སེང་གེ་གནམ་མཆོངས་ཕུག་པའི་ལམ་ཡིག
སེང་གེ་གནམ་མཆོངས་ཕུག་པའི་ལམ་ཡིག་ཁོལ་བུར་ཕྱུང་བ་བཞུགས་སོ༔ གུ་རུ་མཆོག་གི་སྐུ་ལ་ཕྱག་འཚལ་ཞིང་སྐྱབས་སུ་མཆིའོ་བྱིན་གྱིས་བརླབ་ཏུ་གསོལ༔ གནས་ཆེན་པོ་མཁའ་འགྲོ་འབུམ་དེལ་གྱི་ཆོས་ཁྲི་སེང་གེ་འགྱིང་བསྣོལ་གྱི་སྟེང་དུ་བདག་བུད་མེད་ཡེ་ཤེས་མཚོ་རྒྱལ་གྱིས་གུ་རུ་རིན་པོ་ཆེ་ལ་འདི་སྐད་ཞུས་སོ༔ ཀྱེ་གུ་རུ་རིན་པོ་ཆེ་དུས་གསུམ་མཁྱེན་པ་ལགས༔ ཁྱེད་ཀྱིས་བདག་ལ་འབོམ་སེང་གེ་གནམ་ཕུག་གི་ལམ་ཡིག་དང་དཀར་ཆག་རྣམས་གསུང་དུ་གསོལ་ཞེས་ཞུས་པས༔ ཨོ་རྒྱན་རིན་པོ་ཆེས་འདི་སྐད་གསུངས་སོ༔ ཉོན་ཅིག་མཁར་ཆེན་ཡེ་ཤེས་མཚོ་རྒྱལ་མ༔ སེང་གེ་གནམ་མཆོངས་སྒྲུབ་པའི་ཕུག་པ་ནི༔ ལུང་པ་གཞུ་རྒྱུད་སྒྲིམ་འདྲའི་སུམ་མདོའི་ངོས༔ མདའ་ནི་ལྷོ་ནུབ་ཆུ་གཉིས་ཟུང་གཅིག་འདྲེས༔ དེ་ན་ཆུ་ཡི་དགེ་བསྙེན་སྲུང་མར་གནས༔ གསོལ་བ་འདེབས་ཤིང་བསང་དང་གཏོར་མ་འབུལ༔ རྡོ་རྗེ་རྣམ་འཇོམས་ཡིག་བརྒྱས་ཆུ་ལ་བཀྲུ༔ བར་ཆད་ཞི་ཞིང་སྡིག་སྒྲིབ་འདག་པར་འགྱུར༔ ཆུ་ཡི་འགྲམ་ན་རྒྱང་གྲགས་བརྒལ་བའི་སར༔ གཡོན་ཕྱོགས་ལྷོ་ནུབ་ངོས་ལ་མིག་རྒྱང་གང་༔ གྱེན་དུ་བལྟས་པར་སེང་གེ་གནམ་མཆོངས་བྲག༔ རྩི་ཤིང་སྤྲིན་ནག་གཏིབས་འདྲའི་དབུས་ན་ཡོད༔ གཡོན་ཕྱོགས་བྱ་ཕོའི་ཟེ་བ་འདྲ་བ་ན༔ བཀའ་སྲུང་ཀླུ་དང་བཙན་ལ་བསངས་ཀྱིས་མཆོད༔ དེ་ན་ཀླུ་བཙན་བདུད་གསུམ་སྒྲུབ་ཐབས་སྦས༔ གསོལ་བ་བཏབ་པས་བར་ཆད་སེལ་བར་འགྱུར༔ དེ་ནས་སེང་གེ་གནམ་དུ་མཆོངས་འདྲའི་བྲག༔ མདུན་ནས་ཕྱག་བྱ་ཕྱོགས་བཞི་ཀུན་ནས་མཇལ༔ ཕྱི་ལྟར་སྲས་མཆོག་རྡོ་རྗེ་གཞོན་ནུ་ལ༔ འཁོར་ལོ་རྒྱས་འདེབས་ཡུམ་དང་གཉིས་མེད་འཁྲིལ༔ ཕུར་པའི་ལྷ་ཚོགས་སྐུ་ཡི་ཆ་ལ་གསལ༔ སྲས་མཆོག་རང་བྱོན་ཛྙཱ་ན་ཀཱི་ལ་ཡ༔ མཇལ་བས་བར་ཆད་བདུད་བཞིའི་གཡུལ་ལས་རྒྱལ༔ གསོལ་བ་བཏབ་ན་མཆོག་ཐུན་དངོས་གྲུབ་འཐོབ༔ ནང་ལྟར་ཡང་དག་དཔལ་ཆེན་ཧེ་རུ་ཀ༔ བཛྲ་ཀྲོ་ཏི་ཡུམ་དང་གཉིས་སུ་མེད༔ ཞི་ཁྲོའི་ལྷ་ཚོགས་སྐུ་ཡི་རྒྱན་དུ་གསལ༔ ལན་གཅིག་མཇལ་བས་ཚེ་རབས་སྡིག་སྒྲིབ་འབྱང་༔ གསོལ་བ་བཏབ་པས་བསྐྱེད་རྫོགས་ལས་སུ་རུང་༔ གསང་བ་ལྟར་དུ་བདེ་མཆོག་ལྷན་སྐྱེས་ལ༔ རྡོ་རྗེ་ཕག་མོ་གཉིས་མེད་འཁྲིལ་སྦྱོར་རོལ༔ རྒྱུད་སྡེ་བཞི་ཡི་ལྷ་ཚོགས་སྐུ་ལ་གསལ༔ ལན་ཅིག་མཇལ་བས་མཆོག་གི་དངོས་གྲུབ་འཐོབ༔ གསོལ་བ་བཏབ་ན་དབང་བཞིའི་ཏིང་འཛིན་འཆར༔ གཞན་ཡང་ལྷ་ཚོགས་བཞུགས་བྱང་འདི་ལྟ་སྟེ༔ སྟེང་གི་རྩེ་ལ་རིགས་གསུམ་མགོན་པོ་ནི༔ རྒྱལ་པོའི་ལ་ཐོད་ལྟ་བུར་གསལ་བར་བཞུགས༔ སྐུ་ཡི་རྒྱབ་ཏུ་རྫོགས་པའི་སངས་རྒྱས་ལ༔ གནས་བརྟན་བཅུ་དྲུག་ཚོམ་བུའི་ཚུལ་གྱིས་བསྐོར༔ བྲང་རྒྱན་ཚུལ་དུ་བདག་ཉིད་པདྨ་ལ༔ ཐོད་ཕྲེང་སྡེ་ལྔ་ཚོམ་བུའི་ཚུལ་གྱིས་བསྐོར༔ ཡབ་ཡུམ་སྦྱོར་བའི་གསང་བའི་མདོ་ཕུག་ན༔ ཉི་ཤུ་རྩ་བཞིའི་དཔའ་བོ་མཁའ་འགྲོ་བཞུགས༔ སྐྱེས་བུ་རབ་གྱིས་དེ་དག་མངོན་སུམ་མཇལ༔ འབྲིང་རྣམས་སྐུ་དང་གཟུགས་བརྙན་ཙམ་དུ་མཐོང་༔ ཐ་མས་མོས་པ་རྙེད་ཚེ་གསོལ་བ་ཐོབ༔ དུས་ཀྱི་རྒྱལ་པོ་ཚེས་བཅུ་ཤར་བའི་ཚེ༔ ཚོགས་ཀྱི་འཁོར་ལོ་གནས་འདིར་བསྐོར་བ་ན༔ མཁའ་སྤྱོད་ཨོ་རྒྱན་ཡུལ་གྱི་གནས་མཆོག་ཏུ༔ ཟབ་མོའི་ཚོགས་ཀྱི་འཁོར་ལོ་བསྐོར་དང་མཉམ༔ ཕྱག་འཚལ་མི་དགེ་བཅུ་ཡི་སྡིག་སྒྲིབ་འདག༔ བསྐོར་ན་མཚམས་མེད་ལྔ་ཡི་ལས་ཀྱང་འབྱང་༔ དུས་ནི་སྤྲེལ་ཟླའི་ཚེས་ལ་དད་ལྡན་འཚོགས༔ ཕྱག་དང་སྐོར་བ་ཚོགས་འཁོར་ཐོན་པའི་རྗེས༔ བདག་གི་གྲུབ་ཆུ་ནུབ་བྱང་བལྟ་བ་ནས༔ ནང་དུ་འཐུངས་པས་ནད་རིགས་ཀུན་འདག་ཅིང་༔ དངོས་གྲུབ་རྒྱུད་ལ་ལྡན་ནོ་སྐལ་ལྡན་རྣམས༔ འདི་ལྟར་གསང་བ་མཆོག་གི་སྒྲུབ་གནས་འདིར༔ ཟབ་ཆོས་གཏེར་ཁ་ཁྱད་འཕགས་བཅུ་གསུམ་ཡོད༔ སྲུང་མར་བཅོལ་ཞིང་ལས་ཅན་རེ་ལ་བཞག༔ འདོན་དུ་མི་རུང་ནོར་གྱི་གཏེར་ཁ་གསུམ༔ ཡུལ་འདིར་འབྱུང་བའི་སྐྱེ་འགྲོ་བདེ་ཐབས་ཡིན༔ ས་བདག་སྙིང་གི་གཏེར་འདི་ཀླུ་ལ་བཅོལ༔ གཏེར་བདག་གཉན་པས་བཏོན་ན་གཉིས་འཕུང་འགྱུར༔ མ་འོངས་དུས་ན་གནས་འདིའི་མདུན་ཕྱོགས་སུ༔ པདྨ་ང་དང་བྱམས་པ་ཐུབ་དབང་བཞེངས༔ ཡུལ་ཕྱོགས་སྐྱེ་འགྲོ་སེམས་ཅན་བདེ་སྐྱིད་ལྡན༔ གནས་འབྲེལ་ཐོགས་རྣམས་ལས་ངན་རྒྱུན་ཆོད་དེ༔ པདྨ་འོད་ན་ང་ཡི་དྲུང་དུ་འོང་༔ ལོག་ལྟ་ཐེ་ཚོམ་ཅན་ལ་ཨ་ཐམ་རྒྱ༔ སྐལ་ལྡན་ལས་འཕྲོ་ཅན་གྱིས་སྤྱོད་པར་ཤོག༔ ས་མ་ཡཱ༔ རྒྱ་རྒྱ་རྒྱ༔ གཏེར་རྒྱ༔ སྦས་རྒྱ༔ ཟབ་རྒྱ༔ གཉན་རྒྱ༔ ས་མ་ཡཱ༔ རྒྱ་རྒྱ་རྒྱ༔ ཁམས་པ་ཉི་མ་གྲགས་པས་ཁམས་སྲིང་མོ་རྫོང་ནས་ཤིང་ཕོ་སྟག་གི་ལོ་ལ་སྤྱན་དྲངས་ཤིང་ཤོག་སེར་ལས་བསྒྱུར་བ་འདིས་ཀྱང་འགྲོ་ཀུན་གྲོལ་བར་ཤོག །མངྒ་ལཾ།། །།