ཕྲན་བུའི་ལས་ཚོགས།
ཟབ་ཆོས་པདྨ་དྲག་ཁྲོས་ལས༔ ཕྲན་བུའི་ལས་ཚོགས་བཞུགས༔ དྲག་པོ་རྩལ་ལ་ཕྱག་འཚལ་ལོ༔ དྲག་པོ་པདྨའི་རྣལ་འབྱོར་པས༔ འགྲོ་བའི་དོན་དུ་སེམས་བསྐྱེད་དེ༔ འགྲོ་དོན་འདོད་ན་འདི་ལྟར་བྱ༔ དུག་ཤིང་སྟག་མའི་ཐལ་བ་ལ༔ དུད་པ་རལ་བའི་ཁ་ཚར་བཏབ༔ ཡུངས་ཀར་དག་ལ་སྔགས་འདིས་སྔགས༔ ཨཱོཾ་པ་ཙ་ལ་ཀྲོ་ཏ༔ པ་ཙ་ལ་ཀྲོ་ཏ༔ བྷནྡྷ་ར་ཡ༔ བྷནྡྷ་ར་ཡ༔ པ་ཙ་ལ་ཧ་ན་ཧཱུྃ་ཕཊ༔ སྟོང་ཕྲག་གཅིག་གིས་སྔགས་དྲོད་གླན༔ ནང་སྔ་ཟིལ་པ་མ་ཡལ་གོང་༔ ཞིང་ལ་གཏོར་བས་བཙའ་ནད་འཆད༔ ས་མ་ཡཱ༔ རྒྱ་རྒྱ་རྒྱ༔ སེམས་བསྐྱེད་ལྡན་པའི་རྣལ་འབྱོར་པས༔ བོང་བུའི་སྤུ་ལ་སྐུད་ལོགས་བསྒྲིལ༔ རྡོ་རྗེའི་མདུད་པ་གསུམ་བརྒྱབ་ནས༔ སྔགས་འདི་སྟོང་ཚོ་རེ་རེ་བཏབ༔ ཨཱོཾ་ཨཱཿཧཱུྃ་ཁྱད་ཁྱད་སྭཱ་ཧཱ༔ རཀྵཿབཤལ་ནད་ཆོད་པར་ཐེ་ཚོམ་མེད༔ ས་མ་ཡཱ༔ རྒྱ་རྒྱ་རྒྱ༔ དྲག་པོའི་རྣལ་འབྱོར་བྱང་སེམས་ཀྱིས༔ པདྨ་རཀྟ་ཁྱི་ཁྲག་ལ༔ ཨཱོཾ་ཨཱ་ཧཱུྃ་ཁཾ་བཾ་སྭཱ་ཧཱ༔ སྔགས་འདིས་སྟོང་ཕྲག་གཅིག་སྔགས་ནས༔ ནད་པའི་སྣ་རྩེར་ར་ལོག་འབྲི༔ རྩ་འགགས་སེལ་ཞིང་རྐྱེན་ལས་འགྲོལ༔ ས་མ་ཡཱ༔ རྒྱ་རྒྱ་རྒྱ༔ པདྨ་དྲག་པོའི་རྣལ་འབྱོར་པས༔ འགྲོ་བའི་དོན་དུ་སེམས་བསྐྱེད་ནས༔ གླང་རྒན་ཤི་བའི་གཞང་ཁ་དང་༔ ལོང་ཀའི་ཕུགས་གཉིས་ཕྱེ་མར་བརྡུངས༔ གཡེར་མའི་ཆུ་ཡི་ནང་དུ་བཏབ༔ ཨཱོཾ་ཨཱ་ཧཱུྃ་ཨ་མྲྀ་ཏེ་སྭཱ་ཧཱ༔ སྟོང་ཕྲག་བཏབ་ནས་ནད་པར་བླུད༔ དྲི་ཆུ་འགགས་པ་སེལ་བར་བྱེད༔ ས་མ་ཡཱ༔ རྒྱ་རྒྱ་རྒྱ༔ དྲག་པོ་པདྨའི་རྣལ་འབྱོར་པས༔ འགྲོ་བའི་དོན་དུ་སེམས་བསྐྱེད་ནས༔ རྟ་གསེབ་ཤི་བའི་རླིག་པ་དང་༔ རླིག་པའི་རྩ་བ་ཤ་སྐམ་རྣམས༔ རྩྭ་ནི་ཨ་ཝའི་ཆུ་ལ་བཏབ༔ ཨཱོཾ་ཨཱཿཧཱུྃ་ཧྲཱི༔ སྭཱ་ཧཱ༔ སྟོང་བཏབ་ནད་པའི་ལྟོ་བར་བཏང་༔ དྲི་ཆེན་འགགས་པ་སེལ་བར་བྱེད༔ ས་མ་ཡཱ༔ རྒྱ་རྒྱ་རྒྱ༔ གཏེར་རྒྱ༔ སྦས་རྒྱ༔ ཟབ་རྒྱ༔ ས་མ་ཡཱ༔ རྒྱ་རྒྱ་རྒྱ༔ སཱུརྱ་ཀཱིརྟིས་ཤངས་ཟབ་བུ་ལུང་ནས་གདན་དྲངས་པའོ། །མངྒ་ལཾ། །