cover

རིག་འཛིན་ཉི་མ་གྲགས་པའི་ཟབ་གཏེར་ཆོས་སྐོར་གླེགས་བམ་བཅུ་གསུམ་པ།

པོད་པ༽

རིག་འཛིན་ཉི་མ་གྲགས་པ།

མཁན་ཆེན་ཨོ་རྒྱན་རིག་འཛིན་ནས་པར་དུ་བསྐྲུན།

མཁོ་རྒུའི་ལོངས་སྤྱོད་འཛོམས་ཀྱང་མ་བསགས་ཤིང་། །འདོད་ཡོན་འཁོར་མང་ཚོགས་ཀྱང་མ་ཞེན་པར། །བསླབ་གསུམ་སྡེ་སྣོད་རིག་པའི་བང་མཛོད་དེ། །སྤོང་དང་ཀློག་པའི་སྙིང་གི་དབུས་སུ་བསྐྱིལ། །
—རྫོགས་ཆེན་དཔོན་སློབ།

དཔེ་སྐྲུན་གསལ་བཤད།

གྲུབ་བརྙེས་རིག༵་འཛིན༵་ཌཱཀྐིའི་ཐུགས་ཀྱི་བཅུད། །
ཡང་ཟབ་ཆོས་གཏེར་ཉི༵་མ༵་གསར་བའི་གཟིས། །
བསྟན་འགྲོའི་རྒུད་མུན་མིང་གི་མཐར་བྱེད་པའི། །
གྲགས༵་པ༵་ས་གསུམ་རྒྱན་དུ་བརྟན་གྱུར་ཅིག །
རྒྱལ་བ་ཀུན་གྱི་མཁྱེན་ནུས་བརྩེ་བའི་ཡོན་ཏན་གཅིག་ཏུ་སྤུངས་པ། རབ་འབྱམས་དཀྱིལ་འཁོར་རྒྱ་མཚོའི་སྤྲོ་གཞི་རྒྱལ་དབང་མཚོ་སྐྱེས་རྡོ་རྗེ་མཆོག་གིས། སྙིགས་དུས་ཀྱི་རྒུད་མུན་རྩད་ནས་གཞོམས་ཤིང་། འགྲོ་རྣམས་ཕན་བདེའི་དཔལ་ལ་ཡུན་ནས་ཡུན་དུ་སྤྱོད་པའི་སླད། གྲུབ་བརྙེས་རིག་འཛིན་ཌཱཀྐིའི་ཐུགས་བཅུད། འདོད་རྒུ་འབྱུང་བའི་ཡིད་བཞིན་གྱི་ནོར་བུ་ལྟ་བུའི་ཟབ་ཆོས་ཁྱད་པར་ཅན་རྣམས། དཀར་པོར་མོས་པའི་མི་མིན་རྫུ་འཕྲུལ་གྱི་ཤུགས་ཅན་དག་ལ་གཉེར་དུ་གཏད་དེ། བསིལ་ལྡན་ཁ་བ་རི་བའི་ཕྱོགས་བཞི་དབུས་ལྔའི་གངས་རི་འགྱུར་མེད་དང་། གཡུ་མཚོ་གཏན་འཁྱིལ་སོགས་སུ་ནམ་ཡང་མི་འཇིག་པའི་ཕྱག་རྒྱས་བཏབ་ནས་སྦས་པའི། ཤར་གཏེར་འདྲིལ་བ་སྡོང་བོ་ལྟ་བུའི་ཆོས་སྐོར། ལྷོ་གཏེར་སྨིན་པ་འབྲས་བུ་ལྟ་བུ། ནུབ་གཏེར་གསལ་བ་མེ་ཏོག་ལྟ་བུ། བྱང་གཏེར་གྱེས་པ་ཡལ་ག་ལྟ་བུ། དབུས་གཏེར་ཟུག་པ་རྩ་བ་ལྟ་བུར་བཞུགས་པ་དག ཕྱིས་དུས་རྟགས་རྟེན་འབྲེལ་མངོན་དུ་གྱུར་བ་ན། གུ་རུ་ཉིད་དང་རྗེ་འབངས་རིག་འཛིན་མཁའ་འགྲོ་མ་རྣམས་སླར་ཡང་རིག་སྔགས་འཆང་བའི་རྣམ་པར་བྱོན་ནས་འདོན་པར་མཛད་པ་ལས། འདིར་ནི་གངས་ཅན་མིག་གཅིག་ལོ་ཙཱ་བ་ཆེན་པོ་འཁོན་ཆེན་ཀླུ་དབང་སྲུང་གི་སྤྲུལ་བའི་རོལ་བ། ཤར་གཏེར་འདྲིལ་བ་སྡོང་བོ་ལྟ་བུའི་ཆོས་སྒོ་འབྱེད་པོར་ཚད་ཐུབ་གཏེར་ལུང་དུ་མ་ནས་བསྔགས་ཤིང་། ཉམས་རྟོགས་ཀྱི་ཡོན་ཏན། སྤྲུལ་སྒྱུར་གྱི་རོལ་རྩེད། ནུས་མཐུ་ཡི་དྲག་རྩལ། གཏེར་ཆོག་གི་ཁྱད་ཆོས། མཐོང་ཆོས་ཀྱི་རྫས་གཏེར། ཁྲོམ་གཏེར་གྱི་ངོ་མཚར་སོགས་གང་ནས་བསམ་ཀྱང་གཞན་ལས་ཁྱད་དུ་འཕགས་ཤིང་། གཞན་ལས་ཁྱད་ཆོས་མང་བ། གཏེར་ཆེན་བརྒྱ་རྩ་དང་གཏེར་ཕྲན་སྟོང་རྩའི་ཟབ་ཆོས་མཐའ་དག་ལ་དབང་བའི་ཆོས་ཀྱི་དབང་ཕྱུག་ཆེན་པོ། དུས་ལ་བབས་མིན་དང་གཏེར་ཁ་ཡིན་མིན་ལ་མི་ལྟོས་པར་ཟབ་གཏེར་མཐའ་དག་ལ་འདོད་རྒུར་སྤྱོད་པའི་སྟོབས་ཀྱི་འཁོར་ལོས་སྒྱུར་བའི་གཏེར་སྟོན་ཆེན་མོ། ཆོས་དང་རྫས་ཀྱི་གཏེར་དངོས་ཉུང་བསྡུས་ཙམ་མ་ཡིན་པར་རྒྱ་ཆེན་གྲངས་མང་འཛད་མི་ཤེས་པ་རྒྱལ་བོའི་བང་མཛོད་ལྟ་བུ་དག་འབྱིན་པ་ལ་སྔོན་སྨོན་གྱི་མཐུ་གྲུབ་པ། སྤྲུལ་བའི་གཏེར་སྟོན་ཆེན་མོ་༧རིག་འཛིན་ཉི་མ་གྲགས་པའམ་གར་དབང་འགྲོ་འདུལ་གླིང་བ་དེ་ཉིད་ཀྱི་གཏེར་བྱོན་ཟབ་ཆོས་རྣམས། བོད་ཁམས་ཕྱོགས་རྫ་རྒྱུད་ཨ་སེ་དགོན་ཐུབ་བསྟན་མདོ་སྔགས་བསྟན་གཉིས་དར་རྒྱས་གླིང་དུ། ཨ་སེ་མཆོག་སྤྲུལ་འགྱུར་མེད་རྡོ་རྗེས་ཕྱི་ལོ་(༡༩༢༢)སྐོར་ཡིག་མཁན་ཁྱད་འཕགས་དུ་མ་ཆེད་དུ་གདན་དྲངས་ཏེ་འབྲིར་བཅུག་པའི་གླེགས་བམ་པོད་བཅུ་གསུམ་ཡོད་པ་དག །ཕྱིས་ང་དགུའི་དུས་འགྱུར་སྐབས་མ་རུང་ངན་སྤྱོད་པ་དག་གིས། ཕྱག་དར་ཁྲོད་དུ་དོར་ཏེ་རླག་ལ་ཉེ་བའི་སྐབས། ཨ་སེའི་བླ་མ་ནམ་མཁའ་དང་མཁན་པོ་ཆོས་གྲགས་རྣམ་གཉིས་ཀྱིས་སྲོག་དང་བསྡོས་ཏེ་ཉར་ཚགས་བྱས། དུས་ཕྱིས་ཁོ་བོའི་ཞང་པོ་མཁན་པོ་ཆོས་གྲགས་ནས་དེ་དག་གྲོན་པར་དོག་སྟེ་ཁོ་བོ་ལ་བཀས་སྐུལ་བ་བཞིན། ཕྲན་པས་ཀྱང་རྒྱུ་ཚེགས་གཉིས་ཀྱིས་འབད་འབུངས་མི་དམན་པ་བསྐྱེད་དེ། རྩིས་འཕྲུལ་དུ་ཕབས་ཐོག་སྔ་ཕྱིར་ཞུ་དག་ལན་བདུན་བྱས་ཏེ་དཔར་དུ་བསྐྲུན་པ་ཡིན། དེ་ཡང་སྔོན་མའི་མ་དཔེ་ལྟར་གཏེར་གཞུང་རྩ་བའི་ཆོས་སྐོར་པོད་བཅུ་གསུམ་གཞིར་བཞག་བྱས་ཐོག གཏེར་ཆེན་རིན་པོ་ཆེའི་རང་རྣམ་དང་མགུར་འབུམ་དུམ་པ་གཅིག་མགོར་བཞག །སློབ་རྒྱུད་མཁས་གྲུབ་དག་གིས་མཛད་པའི་རྒྱབ་ཆོས་གལ་ཆེན་གྲས་ཕྱོགས་བསྡུས་དུམ་གཅིག་མཇུག་ཏུ་བསྣན་ཏེ་པོད་བཅོ་ལྔ་བྱས་ཏེ་བསྒྲིགས་བྱས་ཡོད། འོན་ཀྱང་མ་དཔེ་ཟག་རུལ་དུ་སོང་བ་སོགས་ཀྱི་དབང་གིས་ད་དུང་ནོར་འཁྲུལ་ཅི་རིགས་ཡོད་ངེས་པས། དབྱིངས་བཞུགས་རྩ་གསུམ་ཆོས་སྐྱོང་ལ་བཟོད་པ་གསོལ་བ་དང་། རྒྱ་ཆེའི་ཀློག་པ་པོ་རྣམས་ནས་དགོངས་ཡངས་དང་ནོར་བཅོས་གནང་བར་ཞུ་ཞེས་གསོལ་བ་འདེབས་པ་དང་འབྲེལ། འདིས་མཚོན་ལེགས་བྱས་མཐའ་དག་འབྲེལ་ཐོགས་ཡིད་ཅན་རྣམས་ཀྱི་གཙོས། མཐའ་ཡས་པའི་སེམས་ཅན་མཐའ་དག་བདེ་ནས་བདེ་བར་འགྲོ་བ་དང་། ཕན་བདེའི་འབྱུང་གནས་རྒྱལ་བསྟན་སྤྱི་དང་། ཁྱད་པར་མཚོར་འཁྲུངས་རྒྱལ་བའི་རིང་ལུགས་གསང་ཆེན་སྙིང་པོའི་བསྟན་པ་དར་ཞིང་རྒྱས་ལ་ཡུན་རིང་དུ་གནས་པའི་རྒྱུར་འགྱུར་བར་སྨོན་ན། དེ་དེ་བཞིན་འགྲུབ་པའི་མཐུན་འགྱུར་དབྱིངས་བཞུགས་སྲས་བཅས་རྒྱལ་བས་གནང་བར་མཛོད་ཅིག ༈ ཆོས་ཚུལ་འདི་ཡང་མཐའ་ཡས་འགྲོ་བ་རྣམས། །གདོད་མའི་གཞི་དབྱིངས་མངོན་པར་བྱང་ཆུབ་བར། །མི་ནུབ་བརྟན་གནས་བྱིན་བརླབས་གཟི་འོད་ཀྱིས། །སྲིད་པའི་གདུང་བ་ཡོངས་སུ་གཞིལ་གྱུར་ཅིག །དཔལ་ལྡན་བླ་མའི་ཞབས་པད་ཡུན་བརྟན་ཐུགས་ཀྱི་བཞེད་དོན་གེགས་མེད་འགྲུབ། །བསླབ་གསུམ་ཡོན་ཏན་དཔལ་གྱིས་བརྒྱན་པའི་འདུས་པའི་སྡེ་ཡིས་ས་སྟེང་གང་། །འབྲེལ་ཐོག་གཙོས་པའི་མཐའ་ཡས་ཡིད་ཅན་གནས་སྐབས་མཐོ་རིས་དཔལ་གྱིས་འབྱོར། །རིང་མིན་ཞི་བ་ཆོས་སྐུའི་དཔལ་ཐོབ་སྤྲུལ་བས་གཞན་དོན་མཐར་ཕྱིན་ཤོག །ཅེས་པར་སྐྲུན་ཡོན་སྦྱར་བ་ཨོ་རྒྱན་རིག་འཛིན་ནས་བོད་རྒྱལ་ལོ་ ༢༡༤༢ ཟླ་ ༢ ཚེས་ ༢༥ ཕྱི་ལོ་ ༢༠༡༥ ཟླ་ ༤ བའི་ཚེས་ ༡༤ ཉིན་ཆོས་སྐོར་འདི་ཉིད་པར་སྐྲུན་སྐབས་གསལ་བཤད་ཀྱི་ཚུལ་དུ་བྲིས་པ་དགེ་ཞིང་བཀྲ་ཤིས་པར་གྱུར་ཅིག །

ཐུགས་རྗེ་ཆེ་ཞུ།

༈ སྐྱེ་རྒུའི་བདེ་སྐྱིད་ཀྱི་འབྱུང་གནས་རྒྱལ་བ་མཉམ་མེད་དོན་ཀུན་གྲུབ་པ་ཆེན་པོའི་གསང་གསུམ་ཡེ་ཤེས་ཀྱི་སྒྱུ་འཕྲུལ་ངོ་མཚར་ཆོས་སྐུའི་རིང་བསྲེལ་གྱི་གཟུགས་སུ་བལྟམས་པ་གསུང་རབ་རྒྱལ་བའི་བཀའ་འགྱུར་རིན་པོ་ཆེ་དང་། ཐུབ་པའི་དགོངས་པ་རང་སྟོབས་ཀྱི་བཀྲལ་ནུས་པའི་འཕགས་ཡུལ་པཎ་གྲུབ་རྣམས་ཀྱི་མཛད་པའི་བསྟན་འགྱུར་རིན་པོ་ཆེ་སྟེ་མདོ་སྔགས་གཉིས་ལྡན་གྱི་ཡོངས་རྫོགས་བསྟན་པ་རྒྱ་མཚོ་འདི་ཉིད། དེང་གི་ཆར་གངས་རིའི་ལྗོངས་ཀྱི་ཡེ་གེ་ཁོ་ནའི་གཟུགས་སུ་བཞུགས་པ་ནི་སྤྲུལ་པའི་མཁན་སློབ་ཆོས་གསུམ་གྱི་ཐུགས་བསྐྱེད་ཉག་གཅིག་ལས་བྱུང་བ་དང་། དེ་དག་མི་ནུབ་བརྒྱུད་འཛིན་ཡུན་གནས་ཀྱི་ཆེད་དུ་གངས་ལྗོངས་ཆོས་བརྒྱུད་ཁག་ལས་བྱོན་པའི་རིས་སུ་མ་ཆད་པའི་སྐྱེས་ཆེན་རྣམས་ཀྱིས་བཀའ་བསྟན་རིན་པོ་ཆེའི་དགོངས་སྙིང་ཅན་གྱི་གསང་རབ་གླེགས་བམ་སྟོང་ཕྲག་མང་པོ་མཛད་ཅིང་། དཀའ་སྤྱད་ཐུགས་བརྩོན་སྣ་ཚོགས་གྱིས་མ་ཕྱི་གསར་བསྐྲུན་དང་བསྐྱར་བསྐྲུན་སོགས་ཀྱིས་འཇིག་རྟེན་གྱི་ཁམས་སུ་བཞུགས་པ་མཛད་མུས་བཞིན། དེང་གི་ཆར་གློག་རྡུལ་འཕྲུལ་ཆ་དང་དྲྭ་རྒྱའི་དུས་རབས་ཀྱི་འགྲོས་དང་བསྟུན་ནས་རྒྱལ་སྤྱིའི་རིག་གཞུང་སྤྱི་མཚུངས་ལྟར། རྒྱལ་བའི་གསུང་རབ་རིན་པོ་ཆེ་གཙོ་བོར་གྱུར་པའི་འཕགས་བོད་མཁས་པའི་གཞུང་ལུགས་རྣམས་དྲྭ་ཐོག་ནས་བཤེར་འཚོར་དང་འདྲ་བཤུས་སྒྲིག་གཟོ་སོགས་སྟབས་བདེའི་ལམ་ནས་བཀོལ་སྤྱོད་ཐུབ་པའི་གཞི་རྒྱ་ཆེ་བའི་འཆར་འགོད་དངོས་སུ་ལས་བཞིན་པར། བསྟན་པ་རིན་པོ་ཆེའི་གསལ་བྱེད་དམ་པ་གྱུར་པ་རྫོགས་ཆེན་མཁན་ཆེན་ཁྲི་ཟུར་ཨྱོན་རིག་འཛིན་རིན་པོ་ཆེ་མཆོག་ནས་བསྐྱར་དུ་བསྐྲུན་གནང་བའི་རིག་འཛིན་ཉི་མ་གྲགས་པའི་གཏེར་ཆོས་གླེགས་བག་བཅོ་ལྔའི་གྲངས་ལྡན་མཐའ་མའི་ཞུ་དག་ཅན་མཁན་རིན་པོ་ཆེ་ཉིད་ནས་གནང་འབྱོར་བྱུང་བ་ལགས་ན། སྐུ་ཉིད་ལ་སྙིང་ནས་ཐུགས་རྗེ་དང་བཀའ་དྲིན་བླ་ལྷག་ཏུ་ཆེ་ཞུ་བ་དང་ཆབ་གཅིག་སླད་ནས་ཀྱང་གསུང་རབ་རིན་པོ་ཆེ་ཅི་རིགས་དཔེ་སྐྲུན་གནང་ན་འདི་གར་འདྲ་བཤུས་གནང་སྩོལ་ཡོང་བར་ཅི་ནས་ཀྱང་བཀའ་དྲིན་མི་ཆུང་བ་ཞུ།
ཞེས་དྲྭ་རྒྱའི་དཔེ་མཛོད་འགན་འཛིན་པ་རྫོགས་ཆེན་བསྟན་འཛིན་རྣམ་དག་ནས་ཕུལ།།

ཟབ་ཐིག་ཕག་མོ་ནག་མོའི་གཏེར་འབྱུང་།

ཟབ་ཐིག་ཕག་མོ་ནག་མོའི་གཏེར་འབྱུང་བཞུགས༔ ཁ་བྱང་ལས། ཕག་གདོང་ནག་མོའི་སྒྲུབ་ཕུག་ན༔ ཟབ་ཏིག་མཁའ་འགྲོའི་གསང་སྒྲུབ་དང་༔ ནཱ་ག་ཨིནྡྲའི་བསྙེན་སྒྲུབ་རྟེན༔ ཕུར་པ་མ་བུ་ཟུང་གཉིས་དང་༔ རིང་བསྲེལ་བདུད་རྩིའི་རིལ་བུ་ཡོད༔ ལུང་བྱང་བཞིན་དུ་རྟེན་འབྲེལ་བསྒྲིགས༔ དུས་བབས་ལོན་ན་བདག་གཞན་འཚེང་༔ དུས་མཐའི་འགྲོ་བ་འདུལ་བ་དང་༔ གསང་སྔགས་བསྟན་ལ་ཕན་པ་ཡོང་༔ ཞེས་གསུངས་འདུག་པས། ས་ཕོ་རྟ་ལོ་ཧོར་ཟླ་བདུན་པར་གནས་མཆོག་ཆེན་པོ་ཁམས་སྲིང་མོ་རྫོང་གི་ཕོ་བྲང་ཡུམ་མཚོའི་ཁར་ཚོགས་ཀྱི་འཁོར་ལོ་བསྐོར། མཚོ་མཇལ་བ་རྣམས་ལ་དབང་ཆོས་ཀྱི་འབྲེལ་བ་བཟང་པོ་བྱས། རི་བོ་བྱ་ཁྱུང་ལྡིང་འདྲའི་ལུང་བསྟན་དུས་བབས་ཀྱི་སྒྲུབ་སྡེ་ཨེ་ཚུགས་ཀྱི་རྟེན་འབྲེལ་ལན་མང་གཟབ་པར། སྔོན་གྱི་སྨོན་ལམ་ངན་པས་འབྲེལ་བའི་གྲྭ་རིགས་མགྲོན་གཉེར་པས་ཐབས་ལམ་སྣ་ཚོགས་ཀྱིས་བར་ཆད་བྱུང་བས། རྟེན་འབྲེལ་མ་འགྲིག་ཅིང་ཡིད་ཆད་བཞིན་ཆགས་རུ་ཕུག་ནག་གི་གཏེར་གདན་ཨེ་དྲོངས་རེ་བས། འཁོར་འདབ་ཉུང་ཙམ་དང་གཏེར་སྲུང་མཆོད་རྫས་བཅས་སོང་བར། རྟེན་འབྲེལ་རྣམས་རིམ་གྱིས་འགྲིག་ཅིང་རྐྱེན་ལམ་མ་ཤོར་ཙམ་གྱི་རིང་ནས། ས་ཕོ་རྟ་ལོ་ཧོར་ཟླ་བརྒྱད་པའི་ཚེས་ཉི་ཤུ་ལྔའི་སྔ་དྲོ་སྒྲུབ་གནས་ཆེན་པོ་གུ་ཧྱ་ཀཱ་ལའི་ཆོས་འབྱུང་གསང་ཕུག་ནས། བཅོམ་ལྡན་འདས་མ་ཕག་གདོང་ནག་མོའི་ཟབ་ཏིག་ཁམ་སའི་གཏེར་སྒྲོམ་གྲུ་གསུམ་པ་ཞིག་གི་ནང་ལ་སྨྱུག་ཚིགས་ལ་བསེས་བསྡམས་པའི་ནང་ནས་ཐུགས་རྗེ་ཁྲོས་མ་ནག་མོའི་སྒྲུབ་བསྐོར་གྱི་ཤོག་སེར་དང་། ལོ་ཆེན་ཀླུའི་དབང་པོའི་སྒྲུབ་ཕུར་མ་བུ་གཉིས། སངས་རྒྱས་ཀྱི་རིང་བསྲེལ་གསུམ། བདུད་རྩིའི་རིལ་བུ་བརྒྱ་གྲངས་བྱོན་པ་ལ་ཚོགས་འཁོར་གྱིས་མཆོད་ཅིང་། ཤོག་སེར་ཞལ་བཤུས་སྒྲུབ་པ་གནས་དེ་ཉིད་དུ་དང་བླངས་བྱས་པར་འཚུབས་ལྷོངས་ཤིན་ཏུ་ཆེ་བ་མང་པོ་བྱུང་། ཤོག་སེར་ཀརྨ་བརྩོན་འགྲུས་པས་སྟོན་ཟེར་ནན་ཆེར་བྱུང་བར་བསྟན་པས། ཁོ་རང་དེ་དགོང་གཡང་ལ་ལྷུང་སྟེ་ཤི། ཕ་རྒན་འདས་པ་སོགས་ཡི་ཟ་བ་མང་དུ་བྱུང་ཡང་། སྒྲུབ་འཕྲོ་མ་ཤོར་བར་བྱས་ཤིང་། སྲིང་མོ་རྫོང་གི་གནས་ཡིག་ལྟར་གསོལ་འདེབས་དང་ཚོགས་འཁོར་སོགས་བརྩོན་འགྲུས་དྲག་པོ་བྱས་པས་ཕྱིར་ལོག་ལ་མ་ཤོར་ཙམ་བྱུང་བ་འདི་ཡང་ཕག་མོ་ནག་མོའི་གཏེར་འབྱུང་མངྒ་ལམ། །

སྒྲུབ་ཐབས་དངོས་གྲུབ་གཏེར་མཛོད།

ཕག་མོ་ནག་མོའི་ཟབ་ཐིག་ལས༔ སྒྲུབ་ཐབས་དངོས་གྲུབ་གཏེར་མཛོད་བཞུགས༔ མཁའ་འགྲོའི་ཚོགས་ལ་ཕྱག་འཚལ་བསྟོད༔ བཀྲ་ཤིས་བྱིན་ཆགས་དབེན་པའི་ནགས༔ ཡང་ན་དུར་ཁྲོད་འཇིགས་རུང་ཚལ༔ གཟའ་སྐར་ཉི་ཁྱིམ་ཕུན་ཚོགས་ལ༔ སྟེགས་བུ་ནག་འཇམ་མཁྲེགས་པའི་ཁར༔ ཆོས་འབྱུང་ཐོད་ར་མེ་རིས་བསྐོར༔ དུར་ཁྲོད་རྡོ་ཚོན་རྣམ་ལྔས་བསྒྱུར༔ དབུས་སུ་མཉྫུའི་ཁྲིའུའི་ཁར༔ ཐང་སྐུ་བླ་རྡོ་ཙཀྲ་བཞུགས༔ མེ་ལོང་ཆོས་འབྱུང་སྔགས་བྲིས་བཀབ༔ མཐིང་ནག་དར་གྱི་གུར་ཡང་ཕུབ༔ གཡས་གཡོན་སྨན་དང་རཀྟ་དང་༔ མདུན་རྒྱབ་གཏོར་མ་གྲི་གུག་དང་༔ མཐའ་ལ་མཆོད་པ་ཚོགས་འཁོར་བཤམས༔ ལས་ཀྱི་གཞུང་བསྲང་བསྐྱེད་རིམ་གསལ༔ མདུན་བསྐྱེད་དཀྱིལ་འཁོར་འཁོར་ལོའི་ཚུལ༔ བདག་ཉིད་འབྱུང་བཞིའི་ཕོ་བྲང་ནང་༔ རང་སེམས་ཕག་མོ་ནག་མོ་ལ༔ ཡན་ལག་རིགས་བཞིའི་ཕག་མོ་བཞི༔ རྩ་དང་བ་སྤུའི་འོད་ཀློང་དུ༔ དཔའ་བོ་དཔའ་མོ་གྲངས་མེད་བསམས༔ སྤྱན་འདྲེན་མཆོད་བསྟོད་གཞུང་བཞིན་བྱ༔ གཙོ་མོའི་ཐུགས་ཀར་ཉི་མའི་དལ༔ ས་བོན་ཡི་གེ་ཧཱུྃ་མཐིང་ནག༔ ཧ་རི་ནི་ས་རིགས་བཞིའི་ཐུགས༔ རྩ་སྔགས་སྙིང་པོ་འདིས་བསྐོར་བསམ༔ ཨཱོཾ་བཛྲ་ཀྲོ་ཏ་ཀཱ་ལི་ཧ་རི་ནི་ས་ཧྲིང་ཧྲིང་ཛཿཛཿསརྦ་སིདྡྷི་ཧཱུྃ་ཕཊ༔ ཤེས་རབ་ཡེ་ཤེས་འཁོར་ལོ་འཁོར༔ འོད་ཟེར་ལྔ་ལྡན་འཁོར་འདས་དང་༔ མཁའ་སྤྱོད་ནུབ་ཕྱོགས་ཨོ་རྒྱན་འཕྲོས༔ བདེ་གཤེགས་རྣམས་ཀྱི་བྱིན་རླབས་དང་༔ འབུམ་ཕྲག་སྐུ་གསུམ་མཁའ་འགྲོའི་གཙོ༔ འོད་ཀྱིས་སྤྱན་དྲངས་དབང་དུ་བསྡུས༔ སྒྲུབ་པའི་རྫས་དང་རང་ལ་ཐིམ༔ དཀྱིལ་འཁོར་གསུམ་དང་འབྲལ་མེད་པར༔ འབུམ་ཚོ་གསུམ་དུ་བསྙེན་བསྒྲུབ་བྱ༔ སྐབས་སྐབས་འཕྲིན་ལས་རྣམ་པ་བཞིའི༔ འོད་ཟེར་སྤྲོ་བསྡུ་གནད་དུ་བསྣུན༔ ཨཱོཾ་ཤཱན་ཏིཾ་ཀུ་རུ་ཡེ་སྭཱ་ཧཱ༔ སྭཱ་པུཥྟིང་ཀུ་རུ་ཡེ་སྭཱ་ཧཱ༔ ཧ་ཝ་ཤཾ་ཀུ་རུ་ཡེ་སྭཱ་ཧཱ༔ ཧཱུྃ་མཱ་ར་ཡ་ཕཊ༔ སྔགས་ཀྱི་ཤམ་བུ་དེ་རྣམས་བཏགས༔ ཐུན་སྐབས་རྣམས་སུ་མཆོད་ཅིང་བསྟོད༔ འོད་ཟེར་སྤྲོ་བསྡུས་དབང་རེ་ལེན༔ དེ་ལྟར་ཚུལ་བཞིན་བརྩོན་པའི་ཚེ༔ སྒྲུབ་རྫས་མེ་འབར་དུད་པ་འཐུལ༔ བདུད་རྩི་ལུད་དང་འོད་ཟེར་འཕྲོ༔ ཁྱད་པར་ཞལ་མཇལ་ལུང་བསྟན་འཐོབ༔ ཏིང་འཛིན་ཉམས་མྱོང་འཁོར་ཡུག་འཆར༔ བློ་བྲལ་ཆོས་ཉིད་ལྟ་བ་རྟོགས༔ དེ་སོགས་ལེགས་ཚོགས་དཔག་མེད་འབྱུང་༔ དབང་བཞི་ལེན་ཞིང་རྣལ་མར་བཞག༔ མ་ཡེངས་འཛིན་མེད་བློ་འདས་སྐྱོངས༔ མི་སྒོམ་སྙིང་པོའི་དོན་ལ་བལྟ༔ ཡང་ན་ཉམས་རྨུགས་རིག་པ་བྱིང་༔ རྨི་ལམ་མཛེ་སྤྲང་ཡུག་ས་འོང་༔ སྒྲུབ་རྫས་རྡུལ་བག་འོད་མེད་ན༔ ཉམས་རྟོགས་སྤར་ཞིང་བསྐྱེད་རིམ་གསལ༔ དམ་བཤགས་བྱ་ཞིང་བསྐང་བ་འདོན༔ ཚོགས་ཀྱིས་བསྐང་ཞིང་སྒྲུབ་པ་སྐྱོར༔ དྲག་པོའི་ཤམ་བུའི་སྔགས་དམིགས་བསྣུན༔ རེ་དོགས་གཉིས་འཛིན་དགའ་བྲོད་སྤང་༔ དེ་ཚེ་མཁའ་འགྲོའི་བྱིན་རླབས་འཐོབ༔ མཁའ་འགྲོ་ལུས་དང་གྲིབ་བཞིན་འགྲོག༔ ཡེ་ཤེས་མཁའ་འགྲོས་མཆོག་སྩོལ་ཞིང་༔ སྐུ་གསུམ་འབྲས་བུ་འཐོབ་པར་འགྱུར༔ འཇིག་རྟེན་མཁའ་འགྲོས་བྲན་བྱེད་ཅིང་༔ འདུ་བ་རྣམ་བཞི་ལྷུན་གྱིས་གྲུབ༔ དམ་ཚིག་མཁའ་འགྲོས་དཔལ་བསྐྱེད་ཅིང་༔ ཚེ་དཔལ་མངའ་ཐང་ཕྱོགས་བཅུར་རྒྱས༔ འཇིག་རྟེན་མི་མོས་བཀའ་ཉན་ཞིང་༔ མཉེས་པའི་ཞབས་ཏོག་ཕུན་ཚོགས་སྒྲུབ༔ མཁའ་འགྲོ་བསྟེན་པའི་རྣལ་འབྱོར་པས༔ ཀུནྡའི་དམ་ཚིག་ལྡན་པ་དང་༔ མུ་དྲ་མཚན་ལྡན་ཐོད་རྔ་དང་༔ སིན་དྷུ་ར་དང་མེ་ལོང་དང་༔ བྷན་དྷ་གྲི་གུག་རྐང་གླིང་འཆང་༔ དམ་མེད་རྣམས་ལ་སྦ་བ་གནད༔ བུད་མེད་ཡོངས་ལ་དམོད་པ་སྤང་༔ ཉེར་ལྔར་ཚོགས་འཁོར་བསྐང་བཤགས་འབད༔ ས་མ་ཡཱ༔ རྒྱ་རྒྱ་རྒྱ༔ དེ་ལྟར་སྒྲུབ་པ་ཚད་འཁྱོལ་ནས༔ དངོས་གྲུབ་ཐོབ་པའི་རྟགས་བྱུང་ཚེ༔ ཐུགས་དམ་བསྐུལ་ཞིང་དངོས་གྲུབ་ཞུ༔ སྒྲུབ་རྫས་རང་གི་གནས་ལྔར་གཏུགས༔ དབང་དང་ཡེ་ཤེས་ཐོབ་པར་བསྒོམ༔ ཤིས་བརྗོད་བསྔོ་སྨོན་འདི་ལྟར་བྱ༔ ཧཱུྃ༔ ཡེ་ཤེས་དབྱིངས་ཀྱི་ཕོ་བྲང་ནས༔ ཕག་མོ་ཆོས་སྐུའི་བཀྲ་ཤིས་ཤོག༔ ཡེ་ཤེས་ལྔ་ལྡན་ཕོ་བྲང་ནས༔ ཕག་མོ་ལོངས་སྐུའི་བཀྲ་ཤིས་ཤོག༔ མཁའ་སྤྱོད་གནས་ཡུལ་དུར་ཁྲོད་ནས༔ ཕག་མོ་སྤྲུལ་སྐུའི་བཀྲ་ཤིས་ཤོག༔ བཀའ་ཡི་འཕྲིན་ལས་དཀྱིལ་འཁོར་ནས༔ སྤྲུལ་པ་འབུམ་སྡེའི་བཀྲ་ཤིས་ཤོག༔ ཧཱུྃ༔ གསང་བའི་བསྐྱེད་རྫོགས་བསྒོམ་བཟླས་མཐུས༔ ལྟ་བ་གཡེལ་བ་སོར་ཆུད་ཅིང་༔ སྒོམ་པ་བྱིང་བ་ཀློང་གྱུར་ཏེ༔ སྤྱོད་པ་ཚོགས་གཉིས་མཐར་ཕྱིན་ཞིང་༔ འབྲས་བུ་སྐུ་བཞི་མངོན་གྱུར་ཤོག༔ ཧཱུྃ༔ སྣང་བ་དག་པ་གཞལ་ཡས་ཁང་༔ གཟུང་འཛིན་བྲལ་བ་ཡི་དམ་ལྷ༔ རང་ངོར་གསལ་བ་ཆོས་ཀྱི་སྐུ༔ སྐྱེ་མེད་མཁའ་འགྲོའི་ལྷ་ཚོགས་རྣམས༔ ཆོས་དབྱིངས་མཁའ་འགྲོའི་གནས་སུ་གཤེགས༔ ཨ་ཨཱཾཿསྨྲ་བསམ་བརྗོད་མེད་ཡུམ༔ རང་སེམས་སྐྱེ་འགག་གནས་གསུམ་འདི༔ མཁའ་འགྲོའི་སྐུ་གསུམ་རོལ་པར་ཤར༔ ས་མ་ཡཱ༔ རྒྱ་རྒྱ་རྒྱ༔ གཏེར་རྒྱ༔ སྦས་རྒྱ༔ ཟབ་རྒྱ༔ ས་མ་ཡཱ༔ རྒྱ་རྒྱ་རྒྱ༔ སཱུརྱ་ཀིརྟིས་ཆགས་རུ་ཕག་མོ་ནག་མོའི་གསང་ཕུག་ནས་གདན་དྲངས་པའོ། །མངྒ་ལཾ།། །།

མཁའ་འགྲོ་སྒྲུབ་པའི་མཚན་རྟགས།

ཕག་མོ་ནག་མོའི་ཟབ་ཐིག་ལས༔ མཁའ་འགྲོ་སྒྲུབ་པའི་མཚན་རྟགས་བཞུགས༔ མཁའ་འགྲོའི་ཚོགས་ལ་ཕྱག་འཚལ་ལོ༔ ཕག་མོ་ཁྲོས་མ་ནག་མོ་ཡི༔ བསྐྱེད་རྫོགས་སྒྲུབ་པའི་རྣལ་འབྱོར་པས༔ དབང་ལུང་གདམས་པ་མེད་པ་ལ༔ གསང་སྔགས་ཆོས་ལ་འཇུག་པ་རྣམས༔ རྒྱལ་པོའི་དཀོར་མཛོད་བརྐུས་པ་འདྲ༔ དེ་བས་དང་པོ་བླ་མ་བསྟེན༔ དབང་དང་གདམས་པ་ཚུལ་བཞིན་ཞུས༔ མན་ངག་གབ་འཁྲུག་ལག་ལེན་བསླབས༔ དེས་ནི་དོན་གཉིས་མྱུར་དུ་འགྲུབ༔ དེ་ནས་བསྙེན་བསྒྲུབ་བརྩམས་པའི་ཚེ༔ ཕག་ཤ་མི་བཟའ་དམ་ཚིག་བསྲུང་༔ འཇིག་རྟེན་བུད་མེད་ཇི་སྙེད་ལ༔ ངན་པའི་མཚང་ནས་མི་འབྲུ་ཞིང་༔ དེ་བཞིན་སེམས་ཀྱིས་བརྙས་པ་སྤང་༔ འདི་ཡི་བསྙེན་སྒྲུབ་འབུང་བའི་ཚེ༔ དཀར་གསུམ་མངར་གསུམ་བཟའ་བཏུང་དང་༔ བོང་བུའི་ཤ་ཡང་བཟའ་མི་བྱ༔ ཤ་ཆང་ཕུན་ཚོགས་ལོངས་སྤྱོད་སྤྱད༔ གཏོར་མ་ཆེ་ན་དངོས་གྲུབ་ཆེ༔ གཏོར་མ་དབུལ་ན་དངོས་གྲུབ་མེད༔ ཚོགས་ཀྱི་མཆོད་པར་རྒྱུན་དུ་གཟབས༔ དེ་ཚེ་སྒྲུབ་པའི་ལྟས་རྣམས་འབྱུང་༔ མ་དང་ཆུང་མ་མཛའ་མོ་དང་༔ བྲན་མོ་གཡོག་མོ་ལ་སོགས་གཟུགས༔ ཆས་དང་རྒྱན་སོགས་ཀླུབས་པ་ལ༔ རུས་པའི་ཕྲེང་བ་ཐོགས་པ་ནི༔ ལྟས་ཀྱི་རིམ་པ་བཟང་བའོ༔ མི་རོ་ཟོས་དང་ཁྲག་འཐུང་དང་༔ ཆང་དང་ཤ་སོགས་ལོངས་སྤྱོད་སྟེར༔ དངོས་གྲུབ་ཐོབ་པའི་རྟགས་ཡིན་ནོ༔ སྦྱོར་བ་བྱས་ན་དངོས་གྲུབ་མྱུར་འཐོབ་རྟགས༔ དགོད་ཅིང་ཧ་ཧིའི་སྒྲ་སྒྲོག་ན༔ དགྲ་དང་བགེགས་རྣམས་ཆོམས་པའི་རྟགས༔ འཛུམ་ཞིང་བཞད་གད་བྱེད་པ་ན༔ སྒྲུབ་པོ་ཚེ་རིང་ནད་མེད་རྟགས༔ གར་དང་བྲོ་བརྡུང་ལ་སོགས་ནི༔ སྟན་ཐོག་དེ་ལ་འགྲུབ་པའི་རྟགས༔ རྒྱང་གླུ་ལེན་ན་སྒྲུབ་པ་འགྱང་བའི་རྟགས༔ ངུ་བ་རྨིས་ན་དམ་ཚིག་ཉམས་ཆག་རྟགས༔ ཡུགས་ས་རྨིས་ན་ཤིན་ཏུ་དམ་ཉམས་རྟགས༔ མཛེ་ཅན་བྱུང་ན་དམ་རྫས་འཆལ་བའི་རྟགས༔ ཁ་ཤོ་བྱུང་ན་གསང་བའི་རྒྱ་རལ་རྟགས༔ སྟུ་རྐུབ་བསྟན་ན་བཀའ་ཆད་འབེབས་པའི་རྟགས༔ ངན་པའི་རིགས་ཀྱི་ལྟས་བྱུང་ན༔ བསྐང་བ་ཚོགས་དང་སྦྱིན་སྲེག་བྱ༔ ཡི་གེ་བརྒྱ་པས་བཤགས་སྐོང་དང་༔ ཁྱད་པར་བསྐང་ཞིང་བཤགས་པ་མཆོག༔ བཟང་པོའི་རྟགས་རྣམས་གང་བྱུང་ཡང་༔ དངོས་གྲུབ་ཞུ་ཞིང་ཏིང་འཛིན་གསལ༔ ལར་ནི་བཟང་ངན་ཐམས་ཅད་ལ༔ སྒྱུ་མ་རྨི་ལམ་བྲག་ཆ་ལྟར༔ དོན་ལ་ངོས་བཟུང་འཛིན་པ་སྤོངས༔ རང་རིག་སྟོང་པ་ཆེན་པོ་འདི༔ མཁའ་འགྲོ་ཆོས་ཀྱི་སྐུ་ཡིན་ཞིང་༔ དེ་ཡི་རྩལ་ཁ་མ་འགགས་པ༔ མཁའ་འགྲོ་ལོངས་སྤྱོད་རྫོགས་པའི་སྐུ༔ མ་བཅོས་སོ་མའི་རིག་པ་འདི༔ མཁའ་འགྲོ་སྤྲུལ་པའི་སྐུ་རུ་གནས༔ དེ་ཕྱིར་རང་ངོར་རང་ཞལ་སྐྱོངས༔ ས་མ་ཡཱ༔ རྒྱ་རྒྱ་རྒྱ༔ གཏེར་རྒྱ༔ སྦས་རྒྱ༔ ཟབ་རྒྱ༔ ས་མ་ཡཱ༔ རྒྱ་རྒྱ་རྒྱ༔ རིག་འཛིན་ཉི་མ་གྲགས་པས་གདན་དྲངས་ཤིང་ཤོག་སེར་ལས་ཞལ་བཤུས་པའོ། །མངྒ་ལམ།། །།

དབང་བཞི་མཆོག་གི་སྙིང་པོ།

ཕག་མོ་ནག་མོའི་ཟབ་ཐིག་ལས༔ དབང་བཞི་མཆོག་གི་སྙིང་པོ་བཞུགས༔ མཁའ་འགྲོའི་ཚོགས་ལ་ཕྱག་འཚལ་བསྟོད༔ དབེན་ཞིང་བཀྲ་ཤིས་གནས་མཆོག་ཏུ༔ སྟེགས་བུ་གྱེན་ཐུར་ཁྲུ་གང་པ༔ ཐིག་ཏུ་བཅད་ཅིང་ཆོས་འབྱུང་ལ༔ ཐོད་ར་མེ་རིས་བསྐོར་བ་བྲི༔ ཆོས་འབྱུང་དབུས་སུ་པད་འདབ་བཞི༔ ཕྱོགས་དང་མཐུན་པའི་ཚོན་གྱིས་བསྒྱུར༔ དབུས་སུ་མཚན་བཟང་བུམ་པའི་ནང་༔ བུམ་སྨན་མགུལ་ཆིངས་ལྡན་པ་བཤམས༔ དེ་སྟེང་བྷན་དྷར་བདུད་རྩི་ལ༔ ཡབ་ཡུམ་བྱང་སེམས་ཨ་མྲྀ་ཏ༔ བུ་རམ་བཅུད་ཀྱིས་རླན་པ་བཤམས༔ དེ་སྟེང་དཀར་དམར་དར་གྱིས་བཀབ༔ དེ་སྟེང་མེ་ལོང་དྲི་མེད་ལ༔ ཆང་གིས་བྱུག་ཅིང་སིན་དྷུར་བསྐུ༔ ཆོས་འབྱུང་ལྟེ་བར་རྩ་བསྙེན་བྲི༔ ཐ་མར་ཨཱ་ལི་ཀཱ་ལི་དང་༔ རྟེན་འབྲེལ་སྙིང་པོ་བྲི་བར་བྱ༔ དེ་སྟེང་མན་ཤེལ་དྲི་མེད་བཞག༔ གཞན་ཡང་སྨན་གཏོར་རཀྟ་བཤམས༔ ལས་ཀྱི་གཞུང་བསྲང་བསྙེན་ཁ་གསོ༔ ཚོགས་འཁོར་བསྐོར་ཞིང་བསྐང་བ་གྱེར༔ འོད་ཟེར་སྤྲོ་བསྡུས་བདག་འཇུག་བླངས༔ མན་ཤེལ་དྲི་མེད་ཤར་དུ་དགོད༔ བྷན་དྷ་བདུད་རྩི་ནུབ་ཏུ་དགོད༔ མེ་ལོང་ཆོས་འབྱུང་ལྷོ་རུ་བཞག༔ སྤོས་ལྡན་དཔལ་གཏོར་བྱང་དུ་བཤམས༔ བུམ་པར་ཁ་རྒྱན་གཟུངས་ཐག་སྤྲས༔ ལས་བུམ་སྟ་གོན་གཞན་མཐུན་ལྟར༔ དམ་ལྡན་སློབ་བུ་ལྔ་གསུམ་བདུན༔ རིན་ཆེན་ནོར་གྱི་མཎྜལ་ཐོགས༔ སྒོ་དྲུང་གསོལ་བ་འདི་ལྟར་གདབ༔ ཧཱུྃ༔ ལས་ཀྱི་སློབ་དཔོན་དགོངས་སུ་གསོལ༔ བདག་ཅག་སྐལ་ལྡན་འདིར་ཚོགས་རྣམས༔ ཕོ་བྲང་ནང་དུ་གཏོང་ནས་ཀྱང་༔ བླ་མེད་དབང་གི་སྨིན་གྲོལ་སྩོལ༔ ཅེས་ལན་གསུམ༔ ལན་སྦྱིན་པ༔ ཧོ༔ ཁྱེད་ཅག་འདིར་ཚོགས་བུ་རྣམས་ཉོན༔ བླ་མེད་དཀྱིལ་འཁོར་འཇུག་འདོད་ན༔ ལས་དང་སྐལ་བར་ལྡན་ལགས་སམ༔ དམ་ཚིག་ཚུལ་བཞིན་བསྲུང་ནུས་སམ༔ ཞེས་དྲིས་ལན་གསོལ་བ༔ ཀྱེ་དགོངས་ཤིག་ལས་ཀྱི་སློབ་དཔོན་དགོངས༔ བདག་ཅག་ལས་དང་སྐལ་བར་ལྡན༔ བླ་མ་ལྷ་དང་མཆེད་ལྕམ་གྱི༔ དམ་ཚིག་སྲོག་ལ་བབས་ཀྱང་བསྲུང་༔ དབང་བཞིའི་སྨིན་གྲོལ་མྱུར་དུ་སྩོལ༔ ཅེས་ཞུ༔ མིག་དར་དམར་པོ་བཀབ་ཅིང་༔ ལས་ཀྱི་སློབ་དཔོན་གྱིས་སྣ་ཁྲིད་དེ༔ བླ་མ་དང་དཀྱིལ་འཁོར་ལ་སྐོར་བ་ལན་གསུམ་བྱས་ཤིང་གྲལ་དུ་འཁོད༔ ཁྲུས་བྱས་བགེགས་བསྐྲད་གུ་གུལ་བདུག༔ མཎྜལ་དབུལ་ཞིང་གནས་གསུམ་དུ༔ བདུད་རྩི་ཆང་གིས་ཐིག་ལེ་བྱ༔ བླ་མས་དབང་བཞིའི་ཕན་ཡོན་དང་༔ ཕག་མོ་ནག་མོའི་ལོ་རྒྱུས་བཤད༔ དེ་ནས་གསོལ་བ་འདི་ལྟར་འདེབས༔ ཨེ་མ་བླ་མ་འགྲོ་བའི་མགོན༔ དུས་གསུམ་བདེ་གཤེགས་ཡུམ་གྱི་མཆོག༔ ཕག་གདོང་ཁྲོས་མ་ནག་མོ་ཡི༔ དབང་བཞིས་བདག་རྒྱུད་སྨིན་པར་ཞུ༔ ཞེས་ལན་གསུམ་བྱའོ༔ དེ་ནས་སྐྱབས་སེམས་འདི་ལྟར་འབོགས༔ ན་མོ་བླ་མ་ཡི་དམ་མཁའ་འགྲོ་སྟེ༔ རྩ་བ་གསུམ་ལ་སྐྱབས་སུ་མཆི༔ འགྲོ་བ་སེམས་ཅན་དོན་སླད་དུ༔ མཁའ་འགྲོའི་བསྐྱེད་རྫོགས་བསྒོམ་བཟླས་བསྒྲུབ༔ ལན་གསུམ་བྱའོ༔ དེ་ནས་ཡན་ལག་བདུན་པ་ནི༔ ཧཱུྃ༔ བླ་མ་ཡི་དམ་མཁའ་འགྲོ་གཤེགས༔ ཉི་ཟླ་པདྨའི་གདན་ལ་བཞུགས༔ ལུས་ངག་ཡིད་གསུམ་གུས་ཕྱག་འཚལ༔ ཕྱི་ནང་གསང་བའི་མཆོད་པ་འབུལ༔ ཉམས་ཆག་སྡིག་སྒྲིབ་མཐོལ་ལོ་བཤགས༔ གསང་སྔགས་སྒྲུབ་ལ་རྗེས་ཡི་རང་༔ སྨིན་གྲོལ་ཆོས་འཁོར་བསྐོར་དུ་གསོལ༔ མྱ་ངན་མི་འདའ་གསོལ་བ་འདེབས༔ དགེ་བ་བྱང་ཆུབ་ཆེན་པོར་བསྔོ༔ ཐམས་ཅད་སངས་རྒྱས་འཐོབ་པར་ཤོག༔ དེ་ནས་སྡོམ་བཟུང་འདི་ལྟར་རོ༔ ཧཱུྃ༔ བླ་མ་ཡི་དམ་ལྷ་ཚོགས་དགོངས༔ ཕྱི་ནང་ཐེག་པའི་སྡོམ་པ་དང་༔ རྩ་གསུམ་དམ་ཚིག་ཡང་དག་བསྲུང་༔ སྔོན་གྱི་འགལ་འཁྲུལ་དམ་ཉམས་བཤགས༔ ཕྱིན་ཆད་མི་བགྱིད་གནོང་ངོ་འགྱོད༔ སེམས་ཅན་ཀུན་གྱི་དོན་བསྒྲུབ་ཕྱིར༔ བདག་གི་སྡོམ་པ་རྣམ་དག་ཤོག༔ ཅེས་བརྗོད་དམ་ཚིག་བདུད་རྩི་སྦྱིན༔ ཧཱུྃ༔ འདི་ནི་དམ་ཚིག་གསང་བའི་ཆུ༔ དམ་ཚིག་སྲུང་ན་དངོས་གྲུབ་འཐོབ༔ དམ་ཉམས་ལུས་སེམས་བརླག་པར་བྱེད༔ དེ་ཕྱིར་ཚུལ་བཞིན་དམ་ཚིག་སྲུངས༔ ས་མ་ཡ་ཨ་མྲྀ་ཏེ་ཧི་ཧོ་ཧཱུྃ༔ དེ་ནས་རྡོ་རྗེ་གནས་གསུམ་དུ་བཞག་ཅིང་༔ ཧཱུྃ༔ ང་ནི་བླ་མ་རྡོ་རྗེ་འཆང་༔ མཁའ་འགྲོ་ཁྲོས་མ་ནག་མོ་ཡི༔ གསང་བ་མཆོག་གི་སྨིན་གྲོལ་འདི༔ མ་དག་དམ་མེད་རྣམས་ལ་གསང་༔ ཚུལ་འདི་རལ་ན་དམ་ཚིག་ཉམས༔ དེ་བས་སྙིང་ལ་བྲོ་བོར་ཞིག༔ ཨེ་དན་ཏེ་ས་མ་ཡ་ཁ་ཐམ༔ དེ་ནས་ཡེ་ཤེས་པ་དབབ་སྟེ༔ ཁྱེད་རང་རྣམས་སྟོང་པའི་ངང་ལས་ཁྲོས་མ་ནག་མོར་གསལ་བའི་ཡན་ལག་བཞི་ལ་ཕག་མོ་རིགས་བཞི་བསྒོམ༔ སྤྱི་བོར་བླ་མ་རིགས་བདག་ཏུ་བསྐྱེད༔ རྐང་པར་གར་སྟབས་སུ་འཁྲབ་པའི་འོག་ཏུ་རླུང་གི་ད་ལ་ནག་པོ་གཞུའི་དབྱིབས་ཅན་ཞིག་བསྒོམ༔ སྙིང་གར་ཉི་དཀྱིལ་གྱི་སྟེང་དུ་ཡི་གེ་ཧཱུྃ་མཐིང་ནག་གིས་མཚན་པ་དང་༔ རིགས་བཞིའི་ཐུགས་ཀར་ཧ་རི་ནི་ས་བཞིས་མཚན་པ་ལས་འོད་ཟེར་འཕྲོས་པས༔ ནུབ་ཕྱོགས་ཨོ་རྒྱན་ཡུལ་གྱི་ཕོ་བྲང་ནས་ཐུགས་རྗེ་ཁྲོས་མ་ནག་མོ་འཁོར་གྱི་མཁའ་འགྲོ་འབུམ་ཕྲག་མང་པོ་དང་བཅས་པ་སྤྱན་དྲངས་ཏེ༔ དམ་ཚིག་ཡེ་ཤེས་གཉིས་སུ་མེད་པར་འདྲེས་པར་བསྒོམ་དུ་བཅུག༔ སློབ་མ་རྣམས་ལངས་ཏེ་ལག་པ་སྤྱི་བོར་ཆོས་འབྱུང་གི་ཕྱག་རྒྱ་བྱེད་དུ་འཇུག༔ རོལ་མོ་འཁྲོལ་ཞིང་སྤྱན་འདྲེན་དང་རྩ་སྔགས་ཨ་ཝེ་ཤ་ཡའི་སྔགས་ཅི་མང་བརྗོད༔ མེ་ཏོག་འཐོར་ཞིང་ཡེ་ཤེས་པ་བརྟན་པར་བྱ༔ དེ་ནས་མེ་ཏོག་འདོར་བ་ནི༔ ཧཱུྃ༔ བྱང་ཆུབ་སེམས་ཀྱི་མེ་ཏོག་འདི༔ དམ་པ་མཆོག་གི་ལྷ་ལ་འབུལ༔ ཚེ་རབས་ལྷ་ལ་བབ་པར་ཤོག༔ པུཥྤེ་པཱུ་ཙ་ཧོ༔ ཞེས་བརྗོད༔ མེ་ཏོག་ཤར་དུ་བབས་ན་རྡོ་རྗེ་དགྱེས་མ༔ ལྷོ་རུ་བབས་ན་རིན་ཆེན་བཞད་མ༔ ནུབ་ཏུ་བབས་ན་པདྨ་བདེ་ཆེན༔ བྱང་དུ་བབས་ན་ལས་རབ་སྒེག་མོ༔ ཤར་ལྷོར་དབང་གི་སེམས་མ༔ ལྷོ་ནུབ་དགྱེས་སྡེ་མཆོག་དགའ༔ ནུབ་བྱང་ཧ་ཧའི་ཅོད་པན༔ བྱང་ཤར་དྲག་མོ་དབང་ཕྱུག༔ དབུས་སུ་རབ་མཆོག་བདེ་མ་ལ་སོགས་གསང་མཚན་སྦྱིན༔ ཅོད་པན་ཐོགས་ཏེ་འདི་སྐད་དོ༔ ཧཱུྃ༔ སྣ་ཚོགས་དར་འདི་ཡེ་ཤེས་ཚོན༔ ལྔ་ལྡན་ཅོད་པཎ་མིང་གི་དབང་༔ སྐལ་ལྡན་རྣམས་ཀྱིས་ཐོབ་པར་ཤོག༔ པྲ་ཏི་གྷྲི་ཧ་ན་ཨ་བྷི་ཥཉྩ་ཧཱུྃ༔ ཞེས་དབང་བསྐུར་གསེར་ཐུར་ཐོགས་ཏེ་སློབ་མའི་སྤྱན་དབྱེ༔ ཧཱུྃ༔ མ་རིག་ལིང་ཏོག་ཆུ་བུར་རྣམས༔ ཐུགས་རྗེ་རིག་པའི་ཐུར་མས་བསལ༔ བུ་ཁྱོད་ཡི་དམ་ལྷ་ཞལ་ལྟོས༔ པྲ་ཝེ་ཤ་ཡ་ཧོ༔ ཞེས་བརྗོད༔ དཀྱིལ་འཁོར་བསྟན༔ ཧཱུྃ༔ རིགས་ཀྱི་བུ་རྣམས་དཀྱིལ་འཁོར་ལྟོས༔ འདི་ནི་ཐར་བ་མཆོག་གི་ཞིང་༔ ཆོས་ཀྱི་འབྱུང་གནས་ཨེ་ཡི་ཀློང་༔ མཁའ་དབྱིངས་དག་པ་བདེ་བ་ཆེ༔ འདི་མཐོང་སྡིག་སྒྲིབ་ཀུན་བྱང་ནས༔ མཆོག་གི་དངོས་གྲུབ་འཐོབ་པར་འགྱུར༔ ཞེས་མཎྜལ་འབུལ་ཞིང་ཕྱག་བྱེད་དུ་འཇུག༔ ས་མ་ཡ༔ རྒྱ་རྒྱ་རྒྱ༔ དེ་ནས་བུམ་པ་ཐོགས་ཏེ་སྤྱི་བོར་དབང་བསྐུར་ཞིང་འདི་སྐད་དོ༔ ཧཱུྃ༔ བུམ་པ་ཆོས་དབྱིངས་མཁའ་འགྲོའི་ཞིང་༔ བཅུད་ནི་ཕག་གདོང་ནག་མོའི་སྐུ༔ རིགས་ཀྱི་བུ་ལ་དབང་བསྐུར་བས༔ སྤྲོས་བཅས་བུམ་པའི་དབང་ཐོབ་ཤོག༔ ཨཱོཾ་བཛྲ་ཀྲོ་ཏ་ཀཱ་ལི་ཧ་རི་ནི་ས་ཀཱ་ཡ་ཨ་བྷི་ཥིཉྩ་ཧཱུྃ༔ དེ་ནས་བྷན་དྷ་ཐོགས་ཏེ༔ མགྲིན་པར་བསྐུར་ཞིང་༔ ཧཱུྃ༔ བྷན་དྷ་ལོངས་སྤྱོད་མཁའ་འགྲོའི་དབྱིངས༔ བཅུད་ནི་ཡབ་ཡུམ་བྱང་ཆུབ་སེམས༔ སྐལ་ལྡན་རྣམས་ལ་དབང་བསྐུར་བས༔ སྤྲོས་མེད་གསང་བའི་དབང་ཐོབ་ཤོག༔ ཨཱོཾ་བཛྲ་ཀྲོ་ཏ་ཀཱ་ལི་ཧ་རི་ནི་ས་ཝཱཀྐ་ཨ་བྷི་ཥིཉྩ་ཧཱུྃ༔ བདུད་རྩི་སྦྱིན༔ དེ་ནས་མེ་ལོང་ཐོགས་ཏེ་སྙིང་གར་བསྐུར༔ ཧཱུྃ༔ མེ་ལོང་འགྲོ་འདུལ་སྤྲུལ་སྐུའི་ཞིང་༔ སིན་དྷུར་ཕོ་བྲང་མཁའ་འགྲོ་ཡུམ༔ རིགས་ཀྱི་བུ་ལ་དབང་བསྐུར་བས༔ ཤིན་ཏུ་སྤྲོས་མེད་དབང་ཐོབ་ཤོག༔ ཨཱོཾ་བཛྲ་ཀྲོ་ཏ་ཀཱ་ལི་ཧ་རི་ནི་ས་ཙིཏྟ་ཨ་བྷི་ཥིཉྩ་ཧཱུྃ༔ སྙིང་གར་སིན་དྷུ་ར་ཡིས་ཐིག་ལེ་བྱ༔ དེ་ནས་ཤེལ་གོང་ཐོགས་ཏེ་ལག་ཏུ་སྦྱིན༔ ཧཱུྃ༔ དྲི་མ་མེད་པའི་ཤེལ་གོང་འདི༔ རང་སེམས་གདོད་ནས་དག་པའི་བརྡར༔ རིགས་ཀྱི་བུ་ལ་དབང་བསྐུར་བས༔ ཚིག་དབང་དོན་གྱི་དབང་ཐོབ་ནས༔ སྐད་ཅིག་རིག་པ་རང་གྲོལ་ཤོག༔ སརྦ་དྷརྨ་ཨ་ཨཱ༔ ཞེས་བརྗོད་གནས་ལུགས་ངོ་སྤྲོད་གདབ༔ བྷ་ལིང་ཐོགས་ཏེ་སྤྱི་བོར་བསྐུར༔ ཧཱུྃ༔ འབྲུ་བཅུད་སྙིང་པོ་བྷ་ལིང་ཏ༔ ཞལ་ཟས་མཆོག་འདི་དངོས་གྲུབ་རྫས༔ རྩ་བ་གསུམ་གྱི་ངོ་བོར་གསལ༔ རིགས་ཀྱི་བུ་ལ་དབང་བསྐུར་བས༔ རྒྱལ་ཚབས་སྤྱི་བླུགས་དབང་ཐོབ་ཤོག༔ ཨཱོཾ་བཛྲ་ཀྲོ་ཏ་ཀཱ་ལི་ཧ་རི་ནི་ས་སརྦ་བྷ་ལིང་ཏ་ཨ་བྷི་ཥིཉྩ་ཧཱུྃ༔ ཞེས་བརྗོད་གཏོར་མ་དངོས་གྲུབ་ཕུང་པོར་བསམ་ཞིང་དམ་རྫས་སུ་རོལ་ལོ༔ མཐའ་བརྟེན་བསྐུར་རམ་ཤིས་བརྗོད་བྱ༔ དབང་བཞི་མཆོག་གི་སྙིང་པོ་འདི༔ ལན་གཅིག་འབྲེལ་བའི་འགྲོ་བ་རྣམས༔ སྐྱེ་བ་གཅིག་གམ་བར་དོའམ༔ སྐྱེ་བ་གསུམ་པ་ཚུན་ཆད་དུ༔ མ་བསྒོམས་པར་ཡང་གྲོལ་བར་འགྱུར༔ ཕྱི་རབས་རྣམས་ཀྱིས་གཅེས་པར་གྱིས༔ དམ་མེད་རྣམས་ལ་ཨ་ཐམ་རྒྱ༔ སྲུང་མས་མེལ་ཚེ་གྱིས་ཤིག་རྒྱ༔ ས་མ་ཡཱ༔ རྗེས་ནི་ལས་བྱང་བཞིན་དུ་བྱ༔ གླུ་གར་བརྩེ་དང་ཚོགས་ལ་རོལ༔ མཎྜལ་འབུལ་ཞིང་དམ་ཚིག་བསྲུང་༔ བུད་མེད་རྣམས་ལ་དམོད་པ་སྤང་༔ བྱང་ཆུབ་སེམས་ནི་ཉམས་མི་བྱ༔ དེས་ནི་མཁའ་འགྲོ་སྤྲིན་བཞིན་འདུ༔ ས་མ་ཡཱ༔ རྒྱ་རྒྱ་རྒྱ༔ གཏེར་རྒྱ༔ སྦས་རྒྱ༔ ཟབ་རྒྱ༔ ས་མ་ཡཱ༔ རྒྱ་རྒྱ་རྒྱ༔ སཱུརྱ་ཀིརྟིས་ཕག་གདོང་ནག་མོའི་ཐུགས་ཀྱི་སྒྲུབ་གནས་ནས་གདན་དྲངས་ཤིང་ཤོག་སེར་ལས་ཕབ་པའོ། །མངྒ་ལམ།། །།

བླ་རྡོ་སྙིང་གི་དུམ་བུ།

ཕག་མོ་ནག་མོའི་ཟབ་ཐིག་ལས༔ བླ་རྡོ་སྙིང་གི་དུམ་བུ་བཞུགས༔ མཁའ་འགྲོ་མ་ལ་ཕྱག་འཚལ་ལོ༔ གཟའ་སྐར་དར་ཞིང་ཤིས་པའི་ཉིན༔ རང་ཉིད་ཕག་མོ་ནག་མོར་བསྒོམ༔ བུ་མོ་རིགས་བཟང་གཙང་མ་ཡི༔ རཀྟས་མཐིང་ནག་དར་རམ་རས༔ ཡང་ན་རྒྱ་ཤོག་བཟང་པོ་ལ༔ ཕག་མོ་ནག་མོའི་སྐུ་འབྲི་ཞིང་༔ ལྟེ་བར་འཁོར་ལོ་མུ་ཁྱུད་ལྔ་རུ་བསྐོར༔ ལྟེ་བར་ཨཱོཾ་ཨཱཿཧཱུྃ་གསུམ་དང་༔ རྩ་སྔགས་བདག་ལ་དངོས་གྲུབ་སྩོལ་ཅིག་འབྲི༔ དེ་ཡི་ཕྱི་རིམ་རྩིབས་བཞི་ལ༔ ཧ་རི་ནི་ས་འབྲུ་བཞི་འགོད༔ ལས་བཞིའི་ཤམ་བུ་འདི་ལྟར་བྲི༔ ནད་གདོན་ཐམས་ཅད་ཤཱནྟིང་ཀུ་རུ་ཡེ་སྭཱ་ཧཱ༔ ཚེ་བསོད་ཐམས་ཅད་པུཥྟིང་ཀུ་རུ་ཡེ་སྭཱ་ཧཱ༔ ལྷ་འདྲེ་མི་གསུམ་ཝ་ཤཾ་ཀུ་རུ་ཡེ་སྭཱ་ཧཱ༔ དགྲ་བགེགས་ཐམས་ཅད་མཱ་ར་ཡ་ཕཊ༔ དེ་ཡི་ཕྱི་རིམ་མུ་ཁྱུད་ལ༔ སྡེ་བརྒྱད་མཁའ་འགྲོ་ལ་སོགས་སམ༔ ཡང་ན་འབུམ་ཕྲག་གཙོ་མོ་སྟེ༔ མཁའ་འགྲོའི་མཚན་སྔགས་ཅི་མང་འབྲི༔ དེ་ཡི་ཕྱི་རིམ་མུ་ཁྱུད་ལ༔ ཨཱ་ལི་ཀཱ་ལི་བྲི་བར་བྱ༔ དེ་ཡི་ཕྱི་རིམ་མུ་ཁྱུད་ལ༔ རྟེན་འབྲེལ་སྙིང་པོ་ཅི་མང་གདབ༔ ཡབ་ཡུམ་བྱང་སེམས་ཨ་མྲྀ་ཏ༔ ཅུ་གང་དང་ནི་སིན་དྷུ་ར༔ གསེར་དངུལ་ཟངས་ལྕགས་རིན་ཆེན་ལྔ༔ དར་ཚོན་རྣམ་ལྔ་མགྲོན་རྒོད་དང་༔ ཤེལ་དང་མུ་མེན་བྱི་རུ་གཟི༔ དུང་དང་སྤོས་ཤེལ་གཡུ་ལ་སོགས༔ བུ་མོ་གཙང་མ་རིགས་བཟང་གི༔ སྐྲ་དང་སེན་མོ་ལ་སོགས་གདབ༔ ལས་ཀྱི་གཞུང་བསྲང་རབ་གནས་བྱ༔ ཕག་མོ་ནག་མོ་དངོས་སུ་བསམས༔ རིན་ཆེན་ཟངས་ཀྱི་གབ་རྩེར་གཞུག༔ སྒྲུབ་པའི་དུས་སུ་ཐོད་པར་བཤམས༔ རྒྱུན་དུ་འབྲལ་མེད་མཆན་གཡོན་བཅང་༔ ལོ་རེ་བཞིན་དུ་རབ་གནས་སྐྱོར༔ དེས་ནི་མཁའ་འགྲོ་གྲིབ་བཞིན་འགྲོག༔ སིདྡྷི་རྣམ་གཉིས་དཔལ་ལ་སྤྱོད༔ དེ་ཕྱིར་གཅེས་སོ་ཡིད་ལ་ཆོངས༔ དམ་མེད་སྣོད་མིན་རྣམས་ལ་རྒྱ༔ ཤིན་ཏུ་གསང་བ་མན་ངག་ཡིན༔ ས་མ་ཡཱ༔ རྒྱ་རྒྱ་རྒྱ༔ གཏེར་རྒྱ༔ སྦས་རྒྱ༔ ཟབ་རྒྱ༔ ས་མ་ཡཱ༔ རྒྱ་རྒྱ་རྒྱ༔ རིག་འཛིན་ཉི་མ་གྲགས་པས་ཁམས་རཀྴ་ཀོ་ཊི་ནས་གདན་དྲངས་ཏེ་ལྕགས་བྱ་ལ་ཤོག་སེར་ལས་ཕབ་པའོ། །མངྒ་ལམ།། །།

སྲུང་བཟློག་བསད་པའི་ལས་མཐའ།

ཕག་མོ་ནག་མོའི་ཟབ་ཐིག་ལས༔ སྲུང་བཟློག་བསད་པའི་ལས་མཐའ་བཞུགས༔ མཁའ་འགྲོ་མ་ལ་ཕྱག་འཚལ་ལོ༔ མཁའ་འགྲོ་སྒྲུབ་པའི་རྣལ་འབྱོར་པས༔ བྱད་ཁ་ཕུར་ཁ་རྦོད་གཏོང་རྣམས༔ སྲུང་བཟློག་བསད་པ་འདི་ལྟ་སྟེ༔ ཕྱི་ནང་གྲུབ་མཐའི་རིགས་སྔགས་མཁན༔ བན་བོན་ངན་སྔགས་སྲུང་འདོད་ན༔ བག་ཟན་བྱད་མའི་ངར་སྣབས་བསྲེ༔ གཟུགས་བྱད་སྐྱེ་མཆེད་ཚང་བར་བཟོས༔ དུག་ཤོག་ངོས་སམ་རོ་རས་ལ༔ དུག་ཁྲག་འཁོར་ལོ་རྩིབས་བརྒྱད་ལིངྒའི་སྙིང་གར་འབྲི༔ ལིངྒར་གནས་ཡིག་སྤྱི་འགྲོས་འགོད༔ སྙིང་གར་ནྲི་ཡིག་བྱད་མའི་མིང་༔ ཁུག་ཅིག་སོད་ཅིག་མཱ་ར་ཡ༔ རྡུལ་དུ་རློགས་ཤིག་བྱ་བ་འབྲི༔ རྩིབས་བརྒྱད་ནང་དུ་འདི་ལྟ་སྟེ༔ བན་དྷེ་ནག་པོའི་བྱད་ཁ་བྷྱོ་ཟློག༔ བོན་པོ་ནག་པོའི་བྱད་ཁ་བྷྱོ་ཟློག༔ ཕྲ་མེན་མཁན་གྱི་བྱད་ཁ་བྷྱོ་ཟློག༔ འཕུང་གཡོས་མཁན་གྱི་བྱད་ཁ་བྷྱོ་ཟློག༔ མནན་གཏད་བཅིངས་པའི་བྱད་ཁ་བྷྱོ་ཟློག༔ རླུང་ལ་འཁོར་ལོ་བསྐོར་བའི་བྱད་ཁ་བྷྱོ་ཟློག༔ ཧོམ་གྱིས་བསྲེགས་པའི་བྱད་ཁ་བྷྱོ་ཟློག༔ པར་བུ་བསྐོར་བའི་བྱད་ཁ་བྷྱོ་ཟློག༔ ཅེས་འབྲི༔ རྩིབས་མཆན་རྣམས་ལ༔ ལྷ་ཡི་རྦོད་ཟོར་བྷྱོ་ཟློག༔ ཀླུ་ཡི་རྦོད་ཟོར་བྷྱོ་ཟློག༔ བདུད་ཀྱི་རྦོད་ཟོར་བྷྱོ་ཟློག༔ མ་མོའི་རྦོད་ཟོར་བྷྱོ་ཟློག༔ གཤིན་རྗེའི་རྦོད་ཟོར་བྷྱོ་ཟློག༔ བཙན་གྱི་རྦོད་ཟོར་ཟློག༔ གཟའ་ཡི་རྦོད་ཟོར་བྷྱོ་ཟློག༔ ཐེའུ་རང་རྦོད་ཟོར་བྷྱོ་ཟློག༔ ཅེས་བྲི་དེ་ཡི་ཕྱི་རིམ་དམོད་བཅོལ་སྣ་ཚོགས་བྲི༔ ལྷ་དབྱེ་ལས་གཞུང་བསྲང་ཞིང་དྲག་སྔགས་ཐུན་གྱིས་བརྡེག༔ ཡང་ཡང་འགུགས་བསྟིམས་དགྲ་བོ་དངོས་སུ་བསམས༔ ཨཱོཾ་བཛྲ་ཀྲོ་ཏ་ཀཱ་ལི་ཧ་རི་ནི་ས་ཧཱུྃ་ཕཊ༔ དགྲ་བོ་བྱད་མ་ལྷ་སྲུང་དང་བཅས་པ་ཁུག་རིལ་ཐུན་བྷྱོ་མ་མ་རཀྴ་ས་མ་ཡ༔ ཁ་ཐུན་ཁ་ཐུན༔ ཨ་ལ་པྲ་མོ་ཧེ་ཟློག༔ ཕུར་ཁ་ཟློག༔ ཟོར་ཁ་ཟློག༔ བྱད་ཁ་ཟློག༔ གཏད་ཁ་ཟློག༔ ཁྲམ་ཁ་ཟློག༔ ནད་ཁ་ཟློག༔ ཡམས་ཁ་ཟློག༔ རྦད་འདྲེ་ཟློག༔ རྦོད་གཏོང་ཟློག༔ ཅི་མང་བཟླ་བའམ་ཕ་རོལ་གྱི་ནུས་པ་དང་བསྟུན་ཏེ་བཟླ༔ ཤོག་ལིང་མགོ་རྟིང་ལྟེབས་ཏེ་དྲིལ༔ བག་ཟན་ཉ་བོའི་སྙིང་གར་གཞུག༔ ཕྱི་ལག་སྦར་སྡེར་སྙིང་གར་བཏབ༔ རང་གི་ཉལ་མལ་འོག་ཏུ་མནན༔ རང་ཉིད་ཕག་མོའི་ང་རྒྱལ་བསྐྱེད༔ ཉི་མ་དམར་ཐག་ཉུལ་བའི་ཚེ༔ མཁའ་འགྲོའི་བསྐུལ་འདོན་རྒྱུན་གཏོར་འབུལ༔ བཟློག་སྔགས་བཟླ་ཞིང་ཐལ་མོ་བརྡབ༔ བྱད་མ་ཤིན་ཏུ་ཐུ་བ་ན༔ ལིངྒ་གཉིས་གསུམ་བཟོས་ནས་ཀྱང་༔ དགྲ་བོ་བྱད་མའི་ཁང་རྨང་ངམ༔ ཡང་ན་བྱད་མ་མཐོང་བའི་ས༔ ཡང་ན་ལུང་གསུམ་འདུས་པའི་མདོ༔ ཡང་ན་རྒྱ་གྲམ་ལམ་གྱི་སྲང་༔ ཡང་ན་མཆོད་རྟེན་ལྷ་ཁང་འོག༔ མནན་ཞིང་དགུག་གཞུག་དྲག་ཏུ་བྱ༔ མེ་རྒྱ་ཆུ་རྒྱ་རོ་གཡམ་བཅད༔ དམོད་བཅོལ་མ་ཉེས་ཤགས་ཀྱང་འདེབས༔ ལྟ་བྲོ་འཁྲབ་ཅིང་བཟློག་སྔགས་འདོན༔ དྲང་སྲོང་དམོད་པ་ཡིན་ཀྱང་བཟློག༔ སྦྱོར་བ་གཞན་ལ་སྨྲོས་ཅི་དགོས༔ ས་མ་ཡ༔ རྒྱ་རྒྱ་རྒྱ༔ མཁའ་འགྲོ་བསྟེན་པའི་རྣལ་འབྱོར་པས༔ བསྲུང་བ་འདོད་ན་འདི་ལྟ་སྟེ༔ ཆོས་རྣམས་མི་དམིགས་སྟོང་པའི་ངང་༔ སྟེང་ན་གསེར་གྱི་འཁོར་ལོ་དང་༔ འོག་ན་གནམ་ལྕགས་འཁོར་ལོ་ནི༔ རྩིབས་སྟོང་ལྡན་པའི་གུར་ནང་དུ༔ གནམ་ལྕགས་ཞུན་མའི་རྡོ་རྗེ་ཡི༔ ལྟེ་བ་ཡངས་ཤིང་རྒྱ་ཆེའི་ནང་༔ རྡོ་རྗེ་རྒྱ་གྲམ་ལྟེ་བའི་སྟེང་༔ པདྨ་ཉི་མའི་དཀྱིལ་འཁོར་གསལ༔ དེ་སྟེང་བམ་ཆེན་མི་རོའི་གདན༔ གསེར་ཀྱི་རྡོ་རྗེ་རྩེ་ལྔའི་དབུས༔ ཧཱུྃ་ཡིག་མཐིང་ནག་ཡོངས་གྱུར་པས༔ རང་ཉིད་ཕག་གདོང་ནག་མོར་བསྒོམ༔ ཡན་ལག་བཞི་ལ་ཕག་མོ་བཞི༔ བ་སྤུའི་འོད་ཀློང་རེ་རེ་ན༔ དཔའ་བོ་དཔའ་མོ་གྲངས་མེད་གསལ༔ རང་རིག་ཕག་མོའི་ཐུགས་ཀ་རུ༔ ཙིཏྟ་ཤེལ་གྱི་མཆོད་རྟེན་ནི༔ ཁྲི་འཕང་ལྔ་དང་ལྡན་པ་ལ༔ བུམ་པ་བྲེ་ཏོག་ལྡན་པར་བསྒོམས༔ བུམ་པའི་ནང་དུ་ཡེ་ཤེས་སེམས་དཔའ་རང་འདྲ་བ་མཚོན་གང་གསལ་བའི་ཐུགས་ཀར༔ སེམས་ཉིད་ཀྱི་ངོ་བོ་ཧཱུྃ་མཐིང་ནག་སྤུས་བྲིས་པ་ཙམ་ཞིག་གསལ་ཞིང་༔ རང་གི་ཚེའི་ངོ་བོ་གནོད་བྱེད་ཀྱི་ལག་ཏུ་ཤོར་བ་ཐམས་ཅད་འོད་ཟེར་དམར་པོ་ལྕགས་ཀྱུའི་དབྱིབས་ཅན་མང་པོ་འཕྲོས་པས་བཀུགས་ཏེ་ཧཱུྃ་ལ་ཐིམ་པར་བསྒོམ༔ སླར་ཡང་འོད་ཟེར་མང་པོ་འཕྲོས་པས་སངས་རྒྱས་དང་བྱང་ཆུབ་སེམས་དཔའ་ཐམས་ཅད་ཀྱི་ཐུགས་རྗེ་དང་བྱིན་རླབས་ནུས་མཐུ་ཐམས་ཅད་བསྡུས་ཏེ་སེམས་ཉིད་ཀྱི་ངོ་བོ་ལ་ཐིམ་པར་བསྒོམ་ཞིང་༔ ཨཱོཾ་བཛྲ་ཀྲོ་ཏ་ཀཱ་ལི་ཧ་རི་ནི་ས་ཆེ་གེ་མོའི་ལུས་ངག་ཡིད་གསུམ་སྲུངས་ཤིག་རཀྵ་རཀྵ་སྭཱ་ཧཱ༔ རྩེ་གཅིག་འདུན་པས་ཅི་མང་བཟླ༔ འཁོར་གཡོག་ཉེ་དུ་སྲུང་བྱེད་ན༔ ཕོ་གཡས་མོ་གཡོན་ནོར་རྫས་དང་༔ ཞིང་ཁང་མདུན་རྒྱབ་བྲན་གཡོག་འོག༔ ཀུན་ཀྱང་ལྷ་ཡི་རྣམ་པར་གསལ༔ དམ་སེལ་ཡོད་པའི་སྐྱེ་འགྲོ་ནི༔ བསྲུང་འཁོར་ནང་དུ་བསྒོམ་མི་རུང་༔ ཕྱི་རབས་རྣལ་འབྱོར་དམ་ལྡན་གྱིས༔ ཞག་སྐོར་རེ་ལ་སྔགས་དམིགས་རྣམས༔ ཐུན་རེ་ཆག་མེད་བྱས་གྱུར་ན༔ དུས་མིན་འཆི་དང་བསམ་སྦྱོར་ངན༔ མི་མཐུན་ཕྱོགས་རྣམས་བཟློག་པ་དང་༔ མཚོན་དང་དུག་གི་འཇིགས་པའང་སྐྱོབ༔ ས་མ་ཡཱ༔ རྒྱ་རྒྱ་རྒྱ༔ མཁའ་འགྲོ་སྒྲུབ་པའི་རྣལ་འབྱོར་ལ༔ དགྲ་བོ་ནག་པོས་ཉེར་འཚེ་ན༔ ཕུང་ཤུལ་ས་ལ་མཎྜལ་བྱ༔ དུག་དང་ཁྲག་གིས་ཆག་ཆག་གདབ༔ དབུས་སུ་ཧོམ་ཁུང་ལེགས་པར་བཟོས༔ ལིངྒ་མིང་རུས་བླ་དྭགས་འབྲི༔ ཟག་རྫས་བྱུག་ཅིང་ལྷ་དབྱེ་ནས༔ དགུག་གཞུག་ཧོམ་ཁུང་ཁ་བཀབ་སྟེ༔ ཐུན་ལམ་རྡོ་རྗེས་དགག་པར་བྱ༔ དེ་སྟེང་མཉྫའི་ཁྲིའུ་ཁར༔ མཁའ་འགྲོའི་གཏོར་མ་བཤམས་ནས་ཀྱང་༔ ལས་གཞུང་བསྲང་ཞིང་བསྐྱེད་རིམ་གསལ༔ རང་ལས་འཕྲོས་པའི་མཁའ་འགྲོ་ནི༔ ཤ་ཟ་ཕྲ་མེན་ལས་བྱེད་ཚོགས༔ སྟོང་གསུམ་གང་བར་འཕྲོ་ཞིང་རྒྱུག༔ དགྲ་བོ་དབང་མེད་ལྕགས་ཀྱུས་བཟུང་༔ ཞགས་པས་བཅིངས་ཤིང་ལྕགས་སྒྲོག་བསྡམས༔ དྲིལ་བུས་དགྲ་བོ་མྱོས་བཅུག་ནས༔ གཉིས་མེད་གཟུགས་ལ་བསྟིམས་པར་བསམས༔ ཨཱོཾ་བཛྲ་ཀྲོ་ཏ་ཀཱ་ལི་ཧ་རི་ནི་ས༔ དགྲ་བོ་འདུ་ཤ་ཡེ༔ བྷནྡྷ་ཡ༔ ཚིནྡྷ་ཡ༔ རཀྟ་ཡེ༔ དགྲ་བོའི་སྙིང་ཁ་རག་མོ་སྲོག་ཁུག༔ མྱུར་དུ་ཁུག་ཛཿཛ༔ དགྲ་བོའི་སྙིང་དུམ་བུར་ཆོད༔ དུམ་བུར་ཆོད༔ དགྲ་བོ་མཱ་ར་ཡ་ཛཿཛ༔ ཞེས་པ་ཐུན་བཟུང་ནན་གྱིས་བཟླ༔ ཐུན་སྐབས་བསྐུལ་འདོན་གཏོར་མ་འབུལ༔ ཟན་ལིང་བསྒྲལ་ཞིང་ཞལ་དུ་བསྟབ༔ ཁུགས་རྟགས་གསལ་ནས་གདབ་ལས་བྱ༔ ལིངྒ་གླང་རུའི་ནང་དུ་བཅུག༔ གདོལ་བ་ནག་པོའི་ཀླུ་ལ་གཏད༔ མ་ཉེས་ཤགས་འདེབས་གསེར་སྐྱེམས་མཆོད༔ བདེན་པ་བརྡར་ཞིང་དམོད་བཅོལ་བྱ༔ དགྲ་བོ་ཁ་ཕུང་རྗེས་མེད་འགྲོ༔ གཏོར་མ་དགྲ་བོའི་ཕྱོགས་སུ་འཕེན༔ ཕུང་གསུམ་བདུད་ཀྱི་ཉི་མར་བརྩམ༔ ལས་ཀྱི་རྗེས་ཀྱང་མི་མངོན་བྱ༔ ས་མ་ཡ༔ རྒྱ་རྒྱ་རྒྱ༔ གཏེར་རྒྱ༔ སྦས་རྒྱ༔ ཟབ་རྒྱ༔ ས་མ་ཡཱ༔ རྒྱ་རྒྱ་རྒྱ༔ རིག་འཛིན་ཆེན་པོ་ཉི་མ་གྲགས་པ་རྩལ་གྱིས་གནས་མཆོག་ཆེན་པོ་རཀྴ་ཀོ་ཊི་ནས་ས་རྟ་ལ་གདན་དྲངས་ཤིང་ལྕགས་བྱ་ལ་ཤོག་སེར་ལས་ཕབ་པའོ། །མངྒ་ལམ།། །།

སྲུང་བཟློག་ཟབ་མོ་སྦས་པ།

ཕག་མོ་ནག་མོའི་ཟབ་ཐིག་ལས༔ སྲུང་བཟློག་ཟབ་མོ་སྦས་པ་བཞུགས༔ མཁའ་འགྲོ་མ་ལ་ཕྱག་འཚལ་ལོ༔ དགྲ་བོ་བྱད་མ་དར་དྲགས་ནས༔ བྱད་གཏད་ལ་སོགས་རྟགས་ཐུའམ༔ མི་མཐུན་བར་ཆད་བཟློག་འདོད་ན༔ སཱ་བྷཱ་ཝའི་སྔགས་ཀྱིས་སྟོང་པར་སྦྱངས༔ ཆོས་ཐམས་ཅད་མི་དམིགས་པ་སྟོང་པ་ཉིད་ཀྱི་ངང་ལས༔ གནམ་ལྕགས་ཞུན་མ་ལས་གྲུབ་པའི་ཆོས་འབྱུང་བསམ་གྱིས་མི་ཁྱབ་པའི་ནང་དུ་འབྱུང་བ་ལྔའི་ཁམས་ལས་གྲུབ་པའི་བྱད་མ་རིད་ཅིང་ཉམ་ཐག་པ་ལྷ་དང་བྲལ་བ༔ དེའི་སྟེང་དུ་ཡཾ་ལས་རླུང་གི་དཀྱིལ་འཁོར༔ དེའི་སྟེང་དུ་རཾ་ལས་མེ་ཡི་དཀྱིལ་འཁོར༔ དེའི་སྟེང་དུ་བཾ་ལས་ཆུའི་དཀྱིལ་འཁོར༔ དེའི་སྟེང་དུ་ལཾ་ལས་སའི་དཀྱིལ་འཁོར༔ དེའི་སྟེང་དུ་གནམ་ལྕགས་ཀྱི་འཁོར་ལོ་རྩིབས་སྟོང་དང་ལྡན་པ༔ དེའི་སྟེང་དུ་གསེར་ཀྱི་འཁོར་ལོ་རྩིབས་སྟོང་དང་ལྡན་པ༔ འཁོར་ལོ་དེ་གཉིས་ཀྱི་ལྟེ་བའི་ཐད་དུ་ཀ་བའི་རྣམ་པ་ལ་གནམ་ལྕགས་ཀྱི་རྡོ་རྗེ་རྩེ་དགུ་པ་སྲ་ལ་བརྟན་པ༔ ལྟེ་བ་ཡངས་ཤིང་རྒྱ་ཆེ་བའི་ནང་དུ་ཟངས་མའི་འཁོར་ལོ་རྩིབས་བརྒྱད་པའི་ལྟེ་བར་ཉི་ཟླའི་གའུ་ཁ་སྦྱོར་གྱི་དབུས་སུ་སྣ་ཚོགས་རྡོ་རྗེའི་རྒྱ་གྲམ་ཞིག་བསྒོམ༔ དེའི་ལྟེ་བར་པཾ་ལས་པདྨ་རཾ་ལས་ཉི་མའི་སྟེང་དུ་མི་རོའི་གདན༔ དེའི་སྟེང་དུ་གསེར་གྱི་རྡོ་རྗེ་རྩེ་ལྔ་པའི་ལྟེ་བར་ཧཱུྃ་སྨུག་ནག་གིས་མཚན་པ་ལས་འོད་འཕྲོས༔ ནུབ་ཕྱོགས་ཨོ་རྒྱན་མཁའ་འགྲོའི་ལྷ་ཚོགས་སངས་རྒྱས་དང་བྱང་ཆུབ་སེམས་དཔའ་ཐམས་ཅད་ཀྱི་ཐུགས་དམ་གྱི་རྒྱུད་བསྐུལ༔ སེམས་ཅན་ཐམས་ཅད་ལ་ཕོག་སྡིག་སྒྲིབ་སྦྱངས༔ འཁོར་འདས་ཐམས་ཅད་ཀྱི་བྱིན་རླབས་དང་ནུས་མཐུ་བསྡུས༔ ཚུར་འདུས་ཧཱུྃ་ལ་ཐིམ་ཞིང་༔ ཡོངས་སུ་གྱུར་པ་ལས་ཕག་མོ་ཁྲོས་མ་ནག་མོ་གཞུང་ལྟར་བསྐྱེད༔ ཡན་ལག་བཞི་ལ་ཕག་མོ་རིགས་བཞི༔ འཁོར་དུ་པདྨའི་འདབ་མ་ལ་སྡེ་བརྒྱད་མཁའ་འགྲོ༔ ཆོས་འབྱུང་གི་ཟུར་དྲུག་རྣམས་སུ་གོ་ཆའི་དཔའ་མོ་རྣམས་དང་སྒོ་མ་རྣམས་བསྐྱེད༔ དེ་ནས་ཕག་མོ་གསལ་བའི་སྙིང་ཤེལ་གྱི་མཆོད་རྟེན་ཁྲི་འཕང་བཅུ་གསུམ་དང་ལྡན་པ༔ བུམ་པ་བྲེ་ཏོག་འཁོར་ལོ་རྫོགས་པ་ལ་འོད་ཟེར་འབར་ཞིང་ནུས་མཐུ་དང་ལྡན་པར་བསྐྱེད༔ བུམ་པའི་ནང་དུ་རང་འདྲ་བའི་ཁྲོ་མོ་ཡེ་ཤེས་སེམས་དཔའི་ཐུགས་ཀར་ཨཱཿལས་ཟླ་བ་རཾ་ལས་ཉི་མ་སྟེ་ཉི་ཟླའི་གའུ་ཁ་སྦྱོར་གྱི་ནང་དུ་གསེར་རམ་གནམ་ལྕགས་ཀྱི་འཁོར་ལོའི་ལྟེ་བར་ས་བོན་ཧཱུྃ་ཡིག་མཐིང་ནག་འོད་ལྔའི་མདངས་དང་ལྡན་པ་ཞིག་གི་ཧ་ཁོག་གི་ཁོང་གསེང་དུ༔ ཚེ་མི་འགྱུར་བའི་ངོ་བོ་ཨ་ཡུ་ཥེ་དང་༔ སྲོག་མི་འགྱུར་བའི་ངོ་བོ་ཨཱཿདཀར་པོ་གནས་པར་བསྒོམས༔ དེ་ནས་བརྒྱུད་པའི་བླ་མ་ཡི་དམ་གྱི་ལྷ་ཚོགས་མཁའ་འགྲོ་ཆོས་སྐྱོང་སྲུང་མ་རྣམས་ཀྱི་བདེན་པ་དང་༔ སྔགས་དང་ཕྱག་རྒྱ་ཏིང་ངེ་འཛིན་གྱི་བདེན་པའི་མཐུ་ལ་བརྟེན་ནས༔ བསྲུང་བྱའི་ཚེ་སྲོག་ལྷ་སྲིན་སྡེ་བརྒྱད་གནོད་བྱེད་བན་བོན་གྱི་སྲུང་མ་གང་གི་ལག་ཏུ་ཡོད་ཀྱང་སྐད་ཅིག་རང་དབང་མེད་པར་འདིར་ཁུག་ཅེས་དྲག་ཏུ་བརྗོད་ཅིང་༔ རང་གི་ཐུགས་ཀའི་ས་བོན་ལས་འོད་ཟེར་འཕྲོས་པའི་སྣ་ལ༔ སྤྲུལ་བའི་མཁའ་འགྲོ་མ་འཁོར་ལོ་ལྕགས་ཀྱུ་ཞགས་པ་ལྕགས་སྒྲོག་དྲིལ་བུ་ཐོགས་པ་གྲངས་མེད་པ་ཕྱོགས་བཅུར་འཕྲོས་ཏེ༔ གནོད་བྱེད་རྣམས་ཀྱི་ལག་ནས་ཚེ་སྲོག་ཐམས་ཅད་འོད་ཟེར་ཀྱི་རྣམ་པར་ཕྲོགས་ཤིང་༔ ས་བོན་ལ་ཐིམ་པས་ཨ་དང་ཚེའི་ངོ་བོ་ཡིག་འབྲུ་རྣམས་ཉི་ཟླའི་གཞལ་ཡས་ཁང་གི་ནང་དུ་འོད་ལྔ་ཆེས་ཆེར་འབར་ཞིང་གནས་པར་བསམས༔ ཉི་ཟླའི་གཞལ་ཡས་ཁང་དེའི་ཤར་ན་རྡོ་རྗེ་དཀར་པོའི་རྩིག་པ༔ ལྷོ་ན་རིན་ཆེན་སེར་པོའི་རྩིག་པ༔ ནུབ་ན་པདྨ་དམར་པོའི་རྩིག་པ༔ བྱང་ན་རྒྱ་གྲམ་ལྗང་གུའི་རྩིག་པ༔ སྟེང་ནས་འཁོར་ལོ་དཀར་པོས་ཁེབས་པ༔ དེའི་ཕྱི་རོལ་ན་སངས་རྒྱས་བྱང་སེམས་དཔའ་བོ་དཔའ་མོ་རྣམས་ཀྱི་བྱིན་གྱིས་བརླབས་པའི་སྐུའི་འོད་ཟེར་དཀར་པོའི་གུར་ཁང་༔ དེའི་ཕྱི་རིམ་ན་གསུང་གི་འོད་ཟེར་དམར་པོའི་གུར་ཁང་༔ དེའི་ཕྱི་རིམ་ན་ཐུགས་ཀྱི་འོད་ཟེར་སྔོན་པོའི་གུར་ཁང་༔ དེའི་ཕྱི་རིམ་ན་ཡོན་ཏན་གྱི་འོད་ཟེར་སེར་པོའི་གུར་ཁང་༔ དེའི་ཕྱི་རིམ་ན་གསུང་གི་འོད་ཟེར་དམར་པོའི་གུར་ཁང་༔ དེའི་ཕྱི་རིམ་ན་ཐུགས་ཀྱི་འོད་ཟེར་སྔོན་པོའི་གུར་ཁང་༔ དེའི་ཕྱི་རིམ་ན་ཡོན་ཏན་གྱི་འོད་ཟེར་སེར་པོའི་གུར་ཁང་༔ དེའི་ཕྱི་རིམ་ན་འཕྲིན་ལས་ཀྱི་འོད་ཟེར་ལྗང་གུའི་གུར་ཁང་༔ དེའི་ཕྱི་རིམ་ན་རྒྱུ་ཤེལ་ལས་གྲུབ་པའི་མཆོད་རྟེན་འོད་འབར་ཞིང་སྟོང་གསུམ་ཁེབས་པ་ཙམ་ལ་འཇིགས་སུ་རུང་བའི་ཏོག་གི་ནང་ན་ཕྱོགས་བཅུའི་སངས་རྒྱས་དང་བྱང་ཆུབ་སེམས་དཔའ༔ བརྒྱུད་ལྡན་གྱི་བླ་མ་རིགས་ལྔའི་སངས་རྒྱས་ཞི་བ་རྡོ་རྗེ་དབྱིངས་ཀྱི་ལྷ་ཚོགས་རིགས་གསུམ་གྱི་མགོན་པོ་རྣམས་བསྒོམ༔ གདུགས་ཀྱི་རྩིབས་མ་བརྒྱད་ལ་རིག་འཛིན་ཆེན་པོ་བརྒྱད༔ བྲེའི་གཞལ་ཡས་ཁང་ན་མགོན་པོ་ཚེ་དཔག་མེད༔ བུམ་པའི་ནང་ན་ཡི་དམ་སྒྲུབ་པ་བཀའ་བརྒྱད་དང་ཆོས་ཀྱི་སྒོ་མོ་བརྒྱད་ཁྲི་བཞི་སྟོང་༔ བང་རིམ་དང་པོ་ལ་སྤྲུལ་སྐུ་རྡོ་རྗེ་ཕག་མོ་ལ་ཡེ་ཤེས་ཀྱི་མཁའ་འགྲོ་བྱེ་བ་འབུམ་གྱིས་བསྐོར་བ༔ གཉིས་པ་ལ་སྤྱང་ཞོན་མ་ནག་མོ་ལ་ལས་ཀྱི་མཁའ་འགྲོ་བྱེ་བ་འབུམ་གྱིས་བསྐོར་བ༔ གསུམ་པ་ལ་སྟག་ཞོན་མ་དུད་ཀ་ལ་སྤྲུལ་པའི་མཁའ་འགྲོ་བྱེ་བ་འབུམ་གྱིས་བསྐོར་བ༔ བཞི་པ་ལ་འཕར་ཞོན་མ་དམར་ནག་ལ་ཞིང་སྐྱོང་གི་མཁའ་འགྲོ་བྱེ་བ་འབུམ་གྱིས་བསྐོར་བ༔ ལྔ་པ་ལ་དོམ་ཞོན་མ་སྔོ་ནག་ལ་འཇིག་རྟེན་གྱི་མཁའ་འགྲོ་བྱེ་བ་འབུམ་གྱིས་བསྐོར་བ༔ གོས་སུ་ཞིང་ཆེན་གྱོན་ཞིང་གྲི་ཐོད་བསྣམས་པ་ལ་རབ་ཏུ་ཁྲོས་པའི་སྐུ་རུ་བསྒོམ༔ དེའི་འོག་རི་རབ་ནག་པོའི་འོག་ཏུ་ལྷ་སྲིན་སྡེ་བརྒྱད་རང་རང་གི་སྲོག་སྙིང་ལ་འཁོད་པ༔ དེའི་འོག་ས་གཞི་ཆེན་པོའི་ཞབས་སུ་ལྕགས་བསྲེགས་ཀྱི་ཁང་སྒྲོམ་ནག་པོའི་ནང་ན་བྱད་མ་དགྲ་བོ་མགོན་སྐྱོབ་དང་རྒྱབ་བརྟེན་གྱི་ལྷ་སྲུང་དང་བྲལ་བ༔ རིག་པ་ཉམ་ང་བ་དྲི་ཁ་བ༔ སྤྲུལ་བའི་མཁའ་འགྲོ་རྣམས་ཀྱིས་ནད་དང་མཚོན་ཆའི་ཆར་འབེབས་པར་བསྒོམ༔ དེའི་ཕྱི་རིམ་དུ་རྡོ་རྗེ་སྔོན་པོའི་གུར་ཁང་གི་ནང་དུ་མཁའ་འགྲོ་སྔོན་མོ་རྡོ་རྗེ་དང་ཐོད་ཁྲག་ཐོགས་པ་ཉི་ཁྲི་ཆིག་སྟོང་༔ དེའི་ཕྱི་རིམ་དུ་རིན་པོ་ཆེ་སེར་པོའི་གུར་ཁང་གི་ནང་དུ་མཁའ་འགྲོ་མ་སེར་མོ་རིན་པོ་ཆེ་དང་ཐོད་ཁྲག་ཐོགས་པ་ཉི་ཁྲི་ཆིག་སྟོང་༔ དེའི་ཕྱི་རིམ་པདྨ་དམར་པོའི་གུར་ཁང་གི་ནང་དུ་མཁའ་འགྲོ་མ་དམར་མོ་པདྨ་དང་ཐོད་ཁྲག་ཐོགས་པ་ཉི་ཁྲི་ཆིག་སྟོང་༔ དེའི་ཕྱི་རིམ་རྒྱ་གྲམ་ལྗང་གུའི་གུར་ཁང་གི་ནང་དུ་མཁའ་འགྲོ་མ་ལྗང་མོ་རྒྱ་གྲམ་དང་ཐོད་ཁྲག་ཐོགས་པ་ཉི་ཁྲི་ཆིག་སྟོང་༔ དེའི་ཕྱི་རིམ་གྲི་གུག་སྨུག་ནག་གི་གུར་ཁང་ནང་དུ་མཁའ་འགྲོ་མ་སྨུག་ནག་གྲི་ཐོད་ཅན་ཉི་ཁྲི་ཆིག་སྟོང་༔ དེའི་ཕྱི་རིམ་ན་མཚོན་ཆ་སྣ་ཚོགས་ཀྱི་གུར་ཁང་གི་ནང་དུ་སྟོད་དུ་ཡེ་ཤེས་ཀྱི་ཆོས་སྐྱོང་༔ རྐེད་པ་ན་སོ་མཚམས་པ༔ འོག་ཕྱོགས་སུ་འཇིག་རྟེན་འདིའི་སྲུང་མ་དམ་པ་རྣམས་ལ་ཁས་བླངས་དམ་ནོས་པའི་སྲུང་མ་རྣམས་ཏེ༔ རང་རྟགས་ཀྱི་ཕྱག་མཚན་སྣ་ཚོགས་འཛིན་པའི་གུར་ཁང་༔ དེའི་ཕྱི་རོལ་ན་རལ་གྲི་འབར་བའི་གུར་ཁང་༔ དེའི་སྟེང་ན་ག །སེར་ཀྱི་འཁོར་ལོ་རྩིབས་སྟོང་དང་ལྡན་པ་ཡེ་ཤེས་ཀྱི་ཁྲོ་བོ་བཅུ་ལ་སོགས་པ་སྟེ་ཁྲོ་བོ་བསེ་ཁྲབ་ཅན་སྟོང་གིས་གཏམས་པ༔ འོག་ན་གནམ་ལྕགས་ཀྱི་འཁོར་ལོ་རྩིབ་སྟོང་དང་ལྡན་པ་ལ་ཡེ་ཤེས་ཀྱི་ཁྲོ་མོ་བཅུ་ལ་སོགས་པ་ལྕགས་ཁྲབ་གསོལ་བ་སྟོང་བསྒོམ༔ ཁྲོ་བོ་ཁྲོ་མོ་དེ་རྣམས་ལས་འོད་ཟེར་འཕྲོས་པས་གནོད་བྱེད་ཐམས་ཅད་རྡུལ་དུ་བརླག་པར་བསམས༔ འཁོར་ལོ་དེ་གཉིས་གཡས་གཡོན་དུ་འཁོར་བས་བྱད་མ་ལྷ་སྲུང་དང་བཅས་པ་ཤ་ཁྲག་དམར་ཕྲུ་ལུ་ལུ་འཐག་པར་བསམ༔ དེའི་ཕྱི་རིམ་ན་ཡཾ་ལས་རླུང་སྤུ་གྲི་འབར་བའི་གུར་ཁང་༔ དེའི་ཕྱི་རིམ་ན་རཾ་ལས་བསྐལ་བའི་མེ་ཆེན་མཆེད་པའི་གུར་ཁང་༔ དེའི་ཕྱི་རིམ་ན་བཾ་ལས་ཆུ་བོ་རྦ་ཀློང་འཁྲུག་པའི་གུར་ཁང་༔ དེའི་ཕྱི་རོལ་ན་ལཾ་ལས་དབང་ཆེན་གསེར་གྱི་ས་གཞི་འབར་བའི་ལྕགས་རི༔ དེའི་ཕྱི་རོལ་ན་མུ་ལས་མུན་པ་ནག་པོའི་གུར་ཁང་ལྷ་འདྲེ་སྟོང་གི་སྒྲིབ་ཤིང་སུས་ཀྱང་མཐོང་དུ་མི་ནུས་པ་ཞིག་བསྒོམ༔ ཨཱོཾ་བཛྲ་ཀྲོ་ཏ་ཀཱ་ལི་ཧ་རི་ནི་ས་སརྦ་དྷཀྐིི་ནི༔ ན་མཿས་མནྟ་ཀཱ་ཡ་ཝཱཀྐ་ཙིཏྟ་ཨཱོཾ་ཨཱཿཧཱུྃ་ཨུཥྞི་ཥ༔ ཙཀྲ་ཝརྟི་ནི༔ སརྦ་ལོ་ཀི་དྷ་ར་ནི༔ ཡནྚ་མནྚ་ཏནྚ་བྷ་ར་ཧི་བྷྲཱུྃ་བྷ྄ཱུྃ་བྷྲ྄ཱུྃ༔ དྲུཾ་དྲུཾ་དྲུཾ༔ ཧཱུྃ་ཧཱུྃ་ཧཱུྃ༔ ཕཊ་ཕཊ་ཕཊ༔ སྭཱ་ཧཱ༔ ཞེས་རང་ཉིད་ཁྲོ་མོའི་ང་རྒྱལ་གྱིས་བཟླས་པས་འཁོར་གྱི་སངས་རྒྱས་དང་བྱང་སེམས་དཔའ་དཔའ་བོ་དཔའ་མོ་ཆོས་སྐྱོང་སྲུང་མ་ཐམས་ཅད་ཀྱིས་ཀྱང་དེ་བཞིན་དུ་བཟླས་ཤིང་ཞལ་ཐམས་ཅད་ནང་དུ་གཟིགས་ཏེ་བསྲུང་བའི་ལས་མཛད་པར་བསྒོམས་ཤིང་ཕ་རོལ་གྱི་ནུས་པ་རང་གི་འདོད་དང་བསྟུན་ཏེ་བཟླ་བར་བྱའོ༔ བཟློག་པའི་དུས་སུ་ཞལ་ཕྱིར་གཟིགས་ཤིང་བཟློག་པའི་ལས་མཛད་པར་དམིགས་ཏེ་སྔགས་དམིགས་དེ་བཞིན་བསྒྱུར་ཤེས་པར་བྱའོ༔ ཐལ་མོ་བརྡབ་པའི་དུས་སུ་ལྷ་ཚོགས་ཐམས་ཅད་ཀྱིས་དུས་གཅིག་ལ་ཐལ་མོ་བརྡབས་པས་དགྲ་བོ་བྱད་མ་ལྷ་སྲུང་བརླག་པར་བསམ་པ་དང་༔ འཁོར་ལོའི་གུར་ཁང་དྲག་ཏུ་འཁོར་བས་རྡུལ་ཕྲན་དུ་བརླག་པར་བསྒོམ་པ་ནི་བཟློག་པའི་ཡང་གནད་དོ༔ རྫོགས་རིམ་ནི༔ ཕྱི་སྣོད་འཁོར་ལ་བསྡུ༔ འཁོར་རྣམས་རང་ལ་བསྡུ་ཞིང་ས་བོན་ཐིག་ལེ་ནཱ་དར་ཡལ་བར་བསམས་ཏེ་ཆོས་ཉིད་ངང་དུ་མ་བཅོས་པར་བཞག༔ སླར་ཡི་དམ་གྱི་ལྷ་སྒྱུ་མ་ལྟ་བུ་དང་རང་བྱུང་གི་གནས་ལུགས་དམིགས་སུ་མེད་པ་གཉིས་དབྱེར་མེད་ཟུང་འཇུག་ལམ་འཁྱེར་དུ་སྤྱོད་པར་བྱའོ༔ ས་མ་ཡ༔ རྒྱ་རྒྱ་རྒྱ༔ གཏེར་རྒྱ༔ སྦས་རྒྱ༔ ཟབ་རྒྱ༔ ས་མ་ཡ༔ རྒྱ་རྒྱ་རྒྱ༔ གཏེར་ཆེན་ཆོས་ཀྱི་རྒྱལ་པོ་རིགས་འདུས་ཉི་མ་གྲགས་པ་རྩལ་གྱིས་རཀྴ་ཀོ་ཊི་ནས་གདན་དྲངས་ཤིང་ཤོག་སེར་བརྡའི་ཡི་གེ་ལས་བོད་ཡིག་ཏུ་ཕབ་པའོ། །མངྒ་ལམ།། །།

ལས་བྱང་དངོས་གྲུབ་ཀུན་འབྱུང་།

ཕག་མོ་ནག་མོའི་ཟབ་ཐིག་ལས༔ ལས་བྱང་དངོས་གྲུབ་ཀུན་འབྱུང་བཞུགས༔ མཁའ་འགྲོའི་ཚོགས་ལ་ཕྱག་འཚལ་ལོ༔ མ་འོངས་སྐལ་ལྡན་ཕྱི་མའི་དོན༔ གུ་རུ་རྗེ་ལ་ལུང་ཞུས་ནས༔ ཕག་ནག་ཐུགས་སྒྲུབ་ལས་བྱང་ཞིག༔ ཁོ་མོས་ཤོག་སེར་ཡི་གེར་འབྲི༔ ས་མ་ཡ༔ རྒྱ་རྒྱ་རྒྱ༔ དབང་སྒྲུབ་ལག་ལེན་རང་གཞུང་ལྟར༔ མཁའ་འགྲོ་འདུ་བའི་གནས་མཆོག་ཏུ༔ མ་དང་མཁའ་འགྲོ་བསྟེན་པའི་ཕྱིར༔ གཞི་མ་སྟེགས་བུ་མཛེས་པའི་སྟེང་༔ འབྲུ་ཡི་ཚོམ་བུ་ལྷ་གྲངས་དགོད༔ མཁའ་འགྲོའི་གཏོར་མ་རྒྱན་ལྡན་བཤམས༔ སྨན་རག་ཚོགས་འཁོར་རྣམ་ལྔ་དཀྲམ༔ རྣལ་འབྱོར་བདེ་བའི་གདན་ལ་འདུག༔ རོལ་མོ་འཁྲོལ་ཞིང་རྐང་གླིང་འབུད༔ ཐོད་རྔ་རྡུང་ཞིང་འདི་སྐད་དོ༔ ཧཱུྃ༔ ང་ནི་ཕག་མོ་ནག་མོའི་སྐུ༔ ཆོས་ཀྱི་དབྱིངས་ལས་སྤྲུལ་པའི་མ༔ མཁའ་འགྲོའི་སྤྲུལ་པས་སྟོང་གསུམ་གང་༔ ལོག་པར་ལྟ་བའི་གདོན་བགེགས་རྣམས༔ རྡུལ་ཕྲན་བཞིན་དུ་བརླག་པར་བྱེད༔ དེ་བས་རང་རང་གནས་སུ་དེངས༔ ཧཱུྃ་བཞི་པ་ཡི་སྔགས་བརྗོད་དོ༔ མཚམས་གཅོད་པ་ནི༔ ཧཱུྃ༔ རབ་ཏུ་ཁྲོས་པའི་མཁའ་འགྲོ་འབུམ༔ དྲག་ཏུ་བསྐྱོད་ལ་སྐུ་བཞེངས་ཤིག༔ དུར་ཁྲོད་མཁའ་འགྲོའི་ཕོ་བྲང་འདིར༔ གནོད་བྱེད་གདོན་བགེགས་མཚམས་ཆོད་ཅིག༔ ཨཱོཾ་བཛྲ་ཀྲོ་ཏ་ཀཱ་ལི་ཧ་རི་ནི་ས་ཧཱུྃ་ཕཊ༔ རཀྵ༔ རཀྵ་སྭཱ་ཧཱ༔ མཆོད་པ་བྱིན་བརླབས་ནི༔ ཧཱུྃ༔ རང་ཉིད་ལྷར་གསལ་ཐུགས་ཀ་ནས༔ འོད་ཟེར་འཕྲོ་འདུའི་ཏིང་འཛིན་གྱིས༔ མཆོད་པའི་མ་དག་ཉེས་པ་སྦྱངས༔ ཡེ་ཤེས་འདོད་དགུའི་བདུད་རྩིར་བསྒྱུར༔ ཨཱོཾ་བཛྲ་ཀྲོ་ཏ་ཀཱ་ལི་ཧ་རི་ནི་ས་ཧཱུྃ་ཕཊ༔ ཨཱོཾ་ཨཱཿཧཱུྃ་སརྦ་པཉྩ་ཨ་མྲྀ་ཏ་རཀྟ་བྷ་ལིངྟ་པཱུ་ཙ་ས་མ་ཡེ་སྭཱ་ཧཱ༔ བརྡ་སྒོ་དབྱེ་བ་ནི༔ ཧཱུྃ༔ བརྗོད་མེད་མ་བཅོས་དེ་བཞིན་ཉིད༔ ངན་རྟོག་དབང་གིས་འཁོར་བར་འཁྱམས༔ གཟུང་འཛིན་སྐྱེ་མེད་རང་གྲོལ་བའི༔ ཡེ་ཤེས་དོན་གྱི་སྒོ་དབྱེ་འཚལ༔ པྲ་ཝེ་ཤ་ཡ་ཧོ༔ བརྡ་ཕྱག་འཚལ་བ་ནི༔ ཧཱུྃ༔ སྐྱེ་མེད་གཉུག་མའི་རང་བྱུང་ལྷ༔ རང་དང་འགྲོགས་ཀྱང་ཞལ་མ་འཇལ༔ དུས་འདིར་རང་རིག་རང་ངོར་ཤར༔ རང་གྲོལ་དོན་གྱི་ཕྱག་འཚལ་ལོ༔ ས་མ་ཡཱ༔ ཨ་ལ་ལ་ཧཱུྃ༔ དམ་བཤགས་ནི༔ ཧཱུྃ༔ གདོད་ནས་རང་དང་གཉིས་མེད་ཀྱང་༔ གཉིས་འཛིན་དབང་གིས་སོ་སོར་ཕྱེས༔ ཆོས་དབྱིངས་མཁའ་འགྲོའི་ལྷ་ཚོགས་ལ༔ གཉིས་སུ་མེད་པའི་ངང་དུ་བཤགསས་མ་ཡཱ་ཤུདྡྷེ་ཨཱཿ བྱིན་དབབ་ནི༔ ཧཱུྃ༔ དབྱིངས་ཀྱི་མཁའ་འགྲོའི་ཕོ་བྲང་ནས༔ མཁའ་འགྲོ་ནག་མོ་མཁའ་འགྲོའི་རྗེ༔ མཁའ་འགྲོ་མ་ཚོགས་འབུམ་གྱིས་བསྐོར༔ སྒྲུབ་པའི་གནས་འདིར་བྱིན་ཅིག་ཕོབ༔ ཨཱོཾ་བཛྲ་ཀྲོ་ཏ་ཀཱ་ལི་ཧ་རི་ནི་ས་ཨ་ཝེ་ཤ་ཡ་ཨ༔ ལྷ་བསྐྱེད་པ་ནི༔ ཧཱུྃ༔ རྒྱུ་ཡི་རང་བཞིན་སྟོང་པར་གྱུར༔ སྟོང་པའི་རྩལ་ཁ་དམིགས་སུ་མེད༔ དམིགས་མེད་བརྩེ་བའི་ངང་ཉིད་ལས༔ རང་ལུས་འབྱུང་བཞི་རང་དག་ཀློང་༔ དུར་ཁྲོད་ཆོས་འབྱུང་མི་རོའི་སྟེང་༔ རང་སེམས་དག་པ་ཁྲོས་མ་ནག༔ བརྐྱང་བསྐུམ་གར་སྟབས་གྲི་ཐོད་ཅན༔ རལ་པ་ཁམ་ནག་ཐོད་པས་བཅིངས༔ ཕག་ཞལ་ངུར་ཞིང་མེ་དཔུང་འབར༔ དུར་ཁྲོད་ཆས་ལྡན་ཁ་ཊྭཱཾ་འཁྲིལ༔ རབ་ཏུ་ཁྲོས་པའི་སྐུ་རུ་བསྒོམས༔ སྣང་སྲིད་ཟིལ་གྱིས་གནོན་པར་བསམས༔ ཧཱུྃ༔ ཡུམ་མཆོག་ཆེན་མོའི་ཕྱོགས་བཞི་རུ༔ ཤར་དུ་ཕག་མོ་བདེ་ཆེན་དཀར༔ ལྷོ་རུ་ཕག་མོ་དོན་གྲུབ་སེར༔ ནུབ་ཏུ་ཕག་མོ་སྒྲ་སྒྲོགས་དམར༔ བྱང་དུ་ཕག་མོ་མཐར་ཕྱིན་ལྗང་༔ གཡས་རྣམས་རང་རྟགས་གྲི་གུག་བསྣམས༔ གཡོན་རྣམས་བྷན་དྷ་རཀྟ་ཐོགས༔ དུར་ཁྲོད་ཆས་རྫོགས་གར་སྟབས་འཁྲབ༔ གཞན་ཡང་འབུམ་ཕྲག་མཁའ་འགྲོའི་ཚོགས༔ ལས་བྱེད་སྡེ་བརྒྱད་དྷཀྐི་རྣམས༔ མ་འདྲེས་འཇའ་ཚོན་སྤྲིན་ལྟར་འཁྲིགས༔ མེ་ལོང་གཟུགས་བརྙན་ལྟ་བུར་གསལ༔ སྤྱན་འདྲེན་པ་ནི༔ ཧཱུྃ༔ ཆོས་དབྱིངས་མཁའ་འགྲོའི་ཕོ་བྲང་ནས༔ ཁྲོས་མ་ནག་མོ་མཁའ་འགྲོའི་གཙོ༔ རང་བཞིན་གནས་ནས་སྐུ་བསྐྱོད་ལ༔ དུར་ཁྲོད་གནས་འདིར་གཤེགས་སུ་གསོལ༔ འགྱུར་བ་མེད་པའི་ཕོ་བྲང་ནས༔ ཕག་མོ་དཀར་མོ་གཤེགས་སུ་གསོལ༔ དངོས་གྲུབ་གཏེར་གྱི་ཕོ་བྲང་ནས༔ ཕག་མོ་སེར་མོ་གཤེགས་སུ་གསོལ༔ ཤེས་རབ་བྷ་གའི་ཕོ་བྲང་ནས༔ ཕག་མོ་དམར་མོ་གཤེགས་སུ་གསོལ༔ འཕྲིན་ལས་ཐོགས་མེད་ཕོ་བྲང་ནས༔ ཕག་མོ་ལྗང་མོ་གཤེགས་སུ་གསོལ༔ གནས་ཡུལ་དུར་ཁྲོད་ཐམས་ཅད་ནས༔ ལས་བྱེད་སྡེ་བརྒྱད་དྷཀྐིའི་ཚོགས༔ འབུམ་ཕྲག་ཡངས་པའི་མཁའ་འགྲོ་རྣམས༔ གནས་འདིར་སྤྱན་འདྲེན་གཤེགས་སུ་གསོལ༔ ཨཱོཾ་བཛྲ་ཀྲོ་ཏ་ཀཱ་ལི་ཧ་རི་ནི་ས་ས་མ་ཡ་ཧྲིང་ཧྲིང་ཛཿཛཿཨ་ཝེ་ཤ་ཡ་ཨ་ཨཱ༔ བཞུགས་སུ་གསོལ་བ་ནི༔ ཧཱུྃ༔ དུར་ཁྲོད་ཆོས་འབྱུང་མི་རོའི་སྟེང་༔ ཕག་མོ་ཁྲོས་མའི་ལྷ་ཚོགས་རྣམས༔ དམ་ཚིག་ཡེ་ཤེས་གཉིས་མེད་པར༔ རོ་གཅིག་ཀློང་དུ་བཞུགས་སུ་གསོལ༔ བཛྲ་ས་མ་ཡ་ཏིཥྛ་ལྷན༔ ཕྱག་འཚལ་བ་ནི༔ ཧཱུྃ༔ དབྱིངས་ལས་ཤར་བ་ཕག་མོའི་སྐུ༔ རང་ལས་རྟོགས་པའི་ཡི་དམ་ལྷ༔ གཉིས་སུ་མེད་པས་ཕ་རོལ་ཕྱིན༔ མཁའ་འགྲོའི་ཚོགས་ལ་ཕྱག་འཚལ་ལོ༔ ན་མོ་པུ་རུ་ཤ་ཡ་ཧོ༔ མཆོད་པ་འབུལ་བ་ནི༔ ཧཱུྃ༔ གཟུགས་སྣང་ཐམས་ཅད་སྐུ་ལ་མཆོད༔ གཉིས་སུ་མེད་པར་བཞེས་སུ་གསོལ༔ སྒྲ་གྲགས་ཐམས་ཅད་གསུང་ལ་མཆོད༔ འགག་པ་མེད་པར་བཞེས་སུ་གསོལ༔ དྲན་རྟོག་ཐམས་ཅད་ཐུགས་ལ་མཆོད༔ སྐྱེ་བ་མེད་པར་བཞེས་སུ་གསོལ༔ འདོད་ཡོན་རྣམ་ལྔའི་མཆོད་པ་འདི༔ ལོངས་སྤྱོད་མ་སྤངས་རྒྱན་དུ་བཞེས༔ གཟུགས་སྒྲ་དྲི་རོ་རེག་བྱའི་ཚོགས༔ སྤང་བླང་བྲལ་བའི་ངང་དུ་བཞེས༔ བདེ་སྟོང་དགའ་བའི་བྱང་ཆུབ་སེམས༔ འདུ་འབྲལ་མེད་པར་བཞེས་སུ་གསོལ༔ རྩ་བརྒྱད་ཡན་ལག་སྟོང་ལ་སྦྱར༔ དུག་ལྔ་རང་གྲོལ་བཞེས་སུ་གསོལ༔ འཁོར་བ་རྩད་བཅད་རཀྟ་དམར༔ དུག་གསུམ་རང་གྲོལ་བཞེས་སུ་གསོལ༔ ཞལ་ཟས་སྣ་ཚོགས་དཔལ་གྱི་བཤོས༔ དངོས་གྲུབ་སྩོལ་ཕྱིར་བཞེས་སུ་གསོལ༔ ཨཱོཾ་བཛྲ་ཀྲོ་ཏ་ཀཱ་ལི་ཧ་རི་ནི་ས་སརྦ་པཱུ་ཙ་ལ་ཁ་རཾ་ཁཱ་ཧི༔ བསྟོད་པ་བྱ་བ་ནི༔ ཧཱུྃ༔ མཐིང་ནག་ཆེན་མོ་འཇིགས་པའི་སྐུ༔ རབ་ཁྲོས་གད་བརྒྱངས་ཕྱོགས་བཅུར་བཞད༔ དཔལ་དང་དུར་ཁྲོད་ཆས་རྣམས་རྫོགས༔ ཕག་མོ་བཅོམ་ལྡན་ནག་མོ་ལ༔ གུས་པའི་ཡིད་ཀྱིས་ཕྱག་འཚལ་བསྟོད༔ ཧཱུྃ༔ ཞི་མཛད་དཀར་མོས་བར་ཆད་སེལ༔ རྒྱས་མཛད་སེར་མོས་དངོས་གྲུབ་སྩོལ༔ དབང་མཛད་དམར་མོས་སྲིད་གསུམ་སྡུད༔ ལས་མཛད་ལྗང་མོས་དགྲ་བགེགས་སྒྲོལ༔ ཕག་མོ་སྡེ་བཞིར་ཕྱག་འཚལ་བསྟོད༔ ཧཱུྃ༔ བཀའ་ཡི་འཕྲིན་ལས་བསྟན་པ་སྐྱོང་༔ གནས་དང་ཡུལ་ཏེ་དུར་ཁྲོད་བདག༔ ཟས་སུ་ཤ་དང་ཁྲག་ལ་རོལ༔ དམ་རྫས་སུ་ར་ཆང་ལ་མཉེས༔ འབུམ་ཕྲག་མཁའ་འགྲོར་ཕྱག་འཚལ་བསྟོད༔ བཟླས་པ་བྱ་བ་ནི༔ ཨཱོཾ་བཛྲ་ཀྲོ་ཏ་ཀཱ་ལི་ཧ་རི་ནི་ས་ཧཱུྃ་ཕཊ༔ བརྒྱ་སྟོང་ཁྲི་འབུམ་སྐབས་དང་སྦྱར༔ ཚོགས་འཁོར་སྦྲན་ཞིང་འདི་སྐད་དོ༔ ཧཱུྃ༔ སྐྱེ་མེད་དབྱིངས་ཀྱི་མཁའ་ཀློང་ནས༔ ཟག་མེད་བདུད་རྩིའི་བཅུད་འཕྲོས་པས༔ གྷ་ན་ཚོགས་ཀྱི་འཁོར་ལོར་ཕོག༔ འདོད་ཡོན་ལོངས་སྤྱོད་སྣང་སྲིད་བཀང་༔ ཨཱོཾ་ཨཱཿཧཱུྃ་སྭཱ་ཧཱ༔ ཚོགས་ལ་སྤྱན་འདྲེན་པ་ནི༔ ཧཱུྃ༔ ཆོས་དབྱིངས་མཁའ་འགྲོའི་ཕོ་བྲང་ནས༔ ཁྲོས་མ་ནག་མོ་མཁའ་འགྲོའི་གཙོ༔ འབུམ་ཕྲག་དྷཀྐིའི་འཁོར་ཀྱིས་བསྐོར༔ གནས་འདིར་མདུན་གྱི་མཁའ་ལ་སྤྱོན༔ ཚོགས་ཀྱི་མཆོད་པ་བཞེས་སུ་གསོལ༔ མཆོད་པ་ནི༔ ཧཱུྃ༔ རོ་བརྒྱ་ལྡན་པའི་ཞལ་ཟས་བཤོས༔ མཾ་ས་ཤ་དང་སུ་ར་ཆང་༔ བཟའ་བཏུང་ལོངས་སྤྱོད་སྣ་ཚོགས་པ༔ མཆོད་པར་འབུལ་ལོ་བཞེས་སུ་གསོལ༔ ཨཱོཾ་བཛྲ་ཀྲོ་ཏ་ཀཱ་ལི་ཧ་རི་ནི་ས་གྷ་ན་པཱུ་ཙ་སརྦ་ས་མ་ཡ་ཁཱ་ཧི་ཁཱ་ཧི༔ བཤགས་པ་ནི༔ ཧཱུྃ༔ ཡེ་ཤེས་མཁའ་འགྲོའི་ལྷ་ཚོགས་དགོངས༔ རང་རྒྱུད་རྨོངས་པས་མི་དགེ་བསགས༔ ཉམས་ཆག་རྟོག་སྒྲིབ་གནོང་ངོ་འགྱོད༔ ཚོགས་མཆོད་འདི་ཡིས་དག་གྱུར་ཅིག༔ གྷ་ན་པཱུ་ཙ་ཁཱ་ཧི་ཤུདྡྷེ་ཨཱཿ བསྒྲལ་ལས་ནི༔ ཧཱུྃ༔ ཕག་གདོང་ནག་མོ་འཇིགས་གཟུགས་བརྔམ༔ རབ་གཏུམ་འཁྲུགས་པས་དུག་གསུམ་འབར༔ སྐུ་གསུང་ཐུགས་སྤྲུལ་སྟོང་གསུམ་གང་༔ སྒྲོལ་བྱེད་འབུམ་སྡེས་དགྲ་བགེགས་སྒྲོལ༔ མཁའ་འགྲོའི་ཚོགས་རྣམས་དགྱེས་པར་རོལ༔ ཁཱ་ཧི་ཁཱ་ཧི་འདོད་ཆགས་ཁྲག་ལ་ཁཱ་ཧི༔ ཁཱ་ཧི་ཁཱ་ཧི་ཞེ་སྡང་རུས་ལ་ཁཱ་ཧི༔ ཁཱ་ཧི་ཁཱ་ཧི་གཏི་མུག་ཤ་ལ་ཁཱ་ཧི༔ ལྷག་མ་ནི༔ ཧཱུྃ༔ ཁྲོ་མོའི་བཀའ་ཡི་དཀྱིལ་འཁོར་ནས༔ དུར་ཁྲོད་ཉུལ་ཞིང་མཁའ་ལ་རྒྱུ༔ ལས་སུ་གསང་སྔགས་བསྟན་པ་བསྲུང་༔ ཟས་སུ་ཤ་ཁྲག་དམར་ལ་གསོལ༔ སྤྲུལ་བ་འབུམ་འབུམ་མཁའ་འགྲོའི་ཚོགས༔ ལྷག་མའི་ལོངས་སྤྱོད་འདི་བཞེས་ལ༔ རྣལ་འབྱོར་བདག་གི་འཕྲིན་ལས་སྒྲུབས༔ སརྦ་དྷཀྐི་ས་མ་ཡ་ཁཱ་ཧི༔ ཆད་ཐོ་ནི༔ ཧཱུྃ༔ སྔོན་ཚེ་བསྐལ་པའི་དང་པོ་ལ༔ ཆོས་དབྱིངས་མཁའ་འགྲོའི་དུར་ཁྲོད་དུ༔ གཙོ་མོ་ཕག་གདོང་ནག་མོ་ཡིས༔ དམ་ལ་བཞག་པའི་མཁའ་འགྲོ་འབུམ༔ ཤ་ཁྲག་གཏོར་མ་འདི་བཞེས་ལ༔ གསང་སྔགས་བླ་མེད་བསྟན་པ་སྲུངས༔ དགྲ་བགེགས་སྒྲོལ་ལ་བར་ཆད་ཟློག༔ བཅོལ་བའི་འཕྲིན་ལས་གྲུབ་པར་མཛོད༔ བསྟན་སྐྱོང་ནི༔ ཧཱུྃ༔ བཀའ་ཡི་སྲུང་མ་དམ་ཚིག་ཅན༔ བོད་ཁམས་སྐྱོང་བའི་བསྟན་མ་རྣམས༔ བཤལ་ཆུའི་གཏོར་མ་འདི་ལོང་ལ༔ བླ་མེད་བསྟན་སྐྱོང་འཕྲིན་ལས་སྒྲུབས༔ བྷྱོ་ས་མ་ཡ་ཁཱ་ཧི༔ གཞན་ཡང་བཀྲ་ཤིས་བསྔོ་སྨོན་དང་༔ བསྡུ་ཆོག་རྫོགས་རིམ་དམིགས་མེད་བསྒོམ༔ འཕྲིན་ལས་ལས་བཞི་གང་འདོད་བརྩམས༔ ས་མ་ཡཱ༔ རྒྱ་རྒྱ་རྒྱ༔ གཏེར་རྒྱ༔ སྦས་རྒྱ༔ གསང་རྒྱ༔ ས་མ་ཡཱ༔ རྒྱ་རྒྱ་རྒྱ༔ རིག་འཛིན་སཱུརྱ་ཀིརྟིས་ཁམས་སྲིང་མོ་རྫོང་གི་ཕུག་ནག་ཕག་གདོང་ནག་མོའི་ཆོས་འབྱུང་གསང་མཚན་ཕུག་ནས་ས་ཕོ་རྟའི་ལོ་ལ་གདན་དྲངས་ཤིང་ལྕགས་མོ་བྱའི་ལོ་ལ་ཤོག་སེར་ལས་བོད་ཡིག་ཏུ་ཕབ་པའོ།། །།དགྱེས་མཛད་ཆེན་མོ་རྡོ་རྗེ་རྣལ་འབྱོར་མ། །སྐྱེ་འགགས་གཉིས་མེད་རང་བཞིན་རྣམ་པར་དག །ཆོས་ལོངས་སྤྲུལ་པའི་གར་གྱིས་འགྲོ་བ་འདྲེན། །བརྡ་དོན་རྟགས་ཀྱི་ཕག་མོ་ཁྲོས་མ་ནག །ཡུལ་སྣང་ལུས་རྩ་ཞིང་དང་གཞལ་ཡས་ལྷ། །སེམས་ཉིད་རྣམ་དག་ཡེ་ཤེས་རྟོགས་བྱའི་ཕྱིར། །ཕྲིན་ལས་བྱང་བུ་ངོ་མཚར་པར་དུ་བཀོད། །དེ་ལས་བྱུང་བའི་བསོད་ནམས་མཐའ་ཡས་ཀྱིས། །ཐར་ལམ་བྱང་ཆུབ་བསྒྲུབ་པ་དོན་གཉེར་དག །ལྟ་སྒོམ་སྤྱོད་འབྲས་གནས་ལུགས་དྲོད་ཚད་བརྙེས། །རིམ་གཉིས་མཐུ་ཡིས་རང་གཞན་ཕན་བདེར་སྦྱོར། །བདེ་ཆེན་ཡེ་ཤེས་སྐུ་བཞི་མངོན་གྱུར་ཤོག །ཟབ་ཐིག་མཁའ་འགྲོའི་ལས་བྱང་པར་དུ་བསྐོས་པའི་པར་བྱང་སྨོན་ལམ་པདྨ་ཐེག་མཆོག་བསྟན་པའི་རྒྱལ་མཚན་གྱིས་སྦྱར་བ་དགེ།། །།

བསྐང་བ་དོན་གཉིས་ལྷུན་གྲུབ།

ཕག་མོ་ནག་མོའི་ཟབ་ཐིག་ལས༔ བསྐང་བ་དོན་གཉིས་ལྷུན་གྲུབ་ཞེས་བྱ་བ་བཞུགས༔ མཁའ་འགྲོའི་ཚོགས་ལ་ཕྱག་འཚལ་བསྟོད༔ ཕག་མོ་ནག་མོའི་རྣལ་འབྱོར་པས༔ ཉ་སྟོང་ཚེས་བཅུའི་དུས་ཆེན་དང་༔ བར་ཆད་སེལ་དང་འཕྲིན་ལས་བསྒྲུབ༔ ནད་ཡམས་བཟློག་དང་དབང་ལ་སོགས༔ མཆོག་ཐུན་ལས་ལ་སྤྱོད་པའི་ཚེ༔ ལས་ཀྱི་གཞུང་བསྲང་བསྙེན་སྒྲུབ་འབད༔ ཕྱི་ནང་མཆོད་རྫས་གྷ་ན་བཤམས༔ མཚན་ལྡན་ཁྱེའུ་གཙང་མ་དང་༔ བུ་མོ་རིགས་བཟང་ཁྲུས་ནས་ཕྱུངས༔ ལག་ཏུ་གསུར་ཆེན་དུད་པ་དང་༔ དྲི་བཟང་སྤོས་ཀྱི་རེང་བུ་ཐོགས༔ མཆེད་ལྕམ་མ་ལུས་ཆས་སུ་ཞུགས༔ རོལ་མོ་འཁྲོལ་ཞིང་འཆམས་སྟབས་བསྒྱུར༔ རྔམ་པའི་དབྱངས་ཀྱིས་འདི་སྐད་དོ༔ ཧཱུྃ༔ དཔལ་ལྡན་རྡོ་རྗེ་མཁའ་འགྲོ་མ༔ མཁའ་འགྲོ་མ་ཡི་འཁོར་ལོས་བསྒྱུར༔ ཆོས་དབྱིངས་མཁའ་འགྲོའི་དུར་ཁྲོད་ནས༔ བསྐང་བའི་གནས་འདིར་གཤེགས་སུ་གསོལ༔ དགྱེས་ཤིང་མི་གཡོ་བརྟན་པར་བཞུགས༔ ཧཱུྃ༔ ཕག་མོ་ནག་མོ་དགྱེས་མཛད་མ༔ འཁྲུག་བྱེད་ཆེན་མོ་སྲིད་གསུམ་གཡོ༔ རྔམ་བྱེད་ཧ་ཧིའི་གད་རྒྱང་སྒྲོག༔ ཕག་མོ་ནག་མོའི་ཐུགས་དམ་བསྐང་༔ ཐུགས་དམ་བསྐང་བའི་དམ་རྫས་ནི༔ ཕྱི་མཆོད་ཉེར་སྤྱོད་འདོད་ཡོན་ལྔ༔ ནང་མཆོད་ཤ་ལྔ་བདུད་རྩི་ལྔ༔ གསང་མཆོད་སྨན་གཏོར་རཀྟ་ཚོགས༔ བླ་མེད་མཆོད་པ་སྦྱོར་དང་སྒྲོལ༔ ཁྲོས་མ་ནག་མོའི་ཐུགས་དམ་བསྐང་༔ ཧཱུྃ༔ དུག་ལྔའི་ངོ་བོ་གནས་གྱུར་པའི༔ ཕག་མོ་རིགས་ལྔའི་ཐུགས་དམ་བསྐང་༔ ཞི་བའི་མཁའ་འགྲོ་རྡོ་རྗེའི་གཙོ༔ ཕག་མོ་དཀར་པོའི་ཐུགས་དམ་བསྐང་༔ རྒྱས་པའི་མཁའ་འགྲོ་རིན་ཆེན་གཙོ༔ ཕག་མོ་སེར་མོའི་ཐུགས་དམ་བསྐང་༔ དབང་ག །ི་མཁའ་འགྲོ་པདྨའི་གཙོ༔ ཕག་མོ་དམར་མོའི་ཐུགས་དམ་བསྐང་༔ དྲག་པོའི་མཁའ་འགྲོ་ལས་ཀྱི་གཙོ༔ ཕག་མོ་ལྗང་མོའི་ཐུགས་དམ་བསྐང་༔ ཐུགས་དམ་བསྐང་བའི་དམ་རྫས་ནི༔ ཕྱི་མཆོད་ཉེར་སྤྱོད་འདོད་ཡོན་ལྔ༔ ནང་མཆོད་ཤ་ལྔ་བདུད་རྩི་ལྔ༔ གསང་མཆོད་སྨན་གཏོར་རཀྟ་ཚོགས༔ བླ་མེད་མཆོད་པ་སྦྱོར་དང་སྒྲོལ༔ ཕག་མོ་རིགས་བཞིའི་ཐུགས་དམ་བསྐང་༔ ཧཱུྃ༔ ཤར་གྱི་ཕྱོགས་ཀྱི་དུར་ཁྲོད་ནས༔ རྡོ་རྗེ་རིགས་ཀྱི་མཁའ་འགྲོ་འབུམ༔ བསྐང་ངོ་མཆོད་དོ་ཐུགས་དམ་བསྐང་༔ ལྷོ་ཡི་ཕྱོགས་ཀྱི་དུར་ཁྲོད་ནས༔ རིན་ཆེན་རིགས་ཀྱི་མཁའ་འགྲོ་འབུམ༔ བསྐང་ངོ་མཆོད་དོ་ཐུགས་དམ་བསྐང་༔ ནུབ་ཀྱི་ཕྱོགས་ཀྱི་དུར་ཁྲོད་ནས༔ པདྨ་རིགས་ཀྱི་མཁའ་འགྲོ་འབུམ༔ བསྐང་ངོ་མཆོད་དོ་ཐུགས་དམ་བསྐང་༔ བྱང་གི་ཕྱོགས་ཀྱི་དུར་ཁྲོད་ནས༔ ལས་ཀྱི་རིགས་ཀྱི་མཁའ་འགྲོ་འབུམ༔ བསྐང་ངོ་མཆོད་དོ་ཐུགས་དམ་བསྐང་༔ ཐུགས་དམ་བསྐང་བའི་དམ་རྫས་ནི༔ ཕྱི་མཆོད་ཉེར་སྤྱོད་འདོད་ཡོན་ལྔ༔ ནང་མཆོད་ཤ་ལྔ་བདུད་རྩི་ལྔ༔ གསང་མཆོད་སྨན་གཏོར་རཀྟ་ཚོགས༔ བླ་མེད་མཆོད་པ་སྦྱོར་དང་སྒྲོལ༔ མཁའ་འགྲོ་སྡེ་བཞིའི་ཐུགས་དམ་བསྐང་༔ ཧཱུྃ༔ ཤར་ལྷོ་མཚམས་ཀྱི་དུར་ཁྲོད་ནས༔ དམ་ཚིག་ཅན་གྱི་མཁའ་འགྲོ་འབུམ༔ བསྐང་ངོ་མཆོད་དོ་ཐུགས་དམ་བསྐང་༔ ལྷོ་ནུབ་མཚམས་ཀྱི་དུར་ཁྲོད་ནས༔ སྣ་ཚོགས་རིགས་ཀྱི་མཁའ་འགྲོ་འབུམ༔ བསྐང་ངོ་མཆོད་དོ་ཐུགས་དམ་བསྐང་༔ ནུབ་བྱང་མཚམས་ཀྱི་དུར་ཁྲོད་ནས༔ ཐམས་ཅད་རིགས་ཀྱི་མཁའ་འགྲོ་འབུམ༔ བསྐང་ངོ་མཆོད་དོ་ཐུགས་དམ་བསྐང་༔ བྱང་ཤར་མཚམས་ཀྱི་དུར་ཁྲོད་ནས༔ འཇིག་རྟེན་རིགས་ཀྱི་མཁའ་འགྲོ་འབུམ༔ བསྐང་ངོ་མཆོད་དོ་ཐུགས་དམ་བསྐང་༔ ཐུགས་དམ་བསྐང་བའི་དམ་རྫས་ནི༔ ཕྱི་མཆོད་ཉེར་སྤྱོད་འདོད་ཡོན་ལྔ༔ ནང་མཆོད་ཤ་ལྔ་བདུད་རྩི་ལྔ༔ གསང་མཆོད་སྨན་གཏོར་རཀྟ་ཚོགས༔ བླ་མེད་མཆོད་པ་སྦྱོར་དང་སྒྲོལ༔ སྡེ་བརྒྱད་མཁའ་འགྲོའི་ཐུགས་དམ་བསྐང་༔ ཧཱུྃ༔ གཞན་ཡང་ཐུགས་དམ་བསྐང་བ་ནི༔ གནས་མཆོག་ཉི་ཤུ་རྩ་བཞི་ནས༔ མཁའ་འགྲོའི་གཙོ་མོ་ཉེར་བཞི་ལ༔ འཁོར་གྱི་མཁའ་འགྲོ་འབུམ་འབུམ་བཅས༔ བསྐང་ངོ་མཆོད་དོ་ཐུགས་དམ་བསྐང་༔ ཐུགས་དམ་བསྐང་བའི་དམ་རྫས་ནི༔ ཕྱི་མཆོད་ཉེར་སྤྱོད་འདོད་ཡོན་ལྔ༔ ནང་མཆོད་ཤ་ལྔ་བདུད་རྩི་ལྔ༔ གསང་མཆོད་སྨན་གཏོར་རཀྟ་ཚོགས༔ བླ་མེད་མཆོད་པ་སྦྱོར་དང་སྒྲོལ༔ ཉེར་བཞིའི་མཁའ་འགྲོ་ཐུགས་དམ་བསྐང་༔ ཧཱུྃ༔ གཞན་ཡང་ཐུགས་དམ་བསྐང་བ་ནི༔ ཡུལ་ཆེན་སུམ་ཅུ་རྩ་གཉིས་ནས༔ མཁའ་འགྲོའི་གཙོ་མོ་སོ་གཉིས་ལ༔ འཁོར་གྱི་མཁའ་འགྲོ་འབུམ་འབུམ་བཅས༔ བསྐང་ངོ་མཆོད་དོ་ཐུགས་དམ་བསྐང་༔ ཐུགས་དམ་བསྐང་བའི་དམ་རྫས་ནི༔ ཕྱི་མཆོད་ཉེར་སྤྱོད་འདོད་ཡོན་ལྔ༔ ནང་མཆོད་ཤ་ལྔ་བདུད་རྩི་ལྔ༔ གསང་མཆོད་སྨན་གཏོར་རཀྟ་ཚོགས༔ བླ་མེད་མཆོད་པ་སྦྱོར་དང་སྒྲོལ༔ ཡུལ་གྱི་མཁའ་འགྲོའི་ཐུགས་དམ་བསྐང་༔ ཧཱུྃ༔ གཞན་ཡང་ཐུགས་དམ་བསྐང་བ་ནི༔ གནས་དང་ཞིང་དང་ཉེ་བའི་གནས༔ ཉེ་བའི་མཐུན་སྤྱོད་དུར་ཁྲོད་དང་༔ ཉེ་བའི་ཚན་དྷོ་ཧར་བཞུགས་པའི༔ གཙོ་མོ་ཡེ་ཤེས་མཁའ་འགྲོ་ལ༔ འདས་དང་མ་འདས་འཁོར་གྱིས་བསྐོར༔ བསྐང་ངོ་མཆོད་དོ་ཐུགས་དམ་བསྐང་༔ ཐུགས་དམ་བསྐང་བའི་དམ་རྫས་ནི༔ ཕྱི་མཆོད་ཉེར་སྤྱོད་འདོད་ཡོན་ལྔ༔ ནང་མཆོད་ཤ་ལྔ་བདུད་རྩི་ལྔ༔ གསང་མཆོད་སྨན་གཏོར་རཀྟ་ཚོགས༔ བླ་མེད་མཆོད་པ་སྦྱོར་དང་སྒྲོལ༔ ཡེ་ཤེས་འཇིག་རྟེན་འབུམ་གྱི་ཐུགས་དམ་བསྐང་༔ ཧཱུྃ༔ གཞན་ཡང་ཐུགས་དམ་བསྐང་བ་ནི༔ གནས་ལས་སྐྱེས་དང་ཞིང་ལས་སྐྱེས༔ སྔགས་ལས་སྐྱེས་དང་ལས་ལས་སྐྱེས༔ ཡེ་ཤེས་དབྱིངས་ལས་སྤྲུལ་བའི་མ༔ སྤྲུལ་པ་འབུམ་སྡེའི་ཐུགས་དམ་བསྐང་༔ ཐུགས་དམ་བསྐང་བའི་དམ་རྫས་ནི༔ ཕྱི་མཆོད་ཉེར་སྤྱོད་འདོད་ཡོན་ལྔ༔ ནང་མཆོད་ཤ་ལྔ་བདུད་རྩི་ལྔ༔ གསང་མཆོད་སྨན་གཏོར་རཀྟ་ཚོགས༔ བླ་མེད་མཆོད་པ་སྦྱོར་དང་སྒྲོལ༔ སྤྲུལ་པའི་མཁའ་འགྲོའི་ཐུགས་དམ་བསྐང་༔ མུན་ལྟར་གཏིབས་པས་ཐུགས་དམ་བསྐང་༔ ཉི་ལྟར་མདངས་ལྡན་ཐུགས་དམ་བསྐང་༔ ཟླ་ལྟར་གསལ་བས་ཐུགས་དམ་བསྐང་༔ རི་ལྟར་སྤུངས་པས་ཐུགས་དམ་བསྐང་༔ མུ་མཐར་ཁྱབ་པས་ཐུགས་དམ་བསྐང་༔ ཧཱུྃ༔ ཐུགས་དམ་བསྐང་བའི་བྱིན་རླབས་ཀྱིས༔ རིག་འཛིན་རྣལ་འབྱོར་བདག་ཅག་གི༔ དམ་ཚིགས་ཉམས་ཆག་བསྐང་དུ་གསོལ༔ སྔོན་གྱི་ལས་དང་འཕྲལ་གྱི་རྐྱེན༔ མི་མཐུན་བར་ཆད་ཟློག་ཏུ་གསོལ༔ ཐོས་བསམ་བསྒོམ་གསུམ་ཉམས་རྟོགས་དྲོད༔ མི་རྟོག་ཡེ་ཤེས་བསྐྱེད་དུ་གསོལ༔ ལས་བཞིའི་འཕྲིན་ལས་དགྲ་བགེགས་སྒྲོལ༔ དབང་བསྡུས་ཟས་ནོར་ཆར་ལྟར་ཕོབ༔ མཆོག་དང་ཐུན་མོང་དངོས་གྲུབ་དཔལ༔ དམ་པ་མཆོག་རྣམས་སྩལ་དུ་གསོལ༔ བདག་གི་ཤེས་རྒྱུད་རྨོངས་པས་སྒྲིབས༔ མཁའ་འགྲོའི་དམ་ཚིག་ཅི་འགལ་བ༔ སྐྱེ་མེད་ཀློང་དུ་མཐོལ་ལོ་བཤགས༔ འགག་མེད་ཀློང་དུ་སོར་ཆུད་ཅིག༔ སྐྱེ་འགག་མཐའ་བྲལ་དངོས་གྲུབ་སྩོལ༔ དབྱིངས་ནས་བཀའ་ཆད་མ་གཏོང་ཞིག༔ ཉམས་པ་སྐོངས་ལ་ཆགས་པ་སོལ༔ སྐུ་བཞིའི་ཡེ་ཤེས་མངོན་གྱུར་སྩོལ༔ ཅེས་བརྗོད་ཉམས་དབྱངས་གླུ་གར་བྱ༔ མི་རྟོག་ཡེ་ཤེས་རང་ངོར་བལྟ༔ ཉམས་ཆགས་རྟོག་སྒྲིབ་ཀུན་བྱང་ནས༔ དངོས་གྲུབ་རྣམ་གཉིས་མྱུར་དུ་འཐོབ༔ དེ་ཕྱིར་ཉམས་སུ་ལོངས་ཤིག་བུ༔ ས་མ་ཡཱ༔ རྒྱ་རྒྱ་རྒྱ༔ གཏེར་རྒྱ༔ སྦས་རྒྱ༔ ཟབ་རྒྱ༔ ས་མ་ཡཱ༔ རྒྱ་རྒྱ་རྒྱ༔ སཱུརྱ་ཀིར་ཏིས་ཁམས་སྲིང་མོ་རྫོང་གི་ཆགས་རུ་གསང་ཕུག་ནས་ས་རྟ་ལ་གཏེར་ནས་བཏོན་ཞིང་ལྕགས་བྱ་ལ་ཤོག་སེར་ལས་མགྱོགས་པར་དཀྱུས་ཏེ་ཞལ་བཤུས་པའོ།། །།མངྒ་ལཾ།། །།

ཐུགས་དམ་བསྐུལ་ཆོག་རྔམ་པ་སྒྲ་སྒྲོགས།

ཕག་མོ་ནག་མོའི་ཟབ་ཐིག་ལས༔ ཐུགས་དམ་བསྐུལ་ཆོག་རྔམ་པ་སྒྲ་སྒྲོགས་བཞུགས༔ མཁའ་འགྲོའི་ཚོགས་ལ་ཕྱག་འཚལ་ལོ༔ ཕག་མོ་ནག་མོའི་རྣལ་འབྱོར་པས༔ ལས་བཞིའི་འཕྲིན་ལས་བསྙེན་སྒྲུབ་དུས༔ ཐུགས་དམ་གནད་ནས་བསྐུལ་བ་ནི༔ གསེར་སྐྱེམས་བཤོས་བུ་བྱིན་རླབས་སྦྲན༔ ཐོད་རྔ་རྐང་གླིང་རོལ་མོ་འཁྲོལ༔ ལྟ་བ་གདེངས་བསྐྱེད་ལྷར་གསལ་ཞིང་༔ འོད་སྤྲོ་གནད་བསྐུལ་འདི་སྐད་དོ༔ ཧཱུྃ༔ ཆོས་དབྱིངས་མཁའ་འགྲོ་བཞུགས་པའི་གནས༔ འབུམ་ཕྲག་མཁའ་འགྲོ་འདུ་བའི་གླིང་༔ རི་བོ་ཆེན་པོའི་བྱང་གི་ཕྱོགས༔ རྩུབ་འགྱུར་ཚལ་གྱི་ནུབ་བྱང་ན༔ ཀེང་རུས་གྲམ་ཁྲོད་སྤུངས་པའི་རི༔ མདའ་མདུང་མཚོན་ཆའི་ནགས་ཚལ་གཏིབས༔ ཤ་ཁྲག་རྒྱ་མཚོ་མུ་མཐའ་མེད༔ རྒྱོབ་སོད་སྒྲ་སྐད་དི་རི་རི༔ མེ་རླུང་འཚུབ་མ་ཀྱིལ་ལི་ལི༔ ནད་མཚོན་དུག་རླངས་ཐུ་ལུ་ལུ༔ རབ་ཏུ་འཇིགས་པའི་གནས་མཆོག་ན༔ གད་རྒྱང་ཧ་ཧའི་སྒྲ་སྒྲོག་མ༔ ཕག་གདོང་ནག་མོ་དབྱིངས་ནས་བཞེངས༔ ཤ་ཁྲག་དམར་གྱི་གཏོར་མ་བཞེས༔ ཐུགས་དམ་བསྐུལ་ལོ་འཕྲིན་ལས་མཛོད༔ ཧཱུྃ༔ དུར་ཁྲོད་འཁོར་ལོའི་རྩིབས་བཞི་ནས༔ ཐུགས་དམ་དབྱིངས་ནས་བསྐུལ་བ་ནི༔ ཤར་ནས་བདེ་ཆེན་དཀར་མོ་ལ༔ རང་འདྲའི་སྤྲུལ་པ་འབུམ་དང་བཅས༔ ཤ་ཁྲག་གཏོར་མ་འདི་བཞེས་ལ༔ ཐུགས་དམ་བསྐུལ་ལོ་འཕྲིན་ལས་མཛོད༔ ལྷོ་ནས་སེར་མོ་དོན་གྲུབ་ལ༔ རང་འདྲའི་སྤྲུལ་པ་འབུམ་དང་བཅས༔ ཤ་ཁྲག་གཏོར་མ་འདི་བཞེས་ལ༔ ཐུགས་དམ་བསྐུལ་ལོ་འཕྲིན་ལས་མཛོད༔ ནུབ་ནས་དམར་མོ་སྒྲ་སྒྲོག་ལ༔ རང་འདྲའི་སྤྲུལ་པ་འབུམ་དང་བཅས༔ ཤ་ཁྲག་གཏོར་མ་འདི་བཞེས་ལ༔ ཐུགས་དམ་བསྐུལ་ལོ་འཕྲིན་ལས་མཛོད༔ བྱང་ནས་སྣ་ཚོགས་མཐར་ཕྱིན་ལ༔ རང་འདྲའི་སྤྲུལ་པ་འབུམ་དང་བཅས༔ ཤ་ཁྲག་གཏོར་མ་འདི་བཞེས་ལ༔ ཐུགས་དམ་བསྐུལ་ལོ་འཕྲིན་ལས་མཛོད༔ ཧཱུྃ༔ དུར་ཁྲོད་ཆེན་པོའི་གནས་བརྒྱད་ནས༔ ལས་བྱེད་སྡེ་བརྒྱད་མཁའ་འགྲོ་ལ༔ རང་འདྲའི་སྤྲུལ་པ་འབུམ་དང་བཅས༔ ཤ་ཁྲག་གཏོར་མ་འདི་བཞེས་ལ༔ ཐུགས་དམ་བསྐུལ་ལོ་འཕྲིན་ལས་མཛོད༔ ཧཱུྃ༔ གཙོ་མོའི་བཀའ་ཡི་དཀྱིལ་འཁོར་ནས༔ འབུམ་ཕྲག་ཡངས་པའི་མཁའ་འགྲོ་ལ༔ རང་འདྲའི་སྤྲུལ་པ་འབུམ་དང་བཅས༔ ཤ་ཁྲག་གཏོར་མ་འདི་བཞེས་ལ༔ ཐུགས་དམ་བསྐུལ་ལོ་འཕྲིན་ལས་མཛོད༔ ཧཱུྃ༔ དབྱིངས་ནས་བཞེངས་ཤིག་ཕག་གདོང་མ༔ དྲག་ཏུ་བསྐྱོད་ཅིག་ཁྲོས་མ་ནག༔ ལས་ལ་བསྐུལ་ལོ་དྷཀྐིའི་ཚོགས༔ སངས་རྒྱས་བསྟན་ལ་གནོད་པའི་དགྲ༔ རིག་འཛིན་རྣལ་འབྱོར་སྒོས་ཀྱི་དགྲ༔ གསང་སྔགས་ཆོས་ལ་དམོད་པ་རྣམས༔ གཟུགས་བྱད་ལིངྒ་འདི་ལ་ཁུག༔ མིང་ཡིག་བྱང་བུ་འདི་ལ་ཁུག༔ དྲི་སྣབས་ཟག་རྫས་འདི་ལ་ཁུག༔ མྱུར་དུ་ཁུག་ལ་དྲག་དུ་སྒྲོལ༔ མ་གཏོང་དགྲ་བོ་ཤོར་ར་རེ༔ དགྲ་བོའི་ཤ་ཁྲག་དོན་སྙིང་བཞེས༔ དོ་ནུབ་སྡང་བའི་དགྲ་ལ་བྷྱོ༔ དོ་ནུབ་གནོད་པའི་བགེགས་ལ་བྷྱོ༔ དོ་ནུབ་ཟ་བའི་འདྲེ་ལ་བྷྱོ༔ དགྲ་དཔུང་བདུན་བརྒྱུད་རྩད་ནས་ཆོད༔ བགེགས་དཔུང་ཐལ་བའི་རྡུལ་དུ་རློགས༔ བཅོལ་བའི་འཕྲིན་ལས་གྲུབ་པར་མཛོད༔ ཨཱོཾ་བཛྲ་ཀྲོ་ཏ་ཀཱ་ལི་ཧ་རི་ནི་ས་སརྦ་དུཥྟན་བྷྱོ་བྷྱོ༔ ཨ་ཡ་མ་ཁྲེ་པ་ས་མ་ཡ༔ ལོ་ཀ་སྟམ་བྷ་ཡ༔ བྱད་མ་དགྲ་བོ་ཧཱུྃ་ཧཱུྃ་བྷྱོ་བྷྱོ་ཟློག་ཟློག༔ ཅེས་གཏོར་མ་འཕེན་ཞིང་གཡབ་མོ་བརྡབ༔ མཁའ་འགྲོའི་འགྱུ་བཟློག་བསྟུན་པར་བྱ༔ དགྲ་བགེགས་མ་ལུས་སྒྲོལ་བ་དང་༔ སྒྲུབ་པའི་བར་ཆད་བཟློག་པར་ངེས༔ ས་མ་ཡཱ༔ རྒྱ་རྒྱ་རྒྱ༔ གཏེར་རྒྱ༔ སྦས་རྒྱ༔ ཟབ་རྒྱ༔ ས་མ་ཡཱ༔ རྒྱ་རྒྱ་རྒྱ༔ རིགས་འཛིན་ཆེན་པོ་སཱུཪྻ་ཀིར་ཏིས་ས་སྲིང་མོ་རྫོང་ནས་ས་ཕོ་རྟའི་ལོ་ལ་གདན་དྲངས་ཤིང་ལྕགས་མོ་བྱའི་ལོ་ལ་ཤོག་སེར་ལས་ཕབ་པའོ། །མངྒ་ལཾ།། །།

བསྒྲལ་ལས་སྤུ་གྲི་རེག་གཅོད།

ཕག་མོ་ནག་མོའི་ཟབ་ཐིག་ལས༔ བསྒྲལ་ལས་སྤུ་གྲི་རེག་གཅོད་བཞུགས༔ མཁའ་འགྲོའི་ཚོགས་ལ་ཕྱག་འཚལ་ལོ༔ གཏོར་བཟློག་གི་མདུན་དུ་འབྲུབ་ཁུང་ནང་དུ་དགྲ་བོའི་ལིངྒ་གཞུག་ཅིང་༔ གཡས་གཡོན་མཐའ་སྐོར་རྣམས་སུ་ཐུན་རྫས་རྣམས་དགོད༔ ཕུད་དང་ཐུན་གཏོར་ལྷ་དབྱེའི་རྫས་རྣམས་ཀྱང་བཤམས་ཤིང་༔ རང་ཉིད་ཁྲོ་མོའི་ང་རྒྱལ་དྲག་ཏུ་བསྐྱེད་ལ༔ རང་གི་ཐུགས་ཀ་ནས་ཨེ་མཐིང་ནག་ཅིག་ཁྲ་ཐབས་སུ་མདུན་དུ་འཕྲོས་པ་ལས༔ གནམ་ལྕགས་འབར་བའི་ཁང་སྒྲོམ་གྲུ་གསུམ་ལ༔ དམ་ཉམས་པའི་དགྲ་བོའི་ལས་ངན་གྱི་རྣམ་པར་སྨིན་པ་ལས་གྲུབ་པ༔ སྐྱི་བུང་ཞིང་ཡ་ང་བ༔ མཐིལ་ཡངས་ཤིང་ཁ་དོག་པ༔ དྲི་ང་ཞིང་ཁྲག་གི་མཚོ་ཁོལ་བ༔ ལས་བྱེད་ཀྱི་མཁའ་འགྲོ་ཕྲ་མེན་འབུམ་ཕྲག་མང་པོ་སྐར་ལྟར་དུ་འཁྲུག་ཅིང་རྡུལ་ལྟར་དུ་འཚུབ་པ༔ དུག་གསུམ་མུན་པའི་སྨག་རུམ་འཐིབ་ཅིང་༔ དུག་ལྔ་དྲག་པོའི་ལས་ཁང་ཆེན་པོའི་ནང་དུ༔ སྲོག་སྙིང་ནྲི་དང་ཏྲི་ཡོངས་སུ་གྱུར་པ་ལས་དགྲའམ་བགེགས་གང་ཡིན་པ་དེ་ཉིད༔ ཁ་དོག་སྔོ་ལ་གཟུགས་བྱད་རིད་པ༔ ཡན་ལག་ལྕགས་སུ་བཅུག་ཅིང་མྱ་ངན་གྱི་སྨྲེ་སྔགས་གདུང་བ༔ མགོན་སྐྱོབ་ཀྱི་ལྷ་སྲུང་མེད་ཅིང་ཉམས་ཐག་པ་ཞིག་ཏུ་གྱུར༔ དེ་ནས་ལྕགས་ཀྱུའི་ཕྱག་རྒྱ་བྱ་ཞིང་བདེན་པའི་བཀའ་བསྒྲག་སྟེ༔ དགྲ་བོ་དེ་ཕུག་རོན་ཧོར་ཁྲས་དེད་པའམ༔ ཉ་མོ་སྲམ་གྱིས་བདས་པའམ༔ ར་ཁྱུ་འཕར་བས་དེད་པ་ལྟར་སྐད་ཅིག་རང་དབང་མེད་པར་ལས་བྱེད་ཀྱི་མ་མོ་མཁའ་འགྲོའི་ཚོགས་ཀྱིས་སྲིད་གསུམ་གང་དུའང་འདུག་པའི་དབང་མེད་པར་གཟུགས་ལ་བསྟིམས་པར་བསམ་ཏེ༔ ཕྱག་རྒྱ་བཞིས་རྒྱས་གདབ་ཅིང་༔ ཛ༔ ཧཱུྃ་བཾ་ཧོ༔ བཛྲ་ཨཾ་གུ་ཤ་ཛ༔ བཛྲ་པ་ཤ་ཧཱུྃ༔ བཛྲ་སྥོ་ཊ་བཾ༔ བཛྲ་གྷནྡྷེ་ཧོ༔ བཛྲ་ཨ་ཝེ་ཤ་ཡས་རྒྱས་འདེབས༔ དགྲ་བོ་འཁོར་བཅས་ཁང་སྒྲོམ་དུ་ཚུད་པར་བསམ༔ དེ་ནས་ཕུད་རྒོད་མཆོད་ཅིང་གཟུ་དཔང་ནི༔ ཧཱུྃ༔ མི་མངོན་དབྱིངས་ནས་དཀོན་མཆོག་གཟུ་དང་དཔང་༔ རྩ་གསུམ་མཁའ་འགྲོ་ཆོས་སྐྱོང་དགོངས་སུ་གསོལ༔ བདག་ནི་ཡང་དག་ངེས་པའི་རྣལ་འབྱོར་ཏེ༔ སྒོ་གསུམ་རྒྱལ་བའི་བཀའ་ལྟར་དང་བླངས་ཀྱང་༔ ཉམས་པའི་དགྲ་བོ་སྡིག་ཅན་ལས་ངན་འདིས༔ བྱང་ཆུབ་བསྒྲུབ་པའི་ཆོས་ལ་བར་བཅད་ཅིང་༔ དང་པོར་སངས་རྒྱས་བསྟན་པ་གཉེན་པོ་བཤིགས༔ བར་དུ་གསང་སྔགས་ཐེག་པའི་དམ་ཡང་བཀྲལ༔ ད་ལྟ་སྒྲུབ་པའི་རྣལ་འབྱོར་བདག་ལ་བསྡོས༔ བསྒྲལ་བའི་ཞིང་བཅུ་ཚང་བ་འདི་ཡིན་པས༔ རྩ་གསུམ་དཔའ་བོ་མཁའ་འགྲོ་ཆོས་སྐྱོང་རྣམས༔ མ་གཡེལ་མ་གཡེལ་འཕྲིན་ལས་དུས་ལ་བབས༔ ཞལ་ལྕེ་སྣང་སྲིད་ལྷ་འདྲེ་ཡོངས་ཀྱིས་མཛོད༔ ཟ་གསོད་སྤྲུལ་པས་དམ་ཉམས་དགྲ་བགེགས་སྒྲོལ༔ ཧཱུྃ༔ བདག་ནི་སངས་རྒྱས་བསྟན་པའི་སྒོར་ཞུགས་ཤིང་༔ རྩ་གསུམ་ལྷ་ཚོགས་བསྟེན་ཅིང་མཆོད་དེ་བསྒྲུབས༔ དེ་རིང་དམ་ཉམས་དགྲ་བོས་བར་དུ་བཅད༔ རེ་ཞིང་ལྟོས་པའི་ལྷ་ཚོགས་ར་མདར་བསྐུལ༔ དབང་མནོས་དམ་ཚིག་བསྲུངས་པ་དོན་མ་ཆུང་༔ བསྙེན་སྒྲུབ་ལྷ་ཚོགས་བསྟེན་པ་ཆུད་མ་གསོན༔ ཆོས་སྐྱོང་སྲུང་མ་རྣམས་ཀྱང་མཐུ་མ་ཆུང་༔ བརྒྱུད་པའི་རིག་འཛིན་སྲུང་མ་རྩལ་མ་ཞན༔ ཡུལ་ལྷ་གཞི་བདག་རྣམས་ཀྱང་བང་མ་བུལ༔ དེ་ནས་འཕྱར་དར་ནག་པོ་བརྡབ་ཅིང་དགྲ་བོའི་བླ་འགུགས་པ་ནི༔ ཧཱུྃ༔ ཁྲོ་མོའི་སྤྲུལ་པའི་དཀྱིལ་འཁོར་ནས༔ བླ་འགུགས་རྒྱལ་མོ་མཆིན་པའི་མདོག༔ ཁྲོས་པའི་ང་རོས་སྟོང་གསུམ་འགེངས༔ སྙོབ་པའི་ལག་པས་སྲིད་གསུམ་ཁྱབ༔ རྒྱུག་པའི་བང་གིས་ཁམས་གསུམ་བསྐོར༔ སྤྱན་གསུམ་བགྲད་ཅིང་བསྐོར་བའི་ཚེ༔ རྒྱ་མཚོ་ཆེན་པོ་ཁོལ་ཞིང་སྐེམ༔ ཞབས་གཉིས་བརྡབས་ཤིང་བསྐྱོད་པའི་ཚེ༔ སྟོང་གསུམ་ཀུན་ཀྱང་འདེགས་ཤིང་འགུལ༔ ཞལ་གདངས་རྐན་སྒྲ་རྡེབ་པའི་ཚེ༔ ཁམས་གསུམ་ཀུན་ཀྱང་ཟས་སུ་ཟ༔ ཁྲག་གི་ཆུ་རྒྱུན་འཁྲུག་པའི་ཚེ༔ སྲིད་གསུམ་ཀུན་ཀྱང་ནད་ཀྱིས་འགེངས༔ ལྷ་མོ་དཔལ་གྱི་སྤྲུལ་པ་སྟེ༔ མ་མོ་མཁའ་འགྲོའི་ཕོ་ཉ་མོ༔ དོ་ནུབ་མུན་པའི་སྨག་རུམ་ལ༔ ནམ་གྱི་ཕར་མ་ཚུར་ཕྱེད་དུས༔ དགྲ་བོའི་བླ་སྲོག་ཁུག་ལ་ཤོག༔ དོན་སྙིང་དམར་པོ་ཁྱེར་ལ་ཤོག༔ སྐྱོབ་པར་བྱེད་པའི་ལྷ་ལས་ཕྲོགས༔ འབྱུང་བ་ལྔ་ཡི་ཁམས་ནས་ཆོམས༔ བླ་སྲོག་རྣམ་ཤེས་མྱུར་དུ་ཁུག༔ ཆེ་གེ་མོ་བཛྲ་ཨཾ་གུ་ཤ་ཡ་ཛཿཛ༔ དེ་ནས་ཉེས་པ་བསྒྲགས་པ་ནི༔ ཧཱུྃ༔ དམ་ཉམས་དགྲ་བོ་ལས་ངན་ཁྱོད༔ དང་པོ་ཞེ་སྡང་ཕ་ལས་བསྐྱེད༔ དེ་ནས་འདོད་ཆགས་མ་ཡི་མངལ༔ ཐ་མར་མི་དགེ་བཅུ་ལ་སྤྱོད༔ ད་ལྟ་བསྒྲལ་བའི་ཞིང་བཅུར་གྱུར༔ ཁྲོ་མོ་འབར་བའི་གཏུན་ཁུང་དུ༔ ཁྲོ་བོའི་རྡོ་རྗེས་བརྡུང་བྱས་པས༔ རྣམ་པར་ཤེས་པ་རྡོ་རྗེར་སྒོམས༔ དེ་ནས་བྱ་རོག་དང་འུག་པའི་སྒྲོ་གཡུག་ཅིང་༔ ཧཱུྃ༔ ཕྲ་མེན་ཆེན་མོའི་དུས་ལ་བབས༔ བསྐུལ་ལོ་རི་རབ་ངོས་ནས་བསྐུལ༔ སྐྱོད་ཅིག་དགྲ་བོ་ལྷ་དང་ཕྱེས༔ མགོན་སྐྱོབ་བྱེད་པའི་ལྷ་སྲུང་རྣམས༔ མྱུར་དུ་བྱེར་ཞིག་གཞན་དུ་དེངས༔ བཀའ་ལ་མི་ཉན་མགོན་བྱེད་ན༔ ཡེ་ཤེས་ལྷ་ཡང་ཐུགས་དམ་ཉམས༔ འཇིག་རྟེན་ལྷ་ནི་རྡུལ་དུ་བརླག༔ དེ་བས་རང་རང་གནས་སུ་དེངས༔ ཨ་ནྲི་དྷེ་ཝ་ཏྲག་རཀྴ་མ་མ་རཱུ་ཏྲ་མཱ་ར་ཡ་ཕྱེ་ཕྱེ༔ དེ་ནས་གཙོ་མོའི་བསྐུལ་འདོན༔ ཐུན་གཏོར་འབུལ༔ ཁྱི་སྤུ་ར་བལ་སོགས་སྣལ་ཚོན་ཐོགས་ཏེ་བྱད་དུ་བཅུག་པ་ནི༔ ཧཱུྃ༔ བྱད་ཐག་ཞགས་པ་རྣམ་ལྔ་ཡིས༔ དམ་ཉམས་དགྲ་བོ་སྡིག་ཅན་འདིའི༔ ལུས་ངག་ཡིད་གསུམ་དམ་དུ་ཆིངས༔ དགྲ་བགེགས་ནྲི་ཏྲི་ཧ་ན་ཡ་ཧཱུྃ་ཕཊ༔ དུག་ཐུན་གྱིས་བྲབ་ཅིང་སྨྱོ་རུ་འཇུག་པ་ནི༔ ཧཱུྃ༔ བསྟན་པ་བཤིགས་པའི་དགྲ་དང་བགེགས༔ དབང་དུ་བསྡུས་ཏེ་ཟིལ་གྱིས་མནན༔ ཁྲོ་མོ་ཁྲོས་པའི་དུག་རླངས་ཀྱིས༔ སྨྱོ་འབོགས་ལུས་ངག་ཡིད་གསུམ་བརྒྱལ༔ དགྲ་བགེགས་ཛྭ་ལ་ས་མ་ཡ་ཧཱུྃ་ཧཱུྃ་ཕཊ༔ ལས་བྱེད་དྲག་ཏུ་བསྐུལ༔ དེ་ནས་ཐུན་རྫས་ཐམས་ཅད་ཁྲོ་མོའི་སྤྲུལ་པ་ཡང་སྤྲུལ་རྣམས་ཀྱིས་ཕྱག་ཏུ་བསྣམས་ཤིང་༔ མ་ཐོབ་བཞིན་དུ་དགྲ་བོ་ལ་བརྒྱབས་པས་ནད་མཚོན་དུག་གསུམ་གྱི་ཆར་ཆེན་པོས་དགྲ་བགེགས་ཐལ་བའི་རྡུལ་དུ་བརླག་པར་བསམས་ཤིང་༔ ཕུར་པ་སྤྲུལ་བའི་སྲས་མཆོག་ཏུ་མངའ་གསོལ་བ་ལ༔ འོད་ཟེར་སྤྲོ་བསྡུས་དབང་བླང་ཞིང་༔ ཕྲ་ཐབས་ཀྱི་ལས་བྱེད་དུ་མ་སྤྲོས་ཏེ་དགྲ་བོའི་ལིངྒ་ལ་བརྡེག་ཅིང་འདི་སྐད་དོ༔ ཧཱུྃ༔ རྡོ་རྗེ་ཕུར་པ་ཀཱི་ལཱ་ཡ༔ ཁྲོ་བོ་ཁྲོ་མོའི་སྲས་ཀྱི་མཆོག༔ ཡེ་ཤེས་མཁའ་འགྲོའི་ཐུགས་ཀྱི་སྤྲུལ༔ ལས་བྱེད་མཁའ་འགྲོའི་སྐུ་རུ་གསལ༔ གདེངས་པ་ཙམ་གྱིས་ཁམས་གསུམ་གཡོ༔ འདྲིལ་བ་ཙམ་གྱིས་སྲིད་གསུམ་འདར༔ བཏབ་ན་ལྷ་ཡང་བརླག་པར་བྱེད༔ དགྲ་དང་བགེགས་ལ་སྨོས་ཅི་དགོས༔ བཏབ་པས་ཐེབས་པར་མཛོད་ཅིག་ཀཱི་ལཱ་ཡ༔ ཧཱུྃ་ཧ་རི་ནི་ས་བཛྲ་ཀཱི་ལི་ཀཱི་ལཱ་ཧཱུྃ་ཕཊ༔ ཨ་ཝེ་ཤ་ཡ་ཨ༔ པྲ་ཝེ་ཤ་ཡ་ཕཊ༔ ཅེས་བརྗོད་ཅིང་ཁོའི་སྙིང་དཀར་ནག་མཚམས་སུ་གདབས་པས༔ ཚེ་བསོད་ཀྱི་ངོ་བོ་ཐིག་ལེ་འོད་ལྔ་ལྡན་ནྲི་ཡིག་དང་བཅས་པར་ཕུར་པའི་རྩེ་མོས་རེག་པ་ཙམ་གྱིས་འོད་ཀྱི་རང་བཞིན་དུ་སེང་སྒྲ་དང་བཅས་ཏེ་འཕོས་ནས་རང་གི་སྙིང་གར་ཐིམ༔ སྟོབས་དང་གཟི་བརྗིད་ནུས་མཐུ་རྒྱས༔ རྣམ་པར་ཤེས་པ་ཕུར་པའི་ཁོང་གསེང་གི་ལམ་བརྒྱུད་དེ༔ ཆོས་དབྱིངས་སམ་སྲས་མཆོག་གི་ཐུགས་ཀར་ཐིམ་པར་བསམས་ཏེ༔ དར་ཅིག་དམིགས་མེད་དུ་བཞག༔ དེ་ནས་ཡུངས་ཐུན་ཐོགས་ཏེ༔ ཧཱུྃ༔ ཡུངས་ཀར་རྒྱལ་པོ་ཤ་རི་རམ༔ ཁྲོ་བོ་ཁྲོ་མོ་འདུས་པའི་སྐུ༔ དྲག་སྔགས་རྡོ་རྗེའི་ཐུན་ཆེན་འདིས༔ དགྲ་བགེགས་ཐལ་བ་རྡུལ་དུ་རློག༔ དྲག་སྔགས་བཟླས་ཞིང་ཡུངས་ཐུན་བྲབ༔ ཧཱུྃ༔ གནམ་ལྕགས་འབར་བའི་གྲི་གུག་འདི༔ ཁྲོ་མོ་འདུས་པ་མཚོན་ཆའི་ཐུན༔ དགྲ་བོའི་བླ་སྲོག་སྙིང་ལ་འདེབས༔ ལུས་ངག་ཐལ་བའི་རྡུལ་དུ་རློག༔ མཁའ་འགྲོའི་བསད་སྔགས་གྲི་གུག་གཏུབས༔ ཧཱུྃ༔ ཐོད་ཁྲག་རཀྟའི་རྦ་རླབས་འཁྲུག༔ མ་མོ་ཡོངས་རྫོགས་འདུས་པའི་སྐུ༔ གསོད་བྱེད་མ་མོའི་ཁྲག་ཐུན་རྒྱོབ༔ ནད་ཡམས་དལ་ཁ་ཆར་བཞིན་ཕོབ༔ དགྲ་བགེགས་ཐལ་བ་རྡུལ་དུ་རློག༔ དྲག་སྔགས་ཐོད་ཁྲག་དམར་པོས་བྲབ༔ ཧཱུྃ༔ ཁ་ཊྭཱཾ་རྩེ་གསུམ་དུག་གསུམ་འབར༔ སྐུ་གསུམ་མཁའ་འགྲོའི་མཚོན་ཆའི་སྐུ༔ དགྲ་བགེགས་དོན་སྙིང་ཚལ་པར་ཁོས༔ ལུས་ངག་ཐལ་བ་རྡུལ་དུ་རློག༔ དྲག་སྔགས་ཁ་ཊྭཱཾ་སྙིང་ལ་གདབ༔ ཧཱུྃ༔ འཛིན་བྱེད་ལྕགས་ཀྱུ་དྲག་མེ་འབར༔ རྡོ་རྗེ་མཁའ་འགྲོ་ཁྲོས་པའི་མཚོན༔ དགྲ་བགེགས་སྙིང་རྩ་ལྕགས་ཀྱུས་དྲོངས༔ སྲོག་རྩ་ཆོད་ལ་དོན་ཁྲག་ཕོས༔ དྲག་སྔགས་ལྕགས་ཀྱུས་ཙིཏྟ་ཕྱུངས༔ ཧཱུྃ༔ རྡོ་རྗེ་ཞགས་པ་འཁོར་ཞིང་གཏུབས༔ རིན་ཆེན་མཁའ་འགྲོ་ཁྲོས་པའི་མཚོན༔ དགྲ་བགེགས་ཡན་ལག་དུམ་བུར་གཏུབས༔ ལུས་ངག་ཡིད་གསུམ་རྡུལ་དུ་རློགས༔ དྲག་སྔགས་ཞགས་པས་ཡན་ལག་གཅོད༔ ཧཱུྃ༔ རྡོ་རྗེ་ལྕགས་སྒྲོག་འཁྲིལ་ཞིང་འཇོམས༔ པདྨ་མཁའ་འགྲོ་ཁྲོས་པའི་མཚོན༔ དགྲ་བགེགས་ཤ་རུས་སོ་སོར་ཕྱེས༔ སྡུག་བསྔལ་ཉམས་སུ་མྱོང་དུ་ཆུག༔ དྲག་སྔགས་ལྕགས་སྒྲོགས་འབར་བས་བརྡུང་༔ ཧཱུྃ༔ རྡོ་རྗེ་རྒྱ་གྲམ་ཁྲོ་ཆུ་ཁོལ༔ ལས་ཀྱི་མཁའ་འགྲོ་ཁྲོས་པའི་མཚོན༔ དགྲ་བགེགས་མགོ་ལུས་ཚལ་པར་ཁོས༔ ཤ་རུས་དོན་སྙིང་དུམ་བུར་གཏུབས༔ དྲག་སྔགས་སྣ་ཚོགས་རྡོ་རྗེས་བརྡུང་༔ ཧཱུྃ༔ ཐོད་དབྱུགས་གཅན་གཟན་མི་ཐོད་བརྔམ༔ དུར་ཁྲོད་མཁའ་འགྲོ་ཁྲོས་པའི་མཚོན༔ དགྲ་བགེགས་ཀླད་ཁྲག་ཞོ་ལྟར་དཀྲུགས༔ དབང་པོ་དོན་སྙིང་ཐལ་བར་རློག༔ དྲག་སྔགས་ཐོད་དབྱུག་འབར་བས་བརྡུང་༔ ཧཱུྃ༔ ཐབས་ཤེས་མདའ་གཞུ་སྲོག་ལ་བརྔམ༔ གསོད་བྱེད་མཁའ་འགྲོ་ཁྲོས་པའི་མཚོན༔ སྲོག་རྩ་ཆོད་ལ་སྙིང་རྩ་གཏུབས༔ བླ་སྲོག་ཐལ་བ་རྡུལ་དུ་རློག༔ དྲག་སྔགས་མདའ་མཚོན་སྙིང་ལ་བརྡེག༔ ཧཱུྃ༔ གནམ་ལྕགས་རལ་གྲི་ཚ་ཚ་འཕྲོ༔ ཤ་ཟ་མཁའ་འགྲོ་ཁྲོས་པའི་མཚོན༔ ལྔ་ཕུང་ཐལ་བ་རྡུལ་དུ་རློག༔ དགྲ་བགེགས་མ་ལུས་དུམ་བུར་གཏུབས༔ དྲག་སྔགས་རལ་གྲིས་གཏུབ་ཅིང་བསྒྲལ༔ ཧཱུྃ༔ སྟོབས་ཆེན་འདུས་པ་ལྕགས་རྡོའི་ཐུན༔ ཕྲ་མེན་མཁའ་འགྲོ་ཁྲོས་པའི་མཚོན༔ དགྲ་བགེགས་བླ་སྲོག་རྣམ་ཤེས་ཕྲོལ༔ སྐད་ཅིག་ཉིད་ལ་རྡུལ་དུ་རློག༔ དྲག་སྔགས་རྡོ་ཕྱེ་ལྕགས་ཕྱེས་བྲབ༔ ཧཱུྃ༔ དཔལ་གྱི་གཏོར་མ་ཟངས་སེ་ཟང་༔ ལས་བྱེད་མཁའ་འགྲོ་ཁྲོས་པའི་མཚོན༔ ཤ་ཟོ་ཁྲག་འཐུང་དོན་སྙིང་མུར༔ ལྷག་རྗེས་མེད་པར་རྡུལ་དུ་རློག༔ དྲག་སྔགས་གཏོར་མའི་ཟོར་ཡང་བརྡེག༔ མཚོན་ཆ་སྣ་ཚོགས་འབར་བས་གཏུབས༔ རྩ་བའི་སྔགས་ལ་ཁཱ་ཧི་གདགས༔ ལིང་རོ་བཟློག་པའི་གཏོར་མར་དབུལ༔ མ་མོ་མཁའ་འགྲོ་འཁོར་བཅས་ཀྱིས༔ དགྲ་བགེགས་ཤ་ཁྲག་དོན་སྙིང་རྣམས༔ ལྷག་མ་མེད་པར་བཞེས་པར་བསམས༔ བཟློག་པའི་འཕྲིན་ལས་བཅོལ་ནས་ཀྱང་༔ གཏོར་ཟོར་དགྲ་བགེགས་ཕྱོགས་སུ་འཕེན༔ བར་ཆད་དགྲ་བགེགས་རྡུལ་དུ་རློག༔ དེ་བས་གཅེས་སོ་སྙིང་ལ་རྒྱ༔ དམ་མེད་རྣམས་ལ་ཤོ་ར་རེ༔ ཁ་བསགས་ཅན་ལ་ཨ་ཐམ་རྒྱ༔ ས་མ་ཡཱ༔ རྒྱ་རྒྱ་རྒྱ༔ གཏེར་རྒྱ༔ སྦས་རྒྱ༔ ཟབ་རྒྱ༔ ས་མ་ཡཱ༔ རྒྱ་རྒྱ་རྒྱ༔ རིག་འཛིན་ཆེན་པོ་ཉི་མ་གྲགས་པས་ཁམས་སྲིང་མོ་རྫོང་ནས་ས་རྟ་ལ་གདན་དྲངས་ཤིང་ལྕགས་བྱ་ལ་ཤོག་སེར་ལས་བོད་ཡིག་ཏུ་ཕབ་པའོ།། །།མངྒ་ལཾ།། །།

གཏོར་བཟློག་སྤུ་གྲི་འབར་བ།

ཕག་མོ་ནག་མོའི་ཟབ་ཐིག་ལས༔ གཏོར་བཟློག་སྤུ་གྲི་འབར་བ་བཞུགས༔ མཁའ་འགྲོའི་ཚོགས་ལ་ཕྱག་འཚལ་ལོ༔ དུར་ཁྲོད་ལ་སོགས་དབེན་གནས་སུ༔ མཎྜལ་གྲི་ཁྲག་རོ་སོལ་བྱུག༔ ཆོས་འབྱུང་ཐོད་ར་མེ་རིས་བསྐོར༔ ཚོན་གྱིས་བསྒྱུར་ཞིང་མཛེས་པར་བྱ༔ དབུས་སུ་མཉྫུའི་ཁྲིའུ་ཁར༔ ཟངས་ལྕགས་བྷན་དྷའི་སྣོད་ནང་དུ༔ འབྲུ་ནག་ཕྱེ་ལ་དཔལ་བཤོས་བྱ༔ ལྷ་གྲངས་མཉམ་པའི་མཐའ་མ་ན༔ ཤ་དུམ་ཨུག་ཀྱུ་ཅི་མང་བསགས༔ དགྲ་བོའི་ལིངྒ་དོན་སྙིང་དང་༔ ཚིལ་ཆེན་དཔལ་འབར་ཤ་སྣས་བརྒྱན༔ རྩང་དང་རྒྱུ་མའི་ཞགས་པས་བསྐོར༔ གཞན་ཡང་སྨན་གཏོར་རཀྟ་དང་༔ ཕྱི་ནང་མཆོད་ཚོགས་སྣ་ཚོགས་བཤམས༔ དགྲ་བོའི་ལིངྒ་མིང་རུས་བཅས༔ ཡང་ན་ཕོ་གདོན་མོ་གདོན་སོགས༔ གནོད་བྱེད་གང་ཡིན་ལིངྒ་ནི༔ ཧོམ་ཁུང་ཚད་ལྡན་ནང་དུ་གཞུག༔ ལས་གཞུང་བསྲང་ཞིང་བསྐྱེད་རིམ་གསལ༔ འཛབ་ཀྱི་ཁ་གསོ་ལས་བཞི་དང་༔ ཁྱད་པར་དྲག་པོའི་སྔགས་དམིགས་བསྒྱུར༔ ཐ་མ་ཚོགས་ཀྱི་བསྒྲལ་ལས་དུས༔ དགྲ་བོ་འགུགས་བསྟིམ་བསྒྲལ་ཞིང་བསྟབ༔ དགྲ་བོའི་ཤ་ཁྲག་དོན་སྙིང་བཅས༔ མ་མོ་མཁའ་འགྲོའི་ལྷ་ཚོགས་ཀྱིས༔ གཅན་གཟན་ཤ་ལ་རུབ་པ་ལྟར༔ ལྷག་མ་མེད་པར་བཞེས་པར་བསམས༔ སྔགས་པ་རལ་བའི་ཐོད་གདེང་བཅིངས༔ གདོང་ལ་དུག་ཁྲག་རོ་སོལ་བྱུག༔ རོལ་མོ་འཁྲོལ་ཞིང་རྔམ་སྟབས་བསྒྱུར༔ དྲག་པོའི་ང་རོས་འདི་སྐད་དོ༔ ཧཱུྃ་བྷྱོ༔ རབ་འཇིགས་དུར་ཁྲོད་ཐོད་མཁར་དབུས༔ བསྐལ་པའི་མེ་རླུང་དམར་ནག་ཀློང་༔ ཁྲག་ཞག་རྒྱ་མཚོའི་རྦ་ཀློང་འཁྲུག༔ བམ་གྱི་རི་ལ་ཀེང་རུས་གྲམ༔ དབང་པོ་ནང་རོལ་ལྷུ་དུམ་འཕྱོ༔ གནམ་ལྕགས་འབར་བའི་གཟེར་གྱིས་བསྡམས༔ ལྷ་ཀླུ་གནོད་སྦྱིན་བྲན་དུ་ཁོལ༔ ཐོག་དང་མཚོན་ཆའི་བུ་ཡུག་འཚུབ༔ གཅན་སྤྱང་དུར་བྱས་ཤ་ཁྲག་རོལ༔ རོ་ལངས་གར་བྱེད་ང་རོ་སྒྲོག༔ གིང་ཆེན་རྣམས་ཀྱིས་བྲོ་བརྡུང་ཞིང་༔ ཧཱུྃ་ཕཊ་གླུ་ལེན་འབྲུག་སྒྲ་ལྡིར༔ མཁའ་འགྲོ་རྣམས་ཀྱིས་བརྡ་སྐད་སྒྲོག༔ ཞིང་སྐྱོང་ཤ་ཟས་བཤུད་གླུ་ལེན༔ ཁྲོ་བཅུ་རྒྱུ་བར་མི་ནུས་པའི༔ རབ་ཏུ་འཇིགས་པའི་གནས་མཆོག་དེར༔ ཆོས་འབྱུང་འབར་བའི་ཕོ་བྲང་དབུས༔ ཏི་ར་ཉི་ཟླ་པདྨའི་སྟེང་༔ ཧཱུྃ་ཡིག་མཐིང་ནག་འཕྲོ་འདུ་ལས༔ རང་བྱུང་ལྷུན་གྲུབ་ཕག་མོ་ནག༔ མ་རིག་འཁྲུལ་བའི་གདོན་བགེགས་ཟློག༔ སྤྱི་བོའི་གཙུག་ན་ཕག་གདོང་ནག༔ མཚན་ལྟས་ངན་པའི་དགྲ་བགེགས་ཟློག༔ ཐོད་སྐམ་འབར་བས་དབུ་ལ་བརྒྱན༔ ཁྲག་འཐུང་མཁའ་འགྲོའི་བཀའ་ཆད་ཟློག༔ རིན་ཆེན་རྣམ་ལྔའི་རྩེ་བྲན་བརྒྱན༔ རིགས་ལྔའི་མཁའ་འགྲོའི་བཀའ་ཆད་ཟློག༔ སྤྱན་གསུམ་སྡང་མིག་དྲག་ཏུ་ཁྲོས༔ སྐུ་གསུམ་མཁའ་འགྲོའི་བཀའ་ཆད་ཟློག༔ སྐུ་ལ་དུར་ཁྲོད་ཆས་བརྒྱད་རྫོགས༔ སྡེ་བརྒྱད་མཁའ་འགྲོའི་བཀའ་ཆད་ཟློག༔ འོད་ཟེར་དམར་ནག་ཕྱོགས་བཅུར་འཕྲོ༔ ཕྱོགས་བཅུའི་མཁའ་འགྲོའི་བཀའ་ཆད་ཟློག༔ ཞབས་གཉིས་བརྐྱང་བསྐུམ་དོར་སྟབས་འགྱིང་༔ འཁོར་འདས་མཁའ་འགྲོའི་བཀའ་ཆད་ཟློག༔ ཕྱག་གཡས་གྲི་གུག་ནམ་མཁའ་འཕྱར༔ གསོད་བྱེད་མཁའ་འགྲོའི་བཀའ་ཆད་ཟློག༔ ཕྱག་གཡོན་ཐོད་ཁྲག་ཐུགས་ཀར་བསྐྱིལ༔ ནད་གཏོང་མཁའ་འགྲོའི་བཀའ་ཆད་ཟློག༔ བསྐལ་པའི་མེ་རི་སྨུག་ནག་འབར༔ འབུམ་ཕྲག་མཁའ་འགྲོའི་བཀའ་ཆད་ཟློག༔ བམ་ཆེན་མི་རོའི་གདན་ལ་འགྱིང་༔ དུར་ཁྲོད་མཁའ་འགྲོའི་བཀའ་ཆད་ཟློག༔ སྤྲུལ་པ་འབུམ་སྡེས་གནས་ཡུལ་སྐྱོང་༔ ཞིང་སྐྱོང་མཁའ་འགྲོའི་བཀའ་ཆད་ཟློག༔ ཞལ་གྱི་མཆེ་བ་ཟླ་ཚེས་གཙིགས༔ ཟ་བྱེད་མཁའ་འགྲོའི་བཀའ་ཆད་ཟློག༔ ལྗགས་ནི་བར་སྣང་གློག་ལྟར་འགྲིལ༔ སྤྲུལ་བའི་མཁའ་འགྲོའི་བཀའ་ཆད་ཟློག༔ སྨ་ར་སྨིན་མ་མེ་འོད་འཁྲུག༔ ལས་བྱེད་མཁའ་འགྲོའི་བཀའ་ཆད་ཟློག༔ རྡོ་རྗེ་ཁ་ཊྭཱཾ་ཡབ་ལ་འཁྲིལ༔ དཔའ་བོ་འབུམ་གྱི་བཀའ་ཆད་ཟློག༔ མཐིང་ནག་དར་ཀྱི་ཅོད་པན་འཕྱོ༔ ཕྲ་མེན་མཁའ་འགྲོའི་བཀའ་ཆད་ཟློག༔ ཧཱུྃ་བྷྱོ༔ ཤར་ཀྱི་ཕྱོགས་ཀྱི་དུར་ཁྲོད་ནས༔ རྡོ་རྗེ་མཁའ་འགྲོ་བྱེ་བ་འབུམ༔ དབྱིངས་ནས་སྐུ་བསྐྱོད་ཕྲིན་ལས་མཛོད༔ བཟློག་བསྒྱུར་མཛད་པའི་དུས་ལ་བབས༔ ཡེ་ཤེས་མཁའ་འགྲོའི་བཀའ་ཆད་ཟློག༔ འཇིག་རྟེན་མཁའ་འགྲོའི་བསུན་མ་ཟློག༔ ལས་བྱེད་མཁའ་འགྲོའི་ཕོ་ཉ་ཟློག༔ ཤ་ཟ་མཁའ་འགྲོའི་ཁྲམ་ཁ་ཟློག༔ ཕྲ་མེན་མཁའ་འགྲོའི་ངན་སྔགས་ཟློག༔ ལྟས་ངན་རྒྱད་བཅུ་རྩ་གཅིག་གིས༔ དངོས་སུ་གནོད་པ་གཏོར་མས་ཟློག༔ ཡེ་འབྲོག་སུམ་བརྒྱ་དྲུག་ཅུ་ལས༔ སྒོས་སུ་སྡང་བ་གཏོར་མས་ཟློག༔ གློ་བུར་བདུན་བརྒྱ་ཉི་ཤུ་ལས༔ བདག་ལ་སྡང་བ་གཏོར་མས་ཟློག༔ དུས་མིན་འཆི་བ་རྣམ་བརྒྱད་ལས༔ སྐག་ལ་བབས་པ་གཏོར་མས་ཟློག༔ ཡས་ཀྱི་བདུད་དུ་གཡོས་པའི་བགེགས༔ དམར་ཆེན་གཏོར་མ་འདི་ཡིས་ཟློག༔ མས་ཀྱི་སྲི་རུ་ལང་བའི་འདྲེ༔ དམར་ཆེན་གཏོར་མ་འདི་ཡིས་ཟློག༔ བར་གྱི་སྡེ་བརྒྱད་དམོད་པའི་ཚོགས༔ དམར་ཆེན་གཏོར་མ་འདི་ཡིས་ཟློག༔ བན་བོན་ངན་སྔགས་མནན་གཏད་བྱད༔ དམར་ཆེན་གཏོར་མ་འདི་ཡིས་ཟློག༔ བརྒྱ་ཡི་མི་ཁ་ངན་པ་ཡང་༔ དམར་ཆེན་གཏོར་མ་འདི་ཡིས་ཟློག༔ སྟོང་གི་བྲ་མཆུ་ངན་པ་ཡང་༔ དམར་ཆེན་གཏོར་མ་འདི་ཡིས་ཟློག༔ ཆགས་ཆེ་མཚན་ལྟས་ངན་པ་ཡང་༔ དམར་ཆེན་གཏོར་མ་འདི་ཡིས་ཟློག༔ ཆེ་སྲི་ཆུང་སྲི་གཞོན་སྲི་ཡང་༔ དམར་ཆེན་གཏོར་མ་འདི་ཡིས་ཟློག༔ སྤར་ཁའི་སྐྱ་མདའ་ཟུག་པ་ཡང་༔ དམར་ཆེན་གཏོར་མ་འདི་ཡིས་ཟློག༔ སྨེ་བ་དུར་དུ་ཆུད་པ་ཡང་༔ དམར་ཆེན་གཏོར་མ་འདི་ཡིས་ཟློག༔ རྒྱལ་པོ་ལོ་ཡི་བདུན་ཟུར་ཡང་༔ དམར་ཆེན་གཏོར་མ་འདི་ཡིས་ཟློག༔ དམག་མི་ཞག་གི་འཁྲུག་རྩོད་ཀྱང་༔ དམར་ཆེན་གཏོར་མ་འདི་ཡིས་ཟློག༔ ལོ་ཟླ་ཞག་དང་ཚེས་གྲངས་སྐག༔ དམར་ཆེན་གཏོར་མ་འདི་ཡིས་ཟློག༔ མི་མཐུན་ཕྱོགས་རིས་དགྲ་དང་བགེགས༔ དམར་ཆེན་གཏོར་མ་འདི་ཡིས་ཟློག༔ ཅེས་པ་འདི་རིགས་བཞི་ཆར་ལ་འགྲེས་ཤེས་པར་བྱའོ༔ ཧཱུྃ་བྷྱོ༔ ལྷོ་ཡི་ཕྱོགས་ཀྱི་དུར་ཁྲོད་ནས༔ རིན་ཆེན་མཁའ་འགྲོ་བྱེ་བ་འབུམ༔ དབྱིངས་ནས་སྐུ་བསྐྱོད་འཕྲིན་ལས་མཛོད༔ བཟློག་བསྒྱུར་མཛད་པའི་དུས་ལ་བབས༔ ཡེ་ཤེས་མཁའ་འགྲོའི་བཀའ་ཆད་ཟློག༔ འཇིག་རྟེན་མཁའ་འགྲོའི་བསུན་མ་ཟློག༔ ལས་བྱེད་མཁའ་འགྲོའི་ཕོ་ཉ་ཟློག༔ ཤ་ཟ་མཁའ་འགྲོའི་ཁྲམ་ཁ་ཟློག༔ ཕྲ་མན་མཁའ་འགྲོའི་ངན་སྔགས་ཟློག༔ ལྟས་ངན་བརྒྱད་ཅུ་རྩ་གཅིག་གིས༔ དངོས་སུ་གནོད་པ་གཏོར་མས་ཟློག༔ ཡེ་འབྲོག་སུམ་བརྒྱ་དྲུག་ཅུ་ལས༔ སྒོས་སུ་སྡང་བ་གཏོར་མས་ཟློག༔ གློ་བུར་བདུན་བརྒྱ་ཉི་ཤུ་ལས༔ བདག་ལ་སྡང་བ་གཏོར་མས་ཟློག༔ དུས་མིན་འཆི་བ་རྣམ་བརྒྱད་ལས༔ སྐག་ལ་བབས་པ་གཏོར་མས་ཟློག༔ ཡས་ཀྱི་བདུད་དུ་གཡོས་པའི་བགེགས༔ དམར་ཆེན་གཏོར་མ་འདི་ཡིས་ཟློག༔ མས་ཀྱི་སྲི་རུ་ལང་བའི་འདྲེ༔ དམར་ཆེན་གཏོར་མ་འདི་ཡིས་ཟློག༔ བར་གྱི་སྡེ་བརྒྱད་དམོད་པའི་ཚོགས༔ དམར་ཆེན་གཏོར་མ་འདི་ཡིས་ཟློག༔ བན་བོན་ངན་སྔགས་མནན་གཏད་བྱད༔ དམར་ཆེན་གཏོར་མ་འདི་ཡིས་ཟློག༔ བརྒྱ་ཡི་མི་ཁ་ངན་པ་ཡང་༔ དམར་ཆེན་གཏོར་མ་འདི་ཡིས་ཟློག༔ སྟོང་གི་བྲ་མཆུ་ངན་པ་ཡང་༔ དམར་ཆེན་གཏོར་མ་འདི་ཡིས་ཟློག༔ ཆགས་ཆེ་མཚན་ལྟས་ངན་པ་ཡང་༔ དམར་ཆེན་གཏོར་མ་འདི་ཡིས་ཟློག༔ ཆེ་སྲི་ཆུང་སྲི་གཞོན་སྲི་ཡང་༔ དམར་ཆེན་གཏོར་མ་འདི་ཡིས་ཟློག༔ སྤར་ཁའི་སྐྱ་མདའ་ཟུག་པ་ཀྱང་༔ དམར་ཆེན་གཏོར་མ་འདི་ཡིས་ཟློག༔ སྨེ་བ་དུར་དུ་ཆུད་པ་ཡང་༔ དམར་ཆེན་གཏོར་མ་འདི་ཡིས་ཟློག༔ རྒྱལ་པོ་ལོ་ཡི་བདུན་ཟུར་ཡང་༔ དམར་ཆེན་གཏོར་མ་འདི་ཡིས་ཟློག༔ དམག་མི་ཞག་གི་འཁྲུག་རྩོད་ཡང་༔ དམར་ཆེན་གཏོར་མ་འདི་ཡིས་ཟློག༔ ལོ་ཟླ་ཞག་དང་ཚེས་གྲངས་སྐག༔ དམར་ཆེན་གཏོར་མ་འདི་ཡིས་ཟློག༔ མི་མཐུན་ཕྱོགས་རིས་དགྲ་དང་བགེགས༔ དམར་ཆེན་གཏོར་མ་འདི་ཡིས་ཟློག༔ ཧཱུྃ་བྷྱོ༔ ནུབ་ཀྱི་ཕྱོགས་ཀྱི་དུར་ཁྲོད་ནས༔ པདྨ་མཁའ་འགྲོ་བྱེ་བ་འབུམ༔ དབྱིངས་ནས་སྐུ་བསྐྱོད་འཕྲིན་ལས་མཛོད༔ བཟློག་བསྒྱུར་མཛད་པའི་དུས་ལ་བབས༔ ཡེ་ཤེས་མཁའ་འགྲོའི་བཀའ་ཆད་ཟློག༔ འཇིག་རྟེན་མཁའ་འགྲོའི་བསུན་མ་ཟློག༔ ལས་བྱེད་མཁའ་འགྲོའི་ཕོ་ཉ་ཟློག༔ ཤ་ཟ་མཁའ་འགྲོའི་ཁྲམ་ཁ་ཟློག༔ ཕྲ་མན་མཁའ་འགྲོའི་ངན་སྔགས་ཟློག༔ ལྟས་ངན་བརྒྱད་ཅུ་རྩ་གཅིག་གིས༔ དངོས་སུ་གནོད་པ་གཏོར་མས་ཟློག༔ ཡེ་འབྲོག་སུམ་བརྒྱ་དྲུག་ཅུ་ལས༔ སྒོས་སུ་སྡང་བ་གཏོར་མས་ཟློག༔ གློ་བུར་བདུན་བརྒྱ་ཉི་ཤུ་ལས༔ བདག་ལ་སྡང་བ་གཏོར་མས་ཟློག༔ དུས་མིན་འཆི་བ་རྣམ་བརྒྱད་ལས༔ སྐག་ལ་བབས་པ་གཏོར་མས་ཟློག༔ ཡས་ཀྱི་བདུད་དུ་གཡོས་པའི་བགེགས༔ དམར་ཆེན་གཏོར་མ་འདི་ཡིས་ཟློག༔ མས་ཀྱི་སྲི་རུ་ལང་བའི་འདྲེ༔ དམར་ཆེན་གཏོར་མ་འདི་ཡིས་ཟློག༔ བར་གྱི་སྡེ་བརྒྱད་དམོད་པའི་ཚོགས༔ དམར་ཆེན་གཏོར་མ་འདི་ཡིས་ཟློག༔ བན་བོན་ངན་སྔགས་མནན་གཏད་བྱད༔ དམར་ཆེན་གཏོར་མ་འདི་ཡིས་ཟློག༔ བརྒྱ་ཡི་མི་ཁ་ངན་པ་ཡང་༔ དམར་ཆེན་གཏོར་མ་འདི་ཡིས་ཟློག༔ སྟོང་གི་བྲ་མཆུ་ངན་པ་ཡང་༔ དམར་ཆེན་གཏོར་མ་འདི་ཡིས་ཟློག༔ ཆགས་ཆེ་མཚན་ལྟས་ངན་པ་ཡང་༔ དམར་ཆེན་གཏོར་མ་འདི་ཡིས་ཟློག༔ ཆེ་སྲི་ཆུང་སྲི་གཞོན་སྲི་ཡང་༔ དམར་ཆེན་གཏོར་མ་འདི་ཡིས་ཟློག༔ སྤར་ཁའི་སྐྱ་མདའ་ཟུག་པ་ཡང་༔ དམར་ཆེན་གཏོར་མ་འདི་ཡིས་ཟློག༔ སྨེ་བ་དུར་དུ་ཆུད་པ་ཡང་༔ དམར་ཆེན་གཏོར་མ་འདི་ཡིས་ཟློག༔ རྒྱལ་པོ་ལོ་ཡི་བདུན་ཟུར་ཡང་༔ དམར་ཆེན་གཏོར་མ་འདི་ཡིས་ཟློག༔ དམག་མི་ཞག་གི་འཁྲུག་རྩོད་ཀྱང་༔ དམར་ཆེན་གཏོར་མ་འདི་ཡིས་ཟློག༔ ལོ་ཟླ་ཞག་དང་ཚེས་གྲངས་སྐག༔ དམར་ཆེན་གཏོར་མ་འདི་ཡིས་ཟློག༔ མི་མཐུན་ཕྱོགས་རིས་དགྲ་དང་བགེགས༔ དམར་ཆེན་གཏོར་མ་འདི་ཡིས་ཟློག༔ ཧཱུྃ་བྷྱོ༔ བྱང་གི་ཕྱོགས་ཀྱི་དུར་ཁྲོད་ནས༔ ལས་ཀྱི་མཁའ་འགྲོ་བྱེ་བ་འབུམ༔ དབྱིངས་ནས་སྐུ་སྐྱོད་འཕྲིན་ལས་མཛོད༔ བཟློག་བསྒྱུར་མཛད་པའི་དུས་ལ་བབས༔ ཡེ་ཤེས་མཁའ་འགྲོའི་བཀའ་ཆད་ཟློག༔ འཇིག་རྟེན་མཁའ་འགྲོའི་བསུན་མ་ཟློག༔ ལས་བྱེད་མཁའ་འགྲོའི་ཕོ་ཉ་ཟློག༔ ཤ་ཟ་མཁའ་འགྲོའི་ཁྲམ་ཁ་ཟློག༔ ཕྲ་མེན་མཁའ་འགྲོའི་ངན་སྔགས་ཟློག༔ ལྟས་ངན་བརྒྱད་ཅུ་རྩ་གཅིག་གིས༔ དངོས་སུ་གནོད་པ་གཏོར་མས་ཟློག༔ ཡེ་འབྲོག་སུམ་བརྒྱ་དྲུག་ཅུ་ལས༔ སྒོས་སུ་སྡང་བ་གཏོར་མས་ཟློག༔ གློ་བུར་བདུན་བརྒྱ་ཉི་ཤུ་ལས༔ བདག་ལ་སྡང་བ་གཏོར་མས་ཟློག༔ དུས་མིན་འཆི་བ་རྣམ་བརྒྱད་ལས༔ སྐག་ལ་བབས་པ་གཏོར་མས་ཟློག༔ ཡས་ཀྱི་བདུད་དུ་གཡོས་པའི་བགེགས༔ དམར་ཆེན་གཏོར་མ་འདི་ཡིས་ཟློག༔ མས་ཀྱི་སྲི་རུ་ལང་བའི་འདྲེ༔ དམར་ཆེན་གཏོར་མ་འདི་ཡིས་ཟློག༔ བར་གྱི་སྡེ་བརྒྱད་དམོད་པའི་ཚོགས༔ དམར་ཆེན་གཏོར་མ་འདི་ཡིས་ཟློག༔ བན་བོན་ངན་སྔགས་མནན་གཏད་བྱད༔ དམར་ཆེན་གཏོར་མ་འདི་ཡིས་ཟློག༔ བརྒྱ་ཡི་མི་ཁ་ངན་པ་ཡང་༔ དམར་ཆེན་གཏོར་མ་འདི་ཡིས་ཟློག༔ སྟོང་གི་བྲ་མཆུ་ངན་པ་ཡང་༔ དམར་ཆེན་གཏོར་མ་འདི་ཡིས་ཟློག༔ ཆགས་ཆེ་མཚན་ལྟས་ངན་པ་ཡང་༔ དམར་ཆེན་གཏོར་མ་འདི་ཡིས་ཟློག༔ ཆེ་སྲི་ཆུང་སྲི་གཞོན་སྲི་ཡང་༔ དམར་ཆེན་གཏོར་མ་འདི་ཡིས་ཟློག༔ སྤར་ཁའི་སྐྱ་མདའ་ཟུག་པ་ཡང་༔ དམར་ཆེན་གཏོར་མ་འདི་ཡིས་ཟློག༔ སྨེ་བ་དུར་དུ་ཆུད་པ་ཡང་༔ དམར་ཆེན་གཏོར་མ་འདི་ཡིས་ཟློག༔ རྒྱལ་པོ་ལོ་ཡི་བདུན་ཟུར་ཡང་༔ དམར་ཆེན་གཏོར་མ་འདི་ཡིས་ཟློག༔ དམག་མི་ཞག་གི་འཁྲུག་རྩོད་ཀྱང་༔ དམར་ཆེན་གཏོར་མ་འདི་ཡིས་ཟློག༔ ལོ་ཟླ་ཞག་དང་ཚེས་གྲངས་སྐག༔ དམར་ཆེན་གཏོར་མ་འདི་ཡིས་ཟློག༔ མི་མཐུན་ཕྱོགས་རིས་དགྲ་དང་བགེགས༔ དམར་ཆེན་གཏོར་མ་འདི་ཡིས་ཟློག༔ ཧཱུྃ་བྷྱོ༔ ཤར་ལྷོ་མཚམས་ཀྱི་དུར་ཁྲོད་ནས༔ དམ་ཚིག་མཁའ་འགྲོ་བྱེ་བ་འབུམ༔ དབྱིངས་ནས་སྐུ་སྐྱོད་འཕྲིན་ལས་མཛོད༔ བཟློག་བསྒྱུར་འཕྲིན་ལས་དུས་ལ་བབས༔ ཡེ་ཤེས་མཁའ་འགྲོའི་བཀའ་ཆད་ཟློག༔ འཇིག་རྟེན་མཁའ་འགྲོའི་བསུན་མ་ཟློག༔ ལས་བྱེད་མཁའ་འགྲོའི་ཕོ་ཉ་ཟློག༔ ཤ་ཟ་མཁའ་འགྲོའི་ཁྲམ་ཁ་ཟློག༔ ཕྲ་མེན་མཁའ་འགྲོའི་ངན་སྔགས་ཟློག༔ ལྟས་ངན་བརྒྱད་ཅུ་རྩ་གཅིག་གིས༔ དངོས་སུ་གནོད་པ་གཏོར་མས་ཟློག༔ ཡེ་འབྲོག་སུམ་བརྒྱ་དྲུག་ཅུ་ལས༔ སྒོས་སུ་སྡང་བ་གཏོར་མས་ཟློག༔ གློ་བུར་བདུན་བརྒྱ་ཉི་ཤུ་ལས༔ བདག་ལ་སྡང་བ་གཏོར་མས་ཟློག༔ དུས་མིན་འཆི་བ་རྣམ་བརྒྱད་ལས༔ སྐག་ལ་བབས་པ་གཏོར་མས་ཟློག༔ ཡས་ཀྱི་བདུད་དུ་གཡོས་པའི་བགེགས༔ དམར་ཆེན་གཏོར་མ་འདི་ཡིས་ཟློག༔ མས་ཀྱི་སྲི་རུ་ལང་བའི་འདྲེ༔ དམར་ཆེན་གཏོར་མ་འདི་ཡིས་ཟློག༔ བར་གྱི་སྡེ་བརྒྱད་དམོད་པའི་ཚོགས༔ དམར་ཆེན་གཏོར་མ་འདི་ཡིས་ཟློག༔ བན་བོན་ངན་སྔགས་མནན་གཏད་བྱད༔ དམར་ཆེན་གཏོར་མ་འདི་ཡིས་ཟློག༔ བརྒྱ་ཡི་མི་ཁ་ངན་པ་ཡང་༔ དམར་ཆེན་གཏོར་མ་འདི་ཡིས་ཟློག༔ སྟོང་གི་བྲ་མཆུ་ངན་པ་ཡང་༔ དམར་ཆེན་གཏོར་མ་འདི་ཡིས་ཟློག༔ ཆགས་ཆེ་མཚན་ལྟས་ངན་པ་ཡང་༔ དམར་ཆེན་གཏོར་མ་འདི་ཡིས་ཟློག༔ ཆེ་སྲི་ཆུང་སྲི་གཞོན་སྲི་ཡང་༔ དམར་ཆེན་གཏོར་མ་འདི་ཡིས་ཟློག༔ སྤར་ཁའི་སྐྱ་མདའ་ཟུག་པ་ཡང་༔ དམར་ཆེན་གཏོར་མ་འདི་ཡིས་ཟློག༔ སྨེ་བ་དུར་དུ་ཆུད་པ་ཡང་༔ དམར་ཆེན་གཏོར་མ་འདི་ཡིས་ཟློག༔ རྒྱལ་པོ་ལོ་ཡི་བདུན་ཟུར་ཡང་༔ དམར་ཆེན་གཏོར་མ་འདི་ཡིས་ཟློག༔ དམག་མི་ཞག་གི་འཁྲུག་རྩོད་ཀྱང་༔ དམར་ཆེན་གཏོར་མ་འདི་ཡིས་ཟློག༔ ལོ་ཟླ་ཞག་དང་ཚེས་གྲངས་སྐག༔ དམར་ཆེན་གཏོར་མ་འདི་ཡིས་ཟློག༔ མི་མཐུན་ཕྱོགས་རིས་དགྲ་དང་བགེགས༔ དམར་ཆེན་གཏོར་མ་འདི་ཡིས་ཟློག༔ ཧཱུྃ་བྷྱོ༔ ལྷོ་ནུབ་མཚམས་ཀྱི་དུར་ཁྲོད་ནས༔ སྣ་ཚོགས་མཁའ་འགྲོ་བྱེ་བ་འབུམ༔ དབྱིངས་ནས་སྐུ་སྐྱོད་འཕྲིན་ལས་མཛོད༔ བཟློག་བསྒྱུར་འཕྲིན་ལས་དུས་ལ་བབས༔ ཡེ་ཤེས་མཁའ་འགྲོའི་བཀའ་ཆད་ཟློག༔ འཇིག་རྟེན་མཁའ་འགྲོའི་བསུན་མ་ཟློག༔ ལས་བྱེད་མཁའ་འགྲོའི་ཕོ་ཉ་ཟློག༔ ཤ་ཟ་མཁའ་འགྲོའི་ཁྲམ་ཁ་ཟློག༔ ཕྲ་མེན་མཁའ་འགྲོའི་ངན་སྔགས་ཟློག༔ ལྟས་ངན་བརྒྱད་ཅུ་རྩ་གཅིག་གིས༔ དངོས་སུ་གནོད་པ་གཏོར་མས་ཟློག༔ ཡེ་འབྲོག་སུམ་བརྒྱ་དྲུག་ཅུ་ལས༔ སྒོས་སུ་སྡང་བ་གཏོར་མས་ཟློག༔ གློ་བུར་བདུན་བརྒྱ་ཉི་ཤུ་ལས༔ བདག་ལ་སྡང་བ་གཏོར་མས་ཟློག༔ དུས་མིན་འཆི་བ་རྣམ་བརྒྱད་ལས༔ སྐག་ལ་བབས་པ་གཏོར་མས་ཟློག༔ ཡས་ཀྱི་བདུད་དུ་གཡོས་པའི་བགེགས༔ དམར་ཆེན་གཏོར་མ་འདི་ཡིས་ཟློག༔ མས་ཀྱི་སྲི་རུ་ལང་བའི་འདྲེ༔ དམར་ཆེན་གཏོར་མ་འདི་ཡིས་ཟློག༔ བར་གྱི་སྡེ་བརྒྱད་དམོད་པའི་ཚོགས༔ དམར་ཆེན་གཏོར་མ་འདི་ཡིས་ཟློག༔ བན་བོན་ངན་སྔགས་མནན་གཏད་བྱད༔ དམར་ཆེན་གཏོར་མ་འདི་ཡིས་ཟློག༔ བརྒྱ་ཡི་མི་ཁ་ངན་པ་ཡང་༔ དམར་ཆེན་གཏོར་མ་འདི་ཡིས་ཟློག༔ སྟོང་གི་བྲ་མཆུ་ངན་པ་ཡང་༔ དམར་ཆེན་གཏོར་མ་འདི་ཡིས་ཟློག༔ ཆགས་ཆེ་མཚན་ལྟས་ངན་པ་ཡང་༔ དམར་ཆེན་གཏོར་མ་འདི་ཡིས་ཟློག༔ ཆེ་སྲི་ཆུང་སྲི་གཞོན་སྲི་ཡང་༔ དམར་ཆེན་གཏོར་མ་འདི་ཡིས་ཟློག༔ སྤར་ཁའི་སྐྱ་མདའ་ཟུག་པ་ཡང་༔ དམར་ཆེན་གཏོར་མ་འདི་ཡིས་ཟློག༔ སྨེ་བ་དུར་དུ་ཆུད་པ་ཡང་༔ དམར་ཆེན་གཏོར་མ་འདི་ཡིས་ཟློག༔ རྒྱལ་པོ་ལོ་ཡི་བདུན་ཟུར་ཡང་༔ དམར་ཆེན་གཏོར་མ་འདི་ཡིས་ཟློག༔ དམག་མི་ཞག་གི་འཁྲུག་རྩོད་ཀྱང་༔ དམར་ཆེན་གཏོར་མ་འདི་ཡིས་ཟློག༔ ལོ་ཟླ་ཞག་དང་ཚེས་གྲངས་སྐག༔ དམར་ཆེན་གཏོར་མ་འདི་ཡིས་ཟློག༔ མི་མཐུན་ཕྱོགས་རིས་དགྲ་དང་བགེགས༔ དམར་ཆེན་གཏོར་མ་འདི་ཡིས་ཟློག༔ ཧཱུྃ་བྷྱོ༔ ནུབ་བྱང་མཚམས་ཀྱི་དུར་ཁྲོད་ནས༔ ཐམས་ཅད་མཁའ་འགྲོ་བྱེ་བ་འབུམ༔ དབྱིངས་ནས་སྐུ་སྐྱོད་འཕྲིན་ལས་མཛོད༔ བཟློག་བསྒྱུར་འཕྲིན་ལས་དུས་ལ་བབས༔ ཡེ་ཤེས་མཁའ་འགྲོའི་བཀའ་ཆད་ཟློག༔ འཇིག་རྟེན་མཁའ་འགྲོའི་བསུན་མ་ཟློག༔ ལས་བྱེད་མཁའ་འགྲོའི་ཕོ་ཉ་ཟློག༔ ཤ་ཟ་མཁའ་འགྲོའི་ཁྲམ་ཁ་ཟློག༔ ཕྲ་མེན་མཁའ་འགྲོའི་ངན་སྔགས་ཟློག༔ ལྟས་ངན་བརྒྱད་ཅུ་རྩ་གཅིག་གིས༔ དངོས་སུ་གནོད་པ་གཏོར་མས་ཟློག༔ ཡེ་འབྲོག་སུམ་བརྒྱ་དྲུག་ཅུ་ལས༔ སྒོས་སུ་སྡང་བ་གཏོར་མས་ཟློག༔ གློ་བུར་བདུན་བརྒྱ་ཉི་ཤུ་ལས༔ བདག་ལ་སྡང་བ་གཏོར་མས་ཟློག༔ དུས་མིན་འཆི་བ་རྣམ་བརྒྱད་ལས༔ སྐག་ལ་བབས་པ་གཏོར་མས་ཟློག༔ ཡས་ཀྱི་བདུད་དུ་གཡོས་པའི་བགེགས༔ དམར་ཆེན་གཏོར་མ་འདི་ཡིས་ཟློག༔ མས་ཀྱི་སྲི་རུ་ལང་བའི་འདྲེ༔ དམར་ཆེན་གཏོར་མ་འདི་ཡིས་ཟློག༔ བར་གྱི་སྡེ་བརྒྱད་དམོད་པའི་ཚོགས༔ དམར་ཆེན་གཏོར་མ་འདི་ཡིས་ཟློག༔ བན་བོན་ངན་སྔགས་མནན་གཏད་བྱད༔ དམར་ཆེན་གཏོར་མ་འདི་ཡིས་ཟློག༔ བརྒྱ་ཡི་མི་ཁ་ངན་པ་ཡང་༔ དམར་ཆེན་གཏོར་མ་འདི་ཡིས་ཟློག༔ སྟོང་གི་བྲ་མཆུ་ངན་པ་ཡང་༔ དམར་ཆེན་གཏོར་མ་འདི་ཡིས་ཟློག༔ ཆགས་ཆེ་མཚན་ལྟས་ངན་པ་ཡང་༔ དམར་ཆེན་གཏོར་མ་འདི་ཡིས་ཟློག༔ ཆེ་སྲི་ཆུང་སྲི་གཞོན་སྲི་ཡང་༔ དམར་ཆེན་གཏོར་མ་འདི་ཡིས་ཟློག༔ སྤར་ཁའི་སྐྱ་མདའ་ཟུག་པ་ཡང་༔ དམར་ཆེན་གཏོར་མ་འདི་ཡིས་ཟློག༔ སྨེ་བ་དུར་དུ་ཆུད་པ་ཡང་༔ དམར་ཆེན་གཏོར་མ་འདི་ཡིས་ཟློག༔ རྒྱལ་པོ་ལོ་ཡི་བདུན་ཟུར་ཡང་༔ དམར་ཆེན་གཏོར་མ་འདི་ཡིས་ཟློག༔ དམག་མི་ཞག་གི་འཁྲུག་རྩོད་ཀྱང་༔ དམར་ཆེན་གཏོར་མ་འདི་ཡིས་ཟློག༔ ལོ་ཟླ་ཞག་དང་ཚེས་གྲངས་སྐག༔ དམར་ཆེན་གཏོར་མ་འདི་ཡིས་ཟློག༔ མི་མཐུན་ཕྱོགས་རིས་དགྲ་དང་བགེགས༔ དམར་ཆེན་གཏོར་མ་འདི་ཡིས་ཟློག༔ ཧཱུྃ་བྷྱོ༔ བྱང་ཤར་མཚམས་ཀྱི་དུར་ཁྲོད་ནས༔ འཇིག་རྟེན་མཁའ་འགྲོ་བྱེ་བ་འབུམ༔ དབྱིངས་ནས་སྐུ་སྐྱོད་འཕྲིན་ལས་མཛོད༔ བཟློག་བསྒྱུར་འཕྲིན་ལས་དུས་ལ་བབས༔ ཡེ་ཤེས་མཁའ་འགྲོའི་བཀའ་ཆད་ཟློག༔ འཇིག་རྟེན་མཁའ་འགྲོའི་བསུན་མ་ཟློག༔ ལས་བྱེད་མཁའ་འགྲོའི་ཕོ་ཉ་ཟློག༔ ཤ་ཟ་མཁའ་འགྲོའི་ཁྲམ་ཁ་ཟློག༔ ཕྲ་མེན་མཁའ་འགྲོའི་ངན་སྔགས་ཟློག༔ ལྟས་ངན་བརྒྱད་ཅུ་རྩ་གཅིག་གིས༔ དངོས་སུ་གནོད་པ་གཏོར་མས་ཟློག༔ ཡེ་འབྲོག་སུམ་བརྒྱ་དྲུག་ཅུ་ལས༔ སྒོས་སུ་སྡང་བ་གཏོར་མས་ཟློག༔ གློ་བུར་བདུན་བརྒྱ་ཉི་ཤུ་ལས༔ བདག་ལ་སྡང་བ་གཏོར་མས་ཟློག༔ དུས་མིན་འཆི་བ་རྣམ་བརྒྱད་ལས༔ སྐག་ལ་བབས་པ་གཏོར་མས་ཟློག༔ ཡས་ཀྱི་བདུད་དུ་གཡོས་པའི་བགེགས༔ དམར་ཆེན་གཏོར་མ་འདི་ཡིས་ཟློག༔ མས་ཀྱི་སྲི་རུ་ལང་བའི་འདྲེ༔ དམར་ཆེན་གཏོར་མ་འདི་ཡིས་ཟློག༔ བར་གྱི་སྡེ་བརྒྱད་དམོད་པའི་ཚོགས༔ དམར་ཆེན་གཏོར་མ་འདི་ཡིས་ཟློག༔ བན་བོན་ངན་སྔགས་མནན་གཏད་བྱད༔ དམར་ཆེན་གཏོར་མ་འདི་ཡིས་ཟློག༔ བརྒྱ་ཡི་མི་ཁ་ངན་པ་ཡང་༔ དམར་ཆེན་གཏོར་མ་འདི་ཡིས་ཟློག༔ སྟོང་གི་བྲ་མཆུ་ངན་པ་ཡང་༔ དམར་ཆེན་གཏོར་མ་འདི་ཡིས་ཟློག༔ ཆགས་ཆེ་མཚན་ལྟས་ངན་པ་ཡང་༔ དམར་ཆེན་གཏོར་མ་འདི་ཡིས་ཟློག༔ ཆེ་སྲི་ཆུང་སྲི་གཞོན་སྲི་ཡང་༔ དམར་ཆེན་གཏོར་མ་འདི་ཡིས་ཟློག༔ སྤར་ཁའི་སྐྱ་མདའ་ཟུག་པ་ཡང་༔ དམར་ཆེན་གཏོར་མ་འདི་ཡིས་ཟློག༔ སྨེ་བ་དུར་དུ་ཆུད་པ་ཡང་༔ དམར་ཆེན་གཏོར་མ་འདི་ཡིས་ཟློག༔ རྒྱལ་པོ་ལོ་ཡི་བདུན་ཟུར་ཡང་༔ དམར་ཆེན་གཏོར་མ་འདི་ཡིས་ཟློག༔ དམག་མི་ཞག་གི་འཁྲུག་རྩོད་ཀྱང་༔ དམར་ཆེན་གཏོར་མ་འདི་ཡིས་ཟློག༔ ལོ་ཟླ་ཞག་དང་ཚེས་གྲངས་སྐག༔ དམར་ཆེན་གཏོར་མ་འདི་ཡིས་ཟློག༔ མི་མཐུན་ཕྱོགས་རིས་དགྲ་དང་བགེགས༔ དམར་ཆེན་གཏོར་མ་འདི་ཡིས་ཟློག༔ ཧཱུྃ་བྷྱོ༔ གནས་མཆོག་ཉི་ཤུ་རྩ་བཞི་ནས༔ མཁའ་འགྲོའི་གཙོ་མོ་ཉེར་བཞི་ལ༔ འཁོར་གྱི་མཁའ་འགྲོ་འབུམ་འབུམ་བཅས༔ དབྱིངས་ནས་སྐུ་སྐྱོད་འཕྲིན་ལས་མཛོད༔ བཟློག་བསྒྱུར་འཕྲིན་ལས་དུས་ལ་བབས༔ ཡེ་ཤེས་མཁའ་འགྲོའི་བཀའ་ཆད་ཟློག༔ འཇིག་རྟེན་མཁའ་འགྲོའི་བསུན་མ་ཟློག༔ ལས་བྱེད་མཁའ་འགྲོའི་ཕོ་ཉ་ཟློག༔ ཤ་ཟ་མཁའ་འགྲོའི་ཁྲམ་ཁ་ཟློག༔ ཕྲ་མེན་མཁའ་འགྲོའི་ངན་སྔགས་ཟློག༔ ལྟས་ངན་བརྒྱད་ཅུ་རྩ་གཅིག་གིས༔ དངོས་སུ་གནོད་པ་གཏོར་མས་ཟློག༔ ཡེ་འབྲོག་སུམ་བརྒྱ་དྲུག་ཅུ་ལས༔ སྒོས་སུ་སྡང་བ་གཏོར་མས་ཟློག༔ གློ་བུར་བདུན་བརྒྱ་ཉི་ཤུ་ལས༔ བདག་ལ་སྡང་བ་གཏོར་མས་ཟློག༔ དུས་མིན་འཆི་བ་རྣམ་བརྒྱད་ལས༔ སྐག་ལ་བབས་པ་གཏོར་མས་ཟློག༔ ཡས་ཀྱི་བདུད་དུ་གཡོས་པའི་བགེགས༔ དམར་ཆེན་གཏོར་མ་འདི་ཡིས་ཟློག༔ མས་ཀྱི་སྲི་རུ་ལང་བའི་འདྲེ༔ དམར་ཆེན་གཏོར་མ་འདི་ཡིས་ཟློག༔ བར་གྱི་སྡེ་བརྒྱད་དམོད་པའི་ཚོགས༔ དམར་ཆེན་གཏོར་མ་འདི་ཡིས་ཟློག༔ བན་བོན་ངན་སྔགས་མནན་གཏད་བྱད༔ དམར་ཆེན་གཏོར་མ་འདི་ཡིས་ཟློག༔ བརྒྱ་ཡི་མི་ཁ་ངན་པ་ཡང་༔ དམར་ཆེན་གཏོར་མ་འདི་ཡིས་ཟློག༔ སྟོང་གི་བྲ་མཆུ་ངན་པ་ཡང་༔ དམར་ཆེན་གཏོར་མ་འདི་ཡིས་ཟློག༔ ཆགས་ཆེ་མཚན་ལྟས་ངན་པ་ཡང་༔ དམར་ཆེན་གཏོར་མ་འདི་ཡིས་ཟློག༔ ཆེ་སྲི་ཆུང་སྲི་གཞོན་སྲི་ཡང་༔ དམར་ཆེན་གཏོར་མ་འདི་ཡིས་ཟློག༔ སྤར་ཁའི་སྐྱ་མདའ་ཟུག་པ་ཡང་༔ དམར་ཆེན་གཏོར་མ་འདི་ཡིས་ཟློག༔ སྨེ་བ་དུར་དུ་ཆུད་པ་ཡང་༔ དམར་ཆེན་གཏོར་མ་འདི་ཡིས་ཟློག༔ རྒྱལ་པོ་ལོ་ཡི་བདུན་ཟུར་ཡང་༔ དམར་ཆེན་གཏོར་མ་འདི་ཡིས་ཟློག༔ དམག་མི་ཞག་གི་འཁྲུག་རྩོད་ཀྱང་༔ དམར་ཆེན་གཏོར་མ་འདི་ཡིས་ཟློག༔ ལོ་ཟླ་ཞག་དང་ཚེས་གྲངས་སྐག༔ དམར་ཆེན་གཏོར་མ་འདི་ཡིས་ཟློག༔ མི་མཐུན་ཕྱོགས་རིས་དགྲ་དང་བགེགས༔ དམར་ཆེན་གཏོར་མ་འདི་ཡིས་ཟློག༔ ཧཱུྃ་བྷྱོ༔ ཡུལ་ཆེན་སུམ་ཅུ་སོ་གཉིས་ནས༔ མཁའ་འགྲོའི་གཙོ་མོ་སོ་གཉིས་ལ༔ རང་འདྲའི་སྤྲུལ་པ་འབུམ་འབུམ་བཅས༔ དབྱིངས་ནས་སྐུ་སྐྱོད་འཕྲིན་ལས་མཛོད༔ བཟློག་བསྒྱུར་འཕྲིན་ལས་དུས་ལ་བབས༔ ཡེ་ཤེས་མཁའ་འགྲོའི་བཀའ་ཆད་ཟློག༔ འཇིག་རྟེན་མཁའ་འགྲོའི་བསུན་མ་ཟློག༔ ལས་བྱེད་མཁའ་འགྲོའི་ཕོ་ཉ་ཟློག༔ ཤ་ཟ་མཁའ་འགྲོའི་ཁྲམ་ཁ་ཟློག༔ ཕྲ་མེན་མཁའ་འགྲོའི་ངན་སྔགས་ཟློག༔ ལྟས་ངན་བརྒྱད་ཅུ་རྩ་གཅིག་གིས༔ དངོས་སུ་གནོད་པ་གཏོར་མས་ཟློག༔ ཡེ་འབྲོག་སུམ་བརྒྱ་དྲུག་ཅུ་ལས༔ སྒོས་སུ་སྡང་བ་གཏོར་མས་ཟློག༔ གློ་བུར་བདུན་བརྒྱ་ཉི་ཤུ་ལས༔ བདག་ལ་སྡང་བ་གཏོར་མས་ཟློག༔ དུས་མིན་འཆི་བ་རྣམ་བརྒྱད་ལས༔ སྐག་ལ་བབས་པ་གཏོར་མས་ཟློག༔ ཡས་ཀྱི་བདུད་དུ་གཡོས་པའི་བགེགས༔ དམར་ཆེན་གཏོར་མ་འདི་ཡིས་ཟློག༔ མས་ཀྱི་སྲི་རུ་ལང་བའི་འདྲེ༔ དམར་ཆེན་གཏོར་མ་འདི་ཡིས་ཟློག༔ བར་གྱི་སྡེ་བརྒྱད་དམོད་པའི་ཚོགས༔ དམར་ཆེན་གཏོར་མ་འདི་ཡིས་ཟློག༔ བན་བོན་ངན་སྔགས་མནན་གཏད་བྱད༔ དམར་ཆེན་གཏོར་མ་འདི་ཡིས་ཟློག༔ བརྒྱ་ཡི་མི་ཁ་ངན་པ་ཡང་༔ དམར་ཆེན་གཏོར་མ་འདི་ཡིས་ཟློག༔ སྟོང་གི་བྲ་མཆུ་ངན་པ་ཡང་༔ དམར་ཆེན་གཏོར་མ་འདི་ཡིས་ཟློག༔ ཆགས་ཆེ་མཚན་ལྟས་ངན་པ་ཡང་༔ དམར་ཆེན་གཏོར་མ་འདི་ཡིས་ཟློག༔ ཆེ་སྲི་ཆུང་སྲི་གཞོན་སྲི་ཡང་༔ དམར་ཆེན་གཏོར་མ་འདི་ཡིས་ཟློག༔ སྤར་ཁའི་སྐྱ་མདའ་ཟུག་པ་ཡང་༔ དམར་ཆེན་གཏོར་མ་འདི་ཡིས་ཟློག༔ སྨེ་བ་དུར་དུ་ཆུད་པ་ཡང་༔ དམར་ཆེན་གཏོར་མ་འདི་ཡིས་ཟློག༔ རྒྱལ་པོ་ལོ་ཡི་བདུན་ཟུར་ཡང་༔ དམར་ཆེན་གཏོར་མ་འདི་ཡིས་ཟློག༔ དམག་མི་ཞག་གི་འཁྲུག་རྩོད་ཀྱང་༔ དམར་ཆེན་གཏོར་མ་འདི་ཡིས་ཟློག༔ ལོ་ཟླ་ཞག་དང་ཚེས་གྲངས་སྐག༔ དམར་ཆེན་གཏོར་མ་འདི་ཡིས་ཟློག༔ མི་མཐུན་ཕྱོགས་རིས་དགྲ་དང་བགེགས༔ དམར་ཆེན་གཏོར་མ་འདི་ཡིས་ཟློག༔ ཧཱུྃ་བྷྱོ༔ གནས་དང་ཞིང་དང་ཉེ་བའི་གནས༔ ཉེ་བའི་མཐུན་སྤྱོད་དུར་ཁྲོད་དང་༔ ཉེ་བའི་ཚནྡྷོ་ཧར་བཞུགས་པའི༔ གཙོ་མོ་ཡེ་ཤེས་མཁའ་འགྲོ་ལ༔ འདས་དང་མ་འདས་མཁའ་འགྲོས་བསྐོར༔ དབྱིངས་ནས་སྐུ་སྐྱོད་འཕྲིན་ལས་མཛོད༔ བཟློག་བསྒྱུར་འཕྲིན་ལས་དུས་ལ་བབས༔ ཡེ་ཤེས་མཁའ་འགྲོའི་བཀའ་ཆད་ཟློག༔ འཇིག་རྟེན་མཁའ་འགྲོའི་བསུན་མ་ཟློག༔ ལས་བྱེད་མཁའ་འགྲོའི་ཕོ་ཉ་ཟློག༔ ཤ་ཟ་མཁའ་འགྲོའི་ཁྲམ་ཁ་ཟློག༔ ཕྲ་མེན་མཁའ་འགྲོའི་ངན་སྔགས་ཟློག༔ ལྟས་ངན་བརྒྱད་ཅུ་རྩ་གཅིག་གིས༔ དངོས་སུ་གནོད་པ་གཏོར་མས་ཟློག༔ ཡེ་འབྲོག་སུམ་བརྒྱ་དྲུག་ཅུ་ལས༔ སྒོས་སུ་སྡང་བ་གཏོར་མས་ཟློག༔ གློ་བུར་བདུན་བརྒྱ་ཉི་ཤུ་ལས༔ བདག་ལ་སྡང་བ་གཏོར་མས་ཟློག༔ དུས་མིན་འཆི་བ་རྣམ་བརྒྱད་ལས༔ སྐག་ལ་བབས་པ་གཏོར་མས་ཟློག༔ ཡས་ཀྱི་བདུད་དུ་གཡོས་པའི་བགེགས༔ དམར་ཆེན་གཏོར་མ་འདི་ཡིས་ཟློག༔ མས་ཀྱི་སྲི་རུ་ལང་བའི་འདྲེ༔ དམར་ཆེན་གཏོར་མ་འདི་ཡིས་ཟློག༔ བར་གྱི་སྡེ་བརྒྱད་དམོད་པའི་ཚོགས༔ དམར་ཆེན་གཏོར་མ་འདི་ཡིས་ཟློག༔ བན་བོན་ངན་སྔགས་མནན་གཏད་བྱད༔ དམར་ཆེན་གཏོར་མ་འདི་ཡིས་ཟློག༔ བརྒྱ་ཡི་མི་ཁ་ངན་པ་ཡང་༔ དམར་ཆེན་གཏོར་མ་འདི་ཡིས་ཟློག༔ སྟོང་གི་བྲ་མཆུ་ངན་པ་ཡང་༔ དམར་ཆེན་གཏོར་མ་འདི་ཡིས་ཟློག༔ ཆགས་ཆེ་མཚན་ལྟས་ངན་པ་ཡང་༔ དམར་ཆེན་གཏོར་མ་འདི་ཡིས་ཟློག༔ ཆེ་སྲི་ཆུང་སྲི་གཞོན་སྲི་ཡང་༔ དམར་ཆེན་གཏོར་མ་འདི་ཡིས་ཟློག༔ སྤར་ཁའི་སྐྱ་མདའ་ཟུག་པ་ཡང་༔ དམར་ཆེན་གཏོར་མ་འདི་ཡིས་ཟློག༔ སྨེ་བ་དུར་དུ་ཆུད་པ་ཡང་༔ དམར་ཆེན་གཏོར་མ་འདི་ཡིས་ཟློག༔ རྒྱལ་པོ་ལོ་ཡི་བདུན་ཟུར་ཡང་༔ དམར་ཆེན་གཏོར་མ་འདི་ཡིས་ཟློག༔ དམག་མི་ཞག་གི་འཁྲུག་རྩོད་ཀྱང་༔ དམར་ཆེན་གཏོར་མ་འདི་ཡིས་ཟློག༔ ལོ་ཟླ་ཞག་དང་ཚེས་གྲངས་སྐག༔ དམར་ཆེན་གཏོར་མ་འདི་ཡིས་ཟློག༔ མི་མཐུན་ཕྱོགས་རིས་དགྲ་དང་བགེགས༔ དམར་ཆེན་གཏོར་མ་འདི་ཡིས་ཟློག༔ ཧཱུྃ་བྷྱོ༔ གནས་ལས་སྐྱེས་དང་ཞིང་ལས་སྐྱེས༔ སྔགས་ལས་སྐྱེས་དང་ལས་ལས་སྐྱེས༔ སྤྲུལ་པ་འབུམ་སྡེ་མཁའ་འགྲོ་འབུམ༔ དབྱིངས་ནས་སྐུ་སྐྱོད་འཕྲིན་ལས་མཛོད༔ བཟློག་བསྒྱུར་འཕྲིན་ལས་དུས་ལ་བབས༔ ཡེ་ཤེས་མཁའ་འགྲོའི་བཀའ་ཆད་ཟློག༔ འཇིག་རྟེན་མཁའ་འགྲོའི་བསུན་མ་ཟློག༔ ལས་བྱེད་མཁའ་འགྲོའི་ཕོ་ཉ་ཟློག༔ ཤ་ཟ་མཁའ་འགྲོའི་ཁྲམ་ཁ་ཟློག༔ ཕྲ་མེན་མཁའ་འགྲོའི་ངན་སྔགས་ཟློག༔ ལྟས་ངན་བརྒྱད་ཅུ་རྩ་གཅིག་གིས༔ དངོས་སུ་གནོད་པ་གཏོར་མས་ཟློག༔ ཡེ་འབྲོག་སུམ་བརྒྱ་དྲུག་ཅུ་ལས༔ སྒོས་སུ་སྡང་བ་གཏོར་མས་ཟློག༔ གློ་བུར་བདུན་བརྒྱ་ཉི་ཤུ་ལས༔ བདག་ལ་སྡང་བ་གཏོར་མས་ཟློག༔ དུས་མིན་འཆི་བ་རྣམ་བརྒྱད་ལས༔ སྐག་ལ་བབས་པ་གཏོར་མས་ཟློག༔ ཡས་ཀྱི་བདུད་དུ་གཡོས་པའི་བགེགས༔ དམར་ཆེན་གཏོར་མ་འདི་ཡིས་ཟློག༔ མས་ཀྱི་སྲི་རུ་ལང་བའི་འདྲེ༔ དམར་ཆེན་གཏོར་མ་འདི་ཡིས་ཟློག༔ བར་གྱི་སྡེ་བརྒྱད་དམོད་པའི་ཚོགས༔ དམར་ཆེན་གཏོར་མ་འདི་ཡིས་ཟློག༔ བན་བོན་ངན་སྔགས་མནན་གཏད་བྱད༔ དམར་ཆེན་གཏོར་མ་འདི་ཡིས་ཟློག༔ བརྒྱ་ཡི་མི་ཁ་ངན་པ་ཡང་༔ དམར་ཆེན་གཏོར་མ་འདི་ཡིས་ཟློག༔ སྟོང་གི་བྲ་མཆུ་ངན་པ་ཡང་༔ དམར་ཆེན་གཏོར་མ་འདི་ཡིས་ཟློག༔ ཆགས་ཆེ་མཚན་ལྟས་ངན་པ་ཡང་༔ དམར་ཆེན་གཏོར་མ་འདི་ཡིས་ཟློག༔ ཆེ་སྲི་ཆུང་སྲི་གཞོན་སྲི་ཡང་༔ དམར་ཆེན་གཏོར་མ་འདི་ཡིས་ཟློག༔ སྤར་ཁའི་སྐྱ་མདའ་ཟུག་པ་ཡང་༔ དམར་ཆེན་གཏོར་མ་འདི་ཡིས་ཟློག༔ སྨེ་བ་དུར་དུ་ཆུད་པ་ཡང་༔ དམར་ཆེན་གཏོར་མ་འདི་ཡིས་ཟློག༔ རྒྱལ་པོ་ལོ་ཡི་བདུན་ཟུར་ཡང་༔ དམར་ཆེན་གཏོར་མ་འདི་ཡིས་ཟློག༔ དམག་མི་ཞག་གི་འཁྲུག་རྩོད་ཀྱང་༔ དམར་ཆེན་གཏོར་མ་འདི་ཡིས་ཟློག༔ ལོ་ཟླ་ཞག་དང་ཚེས་གྲངས་སྐག༔ དམར་ཆེན་གཏོར་མ་འདི་ཡིས་ཟློག༔ མི་མཐུན་ཕྱོགས་རིས་དགྲ་དང་བགེགས༔ དམར་ཆེན་གཏོར་མ་འདི་ཡིས་ཟློག༔ ཅེས་བརྗོད་གསེར་སྐྱེམས་མཆོད་ཅིང་གཏོར་མ་དཔགས༔ ཟོར་ལམ་དབྱེ་ཞིང་རྔམ་སྟབས་བསྒྱུར༔ ལས་ལ་བསྐུལ་ཞིང་ཐུན་རྫས་ཐོགས༔ ཟོར་ཏུ་འཕངས་ཞིང་བཞེས་གདབ་བོ༔ རྗེས་ནི་ལས་གཞུང་སྤྱི་ལྟར་བསྐྱང་༔ ས་མ་ཡཱ༔ རྒྱ་རྒྱ་རྒྱ༔ གཏེར་རྒྱ༔ སྦས་རྒྱ༔ ཟབ་རྒྱ༔ ས་མ་ཡཱ༔ རྒྱ་རྒྱ་རྒྱ༔ རིག་འཛིན་ཉི་མ་གྲགས་པས་ཆགས་རུ་ཕག་གདོང་ནག་མོའི་གནས་ནས་གདན་དྲངས་ཤིང་ཤོག་སེར་ལས་ཕབ་པའོ།། །།མངྒ་ལཾ།། །།

རྩང་བཟློག་མེའི་སྤུ་གྲི།

ཕག་མོ་ནག་མོའི་ཟབ་ཐིག་ལས༔ རྩང་བཟློག་མེའི་སྤུ་གྲི་བཞུགས༔ མཁའ་འགྲོའི་ཚོགས་ལ་ཕྱག་འཚལ་ལོ༔ མཁའ་འགྲོ་བསྒྲུབ་པའི་རྣལ་འབྱོར་པས༔ ཆགས་ཆེ་ཉམ་ང་བཟློག་པའི་ཕྱིར༔ དམར་ནག་གཏོར་མའི་ལྕགས་རི་ལ༔ རྩང་ནི་སྲིན་མོའི་འགྲོས་སུ་བཙུགས༔ གང་གནོད་བཟློག་པའི་བྱང་བུས་བརྒྱན༔ ཤ་དུམ་ལིངྒ་ཅི་མང་གཟུག༔ བ་སུ་ཏ་ཡི་ཞགས་པས་བསྡམས༔ དམར་སྦྲེང་རོལ་མོ་དྲག་ཏུ་འཁྲོལ༔ དྲག་པོའི་ངར་གྱིས་འདི་སྐད་དོ༔ ཧཱུྃ༔ ང་ནི་ཁྲོས་མ་ནག་མོ་སྟེ༔ མ་མོ་མཁའ་འགྲོ་ཀུན་གྱི་རྗེ༔ ཐམས་ཅད་ང་ཡི་བཀའ་ལ་ཉོན༔ འབྱུང་བ་ལྔ་དང་འཁོར་འདས་ཀུན༔ ཐམས་ཅད་ང་ཡི་རང་བཞིན་ཡིན༔ ང་ཡིས་མི་འདུལ་གང་ཡང་མེད༔ བཟློག་པས་མི་བཟློག་གང་ཡང་མེད༔ བཟློག་བསྒྱུར་འཕྲིན་ལས་དུས་ལ་བབས༔ ཧཱུྃ༔ དང་པོ་རྩང་བྱུང་གང་ནས་བྱུང་༔ རྩང་བྱུང་ཨོ་རྒྱན་ཡུལ་ནས་བྱུང་༔ ཨོ་རྒྱན་སྨུག་ནག་འཁྲིགས་པའི་གནས༔ མཁའ་འགྲོ་འདུ་བའི་དུར་ཁྲོད་དུ༔ རྩི་ཤིང་ཐམས་ཅད་མཚོན་ཆར་སྐྱེས༔ ཡེ་ཤེས་ལས་ཀྱི་མཁའ་འགྲོ་ཡིས༔ སྤྲུལ་པའི་ཕོ་ཉར་བྱིན་གྱིས་བརླབས༔ ཧེ་རུ་ཀ་ཡིས་དབང་ཡང་བསྐུར༔ དབྱིབས་ནི་སྣ་ཚོགས་མཚོན་ཆའི་དབྱིབས༔ གཟུགས་ནི་སྲིན་མོའི་འགྲོས་སུ་བཙུགས༔ ཤ་དུམ་ལིངྒ་བྱང་བུས་བརྒྱན༔ ཡེ་ཤེས་མཁའ་འགྲོའི་ཕོ་ཉ་སྟེ༔ ཤ་ཟ་མཁའ་འགྲོའི་ཕོ་བྲང་ཡིན༔ ཟློག་བྱེད་མཁའ་འགྲོའི་སྐུ་རུ་གསལ༔ ཧཱུྃ༔ ཡར་གྱི་རྩེ་མོས་ཆོས་ཉིད་དབྱིངས་སུ་སླེབས༔ མར་གྱི་རྩེ་མོས་ངན་སོང་འགྲོ་དྲུག་ཁྱབ༔ རྐེད་པ་རྒྱ་མདུད་མཁའ་འགྲོའི་ཕོ་བྲང་སྟེ༔ ཡར་གྱི་རྩེ་མོ་སྲིད་རྩེའི་སྟེང་ན་མཐོ༔ མར་གྱི་རྩེ་མོས་ན་རག་དམྱལ་བར་གནོན༔ རྐེད་པ་རྒྱ་མདུད་ཁམས་གསུམ་གཞལ་ཡས་ཁང་། ཡར་གྱི་རྩེ་མོ་མི་མངོན་དབྱིངས་ན་མཐོཿ མར་གྱི་རྩེ་མོས་འབྱུང་བཞིའི་ཁམས་རྣམས་ཁྱབཿ རྐེད་པ་རྒྱ་མདུད་སྟོང་གསུམ་ཟིལ་གྱིས་གནོན༔ ཡར་གྱི་རྩེ་ལ་སྐུ་གསུམ་སངས་རྒྱས་བཞུགས༔ མར་གྱི་རྩེ་མོས་དུག་གསུམ་ཨར་ལ་གཏད༔ རྐེད་པ་རྒྱ་མདུད་ཐབས་ཤེས་དབྱེར་མེད་ཞིང་༔ ཡར་གྱི་རྩེ་ལ་རིགས་ལྔའི་ལྷ་ཚོགས་བཞུགས༔ མར་གྱི་རྩེ་མོས་དུག་ལྔ་དབྱིངས་སུ་བསྒྲལ༔ རྐེད་པ་རྒྱ་མདུད་ཡེ་ཤེས་ལྔ་ལྡན་ཞིང་༔ ཡར་གྱི་རྩེ་ལ་ཕ་རྒྱུད་ལྷ་ཚོགས་བཞུགས༔ མར་གྱི་རྩེ་ལ་མ་རྒྱུད་མཁའ་འགྲོ་འཁྲབ༔ རྐེད་པ་རྒྱ་མདུད་དཔའ་བོ་དཔའ་མོ་འབུམ༔ ཡར་གྱི་རྩེ་ལ་འདབ་ཆགས་བུ་ཡུག་འཚུབ༔ མར་གྱི་རྩེ་ལ་མཆེ་ཅན་གཅན་གཟན་འདུ༔ རྐེད་པ་རྒྱ་མདུད་སེང་འབྲུག་ཆུ་སྲིན་རྔམ༔ ཡར་གྱི་རྩེ་ལ་ཐོག་གི་བུ་ཡུག་འཚུབ༔ མར་གྱི་རྩེ་ལ་གནམ་ལྕགས་སེར་ཆེན་འབེབས༔ རྐེད་པ་རྒྱ་མདུད་དྲག་མེ་དམར་ནག་འཚུབས༔ ཡར་ཀྱི་རྩེ་ལ་ཧཱུྃ་སྒྲས་ཁམས་གསུམ་གཡོ༔ མར་གྱི་རྩེ་ལ་ཕཊ་སྒྲས་སྲིད་གསུམ་འཁྲུག༔ རྐེད་པ་རྒྱ་མདུད་བྷྱོ་བཟློག་སྟོང་གསུམ་བརླག༔ དྲག་པོ་རྩང་གི་འཕྲིན་ལས་དུས་ལ་བབས༔ ཡེ་ཤེས་ཕུར་པའི་འཕྲིན་ལས་དུས་ལ་བབས༔ སྤྲུལ་བའི་ཕོ་ཉས་བཅོལ་བའི་ལས་མཛོད་ཅིག༔ ཧཱུྃ༔ སངས་རྒྱས་བསྟན་ལ་སྡང་བའི་དགྲ༔ ཆོས་ལ་བར་དུ་གཅོད་པའི་བགེགས༔ རིག་འཛིན་རྣལ་འབྱོར་སྒོས་ཀྱི་དགྲ༔ མཁའ་འགྲོའི་ཕོ་ཉ་རྩང་ཕུར་གྱིས༔ མྱུར་དུ་ཁུག་ལ་དམ་དུ་ཆིངས༔ མཚོན་ཆས་གཏུབས་ལ་དྲག་ཏུ་སྒྲོལ༔ འདོད་ཆགས་ཁྲག་ལ་ཆེམས་ཆེམ་འཐུང་༔ གཏི་མུག་ཤ་ལ་གཏིབས་གཏིབས་ཟོ༔ ཞེ་སྡང་རུས་ལ་ཁྲུམ་ཁྲུམ་མུར༔ ཏིལ་འབྲུ་ཙམ་ཡང་མེད་པར་གྱིས༔ བཅོལ་བའི་འཕྲིན་ལས་གྲུབ་པར་མཛོད༔ ཧཱུྃ་བྷྱོ༔ ད་ནི་བཟློག་བསྒྱུར་དུས་ལ་བབས༔ སྟེང་གི་ཕྱོགས་ནས་མི་མཐུན་བགེགས༔ ལྷ་ཡི་དལ་ཁ་རྩང་གིས་ཟློག༔ འོག་གི་ཕྱོགས་ནས་གདུག་པའི་དུག༔ ཀླུ་ཡི་གདོན་ཚོགས་རྩང་གིས་ཟློག༔ བར་གྱི་ཕྱོགས་ནས་རྦོད་གཏོང་བགེགས༔ སྡེ་བརྒྱད་གནོད་པ་རྩང་གིས་ཟློག༔ ཡེ་ཤེས་མཁའ་འགྲོའི་བསུན་མ་སྟེ༔ ཚེ་ལ་བར་ཆད་རྩང་གིས་ཟློག༔ བན་བོན་འདུས་པའི་བྱད་ཀ་སྟེ༔ མནན་གཏད་ཁྲམ་ཁ་རྩང་གིས་ཟློག༔ མ་མོ་ཁྲོས་པའི་དལ་ཁ་སྟེ༔ དམར་ནད་ཡམས་ཁ་རྩང་གིས་ཟློག༔ སྡེ་བརྒྱད་ཁྲོས་པའི་ཁ་རླངས་ཏེ༔ མི་ནད་ཕྱུགས་ནད་རྩང་གིས་ཟློག༔ རྒྱ་འདྲེ་འགོང་པོའི་སྤྲུལ་བསྒྱུར་ཏེ༔ ལོ་ནད་བཙའ་སད་རྩང་གིས་ཟློག༔ ལོ་ཡི་འབྱུང་བ་ཁམས་ཀྱི་རྒྱལ༔ ལོ་སྐག་ཐམས་ཅད་རྩང་གིས་ཟློག༔ ཟླ་བའི་འབྱུང་དགྲ་བློན་གྱི་སྐག༔ ཟླ་ཁམས་དགྲ་གཤེད་རྩང་གིས་ཟློག༔ ཞག་ནི་དམག་མི་དཔུང་གི་དགྲ༔ དུས་ཚོད་བདུད་བབས་རྩང་གིས་ཟློག༔ སྤར་ཁ་རུས་པའི་སྟེང་ཆགས་པ༔ སྐྱ་མདའ་ཟུག་པ་རྩང་གིས་ཟློག༔ སྨེ་བ་ཤ་པགས་རྒྱ་རལ་བ༔ འབྱུང་བཞིའི་དར་གུད་རྩང་གིས་ཟློག༔ ལན་ཆགས་བུ་ལོན་སྟོང་ཕྲག་བགེགས༔ བགེགས་རིགས་གནོད་པ་རྩང་གིས་ཟློག༔ ཤ་འཁོན་མ་དག་སྡང་བའི་དགྲ༔ དགྲ་བོའི་གནོད་པ་རྩང་གིས་ཟློག༔ བསམ་སྦྱོར་ངན་པའི་ལྟས་ངན་རིགས༔ བརྒྱད་ཅུ་རྩ་གཅིག་རྩང་གིས་ཟློག༔ བརྡུང་ཞིང་བརྡེག་པ་ལས་ཀྱི་ནད༔ བཞི་བརྒྱ་རྩ་བཞི་རྩང་གིས་ཟློག༔ བསད་བཅད་བཤས་གཏུབས་གློ་བུར་རྐྱེན༔ ཉི་ཁྲི་ཆིག་སྟོང་རྩང་གིས་ཟློག༔ ཉེར་འཚེ་བར་ཆད་གཞན་ལ་གནོད༔ གློ་བུར་བདུན་བརྒྱ་རྩང་གིས་ཟློག༔ ཧཱུྃ་བྷྱོ༔ གཞན་ཡང་བཟློག་ཅིང་བསྒྱུར་བ་ནི༔ སྲེ་མོང་བྱི་རོ་འཁྱེར་བ་དེ༔ ནལ་གྱི་ལྟས་ངན་རྩང་གིས་ཟློག༔ སྦལ་སྦྲུལ་ཁྱིམ་དུ་འོང་བ་ནི༔ བྱེ་ཡུགས་ལྟས་ངན་རྩང་གིས་ཟློག༔ དྲིའུ་རྟས་རྔ་རྔོག་འཆའ་བ་ནི༔ མཚོན་འཁྲུག་ལྟས་ངན་རྩང་གིས་ཟློག༔ སྦྲ་ཡི་གུང་ཤིང་ཆག་པ་ནི༔ ལྷ་ཉམས་ལྟས་ངན་རྩང་གིས་ཟློག༔ རི་དྭགས་ཁྱིམ་སྒོར་ཆགས་པ་སྤྱོད༔ མ་སྲིང་ནལ་ལྟས་རྩང་གིས་ཟློག༔ རྨོས་གླང་ར་བར་འཁུན་ཞིང་ངར༔ ས་བདག་ལྟས་ངན་རྩང་གིས་ཟློག༔ སོག་པའི་མེ་ལོང་ཞོམ་པ་ནི༔ མ་ཡམས་ལྟས་ངན་རྩང་གིས་ཟློག༔ སྲིན་བྱས་ཁང་ཁྱིམ་སྐད་སྒྲོགས་པ༔ བྱེ་བྲལ་ལྟས་ངན་རྩང་གིས་ཟློག༔ སྒོ་ཁྱིས་ཐོ་རང་ངུ་ཟུག་བྱེད༔ ཤི་ཆད་ལྟས་ངན་རྩང་གིས་ཟློག༔ དུར་ཁྲོད་ཝ་མོ་སྲོད་ལ་བརྒྱལ༔ དུར་སྲི་ལངས་པ་རྩང་གིས་ཟློག༔ རི་གསུམ་རྩེ་ལ་ཤ་ཕོ་འཛིང་༔ མགོ་དཔོན་བརྗེ་ལྟས་རྩང་གིས་ཟློག༔ ལུང་གསུམ་ནང་དུ་ཡུ་མོ་འཛིང་༔ ཤི་ཆད་ལྟས་ངན་རྩང་གིས་ཟློག༔ མདོ་གསུམ་ཆབ་ལ་ཉ་མོ་འཛིང་༔ ཀླུ་སྲིན་ཁྲོས་པ་རྩང་གིས་ཟློག༔ བར་སྣང་མཁའ་ལ་སྡེར་ཆགས་འཛིང་༔ ཡུལ་འཁྲུགས་ལྟས་ངན་རྩང་གིས་ཟློག །༔ གྲོང་འདབས་བུད་མེད་ཅོ་ཏོ་འཛིང་༔ ཉེས་ཀུན་ལྟས་ངན་རྩང་གིས་ཟློག༔ བྱ་ནག་ཞོན་ཞིང་ཆགས་པ་སྤྱོད༔ སྲི་གསུམ་ལང་བ་རྩང་གིས་ཟློག༔ དེ་ལ་སོགས་པའི་མི་མཐུན་བགེགས༔ བར་ཆད་ཐམས་ཅད་རྩང་གིས་ཟློག༔ ཅེས་བཟློག་སྔགས་བཟླ་ཞིང་ཐལ་མོ་བརྡབ༔ དེས་ནི་མི་མཐུན་ཐམས་ཅད་ཟློག༔ དཔེར་ན་མེ་དང་རྩི་སྦུར་འདྲ༔ ས་མ་ཡཱ༔ རྒྱ་རྒྱ་རྒྱ༔ གཏེར་རྒྱ༔ སྦས་རྒྱ༔ ཟབ་རྒྱ༔ ས་མ་ཡཱ༔ རྒྱ་རྒྱ་རྒྱ༔ གཏེར་ཆེན་ཆོས་ཀྱི་རྒྱལ་པོ་རིག་འདུས་ཉི་མ་གྲགས་པ་རྩལ་གྱིས་ཁམས་སྲིང་མོ་རྫོང་གི་ཆགས་རུ་ཕུག་ནག་ནས་ས་རྟ་ལ་གཏེར་ནས་སྤྱན་དྲངས་ཤིང་ལྕགས་བྱ་ལ་ཤོག་སེར་ལས་ཕབ་པའོ།། །།མངྒ་ལཾ།། །།

གསེར་སྐྱེམས་ཟོར་ལམ་གདམས་པ།

ཕག་མོ་ནག་མོའི་ཟབ་ཐིག་ལས༔ གསེར་སྐྱེམས་ཟོར་ལམ་གདམས་པ་བཞུགས༔ མཁའ་འགྲོའི་ཚོགས་ལ་ཕྱག་འཚལ་ལོ༔ རིན་ཆེན་སྣོད་གཙང་ཆང་གིས་བལྟམས༔ རིན་ཆེན་བརྡར་རུ་ཅི་མང་བརྡར༔ ནས་འབྲས་འབྲུ་སྣ་གང་འཛོམས་བཏབ༔ རང་ཉིད་མཁའ་འགྲོའི་ཏིང་འཛིན་གྱིས༔ བྱིན་གྱིས་བརླབ་ཅིང་འདི་སྐད་དོ༔ ཧཱུྃ་བྷྱོ༔ མི་མངོན་དབྱིངས་ཀྱི་ཕོ་བྲང་ནས༔ སྐྱབས་གནས་དཀོན་མཆོག་གཟུ་དང་དཔང་༔ དག་པ་དབྱིངས་ཀྱི་གཞལ་ཡས་ནས༔ ཡི་དམ་ལྷ་ཚོགས་གཟུ་དང་དཔང་༔ མཁའ་སྤྱོད་གནས་ཡུལ་དུར་ཁྲོད་ནས༔ མ་ཚོགས་མཁའ་འགྲོ་གཟུ་དང་དཔང་༔ བཀའ་དང་དམ་ཚིག་གཞལ་ཡས་ནས༔ ཆོས་སྐྱོང་གཏེར་སྲུང་གཟུ་དང་དཔང་༔ ས་ཕྱོགས་ཡུལ་གྲུ་འདི་ཉིད་ཀྱི༔ ཡུལ་ལྷ་གཞི་བདག་གཟུ་དང་དཔང་༔ གཟུ་དང་དཔང་དུ་ཁྱེད་རྣམས་བཞུགས༔ དམ་ཉམས་དགྲ་བོ་ལས་ངན་འདིས༔ དང་པོ་སངས་རྒྱས་བསྟན་པ་བཤིགས༔ བར་དུ་མི་དགེ་བཅུ་ལ་སྤྱད༔ ད་ལྟ་རྣལ་འབྱོར་བདག་ལ་བསྡོས༔ བདག་གིས་མ་ཉེས་ཁོ་ཡིས་ཉེས༔ ཉེས་ཅན་དགྲ་བོ་བསྒྲལ་བའི་ཕྱིར༔ བསད་ཟོར་བཟློག་ཟོར་འདི་འཕེན་པས༔ གསེར་སྐྱེམས་མཆོད་པ་འདི་བཞེས་ལ༔ ཟོར་མདོས་འདི་ཡི་ལམ་ཕྱེས་ཤིག༔ སུ་ར་ཆང་ལས་ངོ་ཆེ་མེད༔ རིན་ཆེན་གསེར་ལས་རིན་ཆེ་མེད༔ མེད་པ་རྣམས་ཀྱང་མི་ལས་བཙལ༔ སྲ་བ་ཡིན་ཀྱང་བྲག་ལས་བརྐོས༔ དེ་ཕྱིར་གསེར་སྐྱེམས་འདི་བཞེས་ལ༔ གཏོར་ཟོར་འདི་ཡི་ལམ་ཕྱེས་ཤིག༔ སྔགས་ཟོར་འདི་ཡི་ལམ་ཕྱེས་ཤིག༔ སྟེང་འོག་ཕྱོགས་བཅུར་གནས་པ་ཡི༔ ལྷ་ཀླུ་གཞིས་བདག་མ་ལུས་ཀུན༔ ཟོར་ལམ་ཕྱེས་ལ་སྐུ་སྐྱོད་ཅིག༔ མཐོ་བས་ཞབས་སྐུམས་ཐད་སོར་གཟུར༔ དམའ་བ་ཐམས་ཅད་དབུ་ཐུམས་ཤིག༔ དྲག་པོའི་ཟོར་གྱི་འོད་འཕྲོས་ནས༔ སྐུ་ལ་དེ་ནི་འཕོག་པར་མཆི༔ དེ་བས་ཐམས་ཅད་སྐུ་བསྐྱོད་ལ༔ བདག་གི་མགོན་དང་གྲོགས་མཛོད་ཅིག༔ ཟོར་འཕེན་དགྲ་བོའི་ཡུལ་དུ་འཕེན༔ སྟེང་གི་ཁྱོ་ལ་གཏོར་ཟོར་ཡ༔ བསད་རྟགས་དོན་སྙིང་ལོང་ལ་ཤོག༔ འོག་གི་ཆུང་མར་ཁྲག་ཟོར་ཡ༔ དམར་ཡམས་ནད་ཀྱིས་སོད་ལ་ཤོག༔ མཆན་གྱི་བུ་ལ་མཚོན་ཟོར་ཡ༔ གྲི་ཐབས་ལྕེབས་གྲིར་སོད་ལ་ཤོག༔ སྒོ་ནོར་ཕྱུགས་ལ་ཟོར་འདི་ཡ༔ གློ་གོར་ཧོན་གསུམ་དམག་སྒར་ཐོབ༔ ས་གཞིས་མཁར་ལ་ཟོར་འདི་ཡ༔ དྲག་པོའི་ཐོག་གིས་རྡུལ་དུ་རློག༔ དགྲ་བོའི་མི་རབས་ལྷ་བསྲུང་རྣམས༔ དེ་རིང་ཐལ་བ་རྡུལ་དུ་རློག༔ ཅེས་བརྗོད་གསེར་སྐྱེམས་མཆོད་ཅིང་གཏོར་ཟོར་འཕེན༔ དམོད་བཅོལ་གཡབ་མོ་བཞེས་བཏང་ངོ་༔ ས་མ་ཡཱ༔ རྒྱ་རྒྱ་རྒྱ༔ གཏེར་རྒྱ༔ སྦས་རྒྱ༔ ཟབ་རྒྱ༔ ས་མ་ཡཱ༔ རྒྱ་རྒྱ་རྒྱ༔ རིག་འཛིན་ཆེན་པོ་ཉི་མ་གྲགས་པས་ས་རྟ་ལ་གདན་དྲངས་ཤིང་ལྕགས་བྱ་ལ་ཤོག་སེར་ལས་ཕབ་པའོ།། །།མངྒ་ལཾ།། །།

དྷཀྐིའི་མཚན་རྟགས་དངོས་གྲུབ་འབྱུང་གནས།

ཕག་མོ་ནག་མོའི་ཟབ་ཐིག་ལས༔ དྷཀྐིའི་མཚན་རྟགས་དངོས་གྲུབ་འབྱུང་གནས་བཞུགས༔ དྷཀྐཱིའི་ཚོགས་ལ་ཕྱག་འཚལ་ལོ༔ བདག་བུད་མེད་ཡེ་ཤེས་མཚོ་རྒྱལ་གྱིས་སློབ་དཔོན་ཆེན་པོ་ལ་གུས་པའི་ཕྱག་དང་བསྐོར་བ་གྲངས་མེད་བྱས་ནས་མཉེས་པའི་ཞབས་ཏོག་བསྒྲུབས་ཏེ་ཞུས་པ༔ སློབ་དཔོན་རིན་པོ་ཆེ་ལགས༔ ཕག་མོའི་ཟབ་ཏིག་གི་ཆོས་བཀའ་ཚང་བའི་ཕྱིར་དུ་བདག་ལ་དྷཀྐཱིའི་མཚན་རྟགས་ཀྱི་རིམ་པ་ཞིག་བཀའ་སྩལ་དུ་གསོལ༔ ཞེས་ཞུས་པས༔ སློབ་དཔོན་ཆེན་པོའི་ཞལ་ནས༔ མཚོ་རྒྱལ་ཉོན་ལ་ཡི་གེར་བྲིས་ནས་ཕག་མོ་ནག་མོའི་ཆོས་སྐོར་དུ་འདེབས་པར་གྱིས་ཤིག༔ དེ་ཡང་དྷཀྐིའི་མཚན་རྟགས་མང་དུ་ཡོད་ཀྱང་གབ་འཁྲུགས་མེད་པར་བརྗོད་པར་བྱའོ༔ དེ་ལ་དང་པོ་ཡེ་ཤེས་མཁའ་འགྲོའི་སྤྲུལ་པ༔ དངོས་གྲུབ་སྩོལ་བའི་གཙོ་མོ༔ འཁྲུལ་བ་མེད་པའི་ལས་རྒྱ་ཞེས་བྱ་བ་མཆོག་དང་ཐུན་མོང་གི་སིདྡྷི་སྟེར་བའི་དྷཀྐི་ནི་པདྨ་ཅན་ཞེས་བྱ་བ་ཞིག་ཡོད་དེ༔ རིང་པོ་མ་ཡིན་ཐུང་བའི་སྐྱོན་མེད་པ༔ ཤིན་ཏུ་ཕྲ་བ་ཡང་མ་ཡིན་ཞིང་༔ དེ་བཞིན་སྦོམ་པའི་ཡང་སྐྱོན་མེད་པ༔ མཉེན་ལ་ལྕུག་ཆགས་པ༔ འཁྲིལ་ལ་ལྡེམ་ཆགས་པ༔ ལྷུན་སྡུག་ཅིང་གཟི་བརྗིད་དང་ལྡན་པ༔ སོ་ཚགས་དམ་ཞིང་སོ་རྐང་ཐུང་ཉམས་ཅན༔ སྨིན་མ་མང་ཉུང་མཚམས་ལ་སྨིན་ཕྲག་ཡངས་ཏེ༔ ཡི་གེ་ཆའི་ན་རོ་ལྟ་བུར་མཚར་བ༔ འཛུམ་མདངས་ཆེ་ཞིང་དཔྲལ་བ་མཛེས་པ༔ པདྨ་ལྟ་བུར་མདངས་དང་ལྡན་པ༔ ཆུ་ཞེང་གབ་ཅིང་ཟླུམ་པ༔ སྐྲ་བཟང་བག་ཙམ་སེར་བའི་ཉམས་དང་ལྡན་པ༔ དཔྲལ་བ་དང་ནུ་འཕྲག་གསང་གནས་ཀྱི་རྨོངས་མཚམས་རྣམས་སུ་གཉེར་མ་གྱེན་འགྲེང་གསུམ་དང་ལྡན་པ༔ ཤེས་རབ་ཆེ་ཞིང་སྙིང་རྗེ་དང་ལྡན་པ༔ དྲི་མ་ཞིམ་ཞིང་གོམ་པ་གཡོན་ཕྱོགས་སྔོན་ལ་འདོར་བ༔ བྷ་ག་རུབ་ཅིང་གསང་སྤྱོད་ལ་མཁས་པ༔ ཡིད་དུ་འོང་ཞིང་བདེ་བ་འཕེལ་བ༔ མདོག་སྣུམ་ཞིང་དཀར་ཉམས་ཆེ་བ༔ མིག་དཀྱུས་མཛེས་ཤིང་དཀར་ནག་ཕྱེད་པ༔ མིག་རྩ་ཅུང་ཟད་དམར་བ༔ མཆུ་ནི་པདྨའི་ཟེའུ་འབྲུ་ལྟ་བུ་ལ་སོ་ཞོ་ཡོད་པ༔ མ་མཆུ་ཅུང་ཟད་རིང་ཉམས་ཅན༔ ལག་པའི་མཐིལ་དང་སེན་མོ་དམར་བ༔ སྐད་ནི་ངང་པ་དང་ངུར་པའི་སྐད་ལྟར་སྙན་ལ་དལ་བ༔ སྤྱོད་ལམ་དལ་ཞིང་བག་ཕེབས་པ༔ མདུན་ནས་བལྟས་ན་དགྱེ་ཉམས་ཙམ་ལ༔ རྒྱབ་ནས་བལྟས་ན་དགུ་ཉམས་ཡོད་པ༔ ཟུར་ནས་བལྟས་ན་ཤིན་ཏུ་དྲང་བ༔ དཀོན་མཆོག་ལ་མཆོད་ཅིང་རྟེན་ལ་མོས་པ༔ བླ་མ་དང་སློབ་དཔོན་ལ་གུས་ཤིང་དད་པ༔ རིག་པ་གསལ་བ༔ རྣམ་ཤེས་བཀྲ་བ༔ གནས་ཁང་གཙང་མར་དགའ་ཞིང་ཕྱག་བདར་ལ་བརྩོན་པ༔ སྤྱོད་ཚེ་རྟ་སྐད་འཚེར་ཞིང་ཀུན་ཏུ་མཛུམ་མདངས་དང་ལྡན་པ༔ བཞད་མདངས་ལྷག་ལྷག་སྒྲོག་ཅིང་མཐོང་བ་ཀུན་གྱི་ཡིད་འཕྲོག་པར་ནུས་པ་ཞིག་འོང་བ་ནི༔ མཆོག་གི་བུད་མེད་ཡེ་ཤེས་ཀྱི་མཁའ་འགྲོའི་སྤྲུལ་པ་ཡིན་ཏེ༔ གསང་རྟགས་རྩ་ནི་པདྨའི་དབྱིབས་སུ་ཡོད་པས་ན༔ འགྱུར་བ་མེད་དེ་པདྨ་ཅན་ཞེས་ཀྱང་བྱ༔ འདི་ལྟར་མཚན་ལྡན་བསྟེན་པའི་རྣལ་འབྱོར་ལ༔ མཆོག་གི་དངོས་གྲུབ་ཚེ་འདིར་འཐོབ་པར་བྱེད་དོ༔ ཐུན་མོང་གི་དངོས་གྲུབ་ཆར་ལྟར་འབབ་བོ༔ འཕྲིན་ལས་བཞི་གང་བརྩམས་ཀྱང་འགྲུབ་བོ༔ ཚེ་རིང་ཞིང་ཚེའི་བར་ཆད་ཀྱང་གྲོལ་བར་འགྱུར་རོ༔ འདི་ལྟར་མཚན་དང་ལྡན་པའི་བུད་མེད་ནི་འཇིག་རྟེན་གྱི་ཁམས་རྣམས་སུ་མེ་ཏོག་ཨུ་དུམ་ཝཱ་ར་ལས་ཀྱང་དཀོན་ནོ༔ དོན་དང་ལྡན་པའི་རྣལ་འབྱོར་བ་བསགས་སྦྱངས་མཐའ་གྲོལ་དང་ལྡན་པའི་སྐལ་ལྡན་རེ་རེའི་དོན་དུ༔ ཡུམ་མཆོག་ཕག་མོའི་ཐུགས་ཀློང་ནས་སྤྲུལ་པ་སྤྲོ་སྟེ་འབྱུང་བ་ལས༔ གཞན་གྱི་རྒྱུ་རྐྱེན་གང་ལས་ཀྱང་འབྱུང་བར་མི་འགྱུར་བས་ན་ཤིན་ཏུ་དཀོན་པར་འགྱུར་རོ༔ དེ་བཞིན་དུང་ཅན་མ་ཞེས་བྱ་བ་ནི་ཁ་དོག་དཀར་ཞིང་བྱམས་དང་སྙིང་རྗེ་ཆེ་བ༔ སྐད་ནི་ཕྲ་ལ་སྙན་པ༔ སྤྱོད་ལམ་ཀུན་ཏུ་དལ་བར་སྤྱོད་པ༔ ཐེག་པ་ཆེན་པོའི་ཆོས་ལ་མོས་ཤིང་གསང་ཚིག་གཞན་ལ་མི་སྨྲ་བ༔ ལུས་ཀྱི་སྟོད་སྨད་རྒྱས་ཤིང་རྐེད་པ་ཕྲ་བ༔ རྣལ་འབྱོར་པ་ལ་ཤིན་ཏུ་གུས་ཤིང་གསང་བའི་རྟགས་ལ་རྩ་ནི་དུང་ལྟར་འཁྱིལ་བ་སྟེ༔ འདི་བསྟེན་ཚེ་རིང་ནད་ཞི་བར་ཆད་གྲོལ༔ དེ་བཞིན་གླང་སྣ་མ་ཞེས་བྱ་བ་ནི༔ སྤྱོད་ལམ་དལ་ཞིང་ངང་རྒྱུད་རིང་བ༔ སྐད་གདངས་མཐོ་ཞིང་སྨྲས་པའི་ཆད་བརྟན་པ༔ བློ་བརྟན་ཞིང་ཉ་སུལ་རགས་པ༔ མིག་འཛུམ་ཞིང་གདོང་མིག་བལྟ་བ༔ སེམས་བཟང་ཞིང་སྦྱོར་བ་ལ་མཁས་པ༔ ནང་རྟགས་ཆོས་ལ་མོས་ཤིང་རྩ་སྣ་གླང་པོའི་སྣ་ལྟར་རིང་བ་སྟེ༔ འདི་བསྟེན་སྙན་གྲགས་འཐོབ་པ་དང་ཐུན་མོང་གི་དངོས་གྲུབ་ཐམས་ཅད་མ་གཉེར་བཞིན་དུ་འགྲུབ༔ དེ་བཞིན་རི་དྭགས་ཅན་ཞེས་བྱ་བ་ནི༔ ལུས་ཀྱི་སྟོད་སྨད་ཕྱེད་ཅིང་རྐེད་པ་ཕྲ་བ༔ ཤ་མདོག་སེར་པོའམ་སྔོན་པོ་ལ་མདངས་ཡོད་པ༔ སྐྲ་སེར་ཞིང་ལི་བ༔ སྤྱོད་ལམ་ཅི་བྱེད་དལ་ལ་མཛེས་པ༔ པདྨ་དམ་ཞིང་སྒྲུབ་པ་པོ་ལ་གུས་པ༔ ནང་རྟགས་རྩ་ནི་བྱ་རོག་གི་མཆུ་ལྟར་ལྡན་པ་སྟེ༔ འདི་བསྟེན་དྲག་པོའི་འཕྲིན་ལས་ཐམས་ཅད་འགྲུབ་པ་དང་༔ ཕ་རོལ་གྱི་ཉེར་འཚེ་ཉུང་ཞིང་དུད་འགྲོ་འཕེལ་བ་སོགས་འབྱུང་ངོ་༔ དེ་བཞིན་གོང་གི་རྟགས་རྣམས་ཚང་ཞིང་༔ ཁྱད་པར་དུ་དཔྲལ་བར་སྨེ་བ་ཡོད་ན་སྐུ་རྡོ་རྗེ་མ་ཞེས་བྱ་བ་སྟེ༔ སྐུ་ཡི་དངོས་གྲུབ་སྟེར་བར་ནུས་སོ༔ མགྲིན་པར་སྨེ་བ་ཡོད་ན་གསུང་རྡོ་རྗེ་མ་ཞེས་བྱ་སྟེ༔ གསུང་གི་དངོས་གྲུབ་སྟེར་བར་ནུས་སོ༔ སྙིང་གར་སྨེ་བ་ཡོད་ན་ཐུགས་རྡོ་རྗེ་མ་ཞེས་བྱ་སྟེ༔ ཐུགས་ཀྱི་དངོས་གྲུབ་སྟེར་བར་ནུས་སོ༔ གནས་གསུམ་གར་སྨེ་བ་ཚང་ན་ཡེ་ཤེས་ཀྱི་མཁའ་འགྲོ་དངོས་ཡིན་པ་ལས༔ དེ་ནི་ཕལ་བའི་བུ་མོ་ཡིན་སྙམ་མི་བྱའོ༔ དེ་ཅིའི་སླད་དུ་ཞེ་ན༔ དེ་ནི་འབྱུང་བར་དཀོན་ཞིང་མཆོག་གི་དངོས་གྲུབ་སྩོལ་ནུས་པའི་ཐུགས་རྗེ་དང་ལྡན་པས་ན༔ ཚུལ་བཞིན་བསྟེན་པར་བྱའོ༔ དེ་ནི་ཡིད་བཞིན་ནོར་བུ་ལས་ཀྱང་ལྷག་གོ༔ དེ་ལྟར་མ་ཡིན་པའི་བུད་མེད་ནི༔ སྔགས་ལས་སྐྱེས་པ་ཞེས་བྱ་བ་ཕ་མ་རྣལ་འབྱོར་སྤྱོད་ཅིང་དངོས་གྲུབ་ཐོབ་པའི་བུ་མོ་ལ་འོང་སྟེ༔ ཤ་མདོག་དཀར་ཞིང་ལུས་སྟོད་སྨད་ཀྱི་ཞིང་རྒྱས་པ༔ ཤངས་ཟོར་བཟང་ཞིང་ནུ་མ་འབུར་བ༔ ནུ་བར་དོག་ཅིང་དམ་ཚིག་གཙང་བ༔ བདེ་བ་ཤིན་ཏུ་ཆེ་ལ་ཡིད་དུ་འོང་ཞིང་མཚར་བ་སྟེ༔ བསྟེན་པས་སྔགས་དང་བསྐྱེད་རྫོགས་ལས་སུ་རུང་༔ དེ་བཞིན་ཞིང་ལས་སྐྱེས་པ་ཞེས་བྱ་བའི་བུད་མེད་ནི༔ གཟུགས་བཟང་ཞིང་མགོ་མཇུག་ལེགས་པ༔ དཔྲལ་བ་ཆེ་ཞིང་མིག་དཀྱུས་རིང་བ༔ སྐད་སྙན་ལ་གད་རྒྱངས་ཧ་ཧིའི་སྒྲ་སྒྲོགས་པ༔ ཟིལ་ཆེ་ཞིང་སྣང་བ་སྒྱུར་ཐུབ་པ་སྟེ༔ ཞིང་སྐྱོང་མཁའ་འགྲོ་མི་ལུས་བླངས་པ་ཡིན་པས༔ བསྟེན་པས་དངོས་གྲུབ་མང་དུ་འབྱུང་༔ བཀྲ་ཤིས་འཁོར་གཡོག་བྱམས་ཤིང་ལོངས་སྤྱོད་འཕེལ་ལོ༔ དེ་བཞིན་ལས་ལས་སྐྱེས་པ་ཞེས་བྱ་བའི་བུད་མེད་ནི༔ འཇིག་རྟེན་ཀྱི་ཁམས་གང་དུའང་རིགས་དང་རུས་ལ་མ་ངེས་པར་འབྱུང་བ་སྟེ༔ མཚན་ཉིད་ཀུན་ལྡན་དངོས་གྲུབ་ཀྱི་བུ་མོ་ནི༔ རང་གི་མ་དང་བྲན་མོ་གདོལ་བ་སྲིང་མོ་མིག་མ་མཁན་གྱི་ཁྲོད་སོགས་གང་དུ་འདུག་ཀྱང་བསྟེན་པར་བྱའོ༔ མཚན་རྟགས་ཇི་ལྟར་ལྡན་པའི་དངོས་གྲུབ་དེ་ལྟར་འབྱུང་ངོ་༔ གནས་ལས་སྐྱེས་པ་ཞེས་བྱ་བའི་བུད་མེད་ནི༔ ཙ་རི་ཊ་དང་དྷེ་ཝི་ཀོ་ཊི་གྷྲི་ཧ་དྷེ་ཝ་ལ་སོགས་དང་༔ ཁྱད་པར་པདྨ་ང་ཡིས་བྱིན་གྱིས་བརླབས་པའི་གནས་ཆེ་ཆུང་རྣམས་དང་བཅས་པའི༔ གནས་རྣམས་ཀྱི་ནང་དུ་འབྱུང་བ་སྟེ༔ ཡོན་ཏན་ལྡན་པའི་དྷཀྐིས་དངོས་གྲུབ་སྟེར༔ ལྷན་སྐྱེས་ཀྱི་རིགས་ཀྱི་བུད་མེད་ཞེས་བྱ་བ་ནི༔ རིགས་བཟང་ཞིང་མཁའ་འགྲོའི་རྟགས་རྣམས་ཚང་བ༔ མཐོང་བ་ཙམ་གྱིས་ཡེ་ཤེས་སྐྱེ་བ༔ ལྷན་ཅིག་སྦྱོར་ན་ཟག་མེད་ཀྱི་ཉམས་མྱོང་རྣམས་རྩོལ་མེད་དུ་འཆར་བ༔ གཟུགས་དང་སྤྱོད་ལམ་མཛེས་ཤིང་ཤ་ལུས་རྒྱས་ལ་རྐེད་པ་ཕྲ་བ༔ ཡན་ལག་མཉེན་ལྕུགས་དང་ལྡན་ཞིང་ཤ་མདོག་མཚར་བ༔ བཞིན་འཛུམ་བག་དང་ལྡན་པ༔ བློ་གསལ་ཤེས་རྒྱུད་བརྟན་ལ་འགྱུར་བར་དཀའ་བ༔ མིག་ལེགས་ཡིད་དུ་འོང་ཞིང་ཐབས་ཀྱི་དཔའ་བོ་མཐོང་ན་དུང་མིག་ཏུ་བལྟ་བ་སྟེ༔ འདི་བསྟེན་ཡོན་ཏན་འདོད་དགུ་འགྲུབ༔ ཏིང་འཛིན་དགའ་བའི་ཡོན་ཏན་རྣམས་རབ་ཏུ་འཕེལ་ཞིང་ཐུན་མོང་རྣམས་ཀྱང་ཞར་ལ་འབྱུང་ངོ་༔ དེ་ལྟར་མ་ཡིན་པའི་བུད་མེད་ནག་མོ་མ་དག་པའི་རིགས་སྤང་བྱའི་ཚོགས་ནི་འདི་ལྟར་རོ༔ དང་པོ་བདུད་མོ་འགྲིབ་བྱེད་མའི་རིགས་ཞེས་བྱ་བ་ནི༔ གཟུགས་ཆེ་ཡན་ལག་རགས་ཤིང་ཁ་སྣ་ཆེ༔ རྐང་བ་གཡས་འདོར་ཤ་མདོག་དམར་རམ་ནག་པོ་ཅན༔ སྐད་སྦོམ་བྲང་རུས་འབུར་ལ་རྐེད་པ་གྱི་ལིང་དུ་ཡོད་པ༔ ཆོས་ལ་མི་དད་ཅིང་སེར་སྣ་ཤིན་ཏུ་ཆེ་བ༔ ཕྲ་མ་དང་གཡེམ་ལ་དགའ་བ༔ ཀུན་ལ་སྙིང་རྗེ་ཆུང་ཞིང་མཛའ་བོ་ལ་ངན་པ་སྟེ༔ དེ་བསྟེན་ཚེ་བསོད་ནམས་ལོངས་སྤྱོད་ཐམས་ཅད་འགྲིབ་པར་འགྱུར་རོ༔ དེ་བཞིན་བདུད་མོ་མནོལ་བྱེད་མ་ཞེས་བྱ་བའི་རིགས་ཀྱི་བུད་མེད་ནི༔ གཟུགས་བོང་ཤིན་ཏུ་ཆུང་ངམ་ཡང་ན་སྦོམ་པ༔ ཤ་རྩུབ་ཉྭ་སུལ་རགས་ཤིང་རྐང་ལག་གི་མགོ་རྣམས་ཆེ་བ༔ མདོག་ཀྱང་དམར་ལ་མིག་སྒོར་མོར་ཡོད་པ༔ སྤྱོད་ལམ་འཚུབ་ལ་ཕྱིན་ཅི་ལོག་ལ་དབང་པོ་གསལ་བ༔ བཟང་ལན་བརྗེད་བརྔམ་ཆེ་ཞིང་བདེན་པ་ཁྱད་དུ་གསོད་པ༔ གཡོ་སྒྱུ་མིག་སེར་རགས་ལ་གོ་ཡུལ་ཤེས་རབ་ངན་པ༔ ཉོན་མོངས་ཆེ་ལ་གཏི་མུག་འཐིབ་པ༔ གོམ་པ་མགྱོགས་ལ་བཟང་ལན་ངན་གྱིས་འདོན་པ༔ ལས་ལ་དྲག་ཏུ་འཇུག་ཅིང་བཟའ་བཏུང་གནོལ་འབོག་ཆེ་བ་སྟེ༔ འདི་བསྟེན་མི་རུང་འཕུང་གསུམ་ལང་ཞིང་ཚེ་གུད་མི་རུང་བ་སྣ་ཚོགས་འབྱུང་བར་འགྱུར་རོ༔ དེ་བཞིན་བདུད་མོ་ཟ་བྱེད་མ་ཞེས་བྱ་བའི་རིགས་ཀྱི་བུད་མེད་ནི༔ ལུས་བོང་སྒེག་ལ་ཤ་སྣ་རྩུབ་པ༔ མིག་དམར་ཁ་ཆེ་སྣ་ཉག་ཅིང་མདོག་ཀྱང་དམར་པོའམ་ནག་པོ་གདོང་ལ་སྨེ་བ་མང་པོ་ཡོད་པ༔ སྨྲ་ཕོད་ཆེ་ལ་ཀོ་ལོང་དམ་པ༔ གང་དང་འགྲོགས་ཀྱང་འཁོན་འཐབ་མང་ཞིང་༔ གཙང་སྦྲ་ཆུང་ཞིང་དམར་ལ་བརྔམ་པ༔ ཞེ་སྡང་རགས་ལ་ཁྲོ་གཏུམ་ཆེ་བ་སྟེ༔ འདི་བསྟེན་དཔལ་རྣམས་རིང་དུ་འགྱུར༔ དེ་བཞིན་གནོད་སྦྱིན་མའི་རིགས་ཀྱི་བུད་མེད་ནི༔ མཚར་བའི་རྣམ་པ་གང་ཡང་མེད་པ་ལ༔ བློ་རྒོད་ཅིང་གོམ་པ་དྲག་པོས་འགྲོ་བ༔ བློ་མི་བརྟན་ཞིང་འགྱུར་ལྡོག་ཆེ་བ༔ གཟུགས་ཀྱི་བྱད་ངན་ལ་རློམ་སེམས་ཆེ་བ༔ ཁ་ནས་དྲི་ངན་མནམ་པ༔ རྐང་ལག་རགས་ལ་ཚིག་སྣ་ཚོགས་སྨྲ་བ༔ མིག་སེར་ཆེ་ཞིང་མཆན་འོག་ནས་གསེབ་དྲི་མནམ་པ༔ གསང་གནས་ཡངས་ཤིང་རུལ་དྲི་ཁ་བ༔ ཞེ་ག་ལོག་ཅིང་མཐོང་ཡང་ཉམས་མི་དགའ་བ་སྟེ༔ དེ་བསྟེན་ཕྲ་མེན་དང་བཀྲ་མི་ཤིས་པ་སྣ་ཚོགས་ལང་ངོ་༔ དེ་བཞིན་ལས་ཀྱི་རིགས་ཀྱི་བུད་མེད་ནི༔ ལུས་ཕྲ་སྐྲ་ནག་མཁུར་ཚོས་ཆེ་བ༔ ཨོག་མ་རྣོ་ཞིང་ཤ་མདོག་སེར་ལ་རིད་པ༔ རྐན་ཕུགས་ནག་ལ་དྲི་མ་ཆེ་བ༔ མིག་ཞུད་དམའ་ལ་མཚུལ་བ་མཐོ་བ༔ མཆེ་བ་ཡོད་ཅིང་ཡང་ན་ཤ་མདོག་དམར་བ་སྟེ༔ མིག་སེར་རྒོད་ལ་འདོད་ཆགས་ཆེ་བ་རྣམས་ཏེ༔ བསྟེན་པས་ཚེ་ལ་བར་དུ་གཅོད་ཅིང་མི་རུང་བས་སྤོང་༔ དེ་བཞིན་དམ་སྲིའི་རིགས་ཀྱི་བུད་མེད་ནི༔ དཔུང་མགོ་ཐོ་ལ་ཚིགས་པ་ཐམས་ཅད་སྦོམ་པ༔ གསུས་པ་ཆེ་ཞིང་འཕོངས་རུས་ཆུང་བ༔ སྣ་ཉག་མཁུར་ཚོས་ཆེ་ལ་དྲི་ངན་མནམ་པ༔ གསང་མི་ཐུབ་ཅིང་ཀོ་ལོང་རགས་པ༔ རྩབ་རྩུབ་མང་ལ་ཕྲག་དོག་དང་མིག་སེར་ཆེ་བ༔ འཁོར་ལ་སྐྱོ་ལ་སེར་སྣ་རགས་ཤིང་བསམ་སྦྱོར་ངན་པ་སྟེ༔ འདི་བསྟེན་མཆོག་གི་དངོས་གྲུབ་སྐྱེ་བ་ལྔ་བརྒྱར་མི་འཐོབ༔ ཡུལ་མཐའ་འཁོབ་དང་མ་རུངས་པ་ཁོ་ནར་བུད་མེད་དེ་དང་ལྷན་དུ་སྐྱེ་བས་སྤོང་བར་བྱའོ༔ དེ་བཞིན་ཤ་ཟའི་རིགས་ཀྱི་བུད་མེད་ནི༔ ཤ་མདོག་ནག་ལ་སྐད་ཕོ་སྐད་ཡོད་པ༔ རྫི་མ་རིང་ཞིང་སྨིན་མ་རྩུབ་པ་གསུས་པ་འདིར་ལ་གཤང་ལྕི་དང་དབྱ་ཆུ་མང་བ༔ ཁས་བཙོག་གཏམ་ལབ་ལ་དགའ་ཞིང་སྦྱོར་བའི་འཁྱེར་སོ་མེད་པར་རོ་ལྟར་ཉལ་བ༔ མིག་སེར་ཤིན་ཏུ་རྒོད་པ་ལ་སོགས་ཏེ༔ དེ་བསྟེན་ཚེ་འདིར་དངོས་གྲུབ་མེད་ཅིང་བར་ཆད་སྣ་ཚོགས་འབྱུང་ངོ་༔ དེ་བཞིན་ཁྲག་འཐུང་མའི་རིགས་ཀྱི་བུད་མེད་ནི༔ གདོང་པ་དམར་ཞིང་ཁ་སྣ་དམར་པོར་ཡོད་པ༔ ལུས་འགྲེང་ཞིང་ཡན་ལག་རགས་པ༔ སྐྲ་རྩུབ་ཅིང་ཁྲོ་བོའི་མིག་ལྟར་བགྲད་པ༔ ལུས་པོ་སྦོམ་ཞིང་དྲེག་པ་ཆེ་བ༔ མཆན་འོག་སྤུ་དང་སྨ་ར་བཟང་པོ་སྐྱེས་པ༔ སེན་མོ་བྱའི་སྡེར་མོ་ལྟར་རྣོ་ཞིང་མིག་སེར་ཆེ་བ་སྟེ༔ དེ་བསྟེན་ན་དངོས་གྲུབ་མེད་ཅིང་ཚེའི་བར་ཆད་མྱུར་དུ་འོང་༔ ཚེ་འཕོས་ནས་དམྱལ་བར་འགྲོ་དགོས་པའོ༔ དེ་བཞིན་རྐང་འཇིབ་མའི་རིགས་ཀྱི་བུད་མེད་ནི༔ གདོང་པ་དྲག་ཅིང་ཧར་ལང་ཆེ་བ༔ ཚིག་རྩུབ་ཅིང་ལུད་པ་ཕྱོགས་བཅུར་འཕེན་པ༔ མི་ནོར་ལ་སྡང་ཞིང་ཟས་བཅུད་ཆུང་བ༔ བྲེལ་ལ་བྱ་བའི་དོན་མི་འགྲུབ་པ༔ སེམས་འཚུབ་ཅིང་ཁ་རྒོད་བཞིན་ཕུགས་སྡུགས་པ༔ རྨི་ལམ་ལྷ་མཐོང་དང་འདྲེ་མཐོང་མང་བ༔ མིག་སྤྲིན་ཁྲ་ལ་རྫི་མ་རིང་བ༔ འཛའ་བོ་ལ་སྡང་ཞིང་ཀུན་དང་འཐབ་པ་སྟེ༔ དེ་བསྟེན་དངོས་གྲུབ་རྣམ་གཉིས་འཛད་ཅིང་ཚེ་ལ་བར་ཆད་འབྱུང་བར་འགྱུར་རོ༔ དེ་བཞིན་བཅུད་འཕྲོག་མའི་རིགས་ཀྱི་བུད་མེད་ནི༔ ཤ་མདོག་སྐྱ་བོ་ཐལ་མདོག་ལྟ་བུའམ༔ ཡང་ན་སེར་ལ་རིད་པ༔ ཡང་ན་སྔོན་པོ་ནག་པོ་སྨུག་པོ་ལ་སོགས་སོ༔ སྐྲ་ཡང་ནག་ལ་རྩུབ་པ༔ ལུས་ལ་དྲི་མ་ཆེ་བ༔ མིག་འབྲས་དམའ་ལ་སྣ་གདོང་ཉག་པ༔ ཁ་བརྩོག་ཅིང་ཚིག་ངན་སྣ་ཚོགས་རྒྱུན་དུ་སྨྲ་བ༔ ཁ་འཁྱལ་ཞིང་ཀུན་ལ་གཤེ་བ༔ གྲོང་སྲང་འགྲིམ་པ་ལ་རྒོད་པ༔ གོས་རྒྱན་དང་ཟས་སོགས་གཙང་བཙོག་མེད་པར་ཁྱི་ཕག་ལྟར་སྤྱོད་པ༔ མིག་སེར་ཆེ་ཞིང་ཟས་ལ་ངན་པ༔ སྐྱེས་པ་ཚུད་ན་འབྲལ་མི་ཕོད་པ་སྟེ༔ དེ་བསྟེན་ཚེ་ཐུང་ནད་སྣ་ཚོགས་ལྡང་༔ རྣལ་འབྱོར་པའི་ཉམས་རྟོགས་འགྲིབ་པས་སྤང་བར་བྱའོ༔ དེ་ལྟར་མ་ཡིན་པའི་ཡང་མ་རུངས་པའི་རིགས་རྣམས་འོང་སྟེ༔ འབྱུང་བ་རླུང་གི་དྭངས་མ་སྐྲ་ཡིན་པས་ཕག་གི་ཟེ་བ་ལྟར་ལངས་ན་དམ་སྲིའི་རིགས་ཀྱི་འདྲེ་མོ་ཡིན་པས་སྤང་༔ རུས་པ་བྱང་སེམས་ཀྱི་དྭངས་མ་ཡིན་པས་སོ་སེར་ཧྲལ་ཧྲོལ་ཁྱི་སོ་འདྲ་ན་སྤང་༔ མ་ཡམས་རིགས་ཀྱི་འདྲེ་མོ་ཡིན༔ རྐང་ལག་གི་སེན་མོ་བྱ་སྡེར་འདྲ་ན་དམ་སྲི་གསོད་བྱེད་མའི་རིགས་ཡིན༔ མཆན་ཁུང་གཡོན་དུ་སྨེ་བ་བྱུང་ན་འཇོམས་བྱེད་མའི་རིགས་ཀྱི་བདུད་མོ་ཡིན༔ གཅེར་གྱིས་བལྟས་པས་སྙིང་མི་དགའ་བ་དང་༔ ལྷང་གིས་སྨྲ་བས་སྒྲ་མི་སྙན་པ་རྣམས་ཀྱང་གནོད་སྦྱིན་མའི་རིགས་ཀྱི་མདུད་མོ་ཡིན༔ གཞན་ཡང་གསང་སྒོ་འཆལ་བ་རྫུན་དང་དབྱེན་ཆེ་བ༔ དག་སྣང་ཆུང་ཞིང་མོས་གུས་མེད་པ༔ བྱི་ལ་དགའ་ཞིང་ཕྲག་དོག་རྒོད་པ་ལ་སོགས་པ་སྟེ༔ ཆོས་ལྟར་མི་ལྡན་ཞིང་ཆོས་ལ་གནོད་པར་བྱེད་པ་བདུད་ཀྱི་རིགས་ཡིན་པས་སྤང་བར་བྱའོ༔ ལར་མཛེ་མོ་ཕྱག་རྒྱར་བསྟེན་ན་རང་སངས་རྒྱས་ཐོབ་ཀྱང་གཞན་དོན་གཏན་ནས་མི་ནུས༔ ཡུགས་ས་མ་ཕྱག་རྒྱར་བསྟེན་ན་སྐྱེ་བ་བརྒྱ་སྟོང་དུ་དངོས་གྲུབ་མི་འཐོབ༔ བླ་མ་དང་སློབ་དཔོན་རྣམས་དང་དམ་ཉམས་པའི་བུད་མེད་ཕྱག་རྒྱར་བསྟེན་ན༔ སྐྱོབ་པའི་ལྷ་དང་འབྲལ་ཞིང་༔ ཡི་དམ་གྱི་ལྷ་མི་འགྲུབ་ཅིང་མཁའ་འགྲོ་རིང་དུ་འབྲོས༔ ཆོས་སྐྱོང་གི་འཕྲིན་ལས་རྒུད༔ གདུལ་བྱའི་སྣ་འགག༔ སྐྱེ་བོའི་ཡ་གས་སྡང་༔ མཚན་དང་མི་ལྡན་པའི་བུད་མེད་ནི༔ ལན་གཅིག་བསྟེན་ཀྱང་མི་རུང་བ་སྣ་གཅིག་འོང་༔ ནོར་འབྲལ་དགྲས་སྡང་ལོངས་སྤྱོད་དབུལ་མི་མཐུན་པའི་ཕྱོགས་རྣམསའཕེལ་བར་འགྱུར་རོ༔ སྐུ་གསུང་ཐུགས་ཀྱི་སྨེ་བ་ཡོད་པ་དང་༔ སྣ་བུག་གཡོན་གྱི་འགྲམ་སྟོད་སྨེ་བས་བརྒྱན་ན༔ སྐྱོན་རྣམས་ལྡན་ཡང་བཟློག་པར་འགྱུར་རོ༔ དེ་བས་ན་རྣལ་འབྱོར་པ་རྣམས་ཀྱིས་ཚུལ་བཞིན་བརྟག་ཅིང་ཚུལ་བཞིན་བརྟེན་པར་བྱའོ། དེ་སྐད་ཅེས་སློབ་དཔོན་ཆེན་པོས་གསུངས་པ་དག་བདག་བུད་མེད་ཡེ་ཤེས་མཚོ་རྒྱལ་གྱིས་བརྡ་ཡིག་ཏུ་བཏབ་སྟེ༔ མ་འོངས་ཀྱི་དོན་དུ་རིན་པོ་ཆེའི་གཏེར་དུ་སྦས་པ་ས་མ་ཡཱ༔ རྒྱ་རྒྱ་རྒྱ༔ གཏེར་རྒྱ༔ སྦས་རྒྱ༔ ཟབ་རྒྱ༔ ས་མ་ཡཱ༔ རྒྱ་རྒྱ་རྒྱ༔ གཏེར་ཆེན་ཆོས་ཀྱི་རྒྱལ་པོ་རིག་འཛིན་ཉི་མ་གྲགས་པ་རྩལ་གྱིས། གུ་རུ་དང་མཁའ་འགྲོའི་ལུང་བསྟན་གསལ་བ་ལ་བརྟེན་ནས། གནས་མཆོག་ཁམས་སྲིང་མོ་རྫོང་གི་ཕུག་ནག་ཐུགས་ཀྱི་སྒྲུབ་གནས་ཀྱི་གཡས་ཕྱོགས་ཆོས་འབྱུང་གསང་མཚན་ཕུག་ནས་ས་ཕོ་རྟ་ལོ་ཧོར་ཟླ་བརྒྱད་པའི་ཉི་ཤུ་ལྔའི་སྔ་དྲོ་སྤྱན་དྲངས་ཤིང་ལྕགས་མོ་བྱ་ལོ་ཧོར་ཟླ་དགུ་བའི་ཚེས་བརྒྱད་ལ་ཤོག་སེར་ལས་ཕབ་པའོ། །མངྒ་ལཾ།། །།

མཚོ་རྒྱལ་གྱིས་ཞུས་ལན།

ཕག་མོ་ནག་མོའི་ཟབ་ཐིག་ལས༔ མཚོ་རྒྱལ་གྱིས་ཞུས་ལན་བཞུགས༔ གུ་རུ་རིན་པོ་ཆེ་ལ་ཕྱག་འཚལ་ལོ༔ དེ་ཡང་གནས་ཆེན་པོ་ཁམས་སྲིང་མོ་རྫོང་གི་ཕག་གདོང་ནག་མོའི་གནས་མཆོག་ཏུ་སློབ་དཔོན་ཆེན་པོས་བདག་མཚོ་རྒྱལ་ལ་ཟབ་ཏིག་མཁའ་འགྲོའི་སྒྲུབ་སྐོར་རྣམས་དང་༔ ཁྱད་པར་དྷཀྐིའི་མཚན་རྟགས་རྣམས་གསུངས་པའི་ཚེ་བདག་གིས་ཞུས་པ༔ གུ་རུ་རིན་པོ་ཆེ་སྐུ་གསུམ་གྱི་རྒྱལ་བ་འདི་རྣམས་ལ་འགྲོ་བའི་དོན་མ་གཏོགས་མཛད་པ་གཞན་མི་མངའ་བར་འདུག་ལགས་པས༔ དེང་ནས་བཟུང་གནས་འདི་དང་འདིའི་ཕྱོགས་མཚམས་རྣམས་ལ་མཚན་ལྡན་གྱི་མཁའ་འགྲོ་ལས་ལྡན་གྱི་དཔའ་བོ་གང་ཟག་མ་རུངས་པའི་རིགས་དག་ཅི་འདྲ་འབྱུང་༔ མ་འོངས་སྐལ་ལྡན་རྣམས་ཀྱི་བརྗེད་བྱང་དུ་བདག་གིས་དཀར་ཆག་ཏུ་འདེབས་བསམ་པས་གུ་རུ་རིན་པོ་ཆེས་གསུང་དུ་གསོལ་ལོ༔ མ་འོངས་འགྲོ་བའི་དོན་དུ་གསུང་དུ་གསོལ་ཞེས་ཞུས་པས་བཀའ་སྩལ་པ༔ ཇོ་མོ་མཚོ་རྒྱལ་ཁྱོད་ཀྱིས་ཞུས་པ་ལེགས་ཀྱང་སྐུ་གསུམ་རྒྱལ་བའི་རྣམ་འཕྲུལ་སོགས་དག་མ་དག་སྣ་ཚོགས་འབྱུང་བ་བརྗོད་དུ་མི་ལང་དཔག་པར་དཀའ་མདོར་བསྡུས་ཀྱི་ཆ་ཙམ་བརྗོད་པ་ལམ་ཡིག་གསང་བའི་སྙིང་པོའི་ནང་ལྟར་ཡིན༔ དེར་མ་འདུས་པའི་ཞིབ་གསལ་ཟུར་ཙམ་ཞིག་བརྗོད་དང་ཁྱོད་ཀྱིས་ཡི་གེར་ཐོབ་ལ་གཏེར་དུ་བཅོལ་དང་མ་འོངས་པའི་འགྲོ་བ་མོས་གུས་ལྡན་པ་རྣམས་ལ་ཕན་པར་འགྱུར་རོ༔ དེ་ཡང་སྟོང་གསུམ་གླིང་བཞི་འཛམ་གླིང་སོགས་སེམས་ཅན་གྱིས་གར་ཁྱབ་ཏུ་སངས་རྒྱས་ཀྱི་སྤྲུལ་པས་མ་ཁྱབ་པ་མི་སྲིད༔ སྤྲུལ་པ་ལ་མཆོག་སྤྲུལ་ཉིང་སྤྲུལ་ཡང་སྤྲུལ་གསུམ་ཡིན༔ མཆོག་སྤྲུལ་ནི་ལྷ་རིགས་ཕོ་རྒྱུད་མོ་རྒྱུད་རྒྱལ་བ་སྤྱི་དང་བྱེ་བྲག་དེ་གདུལ་བྱ་འདུལ་དཀའ་བའི་དོན་དུ་གདུལ་བྱའི་སྣང་བ་དང་ཆ་མཐུན་པའི་འདུལ་བྱེད་ཀྱི་གཟུགས་སྤྱོད་ལ་འབྲས་བུ་མི་མཐུན་པའི་སྤྱོད་པས་གདུལ་ཡུལ་རྗེས་སུ་འཛིན་པ་སྟེ༔ ལས་བཞིའི་སྣང་ཚུལ་སྣ་ཚོགས་སུ་གསལ་བ་དག་གིས་བསྟན་འགྲོར་ཕན་པས་སྐྱོང་བར་འགྱུར་རོ༔ ཉིང་སྤྲུལ་ནི་ཚོགས་བསགས་ཀྱི་འགྲོ་བས་བདག་གཞན་གྱི་དོན་ལ་མོས་ནས་བསྙེན་སྒྲུབ་དང་མཆོད་བསྟོད་བརྩམས་པས་སྒྲུབ་པ་དང་སྒྲུབ་པ་ཆེན་པོ༔ བསྙེན་པ་དང་ཉེ་བསྙེན་སོགས་ཀྱི་ཏིང་ངེ་འཛིན་ལ་དབང་འབྱོར་བས་བཙད་པོའི་ལུང་བསྒྱུར་ན་གཡོག་གིས་ངོ་ཐང་གི་ལས་བཀར་ཞིང་སྒྲུབ་པ་ལྟར༔ སྒོམ་སྒྲུབ་ཀྱི་དྲོད་རྟགས་ལྟར་འགྲོ་ལ་ཕན་པ་སྣ་ཚོགས་འབྱུང་བ་ནི་ཉིང་སྤྲུལ་ལོ༔ ཡང་སྤྲུལ་ནི་ཉིང་སྤྲུལ་ལས་ཆང་གི་ཕབས་རྩིའི་རྒྱུན་ལྟར་བྱིན་རླབས་ཀྱི་བརྒྱུད་འཛིན་ལམ་སྣ་ཟིན་ཅིང་དོན་གཉིས་ལ་སྤྱོད་པ་ངོ་ཐང་ལས་ཤར་བ་བཞིན་གྱི་རབ་འབྲིང་ཐ་མའོ༔ དེ་ལ་མཆོག་སྤྲུལ་འདི་འབྱུང་བ་མང་ཡང་བརྟག་ནི་དཀའ༔ ཉིང་སྤྲུལ་དང་ཡང་སྤྲུལ་བརྟག་དཔྱད་སླ་སྟེ་ཞི་བ་དང་བརྟན་པ་དང་སྙིང་རྗེ་དང་བརྩོན་འགྲུས་དང་བསམ་གཏན་དང་སྦྱིན་པ་དང་བཟོད་པ་དང་ཚུལ་ཁྲིམས་སོགས་ཀྱི་ཚུལ་ཅན་ལས་འབྱུང་བས་འགྲོ་བ་གཞན་གྱི་ཤེས་རྒྱུད་དང་མི་མཐུན་བ་མེད་པས་བརྟག་སླ་ཞི་དུལ་དང་ལྡན་པའི་ངང་ཚུལ་གྱིས་དག་སྣང་ཡང་འཐོབ༔ མཆོག་སྤྲུལ་ནི་ཞི་རྒྱས་ལ་ཡང་འབྱུང་ཡང་ཕལ་ཆེར་དབང་དྲག་ཁོ་ན་མང་སྟེ༔ ཅིའི་ཕྱིར་ན༔ རྒྱལ་བའི་རྣམ་འཕྲུལ་ལས་ས་ལ་དབང་བའི་རྒྱལ་པོ་དང་༔ དེས་མཆོད་པའི་དཀོན་མཆོག་གི་བསྟན་པ་སྲིད་པ་དུས་བབས་ཀྱི་བསྟན་འགྲོའི་མགོན་པོར་སངས་རྒྱས་རྣམས་ཀྱིས་སྤྲུལ་པ་ལ༔ བདུད་ནག་པོ་ཞེས་རང་རྒྱུད་སྲེད་འཛིན་གྱིས་གདུང་ནས་གོང་གི་རིགས་དེ་ལ་བརྟེན་ཡང་ང་ཆེ་ང་གཉན་ཟེར་བའི་ཐ་ཚིག་གིས་དུག་ལྔ་རང་རྒྱུད་ལ་སྤྱོད་ཅིང་བྱང་ཆུབ་ཀྱི་ལམ་ལས་རིང་དུ་གྱུར་ཚེ༔ རྒྱལ་བ་རྣམས་ཀྱིས་དྲེགས་ཅན་གྱི་ཚོགས་དེས་འགྲོ་བ་དབང་དུ་བསྒྱུར་ནས་ལམ་བྱང་ཆུབ་ཀྱི་ལྗོན་པ་སྐེམ་པ་དེ་གདུལ་བྱེད་དབང་དང་དྲག་པོས་འདུལ་ཞིང་ཆོས་མ་ཡིན་པ་རྣམས་ཕམ་པར་བྱེད་པ་དང་ཆོས་ཀྱི་བསྟན་པ་གསལ་བར་བྱེད་པ་སྟེ༔ ངོ་བོ་རྒྱལ་བ་རྒྱ་མཚོ་འདུས་པའི་སྤྲུལ་པ་དེར་བཞུགས་ཀྱང་དབང་དྲག་ལས་ཤུགས་བཙན་པས་བརྟག་བཀའ་བ་ནི་དེ་བཞིན་ཏེ༔ ལས་གནག་ཀྱང་འབྲས་བུ་དཀར་པོར་སྨིན་པ་ཡིན་ཞིང་༔ བདུད་འགོང་མང་པོ་བཟང་བརྫུའི་མཆོད་བསྟོད་བཀུར་འོས་སུ་འོངས་ཀྱང་རང་དང་འབྲེལ་ཐོགས་ཆོས་དང་རྒྱབ་འགལ་གྱི་ལས་བཞིན་སྤྱད་པས་ལས་དཀར་ཡང་འབྲས་བུ་ནི་ནག་པོར་སྨིན་ནོ༔ དེ་དག་རྣམས་ནི་འགྲོ་བའི་ཁམས་ལ་སངས་རྒྱས་ཀྱི་སྤྲུལ་པ་འབྱུང་རིམ་མདོ་ཙམ་མོ༔ མཚོ་རྒྱལ་དེ་ལྟར་ན་དེ་དག་གི་རིམ་པ་ཇི་སྲིད་དུ་འབྱུང་བ་བདག་གིས་ཤེས་ཀྱང་བརྗོད་པར་དཀའོ༔ ཡི་གེར་འབྲི་བ་ཡང་མི་ལང་ངོ་༔ འོན་ཀྱང་ཁྱོད་ཀྱི་ཞུ་དོན་ལྟར་འདི་དང་འདི་ཕྱོགས་རྣམས་ལ་དཔའ་བོ་དཔའ་མོ་དག་མ་དག་མང་ཞིང་༔ ཁྱད་པར་དུ་གནས་འདིའི་ཕྱོགས་བཞི་ནས་དཔའ་བོ་དཔའ་མོ་བརྒྱད་བསྐལ་བ་འགྲོ་བ་ཇི་སྲིད་དུ་འབྱུང་སྟེ༔ སྔ་མ་འཁོགས་པ་བར་མ་དར་བབ་རྗེས་མ་བྱིས་པ་གཅིག་མངལ་དུ་གནས་ཏེ༔ རྒས་པའི་འགྲོ་དོན་རྫོགས་དུས་དར་མས་འགྲོ་བ་སྐྱོབ༔ བྱིས་པ་དང་མངལ་གནས་གཉིས་ཀྱང་དེ་བཞིན་ཟམ་མ་ཆད་པར་འབྱུང་བ་མུ་ཏིག་རྩར་དང་ཕྲེང་བའམ་ལུ་གུ་རྒྱུད་ཀྱི་སྣང་ཚུལ་དུའོ༔ དེ་ཡང་གནས་འདི་གཅིག་པུ་མ་ཡིན་ཞིང་གནས་ཡུལ་དུར་ཁྲོད་གྲོང་བརྡལ་ཆེན་པོ་ཚོང་དུས་འདུ་ཚོགས་གང་ན་ཆེ་བ་ན་མང་ཉུང་སེམས་ཅན་གྱི་ཁམས་ལྟར་འབྱུང་ངོ་༔ ཁྱད་པར་གནས་འདིའི་ཤར་ལུང་དཀར་ཤོད་དང་རེ་ཞེས་བྱ་བ་ན་བུད་མེད་ཨ་མཚོ་ཞེས་བྱ་བ་དང་༔ གཡུང་དྲུང་མཚོ་ཟེར་བ་དང་༔ ཆོས་སྒྲོན་བྱ་བ་དང་༔ མགོན་སྐྱིད་བྱ་བའི་བུད་མེད་འབྲེལ་ཐོགས་མཐོང་ཐོས་མཐོ་རིས་ལ་འདྲེན་ནུས་པ་རྣམས་ཀྱང་འབྱུང་ངོ་༔ མ་རུངས་པའི་བུད་མེད་དར་མོ་དང་༔ སྒྲོལ་མཚོ་བསམ་སྐྱིད་ཀརྨ་མཚོ་མགོ་ཡོན་མ་ནམ་ལངས་སྒྲོན་ཟེར་པའི་མ་རུངས་པ་ཡང་མང་པོ་འབྱུང་༔ པདྨ་དབང་འཕེལ་ལུ་ཆོས་སྐྱོབ་རེ་གོན་དར་རྒྱས་བསམ་འགྲུབ་ཟེར་བའི་རིགས་བཟང་མཆོག་གི་དཔའ་བོ་མང་པོ་ཡང་འབྱུང་བར་འགྱུར་རོ༔ གུ་རུ་དྲག་འཕེལ་དཔལ་གྲུབ་བསོད་དགའ་བསྲུང་ལུ་དར་མགོན་ཟེར་བའི་བདུད་སྤྲུལ་ཡང་མང་དུ་འབྱུང་ངོ་༔ དེ་བཞིན་ལྷོ་ལུང་རྒྱལ་དང་ཨ་ལ་རོང་སོགས་ལ་གུ་རུ་མཚོ་སྒྲོན་དཀར་རིས་ལུ་མ་ལུ་གུ་སྐྱིད་སྲུང་སྐྱིད་མ་བཟང་མོ་སྔོ་ཡུ་མ་ལེགས་མཚོ་ཟེར་བའི་མཁའ་འགྲོ་རྣམས་ཀྱང་འབྱུང་ངོ་༔ དོན་གྲུབ་སྐྱིད་གཡང་མཚོ་མ་ཆོས་མ་དར་མོ་སྐྱིད་དཔལ་ལུ་མ་སྒྲོན་སྐྱོང་མཚོ་སོགས་ཟེར་བའི་བདུད་མོ་རྣམས་ཀྱང་འབྱུང་བར་འགྱུར་རོ༔ དེ་བཞིན་དུ་དབང་ཕྱུག་གཡང་འཕེལ་རྟ་མགྲིན་སྲུངས་རིག་འཛིན་ངག་དབང་དར་རྒྱས་ཟེར་བའི་དཔའ་བོ་རྣམས་ཀྱང་འབྱུང་ངོ་༔ ཨ་འགྲུབ་དར་པོ་དཀོན་མཆོག་པད་འཕེལ་དབང་དྲག་ཚེ་ལུ་ཟེར་བའི་བདུད་རིགས་རྣམས་ཀྱང་འབྱུང་བར་འགྱུར་རོ༔ ནུབ་ལུང་ཉང་དང་འབྲི་རྣམས་སུ་དཔལ་འཕེལ་མ་ནོར་ལྡན་མ་དཀར་མོ་སྐྱིད་ལག་མགོན་བུ་ཁྲིད་པདྨ་བུ་ཁྲིད་ཚུལ་ཁྲིམས་བཟང་མོ་བསོད་ནམས་དཔལ་མོ་སོགས་ཟེར་བའི་རིགས་བཟང་གི་མཁའ་འགྲོ་རྣམས་ཀྱང་འབྱུང་བར་འགྱུར་རོ༔ དར་མོ་སྐྱིད་དབང་སྒྲོན་མཚོ་ལུ་མ་ལྷ་མོ་བུ་ཁྲིད་ཡིད་འཕྲོག་ལྷ་མོ་མགོན་སྐྱོང་མཚོ་ཟེར་པ་སོགས་མ་རུངས་རྣམས་ཀྱང་འབྱུང་བར་འགྱུར་རོ༔ དེ་བཞིན་དུ་དགོས་པ་བཀྲ་ཤིས་མགོན་མཆོག་ནོར་བུ་བསམ་འཕེལ་དཔལ་བཟང་ནང་སོ་དཔལ་འཕེལ་ཚོང་དཔོན་ཨ་འཕེལ་ལགས་བཟང་སྐྱོང་ནོར་འཕེལ་དར་འཕེན་དབང་ཕྱུག་མགོན་པོ་ཟེར་བ་སོགས་ཀྱི་རིགས་བཟང་གི་དཔའ་བོ་མང་པོ་ཡང་འབྱུང་བར་འགྱུར་རོ༔ དེ་བཞིན་ཀརྨ་ཐབས་མཁས་དཀོན་ཅོག་དབང་པོ་གུ་རུ་ཚེ་དབང་ལྡིང་དཔོན་རྡོ་རྗེ་ནང་སོ་དཔལ་བཟང་བཅུ་དཔོན་པདྨ་བློ་བཟང་ནོར་བུ་སོགས་ཟེར་བའི་བདུད་སྤྲུལ་རྣམས་ཀྱང་འབྱུང་བར་འགྱུར་རོ༔ བསོད་ནམས་མཚོ་དར་སྐྱིད་གཡང་མཚོ་མགོན་མོ་སྐྱོང་མོ་ཚེ་སྐྱིད་ཅེས་བྱ་བའི་བདུད་མོ་རྣམས་ཀྱང་འབྱུང་བར་འགྱུར་རོ༔ ཨ་འཕེལ་ཤི་ལོག་མགོན་པོ་གཡང་འཕེལ་ཚེ་རིང་སྨོན་བཟང་བཟང་འཕེལ་ཚེ་སྲུང་ཟེར་བའི་རིགས་བཟང་གི་དཔའ་བོ་རྣམས་ཀྱང་འབྱུང་བར་འགྱུར་རོ༔ པདྨ་དར་པོ་ནོར་འཕེལ་འཕེན་དར་ཚེ་ལུ་བསམ་འགྲུབ་ཕྱི་གོན་རྟགས་བཟང་འཕེན་ལུ་ཟེར་བའི་བདུད་སྤྲུལ་ཡང་མང་པོ་འོང་༔ དེ་དག་ཐམས་ཅད་རིམ་གྱིས་འབྱུང་ཞིང་ལྷ་དང་འདྲེའི་ངང་ཚུལ་གྱིས་ལེགས་ཉེས་ཀྱི་བྱ་བས་རང་རང་གི་ལས་མཐུན་སྤྱོད་གསུངས་པས་བདག་གིས་ཞུས་པ༔ འོ་ན་གུ་རུ་རིན་པོ་ཆེ་དེ་འདྲའི་སེམས་ཅན་བཟང་ངན་ལས་ལ་སྤྱོད་པའི་བྱེ་བྲག་གསུངས་པ་སྐུ་དྲིན་ཆེ༔ ཞིབ་ཏུ་ཞུ་འདོད་ཀྱང་ཡི་གེར་ཡང་འདེབས་མི་ལང་བ་འདྲ༔ སེམས་ཅན་ཀྱི་ཁམས་འདི་རྒྱ་ཆེ་སངས་རྒྱས་ཀྱི་སྤྲུལ་པ་འདི་གྲངས་མང་བ་ངོ་ཡང་མཚར་ཏེ་དཔྱད་ན་སྐྱོ་བ་རབ་ཏུ་འཕེལ་བ་ཞིག་འདུག་ལགས༔ འོན་ཀྱང་ལྔ་བརྒྱའི་ཡང་མཐའ་ལ་ཁམས་པ་ཉི་མ་གྲགས་པས་ཟབ་ཆོས་ཀྱི་གཏེར་ལ་སྤྱོད་དུས་འགྲོ་བ་དག་དང་མ་དག་ཅི་འདྲ་འབྱུང་ལགས༔ དུས་གསུམ་ཀུན་མཁྱེན་གུ་རུ་རིན་པོ་ཆེ་ཁྱེད་ཀྱིས་བསྟན་པ་དང་སེམས་ཅན་གྱི་དོན་དུ་གསུང་དུ་གསོལ་ཞེས་ཞུས་པས་བཀའ་སྩལ་པ༔ ཨེ་མ་གཏེར་འདི་སྤྱོད་པའི་དུས༔ ནགས་སོག་རལ་གསུམ་སྐྱེ་འགྲོ་རྣམས༔ ཕལ་ཆེར་མ་ལུས་བདུད་སྙིང་ཅན༔ ཁྱད་པར་ར་ན་གདོང་རིང་གི༔ སྤྲུལ་པ་སྐྱབས་ཀྱི་མིང་མཐའ་ཅན༔ དབྱི་མ་བུ་སུམ་མདོའི་ནུབ་ནས་འབྱུང་༔ དུག་གི་ཁ་རླངས་སྦྲུལ་ལྕེ་ཅན༔ འབྲེལ་ཐོགས་ངན་སོང་གསུམ་ན་འཁྲིད༔ སྐྱེ་བ་གསུམ་ལ་ཕྱོགས་དེར་འབྱུང་༔ ཆོས་དང་གང་ཟག་འདི་ལ་གཤེ༔ ཆོས་འདིའི་བདག་པོར་སྙིང་ནས་དམོད༔ དེ་ཚེ་ཡབ་གཞེར་ནག་པོའི་སྤྲུལ༔ སོག་ནས་ཚེ་ཡི་མིང་ཅན་འབྱུང་༔ ཟབ་མོའི་ཆོས་ཀྱི་སེལ་བྱེད་ཅིང་༔ འབྲེལ་ཐོགས་ངན་སོང་གནས་ལ་འཁྲིད༔ དམར་རྒྱན་སྤྲུལ་པའི་བུད་མེད་གསུམ༔ སྒྲོལ་མ་དར་དང་དཀར་གྱི་མིང་༔ ཕྱོགས་དེར་འབྱུང་ནས་གཤེ་ཞིང་འབར༔ ཁ་ལག་འབྲེལ་ཐོགས་དམྱལ་བར་འཁྲིད༔ བདུད་ཐེལ་ནག་པོའི་སྤྲུལ་པ་ཞིག༔ ཨཱ་ཡུའི་མིང་ཅན་རྫོང་ནས་འབྱུང་༔ ཆོས་དང་གང་ཟག་འདི་ལ་གཤེ༔ ལས་ངན་དབང་གིས་འབྲེལ་ཐོགས་ལྟུང་༔ གཞན་ཡང་ཨ་དར་འཕེལ་ལ་སོགས༔ སྡིག་ཅན་བདུད་ཀྱི་སྐྱེས་བུ་གསུམ༔ སྙིང་ལ་བདུད་ཀྱི་ཕོ་བྲང་བཅའ༔ ལོག་སྦྱོར་སྡིག་སེམས་ལྡན་པ་འབྱུང་༔ སྨོན་ལམ་དབང་གིས་འབྲེལ་ཐོགས་ལྟུང་༔ འཕགས་པ་དཀོན་མཆོག་ཀཱ་ཡི་མིང་༔ ལོག་ལམ་འཁྲིད་པའི་བླ་མ་གསུམ༔ ཕྱོགས་འདིར་འབྱུང་ནས་འཚེ་ཞིང་དམོད༔ འབྲེལ་ཐོགས་དང་བཅས་དམྱལ་བར་ལྟུང་༔ གཞན་ཡང་མ་དག་སྐྱེ་འགྲོ་འགས༔ ཆོས་དང་གང་ཟག་འདི་ཉིད་ལ༔ ལས་ངན་དབང་གིས་དམོད་པ་མང་༔ དེ་དག་ནག་པོ་བདུད་ཀྱི་རིགས༔ ངན་སོང་གསུམ་ན་ངེས་པར་འགྲོ༔ ད་ལྟའི་ཞང་བློན་བདུད་རིགས་ཀྱིས༔ སྨོན་ལམ་ངན་པའི་མཚམས་སྦྱོར་ཡིན༔ ཨོ་རྒྱན་ཡི་དམ་པདྨ་ནོར༔ གུ་རུ་རྒྱལ་དང་བཀྲ་ཤིས་ཆོས༔ རིག་འཛིན་མིང་ཅན་དཔའ་བོ་དགུ༔ ཚེ་མཚོ་དཔལ་མཚོ་དཀར་མཚོ་དང་༔ གུ་རུ་ཆོས་སྒྲོན་བསོད་ནམས་དབང་༔ གཅོད་ཀྱི་མིང་ཅན་མཁའ་འགྲོ་དགུ༔ ཕྱོགས་ཕྱོགས་དེ་དག་རྣམས་སུ་འབྱུང་༔ བདུད་སྤྲུལ་རྣམས་ཀྱི་ཁ་གནོན་བྱེད༔ སྦས་པའི་ཚུལ་གྱིས་འགྲོ་བ་འདྲེན༔ ཁྱད་པར་ནག་སོག་ཁྲི་གསུམ་ན༔ མི་ལ་གཅན་གཟན་དུད་འགྲོའི་མིང་༔ ལྷས་སྦྱིན་སྐུ་གསུང་ཐུགས་ཀྱི་སྤྲུལ༔ མཐོང་ཐོས་ངན་འགྲོར་ངེས་པར་འཁྲིད༔ ཚེ་སྐྱིད་སྲུང་འཚོ་ཨ་ལོད་མ༔ མཁའ་འགྲོའི་རྣམ་འཕྲུལ་བུད་མེད་གསུམ༔ རྟེན་འབྲེལ་འགྲིག་ན་ཁ་གནོན་ཐུབ༔ རྟེན་འབྲེལ་ཟབ་མོ་དེ་ལོག་ན༔ མི་ལོ་ལྔ་བཅུ་རྩ་བརྒྱད་ལ༔ ལུང་གསུམ་སད་སེར་དར་ཞིང་རྒོད༔ སྐྱེ་འགྲོ་ཕལ་གྱི་ལོངས་སྤྱོད་རྒུད༔ སྤོ་བོ་འདོང་ཆུའི་ལྷ་ཁང་ལ༔ ཞིག་རལ་གསོ་ཞིང་རབ་གནས་དང་༔ ལྷོ་ཡི་གནས་ཆེན་མ་ཀུང་ལུང་༔ བྱང་གི་གནས་མཆོག་སྲིང་མོ་རྫོང་༔ བོད་ཁམས་སྲིན་མོ་གན་རྐྱལ་འདྲའི༔ ནུ་མ་གཡས་གཡོན་འདི་གཉིས་ལ༔ སྙིང་གཏེར་སྦ་ཞིང་ཀླུ་མཆོད་དང་༔ སྐུ་གསུང་ཐུགས་རྟེན་བཞེངས་དང་མཆོད༔ རབ་གནས་མངའ་གསོལ་བུམ་སྒྲུབ་འཛུགས༔ སད་སེར་ཉུང་དང་ལོངས་སྤྱོད་འཕེལ༔ མདོ་ཁམས་སྤྱི་དང་ཤོད་ལ་ཕན༔ དཀར་ཤོད་མཁའ་འགྲོ་སྐྱོང་གི་མིང་༔ ལུས་འབྲེལ་ཐོགས་ཚད་མཐོ་རིས་འཐོབ༔ ཧོར་ནས་ཌཱ་ཀི་ངག་གི་མིང་༔ འབྲེལ་ཐོགས་ངན་སོང་སྐྱེ་སྒོ་ཁེགས༔ རྒྱལ་ཤོད་མཁའ་འགྲོ་བསོད་ནམས་མིང་༔ མཐོང་ཐོས་བདེ་བ་ཅན་ན་འདྲེན༔ སྨེ་ཤོད་མཁའ་འགྲོ་དཀོན་མཆོག་སྐྱིད༔ དུར་ཤོད་མཁའ་འགྲོ་ཁྱི་ནུ་མ༔ རླུང་ཤོད་མཁའ་འགྲོ་ནོར་འཚོ་མ༔ ལྟ་ཤོད་མཁའ་འགྲོ་རེས་ལོད་མ༔ ཕག་ཤོད་མཁའ་འགྲོ་ཀརྨ་སྒྲོན༔ ཚ་ཤོད་མཁའ་འགྲོ་སྲུང་སྐྱིད་མ༔ གནས་ཤོད་མཁའ་འགྲོ་མཚོ་མོ་དང་༔ སྤགས་ཤོད་མཁའ་འགྲོ་སྔོ་ཡུ་མ༔ གཞན་ཡང་ཤོད་ཆེན་ཤོག་བཅུ་སོགས༔ ལྕམ་མདའ་རྟ་མདའ་ཀ་མདའ་དང་༔ བྱ་མདའ་སེར་མདའ་འབོམ་མདའ་དང་༔ དཀར་ནག་གསེར་སོགས་འདི་དག་ནས༔ བུད་མེད་མཁའ་འགྲོའི་རིགས་གྱུར་པ༔ མང་དུ་འབྱུང་ཞིང་འགྲོ་བ་འདྲེན༔ གཟུགས་དང་ཐབས་ཚུལ་སྣ་ཚོགས་ལ༔ བུད་མེད་མ་ངེས་མང་དུ་འབྱུང་༔ འོན་ཀྱང་འཛམ་གླིང་བོད་ཁམས་འདི་རྣམས་ལ༔ མི་སྲིད་པ་ཡི་སྲིད་པ་སྣ་ཚོགས་འབྱུང་༔ ཆོས་གཟུགས་འཆང་བའི་གཟུགས་བརྙན་བསྟན་པ་འཆར༔ ཆོས་ཀྱིས་གྲོལ་བའི་གང་ཟག་ཉིན་སྐར་འདྲ༔ སློབ་དཔོན་སློབ་མ་ཀུན་ཀྱང་དམ་སེལ་གཡོ༔ ཆོས་སྤྱིའི་བྱིན་རླབས་བཞི་ཟུར་མ་གཏོགས་ཉམས༔ མཁན་སློབ་དགེ་འདུན་ཕལ་ཆེར་དམག་ལས་སྤྱོད༔ བོད་ཀྱི་མཁའ་འགྲོ་འདུ་བའི་གནས་གསུམ་ལ༔ མཚོན་ཁ་གཏོང་ཞིང་དམག་གི་འཁྲུག་རྩོད་བྱེད༔ ཞིང་སྐྱོང་དཔའ་བོ་མཁའ་འགྲོ་ཐུགས་ཁྲོས་བྱེད༔ འབྱུང་བཞིའི་གཡོས་དང་ནད་མུག་སད་སེར་མང་༔ མཐའ་དབུས་ཆིག་དྲིལ་ཕྱོགས་ཕྱོགས་ཡོ་ལང་བྱེད༔ གཤིན་གྱི་ཟས་ལ་ཁྲམ་ཁ་གཏོད་པའི་དུས༔ མཁན་པོས་ཆོས་འཆད་བསྐྱུར་ཏེ་གྲོང་ཡུལ་མནར༔ སྐྱེ་བོ་རྣམས་ཀྱི་མནའ་ཆད་ཁྲེལ་གསུམ་འབོར༔ བུད་མེད་མང་པོ་ཧོར་འདྲའི་ཆས་ལ་འཇུག༔ སྡོམ་མེད་བན་བཙུན་ལ་ལུང་མང་བའིི་དུས༔ བེ་རིར་མོ་བཙུན་དམག་དང་སྡེ་ཁྲིམས་ལས༔ བདུད་ཀྱི་སྤྲུལ་པ་ཨོ་རྒྱན་མིང་ཅན་གྱིས༔ གནས་ཆེན་ཙ་རིའི་བྱིན་རླབས་མཐའ་ལ་སྐྱེལ༔ སྨོན་ལམ་ལོག་པར་བཏབ་པའི་སྐྱེས་བུ་བཞི༔ གར་མཁས་ཤེས་རབ་དབང་གི་མཚན་འཚང་བ༔ ཕྱོགས་བཞི་ནས་འབྱུང་མཐོང་ཐོས་ལྟུང་བར་འགྱུར༔ དེ་དག་སྨོན་ལམ་མཐུ་སྟོབ་ཀྱིས༔ མི་སྲིད་སྣ་ཚོགས་ཐན་རིགས་སྲིད༔ ལུས་ཆས་སྣ་ཚོགས་གང་དྲན་སྤྱོད༔ ཆོས་དང་བསྟན་པ་ཡ་མ་ཟུང་༔ དགེ་བསྙེན་ཕལ་ཆེར་དམ་བཅའ་སྟོངས༔ སྲུང་མ་ཕལ་ཆེར་རི་བོར་ཕྱོགས༔ ཡུལ་ལྷ་ཕལ་ཆེར་འདྲེ་རུ་ལྡང་༔ རྒྱ་འདྲེ་འགོང་པོས་རི་ཀླུངས་འཛིན༔ དགེ་བཤེས་སུ་མཐོ་བརྫུན་ཟོག་ཆེ༔ ཤི་འོག་ཕལ་ཆེར་འདྲེ་རུ་སྐྱེ༔ དམ་ཉམས་མང་པོས་བསྲུང་ཁ་འཛིན༔ མི་དཀར་མགོ་ཡི་ཞྭ་ནག་འདྲ༔ ལྷ་བསྲུང་ཐམས་ཅད་རིང་དུ་འགྱུར༔ སྡོམ་ཉམས་མང་པོས་སྔགས་ཆོག་བྱེད༔ མཛེ་ཕོས་རྟ་རོ་བཤས་པ་འདྲ༔ སྐྱོབས་པའི་ལྷ་ལྔ་སྤྲིན་བཞིན་ཡལ༔ ལྟ་ལོག་མང་པོས་ཉམས་ཁྲིད་སྟོན༔ ལོང་བས་ལམ་སྣ་བྱེད་པ་འདྲ༔ ངན་སོང་དུད་འགྲོའི་ས་བོན་འཐོར༔ དམ་སེལ་དུག་ཅན་དབང་ལུང་འབོགས༔ སྨྱོན་པའི་ལག་གིས་གྲི་ཁྱེར་འདྲ༔ ཆོས་བཞིན་སེམས་ཀྱང་ལྟུང་བའི་རྒྱུ༔ ཁྲམ་པ་མང་པོས་མི་དཔོན་བྱེད༔ རི་ཁྱིས་ར་ལུག་བདག་བྱེད་འདྲ༔ དབང་མེད་དལ་མེད་དུཿཁ་ཆེ༔ བདུད་སྤྲུལ་མང་པོས་མཁན་སློབ་བྱེད༔ ཉ་པས་བླ་གོས་བསྒོས་པ་འདྲ༔ ཕྱི་ཚུལ་བཟང་ཡང་ནང་ཚུལ་རུལ༔ ཨེ་མ་དེ་འདྲའི་བསྐལ་པ་ལ༔ སྤྱན་རས་གཟིགས་ཀྱི་སྙིང་རྗེའི་མཐུས༔ ཀླུ་དབང་སྲུང་གི་ལས་འཕྲོའི་མཐའ༔ དུས་དེར་སད་ཅིང་ཆོས་འདི་འཕྲད༔ འགྲོ་དོན་རིམ་བརྒྱུད་ངང་གིས་འཕེལ༔ བསྟན་འཛིན་གཅིག་གིས་ཆོས་འདི་སྤེལ༔ དགེ་བཤེས་གསུམ་གྱིས་དོན་གཉིས་སྤྱོད༔ སྔགས་འཆང་དགུ་ཡིས་དངོས་གྲུབ་འཐོབ༔ བུ་མཆོག་བདུན་གྱིས་ནང་ནོར་བྱེད༔ མཆོག་དང་ཐུན་མོང་དཔལ་ལ་སྤྱོད༔ ཅེས་གསུངས་པ་རྣམས་ཀྱང་བུད་མེད་བདག་གིས་ཡི་གེར་བཏབ་སྟེ་རིན་པོ་ཆེའི་གཏེར་དུ་སྦས་པ་ལས་འཕྲོ་ཅན་དང་འཕྲད་པར་ཤོག༔ ས་མ་ཡཱ༔ རྒྱ་རྒྱ་རྒྱ༔ གཏེར་རྒྱ༔ སྦས་རྒྱ༔ གསང་རྒྱ༔ ཁམས་པ་ཉི་མ་གྲགས་པས་ས་ཕོ་རྟ་ལ་ཁམས་སྲིང་མོ་རྫོང་ནས་གདན་དྲངས་པའོ། །མངྒ་ལཾ།། །།

ལས་བྱེད་སྲུང་མ་ཁྲག་རལ་མའི་སྒྲུབ་ཐབས་སྲོག་རྩ་དམར་ལེན།

ཕག་མོ་ནག་མོའི་ཟབ་ཐིག་ལས༔ ལས་བྱེད་སྲུང་མ་ཁྲག་རལ་མའི་སྒྲུབ་ཐབས་སྲོག་རྩ་དམར་ལེན་བཞུགས༔ མཁའ་འགྲོའི་ཚོགས་ལ་ཕྱག་འཚལ་ལོ༔ ལུང་གསུམ་འདུས་པའི་གྲུ་གསུམ་མམ༔ ཡང་ན་ལུང་སྟོང་ལ་སོགས་སུ༔ གཡུལ་འཁྲུགས་ས་དང་ཕུང་ཤུལ་སར༔ གྲུ་གསུམ་རྒྱ་ནི་ཁྲུ་གང་པ༔ དཔངས་སུ་ཁྲུ་ཕྱེད་ཚད་ལྡན་བཟོས༔ ཁ་ཁྱེར་རྩང་ཕུར་ཉེར་གཅིག་གཟུགས༔ རྩང་རྣམས་མི་སྙིང་དུམ་བུས་བརྒྱན༔ ཕེག་གུ་ཁྲ་བོ་ཤི་བའི་རོ༔ མ་ཉམས་མགོ་བོ་ལྷོ་ལ་བསྟན༔ ལྟེ་བར་དགྲ་བོའི་ལིངྒ་བཞག༔ རོ་གཡམ་རྒྱ་གྲམ་བྲིས་པས་བཅད༔ ཕྱོགས་བཞི་མཚམས་བརྒྱད་སྟེང་རྣམས་སུ༔ མཚོན་ཆ་སྣ་ཚོགས་གཟུགས་པར་བྱ༔ རིན་ཅེན་ཟངས་ཀྱི་སྣོད་ནང་དུ༔ རྟེན་གཏོར་དཔལ་བཤོས་བརྗིད་ལྡན་ལ༔ ཤ་སྣ་སྙིང་སྣས་རབ་བརྒྱན་ཞིང་༔ ཨ་མྲྀ་ཏ་བཏབ་ཁྲག་ཆང་སྦྲན༔ སྨྱུག་མའི་རྩང་གསུམ་གྱེན་དུ་འཛུགས༔ ཡུགས་སའི་སྐྲ་ཤད་རྩེ་མོ་བཅིངས༔ དུག་ཤོག་ངོས་ལ་དུག་ཁྲག་གིས༔ དགྲ་བོའི་ལིངྒ་བྲིས་ནས་ཀྱང་༔ ཟག་རྫས་དྲི་སྣབས་ཕྲེང་དྲེག་བྱུག༔ མ་རྙེད་རྗེས་ས་ནང་དུ་བཏབས༔ མགོ་ཞབས་བཟློག་སྟེ་གཏོར་མར་གཟུགས༔ ལེ་བརྒན་དམར་པོའི་གུར་ཡང་ཕུབ༔ རང་ཉིད་ཕག་མོའི་སྐུ་རུ་བསྒོམ༔ གསུར་ཆེན་དུད་པ་བཏང་བྱས་ནས༔ སྐད་ཅིག་དམིགས་པ་འདི་ལྟར་བསྒོམ༔ རང་གི་མདུན་གྱི་གཏོར་མ་དེ༔ ཡི་གེ་བྷྱོ་དམར་ཡོངས་གྱུར་པ༔ སྲོག་བདག་ལས་ཀྱི་མཁའ་འགྲོ་དམར༔ གཡས་པས་ཟངས་གྲི་ནམ་མཁའ་འཕྱར༔ གཡོན་པས་དགྲ་ཁྲག་ཐོད་པར་ཐོགས༔ ཞབས་གཉིས་བརྐྱང་བསྐུམ་དོར་སྟབས་བགྲད༔ མཆེ་བ་ཟངས་ཡག་དམར་པོ་བལྟམས༔ སྤྱན་གསུམ་དམར་འཁྲུག་སྡང་མིག་བགྲད༔ ཁྲག་གི་རལ་པས་ས་གཞི་ཁྱབ༔ སྦྲུལ་ནག་སྙིང་ཕྲེང་བཏགས་པ་གསོལ༔ ནུ་མ་འཕྱང་ཞིང་བྷ་ག་བགྲད༔ དྲག་ཏུ་ཁྲོས་ཤིང་བརྗིད་ལྡན་བསམས༔ ལིངྒ་དགྲ་བོ་དངོས་སུ་བསྐྱེད༔ བཀྲག་དང་གཟི་བརྗིད་མེད་པར་བསམས༔ རང་གི་གནས་ནས་འོད་འཕྲོས་པས༔ མདུན་གྱི་མཁའ་འགྲོའི་ཐུགས་ཀར་ཕོག༔ བྷྱོ་ལས་འོད་འཕྲོས་ལས་བྱེད་ཀྱི༔ མ་མོ་མཁའ་འགྲོ་གྲངས་མེད་པས༔ དགྲ་བོ་རང་དབང་མེད་པར་བཀུག༔ གཟུགས་དང་ལིངྒར་གཉིས་མེད་བསམ༔ མ་ཡེངས་ཏིང་འཛིན་གསལ་བསྐྱེད་ཅིང་༔ སྲོད་དང་ཐོར་ཁའི་དུས་རྣམས་སུ༔ སྔགས་འདི་ཆད་ལྷག་མེད་པར་བཟླ༔ ཨཱོཾ་བཛྲ་དྷཀྐི་ནི༔ དགྲ་བོ་འདུ་ཤ་ཡེ༔ བྷནྡྷ་ཡེ༔ ཚིནྡྷ་ཡེ༔ རཀྟ་ཡེ༔ དགྲ་བོའི་སྙིང་ཁ་རཀྨོ་སྲོག་ཁུག༔ མྱུར་དུ་ཁུག༔ ཛཿཛ༔ དགྲ་བོའི་སྙིང་དུམ་བུར་ཆོད༔ དུམ་བུར་ཆོད༔ དགྲ་བོ་མཱ་ར་ཡ་ཛཿཛ༔ ཞེས་བཟླས་ཐུན་སྐབས་ཐུན་གཏོར་ལ༔ དགྲ་བོ་འགུགས་བསྟིམ་དྲག་ཏུ་བྱས༔ ཁ་ཁ་ཁཱ་ཧིས་དབུལ་བར་བྱ༔ གསུར་ཆེན་དུད་པ་རོལ་མོ་ལྡིར༔ གདུང་བའི་དབྱངས་ཀྱིས་འདི་སྐད་དོ༔ ཧཱུྃ་བྷྱོ༔ ལས་ཀྱི་མཁའ་འགྲོ་ཁྲག་གི་མདོག༔ གཅེར་བུ་རྒྱན་མེད་སྙིང་སྦྲུལ་ཅན༔ གཡས་པས་ཟངས་གྲིས་དགྲ་སྲོག་གཅོད༔ གཡོན་པས་བྷན་དམར་དགྲ་ཁྲག་རོལ༔ བརྐྱང་བསྐུམ་ཞབས་གཉིས་དོར་སྟབས་བགྲད༔ མཆེ་བ་ཟངས་ཡག་དམར་པོ་གཙིགས༔ དམར་ནག་ཁྲོས་པའི་སྤྱན་གསུམ་བགྲད༔ ཁྲག་གི་རལ་པས་ས་གཞི་ཁྱབ༔ ལས་བྱེད་སྤྲུལ་པ་འབུམ་འབུམ་འགྱེད༔ དུས་དྲུག་དགྲ་བོའི་བླ་སྲོག་བརྐུ༔ རེས་འགའ་དམར་ཐག་ཉི་ཟེར་ཞོན༔ རེས་འགའ་གྲིབ་སོའི་སྨག་ལ་ཞོན༔ རེས་འགའ་མུན་ནག་སྲོད་ལ་ཞོན༔ རེས་འགའ་སྐྱ་རིང་ར་ལ་ཞོན༔ བཞུགས་ནི་ཨོ་རྒྱན་ཡུལ་ན་བཞུགས༔ སྤྲུལ་པ་སྲིད་གསུམ་ཁྱབ་པར་འགྱེད༔ ཟས་སུ་དགྲ་བོའི་ཤ་ལ་བཟའ༔ སྐོམ་དུ་དགྲ་བོའི་ཁྲག་ལ་འཐུང་༔ ལས་སུ་གསོད་དང་གཅོད་ལ་བརྩོན༔ ལས་མཛད་མཁའ་འགྲོ་ཁྲག་རལ་མ༔ དམར་གྱི་གཏོར་མ་འདི་བཞེས་ལ༔ དགྲ་སྲོག་ཆོད་ལ་དགྲ་དབུགས་སྡུས༔ སྙིང་ཁྲག་འཐུང་ལ་ཀླད་ཁྲག་དཀྲུགས༔ ལྷག་མ་རྗེས་ཤུལ་མེད་པར་ཐོང་༔ ལས་མཛད་དམར་མོ་ལས་ལ་བསྐུལ༔ ལས་ལ་བསྐུལ་ལོ་བང་མ་བུལ༔ ལས་ལ་བསྐུལ་ལོ་ངང་མ་རིང་༔ ལས་ལ་བསྐུལ་ལོ་དུས་མ་འགྱངས༔ ཅེས་བརྗོད་ཅིང་གཏོར་མ་རྟེན་གཏོར་དུ་འབུལ་ལམ༔ ཡང་ན་དགྲ་ཕྱོགས་སུ་འཕེན༔ ཡུངས་ཀར་ནག་དང་ཁྲག་སྣ་ཚོགས་ཀྱིས་ཐུན་བརྒྱག༔ དགྲ་བོའི་རྣམ་ཤེས་མར་མེ་ལྟ་བུ་དེ་སས་གཏིབས་ཆུས་བཤལ་མེས་བསྲེགས་རླུང་གིས་གཏོར་ཏེ་རྣམ་ཤེས་ནམ་མཁའི་ངང་དུ་བསམ༔ སྔགས་ལ་ནན་བསྐྱེད་ཅིང་རྟགས་རྣམས་གསལ་བ་དང་གཏོར་མ་འཕེན༔ མ་ཉེས་པའི་ཤགས་འདེབས༔ དགྲ་བོའི་ཉེས་པ་བསྒྲག༔ ལིངྒ་སྦྱིན་སྲེག་བྱ་བའམ་ཡང་ན་མནན་པ་བྱ༔ ཚོགས་དང་བསྐང་བས་གཏང་རག་གཏོང་༔ ས་མ་ཡ༔ རྒྱ༔ དེ་ལྟར་ཉམས་སུ་བླངས་བའི་ཚེ༔ རྟགས་ཀྱི་རིམ་པ་ནི༔ ཕུར་པ་ལ་སོགས་མཚོན་ཆ་བཅག་པ༔ དགྲ་བོ་དངོས་སུ་འོང་བ༔ བླ་རྟགས་བསད་པ༔ བཟུང་བ༔ བཙོན་དུ་ཁྲིད་པ༔ བཤའ་བ་སྙིང་འབྱིན་པ་ལ་སོགས་འབྱུང་བར་ངེས་སོ༔ རྟགས་རྣམས་འགྱངས་ཤིང་ལས་གཡེལ་ན༔ སྔགས་ཀྱི་ཡང་ཞུན་ཟུར་དུ་བལྟ་སྟེ་བཟླ་བར་བྱའོ༔ ས་མ་ཡ༔ རྒྱ་རྒྱ་རྒྱ༔ རིག་འཛིན་ཉི་མ་གྲགས་པས་ཁམས་སྲིང་མོ་རྫོང་ནས་གདན་དྲངས་ཤིང་ཤོག་སེར་ལས་ཕབ་པའོ།། །།མངྒ་ལམ།། །།

ལས་ཀྱི་མཁའ་འགྲོའི་བཟླས་པ་སྔགས་ཀྱི་ཡང་ཞུན།

ཕག་མོ་ནག་མོའི་ཟབ་ཐིག་ལས༔ ལས་ཀྱི་མཁའ་འགྲོའི་བཟླས་པ་སྔགས་ཀྱི་ཡང་ཞུན་བཞུགས༔ ཕག་མོ་ནག་མོའི་བྱ་ར་བ༔ གཏེར་གྱི་བསྲུང་མ་མཆོད་འདོད་ན༔ དྲག་པོའི་སྣོད་དུ་བཤོས་བུ་ལ༔ དགྲ་བོའི་ཤ་ཁྲག་ལིངྒས་བརྒྱན༔ རང་ཉིད་ཡི་དམ་གང་རུང་ངམ༔ བདག་ཉིད་པདྨའི་སྐུ་རུ་བསྒོམ༔ ཐུགས་ཀའི་འོད་ཟེར་ལྕགས་ཀྱུ་ལྟར༔ འཕྲོས་པས་སྲུང་མ་འཁོར་བཅས་རྣམས༔ རང་གི་མདུན་དུ་མཆིས་པར་བསམས༔ རོལ་མོ་འཁྲོལ་ཞིང་འདི་སྐད་དོ༔ ཧཱུྃ་བྷྱོ༔ དེང་གི་གནས་མཆོག་དམ་པ་འདིར༔ གཏེར་སྲུང་ཡང་མ་སྐྱི་མདངས་མ༔ མ་ལུས་འཁོར་བཅས་མྱུར་དུ་སྤྱོན༔ སྨན་གཏོར་རཀྟ་ཤ་ཁྲག་རུས༔ དགྲ་བོའི་དབང་པོ་ཚོགས་སུ་བཞེས༔ མ་མ་ཏིང་ཏིང་རཀྨོ་བ་ལིངྟ་རཀྟ་ཨ་མྲྀ་ཏ་དགྲ་བགེགས་ཀྱི་ཤ་ཁྲག་དོན་སྙིང་དང་བཅས་པ་ལ་ཁཱ་ཧི་ཁཱ་ཧི༔ གསུམ་མམ་བདུན་བྱ༔ དེ་ནས་བསྟོད་ཅིང་བསྐུལ་བ་ནི༔ ཧཱུྃ་བྷྱོ༔ སློབ་དཔོན་པདྨ་ཐོད་ཕྲེང་གི༔ དམ་ལ་གནས་པའི་མ་ཇོ་ཆེ༔ དམ་ཚིག་བསྒྲགས་པའི་གསང་མཚན་ཅན༔ ཡང་མ་ཆེན་མོ་ཅི་མདངས་མ༔ འབར་མ་ཆེན་མོ་མཆེ་གཙིགས་མ༔ སྒོ་མ་ཆེན་མོ་སྤྲེལ་གདོང་མ༔ མ་ལུས་འཁོར་དང་བཅས་ལ་བསྟོད༔ ཤ་ཁྲག་གཏོར་མ་འདི་བཞེས་ལ༔ ཐུགས་དམ་བསྐུལ་ལོ་འཕྲིན་ལས་མཛོད༔ དམ་ཚིག་དབང་གིས་ཁྱོད་བསྐུལ་བས༔ མ་ཐོགས་ལས་ལ་ད་ཆོས་ཤིག༔ བདག་ལ་སྡང་བའི་དགྲ་བོ་འདིས༔ ལྷ་དང་སྲུང་མ་ཁྱོད་བརྙས་ཤིང་༔ བདག་ལ་བསྡོས་ཤིིང་རྒྱུ་འབྲས་བསད༔ མྱུར་དུ་སྒྲོལ་ཅིག་གཏེར་སྲུང་མ༔ ནམ་དགུང་མུན་པའི་སྨག་ལ་ཞོན༔ དགྲ་བོའི་བླ་སྲོག་གཅོད་ལ་ཤོག༔ ཉིན་དགུང་ཉི་མའི་ཟེར་ལ་ཞོན༔ དགྲ་བོའི་ཚེ་སྲོག་ཕྲོགས་ལ་ཤོག༔ དགོང་མོ་གྲིབ་སོའི་ནག་ལ་ཞོན༔ ནད་དང་གདོན་གྱིས་དམག་སྒར་ཐོབ༔ ནམ་ལངས་སྐྱ་རིང་ར་ལ་ཞོན༔ མི་རུང་ལྟས་ངན་སྣ་དགུ་ཐོང་༔ སྐབས་སྐབས་ནམ་མཁའི་གློག་ལ་ཞོན༔ དྲག་པོའི་ཐོག་སེར་ཁོལ་བུར་ཕོབ༔ སྨན་ལ་སྤྲུལ་ལ་བླ་རྐུས་ཤིག༔ ཁྱི་ལ་སྤྲུལ་ལ་སྲོག་ཆོད་ཅིག༔ སྤྲེལ་ལ་སྤྲུལ་ལ་ཐན་ཐོང་ཞིག༔ སྟག་ལ་སྤྲུལ་ལ་ཤ་ཟོ་ཞིག༔ གཟིག་ལ་སྤྲུལ་ལ་རུས་མུར་ཞིག༔ དོམ་ལ་སྤྲུལ་ལ་ཁྲག་འཐུང་ཞིག༔ དྲེད་ལ་སྤྲུལ་ལ་མཐའ་སྡུས་ཤིག༔ དགེ་བསྙེན་རྣམས་དང་སྡོངས་བའི་ཚེ༔ དགྲ་ལ་ཀླུ་ནད་མཛེ་ཤུ་ཐོང་༔ རྫོང་བཙན་དམར་པོར་སྡོངས་བའི་ཚེ༔ ལྐུགས་རེངས་སྨྱོ་འབོག་ནད་ཀྱིས་སོད༔ ཀླུ་བདུད་རྣམས་དང་སྡོངས་བའི་ཚེ༔ དགྲ་བོ་གྲི་དང་མཚོན་གྱིས་སོད༔ རྦད་པ་ཡིན་ནོ་ད་རྒྱུག་ཅིག༔ འཁོར་གྱི་སྨན་རྣམས་ད་རྒྱུག་ཅིག༔ ཁྲག་གི་སྲིན་ཚོགས་ད་རྒྱུག་ཅིག༔ ལས་ལ་བསྐུལ་ལོ་ངང་མ་རིང་༔ སྲུང་མ་འཁོར་བཅས་མཐུ་མ་ཆུང་༔ དགྲ་བོ་ཁ་ཕུང་རྗེས་མེད་ཐོང་༔ སློབ་དཔོན་ཆེན་པོའི་བཀའ་མ་གཅག༔ རྣལ་འབྱོར་དམ་ལྡན་སུན་མ་ཕྱུང་༔ སྦས་ཡུལ་སྐྱོང་ལ་གཏེར་རྣམས་སྲུངས༔ མགོན་སྐྱོབ་མཛོད་ལ་བེའུ་ལུག་འཚོས༔ མེལ་ཚེ་མཛོད་ལ་ཀ་ཅ་སྲུངས༔ བཅོལ་བའི་འཕྲིན་ལས་གྲུབ་པར་མཛོད༔ ཅེས་བརྗོད་གཏོར་མ་གཙང་སར་གཤེགས༔ ཡང་ན་དགྲ་བོའི་ཕྱོགས་སུ་འཕེན༔ འདི་ལྟར་བརྩོན་པས་འཕྲིན་ལས་མྱུར༔ ཀ་ཅ་དཀོར་བསྲུང་དགྲ་བོ་སྒྲོལ༔ དེ་བས་གཅེས་སོ་སྙིང་ལ་གོབ༔ ས་མ་ཡ༔ རྒྱ་རྒྱ་རྒྱ༔ གཏེར་རྒྱ༔ སྦས་རྒྱ༔ ས་མ་ཡ༔ རྒྱ་རྒྱ་རྒྱ༔ རིག་འཛིན་ཆེན་པོ་་ཉི་མ་གྲགས་པས་རཀྴ་ཀོ་ཊིའི་ཕག་གདོང་ནག་མོའི་སྒྲུབ་གནས་ནས་གདན་དྲངས་པའོ། མངྒ་ལཾ།། །།

ཟབ་ཐིག་ཟུར་རྒྱན་ཡིད་བཞིན་ནོར་བུ།

ཕག་མོ་ནག་མོའི་ཟབ་ཐིག་གི་ཟུར་རྒྱན་ཡིད་བཞིན་ནོར་བུ་ཉམས་སུ་ལེན་ངེས་མ་གཏོགས་དྲེད་པོ་ཐོབ་ཆོག་མཁན་དང་བླ་མ་གླ་བ་ཆོས་ལ་གླ་རྩི་རང་ལ་རྔོན་པར་སེམས་པ་རྣམས་ལ་སྦས་རྒྱ། །ཕག་མོ་ནག་མོའི་འཛབ་ནི། ཧཱུྃ༔ གཙོ་མོའི་ཐུགས་ཀར་ཉི་མའི་དལ༔ ས་བོན་ཡི་གེ་ཧཱུཾ་མཐིང་མཐར༔ རྩ་བའི་སྙིང་པོ་སྔགས་ཀྱི་ཕྲེང་༔ ཤེས་རབ་ཡེ་ཤེས་འཁོར་ལོ་འཁོར༔ འོད་ཟེར་ལྔ་ལྡན་འཁོར་འདས་དང་༔ མཁའ་སྤྱོད་ནུབ་ཕྱོགས་ཨོ་རྒྱན་འཕྲོས༔ བདེ་གཤེགས་རྣམས་ཀྱི་བྱིན་རླབས་དང་༔ འབུམ་ཕྲག་སྐུ་གསུམ་མཁའ་འགྲོའི་གཙོ༔ འོད་ཀྱིས་སྤྱན་དྲངས་དབང་དུ་བསྡུས༔ སྒྲུབ་པའི་རྫས་དང་རང་ལ་བསྟིམ༔ དཀྱིལ་འཁོར་གསུམ་དང་འབྲལ་མེད་ངང་༔ སྔགས་ཀྱི་སྙིང་པོ་དིར་རི་རི༔ ཨཱོཾ་བཛྲ་ཀྲོ་ཏ་ཀཱ་ལི་ཧ་རི་ནི་ས་ཧྲིང་ཧྲིང་ཛཿཛཿསརྦ་སིདྡྷི་ཧཱུྃ་ཕཊ༔ སྒྲུབ་གཞུང་ལྟར་ཡིན༔ ཨཱོཾ་བཛྲ་པུཥྤེ་དང་། མ་ཧཱ་སོགས། ཧཱུྃ༔ མཐིང་ནག་ཆེན་མོ་འཇིགས་པའི་སྐུ༔ སོགས་ཀྱི་བསྟོད། རྒྱུན་འཁྱེར་སུམ་བརྒྱ་ལས་མ་ཉུང་པ། སྒྲུབ་དུས་གཞུང་ལྟར་སུམ་འགྱུར། གཏོར་བཟློག་དབང་སོགས་ཀྱི་སྐབས་སུ་ཡང་སྟོང་ལས་མ་ཉུང་བ་བཟླས་རྗེས་བསྲུང་བ་ནི། ཧཱུྃ༔ ཆོས་རྣམས་མི་དམིགས་སྟོང་བའི་ངང་༔ སྟེང་ན་གསེར་གྱི་འཁོར་ལོ་དང་༔ འོག་ན་གནམ་ལྕགས་འཁོར་ལོ་ནི༔ རྩིབས་སྟོང་ལྡན་པའི་གུར་ནང་དུ༔ གནམ་ལྕགས་ཞུན་མའི་རྡོ་རྗེ་ནི༔ གྱེན་དུ་ལངས་པ་ཀ་བའི་ཚུལ༔ ལྟེ་བ་ཡངས་ཤིང་རྒྱ་ཆེའི་ནང་༔ རྡོ་རྗེའི་རྒྱ་གྲམ་ལྟེ་བའི་སྟེང་༔ པདྨ་ཉི་མའི་དཀྱིལ་འཁོར་གསལ༔ དེ་སྟེང་བམ་ཆེན་མི་རོའི་སྟེང་༔ གསེར་གྱི་རྡོ་རྗེ་རྩེ་ལྔ་ཧཱུྃ༔ ཧཱུྃ༔ ཡིག་རྡོ་རྗེ་ཡོངས་གྱུར་པས༔ རང་ཉིད་ཕག་གདོང་ནག་མོར་བསྒོམ༔ ཡན་ལག་རིགས་བཞིའི་ཕག་མོ་བཞི༔ བ་སྤུའི་འོད་ཀློང་རེ་རེ་ན༔ དཔའ་བོ་དཔའ་མོ་གྲངས་མེད་གསལ༔ འཁོར་གཡོག་ཉེ་དུ་བསྲུང་བྱ་རྣམས༔ ཕོ་གཡས་མོ་གཡོན་ནོར་རྫས་དང་༔ ཞིང་ཁང་མདུན་རྒྱབ་བྲན་གཡོག་འོག༔ ཀུན་ཀྱང་ལྷ་ཡི་རྣམ་པར་གསལ༔ རང་རིག་ཕག་མོའི་ཐུགས་ཀ་རུ༔ ཙིཏྟ་ཤེལ་གྱི་མཆོད་རྟེན་ནི༔ ཁྲི་འཕང་ལྔ་དང་ལྡན་པ་ལ༔ བུམ་པ་བྲེ་ཏོག་རྫོགས་པར་བསྒོམ༔ བུམ་ནང་ཡེ་ཤེས་སེམས་དཔའི་སྐུ། །རང་འདྲ་མཚོན་གང་ཐུགས་ཀ་རུ། །ཉི་སྟེང་ཧཱུྃ་ཡིག་མཐིང་ཕྲ་གསལ། །འོད་ཟེར་དམར་པོ་ལྕགས་ཀྱུའི་དབྱིབས། །ཚ་ལ་རྣོ་མྱུར་ཕྱོགས་བཅུར་འཕྲོས། །རང་གི་ཚེ་སྲོག་དབང་ཐང་དཔལ། །གཟུགས་ཅན་གཟུགས་མེད་བན་བོན་དང་། །གནོད་བྱེད་ལག་ཏུ་ཤོར་ཡར་འཁྱམས། །ཐམས་ཅད་དབང་བསྡུས་ཧཱུཾ་ལ་བསྟིམ། །སླར་ཡང་འོད་ཟེར་མང་པོ་འཕྲོས། །སངས་རྒྱས་བྱང་ཆུབ་སེམས་དཔའ་དང་། །རྩ་གསུམ་ཆོས་སྐྱོང་བསྲུང་མ་ཡི། །ཐུགས་རྗེ་བྱིན་རླབས་ཧཱུཾ་ལ་ཐིམ། །ཧཱུྃ་ཡིག་ནུས་སྟོབས་གཟི་འབར་བསྒོམ། །ཨཱོཾ་བཛྲ་ཀྲོ་ཏ་ཀཱ་ལི་ཧ་རི་ནི་ས་བདག་ཅག་བསྲུང་བྱ་མི་ནོར་འཁོར་དང་བཅས་པའི་ཀཱ་ཡ་ཝཱཀྐ་ཙིཏྟ་རཀྵ༔ རཀྵ་སྭཱ་ཧཱ༔ སྐབས་མཐུན་ལྟར་བཟླས་རྗེས། ཨཱོཾ་བཛྲ་པུཥྤེ་དྷུ་པེ་ཨཱ་ལོ་ཀེ་གྷནྡྷེ་ནཻ་ཝེདྱ་ཤཔྟ་པཱུ་ཙ་ཧོ། མ་ཧཱ་སརྦ་པཉྩ་ཨ་མྲྀ་ཏ་རཀྟ་བྷ་ལིངྟ་ཁ་ཁ་ཁཱ་ཧི་ཁཱ་ཧི། བསྟོད་པ་ནི། ཧཱུྃ༔ མཐིང་ནག་ཆེན་མོ་འཇིགས་པའི་སྐུ༔ རབ་ཁྲོས་གད་བརྒྱངས་ཕྱོགས་བཅུར་བཞད༔ དཔལ་དང་དུར་ཁྲོད་ཆས་རྣམས་རྫོགས༔ ཕག་མོ་བཅོམ་ལྡན་ནག་མོ་ལ༔ གུས་པའི་ཡིད་ཀྱིས་ཕྱག་འཚལ་བསྟོད༔ ༈ བདེ་ཆེན་དཀར་མོའི་འཛབ་ནི། ཧཱུྃ༔ བསྐྱེད་པའི་ལྷ་སྐུ་སྣང་སྟོང་ཕྱག་རྒྱ་ཆེ༔ འབྱུང་བཞི་སྦྱངས་པས་ཡེ་ཤེས་འོད་ལྔའི་ཀློང་༔ རིག་པའི་རང་མདངས་རྡོ་རྗེ་རྣལ་འབྱོར་མ༔ བཟླས་པའི་སྙིང་པོ་རྡོ་རྗེ་ལུ་གུ་རྒྱུད༔ ཐབས་ཀྱི་མདའ་དར་འཁོར་འདས་ཀུན་ཏུ་གཡབ༔ ཐུགས་རྗེ་བྱིན་རླབས་ཚེ་བསོད་དཔལ་འབྱོར་སྟོབས༔ འབྱུང་བཞིའི་དྭངས་མ་བླ་ཚེ་ཆད་དམ་ཉམས༔ ལྔ་ལྡན་འོད་དང་ནྲི་ཡིག་རྣམ་པར་སྡུས༔ ཤེས་རབ་བུམ་པར་བསྐྱིལ་ནས་ཡེ་ཤེས་རྒྱས༔ བདེ་སྟོང་ཟུང་འཇུག་ཐབས་ཤེས་འོད་ཟེར་ལྔ༔ རྣལ་འབྱོར་ལུས་ལ་ཐིམ་པས་ཚེ་བསོད་རྒྱས༔ མཆོག་དང་ཐུན་མོང་དངོས་གྲུབ་ཐོབ་པར་བསམ༔ མ་ཡེངས་ཏིང་འཛིན་ངང་ནས་འཛབ་འདི་བགྲང་༔ ཧ་བཛྲ་དྷཀྐི་ནི་བྷ་ར་ཧི་ཨཱ་ཡུ་ཥེཧཱུྃ་བྷྲུྃ་ནྲི་ཛཿསིདྡྷི་སྭཱ་ཧཱ༔ བརྒྱ་ལས་མི་ཉུང་བ་བཟླས་རྗེས་རྩ་སྔགས་ལ། ཨཱོཾ་ཤཱནྟིང་ཀུ་རུ་ཡེ་སྭཱ་ཧཱ། སྦྱར་བ་སྐབས་ལྟར་བཟླས། ཨོཾ་བཛྲ་པུཥྤེ་སོགས། བསྟོད་པ་ནི། ཧཱུྃ༔ སྐྱེ་མེད་དབྱིངས་ལས་ཤར་པའི་ཕག་གདོང་མ༔ འགག་མེད་འཁོར་ལོས་བསྒྱུར་བའི་མཁའ་འགྲོའི་གཙོ༔ སྤྲུལ་པའི་མཁའ་འགྲོ་དམ་ཚིག་ཚེ་ཡི་ལྷ༔ བདེ་ཆེན་དཀར་མོ་འཁོར་དང་བཅས་ལ་བསྟོད༔ ༈ དོན་གྲུབ་སེར་མོའི་འཛབ་ནི། ཧཱུྃ༔ རང་རིག་སྟོང་པའི་རང་མདངས་རོལ་པ་ལས༔ ཟུང་འཇུག་སྐྱེ་མེད་དབྱིངས་ཀྱི་མཁའ་འགྲོ་ཤར༔ ཐུགས་ཀར་ཉི་སྟེང་ས་བོན་སྔགས་འཁོར་བསྒྱུར༔ ཕྱོགས་བཅུ་དུས་བཞིའི་རྒྱལ་བ་རྒྱ་མཚོ་དང་༔ རྩ་གསུམ་མཁའ་འགྲོ་ཆོས་སྐྱོང་སྲུང་མའི་ཚོགས༔ སྲིད་གསུམ་ཀུན་གྱི་ཚེ་དཔལ་འབྱོར་བའི་སྟོབས༔ འོད་ལྔའི་རྣམ་པར་བསྒྱུར་ནས་དབང་དུ་བསྡུས༔ བསྐྱེད་པའི་ལྷ་སྐུ་སྒྲུབ་པའི་སྔགས་འབྲུར་ཐིམ༔ བདེ་སྟོང་རབ་རྒྱས་གཟི་བརྗིད་ཆེས་ཆེར་འབར༔ སྐུ་བཞིའི་ཡེ་ཤེས་མངོན་གྱུར་ཨེ་མ་ཧོ༔ རི་རཏྣ་དྷཀྐི་ནི་བྷ་ར་ཧི་མ་མ་པུཥྟིང་ཀུ་རུ་སརྦ་སིདྡྷི་ཧཱུྃ་སྭཱ་ཧཱ༔ བརྒྱ་ལས་མ་ཉུང་བ་བཟླས་རྗེས། ཨཱོཾ་བཛྲ་པུཥྤེ་སོགས། བསྟོད་པ་ནི། ཧཱུྃ༔ རྒྱས་པའི་མཁའ་འགྲོ་དྷཀྐིའི་གཙོ་མོ་ཆེ༔ མཆོག་གི་མངའ་བདག་སིདྡྷིའི་དཔལ་ལྡན་མ༔ གྲགས་པའི་དཔལ་འབར་དབང་གི་གཟི་བརྗིད་འཕྲོ༔ ནུས་མཐུའི་སྟོབས་རྒྱས་འབྱོར་དྲུག་འབྲས་བུས་ཕྱུག༔ ཡེ་ཤེས་མཁའ་འགྲོ་འཁོར་དང་བཅས་ལ་བསྟོད༔ རྨད་བྱུང་ཐུགས་རྗེས་རྣལ་འབྱོར་བུ་བཞིན་སྐྱོང་༔ ལས་བཞིའི་ཆར་འབེབས་འདོད་པའི་དངོས་གྲུབ་སྩོལ༔ ལེགས་ཉེས་སྟངས་འཛིན་བླ་མེད་བྱ་ར་བྱེད༔ སེར་མོ་དོན་གྲུབ་སེར་མོ་འབུམ་གྱི་གཙོ༔ ཡེ་ཤེས་མཁའ་འགྲོ་འཁོར་དང་བཅས་ལ་བསྟོད༔ ༈ དམར་མོ་སྒྲ་སྒྲོག་གི་འཛབ་ནི། ཧཱུྃ༔ སྣང་བའི་ངོ་བོ་ལྷ་ཡི་སྐུ༔ སྟོང་པའི་རང་བཞིན་ཕྱི་ནང་བྲལ༔ སྣང་སྟོང་ཟུང་འཇུག་ཕྱག་རྒྱ་ཆེ༔ ཐུགས་ཀར་ཡེ་ཤེས་འོད་ལྔའི་ཀློང་། །ཉི་སྟེང་ནི་ཡིག་དམར་པོའི་མཐར། །གསང་བའི་སྙིང་པོ་ཤེས་རབ་འཁོར། །བདག་མདུན་གསལ་བའི་འོད་དམར་ཟེར། །འཁོར་འདས་སྣང་སྲིད་སྣོད་བཅུད་ཁྱབ། །རྩ་གསུམ་རྒྱལ་བའི་ཐུགས་རྗེ་དང་། །ཁམས་གསུམ་སྐྱེ་འགྲོའི་ཚེ་དཔལ་སྟོབས། །དབང་བསྡུས་བདག་མདུན་རྣམས་ལ་ཐིམ། །དབང་གི་འཕྲིན་ལས་མཐར་ཕྱིན་ཅིང་། །མཆོག་གི་དངོས་གྲུབ་མངོན་གྱུར་བསམ། །མ་ཡེངས་ཏིང་འཛིན་དེ་ཡི་ངང་། །གསང་བའི་སྙིང་པོ་འདི་བཟླའོ། །ནི་པདྨ་དྷཀྐི་ནི་བྷ་ར་ཧི་སརྦ་སིདྡྷི་ཕ་ལ་ཧཱུྃ་སྭཱ་ཧཱ༔ བརྒྱ་ལས་མ་ཉུང་བ་བཟླ། རྩ་སྔགས་ལ། ཧ་པ་ཤཾ་ཀུ་རུ་ཡེ་སྭཱ་ཧཱ། བཏགས་པ་སྐབས་ལྟར་བཟླས། ཨཱོཾ་བཛྲ་པུཥྤེ་སོགས། བསྟོད་པ་ནི། ཧཱུྃ༔ ཆོས་ཀྱི་དབྱིངས་ལས་སྐུར་བཞེངས་པ༔ རྣམ་པར་རྟོག་མེད་བཅོམ་ལྡན་མ༔ དུས་གསུམ་སངས་རྒྱས་བསྐྱེད་པའི་ཡུམ༔ ཕག་གདོང་དམར་མོར་ཕྱག་འཚལ་བསྟོད༔ འདིའི་འཛབ་འོད་ཟེར་སྤྲོ་བསྡུའི་དམིགས་པ་བསྒྱུར་ཅེས་པའི་དོན་ལྟར་ཁ་བསབས་པ་ཡིན། ༈ སྣ་ཚོགས་མཐར་ཕྱིན་གྱི་འཛབ་ནི། ཧཱུྃ༔ མཁའ་དབྱིངས་དག་པའི་ཀློང་ནས་ཡེ་ཤེས་ཀྱི༔ ལྗང་མོ་འབུམ་སྡེ་སྣ་ཚོགས་མཐར་ཕྱིན་མ༔ རང་རིག་ངོ་བོ་སྐྱེ་འགག་མེད་པའི་རྩལ། བསྙེན་དང་སྒྲུབ་པ་སྣང་སྟོང་འདུ་འཕྲོ་བསྒྱུར༔ དུས་གསུམ་བདེ་གཤེགས་འབུམ་ཕྲག་མཁའ་འགྲོའི་ཚོགས༔ ཐུགས་རྗེ་བྱིན་རླབས་ཁམས་གསུམ་འཁོར་འདས་བཅུད༔ ནུས་པས་དབང་བསྡུས་རྣལ་འབྱོར་བདག་ལ་བསྟིམ༔ བདེ་སྟོང་དབྱིངས་རྒྱས་ཉམས་རྟོགས་འོད་དུ་འབར༔ ཉི་དཀྱིལ་ས་བོན་སྔགས་ཀྱི་ཕྲེང་བ་ལ༔ ཤེས་རབ་རིག་པའི་ཕྲེང་ཐག་བརྒྱུད་དེ་འཁོར༔ ནད་བཟློག་བགེགས་བསད་བར་ཆད་དབྱིངས་སུ་བསལ༔ སྐུ་དང་ཡེ་ཤེས་འདུ་འབྲལ་མེད་པའི་ཀློང་༔ རང་བྱུང་སྙིང་པོའི་སྒྲ་དབྱངས་དི་རི་རི༔ ས་ཀརྨ་དྷཀྐི་ནི་བྷ་ར་ཧི་ས་མ་ཡ་ཧྲིང་ཧྲིང་ཛཿཛ༔ བརྒྱ་ལས་མ་ཉུང་བ་བཟླ། ནད་གདོན་བགེགས་དང་བར་ཆད་སརྦ་མཱ་ར་ཡ་ཧཱུྃ་བྷྱོ་ཧཱུྃ་ཕཊ་རཾ་རཾ་སྭཱ་ཧཱ༔ སྐབས་ལྟར་བཟླ། མཱ་ར་ཡ་བཟླ་མི་དགོས་འདྲ་འདིར་འཐུས་འདུག །ཨཱོཾ་བཛྲ་པུཥྤེ་སོགས། བསྟོད་པ་ནི། ཧཱུྃ༔ རབ་ཏུ་གཏུམ་ཞིང་དུག་གསུམ་འབར་བའི་མ༔ འབུམ་ཕྲག་དྷཀྐིའི་འཕྲིན་ལས་གར་དབང་མོ༔ ཧ་ཧིའི་སྒྲ་སྒྲོག་སྲིད་གསུམ་དབང་དུ་སྡུད༔ ནད་གདོན་བགེགས་དང་བར་ཆད་དབྱིངས་ནས་སེལ༔ སྒྲུབ་མཆོག་བུ་བཞིན་སྐྱོང་ལ་ཕྱག་འཚལ་བསྟོད༔ ༈ བདེ་ཆེན་དཀར་མོའི་ཚེ་འགུགས་གསུངས་འདོད་ན། མདའ་དར་གཡབ་ཅིང་སྙན་པའི་དབྱངས་ཀྱིས་དམིགས་པ་རང་གཞུང་ལྟར་གསལ་ཏེ། ཧཱུྃ༔ རྡོ་རྗེ་ཕག་མོ་བདེ་ཆེན་ཞི་བ་འཚོ༔ དུས་གསུམ་སངས་རྒྱས་བསྐྱེད་པའི་ཡུམ་ཆེན་མོ༔ བསྐྱེད་པའི་ལྷ་མོ་བསྒྲུབ་པའི་མཁའ་འགྲོ་མ༔ དམ་ཚིག་ཆེན་མོའི་ཐུགས་དམ་དུས་ལ་བབས༔ དབྱིངས་ནས་བཞེངས་ཤིག་རྡོ་རྗེ་རྣལ་འབྱོར་མ༔ སྤྲུལ་པ་སྒྱུར་ཅིག་དཔལ་གྱི་མཁའ་འགྲོའི་ཚོགས༔ ཚེ་བསོད་སྡུས་ཤིག་ལས་བྱེད་ཕོ་ཉ་རྣམས༔ ཧཱུྃ༔ མ་གཡེལ་མ་གཡེལ་ཚེ་ཡི་དྷཀྐི་རྣམས༔ སྐུ་ལས་བསྐྱེད་ཅིང་སྤྲུལ་པའི་ཚེ་འགུགས་མ༔ དཀར་མོ་འབུམ་ཕྲག་ཕྱོགས་བཅུའི་ཞིང་དུ་འཕྲོས༔ ལྕགས་ཀྱུའི་ཕྱག་རྒྱ་བསྒྱུར་ཞིང་གར་སྟབས་འཁྱུག༔ ཕྱོགས་བཅུའི་སངས་རྒྱས་རྣམས་ཀྱི་བྱིན་རླབས་དང་༔ དུས་གསུམ་རིག་འཛིན་རྣམས་ཀྱི་ཐུགས་རྗེ་དང་༔ ཕྱི་སྣོད་འབྱུང་བ་བཞི་ཡི་དྭངས་མ་དང་༔ ནང་བཅུད་སྐྱེ་འགྲོ་རྣམས་ཀྱི་ཚེ་བསོད་དཔལ༔ ལྔ་ལྡན་འོད་དང་ནྲི་ཡིག་རྣམ་པར་བསྡུས༔ རྒྱ་མཚོ་ཆེ་ལ་ཆར་པ་བབས་པ་ལྟར༔ བདག་ཅག་རྣམས་ལ་གཉིས་མེད་སིབ་སིབ་ཐིམ༔ འཆི་མེད་རིག་འཛིན་ཚེ་ཡི་དངོས་གྲུབ་སྩོལ༔ ཧཱུྃ༔ མ་གཡེལ་མ་གཡེལ་ཚེ་ཡི་དྷཀྐི་རྣམས༔ སྐུ་ལས་བསྐྱེད་ཅིང་སྤྲུལ་པའི་ཚེ་འགུགས་མ༔ སེར་མོ་འབུམ་ཕྲག་ཕྱོགས་བཅུའི་ཞིང་དུ་འཕྲོས༔ ཞགས་པའི་ཕྱག་རྒྱ་བསྒྱུར་ཞིང་གར་སྟབས་འཁྱུག༔ ཕྱོགས་བཅུའི་སངས་རྒྱས་རྣམས་ཀྱི་བྱིན་རླབས་དང་༔ དུས་གསུམ་རིག་འཛིན་རྣམས་ཀྱི་ཐུགས་རྗེ་དང་༔ ཕྱི་སྣོད་འབྱུང་བ་བཞི་ཡི་དྭངས་མ་དང་༔ ནང་བཅུད་སྐྱེ་འགྲོ་རྣམས་ཀྱི་ཚེ་བསོད་དཔལ༔ ལྔ་ལྡན་འོད་དང་ནྲི་ཡིག་རྣམ་པར་བསྡུས༔ རྒྱ་མཚོ་ཆེ་ལ་ཆར་པ་བབས་པ་ལྟར༔ བདག་ཅག་རྣམས་ལ་གཉིས་མེད་སིབ་སིབ་ཐིམ༔ འཆི་མེད་རིག་འཛིན་ཚེ་ཡི་དངོས་གྲུབ་སྩོལ༔ ཧཱུྃ༔ མ་གཡེལ་མ་གཡེལ་ཚེ་ཡི་དྷཀྐི་རྣམས༔ སྐུ་ལས་བསྐྱེད་ཅིང་སྤྲུལ་པའི་ཚེ་འགུགས་མ༔ དམར་མོ་འབུམ་ཕྲག་ཕྱོགས་བཅུའི་ཞིང་དུ་འཕྲོས༔ ལྕགས་སྒྲོག་ཕྱག་རྒྱ་བསྒྱུར་ཞིང་གར་སྟབས་འཁྱུག༔ ཕྱོགས་བཅུའི་སངས་རྒྱས་རྣམས་ཀྱི་བྱིན་རླབས་དང་༔ དུས་གསུམ་རིག་འཛིན་རྣམས་ཀྱི་ཐུགས་རྗེ་དང་༔ ཕྱི་སྣོད་འབྱུང་བ་བཞི་ཡི་དྭངས་མ་དང་༔ ནང་བཅུད་སྐྱེ་འགྲོ་རྣམས་ཀྱི་ཚེ་བསོད་དཔལ༔ ལྔ་ལྡན་འོད་དང་ནྲི་ཡིག་རྣམ་པར་བསྡུས༔ རྒྱ་མཚོ་ཆེ་ལ་ཆར་པ་བབས་པ་ལྟར༔ བདག་ཅག་རྣམས་ལ་གཉིས་མེད་སིབ་སིབ་ཐིམ༔ འཆི་མེད་རིག་འཛིན་ཚེ་ཡི་དངོས་གྲུབ་སྩོལ༔ ཧཱུྃ༔ མ་གཡེལ་མ་གཡེལ་ཚེ་ཡི་དྷཀྐི་རྣམས༔ སྐུ་ལས་བསྐྱེད་ཅིང་སྤྲུལ་བའི་ཚེ་འགུགས་མ༔ ལྗང་མོ་འབུམ་ཕྲག་ཕྱོགས་བཅུའི་ཞིང་དུ་འཕྲོས༔ དྲིལ་བུའི་ཕྱག་རྒྱ་བསྒྱུར་ཞིང་གར་སྟབས་འཁྱུག༔ ཕྱོགས་བཅུའི་སངས་རྒྱས་རྣམས་ཀྱི་བྱིན་རླབས་དང་༔ དུས་གསུམ་རིག་འཛིན་རྣམས་ཀྱི་ཐུགས་རྗེ་དང་༔ ཕྱི་སྣོད་འབྱུང་བ་བཞི་ཡི་དྭངས་མ་དང་༔ ནང་བཅུད་སྐྱེ་འགྲོ་རྣམས་ཀྱི་ཚེ་བསོད་དཔལ༔ ལྔ་ལྡན་འོད་དང་ནྲི་ཡིག་རྣམ་པར་བསྡུས༔ རྒྱ་མཚོ་ཆེ་ལ་ཆར་པ་བབས་པ་ལྟར༔ བདག་ཅག་རྣམས་ལ་གཉིས་མེད་སིབ་སིབ་ཐིམ༔ འཆི་མེད་རིག་འཛིན་ཚེ་ཡི་དངོས་གྲུབ་སྩོལ༔ ཧཱུྃ༔ མ་གཡེལ་མ་གཡེལ་ཚེ་ཡི་དྷཀྐི་རྣམས༔ སྐུ་ལས་བསྐྱེད་ཅིང་སྤྲུལ་བའི་ཚེ་འགུགས་མ༔ སྔོན་མོ་འབུམ་ཕྲག་ཕྱོགས་བཅུའི་ཞིང་དུ་འཕྲོས༔ འཁོར་ལོའི་ཕྱག་རྒྱ་བསྒྱུར་ཞིང་གར་སྟབས་འཁྱུག༔ ཕྱོགས་བཅུའི་སངས་རྒྱས་རྣམས་ཀྱི་བྱིན་རླབས་དང་༔ དུས་གསུམ་རིག་འཛིན་རྣམས་ཀྱི་ཐུགས་རྗེ་དང་༔ ཕྱི་སྣོད་འབྱུང་བ་བཞི་ཡི་དྭངས་མ་དང་༔ ནང་བཅུད་སྐྱེ་འགྲོ་རྣམས་ཀྱི་ཚེ་བསོད་དཔལ༔ ལྔ་ལྡན་འོད་དང་ནྲི་ཡིག་རྣམ་པར་བསྡུས༔ རྒྱ་མཚོ་ཆེ་ལ་ཆར་པ་བབས་པ་ལྟར༔ བདག་ཅག་རྣམས་ལ་གཉིས་མེད་སིབ་སིབ་ཐིམ༔ འཆི་མེད་རིག་འཛིན་ཚེ་ཡི་དངོས་གྲུབ་སྩོལ༔ ཨཱོཾ་བཛྲ་ཀྲོ་ཏ་ཀཱ་ལི་ཧ་རི་ནི་ས་ཧྲིང་ཧྲིང་ཛཿཛཿསརྦ་སིདྡྷི་ཧཱུྃ་ཕཊ༔ ཨཱ་ཡུ་ཥེ་ཧཱུྃ་བྷྲུྃ་ནྲི་ཛཿསིདྡྷི་སྭཱ་ཧཱ༔ ཅི་རིགས་སུ་བཟླ། ༈ དངོས་གྲུབ་ལེན་པ་ནི། ཧཱུྃ༔ མཁའ་འགྲོ་རྒྱ་མཚོ་དབང་གི་དཀྱིལ་འཁོར་དུ༔ སྐུ་ལྔའི་ཡོན་ཏན་མ་ལུས་འདུས་པའི་དཔལ༔ ཕག་མོ་རིགས་ལྔའི་སྐུ་དང་གཉིས་སུ་མེད༔ དམ་རྫས་གཏོར་ཆེན་མཆོག་གི་དངོས་གྲུབ་ཞུ༔ མ་དང་མཁའ་འགྲོ་བརྟེན་ཕྱིར་བདག་ལ་སྩོལ༔ ཕག་མོ་རིགས་ལྔ་དུས་གསུམ་རྒྱལ་བའི་ཡུམ༔ བཅོམ་ལྡན་འདས་མ་འབུམ་ཕྲག་དྷཀྐིའི་གཙོ༔ འགྱུར་མེད་རྣམ་དག་སྐུ་ཡི་སྒོ་ཕྱེ་ནས༔ འཆི་མེད་རིགས་འཛིན་ཚེ་ཡི་དངོས་གྲུབ་སྩོལ༔ འགག་མེད་རྣམ་དག་གསུང་གི་སྒོ་ཕྱེ་ནས༔ ཚངས་དབྱངས་དྲུག་ཅུ་གསུང་གི་དངོས་གྲུབ་སྩོལ༔ སྤྲོས་མེད་རྣམ་དག་ཐུགས་ཀྱི་སྒོ་ཕྱེ་ནས༔ ཕྱག་རྒྱ་ཆེན་པོ་མཆོག་གི་དངོས་གྲུབ་སྩོལ༔ རིན་ཆེན་བུམ་བཟང་དཔག་བསམ་ནོར་བུའི་ཚུལ༔ དགོས་འདོད་ཀུན་འབྱུང་མཆོག་ཐུན་དངོས་གྲུབ་སྩོལ༔ ཨཱོཾ་བཛྲ་ཀྲོ་ཏ་ཀཱ་ལི་ཧ་རི་ནི་ས་ཧྲིང་ཧྲིང་ཛཿཛཿསརྦ་སིདྡྷི་ཧཱུྃ་ཀཱ་ཡ་ཝཱཀྐ་ཙིཏྟ་སིདྡྷི་ཧཱུྃ་སྭཱ་ཧཱ༔ ༈ འགུགས་སྔགས་འགུགས་གཞུག་ལ་སྦྱར་ཅེས་པའི་དོན། ན་མོ་དཀོན་མཆོག་གསུམ་དང་རྩ་བ་གསུམ་གྱི་བདེན་པས་གནོད་བྱེད་དགྲ་བགེགས་ཐམས་ཅད་གཟུགས་ལིངྒ་འདིའི་ནང་དུ་ཁུག། གསུམ། ཨཱོཾ་བཛྲ་ཀྲོ་ཏ་ཀཱ་ལི་ཧ་རི་ནི་ས་ཧཱུྃ་ཕཊ༔ དགྲ་བོ་བྱད་མ་ལྷ་བསྲུང་དང་བཅས་པའི་ལུས་ངག་ཡིད་གསུམ་ཁུག་རིལ་ཐུན་བྷྱོ༔ གསུམ། ཛཿཧཱུྃ་བཾ་ཧོཿས་རྒྱས་གདབ། ཧཱུྃ༔ ཕག་གདོང་ནག་མོ་འཇིགས་གཟུགས་བརྔམ༔ སོགས། སྒྲོལ་བྱེད་འབུམ་སྡེས་དགྲ་བགེགས་སྒྲོལ༔ ཨཱོཾ་བཛྲ་ཀྲོ་ཏ་ཀཱ་ལི་ཧ་རི་ནི་ས་མ་མ་ཏྲག་རཀྴ་ཡ་ཁ་ཐུན་ཁ་ཐུན༔ དགྲ་བོ་འདུ་ཤ་ཡེ༔ བྷནྡྷ་ཡེ༔ ཚིནྡྷ་ཡེ༔ རཀྟ་ཡེ༔ དགྲ་བོའི་སྙིང་ཁ་རཀྨོ་སྲོག་ཁུག༔ མྱུར་དུ་ཁུག་ཛཿཛ༔ དགྲ་བོའི་སྙིང་དུམ་བུར་ཆོད་དུམ་བུར་ཆོད༔ དགྲ་བོ་མཱ་ར་ཡ་ཛཿཛ༔ ཧཱུྃ༔ མཁའ་འགྲོའི་ཚོགས་རྣམས་དགྱེས་པར་རོལ༔ ཁཱ་ཧི་ཁཱ་ཧི་འདོད་ཆགས་ཁྲག་ལ་ཁཱ་ཧི༔ ཁཱ་ཧི་ཁཱ་ཧི་ཞེས་སྡང་རུས་ལ་ཁཱ་ཧི༔ ཁཱ་ཧི་ཁཱ་ཧི་གཏི་མུག་ཤ་ལ་ཁཱ་ཧི༔ གསུམ། ཟློག་པ་ནི། ཧཱུྃ༔ མཁའ་འགྲོ་བཀའ་ཡི་དུར་ཁྲོད་ནས༔ མ་མོ་མཁའ་འགྲོ་བྱེ་བ་འབུམ༔ དབྱིངས་ནས་སྐུ་སྐྱོད་འཕྲིན་ལས་མཛོད༔ བཟློག་བསྒྱུར་འཕྲིན་ལས་དུས་ལ་བབས༔ ཡེ་ཤེས་མཁའ་འགྲོའི་བཀའ་ཆད་ཟློག༔ འཇིག་རྟེན་མཁའ་འགྲོའི་བསུན་མ་ཟློག༔ ལས་བྱེད་མཁའ་འགྲོའི་ཕོ་ཉ་ཟློག༔ ཤ་ཟ་མཁའ་འགྲོའི་ཁྲམ་ཁ་ཟློག༔ ཕྲ་མེན་མཁའ་འགྲོའི་ངན་སྔགས་ཟློག༔ ལྟས་ངན་བརྒྱད་ཅུ་རྩ་གཅིག་གིས༔ དངོས་སུ་གནོད་པ་གཏོར་མས་ཟློག༔ ཡེ་འབྲོག་སུམ་བརྒྱ་དྲུག་ཅུ་ལས༔ སྒོས་སུ་སྡང་བ་གཏོར་མས་ཟློག༔ གློ་བུར་བདུན་བརྒྱ་ཉི་ཤུ་ལས༔ བདག་ལ་སྡང་བ་གཏོར་མས་ཟློག༔ དུས་མིན་འཆི་བ་རྣམ་བརྒྱད་ལས༔ སྐག་ལ་བབས་པ་གཏོར་མས་ཟློག༔ ཡས་ཀྱི་བདུད་དུ་གཡོས་པའི་བགེགས༔ དམར་ཆེན་གཏོར་མ་འདི་ཡིས་ཟློག༔ མས་ཀྱི་སྲི་རུ་ལང་བའི་འདྲེ༔ དམར་ཆེན་གཏོར་མ་འདི་ཡིས་ཟློག༔ བར་གྱི་སྡེ་བརྒྱད་དམོད་པའི་ཚོགས༔ དམར་ཆེན་གཏོར་མ་འདི་ཡིས་ཟློག༔ བན་བོན་ངན་སྔགས་མནན་གཏད་བྱད༔ དམར་ཆེན་གཏོར་མ་འདི་ཡིས་ཟློག༔ བརྒྱ་ཡི་མི་ཁ་ངན་པ་ཡང་༔ དམར་ཆེན་གཏོར་མ་འདི་ཡིས་ཟློག༔ སྟོང་གི་བྲ་མཆུ་ངན་པ་ཡང་༔ དམར་ཆེན་གཏོར་མ་འདི་ཡིས་ཟློག༔ ཆགས་ཆེ་མཚན་ལྟས་ངན་པ་ཡང་༔ དམར་ཆེན་གཏོར་མ་འདི་ཡིས་ཟློག༔ ཆེ་སྲི་ཆུང་སྲི་གཞོན་སྲི་ཡང་༔ དམར་ཆེན་གཏོར་མ་འདི་ཡིས་ཟློག༔ སྤར་ཁའི་སྐྱ་མདའ་ཟུག་པ་ཡང་༔ དམར་ཆེན་གཏོར་མ་འདི་ཡིས་ཟློག༔ སྨེ་བ་དུར་དུ་ཚུད་པ་ཡང་༔ དམར་ཆེན་གཏོར་མ་འདི་ཡིས་ཟློག༔ རྒྱལ་པོ་ལོ་ཡི་བདུན་ཟུར་ཡང་༔ དམར་ཆེན་གཏོར་མ་འདི་ཡིས་ཟློག༔ དམག་མི་ཞག་གི་འཁྲུག་རྩོད་ཀྱང་༔ དམར་ཆེན་གཏོར་མ་འདི་ཡིས་ཟློག༔ ལོ་ཟླ་ཞག་དང་ཚེས་གྲངས་སྐག༔ དམར་ཆེན་གཏོར་མ་འདི་ཡིས་ཟློག༔ མི་མཐུན་ཕྱོགས་རིས་དགྲ་དང་བགེགས༔ དམར་ཆེན་གཏོར་མ་འདི་ཡིས་ཟློག༔ རྩ་སྔགས་ཀྱི་མཇུག་ཏུ། བནྡྷེ་ནག་པོའི་བྱད་ཁ་བྷྱོ་ཟློག༔ བོན་པོ་ནག་པོའི་བྱད་ཁ་བྷྱོ་ཟློག༔ ཕྲ་མེན་མཁན་གྱི་བྱད་ཁ་བྷྱོ་ཟློག༔ འཕུང་གཡོས་མཁན་གྱི་བྱད་ཁ་བྷྱོ་ཟློག༔ མནན་གཏད་བཅིང་པའི་བྱད་ཁ་བྷྱོ་ཟློག༔ རླུང་ལ་འཁོར་ལོ་བསྐོར་བའི་བྱད་ཁ་བྷྱོ་ཟློག༔ ཧོམ་གྱི་བསྲེག་པའི་བྱད་ཁ་བྷྱོ་ཟློག༔ པར་བུ་བསྐོར་བའི་བྱད་ཁ་བྷྱོ་ཟློག༔ ལྷ་ཡི་རྦོད་ཟོར་བྷྱོ་ཟློག༔ ཀླུ་ཡི་རྦོད་ཟོར་བྷྱོ་ཟློག༔ བདུད་ཀྱི་རྦོད་ཟོར་བྷྱོ་ཟློག༔ མ་མོའི་རྦོད་ཟོར་བྷྱོ་ཟློག༔ གཤིན་རྗེའི་རྦོད་ཟོར་བྷྱོ་ཟློག༔ བཙན་གྱི་རྦོད་ཟོར་བྷྱོ་ཟློག༔ གཟའ་ཡི་རྦོད་ཟོར་བྷྱོ་ཟློག༔ ཐེའུ་རང་རྦོད་ཟོར་བྷྱོ་ཟློག༔ ཨ་ལ་ལ་པྲ་མོ་ཧེ་ཟློག༔ ཕུར་ཁ་ཟློག༔ ཟོར་ཁ་ཟློག༔ བྱད་ཁ་ཟློག༔ གཏད་ཁ་ཟློག༔ ཁྲམ་ཁ་ཟློག༔ ནད་ཁ་ཟློག༔ ཡམས་ཁ་ཟློག༔ རྦད་འདྲེ་བྷྱོ་ཟློག༔ རྦོད་གཏོང་བྷྱོ་ཟློག༔ ས་མ་ཡ་བྷྱོ་ཟློག༔ ཞེས་ཟློག་སྔགས་སྦྱར། ལྷག་མ་བཏང་། གཏེར་གཞུང་གི་ཆད་ཐོའི་མཇུག་ཏུ། ཧཱུྃ༔ དེ་འོག་བར་གྱི་བསྐལ་བ་ལ། །ཁམས་ཀྱི་སྲིང་མོ་རྫོང་གསུམ་གྱི། །ཕུག་ནག་བདེ་བ་ཆེན་པོ་ནས། །གྲུབ་ཆེན་འཁྲུལ་སྣང་རང་གྲོལ་གྱིས། །ཟབ་ཆོས་གཏེར་སྒོ་ཕྱེས་པའི་ཚེ། །གཡར་དམ་ཕོག་པའི་ལྷ་འདྲེ་རྣམས། །དམར་གྱི་གཏོར་མ་འདི་བཞེས་ལ། །བཅོལ་བའི་འཕྲིན་ལས་གྲུབ་པར་མཛོད། །ཧཱུྃ༔ ད་ལྟ་སྔགས་འཆང་བདག་ཉིད་ཀྱིས། །གསལ་བ་གསུམ་གྱི་དཀྱིལ་འཁོར་དུ། །ཤེས་པ་གསུམ་གྱིས་གཟེར་གདབ་ནས། །མགྲོན་ལ་བོས་པའི་བཀའ་སྐྱོང་རྣམས། །དམར་གྱི་གཏོར་མ་འདི་བཞེས་ལ། །བཅོལ་བའི་འཕྲིན་ལས་གྲུབ་པར་མཛོད། །ཅེས་ཆད་ཐོའི་མཚམས་སྦྱོར་འདི་ནི་སྔགས་པ་གུ་རུ་ཚེ་རྒྱལ་གྱིས་བསྐུལ་ངོར་ཉི་མ་གྲགས་པས་སྦྱར་བའོ། །བྲོ་རྡུང་ནི། ཧཱུྃ༔ མཁའ་འགྲོ་ཁྲོས་པའི་ཏིང་འཛིན་གྱིས། །བདེ་བ་ཆེན་པོའི་བྲོ་བརྡུངས་པས། །སྟོང་པ་ཆེན་པོའི་ཡེ་ཤེས་རྒྱས། །སྒབ་འདྲེ་དམ་སྲི་འབྱུང་པོའི་ཚོགས། །ནམ་ཡང་ལྡང་བར་མ་བྱེད་ཅིག །དམ་སྲི་སརྦ་སྟཾ་བྷ་ཡ་ནན་ནན། །རྫོགས་རིམ་ནི། ཧཱུྃ༔ སྣང་བ་དག་པ་གཞལ་ཡས་ཁང་༔ གཟུང་འཛིན་བྲལ་བ་ཡི་དམ་ལྷ༔ རང་ངོར་གསལ་བ་ཆོས་ཀྱི་སྐུ༔ སྐྱེ་མེད་མཁའ་འགྲོའི་ལྷ་ཚོགས་རྣམས༔ ཆོས་དབྱིངས་མཁའ་འགྲོའི་གནས་སུ་གཤེགས༔ ཨ་ཨཱཾཿསྨྲ་བསམ་བརྗོད་མེད་ཡུམ༔ རང་སེམས་སྐྱེ་འགག་གནས་གསུམ་འདི༔ མཁའ་འགྲོའི་སྐུ་གསུམ་རོལ་པར་ཤར༔ བསྔོ་སྨོན་ནི། ཧཱུྃ༔ གསང་བའི་བསྐྱེད་རྫོགས་བསྒོམ་བཟླས་མཐུས༔ ལྟ་བ་གཡེལ་བ་སོར་ཆུད་ཅིང་༔ སྒོམ་པ་བྱིང་བ་ཀློང་གྱུར་ཏེ༔ སྤྱོད་པ་ཚོགས་གཉིས་མཐར་ཕྱིན་ཞིང་༔ འབྲས་བུ་སྐུ་བཞི་མངོན་གྱུར་ཤོག༔ ཤིས་པ་ནི། ཧཱུྃ༔ ཡེ་ཤེས་དབྱིངས་ཀྱི་ཕོ་བྲང་ནས༔ ཕག་མོ་ཆོས་སྐུའི་བཀྲ་ཤིས་ཤོག༔ ཡེ་ཤེས་ལྔ་ལྡན་ཕོ་བྲང་ནས༔ ཕག་མོ་ལོངས་སྐུའི་བཀྲ་ཤིས་ཤོག༔ མཁའ་སྤྱོད་གནས་ཡུལ་དུར་ཁྲོད་ནས༔ ཕག་མོ་སྤྲུལ་སྐུའི་བཀྲ་ཤིས་ཤོག༔ བཀའ་ཡི་འཕྲིན་ལས་དཀྱིལ་འཁོར་ནས༔ སྤྲུལ་པ་འབུམ་སྡེའི་བཀྲ་ཤིས་ཤོག༔ ཅེས་པ་འདི་རྣམས་སྔ་སོར་ཟིན་བྲིས་བྱས་ཀྱང་ཐོས་ཆུང་རྣམས་ཀྱིས་མ་ངེས་དོགས་པ་དང་ཁྱད་པར་ཞུ་རི་ཞིང་ཞབས་དྲུང་ལ་དགོས་པ་སེམས་ནས་བྲིས་པའོ། ༈ །ཕག་སྔོན་རྡོ་ཐུན་དྲག་སྔགས་ནི། ཨ་ཧ་རི་ནི་ས༔ ར་པ་ཤ་ཡ་སྲོག་ལ་འདུ་འདུ༔ རྡོ་པ་ཤ་སྲོག་ལ་འདུ་འདུ༔ ནི་པ་ཤ་སྲོག་ལ་འདུ་འདུ༔ གྷུ་པ་ཤ་སྲོག་ལ་འདུ་འདུ༔ གནོད་བྱེད་དགྲ་བགེགས་ཐམས་ཅད་མཱ་ར་ཡ་སོད་སོད་བྷྱོ་བྷྱོ་ཟློག་ཟློག༔ ས་ཐུན་དྲག་སྔགས་ནི། ཨ་ཧ་རི་ནི་ས་ཐིབ་ཐིབ་མྱོགས་མྱོགས་ལཾ་ལཾ་གནོད་བྱེད་དགྲ་བགེགས་ཐམས་ཅན་མཱ་ར་ཡ་སོད་ཅིག་བྷྱོ་ཟློག་ཧཱུྃ་ཕཊ༔ མེ་ཐུན་དྲག་སྔགས་ནི། ཨ་ཧ་རི་ནི་ས་དགྲ་བོ་ཐུལ་ཐུལ་རཾ་རཾ་མཱ་ར་ཡ་སོད་སོད་ཧཱུྃ་བྷྱོ་ཛཿབྷྱོ་རཾ་བྷྱོ་ཧཱུྃ་ཕཊ༔ ཁྲག་ཐུན་དྲག་སྔགས་ནི། ཨ་ཧ་རི་ནི་ས་གནོད་བྱེད་དགྲ་བགེགས་ཐམས་ཅད་ཀྱི་སྲོག་ལ་རྔཾ་རྔཾ་ཁཾ་ཁཾ་མཱ་ར་ཡ་སོད་ཅིག་ཟློག་ཅིག༔ ཅི་མང་བཟླ། སྒྱོགས་བཞིའི་སྔགས་གཏོར་བཟློག་དུས་མཁོ་བས་བློ་ལ་འཛིན་པ་གལ་ཆེ་བས་དེ་ལྟར་མཛོད།། །།བཀྲ་ཤིས།། །།

ཕག་མོ་ནག་མོའི་ཟབ་ཐིག་གི་དབང་བཤད།

ཕག་མོ་ནག་མོའི་ཟབ་ཐིག་གི་དབང་བཤད་བཞུགས། །འོ་ན་ད་ལམ་ཁྱེད་རྣམས་ཀྱིས་སེམས་ཅན་ཐམས་ཅད་སངས་རྒྱས་ཀྱི་གོ་འཕང་ལ་འགོད་པར་བྱ་བའི་ཕྱིར་དུ་བཅོམ་ལྡན་འདས་མ་ཕག་གདོང་བདེ་ཆེན་ཡེ་ཤེས་ཀྱི་མཁའ་འགྲོ་མ་ཁྲོས་མ་ནག་མོའི་དབང་ཞུ་སྙམ་པའི་མོས་འདུན་རྩེ་གཅིག་གི་སྒོ་ནས་ལེགས་པར་གསན་པར་ཞུ་ལགས། དེ་ལ་དང་པོ་འཁོར་བ་དང་མྱ་ངན་ལས་འདས་པ་རྒྱ་མ་བྲལ་བའི་སྔོན་རོལ་དུ། མངའ་དབང་རྫོགས་པའི་རྒྱལ་བ་ཀུན་ཏུ་བཟང་པོ་ཉིད་དབྱིངས་རང་བྱུང་གི་ཡེ་ཤེས་བདེ་བར་གཤེགས་པའི་སྙིང་པོ་གདོད་མའི་གཞི་ལས་གཞི་སྣང་དུ་ཤར་ཏེ། གཞི་ལས་འཕགས་པའི་སྐད་ཅིག་ལ་རང་སྣང་དུ་ངོ་ཤེས་པས་རང་བྱུང་གི་ཆོས་གསུམ་གྱིས་ལྷུན་གྲུབ་རིན་པོ་ཆེའི་སྦུབས་གདོད་མའི་ཟད་ས་ཀ་དག་ཆེན་པོ་གཞོན་ནུ་བུམ་པའི་སྐུའི་ཞིང་ལ་བཙན་ས་ཟིན་ཏེ་སྤངས་རྟོགས་ཀྱི་ཡོན་ཏན་ཐམས་ཅད་མཐར་ཕྱིན་ནས་ཆོས་ཀྱི་སྐུའི་རང་བཞིན་དུ་སངས་རྒྱས་ནས་ནང་གསལ་ཕྲ་བའི་ཡེ་ཤེས་སུ་བཞུགས་པའོ། དེའི་རྩལ་ལམ་བྱིན་རླབས་ལས་ཡེ་ཤེས་ལྔས་བརྡལ་བའི་ཞིང་ཁམས་རང་སྣང་ལྷུན་གྲུབ་སྟུག་པོ་བཀོད་པའི་དཀྱིལ་འཁོར་ནམ་མཁའི་མཐའ་ཀླས་པར་རིགས་ལྔ་སོ་སོའི་རང་སྣང་དུ་བཀོད་དེ་གདུལ་བྱའི་ཡུལ་ལས་འདས་པར་བཞུགས་སོ། །དེ་ནས་རིང་ཞིག་ན་གདོད་མའི་གཞི་ལས་གཞི་སྣང་ཤར་བའི་རྩལ་ལས་འགྲོ་བ་རྨི་ལམ་དང་འདྲ་བའི་འཁྲུལ་རྒྱུ་མེད་བཞིན་དུ་འཁྲུལ་པ་རྣམས་གཡོ་བར་གཟིགས་ནས་བརྩེ་བའི་ཐུགས་རྗེ་བཀྱེས་ཏེ་འགྲོ་བའི་དོན་དུ་ཞིང་ཁམས་རྣམ་པར་བཀོད་པ་ནི། རང་སྣང་ལོངས་སྤྱོད་རྫོགས་སྐུའི་སྣང་ཆ་ལས་རིགས་ལྔའི་རྒྱལ་བ་གངས་ཆེན་མཚོའི་སྐུ་ནམ་མཁའི་མཐའ་ཀླས་པར་བཀོད་པ་རྣམས་ཀྱི་ཕྱག་ན་རིགས་ལྔའི་ཕྱག་མཚན་དུ་སྣང་བའི་ཁོང་གསེང་ལས་པདྨ་འཁྲུངས་པའི་ལྟེ་བའི་ཆ་ལ་ཞིང་ཁམས་ཉི་ཤུ་རྩ་ལྔ་དང་། བ་སྤུའི་ཁུང་བུ་རྣམས་ལས་སྤོས་ཆུའི་རྒྱུན་གངས་ཆེན་མཚོ་འབབ་པའི་དབྱིངས་ན། འབྱུང་བཞིའི་རྡུལ་ཕྲ་རབ་ཇི་སྙེད་པའི་གོ་ཐམས་ཅད་སངས་རྒྱས་ཀྱི་བྱིན་རླབས་དང་འགྲོ་བའི་ལས་ཀྱིས་ཞིང་ཁམས་ཐ་དད་སྣ་ཚོགས་པའི་གཟུགས་དང་བཀོད་པ་བསམ་གྱིས་མི་ཁྱབ་པར་སྣང་བར་མཛད་པ་ནི། ནམ་མཁས་གང་དུ་ཁྱབ་པ་དེ་ཙམ་དུ་སྐུ་གསུང་ཐུགས་ཡོན་ཏན་འཕྲིན་ལས་སོགས་ལས་ཤར་བའི་ཞིང་ཁམས་ཀྱིས་ཁྱབ་པར་མཛད་ནས་རྟག་པ་རྒྱུན་ཀྱི་འཁོར་ལོར་འགྲོ་བའི་དོན་མཛད་པ་ནི་ཐོག་མའི་ཀུན་ཏུ་བཟང་པོ་གཅིག་གི་གདུལ་ཞིང་དང་མཛད་པ་ཡིན་ཏེ། ཆོས་ཀྱི་དབྱིངས་དང་ནམ་མཁའི་ཁམས་ནི་རྒྱ་ཆེ་ཞིང་ཐོག་མའི་དུས་འདི་ཙམ་ཞིག་ནས་བྱུང་ཞེས་ལོ་དང་བསྐལ་པ་ཞིང་གི་རྡུལ་རྒྱ་མཚོས་ཀྱང་དཔག་པར་མི་ནུས་ཤིང་མཐར་གྱི་མཛད་པ་འདི་ཙམ་ན་རྫོགས་ཞེས་ཕྱི་མའི་མཐར་གཞལ་བར་མི་ནུས་པས་མི་གཡོ་ལྷུན་གྲུབ་ཆེན་པོའི་ཞིང་ཁམས་རྒྱ་མཚོའི་སྙིང་པོ་ཅན་ན། རང་བཞིན་ལྷུན་གྱིས་གྲུབ་པའི་སངས་རྒྱས་འཁོར་འདས་ཀུན་གྱི་བླ་མར་ཐོག་མ་མེད་པའི་དུས་སུ་བྱོན་ནས་སྐུ་གསུམ་གྱི་སྣང་བ་ལ་ཞིང་ཁམས་མི་འདྲ་བ་གསུམ་བཀོད་པ་ནི། ཆོས་ཀྱི་སྐུའི་དུས་ན་འོད་གསལ་རྡོ་རྗེ་སྙིང་པོའི་ཞིང་ཁམས་ཞེས་བྱ། རང་སྣང་ལོངས་སྤྱོད་རྫོགས་པའི་སྐུའི་དུས་ན་ཚངས་པ་རྔ་སྒྲའི་ཞིང་ཁམས་ཞེས་བྱ། རང་བཞིན་སྤྲུལ་པའི་སྐུའི་དུས་ན་ཚངས་ཆེན་གྱི་བསྐལ་པ་ཆེན་པོའི་ཞིང་ཁམས་ཞེས་བྱའོ། །འདིའི་གོང་ན་ཀུན་ཏུ་བཟང་པོ་ཉིད་ཀྱིས་སྤྲུལ་པའི་སངས་རྒྱས་དང་དེས་བྱིན་གྱིས་བརླབས་པའི་སངས་རྒྱས་པའི་སྟོན་པ། དུས་གསུམ་བདེ་བར་གཤེགས་པ་རྣམས་དང་སེམས་ཅན་གྱི་ཁམས་རྣམས་ཐམས་ཅད་ཡོད་དེ་གདུལ་ཞིང་ཤིན་ཏུ་རྒྱ་ཆེ་བ་ཉིད་དོ། །དེ་ཡང་ས་ཆུ་མེ་རླུང་གིས་གར་ཁྱབ་ཚངས་ཆེན་གྱི་བསྐལ་པའི་ཁོངས་སུ་འདུ་ལ། དེ་ལྟར་རྡུལ་ཕྲན་རེ་རེའི་གོ་ནའང་རི་དང་གླིང་དང་ཞིང་ཁམས་ཆེན་པོར་སྣང་བས་བདེ་སྡུག་སྣ་ཚོགས་སུ་སྤྱོད་པ་ནི་མེད་བཞིན་དུ་སྣང་བ་རྨི་ལམ་གྱི་འཁྲུལ་པ་ལྟ་བུ་སྟེ། ཏིང་འཛིན་རྒྱལ་པོ་ལས། སྐྲ་རྩེའི་ཁྱོན་ལ་སངས་རྒྱས་མང་པོ་ནི། །གང་གཱའི་ཀླུང་གི་བྱེ་མ་ཅི་ཡོད་སྙེད། །རྒྱལ་བ་དེ་དག་ཞིང་ཡང་དེ་སྙེད་དེ། །དེ་དག་མཚན་ཉིད་མི་འདྲ་སྐལ་མི་མཉམ། །སྐྲ་ཡི་ཁྱོན་ལ་འགྲོ་བ་ལྔ་རྣམས་ཏེ། །སེམས་ཅན་དམྱལ་དང་དུད་འགྲོའི་འགྲོ་བ་དང་། །གཤིན་རྗེའི་འཇིག་རྟེན་ལྷ་དང་མི་རྣམས་བཞུགས། །འདྲེས་པ་མེད་ཅིང་གནོད་པར་གྱུར་པ་མེད། །དེ་དག་རྣམས་སུ་མཚོ་དང་རྒྱ་མཚོར་བཅས། །ཆུ་ཀླུང་དེ་བཞིན་མཚོ་དང་ལྟེང་ཀ་རྣམས། །འདྲེས་པ་མེད་ཅིང་གནོད་པར་འགྱུར་མེད་དོ། །དེ་ལྟར་རྒྱལ་བའི་ཆོས་ནི་བསམ་མི་ཁྱབ། །དེ་ཡི་གནས་སུ་རི་བོ་དུ་མ་སྟེ། ཁོར་ར་ཁོར་ཡུག་ལྷུན་པོ་རབ་ལྷུན་དང་། །བཏང་བཟུང་དང་ནི་བཏང་བཟུང་ཆེན་པོ་དང་། །འབིགས་བྱེད་བྱ་རྒོད་ཕུང་པོ་གངས་ཀྱི་རི། །གནས་དེར་སེམས་ཅན་དམྱལ་བ་མི་བཟད་པ། །ཚ་བ་རབ་ཏུ་ཚ་བ་ཉམས་མི་དགའ། །དེ་ན་སེམས་ཅན་དམྱལ་བའི་ཚོར་བ་ནི། །སྡུག་བསྔལ་དེ་དག་རྗེས་སུ་མྱོང་བར་བྱེད། །དེ་ཡི་གནས་ན་ལྷ་ཡི་གཞལ་མེད་ཁང་། །དེ་དག་དཔག་ཚད་བཅུ་གཉིས་ཉམས་དགའ་བ། །ལྷ་རྣམས་སྟོང་ཕྲག་མང་པོ་དག་གིས་ཀྱང་། །ལྷ་ཡི་དགའ་བས་ཤིན་ཏུ་བདེ་བ་མྱོང་། །དེ་ཡི་གནས་སུ་སངས་རྒྱས་རྣམས་བཀྱེ་ཞིང་། །འཇིག་རྟེན་རིག་པའི་བསྟན་པ་འབར་བ་སྣང་། །དེ་ཡི་གནས་ཉིད་ནའང་ཆོས་ནུབ་ཅིང་། །འདྲེན་པ་མྱ་ངན་འདས་པའི་སྒྲ་ཡང་ཐོས། །མི་དག་བདག་གི་ཁྱིམ་ན་རྨི་ལམ་བཞིན། །འདོད་པའི་ཡོན་ཏན་དག་ལ་དགའ་མྱོས་ནས། །ཕྱིར་སད་ནས་ཀྱང་དེ་ཡི་འདོད་མ་མཐོང་། །དེ་ནི་རྨི་ལམ་ཡིན་པ་དེ་ཡིས་ཤེས། །དེ་བཞིན་མཐོང་ཐོས་རིགས་དང་བྱེ་བྲག་ཕྱེད། །འདི་དག་ཐམས་ཅད་མི་བདེན་རྨི་ལམ་བཞིན། ཞེས་དང་། སངས་རྒྱས་ཀྱི་ཡུལ་དང་ཡེ་ཤེས་བསམ་གྱིས་མི་ཁྱབ་པར་འཇུག་པའི་མདོ་ལས། སྟོང་གསུམ་གྱི་ལྷ་དང་མི་ནི་ཆེས་ཉུང་གི། ཕྱི་རོལ་པའི་དྲང་སྲོང་མངོན་པར་ཤེས་པ་དང་ལྡན་པ་ཞིག་གིས་ཤིང་རྟའི་འཕང་ལོ་ཙམ་གྱི་སའི་ཁྱོན་ལ་སེམས་ཅན་མཐོང་བ་ནི་དེ་བས་ཆེས་མང་ངོ་། །དེ་དག་གིས་སྟོང་གསུམ་དུ་མཐོང་བས་ཉན་ཐོས་རྣམ་པར་ཐར་པ་བརྒྱད་ཀྱི་བསམ་གཏན་པའི་གང་ཟག་གཅིག་གིས་ཤིང་རྟའི་འཕང་ལོ་ཙམ་ལ་མཐོང་བ་ཆེས་མང་ངོ་། །དེ་དག་གིས་སྟོང་གསུམ་དུ་མཐོང་བས་ནི་བྱང་ཆུབ་སེམས་དཔའ་རྣམ་པར་ཐར་བ་བརྒྱད་ལས་བསམ་གཏན་པ་ཞིག་གིས་ཤིང་རྟའི་འཕང་ལོ་ཙམ་ལ་མཐོང་བ་ཆེས་མང་ངོ་། །དེ་དག་གིས་་སྟོང་གསུམ་དུ་མཐོང་བས་ནི་དེ་བཞིན་གཤེགས་པའི་སྤྱན་གྱིས་ཤིང་རྟའི་འཕང་ལོ་ཙམ་གྱི་སའི་ཁྱོན་ལ་གཟིགས་པ་ཆེས་མང་ངོ་། །ཞེས་གསུངས་པའི་འཇིག་རྟེན་གྱི་ཁམས་མཐའ་ཡས་ཤིང་མུ་མེད་པ་དེ་དག་རྣམས་དང་། ཞིང་འདིའི་ཐུབ་པ་རྣམ་པར་སྣང་མཛད་གངས་ཆེན་མཚོའི་ཕྱག་གི་སྤོས་ཆུའི་རྒྱ་མཚོ་ལས་འཁྲུངས་པའི་སྟོང་གསུམ་ཉི་ཤུ་རྩ་ལྔ་ནམ་མཁའི་མཐར་ཁྱབ་དང་བཅས་པ་ཐམས་ཅད་དུ། མངའ་དབང་རྫོགས་པའི་མགོན་པོ་ཀུན་ཏུ་བཟང་པོའི་ཤེས་རབ་རྣམ་པར་དག་པའི་ཡེ་ཤེས་ཀྱི་རང་མདངས་གོ་མ་འགགས་པའི་རོལ་བ་ལས་སྐུ་གསུམ་གྱི་མཁའ་འགྲོ་མ་བསམ་གྱིས་མི་ཁྱབ་པར་རང་ཤར་ཞིང་བསྟན་འགྲོའི་དོན་རྒྱ་ཆེན་པོ་མཛད་པའི་ནང་ནས་གདམས་པ་ཟབ་མོ་འདི་ནི། ནང་གསང་བ་སྔགས་ལྟར་གྱི་རྡོ་རྗེ་གདན་ནུབ་ཕྱོགས་ཨོ་རྒྱན་གྱི་ཡུལ་དུ་སངས་རྒྱས་གཉིས་པ་པདྨ་འབྱུང་གནས་དྷ་ན་ཀོ་ཤའི་མཚོ་ལས་སྐུ་འཁྲུངས་ཤིང་འཛམ་གླིང་ལས་ཀྱི་ས་པ་འདིར་འགྲོ་དོན་མཐར་ཕྱིན་དུ་མཛད་པའི་ནང་ནས། ཁྱད་པར་དུ་འཕགས་པའི་གནས་མཆོག་ཆེན་པོ་ཀནྩི་ཧི་མར་རམ་ཕག་གདོང་ནག་མོའི་ཐུགས་ཀྱི་གནས་མཆོག་ཙྭ་རི་ཊའི་སྒྲུབ་གནས་སུ་བཞུགས་པའི་དུས་སུ། མཁའ་འགྲོ་ཡེ་ཤེས་མཚོ་རྒྱལ་གྱིས་སློབ་དཔོན་ཆེན་པོ་ལ་གནས་ཆེན་པོ་འདི་དང་འདྲ་བ་འཇིག་རྟེན་གཞན་དུ་ཡོད་དམ་མེད་ལགས་ཞུས་པས། གུ་རུ་རིན་པོ་ཆེའི་ཞལ་ནས་གནས་ཆེན་པོ་འདི་ལས་ཁྱད་པར་འཕགས་པ་མ་འོངས་པའི་འགྲོ་བ་རྣམས་ཀྱི་དོན་བྱེད་པ་ཞིག་འདི་ནས་བྱང་ཕྱོགས་ཀྱི་ཕ་རོལ་དུ་ཡོད་གསུངས་པས། འོ་ན་གནས་མཆོག་དེར་ཕེབས་ཤིང་མ་འོངས་པའི་འགྲོ་བ་རྣམས་ཀྱི་དོན་དུ་གནས་ཀྱི་གཟིགས་སྣང་གཏན་ལ་འབེབས་པ་དང་། བྱིན་གྱིས་བརླབས་པར་ཞུ་ཞུས་པས་རྟེན་འབྲེལ་གྱི་དུས་ལ་བབས་གསུངས་ཏེ། གངས་ཀྱི་སེང་གེ་དཀར་མོ་ཞིག་ལ་ཆིབས་ནས་གནས་ཆེན་པོ་ཁམས་ཀྱི་སྲིང་མོ་རྫོང་དུ་ཕྱག་ཕེབས་ནས་ཕྱི་ནང་གི་སྲུང་མ་ཐམས་ཅད་དམ་ལ་བཏགས། རྡོ་རྗེ་སྙིང་རྫོང་གིས་གཙོས་པའི་སྒྲུབ་གནས་ཐམས་ཅད་ཞབས་ཀྱིས་བཅགས་གནས་ཀྱི་རྟེན་འབྲེལ་དང་མཐུན་པའི་སྒྲུབ་པ་མཛད་ཅིང་རྒྱུད་དང་གདམས་པ་མང་པོ་གཏེར་དུ་སྦས་པའི་དུས་སུ་སློབ་དཔོན་ཆེན་པོའི་ཞལ་ནས་མ་འོངས་རྩོད་ལྡན་གྱི་སྙིགས་མ་ལ། གནས་མཆོག་ཆེན་པོ་ཙྭ་རི་ཊ་ནས་དམ་ཚིག་ལ་སེལ་ཞུགས་པའི་འཁྲུག་པ་ལན་བདུན་གྱི་ཐ་མ་ལ་དཔའ་བོ་མཁའ་འགྲོ་རྣམས་ཀྱང་མི་དགྱེས་ཤིང་དམ་བཅའ་གཏོང་སྟེ་ཨོ་རྒྱན་གྱི་ཡུལ་དང་མཁའ་སྤྱོད་རི་རབ་ཀྱི་ཟོམ་སོགས་ལ་ཕལ་ཆེར་འབྲོས། ཁྱད་པར་གཙོ་མོ་ཕག་གདོང་ནག་མོ་འཁོར་འབུམ་ཕྲག་དང་བཅས་པ་གནས་འདིར་འཕོ་ཞིང་འགྲོ་བའི་དོན་མཛད་པའི་དུས་སུ། དག་པ་ཤེལ་རིའི་ཤར་ཕྱོགས་ནས༔ གངས་ཀྱི་འུ་རུད་ཡང་ཡང་འཆད༔ དག་པ་ཤེལ་རིའི་ལྷོ་ཕྱོགས་ནས༔ སྒྲུབ་མཚོ་ཞིག་རལ་གངས་སྟོངས་འབྱུང་༔ དག་པ་ཤེལ་རིའི་ནུབ་ཕྱོགས་སུ༔ གནམ་ནས་ལྕེ་འབེབས་སྒྲུབ་ཕུག་འཇིག༔ དག་པ་ཤེལ་རིའི་བྱང་ཕྱོགས་སུ༔ དམག་འཁྲུགས་མི་གསོད་ཤིང་རྣམས་སྲེག༔ འདྲེ་འབོད་མཚན་མོ་སྐལ་ངན་འབྱུང་༔ དེ་ཚེ་དཔའ་བོ་དཔའ་མོ་རྣམས༔ ལ་ལ་མཁའ་སྤྱོད་གནས་སུ་གཤེགས༔ ལ་ལ་རི་རབ་ཟོམ་ལ་འབྲོས༔ ལ་ལ་ཨོ་རྒྱན་གནས་སུ་འགྲོ༔ ཁྱད་པར་དཔའ་བོ་དཔའ་མོ་རྣམས༔ གནས་མཆོག་འདི་ལ་འགྲོ་དོན་འཕོ༔ དེ་ཚེ་གནས་འདིའི་འགྲོ་དོན་དར༔ དད་མོས་ལྡན་རྣམས་ཐར་པ་འཐོབ༔ རོ་སྦྱངས་མེ་མཆེད་ཁག་མཚོ་སྐྱོལ༔ ཤ་སྐམ་ལ་ལ་ཤིང་ལྡེམ་འཕེན༔ པུ་རིར་བདེ་མཆོག་རང་བྱོན་འོང་༔ སྦས་པ་གཡུ་མཚོ་རུས་སྦལ་འདྲ༔ རོང་གསུམ་ཁྲག་མཚོར་བསྐྱིལ་བའི་དུས༔ གནས་འདིའི་འགྲོ་དོན་དུས་ལ་བབས༔ དད་མོས་ལྡན་རྣམས་ཐར་པ་འཐོབ༔ ཅེས་གསུངས་པ་ལྟར་ཁམས་པ་ཉི་མ་གྲགས་པས་ཁམས་ཀྱི་སྲིང་མོ་རྫོང་གི་ཕག་གདོང་ནག་མོའི་ཐུགས་ཀྱི་སྒྲུབ་གནས་ཆགས་རི་ཕུག་ནག་གི་ཆོས་འབྱུང་གསང་མཚན་ཕུག་ནས་ས་ཕོ་རྟ་ལོ་ཧོར་ཟླ་བརྒྱད་པའི་ཉེར་ལྔའི་སྔ་དྲོ་གདན་དྲངས་ཤིང་ཤོག་སེར་ལས་བསྒྱུར་བའི་དབང་ཟབ་མོ་ཞུ་སྙམས་པས་འདིའི་རྗེས་ཟློས་གནང་བར་ཞུ། ཞེས་པ་ནས་དབང་བསྐུར་བར་བྱའོ། ཅེས་པ་འདི་ཡང་གུ་རུ་བསྟན་འཛིན་གྲགས་པ་ཆོས་ཀྱི་རྒྱ་མཚོ་ལ་དགོས་པར་སེམས་ཏེ་ཤར་སྟག་མོ་སྒང་དུ་རིག་འཛིན་པས་བྲིས་པའོ། །མངྒ་ལཾ།། །།

ཟབ་ཐིག་མཁའ་འགྲོའི་གསང་སྒྲུབ་ཟིན་བྲིས།

ཟབ་ཐིག་མཁའ་འགྲོའི་གསང་སྒྲུབ་ཟིན་བྲིས་བཞུགས། བླ་མ་མཁའ་འགྲོའི་ཚོགས་ལ་ཕྱག་འཚལ་ལོ། །བྱིན་གྱིས་བརླབ་པར་མཛད་དུ་གསོལ་ལོ། །ཕག་མོ་ནག་མོའི་ཟབ་ཏིག་ལས་བྱང་གི་རྩ་བའི་བསྙེན་པ་ལ་གཏོར་བཟློག་གི་དུས་སྟོང་མཚམས་སུ་བཛྲ་པུཥྤེ་སོགས་སྤྱི་འགྲོས་ལྟར་ལ་རང་གཞུང་གི་གཙོ་བསྟོད་བརྗོད། བསྲུང་བའི་སྔགས་ཅི་མང་འདོན། དེ་ནས་བདེ་ཆེན་དཀར་མོའི་བསྙེན་པ་བརྒྱ་ལས་མ་ཉུང་བ་ལ་མཇུག་ཏུ་ཚེ་འགུགས་སྦྱར། དེ་ནས་དོན་གྲུབ་སེར་མོའི་བསྙེན་པ། དེ་ནས་དམར་མོ་སྒྲ་སྒྲོག་གི་བསྙེན་པ། དེ་ནས་སྣ་ཚོགས་མཐར་ཕྱིན་དང་བཅས་པའི་བསྙེན་པའི་མཚམས་སུ་བཛྲ་པུཥྤེ་སོགས་མཐོང་རྒྱུད་ལྟར་སྦྱར་བའི་མཐར་ལས་བཞིའི་ཤམ་བུ་སྐབས་མཐུན་རིགས་བཞིའི་ཕག་མོ་ལ་སྦྱར་ནས་བསྟོད་པས་ཀྱང་བསྟོད། དངོས་གྲུབ་ལེན་ཆོག་ཁ་བསྐང་ལྟར་འདོན། བསྙེན་པ་སོ་སོའི་དུས་རང་རང་གི་སྒྲུབ་གཞུང་ལྟར་དམིགས་པ་གནད་དུ་བསྣུན་དགོས་པ་གསང་སྔགས་སྤྱི་འགྲོས་ལྟར་ཡིན་ཞིང་། དེ་ནས་བཀའ་གཏེར་སྲུང་མ་མཆོད། ཚོགས་བསང་ཚོགས་ཕུད་འབུལ། བསྐང་བ་འདོན། བཤགས་པ་འབུལ། བསྐང་བའི་མཇུག་གི་འདོད་གསོལ་སྦྱར། ཡིག་བརྒྱ་བརྗོད། དབང་ཡིན་ན་འདི་ནས་ལས་བུམ་བཞིའི་སྒོམ་བཟླས་ལས་བཞིའི་སྦྱིན་སྲེག་གི་སྐབས་ལྟར་རམ་སྤྱི་འགྲོས་གང་བདེ་བྱེད། དབང་བསྐུར་རྗེས་བསྐྱང་། ཨྠིྀ༔ གཏོར་བཟློག་དང་སྒྱོགས་བཞི་སྦྲགས་པ་ཤིན་ཏུ་ཟབ་པས། མི་གྲངས་སྐབས་མཐུན་ལྟར་གྱིས་ཕྱོགས་བཞིར་རང་རང་གི་ལས་གཞུང་བསྲང་ནས་བསྙེན་པ་རང་གཞུང་སོ་སོ་ལ་སྒྱོགས་སོ་སོའི་སྔགས་བཏགས་པ་ཅི་མང་དུ་འདོན། གཏོར་བཟློག་འཕེན་དུས་གཙོ་མོ་དང་མཉམ་དུ་ཙཀ་ལི་ལ་དབང་བཞི་ལེན་ནས་བསྡུ། སྒྱོགས་རྣམས་དང་གཏོར་མ་ཐམས་ཅད་ཟོར་དུ་འཕེན། དེ་ནས་ལས་བཞིའི་སྦྱིན་སྲེག་སོགས་མནན་སྲེག་གང་འདོད་ལས་ལ་སྦྱར། ལས་བྱང་ཚར་གཅིག་ལའང་བསྲུང་བའི་སྔགས་གཙོ་མོ་ལ་སྦྱར་བ་དང་། འགུགས་སྔགས་འགུགས་གཞུག་ལ་སྦྱར་བ་དང་། བསྒྲལ་ལས་ཀྱི་མཇུག་ཁ་ཁ་ཁཱ་ཧི་ཁཱ་ཧི་འདོད་ཆགས་ཁྲག་ལ་ཁཱ་ཧི་ཞེས་པའི་གོང་དུ་བསད་སྔགས་སྦྱར་ནས་སོ་སོའི་རྩ་སྔགས་ལ་ཁཱ་ཧི་ཁཱ་ཧི་འདོད་ཆགས་ཁྲག་ལ་སོགས་ཀྱི་བསྟབ་པ་དང་། ཆད་ཐོའི་གཏོར་མ་ལ་དམིགས་ནས། ཧཱུྃ། མཁའ་འགྲོ་བཀའ་ཡི་དུར་ཁྲོད་ནས༔ མ་མོ་མཁའ་འགྲོ་བྱེ་བ་འབུམ། །དབྱིངས་ནས་སྐུ་སྐྱོད་འཕྲིན་ལས་མཛོད། །བཟློག་བསྒྱུར་འཕྲིན་ལས་དུས་ལ་བབས། །ཡེ་ཤེས་མཁའ་འགྲོའི་བཀའ་ཆད་ཟློག །འཇིག་རྟེན་མཁའ་འགྲོའི་བསུན་མ་ཟློག །ལས་བྱེད་མཁའ་འགྲོའིི་ཕོ་ཉ་ཟློག །སོགས་བརྗོད་པའི་མཐར་བཟློག་སྔགས་སྦྱར་ནས་ཆད་ཐོ་ལ་འབུལ་ཏེ་འཇུག་སྐྱོང་བར་གྱིས་ཤིག །བཀའ་ལ་རས་གཅོད་གཟུ་ལུམ་སོགས་མ་ཡིན་པར་རང་གཞུང་གི་གྱེར་བསྒོམ་གཞུང་བསྲང་བ་ལ་མཁོ་བར་སེམས་ནས། ཉི་མ་གྲགས་པས་སློབ་མ་དོན་གྲུབ་པའི་དོན་དུ་སྦྱར་བ་མངྒ་ལམ།། །།

གཏོར་བཟློག་གི་འཕྱོང་།

ཕག་མོ་ནག་མོའི་ཟབ་ཐིག་ལས། གཏོར་བཟློག་གི་འཕྱོང་བཞུགས། །ཕག་གདོང་དྷཀྐིའི་ཚོགས་ལ་འདུད། གཏོར་བཟློག་གི་འཕྱོང་ནི། གཙོ་མོའི་བཟློག་པའི་འཇུག་ཏུ་ལིངྒ་དང་ཟོར་ཆུང་ཐུན་རྫས་རྣམས་མཐོང་བརྒྱུད་ལྟར་བྱ་ཞིང་། ན་མོ་དཀོན་མཆོག་གསུམ་དང་རྩ་བ་གསུམ་གྱི་བདེན་པས་གནོད་བྱེད་དགྲ་བགེགས་ཐམས་ཅད་གཟུགས་ལིངྒ་འདིའི་ནང་དུ་ཁུག །གསུམ། ཨཱོཾ་བཛྲ་དྷཀྐི་ནི་ཧ་རི་ནི་ས་ཧཱུྃ་ཕཊ༔ དགྲ་བོ་བྱད་མ་ལྷ་བསྲུང་དང་བཅས་པའི་ལུས་ངག་ཡིད་གསུམ་ཁུག་རིལ་ཐུན་བྷྱོ༔ གསུམ། ཛཿཧཱུྃ་བཾ་ཧོཿས་རྒྱས་འདེབས། ཐུན་ཐོགས། ཧཱུྃ༔ རྡོ་རྗེ་མཁའ་འགྲོ་འཇིགས་གཟུགས་བརྔམ༔ རབ་གཏུམ་འཁྲུག་པས་དུག་གསུམ་འབར༔ སྐུ་གསུང་ཐུགས་སྤྲུལ་སྟོང་གསུམ་གང་༔ སྒྲོལ་བྱེད་འབུམ་སྡེས་དགྲ་བགེགས་སྒྲོལ༔ མཁའ་འགྲོའི་ཚོགས་རྣམས་དགྱེས་པར་རོལ༔ ཨོཾ་བཛྲ་དྷཀྐི་ནི་ཧ་རི་ནི་ས་ཧཱུྃ་ཕཊ་མ་མ་ཏྲག་རཀྴ་ཡ་ཁ་ཐུན་ཁ་ཐུན་དགྲ་བོ་འདུ་ཤ་ཡེ༔ བྷནྡྷ་ཡེ༔ ཚིནྡྷ་ཡེ༔ རཀྟ་ཡེ༔ དགྲ་བོའི་སྙིང་ཁ་རཀྨོ་སྲོག་ཁུག༔ མྱུར་དུ་ཁུག་ཛཿཛ༔ དགྲ་བོའི་སྙིང་དུམ་བུར་ཆོད༔ དུམ་བུར་ཆོད༔ དགྲ་བོ་མཱ་ར་ཡ་ཛཿཛ༔ ལིང་རོ་བསྟབ། ཧཱུྃ༔ མཁའ་འགྲོའི་ཚོགས་རྣམས་དགྱེས་པར་རོལ༔ ཁཱ་ཧི་ཁཱ་ཧི་འདོད་ཆགས་ཁྲག་ལ་ཁཱ་ཧི༔ ཁཱ་ཧི་ཁཱ་ཧི་ཞེ་སྡང་རུས་ལ་ཁཱ་ཧི༔ ཁཱ་ཧི་ཁཱ་ཧི་གཏི་མུག་ཤ་ལ་ཁཱ་ཧི༔ དེ་ནས་བཟློག་པ་གྱེར་མཇུག་ཏུ༔ ཨཱོཾ་བཛྲ་དྷཀྐི་ནི་ཧ་རི་ནི་ས་ཧཱུྃ་ཕཊ༔ བནྡྷེ་ནག་པོའི་བྱད་ཁ་བྷྱོ་ཟློག༔ བོན་པོ་ནག་པོའི་བྱད་ཁ་བྷྱོ་ཟློག༔ ཕྲ་མེན་མཁན་གྱི་བྱད་ཁ་བྷྱོ་ཟློག༔ འཕུང་གཡོས་མཁན་གྱི་བྱད་ཁ་བྷྱོ་ཟློག༔ མནན་གཏད་བཅིང་བའི་བྱད་ཁ་བྷྱོ་ཟློག༔ རླུང་ལ་འཁོར་ལོ་བསྐོར་བའི་བྱད་ཁ་བྷྱོ་ཟློག༔ ཧོམ་གྱིས་སྲེག་པའི་བྱད་ཁ་བྷྱོ་ཟློག༔ པར་བུ་བསྐོར་བའི་བྱད་ཁ་བྷྱོ་ཟློག༔ ལྷ་ཡི་རྦོད་ཟོར་བྷྱོ་ཟློག༔ ཀླུ་ཡི་རྦོད་ཟོར་བྷྱོ་ཟློག༔ བདུད་ཀྱི་རྦོད་ཟོར་བྷྱོ་ཟློག༔ མ་མོའི་རྦོད་ཟོར་བྷྱོ་ཟློག༔ གཤིན་རྗེའི་རྦོད་ཟོར་བྷྱོ་ཟློག༔ བཙན་གྱི་རྦོད་ཟོར་བྷྱོ་ཟློག༔ གཟའ་ཡི་རྦོད་ཟོར་བྷྱོ་ཟློག༔ ཐེའུ་རང་རྦོད་ཟོར་བྷྱོ་ཟློག༔ ཨ་ལ་ལ་པྲ་མོ་ཧེ་ཟློག༔ ཕུར་ཁ་ཟློག༔ ཟོར་ཁཟློག༔ བྱད་ཁ་ཟློག༔ གཏད་ཁ་ཟློག༔ ཁྲམ་ཁ་ཟློག༔ ནད་ཁ་ཟློག༔ ཡམས་ཁ་ཟློག༔ རྦད་འདྲེ་ཟློག༔ རྦོད་གཏོར་ཟློག༔ ས་མ་ཡ་བྷྱོ་ཟློག༔ ན་མོ་དཀོན་མཆོག་གསུམ་དང་རྩ་བ་གསུམ་གྱི་བདེན་པས་གནོད་བྱེད་དགྲ་བགེགས་ཐམས་ཅད་གཟུགས་ལིངྒ་འདིའི་ནང་དུ་ཁུག །གསུམ། ཨཱོཾ་རཏྣ་དྷཀྐི་ནི་ཧ་རི་ནི་ས་ཧཱུྃ་ཕཊ༔ དགྲ་བོ་བྱེད་མ་ལྷ་སྲུང་དང་བཅས་པའི་ལུས་ངག་ཡིད་གསུམ་ཁུག་རིལ་ཐུན་བྷྱོ༔ གསུམ། ཛཿཧཱུྃ་བཾ་ཧོཿས་རྒྱས་འདེབས། ཐུན་ཐོགས། ཧཱུྃ༔ རཏྣ་མཁའ་འགྲོ་འཇིགས་གཟུགས་བརྔམ༔ རབ་གཏུམ་འཁྲུག་པས་དུག་གསུམ་འབར༔ སྐུ་གསུང་ཐུགས་སྤྲུལ་སྟོང་གསུམ་གང་༔ སྒྲོལ་བྱེད་འབུམ་སྡེས་དགྲ་བགེགས་སྒྲོལ༔ ཨཱོཾ་རཏྣ་དྷཀྐི་ནི་ཧ་རི་ནི་ས་མ་མ་ཏྲག་རཀྴ་ཡ་ཁ་ཐུན་ཁ་ཐུན་དགྲ་བོ་འདུ་ཤ་ཡེ༔ བྷནྡྷ་ཡེ༔ ཚིནྡྷ་ཡེ༔ རཀྟ་ཡེ༔ དགྲ་བོའི་སྙིང་ཁ་རཀྨོ་སྲོག་ཁུག༔ མྱུར་དུ་ཁུག་ཛཿཛ༔ དགྲ་བོའི་སྙིང་དུམ་བུར་ཆོད༔ དུམ་བུར་ཆོད༔ དགྲ་བོ་མཱ་ར་ཡ་ཛཿཛ༔ ལིང་རོ་བསྟབ། ཧཱུྃ༔ མཁའ་འགྲོའི་ཚོགས་རྣམས་དགྱེས་པར་རོལ༔ ཁཱ་ཧི་ཁཱ་ཧི་འདོད་ཆགས་ཁྲག་ལ་ཁཱ་ཧི༔ ཁཱ་ཧི་ཁཱ་ཧི་ཞེ་སྡང་རུས་ལ་ཁཱ་ཧི༔ ཁཱ་ཧི་ཁཱ་ཧི་གཏི་མུག་ཤ་ལ་ཁཱ་ཧི༔ དེ་ནས་བཟློག་པ་གྱེར་མཇུག་ཏུ༔ ཨཱོཾ་རཏྣ་དྷཀྐི་ནི་ཧ་རི་ནི་ས་ཧཱུྃ་ཕཊ༔ བནྡྷེ་ནག་པོའི་བྱད་ཁ་བྷྱོ་ཟློག༔ བོན་པོ་ནག་པོའི་བྱད་ཁ་བྷྱོ་ཟློག༔ ཕྲ་མེན་མཁན་གྱི་བྱད་ཁ་བྷྱོ་ཟློག༔ འཕུང་གཡོས་མཁན་གྱི་བྱད་ཁ་བྷྱོ་ཟློག༔ མནན་གཏད་བཅིང་བའི་བྱད་ཁ་བྷྱོ་ཟློག༔ རླུང་ལ་འཁོར་ལོ་བསྐོར་བའི་བྱད་ཁ་བྷྱོ་ཟློག༔ ཧོམ་གྱིས་སྲེག་པའི་བྱད་ཁ་བྷྱོ་ཟློག༔ པར་བུ་བསྐོར་བའི་བྱད་ཁ་བྷྱོ་ཟློག༔ ལྷ་ཡི་རྦོད་ཟོར་བྷྱོ་ཟློག༔ ཀླུ་ཡི་རྦོད་ཟོར་བྷྱོ་ཟློག༔ བདུད་ཀྱི་རྦོད་ཟོར་བྷྱོ་ཟློག༔ མ་མོའི་རྦོད་ཟོར་བྷྱོ་ཟློག༔ གཤིན་རྗེའི་རྦོད་ཟོར་བྷྱོ་ཟློག༔ བཙན་གྱི་རྦོད་ཟོར་བྷྱོ་ཟློག༔ གཟའ་ཡི་རྦོད་ཟོར་བྷྱོ་ཟློག༔ ཐེའུ་རང་རྦོད་ཟོར་བྷྱོ་ཟློག༔ ཨ་ལ་ལ་པྲ་མོ་ཧེ་ཟློག༔ ཕུར་ཁ་ཟློག༔ ཟོར་ཁཟློག༔ བྱད་ཁ་ཟློག༔ གཏད་ཁ་ཟློག༔ ཁྲམ་ཁ་ཟློག༔ ནད་ཁ་ཟློག༔ ཡམས་ཁ་ཟློག༔ རྦད་འདྲེ་ཟློག༔ རྦོད་གཏོང་ཟློག༔ ས་མ་ཡ་བྷྱོ་ཟློག༔ ན་མོ་དཀོན་མཆོག་གསུམ་དང་རྩ་བ་གསུམ་གྱི་བདེན་པས་གནོད་བྱེད་དགྲ་བགེགས་ཐམས་ཅད་གཟུགས་ལིངྒ་འདིའི་ནང་དུ་ཁུག །གསུམ། ཨཱོཾ་པདྨ་དྷཀྐི་ནི་ཧ་རི་ནི་ས་ཧཱུྃ་ཕཊ༔ དགྲ་བོ་བྱད་མ་ལྷ་སྲུང་དང་བཅས་པའི་ལུས་ངག་ཡིད་གསུམ་ཁུག་རིལ་ཐུན་བྷྱོ༔ གསུམ། ཛཿཧཱུྃ་བཾ་ཧོཿས་རྒྱས་འདེབས། ཐུན་ཐོགས་ཏེ། ཧཱུྃ༔ པདྨ་མཁའ་འགྲོ་འཇིགས་གཟུགས་བརྔམ༔ རབ་གཏུམ་འཁྲུག་པས་དུག་གསུམ་འབར༔ སྐུ་གསུང་ཐུགས་སྤྲུལ་སྟོང་གསུམ་གང་༔ སྒྲོལ་བྱེད་འབུམ་སྡེས་དགྲ་བགེགས་སྒྲོལ༔ ཨོཾ་པདྨ་དྷཀྐི་ནི་ཧ་རི་ནི་ས་མ་མ་ཏྲག་རཀྴ་ཡ་ཁ་ཐུན་ཁ་ཐུན་དགྲ་བོ་འདུ་ཤ་ཡེ༔ བྷནྡྷ་ཡེ༔ ཚིནྡྷ་ཡེ༔ རཀྟ་ཡེ༔ དགྲ་བོའི་སྙིང་ཁ་རཀྨོ་སྲོག་ཁུག༔ མྱུར་དུ་ཁུག་ཛཿཛ༔ དགྲ་བོའི་སྙིང་དུམ་བུར་ཆོད༔ དུམ་བུར་ཆོད༔ དགྲ་བོ་མཱ་ར་ཡ་ཛཿཛ༔ ལིང་རོ་བསྟབ། ཧཱུྃ༔ མཁའ་འགྲོའི་ཚོགས་རྣམས་དགྱེས་པར་རོལ༔ ཁཱ་ཧི་ཁཱ་ཧི་འདོད་ཆགས་ཁྲག་ལ་ཁཱ་ཧི༔ ཁཱ་ཧི་ཁཱ་ཧི་ཞེ་སྡང་རུས་ལ་ཁཱ་ཧི༔ ཁཱ་ཧི་ཁཱ་ཧི་གཏི་མུག་ཤ་ལ་ཁཱ་ཧི༔ དེ་ནས་བཟློག་པ་གྱེར་མཇུག་ཏུ༔ ཨཱོཾ་པདྨ་དྷཀྐི་ནི་ཧ་རི་ནི་ས་ཧཱུྃ་ཕཊ༔ བནྡྷེ་ནག་པོའི་བྱད་ཁ་བྷྱོ་ཟློག༔ བོན་པོ་ནག་པོའི་བྱད་ཁ་བྷྱོ་ཟློག༔ ཕྲ་མེན་མཁན་གྱི་བྱད་ཁ་བྷྱོ་ཟློག༔ འཕུང་གཡོས་མཁན་གྱི་བྱད་ཁ་བྷྱོ་ཟློག༔ མནན་གཏད་བཅིང་བའི་བྱད་ཁ་བྷྱོ་ཟློག༔ རླུང་ལ་འཁོར་ལོ་བསྐོར་བའི་བྱད་ཁ་བྷྱོ་ཟློག༔ ཧོམ་གྱིས་སྲེག་པའི་བྱད་ཁ་བྷྱོ་ཟློག༔ པར་བུ་བསྐོར་བའི་བྱད་ཁ་བྷྱོ་ཟློག༔ ལྷ་ཡི་རྦོད་ཟོར་བྷྱོ་ཟློག༔ ཀླུ་ཡི་རྦོད་ཟོར་བྷྱོ་ཟློག༔ བདུད་ཀྱི་རྦོད་ཟོར་བྷྱོ་ཟློག༔ མ་མོའི་རྦོད་ཟོར་བྷྱོ་ཟློག༔ གཤིན་རྗེའི་རྦོད་ཟོར་བྷྱོ་ཟློག༔ བཙན་གྱི་རྦོད་ཟོར་བྷྱོ་ཟློག༔ གཟའ་ཡི་རྦོད་ཟོར་བྷྱོ་ཟློག༔ ཐེའུ་རང་རྦོད་ཟོར་བྷྱོ་ཟློག༔ ཨ་ལ་ལ་པྲ་མོ་ཧེ་ཟློག༔ ཕུར་ཁ་ཟློག༔ ཟོར་ཁཟློག༔ བྱད་ཁ་ཟློག༔ གཏད་ཁ་ཟློག༔ ཁྲམ་ཁ་ཟློག༔ ནད་ཁ་ཟློག༔ ཡམས་ཁཟློག༔ རྦད་འདྲེ་ཟློག༔ རྦོད་གཏོང་ཟློག༔ ས་མ་ཡ་བྷྱོ་ཟློག༔ ན་མོ་དཀོན་མཆོག་གསུམ་དང་རྩབ་གསུམ་གྱི་བདེན་པས་གནོད་བྱེད་དགྲ་བགེགས་ཐམས་ཅད་གཟུགས་ལིངྒ་འདིའི་ནང་དུ་ཁུག །གསུམ། ཨཱོཾ་ཀརྨ་དྷཀྐི་ནི་ཧ་རི་ནི་ས་ཧཱུྃ་ཕཊ༔ དགྲ་བོ་བྱད་མ་ལྷ་སྲུང་དང་བཅས་པའི་ལུས་ངག་ཡིད་གསུམ་ཁུག་རིལ་ཐུན་བྷྱོ༔ གསུམ། ཛཿཧཱུྃ་བཾ་ཧོཿས་རྒྱས་འདེབས། ཐུན་ཐོགས་ཏེ། ཧཱུྃ༔ ཀརྨ་མཁའ་འགྲོ་འཇིགས་གཟུགས་བརྔམ༔ རབ་གཏུམ་འཁྲུག་པས་དུག་གསུམ་འབར༔ སྐུ་གསུང་ཐུགས་སྤྲུལ་སྟོང་གསུམ་གང་༔ སྒྲོལ་བྱེད་འབུམ་སྡེས་དགྲ་བགེགས་སྒྲོལ༔ ཨཱོཾ་ཀརྨ་དྷཀྐི་ནི་ཧ་རི་ནི་ས་མ་མ་ཏྲག་རཀྴ་ཡ་ཁ་ཐུན་ཁ་ཐུན་དགྲ་བོ་འདུ་ཤ་ཡེ༔ བྷནྡྷ་ཡེ༔ ཚིནྡྷ་ཡེ༔ རཀྟ་ཡེ༔ དགྲ་བོའི་སྙིང་ཁ་རཀྨོ་སྲོག་ཁུག༔ མྱུར་དུ་ཁུག་ཛཿཛ༔ དགྲ་བོའི་སྙིང་དུམ་བུར་ཆོད༔ དུམ་བུར་ཆོད༔ དགྲ་བོ་མཱ་ར་ཡ་ཛཿཛ༔ ལིང་རོ་བསྟབ། ཧཱུྃ༔ མཁའ་འགྲོའི་ཚོགས་རྣམས་དགྱེས་པར་རོལ༔ ཁཱ་ཧི་ཁཱ་ཧི་འདོད་ཆགས་ཁྲག་ལ་ཁཱ་ཧི༔ ཁཱ་ཧི་ཁཱ་ཧི་ཞེ་སྡང་རུས་ལ་ཁཱ་ཧི༔ ཁཱ་ཧི་ཁཱ་ཧི་གཏི་མུག་ཤ་ལ་ཁཱ་ཧི༔ དེ་ནས་བཟློག་པ་གྱེར་མཇུག་ཏུ༔ ཨཱོཾ་ཀརྨ་དྷཀྐི་ནི་ཧ་རི་ནི་ས་ཧཱུྃ་ཕཊ༔ བནྡྷེ་ནག་པོའི་བྱད་ཁ་བྷྱོ་ཟློག༔ བོན་པོ་ནག་པོའི་བྱད་ཁ་བྷྱོ་ཟློག༔ ཕྲ་མེན་མཁན་གྱི་བྱད་ཁ་བྷྱོ་ཟློག༔ འཕུང་གཡོས་མཁན་གྱི་བྱད་ཁ་བྷྱོ་ཟློག༔ མནན་གཏད་བཅིང་བའི་བྱད་ཁ་བྷྱོ་ཟློག༔ རླུང་ལ་འཁོར་ལོ་བསྐོར་བའི་བྱད་ཁ་བྷྱོ་ཟློག༔ ཧོམ་གྱིས་སྲེག་པའི་བྱད་ཁ་བྷྱོ་ཟློག༔ པར་བུ་བསྐོར་བའི་བྱད་ཁ་བྷྱོ་ཟློག༔ ལྷ་ཡི་རྦོད་ཟོར་བྷྱོ་ཟློག༔ ཀླུ་ཡི་རྦོད་ཟོར་བྷྱོ་ཟློག༔ བདུད་ཀྱི་རྦོད་ཟོར་བྷྱོ་ཟློག༔ མ་མོའི་རྦོད་ཟོར་བྷྱོ་ཟློག༔ གཤིན་རྗེའི་རྦོད་ཟོར་བྷྱོ་ཟློག༔ བཙན་གྱི་རྦོད་ཟོར་བྷྱོ་ཟློག༔ གཟའ་ཡི་རྦོད་ཟོར་བྷྱོ་ཟློག༔ ཐེའུ་རང་རྦོད་ཟོར་བྷྱོ་ཟློག༔ ཨ་ལ་ལ་པྲ་མོ་ཧེ་ཟློག༔ ཕུར་ཁ་ཟློག༔ ཟོར་ཁ་ཟློག༔ བྱད་ཁ་ཟློག༔ གཏད་ཁ་ཟློག༔ ཁྲམ་ཁ་ཟློག༔ ནད་ཁ་ཟློག༔ ཡམས་ཁ་ཟློག༔ རྦད་འདྲེ་ཟློག༔ རྦོད་གཏོང་ཟློག༔ ས་མ་ཡ་བྷྱོ་ཟློག༔ གསུམ། ན་མོ་དཀོན་མཆོག་གསུམ་དང་རྩབ་གསུམ་གྱི་བདེན་པས་གནོད་བྱེད་དགྲ་བགེགས་ཐམས་ཅད་གཟུགས་ལིངྒ་འདིའི་ནང་དུ་ཁུག །གསུམ། ཨཱོཾ་ས་མ་ཡ་དྷཀྐི་ནི་ཧ་རི་ནི་ས་ཧཱུྃ་ཕཊ༔ དགྲ་བོ་བྱད་མ་ལྷ་སྲུང་དང་བཅས་པའི་ལུས་ངག་ཡིད་གསུམ་ཁུག་རིལ་ཐུན་བྷྱོ༔ གསུམ། ཛཿཧཱུྃ་བཾ་ཧོཿས་རྒྱས་འདེབས། ཐུན་ཐོགས་ཏེ། ཧཱུྃ༔ དམ་ཚིག་མཁའ་འགྲོ་འཇིགས་གཟུགས་བརྔམ༔ རབ་གཏུམ་འཁྲུག་པས་དུག་གསུམ་འབར༔ སྐུ་གསུང་ཐུགས་སྤྲུལ་སྟོང་གསུམ་གང་༔ སྒྲོལ་བྱེད་འབུམ་སྡེས་དགྲ་བགེགས་སྒྲོལ༔ ཨཱོཾས་མ་ཡ་དྷཀྐི་ནི་ཧ་རི་ནི་ས་མ་མ་ཏྲག་རཀྴ་ཡ་ཁ་ཐུན་ཁ་ཐུན་དགྲ་བོ་འདུ་ཤ་ཡེ༔ བྷནྡྷ་ཡེ༔ ཚིནྡྷ་ཡེ༔ རཀྟ་ཡེ༔ དགྲ་བོའི་སྙིང་ཁ་རཀྨོ་སྲོག་ཁུག༔ མྱུར་དུ་ཁུག་ཛཿཛ༔ དགྲ་བོའི་སྙིང་དུམ་བུར་ཆོད༔ དུམ་བུར་ཆོད༔ དགྲ་བོ་མཱ་ར་ཡ་ཛཿཛ༔ ལིང་རོ་བསྟབ། ཧཱུྃ༔ མཁའ་འགྲོའི་ཚོགས་རྣམས་དགྱེས་པར་རོལ༔ ཁཱ་ཧི་ཁཱ་ཧི་འདོད་ཆགས་ཁྲག་ལ་ཁཱ་ཧི༔ ཁཱ་ཧི་ཁཱ་ཧི་ཞེ་སྡང་རུས་ལ་ཁཱ་ཧི༔ ཁཱ་ཧི་ཁཱ་ཧི་གཏི་མུག་ཤ་ལ་ཁཱ་ཧི༔ དེ་ནས་བཟློག་པ་གྱེར་མཇུག་ཏུ༔ ཨཱོཾ་ས་མ་ཡ་དྷཀྐི་ནི་ཧ་རི་ནི་ས་ཧཱུྃ་ཕཊ༔ བནྡྷེ་ནག་པོའི་བྱད་ཁ་བྷྱོ་ཟློག༔ བོན་པོ་ནག་པོའི་བྱད་ཁ་བྷྱོ་ཟློག༔ ཕྲ་མེན་མཁན་གྱི་བྱད་ཁ་བྷྱོ་ཟློག༔ འཕུང་གཡོས་མཁན་གྱི་བྱད་ཁ་བྷྱོ་ཟློག༔ མནན་གཏད་བཅིང་བའི་བྱད་ཁ་བྷྱོ་ཟློག༔ རླུང་ལ་འཁོར་ལོ་བསྐོར་བའི་བྱད་ཁ་བྷྱོ་ཟློག༔ ཧོམ་གྱིས་སྲེག་པའི་བྱད་ཁ་བྷྱོ་ཟློག༔ པར་བུ་བསྐོར་བའི་བྱད་ཁ་བྷྱོ་ཟློག༔ ལྷ་ཡི་རྦོད་ཟོར་བྷྱོ་ཟློག༔ ཀླུ་ཡི་རྦོད་ཟོར་བྷྱོ་ཟློག༔ བདུད་ཀྱི་རྦོད་ཟོར་བྷྱོ་ཟློག༔ མ་མོའི་རྦོད་ཟོར་བྷྱོ་ཟློག༔ གཤིན་རྗེའི་རྦོད་ཟོར་བྷྱོ་ཟློག༔ བཙན་གྱི་རྦོད་ཟོར་བྷྱོ་ཟློག༔ གཟའ་ཡི་རྦོད་ཟོར་བྷྱོ་ཟློག༔ ཐེའུ་རང་རྦོད་ཟོར་བྷྱོ་ཟློག༔ ཨ་ལ་ལ་པྲ་མོ་ཧེ་ཟློག༔ ཕུར་ཁ་ཟློག༔ ཟོར་ཁ་ཟློག༔ བྱད་ཁ་ཟློག༔ གཏད་ཁ་ཟློག༔ ཁྲམ་ཁ་ཟློག༔ ནད་ཁ་ཟློག༔ ཡམས་ཁ་ཟློག༔ རྦད་འདྲེ་ཟློག༔ རྦོད་གཏོང་ཟློག༔ ས་མ་ཡ་བྷྱོ་ཟློག༔ གསུམ། ན་མོ་དཀོན་མཆོག་གསུམ་དང་རྩ་བ་གསུམ་གྱི་བདེན་པས་གནོད་བྱེད་དགྲ་བགེགས་ཐམས་ཅད་གཟུགས་ལིངྒ་འདིའི་ནང་དུ་ཁུག །གསུམ། ཨཱོཾ་བི་ཤྭ་དྷཀྐི་ནི་ཧ་རི་ནི་ས་ཧཱུྃ་ཕཊ༔ དགྲ་བོ་བྱད་མ་ལྷ་སྲུང་དང་བཅས་པའི་ལུས་ངག་ཡིད་གསུམ་ཁུག་རིལ་ཐུན་བྷྱོ༔ གསུམ། ཛཿཧཱུྃ་བཾ་ཧོཿས་རྒྱས་འདེབས། ཐུན་ཐོགས་ཏེ། ཧཱུྃ༔ སྣ་ཚོགས་མཁའ་འགྲོ་འཇིགས་གཟུགས་བརྔམ༔ རབ་གཏུམ་འཁྲུག་པས་དུག་གསུམ་འབར༔ སྐུ་གསུང་ཐུགས་སྤྲུལ་སྟོང་གསུམ་གང་༔ སྒྲོལ་བྱེད་འབུམ་སྡེས་དགྲ་བགེགས་སྒྲོལ༔ ཨཱོཾ་བི་ཤྭ་དྷཀྐི་ནི་ཧ་རི་ནི་ས་མ་མ་ཏྲག་རཀྴ་ཡ་ཁ་ཐུན་ཁ་ཐུན་དགྲ་བོ་འདུ་ཤ་ཡེ༔ བྷནྡྷ་ཡེ༔ ཚིནྡྷ་ཡེ༔ རཀྟ་ཡེ༔ དགྲ་བོའི་སྙིང་ཁ་རཀྨོ་སྲོག་ཁུག༔ མྱུར་དུ་ཁུག་ཛཿཛ༔ དགྲ་བོའི་སྙིང་དུམ་བུར་ཆོད༔ དུམ་བུར་ཆོད༔ དགྲ་བོ་མཱ་ར་ཡ་ཛཿཛ༔ ལིང་རོ་བསྟབ། ཧཱུྃ༔ མཁའ་འགྲོའི་ཚོགས་རྣམས་དགྱེས་པར་རོལ༔ ཁཱ་ཧི་ཁཱ་ཧི་འདོད་ཆགས་ཁྲག་ལ་ཁཱ་ཧི༔ ཁཱ་ཧི་ཁཱ་ཧི་ཞེ་སྡང་རུས་ལ་ཁཱ་ཧི༔ ཁཱ་ཧི་ཁཱ་ཧི་གཏི་མུག་ཤ་ལ་ཁཱ་ཧི༔ དེ་ནས་བཟློག་པ་གྱེར་མཇུག་ཏུ༔ ཨཱོཾ་བི་ཤྭ་དྷཀྐི་ནི་ཧ་རི་ནི་ས་ཧཱུྃ་ཕཊ༔ བནྡྷེ་ནག་པོའི་བྱད་ཁ་བྷྱོ་ཟློག༔ བོན་པོ་ནག་པོའི་བྱད་ཁ་བྷྱོ་ཟློག༔ ཕྲ་མེན་མཁན་གྱི་བྱད་ཁ་བྷྱོ་ཟློག༔ འཕུང་གཡོས་མཁན་གྱི་བྱད་ཁ་བྷྱོ་ཟློག༔ མནན་གཏད་བཅིང་བའི་བྱད་ཁ་བྷྱོ་ཟློག༔ རླུང་ལ་འཁོར་ལོ་བསྐོར་བའི་བྱད་ཁ་བྷྱོ་ཟློག༔ ཧོམ་གྱིས་སྲེག་པའི་བྱད་ཁ་བྷྱོ་ཟློག༔ པར་བུ་བསྐོར་བའི་བྱད་ཁ་བྷྱོ་ཟློག༔ ལྷ་ཡི་རྦོད་ཟོར་བྷྱོ་ཟློག༔ ཀླུ་ཡི་རྦོད་ཟོར་བྷྱོ་ཟློག༔ བདུད་ཀྱི་རྦོད་ཟོར་བྷྱོ་ཟློག༔ མ་མོའི་རྦོད་ཟོར་བྷྱོ་ཟློག༔ གཤིན་རྗེའི་རྦོད་ཟོར་བྷྱོ་ཟློག༔ བཙན་གྱི་རྦོད་ཟོར་བྷྱོ་ཟློག༔ གཟའ་ཡི་རྦོད་ཟོར་བྷྱོ་ཟློག༔ ཐེའུ་རང་རྦོད་ཟོར་བྷྱོ་ཟློག༔ ཨ་ལ་ལ་པྲ་མོ་ཧེ་ཟློག༔ ཕུར་ཁ་ཟློག༔ ཟོར་ཁ་ཟློག༔ བྱད་ཁ་ཟློག༔ གཏད་ཁ་ཟློག༔ ཁྲམ་ཁ་ཟློག༔ ནད་ཁ་ཟློག༔ ཡམས་ཁ་ཟློག༔ རྦད་འདྲེ་ཟློག༔ རྦོད་གཏོང་ཟློག༔ ས་མ་ཡ་བྷྱོ་ཟློག༔ གསུམ། ན་མོ་དཀོན་མཆོག་གསུམ་དང་རྩ་བ་གསུམ་གྱི་བདེན་པས་གནོད་བྱེད་དགྲ་བགེགས་ཐམས་ཅད་གཟུགས་ལིངྒ་འདིའི་ནང་དུ་ཁུག །གསུམ། ཨཱོཾ་སརྦ་དྷཀྐི་ནི་ཧ་རི་ནི་ས་ཧཱུྃ་ཕཊ༔ དགྲ་བོ་བྱད་མ་ལྷ་སྲུང་དང་བཅས་པའི་ལུས་ངག་ཡིད་གསུམ་ཁུག་རིལ་ཐུན་བྷྱོ༔ གསུམ། ཛཿཧཱུྃ་བཾ་ཧོཿས་རྒྱས་འདེབས། ཐུན་ཐོགས་ཏེ། ཧཱུྃ༔ ཐམས་ཅད་མཁའ་འགྲོ་འཇིགས་གཟུགས་བརྔམ༔ རབ་གཏུམ་འཁྲུལ་པས་དུག་གསུམ་འབར༔ སྐུ་གསུང་ཐུགས་སྤྲུལ་སྟོང་གསུམ་གང་༔ སྒྲོལ་བྱེད་འབུམ་སྡེས་དགྲ་བགེགས་སྒྲོལ༔ ཨཱོཾ་སརྦ་དྷཀྐི་ནི་ཧ་རི་ནི་ས་མ་མ་ཏྲག་རཀྴ་ཡ་ཁ་ཐུན་ཁ་ཐུན་དགྲ་བོ་འདུ་ཤ་ཡེ༔ བྷནྡྷ་ཡེ༔ ཚིནྡྷ་ཡེ༔ རཀྟ་ཡེ༔ དགྲ་བོའི་སྙིང་ཁ་རཀྨོ་སྲོག་ཁུག༔ མྱུར་དུ་ཁུག་ཛཿཛ༔ དགྲ་བོའི་སྙིང་དུམ་བུར་ཆོད༔ དུམ་བུར་ཆོད༔ དགྲ་བོ་མཱ་ར་ཡ་ཛཿཛ༔ ལིང་རོ་བསྟབ། ཧཱུྃ༔ མཁའ་འགྲོའི་ཚོགས་རྣམས་དགྱེས་པར་རོལ༔ ཁཱ་ཧི་ཁཱ་ཧི་འདོད་ཆགས་ཁྲག་ལ་ཁཱ་ཧི༔ ཁཱ་ཧི་ཁཱ་ཧི་ཞེ་སྡང་རུས་ལ་ཁཱ་ཧི༔ ཁཱ་ཧི་ཁཱ་ཧི་གཏི་མུག་ཤ་ལ་ཁཱ་ཧི༔ དེ་ནས་བཟློག་པ་གྱེར་མཇུག་ཏུ༔ ཨཱོཾ་སརྦ་དྷཀྐི་ནི་ཧ་རི་ནི་ས་ཧཱུྃ་ཕཊ༔ བནྡྷེ་ནག་པོའི་བྱད་ཁ་བྷྱོ་ཟློག༔ བོན་པོ་ནག་པོའི་བྱད་ཁ་བྷྱོ་ཟློག༔ ཕྲ་མེན་མཁན་གྱི་བྱད་ཁ་བྷྱོ་ཟློག༔ འཕུང་གཡོས་མཁན་གྱི་བྱད་ཁ་བྷྱོ་ཟློག༔ མནན་གཏད་བཅིང་བའི་བྱད་ཁ་བྷྱོ་ཟློག༔ རླུང་ལ་འཁོར་ལོ་བསྐོར་བའི་བྱད་ཁ་བྷྱོ་ཟློག༔ ཧོམ་གྱིས་སྲེག་པའི་བྱད་ཁ་བྷྱོ་ཟློག༔ པར་བུ་བསྐོར་བའི་བྱད་ཁ་བྷྱོ་ཟློག༔ ལྷ་ཡི་རྦོད་ཟོར་བྷྱོ་ཟློག༔ ཀླུ་ཡི་རྦོད་ཟོར་བྷྱོ་ཟློག༔ བདུད་ཀྱི་རྦོད་ཟོར་བྷྱོ་ཟློག༔ མ་མོའི་རྦོད་ཟོར་བྷྱོ་ཟློག༔ གཤིན་རྗེའི་རྦོད་ཟོར་བྷྱོ་ཟློག༔ བཙན་གྱི་རྦོད་ཟོར་བྷྱོ་ཟློག༔ གཟའ་ཡི་རྦོད་ཟོར་བྷྱོ་ཟློག༔ ཐེའུ་རང་རྦོད་ཟོར་བྷྱོ་ཟློག༔ ཨ་ལ་ལ་པྲ་མོ་ཧེ་ཟློག༔ ཕུར་ཁ་ཟློག༔ ཟོར་ཁ་ཟློག༔ བྱད་ཁ་ཟློག༔ གཏད་ཁ་ཟློག༔ ཁྲམ་ཁ་ཟློག༔ ནད་ཁ་ཟློག༔ ཡམས་ཁ་ཟློག༔ རྦད་འདྲེ་ཟློག༔ རྦོད་གཏོང་ཟློག༔ ས་མ་ཡ་བྷྱོ་ཟློག༔ གསུམ། ན་མོ་དཀོན་མཆོག་གསུམ་དང་རྩ་བ་གསུམ་གྱི་བདེན་པས་གནོད་བྱེད་དགྲ་བགེགས་ཐམས་ཅད་གཟུགས་ལིངྒ་འདིའི་ནང་དུ་ཁུག །གསུམ། ཨཱོཾ་ལོ་ཀ་དྷཀྐི་ནི་ཧ་རི་ནི་ས་ཧཱུྃ་ཕཊ༔ དགྲ་བོ་བྱད་མ་ལྷ་སྲུང་དང་བཅས་པའི་ལུས་ངག་ཡིད་གསུམ་ཁུག་རིལ་ཐུན་བྷྱོ༔ གསུམ། ཛཿཧཱུྃ་བཾ་ཧོཿས་རྒྱས་འདེབས། ཐུན་ཐོགས་ཏེ། ཧཱུྃ༔ འཇིག་རྟེན་མཁའ་འགྲོ་འཇིགས་གཟུགས་བརྔམ༔ རབ་གཏུམ་འཁྲུག་པས་དུག་གསུམ་འབར༔ སྐུ་གསུང་ཐུགས་སྤྲུལ་སྟོང་གསུམ་གང་༔ སྒྲོལ་བྱེད་འབུམ་སྡེས་དགྲ་བགེགས་སྒྲོལ༔ ཨཱོཾ་ལོ་ཀ་དྷཀྐི་ནི་ཧ་རི་ནི་ས་མ་མ་ཏྲག་རཀྴ་ཡ་ཁ་ཐུན་ཁ་ཐུན་དགྲ་བོ་འདུ་ཤ་ཡེ༔ བྷནྡྷ་ཡེ༔ ཚིནྡྷ་ཡེ༔ རཀྟ་ཡེ༔ དགྲ་བོའི་སྙིང་ཁ་རཀྨོ་སྲོག་ཁུག༔ མྱུར་དུ་ཁུག་ཛཿཛ༔ དགྲ་བོའི་སྙིང་དུམ་བུར་ཆོད༔ དུམ་བུར་ཆོད༔ དགྲ་བོ་མཱ་ར་ཡ་ཛཿཛ༔ ལིང་རོ་བསྟབ། ཧཱུྃ༔ མཁའ་འགྲོའི་ཚོགས་རྣམས་དགྱེས་པར་རོལ༔ ཁཱ་ཧི་ཁཱ་ཧི་འདོད་ཆགས་ཁྲག་ལ་ཁཱ་ཧི༔ ཁཱ་ཧི་ཁཱ་ཧི་ཞེ་སྡང་རུས་ལ་ཁཱ་ཧི༔ ཁཱ་ཧི་ཁཱ་ཧི་གཏི་མུག་ཤ་ལ་ཁཱ་ཧི༔ དེ་ནས་བཟློག་པ་གྱེར་མཇུག་ཏུ༔ ཨཱོཾ་ལོ་ཀ་དྷཀྐི་ནི་ཧ་རི་ནི་ས་ཧཱུྃ་ཕཊ༔ བནྡྷེ་ནག་པོའི་བྱད་ཁ་བྷྱོ་ཟློག༔ བོན་པོ་ནག་པོའི་བྱད་ཁ་བྷྱོ་ཟློག༔ ཕྲ་མེན་མཁན་གྱི་བྱད་ཁ་བྷྱོ་ཟློག༔ འཕུང་གཡོས་མཁན་གྱི་བྱད་ཁ་བྷྱོ་ཟློག༔ མནན་གཏད་བཅིང་བའི་བྱད་ཁ་བྷྱོ་ཟློག༔ རླུང་ལ་འཁོར་ལོ་བསྐོར་བའི་བྱད་ཁ་བྷྱོ་ཟློག༔ ཧོམ་གྱིས་སྲེག་པའི་བྱད་ཁ་བྷྱོ་ཟློག༔ པར་བུ་བསྐོར་བའི་བྱད་ཁ་བྷྱོ་ཟློག༔ ལྷ་ཡི་རྦོད་ཟོར་བྷྱོ་ཟློག༔ ཀླུ་ཡི་རྦོད་ཟོར་བྷྱོ་ཟློག༔ བདུད་ཀྱི་རྦོད་ཟོར་བྷྱོ་ཟློག༔ མ་མོའི་རྦོད་ཟོར་བྷྱོ་ཟློག༔ གཤིན་རྗེའི་རྦོད་ཟོར་བྷྱོ་ཟློག༔ བཙན་གྱི་རྦོད་ཟོར་བྷྱོ་ཟློག༔ གཟའ་ཡི་རྦོད་ཟོར་བྷྱོ་ཟློག༔ ཐེའུ་རང་རྦོད་ཟོར་བྷྱོ་ཟློག༔ ཨ་ལ་ལ་པྲ་མོ་ཧེ་ཟློག༔ ཕུར་ཁ་ཟློག༔ ཟོར་ཁ་ཟློག༔ བྱད་ཁ་ཟློག༔ གཏད་ཁ་ཟློག༔ ཁྲམ་ཁ་ཟློག༔ ནད་ཁ་ཟློག༔ ཡམས་ཁ་ཟློག༔ རྦད་འདྲེ་ཟློག༔ རྦོད་གཏོང་ཟློག༔ ས་མ་ཡ་བྷྱོ་ཟློག༔ གསུམ། ན་མོ་དཀོན་མཆོག་གསུམ་དང་རྩ་བ་གསུམ་གྱི་བདེན་པས་གནོད་བྱེད་དགྲ་བགེགས་ཐམས་ཅད་གཟུགས་ལིངྒ་འདིའི་ནང་དུ་ཁུག །གསུམ། ཧྲཱི༔ མ་ཧཱ་རི་ནི་ས་ཧཱུྃ་ཕཊ༔ དགྲ་བོ་བྱད་མ་ལྷ་སྲུང་དང་བཅས་པའི་ལུས་ངག་ཡིད་གསུམ་ཁུག་རིལ་ཐུན་བྷྱོ༔ གསུམ། ཛཿཧཱུྃ་བཾ་ཧོཿས་རྒྱས་འདེབས། ཐུན་ཐོགས་ཏེ། ཧཱུྃ༔ གནས་ཀྱི་མཁའ་འགྲོ་འཇིགས་གཟུགས་བརྔམ༔ རབ་གཏུམ་འཁྲུག་པས་དུག་གསུམ་འབར༔ སྐུ་གསུང་ཐུགས་སྤྲུལ་སྟོང་གསུམ་གང་༔ སྒྲོལ་བྱེད་འབུམ་སྡེས་དགྲ་བགེགས་སྒྲོལ༔ ཧྲཱིཿམ་ཧ་རི་ནི་ས་མ་མ་ཏྲག་རཀྴ་ཡ་ཁ་ཐུན་ཁ་ཐུན་དགྲ་བོ་འདུ་ཤ་ཡེ༔ བྷནྡྷ་ཡེ༔ ཚིནྡྷ་ཡེ༔ རཀྟ་ཡེ༔ དགྲ་བོའི་སྙིང་ཁ་རཀྨོ་སྲོག་ཁུག༔ མྱུར་དུ་ཁུག་ཛཿཛ༔ དགྲ་བོའི་སྙིང་དུམ་བུར་ཆོད༔ དུམ་བུར་ཆོད༔ དགྲ་བོ་མཱ་ར་ཡ་ཛཿཛ༔ ལིང་རོ་བསྟབ། ཧཱུྃ༔ མཁའ་འགྲོའི་ཚོགས་རྣམས་དགྱེས་པར་རོལ༔ ཁཱ་ཧི་ཁཱ་ཧི་འདོད་ཆགས་ཁྲག་ལ་ཁཱ་ཧི༔ ཁཱ་ཧི་ཁཱ་ཧི་ཞེ་སྡང་རུས་ལ་ཁཱ་ཧི༔ ཁཱ་ཧི་ཁཱ་ཧི་གཏི་མུག་ཤ་ལ་ཁཱ་ཧི༔ དེ་ནས་བཟློག་པ་གྱེར་མཇུག་ཏུ༔ ཧྲཱིཿམ་ཧ་རི་ནི་ས་ཧཱུྃ་ཕཊ༔ བནྡྷེ་ནག་པོའི་བྱད་ཁ་བྷྱོ་ཟློག༔ བོན་པོ་ནག་པོའི་བྱད་ཁ་བྷྱོ་ཟློག༔ ཕྲ་མེན་མཁན་གྱི་བྱད་ཁ་བྷྱོ་ཟློག༔ འཕུང་གཡོས་མཁན་གྱི་བྱད་ཁ་བྷྱོ་ཟློག༔ མནན་གཏད་བཅིང་བའི་བྱད་ཁ་བྷྱོ་ཟློག༔ རླུང་ལ་འཁོར་ལོ་བསྐོར་བའི་བྱད་ཁ་བྷྱོ་ཟློག༔ ཧོམ་གྱིས་སྲེག་པའི་བྱད་ཁ་བྷྱོ་ཟློག༔ པར་བུ་བསྐོར་བའི་བྱད་ཁ་བྷྱོ་ཟློག༔ ལྷ་ཡི་རྦོད་ཟོར་བྷྱོ་ཟློག༔ ཀླུ་ཡི་རྦོད་ཟོར་བྷྱོ་ཟློག༔ བདུད་ཀྱི་རྦོད་ཟོར་བྷྱོ་ཟློག༔ མ་མོའི་རྦོད་ཟོར་བྷྱོ་ཟློག༔ གཤིན་རྗེའི་རྦོད་ཟོར་བྷྱོ་ཟློག༔ བཙན་གྱི་རྦོད་ཟོར་བྷྱོ་ཟློག༔ གཟའ་ཡི་རྦོད་ཟོར་བྷྱོ་ཟློག༔ ཐེའུ་རང་རྦོད་ཟོར་བྷྱོ་ཟློག༔ ཨ་ལ་ལ་པྲ་མོ་ཧེ་ཟློག༔ ཕུར་ཁ་ཟློག༔ ཟོར་ཁ་ཟློག༔ བྱད་ཁ་ཟློག༔ གཏད་ཁ་ཟློག༔ ཁྲམ་ཁ་ཟློག༔ ནད་ཁ་ཟློག༔ ཡམས་ཁ་ཟློག༔ རྦད་འདྲེ་ཟློག༔ རྦོད་གཏོང་ཟློག༔ ས་མ་ཡ་བྷྱོ་ཟློག༔ གསུམ། ན་མོ་དཀོན་མཆོག་གསུམ་དང་རྩ་བ་གསུམ་གྱི་བདེན་པས་གནོད་བྱེད་དགྲ་བགེགས་ཐམས་ཅད་གཟུགས་ལིངྒ་འདིའི་ནང་དུ་ཁུག །གསུམ། ཧྲཱིཿམ་ཧ་རི་ནི་ས་ཧཱུྃ་ཕཊ༔ དགྲ་བོ་བྱད་མ་ལྷ་སྲུང་དང་བཅས་པའི་ལུས་ངག་ཡིད་གསུམ་ཁུག་རིལ་ཐུན་བྷྱོ༔ གསུམ། ཛཿཧཱུྃ་བཾ་ཧོཿས་རྒྱས་འདེབས། ཐུན་ཐོགས་ཏེ། ཧཱུྃ༔ ཡུལ་གྱི་མཁའ་འགྲོ་འཇིགས་གཟུགས་བརྔམ༔ རབ་གཏུམ་འཁྲུལ་པས་དུག་གསུམ་འབར༔ སྐུ་གསུང་ཐུགས་སྤྲུལ་སྟོང་གསུམ་གང་༔ སྒྲོལ་བྱེད་འབུམ་སྡེས་དགྲ་བགེགས་སྒྲོལ༔ ཧྲིཿམ་ཧ་རི་ནི་ས་མ་མ་ཏྲག་རཀྴ་ཡ་ཁ་ཐུན་ཁ་ཐུན་དགྲ་བོ་འདུ་ཤ་ཡེ༔ བྷནྡྷ་ཡེ༔ ཚིནྡྷ་ཡེ༔ རཀྟ་ཡེ༔ དགྲ་བོའི་སྙིང་ཁ་རཀྨོ་སྲོག་ཁུག༔ མྱུར་དུ་ཁུག་ཛཿཛ༔ དགྲ་བོའི་སྙིང་དུམ་བུར་ཆོད༔ དུམ་བུར་ཆོད༔ དགྲ་བོ་མཱ་ར་ཡ་ཛཿཛ༔ ལིང་རོ་བསྟབ། ཧཱུྃ༔ མཁའ་འགྲོའི་ཚོགས་རྣམས་དགྱེས་པར་རོལ༔ ཁཱ་ཧི་ཁཱ་ཧི་འདོད་ཆགས་ཁྲག་ལ་ཁཱ་ཧི༔ ཁཱ་ཧི་ཁཱ་ཧི་ཞེ་སྡང་རུས་ལ་ཁཱ་ཧི༔ ཁཱ་ཧི་ཁཱ་ཧི་གཏི་མུག་ཤ་ལ་ཁཱ་ཧི༔ དེ་ནས་བཟློག་པ་གྱེར་མཇུག་ཏུ༔ ཧྲིཿམ་ཧ་རི་ནི་ས་ཧཱུྃ་ཕཊ༔ བནྡྷེ་ནག་པོའི་བྱད་ཁ་བྷྱོ་ཟློག༔ བོན་པོ་ནག་པོའི་བྱད་ཁ་བྷྱོ་ཟློག༔ ཕྲ་མེན་མཁན་གྱི་བྱད་ཁ་བྷྱོ་ཟློག༔ འཕུང་གཡོས་མཁན་གྱི་བྱད་ཁ་བྷྱོ་ཟློག༔ མནན་གཏད་བཅིང་བའི་བྱད་ཁ་བྷྱོ་ཟློག༔ རླུང་ལ་འཁོར་ལོ་བསྐོར་བའི་བྱད་ཁ་བྷྱོ་ཟློག༔ ཧོམ་གྱིས་སྲེག་པའི་བྱད་ཁ་བྷྱོ་ཟློག༔ པར་བུ་བསྐོར་བའི་བྱད་ཁ་བྷྱོ་ཟློག༔ ལྷ་ཡི་རྦོད་ཟོར་བྷྱོ་ཟློག༔ ཀླུ་ཡི་རྦོད་ཟོར་བྷྱོ་ཟློག༔ བདུད་ཀྱི་རྦོད་ཟོར་བྷྱོ་ཟློག༔ མ་མོའི་རྦོད་ཟོར་བྷྱོ་ཟློག༔ གཤིན་རྗེའི་རྦོད་ཟོར་བྷྱོ་ཟློག༔ བཙན་གྱི་རྦོད་ཟོར་བྷྱོ་ཟློག༔ གཟའ་ཡི་རྦོད་ཟོར་བྷྱོ་ཟློག༔ ཐེའུ་རང་རྦོད་ཟོར་བྷྱོ་ཟློག༔ ཨ་ལ་ལ་པྲ་མོ་ཧེ་ཟློག༔ ཕུར་ཁ་ཟློག༔ ཟོར་ཁ་ཟློག༔ བྱད་ཁ་ཟློག༔ གཏད་ཁ་ཟློག༔ ཁྲམ་ཁ་ཟློག༔ ནད་ཁ་ཟློག༔ ཡམས་ཁ་ཟློག༔ རྦད་འདྲེ་ཟློག༔ རྦོད་གཏོང་ཟློག༔ ས་མ་ཡ་བྷྱོ་ཟློག༔ གསུམ། ན་མོ་དཀོན་མཆོག་གསུམ་དང་རྩ་བ་གསུམ་གྱི་བདེན་པས་གནོད་བྱེད་དགྲ་བགེགས་ཐམས་ཅད་གཟུགས་ལིངྒ་འདིའི་ནང་དུ་ཁུག །གསུམ། ཧྲཱིཿམ་ཧ་རི་ནི་ས་ཧཱུྃ་ཕཊ༔ དགྲ་བོ་བྱད་མ་ལྷ་སྲུང་དང་བཅས་པའི་ལུས་ངག་ཡིད་གསུམ་ཁུག་རིལ་ཐུན་བྷྱོ༔ གསུམ། ཛཿཧཱུྃ་བཾ་ཧོཿས་རྒྱས་འདེབས། ཐུན་ཐོགས་ཏེ། ཧཱུྃ༔ དུར་ཁྲོད་མཁའ་འགྲོ་འཇིགས་གཟུགས་བརྔམ༔ རབ་གཏུམ་འཁྲུག་པས་དུག་གསུམ་འབར༔ སྐུ་གསུང་ཐུགས་སྤྲུལ་སྟོང་གསུམ་གང་༔ སྒྲོལ་བྱེད་འབུམ་སྡེས་དགྲ་བགེགས་སྒྲོལ༔ ཧྲཱི་མ་ཧ་རི་ནི་ས་མ་མ་ཏྲག་རཀྴ་ཡ་ཁ་ཐུན་ཁ་ཐུན་དགྲ་བོ་འདུ་ཤ་ཡེ༔ བྷནྡྷ་ཡེ༔ ཚིནྡྷ་ཡེ༔ རཀྟ་ཡེ༔ དགྲ་བོའི་སྙིང་ཁ་རཀྨོ་སྲོག་ཁུག༔ མྱུར་དུ་ཁུག་ཛཿཛ༔ དགྲ་བོའི་སྙིང་དུམ་བུར་ཆོད༔ དུམ་བུར་ཆོད༔ དགྲ་བོ་མཱ་ར་ཡ་ཛཿཛ༔ ལིང་རོ་བསྟབ། ཧཱུྃ༔ མཁའ་འགྲོའི་ཚོགས་རྣམས་དགྱེས་པར་རོལ༔ ཁཱ་ཧི་ཁཱ་ཧི་འདོད་ཆགས་ཁྲག་ལ་ཁཱ་ཧི༔ ཁཱ་ཧི་ཁཱ་ཧི་ཞེ་སྡང་རུས་ལ་ཁཱ་ཧི༔ ཁཱ་ཧི་ཁཱ་ཧི་གཏི་མུག་ཤ་ལ་ཁཱ་ཧི༔ དེ་ནས་བཟློག་པ་གྱེར་མཇུག་ཏུ༔ ཧྲིཿ མ་ཧ་རི་ནི་ས་ཧཱུྃ་ཕཊ༔ བནྡྷེ་ནག་པོའི་བྱད་ཁ་བྷྱོ་ཟློག༔ བོན་པོ་ནག་པོའི་བྱད་ཁ་བྷྱོ་ཟློག༔ ཕྲ་མེན་མཁན་གྱི་བྱད་ཁ་བྷྱོ་ཟློག༔ འཕུང་གཡོས་མཁན་གྱི་བྱད་ཁ་བྷྱོ་ཟློག༔ མནན་གཏད་བཅིང་བའི་བྱད་ཁ་བྷྱོ་ཟློག༔ རླུང་ལ་འཁོར་ལོ་བསྐོར་བའི་བྱད་ཁ་བྷྱོ་ཟློག༔ ཧོམ་གྱིས་སྲེག་པའི་བྱད་ཁ་བྷྱོ་ཟློག༔ པར་བུ་བསྐོར་བའི་བྱད་ཁ་བྷྱོ་ཟློག༔ ལྷ་ཡི་རྦོད་ཟོར་བྷྱོ་ཟློག༔ ཀླུ་ཡི་རྦོད་ཟོར་བྷྱོ་ཟློག༔ བདུད་ཀྱི་རྦོད་ཟོར་བྷྱོ་ཟློག༔ མ་མོའི་རྦོད་ཟོར་བྷྱོ་ཟློག༔ གཤིན་རྗེའི་རྦོད་ཟོར་བྷྱོ་ཟློག༔ བཙན་གྱི་རྦོད་ཟོར་བྷྱོ་ཟློག༔ གཟའ་ཡི་རྦོད་ཟོར་བྷྱོ་ཟློག༔ ཐེའུ་རང་རྦོད་ཟོར་བྷྱོ་ཟློག༔ ཨ་ལ་ལ་པྲ་མོ་ཧེ་ཟློག༔ ཕུར་ཁ་ཟློག༔ ཟོར་ཁ་ཟློག༔ བྱད་ཁ་ཟློག༔ གཏད་ཁ་ཟློག༔ ཁྲམ་ཁ་ཟློག༔ ནད་ཁ་ཟློག༔ ཡམས་ཁ་ཟློག༔ རྦད་འདྲེ་ཟློག༔ རྦོད་གཏོང་ཟློག༔ ས་མ་ཡ་བྷྱོ་ཟློག༔ གསུམ། ན་མོ་དཀོན་མཆོག་གསུམ་དང་རྩ་བ་གསུམ་གྱི་བདེན་པས་གནོད་བྱེད་དགྲ་བགེགས་ཐམས་ཅད་གཟུགས་ལིངྒ་འདིའི་ནང་དུ་ཁུག །གསུམ། ཧྲིཿམ་ཧ་རི་ནི་ས་ཧཱུྃ་ཕཊ༔ དགྲ་བོ་བྱད་མ་ལྷ་སྲུང་དང་བཅས་པའི་ལུས་ངག་ཡིད་གསུམ་ཁུག་རིལ་ཐུན་བྷྱོ༔ གསུམ། ཛཿཧཱུྃ་བཾ་ཧོཿས་རྒྱས་འདེབས། ཐུན་ཐོགས་ཏེ། ཧཱུྃ༔ སྤྲུལ་པའི་མཁའ་འགྲོ་འཇིགས་གཟུགས་བརྔམ༔ རབ་གཏུམ་འཁྲུལ་པས་དུག་གསུམ་འབར༔ སྐུ་གསུང་ཐུགས་སྤྲུལ་སྟོང་གསུམ་གང་༔ སྒྲོལ་བྱེད་འབུམ་སྡེས་དགྲ་བགེགས་སྒྲོལ༔ ཧྲིཿ མ་ཧ་རི་ནི་ས་མ་མ་ཏྲག་རཀྴ་ཡ་ཁ་ཐུན་ཁ་ཐུན་དགྲ་བོ་འདུ་ཤ་ཡེ༔ བྷནྡྷ་ཡེ༔ ཚིནྡྷ་ཡེ༔ རཀྟ་ཡེ༔ དགྲ་བོའི་སྙིང་ཁ་རཀྨོ་སྲོག་ཁུག༔ མྱུར་དུ་ཁུག་ཛཿཛ༔ དགྲ་བོའི་སྙིང་དུམ་བུར་ཆོད༔ དུམ་བུར་ཆོད༔ དགྲ་བོ་མཱ་ར་ཡ་ཛཿཛ༔ ལིང་རོ་བསྟབ། ཧཱུྃ༔ མཁའ་འགྲོའི་ཚོགས་རྣམས་དགྱེས་པར་རོལ༔ ཁཱ་ཧི་ཁཱ་ཧི་འདོད་ཆགས་ཁྲག་ལ་ཁཱ་ཧི༔ ཁཱ་ཧི་ཁཱ་ཧི་ཞེ་སྡང་རུས་ལ་ཁཱ་ཧི༔ ཁཱ་ཧི་ཁཱ་ཧི་གཏི་མུག་ཤ་ལ་ཁཱ་ཧི༔ དེ་ནས་བཟློག་པ་གྱེར་མཇུག་ཏུ༔ ཧྲཱིཿམ་ཧ་རི་ནི་ས་ཧཱུྃ་ཕཊ༔ བནྡྷེ་ནག་པོའི་བྱད་ཁ་བྷྱོ་ཟློག༔ བོན་པོ་ནག་པོའི་བྱད་ཁ་བྷྱོ་ཟློག༔ ཕྲ་མེན་མཁན་གྱི་བྱད་ཁ་བྷྱོ་ཟློག༔ འཕུང་གཡོས་མཁན་གྱི་བྱད་ཁ་བྷྱོ་ཟློག༔ མནན་གཏད་བཅིང་བའི་བྱད་ཁ་བྷྱོ་ཟློག༔ རླུང་ལ་འཁོར་ལོ་བསྐོར་བའི་བྱད་ཁ་བྷྱོ་ཟློག༔ ཧོམ་གྱིས་སྲེག་པའི་བྱད་ཁ་བྷྱོ་ཟློག༔ པར་བུ་བསྐོར་བའི་བྱད་ཁ་བྷྱོ་ཟློག༔ ལྷ་ཡི་རྦོད་ཟོར་བྷྱོ་ཟློག༔ ཀླུ་ཡི་རྦོད་ཟོར་བྷྱོ་ཟློག༔ བདུད་ཀྱི་རྦོད་ཟོར་བྷྱོ་ཟློག༔ མ་མོའི་རྦོད་ཟོར་བྷྱོ་ཟློག༔ གཤིན་རྗེའི་རྦོད་ཟོར་བྷྱོ་ཟློག༔ བཙན་གྱི་རྦོད་ཟོར་བྷྱོ་ཟློག༔ གཟའ་ཡི་རྦོད་ཟོར་བྷྱོ་ཟློག༔ ཐེའུ་རང་རྦོད་ཟོར་བྷྱོ་ཟློག༔ ཨ་ལ་ལ་པྲ་མོ་ཧེ་ཟློག༔ ཕུར་ཁ་ཟློག༔ ཟོར་ཁ་ཟློག༔ བྱད་ཁ་ཟློག༔ གཏད་ཁ་ཟློག༔ ཁྲམ་ཁ་ཟློག༔ ནད་ཁ་ཟློག༔ ཡམས་ཁ་ཟློག༔ རྦད་འདྲེ་ཟློག༔ རྦོད་གཏོང་ཟློག༔ ས་མ་ཡ་བྷྱོ་ཟློག༔ གསུམ། ཅེས་ལིངྒ་ཟོར་ཆུང་བཅུ་གཉིས་ཤ་ཁྲག་གིས་བརྒྱན་པ་དང་བཅས་མཐོང་བརྒྱུད་ལྟར་བཟློག་པའི་སོགས་རྒྱས་པར་བྱ། བཀའ་གཏེར་སྲུང་མ་གཉིས་རྩང་དང་བཅས་ཟོར་བཅོ་ལྔ། ཚོགས་གྲུ་གསུམ། ཞལ་ཟས་དམར་གཏོར། གཏོར་གསོལ་ལྷ་གྲངས་མདུན་བསྐྱེད་ལ་འབུལ། བསྐང་སོགས་མདུན་བསྐྱེད་ལ་འབུལ། མཆོད་གཏོར་མཆོད་པ་ཐམས་ཅད་ཀྱི་དུས་སྨན་རག་སྦྲེང་། སྒྱོགས་བཞི་མ་ཚང་བའི་ཟབ་ཏིག་སུས་ཀྱང་མ་བཅའ་བཀའ་རྒྱ་ཡིན་ནོ། །རིག་འཛིན་ཉི་མ་གྲགས་པས་སྦྱར་བའོ། །ཅེས་ཟབ་ཏིག་གི་བཟློག་པའི་འཕྱོངས་རིགས་འཛིན་ཆེན་པོས་མཛད་པ་ལ་བསྒྲལ་ལས་དང་སྟབ་པའི་ཚིག་ཅུང་ཟད་འབྱམས་པ་རྣམས་ཟུར་རྒྱན་ཡིད་བཞིན་ནོར་བུ་སོར་བཞག་སྟེ་པདྨ་ཐེག་མཆོག་བསྟན་པའི་རྒྱལ་མཚན་གྱིས་གསལ་དུ་བཏང་བའོ།། །།མངྒ་ལཾ།། །།

བླ་རྡོའི་ཁ་བསྐང་མཁའ་འགྲོ་འབུམ་གྱི་མཚན་སྔགས།

ཟབ་ཐིག་གི་བླ་རྡོའི་ཁ་བསྐང་མཁའ་འགྲོ་འབུམ་གྱི་མཚན་སྔགས་བཞུགས། །རྟོགས་མེད་ཉམས་དང་ལྡན་པའི་མཁའ་འགྲོ་འབུམ་སརྦ་སིདྡྷི་ཕ་ལ་ཧཱུྃ། །བདེ་ཆེན་ལས་ལ་ཁོལ་བའི་མཁའ་འགྲོ་འབུམ་སརྦ་སིདྡྷི་ཕ་ལ་ཧཱུྃ། །སངས་རྒྱས་རབས་བདུན་ལྡན་པའི་མཁའ་འགྲོ་འབུམ་སརྦ་སིདྡྷི་ཕ་ལ་ཧཱུྃ། །རིགས་ལྔ་ཡབ་དང་སྦྱོར་བའི་མཁའ་འགྲོ་འབུམ་སརྦ་སིདྡྷི་ཕ་ལ་ཧཱུྃ། །ཁྲག་འཐུང་རིགས་ལྔ་རྫོགས་པའི་མཁའ་འགྲོ་འབུམ་སརྦ་སིདྡྷི་ཕ་ལ་ཧཱུྃ། །ཉོན་མོངས་བག་ཆགས་སྲེག་པའི་མཁའ་འགྲོ་འབུམ་སརྦ་སིདྡྷི་ཕ་ལ་ཧཱུྃ། །བདེ་ཆེན་གཉིས་མེད་རྟོགས་པའི་མཁའ་འགྲོ་འབུམ་སརྦ་སིདྡྷི་ཕ་ལ་ཧཱུྃ། །རྣམ་རྟོག་དྲ་བ་གཅོད་པའི་མཁའ་འགྲོ་འབུམ་སརྦ་སིདྡྷི་ཕ་ལ་ཧཱུྃ། །བདེ་བ་ཞལ་དུ་སྟོབ་པའི་མཁའ་འགྲོ་འབུམ་སརྦ་སིདྡྷི་ཕ་ལ་ཧཱུྃ། །ཁམས་གསུམ་དབང་དུ་སྡུད་པའི་མཁའ་འགྲོ་འབུམ་སརྦ་སིདྡྷི་ཕ་ལ་ཧཱུྃ། །དོན་དམ་སྟོང་ཉིད་རྟོགས་པའི་མཁའ་འགྲོ་འབུམ་སརྦ་སིདྡྷི་ཕ་ལ་ཧཱུྃ། །དྲི་ཟ་ཟིལ་གྱིས་གནོན་པའི་མཁའ་འགྲོ་འབུམ་སརྦ་སིདྡྷི་ཕ་ལ་ཧཱུྃ། །དུར་ཁྲོད་རྒྱལ་མཚན་འདུལ་བའི་མཁའ་འགྲོ་འབུམ་སརྦ་སིདྡྷི་ཕ་ལ་ཧཱུྃ། །སྙན་བརྒྱུད་གདམས་ངག་འཛིན་པའི་མཁའ་འགྲོ་འབུམ་སརྦ་སིདྡྷི་ཕ་ལ་ཧཱུྃ། །ལྷ་མིན་གཡུལ་ངོ་བཟློག་པའི་མཁའ་འགྲོ་འབུམ་སརྦ་སིདྡྷི་ཕ་ལ་ཧཱུྃ། །འདུ་བྱེད་ལྔ་བཅུ་སྤྲུལ་པའི་མཁའ་འགྲོ་འབུམ་སརྦ་སིདྡྷི་ཕ་ལ་ཧཱུྃ། །འཁོར་བ་འདམ་ནས་འདོན་པའི་མཁའ་འགྲོ་འབུམ་སརྦ་སིདྡྷི་ཕ་ལ་ཧཱུྃ། །དུར་ཁྲོད་ཤ་ལ་རོལ་བའི་མཁའ་འགྲོ་འབུམ་སརྦ་སིདྡྷི་ཕ་ལ་ཧཱུྃ། །གསོད་གཅོད་ཉོན་མོངས་སྤང་བའི་མཁའ་འགྲོ་འབུམ་སརྦ་སིདྡྷི་ཕ་ལ་ཧཱུྃ། །རྟོག་མེད་ཉམས་དང་ལྡན་པའི་མཁའ་འགྲོ་འབུམ་སརྦ་སིདྡྷི་ཕ་ལ་ཧཱུྃ། །འཁོར་བ་རྩད་ནས་གཅོད་པའི་མཁའ་འགྲོ་འབུམ་སརྦ་སིདྡྷི་ཕ་ལ་ཧཱུྃ། །ཁམས་གསུམ་ཟིལ་གྱིས་གནོན་པའི་མཁའ་འགྲོ་འབུམ་སརྦ་སིདྡྷི་ཕ་ལ་ཧཱུྃ། །དམ་ཚིག་གཞུང་བཞིན་སྲུང་བའི་མཁའ་འགྲོ་འབུམ་སརྦ་སིདྡྷི་ཕ་ལ་ཧཱུྃ། །ལྟ་བ་ཉམས་སུ་ལེན་པའི་མཁའ་འགྲོ་འབུམ་སརྦ་སིདྡྷི་ཕ་ལ་ཧཱུྃ། །མ་བསྒོམ་བྱིན་གྱིས་རླབ་པའི་མཁའ་འགྲོ་འབུམ་སརྦ་སིདྡྷི་ཕ་ལ་ཧཱུྃ། །སྤྱོད་པ་སྣ་ཚོགས་བསྒྱུར་བའི་མཁའ་འགྲོ་འབུམ་སརྦ་སིདྡྷི་ཕ་ལ་ཧཱུྃ། །འབྲས་བུའི་གཏེར་ཁུངས་བརྡོལ་བའི་མཁའ་འགྲོ་འབུམ་སརྦ་སིདྡྷི་ཕ་ལ་ཧཱུྃ། །སྐུ་ཡི་དངོས་གྲུབ་སྟེར་བའི་མཁའ་འགྲོ་འབུམ་སརྦ་སིདྡྷི་ཕ་ལ་ཧཱུྃ། །གསུང་གི་དངོས་གྲུབ་སྟེར་བའི་མཁའ་འགྲོ་འབུམ་སརྦ་སིདྡྷི་ཕ་ལ་ཧཱུྃ། །ཐུགས་ཀྱི་དངོས་གྲུབ་སྟེར་བའི་མཁའ་འགྲོ་འབུམ་སརྦ་སིདྡྷི་ཕ་ལ་ཧཱུྃ། །ཡོན་ཏན་དངོས་གྲུབ་སྟེར་བའི་མཁའ་འགྲོ་འབུམ་སརྦ་སིདྡྷི་ཕ་ལ་ཧཱུྃ། །འཕྲིན་ལས་དངོས་གྲུབ་སྟེར་བའི་མཁའ་འགྲོ་འབུམ་སརྦ་སིདྡྷི་ཕ་ལ་ཧཱུྃ། །དངོས་གྲུབ་སྣ་ཚོགས་སྟེར་བའི་མཁའ་འགྲོ་འབུམ་སརྦ་སིདྡྷི་ཕ་ལ་ཧཱུྃ། །རྡོ་རྗེ་རིགས་ཀྱི་མཁའ་འགྲོ་འབུམ་སརྦ་སིདྡྷི་ཕ་ལ་ཧཱུྃ། །རིན་ཆེན་རིགས་ཀྱི་མཁའ་འགྲོ་འབུམ་སརྦ་སིདྡྷི་ཕ་ལ་ཧཱུྃ། །པདྨ་རིགས་ཀྱི་མཁའ་འགྲོ་འབུམ་སརྦ་སིདྡྷི་ཕ་ལ་ཧཱུྃ། །ཀརྨ་རིགས་ཀྱི་མཁའ་འགྲོ་འབུམ་སརྦ་སིདྡྷི་ཕ་ལ་ཧཱུྃ། །སངས་རྒྱས་རིགས་ཀྱི་མཁའ་འགྲོ་འབུམ་སརྦ་སིདྡྷི་ཕ་ལ་ཧཱུྃ། །དམ་ཚིག་མཁའ་འགྲོ་འབུམ་སརྦ་སིདྡྷི་ཕ་ལ་ཧཱུྃ། །སྣ་ཚོགས་མཁའ་འགྲོ་འབུམ་སརྦ་སིདྡྷི་ཕ་ལ་ཧཱུྃ། །ཐམས་ཅད་མཁའ་འགྲོ་འབུམ་སརྦ་སིདྡྷི་ཕ་ལ་ཧཱུྃ། །བརྒྱུད་འཛིན་འཇིག་རྟེན་མཁའ་འགྲོ་འབུམ་སརྦ་སིདྡྷི་ཕ་ལ་ཧཱུྃ། །ལས་ཀྱི་མཁའ་འགྲོ་དཀར་མོ་འབུམ་སརྦ་སིདྡྷི་ཕ་ལ་ཧཱུྃ། །ལས་ཀྱི་མཁའ་འགྲོ་སེར་མོ་འབུམ་སརྦ་སིདྡྷི་ཕ་ལ་ཧཱུྃ། །ལས་ཀྱི་མཁའ་འགྲོ་དམར་མོ་འབུམ་སརྦ་སིདྡྷི་ཕ་ལ་ཧཱུྃ། །ལས་ཀྱི་མཁའ་འགྲོ་ལྗང་མོ་འབུམ་སརྦ་སིདྡྷི་ཕ་ལ་ཧཱུྃ། །ལས་ཀྱི་མཁའ་འགྲོ་ནག་མོ་འབུམ་སརྦ་སིདྡྷི་ཕ་ལ་ཧཱུྃ། །གཡུང་མོ་དྷཀྐི་མ་སརྦ་སིདྡྷི་ཕ་ལ་ཧཱུྃ། །ཀོ་ཏ་དྷཀྐི་མ་སརྦ་སིདྡྷི་ཕ་ལ་ཧཱུྃ། །གུ་གུ་དྷཀྐི་མ་སརྦ་སིདྡྷི་ཕ་ལ་ཧཱུྃ། །གཟུགས་ཅན་དྷཀྐི་མ་སརྦ་སིདྡྷི་ཕ་ལ་ཧཱུྃ། །ཁྭ་གདོང་དྷཀྐི་མ་སརྦ་སིདྡྷི་ཕ་ལ་ཧཱུྃ། །འུག་གདོང་དྷཀྐི་མ་སརྦ་སིདྡྷི་ཕ་ལ་ཧཱུྃ། །ཁྱི་གདོང་དྷཀྐི་མ་སརྦ་སིདྡྷི་ཕ་ལ་ཧཱུྃ། །ཕག་གདོང་དྷཀྐི་མ་སརྦ་སིདྡྷི་ཕ་ལ་ཧཱུྃ། །གཤིན་རྗེ་སྲེག་བྱེད་མ་སརྦ་སིདྡྷི་ཕ་ལ་ཧཱུྃ། །གཤིན་རྗེ་ཕོ་ཉ་མ་སརྦ་སིདྡྷི་ཕ་ལ་ཧཱུྃ། །གཤིན་རྗེ་འཇོམས་བྱེད་མ་སརྦ་སིདྡྷི་ཕ་ལ་ཧཱུྃ། །གཤིན་རྗེ་གཏུམ་བྱེད་མ་སརྦ་སིདྡྷི་ཕ་ལ་ཧཱུྃ། །དྷཀྐི་གཏུམ་མིག་མ་སརྦ་སིདྡྷི་ཕ་ལ་ཧཱུྃ། །དྷཀྐི་འོད་ལྡན་མ་སརྦ་སིདྡྷི་ཕ་ལ་ཧཱུྃ། །དྷཀྐི་སྣ་ཆེ་མ་སརྦ་སིདྡྷི་ཕ་ལ་ཧཱུྃ། །དཔའ་མོ་བློ་གྲོས་མ་སརྦ་སིདྡྷི་ཕ་ལ་ཧཱུྃ། །དྷཀྐི་མི་ཐུང་མ་སརྦ་སིདྡྷི་ཕ་ལ་ཧཱུྃ། །ལམ་སྣང་དབང་ཕྱུག་མ་སརྦ་སིདྡྷི་ཕ་ལ་ཧཱུྃ། །དྷཀྐི་ཤིང་གྲིབ་མ་སརྦ་སིདྡྷི་ཕ་ལ་ཧཱུྃ། །ས་སྲུང་དྷཀྐི་མ་སརྦ་སིདྡྷི་ཕ་ལ་ཧཱུྃ། །དྷཀྐི་འཇིགས་བྱེད་མ་སརྦ་སིདྡྷི་ཕ་ལ་ཧཱུྃ། །དྷཀྐི་ཆང་འཐུང་མ་སརྦ་སིདྡྷི་ཕ་ལ་ཧཱུྃ། །དྷཀྐི་སྔོ་སངས་མ་སརྦ་སིདྡྷི་ཕ་ལ་ཧཱུྃ། །དྷཀྐི་བཟང་མོ་མ་སརྦ་སིདྡྷི་ཕ་ལ་ཧཱུྃ། །དྷཀྐི་རྟ་རྣ་མ་སརྦ་སིདྡྷི་ཕ་ལ་ཧཱུྃ། །དྷཀྐི་གཙུག་ཕུད་མ་སརྦ་སིདྡྷི་ཕ་ལ་ཧཱུྃ། །དྷཀྐི་བྱ་གདོང་མ་སརྦ་སིདྡྷི་ཕ་ལ་ཧཱུྃ། །དྷཀྐི་འཁོར་ལོའི་ཤུགས་ཆེན་མ་སརྦ་སིདྡྷི་ཕ་ལ་ཧཱུྃ། །དུས་སྐྱེས་དྷཀྐི་མ་སརྦ་སིདྡྷི་ཕ་ལ་ཧཱུྃ། །དྷཀྐི་ཤིང་ཏིང་མ་སརྦ་སིདྡྷི་ཕ་ལ་ཧཱུྃ། །དྷཀྐི་འཁོར་ལོའི་གོ་ཆ་མ་སརྦ་སིདྡྷི་ཕ་ལ་ཧཱུྃ། །ཤིན་གཏུམ་དྷཀྐི་མ་སརྦ་སིདྡྷི་ཕ་ལ་ཧཱུྃ། །སྟོབས་ཆེན་དྷཀྐི་མ་སརྦ་སིདྡྷི་ཕ་ལ་ཧཱུྃ། །འཁོར་བསྒྱུར་བརྩན་མ་ཆེན་མོ་སརྦ་སིདྡྷི་ཕ་ལ་ཧཱུྃ། །འབུམ་ཕྲག་མཁའ་འགྲོ་སརྦ་སིདྡྷི་ཕ་ལ་ཧཱུྃ། །ཨོཾ་ཡེ་དྷརྨཱ་ཧེ་ཏུ་པྲ་བྷ་ཝཱ་ཧེ་ཏུནྟེ་ཥཱནྟ་ཐཱ་ག་ཏོ་ཧྱ་ཝ་དཏ། ཏེ་ཥཉྩ་ཡོ་ནི་རོ་དྷ་ཨེ་ཝཾ་བཱ་དཱི་མ་ཧཱ་ཤྲཱ་མ་ཎ། ༈ གཙུག་ཏོར་ནག་མོའི་གཟུངས་ནི། ཏ་དྱ་ཐཱ། ཨོཾ་ཨུ་པི་ཤ་ཨ་པ་ར་ཙི་ཏེ། མ་ཧཱ་ཀྲོ་དྷཱ་མུར་ཏེ། ཨ་ཙ་ལེ་ཨ་ཙ་ལེ། ཁ་ས་མེ་ཁ་ས་མེ། བཻ་ར་བཻ་ར། བཛྲ་དྷཱ་ར་ཎི་ཧཱུྃ་ཕཊ། པ་ར་བིདྱ་མ་ཎི་ཙ་ར་ཎ་ཧཱུྃ་ཧཱུྃ་ཕཊ་ཕཊ་སྭཱ་ཧཱ། ༈ ཕག་མོ་དམར་མོའི་ཟབ་ཏིག་གི་ཁ་བསྐང་ཚེ་གཟུངས་བཞུགས། ཨོཾ་ན་མོ་བྷ་ག་ཝ་ཏེ་ཨ་པཱ་རི་མི་ཏ་ཨཱ་ཡུརྫྙ་ན་སུ་བི་ནིཥྩིཏྟ་ཏེ་ཛོ་རཱ་ཛ་ཡ། ཏ་ཐཱ་ག་ཏ་ཡ། ཨར་ཏེ་སམྱཀྶཾ་སམ་བུདྡྷཱ་ཡ། ཏདྱ་ཐཱ། ཨཱོཾ་པུཎྱེ་པུཎྱེ་མ་ཧཱ་པུཎྱེ་ཨ་བ་རི་མི་ཏ་པུཎྱེ་ཨ་པ་རི་མི་ཏ་པུཎྱ་ཛྙ་ན་སཾ་བྷཱ་རོ་པ་ཙི་ཏེ། ཨཱོཾ་སརྦ་སཾ་སྐཱ་ར་པ་རི་ཤུདྡྷ་དྷརྨ་ཏེ་ག་ག་ན་ས་པ་མུཏྒ་ཏེ་སྭ་བྷཱ་ཝ་བི་ཤུདྡྷེ་མ་ཧཱ་ན་ཡ་པ་རི་ཝཱ་རེ་སྭཱ་ཧཱ། ༈ ལྷ་མོ་ནོར་རྒྱུན་མའི་གཟུངས་བཞུགས། དེ་ནས་ལྷ་མོ་ནོར་རྒྱུན་མའི་གཟུངས་འདི་རྒྱུན་དུ་འདོན་ཞིང་མེ་ཏོག་དཀར་པོས་མཆོད་ནས་ལན་ཉི་ཤུ་རྩ་གཅིག་ཕུལ་ན་ནོར་དངོས་གྲུབ་ཀྱི་རྒྱུན་མི་འཆད་པར་འབྱུང་བར་འགྱུར་རོ། དེའི་སྔགས་ནི་འདིའོ། །ཨཱོཾ་ཤྲཱྀ་བ་སུ་དྷ་རི་ཎི། དྷ་ན་ཀྵེ་ཏེ། སིདྡྷི་ཧཱུྃ། ཨོཾ་བ་སུ་དྷ་རི། ཨོཾ་ཁྲི་ཧྲི་སིདྡྷི་ཧཱུྃ། ཨཱོཾ་བ་སུ་དྷ་རི་ཎི། ད་ར་ད་ར། དི་རི་དི་རི། ནི་མི་ཡེ་སྭཱ་ཧཱ། ཨོཾ་ག་བ་སུ་སྭཱ་ཧཱ། ཨོཾ་བཱ་ཧ་དེ་བཱི་བ་སུ་དྷ་ར་ཎི་སྭཱ་ཧཱ། ཨོཾ་བྷ་བ་སྭཱ་ཧཱ། ཨོཾ་སུམ་བྷ་སྭཱ་ཧཱ། ཨོཾ་ད་ད་སྭཱ་ཧཱ། ཨོཾ་རི་རི་སྭཱ་ཧཱ། ཨོཾ་ནི་ནི་སྭཱ་ཧཱ། ཨོཾ་བྷ་བཱི་བཱ་སུ་སྭཱ་ཧཱ། ཨོཾ་ན་མོ་བྷ་ག་ཝ་ཏེ་བ་སུ་དྷ་རི་ཨ་ཧེ། ཨ་ཀཪྵ་ཡ་ཏྲ་ཛ། དྷ་ན་མ་མེ་ཏི་ཧི། པུཥྟིང་ཀུ་རུ་སྭཱ་ཧཱ། ཨོཾ་ཙནྟྲ་ཀན་ཏེ་སྭཱ་ཧཱ། ཨོཾ་སུམ་བྷ་དྲ་ཡེ་སྭཱ་ཧཱ། ཨོཾ་ད་ཏྲ་ཏ་ཡེ་སྭཱ་ཧཱ། ཨོཾ་སན་ཏེ་ཡེ་སྭཱ་ཧཱ། ན་མོ་རཏྣ་ཏྲ་ཡཱ་ཡ། ཏདྱ་ཐཱ༔ ཨོཾ་གྷ་ཏ་མ་ཛི་བཱ། ས་རཀྵ་ནི། ཕ་ལ་ཧ་ས་ཏེ། བ་སུ་ན་དྷེ། བཛྲི་ཝ་ཀ་རི། ཤཱན་ཏིང་ཀུ་རུ། པུཥྟིང་ཀ་རི། བྷ་ཡན་ས་ནི། སརྦ་དུཥྟན། བྷ་ཛྷ་བྷ་ཛྷ། ཛམ་བྷ་ཛམ་བྷ། སྟམ་བྷ་སྟམ་བྷ། ཨ་མྲྀ་ཏ་ཨུ་ཏ་བྷ་བེ། ཀུ་རུ་ཀུ་རུ། མ་མ་ཀ་ར་ཛྱཱ་མ་སྭཱ་ཧཱ། བདག་ལ་ཟས་ནོར་ལོངས་སྤྱོད་ཀྱི་དངོས་གྲུབ་ཆེན་པོ་མྱུར་དུ་སྩལ་དུ་གསོལ། ཨོཾ་བསྒུལ་བསྒུལ་མ་མ་ཧྲྀང་ཧྲིང་མ་མ་ཁ་ཤི་བཾ་མི་ནོར་ཁུག །མི་སྙིང་བསྒུལ། མི་འགྲམ་ཆོག །ཧྲིང་ཧྲིང་འདུས་འདུས། མ་མ་བདག་ལ་སིད་དྷི་ཛཿཛ༔ ཨ་ཀཪྵ་ཡ་ཛཿཛ༔ ཡུལ་ཐམས་ཅད་ཀྱི་མི་ནོར་ལོངས་སྤྱོད་དང་། འབྱོར་བ་ཐམས་ཅད་བདག་གི་དབང་དུ་འདུས་འདུས། པུཥྟིང་ཀུ་རུ་ཁུག་ཁུག །ཨོཾ་བསྡུད་དུ་བསྡུད་དུ། མ་མ་ཀུན་ནེ་ཀུན་ནེ་སྡུད་སྭཱ་ཧཱ། །མངྒ་ལཾ།། །།

ཟབ་ཐིག་བརྒྱུད་པའི་གསོལ་འདེབས་མཆོག་ཐུན་མ།

ཟབ་ཐིག་བརྒྱུད་པའི་གསོལ་འདེབས་མཆོག་ཐུན་མ་བཞུགས། །ན་མོ་ཧ་རི་ནི་ས་སིདྡྷི་ཕ་ལ་ཧཱུྃ། །མཁའ་སྤྱོད་ཆོས་སྐུའི་ཕོ་བྲང་ནས། །ཕག་མོ་ཆོས་སྐུའི་ལྷ་ཚོགས་ལ། །གསོལ་བ་འདེབས་སོ་བྱིན་གྱིས་རློབས། །མཆོག་དང་ཐུན་མོང་དངོས་གྲུབ་སྩོལ། །ནུབ་ཕྱོགས་ཨོ་རྒྱན་ཕོ་བྲང་ནས། །ཕག་མོ་ལོངས་སྐུའི་ལྷ་ཚོགས་ལ། །གསོལ་བ་འདེབས་སོ་བྱིན་གྱིས་རློབས། །མཆོག་དང་ཐུན་མོང་དངོས་གྲུབ་སྩོལ། དུར་ཁྲོད་ཆེན་པོའི་གནས་བརྒྱད་ནས། །ཕག་མོ་སྤྲུལ་སྐུའི་ལྷ་ཚོགས་ལ། །གསོལ་བ་འདེབས་སོ་བྱིན་གྱིས་རློབས། །མཆོག་དང་ཐུན་མོང་དངོས་གྲུབ་སྩོལ། སྲིན་ཡུལ་རུ་ལུའི་ཕོ་བྲང་ནས། །གུ་རུ་རྡོ་རྗེ་ཐོད་ཕྲེང་ལ། །གསོལ་བ་འདེབས་སོ་བྱིན་གྱིས་རློབས། །མཆོག་དང་ཐུན་མོང་དངོས་གྲུབ་སྩོལ། བོད་ཡུལ་སྒྲགས་ཀྱི་གནས་མཆོག་ནས། །གཟུངས་མ་ཡེ་ཤེས་མཚོ་རྒྱལ་ལ། །གསོལ་བ་འདེབས་སོ་བྱིན་གྱིས་རློབས། །མཆོག་དང་ཐུན་མོང་དངོས་གྲུབ་སྩོལ། མཆིམས་ཕུ་བྲེ་གུའི་དགེ་གོང་ནས། །ལོ་ཆེན་ཀླུ་ཡི་དབང་པོ་ལ། །གསོལ་བ་འདེབས་སོ་བྱིན་གྱིས་རློབས། །མཆོག་དང་ཐུན་མོང་དངོས་གྲུབ་སྩོལ། ཆགས་རི་རྡོ་རྗེའི་ཀེའུ་ཚང་ནས། །རྟོགས་ལྡན་འཁྲུལ་སྣང་རང་གྲོལ་ལ། །གསོལ་བ་འདེབས་སོ་བྱིན་གྱིས་རློབས། །མཆོག་དང་ཐུན་མོང་དངོས་གྲུབ་སྩོལ། མ་སྲིང་མཁའ་འགྲོའི་གནས་རྫོང་ནས། །འདྲེན་མཆོག་རིག་འཛིན་ཐུགས་སྲས་ལ། །གསོལ་བ་འདེབས་སོ་བྱིན་གྱིས་རློབས། །མཆོག་དང་ཐུན་མོང་དངོས་གྲུབ་སྩོལ། འགྱུར་མེད་བདེ་ཆེན་ཕོ་བྲང་ནས། །དྲིན་ཅན་པདྨའི་མཚན་ཅན་ལ། །གསོལ་བ་འདེབས་སོ་བྱིན་གྱིས་རློབས། །མཆོག་དང་ཐུན་མོང་དངོས་གྲུབ་སྩོལ། ཕུག་ནག་བདེ་བ་ཆེན་པོ་ནས། །ཟབ་ཏིག་མཁའ་འགྲོའི་གསང་སྒྲུབ་ལ། །གསོལ་བ་འདེབས་སོ་བྱིན་གྱིས་རློབས། །མཆོག་དང་ཐུན་མོང་དངོས་གྲུབ་སྩོལ། གནས་དང་ཡུལ་ཀྱི་ཕོ་བྲང་ནས། །འབུམ་ཕྲག་ཡངས་བའི་མཁའ་འགྲོ་ལ། །གསོལ་བ་འདེབས་སོ་བྱིན་གྱིས་རློབས། །མཆོག་དང་ཐུན་མོང་དངོས་གྲུབ་སྩོལ། དམ་ཚིག་གཉན་པོའི་ད་ལ་ནས། །བཀའ་སྲུང་གཏེར་གྱི་བདག་པོ་ལ། །གསོལ་བ་འདེབས་སོ་བྱིན་གྱིས་རློབས། །མཆོག་དང་ཐུན་མོང་དངོས་གྲུབ་སྩོལ། །ཅེས་པ་འདི་ཡུལ་ནགས་ཤོད་རྟིང་ཀར་པའི་སྔགས་འཆང་གུ་རུ་ཚེ་རྒྱལ་བས་དགོས་ཞེས་གསུངས་པ་ལ། སྒོམ་སྡེ་རྟོགས་ལྡན་གྱིས་སྦྱར་བའོ། །དགེ་བས་འགྲོ་བ་མཁའ་སྤྱོད་འགྲུབ་པར་ཤོག །མངྒ་ལཾ། །

བདུད་རྩི་ལག་མཆོད་སོགས་ཁ་སྐོང་སྐོར།

བདུད་རྩི་ལག་མཆོད་ནི༔ ཨཱོཾ་ཨཱཿཧཱུྃ། ཕག་མོ་ཆོས་སྐུའི་ལྷ་ཚོགས་ཞལ་དུ་རྣམ་དག་བདུད་རྩིའི་མཆོད་པ་ཁ་ཁ་ཁཱ་ཧི་ཁཱ་ཧི། ཕག་མོ་ལོངས་སྐུའི་ལྷ་ཚོགས་ཞལ་དུ་རྣམ་དག་བདུད་རྩིའི་མཆོད་པ་ཁ་ཁ་ཁཱ་ཧི་ཁཱ་ཧི། ཕག་མོ་སྤྲུལ་སྐུའི་ལྷ་ཚོགས་ཞལ་དུ་རྣམ་དག་བདུད་རྩིའི་མཆོད་པ་ཁ་ཁ་ཁཱ་ཧི་ཁཱ་ཧི། གུ་རུ་རྡོ་རྗེ་ཐོད་ཕྲེང་ཞལ་དུ་རྣམ་དག་བདུད་རྩིའི་མཆོད་པ་ཁ་ཁ་ཁཱ་ཧི་ཁཱ་ཧི། གཟུངས་མ་ཡེ་ཤེས་མཚོ་རྒྱལ་ཞལ་དུ་རྣམ་དག་བདུད་རྩིའི་མཆོད་པ་ཁ་ཁ་ཁཱ་ཧི་ཁཱ་ཧི། འཁོན་ཆེན་ཀླུ་ཡི་དབང་པོའི་ཞལ་དུ་རྣམ་དག་བདུད་རྩིའི་མཆོད་པ་ཁ་ཁ་ཁཱ་ཧི་ཁཱ་ཧི། རྟོགས་ལྡན་འཁྲུལ་སྣང་རང་གྲོལ་ཞལ་དུ་རྣམ་དག་བདུད་རྩིའི་མཆོད་པ་ཁ་ཁ་ཁཱ་ཧི་ཁཱ་ཧི། ཐུགས་སྲས་ཨོ་རྒྱན་བསྟན་འཛིན་ཞལ་དུ་རྣམ་དག་བདུད་རྩིའི་མཆོད་པ་ཁ་ཁ་ཁཱ་ཧི་ཁཱ་ཧི། ཐེག་མཆོག་བསྟན་པའི་རྒྱལ་མཚན་ཞལ་དུ་རྣམ་དག་བདུད་རྩིའི་མཆོད་པ་ཁ་ཁ་ཁཱ་ཧི་ཁཱ་ཧི། འབུམ་ཕྲག་ཡངས་པའི་མཁའ་འགྲོའི་ཞལ་དུ། །རྣམ་དག་བདུད་རྩིའི་མཆོད་པ་ཁ་ཁ་ཁཱ་ཧི་ཁཱ་ཧི། བཀའ་དང་གཏེར་ཀྱི་སྲུང་མའི་ཞལ་དུ་རྣམ་དག་བདུད་རྩིའི་མཆོད་པ་ཁ་ཁ་ཁཱ་ཧི་ཁཱ་ཧི། ༈ སྒྲུབ་པའི་སྔགས་ནི༔ ཨཱོཾ་བཛྲ་ཀྲོ་ཏ་ཀཱ་ལི་ཧ་རི་ནི་ས་ཧྲིང་ཧྲིང་ཛཿཛཿསརྦ་སིདྡྷི་ཧཱུྃ་ཕཊ༔ ༈ སྐྱབས་སེམས་ནི། ན་མོ་བླ་མ་ཡི་དམ་མཁའ་འགྲོ་སྟེ༔ རྩ་བ་གསུམ་ལ་སྐྱབས་སུ་མཆི༔ འགྲོ་བ་སེམས་ཅན་དོན་སླད་དུ༔ མཁའ་འགྲོའི་བསྐྱེད་རྫོགས་སྒོམ་བཟླས་བསྒྲུབ༔ ལན་གསུམ་བྱའོ༔ དེ་ནས་ཡན་ལག་བདུན་པ་ནི༔ ཧཱུྃ༔ བླ་མ་ཡི་དམ་མཁའ་འགྲོ་གཤེགས༔ ཉི་ཟླ་པདྨའི་གདན་ལ་བཞུགས༔ ལུས་ངག་ཡིད་གསུམ་གུས་ཕྱག་འཚལ༔ ཕྱི་ནང་གསང་བའི་མཆོད་པ་འབུལ༔ ཉམས་ཆགས་སྡིག་སྒྲིབ་མཐོལ་ལོ་བཤགས༔ གསང་སྔགས་སྒྲུབ་ལ་རྗེས་ཡི་རང་༔ སྨིན་གྲོལ་ཆོས་འཁོར་བསྐོར་དུ་གསོལ༔ མྱ་ངན་མི་འདའ་གསོལ་བ་འདེབས༔ དགེ་བ་བྱང་ཆུབ་ཆེན་པོར་བསྔོ༔ ཐམས་ཅད་སངས་རྒྱས་ཐོབ་པར་ཤོག༔ མངྒ་ལཾ།། །།

འགུགས་གཞུག

ཕག་མོ་ནག་མོའི་ཟབ་ཐིག་ལས། འགུགས་གཞུག་ཡོད། ན་མོ་ཕྱོགས་བཅུ་དུས་བཞིའི་རྒྱལ་བ་སྲས་དང་བཅས་པ་རྣམས་ཀྱི་བཀའ་བདེན་པ། སྐུ་གསུམ་མཁའ་འགྲོའི་ལྷ་ཚོགས་རྣམས་ཀྱི་བཀའ་བདེན་པ། རིགས་བཞི་ཕག་མོའི་ལྷ་ཚོགས་རྣམས་ཀྱི་བཀའ་བདེན་པ། སྡེ་བརྒྱད་མཁའ་འགྲོའི་ལྷ་ཚོགས་རྣམས་ཀྱི་བཀའ་བདེན་པ། སྐུ་ཡི་མཁའ་འགྲོ་དཀར་མོ་བྱེ་བ་འབུམ་གྱི་བཀའ་བདེན་པ། གསུང་གི་མཁའ་འགྲོ་དམར་མོ་བྱེ་བ་འབུམ་གྱི་བཀའ་བདེན་པ། ཐུགས་ཀྱི་མཁའ་འགྲོ་ནག་མོ་བྱེ་བ་འབུམ་གྱི་བཀའ་བདེན་པ། ཡོན་ཏན་གྱི་མཁའ་འགྲོ་སེར་མོ་བྱེ་བ་འབུམ་གྱི་བཀའ་བདེན་པ། འཕྲིན་ལས་ཀྱི་མཁའ་འགྲོ་ལྗང་མོ་བྱེ་བ་འབུམ་གྱི་བཀའ་བདེན་པ། སྤྱང་ཞོན་མ་ནག་མོ་ལ་སོགས་ལས་བྱེད་ཀྱི་མཁའ་འགྲོ་བྱེ་བ་འབུམ་གྱི་བཀའ་བདེན་པ། སྟག་ཞོན་མ་དུད་ཀ་ལ་སོགས་སྤྲུལ་པའི་མཁའ་འགྲོ་བྱེ་བ་འབུམ་གྱི་བཀའ་བདེན་པ། འཕར་ཞོན་མ་དམར་ནག་ལ་སོགས་ཞིང་སྐྱོང་གི་མཁའ་འགྲོ་བྱེ་བ་འབུམ་གྱི་བཀའ་བདེན་པ། དོམ་ཞོན་མ་སྔོ་ནག་ལ་སོགས་འཇིག་རྟེན་ཀྱི་མཁའ་འགྲོ་བྱེ་བ་འབུམ་གྱི་བཀའ་བདེན་པ། མ་མོ་ཁྲག་རལ་མ་ལ་སོགས་བཀའ་སྲུང་གི་མཁའ་འགྲོ་བྱེ་བ་འབུམ་གྱི་བཀའ་བདེན་པ། ཡང་མ་སྐྱི་མདངས་མ་ལ་སོགས་གཏེར་སྲུང་གི་མཁའ་འགྲོ་བྱེ་བ་འབུམ་གྱི་བཀའ་བདེན་པ། ཆོས་ཉིད་དེ་བཞིན་ཉིད་རྣམ་པར་དག་པ་དང་། ཆོས་ཅན་རྒྱུ་འབྲས་བསླུ་བ་མེད་པའི་བཀའི་བདེན་པ་དང་བདེན་པ་ཆེན་པོའི་མཐུས། སྡང་བྱེད་ཀྱི་དགྲ། གནོད་བྱེད་ཀྱི་བགེགས། བར་གཅོད་ཀྱི་རྐྱེན། གང་ཡིན་པ་ཐམས་ཅད་སྲིད་པ་གར་གནས་ཀྱང་སྐད་ཅིག་རང་དབང་མེད་པར་གཟུགས་ལིངྒ་མིང་བྱང་བུ། རྟེན་ཟག་རྫས་དང་བཅས་པ་འདི་ལ། ཕུག་རོན་ཧོར་པས་དེད་པ་བཞིན་དུ་ཁུག །ར་ཁྱུ་འཕར་བས་དེད་པ་བཞིན་དུ་ཁུག །ཉ་མོ་སྲམ་གྱིས་བརྡས་པ་བཞིན་དུ་ཁུག །ཛཿཧཱུྃ་བཾ་ཧོ༔ བཛྲ་ཨང་ཀུ་ཤ་ཛ༔ བཛྲ་པཱ་ཤ་ཧཱུྃ༔ བཛྲ་སྥོ་ཊ་བཾ༔ བཛྲ་གྷཎྜེ་ཧོ༔ ཅེས་བརྗོད་ཅིང་ལིངྒ་ལ་ནན་གྱིས་བསྟིམ་མོ། །ཅེས་པ་འདི་ཡུལ་དཀར་མདའི་བན་སྒོམ་དཀོན་མཆོག་ཚེ་རིང་གིས་བསྐུལ་ངོར་འཕོ་ལུང་སྐུ་སྐྱེས་ཆགས་རུ་ཕུག་ནག་ཏུ་སྦྱར་བའོ།། །།མངྒ་ལཾ།། །།

ཕག་མོ་རིགས་ལྔའི་བསྙེན་ཡིག་མཆོག་ཐུན་དངོས་གྲུབ་འགུགས་པའི་ལྕགས་ཀྱུ།

ཕག་མོ་རིགས་ལྔའི་བསྙེན་ཡིག་མཆོག་ཐུན་དངོས་གྲུབ་འགུགས་པའི་ལྕགས་ཀྱུ་ཞེས་བྱ་བ་བཞུགས་སོ། །ཤེས་རབ་སྟོང་ཉིད་ཆོས་འབྱུང་དག་པའི་མཁར། བདེ་ཆེན་རྡོ་རྗེ་བཙུན་མོར་རྣམ་རོལ་བའི། །ཟུང་འཇུག་དབྱིངས་ཀྱི་ཡུམ་ཆེན་མཁའ་འགྲོའི་གཙོར། །འདུད་དོ་དངོས་གྲུབ་འདོད་འཇོ་དགའ་སྟོན་སྩོལ། །དགྱེས་མཛད་ཆེན་མོ་རྡོ་རྗེར་ཁྲོས་མ་ཡི། །བསྙེན་སྒྲུབ་ཚུལ་ལ་འཇུག་འདོད་སྐལ་བཟང་འགྲོར། །ཕན་སླད་བསྙེན་ཡིག་འཇུག་འདོད་ལེགས་བཤད་སྐྱེས། མཆོག་ཐུན་དངོས་གྲུབ་འགུགས་པའི་ལྕགས་ཀྱུ་བྱ། འདིར་དབང་ཐོབ་ཅིང་དམ་ཚིག་དང་ལྡན་པའི་སྔགས་པ་རྡོ་རྗེ་ཕག་མོའི་བསྙེན་སྒྲུབ་ལ་འཇུག་པར་འདོད་པ་རྣམས་སྤྱིར་བསྙེན་སྒྲུབ་ཀྱི་བགྱི་འོས་རྣམས་གསང་བ་སྤྱི་འགྲོས་བཞིན་ངེས་པར་བྱས་ལ། འདིར་སྒེར་ཆོས་ལ་སྦྱོར་བ་ཡོ་བྱད་ཀྱི་བཤམས་དང་དངོས་གཞི་བསྒོམས་བཟླས་བྱ་ཚུལ་རྗེས་ཀྱི་བྱ་བ་དང་གསུམ་གྱི་དང་པོ་ནི། གཞུང་དང་མཐུན་པའི་གནས་དབེན་ཞིང་ཡིད་དུ་འོང་བ་མཁའ་འགྲོ་འདུ་བའི་གནས་སུ་བསྒྲུབ་པར་བྱ་ཞིང་ཁྱད་པར། རང་གཞུང་ལས། བཀྲ་ཤིས་བྱིན་ཆགས་དབེན་པའི་གནས། །ཡང་ན་དུར་ཁྲོད་འཇིགས་རུང་སར༔ ཞེས་གསུངས་པ་ལྟར་གྲུབ་ན་དང་། མ་གྲུབ་ན་སྒྲུབ་ལ་བར་ཆད་མི་འབྱུང་བའི་སར་སྒྲུབ་ཁང་དང་བསྟུན་པའི་སྟེགས་བུ་གཞུང་མཐུན་རྡུལ་ཚོན་དང་བཅས་པའམ་ཡང་ན་རས་བྲིས་སམ་ནས་ནག་གི་འབྲུ་ཚོམ་ལྔ་བཀོད་པའི་ཁར་ཐོད་པ་མཚན་ལྡན་ནང་དུ་བླ་རྡོ་བཞག་པའི་ཁར་མེ་ལོང་སིནྡྷུ་རས་བྱུགས་པར་ཆོས་འབྱུང་ཟུར་དྲུག་ཨ་ཧ་རི་ནི་སས་མཚན་པའི་བསྙེན་སྔགས་ཀྱིས་་བསྐོར་བ་བྲིས་པ་དང་༔ དར་དམར་པོའི་བཀབ་པའི་སྟེང་དུ་ཁྲིའུ་ཁར་སྣོད་འབྲུའི་བཀང་བའི་ནང་དུ་ཐོད་སྐུ་བཤམ། བླ་རྡོ་རྫས་ལྡན་གཞུང་ལྟར་རབ་གནས་བྱས་ལ་ཚོན་སྐུད་ཀྱི་དཀྲིས་པ་ཟངས་གར་འཇུག་པ་གསུངས་ཀྱང་སྒྲུབ་དུས་ཐོད་པར་བཅུག་པ་ཕྱོགས་མ་ལོག་པར་མདུན་རང་ལ་བསྟན་ཏེ་བཀོད། མདུན་དུ་མཆོད་གཏོར་གཡས་གཡོན་དུ་སྨན་རཀ་བཀའ་གཏེར་གྱི་གཏོར་མ་དང་མཆོད་པ་རྣམ་ལྔ་བྲེང་ཚར་དུ་བཤམས། གཞན་ཡང་མཁོ་བའི་ཡོ་བྱད་གུལ་ཡུངས། ནས་ཟེ། ཌཱ་དྲིལ། ཐོད་རྔ། རྐང་གླིང་། གཏོར་མ། ཚོགས་ཀྱི་ཡོ་བྱད་སོགས་མ་ཚང་མེད་པ་འདུ་བྱ་བ་ནི་སྦྱོར་བ་ཡོ་བྱད་ཀྱི་བཤམས་སོ། གཉིས་པ་སྔོན་འགྲོ་ཆོས་སྤྱོད་ནས་བཟུང་དཀར་བགེགས་བཏང་བ་ཡན་སོང་ནས་རང་ཉིད་གཙོ་མོའི་ང་རྒྱལ་གྱིས་བགེགས་བསྐྲད་ནས་སྲུང་བའི་འཁོར་ལོ་བསྒོམ། དེ་ནས་ལས་གཞུང་བསྲང་ནས་འདོན་སྒོམ་བསྒྲགས་མས་བསྙེན་མཚམས་བར་བཏོན་ནས། བསྙེན་དམིགས་དངོས་ནི་བདག་དང་མདུན་བསྐྱེད་གཉིས་ཀ་དང་པོ་ནས་ཚིག་གིས་གསལ་བཏབ་སྟེ་དེ་ཡང་མདུན་བསྐྱེད་དཀྱིལ་འཁོར་ལས་བྱང་ལྟར་ལ་བདག་བསྐྱེད་རང་ཁྲོས་མར་གསལ་བའི་ཐུགས་ཀར་ཡང་ཡེ་ཤེས་སེམས་དཔའ་རང་འདྲ་བ་ཞིག་བསྒོམས་ཤིང་དེའི་ཐུགས་ཀར་ཉི་སྟེང་ཧཱུྃ་གི་མཐར་སྔགས་ཕྲེང་གིས་བསྐོར་བར་བསྒོམ་ཤིང་། ཡན་ལག་གི་ཚིགས་བཞིར་ཕག་མོ་རིགས་བཞི་བསྒོམས་དེ་དག་གི་ཐུགས་ཀར་སོ་སོར་ཧ་རི་ནི་སས་མཚན་པ་ལ་སྔགས་ཕྲེང་རང་མདོག་དང་མཚུངས་པས་བསྐོར་བ་དང་། རྩ་གནས་བ་སྤུའི་འོད་ཀློང་རྣམས་སུ་ཡང་དཔའ་བོ་མཁའ་འགྲོ་གྲངས་མེད་གསལ་ཞིང་སྔགས་བཟླས་པས་རིགས་ལྔ་མཁའ་འགྲོའི་ཐུགས་ཀ་ནས་སྔགས་ཕྲེང་རང་མདོག་དང་མཚུངས་པའི་འོད་ཟེར་འཕྲོས་པས། མདུན་བསྐྱེད་ལྷ་སོ་སོའི་ཐུགས་ཀའི་སྔགས་འཁོར་ལ་ཕོག་པས་དེ་དག་གི་ཐུགས་རྒྱུད་བསྐུལ་ནས་བདག་མདུན་གྱི་ཐུགས་ཀའི་ས་བོན་སྔགས་ཕྲེང་འོད་ཟེར་ལྔ་དང་བཅས་པ་དྲག་ཏུ་འཁོར་བ་ལས། འོད་ཟེར་ལྔ་ལྡན་འཁོར་འདས་ཐམས་ཅད་དུ་ཁྱབ་པར་འཕྲོས་པས་འོག་མིན་དག་པའི་ཞིང་མཆོག་མཁའ་སྤྱོད་བདེ་བ་ཆེན་པོའི་ཞིང་དང་ཁྱད་པར་ནུབ་ཕྱོགས་ཨོ་རྒྱན་གྱི་གནས་ལ་སོགས་པ་ནས་སངས་རྒྱས་བྱང་སེམས་རྩ་བ་གསུམ་གྱི་ལྷ་ཚོགས་གྲངས་མེད་པ་དང་ཁྱད་པར་སྐུ་གསུམ་འབུམ་ཕྲག་མཁའ་འགྲོ་ཐམས་ཅད་དབང་དུ་བསྡུས་ནས་སྤྱན་དྲངས། རང་རང་སྒྲུབ་རྫས་ལྷར་གསལ་བ་ལ་བསྟིམ་པའི་དམིགས་པ་བཅས་ལུས་ལྷ་སྔགས་ཡིད་ཆོས་ཉིད་ཀྱི་དགོངས་པ་ལས་མི་འདའ་བའི་ངང་ནས་བསྙེན་པ་འབུམ་ཕྲག་གསུམ་བཟླ་བར་གསུངས་ཀྱང་། གཏེར་ཆེན་ཆོས་ཀྱི་རྒྱལ་པོས་གསུམ་འགྱུར་དུ་བཟླ་གསུངས་ཏེ། འབུམ་ཕྲག་དགུ་ཁ་སྐོང་དང་བྱེ་བ་རེ་བཟླ་བ་ནི་དེང་སང་ཕྱག་ལེན་དུ་སྣང་ལ་གཞན་དུས་གྲངས་རྟགས་གསུམ་རྟགས་གཙོ་ཞིང་དུས་ཀྱང་ཟླ་དྲུག་ལ་སོགས་བྱེད་པ་གང་ཟག་རང་གི་བློ་ཚོད་དང་བསྟུན་ཞིང་གྲངས་བསྙེན་ལས་རུང་ཙམ་ལ་ནི་དེ་ཙམ་མོ། གཞན་ཡང་ཐུན་སོ་སོར་ལས་བཞིའི་ཤམ་བུ་བདུན་ནམ་ཉེར་གཅིག་སོགས་འདོག་ཚུལ་གཏེར་གསར་སྤྱི་དང་འདྲ་ཞིང་བསྙེན་ཚད་རྫོགས་ནས་ལས་བཞི་སོ་སོར་ཁྲི་ཁྲག་གསུམ་རེ་བཟླས་པ་བྱ་དགོས་ལ། ཐུན་མཚམས་རྣམས་སུ་མཆོད་བསྟོད་དང་བསྲུང་བའི་བསྒོམ་བཟླས་ཀྱང་ཉེར་གཅིག་ཙམ་རེ་བཏང་ཞིང་། མཆོད་བསྟོད་དངོས་གྲུབ་ལེན་པ་སོགས་ལས་བྱང་ལྟར་དགོང་ཐུན་དང་སྲོད་ཐུན་གང་རུང་ཅིག་ལ་ཆོས་སྲུང་སྤྱི་སྒོས་ཚོགས་བསྐང་བསྒྲལ་སྟབ་ལྷག་མ་ཆད་བསྟན་རྟ་བྲོ་སོགས་བྱ་ཞིང་། ཐུན་གཞན་རྣམས་ལ་བསྡུ་རིམ་བསྔོ་སྨོན་ཤིས་བརྗོད་བྱས་ལ་སྲོད་ཐུན་གྱི་མཇུག་ཏུ་ཉལ་བའི་རྣལ་འབྱོར་དང་ཐོར་ཐུན་ལ་ལྡང་ནས་ངག་བྱིན་རླབས་བྱ་ཞིང་ཐུན་གཞན་རྣམས་ལའང་ཨཱ་ལི་ཀཱ་ལི་སོགས་བཟླ་ཚུལ་སྤྱི་ལྟར་ལས། ཐོར་ཐུན་ནས་སྔོན་འགྲོ་ཆོས་སྤྱོད་རྣམས་བཏང་ཞིང་ལས་གཞུང་ལ་འཇུག་པ་སོགས་གཞན་དང་འདྲ། ཐུན་བར་དུ་ཆུ་གཏོར་དང་བསང་སོགས་ཆགས་མེད་ཡོད་རིགས་རྣམས་བྱ་ཞིང་དེ་ལྟར་ཐུན་བཞིའི་ཁྲིགས་སུ་བཅད་པ་ལ་དལ་བྲེལ་དང་བསྟུན་པའི་རིགས་ལ་ཐུན་མང་པོ་མི་བྱ་བ་ཉིན་གཅིག་ཁོ་ན་བྱ་དགོས་ལ། ངག་འཁོར་ཡུག་ཏུ་གཅོད་པའམ་མ་གྲུབ་ཀྱང་ཉིན་གུང་ལྟ་བུར་གསོལ་ཚིགས་དང་བསྟུན་ཏེ་བཏང་བ་ལས་ཐུན་གཞན་རྣམས་ཀྱི་ཐུན་བར་ལའང་ངག་བཅད་བྱ་དགོས་པ་བླ་མ་གོང་མའི་ཕྱག་བཞེས་ཡིན་ཅིང་། བཟླས་པ་མི་ཚིག་གིས་བར་མ་ཆོད་པ་གལ་ཆེ་ཞིང་ངག་གཏམ་དུ་གྲགས་པའི་སྦག་སྦུག་ལྡབ་ལྡིབ་སྨྲ་བའང་གཏན་ནས་མི་རུང་ཞིང་དགེ་སྦྱོར་གྱི་སང་དུ་ཆེ་བས་ངེས་པར་སྤང་དགོས། ཐུན་གཞུང་རྣམས་སྐོམ་པ་སེལ་བྱེད་ཇ་སོགས་བཏུང་བ་ཕྲན་བུ་ལས་ཟས་ཟ་བ་སོགས་སྤང་བར་བསྙེན་སྒྲུབ་ཀྱི་དབུ་ཚུགས་པ་དེ་ནས་བཟུང་། མཚམས་མ་གྲོལ་གྱི་བར་དུ་མཚམས་ཀྱི་བྱ་བ་བོ་ཟག་ལྟེམ་ལོག་བཞི་བསྡོམས་དགོས་ཏེ་བོ་བའི་རྒྱུ་ཆོས་འཆད་ཉན་དང་གཞན་ལ་བསྲུང་བ་བྱིན་རླབས་རིམ་གྲོ་རྟེན་འབྲེལ་སོགས་མི་བྱ་བྱིན་གྱིས་རླབས་པའི་དམ་རྫས་ཕྱིར་མི་གཏོང་། ཟག་པའི་རྒྱུ་གཞན་དང་ཕན་ཚུན་གཉིས་ཀས་མཐོང་རེས་བྱུང་ན་འཁྱམས་པ་ཡིན་པས་བུག་རལ་འཁྱམས་གསུམ་དུ་མ་སོང་བ་དགོས་པས། འགྲུལ་དང་ཡོ་བྱད་གཏོང་ལེན་མི་བྱེད་ཅིང་ཁྱད་པར་རང་གི་ཟས་གོས་སྣོད་སྤྱད་སྤྱོད་འཕྲོ་གཞན་ལ་སྤྱོད་དུ་མི་གཞུག་གཞན་གྱིས་སྤྱད་འཕྲོ་རང་གིས་མི་སྤྱད། ཉམས་རྟོགས་རྟགས་མཚན་གཞན་ལ་མི་བཤད། ལྟེམ་པའི་རྒྱུ་ལུས་གོས་སྐྲ་དང་གདོང་མི་བཀྲུ་སྐྲ་སེན་མི་འབྲེག་མལ་ས་མི་སྤོ་སྟན་མི་སྤྲུག་སྒྲུབ་ཁང་ལ་ཕྱག་དར་མི་བྱ། ལོག་པའི་རྒྱུ་ལྟར་སྣང་ཉི་ཚེའི་གཞན་དོན་གྱི་རྣམ་གཡེང་དང་རང་ཉིད་ཞི་བདེ་དོན་གཉེར་གྱི་བློའི་འཁྲིས་མ་ཞུགས་པས་སྟན་གྱི་དྲོད་མ་ཡལ་བ་བྱས་ལ་སྒྲུབ་དགོས་ཏེ་ཐུན་གྱི་གཞུང་ལ་འགྲོ་འདུག་སྒུལ་སྤྱོད་སོགས་དང་ཉི་མ་ལ་སྲོ་བ་དང་ལུས་ཚུགས་མི་ཐུབ་པའི་ཉལ་བསྙེས་འཕྲས་སོགས་མི་བྱ་བར་རྟག་པར་ལུས་གནད་དང་མ་བྲལ་བར་བྱ། གཞན་ཡང་སྒྲུབ་གཡོག་དང་ལྷ་རྗེ་སོགས་སྒྲུབ་པའི་གྲོགས་སུ་འགྲོ་ངེས་རྣམས་ཐོག་མ་ནས་དམིགས་འོག་ཏུ་ཚུད་པར་བྱེད་གལ་ཆེ། གློ་བུར་འོངས་དགོས་རྣམས་ཀྱང་དམིགས་འོག་ཏུ་ཆུད་ཡོད་སྙམ་པའི་བག་ཡངས་མི་བྱ་པར་ཕྱི་ནང་གི་འགྲུལ་པས་མཚོན་སྲུང་ཅི་ཐུབ་བྱས་ན་མཚམས་མི་རལ་ཞིང་གཡེང་བས་མི་འཁྱེར་ལ་མངོན་ཚན་ཅན་གྱི་སྒྲུབ་པ་ལ་དངོས་གྲུབ་གཡེལ་ཞིང་བར་ཆད་འཇུག་པས་བསྙེན་པ་མ་ཐོན་གྱི་བར་ལ་ཡི་དམ་གང་ཡིན་གཞན་གྱིས་མ་ཤེས་པར་བྱེད་ཅིང་། འགྲུབ་ཏུ་རུང་ན་འཚོ་ཆས་དང་ཕྲིན་ཡིག་ཙམ་ཡང་མི་འགྲུལ་བ་རང་གཅིག་པུས་རྣམ་གཡེང་སྤངས་ནས་སྒྲུབ་ན་ཇི་ཙམ་དུ་བརྩོན་པ་ཆེ་ཞིང་སྲུང་མཚམས་དམ་པ་དེ་ཙམ་དུ་སྒྲུབ་མཚན་མྱུར་པ་རང་གཞན་གྱི་མྱོང་བས་གྲུབ་པ་ཡིན་ཞེས་བླ་མ་དམ་པའི་གསུང་ལས་བྱུང་བ་བཞིན་བྱས་པ་ཡིན་ལ། གཞན་ཡང་དུས་གསུམ་གྱི་རྣམ་རྟོག་ཆུ་གཉེར་འདྲ་བ་འདི་ཉིད་ངོས་བཟུང་ནས་ཐོལ་སྐྱེས་རྦད་ཆོད་དེ་གའི་ངང་ནས་ལྷ་སྔགས་ཏིང་ངེ་འཛིན་གསུམ་ལས་མི་འདའ་བར་བཟླས་པའི་དམིགས་པ་ལ་ནན་ཏན་བྱེད་ཅིང་སྔགས་བརྒྱ་བསྐོར་རེའི་མཚམས་ནས་བཟླས་དམིགས་ཀྱང་བསྐྱལ་ནས་སྒོམ་དགོས་གསུངས། ཧ་ཅང་ཁམས་དུབ་པའང་མི་བྱ་བར་རེས་ལྷ་སྐུ་གསལ་སྣང་ཆུ་ཟླ་ལྟར་ལ་སེམས་གཏོད། རེས་སྔགས་ཕྲེང་ས་བོན་སོགས་ལ་སེམས་གཏད་རེས་གང་ཤར་གྱི་ངོ་བོ་གསལ་བཞག་མེད་པར་སྐྱོང་བ་སོགས་གང་ལ་གང་འཚམས་གྱིས་ཐ་མལ་དུ་སྐད་ཅིག་ཀྱང་མ་ལུས་པར་བྱེད་པ་ནི་གནད་ཀྱི་དམ་པའོ། འདི་དག་ནི་བསྙེན་སྒྲུབ་ཡིན་ནོ་ཅོག་ལ་ཤིན་ཏུ་གལ་ཆེ་བ་ཡིན་ཞེས་བླ་མའི་གསུངས་ཡིན་ཏེ་རྡོ་རྗེ་འཆང་དེའི་ཞལ་ནས་དངོས་སུ་ཐོས་སོ། ཐུན་མཚམས་སུ་བསྡུ་རིམ་བྱ་ཚུལ་ཡང་མདུན་བསྐྱེད་སྣོད་བཅུད་འོད་དུ་ཞུ་འཁོར་དང་གཙོ་བོ་ལ་བསྡུ་ཞིང་དེ་ཉིད་བསྒྲུབ་རྫས་ལ་བསྟིམ། བདག་བསྐྱེད་ལྷ་སྐུ་གདན་བཅས་བསྡུ་ཞིང་དེ་ཡང་རིམ་གྱིས་ཞབས་ཀྱུ་ཧ་ཁོག་མགོ་པོ་ཟླ་ཚེས་ཐིག་ལེ་ནཱ་དའི་བར་དུ་བསྡུས་ནས་དམིགས་མེད་དུ་མཉམ་པར་འཇོག་ཅིང་། དེ་ནས་སྐད་ཅིག་གིས་གཙོ་བོའི་སྐུར་བསྐྱེད་ལ་ཐུན་མཚམས་ཀྱི་བྱ་བ་རྣམས་བྱེད་ཅིང་། སྤྱོད་ལམ་ཐམས་ཅད་དུ་ལྷའི་ང་རྒྱལ་དང་མ་བྲལ་བར་བྱ་ཞིང་བཟླས་པ་ག །ང་འགྲོ་བྱེད་ཀྱང་གྲངས་ལ་མི་བརྩི། བཟའ་བཏུང་རྣམས་བདུད་རྩིར་བྱིན་གྱིས་བརླབས་ནས་ལོངས་སྤྱོད། གཞན་ཡང་གསང་བ་སྤྱིའི་དམ་ཚིག་དང་འདིའི་སྒེར་ཆོས་ཕག་དང་བོང་བུའི་ཤ་མི་ཟ་ཞིང་ཟས་དཀར་གསུམ་བརྟེན་པ་དང་བུད་མེད་ལ་བརྙས་པ་སྤང་བ་དང་ཀུནྡ་ཉམས་པར་བྱེད་པ་སོགས་བསྲུང་མཚམས་རྣམས་ཀྱང་མ་ཉམས་པར་བྱེད་དགོས། སྒྲུབ་པའི་རྟགས་མཚན་གྱི་རིམ་པའང་། གཞུང་ལས། སྒྲུབ་རྫས་མེ་འབར་དུ་བ་འཐུལ༔ བདུད་རྩི་ལུད་ཅིང་འོད་ཟེར་འཕྲོ༔ ལྷ་དང་ཞལ་མཇལ་ལུང་བསྟན་ཐོབ༔ ཏིང་འཛིན་ཉམས་མྱོང་ཁོར་ཡུག་འཆར༔ བློ་བྲལ་ཆོས་ཉིད་ལྟ་བ་རྟོགས༔ ཞེས་སོགས་དང་གཞན་ཡང་མཁའ་འགྲོ་སྒྲུབ་པའི་མཚན་རྟགས་ལས་བཤད་པ་རྣམས་སྐབས་འདིར་གལ་ཆེ་བཟང་ངན་གྱི་དབྱེ་བ་ཕྱེེད་པར་བྱས་ལ། ངན་ན་བསྐང་བཤགས་སོགས་ཚུལ་བཞིན་འབད་པར་བྱ་བ་ནི་མཁའ་འགྲོའི་རིགས་གང་བསྒྲུབས་ཀྱང་གལ་ཆེ་བར་སྣང་ངོ་། སྒྲུབ་པའི་རྟགས་མཚན་བཟང་ངན་གང་བྱུང་ཡང་དགའ་སྡུག་དང་རེ་དོགས་མང་པོ་མི་བྱེད་པ་གནད་དོ། དེ་དག་ནི་དངོས་གཞིའི་རིམ་པའོ། །གསུམ་པ་རྗེས་ཀྱི་བྱ་བ་ནི། དེ་ལྟར་འབད་པས་དུས་གྲངས་རྟགས་གསུམ་གང་ཡིན་བསྙེན་པ་ཐེམ་པའི་ནང་པར་མཚམས་གྲོལ་རྒྱུའི་དེ་ནུབ་ནས་མཆོད་པ་རྙིང་པ་རྣམས་ཁ་གསོ་ཞིང་གསར་པའང་བཟང་དུ་བཤམས་ཤིང་དངོས་གྲུབ་ཀྱི་རྫས་གཞན་ཡང་ཅི་རིགས་པ་བཤམ་མོ། དགོང་ཐུན་ནས་བཟུང་བསྙེན་པའི་འཇུག་ཏུ་ཀཱ་ཡ་ཝཀྐ་སོགས་ཀྱི་ཤམ་བུ་བཏགས་པ་བཟླ་ཞིང་། དམིགས་པ་བསྒྱུར་ཐོར་ཐུན་ལ་སྐྱ་རེངས་མ་ཤར་ཙམ་ནས་བསྙེན་མཚམས་ལ་སླེབ་པར་བྱས་ལ་ཐུན་མཚམས་མཆོད་སྟོད་བྱ། ཆོས་སྲུང་སྤྱི་སྒོས་དང་ཚོགས་བསྐང་ལྷག་མ་ཡན་གྲུབ་ནས་ལྷག་མའི་གོང་དེར་དངོས་གྲུབ་ལེན་པ་ནི། དེ་ཡང་ཐོག་མར་བགེགས་བསྐྲད་བྱིན་འབེབས་སོགས་བྱས་ལ་དམིགས་པ་དང་བཅས་བཟླས་པ་ཅུང་ཟད་བྱས། དེ་ནས་སྒྲུབ་རྫས་རྣམས་ལྷར་གསལ་བའི་གནས་ལྔ་ལས་འོད་ཟེར་དཀར་དམར་མཐིང་སེར་ལྗང་གུ་རྣམས་འཕྲོས་ནས། རང་ལྷར་གསལ་བའི་གནས་ལྔར་ཐིམ་པས་དབང་བཞི་ཡོངས་རྫོགས་ཐོབ་པའི་དམིགས་པ་རྩེ་གཅིག་པས་བསྒྲུབ་རྫས་རྣམས་རང་གི་གནས་ལྔར་གཏུགས། དངོས་གྲུབ་ཀྱི་རྫས་རྣམས་ལོངས་སྤྱོད་རང་དང་སྒྲུབ་གྲོགས་མ་གཏོགས་གཞན་ལ་མི་སྦྱིན་དེ་ནས་ལྷག་མ་བཏང་། བཀའ་གཏེར་སྐུལ་ཆད་བསྟན་རྟ་བྲོ་བསྡུ་རིམ་བསྔོ་སྨོན་ཤིས་བརྗོད་སོགས་བྱ། བསྡུ་རིམ་སྐབས་རྡུལ་ཚོན་གྱི་ཡེ་ཤེས་པ་གཤེགས་རས་བྲིིས་དང་བྲིས་སྐུ་སྒྲུབ་རྫས་བླ་རྡོ་ལ་སོགས་ལ་བསྟིམ། བདག་གི་ཡེ་ཤེས་པ་མི་གཤེགས་པ་ལྷ་དང་དབྱེར་མེད་དུ་བསམ། རྡུལ་ཚོན་སོགས་བསྡུས་ལ་ལས་ཀྱི་རྗེས་མི་མངོན་པར་བྱ་བ་གསང་བ་སྤྱིའི་འགྲོས་བཞིན་ཤེས་པར་བྱའོ། དེ་ནས་མཚམས་གྲོལ་རྗེས་ཆོག་གཏོང་གནས་སྲུང་ཞག་ཤས་བག་བསེང་དམ་ཚིག་གཙང་བ་རེ་ཟུང་དང་ཐོག་མར་འཕྲད་པར་བྱས་ནས་རིམ་གྱིས་ཕྱི་མཚམས་གྲོལ་བར་བྱ་བ་ལེགས་སོ། དེ་ལྟར་ཕག་གདོང་ནག་མོའི་བསྙེན་བསྒྲུབ་བྱ་ཚུལ་མདོར་བསྡུས་ཙམ་བྲིས་པ་འདིས་མཚོན་ནས་རིགས་བཞི་མཁའ་འགྲོའི་བསྙེན་སྒྲུབ་བྱ་ཚུལ་ཡང་སྤྱི་ཁོག་འདིས་ཕུབ་ནས་ནང་གསེས་རང་རང་གི་སྒྲུབ་གཞུང་ནས་ཇི་ལྟ་བ་བཞིན་བྱའོ། དེ་ཡང་ཕག་མོ་བདེ་ཆེན་དཀར་མོའི་བསྙེན་པ་བྱ་ཚུལ་ནི། ལས་མཐུན་ཞི་བ་ལ་འོས་པའི་སྟེགས་བུ་སོགས་ཀྱི་སྟེང་དུ་རྡུལ་ཚོན་ནམ་རས་བྲིས་སམ་འབྲུ་དཀར་གྱི་ཚོམ་བུ་སོགས་གང་འོས་ཀྱི་ཁར། མཉྫིའི་སྟེང་ཚེ་བུམ་རྒྱན་ལྡན་བླ་རྡོ་དང་སྐུ་ཙཀ་ལ་དར་དཀར་གྱི་གུར་ཕུབ་པ་འཛུགས། ཕྱོགས་བཞིར་མདའ་དར་ཕྱོགས་མདོག་བཞི་འཇོག་གཡས་གཡོན་དུ་སྨན་རཀ་བཀའ་གཏེར་མཆོད་པ་རྣམ་ལྔ་སོགས་བཤམ་གྲུབ་ནས་སྒོ་མདུན་དུ་ཐོ་འཛུགས་ཤིང་གཞི་བགེགས་ཀྱི་གཏོར་མ་བཏང་བ་སྔ་མ་ལྟར་ལ་བདེ་ཆེན་དཀར་མོའི་ལས་གཞུང་བསྲང་བསྙེན་མཚམས་སུ་བསྙེན་དམིགས་ནི། རང་དང་མདུན་བསྐྱེད་ཕག་མོར་གསལ་བའི་ཐུགས་ཀར་ཉི་དཀྱིལ་སྟེང་དུ་ཐུགས་སྲོག་ཡི་གེ་ཧཿདཀར་པོའི་མཐར་སྔགས་ཕྲེང་དཀར་པོ་འོད་ལྔའི་མདངས་དང་ལྡན་པ་གཡས་བསྐོར་དུ་འཁོར་བར་བསྒོམ་ཤིང་། སྔགས་བཟླས་པའི་འོད་ཟེར་གྱིས་མདུན་བསྐྱེད་བསྐུལ་མདུན་བསྐྱེད་ལྷའི་ཐུགས་ཀ་ནས་འོད་ཟེར་ལྔ་ལྡན་ཕྱོགས་བཅུའི་ཞིང་རབ་འབྱམས་རྣམས་སུ་འཕྲོས་པས། རྒྱལ་བ་སྲས་དང་བཅས་པའི་ཐུགས་རྗེ་བྱིན་རླབས་འབྱུང་ལྔའི་ཁམས་ཀྱི་བཅུད་དང་ནུས་པ་ལྷ་དང་དྲང་སྲོང་རིག་པ་འཛིན་པ་རྣམས་དང་འགྲོ་བ་ཐམས་ཅད་ཀྱི་ཚེ་བསོད་དཔལ་འབྱོར་དབང་ཐང་ཐམས་ཅད་བསྡུས་ནས། ཕྱག་གི་བུམ་པར་བསྐྱིལ་ཞིང་བདག་མདུན་རྣམས་ལ་ཐིམ་པར་བསྒོམ་ཞིང་བསྙེན་པ་བཟླ། ཁྱད་པར་རང་གི་བླ་ཚེ་ཆད་ཉམས་ཡར་བ་ཐམས་ཅད་འོད་ཟེར་ལྔ་ལྡན་ནྲིཿཡིག་གི་རྣམ་པར་བསྡུས་ནས་རང་ལ་ཐིམ་པས་བླ་ཚེ་ཆད་ཉམས་ཐམས་ཅད་སོར་ཆུད་པར་བསམ་མོ། དེ་ནས་ཐུན་མཚམས་སུ་མཆོད་བསྟོད་བྱས་ལ་མདའ་དར་གཡབ་ཅིང་ཚེ་འགུགས་འདོན་དངོས་གྲུབ་ལེན་པ་དེ་རྣམས་བྱ། དེ་ལྟ་བུའི་བསྙེན་པ་འབུམ་ཕྲག་གསུམ་ཐ་མ་བྱས་པའི་རང་མོས་དང་བསྟུན། ཞི་བའི་སྔགས་ཤམ་ཀྱང་ཐུན་མཐའ་རྣམས་སུ་ཅུང་ཟད་རེ་དང་མཐར་ཁྲི་ཕྲག་སོགས་ཇི་ལྟ་འོས་པ་བཟླ་དགོས། སྒྲུབ་པའི་རྟགས་མཚན་སོགས་གཞུང་ལྟར་གསལ་བར་བྱུང་ནས་རྗེས་ཀྱི་བྱ་བ་དངོས་གྲུབ་ལེན་ཚུལ་སོགས། ཕྱོགས་འགྲོ་གོང་དུ་ཕག་ནག་སྐབས་སུབཤད་པས་རང་གཞུང་ལྟར་བསྒྱུར་ཏེ་ཚེ་འགུགས་འདོན་ཅིང་དངོས་གྲུབ་ལེན་པའི་ཁྱད་པར་ཙམ་མོ། །དེ་བཞིན་དུ་སེར་མོ་དོན་གྲུབ་མའི་བསྙེན་པ་ལའང་རྒྱས་པའི་ལས་ལ་ཤིས་པའི་གནས་སུ་དེར་མཚུངས་སྟེགས་བུ་རབ་འབྲིང་ཐ་མའི་དཀྱིལ་འཁོར་གང་འབྱོར་གྱི་ཁར་ཁྲིའུའི་སྟེང་གཏོར་མ་སྐུ་ཙག་དར་སེར་གྱི་གུར་དང་བཅས་པའི་མདུན་དུ་སྦ་ལྕགས་ལ་བླ་རྡོ་བཏགས་པ་བཤམས། སྨན་རཀ་མཆོད་པ་སོགས་བཤམས་གྲུབ་ནས་མཚམས་བཅད་ཕག་སེར་རང་གི་བསྙེན་མཚམས་བར་འདོན་ནས་བདག་མདུན་གཉིས་ཀ་གྱེར་ཚིག་གཅིག་གིས་གསལ་གདབ་འོད་ཟེར་སྤྲོ་བསྡུས་དམིགས་པ་ཐུགས་ཀར་རི་སེར་པོ་ལ་སྔགས་ཕྲེང་གི་བསྐོར་བ་བསྒོམ་པ་ཙམ་ལས་གཞན་རྣམས་འགྲེ། བསྙེན་གྲངས་གཞུང་ལས་འབུམ་ཚོ་ཙམ་ལས་མ་གསུངས་ཀྱང་སུམ་འགྱུར་བྱེད་དགོས་ཁྲོས་ནག་གི་འགྲེས་གྱི་ཤེས། རྟགས་མཚན་རབ་འབྲིང་ཐ་མ་གང་རུང་གཞུང་མཐུན་བྱུང་ནས་དངོས་གྲུབ་ལེན་སོགས་འདྲའོ། །ཕག་མོ་དམར་མོའི་བསྙེན་པ་བྱེད་ཚུལ་ཡང་དབང་གི་ལས་ལ་ཤིས་ཤིང་གཞུང་མཐུན་མཁའ་འགྲོ་འདུ་བའི་གནས་སུ། སྟེགས་བུ་དམར་པོ་ཤིང་ཏོག་དམར་པོ་དང་མཚལ་དང་སིནྡྷུ་ར་ཆང་དང་སྦྱར་བས་བྱུག་ལ་གཞུང་ལྟར་རྡུལ་ཚོན་རས་བྲིས་སམ་ཚོམ་བུ་ཡིན་ན་རྒྱ་སྐྱེགས་ཀྱིས་མདོག་བསྒྱུར་ཏེ་དམར་པོ་བྱས་པའི་འབྲུ་ཚོམ་གྱི་དབུས་སུ། ཟངས་སྡེར་སོགས་སྣོད་དུ་མཁའ་འགྲོའི་གཏོར་མ་རྒྱན་ལྡན་ལ་སྐུ་ཙག་དར་དམར་གྱི་གུར་ཕུབ་པའི་མདུན་དུ་བླ་རྡོ་རྗས་ལྡན་རབ་གནས་བྱས་པ་སྦ་ལྕགས་ལ་རིགས་ལྡན་གཙང་མའི་སྐྲ་དང་མགྲོན་ཚམ་མེ་ལོང་ཤིང་ཏོག་དམར་པོ་སིནྡྷུ་ར་སོགས་དང་མཉམ་དུ་བཏགས་ལ། དར་གུར་དང་བཅས་མདུན་དུ་བཀོད་གཡས་གཡོན་དུ་སྨན་རཀ་མཐར་མཆོད་པ་རྣམ་ལྔ་སོགས་བཀོད་ཚུལ་གཞན་རྣམས་དང་འདྲ། དེ་ནས་མཚམས་བཅད་དེ་གཏོར་མ་ཆ་གཉིས་བཏང་བགེགས་བསྐྲད་སྲུང་འཁོར་སྒོམ་ཕག་དམར་ལས་བྱང་རང་གཞུང་ལྟར་བསྙེན་མཚམས་བར་བཏང་། རང་དང་སྒྲུབ་རྫས་གཉིས་ཀ་ལྷར་བསྐྱེད་བསྙེན་པའི་དམིགས་པ་བདག་མདུན་གྱི་ཐུགས་ཀར་ཉི་དཀྱིལ་གྱི་སྟེང་དུ་ཡི་གེ་ནི་དམར་པོ་ལ་སྔགས་ཕྲེང་དམར་པོ་གཡས་བསྐོར་དུ་བསྐོར་བར་དམིགས་ལ་སྔགས་བཟླས་པས་བདག་བསྐྱེད་ཀྱི་ཐུགས་ཀའི་འོད་ཟེར་གྱིས་མདུན་བསྐུལ་གྱི་ཐུགས་ཀའི་སྔགས་ཕྲེང་དྲག་ཏུ་འཁོར་བ་ལས། འོད་ཟེར་དམར་པོ་ཚ་ལ་མྱུར་བ་མང་པོས་འཁོར་འདས་སྣང་སྲིད་སྣོད་བཅུད་ཁྱབ་པར་འཕྲོས་པས་དུས་གསུམ་གྱི་རྒྱལ་བ་སྲས་དང་བཅས་པའི་བྱིན་རླབས་དང་སྐྱེ་འགྲོ་གཟུགས་ཅན་གཟུགས་མེད་ལྷ་འདྲེ་མི་གསུམ་ཐམས་ཅད་ཀྱི་ཚེ་བསོད་དཔལ་འབྱོར་མངའ་ཐང་ལོངས་སྤྱོད་ཐམས་ཅད་རང་དབང་མེད་པར་དབང་དུ་བསྡུས་ནས། བདག་དང་སྒྲུབ་རྫས་ལྷར་གསལ་བ་ལ་ཐིམ་པར་བསྒོམ་ཞིང་རབ་འབྱམས་དབང་གི་ཕྲིན་ལས་མངའ་ཐང་འབྱོར་ཏེ་མཆོག་ཐུན་དངོས་གྲུབ་ཐམས་ཅད་ཐོབ་པར་བསམ་ཞིང་། སྔགས་བཟླས་ཐུན་མཐར་དབང་གི་འོད་ཟེར་ལྕགས་ཀྱུའི་འགྲོ་བ་ཕོ་མོ་ལྷ་འདྲེ་མི་གསུམ་ཐམས་ཅད་དབང་མེད་འགུགས་པའི་དམིགས་པ་ཟབ་གནད་དང་ལྡན་པར་ཤམ་བུ་བཏགས་པ་ཅུང་ཟད་རེ་བཟླ་ཞིང་བསྙེན་གྲངས་ཐེམས་ནས། བསྙེན་སྔགས་ཤམ་ཅན་བསྙེན་པའི་བཅུ་ཆ་རེ་བཟླ་ཞིང་བསྙེན་པའི་གྲངས་ཚད་འབུམ་གསུམ་དུ་ངེས་པར་བཟླ་ཞིང་དེ་ལས་ལྷག་པ་འདོད་ན་རང་གི་མོས་པ་དང་བསྟུན་པར་བྱའོ། གྲངས་བསྙེན་རྫོགས་པའི་བསྙེན་རྟགས་གསལ་ནས་རང་གཞུང་གི་དངོས་གྲུབ་ལེན་ཚུལ་གོང་མ་རྣམས་དང་འདྲ། འདི་ལ་ཁྱད་ཆོས་སུ་བསྙེན་སྒྲུབ་རྫོགས་ནས་དབང་གི་སྦྱིན་སྲེག་རང་གཞུང་ལྟར་ལོ་གསུམ་བར་དུ་ནུབ་རེ་བཞིན་ཆགས་མེད་པའི་ཕྱག་སྲོལ་ཡོད་པས་དེ་ལྟར་བརྩོན་པས་གྲུབ་ན་ལེགས་སོ། །ཕག་མོ་ལྗང་མོའི་བསྙེན་སྒྲུབ་བྱེད་ཚུལ་སྤྱི་ཕུབས་ཚུལ་གོང་དུ་གཙོ་མོ་ཁྲོས་མའི་སྐབས་སུ་སྨོས་ལྟར་ལ། མཁའ་འགྲོ་འདུ་བའི་དུས་ཚེས་ཤིས་པ་ལ་ལས་མཐུན་གྱི་སྟེགས་བུ་དང་དཀྱིལ་འཁོར་གྱི་དབུས་སུ་ཁྲིའུའི་ཁར། མཁའ་འགྲོའི་དཔལ་གཏོར་སྐུ་ཙག་དར་ལྗང་གི་གུར་ཅན་འཛུགས་ཤིང་བླ་རྡོ་ཡང་བཤམ་སྨན་རཀ་མཆོད་པ་སོགས་བཤམས་ཚུལ་འདྲ། ཕྱི་ནང་གི་མཚམས་བཅད་སོགས་གྲུབ་ནས་སྔོན་འགྲོ་དཀར་བགེགས་སྲུང་འཁོར་བསྒོམ་པ་རྣམས་སྤྱི་ཁྱབ་ལྟར་ལ་ཕག་མོ་ལྗང་མོ་རང་གི་ལས་བྱང་གཏོང་ཞིང་བདག་མདུན་གསལ་གདབ། བསྙེན་དམིགས་ཀྱི་ཁྱད་པར་ཐུགས་ཀར་ཉི་དཀྱིལ་ལ་ས་བོན་ས་ལྗང་གུའི་མཐར་སྔགས་ཕྲེང་ལྗང་གུས་བསྐོར་བ་ལས་འོད་ཟེར་འཕྲོས་པས། དུས་གསུམ་གྱི་རྒྱལ་བ་སྐུ་གསུམ་གྱི་མཁའ་འགྲོ་འབུམ་ཕྲག་ཡངས་པའི་ཚོགས་དང་བཅས་པའི་ཐུགས་རྗེ་བྱིན་རླབས་མཐུ་སྟོབས་ནུས་པ་ཐམས་ཅད་བདག་མདུན་ལྷར་གསལ་བ་ཐིམ་པར་བསྒོམས་ཤིང་སྔགས་བཟླ། ཡང་བདག་མདུན་ལས་འོད་ཟེར་འཕྲོས་པས་ནད་གདོན་བགེགས་དང་བར་ཆད་ཐམས་ཅད་དབྱིངས་སུ་བསལ་ནས་མིང་ཡང་མེད་པར་གྱུར་པ་བསམ་ཞིང་། སྐུ་དང་ཡེ་ཤེས་འདུ་འབྲལ་མེད་པའི་ངང་ནས་བཟླས་པ་ལ་འབད། ཐུན་མཐར་གཞུང་ལྟར་རྩ་སྔགས་ལ་ཤམ་བུ་བཏགས་པ་ཉུང་ཙམ་རེ་ཇི་ལྟར་འོས་པར་བཟླ་ཞིང་བསྙེན་གྲངས་རྫོགས་ནས་རྩ་སྔགས་ཤམ་ཅན་བསྙེན་པའི་བཅུ་ཆའམ་ཁྲི་ཚོ་སོགས་སྐབས་བསྟུན་བཟླ། དམིགས་པ་བདག་མདུན་གྱི་ཐུགས་ཀའི་སྔགས་ཕྲེང་ལས་འོད་ཟེར་ཚ་ལ་རྩུབ་པ་མང་པོ་འཕྲོས་པའི་སྣེ་ལ་མེ་མཚོན་ཐོག་སེར་དྲག་ཏུ་འཁྲུག་ཅིང་ལས་བྱེད་ཀྱི་མཁའ་འགྲོ་སྐུ་མདོག་ལྗང་ནག་ཤིན་ཏུ་ཁྲོས་ཞིང་གཏུམ་ལ་རྔམས་པ་མང་པོས་མེ་མཚོན་ཐོག་སེར་གྱི་ཆར་ཕབ་པས། སྟོང་གསུམ་ཐམས་ཅད་ཁྱབ་སྟེ་དགྲ་བགེགས་བྱད་མ་ལྷ་སྲུང་དང་བཅས་པ་ཐམ་ཅད་བསད་བཅད་གཏུབས་ཏེ་ཐལ་བའི་རྡུལ་དུ་བརླགས་པར་བསམ་ཞིང་ཤ་ཁྲག་ཐམས་ཅད་ལས་བྱེད་ཀྱི་མཁའ་འགྲོ་རྣམས་ཀྱིས་ལྷག་མ་མེད་པར་བཞེས་པར་བསམ་ལ་སྔགས་དྲག་ཏུ་བཟླ་བར་བྱའོ། གྲངས་སམ་རྟགས་མཚན་གསལ་ནས་དངོས་གྲུབ་ལེན་ཚུལ་སོགས་རང་གཞུང་ལྟར་བྱ་བ་ལ་སོགས་གཞན་དང་མི་འདྲ་མེད། གྲངས་བསྙེན་སུམ་འབུམ་བྱེད་པ་གཏེར་སྟོན་གྱི་ཕྱག་བཞེས་ཏེ་ལས་རུང་ཙམ་ལ་དགོངས་པ་འདྲའོ། དེ་ལྟར་གོང་གི་ཚེ་ཡང་བྱིང་རྒོད་ཀྱི་སྐྱོན་སྤངས་ཤིང་གསལ་དག་བརྟན་གསུམ་གྱི་བསྐྱེད་རིམ་ལྷའི་རྣལ་འབྱོར་གསལ་སྣང་ཆུ་ཟླ་ལྟ་བུའི་ང་རྒྱལ་དང་མ་བྲལ་བར་བྱ་ཞིང་། དེ་ཡང་རང་སེམས་རིག་པའི་རང་རྩལ་ལས་གཞན་དུ་མ་གྲུབ་ཅིང་རང་སེམས་གདོད་མའི་གནས་ལུགས་སྐྱེ་འགགས་གནས་གསུམ་དང་བྲལ་བ་དེ་ཉིད་རིགས་ལྔ་སྐུ་གསུམ་མཁའ་འགྲོ་བརྡའ་དོན་རྟགས་ཀྱི་རྣམ་འགྱུར་དུ་འཆར་བའི་ཚུལ་ལ་ངེས་པ་རྙེད་པར་བྱས་ལ། ལྷ་མི་གསལ་བ་བྱུང་ན་ཡང་བསྒོམ་བྱའི་ལྷ་ཡང་རང་གི་སེམས་ལས་མ་འདས་ཤིང་སྒོམ་བྱེད་ཀྱི་མཁན་པོ་དང་སེམས་ཀྱི་རང་རྩལ་དུ་ཤེས་པས་མ་ཡེངས་པར་བྱ། གསལ་སྣང་ཐེབས་ན་ཇི་ལྟར་གསལ་བར་བསྒོམ་ཤིང་བཟླ་བར་བྱའོ། གཞན་ཡང་རླུང་སྦྱོར་གྱི་རྣལ་འབྱོར་དང་ལྡན་པ་ཡིན་ན་འགོགས་ཟླས་རྡོར་བཟླས་སོགས་བྱ་རུང་བས་དེ་དང་དེའི་མན་ངག་མཁས་པར་བྱའོ། གཞན་ཡང་བཟླས་པའི་སྐྱོན་ལྔ་སྤངས་པ་སོགས་བསྙེན་ཡིག་གཞན་རྣམས་ལས་ཇི་ལྟར་འབྱུང་བ་བཞིན་ཉམས་སུ་ལེན་པ་ལས་བག་མེད་བབ་ཅོལ་གྱི་སྤྱོད་པ་རྡུལ་ཙམ་ཡང་མ་འདྲེས་པར་བྱའོ། ཕག་མོ་རིགས་བཞིར་ཡང་ཚོགས་ཀྱི་སྐབས་སུ་བསྐང་བ་ཁྲོས་ནག་གི་དུས་ལྟར་གཞུང་བཞིན་གཏོང་། ཀུན་ལ་བསྙེན་པའི་ཁ་བསྐང་ཞི་བའི་སྦྱིན་སྲེག་ཡང་ན་མཁའ་འགྲོའི་མེ་མཆོད་སོགས་བྱ་བ་ནི་ཕུན་སུམ་ཚོགས་པའི་ཡན་ལག་ཏུ་འགྱུར་རོ། འདི་རྣམས་ཀྱི་བསྙེན་སྒྲུབ་གནས་དུས་སོ་སོར་བྱ་ཆོག་པ་ལས་སྟན་ཐོག་གཅིག་ཏུ་དགོས་པའི་ངེས་པ་མེད་ཀྱང་འདིར་བསྙེན་ཡིག་སོ་སོར་བྲི་མ་ནུས་པས་དཀྱུས་གཅིག་ཏུ་བྲིས་པ་ཡིན་ནོ། སྨྲས་པ། དེ་ལྟར་རྡོ་རྗེ་ཕག་མོ་རིགས་ལྔ་ཡི། །བསྙེན་ཡིག་གཞུང་དང་བླ་མའི་མན་ངག་བཞིན། །བྲིས་འདི་དངོས་གྲུབ་འདོད་པ་འཇོ་བའི་སྐྱེས། །འགུགས་བྱེད་ལེགས་བཤད་དབང་གི་ལྕགས་ཀྱུ་ཡིན། །འདིར་འབད་ལྷག་བསམ་པད་རྩ་ལྟར་དཀར་དགེས། བདེ་ཆེན་ལྷན་སྐྱེས་དགའ་བའི་བསྐྱེད་ཚལ་ན། །སྐུ་གསུམ་མཁའ་འགྲོ་རོལ་པའི་དགའ་སྟོན་ལ། །དགྱེས་དགུར་སྤྱོད་པའི་སྐལ་བཟང་མྱུར་ཐོབ་ཤོག །ཁྱད་པར་ལས་ཉན་འཐིབ་བུས་ཆེས་ཉེན་པའི། །ལྔ་བདོའི་འགྲོ་ལ་ཕན་བདེ་སྣང་བའི་མཛོད། །སྲིད་ཞིའི་འདྲེན་པ་མཆོག་སྤྲུལ་རིན་པོ་ཆེ། །ཞབས་པད་བསྐལ་བརྒྱར་བརྟན་པའི་རྒྱུར་རྒྱུར་ཅིག །ཅེས་པ་འདི་ནི་ཁྱབ་བདག་སྲིད་ཞིའི་འདྲེན་པ་མཆོག་སྤྲུལ་རིན་པོ་ཆེ་འཇིགས་མེད་བསྟན་པའི་སྡེའི་ཞལ་སྔ་ནས་བཀའ་མཆིད་ཀྱི་ལམ་ནས་ནན་བསྐུལ་གནང་བ་སྤྱི་བོར་མཆོད་དེ་རྨོངས་བཙུན་རྒན་པོ་ངག་དབང་བློ་གྲོས་ཀྱིས་བྲིས་ནས་ཕུལ་བར་དཔྱད་པས་མ་ཁྱབ་པའི་ལོག་རྟོགས་མཆིས་ན་མཆོག་སྤྲུལ་དམ་པ་ཉིད་དང་སྐུ་གསུམ་མཁའ་འགྲོའི་ཚོགས་ལ་སྙིང་ནས་བཤགས་སོ། །དགེ་བས་དཔལ་ལྡན་བླ་མ་དམ་པའི་ཞབས་པད་བསྐལ་བརྒྱར་བརྟན་པའི་རྒྱུར་གྱུར་ཅིག །མངྒ་ལཾ།། །།

འདིའི་བར་ནས་མཁའ་འགྲོའི་མེ་མཆོད་དངོས་གྲུབ་དཔལ་སྟེར་མི་ཚང་།

གཏེར་སྲུང་མངའ་གསོལ།

ཧཱུྃ་བྷྱོཿ སྐྱེ་མེད་ཆོས་དབྱིངས་དག་པའི་མཁའ་ཀློང་ནས། །འགགས་མེད་རོལ་པ་ཀུན་ཏུ་བཟང་མོའི་སྤྲུལ། །སྐྱེ་འགག་འགྱུར་མེད་བདེ་ཆེན་དཔལ་གྱི་ཡུམ། །ཕྲིན་ལས་ཐོགས་མེད་སྨན་ཕྲན་བྱེ་བའི་ཚོགས། །བདུད་སྡེ་ཚར་གཅོད་ཁྲག་འཐུང་དྷཀྐི་མ། །བསྟན་པ་བསྲུང་མཛད་ཡང་མ་བྱང་ཆུབ་སྒྲོན། །དཔོན་གཡོག་མང་པོ་སྨན་ཕྲན་བྱེ་བ་འབུམ། །བདག་གིས་མཆོད་ཅིང་བསྟོད་པའི་གནས་འདི་རུ། །མ་ལུས་འཁོར་བཅས་མཆོད་པའི་གནས་འདིར་བྱོན། ཧཱུྃ་བྷྱོཿ དཔལ་ལྡན་ཁྲག་འཐུང་འབར་མ་ཆེན་མོ་ནི། །ཆོས་ཉིད་མི་འགྱུར་སྐུ་མདོག་དཀར་འཚེར་ལ། ཉོན་མོངས་བདུད་འཇོམས་བེར་ཆེན་འབར་བ་མནབ། །ཐབས་ཤེས་ཟུང་འཇུག་པཉྩ་ལི་ཀ་དམར། །བསྟན་པ་བསྲུང་ཕྱིར་སྤྱན་གཉིས་འཛུམ་དང་ལྡན། །འཁོར་བའི་ཆ་འཛིན་རིན་ཆེན་སྣ་ལྔས་བརྒྱན། །ཐེག་པའི་དོན་རྟོགས་སྙན་གཉིས་རྒྱན་ཆ་འཁྲོལ། །དགྲ་བགེགས་འགུགས་ཕྱིར་ཕྱག་གཉིས་ལྕགས་ཀྱུ་བསྣམས། །ལས་བཞི་སྒྲུབ་ཕྱིར་དར་ཚོན་སྣ་ལྔས་བརྒྱན། །ཟབ་གཏེར་འཛིན་ཕྱིར་ཕྱག་གཡོན་གཏེར་སྒྲོམ་བསྣམས། །གཉན་མོའི་ཆ་འཛིན་ཤ་བ་ཡུ་མོ་ཆིབས། །མཐའ་དམག་ཟློག་ཕྱིར་རབ་འཇིགས་ཁ་འབར་མ། །སྦས་ཡུལ་སྐྱོངས་མཛད་སྒོ་མ་སྤྲེལ་གདོང་མ། །བསྟན་པ་བསྲུང་མཛད་ཡང་མ་སྐྱི་མདངས་མ། །གཞན་ཡང་སྨན་ཕྲན་བྱེ་བ་ས་ཡའི་ཚོགས། །ཁྱེད་རྣམས་འཁོར་དང་བཅས་པ་མངའ་གསོལ་ལོ། །བྱ་རིགས་ཆུ་གནས་རི་དྭགས་མང་པོ་དང་། །གཅན་གཟན་དུད་འགྲོ་རྐང་བཞིས་མངའ་གསོལ་ལོ། །ཕྱི་མཆོད་འདོད་ཡོན་སྣ་ལྔ་ལོངས་སྤྱོད་རྫས། །ནང་མཆོད་སྨན་རག་གཏོར་གསུམ་མཆོད་པའི་ཚོགས། །གསང་མཆོད་བདེ་སྟོང་དགའ་བཞི་འབྱོར་བས་བརྒྱན། །ཀ་ཅ་དཀོར་ཆ་གོ་མཚོན་སྣ་ཚོགས་དང་། །འཕན་གདུག་རྒྱལ་མཚན་མདུང་དར་རོལ་མོ་ཡིས། །འཁོར་བཅས་མཆོད་བསྐང་མངའ་གསོལ་ཉམས་ཆགས་བཤགས། ཧཱུྃ། དེ་ལྟར་མངའ་གསོལ་བྱས་པས་མཁའ་འགྲོའི་ཚོགས། །རྣལ་འབྱོར་བདག་ཅག་ཡོན་མཆོད་འཁོར་བཅས་ལ། །སྔོན་ལས་འཕྲལ་རྐྱེན་རྐྱེན་ཁ་ཟུག་པ་དང་། །དགྲ་འདྲེ་བྱུར་གསུམ་རྨིས་ལྟས་མཚན་ངན་སོགས། །ཟློག་ཅིག་བསྒྱུར་ཅིག་བར་ཆད་དབྱིངས་ནས་སོལ། །བཀའ་ཡི་སྲུང་མ་ཡེ་ཤེས་སྤྱན་དང་ལྡན། །ཀུན་བཟང་སྣང་མཐའ་སྒྱུ་འཕྲུལ་རོལ་བའི་གར། །ཁྱེད་རྣམས་སྔོན་གྱི་བཀའ་ལུང་ཇི་བཞིན་ཏུ། །རྣལ་འབྱོར་འདོད་པའི་འབྲས་བུ་འགྲུབ་པར་མཛོད། །ཅེས་པ་འདི་མོས་ལྡན་འགས་ཡང་ཡང་བསྐུལ་བར་བརྟེན། ཧོར་གྱི་ལོ་ཆེན་བློ་ལྡན་གྱིས་མཛད་པའི་ལས་བཞིའི་རུ་མཚོན་ལ་ཁོག་ཕུབ། གཏེར་ཆེན་ཆོས་ཀྱི་རྒྱལ་པོ་དང་། བསྟན་པའི་རྒྱལ་མཚན་སོགས་ཀྱིས་མཛད་པ་ལ་བསྟུན། མཚམས་སྦྱོར་བསྐང་བ་མངའ་གསོལ་མཆོད་ཕྲེང་སོགས་ཨོ་རྒྱན་དཔལ་འབྱོར་མིང་ཅན་གྱིས་ཆུ་རྟ་སྣྲོན་ཟླའི་མཁའ་འགྲོའི་དུས་ཚེས་བཟང་པོར་སྦྱར་བ་དགེ། མངྒ་ལཾ།

ཕག་མོ་རིགས་བཞིའི་ཆོས་སྐོར་ལས་ཕག་དཀར་སྐོར།

སྒྲུབ་ཐབས་ཚེ་ཡི་བང་མཛོད།

ཕག་མོ་དཀར་མོའི་ཟབ་ཐིག་ལས༔ སྒྲུབ་ཐབས་ཚེའི་བང་མཛོད་བཞུགས༔ ཡེ་ཤེས་མཁའ་འགྲོའི་ལྷ་ཚོགས་རྣམས་ལ་འདུད༔ བདག་འདྲ་རིག་འཛིན་པདྨ་ཐོད་ཕྲེང་གིས༔ མ་འོངས་ཕྱི་མའི་སྐལ་ལྡན་རྣམས་ཀྱི་དོན༔ ཟབ་མོའི་གདམས་པ་ཡིད་བཞིན་ནོར་བུའི་སྒྲོམ༔ ཕག་མོ་དཀར་མོ་སྒྲུབ་པའི་རིམ་པ་སྟོན༔ དབེན་པའི་གནས་སུ་ད་ལར་དྲི་བཟང་བྱུག༔ ཆོས་འབྱུང་ཐོད་ར་པདྨ་རྡོ་རྗེ་མེ༔ ཚོན་གྱིས་བྲི་ཞིང་མཉྫིའི་ཁྲིའུ་ཁར༔ ཚེ་ཡི་བུམ་པ་རྡོ་རྗེ་གྲི་གུག་མཚན༔ སྐུ་གཟུགས་དར་གུར་ཕུབ་ཅིང་སྨན་རཀ་དང་༔ བླ་རྡོ་མདའ་དར་གཡས་གཡོན་ཕྱོགས་བཞིར་འགོད༔ ཕྱི་ནང་མཆོད་པ་དང་བཅས་གདན་ལ་འཁོད༔ དཀར་ཕྱོགས་མཆོད་ཅིང་ནག་ཕྱོགས་སྔགས་ཀྱིས་སྦྱང་༔ སྐྱབས་འགྲོ་སེམས་བསྐྱེད་ཚད་མེད་བཞི་བསྒོམ་ཞིང་༔ སྣང་པའི་རང་བཞིན་སྟོང་པའི་ཀློང་ཡངས་ན༔ ཆོས་འབྱུང་ཉི་ཟླ་པདྨའི་གདན་སྟེང་དུ༔ སྟོང་པའི་ཡེ་ཤེས་ངོ་བོ་ཟང་ཐལ་ཧ༔ འོད་ཟེར་འཕྲོ་འདུའི་སྦྱོར་བས་སྐད་ཅིག་གི༔ བདག་ཉིད་རིག་པའི་ངོ་བོ་བཅོམ་ལྡན་མ༔ ཕག་མོ་དཀར་མོ་ཚེ་བུམ་མདའ་དར་ཅན༔ གར་སྟབས་རུས་རྒྱན་དར་དཔྱངས་ཁ་ཊྲཱཾ་བརྟེན༔ ཞི་འཛུམ་ཉམས་ལྡན་དབུ་སྐྲ་སིལ་བུར་འཕྱང་༔ རིན་ཆེན་ནོར་བུ་དབང་གི་རྩེ་བྲན་ལྡན༔ ཕག་ཞལ་དཀར་མོས་གད་བརྒྱངས་ཕྱོགས་བཅུར་སྒྲོག༔ ཡེ་ཤེསརབ་རྒྱས་གཟི་བརྗིད་ལྡན་པར་བསྒོམ༔ བདེ་ཆེན་དཀར་མོ་ཕག་མོ་དྷཀྐི་མ༔ དཀར་མོ་འབུམ་གྱི་མ་ཚོགས་འཁོར་དང་བཅས༔ ནམ་མཁའ་ས་གཞི་བར་སྣང་ཁྱབ་པར་ཁེངས༔ འོད་ཟེར་མདངས་ལྡན་གར་སྟབས་ཤིགས་སེ་ཤིགས༔ མ་ལུས་འཁོར་བཅས་གནས་འདིར་སྤྱན་འདྲེན་ན༔ མོས་པའི་བུ་ལ་བྱིན་གྱིས་བརླབ་ཕྱིར་གཤེགས༔ མཆོག་དང་ཐུན་མོང་དངོས་གྲུབ་དུས་འདིར་སྩོལ༔ ཧ་བཛྲ་དྷཀྐི་ནི་སརྦ་ས་མ་ཡ་ཧྲིང་ཧྲིང་ཛཿ ཛཿ ཨ་ཝེ་ཤ་ཡ་ཨ་ཨཿ བཞུགས་སུ་གསོལ་བ་ནི༔ ཧཱུྃ༔ མཁའ་དབྱིངས་དག་པ་ཨེ་ཡི་ཀློང་དཀྱིལ་ན༔ ཉི་ཟླ་པདྨའི་གདན་ཁྲི་ཡངས་པའི་དཀྱིལ༔ དཀར་མོ་མཁའ་འགྲོ་འབུམ་གྱི་ལྷ་ཚོགས་རྣམས༔ གདོད་ནས་དག་པའི་དབྱིངས་སུ་བཞུགས་སུ་གསོལ༔ ཧ་བཛྲ་དྷཀྐི་ནི་ས་མ་ཡ་ཏིཥྠ་ལྷན༔ ཕྱག་ནི༔ ཧཱུྃ༔ ངོ་བོ་ཉིད་ལས་ཤར་བའི་བཅོམ་ལྡན་མ༔ རང་རིག་སྐྱེ་འགག་བྲལ་བ་རྒྱལ་བའི་ཡུམ༔ སོ་སོར་རྟོགས་པའི་ཡེ་ཤེས་འཕྲུལ་མོ་ཆེ༔ གཉིས་སུ་མེད་པའི་བརྡ་ཡིས་ཕྱག་འཚལ་ལོ༔ ཧ་བཛྲ་དྷཀྐི་ནི་བྷ་ར་ཧི་ཨཱཿཡུ་ཥེ་ཧཱུྃ་བྷྲུྃ་ནྲི་ཛཿསིདྡྷི་སྭཱ་ཧཱ༔ བསྐྱེད་པའི་ལྷ་སྐུ་སྣང་སྟོང་ཕྱག་རྒྱ་ཆེ༔ འབྱུང་བཞི་སྦྱངས་བས་ཡེ་ཤེས་འོད་ལྔའི་ཀློང་༔ རིག་པའི་རང་མདངས་རྡོ་རྗེ་རྣལ་འབྱོར་མ༔ བཟླས་པའི་སྙིང་པོ་རྡོ་རྗེ་ལུ་གུ་རྒྱུད༔ ཐབས་ཀྱི་མདའ་དར་འཁོར་འདས་ཀུན་ཏུ་གཡབ༔ ཐུགས་རྗེའི་བྱིན་རླབས་ཚེ་བསོད་དཔལ་འབྱོར་སྟོབས༔ འབྱུང་བཞིའི་དངས་མ་བླ་ཚེ་ཆད་དམ་ཉམས༔ ལྔ་ལྡན་འོད་དང་ནྲི་ཡིག་རྣམ་པར་བསྡུས༔ ཤེས་རབ་བུམ་པར་བསྐྱིལ་ནས་ཡེ་ཤེས་རྒྱས༔ བདེ་སྟོང་ཟུང་འཇུག་ཐབས་ཤེས་འོད་ཟེར་ལྔ༔ རྣལ་འབྱོར་ལུས་ལ་ཐིམ་པས་ཚེ་བསོད་རྒྱས༔ མཆོག་དང་ཐུན་མོང་དངོས་གྲུབ་ཐོབ་པར་བསམས༔ མ་ཡེངས་ཏིང་འཛིན་ངང་ནས་འབུམ་ཚོ་ནི༔ གཅིག་གཉིས་གསུམ་སོགས་དབང་པོའི་རིམ་པས་བཟླས༔ འཇའ་འཁྱུག་འོད་འཕྲོ་བདེ་སྟོང་ཉམས་མྱོང་འབར༔ ཞལ་མཇལ་ལུང་སྟོནའཛབ་དབྱངས་རང་གྲག་དང་༔ ཤེལ་རྙེད་དར་འཕྱར་དུང་འབུད་རོལ་མོ་འཁྲོལ༔ ཁྲུས་བྱས་རྒྱན་བཏགས་གོས་གསར་གྱོན་པ་དང་༔ བུད་མེད་མང་པོ་ཚོགས་དང་བཀུར་སྟིས་མཆོད༔ ཉི་ཟླ་ཤར་དང་བཀྲ་ཤིས་ལྟས་རྣམས་འབྱུང་༔ དེ་ཚེ་རེ་དོགས་བྲལ་ཞིང་ངོ་བོར་བལྟ༔ གནས་ལུགས་ངང་ནས་དབང་བཞི་ལེན་པར་བྱ༔ ཐུན་སྐབས་རྣམས་སུ་མཆོད་དང་བསྟོད་པ་ནི༔ ཧཱུྃ༔ གཟུགས་མཛེས་ལྷ་མོ་སྣང་བའི་མདངས་ལྡན་མ༔ མེ་ལོང་ཕྱག་རྒྱ་འཆང་བའི་གར་མཁན་མོ༔ སྟོང་གསུམ་ཁྱབ་པར་སྤྲུལ་ཏེ་མཆོད་པར་འབུལ༔ སྤྱན་གྱི་དབང་པོ་ཚིམ་ཕྱིར་བཞེས་སུ་གསོལ༔ སྒྲ་ཡི་ལྷ་མོ་གྲགས་པའི་མདངས་ལྡན་མ༔ པི་ཝང་ཕྱག་རྒྱ་འཆང་བའི་གླུ་དབྱངས་མ༔ སྟོང་གསུམ་ཁྱབ་པར་སྤྲུལ་ཏེ་མཆོད་པར་འབུལ༔ སྙན་གྱི་དབང་པོ་ཚིམ་ཕྱིར་བཞེས་སུ་གསོལ༔ དྲི་ཡི་ལྷ་མོ་དག་པའི་མདངས་ལྡན་མ༔ སྤོས་ཁང་ཕྱག་རྒྱ་དྲི་བསུང་སྤོང་ངད་ལྡན༔ སྟོང་གསུམ་ཁྱབ་པར་སྤྲུལ་ཏེ་མཆོད་པ་འབུལ༔ ཤངས་ཀྱི་དབང་པོ་ཚིམ་ཕྱིར་བཞེས་སུ་གསོལ༔ རོ་ཡི་ལྷ་མོ་ཟག་མེད་མདངས་ལྡན་མ༔ རོ་བརྒྱ་ལྡན་པའི་ཞལ་ཟས་འཆང་བའི་མ༔ སྟོང་གསུམ་ཁྱབ་པར་སྤྲུལ་ཏེ་མཆོད་པར་འབུལ༔ ལྗགས་ཀྱི་དབང་པོ་ཚིམ་ཕྱིར་བཞེས་ཕྱིར་བཞེས་སུ་གསོལ༔ རེག་བྱའི་ལྷ་མོ་བདེ་སྟོང་མདངས་ལྡན་མ༔ པཉྩ་ལི་ཀས་སྤྲས་པའི་ཕྱག་རྒྱ་ཅན༔ སྟོང་གསུམ་ཁྱབ་པར་སྤྲུལ་ཏེ་མཆོད་པར་འབུལ༔ སྐུ་ཡི་དབང་པོ་དགྱེས་ཕྱིར་བཞེས་སུ་གསོལ༔ ཧཱུྃ༔ དམ་རྫས་བརྒྱན་པའི་གཏོར་མ་རི་ལྟར་སྤུངས༔ ཟག་མེད་བདུད་རྩིའི་མཆོད་པ་མཚོ་ལྟར་བསྐྱིལ༔ ཨརྒྷཾ་དམར་གྱི་ཚོགས་ནི་རྫིང་ལྟར་བསགས༔ ཕྱི་ནང་མཆོད་གཏོར་བཀོད་པས་ཁྱད་འཕགས་འདི༔ མཅོམ་ལྡན་འདས་མ་འཁོར་དངབཅས་ལ་འབུལ༔ བཞེས་ནས་མཆོག་དང་ཐུན་མོང་དངོས་གྲུབ་སྩོལ༔ ཨཱོཾ་ཨཱཿཧཱུྃ་བཛྲ་པུཥྤེ་དྷུ་པེ་ཨཱ་ལོ་ཀེ་གྷནྡྷེ་ནཻ་ཝི་ཏེ་ཤཔྟ་པཱུ་ཙ་ཧོ༔ རཱུ་པ་ཤཔྟ་སོགས་པཱུ་ཙ་ཧོ༔ བྷ་ལིང་ཏ་ཨ་མྲྀ་ཏ་རཀྟ་མ་ཧཱ་སརྦ་པཱུ་ཙ་ཧོ༔ བསྟོད་པ་ནི༔ ཧཱུྃ༔ སྐྱེ་མེད་དབྱིངས་ལས་ཤར་པའི་ཕག་གདོང་་མ༔ འགག་མེད་འཁོར་ལོས་སྒྱུར་པའི་མཁའ་མགྲོའི་གཙོ༔ སྤྲུལ་པའི་མཁའ་འགྲོ་དམ་ཚིག་ཚེ་ཡི་ལྷ༔ བདེ་ཆེན་དཀར་མོ་འཁོར་དང་བཅས་ལ་བསྟོད༔ སྐབས་སུ་ཚེ་འགུགས་དམིགས་པའི་སྤྲོ་བསྡུ་བསྒྱུར༔ བསྙེན་སྒྲུབ་རྟགས་གསལ་སྒྲུབ་རྫས་དངོས་གྲུབ་བླང་༔ བླ་དྷོ་བཅང་ཞིང་དུས་སུ་མཆོད་ཅིང་བསྐང་༔ འདི་ནི་སྒྲུབ་པ་ཀུན་གྱི་ཡང་སྙིང་སྟེ༔ མཁའ་འགྲོའི་སྲོག་སྙིང་པདྨའི་ཐུགས་ཐིག་གོ༔ མ་འོངས་ལས་འཕྲོ་ལྡན་པའི་ཉི་མ་གྲགས༔ ཟབ་པའི་གདམས་པ་ཟབ་ཏིག་སྐོར་ལྔའི་ཆོས༔ ཉམས་སུ་ལོང་དང་མཆོག་ཐུན་དཔལ་ལ་སྤྱོད༔ འདི་ཕྱི་གཉིས་བདེ་བདག་གཞན་དོན་གཉིས་འགྲུབ༔ རིགས་ལྡན་མུ་དྲ་དྷཀྐིས་གདན་འདྲེན་ནམ༔ ཡང་ན་འཆི་ལ་ཐུག་པའི་ནད་བྱུང་ཚེ༔ སྲུང་མ་མཆོད་ལ་བསྐང་བཤགས་ཚོགས་འཁོར་བསྐོར༔ ཤོག་སེར་ཕོབ་ལ་སྒྲུབ་པ་དང་དུ་ལོང་༔ མི་ཡོང་གཞན་དོན་བོར་ལ་རང་དོན་སྒྲུབས༔ གདམས་པ་ཉམས་སུ་ལོང་ཅིག་སྐལ་ལྡན་པ༔ མཚོ་ཨ་དྷརྨ་སྒྲོན་དང་ཀརྨ་སྐྱེད༔ མིང་ཅན་སྐལ་ལྡན་བདུན་པོ་ལ༔ གདམས་པ་འདི་རྣམས་གབ་སྦས་མེད་པར་སྦྱིན༔ སྒྲུབ་ལུགས་ཕོག་ལ་ཞལ་གདམས་སྙིང་ལ་ནོད༔ དེ་རྣམས་ལུས་ཀྱི་མཐའ་བྱེད་ཞིང་ཁམས་ཉུལ༔ འབྲེལ་བ་ཐོགས་རྣམས་མཐོ་རིས་སྦྱོར་བ་ཡོང་༔ ཟབ་ཕྱིར་རིན་ཆེན་གཏེར་དུ་བཅོལ་ལོ་རྒྱ༔ ས་མ་ཡཱ༔ རྒྱ་རྒྱ་རྒྱ༔ གཏེར་རྒྱ༔ སྦས་རྒྱ༔ ཟབ་རྒྱ༔ གཉན་རྒྱ༔ ས་མ་ཡཱ་༔ རྒྱ་རྒྱ་རྒྱ༔ ཁམས་པ་ཉི་མ་གྲགས་པས་གནས་མཆོག་ཆེན་པོ་ཁམས་སྲིང་མོ་རྫོང་གི་ཆགས་རུ་ཕུག་དཀར་ལྷའི་གཞལ་ཡས་ཁང་ནས་ཤིང་གླང་ཧོར་ཟླ་ལྔ་བར་གདན་དྲངས་ཤིང་ཕུག་ནག་བདེ་བ་ཆེན་པོར་ཤོག་སེར་ལས་ཞལ་བཤུས་པ་མངྒ་ལཾ། །

ཚེ་འགུགས་ནོར་བུའི་ལུང་ཐག

ཕག་མོ་དཀར་མོའི་ཟབ་ཐིག་ལསཿ ཚེ་འགུགས་ནོར་བུའི་ལུང་ཐག་བཞུགས༔ ཡེ་ཤེས་མཁའ་འགྲོའི་ལྷ་ཚོགས་རྣམས་ལ་འདུད༔ དབང་སྒྲུབ་དུས་སུ་ཏིང་འཛིན་སྔགས་དམིགས་གསལ༔ འོད་ཟེར་སྤྲོ་བསྡུས་ཚེ་འགུགས་མདའ་དར་གཡབ༔ སྙན་པའི་དབྱངས་ཀྱིས་བསྐུལ་ཞིང་འདི་སྐད་དོ༔ ཧཱུྃ༔ རྡོ་རྗེ་ཕག་མོ་བདེ་ཆེན་ཞི་བ་འཚོ༔ དུས་གསུམ་སངས་རྒྱས་བསྐྱེད་པའི་ཡུམ་ཆེན་མོ༔ བསྐྱེད་པའི་ལྷ་མོ་སྒྲུབ་པའི་མཁའ་འགྲོ་མ༔ དམ་ཚིག་ཆེན་པོའི་ཐུགས་དམ་དུས་ལ་བབས༔ དབྱིངས་ནས་བཞེངས་ཤིག་རྡོ་རྗེ་རྣལ་འབྱོར་མ༔ སྤྲུལ་བ་སྒྱུར་ཅིག་དཔལ་གྱི་མཁའ་འགྲོའི་ཚོགས༔ ཚེ་བསོད་སྡུས་ཤིག་ལས་བྱེད་ཕོ་ཉ་རྣམས༔ ཧཱུྃ༔ མ་གཡེལ་མ་གཡེལ་ཚེ་ཡི་དྷཀྐི་རྣམས༔ སྐུ་ལས་བསྐྱེད་ཅིང་སྤྲུལ་པའི་ཚེ་འགུགས་མ༔ དཀར་མོ་འབུམ་ཕྲག །ཕྱོགས་བཅུའི་ཞིང་དུ་འཕྲོས༔ ལྕགས་ཀྱུའི་ཕྱག་རྒྱ་བསྒྱུར་ཞིང་གར་སྟབས་འཁྱུག༔ ཕྱོགས་བཅུའི་སངས་རྒྱས་རྣམས་ཀྱི་བྱིནརླབས་དང་༔ དུས་གསུམ་རིག་འཛིན་རྣམས་ཀྱི་ཐུགས་རྗེ་དང་༔ ཕྱི་སྣོད་འབྱུང་བ་བཞི་ཡི་དངས་མ་དང་༔ ནང་བཅུད་སྐྱེ་འགྲོ་རྣམས་ཀྱི་ཚེ་བསོད་དཔལ༔ ལྔ་ལྡན་འོད་དང་ནྲི་ཡིག་རྣམ་པར་བསྡུས༔ རྒྱ་མཚོ་ཆེ་ལ་ཆར་བ་བབས་པ་ལྟར༔ བདག་ཅག་རྣམས་ལ་གཉིས་མེད་སིབ་སིབ་ཐིམ༔ འཆི་མེད་རིག་འཛིན་ཚེ་ཡི་དངོས་གྲུབ་སྩོལ༔ ཧཱུྃ༔ མ་གཡེལ་གཡེལ་ཚེ་ཡི་དྷཀྐི་རྣམས༔ སྐུ་ལས་བསྐྱེད་ཅིང་སྤྲུལ་པའི་ཚེ་འགུགས་མ༔ སེར་མོ་འབུམ་ཕྲག་ཕྱོགས་བཅུའི་ཞིང་དུ་འཕྲོས༔ ཞགས་པའི་ཕྱག་རྒྱ་བསྒྱུར་ཞིང་གར་སྟབས་འཁྱུག༔ ཕྱོགས་བཅུའི་སངས་རྒྱས་རྣམས་ཀྱི་བྱིན་རླབས་དང་༔ དུས་གསུམ་རིག་འཛིན་རྣམས་ཀྱི་ཐུགས་རྗེ་དང་༔ ཕྱི་སྣོད་འབྱུང་བ་བཞི་ཡི་དངས་མ་དང་༔ ནང་བཅུད་སྐྱེ་འགྲོ་རྣམས་ཀྱི་ཚེ་བསོད་དཔལ༔ ལྔ་ལྡན་འོད་དང་ནྲི་ཡིག་རྣམ་པར་བསྡུས༔ རྒྱ་མཚོ་ཆེ་ལ་ཆར་པ་བབས་པ་ལྟར༔ བདག་ཅག་རྣམས་ལ་གཉིས་མེད་སིབ་སིབ་ཐིམ༔ འཆི་མེད་རིག་འཛིན་ཚེ་ཡི་དངོས་གྲུབ་སྩོལ༔ ཧཱུྃ༔ མ་གཡེལ་མ་གཡེལ་ཚེ་ཡི་དྷཀྐི་རྣམས༔ སྐུ་ལས་བསྐྱེད་ཅིང་སྤྲུལ་པའི་ཚེ་འགུགས་མ༔ དམར་མོ་འབུམ་ཕྲག་ཕྱོགས་བཅུའི་ཞིང་དུ་འཕྲོས༔ ལྕགས་སྒྲོགས་ཕྱག་རྒྱ་བསྒྱུར་ཞིང་གར་སྟབས་འཁྱུག༔ ཕྱོགས་བཅུའི་སངས་རྒྱས་རྣམས་ཀྱི་བྱིན་རླབས་དང་༔ དུས་གསུམ་རིག་འཛིན་རྣམས་ཀྱི་ཐུགས་རྗེ་དང་༔ ཕྱི་སྣོད་འབྱུང་བ་བཞི་ཡི་དངས་མ་དང་༔ ནང་བཅུད་སྐྱེ་འགྲོ་རྣམས་ཀྱི་ཚེ་བསོད་དཔལ༔ ལྔ་ལྡན་འོད་དང་ནྲི་ཡིག་རྣམ་པར་བསྡུས༔ རྒྱ་མཚོ་ཆེ་ལ་ཆར་བ་བབས་པ་ལྟར༔ བདག་ཅག་རྣམས་ལ་གཉིས་མེད་སིབ་སིབ་ཐིམ༔ འཆི་མེད་རིག་འཛིན་ཚེ་ཡི་དངོས་གྲུབ་སྩོལ༔ ཧཱུྃ༔ མ་གཡེལ་མ་གཡེལ་ཚེ་ཡི་དྷཀྐི་རྣམས༔ སྐུ་ལས་བསྐྱེད་ཅིང་སྤྲུལ་པའི་ཚེ་འགུགས་མ༔ ལྗང་མོ་འབུམ་ཕྲག་ཕྱོགས་བཅུའི་ཞིང་དུ་འཕྲོས༔ དྲིལ་བུའི་ཕྱག་རྒྱ་བསྒྱུར་ཞིང་གར་སྟབས་འཁྱུག༔ ཕྱོགས་བཅུའི་སངས་རྒྱས་རྣམས་ཀྱི་བྱིན་རླབས་དང་༔ དུས་གསུམ་རིག་འཛིན་རྣམས་ཀྱི་ཐུགས་རྗེ་དང་༔ ཕྱི་སྣོད་འབྱུང་བ་བཞི་ཡི་དངས་མ་དང་༔ ནང་བཅུད་སྐྱེ་འགྲོ་རྣམས་ཀྱི་ཚེ་བསོད་དཔལ༔ ལྔ་ལྡན་འོད་དང་ནྲི་ཡིག་རྣམ་པར་བསྡུས༔ རྒྱ་མཚོ་ཆེ་ལ་ཆར་བ་བབས་པ་ལྟར༔ བདག་ཅག་རྣམས་ལ་གཉིས་མེད་སིབ་སིབ་ཐིམ༔ འཆི་མེད་རིགས་འཛིན་ཚེ་ཡི་དངོས་གྲུབ་སྩོལ༔ ཧཱུྃ༔ མ་གཡེལ་མ་གཡེལ་ཚེ་ཡི་དྷཀྐི་རྣམས༔ སྐུ་ལས་བསྐྱེད་ཅིང་སྤྲུལ་པའི་ཚེ་འགུགས་མ༔ སྔོན་མོ་འབུམ་ཕྲག་ཕྱོགས་བཅུའི་ཞིང་དུ་འཕྲོས༔ འཁོར་ལོའི་ཕྱག་རྒྱ་བསྒྱུར་ཞིང་གར་སྟབས་འཁྱུག༔ ཕྱོགས་བཅུའི་སངས་རྒྱས་རྣམས་ཀྱི་བྱིན་རླབས་དང་༔ དུས་གསུམ་རིག་འཛིན་རྣམས་ཀྱི་ཐུགས་རྗེ་དང་༔ ཕྱི་སྣོད་འབྱུང་བ་བཞི་ཡི་དངས་མ་དང་༔ ནང་བཅུད་སྐྱེ་འགྲོ་རྣམས་ཀྱི་ཚེ་བསོད་དཔལ༔ ལྔ་ལྡན་འོད་དང་ནྲི་ཡིག་རྣམ་པར་བསྡུས༔ རྒྱ་མཚོ་ཆེ་ལ་ཆར་བ་བབས་པ་ལྟར༔ བདག་ཅག་རྣམས་ལ་གཉིས་མེད་སིབ་སིབ་ཐིམ༔ འཆི་མེད་རིིག་འཛིན་ཚེ་ཡི་དངོས་གྲུབ་སྩོལ༔ རྩ་སྔགས་བཟླས་ཤིང་ཏིཥྛ་བཛྲ་བརྗོད༔ ས་མ་ཡཱ༔ རྒྱ་རྒྱ་རྒྱ༔ གཏེར་རྒྱ༔ སྦས་རྒྱ༔ ཟབ་རྒྱ༔ ས་མ་ཡཱ༔ རྒྱ་རྒྱ་རྒྱ༔ ཁམས་པ་ཉི་མ་གྲགས་པས་ཕུག་དཀར་ལྷ་ཡི་གཞལ་ཡས་ནས་ཤིང་མོ་གླང་ལ་གདན་དྲངས་ཤིང་མེ་ཕོ་སྟག་ལ་ཕུག་ནག་བདེ་བ་ཆེན་པོར་ཤོག་སེར་ལས་བསྒྱུར་བ་མངྒ་ལཾ། །

ཚེའི་དབང་ཆོག་དངོས་གྲུབ་སྒྲོམ་བུ།

ཕག་མོ་དཀར་མོའི་ཟབ་ཐིག་ལས༔ ཚེའི་དབང་ཆོག་དངོས་གྲུབ་སྒྲོམ་བུའི་དཔལ་ཞེས་བྱ་བ་བཞུགས༔ ཡེ་ཤེས་མཁའ་འགྲོའི་ལྷ་ཚོགས་རྣམས་ལ་འདུད༔ བདེ་ཆེན་མཁའ་འགྲོའི་དྲོད་ཐོབ་རྣལ་འབྱོར་པས༔ དམ་ལྡན་བུ་ལ་སྨིན་གྲོལ་སྦྱིན་པ་ནི༔ ད་ལ་འམ་ནི་འབྲུ་ཡི་ཚོམ་བུ་བཀོད༔ དབུས་སུ་བུམ་པ་གཡས་སུ་ཚེ་ཆང་དང་༔ གཡོན་དུ་ཚེ་རིལ་རྒྱབ་ཏུ་མདའ་དར་གཟུགས༔ ཐ་མར་མཆོད་ཚོགས་ལ་སོགས་རྒྱས་པར་བཤམས༔ བསྐྱེད་རྫོགས་བསྒོམ་ཞིང་བསྙེན་སྒྲུབ་ཏིང་འཛིན་གསལ༔ ཚེ་འགུགས་ཐུགས་དམ་བསྐུལ་ཞིང་དབང་བཞི་ལེན༔ ལས་བུམ་བསྐྱེད་ཅིང་སློབ་མ་ཁྲུས་ནས་ཕྱུངས༔ བགེགས་ལ་བཀའ་བསྒོ་མཚམས་གཅོད་བསྲུང་འཁོར་བསྒོམ༔ མཎྜལ་འབུལ་ཞིང་སྐྱབས་སེམས་ལོ་རྒྱུས་བརྗོད༔ བསྐྱེདརིམ་གཏད་ཅིང་ཡེ་ཤེས་སེམས་དཔའ་དབབ༔ ས་མ་ཡཱ༔ རྒྱ་རྒྱ་རྒྱ༔ ཚེ་འགུགས་རྒྱས་འདེབས་བུམ་པ་སྤྱི་བོར་བཞག༔ ཧཱུྃ༔ བདེ་ཆེན་མཁའ་འགྲོ་ཚེ་ཡི་རྣལ་འབྱོར་མ༔ དཀར་མོ་འབུམ་གྱི་སྐུ་ལས་འོད་ཟེར་འཕྲོས༔ རྡོ་རྗེའི་སློབ་མ་འདི་ཡི་ལུས་ལ་ཐིམ༔ སྐུ་ཡི་དབང་ཐོབ་ལུས་ཀྱི་སྡིག་སྒྲིབ་དག༔ འབྲས་བུ་སྤྲུལ་སྐུ་འཆི་མེད་རིག་པ་འཛིན༔ སྐལ་ལྡན་རིགས་ཀྱི་བུ་ཡིས་ཐོབ་པར་ཤོག༔ ཧ་བཛྲ་དྷཀྐི་ནི་བྷ་ར་ཧི་ཨཱ་ཡུ་ཥེ་ཧཱུྃ་བྷྲུྃ་ནྲི་ཛ་སིདྡྷི་སྭ་ཧཱ༔ ཀཱ་ཡ་ཨ་བྷི་ཥིཉྩ་ཨོཾ་སྤྱི་བོར་བསྐུར༔ ཚེ་ཆང་མགྲིན་པར་བཞག༔ ཧཱུྃ༔ བདེ་ཆེན་མཁའ་འགྲོ་ཚེ་ཡི་རྣལ་འབྱོར་མ༔ དཀར་མོ་འབུམ་གྱི་གསུང་ལས་འོད་ཟེར་འཕྲོས༔ རྡོ་རྗེའི་སློབ་མ་འདི་ཡི་ངག་ལ་ཐིམ༔ གསུང་གི་དབང་ཐོབ་ངག་གི་སྡིག་སྒྲིབ་དག༔ འབྲས་བུ་ལོངས་སྐུ་འཆི་མེད་རིག་པ་འཛིན༔ སྐལ་ལྡན་རིགས་ཀྱི་བུ་ཡིས་ཐོབ་པར་ཤོག༔ ཧ་བཛྲ་དྷཀྐི་ནི་བྷ་ར་ཧི་ཨཱ་ཥེ་ཧཱུྃ་བྷྲུྃ་ནྲི་ཛ་སི་དྡྷི་སྭཱ་ཧྭ༔ ཝཱ་ཀྐ་ཨ་བྷི་ཥིཉྩ་ཨཱ༔ ངག་ཏུ་བླུད༔ ཚེ་རིལ་སྙིང་གར་བཞག༔ ཧཱུྃ༔ བདེ་ཆེན་མཁའ་འགྲོ་ཚེ་ཡི་རྣལ་འབྱོར་མ༔ དཀར་མོ་འབུམ་གྱི་ཐུགས་ལས་འོད་ཟེར་འཕྲོས༔ རྡོ་རྗེའི་སློབ་མ་འདི་ཡི་ཡིད་ལ་ཐིམ༔ ཐུགས་ཀྱི་དབང་ཐོབ་ཡིད་ཀྱི་སྡིག་སྒྲིབ་དག༔ འབྲས་བུ་ཆོས་སྐུ་འཆི་མེད་རིག་པ་འཛིན༔ སྐལ་ལྡན་རིགས་ཀྱི་བུ་ཡིས་ཐོབ་པར་ཤོག༔ ཧ་བཛྲ་དྷཀྐི་ནི་བྷ་ར་ཧི་ཨཱ་ཡུ་ཥེ་ཧཱུྃ་བྷྲུྃ་ནྲི་ཛ་སིདྡྷི་སྭཱ་ཧཱ༔ ཙིཏྟ་ཨ་བྷི་ཥི་ཉྩ་ཧཱུྃ༔ རིལ་བུ་སྦྱིན༔ མདའ་དར་ཐོགས་ཏེ༔ ཧཱུྃ༔ མཁའ་དབྱིངས་དག་པ་བདེ་བ་ཆེན་པོ་ནས༔ སྐུ་ཡི་བྱིན་རླབས་སློབ་བུའི་ལུས་ལ་བསྟིམ༔ རིན་ཆེན་འཁོར་ལོ་འབར་བས་རྒྱས་བཏབ་པས༔ འཆི་མེད་རིག་འཛིན་དཔལ་ལ་སྤྱོད་པར་ཤོག༔ འགག་མེད་ལྷུན་གྲུབ་ཁྱབ་བརྡལ་ཆེན་པོ་ནས༔ གསུང་གི་བྱིན་རླབས་སློབ་བུའི་ངག་ལ་བསྟིམ༔ རིན་ཆེན་པདྨ་འབར་བས་རྒྱས་བཏབ་པས༔ འཆི་མེད་རིག་འཛིན་དཔལ་ལ་སྤྱོད་པར་ཤོག༔ ཡེ་རྫོགས་ཀློང་ཡངས་དག་པར་རང་གྲོལ་ནས༔ ཐུགས་ཀྱི་བྱིན་རླབས་སློབ་བུའི་སེམས་ལ་བསྟིམ༔ རིན་ཆེན་རྡོ་རྗེ་འབར་བས་རྒྱས་བཏབ་པས༔ འཆི་མེད་རིག་འཛིན་དཔལ་ལ་སྤྱོད་པར་ཤོག༔ འབད་མེད་ཡོངས་གྲོལ་དགོས་འདོད་ཀུན་འབྱུང་ནས༔ ཡོན་ཏན་བྱིན་རླབས་སློབ་བུའི་ལྟེ་བར་བསྟིམ༔ རཏྣ་དགོས་འདོད་ཀུན་འབྱུང་རྒྱས་བཏབ་པས༔ འཆི་མེད་རིག་འཛིན་དཔལ་ལ་སྤྱོད་པར་ཤོག༔ རྩོལ་མེད་མཐར་ཕྱིན་བྱ་གྲུབ་ད་ལ་ནས༔ འཕྲིན་ལས་བྱིན་རླབས་སློབ་བུའི་གསང་བར་བསྟིམ༔ རིན་ཆེན་རྒྱ་གྲམ་འབར་བས་རྒྱས་བཏབ་པས༔ འཆི་མེད་རིག་འཛིན་དཔལ་ལ་སྤྱོད་པར་ཤོག༔ ཧ་བཛྲ་དྷཀྐི་ནིི་བྷ་ར་ཧི་ཨཱ་ཡུ་ཥེ་ཧཱུྃ་བྷྲུྃ་ནྲི་ཛ་སིདྡྷི་སྭཱཧཱ༔ བཛྲ་རཏྣ་པདྨ་ཀརྨ་ཙཀྲ་ཨ་ཝེ་ཤ་ཡ་རཀྵ་རཀྵ་ཡེ་སྭཱ་ཧཱ༔ ཞེས་རིགས་ལྔའི་ཕྱག་མཚན་ནམ་མདའ་དར་གྱིས་རྒྱས་འདེབས༔ འཕྲིན་ལས་དབང་ལ་རྫས་བརྒྱད་སྦྱིན་པར་བྱ༔ གཏང་རག་མཎྜལ་འབུལ་ཞིང་བཀའ་དྲིན་ཁུར༔ མཁའ་འགྲོ་མཆོད་བསྟོད་ཚེ་ཡི་སྒྲུབ་བར་འབུང་༔ ལྷ་གཤེགས་དལ་བསྡུ་བསྔོ་སྨོན་རྒྱས་གདབ་བོ༔ ས་མ་ཡཱ༔ རྒྱ་རྒྱ་རྒྱ༔ ཨེ་མ༔ ཚེ་ཡི་རིག་འཛིན་པདྨ་འབྱུང་གནས་ངས༔ འགྲོ་བའི་དོན་དུ་ཟབ་ཆོས་དཔག་མེད་བཀོད༔ ཁྱད་པར་ཟབ་པའི་སྙིང་པོ་གདམས་པ་འདི༔ མ་འོངས་དོན་དུ་དཀར་མོ་སྐུ་ཡི་གནས༔ ཕག་དཀར་སྒྲུབ་གནས་ལྷ་ཡི་གཞལ་ཡས་སུ༔ གཏད་རྒྱས་བཏབ་ཅིང་སྲུང་མར་གཉེར་བྱང་བཅོལ༔ མ་འོངས་དུས་ན་ང་ཡི་ཐུགས་སྤྲུལ་ཞིག༔ ཁམས་ནས་འབྱུང་ཞིང་གདམས་པ་འདི་དང་འཕྲད༔ གསང་སྒོ་མ་འཆལ་སྒྲུབ་ལ་ཚུལ་བཞིན་འབུངས༔ ཆོས་བདག་རྣམས་ལ་གསང་བར་སྤེལ་ཞིག་རྒྱ༔ བསྟན་པ་སེམས་ཅན་འགྲོ་དོན་ངང་གིས་འགྲུབ༔ ས་མ་ཡཱ༔ རྒྱ་རྒྱ་རྒྱ༔ གཏེར་རྒྱ༔ སྦས་རྒྱ༔ ཟབ་རྒྱ༔ ས་མ་ཡཱ༔ རྒྱ་རྒྱ་རྒྱ༔ ཁམས་པ་ཉི་མ་གྲགས་པས་ཤིང་མོ་གླང་གི་ལོ་ལ་ཆགས་རུ་ཕུག་དཀར་ལྷའི་གཞལ་ཡས་ནས་སྤྱན་དྲངས་ཤིང་མེ་ཕོ་སྟག་གི་ལོ་ལ་ཆགས་རུ་ཕུག་ནག་བདེ་བ་ཆེན་པོའི་རྡོ་རྗེའི་ཀེའུ་ཚང་དུ་ཤོག་སེར་ལས་ཕབ་པ་འདི་ཡང་ཧོར་ཟླ་དྲུག་པའི་ཚེས་བཅུ་ལའོ། །མངྒ་ལཾ། །

བླ་རྡོ་མཁའ་འགྲོའི་ཐུགས་ཐིག

ཕག་མོ་དཀར་མོའི་ཟབ་ཐིག་ལས༔ བླ་རྡོ་མཁའ་འགྲོའི་ཐུགས་ཐིག་བཀའ་རྒྱ་མ་བཞུགས༔ ཡེ་ཤེས་མཁའ་འགྲོའི་ལྷ་ཚོགས་རྣམས་ལ་འདུད༔ ཕྱི་མའི་དུས་ཀྱི་སྐལ་ལྡན་སྒྲུབ་པ་པོས༔ དཀར་པོའི་དར་རམ་རྒྱ་ཤོག་བཟང་པོའི་ངོས༔ མཁའ་འགྲོའི་དུས་ཆེན་གཟའ་སྐར་བཟང་བ་ལ༔ ཡབ་ཡུམ་བྱང་སེམས་པཉྩ་ན་ལན་དས༔ མཁའ་འགྲོའི་ལྟེ་བར་མུ་ཁྱུད་ལྔ་ལྡན་འདྲི༔ དབུས་སུ་ཧ་ལ་བསྙེན་པ་འདོད་གསོལ་སྦྱར༔ ཕྱི་རིམ་རྩིབས་བཞིར་ཧ་རི་ནི་ས་འགོད༔ རྩིབས་མཆན་བཞི་ལ་ཚེ་བསོད་དཔལ་འབྱོར་བཞི༔ འདོད་གསོལ་ཤམ་བུ་དང་བཅས་འགོད་པར་བྱ༔ ཕྱི་རིམ་མུ་ཁྱུད་འབུམ་ཕྲག་མཁའ་འགྲོ་ཡི༔ མཚན་སྔགས་བྲི་ཞིང་འདོད་གསོལ་སྦྱར་བར་བྱ༔ དེ་ཡི་ཕྱི་རིམ་ཚེ་ཡི་གཟུངས་སྔགས་འབྲི༔ དེ་ཡི་ཕྱི་རིམ་ཨཱ་ལི་ཀ་ལི་དང་༔ རྟེན་འབྲེལ་སྙིང་པོ་འབྲི་ཞིང་ཚོན་གྱིས་བསྒྱུར༔ རིན་ཆེན་རྣམ་ལྔ་བཏབ་ཅིང་རབ་ཏུ་གནས༔ དར་གྱིས་དྲིལ་ཞིང་སྦ་ལྕག་མགུལ་དུ་བཏགས༔ རིགས་བཟང་ལྕང་ལོ་འགྲོན་བུ་མེ་ལོང་དང་༔ དར་ཚོན་རྣམ་པ་ལྔས་བརྒྱན་དཀྱིལ་འཁོར་འགོད༔ སྒྲུབ་པ་གྲོལ་ནས་ལུས་ལ་བཅང་བའམ༔ བརྟེན་གཏོར་སྟེང་དུ་བཅངས་ཀྱང་འགལ་བ་མེད༔ འདིས་ནི་མཁའ་འགྲོ་མ་བསྒྲུབས་རང་བཞིན་འདུ༔ དེས་ནི་གཅེས་པར་མཛོད་ལ་ཡིད་ལ་ཆོངས༔ དམ་མེད་འགྲོ་ལ་ཤིན་ཏུ་གསང་ཞིང་སྦ༔ ས་མ་ཡ༔ རྒྱ་རྒྱ་རྒྱ༔ གཏེར་རྒྱ༔ སྦས་རྒྱ༔ དམ་རྒྱ༔ ས་མ་ཡ༔ རྒྱ་རྒྱ་རྒྱ༔ བརྡ་ཡིག །ཁམས་པ་ཉི་མ་གྲགས་པས་ཆགས་རུ་ཕུག་དཀར་ལྷའི་གཞལ་ཡས་ནས་སྤྱན་དྲངས་ཤིང་ཆགས་རུ་ཕུག་ནག་བདེ་བ་ཆེན་པོའི་རྡོ་རྗེའི་ཀེའུ་ཚང་དུ་ཤོག་སེར་ལས་ཕབ་པ་མང་ག་ལཾ། །

ཞི་བའི་སྦྱིན་སྲེག་ནད་གདོན་ཀུན་སྦྱོང་།

ཕག་མོ་དཀར་མོའི་ཟབ་ཐིག་ལས༔ ཞི་བའི་སྦྱིན་སྲེག་ནད་གདོན་ཀུན་སྦྱོང་བཞུགས༔ ཡེ་ཤེས་མཁའ་འགྲོའི་ལྷ་ཚོགས་རྣམས་ལ་འདུད༔ བདེ་ཆེན་དཀར་མོ་བསྒྲུབ་པའི་རྣལ་འབྱོར་པས༔ རྐྱེན་ངན་ནད་གདོན་བར་ཆད་ཞི་འདོད་ན༔ སྟེགས་བུ་ཟླུམ་པོ་དཀར་པོའི་སྟེང་༔ རཾ་གྱི་ཁོག་པར་ཧ་བྲི་ཞིང་༔ དཀར་པོ་ཞི་བ་བྱང་ཆུབ་ཤིང་༔ ཟླུམ་པོར་བརྩེག་ཅིང་ཕག་མོར་བསྒོམ༔ སྔགས་དང་དམིགས་པས་བསྙེན་ཅིང་བསྒྲུབ༔ མེ་ཐབ་བསང་ཞིང་སྟོང་བར་སྦྱངས༔ ཧཱུྃ༔ རཾ་ལས་མེ་ལྷ་དྲང་སྲོང་དཀར༔ སྤྱི་བླུགས་གཡས་ལ་བགྲང་འཕྲེང་གཡོན༔ ཕྱེད་སྐྱིལ་ར་སྐྱེས་ཆིབས་ལ་རོལ༔ ཐུགས་ཀའི་འོད་ཀྱིས་ཤར་ལྷོ་ནས༔ མེ་ལྷ་འཁོར་བཅས་སྤྱན་དྲངས་གྱུར༔ ཨོཾ་ཚུར་བྱོན་འབྱུང་བ་མེ་ཡི་ལྷ༔ དྲང་སྲོང་ཆེན་པོ་གཟི་བརྗིད་འབར༔ བསྐྱེད་པའི་ཐབ་འདིར་བཞུགས་ནས་ཀྱང་༔ སྲེག་བླུགས་མཆོད་པ་འདི་བཞེས་ལ༔ ནད་གདོན་བར་ཆད་ཞི་བར་མཛོད༔ ཨོཾ་ཨགྣཱེ་ཡེ་སོགས་ནས་མཆོད༔ མེ་ལྷའི་ལྟོ་བར་གཞལ་ཡས་དབུས༔ བདེ་ཆེན་རྡོ་རྗེ་རྣལ་འབྱོར་མ༔ འབུམ་ཕྲག་ཡངས་པའི་འཁོར་དང་བཅས༔ གསལ་བར་བསྐྱེད་ཅིང་གསལ་བར་བསྟིམ༔ རྩ་སྔགས་སྲེག་རྫས་ཞི་ཆས་དབུལ༔ ནད་གདོན་བགེགས་དང་བར་དུ་གཅོད་པ་ཐམས་ཅད་ཤཱནྟིང་ཀུ་རུ་སྭཱ་ཧཱ༔ བརྒྱ་རྩས་མཆོད་ཅིང་རྣམ་ལྔ་འབུལ༔ ལྷ་ཚོགས་དགྱེས་ཤིང་བར་ཆད་ཞི༔ དངོས་གྲུབ་ཐམས་ཅད་ཐོབ་པར་བསམས༔ ཡེ་ཤེས་པ་གཤེགས་དམ་ཚིག་བསྡུ༔ གཏང་རག་མཆོད་པ་མེ་ལྷ་ལ༔ དགྱེས་བསྐང་བསྟོད་ཅིང་བཟོད་གསོལ་བཤགས༔ དགེ་བ་བསྔོ་ཞིང་མཐའ་རྒྱས་འདེབས༔ ཆོས་རྣམས་སྟོང་ཉིད་ལ་ཟླ་ཞིང་༔ མ་བཅོས་ཏིང་འཛིན་ངང་ལ་བཞག༔ ཐལ་བ་ཆུ་འམ་རླུང་ལ་འཕྱར༔ ས་མ་ཡཱ༔ རྒྱ་རྒྱ་རྒྱ༔ དེ་ལྟར་བརྩམས་པས་ཉམས་ཆག་སྐོངས༔ སྡིག་སྒྲིབ་འདག་ཅིང་རྐྱེན་ངན་གྲོལ༔ བརྩམས་པའི་འཕྲིན་ལས་འགྲུབ་པར་འགྱུར༔ དེ་བས་ཉམས་སུ་ལོངས་ཤིག་རྒྱ༔ ས་མ་ཡཱ༔ རྒྱ་རྒྱ་རྒྱ༔ གཏེར་རྒྱ༔ སྦས་རྒྱ༔ ཟབ་རྒྱ༔ ས་མ་ཡཱ༔ རྒྱ་རྒྱ་རྒྱ༔ ཁམས་པ་ཉི་མ་གྲགས་པས་ཤིང་མོ་གླང་གི་ལོ་ལ་ཆགས་རུ་ཕུག་དཀར་ལྷའི་གཞལ་ཡས་ནས་གདན་དྲངས་ཤིང་༔ མེ་ཕོ་སྟག་གི་ལོ་ལ་གནས་མཆོག་ཆེན་པོ་ཁམས་སྲིང་མོ་རྫོང་གི་ཕུག་ནག་བདེ་བ་ཆེན་པོའི་རྡོ་རྗེའི་ཀེའུ་ཚང་དུ་ཧོར་ཟླ་དྲུག་པའི་ཚེས་བཅུ་ལ་ཤོག་སེར་ལས་ཞལ་བཤུས་པ་དགེ་ལེགས་འཕེལ། །མངྒལཾ། །

བདེ་ཆེན་དཀར་མོའི་ལས་བྱང་།

ཕག་མོ་དཀར་མོའི་ཟབ་ཐིག་ལས༔ བདེ་ཆེན་དཀར་མོའི་ལས་བྱང་བཞུགས། ཕག་གདོང་བདེ་ཆེན་དཀར་མོ་ལ་ཕྱག་འཚལ་ལོ། རྣལ་འབྱོར་པས་དོན་གཉིས་ཀྱི་ཕྱིར་དུ་ཕག་གདོང་བདེ་ཆེན་དཀར་མོའི་ཉམས་ལེན་འདོད་པས་དབེན་པའི་གནས་སུ་དཀྱིལ་འཁོར་སྨན་རག་གཏོར་མ་ཚོགས་དང་མཆོད་རྫས་རྣམས་གཞུང་ལྟར་བཤམས། ཐུན་མོང་གི་སྔོན་འགྲོ་ཆོས་སྤྱོད་གསོལ་འདེབས་གཏོར་མ་ཆ་གཉིས་སོགས་མཐོང་བརྒྱུད་ཕྱག་ལེན་ལྟར་བྱ། དེ་ནས་དངོས་གཞི་བསྒོམ་དང་ལྡན་པས་རོལ་མོ་རྣམས་འཁྲོལ་ཞིང་བགེགས་ལ་བཀའ་བསྒོ་བ་ནི༔ ཧཱུྃ༔ ང་ནི་བདེ་ཆེན་དཀར་མོའི་སྐུ༔ ཆོས་ཀྱི་དབྱིངས་ལས་སྤྲུལ་པའི་མ༔ མཁའ་འགྲོའི་སྤྲུལ་པས་སྟོང་གསུམ་གང་༔ ལོག་པར་ལྟ་བའི་གདོན་བགེགས་རྣམས༔ རྡུལ་ཕྲན་བཞིན་དུ་རླག་པར་བྱེད༔ དེ་བས་རང་རང་གནས་སུ་དེངས༔ ཧཱུྃ་བཞིའི་སྔགས་བརྗོད༔ མཚམས་གཅོད་པ་ནི༔ ཧཱུྃ༔ རབ་ཏུ་ཁྲོས་པའི་མཁའ་འགྲོ་འབུམ༔ དྲག་ཏུ་བསྐྱོད་ལ་སྐུ་བཞེངས་ཤིག༔ དུར་ཁྲོད་མཁའ་འགྲོའི་ཕོ་བྲང་འདིར༔ གནོད་བྱེད་གདོན་བགེགས་མཚམས་ཆོད་ཅིག༔ ཧ་བཛྲ་དྷཀྐི་ནི་བྷ་ར་ཧི་ཧཱུྃ་ཕཊ༔ རཀྵ་རཀྵ་སྭཱ་ཧཱ༔ སྐྱབས་སུ་འགྲོ་བ་ནི༔ ན་མོ་བླ་མ་ཡི་དམ་མཁའ་འགྲོ་སྟེ༔ རྩ་བ་གསུམ་ལ་སྐྱབས་སུ་མཆི༔ སེམས་བསྐྱེད་པ་ནི། འགྲོ་བ་སེམས་ཅན་དོན་སླད་དུ༔ མཁའ་འགྲོའི་བསྐྱེད་རྫོགས་སྒོམ་བཟླས་བསྒྲུབ༔ གསུམ། ཡན་ལག་བདུན་པ་ནི༔ ཧཱུྃ༔ བླ་མ་ཡི་དམ་མཁའ་འགྲོ་གཤེགས༔ ཉི་ཟླ་པདྨའི་གདན་ལ་བཞུགས༔ ལུས་ངག་ཡིད་གསུམ་གུས་ཕྱག་འཚལ༔ ཕྱི་ནང་གསང་བའི་མཆོད་པ་འབུལ༔ ཉམས་ཆག་སྡིག་སྒྲིབ་མཐོལ་ལོ་བཤགས༔ གསང་སྔགས་བསྒྲུབ་ལ་རྗེས་ཡི་རང་༔ སྨིན་གྲོལ་ཆོས་འཁོར་བསྐོར་དུ་གསོལ༔ མྱ་ངན་མི་འདར་གསོལ་བ་འདེབས༔ དགེ་བ་བྱང་ཆུབ་ཆེན་པོར་བསྔོ༔ ཐམས་ཅད་སངས་རྒྱས་ཐོབ་པར་ཤོག༔ ཚད་མེད་བཞི་སྒོམ་པ་ནི། འདོན་བྱ་གཞུང་དུ་མི་གསལ་བ་གཞན་ནས་བླངས་པ། སེམས་ཅན་བདེ་དང་ལྡན་གྱུར་ཅིག །སྡུག་བསྔལ་ཀུན་དང་བྲལ་བར་ཤོག །བདེ་དང་རྟག་ཏུ་མི་འབྲལ་ཞིང་། ཆོས་ཀུན་མཉམ་ཉིད་དོན་རྟོག་ཤོག །མཆོད་པ་བྱིན་གྱིས་བརླབས་པ་ནི༔ ཧཱུྃ༔ རང་ཉིད་ལྷར་གསལ་ཐུགས་ཀ་ནས༔ འོད་ཟེར་འཕྲོ་འདུའི་ཏིང་འཛིན་གྱིས༔ མཆོད་པའི་མ་དག་ཉེས་པ་སྦྱངས༔ ཡེ་ཤེས་འདོད་དགུའི་བདུད་རྩིར་བསྒྱུར༔ ཧ་བཛྲ་དྷཀྐི་ནི་བྷ་ར་ཧི་ཧཱུྃ་ཕཊ༔ ཨོཾ་ཨཱཿཧཱུྃ་སརྦ་པཉྩ་ཨམྲྀ་ཏ་རཀྟ་བྷ་ལིངྟ་པཱུ་ཙ་ས་མ་ཡེ་སྭཱ་ཧཱ༔ གསུམ། བྱིན་དབབ་པ་ནི༔ ཧཱུྃ༔ དབྱིངས་ཀྱི་མཁའ་འགྲོའི་ཕོ་བྲང་ནས༔ བདེ་ཆེན་དཀར་མོ་མཁའ་འགྲོའི་རྗེ༔ མཁའ་འགྲོ་མ་ཚོགས་འབུམ་གྱིས་བསྐོར༔ སྒྲུབ་པའི་གནས་འདིར་བྱིན་ཅིག་ཕོབ༔ ཧ་བཛྲ་དྷཀྐི་ནི་བྷ་ར་ཧི་ཨ་ཝེ་ཤ་ཡ་ཨཱ་ཨཱ༔ བརྡ་སྒོ་དབྱེ་བ་ནི༔ ཧཱུྃ༔ བརྗོད་མེད་མ་བཅོས་དེ་བཞིན་ཉིད༔ ངན་རྟོག་དབང་གིས་འཁོར་བར་འཁྱམས༔ གཟུང་འཛིན་སྐྱེ་མེད་རང་གྲོལ་པའི༔ ཡེ་ཤེས་དོན་གྱི་སྒོ་དབྱེ་འཚལ༔ པྲ་ཝེ་ཤ་ཡ་ཧོཿ བརྡ་ཕྱག་ནི༔ ཧཱུྃ༔ སྐྱེ་མེད་གཉུག་མའི་རང་བྱུང་ལྷ༔ རང་དང་འགྲོགས་ཀྱང་ཞལ་མ་འཇལ༔ དུས་འདིར་རང་རིག་རང་ངོར་ཤར༔ རང་གྲོལ་དོན་གྱི་ཕྱག་འཚལ་ལོ༔ ས་མ་ཡཿ ཨ་ལ་ལ་ཧཱུྃ༔ དམ་བཤགས་ནི༔ ཧཱུྃ༔ གདོད་ནས་རང་དང་གཉིས་མེད་ཀྱང་༔ གཉིས་འཛིན་དབང་གིས་སོ་སོར་ཕྱེ༔ ཆོས་དབྱིངསམཁའ་འགྲོའི་ལྷ་ཚོགས་ལ༔ གཉིས་སུ་མེད་པའི་ངང་དུ་བཤགས༔ ས་མ་ཡ་ཤུདྡྷེ་ཨ༔ བསྐྱེད་རིམ་ནི༔ ཧཱུྃ༔ སྣང་བའི་རང་བཞིན་སྟོང་པའི་ཀློང་ཡངས་ན༔ ཆོས་འབྱུང་ཉི་ཟླ་པདྨའི་གདན་སྟེང་དུ༔ སྟོང་པའི་ཡེ་ཤེས་ངོ་བོ་ཟང་ཐལ་ཧ༔ འོད་ཟེར་འཕྲོ་འདུའི་སྦྱོར་བས་སྐད་ཅིག་གི༔ བདག་ཉིད་རིག་པའི་ངོ་བོ་བཅོམ་ལྡན་མ༔ ཕག་མོ་དཀར་མོ་ཚེ་བུམ་མདའ་དར་ཅན༔ གར་སྟབས་རུས་རྒྱན་དར་དཔྱངས་ཁ་ཊྭཱཾ་བརྟེན༔ ཞི་འཛུམ་ཉམས་ལྡན་དབུ་སྐྲ་སིལ་བུར་འཕྱང་༔ རིན་ཆེན་ནོར་བུ་དབང་གི་རྩེ་བྲན་ལྡན༔ ཕག་ཞལ་དཀར་མོས་གད་བརྒྱངས་ཕྱོགས་བཅུར་སྒྲོགས༔ ཡེ་ཤེས་རབ་རྒྱས་གཟི་བརྗིད་ལྡན་པར་བསྒོམ༔ སྤྱན་འདྲེན་པ་ནི༔ ཧཱུྃ༔ བདེ་ཆེན་དཀར་མོ་ཕག་མོ་དྷཀྐི་མ༔ དཀར་མོ་འབུམ་གྱི་མ་ཚོགས་འཁོར་དང་བཅས༔ ནམ་མཁའ་ས་གཞི་བར་སྣང་ཁྱབ་པར་ཁེངས༔ འོད་ཟེར་ལྔ་ལྡན་གར་སྟབས་ཤིགས་སེ་ཤིག༔ མ་ལུས་འཁོར་བཅས་གནས་འདིར་སྤྱན་འདྲེན་ན༔ མོས་པའི་བུ་ལ་བྱིན་གྱིས་བརླབ་ཕྱིར་གཤེགས༔ མཆོག་དང་ཐུན་མོང་དངོས་གྲུབ་དུས་འདིར་སྩོལ༔ ཧ་བཛྲ་དྷཀྐི་ནི་སརྦ་ས་མ་ཡ་ཧྲིང་ཧྲིང་ཛཿཛ་ཨ་ཝེ་ཤ་ཡ་ཨ་ཨཱ༔ བཞུགས་སུ་གསོལ་བ་ནི༔ ཧཱུྃ༔ མཁའ་དབྱིངས་དག་པ་ཨེ་ཡི་ཀློང་དཀྱིལ་ན༔ ཉི་ཟླ་པདྨའི་གདན་ཁྲི་ཡངས་པའི་དཀྱིལ༔ དཀར་མོ་མཁའ་འགྲོ་འབུམ་གྱི་ལྷ་ཚོགས་རྣམས༔ གདོད་ནས་དག་པའི་དབྱིངས་སུ་བཞུགས་སུ་གསོལ༔ ཧ་བཛྲ་དྷཀྐི་ནི་ས་མ་ཡ་ཏིཥྛ་ལྷན༔ ཕྱག་ནི༔ ཧཱུྃ༔ ངོ་བོ་ཉིད་ལས་ཤར་བའི་བཅོམ་ལྡན་མ༔ རང་རིག་སྐྱེ་འགགས་བྲལ་བ་རྒྱལ་བའི་ཡུམ༔ སོ་སོར་རྟོགས་པའི་ཡེ་ཤེས་འཕྲུལ་མོ་ཆེ༔ གཉིས་སུ་མེད་པར་བརྡ་ཡི་ཕྱག་འཚལ་ལོ༔ མཆོད་པ་ནི༔ ཧཱུྃ༔ གཟུགས་མཛེས་ལྷ་མོ་སྣང་བའི་མདངས་ལྡན་མ༔ མེ་ལོང་ཕྱག་རྒྱ་འཆང་བའི་གར་མཁན་མོ༔ སྟོང་གསུམ་ཁྱབ་པར་སྤྲུལ་ཏེ་མཆོད་པར་འབུལ༔ སྤྱན་གྱི་དབང་པོ་ཚིམ་ཕྱིར་བཞེས་སུ་གསོལ༔ སྒྲ་ཡི་ལྷ་མོ་གྲག་པའི་མདངས་ལྡན་མ༔ པི་ཝང་ཕྱག་རྒྱ་འཆང་བའི་གླུ་དབྱངས་མ༔ སྟོང་གསུམ་ཁྱབ་པར་སྤྲུལ་ཏེ་མཆོད་པ་འབུལ༔ སྙན་གྱི་དབང་པོ་ཚིམ་ཕྱིར་བཞེས་སུ་གསོལ༔ དྲི་ཡི་ལྷ་མོ་དག་པའི་མདངས་ལྡན་མ༔ སྤོས་ཁང་ཕྱག་རྒྱ་དྲི་བསུང་སྤོས་ངད་ལྡན༔ སྟོང་གསུམ་ཁྱབ་པར་སྤྲུལ་ཏེ་མཆོད་པ་འབུལ༔ ཤངས་ཀྱི་དབང་པོ་ཚིམ་ཕྱིར་བཞེས་སུ་གསོལ༔ རོ་ཡི་ལྷ་མོ་ཟག་མེད་མདངས་ལྡན་མ༔ རོ་བརྒྱ་ལྡན་པའི་ཞལ་ཟས་འཆང་བའི་མ༔ སྟོང་གསུམ་ཁྱབ་པར་སྤྲུལ་ཏེ་མཆོད་པ་འབུལ༔ ལྗགས་ཀྱི་དབང་པོ་ཚིམ་ཕྱིར་བཞེས་སུ་གསོལ༔ རེག་བྱའི་ལྷ་མོ་བདེ་སྟོང་མདངས་ལྡན་མ༔ པཉྩ་ལི་ཀས་སྤྲས་པའི་ཕྱག་རྒྱ་ཅན༔ སྟོང་གསུམ་ཁྱབ་པར་སྤྲུལ་ཏེ་མཆོད་པ་འབུལ༔ སྐུ་ཡི་དབང་པོ་དགྱེས་ཕྱིར་བཞེས་སུ་གསོལ༔ ཧཱུྃ༔ དམ་རྫས་རྒྱན་པའི་གཏོར་མ་རི་ལྟར་སྤུངས༔ ཟག་མེད་བདུད་རྩིའི་མཆོད་པ་མཚོ་ལྟར་བསྐྱིལ༔ ཨརྒྷཾ་དམར་གྱི་ཚོགས་ནི་རྫིང་ལྟར་བསགས༔ ཕྱི་ནང་མཆོད་གཏོར་བཀོད་པས་ཁྱད་འཕགས་འདི༔ བཅོམ་ལྡན་འདས་མ་འཁོར་དང་བཅས་ལ་འབུལ༔ བཞེས་ནས་མཆོག་དང་ཐུན་མོང་དངོས་གྲུབ་སྩོལ༔ ཨཱོཾ་ཨཱ་ཧཱུྃ་བཛྲ་པུཥྤེ་དྷཱུཔྤེ་ཨཱ་ལོ་ཀེ་གྷནྡྷེ་ནཻ་ཝི་ཏྱ་ཤཔྟ་པཱུ་ཙ་ཧོ༔ རཱུ་པ་ཤཔྟ་གྷནྡྷེ་རཱ་ས་པར་ཤེ་བྷ་ལིངྟ་ཨ་མྲྀ་ཏ་རཀྟ་མ་ཧཱ་སརྦ་པཱུ་ཙ་ཧོ༔ བསྟོད་པ་ནི༔ ཧཱུྃ༔ སྐྱེ་མེད་དབྱིངས་ལས་ཤར་བའི་ཕག་གདོང་མ༔ འགག་མེད་འཁོར་ལོས་སྒྱུར་བའི་མཁའ་འགྲོའི་གཙོ༔ སྤྲུལ་པའི་མཁའ་འགྲོ་དམ་ཚིག་ཚེ་ཡི་ལྷ༔ བདེ་ཆེན་དཀར་མོ་འཁོར་དང་བཅས་ལ་བསྟོད༔ འཛབ་ནི། ཧཱུྃ༔ བསྐྱེད་པའི་ལྷ་སྐུ་སྣང་སྟོང་ཕྱག་རྒྱ་ཆེ༔ འབྱུང་བཞི་སྦྱངས་པས་ཡེ་ཤེས་འོད་ལྔའི་ཀློང་༔ རིག་པའི་རང་མདངས་རྡོ་རྗེ་རྣལ་འབྱོར་མ༔ བཟླས་པའི་སྙིང་པོ་རྡོ་རྗེ་ལུ་གུ་རྒྱུད༔ ཐབས་ཀྱི་མདའ་དར་འཁོར་འདས་ཀུན་ཏུ་གཡབ༔ ཐུགས་རྗེ་བྱིན་རླབས་ཚེ་བསོད་དཔལ་འབྱོར་སྟོབས༔ འབྱུང་བཞིའི་དངས་མ་བླ་ཚེ་ཆད་དམ་ཉམས༔ ལྔ་ལྡན་འོད་དང་ནྲི་ཡིག་རྣམ་པར་བསྡུས༔ ཤེས་རབ་བུམ་པར་བསྐྱིལ་ནས་ཡེ་ཤེས་རྒྱས༔ བདེ་སྟོང་ཟུང་འཇུག་ཐབས་ཤེས་འོད་ཟེར་ལྔ༔ རྣལ་འབྱོར་ལུས་ལ་ཐིམ་པས་ཚེ་བསོད་རྒྱས༔ མཆོག་དང་ཐུན་མོང་དངོས་གྲུབ་ཐོབ་པར་བསམས༔ མ་ཡེངས་ཏིང་འཛིན་ངང་ནས་འཛབ་འདི་བགྲངས༔ ཧ་བཛྲ་དྷཀྐི་ནི་བྷ་ར་ཧི་ཨཱ་ཡུ་ཥེ་ཧཱུྃ་བྷྲུྃ་ནྲི་ཛཿསིདྡྷི་སྭཱ་ཧཱཿཨཱོོཾ་ཤནྟིང་ཀུ་རུ་ཡེ་སྭཱ་ཧཱཿ བརྒྱ་སྟོང་ཁྲི་འབུམ་སྐབས་ལྟར་བཟླས། དེ་ནས་ཚེ་འགུགས་པ་ནི། མདའ་དར་གཡབ་ཅིང་། ཧཱུྃ༔ རྡོ་རྗེ་ཕག་མོ་བདེ་ཆེན་ཞི་བ་འཚོ༔ དུས་གསུམ་སངས་རྒྱས་བསྐྱེད་པའི་ཡུམ་ཆེན་མོ༔ བསྐྱེད་པའི་ལྷ་མོ་བསྒྲུབ་པའི་མཁའ་འགྲོ་མ༔ དམ་ཚིག་ཆེན་པོའི་ཐུགས་དམ་དུས་ལ་བབ༔ དབྱིངས་ནས་བཞེངས་ཤིག་རྡོ་རྗེ་རྣལ་འབྱོར་མ༔ སྤྲུལ་པ་སྒྱུར་ཅིག་དཔལ་གྱི་མཁའ་འགྲོའི་ཚོགས༔ ཚེ་བསོད་སྡུས་ཤིག་ལས་བྱེད་ཕོ་ཉ་རྣམས༔ ཧཱུྃ༔ མ་གཡེལ་མ་གཡེལ་ཚེ་ཡི་དྷཀྐི་རྣམས༔ སྐུ་ལས་བསྐྱེད་ཅིང་སྤྲུལ་པའི་ཚེ་འགུགས་མ༔ དཀར་མོ་འབུམ་ཕྲག་ཕྱོགས་བཅུའི་ཞིང་དུ་འཕྲོས༔ ལྕགས་ཀྱུའི་ཕྱག་རྒྱ་སྒྱུར་ཞིང་གར་སྟབས་འཁྱུག༔ ཕྱོགས་བཅུའི་སངས་རྒྱས་རྣམས་ཀྱི་བྱིན་རླབས་དང་༔ དུས་གསུམ་རིག་འཛིན་རྣམས་ཀྱི་ཐུགས་རྗེ་དང་༔ ཕྱི་སྣོད་འབྱུང་བ་བཞི་ཡི་དྭངས་མ་དང་༔ ནང་བཅུད་སྐྱེ་འགྲོ་རྣམས་ཀྱི་ཚེ་བསོད་དཔལ༔ ལྔ་ལྡན་འོད་དང་ནྲི་ཡིག་རྣམ་པར་སྡུས༔ རྒྱ་མཚོ་ཆེ་ལ་ཆར་བ་བབས་པ་ལྟར༔ བདག་ཅག་རྣམས་ལ་གཉིས་མེད་སིབ་སིབ་ཐིམ༔ འཆི་མེད་རིག་འཛིན་ཚེ་ཡི་དངོས་གྲུབ་སྩོལ༔ ཧཱུྃ༔ མ་གཡེལ་མ་གཡེལ་ཚེ་ཡི་དྷཀྐི་རྣམས༔ སྐུ་ལས་བསྐྱེད་ཅིང་སྤྲུལ་པའི་ཚེ་འགུགས་མ༔ སེར་མོ་འབུམ་ཕྲག་ཕྱོགས་བཅུའི་ཞིང་དུ་འཕྲོས༔ ཞགས་པའི་ཕྱག་རྒྱ་སྒྱུར་ཞིང་གར་སྟབས་འཁྱུག༔ ཕྱོགས་བཅུའི་སངས་རྒྱས་རྣམས་ཀྱི་བྱིན་རླབས་དང་༔ དུས་གསུམ་རིག་འཛིནརྣམས་ཀྱི་ཐུགས་རྗེ་དང་༔ ཕྱི་སྣོད་འབྱུང་བ་བཞི་ཡི་དྭངས་མ་དང་༔ ནང་བཅུད་སྐྱེ་འགྲོ་རྣམས་ཀྱི་ཚེ་བསོད་དཔལ༔ ལྔ་ལྡན་འོད་དང་ནྲི་ཡིག་རྣམ་པར་སྡུས༔ རྒྱ་མཚོ་ཆེ་ལ་ཆར་བ་བབས་པ་ལྟར༔ བདག་ཅག་རྣམས་ལ་གཉིས་མེད་སིབ་སིབ་ཐིམ༔ འཆི་མེད་རིག་འཛིན་ཚེ་ཡི་དངོས་གྲུབ་སྩོལ༔ ཧཱུྃ༔ མ་གཡེལ་མ་གཡེལ་ཚེ་ཡི་དྷཀྐི་རྣམས༔ སྐུ་ལས་བསྐྱེད་ཅིང་སྤྲུལ་པའི་ཚེ་འགུགས་མ༔ དམར་མོ་འབུམ་ཕྲག་ཕྱོགས་བཅུའི་ཞིང་དུ་འཕྲོས༔ ལྕགས་སྒྲོག་ཕྱག་རྒྱ་སྒྱུར་ཞིང་གར་སྟབས་འཁྱུག༔ ཕྱོགས་བཅུའི་སངས་རྒྱས་རྣམས་ཀྱི་བྱིན་རླབས་དང་༔ དུས་གསུམ་རིག་འཛིན་རྣམས་ཀྱི་ཐུགས་རྗེ་དང་༔ ཕྱི་སྣོད་འབྱུང་བ་བཞི་ཡི་དྭངས་མ་དང་༔ ནང་བཅུད་སྐྱེ་འགྲོ་རྣམས་ཀྱི་ཚེ་བསོད་དཔལ༔ ལྔ་ལྡན་འོད་དང་ནྲི་ཡིག་རྣམ་པར་སྡུས༔ རྒྱ་མཚོ་ཆེ་ལ་ཆར་པ་བབས་པ་ལྟར༔ བདག་ཅག་རྣམས་ལ་གཉིས་མེད་སིབ་སིབ་ཐིམ༔ འཆི་མེད་རིག་འཛིན་ཚེ་ཡི་དངོས་གྲུབ་སྩོལ༔ ཧཱུྃ༔ མ་གཡེལ་མ་གཡེལ་ཚེ་ཡི་དྷཀྐི་རྣམས༔ སྐུ་ལས་བསྐྱེད་ཅིང་སྤྲུལ་པའི་ཚེ་འགུགས་མ༔ ལྗང་མོ་འབུམ་ཕྲག་ཕྱོགས་བཅུའི་ཞིང་དུ་འཕྲོས༔ དྲིལ་བུའི་ཕྱག་རྒྱ་སྒྱུར་ཞིང་གར་སྟབས་འཁྱུག༔ ཕྱོགས་བཅུའི་སངས་རྒྱས་རྣམས་ཀྱི་བྱིན་རླབས་དང་༔ དུས་གསུམ་རིག་འཛིན་རྣམས་ཀྱི་ཐུགས་རྗེ་དང་༔ ཕྱི་སྣོད་འབྱུང་བ་བཞི་ཡི་དྭངས་མ་དང་༔ ནང་བཅུད་སྐྱེ་འགྲོ་རྣམས་ཀྱི་ཚེ་བསོད་དཔལ༔ ལྔ་ལྡན་འོད་དང་ནྲི་ཡིག་རྣམ་པར་བསྡུས༔ རྒྱ་མཚོ་ཆེ་ལ་ཆར་བ་བབས་པ་ལྟར༔ བདག་ཅག་རྣམས་ལ་གཉིས་མེད་སིབ་སིབ་ཐིམ༔ འཆི་མེད་རིག་འཛིན་ཚེ་ཡི་དངོས་གྲུབ་སྩོལ༔ ཧཱུྃ༔ མ་གཡེལ་མ་གཡེལ་ཚེ་ཡི་དྷཀྐི་རྣམས༔ སྐུ་ལས་བསྐྱེད་ཅིང་སྤྲུལ་པའི་ཚེ་འགུགས་མ༔ སྔོན་མོ་འབུམ་ཕྲག་ཕྱོགས་བཅུའི་ཞིང་དུ་འཕྲོས༔ འཁོར་ལོའི་ཕྱག་རྒྱ་སྒྱུར་ཞིང་གར་སྟབས་འཁྱུག༔ ཕྱོགས་བཅུའི་སངས་རྒྱས་རྣམས་ཀྱི་བྱིན་རླབས་དང་༔ དུས་གསུམ་རིག་འཛིན་རྣམས་ཀྱི་ཐུགས་རྗེ་དང་༔ ཕྱི་སྣོད་འབྱུང་བ་བཞི་ཡི་དྭངས་མ་དང་༔ ནང་བཅུད་སྐྱེ་འགྲོ་རྣམས་ཀྱི་ཚེ་བསོད་དཔལ༔ ལྔ་ལྡན་འོད་དང་ནྲི་ཡིག་རྣམ་པར་སྡུས༔ རྒྱ་མཚོ་ཆེ་ལ་ཆར་བ་བབས་པ་ལྟར༔ བདག་ཅག་རྣམས་ལ་གཉིས་མེད་སིབ་སིབ་ཐིམ༔ འཆི་མེད་རིག་འཛིན་ཚེ་ཡི་དངོས་གྲུབ་སྩོལ༔ དངོས་གྲུབ་ལེན་པ་ནི། ཧཱུྃ༔ མཁའ་འགྲོ་རྒྱ་མཚོ་དབང་གི་དཀྱིལ་འཁོར་དུ༔ སྐུ་ལྔའི་ཡོན་ཏན་མ་ལུས་འདུས་པའི་དཔལ༔ བདེ་ཆེན་དཀར་མོའི་སྐུ་དང་གཉིས་སུ་མེད༔ དམ་རྫས་གཏོར་ཆེན་མཆོག་གི་དངོས་གྲུབ་ཞུ༔ མ་དང་མཁའ་འགྲོ་བརྟེན་ཕྱིར་བདག་ལ་སྩོལ༔ ཧཱུྃ༔ བདེ་ཆེན་དཀར་མོ་དུས་གསུམ་རྒྱལ་བའི་ཡུམ༔ རྡོ་རྗེ་དྷཀྐི་ཞི་བའི་མཁའ་འགྲོའི་གཙོ༔ འགྱུར་མེད་རྣམ་དག་སྐུ་ཡི་སྒོ་ཕྱེ་ནས༔ འཆི་མེད་རིགས་འཛིན་ཚེ་ཡི་དངོས་གྲུབ་སྩོལ༔ འགག་མེད་རྣམ་དག་གསུང་གི་སྒོ་ཕྱེ་ནས༔ ཚངས་དབྱངས་དྲུག་བཅུ་གསུང་གི་དངོས་གྲུབ་སྩོལ༔ སྤྲོས་མེད་རྣམ་དག་ཐུགས་ཀྱི་སྒོ་ཕྱེ་ནས༔ ཕྱག་རྒྱ་ཆེན་པོ་མཆོག་གི་དངོས་གྲུབ་སྩོལ༔ རིན་ཆེན་བུམ་བཟང་དཔག་བསམ་ནོར་བུའི་ཚུལ༔ དགོས་འདོད་ཀུན་འབྱུང་མཆོག་ཐུན་དངོས་གྲུབ་སྩོལ༔ ཧ་བཛྲ་དྡྷཀྐི་ནི་བྷ་ར་ཧི་ཀཱ་ཡ་ཝཱ་ཀྐ་ཙིཏྟ་སིདྡྷི་ཧཱུྃ༔ བཀའ་གཏེར་སྲུང་མ་མཆོད་ཅིང་ཚོགས་འཁོར་བཤམས་ཏེ། ཧཱུྃ༔ སྐྱེ་མེད་དབྱིངས་ཀྱི་མཁའ་ཀློང་ནས༔ ཟག་མེད་བདུད་རྩིའི་བཅུད་འཕྲོས་པས༔ གྷ་ན་ཚོགས་ཀྱི་འཁོར་ལོར་ཕོག༔ འདོད་ཡོན་ལོངས་སྤྱོད་སྣང་སྲིད་བཀང་༔ ཨཱོོཾ་ཨཱཿཧཱུྃ་སྭཱ་ཧཱཿ སྤྱན་འདྲེན་པ་ནི༔ ཧཱུྃ༔ ཆོས་དབྱིངས་མཁའ་འགྲོའི་ཕོ་བྲང་ནས༔ བདེ་ཆེན་དཀར་མོ་མཁའ་འགྲོའི་གཙོ༔ འབུམ་ཕྲག་དྷཀྐིའི་འཁོར་གྱིས་བསྐོར༔ གནས་འདིར་མདུན་གྱི་མཁའ་ལ་སྤྱོན༔ ཚོགས་ཀྱི་མཆོད་པ་བཞེས་སུ་གསོལ༔ མཆོད་པ་ནི༔ ཧཱུྃ༔ རོ་བརྒྱ་ལྡན་པའི་ཞལ་ཟས་བཤོས༔ མཾ་ས་ཤ་དང་སུ་ར་ཆང་༔ བཟའ་བཏུང་ལོངས་སྤྱོད་སྣ་ཚོགས་པ༔ མཆོད་པ་འབུལ་ལོ་བཞེས་སུ་གསོལ༔ ཧ་བཛྲ་དྷཀྐི་ནི་བྷ་ར་ཧི་གྷ་ན་པཱུ་ཙ་སརྦ་ས་མ་ཡ་ཁཱ་ཧི་ཁཱ་ཧི༔ བཤགས་པ་ནི༔ ཧཱུྃ༔ ཡེ་ཤེས་མཁའ་འགྲོའི་ལྷ་ཚོགས་དགོངས༔ རང་རྒྱུད་རྨོངས་པས་མི་དགེ་བསགས༔ ཉམས་ཆག་སྡིག་སྒྲིབ་གནོང་ངོ་འགྱོད༔ ཚོགས་མཆོད་འདི་ཡིས་དག་གྱུར་ཅིག༔ གྷ་ན་པཱུ་ཙ་ཁཱ་ཧི་ཤུདྡྷེ་ཨཱ༔ བསྒྲལ་ལས་ནི༔ ཧཱུྃ༔ བདེ་ཆེན་དཀར་མོ་འཇིགས་གཟུགས་བརྔམ༔ རབ་བཏུམ་འཁྲུག་པས་དུག་གསུམ་འབར༔ སྐུ་གསུང་ཐུགས་སྤྲུལ་སྟོང་གསུམ་གང་༔ སྒྲོལ་བྱེད་འབུམ་སྡེས་དགྲ་བགེགས་སྒྲོལ༔ བཛྲ་དྷཀྐི་ནི་ནྲི་ཏྲི་དགྲ་བགེགས་ཤ་ཏྲུཾ་མཱ་ར་ཡ་ཧཱུྃ་ཕཊ༔ སྟོབ་པ་ནི༔ ཧཱུྃ༔ མཁའ་འགྲོའི་ཚོགས་རྣམས་དགྱེས་པར་རོལ༔ ཁཱ་ཧི་ཁཱ་ཧི་འདོད་ཆགས་ཁྲག་ལ་ཁཱ་ཧི༔ ཁཱ་ཧི་ཁཱ་ཧི་ཞེ་སྡང་རུས་ལ་ཁཱ་ཧི༔ ཁཱ་ཧི་ཁཱ་ཧི་གཏི་མུག་ཤ་ལ་ཁཱ་ཧི༔ ལྷག་མ་ནི༔ ཧཱུྃ༔ མཁའ་འགྲོའི་བཀའ་ཡི་དཀྱིལ་འཁོར་ནས༔ དུར་ཁྲོད་ཉུལ་ཞིང་མཁའ་ལ་རྒྱུ༔ ལས་སུ་གསང་སྔགས་བསྟན་པ་བསྲུང་༔ ཟས་སུ་ཤ་ཁྲག་དམར་ལ་གསོལ༔ སྤྲུལ་བ་འབུམ་འབུམ་མཁའ་འགྲོའི་ཚོགས༔ ལྷག་མའི་ལོངས་སྤྱོད་འདི་བཞེས་ལ༔ རྣལ་འབྱོར་བདག་གི་འཕྲིན་ལས་སྒྲུབས༔ སརྦ་དྷཀྐི་ནི་ས་མ་ཡ་ཁཱ་ཧི༔ ཆད་ཐོ་ནི༔ ཧཱུྃ༔ སྔོན་ཚེ་བསྐལ་པ་དང་པོ་ལ༔ ཆོས་དབྱིངས་མཁའ་འགྲོའི་དུར་ཁྲོད་དུ༔ གཙོ་མོ་བདེ་ཆེན་དཀར་མོ་ཡིས༔ དམ་ལ་བཞག་པའི་མཁའ་འགྲོ་འབུམ༔ ཤ་ཁྲག་གཏོར་མ་འདི་བཞེས་ལ༔ གསང་སྔགས་བླ་མེད་བསྟན་པ་སྲུངས༔ དགྲ་བགེགས་སྒྲོལ་ལ་བར་ཆད་ཟློག༔ བཅོལ་བའི་འཕྲིན་ལས་གྲུབ་པར་མཛོད༔ ཧཱུྃ། དེ་འོག་བར་གྱི་བསྐལ་པ་ལ། །ཁམས་ཀྱི་སྲིང་མོ་རྫོང་གསུམ་གྱི། །གནས་མཆོག་ཆགས་རུ་ཕུག་དཀར་ནས། །ཁམས་པ་ཉི་མ་གྲགས་པ་ཡིས། །ཟབ་ཆོས་གཏེར་སྒོ་ཕྱེ་བའི་ཚེ། །གཡར་དམ་ཕོག་པའི་ལྷ་འདྲེ་རྣམས། །དམར་གྱི་གཏོར་མ་འདི་བཞེས་ལ། བཅོལ་བའི་འཕྲིན་ལས་གྲུབ་པར་མཛོད། །ཧཱུྃ། ད་ལྟ་སྔགས་འཆང་བདག་ཉིད་ཀྱིས། །གསལ་བ་གསུམ་གྱི་དཀྱིལ་འཁོར་དུ། ཤེས་པ་གསུམ་གྱི་གཟེར་གདབ་ནས། །མགྲོན་ལ་བོས་པའི་བཀའ་སྐྱོང་རྣམས། །དམར་གྱི་གཏོར་མ་འདི་བཞེས་ལ། །བཅོལ་བའི་འཕྲིན་ལས་གྲུབ་པར་མཛོད། །བསྟན་མ་ནི༔ ཧཱུྃ༔ བཀའ་ཡི་སྲུང་མ་དམ་ཚིག་ཅན༔ བོད་ཁམས་སྐྱོང་བའི་བསྟན་མ་རྣམས༔ བཤལ་ཆུའི་གཏོར་མ་འདི་ལོང་ལ༔ བླ་མེད་བསྟན་སྐྱོང་འཕྲིན་ལས་སྒྲུབས༔ བྷྱོ་ས་མ་ཡ་ཁཱ་ཧི༔ གཏོར་གཞོང་ཁ་སྦུབ་ཅིང་། ཧཱུྃ། བདེ་ཆེན་དཀར་མོའི་ཏིང་འཛིན་གྱིས། །བདེ་བ་ཆེན་པོའི་བྲོ་བརྡུང་བས། །སྟོང་པ་ཆེན་པོའི་ཡེ་ཤེས་རྒྱས། སྒབ་འདྲེ་དམ་སྲི་འབྱུང་པོའི་ཚོགས། །ནམ་ཡང་ལྡང་བར་མ་བྱེད་ཅིག །དམ་སྲི་སརྦ་སྟམ་བྷ་ཡ་ནན། རྫོགས་རིམ་ནི༔ ཧཱུྃ༔ སྣང་བ་དག་པ་གཞལ་ཡས་ཁང་༔ གཟུང་འཛིན་བྲལ་བ་ཡི་དམ་ལྷ༔ རང་ངོར་གསལ་བ་ཆོས་ཀྱི་སྐུ༔ སྐྱེ་མེད་མཁའ་འགྲོའི་ལྷ་ཚོགས་རྣམས༔ ཆོས་དབྱིངས་མཁའ་འགྲོའི་གནས་སུ་གཤེགས༔ ཨ་ཨཱཾཿསྨྲ་བསམ་བརྗོད་མེད་ཡུམ༔ རང་སེམས་སྐྱེ་འགགས་གནས་གསུམ་འདི༔ མཁའ་འགྲོའི་སྐུ་གསུམ་རོལ་པར་ཤར༔ བསྔོ་སྨོན་ནི༔ ཧཱུྃ༔ གསང་བའི་བསྐྱེད་རྫོགས་བསྒོམ་བཟླས་མཐུས༔ ལྟ་བ་གཡེལ་བ་སོར་ཆུད་ཅིང་༔ སྒོམ་པ་བྱིང་བ་ཀློང་གྱུར་ཏེ༔ སྤྱོད་པ་ཚོགས་གཉིས་མཐར་ཕྱིན་ཞིང་༔ འབྲས་བུ་སྐུ་བཞི་མངོན་གྱུར་ཤོག༔ ཤིས་པ་ནི༔ ཧཱུྃ༔ ཡེ་ཤེས་དབྱིངས་ཀྱི་ཕོ་བྲང་ནས༔ ཕག་མོ་ཆོས་སྐུའི་བཀྲ་ཤིས་ཤོག༔ ཡེ་ཤེས་ལྔ་ལྡན་ཕོ་བྲང་ནས༔ ཕག་མོ་ལོངས་སྐུའི་བཀྲ་ཤིས་ཤོག༔ མཁའ་སྤྱོད་གནས་ཡུལ་དུར་ཁྲོད་ནས༔ ཕག་མོ་སྤྲུལ་སྐུའི་བཀྲ་ཤིས་ཤོག༔ བཀའ་ཡི་འཕྲིན་ལས་དཀྱིལ་འཁོར་ནས༔ སྤུལ་པ་འབུལ་སྡེའི་བཀྲ་ཤིས་ཤོག༔ ཅེས་བདེ་ཆེན་དཀར་མོའི་ལས་བྱང་ཆོག་བསྒྲིགས་གཏེར་སྟོན་གྱིས་མཛད་པ་ལྟར་ལ་ཅུང་ཟད་གོ་རིམ་འཁྲུགས་པ་རྣམས། པདྨ་ཐེག་མཆོག་བསྟན་པའི་རྒྱལ་མཚན་གྱིས་བསྒྲིགས་པ་དགེ་ཞིང་ཤིས་པར་གྱུར་ཅིག། །། མངྒ་ལཾ། དགྱེས་མཛད་བདེ་ཆེན་རྣལ་འབྱོར་མའི། སྒྲུབ་འཕྲིན་པར་དུ་བསྒྲུབ་པའི་དགེས། །ནད་གདོན་འཇིགས་ཚོགས་ཉེར་ཞི་ནས། །ཚེ་དཔལ་ལེགས་ཚོགས་སྨིན་གྱུར་ཅིག །ཅེས་རིགས་འཛིན་མིང་གིས་བྲིས་པ་དགེའོ།། །།མངྒ་ལཾ།

ཕག་མོ་རིགས་བཞིའི་དབང་བཤད།

ཟབ་ཐིག་ལས་ཕག་མོ་རིགས་བཞིའི་དབང་བཤད་ཉེར་མཁོ་བཞུགས། །འོ་ན་ད་ལམ་ཁྱེད་རྣམས་ལ་བཅོམ་ལྡན་འདས་མ་བདེ་ཆེན་དཀར་མོའི་དབང་འབུལ་བའི་ཐོག་མར་ལོ་རྒྱུས་ཀྱི་རྣམ་པ་མདོ་ཙམ་ཞིག་བརྗོད་པར་བྱ་སྟེ། ངོ་བོ་ཀ་ནས་དག་པའི་ཆོས་དབྱིངས་ཆེན་པོ་ནས་བཅོམ་ལྡན་འདས་མ་དཔལ་ཀུན་ཏུ་བཟང་མོའི་མེ་ལོང་ལྟ་བུའི་ཡེ་ཤེས་ཀྱི་རང་མདངས་གོ་མ་འགགས་པ་ལས། བདེ་ཆེན་དཀར་མོ་རྡོ་རྗེ་དྷཀྐི་མ་འདི་རང་ཤར་ཞིང་དབྱིངས་རང་བཞིན་གྱི་རྣམ་པར་དག་པའི་མཁའ་སྤྱོད་དུ་དུས་གསུམ་རྟག་པ་རྒྱུན་གྱི་འཁོར་ལོར་རང་འོད་འབར་བཞིན་བཞུགས་པའི་རོལ་པ་ལས། འོག་མིན་སྟུག་པོ་བཀོད་པའི་ཞིང་ཁམས་སུ་རྒྱལ་བ་རྡོ་རྗེ་འཆང་གིས་གསང་སྔགས་བླ་མེད་ཆོས་ཀྱི་འཁོར་ལོ་བསྐོར་བའི་ཚེ། རྡོ་རྗེའི་རིགས་ཀྱི་མཁའ་འགྲོ་མ་འབུམ་ཕྲག་མང་པོ་སྟོན་པ་དེའི་འཁོར་དུ་རང་ཤར་ཞིང་བླ་ན་མེད་པའི་བཀའི་འཁོར་ལོ་རྣམས་ཉན་ཞིང་འཆང་ནས་ཚངས་ཆེན་གྱི་བསྐལ་པ་ཆེན་པོའི་ཞིང་འདི་དང་འདི་མ་ཡིན་པའི་ཡང་ནམ་མཁའི་མཐའ་ཁྱབ་ཏུ་ལས་དང་སྐལ་པར་ལྡན་པ་རྣམས་ཀྱི་སྣང་ངོར། སྤྲུལ་པ་ཡང་སྤྲུལ་ཉིང་སྤྲུལ་བསམ་གྱིས་མི་ཁྱབ་པས་དུས་གསུམ་ཀུན་ཏུ་སྐལ་ལྡན་མང་པོ་གྲོལ་ལམ་ལ་ཐབས་དང་གདམས་པ་མང་པོས་ཡོངས་སུ་གྲོལ་བར་མཛད་ནས་རིམ་གྱིས་བརྒྱུད་པ་ལས། རྩོད་ལྡན་ཚེ་ལོ་བརྒྱ་པའི་སྐབས་ཤྭཀྱའི་བསྟན་པ་ལ་མདོ་སྔགས་ཟུང་ཞིག་གི་ཉི་ཟླ་ཤར་བའི་ཚེ་ཨོ་རྒྱན་གྱི་སློབ་དཔོན་དཔལ་སངས་རྒྱས་གཉིས་པ་པདྨ་འབྱུང་གནས་ཀྱིས་འབུམ་ཕྲག་ཡངས་པའི་མཁའ་འགྲོ་མ་རྣམས་ལ་དབང་བསྒྱུར་ཞིང་མཁའ་འགྲོའི་གསང་མཛོད་ཐམས་ཅད་བརྟོལ་ཏེ་འཛམ་གླིང་སྤྱི་དང་རྒྱ་བོད་ཀུན་ཏུ་བསྟན་འགྲོའི་དོན་བསམ་གྱིས་མི་ཁྱབ་པར་མཛད་པའི་ནང་ནས། ཁྱད་པར་དུ་བོད་ཡུལ་སྲིན་མོ་གན་རྐྱལ་དུ་བསྒྱེལ་བ་འདྲ་བའི་ནུ་མ་གཡས་པ་ཁམས་ཀྱི་སྲིང་མོ་རྫོང་གི་ཆགས་རུ་ཕུག་དཀར་ལྷའི་གཞལ་ཡས་ཁང་དུ། བདེ་ཆེན་དཀར་མོ་རྡོ་རྗེ་དྷ་ཀྐི་མའི་སྒྲུབ་པ་མཛད་ཅིང་ཕག་གདོང་དཀར་མོ་སྐུའི་སྒྲུབ་གནས་སུ་བྱིན་གྱིས་བརླབས་པའི་དུས་སུདབང་སྒྲུབ་ཐབས་མན་ངག་དང་བཅས་པའི་གདམས་པ་འདི་རྣམས། མ་མཁའ་འགྲོ་ཡེ་ཤེས་འཚོ་རྒྱལ་ལ་བཀའ་སྩལ་ཞིང་གདམས་པ་མཁའ་འགྲོའི་ཡི་གེར་བཏབ་སྟེ་ཕྱི་མའི་བསྟན་འགྲོའི་དོན་དུ་མཁའ་འགྲོའི་གསང་མཛོད་དུ་རྒྱས་བཏབ་ནས་བཞུགས་སུ་གསོལ་བ། འགྲོ་བ་འདུལ་བའི་ལུང་བསྟན་དུས་བབས་བཞིན་དུ་ཁམས་པ་ཉི་མ་གྲགས་པས་ཤིང་གླང་ཧོར་ཟླ་ལྔ་པའི་ཚེས་བཅོ་ལྔའི་ཉི་ཤར་ལ་གདན་དྲངས་ཤིང་ཤོག་སེར་ལས་བསྒྱུར་བའི་གདམས་པ་རིན་པོ་ཆེའི་དབང་འདི་ཐོབ་པ་ལ་ཡོན་ཏན་དུ་མ་དང་ལྡན་ཏེ་ལུང་ལས། དབང་བསྐུར་སྟོན་པ་བསླུ་བ་མེད། །དགེ་བ་ཀུན་ལས་དགེ་བའི་མཆོག །ཚེ་རབས་ནད་མེད་བདེ་བ་འཐོབ། །ངན་སོང་གསུམ་ལས་རྣམ་པར་གྲོལ། ཅེས་གསུངས་པའི་དབང་ཞུ་བའི་དོན་དུ་འདིའི་རྗེས་ཟློས་གནང་བར་ཞུ། ཅེས་པ་ནས་གཞུང་ལྟར་དབང་སྦྱིན། མངྒ་ལམ། །འོ་ན་ད་ལམ་ཁྱེད་རྣམས་ལ་བཅོམ་ལྡན་འདས་མ་དོན་གྲུབ་སེར་མོའི་དབང་འབུལ་བའི་ཐོག་མར་ལོ་རྒྱུས་ཀྱི་རྣམ་པ་མདོ་ཙམ་ཞིག་བརྗོད་པར་བྱ་ཏེ། ངོ་བོ་ཀ་ནས་དག་པའི་ཆོས་དབྱིངས་ཆེན་པོ་ནས་བཅོམ་ལྡན་འདས་མ་དཔལ་ཀུན་ཏུ་བཟང་མོའི་མཉམ་པ་ཉིད་ཀྱི་ཡེ་ཤེས་ཀྱི་རང་མདངས་གོ་མ་འགགས་པ་ལས། དོན་གྲུབ་སེར་མོ་རིན་ཆེན་དྷཀྐི་མ་འདི་རང་ཤར་ཞིང་དབྱིངས་རང་བཞིན་གྱི་རྣམ་པར་དག་པའི་མཁའ་སྤྱོད་དུ་དུས་གསུམ་རྟག་པ་རྒྱུན་གྱི་འཁོར་ལོ་རང་འོད་འབར་ཞིང་བཞུགས་པའི་རོལ་པ་ལས། འོག་མིན་སྟུག་པོ་བཀོད་པའི་ཞིང་ཁམས་སུ་རྒྱལ་བ་རྡོ་རྗེ་འཆང་གིས་གསང་སྔགས་བླ་མེད་ཀྱི་ཆོས་ཀྱི་འཁོར་ལོ་བསྐོར་བའི་ཚེ། རིན་ཆེན་རིགས་ཀྱི་མཁའ་འགྲོ་མ་འབུམ་ཕྲག་མང་པོ་སྟོན་པ་དེའི་འཁོར་དུ་རང་ཤར་ཞིང་བླ་ན་མེད་པའི་བཀའི་འཁོར་ལོ་རྣམས་ཉན་ཞིང་འཆང་ནས་ཚངས་ཆེན་གྱི་བསྐལ་པ་ཆེན་པོའི་ཞིང་འདི་དང་། འདི་མ་ཡིན་པའི་ཡང་ནམ་མཁའི་མཐའ་ཁྱབ་ཏུ་ལས་དང་སྐལ་བར་ལྡན་པ་རྣམས་ཀྱི་སྣང་ངོར་སྤྲུལ་པ་དང་ཡང་སྤྲུལ་ཉིང་སྤྲུལ་བསམ་གྱིས་མི་ཁྱབ་པས་དུས་གསུམ་ཀུན་ཏུ་སྐལ་ལྡན་མང་པོ་གྲོལ་ལམ་ལ་ཐབས་དང་གདམས་པ་མང་པོས་ཡོངས་སུ་གྲོལ་བར་མཛད་ནས་རིམ་གྱིས་བརྒྱུད་པ་ལས། རྩོད་ལྡན་ཚེ་ལོ་བརྒྱ་པའི་སྐབས་ཤཱཀྱའི་བསྟན་པ་ལ་མདོ་སྔགས་ཟུང་ཞིག་གི་ཉི་ཟླ་ཤར་བའི་ཚེ། ཨོ་རྒྱན་གྱི་སློབ་དཔོན་དཔལ་སངས་རྒྱས་གཉིས་པ་པདྨ་འབྱུང་གནས་ཀྱིས་འབུམ་ཕྲག་ཡངས་པའི་མཁའ་འགྲོ་མ་རྣམས་དབང་བསྒྱུར་ཞིང་མཁའ་འགྲོའི་གསང་མཛོད་ཐམས་ཅད་བརྟོལ་ཏེ་འཛམ་གླིང་སྤྱི་དང་རྒྱ་བོད་ཀུན་ཏུ་བསྟན་འགྲོའི་དོན་བསམ་གྱིས་མི་ཁྱབ་པ་མཛད་པའི་ནང་ནས། གནས་མཆོག་ཆེན་པོ་ཁམས་ཀྱི་སྲིང་མོ་རྫོང་དུ་ཕྱག་ཕེབས་ནས་ཆགས་རུ་ཕུག་སེར་རྒྱས་པའི་གཞལ་ཡས་ཁང་དུ་ཕག་གདོང་སེར་མོ་ཡོན་ཏན་གྱི་སྒྲུབ་པ་མཛད་ཅིང་བྱིན་གྱིས་བརླབས་པའི་དུས་སུ། དབང་སྒྲུབ་ཐབས་མན་ངག་དང་བཅས་པའི་གདམས་པ་འདི་རྣམས་མ་མཁའ་འགྲོ་ཡེ་ཤེས་འཚོ་རྒྱལ་ལ་བཀའ་སྩལ་ཞིང་གདམས་པ་མཁའ་འགྲོའི་ཡི་གེར་བཏབ་སྟེ། ཕྱི་མའི་བསྟན་འགྲོའི་དོན་དུ་མཁའ་འགྲོའི་གསང་མཛོད་དུ་རྒྱས་བཏབ་ནས་བཞུགས་སུ་གསོལ་བ་འགྲོ་བ་འདུལ་བའི་ལུང་བསྟན་པདྨ་བཀའི་ཐང་ཡིག་ལས། མི་ལ་ལུས་ཆས་ཡ་མ་ཟུང་དུ་འོང་༔ བསྟན་པའི་ཆོས་ཀྱང་ཡ་མ་ཟུང་དུ་འགྲོ༔ དགེ་རྒྱས་བྲིས་པའི་རི་མོ་ཤུལ་རྗེས་ཡོང་༔ ཁམས་ཀྱི་སྲོང་མོ་རྫོང་གསུམ་གཏེར་ཀ་འདི༔ མི་བཞག་འདོན་པའི་རྟགས་དེར་བསྟན་ནས་འབྱུང་༔ ཁམས་པ་ཉི་མ་གྲགས་ཀྱི་མིང་ཅན་འོང་༔ ཞེས་གསུངས་པ་ལྟར་མེ་ཡོས་ཧོར་ཟླ་གཉིས་པའི་ཡར་ཚེས་བཅུ་གསུམ་གྱི་དགོངས་མོ་དབང་གི་དུས་སུ་སྤྱན་དྲངས་པའི་དབང་ཐོབ་པ་ལ་ཕན་ཡོན་བསམ་གྱིས་མི་ཁྱབ་པ་སྟེ། གསང་འདུས་ལས། གསང་སྔགས་ཟབ་མོའི་དབང་བསྐུར་བས། །རབ་ནི་ཚེ་འདི་ཉིད་ལ་གྲོལ། །འབྲྀང་ནི་འཆི་ཀ་བར་དོར་གྲོལ། ཐ་མ་སྐྱེ་བ་བདུན་ནས་གྲོལ། ཅེས་པ་དང་། ཐང་ཡིག་ལས། ལོ་རེ་བཞིན་དུ་དབང་བསྐུར་བྱིན་རླབས་ཞུས༔ ལོ་བརྒྱ་ཐུབ་ན་དབང་བརྒྱ་འཐོབ་པ་ཡིན༔ ཕྱི་མ་དུད་འགྲོར་སྐྱེས་ཀྱང་དབང་ཆེར་འགྱུར༔ ཅེས་དང་། གསང་རྒྱུད་ལས། གསང་སྔགས་རྩ་བ་དབང་ཉིད་དེ། །དེ་ཉིད་རྩ་བ་དམ་ཚིག་ཡིན། །འདའ་བར་མི་བྱ་བསྲུང་མཚམས་རྣམས། །གཉིས་ཀ་ཤེས་ཕྱིན་དངོས་གྲུབ་འབྱུང་། ཅེས་གསུངས་པའི་དོན་དང་ལྡན་པར་བྱ་བའི་ཕྱིར་དབང་གི་དོན་དུ་གསོལ་བ་འདེབས་པ་འདིའི་རྗེས་ཟློས་གནང་བར་ཞུ། ཅེས་པ་ནས་དབང་སྦྱིན། མངྒ་ལམ། །འོ་ན་ད་ལམ་ཁྱེད་རྣམས་ལ་བཅོམ་ལྡན་འདས་མ་དམར་མོ་སྒྲ་སྒྲོག་གི་དབང་འབུལ་བའི་ཐོག་མར་ལོ་རྒྱུས་ཀྱི་རྣམ་པ་མདོ་ཙམ་ཞིག་བརྗོད་པར་བྱ་སྟེ། ངོ་བོ་ཀ་ནས་དག་པའི་ཆོས་དབྱིངས་ཆེན་པོ་ནས་བཅོམ་ལྡན་འདས་མ་དཔལ་ཀུན་ཏུ་བཟང་མོའི་སོ་སོར་རྟོགས་པའི་ཡེ་ཤེས་ཀྱི་རང་མདངས་གོ་མ་འགགས་པ་ལས། ཕག་གདོང་ཆེན་མོ་དམར་མོ་སྒྲ་སྒྲོག་མ་འདི་རང་ཤར་ཞིང་དབྱིངས་རང་བཞིན་གྱི་རྣམ་པར་དག་པའི་མཁའ་སྤྱོད་དུ་དུས་གསུམ་རྟག་པ་རྒྱུན་གྱི་འཁོར་ལོར་རང་འོད་འབར་བཞིན་བཞུགས་པའི་རོལ་པ་ལས། འོག་མིན་སྟུག་པོ་བཀོད་པའི་ཞིང་ཁམས་སུ་རྒྱལ་བ་རྡོ་རྗེ་འཆང་གིས་གསང་སྔགས་བླ་མེད་ཀྱི་ཆོས་ཀྱི་འཁོར་ལོ་བསྐོར་བའི་ཚེ། པདྨ་རིགས་ཀྱི་མཁའ་འགྲོ་མ་འབུམ་ཕྲག་མང་པོ་སྟོན་པ་དེའི་འཁོར་དུ་རང་ཤར་ཞིང་བླ་ན་མེད་པའི་བཀའི་འཁོར་ལོ་རྣམས་ཉན་ཞིང་འཆང་ནས་ཚངས་ཆེན་གྱི་བསྐལ་བ་ཆེན་པོའི་ཞིང་འདི་དང་། འདི་མ་ཡིན་པའི་ཡང་ནམ་མཁའི་མཐའ་ཁྱབ་ཏུ་ལས་དང་སྐལ་པར་ལྡན་པ་རྣམས་ཀྱི་སྣང་ངོར་སྤྲུལ་པ་ཡང་སྤྲུལ་ཉིང་སྤྲུལ་བསམ་གྱི་མི་ཁྱབ་པས་དུས་གསུམ་ཀུན་ཏུ་སྐལ་ལྡན་མང་པོ་གྲོལ་ལམ་ལ་ཐབས་དང་གདམས་པ་མང་པོས་ཡོངས་སུ་གྲོལ་བར་མཛད་ནས་རིམ་གྱིས་བརྒྱུད་པ་ལས། རྩོད་ལྡན་ཚེ་ལོ་བརྒྱ་པའི་སྐབས་ཤཱཀྱའི་བསྟན་པ་ལ་མདོ་སྔགས་ཟུང་ཅིག་གི་ཉི་ཟླ་ཤར་བའི་ཚེ། ཨོ་རྒྱན་གྱི་སློབ་དཔོན་དཔལ་སངས་རྒྱས་གཉིས་པ་པདྨ་འབྱུང་གནས་ཀྱིས་འབུམ་ཕྲག་ཡངས་པའི་མཁའ་འགྲོ་མ་རྣམས་ལ་དབང་བསྒྱུར་ཞིང་མཁའ་འགྲོའི་གསང་མཛོད་ཐམས་ཅད་བརྟོལ་ཏེ་འཛམ་གླིང་སྤྱི་དང་རྒྱ་བོད་ཀུན་ཏུ་བསྟན་འགྲོའི་དོན་བསམ་གྱིས་མི་ཁྱབ་པ་མཛད་པའི་ནང་ནས། གནས་མཆོག་ཆེན་པོ་ཁམས་ཀྱི་སྲིང་མོ་རྫོང་གི་ཆགས་རུ་ཕུག་དམར་དབང་གི་གཞལ་ཡས་སུ་ཕྱག་ཕེབས་ནས་ཕག་གདོང་དམར་མོ་སྒྲ་སྒྲོག་གི་སྒྲུབ་པ་མཛད་ཅིང་དམར་མོ་གསུང་གི་སྒྲུབ་གནས་སུ་བྱིན་གྱིས་བརླབས་པའི་དུས་སུ། དབང་སྒྲུབ་ཐབས་གདམས་པ་དང་བཅས་པ་འདི་རྣམས་མ་མཁའ་འགྲོ་ཡེ་ཤེས་འཚོ་རྒྱལ་ལ་བཀའ་སྩལ་ཞིང་གདམས་བ་མཁའ་འགྲོའི་ཡི་གེར་བཏབ་སྟེ་ཕྱི་མའི་བསྟན་འགྲོའི་དོན་དུ་མཁའ་འགྲོའི་གསང་མཛོད་དུ་རྒྱས་བཏབ་ནས་བཞུགས་སུ་གསོལ་བ། འགྲོ་བ་འདུལ་བའི་ལུང་བསྟན་དུས་བབས་བཞིན་དུ་ཁམས་པ་ཉི་མ་གྲགས་པས་ཤིང་སྟག་ཧོར་ཟླ་གསུམ་པའི་ཚེས་བརྒྱད་ཀྱི་ཉིན་དགུང་གདན་དྲངས་ཤིང་ཤོག་སེར་ལས་བསྒྱུར་བའི་གདམས་པ་རིན་པོ་ཆེ་འདིའི་དབང་ཐོབ་པ་ལ་ཡོན་ཏན་དུ་མ་དང་ལྡན་ཏེ། རྒྱུད་ལས། དབང་ཐོབ་རིགས་ཀྱི་བུ་དེ་ཉིད། ཚེ་འདིར་བསམ་པ་ཀུན་འགྲུབ་ཅིང་། །ཕྱི་མ་མངོན་པར་རྫོགས་འཚང་རྒྱ། ཅེས་དང་། དེ་བཞིན་དུ། བྱང་ཆུབ་དམ་པ་དབང་ལས་བྱུང་། །མ་སྨིན་པ་ནི་སྨིན་བྱེད་ལ། ལུས་ངག་ཡིད་གསུམ་སྒྲིབ་པ་འདག །དབང་གིས་རབ་ཏུ་སྦྱངས་བྱས་ནས། །དཔལ་མཆོག་དང་པོ་འཐོབ་པར་འགྱུར། ཅེས་དང་། དེ་ཉིད་ལས། དབང་མེད་འཁོར་བའི་མཐའ་སྙོགས་སྟེ། །ཕྱི་མའི་བདེ་བ་འཐོབ་པ་མེད། །དབང་མ་བསྐུར་བས་སྔགས་ལམ་སྒོམ། དེ་ནི་ངན་འགྲོར་སྐྱེ་བའི་རྒྱུ། ཅེས་གསུངས་པའི་དོན་དང་ལྡན་པར་བྱ་བའི་ཕྱིར་དབང་གི་དོན་དུ་གསོལ་བ་འདེབས་པ་འདིའི་རྗེས་ཟློས་གནང་བར་ཞུ། ཅེས་པ་ནས་དབང་སྦྱིན། མངྒ་ལམ། །འོ་ན་ད་ལམ་ཁྱེད་རྣམས་ལ་བཅོམ་ལྡན་འདས་མ་སྣ་ཚོགས་མཐར་ཕྱིན་གྱི་དབང་འབུལ་བའི་ཐོག་མར་ལོ་རྒྱུས་ཀྱི་རྣམ་པ་མདོ་ཙམ་ཞིག་བརྗོད་པར་བྱ་སྟེ། ངོ་བོ་ཀ་ནས་དག་པའི་ཆོས་དབྱིངས་ཆེན་པོ་ནས་བཅོམ་ལྡན་འདས་མ་དཔལ་ཀུན་ཏུ་བཟང་མོའི་བྱ་བ་གྲུབ་པའི་ཡེ་ཤེས་ཀྱི་རང་མདངས་གོ་མ་འགགས་པ་ལས། སྣ་ཚོགས་མཐར་ཕྱིན་ལས་ཀྱི་དྷཀྐི་མ་འདི་རང་ཤར་ཞིང་། དབྱིངས་རང་བཞིན་གྱི་རྣམ་པར་དག་པའི་མཁའ་སྤྱོད་དུ་དུས་གསུམ་རྟག་པ་རྒྱུན་གྱི་འཁོར་ལོར་རང་འོད་འབར་བཞིན་བཞུགས་པའི་རོལ་པ་ལས། འོག་མིན་སྟུག་པོ་བཀོད་པའི་ཞིང་ཁམས་སུ་རྒྱལ་བ་རྡོ་རྗེ་འཆང་གིས་གསང་སྔགས་བླ་མེད་ཀྱི་ཆོས་ཀྱི་འཁོར་ལོ་རྣམས་ཉན་ཞིང་འཆང་ནས་ཚངས་ཆེན་གྱི་བསྐལ་པ་ཆེན་པོའི་ཞིང་འདི་དང་། འདི་མ་ཡིན་པའི་ཡང་ནམ་མཁའི་མཐའ་ཁྱབ་ཏུ་ལས་དང་སྐལ་བར་ལྡན་པ་རྣམས་ཀྱི་སྣང་ངོར། སྤྲུལ་པ་དང་ཡང་སྤྲུལ་ཉིང་སྤྲུལ་བསམ་གྱིས་མི་ཁྱབ་པས་དུས་གསུམ་ཀུན་ཏུ་སྐལ་ལྡན་མང་པོ་གྲོལ་ལམ་ལ་ཐབས་དང་གདམས་པ་མང་པོས་ཡོངས་སུ་གྲོལ་བར་མཛད་ནས་རིམ་གྱིས་བརྒྱུད་པ་ལས། རྩོད་ལྡན་ཚེ་ལོ་བརྒྱ་པ་ཤཱཀྱའི་བསྟན་པ་ལ་མདོ་སྔགས་ཟུང་ཅིག་གི་ཉི་ཟླ་ཤར་བའི་ཚེ། ཨོ་རྒྱན་གྱི་སློབ་དཔོན་དཔལ་སངས་རྒྱས་གཉིས་པ་པདྨ་འབྱུང་གནས་ཀྱིས་འབུམ་ཕྲག་ཡངས་པའི་མཁའ་འགྲོ་མ་རྣམས་ལ་དབང་བསྒྱུར་ཞིང་མཁའ་འགྲོའི་གསང་མཛོད་ཐམས་ཅད་བརྟོལ་ཏེ་འཛམ་གླིང་སྤྱི་དང་རྒྱ་བོད་ཀུན་ཏུ་བསྟན་འགྲོའི་དོན་བསམ་གྱིས་མི་ཁྱབ་པ་མཛད་པའི་ནང་ནས། བོད་སྲིན་མོ་གན་རྐྱལ་དུ་བསྒྱེལ་བ་འདྲ་བའི་ནུ་མ་གཡས་པ་ཁམས་སྲིན་མོ་རྫོང་གི་ཆགས་རུ་ཕུག་སྔོན་འཕྲིན་ལས་ཀྱི་གཞལ་ཡས་སུ་ཕྱག་ཕེབས་ཤིང་སྣ་ཚོགས་མཐར་ཕྱིན་གྱི་སྒྲུབ་པ་མཛད་ཅིང་ལྗང་མོ་འཕྲིན་ལས་ཀྱི་སྒྲུབ་གནས་སུ་བྱིན་གྱིས་བརླབས་པའི་དུས་སུ། དབང་སྒྲུབ་ཐབས་མན་ངག་དང་བཅས་པའི་གདམས་པ་འདི་རྣམས་མ་མཁའ་འགྲོ་ཡེ་ཤེས་འཚོ་རྒྱལ་ལ་བཀའ་སྩལ་ཞིང་གདམས་པ་མཁའ་འགྲོའི་ཡི་གེར་བཏབ་སྟེ་ཕྱི་མའི་བསྟན་འགྲོའི་དོན་དུ་མཁའ་འགྲོའི་གསང་མཛོད་དུ་རྒྱབ་བཏབ་ནས་བཞུགས་སུ་གསོལ་བ། འགྲོ་བ་འདུལ་བའི་ལུང་བསྟན་དུས་བབས་བཞིན་དུ་ཁམས་པ་ཉི་མ་གྲགས་པས་མེ་ཡོས་ཧོར་ཟླ་གཉིས་པའི་ཚེས་བཅུའི་ཉིན་དགུང་ལ་གདན་དྲངས་ཤིང་ཤོག་སེར་ལས་བསྒྱུར་བའི་གདམས་པ་རིན་པོ་ཆེ་འདིའི་དབང་ཐོབ་པ་ལ་ཡོན་ཏན་དུ་མ་ལྡན་ཏེ། རྒྱུད་ལས། དམ་ཚིག་མ་ཉམས་ལེགས་བསྲུངས་པའི། །རྣལ་འབྱོར་ཕོ་མོ་གང་ཡིན་རྣམས། །ཚེ་རིང་ནད་མེད་ཆོས་སྤྱོད་ཅིང་། །དཔལ་འབྱོར་ལོངས་སྤྱོད་ཀུན་ཐོབ་ནས། །འདི་ཕྱི་བར་གསུམ་བཀྲ་ཤིས་ལ། །དེ་ནི་རྟག་ཏུ་དགེ་བར་འགྱུར། ཅེས་དང་། དེ་བཞིན་དུ། དང་པོ་དབང་གིས་མ་སྨིན་ན། ཐེག་པའི་ཆོས་ཀྱིས་གྲོལ་མི་ནུས། །རང་རྒྱུད་དབང་གིས་མ་གྲོལ་ན། །རང་སེམས་མངོན་དུ་མི་འགྱུར་རོ། ཅེས་དང་། རྒྱུད་ལས། །དབང་བསྐུར་གནང་བ་ཐོབ་པ་གཙོ། །དབང་ཐོབ་རིགས་ཀྱི་བུ་དེ་ཉིད། །ཚེ་འདིར་བསམ་པ་ཀུན་འགྲུབ་ཅིང་། །ཕྱི་མ་མངོན་པར་རྫོགས་སངས་རྒྱས། ཅེས་གསུངས་པའི་ཕན་ཡོན་དུ་མ་དང་ལྡན་པའི་དབང་ཞུ་བའི་དོན་དུ་འདིའི་རྗེས་ཟློས་གནང་བར་ཞུ། དེ་ནས་དབང་སྦྱིན། ཅེས་པ་འདི་རྣམས་གུ་རུ་བསྟན་འཛིན་གྲགས་པ་རྒྱ་མཚོ་ལ་དགོས་པར་སེམས་ཏེ་ཤར་སྟག་མོ་སྒང་དུ་ཉི་མ་གྲགས་པས་བྲིས་པ་འདི་ཡང་ཐུགས་འཛིན་བདེ་བའི་ཕྱིར་རིགས་འགྲེས་སུ་སྦྱར་བའོ། །མངྒ་ལམ། །

ཞི་བའི་སྦྱིན་སྲེག་སྒྲིག་ཆོག

ཕག་མོ་དཀར་མོའི་ཟབ་ཐིག་ལས། ཞི་བའི་སྦྱིན་སྲེག་བཞུགས། །བཅོམ་ལྡན་འདས་མ་ཕག་གདོང་བདེ་ཆེན་དཀར་མོ་ལ་གུས་པས་ཕྱག་འཚལ་ལོ། དེ་ལ་འདིར་རྣལ་འབྱོར་པ་ཕག་མོ་བདེ་ཆེན་དཀར་མོའི་དཀྱིལ་འཁོར་དུ་དབངཐོབ་ཅིང་དམ་ཚིག་ལ་གནས་པ་གྲངས་མཚན་དུས་རྟགས་ཀྱི་བསྙེན་པ་ཚད་དུ་འཁྱོལ་བས་རང་གཞན་གྱི་ནད་གདོན་སྡིག་སྒྲིབ་སོགས་མི་མཐུན་པའི་ཕྱོགས་མཐའ་དག་ཞི་བར་བྱ་བ་དང་། བསྙེནཔའི་ཁ་བསྐང་སོགས་སུ་སྦྱིན་སྲེག་གི་ཆོ་ག་བརྩམས་པར་བྱ་སྟེ། སྔོན་འགྲོ་དངོས་གཞི་རྗེས་སོ། དང་པོ་ནི། ཤིང་ཁམས་ཀྱི་ལོ་ཟླ་ཉི་ཁྱིམ་ཡོད་པའིཡར་ངོ་བཀྲ་ཤིས་པའི་གཟའ་སྐར་སྦྱོར་བྱེད་དང་ལྡན་པའི་སྔ་དྲོའི་ཚེ། སྐབས་སུ་གང་བབས་ཀྱི་གནས་ཁང་ཕྱག་བརྡར་ལེགས་པར་བྱས་ལ། སྔར་དུལ་བའི་དགོན་གནས་ཡུལ་ཕྱོགས་ཡིན་ན་མི་དགོས་ཤིང་། དེ་མ་ཡིན་པའི་རིགས་ལ་རྒྱས་པར་སྒྲུབ་ཆེན་ཞིག་གི་གཞུང་ལྟར་ས་བརྟག་བླང་སྦྱངས་འདུལ་གྱི་ཆོ་ག་བྱ་ཞིང་། རྒྱས་པར་གཏན་ནས་མ་གྲུབ་ན། བསྡུས་པར་ཡི་གེ་བརྒྱ་པ་དང་བདེ་ཆེན་དཀར་མོའི་སྔགས་བརྗོད་ཅིང་ས་ལ་ཆུ་འཐོར། ལྟོ་འཕྱེ་འཁོར་ཚུལ་དང་བསྟུན་ནས་ལྟོ་བ་ནས་ས་བླང་ཞིང་། ཧ་བཛྲ་དྷཀྐི་ནི་བྷ་ར་ཧི་ཨ་ཡུ་ཥེ་ཧཱུྃ་བྷྲུྃ་ནྲི་ཛཿསིདྡྷིསྭཱ་ཧཱཿ བྷྲུྃ་ཏྲཱཾ་ཧྲཱིཿཨཱཿ ཞེས་བརྗོད་ཅིང་བྱིན་གྱིས་བརླབས་པའི་སྟེགས་བུ་རྒྱར་ཁྲུ་གང་དཔངས་སུ་ཁྲུ་ཕྱེད་པ་ས་དཀར་པོས་ཁ་དོག་བསྒྱུར་བ་ལ་དཀྱིལ་འཁོར་ཟླུམ་པོའི་ལྟེ་བར་རཾ་གྱི་ཁོག་པར་ཧ་བྲིས་བའི་ཁ་ཁྱེར་ལ་རྡོ་རྗེ་དཀར་པོའི་ཕྲེང་བས་བསྐོར་བ་བྲིས་པའི་སྟེང་དུ་ཙན་དན་དཀར་པོ་དང་འོ་མ་ཅན་ལ་སོགས་པའི་ལས་མཐུན་གྱི་བུད་ཤིང་སྨན་སྤོས་དྲི་བཟང་པོས་བྱུག་པ་ཟླུམ་པོ་སྲིད་དང་དཔངས་སོགས་དཀྱིལ་འཁོར་དང་མཐུན་པར་བརྩིགས། སྤྱིར་བཏང་དུ་བླ་མ་ཡི་དམ་མཁའ་འགྲོ་ཆོས་སྐྱོང་གི་མཆོད་གཏོར་སྨན་རག་སོགས་ཕྱི་ནང་གི་མཆོད་པ་རྒྱས་པ་དང་། རང་གི་མདུན་དུ་རྡོར་དྲིལ་ཌཱ་མ་རུ། ཀུ་ཤ། རླུང་གཡབ་དགང་གཟར་བླུགས་ཁ་སྦྱར་ཏེ་ཡ་མ་བྲལ་བར་བཞག་པ་དང་། གཡས་སུ་ཙན་དན་ནམ་འོམ་བུའམ་འོ་མ་ཅན་སོགས་དཀར་པོའི་ཤིང་དྲི་ཞིམ་པོ་དང་ལྡན་པ་སྲིད་དུ་སོར་བཅུ་གཉིས་སྦོམ་ཕྲ་མཐེའུ་ཆུང་ཙམ་པའི་ཁ་མཉམ་པར་བཅད་པ་ལ་འཇིགས་པ་ཆེན་པོ་བརྒྱད་སོགས་ནད་གདོན་བར་གཅོད་མི་མཐུན་པའི་ཕྱོགས་ཐམས་ཅད་ཤནྚིང་ཀུ་རུ་ཡེ་སྭཱ་ཧཱ། ཞེས་པ་བྲིས་པའི་རྩེ་གཉིས་སུ་མར་དང་སྦྲང་རྩིས་བྱུག་པའི་ཡམ་ཤིང་གང་མང་དང་། མར་ཁུ། ཏིལ་དཀར། ཡུངས་ཀར། ཟས་སྣ། ཞོ་ཟན། དཱུར་ཝ། འབྲས། སོ་བ། ནས། སྲན་མ། གྲོ། ཀུ་ཤ། ཕྲུམ། འབྲུ་སྣ། དར་སྣ། ཤིང་ཏོག་སྟེ་སྤྱི་རྫས་དང་། ཁྱད་པར་གྱི་རྫས་པད་དཀར། ཙམ་པ་ཀ །ཙན་དན་དཀར་པོ། ག་བུར། རྩི་མར། དྲི་སྣ། དུང་། ཤེལ། དངུལ་ལ་སོགས་དཀར་པོའི་རིགས་ཀྱི་རིན་ཆེན་དར་གོས་འབྲུ་སྨན་ཅི་འབྱོར་བ་དང་། གཡོན་དུ་འཇིག་རྟེན་དང་འཇིག་རྟེན་ལས་འདས་པའི་ལྷ་ལ་ཉེར་སྤྱོད་ཚར་གཉིས་གཏོར་མ་སྨན་རག་དང་བཅས་པའི་མཆོད་རྫས་བསང་ཆུ་རྣམས་བཤམས་ལ། ཕག་མོ་དཀར་མོ་བདེ་ཆེན་རྣལ་འབྱོར་མའི་ལས་བྱང་བཀའ་གཏེར་གྱི་སྲུང་མ་གང་བྱེད་པའི་འཕྲིན་ལས་བསྐང་གསོལ་དང་བཅས་པ་རང་གཞུང་ལྟར་ལས་བྱང་གི་ལྷག་གཏོར་ཡན་གྲུབ་ནས། གདན་དཀར་པོའི་སྟེང་དུ་དར་དཀར་སོགས་ཆས་གོས་དཀར་པོ་དང་ལྡན་པས་ཁ་ཤར་དུ་ཕྱོགས་ཏེ་མི་ཚིག་གིས་བར་མ་ཆོད་པར་རོལ་མོ་འཁྲོལ་ཏེ་འཛབ་དབྱངས་གར་དུ་འཁྲབ་ཅིང་མེ་ཐབ་ལན་གསུམ་བསྐོར་ཏེ། ཨཱོཾ་སྭ་བྷཱ་ཝས་སྟོང་པར་སྦྱངས། སྟོང་པའི་ངང་ལས་དབུས་སུ་ཧ་དེ་ལ་རཾ་གྱིས་མཚན་པ་ལས་ཡེ་ཤེས་ཀྱི་མེ་དཔུང་དཀར་པོ་ཕྱོགས་བཅུར་འཕྲོས་པས་གནོད་བྱེད་འབྱུང་པོ་ཐམས་ཅད་བརླག །ཚུར་འདུས་ཕྱོགས་མཚམས་ཐམས་ཅད་མེ་རིའི་གུར་དུ་གྱུར་པར་བསམས་ཤིང་། ཧཱུྃ༔ བསྐལ་པའི་མེ་ཆེན་འབར་བའི་གཞལ་ཡས་འདིར༔ མེ་ལྷ་དྲང་སྲོང་ཡི་དམ་མ་གཏོགས་པ༔ གདོན་བགེགས་འབྱུང་པོ་བར་དུ་གཅོད་པའི་བགེགས༔ འདི་རུ་མ་འདུག་རང་རང་གནས་སུ་དེངས༔ གལ་ཏེ་མི་འགྲོ་ཆགས་ཤིང་འདིར་འཁོར་ན༔ མེ་འདག་འབར་བའི་སྦྲང་བུ་བཞིན་དུ་བསྲེག༔ ཞེ་སྡང་འཇོམས་པའི་མེ་ནི་མཐིང་ནག་འབར༔ ང་རྒྱལ་འཇོམས་པའི་མེ་ནི་སེར་ནག་འབར༔ འདོད་ཆགས་འཇོམས་པའི་མེ་ནི་དམར་ནག་འབར༔ ཕྲག་དོག་འཇོམས་པའི་མེ་ནི་ལྗང་ནག་འབར༔ གཏི་མུག་འཇོམས་པའི་མེ་ནི་སྨུག་ནག་འབར༔ ཡེ་ཤེས་འབར་བའི་མེ་ཡིས་མཚམས་ཆོད་ཅིག༔ ཧ་བཛྲ་དྷཀྐི་ནི་བྷ་ར་ཧི་ཨགྣཱེ་ཡེ་ཛྭ་ལ་རཾ་རཾ༔ ཨཱོཾ་སུམ་བྷ་ནི་སོགས་བརྗོད༔ དེ་ནས་རྫས་རྣམས་ཀྱི་ཉེས་སྐྱོན་སྦྱང་ཞིང་བྱིན་གྱིས་བརླབ་པ་ནི། བསང་ཆུའི་སྣོད་ནས་ཀུ་ཤའི་རྩེ་མོས་ལག་པ་གཡས་པས་ཆུ་བླངས་ཏེ་མཆོད་སྲེག་ག །ི་ཡོ་བྱད་ཐམས་ཅད་ལ་རང་གི་མདུན་ནས་གཡས་བསྐོར་དུ་འཐོར་ཞིང་། ནང་མཆོད་ཀྱིས་ཀྱང་བསངས་ལ། རྡོ་རྗེའི་ཁུ་ཚུར་ལས་གུང་མོ་གཉིས་རྩེ་སྤྲད། ཨཱོཾ་སྭཱ་ཧཱས་རྫས་རྣམས་བཀྲུས་པར་བསམས། ཨཱོཾ་ཨཱཿསྭཱ་ཧཱས་ཡམ་ཤིང་དང་། ཨཱོཾ་ཤྲཱི་སྭཱ་ཧཱས་ཞུན་མར་དང་། ཨཱོཾ་ཛྲིཾ་སྭཱ་ཧཱས་འབྲུ་དང་། ཨཱོཾ་ཀུ་རུ་ཀུ་རུ་སྭཱ་ཧཱས་དེ་ལས་གཞན་པའི་རྫས་རྣམས་ཀྱི་ཉེས་སྐྱོན་ཐམས་ཅད་སྦྱངས་ཏེ་སྟོང་པར་གྱུར། སྟོང་པའི་ངང་ལས་བྷྲུྃ་ལས་རིན་པོ་ཆེའི་སྣོད་ཡངས་ཤིང་རྒྱ་ཆེ་བ་རྣམས་ཀྱི་ནང་དུ་ཡི་གེ་གསུམ་འོད་དུ་ཞུ་བ་ལས་བྱུང་བའི་སྲེག་རྫས་རྣམས་ངོ་བོ་ཡེ་ཤེས་ཀྱི་བདུད་རྩིའི་རྒྱ་མཚོ་ཆེན་པོ་ལ་རྣམ་པ་འདོད་ཡོན་ལྔ་སོགས་མཆོད་པའི་ཡོ་བྱད་མ་ཚང་བ་མེད་པ་ཀུན་ཏུ་བཟང་པོའི་མཆོད་པའི་སྤྲིན་གྱི་ཕུང་པོ་རབ་འབྱམས་ནམ་མཁའི་མཐའ་དང་མཉམ་པར་གྱུར། ཨཱོཾ་ཧཱུྃ་ཏྲཱཾ་ཧྲཱིཿཨཱཿ ཨཱོཾ་ཨཱཿཧཱུྃ། གསུམ་མམ་བདུན་བརྗོད༔ དེ་ནས་རྒྱལ་རིགས་ཀྱི་ཁྱིམ་ནས་མེ་བླངས་ཏེ་སྣོད་དུ་བཞག་ལ། ཨཱོཾ་ཨཱཿཧཱུྃ་བརྗོད་ཅིང་ཞུན་མར་གྱི་སྒྲོན་མེ་སྦར་བས་སྦར་ལ་རླུང་གཡབ་ཀྱིས་གཡབ་ཅིང་། ཧཱུྃ༔ ཤར་གྱི་ཕྱོགས་ནས་མེ་སྦར་མས༔ དྲི་ཟའི་ལག་ནས་མེ་ལོངས་ལ༔ ཞི་བའི་མེ་ནི་སྤར་བར་མཛོད༔ ལྷོ་ནུབ་མཚམས་ནས་ཤིང་ཐུན་མས༔ རླུང་ལྷའི་ཡུལ་ནས་ཤིང་ཐུས་ལ༔ རླུང་གི་ལྷ་མོས་རླུང་གཡོབས་ཤིག༔ ཨཱོཾ་ཨགྣཱེ་ཡེ་ཛྭ་ལ་རཾ་རཾ༔ ཞེས་བརྗོད་ཅིང་སྤར་ལ་ཞུན་མར་བླུགས་གཟར་བདུན་གྱིས་ཀྱང་གསོའོ། །དེ་ནས་ཀུ་ཤ་ལ། ཨཱོཾ་བཛྲ་ས་ཏྭ་ཨཱཿ བདུན་གྱི་བྱིན་གྱིས་བརླབས་པའི་རྩེ་མོ་གཉིས་གཤིབས་པ་ལག་ཏུ་བཟུང་ལ། ཨཱོཾ༔ ཀུ་ཤ་འདི་ནི་གཙང་ཞིང་དགེ། ཚངས་པ་ལྷ་རྣམས་དག་བྱེད་ཡིན། །དཀོན་མཆོག་གསུམ་པོ་མཉེས་བྱེད་པ། །ས་ལས་སྐྱེས་པ་འདབ་མའི་སྙིང་། བདག་གི་བགེགས་རྣམས་ཐམས་ཅད་ནི། །ཞི་དང་བཀྲ་ཤིས་མཛད་དུ་གསོལ། །ཞེས་ཐབ་ཀྱི་ཁ་ཁྱེར་ལ་རང་གི་ཁ་བལྟ་ཕྱོགས་ལ་ཤར་དུ་བྱས་པའི་རྩེ་མོ་ཕྱོགས་བཞིར་ཡོང་བར་བྱས་ལ་ཕྱི་མའི་རྩེ་མོས་སྔ་མའི་རྩ་བ་ནོན་པར་བ་ལང་གི་རྣ་བའི་དབྱིབས་ལྟར་ཧ་ཅང་མི་རིང་བར་དགྲམ་མོ། གཉིས་པ་དངོས་གཞི་ལ་འཇིག་རྟེན་པ་དང་འདས་པའི་མེ་ལྷ་མཆོད་པ་གཉིས་ལས། དང་པོ་ལྷ་བསྐྱེད་པ་ནི། ཨཱོཾ་སྭ་བྷཱ་ཝའི་སྔགས་ཀྱིས་སྦྱངས༔ མེ་ཐབ་མི་དམིགས་པ་སྟོང་པ་ཉིད་དུ་གྱུར༔ སྟོང་པའི་ངང་ལས་རཾ་དཀར་པོ་འོད་དུ་ཞུ་བ་ལས་མེ་ཐབ་གཞལ་ཡས་ཀྱི་ཁང་པ་དཀར་ཞིང་འཚེར་བ་ཁ་ཁྱེར་ཕྱིར་ཕྱོགས་པའི་སྟེང་དུ་རྡོ་རྗེའི་ཕྲེང་བས་མཚན་པའི་དབུས་སུ་མེ་ལྷ་དཀར་པོ་དྲང་སྲོང་གི་ཆ་བྱད་ཅན་ཞལ་གཅིག་ཕྱག་གཉིས་པ་གཡས་བགྲང་ཕྲེང་དང་གཡོན་མེ་ཐབ་བསྣམས་པ༔ འཁོར་དུ་དྲང་སྲོང་མང་པོས་བསྐོར་ཞིང་པདྨ་དང་ཟླ་བའི་གདན་ལ་གནས་པའི་སྤྱི་བོར་ཨཱོཾ་མགྲིན་པར་ཨཱཿཐུགས་ཀར་ཧཱུྃ་གིས་མཚན་པ་དང་༔ བདག་ཉིད་ཡི་དམ་དུ་གསལ་བའི་ཐུགས་ཀ་ནས་འོད་ཟེར་འཕྲོས་པས་ཤར་ལྷོ་མཚམས་ནས་ཡེ་ཤེས་ཀྱི་མེ་ལྷ་འཁོར་དྲང་སྲོང་དཔག་ཏུ་མེད་པས་བསྐོར་བ་སྤྱན་དྲངས་པར་བསམས་ཤིང་༔ སྤྱན་འདྲེན་ནི༔ ཧཱུྃ༔ དད་པ་དང་ནི་དམ་ཚིག་གིས༔ ཚུར་གཤེགས་ཚུར་གཤེགས་འབྱུང་བ་ཆེ༔ མེ་ལྷའི་རྒྱལ་པོ་དྲང་སྲོང་མཆོག༔ ཤར་ལྷོ་མཚམས་ཀྱི་གཞལ་ཡས་ནས༔ དམ་ཚིག་དབང་གིས་སྤྱན་འདྲེན་ན༔ བསྐྱེད་པའི་གནས་འདིར་གཤེགས་སུ་གསོལ༔ ཨཱོཾ་ཨགྣཱེ་ཡེ་བཛྲ་ས་མ་ཡ་ཨེ་ཧྱ་ཧི་ཛཿཧཱུྃ་བཾ་ཧོཿ བཞུགས་སུ་གསོལ་བ་ནི༔ ཧཱུྃ༔ གཟི་བརྗིད་འབར་བ་མེ་ཡི་ལྷ༔ འཕྲིན་ལས་མ་ལུས་བསྒྲུབ་པའི་ཕྱིར༔ འབར་བ་མེ་ཡི་གཞལ་ཡས་འདིར༔ གཉིས་མེད་བརྟན་པར་གཞུགས་སུ་གསོལ༔ ཨཱོཾ་ཨཱགྣཱེ་ཡེ་དེ་ཝ་བཛྲ་ས་མ་ཡ་ཨ་ཝེ་ཤ་ཡ་ཏིཥྛ་ལྷན༔ ཕྱག་འཚལ་བ་ནི༔ ཧཱུྃ༔ དྲང་སྲོང་ཆེན་པོ་མེ་ཡི་ལྷ༔ གཟི་བརྗིད་འབར་བ་ལྟ་ན་སྡུག༔ འཕྲིན་ལས་ཀུན་བདག་ཐུགས་རྗེ་ཅན༔ གུས་པའི་ཡིད་ཀྱིས་ཕྱག་འཚལ་བསྟོད༔ ཨཱོཾ་ཨགྣེ་ཡེ་དེ་ཝ་ཨ་ལ་ལ་ཨ་ཏི་པུ་ཧོ༔ མཆོད་པ་འབུལ་བ་ནི༔ ཧཱུྃ༔ མེ་ཏོག་བདུག་སྤོས་མར་མེ་དྲི༔ ཞལ་ཟས་སྒྲ་སྙན་གདུང་བའི་དབྱངས༔ ཕྱི་མཆོད་འདོད་ཡོན་ལོངས་སྤྱོད་ཚོགས༔ དྲང་སྲོང་མེ་ལྷའི་ཚོགས་ལ་འབུལ༔ ཨཱོཾ་ཨགྣཱེ་ཡེ་བཛྲ་པུཥྤེ་དྷཱུ་པེ་ཨཱ་ལོ་ཀེ་གྷནྡྷེ་ནཻ་ཝི་དྱ་ཤཔྟ་པཱུ་ཙ་མེ་གྷ་ཨཱཿཧཱུྃ་སྭཱ་ཧཱ༔ ཧཱུྃ༔ རཀྟ་དམར་གྱི་ཡོན་ཆབ་དང་༔ དབང་པོ་རྣམ་ལྔའི་མེ་ཏོག་ཚོགས༔ ཤ་ཆེན་རྣམ་ལྔའི་བདུག་སྤོས་དང་༔ ཞུན་ཆེན་སྣང་གསལ་མར་མེ་མཆོག༔ བདུད་རྩི་ལྔ་ལྡན་བྱུག་པ་དང་༔ རྣམ་དག་མཆོག་གི་ཞལ་ཟས་སོགས༔ བླ་མེད་ནང་གི་མཆོད་པ་འདི༔ དྲང་སྲོང་མེ་ལྷའི་ཚོགས་ལ་འབུལ༔ ཨཱོཾ་ཨགྣཱེ་ཡེ་ཛྙཱ་ན་སརྦ་པཱུ་ཙ་ཁཱ་ཧི་ཁཱ་ཧི༔ ཧཱུྃ༔ རྩ་བརྒྱད་སྟོང་སྦྱར་ཨམྲྀ་ཏ༔ རཀྟ་དམར་གྱི་རྒྱ་མཚོ་དང་༔ བྷ་ལིང་རྒྱན་ལྡན་གཏོར་མའི་ཚོགས༔ གྷ་ན་ཙཀྲ་ལོངས་སྤྱོད་རྫས༔ བླ་མེད་གསང་བའི་མཆོད་པ་འདི༔ ཡེ་ཤེས་མེ་ལྷའི་ཚོགས་ལ་འབུལ༔ ཨཱོཾ་ཨགྣཱེ་ཡེ་བཛྲ་སརྦ་པཉྩ་ཨམྲྀ་ཏ་རཀྟ་བྷ་ལིངྟ་གྷ་ན་པཱུ་ཙ་ཁ་ཁ་ཁཱ་ཧི༔ འབྲོག་འབྲང་འབུལ་བ་ནི༔ ཧཱུྃ༔ གསུར་ཆེན་དང་ནི་ཤ་ཆེན་དྲི༔ སྐྱེ་བའི་རྒྱུ་ལས་བྱུང་བ་འདི༔ ཡེ་ཤེས་མེ་ལྷའི་ཚོགས་ལ་འབུལ༔ སརྦ་ཤ་ཏྲུཾ་ཨ་མུ་ཀ་མཱ་ར་ཡ་ཧཱུྃ་ཕཊ༔ ཡམ་ཤིང་འབུལ་བ་ནི༔ ཧཱུྃ༔ ཙན་དན་དཀར་པོ་དྲི་ཞིམ་སྤོས༔ གཉིས་སུ་མེད་པར་འབུལ་ལགས་ན༔ བཞེས་ནས་ནད་གདོན་བར་གཅོད་ཚོགས༔ ཞི་བའི་འཕྲིན་ལས་འགྲུབ་པར་མཛོད༔ ཨཱོཾ་ཨགྣཱེ་ཡེ་གྷ་ན་དྷེ་དེ་ཝ་ཨ་སྱ་ཧ་ན་ཡ་བདག །་སོགས་སེམས་ཅན་ཐམས་ཅད་ཀྱི་ནད་གདོན་སྡིག་སྒྲིབ་མི་མཐུན་པའི་ཚོགས་ཐམས་ཅད་དང་། ཁྱད་པར་གཟི་བརྗིད་ཕུན་སུམ་ཚོགས་པ་ལ་བར་དུ་གཅོད་པ་ཐམས་ཅད་ཤཱནྟིང་ཀུ་རུ་ཡེ་སྭཱ་ཧཱ༔ མར་ཁུ་འབུལ་བ་ནི༔ མེ་ལྷའི་ལྗགས་རྡོ་རྗེའི་རྣམ་པ་ཅན་དཀར་པོ་ལ་རཾ་དང་དགང་བླུགས་ཀྱི་ཁར་ཧ་ཡིག་འོདཟེར་དང་ལྡན་པས་མཚན་པར་གྱུར་པར་བསམས་ཤིང་། ལག་པ་གཡོན་ཁུ་ཚུར་བཅིང་བའི་སྟེང་ན་མཐེ་བོས་བཀབ་པ་དེ་བཞིན་གཤེགས་པའི་ཁུ་ཚུར་བྱས་པའི་མཛུབ་མོ་བརྐྱང་བ་གན་རྐྱལ་བྱས་པས་དགང་གཟར་མར་ཁུས་བཀང་བ་བཟུང་། གཡས་པའང་དེ་བཞིན་དུ་བྱས་པ་ཁ་འཐུར་དུ་སྦུབ་པས་བླུགས་གཟར་གྱི་ཡུ་བ་བཟུང་བ་གཡོན་པའི་མཛུབ་མོའི་ཐད་ཀར་གཡས་པའི་ཁུ་ཚུར་བཞག་སྟེ་དགང་གཟར་ཁར་བླུགས་གཟར་གྱི་མགོ་བཞག་ནས་འཛིན་པ་བྱང་ཆུབ་མཆོག་གི་ཕྱག་རྒྱས་ལག་པ་གཉིས་པུས་མོའི་ནང་ལས་མི་འདའ་བར་གཡས་སུ་བསྐོར་ཏེ་འབུལ་ཞིང་། ཨོཾ་ཨགྣཱེ་ཡེ་གྷནྡྷེ་སྭཱ་ཧཱ༔ ནད་གདོན་ཐམས་ཅད་ཤཱནྟིང་ཀུ་རུ་ཡེ་སྭཱ་ཧཱ༔ ཏིལ་ལ། ཨཱོཾ་སརྦ་པཱ་པཾ་ད་ཧ་ན་བཛྲཱ་ཡ་སྭཱ་ཧཱ༔ སྡིག་པ་ཐམས་ཅད་ཤཱནྟི་ཀུ་རུ་སྭཱ་ཧཱ༔ ཡུངས་ཀར་ལ། ཨཱོཾ་སརྦ་ཨརྠ་ས་དྷཱ་ཡ་སྭཱ་ཧཱ༔ བགེགས་ཐམས་ཅད་ཤཱནྟིང་ཀུ་རུ་ཡེ་སྭཱ་ཧཱ༔ ཟས་སྣ་ལ། ཨཱོཾ་སརྦ་སཾ་བྷ་དེ་སྭཱ་ཧཱཿ བདེ་བ་མཆོག་ལ་བར་དུ་གཅོད་པ་ཐམས་ཅད༴དཱུརྦ་ལ། ཨཱོཾ་བཛྲ་ཨཱ་ཡུ་ཥེ་སྭཱ་ཧཱཿ ཚེ་མཐར་ཕྱིན་པ་ལ་བར་དུ་གཅོད༴འབྲས་ལ། ཨཱོཾ་བཛྲ་པཱུཥྟ་ཡེ་སྭཱ་ཧཱཿ བསོད་ནམས་རྒྱས་པ་ལ་བར་དུ༴སོ་བ་ལ། ཨོཾ་བཛྲ་བྷི་ཛཱ་ཡེ་སྭཱ་ཧཱཿ ནོར་དང་འབྲུ་རྒྱས་པ་ལ་བར་དུ༴ནས་ལ། ཨཱོཾ་མ་ཧཱ་བེ་གྷ་ཡ་སྭཱ་ཧཱཿ མྱུར་བའི་ཤུགས་ཕུན་སུམ་ཚོགས་པ་ལ་བར་དུ༴སྲན་མ་ལ། ཨཱོཾ་བཛྲ་མ་ཧཱ་བ་ལཱ་ཡ་སྭཱ་ཧཱཿ སྟོབས་རྒྱས་པ་ལ་བར་དུ༴གྲོ་ལ། ཨཱོཾ་བཛྲ་གྷསྨ་རེ་སྭཱ་ཧཱཿ ནད་མེད་པ་ཕུན་སུམ་ཚོགས་པ་ལ་བར་དུ༴ཀུ་ཤ་ལ། ཨཱོཾ་ཨ་པྲ་ཏི་ཧ་ཏ་བཛྲ་ཡ་སྭཱ་ཧཱཿ སྲུང་བ་མཆོག་ལ་བར་དུ༴ཕྲུམ་ལ། ཨཱོཾ་ཨཱཿསྭཱ་ཧཱ༔ ལོངས་སྤྱོད་ཕུན་སུམ་ཚོགས་པ་ལ༴འབྲུ་སྣ་ལ། ཨཱོཾ་ཛྲིཾ་སྭཱ་ཧཱ༔ མངའ་ཐང་ཕུན་སུམ་ཚོགས་པ་ལ༴ཤིང་ཏོག་ལ། ཨཱོཾ་ཤྲཱི་བ་ཡ་སྭཱ་ཧཱ༔ དཔལ་ཕུན་སུམ་ཚོགས་པ་ལ༴དར་སྣ་ལ། ཨཱོཾ་བཛྲ་ཝཱསྟྲ་ཡེ་སྭཱ་ཧཱཿ བསོད་ནམས་ཕུན་སུམ་ཚོགས་པ་ལ༴སྲེག་རྫས་སྔགས་མེད་པའི་རིགས་ཐམས་ཅད་ལ། ཨཱོཾ་ཀུ་རུ་ཀུ་རུ་སྭཱ་ཧཱཿ མདོར་ན་མི་མཐུན་པའི་ཕྱོགས་ཐམས་ཅད་ཤཱནྟིང་ཀུ་རུ་ཡེ་སྭཱ་ཧཱཿ དེ་ནས་ཚིག་བཅད་ཀྱིས་འབུལ་བ་ནི༔ ཧཱུྃ༔ གཟི་བརྗིད་འབར་བ་མེ་ཡི་ལྷ༔ སྦྱིན་སྲེག་མཆོད་པ་འདི་བཞེས་ལ༔ ནད་གདོན་སྡིག་སྒྲིབ་བར་གཅོད་བགེགས༔ ཞི་བའི་འཕྲིན་ལས་མཛད་དུ་གསོལ༔ ཨཱོཾ་ཨགྣཱེ་ཡེ་ས་པ་རི་ཝཱ་ར་ཨརྒྷཾ་ནས་ཤཔྟ་སརྦ་པཉྩ་ཨ་མྲྀ་ཏ་མ་ཧཱ་རཀྟ་བྷ་ལིངྟ་གྷ་ན་པཱུ་ཙ་ཁ་ཁ་ཁཱ་ཧི་ཁཱ་ཧིཿ བསྡུས་པར་བྱེད་ན་ཚིག་བཅད་འདིའི་མཇུག་ཏུ་མཆོད་པ་གོང་མ་རྣམས་ཕུལ་ཀྱང་རུང་། དེ་ནས་བསྟོད་པ་ནི༔ ཧཱུྃ༔ ཚངས་པ་འཇིག་རྟེན་མགོན་གྱི་སྲས༔ མེ་ལྷའི་རྒྱལ་པོ་དྲང་སྲོང་མཆོག༔ འཕྲིན་ལས་ཐམས་ཅད་བསྒྲུབ་པའི་ལྷ༔ རིགས་སྔགས་དྲང་སྲོང་གྲུབ་པའི་ཚུལ༔ འོད་འབར་བསྐལ་མེའི་ཕྲེང་བ་ཅན༔ མཐུ་སྟོབས་རྫུ་འཕྲུལ་བསམ་མི་ཁྱབ༔ ཐབས་ཀྱི་ཐེག་པ་ར་ལ་བཅིབས༔ བགྲང་ཕྲེང་འཛིན་ཞིང་རིག་སྔགས་གསུང་༔ ཚངས་སྐུད་དྲི་མེད་ཅོད་པན་སྤྲས༔ མཉམ་མེད་ཐུགས་རྗེ་ཆེར་མངའ་བའི༔ མགོན་པོ་ཁྱོད་ལ་ཕྱག་འཚལ་བསྟོད༔ ཅེས་བརྗོད༔ འཕྲིན་ལས་བཅོལ་བ་ནི༔ ཧཱུྃ༔ དྲང་སྲོང་ཆེན་པོ་གཟི་བརྗིད་འཆང་བའི་གར༔ འབར་བའི་ལྷ་ཆེན་ཡབ་ཡུམ་སྲས་འཁོར་བཅས༔ དམ་རྫས་འབར་བའི་མེ་མཆོད་འདི་འབུལ་བས༔ ཞི་བའི་འཕྲིན་ལས་བསྒྲུབ་པའི་དུས་ལ་བབས༔ ཅེས་འཕྲིན་ལས་བཅོལ༔ བཛྲ་མུས་མེ་ལྷའི་ཡེ་ཤེས་པ་ཐབ་ཀྱི་ཤར་ལྷོར་གཤེགས་ཏེ་བཞུགས་པར་གྱུར༔ གཉིས་པ་ཡེ་ཤེས་པའི་མེ་ལྷ་མཆོད་པ་ནི། མེ་ཐབ་ཏུ་རྡོ་རྗེས་བསང་ཆུ་འཐོར་ཞིང་༔ ཨཱོཾ་སྭ་བྷཱ་ཝའི་སྔགས་ཀྱིས་སྦྱངས༔ མེ་ལྷའི་ལྟོ་བ་ཟབ་ལ་རྒྱ་ཆེ་ནང་། །སྣང་བའི་རང་བཞིན་སྟོང་པའི་ཀློང་ཡངས་ན། །ཆོས་འབྱུང་ཉི་ཟླ་པདྨའི་གདན་སྟེང་དུ། ཅེས་པ་ནས་ཨ་མྲྀ་ཏ་རཀྟ་མ་ཧཱ་སརྦ་པཱུ་ཙ་ཧོཿཞེས་པའི་བར་ལས་བྱང་ལྟར་བྱ། དེ་ནས་སྲེག་རྫས་རྣམས་འབུལ་ཚེ་ཡེ་ཤེས་ཀྱི་མེ་ལྷ་འཁོར་དང་བཅས་པས་དགྱེས་པར་བཞེས་ཏེ་ཟག་པ་མེད་པའི་དབྱིངས་སུ་ཐུགས་དམ་གྱི་རྒྱུད་ཡོངས་སུ་སྐོངས་ཏེ་ཇི་ལྟར་གསོལ་བ་བཏབ་པའི་ལས་རབ་འབྱམས་མངོན་པར་བསྒྲུབ་པར་བསམས་ལ། ཡམ་ཤིང་ལ། ཧཱུྃ༔ ཙན་དན་དཀར་པོ་དྲི་ཞིམ་སྤོས། གཉིས་སུ་མེད་པར་འབུལ་ལགས་ན། །བཞེས་ནས་ནད་གདོན་བར་གཅོད་ཚོགས། །ཞི་བའི་འཕྲིན་ལས་གྲུབ་པར་མཛོད། །ཧ་བཛྲ་དྷཀྐི་ནི་བྷ་ར་ཧི་ཨཱ་ཡུ་ཥེ་ཧཱུྃ་བྷྲུྃ་ནྲི་ཛཿ སིདྡྷི་སྭཱ་ཧཱཿ ཨཱོཾ་ཨགྣཱེ་ཡེ་དྷེ་ཝ་ཨ་སྱ་ཧ་ན་ཡ་བདག་སོགས་སེམས་ཅན་ཐམས་ཅད་ཀྱི་སྡིག་སྒྲིབ་ནད་གདོན་མི་མཐུན་པའི་ཕྱོགས་ཐམས་ཅད་དང་། ཁྱད་པར་དུ་གཟི་བརྗིད་ཕུན་སུམ་ཚོགས་པ་ལ་བར་དུ་གཅོད་པ་ཐམས་ཅད་ཤཱནྟིང་ཀུ་རུ་ཡེ་སྭཱ་ཧཱཿ མར་ཁུ་ལ། ལྷ་ཚོགས་ཐམས་ཅད་ཀྱི་ལྗགས་རྡོ་རྗེའི་རྣམ་པ་ཅན་དཀར་པོ་ལ་རཾ་དང་དགང་བླུགས་ཀྱི་ཁར་ཧ་ཡིག་འོད་ཟེར་དང་བཅས་པས་མཚན་པར་གྱུར་པར་བསམས་ཤིང་། ཧཱུྃ༔ བདུད་རྩིའི་བཅུད་ལྡན་སྙིང་པོའི་མར༔ ། བདེ་ཆེན་དཀར་མོའི་ལྷ་ཚོགས་ལ༔ གུས་པས་འབུལ་ལོ་བཞེས་ནས་ཀྱང་༔ ནད་གདོན་བགེགས་ཚོགས་ཞི་བར་མཛོད༔ ཧ་བཛྲ་དྷཀྐི་ནི་བྷ་ར་ཧི་ཨཱ་ཡུ་ཥེ་ཧཱུྃ་བྷྲུྃ་ནྲི་ཛཿསིདྡྷི་སྭཱ་ཧཱཿ ཨཱོཾ་ཨགྣཱེ་ཡེ་གྷནྡྷེ་སྭཱ་ཧཱཿ ནད་གདོན་ཐམས་ཅད་ཤནྟིང་ཀུ་རུ་ཡེ་སྭཱ་ཧཱཿ ཏིལ་ལ། ཞི་བས་རྫས་སུ་བསྔགས་པའི་ཏིལ༔ བདེ་ཆེན་དཀར་མོའི་ལྷ་ཚོགས་ལ༔ འབུལ་ལོ་དགྱེས་པར་བཞེས་ནས་ཀྱང་༔ སྡིག་ལྟུང་མཐའ་དག་ཞི་བར་མཛོད༔ ཧ་བཛྲ་དྷཀྐི་ནི་བྷ་ར་ཧི་ཨཱ་ཡུ་ཥེ་ཧཱུྃ་བྷྲུྃ་ནྲི་ཛཿསིདྡྷི་སྭཱ་ཧཱཿ ཨཱོཾ་སརྦ་པཱ་པཾ་ད་ཧ་ན་བཛྲཱ་ཡེ་སྭཱ་ཧཱཿ སྡིག་པ་ཐམས་ཅད་ཤཱནྟིང་ཀུ་རུ་ཡེ་སྭཱ་ཧཱཿ ཡུངས་ཀར་ལ། ཡུངས་ཀར་བགེགས་འཇོམས་ཁྲོ་བོའི་མཚོན༔ བདེ་ཆེན་དཀར་མོའི་ལྷ་ཚོགས་ལ༔ བློ་ཡིས་བླངས་ཏེ་འབུལ་ལགས་ན༔ བགེགས་དཔུང་མ་ལུས་ཞི་བར་མཛོད༔ ཧ་བཛྲ་དྷཀྐི་ནི༴ཨཱོཾ་སརྦ་ཨརྠ་ས་དྷཱ་ཡ་སྭཱ་ཧཱ༔ བགེགས་ཐམས་ཅད༴ཟས་སྣ་ལ། རོ་བརྒྱ་ལྡན་པ་ལྷ་ཡི་ཟས༔ བདེ་ཆེན་དཀར་མོ་ལ་འབུལ་གྱིས༔ དམིགས་མེད་ཀློང་དུ་བཞེས་ནས་ཀྱང་༔ བདེ་བའི་བར་བཅོད་ཀུན་ཞི་མཛོད༔ ཧ་བཛྲ་དྷཀྐི་ནི༴ཨཱོཾ་སརྦ་སཾ་བྷ་དེ་སྭཱ་ཧཱཿ བདེ་བ་མཆོག་ལ་བར་དུ༴དཱུརྦ་ལ། བཀྲ་ཤིས་དཱུརྦ་འཆི་མེད་རྫས༔ བདེ་ཆེན་དཀར་མོའི་ལྷ་ཚོགས་ལ༔ འབུལ་བས་དགྱེས་པ་ཡོངས་བསྐྱེད་དེ༔ ཚེ་ཡི་བར་ཆད་ཡོངས་ཞི་མཛོད༔ ཧ་བཛྲ་དྷཀྐི་ནི༴ཨཱོཾ་བཛྲ་ཨ་ཡུ་ཥེ་སྭཱ་ཧཱཿ ཚེ་མཐར་ཕྱིན་པ་ལ༴འབྲས་ལ། བཀྲེས་པའི་རྒུད་པ་ཡོངས་སེལ་བའི༔ འབྲས་དཀར་ས་ལུ་ལྷ་ཡི་ཟས༔ བདེ་ཆེན་དཀར་མོ་ལ་འབུལ་གྱིས༔ བསོད་ནམས་ལ་འཚེ་ཀུན་ཞི་མཛོད༔ ཧ་བཛྲ་དྷཀྐི་ནི༴ཨཱོཾ་བཛྲ་པུཥྟ་ཡེ་སྭཱ་ཧཱཿ བསོད་ནམས་རྒྱས་པ་ལ༴སོ་བ་ལ། ཡིད་འོང་རྣམ་པར་རྒྱལ་བའི་འབྲུ༔ སོ་བ་ཟས་ཀྱི་མཆོག་དམ་པ༔ བདེ་ཆེན་དཀར་མོ་ལ་འབུལ་གྱིས༔ འབྲུ་ནོར་ལ་འཚེ་ཀུན་ཞི་མཛོད༔ ཧ་བཛྲ་དྷཀྐི་ནི༴ཨཱོཾ་བཛྲ་བི་ཛཱ་ཡ་སྭཱ་ཧཱཿ ནོར་དང་འབྲུ་རྒྱས་པ་ལ་བར་དུ་གཅོད༴ནས་ལ། དབུལ་བ་རྒྱུན་གཅོད་བསྐལ་བཟང་ནས༔ བདེ་ཆེན་དཀར་མོ་འཁོར་བཅས་ལ༔ འབུལ་ལོ་མྱུར་བའི་ཤུགས་དག་ལ༔ བར་དུ་གཅོད་པ་ཞི་བར་མཛོད༔ ཧ་བཛྲ་དྷཀྐི་ནི༴ཨཱོཾ་མ་ཧཱ་བེ་གྷཱ་ཡ་སྭཱ་ཧཱཿ མྱུར་བའི་ཤུགས་ཕུན་སུམ་ཚོགས༴སྲན་མ་ལ། རོ་བཅུད་ཕུལ་ཕྱིན་སྲན་མའི་འབྲུ༔ བདེ་ཆེན་དཀར་མོ་འཁོར་བཅས་ལ༔ ཐོགས་མེད་བློ་ཡིས་འབུལ་ལོ་བཞེས༔ སྟོབས་ལ་འགོག་པ་ཞི་བར་མཛོད། ཧ་བཛྲ་དྷཀྐི་ནི༴ཨཱོཾ་བཛྲ་མ་ཧཱ་བ་ལཱ་ཡ་སྭཱ་ཧཱཿ སྟོབས་རྒྱས་པ་ལ་བར་དུ༴གྲོ་ལ༔ སྐྱེ་འགྲོའི་སྲོག་གི་ཟུངས་འཛིན་གྲོ༔ བདེ་ཆེན་དཀར་མོ་ལ་འབུལ་ན༔ བརྩེ་བའི་ཤུགས་ཀྱིས་བཞེས་ནས་ཀྱང་༔ ནད་མེད་རིང་འཚོའི་གེགས་ཞི་མཛོད༔ ཧ་བཛྲ་དྷཀྐི་ནི༴ཨཱོཾ་བཛྲ་གྷསྨ་རེ་སྭཱ་ཧཱཿ ནད་མེད་པ་ཕུན་སུམ་ཚོགས་པ་ལ༴ཀུ་ཤ་ལ༔ བྱང་ཆུབ་མཆོག་ལྡན་ཀུ་ཤའི་རྩྭ༔ བདེ་ཆེན་དཀར་མོ་ལ་འབུལ་ན༔ དགྱེས་ཤིང་ཚིམ་པར་ཡོངས་བཞེས་ནས༔ བསྲུང་བའི་གོ་བཤིག་གེགས་ཞི་མཛོད༔ ཧ་བཛྲ་དྷཀྐི་ནི༴ཨཱོཾ་ཨ་པྲ་ཏི་ཧ་ཏ་བཛྲཱ་ཡ་སྭཱ་ཧཱཿབསྲུང་བ་མཆོག་ལ་བར་དུ༴ཕྲུམ་ལ༔ དཀར་གསུམ་བདུད་རྩི་ལས་བྱུང་ཕྲུམ༔ བདེ་ཆེན་དཀར་མོར་འབུལ་ལགས་ན༔ ལོངས་སྤྱོད་ཕུན་སུམ་ཚོགས་པ་ལ༔ བར་དུ་གཅོད་པ་ཞི་བར་མཛོད༔ ཧ་བཛྲ་དྷཀྐི་ནི༴ཨཱོཾ་ཨཱཿསྭཱ་ཧཱ༔ ལོངས་སྤྱོད་ཕུན་སུམ་ཚོགས་པ་ལ༴འབྲུ་སྣ་ལ༔ ཕུན་ཚོགས་གཏེར་ལྡན་སྣ་ཚོགས་འབྲུ༔ བདེ་ཆེན་དཀར་མོ་འཁོར་བཅས་ལ༔ གུས་པས་འབུལ་ལོ་བརྩེ་བས་བཞེས༔ མངའ་ཐང་ལ་འཁུའི་གེགས་ཞི་མཛོད༔ ཧ་བཛྲ་དྷཀྐི་ནི༴ཨཱོཾ་ཛྲིཾ་སྭཱ་ཧཱཿ མངའ་ཐང་ཕུན་སུམ་ཚོགས་ལ་བར་དུ༴ཤིང་ཏོག་ལ༔ བདུད་རྩིའི་རོ་བཅུད་ཉེར་སྨིན་པའི༔ ཡིད་འོང་ལྗོན་པའི་རིན་ཆེན་འབྲས༔ བདེ་ཆེན་དཀར་མོར་འབུལ་ལགས་ན༔ དཔལ་ལ་གནོད་པ་ཞི་བར་མཛོད༔ ཧ་བཛྲ་དྷཀྐི་ནི་བྷ་ར་ཧི༴ཨཱོཾ་བཛྲ་ཤྲཱི་བ་ཡ་སྭཱ་ཧཱཿ དཔལ་ཕུན་སུམ་ཚོགས་པ༴དར་སྣ་ལ༔ དབང་པོའི་གཞུ་ཡི་ཚོན་བཀྲ་བའི༔ སྲབ་འཇམ་ཡང་བ་ལྷ་ཡི་གོས༔ བདེ་ཆེན་དཀར་མོའི་ཚོགས་ལ་འབུལ༔ བསོད་ནམས་འཕེལ་བའི་གེགས་ཞི་མཛོད༔ ཧ་བཛྲ་དྷཀྐི་ནི༴ཨཱོཾ་བཛྲ་ཝསྟྲ་ཡེ་སྭཱ་ཧཱ༔ བསོད་ནམས་རྣམ་པར་རྒྱས་པ་ལ་བར་དུ༴རྫས་སྔགས་མེད་པའི་སྲེག་རྫས་ཐམས་ཅད་ལ་ཕྱོགས་གཅིག་ཏུ༔ མི་ཟད་འདོད་དགུའི་ལོངས་སྤྱོད་རྫས༔ ཀུན་ཏུ་བཟང་པོའི་མཆོད་པའི་སྤྲིན༔ བདེ་ཆེན་དཀར་མོ་ལ་འབུལ་གྱིས༔ མི་མཐུན་ཚོགས་ཀུན་ཞི་བར་མཛོད༔ ཧ་བཛྲ་དྷཀྐི་ནི༴ཨཱོཾ་ཀུ་རུ་ཀུ་རུ་སྭཱ་ཧཱཿ མདོར་ན་མི་མཐུན་པའི་ཚོགས་ཐམས་ཅད་ཤཱནྟིང་ཀུ་རུ་ཡེ་སྭཱ་ཧཱཿ ཞེས་འབུལ༔ གསུམ་པ་རྗེས་ཀྱི་རིམ་པ་ནི༔ ཧཱུྃ༔ བདེ་ཆེན་དཀར་མོའི་ལྷ་ཚོགས་ལ༔ མཆོད་པའི་བྱེ་བྲག་འབུལ་བ་ནི༔ ཕྱི་མཆོད་ཉེར་སྤྱོད་རྣམ་པ་ལྔ༔ ནང་མཆོད་ཤ་ལྔ་བདུད་རྩི་ལྔ༔ གསང་མཆོད་བྱང་སེམས་བདེ་སྟོང་རྒྱུན༔ ཐབས་མཆོག་མཐར་ཕྱིན་བདུད་རྩི་དང་༔ ཤེས་རབ་མཐར་ཕྱིན་རཀྟ་དང་༔ ཐབས་ཤེས་དབྱེར་མེད་གཏོར་མ་འདི༔ སྐུ་གསུམ་ཀློང་དུ་བཞེས་ནས་ཀྱང་༔ མཆོག་དང་ཐུན་མོང་དངོས་གྲུབ་སྩོལ༔ ཨཱོཾ་བཛྲ་དྷཀྐི་ནི་བྷ་ར་ཧི་ས་པ་རི་ཝཱ་ར་ཨརྒྷཾ་ནས༔ ཤཔྟ་སརྦ་པཉྩ་རཀྟ་བྷ་ལིངྟ་པཱུ་ཙ་ཁཱ་ཧིཿ ཧཱུྃ༔ སྐྱེ་མེད་དབྱིངས་ལས་ཤར་བའི་ཕག་གདོང་མ༔ འགག་མེད་འཁོར་ལོས་སྒྱུར་བའི་མཁའ་འགྲོའི་གཙོ༔ སྤྲུལ་པའི་མཁའ་འགྲོ་དམ་ཚིག་ཚེ་ཡི་ལྷ༔ བདེ་ཆེན་དཀར་མོ་འཁོར་དང་བཅས་ལ་བསྟོད༔ ཅེས་བསྟོད་དངོས་གྲུབ་བླང་བ་ནི༔ ཚེ་འགུགས་ཚར་གཅིག་བརྗོད་པའི་མཐར༔ ཟས་སྣ་འདོད་ཡོན་བཏེག་སྟེ༔ ཧཱུྃ༔ ཆོས་དབྱིངས་ནམ་མཁའ་ཡངས་པའི་ཀློང་རུམ་ནས༔ ཕག་མོ་དཀར་མོ་བདེ་ཆེན་ཞི་བ་འཚོ༔ བླ་མ་ཡི་དམ་དྲང་སྲོང་མེ་ལྷའི་ཚོགས༔ བུམ་པ་བཟང་དང་དཔག་བསམ་ནོར་བུའི་ཚུལ༔ འཕྲིན་ལས་རྣམ་པ་བཞི་ཡི་དངོས་གྲུབ་སྩོལ༔ ཀུན་ཏུ་བཟང་མོ་ཆོས་སྐུའི་མཁའ་འགྲོ་འབུམ༔ སྤྲོས་བྲལ་སྐུ་ཡི་དངོས་གྲུབ་སྩལ་དུ་གསོལ༔ རྡོ་རྗེ་ཕག་མོ་ལོངས་སྐུའི་མཁའ་འགྲོ་འབུམ༔ ཕྱག་རྒྱ་ཆེན་པོའི་དངོས་གྲུབ་སྩལ་དུ་གསོལ༔ བདེ་ཆེན་དཀར་མོ་སྤྲུལ་སྐུའི་མཁའ་འགྲོ་འབུམ༔ འཆི་མེད་ཚེ་ཡི་དངོས་གྲུབ་སྩལ་དུ་གསོལ༔ ཡེ་ཤེས་མེ་ལྷ་འཕྲིན་ལས་ཀུན་གྱི་བདག༔ ནད་གདོན་ཞི་བའི་དངོས་གྲུབ་སྩལ་དུ་གསོལ༔ མཆོག་དང་ཐུན་མོང་དངོས་གྲུབ་མ་ལུས་པ༔ མྱུར་བ་ཉིད་དུ་བདག་ལ་སྩལ་དུ་གསོལ༔ ཧ་བཛྲ་དྷཀྐི་ནི་བྷ་ར་ཧི་ཨཱ་ཡུ་ཥེ་ཧཱུྃ་བྷྲུྃ་ནྲི་ཛཿསིདྡྷི་སྭཱ་ཧཱཿ མ་མ་སརྦ་སིདྡྷི་པུཥྟིང་ཀུ་རུ་ཡེ་སྭཱ་ཧཱཿ ཞེས་དངོས་གྲུབ་བླང་ཞིང་ལོངས་སྤྱད༔ བཟོད་པར་གསོལ་བ་ནི༔ ཧཱུྃ༔ ཡེ་ཤེས་མེ་ལྷ་དྲང་སྲོང་བདག་ལ་དགོངས༔ བདག་གིས་འཕྲིན་ལས་མེ་མཆོད་ཆོ་ག་འདི༔ ཚུལ་བཞིན་བགྱིད་པར་སེམས་ཀྱང་ནོར་དང་འཁྲུལ༔ ལྷག་གམ་ཆད་དམ་སྒྲ་ཉམས་རྫས་མ་འཛོམ༔ ཏིང་འཛིན་ཀློང་དུ་མ་གྱུར་ཉེས་བྱས་ཚོགས༔ ཉམས་ཆག་ཉེས་ལྟུང་སྡིག་སྒྲིབ་མཐོལ་ལོ་བཤགས༔ ཚངས་པ་མཆོག་གི་དངོས་གྲུབ་སྩལ་དུ་གསོལ༔ ཞེས་ཡི་གེ་བརྒྱ་བས་ལྷག་ཆད་བསྐང་༔ ཨཱོཾ་ཁྱེད་ཀྱི་སེམས་ཅན་དོན་ཀུན་མཛོད༔ རྗེས་སུ་མཐུན་པའི་དངོས་གྲུབ་སྩོལ༔ སངས་རྒྱས་ཡུལ་དུ་གཤེགས་ནས༔ སླར་ཡང་འབྱོན་པར་མཛད་དུ་གསོལ༔ ཨཱོཾ་བཛྲ་མུཿས་ཡེ་ཤེས་པ་གཤེགས༔ དམ་ཚིག་པ་རང་ལ་བསྡུ༔ སླར་ཡང་འཇིག་རྟེན་པའི་མེ་ལྷ་དཔང་པོར་བཞུགས་པ་བཛྲ་ས་མ་ཛ༔ དམ་ཚིག་པ་དང་གཉིས་སུ་མེད་པར་གྱུར་པ་ལ་གཏང་རག་གི་མཆོད་བསྟོད་དང་རྫས་རྣམས་སྔར་མེ་ལྷ་མཆོད་པའི་སྐབས་ལྟར་ཕུལ་རྗེས༔ གཏོར་མ་ལ་ཡང་༔ ཨཱོཾ་ཨགྣཱེ་ཡེ་ས་པ་རི་ཝཱ་ར་བྷ་ལིངྟ་པཱུ་ཙ་ཁཱ་ཧི༔ གསུམ་གྱིས་ཕུལ་ལ་འདོད་དོན་ལ་གསོལ་བ་གདབ༔ སླར་ཡང་༔ ཨཱོཾ་ཨགྣཱེ་ཡེ་ས་པ་རི་ཝཱ་ར་ཨརྒྷཾ་ནས༔ ཤཔྟའི་བར་གྱིས་མཆོད༔ ཧཱུྃ༔ དྲང་སྲོང་ཆེན་པོ་མེ་ཡི་ལྷ༔ གཟི་བརྗིད་འབར་བ་ལྟ་ན་སྡུག༔ འཕྲིན་ལས་ཀུན་བདག་ཐུགས་རྗེ་ཅན༔ གུས་པས་ཡིད་ཀྱིས་ཕྱག་འཚལ་བསྟོད༔ ཅེས་བསྟོད༔ གཤེགས་གསོལ་ནི༔ ཧཱུྃ༔ དྲང་སྲོང་ཆེན་པོ་མེ་ཡི་ལྷ༔ འབར་བའི་འཕྲིན་ལས་བསྒྲུབ་མཛད་པ༔ རང་བཞིན་གནས་སུ་གཤེགས་ནས་ཀྱང་༔ སླར་ཡང་རྗེས་མཐུན་དངོས་གྲུབ་སྩོལ༔ ཨཱོཾ་ཨགྣེ་ཡེ་དྷེ་ཝ་བྷྱཿབཛྲ་མུ༔ ཤིས་བརྗོད་ནི༔ ཧཱུྃ༔ ཡེ་ཤེས་དབྱིངས་ཀྱི་ཕོ་བྲང་ནས༔ ཅེས་པ་ནས་སྤྲུལ་པ་འབུམ་སྡེའི་བཀྲ་ཤིས་ཤོག༔ ཅེས་པའི་བར་དང་༔ བསྔོ་བ་ནི༔ ཧཱུྃ༔ རྒྱལ་བ་རྒྱ་མཚོའི་ལྷ་ཚོགས་རྣམས༔ སྦྱིན་སྲེག་མཆོད་བསྟོད་ཕུལ་བའི་མཐུས༔ ཐུགས་དམ་གཉེན་པོ་སྐོངས་གྱུར་ཅིག །འཕྲིན་ལས་རྣམ་བཞི་ཐོགས་མེད་སྒྲུབས༔ བདག་སོགས་འགྲོ་བ་སེམས་ཅན་མ་ལུས་པ༔ རྩ་གསུམ་ལྷ་ཚོགས་གོ་འཕང་ཐོབ་པར་ཤོག །སྨོན་ལམ་ནི༔ ཧོཿ འཕྲིན་ལས་མེ་ཡི་ཏིང་འཛིན་སྒོམ་སྒྲུབ་མཐུས༔ དེང་ནས་བཟུང་སྟེ་ཚེ་རབས་ཐམས་ཅད་དུ༔ ལས་བཞིའི་འཕྲིན་ལས་གང་བརྩམས་ལྷུན་གྲུབ་ནས༔ མ་འབད་བཞིན་དུ་མཆོག་ཐུན་ཡོངས་གྲུབ་སྟེ༔ དངོས་གྲུབ་རྒྱ་མཚོའི་དཔལ་ལ་སྤྱོད་པར་ཤོག༔ ཞེས་བརྗོད༔ ཅེས་པ་འདི་ཡང་ཧོར་པཎ་ཆེན་ངག་དབང་འཇམ་དབྱངས་བློ་ལྡན་གྱིས་འགྲིག་ཆོག་མཛད་པའི་ཞི་བའི་སྦྱིན་སྲེག་ལྟར་ལ་བདེ་ཆེན་རྡོ་རྗེ་རྣལ་འབྱོར་མ་ལ་བརྟེན་དགོས་པ་རྣམས་ཁ་བསྐང་སྟེ་ཉི་མ་གྲགས་པས་ཇོ་བོ་སྒྱོགས་ཆེན་གདོང་རའི་མདུན་དུ་སྦྱར་བ་སརྦ་མངྒ་ལཾ། །

ཕག་དཀར་དབང་ཆོག་འཆི་མེད་འདོད་འཇོ།

ཕག་མོ་བདེ་ཆེན་དཀར་མོའི་དབང་ཆོག་འཆི་མེད་འདོད་འཇོ་བཞུགས་སོ། །སྟོང་ཉིད་དབྱིངས་ལས་ཡེ་ཤེས་སྒྱུ་མ་ཆེ། །ཟུང་འཇུག་བདེ་ཆེན་གར་གྱི་རྣམ་རོལ་པའི། །བཅོམ་ལྡན་འདས་མ་འཆི་མེད་ཡེ་ཤེས་ཀྱི། །དངོས་གྲུབ་འདོད་པ་འཇོ་བའི་དགའ་སྟོན་མཛོད། །ཅེས་ཤིས་པ་བརྗོད་ནས་བདེ་ཆེན་དཀར་མོའི་ཚེ་དབང་བསྐུར་བ་ལ་གཉིས་ཏེ། སྦྱོར་བ་ཡོ་བྱད་ཀྱི་བཤམས་དང་། དངོས་གཞི་ཇི་ལྟར་བསྐུལ་བའི་ཚུལ་ལོ། དེ་ཡང་གཏེར་གཞུང་རྩ་བར། ཡེ་ཤེས་མཁའ་འགྲོའི་ལྷ་ཚོགས་རྣམས་ལ་འདུད༔ བདེ་ཆེན་མཁའ་འགྲོའི་དྲོད་ཐོབ་རྣལ་འབྱོར་པས༔ དམ་ལྡན་བུ་ལ་སྨིན་གྲོལ་སྦྱིན་པ་ནི༔ ད་ལའམ་ནི་འབྲུ་ཡི་ཚོམ་བུ་བཀོད༔ དབུས་སུ་བུམ་པ་གཡས་སུ་ཚེ་ཆང་དང་༔ གཡོན་དུ་ཚེ་རིལ་རྒྱབ་ཏུ་མདའ་དར་གཟུགས༔ ཐ་མར་མཆོད་ཚོགས་ལ་སོགས་རྒྱས་པར་བཤམས༔ བསྐྱེད་རྫོགས་བསྒོམ་ཞིང་བསྙེན་སྒྲུབ་ཏིང་འཛིན་གསལ༔ ཚེ་འགུགས་ཐུགས་དམ་བསྐུལ་ཞིང་དབང་བཞི་ལེན༔ ལས་བུམ་བསྐྱེད་ཅིང་སློབ་མ་ཁྲུས་ནས་ཕྱུངས༔ བགེགས་ལ་བཀའ་བསྒོ་མཚམས་གཅོད་བསྲུང་འཁོར་བསྒོམ༔ མཎྜལ་འབུལ་ཞིང་སྐྱབས་སེམས་ལོ་རྒྱུས་བརྗོད༔ བསྐྱེདརིམ་གཏད་ཅིང་ཡེ་ཤེས་སེམས་དཔའ་དབབ༔ ས་མ་ཡཱ༔ རྒྱ་རྒྱ་རྒྱ༔ ཞེས་པས་ལས་གཞུང་བསྲང་ཚོགས་བསྐང་བཀའ་གཏེར་མཆོད་པ་སོགས་མཐར་ཆགས་བྱ་ཞིང་། ལས་བུམ་གསལ་ཁ་མ་ངེས་པས་སྤྱི་ཁྱབ་ལྟར་སྒྲུབ་བོ། དེ་ནས་དྲི་མེད་དག་པ་སོགས་ཀྱིས་ཁྲུས་བྱ། བགེགས་བསྐྲད་སྲུང་བའི་འཁོར་ལོ་བསྒོམ། སྤྲོ་ན་དབང་གི་མཚམས་སྦྱོར་རྒྱས་པའམ། ཡང་ན་དབང་བཤད་གཏེར་ཆེན་གྱིས་མཛད་པ་ནི། འོ་ན་ད་ལམ་ཁྱེད་རྣམས་ལ་བཅོམ་ལྡན་འདས་མ་བདེ་ཆེན་དཀར་མོའི་དབང་འབུལ་བའི་ཐོག་མར་ལོ་རྒྱུས་ཀྱི་རྣམ་པ་མདོ་ཙམ་ཞིག་བརྗོད་པར་བྱ་སྟེ། ངོ་བོ་ཀ་ནས་དག་པའི་ཆོས་དབྱིངས་ཆེན་པོ་ནས་བཅོམ་ལྡན་འདས་མ་དཔལ་ཀུན་ཏུ་བཟང་མོའི་མེ་ལོང་ལྟ་བུའི་ཡེ་ཤེས་ཀྱི་རང་མདངས་གོ་མ་འགགས་པ་ལས་བདེ་ཆེན་དཀར་མོ་རྡོ་རྗེ་དྷ་ཀྐི་མ་འདི་རང་ཤར་ཞིང་དབྱིངས་རང་བཞིན་གྱི་རྣམ་པར་དག་པའི་མཁའ་སྤྱོད་དུ་དུས་གསུམ་རྟག་པ་རྒྱུན་གྱི་འཁོར་ལོར་རང་འོད་འབར་བཞིན་བཞུགས་པའི་རོལ་པ་ལས་འོག་མིན་སྟུག་པོ་བཀོད་པའི་ཞིང་ཁམས་སུ་རྒྱལ་བ་རྡོ་རྗེ་འཆང་གིས་གསང་སྔགས་བླ་མེད་ཆོས་ཀྱི་འཁོར་ལོ་བསྐོར་བའི་ཚེ་རྡོ་རྗེ་རིགས་ཀྱི་མཁའ་འགྲོ་མ་འབུམ་ཕྲག་མང་པོ་སྟོན་པ་དེའི་འཁོར་དུ་རང་ཤར་ཞིང་བླ་ན་མེད་པའི་བཀའི་འཁོར་ལོ་རྣམས་ཉན་ཅིང་འཆང་ནས་ཚངས་ཆེན་གྱི་བསྐལ་བ་ཆེན་པོའི་ཞིང་འདི་དང་། འདི་མ་ཡིན་པའི་ཡང་ནམ་མཁའི་མཐར་ཁྱབ་ཏུ་ལས་དང་སྐལ་བར་ལྡན་པ་རྣམས་ཀྱི་སྣང་ངོར་སྤྲུལ་པ་ཡང་སྤྲུལ་ཉིང་སྤྲུལ་བསམ་གྱིས་མི་ཁྱབ་པས་དུས་གསུམ་ཀུན་ཏུ་སྐལ་ལྡན་མང་པོ་གྲོལ་ལམ་ལ་ཐབས་དང་གདམས་པ་མང་པོས་ཡོངས་སུ་གྲོལ་བར་མཛད་ནས་རིམ་གྱིས་བརྒྱུད་པ་ལས་རྩོད་ལྡན་ཚེ་ལོ་བརྒྱ་པའི་སྐབས་ཤཱཀྱའི་བསྟན་པ་ལ་མདོ་སྔགས་ཟུང་ཞིག་གི་ཉི་ཟླ་ཤར་བའི་ཚེ། ཨོ་རྒྱན་གྱི་སློབ་དཔོན་དཔལ་སངས་རྒྱས་གཉིས་པ་པདྨ་འབྱུང་གནས་ཀྱིས་འབུམ་ཕྲག་ཡངས་པའི་མཁའ་འགྲོ་མ་རྣམས་ལ་དབང་བསྒྱུར་ཞིང་མཁའ་འགྲོའི་གསང་མཛོད་ཐམས་ཅད་བརྟོལ་ཏེ་འཛམ་གླིང་སྤྱི་དང་རྒྱ་བོད་ཀུན་ཏུ་བསྟན་འགྲོའི་དོན་བསམ་གྱིས་མི་ཁྱབ་པ་མཛད་པའི་ནང་ནས་ཁྱད་པར་དུ་བོད་ཡུལ་སྲིན་མོ་གན་རྐྱན་དུ་བསྒྱེལ་བ་འདྲ་བའི་ནུ་མ་གཡས་པ་ཁམས་ཀྱི་སྲིང་མོ་རྫོང་གི་ཆགས་རུ་ཕུག་དཀར་ལྷ་ཡི་གཞལ་ཡས་ཁང་དུ་བདེ་ཆེན་དཀར་མོ་རྡོ་རྗེ་དྷཱཀྐི་མའི་སྒྲུབ་པ་མཛད་ཅིང་ཕག་གདོང་དཀར་མོ་སྐུའི་སྒྲུབ་གནས་སུ་བྱིན་གྱིས་བརླབས་པའི་དུས་སུ་དབང་སྒྲུབ་ཐབས་མན་ངག་དང་བཅས་པའི་གདམས་པ་འདི་རྣམས་མ་མཁའ་འགྲོ་ཡེ་ཤེས་འཚོ་རྒྱལ་ལ་བཀའ་སྩལ་ཞིང་གདམས་པ་མཁའ་འགྲོའི་ཡི་གེར་བཏབ་སྟེ་ཕྱི་མའི་བསྟན་འགྲོའི་དོན་དུ་མཁའ་འགྲོའི་གསང་མཛོད་དུ་རྒྱས་བཏབ་ནས་བཞུགས་སུ་གསོལ་བ་འགྲོ་བ་འདུལ་བའི་ལུང་བསྟན་དུས་བབས་བཞིན་དུ་ཁམས་པ་ཉི་མ་གྲགས་པས་ཤིང་གླང་ཧོར་ཟླ་ལྔ་བའི་ཚེས་བཅོ་ལྔའི་ཉི་ཤར་ལ་གདན་དྲངས་ཤིང་ཤོག་སེར་ལས་བསྒྱུར་བའི་གདམས་པ་རིན་པོ་ཆེའི་དབང་འདི་ཐོབ་པ་ལ་ཡོན་ཏན་དུ་མ་དང་ལྡན་ཏེ། ལུང་ལས། དབང་བསྐུར་སྟོན་པ་བསླུ་བ་མེད། དགེ་བ་ཀུན་ལས་དགེ་བའི་མཆོག །ཚེ་རབས་ནད་མེད་བདེ་བ་འཐོབ། ངན་སོང་གསུམ་ལས་རྣམ་པར་གྲོལ། ཅེས་གསུངས་པའི་དབང་ཞུ་བའི་ཡོན་དུ་མཎྜལ་འབུལ་བར་ཞུ། ཞེས་དང་། དེ་ནས་ཁྱེད་རང་གི་མདུན་གྱི་ནམ་མཁར་བཅོམ་ལྡན་འདས་མ་བདེ་ཆེན་དཀར་མོ་ལ་ཕྱོགས་དུས་ཀྱི་སྐྱབས་ཡུལ་ཐམས་ཅད་ཀྱིས་བསྐོར་ནས་བཞུགས་པར་དམིགས་ལ་སྐྱབས་སུ་འགྲོ་བ། སེམས་བསྐྱེད་པ། ཚོགས་བསགས་ཡན་ལག་བདུན་པ་སོགས་ཚིག་རྗེས་དོན་གྱི་མོས་པའི་སྒོ་ནས་འདིའི་རྗེས་བཟློས་མཛོད། ན་མོ༔ བླ་མ་ཡི་དམ་མཁའ་འགྲོ་སྟེ༔ རྩ་བ་གསུམ་ལ་སྐྱབས་སུ་མཆི༔ འགྲོ་བ་སེམས་ཅན་དོན་སླད་དུ༔ མཁའ་འགྲོའི་བསྐྱེད་རྫོགས་བསྒོམ་བཟླས་བསྒྲུབ༔ ཧཱུྃ༔ བླ་མ་ཡི་དམ་མཁའ་འགྲོ་གཤེགས༔ ཉི་ཟླ་པདྨའི་གདན་ལ་བཞུགས༔ ལུས་ངག་ཡིད་གསུམ་གུས་ཕྱག་འཚལ༔ ཕྱི་ནང་གསང་བའི་མཆོད་པ་འབུལ༔ ཉམས་ཆགས་སྡིག་སྒྲིབ་མཐོལ་ལོ་བཤགས༔ གསང་སྔགས་སྒྲུབ་ལ་རྗེས་ཡི་རངས༔ སྨིན་གྲོལ་ཆོས་འཁོར་བསྐོར་དུ་གསོལ༔ མྱ་ངན་མི་འདའ་གསོལ་བ་འདེབས༔ དགེ་བ་བྱང་ཆུབ་ཆེན་པོར་བསྔོ༔ ཐམས་ཅད་སངས་རྒྱས་ཐོབ་པར་ཤོག༔ དེ་ལྟར་ཐུན་མོང་གི་རྒྱུད་སྦྱོང་བའི་རིམ་པ་སོང་ནས། ཐུན་མོང་མ་ཡིན་པར་དབང་གི་སྣོད་དུ་རུང་བར་བྱ་བའི་ཕྱིར་ཡེ་ཤེས་དབབ་པའི་སླད་དུ་དམིགས་པ་འདི་བཞིན་དུ་མཛོད། ལས་བུམ་གྱི་ཆུ་གཏོར་ལ། ཨཱོཾ་མ་ཧཱ་ཤུ་ནྱ་ཏ་ཛྙཱ་ན་བཛྲ་སྭཱ་བྷཱ་ཝ་ཨཏྨ་ཀོ྅ཧཾ། ཞེས་བརྗོད་པས་ཁྱེད་རང་གི་ཕུང་ཁམས་སྐྱེ་མཆེད་ཀྱིས་མཚན་པའི་མ་དག་པའི་སྣང་བ་ཐམས་ཅད་སྟོང་པར་སྦྱངས། །སྟོང་པའི་ངང་ལས་སྣང་སྲིད་དག་པ་བདེ་ཆེན་ཆོས་ཀྱི་འབྱུང་གནས་ཕྱི་དཀར་ལ་ནང་དམར་བ་རྩེ་མོ་ཕྲ་བ་ཐུར་དུ་ཟུག་པ་གདེང་ཀ་རྒྱས་པ་གྱེན་དུ་ཕྱོགས་པའི་ནང་དུ་པདྨ་དང་ཉི་ཟླའི་གདན་གྱི་སྟེང་དུ་ཁྱེད་རང་སྐད་ཅིག་གིས་བཅོམ་ལྡན་འདས་མ་བདེ་ཆེན་རྡོ་རྗེ་རྣལ་འབྱོར་མ་སྐུ་མདོག་དཀར་མོ་ཞལ་གཅིག་ཕྱག་གཉིས་མ། གཅེར་བུ་བརྒྱད་གཉིས་ལོན་པའི་ལང་ཚོས་སྒེག་པའི་ནུ་མ་དང་བྷ་ག་རབ་ཏུ་རྒྱས་པ། ཞི་ཞིང་འཛུམ་པའི་ཉམས་ལྡན་དབུ་་སྐྲ་རལ་པའི་ཅོད་པན་སིལ་བུར་འཕྱང་བ། དབུ་གཙུག་ནས་ཕག་ཞལ་དཀར་མོས་ཕག་སྐད་ཕྱོགས་བཅུར་སྒྲོགས་པ་རིན་པོ་ཆེ་ནོར་བུ་དབང་གི་རྒྱལ་བོའི་རྩེ་བྲན་ཅན། དར་དཔྱང་དང་རུས་པའི་རྒྱན་དྲུག་གིས་བརྒྱན་པ། ཞབས་བརྐྱང་བསྐུམ་གར་སྟབས་ཀྱི་རྣམ་པར་བཞེངས་པ། ཕྱག་གཡས་མདའ་དར་དང་གཡོན་ཚེའི་བུམ་པ་འཛིན་པའི་གྲུ་མོ་ན་ཁ་ཊྭཱྃ་ཀ་འཆང་བ་ཡེ་ཤེས་རང་འོད་རྒྱས་པའི་དབུས་ན་སྣང་སྟོང་ཟུང་དུ་འཇུག་པའི་སྐུ་གཟི་བརྗིད་དང་ལྡན་པའི་སྤྱི་བོར་ཨཱོཾ་མགྲིན་པར་ཨཱཿ ཐུགས་དཀར་ཧཱུྃ་གིས་མཚན་པ་དང་། སློབ་དཔོན་དང་མདུན་བསྐྱེད་བཅས་ཀྱི་གནས་གསུམ་ལས་འོད་ཟེར་འཕྲོས་པས་འོག་མིན་ཆོས་ཀྱི་དབྱིངས་དང་མཁའ་སྤྱོད་གནས་ཡུལ་དག་པའི་ཞིང་ཁམས་ནས་བདེ་ཆེན་ཡེ་ཤེས་ཀྱི་མཁའ་འགྲོ་མ་བསྒོམ་པ་དང་འདྲ་བ་དཔག་ཏུ་མེད་པ་སྤྱན་དྲངས་ནས་ཁྱེད་རང་གི་དབང་པོའི་སྒོ་དང་བ་སྤུའི་བུ་ག་ཐམས་ཅད་ནས་སིབ་སིབ་ཐིམ་བྱུང་སྙམ་པའི་མོས་པ་རྩེ་གཅིག་ཏུ་མཛོད། ཧཱུྃ༔ བདེ་ཆེན་དཀར་མོ་ཕག་མོ་དྷཀྐི་མ༔ དཀར་མོ་འབུམ་གྱི་མ་ཚོགས་འཁོར་དང་བཅས༔ ནམ་མཁའ་ས་གཞི་བར་སྣང་ཁྱབ་པར་ཁེངས༔ འོད་ཟེར་ལྔ་ལྡན་གར་སྟབས་ཤིགས་སེ་ཤིག༔ མ་ལུས་འཁོར་བཅས་གནས་འདིར་སྤྱན་འདྲེན་ན༔ མོས་པའི་བུ་ལ་བྱིན་གྱིས་རློབས་ཕྱིར་གཤེགས༔ མཆོག་དང་ཐུན་མོང་དངོས་གྲུབ་དུས་འདིར་སྩོལ༔ ཧ་བཛྲ་དྷཱཀྐི་ནི་སརྦ་ས་མ་ཡཱ་ཧྲིང་ཧྲིང་ཛཿཛ༔ ཨ་ཝེ་ཤ་ཡ་ཨ་ཨཱ༔ ཞེས་སྤོས་རོལ་དྲག་ཏུ་བྱ་ཞིང་བྱིན་དབབ༔ རྡོ་རྗེ་སྤྱི་བོར་བཞག་ལ། སྤྱན་དྲངས་པའི་ཡེ་ཤེས་པ་རྣམས་བརྟེན་པའི་མོས་པ་མཛོད༔ ཏིཥྛ་བཛྲ་ཞེས་བརྗོད་དོ། དེ་ནས་མདའ་དར་ཐོགས་ཏེ། ཚེ་འགུགས་པ་ནི། ཧཱུྃ༔ རྡོ་རྗེ་ཕག་མོ་བདེ་ཆེན་ཞི་བ་འཚོ༔ དུས་གསུམ་སངས་རྒྱས་བསྐྱེད་པའི་ཡུམ་ཆེན་མོ༔ བསྐྱེད་པའི་ལྷ་མོ་བསྒྲུབ་པའི་མཁའ་འགྲོ་མ༔ དམ་ཚིག་ཆེན་པོའི་ཐུགས་དམ་དུས་ལ་བབས༔ དབྱིངས་ནས་བཞེངས་ཤིག་རྡོ་རྗེ་རྣལ་འབྱོར་མ༔ སྤྲུལ་བ་སྒྱུར་ཅིག་དཔལ་གྱི་མཁའ་འགྲོའི་ཚོགས༔ ཚེ་བསོད་སྡུད་ཤིག་ལས་བྱེད་ཕོ་ཉ་རྣམས༔ ཧཱུྃ༔ མ་གཡེལ་མ་གཡེལ་ཚེ་ཡི་དྷཱཀྐི་རྣམས༔ སྐུ་ལས་བསྐྱེད་ཅིང་སྤྲུལ་པའི་ཚེ་འགུགས་མ༔ དཀར་མོ་འབུམ་ཕྲག་ཕྱོགས་བཅུའི་ཞིང་དུ་འཕྲོས༔ ལྕགས་ཀྱུའི་ཕྱག་རྒྱ་བསྒྱུར་ཞིང་གར་སྟབས་འཁྱུག༔ ཕྱོགས་བཅུའི་སངས་རྒྱས་རྣམས་ཀྱི་བྱིན་རླབས་དང་༔ དུས་གསུམ་རིག་འཛིན་རྣམས་ཀྱི་ཐུགས་རྗེ་དང་༔ ཕྱི་སྣོད་འབྱུང་བ་བཞི་ཡི་དངས་མ་དང་༔ ནང་བཅུད་སྐྱེ་འགྲོ་རྣམས་ཀྱི་ཚེ་བསོད་དཔལ༔ ལྔ་ལྡན་འོད་དང་ནྲི་ཡིག་རྣམ་པར་བསྡུས༔ རྒྱ་མཚོ་ཆེ་ལ་ཆར་པ་བབས་པ་ལྟར༔ བདག་ཅག་རྣམས་ལ་གཉིས་མེད་སིབ་སིབ་ཐིམ༔ འཆི་མེད་རིག་འཛིན་ཚེ་ཡི་དངོས་གྲུབ་སྩོལ༔ ཧཱུྃ༔ མ་གཡེལ་མ་གཡེལ་ཚེ་ཡི་དྷཱཀྐི་རྣམས༔ སྐུ་ལས་བསྐྱེད་ཅིང་༴སེར་མོ་འབུམ་ཕྲག་ཕྱོགས་བཅུའི༴ཞགས་པའི་ཕྱག་རྒྱ༴ཕྱོགས་བཅུའི་སངས་རྒྱས༴དུས་གསུམ་རིགས་འཛིན༴ཕྱི་སྣོད་འབྱུང་བ་བཞི་ཡི༴ནང་བཅུད་སྐྱེ་འགྲོ༴ལྔ་ལྡན་འོད་དང་༴རྒྱ་མཚོ་ཆེ་ལ༴བདག་ཅག༴འཆི་མེད་རིག་འཛིན༴ཧཱུྃ༔ མ་གཡེལ་མ་གཡེལ་ཚེ་ཡི་དྷཱཀྐི་རྣམས༔ སྐུ་ལས་བསྐྱེད་ཅིང་༴དམར་མོ་འབུམ་ཕྲག་ཕྱོགས༴ལྕགས་སྒྲོགས་ཕྱག་རྒྱ༴ཕྱོགས་བཅུའི་སངས་རྒྱས༴དུས་གསུམ་རིག་འཛིན༴ཕྱི་སྣོད་འབྱུང་བ་བཞི་ཡི༴ནང་བཅུད་སྐྱེ་འགྲོ༴ལྔ་ལྡན་འོད་དང་༴རྒྱ་མཚོ་ཆེ་ལ༴བདག་ཅག༴འཆི་མེད་རིག་འཛིན༴ཧཱུྃ༔ མ་གཡེལ་མ་གཡེལ་ཚེ་ཡི་དྷཱཀྐི་རྣམས༔ སྐུ་ལས་བསྐྱེད་ཅིང་༴ལྗང་མོ་འབུམ་ཕྲག༴ཕྱོགས་བཅུའི༴དྲིལ་བུའི་ཕྱག་རྒྱ༴ཕྱོགས་བཅུའི་སངས་རྒྱས༴དུས་གསུམ་རིག་འཛིན༴ཕྱི་སྣོད་འབྱུང་བ་བཞི་ཡི༴ནང་བཅུད་སྐྱེ་འགྲོ༴ལྔ་ལྡན་འོད་དང་༴རྒྱ་མཚོ་ཆེ་ལ༴བདག་ཅག༴འཆི་མེད་རིགས་འཛིན༴ཧཱུྃ༔ མ་གཡེལ་མ་གཡེལ་ཚེ་ཡི་དྷཱཀྐི་རྣམས༔ སྐུ་ལས་བསྐྱེད་ཅིང་སྤྲུལ་པའི་ཚེ་འགུགས་མ༔ སྔོན་མོ་འབུམ་ཕྲག་ཕྱོགས་བཅུའི་ཞིང་དུ་འཕྲོས༔ འཁོར་ལོའི་ཕྱག་རྒྱ་བསྒྱུར་ཞིང་གར་སྟབས་འཁྱུག༔ ཕྱོགས་བཅུའི་སངས་རྒྱས་རྣམས་ཀྱི་བྱིན་རླབས་དང་༔ དུས་གསུམ་རིག་འཛིན་རྣམས་ཀྱི་ཐུགས་རྗེ་དང་༔ ཕྱི་སྣོད་འབྱུང་བ་བཞི་ཡི་དྭངས་མ་དང་༔ ནང་བཅུད་སྐྱེ་འགྲོ་རྣམས་གྱི་ཚེ་བསོད་དཔལ༔ ལྔ་ལྡན་འོད་དང་ནྲི་ཡིག་རྣམ་པར་བསྡུས༔ རྒྱ་མཚོ་ཆེ་ལ་ཆར་བ་བབས་པ་ལྟར༔ བདག་ཅག་རྣམས་ཀྱི་ལུས་ལ་སིབ་སིབ་ཐིམ༔ འཆི་མེད་རིགས་འཛིན་ཚེ་ཡི་དངོས་གྲུབ་སྩོལ༔ མདའ་དར་གྱིས་རྒྱས་གདབ་བོ། དབང་དངོས་ནི་གཞུང་ལས། ཚེ་འགུགས་རྒྱས་འདེབས་བུམ་པ་སྤྱི་བོར་བཞག༔ ཞེས་པས་ཚེ་བུམ་ཐོགས་ཏེ། ཧཱུྃ༔ བདེ་ཆེན་མཁའ་འགྲོ་ཚེ་ཡི་རྣལ་འབྱོར་མ༔ དཀར་མོ་འབུམ་གྱི་སྐུ་ལས་འོད་ཟེར་འཕྲོས༔ རྡོ་རྗེ་སློབ་མ་འདི་ཡི་ལུས་ལ་ཐིམ༔ སྐུ་ཡི་དབང་ཐོབ་ལུས་ཀྱི་སྡིག་སྒྲིབ་དག༔ འབྲས་བུ་སྤྲུལ་སྐུ་འཆི་མེད་རིག་པ་འཛིན༔ སྐལ་ལྡན་རིགས་ཀྱི་བུ་ཡིས་ཐོབ་པར་ཤོག༔ ཧ་བཛྲ་དྷཀྐི་ནི་བྷ་ར་ཧི་ཨ་ཡུ་ཥེ་ཧཱུྃ་བྷྲཱུྃ་ནྲི་ཛཿསིདྡྷི་སྭཱ་ཧཱ༔ ཀཱ་ཡ་ཨ་བྷི་ཤིཉྩ་ཨཱོཾ༔ སྤྱི་བོར་བསྐུར༔ ཚེ་ཆང་མགྲིན་པར་བཞག༔ ཧཱུྃ༔ བདེ་ཆེན་མཁའ་འགྲོ་ཚེ་ཡི་རྣལ་འབྱོར་མ༔ དཀར་མོ་འབུམ་གྱི་གསུང་ལས་འོད་ཟེར་འཕྲོས༔ རྡོ་རྗེའི་སློབ་མ་འདི་ཡི་ངག་ལ་ཐིམ༔ གསུང་གི་དབང་ཐོབ་ངག་གི་སྡིག་སྒྲིབ་དག༔ འབྲས་བུ་ལོངས་སྐུ་འཆི་མེད་རིག་པ་འཛིན༔ སྐལ་ལྡན་རིགས་ཀྱི་བུ་ཡིས་ཐོབ་པར་ཤོག༔ ཧ་བཛྲ་དྷཀྐི་ནི་བྷ་ར་ཧི་ཨ་ཡུ་ཥེ་ཧཱུྃ་བྷྲཱུྃ་ནྲི་ཛཿསི་དྡྷི་སྭཱ་ཧཱ༔ ཝཱཀྐ་ཨ་བྷི་ཥིཉྩ་ཨཱ༔ ངག་ཏུ་བླུད༔ ཚེ་རིལ་སྙིང་གར་བཞག༔ ཧཱུྃ༔ བདེ་ཆེན་མཁའ་འགྲོ་ཚེ་ཡི་རྣལ་འབྱོར་མ༔ དཀར་མོ་འབུམ་གྱི་ཐུགས་ལས་འོད་ཟེར་འཕྲོས༔ རྡོ་རྗེའི་སློབ་མ་འདི་ཡི་ཡིད་ལ་ཐིམ༔ ཐུགས་ཀྱི་དབང་ཐོབ་ཡིད་ཀྱི་སྡིག་སྒྲིབ་དག༔ འབྲས་བུ་ཆོས་སྐུ་འཆི་མེད་རིག་པ་འཛིན༔ སྐལ་ལྡན་རིགས་ཀྱི་བུ་ཡིས་ཐོབ་པར་ཤོག༔ ཧ་བཛྲ་དྷཀྐི་ནི་བྷ་ར་ཧི་ཨཱ་ཡུ་ཥེ་ཧཱུྃ་བྷྲཱུྃ་ནྲི་ཛཿསིདྡྷི་སྭཱ་ཧཱ༔ ཙིཏྟ་ཨ་བྷི་ཥིཉྩ་ཧཱུྃ༔ རིལ་བུ་སྦྱིན༔ མདའ་དར་ཐོགས་ཏེ༔ ཧཱུྃ༔ མཁའ་དབྱིངས་དག་པ་བདེ་བ་ཆེན་པོ་ནས༔ སྐུ་ཡི་བྱིན་རླབས་སློབ་བུའི་ལུས་ལ་བསྟིམ༔ རིན་ཆེན་འཁོར་ལོ་འབར་བས་རྒྱས་བཏབ་པས༔ འཆི་མེད་རིག་འཛིན་དཔལ་ལ་སྤྱོད་པར་ཤོག༔ འགག་མེད་ལྷུན་གྲུབ་ཁྱབ་བརྡལ་ཆེན་པོ་ནས༔ གསུང་གི་བྱིན་རླབས་སློབ་བུའི་ངག་ལ་བསྟིམ༔ རིན་ཆེན་པདྨ་འབར་བས་རྒྱས་བཏབ་པས༔ འཆི་མེད་རིག་འཛིན་དཔལ་ལ་སྤྱོད་པར་ཤོག༔ ཡེ་རྫོགས་ཀློང་ཡང་དག་པ་རང་གྲོལ་ནས༔ ཐུགས་ཀྱི་བྱིན་རླབས་སློབ་བུའི་སེམས་ལ་བསྟིམ༔ རིན་ཆེན་རྡོ་རྗེ་འབར་བས་རྒྱས་བཏབ་པས༔ འཆི་མེད་རིག་འཛིན་དཔལ་ལ་སྤྱོད་པར་ཤོག༔ འབད་མེད་ཡོངས་གྲོལ་དགོས་འདོད་ཀུན་འབྱུང་ནས༔ ཡོན་ཏན་བྱིན་རླབས་སློབ་བུའི་ལྟེ་བར་བསྟིམ༔ རཏྣ་དགོས་འདོད་ཀུན་འབྱུང་རྒྱས་བཏབ་པས༔ འཆི་མེད་རིག་འཛིན་དཔལ་ལ་སྤྱོད་པར་ཤོག༔ རྩོལ་མེད་མཐར་ཕྱིན་བྱ་གྲུབ་ད་ལ་ནས༔ འཕྲིན་ལས་བྱིན་རླབས་སློབ་བུའི་གསང་བར་བསྟིམ༔ རིན་ཆེན་རྒྱ་གྲམ་འབར་བས་རྒྱས་བཏབ་པས༔ འཆི་མེད་རིག་འཛིན་དཔལ་ལ་སྤྱོད་པར་ཤོག༔ ཧ་བཛྲ་དྷཀྐི་ནི་བྷ་ར་ཧི་ཨ་ཡུ་ཥེ་ཧཱུྃ་བྷྲཱུྃ་ནྲི་ཛཿསིདྡྷི་སྭཱ་ཧཱ༔ བཛྲ་རཏྣ་པདྨ་ཀརྨ་ཙཀྲ་ཨ་ཝེ་ཤ་ཡ་བཛྲ་རཀྵ་རཀྵ་ཡེ་སྭཱ་ཧཱ༔ ཞེས་རིགས་ལྔའི་ཕྱག་མཚན་ནམ་མདའ་དར་གྱིས་རྒྱས་འདེབས༔ འཕྲིན་ལས་དབང་ལ་རྫས་བརྒྱད་སྦྱིན་པར་བྱའོ༔ ཞེས་པ་བཀྲ་ཤིས་རྫས་བརྒྱད་ཚེ་སྒྲུབ་ལྟར་ཏེ༔ ཧཱུྃ༔ སྔོན་ཚེ་ཐུབ་དབང་ཤཱཀྱ་སེང་གེ་ལ༔ ས་ཡི་ལྷ་མོ་བསྟན་མས་མེ་ལོང་ཕུལ༔ བཀྲ་ཤིས་ཚེ་འཕེལ་རྫས་སུ་བྱིན་གྱིས་བརླབས༔ དེང་འདིར་རིགས་ཀྱི་བུ་ལ་དབང་བསྐུར་བས༔ སྒྲིབ་བྲལ་མ་འདྲེས་ཆོས་ཀྱི་དོན་རྟོགས་ནས༔ མེ་ལོང་ལྟ་བུའི་ཡེ་ཤེས་མངོན་གྱུར་ཏེ༔ དབང་མཆོག་དེས་ཀྱང་སྒྲིབ་པ་དག་གྱུར་ཅིག༔ ཨཱོཾ་ཨ་དར་ཤ་ཨ་བྷི་ཥིཉྩ་མཾ༔ ཧཱུྃ༔ སྔོན་ཚེ་ཐུབ་དབང་༴ཁྱེའུ་བཀྲ་ཤིས་རྩ་མཆོག་དཱུརྦ་ཕུལ༔ བཀྲ་ཤིས་ཚེ་འཕེལ་རྫས༴དེང་འདིར་རིགས་ཀྱི༴རྡོ་རྗེ་སེམས་དཔའི་ཚེ་ནི་རབ་གྲུབ་ནས༔ ཉོན་མོངས་སྐྱེ་ཤིའི་ཚོགས་རྣམས་རྒྱུན་ཆོད་ནས༔ དབང་མཆོག་དེས་ཀྱང་ཚེ་ནི་ནི་འཕེལ་བར་ཤོག༔ ཨོཾ་ཨ་པྲ་ཏི་ཧ་ཏ་ཨ་བྷི་ཥིཉྩ་མཾ༔ ཧཱུྃ༔ སྔོན་ཚེ་ཐུབ་དབང་༴ཁྱིམ་བདག་བདེ་འབྱིན་ལི་ཁྲི་དམར་པོ་ཕུལ༔ བཀྲ་ཤིས་ཚེ་འཕེལ་རྫས༴དེང་འདིར་རིགས་ཀྱི༴ཆོས་རྣམས་མ་ལུས་དབང་དུ་འདུས་གྱུར་ནས༔ ཆོས་ཀྱི་རྒྱལ་སྲིད་རབ་ཏུ་བརྟན་པ་ཡི༔ དབང་མཆོག་དེས་ཀྱང་དབང་བཅུ་འཕེལ་བར་ཤོག༔ ཨཱོཾ་ཧྲཱ་ིཔ་ཤ་ཨ་བྷི་ཥིཉྩ་མྃཿ ཧཱུྃ༔ སྔོན་ཚེ་ཐུབ་དབང་༴གླང་ཆེན་ས་སྲུང་བུ་ཡིས་གི་ཝཾ་ཕུལ༔ བཀྲ་ཤིས་ཚེ་འཕེལ༴དེང་འདིར་རིགས་ཀྱི༴ཆོས་ཉིད་སྨན་གྱིས་དུག་གསུམ་ནད་འཇོམ་ནས༔ ཉོན་མོངས་ཟུག་རྔུའི་ཚོགས་རྣམས་ཞི་བ་ཡི༔ དབང་མཆོག་དེས་ཀྱང་ནད་རིགས་ཀུན་ཞི་ཤོག༔ ཨཱོཾ་གི་ཝཾ་ཨ་བྷི་ཥིཉྩ་མཾ༔ ཧཱུྃ༔ སྔོན་ཚེ་ཐུབ་དབང་༴བྲམ་ཟེ་ཀ་ཏི་ཀ་ཡིས་བིལ་བ་ཕུལ༔ བཀྲ་ཤིས་ཚེ་འཕེལ༴དེང་འདིར་རིགས་ཀྱི་༴སྙིང་པོའི་དོན་རྣམས་རབ་ཏུ་རྟོགས་གྱུར་ནས༔ འཇིགས་མེད་རྡོ་རྗེ་ལྟ་བུར་རྟོགས་པ་ཡི༔ དབང་མཆོག་དེས་ཀྱང་ཚེ་ནི་འཕེལ་བར་ཤོག༔ ཨཱོཾ་བིལ་ཝ་ཨ་བྷི་ཥིཉྩ་མཾ༔ ཧཱུྃ༔ སྔོན་ཚེ་ཐུབ་དབང་ཤཱཀྱ་སེང་གེ་ལ༔ བུ་མོ་ལེགས་སྐྱེས་མ་ཡིས་ཞོ་ཕུལ་ཏེ༔ བཀྲ་ཤིས་ཚེ་འཕེལ༴དེང་འདིང་རིགས་ཀྱི་བུ་ལ༴སྙིང་པོ་རྣམ་དག་མཆོག་གི་དོན་རྟོགས་ནས༔ ས་ལམ་ཡོན་ཏན་མ་ལུས་ཡོངས་རྫོགས་ཏེ༔ དབང་མཆོག་དེས་ཀྱང་ཚེ་ནི་འཕེལ་བར་ཤོག༔ ཨཱོཾ་དྷ་རི་ཏ་ཨ་བྷི་ཥིཉྩ་མཾ༔ ཧཱུྃ༔ སྔོན་ཚེ་ཐུབ་དབང་ཤཀྱ་༴རྒྱལ་པོ་མྱ་ངན་མེས་ཀྱིས་དུང་ཕུལ་བས༔ བཀྲ་ཤིས་ཚེ་འཕེལ༴དེང་འདིར་རིགས་ཀྱི་བུ༴ཡེ་ཤེས་རྒྱ་མཚོ་མཆོག་གི་རང་བཞིན་ལས༔ ཆོས་ཀྱི་གྲགས་པ་ཕྱོགས་བཅུར་སྒྲོགས་པ་ཡི༔ དབང་མཆོག་དེས་ཀྱང་སྙན་གྲགས་མཐའ་རྒྱས་ཤོག༔ ཨཱོཾ་མངྒ་ལ་སྭ་བྷ་ལ་ཨ་བྷི་ཥིཉྩ་མཾ༔ ཧཱུྃ༔ སྔོན་ཚེ་ཐུབ་དབང་ཤཱཀྱ༴གསང་བདག་ཕྱག་ན་རྡོ་རྗེས་ཡུངས་ཀར་ཕུལ༔ བཀྲ་ཤིས་ཚེ་འཕེལ་༴དེང་འདིར་རིགས་ཀྱི་༴གདོན་བགེགས་འབྱུང་པོའི་ཚོགས་རྣམས་རབ་ཞི་ནས༔ བར་ཆད་བདུད་ཀྱི་གཡུལ་ལས་རྒྱལ་བ་ཡི༔ དབང་མཆོག་དེས་ཀྱང་བགེགས་རྣམས་ཞི་བར་ཤོག༔ ཨཱོཾ་ཤྲཱི་པ་ཤཾ་མཾ་ཨ་བྷི་ཥིཉྩ་མཾ༔ ཅེས་བསྐུར་རོ། དེ་ནས་ཤིས་བརྗོད་མེ་ཏོག་འཐོར་ལ། ཧཱུྃ༔ ཡེ་ཤེས་དབྱིངས་ཀྱི་ཕོ་བྲང་ནས༔ ཕག་མོ་ཆོས་སྐུའི་བཀྲ་ཤིས་ཤོག༔ ཡེ་ཤེས་ལྔ་ལྡན་ཕོ་བྲང་ནས༔ ཕག་མོ་ལོངས་སྐུའི་བཀྲ་ཤིས་ཤོག༔ མཁའ་སྤྱོད་གནས་ཡུལ་དུར་ཁྲོད་ནས༔ ཕག་མོ་སྤྲུལ་སྐུའི་བཀྲ་ཤིས་ཤོག༔ བཀའ་ཡི་འཕྲིན་ལས་དཀྱིལ་འཁོར་ནས༔ སྤྲུལ་པ་འབུམ་སྡེའི་བཀྲ་ཤིས་ཤོག༔ ལོ་བརྒྱ་ཐུབ་ཅིང་སྟོན་བརྒྱ་མཐོང་བ་དང་། སོགས་བརྗོད་དོ། གཞུང་ལས། གཏང་རག་མཎྜལ་འབུལ་ཞིང་བཀའ་དྲིན་ཁུར༔ མཁའ་འགྲོ་མཆོད་བསྟོད་ཚེ་ཡི་སྒྲུབ་པ་འབུང་༔ ལྷ་གཤེགས་དལ་བསྡུ་བསྔོ་སྨོན་རྒྱས་གདབ་བོ༔ ས་མ་ཡཱ༔ རྒྱ་རྒྱ་རྒྱ༔ ཞེས་གསུངས་པའི་དོན་བཞིན། དེ་ལྟར་ཚེ་དབང་ཟབ་མོ་ལེགས་པར་བསྐུར་གྲུབ་པས་གནས་སྐབས་དེ་དག་ཏུ་ཁས་བླངས་པའི་དམ་ཚིག་དང་སྡོམ་པའི་རིམ་པ་རྣམས་ཚུལ་བཞིན་དུ་བསྲུང་ངོ་སྙམ་པས་འདིའི་རྗེས་བཟློས་མཛོད། །གཙོ་བོས་ཇི་ལྟར་བཀའ་སྩལ་པ། །དེ་དག་ཐམས་ཅད་བདག་གིས་བགྱིད། དེ་ལྟར་ཚེ་དབང་ཟབ་མོ་ལེགས་པར་ཐོབ་པའི་དཀའ་དྲིན་གཏང་རག་ཏུ་དམིགས་ཏེ་མཎྜལ་འབུལ་བར་ཞུ། མཎྜལ་འབུལ་ལོ། སླར་ཡང་ལུས་ལོངས་སྤྱོད་ལ་སོགས་པ་འཁོར་ལོས་བསྒྱུར་བའི་རྒྱལ་སྲིད་ཀྱི་འབྱོར་པ་ལྟ་བུར་ཡིད་ཀྱི་སྤྲུལ་ཞིང་ཕུལ་བས་བཞེས་ཤིང་ཆ་ཤས་ནས་རང་གིས་ཀྱང་ལོངས་སྤྱོད་པའི་མོས་པ་དང་བཅས་འདིའི་རྗེས་བཟློས་མཛོད། །དེང་ནས་བརྩམས་ཏེ་བདག་བྲན་དུ། །ཁྱེད་ལ་བདག་ནི་འབུལ་ལགས་ན། །ཁྱེད་ཀྱི་སློབ་མར་བཟུང་བ་དང་། །ཆ་ཡི་ཀྱང་ནི་བསྐྱེད་དུ་གསོལ། དེ་ལྟར་དབང་བསྐུར་ལེགས་པར་ཐོབ་པའི་དགེ་བ་མཁའ་ཁྱབ་ཀྱི་སེམས་ཅན་ཐམས་ཅད་ཀྱི་དོན་དུ་བསྔོ་བར་མཛོད། བསོད་ནམས་འདི་ཡི་སོགས་དང་རིན་ཆེན་དགེ་ཚོགས་སོགས་བརྗོད་དོ། རྗེས་ཀྱི་བྱ་བ་དཀྱིལ་འཁོར་བསྡུ་བ་སོགས་ལས་བྱང་མཇུག་སྐྱོང་ངོ་། ཨེ་མ་ཚེ་ཡི་རིགས་འཛིན་པདྨ་འབྱུང་གནས་ངས༔ འགྲོ་བའི་དོན་དུ་ཟབ་ཆོས་དཔག་མེད་བཀོད༔ ཁྱད་པར་ཟབ་པའི་སྙིང་པོ་གདམས་པ་འདི༔ མ་འོངས་དོན་དུ་དཀར་མོ་སྐུ་ཡི་གནས༔ ཕག་དཀར་བསྒྲུབ་གནས་ལྷ་ཡི་གཞལ་ཡས་སུ༔ གཏད་རྒྱས་བཏབ་ཅིང་བསྲུང་མར་གཉེར་བྱང་བཅོལ༔ མ་འོངས་དུས་ན་ང་ཡི་ཐུགས་སྤྲུལ་ཞིག༔ ཁམས་ནས་འབྱུང་ཞིང་གདམས་པ་འདི་དང་འཕྲད༔ གསང་སྒོ་མ་འཆལ་སྒྲུབ་ལ་ཚུལ་བཞིན་འབུངས༔ ཆོས་བདག་རྣམས་ལ་གསང་བར་སྤེལ་ཞིག་རྒྱ༔ བསྟན་པ་སེམས་ཅན་འགྲོ་དོན་ངང་གིས་འགྲུབ༔ ས་མ་ཡཱ༔ རྒྱ་རྒྱ་རྒྱ། གཏེར་རྒྱ༔ སྦས་རྒྱ༔ ཟབ་རྒྱ༔ ས་མ་ཡ་རྒྱ་རྒྱ་རྒྱ། ཁམས་པ་ཉི་མས་གྲགས་པས་ཤིང་མོ་གླང་གི་ལོ་ལ་ཆགས་རུ་ཕུག་དཀར་ལྷའི་གཞལ་ཡས་ནས་སྤྱན་དྲངས་ཤིང་། མེ་ཕོ་སྟག་གི་ལོ་ལ་ཆགས་རུ་ཕུག་ནག་བདེ་བ་ཆེན་པོའི་རྡོ་རྗེའི་ཀེའུ་ཚང་དུ་ཤོག་སེར་ལས་ཕབ་པ་འདི་ཡང་ཧོར་ཟླ་དྲུག་པའི་ཚེས་བཅུ་ལའོ། །བདེ་ཆེན་དཔལ་མོ་དབྱིངས་ཀྱི་མཁའ་འགྲོ་མའི། །སྨིན་བྱེད་འཆི་མེད་འདོད་པ་འཇོ་བ་གང་། །ཇི་བཞིན་རྟོགས་ནས་བྲིས་པ་མ་ཡིན་ཀྱང་། བཀའ་ནན་ཆེན་པོས་བསྐུར་ངོར་གཡར་ཁྲལ་དུ། །རང་དང་སྐལ་མཉམ་འགའ་ལ་ཕན་པའི་བློས། །བཀླགས་ཆོག་འཇུག་བདེ་ཁྲིགས་སུ་སྡེབས་པར་བྱས། །འདི་འབད་དགེ་བས་ལུས་ཅན་ཐམས་ཅད་ཀྱི། །འཆི་མེད་འདོད་འཇོའི་དགའ་སྟོན་ཐོབ་གྱུར་ཅིག། ཅེས་པའང་བླ་མ་འགྱུར་མེད་བློ་ལྡན་གྱིས་བཀའ་ནན་ཆེན་པོས་བསྐུལ་ངོར་མ་ལྡོག་པར། བྱ་བྲལ་རྒྱལ་ཁམས་པ་ངག་དབང་བློ་གྲོས་ཀྱིས་བྲིས་པ་ཉེས་གྱུར་གང་མཆིས་མཁའ་འགྲོའི་ཚོགས་ལ་སྙིང་ནས་བཤགས་སོ་སྒྲིབ་མེད་ཚངས་པ་མཆོག་གི་དངོས་གྲུབ་སྩོལ།། །།

ཕག་མོ་རིགས་བཞིའི་ཆོས་སྐོར་ལས་ཕག་སེར་སྐོར།

སྒྲུབ་ཐབས་མཆོག་གི་ནོར་བུ།

ཕག་མོ་སེར་མོའི་ཟབ་ཐིག་ལས༔ སྒྲུབ་ཐབས་མཆོག་གི་ནོར་བུ་བཞུགས༔ ཡེ་ཤེས་ཕག་མོ་མཁའ་འགྲོའི་ཚོགས་ལ་འདུད༔ བདག་ཉིད་པདྨ་དྷཀྐིའི་རྒྱུ་འཕྲུལ་གར༔ རྡོ་རྗེ་ཕག་མོ་ལུས་དང་གྲིབ་བཞིན་འགྲོགས༔ མཁའ་འགྲོའི་གསང་མཛོད་མན་ངག་ཐམས་ཅད་རྡོལ༔ དུས་གསུམ་འགྲོ་བ་སྐལ་ལྡན་ཕོ་མོ་རྣམས༔ བླ་མེད་ཆོས་ཀྱིས་སྨིན་གྲོལ་ལམ་ལ་བཀོད༔ གསང་ཆེན་ཐེག་པའི་ཡང་བཅུད་སྙིང་གི་ནོར༔ མ་འོངས་དོན་དུ་གཏེར་ཁ་དཔག་མེད་སྦས༔ ཀུན་གྱི་ཡང་ཏིག་ཟབ་མོའི་གདམས་པ་འདི༔ འདི་ནས་རིང་འདས་མ་འོངས་བསྐལ་པའི་མཐར༔ ལས་ལྡན་འགྲོ་བ་འགའ་ཡི་དོན་དུ་བཞག༔ ཉམས་སུ་ལོངས་ཤིག་སྐལ་ལྡན་ཕོ་མོ་རྣམས༔ ས་མ་ཡཱ༔ རྒྱ་རྒྱ་རྒྱ༔ དབེན་ཞིང་དངས་ལ་མཁའ་འགྲོ་འདུ་བའི་གནས༔ མི་རྒོད་ཇག་ཆོམ་འཚེ་བ་མེད་པའི་སར༔ སྟེགས་བུ་དྲི་བཟང་སྨན་གྱིས་ལེགས་པར་བྱུག༔ ཆོས་འབྱུང་ཐོད་ར་སྣ་ཚོགས་པདྨ་དང་༔ རྡོ་རྗེའི་ཕྲེང་བ་མེ་ཡི་ར་བས་བསྐོར༔ དབུས་སུ་མཁའ་འགྲོའི་གཏོར་མ་སྐུ་ཡིས་བརྒྱན༔ དར་སེར་གུར་ཕུབ་སྨན་རག་བླ་རྡོ་འགོད༔ དཀར་ཕྱོགས་མཆོད་ཅིང་ནག་ཕྱོགས་གདོན་བགེགས་སྦྱངས༔ སྐྱབས་སེམས་ཡན་ལག་སྡོམ་བཟུང་སྔོན་དུ་འགྲོ༔ ཚད་མེད་བཞི་ལྡན་སྣང་སྟོང་འཇའ་གུར་ཀློང་༔ ཆོས་ཀྱི་འབྱུང་གནས་ཨེ་ཡི་ཕོ་བྲང་དབུས༔ ཏི་ར་ཉི་ཟླ་པདྨ་འབར་བའི་སྟེང་༔ སྐྱེ་མེད་རིག་པའི་རྩལ་སྣང་ཡི་གེ་རི༔ འོད་ལྔའི་འཕྲོ་འདུ་བསྒྱུར་བའི་ཆོ་འཕྲུལ་ལས༔ ཕག་མོ་སེར་མོ་བདེ་ཆེན་མཁའ་འགྲོ་མ༔ ཐབས་ཀྱི་ཌཱ་རུ་ཤེས་རབ་དྲིལ་བུ་འཁྲོལ༔ གར་སྟབས་རུས་རྒྱན་དར་དཔྱངས་འོད་ལྔ་འབར༔ བཞིན་འཛུམ་མདངས་ལྡན་སྤྱན་གསུམ་མཁའ་ལ་གཟིགས༔ དབུ་སྐྲ་སིལ་མ་རིགས་ལྔའི་རྒྱན་གྱིས་སྤྲས༔ ཕག་ཞལ་སེར་མོའི་སྒྲ་ཡིས་སྲིད་གསུམ་གཡོ༔ རྡོ་རྗེ་ཁ་ཊྲཱཾ་བདེ་བའི་ཡབ་དང་འཁྲིལ༔ དོན་གྲུབ་སེར་མོ་བདེ་ཆེན་སྒྱུ་འཕྲུལ་མ༔ འདོད་པའི་དབང་མོ་མ་གཅིག་མཁའ་འགྲོའི་གཙོ༔ གཏེར་འབྱུང་ཡེ་ཤེས་དག་པའི་ཕོ་བྲང་ནས༔ བཞེངས་ཤིག་སྐུ་སྐྱོད་སྒྲུབ་པའི་གནས་འདིར་བྱོན༔ སེར་མོ་འབུམ་གྱི་འཁོར་ཚོགས་སྤུངས་སེ་སྤུང་༔ གནས་ཡུལ་དུར་ཁྲོད་མཁའ་འགྲོ་ཐིབས་སེ་ཐིབ༔ གར་གྱི་སྟངས་སྟབས་ཕྱག་མཚན་ཁྲོལ་ལོ་ལོ༔ འོད་ཕུང་ཐིབས་ཐིབས་གཟི་མདངས་ཡ་ལ་ལ༔ བརྡ་སྐད་དིར་དིར་གད་བརྒྱངས་སངས་སེ་སང་༔ བྱིན་གྱིས་བརླབ་ཕྱིར་གནས་འདིར་སྤྱན་འདྲེན་གཤེགས༔ མོས་པའི་བུ་ལ་མཆོག་ཐུན་དངོས་གྲུབ་སྩོལ༔ བསྐྱེད་པའི་གཞལ་ཡས་འདི་ལ་བརྟན་པར་བཞུགས༔ འདུ་འབྲལ་མེད་པའི་དབྱིངས་སུ་ཕྱག་གིས་མཆོད༔ སྨན་གཏོར་རཀྟ་དགའ་བཞིའི་བདེ་སྟོང་བཞེས༔ རི་རཏྣ་སརྦ་དྷཀྐི་ནི་ས་མ་ཡཱ་ཧྲིང་ཧྲིང་ཕེམ་ཕེམ་ཛཿཛཿ ཨ་ཝེ་ཤ་ཡ་པུ་རུ་ཙ་ཏིཥྛ་ཛྙ་ན་ཛཿཧཱུྃ་བཾ་ཧོ༔ རང་རིག་སྟོང་པའི་རང་མདངས་རོལ་བ་ལས༔ ཟུང་འཇུག་སྐྱེ་མེད་དབྱིངས་ཀྱི་མཁའ་འགྲོ་ཤར༔ ཐུགས་དཀར་ཉི་སྟེང་ས་བོན་སྔགས་འཁོར་བསྒྱུར༔ ཕྱོགས་བཅུ་དུས་བཞིའི་རྒྱལ་བ་རྒྱ་མཚོ་དང་༔ རྩ་གསུམ་མཁའ་འགྲོ་ཆོས་སྐྱོང་སྲུང་མའི་ཚོགས༔ སྲིད་གསུམ་ཀུན་གྱི་ཚེ་དཔལ་འབྱོར་བའི་སྟོབས༔ འོད་ལྔའི་རྣམ་པར་བསྒྱུར་ནས་དབང་དུ་བསྡུས༔ བསྐྱེད་པའི་ལྷ་སྐུ་བཟླས་པའི་སྔགས་འབྲུར་ཐིམ༔ བདེ་སྟོང་རབ་རྒྱས་གཟི་བརྗིད་ཆེས་ཆེས་འབར༔ སྐུ་བཞིའི་ཡེ་ཤེས་མངོན་གྱུར་ཨེ་མ་ཧོ༔ རི་རཏྣ་དྷཀྐི་ནི་བྷ་ར་ཧི་མ་མ་པུཥྟིང་ཀུ་རུ་སརྦ་སིདྡྷི་ཧཱུྃ་སྭཱ་ཧཱ༔ མ་ཡེངས་ཏིང་འཛིན་ངང་ནས་ཡང་སྙིང་འདི༔ འབུམ་ཚོ་བཟླས་པས་མཁའ་འགྲོའི་བྱིན་རླབས་འཐོབ༔ ཞལ་མཇལ་གསུང་ཐོས་ཞིང་ཁམས་མཐོང་བ་དང་༔ དྲི་བཟད་འཐུལ་ལ་ཉམས་རྒྱས་བདེ་སྟོང་འབར༔ ཐོད་ཆང་འཐུངས་དང་ཅང་ཏེའུ་ཁ་ཊྲཱཾ་རྙེད༔ དངོས་གྲུབ་ཐོབ་པའི་ཡ་མཚན་རྟགས་རྣམས་འབྱུང་༔ ཐུན་སྐབས་རྣམས་སུ་མཆོད་ཅིང་བསྟོད་པ་ནི༔ ཧཱུྃ༔ མཆོད་པའི་མཁའ་འགྲོ་སྤྲུལ་པའི་དྷཀྐི་མ༔ སྟོང་གསུམ་གང་བར་སྤྲུལ་ནས་ཕྱག་རྒྱ་སྒྱུར༔ འདབ་ལྡན་ཡིད་འོང་མེ་ཏོག་སྣ་ཚོགས་དང་༔ དྲི་ཞིམ་བདུག་སྤོས་སྣང་གསལ་ཨཱ་ལོ་ཀེ༔ དྲི་ཡི་ཆབ་བཟང་ཞལ་ཟས་རོལ་མོའི་སྒྲ༔ བདེ་གསལ་མི་རྟོག་ཉམས་མྱོང་རྡོ་རྗེའི་གླུ༔ སྣང་བའི་ཕྱག་རྒྱ་སྟོང་པའི་ཡེ་ཤེས་བརྒྱན༔ དགའ་བཞིའི་འགྲོས་ཀྱིས་ཡེ་ཤེས་མཁའ་འགྲོ་མཆོད༔ སྲིད་གསུམ་གཏོར་གཞོང་འགྲོ་དྲུག་གཏོར་མས་སྤྲས༔ དབང་ཤེས་ལང་ཚོའི་འདབ་སྟོང་རྒྱན་གྱིས་བརྒྱན༔ མུ་མཐའ་མེད་པར་ཡོངས་སུ་བཀོད་པ་འདི༔ ཡེ་ཤེས་མཁའ་འགྲོའི་ལྷ་ཚོགས་རྣམས་ལ་མཆོད༔ རྣམ་དག་མཁའ་ལ་འཁྱིལ་བ་ཟིལ་པའི་བཅུད༔ རང་བྱུང་བདུད་རྩི་པཉྩ་ཨ་མྲྀ་ཏ༔ གཙང་དམེ་ཡོངས་གྲོལ་བྷནྡྷར་བསྐྱིལ་བ་འདི༔ ཡེ་ཤེས་མཁའ་འགྲོའི་ལྷ་ཚོགས་རྣམས་ལ་མཆོད༔ གཟུང་འཛིན་མ་རིག་བག་ཆགས་སྣང་པའི་བདུད༔ རང་གྲོལ་སྐུ་གསུམ་ཆོས་དབྱིངས་ཀཱི་ལཱ་ཡས༔ བདག་མེད་སྟོང་པའི་དབྱིངས་སུ་བསྒྲལ་བའི་ཁྲག༔ ཡེ་ཤེས་མཁའ་འགྲོའི་ལྷ་ཚོགས་རྣམས་ལ་མཆོད༔ གཟུགས་སྒྲ་དྲི་རོ་རེག་བྱ་ལ་སོགས་པ༔ མདོར་ན་མཆོད་པའི་སྤྲིན་གྱི་ཕུང་པོ་རྣམས༔ ཡོངས་སུ་བཀོད་ནས་སྤྲུལ་སྟེ་མཆོད་པའི་ཚོགས༔ ཡེ་ཤེས་མཁའ་འགྲོའི་ལྷ་ཚོགས་རྣམས་ལ་འབུལ༔ ཨཱོཾ་ཨཱཿཧཱུྃ་རཏྣ་དྷཀྐི་ནི་སརྦ་གྷྲི་ཧ་ན་མ་ཧཱ་པཱུ་ཙ་ཁཱ་ཧི་ཁཱ་ཧི༔ ཧཱུྃ༔ རྒྱས་པའི་མཁའ་འགྲོ་དྷཀྐིའི་གཙོ་མོ་ཆེ༔ མཆོག་གི་མངའ་བདག་སིདྡྷིའི་དཔལ་ལྡན་མ༔ གྲགས་པའི་དཔལ་འབར་དབང་གི་གཟི་བརྗིད་འཕྲོ༔ ནུས་མཐུའི་སྟོབས་རྒྱས་འབྱོན་དྲུག་འབྲས་བུས་ཕྱུག༔ ཡེ་ཤེས་མཁའ་འགྲོ་འཁོར་དང་བཅས་ལ་བསྟོད༔ རྨད་བྱུང་ཐུགས་རྗེས་རྣལ་འབྱོར་བུ་བཞིན་སྐྱོང་༔ ལས་བཞིའི་ཆར་འབེབས་འདོད་པའི་འབྲས་བུ་སྩོལ༔ ལེགས་ཉེས་སྟངས་འཛིན་བླ་མེད་བྱ་ར་བྱེད༔ སེར་མོ་དོན་གྲུབ་སེར་མོ་འབུམ་གྱི་གཙོ༔ ཡེ་ཤེས་མཁའ་འགྲོ་འཁོར་དང་བཅས་ལ་བསྟོད༔ ཆོས་ཀྱི་དབྱིངས་ལས་རྟོག་བྲལ་མཁའ་འགྲོའི་སྐུ༔ ལོངས་སྤྱོད་རྫོགས་པའི་དཔལ་ལྡན་དབང་མོ་ཆེ༔ གང་འདུལ་སྤྲུལ་པའི་གར་མཁན་རྗེས་ཆགས་ཞལ༔ སྐུ་གསུམ་དཔལ་དང་ལྡན་པའི་དོན་གྲུབ་མ༔ ཡེ་ཤེས་མཁའ་འགྲོ་འཁོར་དང་བཅས་ལ་བསྟོད༔ ས་མ་ཡཱ༔ རྒྱ་རྒྱ་རྒྱ༔ དེ་ལྟར་མཆོད་བསྟོད་བསྙེན་ཅིང་བསྒྲུབས་པའི་མཐར༔ ཏིང་འཛིན་དབང་ལེན་སྒྲུབ་རྫས་དམ་མེད་སྦ༔ བླ་རྡོ་འཆང་ཞིང་མཁའ་འགྲོའི་དམ་ཚིག་བསྲུང་༔ ཀུནྡ་སྤེལ་ཞིང་དགའ་བཞིའི་དབབ་ལྡོག་སྦྱང་༔ གནས་ཡུལ་དུར་ཁྲོད་ཉུལ་ཞིང་འདུ་འཛི་སྤང་༔ རེ་དོགས་ཁུ་འཕྲིག་གཅོད་ཅིང་ཟབ་དོན་སྦྱང་༔ མ་དང་མཁའ་འགྲོ་སྤྲིན་བཞིན་འདུ་བ་དང་༔ དངོས་གྲུབ་རྣམ་གཉིས་དཔལ་རྒྱས་མཆོག་ལ་སྤྱོད༔ ཨེ་མ་ཟབ་པའི་སྙིང་པོ་བསྡུས་པའི་བཅུད༔ ཁྱད་པར་འཕགས་པའི་སྙིང་གི་གདམས་པ་འདི༔ གྲོགས་ཀྱི་མཆོག་གྱུར་མཚོ་རྒྱལ་ཁྱོད་ལ་གདམས༔ བརྡ་ཡི་དཔེར་བྲིས་བཀའ་རྒྱས་སྲུང་མར་བཅོལ༔ རྒྱས་པའི་གནས་མཆོག་དོན་གྲུབ་དྷཀྐིའི་གནས༔ གཡུང་དྲུང་རིས་ཀྱི་རྟགས་ཀྱིས་མཚན་པའི་ཟུར༔ གླང་ཆེན་འདྲ་བའི་བྲག་གི་མཁལ་ཁུང་དུ༔ བཀའ་རྒྱས་ཐོབ་དང་མ་འོངས་བསྐལ་པ་ལ༔ ང་ཡི་ཐུགས་སྤྲུལ་ཉི་མའི་མིང་ཅན་ཞིག༔ ཁམས་ནས་འབྱུང་ཞིང་ང་ཡི་ཟབ་གཏེར་སྤྱོད༔ སྐལ་ལྡན་མང་པོ་ཐར་པའི་ལམ་ལ་འཁྲིད༔ ད་ལྟའི་ཟབ་གཏེར་སྦས་པ་དོན་ཡོད་འབྱུང་༔ མཆོག་ཐུན་འབྱུང་གནས་ཚེ་འདི་བློ་ཡིས་ཐོང་༔ བར་ཆད་རྩ་བ་གྲྭ་སློབ་དགོན་གནས་སྤོངས༔ གཅིག་ཏུ་མ་སྡོད་གར་སོང་ཆ་མེད་གྱིས༔ མཐུན་རྐྱེན་ཀུན་དང་འབྲེལ་བ་བཙན་ཐག་ཆོད༔ འགལ་རྐྱེན་མེད་པའི་གནས་སུ་སྒྲུབ་པ་གྱིས༔ པདྨའི་ཞལ་གདམས་སྙིང་ལ་ཆོངས་ཤིག་རྒྱ༔ སྐལ་བར་ལྡན་པའི་ཚོགས་བསགས་ཕོ་མོ་དང་༔ ཁྱད་པར་རྩ་བ་ཡན་ལག་ཆོས་བདག་ལ༔ གསང་སྔགས་སྦྲུལ་མཇུག་བཞིན་དུ་སྟོན་མཁས་གྱིས༔ བཀའ་ཡི་སྲུང་མས་མེལ་ཚེ་གྱིས་ཤིག་རྒྱ༔ ས་མ་ཡཱ༔ རྒྱ་རྒྱ་རྒྱ༔ གཏེར་རྒྱ༔ སྦས་རྒྱ༔ ཟབ་རྒྱ༔ ས་མ་ཡཱ༔ རྒྱ་རྒྱ་རྒྱ༔ རིགས་འཛིན་ཆེན་པོ་ཉི་མ་གྲགས་པས་མེ་མོ་ཡོས་ལ་ཆགས་རུ་ཕུག་སེར་ནས་གདན་དྲངས་ཤིང་ཕུག་ནག་བདེ་བ་ཆེན་པོས་ཤོག་སེར་ལས་ཞལ་བཤུས་པའོ། །མངྒལཾ། །

དབང་ཆོག་ཡིད་བཞིན་ནོར་བུ།

ཕག་མོ་སེར་མོའི་ཟབ་ཐིག་ལས༔ དབང་ཆོག་ཡིད་བཞིན་ནོར་བུ་བཞུགས༔ ཡེ་ཤེས་མཁའ་འགྲོའི་ལྷ་ཚོགས་རྣམས་ལ་འདུད༔ དུར་ཁྲོད་ལ་སོགས་དབེན་པའི་གནས་མཆོག་ཏུ༔ སྐུ་གསུང་ཐུགས་རྟེན་མཆོད་པའི་བྱེ་བྲག་དང་༔ ཁྱད་པར་དབང་རྫས་བུམ་པ་སྨན་གཏོར་རཀ༔ རྡོར་དྲིལ་ཐོད་རྔ་རྐང་གླིང་རྣམས་ཀྱང་འགོད༔ བསྙེན་སྒྲུབ་ཁ་གསོ་ཏིང་འཛིན་དབང་བཞི་བླངས༔ ལས་བུམ་བསྐྱེད་ཆོག་སློབ་མ་ཁྲུས་ནས་ཕྱུངས༔ སྔོན་འགྲོ་སྟ་གོན་བསྲུང་བའི་འཁོར་ལོ་བསྒོམ༔ རིན་ཆེན་ནོར་གྱི་མཎྜལ་ཐོགས་ནས་ཀྱང་༔ འདུན་པའི་སེམས་ཀྱིས་གསོལ་བ་འདི་ལྟར་བརྗོད༔ ཧོ༔ རྡོ་རྗེ་རྒྱལ་པོ་དཔལ་ཆེན་ཧེ་རུ་ཀ༔ བདག་ནི་ཐེག་མཆོག་ཟབ་ལམ་འདིར་འཇུག་ནས༔ སྨིན་ཅིང་གྲོལ་བའི་ལམ་མཆོག་བླ་ན་མེད༔ བདག་ཅག་རྣམས་ལ་སྩལ་བར་མཛད་དུ་གསོལ༔ ལན་གསུམ༔ དེ་ནས་དམ་ཚིག་གི་ཆུ་སྦྱིན་ཞིང་༔ ཧཱུྃ༔ བླ་མེད་གསང་བའི་བདུད་རྩི་འདི༔ དཔལ་ཆེན་ཡབ་ཡུམ་གསང་བའི་ཆུ༔ བུ་ཁྱོད་འཐུང་ལ་དངོས་གྲུབ་ལོང་༔ དམ་ལས་འདས་ན་སྲེག་ཏ་རེ༔ སྙིང་ནས་བྲོ་བོར་ཆུ་འདི་འཐུང་༔ ས་མ་ཡཱ་དྷཀྐི་ཙིཏྟ་ཧཱུྃ་ཛ༔ ས་མ་ཡཱ༔ རྒྱ་རྒྱ་རྒྱ༔ དངོས་གཞིའི་དབང་གིས་སྨིན་པའི་ཕྱིར༔ དཔོན་སློབ་ཐམས་ཅད་གར་སྟབས་འཁྲབ༔ ལག་པ་སྤྱི་བོར་ཆོས་འབྱུང་བཅའ༔ སྔགས་ཀྱིས་སྦྱང་ཞིང་བསྐྱེད་རིམ་གསལ༔ གུ་གུལ་དཀར་ནག་མི་ཀླད་དང་༔ སྐྲ་སེན་བྱི་ལའི་བྲུན་རྣམས་བསྲེག༔ རོལ་མོ་འཁོལ་ཞིང་སྤྱན་ཡང་འདྲེན༔ ཡེ་ཤེས་པ་བརྟན་ཏིཥྛ་བརྗོད༔ རྡོ་རྗེ་མགོར་བཞག་མེ་ཏོག་འཐོར༔ ས་མ་ཡཱ༔ རྒྱ་རྒྱ་རྒྱ༔ དེ་ནས་དངོས་གཞིའི་དབང་བསྐུར་ནི༔ དམ་ཚིག་ཡེ་ཤེས་གཉིས་མེད་བསྟིམ༔ བུམ་པ་མགོར་བཞག་འདི་སྐད་བརྗོད༔ ཧཱུྃ༔ བུམ་པ་མཁའ་དབྱིངས་ཕོ་བྲང་ན༔ དུས་གསུམ་སངས་རྒྱས་བསྐྱེད་པ་མོ༔ དཔལ་ལྡན་མཁའ་འགྲོ་བདེ་ཆེན་མ༔ སེར་མོ་འབུམ་གྱི་ལྷ་ཚོགས་བཞུགས༔ ལུས་ལ་ལྷ་དབང་ཐོབ་པར་ཤོག༔ རི་རཏྣ་དྷཀྐི་སརྦ་བྷ་ར་ཧི་ཀཱ་ཡ་ཨ་བྷི་ཉྩ་ཨཱོཾ༔ སྤྱི་བོར་བསྐུར་ཞིང་བུམ་ཆུ་སྩལ༔ དེ་ནས་གསུང་དབང་བྷན་དྷ་ཐོགས༔ མགྲིན་པར་སྦྱིན་ཞིང་བདུད་རྩི་མྱང་༔ ཧཱུྃ༔ གསང་བ་ཡུམ་གྱི་མཁའ་ཀློང་ནས༔ པཉྩ་རསྨིཨ་མྲྀ་ཏ༔ གསང་སྔགས་བདུད་རྩིའི་བཅུད་མཆོག་འདིས༔ ངག་ལ་གསང་དབང་ཐོབ་པར་ཤོག༔ གོང་ལྟར་ཝཱཀྐ་ཨ་བྷི་ཥིཉྩ་ཨཱ༔ དེ་ནས་ཐུགས་དབང་རྡོ་རྗེ་ཐོགས༔ སྙིང་གར་བསྐུར་ཞིང་འདི་སྐད་དོ༔ ཧཱུྃ༔ བྱང་ཆུབ་རྡོ་རྗེ་རྫོགས་སངས་རྒྱས༔ བདེ་བ་ཆེན་པོ་ཧེ་རུ་ཀ༔ རྡོ་རྗེ་རྒྱལ་བོ་མཆོག་གི་དབང་༔ རིགས་ཀྱི་བུ་ལ་འདི་སྦྱིན་པས༔ སེམས་ལ་ཐུགས་དབང་ཐོབ་པར་ཤོག༔ རི་རཏྣ་དྷཀྐི་སརྦ་བྷ་ར་ཧི་ཙིཏྟ་ཨ་བྷི་ཥིཉྩ་ཧཱུྃ༔ དྲིལ་བུ་ཡོན་ཏན་ལྟེ་བར་སྦྱིན༔ ཧཱུྃ༔ རྒྱལ་བ་ཀུན་གྱི་ཡུམ་གྱུར་ཞིང་༔ རྒྱལ་བ་ཀུན་གྱི་མ་ཆེན་མོ༔ ཡེ་ཤེས་མཁའ་འགྲོ་ཕག་གདོང་མས༔ དེ་རིང་བུ་ལ་དབང་བསྐུར་བས༔ ཡོན་ཏན་མཁའ་འགྲོའི་དབང་ཐོབ་ཤོག༔ རི་རཏྣ་དྷཀྐི་སརྦ་བྷ་ར་ཧི་རཏྣ་ཨབྷི་ཥིཉྩ་ཧཱུྃ༔ འཕྲིན་ལས་དབང་བསྐུར་རྐང་གླིང་ཐོགས༔ ཧཱུྃ༔ དཔལ་ལྡན་ཡེ་ཤེས་མཁའ་འགྲོ་མ༔ མི་རྐང་རོལ་མོའི་སྒྲ་སྙན་འདི༔ རིགས་ཀྱི་བུ་ལ་དེ་རིང་སྦྱིན༔ སྲིད་གསུམ་ཟིལ་གནོན་ཧེ་རུ་ཀ༔ འཁོར་འདས་ཐམས་ཅད་དབང་སྡུས་ཤིག༔ རི་རཏྣ་དྷཀྐི་སརྦ་བྷ་ར་ཧི་ཀརྨ་ཨ་བྷི་ཥིཉྩ་ཧཱུྃ༔ ཕྱོགས་བཅུར་རྐང་གླིང་འབུད་པར་བྱ༔ ཡོངས་རྫོགས་གཏོར་མའི་བཀའ་གཏད་བྱ༔ ས་མ་ཡཱ༔ རྒྱ་རྒྱ་རྒྱ༔ ཨེ་མ་གསང་བ་སྔགས་ཀྱི་བཅུད༔ ཟབ་གནད་འདུས་པའི་དབང་མཆོག་འདི༔ ལན་ཅིག་བསྐལ་པའི་ཐ་མ་ལ༔ ཐུགས་ཀྱི་སྲས་མཆོག་རིག་པ་འཛིན༔ འགྲོ་བ་འདྲེན་པའི་བུ་ཞིག་འོང་༔ ལས་དང་ལྡན་པའི་སྐལ་ལྡན་དེས༔ དད་ལྡན་ཐར་བའི་ལམ་ལ་འགོད༔ མ་དག་འགྲོ་བས་གཤེ་ཞིང་སྐུར༔ བདུད་ཀྱི་སྤྲུལ་པ་དེ་ཡིན་པས༔ ཁ་ལག་འབྲེལ་ཚད་དམྱལ་བར་འཁྲིད༔ མ་འོངས་རྣམས་ཀྱིས་སྤྱོད་མཁས་བྱ༔ དབང་འདི་ཐོབ་པའི་འགྲོ་བ་རྣམས༔ དམ་ལ་གནས་ན་དངོས་གྲུབ་འཐོབ༔ དམ་མེད་ལོག་ལྟ་བསྲེག་པའི་ཕྱིར༔ སྙིང་ལ་ཆོངས་ཤིག་སྐལ་ལྡན་རྣམས༔ ས་མ་ཡཱ༔ རྒྱ་རྒྱ་རྒྱ༔ རིགས་འཛིན་ཆེན་པོ་ཉི་མ་གྲགས་པས་ཆགས་རུ་ཕུག་སེར་རྒྱས་པའི་ཕོ་བྲང་ནས་མེ་མོ་ཡོས་ཀྱི་ལོ་ཧོར་ཟླ་གཉིས་པ་སྤྲུལ་ཟླ་བའི་ཚེས་བཅུ་གསུམ་གི་དགོངས་མོ་དབང་གི་དུས་སུ་གདན་དྲངས་ཤིང་། །མེ་ཡོས་ཧོར་ཟླ་གསུམ་པའི་ཚེས་བཞི་ལ་ཆགས་རུ་ཕུག་ནག་ཏུ་ཤོག་སེར་ལས་ཞལ་བཤུས། །མངྒ་ལཾ། །

དྷཀྐིའི་བླ་རྡོ་ཟབ་མོ།

ཕག་མོ་སེར་མོའི་ཟབ་ཐིག་ལས༔ དྷཀྐིའི་བླ་རྡོ་ཟབ་མོ་བཀའ་རྒྱ་མ་བཞུགས༔ ཕག་མོ་སེར་མོའི་ལྷ་ཚོགས་རྣམས་ལ་འདུད༔ མ་འོངས་སྒྲུབ་ལ་བརྩོན་པའི་རྣལ་འབྱོར་པས༔ མ་མོ་མཁའ་འགྲོ་རྒྱུ་བའི་དུས་ཆེན་ལ༔ སེར་པོའི་དར་རམ་རྒྱ་ཤོག་དྲི་ལྔས་བྱུག༔ མཁའ་འགྲོའི་སྐུ་བྲིས་ལྟེ་བར་མུ་ཁྱུད་ལྔ༔ དབུས་སུ་རི་ལ་རྩ་སྔགས་འདོད་གསོལ་སྦྱར༔ ཕྱི་རིམ་རྩིབས་བཞིར་ཧ་རི་ནི་ས་བཞི༔ རྩིབས་མཆན་བཞི་ལ་ཚེ་དཔལ་འབྱོར་བ་སོགས༔ འདོད་པའི་དོན་གྱི་གསོལ་འདེབས་ཤམ་བུར་སྦྱར༔ ཕྱི་རིམ་མུ་ཁྱུད་འབུམ་ཕྲག་མཚན་སྔགས་འགོད༔ དེ་ཡི་ཕྱི་རིམ་ཚེ་གཟུངས་ཅི་མང་དང་༔ ནོར་རྒྱུན་མ་ཡི་གཟུངས་སྔགས་འདྲི་བར་བྱ༔ དེ་ཡི་ཕྱི་རིམ་ཨཱ་ལི་ཀཱ་ལི་དང་༔ རྟེན་འབྲེལ་སྙིང་པོའི་གཟུངས་རྣམས་ལེགས་པར་བཀོད༔ ཆད་ལྷག་ནོར་འཁྲུལ་བྲིས་བསུབ་མེད་པར་བྱ༔ ལྔ་ལྔ་ཉེར་ལྔའི་བུམ་རྫས་དང་༔ གཡང་ཅན་ཟས་དང་ནོར་ཕྱུགས་སྤུ༔ དབང་ཆེན་རྗེས་ས་ཀ་ཆའི་རིགས༔ བུད་མེད་འཕྱོན་མའི་སྐྲ་གོས་དང་༔ རིགས་ལྡན་ན་ལན་དས་བརྒྱན་ཏེ༔ ཟ་འོག་ཁུག་མར་སྦས་ནས་ཀྱང་༔ དར་ཚོན་དང་བཅས་སྦ་མགུལ་བཏགས༔ བསྒྲུབ་དུས་སྒྲུབ་པའི་རྫས་སུ་འགོད༔ གྲོལ་ནས་རང་གི་ལུས་ལ་འཆང་༔ དུས་སུ་མཁའ་འགྲོ་མཆོད་པ་དང་༔ ལོ་རེ་བཞིན་དུ་རབ་ཏུ་གནས༔ མ་མོ་མཁའ་འགྲོ་སྤྲིན་བཞིན་འདུ༔ དཔལ་དང་གྲགས་པས་ས་ཆེན་ཁྱབ༔ ཚེ་དང་བསོད་ནམས་ཟླ་ལྟར་རྒྱས༔ ཉམས་དང་ལུང་རྟོགས་ཁོར་ཡུག་འཆར༔ མ་དག་འགྲོ་ལ་ཨ་ཐམ་རྒྱ༔ ས་མ་ཡཱ༔ རྒྱ་རྒྱ་རྒྱ༔ གཏེར་རྒྱ༔ སྦས་རྒྱ༔ ཟབ་རྒྱ༔ མཁའ་འགྲོའི་རྒྱས་གདབ་བོ༔ ས་མ་ཡཱ༔ རྒྱ་རྒྱ་རྒྱ༔ ཞེས་རིགས་འཛིན་ཆེན་པོ་ཉི་མ་གྲགས་པས་ཆགས་རུ་ཕུག་སེར་ནས་སྤྱན་དྲངས་ཤིང་ཤོག་སེར་ལས་བསྒྱུར་བ་འདི་ཡང་ཆགས་རུ་ཕུག་ནག་བདེ་བ་ཆེན་པོར་རོ། །

ཟབ་དོན་གཅོད་ཀྱི་སའི་ངོས་འཛིན་ཐབས་དང་ཚར་སློངས་ཀྱི་སྐབས།

ཕག་མོ་སེར་མོའི་ཟབ་ཐིག་ལས༔ ཟབ་དོན་གཅོད་ཀྱི་སའི་ངོས་འཛིན་ཐབས་དང་ཚར་སློངས་ཀྱི་སྐབས་བཞུགས༔ ཡེ་ཤེས་ཕག་གདོང་དོན་གྲུབ་སེར་མོར་འདུད༔ མ་འོངས་དུས་ཀྱི་སྐལ་ལྡན་ཕོ་མོ་རྣམས༔ ཟབ་དོན་གདམས་པ་ཉམས་སུ་ལེན་པའི་ཚེ༔ གཉན་སའི་བརྟག་པ་ས་དཔྱད་འདི་ལྟར་གཅེས༔ གངས་རི་བརྟན་ཆགས་གྲིབ་སོ་འཕོག་པ་གཉན༔ མདུང་སོ་འདྲ་བའི་བྲག་རིའི་རྩེ་མོ་གཉན༔ མདའ་ལྟོང་འདྲ་བའི་ལ་ཡི་ལ་བཙས་གཉན༔ ཤི་ལྤགས་འདྲ་བའི་ཐང་གི་དཀྱིལ་ན་གཉན༔ ནགས་ཚལ་བྲག་ནག་བདུད་གནས་རྩ་བར་གཉན༔ མཚོ་ཡི་འདབས་གཉན་ལུ་མའི་མགོ་བོ་གཉན༔ ཤིང་གཅིག་དྲུང་གཉན་ནེའུ་གསིང་དཀྱིལ་ན་གཉན༔ དེ་དག་རྣམས་ལ་གཉན་རིགས་ཆེ་ཆུང་གནས༔ རི་དང་ཕ་བོང་སྟག་འདྲའི་སྣ་མགོ་གཉན༔ བྲག་རི་དུག་སྦྲུལ་འདྲ་བའི་སྤྱི་གཙུག་གཉན༔ བྲག་རི་སྦལ་པ་འདྲ་བའི་གཉའ་བ་གཉན༔ རི་བྲག་བྱ་ཕོ་འདྲ་བའི་ཟེ་བ་གཉན༔ རི་བྲག་ཕག་མོ་འདྲ་བའི་མཁལ་ཁུང་གཉན༔ དེ་དག་རྣམས་ལ་ས་བདག་གནས་པས་གཅོད༔ བྲག་རི་ཆེ་ཆུང་ཀུན་གྱི་གདོང་པ་གཉན༔ རི་བྲག་སྡིག་པ་འདྲ་བའི་མཇུག་མ་གཉན༔ དེ་བཞིན་རུས་སྦལ་འདྲ་བའི་རྒལ་པ་གཉན༔ མ་ཧེ་གླང་ཆེན་གཡག་རྒོད་རྔ་མོ་འདྲའི༔ རི་བྲག་རྣམས་ཀྱི་མཁལ་ཁུང་དག་ཏུ་གཉན༔ དེ་དག་རྣམས་ལ་ས་བདག་ཀླུ་གཉན་གཅོད༔ བྲག་ཕུག་ནང་གཉན་གཅོང་རོང་དཀྱིལ་ན་གཉན༔ གད་ཕུག་སྒོ་གཉན་དེ་དག་རྣམས་སུ་ནི༔ བསེན་མོ་དམ་སྲི་ཐེའུ་རང་གཅོད་པར་བྱ༔ ཁང་སྟོང་ནང་གཉན་འཕུང་ཤུལ་འགྲམ་ན་གཉན༔ མཚེར་གྱི་ཤུལ་གཉན་གྲོང་པའི་སྲང་མདོ་གཉན༔ ཚོང་དུས་དབུས་གཉན་ལམ་གྱི་རྒྱ་གྲམ་གཉན༔ དེ་དག་རྣམས་སུ་བསེ་རག་འབྱུང་པོ་དང་༔ གྲོ་བོ་གྲེ་མོ་ལ་སོགས་གཅོད་པར་བྱ༔ ཤར་བལྟས་ཆུ་ལ་རྒྱལ་རིགས་ཀླུ་གནས་ཤིང་༔ ལྷོར་བལྟས་རྗེའི་རིགས་ནུབ་བལྟས་བྲམ་ཟེ་དང་༔ བྱང་བལྟས་གདོལ་པ་གནས་པས་ཀླུ་རིགས་གཅོད༔ དེ་དག་རྣམས་ཀྱི་ཟིལ་སྣང་གང་ཆེ་གཉན༔ རི་བྲག་ཀུན་གྱི་སྒང་གི་གཤོངས་ན་གཉན༔ མཐོན་པོའི་ཀོང་དང་ཀོང་གི་མཐོན་པོ་གཉན༔ ལུང་གསུམ་མདོ་གཉན་ཆུ་བོའི་མདུས་མདོ་གཉན༔ ཐོད་ཕོར་འདྲ་བའི་རི་བྲག་དཀྱིལ་ལ་གཉན༔ སྐྱིལ་ཀྲུང་བསྣོལ་འདྲའི་རི་བྲག་མཚམས་ན་གཉན༔ རལ་གྲི་འདྲ་བའི་རི་བྲག་འཆང་བཟུང་གཉན༔ ཙིཏྟ་འདྲ་བའི་རི་བྲག་སྙིང་རྩ་གཉན༔ གློ་བ་འདྲ་བའི་རི་བྲག་ཨོལ་མགོ་གཉན༔ རྡོ་རྗེ་འདྲ་བའི་འཆང་བཟུང་གཉན་པ་ཡིན༔ ཕོ་མཚན་འདྲ་བའི་རྩེ་མོ་གཉན་པ་ཡིན༔ པདྨ་འདྲ་བའི་དཀྱིལ་ན་གཉན་པ་ཡིན༔ གཡུང་དྲུང་འདྲ་བའི་མདོ་མཚམས་གཉན་པ་ཡིན༔ དར་གདུག་འདྲ་བའི་ཤམ་བུ་གཉན་པ་ཡིན༔ རྒྱལ་མཚན་འདྲ་བའི་ཡུ་བ་གཉན་པ་ཡིན༔ ཤིང་རྟ་འདྲ་བའི་འཕང་ལོ་གཉན་པ་ཡིན༔ ཉ་མོ་འདྲ་བའི་རྒལ་པ་གཉན་པ་ཡིན༔ ཆུ་སྲིན་འདྲ་བའི་ཁ་ནང་གཉན་པ་ཡིན༔ གཞུ་དང་འོད་མ་འདྲ་བའི་འཆང་བཟུང་གཉན༔ དེ་དག་རྣམས་ལ་རི་བྲག་ཆེ་ཆུང་དང་༔ ཁ་དོག་གཟུགས་དང་མཐུན་པའི་གཞི་བདག་གནས༔ སྡེ་བརྒྱད་ཆེ་ཆུང་གང་རིགས་དེར་བརྟགས་གཅོད༔ གཡུལ་འཁྲུགས་ས་དང་དུར་ཁྲོད་མི་ཤིའི་ཤུལ༔ གཤིན་རྗེ་སྲོག་བདག་གནས་པས་དེ་བཞིན་གཅོད༔ ལྷ་ཁང་དགོན་གནས་སྒྲུབ་ཁང་ལ་སོགས་སུ༔ རྒྱལ་པོ་དཀོར་བདག་གནས་པས་གཅོད་པར་བྱ༔ ཀླུ་གཉན་ས་བདག་ས་སྲིན་གཅོད་པའི་དུས༔ བྱིང་རྨུགས་འཐིབ་གསུམ་འབྱུང་བས་དྲུང་ཕྱུང་སྟེ༔ རིག་པ་དར་འདོན་ལྟ་སྟངས་མཁའ་ལ་གཅུན༔ འཕྲལ་དུ་འཇིགས་པའི་སྣང་བ་ཆེར་མེད་ཀྱང་༔ ནོན་དང་ལྷོངས་པར་དཀའ་ཞིང་ཕུགས་གདེངས་ཆེ༔ བཙན་དང་ཐེའུ་རང་ལྷ་སོགས་གཅོད་པའི་དུས༔ མིང་ནས་འབོད་དང་བཤུག་པ་འོ་དོད་བྱེད༔ ཉམས་ཀྱང་གཏད་མེད་རྨི་ལམ་ཤིན་ཏུ་འཚུབ༔ རྣལ་དུ་དབབ་ཅིང་ལྟ་བའི་གདེང་བསྐྱེད་དེ༔ ཡིད་གཉིས་འཛིན་པའི་ཁུ་འཕྲིག་དབྱིངས་སུ་གཏོར༔ ལྷོངས་དང་ནོན་སླ་ཕུགས་ཀྱང་འཇམ་པའོ༔ པེ་ཧར་ལ་སོགས་རྒྱལ་རིགས་ཆེ་ཆུང་དང་༔ གྲེ་བོ་གྲེ་མོ་ལ་སོགས་གཅོད་པའི་ཚེ༔ ཤེས་པ་འཚུབ་ཅིང་རིག་པ་ཚོ་མི་ཐུབ༔ ཞེ་སྡང་ཆེ་ཞིང་ང་རྒྱལ་མེ་ལྟར་འབར༔ ཁྲེགས་ཆོད་ལྟ་བའི་ནམ་མཁའ་ཡངས་པའི་ཀློང་༔ རང་བྱུང་རིག་པའི་ཉི་ཟླའི་བསམ་གཏན་བསྐྱིལ༔ འཕྲལ་ལ་འཚུབ་ཀྱང་ལྷོངས་ནོན་གཉིས་ཀ་སླ༔ དམ་སྲི་བསེན་མོ་མ་མོ་གཅོད་པའི་དུས༔ རིག་པ་གཡེལ་ཞིང་འགྲོ་སྙིང་འདོད་པ་དང་༔ ཆགས་པ་སྐྱེ་ཞིང་ཐིག་ལེ་འཕྲོག་པ་ཡོང་༔ སྒོ་གསུམ་རྣལ་དུ་དབབ་པའི་གདམས་པ་དང་༔ འདྲེན་འཁྲེམ་དགྲམ་པའི་འཁྲུལ་འཁོར་འབར་འཛག་སྦྱང་༔ སློང་གནོན་སླ་ཡང་རྗེས་འབྲེང་ཕུག་མི་འཇམ༔ མི་མང་ཤི་ཤུལ་ལྷ་ཁང་གོག་པོ་དང་༔ དུར་ཁྲོད་རྣམས་ནི་འཕྲལ་འཇིགས་ཕུགས་མི་འཇིགས༔ ཤིང་གཅིག་ས་དང་རྒྱ་མཚོ་ཆུ་མིག་རིགས༔ ཕ་བོང་སྦལ་སྡིག་སྡོམ་གཟུགས་འདྲ་བ་རྣམས༔ འཕྲལ་ལ་མི་འཇིགས་ཕུགས་ལ་ཤིན་ཏུ་འཇིགས༔ ཐང་ཆེན་ཐང་ཆུང་ཐང་གི་རིགས་རྣམས་དང་༔ བྲག་ཕུག་གད་ཕུག་གྲོག་ཧྲོལ་ལ་སོགས་པ༔ འཕྲལ་ཕུགས་གང་དུའང་མི་འཇིགས་གནས་པ་ཆུང་༔ ལར་ནི་གཉན་སའི་རིགས་ཀྱི་རྒྱ་དཔངས་ལྟར༔ སྡེ་བརྒྱད་གང་གནས་དེར་བརྟགས་གཅོད་པའི་ཚེ༔ ཟབ་དོན་དམིགས་པའི་ཡང་ཏིག་བཞིན་དུ་སྤྱད༔ མ་ལྷོངས་པ་དང་མ་ནོན་པ་ཡི་རིགས༔ རྒྱུན་བསྲིང་བརྩོན་འགྲུས་བརྩམ་དང་ངར་ཡང་ཕྱུངས༔ ཕྱི་ཡི་ཆོ་འཕྲུལ་ལྷ་འདྲེའི་སློང་ཚད་ནི༔ རང་རང་གཟུགས་སྟོན་ས་གཡོ་ལྕེ་འབབས་ཤིང་༔ བརྡེག་ཆོམ་འུར་སྒྲ་རྒྱོབ་སོད་སྒྲ་འབྱིན་དང་༔ གོང་ལྟར་རང་རང་ཚུལ་གྱི་རྟགས་རྣམས་འཆར༔ ཁྱད་པར་བློ་འབྲིད་ཤེས་པ་ཆོས་ལས་ལྡོག༔ ཚེ་འདིའི་དབང་ཤོར་ནག་པོ་བདུད་ཀྱིས་སློངས༔ ལུས་ལ་ན་ཚ་སེམས་ལ་ཟུག་རྔུས་གཟིར༔ དངོས་ཉམས་རྨི་ལམ་ཤ་ཁྲག་དམར་པོ་སྟེར༔ སྣག་ནག་བྱིན་དང་གོས་དམར་བསྐོན་པ་དང་༔ འཇིགས་ཤིང་བྲེད་དང་ཡ་ང་སྐྱི་བུང་བྱེད༔ ལྷོངས་རིགས་ཆེ་ཆུང་དེ་དག་གང་བྱུང་ཡང་༔ རབ་ནི་འཁོར་འདས་ཆོས་རྣམས་བརྗོད་མེད་ཀློང་༔ འགྲོ་དྲུག་ཁམས་དང་སྲིད་རྩེ་མནར་མེད་ཡུལ༔ གཟུགས་ཅན་གཟུགས་མེད་སྤང་བླང་བྱ་བྱེད་དང་༔ བཟང་རྟོག་ངན་རྟོག་རེ་དོགས་འདུ་འཕྲོའི་རྩལ༔ ལྷ་འདྲེའི་རྡུར་དང་རང་གི་འཇིགས་སྐྲག་སྣང་༔ སྒྱུ་མའི་གྲོང་ཁྱེར་རྨི་ལམ་བྲག་ཆ་ལྟར༔ དུག་གསུམ་བག་ཆགས་རྒྱུ་དང་བཅས་པའི་འཕྲུལ༔ མེད་ལ་ཡོད་པར་གཟུང་བ་དབྱིངས་གཏོར་ཏེ༔ ཀ་དག་བློ་འདས་ལྟ་བསྒོམ་ལྡན་པས་གཅོད༔ འབྲིང་ནི་ཟབ་མོ་གཅོད་ཀྱི་གདམས་པ་ལ༔ ཉམས་ལེན་བྱས་པའི་ཚད་རྡོར་ངོས་བཟུང་སྟེ༔ ལྷོངས་ཚད་ཤར་བ་མ་བུ་འཕྲད་པ་ལྟར༔ བརྩེ་བའི་སེམས་ཀྱིས་དགའ་བ་རབ་བསྒོམས་ཏེ༔ འཁོར་བ་ཐོག་མ་མེད་པའི་དུས་མཐའ་ནས༔ ལས་ཀྱི་དབང་གིས་འཁོར་བ་འདིར་འཁྱམས་ཏེ༔ ཤ་ཁྲག་དྲ་བའི་འདོར་ལེན་མང་བྱས་ཀྱང་༔ བྱང་ཆུབ་ལམ་ལ་ཕན་པ་གཅིག་ཙམ་མེད༔ དེ་རིང་ཟབ་མོ་གཅོད་ཀྱི་ཉམས་ལེན་མཐུས༔ སྣང་སྲིད་ལྷ་འདྲེའི་ལྷོངས་ཚད་ཤར་བའི་ཚེ༔ ང་ཡི་ཤ་ཁྲག་གཟུགས་ཀྱི་ཕུང་པོ་འདི༔ བསྔོས་པ་བཞིན་དུ་མྱུར་དུ་ད་ཁྱེར་ཞིག༔ སྡང་བའི་དགྲ་དང་གནོད་པའི་བགེགས་གཉིས་ཀྱིས༔ གཙོར་བྱས་ཕ་མ་འགྲོ་དྲུག་སེམས་ཅན་རྣམས༔ སྐུ་གསུམ་གོ་འཕང་འཐོབ་པའི་རྒྱུར་གྱུར་ཅིག༔ སྙམ་པའི་ངང་ནས་བདག་འཛིན་བོར་ཏེ་གཅོད༔ ཡེ་ནས་གྲོལ་བའི་རང་བྱུང་ཡེ་ཤེས་འདི༔ ཡོངས་སུ་གྲོལ་ཞིང་འབད་རྩོལ་བྲལ་བཞིན་དུ༔ ཅེར་གྱིས་གྲོལ་བའི་གནས་ལུགས་ངང་ལ་འཇོག༔ ཐ་མ་རྣམས་ཀྱང་ལྷོངས་ཚད་ཤར་བའི་ཚེ༔ འཇིགས་པའི་སྣང་བར་མི་བལྟ་འཇིགས་མཁན་བལྟ༔ བདག་གཞན་གཉིས་སུ་ཕྱེ་བའི་གཟུང་འཛིན་འདི༔ སེམས་ཀྱིས་བྱས་པའི་རྩལ་སྣང་ཕྱི་ནས་ཤར༔ ལྷོངས་ཚད་ཤར་ལ་འཇིགས་སྐྲག་བྱེད་པ་དང་༔ གདོན་བགེགས་དགྲ་ལ་གཟུང་ན་དམ་བཅའ་བུད༔ ངེས་པར་རང་གི་སེམས་ཉིད་མ་རྟོགས་སྐྱོན༔ དེ་རིང་ཕུང་པོ་བཟན་ལ་ཅིས་ཀྱང་བསྐྱུར༔ བདག་ཏུ་མེད་ལ་བདག་འཛིན་བྱས་པ་འཁྲུལ༔ གཉིས་སུ་མེད་ལ་གཉིས་འཛིན་བྱས་པས་བསླུས༔ དེ་སྔ་སེམས་ཉིད་བག་ལ་ཉལ་ཏེ་བསྒྲིབས༔ དེ་རིང་ལྷོངས་ཀྱིས་རིག་པ་རྗེན་ལ་བུད༔ སྣང་སྲིད་ལྷ་འདྲེ་ངོ་སྤྲོད་བླ་མ་རྗེ༔ ད་ལྟ་ཉིད་དུ་དབུགས་དང་བྲལ་ཀྱང་རུང་༔ ཟབ་དོན་གདམས་པ་ནམ་ཡང་མི་གཏོང་ངོ་༔ སྙམ་པའི་ངང་ནས་དམ་བཅའ་མཐའ་ལ་སྐྱེལ༔ ས་མ་ཡཱ༔ རྒྱ༔ དེ་ལྟར་ཉམས་སུ་བླངས་པས་ཚར་ཚད་ནི༔ སྲོག་སྙིང་འབུལ་དང་བྲན་དུ་ཁས་ལེན་དང་༔ དགེ་བསྙེན་འབོགས་དང་གསང་མཚན་སྦྱིན་པ་དང༔ ནོར་བུ་འབུལ་དང་ཚོགས་འཁོར་བསྐོར་བ་དང་༔ དབང་བསྐུར་ཆོས་འཆད་ཁྲིར་བསྡད་རྒྱན་ཆས་སྤྲས༔ རྣག་ཁྲག་ཟགས་དང་ཁྲུས་བྱས་རྒྱལ་མཚན་བསྒྲེངས༔ ཉི་ཟླ་ཤར་དང་མཆོད་རྟེན་གངས་རིར་འཛེགས༔ རང་གྀ་སྐྱེ་བརྒྱུད་བཤད་དང་བཟའ་བཏུང་སྟེར༔ རང་རིག་ངོ་འཕྲོད་ཟབ་དོན་ཉམས་བླངས་པས༔ ལྷ་འདྲེ་ཆོས་ལ་ཚུད་པའི་ཚད་རྡོར་འཛིན༔ བསྔོ་བ་སྨོན་ལམ་མཐའ་རྒྱས་ཡང་དག་སྐྱོང་༔ ས་མ་ཡཱ༔ རྒྱ་རྒྱ་རྒྱ༔ ཨེ་མ་ཟབ་མོ་གཅོད་ཀྱྀ་གདམས་པའི་གནད༔ ཡང་ཟབ་སྙིང་པོའི་མན་ངག་དམ་པ་འདི༔ ཚུལ་བཞིན་སྤྱད་པས་བདག་གཞན་དོན་གཉིས་འགྲུབ༔ གནས་ལུགས་དོན་རྟོགས་བོགས་ཐོན་བརྡར་ཤ་ཆོད༔ སྐད་ཅིག་རེ་རེའི་བྱེ་བྲག་ཆ་ཤས་ཀྱིས༔ རྫོགས་པའི་སངས་རྒྱས་ས་ལ་འགོད་པའི་ཆོས༔ གཅོད་ཡུལ་གདམས་པ་ཡིན་པས་ཉམས་སུ་ལོང་༔ མ་འོངས་ལས་འཕྲོ་ཅན་དང་འཕྲད་པར་ཤོག༔ སྲུང་མས་གཏེར་འདིའི་བྱ་ར་གྱིས་ཤིག་རྒྱ༔ ས་མ་ཡཱ༔ རྒྱ་རྒྱ་རྒྱ༔ གཏེར་རྒྱ༔ སྦས་རྒྱ༔ ས་མ་ཡཱ༔ རྒྱ་རྒྱ་རྒྱ༔ རིག་འཛིན་ཆེན་པོ་ཉི་མ་གྲགས་པས་ཆགས་རུ་ཕུག་སེར་ནས་གདན་དྲངས་ཤིང་ཕུག་ནག་བདེ་བ་ཆེན་པོར་ཤོག་སེར་ལས་བསྒྱུར་བའོ། །མངྒཱ་ལམ།

ཟབ་དོན་དམིགས་པ་དང་ལག་ལེན་གྱི་ཡང་ཐིག

ཕག་མོ་སེར་མོའི་ཟབ་ཐིག་ལས༔ ཟབ་དོན་དམིགས་པ་དང་ལག་ལེན་གྱི་ཡང་ཐིག་བཞུགས༔ ཡེ་ཤེས་མཁའ་འགྲོའི་ལྷ་ཚོགས་རྣམས་ལ་འདུད༔ ཟབ་མོ་དོན་གྱི་གདམས་པ་གཅོད་ཡུལ་ལ༔ ཉམས་སུ་ལེན་པའི་མན་ངག་རིམ་པ་ནི༔ དཀར་པོ་ལྷ་དང་ནག་པོ་བདུད་ཀྱིི་སྡེ༔ དམར་པོ་བཙན་དང་ཁྲ་བོ་གཟའ་ཡི་ཚོགས༔ རྒྱལ་པོ་འགོང་པོ་ཐེའུ་རང་དམུ་ཡི་རིགས༔ ས་བདག་འབྱུང་པོ་དཀོར་བདག་བསེན་མོ་དང་༔ མདོར་ན་སྣང་ཞིང་སྲིད་པའི་ལྷ་འདྲེའི་སྡེ༔ ཁྱད་པར་ཆོས་ལ་གནག་ཅིང་འགྲོ་ལ་གནོད༔ དེ་ལ་ཡང་ཟབ་གདམས་པའི་གནད་གཟིར་བས༔ རིག་པ་རྗེན་འབུད་བག་ཆགས་དྲུང་ནས་ཕྱུངས༔ ལྟ་བའི་ཀློང་རྡོལ་སྒོམ་པའི་ཏིང་འཛིན་རྒྱས༔ ཚེ་རབས་སྡིག་སྒྲིབ་ཤ་འཁོན་བུ་ལོན་འཁོར༔ ལྷ་འདྲེ་རྣམས་ཀྱང་ཆོས་ལ་འཁོད་པ་དང་༔ དགེ་བའི་རྟོག་པ་རྒྱུད་་ལ་ཤར་བའི་མཐུས༔ ཡུལ་ཁམས་བདེ་ཞིང་ནད་མུག་རྐྱེན་ངན་ཞི༔ དེ་ཕྱིར་མ་འོངས་རྣམས་ཀྱི་ཚུལ་བཞིན་སྤྱོད༔ ས་མ་ཡཱ༔ རྒྱ་རྒྱ་རྒྱ༔ ཟབ་དོན་གཅོད་ཀྱི་ཉམས་ལེན་སྤྱོད་པའི་ཚེ༔ སྐྱིད་སྡུག་རོ་སྙོམས་དགག་སྒྲུབ་སྤང་བླང་བསྐྱུར༔ རྐྱེན་ངན་ཅི་ཤར་གཉེན་པོས་གྲོགས་སུ་ཁྱེར༔ འདྲེ་གདོན་ཕྱི་ན་མེད་དོ་རང་ལ་ཚང་༔ གདོད་ནས་དག་པའི་རང་བྱུང་ཆོས་སྐུ་ལ༔ མ་རིག་པ་ཡི་འདྲེ་བོ་ཆེ་ཞུགས་པས༔ ང་ཡི་བདུད་ལངས་སྣང་བའི་འགོང་པོ་རྒྱས༔ འཛིན་པའི་གཤིན་རྗེ་འདོད་ཆགས་མ་མོ་འཁྲུག༔ ཕྲག་དོག་གཟའ་འཕྲོ་ཞེ་སྡང་སྲིན་པོ་ཁྲོ༔ གཏི་མུག་ཀླུ་འཐིབ་ཟུག་རྔུའི་ཐེའུ་རང་ཚོགས༔ བག་ཆགས་རྒྱལ་འགོང་གཟུགས་ཀྱི་འབྱུང་པོ་དར༔ སྒྲ་ཡི་ཕོ་གདོན་དྲི་ཡི་མོ་གདོན་འཕྲོ༔ རོ་ཡི་ཟ་འདྲེ་རེག་བྱའི་ཤི་གཤེད་རྒྱས༔ མདོར་ན་གདོན་དང་བགེགས་དང་འབྱུང་པོ་འདི༔ བསད་དང་བཅད་དང་གཞིལ་བར་བྱ་བ་དང་༔ སྦྱང་དང་འཁྲུད་དང་དེ་ཉིད་དེས་གྲོལ་ཕྱིར༔ ཕུང་པོ་གཟན་བསྐྱུར་འཁོར་འདས་མགྲོན་ལ་འབོད༔ ཡར་མཆོད་མར་སྦྱིན་བདག་ཏུ་འཛིན་པ་བཤིག༔ བཟང་ངན་རྟོག་པ་བག་ཆགས་རྐྱེན་ངན་ཚོགས༔ ལམ་དུ་སློང་ཞིང་ངོ་བོ་ཉིད་དང་བསྲེ༔ འདི་ནི་ཟབ་མོ་གཅོད་ཀྱི་གདམས་པའི་སྙིང་༔ ས་མ་ཡཱ༔ རྒྱ་རྒྱ་རྒྱ༔ དེ་ལྟར་ལྟ་སྒོམ་ལྡན་པའི་རྣལ་འབྱོར་པས༔ གཉན་ས་གང་དུ་འགྲོ་ཡང་གསང་སྟེ་འགྲོ༔ གྲོགས་མེད་གཅིག་པུར་ཟླ་བོ་ཁྲིད་མི་བྱ༔ སྐྱེ་འགྲོ་གཞན་དང་ངག་ཚིག་མི་བསྲེ་ཞིང་༔ མིག་གི་བརྡ་དང་ལག་པའི་ཕྱག་རྒྱ་བསྒྱུར༔ ཤར་དུ་འགྲོ་ན་ནུབ་ནས་བསྐོར་ཏེ་འགྲོ༔ ཕྱོགས་བཞི་མཚམས་བཞི་རྣམས་ཀྱང་དེ་བཞིན་ནོ༔ མཁའ་འགྲོའི་གར་དང་གིང་གི་འགྲོས་ཀྱིས་སྤྱོད༔ སྐབས་སྐབས་དྲན་ཐང་སྨྱོན་སྤྱོད་བག་རེ་བརྩམ༔ རྐྱེན་དང་བསྲེ་ཞིང་གཉེན་པོས་ལམ་དུ་འཁྱེར༔ རབ་ནི་མི་ལྤགས་འབྲིང་ནི་གཅན་ལྤགས་དང་༔ ཐ་ན་ཡང་ནི་པགས་རིགས་གདན་དང་བཅས༔ བྷནྡྷ་རྐང་གླིང་ཅང་ཏེའུ་འཆང་བ་དང་༔ ཁ་ཊྭཱྃ་དྷཀྐི་བརྟེན་དང་འབྲལ་མི་བྱ༔ སྟག་ཤམ་རུས་རྒྱན་སྦུབ་ར་ཐོད་གདེང་སོགས༔ མདོར་ན་ཧེ་རུ་ཀཿཡི་ཆས་ཀྱིས་སྤྲས༔ རང་ཉིད་དོན་གྲུབ་སེར་མོའི་ཐུགས་ཀ་ནས༔ འོད་ཟེར་ལྔ་ལྡན་རྡོ་རྗེ་ཁ་ཊྭཱྃ་ག༔ སྐར་ལྟར་སྤྲོས་པས་གཉན་སར་ཐོག་ལྟར་དབབ༔ དེར་གནས་ལྷ་འདྲེ་དེ་ཉིད་རང་མལ་ལས༔ གཞན་དུ་འཁྱུག་དབང་མེད་པའི་རྒྱས་གདབ་བསམ༔ ཛཿཧཱུྃ་བཾ་ཧོཿཕཊཿ་ཕཊཿཕཊཿ རྐང་གླིང་ལན་བདུན་སྒྲོག་སྟེ་འདི་ལྟར་བསྒོམ༔ སྲིད་པའི་རྩེ་ནས་ན་རག་དམྱལ་བའི་ཁམས༔ འགྲོ་དྲུག་སེམས་ཅན་གཟུགས་ཅན་གཟུགས་མེད་རྣམས༔ ཐམས་ཅད་འདུས་ཤིག་ཚོགས་ཤིག་འདིར་འདུས་ཤིག༔ ད་སྟེ་འཁོར་བའི་གནས་འདིར་སྙུགས་རེ་བུད༔ དེ་རིང་ང་ཡི་ཤ་ཁྲག་ཕུང་པོ་འདི༔ ཡར་མཆོད་མར་སྦྱིན་བྱང་ཆུབ་དོན་དུ་བསྔོ༔ ཀུན་ཀྱང་རྫོགས་པའི་སངས་རྒྱས་རྒྱུར་གྱུརཅིག༔ ཅེས་བརྗོད་བླ་གབ་སྤངས་ཏེ་ཚ་གྲང་གི༔ ཚོར་བ་ཅི་བྱུང་རྐྱེན་དང་བསྲེ་སྟེ་བསྒོམ༔ གཅོད་ཡུལ་གདམས་པ་ཐུན་དྲུག་གཅོད་པ་དང་༔ སྐབས་སྐབས་ལུས་ངག་ཡིད་གསུམ་རུ་ཤན་དབྱེ༔ ཁྲེག་ཆོད་གདེང་བསྐྱེད་ཐོད་རྒལ་འབེན་ལ་གཅུན༔ སྐད་ཅིག་ཙམ་ཡང་མ་ཡེངས་དོན་ལ་བལྟ༔ བྱམས་དང་སྙིང་རྗེ་འགྲོ་དྲུག་སེམས་ཅན་དང་༔ ཁྱད་པར་གཟུགས་མེད་སྣང་སྲིད་ལྷ་འདྲེ་ལ༔ སྙིང་ནས་བསྒོམ་ཞིང་ཡང་དང་ཡང་དུ་བསྐྱར༔ ང་མེད་ངར་གཟུང་བདག་མེད་བདག་ཏུ་གཟུང་༔ གཟུགས་མེད་གཟུགས་ལ་ཞེན་པའི་ལྷ་འདྲེ་རྣམས༔ དེ་རིང་རང་རིག་ཡེ་ཤེས་ངོ་འཕྲོད་དེ༔ རྫོགས་པའི་སངས་རྒྱས་གོ་འཕང་ཐོབ་པར་ཤོག༔ འདུ་ཤེས་འདི་དང་ཀུན་ཏུ་ལྡན་པ་གཅེས༔ རིག་པ་ངར་ཆུང་ལྷ་འདྲེ་གཡོ་ཆེ་ནས༔ ལྷོངས་དང་ཆོ་འཕྲུལ་ཅི་ཡང་མ་གསལ་ན༔ ཉམས་དང་རྟོག་པའི་ཡེ་ཤེས་བོག་མི་ཐོན༔ ཡུག་སའི་སྐྲ་དང་གཡག་རྒོད་སྙིང་རྩིད་ལ༔ བསྒྲིལ་བའི་གཅོད་ཐག་འདོམ་པ་དགུ་བཟོས་ཏེ༔ གྲི་ལྕགས་ཨ་ལུང་ཕུར་པས་སྣ་གཉིས་བརྒྱན༔ ལྷ་འདྲེ་གནས་པའི་ས་རྡོ་ནགས་ཚལ་སོགས༔ གང་འོང་འཆིང་སྟེ་ལྷ་འདྲེ་བཅིངས་བར་བསམས༔ ཕུར་པ་མལ་གྱི་འོག་ཏུ་བརྡེབ་པར་བྱ༔ ཀྱེ་མ༔ ལས་ངན་འགྲོ་བ་ལྷ་འདྲེ་ཆེ་གེ་མོ༔ བདག་གིས་བྱང་ཆུབ་མཆོག་ཏུ་སེམས་བསྐྱེད་དེ༔ ཤ་ཁྲག་ཕུང་པོ་འདི་ཉིད་ཁྱོད་ལ་སྦྱིན༔ ངན་རྟོག་དབང་གིས་འཁོར་བར་འཁྱམས་པ་ཁྱོད༔ ཆོས་ལ་སྤྱོད་པའི་སྡོམ་པ་འབོགས་ནས་ཀྱང་༔ རང་གཞན་སྒྲིབ་སྦྱོང་སངས་རྒྱས་བསྒྲུབ་བསམ་ཡང་༔ ཁྱོད་ཀྱིས་བྱིན་པའི་ཟས་ལ་མི་བཟའ་ཞིང་༔ མངགས་པའི་ཆོས་ཀྱི་སྡོམ་ལ་མི་འཇུག་ན༔ ནམ་ཡང་འཆོར་བ་མེད་པའི་གཅོད་ཐག་གིས༔ ཁྱོད་ཀྱི་ལུས་སྡོམས་གཅོད་ཕུར་སྙིང་ལ་གཟིར༔ མི་ལྤགས་གཡབ་ཀྱིས་འདོར་ནས་རྡུལ་དུ་བརླག༔ རྣམ་པར་ཤེས་པ་མཁའ་སྤྱོད་གནས་སུ་སྤར༔ ང་ནི་ཆོས་དབྱིངས་ཡེ་ཤེས་མཁའ་འགྲོ་མ༔ འཁོར་འདས་ཐམས་ཅད་ང་ཡི་བྲན་དང་འཁོར༔ འགྲོ་དྲུག་ཐམས་ཅད་ང་ཡི་རྩལ་ལས་ཤར༔ བསད་པ་ཐམས་ཅད་བསྒྲལ་བ་བླ་ན་མེད༔ འདྲེན་པ་ཐམས་ཅད་སྦྱོར་བ་བླ་ན་མེད༔ ཁྱོད་ལ་སྦྱོར་སྒྲོལ་འཕྲིན་ལས་བརྩམ་པར་བྱ༔ ཅེས་བརྗོད་དམིགས་པའི་འདུ་འཕྲོའང་དེ་བཞིན་གཟིར༔ དེས་ནི་མ་སློང་པ་རྣམས་ལྷོངས་པར་འགྱུར༔ དེ་ནས་ཚར་ཚད་རྫོགས་ནས་དགེ་བ་བསྔོ༔ བསྡད་རྗེས་ཐབ་སོགས་ཤུལ་ནི་མི་མངོན་བྱ༔ འགྲོ་ཁ་ཟན་ལ་མི་ཡི་གཟུགས་བཟོས་སྟེ༔ དུར་ཁྲོད་བམ་གྱི་ཚོགས་མཐར་མགྲོན་རྣམས་གཤེགས༔ གོམ་དགུའི་མཚམས་ན་ཐོ་རེ་དགུ་རྫོགས་བྱ༔ ཚིག་ཏུ་བོས་ལ་ལྷ་འདྲེ་ཆེ་གེ་ཁྱོད༔ ཁྱོད་རང་ཡུལ་འདིར་སྡོད་ལ་དམ་ཚིག་སྲུངས༔ དགེ་བའི་ལས་སྤྱོད་འགྲོ་ལ་གནོད་པ་སྤོངས༔ ང་ཡི་ཕྱི་རུ་ཁྱོད་ཅག་འབྲེང་ས་མེད༔ ང་ནི་ཡེ་ཤེས་དབྱིངས་ཀྱི་མཁའ་འགྲོ་མ༔ སེར་མོ་དོན་གྲུབ་ཆོས་ཀྱི་དབྱིངས་ལས་ཤར༔ མཁའ་སྤྱོད་གནས་མཆོག་མཁའ་འགྲོའི་ཞིང་དུ་འགྲོ༔ ལིང་ལིང་ལྡིང་ཞིང་ལྷབས་ལྷབ་འཕུར་ནས་འགྲོ༔ བཀའ་ལས་འདས་ན་ཁྱོད་ཀྱི་དམ་ཚིག་ཉམས༔ གོ་བར་གྱིས་ཤིག་ཡུལ་འདིའི་གཞི་བདག་ཚོ༔ ཞེས་སྨྲ་འཁྱུག་ཅིང་འཁྲབ་ཅིང་འདུར་ཞིང་འོང་༔ དེ་ནས་གཉན་ས་གང་དུ་དམིགས་ལ་སྤྱོད༔ གཉན་ས་བརྒྱ་རྩ་རྫོགས་ནས་ཆོས་ཉིད་ཟད༔ བློ་ཟད་ཆོས་ཟད་རང་བྱུང་རྫོགས་སངས་རྒྱས༔ ཟབ་མོ་གཅོད་ཀྱི་འབྲས་བུ་མངོན་དུ་འགྱུར༔ དེ་ལྟར་མ་གྱུར་བར་དུ་ཉམས་སུ་བླངས༔ ས་མ་ཡཱ༔ རྒྱ་རྒྱ་རྒྱ༔ ཨེ་མ་ཟབ་དོན་སྙིང་པོའི་མན་ངག་འདི༔ རྒྱ་གར་མཁས་པ་བདག་འདྲ་པདྨ་འབྱུང་༔ ཆོས་སྐུ་ཀུན་ཏུ་བཟང་མོས་བྱིན་གྱིས་བརླབས༔ ལོངས་སྐུ་རྡོ་རྗེ་ཕག་མོས་དབང་བཞི་བསྐུར༔ སྤྲུལ་སྐུ་ཁྲོས་མ་ནག་མོ་གྲིབ་ལྟར་འགྲོགས༔ རིགས་བཞིའི་མཁའ་འགྲོས་རྒྱུན་དུ་ཉེ་གནས་མཛད༔ འབུམ་ཕྲག་མཁའ་འགྲོ་བྲན་དང་ཕོ་ཉར་འགྱེད༔ ཁྱད་པར་སྐུ་ལ་རྫོང་གི་དུར་ཁྲོད་དུ༔ སེར་མོ་དོན་གྲུབ་ཡེ་ཤེས་མཁའ་ལ་ཤར༔ ཟབ་མོའི་གདམས་པ་གཅོད་ཀྱི་མན་ངག་གནང་༔ ཉམས་སུ་ལོངས་ཤིག་སྐལ་ལྡན་ཕོ་མོ་རྣམས༔ རང་རིག་བློ་སྣང་ཆོས་ཟད་རྫོགས་སངས་རྒྱས༔ མ་འོངས་འགྲོ་བ་ཕྱི་མའི་དོན་ཕྱིར་དུ༔ གདམས་པའི་མཐར་ཐུག་བརྡ་ཡི་ཡིག་གེར་བཏབ༔ ཉམས་སུ་ལོངས་ཤིག་སྐལ་ལྡན་ཕོ་མོ་རྣམས༔ འབྲས་བུ་ཚེ་འདི་ཉིད་ལ་འཐོབ་པར་འགྱུར༔ བཀའ་ཡི་སྲུང་མས་མེལ་ཚེ་གྱིས་ཤིག་རྒྱ༔ ས་མ་ཡཱ༔ རྒྱ་རྒྱ་རྒྱ༔ གཏེར་རྒྱ༔ སྦས་རྒྱ༔ ཟབ་རྒྱ༔ ས་མ་ཡཱ༔ རྒྱ་རྒྱ་རྒྱ༔ རིག་འཛིན་ཆེན་པོ་ཉི་མ་གྲགས་པ་རྩལ་གྱིས་ཆགས་རུ་ཕུག་སེར་ནས་གདན་དྲན་དྲངས་ཤིང་ཤོག་སེར་ལས་བསྒྱུར་བ་མངྒ་ལཾ།། །།

སྐྱབས་སེམས་དང་གསོལ་འདེབས།

ཕག་མོ་སེར་མོའི་ཟབ་ཐིག་ལས༔ སྐྱབས་སེམས་དང་གསོལ་འདེབས་བཞུགས༔ ཡེ་ཤེས་མཁའ་འགྲོ་ཕག་གདོང་མ་ལ་འདུད༔ བྱིང་རྨུག་འཐིབ་གསུམ་ལེ་ལོ་གཡེང་བ་དང་༔ བདག་གཞན་གཉིས་སུ་ཕྱེ་བའི་འཛིན་པ་འདི༔ རྟོག་བྲལ་དབྱིངས་དང་བསྲེ་བའི་བོགས་འདོན་ཕྱིར༔ ཟབ་དོན་གཅོད་ཀྱི་ཉམས་ལེན་བྱེད་པའི་ཚེ༔ བདེ་བའི་གདན་ལ་སྐྱིལ་ཀྲུང་ལུས་གནད་བསྲང་༔ སྐྱབས་འགྲོ་སེམས་བསྐྱེད་གསོལ་བ་འདི་ལྟར་གདབ༔ ཕཊཿཕཊཿཕཊཿ སྐུ་གསུམ་སྟོན་མཆོག་ཕྱོགས་བཅུའི་བདེ་བར་གཤེགས༔ རྩ་གསུམ་ལྷ་ཚོགས་རྒྱལ་བ་རྒྱ་མཚོ་ལ༔ བདག་དང་མཁའ་མཉམ་འགྲོ་དྲུག་སེམས་ཅན་རྣམས༔ བྱང་ཆུབ་མ་ཐོབ་བར་དུ་སྐྱབས་སུ་མཆི༔ ཕཊཿཕཊཿཕཊཿ སྡང་བྱེད་དགྲ་བོ་གནོད་བྱེད་གདོན་དང་བགེགས༔ རིགས་དྲུག་སེམས་ཅན་སྣང་སྲིད་ལྷ་འདྲེའི་ཚོགས༔ བདག་མེད་ཆོས་སྐུ་ཉོན་མོངས་དབང་གིས་བསླད༔ བདག་གཞན་གཉིས་ཕྱེ་གཟུང་འཛིན་དུཿཁ་བརྒྱུད༔ ལས་ཉོན་བག་ཆགས་སྡིག་སྒྲིབ་སྦྱང་བ་དང་༔ བདག་གཞན་གཉིས་མེད་རྟོགས་ཕྱིར་ཟབ་དོན་བསྒོམ༔ ཕཊཿཕཊཿཕཊ༔ འོག་མིན་ཆོས་ཀྱི་དབྱིངས་ཀྱི་ཕོ་བྲང་ནས༔ ཀུན་བཟང་ཡེ་ཤེས་ཆོས་སྐུའི་མཁའ་འགྲོ་འབུམ༔ གསོལ་བ་འདེབས་སོ་བདག་རྒྱུད་བྱིན་གྱིས་རློབས༔ གཟུང་འཛིན་ང་བདག་གྲོལ་བར་བྱིན་གྱིས་རློབས༔ ཕུང་པོ་གཟན་དུ་འཁྱོལ་བར་བྱིན་གྱིས་རློབས༔ གཉན་ས་རི་ཁྲོད་ཟིན་པར་བྱིན་གྱིས་རློབས༔ ཆོས་སྐུའི་གཏན་སྲིད་ཟིན་པར་བྱིན་གྱིས་རློབས༔ མཁའ་སྤྱོད་རྣམ་པར་དག་པའི་ཞིང་ཁམས་ནས༔ རྡོ་རྗེ་ཕག་མོ་ལོངས་སྐུའི་མཁའ་འགྲོ་འབུམ༔ གསོལ་བ་འདེབས་སོ་བདག་རྒྱུད༴གཟུང་འཛིན༴ང་བདག༴ཕུང་པོ་གཟན་དུ༴གཉན་ས་རི་ཁྲོད༴ཆོས་སྐུའི་གཏན་སྲིད་ཟིན་པར༴ནུབ་ཕྱོགས་ཨོ་རྒྱན་ཡུལ་གྱི་ཕོ་བྲང་ནས༔ ཁྲོས་མ་ནག་མོ་སྤྲུལ་སྐུའི་མཁའ་འགྲོ་འབུམ༔ གསོལ་བ་འདེབས༔ གཟུང་འཛིན༴ཕུང་པོ༴གཉན་ས༔ ཆོས་སྐུའི༴ལྷོ་ཕྱོགས་སྐུ་ལ་རྫོང་གི་དུར་ཁྲོད་ནས༔ པདྨ་སཾ་བྷ་བློ་ལྡན་མཆོག་སྲེད་ལ༔ གསོལ་བ་འདེབས་སོ༴གཟུང་འཛིན༔ ཕུང་པོ༴གཉན་ས༔ ཆོས་སྐུའི༴ནེ་རིང་སེང་གེ་རྫོང་གི་གནས་མཆོག་ནས༔ སྒྲུབ་ཟླ་དྷཀྐི་ཛྙཱ་ནའི་མཚན་ཅན་ལ༔ གསོལ་བ་འདེབས་སོ༴གཟུང་འཛིན༴ཕུང་པོ༴གཉན་ས༴ཆོས་སྐུའི༴ཡེར་བ་ཟླ་བ་ཕུག་གི་སྒྲུབ་གནས་ནས༔ ཤེས་བྱ་ཀུན་གཟིགས་འཁོན་སྟོན་ཀླུ་དབང་ལ༔ གསོལ་བ༴གཟུང་འཛིན༴ཕུང་པོ༴གཉན་ས༴ཆོས་སྐུའི༴སྲིང་རྫོང་ཁམས་ཤག་རྒྱལ་བའི་ཕོ་བྲང་ནས༔ རིག་འཛིན་ཆེན་པོ་འཁྲུལ་སྣང་རང་གྲོལ་ལ༔ གསོལ་བ༴གཟུང་འཛིན༔ ཕུང་པོ༴གཉན་ས༔ ཆོས་སྐུའི༴ཉེར་བཞིའི་གནས་ཡུལ་མཁའ་སྤྱོད་དུར་ཁྲོད་ནས༔ འབུམ་ཕྲག་དཔའ་བོ་དཔའ་མོ་འཁོར་བཅས་ལ༔ གསོལ་བ༴གཟུང་འཛིན༴ཕུང་པོ༴གཉན་ས༴ཆོས་སྐུའི༴བཀའ་དང་དམ་ཚིག་གཉན་པོའི་ད་ལ་ནས༔ དཔལ་མགོན་དམ་ཅན་བཀའ་སྲུང་གཏེར་བདག་ལ༔ གསོལ་བ༴གཟུང་འཛིན༴ང་བདག༔ ཕུང་པོ་གཟན་དུ༴གཉན་ས་རི་ཁྲོད་ཟིན་པར༴ཆོས་སྐུའི་གཏན་སྲིད་ཟིན་པར་བྱིན་གྱིས་རློབས༔ ཕཊཿཕཊཿཕཊཿ མོས་གུས་ཤུགས་ཕྱུང་གསོལ་བ་སྙིང་ནས་གདབ༔ རྐྱེན་ངན་ཞི་ཞིང་ཉམས་རྟོགས་བདེ་སྟོང་འབར༔ བླ་མེད་དོན་གྱི་དགོངས་པ་མངོན་དུ་འགྱུར༔ དེ་ལྟར་མ་གྱུར་བར་དུ་བརྩོན་པར་གནད༔ ས་མ་ཡཱ༔ རྒྱ་རྒྱ་རྒྱ༔ གཏེར་རྒྱ༔ སྦས་རྒྱ༔ ཟབ་རྒྱ༔ ས་མ་ཡཱ༔ རྒྱ་རྒྱ་རྒྱ༔ རིག་འཛིན་ཉི་མ་གྲགས་པས་ཕག་གདོང་སེར་མོ་ནས་གདན་དྲངས་ཤིང་ཤོག་སེར་ལས་བསྒྱུར་བའོ། །མངྒ་ལཾ། །

ཟབ་མོ་གཅོད་ཀྱི་འཕྲིན་ལས།

ཕག་མོ་སེར་མོའི་ཟབ་ཐིག་ལས༔ ཟབ་མོ་གཅོད་ཀྱི་འཕྲིན་ལས་བཞུགས༔ ཕག་གདོང་སེར་མོའི་ལྷ་ཚོགས་ལ༔ གུས་པས་འདུད་དོ་དངོས་གྲུབ་སྩོལ༔ མ་འོངས་སྐལ་ལྡན་ལས་འཕྲོ་ཅན༔ གཟུང་འཛིན་བག་ཆགས་སྦྱང་བའི་ཕྱིར༔ བཟང་ངན་རྟོག་པའི་འདོར་ལེན་ལ༔ རོ་སྙོམས་སྤྱོད་ཕྱིར་འདི་ལྟར་བསྒོམ༔ ས་མ་ཡཱ༔ རྒྱ་རྒྱ་རྒྱ༔ གནས་ཡུལ་དུར་ཁྲོད་ལུང་སྟོང་སོགས༔ གཞུང་ལྟར་སྤྱད་པའི་གཉན་ས་ན༔ འདུ་འཛི་རྣམ་གཡེང་ལེ་ལོ་སྤངས༔ སྐྱབས་སེམས་གསོལ་བ་སྙིང་ནས་བཏབ༔ ས་མ་ཡཱ༔ རྒྱ་རྒྱ་རྒྱ༔ དེ་ནས་དངོས་གཞིའི་ཉམས་ལེན་བསྒོམ་བཟླས་ནི༔ ཕཊཿ ཕཊཿ ཕཊ༔ ཚེ་རབས་འཁོར་བ་ཐོག་མ་མེད་པ་ནས༔ ལས་ངན་མ་རིག་དབང་སོང་ཁམས་གསུམ་འཁྱམས༔ དུག་གསུམ་ཡོ་ལང་བདེ་སྡུག་དུཿཁ་འགྲིམས༔ དོན་མེད་འཁྲུལ་པའི་ལས་ཀྱིས་རང་རྒྱུད་མནར༔ ད་ནི་ཡི་ཆད་འཁོར་བ་རྒྱབ་ཏུ་བསྐྱུར༔ གཅེས་པར་བསྐྱངས་པའི་ཤ་ཁྲག་ཕུང་པོ་འདི༔ ཚེ་རབས་ནས་བསགས་ལན་ཆགས་བུ་ལོན་དང་༔ བསད་བཅད་བཤས་གཏུབས་རྡེག་བཙོག་བརྐུས་དང་ཕྲོགས༔ མདོར་ན་མི་དགེའི་ལས་ངན་ཅིི་བསགས་རྣམས༔ བྱང་ཞིང་དག་ཕྱིར་མཆོད་དང་སྦྱིན་པར་བྱ༔ ལས་ཀྱི་རྒྱུན་གཅོད་སངས་རྒྱས་འཐོབ་པར་ཤོག༔ ཕཊཿ ཕཊཿ ཕཊ༔ སྤྱི་བོར་རུས་པའི་དངས་མ་ཧཾ་ཡིག་དཀར༔ ལྟེ་བར་ཤ་ཁྲག་དངས་མ་ཨ་ཐུང་དམར༔ འདུ་འཕྲོའི་སྦྱོར་བ་ཙིཏྟའི་དབུས་སུ་འདྲེས༔ བསྟིམ་གྱིས་ཐིམ་པ་མ་རིག་ཨ་འཐས་འཁྲུལ༔ ཏལ་གྱི་ཤར་བ་རང་བྱུང་གདོད་ནས་དག༔ སྐད་ཅིག་ཆོས་སྐུའི་དགོངས་པ་མ་བུ་འཕྲད༔ རང་རིག་ཡེ་ཤེས་རི་ཡིག་སེར་པོར་གྱུར༔ དབུ་མའི་ལམ་བརྒྱུད་སྟེང་གི་ནམ་མཁར་འཕྲོས༔ འོད་ཟེར་འཕྲོས་པས་འགྲོ་དྲུག་ལས་སྒྲིབ་སྦྱངས༔ རྒྱལ་བ་ཀུན་མཆོད་བྱིན་རླབས་ཚུར་ལ་འདུས༔ སྟོང་ཉིད་ཆོས་འབྱུང་དག་པའི་མཁའ་དབྱིངས་ནས༔ ཡེ་ཤེས་མཁའ་འགྲོ་སེར་མོ་དོན་གྲུབ་ཤར༔ འོད་ཟེར་འབུམ་ཕྲག་འཕྲོ་བའི་དབུས་ན་གར༔ དུར་ཁྲོད་ཆས་བརྒྱད་སྐུ་ཡི་རྒྱན་དུ་སྤྲས༔ ཐབས་ཀྱི་ཅང་ཏེའུ་ཤེས་རབ་དྲིལ་བུ་འཁྲོལ༔ ཞི་འཛུམ་སྤྱན་གསུམ་ཁ་ཊྭཱཾ་གྲུ་མོར་བརྟེན༔ སྟེང་གི་མཁའ་ལ་སྐུ་གསུམ་སངས་རྒྱས་ལ༔ ཕྱོགས་བཅུ་དུས་བཞིའི་རྒྱལ་བ་འཁོར་དང་བཅས༔ སྐྱབས་གནས་ཀུན་འདུས་རྩ་བརྒྱུད་བླ་མ་དང་༔ བྱང་སེམས་དགྲ་བཅོམ་ཉན་ཐོས་རང་རྒྱལ་ཚོགས༔ ཆོས་དབྱིངས་ནམ་མཁའི་རྒྱ་ཁྱོན་ཁྱབ་པར་ཁེངས༔ བར་དུ་ཡི་དམ་དཔའ་བོ་མཁའ་འགྲོ་གསལ༔ འོག་ཏུ་དཔལ་མགོན་གཞི་བདག་རིགས་དྲུག་མགྲོན༔ སྟོང་གསུམ་འཇིག་རྟེན་སྟོང་ཆེན་ཁམས་རྣམས་གང་༔ ཕཊ༔ ཕཊ༔ ཕཊ༔ ཨཱོཾ་ཨཱཿཧཱུྃ་སྭཱ་ཧཱ༔ ཕཊ༔ ཕཊ༔ ཕཊ༔ འབྲུ་གསུམ་སྐུ་གསུམ་ས་བོན་འཕྲོ་འདུ་བསྒྱུར༔ ཆོས་ཀྱི་དབྱིངས་ནས་སྐྱབས་གྱུར་མ་ལུས་དང་༔ ཡི་དམ་རྒྱ་མཚོ་དཔའ་བོ་དཔའ་མོ་འབུམ༔ དཔལ་མགོན་སྲུང་མ་རིགས་དྲུག་མགྲོན་གྱི་ཚོགས༔ ཐུགས་རྗེའི་དབང་དང་དམ་བཅའ་སྨོན་ལམ་སྟོབས༔ མ་ལུས་ཐམས་ཅད་བཛྲ་ས་མ་ཡཱ༔ ཕཊ༔ ཕཊ༔ ཕཊ༔ སྐྱབས་གནས་རྣམས་ཀྱང་བྱིན་རླབས་ཐུལ་ལུ་ལུ༔ ཡི་དམ་རྣམས་ཀྱང་དངོས་གྲུབ་སྤུངས་སེ་སྤུང་༔ དཔའ་བོ་རྣམས་ཀྱང་གད་བརྒྱངས་ཡ་ལ་ལ༔ དཔའ་མོ་རྣམས་ཀྱང་བརྡ་སྐད་དི་རི་རི༔ སྲུང་མ་རྣམས་ཀྱང་འཕྲིན་ལས་ཁྱུགས་སེ་ཁྱུག༔ རིགས་དྲུག་གཟུགས་ཅན་གཟུགས་མེད་ཉི་ལི་ལི༔ དམ་ཚིག་ཡེ་ཤེས་གཉིིས་སུ་མེད་པར་གྱུར༔ ཕཊ༔ ཕཊ༔ ཕཊ༔ རང་ལས་སྤྲུལ་པའི་མཆོད་པའི་མཁའ་འགྲོ་འབུམ༔ གར་གྱི་ཕྱག་རྒྱས་ཤ་ཁྲག་ཕུང་པོ་གཏུབས༔ པགས་པ་བཤུས་ཏེ་སྟོང་གསུམ་ཁྱོན་དུ་བརྡལ༔ མཾ་ས་ཤ་ཆེན་རི་རྒྱལ་འབུམ་ལས་མཐོ༔ རཀྟ་ཁྲག་ཆེན་རྒྱ་མཚོ་སྟོང་ལས་མང་༔ རུས་ཆེན་གྲམ་ཁྲོད་ནམ་མཁའི་སྐར་ལྟར་བཀྲམ༔ ཙིཏྟ་དོན་སྣོད་རྟ་རྣ་འཛིན་དང་མཉམ༔ གོ་རོ་ཙ་ན་རོལ་མཚོ་བདུན་ལྟར་གཡོ༔ བྷ་སུ་ཏ་ཡི་ཕྱུར་བུ་རྣམ་མདུད་རྒྱལ༔ དབང་པོ་རྣམ་ལྔ་རྒྱུ་སྐར་ལྟ་བུར་བསྒྲིགས༔ ཀུན་བཟང་མཆོད་པའི་སྤྲིན་ལྟར་བྱིན་གྱིས་བརླབས༔ ཕཊ༔ ཕཊ༔ ཕཊ༔ ཨཱོཾ་ཨཱཿཧཱུྃ་སརྦ་མ་ཧཱ་ཛྙཱ་ན་པཉྩ་ཨ་མྲྀ་ཏ་ཨ་ཝེ་ཤ་ཡ་ཕེེཾ་ཕེེཾ་ཕེེཾ༔ ཛཿཧཱུྃ་བཾ་ཧོ༔ ཕཊ༔ ཕཊ༔ ཕཊ༔ དངོས་སུ་བཤམས་ཤིང་ཡོངས་སུ་སྤྲུལ་ཞིང་སྤེལ༔ རྒྱ་ཆེར་རོལ་པའི་མཆོད་སྦྱིན་ཡོ་བྱད་འདི༔ སྐུ་གསུམ་བླ་མ་སྐྱབས་མཆོག་རིག་པ་འཛིན༔ ཕྱོགས་བཅུའི་སངས་རྒྱས་དཀོན་མཆོག་རིན་ཆེན་གསུམ༔ བྱང་སེམས་དགྲ་བཅོམ་ཉན་ཐོས་རང་རྒྱལ་ཚོགས༔ མ་ལུས་མཆོད་གནས་རྣམས་ལ་མཆོད་པར་བགྱིད༔ ཕཊ༔ ཕཊ༔ ཕཊ༔ སྐུ་གསུམ་མངོན་དུ་འགྱུར་བར་བྱིན་གྱིས་རློབས༔ ཕཊ༔ ཕཊ༔ ཕཊ༔ ཕ་རྒྱུད་མ་རྒྱུད་རྣལ་འབྱོར་རྣལ་འབྱོར་རྒྱུད༔ ཕྱི་ནང་ཡི་དམ་རྒྱལ་བ་རྒྱ་མཚོའི་ཚོགས༔ སྒྱུ་འཕྲུལ་འཁོར་ལོའི་དྲ་བ་འབུམ་འབུམ་ལ༔ མཆོད་པར་འབུལ་ལོ་དགྱེས་པའི་མདངས་ཀྱིས་བཞེས༔ ཕཊ༔ ཕཊ༔ ཕཊ༔ མཆོག་དང་ཐུན་མོང་གཉིས་ཀྱི་དངོས་གྲུབ་སྩོལ༔ ཕཊ༔ ཕཊ༔ ཕཊ༔ གནས་མཆོག་ཆེན་པོ་ཉི་ཤུ་རྩ་བཞི་དང་༔ ཡུལ་མཆོག་ཆེན་པོ་སུམ་ཅུ་སོ་ལྔ་སོགས༔ རབ་ཏུ་འཇིགས་ཤིང་འཁྲུག་པའི་དུར་ཁྲོད་བརྒྱད༔ ཉེ་བ་ཉེ་ཞིང་ཉེ་བའི་ཚན་དྷོ་ཧ༔ མཐུན་སྤྱོད་ལ་སོགས་དཔའ་བོ་མཁའ་འགྲོ་ནི༔ མུ་མཐའ་མེད་པར་ཁྱབ་པར་འཁོར་བཅས་ལ༔ ཁཱ་ཧི་ཁཱ་ཧི་དགྱེས་པར་ཞལ་དུ་བཞེས༔ ཕཊ༔ ཕཊ༔ ཕཊ༔ རྐྱེན་ནི་ཕྱི་ནང་གཉིས་ཀྱི་བར་ཆད་སོལ༔ ཕཊ༔ ཕཊ༔ ཕཊ༔ མ་ཧཱ་ཀཱ་ལ་དཔལ་མགོན་བདུན་ཅུ་དང༔ མགོན་པོ་ཕོ་རྒྱུད་ལྷ་མོ་མོ་རྒྱུད་ཚོགས༔ བསྟན་སྲུང་ཕྱི་ནང་གསང་བ་དྲེགས་པའི་སྡེ༔ ལྷ་ཀླུ་གཞི་བདག་སྣང་སྲིད་ལྷ་འདྲེའི་ཚོགས༔ སྲིད་པའི་རྩེ་ནས་ན་རག་དམྱལ་བའི་ཁམས༔ གཟུགས་ཅན་གཟུགས་མེད་ཁམས་གསུམ་རིགས་དྲུག་མགྲོན༔ ཆེ་དགུ་གཉན་བཅུ་གློ་བུར་ལྷག་པའི་འདྲེ༔ ཕན་བྱེད་ལྷ་དང་གནོད་བྱེད་གདོན་བགེགས་ཚོགས༔ མིང་ཐོས་མེད་པའི་ཁ་ཉེན་སྙོམས་ཆུང་རིགས༔ ཁྱད་པར་ཡུལ་འདིར་གནས་པའི་སྡེ་ཚོགས་དང་༔ ཐོགས་མེད་ལན་ཆགས་བུ་ལོན་ཤ་འཁོན་ཆགས༔ ཐམས་ཅད་ཀུན་གྱིས་དེ་རིང་མཆོད་སྦྱིན་བཞེས༔ འདོད་པའི་ཡོན་ཏན་ལྔ་ལྡན་ཕུང་པོ་འདི༔ ཤ་ལ་ཟོ་ཞིག་ཁམ་གང་མ་ལུས་ཤིག༔ ཕཊ༔ ཕཊ༔ ཕཊ༔ ཁྲག་ལ་འཐུངས་ཤིག་ཧུབ་གང་མ་འཇོག་ཅིགཿ ཕཊ༔ ཕཊ༔ ཕཊ༔ རུས་པ་མུར་ཅིག་ཏིལ་ཙམ་མེད་པར་གྱིས༔ ཕཊ༔ ཕཊ༔ ཕཊ༔ ཀླད་པ་ལྡོག་ཅིག་ནེམ་ཙམ་མ་འཇོག་ཅིག༔ ཕཊ༔ ཕཊ༔ ཕཊ༔ དོན་སྣོད་ཁྱེར་ཅིག་རྡུལ་ཙམ་མ་ལུས་ཤིག༔ ཕཊ༔ ཕཊ༔ ཕཊ༔ བདུད་རྩིར་སྤྱོད་ཅིག་མཁོ་དགུའི་ཆར་འབབས་ཤོག༔ ཕཊ༔ ཕཊ༔ ཕཊ༔ རྒྱལ་བ་རྒྱ་མཚོ་མཆོད་པས་མཉེས་གྱུར་ཅིག༔ ཡི་དམ་ལྷ་ཚོགས་ཐུགས་དམ་སྐོངས་གྱུར་ཅིག༔ དཔའ་བོ་མཁའ་འགྲོའི་ཉམས་ཆགས་བྱང་གྱུར་ཅིག༔ དཔལ་མགོན་སྲུང་མའི་བཀའ་ཆད་ཞི་གྱུར་ཅིག༔ རིགས་དྲུག་མགྲོན་རྣམས་འདོད་པ་ཚིམ་གྱུར་ཅིག༔ ལན་ཆགས་རྣམས་ཀྱི་བུ་ལོན་འཁོར་གྱུར་ཅིག༔ ཤ་འཁོན་རྣམས་ཀྱི་སྡིག་སྒྲིབ་དག་གྱུར་ཅིག༔ བརྐུས་འཕྲོག་དཀོར་འབགས་རྣམ་སྨིན་བྱང་གྱུར་ཅིག༔ སྔོན་ལས་འཕྲལ་རྐྱེན་བར་ཆད་ཞི་གྱུར་ཅིག༔ སྒྱུ་ལུས་མཆོད་སྦྱིན་བསོད་ནམས་མཐའ་ཡས་དགེས༔ སྐུ་བཞིའི་འབྲས་བུ་མངོན་དུ་འགྱུར་བར་ཤོག༔ ཕཊ༔ ཕཊ༔ ཕཊ༔ ཅེས་བརྗོད་མགྲོན་གཤེགས་བསྐྱེད་རིམ་དབྱིངས་སུ་ཡལ༔ ས་བོན་ཐིག་ལེ་ན་ད་དམིགས་མེད་སྒྱུར༔ སྟོང་གསལ་རྗེན་པ་རང་བྱུང་ཆོས་ཀྱི་སྐུ༔ དུས་གསུམ་སྐྱེ་འགག་བྲལ་བའི་ངང་ལ་བཞག༔ ཕན་བྱ་གནོད་བྱེད་གདོན་བགེགས་འབྱུང་པོ་དང་༔ ན་ཚའི་སྡུག་བསྔལ་རྐྱེན་ངན་བྱུར་དང་སྐག༔ ཐམས་ཅད་སྔོན་གྱི་མི་དགེའི་ལས་ཀྱི་འབྲས༔ སྡིག་སྒྲིབ་བྱང་ཞིང་བག་ཆགས་འདག་པའིཐབས༔ ཟབ་མོ་དོན་གྱི་གཅོད་ཡུལ་གདམས་པ་འདི༔ ཕྱི་མའི་འགྲོ་ལ་ཕན་ཕྱིར་གཏེར་དུ་སྦས༔ སྐལ་ལྡན་ལས་འཕྲོ་ཅན་དང་འཕྲད་པར་ཤོག༔ ས་མ་ཡཱ༔ རྒྱ་རྒྱ་རྒྱ༔ གཏེར་རྒྱ༔ སྦས་རྒྱ༔ ཟབ་རྒྱ༔ ཨྀ་ཐི། རིགས་འཛིན་ཆེན་པོ་ཉི་མ་གྲགས་པས་ཆགས་རུ་ཕུག་སེར་ནས་གདན་དྲངས་ཤིང་ཤོག་སེར་ལས་བསྒྱུར་བ་མང་ག་ལཾ།། །།རྩ་གསུམ་ལྷ་ཚོགས་ཆོས་ཀྱི་དབྱིངས་སུ་གཤེགས། །དཔལ་མགོན་སྲུང་མ་གནས་དང་ཡུལ་དུ་སྤྱོན། །རིགས་དྲུག་འགྲོ་བ་རང་རང་གནས་སུ་མུ། །དམིགས་བྱའི་མགྲོན་རིགས་ཐམས་ཅད་སོ་སོར་དེངས། ཕཊ༔ གསུམ། བདག་ཉིད་ཡེ་ཤེས་མཁའ་འགྲོ་དོན་གྲུབ་མ། །སྣང་སྟོང་ལྷ་སྐུ་ས་བོན་རི་ལ་ཐིམ། །རི་ཡིག་སེར་པོ་ཐིག་ལེ་ནཱ་དར་ཡལ། སྟོང་གསལ་རྗེན་པ་རང་བྱུང་ཆོས་ཀྱི་སྐུ༔ དུས་གསུམ་སྐྱེ་འགག་བྲལ་བའི་ངང་ལ་བཞག །ཕཊ༔ གསུམ། ན་མོ། ཟབ་དོན་གདམས་པ་བསྒོམ་པའི་བསོད་ནམས་ཀྱིས། །གནོད་བྱ་ལ་བདེ་བ་ཅི་ཡོད་པ། །གནོད་བྱེད་ཀྱི་ཡུལ་དུ་སྨིན་པར་ཤོག །གནོད་བྱེད་ལ་སྡུག་བསྔལ་ཅི་ཡོད་པ། །གནོད་བྱའི་སྟེང་དུ་སྨིན་གྱུར་ཅིག །དེ་བྱང་ཆུབ་མཆོག་གི་རྒྱུར་གྱུར་ནས། །མ་འགྲོ་དྲུག་སྐུ་གསུམ་མངོན་གྱུར་ཤོག །ཕཊ༔ གསུམ། ཅེས་པ་འདི་ཛྙཱ་ནའི་མིང་གིས་དགོས་ཟེར་བ་ལ་རིག་འཛིན་པས་སྨྲས་པའོ། །

ཤ་ཆེན་བཾ་གྱི་ཚོགས་འཁོར།

ཕག་མོ་སེར་མོའི་ཟབ་ཐིག་ལསཿ ཤ་ཆེན་བཾ་གྱི་ཚོགས་འཁོར་བཞུགས༔ ཡེ་ཤེས་ཕག་གདོང་དྷཀྐིའི་ཚོགས་ལ་འདུད༔ མ་འོངས་དུས་ཀྱི་སྐལ་ལྡན་རྣལ་འབྱོར་པས༔ ཟབ་མོ་གཅོད་ཀྱི་ཉམས་ལེན་སྤྱོད་པའི་ཚེ༔ ཚར་ལྷོངས་འགྲིག་ནས་དཔའ་མོ་མཁའ་འགྲོ་དང་༔ སྣང་སྲིད་ལྷ་འདྲེར་དུར་ཁྲོད་ཚོགས་འཁོར་བྱ༔ འབྲུ་ལྔའི་ཕྱེ་ལ་ཤ་ལྔ་བདུད་རྩི་ལྔ༔ སྒ་དང་ལན་ཚ་སྤོད་ཀྱི་རིགས་རྣམས་བཏབ༔ ཆང་གི་རྟར་བསྐྱོན་བམ་གྱི་གཟུགས་བཟོ་ཞིང་༔ གན་རྐྱལ་ལམ་ནི་ཁ་སྦུབ་གང་བདེར་བཞག༔ ཤ་ཆང་མར་ཐུད་ཕྲུམ་སོགས་ཚོགས་ཚད་བཤམས༔ མཁའ་འགྲོའི་གཞུང་བསྲང་སྒྲུབ་པའི་ཁ་གསོ་ཞིང་༔ ལྟ་བ་གདེང་བསྐྱེད་བསྒོམ་པའི་ཉམས་རྟོགས་སྤར༔ ཚོགས་འཁོར་བསང་ཞིང་བྱིན་གྱིས་བརླབ་པ་ནི༔ ཕཊ༔ ཕཊ༔ ཕཊ༔ རང་བྱུང་གདོད་ནས་དག་པའི་མཁའ་དབྱིངས་ནས༔ བྱང་ཆུབ་སེམས་ཀྱི་བདུད་རྩི་འོད་དུ་འཚེར༔ ཤ་ཆེན་བམ་ལ་ཕོག་པས་སྦྱངས་བཀྲུས་སྤེལ༔ འཁོར་འདས་ཡོངས་ལ་མཆོད་པའི་རྫས་སུ་གྱུར༔ མ་ཧཱ་མཾ་ས་ཙིཏྟ་རཀྟ་གོ་རོ་ཙ་ན་བྷ་སུ་ཏ་ཀེེཾ་ནི་རི་ཏི་ཨཱོཾ་ཨཱཿཧཱུྃ་ཧ་ཧོ་ཧྲཱི༔ ཕེེཾ་ཕེེཾ་ཕེེཾ༔ ཕཊཿ ཕཊཿ ཕཊཿ ཅང་ཏེའུ་རྐང་གླིང་སྒྲ་སྒྲོག་སྤོས་གསུར་བདུག༔ སྙན་པའི་དབྱངས་ཀྱིས་སྤྱན་འདྲེན་འདི་སྐད་དོ༔ ཕཊཿ ཕཊཿ ཕཊཿ འོག་མིན་ཆོས་ཀྱི་དབྱིངས་ཀྱི་ཕོ་བྲང་ནས༔ ཆོས་སྐུ་ཀུན་ཏུ་བཟང་པོ་ཡབ་ཡུམ་ལ༔ ཆོས་སྐུའི་ལྷ་ཚོགས་མ་ལུས་འཁོར་གྱིས་བསྐོར༔ དུར་ཁྲོད་བམ་གྱི་ཚོགས་ལ་སྤྱན་འདྲེན་གཤེགས༔ ཕཊཿ ཕཊཿ ཕཊཿ གནས་མཆོག་སྟུག་པོ་བཀོད་པའི་ཞིང་ཁམས་ནས༔ ལོངས་སྐུ་རྒྱལ་བ་རྡོ་རྗེ་འཆང་ཆེན་ལ༔ ལོངས་སྤྱོད་རྫོགས་སྐུའི་ལྷ་ཚོགས་འཁོར་གྱིས་བསྐོར༔ དུར་ཁྲོད་བམ་གྱི་ཚོགས་ལ་སྤྱན་འདྲེན་གཤེགས༔ ཕཊཿ ཕཊཿ ཕཊཿ གསང་ཆེན་རོལ་བའི་དུར་ཁྲོད་ཆེན་པོ་ནས༔ སྤྲུལ་སྐུའི་སྟོན་པ་རྡོ་རྗེ་སེམས་དཔའ་ལ༔ སྤྲུལ་སྐུའི་ལྷ་ཚོགས་མ་ལུས་འཁོར་གྱིས་བསྐོར༔ དུར་ཁྲོད་བམ་གྱི་ཚོགས་ལ་སྤྱན་འདྲེན་གཤེགས༔ ཕཊཿ ཕཊཿ ཕཊཿ སྟེང་འོག་ཕྱོགས་བཅུ་དག་པའི་ཞིང་ཁམས་ནས༔ ཕྱོགས་བཅུ་དུས་བཞིའི་རྒྱལ་བ་རྒྱ་མཚོ་དང་༔ སྐྱབས་གནས་དཀོན་མཆོག་མ་ལུས་འཁོར་དང་བཅས༔ དུར་ཁྲོད་བམ་གྱི་ཚོགས་ལ་སྤྱན་འདྲེན་གཤེགས༔ ཕཊཿ ཕཊཿ ཕཊཿ མཁའ་དབྱིངས་རྣམ་པར་དག་པའི་ཕོ་བྲང་ནས༔ ཆོས་སྐུའི་མཁའ་འགྲོ་ཀུན་ཏུ་བཟང་མོ་ལ༔ ཆོས་སྐུའི་མཁའ་འགྲོ་འབུམ་གྱིས་འཁོར་གྱིས་བསྐོར༔ དུར་ཁྲོད་བམ་གྱི་ཚོགས་ལ་སྤྱན་འདྲེན་གཤེགས༔ ཕཊཿ ཕཊཿ ཕཊཿ མཁའ་སྤྱོད་དག་པའི་ཞིང་ཁམས་ཆེན་པོ་ནས༔ ལོངས་སྐུའི་མཁའ་འགྲོ་རྡོ་རྗེ་ཕག་མོ་ལ༔ ལོངས་སྤྱོད་རྫོགས་སྐུའི་མཁའ་འགྲོ་འབུམ་དང་བཅས༔ དུར་ཁྲོད་བམ་གྱི་ཚོགས་ལ་སྤྱན་འདྲེན་གཤེགས༔ ཕཊཿ ཕཊཿ ཕཊཿ ནུབ་ཕྱོགས་ཨོ་རྒྱན་ཡུལ་གྱི་གནས་མཆོག་ནས༔ སྤྲུལ་སྐུའི་མཁའ་འགྲོ་ཁྲོས་མ་ནག་མོ་ལ༔ སྤྲུལ་སྐུའི་མཁའ་འགྲོ་འབུམ་གྱིས་འཁོར་གྱིས་བསྐོར༔ དུར་ཁྲོད་བམ་གྱི་ཚོགས་ལ་སྤྱན་འདྲེན་གཤེགས༔ ཕཊཿ ཕཊཿ ཕཊཿ ཤར་ནས་གཤེགས་ཤིག་ཕག་གདོང་དཀར་མོ་འབུམ༔ ཤ་ཆེན་བམ་གྱི་ཚོགས་ལ་ད་རོལ་ཞིག༔ ལྷོ་ནས་གཤེགས་ཤིག་ཕག་གདོང་སེར་མོ་འབུམ༔ ཤ་ཆེན་བམ་གྱི་ཚོགས་ལ་ད་རོལ་ཞིག༔ ནུབ་ནས་གཤེགས་ཤིག་ཕག་གདོང་དམར་མོ་འབུམ༔ ཤ་ཆེན་བམ་གྱི་ཚོགས་ལ་ད་རོལ་ཞིག༔ བྱང་ནས་གཤེགས་ཤིག་ཕག་གདོང་ལྗང་མོ་འབུམ༔ ཤ་ཆེན་བམ་གྱི་ཚོགས་ལ་ད་རོལ་ཞིག༔ ཤར་ལྷོ་མཚམས་ནས་དམ་ལྡན་འབུམ་སྡེ་བསྐྱོད༔ ཤ་ཆེན་བམ་གྱི་ཚོགས་ལ་ད་རོལ་ཞིག༔ ལྷོ་ནུབ་མཚམས་ནས་སྣ་ཚོགས་འབུམ་སྡེ་བསྐྱོད༔ ཤ་ཆེན་བམ་གྱི་ཚོགས་ལ་ད་རོལ་ཞིག༔ ནུབ་བྱང་མཚམས་ནས་ཀུན་རྒྱུ་འབུམ་སྡེ་བསྐྱོད༔ ཤ་ཆེན་བམ་གྱི་ཚོགས་ལ་ད་རོལ་ཞིག༔ བྱང་ཤར་མཚམས་ནས་བརྒྱུད་འཛིན་འབུམ་སྡེ་བསྐྱོད༔ ཤ་ཆེན་བམ་གྱི་ཚོགས་ལ་ད་རོལ་ཞིག༔ ཕཊཿ ཕཊཿ ཕཊཿ གཞན་ཡང་གནས་ཡུལ་ཞིང་ཁམས་དུར་ཁྲོད་ནས༔ དཔའ་བོ་མཁའ་འགྲོ་ཐམས་ཅད་འདིར་འདུས་ཤིག༔ དཔའ་བོ་མཁའ་འགྲོ་ཐམས་ཅད་འདིར་བསྐྱོད་ཅིག༔ སྲིད་པའི་རྩེ་ནས་མནར་མེད་དམྱལ་བའི་ཁམས༔ འགྲོ་དྲུག་སེམས་ཅན་གཟུགས་ཅན་གཟུགས་མེད་རྣམས༔ སྔོན་ལས་འཕྲལ་རྐྱེན་གདོན་བགེགས་འབྱུང་པོའི་ཚོགས༔ ཤ་ཆེན་བམ་ལ་རོལ་ཕྱིར་ས་མ་ཡ༔ ཕཊཿ ཕཊཿ ཕཊཿ དེ་ནས་གྲི་གུག་འབར་བ་མཁའ་ལ་གདེང་༔ བཾ་ལ་རྒྱ་གྲམ་བྱས་ནས་ཚོགས་ཕུད་བསྡུས༔ ཡར་མཆོད་སྐྱབས་གནས་རྣམས་ལ་འབུལ་བ་ནི༔ བྷནྡྷའི་སྐྱོགས་ལ་བླུགས་ཏེ་འདི་སྐད་དོ༔ ཕཊཿ ཕཊཿ ཕཊ༔ སྐྱབས་གནས་ཕྱོགས་བཅུ་དུས་བཞིའི་རྒྱལ་བ་དང་༔ ཡི་དམ་སྒྱུ་འཕྲུལ་རྒྱ་མཚོའི་དཀྱིལ་འཁོར་ལྷ༔ དཔའ་བོ་མཁའ་འགྲོ་ཆོས་སྐྱོང་ཐམས་ཅད་ལ༔ མ་ཧཱ་མཾ་ས་མ་ཧཱ་རཀྟ་དང་༔ མ་ཧཱ་ཙིཏྟ་མ་ཧཱ་བྷ་སུ་ཏ༔ མ་ཧཱ་གོ་རོ་ཙ་ན་ཙཀྵུ་ཏ༔ ཚོགས་ཀྱི་མཆོད་པར་འབུལ་ལོ་དགྱེས་པར་བཞེས༔ ཁ་ཁ་ཁཱ་ཧི་རྩ་བརྒྱུད་བླ་མ་མཆོད༔ ཁ་ཁ་ཁཱ་ཧི་སྐྱབས་གནས་དཀོན་མཆོག་མཆོད༔ ཁ་ཁ་ཁཱ་ཧི་ཕྱོགས་བཅུའི་སངས་རྒྱས་མཆོད༔ ཁ་ཁ་ཁཱ་ཧི་ཡི་དམ་རྒྱ་མཚོ་མཆོད༔ ཁ་ཁ་ཁཱ་ཧི་མཁའ་འགྲོ་རྒྱ་མཚོ་མཆོད༔ ཁ་ཁ་ཁཱ་ཧི་དཔའ་བོ་རྒྱ་མཚོ་མཆོད༔ ཁ་ཁ་ཁཱ་ཧི་ཆོས་སྐྱོང་རྒྱ་མཚོ་མཆོད༔ དེ་ནས་བར་གྱི་ཚོགས་མཆོད་འདི་སྐད་དོ༔ ཕཊཿ ཕཊཿ ཕཊ༔ ཆོས་ཀྱི་དབྱིངས་ནས་ཆོས་སྐུའི་མཁའ་འགྲོ་འབུམ༔ དེ་རིང་ཤ་ཆེན་ཚོགས་ཀྱི་མཆོད་པ་བཞེས༔ མཁའ་སྤྱོད་གནས་ནས་ལོངས་སྐུའི་མཁའ་འགྲོ་འབུམ༔ དེ་རིང་ཤ་ཆེན་ཚོགས་ཀྱི་མཆོད་པ་བཞེས༔ ཨོ་རྒྱན་ཡུལ་ནས་སྤུལ་སྐུའི་མཁའ་འགྲོ་འབུམ༔ དེ་རིང་ཤ་ཆེན༴མི་འགྱུར་ཞིང་ནས་བདེ་ཆེན་དཀར་མོ་འབུམ༔ དེ་རིང་ཤ་ཆེན༴གཏེར་འབྱུང་ཞིང་ནས་ཕག་གདོང་སེར་མོ་འབུམ༔ དེ་རིང་ཤ་ཆེན༴ཡུམ་གྱི་མཁའ་ནས་ཕག་གདོང་དམར་མོ་འབུམ༔ དེ་རིང་ཤ་ཆེན༴སྣ་ཚོགས་དབྱིངས་ནས་ཕག་གདོང་ལྗང་མོ་འབུམ༔ དེ་རིང་ཤ་ཆེན༴གཏུམ་དྲག་འཁྲུག་པའི་དུར་ཁྲོད་ཆེན་པོ་ནས༔ རྡོ་རྗེ་མཁའ་འགྲོ་དཀར་མོ་བྱེ་བ་འབུམ༔ དེ་རིང་ཤ་ཆེན༴གད་བརྒྱངས་སྒྲོག་པའི་དུར་ཁྲོད་ཆེན་པོ་ནས༔ རིན་ཆེན་མཁའ་འགྲོ་སེར་མོ་བྱེ་བ་འབུམ༔ དེ་རིང་ཤ་ཆེན༴པདྨ་འཁྱིལ་བའི་དུར་ཁྲོད་ཆེན་པོ་ནས༔ པདྨ་མཁའ་འགྲོ་དམར་མོ་བྱེ་བ་འབུམ༔ དེ་རིང་ཤ་ཆེན༴ཀཱི་ལི་ཀཱི་ལ་སྒྲོག་པའི་དུར་ཁྲོད་ནས༔ ལས་ཀྱི་མཁའ་འགྲོ་ལྗང་མོ་བྱེ་བ་འབུམ༔ དེ་རིང་ཤ་ཆེན༴ཤར་ལྷོ་རབ་ཏུ་འཇིགས་པའི་དུར་ཁྲོད་ནས༔ དམ་ཚིག་ཅན་གྱི་མཁའ་འགྲོ་བྱེ་བ་འབུམ༔ དེ་རིང་ཤ་ཆེན༴ལྷོ་ནུབ་རབ་ཏུ་གཏུམ་པའི་དུར་ཁྲོད་ནས༔ སྣ་ཚོགས་རིགས་ཀྱི་མཁའ་འགྲོ་བྱེ་བ་འབུམ༔ དེ་རིང་ཤ་ཆེན༴ནུབ་བྱང་རབ་ཏུ་རྒྱུ་བའི་དུར་ཁྲོད་ནས༔ ཀུན་ཏུ་རྒྱུ་བའི་མཁའ་འགྲོ་བྱེ་བ་འབུམ༔ དེ་རིང་ཤ་ཆེན༴བྱང་ཤར་དྲག་ཤུལ་ཆེན་པོའི་དུར་ཁྲོད་ནས༔ བརྒྱུད་འཛིན་འཇིག་རྟེན་མཁའ་འགྲོ་བྱེ་བ་འབུལ༔ དེ་རིང་ཤ་ཆེན༴པུ་རི་ཏ་ཡི་གནས་མཆོག་དམ་པ་ནས༔ དཔའ་བོ་ཐོད་དུམ་དཔའ་མོ་གཏུམ་མིག་མ༔ མ་ལུས་འཁོར་དང་བཅས་པ་ཐམས་ཅད་ཀྱིས༔ དེ་རིང་ཤ་ཆེན༴གནས་མཆོག་ཆེན་པོ་ཛ་ལན་དྷ་ར་ནས༔ དཔའ་བོ་ཀེང་རུས་དཔའ་མོ་རབ་གཏུམ་མོ༔ མ་ལུས་འཁོར་དང་བཅས་པ་ཐམས་ཅད་ཀྱིས༔ དེ་རིང་ཤ་ཆེན༴གནས་མཆོག་ཆེན་པོ་ནུབ་ཕྱོགས་ཨོ་རྒྱན་ནས༔ དཔའ་བོ་ཀེང་རུས་དཔའ་མོ་འོད་ལྡན་མ༔ མ་ལུས་འཁོར་དང་བཅས་པ་ཐམས་ཅད་ཀྱིས༔ དེ་རིང་ཤ་ཆེན༴གནས་མཆོག་ཆེན་པོ་ནུབ་ཕྱོགས་ཨོ་རྒྱན་ནས༔ དཔའ་བོ་ཀེང་རུས་དཔའ་མོ་འོད་ལྡན་མ༔ མ་ལུས་འཁོར་དང་བཅས་པ་ཐམས་ཅད་ཀྱིས༔ དེ་རིང་ཤ་ཆེན༴ཨར་བྷུ་ཏ་ཡི་གནས་མཆོག་ཆེན་པོ་ནས༔ དཔའ་བོ་མཆེ་གཙིགས་དཔའ་མོ་སྣ་ཆེ་མ༔ མ་ལུས་འཁོར་དང་བཅས་པ་ཐམས་ཅད་ཀྱིས༔ དེ་རིང་ཤ་ཆེན༴སོ་ས་ར་ཡི་གནས་མཆོག་ཆེན་པོ་ནས༔ འབུ་ར་འབུ་ར་བསྟན་མའི་བློ་གྲོས་མ༔ མ་ལུས་འཁོར་དང་བཅས་པ་ཐམས་ཅད་ཀྱིས༔ དེ་རིང་ཤ་ཆེན༴ར་མི་ཤྭ་རིའི་གནས་མཆོག་ཆེན་པོ་ནས༔ འོད་དཔག་མེད་མགོན་དཔའ་མོ་ཁྲག་འཐུང་མ༔ མ་ལུས་འཁོར་དང་བཅས་པ་ཐམས་ཅད་ཀྱིས༔ དེ་རིང་ཤ་ཆེན༴དྷིབ་ཀ་ཏ་ཡི་གནས་མཆོག་ཆེན་པོ་ནས༔ རྡོ་རྗེ་འོད་ལྡན་ལང་ཀའི་དབང་ཕྱུག་མ༔ མ་ལུས་འཁོར་དང་བཅས་པ་ཐམས་ཅད་ཀྱིས༔ དེ་རིང་ཤ་ཆེན༴མཱ་ལ་ཡ་ཡི་གནས་མཆོག་ཆེན་པོ་ནས༔ རྡོ་རྗེ་མྱུ་གུ་དཔའ་མོ་ས་སྲུང་མ༔ མ་ལུས་འཁོར་དང་བཅས་པ་ཐམས་ཅད་ཀྱིས༔ དེ་རིང་ཤ་ཆེན༴ཨོ་ཏན་ཏ་ཡི་དུར་ཁྲོད་ཆེན་པོ་ནས༔ རྡོ་རྗེ་རལ་བ་དཔའ་མོ་འཇིགས་བྱེད་མ༔ མ་ལུས་འཁོར་དང་བཅས་པ་ཐམས་ཅད་ཀྱིས༔ དེ་རིང་ཤ་ཆེན༴ཤི་ཏ་ཀུ་ནའི་དུར་ཁྲོད་ཆེན་པོ་ནས༔ དཔའ་བོ་རབ་དགའ་དཔའ་མོ་རླུང་ཤུགས་མ༔ མ་ལུས་འཁོར་དངབཅས་པ་ཐམས་ཅད་ཀྱིས༔ དེ་རིང་ཤ་ཆེན༴སོ་ས་ལ་ཡི་གནས་མཆོག་ཆེན་པོ་ནས༔ རྡོ་རྗེ་ཧཱུྃ་མཛད་དཔའ་མོ་ཆང་འཐུང་མ༔ མ་ལུས་འཁོར་དང་བཅས་པ་ཐམས་ཅད་ཀྱིས༔ དེ་རིང་ཤ་ཆེན༴ཀཱི་ལི་ཀཱིལའི་གནས་མཆོག་ཆེན་པོ་ནས༔ དཔའ་བོ་རབ་བཟང་དཔའ་མོ་གཙུག་ཕུད་མ༔ མ་ལུས་འཁོར་དང་བཅས་པ་ཐམས་ཅད་ཀྱིས༔ དེ་རིང་ཤ་ཆེན༴ལམ་པ་ཀ་ཡི་གནས་མཆོག་ཆེན་པོ་ནས༔ རྡོ་རྗེ་བཟང་པོ་དཔའ་མོ་རབ་བཟང་མ༔ མ་ལུས་འཁོར་དང་བཅས་པ་ཐམས་ཅད་ཀྱིས༔ དེ་རིང་ཤ་ཆེན༴གྷ་འཛིན་ཏ་ཡི་གནས་མཆོག་ཆེན་པོ་ནས༔ དཔའ་བོ་འཇིགས་བྱེད་དཔའ་མོ་རྟ་རྣ་མ༔ མ་ལུས་འཁོར་དང་བཅས་པ་ཐམས་ཅད་ཀྱིས༔ དེ་རིང་ཤ་ཆེན༴ཧི་མ་ལ་ཡི་གནས་མཆོག་ཆེན་པོ་ནས༔ སྤྱན་མི་བཟང་དང་དཔའ་མོ་ཁ་གདོང་མ༔ མ་ལུས་འཁོར་དང་བཅས་པ་ཐམས་ཅད་ཀྱིས༔ དེ་རིང་ཤ་ཆེན༴པྲེ་ཏ་པུ་རིའི་གནས་མཆོག་ཆེན་པོ་ནས༔ སྟོབས་ཆེན་རྒྱལ་པོ་དཔའ་མོ་ཤུགས་འཆང་མ༔ མ་ལུས་འཁོར་དང་བཅས་པ་ཐམས་ཅད་ཀྱིས༔ དེ་རིང་ཤ་ཆེན༴གྷྲི་ཧ་དྷེ་བའི་གནས་མཆོག་ཆེན་པོ་ནས༔ རིན་ཆེན་རྡོ་རྗེ་དཔའ་མོ་དུང་སྐྱེས་མ༔ མ་ལུས་འཁོར་དང་བཅས་པ་ཐམས་ཅད་ཀྱིས༔ དེ་རིང་ཤ་ཆེན༴པོའུ་ར་ཏིའི་གནས་མཆོག་ཆེན་པོ་ནས༔ རྟ་མགྲིན་རྒྱལ་པོ་དཔའ་མོ་གླང་གདོང་མ༔ མ་ལུས་འཁོར་དང་བཅས་པ་ཐམས་ཅད་ཀྱིས༔ དེ་རིང་ཤ་ཆེན༴པུརྣ་ཏ་ཡི་གནས་མཆོག་ཆེན་པོ་ནས༔ ནམ་མཁའི་སྙིང་པོ་འཁོར་ལོའི་གོ་ཆ་མོ༔ མ་ལུས་འཁོར་དང་བཅས་པ་ཐམས་ཅད་ཀྱིས༔ དེ་རིང་ཤ་ཆེན༴ནཱ་ག་ར་ཙིའི་གནས་མཆོག་ཆེན་པོ་ནས༔ ཧེ་རུ་ཀ་དང་དཔའ་མོ་རལ་པ་མ༔ མ་ལུས་འཁོར་དང་བཅས་པ་ཐམས་ཅད་ཀྱིས༔ དེ་རིང་ཤ་ཆེན༴སི་ཧུ་ཡུལ་གྱི་གནས་མཆོག་ཆེན་པོ་ནས༔ པདྨ་གར་དབང་དཔའ་མོ་སྟོབས་ཆེན་མ༔ མ་ལུས་འཁོར་དང་བཅས་པ་ཐམས་ཅད་ཀྱིས༔ དེ་རིང་ཤ་ཆེན༴ཀུ་མ་དྷ་རའི་གནས་མཆོག་ཆེན་པོ་ནས༔ རྡོ་རྗེ་སེམས་དཔའ་དཔའ་མོ་བརྩོན་འགྲུས་མ༔ མ་ལུས་འཁོར་དང་བཅས་པ་ཐམས་ཅད་ཀྱིས༔ དེ་རིང་ཤ་ཆེན༴མུ་རུ་དྷ་ཡི་གནས་མཆོག་ཆེན་པོ་ནས༔ རྣམ་པར་སྣང་མཛད་འཁོར་ལོའི་དབང་བསྒྱུར་མ༔ མ་ལུས་འཁོར་དང་བཅས་པ་ཐམས་ཅད་ཀྱིས༔ དེ་རིང་ཤ་ཆེན༴གནས་དང་ཉེ་བའི་གནས་ན་བཞུགས་པ་ཡི༔ དཔའ་བོ་མཁའ་འགྲོ་མ་ལུས་འཁོར་དང་བཅས༔ དེ་རིང་ཤ་ཆེན༴ཞིང་དང་ཉེ་བའི་ཞིང་ན་བཞུགས་པ་ཡི༔ དཔའ་བོ་མཁའ་འགྲོ་མ་ལུས་འཁོར་དང་བཅས༔ དེ་རིང་ཤ་ཆེན༴མཐུན་སྤྱོད་མཐུན་སྤྱོད་དག་ན་བཞུགས་པ་ཡི༔ དཔའ་བོ་མཁའ་འགྲོ་མ་ལུས་འཁོར་དང་བཅས༔ དེ་རིང་ཤ་ཆེན༴ཚནྡྷོ་ཚནྡྷོ་དག་ན་བཞུགས་པ་ཡི༔ དཔའ་བོ་མཁའ་འགྲོ་མ་ལུས་འཁོར་དང་བཅས༔ དེ་རིང་ཤ་ཆེན༴དུར་ཁྲོད་ཉེ་བའི་དུར་ཁྲོད་ཐམས་ཅད་ནས༔ བཞུགས་པའི་དཔའ་བོ་མཁའ་འགྲོ་འཁོར་དང་བཅས༔ དེ་རིང་ཤ་ཆེན་ཚོགས་ཀྱི་མཆོད་པ་བཞེས༔ དེ་ནས་ཚོགས་ཀྱི་མར་མཆོད་ནི༔ ཕཊཿ ཕཊཿ ཕཊ༔ འཇིག་རྟེན་འདིར་གནས་དུར་ཁྲོད་ཆེན་པོ་བརྒྱད༔ དེ་ན་བཞུགས་པའི་རིགས་འཛིན་ཆེན་པོ་བརྒྱད༔ དེ་རིང་དུར་ཁྲོད་བམ་གྱི་ཚོགས་ལ་རོལ༔ དེ་ན་བཞུགས་པའི་དྲང་སྲོང་ཆེན་པོ་བརྒྱད༔ དེ་རིང་དུར་ཁྲོད་བམ་གྱི་ཚོགས་ལ་རོལ༔ དེ་ན་བཞུགས་པའི་མཁའ་འགྲོ་ཆེན་མོ་བརྒྱད༔ དེ་རིང་དུར་ཁྲོད་བམ་གྱི་ཚོགས་ལ་རོལ༔ དེ་ན་བཞུགས་པའི་ཤུགས་འགྲོ་ཆེན་མོ་བརྒྱད༔ དེ་རིང་དུར་ཁྲོད༴དེ་ན་བཞུགས་པའི་ཞིང་སྐྱོང་ཆེན་པོ་བརྒྱད༔ དེ་རིང་དུར་ཁྲོད༴དེ་ན་བཞུགས་པའི་ཕྱོགས་སྐྱོང་ཆེན་པོ་བརྒྱད༔ དེ་རིང་དུར་ཁྲོད༴དེ་ན་བཞུགས་པའི་ཕྲ་མེན་མ་མོ་བརྒྱད༔ དེ་རིང་དུར་ཁྲོད་བམ༴དེ་ན་བཞུགས་པའི་ཀླུ་ཆེན་རྣམ་པ་བརྒྱད༔ དེ་རིང་དུར་ཁྲོད༴ཕཊཿ ཕཊཿ ཕཊ༔ སྲིད་པའི་རྩེ་ནས་དམྱལ་ཁམས་ཡན་ཆད་ཀྱི༔ རིགས་དྲུག་འགྲོ་བ་གཟུགས་ཅན་གཟུགས་མེད་རྣམས༔ དེ་རིང་དུར་ཁྲོད༴དྲེགས་པ་ཕྱི་ཡི་ལྷ་སྲིན་སྡེ་བརྒྱད་རྣམས༔ དེ་རིང་དུར་ཁྲོད༴ཁྲོས་པ་ནང་གི་ལྷ་སྲིན་སྡེ་བརྒྱད་རྣམས༔ དེ་རིང་དུར་ཁྲོད༴ཇག་པ་གསང་བའི་ལྷ་སྲིན་སྡེ་བརྒྱད་རྣམས༔ དེ་རིང་དུར་ཁྲོད༴དམ་ལ་སྦས་པའི་ལྷ་སྲིན་སྡེ་བརྒྱད་རྣམས༔ དེ་རིང་དུར་ཁྲོད༴ལས་བྱེད་མྱུར་མགྱོགས་ལྷ་སྲིན་སྡེ་བརྒྱད་རྣམས༔ དེ་རིང་དུར་ཁྲོད༴དྲག་པོ་སྔགས་ཀྱི་ལྷ་སྲིན་སྡེ་བརྒྱད་རྣམས༔ དེ་རིང་དུར་ཁྲོད༴བསྟན་པ་བསྲུང་བའི་ལྷ་སྲིན་སྡེ་བརྒྱད་རྣམས༔ དེ་རིང་དུར་ཁྲོད༴བཀའ་སྣང་སྲིད་ཀྱི་ལྷ་སྲིན་སྡེ་བརྒྱད་རྣམས༔ དེ་རིང་དུར་ཁྲོད༴དཀར་པོ་ལྷ་ཡི་སྡེ་ཚོགས་འཁོར་བཅས་རྣམས༔ དེ་རིང་༴ནག་པོ་བདུད་ཀྱི་སྡེ་ཚོགས་འཁོར་བཅས་རྣམས༔ དེ་རིང་དུར་ཁྲོད༴འཆི་བདག་གཤིན་རྗེའི་སྡེ་ཚོགས་འཁོར་བཅས་རྣམས༔ དེ་རིང་དུར་ཁྲོད༴སྲོག་གཅོད་སྲིན་པོའི་སྡེ་ཚོགས་འཁོར་བཅས་རྣམས༔ དེ་རིང་དུར་ཁྲོད༴ནད་གཏོང་མ་མོའི་སྡེ་ཚོགས་འཁོར་བཅས་རྣམས༔ དེ་རིང་དུར་ཁྲོད༴དྲག་པོ་གཟའ་ཡི་སྡེ་ཚོགས་འཁོར་བཅས་རྣམས༔ དེ་རིང་དུར༴འཕེན་པོ་ཀླུ་ཡི་སྡེ་ཚོགས་འཁོར་བཅས་རྣམས༔ དེ་རིང་༴འགོང་པོ་ཐེའུ་རང་སྡེ་ཚོགས་འཁོར་བཅས་རྣམས༔ དེ་རིང་དུར་ཁྲོད༴བཙན་རྗེ་དམར་པོ་འབུམ་སྡེ་འཁོར་བཅས་རྣམས༔ དེ་རིང་༴དཀོར་བདག་རྒྱལ་པོ་འབུམ་གྱི་སྡེ་ཚོགས་རྣམས༔ དེ་རིང་༴ནོར་བདག་གནོད་སྦྱིན་འབུམ་གྱི་སྡེ་ཚོགས་རྣམས༔ དེ་རིང་༴མ་མོ་བསྟན་མའི་སྡེ་ཚོགས་འཁོར་བཅས་རྣམས༔ དེ་རིང་དུར༴དྲི་ཟ་ཡོངས་ཀྱི་སྡེ་ཚོགས་འཁོར་བཅས་རྣམས༔ དེ་རིང་དུར༴གྲུལ་བུམ་འབུམ་གྱི་སྡེ་ཚོགས་འཁོར་དང་བཅས༔ དེ་རིང་༴མིའམ་ཅི་ཡི་སྡེ་ཚོགས་འཁོར་དང་བཅས༔ དེ་རིང་༴ལྟོ་འཕྱེ་ཆེན་པོའི་སྡེ་ཚོགས་འཁོར་དང་བཅས༔ དེ་རིང་དུར་ཁྲོད༴མཁའ་ལ་རྒྱུ་བའི་སྡེ་ཚོགས་འཁོར་བཅས་རྣམས༔ དེ་རིང་༴ལྷན་སྐྱེས་འདྲེ་ཡི་སྡེ་ཚོགས་འཁོར་དང་བཅས༔ དེ་རིང་༴ཟ་བའི་འདྲེ་ལྔའི་སྡེ་ཚོགས་འཁོར་དང་བཅས༔ དེ་རིང་༴སྟོང་གསུམ་འཛམ་གླིང་གཞིས་བདག་འཁོར་དང་བཅས༔ དེ་རིང་༴འཇིག་རྟེན་བོད་ཁམས་ཡུལ་འདིའི་གཞིས་བདག་རྣམས༔ དེ་རིང་དུར༴ཁྱད་པར་གཉན་ས་འདིར་གནས་ཀྱི་ཆེ་གེ་འཁོར་བཅས་རྣམས༔ དེ་རིང་དུར་ཁྲོད་བམ་གྱི་ཚོགས་ལ་རོལ༔ ཅེས་བརྗོད་ཡེ་ཤེས་འཇིག་རྟེན་མིང་གི་མཚམས༔ ཚོགས་རྫས་སྣ་ཚང་སྟེང་འོག་ཕྱོགས་བཅུར་སྤྲོ༔ ཚིག་དོན་ལྟ་བུར་ཐམས་ཅད་དགྱེས་སྐོང་བསམས༔ ཚོགས་ལ་རོལ་ཞིང་མཆོག་ཐུན་རྫས་སུ་དམིགས༔ ལྷག་མ་ཁ་ཕྲུས་སྦྲན་ཞིང་འདི་སྐད་དོ༔ ཕཊཿ ཕཊཿ ཕཊ༔ ལྷག་ལ་དབང་བ་འབྱུང་པོའི་སྡེ་ཚོགས་དང་༔ ཁས་ཉེན་སྙོམས་ཆུང་གློ་བུར་ལྷགས་པའི་འདྲེ༔ མ་ལུས་ཐམས་ཅད་ཕམ་རྒྱལ་མེད་པ་རུ༔ དུར་ཁྲོད་བམ་གྱི་གྷ་ནའི་ལྷག་མ་འབུལ༔ ལས་ཀྱི་རྒྱུན་གཅོད་སངས་རྒྱས་མངོན་གྱུར་ཅིག༔ ཕཊཿ ཕཊཿ ཕཊ༔ ཆད་ཐོ་ནི༔ ཕཊཿ ཕཊཿ ཕཊ༔ འཕགས་ཡུལ་རྒྱ་གར་ཡུལ་མཆོག་ཤཱཀྱའི་ཞིང་༔ སྐུ་ལ་རྫོང་གི་དུར་ཁྲོད་ཆེན་པོ་ན༔ བདག་ཉིད་མཁས་པ་བློ་ལྡན་མཆོག་སྲེད་ཀྱིས༔ དུར་ཁྲོད་གནས་སུ་ཤ་ཆེན་ཚོགས་འཁོར་བསྐོར༔ རྩ་གསུམ་མཁའ་འགྲོ་ཆོས་སྐྱོང་སྤྲིན་ལྟར་གཏིབས༔ ཡེ་ཤེས་འཇིག་རྟེན་འཁོར་འདས་དབང་དུ་བསྒྱུར༔ དཔའ་བོ་དཔའ་མོ་སྡེ་བརྒྱད་ཞིང་སྐྱོང་དཀོལ༔ དེ་ཚེ་སྲོག་སྙིང་ཕུལ་བའི་བསྟན་བསྲུང་དང་༔ དྲེགས་པའི་སྡེ་ཚོགས་སྣང་སྲིད་ལྷ་འདྲེའི་ཚོགས༔ དུར་ཁྲོད་བམ་ཆེན་ཚོགས་ཀྱི་ཆད་ཐོ་ལོངས༔ སྔོན་གྱི་དམ་བཅའ་བཞིན་དུ་འཕྲིན་ལས་སྒྲུབས༔ ཕཊཿ ཕཊཿ ཕཊ༔ བསྟན་མ་ནི༔ ཕཊཿ ཕཊཿ ཕཊ༔ དབྱིངས་ནས་སྐྱོད་ཅིག་མ་མོ་བསྟན་མའི་ཚོགས༔ ཟས་ལ་ཟོ་ཞིག་བཀའ་ཡི་ཕམ་ཕབས་ལོང་༔ འཕྲིན་ལས་སྒྲུབས་ཤིག་འཛམ་གླིང་འཇིག་རྟེན་སྐྱོངས༔ ཁྱད་པར་བོད་ཡུལ་འགྲོ་བའི་བདེ་སྐྱིད་སྤེལ༔ བཅོལ་བའི་འཕྲིན་ལས་མཐའ་དམག་འཁྲུག་རྩོད་ཟློག༔ ཕཊཿ ཕཊཿ ཕཊ༔ ཅེས་བརྗོད་བཀྲ་ཤིས་བསྔོ་སྨོན་ལྟ་བྲོ་འཁྲབ༔ བདེ་བའི་ཉམས་སྐྱོང་རྟོགས་པའི་གླུ་ལེན་ཞིང་༔ དུར་ཁྲོད་གཉན་ས་བས་མཐའ་ཀུན་ཏུ་རྒྱུ༔ ཚེ་འདི་བློས་ཐོང་ཕྱི་མ་དང་དུ་ལོང་༔ བསམ་པའི་དོན་འགྲུབ་སངས་རྒྱས་བརྒྱུད་པ་ཟིན༔ ཐེག་པའི་ཡང་རྩེ་ཨ་ཏི་བླ་མེད་ཆོས༔ ལམ་གྱི་བོགས་འདོན་ཟབ་མོའི་གདམས་པ་འདི༔ མ་འོངས་འགྲོ་དོན་མཁའ་འགྲོའི་ཡི་གེར་བཏབ༔ སྲུང་མར་བཅོལ་ཏེ་ཟབ་མོའི་གཏེར་དུ་སྦས༔ ལས་འཕྲོ་ལྡན་པའི་བུ་ལ་སྨོན་ལམ་བཞག༔ ཚུལ་བཞིན་སྤྱོད་ཅིག་མ་འོངས་སྐལ་ལྡན་རྣམས༔ ས་མ་ཡཱ༔ རྒྱ་རྒྱ་རྒྱ༔ གཏེར་རྒྱ༔ སྦས་རྒྱ༔ ཟབ་རྒྱ༔ གཏད་རྒྱ༔ ས་མ་ཡཱ༔ རྒྱ་རྒྱ་རྒྱ༔ རིགས་འཛིན་ཆེན་པོ་ཉི་མ་གྲགས་པས་ཆགས་རུ་ཕུག་སེར་ནས་མེ་ཡོས་ལོ་ལ་གདན་དྲངས་ཏེ་ཤོག་སེར་ལས་བསྒྱུར་བའོ། །མངྒལཾ། །།

བདུད་རྩི་བཞིའི་བཅུད་ལེན།

ཕག་མོ་སེར་མོའི་ཟབ་ཐིག་ལས༔ བདུད་རྩི་བཞིའི་བཅུད་ལེན་བཞུགས༔ ཡེ་ཤེས་མཁའ་འགྲོ་ཕག་གདོང་མ་ལ་འདུད༔ ཕྱི་མའི་དུས་ཀྱི་རྣལ་འབྱོར་སྒྲུབ་པ་པོས༔ ཚེ་འདི་བློས་ཐོང་ཟབ་དོན་ཉམས་ལེན་འབུངས༔ དུར་ཁྲོད་གཉན་ས་བས་མཐའ་ཀུན་ཏུ་རྒྱུ༔ ཆགས་ཞེན་འཁྲི་བ་གསོག་འཇོག་མདུད་པ་ཁྲོལ༔ དེ་ཚེ་བཀྲེས་སྐོམ་ཚོར་བ་ཅི་བྱུང་ཡང་༔ རྐྱེན་དང་བསྲེ་ཞིང་གཉེན་པོས་ལམ་དུ་འཁྱེར༔ མི་ཟད་ལོངས་སྤྱོད་བཅུད་ལེན་འདི་ལ་འབུངས༔ ཕག་མོའི་གདོང་ཅན་རིགས་ཀྱི་དམ་ཚིག་ཡིན༔ ས་མ་ཡཱ༔ རྒྱ༔ རྡོ་རྗེ་རིགས་ཀྱི་མཁའ་འགྲོའི་དམ་ཚིག་ཏུ༔ བྱང་སེམས་དཀར་པོ་ཅོང་ཞིའི་བཅུད་ལེན་ནི༔ ཕོ་ཅོང་དཀར་སེར་མདོག་ལ་སུལ་དང་ལྡན༔ མོ་ཡི་ཅོང་ཞི་དཀར་སྔོ་གངས་རྙིང་འདྲ༔ ཁམས་དང་བསྟུནཏེ་བླངས་ནས་ཁྲུམ་ཙམ་བརྡུངས༔ ཆུ་ལ་གད་བྱ་གྲང་ཤས་ཅན་རྣམས་ཀྱིས༔ བསྲེ་ནས་འདུལ་སྦྱང་ལས་ལ་སྦྱར་ཏེ་འབད༔ ཚ་ཤས་ཅན་དང་བད་ཀན་ཆེ་བའི་རིགས༔ བསྲེ་འདུལ་མི་དགོས་རང་བྱུང་འདུལ་སྦྱོང་བྱ༔ འོ་མ་སྦྱར་འཚོད་བད་ཀན་སེལ་བར་བྱེད༔ ཆང་ལ་བཙོས་པས་གྲང་བ་སེལ་བར་བྱེད༔ རུས་ཁུ་བུ་རམ་སྦྱར་བཙོས་རླུང་རིགས་སེལ༔ དེ་ནས་ཕྱུང་ཏེ་གྲིབ་མར་གཡམ་སྟེང་བསྐམས༔ རྣལ་འབྱོར་གྲང་ཤས་ཅན་གྱིས་ཉི་མར་བསྲེགས༔ དེ་ནས་བཙང་མའི་སྣོད་བགོས་མདུན་དུ་བཞག༔ རང་ཉིད་ཁྲོ་མོའི་ང་རྒྱལ་བགེགས་བསྐྲད་སྦྱངས༔ མེ་རླུང་སྦྱོང་བའི་སྔགས་དང་བསྐྱེད་རིམ་གསལ༔ དམ་ཚིག་ཡེ་ཤེས་གཉིས་མེད་བདུད་རྩིར་བསམས༔ དེ་དབུས་རྟ་ཕག་ཡབ་ཡུམ་སྐུ་མདོག་དཀར༔ འོད་ལྔའི་མདངས་ལྡན་ཡེ་ཤེས་མེ་དཔུང་འབར༔ དམ་ཚིག་ཡེ་ཤེས་གཉིས་མེད་བདུད་རྩིར་བསམས༔ དེ་དབུས་རྟ་ཕག་ཡབ་ཡུམ་སྐུ་མདོག་དཀར༔ འོད་ལྔའི་མདངས་ལྡན་ཡེ་ཤེས་མེ་དཔུང་འབར༔ དམ་ཚིག་ཡེ་ཤེས་གཉིས་སུ་མེད་པའི་སྐུ༔ བདེ་སྟོང་དགའ་བཞིའི་འཁོར་ལོའི་ཤུགས་སྒྱུར་བསམས༔ མ་ཡེངས་ཏིང་འཛིན་ངང་ནས་འཛབ་སྟོང་བསྙེན༔ ཨཱོཾ་བཛྲ་ཀྲོ་ཏ་བཛྲ་དྷཀྐི་ནི་བྷ་ར་ཧི་ཛྙཱ་ན་པཉྩ་སིདྡྷི་ས་མ་ཡ་སྟྭཾ་སྭཱ་ཧཱ༔ ཡིད་ཀྱིས་མཆོད་བསྟོད་དམ་ཚིག་དབང་གིས་ཞུ༔ དངོས་གྲུབ་འཁོར་འདས་བཅུད་ཀྱི་ཕུང་པོར་བསྒོམ༔ ས་མ་ཡཱཿ རྒྱ༔ ཚ་བ་གསུམ་དང་སེའུ་འབྲུ་སྐྱོབས་སུ་སྦྱར༔ མེ་རླུང་བདེ་སྟོང་དྲོད་སྦར་སྔོན་ལ་བསྟེན༔ ཆུ་སྐོལ་ནང་དུ་ཅོང་ཞི་བཏབ་སྟེ་བསྲུབ༔ དེ་ལ་ཕྱེ་ནི་སུམ་ཆ་བཏབ་ལ་སྐོལ༔ གར་སླ་འཚམས་པར་མར་དཀར་དུམ་ཙམ་བཏབ༔ སྐྱོ་ཚར་བསྟེན་པའི་གདམས་ཟབ་ཨི་ཐི་རྒྱ༔ ཅོང་ཞི་ཆུར་མཚོད་དྲུག་ཆའི་མར་བཏབ་ཅིང་༔ བརྒྱད་ཆའི་བུ་རམ་བཏབ་ཅིང་བསྲུབ་པའི་ཚེ༔ སྐྱ་བ་འཛིན་ཚེ་ཆང་བསྣན་ལེགས་པར་སྐོལ༔ ཕྱེ་ནི་སུམ་ཆ་ཉེ་ཤིང་ར་མཉེ་བཏབ༔ ཞོ་ཙམ་བྱུང་ཚེ་ངད་ཡལ་ཕབ་བཏབ་སྟེ༔ ལེགས་པར་བསྙལ་ཞིང་ལངས་ཚེ་ཆུ་ཡིས་སྦྲན༔ གར་སླ་ཐུག་པ་ཙམ་དུ་བསིང་ནས་ཀྱང་༔ ཞོ་དང་དར་བ་ཡང་ན་འོ་མ་སྦྱར༔ ཅོང་ཞི་རྩམ་པ་བུ་རམ་ཆང་བཞིས་བསྣན༔ སྐོལ་ཐག་ལེགས་བཏང་གཡམ་སྟེང་གྲིབ་མར་བསྐམས༔ ལྟོ་སྟོང་དུས་ལ་བཟའ་ཞིང་རླུང་སྦྱོར་འབད༔ བདུད་རྩི་སྨན་མར་བསྟེན་ཐབས་ཨྀ་ཐི་རྒྱ༔ སྐྲན་དང་གྲང་བ་གཅོང་གི་རིགས་རྣམས་འཇོམས༔ ཚེ་རིང་རྒས་སྲ་སྡིག་སྒྲིབ་དྲུངས་ནས་ཕྱུང་༔ རླུང་དང་མཁྲིས་པ་བད་ཀན་རིགས་རྣམས་ཞི༔ དྲི་མ་འགགས་ན་ལོ་མའི་སྐྱོ་ཚ་གཏོང་༔ རླུང་གིས་གཡེང་ན་ནང་སྔ་རུས་ཁུ་བསྟེན༔ སྐབས་སྐབས་པ་གྲོ་སྐམ་པོའི་ཕྱེ་མ་དང་༔ ཅོང་ཞིའི་སྐྱོ་ཚ་བཏང་བས་གེགས་རྣམས་སེལ༔ མར་ནག་ཤིང་ཐོག་ཤ་མོང་ཡོས་དང་ཡུང་༔ དྲག་ཤུལ་ལས་དང་མཚན་འགྲོས་ཉིན་གཉིད་སྤང་༔ ཐིག་ལེ་མ་ཉམས་རླུང་སྦྱོར་སྐབས་བབས་ཚེ༔ ཁམས་དང་བསྟུན་པའི་ཁ་ཟས་སྤྱད་པར་བྱ༔ འདི་ནི་རྡོ་རྗེ་མཁའ་འགྲོའི་དམ་ཚིག་སྟེ༔ མ་དང་མཁའ་འགྲོ་སྤྲིན་ཕུང་བཞིན་དུ་འདུ༔ མེ་ལོང་ལྟ་བུའི་ཡེ་ཤེས་མངོན་དུ་འགྱུར༔ མཆོག་དང་ཐུན་མོང་དཔལ་ལ་ཚེ་འདིས་སྤྱོད༔ དེ་ཕྱིར་མ་འོངས་རྣམས་ཀྱིས་ཉམས་སུ་ལོང་༔ ས་མ་ཡཱཿ རྒྱ༔ རིན་ཆེན་རིགས་ཀྱི་མཁའ་འགྲོའི་དམ་ཚིག་ཏུ༔ བདུད་རྩི་ར་མཉེ་ཤིང་གི་བཅུད་ལེན་ནི༔ མཁའ་འགྲོར་བསྒོམ་ཞིང་དཔྱིད་དང་སྟོན་ཀའི་དུས༔ ར་མཉེ་བརྐོ་ཞིང་གད་བྱ་དུམ་དུམ་གཅོད༔ ཆུ་ལ་འཚོད་ཅིང་རང་ཁུ་རང་ཐགས་བྱ༔ གྲིབ་མར་བསྐམས་ཤིང་ཤིན་ཏུ་ཞིབ་པར་བསྣུན༔ རྩམ་པ་སུམ་ཆ་བསྲེ་སྟེ་སྣོད་དུ་བླུགས༔ རཏྣ་དྷཀྐི་ཡབ་ཡུམ་འདུ་འཕྲོ་བསྒྱུར༔ བྱིན་གྱིས་བརླབ་ཅིང་སྙིང་པོའི་འཛབ་ལ་འབད༔ སྭཱ་རཏྣ་ཀྲོ་ཏ་རཏྣ་དྷཀྐི་ནི་བྷ་ར་ཧི་ཛྙཱ་ན་པཉྩ་སིདྡྷི་ས་མ་ཡ་སྟྭཾ་སྭཱ་ཧཱ༔ ཞེས་བཟླས་འོད་ཞུ་དངོས་གྲུབ་ཕུང་པོར་བསམས༔ གོམས་ནས་ཕྱེ་ཕྲི་ར་མཉེའི་བདུད་རྩིར་སྤྱོད༔ ཁ་ཟས་ལྟ་བུར་བསྟེན་པའི་མན་ངག་རྒྱ༔ དེ་ལ་མེ་ཏོག་སྣ་ཚོགས་བཏབ་ཟོས་ན༔ མདངས་ལྡན་ཚེ་རིང་རྒས་སྲ་དབང་པོ་གསལ༔ དབང་ལག་འོ་མར་བཙོས་པའི་ཕྱེ་མ་དང་༔ རང་གི་ནད་གཞི་ཚ་གྲང་སྨན་སྐྱོབས་སྦྱར༔ ཆང་གི་རྟར་བསྐྱོན་སྐབས་རེ་བསྟེན་པར་བྱ༔ དངས་མ་འཕེལ་ཞིང་མཱུ་དྲ་བརྒྱར་སྤྱོད་ཐུབ༔ འདི་ལྟར་ཉམས་བླངས་ཆུ་སེར་ནད་རིགས་ཞི༔ མ་དང་མཁའ་འགྲོས་དངོས་གྲུབ་མྱུར་དུ་སྟེར༔ ས་མ་ཡཱ༔ རྒྱ་རྒྱ་རྒྱ༔ མཉམ་པ་ཉིད་ཀྱི་ཡེ་ཤེས་མངོན་དུ་འགྱུར༔ ཚེ་དང་བསོད་ནམས་ཡར་ངོའི་ཟླ་ལྟར་རྒྱས༔ དེ་ཕྱིར་མ་འོངས་རྣམས་ཀྱི་ཉམས་སུ་ལོང་༔ ས་མ་ཡཱ༔ རྒྱ་རྒྱ་རྒྱ༔ པདྨ་རིགས་ཀྱི་མཁའ་འགྲོའི་དམ་ཚིག་ཏུ༔ བདུད་རྩི་དྲི་ཆེན་བཅུད་ལེན་རིམ་པ་ནི༔ མཁའ་འགྲོར་བསྒོམ་ཞིང་དྲི་ཆེན་སྐེད་པ་བསྒྲུབ༔ བླ་མ་སློབ་དཔོན་དྲི་ཆེན་ཕབ་ཏུ་བཏབ༔ གྲིབ་སྐམས་བྱས་ནས་ཆུ་དྲོན་ནང་དུ་འཁྲུད༔ ཁུ་བ་བཞུར་ཞིང་དུག་བསངས་སླར་ཡང་བསྐམས༔ སྤོད་དང་བཅུད་བསྲེ་ཞིབ་པར་ཕྱེ་རུ་འཐག༔ གོང་བཞིན་འདུལ་སྦྱང་བྱས་ལ་དངོས་གཞི་ནི༔ པདྨ་དྷཀྐི་ཡབ་ཡུམ་འདུ་འཕྲོ་བསྒྱུར༔ བྱིན་རླབས་ཏིང་འཛིན་ལྡན་པས་འཛབ་འདི་བགྲང་༔ ཨ་པདྨ་ཀྲོ་ཏ་པདྨ་དྷཀྐི་ནི་བྷ་ར་ཧི་ཛྙཱ་ན་པཉྩ་སིདྡྷི་ས་མ་ཡ་སྟྭཾ་སྭཱ་ཧཱ༔ ཞེས་བཟླས་ཡབ་ཡུམ་བཞུ་ཞིང་བདུད་རྩིར་བསྟིམ༔ སུམ་ཆའི་ཕྱེ་བསྣན་ཆང་གིས་རིལ་བུ་བསྒྲིལ༔ རླུང་སྦྱོར་འབད་ཅིང་ཁ་ཟས་ལྟ་བུར་བསྟེན༔ ཨི་ཐི་རྒྱ༔ ཆུ་ཁོལ་ནང་བཏབ་མར་དཀར་སྡོར་གྱིས་སྦྲན༔ ཁམས་བསྟུན་བཏུང་བ་སྐྱོ་ཚའི་མན་ངག་ཡིན༔ ཨི་ཐི་རྒྱ༔ དེ་ལ་ཨ་ཝ་ལྕམ་ཕྱེ་རྟག་དུ་སྦྱར༔ མར་སྦྱར་བསྟེན་པས་མིག་གི་ནད་རིགས་སེལ༔ ཨི་ཐི་རྒྱ༔ དེ་ལ་གླ་རྩི་གུ་གུལ་སྦྱར་ཏེ་བསྟེན༔ ཀླུ་ཡི་ནད་རིགས་ཙི་ཙི་ཛྭ་ལ་བྱང་༔ ཨྀཐི་རྒྱ༔ ཤ་རྙིང་ཕྱེ་མ་ལྔ་ཆ་བསྲེས་ཏེ་བསྟེན༔ ཤ་ལུས་སྟོབས་འཕེལ་དབང་པོའི་སྒོ་རྣམས་གསལ༔ ཨི་ཐི་རྒྱ༔ འོ་མར་སྦྱར་ལ་ཕབ་རྩིས་ལེགས་པར་བསྙལ༔ ཞོ་ལྟར་བསྟེན་པས་ཀུན་ད་ཡོངས་སུ་འཕེལ། ཨི་ཐི་རྒྱ༔ སྐབས་སུ་སྒོས་པས་སྲིན་ནད་བཤལ་བ་གནད༔ བཅའ་བ་གཞན་དང་མེ་ཉི་དྲག་ལས་སྤང་༔ འདི་ལྟར་སྤྱོད་པའི་རྣལ་འབྱོར་དབང་ཕྱུག་ལ༔ སོ་སོར་རྟོགས་པའི་ཡེ་ཤེས་མངོན་འགྱུར་ཞིང་༔ ཚེ་རིང་རྒས་སྲ་འབྱུང་པོའི་ནད་རིགས་གྲོལ༔ བར་ཆད་རྐྱེན་ཞི་མཚམས་མེད་ལས་སྒྲིབ་བྱང་༔ མ་དང་མཁའ་འགྲོ་འཇིག་རྟེན་མི་མོ་འདུ༔ གྲགས་པའི་དཔལ་རྒྱས་ཟས་ནོར་ཆར་ལྟར་འབེབ༔ དེ་ཕྱིར་མ་འོངས་རྣམས་ཀྱིས་ཉམས་སུ་ལོང་༔ ས་མ་ཡཱཿ རྒྱ་རྒྱ་རྒྱ༔ ལས་ཀྱི་རིགས་ཀྱི་མཁའ་འགྲོའི་དམ་ཚིག་ཏུ༔ བདུད་རྩི་དྲི་ཆུའི་བཅུད་ལེན་རིམ་པ་ནི༔ དྲི་ཆུ་བར་པ་ལྕགས་རྫའི་སྣོད་དུ་བསགས༔ མང་ཉུང་རང་གི་སྙིམ་པ་དྲུག་གི་ཚད༔ ཨ་རུ་གསེར་མདོག་ལྔ་དང་བ་རུ་གསུམ༔ ཨ་བ་ལི་དང་བ་རུ་ར་ཡི་ཆ༔ ཆོམས་ཙམ་བརྡུང་སྟེ་དྲི་ཆུའི་ནང་དུ་བཏབ༔ ཤུ་དག་དཀར་པོ་ཐུན་གཅིག་བཏབ་ནས་ཀྱང་༔ བགེགས་བསྐྲད་མཚམས་གཅོད་ཞག་གཅིག་བསྙལ་བར་བྱ༔ དེ་ནས་བཏོན་དེ་མེ་རླུང་སྦྱོར་བ་དང་༔ ཀརྨ་དྷཀྐི་ཡབ་ཡུམ་འདུ་འཕྲོ་བསྒྱུར༔ བྱིན་གྱིས་བརླབ་ཅིང་འཛབ་འདིས་བརྩོན་པར་བསྒྲུབ༔ ཧ་ཀརྨ་ཀྲོ་ཏ་ཀརྨ་དྷཀྐི་བྷ་ར་ཧི་ཛྙཱ་ན་པཉྩ་སིདྡྷི་ས་མ་ཡ་སྟྭཾ་སྭཱ་ཧཱ༔ བཟླས་པ་རྫོགས་ནས་ཡབ་ཡུམ་འོད་དུ་ཞུ༔ དངོས་གྲུབ་འཁྱིལ་བའི་བདུད་རྩིའི་རྒྱ་མཚོར་བསྒོམ༔ ནང་སྔ་རྣལ་འབྱོར་ཁྲུས་ནས་ཕྱུང་བར་བྱ༔ ཁ་སྤྲིས་འདོར་ཞིང་མ་འཁྲུགས་པར་བསིངས་ནས༔ ནང་རེ་རྩ་སྟོང་འཁྱོར་བ་རེ་རེ་བསྟེན༔ སྐབས་སུ་བསྐུ་མཉེ་བག་རེ་ཁམས་དང་བསྟུན༔ དམ་ཚིག་རུལ་བསུངས་ཟོ་ཤེ་འབྲས་རྗེན་སྤང་༔ ཁ་ཟས་རིག་པས་དཔྱད་ཅིང་མི་མཐུན་འདོར༔ འདི་ལྟར་ལན་གསུམ་བསྐྱལ་ཏེ་ཉམས་བླང་པས༔ བྱ་བ་གྲུབ་པའི་ཡེ་ཤེས་མངོན་འགྱུར་ཞིང་༔ མི་དགེ་བཅུ་ཡི་སྡིག་སྒྲིབ་དྲུངས་ནས་ཕྱུངས༔ ཚངས་པའི་དབྱངས་འཐོབ་འཕྲིན་ལས་མ་ལུས་འགྲུབ༔ བསྟན་འགྲོའི་དོན་འགྲུབ་སེམས་ཅན་བདེ་ལ་འཁོད༔ ཡོན་ཏན་དཔག་མེད་ཕྱི་རབས་ཉམས་སུ་ལོང་༔ དད་བརྩོན་ལྡན་པའི་སྐལ་ལྡན་རྣམས་ལ་སྤེལ༔ ས་མ་ཡཱ༔ རྒྱ་རྒྱ་རྒྱ༔ ཨེ་མ་མཁའ་འགྲོ་རིགས་བཞིའི་དམ་ཚིག་ཏུ༔ བདུད་རྩི་རྣམ་བཞིའི་བཅུད་ལེན་གདམས་པ་འདི༔ གཅོད་ཀྱི་ཉམས་ལེན་གདམས་པའི་མཐའ་རྒྱས་ཡིན༔ མི་དགེའི་གཞིར་གྱུར་ཚེ་འདིའི་བདེ་སྐྱིད་སྤོངས༔ གཏན་གྱི་སོ་ནམ་ཕྱི་མའི་བྱང་ཆུབ་སྒྲུབས༔ ཐར་བའི་བདུད་གཅིག་ཆོས་ཀྱི་གྲུབ་མཐའ་བསྐྱུར༔ ཁ་བསགས་མ་ཆེ་གདམས་པ་ཉམས་སུ་ལོང་༔ ལུས་ངག་ཡིད་གསུམ་སྨིན་གྲོལ་གདེང་ཐོབས་འབུངས༔ ས་མ་ཡཱ༔ རྒྱ་རྒྱ་རྒྱ༔ གཏེར་རྒྱ༔ སྦས་རྒྱ༔ ཟབ་རྒྱ༔ ས་མ་ཡཱ༔ རྒྱ་རྒྱ་རྒྱ༔ རིག་འཛིན་ཉི་མ་གྲགས་པ་རྩལ་གྱིས་ཆགས་རུ་ཕུག་སེར་ནས་གདན་དྲངས་པའོ། །མངྒལཾ། །

རྒྱས་པའི་སྦྱིན་སྲེག་ཡིད་བཞིན་ནོར་བུ།

ཕག་མོ་སེར་མོའི་ཟབ་ཐིག་ལས༔ རྒྱས་པའི་སྦྱིན་སྲེག་ཡིད་བཞིན་ནོར་བུ་བཞུགས༔ བཅོམ་ལྡན་ཕག་གདོང་མཁའ་འགྲོར་འདུད༔ མ་མོ་མཁའ་འགྲོའི་རྣལ་འབྱོར་པས༔ ཚེ་དང་བསོད་ནམས་རྒྱས་འདོད་ན༔ སྟེགས་བུ་སེར་པོ་གྲུ་བཞིའི་སྟེང་༔ རཾ་གྱི་ཁོག་པར་རི་འདྲི་ཞིང་༔ རྒྱས་པའི་ཤིང་གི་གྲུ་བཞིར་བརྩེགས༔ མཁའ་འགྲོའི་བསྙེན་སྒྲུབ་ཁ་གསོ་ཞིང་༔ ལྟ་བ་གདེང་བསྐྱེད་མེ་ཐབ་བསང་༔ མེ་ལྷ་དྲང་སྲོང་བསྐྱེད་བསྟིམ་མཆོད༔ ཧཱུྃ༔ དྲང་སྲོང་ཆེན་པོ་མེ་ཡི་ལྷ༔ གཟི་བརྗིད་འབར་བ་ལྟ་ན་སྡུག༔ འོད་འབར་ཕྲེང་བའི་ཀློང་ན་བཞུགས༔ བསྲེག་བླུགས་མཆོད་པ་འདི་བཞེས་ལ༔ ཚེ་དང་བསོད་ནམས་རྒྱས་པར་མཛོད༔ ཨཱོཾ་ཨགྣཱེ་ཡེ་སོགས་ནས་རིམ་བཞིན་མཆོད༔ མེ་ལྷ་འབར་བའི་དབྱིངས་དང་འདྲེས༔ མེ་དཔུང་རྡོ་རྗེ་རྣལ་འབྱོར་མ༔ སེར་མོ་འབུམ་གྱི་འཁོར་གྱིས་བསྐོར༔ བསྐྱེད་ཅིང་སྤྱན་འདྲེན་མཆོད་ཅིང་བསྟོད༔ སྔགས་ལ་རྒྱས་པའི་སྲེག་རྫས་འབུལ༔ ཚེ་དང་བསོད་ནམས་དཔལ་འབྱོར་སྟོབས༔ པུཥྟྀང་ཀུ་རུའྀ་ཤམ་བུས་བརྒྱན༔ བརྒྱ་དང་རྩ་བརྒྱད་སྟོང་ལ་སོགས༔ སྐབས་དང་བསྟུན་ཏེ་རྒྱས་བསྡུས་སྤྲོ༔ སྔགས་དམིགས་གནད་བསྣུན་པཱུ་ཙས་མཆོད༔ སེར་མོ་འབུམ་གྱི་ལྷ་ཚོགས་རྣམས༔ ཡོངས་སུ་དགྱེས་ནས་འདོད་པའི་དོན༔ སྐད་ཅིག་ཉིད་ལ་འཐོབ་པར་བསམས༔ ཡེ་ཤེས་དབྱིངས་གཤེགས་དམ་ཚིག་བསྡུ༔ མེ་ལྷར་གཏང་རག་མཆོད་ཅིང་བསྟོད༔ བཟོད་གསོལ་ཉེས་བཤགས་གཤེགས་གསོལ་བྱ༔ བསྔོ་བ་སྨོན་ལམ་མཐའ་རྒྱས་སྐྱོང་༔ ཉ་སྟོང་ལ་སོགས་དུས་ཆེན་ལ༔ རྒྱུན་དུ་མཆོད་བསྟོད་འདི་བརྩམས་ན༔ མཆོག་གི་དངོས་གྲུབ་བརྒྱ་རྩ་འཐོབ༔ ཐུན་མོང་མ་བརྩམས་ཞོར་ལ་འདུ༔ མ་མོ་མཁའ་འགྲོས་བཀའ་ཉན་ཅིང་༔ ཆོས་སྐྱོང་སྲུང་མས་འཕྲིན་ལས་བསྒྲུབ༔ ལྷ་འདྲེ་མི་གསུམ་དབང་དུ་བསྒྱུར༔ དེ་ཕྱིར་གཅེས་པས་ཉམས་སུ་ལོང་༔ ཐལ་བ་དཔལ་བཟང་རི་བོའམ༔ ཡང་ན་མཛོད་ཀྱི་ནང་དུ་སྦ༔ ས་མ་ཡཱ༔ རྒྱ་རྒྱ་རྒྱ༔ གཏེར་རྒྱ༔ སྦས་རྒྱ༔ ཟབ་རྒྱ༔ ས་མ་ཡཱ༔ རྒྱ་རྒྱ་རྒྱ༔ རིག་འཛིན་ཆེན་པོ་ཉི་མ་གྲགས་པ་རྩལ་གྱིས་ཆགས་རུ་ཕུག་སེར་ནས་མེ་ཡོས་ཧོར་ཟླ་གཉིས་པའི་ཚེས་བཅུ་གསུམ་ལ་སྤྱན་དྲང་ཤིང་ཆགས་རུ་ཕུག་ནག་ཏུ་ཤོག་སེར་ལས་བསྒྱུར་བའོ། མངྒཱ་ལམ། །

དོན་གྲུབ་སེར་མོའི་ལས་བྱང་།

ཕག་མོ་སེར་མོའི་ཟབ་ཐིག་ལས། དོན་གྲུབ་སེར་མོའི་ལས་བྱང་བཞུགས། དོན་གྲུབ་ཕག་གདོང་སེར་མོའི་སྐུ་ལ་ཕྱག་འཚལ་ལོ། །རྣལ་འབྱོར་པས་དོན་གཉིས་ཀྱི་ཕྱིར་ཏུ་དོན་གྲུབ་རྡོ་རྗེ་རྣལ་འབྱོར་མའི་ཉམས་ལེན་འདོད་པས་དབེན་པའི་གནས་སུ་དཀྱིལ་འཁོར་སྨན་རག་གཏོར་མ་སོགས་ཚོགས་དང་མཆོད་རྫས་རྣམས་གཞུང་ལྟར་བཤམས། ཐུན་མོང་གི་སྔོན་འགྲོ་ཆོས་སྤྱོད་གསོལ་འདེབས་གཏོར་མ་ཆ་གཉིས་སོགས་མཐོང་བརྒྱུད་ཕྱག་ལེན་ལྟར་བྱ། དེ་ནས་དངོས་གཞི་གྱེར་བསྒོམ་དང་ལྡན་པས་རོལ་མོ་རྣམས་འཁྲོལ་ཞིང་། བགེགས་ལ་བཀའ་བསྒོ་བ་ནི༔ ཧཱུྃ༔ ང་ནི་དོན་གྲུབ་སེར་མོའི་སྐུ༔ ཆོས་ཀྱི་དབྱིངས་ལས་སྤྲུལ་པའི་མ༔ མཁའ་འགྲོའི་སྤྲུལ་པས་སྟོང་གསུམ་གང་༔ ལོག་པར་ལྟ་བའི་གདོན་བགེགས་རྣམས༔ རྡུལ་ཕྲན་བཞིན་དུ་བརླགས་པར་བྱེད༔ དེ་བས་རང་རང་གནས་སུ་དེངས༔ ཧཱུྃ་བཞིའི་སྔགས་བརྗོད༔ མཚམས་གཅོད་པ་ནི༔ ཧཱུྃ༔ རབ་ཏུ་ཁྲོས་པའི་མཁའ་འགྲོ་འབུམ༔ དྲག་ཏུ་བསྐྱོད་ལ་སྐུ་བཞེངས་ཤིག༔ དུར་ཁྲོད་མཁའ་འགྲོའི་ཕོ་བྲང་འདིར༔ གནོད་བྱེད་གདོན་བགེགས་མཚམས་ཆོད་ཅིག༔ རི་རཏྣ་དྷཀྐི་ནི་བྷ་ར་ཧི་ཧཱུྃ་ཕཊ༔ རཀྵ་རཀྵ་སྭཱ་ཧཱཿ སྐྱབས་སུ་འགྲོ་བ་ནི༔ ན་མོ༔ བླ་མ་ཡི་དམ་མཁའ་འགྲོ་སྟེ༔ རྩ་བ་གསུམ་ལ་སྐྱབས་སུ་མཆི༔ སེམས་བསྐྱེད་པ་ནི། འགྲོ་བ་སེམས་ཅན་དོན་སླད་དུ༔ མཁའ་འགྲོའི་བསྐྱེད་རྫོགས་སྒོམ་བཟླས་བསྒྲུབ༔ ལན་གསུམ། ཡན་ལག་བདུན་པ་ནི༔ ཧཱུྃ༔ བླ་མ་ཡི་དམ་མཁའ་འགྲོ་གཤེགས༔ ཉི་ཟླ་པདྨའི་གདན་ལ་བཞུགས༔ ལུས་ངག་ཡིད་གསུམ་གུས་ཕྱག་འཚལ༔ ཕྱི་ནང་གསང་བའི་མཆོད་པ་འབུལ༔ ཉམས་ཆག་སྡིག་སྒྲིབ་མཐོལ་ལོ་བཤགས༔ གསང་སྔགས་སྒྲུབ་ལ་རྗེས་ཡི་རང་༔ སྨིན་གྲོལ་ཆོས་འཁོར་བསྐོར་དུ་གསོལ༔ མྱ་ངན་མི་འདར་གསོལ་བ་འདེབས༔ དགེ་བ་བྱང་ཆུབ་ཆེན་པོར་བསྔོ༔ ཐམས་ཅད་སངས་རྒྱས་ཐོབ་པར་ཤོག༔ ཚད་མེད་བཞི་ནི་གཞུང་ནས་འདོན་ཆ་མ་གསལ་ཀྱང་གཞན་ནས་བླང་བ། སེམས་ཅན་བདེ་དང་ལྡན་གྱུར་ཅིག །སྡུག་བསྔལ་ཀུན་དང་བྲལ་བར་ཤོག །བདེ་དང་རྟག་ཏུ་མི་འབྲལ་ཞིང་། །ཆོས་ཀུན་མཉམ་ཉིད་རྟོགས་པར་ཤོག །སྡོམ་བཟུང་འདོན་གསུངས་པས། ཧཱུྃ༔ བླ་མ་ཡི་དམ་ལྷ་ཚོགས་དགོངས༔ ཕྱི་ནང་ཐེག་པའི་སྡོམ་པ་དང་༔ རྩ་གསུམ་དམ་ཚིག་ཡང་དག །་བསྲུང་༔ སྔོན་གྱི་འགལ་འཁྲུལ་དམ་ཉམས་བཤགས༔ ཕྱིན་ཆད་མི་བགྱིད་གནོང་ངོ་འགྱོད༔ སེམས་ཅན་ཀུན་གྱི་དོན་བསྒྲུབ་ཕྱིར༔ བདག་གི་སྡོམ་པ་རྣམ་དག་ཤོག༔ མཆོད་པ་བྱིན་གྱིསབརླབས་པ་ནི༔ ཧཱུྃ༔ རང་ཉིད་ལྷར་གསལ་ཐུགས་ཀ་ནས༔ འོད་ཟེར་འཕྲོ་འདུའི་ཏིང་འཛིན་གྱིས༔ མཆོད་པའི་མ་དག་ཉེས་པ་སྦྱངས༔ ཡེ་ཤེས་འདོད་དགུའི་བདུད་རྩིར་བསྒྱུར༔ རི་རཏྣ་དྷཀྐི་ནི་བྷ་ར་ཧི་ཧཱུྃ་སྭཱ་ཧཱཿ ཨཱོཾ་ཨཱཿཧཱུྃ་སརྦ་པཉྩ་ཨ་མྲྀ་ཏ་རཀྟ་བྷ་ལིངྟ་པཱུ་ཙ་ས་མ་ཡེ་སྭཱ་ཧཱཿ གསུམ། བྱིན་དབབ་པ་ནི༔ ཧཱུྃ༔ དབྱིངས་ཀྱི་མཁའ་འགྲོའི་ཕོ་བྲང་ནས༔ སེར་མོ་དོན་གྲུབ་མཁའ་འགྲོའི་རྗེ༔ མཁའ་འགྲོ་མ་ཚོགས་འབུམ་གྱིས་བསྐོར༔ སྒྲུབ་པའི་གནས་འདིར་བྱིན་ཅིག་ཕོབ༔ རི་རཏྣ་དྷཀྐི་ནི་བྷ་ར་ཧི་ཨ་ཝེ་ཤ་ཡ་ཨ་ཨ༔ བརྡ་སྒོ་དབྱེ་བ་ནི༔ ཧཱུྃ༔ བརྗོད་མེད་མ་བཅོས་དེ་བཞིན་ཉིད༔ ངན་རྟོག་དབང་གིས་འཁོར་བར་འཁྱམས༔ གཟུང་འཛིན་སྐྱེ་མེད་རང་གྲོལ་བའི༔ ཡེ་ཤེས་དོན་གྱི་སྒོ་དབྱེ་འཚལ༔ པྲ་ཝེ་ཤ་ཡ་ཧོ༔ བརྡ་ཕྱག་ནི༔ ཧཱུྃ༔ སྐྱེ་མེད་གཉུག་མའི་རང་བྱུང་ལྷ༔ རང་དང་འགྲོག་ཀྱང་ཞལ་མ་མཇལ༔ དུས་འདིར་རང་རིག་རང་ངོར་ཤར༔ རང་གྲོལ་དོན་གྱི་ཕྱག་འཚལ་ལོ༔ ས་མ་ཡ་ཨ་ལ་ལ་ཧཱུྃ༔ དམ་བཤགས་ནི༔ ཧཱུྃ༔ གདོད་ནས་རང་དང་གཉིས་མེད་ཀྱང་༔ གཉིས་འཛིན་དབང་གིས་སོ་སོར་ཕྱེ༔ ཆོས་དབྱིངས་མཁའ་འགྲོའི་ལྷ་ཚོགས་ལ༔ གཉིས་སུ་མེད་པའི་ངང་དུ་བཤགས༔ ས་མ་ཡ་ཤུདྡྷེ་ཨཱཿ བསྐྱེད་རིམ་ནི༔ ཧཱུྃ༔ རྒྱུ་ཡི་རང་བཞིན་སྟོང་པ་ཉིད་དུ་གྱུར༔ སྟོང་པའི་རང་རྩལ་དམིགས་སུ་མེད་པའི་ངང་༔ དམིགས་མེད་བརྩེ་བའི་སྙིང་རྗེའི་རང་མདངས་ལས༔ ཚད་མེད་བཞི་ལྡན་སྣང་སྟོང་འཇའ་གུར་ཀློང་༔ ཆོས་ཀྱི་འབྱུང་གནས་ཨེ་ཡི་ཕོ་བྲང་དབུས༔ ཏི་ར་ཉི་ཟླ་པདྨ་འབར་བའི་སྟེང་༔ སྐྱེ་མེད་རིག་པའི་རྩལ་སྣང་ཡི་གེ་རི༔ འོད་ལྔའི་འདུ་འཕྲོ་སྒྱུར་བའི་ཆོ་འཕྲུལ་ལས༔ ཕག་མོ་སེར་མོ་བདེ་ཆེན་མཁའ་འགྲོ་མ༔ ཐབས་ཀྱི་ཌཱ་རུ་ཤེས་རབ་དྲིལ་བུ་འཁྲོལ༔ གར་སྟབས་རུས་རྒྱན་དར་དཔྱངས་འོད་ལྔ་འབར༔ བཞིན་འཛུམ་མདངས་ལྡན་སྤྱན་གསུམ་མཁའ་ལ་གཟིགས༔ དབུ་སྐྲ་སིལ་མ་རིགས་ལྔའི་རྒྱན་གྱིས་སྤྲས༔ ཕག་ཞལ་སེར་མོའི་སྒྲ་ཡིས་སྲིད་གསུམ་གཡོ༔ རྡོ་རྗེ་ཁ་ཊྭཱཾ་བདེ་བའི་ཡབ་ལ་འཁྲིལ༔ སྤྱན་འདྲེན་པ་ནི༔ ཧཱུྃ༔ དོན་གྲུབ་སེར་མོ་བདེ་ཆེན་སྒྱུ་འཕྲུལ་མ༔ འདོད་པའི་དབང་མོ་མ་གཅིག་མཁའ་འགྲོའི་གཙོ༔ གཏེར་འབྱུང་ཡེ་ཤེས་དག་པའི་ཕོ་བྲང་ནས༔ བཞེངས་ཤིག་སྐུ་སྐྱོད་སྒྲུབ་པའི་གནས་འདིར་སྤྱོན༔ སེར་མོ་འབུམ་གྱི་འཁོར་ཚོགས་སྤུངས་སེ་སྤུང་༔ གནས་ཡུལ་དུར་ཁྲོད་མཁའ་འགྲོ་ཐིབས་སེ་ཐིབ༔ གར་གྱི་སྟང་སྟབས་ཕྱག་མཚན་ཁྲོ་ལོ་ལོ༔ འོད་ཕུང་ཐིབས་ཐིབས་གཟི་མདངས་ཡ་ལ་ལ༔ བརྡ་སྐད་དིར་དིར་གད་བརྒྱངས་སངས་སེ་སང་༔ བྱིན་གྱིས་བརླབ་ཕྱིར་གནས་འདིར་སྤྱན་འདྲེན་གཤེགས༔ མོས་པའི་བུ་ལ་མཆོག་ཐུན་དངོས་གྲུབ་སྩོལ༔ བསྐྱེད་པའི་གཞལ་ཡས་འདི་ལ་བརྟན་པར་བཞུགས༔ འདུ་འབྲལ་མེད་པའི་དབྱིངས་སུ་ཕྱག་གིས་མཆོད༔ རི་རཏྣ་སརྦ་དྷཀྐི་ནི་ས་མ་ཡ་ཧྲིང་ཕེེཾ་ཕེེཾ་ཛཿཛཿཨ་ཝེ་ཤ་ཡ་ཏིཥྛ་ཛྙཱ་ན་ཛཿཧཱུྃ་བཾ་ཧོ༔ ཧཱུྃ༔ མཆོད་པའི་མཁའ་འགྲོ་སྤྲུལ་པའི་དྷཀྐི་མ༔ སྟོང་གསུམ་གང་བར་སྤྲུལ་ནས་ཕྱག་རྒྱ་བསྒྱུར༔ འདབ་ལྡན་ཡིད་འོང་མེ་ཏོག་སྣ་ཚོགས་དང་༔ དྲི་ཞིམ་བདུད་སྤོས་སྣང་གསལ་ཨཱ་ལོ་ཀེ༔ དྲི་ཡི་ཆབ་བཟང་ཞལ་ཟས་རོལ་མོའི་སྒྲ༔ བདེ་གསལ་མི་རྟོག་ཉམས་མྱོང་རྡོ་རྗེའི་གླུ༔ སྣང་བའི་ཕྱག་རྒྱ་སྟོང་པའི་ཡེ་ཤེས་བརྒྱན༔ དགའ་བཞིའི་འགྲོས་ཀྱིས་ཡེ་ཤེས་མཁའ་འགྲོ་མཆོད༔ སྲིད་གསུམ་གཏོར་གཞོང་འགྲོ་དྲུག་གཏོར་མས་སྤྲས༔ དབང་ཤེས་ལང་ཚོའི་འདབ་སྟོང་རྒྱན་གྱིས་བརྒྱན༔ མུ་མཐའ་མེད་པར་ཡོངས་སུ་བཀོད་པ་འདི༔ ཡེ་ཤེས་མཁའ་འགྲོའི་ལྷ་ཚོགས་རྣམས་ལ་མཆོད༔ རྣམ་དག་མཁའ་ལ་འཁྱིལ་བ་ཟིལ་པའི་བཅུད༔ རང་བྱུང་བདུད་རྩི་པཉྩ་ཨ་མྲྀ་ཏ༔ གཙང་དམེ་ཡོངས་གྲོལ་བྷནྡྷར་བསྐྱིལ་བ་འདི༔ ཡེ་ཤེས་མཁའ་འགྲོའི་ལྷ་ཚོགས་རྣམས་ལ་མཆོད༔ གཟུང་འཛིན་མ་རིག་བག་ཆགས་སྣང་བའི་བདུད༔ རང་གྲོལ་སྐུ་གསུམ་ཆོས་དབྱིངས་ཀཱི་ལཱ་ཡས༔ བདག་མེད་སྟོང་པའི་དབྱིངས་སུ་བསྒྲལ་བའི་ཁྲག༔ ཡེ་ཤེས་མཁའ་འགྲོའི་ལྷ་ཚོགས་རྣམས་ལ་མཆོད༔ གཟུགས་སྒྲ་དྲི་རོ་རེག་བྱ་ལ་སོགས་པ༔ མདོར་ན་མཆོད་པའི་སྤྲིན་གྱི་ཕུང་པོ་རྣམས༔ ཡོངས་སུ་བཀོད་ནས་སྤྲུལ་ཏེ་མཆོད་པའི་ཚོགས༔ ཡེ་ཤེས་མཁའ་འགྲོའི་ལྷ་ཚོགས་རྣམས་ལ་འབུལ༔ ཨཱོཾ་ཨཱཿཧཱུྃ་རི་རཏྣ་དྷཀྐི་ནི་སརྦ་གྷྲི་ཧ་ན་མ་ཧཱ་པཱུ་ཙ་ཁཱ་ཧི་ཁཱ་ཧི༔ བསྟོད་པ་ནི། ཧཱུྃ༔ རྒྱས་པའི་མཁའ་འགྲོ་དྷཀྐིའི་གཙོ་མོ་ཆེ༔ མཆོག་གི་མངའ་བདག་སིདྡྷིའི་དཔལ་ལྡན་མ༔ གྲགས་པའི་དཔལ་འབར་དབང་གི་གཟི་བརྗིད་འཕྲོ༔ ནུས་མཐུའི་སྟོབས་རྒྱས་འབྱོར་དྲུག་འབྲས་བུས་ཕྱུག༔ ཡེ་ཤེས་མཁའ་འགྲོ་འཁོར་དང་བཅས་ལ་བསྟོད༔ རྨད་བྱུང་ཐུགས་རྗེས་རྣལ་འབྱོར་བུ་བཞིན་སྐྱོང་༔ ལས་བཞིའི་ཆར་འབེབས་འདོད་པའི་འབྲས་བུ་སྩོལ༔ ལེགས་ཉེས་སྟང་འཛིན་བླ་མེད་བྱ་ར་བྱེད༔ སེར་མོ་དོན་གྲུབ་སེར་མོ་འབུམ་གྱི་གཙོ༔ ཡེ་ཤེས་མཁའ་འགྲོ་འཁོར་དང་བཅས་ལ་བསྟོད༔ ཆོས་ཀྱི་དབྱིངས་ལས་རྟོག་བྲལ་མཁའ་འགྲོའི་སྐུ༔ ལོངས་སྤྱོད་རྫོགས་པའི་དཔལ་ལྡན་དབང་མོ་ཆེ༔ གང་འདུལ་སྤྲུལ་པའི་གར་མཁན་རྗེས་ཆགས་ཞལ༔ སྐུ་གསུམ་དཔལ་དང་ལྡན་པའི་དོན་གྲུབ་མ༔ ཡེ་ཤེས་མཁའ་འགྲོ་འཁོར་དང་བཅས་ལ་བསྟོད༔ འཛབ་ནི༔ ཧཱུྃ༔ རང་རིག་སྟོང་པའི་རང་མདངས་རོལ་པ་ལས༔ ཟུང་འཇུག་སྐྱེ་མེད་དབྱིངས་ཀྱི་མཁའ་འགྲོ་ཤར༔ ཐུགས་ཀར་ཉི་སྟེང་ས་བོན་སྔགས་འཁོར་སྒྱུར༔ ཕྱོགས་བཅུ་དུས་བཞིའི་རྒྱལ་བ་རྒྱ་མཚོ་དང་༔ རྩ་གསུམ་མཁའ་འགྲོ་ཆོས་སྐྱོང་སྲུང་མའི་ཚོགས༔ སྲིད་གསུམ་ཀུན་གྱི་ཚེ་དཔལ་འབྱོར་བའི་སྟོབས༔ འོད་ལྔའི་རྣམ་པར་བསྒྱུར་ནས་དབང་དུ་བསྡུས༔ བསྐྱེད་པའི་ལྷ་སྐུ་བཟླས་པའི་སྔ་འབྲུར་ཐིམ༔ བདེ་སྟོང་རབ་རྒྱས་གཟི་བརྗིད་ཆེས་ཆེར་འབར༔ སྐུ་བཞིའི་ཡེ་ཤེས་མངོན་གྱུར་ཨེ་མ་ཧོ༔ རི་རཏྣ་དྷཀྐི་ནི་བྷ་ར་ཧི་མ་མ་པུཥྟིང་ཀུ་རུ་སརྦ་སིདྡྷི་ཧཱུྃ་སྭཱ་ཧཱ༔ བརྒྱ་སྟོང་ཁྲི་འབུམ་སྐབས་དང་སྦྱར་ཏེ་བཟླ། དངོས་གྲུབ་ཞུ་བ་ནི། ཧཱུྃ༔ མཁའ་འགྲོ་རྒྱ་མཚོ་དབང་གི་དཀྱིལ་འཁོར་དུ༔ སྐུ་ལྔའི་ཡོན་ཏན་མ་ལུས་འདུས་པའི་དཔལ༔ དོན་གྲུབ་སེར་མོའི་སྐུ་དང་གཉིས་སུ་མེད༔ དམ་རྫས་གཏོར་ཆེན་མཆོག་གི་དངོས་གྲུབ་ཞུ༔ ཧཱུྃ༔ དོན་གྲུབ་སེར་མོ་དུས་གསུམ་རྒྱལ་བའི་ཡུམ༔ རིན་ཆེན་དྷཀྐི་རྒྱས་པའི་མཁའ་འགྲོའི་ཚོགས༔ འགྱུར་མེད་རྣམ་དག་སྐུ་ཡི་སྒོ་ཕྱེ་ནས༔ འཆི་མེད་རིག་འཛིན་ཚེ་ཡི་དངོས་གྲུབ་སྩོལ༔ འགག་མེད་རྣམ་དག་གསུང་གི་སྒོ་ཕྱེ་ནས༔ ཚངས་དབྱངས་དྲུག་བཅུ་གསུང་གི་དངོསགྲུབ་སྩོལ༔ སྤྲོས་མེད་རྣམ་དག་ཐུགས་ཀྱི་སྒོ་ཕྱེ་ནས༔ ཕྱག་རྒྱ་ཆེན་པོ་མཆོག་གི་དངོས་གྲུབ་སྩོལ༔ རིན་ཆེན་བུམ་བཟང་དཔག་བསམ་ནོར་བུའི་ཚུལ༔ དགོས་འདོད་ཀུན་འབྱུང་མཆོག་ཐུན་དངོས་གྲུབ་སྩོལ༔ རི་རཏྣ་དྷཀྐི་ནི་བྷ་ར་ཧི་ཀཱ་ཡ་ཝཱཀྐ་ཙིཏྟ་སིདྡྷི་ཧཱུྃ༔ བཀའ་གཏེར་སྲུང་མ་མཆོད་ཅིང་ཚོགས་འཁོར་བཤམས་ལ། ཧཱུྃ༔ སྐྱེ་མེད་དབྱིངས་ཀྱི་མཁའ་ཀློང་ནས༔ ཟག་མེད་བདུད་རྩིའི་བཅུད་འཕྲོས་པས༔ གྷ་ན་ཚོགས་ཀྱི་འཁོར་ལོར་ཕོག༔ འདོད་ཡོན་ལོངས་སྤྱོད་སྣང་སྲིད་བཀང་༔ ཨཱོཾ་ཨཱཿཧཱུྃ་སྭཱ་ཧཱཿཚོགས་ལ་སྤྱན་འདྲེན་པ་ནི༔ ཧཱུྃ༔ ཆོས་དབྱིངས་མཁའ་འགྲོའི་ཕོ་བྲང་ནས༔ སེར་མོ་དོན་གྲུབ་མཁའ་འགྲོའི་གཙོ༔ འབུམ་ཕྲག་དྷཀྐིའི་འཁོར་གྱིས་བསྐོར༔ གནས་འདིར་མདུན་གྱི་མཁའ་ལ་སྤྱོན༔ ཚོགས་ཀྱི་མཆོད་པ་བཞེས་སུ་གསོལ༔ མཆོད་པ་ནི༔ ཧཱུྃ༔ རོ་བརྒྱ་ལྡན་པའི་ཞལ་ཟས་བཤོས༔ མཾ་ས་ཤ་དང་སུ་ར་ཆང་༔ བཟའ་བཏུང་ལོངས་སྤྱོད་སྣ་ཚོགས་པ༔ མཆོད་པར་འབུལ་ལོ་བཞེས་སུ་གསོལ༔ རི་རཏྣ་དྷཀྐི་ནི་བྷ་ར་ཧི་གྷ་ན་པཱུ་ཙ་སརྦ་ས་མ་ཡ་ཁཱ་ཧི་ཁཱ་ཧི༔ བཤགས་པ་ནི༔ ཧཱུྃ༔ ཡེ་ཤེས་མཁའ་འགྲོའི་ལྷ་ཚོགས་དགོངས༔ རང་རྒྱུད་རྨོངས་པས་མི་དགེ་བསགས༔ ཉམས་ཆག་རྟོག་སྒྲིབ་གནོང་ངོ་འགྱོད༔ ཚོགས་མཆོད་འདི་ཡིས་དག་གྱུར་ཅིག༔ ག་ན་པཱུ་ཙ་ཁཱ་ཧི་ཤུདྡྷེ་ཨཱ༔ བསྒྲལ་ལས་ནི༔ ཧཱུྃ༔ དོན་གྲུབ་སེར་མོ་འཇིགས་གཟུགས་བརྔམ༔ རབ་གཏུམ་འཁྲུག་པས་དུག་གསུམ་འབར༔ སྐུ་གསུང་ཐུགས་སྤྲུལ་སྟོང་གསུམ་གང་༔ སྒྲོལ་བྱེད་འབུམ་སྡེས་དགྲ་བགེགས་སྒྲོལ༔ རི་རཏྣ་དྷཀྐི་ནྲི་ཏྲི་དགྲ་བགེགས་ཤ་ཏྲུཾ་མ་ར་ཡ་ཧཱུྃ་ཕཊ༔ བསྟོབ་པ་ནི༔ ཧཱུྃ༔ མཁའ་འགྲོའི་ཚོགས་རྣམ་དགྱེས་པར་རོལ༔ ཁཱ་ཧི་ཁཱ་ཧི་འདོད་ཆགས་ཁྲག་ལ་ཁཱ་ཧི༔ ཁཱ་ཧི་ཁཱ་ཧི་ཞེ་སྡང་རུས་ལ་ཁཱ་ཧི༔ ཁཱ་ཧི་ཁཱ་ཧི་གཏི་མུག་ཤ་ལ་ཁཱ་ཧི༔ ལྷག་མ་ནི༔ ཧཱུྃ༔ མཁའ་འགྲོའི་བཀའ་ཡི་དཀྱིལ་འཁོར་ནས༔ དུར་ཁྲོད་ཉུལ་ཞིང་མཁའ་ལ་རྒྱུ༔ ལས་སུ་གསང་སྔགས་བསྟན་པ་བསྲུང་༔ ཟས་སུ་ཤ་ཁྲག་དམར་ལ་གསོལ༔ སྤྲུལ་པ་འབུམ་འབུམ་མཁའ་འགྲོའི་ཚོགས༔ ལྷག་མའི་ལོངས་སྤྱོད་འདི་བཞེས་ལ༔ རྣལ་འབྱོར་བདག་གིི་འཕྲིན་ལས་སྒྲུབས༔ སརྦ་དྷཀྐི་ནི་ས་མ་ཡ་ཁཱ་ཧི༔ ཆད་ཐོ་ནི༔ ཧཱུྃ༔ སྔོན་ཚེ་བསྐལ་པའི་དང་པོ་ལ༔ ཆོས་དབྱིངས་མཁའ་འགྲོའི་དུར་ཁྲོད་ཏུ༔ གཙོ་མོ་སེར་མོ་དོན་གྲུབ་ཀྱི༔ དམ་ལ་བཞག་པའི་མཁའ་འགྲོ་འབུམ༔ ཤ་ཁྲག་གཏོར་མ་འདི་བཞེས་ལ༔ གསང་སྔགས་བླ་མེད་བསྟན་པ་སྲུངས༔ དགྲ་བགེགས་སྒྲོལ་ལ་བར་ཆད་ཟློག༔ བཅོལ་བའི་འཕྲིན་ལས་གྲུབ་པར་མཛོད༔ ཧཱུྃ། དེ་འོག་བར་གྱི་བསྐལ་པ་ལ། །ཁམས་ཀྱི་སྲིང་མོ་རྫོང་གསུམ་གྱི། །གནས་མཆོག་ཆགས་རུ་ཕུག་སེར་ནས། །ཁམས་པ་ཉི་མ་གྲགས་པ་ཡིས། །ཟབ་ཆོས་གཏེར་སྒོ་ཕྱེ་བའི་ཚེ། །གཡར་དམ་ཕོག་པའི་ལྷ་འདྲེ་རྣམས། །དམར་གྱི་གཏོར་མ་འདི་བཞེས་ལ། །བཅོལ་བའི་འཕྲིན་ལས་གྲུབ་པར་མཛོད། །ཧཱུྃ། ད་ལྟ་སྔགས་འཆང་བདག་ཉིད་ཀྱིས། །གསལ་བ་གསུམ་གྱི་དཀྱིལ་འཁོར་དུ། །ཤེས་པ་གསུམ་གྱི་གཟེར་གདབ་ནས། །མགྲོན་ལ་བོས་པའི་བཀའ་སྐྱོང་རྣམས། །དམར་གྱི་གཏོར་མ་འདི་བཞེས་ལ། །བཅོལ་བའི་འཕྲིན་ལས་གྲུབ་པར་མཛོད། བསྟན་མ་ནི༔ ཧཱུྃ༔ བཀའ་ཡི་བསྲུང་མ་དམ་ཚིག་ཅན༔ བོད་ཁམས་སྐྱོང་བའི་བསྟན་མ་རྣམས༔ བཤལ་ཆུའི་གཏོར་མ་འདི་ལོང་ལ། །བླ་མེད་བསྟན་སྐྱོང་འཕྲིན་ལས་སྒྲུབས༔ བྷྱོ་ས་མ་ཡ་ཁཱ་ཧི༔ གཏོར་གཞོང་སྦུབ་ཅིང་༔ ཧཱུྃ༔ མཁའ་འགྲོ་ཁྲོས་པའི་ཏིང་འཛིན་གྱིས། །བདེ་བ་ཆེན་པོའི་བྲོ་བརྡུང་བས། །སྟོང་པ་ཆེན་པོའི་ཡེ་ཤེས་རྒྱས། །སྒབ་འདྲེ་འབྱུང་པོ་དམ་སྲིའི་ཚོགས། །ནམ་ཡང་ལྡང་བར་མ་བྱེད་ཅིག །དམ་སྲི་སརྦ་སྟམ་བྷ་ཡ་ནན། རྫོགས་རིམ་ནི༔ ཧཱུྃ༔ སྣང་བ་དག་པ་གཞལ་ཡས་ཁང་༔ གཟུང་འཛིན་བྲལ་བ་ཡི་དམ་ལྷ༔ རང་ངོར་གསལ་བ་ཆོས་ཀྱི་སྐུ༔ སྐྱེ་མེད་མཁའ་འགྲོའི་ལྷ་ཚོགས་རྣམས༔ ཆོས་དབྱིངས་མཁའ་འགྲོའི་གནས་སུ་གཤེགས༔ ཨ་ཨཱཾཿསྨྲ་བསམ་བརྗོད་མེད་ཡུམ༔ རང་སེམས་སྐྱེ་འགགས་གནས་གསུམ་འདི༔ མཁའ་འགྲོའི་སྐུ་གསུམ་རོལ་པར་ཤར༔ བསྔོ་སྨོན་ནིི༔ ཧཱུྃ༔ གསང་བའི་བསྐྱེད་རྫོགས་བསྒོམ་བཟླས་མཐུས༔ ལྟ་བ་གཡེལ་བ་སོར་ཆུད་ཅིང་༔ སྒོམ་པ་བྱིང་བ་ཀློང་གྱུར་ཏེ༔ སྤྱོད་པ་ཚོགས་གཉིས་མཐར་ཕྱིན་ཞིང་༔ འབྲས་བུ་སྐུ་བཞི་མངོན་གྱུར་ཤོག༔ ཤིས་པ་ནིི༔ ཧཱུྃ༔ ཡེ་ཤེས་དབྱིངས་ཀྱི་ཕོ་བྲང་ནས༔ ཕག་མོ་ཆོས་སྐུའི་བཀྲ་ཤིས་ཤོག༔ ཡེ་ཤེས་ལྔ་ལྡན་ཕོ་བྲང་ནས༔ ཕག་མོ་ལོངས་སྐུའི་བཀྲ་ཤིས་ཤོག༔ མཁའ་སྤྱོད་གནས་ཡུལ་དུར་ཁྲོད་ནས༔ ཕག་མོ་སྤྲུལ་སྐུའི་བཀྲ་ཤིས་ཤོག༔ བཀའ་ཡི་འཕྲིན་ལས་དཀྱིལ་འཁོར་ནས༔ སྤྲུལ་པ་འབུམ་སྡེའི་བཀྲ་ཤིས་ཤོག༔ ཅེས་པ་འདི་ཡང་དགོས་པར་སེམས་ཏེ་ཕག་གདོང་ནག་མོའི་རང་གཞུང་བྱིན་རླབས་ཀྱི་གནད་ཆེ་བས་སོར་བཞག །སྒྱུར་འོས་རྣམས་དོན་གྲུབ་མའི་བཞུང་བཞིན་མཚམས་སྦྱར་བའི་ལས་བྱང་ཆོག་བསྒྲིགས་གཏེར་སྟོན་གྱིས་མཛད་པ་ལྟར་ལ་ཅུང་ཟད་གོ་རིམ་འཁྲུགས་པ་རྣམས་པདྨ་ཐེག་མཆོག་བསྟན་པའི་རྒྱལ་མཚན་གྱིས་བསྒྲིགས་པ་དགེ་ཞིང་ཤིས་པར་གྱུར་ཅིག། །། མངྒ་ལཾ། །རྒྱས་མཛད་དོན་གྲུབ་རྣལ་འབྱོར་མའི། །སྒྲུབ་འཕྲིན་པར་དུ་བསྒྲུབ་པའི་དགེ། ཉིན་བྱེད་འོད་སྟོང་རབ་འབར་བས། །འབྱོར་དྲུག་པད་ཚལ་རྒྱས་གྱུར་ཞིང་། །ཅེས་པའང་རིག་འཛིན་མིང་གིས་སོ།། །།སརྦ་མངྒ་ལཾ། ཕག་མོ་སེར་མོའི་ཟབ་ཐིག་ལས། རྒྱས་པའི་སྦྱིན་སྲེག་བཞུགས། །བླ་མ་དང་མཅོམ་ལྡན་འདས་མ་ཕག་གདོང་སེར་མོ་ལ་ཕྱག་འཚལ་ཞིང་སྐྱབས་སུ་མཆིའོ། འདི་ཉིད་ཀྱི་སྒོ་ནས་རྒྱས་པའི་སྦྱིན་སྲེག་བྱ་བར་འདོད་པ་ལ་སྔོན་འགྲོ་དང་དངོས་གཞི་རྗེས་གསུམ་ལས། དང་པོ་ནི། གནས་དབེན་ཞིང་ཡིད་དུ་འོང་བ་ཤིང་རྩི་དང་ལོ་འབྲས་རྒྱས་ཤིང་སེར་ལ་དངས་པའི་སར། ས་མ་དུལ་བའི་རིགས་ལ་སྒྲུབ་ཆེན་ཞིག་ནས་འབྱུང་བ་ལྟར་ས་བརྟག་བླང་སྦྱང་བ་དང་ལྟོ་འཕྱེ་བརྟག་པ་སོགས་ཚུལ་བཞིན་བྱས་པའི་ས་ལ། ཇི་སྐད་དུ་གཞུང་ལས། མ་མོ་མཁའ་འགྲོའི་རྣལ་འབྱོར་པས༔ ཚེ་དང་བསོད་ནམས་རྒྱས་འདོད་ན༔ སྟེག་བུ་སེར་པོ་གྲུ་བཞིའི་སྟེང་༔ རཾ་གྱི་ཁོག་པར་རི་འདྲི་ཞིང་༔ རྒྱས་པའི་ཤིང་གི་གྲུ་བཞིར་བརྩེགས༔ ཞེས་པ་ལྟར། མཎྜལ་མདའ་གང་གྲུ་བཞི་པ་བྱས་པའི་དབུས་སུ་རཾ་གྱི་དཀྱིལ་དུ་རི་སེར་པོ་བྲིས་པའི་ཕྱི་རོལ་གྲུ་བཞིར་བཅད་པའི་ཁ་ཁྱེར་ལ་རིན་པོ་ཆེས་མཚན་པ་འབྲི། རྒྱ་ཤུག་སོགས་རྒྱས་པའི་ཤིང་གུར་གུམ་གྱི་ཁུ་བ་ལ་དྲི་བཟང་བཏབ་པས་ཁ་དོག་བསྒྱུར་བ་གྲུ་བཞིར་བརྩིགས་ལ། གཡས་སུ་རྒྱས་པའི་ཤིང་སོར་བཅུ་གཉིས་པ་གྲུ་བཞིར་གཞོགས་ལ་རྩེ་མོར་མེ་ཏོག་གིས་མཚན་པ་ལ་ཚེ་བསོད་དཔལ་འབྱོར་ཐམས་ཅད་པུཥྟིང་ཀུ་རུ་ཡེ་སྭཱ་ཧཱཿ ཞེས་པའི་འདོད་གསོལ་བྲིས་པར་སྦྲང་རྩི་དང་ཏིལ་མར་གྱིས་སྦགས་པ་གྲངས་ལྡན་དང་། མར་ཁུ། ཏིལ། ཡུངས་ཀར། ཟས་སྣ། དཱུརྦ། འབྲས། སོ་བ། ནས། སྲན་མ། གྲོ། ཀུ་ཤ། ཕྲུམ། འབྲུ་སྣ། དར་སྣ། ཤིང་ཏོག་སྟེ་སྤྱི་རྫས་དང་། ཁྱད་པར་གྱི་རྫས་གུར་གུམ། གིའུ་ཝང་། བུ་རམ། སྦྲང་རྩི། གསེར། དར་སེར། སྤོས་ཤེལ། ཤིང་འབྲས་སྣ་ཚོགས་སོགས་སེར་ཆས་རྒྱས་རྫས་གང་འབྱོར་བཤམས། གཡོན་དུ་འཇིག་རྟེན་དང་འཇིག་རྟེན་ལས་འདས་པའི་མེ་ལྷར་ཆུ་གཉིས་སྔོན་དུ་འགྲོ་བའི་ཉེར་སྤྱོད་སྨན་རག་གཏོར་མ་དང་། མདུན་དུ་རྡོར་དྲིལ། ཌཱ་མ་རུ། ཀུ་ཤ། རླུང་གཡབ། དགང་གཟར་བླུགས་ཁ་སྦྱར་ཏེ་མ་བྲལ་བ། ལས་བུམ་རྣམས་བཤམས། དོན་གྲུབ་སེར་མོའི་ལས་བྱང་གཞུང་བསྲང་ལྷག་གཏོར་ཡན་གྲུབ་ནས་ལས་བུམ་བསང་སྦྱངས། །པད་ཟླར་བྷྲུྃ་ལས་བུམ་པ་བཅུད་ལྡན་དབུས། །རྟ་མགྲིན་དམར་པོ་རྡོ་རྗེ་དྲིལ་བུ་འཛིན། ཕག་མོ་ཡུམ་འཁྱུད་དཔལ་གྱི་ཆས་དགུ་རྫོགས། རྟ་སྐད་འཚེར་ཞིང་གྱད་ཀྱི་དོར་སྟབས་བཞུགས། །སྐུ་ལས་རང་འདྲའི་ཁྲོ་ཆུང་དཔག་མེད་འཕྲོས། །གདོན་བགེགས་ཚར་བཅད་བུམ་པའི་ཆུ་དང་འདྲེས། ཨཱོཾ་བཛྲ་ཀྲོ་ཏ་ཧྱ་གྷྲཱི་ཝ་ཧུ་ལུ་ཧུ་ལུ་ཧཱུྃ་ཕཊཿ ཅེས་གང་མང་བཟླས། ལྷ་ཉིད་ཞུ་ནས་བུམ་པའི་ཆུ་ལ་ཐིམ། །བུམ་ཆུ་ནུས་ལྡན་བདུད་རྩིའི་རྒྱ་མཚོར་གྱུར། །གཉིས་པ་དངོས་གཞི་ནི་དར་སེར་གྱི་གོས། གསེར་སོགས་རིན་པོ་ཆེ་ལས་བྱས་པའི་རྒྱན་གྱིས་མཛེས་པར་བརྒྱན་ཏེ། བཞེངས་ནས་རོལ་མོ་འཁྲོལ་ཞིང་། སྭཱ་བྷཱ་ཝའི་སྔགས་ཀྱིས་སྦྱངས། སྟོང་པའི་ངང་ལས་རང་ཉིད་སྐད་ཅིག་གིས་དབང་ཆེན་ཁྲོ་བོའི་རྒྱལ་པོ་སྐུ་མདོག་དམར་ནག་མེ་ཡི་ཚྭ་ཚྭ་འཕྲོ་བ་ཞལ་གཅིག་ཕྱག་གཉིས་ཀྱི་གཡས་རྡོ་རྗེ་ནམ་མཁར་འཕྱར་ཞིང་གཡོན་པས་དྲིལ་བུ་དཀུར་བརྟེན་པ་ཕག་མོ་ཡུམ་དང་མཉམ་པར་སྦྱོར་ཞིང་། སྤྱི་གཙུག་ནས་རྟ་མགོ་འཚེར་བས་ཁམས་གསུམ་དབང་དུ་སྡུད་ཅིང་ཞབས་གཉིས་བརྐྱང་བསྐུམ་དོར་སྟབས་སུ་བཞུགས་པའི་ཐུགས་ཀའི་ཧྲཱིཿལས་དམར་ནག་མེ་ཡི་ཕྲེང་བ་ཕྱོགས་བཅུར་འཕྲོས་པས་གདོན་བགེགས་ལོག་འདྲེན་ཐམས་ཅད་རྒྱ་མཚོའི་ཕ་རོལ་དུ་བསྐྲད་ཅིང་ཐལ་བའི་རྡུལ་དུ་བརླག །ཚུར་འདུས་རྡོ་རྗེའི་ས་གཞི་ར་གུར་འབར་བའི་ཕྲེང་བ་འཁྲུག་པ་དང་བཅས་པའི་བསྲུང་བའི་འཁོར་ལོར་གྱུར་པར་བསམས་ཤིང་། ཧཱུྃ། ང་ནི་རབ་འཇིགས་དབང་ཆེན་སྐུ། །ཉོན་ཅིག་བགེགས་དང་ལོག་འདྲེན་ཚོགས། །འདི་རུ་མ་འདུག་གཞན་དུ་སོང་། །བསྒོ་བའི་བཀའ་ལ་མི་ཉན་ན། །དབང་ཆེན་ཁྲོས་པའི་ཐུགས་ཀ་ནས། །ཁྲོ་བོ་ཁྲོ་མོ་མཚོན་ཆ་དང་། །རབ་འབར་མེ་ཡི་ཕྲེང་བ་ཡིས། །ལུས་ངག་ཐལ་བ་རྡུལ་དུ་གཏོང་། དེ་བས་སྲིད་པ་གཞན་དུ་དེངས། ཨཱོཾ་བཛྲ་ཀྲོ་ཏ་ཧྱ་གྷྲཱི་ཝ་གནོད་བྱེད་འབྱུང་པོ་ཨུ་ཙ་ཏ་ཡ་ཕཊ། ཨཱོཾ་སུམ་བྷཱ་ནི་སོགསབརྗོད། ཧཱུྃ། འཁོར་འདས་གདོད་ནས་དག་པ་ལ། །བགེགས་དང་ལོག་འདྲེན་མི་དམིགས་ཀྱང་། །མ་རིག་འཁྲུལ་པའི་གཉིས་འཛིན་བགེགས། །རང་སྣང་ཆོས་སྐུའི་ཀློང་དུ་བསྟིམས། །འགག་མེད་རིག་པའི་རང་རྩལ་ལས། །མི་ཤིགས་རྡོ་རྗེ་ར་བ་དང་། །ཡེ་ཤེས་མེ་ཡི་གུར་ཁང་ལ། །སུས་ཀྱང་མི་ཆོད་མི་ཤིགས་པའི། །མཚམས་ཀྱི་དཀྱིལ་འཁོར་ལྷུན་གྱིས་གྲུབ། ཨཱོཾ་བཛྲ་རཀྵ་ཧཱུྃ་བྷྲཱུྃཿ ཞེས་བརྗོད་ཅིང་མེ་ཐབ་ལན་གསུམ་བསྐོར་ཏེ་ཁ་ལྷོར་ཕྱོགས་པས་གདན་དུ་འཁོད་དེ། རྫས་རྣམས་ལ་ལས་བུམ་གྱི་ཆུས་འཐོར་ཞིང་སྭ་བྷཱ་ཝའི་སྔགས་ཀྱིས་སྦྱངས༔ སྟོང་པའི་ངང་ལས་བྷྲཱུྃ་ལས་རིན་པོ་ཆེའི་སྣོད་ཡངས་ཤིང་རྒྱ་ཆེ་བ་རྣམས་ཀྱི་ནང་དུ་ཨཱོཾ་ཨཱཿཧཱུྃ་འོད་དུ་ཞུ་བ་ལས་བྱུང་བའི་མཆོད་རྫས་དང་སྲེག་རྫས་ཀྱི་དངོས་པོ་རྣམས་ངོ་བོ་ཟག་པ་མེད་པའི་ཡེ་ཤེས་ཀྱི་བདུད་རྩིའི་རྒྱ་མཚོ་ཆེན་པོ་ལ་རྣམ་པ་སོ་སོའི་མཚན་ཉིད་འགོག་པ་མེད་པར་ཡོངས་སུ་འཆར་བའི་མཆོད་པའི་སྤྲིན་གྱི་ཕུང་པོ་མཐའ་ཡས་པ་རབ་འབྱམས་ནམ་མཁའི་མཐའ་དང་མཉམ་པར་གྱུར། ཨཱོཾ་ཨཱཿཧཱུྃ་ཨཱོཾ་ཧཱུྃ་ཏྲཱཾ་ཧྲཱིཿཨཱཿཞེས་བདུན་ནམ་གསུམ་བརྗོད། དེ་ནས་བྲམ་ཟེའི་ཁྱིམ་ནས་མེ་བླངས་ལ་སྤར་ནས་རླུང་གཡབ་ཀྱིས་གཡབ་ཅིང་། ཧཱུྃ། གོས་དཀར་མོ་ཡི་ངོ་བོ་ཉིད། །འབྱུང་བ་མེ་ཡི་ལྷ་མོ་ཡིས། །ཚེ་བསོད་རྒྱས་པའི་མེ་སྤོར་ལ། །ཕན་བདེའི་ཕུན་ཚོགས་རྒྱས་པར་མཛོད། །དམ་ཚིག་སྒྲོལ་མའི་སྒྱུ་འཕྲུལ་གར། །སྟོབས་ལྡན་རླུང་ལ་དབང་བསྒྱུར་མས། །དྲི་གཞོན་ཁྲོས་པའི་ཤུགས་དྲག་གིས། །བ་དན་ཡོབས་ལ་བྱིན་ཟ་སྤོར། ཨཱོཾ་ཨགྣེ་ཡེ་ཛྭ་ལ་རཾ་རཾ༔ ཅེས་བརྗོད་ཅིང་ཞུན་མེ་བླུགས་གཟར་བདུན་གྱིས་གསོ། དེ་ནས་ཀུ་ཤ་ཐོགས་ལ། ཨཱོཾ་ཀུ་ཤ་འདི་ནི་གཙང་ཞིང་དགེརྩ་གསུམ་དཀོན་མཆོག་མཉེས་བྱེད་རྫས། །འདབ་ལྡན་ཀུན་གྱི་སྙིང་པོ་སྟེ། །བདག་གི་གེགས་སོགས་མི་མཐུན་ཚོགས། ཞི་ཞིང་ཤིས་པར་མཛད་དུ་གསོལ། ཨཱོཾ་བཛྲ་སཏྭ་ཨཱཿ ཅེས་ཐབ་ཀྱི་ཁ་ཁྱེར་ལ་ཕྱོགས་བཞིར་རྩེ་མོ་ཡོང་བར་བྱས་ཏེ་སྔ་མའི་རྩེས་ཕྱི་མའི་རྩ་བ་ནོན་པར་བྱ་བ་བ་ལང་གི་རྣ་བའི་དབྱིབས་སུ་དགྲམ་མོ། གཉིས་པ་དངོས་གཞི་ལ། འཇིག་རྟེན་པ་དང་འདས་པའི་མེ་ལྷ་མཆོད་པ་གཉིས་ལས་དང་པོ་ལྷ་བསྐྱེད་པ་ནི། སྭ་བྷཱ་ཝའི་སྔགས་ཀྱིས་སྦྱངས། མེ་ཐབ་མི་དམིགས་སྟོང་པའི་ངང་། །སྟོང་པའི་རང་རྩལ་འགག་མེད་ལས། །རིན་ཆེན་ལས་གྲུབ་གཞལ་ཡས་ཁང་། །གྲུ་བཞི་སྒོ་བཞི་རྟ་བབས་སོགས། །མཚན་ཉིད་ཡོངས་རྫོགས་ལྟེ་བ་ལ། །པདྨ་ཟླ་བའི་གདན་སྟེང་དུ། །རཾ་གྱི་ཡི་གེ་ལས་བྱུང་བའི། །དྲང་སྲོང་ཆེན་པོ་མེ་ཡི་ལྷ། །སྐུ་མདོག་གསེར་སྦྱངས་བཙོ་མའི་མདོག །ཞལ་གཅིག་ཕྱག་ནི་གཉིས་པ་སྟེ། །གཡས་གཡོན་མེ་རླུང་བ་དན་བསྣམས། །རྩལ་ལྡན་ར་སྐྱེས་ཁམ་པ་བཅིབས། །སྣ་ཚོགས་དར་དང་རིན་པོ་ཆེའི། །རྒྱན་རྣམས་ཀུན་གྱིས་རྣམ་པར་བརྒྱན། །ཞི་འཛུམ་སྒེག་པའི་ཉམས་དང་ལྡན། །འབར་བའི་ཕྲེང་པ་འཁྲིགས་པ་ཡི། །དབུས་ན་བཞུགས་པའི་གནས་གསུམ་དུ། །ཡི་གེ་གསུམ་གྱིས་མཚན་པ་ལས། །ལྕགས་ཀྱུ་ལྟ་བུའི་འོད་ཟེར་གྱིས། །རང་དང་འདྲ་བའི་ཡེ་ཤེས་པ། །རང་བཞིན་གནས་ནས་སྤྱན་དྲངས་གྱུར། །སྤྱན་འདྲེན་ནི། ཨཱོཾ་ཚུར་སྤྱོན་འབྱུང་བ་མེ་ཡི་ལྷ༔ ཆིབས་སུ་ར་སྐྱེས་ཁམ་པ་བཅིབས༔ མེ་རླུང་བ་དན་ཕྱག་ན་བསྣམས༔ གནས་འདིར་སྤྱན་འདྲེན་གཤེགས་སུ་གསོལ༔ ཚེ་དང་བསོད་ནམས་དཔལ་འབྱོར་རྣམས༔ རབ་ཏུ་རྒྱས་པར་བྱ་བའི་ཕྱིར༔ རང་བཞིན་དག་པའི་གནས་མཆོག་ནས༔ དམ་ཚིག་དབང་གིས་གཤེགས་སུ་གསོལ༔ ཨཱོཾ་ཨགྣི་དེ་ཝ་རཱ་ཛ་ས་པ་རི་ཝཱ་ར་བཛྲ་ས་མཱ་ཛཿ བཞུགས་སུ་གསོལ་བ་ནི། ཧཱུྃ། དྲང་སྲོང་ཆེན་པོ་འཁོར་དང་བཅས། །འབར་བ་མེ་ཡི་གཞལ་ཡས་འདིར། །རིན་པོ་ཆེ་དང་པད་ཟླའི་ཁྲིར། །མི་གཡོ་དགྱེས་ཤིང་བརྟན་པར་བཞུགས། །བཛྲ་ས་མ་ཡ་ཏིཥྛ་ལྷན། ཕྱག་འཚལ་བ་ནི། ཧཱུྃ། གཟི་བརྗིད་འབར་བ་སྣང་བའི་གཏེར། །རབ་འབྱམས་འཕྲིན་ལས་བསྒྲུབ་པའི་ལྷ། །འདོད་དགུ་འཛོམས་པའི་ཡིད་བཞིན་ནོར། །མེ་ཡི་ལྷ་ལ་གུས་ཕྱག་འཚལ། ཨ་ལ་ལ་ཧོ༔ ཨ་ཏི་པུ་ཧོཿ པྲ་ཏིཙྪ་ཧོ༔ མཆོད་པ་ནི། ཧཱུྃ། དངོས་བཤམས་ཡིད་ལས་བྱུང་བ་ཡི། །མེ་ཏོག་བདུག་སྤོས་མར་མེ་དྲི། །རོ་ལྡན་ཞལ་ཟས་སྙན་པའི་སྒྲ། །ཤ་ལྔ་བདུད་རྩི་རྣམ་པ་ལྔ། །བདུད་རྩི་སྨན་དང་རཀྟ་དམར། །དམ་རྫས་བརྗིད་ལྡན་གཏོར་མ་སོགས། །ནམ་མཁའ་གང་བའི་མཆོད་པའི་སྤྲིན། །བློ་ཡིས་བླངས་ཏེ་འབུལ་ལགས་ན། །དགྱེས་པར་བཞེས་ལ་འཕྲིན་ལས་མཛོད། ཨཱོཾ་ཨགྣི་དེ་ཝ་རཱ་ཛ་ས་པ་རི་ཝཱ་ར་ཨགྷཾ་ནས། ཤབྟ་ཨམྲི་ཏ་རཀྟ་བ་ལིངྟ་པཱུ་ཙ་ཁཱ་ཧི། བསྟོད་པ་ནི། ཧཱུྃ། གཟི་བརྗིད་ལྡན་པ་མེ་ཡི་ལྷ། །གསེར་མདོག་རིན་ཆེན་རྒྱན་གྱིས་བརྒྱན། །ཐབས་ཤེས་ཕྱག་ན་མེ་རླུང་བསྣམས། །ཞི་འཛུམ་བརྗིད་པའི་ལང་ཚོར་ལྡན། མྱུར་བའི་ཤུགས་ལྡན་ར་སྐྱེས་བཅིབས། །མི་ཟད་འཕྲིན་ལས་རྒྱ་མཚོའི་མཛོད། །བསྲེག་བྱ་བཟའ་པའི་ལྷ་ལ་བསྟོད། དེ་ནས་བྱོན་ཟན་འབུལ་བ་ནི། མེ་ལྷའི་ལྗགས་རྡོ་རྗེའི་རྣམ་པ་ཅན་སེར་པོ་ལ་རཾ་དང་དགང་བླུགས་ཀྱི་ཁར་རཾ་ཡིག་འོད་ཟེར་དང་བཅས་པས་མཚན་པར་གྱུར་པར་བསམས་ཤིང་། ལག་གཡོན་ཁུ་ཚུར་བཅིངས་པའི་སྟེང་ན་མཐེ་བོས་གིས་བཀབ་པ་དེ་བཞིན་གཤེགས་པའི་ཁུ་ཚུར་བྱས་པའི་འཛུབ་མོ་བརྐྱང་བ་གན་རྐྱལ་བྱས་པས་དགང་གཟར་མར་ཁུས་དགང་བ་བཟུང་། གཡས་པའང་དེ་བཞིན་དུ་བྱས་པ་ཁ་ཐུར་དུ་སྦུབ་པས་བླུགས་གཟར་གྱི་ཡུ་བ་བཟུང་བ་གཡོན་པའི་མཛུབ་མོའི་ཐད་ཀར་གཡས་པའི་ཁུ་ཚུར་བཞག་ནས་འཛིན་པ་བྱང་ཆུབ་མཆོག་གི་ཕྱག་རྒྱས་ལག་པ་གཉིས་པུས་མོའི་ནང་ནས་ཕྱིར་མི་འདའ་བར་གཡས་སུ་བསྐོར་ཏེ་འབུལ་ཞིང་། ཨཱོཾ་ཨགྣཱེ་ཡེ་ཨ་དི་བྱ་ཨ་དི་བྱ་ཨ་བི་ཤ་ཨ་བི་ཤ་མ་ཧཱ་ཤྲཱི་ཧ་བྱ་ཀ་བྱ་བཱ་ཧ་ན་ཡེ་སྭཱ་ཧཱཿ ཨཱོཾ་ཨགྣཱེ་ཡེ་སྭཱ་ཧཱཿ བདག་ཅག་དཔོན་སློབ་འཁོར་དང་བཅས་པའི་ཚེ་བསོད་དཔལ་འབྱོར་ཐམས་ཅད་པུཥྟིང་ཀུ་རུ་ཡེ་སྭཱ་ཧཱཿ ཞེས་འབུལ། ཡམ་ཤིང་ལ། ཨཱོཾ་བོ་དྷིབྲིཀྵ་ཡེ་སྭཱ་ཧཱ༔ བདག་ཅག་དཔོན་སློབ་འཁོར་དང་བཅས་པའི་ཚེ་བསོད་དཔལ་འབྱོར་ཐམས་ཅད་པུཥྟིང་ཀུ་རུ་ཡེ་སྭཱ་ཧཱཿ ཨཱོཾ་ཨགྣཱེ་ཡེ་སྭཱ་ཧཱཿ བདག་ཅག་དཔོན་སློབ་འཁོར་དང་བཅས་པའི་བསོད་དཔལ་འབྱོར་ཐམས་ཅད་པུཥྟིང་ཀུ་རུ་ཡེ་སྭཱ་ཧཱ༔ ཏིལ་ལ། ཨཱོཾ་སརྦ་པཱ་པཾ་ད་ཧ་ན་བཛྲཱ་ཡ་སྭཱ་ཧཱཿ བདག་ཅག་དཔོན་སློབ༴ཡུངས་ཀར་ལ། ཨཱོཾ་སརྦ་ཨརྠ་ས་དྷཱ་ཡ་ཧཱཿ བདག་ཅག་དཔོན་སློབ༴ཟས་སྣ་ལ། ཨཱོཾ་སརྦ་སཾ་བྷ་དེ་སྭཱ་ཧཱཿ བདག་ཅག་དཔོན་སློབ་འཁོར་དང་༴དཱུརྦ་ལ། ཨཱོཾ་བཛྲ་ཨཱ་ཡུ་ཥེ་སྭཱ་ཧཱཿ བདག་ཅག་དཔོན་སློབ༴འབྲས་ལ། ཨཱོཾ་བཛྲ་པུཥྟཱ་ཡེ་སྭཱ་ཧཱཿ བདག་ཅག་དཔོན་སློབ༴སོ་བ་ལ། ཨཱོཾ་བཛྲ་བི་ཛཱ་ཡ་སྭཱ་ཧཱཿ བདག་ཅག་དཔོན་སློབ༴ནས་ལ། ཨཱོཾ་མ་ཧཱ་བེ་གྷཱ་ཡ་སྭཱ་ཧཱཿ བདག་ཅག་དཔོན་སློབ༴སྲན་མ་ལ། ཨཱོཾ་བཛྲ་མ་ཧཱ་བ་ལཱ་ཡ་སྭཱ་ཧཱཿ བདག་ཅག་དཔོན་སློབ༴གྲོ་ལ། ཨཱོཾ་བཛྲ་གྷསྨ་རེ་སྭཱ་ཧཱཿ བདག་ཅག་དཔོན་སློབ༴ཀུ་ཤ་ལ། ཨཱོཾ་ཨ་པྲ་ཏི་ཧ་ཏ་བཛྲཱ་ཡ་སྭཱ་ཧཱཿ བདག་ཅག་དཔོན་སློབ༴ཕྲུམ་ལ། ཨཱོཾ་ཨཱཿསྭཱ་ཧཱཿ བདག་ཅག་དཔོན་སློབ༴འབྲུ་སྣ་ལ། ཨཱོཾ་ཛྲིཾ་སྭཱ་ཧཱཿ བདག་ཅག་དཔོན་སློབ༴ཤིང་ཏོག་ལ། ཨཱོཾ་བཛྲ་ཤྲཱི་བ་ཡ་སྭཱ་ཧཱཿ བདག་ཅག་དཔོན་སློབ༴དར་སྣ་ལ། ཨཱོཾ་བཛྲ་ཝསྟྲ་ཡེ་སྭཱ་ཧཱཿ བདག་ཅག་དཔོན་སློབ༴སྲེག་རྫས་སྔགས་མེད་པའི་རིགས་ཐམས་ཅད་ལ། ཨཱོཾ་ཀུ་རུ་ཀུ་རུ་སྭཱ་ཧཱཿ བདག་ཅག་དཔོན་སློབ༴དེ་ནས་མཆོད་པ་ནི། ཧཱུྃ༔ འཇིག་རྟེན་འདིའམ་གཞན་དག་ན། །ཕྱི་ནང་གསང་བ་དེ་ཁོ་ནའི། །མཆོད་པར་འོས་པའི་མཐུན་རྫས་རྣམས། །མེ་ལྷ་འཁོར་དང་བཅས་ལ་འབུལ། ཨཱོཾ་ཨགྣཱེ་ཡེ་རཱ་ཛ་ས་པ་རི་ཝཱ་ར་ཨརྒྷཾ་ནས། ཤཔྟ་ཨམྲི་ཏ་རཀྟ་བ་ལྀངྟ་པཱུ་ཙ་ཁཱ་ཧི། བསྟོད་པ་ནི། ཧཱུྃ། འཇིག་རྟེན་དབང་ཕྱུག་ཚངས་པའི་སྲས། །གཟི་བརྗིད་ཉི་མ་འབུམ་དུ་འབར། །དགོས་འདོད་རེ་སྐོང་ནོར་བུའི་མཛོད། །འཕྲིན་ལས་མངའ་བདག་ཁྱོད་ལ་བསྟོད། ཕྲིན་ལས་བཅོལ་བ་ནི། མེ་ལྷའི་རྒྱལ་བོ་ཁྱོད་ཉིད་ཀྱིས། །ཚེ་བསོད་མ་ལུས་རྒྱས་པ་དང་། །ཡེ་ཤེས་མེ་ཡི་ལས་རབ་འབྱམས། །མ་ལུས་གྲུབ་པར་མཛད་དུ་གསོལ། ཨགྣཱེ་ཡེ་ཛྭ་ལ་གཙྪ་མུས་ཡེ་ཤེས་ཀྱི་མེ་ལྷ་ཐབ་ཀྱི་ལྷོར་གཤེགས་ནས་དཔང་པོ་མཛད་པར་གྱུར། གཉིས་པ་འདས་པའི་མེ་ལྷ་མཆོད་པ་ནི། ཧཱུྃ་ཧྲཱི༔ དམ་ཚིག་མེ་ལྷའི་ལྟོ་བའི་ཀློང་། །ཟབ་ཅིང་རྒྱ་ཆེའི་ནང་ཉིད་དུ། །ཚད་མེད་བཞི་ལྡན་སྣང་སྟོང་འཇའ་གུར་ཀློང་། ཆོས་ཀྱི་འབྱུང་གནས་ཨེ་ཡི་ཕོ་བྲང་དབུས༔ ཞེས་པ་ནས། སྐུ་གསུམ་དཔལ་དང་ལྡན་པའི་དོན་གྲུབ་མ། ཡེ་ཤེས་མཁའ་འགྲོ་འཁོར་དང་བཅས་ལ་བསྟོད༔ ཅེས་བསྟོད་པས་ལྷ་ཚོགས་ཐམས་ཅད་སྐུ་མདོག་བཙོ་མའི་གསེར་གྱི་རི་བོ་ལ་ཉི་མ་བྱེ་བའི་འོད་ཀྱིས་འཁྱུད་པ་ལྟ་བུའི་སྐུ་ལས་འོད་ཟེར་གྱི་ཚོགས་མཐའ་ཡས་པར་འཕྲོས་པས་རང་གཞན་ཐམས་ཅད་ཀྱི་ལེགས་ཚོགས་ཀྱི་ཡོན་ཏན་མ་ལུས་པར་རྒྱ་ཆེར་རྒྱས་པར་མཛད་པའི་ལས་ལ་གཅིག་ཏུ་དགྱེས་པར་མོས་ལ། བྱོན་ཟན་འབུལ་བ་ནི། ལྷ་ཚོགས་རྣམས་ཀྱི་ལྗགས་རྡོ་རྗེའི་རྣམ་པ་ཅན་སེར་པོ་ལ་རཾ་དང་དགང་བླུགས་ཀྱི་ཁར་རི་ཡིག་འོད་ཟེར་དང་བཅས་པས་མཚན་པར་གྱུར་པར་བསམས། རི་རཏྣ་དྷཀྐི་ནི་བྷ་ར་ཧི་མ་མ་པུཥྟིང་ཀུ་རུ་སརྦ་སིདྡྷི་ཧཱུྃ་སྭཱ་ཧཱཿ ཨཱོཾ་ཨགྣཱེ་ཡེ་ཨ་དི་བྱ་ཨ་དི་བྱ་ཨ་བི་ཤ་ཨ་བི་ཤ་མ་ཧཱ་ཤྲཱྀ་ཧཱ་བྱ་ཀ་བྱ་བཱ་ཧ་ན་ཡེ་སྭཱ་ཧཱཿ བདག་ཅག་དཔོན་སློབ་འཁོར་དང་བཅས་པའི་ཚེ་བསོད་དཔལ་འབྱོར་ཐམསཅད་པུཥྟིང་ཀུ་རུ་ཡེ་སྭཱ་ཧཱཿ ཞེས་མར་ཁུ་དགང་གཟར་བདུན་འབུལ། ཡམ་ཤིང་ལ། ཧཱུྃ། དྲི་ཞིམ་ངད་ལྡན་བྱང་ཆུབ་ཤིང་། །དོན་གྲུབ་བདེ་ཆེན་རྣལ་འབྱོར་མ། །འཁོར་དང་བཅས་ལ་འབུལ་ལགས་ན། །ཚེ་དང་བསོད་ནམས་རྒྱས་པར་མཛོད། རི་རཏྣ་དྷཀྐི་ནི་བྷ་ར་ཧི་མ་མ་པུཥྟིང་ཀུ་རུ་སརྦ་སིདྡྷི་ཧཱུྃ་སྭཱ་ཧཱཿ ཨཱོཾ་བོ་དྷི་བྲྀཀྴ་ཡེ་སྭཱ་ཧཱཿ བདག་ཅག་དཔོན་སློབ་འཁོར་དང་བཅསཔའི་ཚེ་བསོད་དཔལ་འབྱོར་ཐམས་ཅད་པུཥྟིང་ཀུ་རུ་ཡེ་སྭཱ་ཧཱཿ མར་ཁུ་ལ། ཧཱུྃ། རྩི་བཅུད་སྙིང་པོ་བསྡུས་པའི་མར། །བདུད་རྩི་མཆོག་གི་བཅུད་ལེན་དུ། །དོན་གྲུབ་སེར་མོ་འཁོར་བཅས་ལ། །འབུལ་ལོ་ཚེ་བསོད་རྒྱས་པར་མཛོད། རི་རཏྣ་དྷཀྐི་ནི་བྷ་ར་ཧི་མ་མ་པུཥྟིང་༴ཨཱོཾ་ཨགྣཱེ་ཡེ་གྷནྡྷེ་སྭཱ་ཧཱཿ བདག་ཅག་དཔོན་སློབ༴ཏིལ་ལ། ཧཱུྃ། མི་མཐུན་ཚོགས་ཀུན་ཞི་བྱེད་པའི། །རྫས་མཆོག་དམ་པ་ཏིལ་དཀར་འབྲུ། །དོན་གྲུབ་རྣལ་འབྱོར་མ་ལ་འབུལ། །མི་ཤིགས་གཡུང་དྲུང་སྙིང་པོ་སྩོལ། རི་རཏྣ་དྷཀྐི་ནི་བྷ་་ར་ཧི༴ཨཱོཾ་སརྦ་པཱ་པཾ་ད་ཧ་ན་བཛྲ་ཡ་སྭཱ་ཧཱཿ བདག་ཅག་དཔོན་སློབ༴ཡུངས་ཀར་ལ། ཧཱུྃ། བགེགས་དཔུང་འཇོམས་ལ་ཆེས་དཔའ་བའི། །ཡུངས་ཀར་ཡེ་ཤེས་ཁྲོ་བོའི་མཚོན། །དོན་གྲུབ་སེར་མོའི་ལྷ་ལ་འབུལ། །ལེགས་ཚོགས་ཡོན་ཏན་རྒྱས་པར་མཛོད། རི་རཏྣ་དྷཀྐི་ནི་བྷ་ར་ཧི༴ཨཱོཾ་སརྦ་ཨརྠ་ས་དྷཱ་ཡ་སྭཱ་ཧཱཿ བདག་ཅག་དཔོན་སློབ༴ཟས་སྣ་ལ། ཧཱུྃ། ལྷ་མིའི་དཔལ་འབྱོར་བསྡུས་པའི་ཟས། །ཟག་མེད་བདུད་རྩིར་བྱིན་བརླབས་ནས། །གཉིས་སུ་མེད་པར་འབུལ་ལགས་ན། །དཔལ་དང་འབྱོར་པ་རྒྱ་ཆེར་སྤེལ། རི་རཏྣ་དྷཀྐི་ནི་བྷ་ར་ཧི༴ཨཱོཾ་སརྦ་སཾ་བྷ་དེ་སྭཱ་ཧཱཿ བདག་ཅག་དཔོན་སློབ༴དཱུརྦ་ལ། ཧཱུྃ། རྣམ་པ་ཀུན་ཏུ་བཀྲ་ཤིས་ཤིང་། །ཚེ་དང་ཡེ་ཤེས་སྤེལ་བའི་རྫས། །རྩྭ་མཆོག་དཱུརྦ་འབུལ་གྱིས་བཞེས། །བདེ་ལེགས་དབྱར་གྱི་མཚོ་བཞིན་བསྐྱིལ། རི་རཏྣ་དྷཀྐི་ནི༴ཨཱོཾ་བཛྲ་ཨཱ་ཡུ་ཥེ་སྭཱ་ཧཱཿ བདག་ཅག་དཔོན་སློབ༴འབྲས་ལ། ཧཱུྃ། འབྲསདཀར་ས་ལུ་འབྲུ་ཡི་མཆོག །འཆི་མེད་དབང་པོའི་ཉེར་སྤྱད་ཟས། །གུས་པའི་བློ་ཡིས་འབུལ་ལགས་ན། །བསོད་ནམས་རབ་ཏུ་རྒྱས་པར་མཛོད། རི་རཏྣ་དྷཀྐི་ནི༴ཨཱོཾ་བཛྲ་པུཥྟཱ་ཡེ་སྭཱ་ཧཱཿ བདག་ཅག་དཔོན་སློབ༴སོ་བ་ལ། ཧཱུྃ། བཀྲེས་པའི་གུད་པ་སེལ་བའི་སྨན། །རབ་མཆོག་དམ་པ་སོ་བའི་འབྲུ། །མཁའ་འགྲོ་འཁོར་དང་བཅས་ལ་འབུལ། །ནོར་དང་འབྲུ་མཆོག་རྒྱས་པར་མཛོད། རི་རཏྣ་དྷཀྐི་ནི་བྷ་ར་ཧི༴ཨཱོཾ་བཛྲ་བི་ཛཱ་ཡ་སྭཱ་ཧཱཿ བདག་ཅག་དཔོན་སློབ༴ནས་ལ། ཧཱུྃ། བསྐལ་པ་མཆོག་ཏུ་བཟང་པོའི་ནས། །སྔགས་དང་ཕྱག་རྒྱ་ཏིང་འཛིན་གྱིས། །བྱིན་གྱིས་བརླབས་ཏེ་འབུལ་ལགས་ན། །མྱུར་བའི་སྟོབས་ཤུགས་རྒྱས་པར་མཛོད། རི་རཏྣ་དྷཀྐི་ནི༴ཨཱོཾ་མ་ཧཱ་བེ་གྷ་ཡ་སྭཱ་ཧཱཿ བདག་ཅག་དཔོན་སློབ༴སྲན་མ་ལ། ཧཱུྃ། ཕུན་ཚོགས་རོ་ལྡན་སྲན་མའི་འབྲུ། །གུས་པའི་ཡིད་ཀྱིས་འབུལ་ལགས་ན། །བདག་ཅག་ཡོན་མཆོད་འཁོར་དང་བཅས། །བསོད་ནམས་སྟོབས་ཤུགས་རྒྱས་པར་མཛོད། རི་རཏྣ་དྷཀྐི་ནི༴ཨཱོཾ་མ་ཧཱ་བ་ལཱ་ཡ་སྭཱ་ཧཱཿ བདག་ཅག་དཔོན་སློབ༴གྲོ་ལ། ཧཱུྃ། འབྲུ་མཆོག་རོ་བཅུད་ལྡན་པའི་གྲོ། སྐྱེ་དགུའི་དབུལ་བ་རྒྱུན་གཅོད་འདི། །ཕག་གདོང་སེར་མོ་ལ་འབུལ་གྱི། །ནད་མེད་ཕུན་ཚོགས་རྒྱས་པར་མཛོད། རི་རཏྣ་དྷཀྐི་ནི༴ཨཱོཾ་བཛྲ་གྷསྨ་རེ་སྭཱ་ཧཱཿ བདག་ཅག་དཔོན་སློབ༴ཀུ་ཤ་ལ། ཧཱུྃ། རྒྱལ་བས་བྱང་ཆུབ་བརྙེས་པའི་གདན། །དངས་ཤིང་ཡིད་འོང་ཀུ་ཤའི་རྩ། །འགྲོ་བའི་དོན་དུ་འབུལ་གྱི་བཞེས། །བསྲུང་བའི་གོ་ཆ་རྒྱས་པར་མཛོད། རི་རཏྣ་དྷཀྐི་ནི༴ཨཱོཾ་ཨ་པྲ་ཏི་ཧ་ཏ་བཛྲཱ་ཡ་སྭཱ་ཧཱ། བདག་ཅག་དཔོན་སློབ༴ཕྲུམ་ལ། ཧཱུྃ། རྩི་བཅུད་རྣམ་པར་རྒྱས་པ་ཡི། ཕུན་ཚོགས་ལས་འོངས་བདུད་རྩི་ཕྲུམ། །རབ་ཏུ་དང་བས་འབུལ་གྱི་བཞེས། །འབྱོར་བ་ལོངས་སྤྱོད་རྒྱས་པར་མཛོད། རི་རཏྣ་དྷཀྐི༴ཨཱོཾ་ཨཱཿསྭཱ་ཧཱཿ བདག་ཅག་དཔོན་སློབ༴འབྲུ་སྣ་ལ། ཧཱུྃ། འགྲོ་བ་ཀུན་གྱི་ཉེར་འཚོའི་གཞི། །བགྲངས་སུ་ཡས་པའི་སྣ་ཚོགས་འབྲུ། །དམིགས་མེད་ཀློང་དུ་བཞེས་ནས་ཀྱང་། །བདག་སོགས་མངའ་ཐང་རྒྱས་པར་མཛོད། །རི་རཏྣ་དྷཀྐི་ནི༴ཨཱོཾ་ཛྲཱིཾ་སྭཱ་ཧཱཿ བདག་ཅག་དཔོན་སློབ༴ཤིང་ཏོག་ལ། ཧཱུྃ། རིན་པོ་ཆེ་ཡི་ལྗོན་པའི་ཤིང་། །ཕན་བདེའི་ལང་ཚོ་སྨིན་པའི་འབྲས། །དོན་གྲུབ་སེར་མོ་ལ་འབུལ་གྱི། །དཔལ་དང་བཀྲ་ཤིས་རྒྱས་པར་མཛོད། རི་རཏྣ་དྷཀྐི་ནི༴ཨཱོཾ་བཛྲ་ཤྲཱི་བ་ཡ་སྭཱ་ཧཱཿ བདག་ཅག་དཔོན་སློབ༴དར་སྣ་ལ། ཧཱུྃ། རེག་ན་བདེ་བ་ལྷ་རྫས་ཀྱི། །སྣ་ཚོགས་གོས་བཟང་ལྟ་ན་སྡུག །ཕག་མོ་འཁོར་དང་བཅས་ལ་འབུལ། །བསོད་ནམས་རྣམ་པར་རྒྱས་པར་མཛོད། རི་རཏྣ་དྷཀྐི་ནི༴ཨཱོཾ་བཛྲ་ཝསྟྲ་ཡེ་སྭཱ་ཧཱཿ བདག་ཅག་དཔོན་སློབ༴སྲེག་རྫས་སྔགས་མེད་པ་རྣམས་ལ། ཧཱུྃ། རྒྱས་པའི་སྔགས་སུ་ཉེར་བསྔགསཔའི། །འདོད་ཡོན་ལོངས་སྤྱོད་མཆོད་པའི་སྤྲིན། །མ་ཚང་མེད་པ་འདི་འབུལ་བས། །འདོད་དགུ་མ་ལུས་རྒྱས་པར་མཛོད། རི་རཏྣ་དྷཀྐི་བྷ་ར་ཧི༴ཨཱོཾ་ཀུ་རུ་ཀུ་རུ་སྭཱ་ཧཱཿ བདག་ཅག་དཔོན་སློབ་འཁོར་དང་བཅས་པའི་ཚེ་བསོད་དཔལ་འབྱོར་ཐམས་ཅད་པུཥྟིང་ཀུ་རུ་ཡེ་སྭཱ་ཧཱཿ སླར་ཡང་། རི་རཏྣ་དྷཀྐི་ནི་བྷ་ར་ཧི་མ་མ་པུཥྟིང་ཀུ་རུ་སརྦ་སིདྡྷི་ཧཱུྃ་སྭཱ་ཧཱཿ ཨཱོཾ་ཨགྣཱེ་ཡེ་སྭཱ་ཧཱཿབདུན་གྱིས་བྱོན་ཟན་ལྟར་གཤེགས་སྐྱེམས་འབུལ། ཧཱུྃ། དོན་གྲུབ་སེར་མོའི་ལྷ་ཚོགས་ལ། །ཕྱི་དང་ནང་གི་ཉེར་སྤྱོད་ལྔ། །སྨན་རག་གཏོར་ཚོགས་མཆོད་པའི་སྤྲིན། བཞེས་ནས་འཆི་མེད་དངོས་གྲུབ་སྩོལ། །ཨཱོཾ་རཏྣ་དྷཀྐི་ནི་བྷ་ར་ཧི་ས་པ་རི་ཝཱ་ར་ཨཱརྒྷཾ་ནས། ཤཔྟ་ཨ་མྲི་ཏ་རཀྟ་བྷ་ལིངྟ་པཱུ་ཙ་ཁཱ་ཧི། ཅེས་པས་མཆོད་ཅིང་། ཨཱོཾ་བཛྲ་ཏམྦུ་ལ་ཡེ་སྭཱ་ཧཱས། སོ་རྩི་དང་། ཨཱོཾབཛྲ་ཝསྟྲ་ཡེ་སྭཱ་ཧཱས་གོས་ཟུང་འབུལ། བསྟོད་པ་ནི། ཧཱུྃ༔ རྒྱས་པའི་མཁའ་འགྲོ་དྷཀྐིའི་གཙོ་མོ་ཆེ༔ ནས། ཡེ་ཤེས་མཁའ་འགྲོའཁོར་དང་བཅས་ལ་བསྟོད༔ ཞེས་པའི་བར་གྱིས་བསྟོད། དེ་ནས་དངོས་གྲུབ་ཀྱི་རྫས་འབྲང་རྒྱས་ཚོགས་རྫས་ལ་སོགས་ཐོགས་ཏེ། དོན་གྲུབ་སེར་མོ་འཁོར་དང་བཅས་པའི་ཐུགས་རྗེ་མཐུ་དཔུང་གིས་འཁོར་འདས་ལམ་གསུམ་གྱི་བདེ་ལེགས་ཡོན་ཏན་ཐམས་ཅད་སྐད་ཅིག་ཉིད་ལ་སྩལ་བར་བསམས་ཤིང་། ཧོཿ བཅོམ་ལྡན་འདས་ཕག་གདོང་རྡོ་རྗེ་རྣལ་འབྱོར་མ་ཁྱོད་ལ་སྦྱིན་སྲེག་མེ་མཆོད་ཀྱི་པཱུ་ཙ་འདི་ཕུལ་བས་རྣལ་འབྱོར་པ་བདག་ལ་ཁམས་གསུམ་དབང་དུ་འདུ་བའི་དངོས་གྲུབ་སྩོལ་ཞིག །སྲིད་གསུམ་ཟིལ་གྱིས་གནོན་པའི་དངོས་གྲུབ་སྩོལ་ཞིག །འཁོར་འདས་ལམ་གསུམ་གྱི་ཐུགས་རྗེ་བྱིན་རླབས་ནུས་མཐུ་ཚེ་དཔལ་འབྱོར་པ་ཁ་རྗེ་དབང་ཐང་སྙན་གྲགས་ཡོན་ཏན་གཟི་བརྗིད་ཐམས་ཅད་དབང་དུ་འདུ་བ་རབ་ཏུ་རྒྱས་པའི་དངོས་གྲུབ་སྐད་ཅིག་འདི་ཉིད་ལ་སྩལ་དུ་གསོལ། ཅེས་དངོས་གྲུབ་བླང་ཞིང་རོལ། དེ་ནས་ཡི་གེ་བརྒྱ་པས་ལྷག་ཆད་བསྐང་ཞིང་། ཧཱུྃ། མ་འབྱོར་པ་དང་ཉམས་པ་དང་། །གང་ཡང་བདག་རྨོངས་བློ་ཡིས་ནི། །བགྱིས་པ་དང་ནི་བགྱིད་སྩལ་བ། །དེ་ཀུན་མགོན་པོས་བཟོད་པར་གསོལ། ཞེས་པས་ནོངས་པ་བཟོད་པར་གསོལ། ཧཱུྃ། སྣང་བ་དག་པ་གཞལ་ཡས་ཁང་༔ གཟུང་འཛིན་བྲལ་བ་ཡི་དམ་ལྷ༔ རང་ངོར་གསལ་བ་ཆོས་ཀྱི་སྐུ༔ སྐྱེ་མེད་མཁའ་འགྲོའི་ལྷ་ཚོགས་རྣམས༔ ཆོས་དབྱིངས་མཁའ་འགྲོའི་གནས་སུ་གཤེགས༔ ཨ་ཨཱཾཿ སྨྲ་བསམབརྗོད་མེད་ཡུམ༔ བཛྲ་མུ༔ ཞེས་པས་ཡེ་ཤེས་པ་དབྱིངས་སུ་གཤེགས་ཤིང་དམ་ཚིག་པ་རང་ལ་བསྟིམ། སླར་ཡང་འཇིག་རྟེན་པའི་མེ་ལྷ་ཐབ་ཀྱི་ཤར་ལྷོར་དཔང་པོར་བཞུགས་པ་བཛྲ་ས་མཱ་ཛ༔ དམ་ཚིག་པ་དང་གཉིས་སུ་མེད་པར་གྱུར་པ་ལ་ཨརྒྷཾ་སོགས་ཀྱིས་མཆོད་ཅིང་། མེ་སྟེ་བསྲེག་བྱ་ཟ་བའི་ལྷ། །དྲང་སྲོང་རྒྱལ་པོ་གདོན་གྱི་བདག །ཤར་ལྷོ་མེ་ལྷའི་ཚོགས་བཅས་ལ། །མཆོད་ཅིང་བསྟོད་དེ་ཕྱག་ཀྱང་འཚལ། དེ་ནས། ཨཱོཾ་ཨགྣཱེ་ཡེ་ཨ་དི་བྱ་ཨ་དི་བྱ་ཨ་བི་ཤ་ཨ་བི་ཤ་མ་ཧཱ་ཤྲཱྀ་ཧཱ་བྱ་ཀ་བྱ་བཱ་ཧ་ན་ཡེ་སྭཱ་ཧཱཿ ཨཱོཾ་ཨགྣཱེ་ཡེ་སྭཱ་ཧཱཿ ཞེས་འབུལ། ཨཱོཾ་བོ་དྷི་བྲྀཀྴ་ཡེ་སྭཱ་ཧཱཿ ཡམ་ཤིང་ལའོ། ཨཱོཾ་ཨགྣཱེ་ཡེ་གྷནྡྷེ་སྭཱ་ཧཱཿ མར་ཁུ་ལའོ། ཨཱོཾ་སརྦ་པཱ་པཾ་ད་ཧ་ན་བཛྲཱ་ཡ་སྭཱ་ཧཱཿ ཏིལ་ལའོ། ཨཱོཾ་སརྦ་ཨརྠ་ས་དྷཱ་ཡ་སྭཱ་ཧཱཿ ཡུངས་ཀར་གྱིའོ། ཨཱོཾ་སརྦ་སཾ་བྷ་དེ་སྭཱ་ཧཱཿ ཟས་སྣའོ། ཨཱོཾ་བཛྲ་ཨཱ་ཡུ་ཥེ་སྭཱ་ཧཱཿ དཱུརྦའོ། ཨཱོཾ་བཛྲ་པུཥྟཱ་ཡེ་སྭཱ་ཧཱཿ འབྲས་ཀྱིའོ། ཨཱོཾ་བཛྲ་བི་ཛཱ་ཡ་སྭཱ་ཧཱཿ སོ་བ་ལའོ། ཨཱོཾ་མ་ཧཱ་བེ་གྷཱ་ཡ་སྭཱ་ཧཱཿ ནས་ཀྱིའོ། ཨཱོཾ་མ་ཧཱ་བ་ལཱ་ཡ་སྭཱ་ཧཱཿ སྲན་མ་ལའོ། ཨཱོཾ་བཛྲ་གྷསྨ་རེ་སྭཱ་ཧཱཿ གྲོ་ལའོ། ཨཱོཾ་ཨ་པྲ་ཏི་ཧ་ཏ་བཛྲཱ་ཡ་སྭཱ་ཧཱཿ ཀུ་ཤ་ལའོ། ཨཱོཾ་ཨཱཿསྭཱ་ཧཱཿ ཕྲུམ་གྱིའོ། ཨཱོཾཛཱིཾ་སྭཱ་ཧཱཿ འབྲུ་སྣའོ། ཨཱོཾ་བཛྲ་ཤྲཱྀ་བཱ་ཡ་སྭཱ་ཧཱ། ཤིང་ཏོག་གོཨཱོཾ་བཛྲ་ཝ་སྟྲ་ཡེ་སྭཱ་ཧཱཿ དར་སྣ་ལའོ། ཨཱོཾ་ཀུ་རུ་ཀུ་རུ་སྭཱ་ཧཱཿ སྲེག་རྫས་སྔགས་མེད་པའི་རིགས་ཐམས་ཅད་ཀྱིའོ། ཨཱོཾ་བཛྲ་ཏམྦུ་ལ་ཡེ་སྭཱ་ཧཱཿ སོ་རྩིའོ། ཨཱོཾ་བཛྲ་ཝ་སྟྲ་ཡེ་སྭཱ་ཧཱཿ གོས་ཟུང་གིའོ། ཞེས་པ་རྣམས་ལ་གསུམ་མམ་བདུན་སོགས་འབུལ། རྒྱས་པ་རེ་རེ་ལའམ། བསྡུ་ན་ཀུན་གྱིས་མཐར་འདོད་གསོལ་ཞིག་སྦྱར་ཡང་རུང་། དེ་ནས་གཏོར་མ་ལ། ཨཱོཾ་ཨགྣཱེ་ཡེ་ས་པ་རི་ཝཱ་ར་ཨི་དམ་བྷ་ལིངྟ་ཁ་ཁ་ཁཱ་ཧི་ཁཱ་ཧི། ཅེས་འབུལ། སླར་ཡང་ཨཱརྒྷཾ་ནས། ཤཔྟའི་བར་གྱིས་མཆོད་ཅིང་། ཧཱུྃ། གཟི་བརྗིད་ཕུང་པོ་ལྟ་ན་སྡུག །འོད་བཟང་ཉི་མའི་དཔལ་དུ་འབར། །རབ་འབྱམས་འཕྲིན་ལས་རྒྱ་མཚོའི་དཔལ། །ཨགྣཱིརཱ་ཛ་ཁྱོད་ལ་བསྟོད། ཅེས་བསྟོད། ཡི་གེ་བརྒྱ་པ་བརྗོད། མ་འབྱོར་པ་དང་ཉམས་པ་དང་། སོགས་ནས་མེ་ལྷའི་རྒྱལ་པོ་གང་ཁྱོད་ཀྱིས། །བདག་གཞན་དོན་གཉིས་ཀུན་མཛོད་ཅིག །ཆོས་ཉིད་ཀློང་དུ་གཤེགས་ནས་ཀྱང་། །གསོལ་བ་བཏབ་ན་སླར་ཡང་བྱོན། ཨགྣཱེ་ཡེ་མུཿ ཅེས་ཡེ་ཤེས་པ་གཤེགས། དམ་ཚིག་པ་མེའི་ཕུང་པོར་གྱུར་པར་བསམ་མོ། དེ་ནས་ཤིས་བརྗོད་ནི། ཧཱུྃ༔ ཡེ་ཤེས་དབྱིངས་ཀྱི་ཕོ་བྲང་ནས༔ ཕག་མོ་ཆོས་སྐུའི་བཀྲ་ཤིས་ཤོག༔ ནས། སྤྲུལ་པ་འབུམ་སྡེའི་བཀྲ་ཤིས་ཤོག༔ གི་བར་དང་། བསྔོ་སྨོན་ནི། ཧཱུྃ༔ གསང་བའི་བསྐྱེད་རྫོགས་སྒོམ་ཟླས་མཐུས༔ ལྟ་བ་གཡེལ་བ་སོར་ཆུད་ཅིང་༔ སྒོམ་པ་བྱིང་པ་ཀློང་གྱུར་ཏེ༔ སྤྱོད་པ་ཚོགས་གཉིས་མཐར་ཕྱིན་ཅིང་༔ འབྲས་བུ་སྐུ་བཞི་མངོན་གྱུར་ཤོག༔ དེ་ནས་ཐལ་བ་རི་བོ་འཕེན་བཟང་གི་ལྟོ་བར་སྐྱེལ། ཅེས་པ་འདི་ཡང་ཧོར་པན་ཆེན་ངག་དབང་འཇམ་དབྱངས་བློ་ལྡན་གྱིས་ཚེ་སྒྲུབ་ཀྱི་ཁ་སྐོང་དུ་རྒྱས་པའི་སྦྱིན་སྲེག་མཛད་པ་སོར་བཞག་སྟེ། ཕག་མོའི་གཏེར་གཞུང་གི་རྩ་ཚིག་འདུག་པ་རྣམས་ཀྱང་མ་སྒྱུར་བ་ནི། རྗེས་འཇུག་བློར་འཛིན་པ་རྣམས་ལ་གཅིག་་ཤེས་ཀུན་གྲོལ་དུ་རེ་བ་ཡིན་པས་གོ་བར་གྱིས། ཅེས་པ་འདི་ཡང་འཕོ་ལུང་སྐུ་སྐྱེ་ཀརྨ་རིགས་འཛིན་པས་སྒ་སྟོད་ཇོ་བོའི་མདུན་འཕེལ་རྒྱས་ཐང་དུ་སྦྱར་བ་སརྦ་མངྒ་ལམ།། །།

གཅོད་ཀྱི་དམིགས་རྐང་གི་ཟིན་བྲིས།

དོན་གྲུབ་སེར་མོའི་གཅོད་ཀྱི་དམིགས་རྐང་གི་ཟིན་བྲིས་བཞུགས། །ན་མོ་གུ་རུ། འདིར་དོན་གྲུབ་སེར་མོའི་གཅོད་ཀྱི་དམིགས་རིམ་གྱི་ཉམས་ལེན་ལྟ་བུར་ཐོག་མར་རང་གཞན་སེམས་ཅན་ཐམས་ཅད་འཁོར་བའི་འཇིགས་པ་ལས་སྐྱོབས་པའི་ཆེད་དུ་བླ་མ་དཀོན་མཆོག་གསུམ་སྐུ་གསུམ་གྱི་སྟོན་པ་ཕྱོགས་བཅུའི་དུས་གསུམ་རྒྱལ་བ་སྲས་དང་བཅས་པ་རྣམས་དང་། ཁྱད་པར་རྩ་གསུམ་རྒྱལ་བ་རྒྱ་མཚོའི་ལྷ་ཚོགས་རྣམས་ལ་སྒོ་གསུམ་གུས་པ་ཆེན་པོའི་ཡིད་ཁྱེད་ཤེས་བློ་ཡིས་ཁ་ཙམ་ཚིག་ཙམ་མ་ཡིན་པར་རྩེ་གཅིག་ཏུ་མཁའ་མཉམ་འགྲོ་བ་རྣམས་དང་ལྷན་གཅིག་ཏུ་བྱང་ཆུབ་མ་ཐོབ་ཀྱི་བར་དུ་སྐྱབས་སུ་འགྲོ་བ་དང་། ཁྱད་པར་རང་ལ་གནོད་ཅིང་འཚེ་བའི་ལྷ་འདྲེ་རྣམས་ཀྱི་གཙོས་བྱས་དགྲ་གདོན་གནོད་བྱེད་བགེགས་རིགས་སྣང་སྲིད་ཀྱི་ལྷ་འདྲེ་རིགས་དྲུག་གི་བསྡུས་པའི་སེམས་ཅན་ཐམས་ཅད་རང་གི་སེམས་ཉིད་སྐྱེ་མེད་ཆོས་ཀྱི་སྐུ་ལ་མ་རིག་པས་སྒྲིབ་པའི་བསླད་ནས་ང་མེད་པ་ལ་ང་དང་། །བདག་མེད་པ་ལ་བདག་ཏུ་བཟུང་། གཉིས་སུ་མེད་པ་ལ་གཉིས་སུ་འཛིན་པའི་འཁྲུལ་པ་སྡུག་བསྔལ་གྱི་རྒྱུ་ཡིན་པས་ད་རེས་བདག་གིས་ཟབ་དོན་གཅོད་ཀྱི་གདམས་པ་འདི་བཞིན་ཉམས་སུ་ལེན་ནས། རང་གཞན་སེམས་ཅན་ཐམས་ཅད་ཀྱི་གཟུང་འཛིན་འཁྲུལ་པ་བཤིག་ནས། ལས་ཉོན་བག་ཆགས་ཀྱི་བསགས་པའི་སྒྲིབ་པ་ཐམས་ཅད་སྦྱང་ཤིང་བདག་གཞན་གཉིས་མེད་ཀྱི་དོན་རྟོགས་པ་ཞིག་བྱའོ་སྙམས་པའི་བསམ་པས་སེམས་བསྐྱེད་ཅིང་། དེ་ནས་སྐད་ཅིག་གིས་མདུན་གྱི་ནམ་མཁར་རྩ་བརྒྱུད་བླ་མ་ཐམས་ཅད་གསལ་གདབ་ནས་མོས་གུས་རྩེ་གཅིག་གིས་གསོལ་བ་གདབ་ཏེ་ཁྱེད་རྣམས་ཀྱིས་བདག་གི་རྒྱུད་བྱིན་གྱིས་རླབས་དུ་གསོལ། ཆོས་ཐམས་ཅད་སྟོང་ཞིང་བདག་མེད་པ་ཡིན་པ་ལ་ཡིན་པར་མ་ཤེས་པས། གཟུང་འཛིན་གྱིས་བསྐྱེད་པས་ང་བདག་ཏུ་འཛིན་པ་ལས་གྲོལ་བ་དང་། འཁོར་བའི་སྡུག་བསྔལ་ཉེ་བར་ལེན་པའི་གཞི་འདུས་བྱས་ཤ་ཁྲག་གི་ཕུང་པོ་འདི་ཉིད་ལྟོས་པ་མེད་པར་གཅེས་འཛིན་གྱི་བློ་སྤང་ནས། སྣང་སྲིད་ཀྱི་ལྷ་འདྲེ་རྣམས་ལ་སྟེར་ནས་ཞེན་པ་མེད་པ་གཟན་ཏུ་འཁྱོལ་བས་ང་བདག་གིས་བསྐྱེད་པའི་རྣམ་སྨིན་དག་ནས་བདག་མེད་ཆོས་ཀྱི་སྐུ་ཡི་གོ་འཕང་ཐོབ་ནས་གཏན་སྲིད་ཐོབ་པར་བྱིན་གྱིས་རློབས་ཤིག་སྙམ་ནས། གསོལ་འདེབས་འདོན་ནས་མཐར་རྩ་བརྒྱུད་ཀྱི་བླ་མ་ཐམས་ཅད་རང་ལ་ཐིམ་པར་བསྒོམ་པ་ཚིག་དོན་གོ་སླ་བར་སྣང་བས་དེ་བཞིན་ཉམས་ལེན་དང་བསྲེ། དེ་ནས་སླར་ཡང་སེམས་བསྐྱེད་གསལ་གདབ་སྟེ་འདི་ལྟར་ཚེ་རབས་འཁོར་བ་ཐོག་མ་མེད་པ་ནས་ཐ་མ་ད་ལ་ཐུག་གི་བར་དུ་འཁོར་བར་འཁྱམས་པ་འདི་ཅིས་ལན་ན་མ་རིག་པའི་དབང་གིས་ང་དང་བདག་ཏུ་འཛིན་པ་འདིས་ལན་འདུག །ད་ནི་བདག་འཛིན་གྱི་འཁྲུལ་པ་དག་ཕྱིར་རྣམ་སྨིན་འདུས་བྱས་ཤ་ཁྲག་གི་ཕུང་པོ་འདི་ཚེ་རབས་ཐོག་མེད་ནས་བསགས་པའི་ལན་ཆགས་བུ་ལོན་ཐམས་ཅད་བྱང་ཞིང་དག་པའི་ཆེད་དུ་སྣང་སྲིད་ཀྱི་ལྷ་འདྲེའི་གཙོས་པའི་རིགས་དྲུག་གི་སེམས་ཅན་ཐམས་ཅད་ལ་སྦྱིན་པ་དང་། ཡར་མཆོག་གསུམ་རྒྱལ་བ་རྒྱ་མཚོའི་ཚོགས་ལ་མཆོད་པ་ཕུལ་ནས་ལས་ཉོན་གྱིས་བསྐྱེད་པའི་སྒྲིབ་པ་ཐམས་ཅད་རྒྱུན་ཆོད་པར་བྱའོ་སྙམས་ནས། སྐད་ཅིག་དེ་ཉིད་ལ་རང་གི་སྤྱི་བོར་བདེ་ཆེན་གྱི་འཁོར་ལོ་དབུ་མའི་ཡར་སྣེར་ཕ་ལས་ཐོབ་པའི་རུས་པའི་དྭངས་མ་ཡི་གེ་ཧཾ་ཡིག་མགོ་ཐུར་བསྟན་ཏུ་ཡོད་པ་དེ་དབུ་མའི་ལམ་ནས་མར་བྱུང་། ལྟེ་འཁོར་གྱི་དབུ་མའི་མར་སྣེ་མ་ལས་ཐོབ་པའི་ཤ་ཁྲག་གི་དྭངས་མ་ཡི་གེ་ཨ་ཐུང་གི་རྣམ་པ་ཅན་དེ་ཡར་བྱུང་ཏེ། སྙིང་གི་དབུས་སུ་ཁམས་དཀར་དམར་གཉིས་ཁ་སྦྱར་བའི་བར་དུ་རང་གི་རྣམ་ཤེས་འཐུམ་གྱིས་བསྟིམས་ཤིང་ཐིམ་པས་རིག་པ་གཉུགས་མ་མི་ཤིག་པའི་རང་བཞིན་དེ་ཉིད་ཡི་གེ་རི་སེར་པོ་ཞིག་ཏུ་གྱུར་ནས་དབུ་མའི་ལམ་རྒྱུད་དེ་སོང་ནས་སྤྱི་བོར་ཚངས་པའི་བུ་ག་ནས་ཐོན་ཏེ་ནམ་མཁར་གནས་པ་ལས་འོད་ཟེར་འཕྲོ་འདུས་རང་ཉིད་མཁའ་འགྲོ་དོན་གྲུབ་སེར་མོ་སྒོམ། སྟེང་འོག་ཕྱོགས་མཚམས་ཐམས་ཅད་དུ་འཇིག་རྟེན་དང་འཇིག་རྟེན་ལས་འདས་པའི་མགྲོན་རིགས་ཐམས་ཅད་གསལ་གདབ་ཅིང་རང་དང་མགྲོན་རིགས་རྣམས་ཀྱི་གནས་གསུམ་ལས་འོད་ཟེར་འཕྲོས་པས་ཡེ་ཤེས་དང་འཇིག་རྟེན་གྱི་མགྲོན་ཐམས་ཅད་སྤྱན་དྲངས་ནས་དབྱེར་མེད་དུ་རྒྱས་གདབ་པ་སོགས་གཞུང་ཁ་གསལ་བས་བཀྲོལ་མ་དགོས། དེ་ནས་རང་ཉིད་དོན་གྲུབ་སེར་མོའི་ཐུགས་ཀ་ནས་ལས་བྱེད་ཀྱི་མཁའ་འགྲོ་མ་དཀར་སེར་དམར་མཐིང་ལྗང་མོ་སོགས་དཔག་ཏུ་མེད་པར་བྱུང་ནས་རང་གི་ལུས་བེམ་པོ་ཆེ་ཞིང་ཚོ་ལ་སྟོང་གསུམ་གང་བར་བསྒོམ་པ་དེ་ཉིད་ལས་བྱེད་མཁའ་འགྲོ་རྣམས་ཀྱིས་བཤས་ཤིང་ཤ་ཁྲག་ནང་རོལ་དབང་པོ་དོན་སྣོད་སོ་སོར་རི་བོ་བས་དཔང་མཐོ་བ། རྒྱ་མཚོ་བས་གཏིང་ཟབ་རྩི་ཤིང་ལས་གྲངས་མང་བར་བསམ་སྟེ། དེ་ཡང་ངོ་བོ་ཡེ་ཤེས་ཀྱི་བདུད་རྩི་ཁར་རེག་པ་དང་དྲི་ཚོར་པ་ཙམ་གྱིས་ཀྱང་ན་བ་ཕན་ཤི་བ་སོས་ནུས་པའི་རང་བཞིན་ཅན་དུ་གྱུར་པ་བསམ་ཤིང་མདོར་ན་མགྲོན་རིགས་མཆོག་དམན་སོ་སོར་གང་ལ་གང་འདོད་འདོད་ཡོན་ཀུན་བཟང་མཆོད་སྤྲིན་ཏུ་གྱུར་བར་བསམ་ཤིང་བྱིན་གྱིས་རླབས། དེ་ནས་ལས་བྱེད་ཀྱི་མཁའ་འགྲོ་དེ་དག་མཆོད་པའི་ལྷ་མོར་སྤྲུལ་ནས་མཆོད། ཡུལ་གོང་མ་རྣམས་ལ་མཆོད་ཅིང་ཁྱད་པར་ཡི་དམ་གྱི་ལྷ་རྣམས་ཕྱི་ནང་གསང་མཆོད་དཔའ་བོ་མཁའ་འགྲོ་རྣམས་ལ་དགྱེས་པའི་མཐུན་རྫས་དང་ཆོས་སྐྱོང་བསྲུང་མ་རྣམས་ལ་ཤ་ཁྲག་རུས་པ་སོགས་དེ་དག་ཀྱང་ངོ་བོ་ཟག་མེད་ཀྱི་བདུད་རྩི་ལ་རྣམ་པ་གང་ལ་གང་འདོད་དུ་བསྔོ་ཞིང་ཚིམས་ཏེ་མགུ་ནས། མཆོད་གནས་རྣམས་དགྱེས་པས་བྱིན་རླབས་དངོས་གྲུབ་ཐོབ། དཔའ་བོ་མཁའ་འགྲོ་རྣམས་ཀྱི་ཉམས་ཆགས་བྱང་ཆོས་སྐྱོང་སྲུང་མ་རྣམས་དགྱེས་པས་ཕྲིན་ལས་གང་དགོས་སྒྲུབས། རིགས་དྲུག་གི་འགྲོ་བ་རྣམས་ཚིམས་ཤིང་བུ་ལོན་འཁོར། གནོད་བྱེད་བགེགས་རིགས་རྣམས་ཀྱང་ལན་ཆགས་བྱང་ཤ་འཁོན་དག་པར་བསམ་ཤིང་བྱང་ཆུབ་ཀྱི་སེམས་བསྒོམ་ཤིང་སྙིང་རྗེ་ཆེན་པོའི་དམིགས་པ་རྣམས་སྐྱོང་ཞིང་ཚིག་དོན་ལ་བློ་གཞོལ་བར་བྱ། མཐར་མགྲོན་གཤེགས་ནས་བསྡུ་རིམ་དང་དམིགས་མེད་ཀྱི་ལྟ་བས་རྒྱས་གདབ་ནས་བསྔོ་སྨོན་སོགས་བྱའོ། དམིགས་པ་གསལ་ན་རང་དང་ནད་པ་སོགས་ལུས་བརྒྱ་ཕྲག་སྟོང་ཕྲག་སོགས་བསྒོམ་ནས་ལུས་སྦྱིན་ཚར་གཅིག་གི་ལུས་སྦྱིན་བརྒྱ་ཕྲག་སྟོང་ཕྲག་ཏུ་གྱུར་པ་ཡིན་ཞེས་མཁས་མཆོག་ཀརྨ་ཆགས་མེད་ཀྱི་གསུངས་ལས་བྱུང་ངོ་། ཞེས་པ་འདི་རྒྱ་རོང་མཆོག་སྤྲུལ་ནམ་མཁའི་གསུང་ཆོས། ཡང་དེ་ཉིད་ནས་རིགས་འཛིན་ཉི་གྲགས་གསུམ་པ་ལ་གདམས་པར། རྗེ་རིན་པོ་ཆེ་ལྟ་བུའི་ཐུགས་དམ་རྒྱུན་ཁྱེར་ཙམ་ལས་གཉན་ས་གཅོད་པ་ཡུལ་དུས་གནས་སྐབས་དང་སྐུ་གཡེང་ཆེ་བའི་སྟབས་ཀྱིས་ཨེ་འགྲིགས་མི་ཤེས་ཤིང་དགོས་རྒྱ་ཡང་ཆུང་བ་འདྲ་སྟེ། གཉན་ས་གཅོད་དོན་ནི་ཕྱག་རྫོགས་ཀྱི་ཁྲིད་དང་གཅོད་ཁྲིད་ཚད་ལྡན་ཐོབ་ནས་ཉམས་ལེན་ལ་དྲོད་ཐོབ་པ་ཙམ་ཡོད་པ་དེ་འདྲ་ལྟ་སྒོམས་ཀྱི་བོག་འདོན་པའི་ཆེད་དུ་གཉན་ཁྲོད་རྣམས་སུ་འགྲོ་བ་ལས་རང་བཞིན་འགྲོ་བ་མ་མཆིས་ཤིང་། གཉན་ཁྲོད་དུ་སོང་ནས་ཀྱང་ཚར་ཚད་སོགས་ཡིད་ཆེས་མ་བྱུང་ན་སླད་ལྷ་འདྲེའི་བར་ཆད་བརྩམས་པར་འགྱུར་བ་སོགས་ལག་ལེན་ཁེལ་དཀའ་བར་སྣང་། གཞན་ཏུ་གྲོང་ཆོག་པ་རྣམས་གཉན་ས་གཅོད་པ་སོགས་ལྟར་སྣང་ཟག་ཟོག་གི་འགྲོ་བ་བསླུ་བྲིད་ལ་ངེས་པ་ཅི་ཡོད་ལགས་གོང་ལྟར་ཡང་གཅོད་ཐུན་གྱི་རྗེས་སུ་བདག་གཞན་བརྗེ་བའི་དམིགས་པ་བསྒོམས་པར་གསུངས་པ་བཞིན་བློ་སྦྱངས་དགེ་སྡིག་གཏོང་ལེན་གྱི་དམིགས་པ་ཐུན་རེ་བསྒོམས་ནས་འཁོར་གསུམ་ཡོངས་དག་གི་ལྟ་བས་རྒྱས་ཐེབ་པའི་བསྔོ་སྨོན་སོགས་བྱ་བར་གསུངས་སོ། གལ་སྲིད་གཉན་ས་སོགས་ཕེབས་ཐུབ་པ་བྱུང་ན་དབོན་རིན་པོ་ཆེས་མཛད་པའི་གཅོད་དམིགས་འདི་ལས་ལྷག་པ་མི་འདུག་པས་ཐུགས་མཁོ་ཡོད་པའང་སྲིད་སྙམས་ནས་དཔེ་ཆ་ཕུལ་ཡོད་ལགས། །དགེའོ། དགེའོ། དགེའོ།

ཕག་མོ་རིགས་བཞིའི་ཆོས་སྐོར་ལས་ཕག་དམར་སྐོར།

སྒྲུབ་ཐབས་དབང་གི་འདོད་འབྱུང་།

ཕག་མོ་དམར་མོའི་ཟབ་ཐིག་ལས༔ སྒྲུབ་ཐབས་དབང་གི་འདོད་འབྱུང་བཞུགས༔ ཡེ་ཤེས་དྷཀྐིའི་ཚོགས་ལ་འདུད༔ མ་འོངས་རྗེས་འཇུག་སྐལ་ལྡན་གྱིས༔ མ་དང་མཁའ་འགྲོའི་དུས་ཆེན་ལ༔ མཁའ་འགྲོ་འདུ་བའི་གནས་མཆོག་ཏུ༔ ཤིང་ཏོག་དམར་པོ་མཚལ་ཆང་གིས༔ ད་ལར་བྱུག་ཅིང་སྐྱང་ནུལ་བྱ༔ ཆོས་འབྱུང་ཐོད་ར་པད་རྡོར་མེ༔ མཛེས་པའི་ཚོན་གྱིས་གླན་པར་བྱ༔ དབུས་སུ་མཉྫིའི་ཁྲིའུ་ཁར༔ མཁའ་འགྲོའི་གཏོར་མ་རྒྱན་ལྡན་བཤམས༔ སྐུ་གཟུགས་དར་དམར་གུར་ཡང་ཕུབ༔ གཡས་གཡོན་སྨན་རཀ་རྒྱབ་ཏུ་ནི༔ རིགས་བཟང་བུ་མོའི་ལྕང་ལོ་དང་༔ མགྲོན་ཚོམ་མེ་ལོང་ཤིང་ཏོག་དམར༔ སིནྡྷུ་ར་དང་བླ་རྡོ་བཏགས༔ དར་ཚོན་རྣམ་ལྔའི་གུར་ཡང་ཕུབ༔ ཐ་མར་རྣམ་ལྔའི་མཆོད་པ་བཤམས༔ རྣལ་འབྱོར་བདེ་བའི་གདན་ལ་འདུག༔ དཀར་ཕྱོགས་སྐྱོང་ལ་གཏོར་མ་འབུལ༔ ནག་ཕྱོགས་བགེགས་རིགས་སྔགས་ཀྱིས་སྦྱངས༔ སྐྱབས་སུ་འགྲོ་ཞིང་སེམས་ཀྱང་བསྐྱེད༔ སྣང་སྲིད་འཁོར་འདས་སྟོང་པར་གྱུར༔ སྟོང་པའི་ངང་ལས་སྐད་ཅིག་གི༔ ཆོས་འབྱུང་དམར་པོ་ཟུར་གསུམ་པའི༔ གཞལ་ཡས་ཁང་གི་ལྟེ་བ་ལ༔ པདྨ་ཉི་ཟླ་བམ་རོའི་སྟེང་༔ རང་སེམས་ངོ་བོ་ནི་དམར་པོ༔ འོད་ཟེར་འཕྲོ་འདུའི་སྦྱོར་བ་ལས༔ མཁའ་འགྲོ་རྡོ་རྗེ་ཕག་མོ་དམར༔ ཞལ་གཅིག་སྤྱན་གསུམ་ཞི་མ་ཁྲོ༔ གྲི་ཐོད་ཕྱག་རྒྱ་གར་སྟབས་ཅན༔ དུར་ཁྲོད་དབང་གི་ཆས་ཀྱིས་བརྒྱན༔ ཁ་ཊྭཱྃ་ག་ལ་བདེ་བ་འཁྱུད༔ སྣང་བའི་ངོ་བོ་ལྷ་ཡི་སྐུ༔ སྟོང་པའི་རང་བཞིན་ཕྱི་ནང་བྲལ༔ སྣང་སྟོང་ཟུང་འཇུག་འགག་པ་མེད༔ མེ་ལོང་གཟུགས་བརྙན་ཆུ་ཟླ་ལྟར༔ བདག་མདུན་གསལ་བའི་གནས་གསུམ་ལས༔ འོད་འཕྲོས་མཁའ་སྤྱོད་གནས་ཡུལ་དང་༔ ནུབ་ཕྱོགས་ཨོ་རྒྱན་ཕོ་བྲང་ནས༔ ཕག་མོ་དམར་མོ་མཁའ་འགྲོའི་ཚོགས༔ ཁ་བ་བུ་ཡུག་འཚུབ་ལྟར་བྱོན༔ རྒྱ་མཚོ་ཆེ་ལ་ཆར་བབས་ལྟར༔ བསྐྱེད་པའི་ལྷ་ལ་གཉིས་མེད་ཐིམ༔ དམ་ཚིག་ཡེ་ཤེས་རོ་གཅིག་ཀློང་༔ བརྗོད་མེད་ཀློང་དུ་དར་གཅིག་བཞག༔ མ་ཡེངས་ངང་ནས་འདི་ལྟར་བརྗོད༔ ཧཱུྃ༔ དམ་ཚིག་སེམས་དཔའ་བསྐྱེད་པའི་ལྷ༔ ཕག་མོ་དམར་མོ་སྒྲ་སྒྲོག་མ༔ འོད་ཟེར་འཕྲོ་འདུའི་ཏིང་འཛིན་གྱིས༔ མཁའ་སྤྱོད་གནས་ཡུལ་ཞིང་ཁམས་དང་༔ ནུབ་ཕྱོགས་ཨོ་རྒྱན་དུར་ཁྲོད་ནས༔ མ་མོ་མཁའ་འགྲོ་ཀུན་གྱི་རྗེ༔ རྡོ་རྗེ་ཕག་མོ་མཁའ་འགྲོ་འབུམ༔ དངོས་གྲུབ་སྩོལ་ཕྱིར་གཤེགས་སུ་གསོལ༔ བདེ་བ་ཆེན་པོ་རཱ་གའི་མ༔ སྐུ་ནི་གར་སྟབས་ལིངས་སེ་ལིང་༔ གསུང་ནི་བརྡ་སྐད་དི་རི་རི༔ ཐུགས་ནི་ཏིང་འཛིན་ཡ་ལ་ལ༔ མཁའ་འགྲོ་མ་ཚོགས་སྤུངས་སེ་སྤུང་༔ དར་དང་ཅོད་པན་པུ་རུ་རུ༔ དུར་ཁྲོད་རུས་རྒྱན་ཁྲོ་ལོ་ལོ༔ མེ་དཔུང་འོད་ཟེར་ཡ་ལ་ལ༔ མོས་པ་གཏད་པའི་གནས་མཆོག་འདིར༔ ཐུགས་རྗེའི་དབང་གིས་གཤེགས་ནས་ཀྱང་ཿགཉིས་སུ་མེད་པའི་དངོས་གྲུབ་སྩོལ༔ དྷ་ཀ་དྷཀྐི་ནི་ས་མ་ཡ་ཧྲིང་ཧྲིང་ཕེཾ་ཕེཾ་ཛཿཛཿཨ་ཝེ་ཤ་ཡ་ཨ་ཨཱ༔ བཞུགས་གསོལ༔ ཧཱུྃ༔ འདུ་འབྲལ་མེད་པའི་ད་ལ་འདིར༔ གཤེགས་བཞུད་མེད་པའི་ཕག་གདོང་མ༔ རྗེས་ཆགས་འཁོར་ལོའི་དབང་མོ་ཆེ༔ རོ་གཅིག་ཀློང་དུ་ཏིཥྛ་ལྷན༔ ཕྱག་ནི༔ ཧཱུྃ༔ བསྐྱེད་པའི་མཁའ་འགྲོ་རྣལ་འབྱོར་མ༔ གསལ་བའི་ཏིང་འཛིན་ཕྱག་རྒྱ་ཡིས༔ རྟོག་མེད་དབྱིངས་ནས་གར་སྒྱུར་ཏེ༔ གཉིས་སུ་མེད་པར་ཨ་ལ་ལ༔ པུ་རུ་ཙ་ཧོ༔ མ་ཡེངས་ཏིང་འཛིན་དེ་ཡི་ངང་༔ འོད་ཟེར་སྤྲོ་བསྡུའི་དམིགས་པ་བསྒྱུར༔ ནི་པདྨ་དྷཀྐིནི་བྷ་ར་ཧི་སརྦ་སིདྡྷི་ཕ་ལ་ཧཱུྃ་སྭཱ་ཧཱ༔ འབུམ་ཚོ་གཅིག་གཉིས་གསུམ་ལ་སོགས༔ གང་ཟག་རིམ་པའི་ཚུལ་གྱིས་བཟླས༔ དངོས་གྲུབ་འོང་རྟགས་སྣ་ཚོགས་འབྱུང་༔ ཁྱད་པར་ཞལ་འཇལ་ལུང་སྟོན་ཞིང་༔ བུད་མེད་མང་པོས་བསྐོར་བ་དང་༔ ཤ་ཆང་བཟའ་གཏུང་སྟེར་བ་སོགས༔ རྟགས་དང་མཚན་མ་གསལ་བའི་ཚེ༔ རྟོག་པ་མི་བསྐྱིལ་རེ་དོག་ཕྲལ༔ མཆོད་བསྟོད་བྱ་ཞིང་དངོས་གྲུབ་ཞུ༔ སིདྡྷཱི་རྣམ་གཉིས་དཔལ་ལ་སྤྱོད༔ ས་མ་ཡཱ༔ རྒྱ་རྒྱ་རྒྱ༔ ཐུན་སྐབས་མཆོད་བསྟོད་རིམ་པ་ནི༔ ཧཱུྃ༔ ཕྱི་ནང་གསང་བའི་འདོད་ཡོན་དང་༔ དངོས་འབྱོར་ཡིད་སྤྲུལ་མཆོད་པའི་ཚོགས༔ སྨན་གཏོར་རཀྟ་བྷ་ལིངྟ༔ མ་ཚོགས་མཁའ་འགྲོའི་ལྷ་ཚོགས་ལ༔ གུས་པས་འབུལ་ལོ་བཞེས་སུ་གསོལ༔ ནི་པདྨ་དྷཀྐི་ནི་བྷ་ར་ཧི་སརྦ་པཱུ་ཙ་ས་མ་ཡ་བྷ་ལིངྟ་རཀྟ་ཨ་མྲྀ་ཏ་ཁ་ཁ་ཁཱ་ཧི་ཁཱ་ཧི༔ གསུམ༔ བསྟོད་པ་ནི༔ ཧཱུྃ༔ ཆོས་ཀྱི་དབྱིངས་ལ་སྐུར་བཞེངས་པ༔ རྣམ་པར་རྟོག་མེད་བཅོམ་ལྡན་མ༔ དུས་གསུམ་སངས་རྒྱས་བསྐྱེད་པའི་ཡུམ༔ ཕག་གདོང་དམར་མོར་ཕྱག་འཚལ་བསྟོད༔ འདོད་པའི་དངོས་གྲུབ་སྩོལ་བའི་ལྷ༔ དཔའ་བོ་མཁའ་འགྲོར་འཁོར་ལོས་སྒྱུར༔ མཆོག་དང་ཐུན་མོང་དངོས་གྲུབ་དཔལ༔ དམ་པ་མཆོག་རྣམས་སྩལ་དུ་གསོལ༔ བདག་རྒྱུད་མི་ཤེས་རྨོངས་པས་བསྒྲིབས༔ ནོངས་པར་གྱུར་པ་ཅི་མཆིས་པ༔ ཆོས་དབྱིངས་ཀློང་དུ་བཟོད་པར་གསོལ༔ ཉམས་ཆག་སྐོངས་ལ་གཡར་དམ་སྩོལ༔ ཀཱ་ཡ་ཝཱཀྐ་ཙིཏྟ་སིདྡྷི་ཧཱུྃ༔ ས་མ་ཡཱ༔ རྒྱ་རྒྱ་རྒྱ༔ སྒྲུབ་པ་གྲོལ་ནས་རྫས་ལ་རོལ༔ དམ་མེད་འགྲོ་བས་མཐོང་མི་བྱ༔ བླ་རྡོ་སྦ་ལྕགས་སྐུ་དང་བཅས༔ དྲིལ་ཞིང་བརྟེན་བཅང་དུས་སུ་མཆོད༔ མཁའ་འགྲོ་ལུས་དང་གྲིབ་བཞིན་འགྲོག །མཆོག་གི་དངོས་གྲུབ་ཚེ་འདིར་འཐོབ༔ མ་འོངས་སྐལ་ལྡན་རྗེས་འཇུག་བུ༔ ཤིན་ཏུ་གསོང་ལ་ཉམས་ལེན་འབུངས༔ ཟབ་ཆོས་འདི་དང་འཕྲད་པའི་དུས༔ བདུད་ཚོགས་སྐྱེ་འགྲོས་གཤེ་ཞིང་འབར༔ དམ་སྲིའི་སྤྲུལ་བའི་འཁོར་འབངས་ཀྱིས༔ རིགས་ལ་བསྡོའམ་དམ་གྲིབ་འཕོག །ཁྱད་པར་འབྱུང་པོ་གླང་སྙིང་སྤྲུལ༔ རྡ་ཡིག་ཡོད་ཀྱི་མིང་ཅན་གསུམ༔ ཕྱོགས་དེར་འབྱུང་སྟེ་གཤེ་ཞིང་སྡང་༔ སྒྲུབ་པ་ཚུལ་བཞིན་ཉམས་ལོན་ན༔ དེ་རྣམས་ཟིལ་གནོན་ཆོས་ལ་འཁོད༔ དཔའ་ཞུམ་མི་དགོས་རིག་རྩལ་བསྐྱེད༔ ཚེས་བཅུ་བཟུང་ལ་གསོལ་བ་ཐོབ༔ མ་མོ་མཁའ་འགྲོས་རྒྱུན་དུ་མཆོད༔ ཁྱོད་ནི་པདྨའི་དཔའ་བོ་སྟེ༔ མཁའ་འགྲོ་ལུས་དང་གྲིབ་བཞིན་འགྲོག །མོ་རྒྱུད་རྣམས་ཀྱིས་བཀའ་ཉན་ཞིང་༔ བྲན་དང་སྡོང་གྲོགས་བྱེད་པ་ཡོང་༔ ཡང་མ་ཆེན་མོས་བཀའ་འདི་སྲུང་༔ དུས་ལ་བབས་ཚེ་སྤྲོད་ཅིག་རྒྱ༔ ས་མ་ཡཱ༔ རྒྱ་རྒྱ་རྒྱ༔ གཏེར་རྒྱ༔ སྦས་རྒྱ༔ གསང་རྒྱ༔ ཟབ་རྒྱ༔ རིག་འཛིན་ཉི་མ་གྲགས་པས་གནས་མཆོག་ཆེན་མོ་ཁམས་སྲིང་མོ་རྫོང་གི་ཆགས་རུ་ཕུག་དམར་ནས་གདན་དྲངས་ཤིང་ཤོག་སེར་ལས་བསྒྱུར་བའོ༔ མངྒ་ལམ༔

དབང་བཞིའི་གདམས་པ་མཁའ་འགྲོའི་སྙིང་ཁྲག

ཕག་མོ་དམར་མོའི་ཟབ་ཐིག་ལས༔ དབང་བཞིའི་གདམས་པ་མཁའ་འགྲོའི་སྙིང་ཁྲག་བཀའ་རྒྱ་མ་བཞུགས༔ ཡེ་ཤེས་མཁའ་འགྲོའི་ལྷ་ཚོགས་རྣམས་ལ་འདུད༔ དུར་ཁྲོད་ལུང་སྟོང་དབེན་པའི་བས་མཐའ་ན༔ ཚེ་འདི་བློས་བཏང་ཕྱི་མ་ཡང་དག་བསྒྲུབ༔ དད་བརྩོན་ཤེས་རབ་སྙིང་རྗེས་ཀུན་ནས་ཟིན༔ མཚན་ཉིད་ལྡན་པའི་སློབ་མས་བླ་མ་ལ༔ པདྨའི་མུ་དྲ་གསེར་གྱི་མཎྜལ་བཅས༔ ཀྱེ་ཧོ་དགོངས་ཤིག་བདེ་ཆེན་རྒྱལ་པོའི་སྐུ༔ བདེ་བའི་འབྱུང་གནས་བདེ་བའི་དབང་མོ་ཆེ༔ ལྷ་མོ་སྒྱུ་འཕྲུལ་བཞིན་མཛེས་ལྟ་ན་སྡུག༔ མཆོད་པར་བཞེས་ལ་བྱང་ཆུབ་བདེ་བའི་ཁམས༔ ཡོངས་སུ་སྤེལ་ཏེ་བདག་ཉིད་སྨིན་པར་ཞུ༔ བླ་མ་ཡབ་ཡུམ་ཆོ་ག་བཞིན་དུ་སྤྱད༔ སྙོམ་པར་འཇུག་ཅིང་བྱང་སེམས་མཁའ་ལ་བསྐྱིལ༔ ཐབས་ཀྱིས་བླང་ཞིང་པཉྩ་སུ་རར་སྦྱར༔ བྷན་དྷར་བླུག་ཅིང་དཀྱིལ་འཁོར་དབུས་སུ་འགོད༔ མེ་ལོང་སིནྡྷུ་རས་གླན་ཆོས་་འབྱུང་འབྲི༔ ཧ་རི་ནི་ས་བསྙེན་སྔགས་ཡི་གེ་བཀོད༔ ཐོད་པའི་ཁ་བཀབ་སྟེང་ན་ཙཀ་ལི་བཞག༔ དར་དམར་གུར་ཕུབ་བསྐྱེད་རྫོགས་ཏིང་འཛིན་གསལ༔ སྔགས་དམིགས་གནད་བསྣུན་བསྙེན་པའི་ཁ་གསོ་ཞིང་༔ ལས་བུམ་བསྐྱེད་བསྟིམ་སློབ་མ་ཁྲུས་ནས་ཕྱུང་༔ བགེགས་བསྐྲད་བསྲུང་འཁོར་བསྒོམ་ཞིང་མིག་དར་བཅིངས༔ གསེར་གྱི་མཎྜལ་ཐོགས་ཏེ་འདི་སྐད་ཞུ༔ ཧཱུྃ༔ མ་ལུས་འདྲེན་པའི་བདག་ཉིད་རྡོ་རྗེ་འཆང་༔ བདག་ཅག་འདིར་ཚོགས་རིགས་ཀྱི་བུ་རྣམས་ལ༔ གསང་བའི་དབང་གི་སྨིན་གྲོལ་དངོས་གྲུབ་སྩོལ༔ ལན་གསུམ་ཞུ༔ ཧོཿ ཁྱོད་ཅག་བཀའ་བཞིན་བསྒྲུབ་པའི་བུ༔ དམ་ཚིག་ཚུལ་བཞིན་བསྲུང་ནུས་པའི༔ རིགས་ལྡན་ཡིན་ན་ནང་དུ་ཤོག༔ ལོག་པར་ལྟ་བ་ཕྱིར་དེངས་ཤིག༔ ཅེས་བརྗོད་བདེ་སྟོང་ལོ་རྒྱུས་བྱ༔ བླ་མ་ཡབ་ཡུམ་དཀྱིལ་འཁོར་ལ༔ བྱང་ཆུབ་སེམས་ཀྱི་མེ་ཏོག་འབུལ༔ སྔོན་ནས་འབྲེལ་བའི་ལྷ་ལ་ཕོབ༔ ཚེ་རབས་ལྷ་དང་མཇལ་བར་ཤོག༔ སྤྱི་བོར་བབས་ན་འཁོར་ལོའི་ཤུགས་འཆང་མ༔ མགྲིན་པར་བབས་ན་དགའ་བའི་རྒྱལ་མོ་རྩལ༔ ཐུགས་ཀར་བབས་ན་མཆོག་གི་དབང་མོ་ཆེ༔ ལྟེ་བར་བབས་ན་དགའ་བྲལ་བདེ་ཆེན་མ༔ གསང་བར་བབས་ན་ལྷན་སྐྱེས་བདེ་སྟོང་མར༔ གསང་མཚན་གདགས་ཤིང་གང་བབས་ཡི་དམ་ལྷ༔ གསེར་ཐུར་མིག་དབྱེ་ཙཀྵུ་པྲ་ཝེ་ཤ་ཡ་ཧོཿ བསྐྱེད་རིམ་གཏད་ཅིང་ཡེ་ཤེས་སེམས་དཔའ་བསྟིམ༔ རིག་མ་ཐོགས་ཤིང་སློབ་བུའི་སྤྱི་བོར་བསྐུར༔ ཧཱུྃ༔ བཅོམ་ལྡན་འདས་མ་ཡེ་ཤེས་མཁའ་འགྲོ་མ༔ དུས་གསུམ་རྒྱལ་བ་བསྐྱེད་པའི་ཡུམ་གྱི་རྗེ༔ ལྷ་མོའི་དབང་ཕྱུག་བདེ་བའི་རྒྱ་མཚོ་མས༔ སྐལ་ལྡན་རིགས་ཀྱི་བུ་ལ་དབང་བསྐུར་བས༔ མཁའ་འགྲོ་རྒྱ་མཚོའི་སྐུ་ཡི་དབང་ཐོབ་ཤོག༔ ཨཱོཾ་ཨཱཿཧཱུྃ་ནི་བཛྲ་བྷ་ར་ཧི་མ་ཧཱ་མུ་དྲ་ཀཱ་ཡ་ཨ་བྷི་ཥིཉྩ་ཧཱུྃ༔ བྷནྡྷ་མགྲིན་པར་བཞག༔ ཧཱུྃ༔ གསང་བའི་མཁའ་ལས་ཕྱུངས་པའི་ཀུན་ད་དང་༔ རྩ་བརྒྱད་སྟོང་སྦྱར་པཉྩ་ཨམྲི་ཏ༔ སུ་ར་ཏ་ཡི་བཅུད་ཀྱིས་སྦྲན་པ་འདི༔ དུམ་གཅིག་སྣོད་དུ་བསྐྱིལཏེ་མགྲིན་པར་བཞག༔ སྐལ་ལྡན་རིགས་ཀྱི་བུ་ལ་དབང་བསྐུར་བས༔ མཁའ་འགྲོ་རྒྱ་མཚོའི་གསུང་གི་དབང་ཐོབ་ཤོག༔ ཨཱོཾ་ཨཱཿཧཱུྃ་ནི་བཛྲ་བྷ་ར་ཧི་མ་ཧཱ་མུ་དྲ་ཝཱཀྐ་ཨ་བྷི་ཥིཉྩ་ཧཱུྃ༔ མེ་ལོང་སྙིང་གར་བཞག༔ ཧཱུྃ༔ གདོད་ནས་དག་པ་རང་བྱུང་འོད་པོ་ཆེ༔ བདེ་སྟོང་གཉིས་མེད་སྨྲ་བསམ་བརྗོད་ལས་འདས༔ ངོ་བོ་ཉིད་སྐུ་ཡེ་ཤེས་མཁའ་འགྲོའི་ཐུགས༔ སྐལ་ལྡན་རིགས་ཀྱི་བུ་ལ་དབང་བསྐུར་བས༔ མཁའ་འགྲོ་རྒྱ་མཚོའི་ཐུགས་ཀྱི་དབང་ཐོབ་ཤོག༔ ཨཱོཾ་ཨཱཿཧཱུྃ་ནི་བཛྲ་བྷ་ར་ཧི་མ་ཧཱ་མུ་དྲ་ཙིཏྟ་ཨ་བྷི་ཥིཉྩ་ཧཱུྃ༔ ཡུམ་གྱི་མཁའ་བསྟན༔ ཧཱུྃ༔ ལྟོས་ཤིག་མཁའ་དབྱིངས་རྣམ་དག་བདེ་བ་ཆེ༔ རྡོ་རྗེ་བཙུན་མོའི་བྷ་ག་ཨེ་ཡི་ཆ༔ སངས་རྒྱས་ཡེ་ཤེས་མི་ཟད་ཟ་མ་ཏོག༔ ཆོས་ཀྱི་དབྱིངས་དང་འདུ་འབྲལ་སྐད་ཅིག་མེད༔ སྐལ་ལྡན་རིགས་ཀྱི་བུ་ལ་དབང་བསྐུར་བས༔ མཁའ་འགྲོ་རྒྱ་མཚོའི་ཡོན་ཏན་དབང་ཐོབ་ཤོག༔ ཨཱོཾ་ཨཱཿཧཱུྃ་ནི་བཛྲ་བྷ་ར་ཧི་མ་ཧཱ་མུ་དྲ་རཏྣ་ཨབྷི་ཥིཉྩ་ཧཱུྃ༔ རིགས་མ་སློབ་བུར་སྦྱིན་ཞིང་༔ ཧཱུྃ༔ བདེ་བ་ཆེན་པོ་དྲུག་པ་རྡོ་རྗེ་འཆང་༔ གསང་ཆེན་ལམ་གྱི་ཐེག་པའི་དམ་ཚིག་ལྟར༔ ཡང་དག་སྤྱོད་ལ་བདེ་སྟོང་རང་ཞལ་ལྟོས༔ སྲོག་གི་ཕྱིར་དུའང་ཀུན་ད་འཛིན་པ་དང་༔ མ་ཆེན་མཁའ་འགྲོའི་ཚོགས་རྣམས་བརྟེནཅིང་བསྒྲུབས༔ ཨཱོཾ་ཨཱཿཧཱུྃ་ནི་བཛྲ་བྷ་ར་ཧི་མ་ཧཱ་མུ་དྲ་ཀརྨ་ཨ་བྷི་ཥིཉྩ་ཧཱུྃ༔ ཡོལ་བའི་ཕྱི་ན་ཆོ་ག་བཞིན་དུ་སྤྱད༔ བླ་མས་བདེ་སྟོང་ངོ་སྤྲོད་གཞུང་ལྟར་བརྗོད༔ སློབ་བུས་དགའ་བཞིའི་ཏིང་འཛིན་དབབ་བསྐྱིལ་བཟློག༔ འདྲེན་དང་དགྲམ་པའི་འཕྲུལ་འཁོར་བརྩོན་པར་བྱ༔ དེ་ནི་དམ་ཚིག་ལྡན་པའི་བུ་བདུན་ལས༔ མང་བར་མི་བྱ་ཤིན་ཏུ་ཕག་ཏུ་སྦོས༔ འཆལ་ན་མཁའ་འགྲོའི་བཀའ་ཆད་འོང་བས་གཟབ༔ ས་མ་ཡཱ༔ རྒྱ་རྒྱ་རྒྱ༔ གཏེར་རྒྱ༔ སྦས་རྒྱ༔ ཟབ་རྒྱ༔ གཉན་རྒྱ༔ དམ་རྒྱ༔ སོ་ཕག་ཤི་ན་རྒྱ༔ ན་ར་ཀན་རྒྱ་རྒྱ་རྒྱ༔ རིག་འཛིན་ཆེན་པོ་ཉི་མ་གྲགས་པས་ཆགས་རུ་ཕུག་དམར་ནས་ཤིང་ཕོ་སྟག་ལ་སྤྱན་དྲངས་ཤིང་ཆགས་རུ་ཕུག་ནག་བདེ་བ་ཆེན་པོར་ཤོག་སེར་ལས་བསྒྱུར་བའོ། །མངྒ་ལཾ། །

བླ་རྡོ་ཡིད་བཞིན་ནོར་བུ།

ཕག་མོ་དམར་མོའི་ཟབ་ཐིག་ལས༔ བླ་རྡོ་ཡིད་བཞིན་ནོར་བུ་བཞུགས༔ ཡེ་ཤེས་མཁའ་འགྲོའི་ཚོགས་ལ་འདུད༔ ཕྱི་རབ་རྣལ་འབྱོར་སྒྲུབ་པ་པོས༔ མ་མོ་མཁའ་འགྲོའི་སྒྲུབ་རྟེན་དུ༔ བླ་རྡོའི་ཙཀྲ་འབྲི་བ་ནི༔ དར་དམར་རྒྱ་ཤོག་གང་རུང་ངོས༔ ཤིང་ཏོག་དམར་པོ་རྒྱ་མཚལ་དང་༔ སིན་དྷུ་རས་གླན་འཁོར་ལོ་ནི༔ ཕག་མོའི་ལྟེ་བར་མུ་ཁྱུད་ལྔ༔ ལྟེ་བར་ནི་ལ་རྩ་བསྙེན་དང་༔ ཐ་མར་འདོད་གསོལ་འབྲི་བར་བྱ༔ དེ་ཡི་ཕྱི་རིམ་རྩིབས་བཞི་ལ༔ ཧ་རི་ནི་ས་འབྲུ་བཞི་བཀོད༔ རྩིབས་མཆན་བཞི་ལ་ཕྱག་མཚན་བཞི༔ དེ་ཡི་ཕྱི་རིམ་མུ་ཁྱུད་ལ༔ དཀར་མོ་སེར་མོ་དམར་མོ་ངང་༔ ལྗང་མོ་ནག་མོ་འབུམ་སྡེ་ཡི༔ སྐུ་གསུང་ཐུགས་ཀྱིས་བྱིན་རློབས་ཤིག༔ ཅེས་དང་མཚན་སྔགས་ཅི་ཤེས་འབྲི༔ མཐའ་ལ་འདོད་གསོལ་སྦྱར་བར་བྱ༔ དེ་ཡི་ཕྱི་རིམ་མུ་ཁྱུད་ལ༔ ཨཱ་ལི་ཀཱ་ལི་འབྲི་བར་བྱ༔ དེ་ཡི་ཕྱི་རིམ་མུ་ཁྱུད་ལ༔ རྟེན་འབྲེལ་སྙིང་པོ་ཅི་མང་བཏབ༔ བྲིས་སུབས་ལྷག་ཆད་སྤངས་ཏེ་གཟབ༔ ཕག་མོ་སྤྱན་འདྲེན་རབ་ཏུ་གནས༔ བླ་མ་ཡབ་ཡུམ་བྱང་སེམས་དང་༔ པཉྩ་རིན་ཆེན་རྣམ་ལྔའི་རིགས༔ སིན་དྷུ་ར་དང་ཤིང་ཏོག་དམར༔ ནང་དུ་གདབ་ཅིང་དར་ཚོན་དྲིལ༔ སྦ་ལྕག་ཚིགས་གསུམ་མགུལ་དུ་བཏགས༔ མཆོད་བསྟོད་སྒྲུབ་པའི་རྟེན་དུ་བཅང་༔ དམ་མེད་ལག་ལ་འགྲིམ་མི་བྱ༔ ས་རྗེན་མེ་ཆུའི་ཁར་མི་བཞག༔ མཁའ་འགྲོ་དངོས་སུ་བསྐྱེད་ནས་ཀྱང་༔ བླ་རྡོར་བཅང་བས་དངོས་གྲུབ་འཐོབ༔ ཕག་མོ་དམར་མོའི་བླ་རྡོ་འདི༔ བདག་འདྲ་པདྨ་འབྱུང་གནས་ཀྱིས༔ ཕྱི་མའི་དོན་དུ་ཁྱོད་ལ་གདམས༔ ཡི་གེར་ཐོབ་ལ་གཏེར་དུ་སྦོས༔ འདི་ནས་རིང་དུ་འདས་པའི་འོག༔ བྱང་ཁམས་སྣ་བརྒྱད་བོད་ན་འགྲིམ༔ བོད་ཡུལ་མངའ་ཐང་ཆེས་ཆེར་འཕེལ༔ དེ་དུས་ཟབ་མོའི་གདམས་པ་འདི༔ ཁམས་པ་ཉི་མ་གྲགས་དང་འཕྲད༔ འགྲོ་བའི་དོན་ཆེན་སྤྱོད་པ་ཡོང་༔ ཟང་ཟིང་མ་མང་བསྒྲུབ་ལ་འབུངས༔ སྙིང་པོའི་ཆོས་ཀྱིས་འགྲོ་བ་འདྲེན༔ ཅེས་གསུངས་པ་རྣམས་བདག་འཚོ་རྒྱལ་གྱིས་བརྡ་ཡིག་ཏུ་བཏབ་སྟེ་རིན་པོ་ཆེས་གཏེར་དུ་སྦས་པའོ༔ ས་མ་ཡཱ༔ རྒྱ་རྒྱ་རྒྱ༔ གཏེར་རྒྱ༔ སྦས་རྒྱ༔ ཟབ་རྒྱ༔ ཨྀ་ཐི་ན་རྒྱ་རྒྱ་རྒྱ༔ རིགས་འཛིན་ཉི་མ་གྲགས་པ་རྩལ་གྱིས་ཕུག་དམར་ནས་གདན་དྲངས་ཤིང་ཞལ་བཤུས་པའོ། །མངྒ་ལཾ། །

ཉམས་ལེན་བདེ་སྟོང་འཁོར་ལོ།

ཕག་མོ་དམར་མོའི་ཟབ་ཐིག་ལས༔ ཉམས་ལེན་བདེ་སྟོང་འཁོར་ལོ་བཞུགས༔ ཡེ་ཤེས་མཁའ་འགྲོའི་ལྷ་ཚོགས་རྣམས་ལ་འདུད༔ དབང་བཞི་ཐོབ་ཅིང་ཐེག་ཆེན་སྐལ་བར་ལྡན༔ བླ་མ་ལ་མོས་གསང་སྔགས་བསྒྲུབ་ལ་བརྩོན༔ ཚེ་འདི་བློས་བཏང་ཕྱི་མ་དང་དུ་བླངས༔ ཆགས་ཅན་བུ་ལ་ཆགས་པས་གྲོལ་བའི་ཕྱིར༔ བདེ་བ་ཆེན་པོ་རང་ལུས་གདམས་པ་འདི༔ མཁའ་འགྲོའི་དུས་བཟང་ཚོགས་འཁོར་མཎྜལ་བཅས༔ སྣོད་དང་ལྡན་ལ་གདམས་པ་སྙན་དུ་སྐྱུགས༔ དེས་ཀྱང་ཐོབ་ཆོག་ལེ་ལོ་མེད་པ་རུ༔ དབེན་པའི་གནས་སུ་སྒྲུབ་པ་རེམ་ལ་འབུངས༔ རྡོ་རྗེའི་སྐུ་འགྲུབ་བདེ་སྟོང་ཡེ་ཤེས་འབར༔ དབང་བཞི་ཐོབ་པས་སྒྲིབ་བཞི་མཐར་ཟད་ཅིང་༔ སྐུ་བཞིའི་ཡེ་ཤེས་མངོན་སུམ་རང་ལ་རྙེད༔ བྱང་སེམས་མ་ཉམས་བརྟེན་ཞིང་གོང་དུ་སྤེལ༔ དགེ་ཚུལ་དགེ་བསྙེན་དགེ་སློང་བསླབ་སྡོམ་རྫོགས༔ བདེ་སྟོང་འབར་ཞིང་དགའ་བཞིའི་ཡེ་ཤེས་མྱོང་༔ དམ་ཚིག་གསུམ་གྱིས་བརྒྱན་པའི་སྔགས་པ་སྟེ༔ སྣོད་ལྡན་སྐྱེས་བུའི་མྱུར་ལམ་ཨེ་མ་ཧོ༔ ས་མ་ཡཱ༔ རྒྱ་རྒྱ་རྒྱ༔ དེ་ནས་བདེ་བའི་གདན་ལ་སྐྱིལ་ཀྲུང་འདུག༔ སྐྱབས་འགྲོ་སེམས་བསྐྱེད་གསོལ་བ་སྙིང་ནས་འདེབས༔ ཆོས་བདུན་ལྡན་པས་ལུས་གནད་དྲང་པོར་བསྲང་༔ མ་དག་ལུས་ཀྱི་སྟོང་ར་བསྒོམ་པ་ཡིས༔ འབྱུང་བཞིའི་དུག་སངས་ལས་རླུང་རང་སོར་རྒྱུ༔ དག་པ་ལྷ་ཡི་སྟོང་ར་བསྒོམ་པ་ཡིས༔ བར་ཆད་བགེགས་གྲོལ་ཡེ་ཤེས་བྱིན་རླབས་འཐོབ༔ དེ་ཡི་ཕྱིར་ན་སྔོན་འགྲོ་འདི་ལ་འབད༔ དམིགས་པ་གསལ་ཞིང་ཏིང་འཛིན་བརྟན་པ་དང་༔ མཚན་ཉིད་བཞི་ལྡན་དབུ་རྐྱང་རོ་གསུམ་དང་༔ རྩ་དང་འཁོར་ལོ་ཡི་གེ་དཀར་དམར་རྣམས༔ ངོ་བོ་སྟོང་པ་རང་བཞིན་གསལ་བ་ལ༔ ཡེ་ཤེས་ལྔ་ལྡན་མདངས་དང་ལྡན་པར་བསྒོམ༔ བུམ་པ་ཅན་གྱི་རླུང་བསྐྱིལ་ཕོ་བར་དགང་༔ ཨ་ཤད་མེ་དང་ཧཾ་ཡིག་བསིལ་རྒྱུན་རྣམས༔ འབར་འཛག་འབྲོས་འདེད་མ་ཡེངས་རྩེ་གཅིག་ངང་༔ དགའ་བཞིའི་ཡེ་ཤེས་མས་འབེབས་ཡས་འཛེག་བསྒོམ༔ ཡན་ལག་ལྔ་འདུལ་འབེབས་ཆེན་འབེབས་ཆུང་དང་༔ བར་འབེབས་རླུང་རོ་འབུད་དང་གསིག་ཅིང་སྤྲུག༔ ས་མ་ཡཱ༔ རྒྱ༔ དེ་ལྟར་གདམས་པ་གནད་བསྣུན་མཐར་ཕྱིན་ནས༔ དྲང་སྲོང་ཙོག་པུའི་འཁྲུལ་འཁོར་བཅས་ནས་ཀྱང་༔ རང་མདུན་ཡིད་འོང་གཞོན་ནུ་ཡིད་ལ་བཀོད༔ རང་ཉིད་དབང་ཆེན་རྟ་མཆོག་རྒྱལ་པོར་བསྒོམས༔ མུ་དྲ་རྡོ་རྗེ་རྣལ་འབྱོར་མ་རུ་གསལ༔ བལྟ་འཁྱུད་གཡའ་སྒོག་འོ་བྱེད་ལྕེ་འཇིབ་དང་༔ དལ་བུས་རྡོ་རྗེ་པདྨ་འདུ་འཕྲོད་སྦྱོར༔ ཐིག་ལེ་དབབ་བསྐྱིལ་ལྡོག་འདྲེན་བཀྲམ་པ་ཡི༔ འཁྲུལ་འཁོར་དམིགས་པ་རིམ་གྱིས་ལས་ལ་སྦྱོར༔ བསྐྱེད་རྫོགས་ལས་རུང་གོམས་པ་ལྡན་པའི་ཚེ༔ ལུས་ནི་ཕྱེད་སྐྱིལ་ལག་སོར་མཁའ་འགྲོ་ལྔ༔ རྡོ་རྗེ་གཅུན་པས་རྟ་མགྲིན་རིགས་ལྔ་དང་༔ སྙོམས་འཇུག་དགའ་བདེ་གོང་བཞིན་ཉམས་བལྟ་སྟེ༔ ཐིག་ལེ་གསང་བར་འབེབ་ཅིང་བསྐྱིལ་ལྡོག་འདྲེན༔ བཀྲམ་པ་ལ་སོགས་ཉམས་ལེན་གནད་དུ་བསྣུན༔ ས་མ་ཡཱ༔ རྒྱ༔ འདི་ཉིད་མཐར་ཕྱིན་བསྐྱེད་རྫོགས་ལས་སུ་རུང་༔ དམིགས་པ་གར་གཏད་བསྒྱུར་ཐུབ་བདེ་སྟོང་རྒྱས༔ ཚ་གྲང་ཐུབ་དང་སྲོག་རྩོལ་དྲོད་གསལ་ཚེ༔ མཚན་ལྡན་མུ་དྲ་གསང་བ་བཅུ་གསུམ་ལྟར༔ ཡང་དག་དམ་ཚིག་ལྡན་པས་བརྟེན་པར་བྱ༔ ཐ་མལ་སྐྱེ་བོས་མཐོང་ཐོས་མེད་པར་སྦད༔ གསང་སྒོ་འཆལ་ན་མཁའ་འགྲོའི་བཀའ་ཆད་ཡོང་༔ ལོག་རྟོག་མཁན་གྱི་འགྲོ་བ་ངན་སོང་འཁྱམ༔ བདག་གཞན་གཉིས་འཕུང་སྔགས་སྤྱོད་ཉེས་པ་ཡིན༔ དེ་ཕྱིར་ལས་ཅན་སྦྱང་པ་སྔོན་ལ་སོང་༔ སྐལ་ལྡན་ཕོ་མོ་རེས་འགའི་སྤྱོད་ཡུལ་ལས༔ ཀུན་གྱི་ཐུན་མོང་མ་ཡིན་གསང་ངོ་རྒྱ༔ ཨོ་རྒྱན་མཁན་པོ་པདྨ་འབྱུང་གནས་བདག༔ མཁའ་འགྲོའི་གསང་མཛོད་ཟབ་མོའི་ཆོས་རྣམས་རྡོལ༔ ཕྱི་མའི་དུས་ཀྱི་འགྲོ་བའི་དོན་བསམ་ཏེ༔ ཟབ་ཆོས་མང་བོ་སྒྲུབ་གནས་རྣམས་སུ་སྦས༔ དེ་དག་ནང་ནས་ཡང་ཟབ་མཆོག་གྱུར་ལམ༔ ཕག་མོ་རིགས་ལྔ་ཟབ་ཏིག་སྐོར་ལྔའི་ཆོས༔ མཁའ་འགྲོ་སྡེ་ལྔའི་གནས་སུ་ཨ་ཐམ་རྒྱ༔ མ་འོངས་དུས་སུ་ཐུགས་སྤྲུལ་སྐལ་ལྡན་ཞིག༔ སྦས་ཚུལ་འགྲོ་འདྲེན་སྣང་སྤྱོད་ཆོ་ལེ་བ༔ ཟང་ཐལ་ཞེན་བྲལ་ཁམས་ནས་ཉི་གྲགས་འབྱུང་༔ རྟེན་འབྲེལ་འགྲིག་ཚེ་གདམས་པ་འདི་དང་འཕྲད༔ དེ་དུས་ཤོག་སེར་ལྟོས་ལ་རང་ཉམས་ལོང་༔ དེ་ནས་ས་གཡོ་ལྕེ་འབབས་ཐུག་ཆོམ་དང་༔ རྣམསལ་སོགས༔ སྡེ་བརྒྱད་འབྱུང་བ་འཁྲུག་པའི་དུས་ཡིན་པས༔ དུས་རྟགས་གསལ་ཚེ་ཟབ་ཆོས་འདི་ཕོབ་ལ༔ ཚོགས་འཁོར་བསྐང་བཤགས་གསོལ་བ་ཐོབ་མཛོད་དང་༔ བོད་འབངས་འགྲོ་བའི་བར་ཆད་སྐབས་ཤིག་སེལ༔ སྐྱབས་ཚེ་དར་ཨ་སྦར་དང་ཐར་པའི་མིང་༔ བདུད་སྤྲུལ་དྲུག་གིས་བསྐུར་འདེབས་འཕུང་དཀྲུག་བརྩོམ༔ དེ་དུས་ཚོགས་བརྒྱ་བསྐང་བཤགས་འཕགས་པ་བསྒྲུབ༔ པདྨ་ང་ལ་གསོལ་བ་ཐོབ་དང་སེལ༔ ལོག་པའི་སེམས་འཆང་ལོག་པའི་སྤྱོད་པ་སྤྱོད༔ དམ་སྲིའི་སྤྲུལ་པ་འགྲུབ་གྱི་མིང་ཅན་གྱི༔ སེལ་ཐབས་ཕག་མོ་སྒྲུབ༔ ཚེས་བཅུ་ཆག་མེད་གསོལ་འདེབས་འབུང་ན་བཟློག༔ དེ་དག་རྣམས་ལ་སྲུང་མ་དམ་ཅན་གྱི༔ བཀའ་ཡི་ཆད་པས་མ་རུང་འཕུང་གསུམ་སྡང་༔ ཡིད་ཆེས་སྐྱེད་ཅིག་མ་འོངས་སྐལ་ལྡན་བུ༔ ཁྱད་པར་གནས་མཆོག་རྡོ་རྗེ་སྙིང་རྫོང་དུ༔ སྒྲུབ་པའི་སྡེ་ཚུགས་མདོ་ཁམས་སེམས་ཅད་བདེ༔ ལམ་ཡིག་གསང་བའི་སྙིང་པོའི་ལུང་བྱང་རྣམས༔ བཀའ་ཡི་ཐ་རམ་ཡིན་པས་སྙིང་ལ་ཆོངས༔ གཞུང་དང་ལུང་བྱང་སྤང་བླང་སོ་སོར་ཕྱེ༔ གཞུང་ནི་ཡིད་ཆེས་བསྐྱེད་ཕྱིར་འགྲོ་ལ་སྟོན༔ ལུང་བྱང་སྤང་བླང་རང་གི་ཉེར་ལེན་གྱིས༔ གཟའ་བདུད་གདམས་སྐོར་ཆོས་ཚན་སུམ་ཅུ་པ༔ ལྕགས་མོ་བྱ་ལ་འབེབས་ལུང་མ་གསལ་ན༔ ཡང་གཏེར་མཁར་གྱི་རི་ལ་སྦ་བ་དགེ༔ ལས་ཅན་ལྕོག་རོའི་སྤྲུལ་པའི་སྐྱེས་བུ་ཡིས༔ ཕྱག་རྟེན་ལོངས་སྤྱོད་རྫོགས་སྐུའི་ཅོད་པན་འབུལ༔ རྟེན་འབྲེལ་ལེགས་བབས་ཆོས་བཀའ་ངང་གིས་སྤེལ༔ གོ་མཚོན་བྱུང་ན་སྐབས་ཤིག་བསྡམ་པར་བྱ༔ ས་མ་ཡཱ༔ རྒྱ་རྒྱ་རྒྱ༔ གཏེར་རྒྱ༔ སྦས་རྒྱ༔ ཟབ་རྒྱ༔ གཉན་རྒྱ༔ ས་མ་ཡ༔ རྒྱ་རྒྱ་རྒྱ༔ ཁམས་པ་ཉི་མ་གྲགས་པ་རྩལ་གྱིས་ཁམས་སྲིང་མོ་རྫོང་གི་ཆགས་རུ་ཕུག་དམར་ནས་ཤིང་ཕོ་སྟག་གི་ལོ་ལ་སྤྱན་དྲངས་ཤིང་། མེ་ཕོ་སྟག་གི་ལོ་ལ་ཆགས་རུ་ཕུག་ནག་བདེ་བ་ཆེན་པོར་ཤོག་སེར་ལས་ཕབ་པའོ། །མངྒ་ལཾ། །

ཆགས་པའི་ལམ་ཟབ་བདེ་བ་ཆེན་པོ།

ཕག་མོ་དམར་མོའི་ཟབ་ཐིག་ལས༔ ཆགས་པའི་ལམ་ཟབ་བདེ་བ་ཆེན་པོ་བཞུགས༔ ཡེ་ཤེས་མཁའ་འགྲོའི་ལྷ་ཚོགས་རྣམས་ལ་འདུད༔ རང་ལུས་ལྡན་པའི་རྣལ་འབྱོར་མཚན་ལྡན་གྱིས༔ གཞན་ལུས་མུ་དྲ་བསྟན་པའི་རིམ་པ་ནི༔ དབེན་ཞིང་དང་ལ་མི་མེད་ལུང་སྟོང་དུ༔ གཞན་གྱི་གཡེང་བ་སྤང་ཞིང་བརྩོན་པས་བསྒྲུབ༔ ས་མ་ཡཱ༔ རྒྱ་རྒྱ་རྒྱ༔ དེ་ནས་ལུང་ནས་བཤད་པའི་མུ་དྲ་མོ༔ མཚན་དང་ལྡན་ཞིང་ཡིད་འོང་བལྟ་ན་སྡུག༔ ཡིད་བཞིན་ནོར་འདྲའི་དྷཀྐི་བཙལ་ནས་ཀྱང་༔ གསང་སྔགས་དབང་སྦྱིན་རྒྱུ་འབྲས་ཆོས་ཀྱིས་སྦྲན༔ ལོག་ལྟ་སེལ་ཞིང་སྣོད་དུ་རུང་བར་བྱས༔ དྲི་བཟང་ཆུས་བཀྲུ་རྒྱན་བཏགས་མཛེས་པར་བྱ༔ ནང་ཚངས་ཅན་གྱི་གདན་ཁར་ཡབ་ཡུམ་གཉིས༔ གཅེར་བུ་ཕྱེད་སྐྱིལ་འདུག་སྟངས་ལེགས་པར་བཅའ༔ མདུན་གྱི་ནམ་མཁར་སྐྱབས་གནས་ཐམས་ཅད་བསྒོམ༔ འགྲོ་དྲུག་ཆགས་པས་བཅིངས་པའི་འགྲོ་བ་རྣམས༔ བྱང་ཆུབ་གོ་འཕང་འདོད་པའི་སྐྱབས་སེམས་ཀྱིས༔ ཚིག་གིས་གསལ་གདབ་འདི་བཞིན་བརྗོད་པར་བྱ༔ ཧཱུྃ་ཧོ༔ སྐྱབས་གནས་ལྷ་ཚོགས་དཔའ་བོ་མཁའ་འགྲོ་ལ༔ ཆགས་པ་དམར་པོ་ཟུང་འཇུག་ཕོ་ཉའི་ལམ༔ བདེ་བ་ཆེན་པོ་རྡོ་རྗེ་འཆང་བ་པོ༔ བདེ་སྟོང་གཉིས་མེད་རྟོགས་ཕྱིར་སྐྱབས་སུ་མཆི༔ མ་རྒྱུད་མཁའ་འགྲོའི་ཚོགས་ལ་ཕྱག་འཚལ་ལོ༔ ཀུནྡ་བྱང་ཆུབ་མཆོད་པ་བཞེས་སུ་གསོལ༔ ཉོན་མོངས་འཛིན་པས་བཟུང་བ་མཐོལ་ལོ་བཤགས༔ དགའ་བ་བཞི་ཡི་དོན་ལ་ཡི་རང་ཞིང་༔ ཐབས་ལམ་ཐེག་མཆོག་ཆོས་ཀྱི་འཁོར་ལོ་བསྐོར༔ མཁའ་དབྱིངས་རྣམ་དག་ཡེ་ཤེས་རྟག་བརྟན་ཞིང་༔ ཆགས་བྲལ་རྡོ་རྗེ་འཛིན་དབང་གྲུབ་པར་ཤོག༔ སེམས་བསྐྱེད་པ་ནི༔ ཧོ་སྐྱེ་རྒ་རྣམ་བཞིས་བསྡུས་པའི་སྐྱེ་འགྲོ་རྣམས༔ སྲིད་པའི་རྟེན་འབྲེལ་བཅུ་གཉིས་རྒྱུན་བཅད་ཅིང་༔ བདེ་ཆེན་ཟུང་འཇུག་སྐུ་གསུམ་ལམ་སྦྱོར་ཏེ༔ ལམ་ལྔ་ས་བཅུ་བླ་མེད་མཆོག་ཐོབ་ཤོག༔ ཅེས་བརྗོད༔ བསྐྱེད་རིམ་ནི༔ ཧཱུྃ་ཧྲཱི༔ སྣང་སྲིད་དག་པ་དབང་གི་གཞལ་ཡས་ན༔ བདག་ཉིད་དབང་གི་རྒྱལ་པོ་རྟ་མཆོག་དཔལ༔ ཞལ་གཅིག་ཕྱག་གཉིས་སྤྱན་གསུམ་ཞི་མ་ཁྲོ༔ དབང་གི་རྟ་སྐད་ཆགས་པའི་ཉམས་འགྱུར་ལྡན༔ མ་ཧཱ་མུ་དྲ་རྡོ་རྗེ་རྣལ་འབྱོར་མ༔ དམར་མོ་མདངས་ལྡན་ཞི་འཛུམ་སྒེག་ལྡེམ་འཁྲིལ༔ ཕག་ཞལ་སྒྲ་སྒྲོག་དྷཀྐི་དབང་དུ་སྡུད༔ ཡབ་ཡུམ་གར་སྟབས་འཁྲིལ་སྦྱོར་གྲི་ཐོད་འཆང་༔ སྤྱི་བོར་རྡོ་རྗེ་ཐོད་ཕྲེང་ཡབ་ཡུམ་ལ༔ བརྒྱུད་པའི་བླ་མ་དྷཀྐིའི་ཚོགས་དང་སྦྱོར༔ དུང་ཁང་བུདྡྷ་དཔའ་བོ་ཡབ་ཡུམ་ལ༔ བུདྡྷ་རིགས་ཀྱི་དཔའ་བོ་མཁའ་འགྲོས་བསྐོར༔ མགྲིན་པར་པདྨ་དཔའ་བོ་ཡབ་ཡུམ་ལ༔ པདྨ་རིགས་ཀྱི་དཔའ་བོ་མཁའ་འགྲོས་བསྐོར༔ ཐུགས་ཀར་བཛྲ་དཔའ་བོ་ཡབ་ཡུམ་ལ༔ རྡོ་རྗེ་རིགས་ཀྱི་དཔའ་བོ་མཁའ་འགྲོས་བསྐོར༔ ལྟེ་བར་རཏྣ་དཔའ་བོ་ཡབ་ཡུམ་ལ༔ རིན་ཆེན་རིགས་ཀྱི་དཔའ་བོ་མཁའ་འགྲོས་བསྐོར༔ གསང་གནས་ཀརྨ་དཔའ་བོ་ཡབ་ཡུམ་ལ༔ ཀརྨ་རིགས་ཀྱི་དཔའ་བོ་མཁའ་འགྲོས་བསྐོར༔ གཞན་ཡང་བ་སྤུའི་འོད་ཀློང་རེ་རེ་བཞིན༔ འབུམ་ཕྲག་ཡངས་པའི་དཔའ་བོ་མཁའ་འགྲོ་རྣམས༔ མ་ལུས་ཏིལ་སྒང་གང་བུ་བྱེ་ལྟར་གསལ༔ སྤྱན་འདྲེན་པ་ནི༔ ཧཱུྃ་ཧྲཱིཿ དབང་ཆེན་རོལ་པའི་གཞལ་ཡས་ཆེན་པོ་ནས༔ བདེ་ཆེན་རྒྱལ་པོ་རྟ་མགྲིན་གཤེགས་སུ་གསོལ༔ ནུབ་ཕྱོགས་ཨོ་རྒྱན་ཡུལ་གྱི་ཕོ་བྲང་ནས༔ ཡུམ་མཆོག་རྡོ་རྗེ་ཕག་མོ་གཤེགས་སུ་གསོལ༔ དཔལ་རི་པདྨ་འོད་ཀྱི་གཞལ་ཡས་ནས༔ པད་འབྱུང་རྩ་བརྒྱུད་བླ་མ་གཤེགས་སུ་གསོལ༔ སྐུ་ལྔ་ལྷུན་གྱིས་གྲུབ་པའི་གཞལ་ཡས་ནས༔ དཔའ་བོ་རྟ་མགྲིན་རིགས་ལྔ་གཤེགས་སུ་གསོལ༔ ཡེ་ཤེས་ལྔ་ལྡན་རིགས་ལྔའི་ད་ལ་ནས༔ ཕག་མོ་སྡེ་ལྔའི་ལྷ་ཚོགས་གཤེགས་སུ་གསོལ༔ གནས་ཡུལ་དུར་ཁྲོད་མཁའ་སྤྱོད་ཞིང་ཁམས་ནས༔ འབུམ་ཕྲག་ཡངས་པའི་དཔའ་བོ་མཁའ་འགྲོ་རྣམས༔ ཐུགས་རྗེའི་དབང་གིས་གནས་འདིར་གཤེགས་ནས་ཀྱང་༔ གཉིས་སུ་མེད་པར་བྱིན་གྱིས་བརླབ་ཏུ་གསོལ༔ ཨཱོཾ་ཨཱ༔ ཧཱུྃ་བཛྲ་གྷུ་རུ་ཧ་རི་ན་ས་ཧྱ་གྷྲཱི་ཝ་ར་ཙ་ཧྲི་ཡ་ཧྲིང་ཧྲིང་ཕེམ་ཕེམ་ཨ་ཝེ་ཤ་ཡ་ཨཱ་ཨཱ༔ ཞེས་བརྗོད་ཅིང་བདག་བསྐྱེད་ལ་བསྟིམས་ཏེ་བསྐྱེད་རིམ་རབ་ཏུ་གསལ༔ དེ་ནས་ཡུམ་གྱིས་འདི་སྐད་དོ༔ ཧཱུྃ་བཛྲ་གསུམ་བརྗོད༔ ཧཱུྃ༔ བདག་གི་ས་བོན་ཧྲཱིཿལས་ཧཱུྃ་འཕྲོས་པས༔ དཔའ་བོའི་རྒྱལ་པོ་ཁྱོད་ཀྱི་གསང་བར་ཕོག༔ གསང་རྡོར་འོད་ཞུ་ས་བོན་ཧཱུྃ་དུ་གྱུར༔ སྐད་ཅིག་གནས་གྱུར་རྡོ་རྗེ་རྩེ་ལྔ་པ༔ བྱང་ཆུབ་སེམས་ཀྱི་ཀུནྡས་ཁེངས་པ་ལ༔ བུག་པ་ཡི་གེ་ཕཊ་ཀྱིས་བཀག་པར་གྱུར༔ དེ་ནས་ཡབ་ཀྱིས་འདི་སྐད་དོ༔ པཾ་པདྨ་མཎྜལ་གསུམ་བརྗོད༔ ཧཱུྃ༔ བདག་གི་ས་བོན་ཧཱུྃ་ལས་ཧྲཱིཿའཕྲོས་པས༔ མཚན་ལྡན་མུ་དྲ་ཁྱོད་ཀྱི་གསང་བར་ཕོག༔ པདྨ་འོད་ཞུ་ས་བོན་ཧྲཱིཿརུ་གྱུར༔ སྐད་ཅིག་གནས་གྱུར་པདྨ་འདབ་མ་བརྒྱད༔ ཟིལ་པ་དངས་མའི་བཅུད་ཀྱིས་བལྟམས་པ་ལ༔ པདྨའི་ཟེ་འབྲུ་ཨ་ཡིག་དམར་པོས་བལྟམས༔ བཛྲ་པདྨ་མ་ཧཱ་སུ་ཁ་དྷ་ར་ཧཱུྃ༔ བདེ་བ་ཆེན་པོ་དབང་གི་འཁོར་ལོར་གྱུར༔ ཨཱོོཾ་ཨཱཿཧཱུྃ་བྷོ་དྷི་ཙིཏྟ་གྷ་ན་གྷུ་ཡ་སརྦ་པཱུ་ཛ་ཧོ༔ ཅེས་བརྗོད་གཟུགས་བལྟ་་དྲིར་སྣོན་ནུ་མ་མཉེ༔ གཡའ་སྒོག་བཅུད་མྱང་ཆགས་གཏམ་འོ་སེན་འདེབས༔ རྡོ་རྗེ་པདྨ་ལས་སུ་རུང་བའི་ཚེ༔ བཟོད་གླགས་མེད་པའི་བདེ་བ་རྒྱས་ནས་ཡོང་༔ དེ་ཚེ་རིག་པའི་ངོ་བོར་ཅེར་གྱིས་བལྟ༔ ལྷ་ཚོགས་གསལ་བསྐྱེད་ཡབ་ཡུམ་ཐམས་ཅད་སྦྱོར༔ བདེ་སྟོང་ཟུང་འཇུག་ཏིང་འཛིན་ཕྲིལ་ཕྲིལ་བསྒོམས༔ པདྨའི་མཐའ་ནས་རྡོ་རྗེས་དལ་གྱིས་བརྩོག༔ དལ་བུས་བསྣུན་ཅིང་དལ་བུས་ཅུང་ཟད་སྤྱོད༔ ཡང་བསྐྱོད་ཡང་བསྒུལ་མ་ཡེངས་དོན་ལ་བལྟ༔ དེ་ཚེ་རྩ་ཕྲན་ཉི་ཁྲི་ཆིག་སྟོང་དང་༔ ཁྱད་པར་དུང་ཁང་ནང་ནས་བདེ་བའི་རྒྱུན༔ ཧཾ་ཡིག་ཞུ་ཞིང་མགྲིན་པར་སླེབ་པའི་ཚེ༔ ཕྱི་རོལ་རྣམ་རྟོག་རག་པ་ཕལ་ཆེར་འགག༔ འདོད་ཆགས་གཉིས་འཛིན་རྟོག་པ་ཕལ་ཆེར་ནུབ༔ ཆགས་པའི་རྟོགས་པ་བཞི་བཅུ་ཞེ་གཅིག་ཡོལ༔ བདེ་ལ་རྟོག་པ་མེད་པའི་ཡེ་ཤེས་འཆར༔ དགའ་བ་དང་པོ་སྤྲུལ་སྐུའི་དགོངས་པའོ༔ བདེ་སྟོང་དབྱེར་མེད་ངང་དེར་དལ་གྱིས་སློད༔ རྟོག་མེད་ཁྱབ་བརྡལ་ཆེན་པོར་བཞག་པར་བྱ༔ དེ་ནས་བདེ་བ་ཡལ་དུས་དལ་བུར་སྤྱོད༔ བདེ་བ་ཆུང་ན་ཅུང་ཟད་དྲག་ཏུ་སྤྱོད༔ རྩ་བཟང་མུ་དྲ་ཡིན་ན་བདེ་བ་རྒྱས༔ རྩ་ཞན་མཚན་ངན་རིགས་ཀྱི་བུད་མེད་ལ༔ དྲག་ཏུ་སྤྱོད་ན་དངས་མ་མྱུར་དུ་འཆོར༔ དེ་བས་དལ་བྲེལ་ཉམས་དང་སྦྱར་བ་གཅེས༔ རྣལ་འབྱོར་དང་པོ་པ་ཡང་དྲག་ཆེ་ན༔ གོམས་པ་མེད་པས་ཁམས་ཉམས་དལ་བར་བསླབ༔ དེ་ལྟར་སྤྱོད་པས་བྱང་སེམས་སྙིང་གར་འབབས༔ དེ་ཚེ་ཞེ་སྡང་རྟོག་པ་སོ་གསུམ་འགགས༔ མཆོག་གི་དགའ་བ་ལོངས་སྐུའི་དགོངས་པ་སྟེ༔ སྣང་བ་མཆེད་པས་ཤེས་པ་ཤིན་ཏུ་གསལ༔ དེ་ལ་སྐད་ཅིག་དང་པོའི་ཡེ་ཤེས་ཞེས༔ བསྒུལ་སྤྱོད་བཤོལ་ནས་ཡེ་ཤེས་ངང་དུ་བཞག༔ དེ་ནས་ཚོད་སྦྱར་རིག་པ་མ་ཡེངས་ངང་༔ ལྟེ་བར་ཕབ་པས་བདེ་བ་ཆེས་ཆེར་རྒྱས༔ གོང་ལས་བདེ་བ་ལྔ་འགྱུར་འཕེལ་བའི་ཚེ༔ གཏི་མུག་ལས་གྱུར་རྟོག་པ་བདུན་འགག་ཅིང་༔ ལྷན་ཅིག་སྐྱེས་པའི་དགའ་བའི་ཡེ་ཤེས་མཆོག༔ ངོ་བོ་ཉིད་སྐུའི་དགོངས་པ་རྒྱུད་ལ་སྐྱེ༔ མཆེད་ཉམས་བདེ་གསལ་མི་རྟོག་ཆེས་ཆེར་གསལ༔ སྐད་ཅིག་གཉིས་པའི་ཡེ་ཤེས་དེ་ཡི་ངང་༔ སྒུལ་སྐྱོད་བཅད་ནས་མ་ཡེངས་ངང་ལ་བཞག༔ དེ་ནས་ཚོད་དང་སྦྱར་ནས་དལ་བུས་སྤྱོད༔ བདེ་བ་གསང་བར་རྒྱས་དུས་འདར་དང་ཟིལ༔ གོང་གི་བདེ་བ་བདུན་འགྱུར་རབ་རྒྱས་ཏེ༔ རང་བཞིན་བརྒྱད་ཅུའི་རྟོག་པ་འགག་པར་འགྱུར༔ དགའ་བྲལ་དགའ་བའི་ཡེ་ཤེས་ཆེན་པོའོ༔ སྐད་ཅིག་གསུམ་པའི་ཡེ་ཤེས་རྗེན་པར་འཆར༔ བདེ་སྟོང་ཆོས་སྐུའི་ཡེ་ཤེས་ངོས་འཛིན་ཅིང་༔ སྒུལ་སྐྱོད་བཞག་སྟེ་རྡོ་རྗེའི་རྩ་བར་བསྐྱིལ༔ ས་མ་ཡཱ༔ རྒྱ་རྒྱ་རྒྱ༔ དེ་ཚེ་བདེ་བ་ཤིན་ཏུ་རྒྱས་དྲགས་པས༔ གཉེན་པོ་བསྟེན་ཅིང་རིག་པ་རྗེན་ལ་ཕུད༔ ཞེན་མེད་བདེ་སྟོང་དབྱེར་མེད་དོན་ལ་བལྟ༔ བདེ་བ་མ་ཡལ་ཙམ་དུ་དལ་བུས་སྤྱོད༔ བདེ་བ་ཆེར་རྒྱས་གཉེན་པོའི་སྟོབས་ཞན་ན༔ འོག་སྒོ་གློད་ཅིང་ཉྭ་བཞི་སྒྲིམ་པ་དང་༔ སྦྲུལ་ཚང་གྱེན་འདྲེན་ལྕེ་ནི་ཡ་རྐན་སྦྱར༔ རྒྱ་མཚོ་ཨར་གཏད་མགོ་བོ་གཡས་གཡོན་སྒྲིལ༔ ཡབ་ཡུམ་དབྲལ་ཞིང་གྱི་ལིང་བཞི་ཕྲ་དང་༔ སྟག་མོའི་སྐྱུགས་སྟངས་ཝ་མོའི་སྣོམ་ཚུལ་དང་༔ གཡང་མོའི་རྩལ་སྤྲུག་དགྲམ་པའི་ལས་སྦྱོར་འབུང་༔ ཚད་དང་ལྡན་ཞིང་གོམས་ནས་བྷ་གར་འབེབས༔ དཀར་དམར་ཀུནྡ་སྨྱུག་སྦུག་ཆུ་འདྲེན་ལྟར༔ ཐོག་ཐོག་ཧྲེད་ཧྲེད་འབུར་འབུར་གར་གར་དུ༔ ཡུམ་གྱི་རྩ་སྣ་ཟིན་ཚེ་ཧྲིལ་གྱིས་གཅུན༔ ཧིང་ཞེས་རྡོ་རྗེས་སྒྲིམས་རྔུབས་ལན་བདུན་འཐེན༔ མ་འདྲོངས་གྱུར་ན་ད་དུང་ཧཱུྃ་གིས་སྤར༔ དངས་མ་དྲོངས་ཚེ་ཡུམ་ནི་འདར་ཞིང་དངངས༔ སྐད་རྩེར་དབུགས་འཁྱིག་དྲན་མེད་བརྒྱལ་སོགས་འབྱུང་༔ དེ་ཚེ་དགྲམ་པའི་འཁྲུལ་འཁོར་འདུལ་སྦྱོང་འབད༔ ས་མ་ཡཱ༔ རྒྱ་རྒྱ་རྒྱ༔ རིགས་མར་བསྐུ་མཉེ་ཟས་ཀྱིས་ལུས་གསོ་ཞིང་༔ ཡབ་ཡུམ་གཉིས་ཀ་བདེ་བའི་ཏིང་འཛིན་དང་༔ བདེ་བའི་ཡོན་ཏན་རྒྱུད་ལ་འབྱོངས་པར་བྱ༔ དངས་མ་ལས་རུང་ཡེ་ཤེས་རྒྱུད་འབྱོངས་ན༔ ཚེ་འདིས་བྱང་ཆུབ་མྱུར་ལམ་རྡོ་རྗེ་འཆང་༔ ཉོན་མོངས་དབང་ཤོར་ཁམས་འཆོར་དམ་ཚིག་ཉམས༔ མི་རུང་སྣ་དགུ་མཁའ་འགྲོའི་བཀའ་ཆད་འབྱུང་༔ རྡོ་རྗེའི་དམྱལ་བར་ཐེམ་པའི་ལས་རྫོགས་ཀྱང་༔ ལྷག་མ་མངལ་གྱི་སྲིན་བུ་སྟོང་ལུས་ལེན༔ སྤྱོད་མཁས་མཆོག་ཐུན་མཁའ་འགྲོ་སྤྲིན་བཞིན་འདུ༔ དེ་ཡི་ཕྱིར་ན་དམ་ཚིག་ལྡན་པ་གཅེས༔ ཤིན་ཏུ་གཅེས་སོ་ཡིད་ཀྱིས་བརྣག་པ་མཛོད༔ མ་འོངས་རྩུབ་འགྱུར་བཞི་བཅུ་ཁ་རལ་ཚེ༔ སྦྱངས་པ་ཅན་གྱི་བུ་དང་འདི་འཕྲད་ནས༔ འབྲེལ་ཐོགས་བུད་མེད་སྐྱེ་མཐའི་ལུས་སུ་ཤོག༔ ས་མ་ཡཱ༔ རྒྱ་རྒྱ་རྒྱ༔ གཏེར་རྒྱ༔ སྦས་རྒྱ༔ ཟབ་རྒྱ༔ ས་མ་ཡཱ༔ རྒྱ་རྒྱ་རྒྱ༔ མཁའ་འགྲོ་གསང་བའི་རྒྱ་ཡོད་དོ༔ ས་མ་ཡཱ༔ ཁ་ཐམ༔ ཨི་ཐི། ཁམས་པ་ཉི་མ་གྲགས་པ་རྩལ་གྱིས་གནས་མཆོག་ཆེན་པོ་ཆགས་རུ་ཕུག་དམར་ནས་ཤིང་ཕོ་སྟག་གི་ལོ་ལ་སྤྱན་དྲངས་པའོ། །མངྒ་ལཾ། །

བདེ་ཆེན་འཁྲུལ་འཁོར་བདེ་སྟོང་རང་འབར།

ཕག་མོ་དམར་མོའི་ཟབ་ཐིག་ལས༔ བདེ་ཆེན་འཁྲུལ་འཁོར་བདེ་སྟོང་རང་འབར་བཞུགས༔ ཡེ་ཤེས་མཁའ་འགྲོའི་ལྷ་ཚོགས་རྣམས་ལ་འདུད༔ ཕྱི་མའི་རྗེས་འཇུག་སྐལ་ལྡན་སྐྱེས་བུ་ཡི༔ དབང་བཞིས་གྲོལ་ནས་ཐབས་ལམ་རླུང་སྦྱོར་གྱི༔ ཐ་མལ་ཉོན་མོངས་དབང་གྱུར་མ་ཡིན་པའི༔ དགའ་བཞིའི་རོལ་རྩེད་ཏིང་འཛིན་སྤེལ་བའི་ཚེ༔ ཡབ་ཡུམ་འཁྲུལ་འཁོར་འདི་བཞིནའབད་པས་བརྩོན༔ མཚན་ལྡན་མ་ལ་རྩ་རིགས་ལྔར་བཤད་ཀྱང་༔ རྣམ་པར་དབྱེ་ན་རྩ་རིགས་ཤིན་ཏུ་མང་༔ དེ་ལྟར་བརྟེན་པའི་འཁྲུལ་འཁོར་མ་འབད་ན༔ རྩ་ནི་མི་ཟིན་བདེ་བ་འཕེལ་མི་འགྱུར༔ དང་པོ་རྡོ་རྗེ་རིགས་ཀྱི་འཁྲུལ་འཁོར་ནི༔ ཡབ་ཀྱི་ཕྱག་རྒྱ་ཡུམ་གྱི་མགུལ་ནས་འཁྱུད༔ ཡུམ་གྱིས་ཡབ་ཀྱི་རྐེད་པ་ནས་འཁྱུད་དེ༔ རྡོ་རྗེས་སྟེང་འོག་བཀན་ཞིང་ཕུལ་བ་ན༔ པདྨའི་གཡོན་ནས་རྩ་སྣ་རྙེད་པར་འགྱུར༔ པདྨ་ཅན་ནི་གན་རྐྱལ་སྟོང་མཐོར་བཅུག༔ ཡུམ་གྱི་ཞབས་གཉིས་ཡབ་ཀྱི་ཕྲག་ལ་བཀལ༔ ཕྱག་གཉིས་དཔུང་མགོ་གཉིས་ནས་དཔུང་པར་བཟུང་༔ དལ་གྱིས་སྤྱོད་པར་བྷ་གའི་སྟེང་ངམ་འོག༔ རྩ་སྣ་རྙེད་ཅིང་བདེ་བ་རྒྱས་པ་འོང་༔ རི་དྭགས་ཅན་ནི་རྐང་གཉིས་གྲུ་ཁུགས་བཀལ༔ ཡབ་ཀྱི་ཕྱག་གིས་བཅུ་དྲུག་མདོ་ནས་བསྡམས༔ རྩ་ནི་བྷ་གའི་གཡས་གཡོན་རྒྱབ་ནས་ཡོང་༔ གླང་སྣའི་ཞབས་གཉིས་ཡབ་ཀྱི་ནུ་ཐད་བརྐྱང་༔ ཡབ་ཀྱི་གཡས་ཀྱིས་ཡུམ་གྱི་མགུལ་ནས་འཁྱུད༔ གཡོན་གྱིས་ཡུམ་གྱིས་རྐང་གཡས་སྨད་ཁོག་བསྡམས༔ རྩ་ནི་ཟེའུ་འབྲུའི་འོག་གམ་རྒྱབ་ནས་འབྱུང་༔ ཁ་གདངས་མ་ཡི་ཕྱག་གཉིས་མཆན་འོག་འཁྱུད༔ ཡབ་ཀྱིས་ཤེས་རབ་མགུལ་འཁྱུད་རྩ་ནི་འོག༔ ཕྱག་རྒྱ་གན་རྐྱལ་རྐང་གཉིས་ལྟག་པར་བཀལ༔ ལག་གཉིས་སྒྱིད་པའི་ནང་ནས་ཕྱི་ལ་གདེངས༔ ཡབ་ཀྱིས་པུས་བཙུགས་སྟེང་ནས་སྦྱར་བར་བྱ༔ ཕྱག་རྒྱ་གན་རྐྱལ་སྒྱིད་པ་དཔུང་པར་བཀལ༔ ལག་གཉིས་སྒྱིད་ཁུང་ནང་ནས་ཕྱིར་གདེངས་ཏེ༔ རྟིང་པ་གཉིས་པོ་གཟུང་ལ་ཕྱི་ལ་བགྲད༔ ཡབ་ཀྱི་ཕྱག་གིས་མགུལ་ནས་འཁྱུད་ཅིང་སྤྱོད༔ ཡུམ་ནི་གན་རྐྱལ་ལག་གཉིས་སྒྱིད་པ་ཡི༔ ནང་ནས་ཕྱིར་སྟོན་རྐང་མགོ་གཉིས་ནས་བཟུང་༔ ཡབ་ཀྱིས་ཕྱག་རྒྱའི་རྐེད་པར་འཁྱུད་དེ་སྦྱོར༔ ཕྱག་རྒྱ་གན་རྐྱལ་སྟོད་ནི་ཅུང་ཞིག་དམའ༔ རྐང་གཉིས་རྣ་བ་གཡས་གཡོན་ཐད་དུ་ཡར༔ མགོ་བོའི་རྒྱབ་བརྟེན་ལག་གཉིས་སྒྱིད་ཁུང་ནས༔ ཡུམ་གྱི་འོག་ཏུ་འབོལ་ལོ་བཅུག་ཅིང་འདེགས༔ ཡུམ་གྱི་སྟེང་རླུང་གཅུན་ནས་བསྐོར་ཞིང་སྤྱོད༔ ཡབ་ཀྱི་སྟེང་ནས་ཉུག་ཉུག་སྤྱོད་ཅིང་བསྒྲིམས༔ པདྨ་ཅན་དང་རྡོ་རྗེའི་རིགས་ལ་བསྔགས༔ རྩ་ནི་ཟེའུ་འབྲུའི་སྟེང་ནས་མཇལ་བར་འགྱུར༔ ཡུམ་ནི་གན་རྐྱལ་རྐང་གཉིས་གནམ་དུ་བགྲད༔ ལག་གཉིས་ཡབ་ཀྱི་འཕོངས་ནས་དམ་དུ་འཁྱུད༔ ཡབ་ཀྱི་ཞབས་གཉིས་ཅུང་ཟད་བརྐྱང་སྟེ་སྤྱོད༔ ཡུམ་ནི་གན་རྐྱལ་རྐང་གཡོན་ཕྲག་པར་བཀལ༔ རྐང་གཡས་རྐེད་བསྡམས་ལག་གཡོན་རྐང་མགོ་བཟུང་༔ ཤེས་རབ་ཕྱག་གཡས་ཡབ་ཀྱི་སྟོད་ནས་འཁྱུད༔ ཡབ་ཀྱི་ཞབས་བརྐྱང་ཕྱག་གིས་མགུལ་ནས་འཁྱུད༔ འདི་ནི་མ་ཧཱ་བྷ་གའི་རིགས་ལའོ༔ ཡབ་ཀྱིས་ཙོག་བུ་པུས་གཉིས་བགྲད་ལ་བཙུགས༔ དེ་ཡི་པང་དུ་ཡུམ་སྟོད་ཙོག་པུ་རུ༔ ལག་གཉིས་རྐང་པའི་བྱིན་པ་གཉིས་བཟུང་ནས༔ གཡས་གཡོན་ཕྱི་ལ་བགྲད་དེ་སྦྱོར་བར་བྱ༔ ཡབ་ཡུམ་ཙོག་པུའམ་ནི་འཕྲེད་ཉལ་ལ༔ ཡུམ་གྱི་རྐང་གཡོན་ཡབ་ཀྱི་གྲུ་ཁུག་གཡས༔ བཅུག་ནས་ཡབ་ཀྱི་ཕྱག་གཉིས་དཔུང་པར་འཁྱུད༔ ཡུམ་གྱི་ཕྱག་གཉིས་བརླ་ཡི་ཕྱི་ལོག་ནས༔ ནང་བཏང་གྲུ་མོ་ཁུག་ལ་སྒྱིད་པ་བཀལ༔ ལག་གཉིས་ཡབ་ཀྱི་འཕོངས་ནས་འཁྱུད་དེ་བསྡམས༔ ཡབ་ཀྱི་ཞབས་གཉིས་བརྐྱང་སྟེ་སྦྱོར་བར་བྱ༔ འདི་བཞིར་ཡུམ་གྱིས་འོག་སྒོ་འཐེན་འཕུལ་དང་༔ ཡབ་ཀྱི་རྡོ་རྗེ་བཀན་ཞིང་སྤྱོད་པར་བྱ༔ རྩ་སྣ་གཡོན་གནས་ལས་རིགས་རི་དྭགས་མར༔ མཆོག་ཏུ་བསྔགས་སོ་མི་རྟོག་ཡེ་ཤེས་འཆར༔ ཡུམ་གྱི་ཞབས་གཉིས་ཡབ་ཀྱི་ཕྲག་ལ་བཀལ༔ ཡབ་ཀྱི་པུས་བཙུགས་འཕོངས་ནི་པང་དུ་བླངས༔ ཕྱག་གིས་ཡུམ་གྱི་མགུལ་ལམ་གཙུག་ནས་བསྡམས༔ ཡུམ་གྱི་ཕྱག་གིས་པུས་ཁུག་མཚམས་ནས་བསྡམས༔ རེ་འགའ་ཡབ་ཡུམ་སྟེང་འོག་ལྡོག་སྟེ་སྤྱོད༔ རིགས་མ་གན་རྐྱལ་ཞབས་གཉིས་རྐེད་པ་བསྣོལ༔ རྐང་པའི་ལོང་མོ་གཉིས་པོ་ལག་གིས་བཟུང་༔ ཡབ་ཀྱི་སྐྱིལ་ཀྲུང་ཡུམ་གྱི་མཆན་འོག་ཏུ༔ ཕྱག་གཉིས་བཏང་སྟེ་དཔུང་པ་གཉིས་བཟུང་སྦྱར༔ རེས་འགའ་ཡུམ་ནི་སྟེང་ནས་མར་ལ་སྦྱར༔ ཡུམ་ནི་འཕྲད་ཉལ་ལག་གཡོན་འོག་ཏུ་བཅུག༔ རྐང་པའི་རྟིང་པ་གཉིས་པོ་འཕོངས་ལ་སྦྱར༔ པུས་མོ་བགྲད་པར་ཡབ་ཀྱིས་སྦྱར་ནས་ཀྱང་༔ ཕན་ཚུན་ལག་པས་རོ་སྟོད་ནས་འཁྱུད་འདེགས༔ རེས་འགའ་གཡས་གཡོན་ལྡོག་སྟེ་སྦྱར་བར་བྱ༔ ཡུམ་ནི་གན་རྐྱལ་ཞབས་གཉིས་མཆན་འོག་གཏད༔ ལག་གཉིས་ཡབ་ཀྱི་རྐེད་ནས་འཐེན་ཞིང་བསྡམས༔ ཡབ་ནི་པུས་མོ་འགྲད་དེ་ཙོག་པུ་ལ༔ ལག་གཉིས་ཡུམ་གྱི་དཔུང་པ་འཐེན་ཞིང་སྤྱོད༔ རེས་འགའ་འཕྲེད་དུ་ཉལ་ཞིང་སྦྱོར་བར་བྱ༔ ཡུམ་གྱི་གཡོན་འཐེན་ཡབ་ཀྱིས་གཡས་སུ་བཀན༔ དུང་ཅན་རིན་ཅེན་རིགས་ཀྱི་རྩ་ནི་གཡས་གཡོན་ཕྱིར༔ འཁྲུལ་འཁོར་བཞི་པོས་བདེ་སྟོང་འབར་བར་བྱེད༔ ཡུམ་ནི་ལངས་ཏེ་ཅུང་ཟད་སྒུར་བ་ལ༔ རྐང་པ་ཉག་བྱ་ཚང་ར་ཕྱི་ལ་གདེངས༔ ལག་གཉིས་བརླ་ཤ་གཉིས་ནས་བཟུང་བ་དང་༔ ཡབ་ཀྱི་པུས་གཙུག་རྒྱབ་ནས་ལག་གཉིས་ཀྱིས༔ ཡུམ་གྱི་དཔུང་པ་གཉིས་ནས་བཟུང་སྟེ་སྤྱོད༔ རིགས་མ་འཕྲེད་ཉལ་གཞོགས་གཡས་འོག་ལ་བཅུག༔ འཕོངས་ནི་ཕྱིར་སྟོན་ཡབ་ཀྱིས་རྒྱབ་ནས་སྦྱོར༔ ལག་གཉིས་ཡུམ་གྱི་རྒྱུ་ཞབས་གཉིས་ནས་བསྡམས༔ ཡུམ་གྱི་ལག་གཉིས་ཡབ་ཀྱི་གྲུ་མོ་ནས༔ ཡར་ལ་འཐེན་ཞིང་རྐང་གཉིས་ཅུང་ཟད་བརྐྱང་༔ ཡུམ་གྱིས་སུག་བཞི་བཙུགས་ཤིང་ཡབ་ལངས་ཏེ༔ ལག་གཉིས་ཡུམ་གྱི་དཔུང་པར་འཁྱུད་དེ་སྤྱོད༔ ཡུམ་ནི་ཁ་བུབ་རུས་སྦལ་ལྟར་འདུག་ཅིང་༔ ཡབ་ཀྱིས་པུས་བཙུགས་རྒྱབ་ནས་རྡོ་རྗེ་བསྣུན༔ ཡུམ་གྱིས་བརླ་སྐྱོགས་ལགས་པས་བཟུང་ལ་སྤྱོད༔ ཡུམ་གྱིས་འོག་རླུང་ཕྱིར་འཕུལ་གྲུད་ཐབས་སྦྱོར༔ གླང་སྣ་མ་དང་པད་ཆེན་རིགས་ལ་བསྔགས༔ རྩ་སྣ་ཟིན་ཞིང་བདེ་སྟོང་འབར་བར་འགྱུར༔ ཡབ་ནི་སྐྱིལ་ཀྲུང་ཡུམ་ནི་པང་དུ་བླངས༔ ཡུམ་ཞབས་རྐེད་པ་ཕྱག་གཉིས་མགུལ་ནས་འཁྱུད༔ ཡུམ་གྱིས་རྐེད་པར་ཕྱག་གིས་བསྡམས་ཏེ་སྤྱོད༔ ཡབ་ནི་གན་རྐྱལ་ཡུམ་ནི་སྟེང་ནས་ཞོན༔ ཡབ་ཀྱི་ཕྱག་གཉིས་ཡུམ་གྱིས་འཕོངས་ཤད་འཁྱུད༔ ཡུམ་གྱིས་ཕྱག་གཉིས་གདན་ཁར་བཙུགས་ནས་ཀྱང་༔ སྨད་ན་གཡས་བསྐོར་གཡོན་བསྐོར་དག་གིས་སྦྱོར༔ ཡུམ་ནི་གན་རྐྱལ་རྐང་པ་གཉིས་པོ་བསྐུམ༔ ལག་གཉིས་རང་གི་སྒྱིད་པ་གཉིས་ནས་བཟུང་༔ ཡབ་ཀྱི་ལག་གཉིས་ཡུམ་གྱི་གཙུག་ནས་འཁྱུད༔ རྐང་གཉིས་བརྐྱང་སྟེ་སྦྱོར་བར་བྱ་བའོ༔ ཡབ་ཡུམ་གཉིས་ལང་རོ་སྟོད་ཕྱི་ལ་སྒྱེ༔ ལག་གཉིས་ཕན་ཚུན་དཔུང་པར་དམ་དུ་འཁྱུད༔ དལ་བུས་སྤྱོད་པས་བདེ་བ་འཕེལ་བར་འོང་༔ འདི་ལྟར་ཟབ་མོའི་ལམ་ལ་ཞུགས་པའི་ཚེ༔ བྱང་སེམས་སྲོག་ནི་ཕྱིར་ཡང་མི་བཏང་ཞིང་༔ བདེ་བ་བསྐྱེད་དུས་གནས་ལུགས་ངང་དུ་ཞོག༔ བདེ་བ་ཡལ་ནས་དལ་བུས་སྤྱོད་མཁས་བྱ༔ དེ་ཚེ་བདེ་བའི་ངོ་བོ་སྟོང་པ་ལ༔ རིག་པའི་ངོ་བོ་གསལ་ལ་རྗེན་ནེ་བ༔ བདེ་སྟོང་ཟུང་དུ་འཇུག་པའི་ཡེ་ཤེས་དེ༔ ཆགས་པའི་ལམ་ལ་བརྟེན་ནས་སྦྱངས་ཐབས་ཡིན༔ ཐ་མལ་སྐྱེ་བོས་ཉོན་མོངས་རང་གར་སྤྱོད༔ བདེ་སྟོང་ངོ་བོ་ཉིད་ལ་མཉམ་བཞག་མེད༔ ཐིག་ལེ་ཉམས་ཤིང་བརྒྱུད་འཕེལ་སྡིག་ལ་སྤྱོད༔ འདི་ཕྱི་གཉིས་མེད་བྱང་ཆུབ་ལམ་དང་འཕྲལ༔ ཆགས་ཅན་རྣལ་འབྱོར་ཆགས་པས་ལམ་བགྲོད་ཕྱིར༔ ཉོན་མོངས་མ་སྤངས་ཡེ་ཤེས་ལམ་དུ་སློངས༔ དགའ་བཞིའི་དོན་རྟོགས་སྐུ་བཞིའི་སངས་རྒྱས་འཐོབ༔ དམ་བཞིན་མི་ལྡན་སྔགས་ལ་འབོག་འཆོལ་སྤྱོད༔ ཉོན་མོངས་དབང་སོང་ཆགས་ལམ་བྱེད་པ་རྣམས༔ རྡོ་རྗེ་མེ་འདག་འབར་བར་འཚོད་ཏ་རེ༔ དེ་བས་ཕྱི་རབས་དད་བརྩོན་ཤེས་རབ་ལྡན༔ ཐེག་ཆེན་སྐལ་ལྡན་རེས་འགའ་མ་གཏོགས་པར༔ འདི་ཉིད་རླུང་ཕྱོགས་ཙམ་དུའང་བསྒྲག་མི་བྱ༔ བསྒྲགས་ན་ཡེ་ཤེས་མཁའ་འགྲོའི་བཀའ་ཆད་འོང་༔ གཉིས་ཀ་ཉམས་པས་དཔེ་ཁ་བསྡམས་པར་རིགས༔ ཕག་མོ་དམར་མོའི་ཟབ་ཏིག་གདམས་པ་རྣམས༔ མཆོག་གི་བུ་གསུམ་དཀྱིལ་འཁོར་འཛིན་པ་བདུན༔ དམ་ལྡན་སྔགས་པ་གཉིས་དང་རྣལ་འབྱོར་བཞི༔ ངག་སྐྱབས་སྙིང་འཚོ་རྒྱལ་དང་པདྨ་བློ༔ དཀོན་འཕྲིན་ཆོས་ཀྱི་མིང་འཛིན་དམ་པ་དང་༔ ཨོ་རྒྱན་ཚེ་ཡུ་གུ་རུ་དཔལ་གྱི་མཚན༔ བཛྲ་དག་གི་མིང་ཟུང་ལྡན་པ་ཡོང་༔ དེ་ལྟར་མ་ཡིན་གཞན་ལ་ཕག་ཏུ་སྦོས༔ ཁྱད་པར་ང་ཡི་ཐུགས་སྤྲུལ་ཉི་མ་གྲགས༔ བདེ་ཆེན་དབང་གི་དཔའ་བོ་པདྨའི་རིགས༔ འདོད་ཆགས་མ་སྤངས་ཐི་བྱ་ཚང་འཇུག་འདྲ༔ གདམས་པ་འདི་བཞིན་ཉམས་སུ་བླངས་པའི་ཚེ༔ ཉམས་མྱོང་བདེ་གསལ་མི་རྟོག་ཡེ་ཤེས་འབར༔ སྤྱན་དང་མངོན་ཤེས་རྫུ་འཕྲུལ་མང་དུ་འབྱུང་༔ སྐུ་བཞིའི་འབྲས་བུ་ཆགས་པའི་ལམ་ནས་རྟོགས༔ བསྙེན་སྒྲུབ་ནུས་སྟོབས་མཐུ་དང་ལྡན་པ་འོང་༔ དེ་ཚེ་འབྲེལ་ཐོགས་བུད་མེད་ངན་སོང་ཁེགས༔ བཀའ་བཞིན་བསྒྲུབ་ཅིང་ཆོས་ལྟར་སྤྱོད་པ་ནི༔ བདེ་བ་ཅན་དང་ང་ཡི་དྲུང་དུ་འོང་༔ ས་མ་ཡཱ༔ རྒྱ་རྒྱ་རྒྱ༔ གཏེར་རྒྱ༔ སྦས་རྒྱ༔ ཟབ་རྒྱ༔ གཉན་རྒྱ༔ གསང་རྒྱ༔ དམ་རྒྱ༔ ས་མ་ཡཱ༔ རྒྱ་རྒྱ་རྒྱ༔ རིགས་འཛིན་ཆེན་པོ་ཉི་མ་གྲགས་པས་ཆགས་རུ་ཕུག་དམར་ནས་གདན་དྲངས་ཤིང་ཤོག་སེར་ལས་བསྒྱུར་བའོ། །མངྒཱ་ལམ། །

ཞལ་གདམས་ལམ་གྱི་སྒྲོན་མེ།

ཕག་མོ་དམར་མོའི་ཟབ་ཐིག་ལས༔ ཞལ་གདམས་ལམ་གྱི་སྒྲོན་མེ་བཞུགས༔ ཡེ་ཤེས་མཁའ་འགྲོའི་ཚོགས་ལ་གུས་པས་འདུད༔ ཕྱི་མའི་བུ་མཆོག་ཐབས་ཀྱི་ལམ་སྤྱོད་རྣམས༔ གདམས་པ་འདི་བཞིན་ཉམས་སུ་ལེན་པར་མཛོད༔ རང་ལུས་ལས་རུང་གཞན་ལུས་བསྟེན་པའི་ཚེ༔ བདུད་རྩི་དབང་ལག་སྦྲང་རྩི་བུ་རམ་དང་༔ ཀ་ར་རུ་རྟ་ཨ་ཝ་སྦྲུལ་གྱི་ཤ༔ འབྲས་བུ་གསུམ་དང་ར་མཉེའི་གདུས་ཁུ་དང་༔ ཅོང་ཞི་རྟག་ངུ་མཆིལ་པ་ད་བྱིད་ཤ༔ ཁབ་ལེན་བཏབ་པའི་རིལ་བུ་འོ་མས་བསྒྲིལ༔ ཐོར་ཁ་གཏོང་ཞིང་རླུང་དང་འཁྲུལ་འཁོར་འབད༔ མ་སྨིན་ཟས་དང་སྔོ་གཙོང་ཚྭ་གཡེར་སྒོག༔ རྗེན་རིགས་ར་ཤ་ཆང་ལད་ཁ་ཚ་རུལ༔ མེ་དང་ཉི་མ་དྲག་ཤུལ་ལས་ལ་སོགས༔ མི་མཐུན་སྤང་ཞིང་ཁ་ཟས་བཅུད་ལྡན་བསྟེན༔ མུ་དྲ་བཟའ་བཏུང་ལོངས་སྤྱོད་འདོད་ཡོན་སྦྲན༔ འབྲས་བུ་གསུམ་པའི་སྨན་མར་ལྕགས་གཡའ་སྦྱང་༔ འོ་མས་ཕུལ་ཏེ་མུ་དྲས་རྒྱུན་ལྡན་བསྟེན༔ ལྕམ་པ་གཡེར་མའི་ཐང་གིས་རྩ་ཁ་དབྱེ༔ ཆང་དང་སྦྲང་རྩི་སྦྱར་བས་བསྐུ་མཉེ་བྱུག༔ ཕྱིང་པ་དར་དྲིལ་རང་གི་སོར་མོ་དྲུག༔ སྦོམ་ཕྲ་རང་གི་རྡོ་རྗེ་དང་མཉམ་པ༔ འབྲུ་མར་བྱ་རྒོད་ཚིལ་བྱུག་གཤང་ལམ་བཏང་༔ མཁལ་ཁུང་གཉིས་སུ་དར་གྱི་ཕོ་རྡོ་བཅུག༔ དར་གྱིས་བསྡམས་ཏེ་གན་རྐྱལ་བཞག་པའི་ཚེ༔ བྷ་གའི་གཡས་གཡོན་ནུ་མ་ལྟ་བུར་ཡོད༔ ཁ་ཕྱེས་བལྟས་པས་རྩ་ནི་ཁབ་ཙམ་ལ༔ རིང་ན་སོར་དྲུག་འབྲིང་ནི་སོར་བཞི་ལ༔ ཐུང་ན་སོར་དོ་ཙམ་པ་ཉུག་ཉུག་འབྱུང་༔ པདྨ་ཅན་ནི་རྩ་ཁ་པདྨ་འདྲ༔ དུང་ཅན་མ་ནི་དུང་ལྟར་ཅུང་ཟད་འཁྱིལ༔ རི་དྭགས་མ་ནི་རི་དྭགས་གཉའ་བ་འདྲ༔ གླང་སྣ་ཅན་ནི་གླང་ཆེན་སྣ་ལྕགས་འདྲ༔ བྱ་རོག་ཅན་ནི་བྱ་ཡི་མཆུ་ལྟར་ཡོང་༔ ཟ་བྱེད་མ་ནི་མདུད་པ་ཅན་དུ་ཡོང་༔ ཕལ་པ་རྣམས་ནི་ཐང་ཁུག་ཁ་བཀྱིགས་འདྲ༔ པདྨ་ཕྱེ་བས་རྩ་སྣ་རབ་རིབ་མཐོང་༔ བ་དཀར་ར་དཀར་འོ་མར་སྦྲང་བུར་བཏབ༔ ཐ་མལ་བ་དང་འོ་མ་ཟ་ཟི་བཏབ༔ རྩ་ལ་བྱུག་པས་རྩ་རིགས་གསལ་བར་མངོན༔ རྩ་སྣ་རྡོ་རྗེའི་བུ་གར་བཅུག་ནས་ཀྱང་༔ འབྲོས་སུ་མི་འཇུག་ཐབས་ཀྱིས་སྤྱོད་པར་བྱ༔ བདེ་གསལ་མི་རྟོག་ཉམས་དང་བཅས་པའི་ངང་༔ རིག་པའི་རང་ཚོ་ཟིན་པ་གལ་ཆེ་ཞིང་༔ དགའ་བཞིའི་ཡེ་ཤེས་ངང་ནས་གསང་བར་འབེབས༔ མཁའ་ལ་སྤྲོ་ཞིང་མཁའ་ནས་རྡོ་རྗེས་འདྲེན༔ སྦྲུལ་ཚང་བྲག་སྦྱར་གླིང་བཞི་དབང་དུ་སྡུད༔ ཉི་ཟླ་གྱེན་སྦྱར་དར་ཆེན་མཁའ་ལ་སྤྱོད༔ ཧཱུྃ༔ དང་ཧ་ཡིས་ཁོང་འདྲེན་དྲག་ཏུ་འཐེན༔ རྡོ་རྗེ་བརྩེ་ཡམ་ཕྱག་རྒྱ་རིལ་གྱིས་འདྲིལ༔ དངས་མ་དྲོངས་རྟགས་དགྲམ་པའི་འཁྲུལ་འཁོར་བརྩོན༔ ནད་བུ་ཅན་དང་རིགས་ངན་རྒན་རྒོན་གྱི༔ དངས་མ་མི་འདྲེན་དྲོངས་ཀྱང་ནད་དུ་འགྱུར༔ རྡོ་རྗེ་རིན་ཆེན་པདྨ་ལས་ཀྱི་རིགས༔ ཁམས་དང་རིགས་བཟང་དངས་མ་དབང་དུ་སྡུད༔ ལུས་ངག་ཡིད་གསུམ་བདེ་བས་རྒྱས་པ་དང་༔ མི་རྟོག་ཡེ་ཤེས་ཉམས་མྱོང་བདེ་དྲོད་འབར༔ མཆོག་ཐུན་དངོས་གྲུབ་མང་འཐོབ་ཨེ་མ་ཧོ༔ བདེ་བ་རྒྱས་ནས་ཐིག་ལེ་འཆོར་བ་ན༔ ཡིད་ལ་འཕྲེང་བའི་བུ་མོ་ཀེང་རུས་བསྒོམ༔ དར་གྱིས་རྡོརྗེའི་མགུལ་བཀྱིགས་འདྲེན་ཞིང་དགྲམ༔ ནེ་ལེའི་རྒྱུས་པས་སྲིན་ལག་རྩ་བ་བསྡམས༔ ཁ་ཟས་མ་འཕྲོད་འཛག་ན་བཅུད་ཅན་ཟས༔ ད་བྱིད་ཤ་སྦྱོར་བསྟེན་ཞིང་སྔོ་སྒོག་གཡེར༔ ཁ་ཚ་རུལ་སོགས་སྤང་པས་སེལ་བར་འགྱུར༔ ཆུ་དང་མཉམ་མམ་མ་ཚོར་ཟགས་པ་ནི༔ ནད་གཞི་གྲང་བའི་སྟབས་ཡིན་བཅུད་ཅན་བཟའ༔ ཚ་བ་གསུམ་གྱི་ཕྱི་མ་བསྟེན་པ་དང་༔ ཨ་རུ་འོ་མར་སྦང་པ་རྒྱུན་དུ་མུར༔ གྲུ་མོ་སླེབས་ཚད་ས་རུ་མེ་བཙའ་བཞག༔ གཅན་ལྤགས་རྐེད་དཀྲི་ཉིན་གྱི་གཉིད་རྣམས་སྤངས༔ གཉིད་དུས་འཆོར་ན་གདོན་གྱིས་འཕྲོག་པ་སྟེ༔ ཡུངས་ཀར་ཐལ་བ་པད་རག་གུ་གུལ་ནག༔ མི་ཀླད་དང་བཅས་བསྣུར་སྟེ་གསང་བར་བྱུག༔ ཉལ་མལ་མ་ལེགས་མཚན་འགྲོས་དྲག་ཤུལ་ལས༔ སྤྱོད་ལམ་ལོག་པས་ཤོར་ན་སྤྱོད་ལམ་བཅོས༔ བྱིན་རླབས་ཉམས་པས་འཆོར་ན་མ་ཚོར་འཛག༔ དེ་ལ་བསྐང་བཤགས་ཚོགས་འཁོར་ཡིག་བརྒྱར་འབུངས༔ ཐིགས་ལེ་དྲངས་པ་བཀྲམ་དུ་མ་ཐུབ་ནས༔ ནད་དང་ཟུག་རྔུ་ཉིད་དུ་གྱུར་པ་ན༔ ཕྱི་ན་འདྲིལ་བ་བསྐུ་མཉེས་སེལ་བར་འགྱུར༔ སྟོད་དུ་འགྲིལ་ན་གཏུམ་མོའི་འབར་འཛག་བྱ༔ སྨད་དུ་འདྲིལ་ན་བྷ་གར་ལྷ་ཚོགས་བསྒོམ༔ སྲིད་མི་ཆགས་པའི་དུས་སུ་མཆོད་པར་འབུལ༔ སྐྲང་དང་ལྕི་འཐིབ་མགོ་བོ་ན་བ་ན༔ བདེ་བ་འཐོར་རྟགས་ཁོལ་བུར་ཁོལ་བ་ཡོང་༔ དེ་ལ་རླུང་བཟུང་བསྐུ་མཉེ་མགོ་བོ་སྤྲུག༔ དམིགས་པ་རྒྱ་མཚོའི་མཐིལ་གཏད་འབེབས་བྱས་ཏེ༔ རོ་སྟོད་ན་ན་གསིག་ཅིང་སྤྲུགས་བས་སེལ༔ རོ་སྨད་ན་ན་བསྐོར་ཞིང་བརྡེག་པས་སེལ༔ ཡན་ལག་ན་ན་མཉེ་ཞིང་སྤྲུགས་པས་སེལ༔ གུ་རུའི་མི་བསྐྱོད་ཐལ་ཆེན་ཞུན་ཆེན་དང་༔ ཕག་ཚིལ་དང་སྦྱར་སྐྲང་དང་འཐོར་བ་དང་༔ འབྲུམ་བུ་ཤུ་བ་རྣམས་ལ་བྱུག་པས་སེལ༔ སྦྲང་རྩི་རྒོད་མཁྲིས་མགྲོན་བུ་དུང་ཐལ་དང་༔ ཞོ་ཤ་འབྲི་མར་རྙིང་པ་དང་སྦྱར་ནས༔ བུ་མོ་གཙང་མས་མགོ་ལུས་མེད་པར་འཕུར༔ རྩེ་ཞིང་ཟ་དང་གཡའ་ཞིང་སྦྲིད་པ་དང་༔ ཁོལ་བུར་ཚ་བ་ལ་སོགས་སེལ་བར་བྱེད༔ ལྕ་བའི་འབྲུ་གུ་ལྕམ་འབྲུ་གཡེར་མ་བསྐོལ༔ བཏང་བས་དྲི་ཆུ་འགག་པ་སེལ་བར་འགྱུར༔ རྡོ་རྗེ་འགྲེང་ན་བ་ནིི་དམར་མོར་སྤྱོད༔ ཉམས་ན་ད་བྱིང་སྦྱོར་བ་བསྟེན་པར་བྱ༔ སྦྲང་རྒོད་དང་སྦྱར་ཏེ༔ རང་དང་འབྲལ་མི་ཕོད༔ སྐལ་ལྡན་ལས་འཕྲོ་ཅན་དང་འཕྲད་པར་ཤོག༔ ས་མ་ཡཱ༔ རྒྱ་རྒྱ་རྒྱ༔ གཏེར་རྒྱ༔ སྦས་རྒྱ༔ ཟབ་རྒྱ༔ ཨི་ཐི་རྒྱ༔ ས་མ་ཡཱ༔ རྒྱ་རྒྱ་རྒྱ༔ གཏེར་ཆེན་ཆོས་ཀྱི་རྒྱལ་པོ་རིགས་འདུས་ཉི་མ་གྲགས་པ་རྩལ་གྱིས་ཤིང་ཕོ་སྟག་གི་ལོ་ལ་ཆགས་རུ་ཕུག་དམར་ནས་སྤྱན་དྲངས་ཤིང་། སླར་ཆགས་རུ་ཕུག་ནག་ཏུ་ཤོག་སེར་ལས་བསྒྱུར་བ་མངྒ་ལཾ། །

བདེ་སྟོང་ངོ་སྤྲོད་སྦས་བཤད་ཆོས་ཉིད་འཁོར་ལོ།

ཕག་མོ་དམར་མོའི་ཟབ་ཐིག་ལས༔ བདེ་སྟོང་ངོ་སྤྲོད་སྦས་བཤད་ཆོས་ཉིད་འཁོར་ལོ་བཞུགས༔ ཡེ་ཤེས་མཁའ་འགྲོའི་ལྷ་ཚོགས་རྣམས་ལ་འདུད༔ ཟབ་མོ་གདམས་པའི་ཡང་སྙིང་དམ་པའི་དོན༔ ཉེ་ལམ་སྨར་འཁྲིད་ངོ་སྤྲོད་ཞལ་གདམས་ནི༔ ཉེ་བའི་ཟབ་ལམ་ཐེག་པའི་རྩེ་རྒྱལ་ཏེ༔ ངོ་སྤྲོད་འདི་བཞིན་ཉམས་ལེན་ལྡན་པར་བྱ༔ ས་མ་ཡཱ༔ རྒྱ་རྒྱ་རྒྱ༔ དང་པོ་ཕྱག་རྒྱ་དང་སྙོམས་པར་ཞུགས་ནས་དལ་བུས་སྤྱོད་པའི་ཚེ༔ དངས་མ་སྤྱི་བོ་ནས་གཡོ་ཞིང་མགྲིན་པར་འཁྱིལ་བས་ཕྱི་རོལ་གྱི་རྣམ་རྟོག་རགས་རིམ་རྣམས་འགག །དགའ་བའི་ཡེ་ཤེས་རྒྱུད་ལ་སྐྱེ་ཐེག་པ་ནི་ཉན་ཐོས་དང་རང་སངས་རྒྱས་ཀྱི་གྲུབ་མཐའ་མཐར་ཕྱིན༔ སྙིང་གར་སླེབས་པས་བདེ་བ་ཆེས་ཆེར་འབར་བདག་ཏུ་འཛིན་པའི་རྣམ་རྟོག་འགག་མཆོག་ཏུ་དགའ་བའི་ཡེ་ཤེས་རྒྱུད་ལ་སྐྱེ་ཐེག་པ་ནི་བྱང་ཆུབ་སེམས་དཔའི་གྲུབ་མཐའ་རྫོགས༔ ལྟེ་བར་སླེབས་པས་ལུས་ཀུན་བདེ་བས་རྒྱས་ཤིང་དགའ་བྲལ་གྱི་ཡེ་ཤེས་རྒྱུད་ལ་སྐྱེ་ཕྱག་རྒྱར་འཛིན་པའི་རྟོག་པ་སྤངས་ཐེག་པ་ནི་སྔགས་ཀྱི་གྲུབ་མཐའ་རྫོགས༔ གསང་བར་སླེབས་པས་བདེ་བ་རྟོག་མེད་ཀྱི་ངང་ནས་ལྷན་ཅིག་སྐྱེས་པའི་དགའ་བ་རྒྱུད་ལ་སྐྱེ་དགའ་བ་གསུམ་དུ་འཛིན་པའི་རྟོག་པ་སྤངས་བླ་ན་མེད་པའི་གྲུབ་མཐའ་རྫོགས༔ ཡབ་ཡུམ་ལྷ་རུ་བསྐྱེད་པ་ཚོགས་ལམ་སྦྱོར་བ་སྦྱོར་ལམ་དགའ་བཞིའི་ཡེ་ཤེས་མཐོང་བས་མཐོང་ལམ༔ དེ་ཉིད་ལྟར་བསྒོམས་པས་སྒོམ་ལམ༔ བདེ་སྟོང་མངོན་དུ་གྱུར་ཚེ་མཐར་ཕྱིན་པའི་ལམ་སྟེ་ལམ་ལྔ་རྫོགས༔ ཡབ་ཡུམ་ལྷར་བསྐྱེད་བདེ་བས་མཆོད་ཚེ་ཚོགས་གཉིས་རྫོགས་པས་སྦྱིན་པ༔ དགའ་བའི་ཡེ་ཤེས་དང་སྦྱོར་བ་ཟུང་འཇུག་ལ་སྤྱོད་ཚེ་ལེ་ལོ་མེད་པས་བརྩོན་འགྲུས༔ བདེ་སྟོང་གི་དགོངས་པའི་ཡེ་ཤེས་ཁོར་ཡུག་ཏུ་འབྱུང་བ་བསམ་གཏན༔ ཐིག་ལེ་མ་ཉམས་པར་གཉེན་པོས་བསྲུང་ཞིང་བཟློག་པ་ཚུལ་ཁྲིམས༔ སྣང་བའི་ཆོས་རྣམས་བདེ་བར་ཤར་བས་ཁོང་ཁྲོ་དང་བྲལ་བ་བཟོད་པ༔ བདེ་སྟོང་གི་ལྟ་བ་མཐར་ཕྱིན་པས་ཤེས་རབ་ཀྱི་ཕ་རོལ་ཏུ་ཕྱིན་པ་དང་དྲུག་གོ༔ ཡབ་ཡུམ་ལྷར་བསྐྱེད་པ་བུམ་པའི་དབང་དང་༔ མཁའ་གསང་སྦྱོར་པ་གསང་བའི་དབང་དང་༔ བདེ་སྟོང་གི་ཉམས་ཤེས་རབ་ཡེ་ཤེས༔ དགའ་བདེའི་ཕ་རོལ་དུ་སོན་པ་ངོ་བོ་ཉིད་ཀྱི་དོན་མཐོང་བ་དབང་བཞི་པའོ༔ ཕྱག་རྒྱ་མཐོང་བས་དགའ་བ་སྐྱེས་པ་ས་དང་པོ་རབ་ཏུ་དགའ་བ༔ ཡབ་ཡུམ་ལྷའི་བསྐྱེད་རིམ་གྱིས་ཐ་མལ་གྱི་སྒྲིབ་པ་མེད་པས་དྲི་མ་མེད་པ༔ སྦྱོར་བས་བྱང་སེམས་རྩ་ལས་འཕྲོ་བས་གསུམ་པ་འོད་བྱེད་པ་དང་༔ དེ་ལས་སྤྱོད་པས་བྱང་སེམས་དྲག་ཏུ་གཡོ་ཞིང་འཕྲོ་བས་འོད་བྱེད་པ་ཆེན་པོའི་ས་དང་༔ བྱང་སེམས་གསང་བ་ནས་ཟིན་ཅིང་ལྡོག་དཀའ་བས་སྦྱང་དཀའ་བའི་ས་དང་༔ བྱང་སེམས་བསྐྱིལ་ཞིང་བདེ་བ་མངོན་དུ་གྱུར་པས་ས་དྲུག་པ་མངོན་དུ་གྱུར་པ་དང་༔ བྱང་ཆུབ་སེམས་ཀྱི་ཁམས་རྩ་ལ་ལྡོག་ཅིང་བཀྲམས་པས་བདུན་པ་རིང་དུ་སོང་པའི་ས་དང་༔ བློ་འདས་ཀྱི་དོན་མ་བཅོས་པའི་དགོངས་པ་དེ་རང་བྱུང་དུ་ལྷན་ནེར་གནས་པ་བརྒྱད་པ་མི་གཡོ་བའི་ས་དང་༔ དེའི་རྟོགས་པ་ཡིད་སྨོན་དུ་མིན་པར་མངོན་དུ་གྱུར་པས་ལེགས་པའི་བློ་གྲོས་ཀྱི་ས་དང་༔ སྣང་བའི་ཆོས་ཐམས་ཅད་བདེ་སྟོང་ཡེ་ཤེས་ཀྱི་ཆོས་ལས་རང་ཤར་ཞིང་རང་གྲོལ་བས་བཅུ་པ་ཆོས་ཀྱི་སྤྲིན་གྱི་ས་ཐོབ་པའོ༔ བདེ་བ་ཆེན་པོ་འགྱུར་བ་མེད་པས་རྡོ་རྗེ་སེམས་དཔའ༔ ཡོན་ཏན་གྱི་རྟོག་པ་མང་པོ་འབྱུང་བས་རིན་ཆེན་འབྱུང་ལྡན༔ ཆགས་པས་ཆགས་པའི་འདུ་ཤེས་ཡེ་ཤེས་ཀྱིས་ཟིན་པས་སྣང་བ་མཐའ་ཡས༔ ཡེ་ཤེས་ཀྱི་འཕྲིན་ལས་ཉོན་མོངས་ལ་བརྟེན་ཏེ་ཐོགས་མེད་དུ་གྲུབ་པས་དོན་ཡོད་གྲུབ་པ༔ དོན་དམ་པ་ཆོས་ཉིད་ཀྱི་དགོངས་པ་བདེ་སྟོང་གི་ཡེ་ཤེས་དེ་སྐད་ཅིག་མའི་སྟེང་ནས་རྟོགས་པས་རྣམ་པར་སྣང་མཛད་དེ་རིགས་ལྔ་མངོན་པར་རྫོགས་སོ༔ པདྨ་དང་རྡོ་རྗེ་སྤྲད་པས་སངས་རྒྱས་སྤྱན་མ༔ གཡོ་བ་དམ་ཚིག་སྒྲོལ་མ༔ དྲོད་འབྱུང་བ་ནི་ན་བཟའ་དཀར་མོ༔ བྱང་ཆུབ་ཀྱི་རྒྱུན་འབྱུང་བ་ནི་མཱ་མ་ཀི༔ བདེ་བ་དང་སྟོང་པའི་ཡེ་ཤེས་དབྱེར་མེད་དུ་རྒྱས་པ་ནི་དབྱིངས་ཕྱུག་མ་སྟེ་ཡུམ་ལྔ་མངོན་དུ་གྱུར་པའོ༔ སྐུ་དང་ཡེ་ཤེས་བདེ་སྟོང་གི་ཡོན་ཏན་ཐམས་ཅད་མངོན་པར་སྒྲིབ་མེད་གསལ་བས་མེ་ལོང་ལྟ་བུའི་ཡེ་ཤེས༔ བདེ་སྟོང་དགའ་བ་བཞིའི་ཚོགས་རྣམས་མ་འདྲེས་པར་སོ་སོར་ཕྱེད་པ་སོ་སོར་རྟོགས་པའི་ཡེ་ཤེས༔ ཡབ་ཡུམ་སྦྱོར་བས་ཐབས་ཤེས་ཟུང་འཇུག་ཏུ་དཀར་དམར་འདྲེས་པས་ཉོན་མོངས་པའི་རྟོག་པ་ཡེ་ཤེས་དང་ལྡན་པའི་རང་བཞིན་དུ་གྱུར་པས་མཉམ་པ་ཉིད་ཀྱི་ཡེ་ཤེས༔ བདེ་བའི་ངོ་བོ་ལས་སྟོང་བའི་ཡེ་ཤེས་ཟུང་འཇུག་ཏུ་གྲུབ་པའི་ཕྱིར་བྱ་བ་གྲུབ་པའི་ཡེ་ཤེས༔ བདེ་སྟོང་ཞེས་ལམ་གྱི་སྟེགས་ལས་ངོ་བོ་ཉིད་ཀྱི་ཡེ་ཤེས་ལ་སུས་ཀྱང་བཅོས་སུ་མེད་པས་ཆོས་ཀྱི་དབྱིངས་ཀྱི་ཡེ་ཤེས་ཏེ་ཡེ་ཤེས་ལྔ་མངོན་དུ་གྱུར་པའོ༔ ས་མ་ཡཱ༔ རྒྱ་རྒྱ་རྒྱ༔ དེ་ཡི་ཕྱིར་ན་ཚེ་འདི་བློས་བཏང་ཞིང་༔ གསང་སྔགས་རྡོ་རྗེ་ཐེག་པའི་སྣོད་གྱུར་པའི༔ སྐལ་ལྡན་སྐྱེས་བུ་མྱུར་ལམ་སྒྲོད་འདོད་རྣམས༔ མཚན་དང་ལྡན་པའི་མུ་དྲ་བསྟེན་པར་བྱ༔ ཡ་ག་འཇིག་རྟེན་ཆོས་བརྒྱད་ཀྱིས་བཅིངས་ནས༔ སྐལ་ལྡན་སྐྱེས་བུས་ཉམས་ལེན་མ་འབྱོངས་ན༔ དལ་འབྱོར་སྣོད་དུ་གསང་སྔགས་རུལ་བ་ཡིན༔ ཚ་ེའདིའི་སྐྱིད་སྡུག་རྨི་ལམ་སྣང་བ་འདྲ༔ ཐབས་ཀྱི་གདམས་པས་མཐར་ཕྱིན་རྩོལ་བ་བྱ༔ ཉིན་མཚན་མེད་པར་ཆུ་བོའི་གཞུང་བཞིན་སྦྱོར༔ དེ་ཚེ་ལོངས་སྤྱོད་རྫོགས་སྐུའི་ལྷ་ཚོགས་རྣམས༔ རྡོ་རྗེ་བཙུན་མོའི་བྷ་གའི་གཞལ་ཡས་ན༔ དགའ་བཞིའི་བརྡ་སྐད་བསྒོམ་བཟླས་མཆོད་བསྟོད་ཀྱིས༔ ཕྱོགས་བཅུའི་རྒྱལ་བ་རིག་འཛིན་ཕོ་མོ་དང་༔ དཔའ་བོ་མཁའ་འགྲོ་ཐམས་ཅད་སྙོམས་པར་འཇུག༔ ཉོན་མོངས་ལས་རླུང་ཛྙཱ་ན་དྷུ་ཏིར་རྒྱས༔ ཐམས་ཅད་བདེ་བའི་གོ་འཕང་རྡོ་རྗེ་འཆང་༔ འབྲིང་གིས་ཉིན་མཚན་ཐུན་དྲུག་བཅད་ལ་སྦྱོར༔ ཐ་ནའང་ནི་ཉིན་མཚན་དུས་བཞིར་སྤྱད༔ འདི་ནི་མཐར་ཕྱིན་རྡོ་རྗེ་གསང་བའི་སྐུ༔ མི་དྲ་མི་འབྲལ་གྲིབ་བཞིན་བསྟེན་ཅིང་བཀོལ༔ བལྟའ་དང་འཁྱུད་དང་འོ་སེན་ཆགས་གཏམ་སྨྲ༔ དེ་ལྟར་ཉམས་སུ་བླངས་པའི་ཡོན་ཏན་ནི༔ ཉམས་གྲིབ་ཀུན་བྱང་ཡིད་འོང་བུད་མེད་འདུ༔ མཚན་ལྡན་མཁའ་འགྲོ་རྣམས་ཀྱིས་སྲོག་ལྟར་བརྩེ༔ ངག་སྙན་ཏིང་འཛིན་གསལ་ཞིང་ཤེས་རབ་འབར༔ མི་རྟོག་ཉམས་མྱོང་འཆར་ཞིང་ཡེ་ཤེས་རྒྱས༔ བདེ་བ་རྒྱས་པས་ལྷ་ཀླུ་མི་གསུམ་གྱི༔ རིགས་ལྡན་བུ་མོ་ཐམས་ཅད་དབང་དུ་འགྱུར༔ འབྱུང་བ་སྙོམས་པས་ནད་མེད་རྒས་སྲ་ཞིང་༔ ངག་ལ་ནུས་པ་སེམས་ལ་རྟོགས་པ་འཆར༔ ཀུན་རྫོབ་ཐིག་ལེ་འབྱོངས་པའི་ཏིང་འཛིན་གྱིས༔ ཉིན་མོ་མི་འདུ་མཚན་མོ་བུད་མེད་འདུ༔ ནང་ནུབ་ཟས་འདུ་བདེ་བ་མེ་ལྟར་འབར༔ ཚོགས་དྲུག་ཡུལ་སྣང་བདེ་བ་ཆེན་པོར་འཆར༔ འདོད་ཆགས་མ་སྤང་ལམ་དུ་ཁྱེར་བ་ཡིས༔ གནས་ལུགས་མངོན་གྱུར་ཆོས་སྐུར་འཚང་རྒྱ་ཞིང་༔ འགག་མེད་ལོངས་སྐུས་ས་བཅུའི་ཞིང་ཀུན་ཁྱབ༔ མ་འགགས་སྤྲུལ་སྐུས་འགྲོ་དྲུག་ཁ་ལོ་བསྒྱུར༔ ཡེ་ཤེས་མཁའ་འགྲོའི་ལུང་བསྟན་རྒྱུན་དུ་འབྱུང་༔ འཇིག་རྟེན་མི་མོས་ཞབས་ཏོག་མཉེས་པར་བསྒྲུབ༔ ལྷ་འདྲེ་མི་གསུམ་འདུ་ཞིང་ཁ་ལོར་བསྒྱུར༔ གཟའ་གཏད་མེད་པའི་སྤྱོད་པ་ཤུགས་འབྱུང་སྐྱེ༔ རྡོ་རྗེ་ལུས་ཀྱི་རྩ་ནི་འབྱོངས་པའི་ཚེ༔ ཤིང་བལ་བཞིན་དུ་ཡང་དང་ངལ་དུབ་མེད༔ ཁབ་ཟོས་མགྲིན་པའི་ལམ་ནས་རྡོ་རྗེར་འཐོན༔ ཟོ་མདོག་བཟང་ཞིང་ཤིན་ཏུ་དངས་མཉེན་འཇམ༔ འགྱུ་བ་རླུང་ནི་འབྱོངས་རྟགས་མང་དུ་འབྱུང་༔ རི་བྲག་རྣམས་ལ་ཟང་ཐལ་འགྲོ་བ་དང་༔ བར་སྣང་རྡོ་རྗེའི་སྐྱིལ་ཀྲུང་བཅའ་བ་དང་༔ སོར་མོའི་རྩེ་ནས་རླུང་འབུད་ཆུར་མི་འབྱིང་༔ སྟེང་རླུང་འོག་ལ་འོག་རླུང་སྟེང་དུ་འདྲེན༔ འཇག་མའི་རྩེ་དང་མདུང་རྩེར་སྐྱིལ་ཀྲུང་བཅའ༔ དེ་སོགས་ཡོན་ཏན་ཐོབ་པའི་རྟགས་རྣམས་འབྱུང་༔ གསུམ་པ་ཀུན་ད་འབྱོངས་པའི་རྟགས་རྣམས་ནི༔ ཆུ་དང་འོ་མ་སོ་སོར་འབྱེད་པ་དང་༔ རྡོ་རྗེ་སྦ་བ་སྦུབས་སུ་ནུབ་པ་དང་༔ བདེ་དྲོད་འབར་དང་རྡེའུ་ཟོས་ཀྱང་འཇུ༔ ལུས་བཀྲག་རྒྱས་དང་པགས་པའི་མདོག་ནི་སྣུམ༔ གངས་ཁྲོད་རི་རྩེར་བསྡད་ཀྱང་མཚན་ལྡན་འདུ༔ ཕྱག་རྒྱའི་དངས་མ་དབང་དུ་འདུ་བར་འགྱུར༔ བདེ་སྟོང་བསྒོམས་པའི་བསྐྱེད་རིམ་འབྱོངས་པའི་རྟགས༔ ཡི་དམ་ཞལ་གཟིགས་གཟུགས་སྣང་ལྷ་རུ་འཆར༔ ལྷ་འདྲེ་མི་གསུམ་དབང་འདུ་བཀའ་ལ་ཉན༔ གདོན་བགེགས་ཚར་ཆོད་འབྱུང་པོ་བྲན་དུ་ཁོལ༔ དེ་སོགས་བསྐྱེད་རིམ་ཟིན་རྟགས་མང་དུ་འབྱུང་༔ བདེ་སྟོང་འབྱོང་ནས་སེམས་ཉིད་གྲོལ་བའི་རྟགས༔ འགྲོ་དྲུག་སེམས་ཅན་བྱ་བྱེད་ཐམས་ཅད་རྣམས༔ སྒྱུ་མ་རྨི་ལམ་ཆུ་ཟླ་ལྟ་་བུར་རྟོགས༔ བདེ་གསལ་མི་རྟོག་ཉམས་མྱོང་རྒྱུད་ལ་སྐྱེ༔ རིག་པས་བཙན་ས་ཟིན་ནས་གདོད་མར་གྲོལ༔ བྱང་ཆུབ་མཆོག་གི་གོ་འཕང་ཕྱིར་མི་ལྡོག༔ བདག་གཞན་དོན་གཉིས་ལྷུན་གྱིས་གྲུབ་པ་འབྱུང་༔ གོམས་པ་རབ་རྣམས་དགའ་རབ་རྡོ་རྗེ་ལྟར༔ འོད་ཀྱི་ལུས་ལ་མཁའ་སྤྱོད་གཤེགས་པ་དང་༔ འབྲིང་རྣམས་རིགས་འཛིན་ཤྲཱི་སེང་ཧ་བཞིན༔ སྒྱུ་ལུས་འབྱོངས་པས་སྣང་སྟོང་སྐུ་རུ་འགྱུར༔ ཐ་མ་འཆི་མེད་པདྨ་ང་འདྲ་བར༔ ཚེ་ཡི་རིགས་འཛིན་འཐོབ་པར་འགྱུར་པ་དང་༔ ཡར་མཐའ་ལུས་ནི་ལྷུང་གཟེད་ཤོང་བ་དང་༔ འཇའ་འཛུགས་འོད་འཁྱུག་ས་གཡོ་འབྱུང་བ་དང་༔ ཞིང་ཁམས་ལྔ་རུ་བགྲོད་པའི་ཡོན་ཏན་འཐོབ༔ ཤ་ཡི་དངས་མ་ཤ་རི་རམ་དུ་འགྲིལ༔ ཁ་དོག་དམར་པོ་སྐྱེ་མེད་ཐོབ་པའི་གདུང་༔ ཁྲག་གི་དངས་མ་ཆུ་རི་རམ་དུ་འགྲིལ༔ ཁ་དོག་སྔོན་པོ་ཡོན་ཏན་འཕེལ་བའི་གདུང་༔ རུས་པའི་དངས་མ་བ་རི་རམ་དུ་འགྲིལ༔ ཁ་དོག་དཀར་པོ་ཆོས་སྐུ་ཐོབ་པའི་གདུང་༔ ཆ་སེར་དངས་མ་གསེར་རི་རམ་དུ་འགྲིལ༔ ཁ་དོག་སེར་པོ་དགོས་འདོད་འབྱུང་བའི་གདུང་༔ རྐང་གི་དངས་མ་ཉ་རི་རམ་དུ་འགྲིིལ༔ ཁ་དོག་ལྗང་གུ་འཕྲིན་ལས་གྲུབ་པའི་གདུང་༔ དངས་མ་ལྔ་འདུས་པཉྩ་རམ་དུ་འགྲིལ༔ ཁ་དོག་ལྔ་ལྡན་སྐུ་ལྔ་ཐོབ་པའི་གདུང་༔ དེ་རྣམས་ཆོས་སྐུ་ལོངས་སྐུ་ཐོབ་པའི་རྟགས༔ རྐྱེན་གྱིས་མི་འཇིགས་པ་ནི་ཁྱད་པར་རོ༔ དངས་མའི་སྙིགས་མ་རིང་བསྲེལ་ཕྲ་མོ་ནི༔ རྐྱེན་གྱིས་འཇིགས་ཀྱང་སྤྲུལ་སྐུ་ཐོབ་པའི་རྟགས༔ དེ་ཡི་སྙིགས་མ་ཐོད་རྒལ་རུས་ཚིགས་སོགས༔ རུས་དུམ་ཀུན་ལ་སྐུ་དང་ཡིག་འབྲུ་དང་༔ རིགས་ལྔའི་ཕྱག་མཚན་ལ་སོགས་འབྱུང་བ་ནི༔ འཁོར་ལོ་ལྔ་ཡི་གདམས་པས་གྲོལ་བའི་རྟགས༔ འབྱུང་བཞི་དངས་དང་ནམ་མཁའ་གཡའ་དག་པ༔ བར་དོ་མེད་ཅིང་བརྟན་པ་ཐོབ་པའི་རྟགས༔ དེ་ལྟར་རྟགས་དང་ཡོན་ཏན་མང་ཡོད་ཀྱང་༔ མདོར་བསྡུས་ཙམ་དུ་བརྗོད་པ་དེ་རྣམས་ཀྱང་༔ མ་རྒྱུད་ཐབས་ལམ་བསྒོམ་པ་མཐར་ཕྱིན་པའི༔ ཕྱི་ནང་དྲོད་རྟགས་རིམ་པར་བསྟན་པའོ༔ གཞན་ཡང་སྤྱི་བོར་གཙུག་ཏོར་རྒྱས་པ་དང་༔ པགས་པ་གསེར་མདོག་ཕྱག་ཞབས་དྲ་བས་འབྲེལ༔ ལྗགས་ཀྱིས་ཞལ་ཁེབས་སྨིན་ཕྲག་མཛོད་སྤུ་ལྡན༔ བ་སྤུ་གཡས་འཁྱིལ་མཐིལ་བཞིར་འཁོར་ལོས་མཚན༔ རོ་སྟོད་སེང་གེ་བཞིན་དུ་རྒྱས་པ་དང་༔ ཐུགས་ཀར་དཔལ་གྱི་བེའུས་མཚན་པ་དང་༔ འདོམས་ཀྱི་སྦ་བ་སྦུབས་སུ་ནུབ་པ་དང་༔ ཚེམས་ཀྱི་ཕྲེང་བ་ཆུ་ཤེལ་སེན་མོ་དམར༔ དངས་མ་ལུས་ཀྱི་གནས་རྣམས་གར་དྲངས་སར༔ མཚན་བཟང་ཡོན་ཏན་ལྡན་པ་དེ་དག་འབྱུང་༔ དཔེར་ན་རིགས་འཛིན་དགའ་རབ་རྡོ་རྗེ་དང་༔ གནས་བརྟན་སྒྲ་གཅན་འཕགས་པ་ཀླུ་སྒྲུབ་སྙིང་༔ བདག་འདྲ་པདྨ་འབྱུང་གནས་ལ་སོགས་རྣམས༔ མཚན་བཟང་ལྡན་པའི་ཡོན་ཏན་འདི་ལས་ཐོབ༔ ཕྱི་མའི་སྐལ་ལྡན་རྣམས་ཀྱང་བརྩོན་པས་བསྒྲུབས༔ ཚེ་འདི་བློས་ཐོང་བཙོན་འགྲུས་རབ་བསྐྱེད་འབུངས༔ ས་མ་ཡཱ༔ རྒྱ་རྒྱ་རྒྱ༔ དེ་ལྟར་གདམས་པའི་སྙིང་པོ་བདེ་སྟོང་ལ༔ ཉམས་སུ་ལེན་པའི་ཐབས་ལམ་ངོ་སྤྲོད་འདི༔ མ་འོངས་ཕྱི་མའི་དུས་ཀྱི་སྐལ་ལྡན་དོན༔ བརྡ་ཡི་ཡི་གེའི་རིས་བཏབ་གཏེར་དུ་བཅོལ༔ ལས་འཕྲོ་ལྡན་པའི་བུ་དང་འཕྲད་ནས་ཀྱང་༔ རྡོ་རྗེ་ཐེག་པའི་འབྲས་བུ་དར་ཞིང་རྒྱས༔ བསྟན་པའི་རིང་ལུགས་ནམ་ཡང་འཕོ་མེད་ཤོག༔ རྟོག་གེ་མཁན་དང་དད་པ་སྣུམ་དྲེད་ཅན༔ ཐོས་པ་ཆུང་དང་གསང་བ་བློར་མི་ཤོང་༔ མ་དག་འགྲོ་ལ་གསང་ཤིག་ཨ་ཐཾ་རྒྱ༔ དབེན་པ་བསྟེན་ཞིང་ཚེ་འདིའི་འདུ་བྱེད་བོར༔ སྒྲུབ་པ་དང་ལེན་བརྩོན་འགྲུས་ཞེ་བཅད་ལྡན༔ དམ་ཚིག་ལྡན་པའི་བུ་ལ་སྤེལ་ཞིག་རྒྱ༔ ས་མ་ཡཱ༔ རྒྱ་རྒྱ་རྒྱ༔ གཏེར་རྒྱ༔ སྦས་རྒྱ༔ ཟབ་རྒྱ༔ གཉན་རྒྱ༔ ས་མ་ཡཱ༔ རྒྱ་རྒྱ་རྒྱ༔ རིག་འཛིན་ཆེན་པོ་ཉི་མ་གྲགས་པས་ཆགས་རུ་ཕུག་དམར་ནས་གདན་དྲངས་ཤིང་ཤོག་སེར་ལས་བསྒྱུར་བ་མངྒ་ལཾ། །

ཁྱེའུ་ཆུང་སྤྲུལ་སྐུའི་གདམས་པ་ཡིད་བཞིན་ནོར་བུ།

ཕག་མོ་དམར་མོའི་ཟབ་ཐིག་ལས༔ ཁྱེའུ་ཆུང་སྤྲུལ་སྐུའི་གདམས་པ་ཡིད་བཞིན་ནོར་བུ་བཞུགས༔ ཡེ་ཤེས་མཁའ་འགྲོའི་ལྷ་ཚོགས་རྣམས་ལ་འདུད༔ མ་འོངས་སྨིན་གྲོལ་ཐོབ་པའི་སྐྱེས་བུ་ཡིས༔ བསྟན་དང་འགྲོ་བའི་དོན་དུ་སེམས་བསྐྱེད་དེ༔ བྱང་སེམས་སྤྲུལ་པའི་རིགས་བརྒྱུད་འཇོག་འདོད་ན༔ མཚན་ལྡན་པདྨའི་རིགས་ཀྱི་བུད་མེད་ལ༔ ཟླ་མཚན་ཆད་པའི་སྐབས་དང་ལེགས་བསྟུན་ཏེ༔ ཡ་ལ་བུ་འབྱུང་ཟུང་ལ་བུ་མོ་འབྱུང་༔ བདུན་གཅིག་བར་དུ་བུ་སྣོད་མི་ཟུམ་པས༔ སྲིད་ནི་ཟུང་རེས་དེ་བཞིན་ཆགས་པར་འགྱུར༔ ལོ་ཟླའི་ཁམས་དང་གཟའ་སྐར་ཚེས་གྲངས་བཟང་༔ བུ་ཚ་ཕ་མའི་དགྲ་ཕྱོགས་ཁམས་བསྐོར་ནས༔ མཐུན་གསུམ་འཛོམས་པའི་རྟེན་འབྲེལ་ལེགས་པ་ལ༔ ཡི་དམ་གཞུང་བསྲང་ཚོགས་འཁོར་བསྐང་གསོལ་བྱ༔ རྩ་བ་གསུམ་ལ་གསོལ་བ་རྩེ་གཅིག་གདབ༔ བསྟན་འགྲོའི་དོན་དུ་སེམས་བསྐྱེད་ནན་དུ་བསྒོམ༔ དེ་ནས་ཡབ་ཡུམ་ཐབས་ཤེས་ཟུང་དུ་འཇུག༔ ཡུམ་གྱི་སྙིགས་མ་ཕྱི་རུ་མ་ཕྱུངས་བར༔ བྱང་སེམས་མི་སྤྲོ་ཀུན་ད་བསྐྱིལ་བར་བྱ༔ སྙིགས་མ་དག་ནས་བུ་སྣོད་གཞལ་ཡས་དབུས༔ རིགས་གསུམ་མགོན་པོ་གང་མོས་ས་བོན་གསལ༔ བྱང་སེམས་སྤྲོས་པས་སྐུ་རུ་ལམ་གྱིས་གྱུར༔ དམ་ཚིག་ཡེ་ཤེས་གཉིས་སུ་མེད་པར་བསྒོམ༔ སྙིང་པོ་བརྒྱ་རྩ་བགྲང་ཞིང་ཡེ་ཤེས་བསྟིམ༔ དེ་ནས་ཡུམ་དེ་གཞོག་གཡས་འོག་ཕབ་ཉལ༔ གོང་བཞིན་བརྩིས་པའི་བདུན་གཅིག་ཞག་གསུམ་སྤྱད༔ དེ་ནས་ཆགས་པ་མི་སྤྱད་གྲིབ་ལ་འཛེམ༔ ཟླ་བ་སོགས་ནས་ཟླ་མཚན་མ་བྱུང་ན༔ སྲིད་ཆགས་ངེས་པས་བསྐང་གསོལ་རིམ་གྲོར་འབུངས༔ གཞོགས་གཡས་བུ་དང་གཞོགས་གཡོན་བུ་མོ་སྟེ༔ བུ་མོའི་ལྟས་བྱུང་ལྟེ་བསྒྱུར་གཟབ་པར་བྱ༔ ཡུམ་ལ་སྲུང་བའི་ཙཀྲ་ཅི་ཟབ་གདགས༔ དེས་ནི་རིགས་པའི་ཁྱེའུ་སྤྲུལ་པའི་སྐུ༔ འཕགས་པ་རྣམས་ཀྱི་ཐུགས་རྗེའི་རྒྱུད་བསྐུལ་ནས༔ བྱང་ཆུབ་སེམས་དཔའི་སྤྲུལ་པ་ངེས་པར་འབྱུང་༔ འདི་ནི་དམ་ཚིག་ལྡན་པའི་སྔགས་པ་དང་། ༔ སྡོམ་གསུམ་འཆང་བའི་དགེ་སློང་ཡིན་ཀྱང་རུང་༔ བསྟན་དང་འགྲོ་བ་རྣམས་ལ་ཕན་གྱུར་ན༔ དམ་ཚིག་སྡོམ་པ་རྣམས་ལ་མི་གནོད་ཅིང་༔ སེམས་ཅན་ཐར་ལམ་འཛུད་པ་བསྟན་པའི་བཙས༔ དེས་ན་དྲོད་ཐོབ་སྐལ་ལྡན་སྐྱེས་བུ་ཡིས༔ འགྲོ་བའི་དོན་དུ་སེམས་བསྐྱེད་འབད་པར་རིགས༔ མ་འོངས་ལས་འཕྲོ་ཅན་དང་འཕྲད་པར་ཤོག༔ ས་མ་ཡཱ༔ རྒྱ་རྒྱ་རྒྱ༔ གཏེར་རྒྱ༔ སྦས་རྒྱ༔ ཟབ་རྒྱ༔ གཉན་རྒྱ༔ ས་མ་ཡཱ༔ རྒྱ་རྒྱ་རྒྱ༔ རིག་འཛིན་ཆེན་པོ་ཉི་མ་གྲགས་པས་ཤིང་ཕོ་སྟག་ལ་སྤྱན་དྲངས་ཤིང་མེ་ཕོ་སྟག་ལ་ཆགས་རུ་ཕུག་ནག་ཏུ་ཤོག་སེར་ལས་ཕབ་པའོ། །མངྒ་ལཾ། །

དབང་གི་སྦྱིན་སྲེག་ཆོག་སྒྲིག

ཕག་མོ་དམར་མོའི་ཟབ་ཐིག་ལས༔ དབང་གི་སྦྱིན་སྲེག་དབང་གི་མེ་འབར་བཞུགས༔ ཡེ་ཤེས་མཁའ་འགྲོའི་ཚོགས་ལ་འདུད༔ ཕག་མོ་དམར་མོའི་རྣལ་འབྱོར་པས༔ སྣང་སྲིད་དབང་དུ་སྡུད་འདོད་ན༔ སྟེགས་བུ་ཟླ་གམ་དམར་པོའི་སྟེང་༔ རཾ་གྱི་ཁོག་པར་ནི་བྲིས་ཏེ༔ ཙན་དན་དམར་པོའི་ཤིང་དག་གི༔ ཐབ་ནི་ཟླ་གམ་དག་ཏུ་བརྩེགས༔ རང་ཉིད་ཕག་མོ་དམར་མོར་བསྒོམས༔ སྔགས་དམིགས་གསལ་ཞིང་བསྙེན་ཁ་གསོ༔ ཐབ་བསངས་མེ་སྤར་མེ་ལྷ་མཆོད༔ ཧཱུྃ༔ རཾ་ཡིག་དམར་པོ་ཡོངས་གྱུར་པས༔ མེ་ལྷ་དམར་པོ་བགྲང་ཕྲེང་ཅན༔ གཡས་པས་ལྕགས་ཀྱུ་མཁའ་ལ་གདེངས༔ ཕྱེད་སྐྱིལ་ར་སྐྱེས་ཁམ་པ་ཆིབས༔ ཐུགས་ཀའི་འོད་ཀྱིས་སྤྱན་དྲངས་གྱུར༔ ཨཱོཾ་ཚུར་སྤྱོན་ཚུར་སྤྱོན་མེ་ཡི་ལྷ༔ ཚངས་པ་འཇིག་རྟེན་མགོན་གྱི་སྲས༔ འོད་འཕྲེང་བསྐལ་པའི་མེ་ཆེན་འཆེད༔ མཆོད་བསྟོད་བསྲེག་རྫས་འདི་བཞེས་ལ༔ འབར་བའི་མེ་དང་དབྱེར་མེད་བཞུགས༔ དབང་གི་དངོས་གྲུབ་བདག་ལ་སྩོལ༔ ཅེས་བརྗོད་ཡེ་ཤེས་མེ་ཀློང་ན༔ དམར་མོ་འབུམ་ཕྲག་དྷཀྐི་རྣམས༔ ཏིལ་གྱི་གོང་བུ་ལྟ་བུར་གསལ༔ རྩ་སྔགས་ཤམ་བུར་སྔགས་འདི་བདགས༔ ལྷ་འདྲེ་མི་གསུམ་ཟས་ནོར་ལོངས་སྤྱོད་དང་བཅས་པ་པ་ཤཾ་ཀུ་རུ་ཡེ་སྭཱ་ཧཱ༔ བརྒྱ་དང་རྩ་བརྒྱད་དག་གིས་མཆོད༔ ཏིལ་མར་དབང་གི་ཆས་རྣམས་བསྲེག༔ མཐའ་ལ་པཱུ་ཙ་རྣམ་ལྔ་སྦྱར༔ ཕག་མོ་དགྱེས་པས་འཁོར་འདས་ཀུན༔ རང་གི་དབང་དུ་གྱུར་པར་བསྒོམ༔ སྣང་བ་བྱུང་རྒྱལ་དྲན་ཐང་སྤྱོད༔ རིག་པ་རྗེན་ཕུད་སྙིང་པོ་བགྲང་༔ ཡེ་ཤེས་གཤེགས་ཤིང་དམ་ཚིག་བསྡུ༔ མེ་ལྷ་གཏང་རག་ཚུལ་གྱིས་མཆོད༔ བཟོད་གསོལ་གཤེགས་ཤིང་བསྔོ་སྨོན་བྱ༔ ས་མ་ཡཱ༔ རྒྱ་རྒྱ་རྒྱ༔ མེ་ཡི་ལས་སྦྱོར་དམ་པ་འདི༔ ཆགས་མེད་ལོ་གསུམ་བརྩོན་གྱུར་ན༔ སྐྱེ་འགྲོ་ཟས་ནོར་དབང་ཐང་སྟོབས༔ འབྱུང་བ་བཞི་ཡི་དངས་མ་རྣམས༔ རྣལ་འབྱོར་དེ་ཡི་དབང་འདུ་ཞིང་༔ དཔལ་དང་གྲགས་པས་ས་ཆེན་ཁྱབ༔ མཆོག་གི་དངོས་གྲུབ་བརྒྱ་རྩ་འཐོབ༔ ཐུན་མོང་རྣམས་ལ་སྨོས་ཅི་དགོས༔ ཟབ་ཕྱིར་འཚོ་རྒྱལ་ཁྱོད་ལ་གདམས༔ དམར་མོ་དབང་གི་སྒྲུབ་ཕུག་གི༔ གསང་བའི་མདོ་ལ་ཨ་ཐམ་རྒྱ༔ གཡས་ཀྱི་ཚེ་བུམ་གཏེར་ཁ་ལས༔ ཚེ་ཡི་ཆུ་རྒྱུན་འབབ་པ་ཡོང་༔ དེ་དུས་ཟབ་པའི་གདམས་པ་འདི༔ ཉི་མ་གྲགས་པས་སྤྱོད་པར་འགྱུར༔ སྲུང་མས་མེལ་ཚེ་གྱིས་ཤིག་རྒྱ༔ ས་མཡཱ༔ རྒྱ་རྒྱ་རྒྱ༔ གཏེར་རྒྱ༔ སྦས་རྒྱ༔ ཟབ་རྒྱ༔ རིགས་འཛིན་ཆེན་པོ་ཉི་མ་གྲགས་པ་རྩལ་གྱིས་ཆགས་རུ་ཕུག་དམར་ནས་སྤྱན་དྲངས་པའོ། །མངྒ་ལཾ། །

དམར་མོ་སྒྲ་སྒྲོག་གི་ལས་བྱང་།

ཕག་མོ་དམར་མོའི་ཟབ་ཐིག་ལས། དམར་མོ་སྒྲ་སྒྲོག་གི་ལས་བྱང་བཞུགས། ཕག་གདོང་དམར་མོ་སྒྲ་སྒྲོགས་མ་ལ་ཕྱག་འཚལ་ལོ། །རྣལ་འབྱོར་པས་དོན་གཉིས་ཀྱི་ཕྱིར་དུ་ཕག་གདོང་དམར་མོ་སྒྲ་སྒྲོག་གི་ཉམས་ལེན་འདོད་པས། དབེན་པའི་གནས་སུ་དཀྱིལ་འཁོར་སྨན་རག་གཏོར་མ་ཚོགས་དང་བཆོད་རྫས་རྣམས་གཞུང་ལྟར་བཤམས། ཐུན་མོང་གི་སྔོན་འགྲོ་ཆོས་སྤྱོད་གསོལ་འདེབས་གཏོར་མ་ཆ་གཉིས་སོགས་མཐོང་བརྒྱུད་ཕྱག་ལེན་ལྟར་བྱ། དེ་ནས་དངོས་གཞི་གྱེར་བསྒོམ་དང་ལྡན་པས་རོལ་མོ་རྣམས་འཁྲོལ་ཞིང་བཀའ་བསྒོ་བ་ནི། ཧཱུྃ༔ ང་ནི་དམར་མོ་སྒྲ་སྒྲོགས་སྐུ༔ ཆོས་ཀྱི་དབྱིངས་ལས་སྤྲུལ་པའི་མ༔ མཁའ་འགྲོའི་སྤྲུལ་པས་སྟོང་གསུམ་གང་༔ ལོག་པར་ལྟ་བའི་གདོན་བགེགས་རྣམས༔ རྡུལ་ཕྲན་བཞིན་དུ་བརླག་པར་བྱེད༔ དེ་བས་རང་རང་གནས་སུ་དེངས༔ ཧཱུྃ་བཞིའི་སྔགས་བརྗོད༔ མཚམས་གཅོད་པ་ནི༔ ཧཱུྃ༔ རབ་ཏུ་ཁྲོས་པའི་མཁའ་འགྲོ་འབུམ༔ དྲག་ཏུ་བསྐྱོད་ལ་སྐུར་བཞེངས་ཤིག༔ དུར་ཁྲོད་མཁའ་འགྲོའི་ཕོ་བྲང་འདིར༔ གནོད་བྱེད་གདོན་བགེགས་མཚམས་ཆོད་ཅིག༔ ནི་པདྨ་དྷཀྐི་ནི་བྷ་ར་ཧི་ཧཱུྃ་ཕཊ་རཀྵ་རཀྵ་སྭཱ་ཧཱ༔ སྐྱབས་སུ་འགྲོ་བ་ནི། ན་མོ་བླ་མ་ཡི་དམ་མཁའ་འགྲོ་སྟེ༔ རྩ་བ་གསུམ་ལ་སྐྱབས་སུ་མཆི༔ སེམས་བསྐྱེད་པ་ནི། འགྲོ་བ་སེམས་ཅན་དོན་སླད་དུ༔ མཁའ་འགྲོའི་བསྐྱེད་རྫོགས་བསྒོམ་བཟླས་བསྒྲུབ༔ གསུམ། ཡན་ལག་བདུན་པ་ནི༔ ཧཱུྃ༔ བླ་མ་ཡི་དམ་མཁའ་འགྲོ་གཤེགས༔ ཉི་ཟླ་པདྨའི་གདན་ལ་བཞུགས༔ ལུས་ངག་ཡིད་གསུམ་གུས་ཕྱག་འཚལ༔ ཕྱི་ནང་གསང་བའི་མཆོད་པ་འབུལ༔ ཉམས་ཆགས་སྡིག་སྒྲིབ་མཐོལ་ལོ་བཤགས༔ གསང་སྔགས་སྒྲུབ་ལ་རྗེས་ཡི་རང་༔ སྨིན་གྲོལ་ཆོས་འཁོར་བསྐོར་དུ་གསོལ༔ མྱ་ངན་མི་འདར་གསོལ་བ་འདེབས༔ དགེ་བ་བྱང་ཆུབ་ཆེན་པོར་བསྔོ༔ ཐམས་ཅད་སངས་རྒྱས་ཐོབ་པར་ཤོག༔ མཆོད་པ་བྱིན་གྱིས་བརླབས་པ་ནི༔ ཧཱུྃ༔ རང་ཉིད་ལྷར་གསལ་ཐུགས་ཀ་ནས༔ འོད་ཟེར་འཕྲོ་འདུའི་ཏིང་འཛིན་གྱིས༔ མཆོད་པའི་མ་དག་ཉེས་པ་སྦྱངས༔ ཡེ་ཤེས་འདོད་དགུའི་བདུད་རྩིར་བསྒྱུར༔ ནི་པདྨ་དྷཀྐི་ནི་བྷ་ར་ཧི་ཧཱུྃ་སྭཱ་ཧཱཿ ཨཱོཾ་ཨཱཿཧཱུྃ་སརྦ་པཉྩ་ཨ་མྲྀ་ཏ་རཀྟ་བྷ་ལིངྟ་པཱུ་ཙ་ས་མ་ཡེ་སྭཱ་ཧཱ༔ གསུམ། བྱིན་དབབ་པ་ནི༔ ཧཱུྃ༔ དབྱིངས་ཀྱི་མཁའ་འགྲོའི་ཕོ་བྲང་ནས༔ དམར་མོ་སྒྲ་སྒྲོག་མཁའ་འགྲོའི་རྗེ༔ མཁའ་འགྲོ་མ་ཚོགས་འབུམ་གྱིས་བསྐོར༔ སྒྲུབ་པའི་གནས་འདིར་བྱིན་ཅིག་ཕོབ༔ ནི་པདྨ་དྷཀྐི་ནི་བྷ་ར་ཧི་ཨ་ཝེ་ཤ་ཡ་ཨ་ཨཱ༔ བརྡ་སྒོ་དབྱེ་བ་ནི༔ ཧཱུྃ༔ བརྗོད་མེད་མ་བཅོས་དེ་བཞིན་ཉིད༔ ངན་རྟོག་དབང་གིས་འཁོར་བར་འཁྱམས༔ གཟུང་འཛིན་སྐྱེ་མེད་རང་གྲོལ་བའི༔ ཡེ་ཤེས་དོན་གྱི་སྒོ་དབྱེ་འཚལ༔ པྲ་ཝེ་ཤ་ཡ་ཧོ༔ བརྡ་ཕྱག་ནི༔ ཧཱུྃ༔ སྐྱེ་མེད་གཉུག་མའི་རང་བྱུང་ལྷ༔ རང་དང་འགྲོག་ཀྱང་ཞལ་མ་མཇལ༔ དུས་འདིར་རང་རིག་རང་ངོར་ཤར༔ རང་གྲོལ་དོན་གྱི་ཕྱག་འཚལ་ལོ༔ ས་མ་ཡ་ཨ་ལ་ལ་ཧཱུྃ༔ དམ་བཤགས་ནི༔ ཧཱུྃ༔ གདོད་ནས་རང་དང་གཉིས་མེད་ཀྱང་༔ གཉིས་འཛིན་དབང་གིས་སོ་སོར་ཕྱེ༔ ཆོས་དབྱིངསམཁའ་འགྲོའི་ལྷ་ཚོགས་ལ༔ གཉིས་སུ་མེད་པའི་ངང་དུ་བཤགས༔ ས་མ་ཡ་ཤུདྡྷེ་ཨཱ༔ བསྐྱེད་རིམ་ནི༔ ཧཱུྃ༔ སྣང་སྲིད་འཁོར་འདས་སྟོང་པར་གྱུར༔ སྟོང་པའི་ངང་ལས་སྐད་ཅིག་གིས༔ ཆོས་འབྱུང་དམར་པོ་ཟུར་གསུམ་པའི༔ གཞལ་ཡས་ཁང་གི་ལྟེ་བ་ལ༔ པདྨ་ཉི་ཟླ་བམ་རོའི་སྟེང་༔ རང་སེམས་ངོ་བོ་ནི་དམར་པོ༔ འོད་ཟེར་འཕྲོ་འདུའི་སྦྱོར་བ་ལས༔ མཁའ་འགྲོ་རྡོ་རྗེ་ཕག་མོ་དམར༔ ཞལ་གཅིག་སྤྱན་གསུམ་ཞི་མ་ཁྲོ༔ གྲི་ཐོད་ཕྱག་རྒྱ་གར་སྟབས་ཅན༔ དུར་ཁྲོད་དབང་གི་ཆས་ཀྱིས་བརྒྱན༔ ཁ་ཊྭཱཾ་ག་ལ་བདེ་བར་འཁྱུད༔ སྣང་བའི་ངོ་བོ་ལྷ་ཡི་སྐུ༔ སྟོང་པའི་རང་བཞིན་ཕྱི་ནང་བྲལ༔ སྣང་སྟོང་ཟུང་འཇུག་འགག་པ་མེད༔ མེ་ལོང་གཟུགས་བརྙན་ཆུ་ཟླ་ལྟར༔ བདག་མདུན་གསལ་བའི་གནས་གསུམ་ལས༔ འོད་འཕྲོས་མཁའ་སྤྱོད་གནས་ཡུལ་དང་༔ ནུབ་ཕྱོགས་ཨོ་རྒྱན་ཕོ་བྲང་ནས༔ ཕག་མོ་དམར་མོའི་མཁའ་འགྲོའི་ཚོགས༔ ཁ་བ་བུ་ཡུག་འཚུབ་ལྟར་བྱོན༔ རྒྱ་མཚོ་ཆེ་ལ་ཆར་བབས་ལྟར༔ བསྐྱེད་པའི་ལྷ་ལ་གཉིས་མེད་ཐིམ༔ སྤྱན་འདྲེན་པ་ནི༔ ཧཱུྃ༔ དམ་ཚིག་སེམས་དཔའ་བསྐྱེད་པའི་ལྷ༔ ཕག་མོ་དམར་མོ་སྒྲ་སྒྲོག་མ༔ འོད་ཟེར་འཕྲོ་འདུའི་ཏིང་འཛིན་གྱིས༔ མཁའ་སྤྱོད་གནས་ཡུལ་ཞིང་ཁམས་དང་༔ ནུབ་ཕྱོགས་ཨོ་རྒྱན་དུར་ཁྲོད་ནས༔ མ་མོ་མཁའ་འགྲོ་ཀུན་གྱི་རྗེ༔ རྡོ་རྗེ་ཕག་མོ་མཁའ་འགྲོ་འབུམ༔ དངོས་གྲུབ་སྩོལ་ཕྱིར་གཤེགས་སུ་གསོལ༔ བདེ་བ་ཆེན་པོ་རཱ་གའི་མ༔ སྐུ་ནི་གར་སྟབས་ལིངས་སེ་ལིང་༔ གསུང་ནི་བརྡ་སྐད་དི་རི་རི༔ ཐུགས་ནི་ཏིང་འཛིན་ཡ་ལ་ལ༔ མཁའ་འགྲོ་མ་ཚོགས་སྤུངས་སེ་སྤུང་༔ དར་དང་ཅོད་པན་པུ་རུ་རུ༔ དུར་ཁྲོད་རུས་རྒྱན་ཁྲོ་ལོ་ལོ༔ མེ་དཔུང་འོད་ཟེར་ཡ་ལ་ལ༔ མོས་པ་གཏད་པའི་གནས་མཆོག་འདིར༔ ཐུགས་རྗེའི་དབང་གིས་གཤེགས་ནས་ཀྱང་༔ གཉིས་སུ་མེད་པའི་དངོས་གྲུབ་སྩོལ༔ དྷ་ཀ་དྷཀྐི་ནི་ས་མ་ཡ་ཧྲིང་ཧྲིང་ཕེཾ་ཕེཾ་ཛཿཛཿཨ་ཝེ་ཤ་ཡ་ཨ་ཨཱ༔ བཞུགས་སུ་གསོལ་བ་ནི༔ ཧཱུྃ༔ འདུ་འབྲལ་མེད་པའི་ད་ལ་འདིར༔ གཤེགས་བཞུད་མེད་པའི་ཕག་གདོང་མ༔ རྗེས་ཆགས་འཁོར་ལོའི་དབང་མོ་ཆེ༔ རོ་གཅིག་ཀློང་དུ་ཏིཥྛ་ལྷན༔ ཕྱག་ནི༔ ཧཱུྃ༔ བསྐྱེད་པའི་མཁའ་འགྲོ་རྣལ་འབྱོར་མ༔ གསལ་བའི་ཏིང་འཛིན་ཕྱག་རྒྱ་ཡིས༔ རྟོག་མེད་དབྱིངས་ནས་གར་སྒྱུར་ཏེ༔ གཉིས་སུ་མེད་པར་ཨ་ལ་ལ༔ པུ་རུ་ཙ་ཧོ༔ མཆོད་པ་ནི༔ ཧཱུྃ༔ ཕྱི་ནང་གསང་བའི་འདོད་ཡོན་དང་༔ དངོས་འབྱོར་ཡིད་སྤྲུལ་མཆོད་པའི་ཚོགས༔ སྨན་གཏོར་རཀྟ་བྷ་ལིངྟ༔ མ་ཚོགས་མཁའ་འགྲོའི་ལྷ་ཚོགས་ལ༔ གུས་པས་འབུལ་ལོ་བཞེས་སུ་གསོལ༔ ནི་པདྨ་དྷཀྐི་ནི་བྷ་ར་ཧི་སརྦ་པཱུ་ཙ་ས་མ་ཡ་བྷ་ལིངྟ་རཀྟ་ཨ་མྲྀ་ཏ་ཁ་ཁ་ཁཱ་ཧི་ཁཱ་ཧི༔ གསུམ། བསྟོད་པ་ནི༔ ཧཱུྃ༔ ཆོས་ཀྱི་དབྱིངས་ལ་སྐུར་བཞེངས་པ༔ རྣམ་པར་རྟོག་མེད་བཅོམ་ལྡན་མ༔ དུས་གསུམ་སངས་རྒྱས་བསྐྱེད་པའི་ཡུམ༔ ཕག་གདོང་དམར་མོར་ཕྱག་འཚལ་བསྟོད༔ འདོད་པའི་དངོས་གྲུབ་སྩོལ་བའི་ལྷ༔ དཔའ་བོ་མཁའ་འགྲོར་འཁོར་ལོས་སྒྱུར༔ མཆོག་དང་ཐུན་མོང་དངོས་གྲུབ་དཔལ༔ དམ་པ་མཆོག་རྣམས་སྩལ་དུ་གསོལ༔ བདག་རྒྱུད་མི་ཤེས་རྨོངས་པས་བསྒྲིབས༔ ནོངས་པར་གྱུར་པ་ཅི་མཆིས་པ༔ ཆོས་དབྱིངས་ཀློང་དུ་བཟོད་པར་གསོལ༔ ཉམས་ཆག་སྐོངས་ལ་གཡར་དམ་སྩོལ༔ འཛབ་ནི། ཧཱུྃ༔ སྣང་བའི་ངོ་བོ་ལྷ་ཡི་སྐུ༔ སྟོང་པའི་རང་བཞིན་ཕྱི་ནང་བྲལ༔ སྣང་སྟོང་ཟུང་འཇུག་ཕྱག་རྒྱ་ཆེ༔ ཐུགས་ཀར་ཡེ་ཤེས་འོད་ལྔའི་ཀློང་། །ཉི་སྟེང་ནི་ཡིག་དམར་པོའི་མཐར། །གསང་བའི་སྙིང་པོ་ཤེས་རབ་འཁོར། །བདག་མདུན་གསལ་བའི་འོད་དམར་ཟེར། །འཁོར་འདས་སྣང་སྲིད་སྣོད་བཅུད་ཁྱབ། །རྩ་གསུམ་རྒྱལ་བའི་ཐུགས་རྗེ་དང་། །ཁམས་གསུམ་སྐྱེ་འགྲོའི་ཚེ་དཔལ་སྟོབས། །དབང་བསྡུས་བདག་མདུན་རྣམས་ལ་བསྟིམ། །དབང་གི་འཕྲིན་ལས་མཐར་ཕྱིན་ཅིང་། །མཆོག་གི་དངོས་གྲུབ་མངོན་གྱུར་བསམས། །མ་ཡེངས་ཏིང་འཛིན་དེ་ཡི་ངང་། །གསང་བའི་སྙིང་པོ་འདི་བཟླའོ། །ནི་པདྨ་དྷཀྐིནི་བྷ་ར་ཧི་སརྦ་སིདྡྷི་ཕ་ལ་ཧཱུྃ་སྭཱ་ཧཱ༔ བརྒྱ་སྟོང་ཁྲི་འབུམ་སྐབས་དང་སྦྱར། ཧཱ་པ་ཤཾ་ཀུ་རུ་ཡེ་སྭཱ་ཧཱ༔ གང་འོས་བཟླས་རྗེས་དངོས་གྲུབ་ལེན་པ་ནི། ཧཱུྃ༔ མཁའ་འགྲོ་རྒྱ་མཚོ་དབང་གི་དཀྱིལ་འཁོར་དུ༔ སྐུ་ལྔའི་ཡོན་ཏན་མ་ལུས་འདུས་པའི་དཔལ༔ དམར་མོ་སྒྲ་སྒྲོག་སྐུ་དང་གཉིས་སུ་མེད༔ དམ་རྫས་གཏོར་ཆེན་མཆོག་གི་དངོས་གྲུབ་ཞུ༔ མ་དང་མཁའ་འགྲོ་བརྟེན་ཕྱིར་བདག་ལ་སྩོལ༔ ཧཱུྃ༔ དམར་མོ་སྒྲ་སྒྲོག་དུས་གསུམ་རྒྱལ་བའི་ཡུམ༔ པདྨ་དྷཀྐི་དབང་གི་མཁའ་འགྲོའི་ཚོགས༔ འགྱུར་མེད་རྣམ་དག་སྐུ་ཡི་སྒོ་ཕྱེ་ནས༔ འཆི་མེད་རིགས་འཛིན་ཚེ་ཡི་དངོསགྲུབ་སྩོལ༔ འགག་མེད་རྣམ་དག་གསུང་གི་སྒོ་ཕྱེ་ནས༔ ཚངས་དབྱངས་དྲུག་ཅུ་གསུང་གི་དངོས་གྲུབ་སྩོལ༔ སྤྲོས་མེད་རྣམ་དག་ཐུགས་ཀྱི་སྒོ་ཕྱེ་ནས༔ ཕྱག་རྒྱ་ཆེན་པོ་མཆོག་གི་དངོས་གྲུབ་སྩོལ༔ རིན་ཆེན་བུམ་བཟང་དཔག་བསམ་ནོར་བུའི་ཚུལ༔ དགོས་འདོད་ཀུན་འབྱུང་མཆོག་ཐུན་དངོས་གྲུབ་སྩོལ༔ ནི་པདྨ་དྷཀྐི་ནི་བྷ་ར་ཧི་ཀཱ་ཡ་ཝཱཀྐ་ཙིཏྟ་སིདྡྷི་ཧཱུྃ༔ དེ་ནས་བཀར་གཏེར་བསྲུང་མ་མཆོད་ཅིང་ཚོགས་འཁོར་བཤམས་ལ། ཧཱུྃ༔ སྐྱེ་མེད་དབྱིངས་ཀྱི་མཁའ་ཀློང་ནས༔ ཟག་མེད་བདུད་རྩིའི་བཅུད་འཕྲོས་པས༔ གྷ་ན་ཚོགས་ཀྱི་འཁོར་ལོར་ཕོག༔ འདོད་ཡོན་ལོངས་སྤྱོད་སྣང་སྲིད་བཀང་༔ ཨོཾ་ཨཱཿཧཱུྃ་སྭཱ་ཧཱཿཚོགས་ལ་སྤྱན་འདྲེན་པ་ནི༔ ཧཱུྃ༔ ཆོས་དབྱིངས་མཁའ་འགྲོའི་ཕོ་བྲང་ནས༔ དམར་མོ་སྒྲ་སྒྲོགས་མཁའ་འགྲོའི་གཙོ༔ འབུམ་ཕྲག་དྷཀྐིའི་འཁོར་གྱིས་བསྐོར༔ གནས་འདིར་མདུན་གྱི་མཁའ་ལ་སྤྱོན༔ ཚོགས་ཀྱི་མཆོད་པ་བཞེས་སུ་གསོལ༔ མཆོད་པ་ནི༔ ཧཱུྃ༔ རོ་བརྒྱ་ལྡན་པའི་ཞལ་ཟས་བཤོས༔ མཾ་ས་ཤ་དང་སུ་ར་ཆང་༔ བཟའ་བཏུང་ལོངས་སྤྱོད་སྣ་ཚོགས་པ༔ མཆོད་པར་འབུལ་ལོ་བཞེས་སུ་གསོལ༔ ནི་པདྨ་དྷཀྐི་ནི་བྷ་ར་ཧི་གྷ་ན་པཱུ་ཙ་ས་མ་ཡ་ཁཱ་ཧི་ཁཱ་ཧི༔ བཤགས་པ་ནི༔ ཧཱུྃ༔ ཡེ་ཤེས་མཁའ་འགྲོའི་ལྷ་ཚོགས་དགོངས༔ རང་རྒྱུད་རྨོངས་པས་མི་དགེ་བསགས༔ ཉམས་ཆག་སྡིག་སྒྲིབ་གནོང་ངོ་འགྱོད༔ ཚོགས་མཆོད་འདི་ཡིས་དག་གྱུར་ཅིག༔ གྷ་ན་པཱུ་ཙ་ཁཱ་ཧི་ཤུདྡྷེ་ཨཱ༔ བསྒྲལ་ལས་ནི༔ ཧཱུྃ༔ དམར་མོ་སྒྲ་སྒྲོགས་འཇིགས་གཟུགས་བརྔམ༔ རབ་གཏུམ་འཁྲུག་པས་དུག་གསུམ་འབར༔ སྐུ་གསུང་ཐུགས་སྤྲུལ་སྟོང་གསུམ་གང་༔ སྒྲོལ་བྱེད་འབུམ་སྡེས་དགྲ་བགེགས་སྒྲོལ༔ པདྨ་དྷཀྐི་ནྲི་ཏྲི་དགྲ་བགེགས་ཤ་ཏྲུཾ་མཱ་ར་ཡ་ཧཱུྃ་ཕཊ༔ སྟོབ་པ་ནི༔ ཧཱུྃ༔ མཁའ་འགྲོའི་ཚོགས་རྣམས་དགྱེས་པར་རོལ༔ ཁཱ་ཧི་ཁཱ་ཧི་འདོད་ཆགས་ཁྲག་ལ་ཁཱ་ཧི༔ ཁཱ་ཧི་ཁཱ་ཧི་ཞེ་སྡང་རུས་ལ་ཁཱ་ཧི༔ ཁཱ་ཧི་ཁཱ་ཧི་གཏི་མུག་ཤ་ལ་ཁཱ་ཧི༔ ལྷག་མ་ནིཿཧཱུྃ༔ མཁའ་འགྲོ་བཀའ་ཡི་དཀྱིལ་འཁོར་ནས༔ དུར་ཁྲོད་ཉུལ་ཞིང་མཁའ་ལ་རྒྱུ༔ ལས་སུ་གསང་སྔགས་བསྟན་པ་བསྲུང་༔ ཟས་སུ་ཤ་ཁྲག་དམར་ལ་གསོལ༔ སྤྲུལ་པ་འབུམ་འབུམ་མཁའ་འགྲོའི་ཚོགས༔ ལྷག་མའི་ལོངས་སྤྱོད་འདི་བཞེས་ལ༔ རྣལ་འབྱོར་བདག་གི་འཕྲིན་ལས་སྒྲུབས༔ སརྦ་དྷཀྐི་ནི་ས་མ་ཡ་ཁཱ་ཧི༔ ཆད་ཐོ་ནི༔ ཧཱུྃ༔ སྔོན་ཚེ་བསྐལ་པ་དང་པོ་ལ༔ ཆོས་དབྱིངས་མཁའ་འགྲོའི་དུར་ཁྲོད་དུ༔ གཙོ་མོ་དམར་མོ་སྒྲ་སྒྲོགས་གིས༔ དམ་ལ་བཏགས་པའི་མཁའ་འགྲོ་འབུམ༔ ཤ་ཁྲག་གཏོར་མ་འདི་བཞེས་ལ༔ གསང་སྔགས་བླ་མེད་བསྟན་པ་སྲུངས༔ དགྲ་བགེགས་སྒྲོལ་ལ་བར་ཆད་ཟློག༔ བཅོལ་བའི་འཕྲིན་ལས་གྲུབ་པར་མཛོད༔ ཧཱུྃ། དེ་འོག་བར་གྱི་བསྐལ་པ་ལ། །ཁམས་ཀྱི་སྲིང་མོ་རྫོང་གསུམ་གྱི། །གནས་མཆོག་ཆགས་རུ་ཕུག་དམར་ནས། །ཁམས་པ་ཉི་མ་གྲགས་པ་ཡིས། །ཟབ་ཆོས་གཏེར་སྒོ་ཕྱེ་བའི་ཚེ། །གཡར་དམ་ཕོག་པའི་ལྷ་འདྲེ་རྣམས། དམར་གྱི་གཏོར་མ་འདི་བཞེས་ལ། །བཅོལ་བའི་འཕྲིན་ལས་གྲུབ་པར་མཛོད། །ཧཱུྃ། ད་ལྟ་སྔགས་འཆང་བདག་ཉིད་ཀྱིས། །གསལ་བ་གསུམ་གྱི་དཀྱིལ་འཁོར་དུ། །ཤེས་པ་གསུམ་གྱི་གཟེར་གདབ་ནས། །མགྲོན་ལ་བོས་པའི་བཀའ་སྐྱོང་རྣམས། །དམར་གྱི་གཏོར་མ་འདི་བཞེས་ལ། །བཅོལ་བའི་འཕྲིན་ལས་གྲུབ་པར་མཛོད། །བསྟན་མ་ནི༔ ཧཱུྃ། བཀའ་ཡི་བསྲུང་མ་དམ་ཚིག་ཅན༔ བོད་ཁམས་སྐྱོང་བའི་བསྟན་མ་རྣམས༔ བཤལ་ཆུའི་གཏོར་མ་འདི་ལོང་ལ༔ བླ་མེད་བསྟན་སྐྱོང་འཕྲིན་ལས་སྒྲུབས༔ བྷྱོ་ས་མ་ཡ་ཁཱ་ཧི༔ གཏོར་གཞོང་སྦུབ་ཅིང་། ཧཱུྃ༔ མཁའ་འགྲོ་ཁྲོས་པའི་ཏིང་འཛིན་གྱིས། །བདེ་བ་ཆེན་པོའི་བྲོ་བརྡུང་བས། །སྟོང་པ་ཆེན་པོའི་ཡེ་ཤེས་རྒྱས། །སྒབ་འདྲེ་དམ་སྲི་འབྱུང་པོའི་ཚོགས། །ནམ་ཡང་ལྡང་བར་མ་བྱེད་ཅིག །དམ་སྲི་སརྦ་སྟམ་བྷ་ཡ་ནན། རྫོགས་རིམ་ནི༔ ཧཱུྃ༔ སྣང་བ་དག་པ་གཞལ་ཡས་ཁང་༔ གཟུང་འཛིན་བྲལ་བ་ཡི་དམ་ལྷ༔ རང་ངོར་གསལ་བ་ཆོས་ཀྱི་སྐུ༔ སྐྱེ་མེད་མཁའ་འགྲོའི་ལྷ་ཚོགས་རྣམས༔ ཆོས་དབྱིངས་མཁའ་འགྲོའི་གནས་སུ་གཤེགས༔ ཨ་ཨཱཾཿསྨྲ་བསམ་བརྗོད་མེད་ཡུམ༔ རང་སེམས་སྐྱེ་འགགས་གནས་གསུམ་འདི༔ མཁའ་འགྲོའི་སྐུ་གསུམ་རོལ་པར་ཤང་༔ བསྔོ་སྨོན་ནི༔ ཧཱུྃ༔ གསང་བའི་བསྐྱེད་རྫོགས་སྒོམ་བཟླས་མཐུས༔ ལྟ་བ་གཡེལ་བ་སོར་ཆུད་ཅིང་༔ སྒོམ་པ་བྱིང་བ་ཀློང་གྱུ་ཏེ༔ སྤྱོད་པ་ཚོགས་གཉིས་མཐར་ཕྱིན་ཞིང་༔ འབྲས་བུ་སྐུ་བཞི་མངོན་གྱུར་ཤོག༔ ཤིས་པ་ནི༔ ཧཱུྃ༔ ཡེ་ཤེས་དབྱིངས་ཀྱི་ཕོ་བྲང་ནས༔ ཕག་མོ་ཆོས་སྐུའི་བཀྲ་ཤིས་ཤོག༔ ཡེ་ཤེས་ལྔ་ལྡན་ཕོ་བྲང་ནས༔ ཕག་མོ་ལོངས་སྐུའི་བཀྲ་ཤིས་ཤོག༔ མཁའ་སྤྱོད་གནས་ཡུལ་དུར་ཁྲོད་ནས༔ ཕག་མོ་སྤྲུལ་སྐུའི་བཀྲ་ཤིས་ཤོག༔ བཀའ་ཡི་འཕྲིན་ལས་དཀྱིལ་འཁོར་ནས༔ སྤྲུལ་པ་འབུམ་སྡེའི་བཀྲ་ཤིས་ཤོག༔ ཅེས་པ་འདི་ཡང་དགོས་པར་སེམས་ཏེ་ཕག་མོ་ནག་མོའི་རང་གཞུང་བྱིན་རླབས་ཀྱི་གནད་ཆེ་བས་སོར་བཞག །སྒྱུར་འོས་རྣམས་དམར་མོ་སྒྲ་སྒྲོགས་གི་གཞུང་བཞིན་མཚམས་སྦྱར་བའི་ལས་བྱང་ཆོག་བསྒྲིགས་གཏེར་སྟོན་གྱིས་མཛད་པ་ལྟར་ལ་ཅུང་ཟད་གོ་རིམ་འཁྲུགས་པ་རྣམས་པདྨ་ཐེག་མཆོག་བསྟན་པའི་རྒྱལ་མཚན་གྱིས་བསྒྲིགས་པ་དགེ་ཞིང་ཤིས་པར་གྱུར་ཅིག །མངྒ་ལཾ། །དབང་མཛད་སྒྲ་སྒྲོགས་རྣལ་འབྱོར་མའི། །འཕྲིན་ལས་པར་དུ་བསྐྲུན་པའི་དགེ༴མྱུར་མགྱོགས་གློག་གི་ལྕགས་ཀྱུ་ཡིས། །སྲིད་ཞི་བདག་གིར་འདུས་གྱུར་ཅིག །ཅེས་པདྨའི་མིང་ཅན་གྱིས་བྲིས་པ་དགེའོ། །

དབང་གི་སྦྱིན་སྲེག་ཆོག་སྒྲིག

ཕག་མོ་དམར་མོའི་ཟབ་ཐིག་ལས། དབང་གི་སྦྱིན་སྲེག་བཞུགས། །གུ་རུ་རིན་པོ་ཆེ་དང་ཕག་གདོང་རྡོ་རྗེ་རྣལ་འབྱོར་མ་ལ་གུས་པ་ཆེན་པོས་ཕྱག་འཚལ་ཞིང་སྐྱབས་སུ་མཆིའོ། བྱིན་གྱིས་བརླབ་ཏུ་གསོལ་ལོ། དེ་ཡང་ཕག་མོའི་དབང་ཐོབ་ཅིང་སྨིན་གྲོལ་གྱི་དྲོད་དང་ལྡན་པས་དོན་གཉིས་ཀྱི་ཕྱིར་དུ་འཕྲིན་ལས་མེའི་ཆོ་ག་བརྩམ་པར་འདོད་པས། །དེ་ལ་གསུམ། སྔོན་འགྲོ་དངོས་གཞི་རྗེས་སོ། དང་པོ་ལ། འབྲིང་པོ་བཞིའི་ཉི་ཤུ་ལ་སོགས་པ་དབང་གི་དུས་ཁྱད་པར་ཅན་ལ། གནས་དབེན་ཞིང་ཡིད་དུ་འོང་བའམ། དབང་གི་ལས་དང་རྗེས་སུ་མཐུན་པའི་གནས་ཉིད་དུ། སྒྲུབ་པའི་ཁོག་འབུབ་ཞིག་ནས་འབྱུང་བ་ལྟར་ས་ཆོག་ལེགས་པར་བྱས་པའི་ས་ལ་སྟེགས་བུ་རྒྱར་མདའ་གང་པ་དཔངས་སུ་ཁྲུ་གང་པ་བྱས་པའི་དབུས་སུ་དབང་གི་ཐབ་ཁུང་དམར་པོ་ཟླ་གམ་རྒྱར་ཁྲུ་གང་དཔང་སུ་མཐོ་གང་པ་རྐན་གཉེར་རིམ་པ་གསུམ་དང་ལྡན་པའི་ཁ་ཁྱེར་ལ་པདྨའམ་ལྕགས་ཀྱུའི་ཕྲེང་བས་བསྐོར་བ་བརྩེགས། །དེའི་ནང་དུ་ལྟེ་བ་ཟླུམ་པོའི་དཀྱིལ་དུ་ཕྱག་མཚན་ནམ་རཾ་ཡིག་ས་བོན་གྱིས་མཚན་པའམ་ཚོམ་བུ་ལྷ་མདོག་ཅན་བཀོད་པ་གང་བདེར་བྱས་ལ། ཐབ་ཁུང་གི་ནང་དུ་ཙན་དན་ནམ་མཛོ་མོ་ཤིང་ངམ་ཨ་ཀ་རུ་སོགས་དབང་ལ་ཤིས་པའི་བུད་ཤིང་རྒྱ་ཚོས་སམ་དྲི་བཟང་བཏབ་པས་མདོག་བསྒྱུར་བ་ཟླ་གམ་དུ་བརྩིགས། །གཡས་ལོགས་སུ་གོང་དུ་བཤད་པའི་ཤིང་ཟླ་གམ་གྱི་དབྱིབས་སུ་གཞོགས་ལ་རིང་ཐུང་སོར་བཅུ་གཉིས་སྦོམ་ཕྲ་སྲིན་ལག་གམ་གུང་མོ་ཙམ་བྱས་པ་ལ་བསྒྲུབ་བྱ་དམིགས་བསལ་ཡོད་ན་མིང་རུས་དང་། མེད་ན་སྣང་སྲིད་ཐམས་ཅད་དབང་དུ་སྡུས་ཤིག་ཝ་ཤཾ་ཀུ་རུ་ཡེ་སྭཱ་ཧཱཿ ཞེས་རྒྱ་སྐྱེགས་ཀྱི་ཁུ་བས་བྲིས་པ་གྲངས་ལྡན་ལ་བུ་རམ་དང་ཏིལ་མར་གྱིས་བྱུགས་པ། མར་ཁུ། ཏིལ། ཡུངས་ཀར། ཟས་སྣ། དཱུརྦ། འབྲས། ནས། སྲན་མ། སོ་བ། གྲོ། ཀུ་ཤ །ཕྲུམ། འབྲུ་སྣ། དར་སྣ། ཤིང་ཏོག །ཟངས། བྱི་རུ། བུར་སྦྲང་། ཧ་ལོ། ཨུག་ཆོས། གླང་སྣ་དམར་པོ། བཙོད། རྒྱ་སྐྱེགས། དར་ཟབ་དམར་པོའི་རིགས་སོགས་དབང་ལ་འོས་པའི་རྫས་གང་ཚོགས། མར་ལ་གོ་ཡུ་བཏབ་པའི་སོ་རྩི། གོས་ཟུང་རྣམས་དང་། གཡོན་དུ་ཉེར་སྤྱོད་སྨན་རག་གཏོར་མ་རྣམས་ཀྱང་དམར་པོའི་ཚོན་གྱིས་བསྒྱུར་བར་འོས་པ་རྣམས་བསྒྱུར་བ་དང་། མདུན་དུ་རྡོར་དྲིལ་དགང་གཟར་བླུགས་ཀུ་ཤ་ལས་བུམ་སོགས་ཉེ་བར་མཁོ་བ་ཐམས་ཅད་དང་། གཞན་ཡང་སྐབས་འདིར་དགོས་པའི་མཆོད་གཏོར་ཚོགས་འཁོར་སོགས་ཀྱང་བཟང་ཞིང་གྱ་ནོམ་པ། སྣང་བ་གཡོ་བར་ནུས་པའི་རྔམ་བརྗིད་དང་ལྡན་པའི་ས་རྒྱན་གནམ་རྒྱན་སོགས་བཀོད་པའི་རྟེན་འབྲེལ་རབ་ཏུ་ཕུན་སུམ་ཚོགས་པར་བཤམས་ལ། ལས་གཞུང་བསྲང་ཞིང་བསྙེན་པའི་སྐབས་སུ་ཝ་ཤཾ་ཀུ་རུའི་ཤམ་བུ་ཅན་གྱི་བཟླས་པ་དང་། དབང་སྡུད་ཀྱི་དམིགས་པ་དང་ལྡན་པའི་སྒོ་ནས་སྐབས་དང་བསྟུན་ཏེ་བཟླ། ཚོགས་ལྷག་ཡན་སོང་ནས་ལས་བུམ་བསང་། སྟོང་པའི་ངང་ནས་བུམ་པ་ནི། རིན་པོ་ཆེ་ཡི་གཞལ་ཡས་ཁང་། །མཚན་ཉིད་རྫོགས་པའི་ནང་ཉིད་དུ། །དབང་གི་ཁྲོ་བོ་རྟ་མཆོག་དཔལ། །དམར་པོ་རྡོར་དྲིལ་ཡུམ་ལ་འཁྱུད། །རྟ་མགོས་མཚན་ཞིང་ཁྲོ་ཆས་རྫོགས། །སྐུ་ལས་སྤྲུལ་པའི་ཁྲོ་ཆུང་གིས། །གདོན་བགེགས་བཅོམ་ནས་བུམ་པའི་ཆུར། ཐིམ་པས་བུམ་ཆུ་ནུས་ལྡན་གྱུར། ཨཱོཾ་བཛྲ་ཀྲོ་ཏ་ཧྱ་གྷྲཱྀ་ཝ་ཧཱུྃ་ཕཊཿ གང་མང་བཟླས་རྗེས། །ཁྲོ་བོ་ཞུ་ནས་བུམ་ཆུར་འདྲེས། །ལས་ཀུན་བསྒྲུབ་པའི་བདུད་རྩིར་གྱུར། དེ་ནས་སྒྲུབ་པ་པོ་དམར་པོའི་ཆས་གོས་དང་རྒྱན་གྱིས་བརྒྱན་ཏེ་བརྗིད་ཤིང་སྒེག་པའི་ཆ་ལུགས་དང་ལྡན་པས་མེ་ཐབ་བསྐོར་ཏེ་རོལ་མོ་རྣམས་སྦིར་ཞིང་། རང་ཉིད་ཕག་གདོང་དམར་མོར་གསལ་བའི་སྐུ་ལས་སྤྲོས་པའི་མེ་དཔུང་དང་མཚོན་ཆའི་ཚོགས་ཀྱིས་གདོན་བགེགས་འབྱུང་པོ་ཐམས་ཅད་ཐལ་བར་བརླགས་ཤིང་སྟེང་འོག་ཕྱོགས་མཚམས་ཐམས་ཅད་ཁྲོ་ཆུང་མཚོན་ཆ་ཐོགས་པ་དང་དམར་ནག་མེ་དཔུང་འཁྱིལ་བའི་བསྲུང་བའི་འཁོར་ལོར་གྱུར་པར་བསམས་ལ། ཧཱུྃ། རྡོ་རྗེ་ཕག་མོའི་ཕོ་བྲང་འདིར། །འབྱུང་བ་མེ་ཡི་མཆོད་སྤྲིན་གྱི། །གསང་བ་མཆོག་ཏུ་བསྒྲུབ་པ་ལ། །ཉན་དང་ལྟ་བར་མི་དབང་བའི། །གདོན་བགེགས་འབྱུང་པོ་གཞན་དུ་སོང་། །བཀའ་དང་དམ་ལ་འདའ་བྱེད་ན། །དབང་མཛད་དམར་མོ་ཐུགས་ཁྲོས་ནས། །གཏུམ་པའི་ཁྲོ་མོས་བགེགས་དཔུང་འཇོམས། །འབར་བའི་མེ་ཡིས་གཟུགས་ཕུང་བསྲེགས། །རྣོ་དབལ་མཚོན་ཆས་དུམ་བུར་གཏོང་། །ཡེ་ཤེས་རྡོ་རྗེས་མགོ་བོ་འགེམས། །དེ་བས་མ་འདུག་གཞན་དུ་སོང་། །ཨཱོཾ་སུམ་བྷཱ་ནི་སོགས་བརྗོད། ཧཱུྃ། སྟེང་ནི་མེ་ཡི་བླ་རེ་ལ། །འོག་ཀྱང་འབར་བའི་ཕྲེང་བས་དཀྲིགས། །ཕྱོགས་མཚམས་ཀུན་ཀྱང་མེ་རིའི་གུར། །བར་སྣང་མེ་ཡི་སྤྲིན་ཕུང་གཏིབས། །གཞན་དུ་མེ་ཡི་ཚ་ཚ་འཕྲོ། །མེ་སྒྲ་འུར་འུར་ཆེམས་ཆེམས་ལྡིར། །འབར་བ་མེ་ཡི་གུར་ཁང་ལ། །སྲིད་ཞི་སུས་ཀྱང་མི་ཚུགས་པའི། མཚམས་ཀྱི་དཀྱིལ་འཁོར་གཞོམ་དུ་མེད། ཨཱོཾ་བཛྲ་རཀྵ་ཛྭ་ལ་རཾ་རཾ། ཞེས་བསྒོ་ཞིང་གྲལ་དུ་འཁོད་ལ། ལས་བུམ་གྱི་ཆུས་རྫས་རྣམས་ལ་འཐོར་ཞིང་། ཨཱོཾ་བཛྲ་ཀྲོ་ཏ་ཧྱ་གྷྲྀ་ཝ་ཧཱུྃ་ཕཊཿཀྱིས་བསངས། སྭ་བྷཱ་ཝས་སྦྱངས། སྟོང་པའི་ངང་ལས་པྂ་ལས་པདྨ་འབར་བའི་སྣོད་ཡངས་ཤིང་རྒྱ་ཆེ་བའི་ནང་དུ་མཆོད་རྫས་དང་སྲེག་རྫས་ཀྱི་དངོས་པོ་རྣམས་ཟག་མེད་ཀྱི་བདུད་རྩི་ལ་རྣམ་པ་སོ་སོའི་མཚན་ཉིད་མ་འདྲེས་པར་གསལ་བར་རྫོགས་པ། ཆགས་ལྡན་སྙིང་རྩ་འདར་ཞིང་རྒྱལ་བའི་བསམ་གཏན་གཡོ་བར་ནུས་པའི་རྒྱལ་སྲིད་རིན་ཆེན་བཀྲ་ཤིས་རྫས་རྟགས་འདོད་ཡོན་ཉེར་སྤྱོད་སོགས་མཆོད་པའི་སྤྲིན་གྱི་ཕུང་པོ་མ་ཚང་བའི་དངོས་པོ་མེད་པས་ནམ་མཁའ་ས་གཞི་བར་སྣང་ཐམས་ཅད་ཁེངས་པར་གྱུར་པར་བསམས་ལ། ཨཱོཾ་ཨཱཿཧཱུྃ་སརྦ་པཱུ་ཙ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཧཱུྃ་ཧྲཱིཿཐཱ༔ གསུམ་མམ་བདུན་གྱིས་བྱིན་གྱིས་བརླབས། དེ་ནས་རྗེའུ་རིགས་སམ་སྨད་འཚོང་མ་ལས་བླངས་པའི་མེ་སྤར་ལ་རླུང་གཡབ་ཅིང་། རཾ་སྤྱི་མཐུན་ལས་ཀྱི་བསོད་ནམས་དང་། །རྒྱལ་བའི་ཐུགས་བསྐྱེད་ལས་གྲུབ་པའི། །ལྗོན་ཤིང་ནགས་ཚལ་བསྲུང་བ་ཡི། །ཤིང་གི་ལྷ་མོས་ཤིང་ཐུས་ལ། །སྐྱེ་དགུ་ཀུན་གྱི་སྲོག་འཛིན་ཅིང་། །སྣང་བ་རབ་ཏུ་གསལ་བའི་སྒྲོན། །མེ་ཡི་ལྷ་མོ་སྲེག་བྱེད་མས། །མེ་ལྷའི་ཡུལ་ནས་མེ་སྤོར་ཞིག །འོག་གཞི་རྡོ་རྗེ་རྒྱ་གྲམ་གྱི། །ཡང་ཞིང་གཡོ་བའི་བ་དན་འཛིན། །འབྱུང་བ་རླུང་ལ་མངའ་མཛད་མས། །རླུང་ལྷའི་ཡུལ་ནས་རླུང་གཡོབས་ཤིག །ཨཱོཾ་ཨགྣཱེ་ཡེ་སྭཱ་ཧཱཿ ཞེས་པའི་སྔགས་བདུན་དང་མར་ཁུ་དགང་བླུགས་བདུན་གྱིས་གསོ། དེ་ནས་ཐབ་ཀྱི་ཁ་ཁྱེར་ལ་ཀུ་ཤ་དགྲམ་ཞིང་། ཧཱུྃ། གཙང་ཞིང་དགེ་བ་ཀུ་ཤའི་རྩྭ། །རྒྱལ་བས་བྱང་ཆུབ་བརྙེས་པའི་གདན། །དག་ཅིང་ཚངས་པའི་རྫས་མཆོག་འདིས། །བགེགས་རྣམས་གཞིལ་ཞིང་ཤིས་པར་མཛོད། ཨཱོཾ་བཛྲ་ས་ཏྭ་ཨཱཿ ཞེས་དགྲམ་མོ། དེ་ནས་དངོས་གཞི་ལ་གཉིས་ཀྱི་འཇིག་རྟེན་པའི་མེ་ལྷ་མཆོད་པ་ནི། ལས་བུམ་ཀྱི་ཆུས་མེ་ཐབ་ལ་འཐོར་ཞིང་བསང་སྦྱངས། མེ་ཐབ་མི་དམིགས་པ་སྟོང་པ་ཉིད་དུ་གྱུར། སྟོང་པའི་ངང་ལས་འབར་བའི་ཐབ་ཁུང་ཟླ་གམ་དམར་པོ་ཡངས་ཤིང་རྒྱ་ཆེ་བ་རྐན་གཉེར་རིམ་པ་གསུམ་དང་ལྡན་ཞིང་ཁ་ཁྱེར་ལ་ལྕགས་ཀྱུ་དམར་པོའི་ཕྲེང་བས་བསྐོར་བ་ཟླ་གམ་དབང་གི་གཞལ་ཡས་ཁང་གི་བཀོད་པ་ཐམསཅད་རྫོགས་པ། དེ་དག་གི་དབུས་སུ་པད་ཉིའི་གདན་ལ་རཾ་ཡིག་དམར་པོ་ཡོངས་སུ་གྱུར་པ་ལས་མེ་ལྷ་དམར་པོ་ཞལ་གཅིག་ཕྱག་གཉིས་པ་ཕྱག་གཡས་མེ་ཡི་འཁོར་ལོ་དང་གཡོན་པས་རླུང་གི་འཁོར་ལོ་བསྣམས་པར་ར་སྐྱེས་ཁམ་པ་འཇའ་འོད་དང་གློག་གི་ཕྲེང་བའི་གོང་རྨེད་དང་སྲབ་མཐུར་ཅན་ལ་བཅིབས་པ། རིན་པོ་ཆེ་སྣ་ཚོགས་པ་དང་པདྨའི་ཕྲེང་བས་བརྒྱན་ཞིང་ཞི་འཛུམ་སྒེག་པའི་ཉམས་དང་ལྡན་པ་དེ་ཡི་སྤྱི་བོར་ཨཱོཾ་མགྲིན་པར་ཨཱཾཿཐུགས་ཀར་ཧཱུྃ་གི་ཁོང་གསེང་དུ་ཐུགས་སྲོག་རཾ་གྱིས་མཚན་པ་དེ་ལས་འོད་ཟེར་འཕྲོས་པས་བསྒོམ་པ་དང་འདྲ་བའི་ཡེ་ཤེས་པ་སྤྱན་དྲངས། སྤྱན་འདྲེན་ནི། ཧཱུྃ། དད་པས་སྤྱན་འདྲེན་དྲང་སྲོང་ཆེ། །དམ་ཚིག་དབང་གིས་ད་ཚུར་སྤྱོན། །ཁམས་གསུམ་སྲིད་གསུམ་དབང་སྡུད་ཕྱིར། །དྲང་སྲོང་ཆེན་པོ་གཤེགས་སུ་གསོལ། ཨཱོཾ་ཨགྣཱེ་ཡེ་ཛཿཧཱུྃ་བྂ་ཧོཿ བཛྲ་ས་མ་ཡ་ཛཿཛཿ བཞུགས་གསོལ་ནི། ཧཱུྃ། དྲང་སྲོང་ཆེན་པོ་འཕྲིན་ལས་བདག །འདོད་པའི་དངོས་གྲུབ་སྤེལ་བའི་ལྷ། །དེང་གི་གནས་མཆོག་དམ་པ་འདིར། །འབར་བའི་གདན་ལ་བཞུགས་སུ་གསོལ། ཨཱོཾ་ཨགྣཱེ་ཡེ་བཛྲ་ས་མ་ཡ་ཏིཥྛ་ལྷན། ཕྱག་འཚལ་བ་ནི། ཧཱུྃ། མེ་ཡི་ལྷ་སྟེ་དྲང་སྲོང་ཆེ། །ལས་བཞིའི་འཕྲིན་ལས་སྩོལ་བའི་ལྷ། །མཐུ་སྟོབས་རྫུ་འཕྲུལ་བསམ་མི་ཁྱབ། །འབར་བ་ཁྱོད་ལ་ཕྱག་འཚལ་ལོ། ཨཱོཾ་བཛྲ་ཨགྣཱེ་ཡེ་ས་མ་ཡ་ཨ་ཏི་པུ་ཧོཿ མཆོད་པ་ནི། ཧཱུྃ། སྟོང་གསུམ་འཇིག་རྟེན་རབ་འབྱམས་ན། །ཕྱི་ནང་གསང་བའི་མཆོད་པའི་ཚོགས། །དངོས་བཤམས་ཡིད་ཀྱིས་རྣམ་སྤྲུལ་ཏེ། །སྲེག་བྱེད་མེ་ཡི་ལྷ་ལ་འབུལ། །ཨཱོཾ་ཨགྣཱེ་ཡེ་སརྦ་པཱུ་ཙ་ཧོཿ ཧཱུྃ། དྲང་སྲོང་ཆེན་པོ་འཁོར་བཅས་ལ། །དངོས་གྲུབ་མྱུར་དུ་སྩོལ་བའི་ཕྱིར། །སྨན་གཏོར་རཀྟའི་མཆོད་པ་འབུལ། །བཞེས་ནས་དངོས་གྲུབ་སྩལ་དུ་གསོལ། ཨཱོཾ་ཨགྣཱེ་ཡེ་མ་ཧཱ་པཉྩ་རཀྟ་བ་ལིངྟ་པཱུ་ཙ་ཁཱ་ཧི། བསྟོད་པ་ནི། ཧཱུྃ། གཟི་བརྗིད་འབར་བ་མེ་ཡི་ལྷ། །ཚངས་པ་འཇིག་རྟེན་དབང་པོའི་སྲས། །འཕྲིན་ལས་མ་ལུས་ཀུན་གྱི་བདག །འབར་བ་ཁྱོད་ལ་ཕྱག་འཚལ་བསྟོད། བྱོན་སྐྱེམས་ནི། མེ་ལྷའི་ལྗགས་པདྨ་འདབ་མ་བརྒྱད་པའི་ལྟེ་བར་རཾ་དང་དགང་བླུགས་ཀྱི་རྩེར་ནི་ཡིག་གིས་མཚན་པར་གྱུར་པར་བསམས་ཤིང་། ཧཱུྃ། འབྲུ་མར་རྩི་མར་བཅུད་ལྡན་སྲེགས་པའི་རྫས། །དམ་རྫས་བདུད་རྩིའི་མཆོད་པ་བླ་མེད་འདི། །དྲང་སྲོང་ཆེན་པོ་མེ་ཡི་ལྷ་ལ་འབུལ། །བདག་གི་འདོད་དོན་འཕྲིན་ལས་གྲུབ་པར་མཛོད། ཨཱོཾ་ཨགྣཱེ་ཡེ་སྭཱ་ཧཱཿ ཨཱོཾ་ཨགྣཱེ་ཡེ་ཨ་དི་བྱ་ཨ་དི་བྱ་ཨ་བི་ཤ་ཨ་བི་ཤ་མ་ཧཱ་ཤྲཱྀ་ཧ་བྱ་ཀ་བྱ་བཱ་ཧ་ན་ཡེ་ཁམས་གསུམ་སྲིད་གསུམ་དབང་དུ་སྡུས་ཤིག་ཝ་ཤཾ་ཀུ་རུ་ཡེ་སྭཱ་ཧཱཿ ཞེས་བདུན་འབུལ། ཡམ་ཤིང་ལ། ཨཱོཾ་བོདྷི་བྲིཀྵ་སྭཱ་ཧཱ༔ ཁམས་གསུམ་སྲིད་གསུམ་དབང་དུ་སྡུས་ཤིག་ཝ་ཤཾ་ཀུ་རུ་ཡེ་སྭཱ་ཧཱ༔ མར་ཁུ་ལ། ཨཱོཾ་ཨགྣཱེ་ཡེ་སྭཱ་ཧཱཿ ཁམས་གསུམ་སྲིད་གསུམ༴ཏིལ་ལ། ཨཱོཾ་སརྦ་པཱ་པཾ་ད་ཧ་ན་བཛྲ་ཡ་སྭཱ་ཧཱཿ ཁམས་གསུམ༴ཡུངས་ཀར་ལ། ཨཱོཾ་སརྦ་ཨརྠ་ས་དྷཱ་ཡ་སྭཱ་ཧཱཿ ཁམས་གསུམ༴ཟས་སྣ་ལ། ཨཱོཾ་སརྦ་སཾ་བྷ་དེ་སྭཱ་ཧཱཿ ཁམས་གསུམ༴དཱུརྦ་ལ། ཨཱོཾ་བཛྲ་ཨཱ་ཡུ་ཥེ་སྭཱ་ཧཱཿ ཁམས་གསུམ༴འབྲས་ལ། ཨཱོཾ་བཛྲ་པུཥྟཱ་ཡེ་སྭཱ་ཧཱཿ ཁམས་གསུམ༴སོ་བ་ལ། ཨཱོཾ་བཛྲ་བི་ཛཱ་ཡ་སྭཱ་ཧཱཿ ཁམས་གསུམ༴ནས་ལ། ཨཱོཾ་མ་ཧཱ་བེ་གྷཱ་ཡ་སྭཱ་ཧཱཿ ཁམས་གསུམ་༴སྲན་མ་ལ། ཨཱོཾ་བཛྲ་མ་ཧཱ་བ་ལཱ་ཡ་སྭཱ་ཧཱཿ ཁམས་གསུམ༴གྲོ་ལ། ཨཱོཾ་བཛྲ་གྷསྨ་རེ་སྭཱ་ཧཱཿ ཁམས་གསུམ༴ཀུ་ཤ་ལ། ཨཱོཾ་ཨ་པྲ་ཏི་ཧ་ཏ་བཛྲ་ཡ་སྭཱ་ཧཱཿ ཁམས་གསུམ༴ཕྲུམ་ལ། ཨཱོཾ་ཨཱཿསྭཱ་ཧཱཿ ཁམས་གསུམ༴འབྲུ་སྣ་ལ། ཨཱོཾ་ཛྲིཾ་སྭཱ་ཧཱཿ ཁམས་གསུམ༴ཤིང་ཏོག་ལ། ཨཱོཾ་བཛྲ་ཤྲཱི་བཱ་ཡ་སྭཱ་ཧཱཿ ཁམས་གསུམ༴དར་སྣ་ལ། ཨཱོཾ་བཛྲ་ཝསྟྲ་ཡེ་སྭཱ་ཧཱཿ ཁམས་གསུམ༴སྲེག་རྫས་སྔགས་མེད་པའི་རིགས་ཐམས་ཅད་ལ། ཨཱོཾ་ཀུ་རུ་ཀུ་རུ་སྭཱ་ཧཱཿ ཁམས་གསུམ་སྲིད་གསུམ་དབང་དུ་སྡུས་ཤིག་ཝ་ཤཾ་ཀུ་རུ་ཡེ་སྭ་ཧཱཿ ཧཱུྃ། འབར་བ་མེ་ཡི་ལྷ་ཚོགས་ལ། །ཕྱི་ནང་གསང་བ་སྨན་རཀ་དང་། དམ་རྫས་གཏོར་མའི་མཆོད་པ་སོགས། །རབ་འབྱམས་མཆོད་སྤྲིན་རྒྱ་མཚོས་མཆོད། ཨཱོཾ་ཨགྣཱེ་ཡེ་ས་པ་རི་ཝཱ་ར་སརྦ་པཱུ་ཙ་ཧོས་མཆོད། ཧཱུྃ། འབར་བ་མེད་ཡི་ཀློང་དཀྱིལ་ན། །གཟི་བརྗིད་འབར་ཞིང་འཕྲིན་ལས་མཛད། །རྩལ་ལྡན་ར་སྐྱེས་སྟེང་ན་བརྗིད། །འབར་བའི་དཔའ་བོ་ཁྱོད་ལ་བསྟོད། ཀྱིས་བསྟོད། ཧཱུྃ། ཨགྣཱི་རཱ་ཛ་མེ་ཡི་ལྷས། །རྫས་རྣམས་ལྷག་པའི་ལྷར་འབུལ་ཞིང་། །མེ་ཡང་ཡེ་ཤེས་མེར་མཛད་ནས། །སྣང་བ་དབང་དུ་བསྡུ་བར་མཛོད། ཅེས་འཕྲིན་ལས་བཅོལ། བཛྲ་མུས་མེ་ལྷའི་ཡེ་ཤེས་པ་ཐབ་ཀྱི་ཤར་ལྷོར་གཤེགས་ནས་མཆོད་བསྟོད་འཕྲིན་ལས་ཀྱི་དཔང་པོ་མཛད་པར་གྱུར། གཉིས་པ་ཡེ་ཤེས་པའི་མེ་ལྷ་མཆོད་པ་ནི། དམ་ཚིག་མེ་ལྷའི་ལྟོ་བ་ཟབ་ཅིང་ཡངས། །རབ་འབྱམས་ཆོས་ཀྱི་དབྱིངས་དང་མཉམ་པའི་ནང་། ཧཱུྃ། ཆོས་འབྱུང་དམར་པོ་ཟུར་གསུམ་པའིཿ གཞལ་ཡས་ཁང་གི་ལྟེ་བ་ལཿ ཞེས་པ་ནས། ཕག་གདོང་དམར་མོར་ཕྱག་འཚལ་བསྟོད༔ ཅེས་པའི་བར་ལས་བྱང་ལྟར་བྱས་པ་ཚར་རྗེས། དེ་ལྟར་མཆོད་ཅིང་བསྟོད་པས་ལྷ་ཚོགས་རྣམས་ཀྱང་བརྩེ་བའི་ཐུགས་རྗེ་ཆེན་པོས་འགྲོ་བ་ཡོངས་ལ་རྗེས་སུ་ཆགས་པའི་སྐུ་མདོག་པདྨ་རཱ་གའི་ལྷུན་པོ་ལྟར་དམར་ཞིང་འཚེར་བའི་སྐུའི་གཟི་བརྗིད་ཀྱིས་བརྟན་གཡོ་ཐམས་ཅད་དབང་མེད་དུ་འགུགས་པར་ནུས་པའི་མཐུ་དང་ལྡན་པར་གྱུར། ལྷ་རྣམས་ཀྱི་ལྗགས་རྡོ་རྗེའི་རྣམ་པ་ཅན་པདྨ་དམར་པོ་འདབ་མ་བརྒྱད་པའི་ལྟེ་བར་རཾ་དང་དགང་བླུགས་ཀྱི་ཁར་ནིཿཡིག་དམར་པོ་འོད་དང་བཅས་པས་མཚན་པར་གྱུར་པར་བསམས་ལ། ཧཱུྃ། འབྲུ་མར་རྩི་མར་བཅུད་ལྡན་བསྲེགས་པའི་རྫས། །དམ་རྫས་བདུད་རྩིའི་མཆོད་པར་དམ་པ་འདི། །མེ་ལྷ་མཁའ་འགྲོ་རྒྱ་མཚོའི་ཚོགས་ལ་འབུལ། །བདག་གི་འདོད་དོན་འཕྲིན་ལས་བསྒྲུབ་པར་མཛོད། ནི་པདྨ་དྷཀྐི་ནི་བྷ་ར་ཧི་སརྦ་སིདྡྷི་ཕ་ལ་ཧཱུྃ་སྭཱ་ཧཱཿ ཨཱོཾ་ཨགྣཱེ་ཡེ་ཨ་དི་བྱ་ཨ་དི་བྱ་ཨ་བི་ཤ་ཨ་བི་ཤ་མ་ཧཱ་ཤྲཱི་ཧ་བྱ་ཀ་བྱ་བཱ་ཧ་ན་ཡེ་སྭཱ་ཧཱཿ ཞེས་སམ། ཨཱོཾ་ཨགྣཱེ་ཡེ་སྭཱ་ཧཱཿ ཞེས་པ་གཉིས་ཀའམ་གང་རུང་རྩ་སྔགས་དང་སྦྲེལ་བ་བདུན་གྱིས་འབུལ། དེ་ནས་ཡམ་ཤིང་ལ། ནི་པདྨ་དྷཀྐི་ནི་བྷ་ར་ཧི་སརྦ་སིདྡྷི་ཕ་ལ་ཧཱུྃ་སྭཱ་ཧཱཿ ཨཱོཾ་བོདྷི་བྲྀཀྵ་ཡེ་སྭཱ་ཧཱཿ ཁམས་གསུམ་སྲིད་གསུམ་དབང་དུ་སྡུས་ཤིག་ཝ་ཤཾ་ཀུ་རུ་ཡེ་སྭཱ་ཧཱཿ མར་ཁུ་ལ། ནི་པདྨ་དྷཀྐི་ནི་བྷ་ར་ཧི་སརྦ་སིདྡྷི་ཕ་ལ་ཧཱུྃ་སྭཱ་ཧཱཿ ཨཱོཾ་ཨགྣཱེ་ཡེ་སྭཱ་ཧཱཿ ཁམས་གསུམ་སྲིད་གསུམ༴ཏིལ་ལ། ནི་པདྨ་དྷཀྐི་ནི་བྷ་ར་ཧི་སརྦ་སིདྡྷི་ཕ་ལ་ཧཱུྃ་སྭཱ་ཧཱཿ ཨཱོཾ་སརྦ་པཱ་པཾ་ད་ཧ་ན་བཛྲ་ཡ་སྭཱ་ཧཱཿ ཁམས་གསུམ༴ཡུངས་ཀར་ལ། ནི་པདྨ་དྷཀྐི་ནི་བྷ་ར་ཧི་སརྦ་སིདྡྷི་ཕ་ལ་ཧཱུྃ་སྭཱ་ཧཱཿ ཨཱོཾ་སརྦ་ཨརྠ་ས་དྷཱ་ཡ་སྭཱ་ཧཱཿ ཁམས་གསུམ༴ཟས་སྣ་ལ། ནི་པདྨ་དྷཀྐི་ནི་བྷ་ར་ཧི་སརྦ་སིདྡྷི་ཕ་ལ་ཧཱུྃ་སྭཱ་ཧཱཿ ཨཱོཾ་སརྦ་སཾ་བྷ་དེ་སྭཱ་ཧཱཿ ཁམས་གསུམ༴དཱུརྦ་ལ། ནི་པདྨ་དྷཀྐི་ནི་བྷ་ར་ཧི་སརྦ་སིདྡྷི་ཕ་ལ་ཧཱུྃ་སྭཱ་ཧཱཿ ཨཱོཾ་བཛྲ་ཨཱ་ཡུ་ཥེ་སྭཱ་ཧཱཿ ཁམས་གསུམ༴འབྲས་ལ། ནི་པདྨ་དྷཀྐི་ནི་བྷ་ར་ཧི་སརྦ་སིདྡྷི་ཕ་ལ་ཧཱུྃ་སྭཱ་ཧཱཿ ཨཱོཾ་བཛྲ་པུཥྟཱ་ཡེ་སྭཱ་ཧཱཿ ཁམས་གསུམ༴སོ་བ་ལ། ནི་པདྨ་དྷཀྐི་ནི་བྷ་ར་ཧི་སརྦ་སིདྡྷི་ཕ་ལ་ཧཱུྃ་སྭཱ་ཧཱཿ ཨཱོཾ་བཛྲ་བི་ཛཱ་ཡ་སྭཱ་ཧཱཿ ཁམས་གསུམ༴ནས་ལ། ནི་པདྨ་དྷཀྐི་ནི་བྷ་ར་ཧི་སརྦ་སིདྡྷི་ཕ་ལ་ཧཱུྃ་སྭཱ་ཧཱཿ ཨཱོཾ་མ་ཧཱ་བེ་གྷཱ་ཡ་སྭཱ་ཧཱཿཁམས་གསུམ་༴སྲན་མ་ལ། ནི་པདྨ་དྷཀྐི་ནི་བྷ་ར་ཧི་སརྦ་སིདྡྷི་ཕ་ལ་ཧཱུྃ་སྭཱ་ཧཱཿ ཨཱོཾ་བཛྲ་མ་ཧཱ་བ་ལཱ་ཡ་སྭཱ་ཧཱཿ ཁམས་གསུམ༴གྲོ་ལ། ནི་པདྨ་དྷཀྐི་ནི་བྷ་ར་ཧི་སརྦ་སིདྡྷི་ཕ་ལ་ཧཱུྃ་སྭཱ་ཧཱཿ ཨཱོཾ་བཛྲ་གྷསྨ་རེ་སྭཱ་ཧཱཿ ཁམས་གསུམ༴ཀུ་ཤ་ལ། ནི་པདྨ་དྷཀྐི་ནི་བྷ་ར་ཧི་སརྦ་སིདྡྷི་ཕ་ལ་ཧཱུྃ་སྭཱ་ཧཱཿ ཨཱོཾ་ཨ་པྲ་ཏི་ཧ་ཏ་བཛྲ་ཡ་སྭཱ་ཧཱཿ ཁམས་གསུམ༴ཕྲུམ་ལ། ནི་པདྨ་དྷཀྐི་ནི་བྷ་ར་ཧི་སརྦ་སིདྡྷི་ཕ་ལ་ཧཱུྃ་སྭཱ་ཧཱཿ ཨཱོཾ་ཨཱཿསྭཱ་ཧཱཿ ཁམས་གསུམ༴འབྲུ་སྣ་ལ། ནི་པདྨ་དྷཀྐི་ནི་བྷ་ར་ཧི་སརྦ་སིདྡྷི་ཕ་ལ་ཧཱུྃ་སྭཱ་ཧཱཿ ཨཱོཾ་ཛྲིཾ་སྭཱ་ཧཱཿ ཁམས་གསུམ༴ཤིང་ཏོག་ལ། ནི་པདྨ་དྷཀྐི་ནི་བྷ་ར་ཧི་སརྦ་སིདྡྷི་ཕ་ལ་ཧཱུྃ་སྭཱ་ཧཱཿ ཨཱོཾ་བཛྲ་ཤྲཱི་བཱ་ཡ་སྭཱ་ཧཱཿ ཁམས་གསུམ༴དར་སྣ་ལ། ནི་པདྨ་དྷཀྐི་ནི་བྷ་ར་ཧི་སརྦ་སིདྡྷི་ཕ་ལ་ཧཱུྃ་སྭཱ་ཧཱཿ ཨཱོཾ་བཛྲ་ཝསྟྲ་ཡེ་སྭཱ་ཧཱཿ ཁམས་གསུམ༴སྲེག་རྫས་སྔགས་མེད་པའི་རིགས་ཐམས་ཅད་ལ། ནི་པདྨ་དྷཀྐི་ནི་བྷ་ར་ཧི་སརྦ་སིདྡྷི་ཕ་ལ་ཧཱུྃ་སྭཱ་ཧཱཿ ཨཱོཾ་ཀུ་རུ་ཀུ་རུ་སྭཱ་ཧཱཿ ཁམས་གསུམ་སྲིད་གསུམ་དབང་དུ་སྡུས་ཤིག་ཝ་ཤཾ་ཀུ་རུ་ཡེ་སྭ་ཧཱཿ སླར་ཡང་། ནི་པདྨ་དྷཀྐི་ནི་བྷ་ར་ཧི་སརྦ་སིདྡྷི་ཕ་ལ་ཧཱུྃ་སྭཱ་ཧཱཿ ཨཱོཾ་ཤགྣཱ་ཡེ་སྭཱ་ཧཱས་བྱོན་སྐྱེམས་ལྟར་གཤེགས་སྐྱེམས་ཀྱང་ཕུལ་ལ། ཧྲཱིཿ ཕག་གདོང་དམར་མོའི་ལྷ་ཚོགས་ལ། །ཕྱི་ནང་གསང་བའི་མཆོད་པ་དང་། །སྨན་རག་གཏོར་སོགས་འཇིག་རྟེན་གྱི། །མཆོད་པའི་རྫས་ཀུན་ཡོངས་སུ་འབུལ། ཨཱོཾ་པདྨ་དྷཀྐི་ནི་བྷ་ར་ཧི་ས་པ་རི་ཝཱ་ར་ཨརྒྷཾ་ནས། ཤཔྟ་པཉྩ་ཨ་མྲྀ་ཏ་རཀྟ་བྷ་ལིངྟ་པཱུ་ཙ་ཁཱ་ཧིས་མཆོད། ཨཱོཾ་བཛྲ་ཏམྦུ་ལཱ་ཡེ་སྭཱ་ཧཱས་སོ་རྩི་དང་། ཨཱོཾ་བཛྲ་ཝསྟྲ་ཡེ་སྭཱ་ཧཱས་གོས་ཟུང་འབུལ་ཞིང་། ཧཱུྃ༔ ཆོས་ཀྱི་དབྱིངས་ལས་སྐུར་བཞེངས་པ༔ རྣམ་པར་རྟོག་མེད་བཅོམ་ལྡན་མ། དུས་གསུམ་སངས་རྒྱས་བསྐྱེད་པའི་ཡུམ༔ ཕག་གདོང་དམར་མོར་ཕྱག་འཚལ་བསྟོད༔ ཅེས་པའི་བར་ལས་བྱང་བཞིན་བྱ། དེ་ནས་འཕྲིན་ལས་བཅོལ་བ་ནི། ཧོཿ དུས་གསུམ་མཁའ་འགྲོ་ཀུན་གྱི་སྤྱི་གཟུགས། །དཔལ་ཆེན་ཁྲོ་བོ་ཀུན་གྱི་དགྱེས་སྡེ། །རབ་འབྱམས་དཀྱིལ་འཁོར་རྒྱ་མཚོའི་གཙོ་མོ། །སྲིད་པའི་དྲ་བ་སྡོམ་པའི་མཚོན་ཆ། སྲིད་གསུམ་དབང་མཛད་དབང་གི་བདག་མོ། ཕག་གདོང་དམར་མོ་སྒྲ་སྒྲོག་མ་སྐུ་གསུམ་གྱི་མཁའ་འགྲོ་འབུམ་ཕྲག་ཡངས་པའི་དྷཀྐི་དཔའ་བོ་དཔའ་མོ་འཁོར་དང་བཅས་པ་ཁྱེད་རྣམས་ལ་སྲེག་བྱེད་མེའི་མཆོད་པས་མཉེས་པར་བྱས་ཏེ་འདོད་དོན་གྱི་འཕྲིན་ལས་གསོལ་བ་ནི། ཟག་མེད་མྱ་ངན་ལས་འདས་པའི་ཐུགས་རྗེ་དང་འཕྲིན་ལས་ཐམས་ཅད་བླ་ན་མེད་པའི་ཐུགས་རྗེའི་ཤུགས་ཀྱིས་དབང་དུ་བསྡུས་ནས་བདག་ལ་སྩལ་ཏེ་ཚེ་འདི་ཉིད་དུ་མངོན་པར་བྱང་ཆུབ་པར་མཛད་དུ་གསོལ། ཚངས་དབང་བརྒྱ་བྱིན་རྒྱལ་ཆེན་བཞི་དང་འཁོར་ལོས་སྒྱུར་བའི་རྒྱལ་པོ་ལ་སོགས་ཟག་བཅས་འཁོར་པའི་དཔལ་ཐམས་ཅད་དབང་དུ་བསྡུས་ནས་སྲིད་པའི་ཁམས་འདིིར་མངོན་པར་མཐོ་བར་མཛད་དུ་གསོལ། འཇིག་རྟེན་ཁམས་གྱི་རྒྱལ་བློན་ཆེ་བཙུན་ཁས་དྲག་བཙུན་མོ་འབངས་དང་བཅས་པ་རྗེས་ཆགས་སྙིང་རྗེའི་སྟོབས་ཀྱིས་དབང་དུ་སྡུས་ལ་བྱང་ཆུབ་ཆེན་པོར་འགོད་པར་མཛད་དུ་གསོལ། སྲིད་པ་གསུམ་གྱི་དཔལ་འབྱོར་ལོངས་སྤྱོད་རིན་ཆེན་དར་ཟབ་འབྲུ་སྨན་རྐང་འགྲོ་སོགས་འབྱོར་པའི་དཔལ་ཐམས་ཅད་དབང་དུ་བསྡུས་ལ་བསོད་ནམས་ཀྱི་ཚོགས་ཡོངས་སུ་རྫོགས་པར་མཛད་དུ་གསོལ། འཁོར་འདས་ཀུན་གྱི་ཚེ་དཔལ་དང་འབྱོར་པ་ཐམས་ཅད་དབང་དུ་སྡུས་ལ་སྲིད་ཞིའི་ཕུན་ཚོགས་ཐམས་ཅད་རབ་ཏུ་འཕེལ་ཞིང་རྒྱས་པར་མཛད་དུ་གསོལ། ཞེས་གསོལ་ཞིང་དངོས་གྲུབ་བླང་བ་ལ་རྟེན་ཅིང་འབྲེལ་འབྱུང་བཟང་བའི་ཟས་ཀྱི་དངོས་པོ་སྣ་ཚོགས་པ་བཏེགས་ལ། ཧཱུྃ། མཁའ་འགྲོ་རྒྱ་མཚོ་དབང་གི་དཀྱིལ་འཁོར་དུ། །སྐུ་ལྔའི་ཡོན་ཏན་མ་ལུས་འདུས་པའི་དཔལ། །དམར་མོ་སྒྲ་སྒྲོག་སྐུ་དང་གཉིས་སུ་མེད། །དམ་རྫས་གཏོར་ཆེན་མཆོག་གི་དངོས་གྲུབ་ཞུ། །མ་དང་མཁའ་འགྲོ་བསྟེན་ཕྱིར་བདག་ལ་སྩོལ། ཧཱུྃ། དམར་མོ་སྒྲ་སྒྲོག་དུས་གསུམ་རྒྱལ་བའི་ཡུམ། །པདྨ་དྷཀྐི་དབང་གི་མཁའ་འགྲོའི་ཚོགས། །འགྱུར་མེད་རྣམ་དག་སྐུ་ཡི་སྒོ་ཕྱེ་ནས། །འཆི་མེད་རིགས་འཛིན་ཚེ་ཡི་དངོས་གྲུབ་སྩོལ། །འགག་མེད་རྣམ་དག་གསུང་གི་སྒོ་ཕྱེ་ནས། །ཚངས་དབྱངས་དྲུག་ཅུ་གསུང་གི་དངོས༴སྤྲོས་མེད་རྣམ་དག་ཐུགས་ཀྱི་སྒོ་ཕྱེ་ནས། །ཕྱག་རྒྱ་ཆེན་པོ་མཆོག་གི༴། རིན་ཆེན་བུམ་བཟང་དཔག་བསམ་ནོར་བུའི་ཚུལ། །དགོས་འདོད་ཀུན་འབྱུང་མཆོག་ཐུན་དངོས་གྲུབ་སྩོལ། ནི་པདྨ་དྷཀྐི་ནི་བྷ་ར་ཧི་སརྦ་སིདྡྷི་ཕ་ལ་ཧཱུྃ་སྭཱ་ཧཱཿ ཀཱ་ཡ་ཝཱཀྐ་ཅིཏྟ་སིདྡྷི་ཧཱུྃ༔ ཞེས་བརྗོད་ཅིང་རྫས་རྣམས་དངོས་གྲུབ་ཏུ་རོལ། ཡི་གེ་བརྒྱ་པས་ལྷག་ཆད་བསྐང་ཞིང་། མ་འབྱོར་པ་དང་ཉམས་པ་དང་། སོགས་ཀྱིས་ནོངས་པ་བཟོད་པར་གསོལ། ཧཱུྃ༔ སྣང་བ་དག་པ་གཞལ་ཡས་ཁང་༔ གཟུང་འཛིན་བྲལ་བ་ཡི་དམ་ལྷ༔ རང་ངོར་གསལ་བ་ཆོས་ཀྱི་སྐུ༔ སྐྱེ་མེད་མཁའ་འགྲོའི་ལྷ་ཚོགས་རྣམས༔ ཆོས་དབྱིངས་མཁའ་འགྲོའི་གནས་སུ་གཤེགས༔ ཨ་ཨཱཾཿསྨྲ་བསམ་བརྗོད་མེད་ཡུམ༔ ཡེ་ཤེས་པ་གཤེགས། དམ་ཚིག་པ་རང་ལ་བསྡུ། སླར་ཡང་འཇིག་རྟེན་པའི་མེ་ལྷ་ཐབ་ཀྱི་ཤར་ལྷོར་དཔང་པོར་བཞུགས་པ་བཛྲ་ས་མཱ་ཛ༔ དམ་ཚིག་པ་དང་གཉིས་སུ་མེད་པར་གྱུར་པ་ལ། ཨརྒྷཾ་སོགས་ཀྱིས་མཆོད་ཅིང་། ཧཱུྃ། བསྲེགས་པའི་རེག་བྱ་ཚ་བའི་ཀློང་། །འབར་བའི་ནུས་པས་སྲིད་གསུམ་གྱི། །ལོག་པར་འདྲེན་པ་ཀུན་སྲེག་པའི། །ལྷ་ཡི་ལྷ་མཆོག་ཁྱོད་ལ་བསྟོད། དེ་ནས། ཨཱོཾ་ཨགྣཱེ་ཡེ་ཨ་དི་བྱ་ཨ་དི་བྱ་ཨ་བི་ཤ་ཨ་བི་ཤ་མ་ཧཱ་ཤྲཱི་ཧ་བྱ་ཀ་བྱ་བཱ་ཧ་ནེ་ཡེ་སྭཱ་ཧཱཿ ཨཱོཾ་ཨགྣཱེ་ཡེ་སྭཱ་ཧཱཿ ཞེས་འབུལ། ཨཱོཾ་བོདྷི་བྲྀཀྵ་ཡེ་སྭཱ་ཧཱཿ ཡམ་ཤིང་གིའོ། ཨཱོཾ་ཨགྣཱེ་ཡེ་སྭཱ་ཧཱཿ མར་ཁུའོ། ཨཱོཾ་སརྦ་པཱ་པཾ་ད་ཧ་ན་བཛྲཱ་ཡ་སྭཱ་ཧཱཿ ཏིལ་གྱིའོ། ཨཱོཾ་སརྦ་ཨརྠ་ས་དྷཱ་ཡ་སྭཱ་ཧཱཿ ཡུངས་ཀར་གྱིའོ། ཨཱོཾ་སརྦ་སཾ་དྷ་དེ་སྭཱ་ཧཱཿ ཟས་སྣའོ། ཨཱོཾ་བཛྲ་ཨཱ་ཡུ་ཥེ་སྭཱ་ཧཱཿ དཱུརྦའོ། ཨཱོཾ་བཛྲ་པུཥྟཱ་ཡེ་སྭཱ་ཧཱཿ འབྲས་ཀྱིའོ། ཨཱོཾ་བཛྲ་བི་ཛཱ་ཡ་སྭཱ་ཧཱཿ སོ་བ་ལའོ། ཨོཾ་མ་ཧཱ་བེ་གྷཱ་ཡ་སྭཱ་ཧཱཿ ནས་ཀྱིའོ། ཨཱོཾ་བཛྲ་མ་ཧཱ་བ་ལཱ་ཡ་སྭ་ཧཱཿ སྲན་མའོ། ཨཱོཾ་བཛྲ་གྷསྨ་རེ་སྭཱ་ཧཱཿ གྲོའོ། ཨཱོཾ་ཨ་པྲ་ཏི་ཧ་ཏ་བཛྲཱ་ཡ་སྭཱ་ཧཱཿ ཀུ་ཤའོ། ཨཱོཾ་ཨཱཿསྭཱ་ཧཱཿ ཕྲུམ་གྱིའོ། ཨཱོཾ་ཛྲི་སྭཱ་ཧཱཿ འབྲུ་སྣའོ། ཨཱོཾ་བཛྲ་ཤྲཱི་བཱ་ཡ་སྭཱ་ཧཱཿ ཤིང་ཏོག་གོཨཱོཾ་བཛྲ་ཝསྟྲ་ཡེ་སྭཱ་ཧཱཿ དར་སྣའོ། ཨཱོཾ་ཀུ་རུ་ཀུ་རུ་སྭཱ་ཧཱཿ སྲེག་རྫས་སྔགས་མེད་པའི་རིགས་ཐམས་ཅད་ཀྱིའོ། ཨཱོཾ་བཛྲ་ཏམྦུ་ལ་ཡེ་སྭཱ་ཧཱཿ སོ་རྩིའོ། ཨཱོཾ་བཛྲ་ཝསྟྲ་ཡེ་སྭཱ་ཧཱཿ གོས་ཟུང་ངོ་། ཞེས་པ་རྣམས་ལ་གསུམ་མམ་བདུན་སོགས་འབུལ། རྒྱས་པར་རེ་རེ་ལའམ། བསྡུ་ན་ཀུན་གྱི་མཐར། འདོད་གསོལ་གཅིག་བྱས་ཀྱང་རུང་། དེ་ནས་གཏོར་མ་ལ། ཨཱོཾ་ཨགྣཱེ་ཡེ་ས་པ་རི་ཝཱ་ར་ཨི་དམ་བ་ལིངྟ་ཁ་ཁ་ཁཱ་ཧིཿ ཅེས་འབུལ། སླར་ཡང་ཨརྒྷཾ་ནས། ཤཔྟའི་བར་གྱིས་མཆོད་ཅིང་། ཧཱུྃ། གཟི་བརྗིད་ཕུང་པོ་ལྟ་ན་སྡུག །འོད་བཟང་ཉི་མའི་དཔལ་དུ་འབར། །རབ་འབྱམས་འཕྲིན་ལས་རྒྱ་མཚོའི་དཔལ། །ཨགྣཱི་རཱ་ཛ་ཁྱོད་ལ་བསྟོད། ཅེས་བསྟོད། ཡི་གེ་བརྒྱ་པ་བརྗོད། མ་འབྱོར་པ་དང་ཉམས་པ་དང་། །གང་ཡང་བདག་རྨོངས་བློ་ཡིས་ནི། །བགྱིས་པ་དང་ནི་བགྱིད་སྩལ་བ། །དེ་ཀུན་མགོན་པོས་བཟོད་པར་གསོལ། མེ་ལྷའི་རྒྱལ་པོ་གང་ཁྱོད་ཀྱིས། །བདག་གཞན་དོན་གཉིས་ཀུན་མཛོད་ཅིག །ཆོས་ཉིད་ཀློང་དུ་གཤེགས་ནས་ཀྱང་། །གསོལ་བ་བཏབ་ན་སླར་ཡང་བྱོན། ཨགྣཱེ་ཡེ་མུ༔ ཅེས་ཡེ་ཤེས་པ་གཤེགས། དམ་ཚིག་པ་མེའི་ཕུང་པོར་གྱུར་པར་བསམ་མོ། དེ་ནས་ཤིས་བརྗོད་ནི། ཧཱུྃ༔ ཡེ་ཤེས་དབྱིངས་ཀྱི་ཕོ་བྲང་ནས༔ ཕག་མོ་ཆོས་སྐུའི་བཀྲ་ཤིས་ཤོག༔ ནས། སྤྲུལ་པ་འབུམ་སྡེའི་བཀྲ་ཤིས་ཤོག༔ ཅེས་སོ། བསྔོ་སྨོན་ནི། ཧཱུྃ༔ གསང་བའི་བསྐྱེད་རྫོགས་སྒོམ་ཟླས་མཐུས༔ ལྟ་བ་གཡེལ་བ་སོར་ཆུད་ཅིང་༔ སྒོམ་པ་བྱིང་བ་ཀློང་གྱུར་ཏེ༔ སྤྱོད་པ་ཚོགས་གཉིས་མཐར་ཕྱིན་ཞིང་༔ འབྲས་བུ་སྐུ་བཞི་མངོན་གྱུར་ཤོག༔ དེ་ནས་ཐལ་བ་ཆུ་བོ་རྒྱུན་བཟང་ལ་ཕབ་བོ། ཅེས་ཕག་གདོང་དམར་མོ་སྒྲ་སྒྲོག་གི་སྦྱིན་སྲེག་འདི་ཡང་ཧོར་པཎ་ཆེན་ངག་དབང་འཇམ་དབྱངས་བློ་ལྡན་གྱིས་མཛད་པའི་སྦྱིན་སྲེག་ལྟར་འཕོ་ལུང་པ་ཨོ་རྒྱན་རིགས་འཛིན་རྣམ་པར་རྒྱལ་བས་ཇོ་བོའི་ཤར་ལུང་ཆོས་འཕེལ་རབ་ཏུ་རྒྱས་པའི་ཐང་དུ་སྦྱར་བ་མངྒ་ལམ།། །།

ཕག་དམར་དབང་ཆོག་ཆོག་སྒྲིག

ཕག་མོ་དམར་མོ་སྒྲ་སྒྲོགས་ཀྱི་དབང་ཆོག་སྒྲིགས་མར་བགྱིས་པ་གསང་ཆེན་མྱུར་ལམ་ཞེས་བྱ་བ་བཞུགས། །སྟོང་ཉིད་རྣམ་པ་ཀུན་ལྡན་ཆོས་འབྱུང་དུ། །མཆོག་ཏུ་མི་འགྱུར་བདེ་ཆེན་ལྷན་སྐྱེས་མ། ཟུང་འཇུག་བདེ་སྟོང་གར་གྱི་རོལ་པ་ཅན། །དམར་མོ་སྒྲ་སྒྲོགས་དབྱིངས་ཀྱི་མཁའ་འགྲོས་སྐྱོངས། །ཟབ་ཁྱད་གདམས་པའི་ཉེ་ལམ་ལ་ཞུགས་ནས། །དགའ་བཞིའི་འགྲོས་ཀྱི་བདེ་སྟོང་ཡེ་ཤེས་ཆེ། །ལྷན་སྐྱེས་གཉུག་མའི་རང་ཞལ་མངོན་བྱེད་ཕྱིར། །སྨིན་བྱེད་གསང་ཆེན་མྱུར་ལམ་འདི་ན་འབྲི། །འདི་དང་བཅོམ་ལྡན་འདས་མ་དམར་མོ་སྒྲ་སྒྲོགས་ཀྱི་དབང་ཀྱི་ཆ་ོག་བཀའ་རྒྱ་མ་དམ་ཚིག་དང་ལྡན་པའི་སློབ་མ་ཉུང་ཤས་ལ་སྐབས་ཐོག་འོས་པར་བསྐུར་བ་ལས་གང་བྱུང་དུ་བསྐུར་དུ་རུང་བར་མ་ཡིན་ཞིང་། དེ་ཡང་ཇི་ལྟར་བྱ་བའི་ཚུལ་ཁྲིགས་སུ་སྡེབས་པ་ལ། སྦྱོར་བ་ཡོ་བྱད་ཀྱི་བཤམས་དང་། དངོས་གཞི་དབང་བསྐུར་བ་གཉིས་ལས། དང་པོ་ནི། དབེན་པའི་གནས་སུ་རྡུལ་མཚོན་ནམ་ཡང་ན་སྟེགས་བུ་ཁེབ་ལྡན་གྱི་ཁར་རས་བྲིས་བཀྲམ་པའམ་དཀྱིལ་འཁོར་གང་ལ་བརྟེན་ཀྱང་། དབུས་སུ་མཉྫིའི་རྟེང་དུ་བྷནྡྷ་བཅུད་ལྡན། དེའི་སྟེང་དུ་མེ་ལོང་སིན་དྷུ་རས་རླན་ཆོས་འབྱུང་ཟུར་དྲུག་ལ་ཧ་རི་ནི་ས། དབུས་སུ་པདྨ་དྷཱཀྐི་ནི་བྷ་ར་ཧི་སརྦ་སིདྡྷི་ཕ་ལ་ཧཱུྃ་སྭཱ་ཧཱཿ དེ་སྟེང་རིགས་ཙག་གམ་ཕག་དམར་སྐུ། དེ་སྟེང་དར་དམར་གྱི་གུར་ཕུབ། ཕྱི་ནང་གི་མཆོད་པ་གཏོར་མ་བཀའ་གཏེར་ཚོགས་འཁོར་སོགས་ལེགས་པར་བཀོད་ལ། གཞན་ཡང་། མིག་དར། མེ་ཏོག། སློབ་དཔོན་མདུན་དུ་ལས་བུམ། མཎྜལ། སྤོས། ཐུན། ཌཱ་དྲིལ་སོགས་དགོས་ཆས་ཐམས་ཅད་ཚོགས་པར་བྱའོ། གཉིས་པ་ནི། གཞུང་ལས་གསོལ་འདེབས་སོགས་སྔོན་ནས་བྱ་ཞིང་། དེ་ནས་དབང་བཤམས་སྒྲུབ་བྱེད་པར་གསུངས་ཀྱང་རེ་ཞིག་འཇུག་པ་བདེ་བའི་ཕྱིར་བཤམས་བཀོད་གྲུབ་ནས་ལས་ཀྱི་གཞུང་བསྲང་བསྙེན་དམིགས་ལྡན་པས་འཛབ་བསྙེན་ནུས་ལྡན་དུ་སྒྲུབ། བདག་འཇུག་ཏིང་ངེ་འཛིན་གསལ་བས་བླངས། ལས་བུམ་བསང་སྦྱང་། སྟོང་པའི་ངང་ལས་པད་ཉིའི་སྟེང་དུ་ཧཱུྃ་ལས་བདུད་རྩི་འཁྱིལ་པ་ལྗང་སྔོན་ཕྱག་གཉིས་གཡས་རྡོ་རྗེའི་དབྱུགས་པ་དང་གཡོན་སྡིག་མཛུབ་མཛད་པ་ཁྲོ་བོའི་ཆ་ལུགས་རྫོགས་པའི་གནས་གསུམ་ཨཱོཾ་ཨཱཿཧཱུྃ་གིས་མཚན་པ་ལས་འོད་འཕྲོས་པ་ལས་ཡེ་ཤེས་པ་སྤྱན་དྲངས་དམ་ཡེ་དབྱེར་མེད་དུ་གྱུར་པའི་ཐུགས་ཀར་ཧཱུྃ་ལ་སྔགས་ཀྱིས་བསྐོར་བར་དམིགས་ནས། ཨཱོཾ་བིག་ནན་ཏ་ཀྲི་ཏ་ཧཱུྃ་ཕཊཿ ཅེས་བཟླས་པ་བརྒྱ་རྩ་ལ་སོགས་པའི་མཐར་བདུད་རྩིར་ཞུ་བར་བསམ། བཀའ་གཏེར་ཚོགས་མཆོད་བཅས་ལེགས་པར་གྲུབ་ནས། སློབ་བུ་རྣམས་ཕོ་བྲང་གི་སྒོ་འམ་ཡོལ་བའི་ཕྱི་ནས་གཞུང་ལྟར་རིགས་མ་འབུལ་ཞིང་གསོལ་བ། སོགས་བྱ་སྟེ། དེ་ཡང་གཏེར་གཞུང་རྩ་བའི་དབང་ནི། ཕག་མོ་དམར་མོའི་ཟབ་ཐིག་ལས༔ དབང་བཞིའི་གདམས་པ་མཁའ་འགྲོའི་སྙིང་ཁྲག་བཀའ་རྒྱ་མ་བཞུགས༔ ཡེ་ཤེས་མཁའ་འགྲོའི་ལྷ་ཚོགས་རྣམས་ལ་འདུད༔ དུར་ཁྲོད་ལུང་སྟོང་དབེན་པའི་བས་མཐའ་ན༔ ཚེ་འདི་བློས་བཏང་ཕྱི་མ་ཡང་དག་བསྒྲུབ༔ དད་བརྩོན་ཤེས་རབ་སྙིང་རྗེས་ཀུན་ནས་ཟིན༔ མཚན་ཉིད་ལྡན་པའི་སློབ་མས་བླ་མ་ལ༔ པདྨའི་མུ་དྲ་གསེར་གྱི་མཎྜལ་བཅས༔ ཀྱེ་ཧོདགོངས་ཤིག་བདེ་ཆེན་རྒྱལ་པོའི་སྐུ༔ བདེ་བའི་འབྱུང་གནས་བདེ་བའི་དབང་མོ་ཆེ༔ ལྷ་མོའི་སྒྱུ་འཕྲུལ་བཞིན་མཛེས་ལྟ་ན་སྡུག༔ མཆོད་པར་བཞེས་ལ་བྱང་ཆུབ་བདེ་བའི་ཁམས༔ ཡོངས་སུ་སྤེལ་ཏེ་བདག་ཉིད་སྨིན་པར་ཞུ༔ བླ་མ་ཡབ་ཡུམ་ཆོ་ག་བཞིན་དུ་སྤྱད༔ སྙོམས་པར་འཇུག་ཅིང་བྱང་སེམས་མཁའ་ལ་བསྐྱིལ༔ ཐབས་ཀྱིས་བླངས་ཤིང་པཉྩ་སུ་རར་སྦྱར༔ བྷནྡྷར་བླུག་ཅིང་དཀྱིལ་འཁོར་དབུས་སུ་འགོད༔ མེ་ལོང་སིནྡྷུ་རས་གླན་ཆོས་འབྱུང་འདྲི༔ ཧ་རི་ནི་ས་བསྙེན་སྔགས་ཡི་གེ་བཀོད༔ ཐོད་པའི་ཁ་བཀབ་སྟེང་ན་ཙག་ལི་བཞག༔ དར་དམར་གུར་ཕུབ་བསྐྱེད་རྫོགས་ཏིང་འཛིན་གསལ༔ སྔགས་དམིགས་གནད་བསྣུན་བསྙེན་པའི་ཁ་གསོ་ཞིང་༔ ལས་བུམ་བསྐྱེད་བསྟིམ་སློབ་མ་ཁྲུས་ནས་ཕྱུངས༔ བགེགས་བསྐྲད་བསྲུང་འཁོར་བསྒོམ་ཞིང་མིག་དར་བཅིངས༔ གསེར་གྱི་མཎྜལ་ཐོག་སྟེ་འདི་སྐད་ཞུ༔ ཞེས་སོགས་གསུངས་པ་ལྟར། དེ་ནས་སློབ་མ་རྣམས་ཁྲུས་ནས་ཕྱུངས། གྲལ་དུ་འཁོད། མེ་ཏོག་བཀྱེ་བསྡུ་དང་། བགེགས་གཏོར་བཏང་ཞིང་གུ་གུལ་གྱི་བདུག་ཐུན་བྲབ་བགེགས་བསྐྲད་བསྲུང་བའི་འཁོར་ལོ་བསྒོམ་ལ། སློབདཔོན་གྱིས་ཉན་པར་བསྐུལ་ཞིང་ཆོས་བཤད་རྒྱས་བསྡུས་ཇི་ལྟར་རིག་པ་དང་ཁྱད་པར་ཆོས་བཀའ་འདིའི་ལོ་རྒྱུས་བརྗོད་པ་སོགས་འོས་ཤིང་མཚམས་པ་བཤད་དུ་རུང་ལ། མདོར་བསྡུས་གཏེར་ཆེན་གྱི་མཛད་པའི་དབང་བཤད་ཙམ་གྱིས་འཐུས་བས༔ འོ་ན་ད་ལམ་ཁྱེད་རྣམས་ལ་བཅོམ་ལྡན་འདས་མ་དམར་མོ་སྒྲ་སྒྲོགས་ཀྱི་དབང་འབུལ་བའི་ཐོག་མར་ལོ་རྒྱུས་ཀྱི་རྣམ་པ་མདོ་ཙམ་ཞིག་བརྗོད་པར་བྱ་སྟེ། །ངོ་བོ་ཀ་ནས་དག་པའི་ཆོས་དབྱིངས་ཆེན་པོ་ནས་བཅོམ་ལྡན་འདས་མ་དཔལ་ཀུན་ཏུ་བཟང་མོའི་སོ་སོར་རྟོགས་པའི་ཡེ་ཤེས་ཀྱི་རང་མདངས་གོ་མ་འགག་པ་ལས་ཕག་གདོང་ཆེན་མོ་དམར་མོ་སྒྲ་སྒྲོགས་མ་འདི་རང་ཤར་ཞིང་དབྱིངས་རང་བཞིན་གྱི་རྣམ་པར་དག་པའི་མཁའ་སྤྱོད་དུ་དུས་གསུམ་རྟག་པ་རྒྱུན་གྱི་འཁོར་ལོར་རང་འོད་འབར་བཞིན་བཞུགས་པའི་རོལ་པ་ལས་འོག་མིན་སྟུག་པོ་བཀོད་པའི་ཞིང་ཁམས་སུ་རྒྱལ་བ་རྡོ་རྗེ་འཆང་གིས་གསང་སྔགས་བླ་མེད་ཀྱི་ཆོས་ཀྱི་འཁོར་ལོ་བསྐོར་བའི་ཚེ། པདྨ་རིགས་ཀྱི་མཁའ་འགྲོ་མ་འབུམ་ཕྲག་མང་པོ་སྟོན་པ་དེའི་འཁོར་དུ་རང་ཤར་ཞིང་བླ་ན་མེད་པའི་བཀའི་འཁོར་ལོ་རྣམས་ཉན་ཞིང་འཆང་ནས་ཚངས་ཆེན་གྱི་བསྐལ་པ་ཆེན་པོའི་ཞིང་འདི་དང་། འདི་མ་ཡིན་པའི་ཡང་ནམ་མཁའི་མཐའ་ཁྱབ་ཏུ་ལས་དང་སྐལ་པར་ལྡན་པ་རྣམས་ཀྱི་སྣང་ངོར་སྤྲུལ་པ་ཡང་སྤྲུལ་ཉིང་སྤྲུལ་བསམ་གྱིས་མི་ཁྱབ་པས་དུས་གསུམ་ཀུན་ཏུ་སྐལ་ལྡན་མང་པོ་གྲོལ་ལམ་ལ་ཐབས་དང་གདམས་པ་མང་པོས་ཡོངས་སུ་གྲོལ་བར་མཛད་ནས་རིམ་གྱིས་བརྒྱུད་པ་ལས་རྩོད་ལྡན་ཚེ་ལོར་རྒྱ་པའི་སྐབས་སུ་ཤཱཀྱའི་བསྟན་པ་ལ་མདོ་སྔགས་ཟུང་གཅིག་གི་ཉི་ཟླ་ཤར་བའི་ཚེ། ཨོ་རྒྱན་གྱི་སློབ་དཔོན་དཔལ་སངས་རྒྱས་གཉིས་པ་པདྨ་འབྱུང་གནས་ཀྱིས་འབུམ་ཕྲག་ཡངས་པའི་མཁའ་འགྲོ་མ་རྣམས་ལ་དབང་བསྒྱུར་ཞིང་མཁའ་འགྲོའི་གསང་མཛོད་ཐམས་ཅད་བརྟོལ་ཏེ་འཛམ་གླིང་སྤྱི་དང་རྒྱ་བོད་ཀུན་ཏུ་བསྟན་འགྲོའི་དོན་བསམ་གྱིས་མི་ཁྱབ་པ་མཛད་པའི་ནང་ནས། གནས་མཆོག་ཆེན་པོ་ཁམས་ཀྱི་སྲིང་མོ་རྫོང་གི་ཆགས་རུ་ཕུག་དམར་དབང་གི་གཞལ་ཡས་སུ་ཕྱག་ཕེབས་ནས་ཕག་གདོང་དམར་མོ་སྒྲ་སྒྲོགས་ཀྱི་སྒྲུབ་པ་མཛད་ཅིང་དམར་མོ་གསུང་གི་སྒྲུབ་གནས་སུ་བྱིན་གྱིས་བརླབས་པའི་དུས་སུ་དབང་སྒྲུབ་ཐབས་གདམས་པ་དང་བཅས་པ་འདི་རྣམས་མ་མཁའ་འགྲོ་ཡེ་ཤེས་མཚོ་རྒྱལ་ལ་བཀའ་སྩལ་ཞིང་གདམས་པ་མཁའ་འགྲོའི་ཡི་གེར་བཏབ་སྟེ་ཕྱི་མའི་བསྟན་འགྲོའི་དོན་དུ་མཁའ་འགྲོའི་གསང་མཛོད་དུ་རྒྱས་བཏབ་ནས་བཞུགས་སུ་གསོལ་བ། འགྲོ་བ་འདུལ་བའི་ལུང་བསྟན་དུས་བབས་བཞིན་དུ་ཁམས་པ་ཉི་མ་གྲགས་པས་ཤིང་སྟག་ཧོར་ཟླ་གསུམ་པའི་ཚེས་བརྒྱད་ཀྱི་ཉིན་གུང་གདན་དྲངས་ཤིང་ཤོག་སེར་ལས་བསྒྱུར་བའི་གདམས་པ་རིན་པོ་ཆེ་འདིའི་དབང་ཐོབ་པ་ལ་ཡོན་ཏན་དུ་མ་དང་ལྡན་ཏེ། རྒྱུད་ལས། དབང་ཐོབ་རིགས་ཀྱི་བུ་དེ་ཉིད༔ ཚེ་འདིར་བསམ་པ་ཀུན་འགྲུབ་ཅིང་༔ ཕྱི་མ་མངོན་པར་རྫོགས་འཚང་རྒྱ༔ ཅེས་དང་། དེ་བཞིན་དུ། བྱང་ཆུབ་དམ་པ་དབང་ལས་བྱུང་། །མ་སྨིན་པ་ནི་སྨིན་བྱེད་ལ། །ལུས་ངག་ཡིད་ཀྱི་སྒྲིབ་པ་འདག །དབང་གི་རབ་ཏུ་སྦྱངས་བྱས་ན། །དཔལ་མཆོག་དང་པོ་ཐོབ་པར་འགྱུར། །ཅེས་དང་དེ་ཉེད་ལས། དབང་མེད་འཁོར་བའི་མཐའ་སྙོག་སྟེ། ཕྱི་མའི་བདེ་བ་ཐོབ་པ་མེད། །དབང་མ་བསྐུར་བས་སྔགས་ལམ་བསྒོམ། །དེ་ནི་ངན་འགྲོར་སྐྱེ་བའི་རྒྱུ། །ཅེས་གསུངས་པའི་དོན་དང་ལྡན་པར་བྱ་བའི་ཕྱིར་སྨིན་བྱེད་ཀྱི་དབང་བསྐུར་བ་སྐབས་སུ་བབས་པ་ཡིན། །དེ་ལ་སྔོན་དུ་འགྲོ་བ་རྡོ་རྗེ་སློབ་དཔོན་གྱི་བྱ་བ་དང་། སློབ་མའི་བྱ་བ་གཉིས། འདི་ཡན་གཏེར་ཆེན་གྱིས་མཛད་པ་ལས། །སློབ་དཔོན་གྱི་བྱ་བ་དཀྱིལ་འཁོར་བཞེངས་བསྒྲུབས་མཆོད་བསྟོད་བཟླས་པ་བདག་འཇུག་གི་དབང་ཏིང་ངེ་འཛིན་གྱིས་བླང་བ་རྣམས་གྲུབ། ད་ཁྱེད་རང་རྣམས་ཀྱི་ངོ་སྐལ་དུ་གྱུར་པ་དབང་བསྐུར་ཟབ་མོའི་ཐོག་མར་མཎྜལ་ཞིག་འབུལ་བར་མཛོད། །ཞེས་བརྡའ་སྤྲད་དེ། དཀྱིལལ་འཁོར་དུ་འཇུག་པའི་ཕྱིར་ཆས་སུ་འཇུག །སྔོན་ཆད་གཉིས་འཛིན་གྱི་ཞེན་རྟོག་འཐུག་པོས་ལྡོངས་ཏེ་དཀྱིལ་འཁོར་གྱི་ལྷ་ཚོགས་མ་མཇལ་བའམ། མཇལ་ནའང་དཀྱིལ་འཁོར་འདི་ཉིད་མ་མཇལ་བའི་མཚོན་བྱེད་དུ་རས་ཡུག་དམར་པོ་རེས་གདོང་པ་བཅིངས་པའི་མོས་པ་མཛོད་ཅིག །ཨཱོཾ་ཨཱཿཧཱུྃ། ཞེས་མིག་དར་བཅིངས། ཡང་ཁྱོད་དཀྱིལ་འཁོར་གྱི་ལྷ་དང་མཇལ་བའི་ཚེ་ཕྱག་སྟོང་པར་མཇལ་མི་རུང་བས་ཕྱག་རྟེན་གྱི་སླད་དུ་ཨུ་དུམ་ཝ་རའི་མེ་ཏོག་གི་ཕྲེང་བ་རེ་བྱིན་པའི་མོས་པ་མཛད་འཚལ། ཨ་ཁཾ་བི་ར་ཧཱུྃ༔ ཞེས་མེ་ཏོག་གཏད་དེ། དེའང་ཁྱེད་རང་རྣམས་མི་ཕྱེད་པའི་གདུང་ཤུགས་དང་བཅས་ཏེ། བླ་མ་དང་དཀྱིལ་འཁོར་གྱི་གཙོ་བོ་བཅོམ་ལྡན་འདས་མ་དབྱེར་མི་ཕྱེད་པར་མོས་ནས་གསོལ་བ་གདབ་པ་འདིའི་རྗེས་བཟློས་གྱིས། ཧཱུྃ༔ མ་ལུས་འདྲེན་པའི་བདག་ཉིད་རྡོ་རྗེ་འཆང་༔ བདག་ཅག་འདིར་ཚོགས་རིགས་ཀྱི་བུ་རྣམས་ལ༔ གསང་བའི་དབང་གི་སྨིན་གྲོལ་དངོས་གྲུབ་སྩོལ༔ གསུམ་ཞུ། ཧོ༔ ཁྱེད་ཅག་བཀའ་བཞིན་བསྒྲུབ་པའི་བུ༔ དམ་ཚིག་ཚུལ་བཞིན་སྲུང་ནུས་པའི༔ རིགས་ལྡན་ཡིན་ན་ནང་དུ་ཤོག༔ ལོག་པར་ལྟ་བ་ཕྱིར་དེངས་ཤིག༔ ཅེས་བརྗོད་བདེ་སྟོང་ལོ་རྒྱུས་བྱཿགསོལ་བ་གདབ་པའི་རིམ་པ་སོང་ནས་དམིགས་པ་འདི་བཞིན་དུ་གྱིས། ས་ཕྱོགས་འདི་ཉིད་ཀྱང་ཐ་མལ་གྱི་སྣང་བ་འདི་ལྟ་བུ་མ་ཡིན་པར་དྭངས་གསལ་གཉིས་སུ་མེད་པའི་ཡེ་ཤེས་རང་སྣང་ལས་གྲུབ་པའི་ཞིང་ཁམས་ཀྱི་དབུས་སུ་དཀྱིལ་འཁོར་གྱི་གཙོ་མོ་བཅོམ་ལྡན་འདས་མ་ལ་ཕྱོགས་དུས་ཀྱི་རྒྱལ་བ་སྲས་བཅས་སྐྱབས་ཡུལ་ཐམས་ཅད་ཀྱིས་བསྐོར་བ་མངོན་སུམ་ལྟ་བུར་བཞུགས་པ་གསལ་བཏབ་ནས་དེ་དག་གི་སྤྱན་སྔར་རང་གཞན་སེམས་ཅན་ཐམས་ཅད་བྱང་ཆུབ་ཀྱི་བར་དུ་སྐྱབས་སུ་མཆིའོ་སྙམས་པས་འདིའི་རྗེས་བཟློས་གྱིས། ན་མོ༔ བླ་མ་ཡི་དམ་མཁའ་འགྲོ་སྟེ༔ རྩ་བ་གསུམ་ལ་སྐྱབས་སུ་མཆི༔ གསུམ༔ ཞེས་ཐེག་པ་ཐུན་མོང་གི་རྨིང་རྡོ་སྐྱབས་སུ་འགྲོ་བའི་རིམ་པ་སོང་ནས། ཐེག་ཆེན་རྩ་བ་གཞན་ཕན་བྱང་ཆུབ་ཀྱི་མཆོག་ཏུ་སེམས་བསྐྱེད་པ་གལ་ཆེ་སྟེ། མཁའ་མཉམས་གྱི་སེམས་ཅན་སྡུག་བསྔལ་གྱི་འབྲས་བུ་ལ་རྟག་ཏུ་སྤྱོད་པ་འདི་རྣམས་སྡུག་བསྔལ་ལས་བསྒྲལ་ཏེ་བྱང་ཆུབ་མཆོག་གི་གོ་འཕང་ལ་འགོད་པར་བྱ། དེའི་ཕྱིར་དུ་ཐེག་པ་ཆེན་པོའི་སེམས་བསྐྱེད་བླང་ནས་ཚུལ་བཞིན་དུ་བགྱིའོ་སྙམས་པས་འདིའི་རྗེས་བཟློས་གྱིས། འགྲོ་བ་སེམས་ཅན་དོན་སླད་དུ༔ མཁའ་འགྲོའི་བསྐྱེད་རྫོགས་བསྒོམ་བཟླས་བསྒྲུབ༔ གསུམ། དེ་ལྟར་ཚོགས་ཞིང་ཁྱད་པར་ཅན་དེ་དག་གི་སྤྱན་སྔར་ཚོགས་བསགས་པ་ནི། རང་གཞན་སེམས་ཅན་ཐམས་ཅད་ལུས་ཞིང་གི་རྡུལ་སྙེད་དུ་སྤྲུལ་ནས་ཕྱག་འཚལ་བ། མཆོད་སྤྲིན་སྤྲོ་བ། སྡིག་པ་བཤགས་པ། དགེ་བ་ལ་རྗེས་སུ་ཡི་རངས་བ། ཆོས་ཀྱི་འཁོར་ལོ་བསྐོར་བར་བསྐུལ་བ། མྱ་ངན་ལས་མི་འདའ་བར་གསོལ་བ་གདབ་པ། དགེ་བ་བླ་ན་མེད་པའི་བྱང་ཆུབ་ཆེན་པོར་བསྔོ་བ་སོགས་ཡན་ལག་བདུན་པའམ་བཅུ་པའི་ཚིག་ཕྱིར་སེམས་གཞོལ་བས་འདིའི་རྗེས་བཟློས་གྱིས། །ཧཱུྃ། བླ་མ་ཡི་དམ་མཁའ་འགྲོ་གཤེགས༔ ཉི་ཟླ་པདྨའི་གདན་ལ་བཞུགས༔ ལུས་ངག་ཡིད་གསུམ་གུས་ཕྱག་འཚལ༔ ཕྱི་ནང་གསང་གསུམ་མཆོད་པ་འབུལ༔ ཉམས་ཆགས་སྡིག་སྒྲིབ་མཐོལ་ལོ་བཤགས༔ གསང་སྔགས་སྒྲུབ་ལ་རྗེས་ཡི་རངས༔ སྨིན་གྲོལ་ཆོས་འཁོར་བསྐོར་དུ་གསོལ༔ མྱ་ངན་མི་འདར་གསོལ་བ་འདེབས༔ དགེ་བ་བྱང་ཆུབ་ཆེན་པོར་བསྔོ༔ ཐམས་ཅད་སངས་རྒྱས་ཐོབ་པར་ཤོག༔ ཞེས་དང་། དེ་ནས་མེ་ཏོག་དོར་བ་ནི། མེ་ཏོག་བླ་མའི་སྐུ་ལ་དོར་ཞིང་ཚིག་འདིའི་རྗེས་བཟློས་མཛོད། །བླ་མ་ཡབ་ཡུམ་དཀྱིལ་འཁོར་ལ༔ བྱང་ཆུབ་སེམས་ཀྱི་མེ་ཏོག་འབུལ༔ སྔོན་ནས་འབྲེལ་བའི་ལྷ་ལ་ཕོབ༔ ཚེ་རབས་ལྷ་དང་མཇལ་བར་ཤོག༔ ཞེས་དོར། དེ་ནས་གསང་མཚན་སྦྱིན་ཏེ་གཞུང་ལས། སྤྱི་བོར་བབས་ན་འཁོར་ལོའི་ཤུགས་འཆང་མ༔ མགྲིན་པར་བབས་ན་དགའ་བའི་རྒྱལ་མོ་རྩལ༔ ཐུགས་ཀར་བབས་ན་མཆོག་གི་དབང་མོ་ཆེ༔ ལྟེ་བར་བབས་ན་དགའ་བྲལ་བདེ་ཆེན་མ༔ གསང་བར་བབས་ན་ལྷན་སྐྱེས་བདེ་སྟོང་མ༔ གསང་མཚན་བཏགས་ཤིང་གདང་བས་ཡི་དམ་ལྷ༔ གསེར་ཐུར་མིག་དབྱེ་ཙཀྵུ་པྲ་ཝེ་ཤ་ཡ་ཧོ༔ བསྐྱེད་རིམ་གཏད་ཅིང་ཡེ་ཤེས་སེམས་དཔའ་བསྟིམ༔ རིགས་མ་ཐོགས་ཤིང་སློབ་བུའི་སྤྱི་བོར་བསྐུར༔ ཞེས་སོགས་གསུངས་པའི་དོན་གསང་མཚན་བཏགས་ཤིང་ལྷ་ངོ་སྤྲད། དེ་ནས་གསེར་ཐུར་གྱི་མིག་དབྱེ་བ་དང་བཅས། མིག་དར་བསལ་ལ། ཙཀྵུ་པྲ་ཝེ་ཤ་ཡ་ཧོ༔ ཞེས་དང་། དེ་ལྟར་མ་རིག་པའི་ལིང་ཐོག་མིག་དར་གྱིས་མཚོན་པ་དེ་ཉིད་བསལ་བའི་ཤུལ་ནས་ཡེ་ཤེས་ཀྱི་མིག་གསར་དུ་ཐོབ་པའི་མོས་པ་གནང་ནས་འདི་ན་ཕྱི་མཚན་མའི་དཀྱིལ་འཁོར་བརྡའ་སྤྲད་པ་ལ་བརྟེན་ནས་ནང་ཡེ་ཤེས་ཀྱི་དཀྱིལ་འཁོར་བཅོམ་ལྡན་འདས་མ་རྡོ་རྗེ་རྣལ་འབྱོར་མའི་རྟེན་གཞལ་ཡས་ཁང་དང་བརྟེན་པ་ལྷ་ཚོགས་ཐམས་ཅད་མངོན་སུམ་ལྟ་བུར་མཇལ་བའི་མོས་པ་དང་། དེ་དག་ཀྱང་ཕྱི་རོལ་ནས་གཞན་ཞིག་བཙལ་དུ་ཡོད་པ་མ་ཡིན་ཞིང་རང་གི་ཕུང་པོ་ཁམས་དང་སྐྱེ་མཆེད་ཐམས་ཅད་རྒྱལ་བའི་དཀྱིལ་འཁོར་ཆེན་པོར་ཡེ་གདོད་མ་ནས་ལྷུན་གྱིས་གྲུབ་པ་ཉིད་དོ། །ད་ནང་འཇུག་གི་དངོས་གཞི་ཡེ་ཤེས་དབབ་པའི་སླད་དུ་ཁྱོད་རང་རྣམས་ལུས་གནད་དྲང་པོར་བསྲང་ལ་དམིགས་པ་འདི་བཞིན་དུ་མཛོད་ཅིག། ཨཱོཾ་མ་ཧཱ་ཤུ་ནྱ་ཏ་ཛྙ་ན་བཛྲ་སྭཱ་བྷ་ཝ་ཨཏྨ་ཀོ྅་ཧཾ། ལས་བུམ་ཁ་རྒྱན་གྱིས་ཆུ་འཐོར། སྣང་སྲིད་འཁོར་འདས་ཀྱི་བསྡུས་པའི་ཆོས་ཐམས་ཅད་མི་དམིགས་པ་སྟོང་པ་ཉིད་དུ་གྱུར། སྟོང་པའི་ངང་ལས་ཆོས་ཀྱི་དབྱིངས་རྣམ་པ་ཀུན་ལྡན་མཚོན་པའི་ཆོས་ཀྱི་འབྱུང་གནས་དམར་པོ་ཟུར་གསུམ་པ་རྩེ་མོ་ཕྲ་བ་མཐུར་དང་གདེངས་ཀ་རྒྱས་པ་གྱེན་དུ་བསྟན་པའི་ནང་གི་ནམ་མཁར་གདན་པདྨ་དང་ཉི་ཟླ་བམ་རོ་བརྩིགས་པའི་ཁར་སེམས་ཉིད་ཀྱི་ངོ་བོ་ཡི་གེ་ནི་དམར་པོ་ཞིག་བསམ། དེ་ལས་འོད་ཟེར་འཕྲོ་འདུས་སྦྱོར་བས་ཡོངས་སུ་གྱུར་པ་ལས་ཁྱེད་རྣམས་སྐད་ཅིག་གིས་བཅོམ་ལྡན་འདས་མ་དམར་མོ་སྒྲ་སྒྲོགས་ཆོས་སྐུ་ཡེ་ཤེས་ཀྱི་མཁའ་འགྲོ་རྡོ་རྗེ་རྣལ་འབྱོར་མའི་སྐུ་ཡི་རྣམ་པར་གྱུར་པ་ནི་སྐུ་མདོག་དམར་པོ་ཨོཏ་ཡན་ག་ཛ་ན་ཡི་སིནྡྷུ་རའི་ཁ་དོག་གམ་པད་རག་གི་ལྷུན་པོར་ཉི་མ་གཞོན་ནུའི་འོད་ཀྱིས་འཁྱུད་པ་ལྟ་བུ་ཞི་མ་ཁྲོ་ཆགས་པའི་ཉམས་ཅན་བཞད་ཞལ་ཚེམས་འཕྲེང་དཀར་ཞིང་མཆེ་བའི་སྨྱུ་གུ་བཞི་གཙིགས་པ་སྤྱན་གསུམ་ནམ་མཁར་ཧྲིག་གེར་གཟིགས་ཤིང་གཞོན་ནུ་བཅུ་དྲུག་ལང་ཚོ་རབ་ཏུ་རྒྱས་པའི་ཉམས་ཅན་མཛེས་ཤིང་ལྟ་བས་ཆོག་མི་ཤེས་པ་ནུ་མ་འབུར་ཞིང་གསང་གནས་རྒྱས་པ། ཕྱག་གཉིས་གཡས་རྡོ་རྗེའི་ཡུ་བ་བྱས་པའི་གྲིི་གུག་ངོ་མ་ཐབས་སུ་འཕྱར་བ། གཡོན་བྷནྡྷ་ཁྲག་གིས་བཀང་བ་ཐུགས་ཀར་འཛིན་ཅིང་ཞལ་དུ་གསོལ་བ། །ཡབ་ཧེ་རུ་ཀ་སྦས་པའི་ངོ་བོ་རྡོ་རྗེ་ཁ་ཊྲཱཾ་ཀ་མཆན་གཡོན་དུ་འཆང་བ། ཞབས་གར་སྟབས་གཡས་བསྐུམ་པའི་རྟིང་པ་བྷ་ག་ལ་གཏད་པ། གཡོན་བརྐྱང་པས་བདག་མེད་པ་མཚོན་པའི་རོ་ཡི་སྙིང་གར་བརྫིས་པ། དབུ་སྐྲ་རལ་པ་གྱེན་དུ་བརྫེས་པའི་དབུས་སུ་ཕག་ཞལ་ནག་པོ་རྔམ་ལ་བརྗིད་པ། ཐོད་སྐམ་ལྔས་དབུ་བརྒྱན་དང། ཐོད་རློན་ལྔ་བཅུའི་དོ་ཤལ་དང་། ཕྱག་རྒྱ་ལྔས་མཛེས་ཤིང་། དར་དང་རིན་པོ་ཆེའི་རྒྱན་གྱིས་བརྒྱན་པ། སྙན་ཆ་གསེར་གྱི་འཁོར་ལོ་དྲིལ་བུས་མཚན་པ་དང་། ཕྱག་ཞབས་གསེར་གྱི་གདུབ་བུ་གཡེར་ཁ་ཁྲོལ་བ། བལྟ་བར་མི་བཟོད་པའི་ཡེ་ཤེས་ཀྱི་འོད་ལྔ་འཁྲིགས་པའི་ཀློང་ན་བཞུགས་པར་གསལ་བའི་གནས་གསུམ་དུ་རྒྱལ་བ་རྣམས་ཀྱི་སྐུ་གསུང་ཐུགས་རྡོ་རྗེའི་བདག་ཉིད་ཡི་གེ་གསུམ་གྱིས་རྣམ་པས་མཚན་པར་གསལ་ཞིང་། དེ་ལྟར་གསལ་བའི་སྐུ་དང་ཐུགས་སྲོག་ས་བོན་ནི་ཡིག་དང་། །བླ་མ་དང་མདུན་བསྐྱེད་ཀྱི་བཅོམ་ལྡན་འདས་རྡོ་རྗེ་རྣལ་འབྱོར་མའི་དཀྱིལ་འཁོར་གྱི་ལྷ་ཚོགས་ལས་ཀྱང་། འོད་ཟེར་བསམ་གྱིས་མི་ཁྱབ་པ་འཕྲོས་པས་འོག་མིན་ཆོས་ཀྱི་དབྱིངས་ཀྱི་ཕོ་བྲང་དང་མཁའ་སྤྱོད་གནས་ཡུལ་དག་པའི་ཞིང་ཁམས་དང་། ཁྱད་པར་དུ་ནུབ་ཕྱོགས་ཨོ་རྒྱན་གྱི་ཡུལ་ནས་ཡེ་ཤེས་ཀྱི་མཁའ་འགྲོའི་ཚོགས་དཔག་ཏུ་མེད་པ་ཁ་ཆར་བུ་ཡུག་འཚུབས་པ་ལྟར་བྱོན་ནས་ཁྱེད་རང་གི་སྒོ་གསུམ་ལ་རྡོ་ཚན་ལ་ཁ་བ་བབ་པའམ་རྒྱ་མཚོ་ལ་ཆར་གྱི་རྒྱུན་དྲག་པོ་འབབ་པ་ལྟར་གཉིས་མེད་དུ་སིབ་སིབ་ཐིམ་བྱུང་སྙམ་པའི་མོས་པ་རྩེ་གཅིག་པར་དྲག་ཏུ་སྒོམས་ཤིག །ཞེས་བརྡའ་སྤྲད། རོལ་མོ་འཁྲོལ། ཅེ་སོག་སྦྱར་བའི་བདུག་པ་དང་། བྱིན་འབེབས་ཀྱི་རྫས་གཞན་སོགས་ཀྱིས་བདུག་ཅིང་། ཧཱུྃ༔ དམ་ཚིག་སེམས་དཔའ་བསྐྱེད་པའི་ལྷ༔ ཕག་མོ་དམར་མོ་སྒྲ་སྒྲོགས་མ༔ འོད་ཟེར་འཕྲོ་འདུའི་ཏིང་འཛིན་གྱིས༔ མཁའ་སྤྱོད་གནས་ཡུལ་ཞིང་ཁམས་དང་༔ ནུབ་ཕྱོགས་ཨོ་རྒྱན་དུར་ཁྲོད་ནས༔ མ་མོ་མཁའ་འགྲོ་ཀུན་གྱི་རྗེ༔ རྡོ་རྗེ་ཕག་མོ་མཁའ་འགྲོ་འབུམ༔ དངོས་གྲུབ་སྩོལ་ཕྱིར་གཤེགས་སུ་གསོལ༔ བདེ་བ་ཆེན་པོ་རཱ་གའི་མ༔ སྐུ་ནི་གར་སྟབས་ལིངས་སེ་ལིང་༔ གསུང་ནི་བརྡ་སྐད་དིར་རི་རི༔ ཐུགས་ནི་ཏིང་འཛིན་ཡ་ལ་ལ༔ མཁའ་འགྲོ་མ་ཚོགས་སྤུངས་སེ་སྤུང་༔ ཐུགས་རྗེའི་དབང་གི་གཤེགས་ནས་ཀྱང་༔ གཉིས་སུ་མེད་པའི་དངོས་གྲུབ་སྩོལ༔ དྷ་ཀ་དྷཱཀྐི་ནི་ས་མ་ཡཱ་ཧྲཱིང་ཧྲཱིང་ཕེམ་ཕེམ་ཛཿཛཿཨ་ཝེ་ཤ་ཡ་ཨ་ཨཱ༔ ཞེས་ཡེ་ཤེས་དབབ་པའི་དམིགས་པ་ནན་ཏན་དུ་བྱ་ཞིང་སྔགས་དྲག་ཏུ་བརྗོད་དོ། །དེ་ནས་མེ་ཏོག་འཐོར་ཞིང་རྡོ་རྗེ་སྤྱི་བོར་བཞག་ལ། སྤྱན་དྲངས་པའི་ཡེ་ཤེས་པ་རྣམས་བརྟན་པར་བཞུགས་སུ་གསོལ༴༔ ཨཱོཾ་སུ་པྲ་ཏིཏྠ་བཛྲ་ཡེ་སྭཱ་ཧཱ༔ དེ་ལྟར་དཀྱིལ་འཁོར་དུ་འཇུག་པའི་རིམ་པ་སོང་ནས། ཞུགས་པ་ལ་དབང་བསྐུར་བ་ལ། དེ་འང་དབང་གི་ངོ་བོ། ངེས་ཚིག །དབྱེ་བ། ཇི་ལྟར་བསྐུལ་བའི་ཚུལ་བཞི་ལས། དང་པོ་ནི་རྒྱུ་རྐྱེན་གཉིས་ལས། རྒྱུ་རླུང་སེམས་རྩ་དང་ཐིག་ལེར་དབང་རྣམས་གདོད་མ་ནས་རང་ལ་རང་ཆས་སུ་ལྡན་པ་ཡིན་ཏེ། དབང་བསྐུར་རྒྱལ་པོའི་རྒྱུད་ལས། དབང་མཆོག་རང་ལ་མེད་གྱུར་ན། །བསྐུར་བས་ཐོབ་པར་ག་ལ་འགྱུར། །བྲ་སྲན་འབྲས་སུ་དབང་བསྐུར་ཀྱང་། །དེ་ལ་འབྲས་ཀྱི་དངོས་སྣང་མེད། །ཅེས་དང་། རྐྱེན་ནི་བཞི་ལས། དབང་བསྐུར་དུ་རུང་བ་སློབ་བུའི་རྒྱུ་རྐྱེན། བསྐུར་ནུས་ཀྱི་སློབ་དཔོན་བདག་པོའི་རྐྱེན་རྫས་སྔགས་ཏིང་ངེ་འཛིན་འཛོམ་པའི་ནུས་པ་ཁྱད་པར་ཅན་དམིགས་པའི་རྐྱེན། དབང་སྔ་མ་སྔ་མས་གོ་ཕྱེ་ནས། ཕྱི་མ་ཕྱི་མ་འབྱུང་བ་དེ་མ་ཐག་པའི་རྐྱེན་ནོ། །གཉིས་པ་ནི། ཨ་བྷི་ཥིཉྩ་ཞེས་པའི་སྒྲ་ལས་དྲངས་ན། མངོན་པར་གཏོར་བའམ་བླུགས་པ་སྟེ། དབང་བཞིས་རང་སྐལ་གྱི་དྲི་མ་འཁྲུད་ཅིང་། །སྐུ་བཞིའི་ས་བོན་གྱི་གསོས་ཐེབ་པའོ། །གསུམ་པ་ནི། བསྐུར་བྱའི་དབང་ལ་དབྱེ་ན། བུམ་གསང་ཤེར་ཡེ་ཚིག་དབང་བཞིའམ། དེ་དག་གི་དོན་གྱི་གནད་འགག་འདུས་པ་སྐུ་གསུང་ཐུགས་ཡོན་ཏན་ཕྲིན་ལས་ལ་སོགས་པའི་དབང་ངོ་། །བཞི་པ་ནི། །སློབ་དཔོན་དང་དབང་རྫས་རྣམས་བཅོམ་ལྡན་འདས་མ་དམར་མོ་སྒྲ་སྒྲོགས་ཀྱི་སྐུར་བསྐྱེད་ནས་དབང་རྫས་དེ་དག་བསྐུར་གནས་སོ་སོར་བསྐུར་བའི་རྐྱེན་གྱིས་ཁྱེད་རང་རྣམས་ཀྱི་སྒོ་གསུམ་ཤེས་བྱའི་སྒྲིབ་ཚོགས་དག་ནས་དབང་བཞིའི་ཡེ་ཤེས་མངོན་དུ་གྱུར་པའི་མོས་པ་མཛོད། །རིགས་མའམ་ཕག་མོའི་སྐུ་ཙག་ཐོགས་ལ༔ ཧཱུྃ༔ བཅོམ་ལྡན་འདས་མ་ཡེ་ཤེས་མཁའ་འགྲོ་མ༔ དུས་གསུམ་རྒྱལ་བ་བསྐྱེད་པའི་ཡུམ་ཆེན་མོ༔ ལྷ་མོའི་དབང་ཕྱུག་བདེ་བའི་རྒྱ་མཚོ་མས༔ སྐལ་ལྡན་རིགས་ཀྱི་བུ་ལ་དབང་བསྐུར་བས༔ མཁའ་འགྲོ་རྒྱ་མཚོའི་སྐུ་ཡི་དབང་ཐོབ་ཤོག༔ ཨཱོཾ་ཨཱཿཧཱུྃ་ནི་བཛྲ་བྷ་ར་ཧི་མ་ཧཱ་མུ་དྲ་ཀཱ་ཡ་ཨབྷི་ཥིཉྩ་ཧཱུྃ༔ བྷནྫ་མགྲིན་པར་བཞག༔ ཧཱུཾ་གསང་བའི་མཁའ་ལས་ཕྱུངས་བའི་ཀུནྡ་དང་༔ རྩ་བརྒྱད་སྟོང་སྦྱར་བཉྩ་ཨ་མྲྀ་ཏ༔ སུ་ར་ཏ་ཡི་བཅུད་ཀྱིས་སྦྲན་པ་འདི༔ དུམ་གཅིག་སྣོད་དུ་བསྐྱིལ་ཏེ་མགྲིན་པར་བཞག༔ སྐལ་ལྡན་རིགས་ཀྱི་བུ་ལ་དབང་བསྐུར་བས༔ མཁའ་འགྲོ་རྒྱ་མཚོའི་གསུང་གི་དབང་ཐོབ་ཤོག༔ ཨཱོཾ་ཨཱཿཧཱུྃ་ནི་བཛྲ་བྷ་ར་ཧི་མ་ཧ་མུ་དྲ་ཝཱཀྐ་ཨ་བྷི་ཥིཉྩ་ཧཱུྃ༔ མེ་ལོང་སྙིང་ཁར་བཞག །ཧཱུྃ༔ གདོད་ནས་དག་པའི་རང་བྱུང་འོད་པོ་ཆེ༔ བདེ་སྟོང་གཉིས་མེད་སྨྲ་བསམ་བརྗོད་ལས་འདས༔ ངོ་བོ་ཉིད་སྐུ་ཡེ་ཤེས་མཁའ་འགྲོའི་ཐུགས༔ སྐལ་ལྡན་རིགས་ཀྱི་བུ་ལ་དབང་བསྐུར་བས༔ མཁའ་འགྲོ་རྒྱ་མཚོའི་ཐུགས་ཀྱི་དབང་ཐོབ་ཤོག༔ ཨོཾ་ཨཱཿཧཱུྃ་ནི་བཛྲ་བྷ་ར་ཧི་མ་ཧཱ་མུ་དྲ་ཙིཏྟ་ཨ་བྷི་ཥིཉྩ་ཧཱུྃ༔ ཡུམ་གྱི་མཁའ་བསྟན༔ ཧཱུྃ༔ ལྟོས་ཤིག་མཁའ་དབྱིངས་རྣམ་དག་བདེ་བ་ཆེ༔ རྡོ་རྗེ་བཙུན་མོའི་བྷ་ག་ཨེ་ཡི་ཆ༔ སངས་རྒྱས་ཡེ་ཤེས་མི་ཟད་ཟ་མ་ཏོག༔ ཆོས་ཀྱི་དབྱིངས་དང་འདུ་འབྲལ་སྐད་ཅིག་མེད༔ སྐལ་ལྡན་རིགས་ཀྱི་བུ་ལ་དབང་བསྐུར་བས༔ མཁའ་འགྲོ་རྒྱ་མཚོའི་ཡོན་ཏན་དབང་ཐོབ་ཤོག༔ ཨཱོཾ་ཨཱ་ཧཱུྃ་ནི་བཛྲ་བྷ་ར་ཧི་མ་ཧཱ་མུ་དྲ་རཏྣ་ཨ་བྷིཥིཉྩ་ཧཱུྃ༔ རིགས་མ་སློབ་མར་སྦྱིན་ཞིང་༔ ཧཱུྃ༔ བདེ་བ་ཆེན་པོ་དྲུག་པ་རྡོ་རྗེ་འཆང་༔ གསང་ཆེན་ལམ་གྱི་ཐེག་པའི་དམ་ཚིག་ལྟར༔ ཡང་དག་སྤྱོད་ལ་བདེ་སྟོང་རང་ཞལ་ལྟོས༔ སྲོག་གི་ཕྱིར་དུའང་ཀུནྡ་འཛིན་པ་དང་༔ མ་ཆེན་མཁའ་འགྲོའི་ཚོགས་རྣམས་བརྟེན་ཅིང་སྒྲུབས༔ ཨཱོཾ་ཨཱཿཧཱུྃ་ནི་བཛྲ་བྷ་ར་ཧི་མ་ཧཱ་མུ་དྲ་ཀརྨ་ཨ་བྷི་ཥིཉྩ་ཧཱུྃ༔ ཡོལ་བའི་ཕྱི་ན་ཆོ་ག་བཞིན་དུ་སྤྱད༔ བླ་མས་བདེ་སྟོང་ངོ་སྤྲོད་གཞུང་ལྟར་བརྗོད༔ སློབ་བུའི་དགའ་བཞིའི་ཏིང་འཛིན་དབབ་བསྐྱིལ་བཟློག༔ འདྲེན་དང་དགྲམ་པའི་འཁྲུལ་འཁོར་བརྩོན་པར་བྱ༔ ཞེས་གསུངས་པའི་དབང་དོན་ཡེ་ཤེས་ངོ་སྤྲོད་གདབ་པ་ནི། སློབ་མ་དཔལ་རྟ་མཆོག་ཧེ་རུ་ཀ༔ དམར་པོ་གྲི་ཐོད་འཛིན་པར་གསལ་བའི་གསང་གནས་ཧཱུྃ་ལས་རྡོ་རྗེ་ཧཱུྃ་གིས་མཚན་པ་ནོར་བུར་ཨཱོོཾ། ཕྱག་རྒྱ་རྡོ་རྗེ་རྣལ་འབྱོར་མ་དམར་མོ་གྲི་ཐོད་འཛིན་པར་གསལ་བའི་མཁའ་ཨ་ལས་པདྨ་ཨས་མཚན་པ་ཡབ་ཀྱི་རྡོ་རྗེ་ནོར་བུའི་རྩ་བར་རྩ་གསུམ་འདུས་པའི་གཡས་ལ་ཨཱོཾ་དཀར་པོ། གཡོན་དུ་ཨཱཿདམར་པོ། དབུས་སུ་ཧཱུྃ་མཐིང་ཁ། རྩེ་མོར་ཕཊ་ཡིག་སེར་པོ་སྒོམ། སྙོམ་པར་ཞུགས་པས་ཁམས་ཀྱི་དྭངས་མ་རྣམས་འཁོར་ལོ་བཞིར་རིམ་པ་བཞིན། དགའ་བ། མཆོག་དགའ། ཁྱད་དགའ། ལྷན་སྐྱེས་ཀྱི་དགའ་བ་རྣམས་རྒྱུད་ལ་སྐྱེས་ནས་སླར་ཡང་རླུང་འཕོ་བ་མེད་པས་མས་བརྟན་གྱི་དགའ་བ་བཞི་ངོ་སྤྲོད་དོ། །ཡོལ་བ་བསལ་དེ་ནས་མེ་ཏོག་འཐོར་ཞིང་ཤིས་བརྗོད་ནི། ཧཱུྃ༔ ཡེ་ཤེས་དབྱིངས་ཀྱི་ཕོ་བྲང་ནས༔ ཕག་མོ་ཆོས་སྐུའི་བཀྲ་ཤིས་ཤོག༔ ཡེ་ཤེས་ལྔ་ལྡན་ཕོ་བྲང་ནས༔ ཕག་མོ་ལོངས་སྐུའི་བཀྲ་ཤིས་ཤོག༔ མཁའ་སྤྱོད་གནས་ཡུལ་དུར་ཁྲོད་ནས༔ ཕག་མོ་སྤྲུལ་སྐུའི་བཀྲ་ཤིས་ཤོག༔ བཀའ་ཡི་འཕྲིན་ལས་དཀྱིལ་འཁོར་ནས༔ སྤྲུལ་པ་འབུམ་སྡེའི་བཀྲ་ཤིས་ཤོག༔ ཞེས་དང་གཞན་ཡང་ཇི་ལྟར་རིག་པར་བརྗོད་ཅིང་མེ་ཏོག་གི་ཆར་དུ་སྙིལ་བར་བྱའོ། །དམ་ཚིག་ལ་གཅེས་སྤྲས་སུ་བྱ་བའི་ཕྱིར། དེ་ལྟར་བཅོམ་ལྡན་འདས་མ་རྡོ་རྗེ་རྣལ་འབྱོར་མའི་དབང་བསྐུར་ཟབ་མོ་ཐོབ་པ་ཡིན་པས་གནས་སྐབས་དེ་དག་ཏུ་ཁས་བླངས་པའི་དམ་ཚིག་དང་སྡོམ་པའི་རིམ་པ་ཚུལ་བཞིན་བསྲུང་བར་བགྱིད་སྙམས་པས་འདིའི་རྗེས་བཟློས་གྱིས། །གཙོ་བོའི་ཇི་ལྟར་སོགས། གཏང་རག་གི་མཎྜལ། སླར་ཡང་ལུས་ལོངས་སྤྱོད་དུས་གསུམ་གྱི་དགེ་ཚོགས་དང་བཅས་པ་འཁོར་ལོས་སྒྱུར་བའི་རྒྱལ་སྲིད་འབྱོར་པ་ལྟར་སྤྲུལ་ཏེ་འབུལ་སྙམས་པས་འདིའི་རྗེས་བཟློས་གྱིས། དེ་ནས་བརྩམས་ཏེ་སོགས། དེ་ལྟར་དབང་བསྐུར་ཐོབ་པའི་དགེ་རྩ་སེམས་ཅན་གྱི་དོན་དུ་བསྔོ་བར་གྱིས། བསོད་རྣམས་འདི་ཡིས་སོགས། རིན་ཆེན་དགེ་ཚོགས་འདི་ཡིས་འགྲོ་བ་ཀུན། །རྟག་ཏུ་དམ་པའི་ཆོས་དང་མི་འབྲལ་ཞིང་། །རང་གཞན་དོན་གཉིས་རྫོགས་པའི་མཐར་ཕྱིན་པ། །ཆོས་རྔ་སྒྲོགས་པས་འཇིག་རྟེན་མཛེས་པར་ཤོག །དེ་ནས་ཚོགས་ལ་རོལ་སློབ་བུ་རྣམས་རང་གནས་བཏང་༔ ལྷག་མ་བཏང་ཞིང་དཀའ་གཏེར་བསྐུལ་བ་སོགས་ལས་ཀྱི་རྗེས་སྐྱོང་བ་གསང་བ་སྤྱི་འགྲོས་བཞིན་ཤེས་པར་བྱའོ། །དེ་ལྟར་གཏེར་གཞུང་རྩ་བར། དེ་ནི་དམ་ཚིག་ལྡན་པའི་བུ་བདུན་ལས༔ མང་བར་མི་བྱ་ཤིན་ཏུ་ཕག་དུ་སྦོས༔ འཆལ་ན་མཁའ་འགྲོའི་བཀའ་ཆད་འོང་བས་བཟབ༔ ས་མ་ཡཱ༔ རྒྱ་རྒྱ་རྒྱ༔ གཏེར་རྒྱ༔ སྦས་རྒྱ༔ ཟབ་རྒྱ༔ གཉན་རྒྱ༔ དམ་རྒྱ༔ སོ་ཕག་ཤིན་རྒྱ༔ ན་ར་ཀན་རྒྱ༔ རིགས་འཛིན་ཆེན་པོ་ཉི་མ་གྲགས་པས་ཆགས་རུ་ཕུག་དམར་ནས་ཤིང་པོ་སྟག་ལ་སྤྱན་དྲངས་ཤིང་ཆགས་རུ་ཕུག་ནག་བདེ་བར་ཆེན་པོར་ཤོག་སེར་ལས་བསྒྱུར་བའོ། །སྨྲས་པ། གསང་ཆེན་མཁའ་འགྲོའི་ཉེ་ལམ་འདི་ལྟ་བུ། །འཛམ་གླིང་འདི་ན་ཟབ་ཅིང་གཉེན་པའི་ཆོས། དེས་ན་ཁྲིགས་སུ་སྡེབས་སོགས་འོས་མིན་ཡང་། །ལྡོག་མེད་བླ་མའི་བཀའ་བཙན་ལམ་དུ་བཏང་། །འོན་ཀྱང་བྱིན་རླབས་གཏེར་གཞུང་རྩ་བའི་ཚིག །ཟུར་རྩམ་མ་ཉམས་བླ་མས་ལེགས་སྩལ་བའི། །མཚམས་སྦྱོར་གྱིས་བརྒྱན་ཕྱག་ལེན་ཇི་བཞིན་པར། །རང་བཟོའི་ལྷད་ཀྱི་མ་གོས་འཇུག་བདེར་བགྱིས། རང་བློ་དམན་པས་ནོང་པར་གྱུར་སྲིད་ན། །ཚེ་རབས་སྡིག་དང་ལྷན་གཅིག་སྙིང་ནས་བཤགས། །འདི་བྱས་ཕྲ་མོའི་བསོད་ནམས་ཐོབ་སྲིད་ན། །གསང་ཆེན་བསྟན་པ་རྒྱས་པའི་རྒྱུ་རུ་བསྔོ། །དེ་ལྟར་བཅོམ་ལྡན་འདས་མ་ཕག་གདོང་དམར་མོའི་དབང་ཆོག་བཀའ་རྒྱ་མ་ཇི་ལྟར་བྱ་བའི་ཚུལ་ཀླགས་ཆོག་ཏུ་བྱས་པ་འདི། བླ་མ་འགྱུར་མེད་བློ་ལྡན་དང་འཁོར་ལོའི་མགོན་པོ་གྲུབ་དབང་བསྟན་འཛིན་སྙིང་པོ་ཟུང་གིས་བཀའ་སྩལ་ལྡོག་མེད་ལ་གཡར་དམ་བགྱིས་ཏེ་སྙིགས་མཐའི་བན་ཆུང་ངག་དབང་བློ་གྲོས་ཀྱིས་གཏེར་གཞུང་ཉམས་མེད་སོར་བཞག་བླ་མའི་ཕྱག་བཞེས་བཞིན་མཚམས་སྦྱོར་རྣམས་ཀྱང་བླ་མའི་གསུངས་དང་ཡེ་ཤེས་དབབ་དམིགས་གསར་བཀོད་དང་བཅས་གཞན་ཡང་རིགས་མཐུན་ནས་ཁ་འགེངས་འོས་རྣམས་ཅུང་ཟད་བླངས་པས་བརྒྱན་ཏེ་བཀོད་པ་ལ། ཀུན་ཏུ་རྨོངས་པ་ཤས་ཆེ་བའི་དབང་གིས་མ་རྟོགས་པ་དང་ལོག་པར་རྟོགས་པ་དང་གསང་སྔགས་ཟབ་མོར་འཆོལ་སྤྱོད་གསང་སྒྲོགས་སོགས་རས་ཆོད་བགྱིས་པའི་ཉེས་གྱུར་རྣམས་བླ་མ་དང་ཡེ་ཤེས་ཀྱི་མཁའ་འགྲོ་ཆོས་བདག་དམ་ཅན་སྲུང་མའི་ཚོགས་དང་བཅས་པའི་སྤྱན་སྔར་ཚེ་རབ་དུ་མ་ནས་བསགས་པའི་སྡིག་ལྟུང་དང་ལྷན་གཅིག་སྙིང་ནས་མཐོལ་ཞིང་བཤགས་སོ། །འདི་ཕྱིར་སྒྲིབ་མེད་ཚངས་པའི་དངོས་གྲུབ་དམ་པ་སྩལ་དུ་གསོལ། །

ཕག་མོ་རིགས་བཞིའི་ཆོས་སྐོར་ལས་ཕག་སྔོན་སྐོར།

སྒྲུབ་ཐབས་དངོས་གྲུབ་འབྱུང་གནས།

ཕག་མོ་སྔོན་མོའི་ཟབ་ཐིག་ལས༔ སྒྲུབ་ཐབས་དངོས་གྲུབ་འབྱུང་གནས་བཞུགས༔ མ་བརྒྱུད་མཁའ་འགྲོའི་ལྷ་ཚོགས་རྣམས་ལ་འདུད༔ དད་བརྩོན་ཤེས་རབ་ལྡན་པའི་རྣལ་འབྱོར་པས༔ མཁའ་འགྲོའི་དུས་ཆེན་གཟའ་སྐར་ཤིས་པའི་ཚེ༔ ད་ལ་རྐྱང་ནུལ་དྲི་བཟང་ཆང་གིས་བྱུག༔ དབུས་སུ་ཆོས་འབྱུང་ཐོད་པའི་ར་བས་བསྐོར༔ རྡོ་རྗེའི་ཕྲེང་བ་མེ་ཡི་རི་མོ་འབྲི༔ མཛེས་པའི་ཚོན་བྱུག་དབུས་སུ་ཁྲིའུའི་ཁར༔ མཁའ་འགྲོའི་གཏོར་མ་མཁའ་འགྲོའི་སྐུ་ཡིས་བརྒྱན༔ དར་ལྗང་གུར་ཕུབ་སྨན་རཀ་བླ་རྡོ་དང་༔ ཕྱི་ནང་མཆོད་པའི་བྱེ་བྲག་ཚང་བར་བཤམས༔ དཀར་ཕྱོགས་མཆོད་ཅིང་ནག་ཕྱོགས་བགེགས་རིགས་སྦྱངས༔ སྐྱབས་སེམས་སྔོན་བཏང་སྣང་སྟོང་འགགས་མེད་ཀློང་༔ རང་བྱུང་སེམས་ཉིད་ངོ་བོ་ཡི་གེ་ས༔ འོད་ཟེར་སྤྲོ་བསྡུ་བསྒྱུར་བས་ཡེ་ཤེས་ཀྱི༔ ཕག་མོ་སྔོན་མོ་སྣ་ཚོགས་མཐར་ཕྱིན་མ༔ ཞལ་གཅིག་ཕྱག་གཉིས་སྤྱན་གསུམ་མཁའ་ལ་གཟིགས༔ གྲི་ཐོད་ཕྱག་རྒྱ་རུས་རྒྱན་གར་སྟབས་འཁྲབ༔ དུར་ཁྲོད་ཆས་བརྒྱན་ཡེ་ཤེས་མེ་དཔུང་འབར༔ ཞལ་གདངས་ལྗགས་འདྲིལ་མཆེ་གཙིགས་རྐན་སྒྲ་བརྡེབ༔ ཐོད་པས་དབུ་བརྒྱན་ཁ་ཊྭཱྂ་ག་ལ་འཁྱུད༔ ཕག་ཞལ་སྒྲ་ཡིས་སྲིད་གསུམ་འདར་ཞིང་འཁྱོམ༔ ལྗང་མོ་འབུམ་གྱི་དབུས་ན་ལྷམ་མེར་གསལ༔ ལས་ཀྱི་མཁའ་འགྲོ་འཕྲིན་ལས་དབང་མོ་ཆེ༔ ནུས་མཐུའི་དཔལ་ལྡན་དྲག་སྔགས་འཁོར་ལོས་སྒྱུར༔ འཕྲིན་ལས་མངའ་བདག་ཡེ་ཤེས་མཁའ་འགྲོ་མ༔ བཞེངས་ཤིག་བཞེངས་ཤིག་འབར་བའི་ཀློང་ནས་བཞེངས༔ གཏུམ་སྐད་ཕེམ་སྒྲའི་ང་རོ་འབྲུག་སྟོང་ལྡིར༔ ཕག་ཞལ་སྒྲ་སྒྲོག་ཁམས་གསུམ་དབང་དུ་སྡུད༔ ཞིང་ཆེན་གཡང་གཞི་ཁྲག་ཏུ་ཙ་ར་ར་ར༔ མི་མགོའི་ཕྲེང་བ་མང་པོ་ཁྲོལ་ལོ་ལོ༔ གནམ་ལྕགས་གྲི་གུག་མཁའ་ལ་ཡ་ལ་ལ༔ ཐོད་ཁྲག་དམར་པོ་ཐུགས་ཀར་སྐྱིལ་ལི་ལི༔ རྡོ་རྗེ་ཁ་ཊྭཱྂ་དབྱིངས་ན་ལྡེམས་སེ་ལྡེམ༔ དུག་སྦྲུལ་ཆུན་པོ་མང་པོ་ཉིལ་ལི་ལི༔ དུར་ཁྲོད་རུས་རྒྱན་སྐར་ལྟར་ཁྲ་ལ་ལ༔ དར་ཚོན་ཅོད་པན་སྤྲིན་ལྟར་སྤུངས་སེ་སྤུང་༔ སྟག་གི་ལྤག་པའི་ཤམ་ཐབས་ལྷབས་སེ་ལྷབ༔ རིན་ཆེན་སྣ་ཚོགས་རྒྱན་ཆ་སི་ལི་ལི༔ ཡེ་ཤེས་བསྐལ་པའི་མེ་དཔུང་འུར་རུ་རུ༔ འདོད་ཆགས་ཁྲག་གི་སེར་བ་ཤར་ར་ར༔ ཞེ་སྡང་དྲག་པོའི་གློག་དམར་ཀེམས་སེ་ཀེམ༔ གཏི་མུག་ནག་པོའི་མུན་པ་ཐིབས་སེ་ཐིབ༔ ང་རྒྱལ་དྲག་པོའི་ཐོག་རྒོད་ཉི་ལི་ལི༔ ཕྲག་དོག་འཁྲུག་པའི་འབྲུག་སྒྲ་འུར་རུ་རུ༔ མ་མོ་མཁའ་འགྲོ་ཐམས་ཅད་དབང་བསྒྱུར་ལ༔ ལྗང་མོ་འབུམ་གྱིི་འཁོར་དང་བཅས་པ་རྣམས༔ དྲག་པོའི་གནས་ནས་ཡེ་ཤེས་མཁའ་ལ་སྐྱོད༔ སྒྲུབ་པའི་གནས་འདིར་བྱིན་གྱིས་བརླབ་ཕྱིར་གཤེགས༔ མ་ཚོགས་མཁའ་འགྲོ་འདོད་པའི་དམ་ལ་འདུས༔ སྒྲུབ་པའི་མཁའ་འགྲོ་བསྐྱེད་པའི་སྐུ་ལ་ཐིམ༔ དབང་དང་དངོས་གྲུབ་སྩོལ་ཕྱིར་བརྟན་པར་བཞུགས༔ བསྐྱེད་རྫོགས་གཉིས་སུ་མེད་པའི་ཕྱག་གིས་འདུད༔ ཐབས་ཤེས་ཟུང་འཇུག་ཡེ་ཤེས་བདུད་རྩིས་མཆོད༔ སྐུ་བཞིའི་ཡུམ་མཆོག་སྐྱབས་གནས་མཆོག་ལ་བསྟོད༔ ས་ཀརྨ་དྷཀྐི་ནི་ས་མ་ཡ་ཧྲིང་ཧྲིང་ཕེམ་ཕེམ་ཛཿཛཿཨ་ཝེ་ཤ་ཡ་ཨ་ཨཱ༔ མཁའ་དབྱིངས་དག་པའི་ཀློང་ནས་ཡེ་ཤེས་ཀྱི༔ ལྗང་མོ་འབུམ་སྡེ་སྣ་ཚོགས་མཐར་ཕྱིན་མ༔ རང་རིག་ངོ་བོ་སྐྱེ་འགག་མེད་པའི་རྩལ༔ བསྙེན་དང་བསྒྲུབ་པ་སྣང་སྟོང་འདུ་འཕྲོ་བསྒྱུར༔ དུས་གསུམ་བདེ་གཤེགས་འབུམ་ཕྲག་མཁའ་འགྲོའི་ཚོགས༔ ཐུགས་རྗེ་བྱིན་རླབས་ཁམས་གསུམ་འཁོར་འདས་བཅུད༔ ནུས་པས་དབང་བསྡུས་རྣལ་འབྱོར་བདག་ལ་བསྟིམ༔ བདེ་སྟོང་དབྱིངས་རྒྱས་ཉམས་རྟོགས་འོད་དུ་འབར༔ ཉི་དཀྱིལ་ས་བོན་སྔགས་ཀྱི་ཕྲེང་བ་ལ༔ ཤེས་རབ་རིག་པའི་ཕྲེང་ཐག་བརྒྱུད་དེ་འཁོར༔ ནད་བཟློག་བགེགས་བསད་བར་ཆད་དབྱིངས་སུ་བསལ༔ སྐུ་དང་ཡེ་ཤེས་འདུ་འབྲལ་མེད་པའི་ཀློང་༔ རང་བྱུང་སྙིང་པོའི་སྒྲ་དབྱངས་དི་རི་རི༔ ས་ཀརྨ་དྷཀྐི་ན་བྷ་ར་ཧི་ས་མ་ཡ་ཧྲིང་ཧྲིང་ཛཿཛཿནད་གདོན་བགེགས་དང་བར་ཆད་སརྦ་མཱ་ར་ཡ་ཧཱུྃ་བྷྱོ་ཧཱུྃ་ཕཊ་རཾ་རཾ་སྭཱ་ཧཱ༔ ཡང་བསྐྱེད་ཡང་གསལ་བྱིང་རྨུགས་འཐིབ་གསུམ་སྤང་༔ མཁའ་འགྲོའི་སྐུ་ལས་འོད་དཔུང་ཚྭ་ཚྭ་དང་༔ མེ་ཞགས་གློག་ཕྲེང་ཁྲག་སེར་ཐོག་གི་ཆར༔ ཁྲོ་མོ་ལྗང་མོ་མཚོན་ཐོགས་གྲངས་མེད་འབུམ༔ སྟོང་གསུམ་ཁྱབ་པར་སྤྲུལ་ཏེ་ཡོངས་སུ་བཀང་༔ བར་ཆད་གདོན་བགེགས་སྔོན་ལས་འཕྲལ་རྐྱེན་ངན༔ བྱད་མ་ལྷ་བསྲུང་བསྐྲད་གཟིར་རྡུལ་དུ་བརླག༔ ཤ་ཟོས་ཁྲག་འཐུངས་རུས་པ་ཆོམ་ཆོམ་བཞེས༔ འབྱུང་པོའི་ཚོགས་ལས་དབྱིངས་སུ་རྒྱལ་བར་བསམས༔ སྔགས་ཀྱི་ཐུན་བཟུང་སྒོ་གསུམ་བྱུང་རྒྱལ་བཏང་༔ དྲན་ཐང་སྨྱོན་སྤྱོད་ཡ་ངར་ཐོག་བརྫིས་སྤྱོད༔ རིག་པ་ངར་བསྐྱེད་སྙིང་པོ་འབུམ་ཚོ་གཅིག༔ བརྩོན་ཏེ་བསྒྲུབས་པས་དངོས་ཉམས་རྨི་ལམ་ལ༔ ཞལ་མཇལ་གསུང་ཐོས་མཁའ་འགྲོའི་ལུང་བསྟན་འཐོབ༔ དར་འཕྱར་དུང་འབུད་རོལ་མོའི་སྒྲ་སྒྲོགས་ཤིང་༔ དམག་བརྒྱབ་དགྲ་བཅོམས་བྲག་གཤགས་ལིངས་བཏབ་སོགས༔ མདོར་ན་མཁའ་འགྲོ་གྲུབ་པའི་ལྟས་མང་ཡོང་༔ དེ་དུས་རེ་དོགས་ཕྲལ་ཞིང་རང་རིག་གི༔ རྩལ་སྣང་ཡེ་ཤེས་མཁའ་འགྲོ་ལམ་འཁྱེར་ངང་༔ དབང་བཞི་བསྒྲུབ་པའི་རྫས་ལས་ལེན་པར་བྱ༔ ཐུན་སྐབས་རྣམས་སུ་མཆོད་ཅིང་བསྟོད་པ་ནི༔ ཧཱུྃ༔ དཔལ་ལྡན་མཁའ་འགྲོ་སྣ་ཚོགས་མཐར་ཕྱིན་མ༔ ལྗང་མོ་འབུམ་གྱི་མཁའ་འགྲོ་འཁོར་བཅས་ལ༔ དབང་པོའི་མེ་ཏོག་ཤ་ཆེན་དུད་སྤྲིན་དང་༔ ཚིལ་ཆེན་མར་མེ་དྲི་ཆུའི་བྱུག་པ་དང་༔ དྲི་ཆེན་ཞལ་ཟས་རྐང་གླིང་རོལ་མོའི་སྒྲ༔ མཆོད་པར་འབུལ་ལོ་མ་ཆེན་དྷཀྐི་ཚོགས༔ ཤ་ལྔ་བདུད་རྩི་བྱང་སེམས་ཨ་མྲི་ཏ༔ མ་ཧཱ་རཀྟ་ལ་སོགས་མཆོད་པའི་རྫས༔ ཕྱི་ནང་མཆོད་ཚོགས་འདོད་ཡོན་རྣམ་པ་ལྔ༔ སྣ་ཚོགས་རྒྱན་གྱིས་སྤྲས་པའི་བཱ་ལིང་ཏ༔ མཆོད་པར་འབུལ་ལོ་མ་ཆེན་དྷཀྐིའི་ཚོགས༔ ཅེས་རྩ་སྔགས་ལ་མ་ཧཱ་མཾ་ས་རཀྟ་ཙིཏྟ་བྷ་ལིངྟ་བྷ་སུ་ཏ་ལ་ཁ་ཁ་ཁཱ་ཧི་ཁཱ་ཧི༔ བདུན་ནམ་ཉེར་གཅིག༔ ཧཱུྃ༔ རབ་ཏུ་གཏུམ་ཞིང་དུག་གསུམ་འབར་བའི་མ༔ འབུམ་ཕྲག་དྷཀྐིའི་འཕྲིན་ལས་གར་དབང་མོ༔ ཧ་ཧའི་སྒྲ་སྒྲོག་སྲིད་གསུམ་དབང་དུ་སྡུད༔ ནད་གདོན་བགེགས་དང་བར་ཆད་དབྱིངས་ནས་སེལ༔ སྒྲུབ་མཆོག་བུ་བཞིན་སྐྱོང་ལ་ཕྱག་འཚལ་བསྟོད༔ ཞི་རྒྱས་དབང་དྲག་མཆོག་ཐུན་དངོས་གྲུབ་དཔལ༔ སྒྲུབ་པའི་བུ་ལ་དུས་འདིར་སྩལ་བ་དང་༔ སྔོན་གྱི་དམ་བཅའ་གཉེན་པོ་བརྩེར་དགོངས་ཏེ༔ མཆོད་གཏོར་བཞེས་ལ་བཅོལ་བའི་འཕྲིན་ལས་མཛོད༔ ས་མ་ཡཱ༔ རྒྱ་རྒྱ་རྒྱ༔ དེ་ལྟར་མཆོད་བསྟོད་བསྙེན་སྒྲུབ་རྟགས་ཐོན་ནས༔ ཏིང་འཛིན་དབང་ལེན་གསོལ་བ་ཕུར་ཚུགས་གདབ༔ བླ་རྡོ་འཆང་ཞིང་མཁའ་འགྲོའི་གསོལ་མཆོད་འབུང་༔ ལས་སྦྱོར་བརྩམ་ཞིང་འགྲོ་ལ་ཕན་པར་གྱིས༔ མ་འོངས་ང་སྤྲུལ་སྐལ་ལྡན་ཉི་མ་གྲགས༔ གསང་སྤྱོད་དམ་སྲུངས་མཁའ་འགྲོའི་མཆོད་བསྟོད་བརྩོན༔ ཟབ་ཏིག་སྐོར་ལྔའི་གདམས་པ་ཡིད་བཞིན་ནོར༔ ཁྱད་པར་འཕགས་པ་སྣ་ཚོགས་མཐར་ཕྱིན་གྱི༔ ཡང་ཟབ་གདམས་པའི་སྙིང་པོ་དམ་པ་འདི༔ ལྗང་མོ་ཕྲིན་ལས་མཁའ་འགྲོ་སྒྲུབ་པའི་གནས༔ ཆགས་རུ་ཕུག་སྔོན་རྒྱ་གྲམ་རིས་ཀྱི་གཡས༔ རྡོ་ཆོལ་གསུམ་པའི་གོང་མར་རྒྱས་བཏང་སྟེ༔ བཀའ་ཡི་བསྲུང་མར་གཉེར་བྱང་གཏད་པ་འདི༔ དམ་སྲིའི་བར་གཅོད་རྐྱེན་གྱིས་མ་ཁྱེར་ན༔ ལྕགས་བྱ་ནག་པོའི་ལོ་ལ་ལོན་པར་འགྱུར༔ ནུས་པའི་མེ་འབར་བསྟན་དང་འགྲོ་ལ་ཕན༔ ཡུལ་ཕྱོགས་བདེ་ཞིང་ལེགས་པའི་ཡོན་ཏན་འཐོབ༔ དེ་ལས་འདས་ན་བརྡ་ཡིག །དང་༔ ཆར་པ་འབབས༔ སྲུང་མར་མཆོད་བསྟོད་ང་ལ་གསོལ་བ་ཐོབ༔ བསྐུལ་བྱང་གསལ་ན་ཆོལ་གསུམ་གོང་མ་ལོང་༔ ལས་ལྡན་རྣམས་ལ་རིམ་བཞིན་སྟོན་ཞིག་རྒྱ༔ དམ་ཚིག་མེད་པའི་སྐྱེ་འགྲོ་སེམས་ཅན་ལ༔ རབ་ཏུ་སྔོས་ཤིག་གསང་བའི་རྒྱ་ལ་འབུངས༔ སྐལ་ལྡན་ལས་འཕྲོ་ཅན་དང་འཕྲད་པར་ཤོག༔ ས་མ་ཡཱ༔ རྒྱ་རྒྱ་རྒྱ༔ གཏེར་རྒྱ༔ སྦས་རྒྱ༔ ཟབ་རྒྱ༔ གཉན་རྒྱ༔ སྲུང་མའི་བསྐུལ་བྱང་གུ་རུ་རིན་པོ་ཆེའི་ཐུགས་རྗེས་གསལ་བ་ལ་བརྟེན་ནས་བྱི་ཕོ་ཉི་མ་གྲགས་པས་ཆགས་རུ་ཕུག་སྔོན་ནས་མེ་ཡོས་ཧོར་ཟླ་གཉིས་པའི་ཚེས་བཅུ་བཞིའི་ཉིན་གུང་ལ་གདན་དྲངས་ཤིང་། ཡར་ཚེས་དགེ་བར་ཆགས་རུ་ཕུག་ནག་ཏུ་ཤོག་སེར་ལས་བསྒྱུར་བའོ། །མངྒ་ལཾ། །

དབང་ཆོག་དྲེགས་པ་ཚར་གཅོད།

ཕག་མོ་སྔོན་མོའི་ཟབ་ཐིག་ལས༔ དབང་ཆོག་དྲེགས་པ་ཚར་གཅོད་བཞུགས༔ ཕག་གདོང་མཁའ་འགྲོའི་ལྷ་ཚོགས་རྣམས་ལ་འདུད༔ བསྙེན་སྒྲུབ་དྲོད་རྟགས་ཐོབ་པའི་རྣལ་འབྱོར་པས༔ མཁའ་འགྲོའི་གཏོར་མར་ཙཀ་ལི་དར་གུར་ཕུབ༔ དཀྱིལ་འཁོར་དབུས་འགོད་སྨན་རག་གྲི་གུ་དང་༔ རྩེ་གསུམ་གཞུང་ལྟར་བསྒྲལ་ལས་ཆས་རྣམས་དང་༔ ལིངྒ་ཁྲོ་ལྕགས་སྣོད་བཞག་དར་ནག་བཀབ༔ ལྟ་བའི་གདེང་བསྐྱེད་བསྙེན་སྒྲུབ་ཁ་ཡང་གསོ༔ འཛབ་ཀྱི་གནད་བསྣུན་དམིགས་པའི་འདུ་འཕྲོ་བསྒྱུར༔ ལས་བུམ་བསྐྱེད་ཅིང་བསྒོམ་བཟླས་མཆོད་བསྟོད་མཐར༔ སྙིང་པོ་བཟླས་ཤིང་ཏིང་འཛིན་དབང་བཞི་བླངས༔ དམ་ཚིག་ཚུལ་དང་ལྡན་པའི་སློབ་བུ་ནི༔ ལྔ་གསུམ་བདུན་ལས་མང་བར་མི་བྱ་ཞིང་༔ ནམ་གྱི་སྲོད་ལ་གོ་མཚོན་མཎྜལ་དབུལ༔ ཁྲུས་ནས་ཕྱུངས་ཤིང་བགེགས་སྦྱངས་བསྲུང་འཁོར་བསྒོམས༔ འདུན་པའི་སེམས་བསྐྱེད་སྐྱབས་སེམས་དམ་ཚིག་ནོད༔ དབང་གི་དོན་དུ་གསོལ་བ་འདི་ལྟར་གདབ༔ ཧཱུྃ༔ རྡོ་རྗེ་འཆང་དབང་ལས་ཀྱི་མཁའ་འགྲོ་མ༔ བདག་ཅག་འདིར་ཚོགས་རིགས་ཀྱི་བུ་རྣམས་ལ༔ ལས་ཀྱི་མཁའ་འགྲོའི་དབང་གི་སྨིན་གྲོལ་མཆོག༔ ཡང་དག་ཉིད་དུ་སྩལ་བར་མཛད་དུ་གསོལ༔ གསུམ༔ གནས་གསུམ་ཁྲག་ཆང་བསྲེས་པའི་ཐིག་ལེས་བརྒྱན༔ སྐུ་གསུང་ཐུགས་ཀྱི་ས་བོན་གསལ་ཡང་གདབ༔ དཔོན་སློབ་ཐམས་ཅད་མཁའ་འགྲོའི་གར་སྟབས་བསྒྱུར༔ ལྷར་བསྐྱེད་རོལ་མོ་འབིར་ཞིང་སྤྱན་འདྲེན་བསྟིམ༔ གུ་གུལ་ནག་པོ་གྲི་ཀླད་ཤ་ཆེན་བསྲེག༔ ཏིཥྛ་བཛྲ་བརྗོད་ཅིང་རྒྱས་ཀྱང་གདབ༔ ས་མ་ཡཱ༔ དེ་ནས་གཏོར་མ་མཁའ་འགྲོར་གསལ་བ་དེ༔ སློབ་བུའི་ལུས་བསྟིམ་འདི་སྐད་བརྗོད་པར་བྱ༔ ཧཱུྃ༔ དཔལ་ལྡན་མཁའ་འགྲོ་རྡོ་རྗེ་རྣལ་འབྱོར་མ༔ འཕྲིན་ལས་མཁའ་འགྲོ་ལྗང་མོ་འབུམ་གྱི་སྡེ༔ སྣ་ཚོགས་མཐར་ཕྱིན་འཁོར་བཅས་སྐུ་ཡི་དབང་༔ སྐལ་ལྡན་བུ་མཆོག་རྣམས་ལ་ཡོངས་རྫོགས་ཤོག༔ ས་ཀརྨ་དྷཀྐི་བྷ་ར་ཧི་ཀཱ་ཡ་ཨབྷི་ཥིཉྩ་ཨཱོཾ༔ ལྕང་ལོ་ཅན་གྱི་བྷནྡྷར་རཀྟ་ཐོགས༔ སློབ་བུའི་མགྲིན་པར་བསྐུར་ཞིང་ངག་ཏུ་སྦྱིན༔ ཧཱུྃ༔ ལྕང་ལོ་ཅན་གྱི་བྷན་དྷའི་སྣོད་ཡངས་དབུས༔ དགྲ་བགེགས་བསྒྲལ་བའི་ཁྲག་གི་རྒྱ་མཚོར་བསྐྱིལ༔ སྐལ་ལྡན་རིགས་ཀྱི་བུ་ལ་དབང་བསྐུར་བས༔ སྣ་ཚོགས་མཐར་ཕྱིན་གསུང་གི་དབང་ཐོབ་ཤོག༔ ས་ཀརྨ་དྷཀྐི་བྷ་ར་ཧི་ཝཱཀྐ་ཨ་བྷི་ཥིཉྩ་ཨཱཿ གནམ་ལྕགས་གྲི་ཁུག་སློབ་བུའི་སྙིང་ཁར་སྦྱིན༔ ཧཱུྃ༔ གནམ་ལྕགས་ཞུན་མའི་གྲི་གུག་ཡ་ལ་ལ༔ མཐིང་ནག་དར་གྱི་ཅོད་པཎ་པུ་རུ་རུ༔ ལྗང་མོ་འབུམ་སྡེ་འཁོར་བཅས་ཐུགས་ཀྱི་དབང་༔ སྐལ་ལྡན་བུ་མཆོག་རྣམས་ལ་དབང་སྐུར་བས༔ སྣ་ཚོགས་མཐར་ཕྱིན་ཐུགས་ཀྱི་དབང་ཐོབ་ཤོག༔ ས་ཀརྨ་དྷཀྐི་བྷ་ར་ཧི་ཙིཏྟ་ཨ་བྷི་ཥིཉྩ་ཧཱུྃ༔ རྩེ་གསུམ་སློབ་བུའི་ལག་ཏུ་གཏད༔ ཧཱུྃ༔ ལྕགས་སྣ་དགུ་ལས་གྲུབ་པའི་ཁ་ཊཾ་ཁ༔ མི་མགོ་སྐམ་རློན་རྒྱན་ཆ་ཁྲ་ལ་ལ༔ ཚེ་ཡི་བུམ་པ་དགོས་འདོད་ཀུན་འབྱུང་གནས༔ རྒྱ་གྲམ་འབར་བས་ཀླད་ཁྲག་དཀྲུགས་པར་བྱེད༔ ཡེ་ཤེས་ལྔ་ལྡན་ཅོད་པཎ་པུ་རུ་རུ༔ ལྗང་མོ་འབུམ་སྡེའི་ཡོན་ཏན་དབང་ཐོབ་ཤོག༔ ས་ཀརྨ་དྷཀྐི་བྷ་ར་ཧི་རཏྣ་ཨ་བྷི་ཥིཉྩ་ཏྲཾ༔ ཕྲིན་ལས་བསྒྲལ་དབང་གཞུང་ལྟར་སྦྱིན་པར་བྱ༔ ས་མ་ཡཱ༔ རྒྱ་རྒྱ་རྒྱ༔ ཨེ་མ་མཁའ་འགྲོའི་དབང་མཆོག་གསང་བའི་བཅུད༔ དུར་ཁྲོད་བརྒྱད་དུ་སྤྱོད་པ་སྤྱད་པའི་ཚེ༔ ཡེ་ཤེས་མཁའ་འགྲོ་རྡོ་རྗེ་རྣལ་འབྱོར་མས༔ འབུམ་ཕྲག་མཁའ་འགྲོ་དབང་བསྡུས་བདག་ལ་སྩལ༔ དེས་ན་བརྗོད་པར་དཀའ་བའི་གདམས་པ་འདི༔ ཕྱི་མའི་དུས་ཀྱི་སྐལ་ལྡན་ཕོ་མོའི་དོན༔ ཡི་གེའི་རིས་བཏབ་རིན་ཆེན་གཏེར་དུ་སྦས༔ ལན་གཅིག་བསྐལ་པ་དུས་ཀྱི་ཐ་མ་ལ༔ འགྲོ་བ་འདྲེན་པའི་བུ་དང་འདི་འཕྲད་ན༔ སངས་རྒྱས་བསྟན་པ་ཡུན་དུ་བསྲིང་བར་ཤོག༔ ས་མ་ཡཱ༔ རྒྱ་རྒྱ་རྒྱ༔ བདག་ཉི་མ་གྲགསཔས་ཁམས་སྲིན་མོ་རྫོང་གི་ཆགས་རུ་ཕུག་སྔོན་ནས་གུ་རུ་རིན་པོ་ཆེ་དང་སྲུང་མས་བསྐུལ་བྱང་གསལ་བ་ལ་བརྟེན་ཏེ་སྤྱན་དྲངས་ཤིང་ཆགས་རུ་ཕུག་ནག་ཏུ་ཤོག་སེར་ལས་བསྒྱུར་བ་མངྒ་ལཾ། །

འཕྲིན་ལས་མཁའ་འགྲོའི་བླ་རྡོ།

ཕག་མོ་སྔོན་མོའི་ཟབ་ཐིག་ལས༔ འཕྲིན་ལས་མཁའ་འགྲོའི་བླ་རྡོ་བཞུགས༔ ཡེ་ཤེས་མཁའ་འགྲོ་ཕག་གདོང་མ་ལ་འདུད༔ ལས་དང་སྐལ་བར་ལྡན་པའི་རྣལ་འབྱོར་པས༔ མཁའ་འགྲོ་བསྒྲུབ་དང་མཁའ་འགྲོ་བསྟེན་པའི་ཕྱིར༔ མཁའ་འགྲོའི་ཐུགས་ཏིག་བླ་རྡོ་འདི་བཞིན་འབད༔ རྒྱ་ཤོག་དྲིས་བྱུག་སྣག་ཚར་ན་ལན་གདབ༔ དྲག་པོའི་འགྲུབ་སྦྱོར་རྣལ་འབྱོར་སེམས་བསྐྱེད་དེ༔ མཁའ་འགྲོའི་ལྟེ་བར་མུ་ཁྱུད་རིམ་ལྔ་བསྐོར༔ དབུས་སུ་ས་བོན་འདོད་གསོལ་ཤམ་བུ་འབྲི༔ ཕྱི་རིམ་རྩིབས་བཞིར་ཧ་རི་ནི་ས་བཀོད༔ རྩིབས་མཆན་བཞི་ལ་དགྲ་བགེགས་བྱད་མ་དང་༔ གནོད་བྱེད་ཟློག་ཅེས་བྱ་བའི་འདོད་གསོལ་སྦྱར༔ ཕྱི་རིམ་མུ་ཁྱུད་ཉི་ཤུ་རྩ་བཞི་དང་༔ སུམ་ཅུ་སོ་ལྔའི་ཡུལ་དང་དུར་ཁྲོད་བརྒྱད༔ དཔའ་བོ་མཁའ་འགྲོ་རྣམས་ཀྱི་མཚན་སྔགས་ལ༔ དངོས་གྲུབ་སྩོལ་བའི་འདོད་གསོལ་སྦྱར་བ་བཀོད༔ དེ་ཡི་ཕྱི་རིམ་གཙུག་ཏོར་ནག་མོ་འདྲི༔ དེ་ཡི་ཕྱི་རིམ་ཨཱ་ལི་ཀཱ་ལི་དང་༔ རྟེན་འབྲེལ་སྙིང་པོས་ཡོངས་སུ་ཁེངས་པར་བཀང་༔ ཆད་ལྷག་བྲིས་བསུབས་ནོར་འཁྲུལ་སྤང་ཏེ་གཟབས༔ གནས་ཆེན་རྣམས་ཀྱི་ས་སྣ་རྡོ་སྣ་དང་༔ གཙང་མའི་རཀྟ་མཚལ་དང་ལི་ཁྲི་བཏབ༔ རིགས་ལྡན་ལྔ་ཡི་སྐྲས་བཅིངས་དར་ཚོན་དྲིལ༔ སྒྲུབ་པའི་དུས་དགྲམ་རྒྱུན་དུ་ལུས་ལ་བཅང་༔ མཁའ་འགྲོ་དངོས་བསྐྱེད་རབ་གནས་ལོ་དུས་བསྐྱར༔ མ་དང་མཁའ་འགྲོ་ལུས་དང་གྲིབ་ལྟར་འགྲོག༔ བརྩམས་པའི་འཕྲིན་ལས་ཐམས་ཅད་ཐོགས་མེད་འགྲུབ༔ བར་ཆད་ཚོགས་ཞི་བྱད་དང་རྦོད་གཏོང་ཟློག༔ མ་དག་འགྲོ་ལ་གསོངས་ཤིག་ཨ་ཐཾ་རྒྱ༔ ས་མ་ཡཱ༔ རྒྱ་རྒྱ་རྒྱ༔ གཏེར་རྒྱ༔ སྦས་རྒྱ༔ ཟབ་རྒྱ༔ མཁའ་འགྲོའི་བཀའ་ཡི་རྒྱ༔ ས་མ་ཡཱ༔ རྒྱ་རྒྱ་རྒྱ༔ རིགས་འཛིན་ཉི་མ་གྲགས་པས་ཆགས་རུ་ཕུག་སྔོན་ནས་གདན་དྲངས་པའོ། །མངྒ་ལཾ། །

བཟློག་པ།

ཕག་མོ་སྔོན་མོའི་ཟབ་ཐིག་ལས༔ བཟློག་པའི་ལས་མཐའ་བཞུགས་སོ༔ ཡེ་ཤེས་མཁའ་འགྲོ་ཕག་གདོང་ལྗང་མོ་ལ༔ གུས་པས་འདུད་དོ་ཕྲིན་ལས་རྒྱལ་བར་མཛོད༔ འདི་ནས་མ་འོངས་ཕྱི་མའི་བསྐལ་པ་ལ༔ སེམས་ཅན་ཀུན་གྱི་མི་དགེའི་ལས་སྤྱོད་པས༔ ལས་ཀྱི་བདེན་འབྲས་འགྲོ་བའི་ཁམས་ལ་འཆར༔ མི་འདོད་པ་ཡི་སྡུག་བསྔལ་སྣ་ཚོགས་སྤྱོད༔ ནད་མུག་མཚོན་གསུམ་གློ་བུར་ཡེ་འགྲོགས་འཐབ༔ དེ་ཚེ་བྱང་ཆུབ་སེམས་ལྡན་རྣལ་འབྱོར་པས༔ མཁའ་འགྲོ་སྒྲུབ་ཅིང་མཁའ་འགྲོའི་ལས་སྦྱོར་འདི༔ བརྩམས་པས་འཕྲལ་གྱི་འགྲོ་བའི་བར་ཆད་ཞི༔ ས་མ་ཡཱ༔ རྒྱ་རྒྱ་རྒྱ༔ གཞུང་ལྟར་མཁའ་འགྲོ་ཆེན་མོའི་གཏོར་བཟློག་བཤམས༔ དུར་ཁྲོད་རི་གཉེན་རྡོ་ནག་ཟུར་གསུམ་དགུ༔ དུག་ཁྲག་གྲི་རྐང་སྐྱུག་གུས་སྔགས་འདི་འགོད༔ བྱད་གཏད་ཁྲམ་གསུམ་རྐྱེན་ངན་བར་ཆད་ཐམས་ཅད་བྷྱོ་བཟློག༔ ཧཱུྃ་བྷྱོ་ཛ་བཟློག་ཅི་མང་འགོད་པར་བྱ༔ ཡུག་སའི་སླང་ངར་བླུག་སྟེ་ཤར་དུ་འགོད༔ ཕུང་ཤུལ་ས་དང་ལྷ་འདྲེ་འཚུབས་པའི་ས༔ གཡུལ་འཁྲུག་ས་དང་དུར་ཁྲོད་གཉེན་པོའི་ས༔ ཆུ་བསྐོར་ས་དང་མཛེ་ཕོ་ཉལ་མལ་ས༔ རྔ་མོང་ཤི་ཤུལ་ཡུག་སའི་ཉལ་མལ་ས༔ ཚེ་ཟད་ས་ཏེ་ས་སྣ་དགུ་བོ་སྦྱར༔ དུག་ཁྲག་ཆུས་སྦྲུས་ཟོར་རྐང་དགུ་བཟོ་ཞིང་༔ ས་མ་ཡཱ་ཨེ་ཀ་ཧེ་དུན་བྱད་གཏད་ཁྲམ་དང་བར་ཅད་ཐམས་ཅད་བཟློག་བྷྱོ་ཧཱུྃ་ཕཊ༔ ལོག་གསུམ་ངོས་ལ་ཚངས་བར་རིས་སུ་བྲི༔ རྩང་གིས་བརྒྱན་ཞིང་ཚེ་དང་ཡུངས་ཀར་བརྒྱན༔ ཞིང་ཆེན་པགས་སྟེང་དཀྱིལ་འཁོར་ལྷོ་ན་འགོད༔ དུར་ཁྲོད་ས་ལ་ཟོར་རྐོང་དགུ་བཟོ་ཞིང་༔ ཛ་བྷྱོ་ཐུན་བྷྱོ་དགྲ་བགེགས་བྱད་མའི་སྟེང་དུ་རཾ་བྷྱོ་རཾ་ཏིག་རཾ་ཤག་རཾ་རཾ་རཾ༔ ལོག་ལ་འགོད་ཅིང་རོ་རས་སྡོང་བུ་སྦྱར༔ མི་རྟ་ཁྱི་སྤྱང་གཅན་གཟན་ཅི་མང་གི༔ ཚིལ་དང་རྐང་མར་སྦྱར་བའི་མར་ཁུས་བྲན༔ གཅན་གཟན་པགས་སྟེང་ནུབ་ཀྱི་ཕྱོགས་སུ་འགོད༔ མཛེ་ཐོད་ཡང་ན་རབ་ཆད་ནག་མོའི་མགོ༔ མཆོག་ནི་ཡུག་ས་དགུ་ཕོག་ཐོད་པ་སྟེ༔ ནང་དུ་དུག་དང་ཁྲག་སྣ་བརྒྱའམ་དགུ༔ ཆུ་མིག་བྱང་ལྟས་དགུ་ཡི་ཆུ་སྣས་བརྒྱན༔ ཕུང་རེ་ནག་པོ་འོག་ཏུ་བཏིངས་པའི་ཁར༔ གྲི་ལྕགས་ཁྲི་འུས་མདའ་མཚོན་ཨོཾ་སྟེང་བྱང་༔ དེ་དག་སྟེང་དུ་ཁྲིའུ་མཛེས་པའི་ཁར༔ རིགས་བཞིའི་གཏོར་མ་སྐུ་དང་དར་གདུགས་བརྒྱན༔ ཕྱག་གི་རྩང་དང་འཚེ་དང་ཡུང་དཀར་གཟུགས༔ རོ་རས་ཞུན་ཆེན་དཔལ་འབར་དག་གིས་བརྒྱན༔ ལས་ཀྱི་གཞུང་བསྲོང་གཙོ་མོའི་བསྙེན་བསྒྲུབ་གཟིར༔ བཟློག་པའི་སྔགས་དམིགས་བསད་པའི་ལས་ལ་སྦྱོར༔ ཁྲག་འཐུང་བཛྲ་དྷཀྐི་འབུམ་ཕྲག་འཕྲོས༔ དགྲ་བགེགས་ཐམས་ཅད་ཁ་ཕུང་རྗེས་མེད་བསམ༔ ཨ་ཧ་རི་ནི་ས་ར་ས་ཡ་སྲོག་ལ་འདུ་འདུ༔ སྡོ་པ་ཤ་སྲོག་ལ་འདུ་འདུ༔ ནི་པ་ཤ་སྲོག་ལ་འདུ་འདུ༔ གྷུ་པ་ཤ་སྲོག་ལ་འདུ་འདུ༔ གནོད་བྱེད་དགྲ་བགེགས་ཐམས་ཅད་མ་ར་ཡ་སོད་སོད་བྷྱོ་བྷྱོ་བཟློག་བཟློག༔ ཅེས་བཟླས་རཏྣ་དྷཀྐི་འབུམ་ཕྲག་འཕྲོས༔ དགྲ་བགེགས་བྱད་མ་ཐམས་ཅད་བརླག་པར་བསམ༔ ཨ་ཧ་རི་ནི་ས་ཐིབ་ཐིབ་མྱོག་མྱོག་ལམ་ལམ་གནོད་བྱེད་དགྲ་བགེགས་ཐམས་ཅད་མ་ར་ཡ་སོད་ཅིག་བྷྱོ་བཟློག་ཧཱུྃ་ཕཊ༔ བརྒྱ་སྟོང་ཁྲི་འབུམ་སྐབས་ལྟར་ལས་ལ་སྦྱར༔ བཟློག་བསྒྱུར་བཅོལ་ཞིང་གསེར་སྐྱེམས་ཕུད་ཀྱིས་མཆོད༔ རྡོ་ཐུན་ཡུག་སའི་སྐྲ་ཡི་འུར་རྡོར་སྐྱོན༔ གདོང་ལ་དར་མཚོན་དུག་ཁྲག་ཕྱེད་གཟུགས་ཅན༔ སྐྱེས་པ་མིང་རུས་མི་གཅིག་དགུ་ཡི་འཕེན༔ ས་ཐུན་སྔགས་པ་བདུད་ཆས་སྤྲས་པ་དགུ༔ གདོང་ལ་སེར་ཚོན་དུག་ཁྲག་ཕྱེད་གཟུགས་ཅན། རྔམས་པའི་སྟངས་སྟབས་བསྒྱུར་ཞིང་དགྲ་ཕྱོགས་འཕེན༔ མེ་ཐུན་བོན་པོ་དམར་ནག་ཕྱེད་གཟུགས་དགུས༔ སྤུ་གྲི་ཤར་བུའི་སྔགས་གཟེར་དགྲ་ལ་འཕེན༔ ཁྲག་ཐུག་གཙོ་བོ་ཡུག་སའི་ལག་ལ་ཐོགས༔ ཕུང་རེའི་གཡབ་མོ་ལྗང་ནག་ཕྱེད་གཟུགས་དགུས༔ དམོད་པའི་ཚིག་བཅས་དགྲ་བགེགས་ཕྱོགས་སུ་གཟིར༔ ས་མ་ཡཱ༔ རྒྱ་རྒྱ་རྒྱ༔ འདི་ལྟར་བརྩམས་པས་བྱད་དང་རྦོད་གཏོང་དང་༔ མི་མཐུན་བར་ཆད་ནད་གདོན་རྐྱེན་ངན་བྱུར༔ མཐའ་དམག་འཁྲུག་རྩོད་དུས་ཀྱི་ཡོ་ལངས་བཟློག༔ དེ་ཡི་ཕྱིར་ན་བསྟན་འགྲོའི་དཔལ་དུ་ཤོག༔ ས་མ་ཡཱ༔ རྒྱ་རྒྱ་རྒྱ༔ གཏེར་རྒྱ༔ སྦས་རྒྱ༔ ཟབ་རྒྱ༔ མཁའ་འགྲོའི་བཀའ་ཡི་རྒྱ༔ ས་མ་ཡཱ༔ རྒྱ་རྒྱ་རྒྱ༔ མེ་མོ་ཡོས་ཀྱི་ལོ་ལ་ཁམས་སྲིན་མོ་རྫོང་གི་ཆགས་རུ་ཕུག་སྔོན་ནས་གདན་དྲངས་ཤིང་ཤོག་སེར་བསྒྱུར་བ་མངྒ་ལཾ། །

ཟོར་གྱི་ཤོག་དྲིལ།

ཕག་མོ་སྔོན་མོའི་ཟབ་ཐིག་ལས༔ ཟོར་གྱི་ཤོག་དྲིལ་བཞུགས༔ ཡེ་ཤེས་མཁའ་འགྲོ་ཕག་གདོང་མ་ལ་འདུད༔ ཕྱི་མའི་དུས་ཀྱི་རྣལ་འབྱོར་སྒྲུབ་པ་པོས༔ བསྟན་འགྲོའི་དོན་དུ་བྱང་ཆུབ་སེམས་བསྐྱེད་ནས༔ མཐའ་དམག་འཁྲུག་རྩོད་ནད་ཡམས་རྐྱེན་བཟློག་ཚེ༔ ལྟ་བའི་གདེངས་བསྐྱེད་སྒོམ་པའི་གཟེངས་བསྟོད་ནས༔ ཉམས་རྟོགས་ཁ་སྤར་དྲག་པོའི་ཤུགས་ཕྱུངས་ཏེ༔ རྔམ་ཞིང་འཁྲུག་པའི་ཚུལ་གྱིས་འདི་ལྟར་བསྐུལ༔ ཧཱུྃ་བྷྱོ༔ ཤར་ནས་གཤེགས་པའི་དཀར་མོ་ཉི་ཁྲི་འབུམ༔ སྐུ་ཡི་ཤུགས་ཕྱུངས་ནུས་པའི་དྲག་རྩལ་བསྐྱེད༔ རྡོ་རྗེ་རིགས་ཀྱི་དཔའ་བོ་དཔའ་མོ་དང་༔ སྣང་སྲིད་འཁོར་འདས་ཐམས་ཅད་དབང་བསྒྱུར་ལ༔ དེ་རིང་དྲག་པོའི་ཟོར་གྱི་དཔུང་ལ་གཤེགས༔ དྲག་པོའི་སྔགས་ཀྱི་རྡོ་ཡི་ཆར་པ་ཡིས༔ མི་རུང་སྣ་དགུ་འཕུང་ཐབས་ཐམས་ཅད་ཟློག༔ ནད་མུག་མཚོན་ཁ་མཐའ་ཡི་དམག་དཔུང་སྒྱུར༔ དགྲ་གདོན་ཐམས་ཅད་ཐལ་བ་རྡུལ་དུ་རློག༔ ལྷོ་ནས་གཤེགས་པའི་སེར་མོ་ཉི་ཁྲི་འབུམ༔ སྐུ་ཡི་ཤུགས་ཕྱུངས་ནུས་པའི་དྲག་རྩལ་བསྐྱེད༔ རིན་ཆེན་རིགས་ཀྱི་དཔའ་བོ་དཔའ་མོ་དང་༔ སྣང་སྲིད་འཁོར་འདས་ཐམས་ཅད་དབང་བསྒྱུར་ལ༔ དེ་རིང་དྲག་པོའི་ཟོར་གྱི་དཔུང་ལ་གཤེགས༔ དྲག་པོའི་སྔགས་ཀྱི་ས་ཟོར་ཆར་པ་ཡིས༔ མི་རུང་སྣ་དགུ་འཕུང་ཐབས་ཐམས་ཅད་ཟློག༔ ནད་མུག་མཚོན་ཁ་མཐའ་ཡི་དམག་དཔུང་སྒྱུར༔ དགྲ་གདོན་ཐམས་ཅད་ཐལ་བའི་རྡུལ་དུ་རློག༔ ནུབ་ནས་གཤེགས་པའི་དམར་མོ་ཉི་ཁྲི་འབུམ༔ སྐུ་ཡིི་ཤུགས་ཕྱུངས་ནུས་པའི་དྲག་རྩལ་བསྐྱེད༔ པདྨ་རིགས་ཀྱི་དཔའ་བོ་དཔའ་མོ་དང་༔ སྣང་སྲིད་འཁོར་འདས་ཐམས་ཅད་དབང་བསྒྱུར་ལ༔ དེ་རིང་དྲག་པོའི་ཟོར་གྱི་དཔུང་ལ་གཤེགས༔ དྲག་པོའི་སྔགས་ཀྱི་མེ་ཟོར་ཆར་པ་ཡིས༔ མི་རུང་སྣ་དགུ་འཕུང་ཐབས་ཐམས་ཅད་ཟློག༔ ནད་མུག་མཚོན་ཁ་མཐའ་ཡི་དམག་དཔུང་སྒྱུར༔ དགྲ་གདོན་ཐམས་ཅད་ཐལ་བ་རྡུལ་དུ་རློག༔ བྱང་ནས་གཤེགས་པའི་ལྗང་མོ་ཉི་ཁྲི་འབུམ༔ སྐུ་ཡི་ཤུགས་ཕྱུངས་ནུས་པའི་དྲག་རྩལ་བསྐྱེད༔ ལས་ཀྱི་རིགས་ཀྱི་དཔའ་བོ་དཔའ་མོ་དང་༔ སྣང་སྲིད་འཁོར་འདས་ཐམས་ཅད་དབང་བསྒྱུར་ལ༔ དེ་རིང་དྲག་པོའི་ཟོར་གྱི་དཔུང་ལ་གཤེགས༔ དྲག་པོའི་སྔགས་ཀྱི་ཐོད་ཟོར་ཁྲག་ཆར་གྱིས༔ མི་རུང་སྣ་དགུ་འཕུང་ཐབས་ཐམས་ཅད་ཟློག༔ ནད་མུག་མཚོན་ཁ་མཐའ་ཡི་དམག་དཔུང་སྒྱུར༔ དགྲ་གདོན་ཐམས་ཅད་ཐལ་བ་རྡུལ་དུ་རློག༔ དབུས་ནས་གཤེགས་པའི་ནག་མོ་ཉི་ཁྲི་འབུམ༔ སྐུ་ཡི་ཤུགས་ཕྱུངས་ནུས་པའི་དྲག་རྩལ་བསྐྱེད༔ བྷུདྡྷུརིགས་ཀྱི་དཔའ་བོ་མཁའ་འགྲོ་དང་༔ སྣང་སྲིད་འཁོར་འདས་ཐམས་ཅད་དབང་སྒྱུར་ལ༔ དེ་རིང་དྲག་པོའི་ཟོར་གྱི་དཔུང་ལ་གཤེགས༔ དྲག་པོའི་སྔགས་ཀྱི་གཏོར་ཟོར་ཆར་པ་ཡིས༔ མི་རུང་སྣ་དགུ་འཕུང་ཐབས་ཐམས་ཅད་ཟློག༔ ནད་མུག་མཚོན་ཁ་མཐའ་ཡི་དམག་དཔུང་སྒྱུར༔ དགྲ་གདོན་ཐམས་ཅད་ཐལ་བ་རྡུལ་དུ་རློག༔ ཧཱུྃ་བྷྱོ༔ གཤེགས་ཤིག་ད་སྐྱོད་འབུམ་ཕྲག་མཁའ་འགྲོའི་ཚོགས༔ བཞེངས་ཤིག་བཞེངས་ཤིག་རྩ་གསུམ་རྒྱལ་བའི་ལྷ༔ ང་ནི་སྣང་སྲིད་འཁོར་འདས་ཀུན་གྱི་བདག༔ ཆེ་བཙན་དྲེགས་ཚོགས་ཐམས་ཅད་ང་ཡི་བྲན༔ ང་ནི་འབུམ་ཕྲག་མཁའ་འགྲོའི་གཙོ་མོ་སྟེ༔ ཁྲོས་མ་ནག་མོ་མ་ཚོགས་འབུམ་གྱི་བདག༔ གར་དགུའི་ཉམས་ཀྱི་སྟངས་སྟབས་ཡ་ལ་ལ༔ དུར་ཁྲོད་འཇིགས་པའི་ཆས་བརྒྱད་ཁྲོ་ལོ་ལོ༔ བསྐལ་པའི་མེ་དཔུང་དམར་ནག་ལྷབས་སེ་ལྷབ༔ རཀྟ་ཐོད་ཟོར་ཁྲག་མཚོ་མེར་རེ་རེ༔ དྲག་པོ་སྔགས་ཀྱི་རྡོ་ཟོར་ཉིལ་ལི་ལི༔ ས་ཟོར་ཟོར་ཀོང་མང་པོ་ཚུབས་སེ་ཚུབ༔ དམར་ཆེན་གཏོར་མའི་ཟོར་ནི་ཟངས་སེ་ཟང་༔ མདའ་མདུང་མཚོན་ཆའི་ཟོར་ནི་ཤར་ར་ར༔ ནད་མཚོན་དུག་རླངས་སྣ་ཚོགས་ཆི་ལི་ལི༔ དེ་རིང་ཟོར་འཕེན་དམ་ཉམས་དགྲ་ལ་འཕེན༔ དེ་རིང་ཟོར་འཕེན་གནོད་བྱེད་བགེགས་ལ་འཕེན༔ ཕོ་བརྒྱུད་མི་རབས་དྲུངས་ནས་ད་ཕྱུངས་ཤིག༔ མོ་བརྒྱུད་ཕྲུ་མ་མངལ་ནས་ད་སྐོམས་ཤིག༔ བུ་ཚ་རིགས་བརྒྱུད་རྩད་ནས་ད་ཆོད་ཅིག༔ གདོན་བགེགས་འབྱུང་པོ་ཐལ་བའི་རྡུལ་དུ་རློག༔ ཚེ་བསོད་དབང་ཐང་རླུང་གིས་ད་ཁྱེར་ལ༔ འདུ་བ་རྣམ་བཞི་དཀྲུགས་ལ་སྙིང་ཁྲག་ཕོས༔ དགྲ་ཤ་ཟོ་ཞིག་ཤ་ཟ་མཁའ་འགྲོ་འབུམ༔ དགྲ་ཁྲག་མཐུང་ཤིག་ཁྲག་འཐུང་མཁའ་འགྲོ་འབུམ༔ རུས་པ་མུར་ཞིག་རུས་མུར་མཁའ་འགྲོ་འབུམ༔ དོན་སྙིང་ཁྱེར་ཞིག་སྡེ་བརྒྱད་མཁའ་འགྲོ་འབུམ༔ དགྲ་གདོན་ཐམས་ཅད་ཐལ་བའི་རྡུལ་བཞིན་རློག༔ དྲག་པོའི་ལས་ཀྱི་འཕྲིན་ལས་གྲུབ་པར་མཛོད༔ ཅེས་བརྗོད་ཟོར་རྣམས་འཕེན་ཞིང་གཡབ་མོ་བརྡེབ༔ ཚིག་དོན་ལྟ་བུའི་དམིགས་པའི་འཕྲུལ་འཁོར་བསྒྱུར༔ དགྲ་བགེགས་ནད་གདོན་བགེགས་དང་བཅས་པ་རྣམས༔ ཐལ་བའི་རྡུལ་ལྟར་དམིགས་ཏེ་བཟློག་སྔགས་བཟླ༔ ལྟ་བའི་བྲོ་རྡུང་ཉམས་ཀྱི་གླུ་ལེན་ཞིང་༔ ཁྱུང་གིས་མཚམས་གཅོད་བསྲུང་བའི་འཁོར་ལོས་བསྒོ༔ བཀྲ་ཤིས་བསྔོ་སྨོན་རྒྱས་འདེབས་གནས་ལམ་བསྲུང་༔ ལས་བཞིའི་སྦྱིན་སྲེག་རྣམས་ཀྱིས་ཁ་བསྐང་ཞིང་༔ དགྲ་གདོན་ཐུ་ན་མནན་སྲེག་འབད་དེ་བསྒྲུབ༔ ས་མ་ཡཱ༔ རྒྱ་རྒྱ་རྒྱཿགཏེར་རྒྱ༔ སྦས་རྒྱ༔ ཟབ་རྒྱ༔ ས་མ་ཡཱ༔ རྒྱ་རྒྱ་རྒྱ༔ རིགས་འཛིན་ཉི་མ་གྲགས་པ་རྩལ་གྱིས་ཕུག་སྔོན་ནས་མེ་ཡོས་ལ་གདན་དྲངས་ཤིང་ཤོག་སེར་ལས་བསྒྱུར་བའོ། །མངྒ་ལཾ། །

ལས་ཚོགས་ཀྱི་ཤོག་དྲིལ།

ཕག་མོ་སྔོན་མོའི་ཟབ་ཐིག་ལས༔ ལས་ཚོགས་ཀྱི་ཤོག་དྲིལ་བཞུགས༔ ཡེ་ཤེས་མཁའ་འགྲོ་ཕག་གདོང་མ་ལ་འདུད༔ མ་འོངས་དུས་སུ་མཁའ་འགྲོའི་རྣལ་འབྱོར་པས༔ བསྙེན་སྒྲུབ་ལས་སྦྱོར་འཕྲིན་ལས་སྔོན་བཏང་ནས༔ བདག་གཞན་དོན་དུ་བྱང་ཆུབ་སེམས་བསྐྱེད་དེ༔ ལས་ཚོགས་འདི་རྣམས་ཚུལ་བཞིན་སྤྱོད་པར་བྱ༔ ས་མ་ཡཱ༔ རྒྱ་རྒྱ་རྒྱ༔ གྲི་ཤ་བཙན་དུག་ཤུ་དག་མུ་ཟི་དང་༔ སྒོག་གཅིག་སྤྱང་ཕག་ཝ་ཡི་བྲུན༔ རྫས་བརྒྱད་བསྡུས་ཏེ་མི་ཁྱི་ཡི༔ གང་རུང་པགས་པའི་ནང་དུ་གཏུམས༔ གནག་དང་ར་ལུག་ཕྱུགས་ཀྱི་སྐེ་ལ་གདགས༔ གོར་གྱི་རིགས་གསུམ་བསྲུང་བར་འགྱུར༔ ས་མ་ཡཱ༔ རྒྱ༔ ཨཱོཾ་བྷ་ར་དྷ་ས་བྷ་མ་ལ་ཀུནྡྷི་ལ་ཛ་ལ་ཡཱ༔ ཨཱོཾ་སམ་བྷ་ལ་བྷ་མ་ལ་་སྭཱ་ཧཱ༔ གི་ཝང་ཅུ་གང་ཆུ་ལ་སྔགས༔ བརྒྱ་རྩ་བཟླས་ཏེ་ཁོང་དུ་གཏོང་༔ གློ་གོར་ཧོར་གསུམ་གནོད་པ་ཐུབ༔ ས་མ་ཡཱ༔ རྒྱ༔ ཨཱོཾ་ཁྲག་ཉལ་རཾ་སོད༔ སེར་རྩི་སྦྱར་བའི་སྣག་ཚས་འདྲི༔ བརྒྱ་རྩ་བརྒྱད་ཀྱི་དྲོད་ཀྱི་གླན༔ དུད་འགྲོ་རང་གི་ལྕི་བས་གཏུམས༔ རྩིད་པའི་སྲད་བུས་རྒྱ་གྲམ་བཅིངས༔ གང་བསྲུང་དུད་འགྲོའི་སྐེ་ལ་བཏགས༔ ཟླ་གསུམ་ཕྱུགས་ཀྱི་གོར་ནད་བསྲུང་༔ ས་མ་ཡཱ༔ རྒྱ༔ ཨཱོཾ་ནིང་སེང་ཡང་རྦད་སྭཱ་ཧཱ༔ དགེ་སློང་བཞི་སྡེས་ཐུན་བཟུང་ནས༔ སྟོང་ངམ་ཁྲི་བཟླས་ཆུ་ལ་སྔགས༔ གོར་ནད་ན་ལ་བླུད་པས་ཐུབ༔ ས་མ་ཡཱ༔ རྒྱ༔ ཨཱོཾ་ཏྲི་ཏོ་མ་རུ་རུ་སྭཱ་ཧཱ༔ སྦ་ཕོབ་བཞག་དྷ་སྭཱ་ཧཱ༔ ཁྲི་བཟླས་སྔགས་ཆུས་ལྷོག་ནད་སེལ༔ ས་མ་ཡཱ༔ རྒྱ༔ ཧྲིང་ནི་ལ་ཁ་ཋ་ཋ༔ ཨཱོཾ་ཨཱཿཧཱུྃ་སྭཱ་ཧཱ༔ ཆུ་ལ་ཅི་མང་བཟླས་ལ་བླུད༔ ཕྱུགས་ཀྱི་གློ་ནད་སེལ་བར་འགྱུར༔ ས་མ་ཡཱ༔ རྒྱ༔ ཤིན་ཏུ་ཐུ་སྟེ་མ་ཆོད་ན༔ གོང་གི་རྫས་བརྒྱད་བསྲེག་ཅིང་འདུག༔ ཁྱད་པར་སྟག་རས་ཡུངས་ཀར་ལ༔ སྔགས་འདི་ཞག་བདུན་བཟླས་ཏེ་བདུག༔ ཨཱོཾ་བཛྲ་བྷ་ར་ཏྲི༔ མ་ཧཱ་ནི་འཆང་བ་པོ་ལ་རཀྵ༔ རྒྱལ་བའི་གསུང་སྒྲོག་གཏོར་མ་གཏོང་༔ འཁོན་གྲིབ་མི་གཙང་མགྲོན་ལ་འཛེམ༔ ས་མ་ཡཱ༔ རྒྱ༔ གུ་གུལ་ནག་པོ་ཉ་ཡི་མཁྲིས༔ སྔགས་པའི་དྲི་ཆེན་ཡུངས་ཀར་བཞི༔ ཤུ་དག་སྦྱར་ཏེ་སྔགས་སྟོང་བཏབ༔ ན་མོ་བྷ་ག་ཝ་ཏེ་སུ་ཏ་ཝ་ཊ་ཡཱ༔ ཏདྱ་ཐཱ༔ ཕུད་ཏ་བ་ར་བ་ར་མི་ལི་མི་ལི་ཕཊ་ཕཊ་སྭཱ་ཧཱ༔ དུད་པས་བདུག་ཅིང་མགུལ་དུ་འཆང་༔ རིམས་དང་ནད་བདག་ཀུན་བསྲུང་ཞིང་༔ གདོན་བགེགས་འབྲོས་ཤིང་སེར་བ་འཆད༔ ས་མ་ཡཱ༔ རྒྱ༔ གུ་གུལ་ལི་ཁྲི་ཛཱ་ཏི་དང་༔ མངལ་ཁྲག་སེང་ལྡེང་ཐང་ཆུ་ལྔ༔ ག་པུར་ཙན་དན་དཀར་པོ་བརྒྱད༔ ཆ་མཉམ་གནས་གསུམ་ཐིག་ལེ་བྱ༔ མ་མོ་མཁའ་འགྲོའི་གནོད་པ་བཟློག༔ ས་མ་ཡཱ༔ རྒྱ༔ བོང་ང་ཤུ་དག་མུ་ཟི་གུ་གུལ་ནག༔ ནལ་བུ་སྦྲུལ་དང་སྲེ་མོང་སྦལ་བའི་ཤ༔ ར་ཐུག་ལུག་ཐུག་སྤྲེ་དང་རྟ་བོན་དང་༔ ལྡོང་རུས་གླ་རྩི་རྒྱ་ཚིལ་རྨ་བྱའི་མདོངས༔ ཤིང་ཀུན་ཅུ་གང་སྦྱར་བ་ཞིབ་ཏུ་བསྣུར༔ མགུལ་དུ་འཆང་ཞིང་མེར་བསྲེག་དུད་པས་བདུག༔ འགོ་བའི་ནད་རིམས་ཀུན་ལས་རྒྱལ༔ ས་མ་ཡཱ༔ རྒྱ༔ སྨན་ཆེན་གསེར་མདོག་སུམ་འགྱུར་དང་༔ གླ་རྩི་དྲི་ཆེན་ཤུ་དག་ནག༔ གྲི་ཤ་རུ་རྟ་རིལ་བུ་བྱ༔ ནད་ཀྱི་ཚབས་ལྟར་སྦྱར་ཏེ་བཏང་༔ འབྱུང་པོ་ལས་གྱུར་ནད་ཀུན་འཇོམས༔ ས་མ་ཡཱ༔ ན་མོ་བྷུདྡྷ་ཡ༔ བཛྲ་ཀཱི་ལི་ཀཱི་ལཱ་ཡ༔ ནཱ་ག་དུ་ཙནྡྷེ་ཙནྡྷེ་མི་ལི་མི་ལི་བྷནྡྷ་བྷནྡྷ་ནཱ་ག་ནི་སྭཱ་ཧཱ༔ ཨཱོཾ་ཀ་ཤ་ཀ་པྲ་ལ་ཚལ་ཤག་ནན་ནད་ཀྱི་སྙིང་མགོ་དཀར་པོ་ཆོད་སྭཱ་ཧཱ༔ རང་ལུས་དུག་རི་མེ་འབར་བསྒོམས༔ ཐོར་ཁ་བརྒྱ་རྩ་མ་ཆག་བརྩོན༔ ནད་རིམས་འགོ་ནད་ཀུན་ལས་རྒྱལ༔ མ་འོངས་འགྲོ་ལ་ཕན་ཐོགས་ཤོག༔ ས་མ་ཡཱ༔ རྒྱ༔ མི་དུར་ཧཱུྃ་བྷྲཱུྃ་གྲུཾ་སྲོཾ་སྲོཾ༔ མ་ཀི་ལ་བྷྱོ་ཡ་ཕཊ༔ ཆེ་གེ་ལ་གནོད་པ་ཐམས་ཅད་སྲུངས་ཤིག༔ མི་ནོར་ཕྱུགས་དང་བཅས་པ་རཀྵ་རཀྵ་སྭཱ་ཧཱ༔ རིན་ཆེན་སྣག་ཚལ་ཤུག་པའི་བྱང་བུར་འདྲི༔ རང་སྔགས་རྟེན་འབྲེལ་སྙིང་པོ་བརྒྱ་རྩས་སྔགས༔ གདོན་བགེགས་གཏོར་མས་བརྔན་ཞིང་བདེན་སྟོབས་བརྗོད༔ དྲག་པོའི་སྔགས་བཟླས་བསྲུང་བའི་འཁོར་ལོ་བསྒོམས༔ རྟ་ཕྱུགས་སྐེར་བཏགས་གོད་ཀྱི་གནོད་པ་ཐུབ༔ ས་མ་ཡཱ༔ རྒྱ༔ ཨཱོཾ་ཨ་ཏིས་ཏ་ཐིབ༔ མུན་མུན་ཐིབ༔ པྲ་ཐིབ༔ སུར་ཡ་ཐིབ༔ ཤེར་ཤིང་ཕུར་བུ་སོར་བཞི་བར༔ ཁྲི་བཏབ་ནག་པོའི་དར་གྱིས་དྲིལ༔ རང་གི་མཆན་ཁུང་གཡོན་དུ་བཅང་༔ ལམ་གྱི་ཇག་ཆོམས་གནོད་པ་བསྲུངས༔ ས་མ་ཡཱ༔ རྒྱ༔ ཨཱོཾ་སུར་ཡ་ཙནྜ་མུན༔ རུ་རུ་ཀ་པྲ་མོ་ཐིབ༔ ཨ་ཏིཥྛ་ཡ༔ ཙིཏྟ་རྦད༔ བྱ་རོག་ཀེ་ཀེ་འུག་པའི་སྒྲོ༔ ལུང་ཐང་བཞི་ལ་ཁྲི་ཚོ་སྔགས༔ ཀེ་ཀེའི་སྒྲོ་ནི་རྣ་བ་གཡས༔ འུག་སྒྲོ་རྣ་བ་གཡོན་དུ་གཟེར༔ ཁྭ་ཏའི་དང་རུ་ལྟག་པར་གཙུགས༔ ལུང་ཐང་ནག་པོ་སྐེ་ལ་གདགས༔ མི་འགྱུར༔ ས་མ་ཡཱ༔ རྒྱ༔ མེ་ང་ར་ཧཱུྃ་གྲུཾ་ཕྲོཾ་ཕྲོཾ་ཀཱི་ལཱ་ཡ་བྷྱོ་ཕཊ༔ བདག་ཆེ་གེའི་རྟ་ནོར་ཕྱུགས་གསུམ་གྱི་གོད་ཀ་ཐམས་ཅད་སྲུངས་ཤིག་རཀྵ༔ ཕོ་ཤིང་བྱང་བུར་བྲིས་ནས་ཀྱང་༔ སྒོ་ཁྱིའི་སྐེར་བཏགས་གོང་ཀ་གཅོད༔ ས་མ་ཡཱ༔ རྒྱ༔ ཨཱོཾ་བྷུདྡྷ་ཏ་པ་ཏེ་ན༔ དྷརྨ་པ་ཏེ་ན༔ པ་ར་པ་ཏེ་ན༔ པ་ཏེ་བྷ་ཏེ་ན༔ སརྦ་པྲ་ཛྙཱ་པྲ་ཧ་ར་ཡ་ཡཱ་སྭཱ་ཧཱ༔ ནགས་ཚལ་དྲ་བས་ཡུལ་ཕྱོགས་གཏིབས༔ གནོད་བྱེད་དགྲ་བོས་མི་མཐོང་བསམས༔ ཆུ་གཙང་སྔགས་ནས་ཕྱོགས་བཞིར་གཏོར༔ དགྲ་ཇག་སྒྲིབ་པའི་ལས་ཚོགས་སོ༔ ས་མ་ཡཱ༔ རྒྱ༔ ཚི་རྟུལ་རྟུལ༔ སྨུ་ཤིག་ཤིག༔ ཧྲིཿཀྲཾ་ཙཀྲ་རྦད་རྦད་ཕཊ༔ ཤོག་ཤོག་ལ་བྲིས་རྫས་རྒོད་བྱུག༔ སྒོ་ཡི་མེ་ལོང་ཕྱི་ལ་སྦྱར༔ འགོ་ནད་ཡམས་རིམས་གནོད་པ་བསྲུང་༔ ས་མ་ཡཱ༔ རྒྱ༔ འདི་ནས་མ་འོངས་བསྐལ་པའི་འོག༔ འགྲོ་ལ་མི་འདོད་འབྱུང་བའི་དུས༔ ཟབ་མོའི་གདམས་པ་འདི་དག་གིས༔ བར་ཆད་རྐྱེན་ལས་རྒྱལ་བར་ཤོག༔ ས་མ་ཡཱ༔ རྒྱ་རྒྱ་རྒྱ༔ གཏེར་རྒྱ༔ སྦས་རྒྱ༔ ཟབ་རྒྱ༔ ས་མ་ཡཱ༔ རྒྱ་རྒྱ་རྒྱ༔ གཏེར་ཆེན་ཉི་མ་གྲགས་པ་རྩལ་གྱིས་ཆགས་རུ་ཕུག་སྔོན་ནས་གདན་དྲང་ཤིང་ཤོག་སེར་ལས་བསྒྱུར་བའོ། མངྒ་ལཾ། །

འགྲོ་ཕན་ལས་ཚོགས།

ཕག་མོ་སྔོན་མོའི་ཟབ་ཐིག་ལས༔ འགྲོ་ལ་ཕན་བྱེད་ལས་ཚོགས་བཞུགས༔ མ་རྒྱུད་མཁའ་འགྲོའི་ཚོགས་ལ་ཕྱག་འཚལ་ལོ༔ འདི་ནས་མ་འོངས་བསྐལ་པའི་དུས་ཀྱི་ཚེ༔ སེམས་ཅན་ཐམས་ཅད་མི་དགེའི་ལས་ལ་སྤྱོད༔ དེ་ཡི་དབང་གིས་འཛམ་གླིང་བོད་ཁམས་འདིར༔ མི་དགེའི་ལྟས་ངན་ནད་ཡམས་འཁྲུག་རྩོད་རྣམས༔ མང་དུ་སྡང་ཞིང་སྐྱེ་འགྲོ་སྡུག་ལ་གཏོད༔ ཁྱད་པར་འབྱུང་པོ་མཁའ་ལ་རྒྱུ་བའི་རིགས༔ ནད་རིམས་བདག་པོ་བྱ་གདོང་སྦྲུལ་མཇུག་ཅན༔ ཚ་གྲང་གཤོག་པས་གཡབ་འདོར་སྟོང་ཁམས་ཉུལ༔ འབྱུང་པོ་ནད་བདག་འབུམ་འབུམ་དུས་དྲུག་འགྱེད༔ ནད་ཡམས་དམར་ནད་ལྟག་དགྱེ་ཆར་དུ་འབེབས༔ དེ་ལྟར་གྱུར་ཚེ་བྱང་སེམས་རྣལ་འབྱོར་པས༔ འགྲོ་བའི་དོན་དུ་སེམས་བསྐྱེད་བསྲུངས་བར་འབད༔ ས་མ་ཡཱ༔ རྒྱ༔ གླ་རྩི་གྀ་ཝང་བོང་ང་ཤུ་དག་ནག༔ བྲག་ཞུན་ལོ་བརྒྱད་ཆུ་ཡི་རིལ་བུར་སྒྲིལ༔ མཁའ་འགྲོའི་བསྙེན་སྔགས་སྲུངས་ཤིག་རཀྵ་གདགས༔ བརྒྱ་སྟོང་ཁྲི་ཡི་དྲོད་ཀྱིས་གླན་ནས་ཀྱང་༔ བསྲུང་བྱའི་མགུལ་བཏགས་ནང་སྔ་སྣ་ལ་སྣོམས༔ དམར་ཡམ་བསྲུང་བའི་ལས་ཚོགས་ཨི་ཐྀ་རྒྱ༔ དམར་ནད་ལྟག་དགྱེ་རྒྱུག་འགྱེལ་པར་པ་སོགས༔ ཐམས་ཅད་མིང་གི་རྣམ་གྲངས་མང་བ་ཡང་༔ ནད་བདག་འབྱུང་པོ་དེ་ཡི་རྩལ་སྣང་ལས༔ གང་ལ་ཕོག་པ་དེ་ཡི་མིང་དུ་འབོད༔ ཡང་གཅིག་དེ་ཉིད་བསྲུང་བ་ཟབ་མོ་ནི༔ ཤིང་ཀུན་གླ་རྩི་བ་བླ་མུ་ཟི་ནག༔ སྤུ་ནག་ཤུ་དག་གུ་གུལ་བོང་ང་རྣམས༔ ཆོམ་ཙམ་བརྡུངས་ནས་བསྙེན་སྔགས་སྟོང་གིས་གསོ༔ གང་བསྲུང་མགུལ་གདགས་མཁའ་འགྲོའི་བསྐྱེད་རིམ་གསལ༔ ཡམས་ནད་བསྲུང་བའི་རིམ་པ་ཨི་ཐི་རྒྱ༔ མུ་ཟི་ཤིང་ཀུན་གླ་རྩི་ཤུ་དག་ནག༔ ཡུང་བ་བལྡོང་རོས་སྨན་ཆེན་ཆ་སྦྱར་བསྣུར༔ མཁའ་འགྲོའི་ཏིང་འཛིན་སྔགས་སྟོང་དྲོད་ཀྱིས་གླན༔ མགུལ་ཏུ་བཏགས་པས་གག་པའི་གནོད་པ་བསྲུང་༔ ཨྀ་ཐི་རྒྱ༔ གུ་གུལ་ནག་པོ་མ་གི་ཏ༔ སྤུ་ནག་སུམ་ཆ་ཆ་མཉམ་ཞིང་༔ ཤིང་ཀུན་ར་དུག་དེ་ཡི་ཆ༔ བོང་ང་མུ་ཟི་སེར་པོ་དང་༔ བ་བླ་ཤུ་དག་སྲན་ཚད་རེ༔ བོང་ང་དཀར་པོ་ལུག་རིལ་ཙམ༔ ཨ་རུ་གསེར་མདོག་གཅིག་གི་ཕྱེད༔ ར་ཐུག་སྦྲེ་ཡང་དེ་དང་མཉམ༔ ས་འཚུར་དཀར་ནག་ཚུམ་རེ་བཏབ༔ མཁའ་འགྲོའི་སྙིང་པོ་བརྒྱ་སྟོང་སྔགས༔ བྲག་ཞུན་ཆུ་ཡིས་རིལ་བུར་སྒྲིལ༔ ཆེ་ཆུང་བྲ་བའི་རིལ་མ་ཙམ༔ ནད་པའི་ཡུལ་དང་ནད་ཚབས་ལྟར༔ ལྔ་བདུན་དགུ་སོགས་རིག་པས་དཔྱད༔ སྐྱུགས་ན་རྡོ་གྲང་མགྲིན་པར་གླན༔ གདོང་ལ་ཆུ་ཡི་ཟོར་གྱིས་སྦྲན༔ བཤལ་ན་ཆུ་ཁོལ་ཡང་ཡང་གཏོང་༔ དཀར་དམར་སྐྱུག་སོགས་ཁ་ཟས་དང་༔ བཟང་དྲུག་སྨན་རིགས་གཏོང་མི་བྱ༔ དམར་ནད་ལྟག་དགྱེས་ཟིན་མ་ཐག༔ སྨན་འདིས་སླེབས་པས་འཆི་མི་སྲིད༔ སྙིང་ཚད་གློ་ཚད་རྒྱུ་ཚད་དང་༔ མཁལ་ཚད་ཉ་གས་ལ་སོགས་པ༔ མདོར་ན་དོན་སྣོད་མིང་གིས་བསྒྱུར༔ ཀུན་ལ་ཐེངས་ཆོག་ཨི་ཐི་རྒྱ༔ ཤུ་དག་དཀར་པོ་གླ་རྩི་ཤིང་ཀུན་གསུམ༔ ནུས་པ་ཅན་ནམ་ལོ་བརྒྱད་དྲི་ཆུར་སྦྱར༔ མཁའ་འགྲོའི་སྔགས་སྟོང་དྲོད་ཀྱིས་གླན༔ རྒྱ་ཐོར་རྒྱུག་གཟེར་གྲིབ་བུ་མེ་ལྕེ་འཁོར༔ གག་པ་ལྷོག་པ་གཟེར་གྱི་རིགས་རྣམས་འཇོམས༔ དཀར་སྐྱུར་དམར་གྱི་ཁ་ཟས་སྤང་༔ གཉན་གཟེར་ཀུན་འཇོམས་ལས་ཚོགས་རྒྱ༔ ལྷོག་དུག་ནག་པོ་ཟངས་རྩི་པ༔ ཡུ་མོ་བདེ་སྦྱིན་བྱ་རྒོད་སྦོས༔ སྟག་ཤ་གླ་རྩི་ཆ་མཉམ་ལ༔ མཁའ་འགྲོའི་སྔགས་སྟོང་དྲོད་ཀྱིས་གླན༔ ནད་ཚབས་ལྟར་སྦྱར་ཁམས་དང་བསྟུན༔ ལྷོག་པ་གཉན་འཇོམས་ཨི་ཐི་རྒྱ༔ གླ་རྩི་ལི་ཤི་སྦལ་པའི་ཤ༔ ལྕེ་ཚ་རྒྱ་ཚ་ཟེ་ཚ་གསུམ༔ ཞིབ་ཏུ་བཏགས་ལ་སྨྱུག་གུས་ཕུལ༔ ཚད་པ་ཆེ་ན་ག་པུར་བསྣན༔ ཡང་ཡང་བཏབ་པས་གག་པ་ཞི༔ གག་པ་འཇོམས་པའི་ལས་ཚོགས་རྒྱ༔ ཤིང་ཀུན་དང་ནི་བྲག་ཞུན་དེ་བ་གསུམ༔ བདུད་རྩི་རྣམ་གསུམ་ཀུན་གྱི་གཙོ་བོ་ཡིན༔ གླང་ཐབས་ཁྲག་ལ་བབས་ན་བ་ལེ་ཀ༔ སྐྱུ་རུ་ར་དང་བ་ཤ་ད་ཏྲིག་བསྣན༔ མཁྲིས་པར་བབས་ན་གསེར་གྱི་མེ་ཏོག་དང་༔ གསེར་གྱི་ཕུད་བུ་ཏིག་ཏ་དུང་མོ་ཉུང་༔ ཆུ་གྲང་རྟར་བསྐྱོན་ན་སར་ལྕགས་རྡོ་གླན༔ གྲང་གླང་བབས་ན་རྒྱ་ཚ་ཁ་རུ་ཚ༔ ཆུ་བསྐོལ་རྟ་ལ་བསྐྱོན་པ་ཤེས་པར་བྱ༔ སྲིན་གླང་བབས་ན་ལང་ཐང་མེ་རུ་རྩེ༔ བྱི་ཐང་ཀ་དང་གླ་རྩི་ཆ་མཉམ་སྦྱར༔ ཚ་གྲང་རྟ་ཡི་མན་ངག་ཡུལ་དང་བསྟུན༔ སེའུ་འབྲུ་ཤིང་ཀུན་ཕོ་བ་རིས༔ བུ་རམ་རིལ་བུས་རླུང་རིགས་སེལ༔ མཁའ་འགྲོ་བསྒྲུབ་པའི་བསྙེན་སྔགས་ལ༔ གླང་ཐབས་རིགས་ལྔ་སོད་ཅེས་སྦྱར༔ སྔགས་སྟོང་སྨན་རྟར་བཏབ་སྟེ་གཏོང་༔ གླང་ཐབས་རིགས་ལྔ་འཇོམས་པ་ཡི༔ ལས་ཚོགས་ཟབ་མོ་ཨི་ཐི་རྒྱ༔ བུ་རམ་སྒོར་ལ་བཅའ་སྒ་བཏབ་བཏང་བས༔ རླུང་གི་ནད་རིགས་མ་ལུས་སེལ་བར་བྱེད༔ ཨྀ་ཐི་རྒྱ༔ འབྲས་བུ་གསུམ་གྱི་སྨན་མར་བསྡུས་ནས་ཀྱང་༔ ཕག་གླད་བཏབ་བཏང་རྣ་བ་འོན་པ་སེལ༔ ཨྀ་ཐི་རྒྱ༔ རུས་ཐང་ནང་དུ་དྲོད་སྨན་རིགས་གྱུར་བཏབ༔ ཤ་ཟོས་ཕོ་བས་མ་ཞུའི་ནད་རིགས་སེལ༔ ཨྀ་ཐི་རྒྱ༔ ཆུ་ཁོལ་ནང་དུ་སེའུ་འབྲུ་བཏབ་འཐུངས་པས༔ ཆུ་འཐབས་ཆུ་འཁྲུགས་མ་ཞུའི་ནད་རྣམས་སེལ༔ ཨི་ཐི་རྒྱ༔ སེའུ་འབྲུ་ཅོང་ཞི་དར་བར་བསྐོལ་བཏང་བས༔ མར་དང་ཚིལ་གྱིས་མ་ཞུའི་རིགས་རྣམས་སེལ༔ ཨི་ཐི་རྒྱ༔ བྱིའུ་གྲོ་རྩའི་ཤ་ཆུར་བསྐོལ་ཏེ་བཏང་༔ སྨན་རིགས་མ་ཞུའི་ནད་རྣམས་སེལ་བར་བྱེད༔ ཨི་ཐི་རྒྱ༔ སེའུ་འབྲུ་ཤིང་ཚ་སུག་སྨེལ་པི་པི་ལིང་༔ ཆ་མཉམ་སྦྱར་བཏང་རླུང་འགགས་རིགས་རྣམས་སེལ༔ ཨི་ཐི་རྒྱ༔ བཟླས་བརྗོད་འབུང་ཚེ་རླུང་གི་སྐད་འགགས་ན༔ སྤང་རྒྱན་དཀར་པོ་བུ་རམ་ཆང་གིས་སེལ༔ མཁྲིས་པས་འགགས་ན་ཏིག་ཏ་རུས་ཁུར་བཏབ༔ དྲོད་ཡལ་ཙམ་དུ་བཏང་བས་སེལ་བར་འགྱུར༔ ཨི་ཐི་རྒྱ༔ བད་ཀན་ཁམས་ཀྱིས་འགགས་པར་གྱུར་པ་དང་༔ སྐྱུ་རུ་ར་དང་སེའུ་འབྲུ་བཏང་བས་སེལ༔ ཨི་ཐི་རྒྱ༔ སུག་སྨེལ་ཤིང་མངར་ཨ་རུ་གསེར་མདོག་དང་༔ སྲོ་ལོ་སྤང་རྒྱན་དཀར་པོ་གཉིས་དང་བཅས༔ བུ་རམ་རིལ་བུར་བསྒྲིལ་ལ་སྣོད་གཙང་བླུགས༔ མཁའ་འགྲོའི་སྙིང་པོ་ཁྲི་ཡི་དྲོད་ཀྱིས་གསོ༔ དབྱངས་སྙན་མགྲིན་པ་བདེ་ཞིང་བཟླས་བརྗོད་འཕེལ༔ ཨི་ཐི་རྒྱ༔ བཅའ་སྒ་ཤིང་ཀུན་ཁ་རུ་ཚ་སྦྱར་བཏང་༔ སྙིང་རླུང་ཞུགས་པ་སེལ་ཐབས་ཨི་ཐི་རྒྱ༔ སྦྲང་རྩི་ཀ་ར་ཅུ་གང་སྦྱར་བཏང་བས༔ གློ་བའི་ནད་རིགས་སེལ་ཐབས་ཨི་ཐི་རྒྱ༔ བྲག་ཞུན་ཨུཏྤལ་པྲི་ཡང་ཀུ༔ གུར་གུམ་ཆུ་ཡིས་མཆིན་ནད་སེལ༔ ཨི་ཐི་རྒྱ༔ ཤུག་གུ་ཚེར་མ་བྲག་ཞུན་སུག་སྨེལ་སྦྱར༔ ལི་ཤི་གསེར་མེ་དང་ནི་ཨ་རུ་ར༔ པི་པི་ལིང་སྦྱར་བཏང་བས་མཚེར་ནད་སེལ༔ སུག་སྨེལ་ཤིང་ཚ་སེའུ་འབྲུ་པི་པི་ལིང་༔ སྦྱར་བཏང་ཕོ་བའི་རླུང་ནད་མ་ལུས་སེལ༔ ཨི་ཐི་རྒྱ༔ ཅོང་ཞི་ཁ་རུ་ཚ་དང་བཅའ་སྒ་སྦྱར༔ ལན་ཚའི་རྟར་བསྐྱོན་བད་ཀན་སེལ་བར་བྱེད༔ ཨི་ཐི་རྒྱ༔ ཅོང་ཞི་འུ་སུ་ཀ་ར་སྦྱར་ཏེ་བཏང་༔ ཆུ་ཁོལ་ཕུལ་བས་བད་སྨུག་ནད་རྣམས་སེལ༔ ཨྀ་ཐི་རྒྱ༔ ཨ་བར་བཅའ་སྒ་རྒྱ་ཚ་གསུམ༔ སྐོལ་བའི་ཐང་གིས་མཁྲིས་ནད་སེལ༔ ཨྀ་ཐི་རྒྱ༔ སྦྲང་རྩི་སྒོར་ལ་ཏིག་ཏ་བཏབ་སྟེ་བརྟེན༔ འཁྲུགས་ཀྱི་རིགས་རྣམས་སེལ་ཐབས་ཨི་ཐི་རྒྱ༔ བྲག་ཞུན་གླ་རྩི་གིའུ་ཝང་གིས༔ གཟེར་ཐུང་ནད་རྣམས་སེལ་བར་བྱེད༔ ཨ་ིཐི་རྒྱ༔ ཨ་བར་བསྡུས་པའི་དྲོན་མོའི་ཐང་༔ རིམས་ཀྱི་ཚད་པ་སེལ་བར་བྱེད༔ ཨི་ཐི་རྒྱ༔ བྱང་བ་སྡིག་པ་དབྱི་མོང་པ༔ ལྕམ་པ་བསྣན་པས་ཆུ་འགགས་སེལ༔ ཨི་ཐི་རྒྱ༔ གིའུ་ཝང་གླ་རྩི་ཤུ་དག་ནག་པོ་སྦྱར༔ ལྷོག་པའི་ནད་རྣམས་སེལ་བར་བྱེད༔ ཨི་ཐི་རྒྱ༔ དངུལ་ཐལ་དོམ་འཁྲིས་ཀ་ར་བཏང་༔ རྨ་འབྲས་རྙིང་པ་སེལ་བར་བྱེད༔ ཨི་ཐི་རྒྱ༔ ཀ་ར་སྦྲང་རྩི་ཆུ་ལ་བཏབ༔ ཉི་དགའི་ཐང་གིས་སྐོམ་ནད་སེལ༔ ཨི་ཐི་རྒྱ༔ ཨ་རུ་ར་དང་ཚ་ལ་བྲག་ཞུན་དང་༔ རེ་རལ་ཆ་མཉམ་བཏང་བས་ཤ་དུག་སེལ༔ ཨི་ཐི་རྒྱ༔ ཨ་བར་རྒྱ་ཚ་པི་པི་ལིང་༔ ཆུ་ཁོལ་རྟར་བསྐྱོན་བཙན་དུག་སེལ༔ ཨི་ཐི་རྒྱ༔ ཨ་བར་བསྡུས་ཁུར་དན་རོག་བཏབ༔ ཆུ་ཡིས་བད་ཀན་སེལ་བར་བྱེད༔ ཨི་ཐི་རྒྱ༔ ཤ་ཚིལ་ཕག་ཚིལ་བསྐོལ་བའི་ཆུར༔ སྒོག་གཅིག་གླ་རྩི་བསྣུར་ཏེ་བཏབ༔ ལྕེ་བྲང་གྲེ་བའི་ནད་རྣམས་སེལ༔ ཨི་ཐི་རྒྱ༔ ར་མཆིན་མར་དུ་བཙོས་ཏེ་བཏང་༔ མིག་གི་རབ་རིབ་སེལ་བར་འགྱུར༔ ཨི་ཐི་རྒྱ༔ དེ་ལྕགས་ཐར་ནུ་ར་དུག་མུ་ཟི་ནག༔ ལྡོང་རོས་གནའ་བ་ར་དང་ཕག་པའི་ཁྲག༔ སྦྱར་ཏེ་བྱུགས་པས་མེ་དབལ་སེལ་བར་བྱེད༔ ཨི་ཐི་རྒྱ༔ ཐར་ནུ་རེ་ལྕགས་བ་བླ་དང་༔ ཆུ་རྩ་སྦྱར་བྱུགས་རྒྱ་ཤུ་སེལ༔ ཨི་ཐི་རྒྱ༔ ག་པུར་ཀ་ར་སྤང་མ་དང་༔ མ་ནུ་བཞི་སྦྱར་མིག་ཚགས་ནད་རྣམས་སེལ༔ ཨི་ཐི་རྒྱ༔ འབྲུ་མར་བསྐོལ་བའི་ནང་དུ་ནི༔ འབྲས་བུ་གསུམ་གྱི་ཕྱེ་མ་བཏབ༔ ལྟོར་བཏང་མིག་ཆུ་འཛགས་པ་སེལ༔ ཨི་ཐི་རྒྱ༔ བཟང་དྲུག་གླ་རྩི་ག་པུར་གིའུ་ཝང་རྣམས༔ སྐེ་ལ་བཏགས་པས་རིམས་ནད་མ་ལུས་འགོགས༔ ཨི་ཐི་རྒྱ༔ བཟང་དྲུག་གླ་རྩི་ག་བུར་གིའུ་ཝང་༔ ཆང་བསྐོལ་བཏབ་བཏུངས་མ་ཞུའི་རིགས་རྣམས་སེལ༔ ཨི་ཐི་རྒྱ༔ མར་རྙིང་ཕག་པའི་ཚིལ་བུ་ཡུངས་ཀར་བཅས༔ ཨ་རུ་ར་ཡིས་དུག་ནད་སེལ་བར་འགྱུར༔ ཨི་ཐི་རྒྱ༔ བཙན་དུག་གླ་རྩི་ཨ་རུ་རིལ་བུ་བསྒྲིལ༔ ཚོད་བརྟགས་བཏང་བས་གཉན་ནད་སེལ༔ སོ་བར་ལྟེམས་ན་སོ་ནད་ཞི༔ ཨི་ཐི་རྒྱ༔ སྦྲུལ་ཤ་བཏང་བས་ཤ་མ་འགགས་པ་འཐོན༔ ཨི་ཐི་རྒྱ༔ ཁྱི་རླིག་སྦྲུལ་ཤས་བུ་རོ་འཐོན༔ ཨི་ཐི་རྒྱ༔ སྐྱེས་པའི་རྨང་སྤུ་ཁྱི་ཡི་རླིག༔ བཏང་བས་བུད་མེད་བུ་འགགས་འཐོན༔ ཨི་ཐི་རྒྱ༔ ཤིང་ཀུན་ཛ་ཏི་བུ་རམ་སྦྱར་བཏང་བས༔ རླུང་དང་རྙིང་རླུང་ཞུགས་པ་སེལ་བར་འགྱུར༔ ཨི་ཐི་རྒྱ༔ སྐྱུར་རུ་སྒ་སྦྱར་སྦྲང་གི་རིལ་བུར་སྒྲིལ༔ ཕོ་བའི་ཚད་པ་སེལ་བར་བྱེད༔ ཨི་ཐི་རྒྱ༔ སྟོན་གྱི་གྲོ་ཕྱེ་ལྟོ་སྟོང་ཞོ་སྦྱར་བཏང་༔ ཚ་འཁྲུགས་ནད་རྣམས་མ་ལུས་སེལ་བར་བྱེད༔ ཨི་ཐི་རྒྱ༔ ཨ་རུ་གླ་རྩི་སྨན་ཆེན་གུ་གུལ་ནག༔ རུ་རྟ་ཤུ་དག་ཁྱེའུའི་དྲི་ཆུས་སྦྲུས༔ རིལ་བུ་སྒྲིལ་ཏེ་ཆུ་ཁོལ་རྟར་བསྐྱོན་བཏང་༔ གག་ལྷོག་མ་ལུས་འཇོམས་པའི་མན་ངག་རྒྱ༔ གདོན་སྲིན་རིགས་ཀུན་རླུང་ནད་རིགས༔ མི་ནད་མ་ལུས་སེལ་བར་བྱེད༔ ཨི་ཐི་རྒྱ༔ དེ་ལ་རྒྱ་ཚ་སྡིག་སྲིན་དང་༔ གསེར་བྱེ་ཤུག་གུ་ཚེར་མ་ཅན༔ བསྣན་ཏེ་བཏང་བས་ཆུ་འགགས་སེལ༔ ས་མ་ཡ༔ རྒྱ་རྒྱ་རྒྱ༔ གནད་ཀྱི་མན་ངག་འགྲོ་ལ་ཕན་དོན་དུ༔ ཕྱི་མའི་དོན་དུ་ཡི་གེའི་རིས་སུ་ཐོབ༔ གནས་ཆེན་བདུན་ལ་སྦོས་ཤིག་ཨ་ཐམ་རྒྱ༔ མ་འོངས་དུས་ན་ཤར་ལྷོ་ནུབ་བྱང་དབུས༔ ལས་ཅན་གཏེར་སྒོ་འབྱེད་པ་འགའ་འབྱུང་ཞིང་༔ སྐབས་དང་སྐབས་སུ་རྒྱ་མཐོངས་ཉི་ཞུར་ལྟར༔ སྡུག་བསྔལ་ལྡན་པའི་འགྲོ་ལ་ཕན་ཐོགས་བྱེད༔ ཅེས་གསུངས་པ་འདི་ཡང་རྒྱས་བསྡུས་བྱེ་བྲག་གསུམ་དང་འདྲ་འདྲ་འདྲ་བ་བཞིར་ཕྱེས་ཏེ་མཐའ་དབུས་ཀྱི་གནས་ཆེན་བདུན་ལ་མཁའ་འགྲོའི་གསང་མཛོད་དུ་སྲུང་མ་ལ་བཅོལ་ལོ༔ སྐལ་ལྡན་ལས་འཕྲོ་ཅན་དང་འཕྲད་པར་ཤོག༔ ས་མ་ཡ༔ རྒྱ་རྒྱ་རྒྱ༔ གཏེར་རྒྱ༔ སྦས་རྒྱ༔ ཟབ་རྒྱ༔ ས་མ་ཡ༔ རྒྱ་རྒྱ་རྒྱ༔ བདག་རྨི་ལམ་ཡུལ་ལྟར་གྱི་མིང་གཟུགས་འཛིན་པའི་འཁྲུལ་པའི་ཟློས་གར་མཁན་ཟོག་པོ་གཡུ་རྣ་ཅན་གྱིས་མེ་ཡོས་ཀྱི་ལོ་ལ་ཆགས་རུ་ཕུག་སྔོན་ནས་གདན་དྲངས་ཤིང་ཤོག་སེར་ལས་བསྒྱུར་བ་མངྒ་ལམ། །འགྲོ་བ་སེམས་ཅན་ཐམས་ཅད་ལ་ཕན་ཐོག་པར་གྱུར་ཅིག །

ལས་ཚོགས།

ཕག་མོ་སྔོན་མོའི་ཟབ་ཐིག་ལས༔ ལས་ཚོགས་བཞུགས༔ ཡེ་ཤེས་མཁའ་འགྲོའི་ལྷ་ཚོགས་རྣམས་ལ་འདུད༔ མཁའ་འགྲོའི་བསྙེན་སྒྲུབ་ལྡན་པའི་རྣལ་འབྱོར་པས༔ འགྲོ་བའི་དོན་དུ་སེམས་བསྐྱེད་ལས་ཚོགས་འབུངས༔ མ་འོངས་འགྲོ་བ་རྣམས་ལ་ཕན་ཐོགས་ཤོག༔ ས་མ་ཡ༔ རྒྱ༔ འདི་འདས་མ་འོངས་བསྐལ་པའི་ཐ་མ་ལ༔ ད་ལྟ་མནན་གཏད་བཅིངས་ཤིང་ཨར་ལ་གཏད༔ དམ་སྲི་མ་རུང་སྦས་པ་ཕལ་ཆེར་དོན༔ མཐའ་འདུལ་ཡང་འདུལ་ལྷ་ཁང་མཆོད་རྟེན་ཉམས༔ ཁྱད་པར་བོད་ཀྱི་རྡོ་རྗེ་གདན་གསུམ་ཉམས༔ དེ་དུས་བདུད་འགོང་སྤྲུལ་པ་ཁ་རྒྱས་ཤིང་༔ སེམས་ཅན་རྣམས་ལ་མི་བདེ་སྣ་ཚོགས་གཏོང་༔ སྟོན་ཆེན་དམ་མེད་དམ་སྲིར་སྐྱེ་བའི་དུས༔ མཁན་ཆེན་སྡོམ་མེད་རྒྱལ་པོར་སྐྱེ་བའི་ཚེ༔ རྩ་ལ་འཇུག་ཅིང་ཡིད་ཀྱི་དབང་པོ་འཐོམ༔ དྲན་པ་ཉམས་དང་བརྒྱལ་ཟིལ་འབོག་པ་ཡོང་༔ དེ་དུས་སེམས་བསྐྱེད་ངང་ནས་ཐབས་འདིར་སྤྱོད༔ ས་མ་ཡ༔ རྒྱ༔ མི་ཁྱི་གཅན་གཟན་གསུམ་གྱི་ལུད༔ ཏེའུ་ལོ་པུ་ཤུད་གཉིས་ཀྱི་ཤ༔ རྟ་ནག་ཁྲག་དང་མཛེ་ཕོའི་ཁྲག༔ མུ་ཟི་དཀར་ནག་གླ་རྩི་བཏབ༔ ནུས་ལྡན་དྲི་ཆེན་མཆོག་ཏུ་གྱུར༔ མཁའ་འགྲོའི་བསྙེན་པ་ཁྲི་ཡིས་སྔགས༔ བྱུག་རྫས་ལྟོ་སྨན་གཉིས་ཀ་བྱ༔ མུ་ཟི་དཀར་ནག་གུ་གུལ་ནག༔ ཐང་ཕྲོམ་སྤུ་ནག་དུད་པས་འདུག༔ རྒྱལ་བསེན་རྒྱལ་གདོན་གཟའ་ནད་ཐུབ༔ ཨི་ཐི་རྒྱ༔ གླ་རྩི་ལྡོང་རོས་བྱ་རྒོད་སྦོས༔ གུ་གུལ་ནག་པོ་སྐྱེར་འབྲུ་བཏབ༔ བསྣུན་ཞིང་མར་ནག་དག་དང་སྦྱར༔ དང་པོ་བུལ་ཆུས་རང་ལུས་དག་པར་འཁྲུད༔ སྔགས་ཀྱི་དྲོད་གླན་ལུས་ལ་ཁྱབ་པར་བྱུག༔ ལན་ཆགས་ཤིག་གི་བསྲུང་བ་ཨི་ཐི་རྒྱ༔ དང་པོ་བུལ་ཆུས་རང་ལུས་དག་པར་བཤལ༔ དུད་པ་བྱ་བལ་སྲན་མའི་མེ་ཏོག་གཉིས༔ སླར་ཡང་བུལ་ཆུའི་རྟར་བསྐྱོན་ལུས་ལ་བྱུག༔ ལུས་ལ་བསེབ་དྲི་འཐུལ་བ་ཐུབ་པར་འགྱུར༔ ཨི་ཐི་རྒྱ༔ དཔའ་བོ་གྲི་ལ་ཤི་བའི་རྩིབ་རུས་ལ༔ རཱ་ཧུ་ལའི་སེར་བ་བྷྱོ་ཟློག༔ ལྷའི་སེར་བ་བྷྱོ་ཟློག༔ ཀླུའི་སེར་བ་བྷྱོ་ཟློག༔ བཙན་གྱི་སེར་བ་བྷྱོ་ཟློག༔ བདུད་ཀྱི་སེར་བ་བྷྱོ་ཟློག༔ མ་མོའི་སེར་བ་བྷྱོ་ཟློག༔ དམུའི་སེར་བ་བྷྱོ་ཟློག༔ རྒྱལ་པོའི་སེར་བ་བྷྱོ་ཟློག༔ ཐེའུ་རང་གི་སེར་བ་བྷྱོ་ཟློག༔ བྲིས་བསུབས་ལྷག་ཆད་མེད་པར་འབྲི་བར་བྱ༔ ཤ་ཆེན་སྒོག་སྐྱ་གུ་གུལ་ནག་པོ་དང་༔ རེ་ལྕགས་ཤིན་ཀུན་གཡེར་མ་མུ་ཟི་ནག༔ གླ་རྩི་ཐང་ཕྲོམ་རྣམས་ཀྱི་རྫས་བསགས་ཏེ༔ རྩིབ་མའི་བྱང་བུའི་སྐེ་ལ་བཏགས་ནས་ཀྱང་༔ ཡུལ་ཕྱོགས་ལྷ་འདྲེར་ཕུད་དང་གཏོར་མས་བསངས༔ བཀའ་བསྒོ་ཏིང་འཛིན་གསལ་ཞིང་སེར་ལམ་དུ༔ ས་ལ་དོང་བྲོས་མི་མངོན་སྦ་བ་གནད༔ སྡེ་བརྒྱད་དམོད་པ་དྲག་པོའི་སེར་བ་ཐུབ༔ ཨི་ཐི་རྒྱ༔ སྲུང་སྐུད་དམར་ནག་གང་རུང་ལ༔ རྡོ་རྗེའི་མདུད་པ་ཉེར་གཅིག་བརྒྱབ༔ ཨཱོཾ་བཛྲ་པཱ་ནི་དྷཀྐི་ནི་ཧ་རི་ནི་ས་ཨཱོཾ་ཨ་ཨེ་ཏི་མི་ཏི་རུ་ཏི་སྭཱ་ཧཱ༔ མདུད་པ་རེ་ལ་སྟོང་རེ་བཏབ༔ ཡེ་དྷར་སྔགས་ཀྱིས་རབ་ཏུ་གནས༔ བྱིས་པའི་སྐེར་བཏགས་གཙེར་བ་ཞི༔ ཨི་ཐི་རྒྱ༔ ས་མ་ཡ༔ རྒྱ་རྒྱ་རྒྱ༔ གཏེར་རྒྱ༔ སྦས་རྒྱ༔ ཟབ་རྒྱ༔ ས་མ་ཡ༔ རྒྱ་རྒྱ་རྒྱ༔ རིགས་འཛིན་ཉི་མ་གྲགས་པས་མེ་ཡོས་ལ་ཕུག་སྔོན་ནས་གདན་དྲངས་པ་མངྒ་ལམ། །

དྲག་པོའི་སྦྱིན་སྲེག་དགྲ་བགེགས་ཚར་གཅོད།

ཕག་མོ་སྔོན་མོའི་ཟབ་ཐིག་ལས༔ དྲག་པོའི་སྦྱིན་སྲེག་དགྲ་བགེགས་ཚར་གཅོད་བཞུགས༔ ཕག་གདོང་མཁའ་འགྲོའི་ལྷ་ཚོགས་རྣམས་ལ་འདུད༔ མ་དང་མཁའ་འགྲོ་གྲུབ་པའི་རྣལ་འབྱོར་པས༔ དྲག་པོའི་གནས་སུ་འཕུང་གསུམ་ཉི་མ་ལ༔ དུར་ཁྲོད་འཕུང་ཤུལ་ས་རྡོར་སྟེགས་བུ་ནི༔ རྒྱ་དཔངས་ཁྲུ་གང་ཟུར་གསུམ་ཚད་ལྡན་བཟོ༔ དུག་ཁྲག་དུར་འཇིམ་དུར་སོལ་ནག་པོར་བསྒྱུར༔ རཾ་ཡིག་དབུས་སུ་ས་བོན་འགོད་པར་བྱ༔ དུར་རྡོ་འམ་ནི་གྲི་ལྕགས་སྒྱེ་དཔུའི་སྟེང་༔ རབས་ཆད་དམ་ཡུགས་སའི་སླ་ངར་སྣུམ་ནག་བླུགས༔ དྲག་པོའི་ཤིང་གི་ཐབ་ནི་ལེགས་པར་བརྩིགས༔ ཡམ་ཤིང་བརྒྱའམ་ཉེར་གཅིག་སྐབས་ལྟར་ལ༔ དགྲ་བགེགས་གང་གནོད་མིང་བྱང་དུག་ཁྲག་འབྲི༔ ཤ་ཁྲག་གཏོར་མ་དྲག་པོའི་སྲེག་རྫས་དང་༔ ལིངྒ་དག་ཀྱང་དེ་ལྟར་སྐབས་མཐུན་བསགས༔ ལྡོང་རོས་སྦྲང་ཕྱེ་སྣུམ་དང་མེ་རྫས་སྦྲན༔ དགྲ་བགེགས་ལིངྒ་སླ་ངའི་ནམ་མཁར་གདགས༔ སྲེག་རྫས་མཆོད་རྫས་ལེགས་པར་བཤམས་ནས་ཀྱང་༔ མཁའ་འགྲོའི་བསྐྱེད་རྫོགས་བསྙེན་སྒྲུབ་ཁ་གསོ་སྟེ༔ མེ་ཐབ་བསང་ཞིང་མེ་ལྷ་དམར་ནག་ཁྲོ༔ གསལ་བར་བསྐྱེད་ཅིང་སྤྱན་འདྲེན་མཆོད་བསྟོད་འབུལ༔ ཧཱུྃ༔ དྲང་སྲོང་ཆེན་པོ་མེ་ཡི་འཕྲིན་ལས་པ༔ ཚངས་ཆེན་སྲས་མཆོག་འཇིག་རྟེན་ཡོངས་ཀྱི་མགོན༔ རབ་ཏུ་འབར་བའི་དྲག་ཤུལ་མཐུ་སྟོབས་རྒྱས༔ སྲེག་རྫས་དགྲ་བགེགས་ཤ་ཁྲག་འདི་བཞེས་ལ༔ དགྲ་བགེགས་འབྱུང་པོའི་ཚོགས་རྣམས་རྡུལ་དུ་རློག༔ ཨཱོཾ་ཨགྣཱེ་ཡེ་དགྲ་བགེགས་ཐམས་ཅད་རཾ་རཾ་ཛྭ་ལ་རཾ་མཱ་ར་ཡ་ཧཱུྃ་ཕཊ༔ རིམ་གྱིས་མཆོད་ལ་མེ་ལྷ་མེ་ཡི་ཀློང་༔ ཐབ་སྒྱེད་སླ་ང་ཆོས་འབྱུང་གྲུ་གསུམ་དབུས༔ ཕག་མོ་ལྗང་མོ་འཕྲིན་ལས་མཁའ་འགྲོ་འབུམ༔ རབ་ཏུ་འཁྲུག་ཅིང་འབར་བའི་སྟོབས་ལྡན་བསྐྱེད༔ སྤྱན་འདྲེན་མཆོད་བསྟོད་རྩ་བའི་སྔགས་ཤམ་ལ༔ གནོད་བྱེད་དགྲ་བགེགས་དམ་སྲིའི་མིང་ལྟེམ་ཞིང་༔ ཛྭ་ལ་རཾ་རཾ་མཱ་ར་ཡ་ཧཱུྃ་ཕཊ༔ བརྒྱ་དང་རྩ་བརྒྱད་སྟོང་ལ་སོགས་པ་ནི༔ སྐབས་ལྟར་རྒྱས་བསྡུས་ཤེས་པར་བྱ་བ་གནད༔ མཚམས་མཚམས་མེ་རྫས་སྤྲོ་ཞིང་འགྱེད་པར་བྱ༔ འཕྲིན་ལས་རྫོགས་མཚམས་གནམ་ལིང་འཚིག་པར་བྱ༔ ལྗང་མོ་འབུམ་སྡེ་མ་མོ་མཁའ་འགྲོའི་ཚོགས༔ རྔམ་ཞིང་འཁྲུགས་སྟེ་འཁོར་ནས་དྲག་ཏུ་འབར༔ གཅན་གཟན་ཤ་ལ་རུབ་པའི་ངང་ཚུལ་ལྟར༔ དགྲ་བགེགས་ཐམས་ཅད་ཆོམ་ཆོམ་ཁྲུམ་ཁྲུམ་བཞེས༔ སྐུ་གསུང་ཐུགས་དགྱེས་བཅོལ་བའི་ལས་མཛད་བསྒོམས༔ ཡེ་ཤེས་པ་གཤེགས་དམ་ཚིག་མཁའ་དབྱིངས་བསྟིམ༔ མེ་ཡི་ལྷ་ལ་བཟོད་གསོལ་གཏང་རག་མཆོད༔ ནུས་པའི་མཐུ་ཡིས་དགྲ་བགེགས་ཚར་བཅད་པའི༔ བསོད་ནམས་དགེ་བ་བསྟན་འགྲོའི་དཔལ་དུ་བསྔོ༔ ལན་གཅིག་དགུ་འམ་བརྒྱ་སོགས་འབྲས་ཚབས་ལྟར༔ ལས་ལ་སྦྱར་བས་དགྲ་བགེགས་གང་ལ་བརྩམས༔ ཐལ་བའི་རྡུལ་ཕྲན་བཞིན་དུ་ངེས་སོ་རྒྱ༔ ཐལ་བ་ལིངྒ་དང་བཅས་འཕུང་གསུམ་ལ༔ མཆོད་རྟེན་ལྷ་ཁང་སྒྲུབ་ཁང་རྒྱ་གྲམ་ལམ༔ དགྲ་གདོན་གང་དམིགས་དགྲ་གཤེད་ཐོད་པར་བསྡམས༔ འཕུང་རེས་དྲིས་ཞིང་ཕྱིན་ལོག་སྐུད་པས་བཅིངས༔ ལྟ་བའི་གདེང་བསྐྱེད་ཡུལ་ལྷར་ཕུད་ཀྱིས་མཆོད༔ ཕྱག་གཡས་གྲི་གུག་ས་ལ་ལན་གསུམ་སྤྲོས༔ རིམ་པ་དགུ་བཤགས་མཐའ་མེད་རྒྱ་མཚོའི་ཀློང་༔ ཁོ་ཡི་ལས་སྨིན་རང་གཟུགས་ཆུ་སྲིན་གྱི༔ གྲེ་བར་བརྫངས་པས་ནམ་ཡང་ཐར་མེད་བསམས༔ མ་ཉེས་ཤགས་འདེབས་བདེན་བརྗོད་དྲག་ཏུ་བརྗོད༔ འགུགས་བསྟིམས་བརྒྱ་རྩའི་སྟེང་ནས་རོ་གཡབ་བཀབ༔ མེ་རྒྱ་ཆུ་རྒྱ་རིམ་དགུའི་ས་ཡིས་མནན༔ མཁའ་འགྲོའི་བྲོ་བརྡུང་ནམ་ཡང་ཐར་མེད་བསམས༔ བསྲུང་བའི་གོ་བསྒོ་བཟློག་པའི་སྔགས་བྱང་བརྩམས༔ ས་མ་ཡ༔ རྒྱ་རྒྱ་རྒྱ༔ འདི་ལ་བརྩོན་པས་འཕྲིན་ལས་མེ་ལྟར་འབར༔ དགྲ་བགེགས་མ་ལུས་ཁ་དག་གཏོང་བ་དང་༔ བསྟན་དང་འགྲོ་བའི་བདེ་བ་བསྐྱེད་པ་ཡོང་༔ དེས་ན་སྐལ་ལྡན་རྣམས་ཀྱིས་སྤྱོད་མཁས་བྱ༔ ས་མ་ཡ༔ རྒྱ་རྒྱ་རྒྱ༔ གཏེར་རྒྱ༔ སྦས་རྒྱ༔ ཟབ་རྒྱ༔ གཏད་རྒྱ༔ ས་མ་ཡ༔ རྒྱ་རྒྱ་རྒྱ༔ རིགས་འཛིན་ཆེན་པོ་ཉི་མ་གྲགས་པས་ཆགས་རུ་ཕུག་སྔོན་ནས་གདན་དྲངས་ཤིང་ཆགས་རུ་ཕུག་ནག་ཏུ་ཤོག་སེར་ལས་བསྒྱུར་བ་མངྒ་ལཾ། །

ལས་བྱང་ཆོག་སྒྲིག

ཕག་མོ་སྔོན་མོའི་ཟབ་ཐིག་ལས། སྣ་ཚོགས་མཐར་ཕྱིན་གྱི་ལས་བྱང་བཞུགས། །ཕག་གདོང་སྣ་ཚོགས་མཐར་ཕྱིན་མ་ལ་ཕྱག་འཚལ་ལོ། །རྣལ་འབྱོར་པས་དོན་ཀྱི་ཕྱིར་དུ་ཕག་གདོང་སྣ་ཚོགས་མཐར་ཕྱིན་མའི་ཉམས་ལེན་འདོད་པས། དབེན་པའི་གནས་སུ་དཀྱིལ་འཁོར་སྨན་རག་གཏོར་མ་ཚོགས་དང་མཆོད་རྫས་རྣམས་གཞུང་ལྟར་བཤམས་ལ། ཐུན་མོང་གི་སྔོན་འགྲོ་ཆོས་སྤྱོད་གསོལ་འདེབས་གཏོར་མ་ཆ་གཉིས་སོགས་མཐོང་བརྒྱུད་ཕྱག་ལེན་ལྟར་བྱ། དེ་ནས་དངོས་གཞི་གྱེར་བསྒོམ་དང་ལྡན་པས་རོལ་མོ་རྣམས་འཁྲོལ་ཞིང་། བཀའ་བསྒོ་བ་ནི༔ ཧཱུྃ༔ ང་ནི་སྣ་ཚོགས་མཐར་ཕྱིན་སྐུ༔ ཆོས་ཀྱི་དབྱིངས་ལས་སྤྲུལ་པའི་མ༔ མཁའ་འགྲོའི་སྤྲུལ་པས་སྟོང་གསུམ་གང་༔ ལོག་པར་ལྟ་བའི་གདོན་བགེགས་རྣམས༔ རྡུལ་ཕྲན་བཞིན་དུ་བརླག་པར་བྱེད༔ དེ་བས་རང་རང་གནས་སུ་དེངས༔ ཧཱུྃ་བཞིའི་སྔགས་བརྗོད༔ མཚམས་གཅོད་པ་ནི༔ ཧཱུྃ༔ རབ་ཏུ་ཁྲོས་པའི་མཁའ་འགྲོ་འབུམ༔ དྲག་ཏུ་བསྐྱོད་ལ་སྐུ་བཞེངས་ཤིག༔ དུར་ཁྲོད་མཁའ་འགྲོའི་ཕོ་བྲང་འདིར༔ གནོད་བྱེད་གདོན་བགེགས་མཚམས་ཆོད་ཅིག༔ ས་ཀརྨ་དྷཀྐི་ནི་བྷ་ར་ཧི་ཧཱུྃ་ཕཊ༔ རཀྵ་རཀྵ་སྭཱ་ཧཱ༔ སྐྱབས་སུ་འགྲོ་བ་ནི༔ ན་མོ༔ བླ་མ་ཡི་དམ་མཁའ་འགྲོ་སྟེ༔ རྩ་བ་གསུམ་ལ་སྐྱབས་སུ་མཆི༔ སེམས་བསྐྱེད་པ་ནི༔ འགྲོ་བ་སེམས་ཅན་དོན་སླད་དུ༔ མཁའ་འགྲོའི་བསྐྱེད་རྫོགས་སྒོམ་བཟླས་བསྒྲུབ༔ གསུམ། ཡན་ལག་བདུན་པ་ནི༔ ཧཱུྃ༔ བླ་མ་ཡི་དམ་མཁའ་འགྲོ་གཤེགས༔ ཉི་ཟླ་པདྨའི་གདན་ལ་བཞུགས༔ ལུས་ངག་ཡིད་གསུམ་གུས་ཕྱག་འཚལ༔ ཕྱི་ནང་གསང་བའི་མཆོད་པ་འབུལ༔ ཉམས་ཆགས་སྡིག་སྒྲིབ་མཐོལ་ལོ་བཤགས༔ གསང་སྔགས་བསྒྲུབ་ལ་རྗེས་ཡི་རང་༔ སྨིན་གྲོལ་ཆོས་འཁོར་བསྐོར་དུ་གསོལ༔ མྱ་ངན་མི་འདར་གསོལ་བ་འདེབས༔ དགེ་བ་བྱང་ཆུབ་ཆེན་པོར་བསྔོ༔ ཐམས་ཅད་སངས་རྒྱས་ཐོབ་པར་ཤོག༔ མཆོད་པ་བྱིན་གྱིས་བརླབས་པ་ནི༔ ཧཱུྃ༔ རང་ཉིད་ལྷར་གསལ་ཐུགས་ཀ་ནས༔ འོད་ཟེར་འཕྲོ་འདུའི་ཏིང་འཛིན་གྱིས༔ མཆོད་པའི་མ་དག་ཉེས་པ་སྦྱངས༔ ཡེ་ཤེས་འདོད་དགུའི་བདུད་རྩིར་བསྒྱུར༔ ས་ཀརྨ་དྷཀྐི་ནི་བྷ་ར་ཧི་ས་མ་ཡ་ཧྲིང་ཧྲིང་ཛཿཛཿ ཨཱོཾ་ཨཱཿཧཱུྃ་སརྦ་པཉྩ་ཨ་མྲྀ་ཏ་རཀྟ་བྷ་ལིངྟ་པཱུ་ཙ་ས་མ་ཡེ་སྭཱ་ཧཱཿ གསུམ། བྱིན་དབབ་པ་ནི༔ ཧཱུྃ༔ དབྱིངས་ཀྱི་མཁའ་འགྲོའི་ཕོ་བྲང་ནས༔ སྣ་ཚོགས་མཐར་ཕྱིན་མཁའ་འགྲོའི་རྗེ༔ མཁའ་འགྲོ་མ་ཚོགས་འབུམ་གྱིས་བསྐོར༔ སྒྲུབ་པའི་གནས་འདིར་བྱིན་ཅིག་ཕོབ༔ ས་ཀརྨ་དྷཀྐི་ནི་བྷ་ར་ཧི་ས་མ་ཡ་ཧྲིང་ཧྲིང་ཛཿཛཿ ཨ་ཝེ་ཤ་ཡ་ཨ་ཨཱཿ བརྡ་སྒོ་དབྱེ་བ་ནི༔ ཧཱུྃ༔ བརྗོད་མེད་མ་བཅོས་དེ་བཞིན་ཉིད༔ ངན་རྟོག་དབང་གིས་འཁོར་བར་འཁྱམས༔ གཟུང་འཛིན་སྐྱེ་མེད་རང་གྲོལ་བའི༔ ཡེ་ཤེས་དོན་གྱི་སྒོ་དབྱེ་འཚལ༔ པྲ་ཝེ་ཤ་ཡ་ཧོཿ བརྡ་ཕྱག་ནི༔ ཧཱུྃ༔ སྐྱེ་མེད་གཉུག་མའི་རང་བྱུང་ལྷ༔ རང་དང་འགྲོག་ཀྱང་ཞལ་མ་མཇལ༔ དུས་འདིར་རང་རིག་རང་ངོར་ཤར༔ རང་གྲོལ་དོན་གྱི་ཕྱག་འཚལ་ལོ༔ ས་མ་ཡ་ཨ་ལ་ལ་ཧཱུྃ༔ དམ་བཤགས་ནི༔ ཧཱུྃ༔ གདོད་ནས་རང་དང་གཉིས་མེད་ཀྱང་༔ གཉིས་འཛིན་དབང་གིས་སོ་སོར་ཕྱེ༔ ཆོས་དབྱིངས་མཁའ་འགྲོའི་ལྷ་ཚོགས་ལ༔ གཉིས་སུ་མེད་པའི་ངང་དུ་བཤགས༔ ས་མ་ཡ་ཤུདྡྷེ་ཨཿ བསྐྱེད་རིམ་ནི༔ ཧཱུྃ༔ རྒྱུ་ཡི་རང་བཞིན་སྟོང་པ་ཉིད་དུ་གྱུར༔ སྟོང་པའི་རང་རྩལ་དམིགས་སུ་མེད་པའི་ངང་༔ དམིགས་མེད་བརྩེ་བའི་སྙིང་རྗེའི་རང་མདངས་ལས༔ ཚད་མེད་བཞི་ལྡན་སྣང་སྟོང་མེ་དཔུང་ཀློང་༔ ཆོས་ཀྱི་འབྱུང་གནས་ཨེ་ཡི་ཕོ་བྲང་དབུས༔ ཏི་ར་ཉི་ཟླ་པདྨ་འབར་བའི་སྟེང་༔ རང་བྱུང་སེམས་ཉིད་ངོ་བོ་ཡི་གེ་ས༔ འོད་ཟེར་སྤྲོ་བསྡུ་བསྒྱུར་བས་ཡེ་ཤེས་ཀྱི༔ ཕག་མོ་སྔོན་མོ་སྣ་ཚོགས་མཐར་ཕྱིན་མ༔ ཞལ་གཅིག་ཕྱག་གཉིས་སྤྱན་གསུམ་མཁའ་ལ་གཟིགས༔ གྲི་ཐོད་ཕྱག་རྒྱ་རུས་རྒྱན་གར་སྟབས་འཁྲབ༔ དུར་ཁྲོད་ཆས་བརྒྱད་ཡེ་ཤེས་མེ་དཔུང་འབར༔ ཞལ་གདངས་ལྗགས་འགྲིལ་མཆེ་གཙིགས་རྐན་སྒྲ་རྡེབ༔ ཐོད་པས་དབུ་བརྒྱན་ཁ་ཊྭཱཾ་ག་ལ་འཁྱུད༔ ཕག་ཞལ་སྒྲ་ཡིས་སྲིད་གསུམ་འདར་ཞིང་འཁྱོམ༔ ལྗང་མོ་འབུམ་གྱི་དབུས་ན་ལྷམ་མེར་གསལ༔ སྤྱན་འདྲེན་པ་ནི༔ ཧཱུྃ༔ ལས་ཀྱི་མཁའ་འགྲོ་འཕྲིན་ལས་དབང་མོ་ཆེ༔ ནུས་མཐུའི་དཔལ་ལྡན་དྲག་སྔགས་འཁོར་ལོས་སྒྱུར༔ འཕྲིན་ལས་མངའ་བདག་ཡེ་ཤེས་མཁའ་འགྲོ་མ༔ བཞེངས་ཤིག་བཞེངས་ཤིག་འབར་བའི་ཀློང་ནས་བཞེངས༔ གཏུམ་སྐད་ཕེཾ་སྒྲའི་ང་རོ་འབྲུག་ལྟར་ལྡིར༔ ཕག་ཞལ་སྒྲ་སྒྲོག་ཁམས་གསུམ་དབང་དུ་སྡུད༔ ཞིང་ཆེན་གཡང་གཞི་ཁྲག་ཏུ་ཙར་ར་ར༔ མི་མགོའི་ཕྲེང་བ་མང་པོ་ཁྲོ་ལོ་ལོ༔ གནམ་ལྕགས་གྲི་གུག་མཁའ་ལ་ཡ་ལ་ལ༔ ཐོད་ཁྲག་དམར་པོ་ཐུགས་ཀར་ཀྱིལ་ལི་ལི༔ རྡོ་རྗེ་ཁ་ཊྭཱཾ་དབྱིངས་ནས་ལྡེམས་སེ་ལྡེམ༔ དུག་སྦྲུལ་ཆུན་པོ་མང་པོ་ཉིལ་ལི་ལི༔ དུར་ཁྲོད་རུས་རྒྱན་སྐར་ལྟར་ཁྲ་ལ་ལ༔ དར་ཚོན་ཅོད་པན་སྤྲིན་ལྟར་སྤུངས་སེ་སྤུང་༔ སྟག་གི་པགས་པའི་ཤམ་ཐབས་ལྷབས་སེ་ལྷབ༔ རིན་ཆེན་སྣ་ཚོགས་རྒྱན་ཆ་སི་ལི་ལི༔ ཡེ་ཤེས་བསྐལ་པའི་མེ་དཔུང་འུ་རུ་རུ༔ འདོད་ཆགས་ཁྲག་གི་སེར་བ་ཤར་ར་ར༔ ཞེ་སྡང་དྲག་པོའི་གློག་དམར་ཀེམས་སེ་ཀེམ༔ གཏི་མུག་ནག་པོའི་མུན་པ་ཐིབས་སེ་ཐིབ༔ ང་རྒྱལ་དྲག་པོའི་ཐོག་རྒོད་ཉིལ་ལི་ལི༔ ཕྲག་དོག་འཁྲུགས་པའི་འབྲུག་སྒྲ་འུར་རུ་རུ༔ མ་མོ་མཁའ་འགྲོ་ཐམས་ཅད་དབང་སྒྱུར་ལ༔ ལྗང་མོ་འབུམ་གྱི་འཁོར་དང་བཅས་པ་རྣམས༔ དྲག་པོའི་གནས་ནས་ཡེ་ཤེས་མཁའ་ལ་བསྐྱོད༔ སྒྲུབ་པའི་གནས་འདིར་བྱིན་གྱིས་བརླབ་ཕྱིར་གཤེགས༔ མ་ཚོགས་མཁའ་འགྲོ་འབོད་པའི་དམ་ལ་འདུས༔ སྒྲུབ་པའི་མཁའ་འགྲོ་བསྐྱེད་པའི་སྐུ་ལ་ཐིམ༔ དབང་དང་དངོས་གྲུབ་སྩོལ་ཕྱིར་བརྟན་པར་བཞུགས༔ བསྐྱེད་རྫོགས་གཉིས་སུ་མེད་པའི་ཕྱག་གིས་འདུད༔ ས་ཀརྨ་དྷཀྐི་ནི་ས་མ་ཡ་ཧྲིང་ཧྲིང་ཕེཾ་ཕེཾ་ཛཿཛཿ ཨ་ཝེ་ཤ་ཡ་ཨ་ཨཱཿ མཆོད་པ་ནི༔ ཧཱུྃ༔ དཔལ་ལྡན་མཁའ་འགྲོ་སྣ་ཚོགས་མཐར་ཕྱིན་མ༔ ལྗང་མོ་འབུམ་གྱི་མཁའ་འགྲོ་འཁོར་བཅས་ལ༔ དབང་པོའི་མེ་ཏོག་ཤ་ཆེན་དུད་སྤྲིན་དང་༔ ཚིལ་ཆེན་མར་མེ་དྲི་ཆུའི་བྱུག་པ་དང་༔ དྲི་ཆེན་ཞལ་ཟས་རྐང་གླིང་རོལ་མོའི་སྒྲ༔ མཆོད་པར་འབུལ་ལོ་མ་ཆེན་དྷཀྐིའི་ཚོགས༔ ཤ་ལྔ་བདུད་རྩི་བྱང་སེམས་ཨ་མྲི་ཏ༔ མ་ཧཱ་རཀྟ་ལ་སོགས་མཆོད་པའི་རྫས༔ ཕྱི་ནང་མཆོད་ཚོགས་འདོད་ཡོན་རྣམ་པ་ལྔ༔ སྣ་ཚོགས་རྒྱན་གྱིས་སྤྲས་པའི་བྷ་ལིངྟ༔ མཆོད་པར་འབུལ་ལོ་མ་ཆེན་དྷཀྐིའི་ཚོགས༔ ས་ཀརྨ་དྷཀྐི་ནི་བྷ་ར་ཧི་མ་ཧཱ་མཾ་ས་རཀྟ་ཙིཏྟ་བྷ་ལིངྟ་ཨ་མྲི་ཏ་བྷ་སུ་ཏ་ལ་ཁ་ཁ་ཁཱ་ཧི་ཁཱ་ཧི༔ བདུན་ནམ་ཉེར་གཅིག་གིས་དབུལ༔ ཧཱུྃ༔ རབ་ཏུ་གཏུམ་ཞིང་དུག་གསུམ་འབར་བའི་མ༔ འབུམ་ཕྲག་དྷཀྐིའི་འཕྲིན་ལས་གར་དབང་མོ༔ ཧ་ཧིའི་སྒྲ་སྒྲོག་སྲིད་གསུམ་དབང་དུ་སྡུད༔ ནད་གདོན་བགེགས་དང་བར་ཆད་དབྱིངས་ནས་སེལ༔ སྒྲུབ་མཆོག་བུ་བཞིན་སྐྱོང་ལ་ཕྱག་འཚལ་བསྟོད༔ འཛབ་ནི། ཧཱུྃ༔ མཁའ་དབྱིངས་དག་པའི་ཀློང་ནས་ཡེ་ཤེས་ཀྱི༔ ལྗང་མོ་འབུམ་སྡེ་སྣ་ཚོགས་མཐར་ཕྱིན་མ༔ རང་རིག་ངོ་བོ་སྐྱེ་འགག་མེད་པའི་རྩལ༔ བསྙེན་དང་སྒྲུབ་པ་སྣང་སྟོང་འདུ་འཕྲོ་སྒྱུར༔ དུས་གསུམ་བདེ་གཤེགས་འབུམ་ཕྲག་མཁའ་འགྲོའི་ཚོགས༔ ཐུགས་རྗེ་བྱིན་རླབས་ཁམས་གསུམ་འཁོར་འདས་བཅུད༔ ནུས་པས་དབང་བསྡུས་རྣལ་འབྱོར་བདག་ལ་བསྟིམ༔ བདེ་སྟོང་དབྱིངས་རྒྱས་ཉམས་རྟོགས་འོད་དུ་འབར༔ ཉི་དཀྱིལ་ས་བོན་སྔགས་ཀྱི་ཕྲེང་བ་ལ༔ ཤེས་རབ་རིག་པའི་ཕྲེང་ཐག་བརྒྱུད་དེ་འཁོར༔ ནད་བཟློག་བགེགས་བསད་བར་ཆད་དབྱིངས་སུ་བསལ༔ སྐུ་དང་ཡེ་ཤེས་འདུ་འབྲལ་མེད་པའི་ཀློང་༔ རང་བྱུང་སྙིང་པོའི་སྒྲ་དབྱང་ས་དིར་རི་རི༔ ས་ཀརྨ་དྷཀྐི་ནི་བྷ་ར་ཧི་ས་མ་ཡ་ཧྲིང་ཧྲིང་ཛཿཛཿ བརྒྱ་ལས་མ་ཉུང་བ་བཟླས་རྗེས། ནད་གདོན་བགེགས་དང་བར་ཆད་སརྦ་མཱ་ར་ཡ་ཧཱུྃབྷྱོ་ཧཱུྃ་ཕཊ་རཾ་རཾ་སྭཱ་ཧཱཿ སྐབས་ལྟར་སྦྱར། དངོས་གྲུབ་ལེན་པ་ནི། ཧཱུྃ༔ མཁའ་འགྲོ་རྒྱ་མཚོ་དབང་གི་དཀྱིལ་འཁོར་དུ༔ སྐུ་ལྔའི་ཡོན་ཏན་མ་ལུས་འདུས་པའི་དཔལ༔ སྣ་ཚོགས་མཐར་ཕྱིན་སྐུ་དང་གཉིས་སུ་མེད༔ དམ་རྫས་གཏོར་ཆེན་མཆོག་གི་དངོས་གྲུབ་ཞུ༔ མ་དང་མཁའ་འགྲོ་བརྟེན་ཕྱིར་བདག་ལ་སྩོལ༔ ཧཱུྃ༔ སྣ་ཚོགས་མཐར་ཕྱིན་དུས་གསུམ་རྒྱལ་བའི་ཡུམ༔ ལས་ཀྱི་དྷཀྐི་ཀརྨ་མཁའ་འགྲོའི་ཚོགས༔ འགྱུར་མེད་རྣམ་དག་སྐུ་ཡི་སྒོ་ཕྱེ་ནས༔ འཆི་མེད་རིག་འཛིན་ཚེ་ཡི་དངོས་གྲུབ་སྩོལ༔ འགག་མེད་རྣམ་དག་གསུང་གི་སྒོ་ཕྱེ་ནས༔ ཚངས་དབྱངས་དྲུག་ཅུ་གསུང་གི་དངོས་གྲུབ་སྩོལ༔ སྤྲོས་མེད་རྣམ་དག་ཐུགས་ཀྱི་སྒོ་ཕྱེ་ནས༔ ཕྱག་རྒྱ་ཆེན་པོ་མཆོག་གི་དངོས་གྲུབ་སྩོལ༔ རིན་ཆེན་བུམ་བཟང་དཔག་བསམ་ནོར་བུའི་ཚུལ༔ དགོས་འདོད་ཀུན་འབྱུང་མཆོག་ཐུན་དངོས་གྲུབ་སྩོལ༔ ས་ཀརྨ་དྷཀྐི་ནི་བྷ་ར་ཧི་ཀཱ་ཡ་ཝཱཀྐ་ཙིཏྟ་སིདྡྷི་ཧཱུྃ༔ བཀའ་གཏེར་སྲུང་མ་མཆོད་ཅིང་ཚོགས་འཁོར་བཤམས་ལ༔ ཧཱུྃ༔ སྐྱེ་མེད་དབྱིངས་ཀྱི་མཁའ་ཀློང་ནས༔ ཟག་མེད་བདུད་རྩིའི་བཅུད་འཕྲོས་པས༔ གྷ་ན་ཚོགས་ཀྱི་འཁོར་ལོར་ཕོག༔ འདོད་ཡོན་ལོངས་སྤྱོད་སྣང་སྲིད་བཀང་༔ ཨཱོཾ་ཨཱཿཧཱུྃ་སྭཱ་ཧཱཿ ཚོགས་ལ་སྤྱན་འདྲེན་པ་ནི༔ ཧཱུྃ༔ ཆོས་དབྱིངས་མཁའ་འགྲོའི་ཕོ་བྲང་ནས༔ སྣ་ཚོགས་མཐར་ཕྱིན་མཁའ་འགྲོའི་གཙོ༔ འབུམ་ཕྲག་དྷཀྐིའི་འཁོར་གྱིས་བསྐོར༔ གནས་འདིར་མདུན་གྱི་མཁའ་ལ་སྤྱོན༔ ཚོགས་ཀྱི་མཆོད་པ་བཞེས་སུ་གསོལ༔ མཆོད་པ་ནི༔ ཧཱུྃ༔ རོ་བརྒྱ་ལྡན་པའི་ཞལ་ཟས་བཤོས༔ མཾ་ས་ཤ་དང་སུ་ར་ཆང་༔ བཟའ་བཏུང་ལོངས་སྤྱོད་སྣ་ཚོགས་པ༔ མཆོད་པར་འབུལ་ལོ་བཞེས་སུ་གསོལ༔ ས་ཀརྨ་དྷཀྐི་ནི་བྷ་ར་ཧི་གྷ་ན་པཱུ་ཙ་སརྦ་ས་མ་ཡ་ཁཱ་ཧི་ཁཱ་ཧི༔ བཤགས་པ་ནི༔ ཧཱུྃ༔ ཡེ་ཤེས་མཁའ་འགྲོའི་ལྷ་ཚོགས་དགོངས༔ རང་རྒྱུད་རྨོངས་པས་མི་དགེ་བསགས༔ ཉམས་ཆགས་སྡིག་སྒྲིབ་གནོང་ངོ་འགྱོད༔ ཚོགས་མཆོད་འདི་ཡིས་དག་གྱུར་ཅིག༔ གྷ་ན་པཱུ་ཙ་ཁཱ་ཧི་ཤུདྡྷེ་ཨ༔ བསྒྲལ་ལས་ནི༔ དགུག་གཞུག་སྤྱི་ལྟར་གྱི་མཐར། ས་ཀརྨ་དྷཀྐི་ནི་བྷ་ར་ཧི་དགྲ་བོ་བྱད་མ་ལྷ་སྲུང་དང་བཅས་པའི་ལུས་ངག་ཡིད་གསུམ་ཁུག་རིལ་ཐུན་བྷྱོ༔ གསུམ། ཛཿཧཱུྃ་བཾ་ཧོ་ས་རྒྱས་གདབ། ཧཱུྃ༔ སྣ་ཚོགས་མཐར་ཕྱིན་འཇིགས་གཟུགས་བརྔམ༔ རབ་གཏུམ་འཁྲུགས་པས་དུག་གསུམ་འབར༔ སྐུ་གསུང་ཐུགས་སྤྲུལ་སྟོང་གསུམ་གང་༔ སྒྲོལ་བྱེད་འབུམ་སྡེས་དགྲ་བགེགས་སྒྲོལ༔ ས་ཀརྨ་དྷཀྐི་ནི་བྷ་ར་ཧི་མ་མ་ཏྲག་རཀྵ་ཡ་ཁ་ཐུན་དགྲ་བོ་འདུ་ཤ་ཡེ་བྷནྡྷ་ཡེ༔ ཚིནྡྷ་ཡེ༔ རཀྟ་ཡེ༔ དགྲ་བོའི་སྙིང་ཁ་རག་མོ་སྲོག་ཁུག་མྱུར་དུ་ཁུག་ཛཿཛཿ དགྲ་བོའི་སྙིང་དུམ་བུར་ཆོད་དུམ་བུར་ཆོད་དགྲ་བོ་མཱ་ར་ཡ་ཛཿཛཿ ཞལ་སྟོབ་ནི། ཧཱུྃ༔ མཁའ་འགྲོའི་ཚོགས་རྣམས་དགྱེས་པར་རོལ༔ ཁཱ་ཧི་ཁཱ་ཧིའདོད་ཆགས་ཁྲག་ལ་ཁཱ་ཧིཿ ཁཱ་ཧི་ཁཱ་ཧི་ཞེ་སྡང་རུས་ལ་ཁཱ་ཧིཿ ཁཱ་ཧི་ཁཱ་ཧི་གཏི་མུག་ཤ་ལ་ཁཱ་ཧིཿ ལྷག་མ་ནི༔ ཧཱུྃ༔ མཁའ་འགྲོ་བཀའ་ཡི་དཀྱིལ་འཁོར་ནས༔ དུར་ཁྲོད་ཉུལ་ཞིང་མཁའ་ལ་རྒྱུ༔ ལས་སུ་གསང་སྔགས་བསྟན་པ་བསྲུང་༔ ཟས་སུ་ཤ་ཁྲག་དམར་ལ་གསོལ༔ སྤྲུལ་པ་འབུམ་འབུམ་མཁའ་འགྲོའི་ཚོགས༔ ལྷག་མའི་ལོངས་སྤྱོད་འདི་བཞེས་ལ༔ རྣལ་འབྱོར་བདག་གི་འཕྲིན་ལས་སྒྲུབས༔ སརྦ་དྷཀྐི་ནི་ས་མ་ཡ་ཁཱ་ཧི༔ ཆད་ཐོ་ནི༔ ཧཱུྃ༔ སྔོན་ཚེ་བསྐལ་པའི་དང་པོ་ལ༔ ཆོས་དབྱིངས་མཁའ་འགྲོའི་དུར་ཁྲོད་དུཿགཙོ་མོ་སྣ་ཚོགས་མཐར་ཕྱིན་གྱིས༔ དམ་ལ་བཞག་པའི་མཁའ་འགྲོ་འབུམ༔ ཤ་ཁྲག་གཏོར་མ་འདི་བཞེས་ལ༔ གསང་སྔགས་བླ་མེད་བསྟན་པ་སྲུངས༔ དགྲ་བགེགས་སྒྲོལ་ལ་བར་ཆད་ཟློག༔ བཅོལ་བའི་འཕྲིན་ལས་གྲུབ་པར་མཛོད༔ ཧཱུྃ། དེ་འོག་བར་གྱི་བསྐལ་བ་ལ། །ཁམས་ཀྱི་སྲིང་མོ་རྫོང་གསུམ་གྱི། །གནས་མཆོག་ཆགས་རུ་ཕུག་སྔོན་ནས། །ཁམས་པ་ཉི་མ་གྲགས་པ་ཡིས། །ཟབ་ཆོས་གཏེར་སྒོ་ཕྱེ་བའི་ཚེ། །གཡར་དམ་ཕོག་པའི་ལྷ་འདྲེ་རྣམས། །དམར་གྱི་གཏོར་མ་འདི་བཞེས་ལ། །བཅོལ་བའི་འཕྲིན་ལས་གྲུབ་པར་མཛོད། །ཧཱུྃ། ད་ལྟ་སྔགས་འཆང་བདག་ཉིད་ཀྱིས། །གསལ་བ་གསུམ་གྱི་དཀྱིལ་འཁོར་དུ། །ཤེས་པ་གསུམ་གྱི་གཟེར་གདབ་ནས། །མགྲོན་ལ་བོས་པའི་བཀའ་སྐྱོང་རྣམས། །དམར་གྱི་གཏོར་མ་འདི་བཞེས་ལ། །བཅོལ་བའི་འཕྲིན་ལས་གྲུབ་པར་མཛོད། །བསྟན་མ་ནི༔ ཧཱུྃ༔ བཀའ་ཡི་སྲུང་མ་དམ་ཚིག་ཅན༔ བོད་ཁམས་སྐྱོང་བའི་བསྟན་མ་རྣམས༔ བཤལ་ཆུའི་གཏོར་མ་འདི་ལོང་ལ༔ བླ་མེད་བསྟན་སྐྱོང་འཕྲིན་ལས་སྒྲུབས༔ བྷྱོ་ས་མ་ཡ་ཁཱ་ཧི༔ གཏོར་གཞོང་སྦུབ་ཅིང་། ཧཱུྃ། མཁའ་འགྲོ་ཁྲོས་པའི་ཏིང་འཛིན་གྱིས། །བདེ་བ་ཆེན་པོའི་བྲོ་བརྡུང་བས། །སྟོང་པ་ཆེན་པོའི་ཡེ་ཤེས་རྒྱས། །སྒབ་འདྲེ་དམ་སྲི་འབྱུང་པོའི་ཚོགས། །ནམ་ཡང་ལྡང་བར་མ་བྱེད་ཅིག །དམ་སྲི་སརྦ་སྟམ་བྷ་ཡ་ནན། །རྫོགས་རིམ་ནི༔ ཧཱུྃ༔ སྣང་བ་དག་པ་གཞལ་ཡས་ཁང་༔ གཟུང་འཛིན་བྲལ་བ་ཡི་དམ་ལྷ༔ རང་ངོར་གསལ་བ་ཆོས་ཀྱི་སྐུ༔ སྐྱེ་མེད་མཁའ་འགྲོའི་ལྷ་ཚོགས་རྣམས༔ ཆོས་དབྱིངས་མཁའ་འགྲོའི་གནས་སུ་གཤེགས༔ ཨཱ་ཨཱཾཿསྨྲ་བསམ་བརྗོད་མེད་ཡུམ༔ རང་སེམས་སྐྱེ་འགགས་གནས་གསུམ་འདི༔ མཁའ་འགྲོའི་སྐུ་གསུམ་རོལ་པར་ཤར༔ བསྔོ་སྨོན་ནི༔ ཧཱུྃ༔ གསང་བའི་བསྐྱེད་རྫོགས་སྒོམ་བཟླས་མཐུས༔ ལྟ་བ་གཡེལ་བ་སོར་ཆུད་ཅིང་༔ སྒོམ་པ་བྱིང་བ་ཀློང་གྱུར་ཏེ༔ སྤྱོད་པ་ཚོགས་གཉིས་མཐར་ཕྱིན་ཞིང་༔ འབྲས་བུ་སྐུ་བཞི་མངོན་གྱུར་ཤོག༔ ཤིས་པ་ནི༔ ཧཱུྃ༔ ཡེ་ཤེས་དབྱིངས་ཀྱི་ཕོ་བྲང་ནས༔ ཕག་མོ་ཆོས་སྐུའི་བཀྲ་ཤིས་ཤོག༔ ཡེ་ཤེས་ལྔ་ལྡན་ཕོ་བྲང་ནས༔ ཕག་མོ་ལོངས་སྐུའི་བཀྲ་ཤིས་ཤོག༔ མཁའ་སྤྱོད་གནས་ཡུལ་དུར་ཁྲོད་ནས༔ སྤྲུལ་པ་འབུམ་སྡེའི་བཀྲ་ཤིས་ཤོག༔ ཅེས་པ་འདི་ཡང་དགོས་པར་སེམས་ཏེ་ཕག་མོ་ནག་མོའི་རང་གཞུང་བྱིན་རླབས་ཀྱི་གནད་ཆེ་བས་སོར་བཞག །བསྒྱུར་འོས་རྣམས་སྣ་ཚོགས་མཐར་ཕྱིན་གྱི་གཞུང་བཞིན་མཚམས་སྦྱར་བའི་ལས་བྱང་ཆོག་སྒྲིགས་གཏེར་སྟོན་གྱིས་མཛད་པ་ལྟར་ལ་ཅུང་ཟས་གོ་རིམ་འཁྲུགས་པ་རྣམས་པདྨ་ཐེག་མཆོག་བསྟན་པའི་རྒྱལ་མཚན་གྱིས་བསྒྲིག་པ་དགེ་ཞིང་ཤིས་པར་གྱུར་ཅིག །མངྒ་ལཾ། །དྲག་རྩལ་མཐར་ཕྱིན་རྣལ་འབྱོར་མའི། །འཕྲིན་སྒྲུབ་པར་དུ་བཞེངས་པའི་དགེ། །མི་བཟད་གནམ་ལྕགས་ཐོག་གི་མདས། །དགྲ་གདོན་བྲག་རི་ཕྱེར་འཐག་ཤོག །ཅེས་པའང་ཀརྨ་འཕྲིན་ལས་པས་སོ།། །།མངྒ་ལཾ།

དྲག་པོའི་སྦྱིན་སྲེག་ཆོག་སྒྲིག

ཕག་མོ་སྔོན་མོའི་ཟབ་ཐིག་ལས། དྲག་པོའི་སྦྱིན་སྲེག་བཞུགས། །སྣ་ཚོགས་མཐར་ཕྱིན་མཁའ་འགྲོའི་ལྷ་ཚོགས་རྣམས་ལ་ཕྱག་འཚལ་ཞིང་སྐྱབས་སུ་མཆིའོ། བྱིན་གྱིས་བརླབ་པར་མཛད་དུ་གསོལ། དེ་ཡང་སྣ་ཚོགས་མཐར་ཕྱིན་གྱི་དཀྱིལ་འཁོར་དུ་ཡོངས་སུ་སྨིན་པར་བྱས་ཤིང་བསྙེན་པ་དང་སྒྲུབ་པའི་རིམ་པར་དྲོད་རྟགས་ཐོན་པ་དམ་ཚིག་ལ་གནས་པའི་སྔགས་པས། འཇིགས་ཤིང་སྐྱི་གཡའ་བའི་དུར་ཁྲོད་དམ་ནག་ཅིང་རྩུབ་ལ་ཁ་ལྷོར་བལྟ་བ་སོགས་དྲག་པོའི་གནས་སམ། སྐབས་སུ་བབས་པའི་གནས་སུ་ལྕགས་ཁམས་ཀྱི་ལོ་ཟླ་ཉི་ཁྱིམ་ཡོད་པའི་འཕུང་གསུམ་བདུད་ཀྱི་ཉི་མ་སོགས་རབ་ཏུ་གཉན་ཅིང་རྩུབ་པའི་སྲོད་ལ་སོགས་པར། གྲོག་མཁའ་གྱི་ས་འཕུང་ཤུལ་གྱིས་གཡུལ་བཀྱེ་བའི་ས་སོགས་ལ་སྟེགས་བུ་ནག་པོ་རྒྱར་ཁྲུ་གང་དཔངས་སུ་མཐོ་གང་པ་དུག་དང་ཁྲག་གིས་ཆག་ཆག་གདབ་པར་མཎྜལ་ནག་པོ་གྲུ་གསུམ་པ་ཐོད་ར་དང་མེ་རིས་བསྐོར་བའི་ནང་དུ་ཕྱག་མཚན་ནམ་རཾ་ཡིག་ས་བོན་གྱིས་མཚན་པའམ་ཚོམ་བུ་གང་ཚོགས་བྲིས་པའི་ཁར་སྐྱེར་པ་སོགས་དུག་དང་ཚེར་མ་ཅན་གྱི་ཤིང་དུག་ཁྲག་གིས་སྦགས་པ་གྲུ་གསུམ་དུ་བརྩིགས། གཡོན་དུ་མེ་སྲོག་འཛིན་པའི་རྫས་ཚེར་མ་ཅན་གྱི་ཤིང་ཟུར་གསུམ་པ་སོར་བཅུ་གཉིས་སྦོམ་ཕྲ་མ་ཐེའུ་ཆུང་དུ་གཞོགས་པ་ལ་དུག་ཁྲག་གིས་གནོད་བྱེད་དགྲ་བགེགས་ཐམས་ཅད་མཱ་ར་ཡ་རྦད་ཅེས་བྲིས་པའི་རྩ་རྩེར་དུག་ཁྲག་དང་མར་ནག་ཚིལ་ཆེན་གྱིས་སྦགས་པ་གང་མང་། རྩ་བའི་རྫས་དགྲ་བགེགས་གང་ལབྱེད་པའི་གཟུགས་དགྲ་ཡིན་ན་ཟག་རྫས་སོགས་དྲི་མ་དྲུག་གིས་བགོས་པ་བརྒྱ་རྩ་བརྒྱད། དྲག་པོའི་རྫས་མི་རྟ་ཁྱི་གསུམ་སོགས་ཀྱི་ཤ་སྣ་བག་ཕྱེ་དང་བསྲེས་པའི་སྐྱུ་གུ་གྲུ་གསུམ་པའི་ནང་དུ་གནོད་བྱེད་ཀྱི་མིང་རུས་དུག་ཤོག་ལ་དུག་ཁྲག་གིས་བྲིས་ཏེ་བཅུག་པ། གནད་ཀྱི་རྫས་སྦལ་ཉ་ཁྱི་སོགས་ཀྱི་ཤ་ར་དུག་ཐང་ཕྲོམ་བཙན་དུག་བོང་དུག་ཐར་ནུ་སོགས་དུག་སྣ་རྣམས་བསྲེས་པ། བསོད་པའི་རྫས་གྲི་ལྕགས་བྲག་ཐོག་གིས་བཤིགས་པ་གནམ་ནས་བབས་པའི་འཁར་ཟངས་བརྡར་བའི་ཕྱེ་མ། མྱོས་པའི་རྫས་མར་ནག་དམེ་མནོལ་གྱི་ཁྲག་དང་སྦྱར་བ། ཚ་བའི་རྫས་ཏིལ་ནག་ཡུངས་ཀར་ལྕེ་ཚ་དབྱི་མོང་སྲུབ་ཀ་སྟེ་ཚ་བ་གསུམ། རྫས་དེ་རྣམས་ལྕགས་སམ་བྷནྡྷའི་སྣོད་དུ་རིམ་པར་འགོད། གོ་ཡུ་མར་དང་སྦྱར་བའི་སོ་རྩི་ལས་མཐུན་གྱི་གོས་ཟུང་རྣམས་བཤམས། གཡས་སུ་མཆོད་ཡོན་ཞབས་བསིལ་གྱིས་ཐོག་དྲངས་པའི་ཉེར་སྤྱོད་འཇིག་རྟེན་པ་དང་འདས་པའི་སྨན་རག་གཏོར་མཆོད། མདུན་དུ་རྡོར་དྲིལ་དགང་གཟར་བླུགས་རླུང་གཡབ་མེ་ཏོག་ལས་བུམ་སོགས་ཉེ་བར་མཁོ་བ་རྣམས་བཤམས། སྣ་ཚོགས་མཐར་ཕྱིན་གྱི་ལས་གཞུང་ཚོགས་ལྷག་ཡན་གྲུབ་ནས་ལས་བུམ་གྱི་ཁར་གཟུངས་ཐག་བཀོད་དེ། སྭ་བྷཱ་ཝས་སྟོང་པར་སྦྱངས། སྟོང་པ་ཆེན་པོའི་ངང་ཉིད་ལས། །ལས་བུམ་ཁྲོ་བོའི་གཞལ་ཡས་ཁང་། །མཚན་ཉིད་ཡོངས་རྫོགས་ལྟེ་བ་རུ། །པད་ཉིར་ཧཱུྃ་ལྗང་འཕྲོ་འདུ་ལས། །བདུད་རྩི་འཁྱིལ་བ་རྔམ་ཞིང་ཁྲོ། །གཡས་གཡོན་རྒྱ་གྲམ་སྡིགས་མཛུབ་ལྗང་། རབ་འཇིག་ཁྲོ་བོའི་ཆ་ལུགས་རྫོགས། །སྐུ་ལས་ཁྲོ་ཆུང་དཔག་མེད་འཕྲོས། །གནོད་བྱེད་ལོག་འདྲེན་མི་བསྲུན་ཚོགས། བསྐྲད་གཟིར་མནན་བསྲེགས་རྡུལ་དུ་བརླག །ཚུར་འདུས་བུམ་པའི་ཆུ་དང་འདྲེས། ཨཱོཾ་བཛྲ་ཨ་མྲྀ་ཏ་ཀུནྜ་ལི་ཧ་ན་ཧ་ན་ཧཱུྃ་ཕཊཿ ཅེས་གང་འགྲུབ་བཟླས་རྗེས། ཁྲོ་བོའི་དབང་པོ་འོད་དུ་ཞུ། །བདུད་རྩི་བུམ་ཆུའི་རྣམ་པར་གྱུར། ཞེས་བསྒྲུབ། དེ་ནས་སྔགས་པ་བདུད་ཆས་སུ་ཞུགས་ཏེ་མི་བསྲུན་པའི་ལོག་འདྲེན་མཐའ་དག་དྲག་པོའི་འཕྲིན་ལས་ཀྱི་སྟོབས་ཀྱིས་བཏུལ་ཏེ་སྣ་ཚོགས་མཐར་ཕྱིན་གྱི་གོ་འཕང་ལ་འགོད་པར་བྱ་བའི་སེམས་བསྐྱེད་དང་ལྡན་པས་རོལ་མོ་འཁྲོལ་ཞིང་འཛབ་དབྱངས་བཟླ་འགྱིང་བག་གི་སྟབས་ཀྱིས་མེ་ཐབ་ལན་གསུམ་བསྐོར་ཏེ། མེ་ཐབ་ཀྱི་དབུས་སུ་ས་ལྗང་ནག་རཾ་གྱིས་མཚན་པ་ལས་འོད་ཟེར་མེ་དཔུང་དམར་ནག་ཚ་ཞིང་རྩུབ་པ་དཔག་ཏུ་མེད་པ་ཕྱོགས་བཅུར་འཕྲོས་པས་གདོན་བགེགས་འབྱུང་པོ་ཐམས་ཅད་མིང་ཡང་མི་གྲག་པར་ཐལ་བའི་རྡུལ་དུ་བརླག་ཚུར་འདུས་པ་ལས་སྟེང་འོག་ཕྱོགས་མཚམས་ཐམས་ཅད་རྣོ་དཔལ་མཚོན་ཆ་འབར་བའི་ས་གཞིར་དྲ་གུར་ཡེ་ཤེས་ཀྱི་མེ་རི་དང་བཅས་པའི་བསྲུང་བའི་འཁོར་ལོས་རབ་ཏུ་གཏམས་པར་གྱུར་པར་བསམ་ཤིང་། ཧཱུྃ༔ བསྐལ་པའི་མེ་ཆེན་འབར་བའི་གཞལ་ཡས་འདིར༔ མེ་ལྷ་དྲང་སྲོང་ཡི་དམ་མ་གཏོགས་པ༔ གདོན་བགེགས་འབྱུང་པོ་བར་དུ་གཅོད་པའི་ཚོགས༔ འདི་རུ་མ་འདུག་རང་རང་གནས་སུ་དེངས༔ གལ་ཏེ་མི་འགྲོ་ཆགས་ཤིང་འདིར་འཁོར་ན༔ མེ་འདག་འབར་བའི་སྦྲང་བུ་བཞིན་དུ་བསྲེག༔ ཞེ་སྡང་འཇོམས་པའི་མེ་ནི་མཐིང་ནག་འབར༔ ང་རྒྱལ་འཇོམས་པའི་མེ་ནི་སེར་ནག་འབར། འདོད་ཆགས་འཇོམས་པའི་མེ་ནི་དམར་ནག་འབར༔ ཕྲག་དོག་འཇོམས་པའི་མེ་ནི་ལྗང་ནག་འབར༔ གཏི་མུག་འཇོམས་པའི་མེ་ནི་སྨུག་ནག་འབར༔ ཡེ་ཤེས་འབར་བའི་མེ་ཡིས་མཚམས་ཆོད་ཅིག༔ ས་ཀརྨ་དྷཀྐི་ནི་བྷ་ར་ཧི་ཨགྣཱེ་ཡེ་ཛྭ་ལ་རཾ་རཾ༔ ཨཱོཾ་སུམ་བྷཱ་ནི་སོགས་བརྗོད༔ དེ་ནས་མཆོད་པ་བྱིན་གྱིས་བརླབ་པ་ནི། ལས་བུམ་གྱི་ཆུར་འཐོར་ཞིང་སྲེག་རྫས་རྣམས་གསང་སྦྱངས། སྟོང་པའི་ངང་ལས་ཨཱཿལས་བྷནྡྷ་ལྕང་ལོར་བཅས་པ་ཡངས་ཤིང་རྒྱ་ཆེ་བ་སྟོང་གསུམ་གྱི་ཁྱོན་དང་མཉམ་པའི་ནང་དུ་ནྲི་ཏྲི་ཡོངས་སུ་གྱུར་པ་ལས་དགྲ་བགེགས་གནོད་བྱེད་གདུག་པ་ཅན་རྣམས་བསྒྲལ་བའི་ཕུང་ཁམས་སྐྱེ་མཆེད་ལས་བྱུང་བའི་མཆོད་རྫས་དང་སྲེག་རྫས་རྣམས་ངོ་བོ་ཡེ་ཤེས་ཀྱི་བདུད་རྩིའི་རྒྱ་མཚོ་ཆེན་པོ་ལ་རྣམ་པ་སོ་སོའི་མཚན་ཉིད་ཐམས་ཅད་ཡོངས་སུ་རྫོགས་ཤིང་བྱེད་ལས་ལྷ་ཚོགས་མ་ལུས་པའི་ཐུགས་རྒྱུད་ལ་ཟག་མེད་ཀྱི་དགྱེས་པ་བསྐྱེད་པར་ནུས་པའི་རབ་འབྱམས་མཆོད་པའི་སྤྲིན་གྱི་ཕུང་པོ་ནམ་མཁའི་མཐའ་དང་མཉམ་པར་གྱུར་པར་བསམས་ཤིང་། ཨཱོཾ་བཛྲ་ཨརྒྷཾ་ཨཱཿཧཱུྃ་ནས་ཤཔྟ་ཨཱཿཧཱུྃ་གིས་མཆོད་རྫས་དང་། ས་ཀརྨ་དྷཀྐི་ནི་བྷ་ར་ཧི་ཀྲོ་ཏི་རཱ་ཛ་ནྲི་ཏྲི་མཱ་ར་ཡ་ཛཿཛཿ ལན་གསུམ་གྱིས་སྲེག་རྫས་རྣམས་བྱིན་གྱིས་བརླབ། དེ་ནས་གདོལ་པའམ་དམེ་ཕོ་ཡུག །་ས་གང་རུང་ནས་མེ་བླངས་ལ་ཐབ་ཏུ་སྦར་ཞིང་། ཧཱུྃ༔ བྱང་གི་ཕྱོགས་ནས་མེ་སྦར་མས༔ གནོད་སྦྱིན་ལག་ནས་མེ་ལོངས་ལ༔ དྲག་པོའི་མེ་ནི་སྤར་བར་མཛོད༔ ལྷོ་ནུབ་མཚམས་ནས་ཤིང་ཐུན་མས༔ རླུང་ལྷའི་ཡུལ་ནས་ཤིང་ཐུས་ལ༔ རླུང་གི་ལྷ་མོས་རླུང་གཡོབ་ཤིག༔ ཨཱོཾ་ཨགྣཱེ་ཡེ་ཧ་བྱ་ཀ་བྱ་ཆེ་གེ་མཱ་ར་ཡ་ཛྭ་ལ་རཾ་རཾ༔ རླུང་གཡབ་ཀྱིས་གཡབ་ཅིང་། ཨཱོཾ་ཨགྣཱེ་ཡེ་ཛྭ་ལ་རཾ་རཾ༔ ཞེས་མར་ནག་བླུགས་གཟར་བདུན་གྱིས་ཀྱང་གསོ། མེ་ཐབ་བསངས་སྦྱངས། སྟོང་པའི་ངང་ལས་རབ་འཇིགས་དྲག་པོའི་ཐབ་ཁུང་གྲུ་གསུམ་ནག་པོ་བང་རིམ་གསུམ་དང་ལྡན་ཞིང་མུ་རན་དང་ཁ་ཁྱེར་འ་ཐོད་པའི་ཕྲེང་བ་དང་མེ་དཔུང་འབར་བས་ཀླུབས་པ་གཏིང་རབ་ཏུ་ཟབ་ལ་རྒྱ་ཁྱོན་ཆོས་ཀྱི་དབྱིངས་དང་མཉམ་པའི་དབུས་སུ་རང་ཉིད་སྣ་ཚོགས་མཐར་ཕྱིན་གྱི་ཐུགས་ཀ་ནས་སྤྲོས་པའི་རཾ་དམར་ནག་ཡོངས་སུ་གྱུར་པ་ལས། ཧཱུྃ་ཧཱུྃ་མེ་ཐབ་གྲུ་གསུམ་རྒྱ་ཆེ་ཡངས་པའི་ནང་༔ མེ་ཡི་འཁོར་ལོ་རྩིབས་བརྒྱད་རཾ་གྱིས་མཚན༔ མེ་ལྷ་དམར་པོ་ཞལ་གཅིག་ཕྱག་བཞི་པ༔ མེ་ཡི་འཁོར་ལོ་མེ་ཡི་རྒྱ་མཚན་དང་༔ འོག་མ་གཉིས་ཀྱི་མེ་ཡི་ལྕགས་ཀྱུ་བསྣམས༔ དབང་དྲག་དཔལ་འབར་གཟི་བརྗིད་ལྡན་པར་བསྐྱེད༔ སྤྱན་འདྲེན་པ་ནི༔ ཧཱུྃ༔ དབང་དྲག་སྟོབས་ཀྱི་འཕྲིན་ལས་གར་དགུར་ལྡན༔ འབྱུང་བ་ཆེན་པོ་སྲེག་བྱེད་འབར་བའི་ལྷ༔ དད་པས་སྤྱན་འདྲེན་དྲག་པོའི་གཞལ་ཡས་འདིར༔ དམ་ཚིག་དབང་གིས་གཤེགས་ཤིག་ས་མ་ཡ༔ ཨཱོཾ་ཨགྣཱེ་ཡེ་བཛྲ་ས་མ་ཡ་ཛཿཛཿཧཱུྃ་བཾ་ཧོ༔ དམ་ཚིག་པ་དང་གཉིས་སུ་མེད་པར་གྱུར༔ ཧཱུྃ༔ གཟི་བརྗིད་འབར་བ་མེ་ཡི་ལྷ༔ དྲག་པོའི་འཕྲིན་ལས་སྒྲུབ་པའི་ཕྱིར༔ འབར་བ་མེ་ཡི་གཞལ་ཡས་འདིར༔ གཉིས་མེད་བརྟན་པར་བཞུགས་སུ་གསོལ༔ ཨཱོཾ་ཨགྣཱེ་ཡེ་དྷེ་ཝ་བཛྲ་ས་མ་ཡ་ཨ་ཝེ་ཤ་ཡ་ཏིཥྛནྟུ༔ ཞེས་པས་གདན་དབུལ༔ ཧཱུྃ༔ དྲང་སྲོང་ཆེན་པོ་མེ་ཡི་ལྷ༔ གཟི་བརྗིད་འབར་བ་ལྟ་ན་སྡུག༔ འཕྲིན་ལས་ཀུན་སྒྲུབ་ཐུགས་རྗེ་ཅན༔ གུས་པའི་ཡིད་ཀྱིས་ཕྱག་འཚལ་བསྟོད༔ ཨཱོཾ་ཨགྣཱེ་ཡེ་དྷེ་ཝ་ཨ་ལ་ལ་ཨ་ཏི་པུ་ཧོཿས་ཕྱག་བྱ། ཧཱུྃ༔ དངོས་བཤམས་ཡིད་ལས་སྤྲུལ་པ་ཡི༔ རྨད་དུ་བྱུང་བའི་ཉེར་སྤྱོད་ལྔ༔ ལོག་འདྲེན་དགྲ་བགེགས་གདུག་པ་ཅན༔ བསྒྲལ་བའི་གཟུགས་ཕུང་ལས་བྱུང་བའི༔ རྔམ་བརྗིད་ནང་གི་ཉེར་སྤྱོད་ལྔ༔ རྩ་བརྒྱད་སྟོང་ལ་སྦྱར་བའི་སྨན༔ བདུད་སྡེའི་སྙིང་གི་རཀྟ་དམར༔ རྨད་བྱུང་གཏོར་མའི་རི་བོ་སྟེ༔ ནམ་མཁའ་གང་བའི་མཆོད་པ་རྣམས༔ དྲང་སྲོང་མེ་ལྷའི་ཚོགས་ལ་འབུལ༔ ཨཱོཾ་ཨགྣཱེ་ཡེ་དྷེ་ཝ་ས་པ་རི་ཝཱ་ར་ཨརྒྷཾ་ནས། ཤཔྟ་སརྦ་པཉྩ་ཨ་མྲི་ཏ་མ་ཧཱ་བཱ་ལིངྟ་པཱུ་ཙ་ཁཱ་ཧི། ཞེས་མཆོད། ཧཱུྃ། ཚངས་པའི་དབང་པོ་འཇིག་རྟེན་མགོན་གྱི་སྲས། །ལས་བཞིའི་སྟོབས་ཀྱིས་འཁོར་ལོའི་སྒྱུར་བའི་ལྷ། །ཡིད་བཞིན་རེ་སྐོང་གཟི་བརྗིད་སྣང་བའི་གཏེར། །ལོག་འདྲེན་སྲེག་བྱེད་མེ་ཡི་ལྷ་ལ་བསྟོད། །ཅེས་བསྟོད་ཅིང་། དེ་ནས་བྱོན་ཟན་འབུལ་བ་ནི། མེ་ལྷའི་ལྗགས་རྡོ་རྗེ་རྩེ་མོ་གཅིག་པར་རཾ་ཡིག་དམར་པོ་དང་དགང་བླུགས་ཀྱི་རྩེ་མོར་ས་ལྗག་ནག་གཟི་བརྗིད་དང་ལྡན་པ་རེས་མཚན་པར་གྱུར་པར་བསམས་ཤིང་། ཨཱོཾ་ཨགྣཱེ་ཡེ་སྭཱ་ཧཱཿ ཞེས་པ་བདུན་གྱིས་དགང་བའི་གཟར་བླུགས་གཉིས་ཁ་སྦྱར་བ་རྡོ་རྗེ་ཁུ་ཚུར་གྱིས་བཟུང་ནས་པུས་མོ་ལས་ཕྱིར་མི་འདའ་བར་གཡོན་དུ་བསྐོར་ཞིང་། ཨཱོཾ་ཨགྣཱེ་ཡེ་ཨ་དི་བྱ་ཨ་དི་བྱ་ཨ་བི་ཨ་བི་ཤ་མ་ཧཱ་ཤྲཱྀ་ཧ་བྱ་ཀ་བྱ་བཱ་ཧ་ན་ཡེ་བདག་ཅག་དཔོན་སློབ་སྒྱུ་སྦྱོར་བ་སྦྱིན་པའི་བདག་པོ་མི་ནོར་འཁོར་དང་བཅས་པ་རྣམས་ལ་གནོད་ཅིང་འཚེ་བར་བྱེད་པའི་གདོན་བགེགས་ལོག་འདྲེན་བསམ་ངན་སྦྱོར་རྩུབ་འཆང་བའི་དགྲ་བོ་མི་ནོར་དང་བཅས་པ་མཱ་ར་ཡ་རྦད༔ ཅེས་ལན་གསུམ་གྱིས་ཕུལ་རྗེས། ཧཱུྃ། སྲེག་བྱེད་འབྱུང་བའི་ལྷ་ཁྱོད་ཀྱིས། །སྲེག་རྫས་ཡེ་ཤེས་ལྷར་འབུལ་ཞིང་། །མེ་ཡང་ཡེ་ཤེས་མེར་མཛད་ནས། །དྲག་པོའི་འཕྲིན་ལས་སྒྲུབ་པར་མཛོད། ཅེས་བརྗོད། དེ་ནས་ཡམ་ཤིང་ལ། ཨཱོཾ་ཨགྣཱེ་ཡེ་ཛྙཱ་ན་ཡ་བདག་ཅག་དཔོན་སློབ་སྒྱུ་སྦྱོར་བ་སྦྱིན་པའི་བདག་པོ་མི་ནོར་འཁོར་དང་བཅས་པ་མཱ་ར་ཡ་རྦད༔ མར་ཁུ་ལ། ཨཱོཾ་ཨགྣཱེ་ཡེ་བདག་ཅག་དཔོན་སློབ་སྒྱུ་སྦྱོར་བ་སྦྱིན་པའི་བདག་པོ་མི་ནོར་འཁོར་དང་བཅས་པ་རྣམས་ལ་གནོད་ཅིང་འཚེ་བར་བྱེད་པའི་གདོན་བགེགས་ལོག་འདྲེན་བསམས་ངན་སྦྱོར་རྩུབ་འཆང་བའི་དགྲ་བོ་མི་ནོར་དང་བཅས་པ་མཱ་ར་ཡ་རྦད༔ རྫས་གཞན་རྣམས་ལ། ཧཱུྃ། སྲེག་བྱེད་འབར་བ་དྲག་པོ་མེ་ཡི་ལྷ། །མ་ལུས་འཁོར་དང་བཅས་པ་ཐམས་ཅད་ལ། །དགྲ་བགེགས་ལོག་པར་འདྲེན་པའི་གཟུགས་ཕུང་དང་༔ དྲག་པོའི་རྫས་དང་གནད་འབེབས་གསོད་དང་མྱོས། །རབ་ཏུ་ཚ་བའི་རྫས་མཆོག་འདི་འབུལ་བས། །དམིགས་པའི་དགྲ་བགེགས་གཏན་ནས་བརླག་པར་མཛོད། ཨཱོཾ་ཨགྣཱི་ཀྲོ་ཏི་དགྲ་བགེགས་གནོད་བྱེད་མཱ་ར་ཡ་ཛྭ་ལ་རཾ་རཾ་ཧཱུྃ་ཕཊ༔ ཅེས་རྩ་བའི་རྫས་ནས་ཚ་བའི་རྫས་ཀྱི་བར་རྣམས་ལ་བདུན་ནམ་ཉེར་གཅིག་སོགས་ལོང་སྐབས་དང་བསྟུན་ཏེ་འབུལ། ཧཱུྃ། ཚངས་པའི་དབང་པོ་འཇིག་རྟེན་མགོན་གྱི་སྲས། །ལས་བཞིའི་སྟོབས་ཀྱི་འཁོར་ལོས་སྒྱུར་བའི་ལྷ༔ ཡིད་བཞིན་རེ་སྐོང་གཟི་བརྗིད་སྣང་བའི་གཏེར། །ལོག་འདྲེན་སྲེག་བྱེད་མེ་ཡི་ལྷ་ལ་བསྟོད། །ཧཱུྃ། སྲེག་བྱེད་འབྱུང་བའི་ལྷ་ཁྱོད་ཀྱིས། །སྲེག་རྫས་ཡེ་ཤེས་ལྷར་འབུལ་ཞིང་། །མེ་ཡང་ཡེ་ཤེས་མེར་མཛད་ནས། །དྲག་པོའི་འཕྲིན་ལས་གྲུབ་པར་མཛོད། ཅེས་བརྗོད་ཅིང་འཕྲིན་ལས་བཅོལ་ལོ། ཨཱོཾ་ཨགྣཱེ་ཡེ་གཙྪ་མུ༔ ཡེ་ཤེས་ཀྱི་མེ་ལྷ་ཐབ་ཀྱི་ཤར་ལྷོར་གཤེགས་ནས་དཔང་པོ་མཛད་པར་གྱུར་པར་བསམ་མོ། འཇིག་རྟེན་ལས་འདས་པའི་མེ་ལྷ་མཆོད་པ་ནི། དམ་ཚིག་མེ་ལྷའི་ངོ་བོ་ནི། །དྲང་སྲོང་མེ་ལྷའི་ལྟོོ་བའི་ཀློང་། ཆོས་ཀྱི་དབྱིངས་དང་མཉམ་པའི་དབུས། ཧཱུྃ། ཆོས་འབྱུང་ཏི་ར་ཉི་ཟླ་པདྨའི་སྟེང་༔ རང་བྱུང་སེམས་ཉིད་ངོ་བོ་ཡི་གེ་ས༔ ཅེས་པ་ནས། སྒྲུབ་མཆོག་བུ་བཞིན་སྐྱོང་ལ་ཕྱག་འཚལ་བསྟོད༔ ཅེས་པའི་བར་ལས་བྱང་བཞིན་བྱ། ཅེས་བསྟོད་པས་ལྷ་ཚོགས་ཐམས་ཅད་མཐུ་སྟོབས་ཀྱི་དཔུང་གཡོས་པས་སྐུ་མདོག་ཆར་སྤྲིན་ནག་པོ་རབ་ཏུ་རྒྱས་པའི་ཕུང་པོ་ལྟར་གནག་ཅིང་བཟོད་པར་དཀའ་བའི་གཟི་བརྗིད་འབར་ཞིང་འོད་དམར་ནག་ཏུ་འཕྲོ་བ་དྲག་པོས་དགྲ་བགེགས་སྒྲོལ་བ་ལས་དཔའ་ཞིང་སྲིད་གསུམ་ལོག་འདྲེན་བཟའ་བའི་ལས་ལ་རྔམ་པའི་སྐུར་གྱུར་པར་བསམས་ཏེ། བྱོན་ཟན་འབུལ་བ་ནི། ལྷ་ཚོགས་རྣམས་ཀྱི་ལྗགས་རྡོ་རྗེ་རྩེ་མོ་གཅིག་པར་རཾ་ཡིག་དམར་པོ་དང་དགང་བླུགས་ཀྱི་རྩེ་མོར་ས་ཡིག་མཐིང་ནག་གཟི་བརྗིད་དང་ལྡན་པ་རེས་མཚན་པར་གྱུར་པར་བསམས་ལ། ས་ཀརྨ་དྷཀྐི་ནི་བྷ་ར་ཧི་ས་མ་ཡ་ཧྲིང་ཧྲིང་ཛཿཛཿ ཨཱོཾ་ཨགྣཱེ་ཡེ་ཨ་དི་བྱ་ཨ་དི་བྱ་ཨ་བི་ཤ་མ་ཧཱ་ཤྲཱི་ཧ་བྱ་ཀ་བྱ་བཱ་ཧ་ན་ཡེ་བདག་ཅག་དཔོན་སློབ་སྒྱུ་སྦྱོར་བ་སྦྱིན་པའི་བདག་པོ་མི་ནོར་འཁོར་དང་བཅས་པ་རྣམས་ལ་གནོད་ཅིང་འཚེ་བར་བྱེད་པའི་གདོན་བགེགས་ལོག་འདྲེན་བསམ་ངན་སྦྱོར་རྩུབ་འཆང་བའི་དགྲ་བོ་མི་ནོར་དང་བཅས་པ་མཱ་ར་ཡ་རྦད༔ ཅེས་བདུན་ནམ་གསུམ་འབུལ་དེ་ནས་སྐབས་འདིར་ཐུགས་དམ་བསྐུལ་ཆོག་དམིགས་གསལ་མེད་པས་སྒྲུབ་ཐབས་ལྟར་སྤྱན་འདྲེན་དང་བསྟོད་པའི་གཤམ་གྱི་ཚིག་རྣམས་སྦྲེལ་བའི་གསར་བསྒྲིགས་ལྟར་བཏང་རྗེས། ལས་བྱང་གི་བསྒྲལ་ལས་ཀྱིས་ལིངྒ་རྣམས་ཕྱོགས་གཅིག་ཏུ་བསྒྲལ་ལ། ཐོག་མར་ཡམ་ཤིང་ལ། ཧཱུྃ། གདུག་རྩུག་དྲག་པོའི་ཡམ་ཤིང་ལ། །དུག་ཁྲག་ཚིལ་ཆེན་འབྲུ་མར་བྱུགས། མཐུ་ལྡན་དྲག་མོའི་ལྷར་འབུལ་ན། །དགྲ་བགེགས་དམིགས་མེད་རྒྱ་ཡིས་ཐོབ། །ས་ཀརྨ་དྷཀྐི་ནི་བྷ་ར་ཧི་ས་མ་ཡ་ཧྲིང་ཧྲིང་ཛཿཛཿ ཨཱོཾ་ཀརྨ་ཀྲོ་ཏི་ཨགྣཱེ་ཡེ་གནོད་བྱེད་དགྲ་བགེགས་ཐམས་ཅད་མཱ་ར་ཡ་ཛྭ་ལ་རཾ་རཾ་ཧཱུྃ་ཕཊ༔ ཅེས་དང་གོང་དུ་བསྒྲལ་བའི་ལིང་རོ་རྣམས་ལ། ཧཱུྃ། ལོག་འདྲེན་དགྲ་བགེགས་གདུག་པ་ཅན། །བསྒྲལ་བའི་ཤ་རུས་དོན་སྣོད་རྣམས། །གཏུམ་དྲག་རྔམ་པའི་ཞལ་དུ་སྟོབ། །སྲིད་གསུམ་དགྲ་བགེགས་རྡུལ་དུ་ཐོང་། ས་ཀརྨ་དྷཀྐི་ནི་བྷ་ར་ཧི་ས་མ་ཡ་ཧྲིང་ཧྲིང་ཛཿཛཿ ཨཱོཾ་ཀརྨ་ཀྲོ་ཏི་ཨགྣཱེ་ཡེ་བདག་ཅག་དཔོན་སློབ་སྒྱུ་སྦྱོར་བ་སྦྱིན་པའི་བདག་པོ་མི་ནོར་འཁོར་དང་བཅས་པ་རྣམས་ལ་གནོད་ཅིང་འཚེ་བར་བྱེད་པའི་གདོན་བགེགས་ལོག་འདྲེན་བསམ་ངན་སྦྱོར་རྩུབ་འཆང་བའི་དགྲ་བོ་མི་ནོར་དང་བཅས་པ་མཱ་ར་ཡ་ཛྭ་ལ་རཾ་རཾ་ཧཱུྃ་ཕཊ༔ ཅེས་པའམ། ཡང་ན་ལིངྒ་རེ་རེའམ་ལྔ་བདུན་བཅུ་སོགས་ལ་དགུག་བཞུག་རེའི་མཐར་ལས་བྱང་གི་ཚོགས་ཐ་མའི་བསྒྲལ་ལས་ཀྱིས་བསྒྲལ་ལ། དེ་ཀའི་སྟབ་པས་འབུལ་ཞྀང་མཐར་རྩ་སྔགས་ལས་སྔགས་ཤམ་བཅས་སྦྱར་ཡང་མཆོག་ཏུ་འགྱུར་རོ། དྲག་པོའི་རྫས་ལ། ཧཱུྃ། ཤ་སྣ་སྟོང་སྦྱར་དྲག་པོའི་རྫས། །གདུག་པ་དུག །་གིས་ངར་བཏབ་ནས། །ཟ་བྱེད་རྔམ་པའི་ཞལ་དུ་འབུལ། །བདུད་སྡེ་དཔུང་བཅས་དུས་མཐའ་བཏུལ། ས་ཀརྨ་དྷཀྐི་ནི་བྷ་ར་ཧི་ས་མ་ཡ་ཧྲིང་ཧྲིང་ཛཿཛཿ ཨཱོཾ་ཀརྨ་ཀྲོ་ཏྀ་ཨགྣཱེ་ཡེ་བདག་ཅག་དཔོན་སློབ་སྒྱུ་སྦྱོར་བ་སྦྱིན་པའི་བདག་པོ་མི་ནོར་འཁོར་དང་བཅས་པ་རྣམས་ལ་གནོད་ཅིང་འཚེ་བར་བྱེད་པའི་གདོན་བགེགས་ལོག་འདྲེན་བསམ་ངན་སྦྱོར་རྩུབ་འཆང་བའི་དགྲ་བོ་མི་ནོར་དང་བཅས་པ་མཱ་ར་ཡ་ཛྭ་ལ་རཾ་རཾ་ཧཱུྃ་ཕཊ༔ གནད་ཀྱི་རྫས་ལ། ཧཱུྃ། གནད་དུ་འབེབས་པའི་རྫས་རྒོད་ལ། །དམིགས་བྱ་བསྟིམས་ནས་འབུལ་ལགས་ན། །སྡང་བའི་དགྲ་དང་གནོད་པའི་བགེགས། །གནད་དུ་ཕོབ་ལ་ལུས་སེམས་ཕྲོལ། ས་ཀརྨ་དྷཀྐི་ནི༴ཨཱོཾ་ཀརྨ་ཀྲོ་ཏི་ཨགྣཱེ་ཡེ་བདག་ཅག་དཔོན༴བསོད་པའི་རྫས་ལ། ཧཱུྃ། ཟངས་ལྕགས་རྡོ་རྗེ་དྲག་པོའི་རྫས། །གནོད་བྱེད་དགྲ་བགེགས་གསོད་པའི་མཚོན། །སྣ་ཚོགས་མཁའ་འགྲོར་འབུལ་ལགས་ན། །ལོག་འདྲེན་བདུད་སྡེ་ཆམ་ལ་ཕོབ། ས་ཀརྨ་དྷཀྐི་ནི༴ཨཱོཾ་ཀརྨ་ཀྲོ་ཏི་ཨགྣཱེ་ཡེ་བདག༴མྱོས་པའི་རྫས་ལ། ཧཱུྃ། མྱོས་པར་བྱེད་པའི་གདུག་པའི་རྫས། །སྣ་ཚོགས་མཁའ་འགྲོར་འབུལ་ལོ་བཞེས། །བསྟན་དང་བདག་ལ་འཚེ་བ་རྣམས། །མྱོས་སུ་ཆུག་ལ་དབང་པོ་དཀྲུགས། ས་ཀརྨ་དྷཀྐི་ནི༴ཨཱོཾ་ཀརྨ་ཀྲོ་ཏི་ཨགྣཱེ་ཡེ་བདག༴ཚ་བའི་རྫས་ལ། ཧཱུྃ། འབར་བའི་ཤུགས་ལྡན་དྲག་པོའི་རྫས། །སྙིང་རྗེ་ཁྲོས་པའི་མགུལ་དུ་བསྟིམ། །ཞིང་བཅུ་བསྒྲུབ་པའི་མི་སྲུན་དགྲ། །དིམ་ཚད་ཚ་བའི་དབལ་གྱིས་གསོད། ས་ཀརྨ་དྷཀྐི་ནི་བྷ་ར་ཧི་ས་མ་ཡ་ཧྲིང་ཧྲིང་ཛཿཛཿ ཨཱོཾ་ཀརྨ་ཀྲོ་ཏི་ཨགྣཱེ་ཡེ་བདག་ཅག་དཔོན་སློབ་སྒྱུ་སྦྱོར་བ་སྦྱིན་པའི་བདག་པོ་མི་ནོར་འཁོར་དང་བཅས་པ་རྣམས་ལ་གནོད་ཅིང་འཚེ་བར་བྱེད་པའི་གདོན་བགེགས་ལོག་འདྲེན་བསམ་ངན་སྦྱོར་རྩུབ་འཆང་བའི་དགྲ་བོ་མི་ནོར་དང་བཅས་པ་མཱ་ར་ཡ་ཛྭ་ལ་རཾ་རཾ་ཧཱུྃ་ཕཊཿ ཅེས་བརྒྱ་རྩ་ལ་སོགས་སྐབས་དང་སྦྱར་ཏེ་འབུལ། དེ་ནས་མར་ནག་གིས་དགང་གཟར་བཀང་སྟེ། ས་ཀརྨ་དྷཀྐི་ནི་བྷ་ར་ཧི་ས་མ་ཡ་ཧྲིང་ཧྲིང་ཛཿཛཿ ཨཱོཾ་ཨགྣཱེ་ཡེ་ཨ་དི་བྱ་ཨ་དི་བྱ་ཨ་བི་ཤ་ཨ་བི་ཤ་མ་ཧཱ་ཤྲཱི་ཧ་བྱ་ཀ་བྱ་བཱ་ཧ་ན་ཡེ་བདག་ཅག་དཔོན་སློབ་སྒྱུ་སྦྱོར་བ་སྦྱིན་པའི་བདག་པོ་མི་ནོར་འཁོར་དང་བཅས་པ་རྣམས་ལ་གནོད་ཅིང་འཚེ་བར་བྱེད་པའི་གདོན་བགེགས་ལོག་འདྲེན་བསམ་ངན་སྦྱོར་རྩུབ་འཆང་བའི་དགྲ་བོ་མི་ནོར་དང་བཅས་པ་མཱ་ར་ཡ་རྦད། ཅེས་བྱོན་སྐྱེམས་ལྟར་གཤེགས་སྐྱེམས་ཀྱང་བདུན་ནམ་གསུམ་གང་བདེར་འབུལ། ཧཱུྃ། ཕག་གདོང་ལྗང་མོའི་ལྷ་ཚོགས་ལ། །ལོག་འདྲེན་འབྱུང་པོ་བསྒྲལ་བ་ཡི། །ཕུང་ཁམས་སྐྱེ་མཆེད་ལས་བྱུང་བའི། །ཉེར་སྤྱོད་ལྔ་དང་སྨན་གཏོར་ཁྲག །རྔམ་བརྗིད་འཇིགས་པའི་མཆོད་པའི་ཚོགས། །འཇིག་རྟེན་ཁམས་ཀུན་བཀང་སྟེ་འབུལ། ཨཱོཾ་ཀརྨ་ཀྲོ་ཏི་ས་པ་རིི་ཝཱ་ར་ཨརྒྷཾ་ནས། ཤཔྟ་མ་ཧཱ་པཉྩ་ཨ་མྲི་ཏ་མ་ཧཱ་རཀྟ་མ་ཧཱ་བ་ལིངྟ་པཱུ་ཙ་ཁཱ་ཧི། ཞེས་པས་མཆོད། ཨཱོཾ་བཛྲ་ཏམྦུ་ལཱ་ཡེ་སྭཱ་ཧཱས་སོ་རྩི་དང་། ཨཱོཾ་བཛྲ་ཝསྟྲ་ཡེ་སྭཱ་ཧཱས་གོས་ཟུང་དབུལ་ཞིང་། བསྟོད་པ་ནི། ཧཱུྃ། རབ་ཏུ་གཏུམ་ཞིང་དུག་གསུམ་འབར་བའི་མ༔ ཅེས་པ་ནས། སྒྲུབ་མཆོག་བུ་བཞིན་སྐྱོང་ལ་ཕྱག་འཚལ་བསྟོད༔ ཅེས་པའི་བར་གྱིས་བསྟོད་ཅིངའཕྲིན་ལས་བཅོལ་བ་ནི། ཧོ། དུས་གསུམ་རྒྱལ་བ་ཀུན་གྱི་ཡུམ་མཆོག །རིགས་དང་དཀྱིལ་འཁོར་ཀུན་གྱི་འབྱུང་གནས། །དཔལ་ཆེན་ཁྲོ་བོ་ཀུན་གྱི་དགྱེས་སྡེ། །འབུམ་ཕྲག་འཕྲིན་ལས་མཁའ་འགྲོའི་ཡང་རྗེ། །མངོན་སྤྱོད་ལས་ཀྱི་མཁའ་འགྲོའི་དབང་མོ། །དབང་དང་དྲག་པོའི་ལས་ཀྱི་མངའ་བདག །ཕག་གདོང་བཅོམ་ལྡན་འདས་མ་སྣ་ཚོགས་མཐར་ཕྱིན། །མཐུ་ལྡན་ལས་ཀྱི་མཁའ་འགྲོ་ཕྲ་མེན་འབུམ་ཕྲག །སྲོག་གཅོད་ཤ་ཟའི་མཁའ་འགྲོ་བྱེ་བའི་དམག་ཚོགས། །བཀའ་སྲུང་མ་མོ་ཁྲག་རལ་མ། །གཏེར་སྲུང་ཡང་མ་སྐྱི་མདངས་མ་དང་བཅས་པ་ཁྱེད་རྣམས་ལ་འཕྲིན་ལས་གཉན་པོ་བཅོལ་བ་ནི། སྤྱི་སྒོས་བསྟན་པའི་རཱུ་ཏྲ་ཕྱོགས་བཅུ་གང་དུ་མཆིས་ཀྱང་ཐལ་བའི་རྡུལ་དུ་རློགས་ཤིག །གནོད་བྱེད་ལོག་འདྲེན་འབྱུང་པོ་སུ་དང་གང་གིས་གནོད་ཀྱང་མིང་ཡང་མེད་པར་མཛོད་ཅིག །བྱད་དང་རྦད་འདྲེ་རྦོད་གཏོང་བན་བོན་གང་གིས་བཏང་ཡང་རང་གཤེད་རང་ལ་ཕོབ་ཅིག །ཟ་འདྲེ་གོད་འདྲེའི་རྒྱུན་ལམ་མི་ནོར་གང་ལ་ཟུག་ཀྱང་གནོད་པའི་རྒྱུན་ལམ་ཆོད་ཅིག །མདོར་ན་གནོད་ཅིང་འཚེ་བར་བྱེད་པའི་དམ་སྲི་བདུད་སྡེ་དཔུང་དང་བཅས་པ་ཐམས་ཅད་མཐུ་སྟོབས་བསྐལ་མེ་འབར་བའི་ཀློང་དུ་བཞེས་ཤིག །ཅེས་འདོད་པའི་དོན་ལ་གསོལ་བ་བཏབ། ཡི་གེ་བརྒྱ་པས་ལྷག་ཆད་བསྐང་། བཟོད་གསོལ་ནི། ཧཱུྃ། ཏིང་འཛིན་ཉམས་དང་རྫས་མ་ཚོགས། །བཟླས་བརྗོད་མ་དག་ཆོ་ག་འཁྲུལ། །དེ་སོགས་ཉམས་པ་ཅི་མཆིས་པ། །བཟོད་པར་གསོལ་ལོ་ཚངས་པར་མཛོད། གཤེགས་གསོལ་ནི། ཧཱུྃ། སྣང་བ་དག་གཞལ་ཡས་ཁང་༔ ཞེས་པ་ནས། ཨ་ཨཱཾཿསྨྲ་བསམ་བརྗོད་མེད་ཡུམ༔ ཅེས་ཡེ་ཤེས་པ་གཤེགས། །དམ་ཚིག་པ་རང་ལ་བསྡུ། སླར་ཡང་། འཇིག་རྟེན་གྱི་མེ་ལྷ་ཐབ་ཀྱི་ཤར་ལྷོར་དཔང་པོར་བཞུགས་པ་བཛྲ་ས་མཱ་ཛཿ དམ་ཚིག་པ་དང་གཉིས་སུ་མེད་པར་གྱུར་པ་ལ། ཨཱོཾ་ཨགྣཱེ་ཡེ་དྷེ་ཝ་ས་པ་རི་ཝཱ་ར་ཨརྒྷཾ་ནས། ཤཔྟ་པཉྩ་ཨམྲི་ཏ་མ་ཧཱ་རཀྟ་བ་ལིངྟ་པཱུ་ཙ་ཁཱ་ཧི། ཅེས་མཆོད་ཅིང་། གཟི་བརྗིད་འབར་བ་མེ་ཡི་ལྷ། །རིགས་སྔགས་གྲུབ་པའི་དྲང་སྲོང་ཆེ། །འཇིག་རྟེན་འདས་ཀྱང་སྲིད་པ་བའི། །རྣམ་པར་རོལ་པ་ཁྱོད་ལ་འདུད། ཅེས་བསྟོད་ཅིང་། ཧཱུྃ། དྲག་པོའི་ཤིང་དང་དགྲ་བགེགས་གཟུགས། །དུག་རྫས་གནད་འབེབས་གསོད་དང་མྱོས། །ཚ་བའི་རྫས་རྣམས་ལས་གྲུབ་པའི། །གཏང་རག་མཆོད་པ་འབུལ་གྱིས་བཞེས། ཨཱོཾ་ཨགྣཱེ་ཡེ་སྭཱ་ཧཱས་མར་ཁུ་དང་། ཨཱོཾ་ཨགྣཱེ་ཡེ་ཡ་ཛྙཱ་ན་ཡ་སྭཱ་ཧཱས་ཡམ་ཤིང་དང་། རྫས་གཞན་རྣམས་ལ། ཨཱོཾ་ཨགྣཱེ་ཡེ་ཀྲོ་ཏི་གནོད་བྱེད་དགྲ་བགེགས་མཱ་ར་ཡ་ཛྭ་ལ་རཾ་རཾ་ཧཱུྃ་ཕཊ༔ ཅེས་པ་རྣམས་ཀྱིས་མང་ཉུང་སྐབས་དང་བསྟུན་ཏེ་འབུལ། ཨཱོཾ་ཨགྣཱེ་ཡེ་སྭཱ་ཧཱ༔ ཨཱོཾ་ཨ་དི་བྱ་ཨ་དི་བྱ་ཨ་བི་ཤ་མ་ཧཱ་ཤྲཱི་ཧ་བྱ་ཀ་བྱ་བཱ་ཧ་ན་ཡེ་བདག་ཅག་དཔོན་སློབ་རྒྱུ་སྦྱོར་བ་སྦྱིན་པའི་བདག་པོ་མི་ནོར་འཁོར་དང་བཅས་པ་རྣམས་ལ་གནོད་ཅིང་འཚེ་བར་བྱེད་པའི་གདོན་བགེགས་ལོག་འདྲེན་བསམ་ངན་སྦྱོར་རྩུབ་འཆང་བའི་དགྲ་བོ་མི་ནོར་དང་བཅས་པ་མཱ་ར་ཡ་རྦད། ཅེས་པས་གཤེགས་སྐྱེམས་འབུལ། ཨཱོཾ་བཛྲ་ཏམྦུ་ལཱ་ཡེ་སྭཱ་ཧཱས་སོ་རྩི་དང་། ཨཱོཾ་བཛྲ་ཝསྟྲ་ཡེ་སྭཱ་ཧཱས་གོས་ཟུང་འབུལ། དམར་གཏོར་ལ། ཨཱོཾ་ཨགྣཱེ་ཡེ་ས་པ་རི་ཝཱ་ར་མ་ཧཱ་བ་ལིངྟ་པཱུ་ཙ་ཁཱ་ཧི། གསུམ་མམ་བདུན་གྱིས་གཏོར་མ་འབུལ། སླར་ཡང་། ཨཱོཾ་ཨགྣཱེ་ཡེ་དྷེ་ཝ་ས་པ་རི་ཝཱ་ར་ཨརྒྷཾ་ནས། ཤཔྟ་སརྦ་པཉྩ་ཨ་མྲི་ཏ་མ་ཧཱ་བཱ་ལིངྟ་པཱུ་ཙ་ཁཱ་ཧི། ཞེས་མཆོད། ཤེས་རབ་ཡེ་ཤེས་འབར་བའི་མེས། །ཉོན་མོངས་བུད་ཤིང་ཀུན་བསྲེག་ཅིང་། །དྲག་པོའི་སྟོབས་ཀྱིས་བགེགས་འཇོམས་པའི། །ཁྲོ་ཆེན་མེ་ཡི་ལྷ་ལ་འདུད། །ཀྱིས་བསྟོད་ཅིང་ཡི་གེ་བརྒྱ་པ་བརྗོད། མ་འབྱོར་པ་དང་ཉམས་པ་དང་། སོགས་ཀྱིས་ནོངས་པ་གསོལ། འདོད་པའི་དོན་རྣམས་གང་ཡིན་པ། །མེ་ཡི་ཁྲོ་བོས་བསྒྲུབས་ཟིན་ནས། །གནས་སུ་གཤེགས་ཏེ་འགྲོ་བའི་དོན། །བསྒྲུབ་ཕྱིར་སླར་ཡང་འབྱོན་འཚལ་ལོ། །བཛྲ་མུས་ཡེ་ཤེས་པ་གཤེགས་དམ་ཚིག་པ་མེའི་རྣམ་པར་གྱུར་བར་བསམ་མོ། ཧཱུྃ༔ གསང་བའི་བསྐྱེད་རྫོགས་སྒོམ་ཟླས་མཐུས༔ ལྟ་བ་གཡེལ་བ་སོར་ཆུད་ཅིང་༔ སྒོམ་པ་བྱིང་བ་ཀློང་གྱུར་ཏེ༔ སྤྱོད་པ་ཚོགས་གཉིས་མཐར་ཕྱིན་ཞིང་༔ འབྲས་བུ་སྐུ་བཞི་མངོན་གྱུར་ཤོག༔ དེ་ནས་ཤིས་བརྗོད་ནི། ཧཱུྃ༔ ཡེ་ཤེས་དབྱིངས་ཀྱི་ཕོ་བྲང་ནས༔ ཕག་མོ་ཆོས་སྐུའི་བཀྲ་ཤིས་ཤོག༔ ནས། སྤྲུལ་པ་འབུམ་སྡེའི་བཀྲ་ཤིས་ཤོག༔ ཅེས་སོགས་ཤིས་བརྗོད་རྒྱས་པར་བྱ་ཞིང་མེ་དུག་ཁྲག་གིས་གཞིལ་བའི་ཐལ་བ་མཆོད་རྟེན་ནམ་ཐེམ་འོག་གམ་ལམ་རྒྱ་གྲམ་དུ་མནན་ལ། ལྟ་བྲོ་བརྡུང་ཞིང་མཐའ་རྒྱས་བྱའོ། ཅེས་པ་འདི་ཡང་ཧོར་པཎྡི་ཏ་ངག་དབང་འཇམ་དབྱངས་བློ་ལྡན་གྱིས་མཛད་པའི་དྲག་པོའི་སྦྱིན་སྲེག་ལྟར་ཕག་གདོང་སྣ་ཚོགས་མཐར་ཕྱིན་གྱི་དྲག་པོའི་སྦྱིན་སྲེག་ཟུར་གསལ་དུ་བགྱིས་པ་འདི་ཡང་ཉི་མ་གྲགས་པས་ཇོ་བོ་སྒྱོགས་ཆེན་གདོང་རའི་མདུན་དུ་སྦྱར་བ་མངྒ་ལམ། །ཕག་མོ་ལྗང་མོ་སྣ་ཚོགས་མཐར་ཕྱིན་མའི་དབང་བསྐུར་ཆོག་སྒྲིགས་ཕྲིན་ལས་སྒོ་འབྱེད་ཅེས་བྱ་བ་བཞུགས་སོ། །ཆོས་དབྱིངས་རྣམ་པར་མི་རྟོག་ཧོམ་ཁུང་དུ། །སྣ་ཚོགས་གཉིས་སྣང་རྟོག་པ་ཚར་གཅོད་པའི། །སྐྱེ་མེད་དོན་གྱི་ཕྲིན་ལས་མཐར་ཕྱིན་མར། །འདུད་དོ་རབ་འབྱམས་ལས་ཀྱི་དངོས་གྲུབ་སྩོལ། །བཅོམ་ལྡན་འདས་མ་གསང་ཆེན་སྣ་ཚོགས་ཡུམ། གང་གིས་སྨིན་བྱེད་འཇུག་བདེའི་ཆོག་ཁྲིག་ཤིག །བླ་མའི་གསུང་བཞིན་ཡི་གེར་སྤེལ་བ་ལ། །ཆོས་བདག་མཁའ་འགྲོའི་ཚོགས་ཀྱིས་གནང་བ་སྩོལ། འདིར་བཅོམ་ལྡན་འདས་མ་སྣ་ཚོགས་མཐར་ཕྱིན་གྱི་དབང་བསྐུར་བྱ་བའི་ཚུལ་ལ།

དབང་ཆོག་དྲེགས་པ་ཚར་གཅོད།

ཕག་མོ་སྔོན་མོའི་ཟབ་ཐིག་ལས༔ དབང་ཆོག་དྲེགས་པ་ཚར་གཅོད་བཞུགས༔ ཕག་གདོང་མཁའ་འགྲོའི་ལྷ་ཚོགས་རྣམས་ལ་འདུད༔ བསྙེན་བསྒྲུབ་དྲོད་རྟགས་ཐོབ་པའི་རྣལ་འབྱོར་པས༔ མཁའ་འགྲོའི་གཏོར་མ་ཙཀ་ལི་དར་གུར་ཕུབ༔ དཀྱིལ་འཁོར་དབུས་འགོད་སྨན་རག་གྲི་གུག་དང་༔ རྩེ་གསུམ་གཞུང་ལྟར་བསྒྲལ་ལས་ཆས་རྣམས་དང་༔ ལིངྒ་ཁྲོ་ལྕགས་སྣོད་བཞག་དར་ནག་བཀབ༔ ལྟ་བའི་གདེང་བསྐྱེད་བསྙེན་བསྒྲུབ་ཁ་ཡང་གསོ༔ འཛབ་ཀྱི་གནད་བསྣུན་དམིགས་པའི་འདུ་འཕྲོ་བསྒྱུར༔ ལས་བུམ་བསྐྱེད་ཅིང་བསྒོམ་བཟླས་མཆོད་བསྟོད་མཐར༔ སྙིང་པོ་བཟླས་ཤིང་ཏིང་འཛིན་དབང་བཞི་བླངས༔ དམ་ཚིག་ཚུལ་དང་ལྡན་པའི་སློབ་བུ་ནི༔ ལྔ་གསུམ་བདུན་ལས་མང་བར་མི་བྱ་ཞིང་༔ ནམ་གྱི་སྲོད་ལ་གོ་མཚོན་མཎྜལ་དབུལ༔ ཁྲུས་ནས་ཕྱུངས་ཤིང་བགེགས་སྦྱངས་བསྲུང་འཁོར་བསྒོམས༔ ཞེས་གསུངས་པ་ལྟར། སྟེགས་བུ་ཁེབས་ལྡན་ཁར་རས་བྲིས་སམ་འབྲུ་ཚོམ་སོགས་ཇི་ལྟར་རིགས་པའི་དཀྱིལ་འཁོར་གྱི་དབུས་སུ་མཉྫིའི་ཁར་མཁའ་འགྲོའི་གཏོར་མ་སྐུ་གཟུགས་དང་དར་ལྗང་གུར་ཕུབ། ཐོད་ཁྲག་གཡས། གྲི་གུག་གཡོན། ཁ་ཊྲཱཾ་མདུན། ཉ་བོ་བསྒྲལ་ཆས་རྣམས་བྱང་། གནས་གསུམ་དུ་ཁྲག་ཆང་བསྲེས་པའིཐིག་ལེ་བྱ་རྒྱུ། གཞན་ཡང་ལས་ཀྱི་བུམ་པ། སྤོས་ཐུན། བྱིན་འབེབས་ཀྱི་བདུག་རྫས་ཁྱད་པར་བ་གཞུང་ནས་འབྱུང་བ་ལྟར་སྦྱར་བ་དང་། ཌཱ་དྲིལ། འཐོར་ནས། བགེགས་གཏོར་མཎྜལ་སོགས་ཚོགས་པར་བྱས་ལ། སློབ་དཔོན་གྱིས་ལས་ཀྱི་གཞུང་བསྲང་ཞིང་འཛབ་བསྙེན་ནུས་ལྡན་དུ་བསྒྲུབ། བདག་འཇུག་བླངས། བཀའ་གཏེར་མཆོད་པ་དང་། ཚོགས་མཆོད་ཡན་གྲུབ་ནས། ལས་བུམ་བསངས་སྦྱངས། སྟོང་པའི་ངང་ལས་པད་ཉིའི་སྟེང་དུ་ཧཱུྃ་ལས་བདུད་རྩི་འཁྱིལ་བ་ལྗང་སྔོན་ཕྱག་གཉིས་གཡས་རྡོ་རྗེའི་དབྱུག་པ་དང་གཡོན་སྡིག་འཛུབ་མཛད་པ་ཁྲོ་བོའི་ཆ་ལུགས་རྫོགས་པའི་གནས་གསུམ་ཨཱོཾ་ཨཱཿཧཱུྃ་གིས་མཚན་པ་ལས་འོད་འཕྲོས་པས་ཡེ་ཤེས་པ་སྤྱན་དྲངས་དམ་ཡེ་དབྱེར་མེད་དུ་གྱུར་པའི་ཐུགས་ཀར་ཧཱུྃ་ལ་སྔགས་ཀྱིས་བསྐོར་བ་དམིགས་ལ། ཨཱོཾ་བིག་ནན་ཏ་ཀྲིཏ་ཧཱུྃ་ཕཊཿ ཅེས་བཟླས་པ་བརྒྱ་རྩ་ལ་སོགསཔའི་མཐར་བདུད་རྩིར་ཞུ་བར་བསམ། སློབ་མ་ཁྲུས་ནས་ཕྱུངས། བགེགས་བསྐྲད་བསྲུང་འཁོར་བསྒོམ་པ་རྣམས་ལེགས་པར་གྲུབ་ནས། ཆོས་བཤད་རྒྱས་བསྡུས་ཅི་རིགས་བྱ་སྟེ། དེ་ཡང་གཏེར་ཆེན་ནས་སྩལ་བའི་དབང་བཤད་ནི། འོ་ན་ད་ལམ་ཁྱེད་རྣམས་ལ་བཅོམ་ལྡན་འདས་མ་སྣ་ཚོགས་མཐར་ཕྱིན་གྱི་དབང་བསྐུར་བའི་ཐོག་མར་ལོ་རྒྱུས་ཀྱི་རྣམ་པ་མདོ་ཙམ་ཞིག་བརྗོད་པར་བྱ་སྟེ། ངོ་བོ་ཀ་ནས་དག་པའི་ཆོས་དབྱིངས་ཆེན་པོ་ནས་བཅོམ་ལྡན་འདས་མ་དཔལ་ཀུན་ཏུ་བཟང་མོའི་བྱ་བ་གྲུབ་པའི་ཡེ་ཤེས་ཀྱི་རང་མདངས་གོ་མ་འགགས་པ་ལས་སྣ་ཚོགས་མཐར་ཕྱིན་ལས་ཀྱི་དྷཱཀྐི་མ་འདི་རང་ཤར་ཞིང་། དབྱིངས་རང་བཞིན་རྣམ་པར་དག་པའི་མཁའ་སྤྱོད་དུ་དུས་གསུམ་རྟག་པ་རྒྱུན་གྱི་འཁོར་ལོར་རང་འོད་འབར་བཞིན་བཞུགས་པའི་རོལ་པ་ལས་འོག་མིན་སྟུག་པོ་བཀོད་པའི་ཞིང་ཁམས་སུ་རྒྱལ་བ་རྡོ་རྗེ་འཆང་གིས་གསང་སྔགས་བླ་མེད་ཀྱི་ཆོས་ཀྱི་འཁོར་ལོ་བསྐོར་བའི་ཚེ། ལས་ཀྱི་རིགས་ཀྱི་མཁའ་འགྲོ་མ་འབུམ་ཕྲག་མང་པོ་སྟོན་པ་དེའི་འཁོར་དུ་རང་ཤར་ཞིང་བླ་ན་མེད་པའི་བཀའ་ཡི་འཁོར་ལོ་རྣམས་ཉན་ཞིང་འཆང་ནས་ཚངས་ཆེན་གྱི་བསྐལ་པ་ཆེན་པོའི་ཞིང་འདི་དང་། འདི་མ་ཡིན་པའི་ཡང་ནམ་མཁའི་མཐར་ཁྱབ་ཏུ་ལས་དང་སྐལ་པར་ལྡན་པ་རྣམས་ཀྱི་སྣང་ངོར་སྤྲུལ་པ་དང་ཡང་སྤྲུལ་བསམ་གྱིས་མི་ཁྱབ་པས་དུས་གསུམ་ཀུན་ཏུ་སྐལ་ལྡན་མང་པོ་གྲོལ་ལམ་ལ་ཐབས་དང་གདམས་པ་མང་པོས་ཡོངས་སུ་གྲོལ་བར་མཛད་ནས་རིམ་གྱིས་བརྒྱུད་པ་ལས། རྩོད་ལྡན་ཚེ་ལོ་བརྒྱ་པའི་ཤཱཀྱའི་བསྟན་པ་ལ་མདོ་སྔགས་ཟུང་ཅིག་གི་ཉི་ཟླ་ཤར་བའི་ཚེ། ཨོ་རྒྱན་གྱི་སློབ་དཔོན་དཔལ་སངས་རྒྱས་གཉིས་པ་པདྨ་འབྱུང་གནས་ཀྱིས་འབུམ་ཕྲག་ཡངས་པའི་མཁའ་འགྲོ་མ་རྣམས་ལ་དབང་བསྒྱུར་ཞིང་མཁའ་འགྲོའི་གསང་མཛོད་ཐམས་ཅད་བརྟོལ་ཏེ་འཛམ་གླིང་སྤྱི་དང་རྒྱ་བོད་ཀུན་ཏུ་བསྟན་འགྲོའི་དོན་བསམ་གྱིས་མི་ཁྱབ་པ་མཛད་པའི་ནང་ནས། བོད་སྲིན་མོ་གན་རྐྱལ་དུ་བསྒྱེལ་བ་འདྲ་བའི་ནུ་མ་གཡས་པ་ཁམས་སྲིན་མོ་རྫོང་གི་ཆགས་རུ་ཕུག་སྔོན་འཕྲིན་ལས་ཀྱི་གཞལ་ཡས་སུ་ཕྱག་ཕེབས་ཤིང་སྣ་ཚོགས་མཐར་ཕྱིན་གྱི་སྒྲུབ་པ་མཛད་ཅིང་ལྗང་མོ་ཕྲིན་ལས་ཀྱི་སྒྲུབ་གནས་སུ་བྱིན་གྱིས་བརླབས་པའི་དུས་སུ། དབང་སྒྲུབ་ཐབས་མན་ངག་དང་བཅས་པའི་གདམས་པ་འདི་རྣམས་མ་མཁའ་འགྲོ་ཡེ་ཤེས་མཚོ་རྒྱལ་ལ་བཀའ་སྩལ་ཞིང་གདམས་པ་མཁའ་འགྲོའི་ཡི་གེར་བཏབ་སྟེ་ཕྱི་མའི་བསྟན་འགྲོའི་དོན་དུ་མཁའ་འགྲོའི་གསང་བཛོད་དུ་རྒྱས་བཏབ་ནས་བཞུགས་སུ་གསོལ་བ། འགྲོ་བ་འདུལ་བའི་ལུང་བསྟན་དུས་བབས་བཞིན་དུ་ཁམས་པ་ཉི་མ་གྲགས་པས་མེ་ཡོས་ཧོར་ཟླ་གཉིས་པའི་ཚེས་བཅུའི་ཉིན་གོང་ལ་གདན་དྲངས་ཤིང་ཤོག་སེར་ལས་བསྒྱུར་བའི་གདམས་པ་རིན་པོ་ཆེ་འདིའི་དབང་ཐོབ་པ་ལ་ཡོན་ཏན་དུ་མ་དང་ལྡན་ཏེ། རྒྱུད་ལས། དམ་ཚིག་མ་ཉམས་ལེགས་བསྲུང་བའི། །རྣལ་འབྱོར་ཕོ་མོ་གང་ཡིན་རྣམས། །ཚེ་རིང་ནད་མེད་ཆོས་སྤྱོད་ཅིང་། །དཔལ་འབྱོར་ལོངས་སྤྱོད་ཀུན་ཐོབ་ནས། འདི་ཕྱི་བར་གསུམ་བཀྲ་ཤིས་ལ། །དེ་ནི་རྟག་ཏུ་དགེ་བར་འགྱུར། ཅེས་དང་། དེ་བཞིན་དུ། དང་པོ་དབང་གི་མ་སྨིན་ན། །ཐེག་པའི་ཆོས་ཀྱི་གྲོལ་མི་ནུས། །རང་རྒྱུད་དབང་གིས་མ་གྲོལ་ན། །རང་སེམས་མངོན་དུ་མི་འགྱུར་རོ། ཅེས་དང་། རྒྱུད་ལས། དབང་བསྐུར་གནང་བ་ཐོབ་པ་གཙོ། །དབང་ཐོབ་རིགས་ཀྱི་བུ་དེ་ཉིད། །ཚེ་འདིར་བསམ་པ་ཀུན་འགྲུབ་ཅིང་། ཕྱི་མ་མངོན་པར་རྫོགས་སངས་རྒྱ། ཅེས་གསུངས་པའི་ཕན་ཡོན་དུ་མ་དང་ལྡན་པའི་དབང་ཞུ་བའི་ཐོག་མར་རྡོ་རྗེ་སློབ་དཔོན་གྱི་བྱ་བ་དང་སློབ་མའི་བྱ་བ་གཉིས་ལས། སློབ་དཔོན་གྱི་བགྱི་བའི་འོས་སུ་གྱུར་པ་བདག་མདུན་དབྱེར་མེད་དུ་སྒྲུབ་མཆོད་བཟླས་པ་དང་། ཟབ་གཏེར་སྲུང་མ་ལ་གཏོར་མ་ཕུལ་ཏེ་རྒྱ་འགྲོལ་བའི་ཕྲིན་ལས་བཅོལ་པ། ཚོགས་ཀྱི་འཁོར་ལོས་ཆོ་གའི་ལྷག་ཆད་བཀང་བ། བདག་འཇུག་གི་ཏིང་ངེ་འཛིན་གྱིས་བླང་བ་སོགས་གོང་དུ་གྲུབ་པ་ཡིན། ད་ཁྱེད་རང་རྣམས་ཀྱི་ངོ་སྐལ་དུ་གྱུར་པ་དབང་བསྐུར་ཞུ་བའི་དོན་དུ་མཎྜལ་ཕུལ་མཛོད། ཞེས་བརྡའ་སྤྲད་དེ། དེ་ནས་གཞུང་ལས། འདུན་པའི་སེམས་བསྐྱེད་སྐྱབས་སེམས་དམ་ཚིག་ནོད༔ དབང་གི་དོན་དུ་གསོལ་བ་འདི་ལྟར་གདབ༔ ཞེས་པས་དམིགས་པ་འདི་བཞིན་དུ་གྱིས། ས་ཕྱོགས་འདི་ཉིད་ཀྱང་ཐ་མལ་གྱི་སྣང་བ་འདི་ལྟ་བུ་མ་ཡིན་པ་དྭངས་གསལ་གཉིས་སུ་མེད་པའི་ཡེ་ཤེས་རང་སྣང་ལས་གྲུབ་པའི་ཞིང་ཁམས་ཀྱི་དབུས་སུ་དཀྱིལ་འཁོར་གྱི་གཙོ་མོ་བཅོམ་ལྡན་འདས་མ་ལ་ཕྱོགས་དུས་ཀྱི་རྒྱལ་བ་སྲས་བཅས་སྐྱབས་ཡུལ་ཐམས་ཅད་ཀྱིས་བསྐོར་བ་མངོན་སུམ་ལྟ་བུར་བཞུགས་པ་གསལ་བཏབ་ནས་དེ་དག་གི་སྤྱན་སྔར་རང་གཞན་སེམས་ཅན་ཐམས་ཅད་བྱང་ཆུབ་ཀྱི་བར་དུ་སྐྱབས་སུ་མཆིའོ་སྙམས་པསའདིའི་རྗེས་བཟློས་གྱིས། ན་མོ༔ བླ་མ་ཡི་དམ་མཁའ་འགྲོ་སྟེ༔ རྩ་བ་གསུམ་ལ་སྐྱབས་སུ་མཆི༔ གསུམ། ཐེག་ཆེན་རྩ་བ་གཞན་ཕན་བྱང་ཆུབ་ཀྱི་མཆོག་ཏུ་སེམས་བསྐྱེད་པ་གལ་ཆེ་སྟེ། མཁའ་མཉམ་གྱི་སེམས་ཅན་ཐམས་ཅད་སྡུག་བསྔལ་གྱི་རྒྱུ་འབྲས་ལ་རྟག་ཏུ་སྤྱོད་པ་འདི་རྣམས་སྡུག་བསྔལ་ལས་བསྒྲལ་ཏེ་བྱང་ཆུབ་མཆོག་གི་གོ་འཕང་ལ་འགོད་པར་བྱ། དེའི་ཕྱིར་དུ་ཐེག་པ་ཆེན་པོའི་སེམས་བསྐྱེད་བླངས་ནས་ཚུལ་བཞིན་དུ་བགྱིའོ་སྙམས་པས་འདིའི་རྗེས་བཟློས་གྱིས། འགྲོ་བ་སེམས་ཅན་དོན་སླད་དུ༔ མཁའ་འགྲོའི་བསྐྱེད་རྫོགས་བསྒོམ་བཟླས་བསྒྲུབ༔ གསུམ། དེ་ལྟར་ཚོགས་ཞིང་ཁྱད་པར་ཅན་དེ་དག་གིས་སྤྱན་སྔར་ཚོགས་བསགས་པ་ནི། རང་གཞན་སེམས་ཅན་ཐམས་ཅད་ལུས་ཞིང་གི་རྡུལ་སྙེད་དུ་སྤྲུལ་ནས་ཕྱག་འཚལ་བ། མཆོད་སྤྲིན་སྤྲོ་བ། སྡིག་པ་བཤགས་པ། དགེ་བ་ལ་རྗེས་སུ་ཡི་རངས་བ། ཆོས་ཀྱི་འཁོར་ལོ་བསྐོར་བར་བསྐུལ་བ། མྱ་ངན་ལས་མི་འདའ་བར་གསོལ་བ་གདབ་པ། དགེ་བ་བླ་ན་མེད་པའི་བྱང་ཆུབ་ཆེན་པོ་བསྔོ་བ་སོགས་ཚིག་ཕྱིར་སེམས་གཞོལ་བས་འདིའི་རྗེས་བཟློས་གྱིས། ཧཱུྃ༔ བླ་མ་ཡི་དམ་མཁའ་འགྲོ་གཤེགས༔ ཉི་ཟླ་པདྨའི་གདན་ལ་བཞུགས༔ ལུས་ངག་ཡིད་གསུམ་གུས་ཕྱག་འཚལ༔ ཕྱི་ནང་གསང་བའི་མཆོད་པ་འབུལ༔ ཉམས་ཆགས་སྡིག་སྒྲིབ་མཐོལ་ལོ་བཤགས༔ གསང་སྔགས་སྒྲུབ་ལ་རྗེས་ཡི་རང་༔ སྨིན་གྲོལ་ཆོས་འཁོར་བསྐོར་དུ་གསོལ༔ མྱ་ངན་མི་འདའ་གསོལ་བ་འདེབས༔ དགེ་བ་བྱང་ཆུབ་ཆེན་པོར་བསྔོ༔ ཐམས་ཅད་སངས་རྒྱས་ཐོབ་པར་ཤོག༔ དེ་ལྟར་ཐུན་མོང་གི་རྒྱུད་སྦྱོངས་བའི་རིམ་པ་སོང་ནས། དངོས་གཞི་དབང་གི་དོན་དུ་གསོལ་བ་གདབ་པ་འདིའི་རྗེས་བཟློས་གྱིས། ཧཱུྃ༔ རྡོ་རྗེ་འཆང་དབང་ལས་ཀྱི་མཁའ་འགྲོ་མ༔ བདག་ཅག་འདིར་ཚོགས་རིགས་ཀྱི་བུ་རྣམས་ལ༔ ལས་ཀྱི་མཁའ་འགྲོའི་དབང་གི་སྨིན་གྲོལ་མཆོག༔ ཡང་དག་ཉིད་དུ་སྩལ་བར་མཛད་དུ་གསོལ༔ གསུམ༔ གནས་གསུམ་ཁྲག་ཆང་བསྲེས་པའི་ཐིག་ལེས་བརྒྱན༔ སྐུ་གསུང་ཐུགས་ཀྱི་ས་བོན་གསལ་ཡང་གདབ༔ དཔོན་སློབ་ཐམས་ཅད་མཁའ་འགྲོའི་གར་སྟབས་བསྒྱུར༔ ལྷར་བསྐྱེད་རོལ་མོ་འདིར་ཞིང་སྤྱན་འདྲེན་བསྟིམ༔ གུ་གུལ་ནག་པོ་གྲི་ཀླད་ཤ་ཆེན་བསྲེག༔ ཏིཥྛ་བཛྲ་བརྗོད་ཅིང་རྒྱས་ཀྱང་གདབ༔ ས་མ་ཡཱ༔ ཞེས་པས། ད་ཁྱེད་རང་རྣམས་ཀྱིས་ཐུན་མོང་མ་ཡིན་པར་དབང་གི་སྣོད་དུ་རུང་བར་བྱ་བའི་ཕྱིར་ཡེ་ཤེས་དབབ་པའི་སླད་དུ་དམིགས་པ་འདི་བཞིན་དུ་མཛོད། ལས་བུམ་གྱི་ཆུ་གཏོར་ལ། ཨཱོཾ་མ་ཧཱ་ཤུ་ནྱ་ཏ་ཛྙཱ་ན་བཛྲ་སྭ་བྷཱ་ཝ་ཨཏྣ་ཀོ྅ཧཾ། ཞེས་བརྗོད་པས་ཁྱེད་རང་གི་ཕུང་ཁམས་སྐྱེ་མཆེད་ཀྱིས་མཚོན་པའི་མ་དག་པའི་སྣང་བ་ཐམས་ཅད་སྟོང་པར་སྦྱངས། སྟོང་པའི་ངང་ལས་གདན་གྱི་ཁར། ཁྱེད་རང་རྣམས་ཀྱི་སེམས་ཉིད་རིག་པའི་ངོ་བོ་ཡི་གེ་ས་ལྗང་གུ་ཞིག་ཏུ་གྱུར། དེ་ལས་འོད་ཟེར་འཕྲོ་འདུའི་ཡོངས་སུ་གྱུར་པ་ལས། ཡེ་ཤེས་ཀྱི་མཁའ་འགྲོ་ཕག་གདོང་སྔོན་མོ་སྣ་ཚོགས་མཐར་ཕྱིན་མ་སྐུ་མདོག་ལྗང་གུ་ནོར་བུ་རིན་པོ་ཆེ་མརྒ་ཏའམ་དབང་སྔོན་གྱི་ལྷུན་པོ་ལ་ཉིན་བྱེད་གཞོན་ནུའི་ཟེར་གྱིས་འཁྱུད་པ་ལྟ་བུ་ལང་ཚོ་རབ་ཏུ་རྒྱས་པའི་སྐུ་ཅན་ཆུ་སྐྱེས་དང་མྱོས་བུམ་རྣམ་པར་རྒྱས་པས་མཚན་པ། ཞལ་གཅིག་ཤིན་ཏུ་ཁྲོས་པའི་ཉམས་ཅན་སྤྱན་གསུམ་མཁའ་ལ་གཟིགས་པ། ཞལ་གདངས་ཤིང་ལྗགས་འདྲིལ་བ་མཆེ་བ་གཙིག་ཤིང་རྐན་སྒྲ་སྒྲོག་པ། ཕྱག་གཉིས་གྲི་ཐོད་ཀྱི་ཕྱག་རྒྱ་ཅན། ཐོད་སྐམ་ལྔས་དབུ་རྒྱན་དང་། དུར་ཁྲོད་ཀྱི་ཆས་བརྒྱད་དང་། རུས་པའི་རྒྱན་གྱིས་བརྒྱན་པ་ཞབས་གར་སྟབས་ཀྱིས་ཁཊྭཱཾ་ག་ལ་འཁྱུད་པ། དབུ་སྐྲ་རལ་བའི་གསེབས་ནས་ཕག་སྐད་འབྲུག་ལྟར་སྒྲོགས་པ། བདེ་སྟོང་གི་ཡེ་ཤེས་རབ་ཏུ་རྒྱས་པའི་སྐུ་སྣང་ལ་རང་བཞིན་མེད་པ་ཡེ་ཤེས་ཀྱི་མེ་རབ་ཏུ་འབར་བའི་དབུས་ན་བཞུགས་པ། དེ་ལྟར་གསལ་བའི་གནས་གསུམ་འབྲུ་གསུམ་གྱིས་མཚན་པའི་འོད་ཟེར་དང་། བླ་མ་དང་མདུན་བསྐྱེད་མཁའ་འགྲོའི་ཐུགས་ཀ་ནས་ཀྱང་འོད་ཟེར་དཔག་ཏུ་མེད་པ་འཕྲོས་པའི་རྐྱེན་ཀྱིས་འོག་མིན་ཆོས་ཀྱི་དབྱིངས་དང་མཁའ་སྤྱོད་གནས་ཡུལ་དུར་ཁྲོད། ཁྱད་པར་ནུབ་ཕྱོགས་ཨོ་རྒྱན་གྱི་ཡུལ་ནས་ཡེ་ཤེས་ཀྱི་མཁའ་འགྲོ་མ་དཔག་ཏུ་མེད་པ་བྱུང་ནས་ཁྱེད་རང་གི་གནས་གསུམ་ལ་གཉིས་མེད་དུ་ཐིམ་བྱུང་སྙམས་པའི་མོས་པ་བརྟན་པོ་མཛོད། ཅེས་དམིགས་པ་སྤྲད་ནས་རྫས་བདུག་སྤོས་རོལ་བྱ་ཞིང་བྱིན་དབབས། ཧཱུྃ༔ ལས་ཀྱི་མཁའ་འགྲོ་ཕྲིན་ལས་དབང་མོ་ཆེ༔ ནུས་མཐུའི་དཔལ་ལྡན་དྲག་སྔགས་འཁོར་ལོས་སྒྱུར༔ ཕྲིན་ལས་མངའ་བདག་ཡེ་ཤེས་མཁའ་འགྲོ་མ༔ བཞེངས་ཤིག་བཞེངས་ཤིག་འབར་བའི་ཀློང་ནས་བཞེངས༔ གཏུམ་སྐད་ཕེམ་སྒྲའི་ང་རོ་འབྲུག་སྟོང་ལྡིར༔ ཕག་ཞལ་སྒྲ་སྒྲོག་ཁམས་གསུམ་དབང་དུ་བསྡུད༔ ཞིང་ཆེན་གཡང་གཞི་ཁྲག་ཏུ་ཙར་ར་ར༔ མི་མགོའི་ཕྲེང་བ་མང་པོ་ཁྲོ་ལོ་ལོ༔ གནམ་ལྕགས་གྲི་གུག་མཁའ་ལ་ཡ་ལ་ལ༔ ཐོད་ཁྲག་དམར་པོ་ཐུགས་ཀར་ཀྱི་ལི་ལི༔ རྡོ་རྗེའི་ཁ་ཊྭཱཾ་དབྱིངས་ན་ལྡེམས་སེ་ལྡེམ༔ དུག་སྦྲུལ་ཆུན་པོ་མང་པོ་ཉི་ལི་ལི༔ དུར་ཁྲོད་རུས་རྒྱན་སྐར་ལྟར་ཁྲ་ལ་ལ༔ དར་ཚོན་ཅོད་པན་སྤྲིན་ལྟར་སྤུངས་སེ་སྤུང་༔ སྟག་གི་པགས་པའི་ཤམ་ཐབ་ལྷབས་སེ་ལྷབ༔ རིན་ཆེན་སྣ་ཚོགས་རྒྱན་ཆ་སི་ལི་ལི༔ ཡེ་ཤེས་བསྐལ་པའི་མེ་དཔུང་འུ་རུ་རུ༔ འདོད་ཆགས་ཁྲག་གི་སེར་བ་ཤར་ར་ར༔ ཞེ་སྡང་དྲག་པོའི་གློག་དམར་སྐེམས་སེ་སྐེམ༔ གཏི་མུག་ནག་པོའི་མུན་པ་ཐིབས་སེ་ཐིབ༔ ང་རྒྱལ་དྲག་པོའི་ཐོག་རྒོད་ཉི་ལི་ལི༔ ཕྲག་དོག་དྲག་པོའི་འབྲུག་སྒྲ་འུར་རུ་རུ༔ མ་མོ་མཁའ་འགྲོ་ཐམས་ཅད་དབང་བསྒྱུར་ལ༔ ལྗང་མོ་འབུམ་གྱི་འཁོར་དང་བཅས་པ་རྣམས༔ དྲག་པོའི་གནས་ནས་ཡེ་ཤེས་མཁའ་ལ་སྤྱོད༔ སྒྲུབ་པའི་གནས་འདིར་བྱིན་གྱིས་བརླབས་ཕྱིར་གཤེགས༔ ས་ཀརྨ་དྷཱཀྐི་ནི་ས་མ་ཡཱ་ཧྲིང་ཧྲིང་ཕེམ་ཕེམ་ཛཿཛཿཨ་ཝེ་ཤ་ཡ་ཨ་ཨཱཿ ཞེས་ཡེ་ཤེས་དབབ་པའི་དམིགས་པ་དང་བཅས་མེ་ཏོག་འཐོར་ཞིང་རྡོ་རྗེ་སྤྱི་བོར་བཞག་ལ། སྤྱན་དྲངས་པའི་ཡེ་ཤེས་པ་རྣམས་བརྟན་པར་བཞུགས་སུ་གསོལ། ཨཱོཾ་སུ་པྲ་ཏིཥྛ་བཛྲ་ཡེ་སྭཱ་ཧཱ། དེ་ནས་དབང་དངོས་ནི་གཞུང་ལས། ད་ེནས་གཏོར་མ་མཁའ་འགྲོར་གསལ་བ་དེ༔ སློབ་བུའི་ལུས་བསྟིམ་འདི་སྐད་བརྗོད་པར་བྱ༔ ཞེས་པས། ཧཱུྃ༔ དཔལ་ལྡན་མཁའ་འགྲོ་རྡོ་རྗེ་རྣལ་འབྱོར་མ༔ ཕྲིན་ལས་མཁའ་འགྲོ་ལྗང་མོ་འབུམ་གྱི་སྡེ༔ སྣ་ཚོགས་མཐར་ཕྱིན་འཁོར་བཅས་སྐུ་ཡི་དབང་༔ སྐལ་ལྡན་བུ་མཆོག་རྣམས་ལ་ཡོངས་རྫོགས་ཤོག༔ ས་ཀརྨ་དྷཱཀྐི་ནི་བྷ་ར་ཧི་ཀཱ་ཡ་ཨ་བྷི་ཥིཉྩ་ཨཱོཾཿ ལྕང་ལོ་ཅན་གྱི་བྷནྡྷ་རཀྟ་ཐོགས༔ སློབ་བུའི་མགྲིན་པར་བསྐུར་ཞིང་ངག་ཏུ་སྦྱིན༔ ཧཱུྃ༔ ལྕང་ལོ་ཅན་གྱི་བྷནྡྷའི་སྣོད་ཡངས་དབུས༔ དགྲ་བགེགས་བསྒྲལ་བའི་ཁྲག་གི་རྒྱ་མཚོར་བསྐྱིལ༔ སྐལ་ལྡན་རིགས་ཀྱི་བུ་ལ་དབང་བསྐུར་བས༔ སྣ་ཚོགས་མཐར་ཕྱིན་གསུང་གི་དབང་ཐོབ་ཤོག༔ ས་ཀརྨ་དྷཱཀྐི་བྷ་ར་ཧི་ཝཱཀྐ་ཨབྷི་ཥིཉྩ་ཨཱོཾ༔ གནམ་ལྕགས་གྲི་གུག་སློབ་བུའི་སྙིང་གར་སྦྱིན༔ ཧཱུྃ༔ གནམ་ལྕགས་ཞུན་མའི་གྲི་གུག་ཡ་ལ་ལ༔ མཐིང་ནག་དར་གྱི་ཅོད་པན་པུར་རུ་རུ༔ ལྗང་མོ་འབུམ་སྡེ་འཁོར་བཅས་ཐུགས་ཀྱི་དབང་༔ སྐལ་ལྡན་བུ་མཆོག་རྣམས་ལ་དབང་བསྐུར་བས༔ སྣ་ཚོགས་མཐར་ཕྱིན་ཐུགས་ཀྱི་དབང་ཐོབ་ཤོག༔ ས་ཀརྨ་དྷཱཀྐི་བྷ་ར་ཧི་ཙིཏྟ་ཨ་བྷི་ཥིཉྩ་ཨཱོཾ༔ རྩེ་གསུམ་སློབ་བུའི་ལག་ཏུ་གཏད༔ ཧཱུྃ༔ ལྕགས་སྣ་དགུ་ལས་གྲུབ་པའི་ཁ་ཊྭཱཾ་ག༔ མི་མགོ་སྐམ་རློན་རྒྱན་ཆ་ཁྲ་ལ་ལ༔ ཚེ་ཡི་བུམ་པ་དགོས་འདོད་ཀུན་འབྱུང་གནས༔ རྒྱ་གྲམ་འབར་བས་ཀླད་ཁྲག་དཀྲུག་པར་བྱེད༔ ཡེ་ཤེས་ལྔ་ལྡན་ཅོད་པན་པུ་རུ་རུ༔ ལྗང་མོ་འབུམ་སྡེའི་ཡོན་ཏན་དབང་ཐོབ་ཤོག༔ ས་ཀརྨ་དྷཱཀྐི་བྷ་ར་ཧི་རཏྣ་ཨ་བྷི་ཥིཉྩ་ཨཱོཾ༔ འཕྲིན་ལས་བསྒྲལ་དབང་གཞུང་ལྟར་སྦྱིན་པར་བྱ༔ ས་མ་ཡཱ༔ རྒྱ་རྒྱ་རྒྱ༔ དེ་ནས་ལྕགས་སྣོད་དུ་ལིང་ག་བཤམས་ལ། སློབ་བུ་རྣམས་ལྷར་གསལ་བས། དགུག་གཞུག་སྤྱི་ལྟར་གྱི་མཐར༔ ས་ཀརྨ་དྷཱཀྐི་ནི་བྷ་ར་ཧི་དགྲ་བོ་བྱད་མ་ལྷ་བསྲུང་དང་བཅས་པའི་ལུས་ངག་ཡིད་གསུམ་ཁུག་རིལ་ཐུན་བྷྱོ༔ གསུམ། ཛཿཧཱུྃ་བཾ་ཧོ༔ ས་རྒྱས་གདབ༔ ཧཱུྃ༔ སྣ་ཚོགས་མཐར་ཕྱིན་འཇིགས་གཟུགས་རྔམ༔ རབ་ཏུ་འཁྲུག་པས་དུག་གསུམ་འབར༔ སྐུ་གསུང་ཐུགས་སྤྲུལ་སྟོང་གསུམ་གང་༔ སྒྲོལ་བྱེད་འབུམ་སྡེས་དགྲ་བགེགས་སྒྲོལ༔ ས་ཀརྨ་དྷཱཀྐི་ནི་བྷ་ར་ཧི་མ་མ་ཏྲག་རཀྴ་ཡ་ཁ་ཐུན་ཁ་ཐུན་དགྲ་བོ་འདུ་ཤ་ཡེ༔ བྷནྡྷ་ཡེ༔ ཚིནྡྷ་ཡེ༔ རཀྟ་ཡེ༔ དགྲ་པོའི་སྙིང་ཁ་རག་མོ་སྲོག་ཁུག༔ མྱུར་དུ་ཁུག་ཛཿཛཿདགྲ་བོའི་སྙིང་དུམ་བུར་ཆོད་དུམ་བུར་ཆོད་དགྲ་བོ་མཱ་ར་ཡ་ཛཿཛཿ ཅེས་སློབ་མ་རྣམས་ཀྱི་དམིགས་པ་གསལ་བས་བསྒྲལ་ལ། དེ་ཡང་ཚེ་ལུང་ཁྲུས་ལུང་གི་དགོངས་པ་དང་ལྡན་པས། སློབ་དཔོན་གྱིས། འོ་ཁྱེད་རང་རྣམས་ཀྱིས་གནད་འདི་ཤེས་དགོས་ཏེ་མཉམ་གཞག་ཆོས་སྐུའི་ངང་དུ་རྟོགས་པས་བདག་བསྒྲལ་ནས། རྗེས་ཐོབ་སྙིང་རྗེའི་རྩལ་གྱིས་ཐུགས་རྗེས་གཞན་བསྒྲལ་བ་ནི་རྡོ་རྗེ་ཐེག་པའི་སྒྲོལ་དབང་གི་དགོངས་པ་ཡིན་པས། དེ་ལྟ་བུའི་དགོངས་པ་དང་ལྡན་པས་ཡུལ་གསུམ་གསལ་བ། དགྲ་གསུམ་བསད་པ་བདུད་བཞི་སྒྲོལ་བ། ཕྲང་གསུམ་བསལ་བ་དེ་ལྟ་བུའི་གཤིས་ལུགས་མངོན་དུ་གྱུར་པ་དེ་བསྒྲལ་དབང་གི་ངོ་བོ་ཡིན་པས་ཤེས་པར་གྱིས་ཤིག །ཅེས་བཤད་ལ་རྟོག་པ་བསྐྱེད་དེ་བསྒྲལ། དེ་ནས་ཤ་ཁྲག་ཚོགས་སུ་དམིགས་ཏེ་འབུལ་ཞིང་ཞལ་བསྟོབ་ནི༔ ཧཱུྃ༔ མཁའ་འགྲོའི་ཚོགས་རྣམས་དགྱེས་པར་རོལ༔ ཁཱ་ཧི་ཁཱ་ཧི་འདོད་ཆགས་ཁྲག་ལ་ཁཱ་ཧི༔ ཁཱ་ཧི་ཁཱ་ཧི་ཞེ་སྡང་རུས་ལ་ཁཱ་ཧི༔ ཁཱ་ཧི་ཁཱ་ཧི་གཏི་མུག་ཤ་ལ་ཁཱ་ཧི༔ ལིང་རོ་གཏོར་མར་སྟོབ་བར་བྱའོ། །དེ་ནས་ཤིས་བརྗོད་མེ་ཏོག་འཐོར། ཧཱུྃ༔ ཡེ་ཤེས་དབྱིངས་ཀྱི་ཕོ་བྲང་ནས༔ ཕག་མོ་ཆོས་སྐུའི་བཀྲ་ཤིས་ཤོག༔ ཡེ་ཤེས་ལྔ་ལྡན་ཕོ་བྲང་ནས༔ ཕག་མོ་ལོངས་སྐུའི་བཀྲ་ཤིས་ཤོག༔ མཁའ་སྤྱོད་གནས་ཡུལ་དུར་ཁྲོད་ནས༔ ཕག་མོ་སྤྲུལ་སྐུའི་བཀྲ་ཤིས་ཤོག༔ བཀའ་ཡི་ཕྲིན་ལས་དཀྱིལ་འཁོར་ནས༔ སྤྲུལ་པ་འབུམ་སྡེའི་བཀྲ་ཤིས་ཤོག༔ ཅེས་དང་གཞན་ཡང་ཤིས་བརྗོད་གང་འོས་བྱའོ། དེ་ལྟར་བཅོམ་ལྡན་འདས་མ་སྣ་ཚོགས་མཐར་ཕྱིན་གྱི་དབང་བསྐུར་ཟབ་མོ་ཐོབ་པ་ཡིན་པས་གནས་སྐབས་དེ་དག་ཏུ་ཁས་བླངས་པའི་དམ་ཚིག་དང་གདམས་པའི་རིམ་པ་རྣམས་ཚུལ་བཞིན་བསྲུང་བར་བགྱིད་སྙམས་པས་འདིའི་རྗེས་བཟློས་གྱིས། གཙོ་བོའི་ཇི་ལྟར་སོགས། གཏང་རག་གི་མཎྜལ། སླར་ལུས་ལོངས་སྤྱོད་དུས་གསུམ་གྱི་དགེ་ཚོགས་དང་བཅས་འཁོར་ལོས་སྒྱུར་བའི་རྒྱལ་སྲིད་ཀྱི་འབྱོར་བ་ལྟར་སྤྲུལ་ཏེ་འབུལ་སྙམས་པས་འདིའི་རྗེས་བཟློས་གྱིས། དེང་ནས་བརྩམས་སོགས། དེ་ལྟར་དབང་བསྐུར་ཐོབ་པའི་དགེ་རྩ་སེམས་ཅན་གྱི་དོན་དུ་བསྔོ་བར་གྱིས། བསོད་ནམས་འདི་ཡི་སོགས་ནས། རིན་ཆེན་དགེ་ཚོགས་སོགས་དགེ་བ་བསྔོ་ཞིང་། དགའ་སྟོནཚོགས་འཁོར་ཡོད་ན་དྲིམ། སློབ་བུ་རྣམས་རང་གནས་བཏང་ངོ་༔ ལྷག་མ་བཏང་སོགས་རྗེས་སྤྱི་ལྟར་བྱ་བས་འཇུག་སྐྱོང་ངོ་། ཨེ་མ་མཁའ་འགྲོའི་དབང་ཆོག་གསང་བའི་བཅུད༔ དུར་ཁྲོད་བརྒྱད་ལ་སྤྱོད་པ་སྤྱད་པའི་ཚེ༔ ཡེ་ཤེས་མཁའ་འགྲོ་རྡོ་རྗེ་རྣལ་འབྱོར་མས༔ འབུམ་ཕྲག་མཁའ་འགྲོ་དབང་བསྡུས་བདག་ལ་སྩལ༔ དེས་ན་བརྗོད་པར་དཀའ་བའི་གདམས་པ་འདི༔ ཕྱི་མའི་དུས་ཀྱི་སྐལ་ལྡན་ཕོ་མོའི་དོན༔ ཡི་གེའི་རིས་བཏབ་རིན་ཆེན་གཏེར་དུ་སྦས༔ ལན་གཅིག་བསྐལ་བ་དུས་ཀྱི་ཐ་མ་ལ༔ འགྲོ་བ་འདྲེན་པའི་བུ་དང་འདི་འཕྲད་ནས༔ སངས་རྒྱས་བསྟན་པ་ཡུན་རིང་བསྲིང་བར་ཤོག༔ ས་མ་ཡཱ༔ རྒྱ་རྒྱ་རྒྱ༔ གཏེར་རྒྱ༔ སྦས་རྒྱ༔ ཟབ་རྒྱ༔ ས་མ་ཡཱ༔ རྒྱ་རྒྱ་རྒྱ༔ གཏེར་ཆེན་ཉི་མ་གྲགས་པ་རྩལ་གྱིས་ཆགས་རུ་ཕུག་སྔོན་ནས་གུ་རུ་རིནཔོ་ཆེ་དང་སྲུང་མའི་བསྐུལ་བྱང་གསལ་བ་ལ་བརྟེན་ཏེ་སྤྱན་དྲངས་ཤིང་ཆགས་རུ་ཕུག་ནག་ཏུ་ཤོག་སེར་ལས་བསྒྱུར་བ་མངྒ་ལཾ། །སྣ་ཚོགས་མཐར་ཕྱིན་ལས་ཀྱི་མཁའ་འགྲོ་ཡི། །དབང་ཆོག་འཇུག་པ་བདེ་བར་བཀོད་པའི་དགེས། རབ་འབྱམས་ལས་ཀྱི་འདོད་པ་ཀུན་འཇོ་བས། །བསྟན་འགྲོའི་བདེ་ལེགས་བསྐྲུན་པའི་ནུས་ཐོབ་ཤོག །ཅེས་བཅོམ་ལྡན་འདས་མ་ཕག་གདོང་སྔོན་མོའི་དབང་ཆོག་དྲེགས་པ་ཚར་གཅོད་ཁྲིགས་སུ་སྡེབས་པ་འདི། བླ་མ་དམ་པ་མཁྱེན་སྤྱན་ཡངས་པ་འགྱུར་མེད་བློ་ལྡན་གྱིས་རིང་མོ་ཞིག་ནས་ནན་ཏན་ཆེན་པོའི་ཡང་ཡང་བསྐུལ་བ་དང་། ཉེ་བར་གྲུབ་པའི་དབང་ཕྱུག་བསྟན་འཛིན་སྙིང་པོ་ནས་གྲུབ་པར་གྱིས་ཤིག་པའི་གསུང་གི་གནང་བ་ཐོབ་པ་ལ་ཡི་དམ་དུ་བགྱིས་ཏེ་སྔགས་བན་ཝཱགྟི་མ་ཏིའི་བགྱིས་པ་ཉེས་གྱུར་མཁའ་འགྲོའི་ཚོགས་ལ་བཤགས།