ར་མོ་ཤག་གི་བཅུད་ལེན།
བཀའ་རྫོགས་པ་ཆེན་པོ་ཚེ་སྒྲུབ་བདུད་བཞིའི་གཡུལ་ལས་རྣམ་རྒྱལ་ལས༔ ར་མོ་ཤག་གི་བཅུད་ལེན་བཞུགས༔ ཚེ་ལྷ་རིག་འཛིན་རྣམས་ལ་འདུད༔ མ་འོངས་འགྲོ་བའི་དོན་ཕྱིར་དུ༔ ར་མོ་ཤག་ཤིང་བཅུད་ལེན་ཞིག༔ ཡི་གེར་འདེབས་ནས་གཏེར་དུ་བཅོལ༔ ལས་འཕྲོ་ཅན་དང་འཕྲད་པར་ཤོག༔ ས་མ་ཡཱ༔ རྒྱ་རྒྱ་རྒྱ༔ འགྲོ་དོན་བྱང་ཆུབ་སེམས་བསྐྱེད་ནས༔ རྫས་མཆོག་སྐྱེ་བའི་ལུང་པར་ཕྱིན༔ གཉུག་མར་གནས་ལ་ཕུད་ཀྱིས་མཆོད༔ བདེན་པ་བདར་ཞིང་འཕྲིན་ལས་བཅོལ༔ རང་ཉིད་ལྷ་ཡི་ང་རྒྱལ་གྱིས༔ ཁམས་གསུམ་སྐྱེ་འགྲོ་འཁོར་འདས་དཔལ༔ འོད་ཀྱིས་བསྡུས་ནས་རྫས་ལ་བསྟིམ༔ བདུད་རྩིའི་རྒྱ་མཚོར་འཁྱིལ་བར་བསྒོམ༔ ཨཱོཾ་ཨཱཿཧཱུྃ་བྷྲཱུྃ་བཛྲ་རཀྵ་སྭཱ་ཧཱ༔ སྔགས་བཟླས་གཙང་མའི་སྣོད་དུ་བསགས༔ གང་བྱས་གཙང་པོའི་ཆུ་ལ་འཁྲུད༔ རྡོ་གཞོང་ནང་དུ་བརྡུངས་ནས་ཀྱང་༔ བཟང་པོའི་སྣོད་དུ་མེ་ལ་བསྐོལ༔ དེ་ནས་ལྦུ་བ་ལན་གསུམ་གཅོད༔ ཁུ་བ་ཕྱུངས་ཤིང་རས་ཀྱིས་བཙགས༔ ལན་གསུམ་བསྐྱར་བའི་ཐ་མ་ལ༔ འདམ་ཐག་གཏོང་ཞིང་ཁཎྜར་གདུ༔ སྦྲང་དང་བུ་རམ་མར་དང་ནི༔ འབྲས་བུ་གསུམ་གྱི་ཕྱེ་མ་བཏབ༔ ཆོས་བསྐོར་རིས་སུ་བསྲུབས་ནས་ཀྱང་༔ བུ་རམ་ཆུ་ཚོད་བཞིན་བྱུང་དུས༔ གཡམ་པ་བཟང་འཇམ་མཁྲེགས་པར་སྒོར༔ ས་མ་ཡཱ༔ རྒྱ་རྒྱ་རྒྱ༔ འདི་ལྟར་བདུད་རྩི་རིན་ཆེན་འདི༔ སྙིང་པོའི་བཅུད་འདུས་བླ་ན་མེད༔ སྤྱི་བོར་བླ་མ་ཡབ་ཡུམ་བསྒོམ༔ མ་ཡེངས་རྩེ་གཅིག་གསོལ་བ་འདེབས༔ ཀྱེ་ཧོ་རྒྱལ་བ་འདུས་པའི་སྐུ༔ བླ་མ་མགོན་པོ་དབྱེར་མེད་ལ༔ བདག་ནི་སྙིང་ནས་གསོལ་བ་འདེབས༔ ཁྱེད་ཀྱི་ཐུགས་རྗེའི་གྲུ་ཆེན་གྱིས༔ བརྩེ་བས་སྐྱོངས་ལ་བྱིན་གྱིས་རློབས༔ ནུས་པས་དངོས་གྲུབ་དུས་འདིར་སྩོལ༔ གསང་བའི་རྫས་མཆོག་བཅུད་ལེན་འདི༔ ལས་སུ་རུང་བར་བྱིན་གྱིས་རློབས༔ བདེ་སྟོང་ཟག་མེད་ཡེ་ཤེས་རྒྱས༔ སྐྱེ་ཤི་མེད་པའི་ཚེ་གྲུབ་ནས༔ བདག་གཞན་དཔལ་ལ་སྤྱོད་པར་ཤོག༔ ཅེས་པའི་གསོལ་བ་ཕུར་ཚུགས་བཏབ༔ དབང་བཞི་ལེན་ཞིང་མཉམ་པར་འཇོག༔ ཚེ་སྒྲུབ་དམིགས་རིམ་ཏིང་འཛིན་གསལ༔ སྙིང་པོ་བཟླ་ཞིང་བདུད་རྩི་ཡིས༔ ཕུང་ཁམས་སྐྱེ་མཆེད་རྩ་འཁོར་རྣམས༔ གང་ཞིང་རྒྱས་པས་དགའ་བཞི་ཡི༔ བདེ་སྟོང་ཟག་མེད་ཉམས་རྟོགས་རྣམས༔ རང་གི་རྒྱུད་ལ་སྐྱེས་པར་བསམས༔ རླུང་སྦྱོར་འཁྲུལ་འཁོར་གཞུང་བཞིན་འབད༔ ཆུང་ངུ་འབྲིང་དང་ཆེན་པོ་སོགས༔ རིམ་བཞིན་བསླབ་ཅིང་ཚུལ་བཞིན་བསྟེན༔ ཁ་ཚྭ་རུལ་སུངས་སྔོ་བཙོང་སྒོག༔ མདོར་ན་མ་སྨིན་རིགས་ཀྱི་ཟས༔ ཁམས་ཉམས་འདོད་ལོག་ལ་སོགས་དང་༔ རྗེན་དང་ཆང་ལད་ཐམས་ཅད་སྤང་༔ བདུན་ནམ་ཟླ་བ་ལོ་ལ་སོགས༔ བསྟེན་པར་གྱུར་པའི་གང་ཟག་ལ༔ ཟག་མེད་ཉམས་མྱོང་འབར་ཞིང་རྒྱས༔ གཅོང་དང་ནད་རིགས་ཐམས་ཅད་བྱང་༔ ཞ་གྲུམ་ཡན་ལག་རེངས་ཀུན་ཞི༔ དབང་པོ་རྣམས་ཀྱི་སྒོ་ཡང་གསལ༔ ཤ་ལུས་རྒྱས་ཤིང་སྟོབས་རྩལ་ལྡན༔ འོད་དང་བཀྲག་མདངས་ཆེས་ཆེར་འབར༔ མཁའ་འགྲོ་དབང་དུ་འདུ་བ་དང་༔ སྲུང་མ་རྣམས་ཀྱིས་འཕྲིན་ལས་བསྒྲུབ༔ རྩ་རླུང་ལས་སུ་རུང་བར་བྱེད༔ འཇིག་རྟེན་མི་མོར་སྤྱོད་ལ་རེམ༔ ཕ་རོལ་སྣང་བ་དབང་དུ་འདུ༔ ཚེ་རིང་རྒས་སྲ་དཔལ་འབྱོར་རྒྱས༔ རི་བྲག་རྣམས་ལ་ཟང་ཐལ་འགྲོ༔ ས་མ་ཡཱ་རྒྱ་རྒྱ་རྒྱ༔ འདི་ལྟར་བླ་མེད་མན་ངག་འདི༔ ཟབ་ཆོས་ཚེ་སྒྲུབ་ཆ་རྐྱེན་དུ༔ ཡི་གེར་འདེབས་ནས་གཏེར་དུ་བཅོལ༔ མ་འོངས་དུས་སུ་འགྲོ་དོན་འབྱུང་༔ མཚོ་རྒྱལ་ཁྱོད་ཀྱི་སྐྱེ་མཐའ་ཡིས༔ ཆོས་འདི་ཉམས་ལེན་བྱེད་པར་འགྱུར༔ ས་མ་ཡཱ༔ རྒྱ་རྒྱ་རྒྱ༔ གཏེར་རྒྱ༔ སྦས་རྒྱ༔ ཟབ་རྒྱ༔ གཉན་རྒྱ༔ གཏད་རྒྱ༔ ས་མ་ཡཱ༔ རྒྱ་རྒྱ་རྒྱ༔ ཟབ་རྒྱ༔ གཉན་རྒྱ༔ གཏད་རྒྱ༔ ས་མ་ཡཱ༔ རྒྱ་རྒྱ་རྒྱ༔ བདག་སྤྲང་བན་ཉི་མ་གྲགས་པས་ཤངས་ཟབ་བུ་ལུང་ནས་གདན་དྲངས་པའོ། །མངྒ་ལཾ།། །།