རྡུལ་ཚོན་ཆུ་གཤེགས་ཀྱི་ངག་འདོན།
༈ དཀྱིལ་འཁོར་གྱི་རྡུལ་ཚོན་དབང་ཆེན་གྱི་ཆུ་བོ་ལ་སྐྱེལ་བའི་ངག་འདོན་བཞུགས། ན་མོ་ཕྱོགས་བཅུ་དུས་བཞིའི་སངས་རྒྱས་དང་བྱང་ཆུབ་སེམས་དཔའ་རྒྱལ་བ་རྒྱ་མཚོའི་ལྷ་ཚོགས་མ་ལུས་ཤིང་ལུས་པ་མེད་པ་རྣམས་དང་བསྙེན་ཅིང་བསྒྲུབ་པའི་ལྷག་པའི་ལྷ་མཆོག་གཙོ་བོ་ཡབ་ཡུམ་རིགས་ཀྱི་བདག་པོ་བརྒྱུད་ལྡན་གྱི་བླ་མ་ཕྱི་ནང་གི་འཁོར་ཚོགས་རྩ་གསུམ་རྒྱལ་བ་རྒྱ་མཚོ་ཁྱེད་རྣམས་ཀྱིས་སྔོན་བསྐལ་བ་མང་པོའི་གོང་རོལ་ནས་ཐུགས་བསྐྱེད་དང་སྨོན་ལམ་རླབས་པོ་ཆེ་ཇི་ལྟར་བཏབ་པའི་ཐུགས་རྗེའི་མཐུ་དཔལ་བྱིན་རླབས་ཀྱི་ནུས་པ། ཁྱད་པར་དུ་བདག་ཅག་རྡོ་རྗེ་སློབ་དཔོན་མཆེད་དང་ལྕམ་དྲལ་འདུས་པ་རྒྱ་མཚོ་རྣམས་ཀྱིས་གསང་སྔགས་བླ་མེད་ཀྱི་དཀྱིལ་འཁོར་འདི་བཞེངས་ཤིང་བསྙེན་སྒྲུབ་ལས་གསུམ་གྱི་ཏིང་ངེ་འཛིན་ཡང་དག་པར་སྤྱད་དེ། སྒོམ་སྒྲུབ་ཀྱི་འཕྲིན་ལས་ཟབ་མོ་མཐར་ཕྱིན་ནས་ཕོ་བྲང་ཆེན་པོ་ཡེ་ཤེས་ལྔ་ལྡན་གྱི་རྡུལ་ཚོན་འདི་བཀྲ་ཤིས་རྒྱུན་མི་འཆད་པའི་དཔལ་གྱིས་བརྒྱན་པའི་དབང་གི་ཆུ་བོའི་འཁོར་ལོ་ནམ་ཡང་ཟད་པ་མེད་པ་འདི་ལ་དོར་བའི་མཐུས། སངས་རྒྱས་ཀྱི་བསྟན་པ་རིན་པོ་ཆེ་ཕྱོགས་དུས་གནས་སྐབས་ཐམས་ཅད་དུ་དར་ཞིང་རྒྱས་ལ་ཡུན་རིང་དུ་གནས་པར་གྱུར་ཅིག གསང་སྔགས་རྡོ་རྗེ་ཐེག་པ་འདིས་ཀྱང་འགྲོ་བ་མཐའ་དག་སྨིན་གྲོལ་གྱི་ལམ་ལ་འགོད་ནུས་པར་གྱུར་ཅིག །བསྟན་པའི་རྩ་ལག་བླ་མ་དགེ་བའི་བཤེས་གཉེན་རྣམས་ཀྱང་སྐུ་ཚེ་དང་མཛད་འཕྲིན་ཐམས་ཅད་ཡར་ལྡན་དུ་འཕེལ་ཞིང་སེམས་ཅན་གྱི་སྒྲོན་མེ་ཡུན་རིང་དུ་མཛད་པར་གྱུར་ཅིག འཇིག་རྟེན་གྱི་ཁམས་ཐམས་ཅད་དུ་ཆར་ཆུ་དུས་སུ་འབབ་ཅིང་ལོ་ཕྱུགས་ལེགས་པ་དང་ནད་མཚོན་མུ་གེའི་བསྐལ་པ་ཐམས་ཅད་ཞི་ཞིང་། བསྐལ་བ་རྫོགས་ལྡན་གྱི་དུས་ལྟར་དཔལ་འབྱོར་ཕུན་སུམ་ཚོགས་པ་ལ་ལོངས་སྤྱོད་པར་གྱུར་ཅིག འཇིག་རྟེན་མི་དབང་གི་རྒྱལ་པོ་རྣམས་ཀྱང་དགེ་བའི་དཔལ་གྱི་ས་སྐྱོང་ཞིང་ཆབ་སྲིད་འབངས་མངའ་འཁོར་དང་བཅས་པ་ཐམས་ཅད་དར་ཞིང་རྒྱས་ནས་དགེ་བའི་ལས་སྣ་ཚོགས་བརྩམ་ཞིང་བཀྲ་ཤིས་པའི་ཡོན་ཏན་དུ་མ་མངོན་དུ་བྱེད་པར་གྱུར་ཅིག ཆུ་བོ་ཆེན་པོ་འདིས་གང་དུ་ཁྱབ་པའི་ཐ་གྲུའི་སྐྱེ་འགྲོ་ལྷ་མི་དུད་འགྲོ་གཟུགས་ཅན་གཟུགས་མེད་ཐམས་ཅད་ཀྱིས་མྱོང་བ་བཀྲུས་པ་རེག་ཅིང་འབོག་པ་ཐམས་ཅད་དེ་བཞིན་གཤེགས་པ་བཅོམ་ལྡན་འདས་རིགས་ཀྱི་བདག་པོའི་གོ་འཕང་རིན་པོ་ཆེ་མངོན་དུ་བྱེད་པར་གྱུར་ཅིག ཅེས་ལན་གསུམ་མམ་གཅིག་སོགས་སྐབས་ལྟར་བརྗོད་པའི་མཐར་༈ བཀྲ་ཤིས་པའི་ཚིགས་བཅད་མང་པོ་མཚམས་དང་མཐའ་རྣམས་རོལ་མོ་སྣ་ཚོགས་ཀྱིས་བརྒྱན་ཏེ་བརྗོད་པར་བྱའོ། །ཅེས་པ་འདི་ཡང་སྒྲུབ་ཆེན་རྣམས་ཀྱི་རྡུལ་ཚོན་དབང་གི་ཆུ་བོ་ལ་སྐྱེལ་བའི་ངག་འདོན་མཐོང་བརྒྱུད་ལྟར་ལ་མ་རིག་མུན་སེལ་གྱི་བསྔོ་བའི་ཤམ་བུའི་བརྒྱན་ཏེ་སྤྲང་པོ་ཉི་མ་གྲགས་པས་ཤར་སྟག་མོ་སྒང་དུ་སྦྱར་བའོ། །སརྦ་མངྒ་ལཾ།། །།