ཐེམས་བྱང་།

བཀའ་རྫོགས་པ་ཆེན་པོ་ཚེ་སྒྲུབ་བདུད་བཞིའི་གཡུལ་ལས་རྣམ་རྒྱལ་ལས༔ ཐེམས་བྱང་བཞུགས༔ རིག་འཛིན་ཚེ་ཡི་ལྷ་ལ་འདུད༔ ཨོ་རྒྱན་ཡུལ་གྱི་སྔགས་འཆང་པད་འབྱུང་ངས༔ རྒྱ་བོད་མཐའ་འཁོབ་ཡང་འཁོབ་མཐའ་དབུས་ཀུན༔ ཞབས་ཀྱིས་བཅགས་ཤིང་འགྲོ་དོན་མཐར་ཕྱིན་བྱས༔ ཁྱད་པར་བོད་ཁམས་རྒྱལ་བློན་རྗེ་འབངས་རྣམས༔ སྨིན་གྲོལ་ཆོས་ཀྱིས་བྱང་ཆུབ་ལམ་ལ་བཀོད༔ མ་འོངས་དོན་དུ་གཏེར་ཁ་དཔག་མེད་སྦས༔ ཁྱད་པར་ཚེ་སྒྲུབ་ཀུན་གྱི་སྙིང་པོ་མཆོག༔ བདུད་བཞིའིི་གཡུལ་ལས་རྣམ་པར་རྒྱལ་བའི་ཆོས༔ ཀུན་དང་མི་འདྲ་ཀུན་ལས་ཁྱད་འཕགས་འདི༔ ནོར་འཁྲུལ་ལྷག་ཆད་སྤང་ཕྱིར་ཐེམས་སུ་འདེབས༔ མ་འོངས་རྗེས་འཇུག་རྣམས་ཀྱིས་བརྟག་མཁས་བྱས༔ ས་མ་ཡཱ༔ རྒྱ་རྒྱ་རྒྱ༔ ལོ་རྒྱུས་དང་ནི་ཟུར་གསལ་ཟིན་བྲིས་ཀྱིས༔ རྗེས་འཇུག་ཡིད་ཆེས་དང་བ་བསྐྱེད་པར་བསྟན༔ ཁོག་འབུབ་དབང་ཆོག་རྒྱས་བསྡུས་ཟུར་གསལ་བཞི༔ སྨིན་བྱེད་ཆོས་འདིའི་སྡོང་པོ་ལྟ་བུར་བསྟན༔ ཁྲེགས་ཆོད་དང་ནི་ཐོད་རྒལ་ཁྲིད་རིམ་གཉིས༔ གྲོལ་ལམ་མཐར་ཐུག་ཡང་སྙིང་ཨེ་མ་ཧོ༔ སྒྲུབ་ཐབས་བུམ་སྒྲུབ་ཙཀྲ་རྣམ་གསུམ་གྱིས༔ འཆི་བདག་བདུད་ཀྱི་གཡུལ་ལས་རྒྱལ་བར་བྱེད༔ རང་ལུས་རླུང་སྦྱོར་གནད་ཀྱི་གདམས་པ་ཡིས༔ ཕུང་པོའི་བདུད་ཀྱི་གཡུལ་ལས་རྒྱལ་བར་བྱེད༔ གཞན་ལུས་རླུང་སྦྱོར་བདེ་བའི་ཉམས་འཁྲིད་ཀྱིས༔ ཉོན་མོངས་བདུད་ཀྱི་གཡུལ་ལས་རྒྱལ་བ་བྱེད༔ དབང་ལག་རྟག་ངུ་ཅོང་ཞི་ཨ་རུ་ར༔ ཉེ་ཤིང་ར་མོ་ཤག་དང་དྲི་ཆེན་དང་༔ བྱེ་མ་ཆུ་རྡོ་བཅུད་ལེན་རྣམ་པ་བཅུས༔ ལྷ་བུའི་བདུད་ཀྱི་གཡུལ་ལས་རྒྱལ་བར་བྱེད༔ ལས་བྱང་བྱིན་འབེབས་འཛབ་དགོངས་ཐུགས་དམ་བསྐུལ༔ སྦྱིན་སྲེག་ལས་ཚོགས་རྣམ་པ་དྲུག་པོ་ཡིས༔ ལས་བཞི་ཀུན་གྱི་ཁ་སྐོང་ཚང་བར་རྫོགས༔ གཏེར་སྲུང་མཆོད་ཐབས་ཀླུ་སྨན་དཀར་མོ་ཡིས༔ ནོར་དང་འབྲུ་སྣ་རིགས་བརྒྱུད་སྩོལ་བའི་ཐབས༔ འདི་ལྟར་ཁ་ཚང་དོན་འདྲིལ་མན་ངག་འདུས༔ སྙིང་པོ་ལས་ཀྱང་ཡང་སྙིང་མཆོག་གི་ཆོས༔ པདྨ་འབྱུང་གནས་བདག་གི་སྙིང་ཏིག་འདི༔ ཆོས་ཚན་སུམ་ཅུ་ཐམ་པས་ཡོངས་སུ་རྫོགས༔ མ་འོངས་སྐལ་ལྡན་ཉམས་སུ་ལེན་པ་རྣམས༔ བསྲེ་བསླད་མ་བྱེད་བཀའ་འདི་ཚུལ་བཞིན་སྤྱོད༔ མི་དགེའི་གཞིར་གྱུར་ཚེ་འདི་བློ་ཡིས་ཐོང་༔ ཚུལ་བཞིན་འབད་པས་འཆི་མེད་མ་གྲུབ་ན༔ ང་ཡིས་བསླུས་སོ་ཡིད་ཆེས་ཐེ་ཚོམ་སྤོངས༔ ས་མ་ཡཱ༔ རྒྱ་རྒྱ་རྒྱ༔ མ་འོངས་དུས་སུ་ཆོས་འདིར་དབང་བའི་བུ༔ ཆོས་རྒྱལ་སྤྲུལ་པ་རྩོད་ལྡན་ཆོས་ཀྱི་རྒྱལ༔ མིང་ཅན་ལ༔ མདུན་རྒྱབ་སྨེ་བའི་ག་ཤས་བརྒྱན་པ་འོང་༔ མཚོ་རྒྱལ་སྤྲུལ་པ་བང་སོའི་འདབས་ནས་འབྱུང་༔ དམ་འཛིན་སྐྱེ་བ་མངའ་རིས་ཡུལ་ནས་འོང་༔ རྨ་ཐོག་སྐྱེ་བ་ལྷོ་བྲག་ཕྱོགས་ནས་འོང་༔ འོ་བྲན་སྐྱེ་བ་ཉང་གི་ཡུལ་ནས་འོང་༔ ཅོག་རོའི་སྐྱེ་བ་ཁམས་ཀྱི་ཡུལ་ནས་འོང་༔ ནམ་སྙིང་སྤྲུལ་པ་འཇང་གི་ཕྱོགས་ནས་འབྱུང་༔ རྩེ་མང་སྤྲུལ་པ་སྲིན་མོ་་ནས་འབྱུང་༔ དཔལ་སེང་སྤྲུལ་པ་མང་ཡུལ་འགྲམ་ནས་འོང་༔ ཆོས་ཀྱི་བདག་པོ་སྐལ་ལྡན་འདི་དགུ་ལ༔ ཆོས་འདི་སྤེལ་མཁས་སྐལ་ལྡན་བརྟག་མཁས་གྱིས༔ གཞན་ཡང་ད་ལྟ་དཀྱིལ་འཁོར་འདིར་ཚོགས་ཤིང་༔ དབང་ཆོས་ཐོབ་པའི་སྐལ་ལྡན་ཕོ་མོ་འགའ༔ ཕྱོགས་ཕྱོགས་ངེས་མེད་ཡུལ་ཁམས་ཀུན་ནས་འདུ༔ དེ་དུས་དངོས་སམ་ཉམས་དང་རྨི་ལམ་དུ༔ ཆོས་བདག་སྲུང་མས་རྒྱུད་བསྐུལ་ལུང་བསྟན་བྱེད༔ དེ་དུས་ཆོས་འདི་སྟོན་མཁས་གྱིས་ཤིག་བུ༔ སྐལ་མེད་འགྲོ་བ་མཐོ་དམན་སུ་ཡིན་ཀྱང་༔ ཟབ་ཆོས་འདི་ཉིད་རླུང་ཕྱོགས་ཙམ་མ་བསྒྲགས༔ གདམས་པ་ཟགས་སུ་མ་འཇུག་སྙིང་གཏམ་ཡིན༔ རང་ཉམས་མ་ལོན་གཞན་ལ་མ་སྤེལ་རྒྱ༔ གང་ཟག་མ་རྟོགས་ཆོས་འདི་མ་སྟོན་རྒྱ༔ དབང་བཞི་མ་བསྐུར་གདམས་པ་མ་སྦྱིན་རྒྱ༔ ཤོག་སེར་ཞལ་བཤུས་མ་དཔེ་ཡང་གཏེར་སྦོས༔ མ་འོངས་དུས་སུ་རྡོ་རྗེའི་མིང་ཅན་གྱིས༔ ཡང་གཏེར་འདོན་ཞིང་འགྲོ་དོན་བྱེད་པ་འོང་༔ ཚིག་ཆད་མེད་དོ་ཞལ་བཤུས་ལེགས་པར་རྒྱོབ༔ འབྲུ་ཆད་གསོབས་ཤིག་གཏེར་སྟོན་རིག་པས་དཔྱོད༔ བསྲེ་བསླད་མ་བྱེད་མན་ངག་འཆལ་དོགས་ཡོད༔ ཚིག་ལ་ཉོན་ཅིག་བསླུ་མེད་ང་ཡི་བཀའ༔ ལས་འཕྲོ་ཅན་གྱི་བུ་དང་འདི་འཕྲད་ཤོག༔ སྲུང་མས་ཆོས་འདིར་བྱ་ར་གྱིས་ཤིག་རྒྱ༔ ས་མ་ཡཱ༔ རྒྱ་རྒྱ་རྒྱ༔ གཏེར་རྒྱ༔ སྦས་རྒྱ༔ ཟབ་རྒྱ༔ གཉན་རྒྱ༔ གཏད་རྒྱ༔ ས་མ་ཡཱ༔ རྒྱ་རྒྱ་རྒྱ༔ ཁོ་བོ་ཁམས་ཞིག་ཉི་མ་གྲགས་པས་ཟབ་བུ་ལུང་ནས་གདན་དྲངས་ཤིང་༔ ཁམས་སྲིང་མོ་རྫོང་གི་དབེན་གནས་སུ་ཤོག་སེར་ལས་ཕབ་པའོ། །མངྒ་ལཾ། ༈། སྐལ་ལྡན་རྣམས་སྙན་གཡར་བར་ཞུ། དུས་འདི་ཡང་སྙིགས། བསྐལ་པ་འདི་ཡང་དམན། མི་ཚོད་མི་ལ་མེད། བདག་སྤྲང་པོ་འདོ་མེད་རིག་འཛིན་རྣམ་རྒྱལ་ང་ལ། སློབ་དཔོན་ཆེན་པོའི་ཐུགས་རྗེ་བྱིན་རླབས་ཀྱི་མཐུས། ཆོས་ཟབ་ཕྲན་བུ་དང་འཕྲད་ནས། ཤོག་སེར་ལས་བོད་ཡིག་ཏུ་གང་ཕབ་པའི་ཆོས་རྣམས་ལ་རང་བཟོ་བྱས་མེད་དོ། བསྣན་ཕྲི་བྱས་མེད་དོ། ཡི་གེའི་སྡེབ་ནོར་དང་འབྲུ་ཆད་འདྲ་ནི་ཅི་མང་ཡོང་བ་ཡོད་དོ། བསླབ་པའི་ཡོན་ཏན་གྱི་སྐོར་ལ་གཏི་ཐུག་ནག་སངས་སངས་ཡིན་པའི་སྟབས་ཀྱིས། ཡི་གེའི་གཟུགས་ལེགས་པོ་མེད་དོ། འབྲུ་ལེགས་པོ་མེད་དོ། སྡེབ་སྦྱོར་ལེགས་པོ་མེད་དོ། བདག་མི་རླུང་ཁམས་པ་ཡིན་པས་འབྲུ་ཆད་འདྲ་ཡང་ཡོད་འོང་ངོ་། ཁྱེད་མཁས་གྲུབ་རྣམས་ཀྱིས་དགོངས་པ་མི་ཁྲེལ་ཞིང་། སྐྱོན་དེ་དག་གི་ཚོགས་གང་འདུག་བཅོས་གྲོགས་གནང་བ་མཁྱེན་མཁྱེན། མངྒ་ལཾ།