བདུད་རྩི་སྨན་སྒྲུབ་ཀྱི་ཡིག་ཆུང་།
བཀའ་རྫོགས་པ་ཆེན་པོ་བླ་མ་བདེ་མཆོག་འཁོར་ལོ་ལས༔ བདུད་རྩི་སྨན་སྒྲུབ་ཀྱི་ཡིག་ཆུང་བཞུགས་སོ༔ དཔལ་ཆེན་པོ་ཧེ་རུ་ཀཿལ་ཕྱག་འཚལ་ལོ༔ གུ་རུ་དུས་གསུམ་མཁྱེན་པའི་སློབ་དཔོན་གྱིས༔ བདུད་རྩི་སྨན་གྱི་གསང་སྒྲུབ་མཛད་པ་ཡི༔ ཕྱག་ལེན་ཡིག་ཆུང་ཟིན་བྲིས་གདམས་པ་འདི༔ ཕྱི་མའི་དོན་དུ་ཁོ་མོས་བཀོད་དེ་སྦས༔ ལས་འཕྲོ་ཅན་གྱི་བུ་དང་འཕྲད་པར་ཤོག༔ ས་མ་ཡཱ༔ རྒྱ་རྒྱ་རྒྱ༔ འདི་ལྟར་སྣང་སྲིད་འཁོར་འདས་མ་ལུས་པ༔ དག་པ་ཡེ་གྲོལ་སྐུ་དང་ཡེ་ཤེས་ལས༔ ངོ་བོ་རང་བཞིན་ཐུགས་རྗེ་བདུད་རྩིར་འཁྱིལ༔ གཙང་རྨེར་འཛིན་པའི་འཁྲུལ་འཁོར་དབྱིངས་སུ་ཡལ༔ དེ་ལྟ་ལས་འདས་སྤང་བླང་རེ་དོགས་ཀྱི༔ གཟུང་འཛིན་འཁྲུལ་པའི་ཆོས་ལ་ཟད་མེད་སྤྱོད༔ དེ་ཡི་ཕྱིར་ན་བདུད་རྩི་མཆོག་འདི་སྤྱོད༔ ས་མ་ཡཱ༔ རྒྱ་རྒྱ་རྒྱ༔ ཕྱི་ཡི་རྩ་བརྒྱད་ཙན་དན་སྦྲུལ་སྙིང་དང་༔ ནང་གི་རྩ་བརྒྱད་མཆོག་ཆེན་མི་ཡི་བམ༔ གསང་བའི་རྩ་བརྒྱད་བྱང་སེམས་དཀར་དམར་ཏེ༔ བརྒྱད་ཚན་གསུམ་པའི་པཉྩ་ཨ་མྲྀ་ཏར༔ འབངས་དང་སྐྱོབ་ཀྱི་རྣམས་གྲངས་བརྒྱ་ཉེར་ལྔ༔ རེ་རེ་བཞིན་དུ་སྦྱར་བས་ལོ་མ་སྟོང་༔ སྟོང་ཚན་གསུམ་གྱི་ཡལ་འདབ་ལྡིང་ཁང་འཕྱོ༔ རྩ་བརྒྱད་སྟོང་སྦྱར་བདུད་རྩིའི་རྒྱ་མཚོ་ནི༔ གཞུང་བཞིན་ལག་ལེན་བསྙེན་སྒྲུབ་ལས་སྦྱོར་དུས༔ སྟག་གཟིག་དོམ་དང་འཕར་སྤྱང་འུག་པ་ཁྲ༔ ཕུག་ཤུད་མཛོ་དྲེའུ་བོང་བུའི་ཤ་ཁྲག་སྤང་༔ ར་དུག་སྤྱང་དུག་བོང་དུག་ཐར་ནུ་དང་༔ རེ་ལྕགས་པ་དང་སྲན་མའི་མེ་ཏོག་སྤང་༔ གསེར་གྱི་མདོག་ཅན་ཨ་རུ་རིགས་ལྔ་ནི༔ གཙོ་བོར་སྤུང་ཞིང་བཞི་ཆའི་བ་རུ་ར༔ བ་རུ་ར་ཡི་བཞི་ཆ་སྐྱུ་རུ་བསྣན༔ ཙན་དན་དཀར་དམར་ཤ་ཕོ་རུ་རྟ་དང་༔ བཟང་དྲུག་བ་ལེ་ཀ་སོགས་ཆེར་སྤུང་ཞིང་༔ ཀཎྜ་ཀ་རི་ཤིང་མངར་རམ་བུ་ལྕུམ༔ གོ་ཡུ་དཔའ་བོ་སེར་པོ་རྣམ་པ་དྲུག༔ རེ་རེ་བཞིན་དུ་ཨ་རུའི་ལྔ་ཆ་གཏོང་༔ བདུད་རྩི་དབང་ལག་སྐྱུ་རུའི་ཕྱེད་གྱི་ཆ༔ གླ་རྩི་དྲི་ཐོན་ཙམ་ལས་མང་མི་བྱ༔ སྨན་དཔུང་མང་བར་འདོད་ན་ད་ལི་དང་༔ ག་དུར་གཉིས་པོ་ཨ་རུའི་ཚོད་ཙམ་སྦྱར༔ ཤིན་ཏུ་མང་བར་འདོད་ན་འབྲས་ཕྱེ་འམ༔ དཀར་མོའི་ནས་ཕྱེ་དར་ཚགས་ལེགས་རྒྱབ་ནས༔ བ་རུ་ར་ཡི་ཆ་ཙམ་སྦྱར་བར་བྱ༔ འདི་ནི་སྨན་རིགས་བསྲེས་ན་མ་གཏོགས་སྤང་༔ ཁ་དོག་དཀར་པོའི་སྨན་རིགས་ཐམས་ཅད་ནི༔ སྒ་སེར་གུར་གུམ་ཆུ་ཡིས་ཁ་དོག་བསྒྱུར༔ མདོག་ནག་དྲི་ཁ་རོ་སྐྱུར་སྨན་གྱི་རིགས༔ སྔོ་སྨན་ཤིང་སྨན་རྡོ་སྨན་ཁ་རུ་ཚྭ༔ ཤིང་ཀུན་ཤིང་ཚ་ལ་སོགས་སྐྱ་འདྲེ་ཙམ༔ གཞན་ཡང་དྲི་རོ་ཁ་དོག་དེར་མཐུན་དང་༔ རིགས་པའི་མདའ་བསྣུན་ཤེས་རབ་ཟབ་མོས་དཔྱད༔ ཤ་ཁྲག་རིགས་ཀྱང་ཕོན་ཚོད་སྐབས་ལྟར་བསགས༔ ས་མ་ཡཱ༔ རྒྱ༔ དེ་ནས་དཀྱིལ་འཁོར་བཅའ་གཞི་སྒྲུབ་ཆེན་ལྟར༔ ཁྱད་པར་དཀྱིལ་འཁོར་ལྡིང་ཁྲིའི་དབུས་དྲང་པོར༔ ཤིང་གསུམ་ཨོམ་བཅིངས་མདུང་ཤིང་གྱེན་དུ་བསླངས༔ རྔ་དཀར་ཀུ་ཤའི་ཆུན་པོས་རྩེ་བཞི་བརྒྱན༔ དེའི་དབུས་ཀྱི་མདུང་གི་རྩེ་མོ་ན༔ བདུད་རྩི་འཁྱིལ་བ་ཚངས་པ་བརྒྱ་བྱིན་དང་༔ ཁམས་གསུམ་རྣམ་རྒྱལ་བཞི་ཡི་ཙ་ཀ་ལི༔ དེ་འོག་བང་རིམ་ལྷ་བརྒྱད་ཙ་ཀ་ལི༔ དེ་འོག་བདུད་རྩིའི་ལྷ་མོ་བཅུ་དྲུག་དང་༔ དེ་འོག་རྒྱུ་སྐར་ཉི་ཤུ་རྩ་བརྒྱད་དེ༔ དེ་འོག་ཀླུ་ཆེན་བརྒྱད་ཀྱི་ཙ་ཀ་ལི༔ ཀུན་ཀྱང་དར་གྱི་ཤམ་བུས་བརྒྱན་པ་ལ༔ བར་མཚམས་ཀུན་ཏུ་རྨ་བྱའི་སྒྲོས་བརྒྱན་ཞིང་༔ བང་རིམ་ཀུན་གྱི་ཕྱོགས་བཞིར་མེ་ལོང་གདགས༔ གཟུངས་ཐག་བཏགས་ཏེ་སྨན་གྱི་ཕོ་བྲང་སྦྲེལ༔ ས་མ་ཡཱ༔ རྒྱ༔ དེ་ནས་ཧེ་རུ་ཀཿཡི་བུམ་པ་བཅུ༔ ཁྲོལ་བུའི་སྨན་གྱིས་བརྒྱན་ཞིང་ཕྱོགས་ཕྱོགས་འགོད༔ དེ་ལ་དང་པོ་ལྡིང་ཁྲིའི་དབུས་སུ་ནི༔ ཡེ་ཤེས་ལྔ་ལྡན་རྡོ་རྗེའི་ཀ་པཱ་ལ༔ དུམ་བུ་ལྔ་པ་ཚངས་བུག་གཉིས་ལྡན་བཤམས༔ དེ་ཡི་སྐྱོབ་ཏུ་རུས་སྦལ་ཁོག་པ་སྟེ༔ མི་འགྱུར་གཡུང་དྲུང་རྡོ་རྗེའི་ཙག་ལིས་བརྒྱན༔ སྐུ་གསུམ་ལྷུན་གྲུབ་རྡོ་རྗེའི་ཀ་པཱ་ལ༔ དུམ་བུ་གསུམ་པ་ཚངས་བུག་དབུས་ལྡན་ཤར༔ དེ་ཡི་སྐྱོབ་ཏུ་སེང་ཐོད་ཤར་ལྷོ་སྟེ༔ མི་ཤིགས་རྫོགས་ལྡན་རྡོ་རྗེའི་ཙག་ལིས་བརྒྱན༔ ཡིད་བཞིན་གཏེར་འཆང་རྡོ་རྗེའི་ཀ་པཱ་ལ༔ ཤིང་ལོ་ཤིན་ཏུ་རྒྱས་པའི་དུམ་གཉིས་ལྷོ༔ དེ་ཡི་སྐྱོབ་ཏུ་གླང་ཆེན་ཐོད་པ་སྟེ༔ སྲིད་པ་ཡོངས་སྒྲོལ་རྡོ་རྗེའི་ཙཀ་ལིས་བརྒྱན༔ ཁམས་གསུམ་དབང་བསྡུད་རྡོ་རྗེ་ཀ་པཱ་ལ༔ དུམ་བུ་གཅིག་པའི་བྷནྡྷ་དཀྱིལ་འཁོར་ནུབ༔ དེ་ཡི་སྐྱོབ་ཏུ་ཆ་ཚན་ཀུ་བ་སྟེ༔ ལྷ་ཆེན་བརྟུལ་པོའི་ཐོད་པ་ཞེས་ཀྱང་བྱ༔ དུས་གསུམ་བསྟན་སྤྲུགས་རྡོ་རྗེའི་ཙཀ་ལིས་བརྒྱན༔ ཆོ་འཕྲུལ་རྟགས་འབྱུང་རྡོ་རྗེའི་ཀ་པཱ་ལ༔ ལས་བཞི་བསྒྲུབ་ཕྱིར་དུམ་བུ་བཞི་ལྡན་བྱང་༔ དེ་ཡི་སྐྱོབ་ཏུ་ཕྱི་བའི་ཐོད་པ་སྟེ༔ མི་ཆེན་གླ་ལིའི་ཐོད་པ་ཞེས་ཀྱང་ཟེར༔ ལི་ཙ་ཀུ་རའི་ཐོད་པ་ཞེས་ཀྱང་ཟེར༔ མཚན་མ་སྤྲོས་བྲལ་རྡོ་རྗེའི་ཙཀ་ལིས་བརྒྱན༔ བཀྲ་ཤིས་མཚན་ལྡན་རྡོ་རྗེའི་ཀ་པཱ་ལ༔ ཨ་ཡུ་དཔལ་ལྡན་རྡོ་རྗེའི་ཀ་པཱ་ལ༔ བདེ་བ་མི་ཤིགས་རྡོ་རྗེའི་ཀ་པཱ་ལ༔ དབང་བཞིའི་བུམ་པ་རྡོ་རྗེ་ཀ་པཱ་ལ༔ ཞེས་པ་འདི་བཞི་མཚན་ཉིད་ལྡན་པ་ཡི༔ དུང་ཅན་མ་དང་གླང་སྣ་པདྨ་ཅན༔ རི་དྭགས་མ་བཞིའི་ཐོད་པ་ཡིན་པས་ན༔ དཀྱིལ་འཁོར་སྒོ་བཞིར་ཚུལ་བཞིན་འགོད་པར་བྱ༔ ས་མ་ཡཱ༔ རྒྱ༔ དེ་ལྟར་བཀོད་རྫོགས་བརྒྱན་ལྡན་ཁྲོལ་བུ་བསྒྲུབ༔ དེ་ནས་འདུལ་སྦྱངས་བཏང་སྟེ་དར་ཚགས་བརྒྱབ༔ ཨ་ཐམ་སྐྱེ་བདུན་ཕབས་རྒྱུན་ཚད་ལྡན་སྦྲན༔ དྲིལ་བུར་གཞལ་སྟེ་ཤིང་གི་གཞོང་པར་བླུགས༔ ཆུ་གཙང་འོ་མས་སྦྲན་ཞིང་ནམ་ཟླ་ལྟར༔ སྐབས་དང་མཐུན་པའི་གར་སླ་རན་པར་བྱ༔ ཆང་གིས་ཕབས་རྩི་ཕོན་དང་དུས་བསྟུན་བཏབ༔ ལྕགས་ཀྱི་སླ་ངའི་ནང་དུ་ནས་བླུགས་ཅིང་༔ སྨན་དང་དྲི་བཟང་ཕྱེ་མ་ཅི་རིགས་གདབ༔ དེ་ལ་ཆུ་ཡིས་སྦྲན་ཏེ་བརླན་པར་བྱ༔ བྷནྡྷའི་རིགས་གྱུར་ཡོངས་རྫོགས་འཛོམ་ན་རབ༔ ཡང་ན་ཕོ་ཐོད་འཁོར་ལོ་མོ་ཐོད་པདྨ་འདྲི༔ སྨན་རྣམས་དར་ཁུག་བཏབ་ནས་ཐོད་པར་བསྡམས༔ རིགས་ལྔའི་ཕྱག་མཚན་བྲིས་པའི་དར་གྱིས་བཏུམས༔ དེ་ནས་དར་ཚོན་སྣ་ལྔས་ལེགས་པར་བཅིངས༔ དེ་ནས་དར་དམར་ཧཱུྃ་མང་བྲིས་པས་དྲིལ༔ དེའི་གཡས་གཡོན་རྡོ་རྗེ་དྲིལ་བུ་བཏགས༔ དེ་ལ་གཟུངས་ཐག་ཕྱོགས་བཞི་རིགས་ལྔས་བརྒྱན༔ སླ་ང་ལྡིང་ཁྲིའི་དབུས་འགོད་ཐོད་པ་དཀྱིལ༔ སླ་ངའི་འོག་ཏུ་མར་མེ་དུས་མཐུན་ལྟར༔ གསུམ་གཉིས་གཅིག་སོགས་དབྱར་དགུན་སྟོན་ལྟར་འགོད༔ དྲོད་ནི་སླངས་ངས་ལག་པ་དྲོས་ཙམ་བྱ༔ དེ་ཡི་ཕྱི་རོལ་ཡོལ་བ་སུམ་རིམ་གཡོལ༔ མེ་འོད་རླུང་གིས་མི་འཕྲོག་ཐབས་ལ་འབད༔ གཞུང་བཞིན་བསྒྲུབ་ཅིང་སྐབས་སྐབས་སྨན་སྒྲོམ་ཉུལ༔ ཆང་གི་སྦྲང་མ་ལྟ་བུར་ཁོལ་བ་ཚད༔ ལེ་ལོ་སྤངས་ཏེ་བརྩོན་འགྲུས་ལྡན་པས་བསྒྲུབ༔ མཐར་ཕྱིན་དབང་བླངས་སྨན་སྒྲོམ་ཞལ་ཕྱེ་བས༔ མདོག་ནི་སེར་པོ་དམར་མདངས་ཆགས་པ་ལ༔ རོ་ནི་ཨ་རུ་ཆང་གི་རྟར་སྐྱོན་འདྲ༔ དེ་ལྟར་མིན་པར་སྐམ་པའི་སྐྱོན་འདུག་ན༔ སླར་ཡང་སྦོལ་ཏེ་བདུད་རྩིས་སྔར་བཞིན་སྦྲན༔ རླུང་སེང་མེད་པར་བྱས་ཏེ་བསྡམས་ནས་བཞག༔ ཁ་དོག་སྐྱ་བོ་སེར་པོ་ལ་སོགས་པ༔ གུར་གུམ་ཆུ་ཡིས་སྦྲན་པ་མན་ངག་ཡིན༔ སྣུམ་བག་མེད་ན་ལག་པར་འབྲུ་མར་བྱུག༔ སྦོལ་ཞིང་རན་ཙམ་ཕུར་བས་མཆོག་ཏུ་འགྱུར༔ རིལ་བུར་བསྒྲུབ་ན་གཞུང་བཞིན་ལས་ལ་སྦྱར༔ ས་མ་ཡཱ༔ རྒྱ་རྒྱ་རྒྱ༔ འདི་ལྟར་བདུད་རྩི་དམར་ཁྲིད་གདམས་པ་འདི༔ ཨོ་རྒྱན་རྗེ་ཡི་ལུང་བཞིན་ཁོ་མོས་བྲིས༔ ཕྱི་མར་གསང་སྔགས་བསྟན་པའི་སྲོག་ཏུ་ཤོག༔ གཅེས་པར་ཆོངས་ཤིག་སྣོད་མེད་རྣམས་ལ་གོབ༔ ཚུལ་བཞིན་སྒྲུབས་ཤིག་བསྟན་འགྲོའི་དོན་ལ་འབུངས༔ ས་མ་ཡཱ༔ རྒྱ་རྒྱ་རྒྱ༔ གཏེར་རྒྱ༔ སྦས་རྒྱ༔ ཟབ་རྒྱ༔ གསང་རྒྱ༔ ས་མ་ཡཱ༔ རྒྱ་རྒྱ་རྒྱ༔ སྤྲུལ་བའི་སྐུ་མཆོག་ཉི་མ་གྲགས་པས་གངས་རིའི་རྒྱལ་པོ་ནས་གདན་དྲངས་ཤིང་ཤོག་སེར་ལས་ཞལ་བཤུས་པའོ། །མངྒ་ལཾ། །