དབང་ཆོག་སྨིན་གྲོལ་ནོར་བུ།
ཟབ་ཆོས་པདྨ་དྲག་ཁྲོས་ལས༔ དབང་ཆོག་སྨིན་གྲོལ་ནོར་བུ་བཞུགས༔ ཐོད་ཕྲེང་རྩལ་ལ་ཕྱག་འཚལ་འདུད༔ དུར་ཁྲོད་ལ་སོགས་དབེན་གནས་སུ༔ སྟེགས་བུ་དུག་ཁྲག་ཆག་ཆག་གདབ༔ ཐིག་ནས་དྲངས་ཤིང་དཀྱིལ་འཁོར་བྲི༔ དབུས་སུ་གྲུ་གསུམ་དམར་ནག་བྱ༔ དེ་ཡི་ཕྱི་རིམ་རྩིབས་བཞིར་བཅད༔ དེ་ཡི་ཕྱི་རིམ་རྩིབས་བཅུ་བྱ༔ ཁྱམས་དང་སྒོ་རྫོགས་སྤྱི་འགྲོས་ལ༔ དུར་ཁྲོད་ཐོད་ར་རྡོ་རྗེའི་ཕྲེང་༔ པདྨ་བྲག་དང་མེ་རི་འབྲི༔ ལྟེ་བ་རྩིབས་སོགས་ལྷ་ཡི་མདོག༔ ཁྱམས་དང་སྒོ་རྫོགས་ཕྱོགས་ཀྱི་མདོག༔ གཞན་དག་སྤྱི་འགྲོས་ལྟ་བུར་སྒྱུར༔ མཚན་ལྡན་བུམ་པར་སྨན་སྤོས་བཏབ༔ མགུལ་ཆིངས་དམར་པོས་བརྒྱན་ནས་ཀྱང་༔ ཤིང་གིས་ཁ་བརྒྱན་གཟུངས་ཐག་བཞག༔ དཀྱིལ་འཁོར་དབུས་སུ་འགོད་པར་བྱ༔ གཞན་ཡང་སྨན་གཏོར་རཀྟ་བཤམས༔ ལྷ་གྲངས་མཉམ་པའི་ཙཀ་ལི་བཀོད༔ ཐ་མར་མདའ་གྲི་མེ་ལོང་དང་༔ ཕུར་པ་ཚོན་སྐུད་དྲ་བས་བསྐོར༔ ལས་གཞུང་བསྲང་ཞིང་བསྙེན་སྒྲུབ་འབུངས༔ དབང་བཞི་བླང་ཞིང་ཐུགས་ཡིད་བསྲེ༔ རང་ཉིད་ཡི་དམ་ལྷ་རུ་བསྐྱེད༔ ལས་བུམ་བསང་ཞིང་ལྷར་བསྐྱེད་བཞུ༔ ཚོགས་ཀྱི་འཁོར་ལོས་ཁ་བསྐངས་ནས༔ སློབ་མར་ཁྲུས་བྱ་བགེགས་བསྐྲད་ཅིང་༔ ལག་གཡོན་མཎྜལ་བཟང་པོ་ཐོགས༔ ཡོལ་བའི་ཕྱིར་འཁོད་འདི་སྐད་ཞུ༔ ཀྱེ་ཧོ༔ སློབ་དཔོན་དགོངས་སུ་གསོལ༔ བདག་ཅག་འདིར་ཚོགས་རིགས་ཀྱི་བུ༔ བླ་མ་དྲག་པོའི་དཀྱིལ་འཁོར་དུ༔ འཇུག་པའི་བཀའ་དབྱེ་གནང་བར་ཞུ༔ ལན་གསུམ་བྱ༔ ལས་ཀྱི་སློབ་དཔོན་གྱིས༔ ཧོ༔ ཁྱེད་རྣམས་ལས་ཀྱི་འཕྲོ་ལྡན་ཞིང་༔ རྡོ་རྗེ་ཐེག་པའི་སྣོད་རུང་ངམ༔ ཅེས་དྲི་ལན་དུ་འདི་སྐད་གསོལ༔ དགོངས་ཤིག་སློབ་དཔོན་དམ་པ་རྗེ༔ བདག་ཅག་འདིར་ཚོགས་སྐལ་བར་ལྡན༔ སྔོན་ནས་སྦྱངས་པའི་བུ་ཡིན་ཞིང་༔ དམ་ཚིག་སྲོག་ལ་བབས་ཀྱང་བསྲུང་༔ ཁྱེད་ཀྱིས་བླ་མ་ལྷ་དང་སྤྲོད༔ དངོས་གྲུབ་མ་ལུས་སྩལ་དུ་གསོལ༔ དེ་ནས་མིག་དར་དམར་པོ་བཀབ༔ ལས་པའི་རྡོ་རྗེས་སྣ་འཁྲིད་ཅིང་༔ དབང་གི་ཕོ་བྲང་ལན་གསུམ་བསྐོར༔ ཕྱག་འཚལ་པུས་བཙུགས་ཐལ་མོ་སྦྱར༔ རྡོ་རྗེ་སློབ་དཔོན་དྲུང་དུ་འཁོད༔ གསང་སྔགས་ཆོས་ཀྱི་ཆེ་བ་དང་༔ པདྨ་དྲག་སྒྲུབ་ལོ་རྒྱུས་བྱ༔ དབང་དོན་སྣོད་དུ་རུང་བའི་ཕྱིར༔ སྐྱབས་སེམས་གསོལ་བ་འདི་ལྟར་གདབ༔ ཧཱུྃ༔ དབང་དྲག་པདྨ་ཁྲོས་པའི་སྐུ༔ རྡོ་རྗེ་དྲག་རྩལ་ལྷ་ཚོགས་ལ༔ དེང་ནས་མི་འབྲལ་བྱང་ཆུབ་བར༔ སྒོ་གསུམ་གུས་པས་སྐྱབས་སུ་མཆི༔ ལན་གསུམ་བྱའོ༔ སེམས་བསྐྱེད་པ་ནི༔ ཧཱུྃ༔ ཀུན་གཞི་རང་རིག་བྱང་ཆུབ་སེམས༔ མ་རྟོག་ལོག་རྟོག་འཁོར་བར་འཁྱམས༔ ཕ་མ་འགྲོ་དྲུག་སེམས་ཅན་རྣམས༔ རྣམ་མཁྱེན་ས་ལ་འགོད་བྱའི་ཕྱིར༔ རིམ་གཉིས་སྨིན་གྲོལ་དོན་ལ་འཇུག༔ ལན་གསུམ་བྱའོ༔ དེ་ནས་སོ་ཤིང་ཚོམ་བུར་འདོར༔ ཧཱུྃ༔ རིགས་ལྔ་བསྐྱེད་པའི་དཀྱིལ་འཁོར་འདིར༔ བྱང་ཆུབ་སོ་ཤིང་འདི་འདོར་བས༔ སྔོན་ནས་འབྲེལ་བའི་ཡི་དམ་ལྷ༔ ལས་འཕྲོའི་དབང་གིས་མཇལ་བར་ཤོག༔ ཨཱོཾ་ཧཱུྃ་ཏྲཾ་ཧྲཱིཿཨཱ་སིདྡྷི་སྟོམ༔ ཅེས་དོར་རིགས་བརྟགས་བསྒོམ་བཟླས་སྦྱིན༔ ཕྱི་རོལ་ཡར་དང་རྩ་བ་བསྟན༔ སྤོང་དག་འཆི་བསླུ་ཚེ་ཆོག་བྱ༔ དེ་ནས་ལྔ་ལྡན་སྐུད་པ་ལ༔ རྡོ་རྗེའི་མདུད་པར་སྔགས་འདིས་བསྔགས༔ ཨཱོཾ་ཨཱ༔ ཧཱུྃ་སྭཱ་ཧཱ༔ རཀྵ་རཀྵ༔ བརྒྱ་རྩ་འམ་ནི་ཉེར་གཅིག་གདབ༔ སློབ་བུའི་དཔུང་པ་གཡས་ལ་དཀྲིས༔ ཡེ་ཤེས་ལྔ་ལྡན་སྲད་བུ་འདིས༔ རིགས་ཀྱི་བུ་ལ་རྒྱས་བཏབ་པས༔ དངོས་གྲུབ་མ་ལུས་ཀུན་ཐོབ་ཅིང་༔ བདུད་ཀྱི་གཡུལ་ལས་རྒྱལ་བར་ཤོག༔ ཀུ་ཤ་སྦྱིན་ཞིང་༔ ཧཱུྃ༔ རྩྭ་མཆོག་བྱང་ཆུབ་བརྙེས་པའི་གདན༔ དེ་རིང་བུ་ཁྱོད་འདི་ཁྱེར་ལ༔ དྲག་པོའི་ལྷ་ལ་གསོལ་བ་ཐོབ༔ སེང་གེ་བཞིན་ཉོལ་རྨི་ལམ་རྟོགས༔ ནང་པར་གང་བྱུང་བདག་ལ་སྨྲོས༔ ཨཱོཾ་ཨཱཿཧཱུྃ༔ ཅེས་སྦྱིན་བཟང་ན་དངོས་གྲུབ་འཐོབ༔ ངན་པ་ཤར་ན་སྒྲིབ་སྦྱོང་དང་༔ སྐུ་རིམ་ལ་སོགས་གང་འོས་སྤྲོ༔ དེ་ནས་ཕོ་བྲང་ཤར་ཕྱོགས་ནས༔ མེ་ཏོག་འབུལ་བ་འདི་སྐད་དོ༔ ཧཱུྃ༔ ཡིད་དུ་འོང་ཞིང་ཀུན་ཏུ་མཚར༔ འདབ་ལྡན་ཟེའུ་འབྲུ་གེ་སར་བཅས༔ ཀུན་ཏུ་རྒྱལ་བ་མཆོད་པའི་རྫས༔ དཀྱིལ་འཁོར་ལྷ་ལ་འདི་འབུལ་བས༔ དཔལ་ཆེན་དབང་གི་དཀྱིལ་འཁོར་དུ༔ ཚེ་རབས་ལྷ་ལ་བབས་པར་ཤོག༔ པུཥྤེ་གྷྲི་ཧ་ན་སྟྭཾ༔ ཅེས་དོར་ཕྱོགས་མཚམས་དབུས་ལ་སོགས༔ ལྷ་ངོས་འཛིན་ཞིང་གསང་བའི་མཚན༔ རྡོ་རྗེ་དགྱེས་པ་རཏྣ་བཞད༔ པདྨ་དྲག་རྩལ་ཀརྨ་དབང་༔ སངས་རྒྱས་འདུས་པ་ལ་སོགས་སྦྱིན༔ དམ་ཆུ་བླུད་པ་འདི་སྐད་དོ༔ ཧཱུྃ༔ དམ་ཚིག་གསང་བ་རྡོ་རྗེའི་ཆུ༔ དེ་རིང་སྐལ་ལྡན་བུ་ཁྱོད་འཐུང་༔ གསང་བའི་བསྐྱེད་རྫོགས་རྡོ་རྗེའི་རྒྱ༔ དམ་མེད་རྣམས་ལ་མ་སྨྲ་ཞིག༔ ཙིཏྟ་བཛྲ་ས་མ་ཡཱ་ཧཱུྃ༔ གནས་གསུམ་དྲི་ཡི་ཐིག་ལེ་བྱ༔ བསྐྱེད་རིམ་ཕོག་ལ་ཡེ་ཤེས་དབབ༔ བྱིན་རླབས་ཕེབས་རྟགས་འདར་དང་འཁྲབ༔ མི་རྟོག་ཡེ་ཤེས་ཉམས་མྱོང་འབར༔ བླ་མ་ལྷ་ལ་མོས་གུས་སྐྱེ༔ དེ་ནས་དབང་དོན་གསོལ་འདེབས་ནི༔ ཧཱུྃ༔ དགོངས་ཤིག་དཔའ་བོ་ཧེ་རུ་ཀ༔ པདྨ་དྲག་པོའི་དཀྱིལ་འཁོར་ནས༔ དབང་བཞིའི་སྨིན་གྲོལ་བདག་ལ་སྩོལ༔ ལན་གསུམ༔ ཙཀྵུ་པྲ་ཝེ་ཤ་ཡ་ཕཊ༔ མིག་དར་དབྱེ་ཞིང་དཀྱིལ་འཁོར་སྟོན༔ དབུས་ཀྱི་བུམ་པ་ལག་ཏུ་ཐོགས༔ སློབ་བུའི་མགོར་བཞག་འདི་སྐད་དོ༔ ཧཱུྃ༔ རིན་ཆེན་བུམ་པ་གཞལ་ཡས་ཁང་༔ དྲག་པོའི་སྐུ་དང་གཉིས་སུ་མེད༔ དེ་རིང་ཁྱོད་ལ་དབང་བསྐུར་བས༔ བུམ་པ་སྐུ་ཡི་དབང་ཐོབ་ཤོག༔ ཀཱ་ཡ་ཨ་བྷི་ཥིཉྩ་ཧཱུྃ༔ གཙོ་བོའི་སྐུ་འབག་ཐོགས་ཏེ༔ ཧཱུྃ༔ སངས་རྒྱས་ཀུན་གྱི་སྤྲུལ་པ་ལས༔ འགྲོ་བའི་སྐྱབས་མགོན་ཧེ་རུ་ཀ༔ པདྨ་དྲག་རྩལ་ཁྲོ་བོའི་རྒྱལ༔ དེ་རིང་ཁྱོད་ལ་དབང་བསྐུར་བས༔ བསྐྱེད་རིམ་སྐུ་ཡི་དབང་ཐོབ་ཤོག༔ ཀ་ཡ་ཨ་བྷི་ཥིཉྩ་ཧཱུྃ༔ རྩ་སྔགས་བརྗོད་ཅིང་སྦྱི་བོར་བསྐུར༔ ཕག་མོ་ཡུམ་གྱི་འདྲ་འབག་ཐོགས༔ ཧཱུྃ༔ དུས་གསུམ་རྒྱལ་བ་ཀུན་གྱི་ཡུམ༔ བཅོམ་ལྡན་འདས་མ་ཕག་གདོང་མས༔ དེ་རིང་བུ་ལ་དབང་བསྐུར་བས༔ ཤེས་རབ་ཡུམ་གྱི་དབང་ཐོབ་ཤོག༔ ཨཱོཾ་དྷཀྐི་ནི་ཀཱ་ཡ་ཨ་བྷི་ཥིཉྩ་ཧཱུྃ༔ ལག་ཏུ་གཏད་ཅིང་འཁྲིལ་སྦྱོར་རོལ༔ ཚེ་བུམ་ཙཀ་ལིས་བརྒྱན་པ་ཐོགས་ཏེ༔ ཧཱུྃ༔ རིགས་བདག་ཚེ་ཡི་དཀྱིལ་འཁོར་ནས༔ བཅོམ་ལྡན་མགོན་པོ་ཚེ་དཔག་མེད༔ དེ་རིང་བུ་ལ་དབང་བསྐུར་བས༔ སྐྱེ་འཆི་མེད་པའི་དབང་ཐོབ་ཤོག༔ ཨཱོཾ་ཨ་མི་དྷེ་ཝ་ཚེ་བྷྲཱུྃ་ཨ་བྷི་ཥིཉྩ་ཧཱུྃ༔ སྤྱི་བོར་བསྐུར་ཞིང་ཚེ་རིལ་སྦྱིན༔ འཁོར་ལོ་གཤིན་རྗེའི་ཙཀ་ལི་ཐོགས༔ ཧཱུྃ༔ ཁྲོ་རྒྱལ་འཇམ་དཔལ་གཤིན་རྗེའི་གཤེད༔ རྩིབས་སྟོང་འཁོར་ལོ་འཆང་བའི་གར༔ སྐུ་མཆོག་འགྱུར་བ་མེད་པའི་ལྷ༔ དེ་རིང་བུ་ལ་དབང་བསྐུར་བས༔ འཇམ་དཔལ་ཁྲོས་པའི་དབང་ཐོབ་ཤོག༔ ཨཱོཾ་ཡ་མཱནྟ་ཀ་ཨ་བྷི་ཥིཉྩ་ཧཱུྃ༔ ཞེས་བརྗོད་དཔྲལ་བའི་དབུས་སུ་སྦྱིན༔ རྡོར་དྲིལ་རྟ་མགྲིན་ཙཀ་ལི་ཐོགས༔ ཧཱུྃ༔ པདྨ་དབང་ཆེན་རྟ་སྐད་འཚེར༔ རྡོ་རྗེ་དྲིལ་བུའི་ཕྱག་རྒྱ་ཅན༔ གསུང་མཆོག་འགག་པ་མེད་པའི་ལྷ༔ དེ་རིང་བུ་ལ་དབང་བསྐུར་བས༔ རྟ་མཆོག་གསུང་གི་དབང་ཐོབ་ཤོག༔ པདྨ་ཏ་ཀྲིད་བཛྲ་ཀྲོ་ཏ་ཨ་བྷི་ཥིཉྩ་ཧཱུྃ༔ མགྲིན་པར་སྦྱིན་ཞིང་རྡོར་དྲིལ་དཀྲོལ༔ ཕྱག་རྡོར་ཙཀ་ལི་རྡོ་རྗེ་ཐོགས༔ ཧཱུྃ༔ ཁྲོ་རྒྱལ་ཀུན་འདུས་གསང་བའི་བདག༔ ཐོགས་མེད་རྡོ་རྗེའི་ཕྱག་རྒྱ་ཅན༔ ཐུགས་མཆོག་འཁྲུལ་བ་མེད་པའི་ལྷ༔ དེ་རིང་བུ་ལ་དབང་བསྐུར་བས༔ ཕྱག་རྡོར་ཐུགས་ཀྱི་དབང་ཐོབ་ཤོག༔ བཛྲ་ཙཎྜ་མ་ཧཱ་རོ་ཥ་ཎ་ཨ་བྷི་ཥིཉྩ་ཧཱུྃ༔ སྙིང་གར་སྦྱིན་ཞིང་རྡོ་རྗེ་གསོར༔ གྲི་ཐོད་དྷཀྐིའི་ཙཀ་ལི་ཐོགས༔ ཧཱུྃ༔ ཡེ་ཤེས་དབྱིངས་ཀྱི་མཁའ་འགྲོ་ལྔ༔ གྲི་ཐོད་རང་རྟགས་ཅོད་པན་ཅན༔ ཡོན་ཏན་ལྷུན་གྱིས་གྲུབ་པའི་ལྷ༔ དེ་རིང་བུ་ལ་དབང་བསྐུར་བས༔ ཡོན་ཏན་མཁའ་འགྲོའི་དབང་ཐོབ་ཤོག༔ བཛྲ་རཏྣ་པདྨ་ཀརྨ་དྷཀྐི་ནི་ཨ་བྷི་ཥིཉྩ་ཧཱུྃ༔ ལྟེ་བར་བཞག་ཅིང་གྲི་ཐོད་ཕྱར༔ ཐོ་བ་མེ་དབལ་ཙཀ་ལི་ཐོགས༔ ཧཱུྃ༔ དྲག་རྩལ་འཕྲིན་ལས་དཀྱིལ་འཁོར་ནས༔ རྡོ་རྗེའི་ཐོ་བ་འཆང་བའི་ལྷ༔ ནུས་མཐུ་ཐོགས་མེད་ཁྲོ་བོའི་མཆོག༔ དེ་རིང་བུ་ལ་དབང་བསྐུར་བས༔ མེ་དབལ་འཕྲིན་ལས་དབང་ཐོབ་ཤོག༔ བཛྲ་ཡཀྴ་ཨ་བྷི་ཥིཉྩ་ཧཱུྃ༔ གསང་བ་སྦྱིན་ཞིང་ཐོ་བ་གདེང་༔ རིགས་བཞི་དྲག་པོའི་ཙཀ་ལི་ཐོགས༔ ཧཱུྃ༔ རིགས་བཞི་དྲག་པོ་ཁྲོ་བོའི་རྒྱལ༔ རྔམ་བརྗིད་འབར་ཁྲོ་དགྲ་བགེགས་གཤེད༔ དེ་རིང་བུ་ལ་དབང་བསྐུར་བས༔ དྲག་པོ་སྡེ་བཞིའི་དབང་ཐོབ་ཤོག༔ བཛྲ་རཏྣ་པདྨ་ཀརྨ་དྲག་པོ་རྩལ༔ ཨ་བྷི་ཥིཉྩ་ཧཱུྃ༔ གནས་བཞིར་བཞག་ཅིང་བདུད་རྩི་བླུད༔ ཁྲོ་བོ་བཅུ་ཡི་ཙཀ་ལི་ཐོགས༔ ཧཱུྃ༔ མི་ཟད་ཁྲོ་ཆེན་འབར་བའི་སྐུ༔ སྟེང་འོག་ཕྱོགས་བཞི་མཚམས་བརྒྱད་སྐྱོང་༔ གར་དགུའི་ཉམས་ལྡན་གདུག་པ་འདུལ༔ དེ་རིང་བུ་ལ་དབང་བསྐུར་བས༔ ནུས་མཐུ་རྩལ་ལྡན་དབང་ཐོབ་ཤོག༔ ཧཱུྃ་ཧཱུྃ་ཧཱུྃ་ཧཱུྃ་ཧཱུྃ་ཧཱུྃ་ཧཱུྃ་ཧཱུྃ་ཧཱུྃ་ཧཱུྃ་ཨ་བྷི་ཥིཉྩ་ཧཱུྃ༔ ལག་ཏུ་སྦྱིན་ཞིང་ཧཱུྃ་སྒྲ་སྒྲོག༔ ཕྲ་མེན་དྷཀྐིའི་ཙཀ་ལི་ཐོགས༔ ཧཱུྃ༔ ཕྲ་མེན་དྷཀྐི་སྡེ་བཞིའི་སྐུ༔ གསང་སྔགས་བཀའ་ཡི་བྱ་ར་བ༔ དེ་རིང་བུ་ལ་དབང་བསྐུར་བས༔ ཕྲིན་ལས་འགྲོ་འདུལ་དབང་ཐོབ་ཤོག༔ ཌཱཀྐི་ནི་ཨ་བྷི་ཥིཉྩ་ཧཱུྃ༔ ཡན་ལག་བཞི་ཡི་མཐིལ་ལ་སྦྱིན༔ འགུགས་འཆིང་སྡོམས་དགྱེས་ཕྱག་རྒྱ་བཅའ༔ ཛཿཧཱུྃ་བཾ་ཧོཿའི་སྔགས་ཀྱང་བགྲང་༔ དེ་ནས་གཙོ་བོའི་ཕྱག་མཚན་རྣམས་གཏད་དེ༔ ཧཱུྃ་གྲི་གུག་རྡོ་རྗེ་རལ་གྲི་འབར༔ མེ་རླུང་རཀྟའི་རྒྱ་མཚོ་འཁྱིལ༔ རི་རབ་ལྕགས་ཀྱུ་ཞགས་པ་ཡིས༔ དེ་རིང་བུ་ལ་དབང་བསྐུར་བས༔ ཁྲོ་རྒྱལ་ཕྱག་རྒྱའི་དབང་ཐོབ་ཤོག༔ གཡས་སུ་གཏད༔ ཧཱུྃ༔ ཐོད་ཁྲག་ཉི་མ་ཟླ་བ་དང་༔ རྩེ་གསུམ་ཐོང་གཤོལ་ཐོད་པའི་རྔ༔ དྲིལ་བུ་ལྕགས་སྒྲོགས་གནམ་ལྕགས་སྡིག༔ དེ་རིང་བུ་ལ་དབང་བསྐུར་བས༔ ཕྱག་མཚན་རྟགས་ཀྱི་དབང་ཐོབ་ཤོག༔ ཨཱོཾ་བཛྲ་སརྦ་ཀརྨ་ཀྲི་ཤ་བྷནྡྷ་རཀྴ་ཨ་བྷི་ཥིཉྩ་ཧཱུྃ༔ གཡོན་དུ་གཏད༔ དེ་ནས་ཆས་དབང་བསྐུར་ཏེ༔ ཧཱུྃ༔ ཐོད་སྐམ་འབར་བའི་པྲོག་ཞུ་དང་༔ ཐལ་ཆེན་ཚོམ་བུ་རཀྟའི་ཐིག༔ ཞག་གི་སོར་རིས་གླང་ཆེན་གོས༔ རྡོ་རྗེའི་གོ་ཁྲབ་ཞིང་ཆེན་ལྤགས༔ སྦྲུལ་དང་ཐོད་ཕྲེང་རུས་པའི་རྒྱན༔ དཔའ་བོ་སྟག་ལྤགས་དྲག་པོའི་མེ༔ དེང་འདིར་བུ་ལ་དབང་བསྐུར་བས༔ དྲག་པོའི་ཆས་ཀྱི་དབང་ཐོབ་ཤོག༔ རཀྴ་ཀྲོ་ཏ་ཀ་ལ་སརྦ་ཨ་བྷི་ཥིཉྩ་ཧཱུྃ༔ གནས་རྣམས་སུ་བསྐུར༔ དེ་ནས་ཁྱུང་ཐོགས་ཏེ༔ ཧཱུྃ༔ ཁྲོ་རྒྱལ་སྤྲུལ་པ་གྷ་རུ་ཌ༔ ཀླུ་དང་ས་བདག་འདུལ་བའི་དབང་༔ དེང་འདིར་བུ་ལ་དབང་བསྐུར་བས༔ གྷ་རུ་ཌ་ཡི་དབང་ཐོབ་ཤོག༔ ཨཱོཾ་ཁྲོཾ་གྷ་རུ་ཌ་ཨ་བྷི་ཥིཉྩ་ཧཱུྃ༔ སྤྱི་བོར་བསྐུར༔ དེ་ནས་དྲག་པོའི་གདན་ཐོགས་ཏེ༔ ཧཱུྃ༔ ཉི་ཟླ་པདྨ་རིན་པོ་ཆེ༔ དྲེགས་པ་སྡེ་བརྒྱད་ལྷ་སྲིན་ཚོགས༔ སྐལ་ལྡན་ཁྱོད་ཀྱི་གདན་དུ་སྦྱིན༔ ལྷ་སྲིན་སྡེ་བརྒྱད་དབང་འདུས་ནས༔ དྲག་པོའི་འཕྲིན་ལས་འགྲུབ་པར་ཤོག༔ ཨ་ཡ་མ་དུ་རུ་ཙ་ཤ་ན་ཏིཥྛ་ལྷན་ཨ་བྷི་ཥིཉྩ་ཧཱུྃ༔ གདན་དུ་གཏད་ཅིང་བསྐྱེད་རིམ་གསལ༔ སྔགས་འཁོར་བཀོད་ཅིང་བཟླས་ལུང་འབོགས༔ སྲུང་མའི་གཏོར་མ་ལག་ཏུ་གཏད༔ ཧཱུྃ༔ བཀའ་ཡི་སྲུང་མ་མཐུ་རྩལ་ཅན༔ དྲག་པོའི་དམ་ཚིག་འཆང་བའི་དཔལ༔ ལེགས་རྩལ་མཆེད་གསུམ་འཁོར་བཅས་ཀྱིས༔ བརྒྱུད་པ་འཛིན་པའི་བུ་འདི་སྲུངས༔ དམ་ཚིག་ལྡན་པའི་སྡོངས་གྲོགས་མཛོད༔ དམ་མེད་བསྟན་དགྲ་ཐལ་བར་རློགས༔ བཅོལ་བའི་འཕྲིན་ལས་གྲུབ་པར་མཛོད༔ ཅེས་བརྗོད་ཤིས་བརྗོད་རོལ་མོ་འཁྲོལ༔ ཆད་ཐོ་བསྟན་སྐྱོང་ད་ལ་བསྡུ༔ ཆོས་རྣམས་དམིགས་མེད་ངང་ལ་བཞག༔ དབང་ཡོན་འབུལ་ཞིང་དམ་ཚིག་བསྲུང་༔ བསྙེན་སྒྲུབ་ལ་སོགས་ཚུལ་བཞིན་འབད༔ ས་མ་ཡཱ༔ རྒྱ༔ ཨེ་མ་བསྐལ་བའི་སྙིགས་མ་ལ༔ སྡེ་བརྒྱད་འབྱུང་པོ་ཁ་འཕྱུར་ཞིང་༔ མི་རུང་སྣ་ཚོགས་འབྱུང་བའི་ཚེ༔ ཟབ་ཆོས་གསང་བའི་སྙིང་པོ་འདི༔ ང་སྤྲུལ་བུ་དང་འཕྲད་ནས་ཀྱང་༔ བར་ཆད་རྐྱེན་འཕྲང་ཞི་བ་དང་༔ གསང་སྔགས་བསྟན་པའི་བཙས་སུ་ཤོག༔ ཤིན་ཏུ་གསང་ཞིང་སྙིང་ལ་ཆོངས༔ ས་མ་ཡཱ༔ ཁ་ཐཾ་རྒྱ༔ གསང་རྒྱ༔ སྦས་རྒྱ༔ ཟབ་རྒྱ༔ རིག་འཛིན་ཉི་མ་གྲགས་པས་ཤངས་ཟབ་བུ་ལུང་གི་བར་སྒོ་ནས་ཤིང་ཡོས་ལ་གདན་དྲངས་ཤིང་ལྕགས་བྱ་ལ་ཤོག་སེར་ལས་བོད་ཡིག་ཏུ་བསྒྱུར་བའོ། །