བླ་མ་བདེ་མཆོག་འཁོར་ལོའི་ཡན་ལག་ཆོས་ཚན་སྨད་ཆའི་སྐོར།

མཁའ་སྤྱོད་བདུད་འདུལ་མའི་སྒྲུབ་ཐབས།

བཀའ་རྫོགས་པ་ཆེན་པོ་བླ་མ་བདེ་མཆོག་ལོ་ལས༔ མཁའ་སྤྱོད་བདུད་འདུལ་མའི་སྒྲུབ་ཐབས་བཞུགས༔ དཔལ་ཧེ་རུ་ཀཿལ་ཕྱག་འཚལ་ལོ༔ མ་འོངས་འགྲོ་བ་རྗེས་འཇུག་དོན༔ བདུད་འདུལ་མཁའ་འགྲོའི་སྒྲུབ་ཐབས་ཤིག༔ ཡི་གེར་འདེབས་ནས་གཏེར་དུ་སྦ༔ ལས་འཕྲོ་ཅན་གྱིས་སྤྱོད་པར་ཤོག༔ ད་ནས་བཟུང་སྟེ་ལོ་རེ་བཞིན༔ དུས་དང་བསྐལ་བ་མར་མར་འགྲིབ༔ སངས་རྒྱས་བསྟན་པའི་ཐ་མ་ལ༔ བདུད་རྣམས་དགེ་སྦྱོང་ཆས་སུ་འོང་༔ ཕྱི་ཚུལ་སྟོན་པའི་ངུར་སྨྲིག་འཆང་༔ ནང་ཚུལ་མི་དགེ་བཅུ་ལ་སྤྱོད༔ ངན་གསུམ་ཁ་རྒྱས་བཟང་གསུམ་སྤྱུགས༔ ཧོར་སོགས་དུ་རུ་ཀཿརྣམས་དར༔ གངས་ཅན་བོད་ཀྱི་རྒྱལ་ཁམས་འདིར༔ དམག་འཁྲུག་ཁྲལ་སྣ་ཨར་ལས་མང་༔ བསྟན་འགྲོའི་བདེ་བ་ཟད་རྟགས་སུ༔ སློབ་དཔོན་སློབ་མར་གྱུར་ཚད་ཀྱིས༔ དམ་ཚིག་སེལ་ལ་དམར་གཡོས་རྒྱག༔ དམག་གི་རྒྱབ་གནོན་མཐུ་ཡིས་བྱེད༔ དེ་དུས་བསྟན་འཛིན་སྐྱེས་བུ་ཡིས༔ བདུད་ཀྱི་བྱད་མ་ལྷ་བསྲུང་རྣམས༔ རྣམ་པར་གཞོམ་ཞིང་བརླག་པའི་ཕྱིར༔ བདུད་འདུལ་མཁའ་འགྲོ་སེང་གདོང་མའི༔ སྒྲུབ་པ་འདི་བཞིན་ཉམས་སུ་ལོངས༔ བདུད་ཀྱི་གཡུལ་ལས་རྒྱལ་བར་བྱེད༔ དེ་ལ་ཡེ་ཤེས་མཁའ་འགྲོ་སེང་གདོང་མའི་སྒྲུབ་པ་ཉམས་སུ་ལེན་པའི་རིམ་པ་ནི༔ སྔོན་འགྲོ་དང་དངོས་གཞི་རྗེས་སོ༔ དང་པོ་སྔོན་དུ་འགྲོ་བ་ལ་དོན་གསུམ་སྟེ༔ ཕྱི་གནས་ཀྱི་སྟ་གོན༔ ནང་དཀྱིལ་འཁོར་གྱི་སྟ་གོན༔ གསང་བ་སྒྲུབ་རྫས་ཀྱི་སྟ་གོན་ནོ༔ ས་མ་ཡཱ༔ རྒྱ༔ དང་པོ་གནས་ཀྱི་སྟ་གོན་ནི༔ རྒྱུད་ལུང་ནས་བཤད་པའི་མ་མོ་མཁའ་འགྲོ་འདུ་བའི་གནས་སམ༔ དུར་ཁྲོད་དང་བྲག་ནག་རི་ནག་ཚང་ཚིང་འཁྲིགས་པའི་ཡུལ་ཏེ༔ མདོར་ན་འཇིགས་ཤིང་བརྔམ་པ༔ ལུང་གསུམ་འདུས་པའི་མདོའམ༔ སོག་པོ་ཁྲོས་པ་འདྲ་བའི་རིའམ༔ སྲིན་མོ་རལ་པ་བསིགས་འདྲའི་བྲག་སོགས་ཏེ༔ ཤིན་ཏུ་རྩུབ་པའི་ཡུལ༔ ཕྱིན་པ་ཙམ་གྱིས་སྐྱི་བུང་བྱེད་པའི་སར་ཕྱིན་ཏེ་གཉུག་མར་གནས་པ་ལ་གཏོར་མ་སྦྱིན༔ བདེན་པ་བརྗོད༔ ས་བརྟགས་བླང་སོགས་གཞུང་གང་རིགས་ལྟར་བྱས་ཏེ་བརྟག་པར་བྱའོ༔ ས་མ་ཡཱ༔ རྒྱ༔ གཉིས་པ་ནང་གི་དཀྱིལ་འཁོར་གྱི་སྟ་གོན་ནི༔ ད་ལ་ཆེ་ཆུང་གནས་ཁང་གི་རྒྱར་དཔག་པར་བཟོས་ཏེ༔ སྐྱང་ནུལ་སོགས་ལེགས་པར་བྱས་ཤིང་ནག་ལ་འཇམ་པ་རབ་ཏུ་མཁྲེགས་པར་བྱས་པ་ལ༔ དུག་སྣ་ཚོགས་ཀྱི་ཁུ་བ་དང་ཁྲག་སྣ་ཚོགས་ཀྱིས་ཆག་ཆག་གདབ་བོ༔ དེའི་ཁར་ཞིང་གི་རྒྱུ་མས་ཐིག་སྐུད་བྱ་ཞིང་༔ ཧཱུྃ་ཨེ་ཡཾ་ར་སུཾ་ཀེཾ་རཾ་བྷྲཱུྃ༔ ཅེས་བརྗོད་ཐིག་ནས་དྲངས་ཤིང་ལྟེ་བའི་ཆོས་འབྱུང་དམར་ནག་ཟླ་གམ་གསུམ་དང་ལྡན་པའི་མུ་ཁྱུད་ཀྱི་མཐར་འཁོར་ལོ་རྩིབས་བརྒྱད་པ་མཐིང་ནག་ཏུ་བཅད༔ སྒོ་གྲུ་རྟ་བབས་ཐོད་ར་མེ་རི་སོགས་སྤྱི་འགྲོས་ལྟར་བྲི་ཞིང་༔ དུར་ཁྲོད་རྡོ་ཚོན་གྱིས་ཁ་དོག་བསྒྱུར༔ ལྷག་ཆད་མེད་པར་བྲི་ཞིང་ཚུལ་དང་མཐུན་པར་བྱའོ༔ ས་མ་ཡཱ༔ རྒྱ༔ གསུམ་པ་གསང་སྒྲུབ་རྫས་ཀྱི་སྟ་གོན་ནི༔ དཀྱིལ་འཁོར་དེའི་དབུས་སུ་བདུད་འདུལ་ཡེ་ཤེས་ཀྱི་མཁའ་འགྲོ་མ་སེང་གེའི་གདོང་པ་ཅན་གྱི་སྐུ༔ རབ་རིན་པོ་ཆེ་ལས་གྲུབ་པ༔ འབྲིང་དུར་ཁྲོད་ཀྱི་ས་རྡོ་ལ་བཟོས་པ༔ ཐ་ནའང་མཐིང་ནག་གི་དར་རམ་རས་ལ་ལྷ་བཟོ་མཁས་པས་མངོན་རྟོགས་ལྟར་བཞེངས་པ་ལ༔ རབ་ཏུ་གནས་ཤིང་བསྙེན་བསྒྲུབ་བསྲུང་བཟློག་བསད་པ་སོགས་ཀྱི་སྔགས་རྣམས་སིན་དྷུ་རའི་ཁུ་བས་བྲིས་པ་དར་ཚོན་ལྔའི་ན་བཟའ་དང་བཅས་པ་དབུས་སུ་འགོད༔ སྐུ་གཟུགས་དེའི་མདུན་དུ་སྦ་ལྕགས་ཚིགས་གསུམ་ལ་བུ་མོ་མགོ་གཙང་གི་ལྕང་ལོ་ལ་མགྲོན་བུ་དང་མེ་ལོང་གིས་བརྒྱན་པ༔ དར་སྣ་ལྔའི་ཅོད་པན་དང་བཅས་པ་བཏགས༔ ཟ་འོག་གི་ཁུག་མའི་ནང་དུ་སྨན་སྣ་ལྔ༔ འབྲུ་སྣ་ལྔ༔ རིན་ཆེན་ལྔ༔ དྲི་བཟང་གི་སྤོས་སྣ་ལྔ༔ སྙིང་པོ་ལྔ༔ གཙང་མའི་རཀྟ༔ གནས་ཆེན་ཙ་རི་ཏྲའི་སིནྡྷུ་ར༔ བླ་རྡོའི་ཙཀྲ་རྣམས་གཞུག་པའི་ཁུག་མ་སྦ་ལྕགས་གི་མགུལ་དུ་བཏགས་པ་གཟུགས༔ སྐུ་དེའི་རྒྱབ་ཏུ་ཁ་ཊྭཱྃ་ག་མཚན་ཉིད་དང་ལྡན་པ་ཞིག་ལ༔ ཟངས་ཀྱི་གྲི་གུག༔ ཐོད་པའི་ཌཱ་མ་རུ༔ མི་རྐང་གི་གླིང་བུ༔ མི་མགོའི་ཕྲེང་བ༔ མི་ལྤགས་ཀྱི་གཡབ་མོ༔ ལྕང་ལོ་ཅན་གྱི་བྷནྡྷ་རྣམས་ཀྱིས་བརྒྱན་པ་འགོད༔ སྐུ་དེའི་གཡས་སུ་སྨན་མཆོད༔ གཡོན་དུ་རཀྟ༔ མདུན་དུ་བྷནྡྷའི་སྣོད་དུ་བཤོས་བུ་གཙོ་འཁོར་དགུ་པ་ལ་ཤ་སྣ་སྙིང་སྣ་བསམ་གྱིས་མི་ཁྱབ་པས་བརྒྱན་པ་བཤམས༔ གཞན་ཡང་མཐའ་སྐོར་རྣམས་སུ་དབང་པོའི་མེ་ཏོག༔ ཞུན་ཆེན་གྱི་མར་མེ༔ གསུར་ཆེན་གྱི་བདུག་སྤོས༔ རཀྟའི་ཡོན་ཆབ༔ དྲི་ཆུའི་བྱུག་པ༔ དྲི་ཆེན་གྱི་ཞལ་ཟས༔ རྐང་གླིང་གི་རོལ་མོ༔ བསད་པའི་ཚོགས་ཤཿ མྱོས་པའི་ཚོགས་ཆང་༔ མདོར་ན་དབང་དྲག་ལས་ཀྱི་མཆོད་རྫས་ཅི་འབྱོར་ཚད་དུ་བསག་གོ༔ ས་མ་ཡཱ༔ རྒྱ༔ གཉིས་པ་དངོས་གཞིའི་རིམ་པ་ལ་གསུམ་སྟེ༔ ལྷ་པསྒོམ་པ་དང་༔ སྔགས་བཟླ་བ་དང་༔ ལས་ལ་སྦྱོར་བའོ༔ ས་མ་ཡཱ༔ རྒྱ༔ དང་པོ་ལྷ་སྒོམ་པ་ལ༔ དེ་བཞིན་ཉིད་ཀྱི་ཏིང་ངེ་འཛིན་ནི༔ ཆོས་ཐམས་ཅད་རྣམ་པར་དག་པ་སྐྱེ་བ་མེད་པའི་དབྱིངས་སྟོང་པ་ཉིད་དུ་བསྒོམ༔ དེ་ནས་ཀུན་ཏུ་སྣང་བའི་ཏིང་ངེ་འཛིན་ནི༔ སྐྱེ་བ་མེད་པའི་དབྱིངས་ལས༔ འགག་མེད་ཀྱི་རོལ་པ་ཁམས་གསུམ་གྱི་སེམས་ཅན་ལ་ཁྱབ་པའི་སྙིང་རྗེ་ཆེན་པོ་བསྒོམ༔ དེ་ནས་རྒྱུ་ཡི་ཏིང་ངེ་འཛིན་ནི༔ འགག་མེད་ཀྱི་རང་གདངས་གང་འདུལ་གྱི་འགྲོ་བ་སྒྲོལ་བའི་ཕྱིར་དུ༔ རང་གི་སེམས་ཉིད་ཀྱི་ངོ་བོ་གནམ་ལྕགས་ལས་གྲུབ་པའི་གྲི་གུག་གི་ལྟེ་བར་ས་བོན་ཡི་གེ་ཧཱུྃ་མཐིང་ནག་གཟི་བརྗིད་དང་ལྡན་པ་ཞིག་ཏུ་བསྒོམ༔ དེ་ནས་འབྱུང་བ་རིམ་བརྩེགས་སྒོམ་པ་ནི༔ ཐུགས་ཀྱི་ས་བོན་ཡི་གེ་ཧཱུྃ་མཐིང་ནག་ལས༔ འོག་གི་ཕྱོགས་སུ་ཨེ་མཐིང་ནག་ཞིག་ཆད་པས༔ ནམ་མཁའ་མཐའ་དབུས་མེད་པར་ཁྱབ་པར་བསྒོམ༔ ནམ་མཁའ་ཀུན་ཏུ་བཟང་མོའི་མཁའ་ཀློང་གྲུ་གསུམ་པའི་རྣམ་པ་ཤིན་ཏུ་རྒྱ་ཁྱོན་གྱིས་བརྒྱན་པའི་སྟེང་དུ༔ ཧཱུྃ་ལས་ནམ་མཁའི་སྟེང་དུ་ཡཾ་འཕྲོས་པ་ལས༔ རླུང་གི་ད་ལ་ལྗང་ནག་ཡུམ་དམ་ཚིག་སྒྲོལ་མའི་མཁའ་ཀློང་གི་རང་བཞིན་དུ་བསྒོམ༔ ཧཱུྃ་ལས་ར་འཕྲོས་པས་རླུང་གི་སྟེང་དུ་ཁྲག་གི་རྒྱ་མཚོ་དམར་པོ་ཟླུམ་པོ་ཆགས་པ་མེད་པར་ཡུམ་མཱ་མ་ཀིའི་མཁའ་ཀློང་གི་རང་བཞིན་དུ་བསྒོམ༔ ཧཱུྃ་ལས་སུྂ་འཕྲོས་པས་ཁྲག་གི་རྒྱ་མཚོའི་སྟེང་དུ་ཞིང་ཆེན་གྱི་ས་གཞི་སྲ་ལ་རབ་ཏུ་བརྟན་པ་ཡུམ་སངས་རྒྱས་སྤྱན་མའི་མཁའ་ཀློང་གི་རང་བཞིན་དུ་བསྒོམ༔ ཧཱུྃ་ལས་རཾ་འཕྲོས་པས་མེའི་ད་ལ་དམར་ནག་གྲུ་གསུམ་རབ་ཏུ་འཁྱིལ་བ་ཡུམ་གོས་དཀར་མོའི་མཁའ་ཀློང་གི་རང་བཞིན་དུ་བསྒོམ༔ ཧཱུྃ་ལས་ཀེཾ་འཕྲོས་པས་ཀེང་རུས་ཀྱི་རི་རབ་སོགས་ཁ་གྱེན་དུ་བསྟན་པ༔ ཁྲག་གི་རྒྱ་མཚོའི་ནང་དུ་རྩ་བ་ནུབ་པ༔ རྐེད་པ་ལས་ཡེ་ཤེས་ཀྱི་ཉི་ཟླ་འཆར་བར་བསྒོམ་མོ༔ དེ་ནས་གཞལ་ཡས་ཁང་བསྒོམ་པ་ནི༔ ཧཱུྃ་ལས་རི་རབ་གྱི་སྟེང་དུ་བྷྲཱུྃ་འཕྲོས་པས་བྷནྡྷ་འབར་བའི་གཞལ་ཡས་ཁང་༔ ཐོད་རློན་གྱི་རྩིགས་པ་ལ་ཐོད་སྐམ་གྱིས་ཁ་བད་བྱས་པ༔ རྙིད་བ་མང་པོས་དྲ་བ་དྲ་ཕྱེད་བྱས་པ༔ རོའི་ཀ་བ་ལ་ཞིང་ལྤགས་ཀྱིས་ཐོག་ཕུབ་པ་མི་རོ་མང་པོའི་རྒྱལ་མཚན་དང་མི་ལྤགས་ཀྱི་བ་དན་ལ་མི་སྐྲའི་ལན་ཕྲན་མི་མགོ་སྐམ་པོའི་ཏོག་གིས་བརྒྱན་པ་མང་པོ་ཕྱོགས་ཕྱོགས་སུ་བཙུགས་པ༔ གྲུ་བཞི་སྒོ་བཞི་རྟ་བབས་བཞི་བཞི་དང་ལྡན་ཞིང་ཚད་མེད་པའི་བཀོད་པས་ཡོངས་སུ་བརྒྱན་པ༔ ནང་རོལ་དབང་པོ་སྣ་ཚོགས་ཀྱིས་ལྡ་ལྡི་དང་འཕན་གདུགས་དྲ་བ་ར་བར་བྲེས་པ། དེའི་ཕྱི་རོལ་དུ་ཐོད་ཕྲེང་མེ་རིས་བསྐོར་བ༔ དེའི་ཕྱི་རོལ་དུ་དུར་ཁྲོད་བརྒྱད་ཀྱིས་བསྐོར་བར་བསྒོམ་མོ༔ གཞལ་ཡས་ཁང་དེའི་དབུས་སུ་ཆོས་འབྱུང་དམར་ནག་ཟླ་གམ་གསུམ་ལྡན་མུ་ཁྱུད་ཀྱིས་མཚན་པའི་མཐར་འཁོར་ལོ་རྩིབས་བརྒྱད་པའི་མཐར་ཐོད་རས་བསྐོར་བར་བསྒོམ༔ དེ་ནས་གདན་བསྐྱེད་པ་ནི༔ ཧཱུྃ་ལས་འོད་འཕྲོས་པས་ཆོས་འབྱུང་གི་དབུས་སུ་དྲེགས་པ་ཕོ་མོའི་སྟེང་དུ་ཉི་ཟླ་པད་གདན་བསམ༔ རྩིབས་བརྒྱད་ལ་རོ་གདན་བརྒྱད༔ སྒོ་བཞི་ལ་རོ་གདན་བཞི་བསྒོམ་མོ༔ དེ་ནས་ལྷ་བསྐྱེད་པ་ནི༔ གཞལ་ཡས་ཁང་གི་དབུས་ཆོས་འབྱུང་འབར་བའི་ཀློང་རུམ་དུ་གདན་གྱི་ཁར་རང་གི་སེམས་ཉིད་ཀྱི་ངོ་བོ་ཡི་གེ་ཧཱུྃ་མཐིང་ནག་གཟི་བརྗིད་དང་ལྡན་པ་དེ་ཁྲ་ཐབས་སུ་བབས་པ་ལས་འོད་ཟེར་འཕྲོས༔ འཕགས་པ་མཆོད༔ སེམས་ཅན་ཐམས་ཅད་ཀྱི་དོན་བྱས༔ དུས་གསུམ་གྱི་སངས་རྒྱས་ཁྲོ་བོ་ཁྲོ་མོ་མ་མོ་མཁའ་འགྲོ་ཐམས་ཅད་ཀྱི་ཐུགས་རྗེ་དང་གཟི་བརྗིད་ནུས་སྟོབས་ཡོན་ཏན་ཐམས་ཅད་ཚུར་བསྡུས༔ ཡི་གེ་ཧཱུྃ་ལ་ཐིམ་པ་ལས་གཟི་བརྗིད་ཆེས་ཆེར་འབར་ཞིང་དེ་ལས་འོད་འཕྲོས་ཚུར་འདུས་པས་བདུད་བདུལ་མཁའ་འགྲོ་སེང་གེའི་གདོང་པ་ཅན་ཞལ་གཅིག་ཕྱག་གཉིས་སྐུ་མདོག་མཐིང་ནག་ཏུ་འབར་བ༔ ཞལ་གདངས་ཤིང་ལྗགས་འདྲིལ་བ༔ མཆེ་བ་རབ་ཏུ་གཙིགས་པ༔ རལ་བ་ཁམས་ནག་སྤྲིན་ལྟར་དུ་གཏིབས་པ༔ སྤྱན་གསུམ་སྡང་མིག་ཏུ་བལྟ་བ༔ སྨ་ར་དང་སྨིན་མ་ལས་མེ་སྟག་ཏུ་འཕྲོ་བ༔ ཕྱག་གཡས་འཁོར་ལོས་མཚན་པའི་གྲི་གུག་ནམ་མཁའ་ལ་འཕྱར་བ༔ གཡོན་ལྕང་ལོས་མཚན་པའི་ཐོད་ཁྲག་ཐུགས་ཀར་བསྣམས་པ༔ ཞབས་གཡས་བསྐུམ་པའི་རྟིང་པ་བྷ་ག་ལ་གཏད་ཅིང་གཡོན་བརྐྱང་བ༔ གྲུ་མོ་གཡོན་དུ་ཡབ་ཧེ་རུ་ཀཿསྦས་པའི་ངོ་བོ་རྡོ་རྗེ་ཁ་ཊྭཱཾ་ག་ལ་བདེ་བར་འཁྱུད་པ༔ བཅུ་དྲུག་ལང་ཚོ་རབ་ཏུ་རྒྱས་པའི་ཉམས་བག་ཅན༔ ནུ་མ་འབུར་ཞིང་བྷ་ག་རབ་ཏུ་རྒྱས་པ༔ ཁྲོ་ལ་གཏུམ་པ༔ དཔའ་ལ་སྒེག་པའི་ཉམས་དང་ལྡན་པ་ལ་དུར་ཁྲོད་ཀྱི་རུས་རྒྱན༔ མི་ལྤགས་ཀྱི་གཡང་གཞི༔ གླང་ཆེན་གྱི་ཀོ་རློན༔ གཟིག་ལྤགས་ཀྱི་ཤམ་ཐབས༔ སྦྲུལ་རིགས་ལྔའི་ཆུན་པོ༔ ཁྲག་གི་ཐིག་ལེ༔ ཞག་གི་སོ་རིས༔ ཐལ་ཆེན་གྱི་ཚོམ་བུ༔ མི་མགོའི་ཕྲེང་བ༔ དར་སྣ་ཚོགས་ཀྱི་ཅོད་པན་འཕུར་ཞིང་མེ་རི་དམར་ནག་འབར་བའི་ཀློང་དཀྱིལ་དུ་བཞུགས་པར་བསྒོམ་མོ༔ རིགས་བདག་བསྐྱེད་པ་ནི༔ དེའི་སྤྱི་གཙུག་ཏུ་རྡོ་རྗེ་དྲག་པོ་རྩལ་མཐིང་ནག་རབ་ཏུ་ཁྲོས་པ༔ ཞལ་གཅིག་ཕྱག་གཉིས་རྡོ་རྗེ་སྡིག་མཛུབ་ཅན༔ ཡུམ་རྡོ་རྗེ་ཕག་མོ་དམར་མོ་དང་འཁྲིལ་བ༔ དུར་ཁྲོད་ཀྱི་ཆས་དང་ལྡན་ཞིང་རྟ་ཕག་གི་ངུར་སྒྲ་སྒྲོགས་པ༔ མེ་རི་འབར་བའི་ཀློང་དུ་དོར་སྟབས་ཀྱི་ཞབས་གཉིས་པད་ཉི་དང་རོ་གདན་ལ་བཞུགས་པར་བསྒོམ་མོ༔ དེ་ནས་འཁོར་བསྐྱེད་པ་ནི༔ གཙོ་མོའི་ཐུགས་ཀའི་ཕྱག་མཚན་དང་ས་བོན་བཅས་པ་ལས་འོད་ཟེར་འཕྲོས་པའི་ཆ་ལས༔ ཆོས་འབྱུང་དམར་ནག་ཟླ་གམ་གསུམ་ལྡན་གྱི་ཕྱི་རོལ་འཁོར་ལོ་རྩིབས་བརྒྱད་པའི་སྟེང་དུ༔ ཧ་རི་ནི་སའི་ཡིག་འབྲུ་རྣམས་འཕྲོས༔ གནས་གྱུར་པ་ལས་ཤར་དུ་རྡོ་རྗེ་མཁའ་འགྲོ་དཀར་མོ་གཡས་པས་གནམ་ལྕགས་ཀྱི་འཁོར་ལོ་ནམ་མཁར་འཕྱར་བ༔ ལྷོར་རིན་ཆེན་མཁའ་འགྲོ་སེར་མོ་གཡས་གནམ་ལྕགས་འབར་བའི་ཁ་ཊྭཱྃ་ག་བསྣམས་པ༔ ནུབ་ཏུ་པདྨ་མཁའ་འགྲོ་དམར་མོ་གཡས་བསྐལ་པའི་མེ་དཔུང་བསྣམས་པ༔ བྱང་དུ་ལས་ཀྱི་མཁའ་འགྲོ་ལྗང་མོ་གཡས་གནམ་ལྕགས་ཀྱི་རལ་གྲི་བསྣམས་པ༔ གཡོན་ཐམས་ཅད་ཐོད་པ་ཁྲག་གིས་བཀང་བ་ཐུགས་ཀར་བསྣམས་པ༔ ཀུན་ཀྱང་གར་སྟབས་འགྱིང་བག་དང་ལྡན་ཞིང་༔ རལ་པའི་ཐོར་ཅོག་ལ་ཐོད་སྐམ་དང་རིན་པོ་ཆེའི་རྩེ་བྲན་གྱིས་བརྒྱན་ཞིང་དུར་ཁྲོད་ཀྱི་ཆས་ཐམས་ཅད་རྫོགས་པ༔ ཞལ་གདངས་ཤིང་ལྗགས་འདྲིལ་བ་མཆེ་བ་རབ་ཏུ་གཙིགས་ཤིང་སྨ་ར་དང་སྨིན་མ་གློག་ལྟར་འཁྱུག་པ༔ སྤྱན་གསུམ་སྡང་མིག་ཏུ་བགྲད་དེ་ཁམས་གསུམ་དབང་དུ་བསྡུད་ཅིང་སྲིད་གསུམ་ཟིལ་གྱིས་གནོན་པ་དྲག་ཏུ་ཁྲོས་པའི་སྐུ་རུ་བསྒོམ་མོ༔ མཚམས་ཀྱི་རྩིབས་བཞིའི་སྟེང་དུ་རིམ་བཞིན་ས་བོན་ཡི་གེ་མ་བཞི་ཧཱུྃ་ལས་འཕྲོས་པ་ལས༔ ཤར་ལྷོར་དམ་ཚིག་མཁའ་འགྲོ་དཀར་ནག་ཕྱེད་མ་ཕྱག་གཉིས་ན་ཉི་ཟླ་ཆ་ལང་རྡེབ་པ༔ ལྷོ་ནུབ་ཏུ་སྣ་ཚོགས་མཁའ་འགྲོ་སེར་ནག་ཕྱག་གཉིས་ན་གསེར་གྱི་འཁོར་ལོ་རྩིབས་སྟོང་དང་ལྡན་པ་རྡེབ་པ༔ ནུབ་བྱང་ཤ་ཟ་མཁའ་འགྲོ་དམར་ནག་ཕྱག་གཉིས་ན་ཟངས་ཀྱི་འཁོར་ལོ་རྩིབས་སྟོང་དང་ལྡན་པ་རྡེབ་པ༔ བྱང་ཤར་དུ་འཇིག་རྟེན་མཁའ་འགྲོ་ལྗང་ནག་ཕྱག་གཉིས་ན་གནམ་ལྕགས་ཀྱི་འཁོར་ལོ་རྩིབས་སྟོང་ཆ་ལང་དུ་རྡེབ་པ༔ ཀུན་ཀྱང་ཕྱེད་གཟུགས་ཅན་ཞལ་གཅིག་ཕྱག་གཉིས་སྤྱན་གསུམ་དང་ལྡན་པ༔ ཞབས་གཉིས་གར་སྟབས་སུ་བཞུགས་པ༔ རྒྱན་དང་ཆ་ལུགས་རིགས་བཞིའི་མཁའ་འགྲོ་ལྟར་ལ་རབ་ཏུ་ཁྲོས་པར་བསྒོམ་མོ༔ སྒོ་མ་བསྐྱེད་པ་ནི༔ ཛཿཧཱུྃ་བཾ་ཧོཿབཞིའི་ཡིག་འབྲུའི་འཕྲོ་འདུ་ལས༔ ཤར་སྒོ་ཁ་གདོང་མ་དཀར་མོ་གཡས་ཤེལ་གྱི་ཅང་ཏེའུ་དང་གཡོན་ཤེལ་གྱི་ལྕགས་ཀྱུ་བསྣམས་པ༔ ལྷོ་སྒོར་ཕག་གདོང་མ་སེར་མོ་གཡས་གསེར་གྱི་ཅང་ཏེའུ་དང་གཡོན་གསེར་གྱི་ཞགས་པ་བསྣམས་པ༔ ནུབ་སྒོར་ཁྱི་གདོང་མ་དམར་མོ་གཡས་ཟངས་ཀྱི་ཅང་ཏེའུ་དང་གཡོན་ཟངས་ཀྱི་ལྕགས་སྒྲོག་བསྣམས་པ༔ བྱང་སྒོ་འུག་གདོང་མ་ལྗང་མོ་གཡས་གཡུའི་ཅང་ཏེའུ་དང་གཡོན་དངུལ་གྱི་དྲིལ་བུ་བསྣམས་པ༔ ཀུན་ཀྱང་ཞལ་གཅིག་ཕྱག་གཉིས་དོར་སྟབས་སུ་འགྱིང་པ་གནས་ལྔར་རུས་པའི་རྒྱན་གྱིས་བརྒྱན་ཞིང་ཁ་ཊྭཱྃ་ག་མཆན་དུ་བཅུག་པ༔ གཅེར་བུ་ནུ་མ་དང་བྷ་ག་རྒྱས་ཤིང་རལ་པ་བསིགས་པར་བསྒོམ་མོ༔ དེ་ཡན་དམ་ཚིག་གི་ལྷ་བསྐྱེད་པའོ༔ དེ་ནས་སྤྱན་འདྲེན་པ་ནི༔ བདུད་འདུལ་དཔལ་གྱི་མཁའ་འགྲོའི་ལྷ་ཚོགས་ཐམས་ཅད་ཀྱི་གནས་གསུམ་ལ་ཡིག་འབྲུ་གསུམ་གྱིས་མཚན་པ་ལས༔ འོད་ཟེར་འཕྲོས་པས་འོག་མིན་དང་མཁའ་སྤྱོད་དུར་ཁྲོད་གནས་ཡུལ༔ ཁྱད་པར་ཨོ་རྒྱན་མཁའ་འགྲོའི་གླིང་ནས་བདུད་འདུལ་དཔལ་གྱི་མཁའ་འགྲོའི་ལྷ་ཚོགས་ཐམས་ཅད་སྤྲིན་འཁྲིགས་པ་ལྟར་རམ་ཁ་ཆར་བུ་ཡུག་འཚུབ་པ་ལྟར་བྱོན་པར་བསམ་མོ༔ དེ་ནས་བཞུགས་སུ་གསོལ་བ་ནི༔ དམ་ཚིག་གི་ལྷ་ཚོགས་དང་ཡེ་ཤེས་ཀྱི་ལྷ་ཚོགས་གཉིས་ཆུ་དང་འོ་མ་འདྲེས་པ་ལྟར་གཉིས་སུ་མེད་པར་ཐིམ་པ་ལས༔ མཆོག་ཐུན་གྱི་དངོས་གྲུབ་མ་ཐོབ་བར་བརྟན་པར་བཞུགས་སུ་གསོལ་བར་བསམ་མོ༔ དེ་ནས་ཕྱག་འཚལ་བས་གཞལ་ཡས་ཁང་གི་སྒོ་བཞི་ནས་མཁའ་འགྲོ་མ་བཞིས་གར་དང་ཕྱག་རྒྱས་ཕྱག་འཚལ་ཏེ་ཡེ་ཤེས་དང་དམ་ཚིག་པ་འདུ་འབྲལ་མེད་པར་ཕྱག་འཚལ་ལོ༔ དེ་ནས་མཆོད་པ་འབུལ་ཏེ༔ གཟུགས་ཀྱི་ལྷ་མོས་མེ་ལོང་༔ སྒྲ་ཡི་ལྷ་མོས་པི་ཝང་༔ དྲི་ཡི་ལྷ་མོས་སྤོས་ཁང་༔ རོ་ཡི་ལྷ་མོས་ཞལ་ཟས༔ རེག་བྱའི་ལྷ་མོས་ན་བཟའ་སྟེ་ཕྱིའི་འདོད་ཡོན་ལྔ་དང་༔ གཟུགས་དང་༔ ཚོར་བ་དང་༔ འདུ་ཤེས་དང་༔ འདུ་བྱེད་དང་༔ རྣམ་པར་ཤེས་པ་ལ་སོགས་ཏེ་ཕུང་པོ་ལྔ་དང་༔ སེམས་དང་ནམ་མཁའ༔ ཤ་དང་རུས་པ༔ དྲོད་དང་མེ༔ ཁྲག་དང་ཆུ་སེར༔ དབུགས་དང་རླུང་སྟེ་འབྱུང་བ་ལྔ་དང་༔ བྱང་སེམས་དྲི་ཆེན་ཤ་ཆེན་རཀྟ་དྲི་ཆུ་སྟེ་བདུད་རྩི་ལྔ་དང་༔ མི་ཤ་རྟ་ཤ་གླང་ཆེན་ཤ་ཁྱི་ཤ་བ་ལང་གི་ཤ་སྟེ་ཤ་ལྔ་དང་༔ གཏི་མུག་གི་རང་བཞིན་ཤ་ཆེན༔ ཞེ་སྡང་གི་རང་བཞིན་རུས་པ༔ འདོད་ཆགས་ཀྱི་རང་བཞིན་ཁྲག༔ ང་རྒྱལ་གྱི་རང་བཞིན་ཀླད་པ༔ ཕྲག་དོག་གི་རང་བཞིན་མཁྲིས་པ་སྟེ་དུག་ལྔ་དབྱིངས་སུ་བསྒྲལ་བའི་མཆོད་པ་དང་༔ གཟུགས་སྣང་སྐུ༔ སྒྲ་གྲག་གསུང་༔ དྲན་རྟོག་ཐུགས་ཏེ་སྣང་སྲིད་འཁོར་འདས་ཀྱི་ཆོས་ཐམས་ཅད་སྒོ་གསུམ་གྱི་རང་མདངས་ལས་རང་ཤར་གྱི་ངང་ནས་རང་གྲོལ་དུ་བདུད་འདུལ་མཁའ་འགྲོའི་ལྷ་ཚོགས་ལ་མཆོད་དོ༔ དེ་ནས་བསྟོད་པ་བྱས་པས༔ ཡེ་ཤེས་མཁའ་འགྲོ་བདུད་འདུལ་མའི་ལྷ་ཚོགས་ཐམས་ཅད་རབ་ཏུ་དགྱེས་ཤིང་རང་དང་གཉིས་སུ་མེད་པར་བསམ་མོ༔ ས་མ་ཡཱ༔ རྒྱཿ གཉིས་པ་སྔགས་བཟླ་བ་ནི༔ བདག་དང་མདུན་བསྐྱེད་གཉིས་སུ་མེད་པར་སྐད་ཅིག་གི་ཡེ་ཤེས་དབྱིངས་ཀྱི་མཁའ་འགྲོ༔ དམ་ཚིག་ལས་ཀྱི་དྷཀྐི་བདུད་འདུལ་སེང་གེའི་གདོང་ཅན་གྱི་ལྷ་ཚོགས་སུ་ལྷམ་མེ་ལྷན་ནེ༔ མེ་ལོང་གི་གཟུགས་བརྙན་དང་ཆུའི་ཟླ་བ་ལྟར་སྟོང་ལ་གསལ་བ༔ གསལ་ལ་སྟོང་པ༔ སྟོང་གསལ་གཉིས་སུ་མེད་པ༔ མཚན་མར་འཛིན་པའི་དྲི་མ་ངོ་བོ་ཉིད་དུ་ཡེ་དག་ཏུ་གསལ་བའི་ལྷ་ཚོགས་ཐམས་ཅད་ཀྱི་སྤྱི་གཙུག་ཏུ་འཁོར་ལོ་རྩིབས་བཞིའི་སྟེང་དུ་ཨཱོཾཿ མགྲིན་པར་པདྨ་འདབ་བཞིའི་སྟེང་དུ་ཨཱཿདམར་པོ༔ སྙིང་གར་རྡོ་རྗེ་རྒྱ་གྲམ༔ དེའི་སྟེང་དུ་ཉི་མའི་དཀྱིལ་འཁོར༔ དེའི་སྟེང་དུ་གཙོ་མོ་ལ་འཁོར་ལོས་མཚན་པའི་གྲི་གུག༔ འཁོར་བཞི་ལ་རང་རྟགས་ཀྱིས་མཚན་པའི་གྲི་གུག་གི་ལྟེ་བར་གཙོ་མོ་ལ་ཧཱུྃ༔ འཁོར་བཞི་ལ་ཧ་རི་ནི་ས་བཞིས་མཚན་པར་བསམ་མོ༔ རིགས་བདག་བླ་མ་དབང་གི་ཐུགས་ཀར་ཧཱུྃ༔ ཡུམ་མཆོག་རྡོ་རྗེ་ཕག་མོ་དང་ཤུགས་འགྲོ་བཞིའི་ཐུགས་ཀར་མ༔ སྙིང་པོ་དེ་རྣམས་ཀྱི་མཐར་ཉི་དཀྱིལ་གྱི་སྟེང་དུ་གཡས་བསྐོར་དུ༔ ཧཱུྃ་བཛྲ་དྷཀྐི་ནི་སིདྷ་མུ་ཥ་ཧ་རི་ནི་ས་སརྦ་ས་མ་ཡ་ཙིཏྟ་ཧྲིང་ཛཿསིདྡྷི་ཧཱུྃ༔ ཅེས་བཟླས་པས་འོད་ཟེར་དམར་པོ་རེག་བྱ་ཚ་བའི་ཕྲེང་ཐག་གཅིག་ལ་བརྟེན་ཏེ་སྔགས་ཕྲེང་རྣམས་གཡས་སུ་འཁོར༔ ཕྲེང་ཐག་གཡོན་དུ་འཁོར་བས༔ རིགས་བདག་རྟ་ཕག་ཡབ་ཡུམ་གྱིས་འབུམ་ཕྲག་མཁའ་འགྲོ་ཐམས་ཅད་དབང་དུ་བསྡུས༔ ཡེ་ཤེས་བདུད་འདུལ་ནག་མོས་མཁའ་འགྲོ་ལས་ལ་བཀོལ༔ དྷཀྐིའི་སྲོག་ཡིག་རྣམས་ཀྱིས་སྲོག་རྒྱུད་བསྐུལ་ཏེ༔ བྱ་ནག་ཁྱུ་འགྲོག་པའམ་གཅན་སྤྱང་ཤ་ལ་རུབ་པ་ལྟར་བདག་གི་དབང་དུ་འདུས་ནས༔ ཅི་བཅོལ་བའི་ལས་བྱེད་ཅིང་དངོས་གྲུབ་དགོས་དགུ་སྟེར་བར་བསམ་མོ༔ གསང་བའི་སྙིང་པོ་ཡིག་འབྲུ་ཉེར་ལྔ་པ་འདི༔ མི་ཚིག་གིས་བར་མཆོད་པར་འབུམ་ཚོ་གསུམ་བཟླ་བར་བྱའོ༔ ཐུན་སྐབས་རྣམས་སུ་གཏོར་མས་མཆོད༔ བསྟོད་པས་བསྟོད་པར་བྱའོ༔ ས་མ་ཡཱ༔ རྒྱ༔ གསུམ་པ་ལས་ལ་སྦྱར་བ་ནི་གཞན་དུ་གསལ་ལོ༔ ས་མ་ཡཱ༔ རྒྱ༔ དོན་གསུམ་རྗེས་ཀྱི་རིམ་པ་ལ་གསུམ་སྟེ༔ སྒྲུབ་པའི་རྟགས་བསྟན་པ༔ དམ་ཚིག་བསྟན་པ༔ དགོས་ཆེད་བསྟན་པའོ༔ ས་མ་ཡཱ༔ རྒྱ༔ དང་པོ་རྟགས་ཀྱི་རིམ་པ་ནི༔ དད་བརྩོན་ལྡན་པའི་རྣལ་འབྱོར་པས་ཚུལ་བཞིན་ཉམས་སུ་བླངས་ཚེ༔ ཕྱི་རྟགས་ཀྱི་རིམ་པ་ཉམས་དྭངས་པ༔ རིག་པ་བརྟན་པ༔ བསྐྱེད་རིམ་གསལ་བ༔ ཐོག་འཚེག་པ༔ སྒོ་བརྡུང་བ༔ སྡེག་ཆོམ་སྣ་ཚོགས་དང་༔ སྒྲུབ་རྫས་ལ་འོད་འཁྱུག་པ༔ མེ་འབར་བ་དུད་པ་འཐུལ་བ༔ དབྱར་མི་རུལ་པ༔ དགུན་མི་འཁྱགས་པ་སོགས་འབྱུང་ངོ་༔ ནང་རྟགས་ཀྱི་རིམ་པ་རྨི་ལམ་དུ་ཉི་ཟླ་ཤར་བ༔ ཆུ་བོར་བརྒལ་པ༔ བྲག་གཤགས་པ༔ ལིངས་བཏབ་པ༔ དམག་དྲངས་པ༔ མཚོན་དང་གོ་གྱོན་པ༔ ལུས་ལས་མེ་འབར་བ༔ གཡུལ་ལས་རྒྱལ་བ༔ བན་བོན་དང་ཁྱི་སྤྱང་བརྡུང་བ༔ ལྡེར་བཟོ་བཅོམ་པ༔ ཤོ་དང་རྒྱན་རྒྱལ་བ་སོགས་ཀྱི་རྨི་ལམ་འབྱུང་ངོ་༔ གསང་བའི་རྟགས་ནི་རབ་དངོས་འབྲིང་ཉམས་ཐ་ནའང་རྨི་ལམ་དུ་ཞལ་མཇལ་བ༔ ལུང་སྟོན་པ༔ བུད་མེད་བཟང་མོས་ཁ་ཟས་དང་༔ ཁྱད་པར་ཆང་འདྲེན་པ༔ ཚོགས་ཀྱི་འཁོར་ལོ་བསྐོར་བ༔ བྱིན་པ༔ ཐོད་རྔ་རྐང་གླིང་གྲི་གུག་ཁ་ཊྭཱྃ་ག་བྷན་དྷ་མཚན་བཟང་རྡོ་རྗེ་སོགས་བྱིན་པའམ་རྙེད་པ༔ ཁྱད་པར་རིག་པ་གར་གཏད་ལ་ཆགས་ཤིང་བསྐྱེད་རྫོགས་ལ་བརྩོན་སྙིང་འདོད་པ་སོགས་འབྱུང་ངོ་༔ ཡང་ཉམས་ང་བ་བག་ཚ་བ༔ སྒྱིད་ལུག་པ༔ སྒྲུབ་ལ་བརྩོན་སྙིང་མི་འདོད་ཅིང་མཛེ་སྤྲང་མང་པོ་དང་ཡུགས་སའི་རིགས་ཀྱི་བུད་མེད་ངུད་མོ་ལྡིར་བ༔ མཚན་མ་སྟོན་པ༔ མུན་ནག་ཏུ་ཕྱིན་པ༔ སྒྲུབ་རྫས་བཀྲག་མདངས་ཞན་པ་སོགས་བྱུང་ན༔ བསྐང་བཤགས་དང་ཚོགས་འཁོར་བྱ༔ གུ་གུལ་བདུག༔ ཐུན་གྱིས་བྲབ༔ བསྐྱེད་རྫོགས་ལ་གསལ་ཡང་ཡང་དུ་གདབ༔ བཟླས་པར་བུང་བས་ཚང་འཚོལ་བ་ལྟར་འབད་པར་བྱའོ༔ བསྙེན་གྲངས་མ་རྫོགས་པ་ལ་གྲུབ་རྟགས་ཐོན་ན་གང་ཟག་སྒྲིབ་བ་བསྲབས་པའི་རིགས་སོ༔ བསྙེན་གྲངས་སོང་ཡང་རྟགས་མེད་འགྱངས་ན་སྒྲིབ་པ་མཐུག་པའི་རིགས་སོ༔ སླར་སྤོག་པའམ་ནན་ཏན་དུ་འབད་དོ༔ དེ་ལྟར་སྒྲུབ་པའི་རྟགས་རྣམས་རྫོགས་པ་དང་༔ ཐུགས་དམ་བསྐུལ༔ དབང་བཞིན་ལེན༔ དངོས་གྲུབ་ཞུའོ༔ ས་མ་ཡཱ༔ རྒྱ༔ གཉིས་པ་དམ་ཚིག་བསྟན་པ་ནི༔ མཁའ་འགྲོའི་སྐུའི་དམ་ཚིག་ཏུ་སྐུ་གཟུགས་འཆང་བ་དང་བསྐྱེད་རིམ་བསྒོམ་པ༔ གསུང་གི་དམ་ཚིག་ཏུ་སྙིང་པོ་བགྲང་བ་དང་སྒྲུབ་ཡིག་འཆང་བ༔ ཐུགས་ཀྱི་དམ་ཚིག་ཏུ་རྫོགས་རིམ་བསྒོམ་པ་དང་བླ་རྡོ་བཅང་བ༔ ཡོན་ཏན་གྱི་དམ་ཚིག་ཏུ་སྒྲུབ་རྫས་འཛོམ་པ་དང་བུད་མེད་ལ་མི་དམོད་པ༔ འཕྲིན་ལས་ཀྱི་དམ་ཚིག་ཏུ་སྦྱོར་སྒྲོལ་གསང་སྤྱོད་དང་ལྟ་སྒོམ་གསང་བའོ༔ ས་མ་ཡཱ༔ རྒྱ༔ གསུམ་པ་དགོས་ཆེད་བསྟན་པ་ནི༔ མ་འོངས་པ་ན་བོད་ཀྱི་རྒྱལ་ཁམས་འདིར༔ དགེ་བཅུའི་ཁྲིམས་ནུབ་ཅིང་མི་དགེ་བཅུ་ལ་སྤྱོད་དེ༔ མནའ་ཆད་དཔང་གསུམ་ཁྲེལ་དང་ངོ་ཚ་བཏང་ནས་མཚམས་མེད་ལས་ལ་ཆེས་ཆེར་སྤྱོད་པའི་དུས་ངན་ཞིག་འོང་ངོ་༔ དེའི་ཚེ་སྔགས་པས་མཐུ་བྱེད་ཅིང་སྐྱེ་བོས་བཟློག་པ་སློབ༔ དམག་གི་ལས་བྱེད་རྒྱབ་གནོན་མཐུ་གཏད་ལ་བརྩོན་ཞིང་༔ ཤཱཀྱའི་བསྟན་པ་འདི་ཡང་རྟགས་ཀྱིས་འཛིན༔ བདུད་དང་འགོང་པོ་ཁ་རྒྱས་པས་སློབ་དཔོན་དང་སློབ་མར་གྱུར་ཚད་དམ་སེལ་དུ་གཡོ༔ བོད་རུ་བཞིའི་གཙུག་ལག་ཁང་རྣམས་བཤིགས་ཏེ་རྫོང་ལ་འགེབས༔ ཚོང་དུས་དང་སྡེ་དགོན་བཙུན་པས་འགང་ཞིང་དད་ཟས་ཁྲལ་དུ་རྒྱུག༔ མཁན་ཆེན་བརྒྱ་རྩས་ཡུལ་སྡེ་ཁྲིམས་ཀྱིས་མནར་ཞིང་གཡོ་རྒྱུ་སུ་མཁས་ཆེ༔ དེ་དུས་བུད་མེད་མོ་ལུས་ཐོབ་ཚད་གསོན་འདྲེར་ལྡང་༔ སྐྱེས་པ་ཤི་ཚད་ཟ་འདྲེར་སྐྱེ༔ བུད་མེད་ཤི་ཚད་བསེན་མོར་སྐྱེ༔ བན་བཙུན་ཤི་ཚད་དཀོར་བདག་ཏུ་སྐྱེ༔ སྟོན་ཆེན་མཁན་ཆེན་ཕལ་ཆེར་དམ་སྲི་དང་རྒྱལ་འགོང་དུ་འགྱུར་ནས༔ ཆོས་བཞིན་སྤྱོད་པའི་སྐལ་ལྡན་ཕོ་མོ་ལ་བར་ཆད་སྣ་ཚོགས་སུ་བརྩོམ་ཞིང་ཚེ་སྲོག་འཕྲོག་པར་བྱེད་དོ༔ མི་དགེ་བ་ལ་སྤྱོད་པ་རྣམས་ཀྱི་ཁ་འཛིན་བྱེད་ཅིང་ཐ་མར་དབུགས་འགམ་བྲན་དུ་བསྐོར་རོ༔ དེའི་ཚེ་ཆོས་བཞིན་སྤྱོད་པའི་སྐལ་ལྡན་འགའི་དོན་དུ༔ བྱ་སླ་ཚེགས་ཆུང་བྱིན་རླབས་མྱུར་བའི་གདམས་པ་མང་པོ༔ ཤར་ལྷོ་ནུབ་བྱང་གི་གནས་འགའ་ལ་སྦས་པ་ཟབ་རྒྱ་འཁྲོལ་ཞིང་༔ སྐལ་ལྡན་འགའ་རེས་དངོས་གྲུབ་སྣ་རེ་འཐོབ་པར་བྱེད་ཅིང་༔ ཁྱད་པར་གསང་བ་བླ་མེད་ཀྱི་གདམས་པ་ཟབ་མོ་འདི་ནི༔ སྙིགས་མ་རྩོད་ལྡན་གྱི་དུས་ངན་དེ་ལྟ་བུ་ཤར་བའི་ཚེ༔ ཆོས་བཞིན་སྤྱོད་པའི་སྐལ་ལྡན་འགའི་རྐྱེན་སེལ་དངོས་གྲུབ་འཐོབ་ཕྱིར་ད་ལྟ་མཚོ་རྒྱལ་ཁྱོད་ལ་གདམས་ཤིང་༔ མ་འོངས་ཀྱི་དོན་དུ་སེང་གདོང་མཁའ་འགྲོའི་སྐུའི་གནས་མཆོག༔ ཏེ་སེ་གངས་ཀྱི་ཕོ་བྲང་དུ་རིན་པོ་ཆེའི་གཏེར་དུ་སྦས་པའོ༔ ས་མ་ཡཱ༔ རྒྱ༔ ཨེ་མ་གསང་བའི་སྙིང་པོ་ཟབ་པའི་མཐར་ཐུག་འདི༔ པདྨ་བདག་གི་སྙིང་གི་བརྣག་པ་སྟེ༔ བོད་འདིར་ཟབ་གཏེར་ཇི་སྙེད་སྦས་ནའང་༔ གཏེར་ཁ་འདི་མིན་གཏེར་ཁ་གཞན་དག་ཏུ༔ བདུད་འདུལ་མཁའ་འགྲོའི་བསྙེན་སྒྲུབ་བསྟན་པ་མེད༔ ཅི་ཕྱིར་འདི་ནི་ཤིན་ཏུ་ཟབ་པའི་ཆོས༔ བདག་སྔོན་རྒྱ་གར་འཕགས་པའི་ཡུལ་གནས་ཚེ༔ མུ་སྟེགས་སྟོན་པ་ལང་ཀའི་བདག་པོ་ཡིས༔ སངས་རྒྱས་བསྟན་པ་འཇིག་ལ་ཉེ་བའི་དུས༔ ཐུབ་པའི་བཞུགས་གནས་རྡོ་རྗེ་གདན་གྱི་ལྷོ༔ ཕ་བོང་རུས་སྦལ་འདྲ་བའི་གསང་མཛོད་ནས༔ མཁའ་འགྲོས་ལུང་བསྟན་བདག་ཉིད་པདྨས་ཕྱུངས༔ མུ་སྟེགས་སྟོན་པ་ལྔ་བརྒྱའི་རྩོད་པ་ཟློག༔ ངན་སྔགས་བདག་པོ་མུ་སྟེགས་ཐོག་གིས་བསྒྲལ༔ སངས་རྒྱས་བསྟན་པའི་བ་དན་ཕྱོགས་བཅུར་བསྒྲེངས༔ དེ་ཕྱིར་ཟབ་པའི་མཐར་ཐུག་གདམས་པ་འདི༔ སྨོན་ལམ་སྟོབས་ཀྱིས་ང་སྤྲུལ་བུས་རྙེད་ཅིང་༔ སངས་རྒྱས་བསྟན་པའི་བཙས་སུ་འདི་གྱུར་ཅིག༔ ས་མ་ཡཱ༔ རྒྱ་རྒྱ་རྒྱ༔ གཏེར་རྒྱ༔ སྦས་རྒྱ༔ ཟབ་རྒྱ༔ གཉན་རྒྱ༔ གཏད་རྒྱ༔ ས་མ་ཡཱ༔ རྒྱ་རྒྱ་རྒྱ༔ བདག་སྤྲང་བན་ཉི་མ་གྲགས་པས་གངས་ཏེ་སེ་ནས་གདན་དྲངས་པའོ། མངྒ་ལཾ། །

བདུད་འདུལ་མཁའ་འགྲོའི་ལས་བྱང་གི་རིམ་པ།

བཀའ་རྫོགས་པ་ཆེན་པོ་བླ་མ་བདེ་མཆོག་འཁོར་ལོ་ལས༔ བདུད་འདུལ་མཁའ་འགྲོའི་ལས་བྱང་གི་རིམ་པ་བཞུགས་སོ༔ དཔལ་ཆེན་མཁའ་འགྲོའི་དབང་ཕྱུག་ཧེ་རུ་ཀཿལ་ཕྱག་འཚལ་ལོ༔ སྔགས་པ་པདྨ་དྲག་རྩལ་གྱི༔ མ་འོངས་འགྲོ་ལ་ཕན་པའི་ཕྱིར༔ བདུད་འདུལ་ནག་མོ་སེང་གདོང་མའི༔ ལས་བྱང་ཆོ་ག་ཁྲིགས་སུ་འདེབས༔ ལས་འཕྲོ་ཅན་གྱིས་སྤྱོད་པར་ཤོག༔ ས་མ་ཡཱ༔ རྒྱ་རྒྱ་རྒྱ༔ དེ་ཡང་ས་བཅད་རྣམ་པ་གསུམ༔ སྔོན་དུ་འགྲོ་དང་དངོས་གཞི་དང་༔ རྗེས་ཀྱི་རིམ་པ་རྣམ་གསུམ་གྱི༔ རིམ་པ་ཕྱེ་སྟེ་གསལ་བར་བྱ༔ རྡ་ཡིག་ཡོད༔ དང་པོ་སྔོན་འགྲོའི་ལས་རིམ་དགུ༔ གནས་ཁང་ཡོ་བྱད་སྟ་གོན་དང་༔ སྐྱབས་སེམས་བཀའ་བསྒོ་བགེགས་མཚམས་གཅོད༔ མཆོད་པ་བྱིན་རླབས་ཏིང་འཛིན་གསུམ༔ ས་མ་ཡཱ༔ རྒྱ་རྒྱ་རྒྱ༔ དང་པོ་གནས་ཁང་སྟ་གོན་ནི༔ གཞུང་ལྟར་རམ་ནི་ཡིད་མཐུན་ནོ༔ གཉིས་པ་ཡོ་བྱད་སྟ་གོན་ནི༔ སྒྲུབ་པ་ལས་སྦྱོར་དབང་ལ་སོགས༔ གང་འདོན་གཙོར་འདོད་ཁྱད་པར་དུ༔ བྷནྡྷར་དཔལ་བཤོས་ཤ་ཁྲག་བརྒྱན༔ སྨན་རག་ཚོགས་འཁོར་ཅི་འབྱོར་བཤམས༔ བཞི་པ་བཀའ་བསྒོ་བ་ནི༔ ཧཱུྃ༔ བདག་ཉིད་དག་པའི་གནས་མཆོག་འདིར༔ དུར་ཁྲོད་མཁའ་འགྲོ་ཡེ་ཤེས་གཙོ༔ ཆོས་ཀྱི་དབྱིངས་ནས་སྐུ་སྤྱོད་ལ༔ གསང་བ་སྒྲུབ་ལ་མི་དབང་བགེགས༔ ལོག་པར་ལྟ་བ་རྡུལ་དུ་རློག༔ ཧཱུྃ་བཛྲ་ཌཱཀྐཱི་ནི་སིངྷ་མུ་ཥ་ཧ་རི་ནི་ས་ཧཱུྃ་ཕཊ༔ ཨོཾ་སུམྦྷ་ནི་སུམྦྷ་ནི་ཧཱུྃ༔ སོགས་བརྗོད༔ ལྔ་པ་མཚམས་གཅོད་པ་ནི༔ ཧཱུྃ༔ བདག་ཉིད་ལྷ་ཡི་ཐུགས་ཀ་ནས༔ གནམ་ལྕགས་འཁོར་ལོ་རྡོ་རྗེ་དང་༔ གྲི་གུག་ཕུར་པ་དགྲ་སྟྭ་འབར༔ ཁ་ཊྭཱྃ་རལ་གྲི་མེ་རླུང་འཁྲུགས༔ རིམ་པ་དགུ་ཡི་གུར་ཁང་གི༔ དྲ་མིག་ཁྲོ་མོ་སྟོང་གིས་གཏམས༔ བྱད་མ་ལྷ་སྲུང་རྡུལ་དུ་བརླག༔ སྲིད་པའི་རླུང་ཡང་མི་ཐར་ན༔ གནོད་བྱེད་འབྱུང་པོ་སྨོས་ཅི་དགོས༔ མཚམས་ཀྱི་དཀྱིལ་འཁོར་ལྷུན་གྱིས་གྲུབ༔ ཧཱུྃ་བཛྲ་ཌཱཀྐི་ནི་སིངྷ་མུ་ཥ་ཧ་རི་ནི་ས་སརྦ་རཀྵ་རཀྵ་ཧཱུྃ་ཕཊ༔ གསུམ་པ་སྐྱབས་འགྲོ་སེམས་བསྐྱེད་ནི༔ ཧཱུྃ༔ བདག་ནི་དེང་ནས་བྱང་ཆུབ་བར༔ བླ་མ་དཀོན་མཆོག་དཀྱིལ་འཁོར་ལྷ༔ ཡེ་ཤེས་མཁའ་འགྲོའི་ལྷ་ཚོགས་ལ༔ རྣམ་པ་ཀུན་ཏུ་སྐྱབས་སུ་མཆི༔ དབང་དྲག་ལས་ཀྱི་བྱང་ཆུབ་སེམས༔ དམ་པ་མཆོག་ནི་བསྐྱེད་པར་བགྱི༔ དྲུག་པ་མཆོད་པ་བྱིན་གྱིས་བརླབས་པ་ནི༔ ཧཱུྃ༔ དུར་ཁྲོད་འབར་བའི་ཕོ་བྲང་འདིར༔ སྨན་གཏོར་རཀྟ་མཆོད་པའི་ཚོགས༔ དགྲ་བོའི་ཤ་རུས་དོན་སྙིང་བཅས༔ འདོད་ཡོན་ལོངས་སྤྱོད་བདུད་རྩིར་བསྒྱུར༔ རྃ་ཡྃ་ཁྃ༔ ཨོཾ་ཨཱཿཧཱུྃ༔ སརྦ་པཉྩ་ཨ་མྲྀ་ཏ་བྷ་ལིངྟ་མ་ཧཱ་རཀྟ་ཀེང་ནི་རི་ཏི་བྷ་སུ་ར་ཏ༔ བཛྲ་པུཥྤེ་དྷུ་པེ་ཨ་ལོ་ཀེ་གནྡྷཻ་ནཻ་ཝི་ཏེ་ཤཔྟ་ཨཱཿཧཱུྃ་སྭཱ་ཧཱ༔ བདུན་པ་དེ་བཞིན་ཉིད་ཀྱི་ཏིང་ངེ་འཛིན་ནི༔ ཧཱུྃ༔ འཁོར་འདས་ཆོས་རྣམས་གདོད་ནས་སྟོང་༔ མ་སྐྱེས་སྤྲོས་བྲལ་བློ་ལས་འདས༔ བརྗོད་མེད་ཡང་དག་དེ་བཞིན་ཉིད༔ རང་བྱུང་ཡེ་ཤེས་ཏིང་འཛིན་བསྒོམས༔ ཨོཾ་ཛྙཱ་ན་སྭ་བྷཱ་ཝ་ཤུདྡྷོ྅ཧཾ༔ བརྒྱད་པ་ཀུན་ཏུ་སྣང་བའི་ཏིང་ངེ་འཛིན༔ ཧཱུྃ༔ སྐྱེ་བ་མེད་པའི་ངང་ཉིད་ལས༔ རྒྱུ་དྲུག་ལོག་ལྟ་དབྱིངས་སྦྱོར་བའི༔ ཀུན་ཁྱབ་བརྩེ་བའི་སྙིང་རྗེ་ནི༔ ཁམས་གསུམ་སེམས་ཅན་ཀུན་ལ་བསྒོམ༔ ཨོཾ་དྷརྨ་དྷརྟུ་སྭ་བྷཱ་ཝ་ཤུདྡྷོ྅ཧཾ༔ དགུ་པ་རྒྱུའི་ཏིང་ངེ་འཛིན་ནི༔ ཧཱུྃ༔ སྟོང་དང་སྙིང་རྗེའི་ཡེ་ཤེས་ཀྱིས༔ ལོག་རྟོགས་ཚར་གཅོད་རྗེས་འཛིན་ཕྱིར༔ གནམ་ལྕགས་ཞུན་མའི་གྲི་གུག་གྲིར༔ རང་རིག་སེམས་ཉིད་ཧཱུྃ་གིས་གཏམས༔ ཧཱུྃ་ཙིཏྟ་ཛྙཱ་ན་བཛྲ་ཧཱུྃ༔ གཉིས་པ་དངོས་གཞིའི་ལས་རིམ་བཅུ༔ འབྱུང་བ་རིམ་བརྩེགས་གཞལ་ཡས་གསལ༔ གདན་སྤྲོ་དམ་ཚིག་ལྷ་བསྐྱེད་ཅིང་༔ ཡེ་ཤེས་སྤྱན་འདྲེན་བཞུགས་སུ་གསོལ༔ ཕྱག་འཚལ་མཆོད་པ་རྣམས་ཀྱིས་མཆོད༔ བསྟོད་པས་བསྟོད་ཅིང་བསྙེན་སྒྲུབ་པ༔ ས་མ་ཡཱ༔ རྒྱ་རྒྱ་རྒྱ༔ དང་པོ་འབྱུང་བ་རིམ་བརྩེགས་ནི༔ ཧཱུྃ༔ སྙིང་པོ་ཧཱུྃ་གི་འཕྲོ་འདུ་ལས༔ ཨེ་ལས་ནམ་མཁའ་ཀུན་བཟང་ཀློང་༔ ཡཾ་འཕྲོས་རླུང་དཀྱིལ་སྒྲོལ་མའི་མཁའ༔ ར་ལས་རཀྟ་མཱ་ཀིའི་ཀློང་༔ སུམ་ལས་ཞིང་ཆེན་ས་གཞི་སྤྱན༔ རཾ་ལས་མེ་འབར་གོས་དཀར་མཁའ༔ ཀེང་ལས་རུས་པའི་རི་རབ་བརྗིད༔ རྩ་བར་འདོད་ཆགས་ཁྲག་མཚོ་ཁོལ༔ སྐེད་པར་ཐབས་ཤེས་ཉི་ཟླ་འཆར༔ རྩེ་མོ་མི་མངོན་དབྱིངས་ན་མཐོ༔ ཧཱུྃ་ཨེ་ཡྃ་ར་སུྃ་ཀེཾ་རཾ་ཧཱུྃ༔ གཉིས་པ་གཞལ་ཡས་ཁང་གསལ་བ་ནི༔ ཧཱུྃ༔ ཧཱུྃ་ལས་བྷྲཱུྃ་འཕྲོས་རི་རབ་སྟེང་༔ བྷནྡྷ་རློན་པའི་རྩིག་པ་ལ༔ ཐོད་པ་སྐམ་པོའི་ཁ་བད་བརྒྱན༔ རྙིད་པས་དྲ་བ་དྲ་ཕྱེད་སྤྲས༔ རོ་ཡི་ཀ་བ་ཞིང་ལྤགས་ཐོག༔ ལྷ་ཆེན་བརྒྱད་དང་ཀླུ་ཆེན་བརྒྱད༔ ཀ་གཞུ་ཡ་ཐེམ་མ་ཐེམ་དང་༔ གཟའ་བརྒྱད་རྒྱུ་སྐར་སྡེ་བརྒྱད་འབུམ༔ ཐོད་མཁར་འབར་བའི་ཟ་ར་ཚགས༔ གྲུ་བཞི་སྒོ་བཞི་རྟ་བབས་བཞི༔ དྲེགས་ཆེན་བསྒྲལ་བའི་དབང་པོ་དང་༔ ནང་རོལ་རྣམ་ལྔས་ལྡ་ལྡི་འཕན༔ བཾ་གྱི་རྒྱལ་མཚན་མང་པོས་བརྒྱན༔ ཞིང་ལྤགས་བ་དན་ལན་ཚར་ཅན༔ དུར་ཁྲོད་བརྒྱད་ཀྱི་འཁོར་ཡུག་གསལ༔ ཧཱུྃ་བྷྲཱུྃ་ཛྙཱ་ན་ཏིཥྛ་བྷྲཱུྃ༔ གསུམ་པ་གདན་སྤྲོ་བ་ནི༔ ཧཱུྃ༔ དཀྱིལ་འཁོར་ཕོ་བྲང་གཞལ་ཡས་དབུས༔ ཆོས་འབྱུང་དམར་ནག་ཟླ་གམ་ཀློང་༔ དབུས་སུ་དྲེགས་བྱེད་ཕོ་མོའི་སྟེང་༔ ཐབས་ཤེས་ཉི་ཟླ་པདྨས་བརྒྱན༔ རྩིབས་བརྒྱད་ཏི་ར་པདྨས་སྤྲས༔ སྒོ་བཞིར་ཞིང་ཆེན་མི་རོའི་གདན༔ བཾ་རཱུ་ཊ་ཀྲོ་ཏི་ཨ་ཙནྜ་མ་སཱུརྱ་པཾ་པདྨ་མཎྜལ་ཧཱུྃ༔ བཞི་པ་དམ་ཚིག་གི་ལྷ་བསྐྱེད་པ་ནི༔ ཧཱུྃ༔ ཐུགས་སྲོག་ཧཱུྃ་ཡིག་འཕྲོ་འདུ་ལས༔ བྱད་མ་དགྲ་བགེགས་ཚར་བཅད་ཅིང་༔ རྒྱལ་བ་རྣམས་ལ་མཉེས་མཆོད་འབུལ༔ དུས་གསུམ་སངས་རྒྱས་བྱིན་རླབས་དང་༔ ཁྲོ་བོ་ཁྲོ་མོའི་ནུས་མཐུས་སྡུས༔ ཧཱུྃ༔ ལ་ཐིམ་པས་གཟི་བརྗིད་འབར༔ སྐད་ཅིག་གནས་གྱུར་དྲན་རྫོགས་སུ༔ བདུད་འདུལ་མཁའ་འགྲོ་སེང་གདོང་མ༔ ཞལ་གདངས་ལྗགས་འདྲིལ་མཆེ་བ་གཙིགས༔ རལ་པ་ཁམ་ནག་སྤྲིན་ལྟར་གཏིབས༔ སྤྱན་གསུམ་སྡང་མིག་རབ་ཏུ་བསྒྲད༔ སྨ་ར་སྨིན་མ་དམར་སེར་འབར༔ འཁོར་ལོས་མཚན་པའི་གྲི་གུག་གཡས༔ ལྕང་ལོས་མཚན་པའི་ཐོད་ཁྲག་གཡོན༔ གཡས་བསྐུམ་གཡོན་བརྐྱང་གར་ཐབས་འགྱིང་༔ དུར་ཁྲོད་འཇིགས་པའི་ཆས་བརྒྱད་དང་༔ དཔལ་གྱི་ཆས་བཅུ་འབར་བས་བརྒྱན༔ ནུ་མ་འབུར་ཞིང་བྷ་ག་རྒྱས༔ དཔའ་སྒེག་ཁྲོ་གཏུམ་གཟི་བརྗིད་འབར༔ ཁ་ཊྭཱྃ་ག་ལ་བདེ་བར་འཁྱུད༔ མེ་དཔུང་དམར་ནག་ཀློང་དུ་བསྐྱེད༔ རིགས་བདག་བསྐྱེད་པ་ནི༔ ཧཱུྃ༔ དེ་ཡི་སྤྱི་གཙུག་ཉི་ཟླའི་སྟེང་༔ བདག་ཉིད་རྡོ་རྗེ་དྲག་པོ་རྩལ༔ མཐིང་ནག་ཞལ་གཅིག་ཕྱག་གཉིས་པ༔ སྤྱན་གསུམ་སྡང་མིག་མཆེ་བ་གཙིགས༔ དབུ་སྐྲ་ཁམས་ནག་ཐོད་པར་བཅིངས༔ རལ་ཁྲོད་དབང་གི་རྟ་སྐད་འཚེར༔ རྡོ་རྗེ་གཡས་ལ་སྡིག་མཛུབ་གཡོན༔ ཞབས་གཉིས་འདོར་ཐབས་འགྱིང་བག་ལྡན༔ ཧཱུྃ༔ སྐུ་ལ་དགྱེས་པའི་སྦྱོར་ཡུམ་ནི༔ རྡོ་རྗེ་ཕག་མོ་སྐུ་མདོག་དམར༔ ཞབས་གཉིས་གཡས་བརྐྱང་གཡོན་བསྐུམ་འཁྲིལ༔ ཕྱག་གཉིས་གྲི་ཐོད་མགུལ་ནས་འཁྱུད༔ ནུ་མ་བྷ་ག་ལང་ཚོ་དར༔ སྤྱན་གསུམ་སྡང་མིག་དབུ་སྐྲ་གྲོལ༔ ཕག་ཞལ་ནག་མོས་ངུར་སྒྲ་སྒྲོགས༔ ཡབ་ཡུམ་དུར་ཁྲོད་ཆས་རྣམས་རྫོགས༔ མེ་དཔུང་དམར་ནག་ཀློང་དཀྱིལ་དུ༔ ཟུང་འཇུག་བདག་ཉིད་ཆེན་པོར་བསྒོམ༔ འཁོར་བསྐྱེད་པ་ནི༔ ཧཱུྃ༔ ཆོས་དབྱིངས་འཁོར་ལོ་རྩིབས་བརྒྱད་ཀྱི༔ ཤར་ཕྱོགས་ཏི་ར་པདྨའི་སྟེང་༔ རྡོ་རྗེ་མཁའ་འགྲོ་སྐུ་མདོག་དཀར༔ ཕྱག་གཡས་གནམ་ལྕགས་འཁོར་ལོ་ཕྱར༔ ལྷོ་ཕྱོགས་ཏི་ར་པདྨའི་སྟེང་༔ རིན་ཆེན་མཁའ་འགྲོ་སྐུ་མདོག་སེར༔ ཕྱག་གཡས་ཁ་ཊྭཱྃ་འབར་བ་བསྣམས༔ ནུབ་ཕྱོགས་ཏི་ར་པདྨའི་སྟེང་༔ པདྨ་མཁའ་འགྲོ་སྐུ་མདོག་དམར༔ ཕྱག་གཡས་མེ་ཡི་འཁོར་ལོ་བསྣམས༔ བྱང་ཕྱོགས་ཏི་ར་པདྨའི་སྟེང་༔ ལས་ཀྱི་མཁའ་འགྲོ་སྐུ་མདོག་ལྗང་༔ ཕྱག་གཡས་གནམ་ལྕགས་རལ་གྲི་འཕྱར༔ གཡོན་རྣམས་ཐོད་ཁྲག་ཐུགས་ཀར་བསྣམས༔ ཀུན་ཀྱང་གར་ཐབས་འགྱིང་བག་ཅན༔ དུར་ཁྲོད་འབར་བའི་ཆས་བརྒྱད་བརྒྱན༔ རལ་བའི་ཐོར་ཅོག་ཐོད་པར་བཅིངས༔ ཞལ་གདངས་མཆེ་གཙིགས་སྤྱན་གསུམ་བསྒྲད༔ རབ་ཏུ་ཁྲོས་པའི་སྐུ་རུ་བསྒོམས༔ ཧཱུྃ༔ ཤར་ལྷོར་ཏི་ར་པདྨའི་སྟེང་༔ དམ་ཚིག་མཁའ་འགྲོ་དཀར་ནག་ཞལ༔ ཕྱག་གཉིས་ཉི་ཟླ་ཆ་ལང་བརྡེབ༔ ལྷོ་ནུབ་ཏི་ར་པདྨའི་སྟེང་༔ སྣ་ཚོགས་མཁའ་འགྲོ་སེར་ནག་ཞལ༔ ཕྱག་གཉིས་གསེར་གྱི་རྩིབས་སྟོང་བརྡེབ༔ ནུབ་བྱང་ཏི་ར་པདྨའི་སྟེང་༔ ཤ་ཟ་མཁའ་འགྲོ་དམར་ནག་ཞལ༔ ཕྱག་གཉིས་ཟངས་ཀྱི་རྩིབས་སྟོང་བརྡེབ༔ བྱང་ཤར་ཏི་ར་པདྨའི་སྟེང་༔ འཇིག་རྟེན་མཁའ་འགྲོ་ལྗང་ནག་ཞལ༔ ཕྱག་གཉིས་གནམ་ལྕགས་རྩིབས་སྟོང་བརྡེབ༔ ཀུན་ཀྱང་འབར་འཁྲོ་སྒེག་འཇོམས་ལྡན༔ ཞལ་མདངས་ལྗགས་འདྲིལ་སྤྱན་གསུམ་འཁྲུགས༔ དུར་ཁྲོད་ཆས་རྫོགས་གར་སྟབས་འགྱིང་༔ མེ་རླུང་འཁྲུགས་པའི་ཀློང་དུ་བསྐྱེད༔ སྒོ་མ་བསྐྱེད་པ་ནི༔ ཧཱུྃ༔ ཕོ་བྲང་ཤར་སྒོའི་གཞལ་ཡས་སུ༔ ཁྭ་གདོང་མཁའ་འགྲོ་སྐུ་མདོག་དཀར༔ གཡས་པས་ཤེལ་གྱི་ཅང་ཏེའུ་བརྡུང་༔ གཡོན་པས་ཤེལ་གྱི་ལྕགས་ཀྱུ་འཛིན༔ ཕོ་བྲང་ལྷོ་སྒོའི་གཞལ་ཡས་སུ༔ ཕག་གདོང་མཁའ་འགྲོ་སྐུ་མདོག་སེར༔ གཡས་པས་གསེར་གྱི་ཅང་ཏེའུ་བརྡུང་༔ གཡོན་པས་གསེར་གྱི་ཞགས་པ་འདེབས༔ ཕོ་བྲང་ནུབ་སྒོའི་གཞལ་ཡས་སུ༔ ཁྱི་གདོང་མཁའ་འགྲོ་སྐུ་མདོག་དམར༔ གཡས་པས་ཟངས་ཀྱི་ཅང་ཏེའུ་བརྡུང་༔ གཡོན་པས་ཟངས་ཀྱི་ལྕགས་སྒྲོག་སྡོམ༔ ཕོ་བྲང་བྱང་སྒོའི་གཞལ་ཡས་སུ༔ འུག་གདོང་མཁའ་འགྲོ་སྐུ་མདོག་ལྗང་༔ གཡས་པས་གཡུ་ཡི་ཅང་ཏེའི་བརྡུང་༔ གཡོན་པས་དངུལ་གྱི་དྲིལ་བུ་འཁྲོལ༔ ཀུན་ཀྱང་གཅེར་བུ་སྐྲ་གྲོལ་ཅིང་༔ གནས་ལྔར་རུས་པའི་རྒྱན་གྱིས་བརྒྱན༔ ཁ་ཊྭཱཾ་ཀ་ནི་མཆན་དུ་བཅུག༔ བརྐྱང་བསྐུམ་མི་རོའི་གདན་ལ་འགྱིང་༔ གཞན་ཡང་རྩ་གསུམ་ཆོས་སྐྱོང་གིང་༔ གནས་ཡུལ་དུར་ཁྲོད་ཞིང་སྐྱོང་བདག༔ འབུམ་ཕྲག་དཔའ་བོ་དཔའ་མོ་རྣམས༔ གཙོ་འཁོར་ལྷ་མིའི་ཁྲོམ་ལྟར་བསྐྱེད༔ ལྔ་པ་སྤྱན་འདྲེན་ནི༔ ཧཱུྃ༔ ཆོས་དབྱིངས་མཁའ་འགྲོའི་ཕོ་བྲང་དང་༔ ནུབ་ཕྱོགས་ཨོ་རྒྱན་དུར་ཁྲོད་ནས༔ མ་མོ་མཁའ་འགྲོ་ཀུན་གྱི་གཙོ༔ བདུད་འདུལ་མཁའ་འགྲོ་སེང་གདོང་མ༔ ཡེ་ཤེས་མཁའ་འགྲོ་འཁོར་དང་བཅས༔ རིགས་བཞི་མཁའ་འགྲོའི་དཔུང་དང་བཅས༔ ལས་བྱེད་མཁའ་འགྲོ་འབུམ་གྱིས་བསྐོར༔ སིངྷ་མུ་ཥ་འཁོར་བཅས་རྣམས༔ གདུང་བའི་ཡིད་ཀྱིས་སྤྱན་འདྲེན་ན༔ ཐུགས་རྗེའི་ཤུགས་ཀྱིས་གཤེགས་སུ་གསོལ༔ དབང་ཆེན་འབར་བའི་དུར་ཁྲོད་ནས༔ རིགས་ཀྱི་བདག་པོ་གཤེགས་སུ་གསོལ༔ ནུབ་ཕྱོགས་ཨོ་རྒྱན་ཕོ་བྲང་ནས༔ རྡོ་རྗེ་ཕག་མོ་གཤེགས་སུ་གསོལ༔ ཤར་གྱི་ཕྱོགས་ཀྱི་དུར་ཁྲོད་ནས༔ རྡོ་རྗེ་མཁའ་འགྲོ་གཤེགས་སུ་གསོལ༔ ལྷོ་ཡི་ཕྱོགས་ཀྱི་དུར་ཁྲོད་ནས༔ རིན་ཆེན་མཁའ་འགྲོ་གཤེགས་སུ་གསོལ༔ ནུབ་ཀྱི་ཕྱོགས་ཀྱི་དུར་ཁྲོད་ནས༔ པདྨ་མཁའ་འགྲོ་གཤེགས་སུ་གསོལ༔ བྱང་གི་ཕྱོགས་ཀྱི་དུར་ཁྲོད་ནས༔ ལས་ཀྱི་མཁའ་འགྲོ་གཤེགས་སུ་གསོལ༔ ཧཱུྃ༔ གཞན་ཡང་གནས་ཡུལ་དུར་ཁྲོད་ནས༔ སྐུ་སྤྲུལ་དཀར་མོ་ཉི་ཁྲི་འབུམ༔ ཐུགས་སྤྲུལ་ནག་མོ་ཉི་ཁྲི་འབུམ༔ གསུང་སྤྲུལ་དམར་མོ་ཉི་ཁྲི་འབུམ༔ ཡོན་ཏན་སྤྲུལ་པ་སེར་མོ་ཉི་ཁྲི་འབུམ༔ ཕྲིན་ལས་སྤྲུལ་པ་ལྗང་མོ་ཉི་ཁྲི་འབུམ༔ གནས་ཡུལ་དུར་ཁྲོད་དཔའ་བོ་དཔའ་མོ་དང་༔ རྩ་གསུམ་ཆོས་སྐྱོང་སྲུང་མ་སྒོ་མའི་ཚོགས༔ མ་ལུས་འཁོར་བཅས་གནས་འདིར་གཤེགས་སུ་གསོལ༔ བསྐལ་པའི་མེ་དཔུང་དམར་ནག་ལྷབས་སེ་ལྷབ༔ རཀྟ་ཁྲག་གི་རྒྱ་མཚོ་མེ་རེ་རེ༔ མཾ་ས་ཤ་ཆེན་དྲི་ངད་སངས་སེ་སང་༔ ཁྲོ་ཆུ་མེ་དཔུང་ཚ་ཚ་ཐོ་རོ་རོ༔ རྐང་གླིང་ཐོད་པའི་རྔ་སྒྲ་དི་རི་རི༔ ཧཱུྃ་ཕཊ་བྷྱོ་ཟློག་སྒྲ་སྐད་ཆེམས་སེ་ཆེམ༔ བར་ཆད་ཟློག་ཕྱིར་གཤེགས་སུ་གསོལ༔ བྱད་ཀ་ཟློག་ཕྱིར་གཤེགས་སུ་གསོལ༔ ཕུར་ཀ་ཟློག་ཕྱིར་གཤེགས་སུ་གསོལ༔ གཏད་ཁ་བཟློག་ཕྱིར་གཤེགས་སུ་གསོལ༔ ཁྲམ་ཁ་ཟློག་ཕྱིར་གཤེགས་སུ་གསོལ༔ ཡམས་ཁ་ཟློག་ཕྱིར་གཤེགས་སུ་གསོལ༔ ནད་ཁ་ཟློག་ཕྱིར་གཤེགས་སུ་གསོལ༔ རྦད་འདྲེ་ཟློག་ཕྱིར་གཤེགས་སུ་གསོལ༔ རྦོད་གཏོང་ཟློག་ཕྱིར་གཤེགས་སུ་གསོལ༔ ཆགས་ཆེ་ཟློག་ཕྱིར་གཤེགས་སུ་གསོལ༔ ཉམ་ང་ཟློག་ཕྱིར་གཤེགས་སུ་གསོལ༔ ཧཱུྃ་བཛྲ་ཌཱཀྐི་ནི་སིངྷ་མུ་ཥ་ཧ་རི་ནི་ས་སརྦ་ས་མ་ཡ་ཛ་ཛཿ དྲུག་པ་བཞུགས་སུ་གསོལ་བ་ནི༔ ཧཱུྃ༔ ཐོད་མཁར་འབར་བའི་ཕོ་བྲང་དབུས༔ ཟླ་གམ་ཆོས་འབྱུང་དམར་ནག་ཀློང་༔ ཏི་ར་ཉི་ཟླ་པདྨའི་སྟེང་༔ འདོད་ཆགས་ཁྲག་མཚོ་འཁྲུག་པའི་དཀྱིལ༔ བདུད་འདུལ་མཁའ་འགྲོའི་ལྷ་ཚོགས་རྣམས༔ འདུ་འབྲལ་མེད་པར་བཞུགས་སུ་གསོལ༔ ཧཱུྃ་བཛྲ་དྷཱཀྐི་ནི་སིངྷ་མུ་ཥ་ཧ་རི་ནི་ས་ས་མཱ་ཡ་ཏིཥྛ་ལྷན༔ བདུན་པ་ཕྱག་འཚལ་བ་ནི༔ ཧཱུྃ༔ ཆོས་དབྱིངས་སྐྱེ་བ་མེད་པ་ལས༔ ལོངས་སྤྱོད་རྫོགས་པའི་སྐུར་གསལ་ཞིང་༔ གང་འདུལ་སྤྲུལ་མཛད་བདུད་འདུལ་མ༔ ཡེ་ཤེས་མཁའ་འགྲོའི་ལྷ་ཚོགས་ལ༔ གུས་པའི་ཡིད་ཀྱིས་ཕྱག་འཚལ་ལོ༔ ཧཱུྃ་བཛྲ་དྷཱཀྐི་ནི་སིངྷ་མུ་ཥ་ཧ་རི་ནི་ས་ན་མོ་པུ་རུ་ཤ་ཡ་ཧོཿ བརྒྱད་པ་མཆོད་པ་འབུལ་བ་ནི༔ ཧཱུྃ༔ བདུད་འདུལ་མཁའ་འགྲོའི་ལྷ་ཚོགས་ལ༔ འདོད་ཡོན་ལྔ་དང་ཕུང་པོ་ལྔ༔ འབྱུང་བ་ལྔ་དང་བདུད་རྩི་ལྔ༔ ཤ་ལྔ་ལ་སོགས་མཆོད་པ་འབུལ༔ གཏི་མུག་ཤ་ཆེན་མཆོད་པ་བཞེས༔ ཞེ་སྡང་རུས་ཀྱི་མཆོད་པ་བཞེས༔ འདོད་ཆགས་ཁྲག་གི་མཆོད་པ་བཞེས༔ ང་རྒྱལ་ཀླད་པའི་མཆོད་པ་བཞེས༔ ཕྲག་དོག་ཁྲིས་པའི་མཆོད་པ་བཞེས༔ གཟུགས་སྣང་ཐམས་ཅད་སྐུ་ལ་མཆོད༔ སྒྲ་གྲགས་ཐམས་ཅད་གསུང་ལ་མཆོད༔ དྲན་རྟོག་ཐམས་ཅད་ཐུགས་ལ་མཆོད༔ ཧཱུྃ༔ གཏོར་སྣོད་བྷནྡྷ་ཡངས་པའི་ནང་༔ འབྲུ་བཅུད་ཤ་ཁྲག་བྷ་ལིང་ཏ༔ འབྲུ་སྣ་སྟོང་དང་ཁྲག་སྣ་སྟོང་༔ ཤ་སྣ་སྟོང་གིས་བརྒྱན་ཏེ་མཆོད༔ བདུད་འདུལ་མཁའ་འགྲོའི་ལྷ་ཚོགས་ཀྱི༔ ཐུགས་དམ་བསྐང་ཕྱིར་བཞེས་སུ་གསོལ༔ ཧཱུྃ་བཛྲ་དྷཱཀི་ནི་སིངྷ་མུ་ཥ་ཧ་རི་ནི་ས་མ་ཧཱ་བྷ་ལིང་ཏ་ལ་ཁ་རཾ་ཁཱ་ཧི་ཁཱ་ཧི༔ ཧཱུྃ༔ རང་བྱུང་བྷནྡྷའི་སྣོད་མཆོག་ཏུ༔ གདོད་ནས་དག་པའི་བདུད་རྩིས་བརྒྱན༔ རྩ་བརྒྱད་སྟོང་སྦྱར་ཨ་མྲྀ་ཏ༔ བདུད་འདུལ་མཁའ་འགྲོའི་ཚོགས་རྣམས་མཆོད༔ ཧཱུྃ་བཛྲ་དྷཱཀྐི་ནི་སིདྷ་མུ་ཥ་ཧ་རི་ནི་ས་སརྦ་པཉྩ་ཨ་མྲྀ་ཏ་ལ་ཁཱ་རཾ་ཁཱ་ཧི་ཁཱ་ཧི༔ ཧཱུྃཿ ཐོད་པ་ཁོར་ཡུག་འབར་བ་རུ༔ དམར་ཆེན་ཁྲག་གི་རྒྱ་མཚོ་བསྐྱིལ༔ རཀྟ་དམར་གྱི་མཆོད་པ་འདི༔ བདུད་འདུལ་མཁའ་འགྲོའི་ཚོགས་ལ་འབུལ༔ ཧཱུྃ་བཛྲ་དྷཱཀྐི་ནི་སིངྷ་མུ་ཥ་ཧ་རི་ནི་ས་མ་ཧཱ་རཀྟ་བྷཱ་སུ་ར་ཏ་ཁཱ་ཧི་ཁཱ་ཧི༔ དགུ་པ་བསྟོད་པ་བྱ་བ་ནི༔ ཧཱུྃ༔ ཆོས་སྐུའི་བདག་ཉིད་སྐུ་གསུམ་མཁའ་འགྲོའི་གཙོ༔ ཡེ་ཤེས་ལས་གྲུབ་དབྱིངས་ཀྱི་དྷཀྐི་མཿ བདུད་དང་མུ་སྟེགས་ལོག་འདྲེན་དགྲ་བགེགས་གཤེད༔ བདུད་འདུལ་སེང་གདོང་མཁའ་འགྲོར་ཕྱག་འཚལ་བསྟོད༔ དུས་གསུམ་རྒྱལ་བ་རྣམས་ཀྱིས་བྱིན་བརླབས་ཅིང་༔ རྩ་གསུམ་དཔའ་བོ་མཁའ་འགྲོ་འདུ་བའི་དཔལ༔ རིགས་ཀྱི་གཙོ་བོ་རིགས་བདག་དབང་གི་སྐུ༔ རྡོ་རྗེ་དྲག་པོ་རྩལ་ལ་ཕྱག་འཚལ་བསྟོད༔ དེ་ཡི་སྐུ་ལ་དགྱེས་པའི་སྦྱོར་ཡུམ་ནི༔ ཟག་མེད་བདེ་བས་ཆགས་མེད་ལམ་སྟོན་ཅིང་༔ མཆོག་གི་དངོས་གྲུབ་སྟེར་བའི་དབང་མོ་ཆེ༔ རྡོ་རྗེ་ཕག་མོའི་སྐུ་ལ་ཕྱག་འཚལ་བསྟོད༔ སྐུ་དང་ཡེ་ཤེས་ཕྲིན་ལས་ཀུན་གྱི་འཕྲུལ༔ གཙོ་མོའི་རོལ་པས་གཙོ་མོའི་བཀའ་བཞིན་སྒྲུབ༔ སྡེ་བརྒྱད་མཁའ་འགྲོས་གནས་ཡུལ་དུར་ཁྲོད་སྐྱོངས༔ འབུམ་ཕྲག་མཁའ་འགྲོའི་སྐུ་ལ་ཕྱག་འཚལ་བསྟོད༔ གཞན་ཡང་རྩ་གསུམ་ཆོས་སྐྱོང་སྲུང་མའི་ཚོགས༔ བཀའ་ཡི་སྒོ་མ་འགུགས་འཆིང་སྡོམ་དགྱེས་བཞི༔ དཀྱིལ་འཁོར་ལྷག་པའི་ལྷ་ཚོགས་མ་ལུས་ལ༔ ལུས་ངག་ཡིད་གསུམ་གུས་པས་ཕྱག་འཚལ་བསྟོད༔ བསྙེན་ཅིང་་སྒྲུབས་པའི་རིམ་པ་ནི༔ སྒྲུབ་ཐབས་ལྟར་བྱ་ཞིང་༔ ཧཱུྃ་བཛྲ་དྷཱཀྐི་ནི་སིངྷཱ་མུ་ཥ་ཧ་རི་ནི་ས་སརྦ་ས་མཱ་ཡ་ཙིཏྟ་ཧྲིཾ་ཛ་སིདྡྷི་ཧཱུྃ༔ ཅེས་མི་ཚིག་གིས་བར་མ་ཆོད་པར༔ སྐབས་དང་བསྟུན་ཏེ་བཟླ་བར་བྱའོ༔ ས་མ་ཡཱ༔ རྒྱ་རྒྱ་རྒྱ༔ གསུམ་པ་རྗེས་ཀྱི་ས་བཅད་བཅུ་གཅིག་སྟེ༔ ཚོགས་འཁོར་བྱིན་རླབས་ཚོགས་ཕུད་སྤྲོ༔ ལྷག་མ་ཆད་ཐོ་བསྟན་མ་དང་༔ རྟ་བྲོ་ལྷ་གཤེགས་ཤིས་པ་བརྗོད༔ བསྐྱེད་རིམ་བསྡུ་ཞིང་བསྔོ་སྨོན་ནི༔ ས་མ་ཡཱ༔ རྒྱ་རྒྱ་རྒྱ༔ དང་པོ་ཚོགས་འཁོར་བྱིན་བརླབས་པ་ནི༔ ཤ་ཆང་ཚོགས་འཁོར་འབྱོར་ཚད་བཤམས༔ བསང་ཆུ་གཏོར་ཞིང་བདུད་རྩིས་སྦྲན༔ ཧཱུྃ༔ བདུད་འདུལ་མཁའ་འགྲོའི་ཏིང་འཛིན་གྱིས༔ ཚོགས་ཀྱི་ཉེས་སྐྱོན་འབག་ཚོགས་སྦྱངས༔ ཡེ་ཤེས་བདུད་རྩིར་བྱིན་གྱིས་བརླབས༔ འདོད་ཡོན་མཆོད་པའི་སྤྲིན་ཕུང་འཐིབ༔ རྃ་ཡྃ་ཁྃ༔ ཨོཾ་ཨཱཿཧཱུྃ་སྭཱ་ཧཱ༔ གཉིས་པ་ཚོགས་ཕུད་སྤྲོ་བ་ནི༔ ཧཱུྃ༔ ཞལ་ཟས་ཚོགས་ཀྱི་མཆོད་པ་འདི༔ བདུད་འདུལ་ནག་མོ་སེང་གེའི་གདོང་༔ རྩ་གསུམ་མཁའ་འགྲོ་ཆོས་སྐྱོང་ལ༔ མཆོད་པ་འབུལ་གྱིས་བཞེས་སུ་གསོལ༔ ཧཱུྃ་བཛྲ་དྷཱཀྐི་ནི་སེངྷ་མུ་ཥ་ཧ་རི་ནི་ས་གྷ་ན་ཙཀྲ་པཱུ་ཙ་ཁཱ་ཧི་ཁཱ་ཧི༔ བསྒྲལ་ལས་ནི། ཧཱུྃ༔ ཡེ་ཤེས་མཁའ་འགྲོ་བདུད་འདུལ་མའི། །སྲས་མཆོག་བཛྲ་ཀཱི་ལཱ་ཡཱ། །རྣམ་པར་གདེངས་པ་ཙམ་གྱིས་ཀྱང་། །ཁམས་གསུམ་འདར་ཞིང་སྲིད་གསུམ་འཁྲུག །ཚངས་སོགས་ལྷ་ཡང་བརླག་བྱེད་ན། །དགྲ་དང་བགེགས་ལ་སྨོས་ཅི་དགོས། །ཞིང་བཅུ་ཚང་བའི་དགྲ་བགེགས་འདི། །ཁྲོ་གཏུམ་ཁྲོས་པའི་དྲག་ཤུལ་གྱིས། །ཡེ་ཤེས་ཆེན་པོའི་ཀློང་དུ་སྒྲོལ། །ཧཱུྃ་བཛྲ་དྷཀྐི་ནི་སིདྷ་མུ་ཥ་ཧ་རི་ནི་ས་བཛྲ་ཀཱི་ལི་ཀཱི་ལཱ་ཡ་ཧཱུྃ་ཕཊ༔ བསྟབ་པ་ནི། ཧཱུྃ༔ ལྷ་སྔགས་ཏིང་འཛིན་རོལ་པའི་མཐུས། །དགྲ་བགེགས་བསྒྲལ་བའི་ཤ་ཁྲག་རུས། །བདུད་འདུལ་དཔལ་གྱི་མཁའ་འགྲོ་མ། །སྤྲུལ་པ་ཡང་སྤྲུལ་བཅས་རྣམས་ལ། །ཟག་མེད་དགྱེས་པ་བསྐྱེད་པ་ཡི། །བླ་མེད་མཆོག་གི་མཆོད་པ་འདི། །གཏི་མུག་ཤ་ཆེན་སྤུངས་པའི་རི། །རྔམ་པའི་སྟོབས་ཀྱིས་བཞེས་སུ་གསོལ། །འདོད་ཆགས་ཁྲག་གི་རོལ་མཚོ་བསྐྱིལ། །བརྗིད་པའི་སྟོབས་ཀྱིས་བཞེས་སུ་གསོལ། །ཞེ་སྡང་རུས་པའི་གྲམ་ཁྲོད་བརྡལ། །དྲག་ཤུལ་སྟོབས་ཀྱིས་བཞེས་སུ་གསོལ། །ཞག་ཀླད་ཚིལ་རྐང་ས་གཞིར་སྤུངས། །ཁྲོ་གཏུམ་སྟོབས་ཀྱིས་བཞེས་སུ་གསོལ། །སྡང་དགྲ་གནོད་བྱེད་ལོག་འདྲེན་ཀུན། །ལྷག་མ་མེད་པར་བཞེས་སུ་གསོལ། །གསུམ་པ་ལྷག་མ་བསྔོ་བ་ནི༔ ཧཱུྃ༔ ཡེ་ཤེས་ལས་ལ་སྒྲུབ་པ་ཡི༔ འཇིག་རྟེན་མཁའ་འགྲོ་ཤུགས་འགྲོ་དང་༔ ཤ་ཟ་མཁའ་འགྲོ་ཕྲ་མེན་ཚོགས༔ ལས་སུ་གསང་སྔགས་བསྟན་པ་སྲུངས༔ ཟས་སུ་ཤ་དང་ཁྲག་ལ་དགྱེས༔ འདིར་གཤེགས་ལྷག་མའི་གཏོར་མ་ལོང་༔ རྣལ་འབྱོར་བདག་གི་ཕྲིན་ལས་སྒྲུབས༔ བཀའ་དང་དམ་ཚིག་གཉེན་པོ་སྲུངས༔ བཛྲ་རཏྣ་པདྨ་ཀརྨ་ས་མ་ཡ་བྷི་ཤ་སརྦ་ལོ་ཀ་དྷཀྐི་ནི་པྲ་ཏི་ཛ་བྷ་ལིངྟ་ཁཱ་ཧི་ཧཱུྃ་ཕཊ༔ བཞི་པ་ཆད་ཐོ་ནི༔ གཏོར་མར་སྨན་རག་སྦྲེང་། དཔལ་འབར་གཟུགས་ཏེ་འདི་སྐད་དོ༔ ཧཱུྃ༔ སྔོན་ཚེ་ནུབ་ཕྱོགས་ཨོ་རྒྱན་དུར་ཁྲོད་དུ༔ དབང་ཆེན་ཡབ་ཡུམ་རྡོ་རྗེ་དྲག་རྩལ་གྱི༔ ཡེ་ཤེས་འཇིག་རྟེན་ལས་ཀྱི་མཁའ་འགྲོའི་ཚོགས༔ དབང་དུ་བསྡུས་ནས་ཐ་ཚིག་བོར་བའི་ཚེ༔ ལྟ་ལོག་མུ་སྟེགས་དྲུང་ནས་ཕྱུངས་པ་དང་༔ བྱད་མ་ལྷ་སྲུང་དགྲ་བགེགས་ཟློག་པ་དང་༔ རྗེས་འཇུག་རྣལ་འབྱོར་བུ་བཞིན་སྐྱོང་བར་ཆད༔ སྔོན་ཚེ་ཁས་བླང་ཐ་ཚིག་རྗེས་དགོངས་ལ༔ ཤ་ཁྲག་དམར་གྱི་གཏོར་མ་འདི་བཞེས་ཏེ༔ མུ་སྟེགས་ལོག་ལྟ་རྡུལ་དུ་བརླག་པ་དང་༔ བྱད་མ་ལྷ་སྲུང་དགྲ་བགེགས་བར་ཆད་ཟློག༔ རྣལ་འབྱོར་བཅོལ་བའི་ཕྲིན་ལས་འགྲུབ་པར་མཛོད༔ ལྔ་པ་བསྟན་མ་སྐྱོང་བ་ནི༔ ཧཱུྃ༔ གནས་ཡུལ་དུར་ཁྲོད་ཞིང་སྐྱོང་མ་མོའི་ཚོགས༔ ནམ་མཁའི་ལུས་ཅན་གར་ཡང་ཐོགས་མེད་རྒྱུ༔ འཇིག་རྟེན་འདས་ཀྱང་འཁོར་བའི་ཆ་ལུགས་འཛིན༔ བསྟན་མ་ཆེན་མོ་སྐྱོང་མ་ཆེན་མོ་དང་༔ ཡང་མ་ཆེན་མོ་མ་ལུས་འཁོར་དང་བཅས༔ གཏོར་མ་འདི་བཞེས་སྔོན་གྱི་དམ་ཚིག་ལྟར༔ བླ་མེད་བསྟན་པ་ཕྱོགས་བཅུར་རྒྱས་པ་དང་༔ རྣལ་འབྱོར་བདག་གི་མགོན་སྐྱོབས་སྡོང་གྲོགས་མཛོད༔ མ་མ་ཧ་ཧེ་ཧོ་བྷ་ལིངྟ་ཁཱ་ཧི་ཁཱ་ཧི༔ དྲུག་པ་རྟ་བྲོ་ནི༔ ཧཱུྃ༔ བདུད་འདུལ་མཁའ་འགྲོའི་ཏིང་འཛིན་གྱིས༔ སྟོང་གསུམ་སྟོང་གི་འཇིག་རྟེན་འོག༔ དབུས་ཕྱོགས་སྟོང་གི་རི་རབ་ཞབས༔ གནོད་བྱེད་བྱད་མ་དགྲ་བགེགས་མནན༔ བདེ་བ་ཆེན་པོའི་བྲོ་བརྡུངས་པས༔ སྟོང་པ་ཆེན་པོའི་ཡེ་ཤེས་རྒྱས༔ བདེ་སྟོང་ཟུང་འཇུག་རྩེ་བྲོ་འཁྲབ༔ རིགས་བཞི་མཁའ་འགྲོའི་ཕྱག་རྒྱས་གདབ༔ ཆོས་དབྱིངས་མཁའ་འགྲོའི་དབྱིངས་སུ་བསྟིམ༔ གླུ་བྲོ་གར་གྱི་རྒྱུན་མི་གཅོད༔ ཧཱུྃ་བཛྲ་དྷཱཀྐི་ནི་སེངྷ་མུ་ཥ་ཧ་རི་ནི་ས་དགྲ་བོ་བྱད་མ་ཛཿཧཱུྃ་བྃ་ཧོཿ སྟྭཾ་བྷ་ཡ་ནན༔ བདུན་པ་ལྷ་གཤེགས་པ་ནི༔ ཧཱུྃ༔ ཆོས་དབྱིངས་མཁའ་འགྲོ་ཡེ་ཤེས་གཙོ༔ ལས་ཀྱི་མཁའ་འགྲོ་དམ་ཚིག་བདག༔ འཇིག་རྟེན་མཁའ་འགྲོ་ཤ་ཟ་འབུམ༔ ཆོས་ཀྱི་དབྱིངས་སུ་གཤེགས་ནས་ཀྱང་༔ སླར་ཡང་བདག་གི་མགོན་དུ་བཞེངས༔ ཧཱུྃ་བཛྲ་དྷཱཀྐི་ནི་སིངྷ་མུ་ཥ་ཧ་རི་ནི་ས་ཛྙཱ་ན་བཛྲ་མུ༔ བརྒྱད་པ་ཤིས་པ་བརྗོད་པ་ནི༔ ཧཱུྃ༔ འོག་མིན་གནས་ནས་སྐུར་བཞེངས་ལ༔ ཡེ་ཤེས་མཁའ་འགྲོ་ཀུན་ཏུ་བཟང་༔ ཆོས་དབྱིངས་མཁའ་འགྲོའི་བཀྲ་ཤིས་དཔལ༔ བདག་ཅག་རྣམས་ལ་དེང་འདིར་སྩོལ༔ མཁའ་སྤྱོད་གནས་ནས་སྐུ་བཞེངས་ལ༔ ལོངས་སྐུའི་མཁའ་འགྲོ་ཕག་མོ་ཡུམ༔ མཁའ་སྤྱོད་མཁའ་འགྲོའི་བཀྲ་ཤིས་དཔལ༔ བདག་ཅག་རྣམས་ལ་དགེ་ལེགས་མཛོད༔ ཨོ་རྒྱན་ཡུལ་ནས་སྐུ་བཞེངས་ལ༔ སྤྲུལ་སྐུའི་མཁའ་འགྲོ་སེང་གདོང་མས༔ འབུམ་ཕྲག་མཁའ་འགྲོའི་བཀྲ་ཤིས་དཔལ༔ བདག་ཅག་རྣམས་ལ་བཀྲ་ཤིས་མཛོད༔ དགུ་པ་བསྐྱེད་རིམ་བསྡུ་བ་ནི༔ ཧཱུྃ༔ དམ་ཚིག་དཀྱིལ་འཁོར་གཞལ་ཡས་ལྷ༔ འོད་དུ་འཚེར་ཞིང་གཙོ་ལ་ཐིམ༔ གཙོ་བོ་སྔགས་འབྲུ་ས་བོན་ཏེ༔ ཧཱུྃ་ཡིག་ཐིག་ལེ་ནཱ་དར་ཡལ༔ བརྗོད་མེད་ཡང་དག་དེ་བཞིན་ཉིད༔ མ་བཅོས་སྤྲོས་བྲལ་ཨེ་མ་ཧོཿ བཅུ་པ་བསྔོ་བ་ནི༔ ཧཱུྃ༔ བསྐྱེད་རྫོོགས་བཟླས་བརྗོད་ཕྲིན་ལས་སྤྱད༔ སྦྱོར་སྒྲོལ་ཟབ་མོ་མཐར་ཕྱིན་དགེས༔ ལོག་རྟོགས་མཚན་འཛིན་འགྲོ་བ་རྣམས༔ མཁའ་འགྲོའི་གོ་འཕང་ཐོབ་ཕྱིར་བསྔོ༔ བཅུ་གཅིག་པ་སྨོན་ལམ་ནི༔ ཧཱུྃ༔ བྱང་ཆུབ་ལྷག་བསམ་དབྱིངས་ཀྱི་མཐུས༔ ཆོས་ཉིད་བདེན་པའི་དོན་གྲུབ་སྟེ༔ སྐུ་གསུམ་མཁའ་འགྲོའི་ཞིང་ཁམས་སུ༔ ཕྱིར་མི་ལྡོག་པ་ཐོབ་པར་ཤོག༔ ཅེས་བརྗོད་དོ༔ ས་མ་ཡཱ༔ རྒྱ་རྒྱ་རྒྱ༔ ཨེ་མ་ཟབ་པའི་ཕྲིན་ལས་འདི༔ ཤོག་སེར་བརྡ་ཡི་ཡི་གེར་བཏབ༔ མ་འོངས་བུ་དང་འདི་འཕྲད་ནས༔ བླ་མེད་བསྟན་པའི་སྙིང་པོ་ཤོག༔ ལོག་འཛིན་ཅན་ལ་ཨ་ཐཾ་རྒྱ༔ ས་མ་ཡཱ༔ རྒྱ་རྒྱ་རྒྱ༔ གཏེར་རྒྱ༔ སྦས་རྒྱ༔ ཟབ་རྒྱ༔ གཉན་རྒྱ༔ གཏད་རྒྱ༔ ས་མ་ཡཱ༔ རྒྱ་རྒྱ་རྒྱ༔ བདག་སྤྲང་བནྡྷེ་ཉི་མ་གྲགས་པས་གནས་མཆོག་ཆེན་པོ་གངས་རིའི་རྒྱལ་པོ་སེང་གདོང་དཀར་མོའི་སྐུའི་ཕོ་བྲང་ནས་གདན་དྲངས་ཤིང་ཤོག་སེར་ལས་ཞལ་བཤུས་པའོ༔ སརྦ་མངྒ་ལཾ༔

བདུད་འདུལ་ནག་མོའི་བསྐུལ་བ་ཤིན་ཏུ་གཉན་པ།

བཀའ་རྫོགས་པ་ཆེན་པོ་བླ་མ་བདེ་མཆོག་འཁོར་ལོ་ལས༔ བདུད་འདུལ་ནག་མོའི་བསྐུལ་བ་ཤིན་ཏུ་གཉན་པ་བཞུགས༔ དཔལ་ཆེན་པོ་མཁའ་འགྲོའི་དབང་ཕྱུག་ལ་ཕྱག་ཚལ་ལོ༔ བྱད་མ་རྦོད་གཏོང་དགྲ་བགེགས་ལ་སོགས་ཀྱིས༔ ཆོས་བྱེད་སྒྲུབ་པ་པོ་ལ་བར་གཅོད་ན༔ བདུད་འདུལ་ནག་མོའི་བསད་ལས་བཟློག་པ་སོགས༔ དྲག་པོའི་འཕྲིན་ལས་བརྩམས་པའི་རྦད་བསྐུལ་དུས༔ སྨན་རག་སྦྲེང་ཞིང་ཐུན་གཏོར་ལག་ཏུ་ཐོགས༔ ཁྲོ་མོའི་ང་རྒྱལ་སྟངས་སྟབས་བསྒྱུར་ནས་ཀྱང་༔ ལས་ལ་བསྐུལ་ཞིང་རྦད་པ་འདི་སྐད་དོ༔ ཧཱུྃ་ཧཱུྃ༔ ཆོས་ཀྱི་དབྱིངས་ལས་སྤྲུལ་པའི་མ༔ འཁོར་འདས་ཀུན་གྱི་མངའ་བདག་མོ༔ ཡེ་ཤེས་འཇིག་རྟེན་མཁའ་འགྲོའི་གཙོ༔ ང་ནི་བདུད་འདུལ་ནག་མོའི་སྐུ༔ བཞེངས་ཤིག་བཞེངས་ཤིག་དབྱིངས་ནས་བཞེངས༔ ཐོད་མཁར་འབར་བའི་ཕོ་བྲང་ནས༔ བདུད་དམག་འཁྲིགས་པའི་དུར་ཁྲོད་ནས༔ གྲུ་གསུམ་མཐིང་ནག་གཞལ་ཡས་ནས༔ རླུང་ནག་འཚུབ་པའི་ཀློང་དཀྱིལ་ནས༔ མེ་དཔུང་འབར་བའི་ད་ལ་ནས༔ ཁྲག་གི་རྒྱ་མཚོ་མེ་རེ་རེ༔ ནད་ཡམས་ན་བུན་ཐུ་ལུ་ལུ༔ ཞུན་ཆེན་གསུར་དུད་ཆི་ལི་ལི༔ གནམ་ལྕགས་སེར་ཆེན་ཁྲ་ལ་ལ༔ ཐོག་གི་བུ་ཡུག་ཚུབས་སེ་ཚུབ༔ མི་རོ་འབུམ་ནི་ཁྲི་རུ་བརྩེགས༔ རྟ་རོ་འབུམ་ནི་གཅལ་དུ་བཀྲམ༔ རི་བོ་ཐམས་ཅད་རུས་པའི་རི༔ ཆུ་བོ་ཐམས་ཅད་ཁྲག་དང་རྣག༔ རྩི་ཤིང་ཐམས་ཅད་མདའ་དང་མདུང་༔ སྒྲ་སྐད་ཐམས་ཅད་སོད་དང་རྒྱོབ༔ དེ་ལྟར་འཇིགས་པའི་དུར་ཁྲོད་ནས༔ ཀུན་ཏུ་བཟང་མོའི་ངོ་བོ་ཉིད༔ རྡོ་རྗེ་ཕག་མོའི་སྤྲུལ་པ་སྟེ༔ བདུད་འདུལ་མཁའ་འགྲོ་སེང་གེའི་གདོང་༔ མཐིང་ནག་གཅེར་བུ་ཁྲོས་པའི་ཞལ༔ ཕྱག་གཡས་གནམ་ལྕགས་གྲི་གུག་གིས༔ དགྲ་བགེགས་ཐམས་ཅད་ཚལ་པར་གཏུབས༔ གཡོན་པས་ཐོད་ཁྲག་ཐུགས་ཀར་བསྣམས༔ དགྲ་བགེགས་སྙིང་ཁྲག་ཧུབ་ཀྱིས་འདེབས༔ སྐུ་ལ་རུས་པའི་རྒྱན་གྱིས་བརྒྱན༔ ནམ་མཁའི་སྐར་ལྟར་ཁྲ་ལ་ལ༔ སྐུ་སྟོད་སེང་ཆེན་ལྤགས་པ་ལ༔ དར་ནག་ཅོད་པན་པུ་རུ་རུ༔ སྐུ་སྨད་སྟག་གི་ཤམ་ཐབས་ལ༔ སྦྲུལ་ནག་ཆུན་པོ་ཉི་ལི་ལི༔ སྐུ་རྐེད་མི་ལྤགས་གཡང་གཞི་ལ༔ ཁྲག་གི་ཆུ་རྒྱུན་ཙ་ར་རཿ གནམ་ལྕགས་སྤུ་གྲིའི་གཤོག་པ་ལ༔ ཁྲོ་ཆུའི་ཚྭ་ཚྭ་ཐོ་རོ་རོ༔ ཉི་མ་འབུམ་གྱིས་སྐུ་ལ་བརྒྱན༔ ཞལ་ནས་བསྐལ་པའི་འབྲུག་སྒྲ་སྒྲོག༔ ཤངས་ནས་བསྐལ་པའི་རླུང་ནག་འཚུབ༔ སྤྱན་ནས་བསྐལ་པའི་གློག་དམར་འཁྱུག༔ རིགས་བདག་རྡོ་རྗེ་དྲག་པོ་རྩལ༔ ཡུམ་མཆོག་རྡོ་རྗེ་ཕག་མོ་ཡི༔ ཡེ་ཤེས་སྤྲུལ་པས་སྟོང་གསུམ་ཁྱབ༔ ཤ་ཟ་ནག་མོའི་ཐུགས་ཀློང་ནས༔ ལས་བྱེད་སྡེ་བརྒྱད་མཁའ་འགྲོ་འབུམ༔ སྐུ་སྤྲུལ་རྡོ་རྗེ་མཁའ་འགྲོ་མ༔ སྨྱོ་འབོགས་གཏོང་བའི་དཀར་མོ་འབུམ༔ གསུང་སྤྲུལ་པདྨ་མཁའ་འགྲོ་མ༔ ཁྲག་ནད་གཏོང་བའི་དམར་མོ་འབུམ༔ ཐུགས་སྤྲུལ་སངས་རྒྱས་མཁའ་འགྲོ་མ༔ འཐིབས་ནད་གཏོང་བའི་ནག་མོ་འབུམ༔ ཡོན་ཏན་སྤྲུལ་པ་རིན་ཆེན་རིགས༔ ནད་མཚོན་གཏིབས་པའི་སེར་མོ་འབུམ༔ འཕྲིན་ལས་སྤྲུལ་པ་ལས་ཀྱི་རིགས༔ སྲོག་གཅོད་ལས་བྱེད་ལྗང་མོ་འབུམ༔ སྤྲུལ་པ་སྣ་ཚོགས་འོད་ལ་ཆིབས༔ ཁམས་གསུམ་ཀུན་ཀྱང་གཡོ་ཞིང་འདེགས༔ སྟོང་གསུམ་ཀུན་ཀྱང་འཁྲུག་ཅིང་འཁྱོམ༔ སྲིད་གསུམ་ཀུན་ཀྱང་འབར་ཞིང་བསྲེག༔ མཁའ་འགྲོའི་སྤྲུལ་པས་ཁམས་གསུམ་གང་༔ ཤུགས་འགྲོའི་སྤྲུལ་པས་སྟོང་གསུམ་གང་༔ ཤ་ཟ་མཁའ་འགྲོས་སྲིད་གསུམ་འགེངས༔ ལྷ་མོས་དལ་ཡམས་ཆི་ལི་ལི༔ ཀླུ་མོས་ཀླུ་ནད་ཐིབས་སེ་ཐིབས༔ བདུད་མོ་ཁྲག་འཐུང་འཇིབས་སེ་འཇིབ༔ བཙན་མོས་རྟ་རྒྱུག་སྤྲེངས་སེ་སྤྲེང་༔ སྨན་མོ་དུག་རླང་ཐུ་ལུ་ལུ༔ འདྲེ་མོས་ཤ་ཟ་ཡམས་སེ་ཡམ༔ སྲིན་མོས་རུས་འཆའ་ཡ་ལ་ལ༔ མ་མོས་སྲོག་གཅོད་ཤ་ར་ར༔ མོན་མོས་བཤུད་ཀླུ་ཙེར་རེ་རེ༔ འདབ་ཆགས་གཤོག་སྒྲོ་འུ་རུ་རུ༔ ཅེ་སྤྱད་ངུ་སྐད་ལྷངས་སེ་ལྷང་༔ བརྔམ་ཞིང་བརྔམ་ཞིང་དགྲ་སྲོག་གཅོད༔ སྲོག་གཅོད་དབུགས་ལེན་ལས་བྱེད་མ༔ བདུད་མོ་འབུམ་སྡེ་ད་རྒྱུག་ཅིག༔ རྒོད་ཅིང་རྒོད་ཅིང་ལས་བྱེད་མ༔ ཁྲག་འཐུང་ཟ་བྱེད་གདོང་པ་ཅན༔ ནག་མོ་ཆེན་མོ་ད་རྒྱུག་ཅིག༔ ཀྲུམ་ཞིང་ཀྲུམ་ཞིང་རུས་ལ་འཆའ༔ འཕུང་བྱེད་ཆེན་མོ་ཐལ་མདོག་ཅན༔ ཁྲོ་གཏུམ་ཅན་ཚོ་ད་རྒྱུག་ཅིག༔ རྒྱུག་ཅིང་རྒྱུག་ཅིང་རླུང་ལྟར་འཚུབ༔ སྣ་ཚོགས་བསྒྱུར་བའི་ལས་མཁན་མ༔ སྐྱོད་བྱེད་འབུམ་སྡེ་ད་རྒྱུག་ཅིག༔ དམར་གྱི་གཏོར་མ་འདི་བཞེས་ལ༔ དམིགས་པའི་བྱད་མ་དགྲ་དང་བགེགས༔ ལས་ཀྱི་མཁའ་འགྲོ་ཁྱེད་རྣམས་ཀྱིས༔ ནམ་གྱི་ཕར་མ་ཚུར་ཕྱེད་ལ༔ ལྷན་ཅིག་སྐྱེས་པའི་ལྷ་དང་ཕྱེས༔ མཉམ་པོར་འོང་བའི་བདུད་དང་སྤྲོད༔ སྲོག་རྩ་དམར་པོ་ཆོད་ལ་ཤོག༔ སྙིང་ཁྲག་དྲོན་མོ་འཐུང་ལ་ཤོག༔ ཀླད་ཁྲག་ཞོ་ལྟར་དཀྲུགས་ལ་ཤོག༔ བསད་རྟགས་དོན་སྙིང་ཁྱེར་ལ་ཤོག༔ ཕོ་བརྒྱུད་རྩད་ནས་ཆོད་ལ་ཤོག༔ སྟེང་གི་ཁྱོ་ལ་ཟོར་འདི་ཡ༔ མོ་བརྒྱུད་མངལ་ནས་སྐོམས་ལ་ཤོག༔ འོག་གི་ཆུང་མར་ཟོར་འདི་ཡ༔ འཕེན་པོ་དྲུངས་ནས་ཕྱུངས་ལ་ཤོག༔ ཕ་ཚན་སྡེ་ལ་ཟོར་འདི་ཡ༔ རྨང་པོ་རྩད་ནས་ཆོད་ལ་ཤོག༔ མཆན་གྱི་བུ་ལ་ཟོར་འདི་ཡ༔ འདུ་བ་རྣམ་བཞི་ཁོང་ནས་སློངས༔ སྲོག་གི་རྩ་ལ་ཟོར་འདི་ཡ༔ འཕུང་ཐབས་སྣ་དགུས་རྗེས་མེད་ཐོང་༔ སྒོ་ཡི་ནོར་ལ་ཟོར་འདི་ཡ༔ ནད་གདོན་བར་ཆད་དམག་སྒར་ཐོབ༔ ལྟས་ངན་ཆོ་འཕྲུལ་སྣ་ཚོགས་ཐོང་༔ ཁ་ཕུང་རྗེས་མེད་རྡུལ་དུ་རློག༔ ཅེས་བརྗོད་བཟློག་སྔགས་གཡབ་མོ་གདབ༔ ཟོར་འཕེན་དམིགས་བྱ་བརླགས་པར་བསམ༔ མཁའ་འགྲོའི་འགྱུ་བར་བསྟུན་པ་གནད༔ འདི་ནི་སྤུ་གྲི་འབར་བ་སྟེ༔ གང་ལ་དམིགས་པ་རྡུལ་དུ་བརླག༔ ཕྱི་རབས་ཆིག་བརྒྱུད་ཨ་ཐཾ་རྒྱ༔ ས་མ་ཡཱ༔ རྒྱ་རྒྱ་རྒྱ༔ གཏེར་རྒྱ༔ སྦས་རྒྱ༔ གསང་རྒྱ༔ གཉན་རྒྱ༔ གཏད་རྒྱ༔ བདག་སྤྲང་བན་གྱིས་གཏེར་ནས་སྤྱན་དྲངས་པའོ། །མངྒ་ལཾ།། །།

བདུད་འདུལ་མཁའ་འགྲོའི་བསྐང་བ།

བཀའ་རྫོགས་པ་ཆེན་པོ་བླ་མ་བདེ་མཆོག་འཁོར་ལོ་ལས༔ བདུད་འདུལ་མཁའ་འགྲོའི་བསྐང་བ་བཞུགས༔ དཔལ་ཆེན་པོ་ཧེ་རུ་ཀཿལ་ཕྱག་འཚལ་ལོ༔ མ་འོངས་དུས་ཀྱི་སྐལ་ལྡན་རྣམས༔ དབེན་ཞིང་དྭངས་ལ་སྤྲོ་བའམ༔ མ་མོ་མཁའ་འགྲོ་འདུ་བའི་གནས༔ གནས་ཡུལ་དུར་ཁྲོད་ལ་སོགས་སུ༔ ནད་ཀྱིས་འཚེ་འམ་གདོན་གྱིས་ཉེན༔ གྲིབ་ཀྱིས་ནོན་ནམ་དལ་ཡམས་བབས༔ མཁའ་འགྲོའི་མཆོད་ཚོགས་གཡེལ་བ་སོགས༔ ཆོས་ལ་སྤྱོད་པའི་སྐལ་ལྡན་ལ༔ མི་མཐུན་རྐྱེན་གྱིས་བར་བཅད་ན༔ དཀྱིལ་འཁོར་སྐྱང་ནུལ་ལེགས་བྱ་ཞིང་༔ སྨན་གཏོར་རཀྟ་སྤྱན་གཟིགས་དགྲམ༔ གྷ་ན་ཚོགས་ཀྱི་ཡོ་བྱད་བསགས༔ ཟལ་ལེ་འབྲི་དང་མཁའ་ལྡིང་བྱ༔ རྒྱུ་མཆོག་མཚན་དང་ལྡན་པའི་བམ༔ ཤ་ཆེན་གསུར་དུད་ཞུན་ཆེན་མེ༔ རྐང་གླིང་ཐོད་རྔའི་སྒྲ་སྒྲོག་ཅིང་ཿ གསལ་བ་གསུམ་གྱི་ཏིང་འཛིན་གྱིས༔ ལས་ཀྱི་གཞུང་བསྲང་བསྙེན་པ་གསོ༔ ཉམས་ཆག་བསྐང་བའི་གདུང་ཤུགས་བསྐྱེད༔ སྙན་པའི་དབྱངས་ཀྱིས་འདི་སྐད་དོ༔ ཧཱུྃ༔ འོག་མིན་ཆོས་དབྱིངས་ཕོ་བྲང་ནས༔ སངས་རྒྱས་ཐམས་ཅད་བསྐྱེད་པའི་ཡུམ༔ ཆོས་སྐུ་ཀུན་ཏུ་བཟང་མོ་ལ༔ འདས་དང་མ་བྱོན་ད་ལྟར་གྱི༔ ཆོས་སྐུའི་ལྷ་ཚོགས་འཁོར་གྱིས་བསྐོར༔ བསྐང་ངོ་མཆོད་དོ་ཐུགས་དམ་བསྐང་༔ ཐུགས་དམ་བསྐང་བའི་དམ་རྫས་ནི༔ བདུད་རྩི་སྨན་དང་རཀྟ་དམར༔ བྷ་ལིང་གཏོར་མས་ཐུགས་དམ་བསྐང་༔ ཞལ་ཟས་ཚོགས་དང་མི་ཤ་བམ༔ ཤ་ཆེན་གསུར་དང་ཞུན་ཆེན་མེ༔ ཐོད་རྔ་རྐང་གླིང་རོལ་མོ་སོགས༔ ཕྱི་ནང་མཆོད་པའི་བསྐང་རྫས་ཀྱིས༔ ཆོས་སྐུའི་ལྷ་ཚོགས་ཐུགས་དམ་བསྐང་༔ ཧཱུྃ༔ མཁའ་སྤྱོད་ལོངས་སྐུའི་ཞིང་ཁམས་ནས༔ ཡེ་ཤེས་དབྱིངས་ཀྱི་མཁའ་འགྲོའི་གཙོཿ ལོངས་སྐུ་རྡོ་རྗེ་ཕག་མོ་ལ༔ འདས་དང་མ་བྱོན་ད་ལྟར་གྱི༔ ལོངས་སྐུའི་ལྷ་ཚོགས་འཁོར་གྱིས་བསྐོར༔ བསྐང་ངོ་མཆོད་དོ་ཐུགས་དམ་བསྐང་༔ ཐུགས་དམ་བསྐང་བའི་དམ་རྫས་ནིཿ བདུད་རྩི་སྨན་དང་རཀྟ་དམར༔ བྷ་ལིང་གཏོར་མས་ཐུགས་དམ་བསྐང་༔ ཞལ་ཟས་ཚོགས་དང་མི་ཤ་བམ༔ ཤ་ཆེན་གསུར་དང་ཞུན་ཆེན་མེ༔ ཐོད་རྔ་རྐང་གླིང་རོལ་མོ་སོགས༔ ཕྱི་ནང་མཆོད་པའི་བསྐང་རྫས་ཀྱིས༔ ལོངས་སྐུའི་ལྷ་ཚོགས་ཐུགས་དམ་བསྐང་༔ ཧཱུྃ༔ ནུབ་ཕྱོགས་ཨོ་རྒྱན་ཕོ་བྲང་ནས༔ མ་མོ་མཁའ་འགྲོ་ཀུན་གྱི་གཙོ༔ སྤྲུལ་སྐུ་བདུད་འདུལ་སེང་གདོང་མར༔ འདས་དང་མ་བྱོན་ད་ལྟར་གྱི༔ སྤྲུལ་སྐུའི་ལྷ་ཚོགས་འཁོར་གྱིས་བསྐོར༔ ཐུགས་དམ་བསྐང་བའི་དམ་རྫས་ནིཿ བདུད་རྩི་སྨན་དང་རཀྟ་དམར༔ བྷ་ལིང་གཏོར་མས་ཐུགས་དམ་བསྐང་༔ ཞལ་ཟས་ཚོགས་དང་མི་ཤ་བམ༔ ཤ་ཆེན་གསུར་དམ་ཞུན་ཆེན་མེ༔ ཐོད་རྔ་རྐང་གླིང་རོལ་མོ་སོགས༔ ཕྱི་ནང་མཆོད་པའི་བསྐང་རྫས་ཀྱིས༔ སྤྲུལ་སྐུའི་ལྷ་ཚོགས་ཐུགས་དམ་བསྐང་༔ ཧཱུྃ༔ མཁའ་འགྲོ་ཀུན་གྱི་གཙོ་མོ་སྟེ༔ བདེ་གཤེགས་སངས་རྒྱས་མཁའ་འགྲོ་མ༔ མཐིང་ནག་གཅེར་བུ་སེང་གེའི་གདོང་༔ ཡེ་ཤེས་མེ་དཔུང་ཀློང་ན་བཞུགས༔ གར་དགུའི་ཉམས་དང་ལྡན་པ་ལ༔ དུར་ཁྲོད་དཔལ་གྱི་ཆས་རྣམས་རྫོགས༔ ནམ་མཁའི་ཁམས་ལ་དབང་བསྒྱུར་མ༔ འབུམ་ཕྲག་ཡངས་པའི་མཁའ་འགྲོའི་གཙོ༔ བསྐང་ངོ་མཆོད་དོ་ཐུགས་དམ་བསྐང་༔ ཐུགས་དམ་བསྐང་བའི་དམ་རྫས་ནིཿ བདུད་རྩི་སྨན་དང་རཀྟ་དམར༔ བྷ་ལིང་གཏོར་མས་ཐུགས་དམ་བསྐང་༔ ཞལ་ཟས་ཚོགས་དང་མི་ཤ་བམ༔ ཤ་ཆེན་གསུར་དང་ཞུན་ཆེན་མེ༔ ཐོད་རྔ་རྐང་གླིང་རོལ་མོ་སོགས༔ ཕྱི་ནང་མཆོད་པའི་བསྐང་རྫས་ཀྱིས༔ མཁའ་འགྲོའི་གཙོ་མོའི་ཐུགས་དམ་བསྐང་༔ ཐུགས་དམ་བསྐང་ལ་བར་ཆད་ཟློག༔ བསྐངས་གྱུར་དབང་དང་དངོས་གྲུབ་སྩོོལ༔ ཧཱུྃ༔ འཁོར་འདས་ཀུན་ལ་མངའ་དབང་བསྒྱུར༔ དཔའ་བོ་མཁའ་འགྲོ་ཀུན་གྱི་རྗེ༔ མ་མོ་མཁའ་འགྲོ་ཡོངས་ཀྱི་བདག༔ རྩ་གསུམ་ཆོས་སྐྱོང་སྲུང་མས་བསྐོར༔ ཧེ་རུ་ཀཿདཔལ་རིགས་ཀྱི་གཙོ༔ བསྐང་ངོ་མཆོད་དོ་ཐུགས་དམ་བསྐང་༔ ཐུགས་དམ་བསྐང་བའི་དམ་རྫས་ནིཿ བདུད་རྩི་སྨན་དང་རཀྟ་དམར༔ བྷ་ལིང་གཏོར་མས་ཐུགས་དམ་བསྐང་༔ ཞལ་ཟས་ཚོགས་དང་མི་ཤ་བམ༔ ཤ་ཆེན་གསུར་དམ་ཞུན་ཆེན་མེ༔ ཐོད་རྔ་རྐང་གླིང་རོལ་མོ་སོགས༔ ཕྱི་ནང་མཆོད་པའི་བསྐང་རྫས་ཀྱིས༔ རྡོ་རྗེ་དྲག་རྩལ་ཐུགས་དམ་བསྐང་༔ ཐུགས་དམ་བསྐང་ལ་བར་ཆད་ཟློགཿ བསྐང་གྱུར་དབང་དང་དངོས་གྲུབ་སྩོོལ༔ ཧཱུྃ༔ ཤར་གྱི་ཕྱོགས་ཀྱི་དཀྱིལ་འཁོར་ནས༔ རྡོ་རྗེ་རིགས་ཀྱི་མཁའ་འགྲོ་མ༔ དཀར་མོ་འབུམ་གྱི་འཁོར་དང་བཅས༔ ཞེ་སྡང་འཇོམས་ཤིང་རྣམ་ཤེས་འཇིག༔ རླུང་གི་ཁམས་ལ་དབང་ཡང་བསྒྱུར༔ བསྐང་ངོ་མཆོད་དོ་ཐུགས་དམ་བསྐང་༔ ཐུགས་དམ་བསྐང་བའི་དམ་རྫས་ནིཿ བདུད་རྩི་སྨན་དང་རཀྟ་དམར༔ བྷ་ལིང་གཏོར་མས་ཐུགས་དམ་བསྐང་༔ ཞལ་ཟས་ཚོགས་དང་མི་ཤ་བམ༔ ཤ་ཆེན་གསུར་དང་ཞུན་ཆེན་མེ༔ ཐོད་རྔ་རྐང་གླིང་རོལ་མོ་སོགས༔ ཕྱི་ནང་མཆོད་པའི་བསྐང་རྫས་ཀྱིས༔ སྐྱོང་བྱེད་མ་ཡི་ཐུགས་དམ་བསྐང་༔ ཐུགས་དམ་བསྐང་ལ་བར་ཆད་ཟློག༔ བསྐངས་གྱུར་དབང་དང་དངོས་གྲུབ་སྩོལ༔ ཧཱུྃ༔ ལྷོ་ཡི་ཕྱོགས་ཀྱི་དཀྱིལ་འཁོར་ནས༔ རིན་ཆེན་རིགས་ཀྱི་མཁའ་འགྲོ་མ༔ སེར་མོ་འབུམ་གྱི་འཁོར་དང་བཅས༔ ང་རྒྱལ་འཇོམས་ཤིང་ཚོར་བ་གཅོད༔ མེ་ཡི་ཁམས་ལ་དབང་ཡང་སྒྱུར༔ བསྐང་ངོ་མཆོད་དོ་ཐུགས་དམ་བསྐང་༔ ཐུགས་དམ་བསྐང་བའི་དམ་རྫས་ནིཿ བདུད་རྩི་སྨན་དང་རཀྟ་དམར༔ བྷ་ལིང་གཏོར་མས་ཐུགས་དམ་བསྐང་༔ ཞལ་ཟས་ཚོགས་དང་མི་ཤ་བམ༔ ཤ་ཆེན་གསུར་དང་ཞུན་ཆེན་མེ༔ ཐོད་རྔ་རྐང་གླིང་རོལ་མོ་སོགས༔ ཕྱི་ནང་མཆོད་པའི་བསྐང་རྫས་ཀྱིས༔ སྲེག་བྱེད་མ་ཡི་ཐུགས་དམ་བསྐང་༔ ཐུགས་དམ་བསྐང་ལ་བར་ཆད་ཟློག༔ བསྐངས་གྱུར་དབང་དང་དངོས་གྲུབ་སྩོལ༔ ཧཱུྃ༔ ནུབ་ཀྱི་ཕྱོགས་ཀྱི་དཀྱིལ་འཁོར་ནས༔ པདྨ་རིགས་ཀྱི་མཁའ་འགྲོ་མ༔ དམར་མོ་འབུམ་གྱི་འཁོར་དང་བཅས༔ འདོད་ཆགས་འཇོམས་ཤིང་འདུ་ཤེས་གཏོར༔ ཆུ་ཡི་ཁམས་ལ་དབང་ཡང་བསྒྱུར༔ བསྐང་ངོ་མཆོད་དོ་ཐུགས་དམ་བསྐང་༔ ཐུགས་དམ་བསྐང་བའི་དམ་རྫས་ནིཿ བདུད་རྩི་སྨན་དང་རཀྟ་དམར༔ བྷ་ལིང་གཏོར་མས་ཐུགས་དམ་བསྐང་༔ ཞལ་ཟས་ཚོགས་དང་མི་ཤ་བམ༔ ཤ་ཆེན་གསུར་དང་ཞུན་ཆེན་མེ༔ ཐོད་རྔ་རྐང་གླིང་རོལ་མོ་སོགས༔ ཕྱི་ནང་མཆོད་པའི་བསྐང་རྫས་ཀྱིས༔ རྨོངས་བྱེད་མ་ཡི་ཐུགས་དམ་བསྐང་༔ ཐུགས་དམ་བསྐང་ལ་བར་ཆད་ཟློག༔ བསྐངས་གྱུར་དབང་དང་དངོས་གྲུབ་སྩོལ༔ ཧཱུྃ༔ བྱང་གི་ཕྱོགས་ཀྱི་གཞལ་ཡས་ནས༔ ལས་ཀྱི་རིགས་ཀྱི་མཁའ་འགྲོ་མ༔ ལྗང་མོ་འབུམ་གྱི་འཁོར་དང་བཅས༔ ཕྲག་དོག་འཇོམས་ཤིང་འདུ་བྱེད་གཏོར༔ ས་ཡི་ཁམས་ལ་དབང་ཡང་བསྒྱུར༔ བསྐང་ངོ་མཆོད་དོ་ཐུགས་དམ་བསྐང་༔ ཐུགས་དམ་བསྐང་བའི་དམ་རྫས་ནིཿ བདུད་རྩི་སྨན་དང་རཀྟ་དམར༔ བྷ་ལིང་གཏོར་མས་ཐུགས་དམ་བསྐང་༔ ཞལ་ཟས་ཚོགས་དང་མི་ཤ་བམ༔ ཤ་ཆེན་གསུར་དང་ཞུན་ཆེན་མེ༔ ཐོད་རྔ་རྐང་གླིང་རོལ་མོ་སོགས༔ ཕྱི་ནང་མཆོད་པའི་བསྐང་རྫས་ཀྱིས༔ ཙན་ཏི་ཀ་ཡི་ཐུགས་དམ་བསྐང་༔ ཐུགས་དམ་བསྐང་ལ་བར་ཆད་ཟློག༔ བསྐངས་གྱུར་དབང་དང་དངོས་གྲུབ་སྩོལ༔ ཧཱུྃ༔ ཤར་ལྷོ་མཚམས་ཀྱི་གཞལ་ཡས་ནས༔ དམ་ཚིག་མཁའ་འགྲོ་མི་ལྤགས་ཅན༔ ལེགས་ཉེས་སྟངས་འཛིན་འབུམ་གྱིས་བསྐོར༔ བསྐང་ངོ་མཆོད་དོ་ཐུགས་དམ་བསྐང་༔ ཐུགས་དམ་བསྐང་བའི་དམ་རྫས་ནིཿ བདུད་རྩི་སྨན་དང་རཀྟ་དམར༔ བྷ་ལིང་གཏོར་མས་ཐུགས་དམ་བསྐང་༔ ཞལ་ཟས་ཚོགས་དང་མི་ཤ་བམ༔ ཤ་ཆེན་གསུར་དང་ཞུན་ཆེན་མེ༔ ཐོད་རྔ་རྐང་གླིང་རོལ་མོ་སོགས༔ ཕྱི་ནང་མཆོད་པའི་བསྐང་རྫས་ཀྱིས༔ བསྐངས་གྱུར༴ ཧཱུྃ༔ ལྷོ་ནུབ་མཚམས་ཀྱི་གཞལ་ཡས་ནས༔ སྣ་ཚོགས་མཁའ་འགྲོ་མི་ཐུབ་མ༔ ཤུགས་འགྲོ་འབུམ་གྱི་འཁོར་གྱིས་བསྐོར༔ བསྐང་ངོ་མཆོད་དོ་ཐུགས་དམ་བསྐང་༔ ཐུགས་དམ་བསྐང་བའི་དམ་རྫས་ནིཿ བདུད་རྩི་སྨན་དང་རཀྟ་དམར༔ བྷ་ལིང་གཏོར་མས་ཐུགས་དམ་བསྐང་༔ ཞལ་ཟས་ཚོགས་དང་མི་ཤ་བམ༔ ཤ་ཆེན་གསུར་དང་ཞུན་ཆེན་མེ༔ ཐོད་རྔ་རྐང་གླིང་རོལ་མོ་སོགས༔ ཕྱི་ནང་མཆོད་པའི་བསྐང་རྫས་ཀྱིས༔ ཤུགས་འགྲོ་འབུམ་གྱི་ཐུགས༴ ཐུགས་དམ་བསྐང་ལ་བར༴ བསྐངས་གྱུར་དབང་༴ ཧཱུྃ༔ ནུབ་བྱང་མཚམས་ཀྱི་གཞལ་ཡས་ནས༔ ཐམས་ཅད་མཁའ་འགྲོ་ཀུན་རྒྱུ་མ༔ ལོག་འདྲེན་འབུམ་གྱི་འཁོར་དང་བཅས༔ བསྐང་ངོ་མཆོད་དོ་ཐུགས་དམ་བསྐང་༔ ཐུགས་དམ་བསྐང་བའི་དམ་རྫས་ནིཿ བདུད་རྩི་སྨན་དང་རཀྟ་དམར༔ བྷ་ལིང་གཏོར་མས་ཐུགས་དམ་བསྐང་༔ ཞལ་ཟས་ཚོགས་དང་མི་ཤ་བམ༔ ཤ་ཆེན་གསུར་དང་ཞུན་ཆེན་མེ༔ ཐོད་རྔ་རྐང་གླིང་རོལ་མོ་སོགས༔ ཕྱི་ནང་མཆོད་པའི་བསྐང་རྫས་ཀྱིས༔ ལོག་འདྲེན་འབུམ་གྱི་ཐུགས་དམ་བསྐང་༔ ཐུགས་དམ་བསྐང་ལ་བར༴ བསྐངས་གྱུར་དབང་དང་༴ ཧཱུྃ༔ བྱང་ཤར་མཚམས་ཀྱི་གཞལ་ཡས་ནས༔ བརྒྱུད་འཛིན་འཇིག་རྟེན་མཁའ་འགྲོ་མ༔ ལས་ཀྱི་མཁའ་འགྲོ་འབུམ་དང་བཅས༔ བསྐང་ངོ་མཆོད་དོ་ཐུགས་དམ་བསྐང་༔ ཐུགས་དམ་བསྐང་བའི་དམ་རྫས་ནིཿ བདུད་རྩི་སྨན་དང་རཀྟ་དམར༔ བྷ་ལིང་གཏོར་མས་ཐུགས་དམ་བསྐང་༔ ཞལ་ཟས་ཚོགས་དང་མི་ཤ་བམ༔ ཤ་ཆེན་གསུར་དང་ཞུན་ཆེན་མེ༔ ཐོད་རྔ་རྐང་གླིང་རོལ་མོ་སོགས༔ ཕྱི་ནང་མཆོད་པའི་བསྐང་རྫས་ཀྱིས༔ ལས་བྱེད་འབུམ་གྱི་ཐུགས་དམ་བསྐང་༔ ཐུགས་དམ་བསྐང་ལ་བར༴ བསྐངས་གྱུར་དབང་དང་༴ ཧཱུྃ༔ དཀྱིལ་འཁོར་ཕྱི་རིམ་བར་འཁྱམས་དང་༔ གནས་ཡུལ་དུར་ཁྲོད་ཐམས་ཅད་ནས༔ རྩ་གསུམ་དཔའ་བོ་ཆོས་སྐྱོང་གིང་༔ དུར་ཁྲོད་ཞིང་སྐྱོང་ལྷ་ཀླུའི་ཚོགས༔ བསྐང་ངོ་མཆོད་དོ་ཐུགས་དམ་བསྐང་༔ ཐུགས་དམ་བསྐང་བའི་དམ་རྫས་ནིཿ བདུད་རྩི་སྨན་དང་རཀྟ་དམར༔ བྷ་ལིང་གཏོར་མས་ཐུགས་དམ་བསྐང་༔ ཞལ་ཟས་ཚོགས་དང་མི་ཤ་བམ༔ ཤ་ཆེན་གསུར་དང་ཞུན་ཆེན་མེ༔ ཐོད་རྔ་རྐང་གླིང་རོལ་མོ་སོགས༔ ཕྱི་ནང་མཆོད་པའི་བསྐང་རྫས་ཀྱིས༔ རྩ་གསུམ་ཆོས་སྐྱ྄ོང་ཐུགས་དམ་བསྐང་༔ ཐུགས་དམ་བསྐང་ལ་བར༴ བསྐངས་གྱུར་དབང་དང་༴ ཧཱུྃ༔ ཤར་གྱི་མཁའ་འགྲོ་ཁྭ་གདོང་མ༔ སྙིང་རྗེའི་ལྕགས་ཀྱུས་འགྲོ་བ་འདྲེན༔ ལས་བྱེད་ཁྭ་གདོང་འབུམ་གྱིས་བསྐོར༔ བསྐང་ངོ་མཆོད་དོ་ཐུགས་དམ་བསྐང་༔ ཐུགས་དམ་བསྐང་བའི་དམ་རྫས་ནིཿ བདུད་རྩི་སྨན་དང་རཀྟ་དམར༔ བྷ་ལིང་གཏོར་མས་ཐུགས་དམ་བསྐང་༔ ཞལ་ཟས་ཚོགས་དང་མི་ཤ་བམ༔ ཤ་ཆེན་གསུར་དང་ཞུན་ཆེན་མེ༔ ཐོད་རྔ་རྐང་གླིང་རོལ་མོ་སོགས༔ ཕྱི་ནང་མཆོད་པའི་བསྐང་རྫས་ཀྱིས༔ ཤར་གྱི་སྒོ་མའི་ཐུགས་དམ་བསྐང་༔ ཐུགས་དམ་བསྐང་ལ་བར་ཆད༴ བསྐངས་གྱུར་དབང་དང་༴ ཧཱུྃ༔ ལྷོ་ཡི་མཁའ་འགྲོ་ཕག་གདོང་མ༔ བྱམས་པའི་ཞགས་པས་སྡོམ་མཛད་མ༔ ལས་བྱེད་ཕག་གདོང་འབུམ་གྱིས་བསྐོར༔ བསྐང་ངོ་མཆོད་དོ་ཐུགས་དམ་བསྐང་༔ ཐུགས་དམ་བསྐང་བའི་དམ་རྫས་ནིཿ བདུད་རྩི་སྨན་དང་རཀྟ་དམར༔ བྷ་ལིང་གཏོར་མས་ཐུགས་དམ་བསྐང་༔ ཞལ་ཟས་ཚོགས་དང་མི་ཤ་བམ༔ ཤ་ཆེན་གསུར་དང་ཞུན་ཆེན་མེ༔ ཐོད་རྔ་རྐང་གླིང་རོལ་མོ་སོགས༔ ཕྱི་ནང་མཆོད་པའི་བསྐང་རྫས་ཀྱིས༔ ལྷོ་ཡི་སྒོ་མའི་ཐུགས་དམ༴ ཐུགས་དམ་བསྐང་ལ་བར༴ བསྐངས་གྱུར་དབང་དང་དངོས༴ ཧཱུྃ༔ ནུབ་ཀྱི་མཁའ་འགྲོ་ཁྱི་གདོང་མ༔ དགའ་བའི་ལྕགས་སྒྲོག་སྡོམ་མཛད་མ༔ ལས་བྱེད་ཁྱི་གདོང་འབུམ་གྱིས་བསྐོར༔ བསྐང་ངོ་མཆོད་དོ་ཐུགས་དམ་བསྐང་༔ ཐུགས་དམ་བསྐང་བའི་དམ་རྫས་ནིཿ བདུད་རྩི་སྨན་དང་རཀྟ་དམར༔ བྷ་ལིང་གཏོར་མས་ཐུགས་དམ་བསྐང་༔ ཞལ་ཟས་ཚོགས་དང་མི་ཤ་བམ༔ ཤ་ཆེན་གསུར་དང་ཞུན་ཆེན་མེ༔ ཐོད་རྔ་རྐང་གླིང་རོལ་མོ་སོགས༔ ཕྱི་ནང་མཆོད་པའི་བསྐང་རྫས་ཀྱིས༔ ནུབ་ཀྱི་སྒོ་མའི་ཐུགས་དམ་བསྐང་༔ ཐུགས་དམ་བསྐང་ལ་བར་ཆད༴ བསྐངས་གྱུར་དབང་དང་༴ ཧཱུྃ༔ བྱང་གི་མཁའ་འགྲོ་འུག་གདོང་མ༔ བཏང་སྙོམས་དྲིལ་བུས་དབང་དུ་སྡུད༔ ལས་བྱེད་འུག་གདོང་འབུམ་གྱིས་བསྐོར༔ བསྐང་ངོ་མཆོད་དོ་ཐུགས་དམ་བསྐང་༔ ཐུགས་དམ་བསྐང་བའི་དམ་རྫས་ནིཿ བདུད་རྩི་སྨན་དང་རཀྟ་དམར༔ བྷ་ལིང་གཏོར་མས་ཐུགས་དམ་བསྐང་༔ ཞལ་ཟས་ཚོགས་དང་མི་ཤ་བམ༔ ཤ་ཆེན་གསུར་དང་ཞུན་ཆེན་མེ༔ ཐོད་རྔ་རྐང་གླིང་རོལ་མོ་སོགས༔ ཕྱི་ནང་མཆོད་པའི་བསྐང་རྫས་ཀྱིས༔ བྱང་གི་སྒོ་མའི་ཐུགས་དམ་བསྐང་༔ ཐུགས་དམ་བསྐང་ལ་བར་ཆད་ཟློག༔ བསྐངས་གྱུར་དབང་དང་དངོས་གྲུབ་སྩོལ༔ དེ་ནས་ཤ་ཆེན་གྱི་གསུར་དུད་སོགས་དུར་ཁྲོད་མཆོད་པའི་རྫས་རྣམས་ལག་ཏུ་ཐོགས་ཏེ༔ ད་ལ་འཆམས་སྟབས་ཀྱིས་བསྐོར་ཞིང་ཿ གནོད་འགྱོད་ཀྱི་མོས་གུས་དྲག་པོའི་ངང་ནས༔ བཤགས་པ་འདི་སྐད་བྱའོ། ཧཱུྃ༔ སྐུ་གསུམ་མཁའ་འགྲོ་འབུམ་ཕྲག་ཡངས་པའི་གཙོ༔ བདུད་འདུལ་མཁའ་འགྲོ་ལས་ཀྱི་དབང་མོ་ཆེ༔ སྐུ་མདོག་སྣ་ཚོགས་ཐ་དད་ཅིར་ཡང་སྟོན༔ རལ་པ་ཁམ་ནག་མཐོན་མཐིང་ཅོད་པན་ཅན༔ བྷ་གའི་ཀློང་ནས་དངོས་གྲུབ་སྩོལ་མཛད་མ༔ སེང་གདོང་མཁའ་འགྲོའི་ལྷ་ཚོགས་དགོངས་སུ་གསོལ༔ བདག་ནི་ཐོག་མེད་དུས་ནས་མ་རིག་འཁྲུལ༔ ལས་ཀྱི་དབང་གིས་རིགས་དྲུག་འཁོར་བར་འཁྱམས༔ ཤ་ཁྲག་དྲ་བའི་ལུས་བླངས་སྲིད་པར་བརྒྱུད༔ དུས་ངན་སྙིགས་མའི་དུས་འདིར་བདག་སྐྱེས་ཤིང་༔ བླ་མ་རྡོ་རྗེ་རྒྱལ་པོས་རྗེས་སུ་བཟུང་༔ ཡེ་ཤེས་མཁའ་འགྲོ་བསྟེན་པའི་དམ་ནོས་ཀྱང་༔ ཐོག་མེད་སྡིག་སྒྲིབ་ལས་ཀྱིས་གཉའ་མནན་ཞིང་༔ མ་རིག་སྒྲིབ་པའི་དབང་གིས་ཁ་འཁོར་བས༔ རང་སེམས་སྐུ་གསུམ་མཁའ་འགྲོར་མ་རྟོགས་ཤིང་ཿ མ་རིག་འཛིན་པས་བཅིངས་པ་མཐོལ་ལོ་བཤགས། ཡེ་ཤེས་མཁའ་འགྲོ་ཆོས་དབྱིངས་ངོ་བོ་ཉིད༔ འཇིག་རྟེན་མཁའ་འགྲོ་བསྟན་པ་བསྲུང་བའི་ལྷ༔ ལས་ཀྱི་མཁའ་འགྲོ་བདེ་ཆེན་འདུ་འབྲལ་མེད༔ ཤ་ཁྲག་དམ་རྫས་ཚོགས་ཀྱིས་མ་སྐོངས་ཤིང་༔ ཉ་སྟོང་བརྒྱད་གསུམ་དུས་ཀྱི་མཆོད་པ་ཆག༔ ཕྱག་རྒྱ་མ་བརྟེན་དགའ་བཞི་ངོས་མ་ཟིན༔ རྩ་བ་ཡན་ལན་དམ་ཚིག་བསྲུང་མཚམས་རྣམས༔ མ་རིག་དབང་གིས་ཉེས་ལྟུང་ཅི་བསགས་པ༔ ཡེ་ཤེས་མཁའ་འགྲོའི་ཚོགས་ལ་བཟོད་པར་གསོལ༔ ལས་ཀྱི་མཁའ་འགྲོའི་ཚོགས་ལ་བཟོད་པར་གསོལ༔ འཇིག་རྟེན་མཁའ་འགྲོའི་ཚོགས་ལ་བཟོད་པར་གསོལ༔ བཟོད་པར་གསོལ་ནས་ཚངས་པ་སྩལ་དུ་གསོལ༔ ཅེས་བརྗོད་བརྗོད་མེད་ཉམས་སྐྱོང་ངོ་༔ ཨེ་མ་ཉམས་པ་གསོ་དང་བསྐང་༔ བར་ཆད་སེལ་ཞིང་དངོས་གྲུབ་སྩོལ༔ བསྐང་བའི་རིམ་པ་འདི་བརྩམས་པས༔ ཕན་ཡོན་ནུས་སྟོབས་དཔག་མེད་འཐོབ༔ མཁའ་འགྲོ་ལུས་དང་གྲིབ་བཞིན་འགྲོག༔ བར་ཆད་ཞི་ཞིང་སྡོངས་གྲོགས་བྱེད༔ གང་བརྩམས་ལས་རྣམས་ཐོགས་མེད་འགྲུབ༔ དེ་ཕྱིར་ཉམས་སུ་ལོངས་ཤིག་རྒྱ༔ ས་མ་ཡཱ༔ རྒྱ་རྒྱ་རྒྱ༔ གཏེར་རྒྱ༔ སྦས་རྒྱ༔ གསང་རྒྱ༔ གཏད་རྒྱ༔ ས་མ་ཡཱཿ རྒྱ་རྒྱ་རྒྱ༔ སྤྲང་བན་དྷེ་ཉི་མ་གྲགས་པས་ཤོག་སེར་ལས་ཕབ་པའོ། །མངྒལཾ།། །།

བདུད་འདུལ་མཁའ་འགྲོ་སེང་གདོང་མའི་དབང་ཆོག་གི་རིམ་པ།

བཀའ་རྫོགས་པ་ཆེན་པོ་བླ་མ་བདེ་མཆོག་འཁོར་ལོ་ལས༔ བདུད་འདུལ་མཁའ་འགྲོ་སེང་གདོང་མའི་དབང་ཆོག་གི་རིམ་པ་བཞུགས༔ དཔལ་ཆེན་པོ་མཁའ་འགྲོའི་དབང་ཕྱུག་ལ་ཕྱག་འཚལ་ལོ༔ ཡིད་དང་མཐུན་པའི་གནས་སུ་དབང་གི་དངོས་རྫས་བསགས་ཤིང་ལས་ཀྱི་གཞུང་བསྲང་༔ བསྙེན་པ་ཁ་གསོ༔ བསྐྱེད་རྫོགས་གསལ་གདབ༔ སློབ་བུ་གྲལ་ལ་འཁོད༔ ཁྲུས་བྱ༔ བགེགས་བསྐྲད༔ བསྲུང་འཁོར་བསྒོམ་ཞིང་ཡེ་ཤེས་པ་དབབ༔ གོ་མཚོན་རིན་ཆེན་མཎྜལ་དབུལ༔ སློབ་དཔོན་ལྷར་གསལ་གསོལ་བ་འདེབས༔ ཧཱུྃ༔ དཔའ་བོ་ཆེན་པོ་མཁའ་འགྲོའི་གཙོ༔ བདག་ཅག་བུ་ལ་དགོངས་སུ་གསོལ༔ དུར་ཁྲོད་མཁའ་འགྲོ་ཡེ་ཤེས་གཙོ༔ བདུད་འདུལ་ནག་མོའི་དབང་བསྐུར་སྩོལ༔ ལན་གསུམ༔ དེ་ནས་བུམ་པ་ལྷ་ཡི་སྐུ༔ སློབ་མའི་སྤྱི་བོར་བཞག་ནས་ཀྱང་༔ ཧཱུྃ༔ ཞིང་ཁམས་སྐུ་དང་འདུ་འབྲལ་མེད༔ སྐུ་གསུམ་ལྷུན་གྲུབ་མཁའ་འགྲོའི་དབང་༔ སྐལ་ལྡན་བུ་ལ་འདི་སྦྱིན་པས༔ སྨིན་གྲོལ་སྐུ་ཡི་དབང་ཐོབ་ཤོག༔ ཧཱུྃ་བཛྲ་དྷཀྐི་ནི་སིངྷ་མུ་ཥ་ཧ་རི་ནི་ས་ཀཱ་ཡ་ཨབྷི་ཥིཉྩ་ཧཱུྃ༔ ཅེས་བརྗོད་བུམ་ཆུ་སློབ་མར་སྦྱིན༔ ཐོད་པ་བདུད་རྩི་མགྲིན་པར་བཞག་ཅིང་༔ ཧཱུྃ༔ དུམ་གཅིག་བྷན་དྷ་རང་བྱུང་བདུད་རྩིས་བཀང་༔ རྩ་ཁམས་རང་གྲོལ་དཔའ་བོ་མཁའ་འགྲོའི་གསུང་༔ ལོངས་སྤྱོད་རྫོགས་སྐུ་འགག་མེད་དབང་བསྐུར་བས༔ འབུམ་ཕྲག་མཁའ་འགྲོའི་གསུང་གི་དབང་ཐོབ་ཤོག༔ ཧཱུྃ་བཛྲ་དྷཀྐི་ནི་སིདྷ་མུ་ཥ་ཧ་རི་ནི་ས་ཝཱཀྐ་ཨ་བྷི་ཥིཉྩ་ཧཱུྃ༔ ཅེས་བརྗོད་བདུད་རྩི་ངག་ཏུ་བླུད༔ མེ་ལོང་སིནྡྷུ་རས་གླན་པ་ལ༔ ཆོས་འབྱུང་ལྟེ་བར་ཧཱུྃ་མཐར་སྙིང་པོ་བྲིས་པ་སློབ་མའི་སྙིང་གར་བཞག་ཅིང་༔ ཧཱུྃ༔ མེ་ལོང་ཆོས་འབྱུང་གསང་བའི་རྫས་དང་ལྡན༔ ཤེས་རབ་ཡེ་ཤེས་འབུམ་ཕྲག་མཁའ་འགྲོའི་ཐུགས༔ དད་ལྡན་སློབ་མ་ཁྱོད་ལ་འདི་སྦྱིན་པས༔ ཡིད་སྒྲིབ་དག་ནས་ཐུགས་ཀྱི་དབང་ཐོབ་ཤོག༔ ཧཱུྃ་བཛྲ་དྷཀྐི་ནི་སིདྷ་མུ་ཥ་ཧ་རི་ནི་ས་ཙིཏྟ་ཨ་བྷི་ཥིཉྩ་ཧཱུྃ༔ ཅེས་བརྗོད་སྙིང་གར་སིནྡྷུ་རས་གླན་ནོ༔ དེ་ནས་དཔལ་གྱི་ཕྱག་མཚན་གྲི་གུག་ཁ་ཊྭཱྃ་རྐང་གླིང་ཐོད་རྔ་བྷནྡྷ་ལྕང་ལོ་ཅན་རྣམས་སློབ་བུའི་ལག་ཏུ་གཏད་ཅིང་༔ ཧཱུྃ༔ བདུད་འདུལ་དྷཀྐི་སེང་གདོང་ནག་མོའི་ཚོགས༔ འབུམ་ཕྲག་མཁའ་འགྲོའི་ཡོན་ཏན་འབྱུང་བའི་རྫས༔ མ་བརྒྱུད་ལྷ་ཚོགས་བསྒྲུབ་པའི་བླ་རྡོ་འདིས༔ དེང་འདིར་རིགས་ཀྱི་བུ་ལ་དབང་བསྐུར་བས༔ འབུམ་ཕྲག་མཁའ་འགྲོའི་ཡོན་ཏན་དབང་ཐོབ་ཤོག༔ ཧཱུྃ་བཛྲ་དྷཀྐི་ནི་སིངྷ་མུ་ཥ་ཧ་རི་ནི་ས་རཏྣ་ཨ་བྷི་ཥིཉྩ་ཧཱུྃ༔ ཅེས་བརྗོད་ཐོད་རྔ་འཁྲོལ་ཞིང་རྐང་གླིང་འབུད་དཔལ་གྱི་གཏོར་མ་སྤྱི་བོར་བཞག་ཅིང་༔ ཧཱུྃ༔ ཤ་ཁྲག་འབྲུ་བཅུད་བྷ་ལིང་གཏོར་མ་འདི༔ མཁའ་འགྲོའི་དཀྱིལ་འཁོར་ལྷ་དང་གཉིས་སུ་མེད༔ སྐལ་ལྡན་བུ་མཆོག་ཁྱོད་ལ་དབང་བསྐུར་བས༔ འབུམ་ཕྲག་མཁའ་འགྲོའི་འཕྲིན་ལས་དབང་ཐོབ་ཤོག༔ ཧཱུྃ་བཛྲ་དྷཀྐི་ནི་སིངྷ་མུ་ཁ་ཧ་རི་ནི་ས་ཀརྨ་བྷ་ལིངྟ་ཨ་བྷི་ཥིཉྩ་ཧཱུྃ༔ བཀའ་གཏད་དྲག་ཏུ་བྱ་ཞིང་ལྷ་ཚོགས་སློབ་མར་བསྟིམ༔ གཏོར་མ་དངོས་གྲུབ་ཏུ་རོལ༔ དབང་ཡོན་སྐྱེམས་བཅས་སློབ་དཔོན་སྐུ་ལ་མཆོད༔ དགའ་བྲོ་བཀྲ་ཤིས་ཚོགས་འཁོར་རྗེས་བསྐྱང་ངོ༔ དགེ་བ་བསྔོ་ཞིང་སྟོང་ཉིད་རྒྱས་གཏབ་སྟེ༔ བླ་རྡོ་བཅང་ཞིང་མཁའ་འགྲོ་བསྒྲུབ་ཅིང་བརྟེན༔ དམ་ཚིག་བསྲུང་ཞིང་མཆོད་གཏོར་བསྐང་གསོལ་འབད༔ རྩ་རླུང་སྦྱང་ཞིང་ཐིག་ལེ་མི་ཉམས་བྱ༔ སྐུ་གསུམ་མཁའ་འགྲོ་བདུད་འདུལ་དྷཀྐི་མས༔ བར་ཆད་སེལ་ཞིང་དངོས་གྲུབ་སྩོལ་བར་འགྱུར༔ དེ་ཕྱིར་ཉམས་སུ་ལོངས་ཤིག་ཕྱི་རབས་རྣམས༔ ས་མ་ཡཱ༔ རྒྱ་རྒྱ་རྒྱ༔ གཏེར་རྒྱ༔ སྦས་རྒྱ༔ གཉན་རྒྱ༔ ས་མ་ཡཱ༔ རྒྱ་རྒྱ་རྒྱ༔ བདག་ཁམས་པ་ཉི་མ་གྲགས་པས་གངས་རིའི་རྒྱལ་པོ་ཏེ་སེ་ནས་ཤིང་མོ་ཡོས་ཀྱི་ལོ་ལ་སྤྱན་དྲངས་ཤིང་། ལྕགས་ཕོ་སྤྲེའུའི་ལོ་ལ་ཤོག་སེར་ལས་ཕབ་པའོ། །མངྒ་ལཾ། །།

མཁའ་སྤྱོད་དཀར་མོའི་ཚེ་སྒྲུབ།

བཀའ་རྫོགས་པ་ཆེན་པོ་བླ་མ་བདེ་མཆོག་འཁོར་ལོ་ལས༔ མཁའ་སྤྱོད་དཀར་མོའི་ཚེ་སྒྲུབ་བཞུགས༔ མཁའ་འགྲོའི་དབང་ཕྱུག་ལ་ཕྱག་འཚལ་ལོ༔ ཤིན་ཏུ་དབེན་པའི་གནས་སུ་ལུས་རྣམ་སྣང་གི་ཆོས་བདུན་དང་ལྡན་པའི་ངང་ནས༔ སྐད་ཅིག་གིས་རང་ཉིད་ཚེ་ཡི་མཁའ་འགྲོ་མཁའ་སྤྱོད་དཀར་མོ་ཞལ་གཅིག་སེང་གེའི་གདོང་ཅན༔ སྐུ་མདོག་དཀར་མོ་རུས་རྒྱན་དང་དར་གྱི་ཅོད་པན་ཅན༔ ཕྱག་གཡས་ན་མདའ་དར་དང་གཡོན་ཚེ་བུམ་བསྣམས་པ༔ ཞབས་གཉིས་མཁའ་ལ་སྤྱོད་པའི་ཚུལ་ཅན་དུ་བཞུགས་ཤིང་༔ མེ་ལོང་དང་དྲིལ་བུ་གཡེར་ཁའི་ཕྲེང་བ་འཁྲོལ་བ་ཞིག་ཏུ་བསྒོམ༔ དེའི་ཐུགས་ཀར་ཙིཏྟ་རིན་པོ་ཆེ་འབར་བའི་ཀློང་དུ༔ ཉི་ཟླ་པདྨའི་གདན་ལ་རང་རིག་གི་ངོ་བོ་མགོན་པོ་ཚེ་དཔག་མེད་སྐུ་མདོག་དམར་པོ་ཞལ་གཅིག་བྱི་རུའི་མདོག་ལྟར་རབ་ཏུ་དམར་བ་ལ༔ ལོངས་སྤྱོད་རྫོགས་སྐུའི་རྒྱན་ཐམས་ཅད་ཀྱིས་སྤྲས་པ༔ ཞབས་རྡོ་རྗེ་སྐྱིལ་ཀྲུང་ཅན༔ མཉམ་གཞག་གི་ཕྱག་རྒྱ་ལ་ཚེ་བུམ་བདུད་རྩིས་བཀང་བ་བསྣམས་པ༔ ཡུམ་མཱ་མ་ཀི་དང་འཁྲིལ་བ༔ མདའ་དར་དང་ཚེ་བུམ་ཅན༔ སྣང་ལ་རང་བཞིན་མེད་པའི་སྐུ་རུ་གསལ་ཞིང་༔ མགོན་པོ་ཚེ་དཔག་མེད་ཀྱི་ཕྱོགས་བཞིར་པདྨ་འདབ་མ་བཞིའི་སྟེང་དུ་་རིགས་བཞིའི་མཁའ་འགྲོ་མདའ་དར་དང་ཚེ་བུམ་ཅན༔ སྐུ་མདོག་ཕྱོགས་མཐུན་ལ་ཞབས་གར་སྟབས་སུ་བཞེངས་པ༔ རྒྱན་དང་ལྡན་ཞིང་གཟི་བརྗིད་དང་ལྡན་པར་བསྐྱེད༔ མགོན་པོ་ཚེ་དཔག་མེད་ཀྱི་ཐུགས་ཀར་ཉི་མའི་སྟེང་དུ་རིན་པོ་ཆེ་པདྨ་རཱ་ག་ལས་གྲུབ་པའི་རྡོ་རྗེ་རྩེ་ལྔ་པ་ཞིག་གི་ལྟེ་བར་ས་བོན་ཐུགས་སྲོག་ཧྲཱིཿཡིག་དམར་པོས་མཚན་པའི་མཐར༔ ཨཱོཾ་ཨཱཿཧཱུྃ་ཧྲཱིཿསིདྷ་མུ་ཥ་ཧ་རི་ནི་ས་ཚེ་བྷྲཱུཾ་ཛྙཱ་ན་སིདྡྷི་ཧཱུྃ་ཧཱུྃ༔ ཅེས་པའི་སྔགས་འབྲུ་རྣམས་ཀྱིས་བསྐོར་བ་གཡས་སུ་འཁོར་བ་ལས་འོད་ཟེར་འཕྲོས༔ ལྷ་མོ་བཞི་དང་མཁའ་སྤྱོད་དཀར་མོའི་ཐུགས་རྒྱུད་བསྐུལ༔ ཚེ་ཡི་ལྷ་མོ་མགྱོགས་མ་སྒོ་མ་གྲངས་མེད་དཔག་ཏུ་མེད་པ་ཉི་ཟེར་གྱི་རྡུལ་ལྟར་འཚུབ་ཅིང་༔ འཁོར་འདས་ཀུན་ཏུ་འཕྲོས༔ སངས་རྒྱས་ཐམས་ཅད་ལ་མཉེས་པའི་མཆོད་པ་ཕུལ༔ སྐུ་གསུང་ཐུགས་ཀྱི་བྱིན་རླབས་ཐམས་ཅད་བསྡུས༔ སྟོང་གསུམ་འཇིག་རྟེན་གྱི་ཕྱི་སྣོད་འབྱུང་བ་བཞིའི་དུག་དབྱུངས༔ འབྱུང་བ་བཞིའི་དྭངས་མ་ཐམས་ཅད་འོད་ཀྱིས་བསྡུས༔ ནང་བཅུད་འགྲོ་བའི་ལས་སྒྲིབ་སྦྱངས༔ ཚེ་བསོད་དཔལ་འབྱོར་ཐམས་ཅད་རང་དབང་མེད་པར་འོད་ཀྱིས་དྲངས༔ ཁྱད་པར་དུ་རང་གི་ཚེ་སྲོག་ཆད་ཉམས་ཐམས་ཅད་བསྡུས་གསོས་སྤེལ་ནས༔ འཁོར་འདས་ཀྱི་ཐུགས་རྗེ་བྱིན་རླབས་ཚེ་བསོད་དབང་ཐང་ཐམས་ཅད་རྒྱ་མཚོ་ཆེན་པོ་ལ་ཆར་འབབས་པ་ལྟར་རང་ལུས་མཁའ་སྤྱོད་མར་གསལ་བ་དང་༔ རང་རིག་མགོན་པོ་ཚེ་དཔག་མེད་རང་སེམས་རྣམ་པར་དག་པའི་ཆ་སྙིང་པོ་ཧྲཱིཿཡིག༔ འབྱུང་བ་བཞིའི་རང་མདངས་དག་པའི་ལྷ་མཁའ་འགྲོ་མ་བཞི༔ སྐུ་གསུང་ཐུགས་ཀྱི་མཁྱེན་བརྩེ་ནུས་མཐུ་ཐམས་ཅད་ངོ་བོ་མ་འགགས་པའི་རང་རྩལ་སྔགས་འབྲུ་རྣམས་དང་བཅས་པ་ལ་ཐིམ་པས༔ འཁོར་འདས་ལམ་གསུམ་གྱི་ཚེ་བསོད་རང་ལ་འདུས༔ ལུས་ངག་ཡིད་གསུམ་འཇིགས་མེད་རྡོ་རྗེ་གསུམ་གྱི་ཀློང་དུ་གྲོལ་བར་བསྒོམ་ཞིང་གོང་གི་སྙིང་པོ་བཟླ༔ སྔགས་དམིགས་རྩེ་གཅིག་གནད་དུ་བསྣུན་པས༔ ཚེ་ལ་དབང་ཐོབ་པའི་རྟགས་དངོས་ཉམས་རྨི་ལམ་སོགས་ལ༔ མཁའ་སྤྱོད་མའི་ཞལ་མཇལ་བ༔ གསུང་ཐོས་པ༔ ལུང་སྟོན་པ༔ ཉི་ཟླ་ལ་ཞོན་པ་སོགས་འབྱུང་བར་འགྱུར་རོ༔ སྐབས་སུ་ཚེ་འགུགས་པ་ནི༔ ཧཱུྃ༔ མཁའ་སྤྱོད་དཀར་མོ་མཁའ་འགྲོའི་གཙོ༔ མཁའ་འགྲོ་འབུམ་ལ་དབང་ཡང་བསྒྱུར༔ མགོན་པོ་རྒྱལ་བ་ཚེ་དཔག་མེད༔ རིག་འཛིན་ཚེ་ལ་མངའ་ཡང་བརྙེས༔ མཁའ་འགྲོ་སྡེ་བཞི་སྐུ་བཞིའི་བདག༔ འཁོར་འདས་ལམ་གསུམ་ནུས་སྟོབས་འཆང་༔ གསལ་བ་གསུམ་གྱི་ཏིང་འཛིན་གྱིས༔ རྡོ་རྗེ་གསུམ་གྱི་ཚེ་བསྒྲུབ་ཅིང་༔ འཁོར་འདས་ཀུན་གྱི་བྱིན་རླབས་དང་༔ ཚེ་བསོད་དཔལ་འབྱོར་དབང་ཐང་རྣམས༔ བདག་གི་ལུས་ངག་ཡིད་གསུམ་ལ༔ གཉིས་སུ་མེད་པར་བསྟིམས་ནས་ཀྱང་༔ ཐ་དད་མེད་པར་དབང་བསྐུར་ཞིག༔ ཅེས་བརྗོད་སྙིང་པོ་ཅི་རིགས་བགྲངས༔ ས་མ་ཡཱ༔ རྒྱ༔ ཨེ་མ་གསང་བའི་ཚེ་སྒྲུབ་འདི༔ ཤིན་ཏུ་ཟབ་ཕྱིར་གཏེར་དུ་སྦས༔ ལས་འཕྲོ་ཅན་གྱིས་སྤྱོད་པར་ཤོག༔ ས་མ་ཡཱ༔ རྒྱ་རྒྱ་རྒྱ༔ གཏེར་རྒྱ༔ སྦས་རྒྱ༔ ཟབ་རྒྱ༔ གཉན་རྒྱ༔ གཏད་རྒྱ༔ བདག་སྤྲང་བན་ཉི་མ་གྲགས་པས་ཤོག་སེར་ལས་ཕབ་པའོ། མངྒཱ་ལཾ། །

མཁའ་སྤྱོད་བདུད་འདུལ་མའི་རྫས་སྲུང་།

བཀའ་རྫོགས་པ་ཆེན་པོ་བླ་མ་བདེ་མཆོག་འཁོར་ལོ་ལས༔ མཁའ་སྤྱོད་བདུད་འདུལ་མའི་རྫས་སྲུང་ཡོདཿ ཡེ་ཤེས་མཁའ་འགྲོའི་ཚོགས་ལ་འདུད༔ ཡེ་ཤེས་མཁའ་འགྲོའི་རྣལ་འབྱོར་པས༔ བསྟན་དང་འགྲོ་བའི་དོན་ཕྱིར་དུ༔ སེམས་བསྐྱེད་གདོན་བགེགས་བསྲུང་བའི་ཕྱིར༔ དྲག་པོའི་ལས་སྦྱོར་རྫས་བསྡུད་བསྟན༔ ས་མ་ཡཱཿ རྒྱ་རྒྱ་རྒྱཿ སྔོན་འགྲོ་དང་ནི་དངོས་གཞི་དང་ཿ རྗེས་ཀྱི་རིམ་པ་རྣམ་གསུམ་གྱིསཿ རིམ་པར་དབྱེ་སྟེ་གསལ་བར་བྱཿ རྗེས་འཇུག་རྣམས་ཀྱི་གོ་ཆར་ཤོག༔ ས་མ་ཡཱ༔ དང་པོ་སྔོན་འགྲོའི་རྫས་བསྲུང་ནི༔ བཙན་དུག་ར་དུག་ཐང་ཕྲོམ་གསུམ༔ མི་ཁྲག་རྟ་ཁྲག་ཁྱི་ཁྲག་གསུམ༔ གླང་གཡག་ར་ཐུག་རྭ་གཞོབ་གསུམ༔ རྒྱ་ཚིལ་ཕག་ཚིལ་ཚིལ་ཆེན་གསུམ༔ དྲི་ཆེན་ཕག་བྲུན་སྤྱང་བྲུན་གསུམ༔ མི་ཤ་རྟ་ཤ་ཕུག་ཤུད་ཤ༔ དྲི་ཆུ་བ་ཆུ་གར་ཆང་གསུམ༔ གླ་རྩི་བ་བླ་སྡོང་རོས་གསུམ༔ ཤུ་དག་དཀར་ན་སྦྲ་བ་གསུམ༔ ཤིང་ཀུན་མུ་ཟི་རྟ་བོན་གསུམ༔ སྒོག་ཅིག་མ་ནུ་ཐང་ཕྲོམ་གསུམ༔ གུ་གུལ་ཡུངས་དཀར་ཡུངས་ནག་གསུམ༔ གཞན་ཡང་ཤ་སྣ་ཁྲག་སྣ་དང་༔ དྲི་ངར་ལྡན་པའི་སྨན་རྣམས་བསགས༔ གླང་ཐུག་རྭ་ཅོའི་ནང་དུ་བླུག༔ རྡོ་རྗེ་འབར་བས་རྒྱ་ཡང་བཏབ༔ སྨྲ་བ་བཅད་ལ་སྔགས་འདི་བསྒྲངས༔ ཧཱུྃ་བཛྲ་དྷཀྐི་ནི་སིང་ཧ་མུ་ཥ་ཧ་རི་ནི་ས་ཧཱུྃ་ཕཊ༔ སྡེ་བརྒྱད་བྱད་མ་རྦོད་གཏོང་དང་བཅས་པའི་སྲོག་རྩ་ལ་ཡཾ་ཡཾཿ སྙིང་རྩ་ལ་འདུས་འདུས༔ ཁྲག་རྩ་ལ་རྒྱུག་རྒྱུག་བླ་སྲོག་རྣམ་པར་ཤེས་པ་པྲེང་པྲེང་༔ སིདྷ་མུ་ཥ་དྷཀྐི་ནི་ས་མ་ཡ་བྷྱོ་བྷྱོ་བཟློག་བཟློགཿ འབྱུང་པོ་གནོད་བྱེད་ཐམས་ཅད་མཱ་ར་ཡ་རྦད་ཡ་ཆོད་ཅིག༔ བྱེར་ཅིག་ཆིངས་ཤིག༔ མ་མ་སྙིང་རྩ་ཁོས་ཁོས༔ ཚལ་པ་ཚལ་པ་རྦད་བྷྱོ༔ དྲག་སྔགས་གནམ་ལྕགས་སྤུ་གྲི་འདི༔ བརྒྱ་སྟོང་ཁྲི་འབུམ་ཅི་མང་བཟླས༔ རྫས་ལ་སྔགས་ཀྱི་དྲོད་ཀྱིས་གླན༔ གསུམ་པ་རྗེས་ཀྱི་རིམ་པ་ནི༔ འདི་ལྟར་རྫས་སྔགས་སུས་བསྒྲུབས་པ༔ སྔོན་ལས་ངན་པའི་རྐྱེན་བཟློག་ན༔ འཕྲལ་རྐྱེན་ཕྲན་བུ་སྨོས་ཅི་དགོས༔ ལུས་ལ་བཅང་བས་བྱད་མ་དང་༔ རྦོད་གཏོང་སྡེ་བརྒྱད་དམོད་པ་ཐུབ༔ དྲི་ཙམ་ཚོར་བས་དཔག་ཚད་བསྲུངས༔ བྱུག་པས་མཛེ་ཤུ་སྐྲང་འབུར་དང་༔ གག་ལྷོག་གཟེར་གསུམ་གནོད་པ་བཟློག༔ རིལ་བུ་བསྟེན་ན་ངེས་པར་བཟློག༔ གཟའ་ཀླུ་རྒྱལ་བསེན་གདུག་པ་འཇོམས༔ ངག་མནན་ཕྲ་མེན་སེལ་གྱི་རིགས༔ འགོས་ནད་འབྲུམ་བུ་དམར་བཤལ་སོགས༔ ནད་གདོན་བར་ཆད་འཇིགས་པ་ན༔ དུ་བས་བདུག་ཅིང་དྲི་ལ་སྣོམས༔ གནོད་བྱེད་གཡུལ་ལས་ངེས་པར་རྒྱལ༔ གཏེར་འདོན་སྦས་ཡུལ་གནས་སྒོ་ཕྱེ༔ རོ་གཉན་ཁུར་དང་ཤིང་གཉན་གཅོད༔ བྲག་གཤོག་རྡོ་བསློག་མཁར་ལས་བྱེད༔ མདོར་ན་དྲག་ལས་གང་བྱེད་ཀྱང་༔ འདི་ནི་རྣལ་འབྱོར་ལུས་ཀྱི་གོ༔ འདི་མེད་གཅེར་བུ་གྲི་ཁ་འདྲ༔ འདི་ཡིས་མི་ཐུབ་གང་ཡང་མེད༔ ཐོད་ངན་ནང་དུ་རྫས་བླུགས་ཏེ༔ ཆུ་མིག་བྱང་ལྟས་མགོ་བོར་སྦས༔ ཐོག་དང་སེར་བ་ཁོལ་རྒྱུག་བྱེད༔ ཐོད་པར་བླུག༔ ཞིང་དཀྱིལ་སྦས་ན་སྐྱེ་རྒྱུན་འཆད༔ རོའི་ཐོད་པར་བླུགཿ ཁང་རྨིང་སྦས་ན་མི་རབས་འཆད༔ ལི་ཐོད་པར་བླུགཿ ལུང་གསུམ་འདུས་པའི་ལ་ཁར་བསྐྱེལ༔ དགྲ་བོའི་རྟ་རབས་རྩད་ནས་གཅོད༔ འདི་དག་ལས་སྦྱོར་གང་བྱེད་ཀྱང་༔ དྲག་སྔགས་བརྒྱ་རྩའི་ནུས་པ་གསོ༔ ས་མ་ཡཱ༔ རྒྱ་རྒྱ་རྒྱ༔ རྒྱ་གར་སྔགས་འཆང་པདྨ་ངས༔ མ་བསྒྲུབས་ནུས་ལྡན་གནམ་ལྕགས་མཁར༔ སྤེེལ་བ་ཕངས་ནས་གཏེར་དུ་སྦས༔ ལས་འཕྲོ་ཅན་གྱིས་སྤྱོད་པར་ཤོག༔ ལྷ་བཙན་ཆེན་པོས་བཀའ་འདི་སྲུངས༔ ས་མ་ཡཱཿ རྒྱ་རྒྱ་རྒྱ༔ གཏེར་རྒྱ༔ སྦས་རྒྱ༔ ཟབ་རྒྱ༔ གཉན་རྒྱ༔ གཏད་རྒྱ༔ ས་མ་ཡཱ༔ བདག་སྤྲང་བན་ཉི་མ་གྲགས་པས་གངས་རིའི་རྒྱལ་པོ་ཏེ་སེའི་བདེ་ཆེན་གསང་བ་ཕུག་ནས་རྙེད་ཅིང་། ཤོག་སེར་ལས་བཤུས་སོ། །མངྒ་ལཾ།། །།

བདུད་འདུལ་མཁའ་འགྲོ་ནག་མོའི་རབ་ཏུ་གསང་བ་བཟློག་པའི་འཕྲིན་ལས།

བཀའ་རྫོགས་པ་ཆེན་པོ་བླ་མ་བདེ་མཆོག་འཁོར་ལོ་ལས༔ བདུད་འདུལ་མཁའ་འགྲོ་ནག་མོའི་རབ་ཏུ་གསང་བ་བཟློག་པའི་འཕྲིན་ལས་བཞུགས༔ དཔལ་ཆེན་པོ་མཁའ་འགྲོའི་དབང་ཕྱུག་ལ་ཕྱག་འཚལ་ལོ༔ དགུ་མཚམས་དུས་ཐེབས་འཕུང་གསུམ་ཉི་མ་ལ༔ ཡིད་དང་མཐུན་པའི་གནས་ཉིད་དུ༔ སྟེགས་བུ་ནག་འཇམས་མཁྲེགས་པའི་སྟེང་དུ་དུག་ཁྲག་གིས་ཆག་ཆག་གདབ་སྟེ༔ རོ་སོལ་གྱིས་ནག་པོར་བྱུག༔ ད་ལ་གཞུང་ལྟར་རམ་ཆོས་འབྱུང་འཁོར་ལོ་རྩིབས་བརྒྱད་པའི་མཐར་ཐོད་ར་མེ་རིས་བསྐོར་བ་འབྲི༔ མཛེས་ཚོན་ནི་སྒྲུབ་གཞུང་ལྟར་དུར་ཁྲོད་རྡོ་ཚོན་གྱིས་སྒྱུར༔ བསད་པ་དང་བཟློག་པ་གང་གཙོ་བོར་འདོན་པའི་བཅའ་གཞི་དང་གཞུང་ལྟར་ལིངྒ་འབྲི་ཞིང་རྫས་རྣམས་བསགས༔ ཁྱད་པར་དུ་ཁྲོ་ལྕགས་ཀྱི་སྣོད་གང་ཡང་རུང་བར༔ ས་གཉན་རི་གཉན་གྱི་ཡུལ་ནས་རྡོ་དམར་ནག་གི་མདོག་ལ་དབྱིབས་གྲུ་གསུམ་དམར་གྱི་གཏོར་མ་གྱེན་དུ་བསླངས་པ་འདྲ་བའི་རྡོ༔ གཙོ་བོ་གཅིག་ལ་འཁོར་བརྒྱད་བསགས་ཤིང་༔ རྩེ་ལ་བཛྲ༔ རྐེད་པ་ལ་ཧཱུྃཿ སྨད་ལ་ཛཿ བྷྱོ་ཟློག་ཅེས་དུག་ཁྲག་གིས་བྲི་ཞིང༔ སྣོད་དུ་བཤམས་ཏེ་ཤ་སྣ་ཁྲག་སྣ་མང་པོས་བརྒྱན༔ མདའ་རྒོད་སྒྲོ་མའི་མགུལ་དུ་མཁའ་འགྲོའི་སྐུ་གཟུགས་དར་ནག་གི་གུར་ཕུབ་པ་རྡོ་ཟོར་དབུས་སུ་གཟུགས༔ ཀེ་ཚེ་ཤངས་ཚེ་འཚེ་དང་ཡུངས་ཀར་ནག་སོགས་ཀྱང་བར་བར་དུ་འཛུགས༔ མཐའ་མར་མཐེབ་ཀྱུ་དང་ཤ་དུམ་ཅི་མང་བཏབ༔ དེ་དཀྱིལ་འཁོར་གྱི་དབུས་སུ་ལྕགས་ཀྱི་རྐང་གསུམ་ཁར་བཤམས༔ མཐའ་སྐོར་དུ་སྨན་རག་གཏོར་སོགས་མཆོད་རྫས་རྣམས་དང་༔ ཚོགས་ཀྱི་ཡོ་བྱད་བཤམས༔ རྣལ་འབྱོར་བ་བདེ་བའི་གདན་ལ་འདུག་ཅིང་རྔ་དུང་རོལ་མོ་རྣམས་འཁྲོལ་ཏེ༔ མཁའ་འགྲོའི་ལས་གཞུང་བསྲང་༔ བདག་མདུན་རྣམས་སྐད་ཅིག་གིས་བདུད་འདུལ་མཁའ་འགྲོ་ནག་མོའི་ལྷ་ཚོགས་སུ་ཡང་ཡང་གསལ་ཞིང་༔ ཤེས་པ་ཧུར་ཕྱུངས་ཉམས་རྟོགས་གོང་དུ་སྤར་ཏེ༔ བསད་པའམ་བཟློག་པ་སོགས་གང་འདོད་ལྟར་དགྲ་བོ་བྱད་མ་དགུག་བསྟིམ་དྲག་ཏུ་བྱ་ཞིང་༔ ལས་སྦྱོར་གང་འདོད་ཀྱི་སྙིང་པོ་བགྲང་བའམ༔ ཡང་ན་བཟློག་པས་མི་བཟློག་མཁན་གྱི་གཤེད་མ་དགྲ་བོ་བྱད་མ་ལྷ་སྲུང་རྡུལ་དུ་བརླག་པའི་དྲག་སྔགས་འདི་བཟླའོ༔ ཧཱུྃ་བཛྲ་དྷཀྐི་ནི་སིདྷ་མུ་ཁ་ཧ་རི་ནི་ས་ཙིཏྟ་ཧྲིང་ཛཿ རྔམ་རྔམ་ཁམ་ཁམ་རམ་རམ་མྱོགས་མྱོགས་ལམ་ལམ་ཡམ་ཡམ་དགྲ་བོ་བྱད་མ་དཀྲུགས་དཀྲུགས༔ ཕྱེས་ཕྱེས་མཱ་ར་ཡ་སྙིང་ཁྲག་ཚལ་པ་རྦད་རྦད་སོད་སོད་བྷྱོ་བྷྱོ་ཟློག་ཟློག༔ ཅེས་མི་ཚིག་གིས་བར་མ་ཆོད་པར་ཕ་རོལ་གྱི་ནུས་པ་དང་སྦྱར་ཏེ་བརྒྱ་སྟོང་ཁྲི་འབུམ་སོགས་བཟླ་ཞིང་༔ མཁའ་འགྲོ་འཁོར་བཅས་ཀྱིས་དགྲ་བོ་བྱད་མ་ལྷ་སྲུང་གདོན་བགེགས་བར་དུ་གཅོད་པ་ཐམས་ཅད་ཆོམ་ཆོམ་གསོལ་ཞིང་ལྷ་ཚོགས་ཐམས་ཅད་དྲག་ཏུ་ཁྲོས་ཏེ༔ ཕ་རོལ་གྱི་ཤ་ཟོས་ཁྲག་འཐུང་རུས་པ་མུར་དབུགས་འགམས་སྲོག་རྩ་བཅད་སྙིང་ཁྲག་འཐུངས་ནོར་ཕྲོགས་གྲོང་སྒྱེལ་ལྷ་སྲུང་དང་ཕྱེས་ནད་ཡམས་ལྟས་ངན་སྣ་ཚོགས་ཀྱི་ཆར་དྲག་ཏུ་ཕབ་པས་རྡུལ་དུ་བརླགས་པར་བསྒོམས་ཤིང་༔ ལིངྒ་བསྒྲལ་ནས་གཏོར་མར་འབུལ་ཞིང་༔ འདོན་སྒོམ་སྦྲགས་མར་འདི་སྐད་བཟློག་པའི་འཕྲིན་ལས་བཅོལ་ལོ༔ ཧཱུྃ་ཧཱུྃ༔ ཆོས་དབྱིངས་མཁའ་འགྲོ་ཅིར་ཡང་མ་གྲུབ་ཀྱང་༔ འགག་མེད་རོལ་པ་ཡེ་ཤེས་དཀྱིལ་འཁོར་ནས༔ བདུད་དང་མུ་སྟེགས་རྦོད་གཏོང་བཟློག་པའི་ལྷ༔ ཡེ་ཤེས་མཁའ་འགྲོ་ལས་ཀྱི་གཙོ་མོ་སྟེ༔ བདུད་འདུལ་ནག་མོ་མཁའ་འགྲོ་སེང་གེའི་གདོང་༔ ཞལ་གདངས་ལྗགས་འདྲིལ་མཚེ་བ་གཙིགས་པ་ཡིས༔ སྟོང་གསུམ་གཡོ་ཞིང་སྲིད་གསུམ་འཁྲུག་པར་བྱེད༔ འཁོར་འདས་གཡོ་འཁྲུག་རྦོད་གཏོང་རྦད་འདྲེའི་ཚོགས༔ སྡང་དགྲ་གནོད་བྱེད་བྱད་མའི་སྟེང་དུ་ཟློག༔ ཞབས་གཉིས་གར་སྟབས་ས་ལ་བརྡབས་པ་ཡིས༔ སྟོང་གི་འཇིག་རྟེན་རི་རབ་འདེགས་སྙམ་བྱེད༔ ས་བདག་གཡོ་འཁྲུག་རྦོད་གཏོང་རྦད་འདྲེའི་ཚོགས༔ སྡང་དགྲ་གནོད་བྱེད་བྱད་མའི་སྟེང་དུ་ཟློག༔ སྤྱན་གསུམ་སྡང་མིག་རབ་ཏུ་འཁྲུག་པ་ལས༔ ཉི་ཟླ་གཉིས་པོ་ཕྱོགས་བཞིར་རྒྱུག་སྙམ་བྱེད༔ གཟའ་སྐར་གཡོ་འཁྲུག་རྦོད་གཏོང་རྦད་འདྲེའི་ཚོགས༔ སྡང་དགྲ་གནོད་བྱེད་བྱད་མའི་སྟེང་དུ་ཟློག༔ དབུ་སྐྲ་ཁམ་གནག་རབ་ཏུ་བསིག་ཅིང་སྤྲུག༔ སྤྲིན་ནག་ཁ་རླངས་མུན་པར་འཐིབས་སྙམ་བྱེད༔ མྱོས་བྱེད་རྗེད་བྱེད་རྦོད་གཏོང་རྦད་འདྲེའི་ཚོགས༔ སྡང་དགྲ་གནོད་བྱེད་བྱད་མའི༴ ཞལ་ནས་ཧཱུྃ་ཕཊ་བྷྱོ་ཟློག་འབྲུག་སྟོང་ལྡིར༔ ཁམས་གསུམ་ཀུན་ཀྱང་བརྒྱལ་ཞིང་འབོགས་པར་བྱེད༔ བརྒྱལ་འབོགས་སྨྱོ་ནད་རྦོད་གཏོང་རྦད་འདྲེའི་ཚོགས༔ སྡང་དགྲ་གནོད་བྱེད་བྱད་མའི༴ ཕྱག་གཡས་གྲི་གུག་ནམ་མཁར་འཕྱར་བ་ཡིས༔ ཕྱི་ནང་སྣོད་བཅུད་ཚལ་པར་གཏུབས་སྙམ་བྱེད༔ གསོད་གནོད་གཏུབ་བྱེད་རྦོད་གཏོང་རྦད་འདྲེའི་ཚོགས༔ སྡང་དགྲ་གནོད་བྱེད༴ ཕྱག་གཡོན་བྷནྡྷར་རཀྟ་བསྐྱིལ་བ་ལས༔ ཡུལ་ཁམས་ཀུན་ཏུ་ཁྲག་མཚོ་འཁྱིལ་སྙམ་བྱེད༔ ཁྲག་ནད་དལ་ཡམས་རྦོད་གཏོང་རྦད་འདྲེའི་ཚོགས༔ སྡང་དགྲ་གནོད་བྱེད་བྱད་མའི༴ གྲུ་མོར་ཁ་ཊྭཱྃ་འབར་བ་བརྟེན་པ་ལས༔ སྣང་སྲིད་ཀུན་ཀྱང་མཚོན་ཆས་གང་སྙམ་བྱེད༔ མཚོན་ཆའི་གཡོ་འཁྲུག་རྦོད་གཏོང་རྦད་འདྲེའི་ཚོགས༔ སྡང་དགྲ་གནོད་བྱེད་བྱད༴ སྐུ་ལ་དུར་ཁྲོད་རུས་རྒྱན་གསོལ་བ་ལས༔ རྒྱུ་སྐར་མ་ལུས་ཚོགས་ཀྱིས་བརྒྱན་སྙམ་བྱེད༔ ཚེས་གྲངས་གཡོ་འཁྲུག་རྦོད་གཏོང་རྦད་འདྲེའི་ཚོགས༔ སྡང་དགྲ་གནོད་བྱེད༴ གཏི་མུག་གླང་ཆེན་ལྤགས་པ་སྤྲུགས་པ་ལས༔ སྟོང་གསུམ་ཀུན་ཀྱང་མུན་པས་གཏིབས་སྙམ་བྱེད༔ རྨོངས་བྱེད་གཏི་མུག་རྦོད་གཏོང་རྦད་འདྲེའི་ཚོགས༔ སྡང་དགྲ་གནོད་བྱེད༴ འདོད་ཆགས་མི་ལྤགས་གཡང་གཞི་གསོལ་བ་ལས༔ ཕོ་བརྒྱུད་མོ་བརྒྱུད་ཐམས་ཅད་སྐུ་ལ་རྫོགས༔ ཆགས་བྱེད་གཡེང་འཁྲུག་རྦོད་གཏོང་རྦད་འདྲེའི་ཚོགས༔ སྡང་དགྲ་གནོད་བྱེད༴ ཞེ་སྡང་སྦྲུལ་ནག་ཆུན་པོས་སྤྲས་པ་ལས༔ རི་རབ་རྒྱ་མཚོ་ཀུན་ཀྱང་འཁྱོམ་སྙམ་བྱེད༔ སྡང་བྱེད་གཡོ་འཁྲུག་རྦོད་གཏོང་རྦད་འདྲེའི་ཚོགས༔ སྡང་དགྲ་གནོད་བྱེད༴ ང་རྒྱལ་སྟག་གི་ཤམ་ཐབས་བཅིངས་པ་ལས༔ དྲེགས་ཆེན་བཅོ་བརྒྱད་བྲན་དང་ཕོ་ཉར་འགྱེད༔ དྲེགས་པའི་ལྷ་སྲིན་རྦོད་གཏོང་རྦད་འདྲའི་ཚོགས༔ སྡང་དགྲ་གནོད་བྱེད༴ མི་མགོ་ལྔ་བཅུའི་ཕྲེང་བ་འཁྲོལ་བ་ལས༔ རི་བྲག་ཐམས་ཅད་ཐབ་ཏུ་འགྲིལ་སྙམ་བྱེད༔ འབྱུང་བའི་ཐུན་ཟོར་རྦོད་གཏོང་རྦད་འདྲེའི་ཚོགས༔ སྡང་དགྲ་གནོད་བྱེད༴ གནམ་ལྕགས་སྤུ་གྲིའི་གཤོགས་པ་བརྡབས་པ་ལས༔ གནམ་ས་གཉིས་པོ་ལྟོ་བ་འབྱར་སྙམ་བྱེད༔ གནམ་སའི་གཡོ་འཁྲུག་རྦོད་གཏོང་རྦད་འདྲེའི་ཚོགས༔ སྡང་དགྲ་གནོད་བྱེད༴ རཀྟ་ཁྲག་གི་ཐིག་ལེས་བརྒྱན་པ་ལས༔ ནད་གཏོང་མ་མོ་འབུམ་འབུམ་འཕྲོ་ཞིང་འགྱེད༔ ཁྲག་ནད་དལ་ཡམས་རྦོད་གཏོང་རྦད་འདྲེའི་ཚོགས༔ སྡང་དགྲ་གནོད་བྱེད༔ ཞག་གི་སོར་རིས་འབར་བ་བྱུགས་པ་ལས༔ སྲིད་པ་གསུམ་གྱི་ཚེ་སྲོག་འཕྲོག་སྙམ་བྱེད༔ ཚེ་སྲོག་ཧུར་ཐུམ་རྦོད་གཏོང་རྦད་འདྲེའི་ཚོགས༔ སྡང་དགྲ་གནོད་བྱེད༴ ཐལ་ཆེན་འབར་བའི་ཚོམ་བུས་བྱུགས་པ་ལས༔ སྣང་སྲིད་ལྷ་འདྲེ་སེར་ལྟར་འདྲིལ་སྙམ་བྱེད༔ ལྷ་སྲིན་སྡེ་བརྒྱད་རྦོད་གཏོང་རྦད་འདྲེའི་ཚོགས༔ སྡང་དགྲ་གནོད་བྱེད༴ སྣ་ཚོགས་དར་གྱི་ཅོད་པན་འཕུར་བ་ལས༔ ཡེ་ཤེས་མཁའ་འགྲོའི་འོད་ཀྱིས་གང་སྙམ་བྱེད༔ ཡེ་ཤེས་མཁའ་འགྲོའི་བཀའ་ཆད་རྦོད་གཏོང་ཚོགས༔ སྡང་དགྲ་གནོད་བྱེད༴ མེ་རླུང་དམར་ནག་ཀློང་དུ་བཞུགས་པ་ལས༔ བསྐལ་པའི་མེ་ཆེན་འབར་ཞིང་སྲེག་སྙམ་བྱེད༔ སྲེག་བྱེད་མེ་ཡི་རྦོད་གཏོང་རྦད་འདྲེའི་ཚོགས༔ སྡང་དགྲ་གནོད་བྱེད༴ སྐུ་ཡི་གཟི་བརྗིད་རབ་ཏུ་འབར་བ་ལས༔ ཉི་མ་འབུམ་གྱི་ཟེར་ཆེན་འཁྲིགས་སྙམ་བྱེད༔ ཡེ་ཤེས་འཇིག་རྟེན་བསུན་རྟ་རྦོད་གཏོང་ཚོགས༔ སྡང་དགྲ་གནོད་བྱེད༴ རིགས་བཞི་མཁའ་འགྲོ་སྡེ་བརྒྱད་འཁོར་གྱིས་བསྐོར༔ སྟོང་ཁམས་སྲིད་པ་རབ་ཏུ་གང་སྙམ་བྱེད༔ སྟོང་གསུམ་འཇིག་རྟེན་རྦོད་གཏོང་རྦད་འདྲེའི་ཚོགས༔ སྡང་དགྲ་གནོད་བྱེད་བྱད་མའི་སྟེང་དུ་ཟློག༔ འབུལ་ལོ་གསང་ཆེན་རྡོ་ཡི་གཏོར་མ་འབུལ༔ བཞེས་ཤིག་བདུད་འདུལ་དཔལ་གྱི་མཁའ་འགྲོའི་ཚོགས༔ བསྐུལ་ལོ་ཐུགས་རྗེ་སྤྲུལ་པའི་མཁའ་འགྲོ་འབུམ༔ བཟློག་ཅིང་བསྒྱུར་བའི་འཕྲིན་ལས་གྲུབ་པར་མཛོད༔ ཧཱུྃ་ཧཱུྃ༔ སྤྱི་གཙུག་བདེ་ཆེན་དབང་གི་དཀྱིལ་འཁོར་ནས༔ རིགས་ཀྱི་བདག་པོ་རྡོ་རྗེ་དྲག་པོ་རྩལ༔ མཁའ་འགྲོ་རྡོ་རྗེ་ཕག་མོ་ཡུམ་དང་བཅས༔ འཁོར་དུ་རྩ་བརྒྱུད་བླ་མ་རྣམས་ཀྱིས་བསྐོར༔ སྐུ་དང་ཡེ་ཤེས་ཐུགས་རྗེའི་ཤུགས་ཕྱུངས་ལ༔ རྣལ་འབྱོར་བདག་ལ་གནོད་བྱེད་གདོན་བགེགས་དགྲ༔ རྦོད་གཏོང་རྦད་འདྲེ་ཐམས་ཅད་ཟློག་ཏུ་གསོལ༔ རྨིས་ལྟས་མཚན་ངན་ཐམས་ཅད་ཟློག་ཏུ་གསོལ༔ ལྟས་ངན་ཡུལ་སྡིག་ཐམས་ཅད་ཟློག་ཏུ་གསོལ༔ ཆགས་ཆེ་ཉམ་ང་ཐམས་ཅད་ཟློག་ཏུ་གསོལ༔ བྱད་ཀ་ཕུར་ཁ་ཐམས་ཅད་ཟློག་ཏུ་གསོལ༔ གཏད་ཁ་ཁྲམ་ཁ་ཐམས་ཅད་ཟློག་ཏུ་གསོལ༔ འབུལ་ལོ་གསང་ཆེན་རྡོ་ཡི་གཏོར་མ་འབུལ༔ བསྐུལ་ལོ་རྡོ་རྗེ་དྲག་རྩལ་ཐུགས་དམ་བསྐུལ༔ བཟློག་ཅིང་བསྒྱུར་བའི་འཕྲིན་ལས་གྲུབ་པར་མཛོད༔ ཧཱུྃ་ཧཱུྃ༔ བདེ་གཤེགས་སངས་རྒྱས་རིགས་ཀྱི་མཁའ་འགྲོ་མ༔ མཚན་ནི་རྡོ་རྗེ་ཕག་མོ་ཞེས་སུ་གྲགས༔ ཆོས་ཀྱི་དབྱིངས་ལ་དབང་ཡང་བསྒྱུར་བའི་མ༔ རྒྱལ་པོའི་ཆོ་འཕྲུལ་བྱད་མ་རྦོད་གཏོང་ཟློག༔ གཤིན་རྗེའི་ཆོ་འཕྲུལ་བྱད་མ་རྦོད་གཏོང་ཟློག༔ ཀླུ་བདུད་ཆོ་འཕྲུལ་བྱད་མ་རྦོད་གཏོང་ཟློག༔ གནོད་སྦྱིན་ཆོ་འཕྲུལ་བྱད་མ་རྦོད་གཏོང་ཟློག༔ སྲིད་གསུམ་སྣོད་བཅུད་ཕྱི་ཡི་གདོན་ཚོགས་ཟློག༔ འབུལ་ལོ་གསང་ཆེན་རྡོ་ཡི་གཏོར་མ་འབུལ༔ བསྐུལ་ལོ་རྡོ་རྗེ་ཕག་མོའི་ཐུགས་དམ་བསྐུལ༔ ཟློག་ཅིག་བསྒྱུར་ཅིག་འཕྲིན་ལས་གྲུབ་པར་མཛོད༔ ཧཱུྃ་ཧཱུྃ༔ ཤར་གྱི་ཕྱོགས་ཀྱི་དཀྱིལ་འཁོར་ནས༔ རྡོ་རྗེ་རིགས་ཀྱི་མཁའ་འགྲོ་མ༔ སྤྲུལ་པ་ཁྲོ་མོ་དཀར་མོ་འབུམ༔ ཤར་གྱི་གདོན་བགེགས་ཐམས་ཅད་ཟློག༔ རྦོད་གཏོང་རྦད་འདྲེ་ཐམས་ཅད་ཟློག༔ ཆགས་ཆེ་ཉམ་ང་ཐམས་ཅད་ཟློག༔ མི་ལྟས་མཚན་ངན་ཐམས་ཅད་ཟློག༔ ལྟས་ངན་ཡུལ་སྡིག་ཐམས་ཅད་ཟློག༔ བྱད་ཀ་ཕུར་ཁ་ཐམས་ཅད་ཟློག༔ གཏད་ཁ་ཁྲམས་ཁ་ཐམས་ཅད་ཟློག༔ ནད་ཁ་ཡམས་ཁ་ཐམས་ཅད་བཟློག༔ ཆེ་སྲི་ཆུང་སྲི་ཐམས་ཅད་ཟློག༔ གོད་ཀ་རྒྱུ་སྦྱོར་ཐམས་ཅད་ཟློག༔ འབུལ་ལོ་གསང་ཆེན་རྡོ་གཏོར་འབུལ༔ བསྐུལ་ལོ་སྐྱོད་བྱེད་དཀར་མོ་འབུལ༔ ས་ཡི་ཁམས་ལ་དབང་སྒྱུར་ལ༔ ས་བདག་གདོན་ཚོགས་ཐམས་ཅད་ཟློག༔ ཟློག་སྒྱུར་འཕྲིན་ལས་གྲུབ་པར་མཛོད༔ ཧཱུྃ་ཧཱུྃ༔ ལྷོ་ཡི་ཕྱོགས་ཀྱི་དཀྱིལ་འཁོར་ནས༔ རིན་ཆེན་རིགས་ཀྱི་མཁའ་འགྲོ་མ༔ སྤྲུལ་པ་ཁྲོ་མོ་སེར་མོ་འབུམ༔ ལྷོ་ཡི་གདོན་བགེགས་ཐམས་ཅད་ཟློག༔ རྦོད་གཏོང་རྦད་འདྲེ༴ ཆགས་ཆེ་ཉམ་ང་༴ རྨི་ལྟས་མཚན༴ ལྟས་ངན་ཡུལ་སྡིག༴ བྱད་ཀ་ཕུར་ཁ༴ གཏད་ཁ་ཁྲམ་ཁ༴ ནད་ཁ་ཡམས་ཁ༴ ཆེ་སྲི་ཆུང་སྲི༴ གོད་ཀ་རྒྱུ་སྦྱོར༴ འབུལ་ལོ་གསང་ཆེན་རྡོ་གཏོར་འབུལ༔ བསྐུལ་ལོ་སྲེག་བྱེད་སེར་མོ་འབུམ༔ མེ་ཡི་ཁམས་ལ་དབང་བསྒྱུར་ལ༔ སྲེག་བྱེད་མེ་ཡི་གདོན་ཚོགས་ཟློག༔ ཟློག་སྒྱུར་འཕྲིན་ལས་གྲུབ་པར་མཛོད༔ ཧཱུྃ་ཧཱུྃ༔ ནུབ་ཀྱི་ཕྱོགས་ཀྱི་དཀྱིལ་འཁོར་ནས༔ པདྨ་རིགས་ཀྱི་མཁའ་འགྲོ་མ༔ སྤྲུལ་པ་ཁྲོ་མོ་དམར་མོ་འབུམ༔ ནུབ་ཀྱི་གདོན་བགེགས་ཐམས༴ རྦོད་གཏོང་རྦད་འདྲེ༴ ཆགས་ཆེ་ཉམ་ང་༴ རྨིས་ལྟས་མཚན་ངན༴ ལྟས་ངན་ཡུལ་སྡིག༴ བྱད་ཀ་ཕུར་ཁ༴ གཏད་ཁ་ཁྲམ་ཁ༴ ནད་ཁ་ཡམས་ཁ༴ ཆེ་སྲི་ཆུང་སྲི་ཐམས༴ གོད་ཀ་རྒྱུ་སྦྱོར༴ འབུལ་ལོ་གསང་ཆེན་རྡོ་གཏོང་འབུལ༔ བསྐུལ་ལོ་རྨོངས་བྱེད་དམར་མོ་འབུལ༔ འབྱུང་བ་ཆུ་ལ་དབང་སྒྱུར་ལ༔ སྐྱོད་བྱེད་ཆུ་ཡི་གདོན་ཚོགས༴ ཟློག་སྒྱུར་འཕྲིན་ལས་གྲུབ༴ ཧཱུྃ་ཧཱུྃ༔ བྱང་གི་ཕྱོགས་ཀྱི་དཀྱིལ་འཁོར་ནས༔ ལས་ཀྱི་རིགས་ཀྱི་མཁའ་འགྲོ་མ༔ སྤྲུལ་པ་ཁྲོ་མོ་ལྗང་མོ་འབུམ༔ བྱང་གི་གདོན་བགེགས་ཐམས་ཅད༴ རྦོད་གཏོང་རྦད་འདྲེ༴ ཆགས་ཆེ་ཉམ་ང་༴ རྨི་ལྟས་མཚན་ངན༴ ལྟས་ངན་ཡུལ་སྡིག༴ བྱད་ཀ་ཕུར་ཁ༴ གཏད་ཁ་ཁྲམ་ཁ༴ ནད་ཁ་ཡམས་ཁ༴ ཆེ་སྲི་ཆུང་སྲི༴ གོད་ཀ་རྒྱུ་སྦྱོར༴ འབུལ་ལོ་གསང་ཆེན༴ བསྐུལ་ལོ་མཁའ་འགྲོ་ཙནྟྲི་འབུམ༔ རླུང་གི་ཁམས་ལ་དབང་སྒྱུར་ལ༔ སྨྱོ་འབོག་རླུང་གི་ནད་གདོན་ཟློག༔ ཟློག་སྒྱུར་འཕྲིན་ལས་གྲུབ་པར་མཛོད༔ ཧཱུྃ་ཧཱུྃ༔ ཤར་ལྷོ་མཚམས་ཀྱི་གཞལ་ཡས་ནས༔ དམ་ཚིག་ཅན་གྱི་མཁའ་འགྲོ་མ༔ སྤྲུལ་པ་ཁྲོ་མོ་དཀར་ནག་འབུམ༔ ཤར་ལྷོའི་གདོན་བགེགས་ཐམས༴ རྦོད་གཏོང་༴ ཆགས་ཆེ༴ རྨི་ལྟས༴ ལྟས་ངན༴ བྱད་ཀ༴ གཏད་ཁ༴ ནད་ཁ༴ ཆེ་སྲིད་ཆུང་སྲི༴ གོད་ཀ་རྒྱུ་སྦྱོར༴ འབུལ་ལོ་གསང་ཆེན༴ བསྐུལ་ལོ་དམ་ཚིག་མཁའ་འགྲོ་འབུམ༔ ཀླུ་ཡི་འཇིག་རྟེན་དབང་སྒྱུར་ལ༔ ཀླུ་ནད་ཐན་ལྟས་རྦོད་གཏོང་ཟློག༔ ཟློག་སྒྱུར་འཕྲིན་ལས༴ ཧཱུྃ་ཧཱུྃ༔ ལྷོ་ནུབ་མཚམས་ཀྱི་གཞལ་ཡས་ནས༔ སྣ་ཚོགས་མཁའ་འགྲོ་མ་ཐུབ་མ༔ སྤྲུལ་པ་ཁྲོ་མོ་སེར་ནག་འབུམ༔ ལྷོ་ནུབ་གདོན་བགེགས་ཐམས་ཅད༴ རྦོད་གཏོང་རྦད་འདྲེ༴ ཆགས་ཆེ་ཉམ་ང་༴ རྨི་ལྟས་མཚན་ངན༴ ལྟས་ངན་ཡུལ་སྡིག༴ བྱད་ཀ་ཕུར་ཁ༴ གཏད་ཁ་ཁྲམ་ཁ༴ ནད་ཁ་ཡམས་ཁ༴ ཆེ་སྲིད་ཆུང་སྲི༴ གོད་ཁ་རྒྱུ་སྦྱོར༴ འབུལ་ལོ་གསང་ཆེན༴ བསྐུལ་ལོ་སྣ་ཚོགས་མཁའ་འགྲོ་འབུམ༔ གཟའ་དང་རྒྱུ་སྐར་དབང་སྒྱུར་ལ༔ གཟའ་ནད་ཐན་ལྟས་རྦོད་གཏོང་ཟློག༔ ཟློག་སྒྱུར་འཕྲིན་ལས༴ ཧཱུྃ་ཧཱུྃ༔ ནུབ་བྱང་མཚམས་ཀྱི་གཞལ་ཡས་ནས༔ ཤ་ཟ་རིགས་ཀྱི་མཁའ་འགྲོ་མ༔ སྤྲུལ་པ་ཁྲོ་མོ་དམར་ནག་འབུམ༔ ནུབ་བྱང་གདོན་བགེགས་ཐམས་ཅད་ཟློག༔ རྦོད་གཏོང་རྦད་འདྲེ༴ ཆགས་ཆེ་ཉམ་ང་༴ རྨི་ལྟས་མཚན་ངན༴ ལྟས་ངན་ཡུལ་སྡིག༴ བྱད་ཀ་ཕུར་ཁ༴ གཏད་ཁ་ཁྲམ་ཁ༴ ནད་ཁ་ཡམས་ཁ༴ ཆེ་སྲི་ཆུང་སྲི༴ གོད་ཁ་རྒྱུ་སྦྱོར༴ འབུལ་ལོ་གསང་ཆེན༴ བསྐུལ་ལོ་ཤ་ཟ་མཁའ་འགྲོ་འབུམ༔ སྲིན་པོའི་འཇིག་རྟེན་དབང་སྒྱུར་ལ༔ སྲིན་པོའི་ཐན་ལྟས་རྦོད་གཏོང་ཟློག༔ ཟློག་སྒྱུར་འཕྲིན་ལས༴ ཧཱུྃ་ཧཱུྃཿ བྱང་ཤར་མཚམས་ཀྱི་གཞལ་ཡས་ནས༔ བརྒྱུད་འཛིན་འཇིག་རྟེན་མཁའ་འགྲོ་མ༔ སྤྲུལ་པ་ཁྲོ་མོ་ལྗང་ནག་འབུམ༔ བྱང་ཤར་གདོན་བགེགས༴ རྦོད་གཏོང་རྦད་འདྲེ༴ ཆགས་ཆེ་ཉམ་ང་༴ རྨི་ལྟས་མཚན་ངན༴ ལྟས་ངན་ཡུལ་སྡིག༴ བྱད་ཀ་ཕུར་ཁ༴ གཏད་ཁ་ཁྲམ་ཁ༴ ནད་ཁ་ཡམས་ཁ༴ ཆེ་སྲི་ཆུང་སྲི༴ གོད་ཁ་རྒྱུ་སྦྱོར༴ འབུལ་ལོ་གསང་ཆེན༴ བསྐུལ་ལོ་འཇིག་རྟེན་མཁའ་འགྲོ་འབུམ༔ མ་མོའི་འཇིག་རྟེན་དབང་སྒྱུར་ལ༔ མ་མོའི་ཐན་ལྟས་རྦོད་གཏོང་ཟློག༔ ཟློག་སྒྱུར་འཕྲིན་ལས༴ ཧཱུྃ་ཧཱུྃ༔ མཁའ་འགྲོའི་དཀྱིལ་འཁོར་ཤར་སྒོ་ནས༔ སྒོ་མ་ཆེན་མོ་ཁྭ་གདོང་མ༔ སྤྲུལ་པ་ཁྭ་གདོང་མཁའ་འགྲོ་འབུམ༔ ཤར་སྒོའི་གདོན་བགེགས་ཐམས་ཅད་ཟློག༔ རྦོ་གཏོང་རྦད་འདྲེ༴ ཆགས་ཆེ་ཉམ་ང་༴ རྨི་ལྟས་མཚན་ངན༴ ལྟས་ངན་ཡུལ་སྡིག༴ བྱད་ཀ་ཕུར་ཁ༴ གཏད་ཁ་ཁྲམ་ཁ༴ ནད་ཁ་ཡམས་ཁ༴ ཆེ་སྲི་ཆུང་སྲི༴ གོད་ཀ་རྒྱུ་སྦྱོར༴ འབུལ་ལོ་གསང་ཆེན༴ བསྐུལ་ལོ་ཁྭ་གདོང་མཁའ་འགྲོ་འབུམ༔ འགུགས་བྱེད་མ་ཚོགས་དབང་སྡུས་ལ༔ ལྕགས་ཀྱུ་ཅན་གྱིས་རྦོད་གཏོང་ཟློག༔ ཟློག་སྒྱུར་འཕྲིན་ལས༴ ཧཱུྃ་ཧཱུྃ༔ མཁའ་འགྲོའི་དཀྱིལ་འཁོར་ལྷོ་སྒོ་ནས༔ སྒོ་མ་ཆེན་མོ་ཕག་གདོང་མ༔ སྤྲུལ་པ་ཕག་གདོང་མཁའ་འགྲོ་འབུམ༔ ལྷོ་སྒོའི་གདོན་བགེགས་ཐམས་ཅད་ཟློག༔ རྦོད་གཏོང་རྦད་འདྲེ༴ ཆགས་ཆེ་ཉམ་ང་༴ རྨི་ལྟས་མཚན་ངན༴ ལྟས་ངན་ཡུལ་སྡིག༴ བྱད་ཀ་ཕུར་ཁ༴ གཏད་ཁ་ཁྲམ་ཁ༴ ནད་ཁ་ཡམས་ཁ༴ ཆེ་སྲི་ཆུང་སྲི༴ གོད་ཁ་རྒྱུ་སྦྱོར༴ འབུལ་ལོ་གསང་༴ བསྐུལ་ལོ་ཕག་གདོང་མཁའ་འགྲོ་འབུམ༔ འཆིང་བྱེད་མ་ཚོགས་དབང་སྡུས་ལ༔ ཞགས་པ་ཅན་གྱིས་རྦོད་གཏོང་ཟློག༔ ཟློག་སྒྱུར་འཕྲིན་ལས༴ ཧཱུྃ་ཧཱུྃ༔ མཁའ་འགྲོའི་དཀྱིལ་འཁོར་ནུབ་སྒོ་ནས༔ སྒོ་མ་ཆེན་མོ་ཁྱི་གདོང་མ༔ སྤྲུལ་པ་ཁྱི་གདོང་མཁའ་འགྲོ་འབུམ༔ ནུབ་སྒོའི་གདོན་བགེགས་ཐམས་ཅད༴ རྦོད་གཏོང་རྦད་འདྲེ༴ ཆགས་ཆེ་ཉམ་ང་༴ མི་ལྟས་མཚན་ངན༴ ལྟས་ངན་ཡུལ་སྡིག༴ བྱད་ཀ་ཕུར་ཁ༴ གཏད་ཁ་ཁྲམ་ཁ༴ ནད་ཁ་ཡམས་ཁ༴ ཆེ་སྲི་ཆུང་སྲི༴ གོད་ཀ་རྒྱུ་སྦྱོར༴ འབུལ་ལོ་གསང་ཆེན༴ བསྐུལ་ལོ་ཁྱི་གདོང་མཁའ་འགྲོའི་ཚོགས༔ སྡོམ་བྱེད་མ་ཚོགས་དབང་སྡུས་ལ༔ ལྕགས་སྒྲོག་ཅན་གྱིས་རྦོད་གཏོང་ཟློག༔ ཟློག་སྒྱུར་འཕྲིན་ལས༴ ཧཱུྃ་ཧཱུྃ༔ མཁའ་འགྲོའི་དཀྱིལ་འཁོར་བྱང་སྒོ་ནས༔ སྒོ་མ་ཆེན་མོ་འུག་གདོང་མ༔ སྤྲུལ་པ་འུག་གདོང་མཁའ་འགྲོ་འབུམ༔ བྱང་སྒོའི་གདོན་བགེགས་ཐམས་ཅད་ཟློག༔ རྦོད་གཏོང་རྦད་འདྲེ༴ ཆགས་ཆེ་ཉམ་ང་༴ རྨི་ལྟས་མཚན་ངན༴ ལྟས་ངན་ཡུལ་སྡིག༴ བྱད་ཀ་ཕུར་ཁ༴ གཏད་ཁ་ཁྲམ་ཁ༴ ནད་ཁ་ཡམས་ཁ༴ ཆེ་སྲི་ཆུང་སྲི༴ གོད་ཀ་རྒྱུ་སྦྱོར༴ འབུལ་ལོ་གསང་ཆེན་རྡོ་གཏོར་འབུལ༔ བསྐུལ་ལོ་འུག་གདོང་མཁའ་འགྲོ་འབུལ༔ སྒྱུར་བྱེད་མ་ཚོགས་དབང་བསྡུས་ལ༔ དྲིལ་བུ་ཅན་གྱིས་རྦོད་གཏོང་ཟློག༔ ཟློག་སྒྱུར་འཕྲིན་ལས༴ ཧཱུྃ་ཧཱུྃ༔ དཀྱིལ་འཁོར་བར་འཁྱམས་ཕྱི་རིམ་ཁོར་ཡུག་ནས༔ རྩ་གསུམ་ཆོས་སྐྱོང་གིང་དང་ཕོ་ཉའི་ཚོགས༔ གནས་ཡུལ་དུར་ཁྲོད་ཞིང་སྐྱོང་སྲུང་མ་དང་༔ འབུམ་ཕྲག་ཡངས་པའི་དཔའ་བོ་དཔའ་མོ་རྣམས༔ ཡེ་ཤེས་འཇིག་རྟེན་སྤྲུལ་པ་ཡང་སྤྲུལ་འབུམ༔ སྟེང་འོག་ཕྱོགས་བཅུའི་བྱད་མ་རྦོད་གཏོང་ཟློག༔ ནད་རིགས་བཞི་བརྒྱ་རྩ་བཞི་ཐམས་ཅད་ཟློག༔ རྐྱེན་ངན་ཉི་ཁྲི་ཆིག་སྟོང་མ་ལུས་ཟློག༔ ཡེ་འབྲོག་སུམ་བརྒྱ་དྲུག་ཅུའི་གནོད་པ་ཟློག༔ གློ་བུར་བདུན་བརྒྱ་ཉི་ཤུའི་བར་ཆད་ཟློག༔ དུས་མིན་འཆི་བ་རྣམ་བརྒྱད་འཇིགས་པ་ཟློག༔ ལྟས་ངན་བརྒྱད་ཅུ་རྩ་གཅིག་ཆག་སྒོ་ཟློག༔ བྱིས་པའི་གདོན་ཆེན་བཅོ་ལྔའི་ཟ་ཁ་ཟློག༔ ལོ་ནག་ཟླ་ནག་ཟ་མའི་བདུན་ཟུར་ཟློག༔ ལོ་སྐག་ཟླ་སྐག་ཞག་སྐག་ཐམས་ཅད་ཟློག༔ མོ་ངན་རྩིས་ངན་མཚན་ལྟས་ངན་པ་ཟློག༔ སྨེ་བའི་བདུན་ཟུར་སྤར་ཁའི་སྐྱ་མདའ་ཟློག༔ ཕྱི་ནང་སྡེ་བརྒྱད་ཟ་ཁ་གཏོད་པ་ཟློག༔ ཡེ་ཤེས་འཇིག་རྟེན་མཁའ་འགྲོའི་བསུན་མ་ཟློག༔ རྒྱལ་བསེན་དམ་སྲི་འདྲེ་མོའི་གདུག་པ་ཟློག༔ ཟ་འདྲེ་ཤི་གཤེད་སྒབ་འདྲེ་འབྱུང་པོ་ཟློག༔ བནྡྷེ་ནག་པོས་མནན་གཏད་བཅིང་བ་ཟློག༔ ལྟ་ལོག་བོན་པོས་ངན་སྔགས་བྱེད་པ་ཟློག༔ མུ་སྟེགས་ཕྲ་མེན་སེལ་དང་འཕུང་ལས་ཟློག༔ སྔགས་པ་ནག་པོས་གཏོར་ཟོར་དམོད་པ་ཟློག༔ རྒྱ་གར་ཆོས་ཀྱི་མཐུ་བསྒྲུབ་བྱེད་པ་ཟློག༔ རྒྱ་ནག་རྩིས་ཀྱི་བཟློག་མདོས་བསྒྱུར་བ་ཟློག༔ ཞང་ཞུང་ཡུལ་གྱི་བཙོ་ཟོར་འཕེན་པ་ཟློག༔ སུམ་པའི་ཡུལ་གྱིས་གླང་ཟོར་འཕེན་པ་ཟློག༔ སྐྱེས་པ་རྣམས་ཀྱིས་མཚོན་ཟོར་འཕེན་པ་ཟློག༔ བུད་མེད་རྣམས་ཀྱིས་དམོད་ཟོར་འདེབས་པ་ཟློག༔ རྦོད་གཏོང་རྦད་འདྲེ་ཆགས་ཆེ་ཉམ་ང་ཟློག༔ རྨིས་ལྟས་མཚན་ངན་ལྟས་ངན་ཡུལ་སྡིག་ཟློག༔ བྱད་ཀ་ཕུར་ཁ་གཏད་ཁ་ཁྲམ་ཁ་ཟློག༔ ནད་ཁ་ཡམས་ཁ་ཆེ་སྲི་ཆུང་སྲི་ཟློག༔ འབུལ་ལོ་གསང་ཆེན་རྡོ་ཡི་གཏོར་མ་འབུལ༔ བསྐུལ་ལོ་རྩ་གསུམ་འབུམ་ཕྲག་སྲུང་མའི་ཚོགས༔ ཡེ་ཤེས་འཇིག་རྟེན་ཐམས་ཅད་དབང་སྡུས་ལ༔ འཁོར་འདས་ཡོངས་ཀྱི་བྱད་མ་རྦོད་གཏོང་ཟློག༔ ཟློག་གོ་གསང་ཆེན་རྡོ་ཡི་གཏོར་མས་ཟློག༔ སྒྱུར་རོ་གསང་ཆེན་རྡོ་ཡི་གཏོར་མས་སྒྱུར༔ ཟློག་ཅིག་སྒྱུར་ཅིང་འཕྲིན་ལས་གྲུབ་པར་མཛོད༔ དེ་ནས་སྔགས་པ་རྣམས་རལ་པའི་ཐོད་བཅིངས༔ གོས་ནག་གྱོན་ཏེ་གདོང་ལ་ཁྲག་གིས་བྱུག༔ ལྟ་བའི་གདེངས་གསལ༔ སྒོམ་པའི་གཟེངས་བསྟོད༔ སྤྱོད་པའི་བརྟུལ་ཞུགས་བསྐྱེད་དེ༔ གསེར་སྐྱེམས་མཆོད༔ བདུད་འདུལ་དཔལ་གྱི་མཁའ་འགྲོ་མ་འཁོར་ལས་བྱེད་བྱེ་བ་དུང་ཕྱུར་གྲངས་མེད་དཔག་ཏུ་མེད་པ་ཐམས་ཅད་བསྐལ་བ་ཆེན་པོའི་མེ་ཆེན་ལྟར་འབར༔ ལྕགས་ཀྱི་སེར་ཆེན་ལྟར་འདྲིལ༔ དུག་གི་རྒྱ་མཚོ་ཆེན་པོ་ལྟར་ཁོལ༔ འབྲུག་སྟོང་ལྡིར་བ་ལྟར་ངར༔ བུ་ཡུག་རླུང་དམར་ལྟར་འཚུབ༔ གློག་ཆེན་འགྱུ་བ་ལྟར་འཁྱུག༔ དྲག་པོའི་གནམ་ལྕགས་ཀྱི་ཐོག་ཆེན་ལྟར་དགྲ་བོ་བྱད་མ་འཁོར་བཅས་ལ་བརྒྱབ་པས༔ ནད་མུག་མཚོན་གསུམ་གྱི་ཆར་ཕབ༔ མི་རུང་པའི་ལྟས་ངན་ཐམས་ཅད་སྐད་ཅིག་དེ་ལ་འཇོམས་ནས་བྱད་མ་ལྷ་སྲུང་རྦད་འདྲེ་རྦོད་གཏོང་གི་ཚོགས་ཐམས་ཅད་ཁ་ཕུང་རྗེས་མེད་དུ་བཏང་སྟེ༔ མེས་བསྲེགས་ཆུས་བཀྲུས་རླུང་གིས་གཏོར་སས་བཀབ་སྟེ་རྣམ་ཤེས་མི་དམིགས་ནམ་མཁའི་ཁམས་དང་འདྲེས་པར་བསམ་ཞིང་༔ བསྐུལ་འདོན་རྡོ་གཏོར་དང་ཐུན་སྣ་ཚོགས་དགྲ་ཕྱོགས་ལ་རྡེག༔ གཡབ་མོ་རྡེབ༔ དམོད་བཅོལ༔ ཝ་དམར་མོ་འཁོས་མེད་མ་ཚོ་ད་རྒྱུག༔ ཤུགས་ཕྱུངས་རྩལ་བསྐྱེད༔ ནུས་མཐུ་ད་ལྟ་ཉིད་དུ་སྟོན་ཅིག༔ བརྗོད་ལ་ཟློག་སྔགས་ཀྱིས་སྦྲན་ནོ༔ ས་མ་ཡཱ༔ རྒྱ་རྒྱ་རྒྱ༔ ཨེ་མ་གསང་བའི་སྙིང་པོ་འདི༔ འཕགས་ཡུལ་རྡོ་རྗེ་གདན་དྲུང་དུ༔ མུ་སྟེགས་སྟོན་པའི་རྩོད་པ་བྱུང་༔ ལུང་རིགས་ནུས་མཐུའི་རྩལ་འགྲན་ཚེ༔ མཁའ་འགྲོ་རྡོ་རྗེ་ཕག་མོ་ཡིས༔ སེང་གེའི་གདོང་ཅན་ཐུགས་བརྒྱུད་ནས༔ བདག་ཉིད་རྡོ་རྗེ་དྲག་རྩལ་ལ༔ དབང་བསྐུར་ལུང་བསྟན་བཀའ་གཏད་མཛད༔ བཟློག་པས་མི་ཟློག་མཁན་གྱི་གཤེད༔ མཁའ་འགྲོའི་དྲག་སྔགས་རྡོ་སྒྱོགས་འདིས༔ མུ་སྟེགས་ངན་པའི་རྒོལ་བ་ཟློག༔ རང་མཐུ་རང་ཟུག་ཁ་ཕུང་བཏང་༔ དེ་ཕྱིར་ཕྱི་རབས་རྣལ་འབྱོར་པས༔ ལས་སྦྱོར་འདི་ལ་བརྩོན་གྱུར་ན༔ བན་བོན་སྡེ་བརྒྱད་རྦོད་གཏོང་དང་༔ མི་མཐུན་ལྟས་ངན་ཡེ་འབྲོག་བགེགས༔ བཟློག་ཅིང་བརླག་པར་ཐེ་ཚོམ་མེད༔ ཆོས་བྱེད་རྣམས་ཀྱི་སྲུང་མར་ཤོག༔ མ་སྤེལ་སྙིང་གི་དཀྱིལ་དུ་སྦོས༔ ལས་འཕྲོ་ཅན་གྱིས་སྤྱོད་པར་ཤོག༔ ས་མ་ཡཱ༔ རྒྱ་རྒྱ་རྒྱ༔ གཏེར་རྒྱ༔ སྦས་རྒྱ༔ ཟབ་རྒྱ༔ གཏད་རྒྱ༔ ཁ་ཐཾ༔ གྷུ་ཧྱ་རྒྱ་རྒྱ་རྒྱ༔ ཅེས་པ་འདི་བདག་སྤྲང་བན་ཉི་མ་གྲགས་པས་སེང་གདོང་མཁའ་འགྲོའི་ཕོ་བྲང་ནས་གདན་དྲངས་ཤིང་ཤོག་སེར་ལས་ཕབ་པའོ། །མངྒ་ལཾ།། །།

བདུད་འདུལ་མཁའ་འགྲོའི་ལས་སྦྱོར་དང་པོ།

བཀའ་རྫོགས་པ་ཆེན་པོ་བླ་མ་བདེ་མཆོག་འཁོར་ལོ་ལས༔ བདུད་འདུལ་མཁའ་འགྲོའི་ལས་སྦྱོར་དང་པོ་བཞུགས་སོ༔ ཧེ་རུ་ཀ་དཔལ་ལྷ་ལ་འདུད༔ མན་ངག་ཐམས་ཅད་འདུས་པའི་མདོ་ཆིངས༔ ཟབ་པའི་སྙིང་པོ་བཅུད་དུ་དྲིལ་བ༔ མཁའ་གྲོ་བདུད་འདུལ་ནག་མོའི་བསྲུང་བའི་ལས་སྦྱོར་འདི་ལ་དོན་བཞིས་སྟོན་སྟེ༔ སྔགས་དང་དམིགས་པ་ཏིང་འཛིན་དགོས་ཆེད་དོ༔ དང་པོ་དམིགས་པ་ནི༔ སྒྲུབ་པའི་གཞུང་དང་མཐུན་པར་བསྐྱེད་རིམ་ལྷའི་རྣལ་འབྱོར་གཞལ་ཡས་སྒོ་གྲུ་རྟ་བབ་མཚན་ཉིད་ཐམས་ཅད་ཡོངས་སུ་གསལ་ཞིང་༔ དེ་ཡང་གཞལ་ཡས་ཀྱི་ཁང་པ་དེ་ཉིད་གནམ་ལྕགས་ལས་གྲུབ་པའི་ཕོ་བྲང་འཇིགས་ཤིང་བརྗིད་པ༔ བརྔམ་ཞིང་འཁྲུག་པ༔ ཚ་ཞིང་བསྲེག་པ་ཅིག་ཏུ་གསལ་བའི་ཕྱི་རོལ་དུ་གནམ་ལྕགས་ཀྱི་འཁོར་ལོ་རྩིབས་སྟོང་དང་ལྡན་པ༔ ཚ་བའི་ཟེར་རྣོ་བའི་ངར་དང་ལྡན་པའི་གུར་ཁང་༔ དེའི་ཕྱི་རོལ་དུ་གནམ་ལྕགས་རྡོ་རྗེ་མེ་རབ་ཏུ་འབར་བའི་གུར་ཁང་༔ དེའི་ཕྱི་རོལ་དུ་གནམ་ལྕགས་ལས་གྲུབ་པའི་གྲི་གུག་མེ་ཤིན་ཏུ་འབར་བའི་གུར་ཁང་༔ དེའི་ཕྱི་རོལ་དུ་གནམ་ལྕགས་ཀྱི་ཕུར་པ་དབལ་ཤིན་ཏུ་རྣོ་ཞིང་ཁྲོ་ཆུའི་ཚྭ་ཚྭ་འཕྲོ་བའི་གུར་ཁང་༔ དེའི་ཕྱིར་རོལ་དུ་གནམ་ལྕགས་ཀྱི་དགྲ་སྟྭ་འབར་བའི་གུར་ཁང་༔ དེའི་ཕྱི་རོལ་དུ་གནམ་ལྕགས་ལས་གྲུབ་པའི་ཁ་ཊྭཾ་འབར་བའི་གུར་ཁང་། དེའི་ཕྱི་རོལ་དུ་གནམ་ལྕགས་ཞུན་མའི་རལ་གྲི་འབར་བའི་གུར་ཁང་༔ དེའི་ཕྱི་རོལ་དུ་མེ་རི་དམར་ནག་ཏུ་འབར་ཞིང་༔ རབ་ཏུ་འཚེག་པའི་གུར་ཁང་༔ དེའི་ཕྱི་རོལ་དུ་སྲིད་པའི་རླུང་ཆེན་པོ་སྤུ་གྲི་འབར་བའི་གུར་ཁང་༔ དེའི་ཕྱི་རོར་དུ་སྟོང་ཉིད་སྒྲ་ཡི་གུར་ཁང་༔ གུར་ཁང་དེ་དག་གི་བར་མཚམས་དང་དྲ་མིག་རྣམས་ཀྱི་མཚམས་མཚམས་སུ་སྤྲུལ་པའི་མཁའ་འགྲོ་སྐུ་མདོག་སྣ་ཚོགས་ཀྱི་མདོག་ཅན༔ ཕྱག་ན་སྣ་ཚོགས་འབར་བའི་མཚོན་ཆ་ཐོགས་པ༔ འཇིགས་ཤིང་བརྔམ་པ༔ དཔའ་ཞིང་སྒེག་པ་གྲངས་མེད་དཔག་ཏུ་མེད་པ་སྐར་ལྟར་འཁྲུག་ཅིང་གློག་ལྟར་དུ་འཁྱུག་པ༔ ཞལ་ནས་བསྲུང་བའི་སྔགས་སྒྲ་འབྲུག་ལྡིར་བ་ཙམ་དུ་སྒྲོགས་པས༔ སྐུ་ལུས་དང་གཞལ་ཡས་ཁང་གུར་ཁང་དང་བཅས་པ་ཐམས་ཅད་ཀྱི་ཚ་ཟེར་རབ་ཏུ་འཁྲུག་པ༔ གནོད་བྱེད་ལྷ་སྲིན་སྡེ་བརྒྱད༔ རྒྱལ་བསེན་འབྱུང་པོ་བན་བོན་བྱད་མ་ལྷ་སྲུང་དང་བཅས་པ་ཐམས་ཅད་རྡུལ་དུ་བརླག་པའི་རང་བཞིན་དུ་བསྒོམ་མོ༔ རང་ཉིད་བདུད་འདུལ་གྱི་མཁའ་འགྲོ་མར་གསལ་བའི་སྤྱི་གཙུག་རིགས་བདག་ཡབ་ཡུམ་གྱི་ཐུགས་ཀར་བླ་མ་སློབ་དཔོན༔ གཡས་སུ་བསྲུང་བྱ་ཕོ་བརྒྱུད༔ གཡོན་དུ་བསྲུང་བྱ་མོ་རིགས༔ འོག་ཏུ་ནོར་རྫས༔ མདུན་དུ་བྲན་གཡོག༔ རྒྱབ་ཏུ་ཞིང་ཁང་དེ་ཐམས་ཅད་ཀྱང་ཀྱང་གཞལ་ཡས་ཁང་ལྷ་དང་ལྷ་མོའི་རང་བཞིན་ལས་གཞན་དུ་མ་གྲུབ་ཅིང་གཉིས་སུ་མི་གནས་པ༔ གཙོ་མོའི་གནས་རྣམས་དང་བ་སྤུའི་འོད་ཀློང་རེ་རེ་ནས་ཀྱང་སྤྲུལ་པ་དང་ཡང་སྤྲུལ་ཉིང་སྤྲ྄ུལ་བསམ་གྱིས་མི་ཁྱབ་པར་འཕྲོ་ཞིང་བསྲུང་བའི་ལས་བྱེད་པར་བསམ་མོ༔ འཁོར་གྱི་མཁའ་འགྲོ་སྤྲུལ་པའི་ལས་བྱེད་ཐམས་ཅད་ཞལ་ནང་དུ་གཟིགས་ཤིང་བར་ཆད་བཟློག་པ་དང་དངོས་གྲུབ་སྟེར་བར་བསམ་མོ༔ ས་མ་ཡཱཿ རྒྱ༔ གཉིས་པ་སྔགས་ནི༔ ཧཱུྃ་བཛྲ་དྷཱཀྐི་ནི་སིང་ཧ་མུ་ཥ་ཧ་རི་ནི་ས་བདག་ཅག་བསྲུང་བྱ་མི་ནོར་འཁོར་དང་བཅས་པ་སྲུངས་ཤིག །རཀྵ་རཀྵ་སིདྷི་སྭཱ་ཧཱ༔ ཅེས་གསང་བའི་སྙིང་པོ་བསྲུང་བའི་མཐར་ཐུག་འདི༔ བརྒྱ་སྟོང་ཁྲི་འབུམ་སོགས་རང་གི་འདོད་སྐབས་ལྟར་བཟླས་པར་བྱའོ༔ འདི་ནི་གལ་ཤིན་ཏུ་ཆེ་ན་སྒྲུབ་གཞུང་གི་སྒྲུབ་པའི་བསྙེན་གྲངས་བསྐྱལ་བའི་མཇུག་ཏུ་འབུམ་ཚོ་ཅིག་བསྙེན་ཞིང་༔ དེ་ནས་རྒྱུན་ལྡན་དུ་བརྒྱ་སྟོང་སོགས་མ་ཆགས་པར་བརྩོན་ན་སངས་རྒྱས་སྟོང་གི་ཡང་མཐུ་བརྡུགས་པར་བྱེད་དོ༔ ཕྲན་བུའི་བར་ཆད་ཀྱི་ཚོགས་ནི་སྨོས་ཀྱང་ཅི་དགོས་སོ༔ དངོས་གྲུབ་ཀྱི་ཚོགས་ཐམས་ཅད་ཀྱང་སྤྲིན་ལྟར་དུ་འདུ་ཞིང་ཆར་ལྟར་དུ་འབབ་བོ༔ དེ་ལྟར་ན་སྐལ་ལྡན་རྣམས་ཀྱིས་སྤྱོད་མཁས་པར་བྱའོ༔ ས་མ་ཡ་རྒྱཿ ཁ་ཐམ༔ གསུམ་པ་ཏིང་ངེ་འཛིན་སྔགས་དམིགས་ཀྱི་རིམ་པ་འདི་རྣམས་ལ་སྐད་ཅིག་ཀྱང་མ་ཡེངས་པར་འབད་པ་ཆེན་པོས་བརྩོན་ཞིང་༔ ཁྱད་པར་དུ་རང་ཉིད་དཔལ་ཆེན་པོ་མཁའ་འགྲོ་བདུད་འདུལ་མར་གསལ་བའི༔ ཐུགས་ཀར་ཕྱག་མཚན་གྱི་ལྟེ་བར༔ ས་བོན་ཧཱུྃ་ཡིག་གི་ཧ་ཁོག་གི་ནང་དུ་རང་གི་རྣམ་པར་ཤེས་པའམ༔ བསྲུང་བྱའི་རྣམ་པར་ཤེས་པ་ཡི་གེ་རྣ྄ི་ལྗང་ཁུ་གསལ་ལ་མདངས་དང་ལྡན་པ༔ སྣུམ་ལ་འོད་ཟེར་ཚེར་བ་ཞིག་ཏུ་བསྒོམ༔ གཙོ་མོ་འཁོར་སྤྲུལ་པ་ཡང་སྤྲུལ་དང་བཅས་པ་ཐམས་ཅད་ཀྱི༔ གནས་རྣམས་ལས་འོད་ཟེར་ཁ་དོག་སྣ་ཚོགས་ཕྱོགས་བཅུའི་ཞིང་རབ་འབྱམས་རྡུལ་གྱིས་གྲངས་དང་མཉམ་པའི་ཕྱི་སྣོད་ནང་བཅུད་ཀུན་ལ་འཕྲོས་ཤིང་ཕོག་པས༔ འཁོར་འདས་ལམ་གསུམ་གྱི་ནུས་སྟོབས་ཡོན་ཏན་གཟི་བརྗིད་དབང་ཐང་དང་བཅས་པ་ཐམས་ཅད༔ རྡོ་ཁབ་ལེན་གྱིས་ལྕགས་བསྡུས་པའམ༔ ཉི་ཟེར་ལ་རྡུལ་འཚུབ་པ་ལྟར་འུབ་འུབ་བསྡུས་ཤིང་༔ འཁོར་མཁའ་འགྲོ་བསྲུང་བའི་ཕོ་བྲང་དང་བཅས་པ་རྣམས་དང་༔ ཁྱད་པར་ཐུགས་ཀའི་སྔགས་ཕྲེང་ས་བོན་ཚེ་སྲོག་གི་ངོ་བོ་རྣ྄ི་ཡིག་དང་བཅས་པ་ལ་ཐིམ་པས༔ ཆེས་ཆེར་གཟི་བརྗིད་འབར་ཞིང་དྲག་རྩལ་ནུས་མཐུ་ཐོགས་པ་མེད་པར་བསམ་ཞིང་སྙིང་པོ་ལ་འབད་པར་བྱའོ༔ སྐབས་སྐབས་མཆོད་བསྟོད་བསྡུས་པ་རེ་བྱེད༔ ཐུན་དུ་མི་གཅོད་པར་སྒོ་གསུམ་དཀྱིལ་འཁོར་གསུམ་ལྡན་དུ་སྤྱོད་པའི་རྣལ་འབྱོར་པ་ལ༔ བརྩམ་པའི་ཡོན་ཏན་རྣམས་འབད་མེད་དུ་འགྲུབ་པར་གདོན་མི་ཟའོ༔ ས་མ་ཡཱ༔ རྒྱ་༔ བཞི་པ་དགོས་ཆེད་བསྟན་པ་ནི༔ གདམས་པ་ཟབ་མོ་འདི་ནི་མན་ངག་ཐམས་ཅད་ཀྱི་སྙིང་པོ་ཡིན་སྟེ༔ ཅི་ཡི་ཕྱིར་ཞེ་ན༔ མཁའ་འགྲོ་གསང་རྒྱུད་ལས༔ བསྲུང་བ་མེད་པར་ཟློག་བྱེད་པ༔ དགྲ་རྐུན་ནང་ཞུགས་མ་མཐོང་བར༔ མེལ་ཚེ་ཕྱི་ལ་བྱེད་དང་མཚུངས༔ དེ་ཕྱིར་བསྲུང་བ་འདི་ལྟ་སྟེ༔ ཅེས་དང་། མཁའ་འགྲོ་ནག་མོ་ལས༔ ལས་རྣམས་གང་དང་གང་འདོད་ཀྱང་༔ དཔའ་བོ་ཆེན་པོའི་གོ་གྱོན་ལྟར༔ ཐོག་མར་རང་ཉིད་ཚགས་སུ་འཛུད༔ དེ་ནས་ལས་སྦྱོར་ཕྲིན་ལས་བརྩམ༔ ཅེས་སོགས་རྒྱ་ཆེར་གསུངས་པའི་སྙིང་ཐིག་བསྡུས་ཏེ༔ མ་འོངས་བོད་ཀྱི་རྒྱལ་ཁམས་འདིར་འབྱུང་བའི༔ སྐལ་ལྡན་གྱི་སྐྱེས་བུ་འགའ་ལ་དགོས་པར་བསམ་སྟེ༔ ད་ལྟ་མཚོ་རྒྱལ་ཁྱོད་ལ་གདམས་པ༔ རིན་པོ་ཆེའི་གཏེར་དུ་སྦོས་ཤིག༔ ཅེས་གསུངས་པ་རྣམས་བདག་མཚོ་རྒྱལ་གྱིས་ཡི་གེར་བཏབ་སྟེ་སེང་གདོང་མཁའ་འགྲོའི་གནས་སུ་གཏེར་དུ་སྦས་པའོ༔ ས་མ་ཡཱ༔ རྒྱ་རྒྱ་རྒྱ༔ གཏེར་རྒྱ༔ སྦས་རྒྱ༔ ཟབ་རྒྱ༔ གཉན་རྒྱ༔ གཏད་རྒྱ༔ ས་མ་ཡཱ༔ རྒྱ་རྒྱ་རྒྱ༔ ཁ་ཐཾ༔ བདག་སྤྲང་པོ་ཉི་མ་གྲགས་པས་གཏེར་ནས་གདན་དྲངས་ཤིང་ཤོག་སེར་ལས་ཕབ་པའོ། མངྒ་ལཾ།། །།

བདུད་འདུལ་མཁའ་འགྲོའི་ལས་སྦྱོར་གཉིས་པ།

བཀའ་རྫོགས་པ་ཆེན་པོ་བླ་མ་བདེ་མཆོག་འཁོར་ལོ་ལས༔ བདུད་འདུལ་མཁའ་འགྲོའི་ལས་སྦྱོར་གཉིས་པ་བཞུགས་སོ༔ དཔལ་ཆེན་པོ་མཁའ་འགྲོའི་དབང་ཕྱུག་ཧེ་རུ་ཀཿལ་ཕྱག་འཚལ་ལོ༔ བདུད་འདུལ་མཁའ་འགྲོ་ནག་མོའི་ལས་སྦྱོར་གཉིས་པ༔ བཟློག་པའི་རིམ་པ་འདི་དོན་བཞིས་སྟོན་ཏེ༔ བསྐྱེད་རིམ་ཏིང་ངེ་འཛིན་གྱི་སྐོར༔ བཟླས་པ་སྔགས་ཀྱི་སྐོར༔ བཟློག་པ་དམོད་བྱང་གི་སྐོར༔ ཕན་ཡོན་དགོས་ཆེད་ཀྱི་རིམ་པའོ༔ ས་མ་ཡཱ་རྒྱ་ཁ་ཐམཿ དང་པོ་བསྐྱེད་རིམ་ཏིང་ངེ་འཛིན་གྱི་སྐོར་ནི༔ སྒྲུབ་གཞུང་ལྷའི་བསྐྱེད་རིམ་ལྟར་སྐད་ཅིག་གིས་བསྐྱེད་པའམ༔ མངོན་རྟོགས་ལྟར་གསལ་ཞིང་༔ ཁྱད་པར་ཕོ་བྲང་དེ་ཡང་ཁྲོ་ཆུ་ཞུན་མ་ལས་གྲུབ་པ༔ བརྔམ་ཞིང་འཁྲུག་པ་སྟོབས་ལྡན་རབ་ཏུ་འཇིགས་པའི་ཕོ་བྲང་དེའི་ཕྱི་རོལ་དུ་རིམ་བཞིན༔ འཁོར་ལོ་དང་༔ རྡོ་རྗེ་དང་༔ གྲི་གུག་དང་༔ ཕུར་པ་དང་༔ དགྲ་སྟྭ་དང་༔ ཁ་ཊྭཾ་དང་༔ རལ་གྲི་དང་༔ མེ་རླུང་སྟོང་ཉིད་སྒྲའི་གུར་ཁང་དང་བཅས་པ་ཐམས་ཅད་ཀྱང་༔ འཁོར་རབ་ཏུ་འཁོར༔ འཁྲུག་རབ་ཏུ་འཁྲུག༔ འབར་རབ་ཏུ་འབར༔ འཚེག་རབ་ཏུ་འཚེག༔ སྤྱོད་རབ་ཏུ་སྤྱོད་པས་གནོད་བྱེད་བྱད་མ་ལྷ་སྲུང་གདོན་བགེགས་འབྱུང་པོ་ཐམས་ཅད་དམར་ཉི་ལི་ལི་གཏུབ་པ༔ གཙོ་མོ་སྤྲུལ་པ་འཁོར་ལས་བྱེད་བྱེ་བ་ས་ཡ་མང་པོའི་ཞལ་ནས་ཟློག་པའི་སྔགས་སྒྲ་འབྲུག་སྟོང་ལྡིར་བ་ཙམ་དུ་སྒྲིག་ཅིང་༔ ཞལ་ཕྱིར་གཟིགས་ནས་ཟློག་པའི་ལས་མཛད་པས༔ དགྲ་བགེགས་བྱད་མ་བན་བོན་ལྷ་སྲུང་ཆོས་བོན་སྐྱོང་བའི་སྡེ་བརྒྱད་ཕྱི་ནང་གསང་བ་དང་བཅས་པ་ཐམས་ཅད་དབང་དུ་བསྡུས༔ རང་དབང་མེད་པར་བཀུག༔ བསྐྲད་གཟིར་མནན་བསྲེག་གཏུབས་ཏེ་མིང་ཙམ་ཡང་མེད་པར་བསྒོམ་མོ༔ བསྲུང་བྱ་མི་ནོར་སོགས་ཀྱི་དམིགས་པ་ནི་བསྲུང་བའི་གཞུང་ལྟར་རོ༔ ས་མ་ཡཱ༔ གཉིས་པ་བཟླས་པ་སྔགས་ཀྱི་སྐོར་ནི༔ གཙོ་འཁོར་ཐམས་ཅད་ཀྱི་ཐུགས་ཀར་ཐུགས་ཀྱི་ངོ་བོ་ཕྱག་མཚན་ས་བོན་རང་གཞུང་ལྟར་གསལ་བའི་མཐར༴ ཟློག་པའི་སྔགས་འབྲུ་རྣམས་གཡོན་བསྐོར་དུ་འཁོར་ཞིང་དྲག་ཏུ་འཁོར་བ་ལ་ཤེས་པ་རྩེ་གཅིག་ཏུ་གཏད་དེ་བཟླ་བར་བྱའོ༔ ཧཱུྃ་བཛྲ་དྷཱཀྐི་ནི་སིངྷ་མུ་ཥ་ཧ་རི་ནི་ས་ཨ་ཀ་ས་མ་ར་ཙ་ཤ་ད་ར་ཡ་ཧཱུྃ་ཕཊ༔ དགྲ་བགེགས་བྱད་མ་ལྷ་སྲུང་དང་བཅས་པ་ཐམས་ཅད་རྣ྄ི་ཏྲི་མཱ་ར་ཡ་བྷྱོ་བྷྱོ་ཟློག་ཟློག༔ ཅེས་བཟླས་སོ༔ ས་མ་ཡཱ་རྒྱ༔ གསུམ་པ་ཟློག་པ་དམོད་བྱང་གི་སྐོར་ནི༔ གསང་བའི་ཟློག་སྔགས་བརྒྱ་སྟོང་གི་མཇུག་ཏུ༔ གཙོ་འཁོར་སྤྲུལ་པ་ཡང་སྤྲུལ་ཐམས་ཅད་ཀྱི་ཕྱག་གཡས་གཡོན་རྣམས་སུ་གནམ་ལྕགས་ཀྱི་འཁོར་ལོ་རྩིབས་སྟོང་དང་ལྡན་པ་དང་༔ ཟངས་ཀྱི་འཁོར་ལོ་རྩིབས་སྟོང་དང་ལྡན་པ་དང་༔ གསེར་གྱི་འཁོར་ལོ་རྩིབས་སྟོང་དང་ལྡན་པ་དང་༔ གནམ་ལྕགས་ལས་གྲུབ་པའི་སྤུ་གྲི་རབ་ཏུ་འབར་བའི་འཁོར་ལོ་རྩིབས་སྟོང་དང་ལྡན་པ་དང་༔ གསལ་བྱེད་ཉི་ཟླའི་དཀྱིལ་འཁོར་ལ་སོགས་པ་ཐམས་ཅད་ཆ་ལང་བརྡབས་པས༔ དགྲ་བགེགས་བྱད་མ་ལྷ་སྲུང་བན་བོན་ངན་པའི་ཚོགས་དང་བཅས་པ་ཐམས་ཅད༔ དམར་ཆོམ་ཆོམ་དུ་བཏང་བས༔ ཤ་ཚལ་པ་ཁྲག་ཐིགས་པ་ཅིག་ཀྱང་མ་ལུས་པར་བྱ་སྒྲོ་མེ་ལ་བཤུར་བའམ༔ ཐལ་བ་རླུང་ལ་བསྐུར་བ་ལྟར་སོང་བར་བསམ་ཞིང་༔ དགྲ་བགེགས་བྱ་མ་ལྷ་སྲུང་བྱད་ཁ་ཕུར་ཁ་གཏད་ཁ་ཁྲམ་ཁ་རྦད་འདྲེ་རྦོད་གཏོང་རྨིས་ལྟས་མཚན་མ་ངན་པ་དང་བཅས་པ་ཐམས་ཅད་བྷྱོ་བྷྱོ་ཟློག་ཟློག་བྷྱོ་ཟློག་ཅིག་ཅེས་བརྗོད་ཐལ་མོ་བརྡབ་བོ༔ ས་མ་ཡཱཿ རྒྱ་རྒྱ་རྒྱ༔ བཞི་བ་ཕན་ཡོན་དགོས་ཆེད་ཀྱི་རིམ་པ་བསྟན་པ་ནི༔ མཁའ་འགྲོ་སྤྱི་རྒྱུད་ལས༔ དགྲ་བོ་སྒྲོལ་བ་མཐུ་འཇིགས་ཀྱང་༔ མཐུ་ཡི་ནུས་པ་བཟློག་གྱུར་ན༔ བྱད་མ་དགྲ་བགེགས་རང་ཕུང་འགྲོ༔ ཞེས་དང་། མཁའ་འགྲོ་ནག་མོའི་བཟློག་རྒྱུད་ལས༔ གསང་བའི་དོན་ལྡན་དྲོད་ཐོབ་པས༔ བཟློག་པས་མི་བཟློག་མཁན་གྱི་གཤེད༔ 'སྤུ་གྲི་སྔགས་ཀྱིས་གཟེར་གཏབ་པ༔ ཟ་བྱེད་ཚོགས་རྣམས་རང་གཤེད་འབབ༔ གནམ་ལྕགས་ཞུན་མའི་རྩིབས་ལ་གཟེར༔ ལྷ་སྲུང་མི་བཟོད་བྱད་མ་སྒྲོལ༔ བསྟན་པའི་དགྲ་བོ་ཁ་དག་གཏོང་༔ ཞེས་གསུངས་པའི་ཕྱིར༔ སྔགས་པ་ནང་འགྲས་པའི༔ སྡེ་དགོན་ཆེན་པོའི་བསྲུང་ཁ་བྱེད་པའམ༔ ཕ་རོལ་གྱིས་བྱད་མ་རྦོད་གཏོང་གིས་རང་ལ་གཟིར་བའི་རྟགས་བྱུང་ན༔ སྒྲུབ་པ་ཉམས་སུ་བླངས་པའི་མཇུག་ཏུ༔ བཟློག་པའི་གཟེར་ཁ་འདི་ཕ་རོལ་གྱི་ནུས་སྟོབས་དང་བསྟུན་ཏེ༔ སྔགས་ཚན་མང་ཉུང་གི་ལས་ལ་སྦྱར་བས་དགྲ་བོ་ཐམས་ཅད་རང་ཕུང་ལ་འགྲོའོ༔ རྒྱུན་དུ་མ་ཆགས་པར་བརྩོན་ན་སངས་རྒྱས་སྟོང་གི་མཐུ་རྡུགས་ཤིང་༔ ཕུར་ཐོགས་ཁྲི་འབུམ་གྱིས་བྲུབས་ཀྱང་ཉམ་ང་མི་དགོས་སོ༔ དེ་ཕྱིར་ཡང་ཟབ་སྙིང་པོའི་གདམས་པ་ཟབ་མོ་འདི༔ ད་ལྟ་མཚོ་རྒྱལ་ཁྱོད་ལ་གདམས་ཤིང་༔ མ་འོངས་ཀྱི་བསྐལ་ལྡན་འགའི་དོན་ཏུ་གཏེར་དུ་སྦོས་ཤིག༔ ཅེས་གསུངས་པ་བདག་མཚོ་རྒྱལ་གྱིས་མཁའ་འགྲོའི་ཟབ་ཡིག་ཏུ་བཏབ་སྟེ༔ སེང་གདོང་མཁའ་འགྲོའི་ཕོ་བྲང་དུ་གཏེར་དུ་སྦས་སོ༔ ལས་འཕྲོ་ཅན་དང་འདི་འཕྲད་ཤོག༔ ས་མ་ཡཱ༔ རྒྱ་རྒྱ་རྒྱ༔ གཏེར་རྒྱ༔ གཉན་རྒྱ༔ གསང་རྒྱ༔ གཏད་རྒྱ༔ ས་མ་ཡཱ༔ རྒྱ་རྒྱ་རྒྱ༔ བདག་སྤྲང་བན་ཉི་མ་གྲགས་པས་གནས་མཆོག་ཆེན་པོ་གངས་རིའི་རྒྱལ་པོ་ཏེ་སེ་ནས་གདན་དྲངས་པའོ། མངྒ་ལཾ།། །།

བདུད་འདུལ་མཁའ་འགྲོའི་ལས་སྦྱོར་གསུམ་པ།

བཀའ་རྫོགས་པ་ཆེན་པོ་བླ་མ་བདེ་མཆོག་འཁོར་ལོ་ལས༔ བདུད་འདུལ་མཁའ་འགྲོའི་ལས་སྦྱོར་གསུམ་པ་བཞུགས་སོ༔ དཔལ་ཆེན་ཧེ་རུ་ཀཿལ་འདུད༔ ངན་སྔགས་ཐམས་ཅད་འདུས་པའི་ཉིང་ཁུ༔ བདུད་འདུལ་མཁའ་འགྲོའི་བསད་པའི་ལས་སྦྱོར་འདི་ལ་དོན་གསུམ་གྱིས་བསྟན་ཏེ༔ སྔོན་འགྲོ་བཅའ་གཞི་དངོས་གཞི་སྒྲུབ་པ་རྗེས་ལས་སྦྱོར་རོ༔ ས་མ་ཡཱ་ཁ་ཐམ་རྒྱ་རྒྱ་རྒྱཿ དང་པོ་སྔོན་འགྲོ་བཅའ་གཞིའི་རིམ་པ་ནི༔ དུར་ཁྲོད་དམ་ལུང་སྟོང་མ་མོ་དང་ཤ་ཟ་ཕྲ་མེན་གནས་པའི་ཡུལ་ལམ༔ རི་བྲག་རྔམ་དྲག་ཅན་ཚང་ཚིང་འཁྲུག་ཅིང་ལྷ་འདྲེའི་འགྱུ་སྲང་ཆེ་བ༔ རི་ལུང་བྲག་སོགས་བརྔམ་ལ་བརྗིད་པ༔ གཞན་གྱི་འཚེ་བ་མེད་པའི་ལུང་དུ་ཕྱིན་ལ༔ གཉུགས་མར་གནས་པ་ལ་གཏོར་མ་བསྔོ༔ འཕྲིན་ལས་བཅོལ་བདེན་སྟོབས་བརྗོད་དོ༔ དེ་ནས་ཕུང་ཤུལ་གྱི་ས་ལ་སྟེགས་བུ་གྲུ་གསུམ་པ་བཟོ༔ དུག་ཁྲག་དང་རོ་སོལ་གྱིས་ཆག་ཆག་གདབ༔ མ་ཏྲམ་བྲིས་པའི་ལྟོ་བར་ཆོས་འབྱུང་ཟླ་གམ་གསུམ་ལྡན༔ མུ་ཁྱུད་ལ་ཐོད་རས་མཚན་པའི་མཐར༔ འཁོར་ལོ་རྩིབས་བརྒྱད་ཚོན་གྱིས་བཅད་ཅིང་སླར་ཡང་ཐོད་རས་བསྐོར༔ མ་ཊཾ་གི་ཡན་ལག་བཞི་ལ་སྒོ་མ་བཞིའི་ངོ་བོ་རྡུལ་ཚོན་གྱི་ཚོམ་བུ་རེ་བླུག༔ མཐར་མེ་རིས་བསྐོར༔ ཆོས་འབྱུང་གི་དབུས་སུ་ཁྲིའི་ཁར་ཟངས་ལྕགས་སམ་བྷནྡྷའི་སྣོད་དུ༔ ནས་ནག་གི་ཕྱེ་ལ་དུག་ཁྲག་གིས་སྦྲུས་པའི་དཔལ་བཤོལ་གཙོ་འཁོར་དགུ་པ་ཤ་སྣ་སྙིང་སྣས་བརྒྱན་པ་ལ༔ བམ་གྱི་རྒྱལ་མཚན་བྷནྡྷའི་ཀོང་བུར་ཚིལ་ཆེན་གྱི་མར་མེ་དགྲ་བགེགས་ཀྱི་ལིངྒ༔ མཚེ་དང་རྩང་ཡུངས་དཀརསོགས་ཀྱིས་བརྒྱན༔ དཀྱིལ་འཁོར་གྱི་མདུན་དུ་ཁམས་ས་ལ་ཧོམ་ཁུང་གྲུ་གསུམ་བང་རིམ་དགུས་མཚན་པ༔ ཁ་དོག་ཅིང་མཐིལ་ཡངས་པ༔ གས་དང་སྲུབ་མེད་པ་དུག་ཁྲག་སྣ་ཚོགས་ཀྱིས་མདོག་བསྒྱུར་བ༔ ཁ་གཅོད་ལ་པུ་རིས་མཚན་པ༔ ཛ་ཁུང་ལ་རྡོ་རྗེས་མཚན་པ་གཅིག་བཟོ༔ དེའི་ནང་དུ་དགྲ་བགེགས་ཀྱི་ལིང་ག །་སྐྱེ་མཆེད་དོད་ཅིང་བུག་ག་ཚང་བ༔ དགྲ་བོའི་ཟས་དང་ངར་སྣབ་ཚང་བ་བཾ་ཆེན་གྱི་ཤའམ༔ དུག་ཁྲག་གི་སྦྲུབ་པའི་ཟན་ལ་བཟོས་པ་གཞུག༔ དགྲ་བོ་ཤིན་ཏུ་ཐུ་ན་དུག་ཤོག་ལ་ལིང་ག་མང་ཉུང་ཅི་རིགས་པར་བྲིས་ཏེ༔ ཧོམ་ཁུང་དུ་གཟུད་དོ༔ ཧོམ་ཁུང་ཁ་རྩང་གིས་བརྒྱན་ཅིང་མཐའ་བསྐོར་རྣམས་ལ་ཐུན་རྫས་དང་མཚོན་ཆས་བསྐོར་ཞིང་༔ ཕུང་གསུམ་བདུད་ཀྱི་ཉི་མ་ལ་ལས་ལ་འཇུག་གོ༔ ས་མ་ཡཱ༔ རྒྱ་རྒྱ་རྒྱ༔ གཉིས་པ་དངོས་གཞི་སྒྲུབ་པའི་རིམ་པ་ནི། བསྙེན་སྒྲུབ་དང་ལྡན་པའི་རྣལ་འབྱོར་པ་བདེ་བའི་གདན་ལ་འདུག༔ བསྟན་པ་དང་སེམས་ཅན་གྱི་དོན་དུ་སེམས་བསྐྱེད༔ ལས་ཀྱི་གཞུང་བསྲང་ཞིང་སྒྲུབ་ཐབས་ལྟར་བསྐྱེད་རིམ་ལྷའི་ཡི་རྣལ་འབྱོར་ལ་འཇུག་སྟེ༔ གཞལ་ཡས་ཀྱི་ཁང་པ་དེ་ཡང་ཐོད་པ་ཚར་གསུམ་ལས་གྲུབ་པ༔ མི་ཁྲག་གི་རྒྱ་མཚོ༔ ཤ་ཆེན་གྱི་བརྩེགས་འཇམ་འཇིམ༔ མི་རོའི་རྩིག༔ མི་རུས་ཀྱི་གྲམ་ཁྲོད༔ དྲི་ང་བ་དང་མི་ང་བའི་བམ་གསར་རྙིང་མང་པོ་རི་ལྟར་བརྩེགས་ཤིང་ལུད་ལྟར་དུ་སྤུངས༔ མཐོང་བ་ཙམ་གྱིས་ཡ་ང་ཞིང་སྐྱི་བུང་བྱེད་པའི་དུར་ཁྲོད་ཀྱི་ཕོ་བྲང་བསྲུང་བའི་འཁོར་ལོ་དགུ་རིམ་གྱིས་མཚན་པའི་འོག་ཏུ༔ གནམ་ལྕགས་ལས་གྲུབ་པའི་བསད་ཁང་མུན་པ་དགུ་རིམ་དང་ལྡན་ཞིང་༔ ཕྱི་ན་ཞེ་སྡང་གི་མེ་འབར་བ༔ ནང་ན་འདོད་ཆགས་ཀྱི་ཁྲག་ཁོལ་བ༔ བར་ན་གཏི་མུག་གི་མུན་པ་འཐིབས་པ༔ ལོགས་ན་ང་རྒྱལ་གྱི་བྲག་རི་ཉིལ་བ༔ སྟེང་ནས་ཐོག་དང་མཚོན་ཆ་སྣ་ཚོགས་ཀྱི་ཆར་འབབ་པ༔ མཐའ་ན་ཕྲག་དོག་གི་རླུང་དམར་ནག་ཏུ་འཚུབ་པའི་ནང་དུ༔ དགྲ་བགེགས་བྱད་མ་ལྷ་སྲུང་བསྐྱེད་བསྟིམ་བྱ་ཞིང་མངོན་སུམ་དུ་ཚུད་པར་བསྒོམ༔ རང་ཉིད་དཔལ་གྱི་མཁའ་འགྲོ་མ་འཁོར་ལས་བྱེད་བཀའ་སྡོད་འབུམ་ཕྲག་ཡངས་པའི་ཡེ་ཤེས་དང་ལས་ལ་གྲུབ་པའི་ལྷ་ཚོགས་ཐམས་ཅད་རབ་ཏུ་ཁྲོས་དྲག་ཏུ་ཁྲོས་ཏེ༔ དྲག་ཏུ་བསྐྱོད་ནས༔ སྤྲུལ་པའི་མཁའ་འགྲོ༔ སྒོ་མ་བཞིའི་ཕྱག་མཚན་ཐོགས་པ་གྲངས་མེད་པས༔ དགྲ་བོ་བྱད་མ་ལྷ་སྲུང་དང་བཅས་པ་བཀུག་ནས༔ བསད་ཁང་དུ་རང་དབང་མེད་པར་བཙུད༔ དུག་མཚོན་སྣ་ཚོགས་ཀྱིས་ཆར་པ་སི་ལི་ལི་ཕབ་པས༔ ཁོའི་རྣམ་པར་ཤེས་པ་མར་མེ་འཆི་ཁའི་འོད་ཙམ་པ་དེ༔ ནག་ཐུམ་ཐུམ་བསད་ཅིང་༔ དམར་ཉིལ་ཉིལ་གཏུབས་ཏེ༔ ཤ་ཁྲག་རུས་པ་ཏིལ་འབྲུ་ཙམ་ཡང་མ་ལུས་པར༔ འབུམ་ཕྲག་ཡངས་པའི་མཁའ་འགྲོ་གཙོ་འཁོར་ཐམས་ཅད་ཀྱིས་ཧབ་སྒྲ་དིར་དིར༔ ཤ་རུས་ཐམས་ཅད་ཆོམ་ཆོམ་དུ་གསོལ་བར་བསམ་ཞིང་སྔགས་འདི་བཟླའོ༔ ཧཱུྃ་བཛྲ་དྷཀྐི་ནི་སིང་ཧ་མུ་ཥ་ཧ་རི་ནི་ས་ཡ་མ་རུ་ཊ་ཤ་ད་ཡཱ་ཕཊཿཛ་ཛ་བྷྱོ་བྷྱོ༔ དགྲ་བོ་མ་ར་ཡ་ཁུག་ཁུག་རིལ་རིལ་ཐུམ་ཐུམ་རྦུད་རྦུད༔ ཅེས་བཟླ་ཤིང་བར་བར་རྣམས་སུ་མཆོད་པས་མཆོད་བསྟོད་པས་བསྟོདཿ ཐུན་མཇུག་རྣམས་སུ་ཐུན་གཏོར་དགྲ་བགེགས་ཀྱི་ཤ་ཁྲག་ཏུ་བྱིན་གྱིས་བརླབས་ལཿ མཁའ་འགྲོའི་འགྱུ་ཕྱོགས་དང་བསྟུན་ཏེ་ལས་ལ་བསྐུལ་བར་བྱའོཿ དེ་ལྟར་བརྩོན་པས་ཉམས་སུ་བླངས་ཚེ་རྟགས་ཀྱི་རིམ་པ་འོང་སྟེཿ བཙད་པོ་དང་ཿ དགེ་བཤེས་དང་ཿ བཙུན་པ་དང་ཿ ཞང་བློན་དང་ཿ མོན་པ་དང་ཿ ཨ་ཙ་ར་དང་ཿ རྟ་བ་ངརཿ ཆོ་འཕྲུལ་སྣ་ཚོགས་འོང་ང་ོཿ དེ་ལྟར་བྱུང་ན་ལས་མྱུར་རོཿ བཙན་མོ་དང་ཿ རྗེ་མོ་དང་ཿ མ་དང་ཿ སྲིང་མོ་དང་ཿ ཆུང་མ་དང་ཿ བྱི་མོ་དང་ཿ མཛའ་མོ་དང་ཿ བྲན་མོ་བུད་མེད་ཀྱི་ཚོགས་མང་པོ་དང་ཿ བྱ་ནག་སྐྱ་ནག་རྣམས་བྱུང་ན་རྒྱུད་འཇམ་ཡང་ལས་འགོར་རོཿ དེ་ནས་ལས་ལ་ཆུད་པའི་རྟགས་ནི་མོ་བརྒྱུད་ཕོ་བརྒྱུད་མང་པོས་དམག་འདྲེན་པཿ སྒྱོགས་འཕེན་པ་ལིངས་བྱེད་པ་རྔ་བརྡུང་བ་ཤིང་གཅོད་པ་བྲག་བཤིགས་པ་རི་དྭགས་བྱེད་པ་དང་ཿ དགྲ་བོ་བཙོན་ལ་ཟིན་པ་སོགས་ཁུགས་རྟགས་བྱུང་ཚེཿ དགྲ་བོ་བསད་པའི་ལས་སྦྱོར་བྱ་སྟེཿ ཧཱུྃ་བཛྲ་དྷཀྐི་ནི་སིངྷ་མུ་ཥ་ཧ་ནི་ནི་ས་ཛཿབྷྱོཿ དགྲ་བོའི་སྙིང་ཁྲག་རྦད་སུ་ཐུན་བྷྱོཿ ཤ་ཏྲུཾ་ཨ་མུ་ཀ་མཱ་ཀ་མཱ་ར་ཡ་རྦད་རྦདཿ ཚལ་པ་ཚལ་པ་སོད་སོདཿ དུག་གསུམ་དུ་ཐུན་གྱིས་བྲབ་ཅིང་གནད་དུ་བསྣུན་པསཿ རྟགས་ནི་དགྲ་བོ་དངོས་སུ་ཁུགས་ནས་བསད་པའམཿ བླ་རྟགས་བསད་པའི་རྟགས་བྱུང་ན་ལས་ལ་སྦྱོར་རོཿ ས་མ་ཡཱཿ རྒྱ་རྒྱ་རྒྱཿ གསུམ་པ་ལས་ལ་སྦྱར་བ་ནིཿ ཐུན་རྫས་ཚོགས་ཚད་ཀྱིས་བྲབ་ཅིང་ཿ རང་ཉིད་ཁྲོ་མོའི་ང་རྒྱལ་དྲག་ཏུ་བསྐྱེདཿ འཁོར་ལས་བྱེད་སྤྲུལ་པ་ཡང་སྤྲུལ་གྱི་ཚོགས་ཐམས་ཅད་་ཀྱིས་གཅན་སྤྱང་ཤ་ལ་རུབ་པ་ལྟརཿ དགྲ་བོ་མི་ནོར་འཁོར་དང་བཅས་པ་ཁ་ཕུང་རྗེས་མེད་དུ་བཏང་བར་བསམས་ཤིང་ཐུན་སྣ་ཚོགས་ཀྱིས་བྲབ་སྟེ་སྔགས་འདིས་བསྒྲལ་ལོཿ ཧཱུྃ་བཛྲ་དྷཀྐི་ནི་སིངྷ་མུ་ཥ་ཧ་རི་ནི་ས་དགྲ་བོའི་སྙིང་ཁྲག་ཧུར་ཐུམ་བྷྱོཿ བཛྲ་ཀཱི་ལི་ཀཱི་ལ་ཡ་དགྲ་བོ་མི་ནོར་འཁོར་དང་བཅས་པ་ཤ་ཏྲུཾ་མཱ་ར་ཡ་ཧཱུྃ་ཕཊཿ སརྦ་དྷཀྐི་ནི་བཛྲ་ཀཱི་ལི་ཀཱི་ལ་ཡ་དགྲ་བོ་མི་ནོར་འཁོར་དང་བཅས་པ་ཤ་ཏྲུཾ་མཱ་ར་ཡ་ཧཱུཾ་ཕཊཿ བཛྲ་དྷཀྐི་ནི་དགྲ་བོའི་ཤ་ལ་ཀཾ་ཀཾཿ རཏྣ་དྷཀྐི་ནི་དགྲ་བོའི་རུས་ལ་ཆེམ་ཆེམཿ པདྨ་དྷཀྐི་ནི་དགྲ་བོའི་ཁྲག་ལ་གཏིབས་གཏིབསཿ ཀརྨ་དྷཀྐི་ནི་དགྲ་བོའི་དབུགས་ལ་ཧབ་ཧབཿ བྷུངྔྷ་དྷཀྐི་ནི་སིངྷ་མུ་ཥ་ཧ་རི་ནི་ས་དགྲ་བོའི་སྲོག་རྩ་ལ་རྦད་རྦདཿ ད་ཡ་ད་ཡཿ ཆོད་ཡ་ཆོད་ཡཿ མཱ་ར་ཡ་ཛ་ཛཿ ཐུན་བྷྱོ་ཐུན་བྷྱོཿ ཅེས་བསྒྲལ་ལིང་རོ་གཏོར་མར་འབུལཿ ཧཱུྃ་བཛྲ་དྷཀྐི་ནི་སིངྷ་མུ་ཥ་ཧ་རི་ནི་ས་དགྲ་བོ་ཤ་ཏྲུཾ་མཱ་ར་ཡཿ མཾ་ས་རཀྟ་ཀེཾ་ནི་རི་ཏི་ཙིཏྟ་བྷ་སུ་ཏ་བྷ་ལིངྟ་་ཁཱ་ཁཱ་ཁཱ་ཧི་ཁཱ་ཧིཿ སརྦ་དྷཀྐི་ནི་ས་མ་ཡཿ མཾ་ས་རཀྟ་ཀེཾ་ནི་རི་ཏི་ཙིཏྟ་བྷ་སུ་ཏ་བྷ་ལིངྟ་ཁཱ་ཁ་ཁཱ་ཧི་ཁཱ་ཧིཿ ཅེས་ཟན་ལིང་གཏོར་མར་འབུལཿ ཤོག་ལིང་ཐུན་རྫས་དང་མི་ཁའི་རྫས་སོགས་བཏབ་སྟེ་གཅན་གཟན་ནམ་མིའི་ཐོད་ངན་ནང་དུ་འབྲུབ་ཅིང་བྱད་ཐག་གིས་དཀྲིསཿ རེ་ནག་གིས་གཏུམ་མོཿ གཏོར་ཟོར་དང་ཐུན་རྫས་དགྲ་བོའི་ཁང་པ་ལ་འབྲུབ་པའམཿ དགྲ་ཕྱོགས་སུ་འཕེན་ཞིང་དམོད་པ་སྣ་ཚོགས་འདེབསཿ གཡབ་མོས་གཡབཿ ཆོ་ངེ་འདོན་ཐལ་བ་བཤོརཿ ཆེ་གེ་འདི་ཞེས་བྱ་བ་མྱུར་དུ་སྒྲོལ་ལྷག་མ་རྗེས་ཤུལ་མེད་པར་ཐོངས་ཤིག་སོགས་བརྗོདཿ དེ་ནས་སྦྱིན་བསྲེག་ཏུ་འདོད་ན་དུག་ཤིང་གི་ཧོམ་བརྩེགས་པ་ལ་མེ་སྦར་ཞིང་ཿ ལིངྒ་ཤ་ཁྲག་སྣ་ཚོགས་ཀྱི་སྲེག་རྫས་དང་བཅས་པ་འབུལ་ཞིང་ཿ ཧཱུྃ་བཛྲ་དྷཀྐི་ནི་སིངྷ་མུ་ཥཧ་རི་ནི་ས་ཆེ་གེ་མོ་ཛྭ་ལ་རཾ་རཾཿ སརྦ་དྷཀྐི་ནི་ཆེ་གེ་མོ་ཛྭ་ལ་རཾ་རཾཿ ཅེས་བརྗོད་ཅིང་མེའི་ནང་དུ་མཁའ་འགྲོ་འཁོར་དང་བཅས་བསམས་ལཿ ལིངྒ་བསྲེག་རྫས་དགྲ་བོའི་ཤ་ཁྲག་ཏུ་བསམ་ཏེ་འབུལ་ཞིང་ཿ དགྲ་བོ་འཁོར་བཅས་བྱ་སྒྲོ་མེ་ལ་རེག་པ་ལྟར་བསྒོམ་མོཿ ཐལ་བ་ལིངྒ་དང་མཉམ་དུ་མནན་ན་ཟབཿ དེ་ནས་མནན་པ་བྱ་བ་ནིཿ གོང་གི་ཐོད་པ་ཧོམ་ཁུངདུ་བཅུག་ཅིང་འགུགས་བསྟིམ་ཡང་ཡང་བྱཿཛཿཧཱུྃ་བཾ་ཧོ་ས་རྒྱས་གདབ་ཅིང་ཞག་གསུམ་སྨྲ་བ་བཅད་ལ་སྔགས་འདིས་བསྒྲུབ་བོཿ ཧཱུྃ་བཛྲ་དྷཀྐི་ནི་སིངྷ་མུ་ཥ་ཧ་རི་ནི་ས་དགྲ་བོ་སརྦ་ཤ་ཏྲུཾ་མཱ་ར་ཡ་ནན་ནནཿ སྟམ་བྷ་ཡ་ནནཿ དགྲ་བོ་ཀཱ་ཡ་ཝཀྐ་ཙིཏྟ་མོ་ཧ་ཡ་ནན་ནནཿ ཅེས་བཟླས་ལ་དུར་ཁྲོད་མཁའ་འགྲོ་འདུ་བའི་སའམཿ ལྷ་འདྲེ་འཚུབ་ཆེ་སར་སྲོད་དྲག་པོ་ལ་མནན་ཞིང་ལྷ་འདྲེ་རྣམས་ལ་གསེར་སྐྱེམས་མཆོདཿ གཉེར་གཏད་དྲག་ཏུ་བྱའོཿ དགྲ་བོ་ཀླུ་ལ་གཏད་ན་སྦལ་པ་ནག་པོ་གྲོ་ག་ལ་བྲིས་པའི་ལྟོ་བར་དགྲ་བོ་ལིངྒ་གཞུང་ལྟར་བྲིཿ ཐ་མར་སྔགས་འདིས་བསྐོར་རོཿ ནཱ་ག་ཁ་མེད་དགྲ་བོ་མི་ནོར་འཁོར་དང་བཅས་པ་ཁཱ་ཧི་ཁཱ་ཧིཿ ནཱ་ག་ནཱ་ག་ཕོ་ཏྲི་ཏེ་ནཱ་ག་ནག་པོ་ཀྲོ་ཏཿ བཛྲ་ཡཀྴ་ཀྲོ་ཏ་ནིཿ ནཱ་ག་ནི་རི་མེ་དཿ ཤ་ཏྲུཾ་ཙནྡྷ་ཙནྡྷ་ཆེ་གེ་མོ་ལ་ཛཿཛཿ ཞེས་ཞག་གསུམ་བཟླ་ཞིང་མཁའ་འགྲོ་མས་ཀླུ་བཀུགཿ ཀླུས་དགྲ་བོ་བརླགས་པར་བསམས་ལཿ ཁམ་པའི་སྦལ་པ་སོ་བཏང་བའི་ནང་དུ་བཅུགཿ ཁ་ལ་ཆས་བསྡམསཿ ཀླུ་གདོལ་ལ་གནས་པའི་ཆུ་མིག་གི་དོང་དུ་སྦའོཿ ཀླུའི་འགྱུ་བ་དང་བསྟུན་ཐུབ་ན་རབ་བོཿ དགྲ་བོ་ཀླུའི་གནོད་པས་བརླག་པར་ཐེ་ཚོམ་མེད་དོཿ འབོད་རྦད་བསད་གསུམ་གང་ལའང་རྟགས་མེད་འགྱངས་ནཿ རང་གཞུང་གི་སྔགས་མགོ་ཞབས་བཟློག་སྟེ་བཟླས་པས་རྟགས་མྱུར་དུ་ཐོན་ནོཿའདི་ནི་ཤིན་ཏུ་འགྱངས་ན་མ་གཏོགས་བྱར་མི་རུང་ངོ་ཿ ས་མ་ཡཱཿ རྒྱ་རྒྱ་རྒྱཿ གདམས་པ་ཟབ་མོ་འདིས་སྔོན་རྒྱ་གར་དུཿ བདག་པདྨ་ཐོད་ཕྲེང་གིས་མུ་སྟེགས་ཀྱི་སྡེ་ལངྐའི་བདག་པོ་དང་བཅས་པ་ཁ་ཕུང་ལ་བཏང་ནསཿ སངས་རྒྱས་ཀྱི་བསྟན་པ་དར་བར་བྱས་ཤིང་ཿ ཁ་བ་ཅན་གྱི་རྒྱལ་ཁམས་སུ་འོངས་ཏེཿ ཆོས་རྒྱལ་གྱི་དགོངས་པ་སྒྲུབསཿ སངས་རྒྱས་ཀྱི་བསྟན་པ་བཙུགས་ཤིང་མཁའ་འགྲོའི་གདམས་ཟབ་མང་པོ་མཚོ་རྒྱལ་ཁྱོད་ལ་གདམས་པའི་ཉིང་ཁུ་ནི་འདིའོཿ ཞེས་གསུངས་པ་རྣམས་བདག་མཚོ་རྒྱལ་གྱིས་ཡི་གེར་བཏབ་སྟེཿ བདེ་མཆོག་དབང་གི་འཁོར་ལོའི་ཆོས་སྐོར་དུཿ སེང་གདོང་མཁའ་འགྲོའི་གནས་ལ་རིན་པོ་ཆེའི་གཏེར་དུ་སྦས་པ་ས་མ་ཡཱཿ རྒྱ་རྒྱ་རྒྱཿ ལས་འཕྲོད་ཅན་དང་འཕྲད་པར་ཤོགཿ གཏེར་རྒྱཿ སྦས་རྒྱཿ ཟབ་རྒྱཿ གཉན་རྒྱཿ གཞད་རྒྱཿ ས་མ་ཡཱཿ རྒྱ་རྒྱ་རྒྱཿ ཁ་ཐཾ་རྒྱཿ བདག་སྤྲང་བན་ཉི་མ་གྲགས་པས་གངས་རིའི་རྒྱལ་པ་ོཏི་སེ་ནས་གདན་དྲངས་ཤིང་ཤོག་སེར་ལས་ཕབ་པའོ། །མངྒ་ལཾ། །

བདུད་འདུལ་མཁའ་འགྲོའི་ཟིན་བྲིས་མཚོ་རྒྱལ་གྱིས་མཛད་པ།

བཀའ་རྫོགས་པ་ཆེན་པོ་བླ་མ་བདེ་མཆོག་འཁོར་ལས༔ བདུད་འདུལ་མཁའ་འགྲོའི་ཟིན་བྲིས་མཚོ་རྒྱལ་གྱིས་མཛད་པ་ཤིན་ཏུ་གསང་བར་བྱའོ་ཨྠིྀ༔ དཔལ་ཆེན་པོ་ལ་ཕྱག་འཚལ་ལོ༔ མཁའ་འགྲོ་བདུད་འདུལ་ནག་མོས་དགྲ་བོ་བསད་པའི་ལས་སྦྱོར་གྱི་དུས༔ དཀྱིལ་འཁོར་གྱི་དབུས་སུ་བསད་ཁང་ཁ་རན་སྟེགས་བུའི་དཔངས་དང་མཉམ་པ་གཏོར་མའི་ཞབས་སུ་འགོད་པ་དང་ཿ ལིང་གའི་སྣོད་གྲི་བོ་གྲི་མོ་གཉིས་ཀྱིར་ཐོད་པ་སྔགས་འཁོར་བྲིས་པའི་ནང་དུ་འཛུད་པར་བྱའོ༔ ཐོད་པ་མཚན་ངན་པ་མཆོག་གོ༔ ཀླུ་ལ་གཏད་ན་མཛེ་ཐོད་ཕོ་མོ་ཁ་སྦྱོར་དགོས་སོ༔ ཕོ་ཐོད་མོ་ཐོད་གཉིས་ལ་རྩིབས་བརྒྱད་དུག་ཁྲག་གིས་བྲིས༔ དེའི་ཕྱི་རོལ་མུ་ཁྱུད་ཀྱིས་བསྐོར༔ ལྟེ་བ་གཉིས་ལ་རྡོ་རྗེ་རྒྱ་གྲམ་ཧོམ་ཁུང་བྲི༔ ཕོ་ཐོད་ལ་རྒྱ་གྲམ་མོ་ཐོད་ལ་ཧོམ་ཁུང་༔ རྩིབས་ཕོ་ཐོད་ལ་བརྒྱད༔ ཨ་ཡ་མ་དུ་རུ་ཙ་ཤ་ན་ཞེས་འགོད༔ མོ་ཐོད་ལ་མ་བརྒྱད་འགོད༔ ཕོ་ཐོད་ཀྱི་མུ་ཁྱུད་ལ་དགྲ་བོའི་སྙིང་རྩ་ལ་ལྷ་མ་སྲིན་སྡེ་བརྒྱད་ཀྱིས་ཧབ་ཧབ་ཐུན་ཐུན་རྦད་རྦད་བྷྱོ་བྷྱོ་ཤ་ཏྲུཾ་བྱད་མ་ལྷ་སྲུང་སརྦ་ཀཱ་ཡ་ཝཱཀྐ་ཙིཏྟ་ནན་ནན༔ ཅེས་བྲི༔ མོ་ཐོད་ལ་དགྲ་བོ་བྱད་མ་ལྷ་སྲུང་དང་བཅས་པ་སརྦ་ཙིཏྟ་གཟེར་ཐུམ་རི་ལི་ལི་མ་མ་རག་མོ་སྙིང་ཁྲག་ལ་དུན་ཏེ་དུན་ཏེ་བྷྱོ་ཡ་བྷྱོ་ཡ་ནན་ཛ་ཛཿ ཞེས་བྲི་ལྷག་ཆད་མེད་པར་བྱའོ༔ དགྲ་བོ་གྲིར་འཆི་འདོད་ན་གྲི་སྙིང་༔ སྨྱོས་སྟེ་འཆི་འདོད་ན་ཁྱི་སྨྱོན་གྱི་སྙིང་༔ སྦ་སྟེ་འཆི་འདོད་ན་འདབ་ཆགས་ཀྱི་སྙིང་༔ ནད་ཀྱིས་འཆི་འདོད་ན་ནད་རིགས་གང་གིས་འཆི་འདོད་པའི༔ ནད་ཀྱིས་ཤི་བའི་མི་སྙིང་དུ་ལིང་ག་བཅུག༔ དེ་ཐོད་པར་བསྡམས༔ དེ་ནས་མནན་པ་རང་གང་འདོད་ཀྱིས་སར་རྒྱག་གོ༔ ལར་མཁའ་འགྲོ་མ་འདིའི་དམ་ཚིག་ཏུ་གཅན་ག །ཟན་སོགས་མཆེ་བ་ཅན་གྱི་ཤ་མི་ཟ༔ བུད་མེད་ལ་མི་དམོད༔ གྲིབ་ལ་འཛེམ༔ གོང་དུ་སྒྲུབ་པའི་བསྙེན་གྲངས་སྐྱེལ༔ དེ་ནས་ལས་སྦྱོར་གང་དགོས་ལ་འབད་པ་ཞལ་གྱིས་གདམས་པ་ཡང་དག་པའོ༔ ས་མ་ཡཱ༔ རྒྱ་རྒྱ་རྒྱ༔ ཅེས་པ་ཡང་ཟབ་གནད་ཀྱིས་གདམས་པ་འདི་ནི་ཆིག་བརྒྱུད་ལས་སྤེལ་བར་མི་བྱའོ༔ ཤིན་ཏུ་ཟབ་ཕྱིར་ཡིག་ཆུང་དུ་གབ་པ་འདི༔ སློབ་དཔོན་ཆེན་པོ་ལ་ལུང་ཞུས་ནས་བདག་བུ་མེད་མཚོ་རྒྱལ་གྱིས་ཟིན་བྲིས་སུ་བཏབ་སྟེ་རིན་པོ་ཆེའི་གཏེར་དུ་སྦས་པའོ༔ ལས་འཕྲོ་ཅན་དང་འཕྲད་པར་ཤོག༔ ས་མ་ཡཱ༔ རྒྱ་རྒྱ་རྒྱ༔ གཏེར་རྒྱ༔ སྦས་རྒྱ༔ ཟབ་རྒྱ༔ གཉན་རྒྱ༔ གཏད་རྒྱ༔ ས་མ་ཡ་ཁ་ཐཾ་རྒྱ༔ བདག་སྤྲང་བན་ཉི་མ་གྲགས་པས་གངས་རིའི་རྒྱལ་པོ་ཏི་སེ་ནས་གདན་དྲངས་པའོ༔ མངྒ་ལཾ།། །།

བདུད་འདུལ་ནག་མོའི་འཕུང་ཤིག་བསྒྲུབ་པ།

བཀའ་རྫོགས་པ་ཆེན་པོ་བླ་མ་བདེ་མཆོག་འཁོར་ལོ་ལས༔ བདུད་འདུལ་ནག་མོའི་འཕུང་ཤིག་བསྒྲུབ་པ་བཞུགས་སོ༔ དབང་ཆེན་ཧེ་རུ་ཀཿལ་འདུད༔ མ་འོངས་བསྐལ་པའི་ཐ་མ་ལ༔ ཆོས་བཞིན་སྒྲུབ་པའི་སྐལ་ལྡན་རྣམས༔ དགྲ་བོས་བདེ་བས་མི་སྟེར་ན༔ འཕུང་ཤིག་ནག་པོའི་སྦྱོར་བ་བརྩམ༔ ས་མ་ཡཱ༔ རྒྱ༔ དེ་ཡང་འཕུང་ཤིག་སེལ་གྱི་ལས་སྦྱོར་འདི་ལ་དོན་གསུམ་སྟེ༔ སྔོན་འགྲོ་བཅའ་གཞི༔ དངོས་གཞི་བསྒྲུབ་པ༔ རྗེེས་ལས་སྦྱོར་རོ༔ ས་མ་ཡཱ༔ རྒྱཿ དང་པོ་སྔོན་འགྲོ་བཅའ་གཞི་ནི༔ ཕུང་ཤུལ་གྱི་གནས་སུ་ཕུང་གསུམ་གྱི་ཉི་མ་ལ༔ ཕུང་ཤུལ་གྱི་ས་ལ་སྟེགས་བུ་གྲུ་གསུམ་པ་བཟོས་པའི་ལྟེ་བར་རླུང་གི་ད་ལ་ལྗང་ཁུ་གཞུའི་དབྱིབས་ཅན་གྱི་མཐར་རླུང་གི་རི་མོ་མཚོན་གྱིས་བྲི༔ རབས་ཆད་ཀྱི་ཐོད་པ་མཚན་ངན་དུ་ཕུང་སེལ་གྱི་འཁོར་ལོས་མཚན་མཚན་པ་དབུས་སུ་འགོད༔ ཤར་དུ་ས་གཤེད་སྲིན་བྱའི་མགོ༔ ལྷོར་མེ་གཤེད་འུག་པའི་མགོ༔ ནུབ་ཏུ་ཆུ་གཤེད་སྦྲུལ་གྱི་མགོ༔ བྱང་དུ་རླུང་གི་གཤེད་ཕུག་ཤུད་ཀྱི་མགོ་རྣམས་སུ་ཡང་འཁོར་ལོ་མཚན་པ་འགོད༔ ཐུན་གཏོར་བྱང་ཤར་དུ་བཤམས༔ ས་མ་ཡཱ༔ རྒྱ༔ གཉིས་པ་དངོས་གཞི་སྒྲུབ་པའི་རིམ་པ་ནི༔ རང་ཉིད་བདུད་འདུལ་དཔལ་གྱི་མཁའ་འགྲོ་མ་སེང་གདོང་ནག་མོར་གསལ་བའི་སྤྱི་གཙུག་གམ་སྙིང་དཀྱིལ་དུ་རྡོ་རྗེ་དྲག་པོ་རྩལ་ཐུགས་ཀར་འཁོར་ལོ་རྩིབས་བཞིར༔ ཧ་རི་ནི་ས་དབུས་སུ་ཧཱུྃ་ཡིག་འབྱུང་གཞི་དཀྲུག་པའི་སྙིང་པོ་དང་བཅས་པ་བསམ་ལ༔ འཁོར་ལོ་ཡིག་འབྲུ་དང་འོད་ཟེར་ཐམས་ཅད་ལས་ཀྱི་རླུང་ནག་རབ་ཏུ་འཚུབ་པ་ཞིག་ཏུ་གྱུར་ནས༔ ཐོད་པ་རྣམས་གྱི་ནང་དུ་སོང་༔ ཐོད་པ་སྲིད་གསུམ་ཁམས་གསུམ་གསལ་བའི་ནང་དུ་བསྐལ་པའི་རླུང་ཆེན༔ ལས་ཀྱ་ིརླུང་དམར་རབ་ཏུ་འཁྲུགས་པས༔ དགྲ་བོ་མི་ནོར་འཁོར་དང་བཅས་པ་གཡོས་རབ་ཏུ་གཡོས༔ སྐྱོད་རབ་ནག་ཏུ་སྐྱོད༔ འཁྲུག་རབ་ཏུ་འཁྲུག༔ གཤིག་རབ་ཏུ་བཤིག༔ གཏོར་རབ་ཏུ་གཏོར༔ ཕུང་རབ་ཏུ་ཕུང་ཤིན་ཏུ་ཕུང་བར་བསམས་ཤིང་སྔགས་འདི་བཟླའོ༔ ཧཱུྃ་བཛྲ་དྷཀྐི་ནི་སིང་ཧ་མུ་ཥ་ཧ་རི་ནི་ས་དགྲ་བོའི་སྲོག་རྩ་ལ་ཡམ་ཡམ༔ སྙིང་རྩ་ལ་རྦུད་རྦུད༔ བླ་སྲོག་རྣམས་པར་ཤེས་པ་ལ་བྲེང་བྲེང་༔ ཡ་ཡ་བྷྱོ་བྷྱོ་རྦད་རྦད༔ ཅེས་བཟླ་ནམ་མཁའ་ལ་འབྱུང་བའི་ཚ་གྲང་ཐོག་སེར་འཁྲུག་པ་ལྟར༔ དགྲ་བོའི་ཕྱི་ནང་གི་ཁམས་དང་དྭངས་མའི་ཁམས་འབྱུང་བ་བཞི་ཐམས་ཅད་རང་དབང་མེད་པར་འཁྲུག་པར་བསམ་མོ༔ དེ་ཡི་ཚེ་རྟགས་ཀྱི་རིམ་པ་ནི༔ ཐོག་འཚེགས་པ༔ ཁང་ཁྱིམ་འགུལ་བ༔ འོད་འཆར་བ༔ ཤེས་པ་འཕྱོ་བ་སོགས་འབྱུང་ཞིང་༔ ཁྱད་པར་གྱི་རྟགས་ཐོད་པ་རྣམས་ལ་རྦུད་པས་བུས་ཚེ༔ རང་དབང་མེད་པར་འཁོར་བ་དང་གཡོ་བ་འབྱུང་ངོ་༔ ས་མ་ཡཱ༔ རྒྱ༔ གསུམ་པ་རྗེས་ཀྱི་ལས་སྦྱོར་ནི༔ དེ་ལྟར་བསྒྲུབས་ནས་རྟགས་གསལ་ཚེ༔ དགྲ་བོའི་ཁང་ས་ཞིང་ས༔ དུར་ས་དང་རབས་ཆད་ནག་པོའི་རུས་པ༔ ཕུང་ཤུལ་ཅི་མང་གི་ས༔ ཡུངས་དཀར་ནག་རྣམས་ལ་སྔགས་འདི་གདབ༔ ཐོད་པ་རྣམས་ལ་ཐུན་གྱིས་བྲབ་ཅིང་བསྐོར༔ མཁའ་འགྲོ་མ་ལ་གཏོར་མ་མཆོད་ཅིང་བསྐུལ་བ་ཡང་སྐབས་སྐབས་བྱ༔ སྔགས་ནི༔ ཧཱུྃ་བཛྲ་དྷཀྐི་ནི་སིང་ཧ་མུ་ཥ་ཧ་རི་ནི་ས་ཧྲིང་ཧྲིང་༔ བཛྲ་པན་ཏྲི་ཡ་མ་ཧྲིང་༔ ཁ་ཏ་བཛྲ་བོ་ན་ཡ་ཡབ་ཏྲི་ཤ་མ་ཀཱ༔ བཛྲ་མ་ར་ཧྲིང་༔ བཛྲ་ཞུང་ཞུང་ཏྲི་མཱ་ར་ཡ་ན་ཏྲི་ལ་མ་ཀུ་ན༔ བཛྲ་མ་ཞུ་ཆུ་གན་རིཿཏྲི་ཛཿ མ་ར་ནི་ཏྲི་ཛཿ བཛྲ་ཀ་ཤད་ནན་ཏེ་པྲ་མཱ་ར་ཡཿ བཛྲ་ཀས་ཧ་གྲ་ཏ་དུ་བཛྲ་ན་ཤ་ཏན༔ མ་ཐ་ན་ཏྲི་ནད་ཏྲི་མ་བུར་དགྲ་བོ་ཆེ་གེ་ཁ་ཕུང་རྗེས་མེད་དུ་ཐོང་ཞིག༔ མཁར་ཤིག་ཚང་དཀྲུགས༔ ཞིང་གི་སྐྱེ་རྒྱུན་ཆོད༔ དུར་ཁ་ནག་པོ་དཀྲུགས༔ ནོར་ཕྱུགས་ཕྱགས་མས་དེད༔ བདུན་རྒྱུད་རྩད་ནས་ཆོད༔ ཚ་གྲང་འཐབ་ཏུ་ཆུག༔ ཕུང་འདྲེས་ཟ་ཁ་ཐོད༔ ལྷག་མ་རྗེས་ཤུལ་མེད་པ་ཐོང་༔ ཞེས་བསྒྲུབ་པའི་ཚད་ནི་ཞག་དགུ་ཡིན་ཞིང་༔ ས་ཚེ་ཟད་སྲིན་བྱའི་ཐོད་པར་བླུག༔ ཆུ་ཉམ་ཐག་སྦྲུལ་གྱི་ཐོད་པར་བླུག༔ མེ་ཉམ་ཐག་འུག་པའི་ཐོད་པར་བླུག༔ རླུང་ཚེ་ཟད་ཕུག་ཤུད་ཐོད་པར་བླུག༔ མཁར་ལ་བྱ་ན་རྨང་༔ ཞིང་ལ་དཀྱིལ༔ དུར་ས་ལ་དབུས༔ རབས་ཆད་ཐོད་པ་དབུས༔ ཐོད་པ་རྣམས་ལ་ཆས་སྡམས་རེ་ནག་གིས་དྲིལ༔ གཞན་བཞི་བསྒྲུབ་དུས་ལྟར་ཕྱོགས་མ་ནོར་བ་འགོད༔ ཁང་སར་བརྩམ་ན་མཁར་འགྱེལ་ཞིང་༔ ཞིང་ལ་བརྩམ་ན་སྐྱེ་རྒྱུན་ཆད༔ དུར་སར་བརྩམས་ན་རྩ་བ་འཆད༔ ཨེ་མ་ཡིད་ཀྱི་གནག་པ་འདི༔ ད་ལྟ་མཚོ་རྒྱལ་ཁྱོད་ལ་གདམ༔ མ་འོངས་བསྟན་བཤིག་དགྲ་བོ་ལ༔ ལས་སྦྱོར་འདི་བརྩམ་ཞེ་རེ་ཚིམ༔ ཅེས་གསུང་པ་རྣམས་བདག་མཚོ་རྒྱལ་གྱིས་ཡི་གེར་བཏབ་སྟེ་རིན་པོ་ཆེའི་གཏེར་དུ་སྦས་པའོ༔ གཏེར་རྒྱ༔ སྦས་རྒྱ༔ གསང་རྒྱ༔ གཉན་རྒྱ༔ གཏད་རྒྱ༔ ས་མ་ཡཱཿ རྒྱ་རྒྱ་རྒྱ༔ བདག་སྤྲང་བནྡྷེ་ཉི་མ་གྲགས་པས་ཏེ་སེ་གངས་རིའི་རྒྱལ་པོ་ནས་གདན་དྲངས་པའོ། །མངྒ་ལཾ།། །།

བདུད་འདུལ་ནག་མོའི་ཕུང་གཏད་ནག་པོ།

བཀའ་རྫོགས་པ་ཆེན་པོ་བླ་མ་བདེ་མཆོག་འཁོར་ལོ་ལས༔ བདུད་འདུལ་ནག་མོའི་ཕུང་གཏད་ནག་པོ་བཞུགས་སོ༔ དཔལ་ཆེན་པོ་མཁའ་འགྲོའི་དབང་ཕྱུག་ལ་ཕྱག་འཚལ་ལོ༔ ངན་སྔགས་གསང་བའི་སྙིང་ཞུན༔ དྲག་སྔགས་དམོད་པའི་མདེལ་ཐུང་༔ དགྲ་བོ་འཇོམས་པའི་གཤེད་མ༔ ཕུང་བྱེད་ནག་པོ་འཆོར་མེད་ཞེས་བྱ་བ་འདི་དོན་གསུམ་གྱིས་སྟོན་ཏེ༔ སྔོན་འགྲོ་དང་དངོས་གཞི་རྗེས་སོ༔ དང་པོ་སྔོན་དུ་འགྲོ་བ་ནི་གྲོ་གའམ་ཤིང་ཤུན་ལ་འཁོར་ལོ་མུ་ཁྱུད་གསུམ་དུ་བསྐོར༔ དབུས་སུ་དགྲ་བོའི་ལིངྒ་དགྲ་དུ་ཡོད་ཀྱི་མིང་རུས་བླ་དག་ཚུལ་མཐུན་དུ་བྲི༔ མུ་ཁྱུད་ནང་མ་ལ་ནཱ་ག་ནཱ་ག་ནག་པོ་ཁ་མེད་དགྲ་བོ་མི་ནོར་འཁོར་དང་བཅས་པ་ཤ་ཏྲུཾ་བརླག༔ མྱོས་མྱོས་ལྷུར་གཏུབ་ཧ་ན་ཧ་ན་རྦད་རྦད་སོད་སོད་མ་ར་ཡ་ཛ་ཛཿ ཅེས་བྲི༔ མུ་ཁྱུད་ཕྱི་མ་ལ༔ ནཱ་ག་ནག་པོ་ཀྲོ་ཏ་བཛྲ་རཀྴ་ཀྲོ་ཏ་ནཱ་ག་ནི༔ རི་མེ་ད་ཡ༔ ཙནྡྷ་ཙནྡྷ་གེ་མོ་མཱ་ར་ཡ་ཛ་ཛཿ ཡ་ཡ་ཆོད་ཆོད་སོད་སོད༔ ཅེས་བྲི། མུ་ཁྱུད་གཉིས་པ་ལ་རྩིབས་བཅུ་འམ་དགུ་དགུ་བཅད་པའི་རྩིབས་ནང་དུ་སྔགས་འདེབས་སོ༔ ཡིག་མགོ་ཕྱིར་བསྟན་པར་བྱའོ༔ དེའི་ཕྱི་རིམ་སྦྲུལ་དམར་ནག་གཉིས་ཀྱིས་བསྐོར་བར་བྲི༔ དེ་ཡི་ཕྱི་རིམ་སྦལ་པ་ནག་པོ་བྲི༔ སྣག་ཚ་ལ་དུག་ཆུ་བསྲེ་བ་གནད་ཡིན༔ དེ་ཁམ་སའི་སྦལ་པར་བཅུག༔ ཁ་ལ་ཆས་བསྡམས༔ ཤིན་ཏུ་མྱུར་བར་འདོད་ན་མཛེ་ཐོད་མཆོག༔ གཉིས་པ་དངོས་གཞིའི་རིམ་པ་ནི༔ ལིང་ཐོད་ཧོམ་ནང་དུ་བཅུག་ནས༔ ཨོཾ་གྱི་སྟོང་དུ་མཁའ་འགྲོའི་ཐུན་གཏོར་བཤམས༔ དང་པོ་རང་བསྲུང་བསྙེན་པ་འདི་ཞག་གཅིག་བཟླའོ༔ ཧཱུྃ༔ བཛྲ་གུ་རུ་དྲག་པོ་རྩལ་སེང་ཧ་མུ་ཥ་སིདྡྷི་ཧཱུྃ༔ ཞེས་བཟླ༔ དེ་ནས་ལས་སྦྱོར་འདི་ལ་འབད༔ ཧཱུྃ་བཛྲ་དྷཀྐི་ནི་སིང་ཧ་མུ་ཥ་ཧ་རི་ནི་ས་ནཱ་ག་ཁ་མེད་དགྲ་བོ་བརླག་བརླག༔ ནཱ་ག་ནག་པོ་ཀྲོ་ཏ་བཛྲ་རཀྴ་ཀྲོ་ཏ་ནཱ་ག་ནི༔ ཙནྡྷ་ཙནྡྷ་ཆེ་གེ་མོ་མཱ་ར་ཡ་སོད་སོད་བརླག་བརླག་ཛཿ ཛཿ ཅེས་ཞག་གསུམ་བཟླ་ཞིང་༔ ཀླུའི་ཆོ་འཕྲུལ་དངོས་ཉམས་རྨི་ལམ་དུ་འཆུག་མེད་གསལ་ཚེ༔ མཁའ་འགྲོ་མ་ལ་ཐུན་གཏོར་འབུལ༔ གསུམ་པ་རྗེས་ཀྱི་ལས་སྦྱོར་བྱ་སྟེ༔ བསྒྲུབ་པ་རྟགས་ཐོན་པ་དང་༔ ཀླུའི་ཐེབས་ཟློག་བསྟུན་ཞིང་༔ ཀླུ་ཡོད་ངེས་ཀྱི་ཆུ་མིག་ཏུ་ཁྱེར་ཏེ༔ ཆུ་མིག་གི་ས་ནས་གཡས་ཕྱོགས་སུ་གྲུ་གང་འཇལ་བའི་སར༔ བཙོད་ཀྱི་རྭ་ཅོས་གྲུ་གསུམ་པའི་རྣམ་པར་དོང་བྲུས༔ ནང་དུ་ཐོད་ལིང་མནན་ཅིང་བདེན་པ་བདར༔ དགུག་གཞུག་བྱེད༔ གསེར་སྐྱེམས་མཆོད༔ དམོད་བཅོལ་དྲག་ཏུ་བྱེད༔ འདི་ནི་ཤིན་ཏུ་ཟབ་པའི་གནད༔ བདག་ཉིད་རྡོ་རྗེ་དྲག་རྩལ་ལ༔ མཁའ་འགྲོ་གསང་མཛོད་མན་ངག་བརྡོལ༔ ད་ལྟ་རྒྱ་བོད་བསྟན་པ་བསྐྱངས༔ མ་འོངས་དོན་དུ་གཏེར་དུ་སྦས༔ ལན་གཅིག་དུས་ཀྱི་ཐ་མ་ལ༔ དགྲ་བོ་སྒྲོལ་བའི་ངན་སྔགས་འདི༔ ལས་འཕྲོ་ཅན་དང་འཕྲད་ནས་ཀྱང་༔ གསང་སྔགས་བསྟན་པ་བསྲུང་བར་ཤོག༔ ས་མ་ཡཱ༔ རྒྱ་རྒྱ་རྒྱ༔ ཟབ་རྒྱ༔ གཉན་རྒྱ༔ གཏད་རྒྱ༔ ཁ་ཐཾ་གྷུ་ཧྱ༔ ས་མ་ཡཱ༔ རྒྱ་རྒྱ་རྒྱ༔ བདག་སྤྲང་བནྡྷེ་ཉི་མ་གྲགས་པས་གངས་རིའི་རྒྱལ་པོ་ནས་གདན་དྲངས་ཤིང་ཤོག་སེར་ལས་ཕབ་པའོ། །མངྒ་ལཾ། །

བདུད་འདུལ་མཁའ་འགྲོའི་འཕུང་ཤིག་གསང་བའི་འཁོར་ལོ་འབྲི་ཐབས།

བཀའ་རྫོགས་པ་ཆེན་པོ་བླ་མ་བདེ་མཆོག་འཁོར་ལོ་ལས༔ བདུད་འདུལ་མཁའ་འགྲོའི་འཕུང་ཤིག་གསང་བའི་འཁོར་ལོ་འབྲི་ཐབས་བཞུགས་སོ༔ དཔལ་ཆེན་མཁའ་འགྲོའི་དབང་ཕྱུག་ལ་ཕྱག་འཚལ་ལོ༔ བསྟན་པ་འཇིགས་པའི་དགྲ་བོ་ཁ་ཕུང་དུ་གཏོང་བའི་མན་ངག་ནི༔ ཕུང་ཤིག་ནག་པོ་སེལ་གྱི་སྙིང་ཁུ་ཕྱུང་བ༔ རབ་ཏུ་གསང་བའི་འཁོར་ལོ་བྲི་བར་འདོད་ན༔ ཕུང་གསུམ་གྱི་ཉི་མ་ལ་བབ་ཚེ༔ རྣལ་འབྱོར་པས་བསྟན་པ་དང་སེམས་ཅན་གྱི་དོན་དུ་སེམས་བསྐྱེད་ཅིང་༔ དུག་ཤོག་ལ་དུག་ཁྲག་གི་འཁོར་ལོ་མུ་ཁྱུད་རིམ་པ་ལྔར་བསྐོར་ཞིང་༔ ལྟེ་བ་ལ་ཧཱུྃ་གི་མཐར་སརྦ་དྷཀྐི་ནི་སེང་ཧ་མུ་ཥ་དགྲ་བོ་ཁ་ཕུང་སོད་སོད༔ ཅེས་འབྲི་ཞིང་ཕ་རོལ་གྱི་མིང་བཅུག༔ དེ་ཡི་ཕྱི་རིམ་རྩིབས་བཞི་ལ། ཧ་རི་ནི་ས་བཞི་བྲི༔ རྩིབས་མཆན་བཞི་ལ། རིགས་བཞི་མཁའ་འགྲོས་འབྱུང་བ་ཆེན་པོ་བཞི་དཀྲུགས༔ མྱུར་དུ་དཀྲུགས༔ དྲག་ཏུ་དཀྲུགས༔ རབ་ཏུ་དཀྲུགས༔ ཤིན་ཏུ་དཀྲུགས་ཞེག་བྱ་བ་བྲི༔ དེ་ཡི་ཕྱི་རིམ་མུ་ཁྱུད་ལ༔ བདུད་འདུལ་འབྱུང་བཞིའི་མཁའ་འགྲོ་ཕུང་འདྲེ་ཉི་ཤུ་ཐམ་པས༔ དམ་ཉམས་པའི་ཆེ་གེའི་འདི་ཞེས་བྱ་བ་ཁ་ཕུང་རྗེས་མེད་དུ་ཐོང་ཞིག༔ ཡུལ་དང་ཁང་ཞིང་དུར་ས་ཐམས་ཅད་ཁ་ཕུང་གནམ་རྡིབ་དུ་ཐོང་༔ ཁང་ཁྱིམ་ཤིག༔ ཚང་དཀྲུགས༔ ཞིང་གི་སྐྱེ་རྒྱུན་ཆོད༔ དུར་ཁ་ནག་པོ་དཀྲུགས༔ འཁྲུགས་པའི་བསྐལ་པ་ཕོབ༔ བཟའ་ཚང་ཐམས་ཅད་ཁ་ཕུང་དུ་ཐོང་༔ ནོར་ཕྱུགས་ཐམས་ཅད་ཕྱགས་མས་ཐོབ༔ མུ་གེའི་བསྐལ་པ་ཕོབ༔ བདུན་རྒྱུད་རྩད་ནས་ཆོད༔ འདུ་བ་རྣམ་བཞི་ཁང་ནས་སློངས༔ འབྱུང་བ་བཞི་ཚ་གྲང་འཐབ་ཏུ་ཆུག༔ འཕུང་འདྲེ་ཉི་ཤུས་ཟ་ཁ་གཏོད༔ ལྷག་མ་རྗེས་ཤུལ་མེད་པར་ཐོང་༔ བྱ་བ་བྲི༔ དེ་ཡི་ཕྱི་རིམ་རྩིབས་ཉི་ཤུ་བཅད་ལ༔ འཕུང་འདྲེ་ཉི་ཤུའི་སྙིང་པོ་འགོད་དེ༔ བཛྲ་པན་ཏྲི་ཡ་བདུད་ཀྱིས་དགྲ་བོ་ཚང་དཀྲུགས༔ ཡ་མ་ཧྲིང་གཤིན་རྗེས་དགྲ་བོ་ཚང་སྤྲུགས༔ ཁ་ཏ་ཁ་ཏ་ཁ་ཏ་བཙན་གྱིས་དགྲ་བོ་ཚང་སྤྲུགས༔ བཛྲ་བོ་བོ་ན་ཐེའུ་རང་གིས་དགྲ་བོ་ཚང་སྤྲུགས༔ ཡ་ཡབ་ན་བྲག་སྲིན་གྱིས་དགྲ་བོ་ཚང་སྤྲུགས༔ ཏྲི་ཤ་མ་ཀ་རྒྱལ་བྱིན་གྱིས་དགྲ་བོ་ཚང་སྤྲུགས༔ བཛྲ་མ་ར་ཧྲིང་འགོང་པོས་དགྲ་བོ་ཚང་སྤྲུགས༔ བཛྲ་ཞུང་ཞུང་གནམ་ཐེལ་གྱིས་དགྲ་བོ་ཚང་སྤྲུགས༔ ཏྲི་མཱ་ར་ཡ་ན་ས་སྲིན་གྱིས་དགྲ་བོ་ཚང་སྤྲུགས༔ ཏྲི་ལ་མ་ཀུ་ན་འབྲོག་སྲིན་གྱིས་དགྲ་བོ་ཚང་སྤྲུགས༔ བཛྲ་མ་ཞུ་མ་ཞུ་ན་དྲི་ཟས་དགྲ་བོ་ཚང་སྤྲུགས༔ ཆུ་ག་ན་རི་ཏྲི་ཛཿགྲི་མོས་དགྲ་བོ་ཚང་སྤྲུགས༔ མ་ར་ན་ཏྲི་ཛཿ སྲིན་པོས་དགྲ་བོ་ཚང་སྤྲུགས༔ བཛྲ་ཀ་ཤད་ནན་ཏེ་མིའམ་ཅིས་དགྲ་བོ་ཚང་སྤྲུགས༔ སྤྲ་མ་ར་ཡ་མ་དམ་སྲིས་དགྲ་བོ་ཚང་སྤྲུགས༔ བཛྲ་ཀ་མ་ས་ཧ་ཕུང་སྲིས་དགྲ་བོ་ཚང་སྤྲུགས༔ གྲ་ཏ་དུ་སྨྱོ་འདྲེས་དགྲ་བོ་ཚང་སྤྲུགས༔ བཛྲ་ན་ཤ་ཏྲན་དམ་འགོང་གིས་དགྲ་བོ་ཚང་སྤྲུགས༔ མ་ཐ་ན་ཏྲི་ཐབ་འདྲེས་དགྲ་བོ་ཚང་སྤྲུགས༔ ནད་ཏྲི་མ་བུར་ཡུགས་སས་དགྲ་བོ་ཚང་སྤུགས༔ ཅེས་བྲིས༔ དེ་ཡི་ཕྱི་རིམ་མུ་ཁྱུད་ལ༔ འབྱུང་བ་རླུང་གི་རི་མོས་བསྐོར༔ ཐོད་སྣ་ལྔ་ཡི་ནང་དུ་གཞུག༔ སྔགས་དམིགས་ཏིང་འཛིན་ལྡན་པ་ཡིས༔ ཞིང་ཁང་དུར་ས་གང་རུང་དུ༔ ལས་ལ་སྦྱར་བས་ཁ་དག་བཏང་༔ དྲང་སྲོང་རྒྱུ་བ་བསྟུན་པ་གནད༔ ད་ལྟ་མཚོ་རྒྱལ་ཁྱོད་ལ་གདམས༔ མ་འོངས་དོན་དུ་གཏེར་དུ་སྦོས༔ ཞེས་གསུངས་པ་རྣམས་བདག་མཚོ་རྒྱལ་གྱིས་ཟིན་བྲིས་སུ་བཏབ་སྟེ༔ སེང་གདོང་མཁའ་འགྲོའི་གནས་སུ་རིན་པོ་ཆེའི་གཏེར་དུ་སྦས་སོ༔ ལས་འཕྲོ་ཅན་གྱིས་སྤྱོད་པར་ཤོག༔ ས་མ་ཡ༔ རྒྱ་རྒྱ་རྒྱ༔ གཏེར་རྒྱ༔ སྦས་རྒྱ༔ ཟབ་རྒྱ༔ གཉན་རྒྱ༔ གཏད་རྒ༔ ས་མ་ཡ༔ རྒྱ་རྒྱ་རྒྱ༔ བདག་སྤྲང་བནྡྷེ་ཉི་མ་གྲགས་པས་གནས་ཆེན་ཏི་སེའི་གངས་ནས་གདན་དྲངས་པའོ། །མངྒ་ལཾ།། །།

བདུད་འདུལ་ནག་མོའི་ཤིན་ཏུ་གསང་བའི་ལས་མཐའ་རྣམ་གསུམ།

བཀའ་རྫོགས་པ་ཆེན་པོ་བླ་མ་བདེ་མཆོག་འཁོར་ལོ་ལས༔ བདུད་འདུལ་ནག་མོའི་ཤིན་ཏུ་གསང་བའི་ལས་མཐའ་རྣམ་གསུམ་བཞུགས་སོ། །དཔལ་ཆེན་པོ་ལ་ཕྱག་འཚལ་ལོ༔ བདུད་འདུལ་ནག་མོས་དགྲ་བོ་ཤིན་ཏུ་བསད་པའི་ལས་སྦྱོར་གྱི་རིམ་པ་གསུམ་ལས༔ དང་པོ་བཟློག་པས་བསད་པ༔ ཐོད་པར་བསད་པ༔ བྲུབ་ཁུང་དུ་བསད་པ་དང་གསུམ་མོ༔ དང་པོ་བཟློག་པས་བསད་པ་ནི༔ དུག་ཤོག་གམ་གྲོ་ག་ལ་རང་དང་འགྲས་པའི་ལིངྒ་ར་ཁྲག་གམ་དུག་ཁྲག་གིས་བྲི༔ དགྲ་བོ་བྱད་མའི་ངར་སྣབ་དང་ཟག་རྫས་བྱུག༔ ཁྱི་ལུད་བདུག་ཅིང་ལྷ་དབྱེ༔ རྡོ་ཕ་བོང་ལོང་བུ་ལ་དགྲ་བོའི་བླ་རྟགས་བྲིས་ཤིང་ལིངྒ་དང་མཉམ་དུ་དྲིལ་ཏེ༔ གཅན་གཟན་དར་མའི་ཐོད་པར་བཅུག༔ རང་ཉིད་ཁྲོ་མོའི་ང་རྒྱལ་གྱིས་བཀུག་གཞུག་དྲག་ཏུ་བྱས༔ ཐོད་པ་རོ་རས་ཀྱིས་དྲིལ༔ རལ་གྲི་གསུམ་ཨོཾ་དུ་བྱས་པའི་གྲུ་གསུམ་པའི་རྣམ་པ་དེའི་ནང་དུ་ཐོད་པ་འཇུག་ཅིང་༔ སྟེང་ལ་མཁའ་འགྲོའི་ཐུན་གཏོར་བཤམས༔ རང་ཉིད་ལྷའི་ང་རྒྱལ་དྲག་ཏུ་བསྐྱེད་ཅིང་༔ ཧཱུྃ་བཛྲ་དྷཀྐི་ནི་སིང་ཧ་མུ་ཥ་ཧ་རི་ནི་ས་ཧ་དེ་མོ་ཧ་ཏྲི་ཏ་ཡཱ༔ པྲ་ཧ་རི་ན་ཧཱུྃ་ཧཱུྃ་ཕཊ་ཕཊ་བྷྱོ་བྷྱོ༔ ས་མ་ཡཱ་ཟློག་ཟློག༔ ཨ་ལ་ལ་པྲ་མོ་མོ་ཧེ་བྷྱོ་བྷྱོ༔ ཨ་ཏི་ཀྲ་མ་ན་ཟློག་ཟློག༔ ཕུར་ཁ་ཟློག༔ བྱད་ཁ་ཟློག༔ ཟོར་ཁ་ཟློག༔ དམོད་མོ་ཟློག༔ རྦོད་སྟོང་ཟློག༔ རྦད་འདྲེ་ཟློག༔ དགྲ་དང་བགེགས་ཀྱི་སྟེང་དུ་བྷྱོ་བྷྱོ་ཟློག་ཟློག༔ ཅེས་བཟླས་ཤིང་ཐུན་མཇུག་རྣམས་སུ་ཨ་ཏི་ཀྲ་མཱ་ན་དགྲ་བོ་མ་ར་ཡ་སོད་སོད༔ ཅེས་བཟླས་ཤིང་ཐུན་གྱིས་ཐོད་པའི་ཀླད་ཁུང་ནས་བྲབ༔ མཁའ་འགྲོའི་བསྐུལ་བ་འདོན༔ དགྲ་བོ་ཁུག་རྟགས་སམ་བླ་རྟགས་སོད་པའི་རྟགས་བྱུང་ཚེ་ཐོད་པ་ལྷ་ཁང་ཐེམ་འོག་གམ་མཆོད་རྟེན་ནམ་རྒྱ་གྲམ་དུ་མནན༔ འགུགས་གཞུགས་རྒྱས་འདེབས་རྟ་བྲོ་བྱ༔ བྱད་མ་སུ་དང་སུར་འགྲས་ཀྱང་༔ ལོ་ཟླ་མི་འགྱང་མྱུར་དུ་འགུམ༔ བཟློག་པས་བསད་པའི་ལས་སྦྱོར་ཟབ༔ ས་མ་ཡཱ༔ རྒྱ་རྒྱ་རྒྱ༔ གཉིས་པ་ཐོད་པར་བསད་པའི་རིམ་པ་ནི༔ གོང་ལྟར་ལིངྒ་བྲིས༔ གྲུ་གསུམ་པའི་དོང་གྲུ་གང་བ་ཅིག་བྲུས་པའི་ནང་དུ༔ རབས་ཆད་ནག་པོའི་ཐོད་པར་ལིངྒ་བཅུག་ལ་བཞག༔ མདའ་གསུམ་སྟེང་དུ་ཨོཾ་བཅིངས་ཁར་ཐུན་གྱི་གཏོར་མ་བཤམ༔ རང་ཉིད་ལྷའི་ང་རྒྱལ་དྲག་ཏུ་བསྐྱེད་ལ་སྔགས་གོང་ལྟར་དུ་བཟླ་ཞིང་༔ ཨ་ཏི་ཀྲ་མ་ན་བཾ་རིལ་ཐུམ་སོད་ཅེས་ཤམ་བུ་བསྒྱུར་ལ་ཐུན་སྣ་ཚོགས་ཀྱིས་བྲབ་ཅིང་ཞག་གཅིག་བསྒྲུབས་ཏེ༔ ཐོད་པ་བཏོན་ནས་རང་གི་རྐང་པས་མནན་ཏེ་ལན་གསུམ་བསྐོར་བས༔ ཐོད་པའི་ཁ་གཡས་སུ་བསྟན་ན་སྒྲུབ་པ་སྐྱོར༔ གཡོན་དང་མདུན་དུ་བསྟན་ན་གོང་ལྟར་མནན་པར་བྱའོ༔ ཕལ་གྱིས་སྦྱོར་བ་ཅི་བརྩམས་ཀྱང་༔ ལས་སྦྱོར་འདི་ལ་འབད་གྱུར་ན༔ དྲག་སྔགས་དམོད་པའི་མཚོན་ཆ་འདིས༔ དགྲ་བོ་མྱུར་དུ་ཕུང་བར་བྱེད༔ ས་མ་ཡཱ༔ རྒྱ་རྒྱ་རྒྱ༔ གསུམ་པ་བྲུབ་ཁུང་དུ་བསད་པ་ནི༔ རང་གི་ཉལ་མལ་འོག་ཏུ་གྲུ་གསུམ་པའི་དོང་བྲུས༔ ནང་དུ་ལྡོང་རོས་མུ་ཟིའི་ཞལ་བ་བྱས་ཤིང་༔ དགྲ་བོའི་ཟག་རྫས་དང་བག་ཕྱེ་བསྲེས་པ་དུག་ཁྲག་གིས་སྦྲུས་པའི་ཉ་བོ་བཟོས༔ སྙིང་ཁར་མིང་རུས་གཞུག༔ གྲི་ལྕགས་ཀྱི་ཕུར་པའམ་སེང་ལྡེང་གི་ཕུར་པ་ལ་སྔགས་སྟོང་ཚོ་བཅོ་བརྒྱད་བཏབ་པ༔ ཁོའི་སྙིང་ཁར་བཏབ༔ རོ་གཡམ་རྒྱ་གྲམ་བྲིས་པས་ཁ་བཅད༔ རང་ཉིད་མཁའ་འགྲོ་མའི་ཏིང་འཛིན་རབ་ཏུ་གསལ་ཞིང་༔ སྔགས་ཀྱི་ཤམ་བུ་བསྒྱུར་ཏེ༔ ཨ་ཏི་ཀྲ་མ་ན་དགྲ་བོ་ཆཻག་བཛྲ་ཀཱི་ལི་ཀཱི་ལཱ་ཡཿ དགྲ་བོ་འཁོར་བཅས་མཱ་ར་ཡ་ཐུམ་རི་ལི་ལི་སོད་སོད༔ ཅེས་ཞག་རེ་ལ་སྟོང་ཚོ་རེ་བཟླས་པས་དགྲ་བོ་སོད་རྟགས་འོང་ངོ་༔ དེ་ཚེ་གོང་བཞིན་མནན་པ་རྒྱབ༔ དགྲ་བོ་ཁ་ཕུང་བྱད་མ་འཆི༔ ཤིན་ཏུ་ཟབ་པའི་མན་ངག་རྒྱ༔ ས་མ་ཡཱ༔ རྒྱ་རྒྱ་རྒྱ༔ ཨེ་མ་བདག་ཉིད་པད་འབྱུང་ངསཿ གཞན་ལ་གནོད་སེམས་མ་ཡིན་ཞིང་༔ མ་འོངས་བོད་ཀྱི་རྒྱལ་ཁམས་འདིར༔ དམ་སྲི་མ་རུངས་ཁ་རྒྱས་ནས༔ བདུད་འགོང་དམོད་པའི་དྲག་སྔགས་ཀྱིས༔ ཆོས་ལྡན་སྐྱེས་བུའི་ཚེ་སྲོག་འཕྲོག༔ དེ་ཚེ་ཕལ་གྱི་སྦྱོར་བ་རྣམས༔ རང་གཤེད་རང་ལ་དབབ་པའི་ཕྱིར༔ ཤི་ས་བསྟན་པའི་ལས་སྦྱོར་གསུམ༔ རྡོ་རྗེ་ཕག་མོའི་དགོངས་པ་ལྟར༔ སེང་གེའི་གདོང་ཅན་སྒྲུབ་སྐོར་དུ༔ ད་ལྟ་མཚོ་རྒྱལ་ཁྱོད་ལ་གདམས༔ མ་འོངས་དོན་དུ་གཏེར་དུ་སྦས༔ ལས་འཕྲོ་ཅན་གྱིས་སྤྱོད་པར་ཤོག༔ ས་མ་ཡཱཿ རྒྱཿ ཅེས་གསུངས་པ་རྣམས་བདག་བུད་མེད་མཚོ་རྒྱལ་གྱིས་ཡིག་གེར་བྲིས་ནས༔ རིན་པོ་ཆེའི་གཏེར་དུ་སྦས་པའོ༔ ས་མ་ཡཱ༔ རྒྱ་རྒྱ་རྒྱ༔ གཏེར་རྒྱ༔ སྦས་རྒྱ༔ ཟབ་རྒྱ༔ གཉན་རྒྱ༔ གཏད་རྒྱ༔ ས་མ་ཡཱ༔ རྒྱ་རྒྱ་རྒྱ༔ ཁ་ཐམ་གུ་ཧྱ༔ བདག་བནྡྷེ་ཉི་མ་གྲགས་པས་སེང་གདོང་མཁའ་འགྲོའི་གནས་ནས་གདན་དྲངས་པའོ། །མངྒ་ལཾ།། །།

བདུད་འདུལ་སེང་གདོང་ནག་མོའི་ཤིན་ཏུ་གསང་བའི་མན་ངག་དུག་མདའ་ནག་པོ།

བཀའ་རྫོགས་པ་ཆེན་པོ་བླ་མ་བདེ་མཆོག་འཁོར་ལོ་ལས༔ བདུད་འདུལ་སེང་གདོང་ནག་མོའི་ཤིན་ཏུ་གསང་བའི་མན་ངག་དུག་མདའ་ནག་པོ་བཞུགས་སོ༔ དཔལ་ཆེན་པོ་མཁའ་འགྲོའི་དབང་ཕྱུག་ལ་ཕྱག་འཚལ་ལོ༔ མཁའ་འགྲོ་ནག་མོའི་རྒྱུད་ལས༔ མ་འོངས་བསྐལ་པའི་སྙིགས་མ་ལཿ ཉོན་མོངས་དུག་ལྔ་ཁ་རྒྱས་པས༔ སེང་གེ་ཁ་འཐབ་བྱུང་གྱུར་ན༔ རལ་གྲི་ངར་མཉམ་རྣོ་ཚད་ལྟར༔ རྒྱུད་པའི་བཀའ་གཏད་ཡོད་མེད་དང་༔ བསྐྱེད་རྫོགས་དྲོད་རྟགས་བཟང་ངན་གྱི༔ མན་ངག་དུག་མདའ་བཟློག་མེད་དགོས༔ ཞེས་གསུངས་པས༔ སྔགས་པ་ནང་རྒྱས་བཟློག་བསད་ཀྱི་གདམ་པ་འདི་ལ་དོན་གསུམ་གྱིས་སྟོན་ཏེ༔ སྔོན་འགྲོ་བཅའ་གཞི་ལག་ལེན༔ དངོས་གཞི་སྒྲུབ་པའི་རིམ་པ༔ རྗེས་ལས་ལ་སྦྱར་བའོ༔ ས་མ་ཡཱཿ རྒྱ༔ དང་པོ་སྔོན་འགྲོ་བཅའ་གཞི་ལག་ལེན་གྱི་རིམ་པ་ནི༔ དུར་ཁྲོད་དམ་ཤིང་དྲུང་ལྷ་འདྲེའི་འགྱུ་སྲང་ཆེ་བའི་གནས་སུཿ འཕུང་སྐར་བྲ་ཉེའི་ཉིན་པར་ཁམས་པ་པའམ་ས་བཟང་པོ་ལ་མཆོད་རྟེན་གཉིས་བཟོས་ཞིང་སོ་བཏང་ལ༔ སྔགས་པ་གང་དང་འགྲས་པའི་རྗེས་ས་ལ་ཁོའི་གཟུགས་བཟོས༔ སྙིང་གར་མིང་རུས་ཁྱི་ཁྲག་གིས་བྲིས་པ་བཞག༔ ཟག་རྫས་ཀྱང་རྙེད་ན་བསྲེའོ༔ ཡན་ལག་བཞི་རི་བོང་གི་བལ་གྱི་སྐུད་པ་ཕྱིར་སྒྲིལ་བྱས་པས་བཅིང་༔ དུག་ཤིང་ལ་ཕུར་བུ་མགོ་བོ་རྒྱ་མདུད་དུ་བྱ་ཞིང་༔ སོ་གསུམ་སོ་སོར་ཡོད་པ་ཞིག་བཟོས་ལ༔ གཉིས་ལ་ཟློག་སྔགས་དང་གཅིག་ལ་བསད་སྔགས་བྲི༔ དུག་ཁྲག་གིས་ངར་བླུད༔ ཉ་བོའི་སྙིང་གར་རྡོག་ཅིང་ཟློག་སྔགས་དང་བསད་སྔགས་ཁྲི་ཚོ་གཅིག་བསྒྲང་༔ མཆོད་རྟེན་གཉིས་པོ་གཅིག་དཀར་པོ་བྱུག༔ གཅིག་ནག་པོ་བྱུག༔ མཆོད་རྟེན་ནག་པོ་མགོ་ཞབས་བཟློག་པའི་ནང་དུ་གཟུགས་ཀྱང་མགོ་ཞབས་བཟློག་སྟེ་གཞུག༔ དུག་ཁྲག་དང་དམེ་ཁྲག་སྣ་ཚོགས་ནང་དུ་བཏབ༔ མཆོད་རྟེན་དཀར་པོའི་བུམ་པར་རང་གི་མིང་དང་༔ བསྲུང་བ་དང་སྒྲུབ་པའི་སྔགས་རྣམས་བྲིས་ཏེ་གཞུག༔ ས་ལ་དོང་གྲུ་གསུམ་པ་བྲུས་པའི་ནང་དུ་མཆོད་རྟེན་ནག་པོ་མགོ་ཞབས་བཟློག་སྟེ་བཞག༔ དཀར་པོ་དེའི་ཁར་ཞབས་གཉིས་སྤྲད་དེ་བཞག༔ མདའ་གསུམ་ཨོཾ་དུ་བཅིངས་པའི་ཁར་མཁའ་འགྲོ་མའི་ཐུན་གཏོར་བཤམས༔ ས་མ་ཡཱ༔ རྒྱ་རྒྱ་རྒྱ༔ གཉིས་པ་དངོས་གཞིི་སྒྲུབ་པའི་རིམ་པ་ནིཿ རང་ཉིད་དཔལ་གྱི་མཁའ་འགྲོ་མ་སེང་གདོང་ནག་མོར་གསལ་ཅིང་ལས་ཀྱི་གཞུང་བསྲང་༔ རྐང་གླིང་དང་ཐོད་རྔ་འཁྲོལ༔ ཤ་ཆེན་གྱི་དུད་པ་བཏང་༔ བདུད་འདུལ་ནག་མོ་སེང་གེའི་གདོང་པ་ཅན་འཁོར་མཁའ་འགྲོ་ཤུག་འགྲོ་ཞིང་སྐྱོང་དཔའ་བོ་དཔའ་མོ་ཐམས་ཅད་རང་དབང་མེད་པར་བྱ་ནག་ཐང་ལ་ལྷུང་བ་ལྟར་སྐད་ཅིག་གིས་བྱོན་ནས༔ བནྡྷེ་རུ་ཊ་ལོག་པ་ཅན་གྱི་སྙིང་ནས་དྲངས༔ ཞགས་པས་བཅིངས༔ ལྕགས་སྒྲོག་གིས་བསྡམས༔ དྲིལ་བུས་མྱོས་སུ་བཅུག་སྟེ་གཟུགས་བྱང་ལ་བསྟིམ༔ ནད་མཚོན་སྣ་ཚོགས་ཀྱི་ཆར་དྲག་པོ་སེར་ཆེན་འདྲིལ་བ་ལྟར་ཕབ༔ ཁོས་རྦད་པའི་ལྷ་སྲུང་རྣམས་ཀྱང་མི་བཟོད་པའི་ཚུལ་གྱིས་རང་གཤེད་རང་ལ་དབབ་ནས་ཤ་ཟོས་ཁྲག་འཐུང་རུས་པ་མུར་ཏེ་རྡུལ་དུ་བརླག་པར་བསྒོམས་ལཿ ཧཱུྃ་བཛྲ་དྷཀྐི་ནི་སིང་ཧ་མུ་ཥ་ཀཱ་ལི་ཧ་རི་ནི་ས་བནྡྷེ་ནག་པོའི་སྙིང་རྩ་ཆོད་ཆོད༔ སྲོག་རྩ་ཕྱུང་ཕྱུང་༔ བནྡྷེ་རྦད་རྦད་ཤ་ཡཿ བྱ་ལོ་ཀ་ཤ་རྦད༔ ཏེ་ལོ་ཀ་ཤ་རྦད༔ རྩ་ནས་ཆོད་ཆོད༔ དྲུང་ནས་ཕྱུང་ཕྱུང་༔ བྱད་མ་ལྷ་སྲུང་སརྦ་ཕྱེ་མར་ཕུར་ཡ༔ ཞེས་བཟླ་ཞིང་ཐུན་སྐབས་རྣམས་སུ་ཐུན་གཏོར་གཏོང་ངོ་༔ ལས་ལ་བསྐུལ༔ མཆོད་རྟེན་ཁ་དབྱེ་ཞིང་ཐུན་སྣ་ཚོགས་ཀྱིས་བྲབ༔ དེ་ཚེ་རྟགས་ཀྱི་རིམ་པ་ནི༔ བྱད་མ་དང་རང་འཐབ་པས་བསད་པ་དང་བཅད་པ་དང་༔ རབ་ཏུ་གཟིར་བ་སོགས་ཀྱི་རྟགས་འོང་༔ རང་རྨས་པ་སོགས་བྱུང་ན་མཁའ་འགྲོ་མ་བཟློག་པ་ཡིན་པས༔ མཁའ་འགྲོ་གནད་ལ་དབབ༔ དྲག་ཏུ་གཅུན༔ ས་མ་ཡཱཿ རྒྱ་རྒྱ་རྒྱ༔ གསུམ་པ་ལས་ལ་སྦྱར་བ་ནི༔ རྟགས་གསལ་བ་དང་ལམ་རྒྱ་གྲམ་མམ༔ ལྷ་ཁང་ཐེམ་འོག་སུ་དོང་གྲུ་གསུམ་པར་བྲུས་པའི་ནང་དུ་མཆོད་རྟེན་གོང་ལྟར་བཞག་ཅིང་༔ དཀར་པོའི་ནང་གི་རང་གི་མིང་ཕྱུང་སྟེ་ལུས་ལ་བཅང་༔ འགུགས་བསྟིམ་བྱ༔ ཐུན་གྱིས་བྲབ༔ དམོད་བཅོལ༔ རྗེས་མི་མངོན་པར་བྱ་ཞིང་༔ བྲོ་བྱ༔ ཕྱི་མིག་མི་བལྟ་བར་ནང་དུ་ལོག༔ ས་མ་ཡཱ༔ རྒྱ་རྒྱ་རྒྱ༔ ཨེ་མ་མན་ངག་འདི་ནི་གནམ་ལྕགས་ཐོག༔ བདག་ཉིད་པདྨར་བདུད་འདུལ་མཁའ་འགྲོས་གནང་༔ ལན་གཅིག་བརྩམས་པས་བྱད་མ་རང་གཤེད་དབབ༔ གཉིས་དང་གསུམ་དུ་ཕས་ཀྱི་རྟགས་བསྟུན་ཏེ༔ ལས་ལ་སྦྱར་བས་སྟོང་གསུམ་ཕུར་ཐོགས་ཀྱིས༔ རང་ལ་བྲུབ་ཀྱང་ཡ་ང་མི་དགོས་སོ༔ ཕ་རོལ་བྱད་མ་རང་གཤེད་རང་དབབ་ནས༔ ཁ་ཕུང་རྗེས་མེད་བཏང་བར་ཐེ་ཚོམ་མེད༔ མ་འོངས་གསང་སྔགས་བསྟན་པའི་བཙས་སུ་ཤོག༔ ལྷ་བཙན་འབར་བས་གཏེར་འདི་སྲུངས་ཤིག་རྒྱ༔ རྡོ་རྗེ་ལེགས་པས་བཀའ་འདིའི་བྱ་ར་གྱིས༔ དུས་ལ་བབ་ཚེ་ལས་ཅན་བུ་ལ་སྤྲོད༔ ས་མ་ཡཱ༔ རྒྱ་རྒྱ་རྒྱ༔ གཏེར་རྒྱ༔ སྦས་རྒྱ༔ ཟབ་རྒྱ༔ གཉན་རྒྱ༔ གཏད་རྒྱ༔ ས་མ་ཡཱ༔ རྒྱ་རྒྱ་རྒྱ༔ བདག་ཁམས་པ་ཉི་མ་གྲགས་པས་གཏེར་ནས་གདན་དྲངས་ཤིང་ཤོག་སེར་ལས་ཕབ་པའོ། །མངྒ་ལཾ། །།

བདུད་འདུལ་སེང་གདོང་ནག་མོའི་དགྲ་བོའི་ངག་མནན་པའི་ལས་སྦྱོར།

བཀའ་རྫོགས་པ་ཆེན་པོ་བླ་མ་བདེ་མཆོག་འཁོར་ལོ་ལས༔ བདུད་འདུལ་སེང་གདོང་ནག་མོའི་དགྲ་བོའི་ངག་མནན་པའི་ལས་སྦྱོར་བཞུགས་སོ༔ དཔལ་ཧེ་རུ་ཀཿལ་ཕྱག་འཚལ་ལོ༔ མ་འོངས་དུས་ཀྱི་སྙིགས་མ་ལ༔ སྔགས་པ་ནང་རྒྱས་བྱུང་བའི་ཚེ༔ བྱད་མའི་ངག་མནན་རིམ་པ་ནི༔ སྔོན་འགྲོ་དངོས་གཞི་རྗེས་དང་གསུམ༔ སྔོན་འགྲོ་བཅའ་གཞི་དངོས་གཞི་སྒྲུབ༔ ཐ་མ་ལས་ལ་སྦྱོར་བའོ༔ ས་མ་ཡཱ༔ རྒྱ་རྒྱ་རྒྱ༔ དང་པོ་སྔོན་འགྲོ་བཅའ་གཞིའི་རིམ་པ་ནི༔ སྐབས་དང་མཐུན་པའི་གནས་སུ༔ མཎྜལ་ནག་པོ་གྲུ་བཞི་པ་གཅིག་བཟོས་པའི་དབུས་སུ་ཟུར་གསུམ་མཐོ་གང་པ་ཚོན་དམར་ནག་གིས་བྱུག༔ ཕྱོགས་གསུམ་གྱི་ཟླ་གམ་སེར་པོར་བྱ༔ དེའི་ཕྱི་ལ་པདྨ་འདབ་མ་བཞི་ཕྱོགས་མདོག་གིས་བསྒྱུར༔ ཁྱི་ཐོད་ཚད་མ་ཞིག་གི་མཆུ་ལ་རྡོ་རྗེ་རྒྱ་གྲམ་བྲིས་པའི་འགྲམ་པ་གཡས་གཡོན་གཉིས་ལ༔ དགྲ་བོ་ཀཱ་ཡ་ཝཱཀྐ་ཙིཏྟ་སྟམ་བྷ་ཡ་ནན༔ བྱ་བ་བྲི༔ དཔྲལ་བར་རི་རབ་གླིང་བཞི་བྲི༔ ལྟག་ཁུང་གི་ཁ་ལ་རྡོ་རྗེ་རྒྱ་གྲམ་བྲི༔ དེ་ནས་དགྲ་བོའི་ལིངྒ་དུག་ཤོག་ལ་དུག་ཁྲག་གིས་གཟུགས་བརྙན་དོད་ལ་གསལ་བ་ཞིག་བྲིས་པའི༔ དཔྲལ་བར་རུས༔ སྙིང་གར་ནྲྀ་ལ་མིང་གི་མཐར་ཁུག་ཅིག་ནན༔ བྱ་བ་བྲི༔ ཡན་ལག་བཞི་ལ་ཛཿཧཱུྃ་བཾ་ཧོ་བཞིཿབྲི༔ བརླ་ལ་བླ་དག་འདོམས་ལ་ཚ་གསང་གནས་ལ་ཕཊ༔ རྣ་བ་ལ་འོན༔ སྤྱི་བོར་ནན༔ མིག་ལ་ལོང་བྱ་བ་བྲི༔ ལྕེས་བྲང་ཞེང་ཁྱབ་བར་བྲིས་པའི་སྟེང་དུ༔ ཨཱོཾ་བྷནྡྷ་ཤ་རུ༔ བྷནྡྷ་མུ་ཀ་ཆེ་གེ་མོའི་ངག་སྟམ་བྷ་ཡ་ཧཱུྃ་ཕཊ༔ ནན་སོད་སྭཱ་ཧཱ༔ བྱ་བ་བྲི༔ དགྲ་བོའི་མཆིལ་སྣབ་དང་ཟག་རྫས་ཀྱིས་ཁྱབ་པར་བྱུག༔ ཐ་མ་ལ་བསད་སྔགས་ཀྱིས་བསྐོར་ཞིང་དམོད་བཅོལ་སྣ་ཚོགས་བྲི༔ གྲུ་གསུམ་པའི་སྟེང་དུ་ཁྱི་ཐོད་བཞག་ཅིང་ཁྱི་ཐོད་ཀྱི་ཁར་ལིངྒ་བཞག༔ ཤར་དུ་ཆབ་ཆུ་བཞག་ཅིང་སྤྱོད་ལམ་གྱི་དུས་ཆབ་བླང་༔ ལྷོར་ཐོད་ངན་ནང་དུ་ཡུངས་དཀར་ནག་དང་ཐུན་བཞག་ཅིང་ལིངྒ་ལ་བྲབ༔ ནུབ་ཏུ་མར་མེ་བཞག༔ བྱང་དུ་མཁའ་འགྲོ་མའི་ཐུན་གཏོར་བཞག༔ ས་མ་ཡཱ༔ རྒྱ་རྒྱ་རྒྱ༔ གཉིས་པ་དངོས་གཞི་སྒྲུབ་པའི་རིམ་པ་ནི༔ རང་ཉིད་སྐད་ཅིག་གི་བདུད་འདུལ་དཔལ་གྱི་མཁའ་འགྲོའི་བསྐྱེད་རིམ་གསལ་ཞིང་༔ ཧཱུྃ་བཛྲ་དྷཱཀྐི་ནི་སིདྷ་མུ་ཥ་ཧ་རི་ནི་ས་ཧཱུྃ་ཛ༔ ཞེས་གོང་བསྙེན་ཞག་གཅིག་བྱས་ནས་དཔའ་བོ་མཁའ་འགྲོ་ཐམས་ཅད་དབང་དུ་གྱུར་པར་བསམས་ཤིང་༔ ལིངྒ་ལ་འགུགས་བསྟིམ་དྲག་ཏུ་བྱ༔ ཐུན་གཏོར་བསྔོ་ལས་ལ་བསྐུལ༔ དེ་ནས་ངག་མནན་པའི་སྔགས་འདི་བསྒྲང་ངོ་༔ ཨོཾ་བྷནྡྷ་ཤ་རུ༔ བྷནྡྷ་མུ་ཥ༔ ཆེ་གེ་མོའི་ངག་སྟམ་བྷ་ཡ་ཧཱུྃ་ཕཊ་མཱ་ར་ཡ་ནན༔ ཅེས་འབུམ་ཚོ་གཅིག་བཟླ་ཞིང་༔ སྐབས་སྐབས་སུ་ཐུན་གྱིས་བྲབ༔ བདུད་འདུལ་མཁའ་འགྲོའི་ལྷ་ཚོགས་དྲག་ཏུ་ཁྲོས་ནས་བྱད་མའི་ལུས་ངག་ཡིད་གསུམ་ཁྱད་པར་དུ་ངག་གི་དབང་པོ་ལ༔ ཕྱི་ནས་ཐུན་མཚོན་སྣ་ཚོགས་ཀྱ་ིཆར་ཕབ༔ ནང་ནས་དབུགས་ཀྱི་འགྱུ་བ་བཅད༔ བར་ནས་གཏི་མུག་གི་མུན་པ་གཏིབས་པར་བསྒོམ་མོ༔ ས་མ་ཡཱ༔ རྒྱ་རྒྱ་རྒྱ༔ གསུམ་པ་ལས་ལ་སྦྱོར་བ་ནི༔ དེ་ལྟར་བསྒྲུབས་པའི་རྟགས་ཀྱི་རིམ་པ་ནི༔ ཕ་རོལ་གྱི་ལྕེ་བཅད་པ༔ ལྕེ་བཅིངས་པ༔ མཆུ་བཅད་པ༔ རླུང་འགགས་པ་སོགས་ཀྱི་ལྟས་བྱུང་ཚེ༔ ལིངྒ་ཟུར་གསུམ་པའི་རྣམ་པར་ལྟེབ་ཅིང་ཁྱི་ཐོད་ཀྱི་ཁར་བཅུག༔ ཚོན་སྐུད་སྣ་ལྔས་རྒྱ་གྲམ་དུ་བཅིངས༔ རེ་བ་ནག་པོས་དྲིལ་ཞིང་རྡོ་རྗེ་རྒྱ་གྲམ་གྱིས་རྒྱས་བཏབ༔ ཕུང་གསུམ་བདུད་ཀྱི་ཉི་མ་ལ་བབ་ཚེ༔ ལམ་རྒྱ་གྲམ་དུ་དོང་གྲུ་གསུམ་པར་བྲུས་པའི་ནང་དུ་མཎྜལ་གྱི་རྡུལ་ཚོན་བཏབ༔ ཐོད་པ་ཁ་ལྷོར་བསྟན་ཞིང་ཁ་སྦུབ་དུ་མནན༔ རོ་གཡམ་རྡོ་རྗེ་རྒྱ་གྲམ་བྲིས་པས་ཁ་བཅད༔ བཀུག་བསྟིམས་བྱ་ཅིང་རྟ་བྲོ་བརྡུང་༔ ཚ་ཚ་རབ་ཏུ་གནས་པ་དགུ་སྟེང་དུ་བཞག་ཅིང་བརླན་གྱིས་མི་འཇིགས་པར་བྱ༔ ས་མ་ཡཱ༔ རྒྱ་རྒྱ་རྒྱ༔ ཨེ་མ་རྒྱ་བོད་ཡུལ་ན་དཀོན་པའི་ནོར༔ ཡིད་ཀྱི་གནག་པ་མཁའ་འགྲོའི་སྙིང་ཁྲག་འདི༔ བསྟན་ལ་གནོད་བྱེད་བྱད་མར་ཞེ་རེ་ཚིམ༔ གསང་བའི་མན་ངག་བསྟན་པའ་ིབཙས་སུ་ཤོག༔ ས་མ་ཡཱ༔ རྒྱ་རྒྱ་རྒྱ༔ གཏེར་རྒྱ༔ སྦས་རྒྱ༔ ཟབ་རྒྱ༔ གཉན་རྒྱ༔ གཏད་རྒྱ༔ ས་མ་ཡཱ༔ རྒྱ་རྒྱ་རྒྱ༔ རིག་འཛིན་ཉི་མ་གྲགས་པས་ཤིང་མོ་ཡོས་ཀྱི་ལོ་ལ་ཏི་སེ་གངས་ཀྱི་རི་ནས་གདན་དྲངས་པའོ༔ མངྒ་ལཾ༔

བདུད་འདུལ་སེང་གདོང་མའི་ཉེ་དབྱེ་ཟབ་མོ།

༁ྃཿ བཀའ་རྫོགས་པ་ཆེན་པོ་བླ་མ་བདེ་མཆོག་འཁོར་ལོ་ལསཿ བདུད་འདུལ་སེང་གདོང་མའི་ཉེ་དབྱེ་ཟབ་མོ་བཞུགསཿ དཔལ་ཆེན་པོ་མཁའ་འགྲོའི་དབང་ཕྱུག་ལ་ཕྱག་འཚལ་ལོ༔ བདུད་འདུལ་དྷཀྐི་སེང་གདོང་མའི་ལས་མཐའ༔ བསྟན་ལ་སྡང་བའི་དགྲ་བོ་འཕམ་པར་བྱེད་པའི་ངན་སྔགས་འདི་ལ་དོན་གཉིས་ཏེ༔ སྔོན་འགྲོ་བཅའ་གཞི་དངོས་གཞི་ལས་སྦྱོར་རོ༔ དང་པོ་སྔོན་དུ་འགྲོ་བ་ལ་བཅའ་གཞིའི་རིམ་པ་ནི༔ སྐབས་དང་མཐུན་པའི་གནས་སུ་ཕོ་རོག་གི་དང་རུ་གཡས་པ་ལ་དགྲ་བོའི་ལིངྒ་བྲི༔ ལིངྒ་ཟག་རྫས་ཀྱིས་བྱུག༔ སྲིན་བྱ་འུག་པའི་དང་རུ་གཡོན་པ་ལ་མཐུན་གསུམ་གང་ལ་དམིགས་པའི་ལིངྒ་བྲི༔ ལིངྒ་སྒྲོ་ལ་འབྲི་མ་ཉན་པར་བྱུང་ན་གྲོ་གའམ་དུག་ཤོག་ལ་བྲིས་ཏེ་འུག་སྒྲོ་ལ་ཁྱི་ཁྲག་གིིས་ལིངྒ་གླན༔ ཕོ་རོག་སྒྲོ་ལ་ར་ཁྲག་གིས་གླན༔ སྒྲོ་གཉིས་ཧོམ་ཁུང་དུ་བཅུག༔ ལྷ་དབྱེ་བའི་དུད་པས་བདུག༔ ས་མ་ཡཱཿ རྒྱ་རྒྱ་རྒྱཿ གཉིས་པ་དངོས་གཞི་ལས་སྦྱོར་གྱི་རིམ་པ་ནི༔ རང་ཉིད་དཔལ་གྱི་མཁའ་འགྲོ་མར་བསྐྱེད་ཅིང་འགུགས་བསྟིམ་བྱཿ ཧཱུྃ་བཛྲ་དྷཀྐི་ནི་སེངྷ་མུ་ཁ་ཧ་རི་ནི་ས་རཀྴ་ཡཀྴ་དགྲ་བོ་ཆེ་གེ་མོ་ཨངྒུ་ཤ་ཛ་ཛ༔ ཅེས་དགྲ་བོ་འགུགས་པའི་སྔགས་འདི་ཐུན་མགོ་རྣམས་སུ་ཅི་མང་རེ་བཟླཿ མུན་རུབ་ནས་འུག་སྒྲོས་ཕོ་རོག་གི་སྒྲོ་ལ་བརྡེག༔ ནམ་ལངས་ནས་ཕོ་རོག་གི་སྒྲོས་འུག་སྒྲོ་ལ་བརྡེག༔ འུག་སྒྲོས་བརྡེག་དུས་འདི་བགྲང་ངོ་༔ ཧཱུྃ་བཛྲ་མུ་ཏ་པོ་ག་ར་ཨུ་ཆོག་ཕུ་རྒྱུ་བྲེང་ཐུཾ་རིལ་མཱ་ར་ཡ་སོད་སོད༔ ཇག་ཆིངས་གུ་གུ་ཐུཾ་ནི་མཱ་ར་ཡ་ཛ༔ ཕཊ༔ ཅེས་བཟླས་ཕོ་རོག་གི་སྒྲོས་བརྡེག་དུས༔ མ་མ་ཏྲག་རཀྴ་ཨ་ནྲི་ཏྲག་རཀྴ་མཱ་ར་ཡ་ཕྱེས་ཕྱེས༔ ཅེས་བཟླས་ཐུན་སྐབས་རྣམས་སུ་ཐུན་གཏོར་འབུལ༔ མཁའ་འགྲོའི་སྤྲུལ་པ་ཡང་སྤྲུལ་གྱིས༔ ཕྲ་མེན་འཕྲིན་ལས་མཛད་ནས་ཀྱང་༔ དགྲ་བོ་ནང་དཀྲུགས་བརླག་པར་བསམ༔ ཞག་གསུམ་བསྙེན་ཅིང་ཐུན་ཡང་བརྡེགས༔ དེ་ནས་ཁམ་བར་ཟག་རྫས་བསྲེས༔ ལིངྒ་གཉིས་བཟོས་རྒྱབ་སྤྲད་ནས༔ ཁྱི་སྤུ་ར་བལ་སྐུད་པས་བསྡམས༔ སྒྲོ་ལིང་སྤྱི་བོའི་གཙུག་ཏུ་གཟུག༔ ཧོམ་བཅུག་མི་ཁའི་རྫས་ངན་བཏབ༔ ཕུང་གསུམ་བདུད་ཀྱི་ཉི་མ་ལ༔ དགྲ་བོའི་ཁང་རྨང་ཐིམ་འོག་མནན༔ ས་མ་ཡཱ༔ རྒྱ་རྒྱ་རྒྱ༔ བསྟན་ལ་སྡང་བྱེད་དགྲ་བོ་རྣམས༔ ནང་འཐབ་དམེ་འཁྲུག་ཁ་དག་གཏོང་༔ གདམས་པ་ཟབ་མོ་འདི་ཉིད་ནི༔ མེ་ལས་ཚ་ཞིང་གློག་ལས་མྱུར༔ ཟབ་ཕྱིར་རིན་ཆེན་གཏེར་དུ་སྦས༔ ལས་འཕྲོ་ཅན་གྱིས་སྤྱོད་པར་ཤོག༔ ས་མ་ཡཱ༔ རྒྱ་རྒྱ་རྒྱ༔ གཏེར་རྒྱ༔ སྦས་རྒྱ༔ ཟབ་རྒྱ༔ གཉེན་རྒྱཿ གཏད་རྒྱ༔ ས་མ་ཡཱ༔ རྒྱ་རྒྱ་རྒྱ༔ བདག་བན་དྷེ་ཉི་མ་གྲགས་པས་གངས་རིའི་རྒྱལ་པོ་ཏི་སེ་ནས་གདན་དྲངས་པའོ༔ མངྒ་ལཾ། །

བདུད་འདུལ་མཁའ་འགྲོའི་ཆོ་འཕྲུལ་གྱི་ལས་མཐའ།

བཀའ་རྫོགས་པ་ཆེན་པོ་བླ་མ་བདེ་མཆོག་འཁོར་ལོ་ལས༔ བདུད་འདུལ་མཁའ་འགྲོའི་ཆོ་འཕྲུལ་གྱི་ལས་མཐའ་བཞུགས་སོ༔ དཔལ་ཆེན་པོ་མཁའ་འགྲོའི་དབང་ཕྱུག་ལ་ཕྱག་འཚལ་ལོ༔ བདུད་འདུལ་དཔལ་གྱི་མཁའ་འགྲོའི་བསྙེན་སྒྲུབ་ཐེམས་པའི་རྣལ་འབྱོར་པས༔ བསྟན་པ་བཤིག་པའི་དགྲ་བོ་ལ་ཆོ་འཕྲུལ་གཏོང་བའི་ལས་སྦྱོར་ནི༔ འཕུང་ཤུལ་གྱི་ས་ལ་མཎྜལ་གྲུ་གསུམ་པར་བཟོས་པའི་དབུས་སུ༔ ཟུར་གསུམ་དུ་བྲུས་པའི་ནང་དུ་དུག་ཤིང་ངམ༔ དུག་ཤོག་ལ་ལིངྒ་གཞུང་ལྟར་བྲིས་པ་བཅུག༔ ཁམ་ས་ལ་མཁའ་འགྲོ་མའི་གཟུགས་བཞི་བཟོས༔ སྐུ་མདོག་དམར་པོ་ལུས་གོས་ནག་པོར་བྱས་པའི་ལག་ཏུ་དུག་ཤིང་གི་གཞུ་འམ་མི་གྲིར་ཤི་བའི་རྩིབ་རུས་ལ་ཡུག་ས་མའི་སྐྲ་ཤད་ཀྱིས་གཞུ་རྒྱུད་བྱས་པ་ལ་འུག་སྒྲོ་སྐྱོན་པའི་སྐྱེར་མདའ་བཀང་བ་མཁའ་འགྲོའི་ལག་ཏུ་བཞག༔ དམར་གྱི་བཤོས་བུ་བཞི་ཕྱོགས་བཞིར་བཤམ༔ དཀར་གསུམ་མངར་གསུམ་གྱི་གཏོར་མ་ཞིག་ཀྱང་བཤམ༔ ཐོད་ངན་ལ་འཁོར་ལོ་རྩིབས་བརྒྱད་བྲིས་ལ་སྔགས་རྣམས་བཀོད༔ ལྟེ་བར་ནྲི་ལ་མིང་གིས་བསྐོར༔ རྩིབས་བརྒྱད་ལ་དགྲ་བོ་འཁོར་བཅས་ལཾ་ལཾ་སྟཾ་བྷ་ཡ་ནན་ཛཿབྷྱོ་ཧྲིང་ཡ༔ དགྲ་བོ་སརྦ་མ་མ་ནན་ཛཿབྷྱོ་ཧྲིང་ཡ༔ དགྲ་བོ་སརྦ་ཙིཏྟ་ཐུཾ་རིལ་ཛཿ བྷྱོཿཧྲིང་ཡ༔ དགྲ་བོ་སརྦ་ཙིཏྟ་ཐུཾ་རིལ་ཛ་བྷྱོ་ཧྲིང་ཡ༔ དགྲ་བོ་སརྦ་ཧ་ན་ཧ་ན་ཐུམ་རིལ་ཛཿ བྷྱོ་ཛ་ཧྲིང་ཡ༔ དགྲ་བོ་ཏྲི་ཏྲན་ཛ་ཤི་དུ་སོད་ཛཿབྷྱོ་ཧྲིང་ཡ༔ དགྲ་བོ་གྷྲིནྡུ་མདའ་མ་ཛཿབྷྱོཿཧྲིང་ཡ༔ དགྲ་བོ་ཀཱ་ཡ་ཝཱཀྐ་མཱ་ར་ཡ་ཛ་ཐུམ་རིལ་ཧཱུྃ༔ དགྲ་བོ་ཨེ་ཧུར་ཐུམ་རྦད་ཡ་ཛ་ནན༔ ཅེས་བྲིས་ཤིང་༔ དོམ་གྱི་རུས་པ༔ ཡུངས་དཀར་ནག་བྱ་མོའི་སྒོང་ངར་གདམས་པ་ལངྒིའི་འོག་ཏུ་བཞག་ཐོད་པས་ཁ་བཅད་དེ༔ དང་པོ་རང་ཉིད་དཔལ་བདུད་འདུལ་ནག་མོར་བསྒོམ་ཞག་གཅིག་བསྙེན་པ་འདིས་སྒྲུབ་བོ༔ ཧཱུྃ་བཛྲ་དྷཀྐི་ནི་སིང་ཧ་མུ་ཥ་ཧ་རི་ནི་ས་ཧྲིང་ཛ་ཧྲིང་ཛ༔ ཏྲི་ནན་ཛཿ བྷི་དུར་ཧུ་ཡཱ༔ ཞེས་བཟླས་པས་ཨ་ཙ་ར་མིག་སྔ་ལ་ཡོང་ངོ༔ དེ་ནས་རྦད་པའི་སྔགས་འདི་བཟླ་འོ༔ ཧཱུྃ་བཛྲ་དྷཀྐི་ནི་སིང་ཧ་མུ་ཥ་ཏྲི་ནན་ཛ༔ བྷི་དུར་ཧུར་ཡཿམ་མ་ཙིཏྟ་ནག་མོ་དགྲ་ལ་བྷྱོ༔ ཞེས་ཞག་བདུན་བཟླས་ཤིང་གཏོར་མ་དགྲ་ཕྱོགས་སུ་འབུལ༔ བསྐུལ་བ་འདོན་མདའ་རྣམས་ལིང་ག་ལ་བརྒྱབ༔ ལིང་ག་ཐོད་པར་རྫས་དང་བཅས་པ་བཅུག༔ རེ་བ་ནག་པོས་དྲིལ༔ དགྲ་བོའི་ཐེམ་འོག་ཏུ་མནན༔ དམོད་བཅོལ་བྱ༔ བདུད་འདུལ་མཁའ་འགྲོ་འཁོར་དང་བཅས་པས་དགྲ་བོ་བརླག་པར་བསམ༔ དགྲ་ལ་ཆོ་འཕྲུལ་སྣ་ཚོགས་འོང་ཞིང་༔ མི་ནོར་ཐམས་ཅད་རྩད་ནས་གཅོད་ཅིང་༔ དྲུང་ནས་འབྱིན་པར་འགྱུར་རོ༔ འདི་ནི་མཁའ་འགྲོའི་གསང་བའི་མན་ངག་ཡང་དག་པའོ༔ དེ་སྐད་ཅེས་སློབ་དཔོན་ཆེན་པོས་གསུངས་པ་དང་༔ བདག་བུད་མེད་མཚོ་རྒྱལ་གྱིས་ཕྱི་རབས་ཀྱི་དོན་དུ་ཡི་གེར་བཏབ་སྟེ་རིན་པོ་ཆེའི་གཏེར་དུ་སྦས་པའོ༔ ལས་འཕྲོ་ཅན་དང་འཕྲད་པར་ཤོག༔ ས་མ་ཡཱ་༔ རྒྱ་རྒྱ་རྒྱ༔ གཏེར་རྒྱ༔ སྦས་རྒྱ༔ ཟབ་རྒྱ༔ གཉན་རྒྱ༔ ཁ་ཐམ་གྷུ་ཧྱ༔ བདག་ཁམས་ཞིག་ཉི་མ་གྲགས་པས་སེང་གདོང་མཁའ་འགྲོའི་གནས་ནས་གདན་དྲངས་པའོ༔ མངྒ་ལཾ།། །།

བདུད་འདུལ་མཁའ་འགྲོའི་ཆུ་འཁྱག་གི་ལས་མཐའ།

བཀའ་རྫོགས་པ་ཆེན་པོ་བླ་མ་བདེ་མཆོག་འཁོར་ལོ་ལས༔ བདུད་འདུལ་མཁའ་འགྲོའི་ཆུ་འཁྱག་གི་ལས་མཐའ་བཞུགས་སོ༔ ཁ་ཐམ། དཔལ་ཆེན་པོ་ཧེ་རུ་ཀཿལ་འདུད༔ སྤྲུལ་པའི་མཁའ་འགྲོ་བདུད་འདུལ་མའི༔ བསྙེན་སྒྲུབ་ཐེམས་པའི་རྣལ་འབྱོར་པས༔ བསྟན་པ་བཤིག་པའི་དགྲ་བོ་ལ༔ ཐོག་སེར་འབེབས་པའི་ལས་སྦྱོར་ཞིག༔ གུ་རུ་རྗེ་ལ་ལུང་ཞུས་ནས༔ མཚོ་རྒྱལ་བདག་གིས་ཡི་གེར་འདེབས༔ ལས་འཕྲོ་ཅན་དང་འཕྲད་པར་ཤོག༔ ས་མ་ཡ་ཁ་ཐམ་རྒྱ་རྒྱ་རྒྱ༔ དེ་ཡང་དགྲ་བོ་ཤིན་ཏུ་ཐུ་ན་བསྙེན་སྒྲུབ་སོང་བའི་རྣལ་འབྱོར་པས༔ དབེན་པའི་གནས་སུ་གཞི་བདག་ལ་གསེར་སྐྱེམས་མཆོད༔ བདེན་པ་བདར༔ མགྲོན་བཞི་ལ་ཆུ་གཏོར་བཏང་༔ ས་རྒོད་ཡིན་ན་ས་འདུལ་ཞིང་བརྟགས་བླང་རྣམས་བྱས་ཏེ་སྟེགས་བུ་བཟོོ༔ ཡུལ་དགོན་གནས་གཞི་སོགས་ཡིན་ན་ས་ཆོག་མི་དགོས༔ འོན་ཀྱང་སེར་བ་འདི་སྒྲུབ་པའི་གནས་ནི་ལུང་སྟོང་མཆོག་གོ༔ དེ་ལ་ད་ལ་གྲུ་བཞི་འམ་གྲུ་གསུམ་ཆེ་ཆུང་གནས་ཁང་དང་མཐུན་པར་བཟོའོ༔ ད་ལའི་དབུས་སུ་གྲུ་གསུམ་བྲུ༔ ར་རྒྱ་བོའི་མགོ་ཞིག་གད་ལེགས་པར་བྱས་ལ༔ དུག་ཁྲག་གི་སྣག་ཚས་འགྲམ་པ་གཡོན་ལ་སྔགས་འདི་བྲིའོ༔ ཕོབ་ཡ་ཕོབ་ཡ༔ སེར་བ་ཕོབ༔ ས་ཐོག་གི་སེར་བ་ཕོབ༔ གནམ་ཐོག་གི་སེར་བ་ཕོབ༔ ནལ་ནལ་ཆེམ་ཆེམ་ས་མ་ཡཱ༔ ནཱ་ཀ་ནཱ་ཀ་གར་ལིང་ཕོབ༔ ཅེས་བྲིས་འགྲམ་པ་གཡས་པ་ལ༔ ནཱ་ག་གུ་ལ་ཙནྟི་ཙནྟི་ཤར་ཤར་ཧྲིལ་ཧྲིལ་ཕྲོམ་ཕྲོམ་ཕོབ་ཕོབ༔ ཡ་ཡ་ཛཿཛཿ ཞེས་བྲིས་ལྟག་པ་ལ༔ མཁའ་ལ་ཧུར་ཧུར་ཆེམ་ཆེམ༔ ནལ་ནལ་ལ་ཤ་ཚབ་ཚབ་བྷྱོ༔ ཕོབ་ཡ་བྷྱོ༔ ཕོབ་ཡ་བྷྱོ༔ ཞེས་བྲིས་མཆུ་ལ༔ ཧཱུྃ་བཛྲ་དྷཱཀྐི་ནི་སེངྷ་མུ་ཥ་ཏྲི་བྱེ་ལ་ཐམ༔ ཨ་ལ་བྱེས་ཐང་༔ སརྦ་ཏ་ཡ༔ སརྦ་བྷ་ལི༔ འུར་ར་འུར་ར༔ ཐོར་ཐོར་འུར་འུར་ས་མ་ཡཱ་ཀར་ཐོག་མ་བྷྱོ༔ ཞེས་བྲིས་རྫས་ཀྱི་རིམ་པ་འདི་རྣམས་བསགས༔ སྦྲུལ་གྱི་སྒོ་ང་༔ བྱ་ངང་པའི་སྒོ་ང་༔ བྱེའུ་ཅོག་གའི་སྒོང་ང་༔ ནལ་གྱི་ཤ་མ་༔ ལན་ཚ༔ གཡའ་ཁྱི་མོ༔ ཕག་རྒོད་ཀྱི་ཁྲག༔ མཛེ་ཁྲག༔ གྲི་ཁྲག་༔ ཡུག་སའི་མངལ་ཁྲག༔ ཁྱི་གུ་ལོང་རོའི་ཀླད་པ༔ དམེ་ཕོའི་ལག་དྲེག༔ མེ་ལྕགས་ཀྱི་དྲེག་པ༔ རྟ་ནག་གི་བོན༔ རྒྱ་མཚོ་སྦུ་བ༔ ར་ཐུག་ལུག་ཐུག་གི་རྨོངས་སྦྲེ༔ དེ་རྣམས་ཞིབ་ཏུ་བཏགས་ལ་རིལ་བུར་སྒྲིལ་ཞིང་ར་ཁྲག་གི་ན་བཟའ་གསོལ༔ ཆེ་ཆུང་སྒོང་ང་ཙམ་གསུམ་བྱས་ཏེ༔ གོང་གི་ར་ཐོད་དུ་བཅུག༔ སྣལ་ཚོན་གྱིས་ཐོད་པ་རྒྱ་གྲམ་དུ་བཅིངས༔ ཐོད་པ་བྲུབ་ཁུང་དུ་གཞུག༔ རང་ཉིད་བདུད་འདུལ་མཁའ་འགྲོའི་བསྐྱེད་རིམ་གསལ་ཞིང་༔ དང་པོ་མཆུ་ལ་བྲིས་པའི་སྔགས༔ གཉིས་པ་འགྲམ་པ་གཡོན༔ གསུམ་པ་འགྲམ་པ་གཡས༔ བཞི་པ་ལྟག་པ་ལ་བྲིས་པའི་སྔགས་རྣམས་ཐུན་དུ་བཟུང་སྟེ༔ མི་ཚིག་གིས་བར་མ་ཆོད་བར་བཟླའོ༔ དེ་ལྟར་བརྩོན་པས་རྟགས་ཀྱི་རིམ་པ་ནི༔ བཙས་མ་རྒྱབ་པ་དང་༔ བམ་འབུ་ཁུར་བ་དང་༔ སྙེ་མ་བཏུས་པ་དང་༔ ཟོར་བ་མགར་བ་དང་༔ རྗིང་བཤང་བ༔ ཆུ་བསྒྱུར་བ༔ དངོས་སུ་ཐོག་སེར་འབབ་པ་སོགས་བྱུང་ན༔ རང་ཉིད་དཔལ་གྱི་མཁའ་འགྲོ་མར་གསལ་ཞིང་དཔའ་བོ་མཁའ་འགྲོ་ལྷ་སྲིན་ཐམས་ཅད་དབང་དུ་བསྡུས་ཏེ༔ དགྲ་བོའི་ཡུལ་དུ་དམག་ལ་ཆས་པས༔ ང་རོ་འབྲུག་ཏུ་ལྡིར༔ ཁ་རླུངས་སྤྲིན་དུ་གཏིབས༔ སྤྲུལ་པ་ཐོག་དང་སེར་པ་དྲག་ཏུ་ཕབ༔ བསྒོམ་ཞིང་སྙིང་པོ་རྣམས་བགྲང་༔ དམོད་བཅོལ་བྱ༔ རྫས་དེ་ཆ་གསུམ་དུ་བྱས་ཏེ་ཆ་གཅིག་ཐོད་པར་བཅུག་ནས་དམིགས་བྱའི་ཞིང་དཀྱིལ་དུ་སྦས༔ ཆ་གཅིག་སྦལ་པ་ནག་པོའི་ཤ་དང་ལྷན་དུ་དགྲ་ཡུལ་མཐོང་ངེས་པར་མེ་ལ་བསྲེག༔ ཆ་གཅིག་རྗེས་ཀྱི་ཕབས་སུ་འཛིན་ནོ༔ འདིའི་སྒྲུབ་པ་བྱེད་ཚེ་ཐུན་སྐབས་རྣམས་སུ་མཁའ་འགྲོ་མའི་བསྐུལ་བ་འདོན་ཞིང་ཐུན་གཏོར་དེ་འབུལ་བར་བྱའོ༔ ས་མ་ཡ༔ རྒྱ་རྒྱ་རྒྱ༔ ཡང་རྟེན་འབྲེལ་གྱི་རྫས་ལ་བརྟེན་ནས་ཐོག་སེར་འབེབས་པར་འདོད་ན༔ གངས་རི་བརྟན་ཆགས་ཀྱི་ས་དང་༔ ཡུལ་ཕྱོགས་དེའི་གང་གཉན་པའི་ས་བླངས་ལ་བསྲེ༔ རིན་ཆེན་བརྟར་རུའི་ཕྱེ་མ་ཐང་དུ་བརྟར་ཏེ༔ རིན་པོ་ཆེའི་སྣོད་དུ་བཞག་པས་ཞག་དྲུག་གི་ནང་པར་རླན་དུ་འགྲོའོ༔ དེ་ནས་མུ་ཟི་བླུགས་ལ་བཞག་པས་ཞག་དགུ་ནས་རླངས་འབྱུང་ངོ་༔ དེ་ནས་ཕྱི་ལུད་བླུགས་ཏེ་བཞག་པས་ཞག་བཅུ་གཅིག་ན་སྒྲུབ་ཁང་ཐོག་ཏུ་རླན་ཆེར་འོང་ངོ་༔ དེ་ནས་བབ་བླ་བླུགས་པས་ཞག་བཅོ་ལྔ་ནས་ཁང་ཐོག་ཏུ་ཁུ་འཕང་འོང་ངོ་༔ དེ་ནས་དགྲ་ཡུལ་གྱི་སྔོ་སྒོོག་དང་བསྲེས་ལ༔ ཡུལ་མིག་གིས་མཐོང་བའི་སར་ཕྱིན་ལ༔ ཟངས་དུང་ནང་དུ་བླུགས་ཏེ་ཕུས་གཏོར་བཏང་ངོ་༔ མ་མོ་མཁའ་འགྲོ་ལྷ་སྲིན་གྱི་ཚོགས་ཀྱི་སེར་བ་དྲག་ཏུ་ཕབ་པར་བསྒོམ་ཞིང་༔ མཁའ་འགྲོའི་སྔགས་ཀྱང་བཟླའོ༔ དམ་ཚིག་ཏུ་རྫས་དེ་མཆོད་གྲལ་དང་༔ སྐུ་གསུང་ཐུགས་རྟེན་གྱི་གྲལ་དུ་མི་བཞག་གོ༔ སྐད་ཅིག་གི་དགྲ་བོའི་ཡུལ་ཁམས་ཕུང་བར་བྱེད་དོ༔ ས་མ་ཡཱ༔ རྒྱ་རྒྱ་རྒྱ༔ ཁྱད་པར་དུ་ཡང་ཟབ་པའི་སྙིང་ཁྲག༔ ཐོག་སེར་འབེབས་པའི་ཡང་ཐིག་ནི༔ མཁར་གཞོང་དུ་གུ་གུལ་དང་ཁྱི་ལུད་བསྲེས་ལ་ཞག་གཉིས་བཞག་པས༔ སྣོད་དྲོས་ཡོང་༔ དེ་ནས་བུད་མེད་ཡུག་ས་མའི་མངལ་ཁྲག་བསྲེས་ལ་བཞག་པས༔ ཞག་དྲུག་ན་རླངས་པ་ཡོང་༔ ལྡོང་རོས་བཏབ་པས༔ ཞག་བདུན་ནས་རྫས་དུས་གཅིག་འདྲེས་འགྲོའོ༔ དེ་ནས་བག་ཕྱི་བསྲེས་ཏེ་རིལ་བུ་བྱས༔ ནམ་དགོས་ཀྱི་དུས་ཡུལ་གཉན་སར་མེར་བསྲེག༔ ལྷ་འདྲེ་ལ་དམོད་བཅོལ་བྱ༔ མཁའ་འགྲོ་མའི་སྔགས་འདོན༔ འདིའི་དམ་ཚིག་ཀྱང་གོང་དང་འདྲའོ༔ ཐོག་དང་སེར་བས་ཁོལ་རྒྱུག་བྱེད༔ དགྲ་བོ་མ་ལུས་ཁ་དག་གཏོང་༔ ཕུང་གསུམ་ཡས་ཀྱི་གཡབ་མོ་འདི༔ བདག་འདྲ་པདྨ་ཐོད་ཕྲེང་གི༔ མུ་སྟེགས་བསྟན་པ་གཞོམ་པའི་ཕྱིར༔ གཏེར་ནས་བཏོན་ཅིང་ལས་ལ་སྦྱར༔ ངན་སྔགས་བདག་པོ་ཐོག་གིས་བསྒྲལ༔ ད་ལྟ་མཚོ་རྒྱལ་ཁྱོད་ལ་གདམས༔ ཤར་ལྷོ་ནུབ་བྱང་དབུས་དང་ལྔར༔ ཡི་གེའི་རི་མོ་ལྔར་ཐོབ་ལ༔ བསྟན་པ་བསྲུང་བའི་བཙས་སུ་ཞོག༔ ཁྱད་པར་ཟབ་པའི་སྙིང་ཐིག་འདི༔ སེང་གདོང་དཀར་མོའི་གནས་ལ་སྦོས༔ ཅེས་གསུངས་པ་རྣམས་བདག་མཚོ་རྒྱལ་གྱིས་ཡི་གེར་བཏབ་སྟེ་རིན་པོ་ཆེའི་གཏེར་དུ་སྦས་པའོ༔ ལས་འཕྲོ་ཅན་གྱིས་སྤྱོད་པར་ཤོག༔ ས་མ་ཡཱ༔ རྒྱ་རྒྱ་རྒྱ༔ གཏེར་རྒྱ༔ སྦས་རྒྱ༔ ཟབ་རྒྱ༔ གཉན་རྒྱ༔ གཏད་རྒྱ༔ ས་མ་ཡཱ༔ རྒྱ་རྒྱ་རྒྱ༔ བདག་ཁམས་པ་ཉི་མ་གྲགས་པས་སེང་གདོང་མཁའ་འགྲོའི་གཏེར་གནས་ཏི་སེ་གངས་ཀྱི་རྒྱལ་པོའི་གནས་མཆོག་ནས་གདན་དྲངས་ཤིང་ཤོག་སེར་ལས་ཕབ་པ་འདིས་ཀྱང་བསྟན་པའི་བཙས་སུ་ཤོག༔ མངྒ་ལཾ། །

བདུད་འདུལ་མཁའ་འགྲོའི་ཤིན་ཏུ་ཟབ་པའི་བསྲུང་བ་རྣམ་གསུམ།

བཀའ་རྫོགས་པ་ཆེན་པོ་བླ་མ་བདེ་མཆོག་འཁོར་ལོ་ལས༔ བདུད་འདུལ་མཁའ་འགྲོའི་ཤིན་ཏུ་ཟབ་པའི་བསྲུང་བ་རྣམ་གསུམ་བཞུགས་སོ༔ དཔལ་ཆེན་པོ་ལ་ཕྱག་འཚལ་ལོ༔ བན་བོན་ངན་པའི་སྦྱོར་བ་བཤིག་པའི་མན་ངག་ནི་གསུམ་སྟེ༔ མཁའ་འགྲོ་ནག་མོའི་རྒྱུད་ལས༔ བན་བོན་ངན་པའི་སྦྱོར་བ་ལ༔ སྟེང་འོག་བར་གསུམ་བསྲུང་བ་བརྩམ༔ བྱད་མ་ལྷ་སྲུང་རྡུལ་དུ་བརླག༔ རང་ཉིད་རྡོ་རྗེའི་གུར་དུ་ཆུད༔ ཅེས་པས༔ དང་པོ་མདའ་ཕུར་གྱིས་བསྲུང་བ་སྟེང་གི་རྟེན་འབྲེལ༔ གཉིས་པ་འཁོར་ལོས་བསྲུང་བ་བར་གྱི་རྟེན་འབྲེལ༔ གསུམ་པ་མཆོད་རྟེན་གྱིས་བསྲུང་བ་འོག་གི་རྟེན་འབྲེལ་ལོ༔ ས་མ་ཡཱ༔ རྒྱ་རྒྱ་རྒྱ༔ དང་པོ་མདའ་ཕུར་གྱི་བསྲུང་བ་སྟེང་གི་རྟེན་འབྲེལ་ལ་དོན་གསུམ་སྟེ༔ བཅའ་གཞི་དང་ལས་སྦྱོར་སྔགས་དམིགས་སོ༔ དང་པོ་བཅའ་གཞི་ནི་སྨྱུག་མ་ཚིགས་གསུམ་ལ༔ བྱ་རྒོད་ཀྱི་སྒྲོ་སྐྱོན་པ་མེ་ལ་བཤུར་བ་ལྔ་བཟོ་ཞིང་༔ གྲི་ལྕགས་ཀྱི་མདེའི་ལ་གྲི་ཁྲག་དང་དུག་ཆུས་ངར་བླུད་པ་སྐྱོན༔ ཟངས་ལྕགས་སམ་ཚེར་མ་ཅན་གྱི་ཤིང་ལ་ཕུར་པ་ལྔ་བཟོ་ཞིང་༔ ལས་སྦྱོར་གཉིས་པ་ལྟར་གྱི་ཟློག་སྔགས་རྣམས༔ ཕུར་པ་རྣམས་ཀྱི་དབལ་ལ་དུག་ཁྲག་གིས་བྲི༔ ཕུར་པའི་སོ་ལ་གྲི་ཁྲག་དུག་ཆུ་བྱུག༔ མདའ་རྣམས་ཀྱི་སྟོད་དང་ཕུར་པའི་མགོ་དབུས་སུ་སྟོན༔ མདེལ་དང་ཕུར་སོ་ཕྱོགས་བཞིར་སྟོན༔ དབུས་ཀྱི་མདའ་ཕུར་གཉིས་ཀྱི་སོ་ཉལ་མལ་ལ་ཐུར་དུ་སྟོན༔ དེ་རྣམས་སྣལ་མ་དམར་པོས་འཁོར་ལོ་རྩིབས་བཞིའི་རྣམ་པར་བསྡམ༔ དར་མཐིང་ནག་གི་ཁུག་མ་ལྔར༔ ཡུངས་དཀར་ནག་ཀེ་ཚེ་ཤང་ཚེ་ཟངས་ལྕགས་སོགས་ཐུན་རྫས་སྣ་ཚོགས་སུ་བླུགས་ལ་མདའི་མགུལ་དུ་བསྡམ་པར་བྱའོ༔ གཉིས་པ་ལས་སྦྱོར་སྔགས་དམིགས་ཀྱི་རིམ་པ་ནི༔ རང་ཉིད་དཔལ་གྱི་མཁའ་འགྲོ་མའི་ཏིང་འཛིན་རབ་ཏུ་གསལ་ཞིང་༔ མདའ་ལྔ་བདུད་འདུལ་ནག་མོ་ལ་མཁའ་འགྲོ་བཞིས་བསྐོར་བར་བསྐྱེད༔ ཕུར་པ་ལྔ་ཡེ་ཤེས་སེམས་དཔའི་ངོ་བོ་ཕྱག་མཚན་ལྔ་ལ་ས་བོན་ཧཱུྃ་ཧ་རི་ནི་ས་ལྔས་མཚན་པའི་དཀྱིལ་དུ་རང་གི་ཚེ་སྲོག་གི་ངོ་བོ་ཡི་གེ་ནྲི་ཡིག་ལྔའི་ཁོང་དུ་ཆུད་པར་བསྒོམ༔ ཐུན་རྫས་རྣམས་སྤྲུལ་བ་ལས་ཀྱ་ིམཁའ་འགྲོ་གྲངས་མེད་དཔག་ཏུ་མེད་པར་གསལ༔ སྣལ་མ་བསྲུང་བའི་གུར་ཁང་དུ་བསྒོམ༔ ལས་སྦྱོར་དང་པོ་ལྟར་བསྲུང་བའི་སྔགས་དམིགས་ལ་བརྩོན་པར་བྱའོ༔ རྟེན་འབྲེལ་གྱི་སྦྱོར་བ་དེ་རང་གི་ཉལ་མལ་གྱི་སྟེང་དུ་གདུགས་ལྟར་དུ་ཕུབ་ནས་བཅང་ངོ་༔ འདི་ནི་ཤིན་ཏུ་ཟབ་པའི་ཕྱིར༔ སྤེལ་བར་ཕངས་ནས་ཟུར་དུ་བཀོད༔ ས་མ་ཡཱ༔ རྒྱ་རྒྱ་རྒྱ༔ གཉིས་པ་འཁོར་ལོས་བསྲུང་བ་བར་གྱི་རྟེན་འབྲེལ་ནི༔ གྲོ་ག་ཤིང་ཤུན་ནམ་རས་ལ་འཁོར་ལོ་མུ་ཁྱུད་དགུ་རུ་བསྐོར་ཏེ༔ ལྟེ་བ་ལ་ཧཱུྃ་ཡིག་གི་མཐར་ཆེ་གེ་འདི་ཞེས་བྱ་བའི་ཀཱ་ཡ་ཝཱཀྐ་ཙིཏྟ་རཀྵ་རཀྵ༔ ཞེས་བྲི༔ དེ་ཡི་ཕྱི་རིམ་མུ་ཁྱུད་ལ༔ སྒྲུབ་པའི་རྩ་བསྙེན་འདེབས༔ དེ་ཡི་ཕྱི་རིམ་མུ་ཁྱུད་ལ་རྩིབས་བཞིར་བཅད་ཅིང་༔ ཧ་རི་ནི་ས་བཞི་བཀོད་པའི་མཐར༔ འདི་ཞེས་བྱ་བ་ལ་སྲུངས་ཤིག་བྱ་བ་བྲི༔ རྩིབས་མཆན་བཞི་ལ་བྱད་མ་འདི་ཞེས་བྱ་བའམ༔ བན་བོན་ངན་པ་ལྷ་སྲིན་སྡེ་བརྒྱད་དང་བཅས་པའི་བྱད་ཁ་ཐམས་ཅད་ཨེ་ཡ་ཧུར་ཐུམ་བྷྱོ་ཟློག༔ ཕུར་ཁ་ཐམས་ཅད་ཨེ་ཡ་ཧུར་ཐུམས་བྷྱོ་ཟློག༔ གཏད་ཁ་ཐམས་ཅད་ཨེ་ཡ་ཧུར་ཐུམ་བྷྱོ་ཟློག༔ ཁྲམ་ཁ་ཐམས་ཅད་ཨེ་ཡ་ཧུར་ཐུམ་བྷྱོ་ཟློག༔ ཅེས་བྲི་དེ་ཡི་ཕྱི་རིམ་མུ་ཁྱུད་ལ་བསྲུང་བའི་བསྙེན་པ་རྣམས་འདེབས༔ དེ་ཡི་ཕྱི་རིམ་བཟློག་པའི་དྲག་སྔགས་རྣམས་འདེབས༔ དེའི་ཕྱི་རིམ་པདྨའི་ཕྲེང་བས་བསྐོར༔ དེའི་ཕྱི་རིམ་རྡོ་རྗེའི་ར་བས་བསྐོར༔ དེའི་ཕྱི་རིམ་མེ་རི་འབར་བས་བསྐོར༔ ཐལ་ཆེན་དང་ཡུངས་དཀར་རྫས་སུ་བཏབ་སྟེ་མཛེས་པའི་ཚོན་གྱིས་བསྒྱུར༔ མཆོད་རྟེན་བཞི་སྤྲོད་རིས་སུ་སྣལ་མཚོན་གྱིས་བསྡམས་ཤིང་ཞྭའི་ནང་ངམ་མགོ་བོ་ལ་གདགས༔ ཁང་ཁྱིམ་འཁོར་གཡོག་བསྲུང་ན་ཉལ་མལ་གྱི་སྟེང་དུ་གདུགས་ལྟར་དུ་དབུབ་བོ༔ རབ་གནས་བགེགས་བསྐྲད་གཞན་དང་མཚུངས༔ འདི་ནི་སུ་ཡི་ལུས་ལ་བཅང་༔ གནམ་ལྕགས་མཁར་དུ་ཚུད་དང་འདྲ༔ བྱད་དང་རྦོད་གཏོང་ཐམས་ཅད་ཐུབ༔ ཤིན་ཏུ་ཟབ་ཕྱིར་ཟུར་དུ་བྲིས༔ ས་མ་ཡཱ༔ རྒྱ་རྒྱ་རྒྱ༔ གསུམ་པ་མཆོད་རྟེན་གྱི་བསྲུང་བ་འོག་གི་རྟེན་འབྲེལ་ནི༔ རྫས་ལ་མཆོད་རྟེན་དམར་པོ་གྲུ་གང་པ་གཅིག་བཟོས༔ སོ་ལེགས་པར་བཏང་ཞིང་༔ རྒྱ་ཤོག་ལ་བཟང་དྲུག་གི་ཆུས་བྱུག་སྟེ༔ འཁོར་ལོ་རྩིབས་བཞི་མུ་ཁྱུད་ལྡན་པར་འབྲི་ཞིང་༔ ལྟེ་བར་ཧཱུྃ་གི་མཐར་ཆེ་གེ་འཁོར་བཅས་སྲུངས་ཤིག་བྱ་བར་བྲི༔ ཧ་རི་ནི་ས་བཞིའི་མཐར་འདོད་གསོལ་བྲི༔ མུ་ཁྱུད་ལ་བསྲུང་བའི་བསྙེན་པ་རྣམས་བྲི༔ མཐའ་མེ་རིས་བསྐོར་ཞིང་རབ་ཏུ་གནས་དར་ཚོན་སྣ་ལྔ་འམ་དར་དམར་གྱིས་དྲིལ་ལ་མཆོད་རྟེན་གྱི་བུམ་པར་གཞུག༔ ཧོམ་ཁུང་དུ་དགྲ་བོ་ཟག་རྫས་ལྡན་པའི་ཉ་བོ་བཟོ་ཞིང་༔ སྙིང་གར་མིང་རུས་བླ་དྭགས་དང་བཅས་པ་གཞུག༔ ཡན་ལག་བཞི་སྙིང་ཁ་དང་བཅས་པར་སེང་ལྡེང་གི་ཕུར་པར་དུག་ཁྲག་བྱུག་ཅིང་བསད་སྔགས་སྟོང་ཕྲག་རེའི་དྲོད་ཀྱིས་གླན་པ་ལྔ་གདབ༔ དེ་ཡི་སྟེང་དུ་མཆོད་རྟེན་བཞག་ཅིང་བཀུག་བཞུག་ཡང་ཡང་བྱ༔ མཆོད་རྟེན་དེ་ཡི་ཕྱོགས་བཞི་མཚམས་བརྒྱད་རྣམས་སུ་སེང་ལྡེང་གི་ཕུར་བུའམ༔ ཚེར་མ་ཅན་གྱི་ཤིང་ལ་བཟོས་པའི་ཕུར་བུ་བརྒྱད་ལ་དུག་ཁྲག་གི་དབལ་རྣམས་སུ་ཟློག་སྔགས་བྲིས་པ་ལ་རང་སྔགས་བརྒྱ་རྩ་བརྒྱད་ཀྱི་དྲོད་ཀྱིས་གླན་པ་བརྒྱད་ཕྱོགས་དང་ཕྱོགས་མཚམས་སུ་གདབ༔ མཆོད་རྟེན་ཉལ་མལ་གྱི་སྔས་སམ་མདུན་དུ་བཞག༔ ཕས་ཀྱི་རྦོད་གཏོང་ཆེ་ན་ཟློག་སྔགས་འདོན་ཅིང་བསྐོར་བ་གཡོན་བསྐོར་དུ་རྒྱབ༔ སྔགས་དམིགས་གཟིར་ཅིང་ཉི་མ་མ་ནུབ་ཙམ་དུ་ཐལ་མོ་དྲག་ཏུ་རྡེབ༔ འདི་ནི་རབ་ཏུ་གསང་བའི་མན་ངག་སྟེ༔ བུ་ལ་སྤེལ་ཀྱང་མནའ་རྒྱ་ལན་གསུམ་སྐྱོར༔ ཆིག་རྒྱུད་མ་གཏོགས་སྤེལ་ན་བཀའ་ཆད་འབྱུང་༔ ས་མ་ཡཱ༔ རྒྱ་རྒྱ་རྒྱ༔ ཧཱུྃ་བཛྲ་དྷཀྐི་ནི་སིདྷ་མུ་ཥ་ཧ་རི་ནི་ས་བཛྲ་ཧ་དེ་དུ་ལིང་ནག་མོས་སྲུངས༔ ཨེ་བུ་ཏ་མ་ཕཊ༔ འདི་ནི་འབུམ་ཕྲག་མཁའ་འགྲོའི་སྙིང་ཞུན་ཏེ༔ རྒྱུན་དུ་བགྲངས་པས་རང་འཁོར་བྲན་གཡོག་རྣམས༔ རབ་ཏུ་བསྲུང་བའི་མན་ངག་ཨེ་མ་ཧོ༔ ས་མ་ཡཱ༔ རྒྱ་རྒྱ་རྒྱ༔ ཨེ་མ་ཤིན་ཏུ་གསང་བའི་མན་ངག་འདི༔ སྐལ་དམན་རྣམས་ལ་གབ་ཕྱིར་ཟུར་དུ་བྲིས༔ ལས་སྦྱོར་དང་པོའི་ལས་ཀྱི་མདེལ་ཐུང་ཡིན༔ མན་ངག་གསང་བའི་སྙིང་ཞུན་དམ་པ་འདི༔ ཕྱི་མའི་དོན་དུ་རིན་ཆེན་གཏེར་དུ་སྦས༔ ལས་འཕྲོ་ཅན་གྱི་བུ་དང་འཕྲད་པར་ཤོག༔ ས་མ་ཡཱ༔ རྒྱ་རྒྱ་རྒྱ༔ གཏེར་རྒྱ༔ སྦས་རྒྱ༔ ཟབ་རྒྱ་༔ གཉན་རྒྱ༔ གཏད་རྒྱ༔ ས་མ་ཡཱ༔ རྒྱ་རྒྱ་རྒྱ༔ བདག་བནྡྷེ་ཉི་མ་གྲགས་པས་གངས་རི་ནས་གདན་དྲངས་པའོ། །མངྒ་ལཾ།། །།

བདུད་འདུལ་སེང་གདོང་མའི་ངག་མནན་བཀྲོལ་ཐབས།

བཀའ་རྫོགས་པ་ཆེན་པོ་བླ་མ་བདེ་མཆོག་འཁོར་ལོ་ལས༔ བདུད་འདུལ་སེང་གདོང་མའི་ངག་མནན་བཀྲོལ་ཐབས་བཞུགས་སོ༔ དཔལ་ཆེན་པོ་མཁའ་འགྲོའི་དབང་ཕྱུག་ཆེན་པོ་ལ་ཕྱག་འཚལ་ལོ༔ མ་འོངས་དུས་ན་བོད་ཀྱི་རྒྱལ་ཁམས་འདི་ཉིད་དུ་སྔགས་པ་ནང་རྒྱས་བྱེད༔ བདེན་པ་བརྒྱ་ལ་རྫུན་གྱི་ལ་ཡོག་འགེལ་བའི་དུས་ངན་ཞིག་ཡོང་༔ དེ་དུས་བདུད་སྤྲུལ་མ་རུངས་པ་མང་པོས་སྐྱེས་བུ་བྱང་ཆུབ་སེམས་དཔའ་མང་པོ་ལ༔ ངན་སྔགས་དང་སེལ་དང་ཕྲ་མེན་དང་ངག་མནན་པ་སོགས་ཀྱི་ལས་སྦྱོར་བྱེད་ཅིང་༔ བདུད་དང་དམ་སྲི་རྣམས་ཀྱིས་ཁ་འཛིན་ཅིང་༔ བྱང་ཆུབ་སེམས་དཔའ་མང་པོ་འོ་བརྒྱལ་བའི་དུས་ངན་ཞིག་འོང་བས༔ དེའི་ཚེ་ཆོས་བཞིན་སྤྱོད་པའི་རྐྱེན་སེལ་དུ་ངག་མནན་བགྲོལ་བའི་གདམས་པ་འདི་ཉམས་སུ་ལེན་པར་བྱའོ༔ ས་མ་ཡཱ༔ རྒྱ་རྒྱ་རྒྱ༔ དེ་ཡང་སྔོན་དུ་འགྲོ་བ་བཅའ་གཞི་དངོས་གཞི་སྔགས་དམིགས་ཏིང་འཛིན༔ རྗེས་ལས་སྦྱོར་རོ༔ དང་པོ་སྔོན་དུ་འགྲོ་བ་བཅའ་གཞིའི་རིམ་པ་ནི༔ ཤིན་ཏུ་དབེན་པའི་གནས་སུ༔ གཟའ་སྐར་བཟང་ལ་གདན་དཀར་པོའི་ཁར་རང་ཉིད་འདུག་ཅིང་༔ ཁ་ཤར་དུ་བལྟས་ཏེ་དྲི་བཟང་བསྲེས་པའི་མཚལ་ལམ་རྒྱ་སྣག་བཟང་པོས༔ རྒྱ་ཤོག་གམ་དར་དྲི་མ་མེད་པ་ལ༔ སྐུ་གསུང་ཐུགས་ཀྱི་ཙཀྲ་གསུམ་བྲི་སྟེ༔ དེ་ཡང་མུ་ཁྱུད་བཞི་བཞིར་བསྐོར་ཞིང་༔ དང་པོ་སྐུའི་ཙཀྲ་ལ་ལྟེ་བར་ཨཱོཾ་གྱི་མཐར་བདག་ཆེ་གེ་ལ་ཕྱོགས་ངན་སོགས་མི་མཐུན་པའི་འཇིགས་པ་ཐམས་ཅད་ལས་སྐྱོབས་ཤིག་བྲི༔ དེའི་ཕྱི་རིམ་རྩིབས་བཞིར་བཅད་ཅིང་༔ བྷི་ན་ཀཱ་ཡ་ནམ་ཞེས་འབྲུ་བཞི་བཀོད༔ རྩིབས་མཆན་བཞི་ལ་ཕཊ་བཞི་བྲི༔ དེའི་ཕྱི་རིམ་མུ་ཁྱུད་ལ༔ ཧཱུྃ་བཛྲ་དྷཀྐི་ནི་སིང་ཧ་མུ་ཥ་ཧ་རི་ནི་ས་ཀཱ་ཡ་སརྦ་སིདྷི་ཧཱུྃ་སྭཱ་ཧཱ༔ ཅེས་བྲི༔ དེའི་ཕྱི་རིམ་མུ་ཁྱུད་ལ་ཡེ་དྷརྨཱ་བྲི༔ མཐར་འཁོར་ལོའི་རི་མོས་བསྐོར་ཞིང་མེ་རི་བྲི༔ ས་མ་ཡཱ༔ རྒྱ༔ གཉིས་པ་གསུང་གི་ཙཀྲ་ནི༔ ལྟེ་བར་ཨཱཿའི་མཐར་འཆང་བ་ཆེ་གེ་ལ་ངག་མནན་པའི་གནོད་པ་ཐམས་ཅད་སྲུངས་ཤིག་བྱ་བ་བྲི༔ རྩིབས་བཞིར་ཀ་རི་ན་ཛ་ཧ་ཞེས་བྲི༔ རྩིབས་མཆན་བཞིར་ཕཊ་བཞི་བྲི༔ དེ་ཡི་ཕྱི་རིམ་མུ་ཁྱུད་ལ༔ ཧཱུྃ་བཛྲ་དྷཱཀྐི་ནི་སིང་ཧ་མུ་ཥ་ཧ་རི་ནི་ས་ཝཀྐ་སརྦ་སིདྷི་ཧཱུྃ་སྭཱ་ཧཱ༔ ཞེས་བྲི༔ དེ་ཡི་ཕྱི་རིམ་མུ་ཁྱུད་ལ༔ དབྱངས་གསལ་བྱེད་དང་རྟེན་འབྲེལ་སྙིང་པོ་བྲི༔ མཐར་པདྨའི་རི་མོས་བསྐོར་ཞིང་མེ་རི་བྲི༔ ས་མ་ཡཱ༔ རྒྱ་རྒྱ་རྒྱ༔ གསུམ་པ་ཐུགས་ཀྱི་ཙཀྲ་ནི༔ ལྟེ་བར་ཧཱུྃ་གི་ཁོང་སེང་དུ་ནྲི་ཡིག་གིས་མཚན་པ་བྲི༔ མཐར་བདག་ཆེ་གེ་ལ་གནོད་པའ་ིབྱད་མ་རྦོད་གཏོང་ཐམས་ཅད་སྲུངས་ཤིག་བྲི༔ རྩིབས་བཞིར་མ་འདུ་ཏི་ནི་ཞེས་བྲི༔ རྩིབས་མཆན་བཞིར་ཕཊ་བཞི་བྲི༔ དེ་ཡི་ཕྱི་རིམ་མུ་ཁྱུད་ལ༔ ཧཱུྃ་བཛྲ་དྷཱཀྐི་ནི་སེང་ཧ་མུ་ཥ་ཧ་རི་ནི་ས་ཙིཏྟ་སརྦ་སིདྷི་ཧཱུྃ་སྭཱ་ཧཱ༔ ཞེས་བྲི༔ དེ་ཡི་ཕྱི་རིམ་མུ་ཁྱུད་ལ༔ རྟེན་འབྲེལ་སྙིང་པོ་དང་དབྱངས་གསལ་བྱེད་བྲི༔ མཐར་རྡོ་རྗེའི་རི་མོས་བསྐོར་ཞིང་མེ་རི་བྲི༔ དེ་ནས་ཙཀྲ་གསུམ་ལ་མཛེས་པའི་མཚོན་གྱིས་བསྒྱུར༔ གཞི་མ་དཀར་པོའི་སྟེང་དུ་འབྲུའི་ཚོམ་བུ་བཀོད་པའི་ཁར་བཞག༔ སྨན་གཏོར་རཀྟ་བཤམས༔ ས་མ་ཡཱ༔ རྒྱ་རྒྱ་རྒྱ༔ གཉིས་པ་དངོས་གཞིའི་སྔགས་དམིགས་ཏིང་འཛིན་ནི༔ གུ་གུལ་བདུག་བགེགས་ལ་བཀའ་བསྒོ༔ ལས་ཀྱི་གཞུང་བསྲང་༔ བསྐྱེད་རིམ་དྲག་ཏུ་གསལ༔ བསྙེན་པ་སུམ་སྟོང་གི་དྲོད་ཀྱིས་གླན༔ འཁོར་ལོ་དམ་ཚིག་སེམས་པར་གསལ༔ ཡེ་ཤེས་ལྷ་ཚོགས་ཁ་ཆར་བུ་ཡུག་འཐིབས་པ་ལྟར་བྱོན་ནས༔ ཙཀྲ་རྣམས་ལ་གཉིས་སུ་མེད་པར་ཐིམ་པར་བསྒོམ༔ རྟེན་འབྲེལ་སྙིང་པོ་བརྒྱ་རྩ་བརྒྱད་ཀྱིས་རབ་ཏུ་གནས༔ ཚོགས་ཀྱི་འཁོར་ལོ་བསྐོར༔ ས་མ་ཡཱ༔ རྒྱ༔ གསུམ་པ་ལས་ལ་སྦྱར་བ་ནི༔ རང་གི་མདུན་གྱི་ནམ་མཁའ་ལ་བདུད་འདུལ་དཔལ་གྱི་མཁའ་འགྲོའི་ལྷ་ཚོགས་བརྒྱུད་པའི་བླ་མ་དང་བཅས་པ་མངོན་སུམ་དུ་བསྐྱེད་ཅིང་༔ ཨེ་མ་ཧོ༔ རྩ་གསུམ་མཁའ་འགྲོའི་ལྷ་ཚོགས་ཀྱིས༔ བདག་ལུས་སྐུ་ཡི་བྱིན་གྱིས་རློབས༔ ལུས་ལ་གཟི་བརྗིད་བསྐྱེད་དུ་གསོལ༔ འཆི་མེད་ཚེ་ཡི་དངོས་གྲུབ་སྩོལ༔ བདག་ངག་གསུང་གི་བྱིན་གྱིས་རློབས༔ ངག་ལ་ནུས་པ་བསྐྱེད་དུ་གསོལ༔ ཚངས་པའི་དབྱངས་ཀྱིས་དངོས་གྲུབ་སྩོལ༔ བདག་ཡིད་ཐུགས་ཀྱི་བྱིན་གྱིས་རློབས༔ སེམས་ལ་སྟོང་པ་བསྐྱེད་དུ་གསོལ༔ ཆོས་ཉིད་སྤྲོས་བྲལ་དངོས་གྲུབ་སྩོལ༔ ལུས་ལ་སྐུའི་དབང་མཆོག་བསྐུར༔ ངག་ལ་གསུང་གི་དབང་མཆོག་བསྐུར༔ སེམས་ལ་ཐུགས་ཀྱི་དབང་མཆོག་བསྐུར༔ ཀཱ་ཡ་ཝཱཀྐ་ཙིཏྟ་སརྦ་སིདྷི་ཕ་ལ་ཧཱུྃ༔ ཞེས་གསོལ་བ་དྲག་ཏུ་བཏབ་ཅིང་༔ བདུད་འདུལ་རྩ་གསུམ་གྱི་ལྷ་ཚོགས་ཐམས་ཅད་གཟི་བརྗིད་དུ་སྤུང་སྤུང་རང་གི་སྤྱི་བོར་བྱོན་ནས༔ འོད་དུ་ལྟེམ་གྱིས་ཞུ༔ རང་གི་ལུས་ངག་ཡིད་གསུམ་ལ་གཉིས་སུ་མེད་པར་ཐིམ༔ བྱད་མ་རྦོད་གཏོང་གི་གནོད་པ་རང་གི་ཚེ་རབས་ཀྱི་སྡིག་སྒྲིབ་ཐམས་ཅད་སྦལ་ལྕོང་དང་། དུད་ཁུའི་རྣམ་པར་འོག་སྒོ་ནས་ཐོན༔ འོག་གི་ས་གཞི་ལ་ཐིམ༔ རང་ལུས་གཟི་བརྗིད་འོད་དུ་འཚེར་བའི་སྤྱི་གཙུག་ཏུ་ཨོཾ་ལས་སྐུའི་འཁོར་ལོ༔ མགྲིན་པར་ཨཱཿལས་གསུང་གི་འཁོར་ལོ༔ སྙིང་ཁར་ཧཱུྃ་ལས་ཐུགས་ཀྱི་འཁོར་ལོ་གསུམ་བྲིས་པ་ལྟར་གསལ་ཞིང་༔ བསྙེན་པ་བརྒྱ་སྟོང་གི་མཐར་བསྲུང་བ་རྣམ་གསུམ་ལྟེ་བ་མ་ཉམས་པར་ལྟེབས་ཏེ་ལུས་ལ་བཏགས༔ གསོལ་འདེབས་དམིགས་པ་སྔགས་བསྙེན་བརྒྱ་སྟོང་ཕས་ཀྱི་བརྟགས་དང་སྦྱར་ཏེ་མ་ཆགས་པར་རྒྱུན་ལྡན་དུ་བཟླ་བར་བྱའོ༔ ས་མ་ཡཱ༔ རྒྱ༔ ཨཱོཾ་དུ་ཡ་དུ་ཡ་མ་དུ་ཡ་བྲ་མ་ཚལ༔ ཨོཾ་དུ་ཡ་ཡང་ས་མི་ས་ཡཱཿ ཨཱོཾ་བྲ་མ་རབ་ཚིམ་ཐུར་ཕུར་ན་སྭཱ་ཧཱ༔ ཞེས་སྔགས་གསུམ་པོ་འདི་ཤོག་བུ་གྲུ་བཞིར་བྱས་པ་གསུམ་ལ༔ ཚར་གསུམ་གསུམ་བྲིས་ཏེ༔ འཁོར་ལོ་གསུམ་བར་དུ་ལྟེ་བ་དང་སྤྲད་ནས་ལྟེམ་མོ༔ ས་མ་ཡཱ༔ རྒྱ༔ ཨེ་མ་ཡང་ཟབ་གདམས་པ་འདི༔ འགྲོ་བ་མཚམས་མེད་ལྔ་སྤྱོད་དུས༔ ཆོས་བཞིན་སྤྱོད་པའི་བསྲུང་བར་ཤོག༔ བཀའ་འདི་ཐུབ་པར་སྲུངས་ཤིག་རྒྱ༔ ས་མ་ཡཱ༔ རྒྱ་རྒྱ་རྒྱ༔ གཏེར་རྒྱ༔ སྦས་རྒྱ༔ ཟབ་རྒྱ༔ གཉན་རྒྱ༔ གཏད་རྒྱ༔ ས་མ་ཡཱཿ རྒྱ་རྒྱ་རྒྱ༔ བདག་བནྡྷེ་ཉི་མ་གྲགས་པས་གངས་རིའི་རྒྱལ་པོ་ཏེ་སེ་ནས་ཤིང་མེ་ཡོས་ལོ་ལ་གདན་དྲངས་ཤིང་ལྕགས་ཕོ་སྤྲེལ་ལོ་ལ་ཤོག་སེར་ལས་ཕབ་པའོ། །མངྒ་ལཾ།། །།

བདུད་འདུལ་སེང་གདོང་ནག་མོའི་གསོལ་འདེབས།

བདུད་འདུལ་སེང་གདོང་ནག་མོའི་གསོལ་འདེབས་བཞུགས། བཛྲ་སིངྷ་མུ་ཥ་སིདྡྷི་ཕ་ལ་ཧཱུྃ། འོག་མིན་ཆོས་དབྱིངས་ཕོ་བྲང་ནས། ཆོས་སྐུ་ཀུན་ཏུ་བཟང་མོ་སོགས། །ཆོས་སྐུའི་མཁའ་འགྲོ་ཐམས་ཅད་ལ། གསོལ་བ་འདེབས་སོ་བྱིན་གྱིས་རློབས། །ཆོས་ཉིད་མངོན་གྱུར་དངོས་གྲུབ་སྩོལ། །མཁའ་དབྱིངས་དག་པའི་ཞིང་ཁམས་ནས། །ལོངས་སྐུ་རྡོ་རྗེ་ཕག་མོ་སོགས། །ལོངས་སྐུའི་མཁའ་འགྲོ་ཐམས་ཅད་ལ། །གསོལ་བ་འདེབས་སོ་བྱིན་གྱིས་རློབས། །མཁའ་སྤྱོད་གྲུབ་པའི་དངོས་གྲུབ་སྩོལ། །ལྷོ་ཕྱོགས་རྒྱ་གར་གནས་མཆོག་ནས། །སྤྲུལ་སྐུ་བདུད་འདུལ་ནག་མོ་སོགས། །སྤྲུལ་སྐུའི་མཁའ་འགྲོ་ཐམས་ཅད་ལ། །གསོལ་བ་འདེབས་སོ་བྱིན་གྱིས་རློབས། །མཆོག་ཐུན་འགྲུབ་པའི་དངོས་གྲུབ་སྩོལ། །པདྨ་འོད་ཀྱི་གཞལ་ཡས་ནས། །གུ་རུ་སེང་གེ་སྒྲ་སྒྲོག་སོགས། །དུས་གསུམ་རིག་འཛིན་རྒྱ་མཚོ་ལ། །གསོལ་བ་འདེབས་སོ་བྱིན་གྱིས་རློབས། །སྒྲུབ་པ་མཐར་ཕྱིན་དངོས་གྲུབ་སྩོལ། །བོད་ཡུལ་སྒྲགས་ཀྱི་དབེན་གནས་ནས། །མཁའ་འགྲོ་ཡེ་ཤེས་མཚོ་རྒྱལ་སོགས། །མ་དང་མཁའ་འགྲོ་ཐམས་ཅད་ལ། །གསོལ་བ་འདེབས་སོ་བྱིན་གྱིས་རློབས། །བདེ་སྟོང་མངོན་གྱུར་དངོས་གྲུབ་སྩོལ། །ཡེར་པ་ལྷ་རི་སྙིང་པོ་ནས། །ཐུགས་སྲས་ཀླུ་ཡི་དབང་པོ་སོགས། །འཛམ་གླིང་ལོ་པཎ་གྲུབ་ཐོབ་ལ། །གསོལ་བ་འདེབས་སོ་བྱིན་གྱིས་རློབས། །གནས་ལྔ་མཐར་ཕྱིན་དངོས་གྲུབ་སྩོལ། །སྲིང་མོ་རྫོང་གི་གཞལ་ཡས་ནས། །རིག་འཛིན་ཉི་མ་གྲགས་པ་སོགས། །དུས་གསུམ་གཏེར་སྟོན་རྒྱ་མཚོ་ལ། །གསོལ་བ་འདེབས་སོ་བྱིན་གྱིས་རློབས། །གྲུབ་པ་ཡ་བརྒྱད་དངོས་གྲུབ་སྩོལ། །རིམ་གཉིས་འབྱོངས་པའི་གཞལ་ཡས་ནས། །ཨུ་རྒྱན་བསྟན་འཛིན་གྲགས་པ་སོགས། །ཐུགས་སྲས་འགྲོ་མགོན་ཐམས་ཅད་ལ། །གསོལ་བ་འདེབས་སོ་བྱིན་གྱིས་རློབས། །དོན་གཉིས་འགྲུབ་པའི་དངོས་གྲུབ་སྩོལ། །རིག་འཛིན་བླ་མའི་བསྟི་གནས་ནས། །སྔགས་འཆང་རྡོ་རྗེ་སྟོབས་མཆོག་སོགས། །རྩ་བརྒྱུད་བླ་མ་ཐམས་ཅད་ལ། །གསོལ་བ་འདེབས་སོ་བྱིན་གྱིས་རློབས། །འཕྲིན་ལས་རབ་འབྱམས་དངོས་གྲུབ་སྩོལ། །ཐབས་དང་ཤེས་རབ་ད་ལ་ནས། །བདུད་འདུལ་མཁའ་འགྲོའི་ལྷ་ཚོགས་སོགས། །འབུམ་ཕྲག་དཔའ་བོ་མཁའ་འགྲོ་ལ། །གསོལ་བ་འདེབས་སོ་བྱིན་གྱིས་རློབས། བསྐྱེད་རྫོགས་མངོན་གྱུར་དངོས་གྲུབ་སྩོལ། །ཅེས་པ་འདི་མདོ་ཁམས་བུ་འབོར་སྒང་གི་ཆ། གེ་སར་གླིང་གི་ཡུལ་དུ་སྔགས་ལྟར་སྤྱོད་བའི་དགེ་སློང་ཛྙཱ་ནའི་མིང་གིས་བསྐུལ་ངོར་རྒྱལ་ཁམས་ཀྱི་སྤྲང་རྒན་རིག་འཛིན་པས་བྲིས་པའོ། །མངྒ་ལཾ།། །།

བདུདའདུལ་དཔལ་གྱི་མཁའ་འགྲོའི་བསྲུང་ཟློག་གི་ངག་འདོན།

བདུདའདུལ་དཔལ་གྱི་མཁའ་འགྲོའི་བསྲུང་ཟློག་གི་ངག་འདོན་བཞུགས། བདུད་འདུལ་ནག་མོའི་བསྲུང་བའི་སྒོམ་བཟླས་ཉམས་སུ་ལེན་པར་འདོད་པས་གོང་གི་བསྒོམ་བཟླས་སྔོན་དུ་བཏང་བའི་རྗེས་ཉིད་དུ་དེ་ཉིད་ཀྱི་ཏིང་ངེ་འཛིན་གྱི་ངང་ནས། ཨཱོཾ་ཡོ་ག་ཤུདྡྷ་སརྦ་དྷརྨཱ་ཡོ་ག་ཤུདྡྷོ྅་ཧཾ། ཞེས་བརྗོད་པས་སྔར་གྱི་རྟེན་དང་བརྟེན་པའི་དམིགས་པ་ཡེ་གསལ་ལ། སླར་ཡང་གསལ་གྱི་ང་རྒྱལ་དྲག་པོས་གསལ་གདབ་སྟེ། དེ་ལྟར་བསྐྱེད་རིམ་ལྷའི་རྣལ་འབྱོར་དང་གཞལ་ཡས་ཁང་སྒོ་གྲུ་རྟ་བབས་སོགས་མཚན་ཉིད་ཐམས་ཅད་ཡོངས་སུ་གསལ་ཞིང་། གཞལ་ཡས་ཀྱི་ཁང་པ་དེ་ཉིད་ཀྱང་གནམ་ལྕགས་ལས་གྲུབ་པའི་ཕོ་བྲང་འཇིགས་ཤིང་བརྗིད་པ། བརྔམ་ཞིང་འཁྲུག་པ། ཚ་ཞིང་སྲེག་པར་གནས་གྱུར་ཏེ། དེའི་ཕྱི་རོལ་དུ་གནམ་ལྕགས་ཀྱི་འཁོར་ལོ་རྩིབས་སྟོང་དང་ལྡན་པ་ཚ་བའི་ཟེར་རྣོ་བའི་ངར་དང་ལྡན་པའི་གུར་ཁང་། དེའི་ཕྱི་རོལ་དུ་གནམ་ལྕགས་ཀྱི་རྡོ་རྗེ་མེ་རབ་ཏུ་འབར་བའི་གུར་ཁང་། དེའི་ཕྱི་རོལ་དུ་གནམ་ལྕགས་ལས་གྲུབ་པའི་གྲི་གུག་མེ་ཤིན་ཏུ་འབར་བའི་གུར་ཁང་། དེའི་ཕྱི་རོལ་དུ་གནམ་ལྕགས་ཀྱི་ཕུར་པ་དབལ་ཤིན་ཏུ་རྣོ་ཞིང་ཁྲོ་ཆུའི་ཚྭ་ཚྭ་འཕྲོ་བའི་གུར་ཁང་། དེའི་ཕྱི་རོལ་དུ་གནམ་ལྕགས་ཀྱི་དགྲ་སྟྭ་འབར་པའི་གུར་ཁང་། དེའི་ཕྱི་རོལ་དུ་གནམ་ལྕགས་ལས་གྲུབ་པའི་ཁ་ཊཱཾ་འབར་བའི་གུར་ཁང་། དེའི་ཕྱི་རོལ་ཏུ་གནམ་ལྕགས་ཞུན་མའི་རལ་གྲི་འབར་པའི་གུར་ཁང་། དེའི་ཕྱི་རོལ་དུ་མེ་རི་དམར་ནག་དྲག་ཏུ་འབར་ཞིང་རབ་ཏུ་འཚིག་པའི་གུར་ཁང་། དེའི་ཕྱི་རོལ་དུ་བསྐལ་པའི་རླུང་ཆེན་པོ་སྤུ་གྲི་འབར་པའི་གུར་ཁང་། དེའི་ཕྱི་རོལ་དུ་སྟོང་ཉིད་སྒྲ་ཡི་གུར་ཁང་། གུར་ཁང་དེ་རྣམས་ཀྱི་བར་མཚམས་དང་དྲ་མིག་རྣམས་ཀྱི་མཚམས་མཚམས་སུ་སྤྲུལ་པའི་མཁའ་འགྲོ་སྐུ་མདོག་སྣ་ཚོགས་ཀྱི་མདོག་ཅན་ཕྱག་ན་སྣ་ཚོགས་འབར་བའི་མཚོན་ཆ་ཐོགས་པ་འཇིགས་ཤིང་བརྔམ་པ། དཔའ་ཞིང་སྒེག་པ་གྲངས་མེད་དཔག་ཏུ་མེད་པ་སྐར་ལྟར་འཁྲུག་ཅིང་གློག་ལྟར་འཁྱུག་པ། ཞལ་ནས་བསྲུང་བའི་སྔགས་སྒྲ་འབྲུག་སྟོང་ལྡིར་བ་ཙམ་དུ་སྒྲོག་པ་སྐུ་ལུས་དང་གཞལ་ཡས་ཁང་གུར་ཁང་དང་བཅས་པ་ཐམས་ཅད་ཚ་ཟེར་རབ་ཏུ་འཁྲུག་པས་གནོད་བྱེད་ལྷ་སྲིན་སྡེ་བརྒྱད་རྒྱལ་བསེན་འབྱུང་པོ་བན་བོན་བྱད་མ་ལྷ་སྲུང་དང་བཅས་པ་ཐམས་ཅད་རྡུལ་དུ་བརླག་པའི་རང་བཞིན་ཅན་དུ་གྱུར། རང་ཉིད་མཁའ་འགྲོའི་གཙོ་མོ་བདུད་འདུལ་མར་གསལ་བའི་སྤྱི་གཙུག་རིགས་བདག་ཡབ་ཡུམ་གྱི་ཐུགས་ཀར་བླ་མ་སློབ་དཔོན། གཡས་སུ་བསྲུང་བྱ་ཕོ་བརྒྱུད། གཡོན་དུ་མོ་རིགས། འོག་ཏུ་ནོར་རྫས། མདུན་དུ་བྲན་གཡོག །རྒྱབ་ཏུ་ཞིང་ཁང་། ཐམས་ཅད་ཀྱང་གཞལ་ཡས་ཁང་དང་ལྷ་དང་ལྷ་མོའི་རང་བཞིན་ལས་གཞན་དུ་མ་གྲུབ་ཅིང་གཉིས་སུ་མི་གནས་པ། གཙོ་མོའི་གནས་རྣམས་དང་བ་སྤུའི་འོད་ཀློང་རེ་རེ་ནས་ཀྱང་སྤྲུལ་པ་དང་ཡང་སྤྲུལ་ཉིང་སྤྲུལ་བསམ་གྱིས་མི་ཁྱབ་པ་འཕྲོ་ཞིང་སྲུང་བའི་ལས་བྱེད་པ། འཁོར་གྱི་མཁའ་འགྲོ་བསྲུང་བའི་ལས་བྱེད་ཐམས་ཅད་ཀྱང་ཞལ་ནང་དུ་གཟིགས་ཤིང་བར་ཆད་བཟློག་པ་དང་དངོས་གྲུབ་སྟེར་བ། རང་གི་ཐུགས་ཀར་འཁོར་ལོས་མཚན་པའི་གྲི་གུག་གི་ལྟེ་བར་ས་བོན་ཧཱུྃ་གི་ཧ་ཁོག་གི་ནང་དུ་རང་དང་བསྲུང་བྱའི་རྣམ་པར་ཤེས་པ་ཡི་གེ་ནྲི་ལྗང་གུ་གསལ་ལ་མདངས་དང་ལྡན་པ་སྣུམ་ལ་འོད་ཟེར་འཚེར་བར་གསལ་བའི་ཧཱུྃ་ལས་འོད་ཟེར་དང་ཁྲོ་ཆུང་གི་ཚོགས་དཔག་ཏུ་མེད་པ་ནམ་མཁའི་ཁམས་གང་བར་སྤྲོས་པས་རྒྱལ་བ་སྲས་དང་བཅས་པའི་ཐུགས་རྗེ་བྱིན་རླབས། སྣང་སྲིད་ལྷ་སྲིན་སྡེ་བརྒྱད་ཀྱི་མཐུ་སྟོབས་དང་ནུས་པ་ཐམས་ཅད་བསྡུས་ནས་བདག་དང་བསྲུང་བྱ་ལ་བསྟིམ། སླར་ཡང་འོད་ཟེར་ཁྲོ་ཆུང་གོང་ལྟར་སྤྲོས་པས་ཕྱི་སྣོད་འབྱུང་བའི་བཅུད་དང་དྭངས་མ། བྱད་མ་དགྲ་བོས་བསྒོམ་པའི་བསྲུང་བའི་འཁོར་ལོ་རྣམས་བཀུག་སྟེ། རང་དང་བསྲུང་བྱ་གུར་ཁང་རྣམས་ལ་བསྟིམས་པས་ཅིས་ཀྱང་མི་ཤིགས་པ་སྲ་ཞིང་མཁྲེགས་པ་རྡོ་རྗེ་ཕ་ལམ་གྱི་རང་བཞིན་དུ་གྱུར། སླར་ཡང་འོད་ཟེར་ཁྲོ་ཆུང་གོང་ལྟར་སྤྲོས་པས། ནང་བཅུད་སྐྱེ་འགྲོ་ཀུན་གྱི་ཚེ་དང་བསོད་ནམས། བྱད་མའི་ཚེ་དང་སྲོག་གི་དྭངས་མ་བསྡུས་ནས་རང་ལ་བསྟིམ་ཞིང་། ཁྱད་པར་དུ་རང་དང་བསྲུང་བྱའི་བླ་ཚེ་ལྷ་སྲིན་སྡེ་བརྒྱད་ཀྱིས་ཁྱེར་བ་རྦོད་གཏོང་མཁན་གྱིས་བཀུག་པ་སོགས་ཀྱིས་འཁྱམས་པ་སྲིད་ན་དེ་རྒྱ་མཚོའི་གླིང་བར་རི་བོའི་ལྕོག་བར་ཉི་ཟླའི་ཐེམ་བར། སྤྲིན་གྱི་གོ་བར། གཤིན་རྗེའི་ལྟོ་བ། ཆུ་སྲིན་གྲེ་བ། བྱད་མའི་ཧོམ་ཁུང་། གཏད་ཀྱི་ལིང་ཁོག་གང་ན་གནས་ཀྱང་ཁྲོ་མོ་རྣམས་ཀྱི་ཡེ་ཤེས་ཀྱི་སྤྱན་གྱིས་གཟིགས་ཏེ་རྫུ་འཕྲུལ་གྱི་སྟོབས་ཀྱིས་ཕྲོགས། ཧཱུྃ་གི་རྣམ་པར་བསྒྱུར་ནས་རང་དང་བསྲུང་བྱའི་སྙིང་གར་ས་བོན་སྔགས་ཕྲེང་ནྲི་ཡིག་དང་བཅས་པ་ལ་ཐིམ་པས་ཆེས་ཆེར་གཟི་བརྗིད་འབར་ཞིང་དྲག་རྩལ་ནུས་མཐུ་ཐོགས་པ་མེད་པ་དང་ལྡན་པར་གྱུར་པར་བསམས་ཤིང་། ཧཱུྃ་བཛྲ་དྷཀྐི་ནི་སིངྷ་མུ་ཥ་ཧ་རི་ནི་ས་བདག་ཅག་བསྲུང་བྱ་མི་ནོར་འཁོར་དང་བཅས་པ་སྲུངས་ཤིག་རཀྵྱ་རཀྵྱ་སིདྡྷི་སྭཱ་ཧཱ༔ ཞེས་བརྒྱ་སྟོང་ཁྲི་འབུམ་སྐབས་དང་བསྟུན་ཏེ་བཟླ། གལ་ཤིན་ཏུ་ཆེ་ན་སྒྲུབ་གཞུང་གི་རྩ་བའི་བསྙེན་གྲངས་བསྐྱལ་བའི་མཇུག་འདི་ཉིད་ལ་འབུམ་བཟླས་ཤིང་། དེ་ནས་རྒྱུན་དུ་བརྒྱ་སྟོང་སོགས་མ་ཆགས་པར་བརྩོན་ན་སངས་རྒྱས་སྟོང་གི་མཐུ་བརྡུགས་པ་སོགས་ཕན་ཡོན་གཞུང་ལས་བཤད་པ་ལྟར་འབྱུང་ངོ་། །བསྲུང་བ་འདིའི་རྗེས་སུ་མཆོད་བསྟོད་བསྡུས་ཙམ་བྱས་ནས་བཟློག་པ་ལ་འཇུག་གོ༈དེ་ནས་བཟློག་པའི་སྒོམ་བཟླས་ལ་འཇུག་པ་ནི། ཧཱུྃ་ཧཱུྃ་ཧཱུྃ་ཞེས་བརྗོད་པ་ཙམ་གྱིས་བསྲུང་འཁོར་གྱི་གཞལ་ཡས་ཁང་དེ་ཉིད་ཀྱང་ཁྲོ་ཆུ་ཞུན་མ་ལས་གྲུབ་པ་བརྔམ་ཞིང་འཁྲུག་པ། སྟོབས་ལྡན་རབ་ཏུ་འཇིགས་པའི་ཕོ་བྲང་དུ་གྱུར་ཏེ། དེའི་ཕྱི་རོལ་དུ་འཁོར་ལོ་རྡོ་རྗེ་གྲི་གུག་ཕུར་བ་དགྲ་སྟྭ་ཁ་ཊྲཱཾ་རལ་གྲི་མེ་རླུང་སྟོང་པ་སྒྲའི་གུར་ཁང་དང་བཅས་པ་ཐམས་ཅད་ཀྱང་། འཁོར་རབ་ཏུ་འཁོར། འཁྲུགས་རབ་ཏུ་འཁྲུགས། འཚེགས་རབ་ཏུ་འཚེགས། སྐྱོད་རབ་ཏུ་བསྐྱོད་པས་གནོད་བྱེད་བྱད་མ་ལྷ་སྲུང་གདོན་བགེགས་འབྱུང་པོ་ཐམས་ཅད་དམར་ཉི་ལི་ལི་གཏུབས། བསྲུང་བའི་བསྒྲུབ་བྱ་ཕོ་མོ་རྣམས་ཁྲོ་བོ་ཁྲོ་མོ་ནོར་རྫས་ཞིང་ཁང་རྣམས་ཀྱང་བཀྲ་ཤིས་པའི་རྫས་བརྒྱད་དང་རྒྱལ་སྲིད་སྣ་བདུན་གྱི་རྣམ་པར་གསལ་ཞིང་། གཙོ་མོའི་སྤྲུལ་པ་འཁོར་ལས་བྱེད་བྱེ་བ་ས་ཡ་མང་པོས་ཞལ་ནས་ཟློག་པའི་དྲག་སྔགས་འབྲུག་སྟོང་ལྡིར་བ་ཙམ་དུ་སྒྲོགས་ཤིང་ཞལ་ཕྱིར་གཟིགས་ནས་ཟློག་པའི་ལས་མཛད་པར་གྱུར། གཙོ་འཁོར་ཐམས་ཅད་ཀྱི་ཐུགས་ཀར་ཐུགས་ཀྱི་ངོ་བོ་རང་རྟགས་ཀྱི་ཕྱག་མཚན་ས་བོན་སོ་སོས་མཚན་པའི་མཐར། ཟློག་པའི་སྔགས་འབྲུ་རྣམས་གཡོན་དུ་དྲག་ཏུ་འཁོར་བ་ལས་སྔགས་ཀྱི་འོད་ཟེར་ཚྭ་ཞིང་རྩུབ་པ་འཕྲོས་པའི་སྣ་ལ་རབ་གཏུམ་འཁྲུགས་པའི་ཁྲོ་མོ་མཚོན་ཆ་མི་བཟད་པ་ཐོགས་པ་འཇིག་རྟེན་གྱི་ཁམས་ཐམས་ཅད་གང་བར་འཕྲོས་པས། བྱད་མ་དགྲ་བོའི་བསྲུང་བའི་གོ་བཤིག །ལྷ་སྲུང་རང་གཤེད་རང་ལ་ཕབ་པས་མཚོན་ཆའི་ཆར་བབས་པས་བླ་སྲོག་རྟེན་དང་བྲལ། དགྲ་བགེགས་བྱད་མ་བན་བོན་ལྷ་སྲུང་ཆོས་བོན་སྐྱོང་བའི་སྡེ་བརྒྱད་ཕྱི་ནང་གསང་བ་དང་བཅས་པ་ཐམས་ཅད་དབང་དུ་བསྡུས་ནས་རང་དབང་མེད་པར་བཀུག །བསྐྲད་གཟིར་མནན་བསྲེགས་གཏུབས་ཏེ་མིང་ཡང་མེད་པར་ཐལ་བའི་རྡུལ་དུ་བརླག །ཚེ་བསོད་ནམས་ནྲི་དང་འོད་ཀྱི་རྣམ་པར་བསྡུས་ཏེ་རང་དང་བསྲུང་བྱ་ལ་བསྟིམས་པས་གཟི་བརྗིད་རྒྱས་པར་གྱུར་པར་བསམས། ཧཱུྃ་བཛྲ་དྷཀྐི་ནི་སིངྷ་མུ་ཥ་ཧ་རི་ནི་ས་ཨ་ཀ་ས་མ་ར་ཙ་ཤ་ད་ར་ཡ་ཧཱུྃ་ཕཊ༔ དགྲ་བགེགས་བྱད་མ་ལྷ་སྲུང་དང་བཅས་པ་ཐམས་ཅད་ནྲི་ཏྲི་མཱ་ར་ཡ་བྷྱོ་བྷྱོ་ཟློག་ཟློག༔ བརྒྱ་སྟོང་ཅི་རིགས་པ་བཟླས་པའི་མཐར། ན་མོ་ཆོས་སྐུ་ཀུན་ཏུ་བཟང་མོ་ལ་ཕྱག་འཚལ་ལོ། །ཆོས་སྐུའི་མཁའ་འགྲོ་བྱེ་བ་འབུམ་གྱི་བཀའ་བདེན་པ། ལོངས་སྐུ་རྡོ་རྗེ་ཕག་མོ་ལ་ཕྱག་འཚལ་ལོ། །ལོངས་སྐུའི་མཁའ་འགྲོ་བྱེ་བ་འབུམ་གྱི་བཀའ་བདེན་པ། སྤྲུལ་སྐུ་སེང་གདོང་ནག་མོ་ལ་ཕྱག་འཚལ་ལོ། །སྤྲུལ་སྐུའི་མཁའ་འགྲོ་བྱེ་བ་འབུམ་གྱི་བཀའ་བདེན་པ། གུ་རུ་རྡོ་རྗེ་དྲག་པོ་ལ་ཕྱག་འཚལ་ལོ། །རིག་འཛིན་དཔའ་བོ་འབུམ་གྱི་བཀའ་བདེན་པ། མཁའ་འགྲོ་ཡེ་ཤེས་མཚོ་རྒྱལ་ལ་ཕྱག་འཚལ་ལོ། །སྤྲུལ་པའི་མཁའ་འགྲོ་རྒྱ་མཚོའི་བཀའ་བདེན་པ། ལོ་ཆེན་ཀླུ་ཡི་དབང་པོ་ལ་ཕྱག་འཚལ་ལོ། །རྒྱ་བོད་མཁས་གྲུབ་རྣམས་ཀྱི་བཀའ་བདེན་པ། རིག་འཛིན་ཉི་མ་གྲགས་པ་ལ་ཕྱག་འཚལ་ལོ། །སྤྲུལ་པའི་གཏེར་སྟོན་རྒྱ་མཚོའི་བཀའ་བདེན་པ། དྲིན་ཆེན་རྩ་བརྒྱུད་བླ་མ་ལ་ཕྱག་འཚལ་ལོ། །དགུ་ལྡན་བརྒྱུད་པའི་བླ་མ་རྣམས་ཀྱི་བཀའ་བདེན་པ། བདུད་འདུལ་ཡེ་ཤེས་ཀྱི་མཁའ་འགྲོ་མ་ལ་ཕྱག་འཚལ་ལོ། །དྲག་མོ་སེང་གདོང་ནག་མོ་སྐུ་འཁོར་དང་བཅས་པའི་སྔགས་དང་ཕྱག་རྒྱ་ཏིང་ངེ་འཛིན་གྱི་བདེན་པའི་མཐུ་ལ་བརྟེན་ནས་བདག་ཅག་མི་ནོར་ཡོན་མཆོད་དམ་བསྲུང་བྱ་འཁོར་དང་བཅས་པ་རྣམས་ལ། སྡང་བར་བྱེད་པའི་དགྲ། གནོད་པར་བྱེད་པའི་བགེགས། བར་དུ་གཅོད་པའི་རྐྱེན། བསམ་ངན་སྦྱོར་རྩུབ་འཆང་བའི་བྱད་མ་ལྷ་སྲུང་། བྱད་ཀ །ཕུར་ཁ། གཏད་ཁ། ཁྲམ་ཁ། རྦད་འདྲེ། རྦོད་གཏོང་། རྨི་ལྟས་མཚན་མ་ངན་པ་བཅས་པ་ཐམས་ཅད། བྷྱོ་བྷྱོ་ཟློག་ཟློག་བྷྱོ་ཟློག་ཅིག །ཕཊ་ཧཱུྃ་ཡ་ར་མ་ས་ར་ད་ཤ་ཙ་ར་མ་ས་ཀ་ཨཿ སྐབས་ལྟར་བཟླས་རྗེས། ཧཱུྃ། གཙོ་འཁོར་སྤྲུལ་པ་ཡང་སྤྲུལ་གྱི། །ཕྱག་ན་སྤུ་གྲི་ཉི་ཟླ་དང་། །གསེར་ཟངས་གནམ་ལྕགས་ཆུ་གྲི་རླུང་། །རྩིབས་སྟོང་ལྡན་པའི་འཁོར་ལོ་འབུམ། །ཉི་ཟླ་ལ་སོགས་ཆ་ལང་བརྡབས། །དགྲ་བགེགས་བྱད་མ་ལྷ་སྲུང་དང་། །བན་བོན་མནན་གཏད་བསམ་ངན་འཆང་། །བྱ་སྒྲོ་མེ་ལ་བཤུར་བ་འམ། །མེ་མདག་འབར་པའི་སྦྲང་བུ་ལྟར། །རྡུལ་དུ་བརླག་ཅིང་རྣམ་ཤེས་ནི། །ཆོས་དབྱིངས་མཁའ་འགྲོའི་དབྱིངས་སུ་སྟིམ། །ས་མ་ཡཱ༔ བྷྱོ་བྷྱོ་ཟློག་ཟློགཿ ཅེས་ཕ་རོལ་གྱི་ཡུལ་དང་རང་གི་འདོད་ལྟར་བཟླ་བར་བྱའོ། །ཞེས་བསྲུང་བཟློག་གི་རིམ་པ་འདི་ཡང་བདག་གཞན་ལ་ཕན་ཕྱིར་ལོ་ཙཱ་བ་བློ་ལྡན་གྱིས་མཛད་པ་ཟུར་རྒྱན་འཁྱེར་བདེ་ལ་ཉི་མ་གྲགས་པས་སྦྱར་བའོ།། །།

བདུད་འདུལ་དཔལ་གྱི་མཁའ་འགྲོའི་སྲུང་བའི་དམིགས་རིམ་ངག་འདོན་གྱི་རིམ་པ་རྡོ་རྗེའི་གོ་ཁྲབ།

བདུད་འདུལ་དཔལ་གྱི་མཁའ་འགྲོའི་སྲུང་བའི་དམིགས་རིམ་ངག་འདོན་གྱི་རིམ་པ་རྡོ་རྗེའི་གོ་ཁྲབ་བཞུགས། གཞལ་ཡས་ཀྱི་ཁང་པ་གནམ་ལྕགས་ལས་གྲུབ་པའི་ཕོ་བྲང་འཇིགས་ཤིང་བརྗིད་པ་བརྔམ་ཞིང་འཁྲུགས་པ་ཚ་ཞིང་བསྲེག་པ་ཞིག་ཏུ་གསལ་བའི་དབུས་སུ་ཆོས་འབྱུང་དམར་ནག་ཟླ་གམ་དྲེགས་བྱེད་ཕོ་མོ་ཐབས་ཤེས་ཉི་ཟླ་པདྨས་བརྒྱན་པའི་སྟེང་དུ། ཐུགས་སྲོག་གི་ཡི་གེ་ཧཱུྃ་གི་འཕྲོ་འདུ་ལས་བྱད་མ་དགྲ་བགེགས་ཐམས་ཅད་ཚར་བཅད། རྒྱལ་བ་རྣམས་ལ་མཉེས་པའི་མཆོད་པ་ཕུལ། ཁྲོ་བོ་ཁྲོ་མོ་ཐམས་ཅད་ཀྱི་ནུས་མཐུ་བསྡུས་ནས་ཧཱུྃ་ལ་ཐིམ། གཟི་བརྗིད་འབར་ཞིང་གནས་གྱུར་པ་ལས། བདག་ཉིད་བདུད་འདུལ་དཔལ་གྱི་མཁའ་འགྲོ་སེང་གེའི་གདོང་པ་ཅན་སྐུ་མདོག་ཆར་སྤྲིན་ལྟར་གནག་པ་ཞལ་གཅིག་ཕྱག་གཉིས་གྲི་ཐོད་ཀྱི་ཕྱག་རྒྱ་དང་དྲག་པོའི་སྤྱན་གསུམ་དང་ལྡན་པ། ཞལ་གདངས་ཤིང་ལྗགས་འདྲིལ་བ་ཞབས་གཉིས་བརྐྱང་བསྐུམ་གྱི་གར་སྟབས་སུ་འགྱིང་ཞིང་དུར་ཁྲོད་ཀྱི་ཆས་དང་དཔལ་གྱི་ཆས་བཅུས་སྤྲས་ཤིང་ཁ་ཊྭཱཾ་ག་ལ་བདེ་བར་འཁྱུད་ཅིང་མེ་དཔུང་དམར་ནག་འཁྲུག་པའི་ཀློང་དཀྱིལ་དུ་བཞུགས་པ་ལ། སྡེ་བརྒྱད་འབུམ་ཕྲག་ཡངས་པའི་མཁའ་འགྲོ་དཔག་ཏུ་མེད་པས་བསྐོར་བར་གྱུར། རང་ཉིད་བདུད་འདུལ་མཁའ་འགྲོར་གསལ་བའི་སྤྱི་གཙུག་གི་རིགས་བདག་ཡབ་ཡུམ་གྱི་ཐུགས་ཀར་བླ་མ་སློབ་དཔོན། དཔལ་གྱི་མཁའ་འགྲོ་མའི་གཡས་ཕྱོགས་སུ་བསྲུང་བྱ་ཕོ་བརྒྱུད། གཡོན་དུ་མོ་རིགས། འོག་ཏུ་ནོར་རྫས། མདུན་དུ་བྲན་གཡོག །རྒྱབ་ཏུ་ཞིང་ཁང་། དེ་ཐམས་ཅད་ཀྱང་གཞལ་ཡས་ཁང་དང་ལྷ་དང་ལྷ་མོའི་རང་བཞིན་དུ་གྲུབ་ཅིང་གཉིས་སུ་མི་གནས་པར་བསྒོམ། གཞལ་ཡས་ཁང་གི་ཕྱི་རོལ་དུ་གནམ་ལྕགས་ཀྱི་འཁོར་ལོ་རྩིབས་སྟོང་དང་ལྡན་པ་ཚ་བའི་ཟེར་རྣོ་བའི་ངར་དང་ལྡན་པའི་གུར་ཁང་། དེའི་ཕྱི་རོལ་དུ་གནམ་ལྕགས་ཀྱི་རྡོ་རྗེ་མེ་རབ་ཏུ་འབར་བའི་གུར་ཁང་། དེའི་ཕྱི་རོལ་དུ་གནམ་ལྕགས་ལས་གྲུབ་པའི་གྲི་གུག་མེ་ཤིན་ཏུ་འབར་བའི་གུར་ཁང་། དེའི་ཕྱི་རོལ་དུ་གནམ་ལྕགས་ཀྱི་ཕུར་པ་དབལ་ཤིན་ཏུ་རྣོ་ཞིང་ཁྲོ་ཆུའི་ཚྭ་ཚྭ་འཕྲོ་བའི་གུར་ཁང་། དེའི་ཕྱི་རིམ་དུ་གནམ་ལྕགས་ཀྱི་དགྲ་སྟྭ་འབར་བའི་གུར་ཁང་། དེའི་ཕྱི་རོལ་དུ་གནམ་ལྕགས་ལས་གྲུབ་པའི་ཁ་ཊྭཱཾ་འབར་བའི་གུར་ཁང་། དེའི་ཕྱི་རོལ་དུ་གནམ་ལྕགས་ཞུན་མའི་རལ་གྲི་འབར་བའི་གུར་ཁང་། དེའི་ཕྱི་རོལ་དུ་མེ་རི་དམར་ནག་དྲག་ཏུ་འབར་ཞིང་འཚེག་པའི་གུར་ཁང་། དེའི་ཕྱི་རོལ་དུ་སྲིད་པའི་རླུང་ཆེན་པོ་སྤུ་གྲི་འབར་བའི་གུར་ཁང་། དེའི་ཕྱི་རོལ་དུ་སྟོང་ཉིད་སྒྲ་ཡི་གུར་ཁང་། གུར་ཁང་དེ་དག་གི་བར་མཚམས་དང་དྲ་མིག་གི་མཚམས་མཚམས་སུ་སྤྲུལ་པའི་མཁའ་འགྲོ་སྐུ་མདོག་སྣ་ཚོགས་ཀྱི་མདོག་ཅན། ཕྱག་ན་སྣ་ཚོགས་འབར་བའི་མཚོན་ཆ་ཐོགས་ཏེ་བརྗིད་ཅིང་བརྔམ་པ་དཔའ་ཞིང་སྒེག་པ་གྲངས་མེད་དཔག་ཏུ་མེད་པ་སྐར་ལྟར་འཁྲུག་ཅིང་གློག་ལྟར་འཁྱུག་པའི་ཞལ་ནས་སྲུང་བའི་སྔགས་སྒྲ་འབྲུག་སྟོང་ལྡིར་བ་ཙམ་དུ་སྒྲོག་པ། སྐུ་ལུས་གཞལ་ཡས་ཁང་གུར་ཁང་དང་བཅས་པ་ཐམས་ཅད་ཚ་ཟེར་དང་སྤྲུལ་པ་རབ་ཏུ་འཁྲུག་པས། གནོད་བྱེད་ལྷ་སྲིན་སྡེ་བརྒྱད་རྒྱལ་བསེན་འབྱུང་པོ་བན་བོན་བྱད་མ་ལྷ་སྲུང་དང་བཅས་པ་ཐམས་ཅད་རྡུལ་དུ་བརླག་པའི་རང་བཞིན་དུ་བསྒོམ། །ཧཱུྃ་བཛྲ་དྷཀྐི་ནི་སིངྷ་མུ་ཥ་ཧ་རི་ནི་ས་བདག་ཅག་བསྲུང་བྱ་མི་ནོར་འཁོར་དང་བཅས་པ་སྲུངས་ཤིག་རཀྵ་རཀྵ་སིདྡྷི་སྭཱ་ཧཱ༔ བརྒྱ་སྟོང་ཁྲི་འབུམ་སྐབས་དང་སྦྱར་ཏེ་བཟླས་པའི་མཇུག་ཏུ་མཆོད་ཅིང་བསྟོད་པར་བྱའོ། །ཞེས་བདུད་འདུལ་མཁའ་འགྲོའི་ལས་སྦྱོར་དང་པོ་སྲུང་བའི་དམིགས་རིམ་གྱི་སྐོར་ངག་གདོན་དུ་བགྱིད་པ་འདི་ནི་རིག་འཛིན་འགྲོ་འདུལ་གླིང་པས་རྣལ་རྒྱལ་དཔལ་འབར་གྱི་བླ་བྲང་དུ་འཕྲལ་དུ་སྦྱར་བའོ།། །།མངྒ་ལཾ། །

བདུད་འདུལ་མཁའ་འགྲོའི་སྒྲུབ་པའི་ཟིན་བྲིས།

རིག་འཛིན་ཆེན་པོ་ཉི་མ་གྲགས་པའི་ཞལ་གདམས་ལས། བདུད་འདུལ་མཁའ་འགྲོའི་སྒྲུབ་པའི་ཟིན་བྲིས་བཞུགས་སོ། །བླ་མ་དང་མཁའ་འགྲོའི་ཚོགས་ལ་ཕྱག་འཚལ་ལོ། །འདིར་བདུད་འདུལ་སེང་གདོང་མཁའ་འགྲོ་སྒྲུབ་པའི་ཟིན་བྲིས་འགོད་པར་བྱ་སྟེ། དེ་ལའང་དངོས་སྒྲུབ་པའི་གནས་དང་ས་བརྟག་སླང་ཐིག་ས་བཅད་དཀྱིལ་འཁོར་མཚོན་བཀྲམ་སྒྲུབ་རྫས་རྣམས་སྒྲུབ་ཐབས་གཞུང་ནས་བཤད་པ་ལྟར་ཡིན་ཏེ་སྒྲུབ་གནས་ནི་གང་ཡང་རུང་། གཟའ་སྐར་འགྲུབ་སྦྱོར་བཟང་པོ་བཀྲ་ཤིས་པའི་དུས་སུ་དཀྱིལ་འཁོར་ཀྱི་ས་བརྟག་སླང་སྒྲུབ་ཆེན་གང་རུང་དང་འབྲེལ་བར་བྱ། ཐིག་སྐུད་ནི་མིའམ་ཁྱི་དཀར་པོའི་རྒྱུ་མས་བྱ། མ་རྙེད་ན་སྐུད་པ་ཡང་རུང་དཀྱིལ་འཁོར་སྒྲུབ་གཞུང་ལྟར་དང་གཏོར་མ་དཔེའུ་རིས་ལྟར་བཅའ་སྒྲུབ་རྟེན་ནི་བདུད་འདུལ་མའི་སྐུ་དར་རས་མཐིང་ཀ་ལ་ལེགས་པར་བྲིས་པའི་སྐུ་རྒྱབ་ལ། བསྙེན་སྒྲུབ་བསྲུང་ཟློག་བསད་པ་སོགས་ཀྱི་སྔགས་རྣམས་རྒྱ་གར་གྱི་ལི་ཁྲིས་བྲི། མ་རྙེད་ན་སིནྡྷུ་ར་དང་མཚལ་སོགས་ཀྱིས་བྲིས། མགོ་ཕྲེང་དང་ཞིང་ལྤགས་ཌཱ་མ་རུ་རྣམས་དངོས་རྟེན་ནམ་ཙཀ་ལི་ལ་བྲིས་པ་བྱ། གཞན་ཡང་སྒྲུབ་རྫས་ཕྱི་ནང་གསང་གསུམ་གྱི་མཆོད་རྫས་རྣམས་ལེགས་པར་བཤམས། དངོས་གཞི་སྒྲུབ་པའི་རིམ་པ་ནི། རྣལ་འབྱོར་པ་བདེ་བའི་སྟན་ལ་འདུག་སྟེ། ཐོག་མར་ཆོས་སྤྱོད་ནས་བཟུང་ལས་བྱང་གཞུང་བསྲང་བསྙེན་པ་བྱེད་པའི་དུས་སུ་གསལ་གདབ་པ་སྔར་བཞིན། རང་ཉིད་བདུད་འདུལ་མཁའ་འགྲོ་སེང་གདོང་མ་སྐུ་མདོག་མཐིང་ནག་དབུ་ཡང་སྐུ་ལུས་དང་མཚུངས་པ་མངོན་རྟོགས་ལྟར་བསྒོམ་པའི་སྤྱི་བོར་བླ་མ་དྲག་པོ་ཐུགས་ཀར་ཡེ་ཤེས་སེམས་དཔའ་རང་འདྲ་བ་སྡེ་བརྒྱད་མཁའ་འགྲོས་བསྐོར་བར་བསྒོམ། ཡན་ལག་གི་ཚིགས་བཞི་ལ་སྒོ་མ་བཞི་གསལ། ཡེ་ཤེས་སེམས་དཔའི་ཐུགས་ཀར་གནམ་ལྕགས་ཀྱི་གྲི་གུག་འཁོར་ལོའི་ཡུ་བ་བྱས་པའི་ལྟེ་བར་ཉི་མའི་གདན་གྱི་སྟེང་དུ་ཧཱུྃ༔ མཐིང་ནག་ཅིག་བསྒོམ༔ དེ་ལ་སྔགས་ཀྱི་ཕྲེང་བ་གཡས་སུ་འཁོར་འོད་ཀྱི་ཕྲེང་ཐག་གཡོན་དུ་འཁོར་བར་བསྒོམ། མདུན་བསྐྱེད་ནི་དཀྱིལ་འཁོར་ལྟར་བསྐྱེད། བསྐྱེད་པའི་རིམ་པ་ཐམས་ཅད་ཨ་འཐས་ཐེར་གཟུགས་མ་ཡིན་པར་ཆུ་ཟླ་འཇའ་ཚོན་ལྟར་སྣང་ལ་རང་བཞིན་མ་གྲུབ་པ་གསལ་སྟོང་དུ་བསྒོམ༔ བསྙེན་པ་བཟླས་པ་ནི་སྔགས་ཀྱི་ཕྲེང་བ་ལས་འོད་ཟེར་འཕྲོས་རང་གི་ཞལ་ནས་ཐོན། མདུན་བསྐྱེད་ཀྱི་ལྷ་ཚོགས་རྣམས་ཀྱི་ཞལ་དུ་ཞུགས། མཉེས་པའི་མཆོད་པ་ཕུལ། དགྱེས་པའི་མདངས་ལས་འོད་ཟེར་དཔག་ཏུ་མེད་པ་འཕྲོས་པས། འོག་མིན་ཆོས་ཀྱི་དབྱིངས་ཀྱི་ཞིང་ཁམས་དང་། ཧེ་རུ་ཀའི་གནས་བཅུ་ནུབ་ཕྱོགས་ཨོ་རྒྱན་གྱི་ཡུལ། ཟངས་མདོག་དཔལ་གྱི་རི་བོ་ལ་སོགས་པ་ཞིང་ཁམས་རྣམས་སུ་བཞུགས་པའི་རྒྱལ་བ་རབ་འབྱམས་ལ་མཉེས་པའི་མཆོད་པ་ཕུལ༔ ཁྲོ་བོ་ཁྲོ་མོ་ཐམས་ཅད་ཀྱི་རྒྱུད་བསྐུལ་བྱིན་རླབས་ཀྱི་སྤྲིན་ཕུང་བདག་མདུན་རྣམས་ལ་སིབ་སིབ་ཐིམ་པས་ཐབས་ཤེས་ཀྱི་བདེ་སྟོང་རྒྱས་ཏེ་ཁ་ཊྭཾ་ཡབ་ཀྱི་ངོ་བོ་སྦས་པ་དང་ཟུང་འཇུག་ཏུ་སྦྱོར་བས་བདེ་སྟོང་གི་ཡེ་ཤེས་རྒྱུད་ལ་སྐྱེས་དབང་དྲག་གི་་ཕྲིན་ལས་ཐམས་ཅད་སྐད་ཅིག་ཉིད་ལ་ཐོབ་པར་བསྒོམ་ཞིང་གནས་ལུགས་ཆོས་ཉིད་ཀྱི་ངང་ནས་བསྙེན་པ་བཟླ། བསྙེན་མཚམས་མཆོད་བསྟོད་བྱ། སྔ་གྲོ་ཉི་མ་དྲོས་ཆེན་ལ་མདའ་དར་བཟུང་ནས་མཁའ་སྤྱོད་དཀར་མོའི་ཚེ་སྒྲུབ་འདོན་བསྙེན་པ་བརྒྱ་ཕྲག་བཟླ་དམིགས་པ་འདོན་ལྟར་བསྒྱུར། མཆོད་བསྟོད་བྱ། སླར་ཡང་རྣམ་པ་གསལ་བ་རྣམ་དག་དྲན་པ་ང་རྒྱལ་བརྟན་པའི་ངང་ནས་བཟླས་པ་བྱ། བཟའ་བཏུང་རྣམས་ཤ་ཁྲག་དང་དམ་རྫས་ཀྱི་མཆོད་པར་དམིགས། སྤྱོད་ལམ་གྱི་དུས་སུ་ཕྲེང་བའམ་རྡོ་རྗེ་གདན་ཐོག་ཏུ་བཞག་མེ་དང་ཉི་མ་རང་ལུས་ཁམས་དང་བསྟུན། ཕྱི་དྲོའི་ཐུན་ལ་གཏོར་གསོས་འབུལ་མཚམས་གཅོད་སྲུང་འཁོར་བཞག་ནས་མཆོད་པ་བྱིན་རླབས་ནས་བཟུང་བསྙེན་པ་དང་དེ་ནས་ཚོགས་བསྐང་བ་དང་། དགོང་མོ་ཆད་ཐོ་བསྟན་མ་གཏོར་བྲོ་བཀྲ་ཤིས་བསྔོ་བ་སྨོན་ལམ་རྣམས་བྱ་དཀྱིལ་འཁོར་བསྡུ་ཆོག་མི་བྱ། སྔོན་འགྲོ་དཀར་བགེགས་ཆད་བསྟན་ཚོགས་ལྷག་རྣམས་དང་པོའི་ཉིན་པར་ཕྱི་རོལ་དུ་འཕངས། དེ་ནས་དཀྱིལ་འཁོར་འགྲམ་དུ་ཕུལ་བསྙེན་གྲངས་མ་སོང་གི་བར་བདུད་འདུལ་མཁའ་འགྲོའི་ང་རྒྱལ་དང་མ་བྲལ་བར་བྱའོ། །སྒྲུབ་པའི་བསྙེན་གྲངས་ཞག་གྲངས་རྟགས་ཚད་ཐེམས་ནས་ཞག་གསུམ་ལ་བསྲུང་བའི་བསྙེན་པ་བཟླ། ཞག་གསུམ་ཟློག་པའི་བསྙེན་པ་ཟླ། ཐུན་འཇུག་ལ་གསང་བའི་ཟློག་སྔགས་ཟླས་ཐལ་མོ་བརྡབ་བོ། ཐུན་མཚམས་རྣམས་སུ་མཆོད་བསྟོད་བྱའོ། །ལར་སྒྲུབ་པའི་དུས་སུ་ཐོད་པའི་གཞལ་ཡས་ཁང་བསྒོམ༔ སྲུང་བའི་དུས་སུ་གནམ་ལྕགས་ཀྱི་གཞལ་ཡས་ཁང་བསྒོམ༔ ཟློག་པའི་དུས་སུ་ཁྲོ་ཆུའི་གཞལ་ཡས་ཁང་བསྒོམ། འདིར་དམིགས་པ་འདོན་སྒོམ་སྦྲགས་པ་གལ་ཆེའོ། །སྒྲུབ་པ་ཐོན་ནས་སྐྱ་རེངས་ཤར་དུས་རྡོ་རྗེ་སྲིན་པོའི་ནམ་ལངས་ཉེ་ཞེས་པས་ཆོ་ག་བཏང་སྒྲུབ་གཏོར་སྒྲུབ་རྟེན་རྣམས་ལ་དབང་བཞིའི་དངོས་གྲུབ་ལེན་ཆོག་བྱ་སྔོན་འགྲོ་གཏོར་མ་ཚོགས་ལྷག་ཆད་བསྟན་རྣམས་གཙང་སར་ཕུལ། དཀྱིལ་འཁོར་བསྡུ་རིམ་བྱ། རྡུལ་ཚོན་སྒྲུབ་གཏོར་གཞན་ལ་མི་སྦྱིན། སླར་ཡང་ཆོ་ག་གཞུང་བཞིན་ཚོགས་བསྐང་རྒྱས་པ་བཏང་སྒྲུབ་པ་མཐའ་རྒྱས་བྱ། ཞག་གཅིག་གཞན་དུ་མི་འགྲོ། གནས་མལ་སྲུང་ཕྱིིན་ཆད་བར་ཆད་མི་འབྱུང་བཀྲ་ཤིས་པ་ཡིན། འདི་ནི་སྟོད་ལས་བྱང་ཆུབ་སྒྲུབ་པའི་ཞལ་གདམས་ཟིན་བྲིས་སུ། །རིག་འཛིན་ཉི་མ་གྲགས་པས་སྦྱར་བའོ། །སརྦ་མངྒ་ལཾ།། །།བདུད་འདུལ་ཡེ་ཤེས་ཀྱི་མཁའ་འགྲོ་མའི་རྒྱུན་འཁྱེར་དང་སྲུང་བཟློག་གི་ངག་འདོན་དཀྱུས་སུ་བཀོད་པ་གནམ་ལྕགས་རྡོ་རྗེ་འབར་བའི་གུར་ཁང་བཞུགས། བདེ་ཆེན་ཆོས་དབྱིངས་ནམ་མཁའ་ལ། །མ་འགགས་ཐུགས་རྗེའི་ཆུ་འཛིན་དཀྲིགས། །མཆོག་ཐུན་སྤྲིན་བཅུད་ཆེར་འབེབས་པའི། །རྩ་གསུམ་རྒྱལ་བ་རྒྱ་མཚོར་འདུད། །དེ་ཡང་ཡེ་ཤེས་ཀྱི་མཁའ་འགྲོ་བདུད་འདུལ་མའི་དབང་ལུང་ཐོབ་ཅིང་མན་ངག་སྤྱི་དང་བྱེ་བྲག་གི་གནད་རྣམས་དམ་པའི་ཞལ་ལུང་ལ་བློ་གྲོས་ཀྱི་འཇུག་པ་ཕྱིན་ཅི་མ་ལོག་ཤིང་དམ་ཚིག་དང་ལྡན་པ་དག་གིས་རྒྱུན་གྱི་རྣལ་འབྱོར་འཁྱེར་བདེ་ངག་འདོན་དུ་བྱ་བ་ལ་ཐོག་མར་སྐྱབས་སེམས་ནི། ཧཱུྃ༔ བདག་ནི་དེང་ནས་བྱང་ཆུབ་བར༔ བླ་མ་དཀོན་མཆོག་དཀྱིལ་འཁོར་ལྷ༔ ཡེ་ཤེས་མཁའ་འགྲོའི་ལྷ་ཚོགས་ལ༔ རྣམ་པ་ཀུན་ཏུ་སྐྱབས་སུ་མཆི༔ དབང་དྲག་ལས་ཀྱི་བྱང་ཆུབ་སེམས༔ དམ་པ་མཆོག་ནི་བསྐྱེད་པར་བགྱི༔ ལན་གསུམ། ཧཱུྃ༔ འཁོར་འདས་གདོད་ནས་སྟོང་པའི་རྩལ། །ཀུན་ཁྱབ་སྙིང་རྗེ་ཆེན་པོའི་ངང་། །རང་རིག་གྲི་གུག་ཧཱུྃ་མཚན་ལས། །འབྱུང་ལྔའི་ད་ལ་ཡུམ་ལྔའི་ཀློང་། །ཁྲག་མཚོ་རུས་པའི་རི་རབ་སྟེང་། །བྷྲཱུྃ་ལས་དྲག་པོའི་གཞལ་ཡས་ཁང་། །མཚན་ཉིད་ཡོངས་རྫོགས་ཕོ་བྲང་དབུས། །རྩིབས་བརྒྱད་ལྟེ་བར་ཆོས་འབྱུང་སྟེང་། །དྲེགས་བྱེད་ཕོ་མོ་པད་ཉིའི་གདན། །ཐུགས་སྲོག་ཧཱུྃ་གི་འཕྲོ་འདུ་ལས། །རང་ཉིད་བདུད་འདུལ་མཁའ་འགྲོ་མ། །སྐུ་མདོག་མཐིང་ནག་སེང་གེའི་གདོང་། །ཞལ་གདངས་ལྗགས་འདྲིལ་མཆེ་བ་གཙིགས། །རལ་པ་ཁམ་ནག་སྤྲིན་ལྟར་གཏིབས། །སྤྱན་གསུམ་སྡང་མིག་རབ་ཏུ་བསྒྲད། །སྨ་ར་སྨིན་མ་དམར་སེར་འབར། །འཁོར་ལོས་མཚན་པའི་གྲི་གུག་གཡས། །ལྕང་ལོས་མཚན་པའི་ཐོད་ཁྲག་གཡོན། །གཡས་བསྐུམ་གཡོན་བརྐྱང་གར་སྟབས་འགྱིངས། །དུར་ཁྲོད་འཇིགས་པའི་ཆས་བརྒྱད་དང་། །གནམ་ལྕགས་སྤུ་གྲིའི་གཤོག་པ་སོགས། །དཔལ་གྱི་ཆས་བཅུ་འབར་བས་བརྒྱན། །ནུ་མ་འབུར་ཞིང་བྷ་ག་རྒྱས། །དཔའ་སྒེག་ཁྲོ་གཏུམ་གཟི་བརྗིད་འབར། །ཁ་ཊྭཱྃ་ག་ལ་བདེ་བས་འཁྱུད། །མེ་དཔུང་དམར་ནག་ཀློང་དཀྱིལ་དུ། །བདེ་སྟོང་ཟུང་དུ་འཇུག་པ་ཡི། །བདག་ཉིད་ཆེན་མོའི་སྤྱི་གཙུགས་ཏུ། །དྲག་རྩལ་མཐིང་ནག་གཡས་རྡོ་རྗེ། །གཡོན་པ་སྡིག་མཛུབ་ཕྱག་རྒྱ་ཅན། །རལ་ཁྲོད་དབང་གི་རྟ་སྐད་འཚེར། །ཕག་མོ་དམར་མོ་གྲི་ཐོད་འཁྲིལ། །ཕག་ཞལ་ངུར་ཞིང་མེ་ཀླུང་བཞུགས། རྩིབས་བརྒྱད་ཏི་ར་པདྨའི་སྟེང་། །རྡོ་རྗེ་རིན་ཆེན་པདྨ་དང་། །ལས་ཀྱི་མཁའ་འགྲོ་ཕྱོགས་ཀྱི་མདོག །གཡས་རྣམས་འཁོར་ལོར་ཁ་ཊྲཱཾ་ག །མེ་ཡི་འཁོར་ལོ་རལ་གྲི་འཕྱར། །གཡོན་རྣམས་ཐོད་ཁྲག་ཐུགས་ཀར་བསྣམས། །དུར་ཁྲོད་ཆས་ལྡན་གར་སྟབས་འགྱིངས། །མེ་དཔུང་ཀློང་དུ་ཁྲོ་གཏུམ་འབར། །མཚམས་བཞིར་དམ་ཚིག་སྣ་ཚོགས་དང་། །འཇིག་རྟེན་ལས་ཀྱི་མཁའ་འགྲོ་བཞི། །ཉི་ཟླ་གསེར་ཟངས་གནམ་ལྕགས་ཀྱི། །རྩིབས་སྟོང་འཁོར་ལོ་ཆ་ལང་བརྡེབ། །ཕྱེད་གཟུགས་མདངས་ལྡན་ཁྲོ་གཏུམ་འབར། །སྒོ་བཞིར་ཁ་གདོང་ཕག་གདོང་དང་། །ཁྱི་གདོང་འུག་པའི་གདོང་ཅན་བཞི། །གཡས་རྣམས་རང་མདོག་ཅང་ཏེ་འཁྲོལ། །གཡོན་རྣམས་རང་རྟགས་ཕྱག་མཚན་འཛིན། །ཁ་ཊྲཱཾ་གར་འཁྱུད་བརྐྱང་བསྐུམ་བཞུགས། །གཞན་ཡང་འབུམ་ཕྲག་མཁའ་འགྲོའི་ཚོགས། །ཉི་ཟེར་རྡུལ་འཚུབ་ལྟར་གསལ་བའི། །གནས་གསུམ་ལས་འཕྲོས་འོད་ཟེར་གྱིས། རང་བཞིན་ཞིང་ཁམས་རྒྱ་མཚོ་ནས། ཡེ་ཤེས་སེམས་དཔའ་རང་འདྲ་བ། །ཆར་སྤྲིན་གཏིབས་ལྟར་བྱོན་པར་གྱུར། །ཧཱུྃ༔ འོག་མིན་མཁའ་སྤྱོད་ཨོ་རྒྱན་ཡུལ། །གནས་ཡུལ་དུར་ཁྲོད་ཐམས་ཅད་ནས། །ཡེ་ཤེས་མཁའ་འགྲོ་འཁོར་དང་བཅས། །དང་པས་སྤྱན་འདྲེན་གནས་འདིར་གཤེགས། །གཉིས་མེད་བརྟན་པ་ཆེན་པོར་བཞུགས། །ཞིང་རྡུལ་གྲངས་མཉམ་སྤྲུལ་ཕྱག་འཚལ། །ཕུང་ལྔ་འབྱུང་ལྔ་འདོད་ཡོན་ལྔ། །ཤ་ལྔ་བདུད་རྩི་སྨན་གཏོར་རཀ །དགྲ་བགེགས་བསྒྲལ་བའི་ཤ་རུས་ཁྲག །ཞག་གླད་ཚིལ་རྐང་ནང་ཁྲོལ་དང་། །སྣང་གྲག་འགྱུ་བའི་རྟོག་ཚོགས་སོགས། །ཕྱི་ནང་གསང་མཆོད་ཞིང་ཁྱབ་འབུལ། །ཧཱུྃ་བཛྲ་དྷཀྐི་ནི་སིངྷ་མུ་ཥ་ཧ་རི་ནི་ས་ས་པཱ་རི་ཝ་ར་སརྦ་པཱུ་ཛ་ཁཱ་ཧི། ཧཱུྃ༔ ཁྱབ་གསལ་བརྗོད་བྲལ་ཡེ་དབྱིངས་ལས། །སྐུ་གསུམ་མཁའ་འགྲོ་གཟུགས་སྐུའི་ཟླ། །གདུལ་བྱའི་ཆུ་མཚོར་འགོག་མེད་དུ། །གྲངས་མེད་དེར་མཐུན་འཆར་ལ་བསྟོད། །འགག་མེད་ཐུགས་རྗེའི་སྤྲིན་ཕུང་ལས། །འཕྲིན་ལས་རྣམ་བཞིའི་ཆར་ཆེན་པོས། །གྲུབ་གཉིས་འབྲས་བཟང་སྨིན་མཛད་པའི། །རིགས་ཀྱི་མཁའ་འགྲོ་རྣམས་ལ་འདུད། །མཐུ་སྟོབས་རྡོ་རྗེའི་མེ་ཆར་གྱིས། །ལོག་འདྲེན་བདུད་སྡེའི་བྲག་གི་རི། །ཕྱེ་མར་འཐགས་མཛད་མཁའ་འགྲོའི་ཚོགས། །འཁོར་དང་བཅས་ལ་གུས་པས་བསྟོད། །རྟེན་དང་བརྟེན་པར་བཅས་པ་ཀུན། །སྣང་སྟོང་གཉིས་མེད་དག་པའི་སྐུའི། །སྤྱི་བོར་འཁོར་ལོ་རྩིབས་བཞིར་ཨཱོཾ། །མགྲིན་པར་པདྨའི་ལྟེ་བར་ཨཱཿ ། སྙིང་གར་རྡོ་རྗེ་རྒྱ་གྲམ་གྱི། །དབུས་སུ་རང་རྟགས་གྲི་གུག་གི། ལྟེ་བར་ཉི་མར་གཙོ་མོ་དང་། །རིགས་བདག་ཡབ་ཀྱི་ཐུགས་ཀར་ཧཱུྃ། །འཁོར་བཞིར་ཧ་རི་ནི་སས་མཚན། །ཕག་མོ་ཤུགས་འགྲོར་བཅས་པར་མ། དེ་རྣམས་མཐའ་མར་བཟླས་པའི་སྔགས། །འོད་དམར་ཚ་བའི་འཕྲེང་ཐག་ཅན། །སྔགས་གཡས་ཕྲེང་ཐག་གཡོན་སྐོར་དུ། །འཁོར་བས་རིགས་བདག་ཡབ་ཡུམ་གྱིས། །འབུམ་ཕྲག་མཁའ་འགྲོ་དབང་དུ་བསྡུས། །བདུད་འདུལ་ནག་མོས་མོ་བརྒྱུད་ཀུན། །ལས་ལ་བཀོལ་ཏེ་དྷཀྐིའི་སྲོག །ཡིག་འབྲུ་རྣམས་ཀྱིས་བརྒྱུད་བསྐུལ་བས། །བདག་གི་དབང་དུ་ཀུན་འདུས་ནས། །ཅི་བཅོལ་ལས་བྱེད་དངོས་གྲུབ་སྩོལ། །སྔགས་ཀྱི་འོད་ཟེར་འཕྲོ་འདུ་ཡིས། །རྒྱལ་བ་ཀུན་མཆོད་འགྲོ་སྒྲིབ་སྦྱངས། །དགྲ་བགེགས་ཚར་བཅད་མཆོག་ཐུན་གྱི། །ལེགས་ཚོགས་དཔལ་ལ་སྤྱོད་པར་བསམ། །རྩ་བའི་བསྙེན་སྒྲུབ་ཀྱི་སྔགས་ནི། ཧཱུྃ་བཛྲ་དྷཀྐི་ནི་སིངྷ་མུ་ཥ་ཧ་རི་ནི་ས་སརྦ་ས་མ་ཡ་ཙིཏྟ་ཧྲིང་ཛ་སིདྡྷི་ཧཱུྃ༔ མང་ཉུང་སྐབས་མཐུན་ལྟར་བཟླས་པའི་མཇུག་ཏུ། །བཛྲ་པུཥྤེ། དྷུ་པེ། ཨཱ་ལོ་ཀེ། གནྡྷེ། ནཻ་ཝི་དྱ། ཤཔྟ་མ་ཧཱ་སརྦ་པཉྩ་རཀྟ་བྷ་ལིངྟ་པཱུ་ཛ་ཁ་ཁ་ཁཱ་ཧི་ཁཱ་ཧི། ཧཱུྃ༔ ཆོས་སྐུའི་བདག་ཉིད་སྐུ་གསུམ་མཁའ་འགྲོའི་གཙོ༔ ཡེ་ཤེས་ལས་གྲུབ་དབྱིངས་ཀྱི་དྷཀྐི་མ༔ བདུད་དང་མུ་སྟེགས་ལོག་འདྲེན་དགྲ་བགེགས་གཤེད༔ བདུད་འདུལ་སེང་གདོང་མཁའ་འགྲོར་ཕྱག་འཚལ་བསྟོད༔ དེ་ནས་བསྲུང་བའི་སྒོམ་བཟླས་ལ་འཇུག་པར་འདོད་ན། ཨཱོཾ་ཡོ་ག་ཤུདྡྷཿསརྦ་དྷརྨཱཿཡོ་ག་ཤུདྡྷོ྅་ཧཾ༔ ཞེས་བརྗོད་པས་སྔར་གྱི་དམིགས་པ་ཡང་ཡང་གསལ་བཏབ་ཏེ། དེ་ལྟར་བསྐྱེད་རིམ་ལྷ་ཡི་རྣལ་འབྱོར་དང་། གཞན་ཡང་གཞལ་ཡས་ཀྱི་ཁང་པ་སྒོ་གྲུ་རྟ་བབས་སོགས་མཚན་ཉིད་ཐམས་ཅད་ཡོངས་སུ་རྫོགས་པ་དེ་ཉིད་གནམ་ལྕགས་ལས་གྲུབ་པའི་ཕོ་བྲང་འཇིགས་ཤིང་བརྗིད་ལ། རྔམ་ཞིང་འཁྲུགས་པ། །ཚ་ཞིག་བསྲེགས་པར་གནས་གྱུར་ཏེ། དེའི་ཕྱི་རོལ་དུ་གནམ་ལྕགས་ཀྱི་འཁོར་ལོ་རྩིབས་སྟོང་དང་ལྡན་པ་ཚ་བའི་ཟེར་རྣོ་བའི་ངར་དང་ལྡན་པའི་གུར་ཁང་། དེའི་ཕྱི་རོལ་དུ་གནམ་ལྕགས་ཀྱི་རྡོ་རྗེ་མེ་རབ་ཏུ་འབར་བའི་གུར་ཁང་། དེའི་ཕྱི་རོལ་དུ་གནམ་ལྕགས་ལས་གྲུབ་པའི་གྲི་གུག་མེ་ཤིན་ཏུ་འབར་བའི་གུར་ཁང་། དེའི་ཕྱི་རོལ་དུ་གནམ་ལྕགས་ཀྱི་ཕུར་པ་དབལ་ཤིན་ཏུ་རྣོ་ཞིང་ཁྲོ་ཆུའི་ཚྭ་ཚྭ་འཕྲོ་བའི་གུར་ཁང་། དེའི་ཕྱི་རོལ་དུ་གནམ་ལྕགས་ཀྱི་དགྲ་སྟྭ་འབར་བའི་གུར་ཁང་། དེའི་ཕྱི་རོལ་དུ་གནམ་ལྕགས་ལས་གྲུབ་པའི་ཁ་ཊྲཱཾ་འབར་བའི་གུར་ཁང་། དེའི་ཕྱི་རོལ་དུ་གནམ་ལྕགས་ཞུན་མའི་རལ་གྲི་འབར་པའི་གུར་ཁང་། དེའི་ཕྱི་རོལ་དུ་མེ་རི་དམར་ནག་དྲག་ཏུ་འབར་ཞིང་རབ་ཏུ་འཚེགས་པའི་གུར་ཁང་། དེའི་ཕྱི་རོལ་དུ་བསྐལ་པའི་རླུང་ཆེན་པོ་སྤུ་གྲི་འབར་བའི་གུར་ཁང་། དེའི་ཕྱི་རོལ་དུ་བྱད་མ་དགྲ་བགེགས་ཐམས་ཅད་སོད་ཆོད་གཏུབས་ཤིག་ལ་སོགས་པའི་སྟོང་ཉིད་སྒྲ་ཡི་གུར་ཁང་། གུར་ཁང་དེ་རྣམས་ཀྱི་བར་མཚམས་དང་དྲ་མིག་རྣམས་ཀྱི་མཚམས་མཚམས་རྣམས་སུ། སྤྲུལ་པའི་མཁའ་འགྲོ་སྐུ་མདོག་སྣ་ཚོགས་ཀྱི་མདོག་ཅན་ཕྱག་ན་སྣ་ཚོགས་འབར་པའི་མཚོན་ཆ་ཐོགས་པ། འཇིགས་ཤིང་རྔམས་པ། དཔའ་ཞིང་སྒེག་པ་གྲངས་མེད་དཔག་ཏུ་མེད་པ་སྐར་ལྟར་འཁྲུག་ཅིང་ཀློག་ལྟར་འཁྱུགས་པ། ཞལ་ནས་བསྲུང་བའི་སྔགས་སྒྲ་འབྲུག་སྟོང་ལྡིར་བ་ཙམ་དུ་སྒྲོགས་པ། སྐུ་ལུས་གཞལ་ཡས་ཁང་གུར་ཁང་དང་བཅས་པ་ཐམས་ཅད་ཀྱི་ཚ་ཟེར་རབ་ཏུ་འཁྲུགས་པས་གནོད་བྱེད་ལྷ་སྲིན་སྡེ་བརྒྱད་རྒྱལ་བསེན་འབྱུང་པོ་བན་བོན་བྱད་མ་ལྷ་སྲུང་དང་བཅས་པ་ཐམས་ཅད་རྡུལ་ཕྲན་དུ་བརླག་པའི་རང་བཞིན་ཅན་དུ་གྱུར། རང་ཉིད་མཁའ་གྲོའི་གཙོ་མོ་བདུད་འདུལ་མར་གསལ་བའི་སྤྱི་གཙུག་རིགས་བདག་ཡབ་ཡུམ་གྱི་ཐུགས་ཀར་བླ་མ་སློབ་དཔོན། གཡས་སུ་བསྲུང་བྱ་ཕོ་རྒྱུད། གཡོན་དུ་མོ་རིགས། འོག་ཏུ་ནོར་རྫས། མདུན་དུ་བྲན་གཡོག །རྒྱབ་ཏུ་ཞིང་ཁང་། དེ་ཐམས་ཅད་ཀྱང་གཞལ་ཡས་ཁང་ལྷ་དང་ལྷ་མོའི་རང་བཞིན་ལས་གཞན་དུ་མ་གྲུབ་ཅིང་གཉིས་སུ་མི་གནས་པ། གཙོ་མོའི་གནས་རྣམས་དང་བ་སྤུའི་འོད་ཀློང་རེ་རེ་ནས་ཀྱང་སྤྲུལ་པ་དང་ཡང་སྤྲུལ་ཉིང་སྤྲུལ་བསམ་གྱིས་མི་ཁྱབ་པ་འཕྲོ་ཞིང་བསྲུང་བའི་ལས་བྱེད་པ། འཁོར་གྱི་མཁའ་འགྲོ་སྤྲུལ་པའི་ལས་བྱེད་ཐམས་ཅད་ཀྱང་ཞལ་ནང་དུ་གཟིགས་ཤིང་བར་ཆད་བཟློག་པ་དང་དངོས་གྲུབ་སྟེར་བ། རང་གི་ཐུགས་ཀར་འཁོར་ལོས་མཚན་པའི་གྲི་གུག་གི་ལྟེ་བར་ས་བོན་ཧཱུྃ་གི་ཧ་ཁོག་གི་ནང་དུ་རང་དང་བསྲུང་བྱའི་རྣམ་པར་ཤེས་པ་ཡི་གེ་ནྲི་ལྗང་གུ་གསལ་ལ་མདངས་དང་ལྡན་པ་སྣུམ་ལ་འོད་ཟེར་འཚེར་བར་གསལ་བའི་ཧཱུྃ་ལས་འོད་ཟེར་དང་ཁྲོ་ཆུང་གི་ཚོགས་དཔག་ཏུ་མེད་པ་ནམ་མཁའི་ཁམས་གང་བར་སྤྲོས་པས་རྒྱལ་བ་སྲས་དང་བཅས་པའི་ཐུགས་རྗེ་དང་བྱིན་རླབས། སྣང་སྲིད་ལྷ་སྲིན་སྡེ་བརྒྱད་ཀྱི་མཐུ་སྟོབས་དང་ནུས་པ་ཐམས་ཅད་བསྡུས་ནས་བདག་དང་བསྲུང་བྱ་ལ་བསྟིམ། སླར་ཡང་འོད་ཟེར་དང་ཁྲོ་ཆུང་གོང་ལྟར་སྤྲོས་པས་ཕྱི་སྣོད་འབྱུང་བའི་བཅུད་དང་དངས་མ། བྱད་མ་དགྲ་བོས་བསྒོམས་པའི་བསྲུང་བའི་འཁོར་ལོ་རྣམས་བཀུག་སྟེ་རང་དང་བསྲུང་བྱ་གུར་ཁང་རྣམས་ལ་བསྟིམས་པས་ཅིས་ཀྱང་མི་ཤིགས་པ་སྲ་ཞིང་མཁྲེགས་པ་རྡོ་རྗེ་ཕ་ལམ་གྱི་རང་བཞིན་དུ་གྱུར། སླར་ཡང་འོད་ཟེར་དང་ཁྲོ་ཆུང་གོང་ལྟར་སྤྲོས་པས་ནང་བཅུད་སྐྱེ་འགྲོ་ཀུན་གྱི་ཚེ་དང་བསོད་ནམས་བྱད་མའི་སྲོག་དང་ཚེའི་དངས་མ་བསྡུས་ནས་རང་ལ་བསྟིབ་ཞིང་ཁྱད་པར་དུ་རང་དང་བསྲུང་བྱའི་བླ་ཚེ་ལྷ་སྲིན་སྡེ་བརྒྱད་ཀྱིས་ཁྱེར་བ། རྦོད་གཏོང་མཁན་གྱིས་བཀུགས་བ་སོགས་ཀྱིས་འཁྱོམས་སྲིད་ན། དེ་ཉིད་རྒྱ་མཚོའི་གླིང་བར། རི་བོའི་ལྕོག་བར། ཉི་ཟླའི་ཐེབ་བར། སྤྲིན་གྱི་གོ་དབར། གཤིན་རྗེའི་ལྟོ་བ། ཆུ་སྲིན་གྱི་གྲེ་བ། བྱེད་མའི་ཧོམ་ཁུང་། གཏད་ཀྱི་ལིང་ཁོག་གང་ན་གནས་ཀྱང་ཁྲོ་མོ་རྣམས་ཀྱི་ཡེ་ཤེས་ཀྱི་སྤྱན་གྱིས་གཟིགས་ཏེ་རྫུ་འཕྲུལ་གྱི་སྟོབས་ཀྱིས་ཕྲོག་ཧཱུྃ་གི་རྣམ་པས་བྱས་ནས་རང་དང་བསྲུང་བྱའི་སྙིང་ཁའི་ས་བོན་སྔགས་ཕྲེང་ནྲི་ཡིག་དང་བཅས་པ་ལ་ཐིམས་པས་ཆེས་ཆེར་གཟི་བརྗིད་འབར་ཞིང་དྲག་རྩལ་ནུས་མཐུ་ཐོགས་པ་མེད་པ་དང་ལྡན་པར་གྱུར་པར་བསམ་ཞིང་། ཧཱུྃ་བཛྲ་དྷཀྐི་ནི་སིངྷ་མུ་ཁ་ཧ་རི་ནི་ས་བདག་ཅག་བསྲུང་བྱ་མི་ནོར་འཁོར་དང་བཅས་པ་སྲུངས་ཤིག་རཀྵ་རཀྵ་སིདྡྷི་སྭཱ་ཧཱ༔ ཧཱུྃ་བཛྲ་དྷཀྐི་ནི་སིངྷ་མུ་ཁ་ཧ་རི་ནི་ས་བཛྲ་ཧ་དེ་དུ་ལིང་ནག་མོས་སྲུངས༔ ཨེ་བུ་ཏ་མ་ཕཊ༔ བསྲུང་བཟློག་འདོན་བསྒྲིགས་ཚོར་བསྲུང་བའི་སྔགས་རྗེས་མ་འདི་ཆེར་མེད་པ་འདྲ་ཞིག་འདུག་ཀྱང་ཟབ་གནད་ཆེ་བས་འདིར་བཀོད་པ་ཡིན་པས་སྔགས་འདི་རྣམས་བརྒྱ་སྟོང་ཁྲི་འབུམ་སྐབས་བསྟུན་བཟླ་བར་བྱ་ཞིང་ཐུན་མཚམས་སུ་མཆོད་བསྟོད་གོང་ལྟར་བྱའོ། །དེ་ནས་བཟློག་པའི་འདོན་སྒོམ་ནི། ཧཱུྃ་ཧཱུྃ་ཧཱུྃ། ཞེས་བརྗོད་པ་ཙམ་གྱིས་བསྲུང་བའི་གཞལ་ཡས་ཁང་དེ་ཉིད་ཀྱང་ཁྲོ་ཆུ་ཞུན་མ་ལས་གྲུབ་པ་རྔམ་ཞིང་འཁྲུགས་པ་སྟོབས་ལྡན་རབ་ཏུ་འཇིགས་པའི་ཕོ་བྲང་དུ་གྱུར་ཏེ། དེའི་ཕྱི་རོལ་གྱི་འཁོར་ལོ། རྡོ་རྗེ། གྲི་གུག །ཕུར་པ། དགྲ་སྟྭ། ཁ་ཊྲཱཾ། རལ་གྲི། མེ། རླུང་། སྟོང་པ་སྒྲ་ཡི་གུར་ཁང་དང་བཅས་པ་ཐམས་ཅད་ཀྱང་འཁོར་རབ་ཏུ་འཁོར། འཁྲུག་རབ་ཏུ་འཁྲུགས། འཚེག་རག་ཏུ་འཚེགས། སྐྱོད། རབ་ཏུ་བསྐྱོད་པས་གནོད་བྱེད་བྱད་མ་ལྷ་སྲུང་གདོན་བགེགས་འབྱུང་པོ་ཐམས་ཅད་དམར་ཉལ་ཉལ་གཏུབས། བསྲུང་བའི་སྒྲུབ་བྱ་ཕོ་མོ་རྣམས་ཁྲོ་བོ་དང་ཁྲོ་མོ། ནོར་རྫས་ཞིང་ཁང་རྣམས་བཀྲ་ཤིས་པའི་རྫས་དང་། རྒྱལ་སྲིད་རིན་པོ་ཆེའི་རྣམ་པར་གསལ་ཞིང་། གཙོ་མོའི་སྤྲུལ་པ་འཁོར་ལས་བྱེད་བྱེ་བ་ས་ཡ་མང་པོའི་ཞལ་ནས་ཟློག་པའི་དྲག་སྔགས་འབྲུག་སྟོང་ལྡིར་བ་ཙམ་དུ་སྒྲོག་ཅིང་ཞལ་ཕྱིར་གཟིགས་ནས་བཟློག་པའི་ལས་མཛད་པར་གྱུར། གཙོ་འཁོར་ཐམས་ཅད་ཀྱི་ཐུགས་ཀར་ཐུགས་ཀྱི་ངོ་བོ་རང་རྟགས་ཀྱི་ཕྱག་མཚན་ས་བོན་སོ་སོས་མཚན་པའི་མཐར་བཟློག་པའི་སྔགས་རྣམས་གཡོན་སྐོར་དུ་དྲག་ཏུ་འཁོར་བ་དེ་ལས་འོད་ཟེར་ཚ་ཞིང་རྩུབ་པ་འཕྲོས་པའི་སྣེ་ལ་རབ་གཏུམ་འཁྲུགས་པའི་ཁྲོ་མོ་མཚོན་ཆ་མི་བཟད་པ་ཐོགས་པ་འཇིག་རྟེན་གྱི་ཁམས་གང་བར་འཕྲོས་པས་བྱད་མ་དགྲ་བོའི་བསྲུང་བའི་གོ་བཤིག །ལྷ་བསྲུང་རང་གཤེད་ཕབས་ཏེ་མཚོན་ཆའི་ཆར་བབས་པས་བླ་སྲོག་རྟེན་དང་ཕྲལ། དགྲ་བགེགས་བྱད་མ་བན་བོན་ལྷ་བསྲུང་ཆོས་བོན་སྐྱོང་བའི་སྡེ་བརྒྱད་ཕྱི་ནང་གསང་བ་དང་བཅས་པ་ཐམས་ཅད་དབང་དུ་བསྡུས་ནས་རང་དབང་མེད་པར་བཀུག །བསྐྲད་གཟིར་མནན་བསྲེག་གཏུབས་ཏེ་མིང་ཡང་མེད་པར་ཐལ་བའི་རྡུལ་དུ་བཏང་། ཚེ་བསོད་རྣམས་ནྲི་ཡིག་དང་འོད་ཀྱི་རྣམ་པར་བྱས་ཏེ་རང་དང་བསྲུང་བྱར་བསྟིམས་པས་བཀྲག་མདངས་གཟི་བརྗིད་རྒྱས་པར་གྱུར་པར་བསམ་ལ། ཧཱུྃ་བཛྲ་དྷཀྐི་ནི་སིངྷ་མུ་ཥ་ཧ་རི་ནི་ས་ཨ་ཀ་ས་མ་ར་ཙ་ཤ་ད་ར་ཡ་ཧཱུྃ་ཕཊཿ དགྲ་བགེགས་བྱད་མ་ལྷ་བསྲུང་དང་བཅས་པ་ཐམས་ཅད་ནྲི་ཏྲི་མཱ་ར་ཡ་བྷྱོ་བྷྱོ་ཟློག་ཟློག༔ ཅི་ནུས་བཟླས་མཐར། གཙོ་འཁོར་སྤྲུལ་པ་ཡང་སྤྲུལ་ཐམས་ཅད་ཀྱི་ཕྱག་གཡས་གཡོན་རྣམས་སུ་གནམ་ལྕགས་ཀྱི་འཁོར་ལོ་རྩིབས་སྟོང་དང་ལྡན་པ་དང་། གསེར་གྱི་འཁོར་ལོ་རྩིབས་སྟོང་དང་ལྡན་པ་དང་། ཟངས་ཀྱི་འཁོར་ལོ་རྩིབས་སྟོང་དང་ལྡན་པ་དང་། གནམ་ལྕགས་ལས་གྲུབ་པའི་སྤུ་གྲི་འབར་པའི་འཁོར་ལོ་རྩིབས་སྟོང་དང་ལྡན་པ་དང་། གསལ་བྱེད་ཉི་ཟླའི་དཀྱིལ་འཁོར་ལ་སོགས་ཐོགས་པ་རྣམས་ཆ་ལང་རྡེབ་པའི་བར་དུ་དགྲ་བགེགས་བྱད་མ་ལྷ་སྲུང་བན་བོན་ངན་པའི་ཚོགས་ཐམས་ཅད་དམར་ཕྲུ་ལུ་ལུར་བཅང་བས་ཤ་ཚལ་པ་ཁྲག་ཐིགས་པ་གཅིག་ཀྱང་མ་ལུས་པར་བྱ་སྒྲོ་མེ་ལ་བཤུར་བའམ་ཐལ་བ་རླུང་ལ་ཕྱར་བ་ལྟར་སོང་བར་གྱུར། ན་མོ། མཆོག་གསུམ་རྒྱལ་བ་རྒྱ་མཚོ་རྩ་བ་དང་བརྒྱུད་པར་བཅས་པའི་དཔལ་ལྡན་བླ་མ་དམ་པ་རྣམས་དང་ཡི་དམ་དཀྱིལ་འཁོར་གྱི་ལྷ་ཚོགས་ཁྱད་པར་དུ་བདུད་སྡེའི་གཤེད་དུ་ཁྲོས་པ་དྲག་མོ་སེང་གེའི་གདོང་པ་ཅན་འཁོར་ཚོགས་སྤྲུལ་པ་ཡང་སྤྲུལ་དམ་ཅན་རྒྱ་མཚོའི་ཚོགས་དང་བཅས་པ་རྣམས་ཀྱི་བཀའ་བདེན་པ་དང་། རིག་འཛིན་བདག་གི་སྔགས་དང་ཕྱག་རྒྱ་ཏིང་ངེ་འཛིན་གྱི་བདེན་པའི་ནུས་མཐུ་ལ་བརྟེན་ནས། བདག་ཅག་དཔོན་སློབ་ཡོན་མཆོད་འཁོར་དང་བཅས་པ་རྣམས་ལ་སྔོན་གྱི་ལས་དང་འཕྲལ་གྱི་རྐྱེན་ལས་བྱུང་བའི་ནད་གདོན་བར་ཆད། ཆགས་ཆེ་ཉམ་ང་། ལོ་ཟླ་ཞག་དུས་ཀྱི་ཀེག་སྲི། དངོས་ཉམས་རྨི་ལམ་དུ་རྟགས་མཚན་རྟེན་འབྲེལ་ངན་པ། བྱུར་དང་བཀལ་ཡུག་བཀྲ་མི་ཤིས་པའི་མཚན་ངན་ཐམས་ཅད་དང་། ཕ་རོལ་གྱི་བན་བོན་སྔགས་པས་བཏང་བའི་རྦད་འདྲེ་རྦད་གཏོང་རིགས་སྔགས་ཀྱི་སྦྱོར་བས་ཧོམ་ལ་བསྲེགས་པ། རླུང་ལ་བསྐོར་བ་ཆུ་ལ་བསྐྱུར་བ། ས་ལ་མནན་པ་སོགས་ཀྱི་ནུས་པ་ཐམས་ཅད་དང་། བཙུན་པ་སྔགས་པ་བོན་པོ་སོགས་ལམ་ཉེས་པ་དམ་སྲི་འགོང་པོར་གྱུར་པའི་བསམ་ངན་སྦྱོར་རྩུབ་ཀྱི་མཐུ་ཐམས་ཅད་བྱད་མ་མཁན་པོ་ཁོ་རང་རྣམས་ཀྱི་སྟེང་དུ་བྷྱོ་བྷྱོ་ཟློག་ཟློག་བྷྱོ་ཟློག་ཅིག །ཐལ་མོ་ལན་དགུ་འམ་གསུམ་དུ་བརྡབ་ཅིང་བདེན་བརྗོད་ཀྱི་གྲངས་ཀྱང་དེ་དང་མཐུན་པར་བྱའོ། །ཕཊ་ཧཱུྃ་ཡ་ར་མ་ས་ར་ད་ཤ་ཙ་ར་མ་ས་ཀ་ཨ༔ ཉུང་ཙམ་བཟླའོ། ཏིང་འཛིན་སྔགས་དང་ཕྱག་རྒྱ་བདེན་ནུས་ཀྱིས། །རྦད་འདྲེ་རྦོད་གཏོང་བྱད་མའི་ནུས་པ་ཀུན། །རང་གཤེད་ལ་ཕབ་རྡུལ་དུ་བཤིགས་བྱས་ནས། །རྣམ་ཤེས་དབྱིངས་ཐིམ་གདོད་མའི་ས་ཐོབ་གྱུར། ཨ་ཨ། ཅེས་བརྗོད་ཅིང་དགོངས་པ་ཅུང་ཟད་བསྐྱང་ངོ་། །དེ་ལྟར་བསྲུང་བཟློག་ལ་བརྩོན་པར་བགྱིས་ན་གནས་སྐབས་མཐའ་ཐུག་གི་ཕན་ཡོན་མཐའ་དག་གཞུང་བཤད་ཇི་བཞིན་ངེས་པར་འབྱུང་བ་ནི་ཐེ་ཚོམ་མེད་དོ། །རྗེས་ཀྱི་རིམ་པ་ནི། རྒྱུན་འཁྱེར་གྱི་བསྲུང་བཟློག་གི་ཚེ་གོང་དུ་བཤད་པའི་མཆོད་བསྟོད་བསྡུས་པ་བྱ་ཞིང་། ཡིག་བརྒྱས་བཟོད་པར་གསོལ། སྣོད་བཅུད་གུར་ཁང་གཞལ་ཡས་འཁོར་དང་བཅས། །འོད་དུ་ཞུ་ནས་རང་ཐིམ་སྔགས་ཕྲེང་དང་། །ཐུགས་སྲོགས་ནཱ་དའི་བར་ཐིམ་འཇའ་ལྟར་ཡལ། །ཀ་དག་ཆོས་སྐུའི་ཀློང་དུ་ཨེ་མ་ཧོ། །སླར་ཡང་དེ་ཉིད་རྩལ་སྣང་འགག་མེད་ལས། །སྲུང་འཁོར་རྟེན་དང་བརྟེན་པར་བཅས་པ་ཀུན། །ཝལ་གྱིས་ཤར་བ་སྣང་སྟོང་གཉིས་མེད་ངང་། །སྒོ་གསུམ་རྡོ་རྗེ་གསུམ་གྱི་དཔལ་ལ་རོལ། །སྨོན་ཤིས་ནི། དགེ་འདིས་བདག་གཞན་ལུས་ཅན་སྲིད་མཚོ་ལས། །བསྒྲལ་ཏེ་མཁའ་སྤྱོད་གཙོ་མོའི་ས་ནོན་ཤོག །ཐུགས་རྗེ་བྱིན་རླབས་ནུས་མཐུ་ཡིད་བཞིན་ལྟར། །སྩོལ་མཛད་རྩ་གསུམ་རྒྱ་མཚོའི་བཀྲ་ཤིས་ཤོག །དེ་ལྟར་མཁའ་སྤྱོད་དྲག་མོའི་རིམ་གཉིས་ཀྱི། །ངང་ནས་ཞར་བྱུང་བསྲུང་བཟློག་བཙན་པོའི་མཁར། །འཇིགས་བྲལ་རྡོ་རྗེ་ཕ་ལམ་ལས་གྲུབ་པ། །འདི་འདྲ་བརྩིགས་ལ་གཞོམ་མེད་ཡ་ལད་ཀྱི། །གོ་གྱོན་ཕ་རོལ་འབྱེད་དཀྲུག་བསྐྲད་གཟིར་མནན། །རབ་འབྱམས་མངོན་སྤྱོད་དྲག་པོའི་སྒྱོགས་ཆེན་པོ། །གནམ་ལྕགས་ཐོག་གིས་འགྲན་པར་ནུས་མིན་པའི། །རྣོ་མྱུར་དྲག་རྩལ་ངར་ལྡན་འདི་འདྲ་ཡིས། །མི་སྲུན་གདོན་བགེགས་འབྱུང་པོའི་བྲག་གི་རི། ཕྱེ་མར་ཐོངས་ཤིག་རིགས་སྔགས་འཆང་བ་རྣམས། རྙེད་དང་བསྐུར་སྟི་མ་ད་ནའི་བཏུང་བ། བཟང་ངན་འདེགས་འཇོག་རྩལ་འགྲན་རིང་དོར་ཅིག །ཅི་ཕྱིར་དེང་སྐབས་གཞན་འཕྲུལ་བདག་པོའི་འཕྲུལ། །རང་གཞན་ཀུན་གྱི་ཀེ་ས་རར་ཞུགས་པ། །ངོས་མ་ཟིན་པར་གང་བྱུང་ཆོ་རོལ་གྱིས། །བསྲུང་བཟློག་གོ་མེད་གཅེར་བུ་མཚོན་ཐོགས་བཞིན། གྲོང་ཆོག་འདྲེ་འདུལ་རེ་བས་དལ་མེད་དུ། །ཡང་ཡང་རྒྱུ་བ་རེ་ཞིག་བྲིན་གྱུར་ཀྱང་། །རྒྱུད་གསུམ་དྲེགས་པའི་དེ་ཉིད་མ་རྟོགས་ན། །ཡ་ངའི་ཉིང་མཚམས་སྦྱོར་བར་སྨོས་ཅི་དགོས། །དེ་སྐད་སྣང་བར་གང་དྲན་སུག་བྲིས་སུ། །བཀོད་པར་དགོས་ཆེད་དབེན་ཀྱང་ཤར་མར་དུ། །སྤེལ་བའི་ཞར་འཕྲོས་ཙམ་ལགས་ངག་ཁྲིགས་འདི། གཏེར་ཆེན་མཆོག་དང་ཧོར་གྱི་ལོ་ཙཱ་བའི། །གསུང་རྩོམ་ལྟར་ལ་ལེགས་ཆས་བརྒྱན་ཏེ་བཀོད། །རང་བཟོ་མཆིས་ན་མཁའ་འགྲོའི་ཚོགས་ལ་འཆག །ཚུལ་འདི་སྔགས་འཆང་སྟོབས་ལྡན་མཆོག་གྲུབ་ཀྱིས། བྲིས་དགེས་བསྟན་དར་འགྲོ་ཀུན་བདེར་སྤྱོད་ཤོག །མངྒཱ་ལམ།། །།

བདུད་འདུལ་མཁའ་འགྲོའི་བསྒྲལ་ལས་གནམ་ལྕགས་རལ་གྲི།

བཀའ་རྫོགས་པ་ཆེན་པོ་བླ་མ་བདེ་མཆོག་འཁོར་ལོ་ལས། བདུད་འདུལ་མཁའ་འགྲོའི་བསྒྲལ་ལས་གནམ་ལྕགས་རལ་གྲི་བཞུགས། བདེ་གཤེགས་ཀུན་གྱི་ཡེ་ཤེས་ཐུགས་རྗེའི་དབྱིངས། །མི་བསྲུན་དྲག་མོར་ཁྲོས་པའི་ཁྲོ་ཆགས་ཉམས། །བདུད་འདུལ་དབང་མོར་ཤར་བའི་དུས་མཐའི་མེས། །མ་ལུས་བདུད་སྡེའི་དཀྱིལ་འཁོར་དབྱིངས་སུ་ཆོམས། དེ་ཡི་ལྷ་སྔགས་ཡེ་ཤེས་རོལ་པའི་ཤུགས། །གནམ་ལྕགས་དྲག་པོའི་དབལ་དུ་འབར་བའི་རྣོས། །ལོག་འདྲེན་སྲོག་དབུགས་དྭངས་མ་རྒྱུན་གཅོད་པའི། །འཇིགས་རུངས་སྤུ་གྲིའི་མཚོན་དུ་འདི་ན་བརྡར། །ཐོག་མར་ཡེ་ཤེས་ཀྱི་མཁའ་འགྲོ་མ་འདི་ཉིད་ཀྱི་དབང་ཐོབ་ཅིང་བསྙེན་པ་སྔོན་དུ་སོང་བས། དགྲ་བགེགས་གདུག་པ་ཅན་བསྒྲལ་བའི་ལས་ལ་འཇུག་པར་འདོད་པས། འབྲུབ་ཁུང་དུ་དགྲ་བོའི་རཱུ་པ་སྐྱེ་མཆེད་དོད་པ་བཅུག་ལ། འོག་ཏུ་དགོས་པའི་ཡོ་བྱད་ཕུར་ཐུན། མཚོན་ཆ་བྱད་ཐག་སོགས་མངོན་པར་འདུ་བྱས་ལ། སྔགས་པ་དྲག་པོའི་ཆས་སུ་ཞུགས་ཤིང་རྒྱུའི་ཀུན་སློང་ཞིང་བཅུ་པ་མཐའ་དག་གི་ལས་ངན་གྱི་བྱེད་པ་རྒྱུན་བཅད་ལ་རྡོ་རྗེ་འཆང་གི་གནས་ལ་འགོད་པར་འདོད་པའི་བརྩེ་བ་ཆེན་པོས། རྣམ་པ་ཁྲོ་གཏུམ་དྲག་མོར་ཁྲོས་པའི་ཏིང་ངེ་འཛིན་དུ་ལངས་པའི་གཏུམ་དྲག་མི་བཟད་པའི་རྣམ་འགྱུར་དང་བཅས་འདི་ཉིད་ཀྱི་བསྐུལ་སྔོན་དུ་འགྲོ་བ་ཕྱོགས་བཅུར་གསེར་སྐྱེམས་མཐོར་ཞིང་འདི་སྐད་དོ། ཧཱུྃ། བྱིན་རླབས་ཐུགས་རྗེའི་བདག་ཉིད་རྩ་བ་གསུམ། །བསླུ་མེད་སྐྱབས་གནས་དཀོན་མཆོག་རིན་པོ་ཆེ། །རྨད་བྱུང་བདུད་རྩིའི་གསེར་སྐྱེམས་འདི་བཞེས་ལ། །རིག་འཛིན་སྒྲུབ་པོའི་མགོན་དང་སྡོངས་གཉེན་མཛོད། །ཁྱད་པར་ཡེ་ཤེས་མཁའ་འགྲོ་སེང་གདོང་མ། །འབུམ་ཕྲག་ཡངས་པའི་མཁའ་འགྲོ་རྒྱ་མཚོར་བཅས། །རྨད་བྱུང་བདུད་རྩིའི་གསེར་སྐྱེམས་འདི་བཞེས་ལ། །བདུད་དཔུང་ཕྱེ་མར་འཐག་པའི་འཕྲིན་ལས་མཛོད། །རྒྱལ་བའི་སྤྱན་སྔར་ཁས་བླངས་དམ་བཅས་པའི། །མཐུ་ལྡན་ཡེ་ཤེས་སྲུང་མའི་དབང་པོ་རྣམས། །རྨད་བྱུང་༴ མཐུ་དཔུང་བསྐྱེད་ལ་སྒྲུབ་པོའི་སྡོངས་གྲོགས་མཛོད། །དྲེགས་པ་སུམ་ཅུ་སྔགས་བདག་བཅོ་བརྒྱད་སོགས། །སྣང་ཞིང་སྲིད་པའི་ལྷ་སྲིན་སྡེ་བརྒྱད་རྣམས། །རྨད་བྱུང་༴ ཞིང་བཅུའི་དགྲ་བགེགས་ཐུགས་རྗེའི་ཤུགས་ཀྱིས་སྒྲོལ། །ལོ་ཟླ་ཞག་དུས་སྤར་ཁ་སྨེ་བའི་ལྷ། །ས་ཕྱོགས་ཡུལ་རིས་སྐྱོང་བའི་གཞི་བདག་རྣམས། །རྨད་བྱུང་༴ རུ་ང་སྤོང་ལ་མཐུ་དཔུང་སྡོངས་གྲོགས་མཛོད། །གཟུ་དཔང་ནི། ཧཱུྃ། ཀ་དག་ལྷུན་གྲུབ་ཟུང་འཇུག་གཉུག་མའི་བབས། །ལྟ་སྒོམ་སྤྱོད་པས་ཟད་སར་སྐྱེལ་སྙམ་ཡང་། །རྟོག་ཚོགས་འཁྲུལ་པའི་དགྲ་བོས་བར་དུ་བཅད། །སྐུ་གསུམ་སངས་རྒྱས་གཟུ་དང་དཔང་མཛོད་ལ། །སེམས་བྱུང་རྟོག་པའི་དགྲ་བོ་དབྱིངས་སུ་སོད། །མདོ་དང་སྔགས་ཀྱི་ལམ་བཟང་དམ་པའི་ཆོས། །ཐོས་བསམ་སྒོམ་པའི་གཏན་ལ་འབེབས་སྙམ་ཡང་། །གཡེང་དང་ལེ་ལོ་དགྲ་བོའི་དབང་དུ་ཤོར། །ལུང་རྟོགས་དམ་ཆོས་གཟུ་དང་དཔང་མཛོད་ལ། །སྙོམ་ལས་ལེ་ལོའི་དམག་ཚོགས་ཕ་མཐར་སྐྲོད། །བསོད་ནམས་ཚོགས་ཀྱི་ཞིང་མཆོག་འཕགས་པའི་ཚོགས། །བཀུར་སྟི་ཕུ་དུད་རིམ་གྲོས་མཆོད་འདོད་ཀྱང་། །དམན་པར་འཛིན་པའི་དགྲ་བོས་བར་དུ་བཅད། །འཕགས་པའི་དགེ་འདུན་གཟུ་དང་དཔང་མཛོད་ལ། །ང་ཆེ་མངོན་པའི་ང་རྒྱལ་ཐལ་བར་ཐོང་། །མ་ནོར་ལམ་བཟང་སྟོན་པའི་སུམ་ལྡན་རྗེ། །རྒྱལ་ཀུན་འདུས་པའི་ངོ་བོར་སྒོམ་རྒྱུ་ལ། །ལོག་རྟོག་ཐ་མལ་འཛིན་པས་བར་དབྱེན་བཅོས། །རྩ་བརྒྱུད་བླ་མས་གཟུ་དང་དཔང་མཛོད་ལ། །ལོག་པར་རྟོག་པའི་བློ་ངན་ཆམ་ལ་ཕོབ། །སྣང་སྲིད་གདོད་ནས་དག་པའི་བདེ་ཆེན་ལྷ། །གསལ་སྟོང་ཟུང་འཇུག་རིམ་གཉིས་རྣལ་འབྱོར་ལ། །བསྒོམ་སྒྲིབ་ལྔ་དང་བག་ཆགས་འཁྲུལ་པས་བསླད། །ཡི་དམ་ལྷ་ཚོགས་གཟུ་དང་དཔང་མཛོད་ལ། །མཆོག་ཐུན་དངོས་གྲུབ་བསྒྲུབ་པའི་བར་ཆད་སོལ། །ཡུལ་སྣང་ཕུང་ཁམས་སྐྱེ་མཆེད་རྩ་ཐིག་རླུང་། །ཡེ་ནས་རང་བྱུང་མཁའ་འགྲོའི་རང་བཞིན་ལ། །རྟོག་སྒྲིབ་ཉམས་ཆག་སྒྲིབ་པའི་གཡའ་ཡིས་སྦགས། །དཔའ་བོ་མཁའ་འགྲོས་གཟུ་དང་དཔང་མཛོད་ལ། །མཚན་འཛིན་ནོངས་པའི་དྲི་མ་དབྱིངས་སུ་སྦྱོངས། །ཀུན་མཁྱེན་རྒྱལ་བའི་བསྟན་པའི་སྒོར་ཞུགས་ནས། །ཡང་དག་རྫོགས་པའི་བྱང་ཆུབ་བསྒྲུབ་པ་ལ། བསྟན་ལ་སྡང་བའི་དགྲ་བོས་བར་དུ་བཅད། །ཆོས་སྐྱོང་སྲུང་མས་གཟུ་དང་དཔང་མཛོད་ལ། །བསྟན་དགྲ་གནོད་བྱེད་མིང་ཡང་མེད་པར་མཛོད་། །ཟབ་གསང་རྡོ་རྗེ་ཐེག་པའི་སྨིན་གྲོལ་གྱིས། །ཚེ་གཅིག་རྣམ་མཁྱེན་གོ་འཕང་བསྒྲུབ་པ་ལ། །དགྲ་བགེགས་ལོག་པར་འདྲེན་པའི་དབང་མ་བཏང་། །ལྷ་སྲིན་སྡེ་བརྒྱད་གཟུ་དང་དཔང་མཛོད་ལ། །ལོག་འདྲེན་དགྲ་བགེགས་ཐམས་ཅད་རྡུལ་དུ་རློག །མཁའ་མཉམ་སྐྱེ་དགུའི་རྩ་ལག་རྒྱལ་བའི་བསྟན། །འཛིན་སྐྱོང་སྤེལ་བའི་གོ་ཆ་ཆེར་གྱོན་ཡང་། །ནག་ཕྱོགས་བདུད་དང་དགྲ་བོས་རྣམ་པར་གཙེས། །དཀར་ཕྱོགས་ལྷ་ཀླུས་གཟུ་དང་དཔང་མཛོད་ལ། །དགྲ་དཔུང་ཤིག་ལ་བགེགས་དཔུང་ཆམ་ལ་ཕོབ། །རེ་ཞིང་ལྟོས་པའི་ལྷ་དང་སྲུང་མ་རྣམས། །བཙན་པོའི་གོ་གྱོན་རྣོ་བའི་མཚོན་ཐོགས་ལ། །མཐུ་ལྡན་དྲེགས་པ་ཡོངས་ཀྱི་དཔུང་བསྐུལ་ཏེ། །དམ་ལྡན་རྣལ་འབྱོར་བདག་གི་གྲོགས་མཛད་ནས། །དམིགས་པའི་ཐེམས་སུ་བཅུག་པའི་དགྲ་དང་བགེགས། །དྲག་པོས་སྒྲོལ་བའི་ལས་ལ་ད་ཞུགས་ཤིག །འབྲུབ་ཁུང་བསྐྱེད་པ་ནི། །མདུན་དུ་ཨེ་ལས་གནམ་ལྕགས་དྲག་པོ་རབ་ཏུ་འབར་བའི་ཁང་སྒྲོམ་གྲུ་གསུམ་པ་བང་རིམ་དགུ་པ། །ཁ་ཁྱེར་དོག་ཅིང་གཏིང་ཟབ་པ། ཕྱི་མཚོན་ཆའི་རང་བཞིན་ནག་ལ་རྩུབ་པ། ནང་འབར་བའི་ལྕགས་བསྲེགས་དམར་ལ་ཚ་བ། འོག་ན་འདོད་ཆགས་ཀྱི་ཁྲག་མཚོ་ཁོལ་བ། སྟེང་ན་གཏི་མུག་གི་མུན་ནག་འཐིབས་པ། ཕྱི་ནས་ཞེ་སྡང་གི་མེ་རི་འབར་བ། བར་ན་ཕྲག་དོག་གི་རླུང་དམར་འཚུབ་པ། །ལོག་ནས་ང་རྒྱལ་གྱི་གློག་ལྕམ་འགྱུ་བ། བྱ་ཤ་ཟན་ཀླད་ལ་ལྡིང་ཞིང་གཅན་གཟན་ཁྲག་འཐུང་འོག་ན་འགྲོ་བ། རྣོ་ངར་མཚོན་ཆའི་ཆར་འབབས་ཤིང་ནད་དང་དུག་གི་རླངས་པ་འཕྱོ་བ། འཆི་བདག་གཤིན་རྗེའི་བཙོན་ཁང་། ནག་པོ་བདུད་ཀྱི་བཤས་ར། ནད་གཏོང་མ་མོའི་ཞིང་ཁམས། གླེན་པ་ཀླུའི་གྲོང་ཁྱེར། དྲང་སྲོང་གཟའ་ཡི་ཕོ་བྲང་། དམར་པོ་བཙན་གྱི་འགྱུ་སྲང་། སྡེ་བརྒྱད་རྦ་ཀློང་འཁྲུག་པའི་གཞལ་ཡས། ཐར་མེད་དམྱལ་བ་ཆེན་པོའི་བཙོན་ཁང་། འགུགས་བྱེད་ལས་ཀྱི་ཕོ་ཉ་གློག་ལྟར་འཁྱུག་ཅིང་སྒྲོལ་བྱེད་བཤན་པ་ཕོ་མོ་རྡུལ་ལྟར་འཚུབ་པ། རྒྱོབ་སོད་འཇིགས་པའི་ང་རོ་འབྲུག་ལྟར་ལྡིར་བའི་སྲིད་པ་ལས་ཀྱི་བཙོན་ཁང་དྲག་པོ་དེའི་ནང་དུ་དགྲ་ལ་ནྲྀ་དུད་ཁ་དང་བགེགས་ལ་ཏྲི་དམར་སེར་ཡོངས་སུ་གྱུར་པས་དགྲ་བགེགས་ལས་ངན་དེ་ཉིད་གཅེར་བུ་ལུས་རིད་ཅིང་ཉམ་ཐག་པ། གདོང་མཆི་མས་གཡོགས་པ། བུ་ག་དགུ་ནས་ཁྲག་འཛགས་པ། ཡན་ལག་ལྕགས་སྒྲོག་གིས་བསྡམས་པ། ཁ་ནས་མྱ་ངན་གྱི་ངུད་མོ་འབྱིན་ཅིང་ཕྱི་ལྤགས་མཛེ་ཤུ་ཕོལ་མིག་གིས་གང་བ། དྲན་པའི་དབང་པོ་རབ་ཏུ་ཉམས་ཤིང་སྲོག་དབུགས་ཀྱི་རྒྱུན་འགགས་ལ་ཁད་ཀྱིས་རྣམ་པར་འདར་བ། གནོད་བྱེད་ལོག་འདྲེན་ཐམས་ཅད་གཅིག་ཏུ་འདུས་པའི་རང་བཞིན་ཅན་དུ་གྱུར་པར་བསམས་ཤིང་། རང་དང་མདུན་བསྐྱེད་ཀྱི་ཐུགས་ཀ་ནས་སྤྲོས་པའི་ལས་མཁན་གྱི་ཁྲོ་བོ་ཁྲོ་མོ་དྲག་ལ་མྱུར་བ། །རྣོ་ལ་རྩུབ་པ་རྣམས་ཀྱིས་འཇིག་རྟེན་གྱི་ཁམས་ཐམས་ཅད་བཀང་སྟེ་དམིགས་བྱའི་དགྲ་བགེགས་གང་ན་གནས་ནས་རང་དབང་མེད་པར་བཀུག་སྟེ་མདུན་གྱི་ལིངྒ་ལ་བསྟིམ་པར་བསམས་ལ། ༈ན་མོ་རྗེ་བཙུན་རྩ་བ་དང་བརྒྱུད་པར་བཅས་པའི་དཔལ་ལྡན་བླ་མ་དམ་པ་རྣམས་ཀྱི་བཀའ་བདེན་པ་དང་། སངས་རྒྱས་ཀྱི་བཀའ་བདེན་པ་དང་། ཆོས་ཀྱི༴ དགེ་འདུན་གྱི༴ གསང་སྔགས་དང་༴ རིགས་སྔགས་དང་། གཟུགས་སྔགས་དང་། སྙིང་པོ་དང་། ཕྱག་རྒྱ་དང་། ཏིང་ངེ་འཛིན་གྱི་བདེན་པ་དང་། ཆོས་ཉིད་རང་བཞིན་གྱིས་རྣམ་པར་དག་ཅིང་ཆོས་ཅན་རྒྱུ་འབྲས་བསླུ་བ་མེད་པའི་བདེན་པ་དང་། ཁྱད་པར་དུ་བདུད་འདུལ་ཡེ་ཤེས་ཀྱི་མཁའ་འགྲོ་མ་དྲག་མོ་སེང་གེའི་གདོང་པ་ཅན་འཁོར་ལས་དང་ཡེ་ཤེས་ལས་གྲུབ་པའི་མཁའ་འགྲོ་མ་བྱེ་བ་འབུམ་སྡེའི་ཚོགས་དང་བཅས་པ་རྣམས་ཀྱི་བཀའ་བདེན་པ་དང་། གཞན་ཡང་མགོན་པོ་ཕོ་རྒྱུད། ལྷ་མོ་མོ་རྒྱུད། དྲེགས་པའི་སྡེ་དཔོན་སུམ་ཅུ། སྔགས་བདག་དྲེགས་པ་བཅོ་བརྒྱད། སྣང་ཞིང་སྲིད་པའི་ལྷ་མ་སྲིན་སྡེ་བརྒྱད། དམ་ཅན་རྡོ་རྗེ་ལེགས་པ། མཆེད་ཟླ་སུམ་བརྒྱ་དྲུག་ཅུ། ལྷ་བཙན་རྡོ་རྗེ་འབར་བ་སོགས་སྲུང་མ་དམ་ཅན་རྒྱ་མཚོའི་ཚོགས་དང་བཅས་པ་རྣམས་ཀྱི་བཀའ་བདེན་པ་དང་། བདེན་པ་ཆེན་པོའི་མཐུ་དང་ནུས་པ་ལ་བརྟེན་ནས། སྤྱིར་སངས་རྒྱས་བསྟན་པའི་སྤྱི་དགྲ། དཔལ་ལྡན་བླ་མའི་སྐུ་དགྲ། དགེ་བ་བཅུ་ལ་བར་དུ་གཅོད་པ། མི་དགེ་བ་བཅུའི་ལམ་སྣ་འདྲེན་པ། བྱེ་བྲག་ཏུ་རྣལ་འབྱོར་བ་བདག་ཅག་དཔོན་སློབ་འཁོར་དང་བཅས་པ་རྣམས་ལ། ཉི་མ་ཕྱོགས་བཞི་མཚམས་བརྒྱད་ནས་དམག་སྣ་སྟོན་པ། རྐུན་སྣ་སྟོན་པ། ཇག་སྣ་སྟོན་པ། སྔར་དགྲ་ལག་གིས་བསྟར་བ། ཕྱི་དགྲ་ཞེ་ལ་བསམས་པ། ད་དགྲ་དངོས་སུ་གཏོད་པར་བྱེད་པའི་གཟུགས་ཅན་མི་ཡི་དགྲ་ཚེ་ལ་བརྐུ་བ། སྲོག་ལ་འཇབ་པ། ནད་དུ་ལྡང་བ། གདོན་དུ་འཚེ་བ། ཚེ་དང་བསོད་ནམས། ཁ་རྗེ་དབང་ཐང་ལ་བར་དུ་གཅོད་པའི་གཟུགས་མེད་ལྷ་འདྲེའི་བགེགས་ཏེ། དམིགས་པའི་ཐེམས་སུ་བཅུག་ཅིང་། གཟུགས་ལིངྒར་བྲིས་ཏེ་མིང་བྱང་བུར་བཀོད་པའི་དགྲ་བགེགས་ལོག་འདྲེན་མཐའ་དག་མཐོ་རི་བོའི་རྩེ། དམའ་རྒྱ་མཚོའི་གཏིང་། བར་ལྕགས་རིའི་ཁོར་ཡུག །ཁམས་གསུམ་སྲིད་པའི་གནས་རིས། ས་འོག་ས་སྟེང་ས་བླ་གར་གནས་ཀྱང་སྐད་ཅིག་ཡུད་ཙམ་ལ་རང་དབང་མེད་པར་དྲག་མོའི་ལས་ཀྱི་ཕོ་ཉ་རྣམས་ཀྱིས་བཀུག་སྟེ། བྱིའུ་ཁྲས་བདས་པའམ་རི་དྭགས་ཤ་ཁྱིས་དེད་པ་བཞིན་དུ་གཟུགས་ལིངྒ་འདི་ལ་ཁུག་ཅིག །སྒྲུབ་སྔགས་ཤམ་བུར། ཨཱ་ཀཪྵ་ཡ་ཛཿཛཿ ཕོ་ཉ་བསྐུལ་བ་ནི། ཧཱུྃ། བདུད་འདུལ་དྲག་མོ་སེང་གདོང་མའི། །སྐུ་ལ་སྤྲུལ་པའི་མཁའ་འགྲོ་མ། །དཀར་མོ་ཉི་ཁྲི་ཆིག་སྟོང་ནི། །ཡང་རྩལ་ཐོགས་མེད་རྫུ་འཕྲུལ་བང་། །གློག་འགྱུ་ཙམ་གྱིས་གླིང་བཞི་བསྐོར། །གསུང་གི་སྤྲུལ་པའི་མཁའ་འགྲོ་མ། །དམར་མོ་ཉི་ཁྲི་ཆིག་སྟོང་ནི། །སྤྲུལ་པའི་འོད་ཟེར་མཐའ་ཡས་པས། །སྲིད་གསུམ་འགུག་ཅིང་རྒྱ་མཚོ་སྐེམ། །ཐུགས་ཀྱི་སྤྲུལ་པའི་མཁའ་འགྲོ་མ། །ནག་མོ་ཉི་ཁྲི་ཆིག་སྟོང་ནི། །དཔའ་གཏུམ་དྲག་མོའི་མཐུ་སྟོབས་ཀྱིས། །འཇིག་རྟེན་གསུམ་ཡང་ཕྱེ་མར་འཐག །ཡོན་ཏན་སྤྲུལ་པའི་མཁའ་འགྲོ་མ། །སེར་མོ་ཉི་ཁྲི་ཆིག་སྟོང་ནི། །སྤྲུལ་པ་འབུམ་སྡེས་སྟོང་གསུམ་འགེངས། །འཕྲིན་ལས་སྤྲུལ་པའི་མཁའ་འགྲོ་མ། །ལྗང་མོ་ཉི་ཁྲི་ཆིག་སྟོང་ནི། །དགྲ་དང་བགེགས་ཀྱི་ཚེ་སྲོག་ལ། །རྡོ་རྗེ་ཕ་ལམ་བཞིན་དུ་རྣོ། །ཁྱེད་རྣམས་འཁོར་དང་བཅས་པ་ཡི། །སྤྲུལ་པ་ཡང་སྤྲུལ་ཉིང་སྤྲུལ་གྱིས། །རབ་འབྱམས་རྒྱ་མཚོའི་ཞིང་ཀུན་འགེངས། །མཐུ་སྟོབས་རྫུ་འཕྲུལ་བསམ་ལས་འདས། །ཤ་ལ་དགའ་ཞིང་ཁྲག་ལ་དགྱེས། །ལོག་འདྲེན་དགྲ་སྡེའི་གཤེད་དུ་དཔའ། །དཔའ་བ་བཞིན་དུ་ལས་མཛོད་ལ། །མིང་བྱང་དམར་ལ་བཏབ་ནས་ནི། །དམིགས་པའི་ཐེམས་སུ་བཅུག་པ་ཡི། །དགྲ་དང་བགེགས་ཀྱི་བླ་ཡིད་སེམས། །སྟོང་གསུམ་སྟོང་གི་འཇིག་རྟེན་གྱི། །འབྲོས་རི་གབ་ཁུང་གར་སོང་ཡང་། །རང་རང་གཉེན་པོར་སྐུར་སྤྲུལ་ལ། །སྐད་ཅིག་ཡུང་ཙམ་ཐང་གཅིག་གིས། །རང་དབང་མེད་པར་ཁུག་ལ་ཤོག །དམིགས་པའི་རྟེན་ལ་གཉིས་མེད་སྟིམས། །ཧཱུྃ། གཞན་ཡང་དྲག་མོ་བདུད་འདུལ་མའི། །འགུགས་བྱེད་དྲག་པོའི་ཕོ་ཉ་ནི། །གནས་དང་ཡུལ་ཆེན་དུར་ཁྲོད་ཀྱི། །ཤ་ཟ་ཁྲག་འཐུང་དྲེགས་པའི་སྡེ། །མི་བསྲུན་རབ་འཇིགས་བཤན་པའི་ཚོགས། །བླ་སྲོག་འགུགས་པའི་མཐུ་བོ་ཆེ། །མ་ངེས་རྣམ་འགྱུར་འབྱམས་སུ་ཀླས། །འགུགས་འདྲེན་སྒྲོལ་བའི་ཕོ་ཉ་བ། །མགྱོགས་པའི་བཞོན་པ་འོག་ན་བཅིབས། །རྣོ་མྱུར་བང་གིས་ཁམས་གསུམ་བསྐོར། །སྙབ་པའི་ལག་པས་སྲིད་གསུམ་ཉུལ། །འགུག་སྒྲོལ་མཚོན་ཆའི་འཁོར་ལོ་བསྐོར། །འཛིན་པའི་དྲ་བ་དམར་ནག་འཁུར། །འགུགས་བྱེད་སྤྲུལ་པ་ཕྱོགས་བཅུར་འཕྲོ། །དམིགས་པའི་དགྲ་བགེགས་ལོག་འདྲེན་གྱི། །རྣམ་ཤེས་རྟེན་དང་ཕྲོལ་ལ་ཤོག །བླ་སྲོག་དྲ་བར་ཆུག་ལ་ཤོག །དོན་སྙིང་སྦར་ཀྱིས་ཁོས་ལ་ཤོག །སྙིང་ཁྲག་ཧུབ་ཀྱིས་རྔུབས་ལ་ཤོག །བསད་རྟགས་དོན་སྙིང་ཁྱེར་ལ་ཤོག །ནོར་རྫས་རླུང་ལ་སྐུར་ལ་ཤོག །མི་ནོར་ཕྱགས་མས་ཕྱོགས་ལ་ཤོག །བདུན་རྒྱུད་རྩད་ནས་ཆོད་ལ་ཤོག །དམིགས་མེད་རྒྱ་ཡིས་ཐོབ་ལ་ཤོག །གནོད་པར་བྱེད་པའི་དགྲ་དང་བགེགས། །ཐམས་ཅད་གཅིག་ཏུ་བསྡུས་ནས་ཀྱང་། །དམིགས་རྟེན་འདི་ལ་གཉིས་མེད་སྟིམས། །དེ་ནས་སྒོ་མ་བཞིའི་ཕྱག་མཚན་རྣམས་རིམ་གྱིས་འཛིན་པ་ལས། དང་པོ་ལྕགས་ཀྱུ་ཐོགས་ལ། ཧཱུྃ། ཕོ་བྲང་ཤར་སྒོ་བསྲུང་བའི་ལྷ། །ཕྲ་མེན་སྒོ་མ་ཁྭ་གདོང་མས། །འགུགས་བྱེད་ལྕགས་ཀྱུ་འབར་བ་ཡིས། །སྡང་དགྲ་གནོད་བྱེད་ལོག་འདྲེན་ཀུན། །ཁུག་ཅིག་དྲོངས་ཤིག་ཨངྒུ་ཤ་ཛཿ ཞགས་པ་ཐོགས་ལ། ཧཱུྃ། ཕོ་བྲང་ལྷོ་སྒོ་བསྲུང་བའི་ལྷ། །ཕྲ་མེན་མཁའ་འགྲོ་ཕག་གདོང་མས། །འཆིང་བྱེད་ཞགས་པ་འབར་བ་ཡིས། །སྡང་དགྲ་གནོད་བྱེད་ལོག་འདྲེན་ཀུན། །དམ་དུ་ཆིངས་ཤིག་པཱ་ཤ་ཧཱུྃ། ལྕགས་སྒྲོ་ཐོགས་ལ། ཧཱུྃ། ཕོ་བྲང་ནུབ་སྒོ་བསྲུང་བའི་ལྷ། །ཕྲ་མེན་མཁའ་འགྲོ་ཁྱི་གདོང་མས། །སྡོམ་བྱེད་ལྕགས་སྒྲོག་འབར་བ་ཡིས། །སྡང་དགྲ་གནོད་བྱེད་ལོག་འདྲེན་ཀུན། །ཡན་ལག་སྡོམས་ཤིག་སྥོ་ཊ་བཾ། དྲིལ་བུ་ཐོགས་ལ། ཧཱུྃ། ཕོ་བྲང་བྱང་སྒོ་བསྲུང་བའི་ལྷ། །ཕྲ་མེན་མཁའ་འགྲོ་འུག་གདོང་མས། །མྱོས་བྱེད་དྲིལ་བུ་འབར་བ་ཡིས། སྡང་དགྲ་གནོད་བྱེད་ལོག་འདྲེན་ཀུན། །མྱོས་སུ་ཆུག་ཅིག་གྷཎྜེ་ཧོཿ དེ་ནས་ལྷ་དབྱེ་བའི་རྫས་ཀྱིས་ལིངྒ་བདུག་ཅིང་། བྱ་རོག་དང་འུག་པའི་དང་རུས་འབྱེད་ཚུལ་བྱ་ཞིང་། ཧཱུྃ། འབྱེད་བྱེད་ཆེན་མོའི་དུས་ལ་བབས། །རི་རབ་ལྷུན་པོའི་ཁོང་གསེང་ནས། །ཕྲ་མེན་ཆེན་མོ་རྫུ་འཕྲུལ་ཅན། །བྱ་རོག་དང་ནི་འུག་པའི་མགོ། སྤྲུལ་པ་ཕྲ་མེན་འཁོར་བཅས་ཀྱིས། །དམ་ཉམས་དགྲ་བོ་ལྷ་དང་ཕྲོལ། །རྣམ་པར་འཚེ་བའི་བདུད་དང་སྤྲོད། །དགྲ་བོ་འདི་ཡི་ལྷ་སྲུང་རྣམས། མི་དགེ་བཅུ་ལ་སྤྱོད་པ་ཡི། །གདུག་པ་ཅན་འདི་མྱུར་དུ་སྤོངས། །བཀའ་ལས་འདའ་བ་ཡོངས་སྲིད་ན། །ཡེ་ཤེས་ལྷ་ཡང་ཐུགས་དམ་ཉམས། །འཇིག་རྟེན་པ་རྣམས་རྡུལ་དུ་གཏོང་། །དེ་བས་འདི་སྤོངས་རང་གཤེད་ཕོབ། །མ་མ་ཏྲག་རཀྴ་མཱ་ར་ཡ་ཕྱེ་ཕྱེ་ནྲྀ་ཏྲི་དེ་ཝ་ཨུ་ཙ་ཏ་ཡ་ཕཊ༔ ཉེས་པ་བསྒྲག་པ་ནི། ཧཱུྃ། ཞིང་བཅུ་ཚང་བའི་གདུག་པ་ཅན། །དུག་ལྔའི་ལས་ལ་སྤྱོད་པ་ཁྱོད། །ངན་སོང་གནས་ངན་རྒྱུན་གཅོད་ཕྱིར། །སྙིང་རྗེའི་ཤུགས་ཀྱིས་བསྒྲལ་ནས་ནི། །ཕུང་པོ་ལྷ་རྣམས་མཆོད་བྱེད་ན། །བྱང་ཆུབ་མཆོག་ཏུ་སེམས་བསྐྱེད་ལ། །དགའ་མགུར་རངས་པའི་འདུ་ཤེས་བསྐྱེད། །བྱད་དུ་འཇུག་པ་ནི། བྱད་ཐག་སྔོ་དམར་གྱིས་བསྡམས་ཤིང་། ཧཱུྃ། མ་མོ་མཁའ་འགྲོ་གདུག་པ་ཅན། །ཁྲོས་པའི་བྱད་ཐག་སྔོ་དམར་གྱིས། །ཡན་ལག་དབང་པོ་བཅས་པ་རྣམས། །དྲུ་གུ་བཞིན་དུ་རབ་ཏུ་ཆིངས། །དགྲ་བགེགས་ནྲི་ཏྲི་ཧ་ན་པ་ཡ་ཕཊ༔ སྨྱོ་རུ་འཇུག་པ་ནི། མྱོས་བྱེད་ཀྱི་དུག་ཁྲག་རྣམས་གཏིགས་ཤིང་། ཧཱུྃ། མཁའ་འགྲོ་ཁྲོས་པའི་ཁ་རླངས་སྤྲིན། །དུག་ཁྲག་ཆར་དུ་འབེབས་པའི་དབལ། །ལོག་འདྲེན་སྙིང་ལ་དབབ་པ་ཡིས། །སྨྱོ་འབོགས་རེངས་ཤིང་བརྒྱལ་དུ་ཆུག །དགྲ་བགེགས་ཛྭ་ལ་ས་མ་ཡ་ཧཱུྃ་ཕཊ། གཞན་ཡང་ཐུན་སྣ་ཚོགས་ཀྱིས་བྲབ་ཅིང་། ཧཱུྃ། ཡུངས་ཀར་ཁྲོ་བོ་ཁྲོ་མོའི་མཚོན། །ཟངས་ཕྱེ་ལྕགས་ཕྱེ་གནམ་ལྕགས་ཐོག །ཀེ་ཚེ་ཤང་ཚེ་མཚོན་ཆའི་མདའ། །སྣ་ཚོགས་ཐུན་རྫས་གདུག་པའི་དབལ། །དྲག་ཤུལ་སྟོབས་ཀྱིས་འཕངས་པ་ཡིས། །ལོག་པར་འདྲེན་པའི་སྙིང་ལ་བརྡེག །འབྱུང་འདུས་ཕུང་པོ་ཕྱེ་མར་ཐོང་། །ཧཱུྃ་བཛྲ་དྷཀྐི་ནི་སིདྷ་མུ་ཁ་ཧ་རི་ནི་ས་ཛཿབྷྱོ༔ དགྲ་བོའི་སྙིང་ཁྲག་རྦད་སུ་ཐུན་བྷྱོ། ཤ་ཏྲུཾ་ཨ་མུ་ཀ་མཱ་ར་ཡ་རྦད་རྦད། ཚལ་པ་ཚལ་པ་སོད་སོད། ཅེས་རང་ཉིད་ཁྲོ་མོའི་ང་རྒྱལ་བསྐྱེད་པའི་འཁོར་ལས་བྱེད་སྤྲུལ་པ་ཡང་སྤྲུལ་གྱི་ཚོགས་ཐམས་ཅད་ཀྱིས་གཅན་སྤྱང་ཤ་ལ་རུབ་པ་ལྟར་བྱས་ཤིང་། ནད་མཚོན་དུག་གི་ཆར་ཕབ་དགྲ་བོ་མི་ནོར་དང་བཅས་པ་ཁ་ཕུང་རྗེེས་མེད་དུ་བཏག་བར་བསམ་ཞིང་ཐུན་དྲག་ཏུ་བརྡེག་གོ། དེ་ནས་ཕུར་པ་རྡེག་པ་ནི། རང་གི་སོར་མོ་བཅུ་རིགས་ལྔ་ཡབ་ཡུམ་བཅུར་གྱུར། ས་མ་ཡ་ཧོཿ རྗེས་སུ་ཆགས་པའི་སྦྱོར་བས་སྙོམས་པར་ཞུགས་པའི་མཁའ་ལས་སྲས་མཆོག་ཀཱི་ལཱ་ཡ་སྐུ་སྟོད་སྲིན་པོ་ཁྲོས་པའི་ཉམས་ཅན་མཐིང་ནག་ཕུར་བུ་སྒྲིལ་བ་ལྟེ་བ་མན་ཆད་གནམ་ལྕགས་ཀྱི་ཕུར་པ་ཟུར་གསུམ་པ་རྣོ་བའི་དབལ་དང་ལྡན་པ། ཁོང་གསེང་ལ་མ་མོ་མཁའ་འགྲོའི་ཕོ་བྲང་བཅས་ཤིང་རྩེ་མོར་ལས་མཁན་བཤན་པ་སྐར་ལྟར་འཁྲུག་ཅིང་ལས་ལ་རྔམ་པར་གྱུར་ཨཱོཾ་བཛྲ་ཀཱི་ལི་ཀཱི་ལཱ་ཡ་ཀཱ་ཡ་ཝཱཀྐ་ཙིཏྟ་ཨ་བྷི་ཥིཉྩ་མཱཾ། ཅེས་བརྗོད་པས་སྲས་མཆོག་ལས་འོད་ཟེར་ཕྱོགས་བཅུར་འཕྲོས་པས་རྒྱལ་བ་སྲས་བཅས་ཀྱི་ཐུགས་རྗེ་དང་ནུས་མཐུ་ཐམས་ཅད་འོད་ཟེར་གྱི་རྣམ་པར་སྤྱན་དྲངས། ཕུར་པ་ལ་ཐིམ་པས་ཁམས་གསུམ་དུས་གཅིག་ལ་སྒྲོལ་བར་ནུས་པའི་མཐུ་དང་ལྡན་པར་གྱུར་པར་བསམས་ལ། ཧཱུྃ། ཡེ་ཤེས་མཁའ་འགྲོ་བདུད་འདུལ་མའི། །སྲས་མཆོག་བཛྲ་ཀཱི་ལཱ་ཡ། །རྣམ་པར་གདེངས་པ་ཙམ་གྱིས་ཀྱང་། །ཁམས་གསུམ་འདར་ཞིང་སྲིད་གསུམ་འཁྲུག །ཚངས་སོགས་ལྷ་ཡང་རླག་བྱེད་ན། །དགྲ་དང་བགེགས་ལ་སྨོས་ཅི་དགོས། །ཞིང་བཅུ་ཚང་པའི་དགྲ་བགེགས་འདི། ཁྲོ་གཏུམ་ཁྲོས་པའི་དྲག་ཤུལ་གྱིས། །ཡེ་ཤེས་ཆེན་པོའི་ཀློང་དུ་སྒྲོལ། ཧཱུྃ་བཛྲ་དྷཀྐི་ནི་སིདྷ་མུ་ཥ་ཧ་རི་ནི་ས་བཛྲ་ཀཱི་ལི་ཀཱ་ལཱ་ཡ་ཧཱུྃ་ཕཊཿ ཅེས་སྙིང་དཀར་ནག་མཚམས་སུ་བཏབ་པས་སྲས་མཆོག་གི་འོད་ཟེར་ཁོ་ལ་ཕོག་པས་ལུས་ལ་ལྷན་སྐྱེས་སུ་གནས་པའི་བདུད་བཞི་དྲན་པ་ལངས་ཏེ་རང་གཤེད་བབ་ནས་འཁོར་ལོ་བཞིའི་རྩ་བ་རྣམས་བཅད་དེ་ཀླད་ཁྲག་ཁྲུག་གིས་འདྲེས། ཚེ་བསོད་ཀྱི་ངོ་བོ་ཨ་ཡིག་དཀར་པོ་འོད་ལྔའི་མདངས་དང་ལྡན་པ། རྣམ་ཤེས་ཀྱི་རྟེན་ནྲྀ་ཡིག་དང་བཅས་པ་ཕུར་རྩེའི་ཧཱུྃ་གིས་རེག་པ་ཙམ་གྱིས་རྡོ་ཁབ་ལེན་གྱིས་ལྕགས་བླངས་པ་ལྟར་སེང་སྒྲ་དང་བཅས་བླངས་ཏེ་ཕུར་རྩེ་ལ་རེག །རང་ལ་བསྟན་པས་ཨ་དཀར་པོ་འོད་ལྔའི་ཐིག་ལེ་དང་བཅས་པ་རྣམས་སྙིང་གར་ཐིམས་པས་ཚེ་བསོད་རྒྱས་ཏེ་གཟི་བརྗིད་འབར། ནྲྀ་ཡིག་ཕཊ་ཀྱིས་འཕངས་པས་ཕུར་པའི་ཁོང་གསེང་གི་ལམ་ནས་བརྒྱུད་ལས་ངན་གྱི་རྣམ་སྨིན་བཀྲུས། དྭངས་མ་ཧཱུྃ་སྔོན་པོར་གྱུར་པ་རྒྱ་མདུད་ཀྱི་རྩེ་ལས་འཐོན་ཏེ་ཡེ་ཤེས་ཀྱི་མཁའ་འགྲོའི་ཐུགས་ཀར་ཐིམ་པར་བསམས་ཤིང་། ཧཱུྃ། སྙིང་རྗེའི་ཡུལ་གྱུར་ལས་ངན་ཁྱོད། །གཟུང་འཛིན་བག་ཆགས་རྒྱུན་གཅོད་ཕྱིར། །ཐུགས་རྗེའི་ཐབས་ཀྱིས་སྒྲོལ་བྱེད་ན། །ཕུང་པོའི་ཞེན་པ་ཡོངས་དོར་ལ། །རྣམ་ཤེས་དྭངས་མའི་ཡི་གེའི་འབྲུ། ཆོས་དབྱིངས་མཁའ་འགྲོའི་ཐུགས་ཀར་བསྟིམ། །སྐྱེ་མེད་ཆོས་སྐུའི་ཀློང་ཡངས་སུ། །འཛིན་མེད་དམིགས་པའི་རྒྱ་ཡིས་ཐོབ། །ཕཊ། ཅེས་བརྗོད་ཅིང་སྤར་ལ་དམིགས་མེད་དུ་དར་གཅིག་མཉམ་པར་བཞག་གོ། དེ་ནས་སྙིགས་མའི་ལུས་མཚོན་ཆའི་ཚོགས་ཀྱིས་གཏུབ་ཅིང་འདྲལ་བར་བྱ་སྟེ། དེ་ཡང་ཐོག་མར་གཏུན་དུ་བརྡུང་ཞིང་། ཧཱུྃ། རྡུངས་ཤིག་རྡོ་རྗེ་འབར་བས་རྡུངས། །བཀའ་ལས་འདའ་བྱེད་སྡིག་ཅན་རྣམས། །ཁྲོ་མོ་འབར་བའི་གཏུན་ཁུང་དུ། །རྡོ་རྗེའི་ཐོ་བས་བརྡུང་བྱས་པས། །ལྷ་ཡང་རུང་སྟེ་རླག་བྱེད་ན། །དགྲ་དང་བགེགས་ལ་སྨོས་ཅི་དགོས། །ཨཱོཾ་པདྨ་ཨ་ཀོ་ཊ་ཡ་ཁ་ཐཾ་ཁ་ཐཾ། ཞེས་བརྡུང་། དེ་ནས་གྲི་གུག་ཐོགས་ལ། ཧཱུྃ། གནམ་ལྕགས་འབར་བ་དྲག་པོའི་མཚོན། །གྲི་གུག་འབར་བའི་རྣོ་དབལ་གྱིས། །གནོད་བྱེད་དགྲ་བགེགས་སྙིང་ལ་འདེབས། །སྲོག་རྩ་ཆོད་ལ་སྙིང་རྩ་གཏུབས། །ཧཱུྃ་བཛྲ་དྷཀྐི་ནི་སིདྷ་མུ་ཥ་ཧ་རི་ནི་ས་ཨ་ཏི་ཀྲ་མ་ན་དགྲ་བགེགས་གནོད་བྱེད་ཀཱི་ལི་ཀཱི་ལཱ་ཡ་སརྦ་ཤ་ཏྲུམ་མཱ་ར་ཡ་ཐུཾ་རི་ལི་ལི་སོད་སོད། ཅེས་གཏུབ་བོ། །ཐོད་ཁྲག་ཐོགས་ལ། ཧཱུྃ། རཀྟའི་རྒྱ་མཚོ་རྦ་ཀློང་འཁྲུག །རྦོད་གཏོང་མ་མོའི་ཁྲག་ཟོར་ཏེ། །ནད་ཡམས་གདུག་པའི་དུག་རླངས་ཀྱིས། །དགྲ་སྲོག་ཆོད་ལ་དགྲ་དཔུང་ཤིག །དྲག་སྔགས་བརྗོད་ཅིང་ཁྲག་ཆར་དབབ། །ཁ་ཊྭཱཾ་ཐོགས་ལ། ཧཱུྃ། དུག་གསུམ་ཁྲོས་པའི་ཁ་ཊྭཱཾ་ག །སྐུ་གསུམ་མཁའ་འགྲོའི་ཕྱག་མཚན་ཏེ། །དགྲ་བོའི་རྩ་གསུམ་འཁོར་ལོ་དང་། །དུག་གསུམ་འཁོར་བ་རྩད་ནས་གཅོད། །ཅེས་དྲག་སྔགས་བརྗོད་ཅིང་སྙིང་གར་བརྡེག །འཁོར་ལོ་ཐོགས་ལ། ཧཱུྃ། རྩིབས་སྟོང་འབར་བའི་འཁོར་ལོ་ཆེ། །བདུད་སྡེའི་གཤེད་དུ་འཁོར་བ་ཡིས། །སྲོག་རྩ་ཁྲག་རྩ་སྙིང་རྩ་དང་། །མ་རིག་སྲིད་པའི་འཁྲུལ་རྒྱུན་ཆོད། །དྲག་སྔགས་བརྗོད་ཅིང་སྙིང་གར་བསྐོར། རྒྱ་གྲམ་ཐོགས་ལ། །ཧཱུྃ། སྣ་ཚོགས་རྡོ་རྗེ་ལས་བཞིའི་མཚོན། །མི་འགྱུར་བརྟན་པའི་བརྟུལ་ཞུགས་ཀྱིས། །གནོད་བྱེད་ཚལ་པ་བརྒྱར་ཁོས་ལ། །ཐལ་བ་རྡུལ་ཕྲན་བཞིན་དུ་ཐོང་། །དྲག་སྔགས་བརྗོད་ཅིང་རྡོ་རྗེས་བརྡུང་། དབྱུག་ཐོ་ཐོགས་ལ། ཧཱུྃ། མི་བཟད་རྡོ་རྗེའི་དབྱུག་པ་ཆེ། །དུར་ཁྲོད་མཁའ་འགྲོའི་མཚོན་ཆ་སྟེ། །དགྲ་བགེགས་ལོག་འདྲེན་མ་ལུས་པའི། །མགོ་ལུས་དབང་པོ་ཕྱེ་མར་རྡུངས། །དྲག་སྔགས་བརྗོད་ཅིང་དབྱུག་པས་བརྡུང་། ཐོ་བ་ཐོགས་ལ། ཧཱུྃ། ཐོ་བ་འབར་བ་དྲག་པོའི་མཚོན། །སྡང་དགྲ་གནོད་བྱེད་འཕུང་སྲི་ཡི། །ཀླད་ཁྲག་ཕུང་པོ་ཞོ་ལྟར་དཀྲུགས། །སྒྱུ་ལུས་ཕུང་པོ་སིལ་བུར་ཤིག །དྲག་སྔགས་བརྗོད་ཅིང་ཐོ་བས་བརྡུང་། མདའ་གཞུ་ཐོགས་ལ། ཧཱུྃ། ཤེས་རབ་དབྱིངས་ཀྱི་གཞུ་བཀང་སྟེ། བདེ་ཆེན་ཐབས་ཀྱི་མདའ་སྤྲིངས་ནས། །བརྣག་པའི་དགྲ་བགེགས་སྙིང་ལ་གཟིར། །ཚེ་སྲོག་དབུགས་ཀྱི་རྒྱུན་ཐག་གཅོད། །དྲག་སྔགས་བརྗོད་ཅིང་མདའ་ཡིས་བརྡེག །གཏོར་མ་ཐོགས་ལ། ཧཱུྃ། དཔལ་གྱི་གཏོར་མ་དྲག་མོའི་ཟོར། །གནམ་ལྕགས་ཐོག་གི་བུ་ཡུག་འཚུབ། །དགྲ་བོའི་གཟུགས་ཕུང་ཐལ་བར་རློག །ཁ་ཕུང་རྗེས་མེད་དུས་མཐའ་བཏུལ། ཅེས་བརྗོད་གཏོར་མ་ལུས་ལ་བརྡེག །རལ་གྲི་ཐོགས་ལ། ཧཱུྃ། གནམ་ལྕགས་རལ་གྲི་གདུག་པའི་དབལ། །རྣོ་ངར་རེག་གཅོད་མཚོན་རྣོན་པོས། །དམིགས་པར་བྱ་བའི་བླ་སྲོག་དང་། །གཟུགས་ཕུང་དུམ་བུ་སིལ་བུར་གཏུབས། །ཧཱུྃ་བཛྲ་དྷཀྐི་ནི་སིདྷ་མུ་ཥ་ཧ་རི་ནི་ས་དགྲ་བོའི་སྙིང་ཁྲག་ཧུར་ཐུཾ་བྷྱོ། བཛྲ་ཀཱི་ལཱ་ཀཱི་ལཱ་ཡ་དགྲ་བོ་མི་ནོར་འཁོར་དང་བཅས་པ་ཤ་ཏྲུཾ་མཱ་ར་ཡ་ཧཱུྃ་ཕཊ༔ སརྦ་དྷཀྐི་ནི་བཛྲ་ཀཱི་ལི་ཀཱི་ལཱ་ཡ་དགྲ་བོ་མི་ནོར་འཁོར་དང་བཅས་པ་ཤ་ཏྲུཾ་མཱ་ར་ཡ་ཧཱུྃ་ཕཊཿ བཛྲ་དྷཀྐི་ནི་དགྲ་བོའི་ཤ་ལ་ཀཾ་ཀཾཿ རཏྣ་དྷཀྐི་ནི་དགྲ་བོའི་རུས་ལ་ཆེམ་ཆེམ༔ པདྨ་དྷཀྐི་ནི་དགྲ་བོའི་ཁྲག་ལ་གཏིབས་གཏིབས༔ ཀརྨ་དྷཀྐི་ནི་དགྲ་བོའི་དབུགས་ལ་ཧབ་ཧབཿ བྷུདྡྷ་དྷཀྐི་ནི་སིདྷ་མུ་ཥ་ཧ་རི་ནི་ས་དགྲ་བོའི་སྲོག་རྩ་ལ་རྦད་རྦདཿ ད་ཡ་ད་ཡཱཿ ཆོད་ཡ་ཆོད་ཡཱཿ མཱ་ར་ཡ་ཛཿཛཿ ཐུན་བྷྱོ་ཐུན་བྷྱོཿ ཅེས་བརྗོད་ཅིང་མཚོན་ཆ་རྣམས་ཀྱིས་ལིངྒ་དུམ་བུར་གཏུབ་བོ། །མཚོན་ཆ་ཐམས་ཅད་ཀྱི་རྗེས་སུ་རྒྱས་པར་བྱེད་ན་སྔགས་འདི་བརྗོད། ཅུང་ཟད་བསྡུ་ན་གོང་གི་གྲི་གུག་གི་འོག་གི་སྔགས་བརྗོད། དེ་ནས་བསྟབ་པ་བྱ་བ་ནི། ཧཱུྃ། ལྷ་སྔགས་ཏིང་འཛིན་རོལ་པའི་མཐུས། དགྲ་བགེགས་བསྒྲལ་བའི་ཤ་ཁྲག་རུས། །བདུད་འདུལ་དཔལ་གྱི་མཁའ་འགྲོ་མ། །སྤྲུལ་པ་ཡང་སྤྲུལ་བཅས་རྣམས་ལ། །ཟག་མེད་དགྱེས་པ་བསྐྱེད་པ་ཡི། །བླ་མེད་མཆོག་གི་མཆོད་པར་འབུལ། །གཏི་མུག་ཤ་ཆེན་སྤུངས་པའིི་རི། །རྔམ་པའི་སྟོབས་ཀྱིས་བཞེས་སུ་གསོལ། །འདོད་ཆགས་ཁྲག་གི་རོལ་མཚོ་བསྐྱིལ། །བརྗིད་པའི་སྟོབས་ཀྱིས་བཞེས་སུ་གསོལ། །ཞེ་སྡང་རུས་པའི་གྲམ་ཁྲོད་བརྡལ། །དྲག་ཤུལ་སྟོབས་ཀྱིས་བཞེས་སུ་གསོལ། །ཞག་ཀླད་ཚིལ་རྐང་ས་གཞིར་སྤུངས། །ཁྲོ་གཏུམ་སྟོབས་ཀྱིས་བཞེས་སུ་གསོལ། །སྡང་དགྲ་གནོད་བྱེད་ལོག་འདྲེན་ཀུན། །ལྷག་མ་མེད་པར་བཞེས་སུ་གསོལ། །ཧཱུྃ་བཛྲ་དྷཀྐི་ནི་སིདྷ་མུ་ཁ་ཧ་རི་ནི་ས་དགྲ་བོ་ཤ་ཏྲུཾ་མཱ་ར་ཡ་མཾ་ས་རཀྟ་ཀེང་ནི་རི་ཏི་ཙིཏྟ་བྷ་སུ་ཏ་བ་ལིང་ཏ་ཁ་ཁ་ཁཱ་ཧི་ཁཱ་ཧི། སརྦ་དྷཀྐི་ནི་ས་མ་ཡ་མཾ་ས་རཀྟ་ཀེང་ནི་རི་ཏི་ཙིཏྟ་བྷ་སུ་ཏ་བ་ལིངྟ་ཁ་ཁ་ཁཱ་ཧི་ཁཱ་ཧི། ཞེས་ལིང་རོ་རྣམས་ཀྱི་ཕྱེད་གཏོར་མར་འབུལ་ཞིང་ཕྱེད་གཏོར་བཟློག་གི་སྐབས་སུ་འབུལ་རྒྱུར་བཞག་གོ། ཞེས་པའང་གཏེར་སྟོན་མཆོག་གི་སྤྲུལ་པའི་སྐུ་ཉིད་ཀྱིས་བཀས་གནང་ཞིང་། འདི་ལྟ་བུ་ཞིག་གྱིས་ཤིག་ཅེས་པའི་བཀའ་སྩལ་ལྟར་མངོན་སྤྱོད་དྲག་པོའི་རིག་སྔགས་འཆང་བ་ཧོར་གྱི་བན་དྷེས་བྱང་སྡང་རྡོའི་གཞུང་དུ་སྦྱར་བ་ཛ་ཡནྟུ། མངྒ་ལཾ། །

བསྒྲལ་སྔགས་དང་བཟློག་སྔགས།

གཞུང་གི་འགུགས་གཞུག་བདེན་བརྗོད་མཇུག་ཏུ། ན་མོ་དཀོན་མཆོག་གསུམ་དང་སོགས། ཧཱུྃ་བཛྲ་དྷཀྐི་ནི་སེངྷ་མུ་ཥ་ཧ་རི་ནི་ས་ཡ་མ་རུ་ཊ་ཤ་ད་ར་ཡ་ཕཊ་ཛཿཛཿ བྷྱོ་བྷྱོ༔ དགྲ་བོ་བྱད་མ་ལྷ་སྲུང་དང་བཅས་པ་མཱ་ར་ཡ་ཁུག་ཁུག་རིལ་རིལ་ཐུམ་ཐུམ་རྦུད་རྦུད༔ ཛ་ཧཱུྃ་སོགས་རྒྱས་འདེབས། བསད་སྔགས་ནི། ཧཱུྃ་བཛྲ་དྷཀྐི་ནི་སིདྷ་མུ་ཥ་ཧ་རི་ནི་ས་དགྲ་བོ་བྱད་མའི་སྙིང་ཁྲག་ཧུར་ཐུམ་བྷྱོཿ བཛྲ་ཀཱི་ལི་ཀཱི་ལཱ་ཡ་དགྲ་བོ་བྱད་མའི་མི་ནོར་འཁོར་དང་བཅས་པ་ཤ་ཏྲུཾ་མཱ་ར་ཡ་ཧཱུྃ་ཕཊཿ སརྦ་དྷཀྐི་ནི་བཛྲ་ཀཱི་ལི་ཀཱི་ལཱ་ཡ་དགྲ་བོ་མི་ནོར་འཁོར་དང་བཅས་པ་ཤ་ཏྲུཾ་མཱ་ར་ཡ་ཧཱུྃ་ཕཊཿ བཛྲ་དྷཀྐི་ནི་དགྲ་བོའི་བྱད་མའི་ཤ་ལ་ཀཾ་ཀཾ༔ རཏྣ་དྷཀྐི་ནི་དགྲ་བོའི་རུས་ལ་ཆེམ་ཆེམ༔ པདྨ་དྷཀྐི་ནི་དགྲ་བོ་བྱད་མའི་ཁྲག་ལ་གཏིབས་གཏིབས༔ ཀརྨ་དྷཀྐི་ནི་དགྲ་བ་ོབྱད་མའི་དབུགས་ལ་ཧབ་ཧབ༔ བུདྡྷ་དྷཀྐི་ནི་སིདྷ་མུ་ཥ་ཧ་རི་ནི་ས་དགྲ་བོ་བྱད་མའི་སྲོག་རྩ་ལ་རྦད་རྦད༔ ད་ཡ་ད་ཡཱ༔ ཆོད་ཡ་ཆོད་ཡཱ༔ མཱ་ར་ཡ་ཛཿཛཿཐུན་བྷྱོ་ཐུན་བྷྱོ༔ ཅེས་བསྒྲལ་ཞིང་ལིང་རོ་གཏོར་མར་འབུལ༔ ཧཱུྃ་བཛྲ་དྷཀྐི་ནི་སིངྷ་མུ་ཥ་ཧ་རི་ནི་ས་དགྲ་བོ་ཤ་ཏྲུཾ་མཱ་ར་ཡཿམཾ་ས་རཀྟ་ཀེང་ནི་རི་ཏི་ཙིཏྟ་བྷ་སུ་ཏ་བྷ་ལིངྟ་ཁ་ཁ་ཁཱ་ཧི་ཁཱ་ཧིཿ སརྦ་དྷཀྐི་ནི་ས་མ་ཡཿ མཾ་ས་རཀྟ་ཀེང་ནི་རི་ཏི་ཙིཏྟ་བྷ་སུ་ཏ་བྷ་ལིངྟ་ཁཱ་ཧི་ཁཱ་ཧི༔ བཟློག་སྔགས་ནི། ཧཱུྃ་བཛྲ་དྷཀྐི་ནི་སིདྷ་མུ་ཥ་ཧ་རི་ནི་ས་ཙིཏྟ་ཧྲིང་ཛཿ རྔཾ་རྔཾ་ཁཾ་ཁཾ་རཾ་རཾ་མྱོག་མྱོག་ལཾ་ལཾ་ཡཾ་ཡཾ་དགྲ་བོ་བྱད་མ་དཀྲུག་དཀྲུག༔ ཕྱེས་ཕྱེས་མཱ་ར་ཡ་སྙིང་ཁྲག་ཚལ་པ་རྦད་རྦད་སོད་སོད་བྷྱོ་བྷྱོ་ཟློག་ཟློག༔ ཧཱུྃ་བཛྲ་དྷཀྐི་ནི་སིདྷ་མུ་ཥ་ཧ་རི་ནི་ས་ཨ་ཀ་ས་མ་ར་ཙ་ཤ་ད་ར་ཡ་ཧཱུྃ་ཕཊ༔ དགྲ་བགེགས་བྱད་མ་ལྷ་སྲུང་དང་བཅས་པ་ཐམས་ཅད་ནྲི་ཏྲི་མཱ་ར་ཡ་བྷྱོ་བྷྱོ་ཟློག་ཟློག༔ ཧཱུྃ་བཛྲ་དྷཀྐི་ནི་སིདྷ་མུ་ཥ་ཧ་རི་ནི་ས་ཧ་དེ་མོ་ཧ་ཏྲི་ཏ་ཡཱ༔ པྲ་ཧ་རི་ན་ཧཱུྃ་ཧཱུྃ་ཕཊ་ཕཊ་བྷྱོ་བྷྱོཿ ས་མ་ཡཱ་ཟློག་ཟློགཿ ཨ་ལ་ལ་པྲ་མོ་ཧེ་བྷྱོ་བྷྱོ༔ ཨ་ཏི་ཀྲ་མ་ན་ཟློག་ཟློག༔ ཕུར་ཁ་ཟློག༔ བྱོལ་ཁ་ཟློག༔ ཟོར་ཁ་ཟློག༔ དམོད་མོ་ཟློག༔ རྦོད་གཏོང་བཟློག༔ རྦད་འདྲེ་ཟློག༔ དགྲ་བགེགས་ཀྱི་སྟེང་དུ་བྷྱོ་བྷྱོ་ཟློག་ཟློག༔

བདུད་འདུལ་ཡེ་ཤེས་ཀྱི་མཁའ་འགྲོ་མའི་རྒྱུན་འཁྱེར་དང་སྲུང་བཟློག་གི་ངག་འདོན་དཀྱུས་སུ་བཀོད་པ་གནམ་ལྕགས་རྡོ་རྗེ་འབར་བའི་གུར་ཁང་།

བདུད་འདུལ་ཡེ་ཤེས་ཀྱི་མཁའ་འགྲོ་མའི་རྒྱུན་འཁྱེར་དང་སྲུང་བཟློག་གི་ངག་འདོན་དཀྱུས་སུ་བཀོད་པ་གནམ་ལྕགས་རྡོ་རྗེ་འབར་བའི་གུར་ཁང་བཞུགས། །བདེ་ཆེན་ཆོས་དབྱིངས་ནམ་མཁའ་ལ། །མ་འགགས་ཐུགས་རྗེའི་ཆུ་འཛིན་དཀྲིགས། །མཆོག་ཐུན་སྤྲིན་བཅུད་ཆེར་འབེབས་པའི། །རྩ་གསུམ་རྒྱལ་བ་རྒྱ་མཚོར་འདུད། དེ་ཡང་ཡེ་ཤེས་ཀྱི་མཁའ་འགྲོ་བདུད་འདུལ་མའི་དབང་ལུང་ཐོབ་ཅིང་མན་ངག་སྤྱི་དང་བྱེ་བྲག་གི་གནད་རྣམས་དམ་པའི་ཞལ་ལུང་ལ་བློ་གྲོས་ཀྱི་འཇུག་པ་ཕྱིན་ཅི་མ་ལོག་ཤིང་དམ་ཚིག་དང་ལྡན་པ་དག་གིས་རྒྱུན་གྱི་རྣལ་འབྱོར་འཁྱེར་བདེ་ངག་འདོན་དུ་བྱ་བ་ལ་ཐོགམར་སྐྱབས་སེམས་ནི། ཧཱུྃ༔ བདག་ནི་དེང་ནས་བྱང་ཆུབ་བར༔ བླ་མ་དཀོན་མཆོག་དཀྱིལ་འཁོར་ལྷ༔ ཡེ་ཤེས་མཁའ་འགྲོའི་ལྷ་ཚོགས་ལ༔ རྣམ་པ་ཀུན་ཏུ་སྐྱབས་སུ་མཆི༔ དབང་དྲག་ལས་ཀྱི་བྱང་ཆུབ་སེམས༔ དམ་པ་མཆོག་ནི་བསྐྱེད་པར་བགྱི༔ ལན་གསུམ། ཧཱུྃ༔ འཁོར་འདས་གདོད་ནས་སྟོང་པའི་རྩལ། ཀུན་ཁྱབ་སྙིང་རྗེ་ཆེན་པོའི་ངང་། རང་རིག་གྲི་གུག་ཧཱུྃ་མཚན་ལས། །འབྱུང་ལྔའི་ད་ལ་ཡུམ་ལྔའི་ཀློང་། ཁྲག་མཚོ་རུས་པའི་རི་རབ་སྟེང་། །བྷྲཱུྃ་ལས་དྲག་པོའི་གཞལ་ཡས་ཁང་། །མཚན་ཉིད་ཡོངས་རྫོགས་ཕོ་བྲང་དབུས། །རྩིབས་བརྒྱད་ལྟེ་བར་ཆོས་འབྱུང་སྟེང་། །དྲེགས་བྱེད་ཕོ་མོ་པད་ཉིའི་གདན། །ཐུགས་སྲོག་ཧཱུྃ་གི་འཕྲོ་འདུ་ལས། །རང་ཉིད་བདུད་འདུལ་མཁའ་འགྲོ་མ། །སྐུ་མདོག་མཐིང་ནག་སེང་གེའི་གདོང་། །ཞལ་གདངས་ལྗགས་འདྲིལ་མཆེ་བ་གཙིགས། །རལ་པ་ཁམ་ནག་སྤྲིན་ལྟར་གཏིབས། །སྤྱན་གསུམ་སྡང་མིག་རབ་ཏུ་བསྒྲད། །སྨ་ར་སྨིན་མ་དམར་སེར་འབར། །འཁོར་ལོས་མཚན་པའི་གྲི་གུག་གཡས། །ལྕང་ལོས་མཚན་པའི་ཐོད་ཁྲག་གཡོན། །གཡས་བསྐུམ་གཡོན་བརྐྱང་གར་སྟབས་འགྱིངས། །དུར་ཁྲོད་འཇིགས་པའི་ཆས་བརྒྱད་དང་། །གནམ་ལྕགས་སྤུ་གྲིའི་གཤོག་པ་སོགས། །དཔལ་གྱི་ཆས་བཅུ་འབར་བས་བརྒྱན། །ནུ་མ་འབུར་ཞིང་བྷ་ག་རྒྱས། །དཔའ་སྒེག་ཁྲོ་གཏུམ་གཟི་བརྗིད་འབར། ཁ་ཊྭཱཾ་ག་ལ་བདེ་བས་འཁྱུད། །མེ་དཔུང་དམར་ནག་ཀློང་དཀྱིལ་དུ། །བདེ་སྟོང་ཟུང་དུ་འཇུག་པ་ཡི། །བདག་ཉིད་ཆེན་མོའི་སྤྱི་གཙུག་ཏུ། ། དྲག་རྩལ་མཐིང་ནག་གཡས་རྡོ་རྗེ། །གཡོན་པ་སྡིགས་མཛུབ་ཕྱག་རྒྱ་ཅན། །རལ་ཁྲོད་དབང་གི་རྟ་སྐད་འཚེར། །ཕག་མོ་དམར་མོ་གྲི་ཐོད་འཁྲིལ། །ཕག་ཞལ་ངུར་ཞིང་མེ་ཀླུང་བཞུགས༔ རྩིབས་བརྒྱད་ཏི་ར་པདྨའི་སྟེང་། །རྡོ་རྗེ་རིན་ཆེན་པདྨ་དང་། །ལས་ཀྱི་མཁའ་འགྲོ་ཕྱོགས་ཀྱི་མདོག །གཡས་རྣམས་འཁོར་ལོ་ཁ་ཊྭཱཾ་ག །མེ་ཡི་འཁོར་ལོ་རལ་གྲི་འཕྱར། །གཡོན་རྣམས་ཐོད་ཁྲག་ཐུགས་ཀར་བསྣམས། །དུར་ཁྲོད་ཆས་ལྡན་་གར་སྟབས་འགྱིངས། །མེ་དཔུང་ཀློང་དུ་ཁྲོ་གཏུམ་འབར། །མཚམས་བཞིར་དམ་ཚིག་སྣ་ཚོགས་དང་། །འཇིག་རྟེན་ལས་ཀྱི་མཁའ་འགྲོ་བཞི། །ཉི་ཟླ་གསེར་ཟངས་གནམ་ལྕགས་ཀྱི། །རྩིབས་སྟོང་འཁོར་ལོ་ཆ་ལང་བརྡེབ། །ཕྱེད་གཟུགས་མདངས་ལྡན་ཁྲོ་གཏུམ་འབར། །སྒོ་བཞིར་ཁ་གདོང་ཕག་གདོང་དང་། ཁྱི་གདོང་འུག་པའི་གདོང་ཅན་བཞི། །གཡས་རྣམས་རང་མདོག་ཅང་ཏེའུ་འཁྲོལ། །གཡོན་རྣམས་རང་རྟགས་ཕྱག་མཚན་འཛིན། ཁ་ཊྭཱཾ་གར་འཁྱུད་བརྐྱང་བསྐུམ་བཞུགས། །གཞན་ཡང་འབུམ་ཕྲག་མཁའ་འགྲོའི་ཚོགས། ཉི་ཟེར་རྡུལ་འཚུབ་ལྟར་གསལ་བའི། །གནས་གསུམ་ལས་འཕྲོས་འོད་ཟེར་གྱིས། །རང་བཞིན་ཞིང་ཁམས་རྒྱ་མཚོ་ནས། །ཡེ་ཤེས་སེམས་དཔའ་རང་འདྲ་བ། ཆར་སྤྲིན་གཏིབས་ལྟར་བྱོན་པར་གྱུར། །ཧཱུྃ། འོག་མིན་མཁའ་སྤྱོད་ཨོ་རྒྱན་ཡུལ། །གནས་ཡུལ་དུར་ཁྲོད་ཐམས་ཅད་ནས། །ཡེ་ཤེས་མཁའ་འགྲོ་འཁོར་དང་བཅས། །དད་པས་སྤྱན་འདྲེན་གནས་འདིར་གཤེགས། །གཉིས་མེད་བརྟན་པ་ཆེན་པོར་བཞུགས། །ཞིང་རྡུལ་གྲངས་མཉམ་སྤྲུལ་ཕྱག་འཆལ། །ཕུང་ལྔ་འབྱུང་ལྔ་འདོད་ཡོན་ལྔ། །ཤ་ལྔ་བདུད་རྩི་སྨན་གཏོར་རཀ །དགྲ་བགེགས་བསྒྲལ་བའི་ཤ་རུས་ཁྲག །ཞག་གླད་ཚིལ་རྐང་ནང་ཁྲོལ་དང་། །སྣང་གྲགས་འགྱུ་བའི་རྟོག་ཚོགས་སོགས། །ཕྱི་ནང་གསང་མཆོད་ཞིང་ཁྱབ་འབུལ། །ཧཱུྃ་བཛྲ་དྷཀྐི་ནི་སིངྷ་མུ་ཥ་ཧ་རི་ནི་ས་ས་པཱ་རི་ཝ་ར་སརྦ་པཱུ་ཛ་ཁཱ་ཧི། ཧཱུྃ། ཁྱབ་གསལ་བརྗོད་བྲལ་ཡེ་དབྱིངས་ལས། །སྐུ་གསུམ་མཁའ་འགྲོ་གཟུགས་སྐུའི་ཟླ། །གདུལ་བྱའི་ཆུ་མཚོར་འགོག་མེད་དུ། །གྲངས་མེད་དེར་མཐུན་འཆར་ལ་བསྟོད། །འགག་མེད་ཐུགས་རྗེའི་སྤྲིན་ཕུང་ལས། །འཕྲིན་ལས་རྣམ་བཞིའི་ཆར་ཆེན་པོས། །གྲུབ་གཉིས་འབྲས་བཟང་སྨིན་མཛད་པའི། །རིགས་ཀྱི་མཁའ་འགྲོ་རྣམས་ལ་འདུད། །མཐུ་སྟོབས་རྡོ་རྗེའི་མེ་ཆར་གྱིས། ལོག་འདྲེན་བདུད་སྡེའི་བྲག་གི་རི། །ཕྱེ་མར་འཐགས་མཛད་མཁའ་འགྲོའི་ཚོགས། །འཁོར་དང་བཅས་ལ་གུས་པས་བསྟོད། །བརྟེན་དང་རྟེན་པར་བཅས་པ་ཀུན། །སྣང་སྟོང་གཉིས་མེད་དག་པའི་སྐུའི། །སྤྱི་བོར་འཁོར་ལོ་རྩིབས་བཞིར་ཨཱོཾ། །མགྲིན་པར་པདྨའི་ལྟེ་བར་ཨཱཿ སྙིང་གར་རྡོ་རྗེ་རྒྱ་གྲམ་གྱི། དབུས་སུ་རང་རྟགས་གྲི་གུག་གི། ལྟེ་བར་ཉི་མར་གཙོ་མོ་དང་། །རིགས་བདག་ཡབ་ཀྱི་ཐུགས་ཀར་ཧཱུྃ། །འཁོར་བཞིར་ཧ་རི་ནི་སས་མཚན། །ཕག་མོ་ཤུགས་འགྲོར་བཅས་པར་མ། །དེ་རྣམས་མཐའ་མར་བཟླས་པའི་སྔགས། །འོད་དམར་ཚ་བའི་འཕྲེང་ཐག་ཅན། །སྔགས་གཡས་ཕྲེང་ཐག་གཡོན་སྐོར་དུ། །འཁོར་བས་རིགས་བདག་ཡབ་ཡུམ་གྱི། །འབུམ་ཕྲག་མཁའ་འགྲོ་དབང་དུ་བསྡུས། །བདུད་འདུལ་ནག་མོས་མོ་བརྒྱུད་ཀུན། །ལས་ལ་བཀོལ་ཏེ་དྷཀྐིའི་སྲོག །ཡིག་འབྲུ་རྣམས་ཀྱིས་བརྒྱུད་བསྐུལ་བས། །བདག་གི་དབང་དུ་ཀུན་འདུས་ནས། །ཅི་བཅོལ་ལས་བྱེད་དངོས་གྲུབ་སྩལ། །སྔགས་ཀྱི་འོད་ཟེར་འཕྲོ་འདུ་ཡིས། །རྒྱལ་བ་ཀུན་མཆོད་འགྲོ་སྒྲིབ་སྦྱངས། །དགྲ་བགེགས་ཚར་བཅད་མཆོག་ཐུན་གྱི། །ལེགས་ཚོགས་དཔལ་ལ་སྤྱོད་པར་བསམ། །རྩ་བའི་བསྙེན་སྒྲུབ་ཀྱི་སྔགས་ནི། ཧཱུྃ་བཛྲ་དྷཀྐི་ནི་སིངྷ་མུ་ཥ་ཧ་རི་ནི་ས་སརྦ་ས་མ་ཡ་ཙིཏྟ་ཧྲིང་ཛ་སིདྡྷི་ཧཱུྃ༔ མང་ཉུང་སྐབས་མཐུན་ལྟར་བཟླས་པའི་མཇུག་ཏུ། བཛྲ་པུཥྤེ་དྷུ་པེ་ཨཱ་ལོ་ཀེ་གནྡྷེ་ནཻ་ཝི་དྱ་ཤཔྟ་མ་ཧཱ་སརྦ་པཉྩ་རཀྟ་བྷ་ལིངྟ་པཱུ་ཛ་ཁ་ཁ་ཁཱ་ཧི་ཁཱ་ཧི། ཧཱུྃ༔ ཆོས་སྐུའི་བདག་ཉིད་སྐུ་གསུམ་མཁའ་འགྲོའི་གཙོ༔ ཡེ་ཤེས་ལས་གྲུབ་དབྱིངས་ཀྱི་དྷཀྐི་མ༔ བདུད་དང་མུ་སྟེགས་ལོག་འདྲེན་དགྲ་བགེགས་གཤེད༔ བདུད་འདུལ་སེང་གདོང་མཁའ་འགྲོར་ཕྱག་འཚལ་བསྟོད༔ དེ་ནས་བསྲུང་བའི་སྒོམ་བཟླས་ལ་འཇུག་པར་འདོད་ན། ཨཱོཾ་ཡོ་ག་ཤུདྡྷཿསརྦ་དྷརྨྨཱཿཡོ་ག་ཤུ་དྡྷོ྅ཧཾ༔ ཞེས་བརྗོད་པས་སྔར་གྱི་དམིགས་པ་ཡང་ཡང་གསལ་བཏབ་ཏེ། དེ་ལྟར་བསྐྱེད་རིམ་ལྷ་ཡི་རྣལ་འབྱོར་དང་། གཞན་ཡང་གཞལ་ཡས་ཀྱི་ཁང་པ་སྒོ་གྲུ་རྟ་བབས་སོགས་མཚན་ཉིད་ཐམས་ཅད་ཡོངས་སུ་རྫོགས་པ་དེ་ཉིད་གནམ་ལྕགས་ལས་གྲུབ་པའི་ཕོ་བྲང་འཇིགས་ཤིང་བརྗིད་ལ། རྔམ་ཞིང་འཁྲུགས་པ། །ཚ་ཞིང་བསྲེགས་པར་གནས་འགྱུར་ཏེ། དེའི་ཕྱི་རོལ་དུ་གནམ་ལྕགས་ཀྱི་འཁོར་ལོ་རྩིབས་སྟོང་དང་ལྡན་པ་ཚ་བའི་ཟེར་རྣོ་བའི་དར་དང་ལྡན་པའི་གུར་ཁང་། དེའི་ཕྱི་རོལ་དུ་གནམ་ལྕགས་ཀྱི་རྡོ་རྗེ་མེ་རབ་ཏུ་འབར་བའི་གུར་ཁང་། དེའི་ཕྱི་རོལ་དུ་གནམ་ལྕགས་ལས་གྲུབ་པའི་གྲི་གུག་མེ་ཤིན་ཏུ་འབར་བའི་གུར་ཁང་། དེའི་ཕྱི་རོལ་དུ་གནམ་ལྕགས་ཀྱི་ཕུར་པ་དབལ་ཤིན་ཏུ་རྣོ་ཞིང་ཁྲོ་ཆུའི་ཚྭ་ཚྭ་འཕྲོ་བའི་གུར་ཁང་། དེའི་ཕྱི་རོལ་དུ་གནམ་ལྕགས་ཀྱི་དགྲ་སྟ་འབར་བའི་གུར་ཁང་། དེའི་ཕྱི་རོལ་དུ་གནམ་ལྕགས་ལས་གྲུབ་པའི་ཁ་ཊྭཱཾ་འབར་བའི་གུར་ཁང་། དེའི་ཕྱི་རོལ་དུ་གནམ་ལྕགས་ཞུན་མའི་རལ་གྲི་འབར་བའི་གུར་ཁང་། དེའི་ཕྱི་རོལ་དུ་མེ་རི་དམར་ནག་དྲག་ཏུ་འབར་ཞིང་རབ་ཏུ་འཚེགས་པའི་གུར་ཁང་། དེའི་ཕྱི་རོལ་དུ་བསྐལ་བའི་རླུང་ཆེན་པོ་སྤུ་གྲི་འབར་བའི་གུར་ཁང་། དེའི་ཕྱི་རོལ་དུ་བྱད་མ་དགྲ་བགེགས་ཐམས་ཅད་སོད་ཆོད་གཏུབས་ཤིག་ལ་སོགས་པའི་སྟོང་ཉིད་སྒྲ་ཡི་གུར་ཁང་། གུང་ཁང་དེ་རྣམས་ཀྱི་བར་མཚམས་དང་དྲ་མིག་རྣམས་ཀྱི་འཚམས་འཚམས་རྣམས་སུ། སྤྲུལ་པའི་མཁའ་འགྲོ་སྐུ་མདོག་སྣ་ཚོགས་ཀྱི་མདོག་ཅན་ཕྱག་ན་སྣ་ཚོགས་འབར་བའི་མཚོན་ཆ་ཐོགས་པ། འཇིགས་ཤིང་རྔམས་པ། དཔའ་ཞིང་སྒེགས་པ་གྲངས་མེད་དཔག་ཏུ་མེད་པ་སྐར་ལྟར་འཁྲུག་ཅིང་ཀློག་ལྟར་འཁྱུགས་པ། ཞལ་ནས་བསྲུང་བའི་སྔགས་སྒྲ་འབྲུག་སྟོང་ལྡིར་བ་ཙམ་དུ་སྒྲོགས་པ། སྐུ་ལུས་གཞལ་ཡས་ཁང་གུར་ཁང་དང་བཅས་པ་ཐམས་ཅད་ཀྱི་ཚ་ཟེར་རབ་ཏུ་འཁྲུགས་པས་གནོད་བྱེད་ལྷ་སྲིན་སྡེ་བརྒྱད་རྒྱལ་བསེན་འབྱུང་པོ་བན་བོན་བྱད་མ་ལྷ་སྲུང་དང་བཅས་པ་ཐམས་ཅད་རྡུལ་ཕྲན་དུ་བརླག་པའི་རང་བཞིན་ཅན་དུ་གྱུར། རང་ཉིད་མཁའ་འགྲོའི་གཙོ་མོ་བདུད་འདུལ་མར་གསལ་བའི་སྤྱི་གཙུག་རིགས་བདག་ཡབ་ཡུམ་གྱི་ཐུགས་ཀར་བླ་མ་སློབ་དཔོན། གཡས་སུ་བསྲུང་བྱ་ཕོ་བརྒྱུད། གཡོན་དུ་མོ་རིགས། འོག་ཏུ་ནོར་རྫས། མདུན་དུ་བྲན་གཡོག །རྒྱབ་ཏུ་ཞིང་ཁང་། དེ་ཐམས་ཅད་ཀྱང་གཞལ་ཡས་ཁང་ལྷ་དང་ལྷ་མོའི་རང་བཞིན་ལས་གཞན་དུ་མ་གྲུབ་ཅིང་གཉིས་སུ་མི་གནས་པ། གཙོ་མོའི་གནས་རྣམས་དང་བ་སྤུའི་འོད་ཀློང་རེ་རེ་ནས་ཀྱང་སྤྲུལ་པ་དང་ཡང་སྤྲུལ་ཉིང་སྤྲུལ་བསམ་གྱིས་མི་ཁྱབ་པ་འཕྲོ་ཞིང་བསྲུང་བའི་ལས་བྱེད་པ། འཁོར་གྱི་མཁའ་འགྲོ་སྤྲུལ་པའི་ལས་བྱེད་ཐམས་ཅད་ཀྱང་ཞལ་ནང་དུ་གཟིགས་ཤིང་བར་ཆད་བཟློག་པ་དང་དངོས་གྲུབ་སྟེར་བ། །རང་གི་ཐུགས་ཀར་འཁོར་ལོས་མཚན་པའི་གྲི་གུག་གི་ལྟེ་བར་ས་བོན་ཧཱུྃ་གི་ཧ་ཁོག་གི་ནང་དུ་རང་དང་བསྲུང་བྱའི་རྣམ་པར་ཤེས་པ་ཡི་གེ་ནྲི་ལྗང་གུ་གསལ་ལ་མདངས་དང་ལྡན་པ་སྣུམ་ལ་འོད་ཟེར་འཚེར་བར་གསལ་བའི་ཧཱུྃ་ལས་འོད་ཟེར་དང་ཁྲོ་ཆུང་གི་ཚོགས་དཔག་ཏུ་མེད་པ་ནམ་མཁའི་ཁམས་གང་བར་སྤྲོས་པས་རྒྱལ་བ་སྲས་དང་བཅས་པའི་ཐུགས་རྗེ་དང་བྱིན་རླབས། སྣང་སྲིད་ལྷ་སྲིན་སྡེ་བརྒྱད་ཀྱི་མཐུ་སྟོབས་དང་ནུས་པ་ཐམས་ཅད་བསྡུས་ནས་བདག་དང་སྲུང་བྱ་ལ་བསྟིམ། སླར་ཡང་འོད་ཟེར་དང་ཁྲོ་ཆུང་གོང་ལྟར་སྤྲོས་པས་ཕྱི་སྣོད་འབྱུང་བའི་བཅུད་དང་དངས་མ། བྱད་མ་དགྲ་བོས་བསྒོམས་པའི་བསྲུང་བའི་འཁོར་ལོ་རྣམས་བཀུགས་ཏེ་རང་དང་སྲུང་བྱ་གུར་ཁང་རྣམས་ལ་བསྟིམས་པས་ཅིས་ཀྱང་མི་ཤིག་པ་བསྲ་ཞིང་མཁྲེགས་པ་རྡོ་རྗེ་ཕ་ལམ་གྱི་རང་བཞིན་དུ་གྱུར། སླར་ཡང་འོད་ཟེར་དང་ཁྲོ་ཆུང་གང་ལྟར་སྤྲོས་པས་ནང་བཅུད་སྐྱེ་འགྲོ་ཀུན་གྱི་ཚེ་དང་བསོད་ནམས་བྱེད་མའི་སྲོག་དང་ཚེའི་དངས་མ་བསྡུས་ནས་རང་ལ་བསྟིམ་ཞིང་ཁྱད་པར་དུ་རང་དང་བསྲུང་བྱའི་བླ་ཚེ་ལྷ་སྲིན་སྡེ་བརྒྱད་ཀྱིས་ཁྱེར་བ། རྦོད་གཏོང་མཁན་གྱིས་བཀུགས་པ་སོགས་ཀྱིས་འཁྱམས་པ་སྲིད་ན། དེ་ཉིད་རྒྱ་མཚོའི་གླིང་བར། རི་བོའི་ལྕོག་བར། ཉི་ཟླའི་ཐིམ་བར། སྤྲིན་གྱི་གོ་དབར། གཤིན་རྗེའི་ལྟོ་བ། ཆུ་སྲིན་གྱི་གྲེ་བ། བྱད་མའི་ཧོམ་ཁུང་། གཏད་ཀྱི་ལིང་ཁོག་གང་ན་གནས་ཀྱང་ཁྲོ་མོ་རྣམས་ཀྱི་ཡེ་ཤེས་ཀྱི་སྤྱན་གྱིས་གཟིགས་ཏེ་རྫུ་འཕྲུལ་གྱི་སྟོབས་ཀྱིས་ཕྲོག་ཧཱུྃ་གི་རྣམ་པར་བྱས་ནས་རང་དང་བསྲུང་བྱའི་སྙིང་ཁའི་ས་བོན་སྔགས་ཕྲེང་ནྲི་ཡིག་དང་བཅས་པ་ལ་ཐིམ་པས་ཆེས་ཆེར་གཟི་བརྗིད་འབར་ཞིང་དྲག་རྩལ་ནུས་མཐུ་ཐོགས་པ་མེད་པ་དང་ལྡན་པར་གྱུར་པར་བསམ་ཞིང་། ཧཱུྃ་བཛྲ་དྷཀྐི་ནི་སིངྷ་མུ་ཁ་ཧ་རི་ནི་ས་བདག་ཅག་སྲུང་བྱ་མི་ནོར་འཁོར་དང་བཅས་པ་སྲུངས་ཤིག་རཀྴ་རཀྵ་སིདྡྷི་སྭཱ་ཧཱ༔ ཧཱུྃ་བཛྲ་དྷཀྐི་ནི་སིངྷ་མུ་ཁ་ཧ་རི་ནི་ས་བཛྲ་ཧ་དེ་དུ་ལིང་ནག་མོས་སྲུངས༔ ཨེ་བུ་ཏ་མ་ཕཊ༔ བསྲུང་བཟློག་འདོན་བསྒྲིགས་ཚོར་བསྲུང་བའི་སྔགས་རྗེས་མ་འདི་ཆེར་མེད་པ་འདྲ་ཞིག་འདུག་ཀྱང་ཟབ་གནད་ཆེ་བས་འདིར་བཀོད་པ་ཡིན་པས་སྔགས་འདི་རྣམས་བརྒྱ་སྟོང་ཁྲི་འབུམ་སྐབས་བསྟུན་བཟླ་བར་བྱ་ཞིང་ཐུན་མཚམས་སུ་མཆོད་བསྟོད་གོང་ལྟར་བྱའོ། དེ་ནས་བཟློག་པའི་འདོན་སྒོམ་ནི། ཧཱུྃ་ཧཱུྃ་ཧཱུྃ། ཞེས་བརྗོད་པ་ཙམ་གྱིས་བསྲུང་བའི་གཞལ་ཡས་ཁང་དེ་ཉིད་ཀྱང་ཁྲོ་ཆུ་ཞུན་མ་ལས་གྲུབ་པ་རྔམ་ཞིང་འཁྲུགས་པ་སྟོབས་ལྡན་རབ་ཏུ་འཇིགས་པའི་ཕོ་བྲང་དུ་གྱུར་ཏེ། དེའི་ཕྱི་རོལ་དུ་འཁོར་ལོ། རྡོ་རྗེ། གྲི་གུག །ཕུར་པ། དགྲ་སྟ། ཁ་ཊྭཱཾ། རལ་གྲི། མེ་རླུང་། སྟོང་པ་སྒྲ་ཡི་གུར་ཁུང་དང་བཅས་པ་ཐམས་ཅད་ཀྱང་འཁོར། རབ་ཏུ་འཁོར། འཁྲུག །རབ་ཏུ་འཁྲུགས། འཚེག །རབ་ཏུ་འཚེགས། སྐྱོད། རབ་ཏུ་བསྐྱོད་པས་གནོད་བྱེད་བྱད་མ་ལྷ་བསྲུང་གདོན་བགེགས་འབྱུང་པོ་ཐམས་ཅད་དམར་ཉལ་ཉལ་གཏུབས། བསྲུང་བའི་སྒྲུབ་བྱ་ཕོ་མོ་རྣམས་ཁྲོ་བོ་དང་ཁྲོ་མོ། ནོར་རྫས་ཞིང་ཁང་རྣམས་བཀྲ་ཤིས་པའི་རྫས་དང་། རྒྱལ་སྲིད་རིན་པོ་ཆེའི་རྣམ་པར་གསལ་ཞིང་། གཙོ་མོའི་སྤྲུལ་པ་འཁོར་ལས་བྱེད་བྱེ་བ་ས་ཡ་མང་པོའི་ཞལ་ནས་བཟློག་པའི་དྲག་སྔགས་འབྲུག་སྟོང་ལྡིར་བ་ཙམ་དུ་སྒྲོག་ཅིང་ཞལ་ཕྱིར་གཟིགས་ནས་བཟློག་པའི་ལས་མཛད་པར་གྱུར། གཙོ་འཁོར་ཐམས་ཅད་ཀྱི་ཐུགས་ཀར་ཐུགས་ཀྱི་ངོ་བོ་རང་རྟགས་ཀྱི་ཕྱག་མཚན་ས་བོན་སོ་སོས་མཚན་པའི་མཐར་བཟློག་པའི་སྔགས་རྣམས་གཡོན་སྐོར་དུ་དྲག་ཏུ་འཁོར་བ་དེ་ལས་འོད་ཟེར་ཚ་ཞིང་རྩུབ་པ་འཕྲོས་པའི་སྣེ་ལ་རབ་གཏུམ་འཁྲུགས་པའི་ཁྲོ་མོ་མཚོན་ཆ་མི་བཟད་པ་ཐོགས་པ་འཇིག་རྟེན་གྱི་ཁམས་གང་བར་འཕྲོས་པས་བྱད་མ་དགྲ་བོའི་བསྲུང་བའི་གོ་བཤིག །ལྷ་བསྲུང་རང་གཤེད་ཕབས་ཏེ་མཚོན་ཆའི་ཆར་བབས་པས་བླ་སྲོག་རྟེན་དང་ཕྲལ། དགྲ་བགེགས་བྱད་མ་བན་བོན་ལྷ་བསྲུང་ཆོས་སྐྱོང་བའི་སྡེ་བརྒྱད་ཕྱི་ནང་གསང་བ་དང་བཅས་པ་ཐམས་ཅད་དབང་དུ་བསྡུས་ནས་རང་དབང་མེད་པར་བཀུག །བསྐྲད་གཟིར་མནན་བསྲེག་གཏུབས་ཏེ་མིང་ཡང་མེད་པར་ཐལ་བའི་རྡུལ་དུ་གཏང་། ཚེ་བསོད་རྣམས་ནྲི་ཡིག་དང་འོད་ཀྱི་རྣམ་པར་བྱས་ཏེ་རང་དང་བསྲུང་བྱར་བསྟིམས་པས་བཀྲག་མདངས་གཟི་བརྗིད་རྒྱས་པར་གྱུར་པར་བསམ་ལ། ཧཱུྃ་བཛྲ་དྷཀྐི་ནི་སིངྷ་མུ་ཧ་རི་ནི་ས་ཨ་ཀ་ས་མ་ར་ཙ་ཤ་ད་ར་ཡ་ཧཱུྃ་ཕཊཿ དགྲ་བགེགས་བྱད་མ་ལྷ་བསྲུང་དང་བཅས་པ་ཐམས་ཅད་ནྲི་ཏྲི་མཱ་ར་ཡ་བྷྱོ་བྷྱོ་ཟློག་ཟློག༔ ཅི་ནུས་བཟླས་མཐར། གཙོ་འཁོར་སྤྲུལ་པ་ཡང་སྤྲུལ་ཐམས་ཅད་ཀྱི་ཕྱག་གཡས་གཡོན་རྣམས་སུ་གནམ་ལྕགས་ཀྱི་འཁོར་ལོ་རྩིབས་སྟོང་དང་ལྡན་པ་དང་། གསེར་གྱི་འཁོར་ལོ་ིབས་སྟོང་དང་ལྡན་པ་དང་། ཟངས་ཀྱི་འཁོར་ལོ་རྩིབས་སྟོང་དང་ལྡན་པ་དང་། གནམ་ལྕགས་ལས་གྲུབ་པའི་སྤུ་གྲི་འབར་བའི་འཁོར་ལོ་རྩིབས་སྟོང་དང་ལྡན་པ་དང་། གསལ་བྱེད་ཉི་ཟླའི་དཀྱིལ་འཁོར་ལ་སོགས་ཐོགས་པ་རྣམས་ཆ་ལང་རྡེབ་པའི་བར་དུ་དགྲ་བགེགས་བྱད་མ་ལྷ་བསྲུང་བན་བོན་ངན་པའི་ཚོགས་ཐམས་ཅད་དམར་ཕྲུ་ལུ་ལུར་བཅང་བས་ཤ་ཚལ་པ་ཁྲག་ཐིག་པ་གཅིག་ཀྱང་མ་ལུས་པར་བྱ་སྒྲོ་མེ་ལ་བཤུར་བའམ་ཐལ་བ་རླུང་ལ་ཕྱར་བ་ལྟར་སོང་བར་གྱུར། ན་མོ་མཆོག་གསུམ་རྒྱལ་བ་རྒྱ་མཚོ་རྩ་བ་དང་བརྒྱུད་པར་བཅས་པའི་དཔལ་ལྡན་བླ་མ་དམ་པ་རྣམས་དང་ཡི་དམ་དཀྱིལ་འཁོར་གྱི་ལྷ་ཚོགས་ཁྱད་པར་དུ་བདུད་སྡེའི་གཤེད་དུ་ཁྲོས་པ་དྲག་མོ་སེང་གེའི་གདོང་པ་ཅན་འཁོར་ཚོགས་སྤྲུལ་པ་ཡང་སྤྲུལ་དམ་ཅན་རྒྱ་མཚོའི་ཚོགས་དང་བཅས་པ་རྣམས་ཀྱི་བཀའ་བདེན་པ་དང་། རིག་འཛིན་བདག་གི་སྔགས་དང་ཕྱག་རྒྱ་ཏིང་ངེ་འཛིན་གྱི་བདེན་པའམ་ནུས་མཐུ་ལ་བརྟེན་ནས། བདག་ཅག་དཔོན་སློབ་ཡོན་མཆོད་འཁོར་དང་བཅས་པ་རྣམས་ལ་སྔོན་གྱི་ལས་དང་འཕྲལ་གྱི་རྐྱེན་ལས་བྱུང་བའི་ནད་གདོན་བར་ཆད། ཆགས་ཆེ་ཉམ་ང་། ལོ་ཟླ་ཞག་དུས་ཀྱི་ཀེག་སྲི། དངོས་ཉམས་རྨི་ལམ་དུ་རྟགས་མཚན་རྟེན་འབྲེལ་ངན་པ། བྱུར་དང་བཀལ་ཡུག་བཀྲ་མི་ཤིས་པའི་མཚན་ངན་ཐམས་ཅད་དང་། ཕ་རོལ་གྱི་བན་བོན་སྔགས་པས་བཏང་བའི་རྦད་འདྲེ་རྦོད་གཏོང་རིགས་སྔགས་ཀྱི་སྦྱོར་བས་ཧོམ་ལ་བསྲེགས་པ། རླུང་ལ་བསྐོར་བ་ཆུ་ལ་བསྐྱུར་བ། ས་ལ་མནན་པ་སོགས་ཀྱི་ནུས་པ་ཐམས་ཅད་དང་། བཙུན་པ་སྔགས་པ་བོན་པོ་སོགས་ལས་ཉེས་པ་དམ་སྲི་འགོང་པོར་གྱུར་པའི་བསམ་ངན་སྦྱོར་རྩུབ་ཀྱི་ནུས་མཐུ་ཐམས་ཅད་བྱད་མ་མཁན་པོ་ཁོ་རང་རྣམས་ཀྱི་སྟེང་དུ་བྷྱོ་བྷྱོ་ཟློག་ཟློག་བྷྱོ་ཟློག་ཅིག །ཐལ་མོ་ལན་དགུའམ་གསུམ་དུ་བརྡབ་ཅིང་བདེན་བརྗོད་ཀྱི་གྲངས་ཀྱང་དེ་དང་མཐུན་པར་བྱའོ། ཕཊ་ཧཱུྃ་ཡ་ར་མ་ས་ར་ད་ཤ་ཙ་ར་མ་ས་ཀ་ཨ༔ ཉུང་ཙམ་བཟླའོ། ཏིང་འཛིན་སྔགས་དང་ཕྱག་རྒྱ་བདེན་ནུས་ཀྱིས། །རྦད་འདྲེ་རྦོད་ཏོང་བྱད་མའི་ནུས་པ་ཀུན། །རང་གཤེད་ལ་ཕབ་རྡུལ་དུ་བཤིགས་བྱས་ནས། རྣམ་ཤེས་དབྱིངས་ཐིམ་གདོད་མའི་ས་ཐོབ་གྱུར། །ཨ་ཨ། ཅེས་བརྗོད་ཅིང་དགོངས་པ་ཅུང་ཟད་བསྐྱང་ངོ་། དེ་ལྟར་བསྲུང་བཟློག་ལ་བརྩོན་བར་བགྱིས་ན་གནས་སྐབས་མཐར་ཐུག་གི་ཕན་ཡོན་མཐའ་དག་གཞུང་བཤད་ཇི་བཞིན་ངེས་བར་འབྱུང་བ་ནི་ཐེ་ཚོམ་མེད་དོ། །རྗེས་ཀྱི་རིམ་པ་ནི། རྒྱུན་འཁྱེར་གྱི་བསྲུང་བཟློག་གི་ཚེ་གོང་དུ་བཤད་པའི་མཆོད་བསྟོད་བསྡུས་པ་བྱ་ཞིང་། ཡིག་བརྒྱས་བཟོད་པར་གསོལ། སྣོད་བཅུད་གུར་ཁང་གཞལ་ཡས་འཁོར་དང་བཅས། །འོད་དུ་ཞུ་ནས་རང་ཐིམ་སྔགས་ཕྲེང་དང་། །ཐུགས་སྲོག་ནཱ་དའི་བར་ཐིམ་འཇའ་ལྟར་ཡལ། །ཀ་དག་ཆོས་སྐུའི་ཀློང་དུ་ཨེ་མ་ཧོ། །སླར་ཡང་དེ་ཉིད་རྩལ་སྣང་འགག་མེད་ལས། །སྲུང་འཁོར་རྟེན་དང་བརྟེན་པར་བཅས་པ་ཀུན། །ཝལ་གྱིས་ཤར་བ་སྣང་སྟོང་གཉིས་མེད་ངང་། །སྒོ་གསུམ་རྡོ་རྗེ་གསུམ་གྱི་དཔལ་ལ་རོལ། སྨོན་ཤིས་ནི། དགེ་འདིས་བདག་གཞན་ལུས་ཅན་སྲིད་མཚོ་ལས། བསྒྲལ་ཏེ་མཁའ་སྤྱོད་གཙོ་མོའི་ས་ནོན་ཤོག །ཐུགས་རྗེ་བྱིན་རླབས་ནུས་མཐུ་ཡིད་བཞིན་ལྟར། །སྩོལ་མཛད་རྩ་གསུམ་རྒྱ་མཚོའི་བཀྲ་ཤིས་ཤོག །དེ་ལྟར་མཁའ་སྤྱོད་དྲག་མོའི་རིམ་གཉིས་ཀྱི། །ངང་ནས་ཞར་བྱུང་བསྲུང་བཟློག་བཙན་པོའི་མཁར། །འཇིག་བྲལ་རྡོ་རྗེ་ཕ་ལམ་ལས་གྲུབ་པ། །འདི་འདྲ་བརྩིགས་ལ་གཞོམ་མེད་ཡ་ལད་ཀྱི། །གོ་གྱོན་ཕ་རོལ་འབྱེད་དཀྲུག་བསྐྲད་གཟིར་མནན། །རབ་འབྱམས་མངོན་སྤྱོད་དྲག་པོའི་སྒྱོགས་ཆེན་པོ། །གནམ་ལྕགས་ཐོག་གིས་འགྲན་པར་ནུས་མིན་པའི། །རྣོ་མྱུར་དྲག་རྩལ་ངར་ལྡན་འདི་འདྲ་ཡིས། །མི་སྲུན་གདོན་བགེགས་འབྱུང་པོའི་བྲག་གི་རི། །ཕྱེ་མར་ཐོངས་ཤིག་རིགས་སྔགས་འཆང་བ་རྣམས། །རྙེད་དང་བཀུར་སྟི་མ་ད་ནའི་བཏུང་བ། །བཟང་ངན་འདེགས་འཇོགས་རྩལ་འགྲན་རིང་དོར་ཅིག །ཅི་ཕྱིར་དེང་སྐབས་གཞན་འཕྲུལ་བདག་པོའི་འཕྲུལ། །རང་གཞན་ཀུན་གྱི་ཀེ་ས་རར་ཞུགས་པ། །ངོས་མ་ཟིན་པར་གང་བྱུང་ཆོ་རོལ་གྱིས། །བསྲུང་བཟློག་གོ་མེད་གཅེར་བུ་མཚོན་ཐོགས་བཞིན། །གྲོང་ཆོག་འདྲེ་འདུལ་རེ་བས་དལ་མེད་དུ། །ཡང་ཡང་རྒྱུ་བ་རེ་ཞིག་བྲན་གྱུར་ཀྱང་། །རྒྱུད་གསུམ་དྲེགས་པའི་དེ་ཉིད་མ་རྟོག་ན། །ཡ་ངའི་ཉིང་མཚམས་སྦྱོར་བར་སྨོས་ཅི་དགོས། །དེ་སྐད་སྣང་བར་གང་དྲན་སུག་བྲིས་སུ། །བཀོད་པར་དགོས་ཆེད་དབེན་ཀྱང་ཤར་མར་དུ། །སྤེལ་བའི་ཞལ་འཕྲོས་ཙམ་ལགས་ངག་ཁྲིག་འདི། །གཏེར་ཆེན་མཆོག་དང་ཧོར་གྱི་ལོ་ཙ་བའི། །གསུང་རྩོམས་ལྟར་ལ་ལེགས་ཆས་བརྒྱན་ཏེ་བཀོད། །རང་བཟོ་མཆིས་ན་མཁའ་འགྲོའི་ཚོགས་ལ་འཆག །ཚུལ་འདི་སྔགས་འཆང་སྟོབས་ལྡན་མཆོག་གྲུབ་ཀྱིས། །བྲིས་དགེས་བསྟན་དང་འགྲོ་ཀུན་བདེར་སྤྱོད་ཤོག །མངྒཱ་ལམ། །

བདུད་འདུལ་སེང་གདོང་ནག་མོའི་བཟློག་པའི་འཕྱོང་།

བཀའ་རྫོགས་པ་ཆེན་པོ་བླ་མ་བདེ་མཆོག་འཁོར་ལོ་ལས། བདུད་འདུལ་སེང་གདོང་ནག་མོའི་བཟློག་པའི་འཕྱོང་རིག་འཛིན་པས་སྦྱར་བ་བཞུགས། ། བདུད་འདུལ་མཁའ་འགྲོའི་ཚོགས་ལ་འདུད། བདུད་འདུལ་སེང་གདོང་ནག་མོའི་གཏོར་བཟློག་གི་འཕྱོང་ནི། གཙོ་མོའི་བཟློག་པའི་མཇུག་ཏུ་ལིང་ག་དང་ཟོར་ཆུང་ཐུན་རྫས་རྣམས་མཐོང་རྒྱུད་ལྟར་བྱ་ཞིང་། ན་མོ། དཀོན་མཆོག་གསུམ་དང་རྩ་བ་གསུམ་གྱི་བདེན་པས་གནོད་བྱེད་དགྲ་བགེགས་ཐམས་ཅད་གཟུགས་ལིང་ག་འདིའི་ནང་དུ་ཁུག །གསུམ། ཧཱུྃ་བཛྲ་དྲག་པོ་རྩལ་དྷཀྐི་ནི་ཡ་མ་རུ་ཊ་ཤ་ད་ར་ཡ་ཕཊ་ཛཿཛཿབྷྱོ་བྷྱོཿ དགྲ་བོ་བྱད་མ་ལྷ་སྲུང་དང་བཅས་པ་མཱ་ར་ཡ་ཁུག་ཁུག་རིལ་རིལ་ཐུཾ་ཐུཾ་རྦུད་རྦུད། གསུམ། ཛཿཧཱུྃ་བཾ་ཧོས་རྒྱས་འདེབས། རལ་གྲི་ཐོགས་ཏེ། ཧཱུྃ༔ རྡོ་རྗེ་དྲག་རྩལ་འཁྲོས་པའི་མཚོན། །གནམ་ལྕགས་རལ་གྲི་གདུག་པའི་དབལ། །རྣོ་ངར་རེག་གཅོད་མཚོན་རྣོན་པོས། །དམིགས་པར་བྱ་བའི་བླ་སྲོག་དང་། །གཟུགས་ཕུང་དུམ་བུ་སིལ་བུར་གཏུབས། །ཧཱུྃ་བཛྲ་དྲག་པོ་རྩལ་དྷཀྐི་ནི་བྱད་མ་དགྲ་བོའི་སྙིང་ཁྲག་ཧུར་ཐུམ་བྷྱོ༔ བཛྲ་ཀཱི་ལི་ཀཱི་ལཱ་ཡ་དགྲ་བོ་བྱད་མ་མི་ནོར་འཁོར་དང་བཅས་པ་ཤ་ཏྲུཾ་མཱ་ར་ཡ་ཧཱུྃ་ཕཊ༔ སརྦ་དྷཀྐི་ནི་བཛྲ་ཀཱི་ལི་ཀཱི་ལཱ་ཡ་དགྲ་བོ་བྱད་མ་མི་ནོར་འཁོར་དང་བཅས་པ་ཤ་ཏྲུཾ་མཱ་ར་ཡ་ཧཱུྃ་ཕཊ༔ བཛྲ་དྷཀྐི་ནི་དགྲ་བོ་བྱད་མའི་ཤ་ལ་ཀཾ་ཀཾ༔ རཏྣ་དྷཀྐི་ནི་དགྲ་བོ་བྱད་མའི་རུས་ལ་ཆེམ་ཆེམ༔ པདྨ་དྷཀྐི་ནི་དགྲ་བོ་བྱད་མའི་ཁྲག་ལ་གཏིབས་གཏིབས༔ ཀརྨ་དྷཀྐི་ནི་དགྲ་བོ་བྱད་མའི་དབུགས་ལ་ཧབ་ཧབ༔ བུདྡྷ་དྷཀྐི་ནི་དགྲ་བོ་བྱད་མའི་སྲོག་རྩ་ལ་རྦད་རྦད༔ ད་ཡ་ད་ཡཱ༔ ཆོད་ཡ་ཆོད་ཡཱ༔ མཱ་ར་ཡ་ཛཿཛཿཐུན་བྷྱོ་ཐུན་བྷྱོཿ ལིང་རོ་བསྟབ་ཅིང་། ཧཱུྃ། ལྷ་སྔགས་ཏིང་འཛིན་རོལ་པའི་མཐུས། །དགྲ་བགེགས་བསྒྲལ་བའི་ཤ་ཁྲག་རུས། །རྡོ་རྗེ་དྲག་རྩལ་ལྷ་ཚོགས་ཀྱི། སྤྲུལ་པ་ཡང་སྤྲུལ་བཅས་རྣམས་ལ། ཟག་མེད་དགྱེས་པ་བསྐྱེད་པ་ཡི། །བླ་མེད་མཆོག་གི་མཆོད་པ་འབུལ། །གཏི་མུག་ཤ་ཆེན་སྤུངས་པའི་རི། །བརྔམ་པའི་སྟོབས་ཀྱིས་བཞེས་སུ་གསོལ། །འདོད་ཆགས་ཁྲག་གི་རོལ་མཚོ་བསྐྱིལ། བརྗིད་པའི་སྟོབས་ཀྱིས་བཞེས་སུ་གསོལ། །ཞེ་སྡང་རུས་པའི་གྲམ་ཁྲོད་བརྡལ། དྲག་ཤུལ་སྟོབས་གྱིས་བཞེས་སུ་གསོལ། །ཞག་ཀླད་ཚིལ་རྐང་ས་གཞིར་སྤུངས། །ཁྲོ་གཏུམ་སྟོབས་ཀྱིས་བཞེས་སུ་གསོལ། །སྡང་དགྲ་གནོད་བྱེད་ལོག་འདྲེན་ཀུན། །ལྷག་མ་མེད་པར་བཞེས་སུ་གསོལ། །ཧཱུྃ་བཛྲ་དྲག་པོ་རྩལ་དྷཀྐི་ནི་དགྲ་བོ་ཤ་ཏྲུཾ་མཱ་ར་ཡ༔ མཾ་ས་རཀྟ་ཀེཾ་ནི་རི་ཏི་ཙིཏྟ་བྷ་སུ་ཏ་བྷ་ལིངྟ་ཁ་ཁ་ཁཱ་ཧི་ཁཱ་ཧི༔ བཛྲ་དྲག་པོ་རྩལ་དྷཀྐི་ནི་ས་མ་ཡཱ་མཾ་ས་རཀྟ་ཀེཾ་ནི་རི་ཏི་ཙིཏྟ་བ་སུ་ཏ་བྷ་ལིངྟ་ཁ་ཁ་ཁཱ་ཧི་ཁཱ་ཧི༔ དེ་ནས་བཟློག་པ་གྱེར་མཇུག་ཏུ། ཧཱུྃ་བཛྲ་དྲག་པོ་རྩལ་དྷཀྐི་ནི་ཙིཏྟ་ཧྲིང་ཛཿ རྔཾ་རྔཾ་ཁཾ་ཁཾ་རཾ་རཾ་མྱོགས་མྱོགས་ལཾ་ལཾ་ཡཾ་ཡཾ་དགྲ་བོ་བྱད་མ་དཀྲུགས་དཀྲུགས༔ ཕྱེས་ཕྱེས་མཱ་ར་ཡ་སྙིང་ཁྲག་ཚལ་པ་རྦད་རྦད་སོད་སོད་བྷྱོ་བྷྱོ་ཟློག་ཟློག༔ ཨཱོཾ་བཛྲ་དྲག་པོ་རྩལ་དྷཀྐི་ནི་ཨ་ཀ་ས་མ་ར་ཙ་ཤ་ད་ར་ཡ་ཧཱུྃ་ཕཊཿ དགྲ་བགེགས་བྱད་མ་ལྷ་སྲུང་དང་བཅས་པ་ཐམས་ཅད་ནྲི་ཏྲཱི་མཱ་ར་ཡ་བྷྱོ་བྷྱོ་ཟློག་ཟློག༔ ཨཱོཾ་བཛྲ་དྲག་པོ་རྩལ་དྷཀྐི་ནི་ཧ་དེ་མོ་ཧ་ཏྲི་ཏ་ཡཱཿ པྲ་ཧ་རི་ནི་ཧཱུྃ་ཧཱུྃ་ཕཊ་ཕཊ་བྷྱོ་བྷྱོ༔ ས་མ་ཡ་ཟློག་ཟློག༔ ཨ་ལ་ལ་པྲ་མོ་ཧེ་བྷྱོ་བྷྱོ༔ ཨ་ཏི་ཀྲ་མ་ན་ཟློག་ཟློག༔ ཕུར་ཁ་ཟློག༔ བྱོལ་ཁ་ཟློག༔ ཟོར་ཁ་ཟློགཿ དམོད་མོ་ཟློག༔ རྦོད་གཏོང་ཟློག༔ རྦད་འདྲེ་ཟློགཿ ཧཱུྃ་ཨེ་ཀ་དུ་ན་ཟློགཿ མ་མ་དུ་ན་ཟློག༔ ས་ག་དུ་ན་ཟློག༔ ཙ་དུ་ར་དུ་ན་ཟློགཿ སྙིང་ཁྲག་དུ་ན་ཟློགཿ ར་ཙ་དུ་ན་ཟློགཿ སུ་ཏྲི་དུ་ན་ཟློགཿ མ་ཧཱ་དུ་ན་ཟློགཿ དགྲ་དང་བགེགས་ཀྱི་སྟེང་དུ་བྷྱོ་བྷྱོ་ཟློག་ཟློགཿ ༈ན་མོ་དཀོན་མཆོག་གསུམ་དང་རྩ་བ་གསུམ་གྱི་བདེན་པས་གནོད་བྱེད་དགྲ་བགེགས་ཐམས་ཅད་གཟུགས་ལིང་ག་འདིའི་ནང་དུ་ཁུག༔ གསུམ། ཧཱུྃ་བཛྲ་དྷཀྐི་ནི་ཡ་མ་རུ་ཊ་ཤ་ད་ར་ཡ་ཕཊ་ཛཿཛཿ བྷྱོ་བྷྱོཿ དགྲ་བོ་བྱད་མ་ལྷ་སྲུང་དང་བཅས་པ་མཱ་ར་ཡ་ཁུག་ཁུག་རིལ་རིལ་ཐུཾ་ཐུཾ་རྦུད་རྦུད༔ གསུམ། ཛཿཧཱུྃ་བཾ་ཧོས་རྒྱས་འདེབས། རལ་གྲི་ཐོགས་ཏེ། ཧཱུྃ་རྡོ་རྗེ་མཁའ་འགྲོ་ཁྲོས་པའི་མཚོན། །གནམ་ལྕགས་རལ་གྲི་གདུག་པའི་དབལཿ རྣོ་ངར་རེག་གཅོད་མཚོན་རྣོན་པོས། །དམིགས་པར་བྱ་བའི་བླ་སྲོག་དང་། །གཟུགས་ཕུང་དུམ་བུ་སིལ་བུར་གཏུབས། ཧཱུྃ་བཛྲ་དྷཀྐི་ནི་བྱད་མ་དགྲ་བོའི་སྙིང་ཁྲག་ཧུར་ཐུམ་བྷྱོ༔ བཛྲ་ཀཱི་ལི་ཀཱི་ལཱ་ཡ་དགྲ་བོ་བྱད་མ་མི་ནོར་འཁོར་དང་བཅས་པ་ཤ་ཏྲུཾ་མཱ་ར་ཡ་ཧཱུྃ་ཕཊ༔ སརྦ་དྷཀྐི་ནི་བཛྲ་ཀཱི་ལི་ཀཱི་ལཱ་ཡ་དགྲ་བོ་བྱད་མ་མི་ནོར་འཁོར་དང་བཅས་ཤ་ཏྲུཾ་མཱ་ར་ཡ་ཧཱུྃ་ཕཊཿ བཛྲ་དྷཀྐི་ནི་དགྲ་བོ་བྱད་མའི་ཤ་ལ་ཀཾ་ཀཾ༔ རཏྣ་དྷཀྐི་ནི་དགྲ་བོ་བྱད་མའི་རུས་ལ་ཆེམ་ཆེམ༔ པདྨ་དྷཀྐི་ནི་དགྲ་བོ་བྱད་མའི་ཁྲག་ལ་གཏིབས་གཏིབས༔ ཀརྨ་དྷཀྐི་ནི་དགྲ་བོ་བྱད་མའི་དབུགས་ལ་ཧབ་ཧབ༔ བུདྡྷ་དྷཀྐི་ནི་དགྲ་བོ་བྱད་མའི་སྲོག་རྩ་ལ་རྦད་རྦད༔ ད་ཡ་ད་ཡཱཿ ཆོད་ཡ་ཆོད་ཡཱཿ མཱ་ར་ཡ་ཛཿཛཿ ཐུན་བྷྱོ་ཐུན་བྷྱོཿ ལིང་རོ་བསྟབ་ཅིང་། ཧཱུྃ། ལྷ་སྔགས་ཏིང་འཛིན་རོལ་པའི་མཐུས། །དགྲ་བགེགས་བསྒྲལ་བའི་ཤ་ཁྲག་རུས། །རྡོ་རྗེ་མཁའ་འགྲོའི་ལྷ་ཚོགས་ཀྱི། །སྤྲུལ་པ་ཡང་སྤྲུལ་བཅས་རྣམས་ལ། །ཟག་མེད་དགྱེས་པ་བསྐྱེད་པ་ཡི། །བླ་མེད་མཆོག་གི་མཆོད་པ་འབུལ། །གཏི་མུག་ཤ་ཆེན་སྤུངས་པའི་རི། །བརྔམ་པའི་སྟོབས་ཀྱིས་བཞེས་སུ་གསོལ། །འདོད་ཆགས་ཁྲག་གི་རོལ་མཚོ་བསྐྱིལ། །བརྗིད་པའི་སྟོབས་ཀྱིས་བཞེས་སུ་གསོལ། །ཞེ་སྡང་རུས་པའི་གྲམ་ཁྲོད་བརྡལ། །དྲག་ཤུལ་སྟོབས་ཀྱིས་བཞེས་སུ་གསོལ། །ཞག་ཀླད་ཚིལ་རྐང་ས་གཞིར་སྤུངས། །ཁྲོ་གཏུམ་སྟོབས་ཀྱིས་བཞེས་སུ་གསོལ། །སྡང་དགྲ་གནོད་བྱེད་ལོག་འདྲེན་ཀུན། །ལྷག་མ་མེད་པར་བཞེས་སུ་གསོལ། །ཧཱུྃ་བཛྲ་དྷཀྐི་ནི་དགྲ་བོ་ཤ་ཏྲུཾ་མཱ་ར་ཡ་མཾ་ས་རཀྟ་ཀེཾ་ནི་རི་ཏི་ཙིཏྟ་བྷ་སུ་ཏ་བ་ལིངྟ་ཁ་ཁ་ཁཱ་ཧི་ཁཱ་ཧི། བཛྲ་དྷཀྐི་ནི་ས་མ་ཡཱ་མཾ་ས་རཀྟ་ཀེཾ་ནི་རི་ཏི་ཙིཏྟ་བྷ་སུ་ཏ་བ་ལིངྟ་ཁ་ཁ་ཁཱ་ཧི་ཁཱ་ཧི། དེ་ནས་བཟློག་པ་གྱེར་མཇུག་ཏུ། ཧཱུྃ་བཛྲ་དྷཀྐི་ནི་ཙིཏྟ་ཧྲིང་ཛཿ རྔཾ་རྔཾ་ཁཾ་ཁཾ་རཾ་རཾ་མྱོགས་མྱོགས་ལཾ་ལཾ་ཡཾ་ཡཾ་དགྲ་བོ་བྱད་མ་དཀྲུགས་དཀྲུགས༔ ཕྱེས་ཕྱེས་མཱ་ར་ཡ་སྙིང་ཁྲག་ཚལ་བ་རྦད་རྦད་སོད་སོད་བྷྱོ་བྷྱོ་ཟློག་ཟློགཿ ཧཱུྃ་བཛྲ་དྷཀྐི་ནི་ཨ་ཀ་ས་མ་ར་ཙ་ཤ་ད་ར་ཡ་ཧཱུྃ་ཕཊཿ དགྲ་བགེགས་བྱད་མ་ལྷ་སྲུང་དང་བཅས་པ་ཐམས་ཅད་རྣ྄ི་ཏྲི་མཱ་ར་ཡ་བྷྱོ་བྷྱོ་ཟློག་ཟློག༔ ཧཱུྃ་བཛྲ་དྷཀྐི་ནི་ཧ་དེ་མོ་ཧ་ཏྲི་ཏ་ཡཱ༔ པྲ་ཧ་རི་ན་ཧཱུྃ་ཧཱུྃ་ཕཊ་ཕཊ་བྷྱོ་བྷྱོ༔ ས་མ་ཡཱ་ཟློག་ཟློག༔ ཨ་ལ་ལ་པྲ་མོ་ཧེ་བྷྱོ་བྷྱོ༔ ཨ་ཏི་ཀྲ་མན་ཟློག་ཟློག༔ ཕུར་ཁ་ཟློག༔ བྱོལ་ཁ་ཟློགཿ ཟོར་ཁ་ཟློག༔ དམོད་མོ་ཟློག༔ རྦོད་གཏོང་ཟློག༔ རྦད་འདྲེ་ཟློག༔ ཧཱུྃ་ཨེ་ཀ་དུ་ན་ཟློག༔ མ་མ་དུ་ན་ཟློག༔ ས་ག་དུ་ན་ཟློག༔ ཙ་དུར་དུ་ན་ཟློག༔ སྙིང་ཁྲག་དུ་ན་ཟློག༔ ར་ཙ་དུ་ན་ཟློག༔ སུ་ཏྲི་དུ་ན་བཟློག༔ མ་ཧཱ་དུ་ན་ཟློག༔ དགྲ་དང་བགེགས་ཀྱི་སྟེང་དུ་བྷྱོ་བྷྱོ་ཟློག་ཟློག༔ ༈ན་མོ་དཀོན་མཆོག་གསུམ༴ གསུམ། ཧཱུྃ་རཏྣ་དྷཀྐི་ནི་ཡ་མ་རུ་ཊ༴ གསུམ། ཛཿཧཱུྃ་བཾ་ཧོས་རྒྱས་འདེབས། རལ་གྲི་ཐོགས་ཏེ། ཧཱུྃ། རིན་ཆེན་མཁའ་འགྲོ༴ གནམ་ལྕགས་རལ་གྲི༴ རྣོ་ངར་རེག་གཅོད༴ དམིགས་པར་བྱ་བའི༴ གཟུགས་ཕུང་དུམ་བུ༴ ཧཱུྃ་རཏྣ་དྷཀྐི་ནི་བྱད་མ་དགྲ་བོའི་སྙིང་ཁྲག་ཧུར༴ ལིང་རོ་བསྟབ་ཅིང་། ཧཱུྃ། ལྷ་སྔགས་ཏིང་འཛིན༴ དགྲ་བགེགས་བསྒྲལ་བའི༴ རིན་ཆེན་མཁའ་འགྲོའི༴ སྤྲུལ་པ་ཡང་སྤྲུལ༴ ཟག་མེད་དགྱེས་པ༴ བླ་མེད་མཆོག་གི་མཆོད་པ༴ གཏི་མུག་ཤ་ཆེན༴ བརྔམ་པའི་སྟོབས་ཀྱིས༴ འདོད་ཆགས་ཁྲག་གི༴ བརྗིད་པའི་སྟོབས་ཀྱིས༴ ཞེ་སྡང་རུས་པའི༴ དྲག་ཤུལ་སྟོབས་ཀྱིས༴ ཞག་ཀླད་ཚིལ་རྐང་ས་གཞིར་སྤུངས། ཁྲོ་གཏུམ་སྟོབས་ཀྱིས༴ སྡང་དགྲ་གནོད་བྱེད༴ ལྷག་མ་མེད་པར༴ ཧཱུྃ་རཏྣ་དྷཀྐི་ནི་དགྲ་བོ་ཤ་ཏྲུཾ་མཱ་ར་ཡ་མཾ་ས་རཀྟ༴ དེ་ནས་བཟློག་པ་གྱེར་མཇུག་ཏུ། ཧཱུྃ་རཏྣ་དྷཀྐི་ནི་ཙིཏྟ་ཧྲིང་ཛཿ རྔཾ་རྔཾ་ཁཾ་ཁཾ་རཾ་རཾ༴ ༈ན་མོ་དཀོན་མཆོག་གསུམ་དང་༴ གསུམ། ཧཱུྃ་པདྨ་དྷཀྐིནི་ཡ་མ་རུ་ཊ༴ གསུམ། ཛཿཧཱུྃ་བཾ་ཧོས་རྒྱས་འདེབས། རལ་གྲི་ཐོགས་ཏེ། ཧཱུྃ། པདྨ་མཁའ་འགྲོ༴ གནམ་ལྕགས་རལ་གྲི༴ རྣོ་ངར་རེག་གཅོད༴ དམིགས་པར་བྱ་བའི༴ གཟུགས་ཕུང་དུམ་བུ༴ ཧཱུྃ་པདྨ་དྷཀྐི་ནི་བྱད་མ་དགྲ་བོའི་སྙིང་ཁྲག་ཧུར༴ ལིང་རོ་བསྟབ་ཅིང་། ཧཱུྃ། ལྷ་སྔགས་ཏིང་འཛིན༴ དགྲ་བགེགས་བསྒྲལ་བའི༴ པདྨ་མཁའ་འགྲོའི༴ སྤྲུལ་པ་ཡང་སྤྲུལ༴ ཟག་མེད་དགྱེས་པ༴ བླ་མེད་མཆོག་གི༴ གཏི་མུག་ཤ་ཆེན༴ བརྔམ་པའི་སྟབས་ཀྱིས༴ འདོད་ཆགས་ཁྲག་གི༴ བརྗིད་པའི་སྟོབས་ཀྱིས༴ ཞེ་སྡང་རུས་པའི༴ དྲག་ཤུལ་སྟོབས་ཀྱིས༴ ཞག་ཀླད་ཚིལ་རྐང་ས་གཞིར་སྤུངས། །ཁྲོ་གཏུམ་སྟོབས་ཀྱིས༴ སྡང་དགྲ་གནོད་བྱེད༴ ལྷག་མ་མེད་པར་བཞེས་སུ༴ ཧཱུྃ་པདྨ་དྷཀྐི་ནི་དགྲ་བོ་ཤ་ཏྲུཾ་མཱ་ར་ཡ་མཾ་ས་རཀྟ༴ དེ་ནས་བཟློག་པ་གྱེར་མཇུག་ཏུ། ཧཱུྃ་པདྨ་དྷཀྐི་ནི་ཙིཏྟ་ཧྲིང་ཛཿ རྔཾ་རྔཾ་ཁཾ་ཁཾ་རཾ་རཾ༴ ༈ན་མོ་དཀོན་མཆོག་གསུམ་དང་༴ གསུམ། ཧཱུྃ་ཀརྨཱ་དྷཀྐི་ནི་ཡ་མ་རུ་ཊ༴ གསུམ། ཛཿཧཱུྃ་བཾ་ཧོས་རྒྱས་འདེབས་རལ་གྲི་ཐོགས་ཏེ། ཧཱུྃ། ཀརྨ་མཁའ་འགྲོ༴ གནམ་ལྕགས་རལ་གྲི༴ རྣོ་ངར་རེག་གཅོད༴ དམིགས་པར་བྱ་བའི༴ གཟུགས་ཕུང་དུམ་བུ༴ ཧཱུྃ་ཀརྨ་དྷཀྐི་ནི་བྱད་མ་དགྲ་བོའི་སྙིང་ཁྲག་ཧུར༴ ལིང་རོ་བསྟབ་ཅིང་། ཧཱུྃ། ལྷ་སྔགས་ཏིང་འཛིན༴ དགྲ་བགེགས་བསྒྲལ་བའི༴ ཀརྨ་མཁའ་འགྲོའི༴ སྤྲུལ་པ་ཡང་སྤྲུལ༴ ཟག་མེད་དགྱེས་པ༴ བླ་མེད་མཆོག་གི༴ གཏི་མུག་ཤ་ཆེན༴ རྔམ་པའི་སྟོབས་ཀྱིས༴ འདོད་ཆགས་ཁྲག་གི༴ བརྗིད་པའི་སྟོབས་ཀྱིས༴ ཞེ་སྡང་རུས་པའི༴ དྲག་ཤུལ་སྟོབས་ཀྱིས༴ ཞག་ཀླད་ཚིལ་རྐང་ས་གཞིར་སྤུངས། ཁྲོ་གཏུམ་སྟོབས་ཀྱིས༴ སྡང་དགྲ་གནོད་བྱེད་ལོག་འདྲེན༴ ལྷག་མ་མེད་པར༴ ཧཱུྃ་ཀརྨ་དྷཀྐི་ནི་དགྲ་བོ་ཤ་ཏྲུཾ་མཱ་ར་ཡ༴ མཾ་ས་རཀྟ༴ དེ་ནས་བཟློག་པ་གྱེར་མཇུག་ཏུ། ཧཱུྃ་ཀརྨ་དྷཀྐི་ནི་ཙིཏྟ་ཧྲིང་ཛཿ རྔཾ་རྔཾ་ཁཾ་ཁཾ་རཾ་རཾ༴ ༈ན་མོ་དཀོན་མཆོག་གསུམ་དང་༴ གསུམ། ཧཱུྃ་ས་མ་ཡཱ་དྷཀྐི་ནི་ཡ་མ་རུ་ཊ༴ གསུམ། ཛཿཧཱུྃ་བཾ་ཧོས་རྒྱས་འདེབས། རལ་གྲི་ཐོགས་ཏེ། ཧཱུྃ། དམ་ཚིག་མཁའ་འགྲོ༴ གནམ་ལྕགས་རལ་གྲི༴ རྣོ་ངར་རེག་གཅོད༴ དམིགས་པར་བྱ་བའི༴ གཟུགས་ཕུང་དུམ་བུ༴ ཧཱུྃ་ས་མ་ཡཱ་དྷཀྐི་ནི་བྱད་མ་དགྲ་བོའི་སྙིང་ཁྲག་ཧུར༴ ལིང་རོ་བསྟབ་ཅིང་། ཧཱུྃ། ལྷ་སྔགས་ཏིང་འཛིན༴ དགྲ་བགེགས་བསྒྲལ་བའི༴ དམ་ཚིག་མཁའ་འགྲོའི༴ སྤྲུལ་པ་ཡང་སྤྲུལ༴ ཟག་མེད་དགྱེས་པ༴ བླ་མེད་མཆོག་གི༴ གཏི་མུག་ཤ་ཆེན༴ རྔཾ་པའི་སྟོབས་ཀྱིས༴ འདོད་ཆགས་ཁྲག་གི༴ བརྗིད་པའི་སྟོབས་ཀྱིས༴ ཞེ་སྡང་རུས་པའི༴ དྲག་ཤུལ་སྟོབས་ཀྱིས༴ ཞག་ཀླད་ཚིལ་རྐང་ས་གཞིར་སྤུངས། །ཁྲོ་གཏུམ་སྟོབས་ཀྱིས༴ སྡང་དགྲ་གནོད་བྱེད༴ ལྷག་མ་མེད་པར༴ ཧཱུྃ་ས་མ་ཡཱ་དྷཀྐི་ནི་དགྲ་བོ་ཤ་ཏྲུཾ་མཱ་ར་ཡཿ མཾ་ས་རཀྟ༔ དེ་ནས་བཟློག་པ་གྱེར་མཇུག་ཏུ། ཧཱུྃ་ས་མ་ཡཱ་དྷཀྐི་ནི་ཙིཏྟ་ཧྲིང་ཛཿ རྔཾ་རྔཾ་ཁཾ་ཁཾ་རཾ་རཾ༔ ༈ན་མོ་དཀོན་མཆོག་གསུམ་དང་༴ གསུམ། ཧཱུྃ་བྷི་ཤ་དྷཀྐི་ནི་ཡ་མ་རུ་ཊ༴ གསུམ། ཛཿཧཱུྃ་བཾ་ཧོས་རྒྱས་འདེབས། རལ་གྲི་ཐོགས་ཏེ། ཧཱུྃ། སྣ་ཚོགས་མཁའ་འགྲོ༴ གནམ་ལྕགས་རལ་གྲི༴ རྣོ་ངར་རེག་གཅོད༴ དམིགས་པར་བྱ་བའི༴ གཟུགས་ཕུང་དུམ་བུ༴ ཧཱུྃ་བྷི་ཤ་དྷཀྐི་ནི་བྱད་མ་དགྲ་བོའི་སྙིང་ཁྲག་ཧུར༴ ལིང་རོ་བསྟབ་ཅིང་། ཧཱུྃ། ལྷ་སྔགས་ཏིང་འཛིན༴ དགྲ་བགེགས་བསྒྲལ༴ སྣ་ཚོགས་མཁའ་འགྲོའི༴ སྤྲུལ་པ་ཡང་སྤྲུལ༴ ཟག་མེད་དགྱེས་པ༴ བླ་མེད་མཆོག་གི༴ གཏི་མུག་ཤ་ཆེན༴ རྔམ་པའི་སྟོབས་ཀྱིས༴ འདོད་ཆགས་ཁྲག་གི༴ བརྗིད་པའི་སྟོབས་ཀྱིས༴ ཞེ་སྡང་རུས་པའི༴ དྲག་ཤུལ་སྟོབས་ཀྱིས༴ ཞག་ཀླད་ཚིལ་རྐང་ས༴ ཁྲོ་གཏུམ་སྟོབས་ཀྱིས༴ སྡང་དགྲ་གནོད་བྱེད༴ ལྷག་མ་མེད་པར༴ ཧཱུྃ་བྷི་ཤ་དྷཀྐི་ནི་དགྲ་བོ་ཤ་ཏྲུཾ་མཱ་ར་ཡཿ མཾ་ས་རཀྟ༴ དེ་ནས་བཟློག་པ་གྱེར་མཇུག་ཏུ། ཧཱུྃ་བྷི་ཤ་དྷཀྐི་ནི་ཙིཏྟ་ཧྲིང་ཛཿ རྔཾ་རྔཾ་ཁཾ་ཁཾ་རཾ་རཾ༴ ༈ན་མོ་དཀོན་མཆོག་གསུམ་དང་༴ གསུམ། ཧཱུྃ་སརྦ་དྷཀྐི་ནི་ཡ་མ་རུ་ཊ༴ གསུམ། ཛཿཧཱུྃ་བཾ་ཧོས་རྒྱས་འདེབས། རལ་གྲི་ཐོགས་ཏེ། ཧཱུྃ། ཤ་ཟ་མཁའ་འགྲོ༴ གནམ་ལྕགས་རལ་གྲི༴ རྣོ་ངར་རེག་གཅོད༴ དམིགས་པར་བྱ་བའི༴ གཟུགས་ཕུང་དུམ་བུ༴ ཧཱུྃ་སརྦ་དྷཀྐི་ནི་བྱད་མ་དགྲ་བོའི་སྙིང་ཁྲག་ཧུར༴ ལིང་རོ་བསྟབ་ཅིང་། ཧཱུྃ། ལྷ་སྔགས་ཏིང་འཛིན༴ དགྲ་བགེགས་བསྒྲལ་བའི༴ ཤ་ཟ་མཁའ་འགྲོའི༴ སྤྲུལ་པ་ཡང་སྤྲུལ༴ ཟག་མེད་གྱེས་པ༴ བླ་མེད་མཆོག་གི༴ གཏི་མུག་ཤ་ཆེན༴ རྔམ་པའི་སྟོབས་ཀྱིས༴ འདོད་ཆགས་ཁྲག་གི༴ བརྗིད་པའི་སྟོབས་ཀྱིས༴ ཞེ་སྡང་རུས་པའི༴ དྲག་ཤུལ་སྟོབས་ཀྱིས༴ ཞག་ཀླད་ཚིལ་རྐང་ས་གཞིར་སྤུངས། །ཁྲོ་གཏུམ་སྟོབས་ཀྱིས༴ སྡང་དགྲ་གནོད་བྱེད༴ ལྷག་མ་མེད་པར༴ ཧཱུྃ་སརྦ་དྷཀྐི་ནི་དགྲ་བོ་ཤ་ཏྲུཾ་མཱ་ར་ཡཿ མཾ་ས་རཀྟ༴ དེ་ནས་བཟློག་པ་གྱེར་མཇུག་ཏུ། ཧཱུྃ་སརྦ་དྷཀྐི་ནི་ཙིཏྟ་ཧྲིང་ཛཿ རྔཾ་རྔཾ་ཁཾ་ཁཾ་རཾ་རཾ༴ ༈ན་མོ་དཀོན་མཆོག་གསུམ་དང་༴ གསུམ། ཧཱུྃ་ལོཀྐ་དྷཀྐི་ནི་ཡ་མ་རུ་ཊ༴ གསུམ། ཛཿཧཱུྃ་བཾ་ཧོས་རྒྱས་འདེབས། རལ་གྲི་ཐོགས་ཏེ། ཧཱུྃ། འཇིག་རྟེན་མཁའ་འགྲོ༴ གནམ་ལྕགས་རལ་གྲི༴ རྣོ་ངར་རེག་གཅོད༴ དམིགས་པར་བྱ་བའི༴ གཟུགས་ཕུང་དུམ་བུ༴ ཧཱུྃ་ལོཀྐ་དྷཀྐི་ནི་བྱད་མ་དགྲ་བོའི་སྙིང་ཁྲག་ཧུར༴ ལིང་རོ་བསྟབ་ཅིང་། ཧཱུྃ། ལྷ་སྔགས་ཏིང་འཛིན༴ དགྲ་བགེགས་བསྒྲལ་བའི༴ འཇིག་རྟེན་མཁའ་འགྲོའི༴ སྤྲུལ་པ་ཡང་སྤྲུལ༴ ཟག་མེད་དགྱེས་པ༴ བླ་མེད་མཆོག་གི༴ གཏི་མུག་ཤ་ཆེན༴ རྔམ་པའི་སྟོབས་ཀྱིས༴ འདོད་ཆགས་ཁྲག་གི༴ བརྗིད་པའི་སྟོབས་ཀྱིས༴ ཞེ་སྡང་རུས་པའི༴ དྲག་ཤུལ་སྟོབས་ཀྱིས༴ ཞག་ཀླད་ཚིལ་རྐང་ས་གཞིར་སྤུངས། །ཁྲོ་གཏུམ་སྟོབས་ཀྱིས༴ སྡང་དགྲ་གནོད་བྱེད༴ ལྷག་མ་མེད་པར༴ ཧཱུྃ་ལོཀྐ་དྷཀྐི་ནི་དགྲ་བོ་ཤ་ཏྲུཾ་མཱ་ར་ཡཿ མཾ་ས་རཀྟ༴ དེ་ནས་བཟློག་པ་གྱེར་མཇུག་ཏུ། ཧཱུྃ་ལོཀྐ་དྷཀྐི་ནི་ཙིཏྟ་ཧྲིང་ཛཿ རྔཾ་རྔཾ་ཁཾ་ཁཾ་རཾ་རཾ༴ ༈ན་མོ་དཀོན་མཆོག་གསུམ་དང་༴ གསུམ། ཧཱུྃ་ཁྭ་ཁྭ་མུ་ཥ་དྷཀྐི་ནི་ཡ་མ་རུ་ཊ༴ གསུམ། ཛཿཧཱུྃ་བཾ་ཧོས་རྒྱས་འདེབས། རལ་གྲི་ཐོགས་ཏེ། ཧཱུྃ། ཁྭ་གདོང་མཁའ་འགྲོ༴ གནམ་ལྕགས་རལ་གྲི༴ རྣོ་ངར་རེག་གཅོད༴ དམིགས་པར་བྱ་བའི༴ གཟུགས་ཕུང་དུམ་བུ༴ ཧཱུྃ་ཁྭ་ཁྭ་མུ་ཥ་དྷཀྐི་ནི་བྱད་མ་དགྲ་བོའི་སྙིང་ཁྲག་ཧུར༴ ལིང་རོ་བསྟབ་ཅིང་། ཧཱུྃ། ལྷ་སྔགས་ཏིང་འཛིན་རོལ་པའི་མཐུས། །དགྲ་བགེགས་བསྒྲལ་བའི༴ ཁྭ་གདོང་མཁའ་འགྲོའི༴ སྤྲུལ་པ་ཡང་སྤྲུལ༴ ཟག་མེད་དགྱེས་པ༴ བླ་མེད་མཆོག་གི༴ གཏི་མུག་ཤ་ཆེན༴ རྔམ་པའི་སྟོབས་ཀྱིས༴ འདོད་ཆགས་ཁྲག་གི༴ བརྗིད་པའི་སྟོབས་ཀྱིས༴ ཞེ་སྡང་རུས་པའི༴ དྲག་ཤུལ་སྟོབས་ཀྱིས༴ ཞག་ཀླད་ཚིལ་རྐང་ས་གཞིར་སྤུངས། །ཁྲོ་གཏུམ་སྟོབས་ཀྱིས༴ སྡང་དགྲ་གནོད་བྱེད༴ ལྷག་མ་མེད་པར༴ ཧཱུྃ་ཁྭ་ཁྭ་མུ་ཥ་དྷཀྐི་ནི་དགྲ་བོ་ཤ་ཏྲུཾ་མཱ་ར་ཡཿ མཾ་ས་རཀྟ༴ དེ་ནས་བཟློག་པ་གྱེར་མཇུག་ཏུ། ཧཱུྃ་ཁྭ་ཁྭ་མུ་ཥ་དྷཀྐི་ནི་ཙིཏྟ་ཧྲིང་ཛཿ རྔཾ་རྔཾ་ཁཾ་ཁཾ་རཾ་རཾ༴ ༈ན་མོ་དཀོན་མཆོག་གསུམ་དང་༴ གསུམ། ཧཱུྃ་སུ་ཀ་མུ་ཥ་དྷཀྐི་ནི་ཡ་མ་རུ་ཊ༴ གསུམ། ཛཿཧཱུྃ་བཾ་ཧོས་རྒྱས་འདེབས། རལ་གྲི་ཐོགས་ཏེ། ཧཱུྃ། ཕག་གདོང་མཁའ་འགྲོ༴ གནམ་ལྕགས་རལ་གྲི༴ རྣོ་ངར་རེག་གཅོད༴ དམིགས་པར་བྱ་བའི༴ གཟུགས་ཕུང་དུམ་བུ༴ ཧཱུྃ་སུ་ཀ་མུ་ཥ་དྷཀྐི་ནི་བྱད་མ་དགྲ་བོའི་སྙིང་ཁྲག་ཧུར༴ ལིང་རོ་བསྟབ་ཅིང་། ཧཱུྃ། ལྷ་སྔགས་ཏིང་འཛིན་རོལ་པའི་མཐུས། །དགྲ་བགེགས་བསྒྲལ་བའི༴ ཕག་གདོང་མཁའ་འགྲོའི༴ སྤྲུལ་པ་ཡང་སྤྲུལ༴ ཟག་མེད་དགྱེས་པ༴ བླ་མེད་མཆོག་གི༴ གཏི་མུག་ཤ་ཆེན༴ རྔམ་པའི་སྟོབས་ཀྱིས༴ འདོད་ཆགས་ཁྲག་གི༴ བརྗིད་པའི་སྟོབས་ཀྱིས༴ ཞེ་སྡང་རུས་པའི༴ དྲག་ཤུལ་སྟོབས་ཀྱིས༴ ཞག་ཀླད་ཚིལ་རྐང་ས་གཞིར་སྤུངས། ཁྲོ་གཏུམ་སྟོབས་ཀྱིས༴ སྡང་དགྲ་གནོད་བྱེད༴ ལྷག་མ་མེད་པར༴ ཧཱུྃ་སུ་ཀ་མུ་ཥ་དྷཀྐི་ནི་དགྲ་བོ་ཤ་ཏྲུཾ་མཱ་ར་ཡཿ མཾ་ས་རཀྟ༴ དེ་ནས་བཟློག་པ་གྱེར་མཇུག་ཏུ། ཧཱུྃ་སུ་ཀ་མུ་ཥ་དྷཀྐི་ནི་ཙིཏྟ་ཧྲིང་ཛཿ རྔཾ་རྔཾ་ཁཾ་ཁཾ་རཾ་རཾ༴ ༈ན་མོ་དཀོན་མཆོག་གསུམ་དང་༴ གསུམ། ཧཱུྃ་ཀུ་ཀུ་མུ་ཥ་དྷཀྐི་ནི་ཡ་མ་རུ་ཊ༴ གསུམ། ཛཿཧཱུྃ་བཾ་ཧོས་རྒྱས་འདེབས། རལ་གྲི་ཐོགས་ཏེ། ཧཱུྃ། ཁྱི་གདོང་མཁའ་འགྲོ༴ གནམ་ལྕགས་རལ་གྲི༴ རྣོ་ངར་རེག་གཅོད༴ དམིགས་པར་བྱ་བའི༴ གཟུགས་ཕུང་དུམ་བུ༴ ཧཱུྃ་ཀུ་ཀུ་མུ་ཥ་དྷཀྐི་ནི་བྱད་མ་དགྲ་བོའི་སྙིང་ཁྲག་ཧུར༴ ལིང་རོ་བསྟབ་ཅིང་། ཧཱུྃ། ལྷ་སྔགས་ཏིང་འཛིན༴ དགྲ་བགེགས་བསྒྲལ་བའི༴ ཁྱི་གདོང་མཁའ་འགྲོའི༴ སྤྲུལ་པ་ཡང་སྤྲུལ༴ ཟག་མེད་དགྱེས་པ༴ བླ་མེད་མཆོག་གི༴ གཏི་མུག་ཤ་ཆེན༴ རྔཾ་པའི་སྟོབས་ཀྱིས༴ འདོད་ཆགས་ཁྲག་གི༴ བརྗིད་པའི་སྟོབས་ཀྱིས༴ ཞེ་སྡང་རུས་པའི༴ དྲག་ཤུལ་སྟོབས་ཀྱིས༴ ཞག་ཀླད་ཚིལ་རྐང་ས་གཞིར་སྤུངས། ཁྲོ་གཏུམ་སྟོབས་ཀྱིས༴ སྡང་དགྲ་གནོད་བྱེད༴ ལྷག་མ་མེད་པར༴ ཧཱུྃ་ཀུ་ཀུ་མུ་ཥ་དྷཀྐི་ནི་དགྲ་བོ་ཤ་ཏྲུཾ་མཱ་ར་ཡཿ མཾ་ས་རཀྟ༴ དེ་ནས་བཟློག་པ་གྱེར་མཇུག་ཏུ། ཧཱུྃ་ཀུ་ཀུ་མུ་ཥ་དྷཀྐི་ནི་ཙིཏྟ་ཧྲིང་ཛཿ རྔཾ་རྔཾ་ཁཾ་ཁཾ་རཾ་རཾ༴ ༈ན་མོ་དཀོན་མཆོག་གསུམ་དང་རྩ་བ་གསུམ་གྱི་བདེན་པས་གནོད་བྱེད་དགྲ་བགེགས་ཐམས་ཅད་གཟུགས་ལིངྒ་འདིའི་ནང་དུ་ཁུག །གསུམ། ཧཱུྃ་ཧུ་ལུ་མུ་ཥ་དྷཀྐི་ནི་ཡ་མ་རུ་ཊ༴ གསུམ། ཛཿཧཱུྃ་བཾ་ཧོས་རྒྱས་འདེབས། རལ་གྲི་ཐོགས་ཏེ། ཧཱུྃ། འུག་གདོང་མཁའ་འགྲོ༴ གནམ་ལྕགས་རལ་གྲི༴ རྣོ་ངར་རེག་གཅོད༴ དམིགས་པར་བྱ་བའི༴ གཟུགས་ཕུང་དུམ་བུ༴ ཧཱུྃ་ཧུ་ལུ་མུ་ཥ་དྷཀྐི་ནི་བྱད་མ་དགྲ་བོའི་སྙིང་ཁྲག་ཧུར༴ ལིང་རོ་བསྟབ་ཅིང་། ཧཱུྃ། ལྷ་སྔགས་ཏིང་འཛིན༴ དགྲ་བགེགས་བསྒྲལ་བའི་༴ འུག་གདོང་མཁའ་འགྲོའི༴ སྤྲུལ་པ་ཡང་སྤྲུལ༴ ཟག་མེད་དགྱེས་པ༴ བླ་མེད་མཆོག་གི༴ གཏི་མུག་ཤ་ཆེན༴ རྔམ་པའི་སྟོབས་ཀྱིས༴ འདོད་ཆགས་ཁྲག་གི༴ བརྗིད་པའི་སྟོབས་ཀྱིས༴ ཞེ་སྡང་རུས་པའི༴ དྲག་ཤུལ་སྟོབས་ཀྱིས༴ ཞག་ཀླད་ཚིལ་རྐང་ས་གཞིར་སྤུངས། །ཁྲོ་གཏུམ་སྟོབས་ཀྱིས༴ སྡང་དགྲ་གནོད་བྱེད༴ ལྷག་མ་མེད་པར༴ ཧཱུྃ་ཧུ་ལུ་མུ་ཥ་དྷཀྐི་ནི་དགྲ་བོ་ཤ་ཏྲུཾ་མཱ་྄ར་ཡཿ མཾ་ས་རཀྟ་༴ དེ་ནས་བཟློག་པ་གྱེར་མཇུག་ཏུ། ཧཱུྃ་ཧུ་ལུ་མུ་ཥ་དྷཀྐི་ནི་ཙིཏྟ་ཧྲིང་ཛཿ རྔཾ་རྔཾ་ཁཾ་ཁཾ་རཾ་རཾ༴ ཅེས་པ་འདི་ཡང་གཏེར་ཆེན་ཆོས་ཀྱི་རྒྱལ་པོ་རིག་འཛིན་འགྲོ་འདུལ་གླིང་པའམ་ཉི་མ་གྲགས་པས་ཤར་སྟག་མོ་སྒང་རྡོ་རྗེའི་གདན་དུ་བྲིས་པ་ཤིན་ཏུ་ཟབ་པར་ཡོད། བསད་ཟློག་གི་སྔགས་ལ་གཞུང་དང་ཅུང་ཟད་མི་འདྲ་བ་འདུག་ཀྱང་གཏེར་ཆེན་གྱི་ཕྱག་བྲིས་ལས་རིམ་པར་བཤུས་པའོ། །མངྒ་ལཾ།། །།

བདུད་འདུལ་མཁའ་འགྲོའི་རྩང་གྱེར་མཚོན་ཆའི་འཕྲུལ་འཁོར།

བཀའ་རྫོགས་པ་ཆེན་པོ་བླ་མ་བདེ་མཆོག་འཁོར་ལོ་ལས། བདུད་འདུལ་མཁའ་འགྲོའི་རྩང་གྱེར་མཚོན་ཆའི་འཕྲུལ་འཁོར་བཞུགས། བླ་མ་དང་བདུད་འདུལ་ཡེ་ཤེས་ཀྱི་མཁའ་འགྲོ་མ་གཉིས་སུ་མ་མཆིས་པ་ལ་ཕྱག་འཚལ་ལོ། །གཏོར་བཟློག་གི་བཅའ་གཞི་བཟློག་པའི་གཞུང་ལྟར་བྱས་པ་ལ། དུར་ཁྲོད་ཀྱི་འཇིམ་པས་ལྕགས་རི་བསྐོར་ཞིང་སྐྱེར་རྩང་ཟུར་གསུམ་པ་དུག་ཁྲག་གིས་སྦགས་པ་གྲངས་ལྡན་སྲིན་མོའི་འགྲོས་སུ་བཙུགས་པ་ལ་ཟློག་སྔགས་དང་། གང་གནོད་བཟློག་པའི་བྱང་བུ་གདགས། རྩེ་རྣམས་ལིང་ཆུང་དང་ཤ་དུམ་གྱིས་བརྒྱན་ཞིང་། རྒྱུ་མའི་ཞགས་པས་འཕྱང་འཕྲུལ་སྐ་རགས་བསྡམ། རང་དང་གཏོར་མ་བདུད་འདུལ་མར་གསལ་བ་ལ། རྩང་རྣམས་སྤྲུལ་པའི་མཁའ་འགྲོ་བྱེ་བ་ས་ཡ་དམ་ཅན་དྲེགས་པའི་ཚོགས་སུ་གསལ་བས་དགྲ་བགེགས་གནོད་བྱེད་ཐམས་ཅད་བཟློག་ཅིང་བསད་པའི་ལས་མཛད་པར་བསམས་ལ། རྔམ་བརྗིད་ཀྱི་རོལ་མོ་དང་བཅས་ཏེ་འདི་སྐད་དོ། །ཧཱུྃ་བྷྱོཿ ཆོས་དབྱིངས་མཁའ་འགྲོའི་ཞིང་ཁམས་ནས། །གདུལ་བཀའ་འདུལ་མཛད་ཁྲོ་མོའི་གཙོ། །མི་བསྲུན་རབ་འཇིགས་དྲག་མོའི་གཟུགས། །བདུད་འདུལ་དཔལ་གྱི་མཁའ་འགྲོ་མ། །འབུམ་ཕྲག་མཁའ་འགྲོའི་ཚོགས་དང་བཅས། །རབ་གཏུམ་ཁྲོས་པའི་སྐུར་བཞེངས་ལ། །སྡང་བའི་དགྲ་དང་གནོད་པའི་བགེགས། །ཟློག་ཅིང་བསད་པའི་འཕྲིན་ལས་མཛོད། །ཧཱུྃ། གནམ་ལྕགས་འབར་བའི་གཏོར་གཞོང་དུ། །གདུག་རྩུབ་དྲག་པོའི་རྡོ་དམར་ལ། །གསང་ཆེན་མཁའ་འགྲོའི་རྡོ་སྒྱོགས་བཅས། །མ་རུངས་གདུག་པའི་དུག་ཁྲག་གིས། །གསང་བ་སྔགས་ཀྱི་ངར་ཡང་བཏགས། །དམ་ཉམས་དགྲ་བགེགས་བསྒྲལ་བ་ཡི། །ཤ་རི་སྤུངས་ཤིང་ཁྲག་མཚོ་བསྐྱིལ། །རྩེ་ལ་མཁའ་འགྲོའི་སྐུ་བརྙན་བཞུགས། །ལོགས་ལ་གསོད་པའི་ཐུན་རྫས་བཙུགས། །ཡེ་ཤེས་མཁའ་འགྲོའི་གཞལ་ཡས་སུ། །ཏིང་འཛིན་དམིགས་པས་བྱིན་གྱིས་བརླབས། །ཡེ་ཤེས་མཁའ་འགྲོའི་བཀའ་ཆད་ཟློག །འབུམ་ཕྲག་མཁའ་འགྲོའི་ཕོ་བྲང་དུ། །ཡེ་ནས་ཡིན་པར་ཡང་གསལ་བཏབ། །འབུམ་ཕྲག་མཁའ་འགྲོའི་ཆོ་འཕྲུལ་ཟློག །ཐ་མར་དུར་འཇིམ་ལྕགས་རིས་བསྐོར། །ཁོར་ཡུག་མུ་ཁྱུད་བར་མཚམས་མེད། །དུར་ཁ་བྱེ་བའི་དུར་སྲི་ཟློག །དུར་ཤིང་སྐྱེར་པའི་རྩང་ཕུར་ནི། །ཕུར་པ་འབར་བའི་དབལ་དུ་གཞོགས། །ཁྲག་སྣ་དུག་སྣས་རྣོ་ངར་བླུད། །སྡེ་བརྒྱད་དྲེགས་པའི་གདུག་རྩུབ་ཟློག །ཤ་ཟ་སྲིན་མོའི་འགྲོས་སུ་བཙུགས། །ལྷ་ཆེན་ཀུན་གྱི་དགྱེེས་སྡེ་མོ། །ཉི་ཤུ་བརྒྱད་ཀྱི་གདུག་རྩུབ་ཟློག །སྐུ་གསུམ་ཞིང་ཁམས་མཚོན་པའི་ཕྱིར། །དྲ་མིག་རིམ་པ་གསུམ་དུ་བརྩེགས། །མ་དག་འཁོར་བའི་སྣོད་བཅུད་འདི། །སྐུ་གསུམ་དག་པའི་ཞིང་དུ་ཟློག །སྲིད་པའི་དྲ་བ་བསྡོམ་པའི་ཕྱིར། །ཆོས་ཉིད་ཡེ་ཤེས་དྲ་བ་ནི། མིག་མང་རིས་ཀྱི་དབྱིབས་སུ་བྲེས། །འཁྲུལ་སྣང་ཡེ་ཤེས་དབྱིངས་སུ་ཟློག །ངེས་ལེགས་ཐར་བའི་སྒོ་འབྱེད་ཕྱིར། །ཤེས་རབ་ཆེན་པོའི་དྲ་མིག་གསལ། །ངན་འགྲོའི་གཡང་སར་འཕྱན་པ་ཡི། །བག་ཆགས་འཁྲུལ་བའི་ལོག་ཤེས་ཟློག །ཐུགས་རྗེས་རྒྱུད་དུ་འབྲེལ་བའི་ཕྱིར། །ལོག་འདྲེན་རྒྱུ་མའི་ཞགས་པས་བྲེས། །མཚན་མར་ལྟ་བའི་ཞེ་སྡང་བྱུར། །ཚད་མེད་སྙིང་རྗེའི་ངང་དུ་ཟློག །ཞིང་བཅུ་རྩད་ནས་གཅོད་པའི་ཕྱིར། རྩེ་ལ་དགྲ་བགེགས་རཱུ་པ་གཟེད། །སྲིད་གསུམ་གནས་པའི་ལོག་འདྲེན་ཀུན། །དམིགས་མེད་ཆོས་དབྱིངས་ཀློང་དུ་ཟློག །ཧཱུྃ། གདུག་རྩུབ་དྲག་པོའི་རྩང་ཕུར་གྱི། །ཡར་རྩེས་ཆོས་ཉིད་དབྱིངས་སུ་སླེབས། །དབྱིངས་ཀྱི་མཁའ་འགྲོ་ཁྲོས་པ་ཡི། །བཀའ་ཆད་ཆོས་ཉིད་དབྱིངས་སུ་ཟློག །མར་རྩེས་ངན་སོང་འགྲོ་དྲུག་ཁྱབ། །རིག་དྲུག་གནས་སུ་འཁོར་བ་ཡི། །རྒྱུ་དྲུག་རྩ་བའི་ཉོན་མོངས་ཟློག །རྒྱ་མདུད་མཁའ་འགྲོའི་ཕོ་བྲང་སྟེ། །ལས་དང་ཡེ་ཤེས་ཌཱ་ཀི་མའི། །བཀའ་ཡི་ཆད་པ་དབྱིངས་སུ་ཟློག །ཧཱུྃ། གདུག་རྩུབ་དྲག་པོའི་རྩང་ཕུར་གྱི། །ཡར་རྩེ་སྲིད་རྩེའི་བླ་ན་མཐོ། །མ་རིག་བདག་འཛིན་སྲིད་པའི་གཞི། །བདག་མེད་སྟོང་པའི་ཀློང་དུ་ཟློག །མར་རྩེས་ན་རག་དམྱལ་བ་གནོན། །ཚ་གྲང་དུཿཁ་འབྱུང་བའི་རྒྱུ། །ལས་སྤྱོད་ལོག་པའི་རྣམ་སྨིན་ཟློག །རྐེད་པ་ཁམས་གསུམ་གཞལ་ཡས་ཁང་། །འཁྲུལ་པར་སྤྱོད་པའི་ཁམས་གསུམ་འགྲོ། །མྱང་འདས་ཞི་བ་ཆེན་པོར་ཟློག །ཧཱུྃ། གདུག་རྩུབ་དྲག་པོའི་རྩང་ཕུར་གྱི། །ཡར་རྩེ་མི་མངོན་དབྱིངས་ན་མཐོ། །ཆོས་ཀུན་ངོ་བོ་སྟོང་པ་ཉིད། །མ་རྟོགས་འཁྲུལ་བའི་ལོག་ཤེས་ཟློག །མར་རྩེས་འབྱུང་བའི་ཁམས་རྣམས་ཁྱབ། །འབྱུང་བ་འཁྲུག་པའི་ལྡན་འདུས་ནད། །རང་བཞིན་ལྷུན་གྲུབ་ཀློང་དུ་ཟློག །རྒྱ་མདུད་སྟོང་གསུམ་ཟིལ་གྱིས་གནོན། །སྟོང་གསུམ་སྟོང་གི་འཇིག་རྟེན་གྱི། །མི་དང་མི་མིན་བྱེད་སྟེམས་ཟློག །ཧཱུྃ། གདུག་རྩུབ་དྲག་པོའི་རྩང་ཕུར་གྱི། །ཡར་རྩེར་སྐུ་གསུམ་སངས་རྒྱས་བཞུགས། །སྐུ་གསུམ་རང་ལ་ཡེ་གནས་པ། །མ་རྟོགས་འཁྲུལ་བའི་སྒྲིབ་གཡོགས་ཟློག །མར་རྩེས་དུག་གསུམ་ཨར་ལ་གཏད། །ཆགས་སྡང་རྨོངས་པའི་ཉོན་མོངས་དུག །རང་རིག་སྐུ་གསུམ་ཀློང་དུ་ཟློག །རྒྱ་མདུད་ཐབས་ཤེས་དབྱེར་མེད་ཞིང་། །ཡ་བྲལ་ལོག་པར་གོལ་བའི་ལམ། །དབྱེར་མེད་ཟུང་འཇུག་ཆེན་པོར་ཟློག །ཧཱུྃ། གདུག་རྩུབ་དྲག་པོའི་རྩང་ཕུར་གྱི། །ཡར་རྩེར་རིགས་ལྔའི་ལྷ་ཚོགས་བཞུགས། །ཁྲག་འཐུང་རིགས་ལྔའི་རྦོད་གཏོང་དང་། །ཕུང་ལྔ་ལྷ་ལྔའི་ཀློང་དུ་ཟློག །མར་རྩེས་དུག་ལྔ་དབྱིངས་སུ་བསྒྲལ། །ཉོན་མོངས་ལྔས་བསྐྱེད་འདྲེ་སྲིན་དང་། །དུག་ལྔ་ཡེ་ཤེས་ལྔ་རུ་ཟློག །རྐེད་པ་ཡེ་ཤེས་ལྔ་ལྡན་ཞིང་། །སྣང་ཞིང་སྲིད་པའི་བརྟན་གཡོ་ཀུན། །ལྔ་ལྡན་ཐིག་ལེའི་ཞིང་དུ་ཟློག །ཧཱུྃ། གདུག་རྩུབ་དྲག་པོའི་རྩང་ཕུར་གྱི། །ཡར་རྩེར་ཕ་བརྒྱུད་ལྷ་ཚོགས་བཞུགས། །ལྷ་རིགས་དེ་ཡི་རྦོད་གཏོང་དང་། །ཐབས་རྨོངས་བདེ་བ་ཆེན་པོར་ཟློག །མར་རྩེར་མ་བརྒྱུད་མཁའ་འགྲོ་འཁྲབ། །དེ་དང་དེ་ཡི་བྱད་ཟོར་དང་། །དངོས་འཛིན་ཁྱབ་བརྡལ་ཀློང་དུ་ཟློག །རྒྱ་མདུད་དཔའ་བོ་དཔའ་མོའི་ཞིང་། །དེ་དག་རྦད་པའི་མཐུ་བྱད་དང་། །དཔའ་བོ་དཔའ་མོའི་བསུན་མ་ཟློག །ཧཱུྃ། གདུག་རྩུབ་དྲག་པོའི་རྩང་ཕུར་གྱི། །ཡར་རྩེར་འདབ་ཆགས་བུ་ཡུག་འཚུབ། །མཁའ་སྡིང་བྱ་ལས་བྱུང་བ་ཡི། །ཐན་དང་ལྟས་ངན་ཐམས་ཅད༴ མར་རྩེར་མཆེ་ཅན་གཅན་གཟན་འདུ། །གཅན་གཟན་གདུག་པ་ལས་བྱུང་བའི། །ཐན་དང་ལྟས་ངན་ཐམས་ཅད༴ རྐེད་པར་སེང་འབྲུག་ཆུ་སྲིན་བརྔམ། །སྲོག་ཆགས་ཆེ་དགུ་ལས་བྱུང་བའི། །ཐན་དང་ལྟས་ངན་ཐམས་ཅད༴ ཧཱུྃ། གདུག་རྩུབ་དྲག་པོའི་རྩང་ཕུར་གྱི། །ཡར་རྩེར་ཐོག་གི་བུ་ཡུག་འཚུབ། །སྡེ་བརྒྱད་དྲེགས་པའི་ཆོ་འཕྲུལ་གྱིས། །གནམ་ལྕགས་ཐོག་དམར་འབེབས་པ༴ མར་རྩེར་ཆུ་འཁྱགས་སེར་ཆེན་འབེབས། །འབྲས་དྲུག་ལོ་ཏོག་འཇོམས་པ་ཡི། །ཆུ་རྒོད་འཁྱམས་པའི་སྐྱི་མདངས༴ རྐེད་པར་དྲག་མེ་དམར་ནག་འཚུབ། །བན་བོན་སྔགས་པའི་བྱད་མ་ཡིས། འབར་བའི་ཧོམ་ལ་བསྲེག་པ༴ ཧཱུྃ། གདུག་རྩུབ་དྲག་པོའི་རྩང་ཕུར་གྱི། ཡར་རྩེར་ཧཱུྃ་སྒྲས་ཁམས་གསུམ་གཡོ། །ཁྲོ་བོ་ཁྲོ་མོའི་གསང་སྔགས་ཀྱི། །འབྱིན་འཇུག་ཐེམས་ལ་བཅུག་པ༴ མར་རྩེར་ཕཊ་སྒྲས་སྲིད་གསུམ་འཁྲུག །དྲག་སྔགས་དམོད་པའི་སྤུ་གྲི་ཡིས། །སྲོག་ལ་མཚོན་ཆ་བརྡེག་པ༴ རྐེད་པར་བྷྱོ་བཟློག་སྟོང་གསུམ་བརླག །ངན་སྔགས་གདུག་པའི་རྨེ་འཐབ་ཀྱིས། །རྐང་མཐིལ་སྤྱི་བོར་བཏོན་པ༴ ཧཱུྃ། གདུག་རྩུབ་དྲག་པོའི་རྩང་ཕུར་གྱི། །ཡར་རྩེར་ཡུལ་ཆེན་ཉེར་བཞི་ཡི། །དཔའ་བོ་དཔའ་མོ་ཁྱུང་ལྟར་ལྡིང་། །ཡུལ་གྱི་ཐབས་དང་ཤེས་རབ་མའི། །བཀའ་ཆད་རྦོད་གཏོང་གདུག་རྩུབ༴ མར་རྩེར་གནས་མཆོག་སོ་གཉིས་ཀྱི། །དཔའ་བོ་དཔའ་མོ་སེང་ལྟར་འགྱིང་། །གནས་ཀྱི་ཐབས་དང་ཤེས་རབ་མའི། །བཀའ་ཆད་རྦོད་གཏོང་གདུག་རྩུབ༴ རྐེད་བར་དྲུར་ཁྲོད་ཆེ་བརྒྱད་ཀྱི། །དཔའ་བོ་དཔའ་མོ་སྟག་ལྟར་བརྔམ། །དུར་ཁྲོད་ཐབས་དང་ཤེས་རབ་མའི། །བཀའ་ཆད་རྦོད་གཏོང་གདུག་རྩུབ་ཟློག །ཧཱུྃ། གདུག་རྩུབ་དྲག་པོའི་རྩང་ཕུར་གྱི། །ཡར་རྩེར་ནད་གཏོང་མ་མོའི་ཚོགས། །དབྱར་གྱི་ཆར་སྤྲིན་ལྟ་བུར་འཁྲིགས། མ་མོ་མཁའ་འགྲོའི་ཁ་རླངས་ཀྱི། །ནད་སྤྲིན་རིམས་ནད་དལ་ཡམས་ཟློག །མར་རྩེར་ཤ་ཟ་མཁའ་འགྲོའི་ཚོགས། །མུན་པ་ནག་པོའི་སྨག་ལྟར་གཏིབས། །འདྲེ་སྲིན་ཡི་དྭགས་དམ་སྲི་མོས། །ཚེ་དང་སྲོག་ལ་འཇབ་པ་ཟློག །རྐེད་པར་གདུག་པའི་ཕྲ་མེན་མ། །བུ་ཡུག་རླུང་དམར་ལྟ་བུར་འཚུབ། །འབྱེད་བསྐྲད་དཀྲུག་སེལ་འཕུང་བཤིག་གི། ངན་ཐབས་ལས་ལ་སྦྱར་བ་ཟློག །ཧཱུྃ། གཞན་ཡང་བཟློག་ཅིང་བསྒྱུར་བ་ནི། ཚངས་པ་བརྒྱ་བྱིན་ཁྱབ་འཇུག་སོགས། །སྟེང་ཕྱོགས་ལྷ་ཡི་དལ་ཁ་ཡང་། །གདུག་རྩུབ་དྲག་པོའི་རྩང་གིས་ཟློག །དགའ་བོ་འཇོག་པོ་དུང་སྐྱོང་སོགས། །ཀླུ་ལ་གཏད་པའི་ཁྲམ་ཁ་ཡང་། །གདུག་རྩུབ་དྲག་པོའི་རྩང་གིས་ཟློག །ཁྱབ་འཇུག་ཉི་མ་ཟླ་བ་སོགས། །གཟའ་ཡི་གཟའ་ནད་ཀི་ཀང་ཡང་། གདུག་རྩུབ་དྲག་པོའི་རྩང་གིས་ཟློག །མ་མོ་མཁའ་འགྲོའི་ཁ་རླངས་ཀྱི། །རིམས་ནད་དལ་ཡམས་དམར་བཤལ་ཡང་། །གདུག་རྩུབ་དྲག་པོའི་རྩང་གིས་ཟློག །ལྷ་སྲིན་སྡེ་བརྒྱད་དྲེགས་པ་ཡིས། །གནོད་ཅིང་འཚེ་བའི་བསམ་སྦྱོར་ཡང་། །གདུག་རྩུབ་དྲག་པོའི་རྩང་གིས་ཟློག །འཆི་བདག་གཤིན་རྗེའི་སྡེ་ཚོགས་ཀྱིས། །བླ་སྲོག་ཁྲམ་ལ་བཏབ་པ་ཡང་། །གདུག་རྩུབ་དྲག་པོའི༴ བན་བོན་གདུག་པའི་བྱད་མ་ཡིས། །ངན་དགུ་དུག་བཅུའི་རྦོད་གཏོང་ཡང་། །གདུག་རྩུབ་དྲག་པོའི༴ སྲོག་བདག་རྒྱལ་པོའི་སྡེ་ཚོགས་ཀྱིས། །མྱོ་འབོག་བརྒྱལ་ནད་བཏང་བ་ཡང་། །གདུག་རྩུབ་དྲག་པོའི༴ གཤིན་རྗེ་འདུས་པའི་རིག་སྔགས་ཀྱིས། །རླུང་ལ་འཁོར་ལོ་བསྐོར་བ་ཡང་། །གདུག་རྩུག་དྲག་པོའི༴ མགོན་པོའི་པར་བུ་བསྐོར་བ་དང་། །ཐོད་པ་ནག་པོར་བཅུག་པ་ཡང་། །གདུག་རྩུབ་དྲག་པོའི༴ ཕྲ་མེན་མ་ཡི་ཉེ་འབྱེད་དང་། །ཁང་དུར་ཞིང་སེལ་བཅུག་པ་ཡང་། །གདུག་རྩུབ་དྲག་པོའི༴ ཡེ་ཤེས་ལས་དང་འཇིག་རྟེན་པའི། །ལྷ་བསྲུང་རྦད་པའི་བྱོལ་ཁ་ཡང་། །གདུག་རྩུབ་དྲག་པོའི༴ འབྱུང་བ་ཆེན་པོ་རྣམ་པ་བཞིས། །ལས་ལ་སྦྱར་བའི་རྦོད་གཏོང་ཡང་། །གདུག་རྩུག་དྲག་པོའི༴ རྣལ་ཟློག་དཀྲུག་སྡེབས་དྲག་སྔགས་ཀྱིས། །སྲོག་ལ་མཚོན་ཆ་བསྐོར་བ་ཡང་། །གདུག་རྩུབ་དྲག་པོའི༴ བྱོལ་སྔགས་ཐུན་གཏོར་དུག་ཁྲག་བླང་། །དམོད་ཟོར་ལ་སོགས་ཟོར་སྣ་ཀུན། །གདུག་རྩུབ་དྲག་པོའི༴ ཕོ་བདུད་མོ་བདུད་སྤྱི་བདུད་སོགས། །ཡས་ཀྱི་བདུད་དུ་གཡོས་པ་ཡང་། །གདུག་རྩུབ་དྲག་པོའི་རྩང་གིས་ཟློག །ཆེ་སྲི་ཆུང་སྲི་དར་སྲི་སོགས། །མས་ཀྱི་སྲི་རུ་ལངས་པ་ཡང་། །གདུག་རྩུབ་དྲག་པོའི༴ ཐེའུ་རང་འགོང་པོ་བསེ་རགས་ཀྱིས། །ཕུགས་ཀྱི་སྲིས་ལ་བརྐུ་བ་ཡང་། །གདུག་རྩུབ་དྲག་པོའི༴ ཉེས་གསུམ་འདུ་བ་འཁྲུགས་པ་ཡི། །བཞི་བརྒྱ་རྩ་བཞིའི་ལུས་ཀྱི་ནད། །གདུག་རྩུབ་དྲག་པོའི༴ ལོག་པར་འདྲེན་པའི་མ་རུངས་པ། །སྟོང་ཕྲག་བརྒྱད་ཅུ་བགེགས་ཀྱི་རིགས། །གདུག་རྩུབ་དྲག་པོའི༴ བཀྲ་མི་ཤིས་ཤིང་ཡིད་མི་འོང་། །མཚན་ལྟས་ངན་པ་བརྒྱད་ཅུ་གཅིག །གདུག་རྩུབ་དྲག་པོའི་རྩང་༴ ལུས་དང་སྲོག་ལ་རྒོལ་བ་ཡི། །རྐྱེན་ངན་ཉི་ཁྲི་ཆིག་སྟོང་ཡང་། །གདུག་རྩུབ་དྲག་པོའི༴ གནོད་ཅིང་འཚེ་བའི་མི་མཐུན་ཚོགས། །གློ་བུར་བདུན་བརྒྱ་ཉི་ཤུ་ཡང་། །གདུག་རྩུབ་དྲག་པོའི༴ རྣམ་པར་འཚེ་བའི་ཐོག་བབ་བྱུར། །ཡེ་འབྲོག་སུམ་བརྒྱ་དྲུག་ཅུ་ཡང་། །གདུག་རྩུབ་དྲག་པོའི༴ ལང་ཚོ་མ་སྨིན་གཞོན་ནུའི་གཤེད། །བྱིས་པའི་གདོན་ཆེན་བཅོ་ལྔ་ཡང་། །གདུག་རྩུབ་དྲག་པོའི༴ ཧུར་ཐུམ་སྲོག་ལ་རྒོལ་བ་ཡིས། །དུས་མིན་འཆི་བ་རྣམ་བརྒྱད་ཀྱང་། །གདུག་རྩུབ་དྲག་པོའི༴ སྐག་ཆེན་བཅོ་ལྔས་གདན་ཉམས་པའི། །ཕྱི་ལྤགས་རལ་བ་གནམ་ལོའི་སྐག །གདུག་རྩུབ་དྲག་པོའི༴ སྐག་ཕྲན་བཞི་དང་དགུ་དུར་གྱིས། །བར་ཤ་སྣད་པ་སྨེ་བའི་སྐག །གདུག་རྩུབ་དྲག་པོའི༴ བུག་འཕུང་ཡོ་འཁྱོམས་སྐྱ་མདའ་ཟུག །ནང་རུས་ཆགས་པ་སྤར་ཁའི་སྐག །གདུག་རྩུབ་དྲག་པོའི༴ བློན་པོ་དམག་མི་མཚོན་ཆ་སྟེ། །ཟླ་ཞག་དུས་ཀྱི་མི་མཐུན་སྐག །གདུག་རྩུབ་དྲག་པོའི༴ སྲོག་ལུས་དབང་ཐང་སྤར་སྨེ་བླར། །རྩིས་བྱས་རྡེའུ་ནག་རྡེའུ་རོ་བུད། །གདུག་རྩུབ་དྲག་པོའི༴ མོ་པྲ་ལ་ཉེ་རྨི་ལམ་ལ། །ངན་པར་ཤར་བའི་མཚན་མ་ཡང་། །གདུག་རྩུབ་དྲག་པོའི༴ ཕོ་གྲལ་མོ་གྲལ་ཆོས་གྲལ་ནས། །གླེང་བའི་མི་ཁ་སྨྲ་མཆུ་ཡང་། །གདུག་རྩུབ་དྲག་པོའི༴ ཁ་སྨྲས་གྱོད་ཐུག་རྒྱ་འདྲེ་ཡི། །དགྲ་སྣ་ཁ་མཆུ་ཟུག་པ་ཡང་། །གདུག་རྩུབ་དྲག་པོའི༴ བརྟན་དང་གཡོ་བའི་དངོས་པོ་ལས། །རྣམ་པར་བྱུང་བའི་ལྟས་ངན་ཡང་། །གདུག་རྩུབ་དྲག་པོའི༴ སྔོན་གྱི་ལས་དང་འཕྲལ་རྐྱེན་གྱིས། །བྱས་ཚད་ལོག་པར་འགྲོ་བ་ཡང་། །གདུག་རྩུབ་དྲག་པོའི་རྩང་གིས་ཟློག །མདོར་ན་ཤེས་བྱར་སྲིད་པ་ཡི། །མི་མཐུན་གནོད་པ་མཆིས་སོ་ཅོག །གདུག་རྩུབ་དྲག་པོའི་རྩང་གིས་ཟློག །ཧཱུྃ། རྣོ་དབལ་ངར་ལྡན་དམར་ནག་རྩང་། །ཕྱི་ནི་རྩུབ་འགྱུར་འབར་བའི་མཚོན། །ནང་ནི་དྲེགས་བྱེད་ཕོ་མོའི་ཞིང་། །གསང་བ་ཡེ་ཤེས་གཞལ་ཡས་ཁང་། །རྟེན་འབྲེལ་ཟབ་མོའི་འཁྲུལ་འཁོར་ལས། །ཏིང་འཛིན་སྔགས་རྒྱས་བྱིན་བརླབས་ནས། །ཆོས་སྐྱོང་ཕོ་ཉའི་རྟེན་དུ་བཙུགས། །མ་མོ་མཁའ་འགྲོའི་རྫོང་དུ་བརྩིགས། །སྡེ་བརྒྱད་དྲེགས་པའི་མཚོན་ཆར་བརྡུངས། །ཁྲོ་བོ་ཁྲོ་མོའི་མཐུ་སྟོབས་དང་། །མ་མོ་མཁའ་འགྲོའི་དྲག་ཤུལ་དང་། །དམར་ནག་རྩང་གི་རྣོ་དབལ་གྱིས། །བསྟན་དང་བླ་མ་རྣལ་འབྱོར་ལ། །རྣམ་པར་སྡང་བའི་སྤྱི་སྒོས་དགྲ། །ཕོ་ཉས་ཁུག་ལ་མཚོན་ཆས་སྒྲོལ། །ཤ་རུས་རྐང་ལ་བརྔམ་ཟོས་གྱིས། མིང་ཤུལ་རྗེས་མེད་ཁ་ཕུང་ཐོང་། །བྱང་ཆུབ་བསྒྲུབ་པའི་བར་ཆད་བགེགས། །འདི་དང་ཕྱི་མ་གར་བྱུང་ཡང་། །དམིགས་པ་མེད་པར་རྒྱ་ཡིས་ཐོབ། །ལུས་དང་སྲོག་ལ་རྒོལ་བའི་འདྲེ། །ཕྱོགས་བཞི་མཚམས་བརྒྱད་གར་གནས་ཀྱང་། །ཐུགས་རྗེའི་སྟོབས་ཀྱིས་རྡུལ་དུ་རློག །བྱོལ་ཁ་རྦོད་ཟོར་གཏོང་བ་ཡི། །བྱད་མ་རང་གཤེད་རང་ལ་ཐོབ། །མི་མཐུན་ཕྱོགས་རྣམས་ཐམས་ཅད་ལས། །རྣམ་པར་རྒྱལ་བའི་ཕྲིན་ལས་མཛོད། །ཨཱོཾ་བཛྲ་ཀཱི་ལི་ཀཱི་ལཱ་ཡ་ནྲྀ་ཏྲི་སརྦ་ཤ་ཏྲུཾ་མཱ་ར་ཡ་རྦད་རྦད། །བྷྱོ་བྷྱོ། ཟློག་ཟློག །ཅེས་བདུད་འདུལ་ནག་མོའི་ཆོས་བཀའི་རབ་ཏུ་གསང་ཟློག་པའི་སྐབས་སུ་རྩང་འཛུགས་པའི་གསལ་ཁ་དང་། རྩང་གྱེར་གསལ་བར་མ་བཤད་ཀྱང་། གཏེར་སྟོན་མཆོག་གི་སྤྲུལ་པའི་སྐུ་ཉིད་གྱིས་རྩང་འཛུགས་ཀྱི་ཕྱག་ལེན་དང་། དེའི་འཕྲིན་ལས་ཀྱང་ཟབ་ཏིག་ནས་ལེན་པར་མཛད་པ་ལ། བདག་ལ་འདི་ལྟ་བུ་ཞིག་གྱིས་ཤིག་པར་བཀས་གནང་བ་ལྟར། །དྲག་པོ་སྔགས་ཀྱི་རིག་པ་འཛིན་པ་ཧོར་གྱི་སྔགས་ནག་གིས། སྔ་འགྱུར་རྡོ་རྗེ་ཐེག་པའི་མཁའ་འགྲོའི་ཟབ་ཆོས་ཤིན་ཏུ་ང་བ་དང་སྒོ་བསྟུན་ཏེ། བྱང་སྡང་རྡོ་དབང་པོའི་སྐྱེད་ཚལ་དུ་སྦྱར་བ་འདིས་ཀྱང་ཟབ་གསང་གི་བསྟན་པ་རིན་པོ་ཆེ་ཕྱོགས་དུས་ཐམས་ཅད་དུ་དར་ཞིང་རྒྱས་པའི་རྒྱུར་གྱུར་ཅིག །མངྒ་ལཾ།། །།

གསེར་སྐྱེམས་བདུད་རྩིའི་རོལ་མཚོ།

བདུད་འདུལ་མཁའ་འགྲོའི་ཟབ་ཆོས་ཀྱི། །གསེར་སྐྱེམས་བདུད་རྩིའི་རོལ་མཚོ་བཞུགས། །ཐུགས་རྗེའི་ཟིལ་ཆེན་ཆེར་རྒྱས་པའི། །གཟི་བརྗིད་ཉི་མ་བརྒྱར་འབར་བས། །སྙིགས་མའི་མུན་ཆེན་དཔུང་གཞོམ་པའི། །གྲགས་དཀར་གསལ་བའི་མགོན་དེས་སྐྱོངས། །གསང་ཆེན་མཁའ་འགྲོ་ཁྲོས་པའི་སྒྱོགས། །ལྷ་སྔགས་རོལ་པའི་གནམ་ལྕགས་ཐོག །བདུད་དཔུང་བཤིག་པའི་ཆ་རྐྱེན་དུ། །གསེར་སྐྱེམས་བདུད་རྩིའི་རོལ་མཚོར་བསྐྱིལ། །དེ་ཡང་རིན་པོ་ཆེའི་སྣོད་དུ་གཙང་མའི་ཕུད་ལ་རིན་པོ་ཆེ་སྣ་ཚོགས། ཤ་ཁྲག་གིས་མ་གོས་པའི་སྨན། དཀར་མངར་གྱི་ཟས། གཙང་མའི་འབྲུ་སྣ་སོགས་བཏབ་ལ། ཨཱོཾ་ཨཱཿཧཱུྃ་གིས་ཟག་མེད་ཀྱི་བདུད་རྩིར་བྱིན་གྱིས་བརླབས་ལ། ཧཱུྃ། ཟབ་ཡངས་རབ་མཛེས་འབར་བའི་རིན་ཆེན་སྣོད། །འབྲུ་བཅུད་རྐྱེན་སྦྱར་བདུད་རྩིའི་བཅུད་ཀྱིས་གཏམས། །འབྲུ་སྨན་རྩི་བཅུད་དཀར་མངར་རིན་ཆེན་སྦྱར། །ཏིང་འཛིན་སྔགས་དང་ཕྱག་རྒྱའི་འཕྲུལ་འཁོར་གྱིས། །འཆི་མེད་བདུད་རྩི་མཆོག་ཏུ་བྱིན་གྱིས་བརླབས། །ཧཱུྃ། ཕན་བདེའི་གཏེར་ཆེན་བསླུ་མེད་དཀོན་མཆོག་གསུམ། །རྩ་བརྒྱུད་བླ་མ་ཡི་དམ་མཁའ་འགྲོ་རྣམས། །འཆི་མེད་བདུད་རྩིའི་གསེར་སྐྱེམས་འདི་བཞེས་ལ། །ཚེ་རབས་གཏན་གྱི་མགོན་དང་སྐྱབས་གནས་མཛོད། །འཇིག་རྟེན་འདས་དང་སྲིད་པ་པར་སྣང་བའི། །བསྟན་དང་དེ་འཛིན་སྐྱོང་བའི་སྲུང་མ་རྣམས། །འཆི་མེད་བདུད་རྩིའི་གསེར་སྐྱེམས་འདི་བཞེས་ལ། །བསྟན་དང་བདག་ལ་སྡང་བའི་དགྲ་བགེགས་སྒྲོལ། །དྲེགས་པ་སུམ་བཅུ་སྔགས་བདག་བཅོ་བརྒྱད་སོགས། །སྣང་ཞིང་སྲིད་པའི་ལྷ་སྲིན་སྡེ་བརྒྱད་རྣམས། །འཆི་མེད༴ སྒྲུབ་པོའི་མཐུ་དཔུང་མཛོད་ལ་དགྲ་དཔུང་ཤིག །ཕྱོགས་བཅུའི་འཇིག་རྟེན་སྐྱོང་བའི་ཕྱོགས་སྐྱོང་བཅུ། །འཆི་མེད༴ སྐུ་གཟུར་ལམ་ཕྱེ་སྒྲུབ་པོའི་གྲོགས་མཛོད་ལ། །ཕྱོགས་བཅུའི་དགྲ་བགེགས་ཐམས་ཅད་རྡུལ་དུ་རློག །ལོ་ཟླ་ཞག་དུས་སྤར་ཁ་སྨེ་བ་ལ། །འཁོར་ཞིང་དབང་བའི་ས་བདག་རྒྱལ་བློན་རྣམས། །འཆི་མེད༴ ཀོ་ལོང་སྤོང་ལ་སྐུ་བཟུར་ཟོར་ལམ་ཕྱེ། །ཕྱོགས་འདིར་གནས་པའི་གཞི་བདག་ཡུལ་གྱི་ལྷ། །ས་བདག་ཀླུ་གཉན་མ་ལུས་ཐམས་ཅད་ཀྱང་། །འཆི་མེད༴ དྲག་པོའི་ཟོར་ལམ་ཕྱེས་ལ་ཟོར་སྣ་དྲོངས། །མིང་དུ་མ་ཐོན་ལམ་དུ་འཁོད་པ་ཡི། །མདོས་དང་ཟོར་ལ་འཁྲེན་པའི་ལྷ་འདྲེ་རྣམས། །འཆི་མེད༴ ཟོར་ལ་སྐུ་བཟུར་རུ་ང་ཕྲག་དོག་སྤོངས། །མདོར་ན་སྣང་སྲིད་ལྷ་འདྲེའི་སྡེར་གཏོགས་པའི། །རིས་སུ་མ་ཕྱེའི་འབྱུང་པོ་ཆེ་ཕྲ་ཀུན། །འཆི་མེད༴ ཀོ་ལོང་གདུག་སེམས་ཕྲག་དོག་ཡོངས་སྤོང་ལ། །སྒྲུབ་པོའི་སྡོང་དང་གྲོགས་ལ་དཔུང་བསྐྱེད་དེ། །དགྲ་བགེགས་རྩད་ནས་གཅོད་པའི་འཕྲིན་ལས་མཛོད། །ཅེས་གསེར་སྐྱེམས་ཕུལ་ལ་ཟོར་ལམ་དབྱེ། དེ་ནས་ནང་སྒོ་དབྱེ་བ་ནི། ཧཱུྃ། རབ་འཇིགས་མཁའ་འགྲོའི་ཕོ་བྲང་གི། ཤར་ཕྱོགས་སྒོ་མ་ཁྭ་གདོང་མ། །ལས་བྱེད་ཁྭ་གདོང་འབུམ་གྱིས་བསྐོར། །ཁམས་གསུམ་འགུགས་པའི་ལྕགས་ཀྱུ་དང་། །ཚད་མེད་སྙིང་རྗེའི་ལྡེ་མིག་གིས། །གཞལ་ཡས་ཆེན་པོའི་ཤར་སྒོ་ཕྱེ། །རྡོ་རྗེ་མཁའ་འགྲོའི་བཀའ་ཆད་དང་། །དྲི་ཟ་ཕོ་མོའི་དལ་ཡམས་གདོན། །གདུག་རྩུབ་ལྟས་ངན་དགྲ་ལ་བསྒྱུར། །ཧཱུྃ། རབ་འཇིགས་མཁའ་འགྲོའི་ཕོ་བྲང་གི། ལྷོ་ཕྱོགས་སྒོ་མ་ཕག་གདོང་མ། །ལས་བྱེད་ཕག་གདོང་འབུམ་གྱིས་བསྐོར། །སྲིད་གསུམ་འཆིང་བའི་ཞགས་པ་དང་། །བྱམས་པ་ཆེན་པོའི་ལྡེ་མིག་གིས། །གཞལ་ཡས་ཆེན་པོའི་ལྷོ་སྒོ་ཕྱེ། །རིན་ཆེན་མཁའ་འགྲོའི་བཀའ་ཆད་དང་། །གཤིན་རྗེ་ཕོ་མོའི་དལ་ཡམས་གདོན། །གདུག་རྩུབ་ལྟས་ངན་དགྲ་ལ་བསྒྱུར། །ཧཱུྃ། རབ་འཇིགས་མཁའ་འགྲོའི་ཕོ་བྲང་གི། །ནུབ་ཕྱོགས་སྒོ་མ་ཁྱི་གདོང་མ། །ལས་བྱེད་ཁྱི་གདོང་འབུམ་གྱིས་བསྐོར། །སྟོང་གསུམ་སྡོམས་པའི་ལྕགས་སྒྲོག་དང་། །དགའ་བ་ཆེན་པོའི་ལྡེ་མིག་གིས། །གཞལ་ཡས་ཆེན་པོའི་ནུབ་སྒོ་ཕྱེ། །པདྨ་མཁའ་འགྲོའི་བཀའ་ཆད་དང་། །ཀླུ་དབང་ཕོ་མོའི་དལ་ཡམས་གདོན། །གདུག་རྩུབ་ལྟས་ངན་དགྲ་ལ་བསྒྱུར། །ཧཱུྃ། རབ་འཇིགས་མཁའ་འགྲོའི་ཕོ་བྲང་གི། །བྱང་ཕྱོགས་སྒོ་མ་འུག་གདོང་མ། །ལས་བྱེད་འུག་གདོང་འབུམ་གྱིས་བསྐོར། །འཁོར་བ་ཡོངས་སྒྲོལ་དྲིལ་བུ་དང་། །བཏང་སྙོམས་ཆེན་པོའི་ལྡེ་མིག་གིས། །གཞལ་ཡས་ཆེན་པོའི་བྱང་སྒོ་ཕྱེ། །ལས་ཀྱི་མཁའ་འགྲོའི་བཀའ་ཆད་དང་། །གནོད་སྦྱིན་ཕོ་མོའི་དལ་ཡམས་གདོན། །གདུག་རྩུབ་ལྟས་ངན་དགྲ་ལ་བསྒྱུར་། ཞེས་དབྱེ། དེ་ནས། ཨཱོཾ་བཛྲ་དྷཀྐི་ནི་ས་པ་རི་ཝཱ་ར་ཨརྒྷཾ་སོགས་ཀྱིས་གཏོར་མའི་ལྷ་ཚོགས་ལ་མཆོད་ཅིང་། དཔལ་ལྡན་ཐུགས་ཀྱི་ལྷ་མོ་ནི། །དྲག་མོ་སེངྒེའི་གདོང་པ་ཅན། །ཡེ་ཤེས་མེ་ཡི་འོད་ཟེར་འཕྲོ། །སེང་གེའི་གདོང་ཅན་མཁའ་འགྲོར་བསྟོད། །ཅེས་པས་ཀྱང་བསྟོད་ཅིང་གཏོར་མ་དང་ཙཀ་ལི་ལ་དབང་བཞི་བླངས། ཡེ་ཤེས་པ་ནམ་མཁར་གཏེག །དམ་ཚིག་པ་རང་ལ་བསྡུ། །དེ་ནས་བཞེངས་གསོལ་གྱི་ཚིག་གིས་གནད་ནས་བསྐུལ་བའི་ཚེ། སླར་ཡང་གཏོར་ཆེན་བདུད་འདུལ་ཡེ་ཤེས་ཀྱི་མཁའ་འགྲོའི་ལྷ་ཚོགས་འཁོར་མཁའ་འགྲོ་བྱེ་བ་འབུམ་སྡེ། །སྣང་སྲིད་ཀྱི་ལྷ་སྲིན་སྡེ་བརྒྱད་ཀྱི་དམག་དཔུང་སྲ་བའི་གོ་གྱོན། རྣོ་བའི་མཚོན་ཐོགས་པ་འཇིག་རྟེན་གྱི་ཁམས་གང་བ་རྣམས་དཔའ་གཏུམ་རབ་ཏུ་འཁྲུག་པའི་ཞེ་སྡང་དྲག་པོས་དགྲ་བགེགས་ལོག་པར་འདྲེན་པའི་སྟེང་དུ་དྲག་པོའི་དམག་ལ་ཆས་པར་བསམ་ཞིང་། ཧཱུྃ་བྷྱོ་བདུད་སྡེ་དཔུང་བཅས་འདུལ་བའི་ལྷ། །མི་བསྲུན་དྲག་མོ་སེང་གདོང་མ། །གཙོ་དང་འཁོར་དུ་བཅས་པ་རྣམས། །བཞེངས་ཤིག་འབར་བའི་ཀློང་ནས་བཞེངས། །ལོག་འདྲེན་མཐའ་དག་འདུལ་བའི་ཕྱིར། །ཆོས་ཉིད་ཞི་བ་དྲག་པོར་བཞེངས། །ཉམས་པའི་སྲོག་དབུགས་འཕྲལ་བའི་ཕྱིར། །ཕྱག་མཚན་ཐམས་ཅད་མཚོན་ཆར་བཞེངས། །ཐ་མལ་སྣང་ཞེན་སྦྱང་བའི་ཕྱིར། །སྣང་སྲིད་ཐམས་ཅད་ཁྲོ་མོར་བཞེངས། །ངག་རླུང་གསུང་དུ་གནས་བསྒྱུར་ཕྱིར། །སྒྲ་གྲག་དྲག་པོའི་སྔགས་སུ་བཞེངས། །ཀུན་གཞི་བག་ཆགས་རྒྱུན་གཅོད་ཕྱིར། །དྲན་རྟོག་ཐམས་ཅད་ཆོས་སྐུར་བཞེངས། །མ་རིག་གཉིས་འཛིན་ལས་བྱུང་བའི། །དགྲ་འདྲེ་བྱུར་གསུམ་འདུལ་བའི་ཕྱིར། །རིགས་བདག་ཐོད་ཕྲེང་ཡབ་ཡུམ་བཞེངས། །དུག་ལྔའི་རང་མདངས་ཕྱིར་ཤར་བའི། །མི་དང་མི་མིན་འདུལ་བའི་ཕྱིར། །རིགས་ལྔའི་མཁའ་འགྲོ་འཁོར་བཅས་བཞེངས། །གནས་སྐབས་མཐར་ཐུག་ཀུན་གྱི་གེགས། །བདུད་བཞི་ཤུགས་ཀྱིས་སྒྲོལ་བའི་ཕྱིར། །རབ་འཇིགས་ཤུགས་འགྲོ་མ་བཞི་བཞེངས། །འཁྲུལ་པར་སྤྱོད་པའི་དགྲ་དང་བགེགས། །ཚད་མེད་རྣམ་བཞིས་འདུལ་བའི་ཕྱིར། །སྒོ་སྐྱོང་དྷཀྐི་སྡེ་བཞི་བཞེངས། །ཐབས་ཤེས་གཉིས་སུ་མེད་པ་ཡིས། །ཁམས་གསུམ་འཁོར་བ་དོང་སྤྲུག་ཕྱིར། །ཁྲོ་བོ་ཁྲོ་མོ་ཐམས་ཅད་བཞེངས། །ཞིང་བཅུ་མཐའ་དག་སྒྲོལ་བའི་ཕྱིར། །གནས་ཡུལ་དུར་ཁྲོད་ཚནྡྷོ་ཧའི། །དཔའ་བོ་དཔའ་མོ་ཐམས་ཅད་བཞེངས། །དམིགས་པའི་ཡུལ་དུ་གྱུར་པ་ཡི། །དགྲ་བགེགས་མ་ལུས་གཞོམ་པའི་ཕྱིར། །ཆོས་སྐྱོང་དམ་ཅན་ཐམས་ཅད་བཞེངས། །སྲིད་གསུམ་ལོག་འདྲེན་མ་ལུས་པ། །དྲག་པོའི་སྟོབས་ཀྱིས་འདུལ་བའི་ཕྱིར། །སྡེ་བརྒྱད་དྲེགས་པ་ཐམས་ཅད་བཞེངས། །ཧཱུྃ། བདུད་འདུལ་མཁའ་འགྲོ་ཁྲོས་པ་ཡིས། །དམག་ཚོགས་ལས་ལ་ཆས་པའི་ཚེ། །འཇིགས་པའི་དམག་ཚོགས་ཉེ་རེ་རེ། །སྣང་སྲིད་ཐམས་ཅད་ཕྱུར་བུར་འགེངས། །ཁྲོས་པའི་གད་རྒྱང་ཡ་ལ་ལ། །ཧཱུྃ། ཕཊ་ང་རོས་སྟོང་གསུམ་འགེངས། །རྣོ་མཚོན་སོ་བདར་ཡམས་སེ་ཡམ། །དངོས་མེད་མཁའ་ཡང་གཅོད་སྙམ་བྱེད། །གནམ་ལྕགས་ཐོག་སེར་ཉི་ལི་ལི། །མ་རུངས་འབྲུག་སྒྲས་ཁོར་ཡུག་འབེར། །འདབ་ཆགས་གཅན་གཟན་ཚུབས་སེ་ཚུབ། །མཆེ་སྡེར་བརྡར་ཞིང་དགྲ་ཤ་ཟ། །དགྲ་བསད་ཤ་ཁྲག་ཉི་ལི་ལི། །ཤ་རི་ཁྲག་མཚོས་ས་གཞི་ཁྱབ། །དྲེགས་བྱེད་ཕོ་མོ་དཔུངས་སེ་དཔུང་། །གདུག་རྩུབ་དྲག་པོས་དགྲ་ལ་བརྔམ། །ལྷ་སྲིན་སྡེ་བརྒྱད་ཤ་ར་ར། གསོད་གཅོད་གཏུབས་པའི་ལས་ལ་བྲེལ། །ལས་བྱེད་ཕོ་ཉ་ཁྱུགས་སེ་ཁྱུག །གློག་འགྱུ་ཙམ་གྱིས་སྟོང་གསུམ་བསྐོར། །ཧཱུྃ། བདུད་འཇོམས་ཁྲོ་མོའི་དམག་ཚོགས་རྣམས། །བྷྱོ་བྷྱོ་སྡང་བའི་དགྲ་ལ་བྷྱོ། །དགྲ་བོའི་མི་ནོར་ཕྱགས་མས་ཕྱོགས། །བྷྱོ་བྷྱོ་གནོད་པའི་བགེགས་ལ་བྷྱོ། །བགེགས་དཔུང་ཐལ་བའི་རླུང་ལ་ཕྱོར། །བྷྱོ་བྷྱོ་བར་ཆད་རྐྱེན་ལ་བྷྱོ། །འགལ་རྐྱེན་བར་ཆད་དབྱིངས་སུ་ཟློག །བྷྱོ་བྷྱོ་བྱད་མའི་སྟེང་དུ་བྷྱོ། །ཁ་ཕུང་རྗེས་མེད་དུས་མཐའ་བཏུལ། །གཟུགས་ཕུང་མཚན་མ་བཀོད་ནས་ནི། །མིང་བྱང་དམར་ལ་བཏབ་པ་ཡི། །ཡིད་ལ་བརྣག་པའི་དགྲ་བགེགས་ལ། །རྣོ་ངར་མཚོན་ཆའི་ཆར་པ་ཕོབ། །ངན་སྔགས་གདུག་པའི་དུག་མདའ་འཕོངས། །དལ་ཡམས་ནད་ཀྱི་རྐྱལ་པ་བྱོས། །བྱད་ཐག་ཚོན་གྱི་དྲུ་གུ་ཁྱོངས། །ནད་སྤྲིན་མ་མོའི་ཁ་རླངས་ཕོབ། །ལྷ་སྲིན་དྲེགས་པའི་དམག་སྒར་ཐོབ། །ཤ་ལ་ཁྲོ་བོས་རྔམ་ཟས་གྱིས། །ཁྲག་ལ་ཁྲོ་མོས་རྔུབ་འཐུང་མཛོད། །ཞག་རྐང་འབྱུང་པོས་ཚིམ་པར་མིད། །པགས་པ་མ་མོས་ལྷབ་ལྷུབ་གྱོན། །དགྲ་བགེགས་ལོག་འདྲེན་བདུད་སྡེའི་མིང་། །སྲིད་པ་གསུམ་ན་མི་གྲག་པའི། །མངོན་སྤྱོད་དྲག་པོའི་འཕྲིན་ལས་མཛོད། །ཅེས་བསྐུལ་ཞིང་བཟློག་བསད་ཟོར་གྱི་དྲག་སྔགས་ཀྱང་དྲག་ཏུ་བཟླས་ལ། གཏོར་མ་དགྲ་བགེགས་ཀྱི་ཤ་ཁྲག་རུས་པ་བྱིན་གྱིས་བརླབས་པ་དམག་ལྟོའི་ཚུལ་དུ་གཏོར་མར་ཕུལ། གཟའི་འགྱུ་ཕྱོགས་སམ་གནོད་པའི་དགྲ་ཕྱོགས་སུ་གཏད་ལ་གཏོར་མ་དཔག །ཆད་ཐོ་བསྒྲགས་ལ། །དྲག་བསྐུལ་དང་བཅས་ཏེ་ཟོར་རྡེག་གོམཐུ་སྟོབས་འབར་བའི་རྡོ་རྗེ་རྩེ་བརྒྱ་པས། །ལོག་འདྲེན་ས་འཛིན་བགྲོད་པ་རྒྱུན་གཅོད་པའི། །དྲག་མོའི་ཆོས་ཟབ་དབང་པོའི་མཚོན་རྣོན་པོ། །ལག་ཏུ་སོན་འདིའང་དམ་པའི་མགོན་དེའི་དྲིན། །ཞེས་པ་འདི་ཡང་བདུད་འདུལ་མཁའ་འགྲོའི་ཟབ་ཆོས་ཀྱི་ཆ་རྐྱེན་དུ་རིགས་སྔགས་འཆང་པ་རིག་འཛིན་མཐུ་སྟོབས་རྡོ་རྗེ་འམ། མིང་གཞན་ངག་དབང་ཚུལ་ཁྲིམས་སྙིང་པོ་སོགས་དུ་མའི་མིང་ཅན་གྱིས་བྱང་ནག་ཆུའི་ངོགས་སུ་སྦྱར་བ་མངྒ་ལཾ།། །།

བདུད་རྩི་མཆོད་པའི་ལྷན་ཐབས།

བདུད་འདུལ་མཁའ་འགྲོའི་བདུད་རྩི་མཆོད་པའི་ལྷན་ཐབས་བཞུགས། །མཚན་དོན་སྦྱར་ཏེ་སྨན་མཆོད་འབུལ་འདོད་ན། ཨཱོཾ་ཨཱཿཧཱུྃ། ཀུན་ཏུ་བཟང་མོ་རྡོ་རྗེ་ཕག་མོ་དང་། །སེང་གེའི་གདོང་ཅན་སྐུ་གསུམ་མཁའ་འགྲོ་ལ། །བདུད་རྩི་སྨན་མཆོད་འབུལ་གྱིས་བཞེས་ནས་ཀྱང་། །མཆོག་དང་ཐུན་མོང་དངོས་གྲུབ་སྩལ་དུ་གསོལ། །མ་ཧཱ་པཉྩ་ཨ་མྲྀ་ཏ་ཁ་རཾ་ཁཱ་ཧི། །སེང་གེ་སྒྲ་སྒྲོགས་མཚོ་རྒྱལ་ཀླུའི་དབང་པོ། །ཉི་གྲགས་ཐུགས་སྲས་རྩ་བརྒྱུད་བླ་མ་ལ། །བདུད་རྩི་སྨན་མཆོད་འབུལ་གྱིས་བཞེས་ནས་ཀྱང་། །མཆོག་དང་ཐུན་མོང་དངོས་གྲུབ་སྩལ་དུ་གསོལ། །མ་ཧཱ་པཉྩ་ཨ་མྲྀ་ཏ་ཁ་རཾ་ཁཱ་ཧི། མཁའ་འགྲོའི་གཙོ་མོ་བདུད་སྡེ་འདུལ་བའི་ལྷ། །རིགས་ཀྱི་བདག་པོ་རྡོ་རྗེ་དྲག་རྩལ་ལ། །བདུད་རྩི་སྨན༴ མཆོག་དང་༴ མ་ཧཱ་པཉྩ་ཨ༴ རིགས་བཞི་མཁའ་འགྲོ་ལས་བྱེད་ཡེ་ཤེས་དང་། །འཇིག་རྟེན་འབུམ་ཕྲག་མཁའ་འགྲོ་རྒྱ་མཚོ་ལ། །བདུད་རྩི་སྨན༴ མཆོག་དང་༴ མ་ཧཱ་པཉྩ་ཨ༴ ཟབ་གཏེར་བསྲུང་མཛད་རྡོ་རྗེ་འབར་བ་དང་། །ཏེ་སེའི་ཞིང་སྐྱོང་ལྷ་བཙན་སྤྲུལ་འཁོར་ལ། །བདུད་རྩི་སྨན་མཆོད༴ མཆོག་དང་ཐུན་མོང་༴ མ་ཧཱ་པཉྩ་ཨ༴ གཞན་ཡང་གནས་ཡུལ་དུར་ཁྲོད་ལ་གནས་པའི། །མཁའ་འགྲོ་ཆོས་སྐྱོང་དམ་ཅན་སྲུང་མ་ལ། །བདུད་རྩི་སྨན་མཆོད་འབུལ་གྱིས་བཞེས་ནས་ཀྱང་། །མཆོག་དང་ཐུན་མོང་དངོས་གྲུབ་སྩལ་དུ་གསོལ། །མ་ཧཱ་པཉྩ་ཨ་མྲྀ་ཏ་ཁ་རཾ་ཁཱ་ཧི། །ཅེས་པ་འདི་ནི་རང་ལ་དགོས་ཆེད་དང་། །གཞན་མོས་དེར་མཐུན་བྱ་ཕྱིར་བྱ་བྲལ་བས། །ལྷ་འདིའི་བསྙེན་སྒྲུབ་སྐབས་ཀྱི་ཚེས་བཅུའི་ཉིན། །མ་སྲིང་མཁའ་འགྲོ་འདུ་བའི་རྫོང་དུ་བྲིས། །པདྨའི་མིང་གིས་སོ། །

བདུད་འདུལ་སེང་གདོང་མཁའ་འགྲོའི་དབང་ཆོག་ཁྲིགས་སུ་བཀོད་པ་བྱིན་རླབས་མྱུར་འཇུག

བདུད་འདུལ་སེང་གདོང་མཁའ་འགྲོའི་དབང་ཆོག་ཁྲིགས་སུ་བཀོད་པ་བྱིན་རླབས་མྱུར་འཇུག་ཅེས་བྱ་བ་བཞུགས་སོ། །སྟོང་ཉིད་དབྱིངས་ལས་རབ་འབར་སྙིང་རྗེའི་རྩལ། །མི་བསྲུན་དྲག་མོར་ཁྲོས་པའི་རྣམ་འགྱུར་ནི། །འཇིགས་རུང་གར་གྱི་ཉམས་བརྒྱར་འཆར་བའི་མ། །བདུད་འདུལ་དབངམོར་འདུད་དོ་ཤིས་པ་སྩོལ། །མཚན་ཙམ་ཐོས་པས་ལོག་འདྲེན་བདུད་དགྲའི་སྙིང་། །ལྐོག་མར་འབྱིན་ནུས་ཆེས་ཟབ་དྲག་མོའི་ཆོས། །ཟབ་ཁྱད་རྣོ་མཚོན་ལག་ཏུ་ལེན་འདོད་འགྲོར། །སྨིན་བྱེད་དབང་ཆོག་བྱིན་རླབས་མྱུར་འཇུག་བྱ། །འདིར་བདུད་འདུལ་ཡེ་ཤེས་ཀྱི་མཁའ་འགྲོའི་སྨིན་བྱེད་དབང་གི་རིམ་པ་འཇུག་བདེར་ཁྲིགས་སུ་སྡེབས་པའི་རིམ་པ་ནི། ༁ྃཿ བཀའ་རྫོགས་པ་ཆེན་པོ་བླ་མ་བདེ་མཆོག་འཁོར་ལས༔ བདུད་འདུལ་སེང་གདོང་མའི་དབང་ཆོག་གི་རིམ་པ་བཞུགས༔ དཔལ་ཆེན་པོ་མཁའ་འགྲོའི་དབང་ཕྱུག་ལ་ཕྱག་འཚལ་ལོ༔ ཡིད་དང་མཐུན་པའི་གནས་སུ་དབང་གི་དགོས་རྫས་བསགས་ཤིང་ལས་ཀྱི་གཞུང་བསྲང་༔ བསྙེན་པ་ཁ་གསོཿ བསྐྱེད་རྫོགས་གསལ་གདབ༔ སློབ་བུ་གྲལ་ལ་འཁོད༔ ཁྲུས་བྱ༔ བགེགས་བསྐྲད༔ བསྲུང་འཁོར་བསྒོམ་ཞིང་ཡེ་ཤེས་དབབ༔ གོ་མཚོན་རིན་ཆེན་མཎྜལ་ཕུལ༔ སློབ་དཔོན་ལྷར་གསལ་གསོལ་བ་འདེབས༔ ཞེས་གསུངས་པ་དེ་ཡང་། ཐོག་མར་དབང་རྫས་བཤམས་བཀོད་ནི། གང་དུ་བྱ་བའི་གནས་ཁང་དུ་སྟེགས་བུའི་ཁར་རས་བྲིས་སམ་ཡང་ན་འབྲུ་ཚོམ་ལྷ་གྲངས་དང་མཉམ་པར་བཀོད་ལ་དབུས་སུ་མཉྫིའི་ཁར་ཉེར་ལྔའི་བཅུད་ལྡན་བུམ་པ་ཁ་རྒྱན་གཟུངས་ཐག་མགུལ་ཆིངས་མཐིང་། གཡས་སུ་བྷནྡྷ་བདུད་རྩི་སྨན་དང་མ་ད་ན་སྦྱར། དེའི་སྟེང་མེ་ལོང་སིནྡྷུ་ར་ཆོས་འབྱུང་ལྟེ་བར་ཧཱུྃ་ལ་བསྙེན་སྒྲུབ་སྔགས་ཧཱུྃ་བཛྲ་དྷཀྐི་ནི་སེངྷ་མུ་ཥ་ཧ་རི་ནི་ས་སརྦ་ས་མ་ཡཱ་ཙིཏྟ་ཧྲིང་ཛཿསིདྡྷི་ཧཱུྃཿབྲིས་པ་བཞག་གམ་ཡང་ན་མདུན་ནམ་གཡོན་ཕྱོགས་སུ་ནི་མཛེས་པར་བཀྲམ། གྲི་གུག་ཁ་ཊྭཱྃ་རྐང་གླིང་ཐོད་རྔ་བྷནྡྷ་ལྕང་ལོ་ཅན་རྣམས་མཐིང་ནག་གི་དར་གྱི་འཕྱང་འཕྲུལ་ལེགས་བརྒྱན་གང་བདེར་བཞག་ཅིང་དཔལ་གཏོར་མདུན་དུ་འགོད། གཞན་ཡང་ལས་བུམ་ཐུན་སྣོད། ཌཱ་དྲིལ་ནས་བཟེད་སྤོས་བཟེད། བགེགས་གཏོར་མཎྜལ་སོགས་དགོས་ཆ་རྣམས་ཚོགས་པར་བྱས་ལ། དེ་ནས་དངོས་གཞི་ནི། ཐོག་མར་དཀྱིལ་འཁོར་སྒྲུབ་མཆོད་སྤྱི་ལྟར་གྲུབ་ནས། ལས་བུམ་བསངས་སྦྱངས། །སྟོང་པའི་ངང་ལས་པད་ཉིའི་སྟེང་དུ་ཧཱུྃ་ལས་བདུད་རྩི་འཁྱིལ་བ་ལྗང་སྔོན་ཕྱག་གཉིས་གཡས་རྡོ་རྗེའི་དབྱུག་པ་དང་གཡོན་སྡིག་འཛུབ་མཛད་པ་ཁྲོ་བོའི་ཆ་ལུགས་རྫོགས་པའི་གནས་གསུམ་ཨཱོཾ་ཨཱཿཧཱུྃ་གིས་མཚན་པ་ལས་འོད་འཕྲོས་པས་ཡེ་ཤེས་པ་སྤྱན་དྲངས་དམ་ཡེ་དབྱེར་མེད་དུ་གྱུར་པའི་ཐུགས་ཀར་ཧཱུྃ་ལ་སྔགས་ཀྱི་བསྐོར་བར་དམིགས་ནས། །ཨཱོཾ་བིགྣན་ཏ་ཀྲི་ཏ་ཧཱུྃ་ཕཊཿ ཅེས་བཟླས་པ་བརྒྱ་རྩ་ལ་སོགས་པའི་མཐར་བདུད་རྩིར་ཞུ་བར་བསམ་ལ། སློབ་མ་ཁྲུས་བྱ། བགེགས་བསྐྲད་སོང་ནས་འདིའི་དབང་བཤད་ནས་བཟུང་སྤྱན་འདྲེན་གྱི་བར་མཆོག་སྤྲུལ་རིན་པོ་ཆེའི་གསུང་ཆོས་ཡིན། ནམ་མཁའ་དང་མཉམ་པའི་སེམས་ཅན་ཐམས་ཅད་སངས་རྒྱས་ཀྱི་གོ་འཕང་ལ་འགོད་པར་བྱ། །དེའི་ཆེད་དུ་ཡེ་ཤེས་ཀྱི་མཁའ་འགྲོ་མ་བདུད་འདུལ་སེང་གདོང་མའི་དབང་བསྐུར་ཟབ་མོ་ཞུ་བར་བགྱིད་སྙམ་པའི་སེམས་བསྐྱེད་ནས་ལེགས་པར་གསན་འཚལ། དེ་ཡང་གཟུང་འཛིན་བག་ཆགས་དང་བཅས་པ་ལ་ཞེན་པའི་ཟག་བཅས་འཁོར་བ་དང་། དེ་དག་ལས་རྣམ་པར་གྲོལ་བ་ཟག་མེད་མྱ་ངན་ལས་འདས་པའི་ཆོས་ཐམས་ཅད་རང་བཞིན་གྱིས་རྣམ་པར་དག་པའི་དབྱིངས་ཀྱི་ཕྱག་རྒྱ་ཆོས་སྐུ་ཀུན་ཏུ་བཟང་མོ་ཉིད་ཀྱི་རང་གདངས་ལས། ལོངས་སྐུ་རྡོ་རྗེ་ཕག་མོ་ཡེ་ཤེས་ལྔ་ལྡན་རང་རྩལ་མ་འགགས་པའི་རྣམ་པར་འཕྲུལ་པས་དུས་བཞི་ཕྱོགས་བཅུ་ཀུན་ཏུ་བསམ་གྱིས་མི་ཁྱབ་པར་བཞུགས་ཤིང་གདུལ་བྱ་འགྲོ་བ་རྣམས་ལ་འདུལ་བྱེད་སོ་སོའི་བློ་དང་མཚམས་པས་འདུལ་ཐབས་དེ་དང་དེས་འདུལ་བར་མཛད། །ཁྱད་པར་དུ་སངས་རྒྱས་ཀྱི་བསྟན་པ་ལ་ཕྱིན་ཅི་ལོག་ཏུ་ལྟ་བ་མུ་སྟེགས་ཞེས་རྟག་ཆད་ཀྱི་མཐར་འཛིན་པ་ལྟ་ལོག་སུམ་བརྒྱ་དྲུག་ཅུ་ལ་ཞེན་པ་དང་། བདུད་དང་བདུད་ཀྱི་རིས་དང་ཕྱི་ནང་བར་བ་ནས་རིགས་སྔགས་དང་ངན་སྔགས་ཀྱི་སྦྱོར་བ་བྱད་གཏད་རྦོད་གཏོང་གི་འཚེ་བས་བསྟན་འགྲོ་དང་བྱང་ཆུབ་སྒྲུབ་པ་ལ་བར་དུ་གཅོད་པའི་ཚོགས་ཐམས་ཅད་ཅིག་ཅར་འཇོམས་ཤིང་ནུས་པ་མེད་པར་བྱེད་པ། བདུད་འདུལ་ཡེ་ཤེས་ཀྱི་མཁའ་འགྲོ་མ་སེངྒེའི་གདོང་ཅན་གྱི་སྐུར་བཞེངས་ནས་ཕས་རྒོལ་གཞན་སྡེའི་ཚོགས་རྣམས་འདུལ་བའི་བྱེད་ལས་དང་ལྡན་པ་སྟེ། འདི་ཉིད་ཀྱི་གཞུང་ལས། ཨེ་མ་གསང་བའི་སྙིང་པོ་འདི༔ འཕགས་ཡུལ་རྡོ་རྗེ་གདན་དྲུང་དུ༔ མུ་སྟེགས་སྟོན་པའི་རྩོད་པ་བྱུང་༔ ལུང་རིགས་ནུས་མཐུའི་རྩལ་འགྲན་ཚེ༔ མཁའ་འགྲོ་རྡོ་རྗེ་ཕག་མོ་ཡིས༔ སེངྒེའི་གདོང་ཅན་ཐུགས་བརྒྱུད་ནས༔ བདག་ཉིད་རྡོ་རྗེ་དྲག་རྩལ་ལ༔ དབང་བསྐུར་ལུང་བསྟན་བཀའ་གཏད་མཛད༔ བཟློག་པས་མི་བཟློག་མཁན་གྱི་གཤེད༔ མཁའ་འགྲོའི་དྲག་སྔགས་རྡོ་སྒྱོགས་འདིས༔ མུ་སྟེགས་ངན་པའི་རྒོལ་བ་བཟློག༔ ཅེས་དང་བདག་སྔོན་རྒྱ་གར་འཕགས་པའི་ཡུལ་གནས་ཚེ༔ མུ་སྟེགས་སྟོན་པ་ལངྐའི་བདག་པོ་ཡིས༔ སངས་རྒྱས་བསྟན་པ་འཇིག་ལ་ཉེ་བའི་དུས༔ ཐུབ་པའི་བཞུགས་གནས་རྡོ་རྗེ་གདན་གྱི་ལྷོ༔ ཕ་ཝང་རུས་སྦལ་འདྲ་བའི་གསང་མཛོད་ནས༔ མཁའ་འགྲོས་ལུང་བསྟན་བདག་ཉིད་པདྨས་ཕྱུངས༔ མུ་སྟེགས་སྟོན་པ་ལྔ་བརྒྱའི་རྩོད་པ་བཟློག༔ ངན་སྔགས་བདག་པོ་མུ་སྟེགས་ཐོག་གིས་བསྒྲལཿ སངས་རྒྱས་བསྟན་པའི་བ་དན་ཕྱོགས་བཅུར་བསྒྲེངས༔ ཞེས་རྒྱ་གར་འཕགས་པའི་ཡུལ་དུ་སློབ་དཔོན་ཆེན་པོ་པདྨ་འབྱུང་གནས་ཀྱིས་གདམས་པ་ཟབ་མོ་འདི་ཉིད་ལ་བརྟེན་ནས་སངས་རྒྱས་ཀྱི་བསྟན་པ་རྒྱས་པར་མཛད་ཅིང་། བོད་ཡུལ་འདིར་སློབ་དཔོན་ཆེན་པོ་ཕེབས་ཏེ་དམ་པའི་ཆོས་ཀྱི་བསྟན་པ་ཉི་འོད་བརྡལ་བར་མཛད་པའི་དུས་སུ་མ་འོངས་སྙིགས་མའི་རྩོད་ལྡན་གྱི་མཐར་བསྟན་འགྲོའི་དོན་དུ་དགོངས་ཏེ་གཏེར་དུ་སྦ་བར་མཛད་པ་ནི། ཨེ་མ་གསང་བའི་སྙིང་པོ་ཟབ་པའི་མཐར་ཐུག་འདི༔ པདྨ་བདག་གིས་སྙིང་གི་བརྣག་པ་སྟེ༔ བོད་འདིར་ཟབ་གཏེར་ཇི་སྙེད་སྦས་ནའང་༔ གཏེར་ཁ་འདི་མིན་གཏེར་ཁ་གཞན་དག་ཏུ༔ བདུད་འདུལ་མཁའ་འགྲོའི་བསྙེན་བསྒྲུབ་བསྟན་པ་མེད༔ ཅེས་དང་དེ་ཕྱིར་ཟབ་པའི་མཐར་ཐུག་གདམས་པ་འདི༔ སྨོན་ལམ་སྟོབས་ཀྱིས་ང་སྤྲུལ་བུས་རྙེད་ཅིང་༔ སངས་རྒྱས་བསྟན་པའི་བཙས་སུ་འདི་གྱུར་ཅིག༔ ཅེས་གཏེར་ནས་གཏེར་དུ་སྩལ་བའི་འདི་ཉིད་དགོས་ཆེད་དུ་མ་དང་ལས་འཕྲོ་ཅན་ལ་སྨོན་ལམ་བཀའ་གཏད་ལུང་བསྟན་དང་བཅས་ཏེ། བླ་མ་བདེ་མཆོག་དབང་གི་འཁོར་ལོའི་ཆོས་སྐོར་གྱི་ཆ་ལག་ཏུ་འཛམ་གླིང་ས་ཡི་ལྟེ་བ་གངས་རིའི་རྒྱལ་པོ་ཏེ་སེ་བདེ་ཆེན་གསང་བ་ཕུག་ཏུ་གཏེར་དུ་སྦས་པ་ལུང་བསྟན་དུས་ལ་བབས་པའི་ཚེ། རིག་འཛིན་ཆེན་པོ་ཉི་མ་གྲགས་པས་གཏེར་ནས་སྤྱན་དྲངས་ཤིང་སྐལ་ལྡན་ལ་རིམ་པར་སྤེལ་བར་མཛད་པ་བྱིན་རླབས་ནུས་མཐུ་ཤིན་ཏུ་ཆེ་བ་འདི་ཉིད་ཀྱི་དབང་བསྐུར་བ་ཟབ་མོ་བགྱི་བ་ལ། དང་པོ་སློབ་དཔོན་གྱི་བྱ་བའི་འོས་རྣམས་སྔོན་དུ་གྲུབ། ད་སློབ་མའི་བྱ་བ་མཎྜལ་ཕུལ་མཛོད། ཅེས་བརྡ་སྤྲད་ནས། མཎྜལ་ཕུལ་ནས་དབང་བསྐུར་ཞུ་བའི་དོན་དུ་གསོལ་བ་གདབ་པ་འདིའི་རྗེས་ཟློས་མཛོད། ཧཱུྃ༔ དཔའ་བོ་ཆེན་པོ་མཁའ་འགྲོའི་གཙོ༔ བདག་ཅག་བུ་ལ་དགོངས་སུ་གསོལ༔ དུར་ཁྲོད་མཁའ་འགྲོ་ཡེ་ཤེས་གཙོ༔ བདུད་འདུལ་ནག་མོའི་དབང་བསྐུར་སྩོལ༔ ལན་གསུམ། དེ་ལྟར་གསོལ་བ་གདབ་པའི་རིམ་པ་སོང་ནས་དམིགས་པ་འདི་བཞིན་དུ་གྱིས། ས་ཕྱོགས་འདི་ཉིད་ཀྱང་ཐ་མལ་གྱི་སྣང་བ་འདི་ལྟ་བུ་མ་ཡིན་པའི་དྭངས་གསལ་གཉིས་སུ་མེད་པའི་ཡེ་ཤེས་རང་སྣང་ལས་གྲུབ་པའི་ཞིང་ཁམས་ཀྱི་དབུས་སུ། དཀྱིལ་འཁོར་གཙོ་བོ་དཔལ་ལྡན་བླ་མ་དང་བདུད་འདུལ་སེང་གདོང་མ་དབྱེར་མ་མཆིས་པ་ལ་ཕྱོགས་དུས་ཀྱི་རྒྱལ་བ་སྲས་བཅས་སྐྱབས་ཡུལ་ཐམས་ཅད་ཀྱིས་བསྐོར་བ་མངོན་སུམ་ལྟ་བུར་བཞུགས་པ་གསལ་བཏབ་ནས། དེ་དག་གི་སྤྱན་སྔར་རང་གཞན་སེམས་ཅན་ཐམས་ཅད་བྱང་ཆུབ་ཀྱི་བར་དུ་སྐྱབས་སུ་མཆིའོ་སྙམ་པས་སྐྱབས་སུ་འགྲོ་བ་དང་ཐེག་ཆེན་རྩ་བ་གཞན་ཕན་བྱང་ཆུབ་ཀྱི་མཆོག་ཏུ་སེམས་བསྐྱེད་པ་འདིའི་རྗེས་ཟློས་གྱིས། ཧཱུྃ༔ བདག་ནི་དེང་ནས་བྱང་ཆུབ་བར༔ བླ་མ་དཀོན་མཆོག་དཀྱིལ་འཁོར་ལྷ༔ ཡེ་ཤེས་མཁའ་འགྲོའི་ལྷ་ཚོགས་ལ༔ རྣམ་པ་ཀུན་ཏུ་སྐྱབས་སུ་མཆི༔ དབང་དྲག་ལས་ཀྱི་བྱང་ཆུབ་སེམས༔ དམ་པ་མཆོག་ནི་བསྐྱེད་པར་བགྱིད༔ ལན་གསུམ། དེ་ལྟར་དབང་གི་སྔོན་འགྲོ་དབང་དོན་གསོལ་འདེབས་སྐྱབས་སེམས་རྣམས་ལེགས་པར་སོང་ནས་དངོས་གཞི་དབང་གི་གཞི་འགོད་པའི་སླད་དུ་ཡེ་ཤེས་དབབ་པའི་དམིགས་པ་འདི་བཞིན་མཛོད། །ཨཱོཾ་མ་ཧཱ་ཤུ་ནྱ་སོགས་ལས་བུམ་ཁ་རྒྱན་གྱིས་ཆུ་འཐོར། །སྟོང་པའི་ངང་ལས་ཆོས་འབྱུང་དམར་ནག་གི་དབུས་སུ་དྲེགས་པ་ཕོ་མོ་པདྨ་ཉི་ཟླའི་གདན་གྱི་སྟེང་དུ་ཁྱད་པར་རང་གི་སེམས་ཉིད་གནམ་ལྕགས་ཞུན་མའི་གྲི་གུག་འཁོར་ལོས་མཚན་པའི་ལྟེ་བར་ཧཱུྃ་ཡིག་མཐིང་ནག་གཟི་བརྗིད་དང་ལྡན་པ་ལས་འོད་ཟེར་འཕྲོས་འཕགས་པ་མཆོད། སེམས་ཅན་གྱི་དོན་བྱས་དུས་གསུམ་གྱི་སངས་རྒྱས་ཁྲོ་བོ་ཁྲོ་མོ་མཁའ་འགྲོ་ཐམས་ཅད་ཀྱི་གཟི་བརྗིད་ནུས་སྟོབས་ཡོན་ཏན་ཐམས་ཅད་ཚུར་བསྡུས་ཧཱུྃ་ཡིག་ལ་ཐིམ། །གཟི་བརྗིད་ཆེས་ཆེར་འབར་ཞིང་ཡོངས་སུ་གནས་གྱུར་པ་ལས་བདུད་འདུལ་མཁའ་འགྲོ་སེངྒེའི་གདོང་པ་ཅན་ཞལ་གཅིག་ཕྱག་གཉིས་སྐུ་མདོག་མཐིང་ནག་འབར་བ། ཞལ་གདངས་ཤིང་ལྗགས་འདྲིལ་བ་མཆེ་བ་རབ་ཏུ་གཙིགས་ཤིང་རལ་བ་ཁམ་ནག་སྤྲིན་ལྟར་གཏིབས་པ་སྤྱན་གསུམ་སྡང་མིག་ཏུ་བལྟ་བ། སྨ་ར་དང་སྨིན་མ་མེ་ལྟར་ཚ་ཚ་འཕྲོ་བ། ཕྱག་གཡས་འཁོར་ལོས་མཚན་པའི་གྲི་གུག་ནམ་མཁའ་ལ་འཕྱར་བ། གཡོན་ལྕང་ལོས་མཚན་པའི་ཐོད་ཁྲག་ཐུག་ཀར་བསྣམས་པ། ཞབས་གཡས་བསྐུམ་པའི་རྟིང་པ་བྷ་ག་ལ་གཏད་ཅིང་གཡོན་བརྐྱང་བ། གྲུ་མོ་གཡོན་དུ་ཡབ་ཧེ་རུ་ཀཿསྦས་པའི་ངོ་བོ་རྡོ་རྗེ་ཁ་ཊྭཱྃ་ཀ་ལ་བདེ་བས་འཁྱུད་པ། བཅུ་དྲུག་ལང་ཚོ་རབ་ཏུ་རྒྱས་པའི་ཉམས་བག་ཅན་ནུ་མ་འབུར་ཞིང་བྷ་ག་རབ་ཏུ་རྒྱས་པ་དཔའ་སྒེག་ཁྲོ་གཏུམ་གྱི་ཉམས་དང་ལྡན་པ། རྣོ་དབལ་དང་ལྡན་པའི་གནམ་ལྕགས་སྤུ་གྲིའི་གཤོག་པ་ཅན། སྐུ་ལ་དུར་ཁྲོད་ཀྱི་ཆས་དང་དཔལ་གྱི་ཆས་བཅུ་འབར་བས་བརྒྱན་ཅིང་མེ་དཔུང་དམར་ནག་འབར་བའི་ཀློང་དཀྱིལ་དུ་བཞུགས་པར་གསལ་བའི་སྤྱི་བོར་ཨཱོཾ་དཀར་པོ། མགྲིན་པར་ཨཱཿདམར་པོ། ཐུགས་ཀར་ཧཱུྃ་མཐིང་ནག་གིས་མཚན་པ་ལས་འོད་ཟེར་འཕྲོས་པས་འོག་མིན་དང་མཁའ་སྤྱོད་དུར་ཁྲོད། གནས་ཡུལ་ཁྱད་པར་ཨོ་རྒྱན་མཁའ་འགྲོའི་གླིང་ནས་བདུད་འདུལ་མཁའ་འགྲོའི་ལྷ་ཚོགས་ཐམས་ཅད་ཁ་ཆར་བུ་ཡུག་འཚུབ་པ་ལྟར་བྱོན་ནས་ཁྱེད་རང་གི་ལུས་ལ་སིབ་སིབ་ཐིམ་པའི་དམིགས་པ་དྲག་ཏུ་གསལ་གདབ་པར་མཛོད། ཅེས་བརྗོད་ནས་སྤྱན་འདྲེན་བརྟན་པར་བྱ། དེ་རྗེས་བུམ་པ་ཐོད་པ་མེ་ལོང་སིདྷྭཱུ་ར་ཕྱག་མཚན་དཔལ་གཏོར་རྣམས་ཀྱི་དབང་བསྐུར། ཅེས་པ་འདི་མདོ་ཁམས་སྨད་ཕྱོགས་རྒྱ་ཕག་བླ་མ་རིན་ཆེན་དཔལ་བཟང་གིས་བསྐུལ་ངོར་པདྨའི་མིང་ཅན་གྱིས་བྲིས་པའོ། །སྤྱན་འདྲེན་པ་ནི༔ ཧཱུྃ༔ ཆོས་དབྱིངས་མཁའ་འགྲོའི་ཕོ་བྲང་དང་༔ ནུབ་ཕྱོགས་ཨོ་རྒྱན་དུར་ཁྲོད་ནས༔ མ་མོ་མཁའ་འགྲོ་ཀུན་གྱི་གཙོ༔ བདུད་འདུལ་མཁའ་འགྲོ་སེང་གདོང་མ༔ ཡེ་ཤེས་མཁའ་འགྲོ་འཁོར་དང་བཅས༔ རིགས་བཞིའི་མཁའ་འགྲོ་དཔུང་དང་བཅས༔ ལས་བྱེད་མཁའ་འགྲོ་འབུམ་གྱིས་བསྐོར༔ སེདྷ་མུ་ཥ་འཁོར་བཅས་རྣམས༔ གདུང་བའི་ཡིད་ཀྱིས་སྤྱན་འདྲེན་ན༔ ཐུགས་རྗེའི་ཤུགས་ཀྱིས་གཤེགས་སུ་གསོལ༔ དབང་ཆེན་འབར་བའི་དུར་ཁྲོད་ནས༔ རིགས་ཀྱི་བདག་པོ་གཤེགས༴ ནུབ་ཕྱོགས་ཨོ་རྒྱན་ཕོ་བྲང་༴ རྡོ་རྗེ་ཕག་མོ་གཤེགས༴ ཤར་གྱི་ཕྱོགས་ཀྱི་དུར་ཁྲོད༴ རྡོ་རྗེ་མཁའ་འགྲོ་གཤེགས༴ ལྷོ་ཡི་ཕྱོགས་ཀྱི་དུར༴ རིན་ཆེན་མཁའ་འགྲོ༴ ནུབ་ཀྱི་ཕྱོགས་ཀྱི་དུར༴ པདྨ་མཁའ༴ བྱང་གི་ཕྱོགས་ཀྱི་དུར༴ ལས་ཀྱི་མཁའ་འགྲོ་གཤེགས༴ ཧཱུྃ༔ གཞན་ཡང་གནས་ཡུལ་དུར་ཁྲོད་ནས༔ སྐུ་སྤྲུལ་དཀར་མོ་ཉི་ཁྲི་འབུམ༔ ཐུགས་སྤྲུལ་ནག་མོ༴ གསུང་སྤྲུལ་དམར་མོ༴ ཡོན་ཏན་སྤྲུལ་པ་སེར་མོ༴ ཕྲིན་ལས་སྤྲུལ་པ་ལྗང་མོ༴ གནས་ཡུལ་དུར་ཁྲོད་དཔའ་བོ་དཔའ་མོ་འབུམ༔ རྩ་གསུམ་ཆོས་སྐྱོང་སྲུང་མ་སྒོ་མའི་ཚོགས༔ མ་ལུས་འཁོར་བཅས་གནས་འདིར་གཤེགས༴ བསྐལ་བའི་མེ་དཔུང་དམར་ནག་ལྷབས་སེ་ལྷབ༔ རཀྟ་ཁྲག་གི་རྒྱ་མཚོ་མེ་རེ་རེ༔ མཾ་ས་ཤ་ཆེན་དྲི་ངད་སངས་སེ་སང་༔ ཁྲོ་ཆུང་མེ་དཔུང་ཚ་ཚ་ཐོ་རོ་རོ༔ རྐང་གླིང་ཐོད་པའི་རྔ་སྒྲ་དི་རི་རི༔ ཧཱུྃ་ཕཊཿབྷྱོ་བཟློག་སྒྲ་སྐད་ཆེམས་སེ་ཆེམ༔ བར་ཆད་བཟློག་ཕྱིར་གཤེགས༴ བྱད་ཁ་བཟློག༴ ཕུར་ཁ༴ གཏད་ཁ༴ ཁྲམ་ཁ༴ ཡམ་ཁ༴ ནད་ཁ༴ རྦད་འདྲེ༴ རྦོད་གཏོང་༴ ཆགས་ཆེ༴ ཉམས་ང་༴ ཧཱུྃ་བཛྲ་དྷཀྐི་ནི་སེངྷ་མུ་ཥ་ཧ་རི་ནི་ས་སརྦ་ས་མ་ཡ་ཛཿཛཿ ཞེས་རྩ་སྔགས་མཐར་ཨ་བེ་ཤ་ཡ་ཨ་ཨཱཿ དེ་ནས་མེ་ཏོག་འཐོར་རྡོ་རྗེ་སྤྱི་བོར་བཞག་ལ། སྤྱན་དྲངས་པའི་ཡེ་ཤེས་པ་རྣམས་བརྟན་པར་བཞུགས་སུ་གསོལ། ཨཱོཾ་སུ་པྲ་ཏིཥྛ་བཛྲ་ཡེ་སྭཱ་ཧཱཿ ཅེས་པས་བརྟན་པར་བྱ། དབང་བསྐུར་བ་ནི་གཞུང་ལས། དེ་ནས་བུམ་པ་ལྷ་ཡི་སྐུ༔ སློབ་བུའི་སྤྱི་བོར་བཞག་ནས་ཀྱང་༔ ཧཱུྃ༔ ཞིང་ཁམས་སྐུ་དང་འདུ་འབྲལ་མེད༔ སྐུ་གསུམ་ལྷུན་གྲུབ་མཁའ་འགྲོའི་དབང་༔ སྐལ་ལྡན་བུ་ལ་འདི་སྦྱིན་པས༔ སྨིན་གྲོལ་སྐུ་ཡི་དབང་ཐོབ་ཤོག༔ ཨཱོཾ་བཛྲ་དྷཀྐི་ནི་སེངྷ་མུ་ཥ་ཧ་རི་ནི་ས་ཀཱ་ཡ་ཨ་བྷི་ཥིཉྩ་ཧཱུྃ༔ ཅེས་བརྗོད་བུམ་ཆུ་སློབ་མར་སྦྱིན༔ ཐོད་པ་བདུད་རྩི་མགྲིན་པར་བཞག་ཅིང་༔ ཧཱུྃ༔ དུམ་གཅིག་བྷནྡྷ་རང་བྱུང་བདུད་རྩིས་བཀང་༔ རྩ་ཁམས་རང་གྲོལ་དཔའ་བོ་མཁའ་འགྲོའི་གསུང་༔ ལོངས་སྤྱོད་རྫོགས་སྐུ་འགག་མེད་དབང་བསྐུར་བས༔ འབུམ་ཕྲག་མཁའ་འགྲོའི་གསུང་གི་དབང་༴ ཧཱུྃ་བཛྲ་དྷཀྐི་ནི་སེངྷ་མུ་ཥ་ཧ་རི་ནི་ས་ཝཱཀྐ་ཨ་བྷི་ཥིཉྩ་ཧཱུྃ༔ ཅེས་བརྗོད་བདུད་རྩི་ངག་ཏུ་བླུད༔ མེ་ལོང་སིནྡྷུ་རས་རླན་པ་ལ༔ ཆོས་འབྱུང་ལྟེ་བར་ཧཱུྃ་མཐར་སྙིང་པོ་བྲིས་པ་སློབ་མའི་སྙིང་གར་བཞག་ཅིང་༔ ཧཱུྃ་མེ་ལོང་ཆོས་འབྱུང་གསང་བའི་རྫས་དང་ལྡན༔ ཤེས་རབ་ཡེ་ཤེས་འབུམ་ཕྲག་མཁའ་འགྲོའི་ཐུགས༔ དད་ལྡན་སློབ་བུ་ཁྱོད་ལ་འདི་སྦྱིན་པས༔ ཡིད་སྒྲིབ་དག་ནས་ཐུགས་ཀྱི་དབང་༴ ཧཱུྃ་བཛྲ་དྷཀྐི༴ ཧ་རི་ནི་ས་ཙིཏྟ་ཨ་བྷི་ཥིཉྩ་ཧཱུྃཿ ཅེས་བརྗོད་སྙིང་གར་སིནྡྷུ་རས་གླན་ནོ༔ དེ་ནས་ཕྱག་མཚན་གྲི་གུག་ཁ་ཊྭཱྃ་རྐང་གླིང་ཐོད་རྔ་བྷནྡྷ་ལྕང་ལོ་ཅན་རྣམས་སློབ་བུའི་ལག་ཏུ་གཏད་ཅིང་༔ ཧཱུྃ༔ བདུད་འདུལ་དྷཀྐི་སེང་གདོང་ནག་མོའི་ཚོགས༔ འབུམ་ཕྲག་མཁའ་འགྲོའི་ཡོན་ཏན་འབྱུང་བའི་རྫས༔ མ་རྒྱུད་ལྷ་ཚོགས་སྒྲུབ་པའི་བླ་རྡོ་འདིས༔ དེང་འདིར་རིགས་ཀྱི་བུ་ལ་དབང་༴ འབུམ་ཕྲག་མཁའ་འགྲོའི་ཡོན་ཏན་དབང་༴ ཧཱུྃ་བཛྲ་དྷཀྐི༴ ཧ་རི་ནི་ས་རཏྣ་ཨ་བྷི་ཥིཉྩ་ཧཱུྃཿ ཅེས་བརྗོད་ཐོད་རྔ་འཁྲོལ་ཞིང་རྐང་གླིང་འབུད༔ དཔལ་གྱི་གཏོར་མ་སྤྱི་བོར་བཞག་ཅིང་༔ ཧཱུྃ༔ ཤ་ཁྲག་འབྲུ་བཅུད་བྷ་ལིང་གཏོར་མ་འདི༔ མཁའ་འགྲོའི་དཀྱིལ་འཁོར་ལྷ་དང་གཉིས་སུ་མེད༔ སྐལ་ལྡན་བུ་མཆོག་ཁྱོད་ལ་དབང་༴ འབུམ་ཕྲག་མཁའ་འགྲོའི་ཕྲིན་ལས་དབང་༴ ཧཱུྃ་བཛྲ་དྷཀྐི༴ ཧ་རི་ནི་ས་ཀརྨ་བྷ་ལིངྟ་ཨ་བྷི་ཥིཉྩ་ཧཱུྃཿ བཀའ་གཏད་དྲག་ཏུ་བྱ་ཞིང་ལྷ་ཚོགས་སློབ་མར་བསྟིམ༔ ཨཱོཾ་ཨཱཿཧཱུྃ་ཆོས་སྐུ་ཀུན་ཏུ་བཟང་མོ། ལོངས་སྐུ་རྡོ་རྗེ་ཕག་མོ། སྤྲུལ་སྐུ་སེང་གདོང་ནག་མོ། གུ་རུ་སེངྒེ་སྒྲ་སྒྲོགས། མཁའ་འགྲོ་ཡེ་ཤེས་མཚོ་རྒྱལ། འཁོན་ཆེན་ཀླུ་ཡི་དབང་པོ། རིག་འཛིན་ཉི་མ་གྲགས་པ། རྒྱལ་སྲས་ཨོ་རྒྱན་བསྟན་འཛིན། ཐེག་མཆོག་བསྟན་པའི་རྒྱལ་མཚན། ངེས་དོན་བསྟན་འཛིན་བཟང་པོ། ཨོ་རྒྱན་བསྟན་པའི་ཉི་མ། མི་འགྱུར་ནམ་མཁའི་རྡོ་རྗེ། འཇིག་མེད་ཆོས་དབྱིངས་རྡོ་རྗེ། ཀུན་བཟང་ཐེག་མཆོག་རྡོ་རྗེ། བསྟན་འཛིན་ཕྲིན་ལས་དབང་ཕྱུག །དྲིན་ཅན་རྩ་བ་དང་བརྒྱུད་པར་བཅས་པའི་དཔལ་ལྡན་བླ་མ་དམ་པ་རྣམས་དང་ཁྱད་པར་མཁའ་འགྲོའི་གཙོ་མོ་བདུད་འདུལ་སེངྒེའི་གདོང་པ་ཅན་གྱི་ལྷ་ཚོགས་ཀྱི་སྐུ་གསུང་ཐུགས་ཡོན་ཏན་འཕྲིན་ལས་དང་བཅས་པའི་ཐུགས་རྗེ་དང་བྱིན་རླབས་ནུས་མཐུ་ཐམས་ཅད་དེང་འདིར་རྡོ་རྗེའི་སློབ་མ་འདིའི་རྒྱུད་ལ་འཇུག་པར་བྱིན་གྱིས་བརླབ་ཏུ་གསོལ། ལུས་ངག་ཡིད་གསུམ་བསྲུང་ཞིང་སྐྱོབས་པ་དང་སྡེ་བརྒྱད་འབྱུང་པོའི་གནོད་པ་ཐམས་ཅད་ཞི་བ་དང་བཟློག་པ་དང་། ཁྱད་པར་ཕྱི་ནང་བར་བའི་རིགས་སྔགས་དང་ངན་སྔགས་རྦོད་གཏོང་གི་འཚེ་བས་བྱང་ཆུབ་སྒྲུབ་པ་དང་ཆོས་མཐུན་གྱི་བསམ་པ་སྒྲུབ་པ་ལ་བར་དུ་གཅོད་པའི་ཚོགས་ཐམས་ཅད་ཅིག་ཆར་སྐད་ཅིག་ཉིད་ལ་འཇོམས་པར་མཛད་དུ་གསོལ། མཆོག་དང་ཐུན་མོང་གི་དངོས་གྲུབ་མ་ལུས་པ་སྐད་ཅིག་ཉིད་ལ་ཐོབ་སྟེ་ཆོས་སྐུ་ཡེ་ཤེས་ཀྱི་མཁའ་འགྲོ་མའི་གོ་འཕང་ཚེ་འདི་ཉིད་ལ་འགྲུབ་པར་མཛད་དུ་གསོལ། ཧཱུྃ་བཛྲ་དྷཀྐི་ནི་སེངྷ་མུ་ཥ་ཧ་རི་ནི་ས་བྷ་ལིངྟ་ཨ་བྷི་ཥིཉྩ་ཧཱུྃ། གཏོར་མ་དངོས་གྲུབ་ཏུ་རོལ༔ མེ་ཏོག་འཐོར་ཞིང་ཤིས་པ་བརྗོད༔ ཧཱུྃ༔ འོག་མིན་གནས་ནས་སྐུར་བཞེངས་ལ༔ ཡེ་ཤེས་མཁའ་འགྲོ་ཀུན་ཏུ་བཟང་༔ ཆོས་དབྱིངས་མཁའ་འགྲོའི་བཀྲ་ཤིས་དཔལ༔ བདག་ཅག་རྣམས་ལ་དགེ་ལེགས་མཛོད༔ མཁའ་སྤྱོད་གནས་ནས་སྐུར༴ ལོངས་སྐུའི་མཁའ་འགྲོ་ཕག་མོ་ཡུམ༔ མཁའ་སྤྱོད་མཁའ་འགྲོའི་བཀྲ་ཤིས་དཔལ༔ བདག་ཅག་རྣམས་ལ༴ ཨོ་རྒྱན་ཡུལ་ནས་སྐུར༴ སྤྲུལ་སྐུའི་མཁའ་འགྲོ་སེང་གདོང་མ༔ འབུམ་ཕྲག་མཁའ་འགྲོའི་བཀྲ་ཤིས་དཔལ༔ བདག་ཅག་རྣམས་ལ་བཀྲ་ཤིས་བཛོད༔ སོགས་གཞན་ཡང་ཤིས་བརྗོད་ཅི་རིགས་བྱའོ། །དེ་ལྟར་བདུད་འདུལ་སེང་གདོང་མཁའ་འགྲོའི་དབང་བསྐུར་ཟབ་མོ་ཐོབ་པ་ཡིན་པས་གནས་སྐབས་དེ་དག་ཏུ་ཁས་བླངས་པའི་དམ་ཚིག་དང་སྡོམ་པའི་རིམ་པ་ཚུལ་བཞིན་བསྲུང་བར་བགྱིའོ་སྙམ་པས་འདིའི་རྗེས་ཟློས་གྱིས། གཙོ་བོས༴ དེ་དག༴ གཏང་རག་གི་མཎྜལ། སླར་ཡང་ལུས་ལོངས་སྤྱོད་དུས་གསུམ་གྱི་དགེ་ཚོགས་དང་བཅས་འཁོར་ལོས་བསྒྱུར་བའི་རྒྱལ་སྲིད་ཀྱི་འབྱོར་བ་ལྟར་སྤྲུལ་ཏེ་འབུལ་སྙམ་པས་འདིའི་རྗེས་ཟློས་གྱིས། དེང་ནས་བརྩམས་ཏེ༴ སོགས། དེ་ལྟར་དབང་བསྐུར་ཐོབ་པའི་དགེ་རྩ་སེམས་ཅན་གྱི་དོན་དུ་བསྔོ་བར་གྱིས། །བསོད་ནམས་འདི་ཡི༴ སོགས། རིན་ཆེན་དགེ་ཚོགས༴ སོགས། དེ་ལྟར་ཡང་དབང་གཞུང་ལས། དབང་ཡོན་སྐྱེམས་བཅས་སློབ་དཔོན་སྐུ་ལ་མཆོད༔ དགའ་བྲོ་བཀྲ་ཤིས་ཚོགས་འཁོར་རྗེས་སྐྱོང་ངོ༔ དགེ་བ་བསྔོ་ཞིང་སྟོང་ཉིད་རྒྱས་གདབ་པའོ༔ བླ་རྡོ་བཅང་ཞིང་མཁའ་འགྲོ་སྒྲུབ་ཅིང་བརྟེན༔ དམ་ཚིག་བསྲུང་ཞིང་མཆོད་གཏོར་བསྐང་གསོལ་འབད༔ རྩ་རླུང་སྦྱང་ཞིང་ཐིག་ལེ་མི་ཉམས་བྱ༔ སྐུ་གསུམ་མཁའ་འགྲོ་བདུད་འདུལ་དྷཀྐི་མས༔ བར་ཆད་སེལ་ཞིང་དངོས་གྲུབ་སྩོལ་བར་འགྱུར༔ དེ་ཕྱིར་ཉམས་སུ་ལོངས་ཤིག་ཕྱི་རབས་རྣམས༔ ས་མ་ཡཱ༔ རྒྱ་རྒྱ་རྒྱ༔ གཏེར་རྒྱ༔ སྦས་རྒྱ༔ གཉན་རྒྱ༔ གཏད་རྒྱ༔ ས་མ་ཡཱ༔ རྒྱ་རྒྱ་རྒྱ༔ བདག་ཁམས་པ་ཉི་མ་གྲགས་པས་གངས་རིའི་རྒྱལ་པོ་ཏེ་སེ་ནས་ཤིང་མོ་ཡོས་ཀྱི་ལོ་ལ་སྤྱན་དྲངས་ཤིང་ལྕགས་ཕོ་སྤྲེའུའི་ལོ་ལ་ཤོག་སེར་ལས་ཕབ་པའོ། །དེ་ནས་ཚོགས་ལ་རོལ། ལྷག་མ་བཏང་བཀའ་གཏེར་བསྐུལ་ཆད་ཐོ་བསྟན་སྐྱོང་རྟ་བྲོ་སོགས་དཀྱིལ་འཁོར་གྱི་རྗེས་ཀྱི་བྱ་བ་རྣམས་གསང་བ་སྤྱི་འགྲོས་བཞིན་བྱའོ། །དེ་ལྟར་བདུད་འདུལ་དཔལ་གྱི་མཁའ་འགྲོ་ཡི། །སྨིན་བྱེད་དབང་ཆོག་བྱིན་རླབས་མྱུར་འཇུག་གང་། །གཞུང་དང་བླ་མ་མཆོག་གིས་སྩལ་བ་ཡི། །མཚམས་སྦྱོར་ཕྱག་བཞེས་ཇི་བཞིན་ཀླག་ཆོག་ཏུ། །བཀོད་པའི་དགེ་བས་བདུད་དང་བྱད་སྟེམས་ཀྱིས། །ལོག་འདྲེན་གདུང་བའི་ཚང་ཚིང་འཁྲིགས་པའི་ནགས། །སྲེག་བྱེད་དུས་མཐའི་ཞུགས་ཀྱི་ལྕེ་རྣོན་ལྟར། །རབ་འབར་ཏིང་འཛིན་རྩལ་གྱིས་བཅོམ་ནས་སླར། །ཕན་བདེའི་འདོད་པ་ཀུན་འཇོ་ཡོངས་འདུའི་དབང་། །གྲུབ་གཉིས་སྐལ་བའི་མགྲོན་དུ་གཉེར་བྱས་ནས། །རྨད་བྱུང་རྫོགས་ལྡན་གསར་བའི་དུས་སྟོན། །མཁའ་སྤྱོད་དབང་མོས་རྗེས་སུ་འཛིན་གྱུར་ཅིག །ཅེས་བདུད་འདུལ་དབང་མོའི་སྨིན་བྱེད་བྱིན་རླབས་མྱུར་འཇུག་ཞེས་པ་འདི་ནི་གཏེར་གཞུང་ཉམས་མེད་བླ་མ་མཆོག་གིས་སྩལ་བའི་མཚམས་སྦྱོར་གྱིས་བརྒྱན་ཏེ་རང་བཟོ་མེད་པར་རྣམ་འདྲེན་ཟུང་གི་གསུང་གིས་བསྐུལ་བ་སྤྱི་བོར་བཅིངས་ནས་སྔགས་བན་ཝ་གིནྡྲར་འབོད་པས་བགྱིས་པ་དགེའོ། མངྒ་ལཾ།། །།

བདུད་འདུལ་ནག་མོའི་ཐུན་གཏོར།

བསྙེན་བསྒྲུབ་དང་བསྲུང་བཟློག་གི་མཇུག་དང་རྒྱུན་གྱི་གཏོར་བསྔོ་སོགས་ཀྱི་སྐབས་སུ་གཏོར་མ་འབུལ་འདོད་ན༔ ལྕགས་སམ་བྷནྦྷའི་སྣོད་དུ་ཤ་ཁྲག་གི་གཏོར་མ་སོགས་འབྱོར་པ་བཤམས་ཏེ་ཆུ་གཙང་གིས་བྲན་ལ་འདི་སྐད་དོ། །ཧཱུྃ། རྩ་གསུམ་དཀོན་མཆོག་དམ་ཅན་སྲུང་མའི་མཐུས། །དགྲ་བགེགས་ལོག་འདྲེན་དམིགས་པའི་ཡུལ་གྱུར་ཀུན། །མྱུར་དུ་ཁུག་ལ་གཏོར་མ་འདི་ལ་བསྟིམ། །ཕོ་ཉའི་མཚོན་ཆས་གཟུགས་ཕུང་དུམ་བུར་གསིལ། །ཧཱུྃ། རབ་འཇིགས་དྲག་པོའི་སྣོད་དུ་གཏོར་མའི་རྫས། །ངོ་བོ་ཟག་མེད་བདུད་རྩིའི་རྒྱ་མཚོ་ལ། །རྣམ་པ་དགྲ་བགེགས་བསྒྲལ་བའི་བམ་ཆེན་གྱི། །ཤ་རི་ཁྲག་མཚོ་རུས་པའི་གྲམ་ཁྲོད་བརྡལ། །ཞག་ཀླད་ཚིལ་རྐང་ཆོས་དབྱིངས་ཁྱབ་པར་སྤེལ། ཨོཾ་ཨཱཿཨོཾ་ཧ་ཧོ་ཧྲཱི༔ གསུམ་བརྗོད། ཧཱུྃ། རང་བཞིན་གནས་ནས་མཁའ་འགྲོ་འཁོར་དང་བཅས། སྤྱན་དྲང་གཏོར་མ་གསོལ་བས་མཉེས་པར་གྱུར། ཧཱུྃ་བཛྲ་དྷཀྐི་ནི་སེངྷ་མུ་ཥ་ཧ་རི་ནི་ས་ས་པ་རི་ཝ་ར་ཨེ་དམ་བྷ་ལིངྟ་ཁ་ཁ་ཁཱ་ཧི་ཁཱ་ཧི། གསུམ་མམ་བདུན་བརྗོད་ལ། དྲག་མཛད་དྲག་མོའི་རྣམ་འགྱུར་གྱིས། གདུག་པ་འདུལ་མཛད་མཁའ་འགྲོའི་གཙོ། །བདུད་འདུལ་མཁའ་འགྲོ་འཁོར་དང་བཅས། །དགྲ་བགེགས་བསྒྲལ་བའི་ཤ་ཁྲག་གི། དགྱེས་དགུའི་བྷ་ལིང་ཚོགས་སུ་རོལ། །སྡང་བྱེད་དགྲ་པོ་ཆམ་ལ་ཕོབ། །ལོག་འདྲེན་བགེགས་དཔུང་ཕྱེ་མར་ཐོང་། །བྱད་མ་རང་གཤེད་རང་ལ་ཕོབ། །ཕྱི་ནང་གསང་བའི་བར་ཆད་སོལ། །འདུ་བ་རྣམ་བཞི་ཆར་ལྟར་ཕོབ། །ཞི་རྒྱས་དབང་དྲག་ལས་ཀུན་བསྒྲུབ། །མཆོག་དང་ཐུན་མོང་དངོས་གྲུབ་སྩོལ། །མཁའ་འགྲོའི་དབང་ཕྱུག་ཧེ་རུ་ཀ །།གོ་འཕང་མཆོག་ལ་སྐྱེ་བ་འདིར། །བདེ་བླག་བསྒྲོད་པའི་བཀའ་དྲིན་སྩོལ། ཅེས་དང་། སྐྱེ་ཞིང་སྐྱེ་བ་ཐམས་ཅད་དུ། །མཁའ་སྤྱོད་དབང་མོས་རྗེས་འཛིན་ཅིང་། །སྲིད་འདིར་གསང་ཆེན་སྨིན་གྲོལ་གྱིས། །འཁོར་ལོས་བསྒྱུར་བའི་མཐུ་ཐོབ་ཤོག །ཅེས་སྨོན་ལམ་དག་པས་རྒྱས་གདབ། ཧཱུྃ། སྐུ་གསུམ་གར་མཁན་གྲུབ་གཉིས་གཏེར། །མི་ཟད་ཕན་དང་བདེ་བའི་མཛོད། །རྩ་གསུམ་དཀོན་མཆོག་རྒྱ་མཚོ་དང་། །བདུད་འདུལ་མཁའ་འགྲོའི་བཀྲ་ཤིས་ཤོག །ཅེས་གཞན་ཡང་ཤིས་པ་ཅི་རིགས་བརྗོད།། །།བྱིན་འབེབས་པ་ནི། ཧཱུྃ། རྣམ་དག་ཆོས་དབྱིངས་ཞིང་ཁམས་ནས། །བཟང་མོ་ཆོས་སྐུའི་མཁའ་འགྲོ་དང་། །ལྷུན་གྲུབ་བདེ་ཆེན་ཞིང་ཁམས་ནས། །ཕག་མོ་ལོངས་སྐུའི་མཁའ་འགྲོ་དང་། །མཁའ་སྤྱོད་གསང་ཆེན་གནས་མཆོག་ནས། །སེང་གདོང་སྤྲུལ་སྐུའི་ཌཀྐི་དང་། །རྔ་ཡབ་པདྨ་འོད་ཞིང་ནས། །གུ་རུ་སེང་གེ་སྒྲ་སྒྲོགས་དང་། །ཨོ་རྒྱན་སྤྲུལ་པའི་ཚོགས་ཁང་ནས། །མཁའ་འགྲོ་གཙོ་མོ་མཁར་ཆེན་བཟའ། །འོག་མིན་དག་པའི་ཞིང་ཁམས་ནས། །རིག་འཛིན་བརྒྱུད་པའི་བླ་མ་དང་། །ཡི་དམ་ཞི་ཁྲོ་རབ་འབྱམས་ཚོགས། །གནས་ཡུལ་དུར་ཁྲོད་བརྒྱད་སོགས་ནས། །མ་སྲིང་མཁའ་འགྲོ་རྒྱ་མཚོ་དང་། །བཀའ་དང་དམ་ཚིག་ཞིང་ཁམས་ནས། །བསྟན་སྐྱོང་ཕོ་རྒྱུད་མོ་རྒྱུད་རྣམས། །གསང་ཆེན་དྲག་པོའི་གནས་མཆོག་ནས། །ཐུགས་རྗེའི་དབང་གིས་ཉེར་དགོངས་ལ། །མ་ལུས་འཁོར་བཅས་གཤེགས་སུ་གསོལ། །ཡེ་ཤེས་མཁའ་འགྲོ་སྤྲིན་ལྟར་གཏིབས། །དམ་ཚིག་མཁའ་འགྲོ་ཆར་ལྟར་ཕོབ། །སྣ་ཚོགས་མཁའ་འགྲོ་རྡུལ་ལྟར་འཁྲིགས། །ལས་བྱེད་མཁའ་འགྲོ་གློག་ལྟར་འཁྱུག །ཤ་ཟ་མཁའ་འགྲོ་རླུང་ལྟར་འཚུབ། །འཇིག་རྟེན་མཁའ་འགྲོ་འབྲུག་ལྟར་སྒྲོགས། །བདག་ཅག་རྣལ་འབྱོར་སྒྲུབ་པ་པོའི། །ལུས་ལ་བརྗིད་པའི་གཟི་བྱིན་ཕོབས། །ངག་ལ་སྔགས་ཀྱི་ནུས་མཐུ་སྩོལ། །ཡིད་ལ་ཏིང་འཛིན་རྟོགས་པ་བསྐྱེད། །ཕྲིན་ལས་རྣམ་བཞིའི་ནུས་པ་སྩོལ། །རྟགས་དང་མཚན་མ་མྱུར་དུ་སྟོན། །ཧཱུྃ་བཛྲ་དྷཀྐི་ནི་སེང་ཧ་མུ་ཁ་ཧ་རི་ནི་ས་སརྦ་ཌཀྐི་ནི་ཛྙ་ན་ཨ་ཝེ་ཤ་ཡ་ཨ་ཨ། ཞེས་འདི་ཡང་སྒྲུབ་ཆེན་མཇུག་ཞལ་འཇལ་བྱུང་ཚེ་རྗེ་དབོན་རྡོ་རྗེ་འཆང་པདྨ་ཀུན་གྲོལ་རྣམ་རྒྱལ་གྱིས་རྒྱ་རོང་དབེན་གནས་སུ་བྲིས་པ་དགེའོ། །སརྦ་མངྒ་ལམ།། །།བདུད་འདུལ་མཁའ་འགྲོའི་འཕུང་གཏད་དང་ཉེ་དབྱེ་ཐུན་རྫས་ངག་མནན་ལ་སོགས་པའི་ལག་ལེན་གནད་ཀྱི་ཟིན་བྲིས་ཟུར་གསལ་དུ་བཀོད་པ་གཞན་ལ་མི་བསྟན་པ་སྙིང་གི་རྒྱ་ཅན་ཤིན་ཏུ་ཟབ་པོ༔ ས་མ་ཡཱ་རྒྱ༔ བདུད་འདུལ་དཔལ་གྱི་མཁའ་འགྲོར་ཕྱག་འཚལ་ལོ། །དེ་ཡང་འཕུང་གཏད་ནག་པོའི་ཞལ་ཤེས་ནི། ལིངྒ་སའི་སྦལ་པ་སོ་བཏང་བའི་ནང་ངམ། མཛེ་ཐོད་ཁ་སྦྱོར་གྱི་ནང་དུ་ཚོན་སྐུད་ཀྱིས་རྒྱ་གྲམ་དུ་བཅིངས་ལ་བཙུད། དགུག་གཞུག་གི་དུས་དམིགས་བྱ་ཀླུ་བདུད་ནག་པོ་མགོ་དགུ་པའི་ལྟོ་བ་ཡངས་ཤིང་རྒྱ་ཆེ་བའི་ནང་དུ་ཡུལ་མཁར་མི་ནོར་འཁོར་དང་བཅས་པ་ཐམས་ཅད་ཚུད་པར་དམིགས་ཤིང་ཐར་པའི་གོ་སྐབས་དང་བྲལ་བར་བསམ། ལས་སྦྱོར་གྱི་སྔགས་བཟླ་དེ་ནས་སྒྲུབ་པའི་གནས་ནི་ནམ་མཁའི་མདངས་མི་མཐོང་པའི་མུན་པ་རབ་དུ་འཁྲིགས་པ་མཆོག་གོ། དེ་ནས་མནན་པའི་དུས་ཕྱི་རོ་རས་ཀྱིས་དྲིལ་ཏེ་ཚོན་སྐུད་སྣ་ལྔས་བཅིངས། ཐང་ཆུ་ལ་པྲ་ཚིལ་ལ་སོགས་པས་བཏུམས་ཏེ་ནང་དུ་ཆུ་མི་འགྲོ་བར་བྱ། ཀླུ་བདུད་གནས་པའི་ཆུ་མིག་ལྐུག་པའམ་ཁ་བྱང་ལྟའམ་མཚོ་ལྐུག་པ་ཀུན་གྱི་འགྲིམ་ལམ་མི་འཁོག་ནང་དུ་བྱད་ཐག་གིས་བཏགས་ལ་གཞུགས། དོང་མི་འབྲུ་ཞིང་འདི་ཚོ་འབྱུང་བའི་རྒྱས་འདེབས་དུར་གཡམ་སོགས་དངོས་སུ་མི་དགོས་དེ་ཡང་ནམ་མཁའ་རླུང་ནི་ཀུན་ཁྱབ་དང་། མེ་ནི་ཉི་མ་ཆུ་ས་ངོ་བོ། སླར་སྐྱོབ་པར་འདོད་པའམ་གང་ལྟར་ཡང་ལས་འགྲུབ་ནས་འདོན་རྒྱུ་མ་རྙེད་ན། གཏད་འབྱམས་ཞེས་རང་ལ་ལྡོག་པའི་ཉེན་ཡོད་པས་ལན་རྒྱུ་ཡོད་པ་གལ་ཆེའོ། ཚུར་འདོན་དུས། སྔར་ཁྱེད་ལ་བཅོལ་བ་ཡིན་གྱིས། ད་ནི་རང་ནོར་རང་གིས་ལེན་པ་ལ་འཕྲེང་བ་མི་མཛད་པར་གཏང་རག་གི་མཆོད་སྦྱིན་བཟང་པོ་འདི་བཞེས་ཤིག །ཅེས་བརྗོད་ཀླུ་སྨན་སོགས་སྦ་ཞིང་ཀླུ་གཏོར་གཏོང་། ལིང་སྣོད་ཀྱི་ནང་དུ་ཡང་། ལིངྒས་མ་ཁེངས་པའི་བར་མཚམས་ཐམས་ཅད་བྱང་བུ་དང་འབྲུ་སྣ་ཐུན་སོགས་ཀྱིས་གང་བར་བྱའོ། །ཁ་ཐམ་གུ་ཧྱེ༔ དཔལ་གྱི་མཁའ་འགྲོར་ཕྱག་འཚལ་ལོ། །ལེགས་མཐུན་དབྱེ་བའི་ཡིག་ཆུང་ནི་དགུག་གཞུགས་སྔགས་གཞུང་ལྟར་དང་། སྒྲོ་ཡི་རྡེེག་དུས་གུ་གུལ་ནག །ཤ་ཆེན་ཡུངས་དཀར་དུད་བས་བདུག །ཐུན་གཏོར་དགུག་གཞུག་བྱས་ཏེ་འབུལ། ཧོ་དུས་གསུམ་སངས་རྒྱས་ཀུན་གྱི་ཡུམ་མཆོག་སོགས་དྲག་པོའི་བསྲེག་ཆོག་ལྟར་དང་། དམ་ཅན་རྒྱལ་མཚོའི་ཚོགས་དང་བཅས་པ་རྣམས་ལ། དགྲ་བགེགས་བསྒྲལ་བའི་ཤ་རི་ཁྲག་མཚོ་རུས་ཕུང་འདི་ཉིད་འབུལ་གྱིས་བཞེས་ལ། ཕྲ་མེན་གྱི་ལས་འདི་མཛོད་ལ། དགྲ་བོ་ཆེ་གེ་དང་ཆེ་གེ་ནང་དཀྲུགས་ཤིག །དུས་རྣམས་ཀུན་ཏུ་འཐབ་ཏུ་ཆུགསཅིག །ཞེ་སེམས་འགྲས་སུ་ཆུག་ཅིག །གཅིག་བདུད་དུ་ཕོབ་ཅིག །ཕོ་ཡི་བདུད་དུ་མོ་ཕོབ་ཅིག །མོ་ཡི་བདུད་དུ་ཕོ་ཕོབ་ཅིག །དཔོན་གྱི་བདུད་དུ་གཡོག་ཕོབ་ཅིག །གཡོག་གི་བདུད་དུ་དཔོན་ཕོབ་ཅིག །རྗེ་ཡི་བདུད་དུ་འབངས་ཕོག་ཅིག །འབངས་ཀྱི་བདུད་དུ་རྗེ་ཕོབ་ཅིག །བླ་མའི་བདུད་དུ་སློབ་མ་ཕོབ་ཅིག །སློབ་མའིབདུད་དུ་བླ་མ་ཕོབ་ཅིག །དེས་འགྲེ་བར་གང་མཐུན་དམིགས་བྱ་ཅིག་བདུད་ཞིག་ཕོབ་ཅིག་པའི་འདོད་གསོལ་དང་། གཞན་ཡང་འགོ་ཞིང་སྡོང་གྲོགས་བྱེད་པའི་ལྷ་བཅོ་ལྔ་བདུད་དུ་ཕོབ་ཅིག །སྣང་སྲིད་ལྷ་སྲིན་སྡེ་བརྒྱད་དང་མི་དང་མི་མ་ཡིན་པ་ཐམས་ཅད་བདུད་དུ་ཕོབ་ཅིག །རང་བདུད་དུ་རང་ཕོབ་ཅིག །ཕུང་ཐབས་སྣ་དགུའི་ཁ་ཕུང་རྗེས་ཤུལ་མེད་པར་རྡུལ་དུ་བརླག་པའི་འཕྲིན་ལས་གཉན་པོ་མཛོད་ཅིག །ཅེས་བརྗོད་ཐུན་གཏོར་ཟོར་དུ་འཕང་པར་བྱའོ། །སླར་གཏད་བབ་ན་འཁོར་ལོ་དབྱུང་ཞིང་མཐུན་པའི་ཐབས་ལམ་ཟབ་མོ་གུད་དུ་བཀོད་པ་ལྟར་སྤྱད་དོ། །བདུད་འདུལ་མཁའ་འགྲོར་ཕྱག་འཚལ་ལོ། དེ་ཡང་སྔགས་བོན་ནང་འགྲས་ལ། ལྐུགས་བྱེད་ངག་མནན་སྦྱོར་བ་བརྩམ། དུག་ཤོག་དག་ལ་ལིངྒ་བྲིས་ལྕེ་ཡི་བྲང་ཁེབས་དབུས་སྙིང་ཁར། ཛ་ནྲི་ཅེས་པའི་མཐར། བྱད་མ་དགྲ་བགེགས་ཆེ་གེ་མོའི། །ལུས་ངག་ཡིད་གསུམ་ཁུག་ཅིག་ནན། །ལྕེ་ལ་ངོས་ནས་བརྩོམ་པ་ཡི། ཨོཾ་དང་བྷནྡྷ་ཤ་རུས་སོགས། །དེའི་མཐར་ཕ་རོལ་དམིགས་བྱ་ཡི། །ཡི་དམ་ཆོས་སྐྱོང་སྲོག་སྔགས་མཐར། །ཆེ་གེའི་ངག་གི་རྣམ་ཤེས་ནི། །མཱ་ར་ཡ་བཾ་ནན་བྲུབ་བྲིས། །ལྕེ་ཡི་ཕྱི་རིམ་ཁོག་པའི་ནང་། །བླ་འགུགས་སྔགས་དང་ཆེ་གེ་མོ། །ཨ་ཝེེ་ཤ་ཡ་གཟུགས་ལ་ཕོབ། །ལུས་ངག་ཡིད་གསུམ་སྟྭཾ་བྷ་ཡ་ནན། ལིངྒའི་ཕྱི་ལ་བསད་སྔགས་མནན་སྔགས་ཁྱད་པར་ངག་མནན་སྔགས། བྱད་མ་དགྲ་བོ་ཆེ་གེ་མོའི། རིགས་སྔགས་དམོད་པའི་ནྲྀ་ཛ་དང་། །རྦད་ནན་སྟྭཾ་བྷ་ཡ་ནན། ཆིངས་ཆིངས་བྲུབས་བྲུབས་བཟློག་སོད་ཡ། །སྣང་སྲིད་ལྷ་འདྲེ་ཐམས་ཅད་དང་། །ཁྱད་པར་འགོ་བའི་ལྷ་ལྔ་དང་། །སྐྱོབས་བྱེད་ལྷ་བཅུ་དམོད་པ་ཕོབ། །རང་ནུས་རང་ལ་སྡིག་ཤིག་དང་། །རང་མགོན་སྲོག་གཅོད་ཤན་པ་ཕོབ། །རང་མཐུ་རང་ཟུག་ལྷ་འདྲེ་སྲུང་མ་རྣམས། །གཤེད་དུ་ཕོབ་ཅིག་རང་སྲོག་ནི་རང་གིས་ཆོད་ཅིག་མི་རུང་བ། །སྣ་དགུའི་ཆར་ཕོབ་སརྦ་སྟྭཾ་བྷ་ཡ་ལམ་ནན་ཆིངས་བྲུབས་སོད། །བཟློག་པ་ཅེས་སོགས་གང་འདོད་བྲི། །དམིགས་བྱའི་མཆིལ་སྣབ་ཟག་རྫས་བྱུགས། །གཞན་ཡང་སྨྲ་མི་ཤེས་པ་ལྐུགས་པ་ཡི། རྟུག་གཅིན་མཆིལ་སྣབས་ཁྲག་དང་ནི། །ཕུག་རོང་སྒོ་ངའི་གསེར་ཐིག་དང་། །མཆོད་རྟེན་སཙྪ་ཞིག་པོའི་ས། །ལྷ་ཁང་རྙིང་པའི་མ་ཐེམ་ས། །དུག་སྣའི་ཆུ་ཡིས་ཁྱབ་པར་བྱུག །བན་སྔགས་ནང་འགྲས་རིགས་ལིང་ལ། །ཁོ་ཡི་གསང་མཚན་གང་ཡིན་བྲིས། །མནན་དུས་སཙྪ་དགུའི་ཁོང་པར། དམོད་མོ་བྲིས་བཅུག་རེ་གདན་བཞག །སངས་རྒྱས་ནག་པོ་སྟོང་རྩར་བསྐྱེད། །ཕྱག་གཉིས་ཉི་ཟླ་ཆ་ལང་བརྡེབ། །སྐུ་སྟོད་དར་ནག་ཆོས་གོས་གསོལ། སྐུ་སྨད་ཕུར་གཟུགས་དམར་ཧོམ་དུ། །དམིགས་བྱ་བསྐལ་པ་དུས་མཐའི་བར། །གཟིར་པའི་ནུས་ལྡན་བསམ་པ་ལ། །སྤྱན་འདྲེན་མཆོད་བསྟོད་སྤྱི་ལྟར་བྱ། །རྟེན་འབྲེལ་སྙིང་པོ་རབ་ཏུ་གནས། །གཟུ་དཔང་དགུག་གཞུག་ལ་སོགས་པ། །མནན་གཞུང་བཞིན་བྱ་ཁྱི་ར་ནི། །སཙྪ་ཁྱི་ཐོད་སྟེང་དུ་བཞག །མྱོང་བྱེད་ལྕེ་ཡིས་བྲང་ཁེབས་པའི། །དཀར་ནག་མཚམས་སུ་བཏབ་པ་ཡི། །རླུང་དཀྱིལ་ལ་ཐུག་གཟིར་བར་བསམ། །དེ་སྟེང་རོ་གཡམ་རྒྱ་གྲམ་དང་། །རི་རབ་བྲིས་པས་ཁ་བཅད་ལ། །འབྱུང་ལྔའི་རྒྱས་འདེབས་རྟ་བྲོ་བརྡིང་། །ངག་མནན་ལས་སྦྱོར་ཡིག་ཆུང་ངོ་། །བབ་ན་འཁོར་ལོ་འདོན་པར་བྱ། །ལིངྒ་དྲི་བཟང་ཆུ་ཡིས་འཁྲུད། །ཆུ་རླུང་ཆེན་པོར་དོར་བར་བྱ། །ཆང་ལ་བདུད་རྩི་ཨ་མྲྀ་ཏ། །ནེ་ཚོ་ལྕོག་གིས་ལྕེ་སྐམ་པོའི། ཕྱེ་མ་བཏབ་ལ་འབྲུ་གསུམ་དང་། །ཧཱུྃ་བཛྲ་དྷཱཀྐི་ནི་སེང་ཧ་མུ་ཥ་ཧ་རི་ནི་ས་ཝཱཀྐ་སརྦ་སིདྡྷི་ཧཱུྃ་སྭཱ་ཧཱ། ཞེས་པ་སྟོང་བཟླས་སྔགས་ཆུ་བླུད། །ལྕེ་ལ་འབྲུ་གསུམ་ཐིམ་པ་ཡིས། །བྱད་རྫས་བསྲེགས་ཤིང་ནུས་ལྡན་བསམ། །ངག་མནན་གྲོལ་བའི་ཡིག་ཆུང་ངོ་། །བདུད་འདུལ་དཔལ་གྱི་མཁའ་འགྲོ་མ་ལ་ཕྱག་འཚལ་ལོ། །མངོན་སྤྱོད་དང་ལས་སྦྱོར་ལའང་གཅེས་པའི་དུག་ཁྲག་རྫས་སྲུང་ལག་ལེན་གྱི་རིམ་པ་ནི། དེ་ལ་རྫས་དངོས་གཞི་གཞུང་བཞིན་ལས་ཅུང་ཟད་གབ་སྲུང་རྣམས་འདིར་འཆད་པར་བྱའོ། །ནུས་ལྡན་སྔགས་ཀྱི་དྲིན་ཆེན། །དགེ་སློང་རྣམ་དག་ལོ་བརྒྱད་བཅུ་པའི་དྲི་ཆུ། བ་དམར་མོའི་གཅིན་དང་། ཆང་གི་སྙིང་ཁུ། ཕག་ནག་གི་ཚིལ་དང་བྲུན། གླ་བ་ནག་པོའི་གླ་རྩི་འབྱོར་ན་ནུས་པ་ཆེ། སྤྲུ་བ་ནག་པོ། རྟ་གསེབ་ནག་པོའི་རྟ་བོན། གུ་གུལ་ནག་པོ། གཞན་ཡང་ཤ་སྣ་ཁྲག་སྣ་དང་། ཅེས་པས་མི་རྟ་ཁྱི་གསུམ་བྱ་ཤ་ཟན་གྱི་རིགས། ཁྱད་པར་དུ་བྱ་རྒོད་གཅན་གཟན་སྣ་ཚོགས་པའི་ཤ་ཁྲག་དང་ལྷག་པར་གྲི་ཁྲག་བུང་ཆེ་བར་བསགས། མཛེ་དང་དམེ་མནལ་གསུམ་གྱི་ཁྲག་མི་འགྲོའོ། །དྲི་ངར་ལྡན་པའི་སྨན། ཞེས་གསུངས་པ་དུག་རིགས་སུ་གྱུར་ཚད། གཞན་ཡང་དྲི་ལྔ་ལ་སོགས་ནུས་པ་ངར་བའི་རིགས་སོ། དེ་ལྟ་བུའི་ཁྲག་གི་རིགས་རྣམས་ར་གྲོད་དམ་ལྒང་ཕུག་ནང་དུ་ལེགས་པར་དཀྲུགས་པས་འདྲེས་ངེས་སུ་བྱ། པར་བུ་དམ་པོར་བླུག །ལུད་ཚད་ཚ་ནང་དུ་བསྙལ། ལེགས་པར་རུལ་བ་དང་། དེའི་ནང་དུ་རྫས་རྣམས་ཞིབ་པར་བཏགས་ཏེ་བླུག །སྐྱ་བས་དཀྲུག་ཏེ་འདྲེས་པར་རིལ་ལུ་བྱ་སྟེ། ཁ་དམ་པར་བཅད་མདུན་དུབཤམས་ཏེ། དངོས་གཞི་སྒྲུབ་པ་དང་བསྐྱེད་པའི་རིམ་པ་གཞུང་བཞིན་བསྐྱེད་ལ། ཡེ་ཤེས་སྤྱན་དྲངས་རྫས་ལ་དབྱེར་མེད་དུ་བསྟིམ་ཞིང་རྫས་རྣམས་དུག་གི་རླངས་པ་མེ་དུད་འཚུབ་པར་བསྒོམ་ལ་སྔགས་བཟླ་ཐུན་མཚམས་རྣམས་སུ་ཧུས་བཏབ་རླངས་མ་ཤོར་བར་བྱ་ཞིང་ཁ་དམ་དུ་བཅད། ལེགས་པར་སྒྲུབས། དེ་ནས་རྫས་དེ་ཉིད་རྟག་ཏུ་འཆང་བའི་སྣོད་གླང་དམར་མགོ་ཅན་གྱི་རྭ་གཡས་པར་བཅང་བའམ། མཆན་ཁུང་གཡོན་དུ་བཅང་བར་བྱའོ། །གཞན་ལ་འདོགས་ན་སྨྱུག་ཚིག་ནང་དུ་བླུག་ལ་གདགས། ཞོ་ཆང་བསྲུང་ན་སྣོད་ཀྱི་མཐར་བསྐོར། སྐོམ་ན་རླན་པའི་ཆུ་ནི་གོང་གི་དྲི་ཆུ་དང་ཆང་གི་སྙིང་ཁུའོ། །དེ་ཡང་ཁྲག་གི་ནུས་པ་རུལ་བ་ལས་འབྱུང་བས་ཤིན་ཏུ་རུལ་བར་བྱའོ། །སྨན་དང་རྫས་ཀྱི་ནུས་པ་གསར་བ་ལས་འབྱུང་བས། གསར་བར་སྦྱར་ཞིང་སྐབས་སྐབས་སུ་ཁ་གསོ། སྔགས་ཀྱི་ནུས་པ་བཟླས་པ་ལས་འབྱུང་བས་ནང་རེ་བཞིན་བརྒྱ་རྩ་རེ་བཟླས་ལ་བཏབ་བོ། །རྫས་དེ་ཉིད་དམ་ཉམས་སོགས་ཀྱི་ལག་ཏུ་ཤོར་ན་ནུས་པ་ཞུད་ནས་སྐད་འབྱིན་པ་དང་རྫས་སྣོད་གས་པ་སོགས་འབྱུང་ངོ་། །དེ་བྱུང་ན་སླད་བསྐྱར་ཞིང་བསྒྲུབ་པ་བྱའོ། ཨྠིྀ། བདུད་འདུལ་མཁའ་འགྲོར་ཕྱག་འཚལ་ལོ། མནན་པའི་བགེགས་རིགས་ཁ་བསྒྱུར་བ། །སྔགས་བགོད་ཕལ་ཆེ་དགྲ་དང་མཚུངས། །ཁྱད་པར་སྙིང་ཁར་ཏྲི་བྲིས་ཏེ། །ལྟོ་བ་གསུས་ཁྱིམ་ཆེ་བ་ལ། །འདྲེ་དེའི་གནས་དང་ཡུལ་བྲི་ཞིང་། །བླ་ལ་མིང་མཐར་ཁུག་ཛཿབྲི། །མཐའ་ཡི་མེ་ཆུ་རླུང་གསུམ་སྤང་། །གཞན་དག་དགྲ་བོའི་མིང་ཤུལ་དུ། །བགེགས་ལ་ལིངྒ་གཞན་ཡང་མགོ། རྒྱལ་སྲི་མི་ལུས་སེངྒེའི་མགོ། ཕོ་སྲི་སྤྱང་ཀིའམ་ཡང་ན་གཡག །མོ་སྲི་ཁྱིའམ་རྔ་མོང་མགོ། མཚན་སྲི་ཤ་བ་དགྲ་སྲི་ནི། །སྤྱང་ཀི་འཕུང་སྲི་རྔ་མོང་དང་། །གོད་སྲི་ར་ཕག་འབྲིའི་མགོ། དམ་སྲི་ཕག་དང་བྱིས་སྲི་རྟ། ཆུང་སྲི་རྔ་མོང་ཁྱི་གུའི་མགོ། བསེན་མོ་བྱ་མགོ་རྒྱལ་པོ་མི། །ཡང་ན་སྤྲེལ་སོགས་མགོ་བོ་ལ། །ལུས་ནི་དགྲ་ལིང་དག་དང་མཚུངས། མཐའ་ལ་དམོད་མོ་སྔར་གནོད་དང་། །ད་ལྟ་ཕྱིས་སུ་གནོད་དོགས་པའི། །བགེགས་ཀྱི་མིང་བཅུག་གཞན་མ་འདྲ། །བསད་ཁྲག་དུག་སྣའི་ཆུ་ཡིས་བྱུག །ཕོ་གདོན་མོ་གདོན་རྒྱལ་བསེན་སོགས། །རང་རང་གནས་སའི་ས་རྡོས་བྱུག །དངོས་གཞི་མནན་གཞུང་བཞིན་དུ་སྤྱད། །ལིང་ལྟེབ་འདྲེ་ལྟེབ་ཞེས་པ་ནི། །སྲོག་ཡིག་ཏྲི་ནི་རྐེད་པར་བཅག །ཤི་པགས་བཏུམ་བཞིན་དྲིལ་བའོ། །མནན་ཐོད་གནས་ཀྱི་ཁྱད་པར་ནི། །བགེགས་རིགས་སྤྱི་ལ་ཕག་ཐོད་དམ། །སྤྱང་ཐོད་ཝ་ཐོད་ཁྱི་ཐོད་དུ། །མཆོད་རྟེན་འོག་དང་ཟམ་ཆེན་རྔས། །རྒྱ་ལམ་བཞི་མདོར་སྡེ་བའི་འོག །རྒྱལ་པོའི་ཕུང་སྲི་མོན་བོད་ཧོར། །ཐོད་པ་ཆོས་འཁོར་དབུས་སུ་མནན། །ཕོ་སྲི་གཡག་ཐོད་གངས་ཞབས་སུ། །མོ་སྲི་ཁྱི་ཐོད་མཚོ་ནང་དུ། །དགྲ་སྲི་སྤྱང་ཀི་ལ་བཙས་འོག །འཕུང་སྲི་རྔ་མོང་གྲོག་གའི་ཕུག །གོད་སྲི་འཕར་སྤྱང་ཐོད་པའམ། ཤི་བ་རྗེས་མའི་རྭ་བའི་དབུས། །དམ་སྲི་འཕར་རམ་འུག་ཐོད་དུ། །མནན་པ་ཐེམ་པའི་འོག་ཏུ་མནན། རྫས་དང་ཕྱག་ལེན་མནན་པ་སྤྱི་འགྲེ་བྱས་པས་མཐུས། ཕྱག་ལེན་མི་ནུབ་པའི་ཆེད་དུ་པར་དགོས།

བདུད་འདུལ་ནག་མོའི་ལས་སྦྱོར་གསུམ་པའི་ཞལ་གདམས།

བདུད་འདུལ་ནག་མོའི་ལས་སྦྱོར་གསུམ་པའི་ཞལ་གདམས་གཏེར་ཆེན་ཆོས་ཀྱི་རྒྱལ་པོ་ཉི་མ་གྲགས་པས་མཛད་པ་བཞུགས་སོ། །བདུད་འདུལ་ནག་མོའི་ལས་སྦྱོར་གསུམ་པའི་ཞལ་གདམས་ནི། སངས་རྒྱས་ཀྱི་བསྟན་པ་དང་སེམས་ཅན་གྱི་སྤྱི་དོན་རྣལ་འབྱོར་པ་ལ་གནོད་པའི་དགྲ་བགེགས་བྱུང་ན་འདི་ཉིད་བརྩམས་ཏེ། བསྙེན་སྒྲུབ་དང་ལྡན་པའི་རྣལ་འབྱོར་པས། གཞུང་ནས་བཤད་པའི་དུར་ཁྲོད་སོགས་དབེན་པའི་གནས་སུ་ཕུང་ཤུལ་གྱི་ས་ལ་སྟེགས་བུ་གྲུ་གསུམ་མ་ཏྲཾ་བྲིས་པ་དཔེའུ་རིས་བཞིན་བྱས་པའི་སྟོང་ཁྲིའི་ཁར་ལྕགས་སམ་བྷནྷའི་སྣོད་དུ། ནས་ནག་གི་ཕྱེ་ལ་བཙན་དུག་ར་དུག་ཐང་ཕྲོམ་བཏབ་པ་ཁྲག་གིས་སྦྲུས་པའི་གཏོར་མ་རྣམས་གཞུང་ནས་བཤད་པ་ལྟར་བཤམས། མདུན་དུ་ཧོམ་ཁུང་གྲུ་གསུམ་བང་རིམ་དགུས་མཚན་པ་ཁ་དོག་ཅིང་མཐིལ་ཡངས་པ་གས་དང་སྲུབ་མེད་པ་དུག་ཁྲག་སྣ་ཚོགས་ཀྱིས་མདོག་བསྒྱུར་བ། བང་རིམ་ཐམས་ཅད་རྩང་གིས་བསྐོར་བར་བྱ། ནང་དུ་དགྲ་བོའི་ལིངྒ་ཕ་རོལ་གྱི་ཚོད་དང་མཐུན་པ་བྲི། བླ་རྟགས་ནི་མི་རིགས་བཞི་ལ་ཤ་བ་རྒྱལ་རིགས། ལུག་རྗེའུ་རིགས། རྟ་བྲམ་ཟེའི་རིགས། གཡག་གདོལ་བའི་རིགས་ཡིན། མ་ཤེས་ན་དྲག་ཁྲོས་སྲི་མནན་ལྟར་བྲི། ལིང་ཁྲུས་གཞན་དང་མཐུན་པར་བྱ། ལིངྒ་སྐྱེར་པའི་སྐམ་པས་ཁ་བསྡོམས་ལ་ལྷ་དབྱེ་རྫས་ངན་རླུང་ཕྱོགས་བསྟུན་པ་བདུག །ཧོམ་དུ་བཅུག །ཁ་ཆོད་ལ་པུ་རི་ཅེས་པ་ཚ་ཚ་རབ་གནས་ཅན་ཡིན། ཛ་ཁུང་ལ་རྡོ་རྗེས་མཚན་ཅེས་པ་ཐུན་ཁུང་དུ་སྐྱེར་པ་ལ་ཕུར་པ་ཡུ་བ་རྡོ་རྗེ་ཕྱེད་པ་བྱས་པས་བཅད་པ་ཡིན། ཐུན་རྫས་དང་མཚོན་ཆ་རྣམས་ཀྱིས་བསྐོར་ནས་འཇིགས་སུ་རུང་བ་བྱ། གོང་དུ་སྒྲུབ་པའི་དུས་ལྟར་གཏོར་ཚོགས་རྒྱས་པར་བཤམས། སྔགས་པ་གདན་ལ་འདུག་སྟེ། ཕྲིན་ལས་ཀྱི་ཆོ་ག་རྒྱུག་བྱང་ལྟར་བསྟོད་པ་ཡན་གྲུབ་ནས་བསྙེན་པ་བཟླ། ཚེ་སྒྲུབ་བསྙེན་པ་བཟླ་བསྲུང་བའི་དམིགས་རིམ་དང་བསྙེན་པ་བཟླ། བསྙེན་མཚམས་རྣམས་སུ་མཆོད་བསྟོད་བྱ། དེ་ནས་མདུན་བསྐྱེད་བསྙེན་པ་བྱ། གཟུ་དཔང་འདོན་གསེར་སྐྱེམས་མཆོད་ཧོམ་བསྐྱེད། བདེན་སྟོབས་རྒྱས་པ་གསུམ་བསྡུས་པ་ཅི་མང་དང་། རྩ་སྔགས་ཤམ་བུ་ཆེ་གེ་མོ་ཞེས་པ་ཁུག་རིལ་ཐུན་བྷྱོ། ཨ་ཀཪྴ་ཡ་ཛ་ཛ། ཉེར་གཅིག་བརྗོད། ཕོ་ཉ་བསྐུལ་བླ་འགུགས། སྒོ་མ་བཞིས་འགུགས་འཆིངས་སྡོམ་དང་མྱོས་པར་བྱེད། དེ་ནས་དགྲ་བོ་བྱད་མ་གང་ཡིན་པ་དེ་ཉིད་ལ་དམིགས་པ་གཞུང་ནས་བཤད་པ་ལྟར་བསྒོམས་ཞིང་རྦད་སྔགས་འདི་ལ་བརྩོན་པར་བྱ། ཧཱུྃ་བཛྲ་དྷཀྐི་ནི་སེང་ཧ་མུ་ཥ་ཧ་རི་ནི་ས་ཡ་མ་རུ་ཊ་སོགས་ཁུགས་རྟགས་མ་གསལ་བར་དུ་འགུགས་སྔགས་ཁུགས་རྟགས་གསལ་ནས་བསད་སྔགས་སོར་འདོན། ཐུན་མཚམས་སུ་མཆོད་གཏོར་དགྲ་བོའི་ཤ་ཁྲག་ཏུ་དམིགས་ལ་མཆོད། བསྟོད་པ་བྱ། བཀའ་སྲུང་མཆོད། ཐུན་དྲུག་བཅད་ཚོགས་བསྐང་རྒྱས་པ་བཏང་། རྨི་ལམ་རྟགས་མཚན་བྱུང་ནས། ཉེས་པ་བསྒྲགས་བསད་ལས་བྱ། ཤོག་ལིང་ཐུན་རྫས་རྣམས་ཐོད་པར་བཅུག་ཟན་ལིང་བསྒྲལ་ནས་བསྟབ་པ་བྱ། ཐོད་པ་སྔར་བཞིན་ཧོམ་དུ་བཅུག་བདེན་སྟོབས་བརྗོད། ཞག་གསུམ་ནས་ལ་མནན་པའི་སྔགས་བརྗོད། མནན་པ་རྒྱག་གཏོར་མ་འཕེན། ལས་ཀྱི་རྗེས་མི་མངོན་པར་བྱ། ༈ལས་ཚོགས་གཞན་ཐམས་ཅད་ཀྱང་གཞུང་འདི་ནས་དྲངས་དགོས། དམ་མེད་ལོག་ལྟ་ཅན་ལ་མ་སྟོན་ཅིག་གསུངས། སྨད་ལས་དགྲ་བགེགས་བསྒྲལ་བའི་ཟིན་རིས་བྲིས་པའོ། །མངྒལཾ།། །།བཀའ་རྫོགས་པ་ཆེན་པོ་བླ་མ་བདེ་མཆོག་འཁོར་ལོ་ལས། བདུད་འདུལ་ནག་མོ་རྒྱུག་བྱང་ནི། ཚིག་བདུན་མ་དང་སྐུ་གསུམ་གསོལ་འདེབས། ཆོས་སྤྱོད་ཐར་པའི་ཐེམ་སྐས། གསོལ་འདེབས། སྔོན་འགྲོ་དཀར་བགེགས་སོགས་སྤྱི་འགྲོས་ལྟར་བྱ། ལས་བྱང་གི་སྐྱབས་སེམས་ལན་གསུམ་བཀའ་བསྒོ་ནས་རཾ་ཡཾ་ཁཾ་གི་བར་མཆོད་པ་བྱིན་རླབས་སྔགས་ལ་ལན་གསུམ། དེ་བཞིན་ཉིད་ཀྱི་ཏིང་འཛིན་ནས་སརྦ་པཉྩ་ཨ་མྲྀ་ཏ་ལ་ཁ་རཾ་ཁ་ཧིའི་བར། འདི་བླ་མ་བརྒྱུད་པའི་བདུད་རྩི་ནང་མཆོད་སྤྲོས་ནས། ཐོད་པ་ཁོར་ཡུག་འབར་བ་རླུ་ནས། བསྙེན་མཚམས་སུ་བསྐྱལ་བསྙེན་པ་ཁྲི་འབུམ་སྐབས་ལྟར་བཟླ། བསྲུང་བའི་དམིགས་པ་འདོན་བསྒོམ་བྱ་ཞིང་བསྲུང་པའི་བསྙེན་པ་མང་ཉུང་གོང་དང་འདྲ། མཁའ་སྤྱོད་དཀར་མོའི་ཚེ་སྒྲུབ་འདོན་ནས་བསྙེན་པ་མང་ཉུང་གོང་དང་འདྲ། བསྙེན་མཚམས་རྣམས་སུ་མཆོད་བསྟོད་བསྡུས་པ་རེ་བྱ། བཀའ་སྲུང་གཏོར་མ་ལ་འགུགས་བསྟིམས་བྱས་ནས་འབུལ་གཏོར་དུ་དམིགས་ནས་འདོན། ཚོགས་འཁོར་བཤམས་ཤིང་བྱིན་རླབས་འདོན། ཚོགས་ཕུད་འབུལ་བསྐང་བ་འདོན། བསྒྲལ་ལས་ནི་ཕུད་བཤམས་ཤིང་བྱིན་གྱིས་རླབས། ཧཱུྃ་བྱིན་རླབས་ཐུགས་རྗེའི་བདག་ཉིད་ཞེས་པ་ནས། སྡོངས་གྲོགས་མཛོད་ཅེས་པའི་བར། ཕུད་མཆོད་གཟུ་དཔང་འདོན་ཞིང་བདེན་སྟོབས་ལན་གསུམ་བརྗོད། ཟོར་ཆུང་བཤམས་ཤིང་བཀུག་གཞུག་བསྡུས་པ་རེ་བྱ། ཕོ་ཉ་བསྐུལ་ཞིང་ཟོར་ཆུང་མདུན་བསྐྱེད་ལ་འབུལ། དེ་ནས་བསྒྲལ་ལས་ལ་འཇུག །ཕོ་བྲང་ཤར་སྒོ་བསྲུང་བའི་ལྷ་ནས། བཛྲ་ཀཱི་ལི་ཀཱི་ལཱ་ཡ་ཧཱུྃ་ཕཊ་བར། དེ་ནས་ཚེ་ལུང་ཁྲུས་ལུང་གིས་སྤར། ཟོར་ཆུང་བཤམས་ཤིང་བཀུག་གཞུག་བསྡུས་པ་བྱ། བཀའ་སྲུང་བསྐུལ་ཞིང་ཟོར་ཆུང་སྲུང་མར་འབུལ། བསྒྲལ་ཆས་རྣམས་ཐོགས་ཤིང་མཚམས་མཚམས་སུ་བསད་སྔགས་འདོན་ལ་བསྒྲལ། ལིང་རོ་ཕྱེད་མདུན་བསྐྱེད་ལ་འབུལ་ཞིང་བསྟབ་པ་བྱ། དེ་ནས་གཏོར་བཟློག་གཞུང་ལ་འཇུག་པ་ནི། རྡོའི་ཟོར་ཆུང་དང་ཤ་སྣ་ལིང་དུམ་ལྷ་གྲངས་དང་མཉམ་པ་བཤམ་ལ། འགུགས་གཞུག་བསྡུས་པ་རེ་བྱ། གཏོར་བཟློག་གྱེར་བཤམཞིང་ལྷ་མཚམས་སུ་ཟོར་ཆུང་མདུན་བསྐྱེད་ལ་འབུལ་བཟློག་སྔགས་འདོན་གཡབ་མོ་བྱ། ཟོར་ཆུང་བཤམས་རྩང་གྱེར་འདོན་མདུན་བསྐྱེད་ལ་འབུལ། ལྷག་མ་བསྔོ་གསེར་སྐྱེམས་མཆོད་སྒོ་དབྱེ་བྱ། མཁའ་འགྲོའི་ཙཀ་ལི་དང་གཏོར་གདུགས་ལ་དབང་བཞི་ལེན། ཡེ་ཤེས་པ་མཁའ་ལ་དཔགས་དམ་ཚིག་པ་རང་ལ་བསྡུ། གླུད་བཏང་དཔལ་འབར་བཙུགས་གཏོར་མ་དཔགས། ཆད་ཐོ་གྱེར། སྒོ་ཕྱི་ལ་ཧོམ་བསྐྱེད་བྱ་བདེན་སྟོབས་ལན་གསུམ་བརྗོད། རྒྱས་པར་བྱས་ན་བསྒྲལ་ལས་གཞུང་ལྟར་བྱ། བདེ་མཆོག་ལྟར་གྱི་དམོད་བཅོལ་བྱ། བཀའ་སྲུང་བསྐུལ་ཞིང་འཕེན། འདུག་ཟོར་བསྐུལ་ཞིང་འཕེན། ཟོར་སྣ་ཐམས་ཅད་དགྲ་ཕྱོགས་སུ་གཏད་པར་བསམ། བསྟན་མ་སྐྱོང་། སྒྲུབ་ཁང་ཐེམ་འོག་ཏུ་རྟ་བྲོ་བརྡུང། ཡར་ལོག་ནས་སྒྲུབ་མལ་དུ་ཚེ་འགུགས་བཀྲ་ཤིས་བསྔོ་སྨོན་རྒྱས་པར་བྱའོ། ཅེས་པ་འདི་ཡང་རིག་འཛིན་ཆེན་པོས་སོ། །མངྒལཾ།། །།