མཐའ་སྐོར་ལུགས།
མཐའ་སྐོར་བསྐོར་ལུགས་བཞུགས། ཨཱོཾ་མ་ཎི་པདྨེ་ཧཱུྃཿ ཇོ་བོ་ཐུགས་རྗེ་ཆེན་པོ་ལ་གསོལ་བ་འདེབས། །བྱིན་གྱིས་བརླབ་ཏུ་གསོལ། །གནས་མཆོག་ཆེན་པོ་སྲིང་མོ་རྫོང་གི་རྩེ་སྐོར་བར་སྐོར་མཐའ་སྐོར་གསུམ་ཡོད་པའི་རྩེ་དང་བར་གཉིས་རྒྱུན་གཏན་བསྐོར་ཆོག །ཕན་ཡོན་གནས་ཡིག་ལྟར་ལགས། མཐའ་སྐོར་སྤྲེལ་ལོ་ཟླ་བ་དང་པོའི་ངོ་ལ། སོག་འཕེལ་རྒྱས་གླིང་། སྲིན་ཐོད་སྔགས་པ་གླིང་། ཆགས་རུ་ཕུག་ནག །བདེ་སྐྱིད་གླིང་། ཕུག་དཀར། ཕུག་སྔོན། གཡག་འཁྲབ་དགོན། སྟག་སྡང་དགོན། ཤུག་ཐང་དགོན། སྦྲུལ་མདའི་དགོན། སེན་ཚའི་དགོན། ཀ་རོང་དགོན། དགོན་གསར། རབ་བརྟན། ལྟ་སྨོན།རོང་པོའི་དགོན་སར། བྱི་རོ་ཆོས་ལུང་། རྐྱང་རིའི་རྔོག་ཕུག མེ་མོ་རག་ཕྲོམ་རྣམས་ལ་དཀར་མེ་སྙན་དར། དགོན་སྡེ་རྣམས་ལ་མང་ཇ་དར་ཅོག་སོགས་ཅི་འབྱོར་གྱིས་འབྲེལ་བ་བཏགས་ནས་བསྐོར་བས་མཚམས་མེད་ལྔའི་སྡིག་པ་འདག་པར་གནས་ཡིག་ལས་བཤད། བསྐོར་ལམ་ཞག་བཅོ་ལྔ། དེའི་ཚེ་ཁ་ཏོན་ཕྱག་བཤགས་པ་གསོལ་འདེབས་རྣམས་ཚུལ་བཞིན་མཛོད། སྐོར་སྣེ་རང་ཡུལ་ཕྱོགས་གང་ནས་སྐོར་ལམ་ལ་ཞུགས་པ་དེར་སྡོམས་པ་ཡིན། སྤྲེལ་ལོ་ཟླ་བ་དང་པོའི་ངོ་མ་གཏོགས་མཐའ་སྐོར་མེད། ལོ་བཅུ་གསུམ་གྱི་ནང་ནས་མཐའ་སྐོར་སྤྲེའུ་ལོ་ཟླ་བ་དང་པོའི་ནང་ཡིན་པས་ངོ་ཤེས་པར་མཛོད། སེར་ཤུལ་བླ་མས་དགོས་གསུངས་པ་ལྟར་བཀྲ་ཤིས་སྟེང་ནས་ཁམས་རྒན་ཉི་མ་གྲགས་ཀྱིས་བྲིས་པ་དགེ་ལེགས་འཕེལ། སརྦ་མངྒ་ལཾ།། །