དྲག་རྩལ་ཧེ་རུ་ཀའི་ཐུགས་སྒྲུབ་སྲོག་གི་ཐིགས་པ།

བཀའ་རྫོགས་པ་ཆེན་པོ་བླ་མ་བདེ་མཆོག་འཁོར་ལོ་ལས༔ དྲག་རྩལ་ཧེ་རུ་ཀའི་ཐུགས་སྒྲུབ་སྲོག་གི་ཐིགས་པ་བཞུགས་སོ༔ དཔལ་ཆེན་པོ་ཧེ་རུ་ཀཿལ་ཕྱག་འཚལ་ལོ༔ མ་འོངས་ལྔ་བརྒྱའི་དུས་ངན་ཤར་བའི་ཚེ༔ པྲེ་ཏ་བོད་ཀྱི་རྒྱལ་ཁམས་འདི་ཉིད་དུ༔ མི་དགེ་བཅུ་ལ་མངོན་སུམ་སྤྱོད་བཞིན་དུ༔ ཕ་རོལ་འགྲོ་ལ་ཆོས་བཤད་དབང་བསྐུར་བྱེད༔ བསྟན་པའི་ཆོམས་པོ་གཞན་ནས་སུ་ཞིག་འདོགས༔ དགེ་བཤེས་ཟེར་ཞིང་དམག་གི་དཔོན་དུ་རྒྱུག༔ དགེ་སྦྱོང་ཟེར་ཞིང་གཤིན་ཟས་ཁྲལ་དུ་ལེན༔ མཁན་པོ་ཟེར་ཞིང་ཡུལ་གྲོང་ཁྲིམས་ཀྱིས་མནར༔ ཆོས་རྒྱལ་ཟེར་ཞིང་མནའ་ཆད་དབང་གསུམ་སྟོངས༔ འགྲོ་དོན་ཟེར་ཞིང་དཀོར་ནག་རྣམ་སྨིན་སྡུད༔ བསྟན་འཛིན་ཟེར་ཞིང་གཅིག་བསྟན་གཅིག་གིས་བརླག༔ གྲུབ་ཐོབ་ཟེར་ཞིང་གྲུབ་མཐས་རང་རྒྱུད་འཆང་༔ རྟོགས་ལྡན་ཟེར་ཞིང་ཉ་མིིའི་མགོ་བོ་བསྐོར༔ ཆེ་བཙན་ཐམས་ཅད་མ་རབས་དམངས་སུ་འབེབས༔ དེ་དུས་དཀར་ཕྱོགས་བསྲུང་མ་ཐམས་ཅད་གྱེས༔ ནག་ཕྱོགས་ལྷ་འདྲེ་མ་རུངས་ཟ་ཁ་དར༔ རྒྱ་འདྲེ་འགོང་པོས་འགྲོ་བའི་ཤེས་རྒྱུད་གཡོ༔ མངོན་ཤེས་གྲུབ་རྟགས་ལུང་བསྟན་སྣ་ཚོགས་བྱེད༔ དེ་དུས་མ་རུངས་རྟེན་འབྲེལ་མང་དུ་ཚོགས༔ ཆོས་ལྡན་སྐྱེས་བུའི་ཚེ་ལ་བར་གཅོད་ཅིང་༔ ཆོས་བཞིན་སྤྱོད་ལ་མི་མཐུན་རྐྱེན་མང་ཚེ༔ བདེ་གཤེགས་ཀུན་འདུས་རྡོ་རྗེ་ཐོད་ཕྲེང་རྩལ༔ ང་ནི་རྒྱལ་བ་ཡོངས་ཀྱི་མངའ་བདག་སྟེ༔ སངས་རྒྱས་ཀུན་གྱི་མཐུ་སྟོབས་ང་ཡིས་འཛིན༔ དེ་དུས་འགྲོ་བའི་སྐྱབས་མགོན་ངས་བྱེད་ཅིང་༔ མ་རུངས་ལྷ་སྲིན་སྡེ་བརྒྱད་ང་ཡིས་འདུལ༔ དེ་ཕྱིར་ཡང་ཟབ་འཁོར་ལོ་བདེ་མཆོག་གི༔ ཆོས་ཀྱི་གཏེར་ཁས་འགྲོ་དོན་བྱེད་པའི་ཚེ༔ ཆོས་བཞིན་སྤྱོད་པའི་བར་ཆད་རྐྱེན་སེལ་དུ༔ རིག་འཛིན་རྡོ་རྗེ་དྲག་རྩལ་ཧེ་རུ་ཀའི༔ ཐུགས་ཀྱི་སྒྲུབ་པ་སྲོག་གི་ཐིགས་པ་ཞིག༔ སྔོན་འགྲོ་དངོས་གཞི་ལས་སྦྱོར་རྣམ་གསུམ་གྱི༔ མ་འོངས་དོན་དུ་རིམ་པར་དབྱེ་སྟེ་འགོད༔ ས་མ་ཡཱ༔ རྒྱ་རྒྱ་རྒྱ༔ དང་པོ་སྔོན་འགྲོ་རྣམ་པ་བཞིས་བསྟན་ཏེ༔ གནས་དང་ཡོ་བྱད་སྐྱབས་འགྲོ་སེམས་བསྐྱེད་དོ༔ དང་པོ་གནས་ནི་རབ་འཇིགས་དུར་ཁྲོད་དམ༔ ཞིང་སྐྱོང་དཔའ་བོ་མཁའ་འགྲོ་འགྱུ་བའི་གླིང་༔ ཡང་ན་སྐབས་སུ་གང་བབས་གནས་པའི་ས༔ ཡུལ་དགོན་ཚོང་འདུས་གྲོང་བརྡལ་གང་ཡང་རུང་༔ གཉིས་པ་ཡོ་བྱད་སྟ་གོན་རིམ་པ་ནི༔ སྟེགས་བུ་གཙང་མར་སྨན་གཏོར་རཀྟ་བཤམས༔ ཁམས་ཀྱི་མཐུན་རྐྱེན་ཚོགས་ཀྱི་ཡོ་བྱད་བསགས༔ དམིགས་པའི་རྟེན་ལ་སྐུ་གཟུགས་ཚད་ལྡན་ཀྲམ༔ གསུམ་པ་སྐྱབས་འགྲོ་མདུན་གྱི་ནམ་མཁའ་ལ༔ རྩ་གསུམ་ལྷ་ཚོགས་བསྒོམ་ཞིང་བློ་སྙིང་བཀལ༔ རེ་ལྟོས་ཁྱེད་ཤེས་ངང་ནས་སྐྱབས་སུ་འགྲོ༔ བཞི་པ་སེམས་བསྐྱེད་འགྲོ་དྲུག་ཕ་མ་རྣམས༔ མ་བསྒྲལ་སྒྲོལ་ཞིང་མ་གྲོལ་འགྲོལ་བའི་ཕྱིར༔ རིགས་བདག་བདེ་གཤེགས་ཀུན་འདུས་ཧེ་རུ་ཀ༔ ཚུལ་བཞིན་བསྒྲུབ་པའི་དམ་བཅའ་སྙིང་ལ་གདབ༔ ས་མ་ཡཱ༔ རྒྱ༔ གཉིས་པ་དངོས་གཞིར་ས་བཅད་རྣམ་པ་གསུམ༔ བསྐྱེད་རིམ་བསྙེན་ཞིང་གྲུབ་རྟགས་བསྟན་པའོ༔ དང་པོ་བསྐྱེད་པའི་རིམ་པ་འདི་ལྟ་སྟེ༔ འཁོར་འདས་ཐམས་ཅད་སྟོང་པའི་རང་བཞིན་ལས༔ གནམ་ལྕགས་རྡོ་རྗེ་རྩེ་ལྔའི་ཁོང་གསེང་དུ༔ ཡེ་ཤེས་རང་བྱུང་ཡི་གེ་ཧཱུྃ་སྨུག་ནག༔ བམ་རོ་ཉི་ཟླ་པདྨའི་སྟེང་དུ་གསལ༔ འོད་ཟེར་འཕྲོས་པས་རྒྱལ་བ་ཞི་ཁྲོ་མཆོད༔ བྱིན་རླབས་ཐམས་ཅད་བསྡུས་ཏེ་ཧཱུྃ་ལ་ཐིམ༔ གཟི་བརྗིད་དཔལ་འབར་འོད་ཀྱིས་རྒྱལ་བསེན་དང་༔ སྡེ་བརྒྱད་འབྱུང་པོ་མ་ལུས་བསྐྲད་ཅིང་གཟིར༔ སེམས་ཅན་ཀུན་གྱི་ཤེས་སྒྲིབ་ཉེས་ལྟུང་སྦྱངས༔ དཔལ་འབྱོར་དབང་ཐང་བསྡུས་ཏེ་ཧཱུྃ་ལ་ཐིམ༔ སྐད་ཅིག་གནས་འགྱུར་ཁྲག་འཐུང་ཐོད་པ་རྩལ༔ སྐུ་མདོག་སྨུག་ནག་ཞལ་གཅིག་ཕྱག་གཉིས་པ༔ སྤྱན་གསུམ་རབ་བགྲད་ཞལ་གདངས་མཆེ་བ་གཙིགས༔ སྨ་ར་སྨིན་མ་དམར་སེར་མེ་འོད་འབར༔ དབུ་སྐྲ་ཁམ་ནག་ཐོད་པའི་ཕྲེང་བས་བཅིངས༔ ཕྱག་གཡས་རྡོ་རྗེས་རི་རབ་ཐལ་བར་བརླག༔ ཕྱག་གཡོན་དྲིལ་བུ་ལྷ་ལྕམ་ཡུམ་ལ་འཁྱུད༔ དུར་ཁྲོད་ཆས་བརྒྱད་དཔལ་གྱི་ཆས་བཅུས་བརྒྱན༔ གནམ་ལྕགས་སྤུ་གྲིའི་གཤོགས་པས་སྲིད་གསུམ་གཡོ༔ ལྷ་ལྕམ་དམར་མོ་རབ་ཏུ་ཁྲོས་མས་འཁྱུད༔ ཡབ་ཡུམ་འཁྲིལ་སྦྱོར་མེ་དཔུང་ཀློང་ན་འགྱིང་༔ སྤྱི་བོར་ཆེ་མཆོག་དཔྲལ་བར་གཤིན་རྗེ་དང་༔ མགྲིན་པར་གསུང་མཆོག་ཐུགས་ཀར་བཛྲ་དཔལ༔ ལྟེ་བར་སྲས་མཆོག་གསང་བར་རྦོད་གཏོང་སྟེ༔ བརླ་གཡས་མཆོད་བསྟོད་བརླ་གཡོན་དྲག་སྔགས་སྐུ༔ གཞན་ཡང་བ་སྤུའི་འོད་ཀློང་རེ་རེ་བཞིན༔ ཞི་ཁྲོ་ཁྲག་འཐུང་དཔལ་དང་ཡང་སྤྲུལ་དང་༔ ཕོ་ཉ་ལས་བྱེད་དཔའ་བོ་དཔའ་མོ་སོགས༔ ཡོམ་ཡོམ་ཤིགས་ཤིགས་ཉི་རྡུལ་ལྟ་བུ་བསམས༔ ཆོས་དབྱིངས་ཀ་དག་ཀློང་ནས་བསྐྱེད་པའི་ལྷ༔ རང་རིག་ཧེ་རུ་ཀཿདང་འདུ་འབྲལ་མེད༔ ཡེ་ནས་རང་གནས་ལྷུན་གྲུབ་རང་ལ་བཞུགས༔ སྐད་ཅིག་གཅིག་གི་བྱེ་བྲག་ཕྱེད་པའི་ཕྱག༔ ཕྱི་ནང་གཟུང་འཛིན་རང་གྲོལ་མཆོད་པ་སྟེ༔ རེ་དོགས་གཟུང་འཛིན་ཕྱོགས་ལས་རྣམ་རྒྱལ་བསྟོད༔ གཉིས་པ་བསྙེན་ཞིང་སྒྲུབ་པའི་རིམ་པ་ནི༔ ཐུགས་ཀར་ཉི་མའི་དཀྱིལ་འཁོར་གསལ་བའི་སྟེང་༔ གནམ་ལྕགས་རྡོ་རྗེ་རྩེ་ལྔའི་ལྟེ་བ་ལ༔ སྨུག་ནག་ཧཱུྃ་གི་ཡི་གེར་མེ་ཆེན་འབར༔ ཁམས་གསུམ་འཁྲུག་ཅིང་སྲིད་གསུམ་རབ་ཏུ་བསྲེག༔ འཁོར་འདས་ཆེ་བཙན་རང་ཉིད་ཧེ་རུ་ཀའི༔ སྐུ་ལས་ཚ་ཚ་ཁྲོ་ཆུང་གྲངས་མེད་འཕྲོ༔ སྡང་མིག་བགྲད་པས་དྲེགས་པ་ཟིལ་གྱིས་གནོན༔ རྣོ་ངར་མཆེ་བ་གཙིགས་པས་བདུད་བཞི་འཇོམས༔ ཕྱག་གཡས་རྡོ་རྗེས་དྲེགས་བྱེད་ཀླད་པ་འགེམས༔ ཕྱག་གཡོན་དྲིལ་བུས་གདོན་བགེགས་སྨྱོ་འབོག་རེངས༔ ལྷ་སྲིན་བྱེ་བ་འདུལ་ཞིང་བྲན་དུ་བཀོལ༔ སྐུ་ནི་ཁྲག་འཐུང་ཞི་ཁྲོའི་ཚོམ་བུར་གསལ༔ ཐུགས་ནི་སྤྲོས་བྲལ་འཁོར་འདས་ཡོངས་ཀྱི་བདག༔ གསུང་ནི་ཧཱུྃ་སྒྲ་འབྲུག་སྟོང་ལྡིར་བ་ལས༔ འཇིག་རྟེན་ཁམས་ཀུན་འུར་འུར་ཤིགས་ཤིགས་འཁྱོམ༔ སངས་རྒྱས་བྱང་སེམས་རིག་འཛིན་ཐམས་ཅད་ཀྱི༔ ཐུགས་རྗེ་བྱིན་རླབས་ནུས་མཐུ་སྨོན་ལམ་སྟོབས༔ ལྷ་འདྲེ་མི་གསུམ་ཚེ་དཔལ་དབང་ཐང་འབྱོར༔ ཐམས་ཅད་ཧེ་རུ་ཀཿལ་གཉིས་མེད་བསྒོམ༔ བདུན་གཅིག་བདུན་གཉིས་བདུན་གསུམ་ལ་སོགས་པ༔ རབ་འབྲིང་ཐ་མའི་རྣལ་འབྱོར་རིམ་པ་བཞིན༔ བརྩོན་འགྲུས་ལྡན་པས་ཉམས་སུ་ལེན་པར་བྱ༔ གསུམ་པ་རྟགས་ཀྱི་རིམ་པ་འདི་ལྟ་སྟེ༔ དབང་པོ་རབ་ཀྱི་དུས་བསྙེན་བདུན་ཕྲག་གཅིག༔ གྲངས་ཀྱི་བསྙེན་པ་ཁྲི་ཚོ་བཅུ་གསུམ་མོ༔ དབང་པོ་འབྲིང་གི་དུས་བསྙེན་བདུན་ཕྲག་གཉིས༔ གྲངས་ཀྱི་བསྙེན་པ་འབུམ་ཚོ་གཉིས་ཀྱིས་རྫོགས༔ དབང་པོ་ཐ་མའི་དུས་བསྙེན་བདུན་ཕྲག་གསུམ༔ གྲངས་ཀྱི་བསྙེན་པ་འབུམ་ཚོ་གསུམ་གྱིས་རྫོགས༔ དབང་པོ་རབ་ཀྱིས་ང་ཉིད་མངོན་སུམ་མཇལ༔ ཆོས་ཉིད་ཀ་དག་རིག་པ་རྗེན་ལ་འབུད༔ རང་སེམས་དུས་གསུམ་སངས་རྒྱས་མངོན་སུམ་རྟོགས༔ སྤང་བླང་རེ་དོགས་གཟུང་འཛིན་རང་སར་གྲོལ༔ ཤེས་རིག་རང་རྩལ་ཧེ་རུ་ཀཿརུ་སྨིན༔ འབྲིང་གིས་བསྐྱེད་རིམ་སྣང་སྟོང་ལྷ་སྐུར་གྲོལ༔ ཉམས་དང་འོད་གསལ་ངང་ནས་ང་དང་མཇལ༔ དུག་གསུམ་རྟོག་ཚོགས་མ་སྤངས་སྐུ་གསུམ་རྟོགས༔ བག་ཆགས་གཟུང་འཛིན་སྣང་སེམས་བདུད་ལས་རྒྱལ༔ ཐ་མས་རྨི་ལམ་བཟང་རྟགས་སྣ་ཚོགས་རྨི༔ བར་ཆད་གདོན་དང་བགེགས་རྣམས་བསྐྲད་ཅིང་རེངས༔ ཐུན་མོང་དངོས་གྲུབ་བསམས་པའི་དོན་བཞིན་འགྲུབ༔ རྒྱལ་བསེན་སྡེ་བརྒྱད་དཔག་ཚད་རྒྱང་གྲགས་འབྲོས༔ ས་མ་ཡཱ༔ རྒྱ༔ གསུམ་པ་རྗེས་ཀྱི་ས་བཅད་རྣམ་པ་ལྔ༔ ལས་སྦྱོར་བཞི་དང་ཕན་ཡོན་རིམ་པའོ༔ ལས་སྦྱོར་དང་པོ་ཞི་བའི་རིམ་པ་ནི༔ ལྷ་ཚོགས་ཐམས་ཅད་ཞི་བ་སྐུ་མདོག་དཀར༔ སྔགས་འབྲུ་འོད་ཟེར་རྣམས་ཀྱང་དཀར་པོར་བསྒྱུར༔ རང་དང་ཕ་མ་འགྲོ་དྲུག་སེམས་ཅན་རྣམས༔ ཉེས་ལྟུང་སྡིག་སྒྲིབ་སྦྱངས་ཏེ་ཉམས་ཆག་སྐོངས༔ མེ་ལོང་ལྟ་བུའི་ཡེ་ཤེས་ལྡན་པར་བསམས༔ རྒྱུན་རིང་འཇམ་པར་ཧཱུྃ་རིང་ཤུབ་བུས་བཟླ༔ ལས་སྦྱོར་གཉིས་པ་རྒྱས་པའི་རིམ་པ་ནི༔ ལྷ་ཚོགས་ཐམས་ཅད་རྒྱས་པ་སྐུ་མདོག་སེར༔ སྔགས་འབྲུ་འོད་ཟེར་རྣམས་ཀྱང་སེར་པོར་བསྒྱུར༔ འཁོར་འདས་ལམ་གསུམ་ནུས་སྟོབས་ཐམས་ཅད་བསྡུས༔ རང་ལ་ཐིམ་པས་ལུང་རྟོགས་ཡོན་ཏན་རྒྱས༔ མཉམ་པ་ཉིད་ཀྱི་ཡེ་ཤེས་རྒྱས་པར་བསམས༔ སྦོམ་ལ་དལ་བར་ཧཱུྃ་གི་སྙིང་པོ་བགྲང་༔ ལས་སྦྱོར་གསུམ་པ་དབང་གི་རིམ་པ་ནི༔ ལྷ་ཚོགས་ཐམས་ཅད་དབང་སྟེ་སྐུ་མདོག་དམར༔ སྔགས་འབྲུ་འོད་ཟེར་རྣམས་ཀྱང་དམར་པོར་བསྒྱུར༔ འཁོར་འདས་ཐམས་ཅད་དབང་བསྡུས་ཟིལ་གྱིས་མནན༔ ཅི་བསྒོའི་བཀའ་ཉན་བྲན་དུ་ཁོལ་བར་བསམས༔ སྙན་ལ་ངར་ལྡན་ཁུག་པའི་ཚུལ་གྱིས་དབྱངས༔ སོ་སོར་རྟོག་པའི་ཡེ་ཤེས་ལྡན་པར་བསམས༔ ལས་སྦྱོར་བཞི་པ་སྒྲུབ་པའི་རང་གཞུང་སྟེ༔ སྣང་སེམས་ཡེ་དག་ཆོས་ཉིད་གསལ་གདབ་ལ༔ ལྷ་ཚོགས་ཐམས་ཅད་གར་དགུའི་ཉམས་ལྡན་འབར༔ འཁྲབ་མཆོང་འགེང་ཞིང་རྒྱུག་ཅིང་གར་སྟབས་སྒྱུར༔ གཅེར་བུ་དྲན་ཐང་སྨྱོན་སྤྱོད་བྱུང་རྒྱལ་བཏང་༔ ཉམ་ང་བག་ཚའི་ཡུལ་ལ་ཐོག་བརྫིས་བྱ༔ ཆོས་ཉིད་རང་བྱུང་ཧཱུྃ་དབྱངས་འབྲུག་སྟོང་ལྡིར༔ ཚར་བཅད་རྗེས་བཟུང་ལས་ཀྱི་ཧེ་རུ་ཀ༔ བྱ་གྲུབ་ཆོས་དབྱིངས་ཡེ་ཤེས་མངོན་གྱུར་བསམ༔ ལྔ་པ་ཕན་ཡོན་རིམ་པ་མདོར་བསྡུས་ནི༔ ལྷ་གཅིག་སྐུ་ལ་ཞི་ཁྲོའི་དཀྱིལ་འཁོར་རྫོགས༔ སྔགས་གཅིག་ཧཱུྃ་ལ་འཁོར་འདས་སྲོག་སྙིང་འདུས༔ ཏིང་འཛིན་གཅིག་ལ་ལས་བཞིའི་ཕྲིན་ལས་རྫོགས༔ འདི་ནི་ཨོ་རྒྱན་མཁའ་འགྲོའི་སྙིང་ཁྲག་སྟེ༔ འདི་ནི་བསྐྱེད་རྫོགས་མ་ལུས་ཀུན་གྱི་སྙིང་༔ འདི་ནི་ལྟ་སྒོམ་ཡོན་ཏན་གསང་བའི་མཛོད༔ འདི་ནི་མཆོག་ཐུན་དངོས་གྲུབ་ཀུན་གྱི་བདག༔ འདི་ནི་གདོན་བགེགས་འབྱུང་པོ་བྱད་མའི་གཤེད༔ འདི་ནི་ཟ་འདྲེ་འབྱུང་པོ་ཀུན་གྱི་བདུད༔ འདི་ནི་ཆིག་ཆོག་ཡིད་བཞིན་ནོར་བུ་སྟེ༔ མ་འོངས་ལྔ་བརྒྱའི་ཐ་མ་རྩོད་ལྡན་དུས༔ ང་ཡི་ཐུགས་སྤྲུལ་སྦས་པའི་རྣལ་འབྱོར་པ༔ ཉི་མ་གྲགས་པ་རྩལ་དང་འཕྲད་པའི་ཚེ༔ ཉམས་ལེན་བསྙེན་སྒྲུབ་ཚད་དུ་འཁྱོལ་བར་གྱིས༔ དམ་སྲི་མི་དང་མི་མིན་བར་ཆད་བཟློག༔ འདི་ནི་གཅེས་སོ་ཡིད་ཀྱིས་བརྣག་པར་མཛོད༔ དེ་ནས་རིམ་བཞིན་ཆོས་བདག་བུ་རྣམས་ལ༔ བཀའ་རྒྱས་ཐོབ་ལ་གདམས་པ་འདི་སྟོན་རྒྱ༔ ཟས་དང་ནོར་ངོར་མ་སྟོན་སྦོས་ཤིག་རྒྱ༔ ཆེ་དྲེགས་ངོ་འཛིན་མ་བྱེད་གསོངས་ཤིག་རྒྱ༔ ཟབ་པའི་སྙིང་ནོར་བདེ་མཆོག་དབང་གི་ཆོས༔ གསང་རྒྱ་མཐར་ཕྱིན་ཉམས་ལེན་གནད་བསྣུན་ན༔ སངས་རྒྱས་བསྟན་པ་ལོ་བརྒྱའི་བར་དུ་བསྲིང་༔ ཟབ་ཆོས་བསྟན་པ་མི་རབས་བདུན་ལ་དར༔ གསང་རྒྱ་མ་ཐུབ་ཉམས་ལེན་མ་བྱུང་ན༔ གཤེད་བཞི་ལོ་པས་ཆོས་འདིར་སྐུར་བ་འདེབས༔ ཁྱི་ཕག་གླང་སྦྲུལ་ལོ་པས་ངན་མཚམས་སྦྱོར༔ འགྲོ་དོན་གུད་ཅིང་བསྟན་ཞབས་ཐག་པ་འདོགས༔ གང་ཟག་རང་ལ་མི་རུང་སྣ་དགུ་འབྱུང་༔ དེ་ཕྱིར་རིག་པར་ལྕགས་ཆུག་གསང་རྒྱ་སྡོམས༔ མེད་དང་མི་ཤེས་རྒྱུས་མེད་ཚིག་གསུམ་པོ༔ མགོ་ནག་འགྲོ་ལ་སྨྲོས་ཤིག་སྙིང་གཏམ་ཡིན༔ ཆོས་བདག་མ་ནོར་ཚུལ་ལ་གཉེར་འདུག་ན༔ མནའ་རྒྱས་ལན་གསུམ་ཐོབ་ལ་གསང་བར་སྤེལ༔ མི་བསླུ་ངེས་སོ་ཨོ་རྒྱན་ང་ཡི་བཀའ༔ ཡིད་ཆེས་སྐྱེད་ཅིག་མ་འོངས་སྐལ་ལྡན་བུ༔ ཡང་གསང་སྙིང་པོ་བཀའ་རྒྱས་བཏབ་པ་འདིའི༔ བདག་པོ་ཨེ་ཡོང་གང་ཟག་ཁྱོད་ལ་རག༔ ལས་འཕྲོའི་དབང་གིས་གཏེར་འདི་རྙེད་པའི་ཚེ༔ ང་ཡི་བཀའ་རྒྱ་སྙིང་ལ་ཆོངས་ཤིག་རྒྱ༔ ས་མ་ཡཱ༔ རྒྱ་རྒྱ་རྒྱ༔ གཏེར་རྒྱ༔ སྦས་རྒྱ༔ ཟབ་རྒྱ༔ གཉན་རྒྱ༔ གཏད་རྒྱ༔ ཁ་ཐམ༔ སོ་ཕག་ཤི་ན་རྒྱ༔ བདག་སྤྲང་བན་གྱིས་ཏེ་སེ་ནས་གདན་དྲངས་པའོ། །སརྦ་མངྒ་ལམ། །