བྱང་ཆོག་གི་མཚམས་སྦྱོར།
བྱང་ཆོག་གི་མཚམས་སྦྱོར་བཞུགས་སོ། །ན་མོ་དྲིན་ཅན་རྩ་བ་དང་བརྒྱུད་པར་བཅས་པའི་དཔལ་ལྡན་བླ་མ་དམ་པ་རྣམས་ཀྱི་བཀའ་བདེན་པ། སངས་རྒྱས་ཀྱི་བཀའ་བདེན་པ། ཆོས་ཀྱི་བཀའ་བདེན་པ། དགེ་འདུན་གྱི་བཀའ་བདེན་པ། བཅོམ་ལྡན་འདས་ཐུགས་རྗེ་ཆེན་པོ་འཕགས་པ་མ་རིག་མུན་སེལ་གྱི་དཀྱིལ་འཁོར་གྱི་ལྷ་ཚོགས་སྐུ་འཁོར་དང་བཅས་པའི་བཀའ་བདེན་པ་དང་། བདེན་པ་ཆེན་པོའི་ཐུགས་རྗེ་བྱིན་རླབས་ཀྱི་མཐུ་ལ་བརྟེན་ནས། འཇིག་རྟེན་འདི་ནས་ཕ་རོལ་དུ་ཚེ་ལས་འདས་པ་འདས་མ་འདི་རྣམས་སྲིད་པ་གསུམ། ལམ་རྒྱུད་ལྔ། འགྲོ་བ་རིགས་དྲུག་གང་དུ་གནས་ཀྱང་། སྐད་ཅིག་ཡུད་ཙམ་ཅིག་གིས་མདུན་གྱི་མིང་བྱང་འདི་ལ་གཉིས་སུ་མེད་པར་མཆིས་པར་གྱུར། ཛཿཧཱུྃ་བཾ་ཧོཿ ཞེས་ལན་གསུམ་བརྗོད་ཅིང་ལྕགས་ཀྱུའི་ཕྱག་རྒྱས་བསྟིམ། བྱང་ཕྱག་ནི། དབང་བཞིའི་སྔོན་དུ་བདུད་རྩི་ལག་མཆོད་ཀྱི་མཚན་གྲངས་ལྟར་མཆོད། གཏོར་མ་ཆ་དྲུག་གི་གོང་མ་རང་གཞུང་ལྟར་བྱིན་གྱིས་བརླབས། འོག་མ་དྲུག་གི་སྐབས་རིན་པོ་ཆེའི་སྣོད་ཀྱི་ནང་དུ་བགེགས་ཀྱི་གཏོར་མ་ཞེས་སྐབས་སུ། །འདོད་ཡོན་གཏོར་མ་གཟུགས་སྒྲ་དྲི་རོ་རེག་བྱ་ཕུན་སུམ་ཚོགས་པ་རྣམས་སུ་གྱུར། ཅེས་བརྗོད་ཅིང་གཏོར་མ་རེ་ལ། ན་མཿསརྦ་ཏ་ཐཱ་ག་ཏའི་སྔགས་གསུམ་གསུམ་གྱི་བྱིན་གྱིས་བརླབ་ཅིང་རང་གཞུང་ལྟར་བསྔོ་བར་བྱའོ། །བྱང་བུའི་ཟས་གཏད་ནི། ཨཱོཾ་ཨ་ཀ་རོ་མུ་ཁཾ་སརྦ་དྷརྨཱ་ནཾ་ཨ་དྱ་ནུཏྤན་ན་ཏོཏྟ་ཨཱོཾ་ཨཱཿཧཱུྃ་ཕཊ་སྭཱ་ཧཱ། གསུམ་བརྗོད། ཁ་དོག་དབྱིབས་ལེགས་ཡིད་འོང་རྒྱན་ཕྲེང་ལྡན། །ཕྱོགས་དུས་ཀུན་ན་གཟུགས་མཆོག་ཅི་མཆིས་པ། །དམིགས་ཡུལ་ཚེ་འདས་ཁྱོད་ལ་འདི་བསྔོས་པས། །ཚེ་འདས་བླ་མེད་བྱང་ཆུབ་འཐོབ་པར་ཤོག །ཕྱོགས་དུས་ཀུན་ན་ཟིན་དང་མ་ཟིན་པའི། །བསྟོད་ཚིག་བརྗོད་པའི་སྒྲ་སྙན་ཡིད་འོང་ལྡན། །དམིགས་ཡུལ་ཚེ་འདས་ཁྱོད་ལ་འདི་བསྔོས་པས། །ཚེ་འདས་བླ་མེད་བྱང་ཆུབ་འཐོབ་པར་ཤོག །ཕྱོགས་དུས་ཀུན་ན་ཙན་དན་སྦྲུལ་སྙིང་དང་། །ཨ་གར་ལ་སོགས་དབང་པོ་ཚིམ་བྱེད་དྲི། །དམིགས་ཡུལ་ཚེ་འདས་ཁྱོད་ལ་འདི་བསྔོས་པས། །ཚེ་འདས་བླ་མེད་བྱང་ཆུབ་འཐོབ་པར་ཤོག །ཕྱོགས་དུས་ཀུན་ན་བཟའ་བཅའ་བཏུང་བའི་རིགས། །རོ་མཆོག་ཁྱད་པར་འཕགས་པ་ཅི་མཆིས་པ། །དམིགས་ཡུལ་ཚེ་འདས་ཁྱོད་ལ་འདི་བསྔོས་པས། །ཚེ་འདས་བླ་མེད་བྱང་ཆུབ་འཐོབ་པར་ཤོག །ཕྱོགས་དུས་ཀུན་ན་འཇམ་མཉེན་འཁྲིལ་ཆགས་པའི། །རེག་བྱ་ཁྱད་པར་འཕགས་པ་ཅི་མཆིས་པ། །དམིགས་ཡུལ་ཚེ་འདས་ཁྱོད་ལ་འདི་བསྔོས་པས། །ཚེ་འདས་བླ་མེད་བྱང་ཆུབ་འཐོབ་པར་ཤོག། ཧཱུྃ། གཟུགས་མཆོག་རྣམས་དང་སྒྲ་ཡི་མཆོག་རྣམས་དང་། དྲི་མཆོག་རྣམས་དང་རོ་ཡི་མཆོག་རྣམས་དང་། རེག་བྱ་མཆོག་གི་མཆོད་པ་འདི་བསྔོས་པས། །ཚེ་འདས་འདོད་ཡོན་ལྔ་ལ་སྤྱོད་པར་ཤོག །འཇིག་རྟེན་ཕ་རོལ་སོང་བའི་ཚེ་འདས་ལ། །ལས་དང་སྨོན་ལམ་དབང་གིས་འབྲེལ་བ་ཡི། །ཉེ་དུ་འབྲེལ་བ་ཤུལ་དུ་མཆིས་པ་ཡི། །ནམ་གཞག་གཏན་གྱི་ཟས་སྐོམ་འདི་བསྔོས་པས། །ཚེ་འདས་མི་ཟད་གཏེར་ལ་སྤྱོད་པར་ཤོག །འཇིག་རྟེན་འདི་ནས་ཕ་རོལ་དུ་སོང་ཞིང་ཚེ་ལས་འདས་པ་དེ་དག་གི་མིག་གི་ཡུལ་དུ་གཟུགས་མཛེས་པར་གྱུར་ཅིག །རྣ་བའི་ཡུལ་དུ་སྒྲ་སྙན་པར་གྱུར་ཅིག །སྣ་ཡི་ཡུལ་དུ་དྲི་ཞིམ་པར་གྱུར་ཅིག ལྕེ་ཡི་ཡུལ་དུ་རོ་མངར་བར་གྱུར་ཅིག ལུས་ཀྱི་ཡུལ་དུ་རེག་བྱ་འཇམ་པར་གྱུར་ཅིག ཡིད་ཀྱི་ཡུལ་དུ་ཕུན་སུམ་ཚོགས་པར་གྱུར་ཅིག བཟའ་བ་རི་བོ་དང་མཉམ་པར་གྱུར་ཅིག བཏུང་རྒྱ་མཚོ་དང་མཉམ་པར་གྱུར་ཅིག འདོད་ཡོན་ལྔ་ལ་མ་ཆགས་མ་ཞེན་པའི་སྒོ་ནས་དཀོན་མཆོག་གསུམ་མཆོད་པའི་སྐབས་དང་ལྡན་པར་གྱུར་ཅིག ཐམས་ཅད་ནམ་མཁའི་མཛོད་བཞིན་དུ། །ལོངས་སྤྱོད་ཟད་པ་མེད་པར་ཤོག། རྩོད་པ་མེད་ཅིང་འཚེ་བ་མེད། །རང་དབང་དུ་ནི་སྤྱོད་བར་ཤོག །འདི་ནས་ནུབ་ཀྱི་ཕྱོགས་རོལ་ན། །འོད་དཔག་མེད་པའི་ཞིང་ཁམས་ཡོད། །སུ་ཞིག་དེ་ཡི་མཚན་འཛིན་པ། །ཞིང་མཆོག་དེ་རུ་སྐྱེ་བར་ཤོག །ཐོས་པས་རིག་པའི་གནས་རྣམས་ཀུན་ལ་བྱང་། །བསམ་པས་མདོ་རྒྱུད་དྲང་ངེས་དགོངས་པ་རྟོགས། །བསྒོམས་པས་ཞི་ལྷག་ཟུང་འབྲེལ་བདེན་པ་མཐོང་། རིམ་གཉིས་ལམ་ལས་རྡོ་རྗེའི་སྐུ་ཐོབ་ཤོག །ཅེས་ཐུགས་རྗེ་ཆེན་པོ་མ་རིག་མུན་སེལ་གྱི་འདོད་ཡོན་བསྔོ་བའི་མཚམས་སྦྱོར་རིག་འཛིན་ཉི་མ་གྲགས་པས་སྦྱར་བའོ། །སརྦ་མངྒ་ལཾ།། །།