ལུང་བསྟན་གསལ་བ།
ཐུགས་རྗེ་ཆེན་པོ་མ་རིག་མུན་སེལ་ལས༔ ལུང་བསྟན་གསལ་བ་བཞུགས༔ འཕགས་མཆོག་ཐུགས་རྗེ་ཆེན་པོར་ཕྱག་འཚལ་ལོ༔ མེ་ཕོ་རྟའི་ལོ་ལ་ཆོས་འཁོར་དཔལ་གྱི་བསམ་ཡས་ཀྱི་བྱང་ཆུབ་སེམས་བསྐྱེད་གླིང་གི་གཙུག་ལག་ཏུ་སློབ་དཔོན་ཆེན་པོས་བདག་ཅག་རྗེ་འབངས་རྣམས་ལ་ཐུགས་རྗེ་ཆེན་པོ་འཕགས་པ་མ་རིག་མུན་སེལ་གྱི་རྒྱུད་ལུང་གདམས་པ་ལས་མཐའ་དང་བཅས་པ༔ ཆོས་འཁོར་ཆེན་པོ་འབྱོངས་པའི་གྲོལ་སྟོན་དུ་གནང་བའི་ཚེ༔ བདག་བུད་མེད་ཡེ་ཤེས་མཚོ་རྒྱལ་དང་༔ ཆོས་སྐྱོང་རྒྱལ་པོ་ཁྲི་སྲོང་ལྡེའུ་བཙན༔ འགོས་པདྨ་གུང་བཙན༔ ལོ་ཆེན་བཻ་རོ་ཙ་ན་ལ་སོགས་པ་ཐམས་ཅད་ཀྱིས་རིན་པོ་ཆེའི་མཎྜལ་སྣ་ཚོགས་ཕུལ་ནས་མགྲིན་གཅིག་ཏུ་སློབ་དཔོན་ཆེན་པོ་ལ་འདི་སྐད་ཞུས་སོ༔ དུས་གསུམ་མཁྱེན་པ་གུ་རུ་རིན་པོ་ཆེ་ལགས༔ ཁྱེད་ཀྱིས་ད་ལྟ་བདག་ཅག་རྣམས་ལ་བཀའ་སྩལ་བའི་ཟབ་ཆོས་ཀྱི་གདམས་པ་འདི་བཀའ་མར་སྤེལ་ལམ་གཏེར་དུ་སྦ༔ ཞེས་ཞུས་པས་གྷུ་རུ་རིན་པོ་ཆེའི་ཞལ་ནས༔ གུས་པས་ཉོན་ཅིག་འདིར་ཚོགས་སྐལ་ལྡན་རྣམས༔ ཟབ་པའི་གདམས་པ་འཕགས་པའི་ཆོས་སྐོར་འདི༔ བཀའ་རུ་མི་སྤེལ་བཀའ་རྒྱས་ལེགས་པར་ཐོབ༔ འདི་ནས་ནུབ་ཕྱོགས་མང་ཡུལ་ལུང་པ་ན༔ ཀ་ཆེན་བཅུ་དྲུག་བཀོད་པས་ཁྱད་པར་འཕགས༔ བྱམས་པ་སྤྲིན་ཞེས་བྱ་བའི་གཙུག་ལག་ཏུ༔ ལཱ་སེ་དཀར་མོའི་ཐུགས་ཀར་གཏད་རྒྱས་ཐོབ༔ འབར་མ་བྱ་ཞོན་གཏེར་གྱི་སྲུང་མར་བཅོལ༔ རྒྱུད་མཆོག་ཆེན་པོ་མ་རིག་མུན་སེལ་འདི༔ གཡའ་རིའི་གོང་གི་རི་བོའི་ཞོལ་འདབས་ན༔ སྡེ་བརྒྱད་རྣམས་དང་དམ་ཅན་རྡོ་རྗེ་ལེགས༔ བྱེ་མ་རབ་ཀར་དམ་ལ་བཏགས་པའི་ཚེ༔ འཕགས་པའི་ཐུགས་རྗེའི་དགོངས་པའི་དྲོད་གཏད་ནས༔ དྲེགས་སེམས་ཟིལ་མནན་ཡེ་ཤེས་ཏིང་འཛིན་ཕོག༔ རྡོ་རྗེ་སྙིང་རྫོང་བྲག་ལ་རྒྱུད་གཏེར་སྦས༔ བཀའ་ཡི་སྲུང་མ་རྡོ་རྗེ་ལེགས་པར་བཅོལ༔ དེ་ཕྱིར་རྒྱུད་དང་གདམས་པ་འདི་གཉིས་པོ༔ འདི་ནས་ཕྱི་མ་མ་འོངས་རིང་འདས་དུས༔ མང་ཡུལ་ནམ་མཁའ་ཁྲག་མདོག་ཡང་ཡང་འོང་༔ ཁྲག་གི་ཆར་པ་ཟླ་བ་བཅོ་བརྒྱད་འབབས༔ དེ་ཚེ་པདྨ་གུང་བཙན་སྐྱེ་བའི་མཐའ༔ སཱུརྱ་སིང་ཧ་ཞེས་བྱས་གདམས་པ་འབྱིན༔ བསྟན་དང་འགྲོ་ལ་བདེ་སྐྱིད་སྤེལ་བ་འོང་༔ རྟེན་འབྲེལ་འཕྱུགས་ན་ཟབ་ཆོས་འདི་མི་ལོན༔ རིགས་བརྒྱུད་འཆད་དམ་སྐུ་ཚེ་གདུལ་བྱ་རྒུད༔ ཡོལ་མོ་གངས་ཀྱི་རི་ལ་བསྒྲུབས་ན་དགེ༔ དེ་འདས་མི་ལ་ལུས་ཆས་ཡ་མ་ཟུང་༔ བསྟན་པའི་ཆོས་ཀྱང་ཡ་མ་ཟུང་འབྱུང་ཞིང་༔ དགེ་རྒྱས་བྲིས་པའི་རི་མོ་ཤུལ་འབྱུང་དུས༔ ཀླུ་དབང་སྐྱེ་མཐའ་ཉི་མ་གྲགས་པ་ཡིས༔ སྨོན་ལམ་འབྲེལ་བས་གདམས་པ་འདི་ཉིད་འབྱིན༔ སྒྲུབ་ལ་བརྩོན་ཏེ་གསང་རྒྱ་མཐར་ཕྱིན་ན༔ ཆོས་བདག་སྲུང་མས་རྒྱུད་བསྐུལ་འགྲོ་དོན་འཕེལ༔ ང་ཡི་གཏེར་སྦས་དོན་ཡོད་བྱེད་པ་འབྱུང་༔ ཅེས་གསུངས་པས་བདག་ཅག་རྗེ་འབངས་རྣམས་ཀྱིས་ཕྱག་དང་བསྐོར་བ་མང་དུ་བྱས་ནས༔ རྒྱལ་པོས་གསེར་ཕྱེ་བྲེ་གང་གི་མཎྜལ་དང་བཅས་ཏེ་འདི་སྐད་ཞུས་སོ༔ ཀྱེ་སློབ་དཔོན་ཆེན་པོ་ལགས༔ རྒྱུད་དང་གདམས་པ་འདིའི་གཏེར་དང་ལུང་བྱང་གསུངས་པ་སྐུ་དྲིན་ཆེ་ལགས༔ པདྨ་གུང་བཙན་དང་ཀླུ་དབང་གི་སྐྱེ་མཐའ་གཉིས་ལ་རྟེན་འབྲེལ་ཡོད་པར་གསུངས་ན་གང་གིས་སྤྱོད༔ འགྲོ་དོན་གང་ལ་བབས་ན་ཆེ༔ ཆོས་བདག་གི་སྐྱེས་བུ་ཅི་འདྲ་འབྱོན་ཞེས་ཞུས་པས༔ སློབ་དཔོན་ཆེན་པོའི་ཞལ་ནས་འདི་སྐད་གསུངས་སོ༔ ཉོན་ཅིག་ཆོས་རྒྱལ་རྗེ་འབངས་དད་ལྡན་རྣམས༔ ཉང་སྨད་ཉི་མ་མདོ་ན་རྫོང་འབྱུང་ཞིང་༔ གཙང་དུ་བདུད་སྤྲུལ་མི་མགོ་བྲན་གྱིས་བྱེད༔ ལྷོ་བྱང་རྒྱལ་པོས་མཚོན་གྱི་རྩེ་ར་འཆའ༔ གཉིས་ཀ་མཉམ་རྗེས་ཤུལ་ཙམ་མེད་པ་འབྱུང་༔ དེ་དུས་གདམས་པའི་སྙིང་པོ་དམ་པ་འདི༔ གཏེར་སྟོན་སཱུརྱ་སིང་ཧ་དང་ཕྲད་ན༔ སངས་རྒྱས་བསྟན་དང་འགྲོ་ལ་རྒྱ་ཆེན་ཕན༔ འོན་ཀྱང་ད་ལྟའི་སྨོན་ལམ་རྟེན་འབྲེལ་གྱིས༔ ལོག་པའི་སྐྱེས་བུ་རང་གི་འཁོར་དུ་འོང་༔ ཐབས་དང་རྟེན་འབྲེལ་ཡ་མ་ཟུང་དུ་སྒྲིག༔ ཟབ་མོའི་གདམས་པ་འདི་ཉིད་ལུས་ཀྱང་སྲིད༔ དེ་འདས་འོག་ཏུ་ཀླུ་དབང་སྐྱེ་མཐའ་ནི༔ སཱུརྱ་ཀིརྟིས་ཆོས་འདི་སྤྱོད་པ་འབྱུང་༔ གཙང་དབུས་ཁམས་གསུམ་འཁྲུག་ཅིང་དྭངས་སྙིགས་འབྱེད༔ ཆོས་ཀྱི་རྒྱལ་པོའི་སྨོན་ལམ་མཐུ་བཙན་པས༔ བྱང་ཆུབ་སེམས་དཔའ་སྙིང་སྟོབས་ལྡན་པའི་བུ༔ འགྲོ་བའི་སྐྱབས་མགོན་བསྟན་པའི་རྩ་ལག་གཅིག༔ དབུས་ནས་འབྱུང་ཞིང་མདོ་སྔགས་བསྟན་པ་འཛིན༔ རྒྱ་མཚོའི་མིང་ཅན་ཕྲིན་ལས་ཕྱོགས་བཅུར་ཁྱབ༔ གདམས་པ་འདི་འཕྲོད་བསྟན་འགྲོའི་བདེ་ལེགས་བསྐྲུན༔ རྩ་བའི་རྒྱལ་མཚན་ཆོས་ཀྱི་ཐེག་པའི་ཏོག༔ སྒྲིབ་པ་རྣམ་སེལ་སྤྲུལ་པ་བཀྲ་ཤིས་མིང་ཆོས་ཀྱི་སེམས་དཔས་ཆོས་འདི་བླ་མ་མཆོད༔ ནམ་སྙིང་སྤྲུལ་པ་གསང་མཚན་བཛྲ་རམ་དཔལ་ལམ་དབང་ཕྱུག་མིང་ཅན་ཆོས་འདི་ངང་གིས་སྤྱོད༔ འཇམ་དབྱངས་སྤྲུལ་པ་ཡར་ཀླུངས་འཇམ་དཔལ་མིང་ཕྱག་རྡོར་སྤྲུལ་པ་འཇང་ནས་ནོར་བུའི་མིང་རྟ་མགྲིན་སྤྲུལ་པ་དབུས་ནས་ངག་གི་མིང་༔ ཀུན་བཟང་སྤྲུལ་པ་ཁམས་ནས་སྙིང་པོའི་མིང་༔ བྱམས་པའི་སྤྲུལ་པ་སྤོ་བོར་ཡེ་ཤེས་མིང་ས་སྙིང་སྤྲུལ་པ་མདོ་སྨད་ཡེ་ཤེས་མིང་༔ འདི་བརྒྱད་བྱང་ཆུབ་སེམས་དཔའ་རྣམ་བརྒྱད་སྤྲུལ༔ འཕགས་པའི་སྤྲུལ་པས་འཕགས་པའི་བསྟན་པ་སྐྱོང་༔ ཆོས་འདིས་འགྲོ་དོན་རིམ་བརྒྱུད་ངང་གིས་བྱེད༔ ཅོག་རོའི་སྤྲུལ་པས་ཆོས་འདིའི་སྒྲོན་མེ་སྦར༔ ལྷ་སྲས་སྤྲུལ་པས་བསྟན་ལ་ཕན་པ་སྐྱོང་༔ བཻ་རོའི་སྤྲུལ་པས་བསྟན་པའི་སྲོག་ཤིང་འཛིན༔ བདུད་འཇོམས་སྤྲུལ་པས་འཕྲིན་ལས་གསལ་ཆ་བྱེད༔ གཡུ་སྒྲའི་སྤྲུལ་པས་བདག་གཞན་དཔལ་ལ་སྤྱོད༔ གྲགས་པའི་མིང་ཅན་སྒྲུབ་པ་མཐའ་རུ་སྐྱེལ༔ ཆོས་ཀྱི་མིང་ཅན་གཞན་རྒྱུད་དགེ་ལ་བསྐུལ༔ དཔལ་གྱི་མིང་གིས་སྟོད་ནས་རྒྱས་པར་བྱེད༔ དཀོན་མཆོག་མིང་གིས་དག་སྣང་གཞན་རྒྱུད་བསྐུལ༔ འདི་དགུ་དཀྱིལ་འཁོར་འཛིན་པའི་སྐལ་ལྡན་མཆོག༔ གཞན་རྒ་ལྟའི་བོད་འབངས་འདིར་ཚོགས་རྣམས༔ དལ་འབྱོར་ལུས་ལེན་གསང་སྔགས་ཆོས་འདིར་སྤྱོད༔ སྐྱེས་པ་བུད་མེད་ཁྱེའུ་དགེ་སྦྱོང་དང་༔ དགེ་བའི་བཤེས་གཉེན་སློབ་དཔོན་སྔགས་པ་སོགས༔ མང་དུ་ཚོགས་ཤིང་གདམས་པ་འདི་ལ་སྤྱོད༔ འབྲེལ་ཐོགས་ཐམས་ཅད་འཁོར་བ་མཐའ་ཅན་བྱེད༔ དབང་བཞི་ཐོབ་རྣམས་ཐར་པར་སྨོས་ཅི་དགོས༔ ཚུལ་བཞིན་ཉམས་བླངས་བདེ་བ་ཅན་དུ་སྐྱེ༔ དེ་བས་མ་འོངས་རྣམས་ཀྱིས་དང་དུ་ལོང་༔ ཅེས་གསུངས་པ་དང་བདག་ཅག་རྣམས་ཀྱིས་ཞུས་པ༔ སློབ་དཔོན་ཆེན་པོ་འོ་ན་ཟབ་མོའི་བསྟན་པ་འདི་ཉིད་ཕྱོགས་གང་དུ་དར་བ་འོང་ཞུས་པས་འདི་སྐད་གསུངས་སོ༔ ཟབ་དོན་གདམས་པ་ཉི་མའི་བསྟན་པ་འདི༔ ཤར་ཕྱོགས་རྒྱས་ན་རྟེན་འབྲེལ་མཆོག་ཡིན་ཞིང་༔ ལྷོ་ཕྱོགས་དར་ན་འགྲོ་དོན་ངང་གིས་བྱེད༔ ནུབ་ཏུ་བསྟན་ན་ཅུང་ཟད་རྒུད་ཀྱང་སྲིད༔ བྱང་ཤར་མཚམས་སུ་དར་རྒྱས་བསྟན་ཡུན་ཐུང་༔ གང་ཟག་བརྟག་མཁས་གདམས་པ་སྤེལ་མཁས་ན༔ འགྲོ་བའི་དོན་ཆེན་ས་ཆེན་ཡོངས་ལ་ཁྱབ༔ སྔོན་ལུང་མ་སྟོན་གདམས་པ་ནུར་འགྲོས་སྦྱིན༔ ལུང་བྱང་ཆོས་སྲུང་གསལ་ཆ་ངེས་པའི་ཚེ༔ གང་ཟག་ཁམས་དང་བསྟུན་ཏེ་ལུང་བསྟན་སྤྲོ༔ ཞིམ་པོའི་ལྟོ་ཚོད་མ་ཟིན་སྐྱུག་ནས་འོང་༔ ཆེ་དྲེགས་ཆོས་བརྒྱད་རྙེད་པ་བཀུར་བསྟིའི་ཕྱིར༔ བཟང་པོའི་ལུང་བསྟན་འདོད་ལ་ཉམས་ལེན་མེད༔ དེ་འདྲའི་ཆོས་བདག་ལུང་བྱང་གསལ་ན་ཡང་༔ ལུང་བསྟན་གབ་རྒྱ་གདམས་པ་སྦོས་ཤིག་རྒྱ༔ ཆོས་ལ་དད་བརྩོན་ཉམས་ལེན་བརྩོན་འགྲུས་ལྡན༔ ངེས་ཤེས་བསྐྱེད་ཕྱིར་ལུང་བྱང་དབུགས་དབྱུང་བྱ༔ བདག་གཞན་འབྲེལ་ཚད་བྱང་ཆུབ་དོན་ལྡན་འོང་༔ གདམས་པ་སྤྱོད་མཁས་གྱིས་ཤིག་སྐལ་ལྡན་བུ༔ ཅེས་གསུངས་པ་རྣམས་མཁའ་འགྲོ་བརྡའི་ཡི་གེར་བཏབ་སྟེ་མང་ཡུལ་བྱམས་པ་སྤྲིན་གྱི་གཙུག་ལག་ཏུ་གཏེར་དུ་སྦས་པའོ༔ སྐལ་ལྡན་ལས་འཕྲོ་ཅན་དང་འཕྲད་པར་ཤོག༔ ས་མ་ཡཱ༔ རྒྱ་རྒྱ་རྒྱ༔ གཏེར་རྒྱ༔ སྦས་རྒྱ༔ ཟབ་རྒྱ༔ ས་མ་ཡཱ༔ རྒྱ་རྒྱ་རྒྱ༔ བཀའ་གཉན་རྒྱ༔ དམ་གསང་རྒྱ༔ ཨི་དན་ཏེ་རྒྱ་རྒྱ་རྒྱ༔ ཁམས་པ་ཉི་མ་གྲགས་པས་མང་ཡུལ་བྱམས་པ་སྤྲིན་གྱི་གཙུག་ལག་ནས་གདན་དྲངས་ཤིང་ཤོག་སེར་ལས་ཞལ་བཤུས་པ་དགེ་ལེགས་འཕེལ། །སརྦ་མངྒ་ལཾ།། །།