ཡེ་ཤེས་མགོན་པོ་ཕྱག་བཞི་པའི་སྒྲུབ་ཐབས།
ཐུགས་རྗེ་ཆེན་པོ་མ་རིག་མུན་སེལ་ལས༔ བཀའ་སྲུང་ཡེ་ཤེས་མགོན་པོ་ཕྱག་བཞི་པའི་སྒྲུབ་ཐབས་བཞུགས༔ ཡེ་ཤེས་མགོན་པོ་ལ་ཕྱག་འཚལ་ལོ༔ དམ་ཚིག་ལྡན་པའི་རྣལ་འབྱོར་པས༔ མར་ངོའི་དུས་ཆེན་ཡང་ན་ཉ༔ ནག་པོ་ཆེན་པོ་རྒྱུ་བའི་དུས༔ དུར་ཁྲོད་ལ་སོགས་དབེན་གནས་སམ༔ ལུང་ནས་བཤད་པའི་གནས་ཡུལ་ཏེ༔ ཏེ་སེ་ཙ་རི་གཏེར་སྒྲོམ་བྲག༔ ཡང་ན་ང་ཡིས་བྱིན་བརླབས་པའི༔ བོད་ཀྱི་གནས་ཆེན་གང་རུང་ངམ༔ ཡང་ན་གནམ་ས་རི་ཀླུངས་རྩུབ༔ ཚེར་མ་ཅན་གྱི་ཤིང་སྐྱེས་ཤིང་༔ བྲག་ནག་རལ་བ་བསིགས་འདྲའི་དྲུང་༔ དཀྱིལ་འཁོར་ས་བླང་སྟེགས་བུ་བཟོ༔ དུག་དང་གྲི་ཁྲག་ཆག་ཆག་གདབ༔ དུར་ཁྲོད་ཀྱི་སོལ་བས་བྱུག་ཅིང་ནག་པོར་བྱས་པའི་སྟེང་དུ༔ འབྲུ་ནག་གི་ཚོམ་བུ་དགུའམ་ཡང་ན་ལྷ་གྲངས་ལྟར་འགོད༔ གྲི་ལྕགས་ཀྱི་རལ་གྲི་གསུམ་ཁྲིའུ་བྱས་པའི་སྟེང་དུ༔ ཁྲོ་ཟངས་སམ་ཐོད་པ་སོགས་ཀྱི་ནང་དུ་འབྲུ་ནག་གི་ཕྱེ་ལ་དཔལ་གྱི་བཤོས་བུ་ཟུར་གསུམ་པ༔ རབ་མདའ་གང་༔ འབྲིང་ཁྲུ་གང་༔ ཐ་ནའང་མཐོ་གང་པ་ཞིག་ལ་བཤོས་ཕྲན་ལྷ་གྲངས་དང་མཉམ་པས་བསྐོར༔ ཨུག་ཀྱུ་དང་ཤ་དུམ་མང་དུ་བསགས༔ མགོན་པོ་ཡབ་ཡུམ་གྱི་ཙཀ་ལི་མདའ་རྒོད་སྒྲོ་མར་བཏགས་ཤིང་༔ དར་མཐིང་གི་གུར་ཕུབ་པ་གཏོར་མར་གཟུགས༔ གཞན་ཡང་ཤ་སྣ་སྙིང་སྣ་དཔལ་འབར་དགྲ་བོའི་ལིངྒ་ལ་སོགས་པས་ཚང་བར་བརྒྱན༔ འཚེ་དང་ཡུངས་ཀར་ལ་སོགས་པའང་གཙོ་བོ་ལ་བཞི་བཞི༔ འཁོར་རྣམས་ལ་གཉིས་གཉིས་ཀྱིས་བརྒྱན༔ མཎྜལ་གྱི་སྟེང་དུ་བདུད་རྩི་སྨན༔ རཀྟ་དམར༔ གྷ་ན་ཚོགས༔ སུ་ར་ཆང་༔ མཾ་ས་ཤ་ལ་སོགས་པའི་མཆོད་རྫས་འཕྱར་དར་གཡབ་དར་གོ་མཚོན་སྤྱན་གཟིགས་སོགས་དང་༔ དབང་པོ་ལྔའི་མེ་ཏོག༔ གསུར་ཆེན་གྱི་བདུག་སྤོས༔ ཞུན་ཆེན་གྱི་མར་མེ༔ དྲི་ཆུའི་བྱུག་པ༔ དྲི་ཆེན་གྱི་ཞལ་ཟས༔ རྐང་གླིང་ཐོད་རྔའི་རོལ་མོ་ལ་སོགས་འབྱོར་ཚད་དུ་བཤམས༔ རང་གི་མདུན་དུ་ཉམས་པའི་གཟུགས་བྱད་ཧོམ་ཁུང་མཚན་ལྡན་དུ་མིང་རུས་བླ་དྭགས་ཟག་རྫས་ལྡན་པ་བཤམས་ཤིང་༔ རྣལ་འབྱོར་པ་བདེ་བའི་གདན་ལ་འདུག་སྟེ༔ ཡི་དམ་གང་ཡིན་གྱི་ལས་ཀྱི་གཞུང་བསྲང་༔ ཏིང་ངེ་འཛིན་གསལ་ཞིང་བསྙེན་པ་དུམ་ཞིག་བསྐྱལ་ཏེ༔ སྐད་ཅིག་གི་རང་ཉིད་ཡི་དམ་དབང་ཆེན་རྟ་མགྲིན་ཡབ་ཡུམ་དུ་གསལ་བའི་མདུན་དུ༔ ཐུགས་ཀ་ནས་ཨེ་མཐིང་ནག་ཅིག་ཆད་པས་ནམ་མཁའ་མཐའ་དབུས་བྲལ་བ་ཞིག་ཏུ་བསམས༔ ཡཾ་ཆད་པས་རླུང་གི་དཀྱིལ་འཁོར་རྡོ་རྗེ་རྒྱ་གྲམ༔ ར་ཆད་བས་རཀྟའི་རྒྱ་མཚོ༔ སུཾ་ཆད་པས་ཞིང་ཆེན་གྱིས་གཞི༔ ཀེཾ་ཆད་པས་རུས་པའི་རི་རབ༔ རཾ་ཆད་པས་ཡེ་ཤེས་ཀྱི་མེ་དཔུང་དམར་ནག་ཏུ་འབར་བའི་ཀློང་དུ་བྷྲཱུྃ་ཆད་པ་ལས་དྲག་པོ་འབར་བའི་གཞལ་ཡས་ཁང་ཐོད་པའི་སྐུ་མཁར་ཟུར་གསུམ་པ༔ མེ་རླུང་དང་ཐོག་མཚོན་སྣ་ཚོགས་ཀྱི་ཚུབ་མ་འཁྲུག་པ༔ དུར་ཁྲོད་ཀྱི་ས་གཞི་ཆེན་པོར་བཾ་གསར་རྙིང་སྣ་ཚོགས་གཅལ་དུ་བཀྲམ་པའི་ཀློང་དཀྱིལ༔ རཀྟའི་རྒྱ་མཚོ་མུ་མཐའ་མེད་པར་འཁྱིལ་བའི་ཀློང་དུ༔ འཁོར་ལོ་རྩིབས་བཞིའི་ལྟེ་བ་ལ་ཨེ་གྲུ་གསུམ་དམར་ནག་ཏུ་འབར་བའི་དཀྱིལ་འཁོར་དབུས་པདྨ་དང་ཉི་མ་རོ་ཡི་གདན་གྱི་ཁར༔ ཡི་གེ་ཧཱུྃ་མཐིང་ནག་གཅིག་ལས་འོད་ཟེར་འཕྲོས༔ དགྲ་བགེགས་གདུག་པ་ཅན་ཐམས་ཅད་ཚར་བཅད༔ ཡེ་ཤེས་དང་འཇིག་རྟེན་གྱི་མགོན་པོ་ཐམས་ཅད་ཀྱི་སྲོག་སྙིང་བསྡུས༔ ཧཱུྃ་ལ་ཐིམ་ཞིང་གཟི་བརྗིད་རྒྱས༔ ནུས་མཐུ་དཔལ་དུ་འབར་བས་སྐད་ཅིག་གིས་ཡོངས་སུ་གནས་གྱུར་ཏེ༔ དཔལ་ཆེན་པོ་ཡེ་ཤེས་ཀྱི་མགོན་པོ་ཕྱག་བཞི་པ་སྐུ་མདོག་མཐིང་ནག་ཟར་མའི་མེ་ཏོག་གམ་ཨིཎྜ་ནཱི་ལ་ལྟ་བུ༔ ཞལ་གཅིག་སྤྱན་གསུམ་དྲག་ཏུ་ཁྲོས་པ༔ ཞལ་གདངས་ཤིང་མཆེ་བ་གཙིགས་པ༔ སྨ་ར་དང་སྨིན་མ་གློག་ལྟར་དུ་འཁྱུག་པ༔ དབུ་སྐྲ་ཁམ་ནག་གྱེན་དུ་འབར་བ་ལ་ཐོད་ཕྲེང་དང་རྩེ་བྲན་གྱིས་བརྒྱན་པ༔ ཕྱག་གཡས་ཀྱི་དང་པོས་རལ་གྲི་རྡོ་རྗེའི་ཡུ་བ་ཅན་ནམ་མཁར་འཕྱར་བ༔ གཡོན་གྱི་དང་པོས་ཏྲི་ཤུལ་རྩེ་གསུམ་འཕྱར་བ༔ འོག་མ་གཉིས་ཀྱིས་གྲི་ཐོད་ཀྱི་ཕྱག་རྒྱས་ཡུམ་ཙནྟི་ཀ་ལ་འཁྱུད་པ༔ སྐུ་ཆེ་ལ་གསུས་ཁྱིམ་སྦོམ་པ༔ ཡན་ལག་རགས་པ༔ དུར་ཁྲོད་ཀྱི་ཆས་ཐམས་ཅད་ཀྱིས་བརྒྱན་ཞིང་མེ་དཔུང་དམར་ནག་ཏུ་འབར་བའི་ཀློང་དཀྱིལ་དུ་ཞབས་གཉིས་ཕྱེད་སྐྱིལ་འགྱིང་བག་གི་ཚུལ་དུ་བཞུགས་པར་བསྒོམ༔ དཔལ་ཡེ་ཤེས་ཀྱི་མགོན་པོ་མ་ཧཱ་ཀཱ་ལའི་པང་དུ་ལུས་དང་གྲིབ་མའི་ཚུལ་དུ་སྲོག་སྙིང་ཡི་གེ་མ་ནག་མོ་ལས་ཡུམ་མཆོག་ཆེན་པོ་ཙནྟི་ཀ་ནག་མོ་ཞལ་གཅིག་ཕྱག་བཞི་མ༔ ཕྱག་དང་པོ་གཉིས་ཀྱིས་གྲི་ཐོད་ཀྱི་ཕྱག་རྒྱས་ཡབ་ཀྱི་མགུལ་ནས་འཁྱུད་པ༔ གཡས་ཀྱི་འོག་མས་གནམ་ལྕགས་ཀྱི་རལ་གྲི་དང་གཡོན་གྱི་འོག་མས་མདའ་གཞུ་བསྣམས་པ༔ ཞལ་གདངས་ཤིང་རྐན་སྒྲ་བརྡེབ་པ༔ སྤྱན་གསུམ་བགྲད་པ་དབུ་སྐྲ་ཐུར་དུ་འཕྱང་བ་ལ་ཐོད་ཕྲེང་གིས་བརྒྱན་པ༔ གཟིག་ལྤགས་ཀྱི་ཤམ་ཐབས་རུས་རྒྱན་དང་ཐོད་པའི་ཕྲེང་བས་སེ་རལ་ཁར་བརྒྱན་པ༔ ཞབས་གཉིས་ཡབ་ཀྱི་སྐེད་ལ་འཁྲིལ་བར་བསྐྱེད༔ དེའི་ཕྱི་རོལ་འཁོར་ལོ་རྩིབས་བཞི་གཙོ་བོ་ཡབ་ཡུམ་གྱི་མདུན་དང་ལྔར༔ སྐུ་ཡི་བཀའ་སྡོད་ལས་མགོན་བྱ་རོག་གི་གདོང་པ་ཅན་དཀར་པོ༔ གསུང་གི་བཀའ་སྡོད་དམར་པོ༔ ཐུགས་ཀྱི་བཀའ་སྡོད་མཐིང་ག༔ ཡོན་ཏན་གྱི་བཀའ་སྡོད་སེར་པོ༔ འཕྲིན་ལས་ཀྱི་བཀའ་སྡོད་ལྗང་གུ་སྟེ༔ ལྔ་པོ་ཐམས་ཅད་བྱ་རོག་གི་གདོང་པ་ཅན༔ གདོང་པ་ཐམས་ཅད་མཐིང་ག་ཞལ་གཅིག་ཕྱག་གཉིས་སྤྱན་གསུམ་པ༔ སྐུ་ཤིན་ཏུ་གཏུམ་ཞིང་བརྔམ་པའི་ཞལ་དང་ལྡན་པ་ལ་རལ་པ་ཁམ་ནག་གྱེན་དུ་འབར་བ༔ སྟག་ལྤགས་རློན་པའི་ཤམ་ཐབས་ཅན༔ ཕྱག་གཡས་གནམ་ལྕགས་ལས་གྲུབ་པའི་གྲི་གུག་རང་རྟགས་ཀྱི་ཡུ་བ་ཅན་ཉམས་པའི་སྙིང་འབྱིན་པའི་ཚུལ་དུ་ནམ་མཁའ་ལ་འཕྱར་བ༔ གཡོན་ཐམས་ཅད་ན་དམར་ཆེན་གྱིས་བཀང་བའི་ཐོད་པ་ཐུགས་ཀར་བསྣམས་པ༔ དབུ་སྐྲ་དང་ཕྱག་ཞབས་ཐམས་ཅད་ལ་ཀླུ་རིགས་རྣམ་པ་ལྔས་བརྒྱན་པ༔ བྱ་རོག་འཕུར་ཤེས་ལ་བཅིབས་པར་བསྐྱེད༔ དེའི་ཕྱི་རོལ་ཕྱོགས་བཞིར་ཤར་དུ་ཚངས་པ་དུད་ཀ་ཞལ་གཅིག་ཕྱག་གཉིས་དར་དཀར་གྱི་ན་བཟའ་གསོལ་ཞིང་གཡས་སྣ་ཚོགས་འབར་བའི་འཁོར་ལོ་དང་༔ གཡོན་ལྕགས་ཀྱུ་བསྣམས་པ་མདའ་གཞུ་འཁོར་གསུམ་གྱིས་བརྒྱན་ཞིང་དར་དཀར་གྱི་ལ་ཐོད་ཅན༔ རྟ་མཆོག་ངང་པ་གསེར་ལྡན་ལ་བཅིབས་པ༔ ལྷོ་ཕྱོགས་སུ་གཤིན་རྗེ་སེར་ནག་ཞལ་གཅིག་ཕྱག་གཉིས་སྐུ་ལ་བསེ་ཁྲབ་སེར་པོ་གསོལ་ཞིང་མདའ་གཞུ་འཁོར་གསུམ་གྱིས་བརྒྱན་པ༔ གཡས་གནམ་ལྕགས་ཀྱི་རལ་གྲི་དང་གཡོན་ཁྲམ་ཤིང་ཅན་དབུ་སྐྲ་ཁམ་ནག་གྱེན་དུ་འབར་བ་ཆུ་གླང་ཁམ་པ་ལ་བཅིབས་པ༔ ནུབ་ཏུ་བཙན་རྗེ་དམར་ནག་ཞལ་གཅིག་ཕྱག་གཉིས་བསེ་ཁྲབ་དམར་པོ་གསོལ་ཞིང་གཡས་རྡོ་རྗེ་དང་གཡོན་དགྲ་སྙིང་ཞལ་དུ་གསོལ་བ༔ མདའ་གཞུ་འཁོར་གསུམ་གྱིས་བརྒྱན་ཞིང་དར་དམར་གྱི་ལ་ཐོད་ཅན་བཙན་རྟ་དམར་པོ་ལ་བཅིབས་པ༔ བྱང་ཕྱོགས་སུ་གནོད་སྦྱིན་སྔོན་པོ་ཞལ་གཅིག་ཕྱག་གཉིས་གནམ་ལྕགས་ཀྱི་གོ་ཁྲབ་གསོལ་ཞིང་མདའ་གཞུ་འཁོར་གསུམ་གྱིས་བརྒྱན་པ༔ གཡས་གནམ་ལྕགས་ཀྱི་རྡོ་རྗེའི་གཏུན་བུ་དང་གཡོན་དགྲ་བགེགས་ཀྱི་དོན་སྙིང་གསོལ་བ་དབུ་སྐྲ་ཁམ་ནག་ལ་ཐོད་པས་བཅིངས་པ༔ བདུད་རྟ་ནག་པོ་ལ་བཅིབས་པར་བསྐྱེད༔ མཚམས་བཞིར་ནག་མོ་ཆེན་མོ་འབར་མ་བྱ་ཞོན་དཀར་སེར་དམར་ལྗང་མཐིང་ག་བྱ་རོག་གི་གདོང་པ་ཅན༔ གཡས་རྩེ་གསུམ་ནམ་མཁར་འཕྱར་བ་གཡོན་ཐོད་པ་དགྲ་བགེགས་ཀྱི་སྙིང་ཁྲག་གིས་བཀང་བ་ཐུགས་ཀར་བསྣམས་ཤིང་གསོལ་བ༔ སྐུ་ལ་ཐོད་ཕྲེང་དང་ཡན་ལག་སྦྲུལ་གྱིས་བརྒྱན་པ༔ དབུ་སྐྲ་ཁམ་ནག་གྱེན་དུ་འབར་ཞིང་གཟིག་གི་ཤམ་ཐབས་གསོལ་ཏེ་བྱ་རོག་འཕུར་ཤེས་ལ་བཅིབས་པར་བསྐྱེད༔ དེའི་ཕྱི་རོལ་དུར་ཁྲོད་ཆེན་པོའི་བར་འཁྱམས་དང་ཁོར་ཡུག་རྣམས་སུ་མ་མོ་མཁའ་འགྲོ་ཞིང་སྐྱོང་ཕྲ་མེན་བདུད་ཀྱི་སོ་པ༔ གཤིན་རྗེའི་ཕོ་ཉ་བཙན་གྱི་ཇག་པ་སྤྲུལ་པ་དང་ཡང་སྤྲུལ་གྱི་ཚོགས་ལས་ཁྲག་གི་ཆར་པ་དང་ནད་ཀྱི་ན་བུན་འཐུལ་བ༔ ཁྲོ་གཏུམ་དྲག་ཤུལ་འཇིགས་སུ་རུང་བའི་སྐུ་ལས་སྤྲུལ་པ་དང་ཡང་སྤྲུལ་བསམ་གྱིས་མི་ཁྱབ་པར་འཕྲོ་བ༔ རླུང་ལས་མགྱོགས་པ་གློག་ལས་མྱུར་བ་དྲག་པོའི་འཕྲིན་ལས་ཐམས་ཅད་ཐོགས་མེད་དུ་སྒྲུབ་པ༔ སྟེང་ཕྱོགས་ཀྱི་ནམ་མཁའ་ལ་སྤྲུལ་པའི་བྱ་ནག་གནམ་ལྕགས་འབར་བའི་མཆུ་སྡེར་ཅན་མང་པོས་དགྲ་བགེགས་ཀྱི་རྒྱུ་མ་འདྲེན་ཞིང་རོལ་བ༔ གཡས་ཕྱོགས་སུ་ཨ་ཙ་ར་མང་པོས་གར་བྱེད་པ༔ གཡོན་ཕྱོགས་སུ་མོན་པ་མང་པོས་བྲོ་བརྡུང་བ༔ མདུན་ཕྱོགས་སུ་མི་ནག་གཅེར་བུ་མང་པོས་འོ་དོད་དགྲ་ལ་འབོད་པ༔ རྒྱབ་ཕྱོགས་དང་འོག་གི་ཕྱོགས་རྣམས་སུ་ཁྱི་ནག་དོམ་བུས་ཉམས་པའི་ཤ་ལ་རོལ་ཞིང་གདུག་པའི་གཅན་གཟན་མང་པོས་དགྲ་བགེགས་ཀྱི་སྙིང་ཁྲག་འཐུང་བ༔ སྤྲུལ་པའི་ཕོ་ཉ་རེ་རེ་ལའང་བྱེ་བ་དུང་ཕྱུར་གྱི་ཚོགས་དང་བཅས་པས་ཡོངས་སུ་བསྐོར་བར་སྐད་ཅིག་དྲན་རྫོགས་ཀྱིས་བསྐྱེད༔ ལྷ་ཚོགས་ཐམས་ཅད་ཀྱི་གནས་གསུམ་ལ་ཨཱོཾ་ཨཱཿཧཱུྃ་དང་རང་རང་གི་ཐུགས་སྲོག་གིས་ཡོངས་སུ་མཚན་པར་བསྒོམ༔ དེ་ནས་རང་ཉིད་དབང་གི་རྒྱལ་པོའམ་ཡི་དམ་དུ་གསལ་བའི་ཐུགས་ཀའི་ས་བོན་ལས་འོད་ཟེར་འཕྲོས་པས་རྡོ་རྗེ་གདན་ན་ལེནྜ་བསིལ་བ་ཚལ་སོགས་གང་དུ་བཞུགས་པའི་ཡེ་ཤེས་ཀྱི་མགོན་པོ་འཁོར་དང་བཅས་པ་ལ་ཕོག་པས༔ སྐད་ཅིག་དེ་ཉིད་ལ་བྱ་ཆེན་ཐད་ལ་ལྷགས་པའམ་གཅན་གཟན་ཤ་ལ་རུབ་པ་ལྟར་སྒྲུབ་པའི་གནས་སུ་བྱོན་ནས་བསྐྱེད་པའི་སྐུ་ལ་ཐིམ་པར་བསམ་ཞིང་༔ གདུང་བས་སྤྱན་འདྲེན་མཆོད་པས་མཆོད་བསྟོད་པས་བསྟོད་པར་བྱའོ༔ ས་མ་ཡཱ༔ རྒྱ་རྒྱ་རྒྱ༔ དེ་ནས་སྔགས་འཁོར་བསྒོམ་པ་ནི༔ རང་ཉིད་ཡི་དམ་དང་མདུན་བསྐྱེད་མགོན་པོའི་ཐུགས་ཀར་སྣ་ཚོགས་པདྨ་འདབ་མ་བརྒྱད་པའི་སྟེང་དུ༔ ཉི་མའི་དཀྱིལ་འཁོར་གྱི་དབུས་སུ་ཐུགས་སྲོག་ཡི་གེ་ཧཱུྃ་མཐིང་ནག་གཟི་བརྗིད་དང་ལྡན་པ་ཞིག་གི་མཐའ་སྐོར་དུ༔ ཨཱོཾ་ཤྲཱི་མ་ཧཱ་ཀཱ་ལ་མ་མ་དུ་ཛ་སིདྡྷི་གྷུ་ན་ཧྲཱི་ད་ཡཱ་ཧཱུྃ་ཕཊ༔ ཞེས་པའི་སྔགས་འབྲུ་འདི་རྣམས་འོད་སྔོན་པོའི་ཕྲེང་བ་ལ་ཞོན་ཏེ་གཡོན་སྐོར་དུ་ཀྱི་ལི་ལི་རང་སྒྲ་དང་བཅས་ནས་འཁོར༔ འོད་ཟེར་གྱི་ཕྲེང་ཐག་གཡས་སུ་འཁོར་བ་ལ་ཤེས་རིག་མ་ཡེངས་པར་གཏད་ཅིང་༔ རང་གི་ཞལ་ནས་བཟླས་པ་དང་མཉམ་དུ་རང་ཉིད་ཀྱི་ཐུགས་ཀ་ནས་སྔགས་ཀྱི་འོད་ཟེར་ཕར་འཕྲོས༔ དཔལ་ཆེན་པོ་ཡེ་ཤེས་ཀྱི་མགོན་པོའི་ཐུགས་ཀར་ཕོག༔ ཐུགས་ཀའི་སྔགས་འབྲུ་རྣམས་ལ་དབྱེར་མེད་དུ་ཐིམ༔ མགོན་པོ་ཆེན་པོས་སྔོན་གྱི་དམ་ཚིག་གཉན་པོ་དྲན༔ མགོན་པོའི་ཞལ་ནས་སྔགས་ཕྲེང་གི་འོད་ཟེར་འཐོན༔ ཚུར་འཕྲོས་རང་ཉིད་ཡི་དམ་དུ་གསལ་བའི་ཞལ་དུ་ཞུགས་ཤིང་ཐུགས་ཀའི་སྔགས་འབྲུ་རྣམས་ལ་ཐིམ་ཞིང་འཁོར་བས༔ དཔལ་ལྡན་ཡེ་ཤེས་ཀྱི་མགོན་པོ་འཁོར་དང་བཅས་པས་སྲོག་གི་སྙིང་པོ་མདོངས་གསོལ་དུ་ཕུལ་ཞིང་བསྒོ་བའི་བཀའ་ཉན་ཕྲིན་ལས་ཐམས་ཅད་བསྒྲུབ་པར་བསམས་ཏེ༔ གོང་གི་སྙིང་པོ་འབུམ་ཚོ་གཅིག་བཟླས་པས་རབ་དངོས་འབྲིང་ཉམས་ཐ་ན་འང་རྨི་ལམ་དུ་མགོན་པོས་སྲོག་སྙིང་འབུལ་བ་དང་༔ སྒྲུབ་རྫས་རྣམས་ལ་འོད་འཁྱུག་པ་དང་༔ མེ་འབར་བ་དང་༔ དུད་པ་འཐུལ་བ་དང་༔ བྱ་ནག་མང་པོས་བསྐོར་བར་རྨི་བ་དང་༔ གོས་ནག་གྱོན་པ༔ དར་ནག་འཕྱར་བ༔ ཁྲག་འཐུང་བ༔ དབང་པོ་དོན་སྙིང་ལ་སོགས་ལ་རོལ་བ༔ བྷན་ཆང་འཐུང་བ༔ ཕྱག་མཚན་རྙེད་པ༔ དམག་དྲངས་པ༔ ལིངས་བཏབ་པ༔ ཤིང་བཅད་པ༔ བྲག་བཤགས་པ༔ གཏོར་མ་ལས་མེ་འབར་བ༔ སྨན་རག་ཁོལ་བ་སོགས་བྱུང་ན་མགོན་པོ་གྲུབ་པའི་རྟགས་ཡིན་ནོ༔ བསྙེན་གྲངས་མ་རྫོགས་ཀྱང་རྟགས་རྣམས་གསལ་ན༔ ཚེ་རབས་སྔ་མའི་ལས་འཕྲོ་ཡོད་པ་ཡིན་པ་དང་༔ བསྙེན་གྲངས་རྫོགས་ཀྱང་རྟགས་མ་གསལ་ན༔ བསྙེན་སྒྲུབ་ཀྱི་ཏིང་འཛིན་གཡེལ་བ་དང་༔ བཟླས་བརྗོད་མ་དག་པ་དང་༔ དམ་ཚིག་ཉམས་ཆག་སོགས་ཡོད་པའི་རྟགས་ཡིན་པས༔ བསྙེན་གྲངས་དུས་དང་བཅས་པ་བལྡབ་སྟེ་བརྩོན་འགྲུབ་ཀྱིས་འབད་པ་གལ་ཆེའོ༔ ལར་དངོས་གྲུབ་ཐ་དད་པ་འདོད་ན༔ སྔགས་ཕྲེང་འོད་ཟེར་དང་བཅས་པ་དཀར་པོར་བསྒྱུར་ཞིང་ཞི་བའི་འཕྲིན་ལས་ཐམས་ཅད་འགྲུབ་པར་བསམ་པ་དང་༔ རྒྱས་པ་ལ་སེར་པོ་དབང་ལ་དམར་པོ་དྲག་པོ་ལ་ནག་པོ་སྟེ༔ ལས་བཞི་སོ་སོར་སྦྱོར་བ འམ་གཅིག་ཏུ་བསྒྲུབ་པ་སོགས་རང་རང་གི་འདོད་དང་བསྟུན་ནོ༔ ཐུན་སྐབས་རྣམས་སུ་དགྲ་བོ་ལ་དམིགས་པའམ་ཡང་ན་བགེགས་སོགས་གང་གནོད་པའི་བླ་སྲོག་འགུགས་བསྟིམ་ལིངྒ་ལ་བྱ་ཞིང་༔ དེ་བསྒྲལ་བའི་ཤ་ཁྲག་གིས་མཆོད་པའམ་ཤ་ཁྲག་ཟན་ཆང་ལ་སོགས་སྣ་ཚོགས་པ་གཏོར་མ་ལ་དབུལ་ཞིང་༔ རྩ་སྔགས་ཀྱི་མཇུག་ཏུ་དགྲ་བགེགས་བསྒྲལ་བའི་མ་ཧཱ་མཾ་ས་ལ་ཁ་ཁ་ཁཱ་ཧི་ཁཱ་ཧི༔ མ་ཧཱ་རཀྟ་ལ་ཁ་ཁ་ཁཱ་ཧི་ཁཱ་ཧི༔ ཙིཏྟ་ལ་ཁ་ཁ་ཁཱ་ཧི་ཁཱ་ཧི༔ གྷོ་རོ་ཙ་ན་ལ་ཁ་ཁ་ཁཱ་ཧི་ཁཱ་ཧི༔ བྷ་སུ་ཏ་ལ་ཁ་ཁ་ཁཱ་ཧི་ཁཱ་ཧི༔ བྷ་ལིངྟ་ཁ་ཁ་ཁཱ་ཧི་ཁཱ་ཧི༔ ཅེས་སོགས་ཉེར་གཅིག་གམ་བདུན་སོགས་ཀྱིས་འབུལ༔ འདོད་པའི་དོན་ལ་གསོལ་བ་གདབ་ཅིང་འཕྲིན་ལས་བཅོལ༔ ཉམས་ཆགས་བཤགས་པའི་བསྐང་བ་སོགས་ཀྱང་བྱའོ༔ ས་མ་ཡཱ༔ རྒྱ་རྒྱ་རྒྱ༔ ཨེ་མ་བདག་ཉིད་པདྨ་འབྱུང་༔ སྔོན་འདས་རྒྱལ་བའི་ལུང་བསྟན་ཐོབ༔ ད་ལྟ་བསྟན་པ་འཛིན་སྐྱོང་སྤེལ༔ མ་འོངས་སྤྲུལ་པས་འགྲོ་བ་འདུལ༔ བསིལ་བ་ཚལ་གྱི་དུར་ཁྲོད་དུ༔ ཕོ་རྒྱུད་མགོན་པོ་སྲོག་སྙིང་ཕུལ༔ ཡེ་ཤེས་མགོན་པོ་ཕྱག་བཞི་པ༔ འཕགས་པ་མཆོག་གི་སྤྲུལ་པ་སྟེ༔ རྒྱུད་འདིའི་བཀའ་ཡི་སྲུང་མ་མཆོག༔ དེ་ཕྱིར་ཆོས་འདིའི་བསྟན་སྐྱོང་ཕྱིར༔ སྒྲུབ་པ་ཉམས་ལེན་རིམ་པ་འདི༔ ཡི་གེར་བྲིས་ནས་གཏེར་ཏུ་བཅོལ༔ ལན་ཅིག་དུས་ཀྱི་ཐ་མ་ལ༔ ཐུགས་ཀྱི་སྲས་དང་འཕྲད་ནས་ཀྱང་༔ སངས་རྒྱས་བསྟན་པའི་བསྲུང་མར་ཤོག༔ ས་མ་ཡཱ༔ རྒྱ་རྒྱ་རྒྱ༔ བདག་སྤྲང་བནྡྷེ་ཉི་མ་གྲགས་པས་མང་ཡུལ་བྱམས་པ་སྤྲིན་ནས་སྤྱན་དྲངས་ཤིང་ཁམས་སྲིང་མོ་རྫོང་དུ་ཤོག་སེར་ལས་ཞལ་བཤུས་པའོ། །སརྨ་མངྒ་ལཾ།། །། ཐུགས་རྗེ་ཆེན་པོ་མ་རིག་མུན་སེལ་ལས༔