ཡི་དམ་སྒྲུབ་པ་བཀའ་བརྒྱད་ཀྱི་སྒྲུབ་ཐབས།
བཀའ་རྫོགས་པ་ཆེན་པོ་བླ་མ་བདེ་མཆོག་འཁོར་ལོ་ལས༔ ཡི་དམ་སྒྲུབ་པ་བཀའ་བརྒྱད་ཀྱི་སྒྲུབ་ཐབས་བཞུགས་སོ༔ དཔལ་ཧེ་རུ་ཀཿལ་ཕྱག་འཚལ་ལོ༔ མ་འོངས་དུས་ཀྱི་སྐལ་ལྡན་དོན༔ རྩ་གསུམ་ཀུན་འདུས་དཔལ་ཆེན་པོ༔ བདེ་མཆོག་དབང་གི་འཁོར་ལོ་ལས༔ ཡི་དམ་སྒྲུབ་པ་བཀའ་བརྒྱད་ཀྱི༔ སྒྲུབ་ཐབས་རིམ་པ་གསལ་བར་བྱ༔ མ་འོངས་བུ་ཡིས་ཉམས་སུ་ལོང་༔ ཐུགས་ཀྱི་སྲས་དང་འཕྲད་པར་ཤོག༔ ས་མ་ཡཱ༔ རྒྱ་རྒྱ་རྒྱ་༔ དེ་ཡང་ནང་སྒྲུབ་ཀྱི་བསྙེན་པ་རྫོགས་ནས༔ དཀྱིལ་འཁོར་བཅའ་གཞི་གཏོར་ཚོགས་བཀོད་པ་སོགས་རང་གཞུང་དེའི་སྟེང་ནས༔ ལས་ཀྱི་གཞུང་བསྲང་ཞིང་འཛབ་ཀྱིས་བསྐུལ་ཏེ༔ ཕྱི་ནང་གཉིས་ཀྱི་བསྙེན་པ་དུམ་རེ་བསྐྱལ༔ རང་རང་གི་གཞུང་ལྟར་གྱི་བསྐྱེད་རིམ་དང་དམིགས་པའི་འདུ་འཕྲོ་སྒྱུར༔ དེ་ནས་རང་ཉིད་བླ་མ་ཧེ་རུ་ཀར་གསལ་བའི་སྤྱི་གཙུག་ཆེ་མཆོག་ཡབ་ཡུམ་གྱི་ཐུགས་ཀར་ཉི་མའི་དཀྱིལ་འཁོར་སྟེང་དུ་ཐུགས་སྲོག་ཧཱུྃ་སྨུག་ནག་གི་མཐར༔ ཨཱོཾ་བཛྲ་མ་ཧཱ་ཀྲོ་ཏ་མ་ཧཱ་ཤྲཱི་ཧེ་རུ་ཀ༔ ཧཱུྃ་ཕཊ༔ ཅེས་་པའི་སྔགས་འབྲུ་རྣམས་རང་སྒྲ་དིར་དིར་འཁོར་བ་ལ་ཤེས་པ་རྩེ་གཅིག་ཏུ་གཏད་ཅིང་རང་གིས་བཟླས་པའི་ཚེ༔ མར་མེ་གཅིག་ལས་གཉིས་མཆེད་ཀྱི་རྣམ་པར་འོད་ཀྱི་ཐག་པ་ལ་ཞོན་ནས་སྔགས་འཕྲེང་མདུན་བསྐྱེད་ཀྱི་ཆེ་མཆོག་གི་ཐུགས་ཀར་ཕོག༔ ཐུགས་དམ་གྱི་རྒྱུད་བསྐུལ་ཞིང་ཡབ་ཡུམ་བདེ་བས་དགྱེས་ཏེ་སྔགས་འཁོར་དྲག་ཏུ་འཁོར་བ་ལས་འོད་ཟེར་འབུམ་ཕྲག་དུ་མ་རོ་གཅིག་ཕྱོགས་བཅུ་ཀུན་ཏུ་འཕྲོས་པ་ལས༔ ཕྱོགས་བཅུའི་བདེ་བར་གཤེགས་པ་ཁྲོ་བོ་ཁྲོ་མོ་ཐམས་ཅད་ཀྱི་ཐུགས་ཀར་ཕོག༔ མཉེས་པའི་མཆོད་པར་གྱུར༔ བདེ་བར་གཤེགས་པ་ཞིང་རབ་འབྱམས་ཀྱི་ཁྲོ་བོ་དང་ཁྲོ་མོ་ཐམས་ཅད་དགྱེས་ཤིང་རབ་ཏུ་དགྱེས་པ་ལས༔ སྐུ་གསུང་ཐུགས་ཡོན་ཏན་ཕྲིན་ལས་ཐམས་ཅད་ཀྱི་བྱིན་རླབས་ནུས་མཐུ་ཡོན་ཏན་དྲག་རྩལ་སྟོབས་དང་གཟི་བརྗིད་ཐམས་ཅད་སྐུ་ཡེ་ཤེས་སེམས་དཔའ་ཆེ་མཆོག་ཧེ་རུ་ཀའི་རྣམ་པ་ཆེ་ཆུང་ངེས་མེད་རྣམ་པ་གྲངས་མེད་དཔག་ཏུ་མེད་པ་ཁ་བ་བུ་ཡུག་འཚུབ་པ་ལྟར་བྱོན་ནས་བདག་མདུན་གྱི་བསྐྱེད་རིམ་གསལ་བའི་ཆེ་མཆོག་ཧེ་རུ་ཀཿལ་ཐིམ༔ དེ་བཞིན་དུ་གསུང་འཛབ་ཀྱི་སྙིང་པོ་ཡིག་འབྲུ་དང་༔ ཐུགས་ཕྱག་མཚན་གྲི་གུག་དང་ཐོད་པ་བདུད་རྩི་ལ་སོགས་ཀྱི་རྣམ་པ་ཡང་སྔར་ལྟར་དཔག་ཏུ་མེད་པ་ཐིམ་པའི་བྱིན་རླབས་ལ་བརྟེན་ནས༔ དཔལ་ཆེན་ཡབ་ཡུམ་གཟི་མདངས་རྒྱས་ཤིང་བདེ་བས་དགྱེས་པ་ལས་འོད་ཟེར་གྱི་ཚོགས་ཀྱིས་སྟོང་གསུམ་གྱི་འཇིག་རྟེན་ཐམས་ཅད་གང་ཞིང་ཉི་ཟླའི་ཟེར་འབུམ་ཕྲག་དུ་མ་བརྡལ་བ་ཙམ་འཁྲུག་པས་བདུད་དང་ལོག་པར་འདྲེན་པའི་གདོན་བགེགས་ཐམས་ཅད་ཚར་བཅད་ཅིང་རྡུལ་དུ་བརླགས༔ ཆེ་བཙན་དྲེགས་པ་ཅན་ཐམས་ཅད་དབང་དུ་བསྡུས་ཤིང་ཟིལ་གྱིས་མནན༔ ལྷ་འདྲེ་མི་གསུམ་གྱི་ནུས་སྟོབས་དང་ཡོན་ཏན་ཐམས་ཅད་རྡོ་ཁབ་ལེན་གྱིས་ལྕགས་བསྡུས་པ་ལྟར་དབང་དུ་བསྡུས་ཏེ༔ སྐུ་འདུ་བའི་སྦྱོར་བས་ཡོངས་སུ་བསྟིམས་པས་ནུས་སྟོབས་དང་ཡོན་ཏན་ཆེས་ཆེར་ཁྱད་དུ་འབར་ཞིང་༔ སྣོད་ཀྱི་འཇིག་རྟེན་གྱི་ཁམས་ཐམས་ཅད་ཀྱང་དབང་དྲག་འབར་བའི་ཞིང་ཁམས་ཀྱི་དུར་ཁྲོད༔ བཅུད་ཀྱི་སྐྱེ་འགྲོ་གཟུགས་ཡོད་དང་གཟུགས་མེད་ཐམས་ཅད་ཀྱང་དཔལ་ཆེན་པོའི་རང་བཞིན༔ སྒྲ་གྲགས་པ་ཐམས་ཅད་སྔགས་ཀྱི་རང་སྒྲ༔ རྟོག་པ་ཅི་ཤར་བ་ཐམས་ཅད་ཡེ་ཤེས་ཀྱི་རོལ་པ་གདོད་མ་ནས་དག་པའི་ཆོས་ཉིད་ཟངས་ཐལ་དུ་ལམ་ལམ་གསལ་ཞིང་གོང་གི་སྙིང་པོ་ལ་འབུམ་ཚོ་གཅིག་བཟླ་བར་བྱའོ༔ ས་མ་ཡཱ༔ རྒྱ་རྒྱ་རྒྱ༔ དེ་བཞིན་དུ་དཔལ་བདུན་པོ་ལ་ཡང་དམིགས་པ་གོང་མ་ལྟར་རིགས་འགྲེ་ཞིང་༔ ཨཱོཾ་རུ་ལུ་རུ་ལུ་ཧཱུྃ་བྷྱོ་ཧཱུྃ་ཕཊ་ཡང་དག་གོ༔ ཨཱོཾ་ཨ་ཀྲོ་ཏེ་ཀ་ཡ་མཱནྟ་ཀ་ཧ་ན་མ་ཐ་བྷཉྫ་ཧཱུྃ་ཕཊ༔ གཤིན་རྗེའོ༔ ཨཱོཾ་པདྨ་ཏ་ཀྲིཏ་བཛྲ་ཀྲོ་ཏ་ཧ་ཡ་གྷྲཱི་ཝ་ཧུ་ལུ་ཧུ་ལུ་ཧཱུྃ་ཕཊ༔ དབང་ཆེན་ནོ༔ ཨཱོཾ་བཛྲ་ཀཱི་ལི་ཀཱི་ལཱ་ཡ་སརྦ་བྷིགྣན་བཾ་ཧཱུྃ་ཕཊ༔ སྲས་མཆོག་གོ༔ ཨཱོཾ་གྷུ་ཧྱ་ཛྙཱ་ན་ཤྲཱི་ཧེ་རུ་ཀཿགྷུ་ཧྱ་ཛྙཱ་ན་ཀྲོ་ཏཱིི་ཤྭ་རི་སྟྭཾ༔ མ་མ་ཡོ་གི་ནི་རུ་ལུ་རུ་ལུ་ཧཱུྃ་བྷྱོ་ཧཱུྃ་ཕཊ༔ མ་མོའོ༔ ཨཱོཾ་བཛྲ་ཙནྜ་སརྦ་དུཥྟཱན་ཧཱུྃ་ཕཊ༔ དྲེགས་པའོ༔ ཨཱོཾ་བཛྲ་སརྦ་དུཥྟཱན་ཧཱུྃ་ཕཊ༔ སྟོབས་ལྡན་ནོ༔ དེ་ལྟར་དཔལ་ཆེན་པོ་བརྒྱད་ཀྱི་གྲངས་བསྙེན་ནི་གོང་མ་དང་འདྲ་ཞིང་འབུམ་ཚོ་རེ་རེས་མི་འགྲུབ་མི་སྲིད་པས་བརྩོན་འགྲུས་ཀྱི་རྟ་ཕོས་རྩལ་ཐོན་པ་བྱེད་དེ༔ ལེ་ལོ་དང་སྙོམས་ལས་སྤངས་ནས་ཚུལ་བཞིན་དུ་བསྒྲུབ་པ་གལ་ཆེའོ༔ དེ་ཚེ་རྟགས་ཀྱི་རིམ་པ་ནི་སྤྱིར་སྒྲུབ་ཐབས་གཞན་རྣམས་དང་འདྲ་ཞིང་ཁྱད་པར་དུ་རབ་འབྲིང་ཐ་མའི་ཚུལ་གྱིས་ཞལ་མཇལ་བ༔ གསུང་ཐོས་པ་ཡང་དག་པའི་ལྟ་བ་ཁྱད་པར་ཅན་རྒྱུད་ལ་སྐྱེ་བ་ལ་སོགས་དང་༔ བྲག་གཤགས་པ་ལིངས་བཏབ་པ་ལྡེར་བཟོ་བཅོམས་པ་གཡུལ་ལས་རྒྱལ་བ་མཚོན་དང་ཕྱག་མཚན་རྙེད་པ༔ ཁྱི་དང་བྱི་ལ་བརྡུངས་པ་དང་བསད་པ་སོགས་གདོན་བགེགས་ཐུལ་བའི་རྟགས་དང་༔ གཏེར་བཏོན་པ་ནམ་མཁའ་ལ་འཕུར་བ་ཉི་ཟླ་ཤར་བ་ཞོན་པ་བུད་མེད་བཟང་མོས་ཆང་འདྲེན་པ་སོགས་དངོས་གྲུབ་ཐོབ་པའི་རྟགས་རྣམས་འབྱུང་ངོ༔ སྔགས་གྲངས་རྫོགས་ཀྱང་རྟགས་རྣམས་མ་གསལ་ན༔ སྔགས་དམིགས་ཀྱི་སྤྲོ་བསྡུ་སོགས་ལ་ལེ་ལོ་སོང་བའི་རྟགས་ཡིན་པས་བླ་མ་ལ་གསོལ་བ་ཕུར་ཚུགས་སུ་གདབ༔ སྒྲུབ་པ་ལ་བརྩོན་པའི་གོ་ཆ་འཛབ་བསྐུལ་ལྟར་བརྩོན་ཞིང་༔ སྐྱེ་ཤི་སྲོག་གི་ཕྱིར་ཡང་མི་གཏོང་ཞིང་བསྒྲུབ་སྙམ་པའི་ཞེ་བཅད་དྲག་པོའི་ངང་ནས་སྒྲུབ་པ་སླར་སྐྱོར་བར་བྱའོ༔ ཐོས་ཆུང་གསར་བུ་འགའ་ཞིག་གིས་རང་གི་བརྩོན་འགྲུས་ཆུང་བ་དང་སྙིང་རུས་མེད་པ་མི་སེམས་པར་བསྒྲུབས་པ་ལ་དྲོད་མེད་པར་འདུ་ཤེས་ནས༔ བསྒྲུབ་པའི་འཕྲོ་བཅད་ན་ནི་བར་ཆད་དུ་སོང་བ་ཞེས་བྱ་སྟེ་ཚེ་འདིར་ཡང་མི་རུང་བ་སྣ་ཚོགས་ཤིག་འབྱུང་ཞིང་༔ ཚེ་རབས་མང་པོར་གསང་སྔགས་ཀྱི་སྒྲ་མི་ཐོས་པར་འགྱུར་བས་སྒྲུབ་པ་ལ་བརྩོན་འགྲུས་སྐྱེད་ཅིག༔ ཡང་ཁ་ཅིག་བསྙེན་པ་མ་རྫོགས་པ་ལ་རྟགས་གསལ་ན་སྒྲུབ་རྫས་ལས་དབང་བཞི་ལེན་ཞིང་དགའ་བྲོད་ཀྱི་བདུད་མ་ཞུགས་པར་བྱས་ཏེ་བསྙེན་པ་ཚད་དུ་འཁྱོལ་བར་བྱའོ༔ རྟགས་གསལ་བ་ཙམ་གྱིས་ང་རྒྱལ་ཏེ་བསྙེན་པ་འཕྲོ་བཅད་ན་དེ་ཡང་ལམ་ལས་གོལ་བར་ཤེས་པར་བྱའོ༔ ལར་དངོས་གྲུབ་ཀྱིི་བདུད་ལ་ཐེ་ཚོམ་དང་ཡིད་གཉིས་ཆེ་བས་ཡིད་གཉིས་ཐེ་ཚོམ་མེད་པའི་ངང་ནས་འཇུག་པ་ནི༔ ཡང་དག་པའི་མན་ངག་གོ༔ ཐུན་སྐབས་རྣམས་སུ་ཕྱི་ནང་གསང་གསུམ་གྱི་མཆོད་པས་ལས་བྱང་ལྟར་མཆོད་ཅིང་བསྟོད་པས་འདི་ལྟར་བསྟོད་དོ༔ ཧཱུྃ་ཧྲཱི༔ བཅོམ་ལྡན་དཔལ་ཆེན་ཆེ་མཆོག་ཧེ་རུ་ཀ༔ སྨུག་ནག་འབར་བ་འཇིགས་གཟུགས་རྔམ་པའི་ཞལ༔ དུར་ཁྲོད་ཆས་བརྒྱད་དཔལ་གྱི་ཆས་བཅུ་རྫོགས༔ གནམ་ཞལ་ཁྲོ་མོ་ཡུམ་དང་གཉིས་སུ་མེད༔ ཡབ་ཡུམ་འཁོར་དང་བཅས་ལ་ཕྱག་འཚལ་བསྟོད༔ ཧཱུྃ་ཧྲཱི༔ བཅོམ་ལྡན་དཔལ་ཆེན་འཇམ་དཔལ་གཤིན་རྗེའི་གཤེད༔ སེར་ནག་འབར་བ་འཇིགས་གཟུགས་རྔམ་པའི་ཞལ༔ དུར་ཁྲོད་ཆས་བརྒྱད་དཔལ་གྱི་ཆས་བཅུ་རྫོགས༔ པེ་ཏ་ཙ་ལི་ཡུམ་དང་གཉིས་སུ་མེད༔ ཡབ་ཡུམ་འཁོར་དང་བཅས༴ ཧཱུྃ་ཧྲཱི༔ བཅོམ་ལྡན་དཔལ་ཆེན་གསུང་མཆོག་ཧེ་རུ་ཀ༔ དམར་ནག་འབར་བ་འཇིགས་གཟུགས་རྔམ་པའི་ཞལ༔ དུར་ཁྲོད་ཆས་བརྒྱད་དཔལ་གྱི་ཆས་བཅུ་རྫོགས༔ པདྨ་གཟི་ལྡན་ཡུམ་དང་གཉིས་སུ་མེད༔ ཡབ་ཡུམ༴ ཧཱུྃ་ཧྲཱི༔ བཅོམ་ལྡན་དཔལ་ཆེན་ཡང་དག་ཧེ་རུ་ཀ༔ མཐིང་དག་འབར་བ་འཇིགས་གཟུགས་རྔམ་པའི་ཞལ༔ དུར་ཁྲོད་ཆས་བརྒྱད་དཔལ་གྱི་ཆས་བཅུ་རྫོགས༔ བཛྲ་ཀྲོ་ཏི་ཡུམ་དང་གཉིས་སུ་མེད༔ ཡབ་ཡུམ་འཁོར་དང་བཅས་ལ༴ ཧཱུྃ་ཧྲཱི༔ བཅོམ་ལྡན་དཔལ་ཆེན་སྲས་མཆོག་ཧེ་རུ་ཀ༔ ལྗང་ནག་འབར་བ་འཇིགས་གཟུགས་རྔམ་པའི་ཞལ༔ དུར་ཁྲོད་ཆས་བརྒྱད་དཔལ་གྱི་ཆས་བཅུ་རྫོགས༔ འཁོར་ལོ་རྒྱས་འདེབས་ཡུམ་དང་གཉིས་སུ་མེད༔ ཡབ་ཡུམ༴ ཧཱུྃ་ཧྲཱི༔ བཅོམ་ལྡན་དཔལ་ཆེན་བླ་མེད་ཧེ་རུ་ཀ༔ མཐིང་ནག་འབར་བ་འཇིགས་གཟུགས་རྔམ་པའི་ཞལ༔ དུར་ཁྲོད་ཆས་བརྒྱད་དཔལ་གྱི་ཆས་བཅུ་རྫོགས༔ མུ་ཁ་མཐིང་ནག་ཡུམ་དང་གཉིས་སུ་མེད༔ ཡབ་ཡུམ་འཁོར༴ ཧཱུྃ་ཧྲཱི༔ བཅོམ་ལྡན་དཔལ་ཆེན་མཆོད་བསྟོད་ཧེ་རུ་ཀ༔ མཐིང་ནག་འབར་བའི་འཇིགས་གཟུགས་རྔམ་པའི་ཞལ༔ དུར་ཁྲོད་ཆས་བརྒྱད་དཔལ་གྱི་ཆས་བཅུ་རྫོགས༔ སྲིད་པ་སྤྱི་འདུལ་ཡུམ་དང་གཉིས་སུ་མེད༔ ཡབ་ཡུམ༴ ཧཱུྃ་ཧྲཱི༔ བཅོམ་ལྡན་དཔལ་ཆེན་དྲག་སྔགས་ཧེ་རུ་ཀ༔ མཐིང་ནག་འབར་བ་འཇིགས་གཟུགས་རྔམ་པའི་ཞལ༔ དུར་ཁྲོད་ཆས་བརྒྱད་དཔལ་གྱི་ཆས་བཅུ་རྫོགས༔ འབྱུང་ལྔའི་བདག་མོ་ཡུམ་དང་གཉིས་སུ་མེད༔ ཡབ་ཡུམ་འཁོར་དང་བཅས་ལ་ཕྱག་འཚལ་བསྟོད༔ ཅེས་རོལ་མོ་སོགས་སྒྲོག་ཅིང་གུས་པའི་ཡིད་ཀྱིས་རང་དང་གཉིས་སུ་མེད་པར་བསྟོད་དོ༔ བསྙེན་སྒྲུབ་རྫོགས་ནས་སྒྲུབ་རྫས་ལས་དབང་བཞི་ལས་བྱང་ལྟར་ལེན་ཞིང་བླ་རྡོ་བཅང་ལུགས་སོགས་ནང་སྒྲུབ་གཞུང་ལྟར་བྱ༔ ས་མ་ཡཱ༔ རྒྱ་རྒྱ་རྒྱ༔ ཨེ་མ་གསང་སྔགས་རྒྱུད་ལུང་མང་པོའི་བཅུད༔ སྣོད་ལྡན་སློབ་མ་རྗེ་འབངས་ཁྱེད་རྣམས་ལ༔ ད་ལྟ་བདག་གིས་སྒྲུབ་ལུང་མན་ངག་བཤད༔ ཁྱེད་རྣམས་སྒོ་གསུམ་དཀྱིལ་འཁོར་གསུམ་དུ་གྲོལ༔ འཆི་བ་དང་པོ་འོད་གསལ་ཆོས་ཀྱི་སྐུ༔ ཁྱེད་རྣམས་ཡི་དམ་ལྷ་དང་གཉིས་སུ་མེད༔ སྤྲུལ་པས་ཁམས་གསུམ་འཇིག་རྟེན་ཐམས་ཅད་དང་༔ ཁྱད་པར་ཁ་བ་ཅན་གྱི་རི་ལྗོངས་འདིར༔ དུས་གསུམ་ཀུན་ཏུ་འགྲོ་བའི་དོན་ཆེན་བྱེད༔ ཁྱད་པར་ལོ་ཙཱ་ཀླུ་ཡི་དབང་པོ་ཁྱོད༔ རྩོད་ལྡན་ཐ་མ་བསྟན་པའི་མར་ཞབས་ལ༔ ཁམས་སུ་སྐྱེས་ནས་དབུས་ཀྱི་ཕྱོགས་སུ་འཁྱར༔ སྒྲོལ་མའི་སྤྲུལ་པ་བུ་མོ་ཨ་ཡི་མིང་༔ ལས་ཀྱི་ཕྱག་རྒྱར་འགྱུར་ཞིང་ཆོས་འདི་རྙེད༔ དེ་ཚེ་ཡ་ག་བཀུར་འདེབས་འབར་གཞི་དང་༔ སུ་འགྲོགས་སྣང་བ་ཐེངས་གསུམ་ལོག་པ་ཡོང་༔ ཅི་ཕྱིར་ཞེ་ན་གསང་སྔགས་གཏེར་སྒྲོམ་འདི༔ ཡིད་བཞིན་ནོར་བུ་བས་ཀྱང་འཚེངས་ཆེ་ཞིང་༔ མཆོག་གི་དངོས་གྲུབ་དམ་པར་ལོངས་སྤྱོད་ཚེ༔ རྒྱ་བོད་ལྷ་འདྲེ་མ་རུངས་ཐམས་ཅད་ཀྱིས༔ འགྲོ་བའི་ཤེས་རྒྱུད་གཡོ་ཞིང་ཉོན་མོངས་སློང་༔ ང་ཡི་སྤྲུལ་པས་མཐོང་ཐོས་སྐྱེ་འགྲོ་རྣམས༔ དག་པའི་ཞིང་ལ་ཁྱུ་དེད་བྱེད་པ་ལ༔ མ་རུངས་ལྷ་འདྲེ་མི་གསུམ་བདུད་སྤྲུལ་གྱིས༔ ལོག་པའི་ལམ་འཛུད་འགྲོ་བ་ངན་འགྲོར་འཁྲིད༔ དེ་ཚེ་སེམ་ཞུམ་མི་དགོས་རིག་རྩལ་བསྐྱེད༔ འཁོར་གཡོག་མ་མང་འདུ་འཛིའི་འབྲེལ་བ་སྐྱུངས༔ དབེན་པ་བསྟེན་ཞིང་སྒྲུབ་པ་སྙིང་པོར་ལོང་༔ དགོན་གནས་མ་གཟུང་གསོག་འཇོག་ནོར་མ་གསོག༔ གཅིག་ཏུ་མ་འདུག་གར་སོང་ཆ་མེད་གྱིས༔ གསང་རྒྱ་རལ་ན་ཚེ་ལ་བར་ཆད་འོང་༔ གསང་རྒྱ་མཐར་ཕྱིན་དོན་གཉིས་ངང་གིས་འགྲུབ་༔ ས་མ་ཡཱ༔ རྒྱ་རྒྱ་རྒྱ་༔ སྤྲང་པོ་ཉི་མ་གྲགས་པས་གངས་ཏེ་སེ་ནས་གདན་དྲངས་ཤིང་ཤོག་སེར་ལས་ཞལ་བཤུས་པའོ། །སརྦ་མངྒ་ལཾ། །