སྐྱེས་བུ་ཆེན་པོའི་བསྐུལ་བ་བསྡུས་པ།
བཀའ་རྫོགས་པ་ཆེན་པོ་བླ་མ་བདེ་མཆོག་འཁོར་ལོ་ལས༔ སྐྱེས་བུ་ཆེན་པོའི་བསྐུལ་བ་བསྡུས་པ་བཞུགས༔ དཔལ་ཆེན་པོ་ཧེ་རུ་ཀ་ལ་ཕྱག་འཚལ་ལོ༔ དམ་ཅན་སྐྱེས་བུ་ཆེན་པོ་ཡི༔ རླུང་འཁོར་འབྲི་བའི་ཟུར་གསལ་དུ༔ འཕྲིན་ལས་བཅོལ་བའི་རིམ་པ་ནི༔ འཁོར་ལོ་རླུང་ལ་བསྐོར་ནས་ཀྱང་༔ དམིགས་པ་གནད་བསྣུན་རོལ་མོ་འཁྲོལ༔ གཙོ་འཁོར་རྣམས་ལ་བཤོས་གཏོར་བཤམས༔ སྨན་རཀ་སྦྲེང་ཞིང་འདི་སྐད་དོ༔ ཧཱུྃ་བྷྱོ༔ ཉི་མ་ནུབ་ཕྱོགས་ཕ་ཀི་ནི༔ ལྕགས་རི་ནག་པོའི་ནང་ཤེད་ན༔ ལྕགས་མཁར་གནམ་དུ་ཟེངས་སེ་ཟེང་༔ འཇའ་ཚོན་སྣ་ལྔ་ལམས་སེ་ལམ༔ སྟེང་ན་དུག་སྤྲིན་ཐིབས་སེ་ཐིབ༔ ཁྲག་གི་རྒྱ་མཚོ་མེ་རེ་རེ༔ རླུང་ནག་འཚུབ་མ་ཚུབས་སེ་ཚུབ༔ གནམ་ལྕགས་ཐོག་མདའ་ཤ་ར་ར༔ རྒྱོབ་སོད་སྒྲ་སྐད་དི་རི་རི༔ སྐུ་མཁར་དེ་ཡི་ནང་ཤེད་ན༔ སྐྱེས་བུ་བཛྲ་ཐིག་ལེ་རྩལ༔ རྒྱལ་བ་རྣམས་ཀྱི་བསྟན་བསྲུང་བ༔ སྐུ་མདོག་ནག་པོ་མུན་པའི་མདོག༔ ཞལ་གཅིག་ཕྱག་ནི་གཉིས་པ་སྟེ༔ གཡས་པས་རྡོ་རྗེ་མདུང་དར་བསྣམས༔ གཡོན་པས་ཐོ་བ་བདུད་ཞགས་ཐོགས༔ ཞལ་ནས་བཤུ་འདེབས་ལྷངས་སེ་ལྷང་༔ ཤངས་ནས་རླུང་ནག་ཚུབས་སེ་ཚུབས༔ ལྗགས་ནས་གློག་དམར་ཁྱུགས་སེ་ཁྱུག༔ སྤྱན་ནས་མེ་འབར་ལྷབས་སེ་ལྷབ༔ སྐུ་ལ་རྡོ་རྗེའི་གོ་ཁྲབ་གསོལ༔ དབུ་ལ་ལྕགས་རྨོག་དང་རུས་བརྒྱན༔ མདའ་གཞུ་འཁོར་གསུམ་སྐེད་ལ་བསྐོར༔ དམ་ཉམས་དགྲ་ལ་རྒྱུག་པའི་ཚེ༔ བདུད་རྟ་ཆིབས་ནས་སྟོང་ཁམས་ཉུལ༔ ལས་ཀྱི་ཕོ་ཉ་མཛད་པའི་ཚེ༔ ཆིབས་སུ་སེངྒེ་དཀར་མོ་བཅིབས༔ གཙུག་ལག་སྐྱོང་ཞིང་དཀོར་བསྲུང་ཚེ༔ ཆིབས་སུ་ར་སྐྱེས་ཁམ་པ་བཅིབས༔ སྣ་ཚོགས་བསྒྱུར་བའི་རྫུ་འཕྲུལ་ཅན༔ མཐུན་པའི་དམ་རྫས་འདི་ཞེས་ལ༔ གང་ལ་དམིགས་པ་ཁྱེད་ཀྱིས་ཤེས༔ རྡུལ་ཕྲན་བཞིན་དུ་བརླག་པར་མཛོད༔ ཧཱུྃ༔ དགྱེས་སྡེ་ཡུམ་ཆེན་བསྟན་མ་སྨན༔ ཁ་རག་ཁྱུང་བཙུན་དམར་ནག་ཁྲོ༔ དགྲ་སྙིང་ཟ་ཞིང་སྟག་ལ་ཆིབས༔ དམར་གྱི་གཏོར་མ་འདི་བཞེས་ལ༔ དགྲ་བོའི་བདུན་རྒྱུད་རྩད་ནས་ཆོད༔ ཧཱུྃ༔ ཤར་ནས་ཚངས་པ་སྲོག་གི་བདག༔ དཀར་སེར་དགྲ་སྙིང་ཞལ་དུ་གསོལ༔ ཆིབས་སུ་རྔམ་བྱེད་འབྲུག་ལ་བཅིབས༔ ལྷོ་ནས་ཡ་མ་རཱ་ཛ་ནི༔ སེར་ནག་ལག་ན་ཁྲམ་ཤིང་ཐོགས༔ ཆིབས་སུ་མ་ཧེ་རུ་རིང་ཆིབས༔ ནུབ་ནས་ཀླུ་བདུད་ནག་པོ་ནི༔ སྔོ་ནག་བདུད་ཀྱི་ཞགས་པ་ཐོགས༔ ཆིབས་སུ་གདུག་པ་སྦྲུལ་ལ་ཆིབས༔ བྱང་ན་བདུད་པོ་རལ་དགུ་ནི༔ ནག་པོ་བཀྲག་མེད་བདུད་ཞགས་ཐོགས༔ ཆིབས་སུ་རླུང་ནག་འཚུབ་དམར་ཆིབས༔ ཤར་ལྷོར་ཡམ་ཤུད་དམར་པོ་ནི༔ བསེ་མདུང་བ་དན་དམར་པོ་ཐོགས༔ ཆིབས་སུ་བཙན་རྟ་དམར་པོ་བཅིབས༔ ལྷོ་ནུབ་དྲང་སྲོང་རཱ་ཧུ་ལ༔ ལྗང་གུ་རཱ་ཡི་མདའ་གཞུ་ཐོགས༔ ཆིབས་སུ་ཆུ་སྲིན་བརྔམ་པ་ཆིབས༔ ནུབ་བྱང་སྲིན་པོ་རེ་ཏི་ནི༔ སྨུག་ནག་རྒྱུ་མའི་ཞགས་པ་ཅན༔ ཆིབས་སུ་གློག་དམར་འཁྱུག་པ་ཆིབས༔ བྱང་ཤར་མ་མོ་ཁྲག་འཛག་མ༔ ནག་མོ་འཇིགས་བྱེད་དྲེལ་རྟ་ཆིབས༔ ཀུན་ཀྱང་དམག་ཆས་གོ་མཚོན་ཅན༔ ཞུབ་ཅན་སྟོང་སྒྲ་སི་ལི་ལི༔ མཚོན་གྱི་ཆར་པ་དགྲ་ལ་འབེབས༔ སྤྲུལ་པའི་བྱ་ཚོགས་ཀླད་ལ་ལྡིང་༔ རང་འདྲའི་སྤྲུལ་པ་འབུམ་འབུམ་འགྱེད༔ ཕོ་ཉ་ཟ་གསོད་གློག་ལས་མྱུར༔ སྟག་གཟིག་དོམ་དྲེད་འཕར་སྤྱང་འབུམ༔ དགྲ་ཤ་ཟ་ཞིང་དགྲ་ཁྲག་འཐུང་༔ མི་སྲུན་རབ་ཁྲོས་དྲག་རྩལ་ཅན༔ ལས་བྱེད་ཤ་ཟ་སྡེ་བརྒྱད་ཚོགས༔ དམར་གྱི་གཏོར་མ་འདི་བཞེས་ལ༔ དམིགས་པའི་དགྲ་བོ་ལས་ངན་འདི༔ ལྷ་སྲིན་སྡེ་བརྒྱད་དཔའ་ཟས་གྱིས༔ མེ་རླུང་མཚོན་གྱི་ཆར་པ་ཕོབ༔ ནད་དང་དུག་གི་རྐྱལ་པ་གཏོར༔ དོན་སྙིང་ཇུར་མིད་གྱིས་ལ་ཤོག༔ ཀླད་ཁྲག་ཁོང་སྙིང་འཇིབ་ལ་ཤོག༔ ཤ་ཟོ་ཁྲག་འཐུང་རུས་པ་མུར༔ ཏིལ་འབྲུ་ཙམ་ཡང་མེད་པར་གྱིས༔ ལྷག་མ་རྗེས་ཤུལ་མེད་པར་ཐོངས༔ བཅོལ་བའི་འཕྲིན་ལས་འགྲུབ་པར་མཛོད༔ ཅེས་བརྗོད་གཏོར་མ་འབུལ༔ མ་ཉེས་ཤགས་འདེབས་དམོད་བཅོལ་བྱ༔ རླུང་འཁོར་གྱི་རྩིབས་ལ་སྡེ་བརྒྱད་ཀྱི་གཟུང་གཅེར་བུ་ལ་སྐུ་མདོག་བསྐུལ་བ་འདི་ལྟར་འདེབས་ཞིང་ཞོན་པ་མེད་པ་འབྲིའོ༔ ས་མ་ཡཱ༔ ལར་རང་ཉེས་མི་ལ་ཐད་ན་ལ་ཡོག་འབྱུང་༔ དམ་རྫས་མ་ཚང་ན་ཚེ་ལ་གནོད༔ ལས་སྦྱོར་སྔ་ན་ཚུར་བཟློག་གོ༔ རྡོ་རྗེ་སློབ་དཔོན་མཆེད་ལྕམ་སོགས་གསང་སྔགས་ཀྱི་དམ་ཚིག་དང་ལྡན་ན་གྲིབ་ལྟར་འགྲོག༔ ཡུགས་གྲིབ་ཕོག་ན་འཕྲལ་ལ་འབྲལ༔ ས་མ་ཡཱ༔ རྒྱ་རྒྱ་རྒྱཿགཏེར་རྒྱ༔ སྦས་རྒྱ༔ ཟབ་རྒྱ༔ གཉན་རྒྱ༔ གཏད་རྒྱ༔ ས་མ་ཡཱ༔ རྒྱ་རྒྱ་རྒྱ༔ ཁོ་བོ་ཉི་མ་གྲགས་པས་གངས་རིའི་རྒྱལ་པོ་ཏེ་སེ་བདེ་ཆེན་ཕུག་ནས་ཤིང་མོ་ཡོས་ལོར་སྤྱན་དྲངས་པ་ས་ཕོ་རྟ་ལོ་ལ་ཤོག་སེར་ལས་ཕབ་པའོ། །སརྦ་མངྒ་ལཾ།