ཚེ་སྒྲུབ་འཆི་མེད་རྡོ་རྗེ།
ཟབ་ཆོས་པདྨ་དྲག་ཁྲོས་ལས༔ ཚེ་སྒྲུབ་འཆི་མེད་རྡོ་རྗེ་བཞུགས༔ རིགས་བདག་ཚེ་ཡི་ལྷ་ལ་འདུད༔ པདྨ་དྲག་པོའི་རྣལ་འབྱོར་པས༔ ཚེ་ཡི་དངོས་གྲུབ་འཐོབ་འདོད་ན༔ ཤིན་ཏུ་དབེན་ཞིང་ཞི་བའི་ལུང་༔ དྭངས་ལ་མཐོ་བ་བསིལ་དྲོད་སྙོམས༔ དཀར་ཕྱོགས་སྐྱོང་བ་གནས་པའི་སར༔ སྟེགས་བུ་དྲི་བཟང་དག་གིས་བྱུག༔ པདྨ་འདབ་བཞི་ལྟེ་བ་དམར༔ མུ་ཁྱུད་འཇའ་ཚོན་རྡོ་རྗེའི་ཕྲེང་༔ ཡང་ན་འབྲུ་ཡི་ཚོམ་བུ་བཀོད༔ དབུས་སུ་ཚེ་གཏོར་རྒྱན་ལྡན་བཤམས༔ ཚེ་དཔག་མེད་ཀྱི་ཙག་ལི་གཟུགས༔ ལེ་བརྒན་དམར་པོའི་གུར་ཡང་ཕུབ༔ གཡས་གཡོན་སྨན་དང་རཀྟ་དང་༔ རྒྱབ་ཏུ་ཡི་དམ་གཏོར་མ་བཤམས༔ མདུན་དུ་པཱུ་ཙ་རྣམ་པ་ལྔ༔ མཐའ་སྐོར་ཚོགས་ཀྱི་འཁོར་ལོས་བསྐོར༔ རྣལ་འབྱོར་བདེ་བའི་གདན་ལ་འདུག༔ དཀར་ཕྱོགས་སྐྱོང་ལ་གཏོར་མ་འབུལ༔ བདེན་པ་བདར་ཞིང་འཕྲིན་ལས་བཅོལ༔ འབྱུང་པོར་བགེགས་ཀྱི་གཏོར་མ་སྦྱིན༔ སྔགས་ཀྱིས་བསྐྲད་ཅིང་བསྲུང་འཁོར་བསྒོམ༔ ལས་གཞུང་བསྲང་ཞིང་བསྙེན་ཁ་གསོ༔ དེ་ནས་སྒྲུབ་པའི་དངོས་གཞི་ནི༔ རང་ཉིད་ལྷར་གསལ་རིགས་བདག་དང་༔ མདུན་བསྐྱེད་བུམ་པ་ཚེ་དཔག་མེད༔ དམར་པོ་རྒྱན་ལྡན་ལོངས་སྤྱོད་རྫོགས༔ མཉམ་བཞག་སྐྱིལ་ཀྲུང་ཚེ་བུམ་བསྣམས༔ ཐུགས་ཀར་ཉི་མའི་དཀྱིལ་འཁོར་སྟེང་༔ ཐུགས་སྲོག་ཧྲཱིཿཡིག་དམར་པོའི་མཐར༔ སྔགས་ཀྱི་ཕྲེང་བས་མཚན་པ་ལས༔ འོད་ཟེར་ཕྱོགས་བཅུར་ཁྱབ་པར་འཕྲོས༔ ཕྱོགས་བཅུ་དག་པའི་ཕོ་བྲང་ནས༔ སངས་རྒྱས་ཀུན་གྱི་བྱིན་རླབས་བསྡུས༔ ཕྱི་སྣོད་འབྱུང་བཞིའི་དྭངས་མ་དང་༔ ནང་བཅུད་སྐྱེ་འགྲོའི་ཚེ་བསོད་ཀྱང་༔ ཐུགས་རྗེའི་རང་མདངས་འོད་ཀྱིས་བསྡུས༔ ཕྱག་གི་བུམ་པའི་ནང་དུ་བསྐྱིལ༔ འོད་ཟེར་ལྔ་ལྡན་བཅུད་ཀྱིས་ཁེངས༔ ཁོལ་ཞིང་ལུད་པས་བདག་ལུས་ཁྱབ༔ ཡི་དམ་ལྷ་ཡི་ཏིང་འཛིན་ངང་༔ བཀྲག་མདངས་གཟི་བརྗིད་ནུས་སྟོབས་རྒྱས༔ ཚེ་ཡི་རིག་འཛིན་ཐོབ་པར་བསམས༔ མ་ཡེངས་ངང་ནས་སྔགས་འདི་བཟླ༔ ཨཱོཾ་ཚེ་བྷྲཱུྃ་ཧྲཱིཿསྭཱ་ཧཱ༔ སྐབས་སྐབས་མཆོད་བསྟོད་དབང་བཞི་ལེན༔ དགོང་མོ་ཚོགས་ཀྱི་འཁོར་ལོ་བསྐོར༔ ཐུན་དྲུག་གསོལ་བ་འདི་ལྟར་འདེབས༔ ཧྲཱི༔ བཅོམ་ལྡན་མགོན་པོ་ཚེ་དཔག་མེད༔ སྔོན་གྱི་ཐུགས་བསྐྱེད་རྗེས་དགོངས་ལ༔ བདག་གིས་བསྒྲུབ་པའི་གནས་མཆོག་འདིར༔ ཐུགས་རྗེའི་དབང་གིས་གཤེགས་སུ་སོལ༔ མོས་པའི་བུ་ལ་བྱིན་གྱིས་རློབས༔ བགེགས་དང་ལོག་འདྲེན་བར་ཆད་སོལ༔ འཆི་མེད་ཚེ་ཡི་དངོས་གྲུབ་སྩོལ༔ ཅེས་བརྗོད་སྔགས་དམིགས་ཏིང་འཛིན་གསལ༔ ས་མ་ཡཱ༔ རྒྱ་རྒྱ་རྒྱ༔ ཨེ་མ་ཟབ་པའི་མཐར་ཐུག་འདི༔ བསྒྲུབ་ཅིང་བསྙེན་པའི་སྐལ་ལྡན་དེས༔ ཞག་བདུན་མ་ཡེངས་བརྩོན་གྱུར་ན༔ ཚེ་འཕྲང་བཟློག་ཅིང་དངོས་གྲུབ་འཐོབ༔ བར་ཆད་མི་རུང་སྣ་དགུ་བྱང་༔ དེ་ཚེ་རྟགས་ཀྱི་རིམ་པ་ཡང་༔ ཉི་ཟླ་ཤར་དང་མེ་ཏོག་འཐུ༔ གྲུ་ཟམ་སྒྲོལ་དང་རོལ་མོ་འཁྲོལ༔ དར་འཕྱར་དུང་འབུད་མཆོད་རྟེན་འཛེག༔ ཆང་འཐུང་གཡུལ་རྒྱལ་ལ་སོགས་འབྱུང་༔ དེ་ཚེ་རྟོག་པ་མི་བསྐྱིལ་བར༔ གནས་ལུགས་ངང་ནས་དབང་བཞི་ལེན༔ སྒྲུབ་རྫས་རོལ་ཞིང་དམ་མེད་སྦ༔ ཤིན་ཏུ་གསང་བ་གནད་ཡིན་ནོ༔ ས་མ་ཡཱ༔ རྒྱ་རྒྱ་རྒྱ༔ ཨེ་མ་ཡང་ཟབ་སྙིང་གི་ཆོས༔ མ་འོངས་སྐལ་ལྡན་རྣམས་ཀྱི་དོན༔ སློབ་དཔོན་རྗེ་ལ་ལུང་ཞུས་ནས༔ པདྨ་དྲག་ཁྲོས་ཆོས་སྐོར་དུ༔ ཡི་གེར་བཏབ་ནས་གཏེར་དུ་སྦས༔ རྩོད་ལྡན་བསྐལ་པའི་མར་འགྲིབ་ལ༔ ལས་འཕྲོ་ཅན་དང་འདི་འཕྲད་ནས༔ ཚེ་ཡི་དངོས་གྲུབ་འཐོབ་པར་ཤོག༔ ས་མ་ཡཱ༔ རྒྱ་རྒྱ་རྒྱ༔ གཏེར་རྒྱ༔ སྦས་རྒྱ༔ གཏད་རྒྱ༔ ས་མ་ཡཱ༔ རྒྱ་རྒྱ་རྒྱ༔ སཱུརྱ་ཀཱིརྟིས་གནས་མཆོག་ཆེན་པོ་ཤངས་ཟབ་བུ་ལུང་ནས་སྤྱན་དྲངས་ཤིང་ཤོག་སེར་ལས་ཕབ་པའོ། །མངྒ་ལཾ།། །།