ལོ་རྒྱུས་གསལ་བའི་འོད་ཟེར།

ཐུགས་རྗེ་ཆེན་པོ་མ་རིག་མུན་སེལ་ལས༔ ལོ་རྒྱུས་གསལ་བའི་འོད་ཟེར་བཞུགས༔ འཕགས་པ་མ་རིག་མུན་སེལ་ལ་ཕྱག་འཚལ་ལོ༔ དེ་ཡང་ནུབ་ཕྱོགས་བདེ་བ་ཅན་གྱི་ཞིང་ཁམས་ཆེན་པོ་ནས༔ མགོན་པོ་ཆོས་ཀྱི་སྐུ་འོད་སྣང་རབ་ཏུ་མཐའ་ཡས་པ་ཞེས་བྱ་བས༔ འགྲོ་བ་རིགས་དྲུག་གི་སྡུག་བསྔལ་གྱི་མུན་པ་ཐམས་ཅད་རབ་ཏུ་བསལ་བའི་ཕྱིར་དུ༔ ཆོས་ཀྱི་དབྱིངས་སྟོང་པ་ཉིད་ཀྱི་ཡེ་ཤེས་ལས་མ་གཡོས་བཞིན་དུ༔ ནམ་མཁའ་སྟོང་པ་ལས་ཉི་མའི་དཀྱིལ་འཁོར་ཤར་བ་ལྟར༔ འཕགས་པ་ཐུགས་རྗེ་ཆེན་པོའི་སྐུར་སྤྲུལ་ཏེ༔ འགྲོ་དྲུག་སོ་སོའི་གླིང་དུ་རང་རང་གི་སྣང་བ་དང་མཐུན་པ་སྣ་ཚོགས་ཀྱི་གཟུགས་སུ་བསྟན་ནས༔ སོ་སོའི་སྐད་དུ་ཆོས་ཀྱི་འཁོར་ལོ་དཔག་ཏུ་མེད་པ་ཡོངས་སུ་བསྐོར་ཞིང་སྡུག་བསྔལ་གྱི་མུན་པ་ཐམས་ཅད་རབ་ཏུ་བསལ་ཞིང་༔ ཁྱད་པར་དུ་འཛམ་བུའི་གླིང་འདིར་སྐུ་གསུང་ཐུགས་ཀྱི་ཆོ་འཕྲུལ་ཆེན་པོ་མངོན་པར་འདུ་བྱེད་ཅིང་༔ ཐོག་མ་དང་ཐ་མ་མེད་པར་འགྲོ་བའི་དོན་སྣ་ཚོགས་མ་འགགས་པའི་རོལ་པར་མཛད་པར་དམ་བཅས་པས༔ མཆོག་ཏུ་གསང་བ་བསམ་གྱིས་མི་ཁྱབ་པའི་ཐབས་ཤེས་ཀྱི་རོལ་བར༔ འཁོར་ལོས་སྒྱུར་བའི་རྒྱལ་པོ་སྟོང་སྲིད་སྐྱོང་ཐབས་ཀྱི་རང་བཞིན་དུ་སྤྲུལ་ནས༔ བསྐལ་པ་བཟང་པོའི་སངས་རྒྱས་སྟོང་སྲིད་པའི་དྲ་བ་གཅོད་པ་མཆོག་གི་ཤེས་རབ་ཀྱི་ངོ་བོ་ལས་རང་ཤར་ཞིང་༔ མི་རྣམས་ཚེ་ལོ་བརྒྱད་ཁྲིའི་དུས་སུ་ཡང་དག་པར་རྫོགས་པའི་སངས་རྒྱས་འཁོར་བ་འཇིག་འགྲོ་བའི་དོན་དུ་བྱོན་ཏེ༔ ཆོས་ཀྱི་འཁོར་ལོ་དཔག་ཏུ་མེད་པ་བསྐོར་ཞིང་འགྲོ་བའི་དོན་སྣ་ཚོགས་སུ་མཛད༔ མི་རྣམས་ཚེ་ལོ་བཞི་ཁྲིའི་དུས་སུ་ཡང་དག་པར་རྫོགས་པའི་སངས་རྒྱས་གསེར་ཐུབ་འགྲོ་བའི་དོན་དུ་བྱོན་ཏེ༔ ཆོས་ཀྱི་འཁོར་ལོ་དཔག་ཏུ་མེད་པས་འགྲོ་བའི་དོན་མཛད༔ མི་རྣམས་ཚེ་ལོ་ཉི་ཁྲིའི་དུས་སུ་ཡང་དག་པར་རྫོགས་པའི་སངས་རྒྱས་འོད་སྲུང་འཇིག་རྟེན་དུ་བྱོན་ཏེ༔ ཆོས་ཀྱི་འཁོར་ལོ་དཔག་ཏུ་མེད་པས་འགྲོ་བའི་དོན་མཛད༔ དེ་ནས་མི་རྣམས་ཀྱིས་མི་དགེ་བ་སྣ་ཚོགས་སུ་སྤྱད་པས་སེམས་ཅན་རྣམས་ཀྱི་བསོད་ནམས་དང་ཚེ་རིམ་གྱིས་བྲི་བ་ལས༔ རྩོད་ལྡན་ཚེ་ལོ་བརྒྱ་པའི་དུས་སུ་སྟོན་པ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པ་རྒྱ་གར་རྡོ་རྗེ་གདན་དུ་བྱོན་ནས། མཛད་པའི་ཆོ་འཕྲུལ་ནི་བཅུ་གཉིས་སུ་བསྟན་ཞིང་བཀའ་འཁོར་ལོ་གསུམ་གྱི་སྒོ་ནས་འགྲོ་བའི་དོན་མཐར་ཕྱིན་པར་མཛད་ཅིང་༔ དགུང་ལོ་བརྒྱད་ཅུ་རྩ་གཉིས་ཀྱི་ལོ་ལ་སེམས་ཅན་རང་རྒྱུད་རྨོངས་ཤིང་འདུས་བྱས་ཀྱི་ཆོས་ལ་རྟག་པར་ལྟ་བ་ཐམས་ཅད་སུན་འབྱིན་པའི་ཆེད་དུ༔ སྐུ་སྐྱེ་འཆི་བགྲེས་རྒུད་ཀྱི་མཐའ་དང་བྲལ་ཡང་༔ མྱ་ངན་ལས་འདའ་བར་བཞེད་ཚེ༔ བྱང་ཆུབ་སེམས་དཔའ་སེམས་དཔའ་ཆེན་པོ་རིགས་གསུམ་གྱི་མགོན་པོས༔ ཀྱེ་མ༔ སྟོན་པ་བཅོམ་ལྡན་འདས་ཆེན་པོ་ཁྱེད་ཡོངས་སུ་མྱ་ངན་ལས་འདའ་བར་བཞེད་ན༔ བྱང་ཕྱོགས་བོད་ཁམས་མུན་པའི་སྨག་རུམ་དུ་འགྲོ་བའི་དོན་མི་མཛད་དམ་ཞུས་པར༔ སྟོན་པས་བཀའ་སྩལ་པ༔ རིགས་གསུམ་གྱི་མགོན་པོ་ཁྱེད་གསུམ་གྱིས་མཐའ་འཁོབ་བོད་ཀྱི་རྒྱལ་ཁམས་ཐུལ་ཞིག༔ སླར་ཆད་པར་ལྟ་བའི་སེམས་ཅན་ཐམས་ཅད་གྲུབ་པའི་མཐའ་བསལ་བའི་ཕྱིར་དུ་ལོ་བཞི་གསུམ་བཅུ་གཉིས་ཀྱི་སྟེང་དུ༔ དྷ་ན་ཀོ་ཤའི་རྒྱ་མཚོ་ཆེན་པོར་པདྨའི་སྡོང་པོ་ལས་ང་ཉིད་རྫུས་ཏེ་སྐྱེ་བ་ལེན་པའི་དུས་སུ་མཐའ་འཁོབ་དང་ཡང་འཁོབ་དཔག་ཏུ་མེད་པའི་འགྲོ་བའི་དོན་བྱེད་པའི་ཚེ༔ བོད་ཡུལ་དུའང་མདོ་སྔགས་ཀྱི་ཆོས་རྒྱ་མཚོ་ལྟ་བུ་ཞིག་སྟོན་པར་བྱེད་དོ༔ ཞེས་གསུངས་ཤིང་སྐུ་ཡོངས་སུ་མྱ་ངན་ལས་འདས་པའི་ཚེ༔ འཕགས་པ་རིགས་གསུམ་མགོན་པོས་བོད་དུ་འགྲོ་དོན་མཛད་པར་དགོངས་ཏེ་གཟིགས་པས༔ སྟོད་མངའ་རིས་སྐོར་གསུམ་བར་དབུས་གཙང་རུ་བཞི་སྨད་མདོ་ཁམས་སྒང་རྣམས་ཐམས་ཅད་དུ༔ རི་དྭགས་ཀྱི་རིགས་དཔག་ཏུ་མེད་པ་དང་སྤྲེའུའི་ཚོགས་དང་༔ བྲག་སྲིན་མོ་གྲངས་མེད་མང་པོས་ལས་ལ་གསོད་གཅོད་དང་ཟས་སུ་གཅིག་གིས་གཅིག་ཟ་ཞིང་༔ རྒྱལ་ཁམས་དེར་ཤི་བའི་སེམས་ཅན་ཐམས་ཅད་དམྱལ་བའི་ཁང་སྒྲོམ་མེ་འདག་རབ་ཏུ་འབར་བ་ཆེན་པོར་འགྲོ་བ་ཤ་སྟག་ཏུ་འདུག་ཚེ༔ འཕགས་པ་འཇམ་དཔལ་དབྱངས་ཀྱིས་བྱང་ཆུབ་སེམས་དཔའ་འཕགས་པ་སྤྱན་རས་གཟིགས་ལ་འདི་སྐད་དོ༔ འཕགས་པ་ཆེན་པོ་སྤྱན་རས་གཟིགས་དབང་ཕྱུག་ཁྱོད་ཐབས་མཁས་ལ་ཐུགས་རྗེ་ཆེ་བས་བོད་ཀྱི་རྒྱལ་ཁམས་འདི་ཐུལ་ཞིག༔ འཕགས་པ་ཕྱག་ན་རྡོ་རྗེ་དང་ང་ཡི་སྤྲུལ་པས་ཀྱང་སྐྱོང་ངོ་༔ ཅེས་གསོལ་བས་འཕགས་པ་ཆེན་པོ་སྤྱན་རས་གཟིགས་དབང་ཕྱུག་དེ་ཉིད་ཀྱིས་དུད་འགྲོའི་རྒྱལ་ཁམས་ལ་སངས་རྒྱས་ཀྱི་བསྟན་པ་དར་བའི་ཡུལ་མེད་ཅིང་༔ མིའི་ལུས་ལ་བརྟེན་དགོས་པར་མཁྱེན་ཏེ༔ འཕགས་པས་སྤྲེའུ་རིག་པ་གསལ་ལ་དབང་པོ་དངས་པ་གཅིག་ལ་བྱིན་གྱིས་བརླབས༔ སྒྲོལ་མས་བྲག་སྲིན་མོ་བློ་བརྟན་པ་ཞིག་ལ་འོད་སྤྲོས་ཤིང་སྣང་བ་སྒྱུར་བས༔ ཕ་མ་དེ་གཉིས་མཉམ་དུ་ཚོགས་པ་ལས་འགྲོ་བ་རིགས་དྲུག་གི་ཡུལ་ནས་ཚེ་འཕོས་པའི་བུ་དྲུག་བྱུང་བ་ཕ་ཡི་རིགས་ཤས་ཆེ་བ་རྣམས་ནི་སྙིང་རྗེ་ཆེ་ཞིང་ཁོག་གྲིམས་པ༔ ས་མཐོ་བ་ལ་དགའ་བར་བྱུང་སྟེ་སྟོད་ཀྱི་ཆ་ལ་ཡུལ་བཟུང་༔ མ་ཡི་རིགས་རྣམས་ནི་གདོང་པ་དམར་ལ་གསོད་གཅོད་དང་ཤ་ཁྲག་གི་ཟས་ལ་དགའ་བ་རོ་གྱོང་བ་བྱུང་སྟེ་ས་ཡང་སྨད་ཀྱི་ཆ་ལ་གནས་སོ༔ དེར་བོད་ཀྱི་རྒྱལ་ཁམས་མིས་གང་སྟེ་མིང་སྣ་ཚོགས་སུ་བཏགས༔ རུས་སྣ་ཚོགས་སུ་བཟུང་ཞིང་ཉེ་རིང་དང་དགྲ་གཉེན་སྣ་ཚོགས་སུ་ཕྱེས་ཏེ༔ ཡུལ་གྲུ་དང་ལུང་པ་སོགས་རང་རང་གི་ངོ་སྐལ་དུ་བཅད་ཅིང་གནས་པ་ལས༔ འཕགས་པ་སྤྱན་རས་གཟིགས་ཀྱིས་བོད་ཡུལ་འགྲོ་བ་མིའི་གླིང་ལ་ཐབས་ཤེས་ཀྱིས་འདུལ་བའི་དུས་ལ་བབས་པ་མཁྱེན་ཏེ༔ དེའི་ཚེ་རྒྱ་གར་ཆོས་ཀྱི་རྒྱལ་པོའི་གདུང་བརྒྱུད་ལ་རྒྱལ་པོ་དམག་རྒྱབ་ཞེས་བྱ་བ་ཞིག་ཡོད་པའི་སྲས་ཅིག་ཡུམ་གྱི་ལྷུམས་སུ་ཞུགས་པ་ལ༔ འཕགས་པས་འོད་ཟེར་སྤྲོས་ཤིང་བྱིན་གྱིས་བརླབས་པས་སྲས་དེ་ཡུམ་ལས་བལྟམས་པའི་ཚེ༔ མིག་བྱ་མིག་ལྟར་མས་འགེབས་སུ་ཡོད་པས༔ སྐྲ་དང་སྨིན་མ་གཡུ་མདོག་ལྟར་འཚེར་བ༔ རྐང་ལག་ངང་པའི་རྒྱལ་པོ་ལྟར་འབྲེལ་བ་ཞིག་བྱུང་བས༔ ཡབ་རྒྱལ་པོས་མི་མ་ཡིན་གྱིས་བརླབས་པའི་བུ་ཡིན་པར་སེམས་ཏེ་སྤྱུགས་བཏང་བས༔ རྒྱལ་བུ་རྐང་འཁྱལ་ཏེ་འཕགས་པས་སྣང་བ་སྒྱུར་ཞིང་བྱིན་གྱིས་བརླབས་པས༔ བྱང་ཕྱོགས་བོད་ཀྱི་རི་བོ་ལྷ་རི་རལ་པའི་རྩེ་ལ་བྱོན་ཞིང་དམུ་སྐས་ཐེམ་དགུ་ལ་བབས་པ་བོད་ཀྱི་མི་འགའ་ཞིག་གིས་མཐོང་བས་གང་ནས་ཡིན་དྲིས་ཚེ་གནམ་ལ་མཛུབ་མོ་སྒྲེངས་ཤིང་༔སུ་ཡིན་དྲིས་པ་ལ་བཙད་པོ་ཡིན་ཟེར་བས༔ དེར་ཚོགས་པ་ཐམས་ཅད་ཀྱིས་གནམ་ནས་འོངས་པའི་ལྷའོ་ཞེས་གླེང་ཞིང་༔ ཐམས་ཅད་ཀྱི་གཉའ་བ་ལ་ཁྲི་བཅིངས་ཏེ་དྲངས་པས་གཉའ་ཁྲི་བཙད་པོར་གྲགས་ཤིང་༔ ཁ་བ་ཅན་གྱི་རྗེ་ལ་སྔ་བ་དེ་བྱུང་སྟེ༔ དེ་ནས་རྒྱལ་པོའི་གདུང་རབས་ཉི་ཤུ་རྩ་གསུམ་སོང་བ་དང་རྒྱལ་པོ་ཁྲི་ཐོག་རྗེ་བཙན་གྱི་སྲས་ལྷ་ཐོ་ཐོ་རི་སྙན་ཤལ་ཞེས་བྱ་བའི་རྒྱལ་པོ་བྱང་ཆུབ་སེམས་དཔའ་ཕྱག་ན་རྡོ་རྗེའི་སྤྲུལ་པ་བྱུང་ཞིང་དམ་པའི་ཆོས་ཀྱི་དབུ་བརྙེས༔ དེ་ནས་རྒྱལ་རབས་བཞི་པའི་སྟེང་དུ་རྒྱལ་པོ་གནམ་རི་སྲོང་བཙན་གྱི་སྲས་རྒྱལ་པོ་སྲོང་བཙན་སྒམ་པོ་ཞེས་བྱ་བའི་རྒྱལ་པོ་བྱང་ཆུབ་སེམས་དཔའ་འཕགས་པ་སྤྱན་རས་གཟིགས་ཀྱི་སྤྲུལ་པར་བྱུང་ཞིང་དམ་པའི་ཆོས་ཀྱི་སྲོལ་བཏོད༔ དེ་ནས་རྒྱལ་རབས་ལྔ་འདས་པ་དང་༔ ཁྲི་ལྡེ་གཙུག་བརྟན་ཞེས་བྱ་བའི་རྒྱལ་པོའི་སྲས་ལ་ཁྲི་སྲོང་ལྡེའུ་བཙན་ཞེས་བྱ་བའི་རྒྱལ་པོ་བྱང་ཆུབ་སེམས་དཔའ་འཕགས་པ་འཇམ་དཔལ་གྱི་སྤྲུལ་པ་བྱུང་ཞིང་དམ་པའི་ཆོས་དར་རྒྱས་སུ་མཛད་པ་ལས༔ བདག་ཉིད་པདྨ་འབྱུང་གནས་ཞེས་བྱ་བ་སྔོན་རི་བོ་ཏ་ལའི་རྩེ་མོར་འཕགས་པ་སྤྱན་རས་གཟིགས་དང་ཞལ་མཇལ་ཚེ༔ སྤྲེའུའི་ཚ་བོ་བོད་ཀྱི་རྒྱལ་ཁམས་སུ་མ་འོངས་པ་ན༔ རྒྱུད་མཆོག་མ་རིག་མུན་སེལ་གྱིས་འགྲོ་བའི་དོན་ཆེན་གྱིས་ཤིག་པའི་ལུང་བསྟན་པ་དུས་ལ་བབས་པ་དང་༔ བོད་ཀྱི་རྒྱལ་པོས་བསམ་ཡས་ཀྱི་ས་འདུལ་བར་སྤྱན་འདྲེན་བཏང་བ་དུས་མཚུངས་ཤིང་༔ རྟེན་འབྲེལ་བཟང་བར་གོ་སྟེ་བོད་ཁམས་ཀྱི་ཡུལ་གྲུ་འདིར་འོངས་ཤིང་བོད་ཀྱི་རྒྱལ་པོའི་བསམ་པ་མཐར་ཕྱིན་པར་བྱས༔ བསམ་ཡས་སོགས་གཙུག་ལག་ཁང་མང་པོ་བཞེངས༔ ལྷ་འདྲེ་མ་རུངས་པ་མང་པོ་དམ་ལ་བཏགས༔ རི་བྲག་ཐམས་ཅད་སྒྲུབ་གནས་སུ་བྱིན་གྱིས་བརླབས་ཤིང་མ་འོངས་ཀྱི་འགྲོ་ལ་ཆོས་ཀྱི་ཕན་པར་བྱ་བའི་ཆེད་དུ་ས་འོག་ཐམས་ཅད་གཏེར་གྱིས་བཀང་ནས་བཞག་པ་ལས༔ ཁྱད་པར་དུ་ཡང་ཟབ་པའི་ཆོས་སྐོར་ཐུགས་རྗེ་ཆེན་པོ་མ་རིག་མུན་སེལ་གྱི་གདམས་པ་འདི་དག་རྣམས་ཆོས་སྐྱོང་རྒྱལ་པོ་ཁྲི་སྲོང་ལྡེའུ་བཙན་དང་༔ མཁའ་འགྲོ་ཡེ་ཤེས་མཚོ་རྒྱལ་འཁོན་ཀླུའི་དབང་པོ་སོགས་རྗེ་འབངས་ཕལ་མོ་ཆེས་འཁོར་བ་ལས་སྒྲོལ་བའི་གཉེན་པོར་གང་ཟབ་པའི་གདམས་པ་དགོས་ཟེར་བར༔ བསམ་ཡས་མི་འགྱུར་ལྷུན་གྱིས་གྲུབ་པའི་གཙུག་ལག་ཁང་འབྱོངས་པའི་གྲོལ་སྟོན་དུ་བྱང་ཆུབ་སེམས་བསྐྱེད་གླིང་གི་གཙུག་ལག་ཏུ་བཤད་ཅིང་༔ མ་འོངས་རྩོད་ལྡན་གྱི་ཡང་མཐའ་ལ་འགྲོ་བའི་དོན་འབྱུང་བར་སྨོན་ལམ་བཏབ་སྟེ༔ ཤོག་སེར་དུ་བྲིས་ནས་མང་ཡུལ་བྱམས་པ་སྤྲིན་གྱི་གཙུག་ལག་ཁང་དུ་སྦས་པའོ༔ མ་འོངས་ལས་འཕྲོ་ཅན་དང་འཕྲད་པར་ཤོག༔ ས་མ་ཡཱ༔ རྒྱ་རྒྱ་རྒྱ༔ གཏེར་རྒྱ༔ སྦས་རྒྱ༔ ཟབ་རྒྱ༔ གཏད་རྒྱ༔ ས་མ་ཡཱ༔ རྒྱ་རྒྱ་རྒྱ༔ ཁམས་པ་ཉི་མ་གྲགས་པས་མང་ཡུལ་བྱམས་པ་སྤྲིན་གྱི་ལྷ་ཁང་ནས་མེ་ཕོ་འབྲུག་གི་ལོ་ལ་གདན་དྲངས་ཤིང་། ལྕགས་ཕོ་སྤྲེའུའི་ལོ་ལ་ཤོག་སེར་ལས་ཕབ་པའོ།། སརྦ་མངྒ་ལཾ།