དམོད་བྱང་།

བཀའ་རྫོགས་པ་ཆེན་པོ་བླ་མ་བདེ་མཆོག་འཁོར་ལོ་ལས༔ དམོད་བྱང་བཞུགས་སོ༔ དཔལ་ཆེན་པོ་ཧེ་རུ་ཀཿཕྱག་འཚལ་ལོ༔ ལྔ་བརྒྱའི་དུས་སུ་བྱད་མ་རྦོད་གཏོང་དང་༔ དུས་འཁྲུག་ནད་ཡམས་མི་མཐུན་བར་ཆད་མང་༔ དེ་དུས་དྲོད་རྟགས་ལྡན་པའི་རྣལ་འབྱོར་པས༔ བཟློག་པའི་གཟེར་ཁས་གནོད་བྱེད་དགྲ་བགེགས་གཟེར༔ ས་མ་ཡཱ༔ རྒྱ་རྒྱ་རྒྱ༔ བཟློག་པའི་ཟོར་གྱིས་དགྲ་བགེགས་སྒྲོལ་བའི་ཚེ༔ བླ་མེད་སྔགས་འཆང་ཆས་དང་ལྡན་པ་དགུས༔ ཟོར་ཐོགས་གསེར་སྐྱེམས་མཆོད་ཅིང་རོལ་མོ་འཁྲོལ༔ གཡས་ནས་སྐྱེས་པ་གོ་མཚོན་ཐོགས་པ་དགུས༔ ཀི་བསོ་འདེབས་ཤིང་མཚོན་ཟོར་སྣ་ཚོགས་ཐོགས༔ གཡོན་ནས་བུད་མེད་གཡབ་མོ་ཐོགས་པ་དགུས༔ གདོང་ལ་ཁྲག་བྱུག་དམོད་བཅོལ་གཡབ་མོ་བྱ༔ གིང་པ་རྣམས་ཀྱིས་ལིང་གར་གྲི་སྐོར་བྱ༔ མཁྱེན་གཟུ་ཤགས་འདེབས་དམོད་བཅོལ་འདི་ལྟར་རོ༔ ཧོ་དགོངས་སུ་གསོལ་ལོ༔ ཧོ་དགོངས་སུ་གསོལ་ལོ༔ ཧོ་དགོངས་སུ་གསོལ་ལོ༔ འོག་མིན་ཆོས་ཀྱི་དབྱིངས་ཀྱི་ཕོ་བྲང་ནས༔ ཀུན་བཟང་ཆོས་སྐུའི་ལྷ་ཚོགས་དགོངས་སུ་གསོལ་ལོ༔ རྣམ་དག་གསང་བ་མཆོག་གི་དཀྱིལ་འཁོར་ནས༔ རྡོར་སེམས་ལོངས་སྐུའི་ལྷ་ཚོགས་དགོངས་སུ་གསོལ་ལོ༔ ལྷོ་ནུབ་པདྨ་འོད་ཀྱི་གཞལ་ཡས་ནས༔ གྷུ་རུ་སྤྲུལ་སྐུའི་ལྷ་ཚོགས་དགོངས་སུ་གསོལ་ལོ༔ འཁོར་འདས་གདོད་ནས་དག་པའི་ཕོ་བྲང་ནས༔ དུས་གསུམ་བརྒྱུད་པ་དགུ་ལྡན་དགོངས་སུ་གསོལ་ལོ༔ སྤྱི་གཙུག་ཉི་ཟླ་པདྨའི་གདན་སྟེང་ནས༔ དྲིན་ཅན་རྩ་བའི་བླ་མ་དགོངས་སུ་གསོལ་ལོ༔ ཆོས་དབྱིངས་རིག་འཛིན་རོལ་པའི་ཕོ་བྲང་ནས༔ ཁྲག་འཐུང་འཁོར་ལོ་བདེ་མཆོག་དགོངས་སུ་གསོལ་ལོ༔ མཁའ་སྤྱོད་རྣམ་པར་དག་པའི་ཕོ་བྲང་ནས༔ འབུམ་ཕྲག་ཡངས་པའི་མཁའ་འགྲོ་དགོངས་སུ་གསོལ་ལོ༔ རིག་འཛིན་རོལ་པའི་དུར་ཁྲོད་ཆེན་པོ་ནས༔ དུས་གསུམ་རིག་འཛིན་རྒྱ་མཚོ་དགོངས་སུ་གསོལ་ལོ༔ མཆོག་དང་ཐུན་མོང་གཉིས་ཀྱི་ཕོ་བྲང་ནས༔ ཡི་དམ་སྒྲུབ་པ་བཀའ་བརྒྱད་དགོངས་སུ་གསོལ་ལོ༔ བཀའ་དང་དམ་ཚིག་གཉན་པོའི་ཕོ་བྲང་ནས༔ གནས་ཡུལ་དུར་ཁྲོད་སྐྱོང་རྣམས་དགོངས་སུ་གསོལ་ལོ༔ ལེགས་ཉེས་སྟངས་འཛིན་དཀྱིལ་འཁོར་ཆེན་པོ་ནས༔ བཀའ་ཡི་ལྷ་སྲིན་སྡེ་བརྒྱད་དགོངས་སུ་གསོལ་ལོ༔ ཁྱེད་རྣམས་ལ་སྔར་བྱས་ལས་ཀྱི་གཏང་རག་གཏོང་ངོ་༔ ཕྱིས་བྱེད་ལས་ཀྱི་ཞུ་སྐྱེམས་འབུལ་ལོ༔ ད་ལྟ་ལས་ཀྱི་མཉེས་ཟས་འདྲེན་ནོ༔ དགྱེས་པར་མཛད་དུ་གསོལ་ལོ༔ བདག་ཅག་རིག་འཛིན་གྱི་རྣལ་འབྱོར་པ་རྣམས་ཀྱིས་དཀའ་བ་འཕྲག་ལ་འཁུར་ནས་ཁྱེད་བསྒྲུབ་བོ༔ ལྕི་བ་དང་དུ་བླངས་ནས་ཁྱེད་བསྒྲུབ་བོ༔ ལུས་སྲོག་འབེན་ལ་བཙུགས་ནས་ཁྱེད་བསྒྲུབ་བོ༔ བྲག་ཕུག་ཞྭ་ལྟར་གོན་ནས་ཁྱེད་བསྒྲུབ་བོ༔ ཤ་ཁྲག་གཟན་དུ་བོར་ནས་ཁྱེད་བསྒྲུབ་བོ༔ སུ་ལའང་མི་རེ་ཁྱེད་རྣམས་ལ་རེའོ༔ སུ་ལའང་མི་ལྟོས་ཁྱེད་རྣམས་ལ་བལྟོས་སོ༔ ཕྲག་པ་ལ་ཁྱེད་རྣམས་འཁུར་རོ༔ རྒྱལ་མཚན་ལ་ཁྱེད་རྣམས་འཛུག་གོ༔ ཡེ་ཤེས་ཀྱི་སྤྱན་གྱིས་གཟིགས་ཤིག༔ ལེགས་ཉེས་ཀྱི་སྟངས་ཤིག་བཟུང་དང་༔ བདག་ཅག་རྣལ་འབྱོར་སྒྲུབ་པ་པོ་རྣམས་ཀྱིས་ནི༔ དང་པོ་མ་ཉེས་སེམས་མ་ཉེས༔ བར་དུ་མ་ཉེས་ཁ་མ་ཉེས༔ ཐ་མར་མ་ཉེས་ལག་མ་ཉེས༔ དམ་ཉམས་ཀྱི་དགྲ་བོ་ཆེ་གེ་མོ་འདི་ཞེས་བྱ་བས་སངས་རྒྱས་ཀྱི་བསྟན་པ་བཤིགས་སོ༔ དཀོན་མཆོག་གི་དབུ་འཕང་དམད་དོ༔ སེམས་ཅན་ཡོངས་ལ་འཚེས་སོ༔ དཀར་པོ་དགེ་བ་བཅུ་ཡི་ལམ་ལ་བར་དུ་བཅད་དོ༔ ནག་པོ་མི་དགེ་བ་བཅུ་དང་དུ་བླངས་སོ༔ མཚམས་མེད་པ་ལྔ་ལ་ལོངས་སྤྱོད་དུ་བྱས་སོ༔ བདེན་པ་བརྒྱ་ལ་རྫུན་གྱིས་ལ་ཡོག་བརྒྱབ་བོ༔ ཆོས་བཞིན་སྤྱད་ཀྱང་སངས་རྒྱས་བདུད་དུ་ཕབ་བོ༔ རྩ་གསུམ་བསྒྲུབ་པའི་ལྷ་ལ་བདེན་མེད་ཟེར་རོ༔ རིག་འཛིན་རྣལ་འབྱོར་བདག་ལ་ལྷ་མེད་ཟེར་རོ༔ བཀའ་སྐྱོང་སྲུང་མ་རྒྱ་མཚོར་མཐུ་མེད་ཟེར་རོ༔ ལེགས་ཉེས་གཟིགས་ཤིག༔ དྲང་ཤན་ཕྱེས་ཤིག༔ རྩ་བརྒྱུད་ཀྱི་བླ་མ༔ ཡི་དམ་གྱི་ལྷ་ཚོགས༔ འབུམ་ཕྲག་གི་མཁའ་འགྲོ༔ ཆོས་སྐྱོང་གི་སྲུང་མ༔ ལྷ་ཆེན་མ་ཧཱ་དེ་ཝ༔ བཙུན་མོ་ཨུ་མ་དེ་ཝི༔ དཀར་པོ་ལྷ་ཡི་སྡེ་ཚོགས༔ ནག་པོ་བདུད་ཀྱི་སྡེ་ཚོགས༔ ཁྲོ་གཏུམ་གཟའ་ཡི་སྡེ་ཚོགས༔ གླེན་པ་ཀླུ་ཡི་སྡེ་ཚོགས༔ ནད་གཏོང་མ་མོའི་སྡེ་ཚོགས༔ འཆི་བདག་གཤིན་རྗེའི་སྡེ་ཚོགས༔ དམར་པོ་བཙན་གྱི་སྡེ་ཚོགས༔ ནོར་བདག་གནོད་སྦྱིན་གྱི་སྡེ་ཚོགས༔ ཕྱི་ཡི་ལྷ་མ་སྲིན་སྡེ་བརྒྱད༔ ནང་གི་ལྷ་མ་སྲིན་སྡེ་བརྒྱད༔ གསང་བའི་ལྷ་མ་སྲིན་སྡེ་བརྒྱད༔ སྦས་པའི་ལྷ་མ་སྲིན་སྡེ་བརྒྱད༔ ཡང་གཏེར་གྱི་ལྷ་མ་སྲིན་སྡེ་བརྒྱད༔ ལས་མྱུར་མགྱོགས་ཀྱི་ལྷ་མ་སྲིན་སྡེ་བརྒྱད༔ དྲག་པོ་སྔགས་ཀྱི་ལྷ་མ་སྲིན་སྡེ་བརྒྱད༔ བསྟན་པ་སྲུང་བའི་ལྷ་མ་སྲིན་སྡེ་བརྒྱད་དང་བཅས་པ་རང་རང་གི་གནས་ནས་སྐུར་བཞེངས་ཤིག༔ གནམ་ས་ཙམ་གྱི་ཞལ་གདོངས་ཤིག༔ གངས་རི་ཙམ་གྱི་མཆེ་བ་གཙིགས་ཤིག༔ གློག་དམར་ལྟ་བུའི་ལྗགས་སྐྱོངས་ཤིག༔ སྐུ་ཡི་ཤུགས་སྐྱེད་ཅིག༔ ནུས་པའི་རྩལ་ཕྱུངས་ཤིག༔ ཐུགས་ཀྱི་ཏིང་ངེ་འཛིན་གྱིས་དམོད་ཅིག༔ དཀོན་མཆོག་གི་བསྟན་དགྲ༔ སློབ་དཔོན་གྱི་སྐུ་དགྲ༔ མཆེད་ལྕམ་གྱི་སྤྱི་དགྲ༔ རྣལ་འབྱོར་གྱི་སྒོས་དགྲ༔ སྔ་དགྲ་དར་བ༔ ཕྱི་དགྲ་སེམས་པ༔ ད་དགྲ་སྡང་བ༔ གཟུགས་ཅན་གྱི་དགྲ༔ གཟུགས་མེད་ཀྱི་བགེགས༔ དམ་ཉམས་པའི་དགྲ་བོ་འཁོར་དང་བཅས་པའི་གནམ་གྱི་འཇུ་ཐག་ཆོད་ཅིག༔ ས་ཡི་བརྟན་ཕུར་ཕུད་ཅིག༔ སྲོག་གི་ཐག་པ་ཆོད་ཅིག༔ ཚེ་ཡི་འདུ་བྱེད་སྟུངས་ཤིག༔ སེམས་ཀྱི་མར་མེ་སོད་ཅིག༔ ལས་རླུང་གིས་རྒྱབ་ནས་ཕུལ་ཞིག༔ མུན་ནག་གིས་མདུན་ནས་སུས་ཤིག༔ ཁ་རུ་ལག་ཆུག་ཅིག༔ ཁོང་ནས་སྙིང་ཕྱུངས་ཤིག༔ ལྟག་ནས་བདུད་དང་སྤྲོད་ཅིག༔ གདོང་ནས་འོད་ཕྲོག་ཤིག༔ ཡར་ཀྱི་སྲོག་སྒོ་ཕྱེས་ཤིག༔ མར་གྱི་བདུད་སྒོ་ཕྱེས་ཤིག༔ སྟོད་ནས་ཚ་བ་མེ་ལྟར་འབར་དུ་ཆུག་ཅིག༔ སྨད་ནས་གྲང་བ་ཆུ་ལྟར་འཁྲུག་ཏུ་ཆུག་ཅིག༔ རླུང་མཁྲིས་དང་བད་ཀན་འཐབ་ཏུ་ཆུག་ཅིག༔ འདུ་བ་རྣམ་བཞི་ཁོང་ནས་སློངས་ཤིག༔ སྨྱོ་འབོགས་དང་བརྒྱལ་ནད་ཐོངས་ཤིག༔ འབྲུམ་ནད་དང་གླད་གཟེར་ཐོངས་ཤིག༔ གག་ལྷོག་དང་འབྲས་ནད་ཐོངས་ཤིག༔ ཕོ་གླང་དང་གཟེར་ནད་ཐོངས་ཤིག༔ བལ་ནད་དང་ཀླང་ཐབས་ཐོངས་ཤིག༔ མཛེ་ཤུ་དང་ཕོལ་མིག་ཐོངས་ཤིག༔ དུག་གསུམ་གྱིས་ཨར་ལ་གཏོད་ཅིག༔ མདའ་གྲི་དང་མདུང་གྲིར་སོད་ཅིག༔ རྟ་གྲི་དང་ལྕེབ་གྲིར་སོད་ཅིག༔ འཐིབ་གྲི་དང་རྦབ་གྲིར་སོད་ཅིག༔ མྱ་ངན་གྱི་འོ་དོད་འབོད་དུ་ཆུག་ཅིག༔ ཡན་ལག་རྣམས་བྲང་ལ་བརྡུང་དུ་ཆུག་ཅིག༔ སྨྲེ་སྔགས་དང་ཆོ་ངེ་འདོན་དུ་ཆུག་ཅིག༔ མི་རུང་བའི་ངན་ལྟས་ཐམས་ཅད་འཛོམ་དུ་ཆུག་ཅིག༔ མིག་འབྲས་ཐང་ལ་ཕོས་ཤིག༔ སྙིང་ཁྲག་ཧུབ་ཀྱིས་ཐོབ་ཅིག༔ ཀླད་ཁྲག་ཞོ་ལྟར་དཀྲུགས་ཤིག༔ ཕོ་རྒྱུད་མི་རབས་རྩད་ནས་ཆོད་ཅིག༔ མོ་རྒྱུད་ཕྲུ་མ་མངལ་ནས་སྐོམས་ཤིག༔ ཀླུ་མོ་ཞིང་གི་སྐྱེ་རྒྱུན་ཆོད་ཅིག༔ ཡུལ་མཁར་ཐལ་བ་རླུང་ལ་སྐུར་ཞིག༔ སྒོ་ནོར་བུ་དང་ཆུང་མ་ཕྲོལ་ཞིག༔ འཁོར་ཤིགས་ཚང་སྤྲུགས༔ སྙིང་ལ་ཆོས་སྐྱོང་གི་དཔའ་ཟས་གྱིས་ཤིག༔ གློ་མཆིན་ལ་བདུད་ཀྱིས་ཇུར་མིད་གྱིས་ཤིག༔ མིག་ལ་གཟའ་ཡི་ཧོམ་ཟོར་གྱིས་ཤིག༔ སོ་ལ་ཐེའུ་རང་གི་ཤྭ་རྡེལ་གྱིས་ཤིག༔ རྒྱུ་མ་ལ་བཙན་གྱི་ཞགས་པ་གྱིས་ཤིག༔ མཁལ་མ་ལ་འདྲེ་མོས་སྲང་རྡོ་གྱིས་ཤིག༔ པགས་པ་ལ་སྲིན་པོས་གཡང་གཞི་གྱིས་ཤིག༔ རུས་པ་ལ་བདུད་ཀྱི་ཁྲམ་མཁར་གྱིས་ཤིག༔ རྐང་པ་ལ་གཤིན་རྗེའི་དབྱུག་པ་གྱིས་ཤིག༔ ཐོད་པ་ལ་བདུད་ཀྱི་ཁ་ཕོར་གྱིས་ཤིག༔ ལོང་ཀ་ལ་རྒྱལ་པོས་དབུགས་རྐྱལ་གྱིས་ཤིག༔ ལག་པ་ལ་སྡེ་བརྒྱད་ཀྱིས་གཡབ་མོ་གྱིས་ཤིག༔ སྐྲ་ལ་སྲོག་གཅོད་ཀྱིས་བྱད་ཐག་གྱིས་ཤིག༔ ཁྲག་ལ་ལས་གཤིན་གྱི་འཐུང་ཆུ་གྱིས་ཤིག༔ ཤ་ལ་ཟ་བྱེད་ཀྱིས་ཧབ་ཐོབ་རྒྱོབ་ཅིག༔ རུས་མགོ་ལ་ལྷ་སྲིན་གྱི་གཟར་བུ་གྱིས་ཤིག༔ ལོ་དང་ཟླ་བར་མ་འགྱངས༔ ཞག་དང་ཟ་མར་མ་བཞག༔ ནམ་མཁའ་ལ་ཚད་མ་འཛུག༔ ཕྱི་མ་ལ་དུས་མ་འདེབས༔ སྐྱེ་ཤི་ལ་ཁག་མ་བསྙེད༔ ལས་དབང་ལ་ཐ་སྙད་དུ་མ་འདོགས་པར༔ མྱུར་དུ་སྒྲོལ་ལ་ལྷག་མ་མེད་པར་བཞེས་ཤིག༔ ཅེས་བརྗོད་དྲག་སྔགས་ཐུན་དང་གཡབ་མོ་གདབ༔ ལྷ་སྲིན་སྡེ་བརྒྱད་འགྱུ་བཟློག་བསྟུན་ནས་ཀྱང་༔ ཟོར་སྣ་དགྲ་བགེགས་མི་མཐུན་ཕྱོགས་སུ་བཏད༔ མི་ནད་ཡམས་ནད་དུས་ཀྱི་འཁྲུག་རྩོད་དང་༔ བྱད་མ་དགྲ་བགེགས་མཐའ་ཡི་དམག་དཔུང་རྣམས༔ བཟློག་འགྱུར་འདི་ལ་ཐེ་ཚོམ་ཡོད་རེ་ཀན༔ ས་མ་ཡཱ༔ རྒྱ་རྒྱ་རྒྱ༔ ཨེ་མ་སྔགས་འཆང་པདྨ་ཐོད་ཕྲེང་ངས༔ དམོད་བྱེད་དགྲ་བགེགས་འཇོམས་པའི་གཟེར་ཁ་འདི༔ ཕྱི་མའི་དུས་ཀྱི་བསྟན་འགྲོའི་དོན་དུ་བྲིས༔ སྤེལ་བར་ཕངས་ནས་རིན་ཆེན་གཏེར་དུ་སྦས༔ ལས་འཕྲོ་ཅན་གྱི་བུ་ལ་སྨོན་ལམ་བཏབ༔ སྲུང་མས་ཆོས་འདི་དུས་ལ་བབས་ཚེ་སྤྲོད༔ སྐལ་མེད་རྣམས་ལ་བྱ་ར་གྱིས་ཤིག་རྒྱ༔ ས་མ་ཡཱ༔ རྒྱ་རྒྱ་རྒྱ༔ གཏེར་རྒྱ༔ སྦས་རྒྱ༔ ཟབ་རྒྱ༔ གཉན་རྒྱ༔ གཏད་རྒྱ༔ ས་མ་ཡཱ༔ རྒྱ་རྒྱ་རྒྱ༔ སྤྲང་བན་ཉི་མ་གྲགས་པས་གཏེར་ནས་གདན་དྲངས་ཤིང་ཤོག་སེར་ལས་ཞལ་བཤུས་པའོ། །མངྒ་ལཾ།། །།