ཕྱི་སྒྲུབ་ཟབ་པའི་མཐར་ཐུག
བཀའ་རྫོགས་པ་ཆེན་པོ་བླ་མ་བདེ་མཆོག་འཁོར་ལོ་ལས༔ ཕྱི་སྒྲུབ་ཡོད་དོ༔ དཔལ་ཆེན་པོ་ཧེ་རུ་ཀཿལ་ཕྱག་འཚལ་ལོ༔ མ་འོངས་སྐལ་ལྡན་སྐྱེས་བུ་ལ༔ བླ་མ་ཡི་དམ་དབྱེར་མེད་ཀྱི༔ མཆོག་ཐུན་དངོས་གྲུབ་སྩོལ་བའི་ཕྱིར༔ ཕྱི་སྒྲུབ་ཟབ་པའི་མཐར་ཐུག་ཅིག༔ པདྨ་འབྱུང་གནས་བདག་གིས་འབྲི༔ ཉམས་སུ་ལོངས་ཤིག་ཞིག་སྐལ་ལྡན་བུ༔ ས་མ་ཡཱ༔ རྒྱ་རྒྱ་རྒྱ༔ དེ་ཡང་གནས་ཡིད་དང་མཐུན་པ་ལ༔ ཡོན་ཏན་རྣམས་ཚང་ཞིང་སྐྱོན་མེད་པ༔ འདུ་འཛིའི་གཡེང་བ་དང་བྲལ་བ་ཅིག་ཏུ་སྟེགས་བུ་འཇམ་ལ་མཁྲེགས་པ་གནས་ཁང་གི་རྒྱ་ཁྱོན་དང་མཐུན་པར་བཟོས༔ བའི་རྣམ་ལྔ་དང་དྲི་བཟང་གིས་ཆག་ཆག་གདབ༔ རབ་རྡུལ་ཚོན་འབྲིང་རས་བྲིས་ཐ་ནའང་འབྲུའི་ཚོམ་བུ་ལྷ་གྲངས་དང་མཉམ་པར་བཀོད༔ དབུས་སུ་ཁྲིའུ་ཁར་མཚན་ལྡན་གྱི་བུམ་པ་དར་དཀར་དམར་གྱི་མགུལ་ཆིངས་ཀྱིས་བརྒྱན་པ་ལ༔ ཆུ་གཙང་བླུག་ཅིང་བུམ་སྨན་ལྡན་པ་རྨ་བྱའི་སྒྲོ་དང་འབྲས་བུ་ཅན་གྱི་ཤིང་གིས་ཁ་བརྒྱན་པ༔ གཟུངས་ཐག་གིས་མཚན་པ་ཞིག་བཤམས༔ བུམ་པ་དེའི་སྟེང་དུ་སྐུའི་རྟེན་ལ་བདེ་མཆོག་ཡབ་ཡུམ་གྱི་འདྲ་འབག་བཞག༔ བུམ་པའི་མདུན་དུ་ཐུགས་ཀྱི་ངོ་བོ་རྡོ་རྗེ་རྩེ་དགུ་པ་དར་གྱི་ཅོད་པན་བཏགས་པ་བཤམས༔ ལྷོར་ཡོན་ཏན་གྱི་རྟེན་དྲིལ་བུ༔ ནུབ་ཏུ་གསུང་གི་རྟེན་སྒྲུབ་ཡིག་པོ་ཏི༔ བྱང་དུ་ཕྲིན་ལས་ཀྱི་རྟེན་ཕུར་པ་རྣམས་བཤམས༔ སྤོད་ལྡན་གྱི་གཏོར་མ་རིན་པོ་ཆེ་འབར་བ༔ བདུད་རྩི་ཛ་གད་བྱང་སེམས་དཀར་དམར་གྱིས་བརྒྱན་པ༔ སེམས་ཅན་གྱི་ཁྲག་ལ་མུ་དྲའི་རཀྟས་བརྒྱན་པ་རྣམས་དང་༔ བཀའ་སྲུང་གི་གཏོར་མ་ལ་ཤ་ཆེན་གྱིས་བརྒྱན་པ༔ ཚིལ་ཆེན་སྣང་གསལ་གྱི་མར་མེ༔ ཤ་ཆེན་དང་སྤོས་ཀྱི་རེང་བུ༔ བདུད་རྩི་དྲི་ཆེན་གྱི་ཞལ་ཟས༔ དྲི་ཆུའི་བྱུག་པ༔ རྐང་ཆེན་གྱི་གླིང་བུ༔ ཐོད་རྔའི་རོལ་མོ་རྣམས་བཤམས༔ རྣལ་འབྱོར་པ་བདེ་བའི་གདན་ལ་འདུག༔ དཀར་གསུམ་གྱི་གཏོར་མ་བཤམས༔ རང་ཉིད་འཕགས་པ་སྤྱན་རས་གཟིགས་སུ་བསྒོམས༔ ཐུགས་ཀའི་འོད་ཀྱིས་བགེགས་དང་གཞི་བདག་རྣམས་སྤྱན་དྲངས་ཤིང་གཏོར་མ་དབུལ་ལ་འདི་སྐད་བརྗོད༔ ཨཱོཾ་ཨ་ཀ་རོ་མུ་ཁཾ་སརྦ་ངྷརྨ་ཎཾ་ཨ་དྱ་ནུཏྤན་ན་ཏྭད་ཏ་ཨཱོཾ་ཨཱཿཧཱུྃ་ཕཊ་སྭཱ་ཧཱ༔ རིན་པོ་ཆེའི་སྣོད་དུ་གཙང་ལྡན་གྱི་གཏོར་མ་འདི་དཀར་གསུམ་མངར་གསུམ་ལས་གྲུབ་པ་བདུད་རྩིའི་རྒྱ་མཚོ་ཆེན་པོར་གྱུར༔ ཨཱོཾ་ཨཱཿ་ཧཱུྃ༔ གསུམ༔ ཧཱུྃ༔ ཚངས་པ་བརྒྱ་བྱིན་རྒྱལ་ཆེན་བཞི༔ ལྷ་ཆེན་ཐམས་ཅད་འཁོར་དང་བཅས༔ དགའ་བོ་འཇོག་པོ་དུང་སྐྱོང་སོགས༔ ཀླུ་རྣམས་མ་ལུས་འཁོར་དང་བཅས༔ ཉི་མ་ཟླ་བ་གཟའ་ཆེན་པོ༔ གཟའ་རྣམས་མ་ལུས་འཁོར་དང་བཅས༔ ས་བདག་ས་ཡི་ལྷ་མོ་སོགས༔ ས་བདག་མ་ལུས་འཁོར་དང་བཅས༔ མགུར་ལྷ་དགེ་བསྙེན་བསྟན་མའི་ཚོགས། ཕྱོགས་སྐྱོང་རྣམས་དང་གནོད་སྦྱིན་དང་༔ སྲིན་པོ་ཤ་ཆེན་ཟ་བ་དང་༔ དྲི་ཟ་གཤིན་རྗེ་མ་མོའི་ཚོགས༔ འབྱུང་པོ་རྣམས་དང་ཡི་དྭགས་དང་༔ སྡེ་བརྒྱད་ཕྱི་ནང་སྲུང་མའི་ཚོགས༔ མཆོད་སྦྱིན་གཏོར་མ་འདི་བཞེས་ལ༔ སྟོབས་ཆེན་ཕྱག་ན་རྡོ་རྗེ་དང་༔ སློབ་དཔོན་པདྨ་ཐོད་ཕྲེང་གི༔ བཀའ་དང་དམ་ལས་མ་འདའ་བར༔ རྣལ་འབྱོར་བདག་ཅག་འཁོར་བཅས་ལ༔ རྣམ་བཞིའི་ལས་ཀྱི་དངོས་གྲུབ་སྩོལ༔ བདག་གིས་བྱང་ཆུབ་མ་ཐོབ་བར༔ ཕྲིན་ལས་སྒྲུབ་ལ་རོགས་དན་མཛོད༔ ཕྱི་ནང་གསང་བའི་བར་ཆད་སོལ༔ བཅོལ་བའི་ཕྲིན་ལས་གྲུབ་པར་མཛོད༔ ཅེས་དཀར་གཏོར་དང་དམར་གཏོར་འབུལ༔ དེ་ནས་བགེགས་ཀྱི་གཏོར་མར་ཆབ་སྦྲན་ལ༔ ཨཱོཾ་བཛྲ་ཀྲོ་ཏ་ཧྱ་གྷྲཱི་ཝ་ཧཱུྃ་ཕཊ༔ ཨཱོཾ་སྭཱ་བྷཱ་ཝ་སོགས༔ རིན་པོ་ཆེའི་སྣོད་ཀྱི་ནང་དུ་བགེགས་ཀྱི་གཏོར་མ་གཟུགས་སྒྲ་དྲི་རོ་རེག་བྱ་ཕུན་སུམ་ཚོགས་པ་རྣམས་སུ་གྱུར༔ ན་མཿསརྦ་ཏ་ཐཱ་ག་ཏ་ཨ་ཝ་ལོ་ཀྀ་ཏེ༔ ཨཱོཾ་སཾ་བྷ་ར་སཾ་བྷ་ར་ཧཱུྃ༔ བདུན་བརྗོད༔ ཧྲཱི༔ ཐུགས་རྗེ་ཆེན་པོ་དབང་གི་རྒྱལ༔ རྟ་མཆོག་རོལ་པ་ཁྲོས་པའི་སྐུ༔ དབང་གི་རྟ་སྐད་འཚེར་བ་ཡིས༔ གདོན་བགེགས་འབྱུང་པོ་བཀུག་ཅིང་གཟིར༔ གསང་བ་བསྒྲུབ་ལ་མི་དབང་བའི༔ གདོན་བགེགས་འབྱུང་པོ་ལན་ཆགས་ཚོགས༔ གླུད་ཀྱི་གཏོར་མ་འདི་ཁྱེར་ལ༔ རང་རང་སོ་སོའི་གནས་སུ་དེངས༔ ཅི་སྟེ་མི་འགྲོ་འཚེ་བྱེད་ན༔ ཆོས་ཉིད་དབྱིངས་ཀྱི་ཏིང་འཛིན་དང་༔ ཁྲོ་བོ་ཆེན་པོའི་བརྟུལ་ཞུགས་ཀྱིས༔ འབྱུང་པོའི་ཚོགས་རྣམས་རྡུལ་དུ་བརླག༔ དེ་བས་རང་རང་གནས་སུ་དེངས༔ ཧཱུྃ་བཞིའི་སྔགས་བརྗོད་ལ་གདོན་བགེགས་སྒྲུབ་ལ་མི་དབང་པ་རྣམས་རྒྱ་མཚོའི་ཕ་རོལ་དུ་བསྐྲད༔ སྲུང་བའི་འཁོར་ལོས་གོ་བསྒོའོ༔ ས་མ་ཡཱ༔ རྒྱ་རྒྱ་རྒྱ༔ དེ་རྣམས་ཀྱིས་སྒྲུབ་པའི་སྟ་གོན་སོང་ནས༔ གཉིས་པ་སྒྲུབ་པའི་དངོས་གཞི་ལ༔ ཏིང་ངེ་འཛིན་དང་༔ སྤྱན་འདྲེན་པ་དང་༔ བཞུགས་སུ་གསོལ་བ་དང་༔ ཕྱག་འཚལ་བ་དང་༔ མཆོད་པ་འབུལ་བ་དང་༔ བསྟོད་པ་བྱ་བ་དང་༔ འཛབ་བོ༔ ས་མ་ཡཱ༔ རྒྱ་རྒྱ་རྒྱ༔ དང་པོ་ཏིང་ངེ་འཛིན་ལ་ཐུན་མོང་དང་ཁྱད་པར་རོ༔ ཐུན་མོང་ལ་གསུམ་སྟེ༔ དང་པོ་དེ་བཞིན་ཉིད་ཀྱི་ཏིང་ངེ་འཛིན་ནི༔ ནམ་མཁའ་ལྟར་སྐྱེ་འགག་གནས་གསུམ་དང་བྲལ་བའི་ཡེ་ཤེས་ཆེན་པོ་ཡེ་གྲོལ་གྱི་ཆོས་ལ་ཡང་གསལ་དུ་གདབ་པའོ༔ གཉིས་པ་ཀུན་ཏུ་སྣང་བའི་ཏིང་ངེ་འཛིན་ནི༔ དེ་ལྟར་མ་རྟོགས་པའི་འགྲོ་བ་རྣམས་རིམ་པ་གཉིས་ལ་བརྟེན་ནས་སྙིང་རྗེ་ཆེན་པོས་རྗེས་སུ་འཛིན་པའི་ཏིང་ངེ་འཛིན་གྱི་གོ་བགོ་བའོ༔ གསུམ་པ་རྒྱུ་ཡི་ཏིང་ངེ་འཛིན་ནི༔ ས་བོན་མེད་པ་ལ་འབྲས་བུ་མི་འབྱུང་བ་ལྟར་ཆོས་དབྱིངས་ཡེ་དག་གི་ཆ་ལ་མཚོན་བརྗོད་ཀྱི་སྤྲོས་པས་དབེན་ཀྱང་༔ མ་འགགས་པའི་རོལ་པས་འགྲོ་བ་འདུལ་བའི་ཕྱིར་དུ༔ ཡེ་ཤེས་ལྷ་ཡི་ས་བོན་སྤྲོ་བའོ༔ གཉིས་པ་ཁྱད་པར་གྱི་ཏིང་ངེ་འཛིན་ནི༔ དུས་གསུམ་གྱི་རྒྱལ་བ་ཡེ་གྲུབ་ཀྱི་ངོ་བོ༔ ཡེ་དག་གི་བློ་འདས་ཆེན་པོ་ལ་གཅིག་དང་སྣ་ཚོགས་ཀྱི་བྱེ་བྲག་ཏུ་མེད་ཅིང་༔ རྒྱལ་བ་ཐམས་ཅད་ཡེ་ཤེས་ཀྱི་ཀློང་དུ་ཆམ་བརྡལ་ཡང་༔ འགྲོ་བ་རྣམས་ལ་ལས་སྣ་ཚོགས་ཀྱི་རྒྱུ་ཡོད་པས༔ དེ་དག་འདུལ་བའི་ཕྱིར་དུ་གང་ལ་གང་འདུལ་གྱི་སྐུར་སྟོན་པ་ནི་ཁྱད་པར་གྱི་ཏིང་ངེ་འཛིན་ཡིན་ཞིང་༔ སྐབས་འདིར་བདག་བསྐྱེད་པ་དང་མདུན་བསྐྱེད་པ་གཉིས་སོ༔ མདུན་བསྐྱེད་པ་ནི༔ ཕྱི་ལྟར་རྡུལ་ཚོན༔ ནང་ལྟར་བུམ་པ་གཞལ་ཡས་ཁང་མཚན་ཉིད་དང་ལྡན་པའི་ཆར་གསལ་ཞིང་༔ སྐུ་གསུང་ཐུགས་ཡོན་ཏན་འཕྲིན་ལས་ཀྱི་མཚན་མ་ཀུན་རྫོབ་ཀྱི་རྫས་ལ་ཡེ་ཤེས་ཀྱིས་རྒྱས་གདབ་པ་ལྔའོ༔ ཚོམ་བུ་བུམ་ནང་གི་ཆུ་བཅུད་ཀྱི་རང་བཞིན་དང་བཅས་པ་རྣམས༔ སྣང་སྟོང་འགག་མེད་ཀྱི་རོལ་པ་ལས་དཔལ་ཆེན་པོ་བདེ་མཆོག་ཡབ་ཡུམ་སྲས་འཁོར་སྒོ་བ་སྒོ་མ་རིག་འཛིན་གྱི་ཚོམ་བུའི་ལྷ་ཚོགས་རྣམས་མདངས་གསལ་མ་འགགས་པར་བསྐྱེད་པ་དང་༔ གཉིས་པ་བདག་བསྐྱེད་པ་ནི༔ རང་ལུས་འབྱུང་འདུས་ཀྱི་ཕུང་པོ་འདི་རང་བྱུང་རྒྱལ་བ་བཞུགས་པའི་ཕོ་བྲང་སྟེ༔ བརྡལ་ཁྱབ་ལྤགས་པས་རབ་ཏུ་གཡོགས་པའི་ཀེང་རུས་ཀྱི་མཁར་ཆེན་པོ་ལ་མཚན་ཉིད་ཐམས་ཅད་ཡོངས་སུ་རྫོགས་པ༔ དབང་པོ་རྣམས་ཉི་ཟླ་དང་སྐར་ཁུང་གི་ཆར་གསལ་བ༔ ཡན་ལག་གི་རྟ་བབས༔ རྩ་རྒྱུས་ཀྱི་དྲ་བ༔ རྒྱུ་མའི་ཕྲེང་བ༔ ཙིཏྟའི་ཕོ་ལོང་༔ སྐྲའི་བ་དན་འཕྱར་བ༔ འབྱུང་འདུས་ཀྱི་གཟུགས་སྣང་དག་པའི་ཆ་ལས་རྩ་གསུམ་གྱི་ཕོ་བྲང་གསལ་ཞིང་༔ མཚན་ཉིད་དང་ལྡན་པའི་ཕོ་བྲང་ཆེན་པོའི་དབུས་ཀྱི་ཆ་ནི་བྷནྡྷ་དཀར་དམར་འབར་བའི་གཞལ་ཡས་ཁང་གི་དབུས་སུ༔ རྣམ་པར་ཤེས་པའི་ངོ་བོ་དཔལ་ཆེན་པོ་ཧེ་རུ་ཀ༔ སྣང་ཚུལ་གྱི་གཟུགས་སུ་སྟོན་པ་དཔལ་ཆེན་པོ་བདེ་མཆོག་འཁོར་ལོ༔ སྟོང་པའི་རང་རྩལ་དུ་ཤར་པ་ཡུམ་མན་ངྷ་རཱ་ཝ་སྣང་སྟོང་ཐབས་ཤེས་ཀྱི་རོལ་པ་ལས་རིག་འཛིན་འདུས་པའི་ཚོམ་བུའི་ལྷ་ཚོགས་རྣམས་ཏེ༔ བདག་དང་མདུན་བསྐྱེད་གཉིས་ཆར་སྐད་ཅིག་གིས་ལས་བྱང་གཅིག་གི་ཁོག་ནས་དམ་ཚིག་སེམས་དཔར་བསྐྱེད་ཅིང་༔ སྣང་ལ་སྟོང་པ་སྟོང་ལ་སྣང་བ་སྣང་སྟོང་དབྱེར་མེད་ཀྱི་ངོ་བོ་ཡེ་ཤེས་ཀྱི་རང་མདངས་རང་རིག་གི་ངོ་བོ་ཡེ་སྟོང་སྤྲོས་བྲལ་གྱི་སྣང་ཆར་གསལ་ཞིང་༔ ཡི་གེ་གསུམ་གྱི་རང་འོད་མ་འགགས་པའི་རོལ་པར་འཕྲོས་པས༔ ཆོས་ཀྱི་དབྱིངས་ཡུམ་གྱི་མཁའ་རང་བཞིན་རྣམ་པར་དག་པའི་ཀློང་ནས་གློ་བུར་གཉིས་འཛིན་གྱི་བག་ཆགས་སྦྱང་བའི་ཕྱིར་དུ༔ ཡེ་ཤེས་སེམས་དཔའ་སྤྱན་དྲངས་ཤིང་བསྟིམ༔ བཞུགས་སུ་གསོལ་བ་དང་༔ ཕྱག་འཚལ་བ་དང་༔ མཆོད་པས་མཆོད་པ༔ བསྟོད་པ་ལ་སོགས་ལས་བྱང་ལྟར་བྱ་ཞིང་༔ ཏིང་ངེ་འཛིན་དེའི་ངང་ནས་ད་སྟེ་བདག་ཉིད་ཀྱི་བླ་མ་ཧེ་རུ་ཀཿརིག་འཛིན་གྱི་རྒྱལ་པོ་ཐོད་པ་རྩལ་འདི༔ བདག་དང་སེམས་ཅན་ཐམས་ཅད་ཀྱི་ལས་སྒྲིབ་བག་ཆགས་དང་བཅས་པའི་ཉོན་མོངས་འདི་རྣམས་བྱང་ཞིང་༔ རིགས་བདག་ཧེ་རུ་ཀཿདང་གཉིས་སུ་མེད་པའི་འབྲས་བུ་མངོན་དུ་མ་གྱུར་པའི་བར་དུ༔ སྲོག་གི་ཕྱིར་ཡང་མི་གཏོང་ཞིང་བསྒྲུབ་པར་བགྱིད་དོ་སྙམ་པའི་དམ་བཅའ་དྲག་པོའི་ངང་ནས༔ རང་ཉིད་དཔལ་ཆེན་པོར་གསལ་བའི་ཐུགས་ཀར་ཉི་མའི་དཀྱིལ་འཁོར་གྱི་སྟེང་དུ་ས་བོན་ཧཱུྃ་གི་མཐར༔ ཨཱོཾ་ཨཱཿཧཱུྃ་བཛྲ་མ་ཧཱ་གུ་རུ་སརྦ་སིངྔྷི་ཧཱུྃ༔ ཅེས་པའི་སྔགས་འབྲུ་རྣམས་འོད་ཟེར་དཀར་དམར་གྱི་ཕྲེང་ཐག་ལ་བརྟེན་ནས་སྔགས་འབྲུ་དང་འོད་ཟེར་གྱི་ཕྲེང་ཐག་གཡས་གཡོན་དུ་འཁོར་བ་ལ་ཤེས་པ་རྩེ་གཅིག་ཏུ་གཏད་ཅིང་མར་མེ་གཅིག་ལས་གཉིས་མཆེད་ཀྱི་རྣམ་པར༔ བདག་བསྐྱེད་ལྷའི་ཞལ་ནས་སྔགས་འབྲུ་རྣམས་འཐོན་ཏེ༔ འོད་ཟེར་གྱི་རྟ་ལ་ཞོན་ནས་མདུན་བསྐྱེད་ལྷའི་ཐུགས་ཀར་མཆོད་པའི་ཚུལ་དུ་ཞུགས༔ སྐུ་གསུང་ཐུགས་ཀྱིས་རྒྱུད་བསྐུལ༔ སླར་མདུན་བསྐྱེད་ཀྱི་གནས་གསུམ་ལས་འོད་ཟེར་གྱི་ཚོགས་དཔག་ཏུ་མེད་པ་འཕྲོས་པས༔ སེམས་ཅན་ཐམས་ཅད་ལ་ཕོག་ལས་དང་ཉོན་མོངས་པའི་སྒྲིབ་པ་སྦྱངས༔ སངས་རྒྱས་ཐམས་ཅད་ལ་མཉེས་པའི་མཆོད་པ་ཕུལ༔ སྐུ་གསུང་ཐུགས་ཀྱི་ཡོན་ཏན་ཐམས་ཅད་དང་༔ ཁྱད་པར་དུ་བདག་ཉིད་ཆེན་པོ་རིག་འཛིན་ཐོད་པ་རྩལ་གྱི་སྐུ་གསུང་ཐུགས་ཀྱི་བྱིན་རླབས་ནུས་མཐུ་ཐམས་ཅད་རང་གི་སྤྱི་གཙུག་བདེ་བ་ཆེན་པོའི་ཕོ་བྲང་དུ་བསྒོམ་པའི་ལྷ་ཚོགས་རྣམས་དང་༔ མདུན་བསྐྱེད་རྣམས་ལ་གཉིས་མེད་དུ་ཐིམ་པར་བསྒོམ་ཞིང་འཛབ་འདི་འབུམ་ཚོ་བཅོ་བརྒྱད་དུ་བགྲང་བར་བྱའོ༔ ཨཱོཾ་ཨཱཿཧཱུྃ་བཛྲ་མ་ཧཱ་གུ་རུ་སརྦ་སིངྔྷི་ཧཱུྃ༔ ཐུན་སྐབས་རྣམས་སུ་གཏོར་མ་འབུལ་ཞིང་བསྟོད་པས་བསྟོད་དོ༔ ཐོ་རེངས་དང་དགོངས་མོ་ཉིན་གུང་མཚན་གུང་རྣམས་སུ་ཐུགས་དམ་བསྐུལ་ཞིང་དངོས་གྲུབ་བླང་ངོ་༔ རིག་པ་བྱིང་བ་དང་འཐིབས་ན་ཧཱུྃ་གི་སྣང་གླུ་ལེན་ཞིང་གར་དང་ཕྱག་རྒྱ་སྒྱུར༔ མདོར་ན་སྣང་སྲིད་འཁོར་འདས་ཀྱི་ཆོས་ཐམས་ཅད་བླ་མ་ཧེ་རུ་ཀཿའི་ངོ་བོར་གསལ་ཞིང་ཡེ་གནས་ཆེན་པོར་ལྷུན་གྲུབ་ཀྱི་དགོངས་པ་དེ་གློ་བུར་གྱི་བག་ཆགས་བསལ་བའི་ཕྱིར་ཡང་གསལ་གདབ་པ་ཙམ་ལས༔ རང་དང་ཞིང་ཁམས་ལྷ་འཁོར་ཏིང་འཛིན་སྔགས་སོགས་སོ་སོར་གྲུབ་པ་དང་གཉིས་སུ་འཛིན་པ་མེད་པའི་དགོངས་པ་འདི་ནི་ལྟ་བ་དོན་གྱི་ལྷ་ཞེས་བྱ་བ་ཡིན་པས༔ དེ་ལྟ་བུའི་ངང་ནས་སྒྲུབ་པ་ལ་བརྩོན་པ་རྣམས་ཀྱིས་ནི་ཡི་དམ་གྱི་ལྷ་མི་འགྲུབ་པའི་ཐབས་མེད་ཅིང་སོ་སོར་བལྟ་བ་རྣམས་ཀྱིས་ནི་གྲུབ་པའི་དུས་མེད་པའོ༔ ས་མ་ཡཱ༔ རྒྱ་རྒྱ་རྒྱ༔ དེ་དག་རྣམས་ཀྱིས་སྒྲུབ་པའི་དངོས་གཞི་སོང་ནས༔ རྗེས་ཀྱི་རིམ་པ་ནི༔ འདི་ལྟར་སྒྲུབ་པའི་དུས་སུ་དགེ་བའི་ལྟས་དང་༔ སྒྲུབ་པའི་དྲོད་རྟགས་མང་པོ་འཆར་ཏེ༔ རྨི་ལམ་དུ་ཉི་ཟླ་ཤར་བ་དང་༔ ནམ་མཁའ་ལ་འཕུར་བ་དང་༔ ཁྲུས་བྱས་པ་དང་༔ གོས་གསར་གྱོན་པ་དང་༔ གངས་རི་དང་མཆོད་རྟེན་རྣམས་ལ་འཛེག་པ་དང་༔ བྲག་གཤགས་པ༔ ལིངས་བཏབ་པ༔ གོ་གོན་པ༔ རྣག་ཁྲག་ཟགས་པ་དང་༔ བུད་མེད་བཟང་མོས་ཆས་གོས་ལོངས་སྤྱོད་རྣམས་འབུལ་བ་སོགས་དང་༔ མངོན་སུམ་དུ་དྲི་བཟང་པོ་འཐུལ་བ་དང་༔ སྒྲུབ་རྫས་རྣམས་ལས་འོད་འཁྱུག་པ་དང་༔ མེ་འབར་བ་དང་༔ དུད་པ་འཐུལ་བ་དང་༔ སྨན་རཀ་ཁོལ་བ་དང་༔ བཀྲག་བཟང་བ་ལ་སོགས་པ་རྣམས་དང་༔ ཁྱད་པར་དུས་གསུམ་གྱི་ངོ་བོ་ཐམས་ཅད་བློ་འདས་ཀ་དག་ཆེན་པོ་སངས་རྒྱས་ཐམས་ཅད་དང་དབྱེར་མེད་པའི་གནས་ལུགས་ལ་ངེས་པ་རྙེད་ཅིང་༔ སྣང་སེམས་ཀྱི་ངོ་བོ་ཆོས་ཟད་དུ་གྲོལ་བ་ནི་དོན་དམ་པའི་ལྷ་གྲུབ་ཅིང་མཆོག་གི་དངོས་གྲུབ་ཐོབ་པ་ལ་སོགས་པའི་རྟགས་རྣམས་འབྱུང་བར་འགྱུར་རོ༔ ས་མ་ཡཱ༔ རྒྱ་རྒྱ་རྒྱ༔ རྟགས་ཀྱི་བསྙེན་པ་ནི་གང་ཟག་གི་སྒྲིབ་པ་ཆེ་ཆུང་ཡིན་ཞིང་༔ གྲངས་ཀྱི་བསྙེན་པ་ནི་གོང་དུ་སྨོས་པ་ལྟར་རོ༔ དུས་ནི་བསྙེན་གྲངས་ཀྱིས་འཛིན་ཏེ༔ སྒྲུབ་པ་པོའི་བརྩོན་འགྲུབ་ལ་རག་ལས་སོ༔ དེ་ལྟར་དུས་རྟགས་གྲངས་གསུམ་གྱི་སྲང་ལ་བཅུན་ནས་ཡང་དག་པར་བསྒྲུབ་པའི་རྣལ་འབྱོར་ཕོ་མོ་ལ༔ བདག་ཉིད་པདྨས་དངོས་གྲུབ་ནི་སྟེར༔ དབང་མཆོག་ནི་བསྐུར༔ བྱིན་རླབས་ནི་འཐོབ་སྟེ༔ བདག་ཉིད་པདྨ་འབྱུང་གནས་ལ་གསོལ་བ་རྩེ་གཅིག་ཏུ་འདེབས་པའི་གང་ཟག་ལ་མ་གཅིག་བུ་ལ་བརྩེ་བ་ལྟར་དུས་གསུམ་རྒྱུན་ཆད་མེད་པར་སྐྱོབ་པར་འགྱུར་རོ༔ ས་མ་ཡཱ༔ རྒྱ་རྒྱ་རྒྱ༔ དེ་ལྟར་ཕྱི་ནང་གི་རྟགས་དང་བསྙེན་གྲངས་རྣམས་རྫོགས་ནས་སྒྲུབ་རྫས་རྣམས་གནས་ལྔར་གཏུག་ཅིང་ཏིང་ངེ་འཛིན་གྱིས་དབང་བླང་ངོ༔ སྐུ་འབག་སོགས་རྫས་རྣམས་བླ་རྡོར་བཅང་ཞིང་དམ་མེད་ལ་སྦ་བར་བྱའོ༔ རྗེས་ཚོགས་ཀྱི་འཁོར་ལོ་བསྐོར༔ གླུ་གར་གྱི་ཉམས་སྐྱོང་ངོ༔ ཞི་རྒྱས་ཀྱི་སྦྱིན་སྲེག་འདེབས༔ སྒྲུབ་པའི་རྗེས་མི་མངོན་པར་བྱའོ༔ སྒྲུབ་པ་འདིའི་དམ་ཚིག་ཏུ༔ བདེ་གཤེགས་ཀུན་འདུས་ཐོད་པ་རྩལ་གྱི་སྐུ་ཆེ་ཆུང་གང་རིགས་ཤིག་དང་སྒྲུབ་ཡིག་པོ་ཏི༔ བྷནྡྷ་མཚན་ལྡན་རྣམས་དུས་རྟག་ཏུ་བཅང་ངོ༔ ས་མ་ཡཱ༔ རྒྱ་རྒྱ་རྒྱ༔ ཨེ་མ༔ བདག་འདྲ་པདྨ་འབྱུང་གནས་ཀྱིས༔ རང་གི་སྒྲུབ་པ་རང་གིས་བརྩམས༔ མ་འོངས་འགྲོ་བའི་དོན་ཕྱིར་དུ༔ གནས་ཆེན་ཏེ་སེའི་གངས་ལ་སྦས༔ བཀའ་འདི་རྡོ་རྗེ་ལེགས་པས་སྲུངས༔ ཐུགས་ཀྱི་སྲས་དང་འཕྲད་པར་ཤོག༔ ས་མ་ཡཱ༔ རྒྱ་རྒྱ་རྒྱ༔ གཏེར་རྒྱ༔ སྦས་རྒྱ༔ ཟབ་རྒྱ༔ གསང་རྒྱ༔ གཉན་རྒྱ༔ གཏད་རྒྱ༔ ས་མཡཱ༔ རྒྱ་རྒྱ་རྒྱ༔ བདག་འདྲ་སྤྲང་བན་ཉི་མ་གྲགས་པས་ཏེ་སེའི་གངས་ནས་རྙེད་དོ། །སརྦ་མངྒ་ལཾ། །བཀའ་རྫོགས་པ་ཆེན་པོ་བླ་མ་བདེ་མཆོག་འཁོར་ལོ་ལས༔ ནང་སྒྲུབ་ཡོད༔ དཔལ་ཆེན་པོ་ཧེ་རུ་ཀཿལ་ཕྱག་འཚལ་ལོ༔ བདག་ཉིད་པདྨ་ཐོད་ཕྲེང་གིས༔ སྔོན་འདས་བསྐལ་པའི་གོང་རོལ་ནས༔ སངས་རྒྱས་སྟོང་གི་མཐུ་རྡུགས་དུས༔ རྩོད་ལྡན་དུས་ཀྱི་ཡང་མཐའ་ལ༔ འགྲོ་བ་འདུལ་བའི་སྨོན་ལམ་བཏབ༔ དེ་ཕྱིར་རིག་འཛིན་རྒྱུད་ལ་བརྟེན༔ རང་གི་སྒྲུབ་པ་རང་གིས་འབྲི༔ ཉམས་སུ་ལོངས་ཤིག་སྐལ་ལྡན་བུ༔ ས་མ་ཡཱ༔ རྒྱ་རྒྱ་རྒྱ༔ གནས་བཟང་ཞིང་ཡིད་དང་མཐུན་པ༔ ཕྱི་ནང་གི་གཡེང་བ་མེད་པ༔ ཁ་ནུབ་བམ་ལྷོར་བསྟན་པ༔ རྒྱབ་རི་རྩེ་ཐོན་པ་ཞིག་ཏུ༔ སྒྲུབ་ཁང་སྐྱང་ནུལ་ལེགས་པར་བྱས༔ མདུན་དུ་གཞི་མ་གཙང་མའམ༔ སྟེགས་བུ་འབྱོར་ན་རབ་སྟེ༔ འབྲུའི་ཚོམ་བུ་ལྷ་གྲངས་ལྟར་བཀོད༔ དབུས་སུ་ཁྲིའུ་ཁར་གཏོར་མ་རིན་པོ་ཆེ་འོད་དུ་འབར་བ་ལ༔ དང་པོར་པད་འདབ་བརྒྱད༔ དེའི་འོག་ཏུ་པད་འདབ་བརྒྱད༔ དེའི་འོག་ཏུ་པད་འདབ་བཅུ་བཞི༔ དེའི་འདབས་སུ་རིལ་བུ་བཅུ་བཞི༔ པདྨ་རྣམས་ཀྱི་མཚམས་སྟོད་སྨད་རྣམས་སུ་རིལ་བུ་རེ་རེས་བརྒྱན་པ༔ སྤོད་དང་ཛ་གད་འབྲུ་སྣ་སྨན་སྣ་རྣམས་གཟུངས་གཞུག་ཏུ་དབུལ་ཞིང་༔ མདོར་ན་ཤ་ལྔ་བདུད་རྩི་ལྔ་སོགས་དང་༔ དར་ཟབ་གསེར་གཡུ་མུ་མེན་བྱི་རུ་ཤེལ་ལ་སོགས་པ་རྣམས་ཀྱང་གཏོར་མ་དེའི་གཟུངས་ལ་གཞུག་གོ༔ རང་གི་རྩ་བའི་བླ་མ་ཡབ་ཡུམ་གྱི་བྱང་སེམས་དབུ་ལོ་ཕྱག་སེན་རྣམས་སྟོད་ཀྱི་ཆ་ལ་གཞུག་གོ༔ བར་གྱི་ཆ་ལ་བླ་རྡོ་གཞུག་གོ༔ གཏོར་མ་དེའི་གཡས་སུ་དུམ་བུ་གཅིག་པའི་སྣོད་ནང་དུ་ཡུམ་གྱི་བྱང་སེམས་དཀར་དམར་དང་༔ ཨ་མྲྀ་ཏ་བཏབ་པའི་ཛ་གད་བཤམས༔ གཡོན་དུ་རཀྟ་རྣམ་པ་བཞིས་བརྒྱན་པའི་ཁྲག་བྷན་ངྷར་བཤམ་མོ༔ མདུན་དུ་བཀའ་སྲུང་གི་གཏོར་མ་ཞལ་གཙོ་བོ་ལ་བསྟན་པ་བཤམ་མོ༔ རྒྱབ་ཏུ་ནོར་ལྷའི་གཏོར་མ་བཤམ་མོ༔ གཏོར་མ་རིན་པོ་ཆེ་འོད་དུ་འབར་བ་ལ་གཙོ་བོ་ཡབ་ཡུམ་གྱི་ཙཀ་ལིས་བརྒྱན༔ དར་དཀར་དམར་གྱི་གུར་ཕུབ༔ དྲི་བཟང་དང་ཤ་ཆེན་གྱི་སྤོས་བཏང་༔ རྐང་གླིང་དང་ཐོད་རྔ་འཁྲོལ༔ ལས་བྱང་གཞུང་བསྲང་ཞིང་གཙོ་བོ་ཡབ་ཡུམ་གྱི་མངོན་རྟོགས་ཀྱི་མཇུག་ཏུ་གོ་ཆའི་ལྷ་དཔལ་ཆེན་པོ་བརྒྱད་བཀོད་པ་ནི༔ ཧཱུྃ་ཧྲཱི༔ དེ་ཡི་སྤྱི་གཙུག་ཉི་ཟླ་པདྨའི་སྟེང་༔ བཅོམ་ལྡན་དཔལ་ཆེན་ཆེ་མཆོག་ཧེ་རུ་ཀ༔ སྨུག་ནག་ཞལ་གཅིག་ཕྱག་གཉིས་དོར་སྟབས་བཞུགས༔ གྲི་ཐོད་ཕྱག་རྒྱ་གསང་བའི་ཡུམ་ལ་འཁྱུད༔ གནམ་ཞལ་དབྱིངས་ཕྱུག་མཐིང་ནག་གཉིས་མེད་འཁྲིལ༔ ཧཱུྃ་ཧྲཱི༔ མི་འགྱུར་དཔྲལ་བ་མཛོད་སྤུའི་འོད་ཀློང་དུ༔ བཅོམ་ལྡན་དཔལ་ཆེན་འཇམ་དཔལ་གཤིན་རྗེའི་གཤེད༔ སེར་ནག་ཞལ་གཅིག་ཕྱག་གཉིས་དོར་སྟབས་བཞུགས༔ འཁོར་ལོ་སྡིག་མཛུབ་གསང་བའི་ཡུམ་ལ་འཁྱུད༔ པེ་ཏ་ཙ་ལི་ནག་མོ་གཉིས་མེད་འཁྲིལ༔ ཧཱུྃ་ཧྲཱི༔ མགྲིན་པ་གསུང་གི་རང་མདངས་འཁྱིལ་བའི་ཀློང་༔ བཅོམ་ལྡན་དཔལ་ཆེན་གསུང་མཆོག་ཧེ་རུ་ཀ༔ དམར་ནག་ཞལ་གཅིག་ཕྱག་གཉིས་དོར་སྟབས་བཞུགས༔ རྡོར་དྲིལ་ཕྱག་རྒྱ་གསང་བའི་ཡུམ་ལ་འཁྱུད༔ པདྨ་གཟི་ལྡན་དམར་སྐྱ་གཉིས་མེད་འཁྲིལ༔ ཧཱུྃ་ཧྲཱི༔ ཐུགས་ཀར་ཆོས་དབྱིངས་ཡེ་ཤེས་འོད་ཀྱི་ཀློང་༔ བཅོམ་ལྡན་དཔལ་ཆེན་བཛྲ་ཧེ་རུ་ཀ༔ མཐིང་ནག་ཞལ་གཅིག་ཕྱག་གཉིས་དོར་སྟབས་བཞུགས༔ རྡོར་དྲིལ་ཕྱག་རྒྱ་གསང་བའི་ཡུམ་ལ་འཁྱུད༔ བཛྲ་ཀྲོ་ཏི་མཐིང་ནག་གཉིས་མེད་འཁྲིལ༔ ཧཱུྃ་ཧྲཱི༔ ལྟེ་བར་སྣ་ཚོགས་འོད་ཀྱི་ཀློང་དཀྱིལ་དུ༔ བཅོམ་ལྡན་དཔལ་ཆེན་སྲས་མཆོག་ཧེ་རུ་ཀ༔ ལྗང་ནག་ཞལ་གཅིག་ཕྱག་གཉིས་དོར་སྟབས་བཞུགས༔ གནམ་ལྕགས་ཕུར་པ་འདྲིལ་ཞིང་ཡུམ་ལ་འཁྱུད༔ འཁོར་ལོ་རྒྱས་འདེབས་མཐིང་སྐྱ་གཉིས་མེད་འཁྲིལ༔ ཧཱུྃ་ཧྲཱི༔ བདེ་ཆེན་གསང་གནས་རང་འོད་འབར་བའི་ཀློང་༔ བཅོམ་ལྡན་དཔལ་ཆེན་བླ་མེད་ཧེ་རུ་ཀ༔ མཐིང་ནག་ཞལ་གཅིག་ཕྱག་གཉིས་དོར་སྟབས་བཞུགས༔ རྡོ་རྗེ་བྷན་དམར་གསང་བའི་ཡུམ་ལ་འཁྱུད༔ ཡུམ་ཆེན་མུ་ཁ་མཐིང་ནག་གཉིས་མེད་འཁྲིལ༔ ཧཱུྃ་ཧྲཱི༔ གང་འདུལ་ཐབས་ཀྱི་རང་བཞིན་བརླ་གཡས་དཀྱིལ༔ བཅོམ་ལྡན་དཔལ་ཆེན་མཆོད་བསྟོད་ཧེ་རུ་ཀ༔ མཐིང་ནག་ཞལ་གཅིག་ཕྱག་གཉིས་དོར་སྟབས་བཞུགས༔ རྡོ་རྗེ་ཐོད་ཁྲག་གསང་བའི་ཡུམ་ལ་འཁྱུད༔ ནག་མོ་སྲིད་གསུམ་སྤྱི་འདུལ་གཉིས་མེད་འཁྲིལ༔ ཧཱུྃ་ཧྲཱི༔ ཐུགས་རྗེ་ཤེས་རབ་རང་བཞིན་བརླ་གཡོན་དཀྱིལ༔ བཅོམ་ལྡན་དཔལ་ཆེན་དྲག་སྔགས་ཧེ་རུ་ཀ༔ མཐིང་ནག་ཞལ་གཅིག་ཕྱག་གཉིས་དོར་སྟབས་བགྲད༔ ཙིཏྟ་ཐོད་ཁྲག་གསང་བའི་ཡུམ་ལ་འཁྱུད༔ འབྱུང་བའི་བདག་མོ་མཐིང་ནག་གཉིས་མེད་འཁྲིལ༔ ཧཱུྃ་ཧྲཱི༔ དཔལ་ཆེན་ཡབ་ཡུམ་ཐམས་ཅད་ཁྲོ་གཏུམ་སྒེག༔ ཞལ་གདངས་ལྗགས་འདྲིལ་སྤྱན་གསུམ་སྡང་མིག་བགྲད༔ དབུ་སྐྲ་གྱེན་བརྫེས་ཐོད་སྐམ་རིན་ཆེན་བརྒྱན༔ རུས་རྒྱན་དུར་ཁྲོད་ཆས་དང་གཤོག་པ་ལྡིང་༔ ཆེ་མཆོག་དབུ་ལ་ཡེ་ཤེས་ཁྱུང་གིས་བརྒྱན༔ ཡུམ་རྣམས་གྲི་ཐོད་སྤྱན་གསུམ་དམར་ལ་འཁྲུག༔ དབུ་སྐྲ་ཐུར་འཕྱང་རུས་རྒྱན་གཟིག་ཤམ་སྤྲས༔ ཉི་ཟླ་པད་གདན་རང་འོད་ཀློང་དུ་བསྐྱེད༔ ཅེས་པ་འདི་ནས་འཁོར་གྱི་ལྷ་རྣམས་བསྐྱེད་དོ༔ ས་མ་ཡཱ༔ རྒྱ་རྒྱ་རྒྱ༔ དེ་ཡང་སྒྲུབ་པའི་དངོས་གཞི་ལ༔ དམིགས་པའི་འཕྲུལ་འཁོར་གསང་གནད་ནི༔ འབྱུང་བཞི་འདུས་པའི་རང་ལུས་འདི༔ ཡེ་ནས་རྣམ་དག་ཕོ་བྲང་དབུས༔ རང་སེམས་རིག་པའི་རྒྱལ་པོ་འདི༔ ཡེ་ནས་རང་བྱུང་ཡི་དམ་ལྷ༔ འདུ་འབྲལ་མེད་པའི་ལྷ་དང་ཞིང་༔ དེས་ན་ཕྱི་རབས་རྣལ་འབྱོར་པས༔ རང་ལུས་ལྷ་ཡི་ཕོ་བྲང་འདི༔ མཚན་ཉིད་ལྡན་པའི་ཞིང་ཁམས་དཀྱིལ༔ ཙིཏྟ་རིན་ཆེན་གཞལ་ཡས་ཁང་༔ རྣམ་ཤེས་འདབ་བརྒྱད་ཕྱི་ནང་བཅས༔ དབུས་སུ་གཙོ་མཆོག་ཐོད་པ་རྩལ༔ ཡུམ་མཆོག་མཁའ་འགྲོ་མན་ངྷ་རཱ༔ གོ་ཆ་དཔལ་ཆེན་ཡབ་དང་ཡུམ༔ རིག་འཛིན་སློབ་དཔོན་གྲུབ་ཆེན་བརྒྱད༔ བཀའ་བབས་བཀའ་སྡོད་སྒོ་བ་སོགས༔ མ་འགགས་རོལ་པའི་ཡེ་ཤེས་ལྷ༔ ཡབ་ཡུམ་བདེ་ཉམས་གར་དགུར་ལྡན༔ རྣམ་པ་གསལ་ལ་རྣམ་དག་དྲན༔ ང་རྒྱལ་བརྟན་པའི་ཏིང་འཛིན་གྱིས༔ བདག་དང་མདུན་བསྐྱེད་གཉིས་མེད་བསྒོམས༔ ཐུགས་ཀར་ཉི་དཀྱིལ་འོད་ཀྱི་ཀློང་༔ ས་བོན་ཧཱུྃ་ལ་སྔགས་ཀྱིས་བསྐོར༔ གཡས་གཡོན་འཁོར་ཞིང་ཞལ་ནས་ཐོན༔ འོད་ཟེར་སྣ་ཚོགས་རྟ་ལ་ཞོན༔ མདུན་བསྐྱེད་གཙོ་བོའི་ཞལ་དུ་ཞུགས༔ ཐུགས་ཀར་སྔགས་འབྲུ་རྣམས་ལ་ཐིམ༔ མཆོད་པས་ཐུགས་དམ་རྒྱུད་བསྐུལ་ནས༔ འོད་ཟེར་སྣ་ཚོགས་ཕྱོགས་བཅུར་འཕྲོས༔ དུས་གསུམ་བདེ་གཤེགས་བཅོམ་ལྡན་འདས༔ བླ་མ་ཡི་དམ་མཁའ་འགྲོ་དང་༔ ཁྱད་པར་བདག་ཉིད་ཐོད་པ་རྩལ༔ འོག་མིན་ཞིང་དང་ལྷོ་ནུབ་ནས༔ ཁ་བ་བུ་ཡུག་འཚུབས་ལྟར་བྱོན༔ དམ་ཚིག་ཡེ་ཤེས་གཉིས་མེད་ཀྱི༔ མ་ཡེངས་དགོངས་པའི་གཟེར་གདབ་སྟེ༔ འཛབ་ཀྱིས་བསྐུལ་ཞིང་འདི་ལྟར་བཟླ༔ ཨཱོཾ་ཨཱཿཧཱུྃ་བཛྲ་གུ་རུ་ངྷེ་ཝ་ངྷཀྐི་ནི༔ བཛྲ་ས་མ་ཡ་ཛ༔ སིངྔྷི་ཕ་ལ་ཧཱུྃ༔ གྲངས་བསྙེན་འབུམ་ཚོ་བཅུ་གསུམ་བགྲང་༔ དུས་ནི་ཟླ་བ་གཉིས་ཀྱིས་འགྲུབ༔ རྟགས་ནི་རབ་དངོས་འབྲིང་ནི་ཉམས༔ ཐ་མ་ཡང་ནི་རྨི་ལམ་དུ༔ རིག་འཛིན་བླ་མ་བདེ་མཆོག་རྩལ༔ ཞི་བ་ཁྲོ་བོ་ཞི་མ་ཁྲོ༔ གང་རུང་ཚུལ་དུ་སྐུར་སྟོན་ཅིང་༔ དབང་བསྐུར་ཆོས་འཆད་ལུང་སྟོན་ནོ༔ གཞན་ཡང་དགེ་བའི་ལྟས་མང་འབྱུང་༔ འདི་ལྟར་བསྒྲུབ་པའི་སྐྱེས་བུ་ལ༔ རིག་འཛིན་པདྨ་བདག་ཉིད་ཀྱིས༔ བྱིན་གྱིས་བརླབ་ཅིང་དབང་མཆོག་བསྐུར༔ གནས་སྐབས་མཐར་ཐུག་ཡོན་ཏན་ནི༔ མཆོག་ཐུན་དངོས་གྲུབ་ཐམས་ཅད་འགྲུབ༔ ཨོ་རྒྱན་ང་དང་སྐལ་པ་མཉམ༔ སྐྱེ་བ་པདྨ་འོད་དུ་འཕོ༔ རང་དོན་གྲུབ་ནས་གཞན་དོན་དུ༔ གང་འདུལ་སྤྲུལ་པས་འགྲོ་བ་འདྲེན༔ ས་མ་ཡཱ༔ རྒྱ་རྒྱ་རྒྱ༔ སྒྲུབ་ལ་ཞུགས་པའི་སྐལ་ལྡན་དེས༔ སྣང་བ་མི་རྟོག་ཉམས་དང་བསྲེ༔ སྐབས་སུ་འཛབ་བྲོ་འཁྲབ་ཅིང་དབྱངས༔ སྐབས་སུ་ཧཱུྃ་གི་སྣང་གླུ་ལེན༔ སྐབས་སུ་ཀ་དག་ཀློང་དུ་བཞག༔ ཐུན་སྐབས་གཏོར་མ་དབུལ་ཞིང་མཆོད༔ བསྟོད་པ་དབྱངས་སྙན་རོལ་མོས་བསྟོད༔ ཐོ་རངས་དགོང་མོ་མཚན་དགུང་དང་༔ ཉིན་གུང་ལ་སོགས་སྐབས་རྣམས་སུ༔ ཐུགས་དམ་བསྐུལ་ཞིང་དངོས་གྲུབ་ཞུ༔ འོད་ཟེར་སྤྲོ་བསྡུས་དབང་བཞི་བླང་༔ ས་མ་ཡཱ༔ རྒྱ་རྒྱ་རྒྱ༔ དེ་ནས་དུས་རྟགས་གྲངས་གསུམ་གྱི༔ སྒྲུབ་པ་རྫོགས་ནས་གཏོར་ཆེན་ལས༔ དབང་བཞི་བླང་ཞིང་ཐུགས་དམ་བསྐུལ༔ གསང་བའི་བླ་རྡོ་ལུས་ལ་བཅང་༔ ཚོགས་འཁོར་ཆད་ཐོ་བསྟན་མ་སྐྱོང་༔ གླུ་བྲོ་བཀྲ་ཤིས་བསྔོ་སྨོན་བརྗོད༔ རྒྱུན་སྤྱོད་ལྷ་ཡི་རྣལ་འབྱོར་བསྒོམས༔ ས་མ་ཡཱ༔ རྒྱ་རྒྱ་རྒྱ༔ སྒྲུབ་པ་འདི་ཡི་དམ་ཚིག་ཏུ༔ གསང་བའི་བླ་རྡོ་འབྲལ་མེད་བཅང་༔ ཐོད་པ་མཚན་ལྡན་ཨ་མྲྀ་ཏ༔ སྐུ་དང་རྡོ་རྗེ་དྲིལ་བུ་བཅང་༔ ཇི་སྲིད་རང་ཉིད་འཚོ་ཡི་བར༔ ཚེས་བཅུ་བཟུང་ལ་ཐུན་དྲུག་ཏུ༔ ཨོ་རྒྱན་ང་ལ་གསོལ་བ་ཐོབ༔ ས་མ་ཡ༔ རྒྱ་རྒྱ་རྒྱ༔