དོན་དབང་ཡིད་བཞིན་ནོར་བུ།
བཀའ་རྫོགས་པ་ཆེན་པོ་བླ་མ་བདེ་མཆོག་འཁོར་ལོ་ལས༔ དོན་དབང་ཡིད་བཞིན་ནོར་བུ་བཞུགས་སོ༔ དཔལ་ཧེ་རུ་ཀ༔ ལ་ཕྱག་འཚལ་ལོ༔ དུར་ཁྲོད་ལ་སོགས་དབེན་གནས་སུ༔ མཎྜལ་དྲི་ཡིས་ཆག་ཆག་གདབ༔ ཚངས་པའི་ཐིག་ལ་དཀྱིལ་འཁོར་འབྲི༔ དབུས་སུ་མཉྫིའི་ཁྲིའུ་ཁར༔ སྟ་གོན་ལེགས་བྱས་བུམ་པ་བཞག༔ བདུད་རྩི་མན་ཤེལ་དྲི་མེད་དང་༔ དྲིལ་བུ་རྡོ་རྫེ་རྩེ་ལྔ་པ༔ གཏོར་མ་རྒྱན་ལྡན་རྣམ་ལྔ་བཤམས༔ སློབ་དཔོན་དབང་གི་སྟ་གོན་དང་༔ བསྙེན་སྒྲུབ་ཁ་གསོ་ཏིང་འཛིན་བསྐྱེད༔ བདག་འཇུག་བླང་ཞིང་གཞན་དོན་སྦྱར༔ ས་མ་ཡཱ༔ རྒྱ་རྒྱ་རྒྱ༔ དེ་ནས་དམ་ལྡན་སློབ་བུ་ནི༔ ཁྲུས་བྱས་བགེགས་བསྐྲད་སྲུང་འཁོར་བསྒོམ༔ མཎྜལ་ཕུལ་ལ་གསོལ་བ་གདབ༔ ཨེ་མ་མགོན་པོ་ཐུགས་རྗེའི་བདག༔ དཀྱིལ་འཁོར་ལྷ་ཚོགས་འདུས་པའི་དཔལ༔ རིག་འཛིན་ཆེན་པོ་བདག་ལ་དགོངས༔ སྐུ་གསུང་ཐུགས་ཀྱི་སྨིན་གྲོལ་སྩོལ༔ གསུམ༔ དེ་ནས་སློབ་དཔོན་གྱིས༔ ཁྱེད་ཅག་མི་ལུས་དོན་དང་ལྡན༔ གསང་སྔགས་ཆོས་ཀྱི་སྨིན་གྲོལ་འདི༔ དམ་ལ་གནས་ན་དངོས་གྲུབ་འཐོབ༔ དམ་མེད་ཉམས་ན་དམྱལ་བར་བསྲེག༔ དེ་བས་དམ་ཚིག་ཡང་དག་སྲུངས༔ ས་མ་ཡཱཿཨི་དན་ཏེ་ཧཱུྃ༔ ཞེས་དམ་ཆུ་བླུད༔ གནས་གསུམ་དྲི་ཡིས་ཐིག་ལེ་བྱ༔ ཡེ་ཤེས་པ་དབབ༔ མེ་ཏོག་འཐོར་ཞིང་བརྟན་པར་བྱ༔ བུམ་པས་དབང་བསྐུར་འདི་སྐད་དོ༔ ཧཱུྃ་ཧྲཱིཿབུམ་པ་ཆོས་དབྱིངས་བཅུད་ནི་ལྷ་ཡི་སྐུ༔ རིག་འཛིན་འདུས་པའི་ལྷ་དང་གཉིས་སུ་མེད༔ སྐལ་ལྡན་རིགས་ཀྱི་བུ་ལ་དབང་བསྐུར་བས༔ འགྱུར་མེད་སྐུ་ཡི་དབང་མཆོག་ཐོབ་པར་ཤོག༔ ཨཱོཾ་བཛྲ་མ་ཧཱ་གུ་རུ་ཀཱ་ཡ་ཨ་བྷི་ཥིཉྩ་ཨཱོཾ་ཨཱོཾ༔ བྷནྡྷ་ཐོགས་ལ༔ ཧཱུྃ་ཧྲཱིཿབྷན་དྷ་ཆོས་དབྱིངས་བཅུད་ནི་བདུད་རྩིའི་མཚོ༔ རིག་འཛིན་ལྷ་ཚོགས་གསུང་དང་གཉིས་སུ་མེད༔ སྐལ་ལྡན་རིགས་ཀྱི་བུ་ལ་དབང་བསྐུར་བས༔ འགག་མེད་གསུང་གི་དབང་མཆོག་ཐོབ་པར་ཤོག༔ ཨཱོཾ་བཛྲ་མ་ཧཱ་གུ་རུ་ཝཱཀྐ་ཨ་བྷི་ཥིཉྩ་ཧྲཱིཿཧྲཱི༔ རྡོ་རྗེ་ཐོགས་ལ༔ ཧཱུྃ་ཧྲཱི༔ རྡོ་རྗེ་ཆོས་དབྱིངས་ས་བོན་ལྷ་ཡི་ཐུགས༔ རིག་འཛིན་ལྷ་ཚོགས་ཐུགས་དང་གཉིས་སུ་མེད༔ སྐལ་ལྡན་རིགས་ཀྱི་བུ་ལ་དབང་བསྐུར་བས༔ སྐྱེ་མེད་ཐུགས་ཀྱི་དབང་མཆོག་ཐོབ་པར་ཤོག༔ ཨཱོཾ་བཛྲ་མ་ཧཱ་གུ་རུ་ཙིཏྟ་ཨ་བྷི་ཥིཉྩ་ཧཱུྃ་ཧཱུྃ༔ དྲིལ་བུ་ཐོགས་ལ༔ ཧཱུྃ་ཧྲཱི༔ དྲིལ་བུ་ཆོས་དབྱིངས་གསུང་དབྱངས་ཡོན་ཏན་ལྷ༔ རིག་འཛིན་ལྷ་ཡི་ཡོན་ཏན་གཉིས་སུ་མེད༔ སྐལ་ལྡན་རིགས་ཀྱི་བུ་ལ་དབང་བསྐུར་བས༔ ལེགས་ཚོགས་མཐར་ཕྱིན་ཡོན་ཏན་དབང་ཐོབ་ཤོག༔ ཨཱོཾ་བཛྲ་མ་ཧཱ་གུ་རུ་རཏྣ་ཨ་བྷི་ཥིཉྩ་ཏྲཾ་ཏྲཾ༔ མན་ཤེལ་ཐོགས་ལ༔ ཧཱུྃ་ཧྲཱི༔ མན་ཤེལ་ཆོས་དབྱིངས་འོད་ལྔ་ཕྲིན་ལས་ཏེ༔ རིག་འཛིན་ལྷ་ཚོགས་ཕྲིན་ལས་གཉིས་སུ་མེད༔ སྐལ་ལྡན་རིགས་ཀྱི་བུ་ལ་དབང་བསྐུར་བས༔ ཐོགས་མེད་རབ་འབྱམས་ཕྲིན་ལས་དབང་ཐོབ་ཤོག༔ ཨཱོཾ་བཛྲ་མ་ཧཱ་གུ་རུ་ཀརྨ་ཨ་བྷི་ཥིཉྩ་ཨཱ༔ ཨཱ༔ གནས་ལྔར་བསྐུར་རོ་གཏོར་མ་མགོར་བཞག་བཀའ་གཏད་བྱ༔ ས་མ་ཡཱ༔ རྒྱ་རྒྱ་རྒྱ༔ ཨེ་མ་རིག་འཛིན་ཡོངས་འདུས་ཀྱི༔ བྱིན་རླབས་དོན་དབང་ཡིད་བཞིན་ནོར༔ ཟབ་བཅུད་ཕྱུངས་ནས་པདྨས་བྲིས༔ ལན་གཅིག་འབྲེལ་ཐོགས་འགྲོ་བ་རྣམས༔ མཁའ་སྤྱོད་གནས་སུ་ཨེ་མ་ཧོཿཏེ་སེའི་གངས་ལ་གཏེར་དུ་སྦས༔ སྲུང་མ་རྣམས་ཀྱིས་བྱ་ར་གྱིས༔ མ་འོངས་བསྐལ་པའི་སྙིགས་མ་ལ༔ ཐུགས་ཀྱི་སྲས་དང་འཕྲད་པར་ཤོག༔ ས་མ་ཡཱ༔ རྒྱ་རྒྱ་རྒྱ༔ གཏེར་རྒྱ༔ སྦས་རྒྱ༔ ཟབ་རྒྱ༔ གཉན་རྒྱ༔ གཏད་རྒྱ༔ ས་མ་ཡཱ༔ རྒྱ་རྒྱ་རྒྱ༔ སྤྲང་བན་ཉི་མ་གྲགས་པས་ཤིང་མོ་ཡོས་ལོ་ཧོར་ཟླ་བཅུ་པའི་ཚེས་བཅོ་ལྔའི་ཐོ་རངས་ཁ་གངས་རིའི་རྒྱལ་པོ་ཏེ་སེའི་བདེ་ཆེན་གསང་བ་ཕུག་ནས་གདན་དྲངས་ཤིང་ས་ཕོ་རྟ་ལོ་ཧོར་ཟླ་བཅུ་པར་ཕུག་ནག་བདེ་བ་ཆེན་པོར་ཤོག་སེར་ལས་ཕབ་པའོ། །མངྒ་ལམ། །