བདུད་རྩི་ཅོང་ཞིའི་བཅུད་ལེན།

བཀའ་རྫོགས་པ་ཆེན་པོ་ཚེ་སྒྲུབ་བདུད་བཞིའི་གཡུལ་ལས་རྣམ་རྒྱལ་ལས༔ བདུད་རྩི་ཅོང་ཞིའི་བཅུད་ལེན་བཞུགས༔ རིག་འཛིན་ཚེ་ཡི་ལྷ་ཚོགས་ལ༔ གུས་པས་བཏུད་དེ་མ་འོངས་དོན༔ བདུད་རྩི་ཅོང་ཞིའི་བཅུད་ལེན་ཞིག༔ ཡི་གེར་འདེབས་ནས་གཏེར་དུ་སྦ༔ ལས་འཕྲོ་ཅན་དང་འཕྲད་པར་ཤོག༔ ༔ དེ་ཡང་སྔོན་འགྲོ་དངོས་གཞི་རྗེས༔ ས་བཅད་གསུམ་གྱིས་ཕྱེ་སྟེ་བརྗོད༔ སྔོན་འགྲོ་བརྟག་དང་འདུལ་བ་དང་༔ དངོས་གཞི་བསྟེན་ཞིང་ལས་ལ་སྦྱར༔ རྗེས་ནི་ཕན་ཡོན་དམ་ཚིག་གོ༔ དང་པོ་བརྟག་པའི་རིམ་པ་ནི༔ ཕོ་ཅོང་རྩུབ་མཁྲེགས་རྟ་སོ་འདྲ༔ མོ་ཅོང་མཉེན་འཇམ་སོག་རྒྱུས་འདྲ༔ མ་ནིང་ཅོང་ཞི་ཆུར་བ་འདྲ༔ ཕོ་ཅོང་བསྟེན་པས་འདོད་ཆགས་འཕེལ༔ བགེགས་དང་བར་ཆད་རབ་ཏུ་རྩུབ༔ མོ་ཅོང་བདུད་རྩིའི་རང་བཞིན་ཏེ༔ འདོད་པའི་དངོས་གྲུབ་མྱུར་དུ་འཐོབ༔ མ་ནིང་ཅོང་ཞིས་ནད་ཀུན་འཇུག༔ འབྱུང་འཁྲུག་བགེགས་ཀྱི་རང་བཞིན་སྤང་༔ གཉིས་པ་འདུལ་བའི་རིམ་པ་ནི༔ བྱང་ཆུབ་སེམས་ལྡན་རྣལ་འབྱོར་པས༔ མཚན་ཉིད་ལྡན་པའི་ཅོང་ཞི་བཙལ༔ དཀར་ཕྱོགས་སྐྱོང་བའི་གཞི་བདག་ལ༔ གསེར་སྐྱེམས་མཆོད་ཅིང་འཕྲིན་ལས་བཅོལ༔ ས་ཡི་ལྷ་མོ་བསྟན་མ་ཡིས༔ རྫས་མཆོག་བདུད་རྩི་ཕུལ་བར་བསམས༔ ཚེ་སྒྲུབ་སྙིང་པོ་བཟླས་པའི་མཇུག༔ སརྦ་སིངྔྷི་སརྦ་པུཥྟིང་ཀུ་རུ་ཡེ་སྭཱ་ཧཱ༔ ཅེས་བཟླས་གཙང་མའི་སྣོད་དུ་བསགས༔ གཞི་མ་མཁྲེགས་པའི་རྡོ་ལེབ་སྟེང་༔ ནས་ཙམ་བརྡུང་ཞིང་ལྷད་རྣམས་བསལ༔ ཆུ་ཡིས་བཀྲུས་ཤིང་ཞིབ་ཏུ་བཏགས༔ རབ་ཏུ་དུལ་ནས་ལྕགས་སྣོད་དུ༔ ཆུ་དང་འོ་མ་འདྲེས་མར་འཚོད༔ རུས་ཁུ་ཚིལ་དང་མར་རྙིང་དང་༔ སྦྲང་བུར་ཀ་ར་ཨ་རུ་ར༔ སྔོན་དུ་བཏབ་སྟེ་ལེགས་པར་གདུ༔ ཉི་མར་སྐམ་ཞིང་ཆ་གཉིས་ཡོས༔ ཆ་གཅིག་ཅོང་ཞི་ལ་བྱས་ཏེ༔ ཟན་དང་སྐྱོ་ཚ་འགམ་ཕྱེ་སོགས༔ སྒྲུབ་པ་པོ་ཡི་ཁམས་བསྟུན་སྤྱོད༔ གཉིས་པ་དངོས་གཞིའི་རིམ་པ་ལས༔ དང་པོ་བསྟེན་པའི་རིམ་པ་ནི༔ རང་ཉིད་མགོན་པོ་ཚེ་དཔག་མེད༔ བསྐྱེད་རིམ་ལྡན་པའི་སྤྱི་གཙུག་ཏུ༔ རང་གི་རྩ་བའི་བླ་མ་ལ༔ བརྒྱུད་པའི་བླ་མས་བསྐོར་བར་བསམས༔ བདག་ནི་འཁོར་བ་འདིར་སྐྱོ་ཞིང་༔ བྱང་ཆུབ་བླ་མེད་འདོད་པའི་བུ༔ ཚེ་འདིར་ཆགས་ཞེན་འཁྲི་བ་བཅད༔ སྐྱབས་མེད་བདག་འདྲ་རྨོངས་པའི་རིགས༔ སངས་རྒྱས་ཀུན་འདུས་བླ་མ་རྗེ༔ ཐུགས་རྗེ་བྱིན་རླབས་མཛོད་ཁང་ནས༔ རྣམ་འཕྲུལ་དཔག་ཡས་འོད་ཟེར་གྱིས༔ བདག་རྒྱུད་གྲོལ་བར་བྱིན་གྱིས་རློབས༔ དམ་རྫས་གསང་བའི་བཅུད་ལེན་འདི༔ ལས་སུ་རུང་བར་བྱིན་གྱིས་རློབས༔ ལོངས་སྤྱོོད་བདུད་ཀྱི་སླུ་བྲིད་ལ༔ ཞེན་ཆགས་མེད་པར་བྱིན་གྱིས་རློབས༔ སྔོན་དུས་ཚེ་དབང་རིག་འཛིན་རྣམས༔ ཐུགས་བསྐྱེད་མཐར་ཕྱིན་སྨོན་ལམ་མཐུས༔ བདག་ལ་བྱིན་གྱིས་བརླབ་ཏུ་གསོལ༔ མཆོག་ཐུན་དངོས་གྲུབ་དུས་འདིར་སྩོལ༔ ཅེས་པའི་གསོལ་བ་ཡང་ཡང་བཏབ༔ དབང་བཞི་ལེན་ཞིང་ཐུགས་ཡིད་བསྲེ༔ ཟན་ལྟར་བསྟེན་ནམ་སྐྱོ་ཚ་འམ༔ འགམ་ཕྱེ་ལ་སོགས་རང་འདོད་བསྟུན༔ འདྲིས་ཤིང་སྐྱོ་བར་མི་སེམས་ཚེ༔ ཅོང་ཞི་ཆ་གཉིས་ཕྱེ་ཆ་གཅིག༔ དེ་ལས་རབ་ཏུ་འདྲིས་པའི་ཚེ༔ ཅོང་ཞི་གཅིག་པུར་བསྟེན་པར་བྱ༔ གཉིས་པ་ལས་ལ་སྦྱར་བ་ནི༔ བདུད་རྩིའི་རྒྱལ་པོ་ཅོང་ཞི་ལ༔ རུས་ཁུ་རྙིང་པ་བུ་རམ་སྦྱར༔ ཡུན་དུ་བསྟེན་པས་རླུང་ནད་རིགས༔ རབ་ཏུ་སེལ་ཞིང་གྲོལ་བར་བྱེད༔ བདུད་རྩིའི་རྒྱལ་པོ་ཅོང་ཞི་ལ༔ ཀ་ར་སྦྲང་རྩི་དུག་མོ་ཉུང་༔ སྦྱར་ཞིང་བསྟེན་པས་མཁྲིས་ནད་འཇོམས༔ བདུད་རྩིའི་རྒྱལ་པོ་ཅོང་ཞི་ལ༔ སྒ་དང་སེའུ་འབྲུ་པི་པི་ལིང་༔ སྦྱར་ཞིང་བསྟན་པས་བད་ཀན་སེལ༔ བདུད་རྩིའི་རྒྱལ་པོ་ཅོང་ཞི་ལ༔ བྲག་ཞུན་སྦྱར་བཏང་ཆུ་སེར་ཞི༔ བདུད་རྩིའི་རྒྱལ་པོ་ཅོང་ཞི་ལ༔ ཨ་རུ་གསེར་མདོག་བྱ་རོག་མིག༔ སྦྱར་ཞིང་བསྟུན་པས་རབ་རིབ་སེལ༔ བདུད་རྩིའི་རྒྱལ་པོ་ཅོང་ཞི་ལ༔ ལུག་མགོའི་གདུས་ཁུ་བཏབ་སྟེ་བཏང་༔ རྣ་བ་འོན་པ་སེལ་བར་བྱེད༔ བདུད་རྩིའི་རྒྱལ་པོ་ཅོང་ཞི་ལ༔ ཚ་སྦྱར་བསྟེན་པས་མ་ཞུ་འཇོམས༔ གསུམ་པ་རྗེས་ཀྱི་རིམ་པ་ནི༔ འདིར་ལྟར་བསྟན་པའི་ཕན་ཡོན་ནི༔ འདུ་འཛི་ལོངས་སྤྱོད་འཁྲི་བ་ཆོད༔ བྱང་ཆུབ་སེམས་མཆོག་ལས་སུ་རུང་༔ ཏིང་འཛིན་འཕེལ་ཞིང་ཉམས་རྟོགས་འཆར༔ རླུང་སེམས་ལས་རུང་དབུ་མར་དྭངས༔ འབྱུང་བ་བཞི་ལ་ཟང་ཐལ་འགྲོ༔ རྒས་མེད་ཚེ་དབང་རིག་འཛིན་འཐོབ༔ གཅོང་ཆེན་སྡེ་བཞིའི་ནད་རྣམས་བྱང་༔ གཉིས་པ་དམ་ཚིག་རིམ་པ་ནི༔ རླུང་སྦྱོར་གཅུན་ཞིང་འཁྲུལ་འཁོར་འབུང་༔ ཨ་ཧཾ་འབར་འཛག་གནད་དུ་བསྣུན༔ སྒོག་བཙོང་སྔོ་ཚོད་ལ་ཕུད་དང་༔ བསིལ་ཟས་ར་ཤ་སྣུམ་ནག་གྲོ༔ མེ་དང་ཉི་མ་འདོད་ལོག་སྤང་༔ རྫོགས་རིམ་མི་རྟོག་ཏིང་འཛིན་ངང་༔ ཚེ་ཡི་སྒྲུབ་ཐབས་སྔགས་དམིགས་བསྒོམ༔ ས་མ་ཡཱ༔ རྒྱ་རྒྱ་རྒྱ༔ ཨེ་མ་རྒྱ་གར་འཕགས་ཡུལ་ནས༔ གསང་སྔགས་མཁའ་འགྲོའི་གསང་མཛོད་བརྡོལ༔ བདག་འདྲ་པདྨ་འབྱུང་གནས་ངས༔ སངས་རྒྱས་སྟོང་གི་འཕྲིན་ལས་པ༔ པྲེ་ཏ་བོད་ཀྱི་རྒྱལ་ཁམས་འདིར༔ བསྟན་པ་བཙུགས་ཤིང་ལྷ་འདྲེ་བཏུལ༔ བླ་མེད་ཆོས་གཏེར་ས་འོག་བཀང་༔ མ་འོངས་འགྲོ་ལ་དྲིན་ཆེན་བྱས༔ དུས་ངན་སྙིགས་མའི་འགྲོ་བ་རྣམས༔ དྲིན་ནི་མི་དྲན་ཁྱེད་རྣམས་ཤེས༔ མ་འོངས་བོད་ཀྱི་རྒྱལ་ཁམས་འདིར༔ ཆོས་པར་ཁ་གཡར་ཚེ་འདི་སྒྲུབས༔ སྟོོ་གོས་ཕོངས་པ་ཞེ་ལ་བཅགས༔ དཀའ་ཐུབ་བཅུད་ལེན་རྒྱང་དུ་འབོར༔ ངན་སོང་གསུམ་ལ་ཁྱུ་དེད་འཁྱམ༔ དེ་ཚེ་ང་ཡི་སྤྲུལ་པ་ཡིས༔ ཆོས་འདི་རྙེད་ནས་བསྟན་འགྲོ་ཡི༔ བདེ་བ་ཡུན་དུ་བསྐྲུན་པར་ཤོག༔ སྲུང་མས་བཀའ་འདིའི་བྱ་ར་གྱིས༔ ས་མ་ཡཱ༔ རྒྱ་རྒྱ་རྒྱ༔ གཏེར་རྒྱ༔ སྦས་རྒྱ༔ ཟབ་རྒྱ༔ གཉན་རྒྱ༔ གཏད་རྒྱ༔ ས་མ་ཡཱ༔ རྒྱ་རྒྱ་རྒྱ༔ བདག་སྤྲང་བན་སྒོམ་སྡེ་པས་ཤངས་ཟབ་བུ་ལུང་ནས་གདན་དྲངས་པའོ༔ མངྒལཾ། །