ཚེའི་སྒྲུབ་ཆེན་གྱི་ཁོག་འབུབས་ཆེན་མོ།
བཀའ་རྫོགས་པ་ཆེན་པོ་ཚེ་སྒྲུབ་བདུད་བཞིའི་གཡུལ་ལས་རྣམ་རྒྱལ་ལས༔ ཚེའི་སྒྲུབ་ཆེན་གྱི་ཁོག་འབུབས་ཆེན་མོ་བཞུགས༔ ཚེ་ལྷ་རིག་འཛིན་རྒྱལ་བའི་ཚོགས་ལ་འདུད༔ ནུབ་ཕྱོགས་བདེ་ཅན་ཆོས་སྐུ་སྣང་མཐའ་ཡས༔ རི་བོ་ཏ་ལར་འཕགས་པ་སྤྱན་རས་གཟིགས༔ དྷ་ན་ཀོ་ཤར་བརྫུས་སྐྱེས་པདྨ་འབྱུང་༔ དབྱེར་མེད་ཐ་དད་དོན་ལ་ཡོད་མ་ཡིན༔ དེ་ཕྱིར་ཁོ་བོ་པདྨ་འབྱུང་གནས་ངས༔ རྒྱ་ཆེ་གྲངས་མང་ཚེ་སྒྲུབ་ཀུན་གྱི་བཅུད༔ བདུད་བཞིའི་རྣམ་རྒྱལ་ཚེ་ཡི་སྒྲུབ་ཆེན་བཀོད༔ ད་ལྟ་དུས་བཟང་སེམས་ཅན་བསོད་ནམས་ཆེ༔ མ་འོངས་ལྔ་བརྒྱའི་དུས་ཀྱི་སྐྱེ་འགྲོ་རྣམས༔ ཚེ་ཐུང་ནད་མང་གློ་བུར་བར་ཆད་སྡང་༔ དེ་ཕྱིར་མ་སྤེལ་རིན་ཆེན་གཏེར་དུ་སྦོས༔ མཚོ་རྒྱལ་ཉིད་ཀྱིས་ཉམས་ལེན་མཐར་ཕྱིན་མཛོད༔ ཕྱི་མའི་དུས་སུ་ཆོས་འདི་དར་རྒྱས་ཆེ༔ ས་མ་ཡཱ༔ རྒྱ་རྒྱ་རྒྱ༔ དེ་ཡང་ཡང་ཟབ་ཚེའི་སྒྲུབ་ཆེན་གྱི་རིམ་པ་ནི་དོན་རྣམ་པ་གསུམ་གྱིས་སྟོན་ཏེ༔ སྔོན་འགྲོ་དང་དངོས་གཞི་རྗེས་སོ༔ དང་པོ་སྔོན་དུ་འགྲོ་བའི་རིམ་པ་ནི་དོན་རྣམ་པ་བདུན་ཏེ༔ སྟོན་པ་ཕུན་སུམ་ཚོགས་པ༔ སྒྲུབ་པའི་གྲོགས་དང་མཆེད་ལྕམ་ཕུན་སུམ་ཚོགས་པ༔ གནས་ཕུན་སུམ་ཚོགས་པ༔ ཡོ་བྱད་ཕུན་སུམ་ཚོགས་པ༔ སྒྲུབ་རྫས་ཕུན་སུམ་ཚོགས་པ༔ དུས་ཕུན་སུམ་ཚོགས་པ༔ བཀོད་པ་ཕུན་སུམ་ཚོགས་པ་དང་བདུན་ནོ༔ ལས་འཕྲོ་ཅན་དང་འཕྲད་པར་ཤོག༔ ས་མ་ཡཱ༔ རྒྱ་རྒྱ་རྒྱ༔ དང་པོ་སྟོན་པ་ཕུན་སུམ་ཚོགས་པ་ནི༔ ཕྱི་ནང་གསང་བ་གསུམ་སྟེ༔ ཕྱི་ཐོས་པ་ཕུན་སུམ་ཚོགས་པས་ཐེག་པ་མཐའ་དག་གི་ཚིག་དོན་རབ་ཏུ་ཕྱེད་ཅིང་༔ མ་འདྲེས་པར་སོ་སོར་གསལ་བ༔ ནང་བསམ་པ་ཕུན་སུམ་ཚོགས་པས་ཆོས་སྒོ་བརྒྱད་ཁྲི་བཞི་སྟོང་གི་དོན་ཐམས་ཅད་ཐེག་པ་གཅིག་གི་རོལ་པ་ལས་ཀུན་ཤར་བ་དང་༔ ཀུན་གཅིག་ལ་འདུས་པ་སོགས་ཀྱི་བྱེ་བྲག་སོ་སོར་གསལ་ཞིང་མ་འདྲེས་པར་བླང་དོར་དབྱེ་བ་ལ་མཁས་པ༔ གསང་བ་བླ་མེད་དོན་གྱི་སྙིང་ཐིག་ངོ་བོ་ཉིད་ཀྱི་སྟེང་དུ་འདྲིལ་ཞིང་བསྐྱེད་རྫོགས་ལས་སུ་རུང་ནས༔ རབ་འབྱམས་ཀྱི་འཕྲིན་ལས་ལ་མ་རྨོངས་པ་ཞིག་གལ་ཆེ་སྟེ༔ སློབ་དཔོན་ཕུན་སུམ་ཚོགས་པ་ནི་དཔྲལ་བའི་མིག་དང་ཁོང་པའི་དོན་སྙིང་ལྟ་བུ་ཡིན་པས་དོན་དེ་རྣམས་ལས་འགལ་བ་ནི་རིང་དུ་སྤང་བར་བྱའོ༔ གཉིས་པ་སྒྲུབ་པའི་གྲོགས་དང་མཆེད་ལྕམ་ཕུན་སུམ་ཚོགས་པ་ནི༔ གྲོགས་ནི་མཚན་ལྡན་གྱི་རིག་མ་སྟེ༔ དམ་ཚིག་གཙང་ཞིང་ངང་རྒྱུད་རིང་བ༔ ཆོས་ལ་བརྩོན་ཞིང་གསང་སྔགས་བླ་མེད་ལ་དད་པ༔ ཕྲག་དོག་དང་མིག་སེར་ཆུང་བ༔ ཀུན་ལས་མཛེས་ཤིང་ཁྱད་པར་འཕགས་པ་ཞིག་གལ་ཆེའོ༔ མཆེད་ལྕམ་ནི་སྒྲུབ་ཟླ་རྣམས་ཏེ༔ ཐེག་པ་ཆེན་པོའི་ཆོས་ཐོས་ཤིང་ལྟ་སྒོམ་སྤྱོད་གསུམ་ལ་མི་སྐྲག་པ༔ དད་པ་དང་དམ་ཚིག་དག་སྣང་སྙིང་རུས་ཞེ་བཅད་སོགས་ཡང་དག་པར་ལྡན་པ༔ ཆོས་ཀྱི་ཕྱིར་དུ་དཀའ་བ་སྤྱོད་ནུས་ཤིང་ཚེ་འདི་བློས་བཏང་བ་ཁོ་ན་གལ་ཆེའོ༔ གསུམ་པ་གནས་ཕུན་སུམ་ཚོགས་པ་ནི༔ ཤར་རི་བརྡལ་བ༔ ལྷོ་རི་སྤུངས་པ༔ ནུབ་རི་སྐྱོར་བ༔ བྱང་རི་གཡོལ་བ༔ རི་རྒྱུད་གངས་དང་འབྲེལ་བའམ་རྒྱབ་རི་བཟང་བ༔ ཁ་ནུབ་བམ་ལྷོར་བསྟན་པ༔ འཇིག་རྟེན་པའི་རྣམ་གཡེང་དང་མི་རྒོད་ཀྱི་འཚེ་བ་མེད་པ༔ གོང་མས་ཞབས་ཀྱིས་བཅགས་པའམ༔ ལུང་ནས་བཤད་པའི་གནས་སམ༔ ཡིད་དང་མཐུན་ཞིང་བསིལ་དྲོད་སྙོམས་པ༔ ས་མདོག་དམར་ཞིང་སྣུམ་ལ་བཅུད་ལེན་གྱི་སྨན་སྣ་ཚོགས་སྐྱེ་བ་ཞིག་གལ་ཆེའོ༔ བཞི་པ་ཡོ་བྱད་ཕུན་སུམ་ཚོགས་པ་ནི༔ ཕྱི་ནང་གསང་བའི་དམ་རྫས་དང་སྒྱུ་ལུས་ཀྱི་ཉེར་མཁོ་སྟེ༔ མདོར་ན་ཆོས་བཞིན་སྤྱོད་པ་ལ་མི་འགལ་ཞིང་གྲོགས་སུ་འགྲོ་བའི་རིམ་པ་རྣམས་སོ༔ ལྔ་པ་སྒྲུབ་རྫས་ཕུན་སུམ་ཚོགས་པ་ནི༔ འཆི་བདག་གི་བདུད་གཞོམ་པའི་ཕྱིར་ཚེའི་སྒྲུབ་ཐབས་དང་མཐུན་པའི་ཡོ་བྱད་དེ༔ བུམ་པ་མེ་ལོང་བྷན་ངྷ་དུམ་བུ་གཅིག་པ༔ ཨ་མྲྀཾ་ཏ་སྐུ་འབག་སྒྲུབ་ཡིག་པོ་ཏི༔ རྡོ་རྗེ་དྲིལ་བུ་དང་རོལ་མོ༔ དར་ཚོན་རྣམ་ལྔའི་མདའ་དར༔ མདའ་བཞི་གྲི་བཞི་ཕུར་པ་བཞི་ཚོན་སྐུད་ཀྱི་དྲ་བ༔ སྟག་ཤམ་གྱི་སྒབ་བསྐོར༔ ཡོལ་བ་བླ་རེ་སྤྱན་གཟིགས་ཕུན་སུམ་ཚོགས་པའི་རིམ་པ་དང་༔ ཚེ་སྒྲུབ་པའི་རིལ་བུ་ལ་སོགས་ཕུན་སུམ་ཚོགས་པར་གསོག་གོ༔ ཕུང་པོའི་བདུད་བཅོམ་པའི་ཕྱིར་དུ་རང་ལུས་ཀྱི་སྐབས་ལྟར་གྱི་ཁམས་འཕྲོད་ཀྱི་ཡོ་བྱད་རིམ་པ་རྩི་སྨན་བཅུད་ལྡན་རྣམས་བསྒྲུབ་བོ༔ ཉོན་མོངས་པའི་བདུད་བཅོམ་པའི་ཕྱིར་དུ་མཚན་ལྡན་གྱི་རིག་མ་རྩ་དང་རླུང་གི་དྲོད་དང་ལྡན་པ༔ ཕྱི་ནང་གསང་གསུམ་གྱི་ཡོན་ཏན་ཚང་ཞིང་པདྨའི་རིགས་ཀྱི་བུད་མེད་བསྟེན་ནོ༔ ལྷའི་བུའི་བདུད་བཅོམ་པའི་ཕྱིར་དུ་དབང་ལག་དང་རྟག་ངུ་སོགས་བཅུད་ལེན་གྱི་གཞུང་དང་མཐུན་པའི་རྫས་ཁྱད་པར་ཅན་བསག་གོ༔ དྲུག་པ་དུས་ཕུན་སུམ་ཚོགས་པ་ནི༔ ལོ་ཟླ་ཞག་གསུམ་ནག་པོའི་རིགས་ཀྱིས་མ་ཆོད་པ༔ གཟའ་སྐར་དང་ཚེས་གྲངས་མི་མཐུན་པ་མེད་ཅིང་འགྲུབ་སྦྱོར་དང་ལྡན་པ༔ མེ་ཏོག་ཁ་འབུས་པའམ་འབྲས་བུ་སྨིན་པའི་དུས་སོགས་སོ༔ བདུན་པ་སྤྱོད་པ་ཕུན་སུམ་ཚོགས་པ་ནི༔ ཕྱི་ནང་གསང་གསུམ་གྱི་རྣམ་གཡེང་སོགས་སྒྲུབ་པ་ལ་འཇུག་ཁར་འཕྲོ་བཅད་ཅིང་ཚགས་བསྡམས༔ སྒྲུབ་ཁང་དང་ཡོ་བྱད་ཟླ་གྲོགས་སྒྲུབ་ཟླ་རྣམས་ཚུལ་དང་མཐུན་པ་བསྟེན་ཞིང་མི་ལྡན་པ་རྣམས་སྤང་༔ གསང་བ་རང་གི་སྒོ་གསུམ་ལ་དམ་བཅའ་དྲག་པོ་འདེབས་ཤིང་༔ སྒྲུབ་པ་སྲོག་དང་བརྡོ་ནུས་པར་བྱེད་ཅིང་སྒྲུབ་རྫས་རྣམས་རྒྱན་བཀོད་ལྟར་ཚུལ་དང་ལྡན་པར་བཤམས༔ ས་མ་ཡཱ༔ རྒྱ་རྒྱ་རྒྱ༔ གཉིས་པ་དངོས་གཞིའི་རིམ་པ་ནི༔ དོན་རྣམ་པ་བཅུ་གཅིག་གིས་སྟོན་ཏེ༔ ས་ཆོག་བྱ་ཞིང་སྟེགས་བུ་བཟོ་བ༔ སློབ་མ་འཇུག་ཅིང་སྟ་གོན་བྱ་བ༔ ཕྱི་ནང་གསང་གསུམ་གྱི་མཚམས་བཅད་ཅིང་དམ་སྲི་མནན་པ༔ ཐིག་ཆོག་བྱ་ཞིང་ད་ལ་འདྲི་བ༔ ལྷག་ཆད་གསོ་ཞིང་མ་ཊཾ་བསྒྲལ་བ༔ སྦྱིན་སྲེག་བུམ་པ་སྟ་གོན་བྱ་བ༔ རྒྱན་བཀོད་དགྲམ་ཞིང་ཞལ་བཀོད་གདབ་པ༔ དམ་རྫས་བཤམས་ཤིང་བྱིན་ཆེན་འབེབས་པ༔ ལས་ཀྱི་གཞུང་བསྲང་ཞིང་བསྙེན་སྒྲུབ་ཀྱི་རིམ་པ༔ ཉུལ་ལེ་བསྐྲད་ཅིང་སྒྲུབ་པའི་ལྟས་བརྟག་པའོ༔ ས་མ་ཡཱ༔ རྒྱ་རྒྱ་རྒྱ༔ དང་པོ་ས་ཆོག་བྱ་ཞིང་སྟེགས་བུ་བཟོ་བའི་རིམ་པ་ནི༔ ནུབ་ཕྱོགས་ཀྱི་རི་ས་མདོག་དམར་ལ་སྣུམ་འཇམ་ལྡན་པ༔ དབྱིབས་ནི་གཞོང་པ་མར་ཁུས་བཀང་བ་འདྲ་བའམ༔ ཚེས་བརྒྱད་ཀྱི་ཟླ་བ་འདྲ་བའི་སྟེང་དུ་རས་དཀར་དྲི་མ་མེད་པའི་ཁར་འབྲུའི་ཚོམ་བུ་བཀོད་དེ༔ ཆ་གསུམ་གྱི་གཏོར་མ་བཤམས་ནས་བྱིན་གྱིས་བརླབ་ཅིང་ས་བླང་བ་འདི་སྐད་དོ༔ ཧཱུྃཿ ས་གཞི་རིན་ཆེན་ས་ཡི་ལྷ་མོ་ཆེ༔ གསེར་གྱི་མདོག་ཅན་སྐུ་ཕྱེད་ས་ལས་འཐོན༔ མཆོད་སྦྱིན་བུམ་པ་རིན་ཆེན་རྒྱན་ལྡན་མ༔ གསེར་སྐྱེམས་དམ་རྫས་གཏོར་མ་འདི་བཞེས་ལ༔ སྔོན་གྱི་དམ་བཅས་དུས་འདིར་བརྩེར་དགོངས་ཏེ༔ བྱང་ཆུབ་བསྒྲུབ་པའི་ས་འདི་བདག་ལ་སྩོལ༔ གཞན་ཡང་འབྱུང་བ་ས་ཡི་བདག༔ བཅུ་གཉིས་ལོ་ཡི་རྟ་ལ་ཞོན༔ ཀོ་ལོང་སྡོམ་པའི་ལྷ་དགུ་སོགས༔ འབྱུང་པོའི་ཚོགས་རྣམས་མ་ལུས་ཀུན༔ མཆོད་སྦྱིན་གཏོར་མ་འདི་བཞེས་ལ༔ གནས་རྟེན་གཞན་དུ་ཁྱོད་སོང་སྟེ༔ ས་འདི་བཀྲ་ཤིས་བྱིན་ཆགས་མཛོད༔ སརྦ་བྷ་ལིངྟ་གྷྲི་ཧ་ན་ཁཱ་ཧི་ཁཱ་ཧི༔ ཤནྟིང་ཀུ་རུ་ཡེ་སྭཱ་ཧཱ་༔ ཅེས་གཏོར་མ་ཕུལ་བས་ལྷ་མོ་དགའ་བའི་མདངས་ཕྱུངས་ཏེ༔ ཅི་དགར་སྤྱོད་ཅིག་པའི་གནང་བ་བྱིན་པར་བསམས༔ དེ་ནས་ས་འདུལ་བ་ནི་རང་ཉིད་དབང་ཆེན་དུ་གསལ་བའི་སྤྲུལ་པ་ལས༔ ཡེ་ཤེས་ཀྱི་ཕུར་པ་ཞིག་འཕྲོས་ཏེ་ས་ལ་བབས་པས༔ གདོན་བགེགས་དང་འབྱུང་པོ་ཐམས་ཅད་བསྐྲད་གཟིར་རེངས་བར་བྱས་ནས་ས་བདག་གི་དབང་དུ་གྱུར་པར་བསམ་མོ༔ ཨཱོཾ་བཛྲ་ཀྲོ་ཏ་ཧྱ་གྷྲི་ཝ༔ བཛྲ་ཀཱི་ལི་ཀཱི་ལཱ་ཧཱུྃ་ཕཊ༔ གྷ་གྷ་གྷ་ཏ་ཡ་སརྦ་དུཥྟཱན་གནོད་བྱེད་འབྱུང་པོ་ཧཱུྃ་ཕཊ༔ ཅེས་བརྗོད་དོ༔ ས་བརྐོ་བ་ནི༔ ས་བདག་ལྟོ་འཕྱེ་ཁོ་རང་གི་ཕོ་བྲང་ལ་གཞོགས་གཡོན་ཕབ་སྟེ་ཟླ་བ་སྔས་སུ་བཅུག་ནས་འཁོར་བས༔ དཔྱིད་གསུམ་ལ་མགོ་ནུབ་ཁ་བྱང་༔ དབྱར་གསུམ་ལ་མགོ་བྱང་ཁ་ཤར༔ འཁོར་ཚུལ་དེའི་ལྟོ་བ་ནས་ས་བླང་ངོ་༔ ས་བརྟག་པ་ནི༔ ཁྲུ་གང་བརྐོས་པའི་དོང་དུ་ས་སླར་བླུགས་པས་ཁེངས་དང་ལུད་ན་དེ་ནས་བརྐོ་ཞིང་༔ མ་གང་ན་གཞན་ནས་སོ༔ གྱོ་མོ་སོལ་བ་འདམ་པ་གསེག་མ་སོགས་བྱུང་ན་ངན་པས་སྤང་ངོ་༔ ས་སྦྱང་བ་ནི་རང་ཉིད་དབང་ཆེན་དུ་གསལ་བའི་ཐུགས་ཀ་ནས་ཡི་གེ་བྷྲཱུྃ་འཕྲོས༔ སའི་ཕུང་པོ་ལ་ཕོག་དངོས་འཛིན་སྦྱངས་རིན་པོ་ཆེའི་རང་བཞིན་གཞལ་ཡས་ཁང་གི་རྒྱུ་ཕུན་སུམ་ཚོགས་པར་བསམ་མོ༔ བྷྲཱུྃ་ཛྙཱ་ན་མཎྜལ་བྷྲཱུྃ་ཅེས་བརྗོད་དོ༔ ས་སྦོལ་བ་ནི་ཆུ་བླངས་ཏེ༔ ཀྱེ༔ མཚོ་སྨན་ཀླུ་མོ་བཞིན་མཛེས་མདངས་ལྡན་མ༔ ཚེ་དབང་ཕོ་བྲང་འདེབས་ཕྱིར་ཆུ་འདི་སྩོལ༔ འབྲུ་མཆོག་ནས་ཀྱི་མཆོད་པ་འབུལ་གྱིས་བཞེས༔ ར་བ་བཞི་ལ་ནམ་མཁའི་དབྱིངས་ན་གནས༔ འབྲིང་པོ་བཞི་ལ་བར་སྣང་ཁམས་ལ་བཞུགས༔ ཐ་ཆུང་བཞི་ལ་རྒྱ་མཚོའི་ཀློང་དུ་ཉལ༔ ཁྱོད་ནི་མི་ཟད་ཆུ་རྒྱུན་སྩོལ་བའི་བདག༔ བདག་ལ་བྱང་ཆུབ་ཆུ་རྒྱུན་དངོས་གྲུབ་སྩོལ༔ ཅེས་བརྗོད་ས་སྦོལ་ལོ༔ སྟེགས་བུ་བཟོ་བ་ནི༔ གནས་ཁང་གི་ཁྱོན་དང་བསྟུན་ཏེ༔ གྲུ་བཞི་པ་མཛེས་འཇམ་མཁྲེགས་པ༔ དངོས་གྲུབ་མྱུར་དུ་འཐོབ་པའི་ཕྱིར་དབུས་མཐོ་བ༔ བར་ཆད་བྱང་ཕྱིར་བྱང་ཤར་དམའ་བ༔ མེ་ལོང་གི་ངོས་ལྟར་འཇམ་པར་བྱ་ཞིང་རྣམ་ལྔ་དང་དྲི་བཟང་གིས་ཆག་ཆག་གདབ༔ ས་མ་ཡཱ༔ རྒྱ་རྒྱ་རྒྱ༔ གཉིས་པ་སློབ་མ་འཇུག་ཅིང་སྟ་གོན་བྱ་བ་ནི༔ རྡོ་རྗེ་སློབ་དཔོན་ཁྲི་ལ་འཁོད་ཅིང་༔ སློབ་མ་རྣམས་ཀྱིས་ཕྱག་འཚལ་ཞིང་འདི་སྐད་ཞུའོ༔ ཀྱེ༔ ཐུགས་རྗེ་ཆེར་ལྡན་འགྲོ་བའི་སྐྱབས༔ དཀྱིལ་འཁོར་མངའ་བདག་དགོངས་སུ་གསོལ༔ བདག་ཅག་སྐྱབས་མེད་འགྲོ་བ་རྣམས༔ འཆི་མེད་རིག་འཛིན་བསྒྲུབ་འདོད་པས༔ སྐྱབས་སུ་འགྲོ་ཞིང་སོ་ཐར་སྡོམ༔ ཉན་ཐོས་འདུལ་ཁྲིམས་བྱང་ཆུབ་སེམས༔ རིག་འཛིན་སྔགས་ཀྱི་དམ་ཚིག་རྣམས༔ མགོན་པོས་བདག་ལ་སྩལ་དུ་གསོལ༔ ཅེས་བརྗོད་མེ་ཏོག་ལག་གཡོན་འབུལ༔ དེ་ནས་སློབ་དཔོན་གྱིས་ལན་ནི༔ ཀྱེ་ཧོ༔ འདིར་ཚོགས་སྐལ་ལྡན་རྣམས༔ དུས་གསུམ་སངས་རྒྱས་ཐམས་ཅད་ཀྱང་༔ བླ་མེད་ཆོ་ག་འདི་ཡིས་གྲོལ༔ རིག་འཛིན་ཚེ་ཡི་དཀྱིལ་འཁོར་དུ༔ བདུད་བཞི་མ་ལུས་དཔུང་བཅོམ་ནས༔ དངོས་གྲུབ་མྱུར་དུ་འཐོབ་པའི་དོན༔ ཁྱེད་རྣམས་སྡོམ་དང་དམ་ཚིག་ལོང་༔ བླ་མེད་བྱང་ཆུབ་ཨེ་མ་ཧོ༔ ཅེས་བརྗོད་གནང་བ་སྦྱིན༔ དེ་ནས་འདི་སྐད་བརྗོད་པར་བྱའོ༔ ད་ཁྱེད་རང་རྣམས་མ་ཡེངས་པར་རྩེ་གཅིག་ཏུ་མདུན་གྱི་ནམ་མཁར་མགོན་པོ་ཚེ་དང་ཡེ་ཤེས་དཔག་ཏུ་མེད་པ་ལ༔ སྐྱབས་ཡུལ་ཐམས་ཅད་ཀྱིས་སྤྲིན་འཁྲིགས་པ་ལྟར་བསྐོར་ནས་མངོན་སུམ་དུ་བཞུགས་པར་དམིགས་ལ་སྐྱབས་སུ་འགྲོ་བ་འདི་བཞིན་སྨྲོས་ཤིག༔ ན་མོ༔ བླ་མ་བདེར་གཤེགས་སྲས་དང་བཅས༔ དཀོན་མཆོག་གསུམ་དང་རྩ་བ་གསུམ༔ རིག་འཛིན་ཚེ་ཡི་ལྷ་ཚོགས་ལ༔ བདག་དང་འགྲོ་དྲུག་སྐྱབས་སུ་མཆི༔ དེ་ནས་སོ་ཐར་གྱི་སྡོམ་པ་བླང་བ་ནི༔ བླ་མ་མཆོག་གི་སྤྱན་སྔ་རུ༔ ལུས་ངག་ཡིད་ཀྱིས་ཉེས་བྱས་ཚོགས༔ མི་དགེ་བཅུ་སྤང་དགེ་བཅུ་བསྒྲུབ༔ དགེ་བསྙེན་དགེ་ཚུལ་དགེ་སློང་དང་༔ སོ་ཐར་བྱང་སེམས་སྡོམ་པ་ལ༔ བདག་ནི་གནས་ཤིང་བསྲུང་བར་བགྱིད༔ སྨོན་འཇུག་གི་སེམས་བླང་བ་ནི༔ ཕ་མ་རིགས་དྲུག་སེམས་ཅན་རྣམས༔ འཁོར་བའི་མཚོ་ལས་བསྒྲལ་བའི་ཕྱིར༔ བྱང་ཆུབ་མཆོག་ཏུ་སེམས་བསྐྱེད་དོ༔ དེང་བཟུང་བླ་མེད་བྱང་ཆུབ་བར༔ འགྲོ་དྲུག་སེམས་ཅན་ཐམས་ཅད་རྣམས༔ མ་བསྒྲལ་བ་རྣམས་བདག་གིས་བསྒྲལ༔ མ་གྲོལ་བ་རྣམས་བདག་གིས་འགྲོལ༔ དབུགས་དབྱུང་མྱ་ངན་འདས་ལ་འགོད༔ དེ་ནས་གསང་བ་སྔགས་ཀྱི་དམ་ཚིག་བླང་བ་ནི༔ དཀོན་མཆོག་གསུམ་བཟུང་མི་གཏོང་བསྒྲུབ༔ སྐུ་གསུམ་སྟོན་པ་རིགས་ལྔ་ཡི༔ དམ་ཚིག་རྣམས་ཀྱང་བདག་གིས་བསྲུང་༔ སངས་རྒྱས་དཀོན་མཆོག་དམ་ཚིག་ཏུ༔ སྐྱོན་རྣམས་སྤང་སྟེ་ཡོན་ཏན་བསྒྲུབ༔ དམ་ཆོས་དཀོན་མཆོག་དམ་ཚིག་ཏུ༔ ཡི་གེ་འདྲི་མཆོད་སྦྱིན་བཀླག་འདོན༔ དགེ་འདུན་དཀོན་མཆོག་དམ་ཚིག་ཏུ༔ སྡོམ་བཟུང་ལོག་པའི་ལྟ་བ་སྤང་༔ ཆོས་ཀྱི་སྐུ་ཡི་དམ་ཚིག་ཏུ༔ ཀ་དག་བློ་འདས་ཁྲེགས་ཆོད་བསྒོམ༔ ལོངས་སྤྱོད་རྫོགས་སྐུའི་དམ་ཚིག་ཏུ༔ སྐུ་དང་ལུག་རྒྱུད་ཐིག་ལེ་བསྟེན༔ སྤྲུལ་པའི་སྐུ་ཡི་དམ་ཚིག་ཏུ༔ གང་ལ་གང་འདུལ་གཞན་དོན་སྤྱོད༔ རྡོ་རྗེ་རིན་ཆེན་པདྨ་ལས་ཀྱི་རིགས༔ དེ་བཞིན་གཤེགས་པ་ལ་སོགས་རིགས་ལྔ་ཡི༔ དམ་ཚིག་མི་སྤང་ཡང་དག་ཉིད་དུ་བསྲུང་༔ ཡང་དག་འཇིགས་བྲལ་རྡོ་རྗེ་ལྟ་བུའི་དོན༔ འགྲོ་བའི་དོན་དུ་མངོན་དུ་འགྱུར་བར་ཤོག༔ ཅེས་དམ་ཚིག་གི་རིམ་པ་རྣམས་བཤད་དོ༔ དེ་ནས་སློབ་མ་རྣམས་ཚེ་དཔག་མེད་དུ་བསྐྱེད༔ གནས་གསུམ་དུ་དྲི་ཡིས་ཐིག་ལེ་བྱ༔ དྲི་བཟང་བསྲེག་ཅིང་རོལ་མོ་འཁྲོལ༔ ཡེ་ཤེས་པ་དབབ་ཅིང་ཏིཥྛ་བཛྲ་གྱིས་བསྟིམ་མོ༔ དེ་ནས་དངོས་གྲུབ་ཀྱི་པྲ་རྟགས་བསྟན་པ་ནི༔ རིགས་ལྔའི་ས་བོན་བྲིས་པའིི་ཚོམ་བུ་ལ་སོ་ཤིང་འདོར་ཞིང་འདི་སྐད་བརྗོད་དོ༔ བླ་མ་ཚེ་དཔག་མེད་པ་དང་༔ རིག་འཛིན་ཚེ་ཡི་དཀྱིལ་འཁོར་ལྷ༔ དཔའ་བོ་མཁའ་འགྲོ་ཆོས་སྐྱོང་དགོངས༔ ལས་བཞིའི་འཕྲིན་ལས་གང་འགྲུབ་པར༔ བདག་གི་སོ་ཤིང་འབབ་པར་ཤོག༔ པྲ་ཏི་གྷྲི་ཧ་ན་སིངྔྷི་སྟྭཾ༔ ཅེས་དོར་རོ༔ ཕྱོགས་བཞི་ཞི་རྒྱས་དབང་དྲག་བཞི༔ ལྷ་སྔགས་ཏིང་འཛིན་ངོ་སྤྲོད་ཅིང་༔ ནད་ཉུང་ཚེ་རིང་དངོས་གྲུབ་འཐོབ༔ བར་ཆད་ཞི་བ་རྣམ་པ་བཞི༔ མཚམས་བཞིར་བབས་པ་རྣམས་ལའོ༔ རྩ་བ་བསྟན་དང་ཕྱི་རོལ་ཡལ༔ སྐུ་རིམ་རྐྱེན་བཟློག་འབུང་གསུམ་འདོན༔ དེ་ནས་ཚོན་སྐུད་ལྔ་དྲིལ་རྡོ་རྗེའི་མདུད་པ་ཅན་སློབ་མའི་དཔུང་པ་ལ་གདགས་ཤིང་༔ ཨོཾ་བཛྲ་ཀྲོ་ཏ་ཧྱ་གྷྲི་ཝ་ཧཱུྃ་ཕཊ༔ གདོན་བགེགས་འབྱུང་པོ་ཐམས་ཅད་རཀྵ་རཀྵ༔ དེ་ནས་ཀུ་ཤ་ཡི་གེ་གསུམ་གྱི་བྱིས་གྱིས་བརླབས་པ་སྔས་གདན་སྦྱིན་ཞིང་༔ ཁ་ནུབ་ཏུ་བསྟན་ཏེ་ཉལ་ནས་ཚེ་ཡི་ལྷ་ཚོགས་ལ༔ ལྟས་བཟང་ངན་གྱི་རྨི་ལམ་སྟོན་ཞིག་པའི་གསོལ་འདེབས་དང་སྨོན་ལམ་བཏབ་སྟེ་ཉལ་ནས༔ ནང་པར་སློབ་དཔོན་གྱི་དྲུང་དུ་གང་བྱུང་ཞུའོ༔ བཟང་ན་གསོལ་བ་འདེབས་ཤིང་མཎྜལ་འབུལ༔ ངན་ན་བཤགས་པ་བརྗོད་ཅིང་ཚོགས་གཏོར་བསྐང་གསོལ་འབད༔ ས་མ་ཡཱ༔ རྒྱ་རྒྱ་རྒྱ༔ གསུམ་པ་ཕྱི་ནང་གསང་གསུམ་གྱི་མཚམས་བཅད་ཅིང་དམ་སྲི་མནན་པ་ནི༔ སྒྲུབ་ཁང་གི་ཕྱི་རོལ་དུ་ཐོ་བཞི་བརྩེགས་ལ༔ ཤིང་རིང་གི་རྩེ་ལ་རྒྱལ་ཆེན་བཞིའི་སྐུ་བྱང་བུ་དང་བཅས་པ་བཏགས་ཏེ༔ གཏོར་མ་རེ་འབུལ་ཞིག་མངའ་གསོལ་བ་ནི་འདི་སྐད་དོ༔ ཧཱུྃཿ ཤར་ཕྱོགས་རྒྱལ་ཆེན་ཡུལ་འཁོར་སྲུང་༔ སྐུ་མདོག་དཀར་པོ་པི་ཝཾ་བསྣམས༔ ཞི་བའི་འཕྲིན་ལས་ཀུན་གྱི་བདག༔ དྲི་ཟའི་གདོན་རྣམས་མཚམས་ཆོད་ཅིག༔ ཨོཾ་བཛྲ་ཏིཥྛ་ར་ཙ་ཡེ་སྭཱ་ཧཱ༔ ཧཱུྃཿ ལྷོ་ཕྱོགས་རྒྱལ་པོ་འཕགས་སྐྱེས་པོ༔ སྐུ་མདོག་སྔོན་པོ་རལ་གྲི་བསྣམས༔ རྒྱས་པའི་འཕྲིན་ལས་ཀུན་གྱི་བདག༔ གཤིན་རྗེའི་གདོན་རྣམས་མཚམས་ཆོད་ཅིག༔ ཨོཾ་བྷེ་རུ་ར་ཏ་ཡེ་སྭཱ་ཧཱ༔ ཧཱུྃཿ ནུབ་ཕྱོགས་རྒྱལ་པོ་སྤྱན་མི་བཟང་༔ སྐུ་མདོག་དམར་པོ་སྦྲུལ་ཞགས་འཛིན༔ དབང་གི་འཕྲིན་ལས་ཀུན་གྱིབདག༔ ཀླུ་དབང་གདོན་རྣམས་མཚམས་ཆོད་ཅིག༔ ཨོཾ་བྷེ་རུ་བྷག་ཤ་ཡེ་སྭཱ་ཧཱ༔ ཧཱུྃཿ བྱང་ཕྱོགས་རྒྱལ་པོ་རྣམས་ཐོས་སྲས༔ སྐུ་མདོག་ལྗང་གུ་ནེའུ་ལེ་བསྣམས༔ དྲག་པོའི་འཕྲིན་ལས་ཀུན་གྱི་བདག༔ གནོད་སྦྱིན་གདོན་བགེགས་མཚམས་ཆོད་ཅིག༔ ཨཱོཾ་བྷཻ་ཤ་ར་ཝ་ཎ་ཡེ་སྭཱ་ཧཱ༔ དེང་གི་གནས་མཆོག་དམ་པ་འདིར༔ བསྒྲུབ་པའི་ཆོ་ག་ཟབ་མོ་འདི་མཐར་མ་ཕྱིན་གྱི་བར་དུ༔ རྒྱལ་པོ་ཆེན་པོ་ཆེ་གེ་མོ་འདི་ཞེས་བྱ་བས༔ ཕྱིའི་བར་ཆད་ནང་དུ་མི་གཏོང་ཞིང་༔ ནང་གི་དངོས་གྲུབ་ཕྱིར་མི་གཏོང་བའི་འཕྲིན་ལས་མཛོད་ཅིག༔ ཅེས་རྒྱལ་པོ་ཆེན་པོ་བཞི་ལ་རིམ་བཞིན་འདོད་གསོལ་འདི་སྦྱར་ཏེ་འཕྲིན་ལས་བཅོལ༔ དེ་ནས་དམ་སྲི་མནན་པ་ནི༔ ར་སོགས་ཀྱི་ཕྱི་ན་རི་རབ༔ ནང་དུ་དམ་སྲིའི་ལིངྒ་བྲིས་པའི་སྙིང་གར་ཏྲི་ལ་ཛཿནག་ཁ་སྦྱོར་གྱིས་བསྐོར་ཞིང་༔ དེའི་ཐ་མར་དམ་སྲི་ག་པ་རི་མཱ་ར་ཡ་ཛ༔ ནན༔ ཏྲེའུ་ཏྲེའུ་ཡ་ཛ༔ ནན༔ ཏྲེའུ་ཏྲེའུ་ཡ༔ ན་མ་ཤོ་ཛ༔ ཁུག་ནན༔ ཅེས་བྲིས་སྒྲུབ་ཁང་གི་ཐེམ་འོག་ཏུ་མནན་ཞིང་༔ རང་ཉིད་དབང་ཆེན་དུ་བསྒོམ་སྟེ༔ འགུགས་བསྟིམ་ཕོ་ཉ་བསྐུལ་ཞིང་ཕྱག་རྒྱ་བཞིས་རྒྱས་གདབ༔ སྟེང་དུ་རྡོ་རྗེ་རྒྱ་གྲམ་གྱིས་མནན་ཞིང་འདི་སྐད་དོ༔ ཧཱུྃཿ དམ་སྲི་བྱ་བའི་སྡིག་ཅན་ཁྱོད༔ བླ་མ་ལ་བསྡོས་མཆེད་ལ་འཁུས༔ དཀོན་མཆོག་དམད་ཅིང་བསྟན་པ་བཤིག༔ དེས་ན་བསྐལ་པའི་མེ་ལ་བསྲེག༔ རི་རབ་གླིང་བཞིའི་འོག་ཏུ་མནན༔ མཚོན་ཆའི་ཚོགས་ཀྱིས་དུམ་བུར་གཏུབ༔ རྡོ་རྗེ་འབར་བའི་རྒྱས་ཀྱང་བཏབ༔ ནམ་ཡང་ཐར་པའི་གོ་སྐབས་མེད༔ ཧཱུྃ༔ བརྗོད་མེད་ཉག་ཅིག་ཆོས་སྐུའི་རྒྱ༔ སྣང་སྟོང་གཉིས་མེད་ལོངས་སྐུའི་རྒྱ༔ སྐུ་གསུམ་དབྱེར་མེད་སྤྲུལ་སྐུའི་རྒྱ༔ གང་འདུལ་འཕྲིན་ལས་རྣམ་བཞིའི་རྒྱ༔ རིགས་བདག་མགོན་པོ་སྐུ་ལྔའི་རྒྱ༔ འགྲོ་འདུལ་ཐུབ་པ་དྲུག་གི་རྒྱ༔ རྐང་གཉིས་གཙོ་བོ་རབས་བདུན་རྒྱ༔ བསྟན་འགྲོའི་རྩ་ལག་སེམས་བརྒྱད་རྒྱ༔ ཐར་པའི་ལམ་མཆོག་ཐེག་དགུའི་རྒྱ༔ རྒྱ་དགུས་བཏབ་པའི་རིམ་དགུའི་འོག༔ མ་རུངས་དམ་སྲི་སྒབ་འདྲེའི་ཚོགས༔ མནན་པ་ཡིན་ནོ་མ་ལྡང་ཞིག༔ བཅིངས་པ་ཡིན་ནོ་མ་གྲོལ་ཞིག༔ ས་མ་ཡཱ༔ རྒྱ་རྒྱ་རྒྱ༔ ཅེས་བརྗོད་དོ༔ དེ་ནས་ཁྲོ་བོ་བཅུར་མངའ་གསོལ་བའི་ཕུར་པ་དར་གྱི་ཅོད་པཎ་ཅན་བཅུ་སྟེང་འོག་བར་གསུམ་དུ་གདབ་ཅིང་༔ ཁྲོ་བོ་བཅུའི་སྙིང་པོ་བཟླས་ལ་གསེར་སྐྱེམས་མཆོད༔ འཕྲིན་ལས་བཅོལ་ལོ༔ དེ་ནས་སྒྲུབ་ཁང་ཡ་ཐེམ་ཕྱི་ལ་དབང་ཆེན་གྱི་སྐུ་བཏགས་ལ༔ ཧཱུྃཿ ཁྲོ་བོའི་རྒྱལ་པོ་པདྨ་དབང་༔ ཁམས་གསུམ་སྐྱེ་འགྲོ་ཁྱོད་ཀྱི་འཁོར༔ གདོན་བགེགས་འབྱུང་པོ་ལན་ཆགས་བྲན༔ རྣམ་པར་སྨིན་པའི་ཆོས་ཤོད་ལ༔ བདག་གིས་དངོས་གྲུབ་མ་ཐོབ་བར༔ ས་འདི་ཡན་ཆད་མ་གཏོང་ཞིག༔ ཨཱོཾ་བཛྲ་ཀྲོ་ཏ་ཧ་ཡ་གྷྲཱི་ཝ་ཧཱུྃ་ཕཊ༔ དེ་ནས་བདུད་རྩི་འཁྱིལ་པའི་སྐུ་ཡ་ཐེམ་གྱི་ནང་དུ་བཏགས་ལ༔ ཧཱུྃཿ ཁྲོ་བོ་ཆེན་པོ་བདུད་རྩི་འཁྱིལ༔ སྤྲུལ་པ་ཁྲོ་ཚོགས་གྲངས་མེད་འཕྲོ༔ བདག་གིས་བྱང་ཆུབ་མ་ཐོབ་བར༔ གདོན་བགེགས་འབྱུང་པོ་མཚམས་ཆོད་ཅིག༔ ཨཱོཾ་བཛྲ་ཨ་མྲྀ་ཏ་ཀུཎྜ་ལི་དམ་སྲི་འབྱུང་པོ་མཱ་ར་ཡ་ཧཱུྃ་ཕཊ༔ ས་མ་ཡཱ༔ རྒྱ་རྒྱ་རྒྱ༔ བཞི་པ་ཐིག་ཆོག་བྱ་ཞིང་ད་ལ་འདྲི་བ་ནི༔ ཐིག་སྐུད་སྣལ་ཚོན་དཀར་དམར་གྱི་སྐུད་པ་སྦོམ་ཕྲ་སྒོའི་ཉིས་འགྱུར༔ རིང་ཐུང་འདོམ་གང་ཁྲུ་གང་མཐོ་གང་སོར་གསུམ་པ་ཞིག་གི་སྣེ་གཉིས་ལ་རྡོ་རྗེ་དང་དྲིལ་བུ་བཏགས་པ་བཟོ་ཞིང་༔ རིག་མ་མཚན་ལྡན་ཁྲུས་ནས་ཕྱུང་ཞིང་རྒྱན་གྱིས་སྤྲས་ལ༔ དྲིལ་བུ་ཡུམ་ལ་གཏད༔ རྡོ་རྗེ་ཡབ་ཀྱིས་བཟུང་ཞིང་༔ ཀྱེ་ཧོ༔ བླ་མེད་གསང་བའི་ཆོས༔ སྐྱེ་མེད་ཆོས་དབྱིངས་ནམ་མཁའ་ལ༔ དམིགས་གཏད་བློ་བྲལ་ཐིག་གདབ་བོ༔ རང་བཞིན་འགག་མེད་བར་སྣང་ལ༔ རངབྱུང་ཡེ་ཤེས་ཐིག་གདབ་བོ༔ སྣ་ཚོགས་ཡངས་པའི་ས་གཞི་ལ༔ འགྲོ་དོན་སྤྲུལ་སྐུའི་ཐིག་གདབ་བོ༔ བྷ་ག་ཡུམ་གྱི་ས་གཞི་ལ༔ བྱང་ཆུབ་སེམས་ཀྱི་ཐིག་གདབ་བོ༔ རིག་འཛིན་ཚེ་ཡི་དཀྱིལ་འཁོར་དུ། སྣང་སྟོང་ངང་ནས་ལྷམ་མེར་གསལ༔ བྷྲཱུྃ་སང་ཏྲི་ཏ་ཛྙཱ་ན་མཎྜལ་བྷྲཱུྃ༔ ཅེས་བརྗོད་ཚངས་པའི་ཐིག་གདབ་ཅིང་༔ ཤར་ནས་ནུབ་ཏུ་ཆ་བཞིར་བགོ༔ ལྷོ་བྱང་གཉིས་ཀྱང་དེ་བཞིན་ནོ༔ དབུས་ཕྱོགས་ཆ་ཆེན་གཉིས་པ་སྟེ༔ བཅུ་དྲུག་གྲངས་སུ་ཐེམས་པར་གདབ༔ དང་པོ་གཉིས་པ་གསུམ་པ་རྣམས༔ ལྟེ་བ་པདྨའི་ཆ་ཡིན་ཞིང་༔ འཁྱམས་དང་སྒོ་གྲུ་ལ་སོགས་པ༔ ཕྱག་ལེན་སྤྱི་འགྲོས་གཞན་དང་མཐུན༔ དེ་ནས་ཚོན་གྱི་རིམ་པ་ནི༔ རབ་རིན་ཆེན་སྣ་ལྔ༔ འབྲིང་དུར་ཁྲོད་ཀྱི་ས་རྡོ༔ ཐ་ནའང་མཛེས་པའི་ས་ཚོན་ལ་ཁ་དོག་རིགས་ལྔར་བསྒྱུར་ཞིང་སྣོད་སོ་སོར་དགྲམ༔ རིགས་ལྔའི་ས་བོན་བྲི༔ དམ་ཚིག་པ་བསྐྱེད༔ ཡེ་ཤེས་པ་བསྟིམ༔ མཆོད་བསྟོད་བསྡུས་པ་ཞིག་བྱ༔ དེ་ནས་སློབ་དཔོན་གྱིས་ཚོན་ཐོགས་ཏེ༔ ཧཱུྃཿ གསང་བ་བླ་མེད་ཚེ་དཔག་མེད༔ རིག་འཛིན་ཚེ་ཡི་ལྷ་ཚོགས་རྣམས༔ སེམས་ཅན་འགྲོ་བ་ཀུན་དོན་དུ༔ ཡེ་ཤེས་ལྔ་ཡི་ཚོན་བཀྲམས་པས༔ འགྲོ་དྲུག་འཁོར་བ་དོང་སྤྲུག་ཤོག༔ ཅེས་བརྗོད་ཅིང་ལྷག་ཆད་སྤང་སྟེ་འབྲི་བར་བྱའོ༔ རྟེན་འབྲེལ་གྱི་གནད་ཆེ་བས་གཟབས་པ་གལ་ཆེའོ༔ ས་མ་ཡཱ༔ རྒྱ་རྒྱ་རྒྱ༔ ལྔ་པ་ལྷག་ཆད་གསོ་ཞིང་མ་ཏྲཾ་བསྒྲལ་བ་ནི༔ རྡོ་རྗེ་སློབ་དཔོན་ཡབ་ཡུམ་གྱིས་རྡོར་དྲིལ་སྒྱུར་ཞིང་གར་འཁྲབ༔ མཆེད་ལྕམ་རྣམས་ཀྱིས་རོལ་མོ་ལྡིར་ཞིང་ད་ལ་བསྐོར་ཏེ་འདི་སྐད་དོ༔ ཧཱུྃཿ གསང་བ་མཆོག་གི་ཕོ་བྲང་འདིར༔ མ་འདྲེས་ཡོངས་རྫོགས་ཟང་ཐལ་ཀློང་༔ ཆོས་དབྱིངས་འགགས་མེད་རོལ་པར་ཤར༔ དུས་གསུམ་རྒྱལ་བ་མ་ལུས་དང་༔ ཚེ་ཡི་ལྷ་ཚོགས་བཞུགས་པའི་གནས༔ དག་པའི་ཞིང་ནས་སྐུ་སྐྱོད་ལ༔ ཕོ་བྲང་འདི་ལ་བརྟན་པར་བཞུགས༔ ཕྱི་ནང་གསང་གསུམ་མཆོད་པ་འབུལ༔ སྐུ་གསུང་ཐུགས་ལ་བསྟོད་པར་བགྱི༔ ལྷག་ཆད་འགལ་འཁྲུལ་ཅི་མཆིས་བཤགས༔ ཅེས་བརྗོད་ཡི་གེ་བརྒྱ་པ་དང་དབྱངས་གསལ་བྱེད་བརྗོད༔ ཁམ་ས་ལ་མ་ཏྲཾ་གྱི་གཟུགས་བཟོས༔ སྒྲོལ་གིང་དུར་ཁྲོད་ཆས་ཀྱིས་བརྒྱན་ཞིང་༔ རྔ་ཆིག་བརྡུང་བྱས་སྟེ་དཀྱིལ་མཁོར་བསྐོར་ཞིང་རྒྱུགས་ནས་འདི་སྐད་དོ༔ ཧཱུྃཿ མ་ཏྲཾ་བྱ་བའི་སྡིག་ཅན་ཁྱོད༔ དངོས་གྲུབ་འཕྲོག་པའི་དགྲ་དང་བགེགས༔ དཔལ་ཆེན་ཚོགས་ཀྱིས་བསྒྲལ་བ་ལྟར༔ ཁྱོད་ཀྱི་ལུས་སྲོག་དུམ་བུར་གཏུབ༔ བདག་འཛིན་རཱུ་ཏྲ་རྩད་ནས་གཅོད༔ རིག་འཛིན་ཚེ་ཡི་ཕོ་བྲང་འདེབས༔ མ་ཏྲཾཾ་རཱུ་ཏྲ་པྲ་ཝེ་ཤ་ཡ་མཱ་ར་ཡ་ཧཱུྃ་ཕཊ༔ ཅེས་བསྒྲལ་དཀྱིལ་འཁོར་ཐ་མར་བསྐོར་ཏེ་བཀོད༔ ས་མ་ཡཱ༔ རྒྱ་རྒྱ་རྒྱ༔ དྲུག་པ་སྦྱིན་སྲེག་བུམ་པ་སྟ་གོན་བྱ་བ་ནི༔ ཤར་ལྷོ་ནུབ་བྱང་ཕྱོགས་བཞིར་ལས་བཞི་སོ་སོར་ཐེབས་ན་རབ༔ ཡང་ན་དཀྱིལ་མཁོར་གྱི་ཤར་རམ་ལྷོར་ཞི་རྒྱས་སམ༔ ནུབ་ཕྱོགས་སུ་དབང་གི་སྦྱིན་སྲེག་གཞུང་མཐུན་ལྟར་འདེབས༔ དེ་ནས་བུམ་པ་སྟ་གོན་ནི༔ མཚན་ཉིད་དང་ལྡན་པའི་བུམ་པ་དག་པར་བཀྲུ༔ དྲི་མ་ཕྱི་གུ་གུལ་གྱིས་བདུག༔ ཐུན་གྱིས་བྲབ༔ དྲག་སྔགས་བརྗོད་དེ༔ ཁྱེའུ་བཀྲ་ཤིས་པས་བླངས་པའི་གཙང་ཆབ་ལ་དྲི་བཟང་གི་བུམ་སྨན་བཏབ་ཅིང་༔ དར་དམར་གྱིས་མགུལ་ཆིངས་བྱ༔ རྨ་བྱ་དང་ཀུ་ཤ་གཟུངས་ཐག་རྣམས་ཀྱིས་ཁ་བརྒྱན་པ་སྟེགས་བུའི་ཁར་བཞག་ཅིང་༔ སྭཱ་བྷཱ་ཝའི་སྔགས་ཀྱིས་སྦྱངས༔ ཨོཾ་ཨཱ༔ ཧཱུྃ་གསུམ་གྱི་བྱིན་གྱིས་བརླབ་ཅིང་༔ ཕྱི་བུམ་པ་གཞལ་ཡས་ཁང་༔ ནང་བཅུད་ཀྱི་ངོ་བོ་ཡི་དམ་གྱི་ལྷ་དང་གཉིས་སུ་མེད་པར་བསམ་ཞིང་༔ ཨཱོཾ་ཧཱུྃ་ཏྲཾ་ཧྲཱི༔ ཨཱ༔ མུཾ་ལཾ་མཾ་པཾ་ཏཾ༔ བཛྲ་ཨཱ་ཡུ་ཤེ༔ ཚེ་བྷྲཱུྃ༔ ཡུ་བྷྲཱུྃ༔ ཡུ་ཚེ་བྷྲཱུྃ༔ ཅེས་བརྒྱ་སྟོང་སྐབས་དང་སྦྱར་ཏེ་བཟླ་ཞིང་བྱིན་གྱིས་བརླབ་བོ༔ དབང་བསྐུར་ན་དབང་རྫས་རྣམས་འདི་ནས་སྟ་གོན་བྱ༔ ས་མ་ཡཱ༔ རྒྱ་རྒྱ་རྒྱ༔ བདུན་པ་རྒྱན་བཀོད་དགྲམ་ཞིང་ཞལ་བཀོད་གདབ་པ་ནི༔ མཆེད་ལྕམ་རྣམས་ལངས་ཏེ་ད་ལའི་རྫས་དང་རྒྱན་རྣམས་ཐོགས་ཏེ༔ དབྱངས་སྙན་པོས་འདི་སྐད་དོ༔ ཧཱུྃཿ བཀྲ་ཤིས་བུམ་པ་རིན་ཆེན་གཞལ་ཡས་ཁང་༔ རྣམ་དག་བདེ་ཆེན་བཀོད་པའི་ཞིང་དུ་གསལ༔ རིག་འཛིན་ཚེ་ཡི་ལྷ་ཚོགས་བཞུགས་སུ་གསོལ༔ མེ་ལོང་བདུད་རྩི་དྲི་མེད་རྣམ་དག་རྫས༔ དམ་རྫས་བྷ་ལིང་རྒྱལ་བ་མཆོད་པའི་རྫས༔ ཕྱི་ནང་གསང་གསུམ་ཀུན་བཟང་མཆོད་སྤྲིན་གཏིབས༔ རྡོ་རྗེ་དྲིལ་བུ་ཐབས་ཤེས་གཉིས་སུ་མེད༔ རོལ་མོ་སིལ་སྙན་རྩ་གསུམ་བསྐུལ་བའི་རྫས༔ ཕུར་པ་རལ་གྲི་བར་ཆད་བཟློག་པའི་མཚོན༔ བདུད་རྩི་སྨན་རག་དངོས་གྲུབ་འབྱུང་བའི་རྫས༔ ཡིད་འོང་རིག་མ་བདེ་བ་སྟེར་བའི་གྲོགས༔ མདའ་བཞི་ཅོད་པན་དར་སྣ་ལོངས་སྤྱོད་རྫོགས༔ ཚོན་སྐུད་དྲ་བ་བར་གཅོད་སྲུང་བའི་གུར༔ ཡོང་བ་བླ་རེ་སྤྱན་གཟིགས་ཕུན་སུམ་ཚོགས༔ སྤོས་དང་མར་མེ་གྷ་ན་ལོངས་སྤྱོད་རྫས༔ མ་ལུས་ཐམས་ཅད་ཕོ་བྲང་གནས་འདིར་བཀོད༔ རིག་འཛིན་ཚེ་ཡི་འཕྲིན་ལས་མཐར་ཕྱིན་ཤོག༔ ཕྱི་མཆོད་ཤར༔ ནང་མཆོད་འདོད་ཡོན་ཚོགས་འཁོར་ལྷོ༔ གསང་མཆོད་སྨན་ཕུད་རཀྟ་ནུབ༔ ལས་གཏོར་རོལ་མོ་བྱང་དུ་བཀོད༔ གཞན་ཡང་གཏོར་ཚོགས་གཡས༔ མཆོད་ཚོགས་གཡོན༔ སྤྱན་གཟིགས་བཀོད་པ་ལེགས་པར་བཤམས༔ ཞལ་བཀོད་གདབ་པ་ནི༔ རྡོ་རྗེ་རྒྱལ་པོ་མཆེད་དང་ལྕམ་དྲལ་རྣམས་གྲལ་ལ་འཁོད་ཅིང་ཕུད་རིམ་པ་ལྟར་དྲངས་ཤིང་འདི་སྐད་དོ༔ ཨེ་མ་ཧོ༔ རྡོ་རྗེ་སློབ་དཔོན་སངས་རྒྱས་ཀུན་གྱི་གཙོ༔ རྡོ་རྗེ་རྒྱལ་ཐེབས་རྡོ་རྗེ་མཚམས་པ་དང་༔ ལས་ཀྱི་རྒྱལ་ཐེབས་ལས་ཀྱི་རིག་མ་དང་༔ འཕྲིན་ལས་གར་གིང་ལས་ཀྱི་སྒྲོལ་གིང་དང་༔ ཚོགས་གཉེར་གཡོས་པ་ཕྱག་ཚང་དུས་འཛིན་སོགས༔ ཐམས་ཅད་མ་ལུས་གནས་འདིར་ལྷུན་གྱིས་གྲུབ༔ ཅེས་བརྗོད༔ མཚན་ལྡན་རིག་མ་བླ་མ་ལ་འབུལ་ཞིང་༔ ཨེ་མ་བླ་མ་འགྲོ་བའི་མགོན༔ རྡོ་རྗེ་རྒྱལ་པོ་ཆོས་ཀྱི་རྒྱལ༔ འདི་ནི་མཚན་ལྡན་བཅུ་དྲུག་མ༔ གཟུགས་མཛེས་ཡིད་འོང་ལྟ་ན་སྡུག༔ དྲི་ཞིམ་ནུ་འབུར་བྷ་ག་རྒྱས༔ གསང་སྔགས་བླ་མེད་བདེ་བའི་ལམ༔ མཆོད་པར་འབུལ་གྱི་བཞེས་སུ་གསོལ༔ ཛྙཱ་ན་མུ་ཏྲ་པཱུ་ཙ་ཧོ༔ དེ་ནས་སློབ་དཔོན་གྱིས་བསྒོ་བ་ནི༔ ཀྱེ་ཧོ་ཉོན་ཅིག་སྐལ་ལྡན་འདིར་ཚོགས་རྣམས༔ སྔོན་ལས་བསོད་ནམས་འབྲས་བུས་མི་ལུས་ཐོབ༔ སྨོན་ལམ་དག་པས་བླ་མེད་ཆོས་འདི་མཇལ༔ ཕུན་སུམ་ཚོགས་པས་སྒྲུབ་པའི་ཁོངས་འདིར་ཆུད༔ གཡར་དམ་གཅིག་པས་མར་མེ་གཅིག་ལ་བལྟ༔ འདི་ནི་སྐལ་བཟང་ཕུན་སུམ་ཚོགས་པ་སྟེ༔ བརྩོན་འགྲུས་རབ་བསྐྱེད་སྒོ་གསུམ་གུས་པར་མཛོད༔ འཁྲུལ་གཏམ་མྱོས་བྱེད་ཆང་དང་གཏི་མུག་གཉིད༔ འཐབ་རྩོད་ཀུ་ཅོ་ལེ་ལོ་སྙོམས་ལས་དང་༔ ཉེ་རིང་ཕྱོགས་ཆ་ཆགས་སྡང་ཕྲ་མའི་གཏམ༔ ཚོད་ཡོད་བརྙས་བཅོས་ལོག་ལྟ་བག་མེད་དང་༔ སླ་ཆོས་ལོག་སྤྱོད་གཡེང་བ་ཉེས་བྱས་སྡོམས༔ བླ་མ་རྒྱལ་ཐེབས་གསང་ཡུམ་རིག་མ་དང་༔ མཆེད་ལྕམ་རྣལ་འབྱོར་ཀུན་ལ་གུས་འདུད་འབུངས༔ འདི་ལྟར་དབང་སྒྲུབ་དཀྱིལ་འཁོར་མཐོང་བའི་བུ༔ ཚེ་འདིར་སངས་རྒྱས་འབྲས་བུ་འཐོབ་པ་ལས༔ ཐུན་མོང་ཕྲན་ཚེགས་ཙམ་ལ་མ་སེམས་ཤིག༔ བླ་མེད་སྒྲུབ་ཐབས་འདི་འདྲ་འཛམ་གླིང་དཀོན༔ ཁྱེད་རྣམས་སྔོན་བསགས་བསོད་ནམས་ཤིན་ཏུ་ཆེ༔ སློབ་དཔོན་གསུང་ལ་རྩེ་གཅིག་མོས་པས་ཉོན༔ བཀའ་ལས་འདས་ན་དངོས་གྲུབ་བརླག་པར་འགྱུར༔ ཚུལ་བཞིན་སྤྱོད་ན་འབྲས་བུ་དུས་འདིར་འཐོབ༔ ཅེས་ཉིན་རེ་བཞིན་བསྐུལ་ལོ༔ ས་མ་ཡཱ༔ རྒྱ་རྒྱ་རྒྱ༔ བརྒྱད་པ་དམ་རྫས་བཤམ་ཞིང་བྱིན་ཆེན་འབེབས་པ་ནི༔ རཏྣའི་བུམ་པ་མཚན་ཉིད་དང་ལྡན་པའི་ནང་དུ༔ ཚེ་སྒྲུབ་ཀྱི་རིལ་བུ་གཞུང་དང་མཐུན་པར་བླུགས་པ་རིག་མས་ཐོགས༔ མཆེད་ལྕམ་དྲལ་རྣམས་ཀྱིས་རོལ་མོ་འབིར༔ དབྱངས་སྙན་པོས་འདི་སྐད་བརྗོད་དོ༔ ཧཱུྃཿ ཆོས་དབྱིངས་ཕོ་བྲང་གསང་བའི་དཀྱིལ་འཁོར་འདིར༔ བླ་མེད་རྫས་མཆོག་སྐུ་གསུམ་འདུ་འབྲལ་མེད༔ རིག་འཛིན་ཚ་ེཡི་སྒྲུབ་རྫས་ཁྱད་འཕགས་འདི༔ བདག་ཅག་འཆི་མེད་ཚེ་སྲོག་ཐོབ་བྱའི་ཕྱིར༔ མི་འགྱུར་ཕོ་བྲང་དཀྱིལ་འཁོར་གནས་འདིར་འགོད༔ ཕྱོགས་བཅུའི་བདེ་གཤེགས་རྒྱལ་བ་ཐམས་ཅད་དང་༔ རིག་འཛིན་ཚེ་ལ་དབང་བའི་དཀྱིལ་འཁོར་ལྷ༔ ལྷ་ཀླུ་མི་གསུམ་དྲང་སྲོང་རིག་པ་འཛིན༔ བདུད་རྩིའི་ལྷ་མོ་སྨན་གྱི་ལྷ་མོ་དང་༔ འབྱུང་བའི་ལྷ་མོ་རྒྱུ་སྐར་ལྷ་མོ་དང་༔ ཚེ་ལྷ་མགྱོགས་མ་སྒོ་མའི་ཚོགས་རྣམས་ཀྱིས༔ སྔོན་གྱི་སྨོན་ལམ་ཞལ་བཞེས་བརྩེར་དགོངས་ལ༔ སྐུ་གསུམ་ཐུགས་ཀྱི་ནུས་པའི་རྩལ་ཕྱུང་ཏེ༔ འཕྲིན་ལས་མྱུར་མགྱོགས་ཐུགས་རྗེའི་གློག་འཁྱུག་ནས༔ འཁོར་འདས་ཀུན་གྱི་བྱིན་རླབས་ནུས་མཐུའི་དཔལ༔ ཚེ་བསོད་དབང་ཐང་འབྱུང་བཞི་སྨན་གྱི་བཅུད༔ འུབ་ཀྱིས་བསྡུས་ནས་སྒྲུབ་པའི་རྫས་ལ་བསྐྱིལ༔ དམ་ཚིག་ཡེ་ཤེས་གཉིས་མེད་རྒྱ་ཡིས་བཏབ༔ བདག་ཅག་རྣམས་ལ་ཚེ་ཡི་དངོས་གྲུབ་སྩོལ༔ ཅེས་བརྗོད་པས་ཕྱོགས་བཅུ་དུས་གསུམ་གྱི་སངས་རྒྱས༔ རིག་འཛིན་ཚེ་ཡི་དཀྱིལ་འཁོར་གྱི་ལྷ་ཚོགས་ཐམས་ཅད་མདུན་གྱི་ནམ་མཁར་བྱོན་ནས༔ སྐུ་གསུང་ཐུགས་མཉེས་པའི་མདངས་ཕྱུངས་ཏེ༔ སྒྲུབ་རྫས་ལ་གཉིས་མེད་དུ་ཐིམ་ནས༔ མི་འགྱུར་ལྷུན་གྲུབ་ཐུགས་རྗེའི་ཀློང་དུ་བཞུགས་པར་བསམས་ཤིང་བྱིན་འབེབས་འདོན༔ རོལ་མོ་འཁྲོལ༔ དྲི་བཟང་དང་གུ་གུལ་གྱི་དུད་པ་གཏོང་ཞིང་སྒྲུབ་རྫས་དཀྱིལ་འཁོར་གྱི་དབུས་སུ་འགོད་དོ༔ ས་མ་ཡཱ༔ རྒྱ་རྒྱ་རྒྱ༔ དགུ་པ་ལས་ཀྱི་གཞུང་བསྲང་ཞིང་བསྙེན་སྒྲུབ་ཀྱི་རིམ་པ་ནི༔ རྒྱུན་ཏུ་འཕྲིན་ལས་ནར་མར་བསྲང་ཞིང་༔ དུས་གསུམ་དུ་ཚོགས་དང་ལྷག་མཆོད་ཐེམས་པར་བྱ༔ ཚེ་སྒྲུབ་གཞན་གྱི་ཡང་ལས་གཞུང་མང་དུ་བསྲང་ལྕོགས་ན་བྱིན་རླབས་དཔག་ཏུ་མེད་པ་འབྱུང་བའི་གནས་སུ་ཤེས་པར་བྱའོ༔ བསྙེན་སྒྲུབ་ལས་སྦྱོར་ཆིག་དྲིལ་གྱི་འཛབ་བསྙེན་གཞུང་དང་མཐུན་པར་ཐུན་བཟུང་ཞིང་༔ དལ་འཁྱུག་འབྲུག་ལྡིར་བ་ལྟར་བཟླ་ཞིང་༔ སྐབས་སྐབས་སུ་དྲག་པོའི་ཧཱུྃ་གི་སྣང་གླུ་ལེན་ཏེ༔ ལེ་ལོ་སྙོམས་ལས་སྤངས་ནས་བསྒྲུབ་པར་བྱའོ༔ མདོར་ན་བསྙེན་སྒྲུབ་ལས་གསུམ་གྱི་དམིགས་པ་དང་འཛབ་ལ་འབད་པ་གལ་ཆེའོ༔ ས་མ་ཡཱ༔ རྒྱ་རྒྱ་རྒྱ༔ བཅུ་པ་ཉུལ་ལེ་བསྐྲད་ཅིང་སྒྲུབ་པའི་ལྟས་བརྟག་པ་ནི༔ སྒྲུབ་པ་ལ་ཞུགས་ནས་ཞག་གྲངས་མ་ཐེམས་བར་དུ་དུས་དྲུག་གམ་བཅུ་གཉིས་སུ་ཉུལ་ལེ་བསྐྲད༔ ཁྱད་པར་ཉམས་མི་གསལ་ཞིང་ཤེས་པ་འཐིབ་པ་དང་༔ བག་གྲང་ཞིང་སྒྲུབ་རྫས་དཀྱིལ་འཁོར་སོགས་ལ་བག་རྡུལ་ཆགས་པ་དང་༔ རིག་པ་བྱིང་ཞིང་མར་མེའི་འོད་ཉམས་པ་སོགས་བྱུང་ན༔ གིང་པ་ཆས་སུ་ཞུགས༔ དམ་ཚིག་སེམས་དཔར་གསལ་ཞིང་ཡེ་ཤེས་པ་བསྟིམ་སྟེ༔ མི་ལྤགས་ཀྱི་གཡབ་མོ་མཚོན་ཆ་སྣ་ཚོགས༔ བོང་བུའི་མཇེ་སོགས་ཐོགས་ཏེ་དྲག་པོའི་ངར་གྱིས་རྒྱུག་ཅིང་༔ ཧཱུྃ་ཕཊ་དང་དྲག་སྔགས་བརྗོད༔ སྒྲུབ་པའི་ལྟས་ནི༔ ཉམས་གསལ་ཞིང་ཤེས་རིག་དྭངས་པ་དང་༔ བག་དྲོ་བ་བྱིན་ཆགས་པ༔ བླ་མ་མཆེད་ལྕམ་ལ་མོས་གུས་དང་དག་སྣང་འབར་བ༔ དཀྱིལ་འཁོར་སྒྲུབ་རྫས་སྒྲུབ་ཁང་སོགས་ལ་འོད་འཚེར་བ༔ བཀྲག་བཟང་བ༔ བུམ་ཆུ་ཁོལ་བ༔ གཏོར་མ་ལ་མེ་འབར་བ༔ སྒྲུབ་རྫས་འཕུར་བ་འཁྲབ་པ༔ དྲི་བཟང་པོ་འཐུལ་བ༔ མར་མེ་འཛིན་པ༔ རྨི་ལམ་དུའང་གྱེན་ལ་འཛེགས་པ༔ ཉི་ཟླ་ཤར་བ༔ ཆུ་བོ་བརྒལ་བ༔ ཟམ་པ་བཏིང་བ༔ དར་འཕྱར་བ༔ དུང་འབུད་པ༔ རོལ་མོ་འཁྲོལ་བ༔ ཁྲི་ལ་འདུག་པ་སོགས་དང་༔ ཁྲུས་བྱས་པ༔ རྒྱན་སྤྲས་པ༔ བྲག་བཤགས་པ༔ ཆུ་རྒྱུན་འབབས་པ་སོགས་བྱུང་ན་ཤིན་ཏུ་ལེགས་པའི་ལྟས་སོ༔ ས་མ་ཡཱ༔ རྒྱ་རྒྱ་རྒྱ༔ གསུམ་པ་རྗེས་ཀྱི་རིམ་པ་དོན་བཅུ་གཉིས་ཀྱིས་སྟོན་ཏེ༔ དངོས་གྲུབ་ཞུ་བ་གཏོར་མ་སྐྱོང་བ༔ ཚེ་འགུགས་པ༔ དཀྱིལ་འཁོར་བསྡུ་བ༔ ལྷག་ཆད་བསྐང་བ༔ ཡོན་འབུལ་བ༔ མར་མེ་སྨོན་ལམ་གདབ་པ༔ བཀྲ་ཤིས་བརྗོད་པ༔ ལུས་བསྲུང་༔ གནས་བསྲུང་༔ བསྔོ་བ་བྱ་བ་དང་བཅུ་གཉིས་སོ༔ ལས་འཕྲོ་ཅན་དང་འཕྲད་པར་ཤོག༔ ས་མ་ཡཱ༔ རྒྱ་རྒྱ་རྒྱ༔ དང་པོ་དངོས་གྲུབ་ཞུ་བ་ནི༔ སྒྲུབ་རྫས་ཚེ་སྒྲུབ་ཀྱི་རིལ་བུ་དང་༔ སྦྲང་བུར་ཀ་ར་སོགས་དཀར་གསུམ་མངར་གསུམ་གྱི་འབྲང་རྒྱས་སམ་ཚེ་རིལ་རིག་མ་རྒྱན་གྱིས་སྤྲས་པའི་ལག་ཏུ་ཐོགས་ཤིང་༔ རྡོ་རྗེ་སློབ་དཔོན་ལ་འབུལ་ཏེ་འདི་སྐད་དོ༔ ཧཱུྃཿ རྡོ་རྗེ་སློབ་དཔོན་དགོངས་སུ་གསོལ༔ འདི་ནི་རྣམ་དག་མཆོག་གི་རྫས༔ ཡེ་ཤེས་རང་བྱུང་བསྒྲུབ་པའི་རྟེན༔ དངོས་གྲུབ་རྒྱ་མཚོའི་དབང་བཞི་ལོང་༔ མ་ཧཱ་སརྦ་སིངྔྷི་སྟྭཾ༔ ཅེས་བརྗོད༔ སློབ་དཔོན་གྱིས་པད་སྐོར་གྱི་ཕྱག་རྒྱས་བླང་ཞིང་དབྱངས་སྙན་པོས་འདི་སྐད་དོ༔ ཧཱུྃཿ དུས་གསུམ་བླ་མ་རིག་འཛིན་ཚེ་ཡི་ལྷ༔ ཆོས་སྐུ་སྣང་མཐའ་ལོངས་སྐུ་སྤྱན་རས་གཟིགས༔ སྤྲུལ་སྐུ་འགྲོ་འདུལ་ཨོ་རྒྱན་རིན་པོ་ཆེ༔ རྩ་གསུམ་ལྷ་ཚོགས་སྲུང་མ་དམ་ཚིག་ཅན༔ ཚེ་ཡི་ལྷ་མོ་མགྱོགས་མ་སྒོ་མའི་ཚོགས༔ བདག་ཅག་རྣལ་འབྱོར་རིག་འཛིན་སྒྲུབ་པ་པོས༔ བཀའ་བཞིན་སྤྱད་ཅིང་ལུང་བཞིན་དང་དུ་བླངས༔ མན་ངག་ཟབ་མོ་བསྒོམ་སྒྲུབ་བཟླས་གསུམ་རྫོགས༔ ད་ལྟ་དངོས་གྲུབ་ལེན་པའི་དུས་ལ་བབས༔ ཚེ་ལྷ་རིག་འཛིན་ཐུགས་རྗེའི་རང་བཞིན་ཀྱང་༔ སྔོན་གྱི་དམ་བཅའ་ཐུགས་དམ་དབྱིངས་ནས་བསྐུལ༔ མ་གཡེལ་རིག་འཛིན་སྲུང་མ་རྒྱ་མཚོའི་ཚོགས༔ འགྱུར་བ་མེད་པ་སྐུ་ཡི་སྒོ་ཕྱེ་ནས༔ འཆི་མེད་རིག་འཛིན་ཚེ་ཡི་དངོས་གྲུབ་སྩོལ༔ འགག་པ་མེད་པ་གསུང་གི་སྒོ་ཕྱེ་ནས༔ རྡོ་རྗེའི་བཟླས་པ་ལུང་གི་དངོས་གྲུབ་སྩོལ༔ འཁྲུལ་བ་མེད་པ་ཐུགས་ཀྱི་སྒོ་ཕྱེ་ནས༔ སྐྱེ་འཆིའི་འཇིགས་བྲལ་མཆོག་གི་དངོས་གྲུབ་སྩོལ༔ བཀྲ་ཤིས་བུམ་བཟང་ཚེ་རྟེན་དཔལ་གྱིས་གཏམས༔ ཡོན་ཏན་མི་འགྱུར་ལྷུན་གྲུབ་དངོས་གྲུབ་སྩོལ༔ རོ་བཅུད་ནུས་ལྡན་ཕུན་ཚོགས་འབྲང་རྒྱས་དཔལ༔ རྒྱལ་བའི་འཕྲིན་ལས་རབ་འབྱམས་དངོས་གྲུབ་སྩོལ༔ ཅེས་བརྗོད་རྩ་སྔགས་བཟླ་ཞིང་ཀཱ་ཡ་ཝཱཀྐ་ཙིཏྟ་སརྦ་སིངྔྷི་ཕ་ལ་ཧཱུྃ༔ དངོས་གྲུབ་ཀྱི་རྫས་རྣམས་ལག་ཏུ་ཐོགས་ཏེ་གནས་ལྔར་གཏུག༔ ཚེ་ཡི་རིག་འཛིན་མཆོག་གི་དངོས་གྲུབ་ཐོབ་པར་བསམ༔ རྫས་ལ་རོལ༔ མཆེད་ལྕམ་རྣམས་ལ་ཚིག་གོང་ལྟར་བརྗོད་ཅིང་དབང་བསྐུར༔ དམིགས་པས་རྒྱས་གདབ་བོ༔ ས་མ་ཡཱ༔ རྒྱ་རྒྱ་རྒྱ༔ གཉིས་པ་གཏེར་སྦ་བ་ནི༔ རྫའི་གའུ་འམ་བུམ་པའི་ནང་དུ་སྙིང་པོ་ལྔ༔ སྨན་ལྔ༔ དྲི་ལྔ༔ འབྲུ་ལྔ༔ རིན་པོ་ཆེ་ལྔ༔ སྒྲུབ་རྫས་དང་སྒྲུབ་གཏོར་རྣམས་ཀྱིས་ཁེངས་པར་དགང་ཞིང་དར་སྣ་ལྔའི་མགུལ་ཆིངས་བརྒྱན༔ འབྲས་བུ་ཅན་གྱི་ཤིང་གིས་སྤྲས་པ་ལ་རྡོ་རྗེ་སློབ་དཔོན་གྱིས་རྒྱས་བཏབ་པ་ཐོགས་ཏེ༔ ས་གཡང་ཆེ་བའི་རི་ལ་གཏེར་དུ་སྦ་ཞིང་མཆེད་ལྕམ་རྣམས་ཀྱིས་རོལ་མོ་དང་མེ་ཏོག་གིས་མཆོད་ཅིང་འདི་སྐད་དོ༔ ཧཱུྃཿ བཀྲ་ཤིས་ལྷ་མོ་ས་ཡི་བསྟན་མ་དང་༔ ཡུལ་ཕྱོགས་འདིར་གནས་དཀར་ཕྱོགས་སྐྱོང་བ་རྣམས༔ དགོས་འདོད་འབྱུང་བའི་རིན་ཆེན་བུམ་བཟང་འདི༔ བསྟན་འགྲོའི་བདེ་སྐྱིད་མི་ནུབ་བསྟན་པའིི་བཙས༔ བདག་ཅག་རྣམ་འབྱོར་རིག་འཛིན་འཁོར་བཅས་ཀྱི༔ ས་ལམ་ཡོན་ཏན་མི་ཟད་བསྒྲུབ་པའི་རྟེན༔ ལྷ་ཀླུ་གཞི་བདག་བང་མཛོད་ནོར་གྱི་མཆོག༔ གཏེར་ཆེན་འདི་སྦ་གཏེར་གྱི་བསྲུང་མར་བཅོལ༔ བྱང་ཆུབ་སེམས་མཆོག་ཐབས་ཤེས་རྟེན་འབྲེལ་མཐུས༔ སྟོང་གསུམ་འཇིག་རྟེན་ཡུལ་ཕྱོགས་རྒྱལ་ཁམས་སུ༔ ནད་མུག་མཚོན་འཁྲུག་དུས་ཀྱི་ཡོ་ལང་ཞི༔ བཀྲ་ཤིས་ཡོན་ཏན་དཔལ་འབྱོར་སྙན་གྲགས་སྟོབས༔ ཡར་ངོའི་ཟླ་ལྟར་འཕེལ་ཞིང་རྒྱས་གྱུར་ཅིག༔ ཅེས་བརྗོད་བཀྲ་ཤིས་བརྗོད་ཅིང་ས་ལ་སྦ༔ གནས་སྐབས་མཐར་ཐུག་ཡོན་ཏན་དགོས་ཆེད་མང་༔ ས་མ་ཡཱ༔ རྒྱ་རྒྱ་རྒྱ༔ གསུམ་པ་གཏོར་མ་བསྐྱང་བ་ནི༔ ཆད་ཐོ་གྱེར་ཞིང་ཟོར་དུ་འཕེན༔ སྒྲུབ་གཏོར་མཛོད་ཀྱི་ཕུག་ཏུ་སྦ༔ སྒྲུབ་ཁང་གི་ཐེམ་འོག་ཏུ་རྟ་བྲོ་བརྡུང་༔ ཧཱུྃཿ གསང་བ་ཚེ་ཡི་དཀྱིལ་འཁོར་དུ༔ བསྙེན་སྒྲུབ་ཟབ་མོའི་རྗེས་འབྲེང་ཞིང་༔ བསྒྲུབ་ལ་བར་གཅོད་སྒབ་འདྲེ་རྣམས༔ གཏོར་གཞོང་རི་རབ་གླིང་འོག་མནན༔ བྱང་ཆུབ་སེམས་མཆོག་མ་སྐྱེས་པར༔ ནམ་ཡང་ལྡང་བར་མ་བྱེད་ཅིགད༔ དགྲ་བགེགས་སརྦ་ཤ་ཏྲུཾ་སྟམ་བྷ་ཡ་ནན་ནན༔ ཞེས་བརྗོད་རྟ་བྲོའི་རྒྱ་ཡིས་གདབ༔ ས་མ་ཡཱ༔ རྒྱ་རྒྱ་རྒྱ༔ བཞི་པ་ཚེ་འགུགས་པ་ནི༔ བུམ་པ་རིན་ཆེན་གཞལ་ཡས་ཁང་གི་དབུས་སུ་ཚེ་དཔག་མེད་ཀྱི་ལྷ་ཚོགས་ཐམས་ཅད་གསལ་ཞིང་༔ འོད་ཟེར་ཕྱོགས་བཅུ་ཀུན་ཏུ་འཕྲོས་པས་འཁོར་འདས་ཐམས་ཅད་ཀྱི་བྱིན་རླབས་དང་གཟི་བརྗིད༔ ཚེ་བསོད་ནམས་དཔལ་འབྱོར་བ༔ ཁ་རྗེ་དབང་ཐང་༔ ལུང་རྟོག་གི་ཡོན་ཏན་དང་བཅས་པ༔ འབྱུང་བཞིའི་རོ་ནུས་བླ་ཚེ་ཆད་ཉམས་ཐམས་ཅད་འུབ་འུབ་བསྡུས་ཏེ༔ རང་དང་སྒྲུབ་རྫས་ཀྱི་ཚེ་བུམ་རྣམས་ལ་ཐིམ་པར་དམིགས་ཤིང་ཚེ་འགུགས་འདོན༔ བསྙེན་པ་བརྒྱ་སྟོང་གིས་ཁ་གསོ༔ མདའ་དར་གྱིས་རྒྱས་གདབ་བོ༔ དེས་ནི་ཚེ་ཡི་དངོས་གྲུབ་ལ་སྤྱོད་པར་འགྱུར་རོ༔ ས་མ་ཡཱ༔ རྒྱ་རྒྱ་རྒྱ༔ ལྔ་པ་དཀྱིལ་འཁོར་བསྡུ་བ་ནི༔ ཧཱུྃཿ བླ་མེད་གསང་བའི་དཀྱིལ་འཁོར་འདིར༔ ལྷ་ཚོགས་གསལ་ཞིང་ལས་ལ་སྦྱར༔ ད་ནི་ཡེ་ཤེས་དོན་གྱི་ལྷ༔ ཆོས་ཀྱི་དབྱིངས་སུ་གཤེགས་ནས་ཀྱང་༔ སླར་ཡང་བདག་ཅག་རྗེས་སྐྱོང་འཚལ༔ ཅེས་བརྗོད་པས་ཡེ་ཤེས་པ་གཤེགས་དམ་ཚིག་པ་རང་ལ་བསྡུ༔ དཀྱིལ་འཁོར་གྱི་རྫས་རྣམས་མཐའ་ནས་དབུས་སུ་བསྡུ་བར་བྱའོ༔ ས་མ་ཡཱ༔ རྒྱ་རྒྱ་རྒྱ༔ དྲུག་པ་ལྷག་ཆད་བསྐང་བ་ནི༔ དབྱངས་གསལ་བྱེད་ཡེ་རྡརྨ་ཅི་མང་བརྗོད་ཅིང་༔ ཧཱུྃཿ ཡེ་ཤེས་ལྷ་ཚོགས་སྲུང་མ་རྣམས༔ གསང་སྔགས་ཟབ་མོའི་ལམ་ཟབ་འདིར༔ བསྙེན་སྒྲུབ་བཟླས་པར་དམ་བཅས་ཀྱང་༔ བསྐྱེད་རྫོགས་ལས་སུ་མ་རུང་ཞིང་༔ ལྷག་ཆད་ནོར་འཁྲུལ་ཅི་མཆིས་པ༔ མཐོལ་བཤགས་བཟོད་གསོལ་དང་དུ་བཞེས༔ ཚངས་པ་མཆོག་གི་དངོས་གྲུབ་སྩོལ༔ ཅེས་བརྗོད་ཡི་གེ་བརྒྱ་པ་བཟླ༔ ས་མ་ཡཱ༔ རྒྱ་རྒྱ་རྒྱ༔ བདུན་པ་ཡོན་འབུལ་བ་ནི༔ མཆེད་ལྕམ་རྣམས་ཀྱི་རྡུལ་གཟན་སྟེགས་བུའི་དབུས་སུ་བརྩེགས་པའི་ཁར་རྡོ་རྗེ་སློབ་དཔོན་གཟུངས་མ་དང་བཅས་པ་བཞུགས་སུ་གསོལ༔ རིན་ཆེན་སྣ་ཚོགསནོར་གྱི་དབྱིག་དང་མཁོ་བའི་ཡོ་བྱད་ཅི་འབྱོར་སྤུང་༔ སྐྱེམས་དང་བཅས་ཏེ་འདི་སྐད་ཞུའོ༔ ཧཱུྃཿ རྡོ་རྗེ་སློབ་དཔོན་དགོངས་སུ་གསོལ༔ དུས་གསུམ་རྒྱལ་བའི་འཕྲིན་ལས་པ༔ ཟབ་གསང་བླ་མེད་ཆོས་མཛོད་འཆང་༔ རབ་འབྱམས་འཕྲིན་ལས་རྣམ་བཞིའི་བདག༔ རྣམ་འཕྲུལ་མཛད་པའི་ཏིང་འཛིན་གྱིས༔ བདག་ཅག་སྨིན་གྲོལ་ལམ་ལ་བཀོད༔ སྟོང་གསུམ་ལྷ་མིའི་དཔལ་འབྱོར་དབང་༔ ཕུལ་ཀྱང་སྐུ་དྲིན་ཟུར་མི་འཁོར༔ འོན་ཀྱང་རིན་ཆེན་ནོར་གྱི་དབྱིག༔ མཁོ་དགུའི་དཔལ་འབྱོར་འདི་ཕུལ་བས༔ ཆོས་དབྱིངས་དགོངས་པ་ཡོངས་དགྱེས་ནས༔ མཁྱེན་དང་བརྩེ་བའི་ཏིང་འཛིན་གྱིས༔ བདག་ཅག་རྗེས་བཟུང་དངོས་གྲུབ་སྩོལ༔ གཟུངས་མ་རྒྱལ་ཐེབས་ཐུགས་ཀྱི་སྲས༔ སྦ་སྲི་མེད་པར་ཡོན་གྱིས་མཆོད༔ བདག་ལ་དགྱེས་དགོངས་སྨིན་གྲོལ་སྩོལ༔ ཅེས་བརྗོད་ཕུད་དྲངས་སྐུ་ཡོན་འབུལ༔ མཁོ་བར་གྱུར་ན་མཆོག་ཡིན་ནོ༔ ས་མ་ཡཱ༔ རྒྱ་རྒྱ་རྒྱ༔ བརྒྱད་པ་མར་མེ་སྨོན་ལམ་འདེབས་པ་ནི༔ མཆེད་ལྕམ་རྣམས་ལངས་ནས་མར་མེ་དང་དྲི་བཟང་གི་སྤོས་རེད་རྣམས་ཐོགས༔ རིག་མ་མཚན་དང་ལྡན་པ་ཁྲུས་བྱས་རྒྱན་གྱིས་སྤྲས་ཏེ༔ རྡོ་རྗེ་སློབ་དཔོན་གྱི་མདུན་དུ་ཀ་པཱ་ལ་ཆང་གིས་བཀང་བ་ཐོགས་ཤིང་དབྱངས་སྙན་པོས་འདི་སྐད་དོ༔ ཧཱུྃཿ བླ་མེད་གསང་བ་མཆོག་གི་དཀྱིལ་མཁོར་དུ༔ སྨོན་ལམ་དབང་གིས་རིག་འཛིན་བདག་ཅག་འདུས༔ ལས་འཕྲོའི་དབང་གིས་དཀྱིལ་འཁོར་གཅིག་ཏུ་ཚོགས༔ རྡོ་རྗེ་སློབ་དཔོན་གཉན་གྱི་སྐུ་དྲིན་དང་༔ རྒྱལ་ཐེབས་གཟུངས་མ་ཐུགས་སྲས་རྟེན་འབྲེལ་མཐུས༔ དམ་ཚིག་གཅིག་པའི་རྡོ་རྗེ་མཆེད་ལྕམ་རྣམས༔ མི་འབྲལ་ཐུགས་རྗེས་འཛིན་ཅིང་འགྲོག་པར་ཤོག༔ འདི་ཕྱི་བར་གསུམ་དུས་རྣམས་ཐམས་ཅད་དུ༔ བླ་མ་མགོན་པོ་རིགས་བདག་ལྷ་རུ་ཤོག༔ འདུས་བྱས་མི་རྟག་ལུས་འདི་བོར་མ་ཐག༔ ལམ་མྱུར་རྒྱལ་བའི་དཀྱིལ་འཁོར་འདི་མཐོང་ཞིང་༔ མཁའ་སྤྱོད་གྲུབ་ནས་མཆོག་གི་ས་ཐོབ་སྟེ༔ མཁའ་འགྲོ་དམ་ཅན་རྒྱ་མཚོས་ཡོངས་བསྐོར་ཞིང་༔ རིག་འཛིན་མཆོག་གི་གོ་འཕང་མངོན་གྱུར་ནས༔ ཆོས་དབྱིངས་དམ་པ་ཀུན་བཟང་ལ་གནས་ཤོག༔ དེ་ལྟར་མ་གྱུར་ཚེ་རབས་ཐམས་ཅད་དུ༔ ལས་ཀྱི་དབང་གིས་འཁོར་བར་སྐྱེས་གྱུར་ན༔ རྡོ་རྗེ་སློབ་དཔོན་བྱམས་པའི་ཏིང་འཛིན་དང་༔ མཆེད་ལྕམ་ལྟ་སྤྱོད་ཏིང་འཛིན་བསོད་ནམས་མཐུས༔ སྣང་གསལ་མར་མེ་འདི་ཡི་གཟི་བརྗིད་ཀྱིས༔ དུག་གསུམ་བག་ཆགས་སྒྲིབ་པ་རང་སར་དག༔ ཏིང་འཛིན་སྐུ་གསུམ་ཡེ་ཤེས་རྒྱུད་གསལ་ནས༔ མཆོག་གི་མི་ལུས་བླ་མས་རྗེས་བཟུང་སྟེ༔ ལྟ་སྒོམ་སྤྱོད་འབྲས་ཐོས་བསམ་ལས་རུང་ཞིང་༔ བྱང་ཆུབ་འབྲས་བུ་མངོན་དུ་གྱུར་ནས་ཀྱང་༔ ཇི་སྲིད་འཁོར་བ་འཇིག་རྟེན་མ་སྟོངས་བར༔ གཞན་དོན་འཕྲིན་ལས་སྣ་ཚོགས་ཐབས་ཆེན་གྱིས༔ ཁམས་གསུམ་འཁོར་བ་དོང་ནས་སྤྲུག་གྱུར་ཅིག༔ ཅེས་བརྗོད༔ སྨོན་ལམ་ཅི་བཏབ་དུས་འདིར་འགྲུབ་པས༔ གཞན་ཡང་ཐེག་པ་ཆེན་པོའི་སྨོན་ལམ་མང་དུ་བཏབ་བོ༔ ས་མ་ཡཱ༔ རྒྱ་རྒྱ་རྒྱ༔ དགུ་པ་བཀྲ་ཤིས་བརྗོད་པ་ནི༔ ནས་དཀར་མོ་ལ་རྟེན་འབྲེལ་སྙིང་པོ་བཏབ་པ་འཐོར་ཞིང་༔ ཧཱུྃཿ དབྱིངས་མཆོག་དམ་པ་དགེ་ལེགས་དཔལ་གྱི་གནས༔ ཕུན་སུམ་ཚོགས་པ་ནུབ་ཕྱོགས་བདེ་བ་ཅན༔ མཚན་དཔེ་ཡོངས་རྫོགས་ཆོས་སྐུ་སྣང་མཐའ་ཡས༔ དམ་པ་དེས་ཀྱང་དེང་འདིར་བདེ་ལེགས་སྩོལ༔ ལྷག་པའི་ལྷ་མཆོག་ལོངས་སྐུ་མཚན་དཔེས་བརྒྱན༔ མ་ཆགས་སྐྱོན་བྲལ་རིག་འཛིན་ཚེ་དཔག་མེད༔ དུས་མིན་འཆི་བའི་འཇིགས་པ་སྐྱོབ་མཛད་པ༔ དམ་པ་དེས་ཀྱང་དེང་འདིར་བདེ་ལེགས་སྩོལ༔ དུས་གསུམ་སངས་རྒྱས་འགྲོ་བའི་དོན་དུ་སྤྲུལ༔ སྐྱེ་འཆིའི་འཇིགས་བྲལ་སློབ་དཔོན་པདྨ་འབྱུང་༔ ལྔབརྒྱའི་དུས་ནའང་ཐུགས་རྗེས་དད་ལྡན་འདྲེན༔ དམ་པ་དེས་ཀྱང་དེང་འདིར་བདེ་ལེགས་སྩོལ༔ ཅེས་བརྗོད་མེ་ཏོགའཐོར་ཞིང་རོལ་མོ་འཁྲོལ༔ ས་མ་ཡཱ༔ རྒྱ་རྒྱ་རྒྱ༔ བཅུ་པ་ལུས་བསྲུང་བ་ནི༔ རང་ཉིད་ཀྱི་ངོ་བོ་ཆོས་སྐུའི་རོལ་པ་མ་འགགས་པ་ལས་པདྨ་དབང་ཆེན་དུ་བསྐྱེད་ཅིང་༔ སྟེང་འོག་ཕྱོགས་མཚམས་བསྲུང་བའི་འཁོར་ལོས་རྒྱས་གདབ་སྟེ༔ ཨོཾ་བཛྲ་ཀྲོ་ཏ་ཧྱ་གྷྲཱི་ཝ་ཧུ་ལུ་ཧུ་ལུ༔ བཛྲ་ཀྲོ་ཏ་རཀྵ་ཧཱུྃ་ཕཊ༔ ཅི་མང་བཟླའོ༔ ས་མ་ཡཱ༔ རྒྱ་རྒྱ་རྒྱ༔ བཅུ་གཅིག་པ་གནས་བསྲུང་བ་ནི༔ རྒྱལ་ཆེན་བཞི་དང་སྒོ་བྱང་རྣམས་ལ་གཏོར་མ་འབུལ༔ མཚམས་ཐོ་བསྡུ༔ དེ་ནས་བླ་མ་ཡི་དམ་གྱི་གཏོར་མ་བཞུང་ལྟར་བཤམས༔ འཕྲིན་ལས་བཏང་༔ ཡོ་བྱད་ལྷག་མ་རྣམས་ཚོགས་ཀྱི་འཁོར་ལོ་ལ་སྒྱུར༔ དེ་ནུབ་གནས་མལ་དེ་ནས་གཞན་དུ་མི་འགྲོ་ཞིང་བཀྲ་ཤིས་པའི་གླུ་བྲོ་སྣ་ཚོགས་བྱ༔ དཀྱིལ་འཁོར་གྱི་རྡུལ་ཚོན་རྣམས་རི་བོ་ཆེན་པོའི་རྩེའམ༔ ཆུ་བོ་ཆེན་པོའི་གཞུང་དུ་མཆེད་ལྕམ་རྣམས་ཆས་ལ་ཞུགས་ཏེ་རོལ་མོ་དང་བཅས་པས་སྐྱེལ་བར་བྱའོ༔ ས་མ་ཡཱ༔ རྒྱ་རྒྱ་རྒྱ༔ བཅུ་གཉིས་པ་བསྔོ་བ་ནི༔ སྤྱི་འགྲོས་སུ་ཤེས་པར་བྱའོ༔ ས་མ་ཡཱ༔ རྒྱ་རྒྱ་རྒྱ༔ ཨེ་མ་ཟབ་པའི་སྙིང་པོ་འདུས་པའི་མདོ༔ ཡིད་བཞིན་དགོས་འདོད་སྒྲུབ་པའི་སྒྲུབ་ཆེན་ཆིངས༔ མན་ངག་ཟབ་རྒྱས་དྲིལ་བའི་སྙིང་པོ་འདི༔ ཕྱི་མའི་དོན་དུ་ལེགས་པར་བཀོད་ནས་ཀྱང་༔ རིན་ཆེན་ས་ལ་གཏེར་དུ་སྦས་ཏེ་བཞག༔ ལས་འཕྲོ་ཅན་གྱི་བུ་དང་འདི་འཕྲད་ནས༔ གསང་སྔགས་བསྟན་པ་མི་ནུབ་སྒྲོན་མེར་ཤོག༔ སྲུང་མ་རྣམས་ཀྱིས་ཆོས་འདིའི་བྱ་ར་གྱིས༔ ས་མ་ཡཱ༔ རྒྱ་རྒྱ་རྒྱ༔ གཏེར་རྒྱ༔ སྦས་རྒྱ༔ ཟབ་རྒྱ༔ གཉན་རྒྱ༔ གཏད་རྒྱ༔ ས་མ་ཡཱ༔ རྒྱ་རྒྱ་རྒྱ༔ བདག་སྤྲང་བན་ཉི་མ་གྲགས་པས། ཤིང་མོ་ཡོས་ལོ་ཧོར་ཟླ་ལྔ་པའི་ཚེས་བཅུའི་དགོང་མོ་དབང་གི་དུས་སུ། ཤངས་ཟབལུང་གི་པཱ་ལོ་གུ་རུའི་སྒྲུབ་ཕུག་རྡོ་རྗེ་ཧཱུྃ་རྒྱ་བྲག་ནས་གདན་དྲངས་ཤིང་། ས་མོ་ལུག་གི་ལོ་ལ་ཤོག་སེར་ལས་ཕབ་པའོ༔ མངྒ་ལཾ།