གླུད་ཀྱི་ཆོ་ག་རྐྱེན་ངན་ཀུན་སེལ།
ཟབ་ཆོས་པདྨ་དྲག་ཁྲོས་ལས༔ གླུད་ཀྱི་ཆོ་ག་རྐྱེན་ངན་ཀུན་སེལ་བཞུགས༔ དྲག་པོ་རྩལ་ལ་ཕྱག་འཚལ་ལོ༔ མ་འོངས་དུས་སུ་སྡེ་བརྒྱད་འཚུབ༔ གདོན་བགེགས་འབྱུང་པོ་ཁ་རྒྱས་དུས༔ སྐྱེ་འགྲོ་བར་ཆད་དབང་དུ་འགྲོ༔ དེ་དུས་འགྲོ་ལ་ཕན་དོན་དུ༔ བར་ཆད་གླུད་ཀྱིས་སེལ་བའི་ཐབས༔ གླུད་བསྔོའི་ཆོ་ག་འདི་ལྟར་བྱ༔ གང་ཡང་རུང་བའི་སྡེར་སྣོད་དུ༔ ཟན་ནམ་གམ་ས་བཟང་པོ་ལ༔ རི་རབ་བང་རིམ་གསུམ་པ་བཟོ༔ གཙང་མའི་ཟན་ལ་སྨན་སྤོས་འབྲུ༔ རིན་ཆེན་སྣ་ཚོགས་ངར་བཏབ་ནས༔ སྦྱིན་བདག་ཕོ་མོ་གང་ཡིན་པའི༔ གཟུགས་བརྙན་མདའ་གང་ཁྲུ་གང་ཚད༔ ཡང་ན་མི་ཚད་མཐོ་གང་སོགས༔ གང་འབྱོར་སྐྱེ་མཆེད་དོད་པར་བཟོ༔ ཤ་མདོག་གོས་འཁྱུད་མཛེས་ཚོན་སྒྱུར༔ ལུང་ཐང་མིག་གི་ནག་ཆ་བྱ༔ མགྲོན་བུས་སོ་ཡི་དཀར་ཆ་བྱ༔ བྱི་རུས་ལྕེ་ཡི་དམར་ཆ་བྱ༔ མཆོང་གིས་སྣ་ཡི་ཀ་བ་བྱ༔ དར་དམར་རྣ་ཆོའི་གསང་ཆ་བྱ༔ ཞོ་ཤ་གསུམ་ནི་མཁལ་མ་མཆིན༔ སྙིང་དང་བཅས་པའི་ནང་རོལ་བྱ༔ དུང་ནི་རྐང་བཞིའི་རུས་པར་བཅུག༔ གསེར་གྱི་ཐིག་ལེས་བརྒལ་ཚིགས་བརྒྱན༔ དངུལ་གྱི་མགོ་ཡི་ཀླད་པ་བྱ༔ གཡུ་ཡིས་ཁ་སྤུ་སྨིན་མ་བརྒྱན༔ ཨཱོཾ་ཨཱཿཧཱུྃ་གིས་བྱིན་གྱིས་བརླབ༔ བང་རིམ་སྟེང་དུ་བརྟན་པར་བཞག༔ གཡས་གྱི་ཕྱག་རྒྱ་བཤགས་འདེབས་ལ༔ གཡོན་པ་གླུད་ལེན་སྙིང་གའི་ཐད༔ མར་མེ་ཆང་བུ་བཟུང་བ་ལ༔ རྐང་གཉིས་གོམ་པ་འདེབས་པའི་ཚུལ༔ ཤིན་ཏུ་ཐུ་བའི་ནད་པ་ལ༔ བླ་རྟགས་བཞོན་པ་བྱས་པ་ལ༔ གདོན་གཟུགས་སྣ་འདྲེན་བྱས་ཀྱང་རུང་༔ དེ་ཡི་མདུན་དུ་མར་མེ་བཞག༔ གཡས་སུ་ཞལ་ཟས་གཡོན་ཏིང་ལོ༔ རྒྱབ་ཏུ་ཆང་བུ་རྣམ་པ་བཞི༔ དགུ་འམ་ལྔ་གསུམ་རེ་རེ་སོགས༔ སྐབས་དང་བསྟུན་ཏེ་བསགས་པར་བྱ༔ དེ་འོག་བང་རིམ་གཉིས་པ་ལ༔ མདུན་གྱི་ཕྱོགས་སུ་དུད་འགྲོའི་རིགས༔ རྟ་མཛོ་བ་གླང་ར་ལུག་གཡག༔ གཡས་ཀྱི་ཕྱོགས་སུ་ཕོ་ཡི་ཆས༔ གོ་མཚོན་རོལ་མོ་རིགས་མཐུན་དང་༔ གཡོན་དུ་ཐགས་ཆས་ལུས་རྒྱན་སོགས༔ བུད་མེད་རྣམས་ཀྱི་མོ་ཆས་དང་༔ རྒྱབ་ཏུ་དར་ཟབ་གསེར་དངུལ་ནོར༔ ལོངས་སྤྱོད་ཁ་ཟས་ལ་སོགས་པ༔ གོང་ལྟར་སྐབས་དང་བསྟུན་ཏེ་བསགས༔ དེ་འོག་བང་རིམ་ཐ་མ་ལ༔ ལོ་སྐོར་བཅུ་གཉིས་གཟུགས་འགྲོས་བཀོད༔ གཡས་གཡོན་ཕོ་གདོང་མོ་གདོང་དང་༔ མདའ་འཕང་དག་གིས་བརྒྱན་པར་བྱ༔ མདུན་རྒྱབ་རྒྱང་བུ་ནམ་མཁའ་བཙུགས༔ རྒྱས་པར་བྱེད་ན་ཕོ་མོའི་གདོང་༔ མདའ་འཕངས་རྒྱང་བུ་ནམ་མཁའ་རྣམས༔ ལྔ་གསུམ་དགུ་སོགས་གོང་མ་ལྟར༔ བསགས་ཤིང་མཐའ་ནས་སྤེལ་མར་འཛུགས༔ ནད་པའམ་ནི་སྦྱིན་བདག་གི༔ ཆང་བུ་ལོ་གྲངས་སོགས་མཐུན་བསགས༔ བྱིན་བརླབས་གླུད་མདོས་ཆང་བུ་རྣམས༔ རང་དང་དཀྱིལ་འཁོར་རྩ་བར་བཞག༔ སྨན་གཏོར་རཀྟ་གྷ་ན་བཤམས༔ ལས་གཞུང་བསྲང་ཞིང་བསྙེན་སྒྲུབ་གསོ༔ ཚོགས་ཀྱི་འཁོར་ལོས་ཁ་བསྐང་ཞིང་༔ ཏིང་འཛིན་གསལ་བས་མདོས་ཡས་རྣམས༔ རཾ་ཡཾ་ཁཾ་དང་བདུད་རྩིས་སྦྲན༔ བྱིན་གྱིས་བརླབ་པ་འདི་སྐད་དོ༔ ཨཱོཾ་མ་ཧཱ་ཤུ་ནྱ་ཏ་ཛྙཱ་ན་བཛྲ་སྭཱ་བྷཱ་ཝ་ཨཏྨ་ཀོ྅་ཧཾ༔ ཨཱོཾ་སྭཱ་བྷཱ་ཝ་བྷི་ཤུདྡྷེ་སརྦ་དྷརྨ་ཏེ་བྷི་ཤུདྡྷོ྅་ཧཾ༔ སྟོང་པ་ཉིད་དུ་གྱུར༔ སྟོང་པའི་ངང་ལས་རིན་ཆེན་རི་རབ་གླིང་དང་བཅས་པའི་སྣོད་ཀྱི་འཇིག་རྟེན་བཀོད་པ་ཕུན་སུམ་ཚོགས་པའི་དབུས་སུ་རིན་ཆེན་སྣ་ཚོགས་བསྡུས་པའི་ཕུང་པོ་མིའི་གཟུགས་བརྙན་དུ་ཤར་བ༔ སྣང་བའི་ངོ་བོ་རྣམ་ཤེས་གསལ་བ༔ ཡིད་ཀྱི་དབང་པོ་སྒོ་ལྔ་བཀྲ་བ༔ ལུས་ཀྱི་ལང་ཚོ་དར་ལ་བབ་པ༔ བཞིན་རས་སྐྱེ་མཆེད་མཛུམ་མདངས་ལྡན་པ༔ བུ་ག་རྣམས་ལས་དྲི་བསུང་འཕྲོ་བ༔ བ་སྤུ་རྣམས་ལས་འོད་ཟེར་འབར་བ༔ སྐྲ་དང་སྨིན་མ་གཡུ་ལྟར་འཚེར་བ༔ ཕུང་ཁམས་སྐྱེ་མཆེད་ཐམས་ཅད་མ་ཚང་བ་མེད་ཅིང་འདོད་པའི་ཡོན་ཏན་ཐམས་ཅད་ཡོངས་སུ་རྫོགས་པའི་རོལ་པ་ལ༔ སྣང་གསལ་མར་མེ༔ ཞལ་ཟས་བཤོས་བུ༔ འདོད་ཡོན་ཆངས་བུ༔ ལམ་བརྒྱགས་ཏིང་ལོ༔ རྐང་བཞི་དུད་འགྲོ༔ སྐྱེས་པ་ཕོ་ཆས༔ ཟ་མ་མོ་ཆས༔ བང་མཛོད་ནོར་རྫས༔ མདའ་བཀྲ་འཕང་བཀྲ༔ ཕོ་གདོང་མོ་གདོང་༔ ནམ་མཁའ་རྒྱང་བུ་ལ་སོགས་པ་ཐམས་ཅད་བཅུ་གཉིས་ལོའི་ནམ་ཟླ་ཞག་དུས་ཚེས་གྲངས་དུས་ཚོད་ལ་དབང་བའི་ལྷ་འདྲེའི་ཟ་ཁ་ཟུག་པའི་ཟས་སྐལ༔ བུ་ལོན་ཆགས་པའི་ནོར་སྐལ༔ ཤ་འཁོན་བརྩད་པའི་སྟོང་སྐལ༔ ཚེ་སྲོག་ཆད་པའི་སླུས་ཟས༔ དབང་ཐང་ཉམས་པའི་མཆོད་སྦྱིན༔ ན་ཚས་གཟིར་བའི་རྐྱེན་སྒྱུར༔ བསུན་མ་ཕོག་པའི་སྐུ་ཚབས༔ དུར་ཁ་ལངས་པའི་དུར་མདོས། ནད་ཁ་གཅོད་པའི་བཟློག་མདོས༔ རྐྱེན་ཁ་སྒྱུར་པའི་གླུད་མདོས༔ སྐྱ་མདའ་ཟུག་པའི་རྫོང་མདོས༔ མི་ཁ་བཟློག་པའི་བྲམ་མདོས༔ མདོར་ན་མཆོད་སྦྱིན་གྱི་ལོངས་སྤྱོད་ནམ་མཁའ་མཛོད་ཀྱི་དཔལ་དང་ལྡན་པ་ཞིག་ཏུ་གྱུར༔ ཨཱོཾ་ཨཱཿཧཱུྃ༔ གསུམ་དེ་བཞིན་གཤེགས་པ་བཞིའི་མཚན་བརྗོད་ཅིང་༔ ན་མཿསརྦ་ཏ་ཐཱ་ག་ཏ་བྷྱོ་བྷི་ཤྭ་མུ་ཥེ་བྷྱ༔ སརྦ་ཏད་ཁཾ་ཨུད་ག་ཏེ་སྥ་ར་ཎ་ཧི་མཾ་ག་ག་ན་ཁམ་གྷྲིཧྣ་ཨི་དམ་བྷ་ལིངྟཡེ་སྭཱ་ཧཱ༔ བདུན་བརྗོད༔ དེ་ནས་སྤྱན་འདྲེན་པ་ནི༔ ཧཱུྃ༔ ཡེ་ཤེས་དབྱིངས་ཀྱི་ཕོ་བྲང་ནས༔ དཀོན་མཆོག་སྐྱབས་གྱུར་ལྷ་ཚོགས་དང་༔ ཡི་དམ་སྲུང་མ་ཕོ་ཉ་བྲན༔ དཔའ་བོ་དཔའ་མོ་དུར་ཁྲོད་བདག༔ གདོན་བགེགས་འབྱུང་པོ་ལྷ་སྲིན་ཚོགས༔ ཐམས་ཅད་མ་ལུས་སྤྱན་འདྲེན་གཤེགས༔ མྱུར་དུ་སྤྱོན་ལ་གདན་ལ་བཞུགས༔ མཆོད་པ་འབུལ་ལོ་དགྱེས་པར་བཞེས༔ ཅེས་བརྗོད་ཅིང་བཛྲ་ཨརྒྷཾ་སོགས་ནས་ཤཔྟའི་བར་མཆོད༔ འབྲུ་སྣ་མདོས་ནང་དུ་ཕྱོགས་བཞི་ནས་གཏོར༔ སྐྱབས་གནས་ཀྱི་ལྷ་ཚོགས་ཐམས་ཅད་མདུན་གྱི་ནམ་མཁའ༔ ལྷ་འདྲེ་དང་གདོན་བགེགས་ཐམས་ཅད་མདུན་གྱ་ིས་གཞི་ལ་འཁོད་པར་བསམས་ཤིང་༔ ཁྱད་པར་དུའང་ནག་པོའི་ཕྱོགས་ཀྱི་གདོན་བགེགས་ལྷ་སྲིན་བཀའ་དང་དམ་ལ་མི་གནས་ཤིང་བོས་པའི་མགྲོན་ལ་མི་འོང་པ་རྣམས་ཀྱང་༔ རང་ཉིད་ཡི་དམ་དུ་གསལ་བའི་སྤྲུལ་པའི་འོད་ཟེར་ལས་ཕོ་ཉའི་ཚོགས་གྲངས་མེད་པ་འཕྲོས་ནས་རང་དབང་མེད་པར་མདུན་དུ་བཀུག་པར་བསམ་ཞིང་༔ བདེན་སྟོབས་ལན་གསུམ་བརྗོད་ཅིང་འགུགས་བསྟིམ་བྱས་ནས༔ ཛཿཧཱུྃ་བཾ་ཧོ༔ ཞེས་བརྗོད༔ དེ་ནས་མདོས་ལ་སྨན་རཀ་སྦྲེང་༔ སྙན་པའི་དབྱངས་ཀྱིས་འདི་སྐད་དོ༔ ཧཱུྃ༔ དེ་རིང་བཤམས་པའི་མདོས་ཆེན་འདི༔ ཕྱི་ལྟར་རི་རབ་གླིང་བཞི་རྫོགས༔ གསེར་རི་རྣམས་ཀྱང་སྤུངས་སེ་སྤུང་༔ རོལ་མཚོ་རྣམས་ཀྱང་ཀྱིལ་ལི་ལི༔ ཉི་ཟླ་རྒྱུ་སྐར་ཏ་ལ་ལ༔ གླིང་བཞི་གླིང་ཕྲན་བཀོད་རེ་ལེགས༔ རི་རབ་རིན་ཆེན་ལྷུན་རེ་སྡུག༔ རྩི་ཤིང་ནགས་ཚལ་དཔུང་རེ་འཐུག༔ ནང་ལྟར་ལྷ་མིའི་ལོངས་སྤྱོད་ཚང་༔ ཞལ་ཟས་བཤོས་བུ་སྤུངས་སེ་སྤུང་༔ སྣང་གསལ་མར་མེ་ཏ་ལ་ལ༔ ཏིང་ལོ་ཟས་མཆོག་ཉི་ལི་ལི༔ འདོད་ཡོན་ཆང་བུ་ཚུབས་སེ་ཚུབ༔ རྐང་བཞི་དུད་འགྲོས་ས་གཞི་གང་༔ འབའ་འཚེར་ངུར་སྐད་དི་རི་རི༔ ཕོ་ཆས་གོ་ཁྲབ་རྫ་ལྟར་ལུད༔ ཐམས་ཅད་བཀྲག་མདངས་ལམས་སེ་ལམ༔ ཟ་མ་མོ་ཆས་གངས་ལྟར་སྙིལ༔ ཐམས་ཅད་འོད་དུ་ཙེ་རེ་རེ༔ བང་མཛོད་ནོར་སྣ་རི་ལྟར་སྤུངས༔ ཐམས་ཅད་འདོད་དགུ་ཉི་ལི་ལི༔ བཅུ་གཉིས་ལོ་ཡི་གཟུགས་བརྙན་རྣམས༔ བཀྲག་དང་གཟི་མདངས་ཀྱི་ལི་ལི༔ མདའ་བཀྲ་རྣམས་ཀྱང་ཤ་ར་ར༔ འཕང་བཀྲ་རྣམས་ཀྱང་སི་ལི་ལི༔ རྒྱང་བུ་རྣམས་ཀྱང་ཧྲོངས་སེ་ཧྲོང་༔ ནམ་མཁའ་རྣམས་ཀྱང་སྐད་དེ་སྐད༔ ཕོ་གདོང་རྣམས་ཀྱང་ཚོམས་སེ་ཚོམ༔ མོ་གདོང་རྣམས་ཀྱང་ལྡེམས་སེ་ལྡེམ༔ འབྲུ་སྣ་རྣམས་ཀྱང་ཉིལ་ལི་ལི༔ སྨན་སྣ་རྣམས་ཀྱང་ཐོར་རོ་རོ༔ དར་སྣ་རྣམས་ཀྱང་པུ་རུ་རུ༔ གསང་བ་རྒྱུ་སྦྱོར་ཆེ་གེ་ཡི༔ ཕུང་ཁམས་སྐྱེ་མཆེད་ཐམས་ཅད་ཚང་༔ སྐུ་ལུས་དར་ཟབ་ན་གཟའ་གསོལ༔ འཇའ་ཚོན་ཆ་ག་ཏ་ལ་ལ༔ ཞབས་ལ་ཕྱགས་ལྷམ་དཀར་པོ་གསོལ༔ གོམ་བཟང་འགྲོ་འདུར་ལྡེམས་སེ་ལྡེམ༔ སྐ་རགས་འཇའ་ཚོན་རྣམ་ལྔས་བྱས༔ འོད་དང་འོད་ཟེར་ཀྱི་ལི་ལི༔ ཕྱག་གཡས་ཤགས་འདེབས་ཕྱག་རྒྱ་ཡིས༔ བདེན་རྫུན་དྲང་ཤན་སོ་སོར་ཕྱེ༔ ཕྱག་གཡོན་གླུད་ལེན་མར་མེ་བསྣམས༔ མི་ཡི་གླུད་དུ་འགྲོ་བའི་རྟགས༔ རུས་བཞི་དུང་གི་རྐང་ལས་གྲུབ༔ ཕ་ཚན་སྐྱེས་པ་ཕོ་ཡི་གླུད༔ ཤ་ཁྲག་རྩ་སྦུབས་ནང་རོལ་རྣམས༔ གསེར་དངུལ་རིན་ཆེན་སྨན་ལས་གྲུབ༔ མ་ཚན་ཟ་མ་མོ་ཡི་གླུད༔ རྒལ་ཚིགས་གསེར་གྱི་དོང་ཙེས་བརྒྱན༔ འབྱུང་བཞི་འདུས་པ་དབུ་མའི་གླུད༔ རིན་ཆེན་དངུལ་གྱི་ཀླད་པ་བྱས༔ བྱང་ཆུབ་བདེ་བ་ཁམས་ཀྱི་གླུད༔ སྤྱན་མིག་ལུང་ཐང་སྨུག་པོར་བྱས༔ ཁམས་གསུམ་ཐམས་ཅད་གསལ་ལེར་གཟིགས༔ ལྟ་བར་བྱེད་པ་མིག་གི་གླུད༔ སྙན་ནི་ལེ་བརྒན་དར་ལས་བྱས༔ སྒྲ་སྐད་ཐམས་ཅད་སངས་སེ་སང་༔ ཉན་པར་བྱེད་པ་རྣ་བའི་གླུད༔ ཤངས་ནི་རིན་ཆེན་འཆོང་ལས་བྱས༔ དྲི་བསུང་སྤོས་ངད་ཐུ་ལུ་ལུ༔ སྣོམ་པར་བྱེད་པ་སྣ་ཡི་གླུད༔ ཚེམས་ནི་རིན་ཆེན་མགྲོན་བུར་བྱས༔ དུང་སོ་སུམ་ཅུ་ཁྲིགས་སེ་ཁྲིག༔ བཟའ་བར་བྱེད་པ་སོ་ཡི་གླུད༔ ལྗགས་ནི་རིན་ཆེན་བྱི་རུར་བྱས༔ སྒྲ་སྐད་གླུ་ལེན་ཀྱུར་རུ་རུ༔ སྨྲ་བར་བྱེད་པ་ལྕེ་ཡི་གླུད༔ ཙིཏྟ་སྨན་མཆོག་ཞོ་ཤར་བྱས༔ བདེ་སྟོང་རང་རིག་ཏ་ལ་ལ༔ བསམ་པར་བྱེད་པ་སེམས་ཀྱི་གླུད༔ སྨ་ར་སྨིན་མ་གཡུ་ལས་བྱས༔ འོད་ཀྱི་ཟེར་མདངས་ཁྱུགས་སེ་ཁྱུག༔ བ་སྤུ་ཉི་ཁྲི་ཆིག་སྟོང་གླུད༔ གླུད་ཀྱི་དབུ་ལ་ཞྭ་ཅིག་བསྣམས༔ སྐུ་ཡི་གླུད་དུ་གཤེགས་པའི་རྟགས༔ གླུད་ཀྱི་ཕྱག་ན་ཆངས་བུ་བསྣམས༔ གསུང་གི་གླུད་དུ་གཤེགས་པའི་རྟགས༔ གླུད་ཀྱི་ཐུགས་ཀར་མར་མེ་ཐོགས༔ ཐུགས་ཀྱི་གླུད་དུ་འགྲོ་བའི་རྟགས༔ གླུད་གྱི་ཞབས་ལ་ལྷམ་ཞིག་གསོལ༔ ཡོན་ཏན་གླུད་དུ་འགྲོ་བའི་རྟགས༔ གླུད་ཀྱི་ཞབས་ལ་བཞོན་པ་ཡོད༔ ཕྲིན་ལས་གླུད་དུ་འགྲོ་བའི་རྟགས༔ ཀྱེ་ཡ་མཚན་བརྒྱད་ལྡན་གླུད་རབ་འདི༔ དེ་རིང་སྐྱབས་གནས་རྣམས་ལ་འབུལ༔ རྒྱུ་སྦྱོར་ཡོན་གྱི་བདག་པོ་ལ༔ སྐུ་གསུང་ཐུགས་ཀྱི་བྱིན་གྱིས་རློབས༔ ཡི་དམ་དཀྱིལ་འཁོར་ལྷ་ལ་འབུལ༔ རྒྱུ་སྦྱོར་ཡོན་གྱི་བདག་པོ་ལ༔ མཆོག་དང་ཐུན་མོང་དངོས་གྲུབ་སྩོལ༔ མཁའ་འགྲོ་ཆོས་སྐྱོང་རྣམས་ལ་འབུལ༔ རྒྱུ་སྦྱོར་ཡོན་གྱི་བདག་པོ་ལ༔ ཕྲིན་ལས་སྒྲུབ་ལ་བར་ཆད་སོལ༔ ཅེས་བརྗོད་པས་སྐྱབས་གནས་རྣམས་ཀྱི་ལྷ་ཚོགས་ཐམས་ཅད་ཀྱིས་ཕྱི་ནང་སྣོད་བཅུད་ཕུང་ཁམས་སྐྱེ་མཆེད་ཐམས་ཅད་ཚང་བའི་གླུད་མཆོད་དེ་དགྱེས་པ་ཆེན་པོའི་མདངས་ཀྱིས་བཞེས་པས་རྒྱུ་སྦྱོར་སྦྱིན་པའི་བདག་པོས་མཆོག་ཐུན་མོང་གི་དངོས་གྲུབ་ཐམས་ཅད་ཐོབ༔ སྐུ་གསུང་ཐུགས་ལས་ཨཱོཾཿཨཱ༔ ཧཱུྃ་གསུམ་གྱི་ཡིག་འབྲུ་ཆར་ཆེན་པོ་བབས་པ་ལྟར་འོད་ཟེར་གྱི་རྣམ་པར་སིབ་སིབ་མདོས་ལ་ཐིམ་པས་ཟག་བཅས་ཀྱི་གླུད་ལ་ཟག་མེད་ཀྱི་འདོད་ཡོན་ནམ་མཁའ་ས་གཞི་བར་སྣང་ཐམས་ཅད་ཁྱབ་པར་འཕྲོ་ནུས་པའི་ཡོན་ཏན་དང་ལྡན་པས་གདོན་བགེགས་འབྱུང་པོ་ཐམས་ཅད་རང་དབང་མེད་པར་ཤེས་རྒྱུད་ཚིམ་ནུས་པ་ཞིག་ཏུ་བསམས་ཤིང་འདི་སྐད་དོ༔ ཀྱེ༔ ཉོན་ཅིག་ལྷ་སྲིན་སྡེ་བརྒྱད་རྣམས༔ གསོན་ཅིག་གདོན་བགེགས་འབྱུང་པོའི་ཚོགས༔ ལྷའམ་འོན་ཏེ་གནོད་པའི་འདྲེ༔ ཕོ་གདོན་མོ་གདོན་བྱིས་པའི་གདོན༔ ཁྱེད་རྣམས་ཐམས་ཅད་ཚུར་ཉོན་དང་༔ གདོན་བགེགས་ཁྱོད་དང་གདོན་ཡུལ་དང་༔ ང་དང་སངས་རྒྱས་བཅོམ་ལྡན་འདས༔ ཐམས་ཅད་མ་ལུས་གཞི་གཅིག་ཀྱང་༔ ཁྱེད་རྣམས་ལས་ངན་དབང་གིས་ཁྱེར༔ ཡིད་ལུས་དངོས་མེད་དངོས་པོར་ཞེན༔ ཉོན་མོངས་དུག་ལྔ་འབར་ཞིང་འཕྱོ༔ མཁའ་ལ་རྒྱུ་ཞིང་སྟོང་གསུམ་བསྐོར༔ ནད་མཚོན་མུ་གེའི་ཆར་པ་འབེབས༔ དུག་དང་ནད་ཀྱི་རླངས་པ་འཐུལ༔ སྐྱེ་འགྲོའི་སྲོག་དབུགས་ཟས་སུ་ཟ༔ ཁྱེད་རྣམས་སྔོན་ཚེ་མང་པོ་ནས༔ ལས་ངན་དབང་གིས་འདྲེ་རུ་སྐྱེས༔ རྣམ་སྨིན་སྡིག་ལྟུང་དཔག་མེད་བསགས༔ རྣམ་པར་སྨིན་པ་བཅོས་དཀའ་བས༔ རང་ལ་སྡིག་ཅིང་དམྱལ་བར་འཚོད༔ དེ་ཕྱིར་གདུག་སེམས་དེ་རིང་སྤོངས༔ བྱང་ཆུབ་སེམས་དང་ལྡན་པའི་ངང་༔ དུས་གསུམ་སངས་རྒྱས་བཀའ་མ་གཅོག༔ རྡོ་རྗེ་ཅན་གྱི་དམ་མ་བཀྲལ༔ ཧེ་རུ་ཀཿདཔལ་སུན་མ་ཕྱུང་༔ དབང་ཆེན་འབར་བའི་བཀའ་ལ་ཉོན༔ ཀྱེ་ལྷའམ་འོན་ཏེ་གནོད་པའི་གདོན༔ ཐམས་ཅད་ཐམས་ཅད་ཚུར་ཉོན་དང་༔ དེ་རིང་མདུན་གྱི་གླུད་མདོས་འདི༔ རྒྱུ་རྐྱེན་ཡོ་བྱད་ཕུན་སུམ་ཚོགས༔ སངས་རྒྱས་རྣམས་ཀྱིས་བྱིན་གྱིས་བརླབས༔ དབང་ཆེན་པདྨ་ཧེ་རུ་ཀས༔ གླུད་དུ་རྫོངས་ཞེས་ལུང་ཡང་བསྟན༔ བཅོམ་ལྡན་ཕྱག་ན་རྡོ་རྗེ་ཡིས༔ སྐུ་གསུང་ཐུགས་ཀྱི་དབང་རྣམས་བསྐུར༔ བསྔོས་པ་ཙམ་གྱིས་ཁྱེད་རྣམས་ལ༔ འདོད་ཡོན་ལྔ་ཡི་ཆར་པ་འབབས༔ བྱིན་པ་ཙམ་གྱིས་ཁྱེད་རྣམས་ལ༔ མཁོ་དགུའི་ལོངས་སྤྱོད་དཔལ་དང་ལྡན༔ རོལ་པ་ཙམ་གྱིས་ཁྱེད་རྣམས་ལ༔ དགའ་བདེའི་ཡེ་ཤེས་རྒྱུད་ལ་སྐྱེ༔ ཏིང་འཛིན་ཟས་མཆོག་བདུད་རྩིས་ཚིམ༔ དེ་ཕྱིར་མི་བས་གླུད་འདི་བཟང་༔ སྲོག་བཅད་པ་ཡི་རྣམ་སྨིན་མེད༔ རྣམ་པར་འཚེ་བའི་ཉེས་པ་མེད༔ ཤ་ཁྲག་ཟོས་པའི་ལན་ཆགས་བྲལ༔ དེ་ཕྱིར་གླུད་བཟང་འདི་ལོངས་ཤིག༔ དེ་ཕྱིར་གླུད་བཟང་འདི་ཁྱེར་ཅིག༔ དེ་ཕྱིར་གླུད་བཟང་འདི་རོལ་ཅིག༔ སྐུ་ལ་དར་ཟབ་ན་བཟའ་གསོལ༔ ཡོན་བདག་འདི་ཡི་གླུད་དུ་འབུལ༔ སྐ་རགས་འཇའ་ཚོན་རྣམ་ལྔ་གསོལ༔ ཡོན་བདག་འདི་ཡི་གླུད་དུ་འབུལ༔ རུས་གཞི་དུང་ལས་བྱས་པ་འདི༔ ཡོན་བདག༴ ཤ་ཁྲག་སྨན་སྤོས་རིན་ཆེན་ལྔ༔ ཡོན་བདག༴ སྒལ་ཚིགས་རྣམས་ཀྱང་གསེར་ལས་གྲུབ༔ ཡོན་བདག༴ ཀླད་པ་རིན་ཆེ་དངུལ་ལས་བྱས༔ ཡོན་བདག༴ སྤྱན་ནི་ལུང་ཐང་སྨུག་པོར་བྱས༔ ཡོན་བདག༴ སྙན་ནི་ལེ་བརྒན་དར་ལས་བྱས༔ ཡོན་བདག༴ ཤངས་ནི་རིན་ཆེན་འཆོང་ལས་བྱས༔ ཡོན་བདག༴ ཚེམས་ནི་དུང་སོ་མགྲོན་བུའི་ཚེམས༔ ཡོན་བདག༴ ལྗགས་ནི་རིན་ཆེན་བྱི་རུར་བྱས༔ ཡོན་བདག༴ སྨ་ར་སྨིན་མ་གཡུ་ལས་བྱས༔ ཡོན་བདག༴ སྙིང་ནི་ཞོ་ཤ་སྨན་གྱི་སྙིང་༔ ཡོན་བདག༴ ཞབས་ལ་ཕྱགས་ལྷམ་མཛེས་པར་གསོལ༔ ཡོན་བདག༔ ཞོན་པ་དུད་འགྲོ་ལང་ཚོ་དར༔ ཡོན་བདག༴ ཕྱག་ན་མར་མེ་ཆང་བུ་བསྣམས༔ ཡོན་བདག༴ སྣང་གསལ་མར་མེ་ཏ་ལ་ལ༔ ཡོན་བདག༴ ཞལ་ཟས་བཤོས་བུ་སྤུངས་སེ་སྤུང་༔ ཡོན་བདག༴ ཏིང་ལོའི་ཁ་ཟས་ཉི་ལི་ལི༔ ཡོན་བདག༴ འདོད་ཡོན་ཆང་བུ་ཚུབས་སེ་ཚུབ༔ ཡོན་བདག༴ རྐང་བཞི་དུད་འགྲོས་ས་གཞི་གང་༔ ཡོན་བདག༴ སྐྱེས་པ་ཕོ་ཆས་རྫ་ལྟར་ལུད༔ ཡོན་བདག༴ ཟ་མ་མོ་ཆས་གངས་ལྟར་སྙིལ༔ ཡོན་བདག༴ བང་མཛོད་ནོར་སྣ་རི་ལྟར་སྤུངས༔ ཡོན་བདག༴ མདའ་བཀྲ་རྣམས་ཀྱང་ཤ་ར་ར༔ ཡོན་བདག༴ འཕང་བཀྲ་རྣམས་ཀྱང་སི་ལི་ལི༔ ཡོན་བདག༴ རྒྱང་བུ་རྣམས་ཀྱང་རྒྱངས་སེ་རྒྱང་༔ ཡོན་བདག༴ ནམ་མཁའ་རྣམས་ཀྱང་སྐད་དེ་སྐད༔ ཡོན་བདག༴ ཕོ་གདོང་རྣམས་ཀྱང་ཤ་ར་ར༔ ཡོན་བདག༴ མོ་གདོང་རྣམས་ཀྱང་ལྡེམས་སེ་ལྡེམ༔ ཡོན་བདག༴ འབྲུ་སྣ་རྣམས་ཀྱང་ཉིལ་ལི་ལི༔ ཡོན་བདག༴ དར་ཚོན་རྣམ་ལྔ་པུར་རུ་རུ༔ ཡོན་བདག༴ རི་རབ་གླིང་བཞི་ཀྱིལ་ལི་ལི༔ ཡོན་བདག༴ གསེར་རི་རོལ་མཚོ་སྤུངས་སེ་སྤུང་༔ ཡོན་བདག༴ ཉི་ཟླ་གཟའ་སྐར་ཏ་ལ་ལ༔ ཡོན་བདག༴ དཔག་བསམ་ཤིང་ཏོག་ཉིལ་ལི་ལི༔ ཡོན་བདག༴ འདོད་ཡོན་སྣ་ཚོགས་སྤུངས་སེ་སྤུང་༔ ཡོན་བདག༴ ཅེས་བརྗོད་ཅིང་ཆེ་གེའི་ལོ་གྲངས་དགུ་འགྱུར་གྱི་ཆང་བུ་འམ་ལྔ་གསུམ་གཅིག་བདུན་སོགས་ཀྱི་གཞུང་དང་མཐུན་པར་གོང་ནས་བསགས་པའི་ཆངས་བུ་རྣམས་གཏོར་སྟེགས་སུ་བཤམས་ཤིང་རིམ་གྱིས་བྱིན་གྱིས་བརླབས་ནས༔ ཆུ་དཀར་གྱིས་སྦྲན་ཞིང་དེ་བཞིན་གཤེགས་པ་བཞིའི་མཚན་དང་ན་མ༔ སརྦ་ཏ་ཐཱ་ག་ཏའི་སྔགས་གསུམ་བདུན་ལྔ་སོགས་གང་རུང་གིས་མདོས་ལ་འབུལ༔ འབྱུང་བཞིའི་གཏོར་མ་ཅི་མང་གཏོང་ཞིང་མདོས་ལ་འབུལ༔ སྦྱིན་བདག་ལ་རྣམ་འཇོམས་ཀྱི་གཟུངས་ཁྲུས་བྱ་ཞིང་ཁྲུས་ཆུ་མདོས་ལ་འབུལ༔ དེ་ནས་གསེར་སྐྱེམས་མཆོད༔ མདོས་ཞལ་བསྒྱུར་སྨན་རཀ་གིས་སྦྲན་ཏེ་འདི་སྐད་དོ༔ ཧཱུྃ༔ དཀར་གྱི་གཏོར་མ་རི་ལྟར་སྤུངས༔ བདུད་རྩི་ཆང་ནི་མཚོ་ལྟར་བསྐྱིལ༔ རིན་ཆེན་རྣམ་ལྔ་ངར་དུ་བཏབ༔ དམ་རྫས་གསེར་སྐྱེམས་མཆོད་པ་འདི༔ མཐོ་བ་གནམ་དང་དམའ་བ་ས༔ ཕྱོགས་བཞི་མཚམས་བརྒྱད་སྟེང་འོག་བཅུའི༔ ལྷ་ཀླུ་ས་བདག་ཕྱོགས་སྐྱོང་དང་༔ ཡུལ་ལྷ་གཞི་བདག་རྣམས་ལ་འབུལ༔ མཆོད་པ་དམ་པ་འདི་བཞེས་ལ༔ གླུད་མདོས་འདི་ཡི་ལམ་ཕྱེ་ཞིག༔ སྐག་མདོས་འདི་ཡི་སྣ་དྲོངས་ཤིག༔ བར་ཆད་རྐྱེན་དང་མི་མཐུན་ཟློག༔ བཅོལ་བའི་འཕྲིན་ལས་གྲུབ་པར་མཛོད༔ ཀྱེ་ཉོན་ཅིག་གདོན་བགེགས་ལན་ཆགས་རྣམས༔ གསོན་ཅིག་ཡས་དང་གླུད་ཀྱི་བདག༔ གླུད་ཆེན་མདོས་ཡས་སྣ་ཚོགས་འདིས༔ རྒྱུ་སྦྱོར་ཡོན་གྱི་བདག་པོ་ལ༔ ལོ་བདུད་ཤར་བའི་ལོ་སྐག་སྒྱུར༔ ཟླ་བདུད་བབས་པའི་ཟླ་སྐག་སྒྱུར༔ ཞག་ཚེས་ཚང་བའི་ཞག་སྐག་སྒྱུར༔ སྤར་ཁའི་ཁམས་ཀྱི་སྐྱ་མདའ་སྒྱུར༔ སྨེ་བའི་ཁམས་ཀྱི་དུར་ཁ་སྒྱུར༔ ཡམས་ཁ་ཟུགས་པའི་ནད་རིམས་སྒྱུར༔ ཟ་ཁ་ཟུགས་པའི་གཤེད་རྣམས་སྒྱུར༔ རྦོད་གཏོང་བྱུང་བའི་བར་ཆད་སྒྱུར༔ ཚེ་ལ་བརྐུ་བའི་བགེགས་རྣམས་སྒྱུར༔ སྲོག་ལ་འཇབས་པའི་གདོན་རྣམས་སྒྱུར༔ བླ་ལ་འཁྱེར་བའི་འདྲེ་རྣམས་སྒྱུར༔ ཀྱེ་མི་ལུས་སྟག་དང་ཡོས་བུའི་མགོ༔ སྟག་ཡོས་ལོ་པའི་གླུད་དུ་གཏོང་༔ མི་ལུས་རྟ་དང་སྦྲུལ་གྱི་མགོ༔ རྟ་སྦྲུལ་ལོ་བའི་གླུད་དུ་གཏོང་༔ མི་ལུས་བྱ་དང་སྤྲེལ་གྱི་མགོ༔ བྱ་སྤྲེལ་ལོ་པའི་གླུད་དུ་གཏོང་༔ མི་ལུས་བྱི་བ་ཕག་གི་མགོ༔ བྱི་ཕག་ལོ་པའི་གླུད་དུ་གཏོང་༔ མི་ལུས་ལུག་དང་གླང་གི་མགོ༔ གླང་ལུག་ལོ་པའི་གླུད་དུ་གཏོང་༔ མི་ལུས་འབྲུག་དང་ཁྱི་ཡི་མགོ༔ ཁྱི་འབྲུག་ལོ་པའི་གླུད་དུ་འབུལ༔ བཅུ་གཉིས་ལོ་ཡི་དགྲར་ཤར་བའི༔ ལོ་སྐག་ཐམས་ཅད་དེ་རིང་སྒྱུར༔ ཟླ་སྐག་ཐམས༴ ཞག་སྐག་ཐམས༴ ཟ་མའི་སྐག་རྣམས་དེ་རིང་སྒྱུར༔ བྱི་ཕག་ལོ་ལ་གནོད་པ་ཡི༔ ས་ཆུ་གཉིས་ཀྱི་དགྲ་གཤེད་སྒྱུར༔ རྟ་སྤྲུལ་ལོ་ལ་གནོད་པ་ཡི༔ མེ་ཆུ་གཉིས་ཀྱི་དགྲ་གཤེད༴ བྱ་སྤྲེལ་ལོ་ལ་གནོད་པ་ཡི༔ མེ་དང་ལྕགས་ཀྱི་དགྲ༴ སྟག་ཡོས་ལོ་ལ་གནོད་པ་ཡི༔ ཤིང་ལྕགས་གཉིས་ཀྱི་དགྲ༴ མཚམས་བཞིའི་ལོ་ལ་གནོད་པ་ཡི༔ ས་ཤིང་གཉིས་ཀྱི་དགྲ༴ བྱི་རྟ་གཉིས་ཀྱི་རུ་གཅོད་ཟློག༔ གླང་ལུག་གཉིས་ཀྱི་འཕུང་གྱོད་ཟློག༔ བྱ་ཡོས་གཉིས་ཀྱི་དགྲ་གཤེད་ཟློག༔ ཕག་སྦྲུལ་གཉིས་ཀྱི་སྣ་ཐུག་ཟློག༔ སྟག་སྤྲེལ་གཉིས་ཀྱི་བདུན་ཟུར་ཟློག༔ ཁྱི་འབྲུག་གཉིས་ཀྱི་ཐོག་བརྫིས་ཟློག༔ སྟག་རྟ་ཁྱི་གསུམ་མཐུན་སྐག་ཟློག༔ བྱ་གླང་སྦྲུལ་གསུམ་མཐུན་སྐག་ཟློག༔ བྱི་འབྲུག་སྤྲེལ་གསུམ་མཐུན་སྐག་ཟློག༔ ཕག་ལུག་ཡོས་གསུམ་མཐུན་སྐག་ཟློག༔ ཀྱེ་གཞན་ཡང་མདོས་ཡས་ཆེན་པོ་འདིས༔ ཆགས་ཆེ་ཉམ་ང་ཐམས་ཅད་ཟློག༔ ལྷ་ཡི་བཀའ་ཆད་བབས་པ་ཟློག༔ ལྷ་ཡི་ཡུལ་གྱི་བསུན་མ་སྒྱུར༔ བདུད་ཀྱིས་ཞགས་པ་བཏབ་པ་ཟློག༔ བདུད་གྱི་ཡུལ་གྱི༴ སྲིན་པོའི་ཟ་ཁ་བབས་པ་ཟློག༔ སྲིན་པོའི་ཡུལ་གྱི༴ རྒྱལ་པོའི་འོད་དཀར་འཕེན་པ་ཟློག༔ རྒྱལ་འགོང་རྣམས་ཀྱི༴ གཤིན་རྗེའི་འཁྲུལ་འཁོར་བྱུང་བ་ཟློག༔ གཤིན་རྗེ་རྣམས་ཀྱི༴ མ་མོའི་དལ་ཡམས་བབས་པ་ཟློག༔ མ་མོ་རྣམས་ཀྱི༴ བཙན་གྱི་ཇག་པ་གཏོང་བ་ཟློག༔ བཙན་གྱི་ཡུལ་གྱི༴ གནོད་སྦྱིན་གདུག་རྩུབ་བྱེད་པ་ཟློག༔ གནོད་སྦྱིན་ཡུལ་གྱི༴ ཐེའུ་རང་ཚེ་ལ་བརྐུ་བ་ཟློག༔ ཐེའུ་རང་ཡུལ་གྱི་བསུན༴ མ་ཡམས་རྣམས་ཀྱི་ལྟས་ངན་ཟློག༔ མ་ཡམས་ཡུལ་གྱི༴ མུ་སྟེགས་རྣམས་ཀྱི་ངན་སྔགས་ཟློག༔ ཕྲ་མེན་མཁའ་འགྲོའི༴ ཁྲོ་བོ་ཆེན་པོའི་ནུས་པ་ཟློག༔ དུར་ཁྲོད་མཁའ་འགྲོའི༴ ཧེ་རུ་ཀ་ཡིགཟི་བརྗིད་ཟློག༔ འཇིག་རྟེན་མཁའ་འགྲོའི་བསུན་མ་སྒྱུར༔ ཡེ་ཤེས་ལྷ་ཡི་བཀའ་ཆད་ཟློག༔ དབྱིངས་ཀྱི་མཁའ་འགྲོའི༴ དེ་ནས་མི་ཁའི་རྫས་རྣམས་མདོས་ལ་འཐོར་ཞིང་༔ ཀྱེ༔ གཞན་ཡང་མདོས་ཡས་ཆེན་པོ་འདིས༔ ཟློག་ཅིང་སྒྱུར་བའི་འཕྲིན་ལས་མཛོད༔ རྒྱུ་སྦྱོར་ཡོན་གྱི་བདག་པོ་ལ༔ བརྒྱ་ཡི་མི་ཁ་ཐམས་ཅད་ཟློག༔ སྟོང་གི་སྨྲ་མཆུ་ཟུག་པ་ཟློག༔ སྐྱེས་པ་ཕོ་བརྒྱའི་མདའ་གྲལ་ནས༔ མི་ཁ་མདའ་ལྟར་འཕེན་པ་ཟློག༔ ཟ་མ་མོ་བརྒྱའི་འཕང་གྲལ་ནས༔ མི་ཁ་དྲུག་ལྟར་སྒོང་བ་ཟློག༔ རྒྱལ་ཁམས་འགྲིམ་པའི་ལམ་སྲང་ནས༔ མི་ཁ་ཐང་ལྟར་བརྡལ་བ་ཟློག༔ ཁྲིམས་ལྡན་བཙུན་པའི་ཆོས་གྲལ་ནས༔ མི་ཁ་ཆོས་ལྟར་བཤད་པ་ཟློག༔ གཡུང་དྲུང་བོན་གྱི་ཚོགས་ཁང་ནས༔ མི་ཁ་བོན་ལྟར་གྱེར་བ་ཟློག༔ མི་ཁ་ཆུ་བོའི་གཞུང་ལ་ཟློག༔ ཉ་མོ་རྔ་འཛིངས་སྟེང་ལ་སྒྱུར༔ མི་ཁ་རི་བོའི་རྩེ་ལ་ཟློག༔ ཤ་ཕོ་རྭ་འཐབ་སྟེང་ལ་སྒྱུར༔ མི་ཁ་ལུང་གསུམ་མདོ་ལ་ཟློག༔ ཡུ་མོ་སྒྱིད་བརླས་སྟེང་ལ་སྒྱུར༔ མི་ཁ་ནམ་མཁའི་མཐོངས་ལ་ཟློག༔ སྲིན་བྱ་སྡེར་འཛིང་དེ་ལ་སྒྱུར༔ དེ་ནས་མདོས་བཏེག་ཅིང་འདྲེ་ལྔ་བདུད་གཅོད་ཀྱི་སྟེང་དུ་སྐྱེལ་ཏེ༔ གླུད་རྫོང་གཞན་ལྟར་བྱ་ཞིང་༔ རང་ཉིད་ཡི་དམ་དབང་ཆེན་དུ་བསྒོམས་པའི་ཏིང་འཛིན་དྲག་ཏུ་བསྐྱེད་དེ༔ གཏོར་ཟོར་བརྡེག་ཅིང་མཚམས་གཅོད་དྲག་ཏུ་བྱ༔ བསྲུང་བའི་འཁོར་ལོ་བསྒོམ་ཞིང་སྦྱིན་བདག་ལ་ཤིས་བརྗོད་མེ་ཏོག་འཐོར༔ ལས་ཀྱི་ཤུལ་མི་མངོན་པར་བྱ་ཞིང་རྫོགས་རིམ་བློ་འདས་བསྒོམ༔ ས་མ་ཡཱ༔ རྒྱ་རྒྱ་རྒྱ༔ འདི་ལྟར་ཕྲིན་ལས་ཁ་སྐོང་དུ༔ གླུད་ཀྱི་ཆོ་ག་འདི་བརྩམས་ན༔ བར་ཆད་ཞི་ཞིང་རྐྱེན་ལས་འགྲོལ༔ ནད་གདོན་ཐམས་ཅད་རང་སར་ཞི༔ སྔོན་གྱི་ལས་ཀྱང་འགྱུར་སྲིད་ན༔ འཕྲལ་གྱི་རྐྱེན་ལ་སྨོས་ཅི་དགོས༔ དེ་ཕྱིར་ཉམས་སུ་ལོངས་ཤིག་རྒྱ༔ མ་འོངས་འགྲོ་ལ་ཕན་ཐོགས་ཤོག༔ ཅེས་པའི་གླུད་ཀྱི་ཆོག་གཞུང་འདི་ཡང་སློབ་དཔོན་ཆེན་པོའི་གསུང་བཞིན་ཁོ་མོས་ཤོག་སེར་ལ་བཏབ་ཏེ་རིན་པོ་ཆེའི་གཏེར་དུ་སྦས་པའོ༔ ས་མ་ཡཱ༔ རྒྱ་རྒྱ་རྒྱ༔ གཏེར་རྒྱ༔ སྦས་རྒྱ༔ ཟབ་རྒྱ༔ ས་མ་ཡཱ༔ རྒྱ་རྒྱ་རྒྱ༔ སཱུརྱ་ཀཱིརྟིས་ཟབ་བུ་ལུང་ནས་གདན་དྲངས་ཤིང་ཤོག་སེར་ལས་ཕབ་པའོཿ མངྒ་ལཾ།། །།