གསེར་སྐྱེམས་བདུད་རྩིའི་སྤྲིན་ཕུང་།
ཟབ་ཆོས་པདྨ་དྲག་ཁྲོས་ལས༔ གསེར་སྐྱེམས་བདུད་རྩིའི་སྤྲིན་ཕུང་བཞུགས༔ ཧཱུྃཿ དྲག་པོ་རྩལ་ལ་ཕྱག་འཚལ་ལོ༔ དྲག་པོ་པདྨའི་རྣལ་འབྱོར་པས༔ མདོས་ཀྱི་ཟོར་ལམ་སྒོ་དབྱེའི་འཕྱོངས༔ རིན་ཆེན་སྣོད་དུ་གསེར་སྐྱེམས་བཤམས༔ རང་ཉིད་ལྷར་གསལ་བྱིན་གྱིས་བརླབ༔ འདོད་དགུ་རང་བྱུང་བདུད་རྩིར་དམིགས༔ སྙན་པའི་དབྱངས་ཀྱིས་འདི་སྐད་དོ༔ ཧཱུྃ༔ རིན་ཆེན་སྣོད་ཀྱི་ཀོང་བུ་རུ༔ རང་བྱུང་བདུད་རྩི་ཨ་མྲྀ་ཏ༔ གསེར་དངུལ་ལ་སོགས་རིན་ཆེན་ཚང་༔ ཨ་བར་ལ་སོགས་སྨན་སྣ་ཚང་༔ ནས་འབྲས་ལ་སོགས་འབྲུ་སྣ་ཚང་༔ དར་གོས་ལ་སོགས་དར་ཟབ་ཚང་༔ འདོད་དགུ་རང་བྱུང་བདུད་རྩིས་གཏམས༔ བསྐྱེད་རིམ་ལྷ་བསྒོམས་བྱིན་གྱིས་བརླབས༔ བཟླས་པ་སྔགས་ཀྱིས་སྤེལ་ཞིང་བསྒྱུར༔ ཏིང་འཛིན་དམིགས་པས་མགྲོན་ལ་བསྔོ༔ ཧཱུྃ༔ དབང་དྲག་རོལ་པའི་དུར་ཁྲོད་ནས༔ ལས་བྱེད་ཕོ་ཉ་སྒོ་མའི་ཚོགས༔ གསེར་སྐྱེམས་མཆོད་པ་འདི་བཞེས་ལ༔ དྲག་པོ་དཔལ་གྱི་ཟོར་ལམ་ཕྱེ༔ སྒོ་བས་སྒོ་ཕྱེ་ཤ་ར་ར༔ འཕྲང་མས་འཕྲང་བསྒྲོལ་སི་ལི་ལི༔ ཟོར་ལམ་དགྲ་དང་བགེགས་ལ་ཐོད༔ ཧཱུྃ༔ སྟེང་གི་ཕྱོགས་ཀྱི་ལྷ་རྣམས་དང་༔ འོག་གི་ཕྱོགས་ཀྱི་ཀླུ་རྣམས་དང་༔ བར་སྣང་གནས་པའི་གཉན་རྣམས་དང་༔ གཟའ་དང་རྒྱུ་སྐར་ས་བདག་ཚོགས༔ ཕོ་བརྒྱུད་མོ་བརྒྱུད་སྲུང་མ་རྣམས༔ གསེར་སྐྱེམས་མཆོད་པ་འདི་བཞེས་ལ༔ ཐམས་ཅད་སྐུ་བཞེངས་ལས་ལ་གཤེགས༔ དྲག་པོའི་ཟོར་གྱི་དཔུང་ལ་གཤེགས༔ དགྲ་བགེགས་སྒྲོལ་བའི་དམག་ལ་ཆོས༔ དམ་ཉམས་སྒྲོལ་བའི་འཕྲིན་ལས་མཛོད༔ བཀའ་དང་དམ་ལས་མ་འདའ་ཞིག༔ གསེར་སྐྱེམས་མཆོད་པ་འདི་བཞེས་ནས༔ ལས་དང་གྲོགས་ལ་མ་བསྐྱོད་ན༔ དྲག་པོའི་ཟོར་གྱི་འོད་འཕྲོ་སྟེ༔ ཕོག་ནས་རྡུལ་དུ་བརླག་པར་འགྱུར༔ དེ་བས་སྔོན་གྱི་དམ་དགོངས་ལ༔ གསེར་སྐྱེམས་བཞེས་ལ་ཕྲིན་ལས་མཛོད༔ ཟོར་སྣ་དྲོངས་ལ་རུ་མཚོན་འཕྱོར༔ དམག་དཔུང་བསྐྱེད་ལ་དགྲ་བགེགས་སྒྲོལ༔ སྡེ་བརྒྱད་ལྷ་བསྲུང་གཞི་བདག་རྣམས༔ སྔགས་འཆང་བདག་གི་བཀའ་མ་གཅོག༔ གསང་སྔགས་ཟབ་མོའི་དམ་མ་བཀྲལ༔ བཅོལ་བའི་འཕྲིན་ལས་གྲུབ་པར་མཛོད༔ ཟོར་སྒོ་དབྱེ་ཞིང་གསེར་སྐྱེམས་མཆོད༔ ཟོར་སྣ་དགྲ་བགེགས་ཕྱོགས་སུ་གཏད༔ འདིས་ནི་བར་ཆད་ཀུན་ཞི་ཞིང་༔ གང་བརྩམས་འཕྲིན་ལས་གྲུབ་པར་བྱེད༔ ས་མ་ཡཱ༔ རྒྱ་རྒྱ་རྒྱ༔ གཏེར་རྒྱ༔ སྦས་རྒྱ༔ ཟབ་རྒྱ༔ ས་མ་ཡཱ༔ རྒྱ་རྒྱ་རྒྱ༔ སཱུརྱ་ཀིརྟིས་ཤངས་ཟབ་བུ་ལུང་ནས་གདན་དྲངས་པའོ།། །།མངྒ་ལཾ། །