རྩང་བཟློག་སྤུ་གྲི་འབར་བ།
ཟབ་ཆོས་པདྨ་དྲག་ཁྲོས་ལས༔ རྩང་བཟློག་སྤུ་གྲི་འབར་བ་བཞུགས༔ དྲག་པོ་རྩལ་ལ་ཕྱག་འཚལ་ལོ༔ དབང་དྲག་པདྨའི་རྣལ་འབྱོར་པས༔ བཟློག་པའི་འཕྲིན་ལས་བརྩམ་པའི་ཚེ༔ རྩང་གི་ཤམ་བུ་སྦྱར་འདོད་ན༔ ལྷ་ཚོགས་གཙོ་འཁོར་དྲག་ཏུ་ཁྲོས༔ སྤྲུལ་པ་ཡང་སྤྲུལ་ཟ་བྱེད་ཚོགས༔ གྲངས་མེད་སྐར་ལྟར་འཁྲུག་པ་ཡིས༔ སྡང་བྱེད་དགྲ་དང་གནོད་བྱེད་བགེགས༔ ཐམས་ཅད་མ་ལུས་བཟློག་པར་བསམས༔ རྩང་དང་གཏོར་མར་སྨན་རག་སྦྲེང་༔ སྟངས་སྟབས་སྒྱུར་ཞིང་འདི་སྐད་དོ༔ ཧཱུྃ་བྷྱོ༔ ང་ནི་སྟོབས་ལྡན་ཁྲོ་བོའི་རྒྱལ༔ དབང་དྲག་པདྨ་ཧེ་རུ་ཀ༔ ཟ་གསོད་སྤྲུལ་པ་ཡང་སྤྲུལ་གྱིས༔ གནོད་བྱེད་གདོན་བགེགས་ཁུག་ཅིག་དྲོངས༔ དྲག་པོའི་འཕྲིན་ལས་དུས་ལ་བབས༔ དུས་ལ་བབ་པོ་ས་མ་ཡཱ༔ བཅོལ་བའི་འཕྲིན་ལས་གྲུབ་པར་མཛོད༔ ཧཱུྃ་བྷྱོ༔ དབང་དྲག་རོལ་བའི་དུར་ཁྲོད་འདིར༔ དུག་ཁྲག་དུར་འཇིམ་ལྕགས་རི་ལ༔ དུར་ཤིང་སྐྱེར་པ་བཅད་ནས་ཀྱང་༔ རྩང་ཕུར་སྲིན་མོ་འགྲོས་སུ་བཏབ༔ མི་མཐུན་བཟློག་པའི་བྱང་བུས་བརྒྱན༔ རྩེ་ལ་ཤ་ཆེན་ལིངྒ་བཙུགས༔ ཡེ་ཤེས་ལྔ་ལྡན་སྲད་བུས་བསྡམས༔ ལས་མཁན་འདུ་བའི་རྟེན་དུ་བཙུགས༔ དགྲ་བགེགས་འགུགས་པའི་གྲངས་སུ་བཅད༔ ལྟས་ངན་བཟློག་པའི་དྲ་བས་སྤྲས༔ ཧཱུྃ་བྷྱོ༔ དྲག་པོས་འཕྲིན་ལས་མཛད་པའི་ཚེ༔ ཡེ་ཤེས་རྩང་གི་ཕུར་བུ་རྣམས༔ ཆོས་ཀྱི་དབྱིངས་ནས་ད་བཞེངས་ཤིག༔ ཐུགས་དམ་བསྐུལ་ལོ་ལས་ལ་སྤྱོད༔ ཕྱི་ནི་ཕུར་པའི་རང་བཞིན་ལ༔ ནང་ནི་ལས་མཁན་ཕོ་ཉའི་ཞིང་༔ ཟ་བྱེད་ཕོ་ཉ་ཚུབས་སེ་ཚུབ༔ འགུགས་བྱེད་ཕོ་ཉ་ཤ་ར་ར༔ གསོད་བྱེད་ཕོ་ཉ་ཉིལ་ལི་ལི༔ དགྲ་བགེགས་ཤ་ཁྲག་ཚོགས་སུ་རོལ༔ གདོན་བགེགས་འབྱུང་པོ་ཟློག་ཅིག་སྒྱུར༔ ཡར་གྱི་རྩེ་མོས་ཆོས་དབྱིངས་ཁྱབ༔ སངས་རྒྱས་རྣམས་དང་གཉིས་སུ་མེད༔ མ་རིག་འཁྲུལ་བའི་ཉོན་མོངས་ཟློག༔ མར་གྱི་རྩེ་མོས་ན་རཀ་ཁྱབ༔ ངན་སོང་གསུམ་དང་གཉིས་སུ་མེད༔ རང་སྣང་འཁྲུལ་བའི་ལས་ངན་ཟློག༔ བར་གྱི་སྐེད་པས་གཉན་ཁམས་ཁྱབ༔ སྟོང་གསུམ་ཀུན་དང་གཉིས་སུ་མེད༔ སྐྱེ་རྒ་ན་འཆིའི་སྡུག་བསྔལ་ཟློག༔ རྩེ་ལ་འདབ་ཆགས་བུ་ཡུག་འཚུབ༔ མཁའ་ལྡིང་བྱ་ཡི་ལྟས་ངན་ཟློག༔ སྐེད་པར་སྟག་སེང་དོམ་དྲེད་ངར༔ སྡེར་ཆགས་གཅན་གཟན་ལྟས་ངན་ཟློག༔ རྩ་བར་སྦལ་སྡིག་སྡོམ་སྦྲུལ་འཕྱོ༔ ཀླུ་དང་དུད་འགྲོའི་ལྟས་ངན་ཟློག༔ རྩེ་ལས་བསྐལ་པའི་མེ་ཆེན་མཆེད༔ སྲེག་པ་ཧོམ་གྱི་ལས་སྦྱོར་ཟློག༔ རྩ་བར་དུག་གི་རྒྱ་མཚོ་ཁོལ༔ མནན་གཏད་བཅིངས་པའི་མཐུ་ནུས་ཟློག༔ སྐེད་པར་རླུང་དམར་བུ་ཡུག་འཚུབ༔ ཕྲ་མེན་མཁའ་འགྲོའི་ངན་སྔགས་ཟློག༔ རྩེ་ལ་འབྲུག་སྒྲས་ཁམས་གསུམ་ཁྱབ༔ དྲག་པོ་སྔགས་ཀྱི་རྦོད་གཏོང་ཟློག༔ རྩ་བར་ཐོག་ཆར་སྟོང་གསུམ་གཡོ༔ འཕེན་པ་ཟོར་གྱི་རྦོད་གཏོང་ཟློག༔ སྐེད་པར་ཁྲག་སེར་སྲིད་གསུམ་འཁྲུག༔ འབྲབ་པ་ཐུན་གྱི་རྦོད་གཏོང་ཟློག༔ རྩེ་ལ་ཤ་ཆེན་ལིངྒས་བརྒྱན༔ སྡང་བྱེད་དགྲ་བོ་ཐམས་ཅད་ཟློག༔ རྩ་བར་དུར་འཇིམ་ལྕགས་རིར་བཙུགས༔ དུར་སྲི་དུར་ཁ་ལངས་པ་ཟློག༔ སྐེད་པར་བཟློག་པའི་བྱང་བུས་བརྒྱན༔ ལྟས་ངན་བརྒྱད་ཅུ་རྩ་གཅིག་ཟློག༔ ཡེ་འགྲོགས་སུམ་བརྒྱ་དྲུག་ཅུ་ཟློག༔ གློ་བུར་བདུན་བརྒྱ་ཉི་ཤུ་ཟློག༔ དུས་མིན་འཆི་བ་རྣམ་བརྒྱད་ཟློག༔ མི་མཐུན་གནོད་པའི་གདོན་དང་བགེགས༔ ཐམས་ཅད་མ་ལུས་ཟློག་ཅིང་སྒྱུར༔ བཅོལ་བའི་འཕྲིན་ལས་གྲུབ་པར་མཛོད༔ ཅེས་བརྗོད་ཤ་ཁྲག་གཏོར་མ་འབུལ༔ མི་མཐུན་གནོད་པའི་རྐྱེན་རྣམས་ཟློག༔ བར་ཆད་རྣམས་ལས་གྲོལ་བ་དང་༔ ནད་གདོན་ལྟས་ངན་བྱད་ཀ་ཕུར༔ ཐམས་ཅད་བཟློག་འགྱུར་ཐེ་ཚོམ་མེད༔ དེ་ཕྱིར་ཡིད་ཀྱིས་བརྣག་པ་མཛོད༔ ཤིིན་ཏུ་ཟབ་བོ་ཨི་ཐི་རྒྱ༔ ས་མ་ཡཱ༔ རྒྱ་རྒྱ་རྒྱ༔ གཏེར་རྒྱ༔ སྦས་རྒྱ༔ ཟབ་རྒྱ༔ ས་མ་ཡཱ༔ རྒྱ་རྒྱ་རྒྱ༔ སཱུརྱ་ཀིརྟིས་ཤངས་ཟབ་བུ་ལུང་ནས་གདན་དྲངས་ཤིང་། རཀྟ་ཀཽ་ཊིར་ཤོག་སེར་ལས་བོད་ཡིག་ཏུ་སྒྱུར་བའོ།། །།མངྒ་ལཾ།། །།