ཚེ་རིལ་བུམ་སྒྲུབ་ཀྱི་རིམ་པ།

བཀའ་རྫོགས་པ་ཆེན་པོ་ཚེ་སྒྲུབ་བདུད་བཞིའི་གཡུལ་ལས་རྣམ་རྒྱལ་ལས༔ ཚེ་རིལ་བུམ་སྒྲུབ་ཀྱི་རིམ་པ་བཞུགས༔ ཚེ་ལྷ་རིག་འཛིན་རྣམས་ལ་འདུད༔ མ་འོངས་བསྐལ་པའི་ཐ་མ་ལ༔ ཆོས་བཞིན་སྤྱོད་པའི་སྐལ་ལྡན་དོན༔ ཚེ་སྒྲུབ་ཟབ་མོའི་ཡང་སྙིང་དུ༔ ཚེ་ཡི་རིལ་བུ་བསྒྲུབ་པའི་ཐབས༔ ཡི་གེར་འདེབས་ནས་གཏེར་དུ་སྦ༔ ལས་འཕྲོ་ཅན་གྱིས་སྤྱོད་པར་ཤོག༔ ས་མ་ཡཱ༔ རྒྱ་རྒྱ་རྒྱ༔ དེ་ལ་ཚེ་ཡི་བུམ་སྒྲུབ་འདི༔ སྔོན་འགྲོ་དངོས་གཞི་རྗེས་གསུམ་གྱི༔ རིམ་པར་དབྱེ་སྟེ་ཉམས་སུ་བླངས༔ འདིས་ནི་རྡོ་རྗེའི་ཚེ་འགྲུབ་ཅིང་༔ དངོས་གྲུབ་རྣམ་གཉིས་མྱུར་དུ་འཐོབ༔ ས་མ་ཡཱ༔ རྒྱ་རྒྱ་རྒྱ༔ དང་པོ་སྔོན་དུ་འགྲོ་བའི་རིམ་པ་ལ་ཐུན་མོང་དང་ཁྱད་པར་གཉིས་ལས༔ ཐུན་མོང་ནི་སྒྲུབ་ཆེན་ལྟ་བུ་ལ༔ ཁྱད་པར་གྱི་སྔོན་འགྲོ་ནི་གསུམ་སྟེ༔ རྫས་བསགས་པ་དང་༔ རིལ་བུ་བསྒྲིལ་བ་དང་༔ བུམ་པ་སྟ་གོན་བྱེད་པའོ༔ ས་མ་ཡཱ༔ རྒྱ་རྒྱ་རྒྱ༔ དང་པོ་རྫས་བསགས་པ་ནི་དོན་གསུམ་སྟེ༔ རྩ་བ་དང་གྲོགས་དང་སྐྱོབས་སོ༔ རྩ་བ་ལ་དགུ་སྟེ༔ སྲིད་པ་ཕོ་ཡི་བཅུད་ཅོང་ཞི༔ སྲིད་པ་མོའི་བཅུད་བྲག་ཞུན༔ འབྱུང་བ་ཆུའི་བཅུད་ལན་ཚ༔ འབྱུང་བ་མེའི་བཅུད་མེ་ཤེལ༔ འབྱུང་བ་རླུང་གི་བཅུད་བྱ་རྒོད་ཀྱི་མཁྲིས་པ༔ རྩི་ཏོག་གི་བཅུད་མ་ཧེའམ་མཛོ་མོའི་མར༔ འབྱུང་བ་མེ་ཏོག་གི་བཅུད་སྦྲང་རྩི༔ འབྱུང་བ་ཤིང་གི་བཅུད་བུ་རམ༔ འབྱུང་བ་འབྲས་བུའི་བཅུད་ཆང་སྟེ་དགུའོ༔ གཉིས་པ་གྲོགས་ལ་བཅུ་སྟེ༔ མཆོག་ཆེན་མིའི་ཤ༔ ཀུ་ཀུ་ཁྱི་ཡི་ཤ༔ ཅང་ཤེས་རྟའི་ཤ༔ གླང་ཆེན་བ་ལང་གི་ཤ༔ འདབ་ཆགས་ཁྱུང་གི་ཤ༔ མཚན་ལྡན་བཤེས་གཉེན་གྱི་དྲི་ཆུ༔ ནུས་ལྡན་སྔགས་པའི་དྲི་ཆེན༔ མཚན་ལྡན་བཅུ་དྲུག་མའི་རཀྟ༔ རྩ་བའི་བླ་མ་ཡབ་ཡུམ་གྱི་བྱང་སེམས་དཀར་དམར༔ ཁྱེའུ་ཕོ་མོ་གཙང་མའི་ཀླད་པ་དང་བཅུའོ༔ གསུམ་པ་སྐྱོབས་ལ་རྩ་བ་དང་ཡན་ལག་གོ༔ དང་པོ་རྩ་བའི་སྐྱོབས་ལ་བཅུ་སྟེ༔ ལི་ཤི་དང་༔ སུག་སྨེལ་དང་༔ གུར་གུམ་དང་༔ ཅུ་གང་དང་༔ ཀ་ཀོ་ལ་དང་༔ ཛ་ཏི་དང་༔ ཨ་རུ་ར་དང་༔ བ་རུ་ར་དང་༔ སྐྱུ་རུ་ར་དང་༔ གི་ཝང་དང་བཅུའོ༔ གཉིས་པ་ཡན་ལག་གི་སྐྱོབས་ལ་བཞི་སྟེ༔ ཉེ་ཤིང་དང་༔ ར་མོ་ཤག་དང་༔ དབང་ལག་དང་༔ རྟག་ངུ་དང་བཞིའོ༔ དེ་ལྟེ་རྩ་བ་གྲོགས་དང་སྐྱོབས་ཀྱི་ཚོགས་རྣམས་རྩ་བ་དང་ཡན་ལག་གི་ཆ་མཐུན་དུ་བསགས་མཁས་པར་བྱ་ཞིང་༔ བྲམ་ཟེ་སྐྱེ་བ་བདུན་པ་ཡིན་ངེས་པའི་ཤ་དང་༔ བདག་ཉིད་པདྨ་ཡབ་ཡུམ་གྱི་བྱང་སེམས་དཀར་དམར་ཨ་ཐམ་མ་འཁྲུལ་མེད་སོགས་ཀྱང་བཏབ་སྟེ༔ ཞིབ་པར་འདུལ་སྦྱང་ལ་མཁས་པར་བྱའོ༔ ས་མ་ཡཱ༔ རྒྱ་རྒྱ་རྒྱ༔ གཉིས་པ་རིལ་བུ་བསྒྲིལ་བ་ནི༔ མཚན་བཟང་གི་བུ་མོ་གཙང་མ་དང་༔ རིགས་ལྡན་གྱི་ཁྱེའུ་གཙང་མ་ཁྲུས་ནས་ཕྱུངས༔ སྐྱབས་སེམས་ཕོག༔ ཁ་ལྷོར་བལྟ་སྟེ་སྒྲིལ་བར་བྱའོ༔ ཆེ་ཆུང་ནི་རང་གི་འདོད་དང་བསྟུན་ཞིང་མཚལ་ལམ་ལི་ཁྲིའི་གོས་བཀོན་ནོ༔ ས་མ་ཡཱ༔ རྒྱ་རྒྱ་རྒྱ༔ གསུམ་པ་བུམ་པ་སྟ་གོན་ནི༔ མཚན་ཉིད་དང་ལྡན་པའི་རིན་པོ་ཆེའི་བུམ་པ་གུ་གུལ་གྱིས་བདུག༔ ཡུངས་ཀར་གྱིས་བྲབ༔ དྲག་སྔགས་ཀྱིས་གདོན་བགེགས་བསྐྲད་ཅིང་༔ རིལ་བུ་ནང་དུ་བླུགས་པ་དང་ཁ་དར་དམར་གྱིས་བཀབ༔ མགུལ་ཆིངས་དང་གཟུངས་ཐག་གིས་བརྒྱན་སྟེ༔ དཀྱིལ་འཁོར་གྱི་དབུས་སུ་སྒྲུབ་ཆེན་གྱི་རྒྱན་བཀོད་ལྟར་དགྲམ་མོ༔ ས་མ་ཡཱ༔ རྒྱ་རྒྱ་རྒྱ༔ གཉིས་པ་དངོས་གཞིའི་རིམ་པ་ལ་གསུམ་སྟེ༔ ལས་ཀྱི་གཞུང་བསྲང་བ༔ བསྙེན་ཅིང་སྒྲུབ་པ༔ དངོས་གྲུབ་ཞུ་བ་དང་གསུམ་མོ༔ ས་མ་ཡཱ༔ རྒྱ་རྒྱ་རྒྱ༔ དང་པོ་ལས་ཀྱི་བཞུང་བསྲང་བ་ནི༔ ཚེ་སྒྲུབ་འདི་ཉིད་ཀྱི་གཞུང་གཙོ་བོར་འདོན་ཞིང་གཞན་གཏེར་ཁ་གོང་འོག་མང་པོའི་ལས་གཞུང་བསྲང་བར་བྱའོ༔ ས་མ་ཡཱ༔ རྒྱ་རྒྱ་རྒྱ༔ གཉིས་པ་སྒྲུབ་པའི་རིམ་པ་ནི༔ ཕྱི་ལྟར་གནས་ཁང་གཞལ་ཡས་ཁང་གི་ནང་དུ༔ རིག་འཛིན་རྡོ་རྗེ་སློབ་དཔོན་མཆེད་ལྕམ་དྲལ་འདུས་པ་རྒྱ་མཚོའི་ཚོགས་དང་བཅས་པ་ཐམས་ཅད་རིག་འཛིན་ཚེ་ཡི་ལྷ་དང་ལྷ་མོའི་སྐུ་རུ་གསལ་ཞིང་༔ ནང་ལྟར་དཀྱིལ་འཁོར་གཞལ་ཡས་ཁང་གི་དབུས་སུ་སྒྲུབ་རྫས་ཕུན་སུམ་ཚོགས་པ་ཐམས་ཅད་ཚེ་ལྷའི་ངོ་བོར་གསལ་ཞིང་༔ གསང་བ་བུམ་པ་གཞལ་ཡས་ཁང་གི་དབུས་སུ་དམ་རྫས་གསང་བའི་རིལ་བུ་རེ་རེ་བཞིན་ཚེ་དཔག་མེད་ཡབ་ཡུམ་གྱི་སྐུ་རུ་ལམ་ལམ་དུ་བསྐྱེད་ཅིང་༔ བླ་མེད་ལྟར་རང་རིག་དྲི་མ་མེད་པའི་ཆ་ཚེ་དཔག་མེད་ཀྱི་ཡེ་ཤེས་རྡོ་རྗེའི་ཐུགས་དང་གཉིས་སུ་མེད་པར་གསལ་བའི་རོལ་པས༔ ཕྱི་ནང་གསང་གསུམ་གྱི་དཀྱིལ་འཁོར༔ ཁྱད་པར་གསང་བ་སྒྲུབ་རྫས་རིལ་བུ་ཚེ་ལྷར་གསལ་བའི་གནས་གསུམ་དུ་ས་བོན་ཡིག་འབྲུ་གསུམ་གྱི་འདུ་འཕྲོར་རྒྱས་གདབ་པས་གནས་གསུམ་ཨཱོཾ་ཨཱཿ ཧཱུྃ་གསུམ་གྱིས་མཚན་པར་བསམ༔ ཡིག་འབྲུ་གསུམ་ལས་འོད་ཟེར་གྱི་ཚོགས་གྲངས་མེད་དཔག་ཏུ་མེད་པ་འཕྲོས༔ བདེ་བ་ཅན་དང་དག་པའི་ཞིང་ཁམས་གྲངས་མེད་པ་ནས་ཚེ་ལྷ་ཡེ་ཤེས་སེམས་དཔའི་ཚོགས་ཉི་ཟེར་གྱི་རྡུལ་གྲངས་དང་མཉམ་པར་སྤྱན་དྲངས༔ ཕྱི་ནང་གསང་གསུམ་གྱི་དམ་ཚིག་པ་རྣམས་དང་༔ ཁྱད་པར་བུམ་པའི་སྒྲུབ་རྫས་ལྷར་གསལ་བ་ལ་གཉིས་མེད་དུ་ཐིམ་པར་བསྟིམ༔ བདག་ཉིད་ཚེ་དཔག་མེད་ཀྱི་སྐུ་རུ་གསལ་བའི་ཐུགས་ཀ་པདྨ་དབང་ཆེན་བསྒོམ་ཞིང་༔ དེའི་ཐུགས་ཀར་ཉི་དཀྱིལ་གྱི་སྟེང་དུ་ཧཱུྃ་དང་ཧྲཱིཿ ཡིག་གི་མཐར་སྔགས་ཕྲེང་གཡས་སྐོར་གྱི་འཁོར་ལོ་འཁོར་བ་ལས༔ མར་མེ་གཅིག་ལས་གཉིས་མཆེད་ཀྱི་ཚུལ་དུ་འཕྲོས༔ བདག་བསྐྱེད་ཀྱི་ཞལ་ནས་འཐོན༔ མདུན་བསྐྱེད་ཀྱི་ཞལ་དུ་ཞུགས༔ ཐུགས་ཀར་སྔགས་འབྲུ་རྣམས་ལ་ཐིམ༔ གཡས་སུ་དྲག་ཏུ་སྔགས་འབྲུ་རྣམས་འཁོར༔ ཐུགས་དམ་གྱི་རྒྱུད་བསྐུལ༔ འོད་ཟེར་ལྔ་ལྡན་གྲངས་མེད་དཔག་ཏུ་མེད་པ་ཕྱོགས་བཅུར་འཕྲོས༔ ཕྱོགས་བཅུའི་བདེ་གཤེགས་ཚེ་ལྷའི་ཚོགས་རྣམས་ལ་མཉེས་པའི་མཆོད་པ་ཕུལ༔ སྐུ་གསུང་ཐུགས་ཀྱི་བྱིན་རླབས་ཐམས་ཅད་འུབས་འུབས་བསྡུས་ནས་དཀྱིལའཁོར་གསུམ་གྱི་ཚོགས་ལ་བསྟིམ༔ ཡབ་ཡུམ་ཐམས་ཅད་ཡོངས་སུ་དགྱེས་ནས་སྙོམས་པར་ཞུགས་པས་དགའ་བཞིའི་ཡེ་ཤེས་ལམ་དུ་བྱས༔ ཕྱི་རིག་འཛིན་ཕོ་མོའི་ལུས་ངག་ཡིད་གསུམ༔ ནང་དཀྱིལ་འཁོར་སྒྲུབ་རྫས་ཀྱི་ཚོགས༔ གསང་བ་བུམ་པ་རིལ་བུ་དང་བཅས་པ་ཐམས་ཅད་ཡབ་ཡུམ་སྙོམས་པ་ཞུགས་པའི་བྱང་སེམས་དཀར་དམར་གྱིས་ལྟེམ་ལྟེམ་ཁྱབ་པས༔ ཐབས་ཤེས་ཀྱི་རང་བཞིན་དུ་ལམ་ལམ༔ བདེ་སྟོང་གི་ཡེ་ཤེས་སུ་ཟང་ཐལ་ཐལ༔ ཟུང་འཇུག་གི་ཆོས་ཉིད་དུ་བདེ་ཕྲིལ་ཕྲིལ་དུ་བསྒོམ་ཞིང་༔ ཨཱོཾ་ཧཱུྃ་ཏྲཾ་ཧྲཱིཿཨཱ༔ མཱཾ་ལཾ་མཾ་པཾ་ཏཾ༔ ཧྱ་གྷྲཱི་ཝ་ཛྙཱ་ན་བཛྲ་ཨཱ་ཡུ་ཤེ་ཚེ་བྷྲཱུྃ༔ ཡུ་བྷྲཱུྃ༔ ཡུ་ཚེ་བྷྲཱུྃ༔ ཛྙཱ་ན་སརྦ་སིངྔྷི་མ་མ་པ་ཤཾ་ཀུ་རུ་ཧཱུྃ་སྭཱ་ཧཱ༔ ཅེས་མི་ཚིག་གིས་བར་མ་ཆོད་པར་བཟླས་པའི་གྲངས་ནི༔ རབ་བདུན་གསུམ༔ འབྲིང་བདུན་གཉིས༔ ཐ་ནའང་བདུན་གཅིག་ལས་མི་ཉུང་བར་བསྒྲུབས་པས༔ དྲི་བཟང་འཐུལ་བ༔ རིལ་བུ་འཕུར་བ༔ ལྷ་ཞལ་མཐོང་བ་སོགས་རྟགས་ཁྱད་པར་ཅན་འབྱུང་བར་འགྱུར་རོ༔ ས་མ་ཡཱ༔ རྒྱ་རྒྱ་རྒྱ༔ གསུམ་པ་དངོས་གྲུབ་ཞུ་བ་ནི༔ སྒྲུབ་པའི་ལྟས་གསལ་བ་དང་༔ སྒྲུབ་རྫས་རིལ་བུ་ཚེའི་ལྷ་ཚོགས་སུ་མངོན་སུམ་དུ་བསྐྱེད་ལ༔ རིག་མས་སློབ་དཔོན་ལ་དབུལ་ཞིང་༔ སྒྲུབ་ཆེན་ལྟར་དངོས་གྲུབ་ཞུ༔ འདུས་པ་རྣམས་ལ་དབང་བསྐུར༔ རྗེས་བསྐྱང་སྒྲུབ་པའི་ཤུལ་མི་མངོན་པར་བྱ་བའམ་བརྟན་ཆགས་སུ་བཞག་གོ༔ ས་མ་ཡཱ༔ རྒྱ་རྒྱ་རྒྱ༔ འདི་ལྟར་གསང་བའི་སྙིང་ཏིག་མཆོག༔ ཚེ་སྒྲུབ་སྙིང་པོ་འདུས་པའི་མདོ༔ མན་ངག་ཡིད་བཞིན་རིན་ཆེན་འདི༔ ཚེ་དཔག་མེད་ཀྱིས་བདག་ཉིད་ལ༔ མངོན་སུམ་པྲ་ཁྲིད་ལག་ལེན་གནང་༔ བདག་གིས་རིག་འཛིན་ཚེ་བསྒྲུབས་པས༔ འཇིགས་མེད་སྐྱེ་འཆི་མེད་པར་གྱུར༔ བོད་ཡུལ་ཐུབ་པས་ཞབས་མ་བཅགས༔ མཐའ་འཁོབ་གདོང་དམར་བོད་ཁམས་འདིར༔ རྒྱལ་བློན་རྗེ་འབངས་གྲོལ་ལམ་བཀོད༔ མ་འོངས་ཕྱི་མའི་འགྲོ་དོན་དུ༔ ཟབ་ཆོས་མང་པོ་གཏེར་དུ་སྦས༔ ལས་འཕྲོའི་དབང་གིས་རྒྱུད་བསྐུལ་ནས༔ སྨོན་ལམ་དག་པའི་སྐྱེས་བུ་འགས༔ འགྲོ་དོན་དཔག་མེད་བྱེད་པར་འགྱུར༔ ཁྱད་པར་བཞི་བཅུ་ཁ་རལ་ནས༔ སུམ་ཅུར་ཉེ་བའི་དུས་དག་ཏུ༔ ཤངས་ཀྱི་ཟབ་ལུང་འདི་ཉིད་དུ༔ གཏེར་ལུང་བདུན་པར་ཆུ་གསར་རྡོལ༔ དེ་དུས་ང་ཡི་གཏེར་འདི་འདོན༔ དེ་ཚེ་སྐལ་ལྡན་ཉི་མ་གྲགས༔ སྒྲུབ་པ་འདིར་བརྩོན་ཚེ་རིལ་བསྟེན༔ ཚེ་ཡི་བར་ཆད་ཀུན་ལས་འགྲོལ༔ ཚེ་སྒྲུབ་རྩ་བའི་ཆོས་བདག་ལ༔ བཀའ་རྒྱས་ཐོབ་ལ་ཆོས་འདི་སྤེལ༔ ས་མ་ཡཱ༔ རྒྱ་རྒྱ་རྒྱ༔ གཏེར་རྒྱ༔ སྦས་རྒྱ༔ ཟབ་རྒྱ༔ གཉན་རྒྱ༔ གཏད་རྒྱ༔ ས་མ་ཡཱ༔ རྒྱ་རྒྱ་རྒྱ༔ བདག་སྤྲང་བན་ཉི་མ་གྲགས་པས་ཟབ་བུ་ལུང་ནས་གདན་དྲངས་པའོ། །མངྒ་ལཾ།