བཀའ་སྲུང་མགོན་པོ་ཕྱག་བཞི་པའི་དབང་།
ཐུགས་རྗེ་ཆེན་པོ་མ་རིག་མུན་སེལ་ལས༔ བཀའ་སྲུང་མགོན་པོ་ཕྱག་བཞི་པའི་དབང་བཞུགས༔ ཡེ་ཤེས་མགོན་པོའི་ཚོགས་ལ་འདུད༔ དུར་ཁྲོད་ལ་སོགས་དབེན་གནས་སུ༔ མཎྜལ་དུག་ཁྲག་ཆག་ཆག་གདབ༔ མགོན་པོའི་དཀྱིལ་འཁོར་བྲིས་ནས་ཀྱང་༔ སྨན་གཏོར་རཀྟ་དར་ནག་བཤམས༔ ལས་བྱང་བཏང་ཞིང་བསྙེན་ཁ་གསོ༔ ཏིང་འཛིན་ངང་ནས་བསྐྱེད་རིམ་གསལ༔ སྣོད་དང་ལྡན་པའི་སློབ་མ་ཡིས༔ ནམ་གྱི་སྲོད་ལ་བབས་པའི་ཚེ༔ གོ་མཚོན་དར་ཟབ་ནག་པོ་སོགས༔ དབང་ཡོན་མཎྜལ་ལག་ཏུ་ཐོགས༔ དབང་དོན་གསོལ་བ་འདི་ལྟར་གདབ༔ རྡོ་རྗེ་འཛིན་དབང་དཔའ་བོ་ཆེ༔ རྡོ་རྗེ་སློབ་དཔོན་དགོངས་སུ་གསོལ༔ བདག་ཅག་འདིར་ཚོགས་བུ་རྣམས་ལ༔ ནག་པོ་ཆེན་པོའི་དབང་བསྐུར་སྩོལ༔ སློབ་དཔོན་གྱིས་འདི་སྐད་དོ༔ འོ་ཁྱེད་ཅག་སྐལ་ལྡན་རིགས་ཀྱི་བུ༔ མ་ཧཱ་ཀཱ་ལའི་ད་ལ་འདིར༔ འཇུག་པར་འདོད་པའི་བུ་ཡིན་ན༔ ཚུལ་བཞིན་བསྙེན་སྒྲུབ་སྐྱོང་ནུས་སམ༔ ཞིང་བཅུ་ཡན་པར་མི་གཏོང་བའི༔ དམ་ཚིག་ཚུལ་བཞིན་སྲུང་ནུས་སམ༔ སློབ་མ་རྣམས་ཀྱིས༔ རྡོ་རྗེ་འཛིན་པ་དགོངས་སུ་གསོལ༔ མ་ཧཱ་ཀཱ་ལ་དཔལ་ཆེན་པོའི༔ བསྙེན་སྒྲུབ་ཚུལ་བཞིན་སྐྱོང་ནས་ཀྱང་༔ ཞིང་བཅུའི་བསྟན་དགྲ་བརླག་པ་ཡི༔ དམ་ཚིག་སྲོག་ལ་བབས་ཀྱང་སྲུང་༔ དབང་བསྐུར་བདག་ཅག་རྣམས་ལ་སྩོལ༔ ཅེས་ཞུས་གྲལ་དུ་འཁོད༔ བགེགས་ལ་བཀའ་བསྒོ་ཞིང་མཚམས་བཅད༔ སྐྱབས་སེམས་རྣམས་སྤྱི་འགྲོས་ལྟར་འབོགས༔ མཎྜལ་དབུལ་ཞིང་གསོལ་བ་འདི་ལྟར་གདབ༔ རྡོ་རྗེ་སློབ་དཔོན་ཧེ་རུ་ཀ༔ དཔལ་ཆེན་བླ་མ་དགོངས་སུ་གསོལ༔ སྲིད་གསུམ་དྲེགས་པའི་ཆེ་བཙན་དཔལ༔ མ་ཧཱ་ཀཱ་ལའི་དབང་བསྐུར་ཞུ༔ ཅེས་ལན་གསུམ་ཞུ༔ དེ་ནས་སློབ་མ་རྣམས་ཀྱི་རྒྱུད་སྦྱངས་ཤིང་པདྨ་ཧེ་རུ་ཀའི་བསྐྱེད་རིམ་ཕོག༔ བཛྲ་ཀྲོ་ཏའི་སྔགས་དང་ཨ་ཝེ་ཤ་ཡས་ཡེ་ཤེས་པ་དབབ་ཅིང་བརྟན་པར་བྱ༔ དེ་ནས་མགོན་པོའི་དཔལ་གཏོར་ཙཀ་ལིས་བརྒྱན་ཞིང་དར་ནག་གི་གུར་ཕུབ་པ་སློབ་མ་རྣམས་ཀྱི་སྤྱི་བོར་བཞག་ཅིང་༔ ཧཱུྃ༔ གཏོར་སྣོད་བྷན་དྷ་ཡངས་པའི་སྣོད་མཆོག་ཏུ༔ དཔལ་བཤོས་འབར་བ་ཡེ་ཤེས་མགོན་པོའི་སྐུ༔ བརྒྱུད་འཛིན་སྐྱེས་བུ་ཁྱོད་ལ་དབང་བསྐུར་བས༔ མ་ཧཱ་ཀཱ་ལའི་སྐུ་ཡི་དབང་ཐོབ་ཤོག༔ ཨཱོཾ་མ་ཧཱ་ཀཱ་ལ་ཀཱ་ཡ་ཨ་ཝེ་ཤ་ཡ་ཨ་བྷི་ཥིཉྩ་ཧཱུྃ༔ ཐོད་ཁྲག་མགྲིན་པར་བཞག་ལ༔ ཧཱུྃ༔ ལྕང་ལོ་ཅན་གྱི་ཐོད་སྣོད་ཡངས་པ་རུ༔ དམར་ཆེན་འབར་བ་རཀྟའི་བདུད་རྩི་སྐྱིལ༔ ནུས་ལྡན་སློབ་བུ་ཁྱོད་ལ་དབང་བསྐུར་བས༔ མ་ཧཱ་ཀཱ་ལའི་གསུང་གི་དབང་ཐོབ་ཤོག༔ ཨཱོཾ་མ་ཧཱ་ཀཱ་ལ་ཝཱཀྐ་ཨ་ཝེ་ཤ་ཡ་ཨ་བྷི་ཥིཉྩ་ཧཱུྃ༔ གྲི་གུག་མཐིང་ནག་དར་གྱི་ཅོད་པན་དང་བཅས་པ་སྙིང་གར་བཞག་ཅིང་༔ ཧཱུྃ༔ གནམ་ལྕགས་འབར་བའི་གྲི་གུག་ཧཱུྃ་གིས་མཚན༔ མཐིང་ནག་དར་གྱི་ཅོད་པན་ཀུན་ཏུ་འཕྱོ༔ དམ་ལྡན་སློབ་བུ་ཁྱོད་ལ་དབང་བསྐུར་བས༔ མ་ཧཱ་ཀཱ་ལའི་ཐུགས་ཀྱི་དབང་ཐོབ་ཤོག༔ ཨཱོཾ་མ་ཧཱ་ཀཱ་ལ་ཙིཏྟ་ཨ་ཝེ་ཤ་ཡ་ཨ་བྷི་ཥིཉྩ་ཧཱུྃ༔ རྩེ་གསུམ་ལྟེ་བར་བཞག་ཅིང་༔ ཧཱུྃ༔ ཁ་ཊྭཱཾ་རྩེ་གསུམ་དུག་གསུམ་རྩད་ནས་གཅོད༔ མི་མགོ་སྐམ་རློན་སྐྲ་ཡི་ལན་ཕྲན་ཅན༔ བསྟན་འཛིན་སློབ་བུ་ཁྱོད་ལ་དབང་བསྐུར་བས༔ མ་ཧཱ་ཀཱ་ལའི་ཡོན་ཏན་དབང་ཐོབ་ཤོག༔ ཨཱོཾ་མ་ཧཱ་ཀཱ་ལ་རཏྣ་ཨ་བྷི་ཥིཉྩ་ཨ་ཝེ་ཤ་ཡ་ཨཱ༔ རལ་གྲི་ལག་ཏུ་གཏད་ཅིང་༔ ཧཱུྃ༔ སྤུ་གྲི་འབར་བ་རྡོ་རྗེའི་ཡུ་བ་ཅན༔ དྲག་པོའི་མཚོན་ཆ་སྣ་ཚོགས་བུ་ཡུག་འཐིབ༔ བསྟན་སྐྱོང་བུ་མཆོག་ཁྱོད་ལ་དབང་བསྐུར་བས༔ མ་ཧཱ་ཀཱ་ལའི་འཕྲིན་ལས་དབང་ཐོབ་ཤོག༔ ཨཱོཾ་མ་ཧཱ་ཀཱ་ལ་ཀརྨ་ཨ་བྷི་ཥིཉྩ་ཨ་ཝེ་ཤ་ཡ་ཨཱཿ དེ་ནས་ལིངྒ་དགུག་གཞུག་དྲག་ཏུ་བྱས་ལ་ཛཿཧཱུྃ་བཾ་ཧོཿས་ཕྱག་རྒྱས་བསྡམས་ཤིང་༔ ཨཱོཾ་མ་ཧཱ་ཀཱ་ལ་མ་མ་དུ་ཛ༔ ཨཱོཾ་མ་ཧཱ་ཀཱ་ལ་ནྲི་ཏྲི་ཐུམ་རིལ་རྦུད༔ ཏྲག་རཀྴ་ཐུམ་རིལ་རྦད༔ མ་ཧཱ་ཀཱ་ལ་གིང་ཀ་ར་གིང་ཀ་ར་དགྲ་བགེགས་ཀྱི་སྲོག་རྩ་ལ་ཡ་ཡཱ༔ སྙིང་རྩ་ལ་རྦད་རྦད༔ རུ་རུ་པ་ཙ་ཡ་ཡཱ༔ མ་ཧཱ་ཀཱ་ལ་བྷྱོ་བྷྱོ༔ དགྲ་བོའི་ཙིཏྟ་གཏུབས་གཏུབས༔ སྲོག་རྩ་ཆོད་ཆོད༔ སྙིང་རྩ་ཕྱུངས་ཕྱུངས༔ ཤག་ཤག་ཕྱེས་ཕྱེས༔ མ་མ་ཏྲག་རཱུ་ཊ་དགྲ་བོ་མཱ་ར་ཡ་ཧཱུྃཿཕཊ༔ ཅེས་པའི་དྲག་སྔགས་ཀྱི་བཟླས་པས་དམོད་ཅིང་ཕྱག་མཚན་དང་ཐུན་གྱིས་བརྡེག༔ བསྒྲལ་ལས་བྱ་ཞིང་གཏོར་མར་འབུལ༔ དེ་ནས་དར་ནག་ལག་གཡས་སུ་གཏད་སྒྲུབ་ཡིག་གཡོན་དུ་གཏད་ཅིང་འདི་སྐད་དོ༔ ཧཱུྃ༔ མ་ཡེངས་བུ་ཁྱོད་སློབ་དཔོན་ངག་ལ་ཉོན༔ དར་ནག་སྒྲུབ་ཡིག་མགོན་པོའི་བླ་རྡོ་སྟེ༔ ཁྱོད་ལ་གཏད་དོ་ནམ་ཡང་མ་གཏོང་བཟུང་༔ མ་ཧཱ་ཀཱ་ལ་ནག་པོ་སྟོང་གི་ཚོགས༔ མ་མོ་བྱེ་བ་ཤ་ཟ་འབུམ་གྱི་སྡེ༔ བསྟན་བསྲུང་དམ་ཅན་རྒྱ་མཚོ་འཁོར་བཅས་ཀྱིས༔ དམ་ལ་གནས་པའི་རྡོ་རྗེའི་སློབ་བུ་འདིས༔ བྱིན་པའི་ཟས་ཟོ་བཅོལ་བའི་ཕྲིན་ལས་སྒྲུབས༔ དམ་ལྡན་རྣམས་ལ་བསྲུང་ཞིང་མེལ་ཚེ་མཛོད༔ དམ་མེད་ལོག་པར་ལྟ་བ་རྡུལ་དུ་རློགས༔ ཅེས་བརྗོད་བསྐུལ་བ་འདོན་ཞིང་གཏོར་མ་དགྲ་ཕྱོགས་སུ་འཕེན་པའམ༔ མངའ་གསོལ་བྱ་ཞིང་རྟེན་གཏོར་དུ་བཅང་ཡང་རུང་ངོ་༔ ཤ་ཁྲག་ཆང་སོགས་ཕངས་མེད་ཀྱི་ཚོགས་བྱ༔བསྔོ་སྨོན་གྱིས་རྗེས་སྐྱོང་ཞིང་དཀྱིལ་འཁོར་གྱི་ལས་རྗེས་མི་མངོན་པར་བྱའོ༔ དམ་ལ་གནས་ཤིང་སྒྲུབ་པའི་བསྟན་པ་འཛིན་ངེས་མ་གཏོགས་སུ་ཐོད་ཐོད་ལ་སྦྱིན་ན༔ རང་ལ་ནག་པོ་ཆེན་པོའི་འཁུ་ལྡོག་འོང་བས་སྐལ་ལྡན་རེ་རེ་ཙམ་ལས་སྤེལ་མི་རུང་ངོ་༔ ཤིན་ཏུ་གསང་བར་བྱའོ༔ ས་མ་ཡཱ༔ རྒྱ་རྒྱ་རྒྱ༔ གཏེར་རྒྱ༔ སྦས་རྒྱ༔ གཉན་རྒྱ༔ གསང་རྒྱ༔ ས་མ་ཡཱ༔ རྒྱ་རྒྱ་རྒྱ༔ བདག་སྤྲང་བནྡེ་ཉི་མ་གྲགས་པས་མང་ཡུལ་བྱམས་པ་སྤྲིན་གྱི་གཙུག་ལག་ནས་གདན་དྲངས་པའོ།། སརྦ་མངྒ་ལཾ།། །།