ཡེ་ཤེས་བྱིན་འབེབས།
བཀའ་རྫོགས་པ་ཆེན་པོ་ཚེ་སྒྲུབ་བདུད་བཞིའི་གཡུལ་ལས་རྣམ་རྒྱལ་ལས༔ ཡེ་ཤེས་བྱིན་འབེབས་བཞུགས༔ ཚེ་ལྷ་རིག་འཛིན་རྣམས་ལ་འདུད༔ བདག་འདྲ་མཚོ་སྐྱེས་རྡོ་རྗེ་ངས༔ མ་འོངས་རྗེས་འཇུག་སྐལ་ལྡན་གྱིས༔ དངོས་གྲུབ་མྱུར་དུ་འཐོབ་བྱའི་ཕྱིར༔ ཚེ་སྒྲུབ་ཟབ་མོའི་ཆ་ལག་ཏུ༔ དམ་ཚིག་གནད་བསྐུལ་བྱིན་འབེབས་འབྲི༔ ས་མ་ཡཱ༔ རྒྱ་རྒྱ་རྒྱ༔ དེ་ཡང་སྒྲུབ་པ་ལ་སོགས་ཀྱི་དུས་ཁྱད་པར་ཅན་ལ་བབས་ཚེ༔ རྣལ་འབྱོར་ཕོ་མོ་ཆས་གོས་ཀྱིས་བརྒྱན་ཞིང་དྲི་བཟང་གི་སྤོས་གཏོང་༔ རོལ་མོའི་སྒྲ་འཁྲོལ༔ ད་ལ་འཆམས་སྟབས་ཀྱིས་བསྐོར་ཞིང་༔ གདུང་བའི་དབྱངས་ཀྱིས་འདི་སྐད་དུ་བྱའོ༔ ཧཱུྃཿཧྲཱི༔ ནུབ་ཕྱོགས་བདེ་བ་ཅན་གྱི་ཞིང་ཁམས་ནས༔ ཆོས་སྐུ་སྣང་བ་མཐའ་ཡས་འཁོར་དང་བཅས༔ སྒྲུབ་པའི་ཕོ་བྲང་ཚེ་ཡི་གཞལ་ཡས་འདིར༔ བྱིན་ཆེན་དབབ་ཅིང་དབང་མཆོག་བསྐུར་དུ་གསོལ༔ ཕོ་བྲང་རི་བོ་ཏ་ལའི་རྩེ་མོ་ནས༔ ལོངས་སྐུ་ཐུགས་རྗེ་ཆེན་པོ་འཁོར་དང་བཅས༔ སྒྲུབ་པའི་ཕོ་བྲང་ཚེ༴ བྱིན་ཆེན་དབབ༴ ཟངས་མདོག་པདྨ་འོད་ཀྱི་གཞལ་ཡས་ནས༔ སྤྲུལ་སྐུ་པདྨ་འབྱུང་གནས་འཁོར་དང་བཅས༔ སྒྲུབ་པའི་ཕོ་བྲང་ཚེ༴ བྱིན་ཆེན་དབབ༴ ཟབ་ལུང་གནས་མཆོག་རྡོ་རྗེའི་ཀེའུ་ཚངས་ནས༔ ཡེ་ཤེས་མཚོ་རྒྱལ་མཁའ་འགྲོ་འཁོར་དང་བཅས༔ སྒྲུབ་པའི་ཕོ་བྲང་ཚེ༴ བྱིན་ཆེན་དབབ༴ ཡེར་པ་ལྷ་རི་སྙིང་པོའི་གཞལ་ཡས་ནས། །ལོ་ཙཱ་ཆེན་པོ་ཀླུ་ཡི་དབང་པོ་ལ། །རྒྱ་བོད་ལོ་ཙཱ་མཁས་གྲུབ་ཚོགས་ཀྱིས་བསྐོར། སྒྲུབ་པའི་ཕོ་བྲང་ཚེ༴ བྱིན་ཆེན་དབབ༴ གནས་མཆོག་སྲིང་མོ་རྫོང་གི་གཞལ་ཡས་ནས། །རིག་འཛིན་ཆེན་པོ་ཉི་མ་གྲགས་པ་ལ། །གཏེར་སྟོན་གྲུབ་ཐོབ་རིག་འཛིན་ཚོགས་ཀྱིས་བསྐོར། །སྒྲུབ་པའི༴ བྱིན་ཆེན་དབབ་ཅིང༴ དབུས་ཕྱོགས་འཐུག་པོ་བཀོད་པའི་ཞིང་ཁམས་ནས༔ བཅོམ་ལྡན་ཚེ་དཔག་མེད་མགོན་ཡབ་ཡུམ་ལ༔ རིག་འཛིན་ཚེ་ཡི་ལྷ་ཚོགས་འཁོར་དང་བཅས༔ སྒྲུབ་པའི༴ བྱིན་ཆེན་དབབ༴ ཤར་ཕྱོགས་མངོན་པར་དགའ་བའི་ཞིང་ཁམས་ནས༔ རྣམ་སྣང་ཚེ་དཔག་མེད་མགོན་ཡབ་ཡུམ་ལ༔ རྡོ་རྗེ་རིགས་ཀྱི་ཚེ་ལྷ་འཁོར་དང་བཅས༔ སྒྲུབ་པའི་ཕོ་བྲང༴ བྱིན་ཆེན་དབབ་ཅིང་༴ ལྷོ་ཕྱོགས་དཔལ་དང་ལྡན་པའི་ཞིང་ཁམས་ནས༔ རིན་འབྱུང་ཚེ་དཔག་མེད་མགོན་ཡབ་ཡུམ་ལ༔ རིན་ཆེན་རིགས་ཀྱི་ཚེ་ལྷ་འཁོར་དང་བཅས༔ སྒྲུབ་པའི་ཕོ་བྲང་ཚེ་ཡི༴ བྱིན་ཆེན་དབབ་ཅིང་༴ ནུབ་ཕྱོགས་བདེ་ཆེན་དབང་གི་ཞིང་ཁམས་ནས༔ སྣང་མཐའ་ཚེ་དཔག་མེད་མགོན་ཡབ་ཡུམ་ལ༔ པདྨ་རིགས་ཀྱི་ཚེ་ལྷ་འཁོར་དང་བཅས༔ སྒྲུབ་པའི་ཕོ་བྲང་ཚེ་ཡི༴ བྱིན་ཆེན་དབབ་ཅིང་དབང་༴ བྱང་ཕྱོགས་ལས་རབ་རྫོགས་པའི་ཞིང་ཁམས་ནས༔ དོན་གྲུབ་ཚེ་དཔག་མེད་མགོན་ཡབ་ཡུམ་ལ༔ ཀརྨ་རིགས་ཀྱི་ཚེ་ལྷ་འཁོར་དང་བཅས༔ སྒྲུབ་པའི་ཕོ་བྲང་ཚེ་ཡི་གཞལ༴ བྱིན་ཆེན་དབབ་ཅིང་༴ ཚེ་ཡི་ལྷ་མོ་མགྱོགས་མ་སྒོ་མའི་ཚོགས༔ ཡི་དམ་མཁའ་འགྲོ་ཆོས་སྐྱོང་སྲུང་མ་རྣམས༔ སྒྲུབ་པའི་ཕོ་བྲང་ཚེ་ཡི་གཞལ་ཡས་འདིར༔ བྱིན་ཆེན་དབབ་ཅིང་དབང་མཆོག་བསྐུར་དུ་གསོལ༔ ཧཱུྃཿཧྲཱི༔ བླ་མེད་ཚེ་ཡི་དཀྱིལ་འཁོར་འདིར༔ དམ་ཚིག་གསང་བའི་རྫས་ལ་བརྟེན༔ རིག་འཛིན་རྣལ་འབྱོར་བདག་ཅག་གིས༔ བསྙེན་སྒྲུབ་ལས་སྦྱོར་བརྩམ་ལགས་པས༔ བླ་མ་ཡི་དམ་མཁའ་འགྲོ་དང་༔ རིག་འཛིན་གྲུབ་ཐོབ་རྒྱ་མཚོ་འབུམ༔ དམ་ཅན་སྲུང་མ་ལས་བྱེད་ཚོགས༔ འོག་མིན་ཆོས་དབྱིངས་ཞིང་ཁམས་དང་༔ མཁའ་སྤྱོད་རིག་འཛིན་ཕོ་བྲང་ཆེ༔ གནས་ཡུལ་དུར་ཁྲོད་ཐམས་ཅད་ནས༔ སྐུ་ཡི་གར་སྟབས་ལིངས་སེ་ལིང་༔ གསུང་གི་གད་རྒྱངས་ཡ་ལ་ལ༔ ཐུགས་ཀྱི་ཏིང་འཛིན་ཏ་ལ་ལ༔ རྒྱན་ཆ་མང་པོ་སིལ་ལི་ལི༔ ཅོད་པན་མང་པོ་པུ་རུ་རུ༔ རོལ་མོ་མང་པོ་དིར་རི་རི༔ བྱིན་རླབས་དངོས་གྲུབ་ཐིབས་སེ་ཐིབ༔ གནས་མཆོག་འདི་རུ་བྱིན་ཕོབ་ལ༔ སྒྲུབ་མཆོག་བདག་ལ་དབང་བཞི་བསྐུར༔ བགེགས་དང་ལོག་འདྲེན་བར་ཆད་སོལ༔ མཆོག་དང་ཐུན་མོང་དངོས་གྲུབ་སྩོལ༔ ཨཱོཾ་ཧཱུྃ་ཏྲཾ་ཧྲཱིཿཨཱ༔ མུཾ་ལཾ་མཾ་པཾ་ཏཾ༔ ཚེ་བྷྲུྃ་ཡུ་བྷྲུྃ་ཡུ་ཚེ་བྷྲུྃ༔ ཛྙཱ་ན་བཛྲ་ས་མ་ཡ་ཨ་ཝེ་ཤ་ཡ་ཨ་ཨཱ༔ ཅེས་བརྗོད་པས་རྩ་བ་གསུམ་གྱི་ལྷ་ཚོགས་མཁའ་འགྲོ་ཆོས་སྐྱོང་སྲུང་མ་རིག་འཛིན་གྲུབ་ཐོབ་རྒྱ་མཚོའི་ཚོགས་དང་བཅས་པ་ཐམས་ཅད་མངོན་སུམ་དུ་བྱིན་ཐིབས་ཐིབས་བྱོན་ནས༔ མཆོག་ཐུན་གྱི་དངོས་གྲུབ་ཐམས་ཅད་སྩལ་ཞིང་སྐུ་གསུང་ཐུགས་ཀྱི་བྱིན་རླབས་ཐམས་ཅད་ཐོབ་པའི་མོས་པ་རྩེ་གཅིག་ཏུ་བྱའོ༔ ས་མ་ཡཱ༔ རྒྱ་རྒྱ་རྒྱ༔ གཏེར་རྒྱ༔ སྦས་རྒྱ༔ ཟབ་རྒྱ༔ གཉན་རྒྱ༔ གཏད་རྒྱ༔ ས་མ་ཡཱ༔ རྒྱ་རྒྱ་རྒྱ༔ བདག་སྤྲང་བན་ཉི་མ་གྲགས་པས་གནས་མཆོག་ཆེན་པོ་ཟབ་ལུང་པཱ་ལོ་གུ་རུའི་སྒྲུབ་ཕུག་གི་རྡོ་རྗེ་ཧཱུྃ་རྒྱ་བྲག་ནས། ཤིང་མོ་ཡོས་ལོ་ཧོར་ཟླ་ལྔ་པའི་ཚེས་བཅུའི་དགོངས་མོ་དབང་གི་དུས་སུ་གདན་དྲངས་ཤིང་། ས་མོ་ལུག་ལོ་ཧོར་ཟླ་བདུན་པའི་ཚེས་དགེ་བར་ཤོག་སེར་ལས་བཤུས་པའོ། །མངྒ་ལཾ། །