ཁམས་ཤག་གི་ལོ་རྒྱུས་གནས་ཡིག
ཁམས་ཤག་གི་གནས་ཡིག་བཞུགས་སོ༔ རྒྱ་གར་ཡུལ་དུ་སྒྲོལ་འདྲེན་རྣམ་གཉིས་མཛད༔ ཨོ་རྒྱན་ཡུལ་དུ་སྒྲོ་འདོགས་རྣམ་གཉིས་བཅད༔ ཁ་བ་ཅན་དུ་བསྟན་པ་རྒྱས་པར་མཛད༔ ཨོ་རྒྱན་གུ་རུ་རྒྱལ་པོ་དུས་འདིར་དྲན༔ གུ་རུ་པདྨ་རྒྱལ་པོ་ལ་ཕྱག་འཚལ་ལོ༔ ཨོ་རྒྱན་པདྨ་རྒྱལ་པོ་དེས༔ སྒྲུབ་པ་བྱས་པ་གྲངས་ཀྱིས་མི་ལངས་ཏེ༔ ཁྱད་པར་གནས་མཆོག་དམ་པ་འདི་ཉིད་དུ༔ སློབ་དཔོན་པདྨ་འབྱུང་གནས་དང་༔ མཁའ་འགྲོ་ཡེ་ཤེས་མཚོ་རྒྱལ་གཉིས་ཀྱིས་གནས་འདི་ལ་ལོ་བཅུ་གསུམ༔ ཟླ་བ་བཅུ་གསུམ༔ ཞག་བཅུ་གསུམ༔ ཟ་མ་བཅུ་གསུམ་སྟེ༔ བཅུ་གསུམ་པ་ཆ་བཞིའི་དམ་བཅའ་བྱས་ནས་སྒྲུབ་པ་མཛད༔ དབྱར་གྱི་དུས་སུ་ཕ་བོང་གུར་འདྲ་ན་བཞུགས༔ དགུན་གྱི་དུས་སུ་མདོ་རི་ན་བཞུགས༔ སྟོན་གྱི་དུས་ན་གཉན་རྒྱལ་བ་ཐོད་དཀར་བཏུལ༔ བཀའ་བརྒྱད་ཀྱི་དཀྱིལ་འཁོར་བཞེངས༔ གཏོར་མ་བཅས་དབང་བསྐུར༔ འདོད་ཡོན་ལྔའི་འབུལ་བ་བྱས༔ མཁའ་འགྲོ་སྡེ་ལྔས་སྲོག་སྙིང་ཕུལ༔ རྗེ་བཙུན་སྒྲོལ་མས་ཨུཏྤལ་ཕྱག་ཏུ་ཕུལ༔ ཀླུ་རྒྱལ་གཙུག་ན་རིན་ཆེན་དང་༔ ཀླུ་སྐྱེ་བཟང་སྣ་ཚོགས་གཉིས་ཀྱིས་ཆུའི་དངོས་གྲུབ་ཕུལ༔ ནུབ་མོ་མཁའ་འགྲོ་མ་རྣམས་ལ་ཆོས་གསུང་༔ བྲག་མཆོད་རྟེན་འདྲ་བ་ན༔ མཁའ་འགྲོ་སྡེ་ལྔའི་ཕོ་བྲང་ཡོད༔ ཀླུ་བདུད་བཏུལ་པའི་རལ་གྲི་བརྒྱ་ཕོན་ཕར་ལ་གཏེར་དུ་སྦས༔ གཟིགས་སྣང་གཏན་ལ་ཕབ་པ་ནི༔ བཀའ་བརྒྱད་དཀྱིལ་འཁོར་བཞེངས་པའི་ས་དེར༔ བདེ་མཆོག་ལྷ་དྲུག་བཅུ་རྩ་གཉིས་ཞལ་གཟིགས་ཡོད༔ དེའི་བྲག་ལྷོར་ཕྱོགས་པ་ན༔ དགྱེས་རྡོར་སྤྲུལ་པའི་ལྷ་དགུའི་ཞལ་གཟིགས་ཡོད༔ འཕྲང་འོ་ཟན་འདྲ་བའི་བྲག་ལ་ཚེ་དཔག་མེད་ལྷ་དགུའི་ཞལ་གཟིགས་ཡོད༔ དེའི་དུས་སུ་ཇོ་མོས་ཞུས་པ༔ གནས་འདི་ལ་གཞན་ལས་ཁྱད་པར་འཕགས་པའི་ཡོན་ཏན་ཆེ་བ་ཅི་ལགས་ཞུས་པས༔ སློབ་དཔོན་གྱིས་གསུངས་པ་ལ༔ ཁྱོད་ཤེས་རབ་ཆེ་བས་ང་ལ་ཞུས་པ་ལེགས༔ ངའི་གནས་ཙཱ་རི་མིན་ཏེ་ཙཱ་འདྲ་ཡིན༔ སྦས་པའི་ཚུལ་གྱིས་ཅུང་ཞིག་ཟབ༔ སྟོད་འདི་ན་ཇོ་བོ་དཔལ་འཛོམ་དཀར་པོ་ཡོད་པ་དེ༔ ཇོ་བོ་བཅུ་གཅིག་ཞལ་གྱི་སྐུ་ཡིན༔ དེའི་པང་ལ་མུ་ལེ་མཐིང་མཚོ་ཡོད་པ་འདིར༔ སྒྲོལ་མ་ལྷ་ཉི་ཤུ་རྩ་གཅིག་གི་ཕོ་བྲང་ཡོད༔ འདིའི་འཁོར་ལ་ནགས་སོག་གཉིས་ན་མུཥྟ་ཚ་མཚོ་བརྒྱ་དང་རྩ་བརྒྱད་ཡོད༔ དེའི་ཉེ་འཁོར་དུ་མཚོ་ཆེན་བརྒྱད༔ མཚོ་ཕྲན་བརྒྱད༔ བླ་མཚོ་ལྔ་དང་ཉི་ཤུ་རྩ་གཅིག་ཡོད༔ ཤར་རྡོ་རྗེ་མཁའ་འགྲོའི་བླ་མཚོ༔ དཀྱིལ་རིའི་མཚོ་ལ་སོགས་པ་མཁའ་འགྲོ་རིགས་བཞིའི་བླ་མཚོ་ཡོད༔ མཚོ་ཆེན་འདི་ལ་ཕྱི་རིམ་བརྒྱ་དང་རྩ་བརྒྱད་ཡོད༔ ནང་རིམ་བརྒྱ་རྩ་བརྒྱད་ཡོད༔ ཤར་ཀྱི་སྒོ་སྲུང་མི་གཡོ་བས་བྱེད༔ ལྷོའི་སྒོ་སྲུང་འཇམ་དཔལ་གཤིན་རྗེའི་གཤེད་ཀྱིས་བྱེད༔ མཚོ་ལྔའིི་ཞབས་ན་ཡོད༔ ནུབ་ཀྱི་སྒོ་སྲུང་རྟ་མགྲིན་དམར་པོས་བྱེད༔ ཅི་མདའ་བྲག་དམར་ལ་ཡོད༔ བྱང་གྱི་སྒོ་སྲུང་བདུད་རྩི་འཁྱིལ་བས་བྱེད༔ གསུ་ཁྱི་གདོང་མེར་ནག་ན་ཡོད༔ གནས་འདིར་ཞབས་ཀྱིས་བཅགས་པ་རྣམས་ངན་འགྲོའི་འཇིགས་པ་ལས་སྐྱོབ༔ གནས་འདིར་སྒྲུབ་པ་བྱས་ན་པདྨ་ང་དང་མཉམ༔ བལ་དིལ་དང་ཉིད་རྐང་གཉིས་ལ་མཁའ་འགྲོ་མ་བྱེ་བ་འབུམ་བདུན་དུ་གནས༔ སློབ་དཔོན་ཀྱི་ཚེ་བུམ་ཆུ་དེ་གང་གིས་འཐུང་བ་ཚེ་རིང་ཕྱི་མ་ངན་འགྲོ་ལས་སྐྱོབ༔ ཙཱ་རིའི་མཁའ་འགྲོ་མ་རྣམས་རམ་ཟླའི་བཅོ་ལྔ་ལ་འབྱོན་དུས་མཚོ་ཞལ་བྱེ༔ དག་པ་ཤེལ་རིའི་ལྷ་ཉིས་སྟོང་བརྒྱད་བརྒྱ་ཇོ་བོ་དཔལ་འཛོམ་དཀར་པོ་ལ་གནས༔ དཔེར་ན་མི་གཅིག་ལ་གཞིས་གཉིས་ཡོད་པ་དང་འདྲ༔ དག་པ་ཤེལ་རིའི་མཆོད་རྟེན་མེ་ཏོག་མངོན་པར་དགའ་རྣལ་འབྱོར་བ་རྣམས་ཀྱིས་མཐོང་༔ དེང་སང་གནས་སྒོ་བར་མ་བྱེ་བ་ཡིན་པས་ཕལ་བོ་ཆེས་མཐོང་བ་ཡོད༔ ད་ནི་ཁམས་ཀྱི་ཕྱོགས་ནས་སློབ་དཔོན་གྱི་རྣམ་སྤྲུལ་སྐྱ་མིན་སེར་མིན་གཅིག་ཡོང་ནས་གཟིགས་སྣང་གཏན་ལ་འབེབས༔ དེའི་དུས་སུ་མཚོའི་ནང་ནས་ཤེལ་གྱི་མཆོད་རྟེན་ཁྲུ་གང་པ་ཞིག་འདོན་ནས་བྱིན་བརླབས་ཞུས་པས་ཆོག༔ ལྷ་རྣམས་ལ་ཞལ་ཕྱག་དོད་ཚེ་ཀུ་ཤ་རྒྱས༔ ཙཱ་རི་ནུས་པ་ཇེ་ཆུང་ལ་འགྲོ༔ ཁམས་ཤག་ཇེ་ཆེ་ལ་འགྲོ༔ མདོ་རི་རིན་ཆེན་སྤུངས་པར༔ སློབ་དཔོན་གྱི་མན་ངག་ཤོག་དྲིལ་བདུན་དང་གསེར་རྣམས་ཡོད༔ ཙཱ་ཀླུ་བདུད་རྡོ་རྗེ་མ་གཏོགས་པ༔ ཙཱ་རི་དང་ནི་ཡོད་ཚུལ་མཐུན༔ བྲག་ཐམས་ཅད་སོག་པོ་ཁྲོས་པ་འདྲ་བ༔ ཤིང་ཐམས་ཅད་དངོས་གྲུབ་ལ་ལག་པ་བཟེད་པ་འདྲ་བ༔ དབྱི་མ་བུ་སུམ་མདོའི་བྲག་ལ་མཆོད་རྟེན་བྱ་རུང་ཁ་ཤོར་ཡོད༔ གློ་མ་ལྷའི་བྲག་ལ་མན་ངག་ཤོག་དྲིལ་གཅིག་དང་བདུད་རྩི་བུམ་པ་གང་ཡོད༔ ཡང་སློབ་དཔོན་གྱིས་ཕུག་དཀར་ཕུག་སྔོན་ཕུག་སེར་དུ་སྒྲུབ་པ་མཛད་ཅིང་དགེ་སྙེན་མ་འདུལ་ཞིང་དམ་ལ་བཏགས་ནས་བཀའ་སྲུང་མཛད༔ ཕྱི་སྒོ་གྲོང་སྣེ་དང་གཡོམ་གཉིས་ཀྱི་བར་གྱི་ཡུལ་མཚམས་ཡིན། བར་སྒོ་ནི་གཡི་མ་བུ་སུམ་མདོ་ཡིན༔ རྡོ་རྗེ་གཞོན་ནུའི་སྐུ་ཡོད༔ ནང་གི་སྒོ་སྲུང་ནི་བེའུ་ལ་ཁ་ཡིན༔ རྟ་མགྲིན་ཀུན་སྒྲོལ་གྱི་སྐུ་མི་ལངས་པ་འདྲ་བ་ཞིག་ཡོད༔ ཇོ་བོ་དཔལ་འཛོམ་དཀར་པོའི་ཕྱག་གཡས་ན་ཀ་ལ་དུང་མཚོ་ཡོད༔ གཡོན་ན་དམར་ནག་རཀྟ་ཡོད༔ རྒྱབ་ན་ཁྲ་མོ་གཟི་མཚོ་ཡོད༔ མདུན་ན་ཕོ་བྲང་གཡུ་མཚོ་ཡོད༔ ཟླ་གོང་སང་གི་བྲག་ལ་འདས་མ་འོངས་ད་ལྟ་དུས་གསུམ་གྱི་མཆོད་རྟེན་གསུམ་ཡོད༔ དེའི་ནུབ་ཕྱོགས་ཀྱི་བྲག་ངོས་ན༔ སངས་རྒྱས་སྟོང་སྐུ་ཡོད༔ ཆུ་ཕྱར་གོང་མའི་ཤར་ཕྱོགས་ན༔ ཐུབ་པ་གཙོ་འཁོར་གསུམ་ཡོད༔ ཟླ་གོང་སང་རིའི་བྲག་ལ་རྣམ་སྲས་སྐྱ་བརྒྱད་ཡོད༔ མདོ་རི་རིན་ཅེན་སྤུངས་པ་ན༔ མཁའ་འགྲོ་བྱེ་བ་འབུམ་གྱི་ཚོགས་ཁང་ཡོད༔ དེའི་བྲག་ལ་མཁའ་འགྲོ་སྡེ་ལྔ་རང་བྱོན་ཡོད༔ ཆུ་ཕྱར་བརྒྱད་ཡོད་པ་ལ་མཆོད་པའི་ལྷ་མོ་བརྒྱད་ཡོད༔ ཆུ་ཕྱར་གོང་མའི་གཡས་ཕྱོགས་སུ་སྤྱན་རས་གཟིགས་ཀྱི་སྐུ་ཡོད༔ གཡོན་ཕྱོགས་སུ་ཡེ་ཤེས་མཚོ་རྒྱལ་གྱི་སྐུ་རང་བྱོན་ཡོད༔ སློབ་དཔོན་ལ་མུ་ཏིག་གི་འཕྲེང་བ་ཕུལ་བའི་ཚུལ་ཡོད༔ ཆུ་ཕྱར་གཞུག་མ་དེ་ཆུ་ཡན་ལག་བརྒྱད་ལྡན་ཡིན༔ དེ་གང་གིས་འཐུང་བ་དེ་ངན་འགྲོར་མི་འགྲོཿ གཉན་རྒྱལ་བ་ཐོད་དཀར་བཏུལ་བའི་དུས་སུ་ཆུ་ཕྱར་མདོ་ན་ཞབས་རྗེས་གཅིག་ཡོད༔ མཚོ་རྒྱལ་གྱི་ཞབས་རྗེས་ཡོད༔ སྦ་ཟོའི་རྗེས་ཡོད༔ ཕ་བོང་གུར་འདྲ་ན་བྲང་རྒྱན་གྱི་གཏེར་ཡོད༔ མཚོའི་དབུས་སུ་ཀླུ་རྒྱལ་སྐྱེ་བ་སྣ་ཚོགས་ཀྱི་ཕོ་བྲང་ཡོད༔ གཙུག་ན་རིན་ཆེན་གྱི་གུར་སྟོད་ན་སྦ་ཡོད༔ གུར་སྨད་ན་ཆུ་ཕྱར་གསུམ་ཡོད་པ་རིགས་གསུམ་མགོན་པོས་ཁྲུས་གསོལ་བའི་ཆུ་ཡིན༔ དུས་ཐམས་ཅད་དུ་མཛད༔ དབྱར་དགུན་མེད་པ་མེ་ཏོག་འདྲ༔ དེའང་གནས་མཆོག་ཁྱད་དུ་འཕགས་པ་འདི༔ བསྐལ་བ་འཇིག་པའི་དུས་སུ་ཟོ་ཕོར་གནམ་དུ་བཏགས་པ་འདྲ་བ་ཞིག་འོང་༔ ཀླ་ཀློ་མ་དད་པ་རྣམས་ལ་སྦས་པའི་ཚུལ་དུ་ཡོད༔ སློབ་དཔོན་གྱིས་དེ་སྐད་གསུངས་སོ༔ ཁམས་ཤག་གི་གནས་ཡིག་སློབ་དཔོན་པདྨའི་ཐང་ཡིག་ཆེན་མོ་ནས་ཁོལ་བུར་ཕྱུང་བའོ༔ རྒྱ་རྒྱ་རྒྱ༔ ཁ་ཐམ་གུ་ཧྱ༔ སློབ་དཔོན་པདྨ་གཞོ་སྟོད་ཏི་སྒྲོའི་བྲག་ལ་བཞུགས་པའི་དུས༔ མཁའ་འགྲོ་ཡེ་ཤེས་མཚོ་རྒྱལ་གྱིས་སློབ་དཔོན་ལ་ཞབས་ཏོག་བྱས་ནས་བཞུགས་པའི་དུས༔ ཚོགས་ཀྱི་འཁོར་ལོ་བསྐོར་ནས་སློབ་དཔོན་ལ་ཞུས་པ་བོད་དུ་གནས་དུ་ཙམ་ཡོད་ཞུས་པས༔ ཙཱ་རི་ཆེ་ཆུང་གཉིས༔ གངས་ཏི་སེ་ལ་ཕྱི་ལ་སོགས་མང་སྟེ༔ ཏི་སྒྲོ་བྲག་དཀར་ཞེས་བྱ་བ༔ བོད་ལ་འདི་ལས་ངོ་མཚར་ཆེ་བ་མེད་དེ༔ བོད་མ་དག་པས་མི་ཤེས༔ འདིའི་ཡོན་ཏན་བརྗོད་ན་བསམ་ལས་འདས་གསུངས༔ ཡང་མཚོ་རྒྱལ་གྱིས་འདིའི་ཡོན་ཏན་ཅུང་ཞིག་བརྗོད་པར་ཞུ་ཞུས་པས༔ འདི་སྐད་གསུངས་སོ༔ མཁའ་འགྲོ་མ་རྣམས་རང་ངམ་མང་བར་འདུའོ༔ འདི་ལ་གནས་འབྲེལ་བཏགས་པ་ཙམ་གྱིས་ནུབ་ཕྱོགས་པདྨ་བཀོད་པར་སྐྱེའོ་གསུངས༔ འདི་མིན་མེད་པ་ཨེ་ཡིན་ལགས་ཞུས་པས་ཡོད་དེ་བརྗོད་ཀྱང་ཅོལ་ཆུང་དུ་འགྲོ་གསུངས་ནས་གསུང་དུ་མ་ཉན་ནོ༔ རྒྱ༔ སློབ་དཔོན་པདྨ་ནགས་སོག་རྒྱུད་པར་ན་ཕུག་དཀར་དམར་གཉིས་ན་ཇོ་མོས་ཞབས་ཏོགས་མཛད་ཅིང་བཞུགས་པ་ལ༔ ཇོ་མོས་ཞུས་པ༔ ནགས་སོག་གཉིས་ན་གནས་དུ་ཙམ་ཡོད་ཞུས་པས༔ གདོལ་བའི་ཡུལ་དུ་གནས་དུ་ཡོད་ཅི་ཕན་གསུངས༔ ཅིས་ཀྱང་གསུང་བར་ཞུ་ཞུས་པས༔ སློབ་དཔོན་གྱིས༔ ཁམས་ཤག་འདི་ཇོ་མོ་སྒྲོལ་མས་བྱིན་གྱིས་བརླབས་པའི་གནས་ཡིན༔ འདི་ལ་མཚོ་བཅུ་གཉིས་ཀྱིས་བསྐོར་ནས་ཡོད༔ དེའི་སྤྱི་བོའི་སྟེང་ན་ཡོད་པ་ལ་ཕ་བོང་སྦལ་བ་ལྟ་བུའི་སེ་བོ་ཞིག་ཡོད༔ དེ་ལ་ཀླུ་གཙུག་ན་རིན་ཆེན་གནས༔ དེ་ལ་བྱ་གྱི་བསྐོར་བ་ནི༔ དེ་ལ་མཚོ་ཕྲན་ལྔས་བསྐོར་ནས་ཡོད༔ ནགས་སོག་སུམ་མདོའི་སྡིག་པ་ལྟ་བུ་ལ༔ མཚོ་རྟིང་དཀར་མཚོ་སེར་བྱ་བ་ཡོད༔ མ་མཚོ་ལ་སྦལ་མཚོ་སྐྱ་བོ༔ འབྲི་མཚོ་སྔོན་མོ༔ གཡུ་མཚོ་དང་ལྔའོ༔ མཚོ་བརྒྱད་ཇོ་མོ་སྒྲོལ་མའི་སྤྲུལ་པ་ཡིན༔ ཁྱེད་ཀྱིས་གནས་འདི་རུ་སྡོད་པས་སྨོས་མི་དགོས་གསུངས༔ རྐང་པས་བཅགས་པའི་མི་རྣམས་ནམ་ཡང་ངན་སོང་དུ་རྡོག་པས་ཕུལ་ཡང་མི་འགྲོ་གསུངས༔ ཙཱ་རི་ལས་ཅུང་ཞིག་དགའ༔ གསུངས༔ ཡང་ནགས་སོག་གཉིས་ན་གནས་དུ་ཙམ་ཡོད་ཞུས་པས༔ ཡང་གསུངས་པ༔ ཁམས་ཤག་ནགས་སོག་སུམ་མདོ་ཕུག་དཀར་དམར་གཉིས༔ སོག་ན་སྐྱེ་ཚ་བྲག་དཀར་དང་གསུམ༔ ཀ་ཡི་རི་ཕུག་སྔོན་དང་བཞི༔ ཆོས་རྫོང་ཕུག་སྟག་རྩེ་དང་ལྔ༔ མེ་མོ་རག་ཕྲོམ་དང་དྲུག༔ སྨུག་སེང་གེ་ལུང་དང་བདུན༔ འབྲོག་གུ་ཟེ་བློན་དང་བརྒྱད༔ འགག་ལ་དཔའ་ཕྲོམ་དང་དགུ༔ ཆམ་བྱུར་མཛོད་དང་བཅུ༔ ཨར་སྡོམ་རྫ་དཀར་དང་བཅུ་གཅིག༔ ཤ་རུ་སྨན་དར་དང་བཅུ་གཉིས༔ ཆུ་དྲོན་གཡུ་ཕུག་དང་བཅུ་གསུམ༔ ཡོན་ཏན་མང་སྟེ་སྒྲུབ་པ་བྱེད་མི་མེད་གསུངས༔ ཁམས་ཤག་སྙིང་རྫོང་ན་གསེར་གྱི་རྡོ་རྗེ་གཅིག༔ འབེབས་མཐུའི་ཤོག་དྲིལ་གསུམ་ཡོད༔ ཡུམ་གཉིས་ཀྱི་སྒྲུབ་ཐབས་ཤོག་དྲིལ་གསུམ་གསུམ་དང་དགུ་ཡོད༔ ནོར་གྱི་གཏེར་མང་གསུངས༔ སོག་སྨན་འཕྲང་ན་ཚེ་སྒྲུབ་ཤོག་དྲིལ་གཅིག༔ བདུད་རྩི་སྤ་རུ་གང་ཡོད༔ སྨན་གྱི་ཤོག་དྲིལ་གཅིག༔ བདུད་རྩི་སྒྲུབ་ཐབས་ཤོག་དྲིལ་གཅིག་དང་གསུམ་ཡོད༔ གཏེར་བྲག་ན་གསེར་དང་ངན་སྔགས་ཤོག་དྲིལ་མི་འདྲ་བ་གསུམ་ཡོད༔ བཞག་པ་མང་སྟེ་བཤད་མི་ལངས་གསུངས༔ ཁོ་མོ་མཁར་ཆེན་བཟས་ནགས་སོག་གི་གནས་ལུགས་བསྟན་པའོ༔ ཤ་ཤ་ཤ༔ ཁམས་ཤག་འདི་ཐེངས་གཅིག་བསྐོར་ན་ས་གཅིག་ནོན༔ ཐེང་གཉིས་བསྐོར་ན་ས་གཉིས་ནོན༔ དེ་བཞིན་བརྩིས་པས་ས་བཅུ་ནོན༔ རིམ་གྱིས་བསྒྲོད་པའི་ཡོན་ཏན་ཡོད༔ གནས་ཀྱི་ཡོན་ཏན་ཟུར་ཙམ་སྤྲོས་པའོ༔ ས་མ་ཡཱ༔ རྒྱ་རྒྱ་རྒྱ༔ གུ་ཧྱ་ཁ་ཐཾ༔ རྒྱ་རྒྱ་རྒྱ༔