གསང་སྒྲུབ་སྣང་སྲིད་ཟིལ་གནོན།
བཀའ་རྫོགས་པ་ཆེན་པོ་བླ་མ་བདེ་མཆོག་འཁོར་ལོ་ལས༔ གསང་སྒྲུབ་ཡོད༔ དཔལ་ཆེན་པོ་ཧེ་རུ་ཀཿརིག་འཛིན་འདུས་པའི་རྒྱལ་པོ་ལ་ཕྱག་འཚལ་ལོ༔ མ་འོངས་དུས་ཀྱི་སྐལ་ལྡན་ནི༔ ཆོས་ལ་སྤྱོད་པའི་རྣལ་འབྱོར་དོན༔ སྒྲུབ་ཐབས་ཀུན་གྱི་མཐར་ཐུག་པ༔ གསང་སྒྲུབ་སྣང་སྲིད་ཟིལ་གནོན་གྱི༔ མན་ངག་ཨོ་རྒྱན་བདག་གིས་འབྲི༔ ཉམས་སུ་ལོངས་ཤིག་སྐལ་ལྡན་རྣམས༔ ས་མ་ཡཱ༔ རྒྱ་རྒྱ་རྒྱ༔ ཆོས་རྣམས་མ་སྐྱེས་སྐྱེ་བ་མེད༔ འགག་པ་མེད་ཅིང་གནས་པ་མེད༔ འཁོར་འདས་རོལ་པ་སྣ་ཚོགས་པ༔ རང་བྱུང་ཆོས་ཉིད་རྒྱན་དུ་ཆེ༔ རྒྱན་དུ་ཆེ་ཞིང་རྒྱན་དུ་རོལ༔ ངོ་བོ་ཉིད་ཀྱི་རྩལ་སྣང་དུ༔ ཡེ་ནས་ཤར་ཞིང་ཡེ་ནས་གྲོལ༔ གྲོལ་འཁྲུལ་འཛིན་པའི་བླང་དོར་རྣམས༔ ཀ་དག་ཡེ་རྒྱས་ཀློང་བརྡལ་ཕྱིར༔ ཕྱི་རབས་རྣལ་འབྱོར་སྒྲུབ་པ་པོས༔ ཡང་ཟབ་འདི་བཞིན་ཉམས་སུ་ལོངས༔ དགོན་པའམ་ནི་དུར་ཁྲོད་དང་༔ ཚོང་དུས་གྲོང་ཁྱེར་སྲང་མདོ་སོགས༔ རང་ཉིད་གང་ན་གནས་པའི་ཡུལ༔ ཡེ་ནས་དག་པ་མཁའ་སྤྱོད་ཞིང་༔ རིག་འཛིན་རྒྱལ་བའི་ཕོ་བྲང་ཡིན༔ འབྱུང་བཞི་འདུས་པའི་རང་ལུས་འདི༔ རང་བྱུང་དམ་ཚིག་སེམས་དཔའ་ཡིན༔ གདོད་ནས་དག་པའི་སེམས་ཉིད་འདི༔ ཆོས་སྐུ་ཡེ་ཤེས་སེམས་དཔའ་ཡིན༔ སྣང་བ་མ་འགགས་ཟང་ཐལ་འདི༔ ཀུན་བཟང་རྒྱལ་པོ་ཧེ་རུ་ཀ༔ ངོ་བོ་རིག་པའི་ཡེ་ཤེས་འདི༔ རིག་འཛིན་རྒྱལ་བོ་ཐོད་པ་རྩལ༔ སྐྱེ་འགགས་གནས་གསུམ་སྤྲོས་བྲལ་སྟོང་༔ སྟོང་ཉིད་ཡུམ་ཆེན་མན་ངྷ་རཱ༔ སྣང་སྟོང་ཡེ་གྲོལ་ཀ་དག་འདི༔ མ་བཅོས་རང་བྱུང་ཆོས་དབྱིངས་ཐུགས༔ སོ་སོར་ཤར་བའི་རྣམ་ཤེས་བརྒྱད༔ རིག་འཛིན་བཞི་དང་སློབ་དཔོན་བཞི༔ ཐ་དད་མེད་ཅིང་འཛིན་པ་བྲལ༔ རང་འོད་རང་ཤར་མཁའ་འགྲོ་བརྒྱད༔ ཡེ་ནས་རང་བྱུང་རང་ལ་གྲུབ༔ གྲུབ་པའི་རིག་འཛིན་ཆེན་པོ་དེ༔ རང་ལས་ཤར་ཞིང་རང་ལ་གྲོལ༔ བདེ་བ་སྤེལ་བའི་རིག་མ་བརྒྱད༔ མ་བཅོས་ཆོས་དབྱིངས་ཀློང་དུ་བརྡལ༔ དོན་གྱི་བཀའ་བབས་སློབ་དཔོན་དགུ༔ གང་འདུལ་འཕྲིན་ལས་རྣམ་པ་བཞི༔ རིག་འཛིན་གིང་ཆེན་སྒོ་བ་ལ༔ བདག་སོགས་ལྟ་བཞི་དབྱིངས་སུ་དག༔ རིག་འཛིན་མཁའ་འགྲོ་སྒོ་མ་བཞི༔ ཐམས་ཅད་རང་བྱུང་རང་བཞིན་ཀློང་༔ རང་གསལ་རང་བྱུང་རང་ངོ་ལྟོས༔ བལྟ་བྱ་ལྟ་བྱེད་རྟོགས་ཚོགས་བྲལ༔ མཐོང་མེད་མཐོང་བ་དོན་གྱི་ལྷ༔ མ་བསྒྲུབས་ཡེ་ནས་རང་ལ་གནས༔ རེ་དོགས་བསྒྲུབས་ཀྱང་ལྷ་མི་འགྲུབ༔ མ་བཙལ་བཞག་པས་རང་ས་ཟིན༔ གདོད་མའི་རིག་འཛིན་ཆོས་ཀྱི་སྐུ༔ མ་ཡེངས་འཛིན་མེད་གཟེར་གྱིས་ཐོབ༔ སྤྲོས་བྲལ་བློ་འདས་ཆེན་པོར་ཞོག༔ རང་བྱུང་རོལ་པའི་འཛབ་འདི་བགྲང་༔ ཨཱོཾ་ཤྲཱི་ཧེ་རུ་ཀ་ཧཱུྃ་ཧཱུྃ་ཕཊ་སྭཱ་ཧཱ༔ ཞེས་བཟླས་རང་རིག་དྲི་མེད་འདི༔ ཡེ་ནས་རང་བྱུང་ཧེ་རུ་ཀ༔ དཔའ་བོ་དཔའ་མོའི་རང་བཞིན་ལ༔ ཡིན་ལ་ཡིན་བཞིན་རང་གསལ་གདབ༔ ཆོས་དབྱིངས་ཡེ་ཤེས་འཛབ་བསྙེན་འདི༔ འབུམ་ཚོ་བཅུ་གསུམ་གྲངས་ཐེམས་ན༔ བླ་མ་རིག་འཛིན་ཧེ་རུ་ཀ༔ གཉིས་མེད་འབྲས་བུ་བླ་མའི་ས༔ བཅུ་གསུམ་འཁོར་ལོ་ཚོགས་ཆེན་འཐོབ༔ སྒྲུབ་པ་འདི་ཡི་དྲོད་རྟགས་ཀྱིས༔ ཟག་བཅས་ཟག་མེད་ཀློང་དུ་གྲོལ༔ སྐུ་བཞིའི་འབྲས་བུ་མངོན་དུ་འགྱུར༔ གནས་སྐབས་འབྱུང་བཞིར་རང་དབང་སྒྱུར༔ ལྷ་འདྲེ་མི་གསུམ་དབང་དུ་འདུ༔ ཟིལ་གྱིས་གནོན་ཅིང་ཆོས་ལ་འགོད༔ རིག་འཛིན་རྒྱལ་པོ་ཧེ་རུ་ཀ༔ པདྨ་ང་དང་སྐལ་པ་མཉམ༔ དུས་གནས་རྫས་དང་ཡོ་བྱད་རྣམས༔ སྒྲུབ་པ་ཟབ་མོ་འདི་ལ་མེད༔ བླང་དོར་འཛིན་པའི་མཐའ་དང་བྲལ༔ གང་ལྟར་བསྒྲུབ་ཀྱང་མི་འགྲུབ་མེད༔ འགྲུབ་དང་མི་འགྲུབ་རེ་དོགས་བྲལ༔ ཡང་གསང་སྒྲུབ་པའི་མཐར་ཐུག་ཡིན༔ པདྨ་འབྱུང་གནས་ཧེ་རུ་ཀ༔ རབ་དངོས་འབྲིང་ཉམས་ཐ་མ་ཡང་༔ རྨི་ལམ་ངང་ནས་མངོན་སུམ་མཇལ༔ ཆོས་འཆད་ལུང་སྟོན་ངོ་སྤྲོད་འདེབས༔ དེ་ཚེ་རང་དང་བླ་མ་གཉིས༔ དབྱེར་མེད་ཆོས་དབྱིངས་ངང་དུ་ཀློད༔ ས་མ་ཡཱ༔ སྐུའི་རྒྱ༔ གསུང་གི་རྒྱ༔ ཐུགས་ཀྱི་རྒྱ༔ ཨེ་མ་བདག་ཉིད་པདྨ་ཡིས༔ ཁ་བ་ཅན་གྱི་རི་ལྗོངས་འདིར༔ སྒྲུབ་ཐབས་མན་ངག་མང་སྦས་ཀྱང་༔ ཡང་ཟབ་སྒྲུབ་པའི་སྙིང་པོ་འདི༔ གཏེར་ཁ་འདི་མིན་གཞན་ལ་མེད༔ ཅི་ཕྱིར་རིག་འཛིན་ཧེ་རུ་ཀ༔ འཁོར་འདས་ཀུན་གྱི་སྤྱི་དཔལ་ཕྱིར༔ སྙིང་ཐིག་ཆོས་དབྱིངས་སྒྲུབ་པ་འདི༔ སྐལ་ལྡན་རེ་རེའི་ཆོས་སྐལ་ལས༔ མང་དུ་སྤེལ་བར་མི་རུང་བས༔ རིན་ཆེན་ས་ལ་གཏེར་དུ་སྦེད༔ ཐུགས་ཀྱི་སྲས་དང་འཕྲད་པར་ཤོག༔ ཕྲད་ནས་ཆོས་སྐུར་གྲོལ་བར་ཤོག༔ ས་མ་ཡཱ༔ རྒྱ་རྒྱ་རྒྱ༔ གཏེར་རྒྱ༔ སྦས་རྒྱ༔ ཟབ་རྒྱ༔ གཉན་རྒྱ༔ གཏད་རྒྱ༔ ས་མ་ཡཱརྒྱ་རྒྱ་རྒྱ༔ བདག་སྤྲང་བན་ཉི་མ་གྲགས་པས་གངས་ཏེ་སེའི་བདེ་ཆེན་གསང་བ་ཕུག་ནས་རྙེད། །མངྒ་ལམ།། །།