སྨན་མཆོག་ཨ་རུ་རའི་བཅུད་ལེན།

བཀའ་རྫོགས་པ་ཆེན་པོ་ཚེ་སྒྲུབ་བདུད་བཞིའི་གཡུལ་ལས་རྣམ་རྒྱལ་ལས༔ སྨན་མཆོག་ཨ་རུ་རའི་བཅུད་ལེན་བཞུགས༔ འཆི་མེད་ཚེ་ཡི་ལྷ་ལ་འདུད༔ ཟབ་ཆོས་ཚེ་སྒྲུབ་ཆ་རྐྱེན་དུ༔ སྨན་མཆོག་རྒྱལ་པོ་ཨ་རུ་རའི༔ བཅུད་ལེན་བཀོད་ནས་གཏེར་དུ་སྦ༔ ལས་འཕྲོ་ཅན་གྱིས་སྤྱོད་པར་ཤོག༔ ཨ་རུ་གསེར་མདོག་ཤ་ཆེན་རིགས༔ ཉེར་ལྔ་སུམ་ཅུ་ཞེ་ལྔ་སོགས༔ རབ་འབྲིང་ཐ་མ་ཇི་སྙེད་བསགས༔ བྲེ་གང་འོ་མར་ཞག་འགའ་སྦང་༔ ལུག་ཤ་བཅུད་ལྡན་ལྷུ་གཅིག་པ༔ ཞིབ་ཏུ་བཏུལ་ནས་བྲེ་གང་ཆུར༔ གདུས་ཏེ་སྐོལ་ཐག་བཏང་བར་བྱ༔ ཤིན་ཏུ་ཉུང་ངུར་འདུས་པ་དང་༔ ཁུ་བ་བཙགས་ནས་འོ་མར་བསྲེ༔ ཆེ་ཆུང་རན་པའི་མེ་ལ་བསྐོལ༔ འོ་མ་ཁོལ་དུས་ཨ་རུ་འཚོད༔ འདམ་ཐག་ཁར་བ་ཨ་རུར་གདུ༔ གྲིབ་མར་བསྐམ་ཞིང་རིམ་གྱིས་བསྟེན༔ རླུང་སྦྱོར་འབད་ཅིང་འཁྲུལ་འཁོར་བརྩོན༔ སྤྱི་བོར་མགོན་པོ་ཚེ་དཔག་མེད༔ ཡབ་ཡུམ་སྦྱོར་བའི་བྱང་སེམས་བབས༔ གསོལ་བ་བཏབ་པའི་མོས་གུས་ཀྱིས༔ རྩ་གསུམ་འཁོར་ལོ་ཀུན་གང་རྒྱས༔ ཚེ་བསོད་ཉམས་རྟོགས་ཡོངས་འཕེལ་ནས༔ ཚེ་ཡི་རིག་འཛིན་ཐོབ་པར་བསམས༔ བླ་མ་མགོན་པོ་ཚེ་དཔག་མེད༔ སྐུ་བཞི་ཡེ་ཤེས་ལྔ་ཡི་བདག༔ མགོན་མེད་བདག་གི་སྐྱབས་མཆོག་རྗེ༔ རྩེ་གཅིག་ངང་ནས་གསོལ་བ་འདེབས༔ ཐུགས་རྗེའི་ཡེ་ཤེས་བྱིན་རླབས་དང་༔ ཟབ་མོ་གནད་ཀྱི་རྟེན་འབྲེལ་གྱིས༔ སྣང་སྲིད་སྣོད་བཅུད་འོད་སྐུར་གྲོལ༔ སྒྱུ་ལུས་ཕུང་པོ་ཟག་མེད་འགྲུབ༔ བདེ་སྟོང་ཡེ་ཤེས་རང་ས་ཟིན༔ སྐུ་བཞིའི་འབྲས་བུ་མངོན་གྱུར་ནས༔ ཕྱག་རྒྱ་ཆེན་པོའི་རིག་པ་འཛིན༔ ཚེ་དབང་དངོས་གྲུབ་བདག་ལ་སྩོལ༔ ཚེ་བྷྲཱུྃ་ཛྙཱ་ན་སརྦ་སིངྔྷི་ཧཱུྃ༔ ཅེས་བརྗོད་ཚེ་སྒྲུབ་སྙིང་པོ་བགྲང་༔ ཐུན་མཇུག་བླ་མ་ཚེ་དཔག་མེད༔ འོད་དུ་ཞུ་ནས་རང་ལ་བསྟིམ༔ བླ་མའི་ཐུགས་མཆོག་ཡེ་ཤེས་ཆེ༔ རང་གི་རིག་པ་དྲི་མ་མེད༔ དབྱེར་མེད་བསྲེས་ནས་མངོན་སུམ་སྐྱོང་༔ སྐྱེ་ཤི་མེད་པའི་གདེང་ཐོབ་ནས༔ ཚེ་ཡི་དངོས་གྲུབ་འཐོབ་པ་དང་༔ མཆོག་དང་ཐུན་མོང་འབད་མེད་འགྲུབ༔ ཉམས་སུ་ལོངས་ཤིག་སྐལ་ལྡན་རྣམས༔ ལས་འཕྲོ་ཅན་གྱིས་སྤྱོད་པར་ཤོག༔ ས་མ་ཡཱ༔ རྒྱ་རྒྱ་རྒྱ༔ གཏེར་རྒྱ༔ སྦས་རྒྱ༔ གཏད་རྒྱ༔ ས་མ་ཡཱ༔ རྒྱ་རྒྱ་རྒྱ༔ རིག་འཛིན་ཆེན་པོ་ཉི་མ་གྲགས་པས་ཟབ་བུ་ལུང་ནས་གདན་དྲངས་པའོ། །མངྒ་ལཾ།