རབ་གནས་ཡེ་ཤེས་ཉི་མ།
ཐུགས་རྗེ་ཆེན་པོ་མ་རིག་མུན་སེལ་ལས༔ རབ་གནས་ཡེ་ཤེས་ཉི་མ་བཞུགས༔ འཕགས་པ་མ་རིག་མུན་པ་ཐམས་ཅད་རབ་ཏུ་སེལ་བ་ལ་ཕྱག་འཚལ་ལོ༔ རྒྱུད་ལས༔ རང་ཉིད་འཕགས་པའི་སྐུ་རུ་བསྒོམ༔ རྟེན་ལ་བགེགས་བསྐྲད་ཐུན་གྱིས་བྲབ༔ སྟོང་པར་སྦྱོང་ཞིང་ལྷ་རུ་བསྐྱེད༔ ཁྲུས་གསོལ་སྤྱན་དབྱེ་ན་བཟའ་དབུལ༔ ཡེ་ཤེས་བསྟིམ་ཞིང་མཆོད་བསྟོད་བྱ༔ མི་དམིགས་རྒྱས་གདབ་དགེ་བ་བསྔོ༔ ཅེས་པས་རབ་ཏུ་གནས་པའི་ཆོ་ག་ཡེ་ཤེས་ཉི་མ་འདི་སྔོན་འགྲོ་དང་དངོས་གཞི་རྗེས་གསུམ་གྱིས་སྟོན་ཏེ༔ དང་པོ་སྔོན་དུ་འགྲོ་བ་ནི༔ གནས་ཡིད་དུ་འོང་བར་བཀྲ་ཤིས་པའི་ཉི་ཟླ་གཟའ་སྐར་བཟང་པོ་ལ༔ ཐུགས་རྗེ་ཆེན་པོའི་དཀྱིལ་འཁོར་ཞལ་ཕྱེས་ཏེ་བསྙེན་སྒྲུབ་ཁ་གསོའོ༔ དེ་ནས་སྐུ་གསུང་ཐུགས་ཀྱི་རྟེན་གང་ཡིན་དེ་རང་གི་མདུན་དུ་འགོད་ཅིང་༔ རང་ཉིད་ལྷའི་ང་རྒྱལ་དྲག་ཏུ་བསྐྱེད་དེ༔ གུ་གུལ་གྱིས་བདུག་བགེགས་གཏོར་བསྔོ༔ ཡུངས་ཀར་གྱིས་བྲབ་ཅིང་བགེགས་བསྐྲད་མཚམས་གཅོད་བསྲུང་བའི་འཁོར་ལོས་གོ་བསྒོའོ༔ ས་མ་ཡཱ༔ རྒྱ་རྒྱ་རྒྱ༔ གཉིས་པ་དངོས་གཞིའི་རིམ་པ་ནི༔ སྐུ་རྟེན་གྱི་རིགས་ལ་གང་ཡིན་གྱི་ལྷར་བསྐྱེད་རིམ་སྟོང་པའི་ངང་ལས་ལམ་གྱིས་ཤར་བར་བསྒོམ༔ གསུང་རྟེན་ཡིན་ན་ཡིག་འབྲུ་རྣམས་ཨཱ་ལི་ཀཱ་ལིའི་རང་སྒྲ་དིར་རེར་བསྒོམ༔ ཐུགས་རྟེན་ཡིན་ན་ཕྱི་མཆོད་རྟེན་གྱི་རྣམ་པར་ནང་གཞལ་ཡས་ཁང་༔ གསང་བ་དུས་གསུམ་གྱི་སངས་རྒྱས་ཀྱི་སྐུ་གསུང་ཐུགས་དང་གཉིས་སུ་མེད་པར་སྐྱེད༔ ཧཱུྃ༔ བཞེངས་ཤིག་བླ་མེད་དཀོན་མཆོག་གསུམ༔ སྐུ་གསུང་ཐུགས་མཆོག་རྡོ་རྗེ་ཆེ༔ ཐུགས་བསྐྱེད་སྨོན་ལམ་རྗེས་དགོངས་ལ༔ སྒྲུབ་པའི་གནས་འདིར་གཤེགས་ནས་ཀྱང་༔ སྐུ་གསུང་ཐུགས་ཀྱི་རྟེན་འདི་ལ༔ ཡེ་ཤེས་ཆེན་པོས་དབང་མཆོག་བསྐུར༔ བཛྲ་ས་མ་ཡཱ་ཛཿཛཿ ཅེས་སྤྱན་འདྲེན༔ ཧཱུྃ༔ དམ་ཚིག་སེམས་དཔའ་བཞེངས་པའི་རྟེན༔ ཡེ་ཤེས་སེམས་དཔའ་བདེ་བར་གཤེགས༔ ཆུ་ལ་ཆུ་བཞག་ཇི་བཞིན་དུ༔ གཉིས་མེད་བརྟན་པར་བཞུགས་སུ་གསོལ༔ བཛྲ་ས་མ་ཡཱ་ཏིཥྛ་ལྷན༔ ཅེས་རྟེན་དང་གཉིས་སུ་མེད་པར་བཞུགས་པར་བསམས༔ ཧཱུྃ༔ རྒྱལ་བ་རྣམ་རྒྱལ་དགྲ་ལས་རྒྱལ༔ ཉོན་མོངས་རྒོལ་བ་འཇོམས་པའི་ལྷ༔ འགྲོ་བ་འདྲེན་པའི་སྐྱབས་གཅིག་པུ༔ རྩ་གསུམ་ལྷ་ལ་ཕྱག་འཚལ་བསྟོད༔ ཅེས་པས་གཉིས་སུ་མེད་པར་ཕྱག་འཚལ་ལོ༔ ཧཱུྃ༔ རིན་ཆེན་སྣོད་ཀྱི་བུམ་པ་འདི༔ སྨན་སྤོས་དྲི་བཟང་ཆུ་ཡིས་བཀང་༔ གཙང་མར་སྦྱར་བའི་དྲི་ཆབ་འདིས༔ རྒྱལ་བའི་སྐུ་ལ་ཁྲུས་གསོལ་བས༔ སེམས་ཅན་ལུས་སྒྲིབ་དག་གྱུར་ཅིག༔ ཨཱོཾ་སརྦ་ཏ་ཐཱ་ག་ཏ་ས་མ་ཡ་ཤྲཱི་ཡེ་ཧཱུྃ༔ ཅེས་སྐུ་གསུང་ཐུགས་ལ་ཁྲུས་གསོལ༔ ཧཱུྃ༔ ཡེ་ཤེས་སྤྱན་ལ་དབྱེ་གསལ་མིང་མེད་ཀྱང་༔ སེམས་ཅན་ལས་ཀྱི་སྒྲིབ་པ་བསལ་བའི་ཕྱིར༔ འཕགས་པའི་སྤྱན་དབྱེ་འགྲོ་བའི་མུན་སེལ་ཤོག༔ ཨཱོཾ་སརྦ་ཛྙཱ་ན་ཙཀྵུ་པྲ་ཝེ་ཤ་ཡ་སྭཱ་ཧཱ༔ ཅེས་སྤྱན་དབྱེ༔ ཧཱུྃ༔ བཀྲ་ཤིས་ལྷབ་ལྷུབ་པཉྩ་ལི་ཀའི་དར༔ རིན་ཐང་མེད་པ་སྲབ་འཇམ་ཡང་བའི་གོས༔ རྒྱལ་བ་རྣམས་ཀྱི་སྐུ་ལ་འདི་གསོལ་བས༔ བསོད་ནམས་དམ་པའི་མཆོག་ཏུ་འདི་གྱུར་ཅིག༔ ཨཱོཾ་སརྦ་ཏ་ཐཱ་ག་ཏ་ཀཱ་ཡ་བཛྲ་ཛྙ་ན་ཝ་སྟྲ་ཡེ་སྭཱ་ཧཱ༔ ཅེས་བརྗོད་ཅིང་ལྷ་ཁྲོ་བོ་ཕོ་བརྒྱུད་མོ་བརྒྱུད་ཞི་བ་ཞི་མ་ཁྲོ་སོགས་གང་ཡིན་པ་ལ་དེར་མཐུན་གྱི་ན་བཟའ་དང་རྒྱན་གོས་ལ་སོགས་རང་གཞུང་ལྟར་དབུལ༔ མཎྜལ་གྱིས་མཆོད༔ ཕྱི་ནང་གསང་གསུམ་གྱི་མཆོད་པ་ལྷའི་ངོ་བོ་ཐེག་པའི་བྱེད་བྲག་དང་མཐུན་པས་མཆོད༔ སོ་སོའི་བསྟོད་པ་ལས་བྱུང་བ་ལྟར་བསྟོད༔ བསྟོད་པ་མེད་པའི་རིགས་སམ་རང་གིས་མ་ཤེས་པའི་རིགས་ལ༔ ཧཱུྃ༔ ཡེ་ཤེས་ཆེན་པོའི་གཟི་བརྗིད་འཆང་བའི་གར༔ ཆོས་ཀྱི་དབྱིངས་ལས་ཟློས་གར་སྒྱུར་བའི་ལྷ༔ འགྲོ་བའི་ཉི་མ་བདེ་ལེགས་དཔལ་གྱི་ཞིང་༔ གུས་པས་ཕྱག་འཚལ་དང་བའི་ཡིད་ཀྱིས་བསྟོད༔ བཛྲ་ས་མ་ཡ༔ ཨ་ཏི་པཱུ་ཙ་ཧོ༔ ཅེས་བརྗོད་དོ༔ ས་མ་ཡཱ༔ རྒྱ་རྒྱ་རྒྱ༔ གསུམ་པ་རྗེས་ཀྱི་རིམ་པ་ནི༔ ནས་སམ་འབྲས་སོགས་འབྲུ་བག་རྡུལ་མེད་པ་ལ་ཡི་དམ་གྱི་སྙིང་པོ་དང་དབྱངས་གསལ་བྱེད་རྟེན་འབྲེལ་སྙིང་པོ་ལ་སོགས་ཅི་མང་གི་གཟུངས་སྔགས་བཏབ་པ་རྡོ་རྗེ་རྒྱལ་པོ་མཆེད་ལྕམ་རྣམས་ཀྱིས་ཐོགས་ཏེ༔ བཀྲ་ཤིས་པའི་ཚིགས་སུ་བཅད་པ་མང་པོ་བརྗོད་ཅིང་༔ མེ་ཏོག་འཐོར་རབ་ཏུ་གནས་ཏེ༔ སྲིད་པའི་འགྲོ་བ་ཐམས་ཅད་སངས་རྒྱས་མ་ཐོབ་ཀྱི་བར་དུ་སྐུ་གསུང་ཐུགས་ཀྱི་རྟེན་ལ་རྒྱལ་བ་འཕགས་པའི་ལྷ་ཚོགས་རྣམས་དང་གཉིས་སུ་མེད་པར་བཞུགས་སུ་གསོལ༔ མཐོང་ཐོས་དྲན་རེག་གི་སེམས་ཅན་ཐམས་ཅད་འཕགས་པ་དེ་བཞིན་གཤེགས་པའི་གོ་འཕང་འཐོབ་པར་མཛད་དུ་གསོལ༔ ཅེས་སོགས་བརྗོད་ཅིང་ཡེ་ཤེས་ཀྱི་ལྷ་ཚོགས་རྟེན་དང་གཉིས་སུ་མེད་པར་བསམས༔ གླུ་གར་གྱི་ཉམས་སྐྱོང་ཚོགས་ཀྱི་འཁོར་ལོ་བསྐོར༔ ཆོས་སྐྱོང་བསྲུང་མར་རྟེན་གྱི་གཉེར་ཁ་བཅོལ༔ སྦྱིན་སྲེག་འདེབས་ཤིང་བསྔོ་སྨོན་མཐའ་རྒྱས་སྐྱོང་༔ དམིགས་མེད་རྡོ་རྗེ་ལྟ་བུའི་ཏིང་འཛིན་གྱི༔ ཟག་བཅས་ཟག་མེད་ཆོས་དབྱིངས་ལ་ཟླའོ༔ ས་མ་ཡཱ༔ རྒྱ་རྒྱ་རྒྱ༔ གཏེར་རྒྱ༔ སྦས་རྒྱ༔ གཏད་རྒྱ༔ ཟབ་རྒྱ༔ ས་མ་ཡཱ༔ རྒྱ་རྒྱ་རྒྱ༔ བདག་སྤྲང་བནྡྷེ་ཉི་མ་གྲགས་པས་མང་ཡུལ་བྱམས་པ་སྤྲིན་གྱི་གཙུག་ལག་ནས་མེ་ཕོ་འབྲུག་གི་ལོ་ལ་སྤྱན་དྲངས་ཤིང་ལྕགས་ཕོ་སྤྲེལ་གྱི་ལོ་ལ་ཁམས་སྲིང་མོ་རྫོང་གི་ཕུག་ནག་བདེ་བ་ཆེན་པོར་ཤོག་སེར་ལས་ཕབ་པའོ།། སརྦ་མངྒ་ལཾ།། །།