ལྕགས་སྡིག་སྒྲུབ་ཐབས་གདོན་བགེགས་ཀུན་འཇོམས།
ཟབ་ཆོས་པདྨ་དྲག་ཁྲོས་ལས༔ ལྕགས་སྡིག་སྒྲུབ་ཐབས་གདོན་བགེགས་ཀུན་འཇོམས་བཞུགས༔ དྲག་པོ་རྩལ་ལ་ཕྱག་འཚལ་ལོ༔ མ་འོངས་བསྐལ་པའི་སྙིགས་མ་ལ༔ སྟོན་ཆེན་དམ་མེད་དམ་སྲིར་སྐྱེ༔ མཁན་ཆེན་སྡོམ་མེད་རྒྱལ་པོར་སྐྱེ༔ བཙུན་པ་ཁྲིམས་མེད་འགོང་པོར་སྐྱེ༔ སྐྱེ་བོ་ཕལ་ཆེར་ཟ་འདྲེར་སྐྱེ༔ བུད་མེད་ཕལ་ཆེར་བསེན་མོར་སྐྱེ༔ དེ་དུས་མི་དགེ་སྟོབས་རྒྱས་པས༔ བོད་འདིར་མི་རུང་སྣ་དགུ་འབྱུང་༔ ནད་ཡམས་གློ་བུར་འཁྲུག་རྩོད་མང་༔ ཁྱད་པར་ཆོས་ལྡན་སྐྱེས་བུ་ལ༔ བར་ཆད་མི་རུང་སྣ་ཚོགས་འཚུབ༔ དེ་དུས་དྲག་སྒྲུབ་འཕྲིན་ལས་སྐོར༔ ལྕགས་སྡིག་ནག་པོའི་སྒྲུབ་པ་འདི༔ ཚུལ་བཞིན་ཉམས་སུ་ལོངས་ཤིག་རྒྱ༔ ས་མ་ཡཱ༔ དབེན་ཞིང་དྲག་པོའི་གནས་དག་ཏུ༔ མཎྜལ་སྟེགས་བུར་དུག་ཁྲག་བྱུག༔ དུར་ཁྲོད་རྡོ་ཡིས་ཛཿནག་བྲི༔ དེ་སྟེང་མཉྫིའི་ཁྲིའུ་ཁར༔ འབྲུ་ནག་ཕྱེ་ལ་དཔལ་བཤོས་བཤམས༔ ཤ་སྣ་ཁྲག་སྣས་བརྒྱན་པར་བྱ༔ རྩེ་ལ་སྡིག་པའི་ཙཀ་ལི་བཙུགས༔ གཡས་གཡོན་སྨན་རཀ་མཆོད་པ་བཤམས༔ རང་ཉིད་པདྨ་དྲག་པོའི་སྐུ༔ ཐུགས་ཀའི་གསང་བདག་གཏུམ་པོའི་འཕྲུལ༔ ས་བོན་ཧཱུྃ་ལས་ཛཿནག་འཕྲོས༔ མདུན་བསྐྱེད་དཀྱིལ་འཁོར་རྫས་ལ་ཐིམ༔ སྐད་ཅིག་གནས་གྱུར་གནམ་ལྕགས་སྡིག༔ ཁ་དགུ་མིག་དགུ་རྭ་བཅོ་བརྒྱད༔ མཇུག་མ་གཡུགས་པས་གནོད་བྱེད་འཛིན༔ གཉེར་མ་དམར་ནག་འཁྲུག་ཅིང་འཁྱིལ༔ མེ་སྟག་ཚྭ་ཚྭ་ཁོལ་ཞིང་འཁྲུག༔ འཇིགས་ཤིང་བརྔམ་ལྡན་དྲག་པོའི་སྐུ༔ ཡ་ང་སྐྱི་བུང་བྱེད་པར་བསྒོམ༔ བདག་མདུན་ས་བོན་ཛཿནག་ལས༔ འོད་ཟེར་འཕྲོས་པས་ཆོས་དབྱིངས་དང་༔ ལྕང་ལོ་ཅན་གྱི་གནས་མཆོག་ནས༔ ཡེ་ཤེས་སྡིག་པ་སྤྱན་དྲངས་བསྟིམ༔ མཆོད་བསྟོད་བྱ་ཞིང་གཏོར་མ་འབུལ༔ དམ་ཚིག་ཡེ་ཤེས་གཉིས་མེད་བསམས༔ ཆོས་ཉིད་ངང་དུ་དར་ཅིག་ཀློད༔ སླར་ཡང་ཐུགས་སྲོག་ས་བོན་ལས༔ ཛཿནག་སྟོང་གསུམ་ཁྱབ་པར་འཕྲོས༔ ཀུན་ཀྱང་ལྕགས་སྡིག་ནག་པོར་གྱུར༔ ཡོམ་ཡོམ་ཤིག་ཤིག་སྟོང་གསུམ་འགུལ༔ གནོད་བྱེད་རྒྱལ་བསེན་དམ་སྲི་དང་༔ གང་གིས་གནོད་པའི་གདོན་བགེགས་རྣམས༔ ཤ་ཁྲག་དོན་སྙིང་དབང་པོའི་ཚོགས༔ ལྷག་མ་མེད་པར་ཀྲུམ་ཀྲུམ་ཟོས༔ དབང་བསྡུས་ཟིལ་མནན་བྲན་དུ་བཀོལ༔ རྡུལ་ཕྲན་བཞིན་དུ་བརླགས་པར་བསྒོམ༔ ཨཱོཾ་བཛྲ་ར་ཙའི་སྲོག་ལ་དུ་དུ༔ རུ་རུ་བྷ་ཤ་ཧཱུྃ་མ་མ་སྲོག་ལ་དུང་དུང་སྙིང་ལམ་མ་བྷྱོ་ས་མ་ཡཱ་ཧཱུྃ་ཕཊ༔ འབུམ་ཚོ་གསུམ་དུ་བཟླ་བར་བྱ༔ ཐུན་སྐབས་མཆོད་བསྟོད་གཏོར་མ་འབུལ༔ སྐབས་སུ་ཤམ་བུ་འདི་བཏགས་བཟླས༔ ཏྲིག་ཤོ་ཏྲག་ཤོ་ར་ཙ་ཐུན་གནོད་བྱེད་ཁུག་ར་ཙ་ལིང་ཏྲི་ཙ་ས་ལ་ཨ་ཤུ་མེ་ཤཱིནྟཾ་ཛ༔ ཨེ་དུན་ཛ་ཨེ་དུན་ཛ་ཧཱུྃ་ཕཊ༔ གནོད་བྱེད་དམ་སྲི་གང་ཡིན་དེ༔ སྤྲུལ་པའི་ལྕགས་སྡིག་གྲངས་མེད་པས༔ ལ་ལས་ཕྱི་ཡི་ཤ་ཁྲག་ཟོས༔ ལ་ལས་ནང་གི་དབང་པོ་རོལ༔ ལ་ལས་གསང་བའི་སྙིང་ཁྲག་འཇིབས༔ སྐད་ཅིག་ཉིད་ལ་བརླགས་པར་བསམས༔ རྒྱུན་གཏོར་འབུལ་ཞིང་བསྟོད་བསྐུལ་འདོན༔ ས་མ་ཡཱ༔ རྒྱ་རྒྱ་རྒྱ༔ དེ་ལྟར་བསྒྲུབ་ཅིང་བསྙེན་པའི་ཚེ༔ བྲག་བཤིགས་ལིངས་བཏབ་ཤིང་སྡོང་བཅད༔ ཆུ་བཟློག་དམག་དྲངས་ཁྱི་སྤྱང་དང་༔ བན་དེ་བསད་དང་ལྷ་ཁང་བཤིགས༔ ལྡེར་སོ་བཅོམ་ཞིང་གོ་ཁྲབ་གྱོན༔ རི་བྲག་འཛུལ་དང་མེ་ཆེན་མཆེད༔ དེ་སོགས་གྲུབ་པའི་རྟགས་བྱུང་ན༔ སྒྲུབ་རྫས་རྣམས་ལས་དབང་བླང་ཞིང་༔ སྤྲུལ་པ་མདུན་བསྐྱེད་གཙོ་བོར་བསྡུ༔ གཙོ་བོ་ས་བོན་ཛཿལ་ཐིམ༔ ཡེ་ཤེས་སེམས་དཔའ་དབྱིངས་སུ་གཤེགས༔ དམ་ཚིག་ངོ་བོ་ཐུགས་ཀར་བསྟིམ༔ དབང་དྲག་འཕྲིན་ལས་ཐོགས་མེད་བསམ༔ ཕོ་གདོན་མོ་གདོན་གདུལ་བ་དང་༔ བགེགས་ཀྱི་སྦྱོར་བ་གང་བཤིགས་ཀྱང་༔ དམིགས་པའི་ཁ་བསྒྱུར་ཤམ་བུ་བསྒྱུར༔ བརྩམས་པས་དངོས་གྲུབ་མྱུར་དུ་འཐོབ༔ ས་མ་ཡཱ༔ རྒྱ་རྒྱ་རྒྱ༔ འདི་ལྟར་བསྒྲུབ་པའི་སྐལ་ལྡན་ལ༔ ལྷ་འདྲེ་སྡེ་བརྒྱད་ཐམས་ཅད་ཀྱིས༔ ཕྱག་ན་རྡོ་རྗེ་དངོས་སུ་མཐོང་༔ དཔག་ཚད་རྒྱང་གྲག་ཉེ་མི་ནུས༔ གདོན་བགེགས་འབྱུང་པོ་ཀུན་གྱི་གཤེད༔ དེ་ཕྱིར་གཅེས་པས་ཉམས་སུ་ལོང་༔ མ་སྤེལ་སྙིང་གི་དཀྱིལ་དུ་སྦོས༔ ས་མ་ཡཱ༔ རྒྱ་རྒྱ་རྒྱ༔ གཏེར་རྒྱ༔ སྦས་རྒྱ༔ ཟབ་རྒྱ༔ གཉན་རྒྱ༔ གཏད་རྒྱ༔ ཁ་ཐཾ༔ རྒྱ་རྒྱ་རྒྱ༔ སཱུརྱ་ཀཱིརྟིས་ཤངས་ཟབ་བུ་ལུང་ནས་གདན་དྲངས་པའོ། མངྒ་ལཾ། །