དྲག་པོའི་སྦྱིན་སྲེག་དགྲ་བགེགས་ཀུན་འཇོམས།
ཟབ་ཆོས་པདྨ་དྲག་ཁྲོས་ལས༔ དྲག་པོའི་སྦྱིན་སྲེག་དགྲ་བགེགས་ཀུན་འཇོམས་བཞུགས༔ ཐོད་ཕྲེང་རྩལ་ལ་ཕྱག་འཚལ་བསྟོད༔ དྲག་པོ་པདྨའི་རྣལ་འབྱོར་པས༔ དགྲ་འམ་བགེགས་སོགས་སྒྲོལ་བའི་ཕྱིར༔ དྲག་པོའི་སྦྱིན་སྲེག་འདི་ལྟར་བྱ༔ མཎྜལ་ནག་པོར་དུག་ཁྲག་བྱུག༔ ཚངས་པའི་ཐིག་གདབ་གྲུ་གསུམ་བཅད༔ མེ་རི་ཐོད་པའི་ཕྲེང་བས་བསྐོར༔ ཚེར་མ་ཅན་གྱི་ཧོམ་ཁུང་བརྩིག༔ དུག་དང་ཤ་སྣ་ཁྲག་སྣ་དང་༔ དྲག་པོའི་སྲེག་རྫས་འབྱོར་ཚད་བཤམས༔ ཚེར་མ་ཅན་གྱི་ཡམ་ཤིང་ལ༔ འདོད་གསོལ་བྱང་བུ་ཁྲག་གིས་འབྲི༔ ཁྱད་པར་དགྲ་བགེགས་གང་གནོད་པའི༔ ལིངྒ་ཅི་མང་སྤྱི་ལྟར་འབྲི༔ ཟག་རྫས་ངར་སྣབས་ལྡན་པ་བསགས༔ མེ་ལྷ་ལྕགས་སྡིག་འབར་བར་བསྒོམ༔ ཡམ་ཤིང་ལ་སོགས་སྲེག་རྫས་དབུལ༔ མེ་ཡི་ངོ་བོ་ལྕགས་སྡིག་ལ༔ རྣམ་པ་དྲག་པོའི་དཀྱིལ་འཁོར་དུ༔ ཐམས་ཅད་སྐུ་མདོག་ནག་པོར་སྒྱུར༔ སྤྱན་འདྲེན་མཆོད་བསྟོད་སྲེག་རྫས་འབུལ༔ ཨགྣེ་ཡེ་དམ་སྲི་དགྲ་བགེགས་ཆེ་གེ་འདི་ཞེས་བྱ་བ་མཱ་ར་ཡ་ཛྭ་ལ་རཾ་རཾ་ཧཱུྃ་ཕཊ༔ རྩ་སྔགས་ཤམ་བུར་གདགས་པར་བྱ༔ ལིངྒ་བརྒྱ་རྩ་འབུལ་བ་གཅེས༔ མཆོད་བསྟོད་རྦད་བསྐུལ་དྲག་ཏུ་བྱ༔ ཐལ་བ་མཆོད་རྟེན་འོག་ཏུ་མནན༔ ཁྲོ་བོ་ཆེན་པོའི་བྲོ་བརྡུང་ཞིང་༔ བསྐལ་པའི་མཐར་ཡང་ཐར་མེད་བསམ༔ ས་མ་ཡཱ༔ རྒྱ་རྒྱ་རྒྱ༔ མ་འོངས་དུས་ཀྱི་སྐལ་ལྡན་རྣམས༔ གདམས་པ་འདི་བཞིན་སུས་བརྩམས་པས༔ དགྲ་བགེགས་གང་ཡིན་ཁ་དག་གཏོང་༔ དེ་ཕྱིར་སྙིང་ལ་བརྣག་པ་མཛོད༔ ལས་འཕྲོ་ཅན་དང་འཕྲད་པར་ཤོག༔ ས་མ་ཡཱ༔ རྒྱ་རྒྱ་རྒྱ༔ གཏེར་རྒྱ༔ སྦས་རྒྱ༔ ཟབ་རྒྱ༔ ས་མ་ཡཱ༔ རྒྱ་རྒྱ་རྒྱ༔ ཁམས་པ་ཉི་མ་གྲགས་པས་ཤངས་ཟབ་བུ་ལུང་ནས་གདན་དྲངས་ཤིང་། ཤོག་སེར་ལས་བོད་ཡིག་ཏུ་བསྒྱུར་བའོ། མངྒ་ལཾ། །