ལྕགས་སྡིག་བསྟོད་བསྐུལ་དུག་མདའ་ནག་པོ།
ཟབ་ཆོས་པདྨ་དྲག་ཁྲོས་ལས༔ ལྕགས་སྡིག་བསྟོད་བསྐུལ་དུག་མདའ་ནག་པོ་བཞུགས༔ དྲག་པོ་པདྨའི་སྐུ་ལ་འདུད༔ བདག་ཉིད་པདྨ་དྲག་རྩལ་གྱི༔ ས་བོན་ཧཱུཾ་ལས་ཛཿནག་འཕྲོས༔ ལྕགས་ཀྱི་སྡིག་པ་འཇིགས་ཤིང་བརྔམ༔ སྤྲུལ་པ་ཡང་སྤྲུལ་གནམ་ས་ཁེངས༔ གནོད་བྱེད་འགུགས་འཆིང་ཟས་སུ་ཟ༔ དྲག་པོའི་འཕྲིན་ལས་བསྒྲུབ་པར་བསམས༔ འཕྲིན་ལས་བསྟོད་བསྐུལ་འདི་སྐད་དོ༔ ཧཱུྃ་བྷྱོ༔ ང་ནི་པདྨ་དྲག་པོ་རྩལ༔ ཐུགས་ལས་སྤྲུལ་པ་གདོན་བགེགས་གཤེད༔ གནམ་ལྕགས་སྡིག་པ་མགོ་དགུ་པ༔ མགོ་ལུས་མེད་པར་མིག་གིས་གང་༔ ཚད་ནི་རི་རབ་ཁམས་དང་མཉམ༔ གྲངས་ནི་སྟོང་གསུམ་ཁྱབ་པར་འགྱེད༔ རྭ་ནི་བཅོ་བརྒྱད་ཟངས་སེ་ཟང་༔ ཡན་ལག་བགྲད་པས་གནམ་ས་ཁེངས༔ མཇུག་མ་གཡུག་པས་འབྱུང་པོ་འཛིན༔ དྲག་པོའི་མཆེ་གཙིགས་ལྕེ་ནི་གློག༔ དྲག་པོའི་སྔགས་ཀྱི་ང་རོ་སྒྲོག༔ རྒྱལ་བསེན་དམ་མེད་འབྱུང་པོའི་གཤེད༔ ཤངས་ནས་དུག་རླངས་ཁམས་ནག་འཕྱོ༔ བྷྱོ་བྷྱོ་སྡང་བྱེད་དགྲ་ལ་བྷྱོ༔ བྷྱོ་བྷྱོ་གནོད་བྱེད་བགེགས་ལ་བྷྱོ༔ བྷྱོ་བྷྱོ་བར་ཆད་རྐྱེན་ལ་བྷྱོ༔ གང་ལ་དམིགས་པ་ཁྱོད་ཀྱིས་ཤེས༔ ཐལ་བའི་རྡུལ་བཞིན་བརླག་པར་མཛོད༔ ཀྲུམ་ཀྲུམ་བཞེས་ཤིག་གནོད་བྱེད་ཤ༔ ལྷག་མ་མེད་པར་བཞེས་སུ་གསོལ༔ ཀྲོག་ཀྲོག་འཐུངས་ཤིག་གནོད་བྱེད་ཁྲག༔ ཐིགས་པ་ཙམ་ཡང་མེད་པར་གྱིས༔ ཁྲུམ་ཁྲུམ་མུར་ཞིག་གནོད་བྱེད་རུས༔ ཏིལ་འབྲུ་ཙམ་ཡང་མེད་པར་གྱིས༔ གདོན་བགེགས་འབྱུང་པོ་མྱུར་དུ་སྒྲོལ༔ དུས་ལ་བབ་པོ་ས་མ་ཡཱ༔ བཅོལ་བའི་འཕྲིན་ལས་གྲུབ་པར་མཛོད༔ དྲག་ཏུ་བསྐུལ་ཞིང་གཏོར་མ་འབུལ༔ ཤིན་ཏུ་གཉན་པས་གསང་བར་བྱ༔ འཆལ་ན་རང་གི་སྲོག་ལ་འོང་༔ ཟབ་ཕྱིར་རིན་ཆེན་གཏེར་དུ་བཅོལ༔ ལས་འཕྲོ་ཅན་གྱིས་སྤྱོད་པར་ཤོག༔ ས་མ་ཡཱ༔ རྒྱ་རྒྱ་རྒྱ༔ སཱུརྱ་ཀཱིརྟིས་ཟབ་བུ་ལུང་ནས་གདན་དྲངས་པའོ།། །།མངྒ་ལཾ།