མགྱོགས་དབང་གི་ལོ་རྒྱུས།
ཐུགས་རྗེ་ཆེན་པོ་མ་རིག་མུན་སེལ་གྱི་མགྱོགས་དབང་གི་ལོ་རྒྱུས་བཞུགས། ཁྱེད་རྣམས་ལ་ཇོ་བོ་ཐུགས་རྗེ་ཆེན་པོ་འཕགས་པ་མ་རིག་མུན་སེལ་གྱི་དབང་སྦྱིན་པའི་ཐོག་མར་ལོ་རྒྱུས་ཅུང་ཟད་ཅིག་བརྗོད་པར་བྱ་སྟེ། དེ་ཡང་གནས་ཕུན་སུམ་ཚོགས་པ་ནུབ་ཕྱོགས་བདེ་བ་ཅན་གྱི་ཞིང་ཁམས་སུ། སྟོན་པ་ཕུན་སུམ་ཚོགས་པ་མགོན་པོ་སྣང་བ་མཐའ་ཡས་ཀྱིས། འཁོར་ཕུན་སུམ་ཚོགས་པ་འཕགས་པ་སྤྱན་རས་གཟིགས་རིགས་ལྔ་དང་པདྨ་རིགས་ཀྱི་སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ། དུས་ཕུན་སུམ་ཚོགས་པ་ཐོག་མཐའ་དང་བྲལ་བའི་ཚེ། ཆོས་ཕུན་སུམ་ཚོགས་པ་མ་རིག་མུན་པ་ཐམས་ཅད་རབ་ཏུ་སེལ་བ་རིན་པོ་ཆེ་འདུས་པའི་རྒྱུད་གསུངས་པ་སྤྲུལ་པའི་མཁའ་འགྲོ་མ་རྣམས་ཀྱིས་ཡི་གེར་བཏབ་སྟེ། བཅོམ་ལྡན་འདས་འཕགས་པ་སྤྱན་རས་གཟིགས་ཀྱིས་འདི་སྐད་ཞུས་སོ། སྟོན་པ་འོད་སྣང་དེ་བཞིན་གཤེགས༔ རྒྱུད་ཆེན་རྒྱུད་མཆོག་དམ་པ་འདི༔ བཀའ་བབས་ཆོས་བདག་གང་གིས་བྱེད༔ ཅེས་གསོལ་སྟོན་པས་བཀའ་སྩལ་བ༔ འདུས་པའི་འཁོར་རྣམས་ང་ལ་ཉོན༔ རྒྱུད་ཆེན་རྒྱུད་མཆོག་དྲི་མེད་འདི༔ ད་ལྟ་འཕགས་པའི་ཐུགས་དམ་བསྟིམ༔ རྩོད་ལྡན་ཚེ་ལོ་བརྒྱ་པའི་ཚེ༔ ཤཱཀྱ་ཐུབ་པའི་བསྟན་པ་ལ༔ གསང་སྔགས་ཆོས་ཀྱི་འབྲས་བུ་སྨིན༔ དེ་དུས་ང་ཡི་ཐུགས་ཀྱི་སྤྲུལ༔ མཚོ་སྐྱེས་པདྨའི་སྡོང་པོ་ལས༔ པདྨ་འབྱུང་གནས་ཞེས་བྱ་འབྱུང་༔ སངས་རྒྱས་སྟོང་གི་འཕྲིན་ལས་སྐྱོང་༔ འཕགས་པ་ཁྱོད་དང་བཀའ་བགྲོས་བྱེད༔ དེ་ཚེ་རྒྱུད་མཆོག་དམ་པ་འདི༔ རྡོ་རྗེ་པདྨ་འབྱུང་ལ་ཐིམ༔ མི་མཇེད་འགྲོ་དྲུག་ཐབས་ཀྱིས་འདུལ༔ ཁྱད་པར་མཐའ་འཁོབ་གངས་ཁྲོད་དུ༔ འཕགས་པའི་སྤྲུལ་པས་རྐྱེན་བྱེད་དེ༔ འགྲོ་བ་མི་ཡི་གླིང་ཞིག་འབྱུང་༔ མདོ་སྔགས་ཆོས་ཀྱི་བསྟན་པ་དར༔ རྩོད་ལྡན་སྙིགས་མ་ལྔ་བདོའི་ཚེ༔ ལོག་འདྲེན་འགོང་པོ་སྟོབས་རྒྱས་པས༔ གཡོ་ཟོག་ཁྲམ་གསུམ་འཁོར་ལོ་བསྐོར༔ བསྟན་པ་ཐབས་ཀྱིས་བརླག་པའི་ཕྱིར༔ བདུད་སྤྲུལ་གོས་སེར་གྱོན་པ་མང་༔ སེམས་ཅན་བསོད་ནམས་དམན་པའི་ཕྱིར༔ ཧོར་སོག་དུ་རུ་ཀ་རྣམས་དར༔ མུ་སྟེགས་བསྟན་པ་ཤར་བའི་རྟགས༔ དགེ་བཤེས་རྣམས་ཀྱིས་དམག་དཔོན་བྱེད༔ འགོང་སྤྲུལ་མང་པོས་ཤེས་རྒྱུད་གཡོ༔ སེམས་བསྐྱེད་སྙིང་རྗེ་ཆུ་རུ་འཕོ༔ བྱང་སེམས་མང་པོ་དྲི་རུ་བཀུམས༔ བདུད་ཀྱིས་བྱིན་བརླབས་འཁྲུག་རྩོད་དར༔ འཕགས་པའི་ཐུགས་རྗེས་སྐྱོབ་དཀའ་ཡང་༔ སྨོན་ལམ་དག་པའི་སྟོབས་ཤུགས་ཀྱིས༔ ཆོས་འདིས་སྙིགས་དུས་འགྲོ་དོན་བྱེད༔ པད་འབྱུང་སྤྲུལ་པས་གཏེར་འདོན་ཞིང་༔ འཕགས་པའི་སྤྲུལ་པས་ཆོས་འདི་སྤེལ༔ སྐབས་ཤིག་འགྲོ་བ་བདེ་ལ་འགོད༔ ཅེས་གསུངས་པའི་གདམས་པ་རིན་པོ་ཆེ་འདི། ཆོས་འཁོར་བསམ་ཡས་འབྱོངས་པའི་གྲོལ་སྟོན་ཆོས་ཀྱི་ཕ་འབབས་སུ་གུ་རུ་རིན་པོ་ཆེས་བྱང་ཆུབ་སེམས་བསྐྱེད་གླིང་གི་གཙུག་ལག་ཁང་དུ། རྒྱུད་ལུང་གདམས་པ་དང་བཅས་པ་བཀའ་སྩལ་པ། མཁའ་འགྲོ་ཡེ་ཤེས་མཚོ་རྒྱལ་གྱིས་མཁའ་འགྲོའི་ཡི་གེར་བཏབ་ཏེ་གུ་རུས་ལུང་བསྟན་པ་བཞིན་དུ་མང་ཡུལ་ལུང་པ་གྲི་ཀྱོག་འདྲ་བའི་ནང་། ཀ་ཆེན་བཅུ་དྲུག་བཀོད་པས་ཁྱད་པར་འཕགས་པའི་གནས་མཆོག་བྱམས་པ་སྤྲིན་གྱི་གཙུག་ལག་ཁང་གི མཁའ་གྲོ་ལཱ་སེ་དཀར་མོའི་ཐུགས་ཀ་ནས་གདམས་པ་ཡོངས་རྫོགས་རྣམས་དང་༔ རྒྱུད་ཆེན་པོ་མ་རིག་མུན་སེལ་རྡོ་རྗེ་སྙིང་རྫོང་སོགས་ནས་མེ་ཕོ་འབྲུག་གི་ལོ་ལ་གདན་དྲངས་ཤིང་། ལྕགས་ཕོ་སྤྲེལ་གྱི་ལོ་ལ་ཁམས་སྲིང་མོ་རྫོང་གི་སྒྲུབ་གནས་ཆགས་རུ་ཕུག་ནག་གུ་ཧ་ཀཱ་ལར་ཤོག་སེར་ལས་ཕབ་པའི་ཟབ་ཆོས་ཀྱི་དབང་དང་གདམས་བསྐོར་ཡོངས་སུ་རྫོགས་པ་འཕགས་པ་སེམས་ཉིད་ངལ་བསོའི་སྤྲུལ་པ་ལོ་ཙཱ་བ་ཀླུའི་དབང་པོའི་སྐྱེ་མཐའ་ཁམས་པ་ཉི་མ་གྲགས་པས་བདག་ལ་གནང་བའི་ཟབ་ཆོས་ཁྱད་པར་པའི་དབང་བསྐུར་ཟབ་མོ་ཞུ་སྙམས་པའི་འདུན་པ་རྩེ་གཅིག་གིས་འདིའི་རྗེས་ཟློས་སོགས་བྱ། ཅེས་པ་འདི་ཡང་བློ་གྲོས་རྒྱ་མཚོའི་དོན་དུ་ཉི་མ་གྲགས་པས་བྲིས། སརྦ་མངྒ་ལཾ།། །།