མེ་དབལ་འཕྲིན་ལས་སྡེ་བརྒྱད་སྤྱི་གཤེད།
ཟབ་ཆོས་པདྨ་དྲག་ཁྲོས་ལས༔ མེ་དབལ་འཕྲིན་ལས་སྡེ་བརྒྱད་སྤྱི་གཤེད་བཞུགས༔ དྲག་པོ་རྩལ་ལ་ཕྱག་འཚལ་བསྟོད༔ མེ་དབལ་དྲག་པོའི་སྒོས་སྒྲུབ་ཀྱིས༔ སྡེ་བརྒྱད་རང་ལ་གང་གནོད་པ༔ རྐྱང་འདེད་བར་ཆད་བཟློག་འདོད་ན༔ དཀྱིལ་འཁོར་བཅའ་གཞི་གོང་ལྟར་ལ༔ སྡེ་བརྒྱད་གང་གནོད་ལིངྒ་འབྲི༔ ལྷ་དབྱེ་འགུགས་བསྟིམ་ཧོམ་དུ་བཅུག༔ རང་ཉིད་ཁྲོ་རྒྱལ་དྲག་ཏུ་ཁྲོས༔ ཐུགས་སྲོག་ཧཱུྃ་ལས་ཧཱུྃ་འཕྲོས་པས༔ སྣང་སྲིད་འཁོར་འདས་ཧཱུྃ་གིས་ཁེངས༔ ཧཱུྃ་ཡིག་གནས་གྱུར་ཁྲོ་བོའི་རྒྱལ༔ ཡཀྴ་མེ་དབལ་སྐུ་རུ་གྱུར༔ གནོད་བྱེད་གདོན་བགེགས་གང་ཡིན་པ༔ དབང་མེད་མེ་ཡི་ཞགས་པས་བཅིངས༔ ཐོ་བས་བརྒྱབ་ཅིང་ཧོམ་དུ་བཅུག༔ ཕོ་ཉ་ཁྲོ་ཚོགས་རླུང་ལྟར་འཚུབས༔ ཤ་ཟོས་ཁྲག་འཐུངས་རུས་པ་མུར༔ ཏིལ་འབྲུ་ཙམ་ཡང་མེད་པར་བསམས༔ ཨཱོཾ་བཛྲ་ཡཀྴ་རཀྴ་ཧཱུྃ༔ གནོད་བྱེད་འདི་ཞེས་སྙིང་ལ་མཱ་ར་ཡ་ཧཱུྃ་ཕཊ༔ ཅེས་བཟླས༔ སྐབས་སྐབས་ཐུན་གྱིས་རྡེགས༔ ཟན་ལིང་བསྒྲལ་ཞིང་གཏོར་མར་འབུལ༔ ལས་ལ་བསྐུལ་ཞིང་འཕྲིན་ལས་བཅོལ༔ བསད་པའི་རྟགས་དང་ཁུགས་རྟགས་འོང་༔ གཏོར་མ་ཟོར་འཕེན་ལིངྒ་མནན༔ དགྲ་བགེགས་གང་བརྩམས་མྱུར་དུ་སྒྲོལ༔ ས་མ་ཡཱ༔ ཨྠིྀ༔ བསྟོད་བསྐུལ་ནི༔ ཧཱུྃ༔ ཁྲོ་རྒྱལ་ཆེན་པོའི་འཕྲིན་ལས་དཀྱིལ་འཁོར་ནས༔ ཡཀྴ་མེ་དབལ་སྡེ་བརྒྱད་གཤེད་མ་ཆེ༔ སྨུག་ནག་ཁྲོས་པས་འབྱུང་པོ་རྡུལ་དུ་བརླགས༔ དུར་ཁྲོད་ཆས་གསོལ་དྲེགས་པའི་སྲོག་སྙིང་འཕྲོག༔ ཐུགས་ལས་སྤྲུལ་པའི་ཁྲོ་བོས་སྟོང་གསུམ་འགེངས༔ ཧཱུྃ་ཕཊ་སྒྲ་སྒྲོག་འབྱུང་པོ་དམྱལ་ཐག་གཅོད༔ སྲིན་པོའི་གཟུགས་འཆང་ཁྲོ་རྒྱལ་སྤྲུལ་པའི་སྲས༔ ཡཀྴ་མེ་དབལ་སྐུ་ལ་ཕྱག་འཚལ་བསྟོད༔ དམ་རྫས་ཤ་ཁྲག་མཆོད་གཏོར་འདི་བཞེས་ལ༔ རྒྱལ་བསེན་དམ་མེད་འབྱུང་པོའི་སྙིང་ནས་དྲོངས༔ སྤྱི་ནས་ཆོམས་ཤིག་ཤ་ཁྲག་དོན་སྙིང་བཞེས༔ མཐུ་སྟོབས་ཕྲོགས་ལ་རྡུལ་དུ་བརླག་པར་མཛོད༔ བཅོལ་བའི་འཕྲིན་ལས་མི་ཟད་མྱུར་དུ་སྒྲུབས༔ ཅེས་བརྗོད་གཏོར་མ་འབུལ་ཞིང་དམིགས་པ་སྒྱུར༔ ས་མ་ཡཱ༔ རྒྱ་རྒྱ་རྒྱ༔ ཁ་ཐམ་གུ་ཧྱ༔ རྒྱ་རྒྱ་རྒྱ༔ ཞེས་པ་འདི་ནི་གདམས་པའི་སྙིང་༔ སྡེ་བརྒྱད་དམ་སྲི་འབྱུང་པོའི་གཤེད༔ གཞན་ལ་མ་སྤེལ་སྙིང་ལ་གབ༔ ཤིན་ཏུ་སྦོས་ཤིག་དམ་དུ་གྱིས༔ འཆལ་ན་གཉན་པས་རང་ལ་འོང་༔ ས་མ་ཡཱ༔ རྒྱ་རྒྱ་རྒྱ༔ གཏེར་རྒྱ༔ སྦས་རྒྱ༔ ཟབ་རྒྱ༔ རིག་འཛིན་ཉི་མ་གྲགས་པས་ཟབ་བུ་ལུང་ནས་གདན་དྲངས་པའོ།། །།མངྒ་ལཾ།