སྒྲུབ་པའི་ཟིན་བྲིས།
༈ ཐུགས་རྗེ་ཆེན་པོ་མ་རིག་མུན་སེལ་གྱི་སྒྲུབ་པའི་ཟིན་བྲིས་བཞུགས། ཐུགས་རྗེ་ཆེན་པོ་མ་རིག་མུན་སེལ་གྱི་སྒྲུབ་པ་ཉམས་སུ་ལེན་པའི་གང་ཟག་གིས། །གནས་ཡིད་དང་མཐུན་པར་གཟའ་སྐར་ཤིས་པའི་ཉི་མ་ལ། ནུབ་བམ་དབུས་སོགས་དཔལ་གང་བཟང་གི་ས་ནས་ས་བླང་བ་ས་འདུལ་བ་ས་བརྟགས་པར་བྱ། མ་ལེགས་ན་གཞན་དུ་སྤོ། ས་སྦྱངས་ནས་ཤུལ་དུ་བུམ་གཏེར་སྦ། ཆུ་བླང་སྒྲུབ་ཁང་ནང་དུ་དྲི་བཟང་གི་ཆུ་འཐོར། སྟེགས་བུའི་འདམ་སྦོ ལ་ལ་མ་ཏྲཾ་གྱི་གཟུགས་བཟོ། དགུག་གཞུག་བསྟིམས་ནས་ཡན་ལག་དྲུག་བཅད་དེ་སྟེགས་བུའི་ཕྱོགས་སུ་འགོད། རྒྱལ་མཐོ་འཛུགས་དམ་སྲི་གནོན་སྒོ་བྱང་གདགས། ཐིག་ཆོག་བྱ་ཞིང་ཚངས་ཐིག་གི་ནམ་མཁར་ལྷ་ཚོགས་བསྒོམ་ཞིང་མཆོད་བསྟོད་བསྡུས་པ་ཞིག་བྱ། དེ་ནས་ཐིག་རྫོགས་པར་གདབ་ཚོན་བྱིན་གྱིས་བརླབ་ཅིང་དགྲམ། ནམ་མཁའི་ལྷ་ཚོགས་ད་ལར་བསྟིམ། ལྷག་ཆད་གསོ། སྒྲུབ་རྫས་རྣམས་སྟ་གོན་བྱ་རྒྱན་བཀོད་དགྲམ་བྱིན་འབེབས། ལས་ཀྱི་གཞུང་བསྲང་བསྙེན་པ་དང་སྒྲུབ་པ་སོགས་ཀྱི་དམིགས་པ་གནད་དུ་བསྣུན། སྐབས་སྐབས་སུ་འཛབ་དགོངས་ཀྱི་སྔགས་དམིགས་སྒྱུར། འཚུབ་ནམ་བྱུང་གཏོར་མ་འབུལ་ཞིང་ཉུ་ལེ་བསྐྲད། བཟང་ལྟས་ནམ་བྱུང་གི་དུས་སུ་དགའ་བྲོད་ཀྱི་བདུད་མ་ཞུགས་པའི་ངང་ནས་ལས་བྱང་གི་ཐུགས་དམ་བསྐུལ་ཆོག་ལ་ཁོག་འབུབ་ཀྱི་ཐོད་ཆང་ལ་བརྟེན་དངོས་གྲུབ་ལེན་ཆོག་སྦྱར་ཏེ་རྩེ་གཅིག་ཏུ་གསོལ་བ་གདབ། བཀའ་གཏེར་གྱི་བསྲུང་མ་མཆོད། ཚོགས་ཀྱི་འཁོར་ལོ་བསྐོར་བསྐང་བ་སོགས་སྒྲུབ་པ་མཐར་མ་ཕྱིན་གྱི་བར་བརྩོན་པར་བྱ། སྒྲུབ་པ་ལ་ཞུགས་དུས་དང་གྲོལ་དུས་གཉིས་མ་གཏོགས་ལྷག་མ་ཆད་ཐོ་བསྟན་མ་སོགས་བཀའ་བསྲུང་གི་གཏོར་མ་འབུལ། སྒྲུབ་པ་གྲོལ་ཉིན་སྐྱ་རེངས་དང་པོའི་དུས་སུ་དངོས་གྲུབ་ཞུ་ཞིང་ལྷག་ཆད་བསྐང་། སྨོན་ལམ་བཏབ་གཏོར་མ་སྐྱོང་། ལྟ་བྲོ་བཀྲ་ཤིས་རྒྱལ་ཐོ་དང་དཀྱིལ་འཁོར་རྣམས་བསྡུ། རྡུལ་ཚོན་བསྐྱལ། གཏེར་སྦ། མཆོད་གཏོར་ཚོགས་འཁོར་ལས་གཞུང་བསྲང་བསྐྱེད་རྫོགས་མཐར་སྐྱེལ། བཀྲ་ཤིས་གླུ་བྲོ་རྩེ། གནས་སྲུང་ལུས་སྲུང་སྒྲུབ་རྫས་གཞན་ལ་སྦ། ཞི་སྒྲུབ་ཕལ་ཆེར་གྱི་སྤྱི་འགྲོས་སརྦ་མངྒ་ལཾ། །ཞེས་པ་གཏེར་སྟོན་ཉིད་ཀྱིས་སྦྱར་བའོ།། །།