ལྷ་མོ་སྔགས་བདག་མའི་སྐོར།

ལོ་རྒྱུས་ཀྱི་ཡི་གེ

སྔགས་བདག་འབར་བའི་ཐུགས་ཐིག་ལས༔ ལོ་རྒྱུས་ཀྱི་ཡི་གེ་བཞུགས༔ སྔགས་སྲུང་མཁའ་འགྲོའི་ཚོགས་ལ་འདུད༔ རྒྱ་གར་ཡུལ་གྱི་བྷདྒ་ལར༔ བདག་ཉིད་པདྨ་འབྱུང་གནས་ཀྱིས༔ རཱ་ཛ་ནོར་བུ་འོད་ལྡན་བསྒྲལ༔ རྣམ་ཤེས་མཁའ་སྤྱོད་གནས་སུ་སྤར༔ རྒྱལ་སྲིད་བདག་གིར་བཟུང་བྱས་ནས༔ ཡུལ་དེར་དམ་པའི་ཆོས་ཁྲིམས་བཙུགས༔ དེ་ཚེ་མུ་སྟེགས་སྟོན་པ་འགས༔ ཟག་བཅས་མངོན་ཤེས་སྣ་ཚོགས་ཀྱིས༔ ལེགས་པར་བལྟས་ནས་ཁུངས་བཅད་པས༔ རྒྱལ་པོ་ནོར་བུ་འོད་ལྡན་ལ༔ ཨོ་རྒྱན་རྒྱལ་པོའི་སྲས་པོ་ཡིས༔ བརྟུལ་ཞུགས་ཕོག་སྟེ་རྒྱལ་པོ་བསྒྲལ༔ གསོབ་འདི་པདྨ་སམ་བྷས་བཟུང་༔ ནང་པའི་བསྟན་པ་བཙུགས་པར་གདའ༔ ད་སྟེ་རང་ཅག་སྟོན་པ་རྣམས༔ དུར་ཁྲོད་ཆེན་པོའི་གནས་སུ་འདོང་༔ དྲག་སྔགས་ཕབ་སྟེ་རྒྱལ་པོ་བསྒྲལ༔ ནང་པའི་བསྟན་པ་ཉམས་པར་བྱེད༔ ཅེས་པ་ཁོང་རྣམས་སེམས་འཆམ་སྟེ༔ དུར་ཁྲོད་འདམ་བུའི་ཚལ་དུ་སོང་༔ དེ་ཚེ་བདག་ཉིད་པད་འབྱུང་ལ༔ སྔགས་བདག་འབར་མས་སྲོག་སྙིང་ཕུལ༔ སྒོམ་བཟླས་བསྐྱེད་རྫོགས་ལས་ལ་སྦྱར༔ འབོད་རྦད་བསད་གསུམ་ལས་སྦྱོར་གྱིས༔ མུ་སྟེགས་སྟོན་པ་ཁ་ཕུང་བཏང་༔ ཡུལ་དེར་སངས་རྒྱས་བསྟན་པ་རྒྱས༔ དེ་ནས་གདམས་པ་ཟབ་མོ་འདི༔ མཚན་བཟང་སུམ་ཅུས་སྤྲས་པ་ཡི༔ བྲམ་ཟེའི་བུ་མོ་དཔལ་སྐྱེས་མར༔ བཀའ་རྒྱ་བྱས་ཤིང་སྨོན་ལམ་བཏབ༔ རྩྭ་མཆོག་དྲུང་གི་བྱང་སྒོ་ན༔ རྒྱ་བདུན་བཏབ་སྟེ་གཏེར་དུ་སྦས༔ ལས་འཕྲོ་ཅན་ལ་སྨོན་ལམ་བཞག༔ ས་མ་ཡཱ༔ རྒྱ་རྒྱ་རྒྱ༔ གཏེར་རྒྱ༔ སྦས་རྒྱ༔ ཟབ་རྒྱ༔ བཀའ་རྒྱ༔ དམ་རྒྱ༔ ས་མ་ཡཱ༔ རྒྱ་རྒྱ་རྒྱ༔ རིག་འཛིན་ཆེན་པོ་ཉི་མ་གྲགས་པ་རྩལ་གྱིས་ཤིང་ཕོ་བྱི་བའི་ལོ་ཧོར་ཟླ་དང་པོའི་ཡར་ཚེས་ལ་རྒྱ་གར་རྩ་མཆོག་གྲོང་གི་བྱང་སྒོ་ནས་གདན་དྲངས་ཤིང་སྦས་ཡུལ་སྐྱེད་མོ་གཤོང་དུ་ཤོག་སེར་ལས་བོད་ཡིག་ཏུ་བསྒྱུར་བའོ། །མངྒ་ལཾ།། །།

རྟེན་གྱི་ཁ་བྱང་།

སྔགས་བདག་འབར་མའི་ཐུགས་ཐིག་ལས༔ རྟེན་གྱི་ཁ་བྱང་བཞུགས༔ སྔགས་སྲུང་མཁའ་འགྲོའི་ལྷ་ཚོགས་རྣམས་ལ་འདུད༔ བདག་འདྲ་རིག་འཛིན་པདྨ་འབྱུང་གནས་ཀྱིས༔ འཛམ་གླིང་ཀུན་ཏུ་བསྟན་འགྲོའི་དོན་ཆེན་བསྐྱང་༔ ཁྱད་པར་ཤར་ཕྱོགས་བྷདྒ་ལ་ཞེས་པར༔ སྡིག་སྤྱོད་འཇིག་རྟེན་ལྷ་ལ་སྐྱབས་གསོལ་བའི༔ རྒྱལ་པོ་ནོར་བུ་འོད་ལྡན་ཞེས་བྱ་བ༔ སྟོབས་ཀྱི་དཔུང་ཚོགས་དུ་མས་བརྒྱན་པ་དེ༔ དུས་གསུམ་སྐྱེ་འགྲོ་བྱང་ཆུབ་ལམ་འགོད་ཕྱིར༔ དབྱིངས་སུ་བསྟིམས་པས་ཡུལ་དེར་དམ་ཆོས་དར༔ དེ་ཚེ་སློབ་དཔོན་ཀླུ་སྒྲུབ་སྙིང་པོ་ཡིས༔ ཤར་ནུབ་ལི་གཉིས་བཞུས་ཏེ་སྨོན་ལམ་ནི༔ གདུལ་ཞིང་ཁྱད་འཕགས་བྷ་ག་ལ་ཡི་གླིང་༔ འདུལ་བྱེད་སྟོན་པ་པདྨ་འབྱུང་གནས་ཀྱིས༔ དམ་པའི་ཆོས་ཀྱི་བསྟན་པ་བཙུགས་པ་དེ༔ དར་ཞིང་རྒྱས་པའི་ལེགས་ཚོགས་རྟེན་འབྲེལ་ལྷ༔ གང་ཡིན་སྐུ་ཡི་དཀྱིལ་འཁོར་གསལ་བར་སྟོན༔ བཀྲ་ཤིས་དགེ་བའི་མཚན་དཔེར་ལྡན་པར་ཤོག༔ གསུང་ནས་ལུགས་སུ་བླུགས་པས་དང་པོའི་སྐུས༔ ང་ནི་སྔགས་སྲུང་མཁའ་འགྲོའི་རིགས་ཀྱི་བདག༔ ཆོས་སྐུ་མི་བསྐྱོད་རྡོ་རྗེ་ཞེས་སུ་གྲགས༔ ཞེས་པའི་གསུང་བྱོན་ལྟས་ཆེན་བཅོ་བརྒྱད་ཤར༔ མཚན་ཡང་ཆོས་སྐུ་མི་བསྐྱོད་རྡོ་རྗེར་གསོལ༔ གཉིས་པ་ནུབ་ལི་ལུགས་སུ་བླུགས་པའི་ཚེ༔ མཁའ་ལ་འབྲུག་གྲགས་བར་སྣང་འཇའ་འོད་འཁྲུགས༔ ང་ནི་ཇོ་བོ་མི་བསྐྱོད་རྡོ་རྗེ་སྟེ༔ མཐོང་ཐོས་སྐྱེ་འགྲོ་འཕགས་པའི་ཞིང་ལ་འགོད༔ ཅེས་པའི་གསུང་བྱོན་ཀུན་གྱིས་ཡ་མཚན་མཆོད༔ མཚན་ཡང་ཇོ་བོ་མི་བསྐྱོད་རྡོ་རྗེར་གསོལ༔ དེ་ནས་ཁྱད་པར་འཕགས་པའི་སྐུ་དེ་གཉིས༔ ལོ་རྒྱུས་མཚན་བྱང་བཅས་ཏེ་བདག་ལ་གནང་༔ སངས་རྒྱས་བསྟན་པ་ཚུགས་པའི་སྐྱེས་ཡིན་གསུང་༔ བདག་གིས་ཤིས་བརྗོད་རབ་ཏུ་གནས་པའི་ཚེ༔ མདུན་གྱི་མཁའ་ལས་ཇོ་བོ་མཆེད་གཉིས་འདི༔ འགྲོ་དོན་གདུལ་བྱ་གདོང་དམར་བོད་ན་ཡོད༔ དེ་བར་མཁའ་འགྲོའི་གསང་མཛོད་སྦ་བར་དགེ༔ ཅེས་པའི་སྒྲ་བྱུང་ཧ་ཙོའི་བྱང་སྒོའི་སྟེང་༔ སྲུང་མ་མཁའ་འགྲོ་ཁྲག་རལ་མ་ལ་བཅོལ༔ འགྲོ་དོན་འབྱུང་དང་བདག་པོ་མ་བྱུང་བར༔ ཐུབ་པར་སྲུངས་ཤིག་དུས་ལ་བབས་པའི་ཚེ༔ སྐལ་ལྡན་ལས་འཕྲོ་ཅན་དང་འཕྲད་པར་ཤོག༔ ས་མ་ཡཱ༔ རྒྱ་རྒྱ་རྒྱ༔ འདི་ནས་རིང་འདས་མ་འོངས་བསྐལ་པའི་མཐར༔ ལས་འཕྲོ་སད་པའི་སྐལ་ལྡན་སྐྱེས་བུ་དང་༔ འཕགས་པ་མཆེད་གཉིས་སྔགས་སྲུང་གདམས་པའི་སྐོར༔ ཕྲད་པའི་དུས་སུ་བསྟན་འགྲོའི་དཔལ་གྱི་མགོན༔ གངས་ལྗོངས་ས་ཡི་དབང་ཕྱུག་དབུས་དང་ཤར༔ རྟེན་འབྲེལ་གང་བབས་ལེགས་བརྟགས་ཡུལ་ཕྱོགས་སུ༔ འཕགས་པ་བཞུགས་གསོལ་ཆོས་ཀྱི་གྲྭ་སྡེ་ཚུགས༔ མཐོང་ཐོས་འབྲེལ་ཐོགས་འཕགས་པའི་ཞིང་དུ་གྲོལ༔ ཡ་གཅིག་རོང་གསུམ་ལུང་པའི་འདུས་མདོ་ན༔ བཻ་རོའི་སྤྲུལ་བས་སྲིད་སྐྱོང་མཆོད་པའི་རྟེན༔ ཀླུ་གོང་སྤྲུལ་བས་བར་གཅོད་མ་བྱུང་ན༔ ཡུལ་འདིར་ནད་མུག་མཚོན་གྱི་བསྐལ་བ་ཞི༔ ལར་ནི་འཕགས་པའི་སྐུ་མཆོག་འདི་གཉིས་ལ༔ མོས་འདུན་མཆོད་པ་ཕྱག་སྐོར་མར་མེས་འབྲེལ༔ ཤན་པ་ཡིན་ཀྱང་ངན་སོང་སྐྱེ་སྒོ་ཆོད༔ མཚམས་མེད་ལས་སྲབ་མི་དགེའི་སྡིག་ལྟུང་འདག༔ དེ་ཕྱིར་མ་འོངས་འགྲོ་ལ་ཕན་ཐོགས་ཤོག༔ བཀའ་ཡི་སྲུང་མས་བྱ་ར་གྱིས་ཤིག་རྒྱ༔ ས་མ་ཡཱ༔ རྒྱ་རྒྱ་རྒྱ༔ ཁམས་པ་ཉི་མ་གྲགས་པས་ཧ་ཙོ་ནས་གདན་དྲངས་པའོ། །མངྒ་ལཾ།། །།

སྒྲུབ་ཐབས་མ་མོའི་སྙིང་ཞུན།

སྔགས་བདག་འབར་མའི་ཐུགས་ཐིག་ལས༔ སྒྲུབ་ཐབས་མ་མོའི་སྙིང་ཞུན་བཞུགས༔ བདག་འདྲ་པདྨ་འབྱུང་གནས་ཀྱིས༔ མ་འོངས་འགྲོ་བའི་དོན་བསམས་ཏེ༔ བཀའ་ཡི་སྲུང་མ་ཆེན་མོ་ཡི༔ མན་ངག་ཡང་ཏིག་སྒྲུབ་པའི་སྐོར༔ མ་བུ་ཆ་ལག་སོ་སོར་ཕྱེ༔ གབ་འཁྲུགས་མེད་པར་རིམ་བཞིན་བཀོད༔ ཆོས་བྱེད་འགའ་ཡི་དོན་འགྲུབ་ཤོག༔ ཆོས་ཀྱི་བར་ཆད་ཟློག་པར་ཤོག༔ ས་མ་ཡཱ༔ རྒྱ་རྒྱ་རྒྱ༔ མ་འོངས་སྐལ་ལྡན་རྗེས་འཇུག་གི༔ ལྷ་མོ་ཆེན་མོ་བསྒྲུབ་འདོད་ན༔ བསྙེན་དང་སྒྲུབ་པ་ལས་སྦྱོར་རོ༔ ས་མ་ཡ༔ རྒྱ་རྒྱ་རྒྱ༔ བསྙེན་ཅིང་སྒྲུབ་པའི་རིམ་པ་ནི༔ སྒྲུབ་པོ་དམ་ཚིག་ལྡན་པ་ཡིས༔ དྲག་པོའི་གནས་སམ་སྒྲུབ་ཁང་ནང་༔ ཆག་ཆག་གདབ་ཅིང་གད་བདར་བྱ༔ འབྲུ་ནག་ཕྱེ་ལ་དཔལ་གྱི་བཤོས༔ ཟུར་གསུམ་ཁྲུ་གང་ལྡན་པར་བྱ༔ ཤ་སྣ་སྙིང་སྣ་དག་གིས་བརྒྱན༔ ཤ་ཆེན་ནལ་བུ་རབ་ཡིན་ནོ༔ བདུད་རྩི་སྨན་དང་རཀྟ་བཅས༔ འཕུང་ཤུལ་ས་ཡི་སྟེགས་བུའམ༔ མདའ་གསུམ་ཨོཾ་མམ་མཉྫིའི་སྟེང་༔ གཏོར་མ་བཞག་ཅིང་སྨན་རཀ་དང་༔ རྣམ་ལྔ་ལ་སོགས་རྒྱས་པར་བཤམས༔ མཐིང་ནག་དར་གྱི་གུར་ཡང་ཕུབ༔ བྷ་སུ་ཏ་ཡི་ཞགས་པས་དཀྲི༔ གཏོར་མར་ཆུ་གཙང་སྨན་རག་སྦྲེང་༔ རང་ཉིད་ཡི་དམ་བསྐྱེད་རིམ་གསལ༔ བསྟན་པ་བསྲུང་བའི་སེམས་ཀྱང་བསྐྱེད༔ ཐུགས་ཀར་ཧཱུྃ་བྷྱོཿཉི་མའི་དཀྱིལ༔ ཐ་མར་སྔགས་ཀྱི་ཕྲེང་བས་བསྐོར༔ རང་མདུན་དུར་ཁྲོད་ས་གཞིའི་དབུས༔ ཁྲག་ཞག་རྒྱ་མཚོ་འཁྱིལ་བའི་ཀློང་༔ གྲུ་གསུམ་ཐོད་པ་སྐམ་རློན་མཁར༔ ནང་ནི་གནམ་ལྕགས་ཨུར་མོ་གྲུབ༔ རླུང་ནག་འཚུབ་མ་བསྐལ་མེ་འབར༔ མི་རོ་རྟ་རོ་འབུམ་ཁྲི་བརྡལ༔ ཉི་མའི་དཀྱིལ་འཁོར་འབར་བའི་ཀློང་༔ ཏི་ལས་སྐྱེས་པའི་བོང་བུ་ནི༔ དམར་ག་དྲག་རྩལ་མྱུར་མགྱོགས་ལྡན༔ གཡང་གཞི་མི་མགོ་ཐོད་པའི་སྒ༔ གཡུ་མཐུར་གསེར་སྲབ་མིག་འབྲས་བརྒྱན༔ མཆོང་སྦྲུལ་རྒྱུ་མའི་གོང་རྨེད་ལ༔ མི་མགོ་སྙིང་གི་དོ་ཤལ་སྤྲས༔ རྣ་བར་དར་གྱི་འཕུར་ལྕེ་དང་༔ གསེར་གྱི་གཡེར་ཁ་འཁྲོལ་བར་བསྒོམ༔ དེ་སྟེང་པདྨ་ཉི་ཟླའི་དབུས༔ རང་གི་ཐུགས་ཀའི་ས་བོན་ལས༔ མ་འཕྲོས་ཡོངས་གྱུར་དཔལ་ལྡན་མ༔ མཐིང་ནག་ཞལ་གཅིག་ཕྱག་གཉིས་པ༔ སྤྱན་གསུམ་རབ་འཁྱིལ་ཕྱོགས་བཅུར་གཟིགས༔ ཞལ་གདངས་ལྗགས་འགྲིལ་མཆེ་བ་གཙིགས༔ རལ་བ་དམར་ནག་གྱེན་ཐུར་གཏིབས༔ གསེར་གཡུ་མུ་ཏིག་ཆུན་པོས་བརྒྱན༔ གཡས་པས་ཁ་ཊྭཱཾ་བ་དན་ནག༔ གཡོན་པས་ནད་གྱི་རྐྱལ་པ་བསྣམས༔ སྐུ་སྟོད་ཞིང་ལྤགས་དར་ནག་གསོལ༔ སྐུ་སྨད་སྟག་ལྤགས་མི་རྩིབས་ཀྱི༔ རེ་ལྡེ་མིག་མང་རིས་སུ་དཀྲིས༔ སྤྱི་བོར་རྨ་བྱའི་སྒྲོ་ཕོད་ལ༔ སྙན་གཡས་སེང་གེ་གཡོན་སྦྲུལ་གདེངས༔ ཐོད་པ་སྐམ་རློན་སྦྲུལ་གྱིས་བརྒྱན༔ སྤྱི་བོའི་གཙུག་ན་ཟླ་བ་རྒྱས༔ ལྟེ་བའི་དཀྱིལ་ནས་ཉི་མ་འཆར༔ ནག་མོ་འབུམ་གྱིས་བསྐོར་བར་བསྐྱེད༔ ས་མ་ཡཱ༔ རྒྱ་རྒྱ་རྒྱ༔ དེ་ནས་གཙོ་མོའི་ཐུགས་ཀྱི་དབུས་སུ་མ་དམར་ནག་གི་མིག་ཏུ་བྷྱོ་ནག་མོའི་མཐར༔ རེ་མ་ཏཱི་མཱ་ར་ཡ་ཛ་མ་མ་རཀྴ་སྙིང་ཁ་རག་ཙིཏྟ་སྲོག་དུང་དུང་ཛཿཛཿ ཧཱུྃ༔ དེ་ནས་བདག་གི་ཧཱུྃ་བྷྱོ་མ་ལས་འོད་ཟེར་འཕྲོས་པས་ཡིག་འབྲུ་རྣམས་བརྒྱུད་ནས་ཐུགས་ཀར་ཕར་འཕྲོས་ལྷ་མོ་དམ་ཚིག་སེམས་དཔའི་ཐུགས་ཀར་ཐིམ་སྔགས་འབྲུ་རྣམས་བརྒྱུད་ནས་བྷྱོ་དང་མ་ལ་ཕོག་པས་འོད་ཟེར་བྱང་ཤར་དུ་འཕྲོས་པས་མཚོ་མུ་ལེ་མཐིང་གི་ནང་ཡོངས་འདུ་ཤིང་གི་རྩ་བ་ནས་ཐོད་མཁར་འབར་བའི་ཕོ་བྲང་ནས༔ དཔལ་ལྡན་ནག་མོ་ཆེན་མོ་འཁོར་ནག་མོ་འབུམ་གྱི་ཚོགས་དང་བཅས་པ་སྐད་ཅིག་གི་བྱ་ཁྱུང་ཐང་ལ་ལྷགས་པ་ལྟར་སྤྱན་འདྲེན་ཅིང་ཡང་ཡང་བསྟིམ༔ ལས་བྱང་ལྟར་སྤྱན་འདྲེན༔ ས་མ་ཡཱ༔ རྒྱ་རྒྱ་རྒྱ༔ དེ་ནས་བསྙེན་སྒྲུབ་ལས་གསུམ་གྱི༔ ཡོངས་སུ་དྲིལ་བའི་སྙིང་པོ་འདི༔ འབོད་པའི་ཚུལ་གྱིས་བཟླ་བར་བྱ༔ བྷྱོ་རེ་མ་ཏཱི་ཆེ་གེ་མཱ་ར་ཡ་ཛཿཧཱུྃ་བྷྱོ་ཕཊ༔ རང་ཉིད་ཡི་དམ་གྱི་ང་རྒྱལ་དྲག་ཏུ་བསྐྱེད་ཅིང་ཐུགས་ཀའི་ཧཱུྃ་དང་བྷྱོ་ལས་འོད་ཟེར་དམར་པོ་དམར་ལམ་ལམ་དུ་འཕྲོས་པས་སྔགས་འབྲུ་རྣམས་རིམ་གྱིས་བརྒྱུད་མ་མོའི་ཐུགས་ཀར་ཐིམ་པས་བྷྱོ་དང་མ་ལ་ཕོག་དཔལ་ལྡན་མའི་ཐུགས་དམ་བསྐུལ་མ་མོའི་སྲོག་བཅུད་མཐུ་སྟོབས་བཀྲག་མདངས་རྣམས་བདག་ཉིད་ལྷར་གསལ་བ་ལ་ཚུར་འདུས་པར་བསམས༔ རང་གི་ཐུགས་ཀའི་ཧཱུྃ་ལ་ཐིམ་པས་སྔགས་བདག་མའི་མཐུ་སྟོབས་གཟི་བརྗིད་ཐམས་ཅད་རང་གིས་ཐོབ་པར་བསྒོམ༔ དེ་ལྟར་མ་ཡེངས་རྩེ་གཅིག་ངང་༔ སྤྲོ་བསྡུ་བྱ་ཞིང་བསྙེན་པ་བསྐྱལ༔ ས་མ་ཡཱ༔ རྒྱ་རྒྱ་རྒྱ༔ དེ་ཚེ་རྟགས་ཀྱི་རིམ་པ་ནི༔ རབ་ནི་མངོན་སུམ་ཞལ་མཇལ་ཞིང་༔ འབྲིང་ནི་རྨི་ལམ་ཉམས་སྣང་དུ༔ མ་སྲིང་བུད་མེད་ལ་སོགས་པས༔ ཕྱག་རྒྱ་བྱེད་དང་དངོས་གྲུབ་སྟེར༔ ཕྱག་མཚན་མཚོན་ཆ་བོང་བུ་རྙེད༔ རླུང་ནག་འཚུབ་དང་མེ་འབར་སོགས༔ ཐ་ནའང་ནི་སྒྲུབ་རྫས་ལ༔ བག་རྡུལ་མེད་དང་བསྐྱེད་རིམ་གསལ༔ དེ་སོགས་གྲུབ་པའི་རྟགས་བྱུང་ནས༔ མཆོད་བསྟོད་སྨན་རག་གཏོར་མ་འབུལ༔ དངོས་གྲུབ་བླང་ཞིང་འཕྲིན་ལས་བཅོལ༔ ས་མ་ཡཱ༔ རྒྱ་རྒྱ་རྒྱ༔ གཏེར་རྒྱ༔ སྦས་རྒྱ༔ སྲོག་གི་སྤུ་གྲི་འབར་བའི་རྒྱས་བཏབ་བོ༔ བཀའ་གཉན་རྒྱ༔ དམ་གསང་རྒྱ༔ འཆལ་བར་མ་སྤྱོད་ཤིན་ཏུ་གཉན་པས་གབ་རྒྱ༔ ཁ་ཐཾ་ཨྠིྀ༔ རྒྱ་རྒྱ་རྒྱ༔ ཆིག་བརྒྱུད་མ་གཏོགས་མ་སྤེལ་ལོ༔ ས་མ་ཡཱ༔ རྒྱ་རྒྱ་རྒྱ༔ ཅེས་པ་འདི་ཁམས་པ་ཉི་མ་གྲགས་པས་ཤིང་ཕོ་བྱི་བའི་ལོ་ཧོར་ཟླ་དང་པོའི་ཚེས་བཅོ་བརྒྱད་ཀྱི་སྲོད་དྲག་པོའི་དུས་སུ་འཕགས་ཡུལ་ཆེན་པོ་རྒྱ་གར་ཧ་ཙོའམ་རྩྭ་མཆོག་གྲོང་གི་བྱང་སྒོའི་བསམ་བསེའུ་ནས་འབར་ཞིང་འཁྲུགས་པའི་ཉམས་མང་པོའི་ངང་ནས་གདན་དྲངས་ཏེ་ཨོ་རྒྱན་སངས་རྒྱས་གཉིས་པའི་སྦས་ལུང་སྐྱིད་མོ་གཤོང་གི་མཚོ་གྲོང་དགོན་པའི་གཙུག་ལག་ཁང་གི་ཡང་དབེན་དུ་མཁའ་འགྲོའི་གསང་བའི་ཤོག་སེར་ལས་བོད་ཡིག་ཏུ་མགྱོགས་པར་དཀྱུས་སུ་བྲིས་པ་འདིས་ཀྱང་སངས་རྒྱས་ཀྱི་བསྟན་པ་རིན་པོ་ཆེ་བསྲུང་བར་ཤོག །མངྒ་ལཾ།། །།

བསྔགས་སྡེབ་སྙིང་ཞུན་ཟབ་མོ།

སྔགས་བདག་འབར་མའི་ཐུགས་ཐིག་ལས༔ བསྔགས་སྡེབ་སྙིང་ཞུན་བཞུགས་སོ༔ རྦོད་གཏོང་མ་མོའི་ཚོགས་ལ་འདུད༔ མ་མོ་སྒྲུབ་པའི་གསང་བའི་སྙིང་ཞུན་གྱི་རིམ་པ་ནི༔ བསྙེན་ཅིང་བསྒྲུབ་པའི་རྟགས་འགོར་ན༔ ལྕམ་སྲིང་སྤེལ་མའི་བཟླས་པ་ནི༔ བྷྱོ་མ་རེ་ར་མ་ཡ་ཏི་ཛ་ཧཱུྃ་བྷྱོ་ཕཊ༔ བསད་པ་ལ་ནི་རྟགས་མེད་ན༔ སྔགས་རྣམས་བཟློག་ཞིང་དཀྲུག་པ་ནི༔ ཧཱུྃ་ཕཊ་བྷྱོ་ཡ་ཛ་ཏི་མ་ར་རེ་མ་བྷྱོ༔ ཧཱུྃ་ཕཊ་བྷྱོ་མ་༡༢་མ་བྷྱོ༔ འཆོལ་པར་བཀྲུག་ལ་ངེས་པ་མེད༔ ཕོ་རྒྱུད་རྒྱལ་པོས་རྟགས་མང་ན༔ གཤིན་རྗེ་ཆེན་པོའི་རྟགས་མང་ན༔ ཡ་མ་རཱ་ཛཿབདུད་ཚོགས་རྣམས་ཀྱི་རྟགས་མང་ན༔ ཛ་མ་མཱ་ཡ་ཧཱུྃ༔ བྷྱོ་མཱ་ར་ཡ་དགྲ་བོ་ཆེ་གེ་ཕཊ༔ བྷྱོ་ཡ་མ་ར་ཛ་ཆེ་གེ་མ་ར་ཕཊ༔ བྷྱོ་ཛ་མཱ་ར་ཡ་ཆཻ་ཕཊ༔ ཆེས་བསད་པའི་ལས་ལ་ཕྱི་སྒྲུབ་བོ༔ ཡི་གེ་བཞི་པོ་འཁོར་ལོའི་དབུས་སུ་སྟོན༔ ཁྲག་འཐུང་རྩ་ལ་སྲོག་དང་སྲོག་སྙིང་དང་༔ ཡི་གེ་མའི་ངོ་བོར་བསྒྲུབ་པར་བྱ༔ དང་མ་ལྔའི་ངོ་བོ་ཅན༔ འབྲུ་ལྔའི་འོག་ཏུ་རང་མིང་ནི༔ རེ་མ་ཏི་ཞེས་བཟླ་བ་ཡིན༔ དེའི་སྲོག་དབང་ངེས་པར་འདྲེན༔ གང་མིང་དེར་བཞག་སྲོག་དབང་ནི༔ ཟླ་བ་ཕྱེད་ཀྱིས་འདྲེན་པར་འགྱུར༔ ས་མ་ཡཱ༔ རྒྱ་རྒྱ་རྒྱ༔ བྷྱོ་གཙོ་མོ༔ བ་ལམ་དྲེའུ་སྣ་མ༔ མ་རྟགས་སྨན་གཟེར་འདེབ་མ༔ ཏྲི་ཁྲི་སྨན་ལྡེན་དྲུག༔ ཡང་མ་འོག་མ་ལ་མ༔ མ་མོ་རྡོ་རྗེ་སི༔ ར་ར་ཙ་ཡ་ཡ་མ༔ ཛ་བདུད༔ ཧཱུྃ་འབོད་པ༔ བྷྱོ་རྦད་པ༔ ཕཊ་བསད་པ༔ འབོད་པ་ཧཱུྃ་དང་བྷྱོ༔ ཁ་སྦྱོར་ལ་སྤོ༔ རྦད་པ་ལ་ཧཱུྃ་དང་བྷྱོ༔ ཁ་སྦྱོར་ལ་སྤོ༔ མ་མོའི་ཐུར་མ་མིག་བྷྱོ༔ བསད་པ་ཪྣྲྀ་མིག་ཕཊ༔ ཤི་ས་བྷྱོ་མིག་ཕཊ༔ ས་མ་ཡཱ༔ རྒྱ་རྒྱ་རྒྱ༔ ཕྱི་འབྲུ་བཅུ་དྲུག་བཅུག་པ་ནས༔ ནང་སྣག་ལ་གསང་བ་འབྲུ་བཞིའོ། །བསྙེན་པ་བྷྱོ་ནས་ཧཱུྃ་ལ་གཏུག༔ སྒྲུབ་པ་མ་ནས་བྷྱོ་ལ་གཏུག༔ བསད་པ་མ་ནས་ཕཊ་ལ་གཏུག༔ བསྙེན་སྒྲུབ་ལས་ཀྱི་མཐའ་སྦྱོར་སྔགས༔ ཧཱུྃ་བྷྱོ་ཕཊ་གསུམ་བཞུག་པར་བྱ༔ རྟགས་མགོར་བྷྱོ་མགོར་རང་མིང་འབྲུ་གསུམ་གཞུག༔ སྒྲུབ་དང་བསད་པ་དག་ལ་ནི༔ མའི་ཀླད་དུ་དགྲ་ལིང་བཙུག༔ ས་མ་ཡཱ༔ རྒྱ་རྒྱ་རྒྱ༔ རྟགས་དང་ཆོ་འཕྲུལ་འགྱང་འགྱུར་ན༔ མིང་སྲིང་སྦག་དམར་བསྒྲུབ་པ་ནི༔ ཕོ་མོའི་བསྙེན་པ་སྟོང་ཕྲག་གི༔ འབུམ་ཚོ་རེ་རེ་བཟླས་པར་བྱ༔ ཕོ་སྙན་གཡས་སུ་འཁོར་བ་ནི༔ ཛ་མཱ་ར་ཡ་ཧཱུྃ༔ སྒྲུབ་པ་བྷྱོ༔ བསད་པ་ཕཊ༔ ར་དང་ཡ་ནི་གང་དང་འདྲ༔ ཕོ་ཡི་སྔགས་ནི་ཤིན་དུ་རྩུབ༔ འབྲུ་གཞི་མགོ་བོར་གང་ཕྱིན་པ༔ འཁོར་ལོའི་ནི་དབུས་སུ་འོང་༔ ས་མ་ཡཱ༔ རྒྱ་རྒྱ་རྒྱ༔ བསྙེན་པ་བཅུ་ནི༔ མ་བྷྱོ་མ་མ་རུ་ལུ་ཏྲག་རག་ཤ་བཛྲ་ཧཱུྃ༔ སྒྲུབ་པ་བཅོ་ལྔའི། མ་བྷྱོ་མ་མ་རུ་ལུ་ཏྲག་རག་ཤ་བཛྲ་ཧཱུྃ་སརྦ་སིདྡྷི་བཛྲ་ཧཱུྃ༔ བསད་པ་བཅུ་གཉིས་ནི༔ མ་བྷྱོ་མ་མ་རུ་ལུ་ཏྲག་རག་ཤ་དགྲ་བོ་ཪྣྲི་ཧཱུྃ་བྷྱོ་བཛྲ་ཕཊ༔ སྦྲག་སྒྲུབ་འབོད་པ་བཅོ་བརྒྱད་པ༔ མ་བྷྱོ་མ་མ་རུ་ལུ་ཏྲག་རག་ཤ་བྷྱོ་རེ་མ་ཏི་མཱ་ར་ཡ་ཛ་བཛྲ་ཧཱུྃ༔ སྒྲུབ་པ་ཉེར་བཞི་པ་ནི༔ མ་བྷྱོ་མ་མ་རུ་ལུ་ཏྲག་རག་ཤ་བྷྱོ་རེ་མ་ཏི་མཱ་ར་ཡ་ཛ་བཛྲ་ཧཱུྃ་སརྦ་སིདྡྷི་བཛྲ་ཧཱུྃ༔ བསད་པ་ཉེར་གསུམ་ནི༔ མ་བྷྱོ་མ་མ་རུ་ལུ་ཏྲག་རག་ཤ་བྷྱོ་རེ་མ་ཏི་དགྲ་བོ་སརྦ་ཤ་ཏྲུམ་མཱ་ར་ཡ་ཛ་ཧཱུྃ་བྷྱོ་བཛྲ་ཕཊ༔ སྦྱིན་སྲེག་ཉེར་དྲུག་པ་ནི༔ མ་བྷྱོ་མ་མ་རུ་ལུ་ཏྲག་རག་ཤ་བྷྱོ་རེ་མ་ཏི་མཱ་ར་ཡ་དགྲ་བོ་སརྦ་ཤ་ཏྲུམ་མཱ་ར་ཡ་ཛ་ཧཱུྃ་བྷྱོ་བཛྲ་ཕཊ༔ བསད་པ་སོ་དགུ་པ་ནི༔ མ་བྷྱོ་མ་མ་རུ་ལུ་ཏྲག་རག་ཤ་བྷྱོ་རེ་མ་ཏིཿམཱ་ར་ཡ་ཛ་མ་མ་ཏྲག་རག་ཤ་དགྲ་བོའི་སྙིང་ཁ་རག་ཙིཏྟ་སྲོག་དུང་དུང་ཛ་ཛ་ཧཱུྃ་བྷྱོ་བཛྲ་ཕཊ༔ ས་མ་ཡཱ༔ རྒྱ་རྒྱ་རྒྱ༔ ཨེ་མ་གསང་བའི་མན་ངག་དམ་པ་ནི༔ ཕྱི་རབས་བུ་ཡིས་གཅེས་པར་སྙིང་ལ་ཆོངས། སྣོད་མེད་ལོག་སྲེད་འགྲོ་ལ་གནོད་བྱེད་ལ༔ རླུང་ཕྱོགས་ཙམ་དུ་ཟགས་སུ་མ་འཇུག་རྒྱ༔ སངས་རྒྱས་བསྟན་ལ་སེམས་བསྐྱེད་ལྡན་པའི་བུ༔ སྒྲུབ་པ་ཉམས་ལེན་སེམས་ཅན་བདེར་འགོད་པའི༔ སྣོད་ལྡན་རྣམས་ལ་གསང་བ་སྙན་དུ་ཀྱུག༔ ཤིན་ཏུ་ཟབ་པོ་མཁའ་འགྲོའི་བཀའ་རྒྱ་ཡོད༔ མན་ངག་སྙིང་ཞུན་འདི་ལྟར་སུ་ལྡན་པ༔ འཁོར་ལོས་བསྒྱུར་བའི་རྒྱལ་པོ་དང་མཚུངས་ཤིང་༔ འདི་ལྟར་མི་ལྡན་བསྙེན་བསྒྲུབ་བརྩམ་པའི་མི༔ སྤྲང་པོས་རྒྱལ་སྲིད་ཁ་ལོ་བསྒྱུར་དང་འདྲ༔ པདྨའི་གདམ་པ་ཡང་ཟབ་མན་ངག་རྒྱ༔ ས་མ་ཡཱ༔ རྒྱ་རྒྱ་རྒྱ༔ བདག་ཁམས་པ་ཉི་མ་གྲགས་པས་གནས་མཆོག་ཧ་ཙོ་ནས་གདན་དྲངས་པའོ། །མངྒ་ལཾ་དགེ་འོ། །

སྒྲུབ་པའི་མཚན་རྟགས་ཀྱི་རིམ་པ།

སྔགས་བདག་འབར་མའི་ཐུགས་ཐིག་ལས༔ སྒྲུབ་པའི་མཚན་རྟགས་ཀྱི་རིམ་པ་བཞུགས༔ རྦོད་གཏོང་མ་མོའི་ཚོགས་ལ་འདུད༔ དཔལ་གྱི་རྒྱལ་མོ་སྒྲུབ་པའི་ཚེ༔ མཁའ་འགྲོའི་མཚན་རྟགས་རིམ་པ་ནི༔ ནག་མོ་ཁྲོས་ཚུལ་བསྟན་ན་དྲག་པོའི་འཕྲིན་ལས་འགྲུབ༔ དམར་མོ་བྱུང་ན་དབང་གི་འཕྲིན་ལས་འགྲུབ༔ དཀར་མོ་བྱུང་ན་ཞི་བའི་དངོས་གྲུབ་སྟེར༔ སེར་མོ་བྱུང་ན་ཚེ་ཡི་དངོས་གྲུབ་སྟེར༔ རྒྱང་གླུ་ལེན་ན་བསྒྲུབ་པ་འགྱང་བའི་རྟགས༔ ཁ་ལ་འོ་བྱེད་སྤྱོད་པར་འདོད་པའི་རྟགས༔ ཕྲེང་བ་འདྲེན་ན་སྦྱིན་སྲེག་འདོད་པའི་རྟགས༔ མིག་ལོག་བྱེད་ན་དམ་ཚིག་མི་གཙང་རྟགས༔ ཁྲོས་པ་བྱུང་ན་བར་ཆད་སེལ་ཐབས་འབུང་༔ ཐལ་མོ་བརྡེབ་ན་དམ་རྫས་མ་ཚང་རྟགས༔ གླིང་བུ་འབུད་པ་མཐོང་ན་གཏོར་མ་འབུལ༔ ལྕེ་ནར་མཐོང་ན་སྙིང་པོ་མ་དག་རྟགས༔ བུ་མོ་མང་པོས་བྲོ་བརྡུང་བཀྲ་ཤིས་རྟགས༔ ཁ་ཟས་དཀར་མཚན་བྱུང་ན་ཚེ་འཕེལ་འགྱུར༔ སྨན་དྲི་འཐུལ་བ་དངོས་གྲུབ་འཐོབ་པའི་རྟགས༔ ཤ་ཁྲག་འབྱུང་ན་ལས་སྦྱོར་འགྲུབ་པའི་རྟགས༔ བཙོས་པ་བྱུང་ན་འཕྲིན་ལས་ཤིན་ཏུ་མྱུར༔ གློ་སྙིང་སྐམ་པོ་བྱུང་ན་ཚེ་ཆད་རྟགས༔ ཤ་ཆང་གཉིས་ནི་ཤིན་ཏུ་བཟང་བར་འགྱུར༔ ཉུང་མ་སྐམ་རློན་བྱུང་ན་ནང་ནོར་འཕེལ༔ ཞིང་རྨོ་ལུད་འགྱེད་སྒྲུབ་པ་ལམ་འགྲོའི་རྟགས༔ ཀུ་མུ་ག་བུར་གུར་གུམ་དྲི་འཐུལ་བ༔ རྗེ་མོའི་ཚུལ་གྱིས་མཁའ་འགྲོ་འགྲུབ་པའི་རྟགས༔ ཤ་བོང་རྨིས་ན་མཛའ་མོའི་ཚུལ་དུ་སྟེ༔ དྲེའུ་བྱ་རོག་ཁོལ་མོའི་རྣམ་པའོ༔ མཚན་མ་སྟོན་ན་བསྐང་བཤགས་འབད་པར་རིགས༔ བོང་བུའམ་རལ་གྲི་མང་བྱུང་བཞུད་པའི་རྟགས༔ འབྲུག་དང་གློག་དམར་ཐོག་སྒྲ་འོང་བ་དང་༔ སྤྲ་སྤྲེ་འདུ་ཚོགས་ཚྭ་ཚྭ་འཁྱུགས་པ་སོགས༔ ལྷ་མོ་དྲག་པོའི་ཚུལ་གྱིས་སྒྲུབ་པའི་རྟགས༔ གདོན་གཟུགས་ཡུགས་ས་མཛེ་སྤྲང་བྱི་ལ་རྣམས༔ དམ་ཚིག་ཉམས་དང་གྲིབ་ཕོག་དམ་རྫས་འཁྱལ༔ བྱ་ནག་ཟངས་མཆུ་ཁྱི་ནག་འདུ་ཚོགས་ནི༔ མ་མོ་མཁའ་འགྲོ་ངེས་པར་འདུས་པའི་རྟགས༔ འཛའ་མོ་ཆུང་མའི་ཚུལ་དང་ཕྱག་རྒྱ་བྱེད༔ དངོས་གྲུབ་སྟེར་དང་བཀྲ་ཤིས་དར་རྒྱས་རྟགས༔ མ་དང་སྲིང་མོའི་ཚུལ་ནི་སྙིང་ཉེ་མྱུར༔ བློ་མི་བདེ་ཞིང་ཉམས་འཐིབ་ཤེས་པ་བྱིང་༔ སྒྲུབ་རྫས་བག་རྡུལ་ཆགས་དང་སྣོད་སྟོང་ཐོགས༔ མི་ཁའི་རྫས་ངན་ཟོས་དང་ལག་ཏུ་ཁྱེར༔ བར་ཆད་རྟགས་ཡིན་སྒབ་འདྲེ་གནོན་པར་བྱ༔ སློབ་དཔོན་གྲོགས་པོར་བརྫུ་ན་འགོང་པོ་ཡིན༔ སྦལ་སྦྲུལ་ཁྱི་ནག་བྱུང་ན་གཤིན་རྗེའི་རྟགས༔ མི་ནག་རྟ་ནག་བདུད་ཀྱི་རྟགས་སུའོ༔ གཅན་གཟན་མང་པོ་བྱུང་ན་མ་མོ་འབུམ་སྡེའི་རྟགས༔ བུ་མོ་བཟང་མོས་ཟས་སྟེར་ཤིན་ཏུ་ལེགས༔ དབང་བསྐུར་ཆོས་འཆད་དབང་འདུས་ཟིལ་ནོན་རྟགས༔ དེ་ཡི་ཕྱིར་ན་ཕྱི་རབས་སྒྲུབ་པ་པོས༔ མ་མོ་བསྒྲུབ་མཁས་དམ་ཚིག་བརྟག་མཁས་བྱ༔ ས་མ་ཡཱ༔ རྒྱ་རྒྱ་རྒྱ༔ གཏེར་རྒྱ༔ སྦས་རྒྱ༔ ཟབ་རྒྱ༔ གཏད་རྒྱ༔ ས་མ་ཡཱ༔ རྒྱ་རྒྱ་རྒྱ༔ རིག་འཛིན་ཉི་མ་གྲགས་པས་གནས་མཆོག་ཆེན་པོ་ཧ་ཙོ་ནས་གདན་དྲངས་པའོ། །མངྒ་ལཾ།། །།

ཐུན་སྐབས་གཏོར་མ་འབུལ་ཐབས།

སྔགས་བདག་འབར་མའི་ཐུགས་ཐིག་ལས༔ ཐུན་སྐབས་གཏོར་མ་འབུལ་ཐབས་བཞུགས༔ རྦོད་གཏོང་མ་མོའི་ལྷ་ལ་འདུད༔ དཔལ་ལྡན་ལྷ་མོ་ནག་མོ་ལ༔ བསྙེན་སྒྲུབ་ལས་སྦྱོར་བརྩམ་པའི་ཚེ༔ ཐུན་སྐབས་གཏོར་མ་འབུལ་བ་ནི༔ གཏོར་སྣོད་བྷནྡྷ་ཡངས་པའི་ནང་༔ ནལ་བུའི་ཤའམ་ཤ་ཁྲག་གི༔ གཏོར་མ་བཤམས་ནས་ཡི་དམ་གསལ༔ མེ་རླུང་སྦྱོར་བས་བྱིན་གྱིས་བརླབ༔ ཡང་ན་དགྲ་བགེགས་གཏོར་མར་བསྟིམ༔ ནུས་པས་བསྒྲལ་བའི་ཤ་ཁྲག་རུས༔ དཔལ་ལྡན་ལྷ་མོ་འཁོར་བཅས་ཀྱིས༔ ཧབ་ཧབ་གསོལ་ཞིང་ཁྲུམ་ཁྲུམ་མུར༔ ཀྲོག་ཀྲོག་འཐུང་ཞིང་ཅིབ་ཅིབ་བལྡགས༔ ལྷག་མ་མེད་པར་རོལ་བར་བསམས༔ རྩ་བའི་སྔགས་ལ་འདི་བཏགས་འབུལ༔ མ་མ་དྷེ་ཝི་ཀཱ་ལི་རེ་མ་ཏཱི་ཨི་དམ་བྷ་ལིངྟ་ཁཱ་ཧི་ཁཱ་ཧི༔ པཱུ་ཙ་པི་པ་ཏོ་ཧི་ས་མ་ཡ་ཨི་དམ་བྷ་ལིངྟ་ཁཱ་ཧི་ཁཱ་ཧི༔ བདུན་ནམ་ཉེར་གཅིག་དག་གིས་འབུལ༔ ནལ་བུའི་ཤའམ་ཤ་ཆེན་གྱི༔ དུད་པ་བཏང་ཞིང་གླིང་བུ་འབུད༔ ཐོད་པ་ལྟག་སྤྲོད་རྔ་བརྡུང་ཞིང་༔ ལས་གཞུང་ལྟ་བུར་སྤྱན་དྲངས་མཆོད༔ བསྟོད་པ་ལ་སོགས་རྒྱས་པར་བྱ༔ དམོད་བཅོལ་བཞེས་གདབ་གཡབ་མོ་ཐོགས༔ གཏོར་མ་དགྲ་བོའི་ཡུལ་དུ་འཕང་༔ ཐལ་མོ་བརྡབ་ཅིང་དྲག་ཏུ་བསྐུལ༔ རབ་ནི་དུས་དྲུག་འབྲིང་ནི་བཞི༔ ཐ་ནའང་ནམ་དགུང་ཉིན་དགུང་བྱ༔ ས་མ་ཡཱ༔ རྒྱ་རྒྱ་རྒྱ༔ འདི་ལྟར་བརྩམས་པས་ལྷ་མོ་འཁོར༔ ལས་བསྒྲུབ་སྟོངས་གྲོགས་རྩ་བ་སྟེ༔ ཚུལ་བཞིན་སྤྱོད་ཅིག་སྐལ་ལྡན་རྣམས༔ ས་མ་ཡཱ༔ རྒྱ་རྒྱ་རྒྱ༔ ཟབ་རྒྱ༔ གཏད་རྒྱ༔ དམ་རྒྱ༔ ས་མ་ཡཱ༔ རྒྱ་རྒྱ་རྒྱ༔ རིག་འཛིན་ཉི་མ་གྲགས་པས་ཤིང་ཕོ་བྱི་བའི་ལོ་ལ་རྒྱ་གར་རྩྭ་མཆོག་གྲོང་ནས་གདན་དྲངས་ཤིང་ཤོག་སེར་ལས་བོད་ཡིག་ཏུ་བསྒྱུར་བའོ། །མངྒ་ལཾ།། །།

དངོས་གྲུབ་ལེན་ཐབས་བདུད་རྩིའི་རྒྱ་མཚོ།

སྔགས་བདག་འབར་མའི་ཐུགས་ཐིག་ལས༔ དངོས་གྲུབ་ལེན་ཐབས་བདུད་རྩིའི་རྒྱ་མཚོ་བཞུགས༔ རྦོད་གཏོང་མ་མོའི་ལྷ་ལ་འདུད༔ དཔལ་ལྡན་ལྷ་མོ་བརྟེན་པའི་ཚེ༔ ཆགས་པ་གཡོ་དང་གསང་གནས་ནས༔ ཁྲག་དང་བྱང་སེམས་འབབ་པ་དང་༔ ཚ་ཙག་འཁྱུག་ཅིང་ན་བ་སོགས༔ བྱུང་ན་གདམས་པ་འདི་ལྟར་འབད༔ ས་མ་ཡཱ༔ རྒྱ་རྒྱ་རྒྱ༔ མཚན་དང་ལྡན་པའི་ཐོད་པ་རུ༔ མཚལ་གྱིས་ཡི་གེ་མ་བྷྱོ་བྲི༔ སྔགས་ཕྲེང་ཕྱི་ནང་རིམ་པ་ནི༔ སྙིང་ཞུན་ནང་ལྟར་བྲི་བར་བྱ༔ རང་གི་རྩ་ལས་འཐོན་པའི་ཁྲག༔ བྱང་སེམས་དཀར་དམར་ཨ་མྲྀ་ཏ༔ མཚལ་དང་སི་ལ་སིནྡྷུར༔ ཕྱེེ་མར་འཐག་ནས་ཐོད་པར་བྱུག༔ ཆང་གི་ཉིང་ཁུས་ཁུ་བ་བྱ༔ རླན་གྱིས་མི་འཇིགས་རྩི་ཡིས་སྦྱར༔ མདུན་དུ་སྨན་གཏོར་རཀྟ་དང་༔ ཐོད་པ་བདུད་རྩིས་བཀང་བ་བཤམས༔ རང་ཉིད་ཡི་དམ་ལྷ་རུ་གསལ༔ ཐོད་པའི་ནང་དུ་ལྷ་མོ་བསྒོམ༔ ཡེ་ཤེས་སེམས་དཔའ་སྤྱན་དྲངས་བསྟིམ༔ རྩ་སྔགས་བརྒྱ་སྟོང་བཟླས་པའི་རྗེས༔ འབོད་པའི་ཏིང་འཛིན་གནད་དུ་བསྣུན༔ མཆོད་བསྟོད་གཞུང་ལྟར་རྒྱས་པར་བྱ༔ ལྷ་མོ་མཉེས་ནས་ཆང་ལ་ཐིམ༔ བདུད་རྩིའི་རྒྱ་མཚོར་འཁྱིལ་བར་བསྒོམ༔ སྲིན་ལག་གཡོན་པས་བདུད་རྩི་བསྲུབ༔ མ་གཅིག་དཔལ་གྱི་ལྷ་མོ་དང་༔ རང་ཉིད་ཡི་དམ་ཧེ་རུ་ཀ༔ དམ་ཚིག་གཅིག་ཏུ་འདྲེས་པར་བསམས༔ ཆང་ལ་རོལ་ཞིང་ཧབ་ཀྱིས་བཏུང་༔ ས་མ་ཡཱ༔ རྒྱ་རྒྱ་རྒྱ༔ འདི་ལྟར་བརྩམས་པས་སྔགས་སྲུང་མ༔ དམ་ཚིག་གཅིག་ནས་རྒྱུན་དུ་འགྲོག༔ མི་འབྲལ་སྡོངས་གྲོགས་དངོས་གྲུབ་སྟེར༔ ཇི་བརྩམས་ལས་རྣམས་ཐོགས་མེད་འགྲུབ༔ ནུས་མཐུ་ཐོགས་མེད་མེ་ལྟར་འབར༔ དེ་ཕྱིར་ཉམས་སུ་ལོངས་ཤིག་རྒྱ༔ ས་མ་ཡཱ༔ རྒྱ་རྒྱ་རྒྱ༔ ཤིན་ཏུ་གསང་བ་དངོས་གྲུབ་ཆེ༔ ཨི་དན་ཏེ་ན་ར་ཀན་རྒྱ༔ དམ་རྒྱ༔ ས་མ་ཡཱ༔ རྒྱ་རྒྱ་རྒྱ༔ རིག་འཛིན་ཉི་མ་གྲགས་པས་རྒྱ་གར་རྩྭ་མཆོག་གྲོང་ནས་སྤྱན་དྲངས་ཤིང་ཤིང་ཕོ་བྱི་བའི་ལོ་ཧོར་ཟླ་བཞི་པའི་ཡར་ཚེས་བཅོ་ལྔ་ལ་བོད་ཡིག་ཏུ་བསྒྱུར་བ་མངྒ་ལཾ། །ནཾཿསྔགས་བདག་འབར་མའི་ཐུགས་ཐིག་ལས༔ ཤི་ས་བསྟན་པ་བཀའི་ཐ་རམ་བཞུགས་སོ༔ རྦོད་གཏོང་མ་མོའི་ལྷ་ལ་འདུད༔ བསྟན་པ་བསྲུང་བའི་རྣལ་འབྱོར་པས༔ བསྟན་འགྲོའི་དོན་དུ་སེམས་བསྐྱེད་ནས༔ བསྙེན་བསྒྲུབ་ལས་སྦྱོར་བརྩམ་པའི་ཚེ༔ མ་མོ་འཁུ་ཞིང་བཟློག་པ་དང་། ཡུན་དུ་འགོར་ཞིང་རྟགས་མེད་ན༔ མ་མོ་ལས་ལ་བཙུད་པའི་ཐབས༔ ཤི་ས་བསྟན་ཐབས་འདི་ལྟར་འབད༔ ས་མ་ཡཱ༔ རྒྱ་རྒྱ་རྒྱ༔ ཆོས་དབྱིངས་ངང་ལས་མ་གཡོས་ཀྱང་༔ རང་ཉིད་ཡི་དམ་ཧེ་རུ་ཀ༔ གར་དགུའི་ཉམས་དང་ལྡན་པར་བསམ༔ མདུན་དུ་ལྷ་མོ་བསྒོམ་པར་བྱཿསྙིང་དཀྱིལ་བྷྱོ་ཡིག་སྲོག་སྙིང་གི༔ བུག་པར་ཕཊ་ནི་དམར་ནག་བསམ༔ སྔགས་ཕྲེང་རྣམས་ཀྱིས་རིམ་བཞིན་བསྐོར༔ བདག་གི་ཐུགས་ཀའི་ས་བོན་ལས༔ འོད་འཕྲོས་སྔགས་ཀྱི་ཕྲེང་བ་བརྒྱུད༔ བྷྱོ་ཡིག་བུག་ཀའི་ཕཊ་ལ་ཕོག༔ ཕཊ་ལས་མེ་རླུང་མཚོན་ཆའི་ཚོགས༔ མགར་གྱི་ཚྭ་ཚྭ་ལྟ་བུར་ཁོལཿསྲོག་ཡིག་བྷྱོ་དེ་བཅད་ཅིང་གཏོར༔ ལྷ་མོ་ལུས་འདར་སེམས་ཡིང་ཅིང་ཿ ཅི་བགྱིད་བཀའ་ཉན་གུས་པར་བསམ༔ བྷྱོ་མ་རེ་མ་ར་ཡ་ཏི་ཛ་ཧཱུྃ་བྷྱོ་ཕཊ༔ ཅེས་བཟླས་དམིགས་པ་གནད་དུ་བསྣུན༔ མ་མོ་འཆུན་ཞིང་ལས་ལ་ཁོལ༔ རྟགས་གསལ་མཆོད་བསྟོད་བསྐང་བ་འདོན༔ འདི་ནི་ཤི་ས་བསྟན་པ་ཏེ༔ ཤིན་ཏུ་འགོར་ཞིང་ལས་འགྱང་ནས༔ མི་བྱ་ཀ་མེད་མ་རྟོགས་པ༔ ནམ་ཡིན་དུས་ཡིན་བྱར་མི་ཆོག༔ ཅི་ཕྱིར་ལྷ་མོ་ཆེན་མོ་འདི༔ བཀའ་ཉན་དམ་ཆེ་ཡེ་ཤེས་དང་༔ འཇིག་རྟེན་ཡོངས་ཀྱི་བདག་མོ་སྟེ༔ རང་ལ་ངན་ཞིང་ཚུར་ངན་ཡོང་༔ དེས་ན་གདམ་པ་སྤྱད་མཁས་བྱ༔ ས་མ་ཡཱ༔ རྒྱ་རྒྱ་རྒྱ༔ ལྷ་མོ་སྒྲུབ་དང་འབོད་རྦད་བསད༔ ལས་སྦྱོར་ཕྲིན་ལས་གང་བརྩམས་ཀྱང་༔ གྲངས་བསྙེན་འབུམ་ཚོ་རེ་རེ་སྟེེ༔ དུས་ནི་ཟླ་བའི་ཉེར་གཅིག་གོ༔ རྟགས་ནི་རྣལ་འབྱོར་བསྐྱེད་རྫོགས་དང་ཿ ཁྱད་པར་བརྩོན་འགྲུས་ཚད་ཀྱིས་བྱེད༔ ས་མ་ཡཱ༔ རྒྱ་རྒྱ་རྒྱ༔ མདུན་གྱི་ལིང་ཀ་དམིགས་པ་ལྟར༔ ཉམས་པའི་དགྲ་བོ་ལས་ངན་དེ༔ ཡུལ་ཕྱོགས་རི་ཁྱིམ་གར་ཡོད་ཀྱང་༔ སྙིང་དཀྱིལ་སྔགས་དང་སྲོག་ཡིག་ཕཊ༔ འཆི་བདག་བདུན་གྱིས་བསད་བཅད་གཏོར༔ ཤ་ཟོས་ཁྲག་འཐུང་རྡུལ་དུ་བརླག༔ གནད་དུ་བསྣུན་པ་གབ་ཏིག་ཡིན༔ ཤེས་རབ་ལྡན་པས་འཁྲོལ་ཤེས་བྱ༔ ས་མ་ཡཱ༔ རྒྱ་རྒྱ་རྒྱ༔ གཏེར་རྒྱ༔ སྦས་རྒྱ༔ ཟབ་རྒྱ༔ བཀའ་རྒྱ༔ གསང་རྒྱ༔ དམ་རྒྱ༔ ས་མ་ཡཱ༔ རྒྱ་རྒྱ་རྒྱ༔ བདག་ཁམས་པ་ཉི་མ་གྲགས་པས་ཤིང་ཕོ་བྱི་བའི་ལོ་ལ་རྒྱ་གར་རྩྭ་མཆོག་གྲོང་ནས་གདན་དྲངས་ཤིང་སྦས་ལུང་སྐྱིད་མོ་གཤོང་གི་གཙང་དྲོང་དགོན་པར་ཤོག་སེར་ལས་ཞལ་བཤུས་པའོ། །མངྒ་ལཾ།། །།

རྟེན་གཏོར་བླ་རྡོའི་ཤོག་དྲིལ།

སྔགས་བདག་འབར་མའི་ཐུགས་ཐིག་ལས༔ རྟེན་གཏོར་བླ་རྡོའི་ཤོག་དྲིལ་བཞུགས༔ རྦོད་གཏོང་མ་མོའི་ཚོགས་ལ་འདུད༔ མི་དབང་ལྤགས་པ་ཡང་ན་ནི༔ དུར་ཁྲོད་རོ་རས་དར་ནག་སོགས༔ གང་ཡིན་ངོས་ལ་ལྷ་མོ་བྲི༔ ལྟེ་བ་གྲུ་གསུམ་བྷྱོ་ཡིག་ལ༔ ཧེ་རུ་ཀཿཡི་སྙིང་པོ་དང་༔ རྩ་བའི་བསྙེན་པས་བསྐོར་བ་བྲི༔ དེ་ཡི་ཕྱི་རིམ་མུ་ཁྱུད་ལ༔ འབོད་པའི་བསྙེན་པ་ཅི་མང་གདབ༔ དེའི་ཕྱི་རིམ་རྩིབས་བདུན་ལ༔ དྲེགས་པ་བདུན་གྱི་ས་བོན་བཀོད༔ རྩིབས་མཆན་རྣམས་ལ་བྷྱོ་རེ་བྲི༔ དེ་ཡི་ཕྱི་རིམ་མུ་ཁྱུད་ལ༔ འདོད་གསོལ་སྨོན་ལམ་ཅི་མང་བྲི༔ དེ་ཡི་ཕྱི་རིམ་ཨཱ་ལི་ཀཱ་ལི་དང་༔ རྟེན་འབྲེལ་སྙིང་པོ་འབྲི་བར་བྱ༔ དར་ཟབ་གསེར་དངུལ་ཟངས་ལྕགས་དང་༔ མུ་ཏིག་མུ་མེན་ཤེལ་དང་གཡུཿ གཟི་མཆོང་དུང་དང་སྤོས་ཤེལ་དང་༔ རྩ་བརྒྱད་སྟོང་སྦྱར་ཨ་མྲྀ་ཏ༔ འབྲུ་སྨན་དྲི་བཟང་སྣ་ཚོགས་བཏབ༔ བུ་ཚ་བཅུ་དྲུག་གཞོན་ནུའི་བཅུད༔ མཚལ་གྱི་ཤིང་ཏོག་གཙང་མ་བཏབ༔ དར་ཚོན་རྣམ་ལྔས་ལེགས་པར་དྲིལ༔ རབ་ཏུ་གནས་པར་ནན་ཏན་བསྐྱེད༔ མི་དབང་ཙིཏྟར་ཙཀྲ་སྦ༔ མི་དབང་ཐོད་པ་ཁ་སྦྱོར་རམ༔ མ་རྙེད་བཅུ་དྲུག་གཙང་ཐོད་དུ༔ འཁོར་ལོ་མུ་ཁྱུད་གསུམ་དུ་བསྐོར༔ དབུས་སུ་བྷྱོ་ལ་བསྙེན་པས་བསྐོར༔ དེ་ཡི་ཕྱི་རིམ་འདོད་གསོལ་བྲི༔ དེའི་ཕྱི་རིམ་རྩིབས་བདུན་ལ༔ དྲེགས་པ་བདུན་གྱི་ས་བོན་དང་༔ རྩིབས་མཆན་རྣམས་སུ་བྷྱོ་རེ་བྲི༔ མི་དབང་ཙིཏྟ་ནང་དུ་གཞུག༔ དར་གྱིས་དྲིལ་ཞིང་གཏོར་མའི་དཀྱིལ༔ གཟུངས་ཐག་བཏགས་ཏེ་སྦ་བར་བྱ༔ གཏོར་མའི་མདུན་ཕྱོགས་དཀར་པོར་བྱ༔ རྩེ་ལ་རྨ་བྱའི་སྒྲོ་མདོངས་བཙུགས༔ དྲེགས་པ་བདུན་གྱི་གཏོར་མས་བསྐོར༔ ཐ་མར་བཤོས་ཆུང་བཅུ་དྲུག་དང་༔ མཐེབ་སྐྱུ་ཤ་དུམ་དག་གིས་བསྐོར༔ མི་དབང་ཤ་ཡིས་བརྒྱན་པར་བྱ༔ གཏོར་མ་དེ་ཡི་མདུན་དུ་ནི༔ འབྲང་རྒྱས་དཀར་པོ་རྒྱན་ལྡན་བཞག༔ གཡས་སུ་སྙིང་གསུམ་བཟོས་ལ་བཞག༔ གཡོན་དུ་ནག་མོ་གྲིར་ཤིའི་སྙིང་༔ རྒྱབ་ཏུ་མཁར་ཐབས་བཤོས་བུ་ཉི་ཟླས་བརྒྱན༔ ཉི་མར་བསྙེན་པའི་སྔགས་རྣམས་བྲི༔ ཟླ་བར་མཚལ་གྱིས་གསང་མཚན་བྲི༔ སྟེང་ན་སེང་ལྡེང་ཕུར་བ་ལ༔ ཡི་དམ་སྔགས་བྲི་དར་རྒྱན་བཀོད༔ སྨྱུག་རྒོད་མགུལ་དུ་དར་སྣ་ལྔ༔ གཙང་མའི་ཤིང་ཏོག་དམར་པོ་ཡི༔ མེ་ལོང་ངོས་ལ་བསྙེན་སྔགས་འབྲི༔ སོར་གདུབ་དང་བཅས་སྨྱུག་ལ་གདགས༔ བ་ར་དཀར་མོའི་འོ་མ་ཡིས༔ བག་ཕྱེ་སྦྲུས་ལ་མི་དབང་གཟུགས༔ བཟོས་ཏེ་དར་གཏུམས་རྒྱལ་མཚན་འཛུགས༔ བསྒྲུབ་ཅིང་བསྙེན་ཏེ་བསྐྱེད་ཅིང་བསྟིམ༔ དཔལ་གྱི་ལྷ་མོ་དངོས་སུ་བསྒོམ༔ རྩ་བསྙེན་བརྒྱ་རྩ་ཆག་མེད་བཟླ༔ ཞི་བ་སྔགས་དམིགས་སྐུ་མདོག་དཀར༔ རྒྱས་པ་དབང་དང་དྲག་པོ་འདྲེས༔ སྔགས་ཐེམས་ཤམ་བུ་འདོད་པས་སྦྱར༔ བཟའ་བཏུང་ཁ་ཟས་ཕུད་ཀྱིས་མཆོད༔ ཉ་སྟོང་བརྒྱད་དང་ཉེར་ལྔ་ལ༔ གསོལ་མཆོད་བསྐང་བ་མངའ་གསོལ་འབུང་༔ ཚེ་ལ་དམིགས་ན་མདའ་དར་གཡབ༔ རྩ་སྔགས་ཤམ་བུ་འདོད་གསོལ་སྦྱར༔ ཚེ་ཡི་དངོས་གྲུབ་ཐོབ་པར་བསམས༔ དཀར་མོ་ཚེ་བུམ་མདའ་དར་ཅན༔ གར་སྟབས་པདྨ་ཉི་སྟེང་བསྒོམ༔ ནོར་ལ་དམིགས་ན་ཞི་བ་མཐིང་༔ ཕྱག་ན་ནོར་བུ་ནེའུ་ལེ་བསྣམས༔ ཕྱེད་སྐྱིལ་རྒྱན་དང་ལྡན་པར་བསྐྱེད༔ སྔགས་ལ་ཐེམ་བཅུག་བཟླ་བར་བྱ༔ ནོར་གྱི་དངོས་གྲུབ་སྩོལ་བར་ངེས༔ ས་མ་ཡཱ༔ རྒྱ་རྒྱ་རྒྱ༔ ཨེ་མ་སྙིང་པོའི་མན་ངག་འདི༔ སུ་ལའང་སྟོན་པར་མི་བྱ་ཞིང་༔ སྐལ་ལྡན་གཅིག་ལ་སྙན་དུ་སྐྱུག༔ འཆལ་ན་མཁའ་འགྲོའི་བཀའ་ཆད་འོང་༔ ཤིན་ཏུ་ཟབ་བོ་ཨྠིྀ་རྒྱ༔ ས་མ་ཡ༔ རྒྱ་རྒྱ་རྒྱ༔ ཟབ་རྒྱ༔ གཏད་རྒྱ༔ གཉན་རྒྱ༔ དམ་རྒྱ༔ གསང་རྒྱ༔ ས་མ་ཡཱ༔ རྒྱ་རྒྱ་རྒྱ༔ རིག་འཛིན་ཉི་མ་གྲགས་པས་གནས་མཆོག་ཆེན་པོ་འཕགས་ཡུལ་ཧ་ཙོ་ནས་ཤིང་ཕོ་བྱི་བའི་ལོ་ཧོར་ཟླ་དང་པོའི་ཚེས་བཅོ་བརྒྱད་ཀྱི་སྲོད་དྲག་པོའི་དུས་སུ་བྱང་སྒོའི་བསམ་སེའུ་ནས་འབར་ཞིང་འཁྲུག་པའི་ཉམས་མང་པོའི་ངང་ནས་གདན་དྲངས་ཏེ་བརྡ་ཡིག་ལས་བསྒྱུར་བའོ། །མངྒ་ལཾ།། །།

མ་མོ་དྲེགས་པའི་སྲོག་དབང་།

སྔགས་བདག་འབར་མའི་ཐུགས་ཐིག་ལས༔ མ་མོ་དྲེགས་པའི་སྲོག་དབང་བཀའ་རྒྱ་ཅན་བཞུགས༔ རྦོད་གཏོང་མ་མོའི་ཚོགས་ལ་འདུད༔ དུར་ཁྲོད་ལ་སོགས་དབེན་གནས་སུ༔ བསྙེན་སྒྲུབ་ཐེམས་པའི་སློབ་དཔོན་གྱིས༔ སྣོད་དང་ལྡན་པའི་སློབ་མ་ལ༔ ནམ་གྱི་སྲོད་ལ་བབས་པའི་ཚེ༔ དབང་གི་སྨིན་གྲོལ་སྩོལ་བར་བྱ༔ ས་མ་ཡཱ༔ རྒྱ་རྒྱ་རྒྱ༔ དུར་ཁྲོད་ས་རྡོའི་སྟེགས་བུའི་ཁར༔ གྲུ་གསུམ་མུ་ཁྱུད་ཐོད་རས་བསྐོར༔ ཕྱི་རིམ་ཁྲག་གི་རྒྱ་མཚོའི་རིས༔ དེ་ཕྱིར་རླུང་གི་རི་མོ་དང་༔ དེ་ཕྱིར་མེ་རིས་བསྐོར་བ་འབྲི༔ དབུས་སུ་བུམ་པར་ཁ་རྒྱན་སྤྲས༔ གཡས་གཡོན་སྨན་རག་དགོད་པར་བྱ༔ རྒྱབ་ཏུ་དབང་གཏོར་མདུན་དུ་མཆོད་གཏོར་བཤམས༔ གཞན་ཡང་དབང་གི་དགོས་རྫས་བསགས༔ ཐ་མར་མཆོད་ཚོགས་ཅི་འབྱོར་བཤམས༔ ལས་གཞུང་བསྲང་ཞིང་བསྙེན་ཁ་གསོ༔ ལས་བུམ་བསྒྲུབ་ཅིང་ཏིང་འཛིན་གྱིས༔ བདག་འཇུག་བླང་ཞིང་ལྷ་མོ་ལ༔ སློབ་བུ་འཇུག་པའི་གསོལ་བ་གདབ༔ གནང་བ་བྱིན་ནས་འོད་དུ་ཞུ༔ དབང་རྫས་རྣམས་ལ་ཐིམ་པར་བསྒོམ༔ ས་མ་ཡཱ༔ རྒྱ་རྒྱ་རྒྱ༔ སྣོད་ལྡན་སློབ་བུ་ལྔ་གསུམ་བདུན༔ གསེར་གཡུ་གོ་མཚོན་མཎྜལ་ཐོགས༔ མགྲིན་གཅིག་གསོལ་བ་འདི་ལྟར་གདབ༔ ཀྱེ༔ དགོངས་ཤིག་རྡོ་རྗེ་རྒྱལ་པོ་དགོངས༔ བདག་ཅག་འདིར་ཚོགས་བུ་རྣམས་ལ༔ མ་ཅིག་ལྷ་མོ་དཔལ་ཆེན་མོའི༔ དབང་དང་བྱིན་རླབས་སྩལ་དུ་གསོལ༔ གསུམ༔ དྲི་བ་ནི༔ ཧོ་ཁྱེད་རྣམས་དམ་ཚིག་ལ་གནས་ཤིང་༔ ལྷ་མོ་ཆེན་མོ་མཆོད་བསྟོད་བསྒྲུབ༔ བསྙེན་སྒྲུབ་ལས་སྦྱོར་རྩམ་ཕོད་དམ༔ དམ་ལ་གནས་ན་སྨིན་པར་བགྱིད༔ ཅེས་དྲིས་ལན་གསོལ་བ༔ ཀྱེ་དགོངས་ཤིག་དཔལ་ལྡན་ཧེ་རུ་ཀ༔ བདག་ནི་ཐེག་མཆོག་སྐལ་ལྡན་བུ༔ བཀའ་ལྟར་བསྒྲུབ་ཅིང་དམ་ལ་གནས༔ བདག་ལ་སྨིན་གྲོལ་དངོས་གྲུབ་སྩོལ༔ གསུམ༔ དེ་ནས་ལས་བུམ་གྱིས་བཀྲུས༔ བགེགས་མཚམས་བཅད༔ བསྲུང་བའི་འཁོར་ལོ་བསྒོམ༔ མཎྜལ་འབུལ་ཞིང་ཕྱག་བྱེད༔ དམ་ཆུ་བླུད་པ་ནི༔ ཧཱུྃ༔ གསང་བ་སྔགས་ཀྱི་དམ་ཚིག་དང་༔ ཁྱད་པར་ལྷ་མོ་ཆེན་མོ་ཡི༔ མཆོད་བསྟོད་ལས་སྦྱོར་དམ་ཚིག་བསྲུང་༔ ཉམས་ན་ན་རཀ་འབར་བར་བསྲེག༔ དེ་བས་གསང་བའི་དམ་ཆུ་འཐུང་༔ ཨཱོཾ་ཨཱཿཧཱུྃ་ས་མ་ཡ༔ སྐྱབས་སུ་འགྲོ་བ་ནི༔ ཧཱུྃ༔ བླ་མ་དཔལ་ཆེན་ཧེ་རུ་ཀ༔ རྩ་གསུམ་བརྒྱུད་ལྡན་དཀྱིལ་འཁོར་ལྷ༔ མ་རྒྱུད་མཁའ་འགྲོའི་ལྷ་ཚོགས་ལ༔ བསྐྱབ་ཏུ་གསོལ་ལོ་བྱིན་གྱིས་རློབས༔ བདག་ཅག་སེམས་ཅན་བདེ་ལྡན་དོན༔ བྱང་ཆུབ་སེམས་བསྐྱེད་ལྷ་མོ་བསྒྲུབ༔ བདག་ཅག་ཡང་དག་བསྐྱབ་ཏུ་གསོལ༔ དེ་ནས་བསྐྱེད་རིམ་གཏད་སྤོས་གསུར་བདུག༔ རོལ་མོ་འཁྲོལ་བྱིན་དབབ་བརྟན་པར་བྱ༔ ཏིཥྛ་བཛྲ་ཡེ་སྭཱ་ཧཱ༔ ཅེས་བརྗོད་མེ་ཏོག་འཐོར་རོ༔ དེ་ནས་དབང་དོན་འདིའི་རྗེས་བཟློས་སྨྲོས༔ ཧཱུྃ༔ བླ་མ་ཡང་དག་དཔལ་ཆེན་པོས༔ མཁའ་འགྲོ་དྲེགས་པའི་སྡེ་ཚོགས་ཀྱི༔ སྲོག་དབང་བདག་ལ་སྩལ་དུ་གསོལ༔ ལན་གསུམ་བྱ༔ བུམ་པ་ཐོགས་ཏེ་སྤྱི་བོར་བསྐུར༔ ཧཱུྃ༔ རིན་ཆེན་སྣ་ཚོགས་བུམ་པའི་གཞལ་ཡས་ན༔ མ་རྒྱུད་གཙོ་མོ་དཔལ་གྱི་ལྷ་མོ་བཞུགས༔ སྐལ་ལྡན་བུ་ལ་དབང་མཆོག་འདི་སྦྱིན་པས༔ སྔགས་སྲུང་མཁའ་འགྲོའི་སྐུ་ཡི་དབང་ཐོབ་ཤོག༔ ཨཱོཾ་བཛྲ་མ་ཧཱ་ཀཱ་ལི་རེ་མ་ཏི་ཀཱ་ཡ་ཨ་བྷི་ཥིཉྩ་ཧཱུྃ༔ གཙོ་མོའི་ཙཀ་ལི་ཐོགས་ཏེ༔ ཧཱུྃ༔ སྐུ་གསུམ་མཁའ་འགྲོ་རྣམས་ཀྱི་བྱིན་རླབས་ལས༔ བསྟན་པའི་བྱ་ར་བྱེད་པའི་སྐུར་བསྟན་པ༔ ཡེ་ཤེས་མཁའ་འགྲོ་དཔལ་ལྡན་རྒྱལ་མོ་ཡི༔ སྐལ་ལྡན་བུ་ལ་དབང་མཆོག་སྦྱིན་པར་བྱ༔ བཛྲ་མ་ཧཱ་ཀཱ་ལི་རེ་མ་ཏཱི་ཛྙཱ་ན་ཀཱ་ཡ་ཨ་བྷི་ཥིཉྩ་ཧཱུྃ༔ ཧེ་རུ་ཀ་ཐོགས་ཏེ༔ ཧཱུྃ༔ བཅོམ་ལྡན་དཔལ་ཆེན་ཡང་དག་ཧེ་རུ་ཀ༔ རིགས་ཀྱི་བདག་པོ་རྩ་གསུམ་འདུས་པའི་དཔལ༔ སྐལ་ལྡན་རིགས་ཀྱི་བུ་ལ་དབང་བསྐུར་བས༔ ཁྲག་འཐུང་དཔལ་ཆེན་ཡབ་ཡུམ་དབང་ཐོབ་ཤོག༔ ཨཱོཾ་ཤྲཱི་ཧེ་རུ་ཀ་རུ་ལུ་རུ་ལུ་ཀཱ་ཡ་ཨ་བྷི་ཥིཉྩ་ཧཱུྃ༔ བ་ལམ་མ་ཐོགས་ཏེ༔ ཧཱུྃ༔ མ་མོ་ཆེན་མོ་བ་ལམ་དྲེལ་སྣ་མ༔ སྐུ་ལས་སྤྲུལ་པའི་ལྷ་མོ་འཁོར་བཅས་ཀྱིས༔ སྐལ་ལྡན་རིགས་ཀྱི་བུ་ལ་དབང་བསྐུར་བས༔ ཀཱ་ཡ་ངྷཀྐིའི་ཚོགས་ཀྱི་དབང་ཐོབ་ཤོག༔ བ་ལམ་ཀཱ་ཡ་ཨ་བྷི་ཥིཉྩ་ཧཱུྃ༔ སྟག་སྨན་ཐོགས་ཏེ༔ ཧཱུྃ༔ སྟག་སྨན་ཆེན་མོ་གཟེར་འདེབས་དཔལ་མོ་ཆེ༔ གསུང་ལས་སྤྲུལ་པའི་ལྷ་མོ་འཁོར་བཅས་ཀྱིས༔ སྐལ་ལྡན་རིགས་ཀྱི་བུ་ལ་དབང་བསྐུར་བས༔ ཝཱཀྐ་དྷཀྐིའི་ཚོགས་ཀྱི་དབང་ཐོབ་ཤོག༔ སྟག་སྨན་ཀཱ་ཡ་ཨ་བྷི་ཥིཉྩ་ཧཱུྃ༔ ཁྲི་སྨན་ཐོགས་ཏེ༔ ཧཱུྃ༔ མ་མོ་ཆེན་མོ་ཁྲི་སྨན་སི་ལེ་མ༔ ཐུགས་ལས་སྤྲུལ་པའི་ལྷ་མོ་འཁོར་བཅས་ཀྱིས༔ སྐལ་ལྡན་རིགས་ཀྱི་བུ་ལ་དབང་བསྐུར་བས༔ ཙིཏྟ་དྷཀྐིའི་ཚོགས་ཀྱི་དབང་ཐོབ་ཤོག༔ ཁྲི་སྨན་ཀཱ་ཡ་ཨ་བྷིཥིཉྩ་ཧཱུྃ༔ རྡོ་རྗེ་བ་ལམ་མ་ཐོགས་ཏེ༔ ཧཱུྃ༔ མ་མོ་ཆེན་མོ་རྡོ་རྗེ་བ་ལམ་མ༔ ཡོན་ཏན་སྤྲུལ་པའི་ལྷ་མོ་འཁོར་བཅས་ཀྱིས༔ སྐལ་ལྡན་རིགས་ཀྱི་བུ་ལ་དབང་བསྐུར་བས༔ རཏྣ་དྷཀྐིའི་ཚོགས་ཀྱི་དབང་ཐོབ་ཤོག༔ བ་ལམ་ཀཱ་ཡ་ཨ་བྷི་ཥིཉྩ་ཧཱུྃ༔ ཚངས་པ་ཐོགས་ཏེ༔ ཧཱུྃ༔ ཚངས་པ་ཆེན་པོ་དུང་གི་ཐོར་ཚུགས་ཅན༔ འཕྲིན་ལས་སྤྲུལ་པའི་ཆོས་སྐྱོང་འཁོར་བཅས་ཀྱིས༔ སྐལ་ལྡན་རིགས་ཀྱི་བུ་ལ་དབང་བསྐུར་བས༔ ལི་བྱིན་སྐུ་ལྔའི་ཚོགས་ཀྱི་དབང་ཐོབ་ཤོག༔ ཀརྨ་རཱ་ཛ་ཀཱ་ཡ་ཨ་བྷི་ཥིཉྩ་ཧཱུྃ༔ གཤིན་རྗེ་ཐོགས་ཏེ༔ ཧཱུྃ༔ གཤིན་རྗེའི་གཤེད་པོ་མི་བཟད་འབར་བའི་སྐུ༔ གཉིས་མེད་སྤྲུལ་པའི་གཤིན་རྗེ་འཁོར་བཅས་ཀྱིས༔ སྐལ་ལྡན་རིགས་ཀྱི་བུ་ལ་དབང་བསྐུར་བས༔ གཤིན་རྗེ་མི་ཟན་ཆེན་པོའི་དབང་ཐོབ་ཤོག༔ བྷེ་ཝ་ས་ཏ་ཀཱ་ཡ་ཨ་བྷི་ཥིཉྩ་ཧཱུྃ༔ དགུ་རིང་ཐོགས་ལ༔ ཧཱུྃ༔ བདུད་ཀྱི་རྒྱལ་པོ་རྔམ་བརྗིད་སྟོབས་ལྡན་འབར༔ ཡོངས་འདུས་སྤྲུལ་པའི་བདུད་རྒྱལ་འཁོར་བཅས་ཀྱིས༔ སྐལ་ལྡན་རིགས་ཀྱི་བུ་ལ་དབང་བསྐུར་བས༔ ནག་པོ་བདུད་ཀྱི་སྡེ་ཚོགས་དབང་ཐོབ་ཤོག༔ བྱེ་བ་དགུ་རིང་ཀཱ་ཡ་ཨ་བྷི་ཥིཉྩ་ཧཱུྃ༔ བསྟན་མ་ཐོགས་ཏེ༔ ཧཱུྃ༔ བསྟན་མ་ཆེན་མོ་བསྟན་པའི་བྱ་ར་བ༔ བསྟན་སྐྱོང་སྲུང་མ་རྒྱ་མཚོ་འཁོར་བཅས་ཀྱིས༔ སྐལ་ལྡན་རིགས་ཀྱི་བུ་ལ་དབང་བསྐུར་བས༔ མ་མོ་བསྟན་བསྲུང་རྒྱ་མཚོའི་དབང་ཐོབ་ཤོག༔ མ་མ་ཏང་ཏང་ཏིང་ཏིང་ཀཱ་ཡ་ཨ་བྷི་ཥིཉྩ་ཧཱུྃ༔ བདུད་རྩི་ཐོགས་ལ༔ ཧཱུྃ༔ གཡུང་མཆན་རུས་སྦལ་གྱི་ཁོག་པ། དྲུང་མི་འགྱུར་རྡོ་རྗེའི་ཀ་པཱ་ལར༔ ར་ས་ཡ་ནའི་བཅུད་ཀྱིས་གཏམས་པ་འདིས༔ སྐལ་ལྡན་རིགས་ཀྱི་བུ་ལ་དབང་བསྐུར་བས༔ དཔལ་ལྡན་ལྷ་མོའི་གསུང་གི་དབང་ཐོབ་ཤོག༔ ཨཱོཾ་མ་ཧཱ་ཀཱ་ལི་ཝཱཀྐ་ཨ་བྷི་ཥིཉྩ་ཧཱུྃ༔ རྩེ་གསུམ་ཐོགས་ལ༔ ཧཱུྃ༔ ཁ་ཊྭཱཾ་རྩེ་གསུམ་དར་ནག་བ་དན་འཕྱོ༔ རལ་གྲི་འབར་བས་དགྲ་བགེགས་དུམ་བུར་གཏུབ༔ གྲི་གུག་འབར་བས་སྐྱེ་ཤི་རྩད་ནས་གཅོད༔ བེ་ཅོན་འབར་བས་དགྲ་བགེགས་ཀླད་ཁྲག་དཀྲུག༔ མེ་ལོང་འབར་བས་ཁམས་གསུམ་གསལ་ལེར་གཟིགས༔ སྐལ་ལྡན་རིགས་ཀྱི་བུ་ལ་དབང་བསྐུར་བས༔ དཔལ་ལྡན་ལྷ་མོའི་ཐུགས་ཀྱི་དབང་ཐོབ་ཤོག༔ ཨཱོཾ་མ་ཧཱ་ཀཱ་ལི་ཙིཏྟ་ཨ་བྷི་ཥིཉྩ་ཧཱུྃ༔ རྔ་ཐོད་ཕྲེང་གི་རྒྱན་ཅན་ཐོགས་ལ༔ ཧཱུྃ༔ ཐོད་སྐམ་འབར་བའི་རྔ་ཆེན་ཞིང་ལྤགས་ཅན༔ གྲིར་ཤི་མི་ཡི་རྩིབ་མའི་ལྕག་གིས་བརྒྱན༔ མཐོ་བདུན་པ་ཡི་སྒྲ་ཡིས་ཁམས་གསུམ་འུར༔ སྐལ་ལྡན་རིགས་ཀྱི་བུ་ལ་དབང་བསྐུར་བས༔ དཔལ་ལྡན་ལྷ་མོའི་ཡོན་ཏན་དབང་ཐོབ་ཤོག༔ ཨཱོཾ་མ་ཧཱ་ཀཱ་ལི་རཏྣ་ཨ་བྷི་ཥིཉྩ་ཧཱུྃ༔ ལིངྒར་དགྲ་བགེགས་དགུག་བསྟིམ་བྱ༔ མཚོན་གྱིས་གཏུབ་ཅིང་གཏོར་མར་སྦྲན༔ རྒྱས་པ་སྒྲལ་ལས་གཞུང་ལྟར་བཀབ༔ ས་མ་ཡཱ༔ རྒྱ་རྒྱ་རྒྱ༔ ཨེ་མ་མ་མོ་དྲེགས་པའི་སྲོག༔ ཤིན་ཏུ་གཉན་རྒྱ་ཐབས་མཁས་སྤྱོད༔ དམ་མེད་འགྲོ་ལ་གསང་བའི་རྒྱ༔ འཆལ་ན་རང་གི་སྲོག་ལ་འོང་༔ ཆིག་བརྒྱུད་བསྟན་འཛིན་བུ་ལ་བྱིན༔ སྤེལ་ལམ་མི་སྤེལ་ཁྱད་པར་ཅན་ལ༔ འཕྲོང་ན་ལ་ཕན༔ ས་མ་ཡཱ༔ རྒྱ་རྒྱ་རྒྱ༔ གཏེར་ཆེན་ཆོས་ཀྱི་རྒྱལ་པོ་རིག་འཛིན་ཉི་མ་གྲགས་པ་རྩལ་གྱི་གནས་མཆོག་ཆེན་པོ་ཧ་ཙོ་ནས་གདན་དྲངས་ཤིང་ཤོག་སེར་ལས་ཞལ་བཤུས་པའོ། །མངྒ་ལཾ།། །།

ལས་བྱང་གནམ་ལྕགས་རལ་གྲི།

སྔགས་བདག་འབར་མའི་ཐུགས་ཐིག་ལས༔ ལས་བྱང་གནམ་ལྕགས་རལ་གྲི་བཞུགས༔ རྦོད་གཏོང་མ་མོའི་ལྷ་ལ་འདུད༔ གསང་བ་སྔགས་ཀྱི་རྣལ་འབྱོར་པས༔ དཔལ་ལྡན་ལྷ་མོ་ཆེན་མོ་ལ༔ མཆོད་བསྟོད་འཕྲིན་ལས་བཅོལ་འདོད་ན༔ དབང་སྒྲུབ་ལས་སྦྱོར་རང་གཞུང་བཞིན༔ དཀྱིལ་འཁོར་བཅའ་གཞི་ལས་ལ་སྦྱོར༔ ཀུན་གྱི་ཁ་སྐོང་ལས་གཞུང་བསྲང་༔ ཁྱད་པར་ཉ་སྟོང་དུས་ཆེན་དང་༔ ཡར་ངོ་མར་ངོའི་ཚེས་བཅུ་སོགས༔ ལྷ་མོ་བརྟེན་ཅིང་མཆོད་འདོད་ན༔ བྷནྡྷར་བཤོས་བུ་ལྷ་གྲངས་བཤམས༔ ནལ་བུའི་ཤ་དང་ལིང་ག་དང་༔ ཤ་སྣ་ཁྲག་སྣ་མར་མེས་བརྒྱན༔ བྷ་སུ་ཏ་ཡི་ཞགས་པས་བསྐོར༔ འཚེ་དང་ཡུངས་ཀར་ཕྱག་རྩང་གཟུགས༔ སྨྱུག་རྒོད་འམ་ནི་མདའ་མགུལ་དུ༔ ཙཀ་ལི་གདགས་ཤིང་དར་གུར་ཕུབ༔ གཏོར་མར་བཙུགས་ཤིང་སྨན་རག་བཤམས༔ གྱེར་སྒོམ་གསོལ་འདེབས་འདི་ལྟར་རོ༔ ས་མ་ཡ༔ རྒྱ་རྒྱ་རྒྱ༔ ཧཱུྃ་ཧཱུྃ་ཧཱུྃ༔ ཞེས་པའི་ཡིག་འབྲུ་གནས་གྱུར་པ་ལས༔ སྐད་ཅིག་གིས་བདག་ཉིད་ཏི་ར་ཉི་ཟླ་པདྨ་བདུད་བཞིའི་སྟེང་དུ་དཔལ་ཆེན་པོ་ཡང་དག་ཧེ་རུ་ཀཿམཐིང་ནག་ཞལ་གཅིག་ཕྱག་གཉིས་རྡོ་རྗེ་དང་དྲིལ་བུའི་ཕྱག་རྒྱས་ཡུམ་ལ་འཁྱུད་པ་ཞབས་བརྐྱང་བསྐུམ་དོར་སྟབས་སུ་བགྲད་པ་ཞལ་གདངས་ཤིང་ལྗགས་འདྲིལ་བ་སྤྱན་གསུམ་ཁྲག་མཚོ་ལྟར་ཁོལ་ཞིང་སྨ་ར་དང་ཁ་སྤུ་ལས་མེ་འབར་བ་དབུ་སྐྲ་ཁམ་སེར་གྱེན་དུ་འབར་ཞིང་ཐུར་དུ་གཏིབས་པ་ལ་ཐོད་ཕྲེང་དང་རྩེ་བྲན་གསོལ་ཞིང་མི་བསྐྱོད་པ་སྔོན་པོས་དབུར་བརྒྱན་པ་དུར་ཁྲོད་ཀྱི་ཆས་བརྒྱད་ཀྱིས་བརྒྱན་ཞིང་མེ་རབ་ཏུ་འབར་བའི་ཀློང་དུ་བཞུགས་པའི་སྐུ་ལ་ལུས་དང་གྲིབ་མའི་ཚུལ་ལྟར་ཡུམ་ཆེན་མོ་བཛྲ་ཀྲོ་ཏཱི་མ་མཐིང་སྐྱ་གྲི་ཐོད་ཀྱི་ཕྱག་རྒྱ་དང་ཁྲོ་མོའི་ཆས་རྣམས་ཀྱིས་བརྒྱན་ཞིང་ཡབ་ལ་འཁྲིལ་བ་ཡབ་ཡུམ་གཉིས་ཀ་གར་དགུའི་ཉམས་དང་ལྡན་པར་བསྒོམ༔ འོག་མིན་གྱི་ཞིང་ཁམས་ཡང་དག་རོལ་པའི་དུར་ཁྲོད་ནས་དཔལ་ཆེན་པོ་ཧེ་རུ་ཀཿསྐུ་འཁོར་དང་བཅས་པ་བཛྲ་ས་མ་ཡ་ཛཿབཛྲ་ས་མ་ཡ་ཏིཥྛ་ལྷན༔ ཨ་ཏི་པུ་ཧོ༔ ཨ་ལ་ལ་ཧོ༔ བཛྲ་པུཥྤེ་དྷཱུ་པེ་ཨཱ་ལོ་ཀེ་གྷནྡྷེ་ནཻ་ཝི་དྱ་ཤཔྟ་ཨ་མྲྀ་ཏ་རཀྟ་བྷ་ལིངྟ་པཱུ་ཙ་ས་མ་ཡ་ཁཱ་ཧི་ཁཱ་ཧི༔ ཧཱུྃ༔ ཆོས་ཀྱི་དབྱིངས་ལས་མ་གཡོས་ཀྱང་༔ ཚར་གཅོད་རྗེས་འཛིན་ཧེ་རུ་ཀ༔ སྟོབས་བཅུའི་དབང་བསྒྱུར་ཡབ་ཡུམ་ཆེ༔ རྡོ་རྗེ་ཁྲག་འཐུང་སྐུ་ལ་བསྟོད༔ ཐུགས་ཀར་ཉི་མའི་དཀྱིལ་འཁོར་གྱི་སྟེང་དུ་ཕྱག་མཚན་གྱི་ལྟེ་བར་ཧཱུྃ་མཐིང་ནག་གི་མཐར་སྔགས་ཕྲེང་འཁོར་བས་སྟོབས་བཅུའི་དབང་དང་ལྡན་པར་གྱུར༔ ཨཱོཾ་བཛྲ་ཤྲཱི་ཧེ་རུ་ཀཿརུ་ལུ་རུ་ལུ་ཧཱུྃ་བྷྱོ་ཧཱུྃ་ཕཊ༔ ཅི་མང་བཟླ་ཏིང་ངེ་འཛིན་རབ་ཏུ་གསལ་བར་བསྐྱེད༔ དེ་ནས་སྒྲུབ་གཏོར་ལྷ་མོར་བསྐྱེད་མཆོད་གཏོར་དགྲ་བགེགས་སུ་དམིགས་ཤིང་ཤ་ཁྲག་གི་རྒྱ་མཚོར་བྱིན་གྱིས་བརླབས་ནས་ལྷ་མོ་སྐྱེད་ཅིང་འབོད་དེ་མཆོད་བསྟོད་འཕྲིན་ལས་འདི་ལྟར་བཅོལ༔ བདག་ཉིད་དཔལ་ཆེན་པོར་གསལ་བའི་མདུན་དུ་ཨེ་གྲུ་གསུམ་དམར་ནག་ཏུ་འབར་བའི་ཀློང་ཁྲག་ཞག་གི་རྒྱ་མཚོ་ཆེན་པོ་རབ་ཏུ་ཁོལ་ཞིང་འཁྱོམ་པའི་དབུས་སུ་ཐོད་པ་སྐམ་རློན་གྱི་སྐུ་མཁར་ཟུར་གསུམ་པ་ནང་གནམ་ལྕགས་ལས་གྲུབ་ཅིང་བསྐལ་པའི་མེ་ཆེན་འབར་བ་དུག་རླུང་ཁམ་ནག་ཏུ་འཚུབ་ཅིང་མི་རོ་རྟ་རོ་འབུམ་ཁྲི་བརྡལ་བ༔ སྟེང་གི་བར་སྣང་ལས་གནམ་ལྕགས་ཀྱི་ཐོག་སེར་འབབ་ཅིང་འབྲུག་སྟོང་ལྡིར་ཏེ་གློག་སྟོང་འཁྱུག་པའི་དབུས་སུ་ཉི་དཀྱིལ་ཏི་རའི་སྟེང་དུ་ཏི་ལས་སྐྱེས་པའི་བོང་བུ་དམར་ག་དྲག་རྩལ་མྱུར་མགྱོགས་དང་ལྡན་པའི་རྒྱབ་ཏུ་གཡང་གཞི་དང་མི་མགོའི་སྒ་སྟན་ལ་འཆོང་སྦྲུལ་དང་རྒྱུ་མས་གོང་རྨེད་བྱས་ཤིང་། མགོ་བོ་དང་སྙིང་གི་ཐོང་དོམ་འཕྱང་བ་གཡུ་མཐུར་དང་གསེར་སྲབ་ལ་མིག་འབྲས་ཀྱི་འཕྲས་བརྒྱན་ཞིང་གསེར་གྱི་གཡེར་ཁ་མང་དུ་འཁྲོལ་བ་རྣ་བར་དར་གྱི་འཕུར་ལྕེས་བརྒྱན་པར་བསྐྱེད༔ དེའི་སྟེང་དུ་རང་གི་ཐུགས་ཀའི་ས་བོན་ལས་ཡི་གེ་མ་མཐིང་ནག་གཅིག་འཕྲོས་པ་ལས་དཔལ་ལྡན་ལྷ་མོ་ཆེན་མོ་མཐིང་ནག་ཞལ་གཅིག་ཕྱག་གཉིས་པ་སྤྱན་གསུམ་རབ་ཏུ་བགྲད་ཅིང་ཞལ་གདངས་ཤིང་ལྗགས་འགྲིལ་བ་མཆེ་བ་རབ་ཏུ་གཙིགས་ཤིང་རལ་པ་ཁམ་ནག་གྱེར་ཐུར་དུ་གཏིབས་པ་ལ་གསེར་གཡུ་མུ་ཏིག་གི་ཆུན་པོ་དང་ཐོད་པས་བརྒྱན་པ་གཡས་པས་ཁ་ཊྭཱཾ་དང་བ་དན་ནག་པོ་ནམ་མཁའ་ལ་འཕྱར་བ་གཡོན་པས་ནད་ཀྱི་རྐྱལ་པ་བསྣམས་པ་སྐུ་སྟོད་ལ་ཞིང་ལྤགས་དང་དར་ནག་གསོལ་བ་སྐུ་སྨད་ལ་སྟག་ལྤགས་དང་མི་རྩིབ་ཀྱི་རེ་ལྡེ་མིག་མང་རིས་སུ་དཀྲིས་པ་སྤྱི་བོར་རྨ་བྱའི་སྒྲོ་ཕོད་བཙུག་པ་སྙན་གཡས་ནས་སེང་གེ་འཕྲོ་ཞིང་གཡོན་ནས་སྦྲུལ་ནག་གདེང་བ་ཐོད་པ་སྐམ་རློན་དང་སྦྲུལ་གྱི་དོ་ཤལ་བྱས་པ་སྤྱི་བོའི་གཙུག་ན་ཟླ་བ་རྒྱས་པ་ལྟེ་བའི་དཀྱིལ་ནས་ཉི་མ་འཆར་བ་ཞབས་གཉིས་ཕྱེད་སྐྱིལ་གྱིས་ཆིབས་ལ་རོལ་པ་ནད་མཚོན་དུག་རླངས་ཀྱི་ཆར་པ་འཕྲོ་ཞིང་བལྟར་མི་བཟོད་པའི་སྐུར་གསལ་བའི་འཁོར་དུ་བ་ལམ་དྲེལ་སྣ་མ་སྟག་སྨན་གཟེར་འདེབས་མ་ཁྲི་སྨན་ས་ལེ་མ་རྡོ་རྗེ་བ་ལམ་མ་ཚངས་པ་དུང་གི་ཐོར་ཚུགས་གཤིན་རྗེ་བྷེ་ཝ་ས་ཏ་བདུད་པོ་བྱེ་བ་དགུ་རིང་ལ་སོགས་པ་འཆི་བདག་དྲེགས་པ་ཆེན་པོ་བདུན་དང་ཡེ་ཤེས་དང་འཇིག་རྟེན་གྱི་མ་མོ་མཁའ་འགྲོ་བྱེ་བ་འབུམ་གྱི་ཚོགས་ཀྱིས་བསྐོར་བར་བསྐྱེད་པའི་གནས་གསུམ་ལས་འོད་ཟེར་འཕྲོས་པས་རྒྱ་མཚོ་ཆེན་པོའི་ཕ་རོལ་བྱང་ཤར་མཚམས་ཀྱི་དུར་ཁྲོད་ཡོངས་འདུ་ཤིང་གི་རྩ་བ་མེ་རུ་རྩེ་ཡི་སྒོ་དྲུང་མུ་ལེ་མཐིང་མཚོའི་གཏིང་རུམ་མཐིང་ཤུན་སྔོན་པོའི་གུར་ཁང་ཐོད་མཁར་འབར་བའི་ཕོ་བྲང་ནས་དཔལ་ལྡན་སྔགས་ཀྱི་སྲུང་མ་ཆེན་མོ་སྐུ་འཁོར་དང་བཅས་པ་བསྐྱེད་པའི་གནས་འདིར་བཛྲ་ས་མ་ཡ་ཛཿཛཿ རོལ་མོ་རྣམས་འཁྲོལ་ཞིང་གསུར་ཆེན་གྱི་དུད་པ་གཏོང་མི་རྐང་གི་གླིང་བུ་འབུད་དར་ནག་གི་གཡབ་འདོར་གདུང་བའི་ཡིད་ཀྱིས་སྤྱན་འདྲེན་པ་ནི་འདི་སྐད་དོ༔ ཧཱུྃ་བྷྱོ༔ ཕྱོགས་ནི་ཉི་མ་བྱང་ཤར་མཚམས༔ ཡུལ་ནི་རྒྱ་མཚོའི་ཕ་རོལ་ན༔ མ་མོ་མཁའ་འགྲོ་འདུ་བའི་གནས༔ ལས་བྱེད་མཁའ་འགྲོའི་དུར་ཁྲོད་ན༔ མུ་ལེ་མཐིང་མཚོའི་གུར་ཁང་ན༔ ཡོངས་འདུའི་ཤིང་ཆེན་ལོ་འདབ་རྒྱས༔ ཐོད་མཁར་འབར་བའི་གཞལ་ཡས་ནས༔ དཔལ་ལྡན་ལྷ་མོ་ཆེན་མོ་ལ༔ དྲེགས་པ་བདུན་དང་ནག་མོ་འབུམ༔ མ་མོ་བྱེ་བའི་འཁོར་གྱིས་བསྐོར༔ མ་ཐོགས་མྱུར་དུ་ད་ཚུར་བྱོན༔ ཞལ་བཞེས་དགོངས་ལ་གནས་འདིར་སྤྱོན༔ དམ་བཅས་དགོངས་ལ་འཕྲིན་ལས་སྒྲུབས༔ བུ་ཡིས་སྒྲུབ་པའི་གནས་མཆོག་འདིར༔ མ་ལ་གདུང་བས་འབོད་པའི་ཚེ༔ དམ་ལ་འདུས་ཤིག་དཔལ་ལྡན་མ༔ ཆད་ལ་བྱོན་ཅིག་རེ་མ་ཏཱི༔ གནས་འདིར་སྤྱན་འདྲེན་གཤེགས་སུ་གསོལ༔ དྲེགས་པའི་འཁོར་ཚོགས་གཤེགས་སུ་གསོལ༔ ནག་མོ་འབུམ་སྡེ་གཤེགས་སུ་གསོལ༔ བཀའ་ཉན་བྲན་གཡོག་གཤེགས་སུ་གསོལ༔ རླུང་ནག་འཚུབ་མ་འུར་རུ་རུ༔ བསྐལ་པའི་མེ་འབར་ལྷབས་སེ་ལྷབ༔ ནད་ཀྱི་རླངས་པ་ཐིབས་སེ་ཐིབ༔ མཚོན་གྱི་དྲུ་གུ་ཧྲི་ལི་ལི༔ དུག་རླངས་མང་པོ་ཕྱུར་རུ་རུ༔ ཐུན་གྱི་སེར་བ་ཤ་ར་ར༔ མཚོན་གྱི་ཐོག་མདའ་ཆེམས་སེ་ཆེམ༔ དྲག་ཏུ་བསྐྱོད་ལ་ལས་མཛོད་ཅིག༔ དགྲ་རྣམས་སྒྲོལ་ཕྱིར་གཤེགས་སུ་གསོལ༔ བགེགས་རྣམས་འདུལ་ཕྱིར་གཤེགས་སུ་གསོལ༔ ནད་རྣམས་ཟློག་ཕྱིར་གཤེགས་སུ་གསོལ༔ བར་ཆད་སེལ་ཕྱིར་གཤེགས་སུ་གསོལ༔ རྐྱེན་རྣམས་བསྒྱུར་ཕྱིར་གཤེགས་སུ་གསོལ༔ ནག་མོ་ཏི་ལམ་མ་མ་དུན་བྷྱོ༔ བྷྱོ་རེ་མ་ཏཱི་བཛྲ་ས་མ་ཡ་ཛཿཛཿ བཞུགས་སུ་གསོལ་བ་ནི༔ ཧཱུྃ་བྷྱོ༔ སྒྲུབ་པའི་གནས་མཆོག་ཆེན་པོ་འདིར༔ བསྐྱེད་པའི་ལྷ་མོ་དཔལ་ལྷ་མོ༔ མ་ལུས་འཁོར་དང་བཅས་པ་རྣམས༔ དངོས་གྲུབ་སྩོལ་ཕྱིར་བཞུགས་སུ་གསོལ༔ ནག་མོ་ཏི་ལམ་མ་མ་དུན་བྷྱོ༔ ས་མ་ཡ༔ ཏིཥྛ་ལྷན༔ ཕྱག་འཚལ་བ་ནི༔ ཧཱུྃ་བྷྱོ༔ ཆོས་ཀྱི་དབྱིངས་ལས་མ་གཡོས་ཀྱང་༔ བླ་མེད་བསྟན་པ་བསྲུང་བའི་ཕྱིར༔ ཁྲག་འཐུང་བཛྲ་དྷཀྐི་མ༔ འཁོར་དང་བཅས་ལ་ཕྱག་འཚལ་བསྟོད༔ ནག་མོ་ཏི་ལམ་མ་མ་དུན་བྷྱོ༔ བྷྱོ་རེ་མ་ཏཱི་བཛྲ་ན་མོ་པཱུ་ཙ་ཨ་ལ་ལ་ཧེ་ཧོ་ཧཱུྃ༔ མཆོད་པ་འབུལ་བ་ནི༔ ཧཱུྃ་བྷྱོ༔ དཔལ་ལྡན་ལྷ་མོ་འཁོར་བཅས་ལ༔ ཆུ་སྣ་སྟོང་གི་ཡོན་ཆབ་འབུལ༔ འབྲུ་སྣ་སྟོང་གི་མེ་ཏོག་འབུལ༔ ཤིང་སྣ་སྟོང་གི་དུད་སྤྲིན་འབུལ༔ ཉི་ཟླ་སྟོང་གི་མར་མེ་འབུལ༔ དྲི་བཟང་སྟོང་གི་བྱུག་པ་འབུལ༔ བཅུད་ལྡན་སྟོང་གི་ཞལ་ཟས་འབུལ༔ སྒྲ་སྙན་སྟོང་གི་རོལ་མོ་འབུལ༔ ཧཱུྃ་བྷྱོ༔ དཔལ་ལྡན་ལྷ་མོ་འཁོར་བཅས་ལ༔ དབང་པོ་ལྔ་ཡི་པུཥྤེས་མཆོད༔ ཞུན་ཆེན་གསུར་གྱི་དྷཱུ་པེས་མཆོད༔ ཚིལ་ཆེན་སྣང་གསལ་ཨཱ་ལོས་མཆོད༔ རྡོ་རྗེ་དྲི་ཆུའི་གྷནྡྷེས་མཆོད༔ བདུད་རྩི་དྲི་ཆེན་ནཻ་ཏྱས་མཆོད༔ རྐང་གླིང་ཐོད་པའི་ཤཔྟས་མཆོད༔ ཧཱུྃ་བྷྱོ༔ དཔལ་ལྡན་ལྷ་མོ་འཁོར་བཅས་ལ༔ རཀྟ་དམར་གྱི་ཨརྒྷས་མཆོད༔ བྷ་ལིང་རྒྱན་དང་ལྡན་པས་མཆོད༔ ཨ་མྲྀ་ཏ་ཡི་བཅུད་ཀྱིས་མཆོད༔ ཧཱུྃ་བྷྱོ༔ དཔལ་ལྡན་ལྷ་མོ་འཁོར་བཅས་ལ༔ གཏི་མུག་ཤ་སྣ་སྟོང་གིས་མཆོད༔ འདོད་ཆགས་ཁྲག་སྣ་སྟོང་གིས་མཆོད༔ ཞེ་སྡང་རུས་སྣ་སྟོང་གིས་མཆོད༔ ཕྲག་དོག་མཁྲིས་སྣ་སྟོང་གིས་མཆོད༔ ང་རྒྱལ་ཀླད་སྣ་སྟོང་གིས་མཆོད༔ ཧཱུྃ་བྷྱོ༔ དཔལ་ལྡན་ལྷ་མོ་འཁོར་བཅས་ལ༔ དཔྱིད་གསུམ་མཆོད་པ་འབུལ་བ་ནི༔ ག་བུར་གྲི་སྙིང་རཀྟ་དང་༔ འཚུབ་ནག་རླུང་གིས་བསྡུས་པའི་རྫས་ཀྱིས་མཆོད༔ ཧཱུྃ་བྷྱོ༔ དཔལ་ལྡན་ལྷ་མོ་འཁོར་བཅས་ལ༔ དབྱར་གསུམ་མཆོད་པ་འབུལ་བ་ནི༔ མདངས་ལྡན་མེ་ཏོག་འབྱུང་ཟད་ཁྲག༔ གསོན་ཁྲག་འཕྱོན་མའི་མཚལ་ཐིགས་མཆོད༔ ཧཱུྃ་བྷྱོ༔ དཔལ་ལྡན་ལྷ་མོ་འཁོར་བཅས་ལ༔ སྟོན་གསུམ་མཆོད་པ་འབུལ་བ་ནི༔ འབྲས་བཟང་གྲོ་ཏིལ་མོན་སྲན་དང་༔ ཤིང་ཏོག་སྣ་ཚོགས་འབྲུ་སྣས་མཆོད༔ ཧཱུྃ་བྷྱོ༔ དཔལ་ལྡན་ལྷ་མོ་འཁོར་བཅས་ལ༔ དགུན་གསུམ་མཆོད་པ་འབུལ་བ་ནི༔ བསད་པའི་ཤ་ཁྲག་མྱོས་བྱེད་ཆང་༔ མི་དབང་འབྲས་བུའི་ཤ་ཡིས་མཆོད༔ ཨཱོཾ་བཛྲ་མ་ཧཱ་ཀཱ་ལི་དྷཀྐི་རེ་མ་ཏཱི་སརྦ་ས་མ་ཡ་སརྦ་པཱུ་ཙ་ཁ་ཁ་ཁཱ་ཧི་ཁཱ་ཧི༔ བསྟོད་པ་ནི༔ ཧཱུྃ་བྷྱོ༔ ཁམས་གསུམ་དབང་བསྒྱུར་དཔལ་ལྡན་མ༔ སྲིད་གསུམ་ཟིལ་གནོན་རལ་གཅིག་མ༔ མ་བདུད་ཆེན་མོ་རེ་མ་ཏཱི༔ མཁའ་འགྲོའི་གཙོ་ལ་ཕྱག་འཚལ་བསྟོད༔ འདོད་ཁམས་ལྷ་དབང་དགྱེས་སྡེ་མོ༔ ནཱ་ག་རཀྴ་ཀླུ་ཡི་ལྕམ༔ བདུད་མོ་ནག་མོ་ཕྱག་གཉན་མོ༔ སྔགས་ཀྱི་སྲུང་མར་ཕྱག་འཚལ་བསྟོད༔ མ་མོ་མཁའ་འགྲོའི་ལས་མཁན་མོ༔ བསྟན་པ་ཀུན་གྱི་ཡང་རྗེ་མོ༔ དུར་ཁྲོད་དྷཀྐིའི་གཙོ་མོ་སྟེ༔ ཤ་ཟ་ཀཱ་ལིར་ཕྱག་འཚལ་བསྟོད༔ འཆི་བདག་ལས་བྱེད་དྲེགས་པ་བདུན༔ སོ་སོའི་བྲན་གཡོག་བཀའ་ཉན་དང་༔ ནག་མོ་འབུམ་སྡེ་བྱེ་བའི་ཚོགས༔ འཁོར་དང་བཅས་ལ་ཕྱག་འཚལ་བསྟོད༔ ཨཱོཾ་བཛྲ་དྷཀྐི་མ་ཧཱ་ཀ་ལི་རེ་མ་ཏི་ཧཱུྃ་བྷྱོ་ཧཱུྃ་ཕཊ༔ ཅེས་བཟླས་པ་ལ་འབུང་༔ འབྲུ་སྣ་གཏོར་གསུར་ཆེན་གྱི་དུད་སྤྲིན་གཏོང་རོལ་མོ་འབིར་ཞིང་གཉེར་གཏད་པ་ནི༔ ཧཱུྃ་བྷྱོ༔ དགོངས་སུ་གསོལ་ལོ་མ་ཆེན་མོ༔ གསན་དུ་གསོལ་ལོ་རེ་མ་ཏཱི༔ སྔོན་གྱི་བསྐལ་པ་དང་པོ་ལ༔ རི་རབ་ཆེན་པོའི་བྱང་ཕྱོགས་ན༔ ཡང་དག་དཔལ་ཆེན་ཧེ་རུ་ཀས༔ དམ་ལ་བཏགས་པའི་གཡར་དམ་དགོངས༔ གཡར་དམ་དགོངས་ལ་གཉེར་བྱང་ལོང་༔ དེ་འོག་བར་གྱི་བསྐལ་པ་ལ༔ རི་རབ་ཆེན་པོའི་བྱང་ཤར་མཚམས༔ ཡོངས་འདུ་ཤིང་གི་རྩ་བ་ན༔ གྷུ་རུ་རྡོ་རྗེ་ཐོད་ཕྲེང་གིས༔ དམ་ལ་བཏགས་པའི་ཐ་ཚིག་དགོངས༔ ཐ་ཚིག་དགོངས་ལ་གཉེར་བྱང་ལོང་༔ དེ་འོག་བསྐལ་པའི་ཐ་མ་ལ༔ ཡང་ལེ་གོང་གི་བྲག་ཕུག་ཏུ༔ སློབ་དཔོན་དྷ་ན་སཾ་སྐྲྀ་ཏས༔ དམ་ལ་བཏགས་པའི་ཁས་ལེན་དགོངས༔ ཁས་ལེན་དགོངས་ལ་གཉེར་བྱང་ལོང་༔ ཧཱུྃ་བྷྱོ༔ མ་གཅིག་ཁྱོད་ལ་གཉེར་གཏད་པ༔ སངས་རྒྱས་བསྟན་པའི་གཞུག་གཉེར་འདིར༔ བསྟན་པ་འཛིན་པའི་སྐྱེས་བུ་རྣམས༔ ཁྱོད་ལ་གཉེར་གཏད་སྲུངས་ཤིག་སྐྱོབས༔ སྐུ་དགྲ་སྒྲོལ་ལ་བསུན་མ་ཟློག༔ བླ་མེད་ཆོས་ཀྱི་ཐེག་པ་རྣམས༔ ཁྱོད་ལ་གཉེར་གཏད་སྲུངས་ཤིག་རྒྱ༔ སྒྲུབ་པའི་རྟགས་སྟོན་བཀའ་སྐྱོངས་ཤིག༔ འཕགས་པའི་དགེ་འདུན་ཆོས་གྲྭ་རྣམས༔ ཁྱོད་ལ་གཉེར་གཏད་སྲུངས་ཤིག་སྐྱོབས༔ བཤད་སྒྲུབ་ཕྱོགས་བཅུར་རྒྱས་པར་མཛོད༔ འཛམ་བུ་གླིང་གི་སྐྱེ་འགྲོ་རྣམས༔ ཁྱོད་ལ་གཉེར་གཏད་ལེགས་ཉེས་གཟིགས༔ སྡིག་ལྡན་སྒྲོལ་ལ་ཆོས་ལྡན་སྐྱོངས༔ རྣལ་འབྱོར་བདག་གི་དགོན་གཞིས་མཁར༔ ཁྱོད་ལ་གཉེར་གཏད་བདག་ཏུ་བཅོལ༔ ཀ་ཅ་དཀོར་སྲུངས་དཀོར་རྐུན་སྒྲོལ༔ རྣལ་འབྱོར་བདག་གི་རྟ་ཕྱུགས་ནོར༔ ཁྱོད་ལ་གཉེར་གཏད་དགྱེས་བསྐང་བཞེས༔ ཇག་ཆོམ་སྒྲིབས་ལ་ཅེ་སྤྱང་སྲུངས༔ རྣལ་འབྱོར་བདག་གི་འཁོར་སློབ་བྲན༔ ཁྱོད་ལ་གཉེར་གཏད་སྲུང་སྐྱོབས་མཛོད༔ དམ་ལྡན་སྐྱོངས་ལ་དམ་མེད་སྒྲོལ༔ ཧཱུྃ་བྷྱོ༔ དཔལ་ལྡན་ལྷ་མོ་དུད་སོལ་མ༔ བདག་ཅག་རྣལ་འབྱོར་སྒྲུབ་པ་པོས༔ རྗེ་ལྟར་བརྟེན་ནོ་དབང་མ་ཆེ༔ མ་ལྟར་བརྟེན་ནོ་སྙིང་མ་རིང་༔ སྲིང་ལྟར་བརྟེན་ནོ་ཚུལ་མ་ཞན༔ ཆུང་མར་བྱས་སོ་མཚུངས་མ་ཞན༔ འཛའ་མོར་བྱས་སོ་གཞུང་མ་ངན༔ གཡོག་མོར་བྱས་སོ་སྒབ་མ་ལྗི༔ བྲན་ལྟར་བརྟེན་ནོ་རྩལ་མ་ཆུང་༔ ཕོ་ཉར་བཏང་ངོ་བང་མ་བུལ༔ བཤན་པར་བསྐོས་སོ་དགྲ་མ་ཤོར༔ སྲུང་མར་བྱས་སོ་བགེགས་མ་གཏོང་༔ བོས་པའི་ཚེ་ན་སྙན་མ་སྲ༔ གཡབ་པའི་ཚེ་ན་སྤྱན་མ་བརྟུལ༔ བསྐུལ་བའི་ཚེ་ན་ངང་མ་རིང་༔ རྦད་པའི་ཚེ་ན་ལས་མ་འགྱང་༔ མངགས་པའི་ཚེ་ན་བང་མ་བུལ༔ དམར་ཆེན་ཨརྒྷཾ་འདི་བཞེས་ལ༔ དགྲ་བགེགས་བཟློག་ལ་བར་ཆད་བསྒྱུར༔ དེང་ནས་བྱང་ཆུབ་མ་ཐོབ་བར༔ བདག་གི་མགོན་སྐྱོབས་སྟོངས་གྲོགས་མཛོད༔ མཆོད་པ་ཡིན་ནོ་ངོ་མ་ཆུང་༔ བརྟེན་པ་ཡིན་ནོ་རྒྱང་མ་རིང་༔ བསྒྲུབ་པ་ཡིན་ནོ་ཕྲག་མ་དོག༔ ལུས་དང་གྲིབ་མའི་ཚུལ་དུ་འགྲོགས༔ འདུ་བ་རྣམ་བཞི་དབང་དུ་བསྡུས༔ དཔལ་འབྱོར་ཚེ་བསོད་ཉམས་རྟོགས་སྤེལ༔ བཅོལ་བའི་འཕྲིན་ལས་གྲུབ་པར་མཛོད༔ ཅེས་བརྗོད་ཕུད་མཆོད་གསོལ་མཆོད་འབུལ༔ ས་མ་ཡ༔ རྒྱ་རྒྱ་རྒྱ༔ མན་ངག་བཀའ་ཡི་ཐ་རམ་མཁའ་འགྲོའི་སྙིང་ཁྲག་དྭངས་མ་ཨོ་རྒྱན་བདག་གི་སྙིང་ཐིགས་དམ་པ་འདི་བཞིན་དམ་ལྡན་རྣམས་ཀྱིས་བརྩོན་པར་བྱའོ༔ དམ་མེད་ལ་གསང་ངོ་འདི་ལྟར་མཆོད་བསྟོད་བརྟེན་པས་ལུས་དང་གྲིབ་མ་ལྟར་འགྲོག་ཅིང་མགོན་སྐྱོབ་དང་སྡོང་གྲོགས་བྱེད་པར་གདོན་མི་ཟའོ༔ གཡར་དམ་ལས་རང་འགལ་ན་འཁུ་ཞིང་ལྡོག་སྟེ་རང་གཤེད་རང་ལ་འབབ་པར་འགྱུར་བ་ཡང་ངེས་ཤེས་པས་དམ་ཚིག་སྲུང་ཞིང་མཆོད་བསྟོད་ལ་འབུང་བ་གལ་ཆེའོ༔ ས་མ་ཡ༔ ཨི་དན་ཏེ་རྒྱ༔ ན་ར་ཀན་རྒྱ༔ སོ་ཕག་ཤི་ན་རྒྱ༔ བཀའ་རྒྱ༔ དམ་རྒྱ༔ གཉན་རྒྱ༔ གསང་རྒྱ༔ སྦས་རྒྱ༔ གཏད་རྒྱ༔ གཏེར་རྒྱ༔ སྦས་རྒྱ༔ ས་མ་ཡ༔ རིག་འཛིན་ཆེན་པོ་ཉི་མ་གྲགས་པས་འཕགས་ཡུལ་རྒྱ་གར་ནས་གདན་དྲངས་ཤིང་གནས་མཆོག་དམ་པ་ལོ་རོའི་དཀར་པོ་དོན་ལྡན་དུ་དུས་ཀྱི་རྒྱལ་པོ་ཚེས་བཅུའི་ཉིན་ཅོག་པུའི་ནང་དུ་ཤོག་སེར་ལས་བོད་ཡིག་ཏུ་བསྒྱུར་བའོ། །མངྒ་ལཾ།། །།

ག་ན་ཙཀྲའི་ལས་མཐའ།

སྔགས་བདག་འབར་མའི་ཐུགས་ཐིག་ལས༔ ག་ན་ཙཀྲའི་ལས་མཐའ་ཡོད༔ རྦོད་གཏོང་མ་མོའི་ཚོགས་ལ་འདུད༔ ཕྱི་རབས་རྣལ་འབྱོར་སྒྲུབ་པ་པོས༔ མ་མོ་མཁའ་འགྲོའི་ལྷ་ཚོགས་ལ༔ ཤ་ཆང་ཚོགས་ཀྱིས་མཆོད་འདོད་ན༔ མ་མོ་མཁའ་འགྲོའི་དུས་ཆེན་ལ༔ ཚོགས་གཏོར་མཆོད་ཚོགས་རྒྱས་པར་བཤམས༔ ཁྱད་པར་ཤ་ཆང་དམ་རྫས་བཅས༔ བྱིན་གྱིས་བརླབ་ཅིང་འདི་སྐད་དོ༔ ཧཱུྃ་བྷྱོ༔ གདོད་ནས་དག་པའི་མཁའ་ཀློང་ཡངས་པ་ནས༔ རྣམ་དག་པཉྩ་རས་མི་གྷ་ནར་འཕྲོས༔ ཟག་པ་མེད་པའི་ར་ས་ཡ་ནར་བསྐྱིལ༔ མ་བརྒྱུད་ཀཱ་ལི་དགྱེས་པའི་པཱུ་ཙར་གྱུར༔ ཧཱུྃ་ཧོཿར་ས་ཡ་ན་སྭཱ་ཧཱ༔ གསུམ༔ སྤྱན་འདྲེན་པ་ནིཧཱུྃ་བྷྱོ༔ དབྱིངས་ནས་སྐུ་བསྐྱོད་རྩ་གསུམ་རྒྱལ་བའི་ཚོགས༔ འབོད་པའི་དམ་ལ་འདུས་ཤིག་མཁའ་འགྲོ་རྣམས༔ མཆོད་པའི་གྷ་ན་ཙཀྲ་པཱུ་ཙ་ཧོ༔ ཕུད་ནི༔ ཧཱུྃ་བྷྱོ༔ བསྒྲལ་བའི་ཤ་དང་མྱོས་བྱེད་སུ་ར་ཏ༔ འཇམ་དེས་ཀུན་རྒྱུ་ལྡན་དང་ཟླ་རྒྱས་དང་༔ ཟླ་ཁྲོམ་ཛ་གད་སྤང་དང་ནགས་ལས་སྐྱེས༔ ཙི་དང་ཙ་རུ་བཙོས་རྗེན་སྣ་ཚོགས་དང་༔ ཤྭ་ཀྲ་རྣམ་ལྔ་མ་ཧཱ་མཾ་སའི་རིགས༔ རི་ལྟར་སྤུངས་ཤིང་སཱ་ག་ར་ལྟར་བསྐྱིལ༔ རྩ་གསུམ་ལྷ་ཚོགས་ཞལ་དུ་པཱུ་ཙ་ཧོ༔ མ་རྒྱུད་མཁའ་འགྲོའི་ཞལ་དུ་པཱུ་ཙ་ཧོ༔ ཀཱ་ལི་འཁོར་བཅས་ཞལ་དུ་པཱུ་ཙ་ཧོ༔ སྲུང་མ་སརྦའི་ཞལ་དུ་པཱུ་ཙ་ཧོ༔ ཅེས་བརྗོད་བཤགས་པ་ནི༔ ཧཱུྃ་ཧོ༔ དགོངས་ཤིག་རྒྱལ་བ་རྒྱ་མཚོའི་ལྷ་ཚོགས་དགོངས༔ གསོན་ཅིག་མ་མོ་མཁའ་འགྲོ་ཆོས་སྐྱོང་རྣམས༔ ཐོག་མེད་དུས་ནས་ད་ལྟ་ཡན་ཆད་དུ༔ འདུལ་ཁྲིམས་སེམས་བསྐྱེད་སྔགས་ཀྱི་དམ་དང་འགལ༔ ནོངས་པར་གྱུར་པ་ཅི་མཆིས་ཚོགས་ཀྱིས་བཤགས༔ བྱང་ཞིང་དག་ནས་ཚངས་པར་སྩལ་དུ་གསོལ༔ ཡི་གེ་བརྒྱ་པ་བརྗོད༔ ཐ་མ་ནི༔ ཧཱུྃ་བྷྱོ༔ བརྔམ་ཞིང་བརྔམ་ཞིང་དགྲ་བགེགས་སྲོག་རྩ་གཅོད༔ སྲོག་གཅོད་བདུད་མོ་འབུམ་སྡེའི་དུས་ལ་བབས༔ བགད་ཅིང་བགད་ཅིང་ཤ་ཟ་རུས་ལ་འཆའ༔ ཟ་བྱེད་མ་མོ་འབུམ་སྡེའི་དུས་ལ་བབས༔ འབར་ཞིང་འཁྲུག་སྟེ་ནད་མཚོན་བུ་ཡུག་གཏིབ༔ གསོད་བྱེད་དྷཀྐིའི་ཚོགས་རྣམས་དུས་ལ་བབས༔ དུས་ལ་བབ་བོ་དམ་ཉམས་དགྲ་བགེགས་སྒྲོལ༔ ནྲི་ཏྲི་ཤ་ཏྲུཾ་གྷརྫ་གྷརྫ་མྱོགས་མྱོགས་གཏུབས་གཏུབས་འབར་འབར་ཤག་ཤག་མཱ་ར་ཡ་ཧཱུྃ་ཕཊ༔ འབགས་ལྷག་ནི༔ ཧཱུྃ་བྷྱོ༔ བཀའ་ཡི་འཁོར་ཚོགས་སྐྱོང་བའི་དྲེགས་པ་རྣམས༔ བཟའ་བའི་འབགས་ལྷག་རི་རབ་ཙམ་དུ་སྒྱུར༔ བཏུང་བའི་འབགས་ལྷག་རྒྱ་མཚོ་ལྟ་བུར་དམིགས༔ བསྔོས་པ་བཞིན་དུ་ཁྱེད་རྣམས་འདི་བཞེས་ལ༔ སངས་རྒྱས་བསྟན་བསྲུང་རྣལ་འབྱོར་བཀའ་འཁོར་སྐྱོངས༔ བཅོལ་བའི་འཕྲིན་ལས་དུས་སུ་གྲུབ་པར་མཛོད༔ སརྦ་གྷ་ཧི་ཧོཿསྟཾ་བྷྱོ་པཱུ་ཙ་ཧོ༔ ཆད་མཐོ་ནི། ཧཱུྃ་བྷྱོ༔ སྔོན་ཚེ་འདས་དུས་བསྐལ་པའི་དང་པོ་ལ༔ བྱང་ཕྱོགས་གནོད་སྦྱིན་རྫོང་གི་སྒྲུབ་ཕུག་ཏུ༔ ཡང་དག་དཔལ་ཆེན་བཅོམ་ལྡན་ཧེ་རུ་ཀས༔ དམ་ལ་བཞག་པའི་མ་མོ་མཁའ་འགྲོ་རྣམས༔ གཏོར་མ་བཞེས་ལ་དམ་བཞིན་འཕྲིན་ལས་མཛོད༔ ཧཱུྃ་བྷྱོ༔ དེ་འོག་རྡོ་རྗེ་གདན་གྱི་གནས་མཆོག་ཏུ༔ ཡང་དག་རྫོགས་པའི་སངས་རྒྱས་ཤཱཀ་ཐུབ་ཀྱིས༔ གཡར་དམ་ཕོག་པའི་མ་མོ་མཁའ་འགྲོ་རྣམས༔ གཏོར་མ་བཞེས་ལ་དམ་བཞིན་འཕྲིན་ལས་མཛོད༔ ཧཱུྃ་བྷྱོ༔ དེ་འོག་ཨོ་རྒྱན་ཡུལ་གྱི་གནས་མཆོག་ཏུ༔ བདག་ཉིད་སྔགས་འཆང་པདྨ་ཐོད་ཕྲེང་གིས༔ རྡོ་རྗེ་སྤྱི་བོར་བཞག་པའི་དྷཱཀྐི་རྣམས༔ གཏོར་མ་བཞེས་ལ་དམ་བཞིན་འཕྲིན་ལས་མཛོད༔ ཧཱུྃ་བྷྱོ༔ དེ་འོག་ཡང་ལེ་ཤོད་ཀྱི་གནས་མཆོག་ཏུ༔ སློབ་དཔོན་ཆེན་པོ་དྷ་ན་སཾ་སྐྲྀ་ཡིས༔ ལྕེ་ལ་ཨརྒྷཾ་བཞག་པའི་ཀཱ་ལི་རྣམས༔ གཏོར་མ་བཞེས་ལ་དམ་བཞིན་འཕྲིན་ལས་མཛོད༔ བཤལ་ཆུ་བདུད་རྩིས་བསྟན་མ་མཆོད་ཅིང་༔ མ་མ་ཏང་ཏང་ཏིང་ཏིང་ལང་ལང་ལིང་ལིང་ས་མ་ཡ་སརྦ་པཉྩ་པཱུ་ཙ་ཁཱ་ཧི་ཁཱ་ཧི༔ ཅེས་བརྗོད༔ བྲོ་ནི༔ ཧཱུྃ་བྷྱོ༔ མ་མོ་མཁའ་འགྲོའི་བྲོ་ར་བཙུགས་པའི་འོག༔ སྒབ་འདྲེ་འབྱུང་པོའི་ཚོགས་ནི་མནན་ནོ་རྒྱ༔ བདེ་བའི་ཡེ་ཤེས་རྒྱས་པ་ཁྱུགས་སེ་ཁྱུག༔ སྟོང་པའི་ཡེ་ཤེས་རྒྱས་པ་ཡ་ལ་ལ༔ བདེ་སྟོང་གཉིས་སུ་མེད་པ་ཁྲིགས་སེ་ཁྲིག༔ ཧཱུྃ་ཧཱུྃ་ལཾ་ལཾ་བྷནྡྷ་ཡ་བྷནྡྷ་ཡ་མཱ་ར་ཡ་ཧཱུྃ་ཕཊ༔ ཅེས་བརྗོད་བདེ་བའི་ཉམས་སྐྱོང་ངོ་༔ ས་མ་ཡཱ༔ རྒྱ་རྒྱ་རྒྱ༔ གཏེར་རྒྱ༔ སྦས་རྒྱ༔ གཏད་རྒྱ༔ ཟབ་རྒྱ༔ ས་མ་ཡ༔ རྒྱ་རྒྱ་རྒྱ༔ རིག་འཛིན་ཉི་མ་གྲགས་པས་གནས་མཆོག་ཧ་ཙོ་ནས་གདན་དྲངས་པའོ། །མངྒ་ལཾ།། །།

བསྐང་མདོས་རྐྱེན་ངན་ཀུན་སེལ།

སྔགས་བདག་འབར་མའི་ཐུགས་ཐིག་ལས༔ བསྐང་མདོས་རྐྱེན་ངན་ཀུན་སེལ་བཞུགས༔ རྦོད་གཏོང་མ་མོའི་ལྷ་ལ་འདུད༔ མ་འོངས་དུས་ཀྱི་སྙིགས་མ་ལ༔ མི་དགེ་བཅུ་ཡི་སྟོབས་རྒྱས་པས༔ མི་རུང་སྣ་དགུ་འབྱུང་བའི་ཚེ༔ རྣལ་འབྱོར་བར་ཆད་རྐྱེན་ཟློག་དང་༔ མ་མོས་འཁུ་ལྡོག་སེལ་བའི་ཕྱིར༔ བསྐང་བའི་རིམ་པ་བསྟན་པར་བྱ༔ ས་མ་ཡཱ༔ རྒྱ་རྒྱ་རྒྱ༔ དུར་ཁྲོད་ལ་སོགས་དབེན་གནས་སུ༔ མནྜལ་དུག་ཁྲག་རོ་སོལ་བྱུག༔ དབུས་སུ་གྲི་གུག་ལྟེ་བ་ལ༔ མ་ཡིག་མིག་ཏུ་བྷྱོ་འབྲི་ཞིང་༔ ཕྱི་རིམ་འཁོར་ལོ་རྩིབས་བདུན་བཅད༔ དྲེགས་པ་བདུན་གྱི་སྲོག་ཡིག་བཀོད༔ ཐོད་ར་དུར་ཁྲོད་བྲག་རི་དང་༔ པདྨ་རྡོ་རྗེ་མེ་རིས་བསྐོར༔ དུར་ཁྲོད་རྡོ་ཚོན་ཁ་དོག་བསྒྱུར༔ དབུས་སུ་མཉྫིའི་ཁྲིའུ་ཁར༔ ཁྲོ་ལྕགས་སམ་ནི་བྷནྡྷའི་སྣོད༔ འབྲུ་ནག་ཕྱེ་ལ་དཔལ་བཤོས་ནི༔ ཁྲུ་གང་མདའ་ཚད་མཐོ་གང་སོགས༔ སྐབས་ལྟར་བཅའ་ཞིང་བཤོས་ཕྲན་བདུན༔ འཁོར་དུ་བསྐོར་ཏེ་མཐེབ་སྐྱུ་དང་༔ ཤ་དུམ་ཅི་མང་ཐ་མར་བཏབ༔ ནལ་བུའི་རྒྱལ་མཚན་དབང་པོ་ལྔ༔ གློ་མཚེར་མཁལ་མ་རྒྱུ་མ་དང་༔ མཆིན་པ་ལོང་ཀ་མཁྲིས་པ་དང་༔ བྱ་ནག་ཟངས་མཆུ་འདབ་ཆགས་རིགས༔ ཟལ་དཀར་འབྲི་སོགས་དུད་འགྲོའི་རིགས༔ སྟག་སེང་དོམ་སོགས་གཅན་སྤྱང་རིགས༔ ཉ་སྦལ་དུང་སོགས་ཆུ་གནས་རིགས༔ གཅིག་བདུན་དགུ་སོགས་སྐབས་མཐུན་བྱ༔ ཕྱོགས་བཞི་མཚམས་བཞིར་མདུང་དར་དང་༔ ཉི་ཟླ་གཡས་གཡོན་ཤིང་བྱང་གཟུགས༔ རྩེ་ལ་ལྷ་མོའི་ཞལ་ནམ་མམ༔ ཡང་ན་གཏོར་མ་ཞལ་གཏོར་ལ༔ ཙིཏྟ་ཐུགས་ཀྱི་ནམ་མཁས་བརྒྱན༔ ཕྱོགས་བཞིར་ཕྱོགས་མདོག་མཚམས་བཞི་ལ༔ ནམ་མཁའ་ཕྱེད་མདོག་ལྡན་པ་ནི༔ གོང་གི་སོགས་དང་སྐབས་མཐུན་བསགས༔ ལྷ་གྲངས་ཙཀ་ལིས་གཏོར་མར་བརྒྱན༔ དར་ཚོན་རྣམ་ལྔའི་མདའ་དར་བཙུགས༔ སྨན་རག་མཆོད་ཚོགས་གྷ་ན་བཤམས༔ ལས་གཞུང་བསྲང་ཞིང་བསྐྱེད་རིམ་གསལ༔ སྔགས་འཁོར་སྤྲོ་བསྡུ་སྙིང་པོ་འདྲེན༔ བསྐང་མདོས་བྱིན་གྱིས་བརླབས་པ་ནི༔ སྨན་རག་སྦྲེང་ཞིང་འདི་སྐད་དོ༔ ཨཱོཾ་ཤྲཱི་བཛྲ་ཧེ་རུ་ཀཿརུ་ལུ་རུ་ལུ་ཧཱུྃ་བྷྱོ་ཧཱུྃ་ཕཊ༔ བདག་ཉིད་དཔལ་ཆེན་པོར་གསལ་བའི་ཐུགས་ཀ་ནས༔ ཨེ་མ་བྷྱོ་ཞེས་པའི་ཡིག་འབྲུ་རྣམས་མདུན་དུ་འཕྲོས་པ་ལས་ནམ་མཁའ་སྟོང་པའི་དབྱིངས་སུ་སྲ་བརྟན་རྡོ་རྗེ་རླུང་གི་དཀྱིལ་འཁོར་གྱི་སྟེང་དུ་ཁྲག་ཞག་གི་རྒྱ་མཚོ་འཁྲུག་པའི་དབུས་སུ་ཞིང་ཆེན་གྱི་ས་གཞི་བརྡལ་བའི་སྟེང་དུ་ཀེང་རུས་ཀྱི་རི་རབ་ཆེན་པོའི་རྩེར༔ ཕྱི་ཐོད་པའི་མཁར་ཟུར་གསུམ་པ་ལ་ནང་གནམ་ལྕགས་ཨུར་མོ་ལས་གྲུབ་པའི་ཕོ་བྲང་དུར་ཁྲོད་ཀྱི་ས་གཞི་ཆེན་པོ་མི་ཁྲག་དང་རྟ་ཁྲག་གི་ཞམ་ཆུ་འབབ་ཅིང་མི་རོ་དང་རྟ་རོ་འབུམ་ཁྲི་བརྡལ་བའི་དབུས་སུ་དུར་མེ་དམར་ནག་ཏུ་འབར་ཞིང་དུར་རླུང་ཁམ་ནག་ཏུ་འཚུབ་པའི་དཀྱིལ་དུ་ཉི་ཟླ་པདྨ་བམ་གྱི་སྟེང་དུ་ཏིི་ལས་སྐྱེས་པའི་བོང་བུ་དམར་ག་རླུང་ལྟར་མགྱོགས་ཤིང་གློག་ལྟར་མྱུར་བའི་སྟེང་དུ་ཁྲག་གི་ཆུ་རྒྱུན་འཁྲུག་པའི་མི་ལྤགས་ཀྱི་གཡང་གཞིས་བརྒྱན་པའི་ཁར་སྲིན་པོ་སྟོང་གི་ཡ་ཐོད་ཀྱི་སྔ་རུ་བྱས་ཤིང་མ་ཐོད་ཀྱི་ཕྱི་རུ་བྱས་པ་སྦྲུལ་དང་རྒྱུ་མའི་གོང་རྨེད་ལ་ནད་རྐྱལ་དང་མཚོན་དྲུ་སྙིང་དང་མགོ་བོ་རྣམས་ཀྱིས་བརྒྱན་པ་གཡུ་མཐུར་དང་གསེར་སྲབ་ཀྱི་མདོ་མཚམས་སུ་མིག་གི་འཕྲས་བརྒྱན་པ་རྣ་བར་དར་གྱི་འཕུར་ལྕེས་སྤྲས་པར་བསྐྱེད་པའི་སྟེང་དུ་དཔལ་ལྡན་ལྷ་མོ་ཆེན་མོ་སྐུ་མདོག་མཐིང་ནག་ཞལ་གཅིག་ཕྱག་གཉིས་ན་ཁ་ཊྭཱཾ་བ་དན་གྱིས་མཚན་པ་དང་ནད་རྐྱལ་ཐོགས་པ་ཞལ་གདངས་ཤིང་ལྗགས་འདྲིལ་བ་སྤྱན་གསུམ་དྲག་ཏུ་འགྲིལ་ཞིང་ཕྱོགས་བཅུར་གཟིགས་པ་སྐྲ་ཁམ་སེར་གྱེན་ཐུར་དུ་གཏིབ་ཅིང་ཐོད་ཕྲེང་དང་སྦྲུལ་གྱིས་བརྒྱན་པ་དུར་ཁྲོད་ཀྱི་ཆས་བརྒྱད་ཀྱིས་བརྒྱན་ཞིང་དཔའ་གཏུམ་འཁྲུག་པའི་ང་རོ་འབྲུག་ལྟར་སྒྲོག་པའི་སྤྱི་བོར་མི་བསྐྱོད་པས་དབུ་བརྒྱན་པར་བསྐྱེད༔ དེའི་ཕྱི་རོལ་དུ་མདུན་ནས་རིམ་བཞིན་རེ་ལས་བ་ལམ་དྲེལ་སྣ་མ་སྐུ་མདོག་ནག་མོ་མུན་པའི་མདོག་ཅན་ཞལ་གཅིག་ཕྱག་གཉིས་དྲག་ཏུ་ཁྲོས་པ་ཞལ་གདངས་ཤིང་ལྗགས་འགྲིལ་བ་མཆེ་བ་གཙིགས་ཤིང་སྤྱན་རབ་ཏུ་བགྲད་པ་གཡས་མདུང་དར་ནམ་མཁའ་ལ་འཕྱར་ཞིང་གཡོན་ཐུན་ཁྲག་བསྣམས་པ་ཆིབས་སུ་བོང་བུ་ཁ་དཀར་ལ་བཅིབས་པ༔ མ་ལས་སྟག་སྨན་གཟེར་འདེབས་མ་སྐུ་མདོག་ནག་མོ་དྲག་ཏུ་ཁྲོས་པའི་གཡས་མདུང་དར་དང་གཡོན་ཐུན་ཁྲག་བསྣམས་པ་ཆིབས་སུ་སྟག་མོ་གྲུས་མ་ལ་བཅིབས་པ༔ ཏི་ལས་ཁྲི་སྨན་སི་ལེ་མ་སྐུ་མདོག་ནག་མོ་ཤིན་ཏུ་ཁྲོས་པའི་གཡས་ནད་ཀྱི་རྐྱལ་པ་དང་གཡོན་ཐུན་ཁྲག་ཐོགས་པ་ཆིབས་སུ་བྱ་རོག་ནག་པོ་ལ་བཅིབས་ཤིང་སྐུ་ལ་རེ་ལྡེ་ནག་པོ་གསོལ་བ༔ མ་ལས་མ་མོ་རྡོ་རྗེ་བ་ལམ་མ་ཞལ་གཅིག་ནག་ལ་བརྔམ་ཞིང་ཁྲོས་པ་གཡས་རལ་གྲི་དང་གཡོན་ནེའུ་ལེ་བསྣམས་པ་དར་ནག་གི་གོས་ཟུང་དང་རེ་ལྡེ་མི་ལྤགས་གསོལ་བ་ཟླ་བས་དབུ་ལ་བརྒྱན་ཅིང་དྲེལ་རྟ་རྐང་གསུམ་ལ་ཆིབས་པ༔ ར་ལས་ཚངས་པ་དུང་གི་ཐོར་ཚུགས་ཅན་སྐུ་མདོག་དཀར་པོ་ཨམ་གཙིགས་བསྡམས་ཤིང་དར་དཀར་གྱི་འཇོལ་བེར་དང་དུང་རྨོག་གསོལ་བ་མདའ་གཞུ་འཁོར་གསུམ་བཏགས་ཤིང་གཡས་སྤུ་གྲི་ཟངས་ཡག་དང་གཡོན་ཞགས་པ་དམར་པོ་ཐོགས་ཤིང་དགྲ་བོའི་སྐེ་ནས་ཁྱི་བཞིན་འཁྲིད་པ་ཆིབས་སུ་སྟག་ཆེན་བརྔམ་པ་ལ་བཅིབས་པ༔ ཡ་ལས་ལས་ཀྱི་ག །ཤིན་རྗེ་བྷེ་ཝ་ས་ཏ་སྐུ་མདོག་ནག་པོ་ཞལ་གདངས་ཤིང་ལྗགས་འདྲིལ་བ་མཆེ་བ་གཙིགས་པ་སྤྱན་བགྲད་ཅིང་གཡང་གཞི་གྱོན་པ་ཐོད་པས་དབུ་ལ་བརྒྱན་ཞིང་གཡས་ཁྲམ་ཤིང་དང་གཡོན་མེ་ལོང་བསྣམས་པ་ཆིབས་སུ་ཆུ་གླང་ནག་པོ་ལ་བཅིབས་པ༔ ཛཿལས་བདུད་པོ་བྱེ་བ་དགུ་རིང་སྐུ་མདོག་ནག་པོ་ཐོད་སྐམ་གྱི་དབུར་བརྒྱན་ཞིང་མི་ལྤགས་གྱོན་པ་ཐོད་རློན་ཕྲེང་བས་དོ་ཤལ་བྱས་པ་གཡས་མདུང་དར་དཀར་པོ་དང་གཡོན་ཞགས་པ་ནག་པོས་དགྲ་བོ་འཁྲིད་པ་ཆིབས་སུ་བདུད་རྟ་ནག་པོ་ལ་བཅིབས་པ་མཆེ་བ་རབ་ཏུ་གཙིགས་ཤིང་ཤིན་ཏུ་ཁྲོས་པར་བསྒོམ༔ དེའི་ཕྱི་རོལ་དུ་ཡེ་ཤེས་དང་ལས་ལ་གྲུབ་པའི་མ་མོ་མཁའ་འགྲོ་ཁྲོ་གཏུམ་དྲག་རྩལ་དང་ལྡན་པ་བྱེ་བ་འབུམ་གྱི་ཚོགས་ནི་སྐར་ལྟར་དུ་འཁྲུག་ཅིང་རླུང་ལྟར་དུ་འཚུབས་པར་གསལ༔ ཧོཿམ་གཅིག་དཔལ་ལྡན་རྡོ་རྗེ་དྷཀྐི་མ་སྐུ་འཁོར་དང་བཅས་པ་དེ་རྣམས་ལ་མཆོད་པའི་རྫས་བརྟེན་པའི་རྫས་བསྐང་བའི་རྫས་སྨན་གཏོར་རཀྟ་ཀ་ཅ་དཀོར་ཆ་བྱ་ནག་ཁྱི་ནག་རྟ་ནག་གཡག་ནག་ལུག་ནག་ཉི་ཟླ་ནམ་མཁའ་དོམ་དྲེད་གཅན་སྤྱང་ཕྱི་ནང་གསང་གསུམ་གྱི་མཆོད་རྫས་འབུམ་ཕྲག་འབུམ་ཕྲག་དང་ལྡན་པ་ལས་འོད་ཟེར་བྱེ་བ་བརྒྱ་སྟོང་དང་སྤྲུལ་སྒྱུར་སྣ་ཚོགས་གྱ་གྱུ་ལང་ལིང་དུ་འགྱེད་པར་གྱུར༔ བདག་ཉིད་དཔལ་ཆེན་པོར་གསལ་བའི་ཐུགས་ཀ་ནས་འོད་ཟེར་དམར་པོ་ལྕགས་ཀྱུའི་རྣམ་པ་ཅན་འབུམ་ཕྲག་དུ་མ་འཕྲོས་པས་ཆོས་ཀྱི་དབྱིངས་དང་གནས་ཡུལ་དུར་ཁྲོད་ཆེན་པོ་ཚནྡྷོ་ཧ་རྣམས་ན་བཞུགས་པའི་བླ་མ་ཡི་དམ་དཔའ་བོ་མཁའ་འགྲོ་དམ་པ་ཡེ་ཤེས་བསྟན་བསྲུང་རྒྱ་མཚོའི་འཁོར་དང་བཅས་པ་རྣམས་དང་༔ ཁྱད་པར་དུ་བྱང་ཤར་མཁའ་འགྲོའི་དུར་ཁྲོད་ཆེན་པོ་ནས་མ་མོ་མཁའ་འགྲོ་ཀུན་གྱི་དབང་ཕྱུག་མ་དཔལ་གྱི་ལྷ་མོ་སྐུ་འཁོར་དང་བཅས་པ་བྱ་ཆེན་ཐད་ལ་ལྷགས་པ་ལྟར་བཛྲ་ས་མ་ཡཱ་ཛཿཛཿ རོལ་མོ་རྣམས་འཁྲོལ་ཞིང་རྐང་གླིང་དང་གསུར་ཆེན་བཤུད་པས་མཚོན་ཏེ་འདི་སྐད་དོ༔ ཧཱུྃ༔ འོག་མིན་ཆོས་དབྱིངས་ཕོ་བྲང་དང་༔ ཉེར་བཞིའི་གནས་ཡུལ་དུར་ཁྲོད་ནས༔ ཕྱོགས་བཅུ་དུས་བཞིའི་བཅོམ་ལྡན་འདས༔ བླ་མ་ཡི་དམ་མཁའ་འགྲོ་དང་༔ བསྟན་སྲུང་དམ་ཅན་རྒྱ་མཚོའི་ཚོགས༔ བསྐང་བའི་གནས་འདིར་གཤེགས་སུ་གསོལ༔ ཧཱུྃ་བྷྱོ༔ རྒྱ་མཚོ་ཆེན་པོའི་ཕ་རོལ་ནས༔ ཡོངས་འདུ་ཤིང་གི་རྩ་བ་ནས༔ མུ་ལེ་མཐིང་མཚོའི་གཞལ་ཡས་ནས༔ མེ་རླུང་འཚུབ་པའི་ད་ལ་ནས༔ ཐོད་མཁར་འབར་བའི་ཕོ་བྲང་ནས༔ མ་མོ་མཁའ་འགྲོ་ཀུན་གྱི་རྗེ༔ དཔལ་ལྡན་ལྷ་མོ་གཤེགས་སུ་གསོལ༔ དམག་གི་རྒྱལ་མོ་གཤེགས་སུ་གསོལ༔ འདོད་ཁམས་གཙོ་མོ་གཤེགས་སུ་གསོལ༔ དགྲ་ལྷའི་རྒྱལ་མོ་གཤེགས་སུ་གསོལ༔ བདུད་མོ་ཆེན་མོ་གཤེགས་སུ་གསོལ༔ སྔགས་ཀྱི་སྲུང་མ་གཤེགས་སུ་གསོལ༔ འབར་མ་ཆེན་མོ་གཤེགས་སུ་གསོལ༔ མིང་བརྒྱ་མ་ལ་མཚན་སྟོང་མ༔ ལྷ་མོ་ཀུན་གྱི་སྒྱུ་འཕྲུལ་མ༔ བསྐང་བའི་གནས་འདིར་གཤེགས་སུ་གསོལ༔ རིགས་བདག་ཁྲག་འཐུང་ཡབ་ཡུམ་ལ༔ རྒྱལ་བ་རྒྱ་མཚོའི་འཁོར་དང་བཅས༔ བསྐང་བའི་གནས་འདིར་གཤེགས་སུ་གསོལ༔ མ་མོ་བ་ལམ་དྲེལ་སྣ་མ༔ མུན་པའི་མདོག་ཅན་འབུམ་གྱིས་བསྐོར༔ བསྐང་བའི་གནས་འདིར་གཤེགས་སུ་གསོལ༔ སྟག་སྨན་ཆེན་མོ་གཟེར་འདེབས་མ༔ ནག་མོ་ཆེན་མོ་འབུམ་གྱིས་བསྐོར༔ བསྐང་བའི་གནས་འདིར་གཤེགས་སུ་གསོལ༔ ཁྲི་སྨན་ཆེན་མོ་སི་ལེ་མ༔ ཆར་སྤྲིན་གཏིབས་འདྲ་འབུམ་གྱིས་བསྐོར༔ བསྐང་བའི་གནས་འདིར་གཤེགས་སུ་གསོལ༔ མ་མོ་རྡོ་རྗེ་བ་ལམ་མ༔ རབ་ཁྲོས་ནག་མོ་འབུམ་གྱིས་བསྐོར༔ བསྐང་བའི་གནས་འདིར་གཤེགས་སུ་གསོལ༔ ཚངས་པ་དུང་གི་ཐོར་ཚུགས་ཅན༔ རྒྱལ་པོ་འབུམ་གྱི་འཁོར་གྱིས་བསྐོར༔ བསྐང་བའི་གནས་འདིར་གཤེགས་སུ་གསོལ༔ གཤིན་རྗེ་བྷེ་ཝ་ས་ཏ་ལ༔ གཤིན་རྗེ་འབུམ་གྱི་འཁོར་གྱིས་བསྐོར༔ བསྐང་བའི་གནས་འདིར་གཤེགས་སུ་གསོལ༔ བདུད་པོ་བྱེ་བ་དགུ་རིང་ལ༔ བདུད་དམག་འབུམ་གྱི་འཁོར་གྱིས་བསྐོར༔ བསྐང་བའི་གནས་འདིར་གཤེགས་སུ་གསོལ༔ བཀའ་ཉན་ལྷ་སྲིན་སྡེ་བརྒྱད་ལ༔ རང་རང་སྤྲུལ་པ་འབུམ་གྱིས་བསྐོར༔ བསྐང་བའི་གནས་འདིར་གཤེགས་སུ་གསོལ༔ བདུད་མོ་བཞི་སོགས་བསྟན་མ་ལ༔ བསྟན་མ་སྐྱོང་མཛད་འབུམ་གྱིས་བསྐོར༔ བསྐང་བའི་གནས་འདིར་གཤེགས་སུ་གསོལ༔ དུར་ཁྲོད་འབར་བའི་ཕོ་བྲང་འདིར༔ དཔལ་ལྡན་ལྷ་མོ་སྔགས་སྲུང་མ༔ མ་ལུས་འཁོར་བཅས་བཞུགས་སུ་གསོལ༔ གུས་པའི་ཡིད་ཀྱིས་ཕྱག་འཚལ་མཆོད༔ རྒྱལ་བ་རྣམས་ཀྱིས་བསྔགས་པ་ལྟར༔ ལྷ་མོ་ཁྱོད་ལ་བསྟོད་པར་བགྱིད༔ ཧཱུྃ་བྷྱོ༔ མ་གཅིག་དཔལ་ལྡན་མཁའ་འགྲོ་མ༔ ཞལ་གཅིག་མཐིང་ནག་འོད་དུ་འབར༔ སྤྱན་གསུམ་སྒྲིལ་ཞིང་དྲག་ཏུ་གཟིགས༔ རེ་ལྡེ་མི་ལྤགས་སྟག་ཤམ་གསོལ༔ ཞལ་གདངས་ལྗགས་འདྲིིལ་མཆེ་བ་གཙིགས༔ ཤ་ཆེན་བམ་ལ་ཀྲུམ་ཀྲུམ་རོལ༔ རལ་པ་ཁམ་ནག་གྱེན་ཐུར་གཏིབས༔ དར་གྱི་ཅོད་པན་པུ་རུ་རུ༔ གསེར་གཡུ་མུ་ཏིག་སིལ་ལི་ལི༔ ཐོད་སྐམ་འབར་བའི་རྩེ་བྲན་ཅན༔ རྨ་བྱའི་མདོངས་ཕོད་ཡ་ལ་ལ༔ སྙན་ནས་སྦྲུལ་དང་སེང་གེ་འགྱེད༔ གཡས་པས་རྩེ་གསུམ་ནམ་མཁར་འཕྱར༔ བ་དན་ནག་པོས་བར་སྣང་ཁྱབ༔ གཡོན་པས་ནད་ཀྱི་རྐྱལ་པ་བསྣམས༔ སྲིད་གསུམ་ཀུན་ཀྱང་ནད་ཀྱིས་འགེངས༔ སྦྲུལ་དང་ཐོད་པའི་ཕྲེང་བས་བརྒྱན༔ སྤྱི་བོའི་གཙུག་ན་ཟླ་བས་བརྒྱན༔ ལྟེ་བའི་དཀྱིལ་ནས་ཉི་མ་འཆར༔ ནད་མཚོན་དུག་རླངས་བུ་ཡུག་འཐིབ༔ རྒྱ་བོང་དམར་གའི་ཁྲི་སྟེང་ན༔ འགྱིང་བག་སྟབས་ཀྱིས་བཞུགས་པའི་མ༔ དོ་ནུབ་ཁྱེད་ཀྱིས་ཐུགས་དམ་བསྐང་༔ དམར་ཆེན་གཏོར་མས་ཐུགས་དམ་བསྐང་༔ རཀྟ་དམར་གྱི་ཐུགས་དམ་བསྐང་༔ བདུད་རྩི་སྨན་གྱིས་ཐུགས་དམ་བསྐང་༔ བམ་ཆེན་རྒྱལ་མཚན་མང་པོས་ཐུགས་དམ་བསྐང་༔ ནམ་མཁའ་ཉི་ཟླ་མང་པོས་ཐུགས་དམ་བསྐང་༔ མདའ་དར་མདུང་དར་མང་པོས་ཐུགས་དམ་བསྐང་༔ མཁའ་ལྡིང་འདབ་ཆགས་མང་པོས་ཐུགས་དམ་བསྐང་༔ སྟག་སེང་གཅན་སྤྱང་མང་པོས་ཐུགས་དམ་བསྐང་༔ རྟ་གླང་དུད་འགྲོ་མང་པོས་ཐུགས་དམ་བསྐང་༔ རི་གནས་ཆུ་གནས་མང་པོས་ཐུགས་དམ་བསྐང་༔ ཆུ་སྣ་རྒྱ་མཚོ་མང་པོས་ཐུགས་དམ་བསྐང་༔ སྟོང་གསུམ་རི་རབ་གླིང་བཞིས་ཐུགས་དམ་བསྐང་༔ ནང་བཅུད་སྐྱེ་འགྲོ་མང་པོས་ཐུགས་དམ་བསྐང་༔ རིན་ཆེན་རྣམ་པ་མང་པོས་ཐུགས་དམ་བསྐང་༔ བདག་ཏུ་བཟུང་བའི་ཀ་ཅས་ཐུགས་དམ་བསྐང་༔ ཚུལ་བཞིན་བསྒྲུབ་པའི་དཀོར་ཆས་ཐུགས་དམ་བསྐང་༔ བདག་མེད་གྲུབ་པའི་ནོར་གྱིས་ཐུགས་དམ་བསྐང་༔ དར་ཟབ་རས་གོས་ཤིང་བལ་ཐུགས་དམ་བསྐང་༔ ཤིང་ཐོག་སྨན་སྣ་མང་པོས་ཐུགས་དམ་བསྐང་༔ འབྲས་སྲན་འབྲུ་སྣ་མང་པོས་ཐུགས་དམ་བསྐང་༔ ཤ་ཆང་བཟའ་བཏུང་མང་པོས་ཐུགས་དམ་བསྐང་༔ སྒྲ་སྐད་རོལ་མོ་མང་པོས་ཐུགས་དམ་བསྐང་༔ གོ་མཚོན་སྤྱན་གཟིགས་མང་པོས་ཐུགས་དམ་བསྐང་༔ རྐང་གླིང་བཤུད་པ་མང་པོས་ཐུགས་དམ་བསྐང་༔ འདབ་ལྡན་མེ་ཏོག་མང་པོས་ཐུགས་དམ་བསྐང་༔ སྤོས་གསུར་དུད་སྤྲིན་མང་པོས་ཐུགས་དམ་བསྐང་༔ རྣམ་ལྔའི་དབང་པོ་མང་པོས་ཐུགས་དམ་བསྐང་༔ ཤ་ལྔ་བདུད་རྩི་ལྔ་ཡིས་ཐུགས་དམ་བསྐང་༔ འཕྱར་དར་གཡབ་དར་མང་པོས་ཐུགས་དམ་བསྐང་༔ དུག་ལྔ་དུག་གསུམ་རྣམས་ཀྱིས་ཐུགས་དམ་བསྐང་༔ མཁའ་ལྟར་ཁྱབ་པའི་ལྟ་བས་ཐུགས་དམ་བསྐང་༔ ཉི་ལྟར་གསལ་བའི་སྒོམ་པས་ཐུགས་དམ་བསྐང་༔ བླང་དོར་བྲལ་བའི་སྤྱོད་པས་ཐུགས་དམ་བསྐང་༔ རེ་དོགས་མེད་པའི་འབྲས་བུས་ཐུགས་དམ་བསྐང་༔ ཧཱུྃ་བྷྱོཁྱད་པར་མཆོག་གི་བསྐང་བའི་དམ་རྫས་ནི༔ རྟ་ནག་སྙིང་གི་མཆོད་པས་ཐུགས་དམ་བསྐང་༔ སྒྲུབ་ལ་འཁུ་ལྡོག་མེད་པའི་དངོས་གྲུབ་སྩོལ༔ ལུག་ནག་སྙིང་གི་མཆོད་པས་ཐུགས་དམ་བསྐང་༔ བུ་ཚ་རིགས་བརྒྱུད་འཕེལ་བའི་དངོས་གྲུབ་སྩོལ༔ ཁྱི་དཀར་སྙིང་གི་མཆོད་པས་ཐུགས་དམ་བསྐང་༔ འཁོར་འབངས་བུ་སློབ་རྒྱས་པའི་དངོས་གྲུབ་སྩོལ༔ རྨ་བྱའི་རྒྱལ་མཚན་བཙུགས་པས་ཐུགས་དམ་བསྐང་༔ ཚེ་ལ་བར་ཆད་མེད་པའི་དངོས་གྲུབ་སྩོལ༔ བྱི་ལ་ག་པའི་སྙིང་གིས་ཐུགས་དམ་བསྐང་༔ སྒྲུབ་པའི་མཚན་རྟགས་སྟོན་པའི་དངོས་གྲུབ་སྩོལ༔ བོང་བུ་ནག་པོའི་སྙིང་གིས་ཐུགས་དམ་བསྐང་༔ གཟུང་མར་བདེ་སྐྱིད་ལྡན་པའི་དངོས་གྲུབ་སྩོལ༔ བཀའ་ལོག་གྲིར་ཤིའི་སྙིང་གིས་ཐུགས་དམ་བསྐང་༔ བཅོལ་བའི་ལས་རྣམས་གྲུབ་པའི་དངོས་གྲུབ་སྩོལ༔ ཧཱུྃ་བྷྱོ༔ སྤྱི་གཙུག་སྟེང་གི་ནམ་མཁའ་ནས༔ ཡང་དག་དཔལ་ཆེན་རིགས་ཀྱི་བདག༔ རྩ་གསུམ་བརྒྱུད་པའི་བླ་མས་བསྐོར༔ བསྐང་ངོ་མཆོད་དོ་ཐུགས་དམ་བསྐང་༔ དཔལ་གྱི་གཏོར་མས་ཐུགས་དམ་བསྐང་༔ བདུད་རྩི་སྨན་གྱིས་ཐུགས་དམ་བསྐང་༔ རཀྟ་དམར་གྱིས་ཐུགས་དམ་བསྐང་༔ བཟའ་བཏུང་མཆོད་པས་ཐུགས་དམ་བསྐང་༔ ཞལ་ཟས་ཚོགས་ཀྱིས་ཐུགས་དམ་བསྐང་༔ ཕྱི་ནང་གསང་མཆོད་ཐུགས་དམ་བསྐང་༔ ཧཱུྃ་བྷྱོ༔ ཁྱད་པར་མཆོག་གི་བསྐང་རྫས་ནི༔ མི་ལྤགས་གཡང་གཞིས་ཐུགས་དམ་བསྐང་༔ ཐོད་ཕྲེང་མི་མགོས་ཐུགས་དམ་བསྐང་༔ སྟག་གཟིག་ལྤགས་པས་ཐུགས་དམ་བསྐང་༔ ཐལ་ཆེན་ཚོམ་བུས་ཐུགས་དམ་བསྐང་༔ རཀྟའི་ཐིག་ལེས་ཐུགས་དམ་བསྐང་༔ སོར་རིས་ཞག་གིས་ཐུགས་དམ་བསྐང་༔ སེང་གླང་ལྤགས་པས་ཐུགས་དམ་བསྐང་༔ རུས་རྒྱན་རཏྣས་ཐུགས་དམ་བསྐང་༔ ཅོད་པན་དར་གྱིས་ཐུགས་དམ་བསྐང་༔ པདྨ་ཉི་ཟླས་ཐུགས་དམ་བསྐང་༔ དབུགས་བྲལ་ཕོ་མོས་ཐུགས་དམ་བསྐང་༔ བསྐལ་མེ་འབར་བས་ཐུགས་དམ་བསྐང་༔ གྲི་ཐོད་ཕྱག་ཆས་ཐུགས་དམ་བསྐང་༔ ཐུགས་དམ་བསྐང་ལ་དངོས་གྲུབ་སྩོལ༔ ཉམས་ཆག་སྡིག་སྒྲིབ་མཐོལ་ལོ་བཤགས༔ སོ་ཐར་ཕྱི་ཡི་སྡོམ་པ་དང་༔ བྱང་ཆུབ་སེམས་ཀྱི་བསླབ་པ་དང་༔ གསང་བ་སྔགས་ཀྱི་དམ་ཚིག་ལས༔ འགལ་གྱུར་ཉམས་ཆག་གནང་ངོ་འགྱོད༔ ཚངས་པ་མཆོག་གི་དངོས་གྲུབ་སྩོལ༔ ཧཱུྃ་བྷྱོ༔ མ་གཅིག་སྐུ་ཡི་དཀྱིལ་འཁོར་ནས༔ སྐུ་ལས་སྤྲུལ་པའི་དྷཀྐི་མ༔ བ་ལམ་དྲེལ་སྣ་བོང་བུ་ཆིབས༔ རབ་ཁྲོས་མདུང་དར་ཐོད་ཁྲག་ཅན༔ མུན་པའི་མདོག་ཅན་འབུམ་འབུམ་བསྐོར༔ དོ་ནུབ་ཁྱེད་ཀྱི་ཐུགས་དམ་བསྐང་༔ དམར་ཆེན་གཏོར་མས་ཐུགས་དམ་བསྐང་༔ རཀྟ་དམར་གྱིས་ཐུགས་དམ་བསྐང་༔ བདུད་རྩི་སྨན་གྱིས་ཐུགས་དམ་བསྐང་༔ བམ་ཆེན་རྒྱལ་མཚན་མང་པོས་ཐུགས་དམ་བསྐང་༔ ནམ་མཁའ་ཉི་ཟླ་མང་པོས་ཐུགས་དམ་བསྐང་༔ མདའ་དར་མདུང་དར་མང་པོས་ཐུགས་དམ་བསྐང་༔ མཁའ་ལྡིང་འདབ་ཆགས་མང་པོས་ཐུགས་དམ་བསྐང་༔ སྟག་སེང་གཅན་སྤྱང་མང་པོས་ཐུགས་དམ་བསྐང་༔ རྟ་གླང་དུད་འགྲོ་མང་པོས་ཐུགས་དམ་བསྐང་༔ རི་གནས་ཆུ་གནས་མང་པོས་ཐུགས་དམ་བསྐང་༔ ཆུ་སྣ་རྒྱ་མཚོ་མང་པོས་ཐུགས་དམ་བསྐང་༔ སྟོང་གསུམ་རི་རབ་གླིང་བཞིས་ཐུགས་དམ་བསྐང་༔ ནང་བཅུད་སྐྱེ་འགྲོ་མང་པོས་ཐུགས་དམ་བསྐང་༔ རིན་ཆེན་རྣམ་པ་མང་པོས་ཐུགས་དམ་བསྐང་༔ བདག་ཏུ་བཟུང་བའི་ཀ་ཅས་ཐུགས་དམ་བསྐང་༔ ཚུལ་བཞིན་བསྒྲུབ་པའི་དཀོར་ཆས་ཐུགས་དམ་བསྐང་༔ བདག་མེད་གྲུབ་པའི་ནོར་གྱིས་ཐུགས་དམ་བསྐང་༔ དར་ཟབ་རས་གོས་ཤིང་བལ་ཐུགས་དམ་བསྐང་༔ ཤིང་ཐོག་སྨན་སྣ་མང་པོས་ཐུགས་དམ་བསྐང་༔ འབྲས་སྲན་འབྲུ་སྣ་མང་པོས་ཐུགས་དམ་བསྐང་༔ ཤ་ཆང་བཟའ་བཏུང་མང་པོས་ཐུགས་དམ་བསྐང་༔ སྒྲ་སྐད་རོལ་མོ་མང་པོས་ཐུགས་དམ་བསྐང་༔ གོ་མཚོན་སྤྱན་གཟིགས་མང་པོས་ཐུགས་དམ་བསྐང་༔ རྐང་གླིང་བཤུད་པ་མང་པོས་ཐུགས་དམ་བསྐང་༔ འདབ་ལྡན་མེ་ཏོག་མང་པོས་ཐུགས་དམ་བསྐང་༔ སྤོས་གསུར་དུད་སྤྲིན་མང་པོས་ཐུགས་དམ་བསྐང་༔ རྣམ་ལྔའི་དབང་པོ་མང་པོས་ཐུགས་དམ་བསྐང་༔ ཤ་ལྔ་བདུད་རྩི་ལྔ་ཡིས་ཐུགས་དམ་བསྐང་༔ འཕྱར་དར་གཡབ་དར་མང་པོས་ཐུགས་དམ་བསྐང་༔ དུག་ལྔ་དུག་གསུམ་རྣམས་ཀྱིས་ཐུགས་དམ་བསྐང་༔ མཁའ་ལྟར་ཁྱབ་པའི་ལྟ་བས་ཐུགས་དམ་བསྐང་༔ ཉི་ལྟར་གསལ་བའི་སྒོམ་པས་ཐུགས་དམ་བསྐང་༔ བླང་དོར་བྲལ་བའི་སྤྱོད་པས་ཐུགས་དམ་བསྐང་༔ རེ་དོགས་མེད་པའི་འབྲས་བུས་ཐུགས་དམ་བསྐང་༔ ཧཱུྃ་བྷྱོ༔ ཁྱད་པར་ཐུགས་དམ་བསྐང་བ་ནི༔ མདུང་དར་ནག་པོ་འབུམ་གྱིས་ཐུགས་དམ་བསྐང་༔ དམར་ཆེན་ཐོད་ཁྲག་མང་པོས་ཐུགས་དམ་བསྐང་༔ རྒྱ་བོང་ཁ་དཀར་མང་པོས་ཐུགས་དམ་བསྐང་༔ ཐོད་སྐམ་རྩེ་བྲན་ཕྲེང་བས་ཐུགས་དམ་བསྐང་༔ ནལ་བུའི་ཤ་སྣ་སྟོང་གིས་ཐུགས་དམ་བསྐང་༔ ནལ་བུའི་ཁྲག་སྣ་སྟོང་གིས་ཐུགས་དམ་བསྐང་༔ གློ་མཆིན་དོན་སྣོད་རྣམ་ལྔས་ཐུགས་དམ་བསྐང་༔ ཐུགས་དམ་བསྐང་ལ་རྐྱེན་ངན་བར་ཆད་ཟློག༔ ཧཱུྃ་བྷྱོ༔ མ་གཅིག་གསུང་གི་དཀྱིལ་འཁོར་ནས༔ གསུང་ལས་སྤྲུལ་པའི་དྷཀྐི་མ༔ སྟག་སྨན་གཟེར་འདེབས་སྟག་མོ་ཆིབས༔ རབ་ཁྲོས་མདུང་དར་ཐོད་ཁྲག་བསྣམས༔ ནག་མོ་འབུམ་འབུམ་འཁོར་དང་བཅས༔ དོ་ནུབ་ཁྱེད་ཀྱི་ཐུགས་དམ་བསྐང་༔ དམར་ཆེན་གཏོར་མས་ཐུགས་དམ་བསྐང་༔ རཀྟ་དམར་གྱི་ཐུགས་དམ་བསྐང་༔ བདུད་རྩི་སྨན་གྱིས་ཐུགས་དམ་བསྐང་༔ བམ་ཆེན་རྒྱལ་མཚན་མང་པོས་ཐུགས་དམ་བསྐང་༔ ནམ་མཁའ་ཉི་ཟླ་མང་པོས་ཐུགས་དམ་བསྐང་༔ མདའ་དར་མདུང་དར་མང་པོས་ཐུགས་དམ་བསྐང་༔ མཁའ་ལྡིང་འདབ་ཆགས་མང་པོས་ཐུགས་དམ་བསྐང་༔ སྟག་སེང་གཅན་སྤྱང་མང་པོས་ཐུགས་དམ་བསྐང་༔ རྟ་གླང་དུད་འགྲོ་མང་པོས་ཐུགས་དམ་བསྐང་༔ རི་གནས་ཆུ་གནས་མང་པོས་ཐུགས་དམ་བསྐང་༔ ཆུ་སྣ་རྒྱ་མཚོ་མང་པོས་ཐུགས་དམ་བསྐང་༔ སྟོང་གསུམ་རི་རབ་གླིང་བཞིས་ཐུགས་དམ་བསྐང་༔ ནང་བཅུད་སྐྱེ་འགྲོ་མང་པོས་ཐུགས་དམ་བསྐང་༔ རིན་ཆེན་རྣམ་པ་མང་པོས་ཐུགས་དམ་བསྐང་༔ བདག་ཏུ་བཟུང་བའི་ཀ་ཅས་ཐུགས་དམ་བསྐང་༔ ཚུལ་བཞིན་བསྒྲུབ་པའི་དཀོར་ཆས་ཐུགས་དམ་བསྐང་༔ བདག་མེད་གྲུབ་པའི་ནོར་གྱིས་ཐུགས་དམ་བསྐང་༔ དར་ཟབ་རས་གོས་ཤིང་བལ་ཐུགས་དམ་བསྐང་༔ ཤིང་ཐོག་སྨན་སྣ་མང་པོས་ཐུགས་དམ་བསྐང་༔ འབྲས་སྲན་འབྲུ་སྣ་མང་པོས་ཐུགས་དམ་བསྐང་༔ ཤ་ཆང་བཟའ་བཏུང་མང་པོས་ཐུགས་དམ་བསྐང་༔ སྒྲ་སྐད་རོལ་མོ་མང་པོས་ཐུགས་དམ་བསྐང་༔ གོ་མཚོན་སྤྱན་གཟིགས་མང་པོས་ཐུགས་དམ་བསྐང་༔ རྐང་གླིང་བཤུད་པ་མང་པོས་ཐུགས་དམ་བསྐང་༔ འདབས་ལྡན་མེ་ཏོག་མང་པོས་ཐུགས་དམ་བསྐང་༔ སྤོས་གསུར་དུད་སྤྲིན་མང་པོས་ཐུགས་དམ་བསྐང་༔ རྣམ་ལྔའི་དབང་པོ་མང་པོས་ཐུགས་དམ་བསྐང་༔ ཤ་ལྔ་བདུད་རྩི་ལྔ་ཡིས་ཐུགས་དམ་བསྐང་༔ འཕྱར་དར་གཡབ་དར་མང་པོས་ཐུགས་དམ་བསྐང་༔ དུག་ལྔ་དུག་གསུམ་རྣམས་ཀྱིས་ཐུགས་དམ་བསྐང་༔ མཁའ་ལྟར་ཁྱབ་པའི་ལྟ་བས་ཐུགས་དམ་བསྐང་༔ ཉི་ལྟར་གསལ་བའི་སྒོམ་པས་ཐུགས་དམ་བསྐང་༔ བླང་དོར་བྲལ་བའི་སྤྱོད་པས་ཐུགས་དམ་བསྐང་༔ རེ་དོགས་མེད་པའི་འབྲས་བུས་ཐུགས་དམ་བསྐང་༔ ཧཱུྃ་བྷྱོ༔ ཁྱད་པར་ཐུགས་དམ་བསྐང་བ་ནི༔ དར་མདུང་ནག་པོ་འབུམ་གྱིས་ཐུགས་དམ་བསྐང་༔ དམར་ཆེན་རཀྟ་མང་པོས་ཐུགས་དམ་བསྐང་༔ སྟག་མོ་གྲུས་མ་མང་པོས་ཐུགས་དམ་བསྐང་༔ ཚེ་བདུད་བསྒྲལ་བའི་ཤ་སྣས་ཐུགས་དམ་བསྐང་༔ ཚེ་བདུད་བསྒྲལ་བའི་ཁྲག་སྣས་ཐུགས་དམ་བསྐང་༔ དོན་སྙིང་ནང་རོལ་མང་པོས་ཐུགས་དམ་བསྐང་༔ ཐུགས་དམ་བསྐང་ལ་ཚེ་དབང་དངོས་གྲུབ་སྩོལ༔ ཧཱུྃ་བྷྱོ༔ མ་གཅིག་ཐུགས་ཀྱི་དཀྱིལ་འཁོར་ནས༔ ཐུགས་ལས་སྤྲུལ་པའི་དྷཀྐི་མ༔ ཁྲི་སྨན་སི་ལེ་བྱ་རོག་ཆིབས༔ རབ་ཁྲོས་ནད་རྐྱལ་ཐོད་ཁྲག་ཅན༔ ཆར་སྤྲིན་མདོག་འདྲ་འབུམ་འབུམ་ལྡན༔ དོ་ནུབ་ཁྱེད་ཀྱི་ཐུགས་དམ་བསྐང་༔ དམར་ཆེན་གཏོར་མས་ཐུགས་དམ་བསྐང་༔ རཀྟ་དམར་གྱིས་ཐུགས་དམ་བསྐང་༔ བདུད་རྩི་སྨན་གྱིས་ཐུགས་དམ་བསྐང་༔ བམ་ཆེན་རྒྱལ་མཚན་མང་པོས་ཐུགས་དམ་བསྐང་༔ ནམ་མཁའ་ཉི་ཟླ་མང་པོས་ཐུགས་དམ་བསྐང་༔ མདའ་དར་མདུང་དར་མང་པོས་ཐུགས་དམ་བསྐང་༔ མཁའ་ལྡིང་འདབ་ཆགས་མང་པོས་ཐུགས་དམ་བསྐང་༔ སྟག་སེང་གཅན་སྤྱང་མང་པོས་ཐུགས་དམ་བསྐང་༔ རྟ་གླང་དུད་འགྲོ་མང་པོས་ཐུགས་དམ་བསྐང་༔ རི་གནས་ཆུ་གནས་མང་པོས་ཐུགས་དམ་བསྐང་༔ ཆུ་སྣ་རྒྱ་མཚོ་མང་པོས་ཐུགས་དམ་བསྐང་༔ སྟོང་གསུམ་རི་རབ་གླིང་བཞིས་ཐུགས་དམ་བསྐང་༔ ནང་བཅུད་སྐྱེ་འགྲོ་མང་པོས་ཐུགས་དམ་བསྐང་༔ རིན་ཆེན་རྣམ་པ་མང་པོས་ཐུགས་དམ་བསྐང་༔ བདག་ཏུ་བཟུང་བའི་ཀ་ཅས་ཐུགས་དམ་བསྐང་༔ ཚུལ་བཞིན་བསྒྲུབ་པའི་དཀོར་ཆས་ཐུགས་དམ་བསྐང་༔ བདག་མེད་གྲུབ་པའི་ནོར་གྱིས་ཐུགས་དམ་བསྐང་༔ དར་ཟབ་རས་གོས་ཤིང་བལ་ཐུགས་དམ་བསྐང་༔ ཤིང་ཐོག་སྨན་སྣ་མང་པོས་ཐུགས་དམ་བསྐང་༔ འབྲས་སྲན་འབྲུ་སྣ་མང་པོས་ཐུགས་དམ་བསྐང་༔ ཤ་ཆང་བཟའ་བཏུང་མང་པོས་ཐུགས་དམ་བསྐང་༔ སྒྲ་སྐད་རོལ་མོ་མང་པོས་ཐུགས་དམ་བསྐང་༔ གོ་མཚོན་སྤྱན་གཟིགས་མང་པོས་ཐུགས་དམ་བསྐང་༔ རྐང་གླིང་བཤུད་པ་མང་པོས་ཐུགས་དམ་བསྐང་༔ འདབ་ལྡན་མེ་ཏོག་མང་པོས་ཐུགས་དམ་བསྐང་༔ སྤོས་གསུར་དུད་སྤྲིན་མང་པོས་ཐུགས་དམ་བསྐང་༔ རྣམ་ལྔའི་དབང་པོ་མང་པོས་ཐུགས་དམ་བསྐང་༔ ཤ་ལྔ་བདུད་རྩི་ལྔ་ཡིས་ཐུགས་དམ་བསྐང་༔ འཕྱར་དར་གཡབ་དར་མང་པོས་ཐུགས་དམ་བསྐང་༔ དུག་ལྔ་དུག་གསུམ་རྣམས་ཀྱིས་ཐུགས་དམ་བསྐང་༔ མཁའ་ལྟར་ཁྱབ་པའི་ལྟ་བས་ཐུགས་དམ་བསྐང་༔ ཉི་ལྟར་གསལ་བའི་སྒོམ་པས་ཐུགས་དམ་བསྐང་༔ བླང་དོར་བྲལ་བའི་སྤྱོད་པས་ཐུགས་དམ་བསྐང་༔ རེ་དོགས་མེད་པའི་འབྲས་བུས་ཐུགས་དམ་བསྐང་༔ ཧཱུྃ་བྷྱོ༔ ཁྱད་པར་ཐུགས་དམ་བསྐང་བ་ནི༔ ནད་ཀྱི་རྐྱལ་བ་མང་པོས་ཐུགས་དམ་བསྐང་༔ དམེ་ཁྲག་གྲི་ཐོད་མང་པོས་ཐུགས་དམ་བསྐང་༔ བྱ་ནག་འདབ་ཆགས་མང་པོས་ཐུགས་དམ་བསྐང་༔ དབང་པོ་དོན་སྙིང་མང་པོས་ཐུགས་དམ་བསྐང་༔ ཐུགས་དམ་བསྐང་ལ་མཆོག་ཐུན་དངོས་གྲུབ་སྩོལ༔ ཧཱུྃ་བྷྱོ༔ མ་གཅིག་ཡོན་ཏན་དཀྱིལ་འཁོར་ནས༔ ཡོན་ཏན་སྤྲུལ་པའི་དྷཀྐི་མ༔ རྡོ་རྗེ་བ་ལམ་དྲེའུ་རྟ་ཆིབས༔ རབ་ཁྲོས་ནག་མོ་འབུམ་གྱིས་བསྐོར༔ དོ་ནུབ་ཁྱེད་ཀྱི་ཐུགས་དམ་བསྐང་༔ དམར་ཆེན་གཏོར་མས་ཐུགས་དམ་བསྐང་༔ རཀྟ་དམར་གྱིས་ཐུགས་དམ་བསྐང་༔ བདུད་རྩི་སྨན་གྱིས་ཐུགས་དམ་བསྐང་༔ བམ་ཆེན་རྒྱལ་མཚན་མང་པོས་ཐུགས་དམ་བསྐང་༔ ནམ་མཁའ་ཉི་ཟླ་མང་པོས་ཐུགས་དམ་བསྐང་༔ མདའ་དར་མདུང་དར་མང་པོས་ཐུགས་དམ་བསྐང་༔ མཁའ་ལྡིང་འདབ་ཆགས་མང་པོས་ཐུགས་དམ་བསྐང་༔ སྟག་སེང་གཅན་སྤྱང་མང་པོས་ཐུགས་དམ་བསྐང་༔ རྟ་གླང་དུད་འགྲོ་མང་པོས་ཐུགས་དམ་བསྐང་༔ རི་གནས་ཆུ་གནས་མང་པོས་ཐུགས་དམ་བསྐང་༔ ཆུ་སྣ་རྒྱ་མཚོ་མང་པོས་ཐུགས་དམ་བསྐང་༔ སྟོང་གསུམ་རི་རབ་གླིང་བཞིས་ཐུགས་དམ་བསྐང་༔ ནང་བཅུད་སྐྱེ་འགྲོ་མང་པོས་ཐུགས་དམ་བསྐང་༔ རིན་ཆེན་རྣམ་པ་མང་པོས་ཐུགས་དམ་བསྐང་༔ བདག་ཏུ་བཟུང་བའི་ཀ་ཅས་ཐུགས་དམ་བསྐང་༔ ཚུལ་བཞིན་བསྒྲུབ་པའི་དཀོར་ཆས་ཐུགས་དམ་བསྐང་༔ བདག་མེད་གྲུབ་པའི་ནོར་གྱིས་ཐུགས་དམ་བསྐང་༔ དར་ཟབ་རས་གོས་ཤིང་བལ་ཐུགས་དམ་བསྐང་༔ ཤིང་ཐོག་སྨན་སྣ་མང་པོས་ཐུགས་དམ་བསྐང་༔ འབྲས་སྲན་འབྲུ་སྣ་མང་པོས་ཐུགས་དམ་བསྐང་༔ ཤ་ཆང་བཟའ་བཏུང་མང་པོས་ཐུགས་དམ་བསྐང་༔ སྒྲ་སྐད་རོལ་མོ་མང་པོས་ཐུགས་དམ་བསྐང་༔ གོ་མཚོན་སྤྱན་གཟིགས་མང་པོས་ཐུགས་དམ་བསྐང་༔ རྐང་གླིང་བཤུད་པ་མང་པོས་ཐུགས་དམ་བསྐང་༔ འདབ་ལྡན་མེ་ཏོག་མང་པོས་ཐུགས་དམ་བསྐང་༔ སྤོས་གསུར་དུད་སྤྲིན་མང་པོས་ཐུགས་དམ་བསྐང་༔ རྣམ་ལྔའི་དབང་པོ་མང་པོས་ཐུགས་དམ་བསྐང་༔ ཤ་ལྔ་བདུད་རྩི་ལྔ་ཡིས་ཐུགས་དམ་བསྐང་༔ འཕྱར་དར་གཡབ་དར་མང་པོས་ཐུགས་དམ་བསྐང་༔ དུག་ལྔ་དུག་གསུམ་རྣམས་ཀྱིས་ཐུགས་དམ་བསྐང་༔ མཁའ་ལྟར་ཁྱབ་པའི་ལྟ་བས་ཐུགས་དམ་བསྐང་༔ ཉི་ལྟར་གསལ་བའི་སྒོམ་པས་ཐུགས་དམ་བསྐང་༔ བླང་དོར་བྲལ་བའི་སྤྱོད་པས་ཐུགས་དམ་བསྐང་༔ རེ་དོགས་མེད་པའི་འབྲས་བུས་ཐུགས་དམ་བསྐང་༔ ཧཱུྃ་བྷྱོ༔ ཁྱད་པར་ཐུགས་དམ་བསྐང་བ་ནི༔ ཆུ་ཤེལ་ཟླ་བ་མང་པོས་ཐུགས་དམ་བསྐང་༔ མི་ལྤགས་གཡང་གཞི་མང་པོས་ཐུགས་དམ་བསྐང་༔ དྲེའུ་རྟ་རྐང་གསུམ་མང་པོས་ཐུགས་དམ་བསྐང་༔ གནམ་ལྕགས་རལ་གྲི་མང་པོས་ཐུགས་དམ་བསྐང་༔ འདོད་འབྱུང་ནེའུ་ལེ་མང་པོས་ཐུགས་དམ་བསྐང་༔ དར་ནག་གོས་ཟུང་རེ་ལྡེས་ཐུགས་དམ་བསྐང་༔ ཐུགས་དམ་བསྐང་ལ་འདོད་འབྱུང་དངོས་གྲུབ་སྩོལ༔ ཧཱུྃ་བྷྱོ༔ མ་གཅིག་འཕྲིན་ལས་དཀྱིལ་འཁོར་ནས༔ འཕྲིན་ལས་སྤྲུལ་པའི་ཆོས་སྐྱོང་ནི༔ དུང་གི་ཐོར་ཚུགས་སྟག་ལ་ཆིབས༔ རབ་ཁྲོས་རྒྱལ་པོ་འབུམ་གྱིས་བསྐོར༔ དོ་ནུབ་ཁྱེད་ཀྱི་ཐུགས་དམ་བསྐང་༔ དམར་ཆེན་གཏོར་མས་ཐུགས་དམ་བསྐང་༔ རཀྟ་དམར་གྱིས་ཐུགས་དམ་བསྐང་༔ བདུད་རྩི་སྨན་གྱིས་ཐུགས་དམ་བསྐང་༔ བམ་ཆེན་རྒྱལ་མཚན་མང་པོས་ཐུགས་དམ་བསྐང་༔ ནམ་མཁའ་ཉི་ཟླ་མང་པོས་ཐུགས་དམ་བསྐང་༔ མདའ་དར་མདུང་དར་མང་པོས་ཐུགས་དམ་བསྐང་༔ མཁའ་ལྡིང་འདབ་ཆགས་མང་པོས་ཐུགས་དམ་བསྐང་༔ སྟག་སེང་གཅན་སྤྱང་མང་པོས་ཐུགས་དམ་བསྐང་༔ རྟ་གླང་དུད་འགྲོ་མང་པོས་ཐུགས་དམ་བསྐང་༔ རི་གནས་ཆུ་གནས་མང་པོས་ཐུགས་དམ་བསྐང་༔ ཆུ་སྣ་རྒྱ་མཚོ་མང་པོས་ཐུགས་དམ་བསྐང་༔ སྟོང་གསུམ་རི་རབ་གླིང་བཞིས་ཐུགས་དམ་བསྐང་༔ ནང་བཅུད་སྐྱེ་འགྲོ་མང་པོས་ཐུགས་དམ་བསྐང་༔ རིན་ཆེན་རྣམ་པ་མང་པོས་ཐུགས་དམ་བསྐང་༔ བདག་ཏུ་བཟུང་བའི་ཀ་ཅས་ཐུགས་དམ་བསྐང་༔ ཚུལ་བཞིན་བསྒྲུབ་པའི་དཀོར་ཆས་ཐུགས་དམ་བསྐང་༔ བདག་མེད་གྲུབ་པའི་ནོར་གྱིས་ཐུགས་དམ་བསྐང་༔ དར་ཟབ་རས་གོས་ཤིང་བལ་ཐུགས་དམ་བསྐང་༔ ཤིང་ཐོག་སྨན་སྣ་མང་པོས་ཐུགས་དམ་བསྐང་༔ འབྲས་སྲན་འབྲུ་སྣ་མང་པོས་ཐུགས་དམ་བསྐང་༔ ཤ་ཆང་བཟའ་བཏུང་མང་པོས་ཐུགས་དམ་བསྐང་༔ སྒྲ་སྐད་རོལ་མོ་མང་པོས་ཐུགས་དམ་བསྐང་༔ གོ་མཚོན་སྤྱན་གཟིགས་མང་པོས་ཐུགས་དམ་བསྐང་༔ རྐང་གླིང་བཤུད་པ་མང་པོས་ཐུགས་དམ་བསྐང་༔ འདབ་ལྡན་མེ་ཏོག་མང་པོས་ཐུགས་དམ་བསྐང་༔ སྤོས་གསུར་དུད་སྤྲིན་མང་པོས་ཐུགས་དམ་བསྐང་༔ རྣམ་ལྔའི་དབང་པོ་མང་པོས་ཐུགས་དམ་བསྐང་༔ ཤ་ལྔ་བདུད་རྩི་ལྔ་ཡིས་ཐུགས་དམ་བསྐང་༔ འཕྱར་དར་གཡབ་དར་མང་པོས་ཐུགས་དམ་བསྐང་༔ དུག་ལྔ་དུག་གསུམ་རྣམས་ཀྱིས་ཐུགས་དམ་བསྐང་༔ མཁའ་ལྟར་ཁྱབ་པའི་ལྟ་བས་ཐུགས་དམ་བསྐང་༔ ཉི་ལྟར་གསལ་བའི་སྒོམ་པས་ཐུགས་དམ་བསྐང་༔ བླང་དོར་བྲལ་བའི་སྤྱོད་པས་ཐུགས་དམ་བསྐང་༔ རེ་དོགས་མེད་པའི་འབྲས་བུས་ཐུགས་དམ་བསྐང་༔ ཧཱུྃ་བྷྱོ༔ ཁྱད་པར་ཐུགས་དམ་བསྐང་བ་ནི༔ དར་དཀར་གོས་ཟུང་མང་པོས་ཐུགས་དམ་བསྐང་༔ འཁོར་གསུམ་གོ་མཚོན་མང་པོས་ཐུགས་དམ་བསྐང་༔ སྤུ་གྲི་ཟངས་ཡག་མང་པོས་ཐུགས་དམ་བསྐང་༔ བདུད་ཞགས་དམར་ནག་མང་པོས་ཐུགས་དམ་བསྐང་༔ དུང་གི་རྨོག་ཞུ་མང་པོས་ཐུགས་དམ་བསྐང་༔ སྟག་ཆེན་བརྔམ་པ་མང་པོས་ཐུགས་དམ་བསྐང་༔ དགྲ་བགེགས་བསྒྲལ་བའི་སྙིང་གིས་ཐུགས་དམ་བསྐང་༔ དགྲ་བགེགས་བསྒྲལ་བའི་ཤ་སྣས་ཐུགས་དམ་བསྐང་༔ ཐུགས་དམ་བསྐང་ལ་དགྲ་བགེགས་ཐམས་ཅད་སྒྲོལ༔ ཧཱུྃ་བྷྱོ༔ མ་གཅིག་གཉིས་མེད་ད་ལ་ནས༔ གཉིས་མེད་སྤྲུལ་པའི་གཤིན་རྗེ་ནི༔ བྷེ་བ་ས་ཏ་ཆུ་གླང་ཆིབས༔ རབ་ཁྲོས་ཁྲམ་ཤིང་མེ་ལོང་ཅན༔ གཤིན་རྗེ་ནག་པོ་འབུམ་འབུམ་བསྐོར༔ དོ་ནུབ་ཁྱེད་ཀྱི་ཐུགས་དམ་བསྐང་༔ དམར་ཆེན་གཏོར་མས་ཐུགས་དམ་བསྐང་༔ རཀྟ་དམར་གྱིས་ཐུགས་དམ་བསྐང་༔ བདུད་རྩི་སྨན་གྱིས་ཐུགས་དམ་བསྐང་༔ བམ་ཆེན་རྒྱལ་མཚན་མང་པོས་ཐུགས་དམ་བསྐང་༔ ནམ་མཁའ་ཉི་ཟླ་མང་པོས་ཐུགས་དམ་བསྐང་༔ མདའ་དར་མདུང་དར་མང་པོས་ཐུགས་དམ་བསྐང་༔ མཁའ་ལྡིང་འདབ་ཆགས་མང་པོས་ཐུགས་དམ་བསྐང་༔ སྟག་སེང་གཅན་སྤྱང་མང་པོས་ཐུགས་དམ་བསྐང་༔ རྟ་གླང་དུད་འགྲོ་མང་པོས་ཐུགས་དམ་བསྐང་༔ རི་གནས་ཆུ་གནས་མང་པོས་ཐུགས་དམ་བསྐང་༔ ཆུ་སྣ་རྒྱ་མཚོ་མང་པོས་ཐུགས་དམ་བསྐང་༔ སྟོང་གསུམ་རི་རབ་གླིང་བཞིས་ཐུགས་དམ་བསྐང་༔ ནང་བཅུད་སྐྱེ་འགྲོ་མང་པོས་ཐུགས་དམ་བསྐང་༔ རིན་ཆེན་རྣམ་པ་མང་པོས་ཐུགས་དམ་བསྐང་༔ བདག་ཏུ་བཟུང་བའི་ཀ་ཅས་ཐུགས་དམ་བསྐང་༔ ཚུལ་བཞིན་བསྒྲུབ་པའི་དཀོར་ཆས་ཐུགས་དམ་བསྐང་༔ བདག་མེད་གྲུབ་པའི་ནོར་གྱིས་ཐུགས་དམ་བསྐང་༔ དར་ཟབ་རས་གོས་ཤིང་བལ་ཐུགས་དམ་བསྐང་༔ ཤིང་ཐོག་སྨན་སྣ་མང་པོས་ཐུགས་དམ་བསྐང་༔ འབྲས་སྲན་འབྲུ་སྣ་མང་པོས་ཐུགས་དམ་བསྐང་༔ ཤ་ཆང་བཟའ་བཏུང་མང་པོས་ཐུགས་དམ་བསྐང་༔ སྒྲ་སྐད་རོལ་མོ་མང་པོས་ཐུགས་དམ་བསྐང་༔ གོ་མཚོན་སྤྱན་གཟིགས་མང་པོས་ཐུགས་དམ་བསྐང་༔ རྐང་གླིང་བཤུད་པ་མང་པོས་ཐུགས་དམ་བསྐང་༔ འདབ་ལྡན་མེ་ཏོག་མང་པོས་ཐུགས་དམ་བསྐང་༔ སྤོས་གསུར་དུད་སྤྲིན་མང་པོས་ཐུགས་དམ་བསྐང་༔ རྣམ་ལྔའི་དབང་པོ་མང་པོས་ཐུགས་དམ་བསྐང་༔ ཤ་ལྔ་བདུད་རྩི་ལྔ་ཡིས་ཐུགས་དམ་བསྐང་༔ འཕྱར་དར་གཡབ་དར་མང་པོས་ཐུགས་དམ་བསྐང་༔ དུག་ལྔ་དུག་གསུམ་རྣམས་ཀྱིས་ཐུགས་དམ་བསྐང་༔ མཁའ་ལྟར་ཁྱབ་པའི་ལྟ་བས་ཐུགས་དམ་བསྐང་༔ ཉི་ལྟར་གསལ་བའི་སྒོམ་པས་ཐུགས་དམ་བསྐང་༔ བླང་དོར་བྲལ་བའི་སྤྱོད་པས་ཐུགས་དམ་བསྐང་༔ རེ་དོགས་མེད་པའི་འབྲས་བུས་ཐུགས་དམ་བསྐང་༔ ཧཱུྃ་བྷྱོ༔ ཁྱད་པར་ཐུགས་དམ་བསྐང་བ་ནི༔ མི་ལྤགས་གཡང་གཞི་མང་པོས་ཐུགས་དམ་བསྐང་༔ ཁྲམ་ཤིང་གཤིན་རིས་ལྡན་པས་ཐུགས་དམ་བསྐང་༔ མེ་ལོང་ལས་འབྲས་སྟོན་པས་ཐུགས་དམ་བསྐང་༔ ཆུ་གླང་གཤིན་རྗེའི་ཆིབས་ཀྱིས་ཐུགས་དམ་བསྐང་༔ ཐོད་ཕྲེང་རྩེ་བྲན་ལྡན་པས་ཐུགས་དམ་བསྐང་༔ ཐུགས་དམ་བསྐང་ལ་མཐུ་སྟོབས་དངོས་གྲུབ་སྩོལ༔ ཧཱུྃ་བྷྱོ༔ མ་གཅིག་ཡོངས་འདུའི་དཀྱིལ་འཁོར་ནས༔ ཡོངས་སུ་འདུས་པའི་བདུད་པོ་ནི༔ བྱེ་བ་དགུ་རིང་རྟ་ནག་ཆིབས༔ རྔམ་ཁྲོས་མདུང་དར་ཞགས་པ་ཅན༔ བདུད་དམག་ནག་པོ་འབུམ་འབུམ་བསྐོར༔ དོ་ནུབ་ཁྱེད་ཀྱི་ཐུགས་དམ་བསྐང་༔ དམར་ཆེན་གཏོར་མས་ཐུགས་དམ་བསྐང་༔ རཀྟ་དམར་གྱིས་ཐུགས་དམ་བསྐང་༔ བདུད་རྩི་སྨན་གྱིས་ཐུགས་དམ་བསྐང་༔ བམ་ཆེན་རྒྱལ་མཚན་མང་པོས་ཐུགས་དམ་བསྐང་༔ ནམ་མཁའ་ཉི་ཟླ་མང་པོས་ཐུགས་དམ་བསྐང་༔ མདའ་དར་མདུང་དར་མང་པོས་ཐུགས་དམ་བསྐང་༔ མཁའ་ལྡིང་འདབ་ཆགས་མང་པོས་ཐུགས་དམ་བསྐང་༔ སྟག་སེང་གཅན་སྤྱང་མང་པོས་ཐུགས་དམ་བསྐང་༔ རྟ་གླང་དུད་འགྲོ་མང་པོས་ཐུགས་དམ་བསྐང་༔ རི་གནས་ཆུ་གནས་མང་པོས་ཐུགས་དམ་བསྐང་༔ ཆུ་སྣ་རྒྱ་མཚོ་མང་པོས་ཐུགས་དམ་བསྐང་༔ སྟོང་གསུམ་རི་རབ་གླིང་བཞིས་ཐུགས་དམ་བསྐང་༔ ནང་བཅུད་སྐྱེ་འགྲོ་མང་པོས་ཐུགས་དམ་བསྐང་༔ རིན་ཆེན་རྣམ་པ་མང་པོས་ཐུགས་དམ་བསྐང་༔ བདག་ཏུ་བཟུང་བའི་ཀ་ཅས་ཐུགས་དམ་བསྐང་༔ ཚུལ་བཞིན་བསྒྲུབ་པའི་དཀོར་ཆས་ཐུགས་དམ་བསྐང་༔ བདག་མེད་གྲུབ་པའི་ནོར་གྱིས་ཐུགས་དམ་བསྐང་༔ དར་ཟབ་རས་གོས་ཤིང་བལ་ཐུགས་དམ་བསྐང་༔ ཤིང་ཐོག་སྨན་སྣ་མང་པོས་ཐུགས་དམ་བསྐང་༔ འབྲས་སྲན་འབྲུ་སྣ་མང་པོས་ཐུགས་དམ་བསྐང་༔ ཤ་ཆང་བཟའ་བཏུང་མང་པོས་ཐུགས་དམ་བསྐང་༔ སྒྲ་སྐད་རོལ་མོ་མང་པོས་ཐུགས་དམ་བསྐང་༔ གོ་མཚོན་སྤྱན་གཟིགས་མང་པོས་ཐུགས་དམ་བསྐང་༔ རྐང་གླིང་བཤུད་པ་མང་པོས་ཐུགས་དམ་བསྐང་༔ འདབ་ལྡན་མེ་ཏོག་མང་པོས་ཐུགས་དམ་བསྐང་༔ སྤོས་གསུར་དུད་སྤྲིན་མང་པོས་ཐུགས་དམ་བསྐང་༔ རྣམ་ལྔའི་དབང་པོ་མང་པོས་ཐུགས་དམ་བསྐང་༔ ཤ་ལྔ་བདུད་རྩི་ལྔ་ཡིས་ཐུགས་དམ་བསྐང་༔ འཕྱར་དར་གཡབ་དར་མང་པོས་ཐུགས་དམ་བསྐང་༔ དུག་ལྔ་དུག་གསུམ་རྣམས་ཀྱིས་ཐུགས་དམ་བསྐང་༔ མཁའ་ལྟར་ཁྱབ་པའི་ལྟ་བས་ཐུགས་དམ་བསྐང་༔ ཉི་ལྟར་གསལ་བའི་སྒོམ་པས་ཐུགས་དམ་བསྐང་༔ བླང་དོར་བྲལ་བའི་སྤྱོད་པས་ཐུགས་དམ་བསྐང་༔ རེ་དོགས་མེད་པའི་འབྲས་བུས་ཐུགས་དམ་བསྐང་༔ ཧཱུྃ་བྷྱོ༔ ཁྱད་པར་ཐུགས་དམ་བསྐང་བ་ནི༔ མི་མགོའི་ཕྲེང་བ་མང་པོས་ཐུགས་དམ་བསྐང་༔ མི་ལྤགས་གཡང་གཞི་མང་པོས་ཐུགས་དམ་བསྐང་༔ མདུང་དར་དཀར་པོ་མང་པོས་ཐུགས་དམ་བསྐང་༔ བདུད་ཞགས་ནག་པོ་མང་པོས་ཐུགས་དམ་བསྐང་༔ བདུད་ཀྱི་རྟ་ནག་མང་པོས་ཐུགས་དམ་བསྐང་༔ ཐུགས་དམ་བསྐང་ལ་དམ་ཉམས་དགྲ་བགེགས་སྒྲོལ༔ ཧཱུྃ་བྷྱོ༔ མ་གཅིག་དབང་གི་དཀྱིལ་འཁོར་ནས༔ ལྷ་དབང་ཡོངས་ཀྱི་དགྱེས་སྡེ་མོ༔ ཚངས་པ་བརྒྱ་བྱིན་རྒྱལ་ཆེན་བཞི༔ དྲག་ཤུལ་ཅན་དང་ལྷ་ཕྲན་འབུམ༔ བསྐང་ངོ་མཆོད་དོ་ཐུགས་དམ་བསྐང་༔ ཧཱུྃ་བྷྱོ༔ མ་གཅིག་དབང་གི་དཀྱིལ་འཁོར་ནས༔ ཀླུ་ཁམས་ཡོངས་ཀྱི་དགྱེས་སྡེ་མོ༔ ནཱ་ག་རཀྴ་ཀླུ་ཡི་ལྕམ༔ ཀླུ་ཕྲན་མང་པོ་འབུམ་དང་བཅས༔ བསྐང་ངོ་མཆོད་དོ་ཐུགས་དམ་བསྐང་༔ ཧཱུྃ་བྷྱོ༔ མ་གཅིག་དབང་གི་དཀྱིལ་འཁོར་ནས༔ སྲིན་པོ་ཡོངས་ཀྱི་དགྱེས་སྡེ་མོ༔ རཀྴ་དཔལ་ལྡན་རྡོ་རྗེའི་ལྕམ༔ སྲིན་གྱི་རྒྱལ་པོ་འཁོར་དང་བཅས༔ སྲིན་ཕྲན་མང་པོ་འབུམ་གྱིས་བསྐོར༔ བསྐང་ངོ་མཆོད་དོ་ཐུགས་དམ་བསྐང་༔ ཧཱུྃ་བྷྱོ༔ མ་གཅིག་དབང་གི་དཀྱིལ་འཁོར་ནས༔ སྡེ་བརྒྱད་ཀུན་གྱི་དགྱེས་སྡེ་མོ༔ དཔལ་ལྡན་ལྷ་མོ་དུད་སོལ་མ༔ དམག་གི་རྒྱལ་མོ་རེ་མ་ཏཱི༔ ཕྱི་ནང་གསང་བའི་ལྷ་སྲིན་རྣམས༔ འཁོར་དུ་བསྐོར་ཞིང་ལས་ལ་འགྱེད༔ བསྐང་ངོ་མཆོད་དོ་ཐུགས་དམ་བསྐང་༔ ཧཱུྃ་བྷྱོ༔ མ་གཅིག་སྤྲུལ་པའི་དཀྱིལ་འཁོར་ནས༔ དུས་བཞིའི་རྒྱལ་མོ་སྤྲུལ་པའི་འོད༔ བསྟན་མ་སྐྱོང་མ་ཡང་མའི་ཚོགས༔ ཐུགས་ལས་སྤྲུལ་ཞིང་ཕོ་ཉར་གཏོང་༔ བསྐང་ངོ་མཆོད་དོ་ཐུགས་དམ་བསྐང་༔ ཧཱུྃ་བྷྱོ༔ དཔལ་ལྡན་ལྷ་མོ་དགོངས་སུ་གསོལ༔ མ་ལུས་འཁོར་བཅས་དགོངས་སུ་གསོལ༔ སྤྲུལ་པ་འབུམ་སྡེ་དགོངས་སུ་གསོལ༔ མིང་བརྒྱ་མ་ལ་མཚན་སྟོང་མ༔ སྲིད་གསུམ་བདག་མོ་དགོངས་སུ་གསོལ༔ མཐུ་སྟོབས་རྫུ་འཕྲུལ་མངའ་བདག་མོ༔ སྔགས་ཀྱི་བདག་མོ་དགོངས་སུ་གསོལ༔ མཆོད་པ་ཡིན་ནོ་ངོ་མ་ཆུང་༔ བསྒྲུབ་པ་ཡིན་ནོ་གོང་མ་གཡེལ༔ བརྟེན་པ་ཡིན་ནོ་རྒྱང་མ་རིང་༔ བསྐང་བ་ཡིན་ནོ་དགྱེས་པར་དགོངས༔ བོས་པའི་དུས་ན་སྙན་མ་སྲ༔ གཡབ་པའི་ཚེ་ན་སྤྱན་མ་བརྟུལ༔ མངགས་པའི་ཚེ་ན་བང་མ་བུལ༔ རྦད་པའི་ཚེ་ན་མཐུ་མ་ཆུང་༔ རྗེ་ལྟར་བརྟེན་ནོ་དབང་མ་ཆེ༔ བྲན་ལྟར་བརྟེན་ནོ་རྒྱུད་མ་ངན༔ མ་ལྟར་བརྟེན་ནོ་སྙིང་མ་སྲ༔ སྲིང་ལྟར་བརྟེན་ནོ་ཚུལ་མ་ཞན༔ མནའ་ཐོ་བཅད་དོ་མནའ་མ་ཟ༔ ཆད་ཐོ་བྱས་པའི་ཆད་མ་གཏོང་༔ དམ་ཚིག་མནོས་པའི་དམ་མ་བཀྲལ༔ སྲུང་མ་ཁྱོད་དང་རྣལ་འབྱོར་བདག༔ བསྐལ་པ་ཞིག་ཀྱང་མི་འབྲལ་ལོ༔ མགོན་སྐྱོབ་མཛོད་ལ་དངོས་གྲུབ་སྩོལ༔ གསོལ་ལོ་མཆོད་དོ་སྔགས་སྲུང་མ༔ མ་ལུས་འཁོར་བཅས་ཐུགས་དམ་བསྐང་༔ ཚེ་རབས་སྔོན་ནས་ད་ལྟའི་བར༔ མི་དགེ་སྡིག་ལྟུང་ཅི་བསགས་པ༔ གནོང་ངོ་འགྱོད་དོ་མཐོལ་ལོ་བཤགས༔ དམ་ཚིག་ཉམས་ཆག་འགལ་འཁྲུལ་རྣམས༔ གནོང་ངོ་འགྱོད་དོ་མཐོལ་ལོ་བཤགས༔ ཁྱེད་ཀྱི་ཐུགས་དང་འགལ་བ་རྣམས༔ གནོང་ངོ་འགྱོད་དོ་མཐོལ་ལོ་བཤགས༔ སྒྲུབ་ལ་བར་ཆད་ཤོར་བ་རྣམས༔ གནོང་ངོ་འགྱོད་དོ་མཐོལ་ལོ་བཤགས༔ ལྟ་བ་གཡེལ་དང་སྒོམ་པ་བྱིང་༔ གནོང་ངོ་འགྱོད་དོ་མཐོལ་ལོ་བཤགས༔ སྤྱོད་པ་ལོག་དང་དམ་ཚིག་འཆལ༔ གནོང་ངོ་འགྱོད་དོ་མཐོལ་ལོ་བཤགས༔ གསོལ་མཆོད་འགྱངས་དང་འབག་བཙོག་ཕྲིས༔ གནོང་ངོ་འགྱོད་དོ་མཐོལ་ལོ་བཤགས༔ བཟླས་བརྗོད་སྙིང་པོ་སྒྲ་ཟུར་ཉམས༔ གནོང་ངོ་འགྱོད་དོ་མཐོལ་ལོ་བཤགས༔ སྒྲུབ་རྫས་བླ་རྡོ་མ་འཛོམ་པ༔ གནོང་ངོ་འགྱོད་དོ་མཐོལ་ལོ་བཤགས༔ བཀའ་འཁོར་དྲེགས་པའི་ཚོགས་ལ་བཤགས༔ ཕྱི་འཁོར་སྡེ་བརྒྱད་རྣམས་ལ་བཤགས༔ སྤྲུལ་འཁོར་བསྟན་མ་རྒྱ་མཚོར་བཤགས༔ བསྐང་ཞིང་བཤགས་པའི་བྱིན་རླབས་ཀྱིས༔ སྔོན་གྱི་ལས་དང་འཕྲལ་གྱི་རྐྱེན༔ མི་མཐུན་གནོད་པ་ཐམས་ཅད་ཟློག༔ ལྟས་ངན་ཡེ་འབྲོག་ཐམས་ཅད་ཟློག༔ ནད་ཁ་ཡམས་ཁ་ཐམས་ཅད་ཟློག༔ ཆེ་སྲི་ཆུང་སྲི་ཐམས་ཅད་ཟློག༔ རྨི་ལྟས་མཚན་མ་ངན་པ་ཟློག༔ བྱད་ཀ་ཕུར་ཁ་ཐམས་ཅད་ཟློག༔ གཏད་ཁ་ཁྲམ་ཁ་ཐམས་ཅད་ཟློག༔ མི་ཁ་བྲམ་མཆུ་ཐམས་ཅད་ཟློག༔ བྱུར་དང་སྐག་ངན་ཐམས་ཅད་ཟློག༔ ལོ་སྐག་ཟླ་སྐག་ཐམས་ཅད་ཟློག༔ ཞག་སྐག་ཟ་སྐག་ཐམས་ཅད་ཟློག༔ ཤོ་ཁྲམ་རྩིས་ལ་བབས་པ་ཟློག༔ མ་མོ་མཁའ་འགྲོའི་བཀའ་ཆད་ཟློག༔ སྡེ་བརྒྱད་འདུས་པའི་དྲག་སྔགས་ཟློག༔ ཡེ་ཤེས་འཇིག་རྟེན་བསུན་མ་ཟློག༔ ཅེས་དྲག་སྔགས་བཟླ་ཞིང་ཐལ་མོ་གདབ༔ ཟོར་དུ་འཕེན་ནམ་ཐོག་ཁར་གཤེགས༔ སྐབས་ལྟར་སྦྱར་ཞིང་མངའ་གསོལ་བསངས༔ མི་ནད་ཡམས་རིགས་འཁྲུག་རྩོད་དང་༔ རྐྱེན་ངན་བར་ཆད་ཀུན་ཀྱང་ཞི༔ དེ་ཕྱིར་གཅེས་པས་ཉམས་སུ་ལོངས༔ མ་འོངས་འགྲོ་ལ་ཕན་ཐོགས་ཤོག༔ ས་མ་ཡཱ༔ རྒྱ་རྒྱ་རྒྱ༔ ཅེས་འཕགས་ཡུལ་རྒྱ་གར་རྩྭ་མཆོག་གྲོང་ནས་སྤྱན་དྲངས་ཤིང་ཤོག་སེར་ལས་ཞལ་བཤུས་པ་འདི་ཡང་རིགས་འཛིན་མིང་གིས་སོ། །དགེ་ལེགས་འཕེལ། མངྒ་ལཾ།། །།

མངའ་གསོལ་ཡིད་བཞིན་ནོར་བུ།

སྔགས་བདག་འབར་མའི་ཐུགས་ཐིག་ལས༔ མངའ་གསོལ་ཡིད་བཞིན་ནོར་བུ་བཞུགས༔ རྦོད་གཏོང་མཁའ་འགྲོའི་ཚོགས་ལ་འདུད༔ བཤོས་བུ་ཟུར་གསུམ་ལྷ་གྲངས་ལ༔ ཤ་སྣ་སྙིང་སྣ་ལིང་གས་བརྒྱན༔ འབྲུ་སྣ་དར་ཟབ་རིན་ཆེན་བཏབ༔ སྨན་རག་སྦྲེང་ཞིང་རོལ་མོ་འཁྲོལ༔ གདུང་བའི་ཡིད་ཀྱིས་འདི་སྐད་དོ༔ ཧཱུྃ་བྷྱོ༔ བཞེངས་ཤིག་བཞེངས་ཤིག་མ་གཅིག་དཔལ་ལྷ་མོ༔ བདག་གིས་མཆོད་ཅིང་བསྟོད་པའི་གནས་འདི་རུ༔ མ་ལུས་འཁོར་བཅས་མདུན་གྱི་མཁའ་ལ་སྤྱོན༔ འབྲུ་སྣ་རྣམས་མཆོད་ཅིང་༔ ཧཱུྃ་བྷྱོ༔ དཔལ་ལྡན་སྔགས་ཀྱི་སྲུང་མ་ཆེན་མོ་ལ༔ ཆོས་སྐུའི་ལྷ་ཚོགས་རྣམས་ཀྱིས་མངའ་གསོལ་བ༔ ཐུགས་ནི་མ་བཅོས་དྲི་མེད་ཆོས་ཀྱི་སྐུ༔ དེ་བཞིན་རྣལ་འབྱོར་བདག་གིས་མངའ་གསོལ་ལོ༔ ཧཱུྃ་བྷྱོ༔ དཔལ་ལྡན་སྔགས་ཀྱི་སྲུང་མ་ཆེན་མོ་ལ༔ ལོངས་སྐུའི་ལྷ་ཚོགས་རྣམས་ཀྱིས་མངའ་གསོལ་བ༔ ཚངས་པའིི་གསུང་དབྱངས་དྲག་སྔགས་སྒྲ་སྒྲོགས་མ༔ དེ་བཞིན་རྣལ་འབྱོར་བདག་གིས་མངའ་གསོལ་ལོ༔ ཧཱུྃ་བྷྱོ༔ དཔལ་ལྡན་སྔགས་ཀྱི་སྲུང་མ་ཆེན་མོ་ལ༔ སྤྲུལ་སྐུའི་སངས་རྒྱས་རྣམས་ཀྱིས་མངའ་གསོལ་བ༔ རྔམ་བརྗིད་སྟོབས་ལྡན་གཟི་བརྗིད་ཕྱོགས་བཅུར་འཕྲོ༔ དེ་བཞིན་རྣལ་འབྱོར་བདག་གིས་མངའ་གསོལ་ལོ༔ ཧཱུྃ་བྷྱོ༔ དཔལ་ལྡན་སྔགས་ཀྱི་སྲུང་མ་ཆེན་མོ་ལ༔ དུས་གསུམ་བདེ་བཤེགས་རྣམས་ཀྱིས་མངའ་གསོལ་བ༔ མི་བསྐྱོད་རྡོ་རྗེས་གཙུག་གི་ནོར་བུར་བརྒྱན༔ དེ་བཞིན་རྣལ་འབྱོར་བདག་གིས་མངའ་གསོལ་ལོ༔ ཧཱུྃ་བྷྱོ༔ དཔལ་ལྡན་སྔགས་ཀྱི་སྲུང་མ་ཆེན་མོ་ལ༔ ཕྱོགས་བཅུའི་སངས་རྒྱས་རྣམས་ཀྱིས་མངའ་གསོལ་བ༔ ཡེ་ཤེས་སྤྱན་གྱིས་དུས་གསུམ་གསལ་ལེར་གཟིགས༔ དེ་བཞིན་རྣལ་འབྱོར་བདག་གིས་མངའ་གསོལ་ལོ༔ ཧཱུྃ་བྷྱོ༔ དཔལ་ལྡན་སྔགས་ཀྱི་སྲུང་མ་ཆེན་མོ་ལ༔ དཔལ་ཆེན་ཧེ་རུ་ཀཿཡིས་མངའ་གསོལ་བ༔ ཐོད་སྐམ་འབར་བའི་པྲོག་ཞུས་དབུ་ལ་བརྒྱན༔ དེ་བཞིན་རྣལ་འབྱོར་བདག་གིས་མངའ་གསོལ་ལོ༔ ཧཱུྃ་བྷྱོ༔ དཔལ་ལྡན་སྔགས་ཀྱི་སྲུང་མ་ཆེན་མོ་ལ༔ འཁོར་འདས་གཉིས་ཀྱི་ཁམས་ཀྱིས་མངའ་གསོལ་བ༔ ཐབས་དང་ཤེས་རབ་སྤྱན་གྱིས་ལེགས་ཉེས་གཟིགས༔ དེ་བཞིན་རྣལ་འབྱོར་བདག་གིས་མངའ་གསོལ་ལོ༔ ཧཱུྃ་བྷྱོ༔ དཔལ་ལྡན་སྔགས་ཀྱི་སྲུང་མ་ཆེན་མོ་ལ༔ ཁྲག་འཐུང་ལྷ་ཚོགས་རྣམས་ཀྱིས་མངའ་གསོལ་བ༔ ཐོད་པའི་ཕྲེང་བ་སྐུ་ཡི་རྒྱན་དུ་སྤྲས༔ དེ་བཞིན་རྣལ་འབྱོར་བདག་གིས་མངའ་གསོལ་ལོ༔ ཧཱུྃ་བྷྱོ༔ དཔལ་ལྡན་སྔགས་ཀྱི་སྲུང་མ་ཆེན་མོ་ལ༔ ལྷ་ཆེན་དྲག་པོ་རྣམས་ཀྱིས་མངའ་གསོལ་བ༔ ཐལ་ཆེན་ཁྲག་ཐིག་ཞག་གི་སོར་རིས་ཅན༔ དེ་བཞིན་རྣལ་འབྱོར་བདག་གིས་མངའ་གསོལ་ལོ༔ ཧཱུྃ་བྷྱོ༔ དཔལ་ལྡན་སྔགས་ཀྱི་སྲུང་མ་ཆེན་མོ་ལ༔ ཆོས་སྐུའི་མཁའ་འགྲོ་རྣམས་ཀྱིས་མངའ་གསོལ་བ༔ ཆོས་ཉིད་འགྱུར་མེད་སྐུ་མདོག་མཐིང་འོད་འབར༔ དེ་བཞིན་རྣལ་འབྱོར་བདག་གིས་མངའ་གསོལ་ལོ༔ ཧཱུྃ་བྷྱོ༔ དཔལ་ལྡན་སྔགས་ཀྱི་སྲུང་མ་ཆེན་མོ་ལ༔ ལོངས་སྐུའི་མཁའ་འགྲོ་རྣམས་ཀྱིས་མངའ་གསོལ་བ༔ མཐིང་ནག་དར་གྱི་ཅོད་པན་པུ་རུ་རུ༔ དེ་བཞིན་རྣལ་འབྱོར་བདག་གིས་མངའ་གསོལ་ལོ༔ ཧཱུྃ་བྷྱོ༔ དཔལ་ལྡན་སྔགས་ཀྱི་སྲུང་མ་ཆེན་མོ་ལ༔ སྤྲུལ་སྐུའི་མཁའ་འགྲོ་རྣམས་ཀྱིས་མངའ་གསོལ་བ༔ ཟངས་གྲི་ཟངས་ཡག་འབར་བའི་ཕྱག་རྒྱ་ཅན༔ དེ་བཞིན་རྣལ་འབྱོར་བདག་གིས་མངའ་གསོལ་ལོ༔ ཧཱུྃ་བྷྱོ༔ དཔལ་ལྡན་སྔགས་ཀྱི་སྲུང་མ་ཆེན་མོ་ལ༔ ཕོ་རྒྱུད་མགོན་པོའི་ཚོགས་ཀྱིས་མངའ་གསོལ་བ༔ གནམ་ལྕགས་རལ་གྲི་འབར་བས་དགྲ་སྲོག་གཅོད༔ དེ་བཞིན་རྣལ་འབྱོར་བདག་གིས་མངའ་གསོལ་ལོ༔ ཧཱུྃ་བྷྱོ༔ དཔལ་ལྡན་སྔགས་ཀྱི་སྲུང་མ་ཆེན་མོ་ལ༔ མོ་རྒྱུད་མ་མོའི་ཚོགས་ཀྱིས་མངའ་གསོལ་བ༔ ཐོད་ཁྲག་སྐོམ་དུ་འཐུང་བའི་དཔལ་འབར་མ༔ དེ་བཞིན་རྣལ་འབྱོར་བདག་གིས་མངའ་གསོལ་ལོ༔ ཧཱུྃ་བྷྱོ༔ དཔལ་ལྡན་སྔགས་ཀྱི་སྲུང་མ་ཆེན་མོ་ལ༔ ཆེ་བཙན་དྲག་ཤུལ་ཅན་གྱིས་མངའ་གསོལ་བ༔ རྩེ་གསུམ་འབར་བའི་གཡབ་མོས་སྲིད་གསུམ་གཡོ༔ དེ་བཞིན་རྣལ་འབྱོར་བདག་གིས་མངའ་གསོལ་ལོ༔ ཧཱུྃ་བྷྱོ༔ དཔལ་ལྡན་སྔགས་ཀྱི་སྲུང་མ་ཆེན་མོ་ལ༔ སྟེང་གི་ལྷ་ཁམས་རྣམས་ཀྱིས་མངའ་གསོལ་བ༔ ཕྱག་ཞབས་མགུལ་ཆུན་གདུ་བུ་སྙན་རྒྱན་འཁྲོལ༔ དེ་བཞིན་རྣལ་འབྱོར་བདག་གིས་མངའ་གསོལ་ལོ༔ ཧཱུྃ་བྷྱོ༔ དཔལ་ལྡན་སྔགས་ཀྱི་སྲུང་མ་ཆེན་མོ་ལ༔ འོག་གི་ཀླུ་ཁམས་རྣམས་ཀྱིས་མངའ་གསོལ་བ༔ སྦྲུལ་རིགས་རྣམ་ལྔ་སྐུ་ཡི་རྒྱན་དུ་སྤྲས༔ དེ་བཞིན་རྣལ་འབྱོར་བདག་གིས་མངའ་གསོལ་ལོ༔ ཧཱུྃ་བྷྱོ༔ དཔལ་ལྡན་སྔགས་ཀྱི་སྲུང་མ་ཆེན་མོ་ལ༔ བར་གྱི་གཉན་ཁམས་རྣམས་ཀྱིས་མངའ་གསོལ་བ༔ རེ་ལྡེ་མི་རྩིབ་མཛེས་པའི་རྒྱན་ལྡན་མ༔ དེ་བཞིན་རྣལ་འབྱོར་བདག་གིས་མངའ་གསོལ་ལོ༔ ཧཱུྃ་བྷྱོ༔ དཔལ་ལྡན་སྔགས་ཀྱི་སྲུང་མ་ཆེན་མོ་ལ༔ རྒྱལ་པོ་ཆེན་པོ་སྡེ་བཞིས་མངའ་གསོལ་བ༔ མདུང་དར་དམར་ནག་ཕྱག་རྒྱའི་འཁོར་ལོ་ཅན༔ དེ་བཞིན་རྣལ་འབྱོར་བདག་གིས་མངའ་གསོལ་ལོ༔ ཧཱུྃ་བྷྱོ༔ དཔལ་ལྡན་སྔགས་ཀྱི་སྲུང་མ་ཆེན་མོ་ལ༔ ཟ་བྱེད་ཕོ་ཉའི་ཚོགས་ཀྱིས་མངའ་གསོལ་བ༔ བམ་ཆེན་ཞལ་དུ་སྒྲིལ་ཞིང་བཞད་མདངས་འབར༔ དེ་བཞིན་རྣལ་འབྱོར་བདག་གིས་མངའ་གསོལ་ལོ༔ ཧཱུྃ་བྷྱོ༔ དཔལ་ལྡན་སྔགས་ཀྱི་སྲུང་མ་ཆེན་མོ་ལ༔ གསོད་བྱེད་ཕོ་ཉའི་ཚོགས་ཀྱིས་མངའ་གསོལ་བ༔ ཞལ་གྱི་མཆེ་བ་རྣམ་བཞི་གངས་ལྟར་གཙིགས༔ དེ་བཞིན་རྣལ་འབྱོར་བདག་གིས་མངའ་གསོལ་ལོ༔ ཧཱུྃ་བྷྱོ༔ དཔལ་ལྡན་སྔགས་ཀྱི་སྲུང་མ་ཆེན་མོ་ལ༔ འགུགས་བྱེད་ཕོ་ཉའི་ཚོགས་ཀྱི་མངའ་གསོལ་བ༔ ཁྲག་གི་ཞགས་པ་དམར་པོ་ཡ་ལ་ལ༔ དེ་བཞིན་རྣལ་འབྱོར་བདག་གིས་མངའ་གསོལ་ལོ༔ ཧཱུྃ་བྷྱོ༔ དཔལ་ལྡན་སྔགས་ཀྱི་སྲུང་མ་ཆེན་མོ་ལ༔ ནད་གཏོང་མ་མོའི་ཚོགས་ཀྱིས་མངའ་གསོལ་བ༔ ནད་ཀྱི་རྐྱལ་པ་མང་པོ་ཕྱུ་རུ་རུ༔ དེ་བཞིན་རྣལ་འབྱོར་བདག་གིས་མངའ་གསོལ་ལོ༔ ཧཱུྃ་བྷྱོ༔ དཔལ་ལྡན་སྔགས་ཀྱི་སྲུང་མ་ཆེན་མོ་ལ༔ མིང་པོ་ལས་ཀྱི་གཤིན་རྗེས་མངའ་གསོལ་བ༔ སྙིང་རྗེ་བྲལ་བའི་ཞེ་སྡང་མེ་ལྟར་འབར༔ དེ་བཞིན་རྣལ་འབྱོར་བདག་གིས་མངའ་གསོལ་ལོ༔ ཧཱུྃ་བྷྱོ༔ དཔལ་ལྡན་སྔགས་ཀྱི་སྲུང་མ་ཆེན་མོ་ལ༔ དྲེགས་ཆེན་བདུད་ཚོགས་རྣམས་ཀྱིས་མངའ་གསོལ་བ༔ སྲིད་གསུམ་ཟིལ་གནོན་ང་རྒྱལ་རི་ལྟར་ཉིལ༔ དེ་བཞིན་རྣལ་འབྱོར་བདག་གིས་མངའ་གསོལ་ལོ༔ ཧཱུྃ་བྷྱོ༔ དཔལ་ལྡན་སྔགས་ཀྱི་སྲུང་མ་ཆེན་མོ་ལ༔ རྒྱལ་པོ་འབུམ་སྡེའི་ཚོགས་ཀྱིས་མངའ་གསོལ་བ༔ ཁམས་གསུམ་དབང་སྡུད་ཕྲག་དོག་རླུང་ལྟར་འཚུབ༔ དེ་བཞིན་རྣལ་འབྱོར་བདག་གིས་མངའ་གསོལ་ལོ༔ ཧཱུྃ་བྷྱོ༔ དཔལ་ལྡན་སྔགས་ཀྱི་སྲུང་མ་ཆེན་མོ་ལ༔ སྨན་མོ་བསྟན་མ་རྣམས་ཀྱིས་མངའ་གསོལ་བ༔ འདོད་ཆགས་འབར་བའི་ཁྲག་མཚོ་ཕྱུར་རུ་རུ༔ དེ་བཞིན་རྣལ་འབྱོར་བདག་གིས་མངའ་གསོལ་ལོ༔ ཧཱུྃ་བྷྱོ༔ དཔལ་ལྡན་སྔགས་ཀྱི་སྲུང་མ་ཆེན་མོ་ལ༔ རིགས་དྲུག་སེམས་ཅན་རྣམས་ཀྱིས་མངའ་གསོལ་བ༔ དུག་ལྔའི་རྒྱ་མཚོ་གཏི་མུག་མུན་ལྟར་གཏིབ༔ དེ་བཞིན་རྣལ་འབྱོར་བདག་གིས་མངའ་གསོལ་ལོ༔ ཧཱུྃ་བྷྱོ༔ དཔལ་ལྡན་སྔགས་ཀྱི་སྲུང་མ་ཆེན་མོ་ལ༔ ཡམ་ཤུད་བཙན་ཁམས་རྣམས་ཀྱིས་མངའ་གསོལ་བ༔ སྨ་ར་ཁ་སྤུ་མེ་ལྟར་ཡ་ལ་ལ༔ དེ་བཞིན་རྣལ་འབྱོར་བདག་གིས་མངའ་གསོལ་ལོ༔ ཧཱུྃ་བྷྱོ༔ དཔལ་ལྡན་སྔགས་ཀྱི་སྲུང་མ་ཆེན་མོ་ལ༔ ཁྲག་འཐུང་མཁའ་འགྲོའི་ཚོགས་ཀྱིས་མངའ་གསོལ་བ༔ ཁྲག་ལྕེ་དམར་པོ་གློག་ལྟར་ཁྱུགས་སེ་ཁྱུག༔ དེ་བཞིན་རྣལ་འབྱོར་བདག་གིས་མངའ་གསོལ་ལོ༔ ཧཱུྃ་བྷྱོ༔ དཔལ་ལྡན་སྔགས་ཀྱི་སྲུང་མ་ཆེན་མོ་ལ༔ རཀྴ་སྲིན་པོ་རྣམས་ཀྱིས་མངའ་གསོལ་བ༔ མི་ལྤགས་གཡང་གཞི་ཁྲག་ཏུ་ཙ་ར་ར༔ དེ་བཞིན་རྣལ་འབྱོར་བདག་གིས་མངའ་གསོལ་ལོ༔ ཧཱུྃ་བྷྱོ༔ དཔལ་ལྡན་སྔགས་ཀྱི་སྲུང་མ་ཆེན་མོ་ལ༔ དམ་ཅན་ཐེའུ་རང་རྣམས་ཀྱིས་མངའ་གསོལ་བ༔ ཤོ་ཡི་རྡེའུ་སྐྱེ་འགྲོའི་ཚེ་ལ་འདེབས༔ དེ་བཞིན་རྣལ་འབྱོར་བདག་གིས་མངའ་གསོལ་ལོ༔ ཧཱུྃ་བྷྱོ༔ དཔལ་ལྡན་སྔགས་ཀྱི་སྲུང་མ་ཆེན་མོ་ལ༔ ཕྲ་མེན་བདུད་མོ་རྣམས་ཀྱིས་མངའ་གསོལ་བ༔ མཚོན་གྱི་དྲུ་གུ་ཆར་ལྟར་སི་ལི་ལི༔ དེ་བཞིན་རྣལ་འབྱོར་བདག་གིས་མངའ་གསོལ་ལོ༔ ཧཱུྃ་བྷྱོ༔ དཔལ་ལྡན་སྔགས་ཀྱི་སྲུང་མ་ཆེན་མོ་ལ༔ ཆོས་ཀྱི་རྒྱལ་པོ་འཁོར་བཅས་མངའ་གསོལ་བ༔ ཁྲམ་ཤིང་དམར་པོས་སྲིད་གསུམ་ཁྲམ་ལ་འདེབས༔ དེ་བཞིན་རྣལ་འབྱོར་བདག་གིས་མངའ་གསོལ་ལོ༔ ཧཱུྃ་བྷྱོ༔ དཔལ་ལྡན་སྔགས་ཀྱི་སྲུང་མ་ཆེན་མོ་ལ༔ བྱང་ཕྱོགས་གནོད་སྦྱིན་རྣམས་ཀྱིས་མངའ་གསོལ་བ༔ རིན་ཆེན་སྣ་ཚོགས་སྐུ་ཡི་རྒྱན་དུ་སྤྲས༔ དེ་བཞིན་རྣལ་འབྱོར་བདག་གིས་མངའ་གསོལ་ལོ༔ ཧཱུྃ་བྷྱོ༔ དཔལ་ལྡན་སྔགས་ཀྱི་སྲུང་མ་ཆེན་མོ་ལ༔ འགོང་པོའི་སྡེ་ཚོགས་རྣམས་ཀྱིས་མངའ་གསོལ་བ༔ རྒྱ་བོང་དམར་གའི་ཆིབས་ལ་ཕྱེད་སྐྱིལ་ཅན༔ དེ་བཞིན་རྣལ་འབྱོར་བདག་གིས་མངའ་གསོལ་ལོ༔ ཧཱུྃ་བྷྱོ༔ དཔལ་ལྡན་སྔགས་ཀྱི་སྲུང་མ་ཆེན་མོ་ལ༔ གཟའ་དང་རྒྱུ་སྐར་རྣམས་ཀྱིས་མངའ་གསོལ་བ༔ ལྕགས་ཀྱི་སེར་འབེབས་ཐོག་གི་བུ་ཡུག་འཚུབ༔ དེ་བཞིན་རྣལ་འབྱོར་བདག་གིས་མངའ་གསོལ་ལོ༔ ཧཱུྃ་བྷྱོ༔ དཔལ་ལྡན་སྔགས་ཀྱི་སྲུང་མ་ཆེན་མོ་ལ༔ ཕྱོགས་སྐྱོང་དྲག་པོ་རྣམས་ཀྱིས་མངའ་གསོལ་བ༔ སྲིད་པའི་རླུང་འཚུབ་བསྐལ་པའི་མེ་ཆེན་མཆེད༔ དེ་བཞིན་རྣལ་འབྱོར་བདག་གིས་མངའ་གསོལ་ལོ༔ ཧཱུྃ་བྷྱོ༔ དཔལ་ལྡན་སྔགས་ཀྱི་སྲུང་མ་ཆེན་མོ་ལ༔ སྡེར་ཆགས་གཅན་གཟན་རྣམས་ཀྱིས་མངའ་གསོལ་བ༔ དཔའ་བོ་སྟག་གི་ཤམ་ཐབས་འབར་བས་དཀྲིས༔ དེ་བཞིན་རྣལ་འབྱོར་བདག་གིས་མངའ་གསོལ་ལོ༔ ཧཱུྃ་བྷྱོ༔ དཔལ་ལྡན་སྔགས་ཀྱི་སྲུང་མ་ཆེན་མོ་ལ༔ མཆེ་ཅན་གཅན་གཟན་རྣམས་ཀྱིས་མངའ་གསོལ་བ༔ དུང་གི་སེང་གེ་འབུམ་འབུམ་སྤྲུལ་པར་འགྱེད༔ དེ་བཞིན་རྣལ་འབྱོར་བདག་གིས་མངའ་གསོལ་ལོ༔ ཧཱུྃ་བྷྱོ༔ དཔལ་ལྡན་སྔགས་ཀྱི་སྲུང་མ་ཆེན་མོ་ལ༔ ཁམས་གསུམ་སྐྱེ་འགྲོ་རྣམས་ཀྱིས་མངའ་གསོལ་བ༔ ཉི་ཟླ་འབར་བའི་ཅོད་པན་སྐུ་ལ་བརྒྱན༔ དེ་བཞིན་རྣལ་འབྱོར་བདག་གིས་མངའ་གསོལ་ལོ༔ ཧཱུྃ་བྷྱོ༔ དཔལ་ལྡན་སྔགས་ཀྱི་སྲུང་མ་ཆེན་མོ་ལ༔ དམ་ལྡན་རིག་འཛིན་རྣལ་འབྱོར་བདག་ཅག་གིས༔ སྒྲུབ་པའི་དམ་རྫས་བཤམས་ཏེ་མངའ་གསོལ་ལོ༔ འབོད་པའི་རོལ་མོའི་ཚོགས་ཀྱིས་མངའ་གསོལ་ལོ༔ བརྟེན་པའི་བླ་རྡོ་བཅང་སྟེ་མངའ་གསོལ་ལོ༔ མཆོད་པའི་ཡོ་བྱེད་བཤམས་ཏེ་མངའ་གསོལ་ལོ༔ བསྐང་བའི་ཀ་ཆ་དཀོར་ཆས་མངའ་གསོལ་ལོ༔ གདུང་བའི་ཡིད་ཀྱིས་འདུད་དེ་མངའ་གསོལ་ལོ༔ སྙན་པའི་ཚིག་གིས་བསྟོད་དེ་མངའ་གསོལ་ལོ༔ གུས་པའི་ལུས་ཀྱིས་ཐལ་སྦྱར་མངའ་གསོལ་ལོ༔ མངའ་གསོལ་བཞེས་ལ་ལྷ་མོ་གཟི་མདངས་བསྐྱེད༔ མངའ་གསོལ་བཞེས་ལ་ལྷ་མོ་སྟོབས་རྩལ་བསྐྱེད༔ མངའ་གསོལ་བཞེས་ལ་ལྷ་མོས་ཐ་ཚིག་དགོངས༔ མངའ་གསོལ་བཞེས་ལ་ལྷ་མོས་འཕྲིན་ལས་སྒྲུབས༔ མ་གཅིག་ཁྱོད་དང་གཡར་དམ་གཅིག་བསྲེས་ཀྱང་༔ རྩོད་ལྡན་དུས་ཀྱི་བསྐལ་པ་ངན་པ་འདིར༔ བདག་ཅག་སྒོ་གསུམ་དུག་གསུམ་དབང་གྱུར་ཏེ༔ བཀའ་དང་དམ་ལས་འགལ་བ་ཅི་མཆིས་པ༔ ཡེ་ཤེས་ལྷ་མོ་ཁྱེད་ཀྱིས་བརྩེར་དགོངས་ལ༔ རྟོག་མེད་ཆོས་ཀྱི་དབྱིངས་སུ་བཟོད་པར་བཞེས༔ བཀའ་འཁོར་སྲུང་མའི་བཀའ་ཆད་དབྱིངས་ནས་སོལ༔ མི་མཐུན་བགེགས་ཀྱི་བར་ཆད་མ་ལུས་ཟློག༔ རེ་བའི་ལྷ་ཁྱོད་བདག་གིས་སྐྱབས་བྱས་པས༔ ཉིན་མཚན་དུས་དྲུག་ཀུན་ཏུ་བདག་ཅག་སྲུངས༔ གཞི་བྱེས་ཀུན་ཏུ་ཁྱོད་ཀྱིས་སྟོངས་གྲོགས་མཛོད༔ སངས་རྒྱས་བསྟན་དང་བསྟན་འཛིན་སྐྱེས་བུ་དང་༔ ཁྱད་པར་དཔལ་ལྡན་བླ་མའི་སྐུ་ཚེ་བསྲིངས༔ བཤད་སྒྲུབ་ཆོས་ཀྱི་སྡེ་སྐྱོངས་དར་རྒྱས་མཛོད༔ བསྟན་པའི་རྩ་ལག་ཆོས་ཀྱི་སྦྱིན་བདག་སྲུངས༔ འཇིག་རྟེན་རྒྱལ་ཁམས་ཀུན་ཏུ་བདེ་སྐྱིད་སྤེལ༔ ནད་མཚོན་མུ་གེ་མཐའ་དམག་ཞི་བར་མཛོད༔ རྣལ་འབྱོར་བསམ་པ་ཡིད་བཞིན་བསྒྲུབ་ཏུ་གསོལ༔ ཅེས་བརྗོད་གཏོར་མ་མཆོད་ཅིང་མངའ་གསོལ་ལོ༔ ས་མ་ཡ༔ རྒྱ་རྒྱ་རྒྱ༔ གཏེར་རྒྱ༔ སྦས་རྒྱ༔ ཟབ་རྒྱ༔ གཏད་རྒྱ༔ ས་མ་ཡ༔ རྒྱ་རྒྱ་རྒྱ༔ རིག་འཛིན་ཆེན་པོ་ཉི་མ་གྲགས་པས་གནས་མཆོག་ཆེན་པོ་ཧ་ཙོ་ནས་གདན་དྲངས་ཤིང་ཤོག་སེར་ལས་བསྒྱུར་བའོ། །མངྒ་ལཾ།། །།

སྔགས་སྲུང་མ་ལ་གཏོར་མ་འབུལ་ཐབས་བཞུགས། ཨོཾ་བཛྲ་ཤྲཱི་ཧེ་རུ་ཀ་རུ་ལུ་རུ་ལུ་ཧཱུྃ་བྷྱོ་ཧཱུྃ་ཕཊ༔ བདག་ཉིད་སྐད་ཅིག་གིས་དཔལ་ཆེན་པོར་གསལ་བའི་མདུན་དུ་དཔལ་ལྡན་སྔགས་ཀྱི་སྲུང་མ་འཁོར་དྲེགས་པ་བདུན་དང་མ་མོ་བྱེ་བའི་ཚོགས་ཀྱིས་བསྐོར་བར་གསལ་བའི་གནས་གསུམ་ལས་འོད་ཟེར་འཕྲོས་པས་བྱང་ཤར་རྒྱ་མཚོ་ཆེན་པོའི་ཕ་རོལ་མུ་ལེ་མཐིང་གི་གཞལ་ཡས་ནས་བསྐྱེད་པའི་གནས་འདིར་སྐད་ཅིག་གིས་བཛྲ་ས་མ་ཡ་ཛཿཛཿཛཿ ཧཱུྃ་བཾ་ཧོ༔ ཞིང་བཅུའི་དགྲ་བགེགས་ཐུགས་རྗེའི་ཤུགས་ཀྱིས་བསྒྲལ་བའི་ཤ་ཁྲག་གི་རྒྱ་མཚོ་ལ་མ་མོ་ཆེན་མོ་སྔགས་ཀྱི་སྲུང་མ་སྐུ་འཁོར་དང་བཅས་པས་བཞེས་ནས་དགྱེས་ཏེ་བཅོལ་བའི་ལས་ཐམས་ཅད་ཐོགས་པ་མེད་པར་བསྒྲུབ་པར་གྱུར། །ཨཱོཾ་བཛྲ་དྷཀྐི་མ་ཧཱ་ཀ་ལི་རེ་མ་ཏི་ཧཱུྃ་བྷྱོ་ཧཱུྃ་ཕཊ༔ མ་མ་དྷེ་ཝི་ཀ་ལི་རེ་མ་ཏི་ཨི་དམ་བྷ་ལིངྟ་ཁཱ་ཧི་ཁཱ་ཧིཿཔཱུ་ཙ་པི་པ་ཏོ་ཧི་ས་མ་ཡ་ཨི་དམ་བྷ་ལིང་ཏ་ཁཱ་ཧི་ཁཱ་ཧི༔ བདུན་ནམ་གསུམ་བརྗོད། དེ་ནས་འབྲུ་སྣ་གཏོར་གསུར་ཆེན་གྱི་དུད་སྤྲིན་གཏོར། རོལ་མོ་འཁྲོལ་ཞིང་གཉེར་གཏད་པ་ནི། ཧཱུྃ་བྷྱོ༔ དགོངས་སུ་གསོལ་ལོ་མ་ཆེན་མོ༔ གསན་དུ་གསོལ་ལོ་རེ་མ་ཏཱི༔ སྔོན་གྱི་བསྐལ་པ་དང་པོ་ལ༔ རི་རབ་ཆེན་པོའི་བྱང་ཕྱོགས་ན༔ ཡང་དག་དཔལ་ཆེན་ཧེ་རུ་ཀས༔ དམ་ལ་བཏགས་པའི་གཡར་དམ་དགོངས༔ གཡར་དམ་དགོངས་ལ་གཉེར་བྱང་ལོང་༔ དེ་འོག་བར་གྱི་བསྐལ་པ་ལ༔ རི་རབ་ཆེན་པོའི་བྱང་ཤར་མཚམས༔ ཡོངས་འདུ་ཤིང་གི་རྩ་བ་ན༔ གུ་རུ་རྡོ་རྗེ་ཐོད་ཕྲེང་གིས༔ དམ་ལ་བཏགས་པའི་ཐ་ཚིག་དགོངས༔ ཐ་ཚིག་དགོངས་ལ་གཉེར་བྱང་ལོང་༔ དེ་འོག་བསྐལ་བའི་ཐ་མ་ལ༔ ཡང་ལེ་གོང་གི་བྲག་ཕུག་ཏུ༔ སློབ་དཔོན་དྷ་ན་སཾ་སྐྲྀ་ཏས༔ དམ་ལ་བཏགས་པའི་ཁས་ལེན་དགོངས༔ ཁས་ལེན་དགོངས་ལ་གཉེར་བྱང་ལོང་༔ ཧཱུྃ་བྷྱོ༔ མ་གཅིག་ཁྱོད་ལ་གཉེར་གཏད་པ༔ སངས་རྒྱས་བསྟན་པའི་གཞུག་གཉེར་འདིར༔ བསྟན་པ་འཛིན་པའི་སྐྱེས་བུ་རྣམས༔ ཁྱོད་ལ་གཉེར་གཏང་སྲུངས་ཤིག་སྐྱོབས༔ སྐུ་དགྲ་སྒྲོལ་ལ་བསུན་མ་བཟློག༔ བླ་མེད་ཆོས་ཀྱི་ཐེག་པ་རྣམས༔ ཁྱོད་ལ་གཉེར་གཏད་སྲུངས་ཤིག་རྒྱཿ སྒྲུབ་པའི་རྟགས་སྟོན་བཀའ་སྐྱོངས་ཤིག༔ འཕགས་པའི་དགེ་འདུན་ཆོས་གྲྭ་རྣམས༔ ཁྱོད་ལ་གཉེར་གཏད་སྲུངས་ཤིག་སྐྱོབས༔ བཤད་སྒྲུབ་ཕྱོགས་བཅུར་རྒྱས་པར་མཛོད༔ འཛམ་བུ་གླིང་གི་སྐྱེ་འགྲོ་རྣམས༔ ཁྱོད་ལ་གཉེར་གཏད་ལེགས་ཉེས་གཟིགས༔ སྡིག་ལྡན་སྒྲོལ་ལ་ཆོས་ལྡན་སྐྱོངས༔ རྣལ་འབྱོར་བདག་གི་དགོན་གཞིས་མཁར༔ ཁྱོད་ལ་གཉེར་གཏད་བདག་ཏུ་བཅོལ༔ ཀ་ཆ་དཀོར་སྲུངས་དཀོར་རྐུན་སྒྲོལ༔ རྣལ་འབྱོར་བདག་གི་རྟ་ཕྱུགས་ནོར༔ ཁྱོད་ལ་གཉེར་གཏད་དགྱེས་བསྐང་བཞེས༔ ཇག་ཆོམ་སྒྲིབས་ལ་ཅེ་སྤྱང་སྲུངས༔ རྣལ་འབྱོར་བདག་གི་འཁོར་སློབ་བྲན༔ ཁྱོད་ལ་གཉེར་གཏད་སྲུང་སྐྱོབས་མཛོད༔ དམ་ལྡན་སྐྱོངས་ལ་དམ་མེད་སྒྲོལ༔ ཧཱུྃ་བྷྱོ༔ དཔལ་ལྡན་ལྷ་མོ་དུད་སོལ་མ༔ བདག་ཅག་རྣལ་འབྱོར་སྒྲུབ་པ་པོས༔ རྗེ་ལྟར་བརྟེན་ནོ་དབང་མ་ཆེ༔ མ་ལྟར་བརྟེན་ནོ་སྙིང་མ་རིང་༔ སྲིང་ལྟར་རྟེན་ནོ་ཚུལ་མ་ཞན༔ ཆུང་མར་བྱས་སོ་མཚུངས་མ་ཞན༔ འཛའ་མོར་བྱས་སོ་གཞུང་མ་ངན༔ གཡོག་མོར་བྱས་སོ་སྒབ་མ་ལྗི༔ བྲན་ལྟར་བརྟེན་ནོ་རྩལ་མ་ཆུང་༔ ཕོ་ཉར་བཏང་ངོ་བང་མ་བུལ༔ བཤན་པར་བསྐོས་སོ་དགྲ་མ་ཤོར༔ སྲུང་མར་བྱས་སོ་བགེགས་མ་གཏོང་༔ བོས་པའི་ཚེ་ན་སྙན་མ་སྲ༔ གཡབ་པའི་ཚེ་ན་སྤྱན་མ་བརྟུལ༔ བསྐུལ་བའི་ཚེ་ན་ངང་མ་རིང་༔ རྦད་པའི་ཚེ་ན་ལས་མ་འགྱང་༔ མངགས་པའི་ཚེ་ན་བང་མ་བུལ༔ དམར་ཆེན་ཨརྒྷཾ་འདི་བཞེས་ལ༔ དགྲ་བགེགས་ཟློག་ལ་བར་ཆད་བསྒྱུར༔ དེང་ནས་བྱང་ཆུབ་མ་ཐོབ་བར༔ བདག་གི་མགོན་སྐྱོབས་སྟོངས་གྲོགས་མཛོད༔ མཆོད་པ་ཡིན་ནོ་ངོ་མ་ཆུང་༔ བརྟེན་པ་ཡིན་ནོ་རྒྱང་མ་རིང་༔ བསྒྲུབ་པ་ཡིན་ནོ་ཕྲག་མ་དོག༔ ལུས་དང་གྲིབ་མའི་ཚུལ་དུ་འགྲོགས༔ འདུ་བ་རྣམ་བཞི་དབང་དུ་བསྡུས༔ དཔལ་འབྱོར་ཚེ་བསོད་ཉམས་རྟོགས་སྤེལ༔ བཅོལ་བའི་འཕྲིན་ལས་གྲུབ་པར་མཛོད༔ ཅེས་ཕུད་དང་གཏོར་མས་མཆོད། །

བསྲུང་བའི་ལས་མཐའ་ཤིན་ཏུ་ཟབ་པ།

སྔགས་བདག་འབར་མའི་ཐུགས་ཐིག་ལས༔ བསྲུང་བའི་ལས་མཐའ་ཤིན་ཏུ་ཟབ་པ་བཞུགས༔ རྦོད་གཏོང་མ་མོའི་ཚོགས་ལ་འདུད༔ སྔགས་བདག་འབར་མའི་རྣལ་འབྱོར་པས༔ རང་ཉིད་བསྲུང་བའི་ལས་འདོད་ན༔ མཎྜལ་དྲི་བཟང་སྨན་གྱིས་བྱུག༔ གཏོར་མ་ཟླ་གམ་དབྱིབས་ཅན་ལ༔ རྒྱན་དང་ལྡན་པར་བཞེངས་པའི་སྟེང་༔ གཙོ་མོ་སྐུ་མདོག་དམར་སེར་ལ༔ ཁ་ཊྭཱཾ་གཡས་ལ་བྷནྡྷ་གཡོན༔ ཕྱེད་སྐྱིལ་བཞུགས་པའི་ཙཀ་ལི་གཟུགས༔ དར་ཚོན་རྣམ་ལྔའི་གུར་ཡང་ཕུབ༔ སྨན་དང་རཀྟ་པཱུ་ཙ་བཤམས༔ རྣལ་འབྱོར་བདེ་བའི་གདན་ལ་འདུག༔ སྐད་ཅིག་མི་དམིགས་སྟོང་པའི་ངང་༔ རླུང་ནག་འཚུབ་མ་མེ་རིའི་ཀློང་༔ པདྨ་ཉི་ཟླའི་གདན་སྟེང་དུ༔ ཐུགས་སྲོག་མ་ཡིག་དཀར་པོ་ལས༔ འོད་ཟེར་འཕྲོས་པས་རྒྱལ་བ་མཆོད༔ བྱིན་རླབས་ཚུར་འདུས་འཁོར་འདས་ཀྱི༔ དྲེགས་ཚོགས་མ་ལུས་ཀུན་ལ་ཕོག༔ ཞེ་སྡང་ཞི་ཞིང་ནུས་མཐུ་བསྡུས༔ འོད་ཀྱི་རྣམ་པར་མ་ལ་ཐིམ༔ མ་ཡིག་གནས་གྱུར་དྲན་རྫོགས་སུ༔ དཔལ་གྱི་ལྷ་མོ་དམར་སེར་མདོག༔ ཞལ་གཅིག་ཕྱག་གཉིས་འཛུམ་མདངས་ལྡན༔ ཞབས་གཉིས་ཕྱེད་སྐྱིལ་འགྱིང་བག་ཅན༔ དར་གྱི་ན་བཟའ་རིན་ཆེན་བརྒྱན༔ གཡས་པས་ཁ་ཊྭཱཾ་བུམ་པའི་དབྱིབས༔ འོད་ཟེར་སྣ་ལྔའི་གུར་ཁང་ནང་༔ བསྲུང་བྱ་ཐམས་ཅད་ཚུད་པར་བསྒོམ༔ གཡོན་གྱི་བྷནྡྷ་བདུད་རྩི་ལས༔ བཛྲ་རཏྣ་པདྨ་དང་༔ རལ་གྲི་འཁོར་ལོའི་གུར་ཁང་འབར༔ རིམ་པ་ལྔ་ཡི་དྲ་མིག་ཏུ༔ ལྷ་མོ་དཀར་མོ་གྲངས་མེད་གཏམས༔ རང་གི་ཞལ་ནས་སྔགས་བཟླས་པས༔ འཁོར་བཅས་ཐམས་ཅད་སྔགས་སྒྲ་སྒྲོགས༔ ནང་དུ་ཞལ་གཟིགས་བསྲུང་བར་བསྒོམ༔ ཨཱོཾ་རུ་རུ་རོ་རུ་བེ་ཏི་ཏ༔ བ་ཏ་ཏོ་པི་མེ་ཙ་པ་ལ་ཨ་ཤུག་མེ༔ མ་མ་ཏྲག་རཀྴ༔ ཨཱོཾ་རུ་རུ་རོ་རུ་བེ་ཏོ་ཧུ་ཏ༔ ཥྟ་ཏོ་བི་མེ་ཙ་པ་ལ་ཨ་ཤུག་མེ་མ་མ་ཏྲག་རཀྴ་རུ་ལུ་རུ་ལུ་རེ་མ་ཏི་རུ་ཏི་སྙིང་ཁ་རག་མོ་ཙ་ཙ་མོ་མུཾ་ཛ་ཛཿཧཱུྃ་བྷྱོ་ཛཿཛཿ ཨཱོཾ་བཛྲ་དྷཻ་ཝི་ཀཱ་ལི་རཀྵ༔ རུ་ཏི་ཧྲི༔ བདག་ཅག་འཁོར་དང་བཅས་པ་སྲུངས་ཤིག་རཀྵ་རཀྵ་སྭཱ་ཧཱ༔ བསྲུང་པའི་གུར་དང་སྔགས་ཕྲེང་ལྷ་ཚོགས་ལས༔ འོད་དང་གཟི་བརྗིད་ཕྱོགས་བཅུར་འབར་བ་ཡིས༔ བྱད་དང་རྦོད་གཏོང་གནོད་བྱེད་ཐམས་ཅད་ཟློག༔ ཚེ་དང་བསོད་ནམས་ཡར་ངོ་ལྟར་རྒྱས་བསམས༔ སྔགས་དམིགས་གནད་བསྣུན་མཆོད་བསྟོད་གཏོར་མ་འབུལ༔ གསོལ་བ་གདབ་ཅིང་སྔགས་དམིགས་ལམ་ཁྱེར་རམ༔ གུར་དང་འཁོར་རྣམས་གཙོ་མོ་ཉིད་ལ་བསྡུ༔ གཙོ་མོ་གཤེགས་བཞུད་མེད་པར་ཆོས་དབྱིངས་ཀློང་༔ དགེ་བ་བྱང་ཆུབ་དོན་དུ་བསྔོ་སྨོན་བྱ༔ ཐོ་རངས་རྒྱས་པའི་དུས་སུ་རྣལ་འབྱོར་པས༔ སྔགས་དམིགས་ཆག་མེད་བརྩོན་ཏེ་ཉམས་བླངས་ན༔ བར་ཆད་མི་མཐུན་ཕྱོགས་ལས་རྣམ་པར་རྒྱལ༔ དམ་མེད་རྣམས་ལ་གསོངས་ཤིག་འབར་མའི་རྒྱ༔ བཀའ་རྒྱས་བཏབ་བོ་མ་འོངས་ལེགས་པར་སྤྱོད༔ ས་མ་ཡ༔ རྒྱ་རྒྱ་རྒྱ༔ གཏེར་རྒྱ༔ སྦས་རྒྱ༔ ཟབ་རྒྱ༔ གཉན་རྒྱ༔ ས་མ་ཡ༔ རྒྱ་རྒྱ་རྒྱ༔ རིག་འཛིན་ཉི་མ་གྲགས་པས་གནས་མཆོག་ཆེན་པོ་ཧ་ཙོ་ནས་གདན་དྲངས་པའོ། །མངྒ་ལཾ།། །།

རྦོད་གཏོང་བཟློག་པའི་ལས་མཐའ།

སྔགས་བདག་འབར་མའི་ཐུགས་ཐིག་ལས༔ རྦོད་གཏོང་བཟློག་པའི་ལས་མཐའ་བཞུགས༔ རྦོད་གཏོང་མཁའ་འགྲོའི་ཚོགས་ལ་འདུད༔ མ་འོངས་རྗེས་འཇུག་སྐལ་ལྡན་གྱིས༔ བྱད་མ་རྦོད་གཏོང་བཟློག་འདོད་ན༔ དུག་ཤོག་ངོས་ལ་ལིང་ག་བྲི༔ མིང་རུས་བླ་དྭགས་ལྡན་པར་བྱ༔ ཟག་རྫས་བྱུག་ཅིང་ལྷ་དང་དབྱེ༔ ཆོས་འབྱུང་ནག་པོའི་ནང་དུ་གཞུག༔ བདེན་པ་བདར་ཞིང་ཕོ་ཉ་སྤྲོ༔ འགུགས་བསྟིམ་དམིགས་པས་རྒྱས་གདབ་སྟེ༔ རི་རབ་ནག་པོས་ཧོམ་ཁ་བཀག༔ ཐུན་ལམ་བུག་པར་རྡོ་རྗེས་མཚན༔ མཆོད་རྟེན་དུག་ཁྲག་རོ་སོལ་བྱུག༔ དམིགས་པ་ལྕགས་ཁང་འབར་བའི་ནང་༔ དགྲ་བོ་བྱད་མ་ལྷ་སྲུང་རྣམས༔ དབང་དུ་བསྡུས་ཏེ་ཟིལ་གྱིས་མནན༔ ལྷ་མོ་ནག་མོ་དྲེའུ་ཞོན་མས༔ སྤྲུལ་པ་ནད་མཚོན་དུག་ཆར་ཕབ༔ ལྕགས་ཁང་དྲེའུ་རྟའི་ཞབས་འོག་ཏུ༔ དགྲ་བགེགས་བྱད་མ་ནེམ་པར་མནན༔ ཁོ་ཡི་ལྷ་སྲུང་མ་བཟོད་ཁྲོས༔ བྱད་མར་རང་གཤེད་རང་ལ་ཕབ༔ མ་མོའི་སྤྲུལ་པ་དྲེགས་ཚོགས་ཀྱིས༔ རྡུལ་ཕྲན་ཉིད་དུ་བརླག་པར་བསམས༔ མ་བྷྱོ་མ་མ་རུ་ལུ་ཏྲག་རཀྴ་བྷྱོ་རེ་མ་ཏི་དགྲ་བགེགས་བྱད་མ་ལྷ་བསྲུང་དང་བཅས་པ་མཱ་ར་ཡ་ཧཱུྃ་ཛཿབྷྱོ་ཟློག༔ བྱད་ཕུར་གཏད་ཁྲམ་གཏོང་བའི་ཆེ་གེའི་བླ་སྲོག་རྣམ་པར་ཤེས་པ་སོད་ཅིག་ཆོད་ཅིག་གཏུབས་ཤིག་ས་མ་ཡ་བྷྱོ་བྷྱོ་ཟློག་ཟློག་མཱ་ར་ཡ་ཧཱུྃ་ཕཊ༔ ཅི་མང་བཟླ་ཞིང་ཐུན་སྐབས་སུ༔ མཆོད་བསྟོད་རྦད་བསྐུལ་ཐུན་ཡང་བརྡེག༔ དམར་ཐག་ཟེར་ཁར་བདེན་སྟོབས་བརྗོད༔ ཐལ་མོ་བརྡབས་པས་དགྲ་དང་བགེགས༔ ཁྱད་པར་བྱད་མ་རྦོད་གཏོང་རྣམས༔ མེ་ལྕེ་ཁ་ཡི་སྦྲང་བུ་ལྟར༔ སྐད་ཅིག་ཉིད་ལ་བརླག་པར་བསྒོམ༔ ཉ་སྟོང་ལ་སོགས་དུས་ཆེན་ལ༔ ཐུན་བཟུང་གནད་དུ་བསྣུན་པར་བྱ༔ དམར་ཐག་དུས་སམ་སྲོད་དྲག་པོར༔ རྒྱུན་དུ་མ་ཆག་བརྩོན་གྱུར་ན༔ ཕས་ཀྱི་བྱད་མ་རྦོད་གཏོང་རྣམས༔ བཟློག་འགྱུར་འདི་ལ་ཐེ་ཚོམ་མེད༔ ལྔ་བརྒྱའི་དུས་ཀྱི་ཐ་མ་ལ༔ ལས་འཕྲོ་ཅན་དང་འདི་བཕྲད་ནས༔ བར་ཆད་ཚོགས་ལས་རྒྱལ་བར་ཤོག༔ སྲུང་མ་རྣམས་ལ་བཅོལ་ལོ་རྒྱ༔ དམ་མེད་འགྲོ་ལ་ཨ་ཐམ་རྒྱ༔ ས་མ་ཡ༔ རྒྱ་རྒྱ་རྒྱ༔ གཏེར་རྒྱ༔ སྦས་རྒྱ༔ ཟབ་རྒྱ༔ ས་མ་ཡ༔ རྒྱ་རྒྱ་རྒྱ༔ རིག་འཛིན་ཆེན་པོ་གཏེར་ཆེན་ཆོས་ཀྱི་རྒྱལ་པོ་ཉི་མ་གྲགས་པ་རྩལ་གྱིས་གནས་མཆོག་ཆེན་པོ་ཧ་ཙོ་ནས་གདན་དྲངས་པའོ། །མངྒ་ལཾ།། །།

རྦད་པ་ལྕགས་ཀྱུ་དམར་པོ།

སྔགས་བདག་འབར་མའི་ཐུགས་ཐིག་ལས༔ རྦད་པ་ལྕགས་ཀྱུ་དམར་པོ་བཞུགས༔ རྦོད་གཏོང་དྲག་སྔགས་ལྷ་ལ་འདུད༔ ཁོ་བོ་པདྨ་ཐོད་ཕྲེང་རྩལ༔ དྷ་ན་ཀོ་ཤའི་མཚོ་ལས་སྐྱེས༔ སུམ་སྟོང་ལོན་བར་རྒྱ་གར་བསྡད༔ སློབ་དཔོན་རྡོ་རྗེ་དབང་བསྡུད་ལ༔ མ་མོའི་རྒྱུད་ནི་སྟོང་ཕྲག་ཞུས༔ སོ་སོའི་ལས་ཚོགས་གདམས་པར་བཅས༔ རྒྱ་བོད་འཛམ་གླིང་ཐམས་ཅད་དུ༔ སངས་རྒྱས་བསྟན་པའི་བཙས་སུ་བཞག༔ ལས་འཕྲོ་ལྡན་པའི་སྐལ་ལྡན་ནི༔ ཐར་ཐོར་འབྱུང་ཞིང་རྒྱ་འགྲོལ་ཏེ༔ བསྟན་དང་འགྲོ་བའི་དོན་ཆེན་བྱེད༔ ས་མ་ཡ༔ རྒྱ་རྒྱ་རྒྱ༔ སྔགས་བདག་འབར་མའི་རྣལ་འབྱོར་པས༔ དགྲ་བོ་ཁ་ཕུང་གཏོང་འདོད་ན༔ བག་ཟན་ངལ་སྣབས་ཟག་རྫས་ལ༔ དགྲ་བོའི་ལིངྒ་བཟོ་བར་བྱ༔ ཧོམ་གཞུག་དུག་ཁྲག་དག་གིས་བྱུག༔ རྩང་གིས་བསྐོར་ཞིང་རང་མདུན་བཞག༔ དགྲ་བོ་ཤིན་ཏུ་ཐུ་བ་ན༔ དུག་ཤོག་ངོས་ལ་དུག་ཁྲག་གིས༔ ལིངྒ་ལྔ་གསུམ་བདུན་ལ་སོགས༔ དགྲ་བོའི་དཔུང་ཚན་སྐབས་ལྟར་བྲི༔ དེ་ཡང་ཧོམ་ཁུང་ནང་དུ་བཅུག༔ གཏོར་མཆོད་བསྒྲུབ་པའི་གཞུང་བཞིན་བཤམས༔ སྐྱབས་སེམས་སྔོན་བཏང་ལས་གཞུང་བསྲང་༔ མ་ཉེས་ཤགས་འདེབས་གསེར་སྐྱེམས་མཆོད༔ བདེན་སྟོབས་བརྗོད་ཅིང་དགྲ་བོ་དགུག༔ སྔགས་དང་ཕྱག་རྒྱས་བསྟིམ་ཞིང་བསྡམས༔ ཧོམ་ཁུང་ཐུན་ལམ་མ་གཏོགས་བསྡམས༔ ཐར་མེད་ནང་དུ་ཚུད་པར་བསྒོམ༔ དེ་ནས་འདི་ལྟར་རྦད་པར་བྱ༔ བདག་དང་མདུན་བསྐྱེད་གོང་ལྟར་ལ༔ འབོད་པའི་ཏིང་འཛིན་མ་བྲལ་བར༔ སྲོག་གི་སྙིང་པོ་བརྒྱ་རྩ་བཟླ༔ དེ་ནས་མདུན་གྱི་ཉ་བོ་དང་༔ དགྲ་བོ་ཁོ་རང་གར་གནས་ཀྱང་༔ སྙིང་གི་ནང་དུ་ནྲི་ལྗང་གུའི༔ མིག་ཏུ་ཡི་གེ་ཕཊ་དམར་ནག༔ ཐ་མར་སྔགས་ཀྱི་རིམ་པ་ནི༔ སྙིང་ཞུན་གབ་ཡིག་ལྟ་བུ་ལ༔ གབ་ཏིག་སྤྲད་དེ་གསལ་བར་བསྒོམ༔ དེ་ནས་བདག་དང་མདུན་བསྐྱེད་ཀྱི༔ འོད་དང་གཟི་བརྗིད་འཁྲུག་ཅིང་འབར༔ སྤྲུལ་པ་ཡང་སྤྲུལ་ལྷ་མོའི་ཚོགས༔ ནམ་མཁའ་ས་གཞི་བར་སྣང་ཁྱབ༔ ལྕགས་ཀྱུ་ཞགས་པ་ལྕགས་སྒྲོག་དང་༔ རྣོ་ངར་ལྡན་པའི་མཚོན་ཆ་ཐོགས༔ ཡོམ་ཡོམ་ཤིགས་ཤིག་ཀུན་ཏུ་འཕྲོ༔ དམ་ཉམས་དགྲ་བོ་ལས་ངན་དེ༔ ཉེས་ཅན་བཙོན་དུ་ཁྲིད་པའམ༔ བྱིའུ་ཁྲ་ཡིས་བཤུར་བའམ༔ ཉ་མོ་སྲམ་གྱིས་དེད་པ་ལྟར༔ སྐད་ཅིག་རང་དབང་མེད་པ་རུ༔ མདུན་གྱི་གཟུགས་ལ་ཐིམ་པར་བསམས༔ ཡང་གསལ་ཡང་བསྐྱེད་ནན་གྱིས་བསྟིམ༔ སྒྲུབ་ཐབས་གཞུང་ལྟར་སྔགས་བཟླའོ༔ སྐབས་སྐབས་ཤགས་འདེབས་བདེན་སྟོབས་བརྗོད༔ བསྐུལ་འདོན་ཚོགས་མཆོད་དམིགས་པ་གསལ༔ ནན་ཏན་སྔགས་ལ་བསྐྱེད་པར་བྱ༔ ས་མ་ཡ༔ རྒྱ་རྒྱ་རྒྱ༔ འདི་ལྟར་བརྩམས་པའི་རྣལ་འབྱོར་ལ༔ རབ་ནི་དགྲ་བོ་དངོས་ཀྱི་ཡོང་༔ འབྲིང་ནི་རྨི་ལམ་ཉམས་སྣང་ལ༔ དམག་དྲངས་ལིངས་བཏབ་དོན་སྙིང་བཅང་༔ དགྲ་བོའི་ཁང་ཁྱིམ་བཤིགས་པ་སོགས༔ རྟགས་བྱུང་ལིངྒ་བྱད་ཐག་དཀྲི༔ ལྷ་མོ་འཁོར་བཅས་གཏོར་མས་མཆོད༔ དེ་ནས་བསད་པའི་ལས་ལ་སྦྱོར༔ དགྲ་བོ་ཐམས་ཅད་ཁ་ཕུང་འགྲོ༔ རྦད་པའི་ཡང་ཏིག་གདམས་པ་འདི༔ ཤིན་ཏུ་ཟབ་པའི་བཀའ་ཡིན་པས༔ བྲམ་ཟེའི་བུ་མོ་དཔལ་སྐྱེས་མས༔ ལེགས་པར་ཉོན་ལ་ཡི་གེར་ཐོབ༔ ཧཱ་ཙོའི་བྱང་སྒོར་གཏེར་དུ་སྦོས༔ འདི་ནས་མ་འོངས་རིང་འདས་དུས༔ ཁྱོད་ནི་བོད་ཡུལ་ཁམས་སུ་སྐྱེ༔ གསང་སྔགས་ཟབ་ཆོས་གཏེར་ནས་ཕྱུང་༔ དེ་དུས་ཟབ་མོའི་ཡང་ཏིག་འདི༔ བོད་ནས་འོང་ཞིང་རྒྱ་ནས་རྙེད༔ ལས་འཕྲོ་ཅན་དེའི་སྙིང་ནོར་བྱེད༔ སངས་རྒྱས་བསྟན་ལ་ཕན་པ་ཡོང་༔ ཅེས་གསུངས་པ་རྣམས་བདག་བྲམ་ཟེའི་བུ་མོ་དཔལ་སྐྱེས་མས་ཡི་གེར་བྲིས་ཏེ་ཧ་ཙོའི་བྱང་སྒོར་གཏེར་དུ་བཅོལ་ལོ༔ ས་མ་ཡ༔ ཁ་ཐཾ༔ ཁ་ཐཾ༔ ཁ་ཐཾ༔ རྒྱ་རྒྱ་རྒྱ༔ གཏེར་ཆེན་ཆོས་ཀྱི་རྒྱལ་པོ་རིག་འཛིན་ཉི་མ་གྲགས་པས་རྒྱ་གར་རྩྭ་མཆོག་གྲོང་ནས་གདན་དྲངས་ཤིང་སྦས་ཡུལ་སྐྱིད་མོ་གཤོང་གི་དགོན་པ་མཚོ་གྲོང་གི་གཙུག་ལག་ཁང་གི་ཡང་དབེན་དུ་ཤོག་སེར་ལས་བོད་ཡིག་ཏུ་བསྒྱུར་བའོ། །མངྒ་ལཾ།། །།

བསད་པ་ཧུར་ཐུམ་ནག་པོ།

སྔགས་བདག་འབར་མའི་ཐུགས་ཐིག་ལས༔ བསད་པ་ཧུར་ཐུམ་ནག་པོ་བཞུགས༔ རྦོད་གཏོང་མ་མོའི་ལྷ་ལ་འདུད༔ སྔགས་བདག་འབར་མའི་རྣལ་འབྱོར་པས༔ དགྲ་བོ་བསད་པའི་ལས་སྦྱོར་ནི༔ བརྩོན་འགྲུས་ལྡན་པས་འདིར་ལྟར་བརྩམས༔ ས་མ་ཡ༔ རྒྱ་རྒྱ་རྒྱ༔ དཀྱིལ་འཁོར་བཅའ་གཞི་ལག་ལེན་ནི༔ རྦད་པའི་སྐབས་ལྟར་ཤེས་པར་བྱ༔ ཁྱད་པར་གྲི་ལྕགས་རལ་གྲིའམ༔ ཡང་ན་སོ་ལ་གྲི་ཁྲག་བྱུག༔ ཕུར་པ་ལ་སོགས་མཚོན་ཆ་ཀུན༔ སོ་ལ་དུག་ཁྲག་བྱུག་པར་བྱ༔ དགྲ་བོའི་ངལ་སྣབས་དྲི་ཆུ་དང་༔ སྐྲ་སེན་གོས་དུམ་ཕྲེང་དྲེག་རྣམས༔ གང་རྙེད་ལིངྒར་ལྡན་པ་གཅེས༔ ལས་ཀྱི་གཞུང་བསྲང་བསྐྱེད་རྫོགས་གསལ༔ མ་ཉེས་ཤགས་འདེབས་བདེན་སྟོབས་བརྗོད༔ སྒྲུབ་པ་རྦད་པའི་སྔགས་དམིགས་རྣམས༔ ཐུན་གྱི་མགོ་བོར་དུམ་རེ་སྐྱལ༔ དེ་ནས་བསད་བའི་ཡང་ཏིག་ནི༔ བསྐྱེད་རིམ་སྔགས་དམིགས་འདི་ལྟར་བྱ༔ རང་ཉིད་དཔལ་གྱི་ལྷ་མོར་བསྒོམ༔ ཐུགས་ཀའི་མ་དང་བྷྱོ་ཡིག་ལས༔ འོད་ཟེར་དམར་ནག་ཕྲེང་བའི་ཚུལ༔ ཕྱིར་འཕྲོས་སྔགས་འབྲུ་ཕྱི་ནང་བརྒྱུད༔ དགྲ་བོའི་སྙིང་གར་འཕྲོས་པ་ལས༔ སྔགས་འབྲུ་ཡི་གེ་རིམ་བཞིན་བརྒྱུད༔ ནྲི་ཡི་དཀྱིལ་གྱི་ཕཊ་ལ་ཕོག༔ ཕཊ་ལས་མེ་དཔུང་མཚོན་ཆའི་ཆར༔ དཔག་མེད་འཕྲོས་པས་སྲོག་སྙིང་ནྲི༔ ཚལ་བ་དུམ་བུར་གཏུབས་པར་བསམས༔ སྔགས་ཕྲེང་ཡིག་འབྲུ་ནང་མ་གསུམ༔ སྐད་ཅིག་གནས་གྱུར་འདི་ལྟར་གསལ༔ རེ་ལས་བ་ལམ་དྲེལ་སྣ་མ༔ ནག་མོ་བོང་བུ་ཁ་དཀར་ཆིབས༔ མདུང་དར་ནག་པོ་ཁྲག་ཐུན་བསྣམས༔ མ་ལས་སྟག་སྨན་གཟེར་འདེབས་མ༔ ནག་མོ་སྟག་མོ་གྲུས་མ་ཆིབས༔ མདུང་དར་ནག་མོ་ཁྲག་ཐུན་བསྣམས༔ ཏི་ལས་ཁྲི་སྨན་སི་ལེ་མ༔ ནག་མོ་རེ་ལྡེ་སྐུ་ལ་གསོལ༔ ནད་ཀྱི་རྐྱལ་པ་ཐུན་ཁྲག་ཐོགས༔ ཆིབས་སུ་བྱ་རོག་ནག་པོ་བཅིབས༔ དེ་ཡི་ཕྱི་རིམ་ཡིག་འབྲུ་ལས༔ མ་ལས་མ་མོ་རྡོ་རྗེ་བ་ལམ་མ༔ ནག་མོ་དྲེའུ་རྟ་རྐང་གསུམ་ཆིབས༔ དར་ནག་གོས་ཟུང་རེ་ལྡེ་ནག༔ ཟླ་བས་དབུ་རྒྱན་གཡང་གཞི་གསོལ༔ རལ་གྲི་ནེའུ་ལེ་ཕྱག་ན་བསྣམས༔ ར་ལས་རྒྱལ་པོ་ཚངས་པ་དཀར༔ དར་དཀར་བེར་གསོལ་དུང་རྨོག་གྱོན༔ སྟག་རལ་གཡས་ལ་གཟིག་ཤུབས་གཡོན༔ སྤུ་གྲི་ཟངས་ཡག་ཞགས་པ་དམར༔ ཆིབས་སུ་སྟག་ཆེན་རྔམ་པ་བཅིབས༔ ཡ་ལས་བྷེ་ཝ་ས་ཏ་ནག༔ ཁྲམ་ཤིང་གཡས་ལ་མེ་ལོང་གཡོན༔ ཐོད་པས་དབུ་བརྒྱན་གཡང་གཞི་གསོལ༔ ཆིབས་སུ་ཆུ་གླང་ནག་པོ་བཅིབས༔ ཛ་ལས་བྱེ་བར་དགུ་རིང་ནག༔ ཐོད་སྐམ་དབུ་བརྒྱན་མི་ལྤགས་གྱོན༔ ཐོད་རློན་ཕྲེང་བས་དོ་ཤལ་བྱས༔ མདུང་དར་དཀར་པོ་ཞགས་པ་ནག༔ ཆིབས་སུ་བདུད་ཀྱི་རྟ་ནག་བཅིབས༔ ཀུན་ཀྱང་མི་བཟད་འཇིགས་རྔམ་འཁྲུག༔ འབར་བའི་སྟོབས་དང་ལྡན་པར་བསྒོམ༔ ཐུགས་ཀར་སོ་སོའི་སྙིང་པོས་མཚན༔ འཁྲུག་པས་དགྲ་བོ་བརླག་པར་བསམས༔ དེ་རྒྱབ་སྔགས་འབྲུ་བཅུ་དྲུག་པ༔ གནས་གྱུར་མེ་དཔུང་མཚོན་ཆའི་ཆར༔ དུག་ནད་རྐྱལ་བ་ཐོག་ཆར་འབབ༔ དགྲ་བོ་བརླག་པའི་མཐུ་ལྡན་བསམས༔ དེ་ནས་དམིགས་བྱའི་སྙིང་ནང་དུ༔ ཁོ་ཡི་ལས་ངན་རྣམ་སྨིན་ལས༔ གྲུབ་པའི་ལས་གཤིན་མང་པོ་དང་༔ འཆི་བདག་དྲེགས་པ་བདུན་པོ་ཡིས༔ གློ་སྙིང་ནང་རོལ་ཧབ་ཧབ་བཞེས༔ སྲོག་རྩ་བཅད་ཅིང་སྙིང་ཁྲག་འཇིབས༔ ནྲི་དཀྱིལ་ཕཊ་ཀྱིས་ཕྱིར་ལ་གཏོར༔ ཁྲོ་བོ་ཁྲོ་མོ་ནང་ལ་གཏུམས༔ རྣམ་ཤེས་མར་མེ་འཆི་ཀ་ཙམ༔ ནག་ནི་ཐུམ་ཐུམ་བསད་པར་བསམས༔ བསྐྱེད་རིམ་དམིགས་པ་གནད་དུ་བསྣུན༔ སྒྲུབ་ཐབས་གཞུང་གི་སྔགས་བཟླའོ༔ ས་མ་ཡ༔ རྒྱ་རྒྱ་རྒྱ༔ འདི་ལྟར་འབད་པས་སོད་པའི་རྟགས༔ རབ་དངོས་འབྲིང་ཉམས་ཐ་ནའང་༔ རྨི་ལམ་སོགས་ལ་དོན་སྙིང་གཏང་༔ ཡང་ན་དགྲ་བོའི་ཁང་ཁྱིམ་བཤིག༔ བླ་རྟགས་བསད་དང་ལིངས་བཏབ་དང་༔ བྲག་བཤིགས་ཤིང་བཅད་ཐོག་ཕབ་པ༔ དེ་སོགས་དུས་ལ་བབས་པའི་རྟགས༔ ལིང་ག་བསྒྲལ་ཞིང་གཏོར་མ་འབུལ༔ ཤོག་ལིང་ར་རུ་གླང་རུ་དང་༔ གཅན་གཟན་སོགས་ཀྱི་ཐོད་པར་བཅུག༔ ཐུན་རྫས་རེ་ཧྲུལ་ནག་པོས་དྲིལ༔ གྲུ་གསུམ་འདུས་པའི་ས་མདོའམ༔ རྒྱ་གྲམ་ལམ་མམ་མཆོད་རྟེན་ཞབས༔ སྒྲུབ་ཁང་ལྷ་ཁང་ཐེམ་འོག་སོགས༔ རིགས་པས་དཔྱད་དེ་གནོན་པར་བྱ༔ ས་མ་ཡ༔ རྒྱ་རྒྱ་རྒྱ༔ ཐུན་སྐབས་བསྐུལ་དང་གཏོར་མས་མཆོད༔ ལས་གྲུབ་གཏང་རག་མཆོད་གཏོར་འབུལ༔ བསྐང་བ་ལ་སོགས་རྒྱས་པར་བྱ༔ གྲིབ་ལ་འཛེམ་ཞིང་དམ་ཚིག་བསྲུང་༔ རྒྱུན་དུ་མཆོད་བསྟོད་ནར་མར་བརྩོན༔ བུད་མེད་རྣམས་ལ་སྨད་པ་སྤང་༔ འདི་ནི་མཁའ་འགྲོའི་དམ་ཚིག་གོ༔ ས་མ་ཡ༔ རྒྱ་རྒྱ་རྒྱ༔ ཁ་ཐཾ༔ སོ་ཕག་ཤི་ན་རྒྱ༔ ན་ར་ཀན་རྒྱ༔ ས་མ་ཡ༔ རྒྱ་རྒྱ་རྒྱ༔ ཆིག་བརྒྱུད་བུ་ལ་མ་གཏོགས་ཕག་ཏུ་སྦོས༔ ས་མ་ཡ༔ ཁ་ཐཾ༔ རིག་འཛིན་ཉི་མ་གྲགས་པས་ཤིང་ཕོ་བྱི་བའི་ལོ་ཧོར་ཟླ་དང་པོའི་ཚེས་ལ་རྒྱ་གར་རྩྭ་མཆོག་གྲོང་ནས་གདན་དྲངས་ཤིང་སྦས་ཡུལ་སྐྱིད་མོ་གཤོང་དུ་ཤོག་སེར་ལས་བོད་ཡིག་ཏུ་བསྒྱུར་པའོ། །མངྒ་ལཾ།། །།

ཤིན་ཏུ་ཟབ་པའི་ལས་སྦྱོར།

སྔགས་བདག་འབར་མའི་ཐུགས་ཐིག་ལས༔ ཤིན་ཏུ་ཟབ་པའི་ལས་སྦྱོར་བཞུགས༔ རྦོད་གཏོང་མཁའ་འགྲོའི་ཚོགས་ལ་འདུད༔ དམ་ཉམས་དགྲ་བོ་སྒྲོལ་འདོད་ན༔ དུར་ཁྲོད་ས་ལ་དཀྱིལ་འཁོར་ནི༔ མཐིང་ནག་གྲུ་གསུམ་ཨེ་ཡི་དབྱིབས༔ ཟླ་གམ་གསུམ་ནི་དམར་པོར་བྱ༔ བརྟེན་གཏོར་རྒྱུན་གཏོར་སྨན་རག་བཤམས༔ ལྷ་ཁང་དུར་ཁྲོད་འཕུང་ཤུལ་ཆུ་འགྲམ་སར༔ ཚ་བ་གསུམ་དང་རྗེས་ས་བསྲེས་པ་ལ༔ དགྲ་བོའི་ལིངྒ་སོར་མོ་བརྒྱད་པ་བཟོ༔ མིང་རུས་ལིང་གར་བྲིས་པ་སྙིང་གར་གཞུག༔ ཡུགས་སའི་སྐྲ་ཤད་ཞིང་རྒྱུས་སྐེ་ནས་བཏགས༔ རང་ཉིད་དཔལ་གྱི་སྔགས་བསྲུང་གཞུང་ལྟར་བསྐྱེད༔ མདུན་དུའང་དེ་བཞིན་གསལ་ཞིང་དགྲ་བོ་དེ༔ སྐད་ཅིག་རང་དབང་མེད་པར་གཟུགས་ལ་བསྟིམ༔ རྩ་བའི་སྔགས་ལ་འདི་བཏགས་བཟླ་བར་བྱ༔ བྷྱོ་རེ་མ་ཏི་མཱ་ར་ཡ་ཛཿཧཱུྃ༔ མ་མ་ཏྲག་རཀྴ་རུ་ལུ་རུ་ལུ་ཧཱུྃ་བྷྱོ་ཛཿཛཿ ཁུག་ཛཿཨ་ཀཪྴ་ཡ་ཛ་ཛཿཁུག་རྟགས་མ་གསལ་བར་དུ་ནན་གྱིས་བཟླ༔ ཁུགས་རྟགས་གསལ་ནས་ལྷ་དང་དབྱེ་བ་ནི༔ གུ་གུལ་དུད་པས་ལིང་ག་བདུག༔ བྱ་རོག་འུག་པའི་སྒྲོ་ཡིས་བརྡེག༔ མ་མ་ཏྲག་རཀྴ་རུ་ལུ་རུ་ལུ་ཧཱུྃ་ཛཿཛཿ དགྲ་བོ་མཱ་ར་ཡ་ཕྱེ་ཕྱེ༔ མཱ་ར་ཡ་རུ་ཏྲི་ནི་ཨ་ཕྱེ༔ ཅི་མང་བཟླ་ཞིང་ལྷ་དང་དབྲལ༔ ཡུངས་ཀར་ཡུངས་ནག་ཐུན་གྱིས་བྲབ༔ དེ་ནས་བསད་སྔགས་འདི་ལྟར་བཟླ༔ ཨཱོཾ་ཏྲི་ལེ་སུ་ཧེ་ནི་སྙིང་ལ་ཡ་མ་ཏྲི་ནི་ཁ་ཁ་ཊཾ་སརྦ་རྦད་རྦད༔ དགྲ་བོའི་སྙིང་རྩ་ལ་མཱ་ར་ཡ་ཐུན་ཡ༔ ཧལ་ཧལ་མ་ཧཱ་ཀུ་ཀུ་མ་ལ་དུག༔ དགྲ་བོ་ཤ་ཏྲ་མ་རྦད༔ གཡག་མོ་གཡས་མོ་སོད་ཁྲོལ་དགྲ་བོ་ཐུན་ཐུན་མཱ་ར་ཡ་ཛཿཛཿ ཅེས་བཟླ་བསད་རྟགས་གསལ་ནས་ལས་ལ་སྦྱར༔ གདོལ་པ་ཀླུའམ་ལྷ་ཁང་མཆོད་རྟེན་འོག༔ མནན་ཅིང་འགུགས་བསྟིམ་རྒྱས་འདེབས་མི་མངོན་བྱ༔ དགྲ་བོ་སྒྲོལ་བའི་ལས་མཐའ་ཟབ་པོ་རྒྱ༔ ས་མ་ཡ༔ རྒྱ་རྒྱ་རྒྱ༔ གཏེར་རྒྱ༔ སྦས་རྒྱ༔ ཟབ་རྒྱ༔ གཉན་རྒྱ༔ ས་མ་ཡ༔ རྒྱ་རྒྱ་རྒྱ༔ རིག་འཛིན་ཉི་མ་གྲགས་པས་ཧ་ཙོ་ནས་གདན་དྲངས་པའོ། །མངྒ་ལཾ།། །།

སྔགས་ཀྱི་མདེའུ་ཐུང་།

སྔགས་བདག་འབར་མའི་ཐུགས་ཐིག་ལས༔ སྔགས་ཀྱི་མདེའུ་ཐུང་༔ རྦོད་གཏོང་མ་མོའི་ཚོགས་ལ་འདུད༔ སྤུ་གྲི་སྔགས་ཀྱི་ལས་ཁྲིགས་ནི༔ རང་ཉིད་ལྷར་གསལ་ཧཱུྃ་ལ་སྔགས་རྣམས་འཁོར༔ ལྷ་མོའི་ཐུགས་ཀའི་བྷྱོ་ལ་སྔགས་འཁོར་བསྐོར༔ མ་ཡིག་མིག་ཏུ་བྷྱོ་བསྒོམ་ཞིང་༔ འོད་ཟེར་དམར་པོ་ཧཱུྃ་ལས་འཕྲོས་པས༔ ལྷ་མོའི་ཐུགས་ཀའི་འབོད་སྔགས་བཅུ་དྲུག་བརྒྱུད༔ བཞི་བརྒྱུད་གསུམ་བརྒྱུད་བྷྱོ་ལ་ཕོགས་པ་ཡི༔ འོད་ཟེར་འཕྲོས་པས་བྱང་ཤར་དུར་ཁྲོད་ནས༔ ལྷ་མོ་སྤྱན་དྲངས་བསྐྱེད་པའི་སྐུ་ལ་བསྟིམ༔ སླར་ཡང་ཐུགས་ཀའི་ཧཱུྃ་སྔགས་ཕྲེང་བ་ལས༔ འོད་ཟེར་འཕྲོས་པས་བོད་པ་བཅུ་དྲུག་བརྒྱུད༔ བཞི་བརྒྱུད་གསུམ་བརྒྱུད་བྷྱོ་ལ་འོད་ཕོགས་པས༔ བྷྱོ་ལས་འོད་དམར་མ་མོའི་སྲོག་གི་ཚུལ༔ རང་ཉིད་ཧེ་རུ་ཀ་ཡི་ཐུགས་ཀར་བསྟིམ༔ དེ་ནི་འབོད་པའི་དམིགས་པའི་མདེའུ་ཐུང་ངོ་༔ ས་མ་ཡ༔ རྒྱ༔ གཉིས་པ་རྦད་པའི་དམིགས་པའི་མདེའུ་ཐུང་ནི༔ ལྷ་མོའི་སྐུ་ལས་རང་འདྲའི་སྤྲུལ་པ་ནི༔ བྱེ་བ་འབུམ་འབུམ་གྲངས་མེད་དགྲ་ཡུལ་སྤྲོས༔ ནད་མཚོན་ཆར་ཕབ་དགྲ་བོ་བརླག་པར་བསམས༔ རྦད་པའི་ལས་སྦྱོར་སྔགས་དམིགས་ནན་ལྟར་བསྐྱེད༔ ས་མ་ཡ༔ རྒྱ༔ གསུམ་པ་བསད་པའི་དམིགས་པའི་མདེའུ་ཐུང་ནི༔ རང་ཉིད་དཔལ་གྱི་ལྷ་མོར་བསྐྱེད་ཅིང་གསལ༔ དགྲ་བོའི་སྙིང་གར་ནྲི་ལ་འཁོར་ལོ་བསྐོར༔ ལྷ་མོའི་ཐུགས་ཀའི་འོད་ཟེར་གྱིས་བསྐུལ་བས༔ ཕཊ་ཀྱིས་ནྲི་ཡིག་ལྗང་གུ་དཀྲུགས་ཤིང་གཏོར༔ དྲེགས་པ་བདུན་གྱིས་དགྲ་བོའི་སྲོག་རྩ་བཅད༔ གསུམ་པ་བརྒྱུད་ནས་འོད་ཀྱི་ཚེ་བསོད་དང་༔ རྣམ་ཤེས་དྲངས་ཏེ་རང་དང་གཉིས་མེད་བསམས༔ བློ་འདས་སྙིང་རྗེས་སྒྲོལ་བའི་ཏིང་འཛིན་གསལ༔ ཆགས་པ་སྐྱེས་ནས་ཁུ་བ་ཟགས་གྱུར་ན༔ སིནྡྷུ་ར་སྦྱར་ཐོད་པར་ཛ་གད་བླུག༔ ལྷ་མོ་བསྐྱེད་བསྟིམ་འོད་བཞུ་ནང་དུ་བཏུང་༔ སྔགས་བཟླས་མཆོད་བསྟོད་བྱེད་པ་གནད་ཡིན་ནོ༔ ནུས་པའི་དངོས་གྲུབ་ཡོན་ཏན་མང་དུ་འཐོབ༔ ས་མ་ཡ༔ རྒྱ༔ སྙིང་སྤེལ་ནག་མོའི་རྒྱུད་ཀྱི་སྔགས་བྱང་ནི༔ བྷྱོ་མཱ་ར་ཡ་ཛཿཧཱུྃ༔ བྷྱོ་རེ་མ་ཏཱི་མཱ་ར་ཡ་ཛཿཕཊ༔ བྷྱོ་རེ་མ་ཏཱི་མཱ་ར་ཡ་ཛ་ཧཱུྃ་བྷྱོ་ཕཊ༔ བྷྱོ་རེ་མ་ཏཱི་ཆེ་གེ་མཱ་ར་ཡ་ཛཿཧཱུྃ་བྷྱོ་ཕཊ༔ ས་མ་ཡ༔ རྒྱ་རྒྱ་རྒྱ༔ ཟབ་རྒྱ༔ གཉན་རྒྱ༔ དམ་རྒྱ༔ རིག་འཛིན་ཆེན་པོ་ཁམས་པ་ཉི་མ་གྲགས་པས་གནས་མཆོག་ཆེན་པོ་ཧ་ཙོ་ནས་གདན་དྲངས་ཤིང་བོད་ཡིག་ཏུ་བསྒྱུར་བའོ། །མངྒ་ལཾ།། །།

རྦད་ཅིང་བསྐུལ་བའི་ལས་མཐའ།

སྔགས་བདག་འབར་མའི་ཐུགས་ཐིག་ལས༔ རྦད་ཅིང་བསྐུལ་བའི་ལས་མཐའ་བཞུགས༔ རྦོད་གཏོར་མ་མོའི་ཚོགས་ལ་འདུད༔ གཏོར་མར་འགུགས་བསྟིམ་སྨན་རག་སྦྲེང་༔ རོལ་མོ་འཁྲོལ་ཞིང་འདི་སྐད་དོ༔ ཧཱུྃ་བྷྱོ༔ མ་བདུད་ཆེན་མོ་འབུམ་གྱི་གཙོ་མོ་ནི༔ དཔལ་ལྡན་དམག་ཟོར་རྒྱལ་མོ་རེ་མ་ཏཱི༔ ཤ་ཟ་མཁའ་འགྲོ་བདུད་མོ་སྨན་མོ་འབུམ༔ འཁོར་དུ་བསྐོར་ལ་དྲེགས་ཚོགས་དབང་དུ་སྡུས༔ ལས་ལ་བསྐུལ་ལོ་ཐུགས་དམ་དུས་ལ་བབས༔ སྔོན་ཚེ་རྒྱལ་བ་རྣམས་ཀྱི་སྤྱན་སྔ་རུ༔ སྤྱི་བོར་རྡོ་རྗེ་ལྕེ་ལ་བདུད་རྩི་བཞག༔ གསང་མཚན་གསོལ་ཏེ་བསྟན་པ་བསྲུང་བར་བསྐོས༔ སྲོག་སྙིང་ཕུལ་ཏེ་དམ་བཅའ་བཏབ་པ་རྣམས༔ ལྷ་མོས་དགོངས་ལ་བཅོལ་བའི་འཕྲིན་ལས་མཛོད༔ དཔལ་ལྡན་དམག་གི་རྒྱལ་མོ་རེ་མ་ཏཱི༔ མཐིང་ནག་མུན་པའི་མདོག་ཅན་རལ་གཅིག་མ༔ མེ་རླུང་དམར་ནག་འཚུབས་མ་ཀྱི་ལི་ལི༔ མ་བདུད་ཀུན་གྱི་རྒྱལ་མོ་ཤ་ཟ་མ༔ རྟག་ཏུ་དམ་ཉམས་དགྲ་བགེགས་ཤ་ལ་ཟ༔ དགྲ་ཤ་ཟོ་ཞིག་བདུད་མོ་རེ་མ་ཏཱི༔ དགྲ་ཁྲག་འཐུངས་ཤིག་ནག་མོ་ཀཱ་ལི་མ༔ ཕྱོགས་བཞི་མཚམས་བརྒྱད་ནད་ཀྱི་ཆར་པ་ཕོབ༔ ཕྱོགས་བཞི་མཚམས་བརྒྱད་དགྲ་བོ་རྡུལ་དུ་རློགས༔ རྒྱ་བོང་ཆིབས་ལ་སྟོང་གསུམ་བང་གིས་བསྐོར༔ དགྲ་བགེགས་ཐམས་ཅད་ཁུག་ལ་རྡུལ་དུ་རློགས༔ ཞལ་ནས་ནད་ཀྱི་རླངས་པ་བུ་ཡུག་འཐིབ༔ ནད་གདོན་དམག་སྒར་དམ་ཉམས་དགྲ་ལ་ཐོབ༔ རེས་འགའ་ཕྱག་ན་རལ་གྲི་བསྣམས་ཏེ་སྐྱོད༔ དམ་ཉམས་དགྲ་བགེགས་ཚལ་བ་ཚལ་བར་ཁོས༔ རེས་འགའ་ཕྱག་ན་རྩེ་གསུམ་བསྣམས་ཏེ་སྐྱོད༔ དམ་ཉམས་དགྲ་བགེགས་སྙིང་རྩ་འདྲེན་པར་བྱེད༔ རེས་འགའ་ཕྱག་ན་ཐོད་ཁྲག་ཐོགས་ཏེ་སྐྱོད༔ ཁྲག་མདའ་དམར་པོ་དགྲ་བགེགས་སྙིང་ལ་རྒྱོབ༔ རེས་འགའ་ཕྱག་ན་མདུང་དར་དམར་ནག་བསྣམས༔ དམ་ཉམས་དགྲ་བགེགས་རྡུལ་དུ་ད་རློགས་ཤིག༔ སྡིག་ཅན་ཡིད་ལ་བརྣག་པའི་དགྲ་བགེགས་འདིས༔ དང་པོར་སངས་རྒྱས་བསྟན་པ་གཉན་པོ་བཤིགས༔ བར་དུ་སེམས་ཅན་ཡོངས་ལ་གནོད་ཅིང་འཚེས༔ ཐ་མར་མི་དགེ་བཅུ་ཡི་ལས་ལ་སྤྱད༔ ད་ལྟ་རྣལ་འབྱོར་བདག་གི་དགྲ་རུ་ལངས༔ དུས་ལ་བབ་པོ་མ་མོ་མཁའ་འགྲོ་རྣམས༔ ཤ་ཟོ་ཁྲག་འཐུང་སྲོག་ཆོད་དབུགས་འགོམས་ལ༔ རྡུལ་དུ་རློགས་ཤིག་སྔགས་སྲུང་དམ་ཅན་མ༔ རྣལ་འབྱོར་བཅོལ་བའི་འཕྲིན་ལས་གྲུབ་པར་མཛོད༔ ཨཱོཾ་བཛྲ་རུ་ལུ་རུ་ལུ་སྙིང་ཁ་རག་མོ་བྷྱོ༔ ཨཱོཾ་རུ་རུ་རོ་རུ་སྙིང་ཁ་རག་མོ་བྷྱོཿབྷྱོ༔ ཅེས་བསྐུལ་ཕུད་དང་གཏོར་མས་མཆོད༔ དགྲ་བགེགས་བཟློག་ཅིང་འཕྲིན་ལས་མྱུར༔ ས་མ་ཡ༔ རྒྱ་རྒྱ་རྒྱ༔ གཏེར་རྒྱ༔ སྦས་རྒྱ༔ ཟབ་རྒྱ༔ ས་མ་ཡ༔ རྒྱ་རྒྱ་རྒྱ༔ རིག་འཛིན་ཉི་མ་གྲགས་པས་ཤིང་ཕོ་བྱི་བའི་ལོ་ལ་རྒྱ་གར་རྩྭ་མཆོག་དྲུང་ནས་གདན་དྲངས་ཤིང་སྦས་ལུང་སྐྱིད་མོ་གཤོང་གི་གཙང་གྲོང་དགོན་པར་ཤོག་སེར་ལས་ཞལ་བཤུས་པའོ། །མངྒ་ལཾ།། །།

བསྐུལ་ཞིང་རྦད་པའི་ལས་མཐའ།

སྔགས་བདག་འབར་མའི་ཐུགས་ཐིག་ལས༔ བསྐུལ་ཞིང་རྦད་པའི་ལས་མཐའ་བཞུགས༔ རྦོད་གཏོང་མ་མོའི་ཚོགས་ལ་འདུད༔ གཏོར་མར་ཤ་ཁྲག་ལིང་གས་སྦྲན༔ དཔལ་འབར་གཟུགས་ཤིང་སྨན་རག་སྦྲེང་༔ སྲིན་པོ་ཁྲོས་པའི་ངར་སྐད་དམ༔ མ་མོ་ཁྲོས་པའི་ངུར་སྐད་ཀྱིས༔ བསྐུལ་ཞིང་རྦད་པ་འདི་སྐད་དོ༔ ཧཱུྃ་བྷྱོ༔ སྔགས་སྲུང་རྒྱལ་མོ་ཆེན་མོའི་ཐུགས་དམ་བསྐུལ༔ བྱང་ཤར་རྒྱ་མཚོ་ཆེན་པོའི་ཕ་རོལ་ན༔ ཡོངས་འདུ་ཤིང་ཆེན་ལོ་འདབ་རྒྱས་པའི་དྲུང་༔ མུ་ལེ་མཐིང་མཚོའི་གཏིང་རུམ་ཡངས་པ་ནས༔ མཐིང་ཤུན་འོད་བཅས་ཐོད་མཁར་གཞལ་ཡས་ན༔ མི་རོ་རྟ་རོ་འབུམ་ནི་གཅལ་དུ་བཀྲམ༔ མི་ཁྲག་རྟ་ཁྲག་མང་པོ་རྒྱ་མཚོར་བསྐྱིལ༔ མི་རྟའི་གསུར་ཆེན་དུད་པ་ཆི་ལི་ལི༔ མི་རྐང་ཐོད་རྔ་གླིང་བུ་ཁྲ་ལ་ལ༔ རབ་ཏུ་འཇིགས་པའི་གནས་མཆོག་ཆེན་པོ་ནས༔ ཐུགས་དམ་བསྐུལ་ལོ་མ་གཅིག་དཔལ་ལྡན་མ༔ སྔོན་ཚེ་རྒྱལ་བ་རྣམས་ཀྱི་སྤྱན་སྔ་རུ༔ ཞལ་བཞེས་དགོངས་ལ་དབྱིངས་ནས་ད་གཤེགས་ཤིག༔ རེས་འགའ་སེང་གེ་ཆིབས་ཏེ་ལྷ་ཡུལ་ཉུལ༔ རེས་འགའ་འབྲུག་ལ་ཆིབས་ཏེ་བར་སྣང་ཉུལ༔ རེས་འགའ་གློག་ལ་ཆིབས་ཏེ་གཟའ་ཁམས་ཉུལ༔ རེས་འགའ་འོད་ལ་ཆིབས་ཏེ་རི་རབ་བསྐོར༔ རེས་དགའ་འཚུབས་མར་ཆིབས་ཏེ་གླིང་བཞི་བསྐོར༔ རེས་འགའ་སྤྱང་ཀིར་ཆིབས་ཏེ་དུར་ཁྲོད་ཉུལ༔ རེས་འགའ་སྟག་ལ་ཆིབས་ཏེ་གནས་རྣམས་ཉུལ༔ རེས་འགའ་དོམ་ལ་ཆིབས་ཏེ་ཡུལ་རྣམས་ཉུལ༔ རེས་འགའ་འཕར་བར་ཆིབས་ཏེ་འདུ་བ་ཉུལ༔ རེས་འགའ་གཟིག་ལ་ཆིབས་ཏེ་མཐུན་སྤྱོད་ཉུལ༔ རེས་འགའ་དྲེལ་ལ་ཆིབས་ཏེ་གཙུག་ལག་སྐྱོད༔ རེས་འགའ་རྒྱ་བོང་ཆིབས་ཏེ་ནད་མཚོན་འགྱེད༔ རེས་འགའ་རྟ་ནག་ཆིབས་ཏེ་དགྲ་སྲོག་གཅོད༔ རེས་འགའ་ཆུ་སྲིན་ཆིབས་ནས་ཀླུ་ཡུལ་ཉུལ༔ རེས་འགའ་མེ་ལོང་བསྣམས་ཏེ་ལེགས་ཉེས་གཟིགས༔ རེས་འགའ་རལ་གྲི་བསྣམས་ཏེ་དགྲ་སྲོག་གཅོད༔ རེས་འགའ་ཁྲམ་ཤིང་བསྣམས་ནས་ཁྲམ་ལ་འདེབས༔ རེས་འགའ་མདའ་དར་བསྣམས་ནས་ཚེ་གཡང་འགུགས༔ རེས་འགའ་མདུང་དར་བསྣམས་ནས་སྲིད་གསུམ་དཀྲུག༔ རེས་འགའ་བེ་ཅོན་བསྣམས་ནས་དགྲ་ལ་བསྣུན༔ རེས་འགའ་ཏྲི་ཤུལ་གཡབ་མོས་དགྲ་བགེགས་བརླག༔ རེས་འགའ་ནད་རྐྱལ་བསྣམས་ནས་སྲིད་གསུམ་འགེངས༔ རེས་འགའ་ཞགས་པ་ནག་པོས་དགྲ་བོ་འགུག༔ རེས་འགའ་ལྕགས་ཀྱུ་འབར་བས་དགྲ་སྙིང་འབྱིན༔ སྣ་ཚོགས་སྤྲུལ་བསྒྱུར་འགྱེད་པའི་དཔལ་ལྡན་མ༔ འཁོར་དུ་དྲེགས་ཚོགས་བདུད་མོ་འབུམ་གྱིས་བསྐོར༔ གདུང་བས་འབོད་པའི་གནས་འདིར་མྱུར་དུ་གཤེགས༔ དུས་ལ་བབ་པོ་སྔགས་བསྲུང་རེ་མ་ཏཱི༔ དྲག་ཏུ་རྒྱུག་ཅིག་མ་ཚོགས་འབུམ་སྡེ་རྣམས༔ དུས་ལ་བབ་བོ་དམ་ཉམས་དགྲ་བགེགས་སྒྲོལ༔ མ་གཅིག་དཔལ་གྱི་རྒྱལ་མོ་སྐྱོད་བའི་ཚེ༔ གཡུ་ཡི་ན་བུན་མང་པོ་ཐུ་ལུ་ལུ༔ འབྲུག་གི་སྒྲ་སྐད་མང་པོ་དི་རི་རི༔ གློག་གི་ལྕེ་མདུང་དམར་པོ་ཁྱུགས་སེ་ཁྱུག༔ ཁྲག་གི་ཆར་པ་ཆེན་པོ་སི་ལི་ལི༔ དུང་གི་ཁུ་འཕང་མང་པོ་ཐོར་རོ་རོ༔ ལྕགས་ཀྱི་སེར་བ་མང་པོ་ཁྲ་ལ་ལ༔ ཐོག་གི་བུ་ཡུག་མང་པོ་ཚུབས་སེ་ཚུབ༔ མི་རྐང་གླིང་བུ་མང་པོ་ཀྱུ་རུ་རུ༔ སྦྲུལ་ནག་ཆུན་པོ་མང་པོ་ཉི་ལི་ལི༔ ཁྲག་གི་ཞགས་པ་མང་པོ་ཁྱུགས་སེ་ཁྱུག༔ མཚོན་ཆ་སྣ་ཚོགས་བུ་ཡུག་ཐིབས་སེ་ཐིབ༔ དར་ནག་ཅོད་པན་མང་པོ་པུ་རུ་རུ༔ རཀྟའི་རྒྱ་མཚོ་མང་པོ་ཀྱི་ལི་ལི༔ ཞིང་ཆེན་གཡབ་མོ་མང་པོ་ལྷབས་སེ་ལྷབ༔ སྟག་སྤྱང་གཅན་གཟན་ཚོགས་ནི་འདུར་རུ་རུ༔ བྱ་རོག་འདབ་ཆགས་འབུམ་ནི་ཉི་ལི་ལི༔ དོམ་དྲེད་ཁྱི་ནག་མང་པོ་ཀང་སེ་ཀང་༔ རླུང་ནག་འཚུབས་མ་མང་པོ་ཀྱི་ལི་ལི༔ བསྐལ་པའི་མེ་དཔུང་དམར་ནག་ལྷབས་སེ་ལྷབ༔ ཆིབས་སུ་རྒྱ་བོང་དེ་ནི་དམར་ག་བཅིབས༔ རླུང་ལྟར་རྒྱུག་ཅིང་གློག་ལྟར་མྱུར་མགྱོགས་ལྡན༔ སྔ་ཤད་གཡས་ན་ཁྲམ་ཤིང་ཡ་ལ་ལ༔ སྔ་ཤད་གཡོན་དུ་ཚོན་དྲུ་ཀྱི་ལི་ལི༔ ཕྱི་ཤ་གཡས་ན་ཤྭ་རྡེའུ་ཁྲོ་ལོ་ལོ༔ ཕྱི་ཤ་གཡོན་ན་ནད་རྐྱལ་ཕྱུ་རུ་རུ༔ ཞབས་ལ་ལྕགས་སྒྲོག་འབར་བ་ཁྱུགས་སེ་ཁྱུག༔ དོ་ནུབ་ནམ་གྱི་ཕར་མ་ཚུར་ཕྱེད་ལ༔ དམ་ཉམས་དགྲ་བགེགས་ཐམས་ཅད་ཁུག་ལ་ཤོག༔ གནོད་བྱེད་གདོན་བགེགས་བཟློག་པའི་དུས་ལ་བབས༔ ཤ་ཁྲག་དམར་གྱི་གཏོར་མ་འདི་བཞེས་ལ༔ ཐུགས་དམ་བརྒྱུད་བསྐུལ་བཅོལ་བའི་འཕྲིན་ལས་མཛོད༔ རྦད་པ་ཡིན་ནོ་དགྲ་བགེགས་སྲོག་རྩ་ཆོད༔ བསྐུལ་བ་ཡིན་ནོ་ལས་ལ་བང་མ་བུལ༔ མངགས་པ་ཡིན་ནོ་དགྲ་བགེགས་ཐལ་བར་རློགས༔ རྣལ་འབྱོར་བཅོལ་བའི་འཕྲིན་ལས་གྲུབ་པར་མཛོད༔ ཧཱུྃ་བྷྱོ༔ སྐུ་ལས་སྤྲུལ་པའི་མ་མོ་ཆེན་མོ་ནི༔ རྒྱ་བོང་ཆིབས་པའི་བ་ལམ་དྲེལ་སྣ་མ༔ ཁྲོ་གཏུམ་ལྡན་པ་ནག་མོ་འབུམ་སྡེའི་ཚོགས༔ ཤ་ཁྲག་དམར་གྱི་གཏོར་མ་འདི་བཞེས་ལ༔ ཐུགས་དམ་རྒྱུད་བསྐུལ་བཅོལ་བའི་འཕྲིན་ལས་མཛོད༔ ཧཱུྃ་བྷྱོ༔ གསུང་ལས་སྤྲུལ་པའི་མ་མོ་ཆེན་མོ་ནི༔ སྟག་མོ་ཆིབས་པའི་སྟག་སྨན་གཟེར་འདེབས་མ༔ དྲག་ཏུ་ཁྲོས་པའི་ནག་མོ་འབུམ་སྡེའི་ཚོགས༔ ཤ་ཁྲག་དམར་གྱི་གཏོར་མ་འདི་བཞེས་ལ༔ ཐུགས་དམ་བརྒྱུད་བསྐུལ་བཅོལ་བའི་འཕྲིན་ལས་མཛོད༔ ཧཱུྃ་བྷྱོ༔ ཐུགས་ལས་སྤྲུལ་པའི་མ་མོ་ཆེན་མོ་ནི༔ བྱ་རོག་ཆིབས་པའི་ཁྲི་སྨན་སི་ལི་མ༔ ཤིན་ཏུ་ཁྲོས་པའི་ནག་མོ་འབུམ་སྡེའི་ཚོགས༔ ཤ་ཁྲག་དམར་གྱི་གཏོར་མ་འདི་བཞེས་ལ༔ ཐུགས་དམ་བརྒྱུད་བསྐུལ་བཅོལ་བའི་འཕྲིན་ལས་མཛོད༔ ཧཱུྃ་བྷྱོ༔ ཡོན་ཏན་སྤྲུལ་པའི་མ་མོ་ཆེན་མོ་ནི༔ དྲེལ་ལ་ཆིབས་པའི་རྡོ་རྗེ་བ་ལམ་མ༔ དབྱིངས་ནས་ཁྲོས་པའི་ནག་མོ་འབུམ་སྡེའི་ཚོགས༔ ཤ་ཁྲག་དམར་གྱི་གཏོར་མ་འདི་བཞེས་ལ༔ ཐུགས་དམ་བརྒྱུད་བསྐུལ་བཅོལ་བའི་འཕྲིན་ལས་མཛོད༔ ཧཱུྃ་བྷྱོ༔ བར་སྣང་ཡངས་པའི་ད་ལ་ཆེན་པོ་ནས༔ སྟག་ལ་ཆིབས་པའི་ཚངས་པ་དུང་ཐོད་ཅན༔ རྒྱལ་པོ་འབུམ་སྡེའི་ཚོགས་ནི་འཁོར་དུ་བསྐོར༔ ཤ་ཁྲག་དམར་གྱི་གཏོར་མ་འདི་བཞེས་ལ༔ ཐུགས་དམ་བརྒྱུད་བསྐུལ་བཅོལ་བའི་འཕྲིན་ལས་མཛོད༔ ཧཱུྃ་བྷྱོ༔ བྱང་ཤར་ལྕགས་མཁར་སྒོ་མདུན་མཚོ་ནང་ནས༔ ཆུ་གླང་ཆིབས་པའི་ལས་ཀྱི་གཤིན་རྗེ་ལ༔ སྙིང་རྗེ་མེད་པའི་གཤིན་རྗེ་འབུམ་གྱིས་བསྐོར༔ ཤ་ཁྲག་དམར་གྱི་གཏོར་མ་འདི་བཞེས་ལ༔ ཐུགས་དམ་བརྒྱུད་བསྐུལ་བཅོལ་བའི་འཕྲིན་ལས་མཛོད༔ ཧཱུྃ་བྷྱོ༔ ཤར་ཕྱོགས་བདུད་མཁར་རྩེ་དགུའི་ཕོ་བྲང་ནས༔ རྟ་ནག་ཆིབས་པའི་བདུད་པོ་ནག་པོ་ལ༔ བདུད་པོ་མི་ཟན་འབུམ་གྱི་འཁོར་གྱིས་བསྐོར༔ ཤ་ཁྲག་དམར་གྱི་གཏོར་མ་འདི་བཞེས་ལ༔ ཐུགས་དམ་བརྒྱུད་བསྐུལ་བཅོལ་བའི་འཕྲིན་ལས་མཛོད༔ ཅེས་བརྗོད་གཏོར་མ་འབུལ་ཞིང་ཕུད་ཀྱིས་མཆོད༔ སྤྲུལ་པའི་ཚོགས་ཀྱིས་དགྲ་བགེགས་སྒྲོལ་བར་ངེས༔ དེ་ཕྱིར་གཅེས་སོ་ཡིད་ཀྱིས་བརྣག་པར་མཛོད༔ ས་མ་ཡ༔ རྒྱ་རྒྱ་རྒྱ༔ གཏེར་རྒྱ༔ སྦས་རྒྱ༔ གསང་རྒྱ༔ གཉན་རྒྱ༔ དམ་རྒྱ༔ ས་མ་ཡ༔ རྒྱ་རྒྱ་རྒྱ༔ རིག་འཛིན་ཉི་མ་གྲགས་པས་ཧ་ཙོ་ནས་གདན་དྲངས་ཤིང་ཤོག་སེར་ལས་བོད་ཡིག་ཏུ་བསྒྱུར་བའོ། མང་ག་ལཾ།

བསྒྲལ་ལས་སྲོག་གི་སྤུ་གྲི།

སྔགས་བདག་འབར་མའི་ཐུགས་ཐིག་ལས༔ བསྒྲལ་ལས་སྲོག་གི་སྤུ་གྲི་བཞུགས༔ རྦོད་གཏོང་མ་མོའི་ཚོགས་ལ་འདུད༔ ཧོམ་ཁུང་ནང་དུ་ལིང་ག་གཞུག༔ ཐུན་རྫས་སྣ་ཚོགས་ཐ་མར་བསྐོར༔ རྣལ་འབྱོར་ལྟ་བའི་གདེང་བསྐྱེད་ཅིང་༔ ཁྲོས་པའི་དབྱངས་ཀྱིས་འདི་སྐད་དོ༔ ཧཱུྃ་ཧཱུྃ་བྷྱོ༔ ང་ནི་དཔལ་ཆེན་ཡང་དག་ཧེ་རུ་ཀ༔ མ་མོ་མཁའ་འགྲོ་ཀུན་གྱི་མངའ་བདག་ཆེ༔ ང་ལས་ཆེ་བཙན་དྲེགས་པ་སུ་ཡང་མེད༔ ཐམས་ཅད་ཐམས་ཅད་ང་ཡི་འཁོར་དང་བྲན༔ ཕོ་རྒྱུད་མོ་རྒྱུད་དྲེགས་ཚོགས་ད་འདུས་ཤིག༔ སངས་རྒྱས་བསྟན་པ་གཉན་པོའི་གཞུག་གཉེར་འདིར༔ བཀའ་ལས་འདས་དང་དམ་ལ་འཁུ་བའི་རིགས༔ དགྲ་བགེགས་གནོད་བྱེད་འདུལ་པའི་དུས་ལ་བབས༔ ལྷ་ཚོགས་ཐམས་ཅད་སྐུ་ཡི་རྩལ་བསྐྱེད་ལ༔ ནུས་པའི་ཤུགས་ཕྱུངས་ཐུགས་ཀྱི་ཏིང་འཛིན་གསལ༔ ཨཱོཾ་བཛྲ་ཤྲཱི་ཧེ་རུ་ཀ་རུ་ལུ་རུ་ཧཱུྃ་བྷྱོ་ཧཱུྃ་ཕཊ༔ ཨཱོཾ་བཛྲ་དྷཀྐི་མ་ཧཱ་ཀཱ་ལི་རེ་མ་ཏཱི་ཧཱུྃ་བྷྱོ་ཧཱུྃ་ཕཊ༔ ཅི་མང་བཟླ༔ ཧཱུྃ་ཧཱུྃ་ཧཱུྃ༔ རང་ཉིད་དཔལ་ཆེན་པོ་འཁོར་བཅས་སུ་གསལ་བའི་མདུན་དུ་གནམ་ལྕགས་འབར་བ་ལས་གྲུབ་པའི་ཆོས་འབྱུང་ཟུར་གསུམ་པ་རབ་ཏུ་བརྔམ་ཞིང་སྐྱི་བུང་བྱེད་པ་རྒྱ་ཆེ་ཞིང་དཔངས་མཐོ་བ་ཁ་དོག་ཅིང་གཏིང་ཟབ་པ་རིམ་པ་དགུའི་རྟ་རྐན་དང་ལྡན་པ་ཞིག་གི་ནང་དུ༔ ནྲི་དང་ཏྲི་ལ་དགྲ་བགེགས་འབྱུང་པོ་ཁ་དོག་སྔོ་ལ་གཟུགས་བྱད་རིད་པ་མྱ་ངན་གྱི་ཕྱག་རྒྱ་དང་ལྡན་པ་ཞིག་ཏུ་གྱུར༔ འགུགས་པའི་ཕྱག་རྒྱ་བཅས་ལ༔ ཧཱུྃ་ཧཱུྃ་ཧཱུྃ༔ ཆོས་སྐུ་མི་བསྐྱོད་རྡོ་རྗེ་ལ་སོགས་ཆོས་སྐུའི་ལྷ་ཚོགས་རྣམས་ཀྱི་བཀའ་བདེན་པ༔ ལོངས་སྐུ་དཔལ་ཆེན་ཧེ་རུ་ཀ་སོགས་ལོངས་སྐུའི་ལྷ་ཚོགས་རྣམས་ཀྱི་བཀའ་བདེན་པ༔ སྤྲུལ་སྐུ་སངས་རྒྱས་བཅོམ་ལྡན་འདས་ལ་སོགས་ཕྱོགས་བཅུ་དུས་བཞིའི་རྒྱལ་བ་རྣམས་ཀྱི་བཀའ་བདེན་པ༔ རིགས་གསུམ་གྱི་མགོན་པོ་ལ་སོགས་བྱང་ཆུབ་སེམས་དཔའ་སེམས་མ་རྣམས་ཀྱི་བཀའ་བདེན་པ༔ སློབ་དཔོན་པདྨ་བཛྲ་ལ་སོགས་གསང་སྔགས་འཆང་བའི་རིག་འཛིན་གྲུབ་ཐོབ་རྣམས་ཀྱི་བཀའ་བདེན་པ༔ ཡི་དམ་ཆེ་གེ་ལ་སོགས་རྩ་གསུམ་རྒྱལ་བ་རྒྱ་མཚོའི་ལྷ་ཚོགས་རྣམས་ཀྱི་བཀའ་བདེན་པ༔ དཔལ་ལྡན་ལྷ་མོ་ནག་མོ་ལ་སོགས་མ་རྒྱུད་མཁའ་འགྲོ་འབུམ་གྱི་ལྷ་ཚོགས་རྣམས་ཀྱི་བཀའ་བདེན་པ༔ བ་ལམ་དྲེལ་སྣ་མ་ལ་སོགས་སྐུ་སྤྲུལ་གྱི་མཁའ་འགྲོ་མ་ཉི་ཁྲི་ཆིག་སྟོང་གིས་བཀའ་བདེན་པ༔ སྟག་སྨན་གཟེར་འདེབས་མ་ལ་སོགས་གསུང་སྤྲུལ་གྱི་མཁའ་འགྲོ་མ་ཉི་ཁྲི་ཆིག་སྟོང་གིས་བཀའ་བདེན་པ༔ ཁྲི་སྨན་སི་ལི་མ་ལ་སོགས་ཐུགས་སྤྲུལ་གྱི་མཁའ་འགྲོ་མ་ཉི་ཁྲི་ཆིག་སྟོང་གིས་བཀའ་བདེན་པ༔ རྡོ་རྗེ་བ་ལམ་མ་ལ་སོགས་ཡོན་ཏན་སྤྲུལ་པའི་མ་མོ་ཉི་ཁྲི་ཆིག་སྟོང་གིས་བཀའ་བདེན་པ༔ ཚངས་པ་དུང་གི་ཐོར་ཚུགས་ཅན་ལ་སོགས་རྒྱལ་འགོང་འབུམ་སྡེའི་བཀའ་བདེན་པ༔ གཤིན་རྗེ་བྷེ་ཝ་ས་ཏ་ལ་སོགས་འཆི་བདག་གཤིན་རྗེ་འབུམ་གྱི་བཀའ་བདེན་པ༔ བདུད་པོ་བྱེ་བ་དགུ་རིང་ལ་སོགས་བདུད་དམག་བྱེ་བ་འབུམ་གྱི་བཀའ་བདེན་པ༔ དཔལ་མགོན་དྲེགས་པ་ཕྱི་ནང་གསང་བའི་ལྷ་སྲིན་རང་རང་སྤྲུལ་འཁོར་དང་བཅས་པའི་བཀའི་བདེན་པ་དང་བདེན་པ་ཆེན་པོའི་མཐུ་དང་ནུས་པ་ལ་བརྟེན་ནས༔ ཞིང་བཅུ་ཚང་བའི་སྤྱི་དགྲ་དཔལ་ལྡན་བླ་མའི་སྐུ་དགྲ་རྣལ་འབྱོར་གྱི་སྒོས་དགྲ་གནོད་ཅིང་འཚེ་བའི་གདོན་བགེགས་དང་བཅས་པ་ཐམས་ཅད་སྐད་ཅིག་གིས་རུ་པ་འདི་ལ་གཉིས་སུ་མེད་པར་ཁུག༔ ཅེས་བརྗོད་ཅིང་ཕོ་ཉ་སྤྲོ་བ་ནི༔ ཧཱུྃ་བྷྱོ༔ དཔལ་ཆེན་ཡབ་ཡུམ་ཐུགས་ལས་སྤྲུལ་པའི་ལྷ༔ དགྲ་བགེགས་འབྱུང་པོར་འགུགས་པའི་ཕོ་ཉ་ནི༔ ཛཿལས་སྤྲུལ་པའི་མ་མོ་ལྕགས་ཀྱུ་མ༔ ལྕགས་ཀྱུ་དཀར་མོའི་ཚོགས་ཀྱིས་སྟོང་གསུམ་གང་༔ ཡང་སྤྲུལ་ཕོ་ཉའི་ཚོགས་ཀྱི་སྲིད་གསུམ་གཡོ༔ ཞིང་བཅུ་ཚང་པའི་དམ་ཉམས་དགྲ་དང་བགེགས༔ ལྕགས་ཀྱུ་དཀར་མོས་སྙིང་ནས་དྲོངས་ལ་ཁུག༔ སྲིད་པའི་རྩེ་ནས་ན་རག་དམྱལ་བའི་ཁམས༔ ཡངས་པའི་ནམ་མཁའ་ཉི་ཟླའི་འོད་ཁྱིམ་སོགས༔ གང་དུ་འདུག་ཀྱང་རང་དབང་མེད་པར་ཁུག༔ སྤྲུལ་དུ་མ་འཇུག་ཕྱག་རྒྱས་ཆིངས་ལ་ཤོག༔ གབ་ཏུ་མ་འཇུག་ཕོ་ཉས་དེད་ལ་ཤོག༔ ལ་ཉེས་དེད་ལ་ལས་ཀྱི་དབང་གིས་ཁྲིད༔ མུན་པས་བསུས་ལ་མྱུར་དུ་ཁུག་ཅིག་ཛཿཧཱུྃ་བྷྱོ༔ དཔལ་ཆེན་ཡབ་ཡུམ་ཐུགས་ལས་སྤྲུལ་པའི་ལྷ༔ དགྲ་བགེགས་འབྱུང་པོ་འགུགས་པའི་ཕོ་ཉ་ནི༔ ཧཱུྃ་ལས་སྤྲུལ་པའི་ལྷ་མོ་ཞགས་པ་མ༔ ཞགས་པ་སེར་མོའི་ཚོགས་ཀྱིས་སྟོང་གསུམ་གང་༔ ཡང་སྤྲུལ་ཕོ་ཉའི་ཚོགས་ཀྱིས་སྲིད་གསུམ་གཡོ༔ ཞིང་བཅུ་ཚང་པའི་དམ་ཉམས་དགྲ་དང་བགེགས༔ ཞགས་པ་སེར་མོས་སྐེ་ནས་ཆིངས་ལ་ཁུག༔ སྲིད་པའི་རྩེ་ནས་ན་རག་དམྱལ་བའི་ཁམས༔ ཡངས་པའི་ནམ་མཁའ་ཉི་ཟླའི་འོད་ཁྱིམ་སོགས༔ གང་དུ་འདུག་ཀྱང་རང་དབང་མེད་པར་ཁུག༔ སྤྲུལ་དུ་མ་འཇུག་ཕྱག་རྒྱས་ཆིངས་ལ་ཤོག༔ གབ་ཏུ་མ་འཇུག་ཕོ་ཉས་དེད་ལ་ཤོག༔ ལ་ཉེས་དེད་ལ་ལས་ཀྱི་དབང་གིས་ཁྲིད༔ མུན་པས་བསུས་ལ་མྱུར་དུ་ཁུག་ཅིག་ཧཱུྃ༔ ཧཱུྃ་བྷྱོ༔ དཔལ་ཆེན་ཡབ་ཡུམ་ཐུགས་ལས་སྤྲུལ་པའི་ལྷ༔ དགྲ་བགེགས་འབྱུང་པོ་འགུགས་པའི་ཕོ་ཉ་ནི༔ བཾ་ལས་སྤྲུལ་པའི་ལྷ་མོ་ལྕགས་སྒྲོག་མ༔ ལྕགས་སྒྲོག་དམར་མོའི་ཚོགས་ཀྱིས་སྟོང་གསུམ་གང་༔ ཡང་སྤྲུལ་ཕོ་ཉའི་ཚོགས་ཀྱིས་སྲིད་གསུམ་གཡོ༔ ཞིང་བཅུ་ཚང་བའི་དམ་ཉམས་དགྲ་དང་བགེགས༔ ལྕགས་སྒྲོག་དམར་མོས་ཡན་ལག་སྡོམས་ལ་ཁུག༔ སྲིད་པའི་རྩེ་ནས་ན་རག་དམྱལ་བའི་ཁམས༔ ཡངས་པའི་ནམ་མཁའ་ཉི་ཟླའི་འོད་ཁྱིམ་སོགས༔ གང་དུ་འདུག་ཀྱང་རང་དབང་མེད་པར་ཁུག༔ སྤྲུལ་དུ་མ་འཇུག་ཕྱག་རྒྱས་ཆིངས་ལ་ཤོག༔ གབ་ཏུ་མ་འཇུག་ཕོ་ཉས་དེད་ལ་ཤོག༔ ལ་ཉེས་དེད་ལ་ལས་ཀྱི་དབང་གིས་ཁྲིད༔ མུན་པས་བསུས་ལ་མྱུར་དུ་ཁུག་ཅིག་བམ༔ ཧཱུྃ་བྷྱོ༔ དཔལ་ཆེན་ཡབ་ཡུམ་ཐུགས་ལས་སྤྲུལ་པའི་ལྷ༔ དགྲ་བགེགས་འབྱུང་པོ་འགུགས་པའི་ཕོ་ཉ་ནི༔ ཧོཿལས་སྤྲུལ་པའི་ལྷ་མོ་དྲིལ་བུ་མ༔ དྲིལ་བུ་ལྗང་མོའི་ཚོགས་ཀྱིས་སྟོང་གསུམ་གང་༔ ཡང་སྤྲུལ་ཕོ་ཉའི་ཚོགས་ཀྱིས་སྲིད་གསུམ་གཡོ༔ ཞིང་བཅུ་ཚང་པའི་དམ་ཉམས་དགྲ་དང་བགེགས༔ དྲིལ་བུ་ལྗང་མོས་མྱོས་པར་གྱིས་ལ་ཁུག༔ སྲིད་པའི་རྩེ་ནས་ན་རག་དམྱལ་བའི་ཁམས༔ ཡངས་བའི་ནམ་མཁའ་ཉི་ཟླའི་འོད་ཁྱིམ་སོགས༔ གང་ཏུ་འདུག་ཀྱང་རང་དབང་མེད་པར་ཁུག༔ སྤྲུལ་དུ་མ་འཇུག་ཕྱག་རྒྱས་ཆིངས་ལ་ཤོག༔ གབ་ཏུ་མ་འཇུག་ཕོ་ཉས་དེད་ལ་ཤོག༔ ལ་ཉེས་དེད་ལ་ལས་ཀྱི་དབང་གིས་ཁྲིད༔ མུན་པས་བསུས་ལ་མྱུར་དུ་ཁུག་གཅིག་ཧོ༔ བཛྲ་ཀེའུ་རི་ཨ་ཀཪྴཡ་ཛ་ཛཿབཛྲ་ཙེའུ་རི་པྲ་ཝེ་ཤ་ཡ་ཧཱུྃ་ཧཱུྃ༔ བཛྲ་པྲ་མོ་ཧ་སྥོ་ཊ་བཾ་བཾ༔ བཛྲ་བཻ་ཏ་ལི་གྷནྡྷེ་མས་ཧོ་ཧོ༔ ཞེས་བརྗོད༔ ཤགས་འདེབས་ཤིང་ཉེས་པ་བསྒྲག་པ་ནི༔ ཧཱུྃ་བྷྱོ༔ དགོངས་ཤིག་ཕྱོགས་བཅུའི་སངས་རྒྱས་བདེ་གཤེགས་རྣམས༔ རྩ་བརྒྱུད་བླ་མ་རྣམས་ཀྱང་དགོངས་སུ་གསོལ༔ ཡི་དམ་ལྷ་ཚོགས་རྣམས་ཀྱང་དགོངས་སུ་གསོལ༔ མཁའ་འགྲོ་ཆོས་སྐྱོང་རྣམས་ཀྱང་དགོངས་སུ་གསོལ༔ དཔལ་ལྡན་ལྷ་མོ་འཁོར་བཅས་དགོངས་སུ་གསོལ༔ འཆི་བདག་དྲེགས་ཆེན་རྣམས་ཀྱང་དགོངས་སུ་གསོལ༔ དཔལ་མགོན་དྲེགས་པའི་ཚོགས་ཀྱང་དགོངས་སུ་གསོལ༔ སྣང་སྲིད་ལྷ་ཀླུ་གཞི་བདག་དགོངས་སུ་གསོལ༔ གནས་ཡུལ་སྲུང་མ་རྣམས་ཀྱང་དགོངས་སུ་གསོལ༔ རྣལ་འབྱོར་བདག་ནི་མ་ལན་མ་ཉེས་སོ༔ དམ་ཉམས་དགྲ་བོ་སྡིག་ཅན་ལས་ངན་འདིས༔ དང་པོ་སངས་རྒྱས་བསྟན་པ་གཉན་པོ་བཤིགས༔ བར་དུ་མི་དགེ་བཅུ་ཡི་ལས་ལ་སྤྱད༔ ཐ་མ་རྣལ་འབྱོར་བདག་གི་དགྲ་རུ་ལང་༔ གནོད་བྱེད་འབྱུང་པོ་གདོན་བགེགས་ཕོ་མོ་འདིས༔ དང་པོ་བདེ་གཤེགས་རྣམས་ཀྱི་དམ་དང་འགལ༔ བར་དུ་སེམས་ཅན་ཡོངས་ཀྱི་སྲོག་དབུགས་འགམས༔ ཐ་མར་རིག་འཛིན་བདག་ལ་འཁུ་ཤིང་གདོན༔ ཡེ་ཤེས་སྤྱན་གྱིས་ལེགས་ཉེས་ད་གཟིགས་ལ༔ རྫུ་འཕྲུལ་མཐུ་ཡིས་དྲངས་ཤན་སོ་སོར་ཕྱེ༔ ནུས་མཐུའི་སྟོབས་ཀྱིས་དགྲ་བགེགས་ལས་ངན་སྒྲོལ༔ ཐུགས་རྗེའི་ཤུགས་ཀྱིས་རྣམ་ཤེས་དབྱིངས་སུ་སྤོར༔ ལྷ་དང་དབྱེ་བ་ནི༔ ཧཱུྃ་བྷྱོ༔ དམ་ཉམས་དགྲ་བགེགས་སྐྱོབས་པའི་ལྷ་སྲུང་རྣམས༔ དཔལ་ཆེན་ཡབ་ཡུམ་བཀའ་ལ་ཚུར་ཉོན་དང་༔ ཉམས་པའི་དགྲ་བོ་སྡིག་ཅན་ལས་ངན་འདིར༔ འགོ་ཞིང་བསྲུང་ན་ཁྱེད་རྣམས་ཐུགས་དམ་ཉམས༔ དམ་ཉམས་བསྒྲལ་ཞིང་དམ་ལྡན་སྲུང་བ་ཡི༔ བཀའ་དང་དམ་ཚིག་ལོག་ལ་མི་དྲན་ནས༔ དེ་ཕྱིར་བྱད་མ་རང་གཤེད་རང་ལ་ཕོབ༔ བཀའ་ལ་མི་ཉན་འགོ་ཞིང་སྐྱོབས་བྱེད་ན༔ བདག་ཉིད་དཔལ་ཆེན་སྤྲུལ་བས་རྡུལ་དུ་བརླག༔ ཧཱུྃ་བྷྱོ༔ ལས་ཀྱི་སྤྲུལ་པའི་དཀྱིལ་འཁོར་གཉན་པོ་ནས༔ ཕྲ་མེན་ཆེན་མོ་ཁ་ཁ་མུ་ཁ་མ༔ སྐུ་མདོག་ནག་མོ་གནམ་ལྕགས་གཤོག་པ་ཅན༔ བ་དན་ཐོགས་པའི་སྤྲུལ་པས་སྲིད་གསུམ་གཡོ༔ འཛུམ་རྩལ་རེ་རེས་དཔག་ཚད་བརྒྱད་ཁྲིར་བགྲོད༔ རྫུ་འཕྲུལ་མཐུ་དང་སྟོབས་ཀྱི་མངའ་བདག་མོ༔ མྱུར་དུ་ཕྱེས་ཞིག་དགྲ་བོ་ལྷ་དང་ཕྱེས༔ སོ་སོར་ཕྲོལ་ཞིག་དགྲ་བོ་ལྷ་དང་ཕྲོལ༔ ཧཱུྃ་བྷྱོ༔ ལས་ཀྱི་སྤྲུལ་པའི་དཀྱིལ་འཁོར་གཉན་པོ་ནས༔ ཕྲ་མེན་ཆེན་མོ་ཧུ་ལུ་མུ་ཁ་མ༔ སྐུ་མདོག་སེར་མོ་ཟངས་ཀྱི་གཤོག་པ་ཅན༔ མེ་ཆུ་ཐོགས་པའི་སྤྲུལ་པས་སྲིད་གསུམ་གཡོ༔ འཇུམ་རྩལ་རེ་རེས་དཔག་ཚད་བརྒྱད་ཁྲིར་བགྲོད༔ བརྫུ་འཕྲུལ་མཐུ་དང་སྟོབས་ཀྱི་མངའ་བདག་མོ༔ མྱུར་དུ་ཕྱེས་ཞིག་དགྲ་བོ་ལྷ་དང་ཕྱེས༔ སོ་སོར་ཕྲོལ་ཅིག་དགྲ་བོ་ལྷ་དང་ཕྲོལ༔ དགྲ་བོའི་ལྷ་སྲུང་ཐལ་བ་རྡུལ་དུ་རློགས༔ ཉིན་མཚན་དུས་དྲུག་བཅུ་གཉིས་ཆ་བཟུང་ལ༔ དམ་ཉམས་དགྲ་བོ་འདི་ཉིད་ལྷ་དང་ཕྲོལ༔ ཕ་ལྷ་མ་ལྷ་འགོ་ཞིང་སྐྱོབས་པའི་ལྷ༔ མྱུར་དུ་འཕྲལ་བའི་ཐུགས་དམ་དུས་ལ་བབས༔ མེ་ཡིས་བཤུར་ལ་ཆུ་ཡིས་འཁྲུད་པར་མཛོད༔ བ་དན་ནག་པོས་གཡོབས་ལ་མྱུར་དུ་ཕྱེས༔ སྤུ་གྲིའི་འདབ་གཤོག་གཡོབས་ལ་མྱུར་དུ་ཕྱེས༔ སྡང་མིག་གློག་ལྟར་འཁྱུགས་ལ་མྱུར་དུ་ཕྱེས༔ ཨཱོཾ་ས་འདི་མྱུར་དུ་རྒྱུད༔ སྡེ་ཤིག་སྡེ་ཤིག༔ གྲཾ་ཡ་གྲཾ་ཡ༔ མེས་ཚིག་ཆུར་སྐྱུར༔ རླུང་གིས་གཡོབས༔ དགྲ་བོའི་ལྷ་སྲུང་ཐམས་ཅད་ཤག་ཤག་བྱེར་བྱེར་མཱ་ར་ཡ་ཧཱུྃ་ཧཱུྃ་ཕཊ་ཕཊ༔ དེ་ནས་བསྒྲལ་བ་ནི༔ ཧཱུྃ་བྷྱོ༔ ང་ནི་བཅོམ་ལྡན་དཔལ་ཆེན་ཧེ་རུ་ཀ༔ ང་ནི་སྲིད་གསུམ་བདག་མོ་རེ་མ་ཏཱི༔ དམ་ཉམས་དགྲ་བོ་སྡིག་ཅན་ལས་ངན་འདིའི༔ རྣམ་སྨིན་ལས་ལས་གྲུབ་པའི་སྦྲུལ་དཀར་ནག༔ འཁྲིལ་ཞིང་འཛིངས་ནས་མདུང་དེ་སྤྱི་གཙུག་དང་༔ འོག་སྒོ་གཉིས་ནས་མགོ་ཞུགས་སྙིང་ཁྲག་འཇིབས༔ སྲོག་གི་རྩ་བྲེགས་ཚེ་འདིའི་འདུ་བྱེད་སྡུས༔ རྣམ་ཤེས་མཁར་བསྟིམ་ཚེ་བསོད་རང་ལ་བསྡུ༔ ནྲི་པ་ར་ན་ཕཊ༔ ཧཱུྃ་མཱ་ར་ཡ་ཛཿཨེ་ས་མ་ཡ་བྷྱོ༔ ཐུན་རྣམས་ཐོགས་ཏེ༔ ཧཱུྃ་བྷྱོ༔ དཔལ་གྱི་སྤྲུལ་པ་དཔལ་གྱི་ལས་མཁན་མ༔ ཤ་ཟ་ནག་མོ་བཛྲ་དྷཀྐི་མ༔ ནད་རིགས་བཞི་བརྒྱ་རྩ་བཞི་སྐུ་ལས་འཕྲོ༔ ནད་ཀྱི་ཆར་པས་དམ་ཉམས་དགྲ་བགེགས་རློགས༔ གདོན་རིགས་སྟོང་ཕྲག་བརྒྱད་ཅུ་ཐུགས་ལས་སྤྲུལ༔ གདོན་གྱི་དམག་སྒར་དམ་ཉམས་དགྲ་ལ་ཐོབ༔ བ་སྤུ་རེ་ལས་མཚོན་ཆའི་ཆར་བ་འབབས༔ མཚོན་ཆའི་ཆར་པས་དམ་ཉམས་དགྲ་བོ་རློགས༔ ཧཱུྃ་བྷྱོ༔ ཐོད་གཞུ་ནག་པོ་འོད་དུ་ཀྱི་ལི་ལི༔ ཐོད་ཁྲག་དམར་པོའི་མདའ་ནི་ཟངས་སེ་ཟང་༔ དམ་ཉམས་དགྲ་བོའི་དོན་སྙིང་ཚལ་པར་ཁོས༔ ཞག་དང་ཟ་མར་མ་འཇོག་རེ་མ་ཏཱི༔ ཧཱུྃ་བྷྱོ༔ བཛྲ་མ་བྷྱོ་མ་མ་རུ་ལུ་ཏྲག་རཀྴ་དགྲ་བགེགས་ནྲི་ཏྲི་མཱ་ར་ཡ་ཧཱུྃ་ཕཊ༔ ཧཱུྃ་བྷྱོ༔ གནམ་ལྕགས་འབར་བའི་རལ་གྲི་ཟངས་སེ་ཟང་༔ སྤུ་གྲི་དམར་པོ་ཟངས་ཡག་འབུམ་འབུམ་འཕྲོ༔ གནོད་བྱེད་དགྲ་བགེགས་རལ་གྲིའི་སོ་ལ་བསྐྱོན༔ དོན་སྙིང་ཕྱུངས་ཤིག་བཛྲ་དྷཀྐི་མ༔ སྔགས༔ ཧཱུྃ་བྷྱོ༔ ཏྲི་ཤུལ་བ་དན་ནག་པོ་ལྷབས་སེ་ལྷབ༔ གཡབ་ཀྱིས་འདོར་ཞིང་མཚོན་གྱི་ཆར་པ་འབེབས༔ དགྲ་བགེགས་གཡབ་ཀྱིས་འདོར་ལ་གསལ་ཞིང་བསྣུན༔ སྲོག་རྩ་ཆོད་ཅིག་མ་མོ་སྲོག་བདག་མ༔ སྔགས༔ ཧཱུྃ་བྷྱོ༔ ཁྲམ་ཤིང་དམར་པོ་ཁྲག་ལྟར་ཡ་ལ་ལ༔ འཆི་བདག་གཤིན་རྗེའི་ཕོ་ཉ་འབུམ་འབུམ་འཕྲོ༔ གནོད་བྱེད་དགྲ་བགེགས་གཤིན་རྗེའི་ཁྲམ་ལ་ཐོབ༔ སྙིང་རྗེ་མེད་པར་སྒྲོལ་ཅིག་གཤིན་རྗེ་མོ༔ སྔགས༔ ཧཱུྃ་བྷྱོ༔ བེ་ཅོན་རྡོ་རྗེའི་གཏུན་བུ་ཧྲི་ལི་ལི༔ རྡོ་རྗེ་ཆར་འབེབས་དགྲ་བགེགས་ཀླད་ཁྲག་དཀྲུག༔ ཀླད་ཁྲག་ཞོ་ལྟར་དཀྲུག་པའི་དུས་ལ་བབས༔ དབང་པོ་རྡུལ་དུ་རློགས་ཤིག་ཁྲག་འཐུང་མ༔ སྔགས༔ ཧཱུྃ་བྷྱོ༔ ཟངས་ཀྱི་གྲི་གུག་རྡོ་རྗེའི་ཡུ་བ་ཅན༔ ཁྲོ་ཆུའི་ཚ་ཚ་ཐོག་གི་བུ་ཡུག་འཐིབ༔ དགྲ་བགེགས་རྡུལ་དུ་བརླགས་པའི་དུས་ལ་བབས༔ དུས་མཐའ་སྡུས་ཤིག་ཐོག་གི་བུ་ཡུག་མ༔ སྔགས༔ ཧཱུྃ་བྷྱོ༔ ནད་ཀྱི་རྐྱལ་པ་དུག་གི་རླངས་པ་འཕྲོ༔ མཚོན་གྱི་དྲུ་གུས་ཡན་ལག་གཅོད་ཅིང་གཏུབ༔ དགྲ་བགེགས་མྱུར་དུ་གསོད་པའི་དུས་ལ་བབས༔ རྗེས་ཤུལ་མེད་པར་ཐོངས་ཤིག་ནད་བདག་མོ༔ སྔགས༔ ཧཱུྃ་བྷྱོ༔ ཁྲོ་བོའི་རྒྱལ་པོ་བཛྲ་ཀཱི་ལ་ཡ༔ གསོད་བྱེད་ཕོ་རྒྱུད་གིང་ཚོགས་སེར་ལྟར་འདྲིལ༔ ཟ་བྱེད་མོ་རྒྱུད་ཤ་ཟ་རྡུལ་ལྟར་འཚུབ༔ ཁྲོ་བོའི་རྒྱལ་པོ་མཁའ་འགྲོའི་དབང་ཕྱུག་གིས༔ དགྲ་བགེགས་རྡུལ་དུ་རློགས་ལ་དུམ་བུར་གཏུབས༔ ཚལ་བར་ཁོས་ལ་སོད་ཅིག་ཀཱི་ལཱ་ཡཱ༔ ཐུན་སྣ་སྣ་ཚོགས་དགྲ་བོའི་སྟེང་དུ་རྒྱོབ༔ དུས་ལ་བབ་པོ་དྲེགས་ཚོགས་ལྷ་སྲིན་རྣམས༔ བཀའ་ལས་མ་འདའ་མ་མོ་བསྟན་མའི་ཚོགས༔ དམ་ལས་མ་འདའ་དགྲ་བགེགས་མྱུར་དུ་སྒྲོལ༔ སྔགས་དང་བཅས་ཏེ་ལིང་ག་བསྒྲལ་བར་བྱ༔ ལྷ་ཚོགས་རྣམས་ཀྱིས་དགྲ་བགེགས་ཤ་ཁྲག་ལ༔ ལྷག་མ་མེད་པར་བཞེས་པས་གཟི་བརྗིད་རྒྱས༔ མཐུ་སྟོབས་དཔལ་འབར་ཁམས་གསུམ་དབང་དུ་སྒྱུར༔ ནུས་མཐུའི་དཔུང་ལྡན་སྲིད་གསུམ་ཟིལ་གནོན་བསམས༔ དྲེགས་པའི་སྟོབས་བསྐྱེད་དྲེགས་པའི་དགྲ་བགེགས་བཟློག༔ ས་མ་ཡ༔ རྒྱ་རྒྱ་རྒྱ༔ གཏེར་རྒྱ༔ སྦས་རྒྱ༔ ཟབ་རྒྱ༔ གཉན་རྒྱ༔ དམ་རྒྱ༔ གབ་རྒྱ༔ གསང་རྒྱ༔ མཁའ་འགྲོའི་བཀའ་ཡི་རྒྱ༔ ས་མ་ཡ༔ རྒྱ་རྒྱ་རྒྱ༔ རིག་འཛིན་ཆེན་པོ་ཁམས་པ་ཉི་མ་གྲགས་པས་ཧ་ཙོ་ནས་སྤྱན་དྲངས་ཤིང་ཤོག་སེར་ལས་བསྒྱུར་བའོ། །མངྒ་ལཾ།། །།

ཁྲག་ཟོར་ནད་གདོན་ཀུན་འཇོམས།

སྔགས་བདག་འབར་མའི་ཐུགས་ཐིག་ལས༔ ཁྲག་ཟོར་ནད་གདོན་ཀུན་འཇོམས་བཞུགས༔ རྦོད་གཏོང་མ་མོའི་ཚོགས་ལ་འདུད༔ མ་འོངས་དུས་ན་སྡེ་བརྒྱད་དང་༔ འབྱུང་པོ་ནག་ཕྱོགས་ཁ་དར་བས༔ མི་ནད་ཡམས་རིམས་རླུང་ལྟར་འཚུབ༔ དེ་ཚེ་འགྲོ་བའི་རྐྱེན་ཟློག་དུ༔ མ་མོའི་ཁྲག་ཟོར་འདི་ལྟར་འབད༔ ས་མ་ཡ༔ རྒྱ་རྒྱ་རྒྱ༔ གཡུལ་འཁྲུག་འདྲེ་འཚུབ་ས་རྡོ་ལ༔ མཎྜལ་ནག་པོར་དུག་ཁྲག་བྱུག༔ ལྟེ་བ་གྲུ་གསུམ་རྩིབས་བདུན་བཅད༔ ཐོད་ར་མེ་རིས་བསྐོར་བ་འདྲི༔ ཚོན་གྱིས་གླན་ཅིང་མཛེས་པར་བྱ༔ དགྲ་གདོན་བྱད་མ་གང་དམིགས་པའི༔ བླ་རྟགས་སྤྲུལ་བརྒྱུད་ལེགས་བརྟགས་པའི༔ ཐོད་པ་ཡས་མས་ཚང་པའི་ནང་༔ དམེ་ཁྲག་གྲི་ཁྲག་ནལ་གྱི་ཁྲག༔ ཡུགས་ས་མོ་དང་མཛེ་ཕོའི་ཁྲག༔ གཅེན་སྤྱང་ཁྲག་སྣ་ཅི་མང་དང་༔ ཐལ་ཆེན་བཙན་དུག་ཡུངས་ཀར་ནག༔ ཐུན་གྱི་རིགས་དང་མི་ཁའི་རྫས༔ ཐོད་པར་སྤུངས་ཤིང་དབུས་སུ་འགོད༔ སྟེང་དུ་མཉྫིའི་ཁྲིའུ་ཁར༔ ཐོད་པ་ཟངས་སམ་ལྕགས་ཁྲོའི་ནང་༔ འབྲུ་ནག་དུག་ཁྲག་སྦྲུས་པ་ལ༔ ལྷ་མོའི་ཞལ་གཏོར་ཚད་ལྡན་བཞེང་༔ དྲེགས་པ་བདུན་གྱི་གཏོར་མ་དང་༔ ཤ་སྣ་སྙིང་སྣ་ལིང་གས་བརྒྱན༔ ཁྲག་གི་ཟོར་ཀོང་བཅུ་དྲུག་ནང་༔ ཁྲག་སྣ་ཅི་མང་རྩང་གིས་བརྒྱན༔ མཐའ་ནས་བསྐོར་ཞིང་ཞིང་རྒྱུས་བསྡམས༔ བརྒྱན་ཅིང་སྐུ་གཟུགས་དར་གུར་ཕུབ༔ ལས་ཀྱི་གཞུང་བསྲང་བསྙེན་ཁ་གསོ༔ ལྟ་བ་བསྐྱེད་ཅིང་བསྒོམ་པ་གསལ༔ མདུན་བསྐྱེད་ལྷ་མོ་འཁོར་བཅས་ཀྱི༔ གསང་བའི་གནས་ནས་ཁྲག་དུ་འཛགས༔ རྒྱ་མཚོ་ཙམ་དུ་ཐོད་པར་འཁྱིལ༔ དགྲ་བགེགས་བྱད་མ་ལྷ་སྲུང་ལ༔ དུག་རླངས་ན་བུན་འོད་དུ་འཁྱུགས༔ མ་མོ་ཁྲོས་པའི་ཁྲག་ནད་ཀྱིས༔ སྐད་ཅིག་ཉིད་ལ་བརླགས་པར་བསམས༔ བྷྱོ་ནག་མོ་རེ་མ་ཏཱི་ནྲི་ཏྲི་དགྲ་བགེགས་ཆེ་གེ་མཱ་ར་ཡ་ཛཿཁྲག་ཐུན་ནག་པོས་མྱོས་མྱོས༔ ཁྲག་ཐུན་ནག་པོས་མྱོགས་མྱོགས༔ ཆེ་གེ་མོའི་སྲོག་རྩ་ཆོད༔ སྙིང་རྩ་ཕྱུངས༔ བླ་སྲོག་རྣམ་པར་ཤེས་པ་ཐུཾ་ཐུཾ་རིལ་རིལ་སོད་སོད་ཧཱུྃ་ཧཱུྃ་ཕཊ་ཕཊ༔ ཉེར་གཅིག་བཅུ་བཞི་བདུན་ལ་སོགས༔ དགྲ་གདོན་ལྟས་དང་སྦྱར་ཏེ་བཟླ༔ བདེན་སྟོབས་བརྗོད་ཅིང་དགྲ་བགེགས་འགུགས༔ ལིང་ག་བསྒྲལ་ཞིང་གཏོར་མར་འབུལ༔ དུག་ཁྲག་རོ་སོལ་བདུད་ཆས་སྤྲད༔ ཁྲོས་པའི་དབྱངས་ཀྱིས་འདི་སྐད་དོ༔ ཧཱུྃ་བྷྱོ༔ ང་ནི་དཔལ་ཆེན་ཡང་དག་ཧེ་རུ་ཀ༔ སྲིད་གསུམ་ཆེ་བཙན་འཁོར་འདས་ང་ཡི་བྲན༔ ཁྲག་འཐུང་ཁྲོས་པའི་ང་རོ་ཕྱོགས་བཅུར་སྒྲོག༔ དམ་ལ་འདུས་ཤིག་མ་སྲིང་རྒྱ་མཚོའི་ཚོགས༔ ཆད་ལ་སྤྱོན་ཅིག་དཔལ་ལྡན་རེ་མ་ཏཱི༔ བཟློག་ཅིང་བསྒྱུར་བའི་འཕྲིན་ལས་དུས་ལ་བབས༔ ཧཱུྃ་བྷྱོ༔ དང་པོ་ཁྲག་ཟོར་གང་ནས་བྱུང་དང་སྲིད༔ རྡོ་རྗེ་གདན་གྱི་གནས་མཆོག་དམ་པ་དེར༔ ཡང་དག་རྫོགས་པའི་སངས་རྒྱས་ཤཱཀ་ཐུབ་ལ༔ མུ་སྟེགས་སྡེ་དྲུག་སྟོན་པས་བསྟན་ལ་བརྩད༔ སངས་རྒྱས་དམ་ནོས་ལྷ་མོས་ཁྲག་ཟོར་འཕངས༔ མུ་སྟེགས་སྡེ་དྲུག་སྟོན་པ་རྡུལ་དུ་བརླགས༔ ཧཱུྃ་བྷྱོ༔ དེ་ནས་ཁྲག་ཟོར་གང་ནས་བྱུང་དང་སྲིད༔ ནུབ་ཕྱོགས་ཨོ་རྒྱན་ཡུལ་གྱི་དུར་ཁྲོད་དུ༔ ཨོ་རྒྱན་མཁན་པོ་པདྨ་འབྱུང་གནས་ལ༔ མུ་སྟེགས་སྟོན་པ་ལྔ་བརྒྱའི་རྩོད་པ་བྱུང་༔ མ་མོ་བསྒྲུབས་ཏེ་ཁྲག་གི་ཟོར་ཆེན་འཕངས༔ མུ་སྟེགས་སྟོན་པ་ལྔ་བརྒྱ་དྲུངས་ནས་ཕྱུང་༔ ཧཱུྃ་བྷྱོ༔ དེ་ནས་ཁྲག་ཟོར་གང་ནས་བྱུང་དང་སྲིད༔ གནས་མཆོག་ཡང་ལེ་ཤོད་ཀྱི་བྲག་ཕུག་ཏུ༔ རིག་འཛིན་ཆེན་པོ་དྷ་ན་སཾ་སྐྲྀ་ཏས༔ མོན་པ་ཤི་བའི་ཐོད་པ་ནག་པོའི་ནང་༔ མོན་པ་ཤི་བའི་ཁྲག་གི་བསྐང་སྟེ་བསྒྲུབས༔ མུ་སྟེགས་བལ་པོ་ཁྲམ་བོན་རྡོ་དབྱུག་བསྒྲལ༔ ཧཱུྃ་བྷྱོ༔ དེ་ནས་ཁྲག་ཟོར་གང་ནས་བྱུང་དང་སྲིད༔ བྷངྒ་ལ་ཡི་རྒྱལ་པོའི་ཕོ་བྲང་དུ༔ ཨོ་རྒྱན་རྒྱལ་པོ་པདྨ་སམ་བྷ་ལ༔ མུ་སྟེགས་རཀྴ་ཀཱ་ལས་ནུས་མཐུ་འགྲན༔ ཕུང་ཐོད་ཁྲག་སྣ་དགུ་ལྡན་ཟོར་དུ་འཕངས༔ མུ་སྟེགས་རཀྴ་ཀཱ་ལ་འཁོར་བཅས་བསྒྲལ༔ ཧཱུྃ་བྷྱོ༔ སྔོན་བྱུང་སྲིད་པའི་ཁྲག་ཟོར་བསྒྲུབས་པ་ལྟར༔ དེང་དུས་རྣལ་འབྱོར་རིག་འཛིན་བདག་ཅག་གིས༔ བསྟན་དང་འགྲོ་བའི་དོན་དུ་སེམས་བསྐྱེད་དེ༔ དུར་ཁྲོད་འབར་བའི་ས་གཞི་ཆེན་པོ་འདིར༔ འཕུང་ཐོད་ནག་པོ་ཁྲག་སྣ་དུག་གིས་བརྒྱན༔ བརྟན་པའི་རྫས་བཤམས་སྒྲུབ་པའི་སྙིང་པོ་བཟླས༔ རྦད་པའི་ཐུན་བསྒྲུབས་བསད་པའི་ལས་སྦྱོར་ན༔ ཞལ་བཞེས་དགོངས་ལ་བཟློག་པའི་འཕྲིན་ལས་མཛོད༔ ཧཱུྃ་བྷྱོ༔ མ་གཅིག་དཔལ་གྱི་ལྷ་མོ་སྔགས་བསྲུང་མ༔ ཁམས་གསུམ་དབང་དུ་བསྡུད་པའི་སྟོབས་མངའ་མ༔ སྲིད་གསུམ་ཟིལ་གྱིས་གནོན་པའི་གཟི་བརྗིད་ཅན༔ སྐུ་གསུང་ཐུགས་ལས་སྤྲུལ་པ་དཔག་མེད་འགྱེད༔ སྟོང་གསུམ་ཆེ་བཙན་དྲེགས་པ་བྲན་དུ་བཀོལ༔ ནད་མཚོན་དུག་རླངས་ཟོར་གྱིས་དགྲ་བགེགས་སྒྲོལ༔ མ་མོ་ཆེན་མོས་བཟློག་པའི་ལས་མཛོད་ཅིག༔ ཧཱུྃ་བྷྱོ༔ སྐུ་མདོག་མཐིང་ནག་འོད་དུ་ཡ་ལ་ལ༔ ཆོས་སྐུའི་མཁའ་འགྲོ་རྣམས་དང་གཉིས་སུ་མེད༔ གཉིས་མེད་སྤྲུལ་པའི་ལྷ་མོ་དཔལ་ལྡན་མས༔ གསང་སྔགས་འདུས་པའི་བྱད་མ་རྦོད་གཏོང་རྣམས༔ ཐོད་གཞུ་ནག་པོའི་ནུས་པས་དགྲ་ལ་ཟློག༔ ཐོད་ཁྲག་ཟོར་མདའི་ནུས་པས་བགེགས་ལ་སྒྱུར༔ རིགས་སྔགས་འདུས་པའི་བྱད་མ་རྦོད་གཏོང་རྣམས༔ ཐོད་གཞུ་ནག་པོའི་ནུས་པས་དགྲ་ལ་ཟློག༔ ཐོད་ཁྲག་ཟོར་མདའི་ནུས་པས་བགེགས་ལ་སྒྱུར༔ གཟུངས་སྔགས་འདུས་པའི་བྱད་མ་རྦོད་གཏོང་རྣམས༔ ཐོད་གཞུ་ནག་པོའི་ནུས་པས་དགྲ་ལ་ཟློག༔ ཐོད་ཁྲག་ཟོར་མདའི་ནུས་པས་བགེགས་ལ་སྒྱུར༔ ཕུར་ཁ་སྟོན་པའི་བྱད་མ་རྦོད་གཏོང་རྣམས༔ ཐོད་གཞུ་ནག་པོའི་ནུས་པས་དགྲ་ལ་ཟློག༔ ཐོད་ཁྲག་ཟོར་མདའི་ནུས་པས་བགེགས་ལ་སྒྱུར༔ གནན་གཏད་བཅིངས་པའི་བྱད་མ་རྦོད་གཏོང་རྣམས༔ ཐོད་གཞུ་ནག་པོའི་ནུས་པས་དགྲ་ལ་ཟློག༔ ཐོད་ཁྲག་ཟོར་མདའི་ནུས་པས་བགེགས་ལ་སྒྱུར༔ མ་མོ་མཁའ་འགྲོའི་བྱད་མ་རྦོད་གཏོང་རྣམས༔ ཐོད་གཞུ་ནག་པོའི་ནུས་པས་དགྲ་ལ་ཟློག༔ ཐོད་ཁྲག་ཟོར་མདའི་ནུས་པས་བགེགས་ལ་སྒྱུར༔ གཤིན་རྗེའི་ཁྲམ་ཁ་བྱད་མ་རྦོད་གཏོང་རྣམས༔ ཐོད་གཞུ་ནག་པོའི་ནུས་པས་དགྲ་ལ་ཟློག༔ ཐོད་ཁྲག་ཟོར་མདའི་ནུས་པས་བགེགས་ལ་སྒྱུར༔ བདུད་ཀྱི་ཞགས་པ་བྱད་མ་རྦོད་གཏོང་རྣམས༔ ཐོད་གཞུ་ནག་པོའི་ནུས་པས་དགྲ་ལ་ཟློག༔ ཐོད་ཁྲག་ཟོར་མདའི་ནུས་པས་བགེགས་ལ་སྒྱུར༔ བཙན་གྱི་གཟེར་ནད་བྱད་མ་རྦོད་གཏོང་རྣམས༔ ཐོད་གཞུ་ནག་པོའི་ནུས་པས་དགྲ་ལ་ཟློག༔ ཐོད་ཁྲག་ཟོར་མདའི་ནུས་པས་བགེགས་ལ་སྒྱུར༔ ཐེའུ་རང་ཆོ་འཕྲུལ་བྱད་མ་རྦོད་གཏོང་རྣམས༔ ཐོད་གཞུ་ནག་པོའི་ནུས་པས་དགྲ་ལ་ཟློག༔ ཐོད་ཁྲག་ཟོར་མདའི་ནུས་པས་བགེགས་ལ་སྒྱུར༔ རྒྱལ་པོའི་སྨྱོ་འབོགས་བྱད་མ་རྦོད་གཏོང་རྣམས༔ ཐོད་གཞུ་ནག་པོའི་ནུས་པས་དགྲ་ལ་ཟློག༔ ཐོད་ཁྲག་ཟོར་མདའི་ནུས་པས་བགེགས་ལ་སྒྱུར༔ འགོང་པོས་དམོད་པའི་བྱད་མ་རྦོད་གཏོང་རྣམས༔ ཐོད་གཞུ་ནག་པོའི་ནུས་པས་དགྲ་ལ་ཟློག༔ ཐོད་ཁྲག་ཟོར་མདའི་ནུས་པས་བགེགས་ལ་སྒྱུར༔ དམུ་ཡིས་དམོད་པའི་བྱད་མ་རྦོད་གཏོང་རྣམས༔ ཐོད་གཞུ་ནག་པོའི་ནུས་པས་དགྲ་ལ་ཟློག༔ ཐོད་ཁྲག་ཟོར་མདའི་ནུས་པས་བགེགས་ལ་སྒྱུར༔ ལྷ་ཡིས་དམོད་པའི་བྱད་མ་རྦོད་གཏོང་རྣམས༔ ཐོད་གཞུ་ནག་པོའི་ནུས་པས་དགྲ་ལ་ཟློག༔ ཐོད་ཁྲག་ཟོར་མདའི་ནུས་པས་བགེགས་ལ་སྒྱུར༔ ཀླུ་ཡིས་དམོད་པའི་བྱད་མ་རྦོད་གཏོང་རྣམས༔ ཐོད་གཞུ་ནག་པོའི་ནུས་པས་དགྲ་ལ་ཟློག༔ ཐོད་ཁྲག་ཟོར་མདའི་ནུས་པས་བགེགས་ལ་སྒྱུར༔ གནོད་སྦྱིན་དམོད་པའི་བྱད་མ་རྦོད་གཏོང་རྣམས༔ ཐོད་གཞུ་ནག་པོའི་ནུས་པས་དགྲ་ལ་ཟློག༔ ཐོད་ཁྲག་ཟོར་མདའི་ནུས་པས་བགེགས་ལ་སྒྱུར༔ སྲིན་པོས་དམོད་པའི་བྱད་མ་རྦོད་གཏོང་རྣམས༔ ཐོད་གཞུ་ནག་པོའི་ནུས་པས་དགྲ་ལ་ཟློག༔ ཐོད་ཁྲག་ཟོར་མདའི་ནུས་པས་བགེགས་ལ་སྒྱུར༔ གཟའ་ཡིས་དམོད་པའི་བྱད་མ་རྦོད་གཏོང་རྣམས༔ ཐོད་གཞུ་ནག་པོའི་ནུས་པས་དགྲ་ལ་ཟློག༔ ཐོད་ཁྲག་ཟོར་མདའི་ནུས་པས་བགེགས་ལ་སྒྱུར༔ དཔལ་མགོན་དམོད་པའི་བྱད་མ་རྦོད་གཏོང་རྣམས༔ ཐོད་གཞུ་ནག་པོའི་ནུས་པས་དགྲ་ལ་ཟློག༔ ཐོད་ཁྲག་ཟོར་མདའི་ནུས་པས་བགེགས་ལ་སྒྱུར༔ དྲེགས་པས་དམོད་པའི་བྱད་མ་རྦོད་གཏོང་རྣམས༔ ཐོད་གཞུ་ནག་པོའི་ནུས་པས་དགྲ་ལ་ཟློག༔ ཐོད་ཁྲག་ཟོར་མདའི་ནུས་པས་བགེགས་ལ་སྒྱུར༔ ཕྱི་ནང་སྡེ་བརྒྱད་བྱད་མ་རྦོད་གཏོང་རྣམས༔ ཐོད་གཞུ་ནག་པོའི་ནུས་པས་དགྲ་ལ་ཟློག༔ ཐོད་ཁྲག་ཟོར་མདའི་ནུས་པས་བགེགས་ལ་སྒྱུར༔ མགུར་ལྷས་དམོད་པའི་བྱད་མ་རྦོད་གཏོང་རྣམས༔ ཐོད་གཞུ་ནག་པོའི་ནུས་པས་དགྲ་ལ་ཟློག༔ ཐོད་ཁྲག་ཟོར་མདའི་ནུས་པས་བགེགས་ལ་སྒྱུར༔ བསྟན་མས་དམོད་པའི་བྱད་མ་རྦོད་གཏོང་རྣམས༔ ཐོད་གཞུ་ནག་པོའི་ནུས་པས་དགྲ་ལ་ཟློག༔ ཐོད་ཁྲག་ཟོར་མདའི་ནུས་པས་བགེགས་ལ་སྒྱུར༔ ཕྱོགས་སྐྱོང་དམོད་པའི་བྱད་མ་རྦོད་གཏོང་རྣམས༔ ཐོད་གཞུ་ནག་པོའི་ནུས་པས་དགྲ་ལ་ཟློག༔ ཐོད་ཁྲག་ཟོར་མདའི་ནུས་པས་བགེགས་ལ་སྒྱུར༔ མ་ཡམས་དམོད་པའི་བྱད་མ་རྦོད་གཏོང་རྣམས༔ ཐོད་གཞུ་ནག་པོའི་ནུས་པས་དགྲ་ལ་ཟློག༔ ཐོད་ཁྲག་ཟོར་མདའི་ནུས་པས་བགེགས་ལ་སྒྱུར༔ རྒྱ་གར་ཆོས་ཀྱི་བྱད་མ་རྦོད་གཏོང་རྣམས༔ ཐོད་གཞུ་ནག་པོའི་ནུས་པས་དགྲ་ལ་ཟློག༔ ཐོད་ཁྲག་ཟོར་མདའི་ནུས་པས་བགེགས་ལ་སྒྱུར༔ རྒྱ་ནག་རྩིས་ཀྱི་བྱད་མ་རྦོད་གཏོང་རྣམས༔ ཐོད་གཞུ་ནག་པོའི་ནུས་པས་དགྲ་ལ་ཟློག༔ ཐོད་ཁྲག་ཟོར་མདའི་ནུས་པས་བགེགས་ལ་སྒྱུར༔ གེ་སར་དམག་དགྲའི་བྱད་མ་རྦོད་གཏོང་རྣམས༔ ཐོད་གཞུ་ནག་པོའི་ནུས་པས་དགྲ་ལ་ཟློག༔ ཐོད་ཁྲག་ཟོར་མདའི་ནུས་པས་བགེགས་ལ་སྒྱུར༔ ཏ་ཟིག་ནོར་དབྱིག་བྱད་མ་རྦོད་གཏོང་རྣམས༔ ཐོད་གཞུ་ནག་པོའི་ནུས་པས་དགྲ་ལ་ཟློག༔ ཐོད་ཁྲག་ཟོར་མདའི་ནུས་པས་བགེགས་ལ་སྒྱུར༔ སུམ་པའི་གླང་དམར་བྱད་མ་རྦོད་གཏོང་རྣམས༔ ཐོད་གཞུ་ནག་པོའི་ནུས་པས་དགྲ་ལ་ཟློག༔ ཐོད་ཁྲག་ཟོར་མདའི་ནུས་པས་བགེགས་ལ་སྒྱུར༔ ཞང་ཞུང་ངན་སྔགས་བྱད་མ་རྦོད་གཏོང་རྣམས༔ ཐོད་གཞུ་ནག་པོའི་ནུས་པས་དགྲ་ལ་ཟློག༔ ཐོད་ཁྲག་ཟོར་མདའི་ནུས་པས་བགེགས་ལ་སྒྱུར༔ ཀླ་ཀློའི་ངན་སྔགས་བྱད་མ་རྦོད་གཏོང་རྣམས༔ ཐོད་གཞུ་ནག་པོའི་ནུས་པས་དགྲ་ལ་ཟློག༔ ཐོད་ཁྲག་ཟོར་མདའི་ནུས་པས་བགེགས་ལ་སྒྱུར༔ བན་བོན་འདུས་པའི་བྱད་མ་རྦོད་གཏོང་རྣམས༔ ཐོད་གཞུ་ནག་པོའི་ནུས་པས་དགྲ་ལ་ཟློག༔ ཐོད་ཁྲག་ཟོར་མདའི་ནུས་པས་བགེགས་ལ་སྒྱུར༔ སྲེག་པ་མེ་ཡི་བྱད་མ་རྦོད་གཏོང་རྣམས༔ ཐོད་གཞུ་ནག་པོའི་ནུས་པས་དགྲ་ལ་ཟློག༔ ཐོད་ཁྲག་ཟོར་མདའི་ནུས་པས་བགེགས་ལ་སྒྱུར༔ བསྐོར་བ་རླུང་གི་བྱད་མ་རྦོད་གཏོང་རྣམས༔ ཐོད་གཞུ་ནག་པོའི་ནུས་པས་དགྲ་ལ་ཟློག༔ ཐོད་ཁྲག་ཟོར་མདའི་ནུས་པས་བགེགས་ལ་སྒྱུར༔ མནན་པ་ས་ཡི་བྱད་མ་རྦོད་གཏོང་རྣམས༔ ཐོད་གཞུ་ནག་པོའི་ནུས་པས་དགྲ་ལ་ཟློག༔ ཐོད་ཁྲག་ཟོར་མདའི་ནུས་པས་བགེགས་ལ་སྒྱུར༔ ཀླུ་གཏད་ཆུ་ཡིས་བྱད་མ་རྦོད་གཏོང་རྣམས༔ ཐོད་གཞུ་ནག་པོའི་ནུས་པས་དགྲ་ལ་ཟློག༔ ཐོད་ཁྲག་ཟོར་མདའི་ནུས་པས་བགེགས་ལ་སྒྱུར༔ ནད་རིགས་བཞི་བརྒྱ་རྩ་བཞིའི་གནོད་པ་རྣམས༔ ཐོད་གཞུ་ནག་པོའི་ནུས་པས་དགྲ་ལ་ཟློག༔ ཐོད་ཁྲག་ཟོར་མདའི་ནུས་པས་བགེགས་ལ་སྒྱུར༔ བགེགས་རིགས་སྟོང་ཕྲག་བརྒྱད་ཅུའི་གནོད་པ་རྣམས༔ ཐོད་གཞུ་ནག་པོའི་ནུས་པས་དགྲ་ལ་ཟློག༔ ཐོད་ཁྲག་ཟོར་མདའི་ནུས་པས་བགེགས་ལ་སྒྱུར༔ ཡེ་འགྲོག་སུམ་བརྒྱ་དྲུག་ཅུའི་གནོད་པ་རྣམས༔ ཐོད་གཞུ་ནག་པོའི་ནུས་པས་དགྲ་ལ་ཟློག༔ ཐོད་ཁྲག་ཟོར་མདའི་ནུས་པས་བགེགས་ལ་སྒྱུར༔ གློ་བུར་བདུན་བརྒྱ་ཉི་ཤུའི་གནོད་པ་རྣམས༔ ཐོད་གཞུ་ནག་པོའི་ནུས་པས་དགྲ་ལ་ཟློག༔ ཐོད་ཁྲག་ཟོར་མདའི་ནུས་པས་བགེགས་ལ་སྒྱུར༔ བྱིས་པའི་གདོན་ཆེན་བཅོ་ལྔའི་གནོད་པ་རྣམས༔ ཐོད་གཞུ་ནག་པོའི་ནུས་པས་དགྲ་ལ་ཟློག༔ ཐོད་ཁྲག་ཟོར་མདའི་ནུས་པས་བགེགས་ལ་སྒྱུར༔ ལྟས་ངན་བརྒྱད་ཅུ་རྩ་གཅིག་གནོད་པ་རྣམས༔ ཐོད་གཞུ་ནག་པོའི་ནུས་པས་དགྲ་ལ་ཟློག༔ ཐོད་ཁྲག་ཟོར་མདའི་ནུས་པས་བགེགས་ལ་སྒྱུར༔ རྒྱ་འདྲེ་འགོང་པོའི་གནོད་པ་ཐམས་ཅད་རྣམས༔ ཐོད་གཞུ་ནག་པོའི་ནུས་པས་དགྲ་ལ་ཟློག༔ ཐོད་ཁྲག་ཟོར་མདའི་ནུས་པས་བགེགས་ལ་སྒྱུར༔ ལོ་ནད་བཙའ་སད་སེར་གསུམ་ཐམས་ཅད་ཀྱང་༔ ཐོད་གཞུ་ནག་པོའི་ནུས་པས་དགྲ་ལ་ཟློག༔ ཐོད་ཁྲག་ཟོར་མདའི་ནུས་པས་བགེགས་ལ་སྒྱུར༔ མི་ནད་ཕྱུགས་ནད་ངན་པ་ཐམས་ཅད་རྣམས༔ ཐོད་གཞུ་ནག་པོའི་ནུས་པས་དགྲ་ལ་ཟློག༔ ཐོད་ཁྲག་ཟོར་མདའི་ནུས་པས་བགེགས་ལ་སྒྱུར༔ ཧཱུྃ་ཡ་བྷྱོ་བྷྱོ་སྡང་བའི་དགྲ་ལ་བྷྱོ༔ ཧཱུྃ་ཡ་བྷྱོ་བྷྱོ་གནོད་པའི་བགེགས་ལ་བྷྱོ༔ ཧཱུྃ་ཡ་བྷྱོ་བྷྱོ་བར་ཆད་རྐྱེན་ལ་བྷྱོ༔ བྷྱོ་རེ་མ་ཏཱི་སརྦ་ས་མ་ཡ་ཛཿཛཿ བྷྱོ་བྷྱོ་ཟློག་ཟློག༔ མཱ་ར་ཡ་བྷྱོ་ཟློག༔ ཅེས་བཟླ༔ ཧཱུྃ་བྷྱོ༔ སྦྲུལ་རལ་ཁམ་ནག་གྱེན་བརྫེས་མཐུར་ལ་འཕྱང་༔ ལོངས་སྐུའི་མཁའ་འགྲོ་རྣམས་དང་གཉིས་སུ་མེད༔ གཉིས་མེད་སྤྲུལ་པའི་ལྷ་མོ་དཔལ་ལྡན་མས༔ གསང་སྔགས་འདུས་པའི་བྱད་མ་རྦོད་གཏོང་རྣམས༔ ཐོད་གཞུ་ནག་པོའི་ནུས་པས་དགྲ་ལ་ཟློག༔ ཐོད་ཁྲག་ཟོར་མདའི་ནུས་པས་བགེགས་ལ་སྒྱུར༔ སོགས་ཀུན་ལ་འགྲེས་སྦྱར། ཧཱུྃ་བྷྱོ༔ སྤྱན་གསུམ་སྡང་མིག་ཕྱོགས་བཅུར་གཟིགས་པ་ཡི༔ སྤྲུལ་སྐུའི་མཁའ་འགྲོ་རྣམས་དང་གཉིས་སུ་མེད༔ གཉིས་མེད་སྤྲུལ་པའི་ལྷ་མོ་དཔལ་ལྡན་མས༔ གསང་སྔགས་འདུས་པའི་བྱད་མ་རྦོད་གཏོང་ཟློག༔ ཐོད་གཞུ་ནག་པོའི་ནུས་པས་དགྲ་ལ་ཟློག༔ ཐོད་ཁྲག་ཟོར་མདའི་ནུས་པས་བགེགས་ལ་སྒྱུར༔ སོགས་འགྲེས་སོ༔ ཧཱུྃ་བྷྱོ༔ ཞལ་གྱི་མཆེ་བ་རྣམ་བཞི་གཙིགས་པ་ཡི༔ ཟ་གསོད་སྤྲུལ་པའི་མཁའ་འགྲོ་གཉིས་སུ་མེད༔ གཉིས་མེད་སྤྲུལ་པའི་ལྷ་མོ་དཔལ་ལྡན་མས༔ གསང་སྔགས་འདུས་པའི་བྱད་མ་རྦོད་གཏོང་རྣམས༔ ཐོད་གཞུ་ནག་པོའི་ནུས་པས་དགྲ་ལ་ཟློག༔ ཐོད་ཁྲག་ཟོར་མདའི་ནུས་པས་བགེགས་ལ་སྒྱུར༔ སོགས་འགྲེས་སོ༔ ཧཱུྃ་བྷྱོ༔ ཐོད་སྐམ་རིགས་ལྔས་དབུ་ལ་བརྒྱན་པ་ནི༔ ཁྲག་འཐུང་མཁའ་འགྲོའི་ཚོགས་དང་གཉིས་སུ་མེད༔ གཉིས་མེད་སྤྲུལ་པའི་ལྷ་མོ་དཔལ་ལྡན་མས༔ གསང་སྔགས་འདུས་པའི་བྱད་མ་རྦོད་གཏོང་རྣམས༔ ཐོད་གཞུ་ནག་པོའི་ནུས་པས་དགྲ་ལ་ཟློག༔ ཐོད་ཁྲག་ཟོར་མདའི་ནུས་པས་བགེགས་ལ་སྒྱུར༔ སོགས་འགྲེའོ༔ ཧཱུྃ་བྷྱོ༔ སྨ་ར་ཁ་སྤུ་མེ་ལྟར་འབར་བ་ནི༔ རཀྴ་སྲིན་པོའི་ཚོགས་དང་གཉིས་སུ་མེད༔ གཉིས་མེད་སྤྲུལ་པའི་ལྷ་མོ་དཔལ་ལྡན་མས༔ གསང་སྔགས་འདུས་པའི་བྱད་མ་རྦོད་གཏོང་རྣམས༔ ཐོད་གཞུ་ནག་པོའི་ནུས་པས་དགྲ་ལ་ཟློག༔ ཐོད་ཁྲག་ཟོར་མདའི་ནུས་པས་བགེགས་ལ་སྒྱུར༔ སོགས་འགྲེའོ༔ ཧཱུྃ་བྷྱོ༔ སྙན་གཡས་དུང་སེང་འབུམ་འབུམ་འཕྱོ་བ་ནི༔ སེང་གདོང་མཁའ་འགྲོའི་ཚོགས་དང་གཉིས་སུ་མེད༔ གཉིས་མེད་སྤྲུལ་པའི་ལྷ་མོ་དཔལ་ལྡན་མས༔ གསང་སྔགས་འདུས་པའི་བྱད་མ་རྦོད་གཏོང་རྣམས༔ ཐོད་གཞུ་ནག་པོའི་ནུས་པས་དགྲ་ལ་ཟློག༔ ཐོད་ཁྲག་ཟོར་མདའི་ནུས་པས་བགེགས་ལ་སྒྱུར༔ སོགས་འགྲེའོ༔ ཧཱུྃ་བྷྱོ༔ སྙན་གཡོན་དུག་སྦྲུལ་འབུམ་འབུམ་འཕྱོ་བ་ནི༔ ཕྲ་མེན་མཁའ་འགྲོའི་ཚོགས་དང་གཉིས་སུ་མེད༔ གཉིས་མེད་སྤྲུལ་པའི་ལྷ་མོ་དཔལ་ལྡ་ན་མས༔ གསང་སྔགས་འདུས་པའི་བྱད་མ་རྦོད་གཏོང་རྣམས༔ ཐོད་གཞུ་ནག་པོའི་ནུས་པས་དགྲ་ལ་ཟློག༔ ཐོད་ཁྲག་ཟོར་མདའི་ནུས་པ་བགེགས་ལ་སྒྱུར༔ འགྲེའོ༔ ཧཱུྃ་བྷྱོ༔ སྤྱི་བོར་རྨ་བྱའི་སྒྲོ་ཕོད་བཙུགས་པ་ནི༔ རིགས་ལྔའི་ཡུམ་ཆེན་རྣམས་དང་གཉིས་སུ་མེད༔ གཉིས་མེད་སྤྲུལ་པའི་ལྷ་མོ་དཔལ་ལྡན་མས༔ གསང་སྔགས་འདུས་པའི་བྱད་མ་རྦོད་གཏོང་རྣམས༔ ཐོད་གཞུ་ནག་པོའི་ནུས་པས་དགྲ་ལ་ཟློག༔ ཐོད་ཁྲག་ཟོར་མདའི་ནུས་པས་བགེགས་ལ་སྒྱུར༔ སོགས། ཧཱུྃ་བྷྱོ༔ སྤྱི་བོའི་གཙུག་ན་ཟླ་བ་རྒྱས་པ་ནི༔ ཡེ་ཤེས་མཁའ་འགྲོའི་ཚོགས་དང་གཉིས་སུ་མེད༔ གཉིས་མེད་སྤྲུལ་པའི་ལྷ་མོ་དཔལ་ལྡན་མས༔ གསང་སྔགས་འདུས་པའི་བྱད་མ་རྦོད་གཏོང་རྣམས༔ ཐོད་གཞུ་ནག་པོའི་ནུས་པས་དགྲ་ལ་ཟློག༔ ཐོད་ཁྲག་ཟོར་མདའི་ནུས་པས་བགེགས་ལ་སྒྱུར༔ སོགས། ཧཱུྃ་བྷྱོ༔ ལྟེ་བའི་དཀྱིལ་ན་ཉི་མ་རྒྱས་པ་ནི༔ འཇིག་རྟེན་མཁའ་འགྲོའི་ཚོགས་དང་གཉིས་སུ་མེད༔ གཉིས་མེད་སྤྲུལ་པའི་ལྷ་མོ་དཔལ་ལྡན་མས༔ གསང་སྔགས་འདུས་པའི་བྱད་མ་རྦོད་གཏོང་རྣམས༔ ཐོད་གཞུ་ནག་པོའི་ནུས་པས་དགྲ་ལ་ཟློག༔ ཐོད་ཁྲག་ཟོར་མདའི་ནུས་པས་བགེགས་ལ་སྒྱུར༔ སོགས། ཧཱུྃ་བྷྱོ༔ དར་ནག་ཅོད་པན་ནག་པོ་འཕྱོ་བ་ནི༔ ཤ་ཟ་བདུད་མོའི་ཚོགས་དང་གཉིས་སུ་མེད༔ གཉིས་མེད་སྤྲུལ་པའི་ལྷ་མོ་དཔལ་ལྡན་མས༔ གསང་སྔགས་འདུས་པའི་བྱད་མ་རྦོད་གཏོང་རྣམས༔ ཐོད་གཞུ་ནག་པོའི་ནུས་པས་དགྲ་ལ་ཟློག༔ ཐོད་ཁྲག་ཟོར་མདའི་ནུས་པས་བགེགས་ལ་སྒྱུར༔ སོགས། ཧཱུྃ་བྷྱོ༔ རེ་ལྡེ་ནག་པོས་སྐུ་ལ་བརྒྱན་པ་ནི༔ ཟ་བྱེད་སྲིན་པོའི་ཚོགས་དང་གཉིས་སུ་མེད༔ གཉིས་མེད་སྤྲུལ་པའི་ལྷ་མོ་དཔལ་ལྡན་མས༔ གསང་སྔགས་འདུས་པའི་བྱད་མ་རྦོད་གཏོང་རྣམས༔ ཐོད་གཞུ་ནག་པོའི་ནུས་པས་དགྲ་ལ་ཟློག༔ ཐོད་ཁྲག་ཟོར་མདའི་ནུས་པས་བགེགས་ལ་སྒྱུར༔ སོགས། ཧཱུྃ་བྷྱོ༔ མི་ལྤགས་གཡང་གཞི་གོས་སུ་གྱོན་པ་ནི༔ མཐུ་ཆེན་བདུད་ཀྱི་ཚོགས་དང་གཉིས་སུ་མེད༔ གཉིས་མེད་སྤྲུལ་པའི་ལྷ་མོ་དཔལ་ལྡན་མས༔ གསང་སྔགས་འདུས་པའི་བྱད་མ་རྦོད་གཏོང་རྣམས༔ ཐོད་གཞུ་ནག་པོའི་ནུས་པས་དགྲ་ལ་ཟློག༔ ཐོད་ཁྲག་ཟོར་མདའི་ནུས་པས་བགེགས་ལ་སྒྱུར༔ སོགས། ཧཱུྃ་བྷྱོ༔ སྟག་གི་པགས་པས་སྨད་ལ་དཀྲིས་པ་ནི༔ དབང་ཕྱུག་ཆེན་པོའི་སྐུ་དང་གཉིས་སུ་མེད༔ གཉིས་མེད་སྤྲུལ་པའི་ལྷ་མོ་དཔལ་ལྡན་མས༔ གསང་སྔགས་འདུས་པའི་བྱད་མ་རྦོད་གཏོང་རྣམས༔ ཐོད་གཞུ་ནག་པོའི་ནུས་པས་དགྲ་ལ་ཟློག༔ ཐོད་ཁྲག་ཟོར་མདའི་ནུས་པས་བགེགས་ལ་སྒྱུར༔ སོགས། ཧཱུྃ་བྷྱོ༔ སྦྲུལ་རིགས་ལྔ་ཡིས་སྐུ་ལ་བརྒྱན་པ་ནི༔ གདུག་པའི་ཀླུ་ཆེན་བརྒྱད་དང་གཉིས་སུ་མེད༔ གཉིས་མེད་སྤྲུལ་པའི་ལྷ་མོ་དཔལ་ལྡན་མས༔ གསང་སྔགས་འདུས་པའི་བྱད་མ་རྦོད་གཏོང་རྣམས༔ ཐོད་གཞུ་ནག་པོའི་ནུས་པས་དགྲ་ལ་ཟློག༔ ཐོད་ཁྲག་ཟོར་མདའི་ནུས་པས་བགེགས་ལ་སྒྱུར༔ སོགས། ཧཱུྃ་བྷྱོ༔ ཕྱག་གཡས་དར་ནག་རྩེ་གསུམ་འཕྱར་བ་ནི༔ འཆི་བདག་གཤིན་རྗེའི་ཚོགས་དང་གཉིས་སུ་མེད༔ གཉིས་མེད་སྤྲུལ་པའི་ལྷ་མོ་དཔལ་ལྡན་མས༔ གསང་སྔགས་འདུས་པའི་བྱད་མ་རྦོད་གཏོང་རྣམས༔ ཐོད་གཞུ་ནག་པོའི་ནུས་པས་དགྲ་ལ་ཟློག༔ ཐོད་ཁྲག་ཟོར་མདའི་ནུས་པས་བགེགས་ལ་སྒྱུར༔ སོགས། ཧཱུྃ་བྷྱོ༔ ཕྱག་གཡོན་ནད་ཀྱི་རྐྱལ་བ་བསྣམས་པ་ནི༔ ནད་གཏོང་མ་མོའི་ཚོགས་དང་གཉིས་སུ་མེད༔ གཉིས་མེད་སྤྲུལ་པའི་ལྷ་མོ་དཔལ་ལྡན་མས༔ གསང་སྔགས་འདུས་པའི་བྱད་མ་རྦོད་གཏོང་རྣམས༔ ཐོད་གཞུ་ནག་པོའི་ནུས་པས་དགྲ་ལ་ཟློག༔ ཐོད་ཁྲག་ཟོར་མདའི་ནུས་པས་བགེགས་ལ་སྒྱུར༔ སོགས། ཧཱུྃ་བྷྱོ༔ རིན་ཆེན་སྣ་ཚོགས་སྐུ་ཡི་རྒྱན་དུ་སྤྲས༔ གནོད་སྦྱིན་རྣམས་ཀྱི་ཚོགས་དང་གཉིས་སུ་མེད༔ གཉིས་མེད་སྤྲུལ་པའི་ལྷ་མོ་དཔལ་ལྡན་མས༔ གསང་སྔགས་འདུས་པའི་བྱད་མ་རྦོད་གཏོང་རྣམས༔ ཐོད་གཞུ་ནག་པོའི་ནུས་པས་དགྲ་ལ་ཟློག༔ ཐོད་ཁྲག་ཟོར་མདའི་ནུས་པས་བགེགས་ལ་སྒྱུར༔ སོགས། ཧཱུྃ་བྷྱོ༔ ཐོད་པའི་ཕྲེང་བས་སྐུ་ལ་བརྒྱན་པ་ནི༔ གཟའ་རྒོད་དྲག་པོའི་ཚོགས་དང་གཉིས་སུ་མེད༔ གཉིས་མེད་སྤྲུལ་པའི་ལྷ་མོ་དཔལ་ལྡན་མས༔ གསང་སྔགས་ཀྱི་འདུས་པའི་བྱད་མ་རྦོད་གཏོང་རྣམས༔ ཐོད་གཞུ་ནག་པོའི་ནུས་པས་དགྲ་ལ་ཟློག༔ ཐོད་ཁྲག་ཟོར་མདའི་ནུས་པས་བགེགས་ལ་སྒྱུར༔ སོགས། ཧཱུྃ་བྷྱོ༔ ཆིབས་སུ་དྲེའུའི་ཕ་ལ་བཅིབས་པ་ནི༔ འབྱུང་པོ་རྣམས་ཀྱི་ཚོགས་དང་གཉིས་སུ་མེད༔ གཉིས་མེད་སྤྲུལ་པའི་ལྷ་མོ་དཔལ་ལྡན་མས༔ གསང་སྔགས་འདུས་པའི་བྱད་མ་རྦོད་གཏོང་རྣམས༔ ཐོད་གཞུ་ནག་པོའི་ནུས་པས་དགྲ་ལ་ཟློག༔ ཐོད་ཁྲག་ཟོར་མདའི་ནུས་པས་བགེགས་ལ་སྒྱུར༔ སོགས། ཧཱུྃ་བྷྱོ༔ ཆིབས་སུ་སྔ་ཤར་ཚོན་དྲུབ་བཏགས་པ་ནི༔ འགུགས་འཆིང་ཕོ་ཉའི་ཚོགས་དང་གཉིས་སུ་མེད༔ གཉིས་མེད་སྤྲུལ་པའི་ལྷ་མོ་དཔལ་ལྡན་མས༔ གསང་སྔགས་འདུས་པའི་བྱད་མ་རྦོད་གཏོང་རྣམས༔ ཐོད་གཞུ་ནག་པོའི་ནུས་པས་དགྲ་ལ་ཟློག༔ ཐོད་ཁྲག་ཟོར་མདའི་ནུས་པས་བགེགས་ལ་སྒྱུར༔ སོགས། ཧཱུྃ་བྷྱོ༔ ཆིབས་ཀྱི་ཕྱི་ཤར་ཤོ་རྡེལ་འཕྱོ་བ་ནི༔ འགོང་པོ་ཐེའུ་རང་རྣམས་དང་གཉིས་སུ་མེད༔ གཉིས་མེད་སྤྲུལ་པའི་ལྷ་མོ་དཔལ་ལྡན་མས༔ གསང་སྔགས་འདུས་པའི་བྱད་མ་རྦོད་གཏོང་རྣམས༔ ཐོད་གཞུ་ནག་པོའི་ནུས་པས་དགྲ་ལ་ཟློག༔ ཐོད་ཁྲག་ཟོར་མདའི་ནུས་པས་བགེགས་ལ་སྒྱུར༔ སོགས། ཧཱུྃ་བྷྱོ༔ རླུང་ནག་འཚུབ་མའི་དབུས་ན་འགྱིང་བ་ནི༔ རྒྱལ་པོ་འབུམ་སྡེའི་ཚོགས་དང་གཉིས་སུ་མེད༔ གཉིས་མེད་སྤྲུལ་པའི་ལྷ་མོ་དཔལ་ལྡན་མས༔ གསང་སྔགས་འདུས་པའི་བྱད་མ་རྦོད་གཏོང་རྣམས༔ ཐོད་གཞུ་ནག་པོའི་ནུས་པས་དགྲ་ལ་ཟློག༔ ཐོད་ཁྲག་ཟོར་མདའི་ནུས་པས་བགེགས་ལ་སྒྱུར༔ སོགས། ཧཱུྃ་བྷྱོ༔ བསྐལ་པའི་མེ་ཆེན་རབ་ཏུ་འབར་བ་ནི༔ ཁམས་གསུམ་ཆེ་མཚན་ཀུན་དང་གཉིས་སུ་མེད༔ གཉིས་མེད་སྤྲུལ་པའི་ལྷ་མོ་དཔལ་ལྡན་མས༔ གསང་སྔགས་འདུས་པའི་བྱད་མ་རྦོད་གཏོང་རྣམས༔ ཐོད་གཞུ་ནག་པོའི་ནུས་པས་དགྲ་ལ་ཟློག༔ ཐོད་ཁྲག་ཟོར་མདའི་ནུས་པས་བགེགས་ལ་སྒྱུར༔ སོགས། ཧཱུྃ་བྷྱོ༔ སྐུ་ལས་ནད་མཚོན་དུག་རླངས་འཕྲོ་བ་ནི༔ བསྟན་བསྲུང་རྒྱ་མཚོའི་ཚོགས་དང་གཉིས་སུ་མེད༔ གཉིས་མེད་སྤྲུལ་པའི་ལྷ་མོ་དཔལ་ལྡན་མས༔ གསང་སྔགས་འདུས་པའི་བྱད་མ་རྦོད་གཏོང་རྣམས༔ ཐོད་གཞུ་ནག་པོའི་ནུས་པས་དགྲ་ལ་ཟློག༔ ཐོད་ཁྲག་ཟོར་མདའི་ནུས་པས་བགེགས་ལ་སྒྱུར༔ སོགས། ཧཱུྃ་བྷྱོ༔ སྐུ་མདོག་དཀར་ལ་བཞད་པར་བསྟན་པའི་ཚེ༔ དཀར་མོ་འབུམ་གྱི་ཚོགས་དང་གཉིས་སུ་མེད༔ གཉིས་མེད་སྤྲུལ་པའི་ལྷ་མོ་དཔལ་ལྡན་མས༔ གསང་སྔགས་འདུས་པའི་བྱད་མ་རྦོད་གཏོང་རྣམས༔ ཐོད་གཞུ་ནག་པོའི་ནུས་པས་དགྲ་ལ་ཟློག༔ ཐོད་ཁྲག་ཟོར་མདའི་ནུས་པས་བགེགས་ལ་སྒྱུར༔ སོགས། ཧཱུྃ་བྷྱོ༔ སྐུ་མདོག་སེར་ལ་བརྗིད་པར་བསྟན་པའི་ཚེ༔ སེར་མོ་འབུམ་གྱི་ཚོགས་དང་གཉིས་སུ་མེད༔ གཉིས་མེད་སྤྲུལ་པའི་ལྷ་མོ་དཔལ་ལྡན་མས༔ གསང་སྔགས་འདུས་པའི་བྱད་མ་རྦོད་གཏོང་རྣམས༔ ཐོད་གཞུ་ནག་པོའི་ནུས་པས་དགྲ་ལ་ཟློག༔ ཐོད་ཁྲག་ཟོར་མདའི་ནུས་པས་བགེགས་ལ་སྒྱུར༔ སོགས། ཧཱུྃ་བྷྱོ༔ སྐུ་མདོག་དམར་ལ་བརྔམ་པར་བསྟན་པའི་ཚེ༔ དམར་མོ་འབུམ་གྱི་ཚོགས་དང་གཉིས་སུ་མེད༔ གཉིས་མེད་སྤྲུལ་པའི་ལྷ་མོ་དཔལ་ལྡན་མས༔ གསང་སྔགས་འདུས་པའི་བྱད་མ་རྦོད་གཏོང་རྣམས༔ ཐོད་གཞུ་ནག་པོའི་ནུས་པས་དགྲ་ལ་ཟློག༔ ཐོད་ཁྲག་ཟོར་མདའི་ནུས་པས་བགེགས་ལ་སྒྱུར༔ སོགས། ཧཱུྃ་བྷྱོ༔ སྐུ་མདོག་ལྗང་ལ་ཁྲོས་པར་བསྟན་པའི་ཚེ༔ ལྗང་མོ་འབུམ་གྱི་ཚོགས་དང་གཉིས་སུ་མེད༔ གཉིས་མེད་སྤྲུལ་པའི་ལྷ་མོ་དཔལ་ལྡན་མས༔ གསང་སྔགས་འདུས་པའི་བྱད་མ་རྦོད་གཏོང་རྣམས༔ ཐོད་གཞུ་ནག་པོའི་ནུས་པས་དགྲ་ལ་ཟློག༔ ཐོད་ཁྲག་ཟོར་མདའི་ནུས་པས་བགེགས་ལ་སྒྱུར༔ སོགས། ཧཱུྃ་བྷྱོ༔ སྐུ་མདོག་དཀར་ནག་ཕྱེད་གཟུགས་བསྟན་པའི་ཚེ༔ རྡོ་རྗེ་ཕྲ་མེན་ཚོགས་དང་གཉིས་སུ་མེད༔ གཉིས་མེད་སྤྲུལ་པའི་ལྷ་མོ་དཔལ་ལྡན་མས༔ གསང་སྔགས་འདུས་པའི་བྱད་མ་རྦོད་གཏོང་རྣམས༔ ཐོད་གཞུ་ནག་པོའི་ནུས་པས་དགྲ་ལ་ཟློག༔ ཐོད་ཁྲག་ཟོར་མདའི་ནུས་པས་བགེགས་ལ་སྒྱུར༔ སོགས། ཧཱུྃ་བྷྱོ༔ སྐུ་མདོག་སེར་ནག་ཕྱེད་གཟུགས་བསྟན་པའི་ཚེ༔ རཏྣ་ཕྲ་མེན་ཚོགས་དང་གཉིས་སུ་མེད༔ གཉིས་མེད་སྤྲུལ་པའི་ལྷ་མོ་དཔལ་ལྡན་མས༔ གསང་སྔགས་འདུས་པའི་བྱད་མ་རྦོད་གཏོང་རྣམས༔ ཐོད་གཞུ་ནག་པོའི་ནུས་པས་དགྲ་ལ་ཟློག༔ ཐོད་ཁྲག་ཟོར་མདའི་ནུས་པས་བགེགས་ལ་སྒྱུར༔ སོགས། ཧཱུྃ་བྷྱོ༔ སྐུ་མདོག་དམར་ནག་ཕྱེད་གཟུགས་བསྟན་པའི་ཚེ༔ པདྨ་ཕྲ་མེན་ཚོགས་དང་གཉིས་སུ་མེད༔ གཉིས་མེད་སྤྲུལ་པའི་ལྷ་མོ་དཔལ་ལྡན་མས༔ གསང་སྔགས་འདུས་པའི་བྱད་མ་རྦོད་གཏོང་རྣམས༔ ཐོད་གཞུ་ནག་པོའི་ནུས་པས་དགྲ་ལ་ཟློག༔ ཐོད་ཁྲག་ཟོར་མདའི་ནུས་པས་བགེགས་ལ་སྒྱུར༔ སོགས། ཧཱུྃ་བྷྱོ༔ སྐུ་མདོག་ལྗང་ནག་ཕྱེད་གཟུགས་བསྟན་པའི་ཚེ༔ ཀརྨ་ཕྲ་མེན་ཚོགས་དང་གཉིས་སུ་མེད༔ གཉིས་མེད་སྤྲུལ་པའི་ལྷ་མོ་དཔལ་ལྡན་མས༔ གསང་སྔགས་འདུས་པའི་བྱད་མ་རྦོད་གཏོང་རྣམས༔ ཐོད་གཞུ་ནག་པོའི་ནུས་པས་དགྲ་ལ་ཟློག༔ ཐོད་ཁྲག་ཟོར་མདའི་ནུས་པས་བགེགས་ལ་སྒྱུར༔ སོགས། ཧཱུྃ་བྷྱོ༔ སྐུ་མདོག་ལྗང་ནག་ཕྱེད་གཟུགས་བསྟན་པའི་ཚེ༔ ཀརྨ་ཕྲ་མེན་ཚོགས་དང་གཉིས་སུ་མེད༔ གཉིས་མེད་སྤྲུལ་པའི་ལྷ་མོ་དཔལ་ལྡན་མས༔ གསང་སྔགས་འདུས་པའི་བྱད་མ་རྦོད་གཏོང་རྣམས༔ ཐོད་གཞུ་ནག་པོའི་ནུས་པས་དགྲ་ལ་ཟློག༔ ཐོད་ཁྲག་ཟོར་མདའི་ནུས་པས་བགེགས་ལ་སྒྱུར༔ སོགས། གོང་བཞིན་སྔགས་ཐེམས་བར་ཀུན་གྱི་མཚམས་ལ་འགྲེ། ཧཱུྃ་བྷྱོ༔ ད་ནི་བཟློག་བསྒྱུར་འཕྲིན་ལས་དུས་ལ་བབས༔ བཟློག་པར་བཅོལ་བས་མི་ཟློག་གང་ཡང་མེད༔ བསྒྱུར་བར་བྱས་པས་མི་བསྒྱུར་གང་ཡང་མེད༔ ཧཱུྃ་བྷྱོ༔ དཔལ་ལྡན་ལྷ་མོ་གཉན་གྱི་རེ་མ་ཏཱི༔ ཁྱོད་ནི་འདོད་ཁམས་སྲིད་གསུམ་ཀུན་གྱི་བདག༔ ཤར་ཕྱོགས་མངོན་པར་དགའ་བའི་ཞིང་ཁམས་སུ༔ བཅོམ་ལྡན་ཆོས་སྐུ་མི་བསྐྱོད་རྡོ་རྗེ་ཡིས༔ བཛྲ་དྷཀྐི་ནག་མོར་མཚན་ཡང་གསོལ༔ སྐུ་གསུམ་སངས་རྒྱས་བྱིན་རླབས་འདུས་པའི་མས༔ ཡི་དམ་མཁའ་འགྲོ་ཆོས་སྐྱོང་དབང་བསྒྱུར་ལ༔ ནད་གདོན་བགེགས་དང་བར་ཆད་མི་མཐུན་ཚོགས༔ དམར་ཆེན་འདུས་པའི་ཁྲག་ཟོར་འདི་ཡིས་ཟློག༔ ཟློག་ཅིང་བསྒྱུར་བའི་འཕྲིན་ལས་གྲུབ་པར་མཛོད༔ རི་རབ་བྱང་ཕྱོགས་གནོད་སྦྱིན་ཕུག་པ་རུ༔ ལོངས་སྐུ་དཔལ་ཆེན་ཡང་དག་ཧེ་རུ་ཀས༔ འདོད་ཁམས་གཙོ་མོ་ཆེན་མོར་མཚན་ཡང་གསོལ༔ ཁྲག་འཐུང་ཕོ་རྒྱུད་མོ་རྒྱུད་དབང་སྒྱུར་ལ༔ ནད་གདོན་བགེགས་དང་བར་ཆད་མི་མཐུན་ཚོགས༔ དམར་ཆེན་འདུས་པའི་ཁྲག་ཟོར་འདི་ཡིས་ཟློག༔ ཟློག་ཅིང་བསྒྱུར་བའི་འཕྲིན་ལས་གྲུབ་པར་མཛོད༔ རྒྱ་གར་རྡོ་རྗེ་གདན་གྱི་གནས་མཆོག་ཏུ༔ སྤྲུལ་སྐུའི་སྟོན་པ་ཤཱཀྱ་ཐུབ་པ་ཡིས༔ དཔལ་ལྡན་ལྷ་མོ་ཆེན་མོར་མཚན་ཡང་གསོལ༔ དཔལ་མགོན་སྲུང་མ་རྒྱ་མཚོར་དབང་སྒྱུར་ལ༔ ནད་གདོན་བགེགས་དང་བར་ཆད་མི་མཐུན་ཚོགས༔ དམར་ཆེན་འདུས་པའི་ཁྲག་ཟོར་འདི་ཡིས་ཟློག༔ ཟློག་ཅིང་སྒྱུར་བའི་འཕྲིན་ལས་གྲུབ་པར་མཛོད༔ བྱང་ཤར་ཡོངས་འདུ་ཤིང་གི་རྩ་བ་ན༔ བདག་ཉིད་སྔགས་འཆང་པདྨ་ཐོད་ཕྲེང་གིས༔ དཔལ་ལྡན་སྔགས་ཀྱི་བསྲུང་མར་མཚན་ཡང་གསོལ༔ སྔགས་བསྲུང་དམ་ཅན་རྒྱ་མཚོ་དབང་སྒྱུར་ལ༔ ནད་གདོན་བགེགས་དང་བར་ཆད་མི་མཐུན་ཚོགས༔ དམར་ཆེན་འདུས་པའི་ཁྲག་ཟོར་འདི་ཡིས་ཟློག༔ ཟློག་ཅིང་བསྒྱུར་བའི་འཕྲིན་ལས་གྲུབ་པར་མཛོད༔ གནས་མཆོག་ཡང་ལེ་ཤོད་ཀྱི་དབེན་གནས་སུ༔ སློབ་དཔོན་ཆེན་པོ་དྷ་ན་སཾ་སྐྲྀ་ཏས༔ ལྷ་མོ་རེ་མ་ཏཱི་ཞེས་མཚན་ཡང་གསོལ༔ རེ་ཏཱི་འབུམ་གྱི་ཚོགས་རྣམས་དབང་སྒྱུར་ལ༔ ནད་གདོན་བགེགས་དང་བར་ཆད་མི་མཐུན་ཚོགས༔ དམར་ཆེན་འདུས་པའི་ཁྲག་ཟོར་འདི་ཡིས་ཟློག༔ ཟློག་ཅིང་བསྒྱུར་བའི་འཕྲིན་ལས་གྲུབ་པར་མཛོད༔ ནུབ་ཕྱོགས་ཨོ་རྒྱན་ཡུལ་དུ་སྐྱོད་པའི་ཚེ༔ མཁའ་འགྲོའི་གཙོ་མོ་རྡོ་རྗེ་ཕག་མོ་ཡིས༔ མ་མོ་ཨེ་ཀ་ཛ་ཏིར་མཚན་ཡང་གསོལ༔ ཨེ་ཀ་ཛ་ཏི་དྲུག་འབུམ་དབང་སྒྱུར་ལ༔ ནད་གདོན་བགེགས་དང་བར་ཆད་མི་མཐུན་ཚོགས༔ དམར་ཆེན་འདུས་པའི་ཁྲག་ཟོར་འདི་ཡིས་ཟློག༔ ཟློག་ཅིང་བསྒྱུར་བའི་འཕྲིན་ལས་གྲུབ་པར་མཛོད༔ གནས་མཆོག་ལྕང་ལོ་ཅན་དུ་སྐྱོད་པའི་ཚེ༔ གནོད་སྦྱིན་ལག་ན་རྡོ་རྗེ་འཁོར་བཅས་ཀྱིས༔ སྲིད་གསུམ་དེད་དཔོན་ཆེན་མོར་མཚན་ཡང་གསོལ༔ སྲིད་གསུམ་དྲེགས་པའི་ཚོགས་རྣམས་དབང་སྒྱུར་ལ༔ ནད་གདོན་བགེགས་དང་བར་ཆད་མི་མཐུན་ཚོགས༔ དམར་ཆེན་འདུས་པའི་ཁྲག་ཟོར་འདི་ཡིས་ཟློག༔ ཟློག་ཅིང་བསྒྱུར་བའི་འཕྲིན་ལས་གྲུབ་པར་མཛོད༔ དུར་ཁྲོད་ཆེན་པོ་བརྒྱད་ལ་སྐྱོད་པའི་ཚེ༔ མ་ཚོགས་དབང་ཕྱུག་ཁྲོས་མ་ནག་མོ་ཡིས༔ ལྷ་མོ་སྤྱང་ཞོན་མ་རུ་མཚན་ཡང་གསོལ༔ དུར་ཁྲོད་བརྒྱད་ཀྱི་མཁའ་འགྲོ་དབང་སྒྱུར་ལ༔ ནད་གདོན་བགེགས་དང་བར་ཆད་མི་མཐུན་ཚོགས༔ དམར་ཆེན་འདུས་པའི་ཁྲག་ཟོར་འདི་ཡིས་ཟློག༔ ཟློག་ཅིང་སྒྱུར་བའི་འཕྲིན་ལས་གྲུབ་པར་མཛོད༔ ཉི་ཤུ་རྩ་བཞིའི་གནས་ལ་སྐྱོད་པའི་ཚེ༔ ཡེ་ཤེས་དཔའ་བོ་རྒྱ་མཚོས་མཚན་གསོལ་བ༔ དབྱིངས་ཀྱི་རྒྱལ་མོ་ཞེས་སུ་མཚན་ཡང་གསོལ༔ ཉེར་བཞིའི་དཔའ་བོ་དཔའ་མོ་དབང་སྒྱུར་ལ༔ ནད་གདོན་བགེགས་དང་བར་ཆད་མི་མཐུན་ཚོགས༔ དམར་ཆེན་འདུས་པའི་ཁྲག་ཟོར་འདི་ཡིས་ཟློག༔ ཟློག་ཅིང་སྒྱུར་བའི་འཕྲིན་ལས་གྲུབ་པར་མཛོད༔ སུམ་ཅུ་སོ་ལྔའི་ཡུལ་ན་སྐྱོད་པའི་ཚེ༔ ཞིང་སྐྱོང་དཔའ་བོ་མཁའ་འགྲོ་ཐམས་ཅད་ཀྱིས༔ སྟངས་འཛིན་དྷཀྐི་མ་ཞེས་མཚན་ཡང་གསོལ༔ ཞིང་སྐྱོང་བསྲུང་མ་ཐམས་ཅད་དབང་སྒྱུར་ལ༔ ནད་གདོན་བགེགས་དང་བར་ཆད་མི་མཐུན་ཚོགས༔ དམར་ཆེན་འདུས་པའི་ཁྲག་ཟོར་འདི་ཡིས་ཟློག༔ ཟློག་ཅིང་སྒྱུར་བའི་འཕྲིན་ལས་གྲུབ་པར་མཛོད༔ འདུ་བ་མཐུན་སྤྱོད་རྣམས་སུ་གཤེགས་པའི་ཚེ༔ སྔགས་འཆང་རིག་འཛིན་ཕོ་མོ་ཐམས་ཅད་ཀྱིས༔ དམ་ཚིག་མཁའ་འགྲོ་མ་ཞེས་མཚན་ཡང་གསོལ༔ རིག་པ་འཛིན་པའི་ཚོགས་རྣམས་དབང་སྒྱུར་ལ༔ ནད་གདོན་བགེགས་དང་བར་ཆད་མི་མཐུན་ཚོགས༔ དམར་ཆེན་འདུས་པའི་ཁྲག་ཟོར་འདི་ཡིས་ཟློག༔ ཟློག་ཅིང་སྒྱུར་བའི་འཕྲིན་ལས་གྲུབ་པར་མཛོད༔ སྟེང་ཕྱོགས་ལྷ་ཡུལ་རྣམས་སུ་གཤེགས་པའི་ཚེ༔ ལྷ་ཁམས་དབང་ཕྱུག་ཀུན་གྱིས་མཚན་གསོལ་བ༔ འདོད་ཁམས་ལྷ་དབང་ཡོངས་ཀྱི་ཡིད་འཛིན་མ༔ སྟེང་གི་ལྷ་ཁམས་ཐམས་ཅད་དབང་སྒྱུར་ལ༔ ནད་གདོན་བགེགས་དང་བར་ཆད་མི་མཐུན་ཚོགས༔ དམར་ཆེན་འདུས་པའི་ཁྲག་ཟོར་འདི་ཡིས་ཟློག༔ ཟློག་ཅིང་སྒྱུར་བའི་འཕྲིན་ལས་གྲུབ་པར་མཛོད༔ འོག་ཕྱོགས་ཀླུ་ཡི་ཡུལ་དུ་སྐྱོད་པའི་ཚེ༔ ཀླུ་རྒྱལ་འབངས་འཁོར་བཅས་པ་ཐམས་ཅད་ཀྱིས༔ ནཱ་ཀ་ཀླུ་ཡི་ལྕམ་གཅིག་མ་ཞེས་འབོད༔ འོག་ཕྱོགས་ཀླུ་ཁམས་ཐམས་ཅད་དབང་སྒྱུར་ལ༔ ནད་གདོན་བགེགས་དང་བར་ཆད་མི་མཐུན་ཚོགས༔ དམར་ཆེན་འདུས་པའི་ཁྲག་ཟོར་འདི་ཡིས་ཟློག༔ ཟློག་ཅིང་སྒྱུར་བའི་འཕྲིན་ལས་གྲུབ་པར་མཛོད༔ ནམ་མཁའ་ཡངས་པའི་ད་ལར་སྐྱོད་པའི་ཚེ༔ གཟའ་དང་རྒྱུ་སྐར་མ་ལུས་ཐམས་ཅད་ཀྱིས༔ ནམ་མཁའི་རྒྱལ་མོ་ཞེས་སུ་མཚན་ཡང་གསོལ༔ གཟའ་དང་རྒྱུ་སྐར་ཐམས་ཅད་དབང་སྒྱུར་ལ༔ ནད་གདོན་བགེགས་དང་བར་ཆད་མི་མཐུན་ཚོགས༔ དམར་ཆེན་འདུས་པའི་ཁྲག་ཟོར་འདི་ཡིས་ཟློག༔ ཟློག་ཅིང་སྒྱུར་བའི་འཕྲིན་ལས་གྲུབ་པར་མཛོད༔ དབུས་ཀྱི་ལྷུན་པོའི་ལོགས་སུ་སྐྱོད་པའི་ཚེ༔ རྒྱལ་ཆེན་སྡེ་བཞི་འཁོར་དང་བཅས་པ་ཡིས༔ དུས་བཞིའི་ལྷ་མོ་ཞེས་སུ་མཚན་ཡང་གསོལ༔ རྒྱལ་པོ་ཆེན་པོ་སྡེ་བཞི་དབང་སྒྱུར་ལ༔ ནད་གདོན་བགེགས་དང་བར་ཆད་མི་མཐུན་ཚོགས༔ དམར་ཆེན་འདུས་པའི་ཁྲག་ཟོར་འདི་ཡིས་ཟློག༔ ཟློག་ཅིང་སྒྱུར་བའི་འཕྲིན་ལས་གྲུབ་པར་མཛོད༔ རི་རབ་ཆེན་པོའི་ཟོམ་ལ་སྐྱོད་པའི་ཚེ༔ ལྷ་མིན་ཐག་བཟང་རིས་དབང་འཁོར་བཅས་ཀྱིས༔ དམག་གི་རྒྱལ་མོ་ཞེས་སུ་མཚན་ཡང་གསོལ༔ ལྷ་མིན་དམག་ཚོགས་ཐམས་ཅད་དབང་སྒྱུར་ལ༔ ནད་གདོན་བགེགས་དང་བར་ཆད་མི་མཐུན་ཚོགས༔ དམར་ཆེན་འདུས་པའི་ཁྲག་ཟོར་འདི་ཡིས་ཟློག༔ ཟློག་ཅིང་སྒྱུར་བའི་འཕྲིན་ལས་གྲུབ་པར་མཛོད༔ འཇིག་རྟེན་ས་གཞིའི་ཁམས་ལ་སྐྱོད་པའི་ཚེ༔ གཉན་ཁམས་ཡུལ་ལྷ་གཞི་བདག་ཐམས་ཅད་ཀྱིས༔ དཔལ་ལྡན་གཉན་མོ་ཆེན་མོར་མཚན་ཡང་གསོལ༔ གཉན་ཁམས་ཡུལ་ལྷ་གཞི་བདག་དབང་སྒྱུར་ལ༔ ནད་གདོན་བགེགས་དང་བར་ཆད་མི་མཐུན་ཚོགས༔ དམར་ཆེན་འདུས་པའི་ཁྲག་ཟོར་འདི་ཡིས་ཟློག༔ ཟློག་ཅིང་སྒྱུར་བའི་འཕྲིན་ལས་གྲུབ་པར་མཛོད༔ སྟེང་འོག་ཕྱོགས་བཅུའི་ཡུལ་དུ་གཤེགས་པའི་ཚེ༔ ཕྱོགས་སྐྱོང་བསྲུང་མ་མ་ལུས་འཁོར་བཅས་ཀྱིས༔ ཕྱོགས་མཐུན་དཔལ་གྱི་རྒྱལ་མོར་མཚན་ཡང་གསོལ༔ ཕྱོགས་བཅུ་སྐྱོང་བའི་བསྲུང་མ་དབང་སྒྱུར་ལ༔ ནད་གདོན་བགེགས་དང་བར་ཆད་མི་མཐུན་ཚོགས༔ དམར་ཆེན་འདུས་པའི་ཁྲག་ཟོར་འདི་ཡིས་ཟློག༔ ཟློག་ཅིང་སྒྱུར་བའི་འཕྲིན་ལས་གྲུབ་པར་མཛོད༔ རཀྴ་སྲིན་གྱི་ཡུལ་དུ་སྐྱོད་པའི་ཚེ༔ སྲིན་གྱི་རྒྱལ་མོ་མ་ལུས་འཁོར་བཅས་ཀྱིས༔ སྲིན་མོ་དཔལ་ལྡན་རྡོ་རྗེའི་ལྕམ་ཞེས་འབོད༔ རཀྴ་སྲིན་པོའི་ཚོགས་རྣམས་དབང་སྒྱུར་ལ༔ ནད་གདོན་བགེགས་དང་བར་ཆད་མི་མཐུན་ཚོགས༔ དམར་ཆེན་འདུས་པའི་ཁྲག་ཟོར་འདི་ཡིས་ཟློག༔ ཟློག་ཅིང་སྒྱུར་བའི་འཕྲིན་ལས་གྲུབ་པར་མཛོད༔ བྷ་ཏ་ཧོར་གྱི་ཡུལ་དུ་གཤེགས་པའི་ཚེ༔ དགྲ་ལྷ་ལི་བྱིན་ཧ་ར་འཁོར་བཅས་ཀྱིས༔ གནམ་སྨན་ཐོག་གི་བུ་ཡུག་མཚན་དུ་གསོལ༔ རྒྱལ་པོ་འབུམ་གྱི་ཚོགས་རྣམས་དབང་སྒྱུར་ལ༔ ནད་གདོན་བགེགས་དང་བར་ཆད་མི་མཐུན་ཚོགས༔ དམར་ཆེན་འདུས་པའི་ཁྲག་ཟོར་འདི་ཡིས་ཟློག༔ ཟློག་ཅིང་བསྒྱུར་བའི་འཕྲིན་ལས་གྲུབ་པར་མཛོད༔ ཏ་ཟིག་འོལ་མོ་ལུང་དུ་བསྐྱོད་པའི་ཚེ༔ དཔལ་ཆེན་སྟག་ལྷ་འཁོར་དང་བཅས་པ་ཡིས༔ སྲིད་པའི་རྒྱལ་མོ་ཞེས་སུ་མཚན་ཡང་གསོལ༔ བོན་སྐྱོང་བསྲུང་མ་ཐམས་ཅད་དབང་སྒྱུར་ལ༔ ནད་གདོན་བགེགས་དང་བར་ཆད་མི་མཐུན་ཚོགས༔ དམར་ཆེན་འདུས་པའི་ཁྲག་ཟོར་འདི་ཡིས་ཟློག༔ ཟློག་ཅིང་སྒྱུར་བའི་འཕྲིན་ལས་གྲུབ་པར་མཛོད༔ ན་རག་དམྱལ་བའི་ཡུལ་དུ་སྐྱོད་པའི་ཚེ༔ གཤིན་རྗེ་ཆོས་རྒྱལ་འཁོར་དང་བཅས་པ་ཡིས༔ མ་མོ་ཀུན་ཐུབ་རྒྱལ་མོ་ཞེས་སུ་འབོད༔ ན་རག་གཤིན་རྗེའི་ཚོགས་རྣམས་དབང་སྒྱུར་ལ༔ ནད་གདོན་བགེགས་དང་བར་ཆད་མི་མཐུན་ཚོགས༔ དམར་ཆེན་འདུས་པའི་ཁྲག་ཟོར་འདི་ཡིས་ཟློག༔ ཟློག་ཅིང་སྒྱུར་བའི་འཕྲིན་ལས་གྲུབ་པར་མཛོད༔ པྲེ་ཏ་ཡི་དྭགས་ཡུལ་དུ་སྐྱོད་པའི་ཚེ༔ ཡི་དྭགས་ཐུབ་པ་འཁོར་བཅས་ཐམས་ཅད་ཀྱིས༔ མ་མོ་ཁ་འབར་མ་ཞེས་མཚན་ཡང་གསོལ༔ འབྱུང་པོ་ཡི་དྭགས་ཚོགས་རྣམས་དབང་སྒྱུར་ལ༔ ནད་གདོན་བགེགས་དང་བར་ཆད་མི་མཐུན་ཚོགས༔ དམར་ཆེན་འདུས་པའི་ཁྲག་ཟོར་འདི་ཡིས་ཟློག༔ ཟློག་ཅིང་སྒྱུར་བའི་འཕྲིན་ལས་གྲུབ་པར་མཛོད༔ ཏིཪྻ་དུད་འགྲོའི་ཡུལ་དུ་བསྐྱོད་པའི་ཚེ༔ སྟོན་པ་སེང་གེ་རབ་བརྟན་འཁོར་བཅས་ཀྱིས༔ ཆུ་སྲིན་ཟོར་གདོང་མ་ཞེས་མཚན་ཡང་གསོལ༔ ཟ་གསོད་སྟག་སྤྱང་གཅན་ཚོགས་དབང་སྒྱུར་ལ༔ ནད་གདོན་བགེགས་དང་བར་ཆད་མི་མཐུན་ཚོགས༔ དམར་ཆེན་འདུས་པའི་ཁྲག་ཟོར་འདི་ཡིས་ཟློག༔ ཟློག་ཅིང་སྒྱུར་བའི་འཕྲིན་ལས་གྲུབ་པར་མཛོད༔ ནག་པོ་རྒྱ་ཡི་ཡུལ་དུ་སྐྱོད་པའི་ཚེ༔ རྒྱལ་འབངས་སྐྱེ་འགྲོ་མ་ལུས་ཐམས་ཅད་ཀྱིས༔ དུནྟི་ནག་མོ་ཞེས་སུ་མཚན་ཡང་གསོལ༔ རྒྱ་འདྲེ་འགོང་པོའི་ཚོགས་རྣམས་དབང་སྒྱུར་ལ༔ ནད་གདོན་བགེགས་དང་བར་ཆད་མི་མཐུན་ཚོགས༔ དམར་ཆེན་འདུས་པའི་ཁྲག་ཟོར་འདི་ཡིས་ཟློག༔ ཟློག་ཅིང་སྒྱུར་བའི་འཕྲིན་ལས་གྲུབ་པར་མཛོད༔ སྤུར་རྒྱལ་བོད་ཀྱི་ཡུལ་དུ་སྐྱོད་པའི་ཚེ༔ བོད་ཀྱི་རྒྱལ་འབངས་མ་ལུས་ཐམས་ཅད་ཀྱིས༔ མ་མོ་ཙ་མུན་ཌི་ཞེས་མཚན་ཡང་གསོལ༔ མ་མོ་བསྟན་མའི་ཚོགས་རྣམས་དབང་སྒྱུར་ལ༔ ནད་གདོན་བགེགས་དང་བར་ཆད་མི་མཐུན་ཚོགས༔ དམར་ཆེན་འདུས་པའི་ཁྲག་ཟོར་འདི་ཡིས་ཟློག༔ ཟློག་ཅིང་སྒྱུར་བའི་འཕྲིན་ལས་གྲུབ་པར་མཛོད༔ འཛམ་གླིང་ཆོས་གྲྭ་གཙུག་ལག་དཀོར་བསྲུང་ཚེ༔ རྣལ་འབྱོར་རིག་འཛིན་དགེ་འདུན་སྡེར་བཅས་ཀྱིས༔ དཔལ་གྱི་ལྷ་མོ་ཞེས་སུ་མཚན་ཡང་གསོལ༔ དཀོར་བསྲུང་ཕོ་རྒྱུད་མོ་རྒྱུད་དབང་བསྒྱུར་ལ༔ ནད་གདོན་བགེགས་དང་བར་ཆད་མི་མཐུན་ཚོགས༔ དམར་ཆེན་འདུས་པའི་ཁྲག་ཟོར་འདི་ཡིས་ཟློག༔ ཟློག་ཅིང་སྒྱུར་བའི་འཕྲིན་ལས་གྲུབ་པར་མཛོད༔ ཧཱུྃ་བྷྱོ༔ སྔགས་བསྲུང་མཐུ་ཆེན་རྒྱལ་མོ་འཁོར་བཅས་ཀྱིས༔ བདག་ཅག་ཡོན་མཆོད་འཁོར་དང་བཅས་པ་ལ༔ གནོད་ཅིང་འཚེ་བར་བྱེད་པ་ཐམས་ཅད་ཟློག༔ ནད་རིགས་བཞི་བརྒྱ་རྩ་བཞིའི་གནོད་པ་ཟློག༔ བགེགས་རིགས་སྟོང་ཕྲག་བརྒྱད་ཅུའི་གནོད་པ་ཟློག༔ རླུང་མཁྲིས་བད་ཀན་འདུས་པའི་ནད་རྣམས་ཟློག༔ ཕོ་གདོན་མོ་གདོན་ཀླུ་གདོན་ཐམས་ཅད་ཟློག༔ འབྲས་ནད་འབྲུམ་གཟེར་ཀླད་ནད་ཐམས་ཅད་ཟློག༔ རྒྱ་འདྲེ་འགོང་པོ་ཟ་འདྲེ་ཤི་གཤེད་ཟློག༔ ལྟག་ཚད་རྒྱུ་གཟེར་དམར་ཡམས་ཐམས་ཅད་ཟློག༔ སྟེང་གདོན་འོག་གདོན་བར་གདོན་ཐམས་ཅད་ཟློག༔ གཟའ་ནད་སྨྱོ་འབོག་མཛེ་ཤུ་ཕོལ་མིག་ཟློག༔ ལོ་སྐག་ཟླ་སྐག་ཞག་སྐག་ཟ་སྐག་ཟློག༔ གག་ལྷོག་གཟེར་དང་ཚད་ནད་བས་ལྡགས་ཟློག༔ མོ་ངན་རྩིས་ངན་རྨི་ལམ་ངན་པ་ཟློག༔ སྐྲངས་དང་ཤུ་བ་མེ་ལྕེ་རྒྱ་ཐོར་ཟློག༔ ཚེ་སྲོག་བླ་ལ་འཇབ་པའི་གདོན་བགེགས་ཟློག༔ སྐེམ་པ་གཡེམ་པ་ཞ་གྲུམ་རེངས་པ་ཟློག༔ དམེ་ཡུགས་དམུག་དང་ནལ་གྱི་གནོད་པ་ཟློག༔ ལྐུག་ལོང་འོན་དང་རྨུགས་འཐིབས་བྱིང་བ་ཟློག༔ ལྟས་ངན་བརྒྱད་ཅུ་རྩ་གཅིག་ཐམས་ཅད་ཟློག༔ དེ་ལས་བྱུང་བའི་གདོན་བགེགས་ཐམས་ཅད་ཟློག༔ དགྲ་འདྲེ་བྱུར་གསུམ་མི་ཁ་སྨྲ་གྱོད་ཟློག༔ ཐབ་འཁོན་ཕྲ་མ་ཁ་མཆུ་ཐམས་ཅད་ཟློག༔ དམེ་གྲི་ཐིབ་སོགས་གྲི་ཡི་གནོད་པ་ཟློག༔ འཇིགས་ཆེན་བརྒྱད་དང་བཅུ་དྲུག་ཐམས་ཅད་ཟློག༔ ས་ཆུ་མེ་རླུང་འབྱུང་བའི་གཡོས་རྣམས་ཟློག༔ བཙའ་སད་སེར་གསུམ་ཞིང་ལ་གནོད་པ་ཟློག༔ གློ་གོར་ཧོན་གསུམ་ཕྱུགས་ཀྱི་ནད་ཡམས་ཟློག༔ བསེ་ཐོམ་ལ་བ་རྟ་ནད་ཐམས་ཅད་ཟློག༔ དཀར་འདྲེ་དབུལ་འདྲེ་བང་འདྲེ་ཐབ་འདྲེ་ཟློག༔ ཟློག་གོ་དམར་ཆེན་ཁྲག་ཟོར་འདི་ཡིས་ཟློག༔ སྒྱུར་རོ་དམར་ཆེན་ཁྲག་ཟོར་འདི་ཡིས་སྒྱུར༔ ཟློག་ཅིང་སྒྱུར་པའི་འཕྲིན་ལས་གྲུབ་པར་མཛོད༔ བྷྱོ་རེ་མ་ཏཱི་སརྦ་ས་མ་ཡ་ཛཿཛཿ བྷྱོ་བྷྱོ་ཟློག་ཟློག་མཱ་ར་ཡ་བྷྱོ་ཟློག༔ ས་མ་ཡ་བྷྱོ་ཟློག༔ ན་ཤ་ཡ་བྷྱོ་ཟློག༔ ཨེ་ཧུར་ཐུམ་བྷྱོ་ཟློག༔ བྱད་གཏད་ཐན་གསུམ་ནད་གདོན་བགེགས་དང་བཅས་པ་ཐམས་ཅད་བྷྱོ་བྷྱོ་ཟློག་ཟློག༔ ཅེས་བརྗོད་སྟངས་སྟབས་བསྒྱུར་ཞིང་ཟོར་དུ་འཕེན༔ མ་མོ་མཁའ་འགྲོའི་རིམས་ནད་དང་༔ བན་བོན་འདུས་པའི་བྱད་ཟོར་དང་༔ སྡེ་བརྒྱད་དམོད་པའི་རྦོད་གཏོང་ཚོགས༔ མདོར་ན་མི་མཐུན་ནད་གདོན་བགེགས༔ འདི་ཡིས་མི་ཟློག་གང་ཡང་མེད༔ དེ་ཕྱིར་འགྲོ་ལ་ཕན་ཐོག་ཤོག༔ ཤ་ཟ་ནག་མོས་བཀའ་འདི་སྲུངས༔ ལས་འཕྲོ་ལྡན་པའི་བུ་ལ་སྤྲོད༔ ས་མ་ཡ༔ རྒྱ་རྒྱ་རྒྱ༔ རིག་འཛིན་ཆེན་པོ་ཉི་མ་གྲགས་པས་ཧ་ཙོ་ནས་ཤིང་ཕོ་བྱི་བའི་ལོ་ལ་གདན་དྲངས་ཤིང་ཤོག་སེར་ལས་སྒྱུར་བ་མངྒ་ལཾ། །

ཟོར་ལམ།

སྔགས་བདག་འབར་མའི་ཐུགས་ཐིག་ལས༔ ཟོར་ལམ་རྦོད་གཏོང་མ་མོའི་ཚོགས་ལ་འདུད༔ ལྷ་མོ་ཆེན་མོའི་ལས་སྦྱོར་བསྒྲུབ༔ འཕྲིན་ལས་ཁ་བསྒྱུར་གང་བརྩམ་ཚེ༔ རིན་ཆེན་སྣོད་དུ་གཏོར་མ་དང་༔ ཆང་དང་འབྲུ་སྣ་གསེར་སྐྱེམས་བཅས༔ རང་ཉིད་ལྷར་བསྐྱེད་འདི་སྐད་དོ༔ ཧོཿ དགོངས་སུ་གསོལ་ལོ༔ ཧོ༔ དགོངས་སུ་གསོལ་ལོ༔ ཧོ༔ དགོངས་སུ་གསོལ་ལོ༔ དྲིན་ཅན་རྩ་བ་དང་བརྒྱུད་པར་བཅས་པའི་བླ་མ་རྣམས་དགོངས་སུ་གསོལ་ལོ༔ ཡི་དམ་དཀྱིལ་འཁོར་གྱི་ལྷ་ཚོགས་རྣམས་དགོངས་སུ་གསོལ་ལོ༔ གནས་ཉི་ཤུ་རྩ་བཞི་ཡུལ་སུམ་ཅུ་སོ་ལྔ་དུར་ཁྲོད་ཆེན་པོ་བརྒྱད་ཀྱི་བླ་མ་ཡི་དམ་དཔའ་བོ་མཁའ་འགྲོ་དམ་པ་ཡེ་ཤེས་ཆོས་སྐྱོང་བའི་སྲུང་མ་རྣམས་དགོངས་སུ་གསོལ་ལོ༔ ལྷ་མོ་ཆེན་མོ་སྔགས་ཀྱི་སྲུང་མ་དཔལ་ལྡན་དམག་ཟོར་རྒྱལ་མོ་འདོད་པའི་ཁམས་ཀྱི་དབང་ཕྱུག་མ་སྐུ་འཁོར་དང་བཅས་པ་དགོངས་སུ་གསོལ་ལོ༔ སྟེང་གི་ལྷ་འོག་གི་ཀླུ་བར་སྣང་གི་གཉན་བཀའ་སྣང་ཞིང་སྲིད་པའི་ལྷ་མ་སྲིན་སྡེ་བརྒྱད་ཡུལ་རིས་ཀྱི་གཞི་བདག་གཉན་པོ་དང་བཅས་པ་ཐམས་ཅད་དགོངས་སུ་གསོལ་ལོ༔ གསན་དུ་གསོལ་ལོ༔ ཁྱེད་རྣམས་ཡེ་ཤེས་ཀྱི་སྤྱན་དང་ལྡན་ལགས༔ ཐུགས་རྗེའི་མཐུ་དང་ལྡན་ལགས༔ རྫུ་འཕྲུལ་གྱི་སྟོབས་དང་ལྡན་ལགས༔ ནུས་པའི་དཔུང་དང་ལྡན་ལགས་པས་ལེགས་ཉེས་ཀྱི་དྲང་ཤན་ཕྱེ་ལ་གསེར་སྐྱེམས་ཀྱི་མཆོད་པ་འདི་བཞེས་ཏེ༔ བདག་གི་མགོན་སྐྱོབ་དང་སྡོང་གྲོགས་སུ་གཤེགས་ནས་དམ་ཉམས་པའི་དགྲ་བགེགས་ཀྱི་སྟེང་དུ་ཟོར་ལམ་གཏོད་ལ་ཐལ་བའི་རྡུལ་ཕྲན་བཞིན་བརླག་པའི་འཕྲིན་ལས་དམ་པ་མཛད་དུ་གསོལ་ལོ༔ ཧཱུྃ༔ དགོངས་ཤིག་བརྒྱུད་ལྡན་རྩ་བའི་བླ་མ་རྣམས༔ གསོན་ཅིག་རྩ་གསུམ་མཁའ་འགྲོ་ཆོས་སྐྱོང་བཅས༔ ཉོན་ཅིག་སྣང་ཞིང་སྲིད་པའི་ལྷ་འདྲེ་རྣམས༔ སངས་རྒྱས་བསྟན་པ་གཉན་པོའི་གཞུག་གཉེར་འདིར༔ བསྟན་པ་འཛིན་དང་སྐྱེ་འགྲོ་སེམས་ཅན་ལ༔ མི་མཐུན་བར་ཆད་སྣ་ཚོགས་འཚུབ་པའི་ཚེ༔ སྔགས་འཆང་བདག་གིས་བྱང་ཆུབ་སེམས་བསྐྱེད་ནས༔ དཀའ་བ་དང་བླངས་ལྕི་བ་ཕྲག་ལ་ཁུར༔ མ་མོ་མཁའ་འགྲོ་བསྒྲུབས་སྟེ་ཁྲག་ཟོར་བཅས༔ དམ་ཉམས་དགྲ་བགེགས་སྒྲོལ་བའི་ལས་སྦྱོར་ན༔ མ་ལུས་འཁོར་བཅས་གསེར་སྐྱེམས་འདི་བཞེས་ཏེ༔ བདག་གི་མགོན་དང་གྲོགས་ལ་ད་གཤེགས་ལ༔ དྲག་པོའི་ཟོར་གྱིས་དགྲ་བགེགས་སྒྲོལ་བར་མཛོད༔ མཆོད་བསྟོད་གསོལ་ཀྱང་ཚིག་ལ་མ་གསན་ཏེ༔ འབོད་རྦད་བསྐུལ་ཀྱང་ལས་ལ་མ་སྐྱོད་ན༔ ཁྱེད་རྣམས་སྔོན་གྱི་དམ་བཅས་མི་འགལ་ལམ༔ དམ་བཅས་དགོངས་ལ་བཅོལ་བའི་འཕྲིན་ལས་མཛོད༔ དམ་བཅས་དགོངས་ལ་དགྲ་བགེགས་ཐལ་བར་རློགས༔ དམ་བཅས་དགོངས་ལ་ཟོར་ལམ་དགྲ་ལ་ཐོད༔ ཞེས་བརྗོད་གསེར་སྐྱེམས་ཕྱོགས་བཞིར་མཆོད་ཅིང་དབུལ༔ ས་མ་ཡ༔ རྒྱ་རྒྱ་རྒྱ༔ གཏེར་རྒྱ༔ སྦས་རྒྱ༔ ཟབ་རྒྱ༔ གཏད་རྒྱ༔ ས་མ་ཡ༔ རྒྱ་རྒྱ་རྒྱ༔ རིག་འཛིན་ཉི་མ་གྲགས་པས་གནས་མཆོག་ཧ་ཙོ་ནས་གདན་དྲངས་པའོ། །མངྒ་ལཾ། །

འཕེན་པ་ཟོར་གྱི་ལས་མཐའ།

སྔགས་བདག་འབར་མའི་ཐུགས་ཐིག་ལས༔ འཕེན་པ་ཟོར་གྱི་ལས་མཐའ་བཞུགས་སོ༔ སྔགས་བདག་མཁའ་འགྲོའི་ཚོགས་ལ་འདུད༔ ཁྲག་ཟོར་དམར་པོ་འཕེན་པའི་ཚེ༔ སྔགས་པ་བདུད་ཀྱི་ཆས་ཀྱིས་བརྒྱན༔ བསྐྱེད་རིམ་གསལ་གདབ་ཟོར་རྣམས་ཐོགས༔ བུད་མེད་ནག་མོ་བདུད་མོ་བཞི༔ བནྡྷེ་བཀའ་ལོག་ཤན་པ་གྲི་བོ་གསུམ༔ གཡས་ནས་འཕུང་རེའི་གཡབ་མོ་ཐོགས༔ གཡོན་ན་རྫས་ངན་ཐུན་སྣ་ཐོགས༔ དགྲ་གདོན་གང་ལ་དམིགས་པའི་ཕྱོགས༔ ཁྲག་ཟོར་དམར་པོ་འཕེན་པར་བྱ༔ མ་མོ་མཁའ་འགྲོ་འཁོར་བཅས་ཀྱིས༔ ནད་མཚོན་དུག་གསུམ་ཆར་ཕབ་པས༔ དགྲ་གདོན་ཐམས་ཅད་བཟློག་གམ་བརླགས༔ ཐལ་བ་རླུང་ལ་བཤོར་ལྟར་བསྒོམ༔ བརྔམ་པའི་དབྱངས་ཀྱིས་འདི་སྐད་དོ༔ ཧཱུྃ་བྷྱོ༔ ང་ནི་ཁྲག་འཐུང་ཡང་དག་ཧེ་རུ་ཀ༔ ང་ནི་སྔགས་སྲུང་ལྷ་མོ་རེ་མ་ཏཱི༔ འཁོར་འདས་ཐམས་ཅད་ང་ཡི་བཀའ་ལ་ཉོན༔ བཞེངས་ཤིག་བཞེངས་ཤིག་རབ་འཇིགས་གནས་ནས་བཞེངས༔ བསྐུལ་ལོ་བསྐུལ་ལོ་འགྲོ་བའི་དོན་དུ་བསྐུལ༔ སྲིད་གསུམ་བདག་མོ་བདུད་དང་གཤིན་རྗེའི་ལྕམ༔ བདུད་མོ་འབུམ་གྱི་ཚོགས་ནི་འཁོར་དུ་བསྐོར༔ ཟོར་གྱི་བདག་མོ་བྱེ་བ་ས་ཡ་འགྱེད༔ ཟོར་བདག་ཆེན་མོ་དབྱིངས་ནས་ད་སྐྱོད་ཅིག༔ སེར་ནག་འཁྲུག་པའི་ད་ལ་ཆེན་པོ་ནས༔ སྲིད་གསུམ་ཟོར་ལ་དབང་བའི་མཐུ་མོ་ཆེ༔ ཕྱག་ན་མི་ལྤགས་གཡབ་མོ་ལིངས་སེ་ལིང་༔ སྐུ་གསུང་ཐུགས་སྤྲུལ་མཚོན་ཟོར་འབུམ་འབུམ་འཕྲོ༔ དམ་ཉམས་དགྲ་བོ་ཐམས་ཅད་མཱ་ར་ཡ༔ གནོད་བྱེད་གདོན་བགེགས་ཐམས་ཅད་ཧུར་ཐུམས་རྦད༔ མཐིང་ནག་བརྔམ་པའི་ད་ལ་ཆེན་པོ་ནས༔ སྲིད་གསུམ་ཟོར་ལ་དབང་བའི་མཐུ་མོ་ཆེ༔ ཕྱག་ན་མི་རྐང་གླིང་བུ་ཙེ་རེ་རེ༔ རཀྴ་སྲིན་འདུལ་ནག་མོ་འབུམ་འབུམ་འགྱེད༔ དམ་ཉམས་དགྲ་བོ་ཐམས་ཅད་མཱ་ར་ཡ༔ གནོད་བྱེད་གདོན་བགེགས་ཐམས་ཅད་ཧུར་ཐུམས་རྦད༔ དམར་ནག་འབར་བའི་ད་ལ་ཆེན་པོ་ནས༔ སྲིད་གསུམ་ཟོར་ལ་དབང་བའི་མཐུ་མོ་ཆེ༔ གཡས་ན་ཁྲག་ཟོར་དམར་པོ་ཤ་ར་ར༔ གཡོན་པ་མི་རྐང་གླིང་བུ་ཙེ་རེ་རེ༔ ཁྲག་ཟོར་ནད་གཏོང་དམར་མོ་འབུམ་འབུམ་འཕྲོ༔ དམ་ཉམས་དགྲ་བོ་ཐམས་ཅད་མཱ་ར་ཡ༔ གནོད་བྱེད་གདོན་བགེགས་ཐམས་ཅད་ཧུར་ཐུམས་རྦད༔ ལྗང་ནག་འཚུབ་པའི་ད་ལ་ཆེན་པོ་ནས༔ སྲིད་གསུམ་ཟོར་ལ་དབང་བའི་མཐུ་མོ་ཆེ༔ གཡས་ན་མི་མགོའི་ཁྲག་ཟོར་ཡ་ལ་ལ༔ གཡོན་ན་ཁྲག་གི་ཞགས་པ་ཀྱི་ལི་ལི༔ ཁྲག་གི་རལ་བས་ཁྲག་གི་ཆར་པ་འབེབས༔ ནད་རིགས་བཞི་བརྒྱ་རྩ་བཞི་སྐུ་ལས་འཕྲོ༔ དམ་ཉམས་དགྲ་བོ་ཐམས་ཅད་མཱ་ར་ཡ༔ གནོད་བྱེ་གདོན་བགེགས་ཐམས་ཅད་ཧུར་ཐུམས་རྦད༔ ཧཱུྃ་བྷྱོ༔ ཤར་ཕྱོགས་ནམ་མཁའ་ཡངས་པའི་ད་ལ་ནས༔ སྲིད་གསུམ་ཟོར་ལ་དབང་བའི་མ་ཆེན་མོ༔ དཀར་མོ་སྒེག་མོ་སྲོག་བདག་འབུམ་འབུམ་འགྱེད༔ དམ་ཉམས་དགྲ་བོ་ཐམས་ཅད་མཱ་ར་ཡ༔ གནོད་བྱེད་གདོན་བགེགས་ཐམས་ཅད་ཧུར་ཐུམས་རྦད༔ ལྷོ་ཕྱོགས་ནམ་མཁའ་ཡངས་པའི་ད་ལ་ནས༔ སྲིད་གསུམ་ཟོར་ལ་དབང་བའི་མཐུ་མོ་ཆེ༔ སྔོན་མོ་སྒེག་མོ་ཆུ་སྲིན་འབུམ་འབུམ་འཕྲོ༔ དམ་ཉམས་དགྲ་བོ་ཐམས་ཅད་མཱ་ར་ཡ༔ གནོད་བྱེད་གདོན་བགེགས་ཐམས་ཅད་ཧུར་ཐུམས་རྦད༔ ནུབ་ཕྱོགས་ནམ་མཁའ་ཡངས་པའི་ད་ལ་ནས༔ རཀྟ་ཁྲག་ལ་དབང་བའི་མ་ཆེན་མོ༔ དམར་མོ་སྒེག་མོ་ཁྲག་ནད་བུ་ཡུག་འཐིབ༔ དམ་ཉམས་དགྲ་བོ་ཐམས་ཅད་མཱ་ར་ཡ༔ གནོད་བྱེད་གདོན་བགེགས་ཐམས་ཅད་ཧུར་ཐུམས་རྦད༔ བྱང་ཕྱོགས་ནམ་མཁའ་ཡངས་པའི་ད་ལ་ནས༔ སྲིད་གསུམ་ཟོར་ལ་དབང་བའི་མ་ཆེན་མོ༔ ཧ་ནུ་རཀྴ་སྲོག་གཅོད་འབུམ་འབུམ་འཕྲོ༔ དམ་ཉམས་དགྲ་བོ་ཐམས་ཅད་མཱ་ར་ཡ༔ གནོད་བྱེད་གདོན་བགེགས་ཐམས་ཅད་ཧུར་ཐུམས་རྦད༔ སྟེང་ཕྱོགས་ནམ་མཁའ་ཡངས་པའི་ད་ལ་ནས༔ ཁམས་གསུམ་ཟོར་ལ་དབང་བའི་མ་ཆེན་མོ༔ སྟོང་ཕྲག་བརྒྱད་ཅུའི་བགེགས་ཚོགས་ཉི་ལི་ལི༔ དམ་ཉམས་དགྲ་བོ་ཐམས་ཅད་མཱ་ར་ཡ༔ གནོད་བྱེད་གདོན་བགེགས་ཐམས་ཅད་ཧུར་ཐུམས་རྦད༔ འོག་ཕྱོགས་ནམ་མཁའ་ཡངས་པའི་ད་ལ་ནས༔ སྟོང་གསུམ་ཟོར་ལ་དབང་བའི་མ་ཆེན་མོ༔ ཁྲག་འཐུང་ཆེན་མོ་ཀླུ་གདོན་འབུམ་འབུམ་འཕྲོ༔ དམ་ཉམས་དགྲ་བོ་ཐམས་ཅད་མཱ་ར་ཡ༔ གནོད་བྱེད་གདོན་བགེགས་ཐམས་ཅད་ཧུར་ཐུམས་རྦད༔ ཧཱུྃ་བྷྱོ༔ ཐོད་ཆེན་འབར་བའི་གཞལ་ཡས་ཆེན་པོ་ནས༔ ལྷ་མོ་ཟོར་གྱི་བདག་མོ་ད་གཤེགས་ཤིག༔ མ་ལུས་འཁོར་དང་བཅས་པ་དྲག་ཏུ་སྐྱོད༔ ཀུན་ཀྱང་ཕྱག་ན་ཐོད་གཞུ་ནག་པོ་འགེངས༔ ཐོད་གཞུ་ནག་པོ་འོད་དུ་ཀྱི་ལི་ལི༔ ཐོད་ཁྲག་དམར་པོའི་མདའ་ནི་ཟངས་སེ་ཟང་༔ ཐུན་སྣ་མང་པོའི་མདེའུ་ཐུང་ཤ་ར་ར༔ ད་ནི་ཟོར་འཕེན་དམ་ཉམས་དགྲ་ལ་འཕེན༔ ད་ནི་ཟོར་འཕེན་གནོད་བྱེད་བགེགས་ལ་འཕེན༔ དགྲ་བགེགས་སྙིང་གི་དཀྱིལ་དུ་ཁྲག་ཟོར་ཡཱ༔ སྲོག་རྩ་ཆོད་ལ་སྙིང་ཁྲག་ཐང་ལ་ཕོས༔ དགྲ་བགེགས་ཀླད་པའི་དཀྱིལ་དུ་ཁྲག་ཟོར་ཡཱ༔ ཀླད་ཁྲག་དམར་པོ་ཞོ་ལྟར་ད་དཀྲུགས་ཤིག༔ དགྲ་བགེགས་ལྟ་བའི་མིག་ལ་ཁྲག་ཟོར་ཡ༔ མིག་འབྲས་ཁྲག་ཏུ་བསྐྱུར་ལ་ཐང་ལ་ཕྱུངས༔ དགྲ་བགེགས་ཉན་པའི་རྣ་བར་ཁྲག་ཟོར་ཡ༔ རྣ་བའི་དབང་པོ་ཁྲག་ཏུ་ད་གཡོས་ཤིག༔ དགྲ་བགེགས་སྣོམས་པའི་སྣ་ལ་ཁྲག་ཟོར་ཡ༔ སྣ་ཡི་དབང་པོ་ཁྲག་ཏུ་ད་གཡོས་ཤིག༔ དགྲ་བགེགས་སྨྲ་བྱེད་ལྕེ་ལ་ཁྲག་ཟོར་ཡ༔ ལྕེ་ཡི་དབང་པོ་ཁྲག་ཏུ་ད་གཡོས་ཤིག༔ དགྲ་བགེགས་མགྲིན་པའི་དཀྱིལ་དུ་ཁྲག་ཟོར་ཡ༔ ཁྱབ་བྱེད་ངག་གི་འཁོར་ལོ་ཁྲག་ཏུ་གཡོས༔ དགྲ་བགེགས་རྒྱུ་ལོང་དཀྱིལ་དུ་ཁྲག་ཟོར་ཡ༔ དོན་སྙིང་ནང་རོལ་ཁྲག་ཏུ་ཟགས་སུ་ཆུག༔ དགྲ་བགེགས་ལྟེ་བའི་དཀྱིལ་དུ་ཁྲག་ཟོར་ཡ༔ སྲིད་པའི་རྩ་འཁོར་ཁྲག་ཏུ་གཡོས་ལ་ཆོད༔ དགྲ་བགེགས་གསང་བའི་གནས་ལ་ཁྲག་ཟོར་ཡ༔ སྐྱེ་རྒྱུན་རིགས་བརྒྱུད་རྩད་ནས་ད་ཆོད་ཤིག༔ དགྲ་བགེགས་ཡན་ལག་བཞི་ལ་ཁྲག་ཟོར་ཡ༔ ཡན་ལག་རྩ་འཁོར་ཁྲག་ཏུ་གཡོས་ལ་གཏུབས༔ དགྲ་བགེགས་སྐྱོབས་པའི་ལྷ་ལ་ཁྲག་ཟོར་ཡཱ༔ ཁྲག་ཟོར་དམར་པོས་ལྷ་དང་སོར་སོར་ཕྱེ༔ གཅེས་པ་མཆན་གྱི་བུ་ལ་ཁྲག་ཟོར་ཡ༔ བརྩེ་བ་འོག་གི་ཆུང་མར་ཁྲག་ཟོར་ཡ༔ ཉེ་བ་ཕ་ཚན་སྡེ་ལ་ཁྲག་ཟོར་ཡ༔ འདུས་པ་བྱམས་པའི་གཉན་ལ་ཁྲག་ཟོར་ཡ༔ ཡུལ་གཞིས་ཁང་ཁྱིམ་ནོར་ལ་ཁྲག་ཟོར་ཡ༔ ཁྲག་ཟོར་བརྒྱབས་པས་དམུགས་བརྗེད་འཐིབ་གསུམ་ཐོང་༔ ཁྲག་ཟོར་བརྒྱབ་པས་བརྒྱལ་ནད་སྨྱོ་འབོག་ཐོང་༔ ཁྲག་ཟོར་བརྒྱབས་པས་ཐལ་བའི་རྡུལ་དུ་རློགས༔ ཁྲག་ཟོར་བརྒྱབ་པས་མི་མཁར་རྩད་ནས་ཆོད༔ ཁྲག་ཟོར་བརྒྱབ་པས་ས་མཁར་རྨང་ནས་སྒྱེལ༔ ཁྲག་ཟོར་བརྒྱབ་པས་ནོར་ཕྱུག་ཕྱགས་མས་དེད༔ ཁྲག་གི་ཟོར་མདའ་དམར་པོ་འདི་འཕངས་པས༔ དགྲ་བགེགས་ཐམས་ཅད་ཐལ་བའི་རྡུལ་དུ་རློགས༔ ཞེས་བརྗོད་གཡབ་མོ་དྲག་སྔགས་བཞེས་གདབ་བོ༔ མ་འོངས་དུས་ཀྱི་བསྐལ་པའི་འོག་རོལ་དུ༔ སེམས་ཅན་མི་དགེའི་ལས་ལ་སྤྱོད་སྟབས་ཀྱིས༔ ནད་རིམས་བར་ཆད་རླུང་ལྟར་འཚུབས་པའི་ཚེ༔ ཆོས་ལྡན་བྱང་སེམས་རྣམས་ཀྱི་རྐྱེན་སེལ་ཤོག༔ ཤིན་ཏུ་གཉན་པས་གབ་ཏུ་སྦ་བར་བྱ༔ འཆལ་ན་རང་ལ་གནོད་པས་ཐབས་མཁས་སྤྱོད༔ ལས་འཕྲོ་ཅན་གྱི་བུ་དང་འཕྲད་པར་ཤོག༔ ས་མ་ཡ༔ རྒྱ་རྒྱ་རྒྱ༔ གཏེར་རྒྱ༔ སྦས་རྒྱ༔ གཏད་རྒྱ༔ ཟབ་རྒྱ༔ དམ་རྒྱ༔ ས་མ་ཡ༔ རྒྱ་རྒྱ་རྒྱ༔ རིག་འཛིན་ཆེན་པོ་ཉི་མ་གྲགས་པས་ཧ་ཙོ་ནས་གདན་དྲངས་ཤིང་ཤོག་སེར་ལས་བསྒྱུར་བའོ། །མངྒ་ལཾ།། །།

དམ་སྲི་སྒབ་འདྲེ་གནོན་པའི་ཤོག་དྲིལ།

སྔགས་བདག་འབར་མའི་ཐུགས་ཐིག་ལས༔ དམ་སྲི་སྒབ་འདྲེ་གནོན་པའི་ཤོག་དྲིལ་བཞུགས༔ རྦོད་གཏོང་མ་མོའི་ཚོགས་ལ་འདུད༔ དུག་ཤོག་ངོས་ལ་དུག་ཁྲག་གིསམོ་གཟུགས་སྐྱུང་ཀའི་མགོ་ཅན་འབྲི༔ སའི་ལྟེ་ཕུར་ནག་མོ་ཁུག་ཛཿཞེས་སྙིང་གར་ཏྲི་མཐར་བྲི༔ དེ་བཞིན་ཕོ་གཟུགས་བསེ་ཐེབས་ཅན༔ གླང་མའི་བེར་ཀ་ཐོགས་པ་བྲི༔ ཡན་ལག་ལྕགས་བཅུག་གནས་ཡིག་འགོད༔ ཕོ་ཡིག་སྙིང་གར་ཏྲི་ཡི་མཐར༔ འབྲོག་ཐེའུ་ནག་པོ་ཁུག་ཛཿབྲི༔ ཏྲིའུ་ཏྲིའུ་ཡ་ན་ཤོ་ར་ཛཿཡ་མ་ནི་ཛཿདུག་རི་ནག་པོའི་རྒྱུད་སྔགས་འདི༔ ཅི་མང་དག་གིས་མཐའ་བསྐོར་ཞིང་༔ དམོད་བཅོལ་འདོད་གསོལ་ཛཿཁྲམ་བསྐོར༔ ལས་ཀྱི་གཞུང་བསྲང་བསྙེན་ཁ་གསོ༔ ལྷ་དབྱེ་འགུགས་བསྟིམ་ཐུན་གྱིས་བརྡེག༔ བསད་པའི་སྔགས་དམིགས་འཁོར་ལོ་སྒྱུར༔ འཕུང་རེས་དྲིལ་ཞིང་འུག་ཐོད་བསྡམས༔ ཧོམ་བཅུག་རོ་གཡམ་རྒྱ་གྲམ་བཀབ༔ སྒྲུབ་ཁང་ཐེམས་པའི་འོག་ཏུ་མནན༔ ང་རྒྱལ་བརྟན་ཞིང་འདི་སྐད་དོ༔ ཧཱུྃ༔ ཁྲག་འཐུང་ཁྲོས་པའི་ང་རྒྱལ་དྲག་པོ་ཡིས༔ དྲེགས་པའི་དམ་སྲི་དབང་སྡུས་ཟིལ་གྱིས་གནོན༔ ཉོན་ཅིག་དམ་ཉམས་ལས་ངན་དམ་སྲི་མོ༔ སྔོན་ཚེ་འདས་དུས་བསྐལ་པའི་དང་པོ་ལ༔ ཁྱོད་དང་མ་ཆེན་དཔལ་གྱི་ལྷ་མོ་གཉིས༔ ཆེན་ཆུན་གྱུར་ཚེ་ལས་ཀྱི་སྨོན་ལམ་ལོག༔ ཁྱོད་ནི་དམ་སྲི་ལྟེ་ཕུར་ནག་མོར་སྐྱེས༔ དཔལ་ཆེན་མཁའ་འགྲོ་སྒྲུབ་ལ་སྒབ་འདྲེར་རྒྱུགས༔ ཡུལ་གྱི་འདྲེ་མོ་རྣམས་དང་ལྡོང་ཟླར་འདེབས༔ མིང་པོ་འབྲོག་ཐེའུ་ནག་པོ་གྲོགས་སུ་ཁྲིད༔ ཡུལ་གྱི་རྒྱལ་འགོང་རྣམས་དང་སྡོང་ཟླ་འདེབས༔ མི་བརྫུ་དགུ་རུ་བརྫུ་བའི་གཟུགས་སུ་སྟོན༔ ཟས་ནོར་གཡང་འཕྲོག་ཤེས་བསྒྱུར་འཕུང་འཁྲུག་གཏོང་༔ བཀྲ་མི་ཤིས་པའི་ངན་ལྟས་ཐམས་ཅད་སློང་༔ སྐྱེ་འགྲོའི་སྲོག་དབུགས་ཟ་ཞིང་འཁོར་དུ་བསྐོར༔ དེ་ལྟར་གྱུར་པའི་ལས་ངན་དམ་སྲི་ཁྱོད༔ བདག་ཉིད་སྔགས་འཆང་པདྨ་ཐོད་ཕྲེང་གིས༔ ཡང་ལེ་ཤོད་ཀྱི་གནས་མཆོག་དམ་པ་དེར༔ བར་ཆད་བགེགས་ཁྱོད་རྡོ་རྗེ་ཕུར་པས་བསྒྲལ༔ སྙིང་ཁྲག་ཕྱུངས་ཏེ་དམ་ལ་བཏགས་པའི་ཚེ༔ ཡང་དག་ཧེ་རུ་ཀཿཡིས་བཀའ་བསྒོས་ཤིང་༔ ཕུར་སྲུང་བཅུ་གཉིས་དུས་ཀྱི་ཆ་འཛིན་བསྐོས༔ སངས་རྒྱས་བསྟན་པའི་མཐའ་ལ་མ་ཐུག་བར༔ ནམ་ཡང་ལྡང་བ་མེད་པར་མ་ཆད་དམ༔ དེ་བས་དམ་སྲི་བཀའ་ལས་མ་འདའ་ཞིག༔ དེ་བས་དམ་སྲི་དམ་ལས་མ་འདའ་ཞིག༔ བཀའ་ལས་འདས་ན་རི་རབ་འོག་ཏུ་གནོན༔ དམ་སྲི་མནན་པ་ཡིན་ནོ་མ་ལྡང་ཞིག༔ དམ་ལས་འདས་ན་རྒྱ་མཚོའི་ནང་དུ་སྐྱུར༔ དམ་སྲི་བསྐྱུར་བ་ཡིན་ནོ་མ་ལྡང་ཞིག༔ ཆད་ལས་འདས་ན་ཆུ་སྲིན་གྲེ་བར་རྫོང་༔ དམ་སྲི་བརྫངས་པ་ཡིན་ནོ་མ་ལྡང་ཞིག༔ སྒྲུབ་ལ་འཁུ་ན་བོང་དྲེའུའི་མཇེ་ཡིས་བརྡུང་༔ བརྡུངས་ནས་བརླག་གོ་དམ་སྲི་མ་ལྡང་ཞིག༔ རྗེས་ལ་འབྲེང་ན་དམ་སྲི་ལྕགས་སུ་བཅུག༔ དམ་སྲི་བཅིངས་པ་ཡིན་ནོ་མ་འགྲོལ་ཞིག༔ རིགས་ལ་བསྙེགས་ན་སྲིན་བྱའི་ཐོད་པར་བསྡམས༔ དམ་སྲི་བསྡམས་པ་ཡིན་ནོ་མ་ལྡང་ཞིག༔ ཅེས་བརྗོད་རྗེས་མནན་མེ་རྒྱ་ཆུས་རྒྱས་འགེབས༔ བྲོ་བརྡུང་ལོ་དུས་བཞིན་དུ་འགུགས་བསྟིམ་གནོན༔ ས་མ་ཡ༔ རྒྱ་རྒྱ་རྒྱ༔ མ་འོངས་དུས་སུ་དམ་སྲི་ཁ་རྒྱས་ཤིང་༔ འགྲོ་བའི་བདེ་བ་བཅོམ་ཞིང་ཚེ་སྲོག་འཕྲོག༔ སྒྲུབ་ལ་བར་ཆད་བྱེད་པའི་དུས་བྱུང་ཚེ༔ ཟབ་མོའི་གདམས་པས་འགྲོ་ལ་ཕན་ཐོགས་ཤོག༔ ས་མ་ཡ༔ རྒྱ་རྒྱ་རྒྱ༔ གཏེར་རྒྱ༔ སྦས་རྒྱ༔ ཟབ་རྒྱ༔ ས་མ་ཡ༔ རྒྱ་རྒྱ་རྒྱ༔ རིག་པ་འཛིན་པ་ཉི་མ་གྲགས་པས་གནས་མཆོག་ཆེན་པོ་ཧ་ཙོ་ནས་གདན་དྲངས་པའོ། །མངྒ་ལཾ།། །།

འབར་མའི་འཕྲིན་ལས་བར་ཆད་ཀུན་སེལ།

སྔགས་བདག་འབར་མའི་ཐུགས་ཐིག་ལས༔ འབར་མའི་འཕྲིན་ལས་བར་ཆད་ཀུན་སེལ་བཞུགས༔ རྦོད་གཏོང་མཁའ་འགྲོའི་ཚོགས་ལ་འདུད༔ འདི་ནས་མ་འོངས་རིང་འདས་དུས༔ འཛམ་གླིང་ལས་ཀྱི་ས་པ་འདིར༔ བདེ་སྡུག་དབྱར་གྱི་ཉི་མ་འདྲ༔ ཚེ་ལོ་བཞི་བཅུ་ཁ་རལ་དུས༔ མ་ག་དྷ་ན་ཕྱི་པ་དར༔ ཏ་ཟིག་ཡུལ་ན་འཁྲུག་རྩོད་ལང་༔ ལི་ཡི་རྒྱལ་པོ་བཤན་པས་བྱེད༔ ཁ་ཆེའི་གུར་གུམ་སད་ཀྱིས་འཁྱེར༔ འབྱུང་བ་མི་སྙོམས་ཚ་གྲང་འཐབ༔ རྡོ་རྗེ་གདན་ན་ཁ་བ་འབབས༔ ཛ་ལན་དྷ་རར་བོད་དམག་འབོ༔ བྷེ་ཏའི་ཡུལ་དུ་མཚོན་ཆར་འབབས༔ མོན་གྱི་ས་གཡོས་རྒྱ་ཚོར་བསྲེ༔ མི་རྒོད་གཉའ་རེངས་བྱང་ཁམས་ཉུལ༔ ན་ལེན་ཊ་ན་མཐའ་མི་ཡོང་༔ ཐོ་གར་མི་ཡིས་རྒྱ་གར་འགྲིམ༔ ཨོ་རྒྱན་ཡུལ་དུ་སེར་བ་འབབས༔ དྷ་ན་ཀོ་ཤར་སྐྱེ་འབྲི་བོང་༔ དཔལ་གྱི་རི་ལ་རྔོན་པ་རྒྱུག༔ ཛོ་ཀི་རྣམས་ཀྱིས་ས་མཐའ་འགྲིམ༔ རྡོ་རྗེ་གདན་གྱི་བླ་ཤིང་ཉམས༔ རྩྭ་མཆོག་གྲོང་དུ་ཕྱི་པ་དར༔ ཤིང་གྷི་རི་ནི་ཆུ་ཡིས་འཇིགས༔ བལ་ཡུལ་ནང་འཁྲུགས་ཡང་ཡང་འོང་༔ འ་ཤའི་ཡུལ་དུ་ཀུན་གྱིས་ཕ་མ་གསོད༔ ཟ་ཧོར་ཡུལ་དུ་མེ་ཡིི་འཇིགས་པ་འབྱུང་༔ བྷ་ག་ཡ་ན་འཁྲུག་རྩོད་བསྐལ་བ་དར༔ རྡོ་ཡི་ཡུལ་དུ་འཕགས་པའི་སྤྲུལ་པ་འབྱུང་༔ མགོ་མེད་ཡུལ་དུ་ནད་ཀྱིས་མི་ཐོག་འཇོམས༔ མོན་ཁ་སྡེ་བཞིར་མཐའ་དམག་ལན་མང་འབོ༔ རྒྱ་ནག་ཡུལ་ཁྲིམས་ཉམས་ཤིང་གསར་ངད་ཆེ༔ འབངས་འཁོར་ཐམས་ཅད་དུག་མཚོ་ལྟ་བུར་ཁོལ༔ ས་མའི་ཡུལ་དུ་བསྟན་པའི་ལྷག་མ་ཡོང་༔ དེ་དུས་སྟེང་འོག་བར་གསུམ་སྡེ་བརྒྱད་དང་༔ མ་མོ་མཁའ་འགྲོ་ཞིང་སྐྱོང་ཐམས་ཅད་འཁྲུག༔ ནད་མཚོན་མུ་གེ་ལྟས་ངན་སྣ་ཚོགས་འབྱུང་༔ ས་གཡོ་རི་འཆང་ལྕེ་འབབ་ཐུགས་ཆོམ་དང་༔ དབྱར་དགུན་གོ་ལོག་འབྱུང་བཞིར་ལྷག་ཆད་མང་༔ གཟའ་སྐར་འཁྲུག་ཅིང་ཉི་ཟླར་ལྟས་ངན་འོང་༔ མདོ་སྔགས་ཆོས་ལ་སྤྱོད་ཀྱང་དམ་སྡོམ་དཀོན༔ བཟང་པོར་ཁས་ལེན་ངན་སྤྱོད་འབའ་ཞིག་དར༔ གཏམ་སྐད་སྣ་ཚོགས་ལུས་ཆས་ཡ་མ་ཟུང་༔ དེ་ཚེ་འཛམ་གླིང་ཡངས་པའི་རྒྱལ་ཁམས་སུ༔ ཉེ་བའི་སྲས་བརྒྱད་རིགས་གསུམ་མགོན་པོ་དང་༔ བདག་ཉིད་པདྨའི་སྤྲུལ་པ་ཁྲི་འབུམ་སྤྲོ༔ ཞི་རྒྱས་དབང་དྲག་གང་ལ་གང་འདུལ་ཏེ༔ ཞེ་སྡང་ཅན་རྣམས་ཞེ་སྡང་ཚུལ་གྱིས་འདུལ༔ དེ་བཞིན་དུག་ལྔའི་ལས་སྤྱོད་ཁམས་གསུམ་དུ༔ དུག་ལྔའི་གཟུགས་ཀྱིས་དུག་ལྔའི་སྐྱེ་འགྲོ་འདུལ༔ དེ་ལྟར་བསྐལ་བའི་མར་ཞབས་སླེབས་པའི་ཚེ༔ དཀོན་མཆོག་གསུམ་དང་རྩ་གསུམ་ཆོས་སྐྱོང་ལ༔ བློ་སྙིང་བཀལ་ཞིང་བཀུར་སྟི་ཕུད་ཀྱིས་མཆོད༔ སྐུ་གསུང་ཐུགས་རྟེན་བཞེངས་གསོ་ས་གནད་བསྡམས༔ མདོས་བཟློག་བསྐང་གསུམ་རབ་གནས་མངའ་གསོལ་འབུངས༔ རྩོད་ལྡན་འགྲོ་བ་འདུལ་བའི་སྨོན་ལམ་ནི༔ བདག་ཉིད་པདྨ་འབྱུང་གནས་ཁོ་ན་སྟེ༔ ཚེས་བཅུ་བཟུང་ལ་བདག་ལ་གསོལ་བ་ཐོབ༔ དེ་ལྟར་བསྟན་པའི་རིམ་གྲོ་སུས་འབུངས་པ༔ ཡུལ་འཁོར་རྒྱལ་འབངས་བདེ་སྐྱིད་ལྡན་པར་འོང་༔ ཁྱད་པར་ནད་ཡམས་ལོ་ལ་བཙའ་སད་སོགས༔ དུས་འཁྲུག་འབྱུང་བཞིའི་ལྟས་ངན་གར་བབས་སར༔ མ་ག་དྷ་ཡི་སྲུང་མའི་འཕྲིན་ལས་འདི༔ བརྩམས་པས་བར་ཆད་རིགས་ལས་རྒྱལ་བར་བྱེད༔ ཅི་ཕྱིར་གཟུགས་མེད་ཁམས་ཀྱི་གཙོ་མོ་ལ༔ འཕྲིན་ལས་བཅོལ་ན་སྔོན་གྱི་དམ་དགོངས་ཏེ༔ གདོན་བགེགས་འབྱུང་པོ་ཁ་ལོ་བསྒྱུར་བར་བྱེད༔ དེ་ཕྱིར་མ་འོངས་རྣམས་ཀྱིས་བཀའ་འདི་སྤྱོད༔ ས་མ་ཡ༔ རྒྱ་རྒྱ་རྒྱ༔ འབར་མའི་ལས་མཐའ་འཕྲིན་ལས་ཁ་བསྒྱུར་གྱི༔ བར་ཆད་སེལ་ཐབས་རྣམ་པ་གསུམ་གྱིས་སྟོན༔ དེ་ལ་དང་པོ་སྔོན་དུ་འགྲོ་བ་ནི༔ ས་གཞི་འདུལ་སྦྱོང་མཎྜལ་དྲི་བཟང་བྱུག༔ ཐིག་ནས་དྲངས་ཤིང་འདབ་བཞི་མུ་ཁྱུད་ཟླུམ༔ སྐུ་མདོག་མཚུངས་པའི་ཚོན་གྱིས་ཁ་དོག་བསྒྱུར༔ ཟླུམ་གཏོར་རྒྱན་ལྡན་ལྔ་ལ་ཙཀ་ལིས་བརྒྱན༔ མཉྫིའི་ཁ་རུ་ཕྱོགས་བཞི་དབུས་ལྔར་འགོད༔ རྣམ་ལྔའི་མཆོད་པ་ལྔ་སོགས་མཐའ་ནས་བསྐོར༔ མདུན་དུ་རིན་ཆེན་བརྡར་བའི་ཕྱེའམ་སར༔ གནམ་ལོའི་རྟར་ཞོན་འབར་མ་གཞུང་བཞིན་བཟོ༔ དགྲ་གཤེད་བཟློག་པའི་ཚོན་བྱུག་མཛེས་པར་བྱ༔ འབར་མ་བརྒྱད་ཀྱི་གཏོར་མ་ཕྱོགས་སུ་འགོད༔ ཤ་དུམ་ལིང་ག་དཔལ་འབར་དག་གིས་བརྒྱན༔ ཞལ་ཟས་ཆངས་བུ་མར་མེ་ཏིང་ལོ་དང་༔ འབྲས་ཆན་འབྲུ་སྣ་ཤ་དུམ་ཆང་དང་ཆུ༔ གཡས་གཡོན་ལྔ་བཅུ་རྩ་ལྔའི་སོགས་ཀྱང་བསགས༔ ཤར་དུ་ཆུ་གཏོར་ལྷོ་ན་སཱཙྪ་གདབ༔ ནུབ་ཏུ་སྦྱིན་སྲེག་བྱང་དུ་གཏོར་བཟློག་བཅའ༔ ཤར་ལྷོར་རྣམས་འཇོམས་བུམ་སྒྲུབ་ཆོ་ག་བྱ༔ ལྷོ་ནུབ་ཚེ་གཟུངས་ནུབ་བྱང་སྒྲོལ་མ་དང་༔ བྱང་ཤར་གཙུག་ཏོར་ནག་མོ་སྒྲོག་པར་བྱ༔ ས་མ་ཡ༔ རྒྱ་རྒྱ་རྒྱ༔ དེ་ནས་དངོས་གཞི་ཁྲིམས་ལྡན་དགེ་སློང་བཞི༔ ཡང་ན་དམ་ཚིག་ལྡན་པའི་སྔགས་པ་བཞི༔ གོང་གི་དཀྱིལ་འཁོར་ཕྱོགས་བཞིར་གདན་ལ་འཁོད༔ དཀར་ཕྱོགས་སྐྱོང་དང་ནག་ཕྱོགས་བགེགས་ཀྱི་རིགས༔ གཏོར་མ་འབུལ་ཞིང་འཕྲིན་ལས་བཀའ་ཡང་བསྒོ༔ བསང་ཆུ་འཐོར་ཞིང་མེ་དང་རླུང་གིས་བསངས༔ རཾ་ཡཾ་ཁཾ༔ གསུམ༔ དུང་ཆོས་ནང་གི་དྲི་བཟང་ཆུས་སྦྲན་ཞིང་༔ ཨཱོཾ་ཨཱ༔ ཧཱུྃ་གསུམ༔ དེ་ནས་འདོན་སྒོམ་སྦྲགས་མར་འདི་སྐད་དོ༔ ཨཱོཾ་སྭ་བྷ་ཝ་ཤུདྡྷོ་སརྦ་དྷརྨཱ་སྭ་བྷཱ་ཝ་སོགས༔ སྟོང་པ་ཉིད་དུ་གྱུར༔ སྟོང་པའི་ངང་ལས་རིན་པོ་ཆེའི་ད་ལའི་ལྟེ་བ་ལ་པདྨ་འདབ་མ་བཞིའི་དབུས་སུ་པདྨ་ཉི་ཟླའི་གདན་ལ་བཅོམ་ལྡན་འདས་དེ་བཞིན་གཤེགས་པར་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དཔལ་རྒྱལ་བ་ཤཱཀྱ་ཐུབ་པ་སྐུ་མདོག་གསེར་བཙོ་མ་ལྟ་བུ་ཞལ་གཅིག་ཞབས་སྐྱིལ་ཀྲུང་ཕྱག་གཉིས་ས་གནོན་དང་མཉམ་གཞག་གི་སྟེང་ན་ནོར་བུ་དབང་གི་རྒྱལ་པོ་བསྣམས་པ་མཚན་བཟང་དང་དཔེ་བྱད་འབར་ཞིང་ཆོས་གོས་རྣམ་གསུམ་གྱིས་སྐུ་ལ་ཀླུབས་པར་གསལ༔ ཤར་ཕྱོགས་སུ་པདྨ་ཉི་ཟླའི་གདན་གྱི་ཁར་པདྨ་སམ་བྷ་དཀར་ལ་དམར་བའི་མདངས་ཆགས་པ་ཞལ་གཅིག་ཞབས་ཕྱེད་སྐྱིལ་ཕྱག་གཉིས་པད་ཕོར་དང་སྐྱབས་སྦྱིན་གྱི་ཕྱག་རྒྱ་ཅན་རབ་བྱུང་པཎྜི་ཏའི་སྐུ་རུ་གསལ༔ ལྷོ་ཕྱོགས་སུ་བྱང་ཆུབ་སེམས་དཔའ་འཇམ་དཔལ་དབྱངས་སེར་པོ་རལ་གྲི་དང་པོ་ཏི་ཅན་ཞབས་ཕྱེད་སྐྱིལ་བྱང་ཆུབ་སེམས་དཔའི་ཆས་དང་ལྡན་པར་གསལ༔ ནུབ་ཕྱོགས་སུ་འཕགས་པ་སྤྱན་རས་གཟིགས་དཀར་པོ་མཆོག་སྦྱིན་དང་པདྨ་དཀར་པོ་ཅན་ཞབས་ཕྱེད་སྐྱིལ་བྱང་ཆུབ་སེམས་དཔའི་ཆས་ཀྱིས་བརྒྱན་པར་གསལ༔ བྱང་ཕྱོགས་སུ་ཕྱག་ན་རྡོ་རྗེ་ལྗང་གུ་རྡོ་རྗེ་དང་སྐྱབས་སྦྱིན་ཅན་ཞབས་ཕྱེད་སྐྱིལ་བྱང་ཆུབ་སེམས་དཔའི་ཆས་ཀྱིས་བརྒྱན་པར་གསལ༔ དེའི་ཕྱི་རོལ་གྱི་མུ་ཁྱུད་ལ་ཤ་རིའི་བུ་མོའུ་འགལ་རབ་འབྱོར་འོད་སྲུང་ཀཱ་ཏྱཱ་ཡ་ན་མ་འགགས་པ་ཉེ་བ་འཁོར་ཀུན་ཤེས་ཀོཎྜི་ནྱ་ལ་སོགས་འཕགས་ལམ་བརྙེས་པའི་དགེ་འདུན་མང་པོས་བསྐོར་བར་གྱུར༔ དེ་དག་གི་སྟེང་གི་ཆ་ལ་བརྒྱུད་ལྡན་བླ་མ་ཕྱོགས་བཅུའི་སངས་རྒྱས༔ བར་གྱི་ཆ་ལ་ཡི་དམ་གྱི་ལྷ་ཚོགས༔ འོག་གི་ཆ་ལ་དཔལ་མགོན་དམ་པ་ཆོས་སྐྱོང་བའི་སྲུང་མ་ཐམས་ཅད་སྤྲིན་ལྟར་འཁྲིགས་པར་གསལ་བའི་ལྷ་ཚོགས་ཐམས་ཅད་ཀྱི་སྤྱི་བོར་ཨཱོཾ་མགྲིན་པར་ཨཱཿཐུགས་ཀའི་ཧཱུྃ་ལས་འོད་ཟེར་ཕྱོགས་བཅུར་འཕྲོས་པས་ལྷ་ཚོགས་ཐམས་ཅད་བསྐྱེད་པའི་གནས་སུ་བཛྲ་ས་མ་ཡ་ཛཿདྲི་བཟང་གིས་བདུག་རོལ་མོ་འབིར་ཞིང་༔ ཧཱུྃ༔ འོག་མིན་སྟུག་པོ་བཀོད་པའི་ཞིང་ཁམས་དང་༔ རྒྱ་གར་རྡོ་རྗེ་གདན་གྱི་གནས་མཆོག་ནས༔ ཡང་དག་རྫོགས་པའི་སངས་རྒྱས་བཅོམ་ལྡན་འདས༔ ཐུགས་རྗེའི་དབང་གིས་གནས་འདིར་གཤེགས་སུ་གསོལ༔ ནུབ་ཕྱོགས་ཨོ་རྒྱན་ཡུལ་གྱི་གནས་མཆོག་ནས༔ སློབ་དཔོན་པདྨ་སམ་བྷ་གཤེགས་སུ་གསོལ༔ རྒྱ་ནག་རི་བོ་རྩེ་ལྔའི་གནས་མཆོག་ནས༔ མགོན་པོ་འཕགས་པ་འཇམ་དཔལ་གཤེགས་སུ་གསོལ༔ ཤར་ཕྱོགས་པོ་ཊ་ལ་ཡི་གནས་མཆོག་ནས༔ འཕགས་པ་སྤྱན་རས་གཟིགས་དབང་གཤེགས་སུ་གསོལ༔ བྱང་ཕྱོགས་ལྕང་ལོ་ཅན་གྱི་གནས་མཆོག་ནས༔ མཐུ་ཆེན་ཕྱག་ན་རྡོ་རྗེ་གཤེགས་སུ་གསོལ༔ རི་བོ་བྱ་རྒོད་སྤུངས་པའི་གནས་མཆོག་ནས༔ དགྲ་བཅོམ་འཕགས་པའི་ཚོགས་རྣམས་གཤེགས་སུ་གསོལ༔ ཆོས་དབྱིངས་ཕོ་བྲང་མཁའ་སྤྱོད་དག་པ་ནས༔ དྲིན་ཅན་རྩ་བརྒྱུད་བླ་མ་གཤེགས་སུ་གསོལ༔ རང་བཞིན་ལྷུན་གྱིས་གྲུབ་པའི་ཕོ་བྲང་ནས༔ ཡི་དམ་དཀྱིལ་འཁོར་ལྷ་ཚོགས་གཤེགས་སུ་གསོལ༔ གནས་ཡུལ་དུར་ཁྲོད་མཐུན་སྤྱོད་འདུ་བ་ནས༔ དཔལ་མགོན་ཆོས་སྐྱོང་སྲུང་མ་གཤེགས་སུ་གསོལ༔ བཛྲ་ས་མ་ཡ་ཛཿཛཿ བཞུགས་སུ་གསོལ་བ་ནི༔ ཧཱུྃ༔ རིན་ཆེན་སྣ་ཚོགས་བཀོད་པའི་གཞལ་ཡས་འདིར༔ རྒྱལ་བ་སྲས་བཅས་མཁའ་འགྲོ་ཆོས་སྐྱོང་རྣམས༔ མ་ལུས་འགྲོ་བའི་དོན་དུ་རྗེས་དགོངས་ལ༔ གཉིས་སུ་མེད་པར་དགྱེས་པར་བཞུགས་སུ་གསོལ༔ པདྨ་ཀ་མཱ་ལ་ཡེ་སྟྭཾ༔ ཕྱག་ནི༔ ཧཱུྃ༔ རབ་འབྱམས་རྒྱལ་བའི་དཀྱིལ་འཁོར་ལྷ་ཚོགས་ལ༔ འདུ་འབྲལ་མེད་པའི་ངང་ནས་ཕྱག་གིས་མཆོད༔ ཉེས་ལྟུང་སྡིག་པར་གྱུར་རྣམས་མཐོལ་ལོ་བཤགས༔ དགེ་བ་བྱང་ཆུབ་ཆེན་པོར་ཡི་རང་བས༔ ཐེག་ཆེན་ཆོས་ཀྱི་འཁོར་ལོས་ཤུགས་བསྒྱུར་ཏེ༔ སེམས་ཅན་མ་སྟོངས་བར་དུ་རྟག་བརྟན་ཞིང་༔ རྡོ་རྗེ་འཛིན་པའི་ས་ལ་མངོན་གྱུར་ཤོག༔ མཆོད་པ་ནི༔ ཧཱུྃ༔ མ་ལུས་རྒྱལ་བ་སྲས་དང་བཅས་རྣམས་ལ༔ པདྨ་དཀར་པོ་སྟོང་ལྡན་གེ་སར་དང་༔ ཀུ་མུད་ཏ་དང་ཧ་ལོ་འདབ་ལྡན་རིགས༔ ནམ་མཁའི་སྐར་ཚོགས་ལྟ་བུར་རབ་བཀྲམ་སྟེ༔ སྟོང་གསུམ་ཡོངས་བཀང་རྒྱལ་བའི་ཚོགས་ལ་འབུལ༔ ཨཱོཾ་བཛྲ་བུཥྤེ་པཱུ་ཙ་སརྦ་ས་མ་ཡེ་སྭཱ་ཧཱ༔ ཧཱུྃ༔ མ་ལུས་རྒྱལ་བ་སྲས་དང་བཅས་རྣམས་ལ༔ ཨ་ཀ་རུ་དང་ཙན་དན་དཀར་དམར་དང་༔ དུ་རུ་ཀ་སོགས་དྲི་བཟང་སྤོས་ཀྱི་རིགས༔ བར་སྣང་སྤྲིན་ཚོགས་ལྟ་བུར་རབ་གཏིབས་ཏེ༔ སྟོང་གསུམ་ཡོངས་བཀང་རྒྱལ་བའི་ཚོགས་ལ་འབུལ༔ ཨཱོཾ་བཛྲ་དྷུ་པེ་པཱུ་ཙ་སརྦ་ས་མ་ཡེ་སྭཱ་ཧཱ༔ ཧཱུྃ༔ མ་ལུས་རྒྱལ་བ་སྲས་དང་བཅས་རྣམས་ལ༔ རིན་ཆེན་ཀོང་བུར་འབྲུ་མར་རྩི་མར་བཅུད༔ མཐའ་ཡི་རྒྱ་མཚོ་ཙམ་དུ་རབ་བསྐྱིལ་ཏེ༔ ཉི་ཟླའི་མདངས་ལྟར་སྒྲོན་མེ་ལེགས་སྦྱར་ནས༔ སྟོང་གསུམ་ཡོངས་བཀང་རྒྱལ་བའི་ཚོགས་ལ་འབུལ༔ ཨཱོཾ་བཛྲ་ཨཱ་ལོ་ཀེ་པཱུ་ཙ་སརྦ་ས་མ་ཡེ་སྭཱ་ཧཱ༔ ཧཱུྃ༔ མ་ལུས་རྒྱལ་བ་སྲས་དང་བཅས་རྣམས་ལ༔ ག་པུར་ཆུ་དང་གུར་གུམ་སྦྱར་བ་ཡིས༔ ཡན་ལག་བརྒྱད་དང་ལྡན་པའི་དྲི་བཟང་ཆབ༔ རོལ་མཚོ་བདུན་ལྟར་བཀོད་དེ་བསྐྱིལ་ནས་ཀྱང་༔ སྟོང་གསུམ་ཡོངས་བཀང་རྒྱལ་བའི་ཚོགས་ལ་འབུལ༔ ཨཱོཾ་བཛྲ་གྷནྡྷེ་པཱུ་ཙ་སརྦ་ས་མ་ཡེ་སྭཱ་ཧཱ༔ ཧཱུྃ༔ མ་ལུས་རྒྱལ་བ་སྲས་དང་བཅས་རྣམས་ལ༔ ས་ལུ་འབྲས་ཀྱི་བཤོས་བཟང་རོ་བརྒྱར་ལྡན༔ མཛེས་པའི་རྒྱན་གྱིས་སྤྲས་ཏེ་རི་བདུན་ལྟར༔ བཀོད་པས་བརྒྱན་པའི་ཞལ་ཟས་ཕུན་ཚོགས་འདི༔ སྟོང་གསུམ་ཡོངས་བཀང་རྒྱལ་བའི་ཚོགས་ལ་འབུལ༔ ཨཱོཾ་བཛྲ་ནཻཝི་དྱ་པཱུ་ཙ་སརྦ་ས་མ་ཡེ་སྭཱ་ཧཱ༔ ཧཱུྃ༔ མ་ལུས་རྒྱལ་བ་སྲས་དང་བཅས་རྣམས་ལ༔ ཆ་ལང་རྫ་ཟངས་རྔ་དང་སིལ་སིལ་སྙན༔ ཏིང་ཏིང་ཤག་དང་པི་ཝང་གླིང་བུའི་སྒྲ༔ སྒྲ་སྙན་རོལ་མོ་དབྱར་གྱི་རྔ་ཆེན་ལྟར༔ སྟོང་གསུམ་ཡོངས་བཀང་རྒྱལ་བའི་ཚོགས་ལ་འབུལ༔ ཨཱོཾ་བཛྲ་ཤཔྟ་པཱུ་ཙ་སརྦ་ས་མ་ཡེ་སྭཱ་ཧཱ༔ གཏོར་མ་ནི༔ ཨཱོཾ་ཨ་ཀ་རོ་སོགས་གསུམ༔ ལྷ་ཚོགས་ཐམས་ཅད་ཀྱི་ལྗགས་འོད་ཟེར་གྱི་སྦུ་གུས་མཆོད་རྫས་ཀྱི་གཏོར་མ་བཞེས་པར་གྱུར༔ ཨཱོཾ་ཨཱ༔ ཧཱུྃ་སརྦ་དྷེ་ཝ་མ་ཧཱ་བྷ་ལིངྟ་གྷྲི་ཧ་ན་ཨི་དམ་པཱུ་ཙ་ཁཱ་ཧི་ཁཱ་ཧི༔ བདུན་བརྗོད༔ མགྲོན་རྣམས་ཀྱི་གཏོར་མ་བཞེས་ནས་སྐུ་གསུང་ཐུགས་དགྱེས་ཏེ་མཉེས་པའི་མདངས་ཕྱུངས་ནས་རྣལ་འབྱོར་པ་ལ་མཆོག་ཐུན་མོང་གི་དངོས་གྲུབ་སྩོལ་བར་གྱུར༔ ཀཱ་ཡ་སིདྡྷི་ཨཱོཾ༔ ཝཱཀྐ་སིདྡྷི་ཨཱ༔ ཙིཏྟ་སིདྡྷི་ཧཱུྃ༔ སརྦ་སིདྡྷི་ཧྲཱི༔ བསྙེན་པ་ནི༔ ལྷ་ཚོགས་ཐམས་ཅད་ཀྱི་ཐུགས་ཀར་ཟླ་བའི་དཀྱིལ་འཁོར་གྱི་སྟེང་དུ་རང་རང་གི་ས་བོན་གྱི་མཐར་སྔགས་ཕྲེང་འཁོར་བ་ལས་འོད་ཟེར་འཕྲོས་རྒྱལ་བ་མཆོད་བྱིན་རླབས་བསྡུས་སྐུ་གསུང་ཐུགས་ལ་ཐིམ༔ གཟི་བརྗིད་རྒྱས་འོད་ཟེར་འཕྲོས་ནད་གདོན་བགེགས་དང་བར་ཆད་ཐམས་ཅད་བསལ་སྡིག་སྒྲིབ་སྦྱངས་ཏེ་སེམས་ཅན་ཐམས་ཅད་སངས་རྒྱས་ཀྱི་གོ་འཕང་ལ་འཁོད་པར་བསམས་ཏེ་བསྙེན་པ་བསྒྲང་༔ ཨཱོཾ་མུ་ནེ་མུ་ནེ་མ་ཧཱ་མུ་ནེ་མ་ཧཱ་ཤཱཀྱ་མུ་ན་ཡེ་སྭཱ་ཧཱ༔ ཨཱོཾ་ཨཱཿཧཱུྃ་བཛྲ་གུ་རུ་པདྨ་སིདྡྷི་ཧཱུྃ༔ ཨཱོཾཝཱ་གཱི་ཤཱ་རི་མུཾ༔ ཨཱོཾ་མ་ཎི་པདྨེ་ཧཱུྃ༔ ཨོཾ་བཛྲ་པཱ་ཎི་ཧཱུྃ༔ བརྒྱ་སྟོང་ཁྲི་འབུམ་སྐབས་སྦྱར་བཟླས༔ བསྟོད་པ་ནི༔ ཧཱུྃ༔ གྲངས་མེད་བསགས་སྦྱངས་མཐར་སོན་བཅོམ་ལྡན་འདས༔ འོག་མིན་གནས་སུ་མངོན་པར་རྫོགས་སངས་རྒྱས༔ འགྲོ་དྲུག་འདུལ་ཕྱིར་སྤྲུལ་པ་ཁྲི་འབུམ་འགྱེད༔ འཛམ་གླིང་སྟོན་པ་ཤཱཀྱའི་རྒྱལ་པོ་ལ༔ གུས་པས་ཕྱག་འཚལ་དྭངས་པའི་ཡིད་ཀྱིས་བསྟོད༔ པདྨ་ལས་འཁྲུངས་འཆི་མེད་རྡོ་རྗེའི་སྐུ༔ ཐུགས་རྗེ་རྨད་བྱུང་རྒྱལ་བའི་རྒྱལ་ཚབ་འཛིན༔ མཁྱེན་བརྩེ་ནུས་པའི་སྟོབས་བཅུའི་དབང་ཕྱུག་རྒྱལ༔ བླ་མེད་བླ་མ་པདྨ་སམ་བྷ་ལ༔ གུས་པས་ཕྱག་འཚལ་དྭངས་བའི་ཡིད་ཀྱིས་བསྟོད༔ སངས་རྒྱས་ཀུན་གྱི་སྐུ་ཡི་གསང་བ་འཛིན༔ བརྩེ་བས་རྗེས་ཆགས་འགྲོ་དྲུག་ཁ་ལོ་བསྒྱུར༔ ཡེ་ཤེས་འོད་ཀྱིས་སྟོང་གསུམ་མུན་པ་སེལ༔ བྱང་ཆུབ་སེམས་དཔའ་མགོན་པོ་འཇམ་དཔལ་དབྱངས༔ གུས་པས་ཕྱག་འཚལ་དྭངས་བའི་ཡིད་ཀྱིས་བསྟོད༔ སངས་རྒྱས་ཀུན་གྱི་གསུང་གི་གསང་བ་འཛིན༔ གར་གྱི་དབང་ཕྱུག་འཁོར་བ་དོང་ནས་སྤྲུགས༔ ཁམས་གསུམ་སེམས་ཅན་རྣམས་ཀྱི་འདྲེན་པ་པོ༔ བྱང་ཆུབ་སེམས་དཔའ་འཕགས་པ་སྤྱན་རས་གཟིགས༔ གུས་པས་ཕྱག་འཚལ་དྭངས་བའི་ཡིད་ཀྱིས་བསྟོད༔ སངས་རྒྱས་ཀུན་གྱི་ཐུགས་ཀྱི་གསང་བ་འཛིན༔ བདུད་དང་དྲེགས་ཆེན་འདུལ་བའི་དེད་དཔོན་མཆོག༔ གཟི་བརྗིད་མདངས་ལྡན་ནུས་མཐུའི་མཚན་དཔེས་སྤྲས༔ བྱང་ཆུབ་སེམས་དཔའ་ལག་ན་རྡོ་རྗེ་འཛིན༔ གུས་པས་ཕྱག་འཚལ་དྭངས་བའི་ཡིད་ཀྱིས་བསྟོད༔ རྫོགས་པའི་སངས་རྒྱས་ཉིད་དང་དབྱེར་མེད་ཅིང་༔ ལྷ་མིའི་དེད་དཔོན་དགྲ་བཅོམ་ཟག་པ་ཟད༔ འཕགས་ལམ་མངོན་པར་མཐོ་བའི་འཕགས་པའི་ཏོག༔ ཕྱིར་མི་ལྡོག་པའི་དགེ་འདུན་རྒྱ་མཚོ་ལ༔ གུས་པས་ཕྱག་འཚལ་དྭངས་བའི་ཡིད་ཀྱིས་བསྟོད༔ གཞན་ཡང་རྩ་བརྒྱུད་བླ་མ་ཡི་དམ་ལྷ༔ མཁའ་འགྲོ་ཆོས་སྐྱོང་དམ་ཅན་སྲུང་མར་བཅས༔ མ་ལུས་འཁོར་དང་བཅས་པ་ཐམས་ཅད་ལ༔ གུས་པས་ཕྱག་འཚལ་དྭངས་བའི་ཡིད་ཀྱིས་བསྟོད༔ ཅེས་བསྟོད༔ འབར་མ་ལ་བསང་ཆུ་གཏོར་ཞིང་༔ རཾ་ཡཾ་ཁཾ༔ གསུམ༔ དྲི་བཟང་གི་ཆུས་སྦྲན་ཏེ༔ ཨཱོཾ་ཨཱཿཧཱུྃ་གསུམ་བརྗོད༔ ཨཱོཾ་སྭཱ་བྷཱ་ཝ་སོགས༔ སྟོང་པའི་ངང་ལས་མདུན་དུ་མ་ཡོངས་སུ་གྱུར་པ་ལས་མ་མོ་འབར་མ་སྐུ་མདོག་དམར་ལ་རྔམ་པ་ཁྲག་གི་མདོག་ཅན་ཞལ་གདངས་ཤིང་ལྗགས་འགྲིལ་ཏེ་མཆེ་བ་གཙིགས་པ་སྤྱན་གསུམ་ཁྲག་ལྟར་ཁོལ་ཞིང་སྨ་ར་དང་ཁ་སྤུ་མེ་ལྟར་འབར་བ་སྐྲ་ཁམ་ནག་གྱེན་ཐུར་དུ་གཏིབས་པ་ལ་ཐོད་པས་བཅིངས་པ་སྦྲུལ་ནག་གི་སྙན་རྒྱན་འཕྱོ་ཞིང་གཡང་གཞི་དམར་པོ་གོས་སུ་གྱོན་ཏེ་གཡས་ཁྲག་གི་ཟོར་ཀོང་ནམ་མཁའ་ལ་འཕྱར་བ༔ གཡོན་པས་ཚིལ་ཆེན་གྱི་མར་མེ་དཔྱི་སྟེང་དུ་བསྣམས་ཤིང་ནུ་མ་གཡས་ཕྲག་ལ་བཀལ་ཞིང་གཡོན་མཐུར་དུ་འཕྱང་བ༔ ཞབས་ཕྱེད་སྐྱིལ་གྱིས་ཆིབས་ཆེ་གེ་ལ་རོལ་ཞིང་བྷ་ག་དྲག་ཏུ་བགྲད་པ་གཅིག་ཏུ་གསལ་བའི་ཕྱི་རོལ་དུ་མ་མོ་འབར་མ་བརྒྱད་ཀྱིས་བསྐོར་ཞིང་མ་མོ་འབུམ་འབུམ་གྱི་དྲ་བ་ར་བར་གསལ༔ དེ་དག་གི་ཕྱི་རོལ་དུ་དྲེགས་བྱེད་ཀྱི་ལྷ་སྲིན་རྣམས་དང་ཡེ་འབྲོག་སུམ་བརྒྱ་དྲུག་ཅུ་བགེགས་རིགས་སྟོང་ཕྲག་བརྒྱད་ཅུ་བྱིས་པའི་གདོན་ཆེན་བཅོ་ལྔ་ནད་ཐན་ཡམས་ཀྱི་བདག་པོ་བདག་མོ་གྲེ་བོ་གྲེ་མོ་ཕོ་གདོན་མོ་གདོན་ཟ་འདྲེ་ཤི་གཤེད་མཁའ་ལ་རྒྱུ་བའི་འབྱུང་པོ་ཡི་དྭགས་འཁྲུག་རྩོད་ཡམས་གསུམ་གཏོང་བའི་གློ་བུར་དུ་ལྷགས་པའི་སྡེ་ཚོགས་དང་བཅས་པ་ཐམས་ཅད་ཁྲོམ་ཚོགས་པ་ལྟར་བསྐོར་ཏེ་གནས་པར་གྱུར༔ ལྷ་ཚོགས་རྣམས་ཀྱི་ཐུགས་ཀ་ནས་འོད་ཟེར་འཕྲོས་པས་མདུན་གྱི་མ་མོའི་ཐུགས་རྒྱུད་བསྐུལ་ཞིང་འཁོར་དང་བཅས་པ་སྐད་ཅིག་གིས་བྱ་ཆེན་ཐང་ལ་འདུས་པ་ལྟར་བསྐྱེད་པའི་གནས་སུ་མཆིས་པར་གྱུར༔ རོལ་མོ་འཁྲོལ་སྤོས་དཀར་གཏོང་ཞིང་འདི་སྐད་དོ༔ ཧཱུྃ་བྷྱོ༔ བྱང་ཤར་མཚམས་ཀྱི་དུར་ཁྲོད་ཆེན་པོ་དང་༔ མ་ག་དྷ་ཡི་བཀའ་ཡི་ཁོར་ཡུག་ནས༔ འབར་མ་ཆེན་མོ་མ་མོ་ཁ་འབར་མ༔ དམ་ཚིག་དབང་གིས་སྤྱན་འདྲེན་ད་ཚུར་སྤྱོན༔ ཁྱོད་ནི་བགེགས་རྣམས་ཡོངས་ཀྱི་སྡེ་དཔོན་མོ༔ ཁྱོད་ནི་ཡི་དྭགས་ཡོངས་ཀྱི་རྒྱལ་མོ་སྟེ༔ ཁྱོད་ནི་ཁམས་གསུམ་ཉུལ་བའི་བང་མགྱོགས་མ༔ གནམ་ལོའི་རྟར་ཞོན་སྟོང་ཁམས་སྐད་ཅིག་རྒྱུ༔ སྟོང་གསུམ་ཀུན་ཏུ་ནད་མཚོན་ཆར་པ་འབེབས༔ ཟླ་བདག་རོལ་དུ་ཁྲིད་ནས་གླིང་རྣམས་ཉུལ༔ མི་དགེར་སྤྱོད་པའི་སྐྱེ་འགྲོར་ནད་ཡམས་འགྱེད༔ དམ་ལས་འགལ་བའི་སྲོག་གི་གཤེད་མ་བྱེད༔ གདོན་བགེགས་འབྱུང་པོའི་ཚོགས་ནི་ཕོ་ཉར་འགྱེད༔ ཆོས་ཁམས་དགེ་བའི་ཁམས་དང་མི་ལྡན་ཞིང་༔ མི་དགེ་བཅུ་ལ་སྤྱོད་པའི་སྐྱེ་འགྲོ་ལ༔ ནད་གདོན་ལྟས་ངན་མི་རུང་སྣ་དགུ་གཏོང་༔ དེ་ཕྱིར་ཁྱོད་ནི་བཀའ་ཡི་སྲུང་མ་སྟེ༔ དེ་ཕྱིར་ཁྱོད་ནི་དཔལ་གྱི་ལས་མཁན་མོ༔ བཀའ་དང་དམ་ལ་དགོངས་ལ་གནས་འདིར་སྤྱོན༔ མ་མོ་འབུམ་གྱི་ཚོགས་དང་བཅས་ཏེ་བསྐྱོད༔ ལྷ་སྲིན་དྲེགས་པའི་གྲོགས་དང་བཅས་ཏེ་གཤེགས༔ གདོན་བགེགས་འབྱུང་པོའི་བྲན་དང་བཅས་ཏེ་ཛཿམི་ནད་ཕྱུགས་ནད་བཟློག་ཕྱིར་གཤེགས་སུ་གསོལ༔ ནད་ཁ་ཡམས་ཁ་བཟློག་ཕྱིར་གཤེགས་སུ་གསོལ༔ དགྲ་འདྲེ་བྱུར་གསུམ་བཟློག་ཕྱིར་གཤེགས་སུ་གསོལ༔ བཙའ་སད་སེར་གསུམ་བཟློག་ཕྱིར་གཤེགས་སུ་གསོལ༔ མཚོན་ཁ་འཁྲུག་རྩོད་བཟློག་ཕྱིར་གཤེགས་སུ་གསོལ༔ རིམས་ནད་དམར་ཡམས་བཟློག་ཕྱིར་གཤེགས་སུ་གསོལ༔ ཆེ་སྲི་ཆུང་སྲི་བཟློག་ཕྱིར་གཤེགས་སུ་གསོལ༔ གློ་གོར་ཧོན་གསུམ་བཟློག་ཕྱིར་གཤེགས་སུ་གསོལ༔ སངས་རྒྱས་བཀའ་ལ་མི་ཉན་གང་ཡང་མེད༔ གཡོ་བའི་རླུང་ལ་མི་བརྟེན་གང་ཡང་མེད༔ རྒྱ་མཚོའི་ཆུ་ལ་མི་འཐུང་གང་ཡང་མེད༔ བདེན་པའི་དོན་ལ་མི་སེམས་གང་ཡང་མེད༔ ཟབ་མོའི་དོན་ལ་མི་དགོངས་གང་ཡང་མེད༔ དེ་ཕྱིར་མ་ལུས་འཁོར་བཅས་དམ་ལ་འདུས༔ བདག་ཅག་ཡོན་མཆོད་འཁོར་དང་བཅས་པ་རྣམས༔ སངས་རྒྱས་བསྟན་ལ་མི་ཕྱེད་དད་ལྡན་ཞིང་༔ རྣམ་དཀར་དགེ་བའི་ཁམས་ལ་སྤྱོད་བསམས་ཀྱང་༔ རྩོད་ལྡན་བསྐལ་བའི་མར་ཞབས་འདིར་སྐྱེས་ཤིང་༔ ཆོས་ཁམས་དགེ་བའི་ལས་ལ་ཤུགས་ཆུང་སྟེ༔ འབད་པ་མ་ཐོགས་མི་དགེའི་དབང་དུ་ཤོར༔ བདེ་བ་འདོད་ཀྱང་སྡུག་བསྔལ་འདམ་དུ་བྱིང་༔ མ་མོ་བཀའ་ཡི་སྲུང་མ་འཁོར་བཅས་ཀྱིས༔ བཀའ་ཆད་ཕབ་སྟེ་ནད་གདོན་འབྱུང་པོས་བཏབ༔ རང་གི་ལས་ལ་འགྱོད་དོ་ཡི་ཆད་ནོངས༔ དེ་ཕྱིར་དེ་རིང་མ་མོ་འཁོར་བཅས་ལ༔ མཆོད་བཤགས་འཁོན་སྦྱང་ཕྱིར་དུ་སྤྱན་འདྲེན་གཤེགས༔ དམ་མེད་གནོད་བྱེད་གདོན་བགེགས་གློ་བུར་པ༔ བཀའ་ལ་མི་ཉན་རྣམས་ཀྱང་ཆོས་ཉིད་ཀྱི༔ ཡང་དག་བདེན་པའི་སྟོབས་ཀྱིས་འདིར་ཁུག་ཅིག༔ ཧཱུྃ་བཛྲ་ས་མ་ཡ་ན་ར་ཀན་ཛཿཛཿཛཿ ཧཱུྃ་བཾ་ཧོ༔ ལན་མང་དུ་བརྗོད་ཅིང་ནན་གྱིས་བཀུག༔ བཞུགས་གསོལ་ནི༔ ཧཱུྃ༔ མ་མོ་ཆེན་མོ་འབར་མ་མཆེད་དགུའི་ཚོགས༔ བསྐྱེད་པའི་གཟུགས་ལ་དབྱེར་མེད་ཏིཥྛ་ཧོ༔ ལྷ་ཀླུ་གནོད་སྦྱིན་གདོན་བགེགས་འབྱུང་པོའི་ཚོགས༔ ནད་གདོན་གཏོང་བའི་འབྱུང་པོའི་རིགས་རྣམས་ཀྱང་༔ བཀའ་ཡི་སྲུང་མའི་བྲན་དུ་འཁོད་པར་གྱུར༔ ཧཱུྃ་ས་མ་ཡ་ཏིཥྛ་ལྷན༔ དེ་ནས་གཡས་ཀྱི་གཏོར་མ་འབྲས་ཆན་དང་བཅས་པ་ནས་ཆ་རེ་བཞིན་བཤམས་ཤིང་ཆུ་དཀར་གྱིས་སྦྲན་ཏེ་དེ་བཞིན་གཤེགས་པ་བཞིའི་མཚན་མཐར༔ ན་མཿསརྦ་ཏ་ཐཱ་ག་ཏ་སོགས་བདུན་རེས་བྱིན་གྱིས་བརླབ་ཅིང་འབར་མ་ལ་འབུལ་ཏེ༔ ཧཱུྃ༔ འདོད་ཡོན་ལྔ་དང་ལྡན་པའི་བྷ་ལིངྟ༔ བཟའ་བ་རི་བོ་བཏུང་བ་རྒྱ་མཚོ་ལྟར༔ སྔགས་དམིགས་ཏིང་འཛིན་འཁོར་ལོས་བྱིན་བརླབས་ཏེ༔ འབར་མ་འཁོར་དང་བཅས་ལ་འབུལ་ལགས་ན༔ དམ་ཚིག་དགོངས་ལ་དམ་རྫས་གཏོར་མ་བཞེས༔ རྣལ་འབྱོར་བདག་ཅག་ཡོན་མཆོད་འཁོར་བཅས་ལ༔ ནད་མེད་ཚེ་རིང་བདེ་སྐྱིད་ལྡན་པར་མཛོད༔ ལོག་ལྟ་དབང་སྡུས་མངོན་སྤྱོད་མི་མཐུན་སོལ༔ རྣལ་འབྱོར་བཅོལ་བའི་འཕྲིན་ལས་གྲུབ་པར་མཛོད༔ ཅེས་བརྗོད་ལྔ་བཅུ་རྩ་ལྔ་ཚང་བར་འབུལ༔ དེ་ནས་ཞལ་ཕྱིར་བསྒྱུར་ཏེ་གཡོན་གྱི་གཏོར་མ་འབྲས་ཆན་དང་བཅས་པ་ནས་ཆ་རེ་བཞིན་བཤམས་ཤིང་ཤ་དུམ་དང་འབྲུ་སྣ་ཅི་མང་བཏབ༔ ཆུ་གཙང་དང་བདུད་རྩིས་སྦྲན་ཏེ་གོང་བཞིན་འབུལ༔ ལྔ་བདུན་དགུ་སོགས་སྐབས་དང་བསྟུན་ཏེ་མཚམས་སུ་ལིང་ག་ལ་དགུག་བསྟིམ་བྱས་ནས་བསྒྲལ་ལ་ཟོར་ཆུང་རེ་ཤས་བརྒྱན་པ་དང་བཅས་ཏེ་འབུལ་ཞིང་སྨན་རག་སྦྲེང་ནས་འདི་སྐད་དོ༔ ཧཱུྃ་བྷྱོ༔ སངས་རྒྱས་རྣམས་ཀྱི་བཀའ་ཡི་བྱིན་རླབས་དང་༔ དཀོན་མཆོག་གསུམ་གྱི་ཐུགས་རྗེའི་བདེན་པ་དང་༔ གསང་སྔགས་རིགས་སྔགས་རྣམས་ཀྱི་ནུས་པ་དང་༔ འབར་མ་མཆེད་དགུའི་དྲག་རྩལ་ནུས་མཐུ་ཡིས༔ མཁའ་ལ་རྒྱུ་བའི་འབྱུང་པོ་སྡེ་བརྒྱད་དང་༔ ཡི་དྭགས་སྡེ་ཚོགས་གློ་བུར་ལྷག་པའི་འདྲེ༔ ཤ་ཟ་མཁའ་འགྲོ་ནད་གཏོང་མ་མོ་འབུམ༔ འཕྲོག་མའི་གདོན་དང་ཟ་འདྲེ་གོད་སྲིའི་ཚོགས༔ དབང་དུ་སྒྱུར་ལ་བཟློག་པའི་དུས་ལ་བབས༔ ཧཱུྃ་བྷྱོ༔ བདག་ཅག་ཡོན་མཆོད་འཁོར་དང་བཅས་པ་ལ༔ གནོད་ཅིང་འཚེ་བར་བྱེད་པའི་མི་མཐུན་ཚོགས༔ ནད་རིགས་བཞི་བརྒྱ་རྩ་བཞིའི་གནོད་པ་ཟློག༔ བགེགས་རིགས་སྟོང་ཕྲག་བརྒྱད་ཅུའི་གནོད་པ་ཟློག༔ བྱིས་པའི་གདོན་ཆེན་བཅོ་ལྔའི་གནོད་པ་ཟློག༔ ལྷ་སྲིན་དྲེགས་པའི་ཚོགས་ཀྱི་གནོད་པ་ཟློག༔ མཁའ་ལ་རྒྱུ་བའི་འབྱུང་པོའི་གནོད་པ་ཟློག༔ ཡི་དྭགས་རིགས་ཀྱི་གདོན་བགེགས་ཐམས་ཅད་ཟློག༔ ཤ་ཟ་ནག་མོ་འབུམ་གྱི་གནོད་པ་ཟློག༔ ནད་གཏོང་མ་མོའི་ཚོགས་ཀྱི་ནུས་པ་ཟློག༔ འཕྲོག་མའི་གདོན་དང་ཟ་འདྲེ་གོད་སྲི་ཟློག༔ དམ་སྲིའི་གནོད་པ་གློ་བུར་འདྲེ་གདོན་ཟློག༔ མི་ནད་ཕྱུགས་ནད་ནད་ཁ་ཡམས་ཁ་ཟློག༔ དགྲ་འདྲེ་བྱུར་གསུམ་མི་ཁ་སྨྲ་གྱོད་ཟློག༔ མཐའ་དམག་མཚོན་འཁྲུག་བཙའ་སད་སེར་གསུམ་ཟློག༔ དམར་ནད་ཡམས་རིམས་སིབ་དང་འབྲུམ་པ་ཟློག༔ ཆེ་སྲི་ཆུང་སྲི་བསྲུན་མའི་སྐྱ་མདའ་ཟློག༔ གློ་གོར་ཧོན་གསུམ་གནག་གི་ནད་རྣམས་ཟློག༔ དེ་རིང་བར་ཆད་ཐམས་ཅད་གཡས་སུ་སྒྱུར༔ དེ་རིང་རྐྱེན་ངན་ཐམས་ཅད་གཡོན་དུ་སྒྱུར༔ ནད་གདོན་བགེགས་དང་བར་དུ་གཅོད་པ་རྣམས༔ དམ་ཉམས་དགྲ་བོའི་སྟེང་དུ་བྷྱོ་བྷྱོ་ཟློག༔ ཅེས་བརྗོད་ཅིང་སོགས་ཚང་བ་དང་གསེར་སྐྱེམས་མཆོད་བུམ་ཆུས་མདུན་སེལ་ཡས་ལམ་དུ་སྐྱེལ༔ ལིང་ག་འབར་མའི་མདུན་དུ་སྐྱེལ་ཏེ་སྔགས་པས་ཟོར་འཕེན་སྐྱེས་པ་རུས་མི་མཐུན་པ་དགུས་མཚོན་ཟོར་ལིང་གར་གཏད་ཅིང་གོ་ཆས་སྤྲས་ཏེ་ཀི་བསོ་འདེབས༔ འབར་མར་སྨན་རག་སྦྲེང་ཞིང་ཞལ་དུ་དཔལ་འབར་གཟུགས་འབྲུ་སྣ་འཐོར་ཞིང་༔ ཧཱུྃ་བྷྱོ༔ འབར་མ་ཆེན་མོ་མ་མོ་ཁ་འབར་མ༔ ད་ནི་སྐུ་གཤེགས་ཡས་ཀྱི་ལམ་དུ་གཤེགས༔ ཡས་དང་གླུད་དུ་ཕུལ་བ་འདི་དག་རྣམས༔ ནད་ཡམས་བདག་པོ་ཐམས་ཅད་ཚིམ་ཕྱིར་བསྔོ༔ འབར་མ་ཆེན་མོ་ཉི་མའི་ཞགས་པ་ཅན༔ ཤར་གྱི་དྲི་ཟའི་ཕོ་གདོན་མོ་གདོན་སྒྱུར༔ འབར་མ་ཆེན་མོ་མེ་ཁྱེར་གློག་འཕྲེང་ཅན༔ ཤར་ལྷོ་མེ་ལྷའི་ཕོ་གདོན་མོ་གདོན་སྒྱུར༔ འབར་མ་ཆེན་མོ་གཤིན་རྗེ་སྐར་མདའ་གདོང་༔ ལྷོ་ཕྱོགས་གཤིན་རྗེའི་ཕོ་གདོན་མོ་གདོན་བསྒྱུར༔ འབར་མ་ཆེན་མོ་སྲིན་མོ་མདུང་ཐུང་འཕེན༔ ལྷོ་ནུབ་སྲིན་པོའི་ཕོ་གདོན་མོ་གདོན་སྒྱུར༔ འབར་མ་ཆེན་མོ་ཀླུ་མོ་ལྕེ་འབར་མ༔ ནུབ་ཕྱོགས་ཀླུ་ཡི་ཕོ་གདོན་མོ་གདོན་སྒྱུར༔ འབར་མ་ཆེན་མོ་རླུང་བདག་རལ་གྲི་འཛིན༔ ནུབ་བྱང་རླུང་ལྷའི་ཕོ་གདོན་མོ་གདོན་སྒྱུར༔ འབར་མ་ཆེན་མོ་གནོད་སྦྱིན་བ་ལང་སྣ༔ བྱང་ཕྱོགས་གནོད་སྦྱིན་ཕོ་གདོན་མོ་གདོན་སྒྱུར༔ འབར་མ་ཆེན་མོ་འཇིགས་བྱེད་ཁྱུང་ཐོགས་མ༔ བྱང་ཤར་དབང་ལྡན་ཕོ་གདོན་མོ་གདོན་སྒྱུར༔ ཧཱུྃ་བྷྱོ༔ མ་ཆེན་འབར་མ་ཆེན་མོ་དམ་ཚིག་ཅན༔ ཁྱོད་ཀྱི་འཁོར་དུ་གཏོགས་པའི་གདོན་བགེགས་ལ༔ ཁྱོད་ཀྱི་རྣམ་པར་སྨིན་པའི་ཆོས་ཤོད་ལ༔ བདག་ཅག་ཡོན་མཆོད་རྣམས་ལ་གནོད་མ་འཇུག༔ བདག་ཅག་ཡོན་མཆོད་རྣམས་ལ་གདོན་མ་འཇུག༔ བདག་ཅག་ཡོན་མཆོད་རྣམས་ལ་གཟན་མ་འཇུག༔ འཕགས་ཡུལ་མ་ག་དྷ་ཡི་གནས་མཆོག་ཏུ༔ ཡང་དག་རྫོགས་སངས་རྒྱས་ཀྱིས་བཀའ་བསྒོས་ལྟར༔ དམ་བཅས་དགོངས་ལ་མ་མོས་འཕྲིན་ལས་མཛོད༔ རྒྱ་ནག་རི་བོ་རྩེ་ལྔའི་གནས་མཆོག་ཏུ༔ འཕགས་པ་འཇམ་དཔལ་དབྱངས་ཀྱིས་བཀའ་བསྒོས་ལྟར༔ དམ་བཅས་དགོངས་ལ་མ་མོས་འཕྲིན་ལས་མཛོད༔ རི་བོ་པོ་ཊ་ལ་ཡི་གནས་མཆོག་ཏུ༔ འགྲོ་མགོན་སྤྱན་རས་གཟིགས་ཀྱིས་བཀའ་བསྒོས་ལྟར༔ དམ་བཅས་དགོངས་ལ་མ་མོས་འཕྲིན་ལས་མཛོད༔ གནས་མཆོག་ལྕང་ལོ་ཅན་གྱི་ཕོ་བྲང་དུ༔ བཅོམ་ལྡན་ཕྱག་ན་རྡོ་རྗེས་བཀའ་བསྒོས་ལྟར༔ དམ་བཅས་དགོངས་ལ་མ་མོས་འཕྲིན་ལས་མཛོད༔ ནུབ་ཕྱོགས་ཨོ་རྒྱན་ཡུལ་གྱི་གནས་མཆོག་ཏུ༔ སློབ་དཔོན་པདྨ་སམ་བྷས་བཀའ་བསྒོས་ལྟར༔ དམ་བཅས་དགོངས་ལ་མ་མོས་འཕྲིན་ལས་མཛོད༔ ད་དུས་དེང་སང་བསྐལ་པའི་ཐ་མ་འདིར༔ རིག་འཛིན་རྣལ་འབྱོར་བདག་གིས་སེམས་བསྐྱེད་དེ༔ མདོས་ཡས་རྫོངས་སུ་བཏབ་ནས་འཕྲིན་ལས་བཅོལ༔ རྒྱལ་བའི་བཀའ་དང་དམ་ཚིག་རྗེས་དགོངས་ལ༔ རྣལ་འབྱོར་བཅོལ་བའི་འཕྲིན་ལས་གྲུབ་པར་མཛོད༔ བཀའ་དང་དམ་ལ་མི་གནས་གདོན་བགེགས་རྣམས༔ ཆོས་ཉིད་སྟོབས་དང་ཁྲོ་ཚོགས་སྤྲུལ་པ་ཡིས༔ རྡུལ་དུ་བརླགས་པར་འགྱུར་ལ་གདོན་མི་ཟ༔ དེ་བས་མ་འདུག་རྒྱ་མཚོའི་ཕ་རོལ་སྒྲོལ༔ ཧཱུྃ་བཞིའི་སྔགས་བརྗོད་དམ་ཚིག་ཅན་རྣམས་ཀྱིས༔ དམ་ཚིག་དྲན་ཏེ་འཕྲིན་ལས་བསྒྲུབ་པར་བསམ༔ དམ་མེད་གནོད་བྱེད་རྒྱ་མཚོའི་ཕ་རོལ་བསྐྲད༔ ཁྱུང་གི་མཚམས་བསྒོ་བགེགས་རྣམས་བསྲུང་བར་བསམས༔ ཁྱུང་གི་སྔགས་ལ་རཀྵ་གདགས་ཏེ་བཟླ༔ ནང་ལོག་བཀྲ་ཤིས་བསྔོ་སྨོན་དལ་གཤེགས་བསྡུ༔ ཤིན་ཏུ་སྐག་ཆེན་བབས་པའི་ནད་པའམ༔ མི་ནད་ཡམས་རིམས་ལོ་ནད་བཙའ་སད་སེར༔ ནད་མཚོན་མཐའ་དམག་དུས་ཀྱི་ཡོ་ལང་ཤར༔ ལྟས་ངན་མི་མཐུན་ས་གཡོ་ལྕེ་འབེབས་སོགས༔ མདོར་ན་གང་ལ་བརྩམས་པའི་ནད་དང་གདོན༔ བཟློག་པར་འགྱུར་རོ་ཐེ་ཚོམ་ཡིད་གཉིས་སྤོངས༔ གླུད་ཀྱི་རྫོང་བརྡ་གཞན་ལྟར་ཁ་བསྒྱུར་རོ༔ ཟོར་སྣའི་ལིང་ག་ལྷ་ཁང་ཐེམ་འོག་མནན༔ ས་མ་ཡ༔ རྒྱ་རྒྱ་རྒྱ༔ གཏེར་རྒྱ༔ སྦས་རྒྱ༔ ཟབ་རྒྱ༔ ས་མ་ཡ༔ རྒྱ་རྒྱ་རྒྱ༔ རིག་འཛིན་ཉི་མ་གྲགས་པས་གནས་མཆོག་ཆེན་པོ་ཧ་ཙོ་ནས་གདན་དྲངས་པའོ། །མངྒ་ལཾ།། །།

བཀའ་ཡི་སྲུང་མ་མཆོད་ཐབས།

སྔགས་བདག་འབར་མའི་ཐུགས་ཐིག་ལས༔ བཀའ་ཡི་སྲུང་མ་མཆོད་ཐབས་བཞུགས༔ རྦོད་གཏོང་མ་མོའི་ཚོགས་ལ་འདུད༔ དམར་གྱི་གཏོར་མར་ཤ་ཁྲག་བརྒྱན༔ རང་ཉིད་ལྷར་གསལ་འདི་སྐད་དོ༔ ཧཱུྃ་བྷྱོ༔ མ་མོ་ཆེན་མོ་སྔགས་ཀྱི་སྲུང་མ་ནི༔ ནམ་མཁའ་ཡངས་པའི་ཁམས་ལ་དབང་བསྒྱུར་ཞིང་༔ སྲིད་པ་གསུམ་གྱི་སྲོག་གི་བདག་མོ་བྱེད༔ ཟས་སུ་ཤ་ཟ་སྐོམ་དུ་ཁྲག་ལ་འཐུང་༔ ལས་སུ་གསོད་དང་གཅོད་པའི་འཕྲིན་ལས་བསྒྱུར༔ ཁྲག་འཐུང་ལས་ཀྱི་མ་མོ་མཐུ་མོ་ཆེ༔ གཡར་དམ་དགོངས་ལ་བོད་པའི་གནས་འདིར་བྱོན༔ ཞིང་བཅུ་ཚང་བའི་ཤ་ཁྲག་བྷ་ལིངྟ༔ མཆོད་པར་འབུལ་ལོ་དགྱེས་པར་འདི་བཞེས་ལ༔ སྔོན་ཚེ་རྒྱལ་བ་རྣམས་ཀྱི་སྤྱན་སྔ་རུ༔ ཁས་བླངས་དམ་བཅས་བཞིན་དུ་འཕྲིན་ལས་མཛོད༔ འཛམ་གླིང་རྒྱལ་ཁམས་འགྲོ་ལ་བདེ་སྐྱིད་སྤེལ༔ བཤད་སྒྲུབ་སྡེ་སྐྱོངས་ཐོས་བསམ་ཉམས་རྟོགས་བསྐྱེད༔ ལྷ་མོ་དམར་མོས་སྣ་ཚོགས་སྤྲུལ་པ་འགྱེད༔ གཡས་པས་ཙིཏྟ་གཡོན་པས་བམ་རོ་འདྲད༔ འཇིགས་གཟུགས་ལྡན་པའི་མ་ཁྱོད་དགྲ་བོ་སྒྲོལ༔ སྒྲུབ་ལ་རྟགས་མེད་ལས་ལ་མཐུ་མེད་ན༔ སྲུང་མ་ཁྱོད་ཀྱང་དམ་ལ་མི་འགལ་ལམ༔ སྐུ་ཡི་ཤུགས་ཕྱུངས་ནུས་པའི་རྩལ་བསྐྱེད་ལ༔ མཐུ་སྟོབས་དྲག་པོས་དམ་ཉམས་དགྲ་བགེགས་སྒྲོལ༔ རྣལ་འབྱོར་བཅོལ་བའི་འཕྲིན་ལས་གྲུབ་པར་མཛོད༔ ཅེས་བརྗོད་གཏོར་མ་འབུལ་ཞིང་བསྲུང་མ་མཆོད༔ བཅོལ་བའི་ལས་བྱེད་འཁོར་དང་བསྟན་པ་སྐྱོང་༔ དེ་ཡི་ཕྱིར་ན་གཅེས་པར་སྙིང་ལ་ཆོངས༔ ས་མ་ཡཱ༔ རྒྱ་རྒྱ་རྒྱ༔ གཏེར་རྒྱ༔ སྦས་རྒྱ༔ ཟབ་རྒྱ༔ གཉན་རྒྱ༔ ས་མ་ཡཱ༔ རྒྱ་རྒྱ་རྒྱ༔ རིག་འཛིན་ཉི་མ་གྲགས་པས་སྤྱན་དྲངས་པའོ།། །།མངྒ་ལཾ།། །།

སྔགས་བདག་འབར་མའི་ཐུགས་ཐིག་གི་བརྒྱུད་འདེབས་སོགས་བཞུགས་སོ། །ཤར་ཕྱོགས་མངོན་དགའ་དག་པའི་ཞིང་མཆོག་ནས། །ཆོས་སྐུ་མགོན་པོ་མི་བསྐྱོད་རྡོ་རྗེ་ལ། །གསོལ་བ་འདེབས་སོ་རང་རིག་མངོན་གྱུར་སྩོལ། །སྐྱེ་མེད་ཆོས་སྐུ་འགྲུབ་པར་བྱིན་གྱིས་རློབས། །བྱང་ཕྱོགས་གནོད་སྦྱིན་རྫོང་གི་ཕོ་བྲང་ནས། །ལོངས་སྐུ་དཔལ་ཆེན་ཡང་དག་ཧེ་རུ་ཀར། །གསོལ་བ་འདེབས་སོ་བདེ་སྟོང་མངོན་གྱུར་སྩོལ། །སྣང་སྟོང་ལོངས་སྐུ་གྲུབ་པར་བྱིན་གྱིས་རློབས། །གནས་མཆོག་རྒྱ་གར་རྡོ་རྗེ་གདན་དྲུང་ནས། །སྤྲུལ་སྐུ་སངས་རྒྱས་ཤཱཀྱ་ཐུབ་པ་ལ། །གསོལ་བ་འདེབས་སོ་འགྲོ་འདུལ་དངོས་གྲུབ་སྩོལ། །སྣ་ཚོགས་སྤྲུལ་སྐུ་གྲུབ་པར་བྱིན་གྱིས་རློབས། །གནས་མཆོག་ཡང་ལེ་ཤོད་ཀྱི་དགེ་གོང་ནས། །རིག་འཛིན་ཆེན་པོ་དྷ་ན་སཾ་སྐྲྀ་ཏར། །གསོལ་བ་འདེབས་སོ་སྨིན་གྲོལ་དངོས་གྲུབ་སྩོལ། ལས་བཞིའི་འཕྲིན་ལས་གྲུབ་པར་བྱིན་གྱིས་རློབས། །བྱང་ཤར་ཡོངས་འདུའི་ཤིང་དྲུང་སྐྱེད་ཚལ་ནས། །གུ་རུ་མཚོ་སྐྱེས་རྡོ་རྗེ་ཐོད་ཕྲེང་ལ། །གསོལ་བ་འདེབས་སོ་དབང་བཅུ་མངོན་གྱུར་སྩོལ། །སྣང་སྲིད་ཟིལ་གྱིས་གནོན་པར་བྱིན་གྱིས་རློབས། །ཤར་ཕྱོགས་བྷདྒ་ལ་ཡི་གནས་མཆོག་ནས། སྤྲུལ་པའི་གསང་ཡུམ་དཔལ་གྱི་མཚན་ཅན་ལ། །གསོལ་བ་འདེབས་སོ་དགའ་བཞི་མངོན་གྱུར་སྩོལ། །ཐབས་ཤེས་མཐའ་རུ་ཕྱིན་པར་བྱིན་གྱིས་རློབས། །སྣང་སྲིད་དག་པ་བདེ་བ་ཆེན་པོ་ནས། །རྒྱལ་བའི་སྤྱི་གཟུགས་གཏེར་ཆེན་ཉི་གྲགས་ལ། །གསོལ་བ་འདེབས་སོ་ཚད་བཞི་མངོན་གྱུར་སྩོལ། །སྣང་སྲིད་ཆོས་སྐུར་རྟོགས་པར་བྱིན་གྱིས་རློབས། །རང་སྣང་དག་པ་མཁའ་སྤྱོད་ཕོ་བྲང་ནས། །འདྲེན་པ་མཚུངས་མེད་རྒྱལ་བའི་སྲས་མཆོག་ལ། །གསོལ་བ་འདེབས་སོ་འཁྲུལ་ཟད་དངོས་གྲུབ་སྩོལ། ཀ་དག་མངོན་དུ་འགྱུར་བར་བྱིན་གྱིས་རློབས། །ངེས་གསང་ཐེག་མཆོག་རྡོ་རྗེའི་ཕོ་བྲང་ནས། །ཟབ་མོའི་ལམ་སྟོན་བསྟན་པའི་རྒྱལ་མཚན་ལ། །གསོལ་བ་འདེབས་སོ་མཆོག་ཐུན་དངོས་གྲུབ་སྩོལ། །ཕན་བདེའི་དཔལ་ཡོན་རྒྱས་པར་བྱིན་གྱིས་རློབས། །གཏེར་གནས་རྩྭ་མཆོག་གྲོང་གི་གཙུག་ལག་ནས། །ཟབ་ཆོས་ཐུགས་ཐིག་མཁའ་འགྲོའི་གསང་སྒྲུབ་ལ། །གསོལ་བ་འདེབས་སོ་ཉམས་རྟོགས་མངོན་གྱུར་སྩོལ། །ཟབ་དོན་སྙིང་པོ་ལོན་པར་བྱིན་གྱིས་རློབས། །རྔམ་བརྗིད་དྲག་གཏུམ་རབ་འཇིགས་དུར་ཁྲོད་ནས། །མཁའ་འགྲོའི་གཙོ་མོ་སྔགས་སྲུང་ཆེན་མོ་ལ། །གསོལ་བ་འདེབས་སོ་བསྐྱེད་རྫོགས་མངོན་གྱུར་སྩོལ། །དགྲ་བགེགས་གདུག་པ་སྒྲོལ་བར་བྱིན་གྱིས་རློབས། །ལེགས་ཉེས་སྟངས་འཛིན་དམ་ཚིག་གཉན་པོ་ནས། །སྤྲུལ་པ་ཡང་སྤྲུལ་བཀའ་འཁོར་ལས་བྱེད་ལ། །གསོལ་བ་འདེབས་སོ་རྐྱེན་ངན་བར་ཆད་སོལ། །ཚེ་བསོད་དཔལ་འབྱོར་རྒྱས་པར་བྱིན་གྱིས་རློབས། །དྲག་རྩལ་ཐོགས་མེད་བསྟན་པ་བསྲུང་བ་ནས། །དགྲ་སྒྲོལ་བགེགས་འདུལ་ཆོས་སྐྱོང་སྲུང་མ་ལ། །གསོལ་བ་འདེབས་སོ་བདག་རྒྱུད་རྟག་བསྲུང་འཚོས། །བདེ་སྐྱིད་ཕུན་ཚོགས་བསྲིང་བར་བྱིན་གྱིས་རློབས། །མཆོག་ཐུན་དངོས་གྲུབ་ཐོབ་པར་བྱིན་གྱིས་རློབས། །བདུད་བཞིའི་གཡུལ་ལས་རྒྱལ་བར་བྱིན་གྱིས་རློབས། །ཁམས་གསུམ་དབང་དུ་འདུ་བར་བྱིན་གྱིས་རློབས། །སྲིད་གསུམ་ཟིལ་གྱིས་གནོན་པར་བྱིན་གྱིས་རློབས། །༈སྐྱབས་སེམས་ནི། ཧཱུྃ༔ བླ་མ་དཔལ་ཆེན་ཧེ་རུ་ཀཿ རྩ་གསུམ་བརྒྱུད་ལྡན་དཀྱིལ་འཁོར་ལྷ༔ མ་རྒྱུད་མཁའ་འགྲོའི་ལྷ་ཚོགས་ལ༔ བསྐྱབ་ཏུ་གསོལ་ལོ་བྱིན་གྱིས་རློབས༔ བདག་ཅག་སེམས་ཅན་བདེ་ལྡན་དོན༔ བྱང་ཆུབ་སེམས་བསྐྱེད་ལྷ་མོ་བསྒྲུབ༔ བདག་ཅག་ཡང་དག་བསྐྱབ་ཏུ་གསོལ༔ ལན་གསུམ༔ ༈མཆོད་གཏོར་བྱིན་གྱིས་བརླབ་པ་ནི། ཆུ་གཙང་དང་རཀྟས་བྲན་ལ། ན་མོ། རིག་འཛིན་རྩ་བརྒྱུད་ཀྱི་དཔལ་ལྡན་བླ་མ་དམ་པ་རྣམས་ཀྱི་བཀའ་བདེན་པ་དང་། སངས་རྒྱས་ཀྱི་བཀའ་བདེན་པ་དང་། ཆོས་ཀྱི་བཀའ་བདེན་པ་དང་། དགེ་འདུན་གྱི་བཀའ་བདེན་པ་དང་། གསང་སྔགས་དང་། རིགས་སྔགས་དང་། གཟུངས་སྔགས་དང་། སྙིང་པོ་དང་། ཕྱག་རྒྱ་དང་། ཏིང་ངེ་འཛིན་གྱི་བདེན་པ་དང་། ཆོས་ཉིད་རང་བཞིན་གྱི་རྣམ་པར་དག་པ་དང་། ཆོས་ཅན་རྒྱུ་འབྲས་བསླུ་བ་མེད་པའི་བདེན་པ་དང་། ཁྱད་པར་དུ་ཡི་དམ་རྩ་གསུམ་རྒྱལ་བ་རྒྱ་མཚོ་ཆོས་སྐྱོང་སྲུང་མའི་ཚོགས་དང་བཅས་པ་རྣམས་ཀྱི་བདེན་པ་དང་། བདེན་པ་ཆེན་པོའི་མཐུ་ལ་བརྟེན་ནས། བསྟན་དང་འགྲོ་བའི་སྤྱི་དགྲ། ཁྱད་པར་རིག་པ་འཛིན་པ་བདག་ཅག་འཁོར་དང་བཅས་པ་ལ་གནོད་ཅིང་འཚེ་བར་བྱེད་པའི་དགྲ་བགེགས་བྱད་མ་ལྷ་སྲུང་དང་བཅས་པ་ཐམས་ཅད་སྐད་ཅིག་ཡུད་ཙམ་ལ་འདིར་ཁུག་ཅིག །གསུམ། ཨཱོཾ་བཛྲ་ཨཾ་ཀུ་ཤ་ཛཿབཛྲ་པཱ་ཤ་ཧཱུྃ༔ བཛྲ་སྥོ་ཊ་བཾ༔ བཛྲ་གྷནྡེ་ཧོ༔ བཛྲ་པྲ་བེ་ཤ་ཡ་ཕཊ༔ བཛྲ་ཨ་བེ་ཤ་ཡ་ཨ༔ ཞེས་འགུགས་འཆིངས་སྡོམ་མྱོས་ལྷ་དང་ཕྲལ་ཏེ་གཏོར་མ་ལ་གཉིས་མེད་དུ་བསྟིམ། བདུད་རྩིས་བྲན་རཾ་ཡཾ་ཁཾ་གིས་བསངས་སྦྱང་། ལག་པའི་སོར་མོ་བསྣོལ་ལ་མཐེ་བོང་གཉིས་བསྒྲེང་བའི་ངོས་ལ་མཛུབ་མོ་གཉིས་བཀུག་ལ། ཨཱོཾ་བཛྲ་བྷཉྫ་བྷ་ལིང་ཏ་བི་ཤྭ་ཙཀྲ་བྷྲུྃ། རྡོ་རྗེའི་གཏོར་སྣོད་ཀ་པཱ་ལ་ཡངས་ཤིང་རྒྱ་ཆེ་བར་གྱུར། ལག་པ་གཉིས་ཁུ་ཚུར་མཛུབ་མོ་མཆེ་བ་འདྲ་བར་བྱས་ལ། ཨཱོཾ་མ་ཧཱ་སྨི་ཏ་ཛྭ་ལ་མཎྜལ་ཧཱུྃ། གཏི་མུག་ཤའི་གཏོར་མ་རི་བོ་ཙམ་དུ་གྱུར། རྡོར་ཐལ་བསྐྱོད་པ་རཀྟ་སྦྲེང་བ་ལྟར་བྱས་ལ། ཨཱོཾ་མ་ཧཱ་རཀྟ་ཛྭ་ལ་མཎྜལ་ཧཱུྃ། འདོད་ཆགས་ཁྲག་གི་གཏོར་མ་རྒྱ་མཚོ་ལྟ་བུར་གྱུར། ལག་པ་སོའི་འཕྲེང་བ་ལྟར་བྱས་ལ། ཨཱོཾ་མ་ཧཱ་ཀེཾ་ནི་རི་ཏི་ཛྭ་ལ་མཎྜལ་ཧཱུྃ། ཞེ་སྡང་རུས་པའི་གཏོར་མ་གྲམ་བུ་ལྟར་ཁྲོལ་བར་གྱུར། རྡོར་ཐལ་སྙིང་གར་གཏུགས་རྗེས་མགོ་ཐོད་ཀྱི་རྒྱ་ལུས་ལ་ལན་གསུམ་བསྐོར། དེ་རྗེས་ལག་པའི་མཛུབ་མོ་གཉིས་དང་མཐེ་བོང་གཉིས་ཏེ་བཞི་པོ་རྩེ་སྤྲད་སོར་མོ་གཞན་བསྣོལ་ཏེ་བསྒྲེང་ལ། ཨཱོཾ་ཀ་པཱ་ལ་བ་སུ་ཏ་ར་ལྀ་ཀྲོཾ་ཀྲོཾ་དྷེ་ཝ་བྷྱོ། རུ་ལུ་རུ་ལུ་ཧཱུྃ། བ་ལིང་ཏ་མཎྜ་ལ་ཧཱུྃ། གཏོར་མ་ངོ་བོ་རང་བཞིན་རྣམ་པར་དག་ཅིང་རྨད་དུ་བྱུང་བ། རྣམ་པ་ཤ་ཁྲག་རུས་པའི་རང་བཞིན་དམ་ཅན་རྒྱ་མཚོའི་དགྱེས་སྐོང་དམ་པར་གྱུར། ཨཱོཾ་ཨཿཧཱུྃ་གསུམ། ཞེས་བྱིན་གྱིས་བརླབ། ཡང་བྱིན་རླབས་བསྡུ་བར་འདོད་ན། ན་མོ་དཀོན་མཆོག་གསུམ་དང་རྩ་བ་གསུམ་གྱི་བདེན་པས་གནོད་བྱེད་དགྲ་བགེགས་ཐམས་ཅད་དྲག་པོ་དམར་གྱི་གཏོར་མ་འདི་ལ་ཁུག །གསུམ། ཛཿཧཱུྃ་བཾ་ཧོ༔ བཛྲ་ཨཾ་ཀུ་ཤ་ཛཿསོགས། དམ་ཉམས་དགྲ་བགེགས་མ་ལུས་བསྒྲལ་བའི་ཤ་ཡི་རི་བོ། ཁྲག་གི་རྒྱ་མཚོ། རུས་པའི་གྲམ་ཁྲོད་བསམ་གྱིས་མི་ཁྱབ་པར་གྱུར། ཨཱོཾ་ཨཱ་ཧཱུྃ། ལན་གསུམ། ༈བདུད་རྩི་ཁཱ་ཧི་ནི། ཨཱོཾ་ཨཱཿཧཱུྃ་ཆོས་སྐུ་མི་བསྐྱོད་རྡོ་རྗེའི་ཞལ་དུ་ཨཱོཾ་ཨཱཿཧཱུྃ་སརྦ་པཉྩ་ཨ་མྲྀ་ཏ་ལ་ཁ་རཾ་ཁཱ་ཧི། ལོངས་སྐུ་ཡང་དག་ཧེ་རུ་ཀའི་ཞལ་དུ་ཨཱོཾ་ཨཱཿཧཱུྃ་སརྦ་པཉྩ་ཨ་མྲྀ་ཏ་ལ་ཁ་རཾ་ཁཱ་ཧི། སྤྲུལ་སྐུ་ཤཱཀྱ་སེང་གེའི་ཞལ་དུ་ཨཱོཾ་ཨཱཿཧཱུྃ་སརྦ་པཉྩ་ཨ་མྲྀ་ཏ་ལ་ཁ་རཾ་ཁཱ་ཧི། རིག་འཛིན་དྷ་ན་སཾ་སྐྲྀའི་ཞལ་དུ་ཨཱོཾ་ཨཱཿཧཱུྃ་སརྦ་པཉྩ་ཨ་མྲྀ་ཏ་ལ་ཁ་རཾ་ཁཱ་ཧི། གུ་རུ་མཚོ་སྐྱེས་རྡོ་རྗེའི་ཞལ་དུ་ཨཱོཾ་ཨཱཿཧཱུྃ་སརྦ་པཉྩ་ཨ་མྲྀ་ཏ་ལ་ཁ་རཾ་ཁཱ་ཧི། གསང་ཡུམ་དཔལ་གྱི་མཚན་ཅན་ཞལ་དུ་ཨཱོཾ་ཨཱཿཧཱུྃ་སརྦ་པཉྩ་ཨ་མྲྀ་ཏ་ལ་ཁ་རཾ་ཁཱ་ཧི། རྒྱལ་བའི་སྤྱི་གཟུགས་གཏེར་ཆེན་བླ་མའི་ཞལ་དུ་ཨཱོཾ་ཨཱཿཧཱུྃ་སརྦ་པཉྩ་ཨ་མྲྀ་ཏ་ལ་ཁ་རཾ་ཁཱ་ཧི། རྒྱལ་སྲས་ཨོ་རྒྱན་བསྟན་འཛིན་ཞལ་དུ་ཨཱོཾ་ཨཱཿཧཱུྃ་སརྦ་པཉྩ་ཨ་མྲྀ་ཏ་ལ་ཁ་རཾ་ཁཱ་ཧི། ཐེག་མཆོག་བསྟན་པའི་རྒྱལ་མཚན་ཞལ་དུ་ཨཱོཾ་ཨཱཿཧཱུྃ་སརྦ་པཉྩ་ཨ་མྲྀ་ཏ་ལ་ཁ་རཾ་ཁཱ་ཧི། མཁའ་འགྲོའི་གཙོ་མོ་སྔགས་སྲུང་ཆེན་མོའི་ཞལ་དུ་ཨཱོཾ་ཨཱཿཧཱུྃ་སརྦ་པཉྩ་ཨ་མྲྀ་ཏ་ལ་ཁ་རཾ་ཁཱ་ཧི། སྤྲུལ་པ་ཡང་སྤྲུལ་བཀའ་འཁོར་ཞལ་དུ་ཨཱོཾ་ཨཱཿཧཱུྃ་སརྦ་པཉྩ་ཨ་མྲྀ་ཏ་ལ་ཁ་རཾ་ཁཱ་ཧི། དྲག་རྩལ་ཐོགས་མེད་བསྟན་བསྲུང་ཞལ་དུ་ཨཱོཾ་ཨཱཿཧཱུྃ་སརྦ་པཉྩ་ཨ་མྲྀ་ཏ་ལ་ཁ་རཾ་ཁཱ་ཧི། ༈ཚོགས་ཐ་མ་བསྒྲལ་བ་ནི། ལིང་གར་འགུགས་བསྟིམ་བྱས། ཛཿཧཱུྃ་བཾ་ཧོས་རྒྱས་འདེབས། བསྒྲལ་ལས་ནི། ཧཱུྃ་བྷྱོ༔ བརྔམ་ཞིང་བརྔམ་ཞིང་དགྲ་བགེགས་སྲོག་རྩ་གཅོད༔ སྲོག་གཅོད་བདུད་མོ་འབུམ་སྡེའི་དུས་ལ་བབ༔ བགད་ཅིང་བགད་ཅིང་ཤ་ཟ་རུས་ལ་འཆའ༔ ཟ་བྱེད་མ་མོ་འབུམ་སྡེའི་དུས་ལ་བབ༔ འབར་ཞིང་འཁྲུག་སྟེ་ནད་མཚོན་བུ་ཡུག་གཏིབ༔ གསོད་བྱེད་དྷཀྐིའི་ཚོགས་རྣམས་དུས་ལ་བབ༔ དུས་ལ་བབ་པོ་དམ་ཉམས་དགྲ་བགེགས་སྒྲོལ༔ ནྲི་ཏྲི་ཤ་ཏྲུཾ་གྷརྫ་གྷརྫ་མྱོགས་མྱོགས་གཏུབས་གཏུབས་འབར་འབར་ཤག་ཤག་མཱ་ར་ཡ་ཧཱུྃ་ཕཊ༔ བསྟབས་པ་ནི། དམ་ཉམས་དགྲ་བགེགས་བསྒྲལ་བའི་གཏི་མུག་ཤའི་བྷ་ལིང་ཏ་ལ་ཁཱ་ཧི། འདོད་ཆགས་ཁྲག་གི་བྷ་ལིང་ཏ་ལ་ཁཱ་ཧི། ཞེ་སྡང་རུས་པའི་བྷ་ལིང་ཏ་ལ་ཁཱ་ཧི། དབང་པོ་རྣམ་ལྔའི་བྷ་ལིང་ཏ་ལ་ཁཱ་ཧི། དོན་སྙིང་རྣམ་ལྔའི་བྷ་ལིང་ཏ་ལ་ཁཱ་ཧི། མ་ཧཱ་མཾ་ས་ལ་ཁཱ་ཧི། མ་ཧཱ་ཙིཏྟ་ལ་ཁཱ་ཧི། མ་ཧཱ་རཀྟ་ལ་ཁཱ་ཧི། མ་ཧཱ་གོ་རོ་ཙ་ན་ལ་ཁཱ་ཧི། མ་ཧཱ་བྷ་སུ་ཏ་ལ་ཁཱ་ཧི། མ་ཧཱ་ཀེཾ་ནི་རི་ཏི་ལ་ཁཱ་ཧི། བཤལ་ཆུ་བདུད་རྩིས་བསྟན་མ་མཆོད་ཅིང་། ཧཱུྃ་བྷྱོ༔ ལྷ་མོ་ཆེན་མོ་རྣམ་པ་བཞི། །ཀླུ་མོ་ཆེན་མོ་རྣམ་པ་བཞི། །བདུད་མོ་ཆེན་མོ་རྣམ་པ་བཞི། །བསྟན་སྐྱོང་སྲུང་མ་འཁོར་བཅས་རྣམས། །དམ་རྫས་གཏོར་མ་འདི་བཞེས་ལ། །བསྟན་པ་སྐྱོང་ལ་གང་ཟག་སྲུངས། །བཅོལ་བའི་འཕྲིན་ལས་གྲུབ་པར་མཛོད། །མ་མ་ཏང་ཏང་ཏིང་ཏིང་ལང་ལང་ལིང་ལིང་ས་མ་ཡ་སརྦ་པཉྩ་པུ་ཙ་ཁཱ་ཧི་ཁཱ་ཧི། ཅེས་བརྗོད། བཟོད་གསོལ་ནི། ཧོ། རྩ་གསུམ་སྲུང་མའི་ཚོགས་རྣམས་དགོངས་སུ་གསོལ། །སྐུ་གསུང་ཐུགས་དང་རྩ་བ་ཡན་ལག་གི། བསྲུང་མཚམས་སྤང་བླང་ཚུལ་བཞིན་མ་བགྱིས་ཤིང་། །རྟེན་རྫས་མ་ཚང་གསོལ་མཆོད་འགྱངས་པ་དང་། །རྒྱུ་ཆུང་ཕུད་ཉམས་འཇུར་གེགས་དབང་གྱུར་ཞིང་། །མ་རིག་བློ་ཡིས་ནོངས་པར་གྱུར་པའི་ཚོགས། །སྙིང་ནས་བཤགས་སོ་ཚངས་པར་སྩལ་བ་དང་། །མཆོག་ཐུན་འཕྲིན་ལས་ཡིད་བཞིན་འགྲུབ་གྱུར་ཅིག །ཡིག་བརྒྱ་སོགས་བརྗོད། བྲིས་སྐུ་སོགས་རྟེན་ཡོད་ན། འདིར་ནི་གཟུགས་དང་ལྷན་ཅིག་ཏུ། །འགྲོ་བའི་དོན་དུ་བཞུགས་ནས་ཀྱང་། །ནད་མེད་ཚེ་དང་དབང་ཕྱུག་དང་། །མཆོག་རྣམས་ལེགས་པར་སྩལ་དུ་གསོལ། །ཨཱོཾ་སུ་པྲ་ཏིཥྛ་བཛྲ་ཡེ་སྭཱ་ཧཱ༔ ཞེས་བསྟིམ་པར་བྱ་ཞིང་། རྟེན་མེད་ན་གཤེགས་གསོལ། ཨོཾ། ཁྱེད་ཀྱིས་སེམས་ཅན་དོན་ཀུན་མཛད། སོགས་དང་། བདག་ཉིད་ཐུགས་སྲོག་ལ་ཐིམ་དམིགས་མེད་ངང་། སླར་ཡང་དཔལ་ཆེན་བཛྲ་ཧེ་རུ་ཀའི། །རྡོ་རྗེ་གསུམ་གྱི་ངོ་བོར་ཡོངས་གསལ་བས། སྣང་སྲིད་དག་པ་རབ་འབྱམས་འཁོར་ལོར་གྱུར། །བསྔོ་བ་སྨོན་ལམ་ནི། ལྷག་བསམ་མི་ཕྱེད་དང་བས་མཆོད་བསྟོད་འབྲས། །ངེས་གསང་བསྟན་པ་མི་ནུབ་དར་རྒྱས་ཤིང་། །བཤད་སྒྲུབ་འདུས་པ་དབྱར་གྱི་མཚོ་ལྟར་འཕེལ། །འགྲོ་ཀུན་རྣམ་པ་ཐམས་ཅད་མཁྱེན་ཐོབ་ཤོག །རིག་འཛིན་བདག་ཅག་དཔོན་སློབ་འཁོར་བཅས་ཀྱིས། །ཡུན་དུ་ཁྱེད་བསྟེན་བསྒྲུབ་ཅིང་མཆོད་བགྱིད་ན། །སྲིད་གསུམ་བདག་མོས་ཚེ་རབས་ཐམས་ཅད་དུ། །འབྲལ་མེད་འགྲོགས་ཤིང་འཕྲིན་ལས་ཀུན་བསྒྲུབ་ཤོག །བཀྲ་ཤིས་ནི། རྣམ་དག་སྤྲོས་དང་བྲལ་བའི་ཞིང་ཁམས་ནས། །ཆོས་སྐུའི་ལྷ་ཚོགས་རྣམས་ཀྱི་བཀྲ་ཤིས་ཤོག །ཡང་དག་ངེས་པ་ལྔ་ལྡན་ཕོ་བྲང་ནས། །ལོངས་སྐུའི་ལྷ་ཚོགས་རྣམས་ཀྱི་བཀྲ་ཤིས་ཤོག །མ་ག་དྷ་ཡི་གནས་མཆོག་ཆེན་པོ་ནས། །སྤྲུལ་སྐུའི་ལྷ་ཚོགས་རྣམས་ཀྱི་བཀྲ་ཤིས་ཤོག །སྒྲུབ་གནས་ཨ་སུ་ར་ཡི་བྲག་ཕུག་ནས། །སློབ་དཔོན་དྷ་ན་སཾ་སྐྲྀའི་བཀྲ་ཤིས་ཤོག །ལངྐའི་གནས་མཆོག་དཔལ་གྱི་གཞལ་ཡས་ནས། །གུ་རུ་མཚོ་སྐྱེས་རྡོ་རྗེའི་བཀྲ་ཤིས་ཤོག །མ་རྒྱུད་མཁའ་འགྲོའི་རྒྱུ་འཕྲུལ་དྲ་བ་ནས། །དྷཀྐི་དཔལ་གྱི་མཚན་འཆང་བཀྲ་ཤིས་ཤོག །སྤྱི་གཙུག་ཉི་ཟླ་འབར་བའི་གདན་སྟེང་ནས། །སངས་རྒྱས་ཀུན་འདུས་བླ་མའི་བཀྲ་ཤིས་ཤོག །སྔགས་ཀྱི་མཚོན་ཆ་འབར་བའི་གཞལ་ཡས་ནས། །དཔལ་ལྡན་རེ་མ་ཏཱི་ཡི་བཀྲ་ཤིས་ཤོག །དམ་ཚིག་གཉན་པོའི་ད་ལ་ཆེན་པོ་ནས། །དམ་ཅན་དྲེགས་པའི་ཚོགས་ཀྱིས་བཀྲ་ཤིས་ཤོག །ཧཱུྃ། བཀྲ་ཤིས་དཔལ་འབར་ཕུན་སུམ་ཚོགས་པའི་དཔལ། །ལེགས་པའི་དབང་ཕྱུག་འཁོར་འདས་ཡོངས་ཀྱི་བཅུད། །ཡིད་བཞིན་འགྲོ་བའི་རེ་བ་སྐོང་མཛད་པ། །མཆོག་ཐུན་དཔལ་ལ་སྤྱོད་པའི་བཀྲ་ཤིས་ཤོག །ཞེས་པ་རིག་འཛིན་ཆེན་པོ་ཉི་མ་གྲགས་པས་སྦྱར་བ་དགེ་ལེགས་འཕེལ། མཆོད་གཏོར་བྱིན་བརླབས་བཟོད་གསོལ་བསྔོ་སྨོན་བསྡུ་ཆོག་རྣམས་པདྨ་ཐེག་མཆོག་བསྟན་པའི་རྒྱལ་མཚན་གྱིས་ཁ་བསྐང་བྱས་པའོ། །མངྒ་ལཾ།། །།

ལྷན་ཐབས་གོང་འོག

སྔགས་བདག་འབར་མའི་ལྷན་ཐབས་གོང་འོག་བཞུགས། འབར་མའི་ལྷན་ཐབས་གོང་མ། འགུགས་པའི་ཕྱག་རྒྱ་བཅས། ཧཱུྃ་ཧཱུྃ་ཧཱུྃ་ཆོས་སྐུ་མི་བསྐྱོད་རྡོ་རྗེ་ལ་སོགས་ཆོས་སྐུའི་ལྷ་ཚོགས་རྣམས་ཀྱི་བཀའ་བདེན་པ། ལོངས་སྐུ་དཔལ་ཆེན་ཧེ་རུ་ཀཿལ་སོགས་ལོངས་སྐུའི་ལྷ་ཚོགས་རྣམས་ཀྱི་བཀའ་བདེན་པ། སྤྲུལ་སྐུ་སངས་རྒྱས་བཅོམ་ལྡན་འདས་ལ་སོགས་ཕྱོགས་བཅུ་དུས་བཞིའི་རྒྱལ་བ་རྣམས་ཀྱི་བཀའ་བདེན་པ། རིགས་གསུམ་མགོན་པོ་ལ་སོགས་བྱང་ཆུབ་སེམས་དཔའ་སེམས་མ་རྣམས་ཀྱི་བཀའ་བདེན་པ། སློབ་དཔོན་པདྨ་བཛྲ་ལ་སོགས་གསང་སྔགས་འཆང་བའི་རིག་འཛིན་གྲུབ་ཐོབ་རྣམས་ཀྱི་བཀའ་བདེན་པ། ཡི་དམ་རྩ་གསུམ་རྒྱལ་བ་རྒྱ་མཚོའི་ལྷ་ཚོགས་རྣམས་ཀྱི་བཀའ་བདེན་པ། དཔལ་ལྡན་ལྷ་མོ་ནག་མོ་ལ་སོགས་མ་བརྒྱུད་མཁའ་འགྲོ་འབུམ་གྱི་ལྷ་ཚོགས་རྣམས་ཀྱི་བཀའ་བདེན་པ། བ་ལམ་དྲེའུ་སྣ་མ་ལ་སོགས་སྐུ་སྤྲུལ་གྱི་མཁའ་འགྲོ་མ་ཉི་ཁྲི་ཆིག་སྟོང་གི་བཀའ་བདེན་པ། སྟག་སྨན་གཟེར་འདེབས་མ་ལ་སོགས་གསུང་སྤྲུལ་གྱི་མཁའ་འགྲོ་མ་ཉི་ཁྲི་ཆིག་སྟོང་གི་བཀའ་བདེན་པ། ཁྲི་སྨན་ས་ལེ་མ་ལ་སོགས་ཐུགས་སྤྲུལ་གྱི་མཁའ་འགྲོ་མ་ཉི་ཁྲི་ཆིག་སྟོང་གི་བཀའ་བདེན་པ། རྡོ་རྗེ་བ་ལམ་མ་ལ་སོགས་ཡོན་ཏན་སྤྲུལ་པའི་མ་མོ་ཉི་ཁྲི་ཆིག་སྟོང་གི་བཀའ་བདེན་པ། ཚངས་པ་དུང་གི་ཐོར་ཚུགས་ཅན་ལ་སོགས་རྒྱལ་འགོང་འབུམ་སྡེའི་བཀའ་བདེན་པ། གཤིན་རྗེ་བྷེ་བ་ས་ཏ་ལ་སོགས་འཆི་བདག་གཤིན་རྗེ་འབུམ་གྱི་བཀའ་བདེན་པ། བདུད་པོ་བྱེ་བ་དགུ་རིང་ལ་སོགས་བདུད་དམག་བྱེ་བ་འབུམ་གྱི་བཀའ་བདེན་པ། དཔལ་མགོན་དྲེགས་པ་ཕྱི་ནང་གསང་བའི་ལྷ་སྲིན་སྡེ་བརྒྱད་རང་རང་སྤྲུལ་འཁོར་དངབཅས་པའི་བཀའ་བདེན་པའི་མཐུ་ལ་བརྟེན་ནས། བགེགས་ཀྱི་རྒྱལ་པོ་བི་ན་ཡ་ལ་སོགས་བགེགས་རིགས་སྟོང་ཕྲག་བརྒྱད་ཅུ། བྱིས་པའི་གདོན་ཆེན་བཅོ་ལྔ། ནད་ཐན་ཡམས་ཀྱི་བདག་པོ་བདག་མོ། རྒྱ་འདྲེ་འགོང་པོ། གྲེ་བོ་གྲེ་མོ་ཕོ་གཤིན་མོ་གཤིན། ཟ་འདྲེ་ཤི་གཤེད། གློ་བུར་དུ་ལྷགས་པའི་གདོན་བགེགས། ཁྱད་པར་དུ་ཡང་བདག་ཅག་ཡོན་མཆོད་མི་ནོར་འཁོར་དང་བཅས་པའི་ཚེ་ལ་བརྐུ་ཞིང་སྲོག་ལ་འཇབ་པ། བླ་ལ་འཁྱེར་ཞིང་ཡིད་ལ་བརྔམ་པ། ལུས་ལ་ན་ཚ། སེམས་ལ་སྡུག་བསྔལ། བསམ་པ་ལ་བར་ཆད། སྒོ་ནོར་ལ་གོད་ཡམས་གཏོང་བའི་འབྱུང་པོ་མི་མིན་མི་རུ་བརྫུ་ཞིང་ལྷ་མིན་ལྷ་རུ་བརྫུ་བ། ཕག་ཏུ་ཡིབ་ཅིང་སྒབ་ཏུ་འཁྲི་བ། ཁའི་ཟས་འཕྲོག་ཅིང་ལག་གི་ནོར་འཕྲོག་པ། ཁྱིམ་སྒོ་ལམ་སྲང་ལ་བར་དུ་གཅོད་པའི་གདོན་བགེགས་ཐམས་ཅད་མཆོད་སྦྱིན་གྱི་གཏོར་མ་བཞེས་པའི་སླང་དུ། སྐད་ཅིག་རང་དབང་མེད་པར་བསྐྱེད་པའི་ཡུལ་འདིར་ཁུག་ཅིག །བཛྲ་ཨཾ་གུ་ཤ་ཡ་ཛཿབཛྲ་པ་ཤ་ཧཱུྃ༔ བཛྲ་སྥོ་ཊ་བཾ༔ བཛྲ་གྷཎྜེ་ཧོ༔ བཛྲ་ཨ་ཝེ་ཤ་ཡ་ཨ་ཨ༔ ༈འབར་མའི་ལྷན་ཐབས་འོག་མ། །ལིང་ག་འགུགས་བསྟིམ་བྱ། ཛཿཧཱུྃ་བཾ་ཧོཿས་རྒྱས་འདེབས། བསྒྲལ་ལས་ནི། ཧཱུྃ་བྷྱོ༔ བརྔམ་ཞིང་བརྔམ་ཞིང་དགྲ་བགེགས་སྲོག་རྩ་གཅོད༔ སྲོག་གཅོད་བདུད་མོ་འབུམ་སྡེའི་དུས་ལ་བབས༔ བགད་ཅིང་བགད་ཅིང་ཤ་ཟ་རུས་ལ་འཆའ༔ ཟ་བྱེད་མ་མོ་འབུམ་སྡེའི་དུས་ལ་བབས༔ འབར་ཞིང་འཁྲུག་སྟེ་ནད་མཚོན་བུ་ཡུག་གཏིབས༔ གསོད་བྱེད་དྷཀྐིའི་ཚོགས་རྣམས་དུས་ལ་བབས༔ དུས་ལ་བབ་བོ་དམ་ཉམས་དགྲ་བགེགས་སྒྲོལ༔ ནྲི་ཏྲི་ཤ་ཏྲུཾ་གྷརྫ་གྷརྫ་མྱོགས་མྱོགས་གཏུབས་གཏུབས་འབར་འབར་ཤག་ཤག་མཱ་ར་ཡ་ཧཱུྃ་ཕཊ༔ དམ་ཉམས་དགྲ་བགེགས་བསྒྲལ་བའི་གཏི་མུག་ཤ་ཡི་བ་ལིངྟ་ལ་ཁཱ་ཧི། འདོད་ཆགས་ཁྲག་གི་བྷ་ལིངྟ་ལ་ཁཱ་ཧི། ཞེ་སྡང་རུས་པའི་བྷ་ལིངྟ་ལ་ཁཱ་ཧི། དབང་པོ་རྣམ་ལྔའི་བྷ་ལིངྟ་ལ་ཁཱ་ཧི། དོན་སྙིང་རྣམ་ལྔའི་བྷ་ལིངྟ་ལ་ཁཱ་ཧི། མ་ཧཱ་མཾ་ས་ལ་ཁཱ་ཧི། མ་ཧཱ་ཙིཏྟ་ལ་ཁཱ་ཧི། མ་ཧཱ་རཀྟ་ལ་ཁཱ་ཧི། མ་ཧཱ་གོ་རོ་ཙ་ན་ལ་ཁཱ་ཧི། མ་ཧཱ་བྷ་སུ་ཏ་ལ་ཁཱ་ཧི། མ་ཧཱ་ཀེཾ་ནི་རི་ཏི་ལ་ཁཱ་ཧི། རྟེན་བཞུགས་ནི། ཧོ་བདེ་སྟོང་ཡེ་ཤེས་ཀྱི་སྒྱུ་འཕྲུལ། མ་ཅིག་འདོད་ཁམས་ཀྱི་བདག་མོ། དུང་སྐྱོང་ལྷ་མོ། སྲིད་པ་གསུམ་གྱི་རྒྱལ་མོ། མིང་པོ་བདུན་གྱི་སྲིང་ཅིག་མ། དུས་བཞིའི་རྒྱལ་མོ། བསྟན་པའི་གཙོ་མོ། ཁམས་གསུམ་གྱི་ཆེ་བཙན། རིག་པ་འཛིན་པའི་སྲུང་མ། བསྟན་པ་ཀུན་གྱི་ཡང་རྗེ། གསང་སྔགས་བཀའི་སྲུང་མ། མ་མོ་ཆེན་མོའི་རྣལ་འབྱོར་བདག་ལ། མ་ལྟར་རྗེས་སུ་སྐྱོང་བ། སྲིང་ལྟར་སྙིང་ཉེ་བ། ཆུང་མ་བཞིན་དུ་མི་འབྲལ་འགྲོགས་པ། བྲན་ལྟར་ལས་མྱུར་བ། དགྲ་ལ་རྣོ་མྱུར་ཆེ་བ། ཕྲིན་ལས་གློག་ལྟར་འཁྱུགས་པ། དྲག་རྩལ་ཐོག་ལས་མྱུར་བ། རྦད་ན་མཐུ་ཆེ་བ། བསྐུལ་ན་ལས་མྱུར་བ། འབྱུང་བ་ལྔ་ལ་དབང་བསྒྱུར་ནུས་པ། གཙོ་མོས་མི་མངོན་དབྱིངས་ནས་ཐུགས་རྗེའི་དམ་ཚིག་ལ་དགོངས་ཏེ་འཁོར་ཚོགས་སྒྱུ་འཕྲུལ་རྒྱ་མཚོས་འཁོར་འདས་ཡོངས་ལ་དབང་བསྒྱུར་བ། ཁྱེད་རྣམས་རང་བཞིན་ཡེ་ཤེས་ཀྱི་རང་རྩལ་རྟོག་ཚོགས་མ་རིག་པས་བཅིངས་པ་རྣམས་ལ་ཐུགས་རྗེའི་ཆོ་འཕྲུལ་འཕྲིན་ལས་འདོད་དགུར་སྒྱུར་ལ། བསྟན་དང་གང་ཟག་སྒྲུབ་པ་པོ་ཡི་མཐུ་རྩལ་བསྐྱེད་ལ། གསང་སྔགས་ཀྱི་བསྟན་པའི་ཕྲིན་ལས་སྤེལ་བའི། གནས་མཆོག་འོག་མིན་སུམ་ཅུ་རྩ་གསུམ། རི་བོའི་རྩེ། རྒྱ་མཚོའི་གླིང་། ས་འོག་ས་སྟེང་ས་བླ་ཏེ་སྲིད་པ་གསུམ་གྱི་ཞིང་ཁམས་ཕོ་བྲང་གང་ན་བཞུགས་ཀྱང་གནས་འདིར་དགོངས་ཏེ་གཞལ་ཡས་ཕོ་བྲང་སྤྱན་གཟིགས་གཏོར་མ་ཕྱི་ནང་གསང་བའི་རྟེན་རྫས་གཙུག་ལག་དགོན་འདིའི་གཉེར་ཁ་གྱིས་ལ་ལུས་དང་གྲིབ་མ་བཞིན་མི་འབྲལ་བར་མགོན་སྐྱོབས་གཡེལ་བ་མེད་པར་བཞུགས་ཤིང་། ཐ་དད་མེད་པའི་དམ་ཚིག་ཡེ་ཤེས་འདུ་འབྲལ་སྤངས་ཏེ་རྟག་པར་བཞུགས་ཏེ་གདོང་གྲོགས་མཛོད་ཅིག །ཨཱོཾ་སུ་པྲ་ཏིཥྛ་སོགས། ཉི་དབོན་པས་སོ། །

སྔགས་བདག་འབར་མའི་སྲུང་ཟློག་གི་འདོན་སྒོམ་ཟབ་མོ།

སྔགས་བདག་འབར་མའི་སྲུང་ཟློག་གི་འདོན་སྒོམ་ཟབ་མོ་བཞུགས༔ སྔགས་བདག་འབར་མའི་བསྲུང་བའི་འདོན་བསྒོམ་གྱི་རིམ་པ༔ ཧཱུྃ༔ སྐད་ཅིག་མི་དམིགས་སྟོང་པའི་ངང་༔ རླུང་ནག་འཚུབ་མ་མེ་རིའི་ཀློང་༔ པདྨ་ཉི་ཟླའི་གདན་སྟེང་དུ༔ ཐུགས་སྲོག་མ་ཡིག་དཀར་པོ་ལས༔ འོད་ཟེར་འཕྲོས་པས་རྒྱལ་བ་མཆོད༔ བྱིན་རླབས་ཚུར་བསྡུས་འཁོར་འདས་ཀྱི༔ དྲེགས་ཚོགས་མ་ལུས་ཀུན་ལ་ཕོག༔ ཞེ་སྡང་ཞི་ཞིང་ནུས་མཐུ་བསྡུས༔ འོད་ཀྱི་རྣམ་པར་མ་ལ་ཐིམ༔ མ་ཡིག་གནས་གྱུར་དྲན་རྫོགས་སུ༔ དཔལ་གྱི་ལྷ་མོ་དམར་སེར་མདོག༔ ཞལ་གཅིག་ཕྱག་གཉིས་མཛུམ་མདངས་ཅན༔ ཞབས་གཉིས་ཕྱེད་སྐྱིལ་འགྱིང་བག་བཞུགས༔ དར་གྱི་ན་བཟའ་རིན་ཆེན་རྒྱན༔ གཡས་པ་ཁ་ཊྭཱཾ་བུམ་པའི་དབྱིབས༔ འོད་ཟེར་སྣ་ལྔའི་གུར་ཁང་ནང་༔ བསྲུང་བྱ་ཐམས་ཅད་ཚུད་པར་བསྒོམ༔ གཡོན་གྱི་བྷནྡྷ་བདུད་རྩི་ལས༔ བཛྲ་རཏྣ་པདྨ་དང་༔ རལ་གྲི་འཁོར་ལོའི་གུང་ཁང་འབར༔ རིམ་པ་ལྔ་ཡི་དྲ་མིག་ཏུ༔ ལྷ་མོ་དཀར་མོ་གྲངས་མེད་གཏམས༔ རང་གི་ཞལ་ནས་སྔགས་བཟླས་པས༔ འཁོར་བཅས་ཐམས་ཅད་སྔགས་སྒྲ་སྒྲོག༔ ནང་དུ་ཞལ་གཟིགས་བསྲུང་བར་བསྒོམ༔ ཨཱོཾ་རུ་རུ་རོ་རུ་བེ་ཏི་ཏ༔ བ་ཏ་ཏོ་པི་མེ་ཙ་པ་ལ་ཨ་ཤུག་མེ་མ་མ་ཏྲག་རཀྵ༔ ཨཱོཾ་རུ་རུ་རོ་རུ་བེ་ཏོ་ཧུ་ཏ༔ ཥྟ་ཏོ་བི་མི་ཙ་པ་ལ་ཨ་ཤུག་མེ་མ་མ་ཏྲག་རཀྴ་རུ་ལུ་རུ་ལུ་རེ་མ་ཏཱི་རུ་ཏི་སྙིང་ཁ་རཀྨོ་ཙ་ཙ་མུཾ་ཛཿཛཿ ཧཱུྃ་བྷྱོ་ཛཿཛཿ ཨཱོཾ་བཛྲ་དྷེ་ཝི་ཀཱ་ལི་རཀྵ༔ རུ་ཏི་ཧྲཱི༔ བདག་ཅག་འཁོར་དང་བཅས་པ་སྲུངས་ཤིག་རཀྵ་རཀྵ་སྭཱ་ཧཱ༔ རྒྱས་བསྡུས་སྐབས་ལྟར་བཟླ༔ བཛྲ་པུཥྤེ་སོགས༔ ཧཱུྃབྷྱོ༔ ཁམས་གསུམ་དབང་བསྒྱུར་དཔལ་ལྡན་མ༔ སྲིད་གསུམ་ཟིལ་གནོན་རལ་གཅིག་མ༔ མ་བདུད་ཆེན་མོ་རེ་མ་ཏཱི༔ མཁའ་འགྲོའི་གཙོ་ལ་ཕྱག་འཚལ་བསྟོད༔ བསྲུང་བའི་གུར་དང་སྔགས་ཕྲེང་ལྷ་ཚོགས་ལས༔ འོད་དང་གཟི་བརྗིད་ཕྱོགས་བཅུར་འབར་བ་ཡིས༔ བྱད་དང་རྦོད་གཏོང་གནོད་བྱེད་ཐམས་ཅད་ཟློག༔ ཚེ་དང་བསོད་ནམས་ཡར་ངོ་ལྟར་རྒྱས་གྱུར༔ པར་བསམས། ༈སྔགས་བདག་འབར་མའི་བཟློག་པའི་འདོན་སྒོམ་ནི༔ ཧཱུྃ༔ ཨེ་མཐིང་ལྕགས་ཁང་འབར་བའི་ནང་༔ དགྲ་བགེགས་བྱད་མ་ལྷ་བསྲུང་རྣམས༔ དབང་དུ་བསྡུས་ཏེ་ཟིལ་གྱིས་མནན༔ ལྷ་མོ་ཆེན་མོ་སྔགས་སྲུང་མས༔ སྤྲུལ་པ་ནད་མཚོན་དུག་ཆར་ཕབ༔ ལྕགས་ཁང་དྲེའུ་རྟའི་ཞབས་འོག་ཏུ༔ དགྲ་བགེགས་བྱད་མ་ནེམ་པར་མནན༔ ཁོ་ཡི་ལྷ་སྲུང་མ་བཟོད་ཁྲོས༔ བྱད་མ་རང་གཤེད་རང་ལ་ཕབ༔ མ་མོའི་སྤྲུལ་པའི་དྲེགས་ཚོགས་ཀྱིས༔ རྡུལ་ཕྲན་ཉིད་དུ་བརླག་པར་གྱུར༔ པར་བསམས། མ་བྷྱོ་མ་མ་རུ་ལུ་ཏྲག་རཀྴ་བྷྱོ་རེ་མ་ཏཱི་དགྲ་བགེགས་བྱད་མ་ལྷ་བསྲུང་དང་བཅས་པ་མཱ་ར་ཡ་ཧཱུྃ་ཛཿབྷྱོ་ཟློག༔ བྱད་ཕུར་གཏད་ཁྲམ་གཏོང་བའི་བན་བོན་བྱད་མ་དགྲ་བགེགས་ཐམས་ཅད་ཀྱི་བླ་སྲོག་རྣམ་པར་ཤེས་པ་སོད་ཅིག་ཆོད་ཅིག་གཏུབས་ཤིག་ས་མ་ཡ་བྷྱོ་བྷྱོ་ཟློག་ཟློག་མཱ་ར་ཡ་ཧཱུྃ་ཕཊ༔ ཅི་མང་བཟླ་ཞིང་ཐུན་སྐབས་སུ་མཆོད་བསྟོད་འབུལ་བ་ནི༔ ཨཱོཾ་ཨཱཿཧཱུྃ༔ བཛྲ་པུཥྤེ་དྷུ་པེ་ཨཱ་ལོ་ཀེ་གྷནྡྷེ་ནཻ་ཝི་དྱ་ཤཔྟ་པཱུ་ཙ་ཧོ༔ མ་ཧཱ་པཉྩ་ཨ་མྲྀ་ཏ་མ་ཧཱ་བྷ་ལིངྟ་མ་ཧཱ་རཀྟ་སརྦ་པཱུ་ཙ་ས་མ་ཡ་ཁཱ་ཧི་ཁཱ་ཧཱི༔ མ་ཧཱ་མཾ་ས་ཙིཏྟ་རཀྟ་བྷ་སུ་ཏ་གོ་རོ་ཙ་ན་ཀེཾ་ནི་རི་ཏི་ཁ་ཁ་ཁཱ་ཧི་ཁཱ་ཧི༔ ཧཱུྃ་བྷྱོ༔ ཁམས་གསུམ་དབང་བསྒྱུར་དཔལ་ལྡན་མ༔ སྲིད་གསུམ་ཟིལ་གནོན་རལ་གཅིག་མ༔ མ་བདུད་ཆེན་མོ་རེ་མ་ཏཱི༔ མཁའ་འགྲོའི་གཙོ་ལ་ཕྱག་འཚལ་བསྟོད༔ འདོད་ཁམས་ལྷ་དབང་དགྱེས་སྡེ་མོ༔ ནཱ་ག་རཀྴ་ཀླུ་ཡི་ལྕམ༔ བདུད་མོ་ནག་མོ་ཕྱག་གཉན་མོ༔ སྔགས་ཀྱི་བསྲུང་མར་ཕྱག་འཚལ་བསྟོད༔ མ་མོ་མཁའ་འགྲོའི་ལས་མཁན་མོ༔ བསྟན་པ་ཀུན་གྱི་ཡང་རྗེ་མོ༔ དུར་ཁྲོད་དྷཀྐིའི་གཙོ་མོ་སྟེ༔ ཤ་ཟ་ཀཱ་ལིར་ཕྱག་འཚལ་བསྟོད༔ འཆི་བདག་ལས་བྱེད་དྲེགས་པ་བདུན༔ སོ་སོའི་བྲན་གཡོག་བཀའ་ཉན་དང་༔ ནག་མོ་འབུམ་སྡེ་བྱེ་བའི་ཚོགས༔ འཁོར་དང་བཅས་ལ་བསྟོད་པར་བགྱི༔ ཅེས་བསྟོད་དོ། ཧཱུྃ་ཧཱུྃ་ཧཱུྃ༔ ཆོས་སྐུ་མི་བསྐྱོད་རྡོ་རྗེའི་ལྷ་ཚོགས་རྣམས་ཀྱི་བཀའ་བདེན་པ། ལོངས་སྐུ་དཔལ་ཆེན་ཧེ་རུ་ཀའི་ལྷ་ཚོགས་རྣམས་ཀྱི་བཀའ་བདེན་པ། སྤྲུལ་སྐུ་སངས་རྒྱས་བཅོམ་ལྡན་འདས་ཀྱི་ལྷ་ཚོགས་རྣམས་ཀྱི་བཀའ་བདེན་པ། རིགས་གསུམ་མགོན་པོ་ལ་སོགས་བྱང་ཆུབ་སེམས་དཔའ་རྣམས་ཀྱི་བཀའ་བདེན་པ། སློབ་དཔོན་པདྨ་བཛྲ་ལ་སོགས་གསང་སྔགས་འཆང་བའི་རིག་འཛིན་གྲུབ་ཐོབ་རྣམས་ཀྱི་བཀའ་བདེན་པ། ཡི་དམ་རྩ་གསུམ་ལྷ་ཚོགས་རྣམས་ཀྱི་བཀའ་བདེན་པ། དཔལ་ལྡན་ལྷ་མོ་འབུམ་ཕྲག་ཡངས་པའི་མཁའ་འགྲོ་རྣམས་ཀྱི་བཀའ་བདེན་པ། བ་ལམ་དྲེལ་སྣ་མ། སྟག་སྨན་གཟེར་འདེབས་མ། ཁྲི་སྨན་ས་ལེ་མ། རྡོ་རྗེ་བ་ལམ་མ། ཚངས་པ་དུང་གི་ཐོར་ཚུགས། གཤིན་རྗེ་བྷེ་ཝ་ས་ཏ། བདུད་པོ་བྱེ་བ་དགུ་རིང་ལ་སོགས་པ། དཔལ་མགོན་དྲེགས་པ། ཕྱི་ནང་གསང་བའི་ལྷ་སྲིན་རང་རང་སྤྲུལ་འཁོར་དང་བཅས་པའི་བཀའ་བདེན་པའི་མཐུ་ལ་བརྟེན་ནས། བདག་ཅག་དཔོན་སློབ་ཡོན་མཆོད་འཁོར་དང་བཅས་པ་རྣམས་ལ་གནོད་ཅིང་འཚེ་བར་བྱེད་པའི་གཟུགས་ཅན་གཟུགས་མེད་བན་བོན་སྡེ་བརྒྱད། སྔོན་ལས་འཕྲལ་རྐྱེན་ངན་པ། ཆགས་ཆེ་ཉམ་ང་། བྱད་མ་རྦོད་གཏོང་། ནད་རིགས་བཞི་བརྒྱ་རྩ་བཞི། གློ་བུར་བདུན་བརྒྱ་ཉི་ཤུ། རྐྱེན་ངན་ཉི་ཁྲི་ཆིག་སྟོང་། ཡེ་འབྲོག་སུམ་བརྒྱ་དྲུག་ཅུ། བགེགས་རིགས་སྟོང་ཕྲག་བརྒྱད་ཅུ། བྱིས་པའི་གདོན་ཆེན་བཅོ་ལྔ། ལྟས་ངན་བརྒྱད་ཅུ་རྩ་གཅིག །རྒྱ་འདྲེ་འགོང་པོའི་གནོད་པ། ལོ་ཟླ་ཞག་དུས་སྐག་ངན། ཕོ་གདོན་མོ་གདོན། གྲི་བོ་གྲི་མོ། ཤི་འདྲེ་གསོན་འདྲེ། དམ་སྲི་དམ་འགོང་། ཟ་འདྲེ་ཤི་གཤེད། མི་ནད་ཕྱུགས་ནད། ཡམས་རིམས་ངན་པ་ལ་སོགས་པ་མི་མཐུན་པའི་ཚོགས་ཐམས་ཅད་ཕྱིར་ཟློག་པར་གྱུར་ཅིག །མེད་པར་གྱུར་ཅིག །ཞི་བར་གྱུར་ཅིག །བརླག་པར་གྱུར་ཅིག །རབ་ཏུ་ཞི་བར་གྱུར་ཅིག །ཐལ་མོ་བརྡབས་པས་དགྲ་དང་བགེགས། །ཁྱད་པར་བྱད་མ་རྦོད་གཏོང་རྣམས། །མེ་ལྕེ་ཁ་ཡི་སྦྲང་བུ་ལྟར། །སྐད་ཅིག་ཉིད་ལ་བརླགས་པར་གྱུར། །པར་བསྒོམ། ཉ་སྟོང་དུས་ཆེན་ལ་སོགས་ལ༔ ཐུན་བཟུང་གནད་དུ་བསྣུན་པར་བྱ༔ དམར་ཐག་དུས་སམ་སྲོད་དྲག་པོར༔ རྒྱུན་དུ་མ་ཆག་བརྩོན་གྱུར་ན། ཕས་ཀྱི་བྱད་མ་རྦོད་གཏོང་རྣམས༔ བཟློག་འགྱུར་འདི་ལ་ཐེ་ཚོམ་མེད༔ ལྔ་བརྒྱའི་དུས་ཀྱི་ཐ་མ་ལ༔ ལས་འཕྲོ་ཅན་དང་འདི་འཕྲད་ནས༔ བར་ཆད་ཚོགས་ལས་རྒྱལ་བར་ཤོག༔ སྲུང་མ་རྣམས་ལ་བཅོལ་ལོ་རྒྱ༔ དམ་མེད་འགྲོ་ལ་ཨ་ཐམ་རྒྱ༔ ས་མ་ཡཱ༔ རྒྱ་རྒྱ་རྒྱ༔ གཏེར་རྒྱ༔ སྦས་རྒྱ༔ ཟབ་རྒྱ༔ ས་མ་ཡ༔ རིག་འཛིན་ཉི་མ་གྲགས་པས་གནས་མཆོག་ཧ་ཙོ་ནས་སྤྱན་དྲངས་པའོ། །མ་བྷྱོ་མ་རུ་ལུ་ཏྲག་རཀྴ་བཛྲ་ཧཱུྃ༔ སརྦ་སིདྡྷི་བཛྲ་ཧཱུྃ༔ མངྒ་ལཾ།། །།

ལྷ་མོའི་བསྐང་བ་བསྡུས་པ་བར་ཆད་ཀུན་སེལ།

དཔལ་ལྡན་ལྷ་མོའི་བསྐང་བ་བསྡུས་པ་བར་ཆད་ཀུན་སེལ་བཞུགས། ཧཱུྃ༔ ཆོས་དབྱིངས་འོག་མིན་ཞིང་མཆོག་ནས། །བཅོམ་ལྡན་མི་བསྐྱོད་ཡང་དག་དཔལ། །རྩ་གསུམ་རྒྱལ་བའི་ཚོགས་དང་བཅས། །གནས་འདིར་སྤྱན་འདྲེན་གཤེགས་སུ་གསོལ། བྷྱོཿ བྱང་ཤར་ཡོངས་འདུ་ཤིང་གི་དྲུང་། །གཡུ་མཚོ་མུ་ལེ་མཐིང་གི་ནང་། །སྲིད་གསུམ་ཐོད་མཁར་གཞལ་ཡས་ཁང་། དུར་ཁྲོད་རབ་འཇིགས་གནས་མཆོག་ནས། ཁམས་གསུམ་སྲིད་པར་དབང་བསྒྱུར་མ། །བདུད་ཀྱི་ཡུམ་ལ་གཤིན་རྗེའི་ལྕམ། །དཔལ་ལྡན་གཉེན་གྱི་རེ་མ་ཏི། །དྲེགས་ཆེན་བདུན་གྱིས་ཡོངས་སུ་བསྐོར། །མ་མོ་བྱེ་བ་འབུམ་གྱི་ཚོགས། །སྣང་སྲིད་ལྷ་སྲིན་དྲེགས་པའི་སྡེ། །མ་མོ་ཆེན་མོའི་བྲན་ལགས་ན། །ད་ཚུར་ད་ཚུར་མྱུར་དུ་བྱོན། །རྐང་གླིང་ཐོད་རྔ་རོལ་མོའི་སྒྲས། །འབོད་པའི་དུས་ན་གཤེགས་སུ་གསོལ། །ཞིང་ལྤགས་ཧསྟ་དར་ནག་གིས། །གཡབ་པའི་ཚེ་ན་གཤེགས་སུ་གསོལ། །གསུར་ཆེན་ལ་སོགས་དྲི་ཞིམ་སྤོས། །འཐུལ་བའི་ཚེ་ན་གཤེགས་སུ་གསོལ། །ཏིང་འཛིན་སྔགས་དང་ཕྱག་རྒྱ་ཡི། བདེན་པའི་སྟོབས་ཀྱིས་གཤེགས་སུ་གསོལ། །ཐུགས་དམ་གཉན་པོ་བསྐང་བའི་རྫས། །དངོས་འབྱོར་ཡིད་རོལ་ལས་བྱུང་བའི་། །མ་ད་ན་དང་རུ་དྷི་ར། །མཾ་ས་བྷ་ལིང་ཚོགས་ཀྱིས་བསྐང་། །ལྕགས་ཀྱུ་ལྔ་དང་སྒྲོན་མ་ལྔ། །རོ་མཆོག་བརྒྱ་དང་བརྒྱད་ལྡན་པའི། །བཟའ་བཅའ་བཏུང་བའི་རིགས་རྣམས་དང་། འབྲུ་སྨན་རིན་ཆེན་མང་པོས་བསྐང་། དབང་ལྔའི་མེ་ཏོག་ཚིལ་གསུར་སྤོས། །ཞུན་ཆེན་སྒྲོན་མེ་དྲི་ཆུའི་ཆབ། །ཤ་ཁྲག་རུས་པའི་ཞལ་ཟས་དང་། རྐང་གླིང་ཐོད་རྔ་རོལ་མོས་བསྐང་། །རི་རབ་གླིང་བཞི་མདོས་ཆེན་པོ། །ནམ་མཁའ་ཉི་ཟླ་མི་དབང་གི། །རྒྱལ་མཚན་རྣམ་མང་ཟ་འོག་གོས། །མདའ་དར་མདུང་དར་མང་པོས་བསྐང་། །མཁའ་ལྡིང་བྱ་དང་གཅན་གཟན་དང་། དྲེལ་རྟ་རྒྱ་བོང་གླང་གཡག་ལུག །རི་གནས་ཆུ་གནས་དུད་འགྲོའི་རིགས། །སྲོག་ཆགས་མང་པོས་ཐུགས་དམ་བསྐང་། །སྟོང་གསུམ་འཇིག་རྟེན་རབ་འབྱམས་དང་། །ནང་བཅུད་འགྲོ་བའི་འདོད་ཡོན་རིགས། །བདག་ཏུ་བཟུང་དང་མ་བཟུང་པའི། །ལྷ་མིའི་དཔལ་འབྱོར་རྣམས་ཀྱིས་བསྐང་། །རྩེ་གསུམ་དར་ནག་བ་དན་དང་། །རལ་གྲི་ནད་རྐྱལ་ཐོད་ཁྲག་དང་། སྲ་བརྟན་གོ་ཆ་རྣོ་ངར་མཚོན། །ཁྲམ་ཤིང་ཤོ་རྡེལ་མཚོན་དྲུས་བསྐང་། །གཙོ་འཁོར་སོ་སོའི་བསྐང་རྫས་དང་། །མ་སྲིང་ཆུང་མ་བྲན་གྱི་ཚུལ། །བརྟེན་རྫས་སྲོག་འཁོར་རྟེན་གཏོར་དང་། །རྒྱུན་གྱི་གཏོར་མས་ཐུགས་དམ་བསྐང་། །སྲིད་པ་མ་མོའི་དཀྱིལ་འཁོར་རྣམས། །ཧེ་རུ་ཀ་དཔལ་སྐུ་ལ་རྫོགས། །མི་བཟད་རྒྱན་འཁོར་ལྔ་ཡི་བདག །རྩ་རླུང་སེམས་སུ་ཤར་བས་བསྐང་། །རྒྱལ་བ་དགོངས་བརྒྱུད་ལ་སོགས་པ། །བླ་མ་རིགས་བདག་ཐུགས་དམ་བསྐང་། །ཡི་དམ་དཔའ་བོ་མཁའ་འགྲོ་དང་། །དམ་ཅན་རྒྱ་མཚོའི་ཐུགས་དམ་བསྐང་། །བདག་ཅག་མ་རིག་དབང་གྱུར་པས། །རྩ་གསུམ་ལྷ་ཚོགས་ཐམས་ཅད་དང་། །ཁྱད་པར་ལྷ་མོ་ཆེན་མོ་ཡི། །དམ་ཚིག་འགལ་གྱུར་མཐོལ་ཞིང་བཤགས། །ཕྱི་ནང་གསང་བའི་བར་ཆད་སོལ། །མཆོག་དང་ཐུན་མོང་འཕྲིན་ལས་ཀུན། །ཡིད་ལ་ཇི་ལྟར་བསམ་པའི་དོན། །ཐོགས་མེད་མྱུར་དུ་གྲུབ་པར་མཛོད། །ཅེས་དཔལ་ལྡན་སྔགས་ཀྱི་སྲུང་མའི་བསྐང་བ་བསྡུས་པ་འདི་ཡང་པདྨ་ཐེག་མཆོག་བསྟན་པའི་རྒྱལ་མཚན་གྱིས་སྒྲུབ་ཁང་འོག་མིན་ལྕང་ལོ་ཅན་དུ་སྦྱར་བ་མངྒ་ལཾ།། །།

འཁྲུག་བསྐང་རིན་ཆེན་ཕྲེང་བ།

དཔལ་ལྡན་ལྷ་མོའི་འཁྲུག་བསྐང་རིན་ཆེན་ཕྲེང་བ་ཅེས་བྱ་བ་བཞུགས་སོ། །དཔལ་ཆེན་པོ་ཧེ་རུ་ཀཿལ་ཕྱག་འཚལ་ལོ༔ མ་མོ་འཁྲུགས་པའི་བསྐང་གསོལ་འདི་ལ༔ ཡུལ་དུ་ནད་རིམས་དྲག་པོ་བྱུང་བ་དང་༔ བྱད་ཁ་དྲག་པོས་སྡིག་པ་དང་༔ མཚན་ལྟས་ངན་པ་བྱུང་ཚེའི་དུས༔ རྣལ་འབྱོར་ཉམས་ཆག་བསྐང་བའི་ཕྱིར༔ བསྐང་བ་དྲག་པོ་འདི་བྱའོ༔ བྷྱོ༔ སྙིགས་མ་ལྔ་ཡི་དུས་བྱུང་ཚེ༔ བཀའ་བཞིན་མི་བྱེད་བཀའ་གསང་བཀྲལ༔ གསང་སྔགས་མི་གསང་ནོར་ལ་འཚོང་༔ བོན་དུ་གྱེར་ཞིང་གྲོང་བསྙེན་བྱེད༔ མངོན་དུ་གྱེར་ཞིང་མངོན་སྤྱོད་བྱེད༔ དོན་མི་རྟོགས་ཤིང་ཟོང་དུ་བྱེད༔ ནང་འཐབ་བྱེད་ཅིང་འདུལ་ཁྲིམས་ཉམས༔ སློབ་དཔོན་ཕ་མའི་བཀའ་ངག་བཅག༔ སྐྱེ་བོས་རང་སྡིག་སྤྱོད་པའི་ཚེ༔ དེ་ཚེ་སྲིད་པའི་མ་མོ་འཁྲུག༔ འཁྲུག་པའི་མ་མོ་བསྐང་བར་བྱ༔ བསྐང་ངོ་བསྐལ་པར་ཐུགས་དམ་བསྐང་༔ གཞན་ཡང་མ་མོ་འཁྲུག་པའི་རྒྱུ༔ མཆོད་པ་ལོ་ཟླར་འདས་པ་དང་༔ ཁས་བླངས་དགེ་བ་ཆག་པ་དང་༔ ཡོ་བྱད་ཉམས་དང་རྫས་མ་ཚོགས༔ བཟླས་བརྗོད་བར་ཆད་བྱས་པ་དང་༔ ཕུད་ཉམས་ལྷག་མའི་གཏོར་མ་དང་༔ བདེན་ནམ་མི་བདེན་བསམ་པ་དང་༔ ཐེ་ཚོམ་སོམ་ཉི་ཟོས་པ་དང་༔ གཞན་ཡང་མ་མོ་འཁྲུག་པའི་རྒྱུ༔ སྐུ་ཡི་ཕྱག་རྒྱ་རིང་དུ་སྤང་༔ རྡོ་རྗེ་སློབ་དཔོན་ཐུགས་མ་མཉེས༔ རྡོ་རྗེ་སྤུན་ལ་གདུང་སེམས་མེད༔ སྐུ་ཡི་དམ་ཚིག་ཉམས་གྱུར་པ༔ བསྐང་ངོ་བསྐལ་པར་ཐུགས་དམ་བསྐང་༔ གཞན་ཡང་མ་མོ་འཁྲུག་པའི་རྒྱུ༔ བཟླས་བརྗོད་བསྙེན་པ་རྒྱུན་བཅད་པ༔ གསུང་གི་དམ་ཚིག་ཉམས་པའི་རྒྱུ༔ བསྐང་ངོ་བསྐལ་པར་ཐུགས་དམ་བསྐང་༔ གཞན་ཡང་དམ་ཚིག་ཉམས་པའི་རྒྱུ༔ གསང་བའི་མན་ངག་གཞན་ལ་སྤེལ༔ ཐུགས་ཀྱི་དམ་ཚིག་ཉམས་པའི་རྒྱུ༔ བསྐང་ངོ་བསྐལ་པར་ཐུགས༴ ཏ་ན་ག་ནའི་འཕྲིན་ལས་ལྔ་མ་སྤྱད༔ ཡན་ལག་དམ་ཚིག་ཉམས་པའི་རྒྱུ༔ བསྐང་ངོ་བསྐལ༴ གཙོ་མོའི་སྐུ་ཡི་དམ་ཚིག་ཉམས་པ་ན༔ མཐོ་རིས་ཐར་པའི་ལམ་ཡང་ཆད༔ གསུང་གི་དམ་ཚིག་ཉམས་པ་ན༔ བསྒྲུབ་ཀྱང་དངོས་གྲུབ་མི་འཐོབ་བོ༔ སྔགས་བཟླས་ནུས་པ་མེད་པར་འོང་༔ ཐུགས་ཀྱི་དམ་ཚིག་ཉམས་པ་ན༔ མཁའ་འགྲོའི་ཆད་པ་བཅད་ནས་ནི༔ ངེས་པར་རྡོ་རྗེའི་དམྱལ་བར་འགྲོ༔ དངོས་གྲུབ་མེད་པར་བར་ཆད་འབྱུང་༔ བསྐང་ངོ་བསྐལ་པར༴ ལྷ་མོའི་སྐུ་ཡི་དམ་ཚིག་ཉམས་པ་ན༴ རྒྱལ་པོའི་ཆད་པ་སྦྲུལ་དུག་འབྱུང་༔ མེ་དང་ཆུ་ཡིས་བར་དུ་གཅོད༔ གསུང་གི་དམ་ཚིག་ཉམས་པ་ན༔ སྒྲུབ་པ་གཡེལ་ཞིང་ནུས་མཐུ་ཆུང་༔ སྒྲུབ་པ་བརྩམ་པར་བར་ཆད་འོང་༔ ཐུགས་ཀྱི་དམ་ཚིག་ཉམས་པ་ན༔ ཉམས་ལེན་གཡེལ་ཞིང་བར་ཆད་འོང་༔ བསྐང་ངོ་བསྐལ་པར༴ གཙོ་མོའི་སྐུ་ཡི་དམ་ཚིག་ཉམས་པ་ན༔ འཁོར་ལ་རིམས་ནད་སྨྱོ་འབོག་འབྱུང་༔ དགྲ་རྣམས་ཚེ་དང་ལོངས་སྤྱོད་འཕེལ༔ གསུང་གི་དམ་ཚིག་ཉམས་པ་ན༔ བུ་དང་ཆུང་མ་འཆི་བར་འགྱུར༔ སྙིང་ཡང་མི་དགའ་ཁ་ཡང་འགྱོད༔ ཐུགས་ཀྱི་དམ་ཚིག་ཉམས་པ་ན༔ རང་གི་ཚེ་ལ་བར་ཆད་འོང་༔ མཛེ་དང་རྒྱུ་གཟེར་ན་ཞིང་འབོག༔ བསྐང་ངོ་བསྐལ་པར༴ མ་མོ་སྤྱི་ཡི་དམ་ཚིག་ཉམས་པ་ན༔ རྟག་ཏུ་བསྒྲུབས་ཀྱང་འགྲུབ་དུས་མེད༔ ན་ཚ་དགྲ་དང་མི་འབྲལ་ལོ༔ བསྐང་ངོ་བསྐལ་པར༴ ཧཱུྃ༔ དམ་ཚིག་བསྲུང་བའི་ཕན་ཡོན་ནི༔ གཙོ་མོའི་སྐུ་ཡི་དམ་ཚིག་མ་ཉམས་ན༔ བླ་མེད་བྱང་ཆུབ་གོ་འཕང་འཐོབ༔ གསུང་གི་དམ་ཚིག་མ་ཉམས་ན༔ རྡོ་རྗེའི་ངག་ལ་དབང་ཐོབ་འགྱུར༔ ཐུགས་ཀྱི་དམ་ཚིག་མ་ཉམས་ན༔ འཕྲིན་ལས་རྣམ་བཞི་མངོན་དུ་འགྱུར༔ མཁའ་འགྲོ་མ་བཞི་མངོན་དུ་འཁོར༔ མཐུ་དང་རྫུ་འཕྲུལ་བསམ་མི་ཁྱབ༔ བསྐང་ངོ་བསྐལ༴ ལྷ་མོའི་སྐུ་ཡི་དམ་ཚིག་མ་ཉམས་ན༔ ལྷ་སྲིན་རྒྱལ་པོའི་ཕྱག་བྱས་ནས༔ འདོད་པ་ཁམས་ཀྱི་རྒྱལ་སྲིད་འཐོབ༔ གསུང་གི་དམ་ཚིག་མ་ཉམས་ན༔ སྔགས་བཟླས་མཁའ་འགྲོ་མངོན་དུ་འབྱུང་༔ བར་ཆད་མེད་པར་དངོས་གྲུབ་སྟེར༔ ཐུགས་ཀྱི་དམ་ཚིག་མ་ཉམས་ན༔ བདུད་དང་དགྲ་ཡིས་མི་ཚུགས་ཏེ༔ རྟག་ཏུ་རིམས་ནད་མི་འབྱུང་ངོ་༔ དགྲ་རྣམས་ཐེ་ཚོམ་མེད་པར་འཆི༔ ལྷ་དང་མི་ཡིས་བཀུར་བར་བྱེད༔ ཚེ་རིང་ནོར་དང་ལྡན་པར་འགྱུར༔ བསྐང་ངོ་༴ ཁྲོ་མོའི་སྐུ་ཡི་དམ་ཚིག་མ་ཉམས་ན༔ འཁོར་རྣམས་བཀྲ་ཤིས་དར་ཞིང་རྒྱས༔ དགྲ་དང་བགེགས་རྣམས་ཕུང་བར་བྱེད༔ བསྐང་ངོ་བསྐལ༴ གསུང་གི་དམ་ཚིག་མ་ཉམས་ན༔ བུ་དང་ཆུང་མ་དར་བ་དང་༔ འཁོར་དང་ལོངས་སྤྱོད་རྒྱས་པར་འགྱུར༔ བསྐང་ངོ་༴ ཐུགས་ཀྱི་དམ་ཚིག་མ་ཉམས་ན༔ ཚེ་དང་གྲགས་པ་འཐོབ་པར་འགྱུར༔ ལུས་ལ་ནད་ཀྱིས་མི་ཚུགས་སོ༔ སེམས་ལ་སྡུག་བསྔལ་མི་འབྱུང་ངོ་༔ མཐུ་རྩལ་ཆེན་པོ་འཐོབ་པར་འགྱུར༔ བསྐང་ངོ་བསྐལ༴ མ་མོ་སྤྱི་ཡི་དམ་ཚིག་མ་ཉམས་ན༔ ལྷ་མོ་ནག་མོ་དཔོན་གཡོག་རྣམས༔ རྟག་ཏུ་བདག་དང་མི་འབྲལ་ལོ༔ གང་ལྟར་འདོད་པའི་ལས་རྣམས་འགྲུབ༔ ཅི་ལྟར་བཅོལ་བའི་ལས་རྣམས་བྱེད༔ བསྐང་ངོ་བསྐལ༴ ཧཱུྃ༔ མ་མོ་འཁྲུག་པའི་སྤྱོད་པ་ནི༔ ཡུགས་ས་དག་ལ་ཆགས་པ་དང་༔ སྦྲུམ་མ་མི་དགར་བཅུག་པ་དང་༔ ཕ་མེས་བུ་ཚ་སྤང་བ་དང་༔ བོང་བུ་བཙོག་བརྡུང་བསྐུར་བ་དང་༔ རལ་གྲི་དག་ལ་མ་མོས་དང་༔ རྨ་བྱ་རིང་དུ་སྤང་བ་དང་༔ ཁུ་བ་དཀར་དམར་མ་བསྟེན་དང་༔ མ་ལ་དད་པ་ལོག་པ་དང་༔ ནེའུ་ལེའི་རྐྱལ་བ་བཀྲལ་བ་དང་༔ ཤིང་ལོ་རླུང་ཁྱེར་མ་བཟུང་དང་༔ རྡོ་སོལ་ཆུ་ལ་བསྐུར་བ་དང་༔ འཚུབ་མ་མཐོང་ན་མ་མོས་དང་༔ རྗེས་ཆགས་བྱས་དང་རཀྟ་སྤངས༔ ཡོངས་སུ་མ་སྨིན་སེམས་ཅན་ལ༔ ལྷ་ཡི་ཁ་དོག་བསྟན་པ་དང་༔ སྙིང་པོ་སྔགས་བཟླས་འཆལ་བ་དང་༔ ཕྱག་རྒྱ་གཞན་ལ་བསྟན་པ་དང་༔ རྟགས་དང་དམ་ཚིག་ཟློ་བ་དང་༔ མཚན་མ་གཞན་ལ་ཟློ་བ་དང་༔ དུས་ཀྱི་མཆོད་པ་ཆག་པ་དང་༔ གྲངས་ཀྱི་བསྙེན་པ་མ་ཐེམས་དང་༔ སངས་རྒྱས་སྐུ་གཟུགས་མ་བྲིས་དང་༔ བྲམ་ཟེར་མཆོག་སྲིད་སྤངས་པ་དང་༔ དམ་ཚིག་ཕྱག་རྒྱ་མ་བསྟེན་དང་༔ བྱ་ནག་ལུག་ནག་མ་བསྟེན་དང་༔ མཆེད་དང་ལྕམ་དྲལ་ཞེ་བཅད་པས༔ མ་མོ་དཔོན་གཡོག་འཁྲུག་པར་འགྱུར༔ བསྐང་ངོ་བསྐལ་པར༴ གཞན་ཡང་མ་མོ་འཁྲུག་པའི་རྒྱུ༔ མ་ཉེས་བགེགས་ཆེན་བཏགས་པ་དང་༔ ས་བདག་ཀླུ་གཉན་རྒྱུད་དཀྲུགས་དང་༔ དམ་བཅའ་ཉམས་སུ་བཅུག་པ་དང་༔ མི་ཐུབ་ལྷ་འདྲེར་དོ་བསྡོས་པས༔ འཇིག་རྟེན་ལྷ་འདྲེ་ཐམས་ཅད་དང་༔ སྣང་སྲིད་མ་མོ་འཁྲུག་པའི་རྒྱུ༔ བསྐང་ངོ་བསྐལ༴ གཞན་ཡང་མ་མོ་འཁྲུག་པའི་རྒྱུ༔ བཀའ་དྲིན་ཅན་གྱི་སློབ་དཔོན་དེ༔ སྒྱུ་མའི་ནོར་གྱིས་མ་མཉེས་ན༔ རིན་ཆེན་གདམས་ངག་མི་སྟེར་བས༔ དངོས་གྲུབ་་འཐོབ་པའི་རྒྱུ་ཡང་མེད༔ རང་ཉིད་ཤེས་རབ་ཆུང་བ་ཡི༔ དོན་རྣམས་ལོག་པར་བསྒྲུབས་ནས་ཀྱང་༔ འཇིག་རྟེན་མ་མོ་འཁྲུག་པར་འགྱུར༔ བསྐང་ངོ་བསྐལ༴ གཞན་ཡང་མ་མོ་འཁྲུགས་པའི་རྒྱུ༔ མཚན་མ་ཅུང་ཟད་བུལ་བའི་ཚེ༔ མ་མོ་གནད་ལ་བོར་བ་དང་༔ མི་མཐུན་འཁོར་ལོ་བཅས་བྱས་ནས༔ མ་མོ་འཁྲུགས་པའི་སྔགས་ཀྱང་བཟླས༔ སེམས་རྟོག་བྱེད་ཅིང་ལས་ལ་གཟིར༔ སེམས་ཁྲོ་ང་རོ་མི་སྙན་པས༔ དམ་དུ་བདར་ཞིང་གཡབ་མོ་བརྡེབ༔ དེ་ཚེ་སྲིད་པའི་མ་མོ་འཁྲུག༔ མ་མོ་འཁྲུག་པས་འཇིག་རྟེན་དུ༔ མི་མཐུན་སྣ་ཚོགས་འབྱུང་བར་འགྱུར༔ འཁྲུག་པའི་མ་མོ་བསྐང་བར་བྱ༔ བསྐང་ངོ་བསྐལ་པར༴ གཞན་ཡང་མ་མོ་འཁྲུགས་པའི་རྨིས་ལྟས་ནི༔ གཅན་གཟན་འཁྲུག་ཅིང་འཐབ་པ་དང་༔ བྱ་ནག་རྣམས་ཀྱང་ནང་འཐབ་བྱེད༔ མ་མོ་ནང་འཐབ་མཚོན་གྱི་ཆར་པ་འབེབས༔ མེ་ཡིས་ལུས་ལ་ཚིག་ཉམས་བྱེད༔ བུད་མེད་སྨྲ་བ་མང་པོ་དང་༔ ངུ་འབོད་བྱེད་ཅིང་ཐལ་མོ་རྡེབ༔ ངོ་འཛུམ་ནག་ཅིང་ཁ་དོག་ནག༔ གོས་ཀྱང་ཁ་དོག་ངན་པ་དང་། དགྲ་བྱུང་ཟེར་ཞིང་ཕུ་མདར་རྒྱུག༔ གཅིག་ལ་གཅིག་ཀྱང་རྒོལ་བར་འགྱུར༔ ནང་མི་རྣམས་ཀྱང་ནང་འཐབ་བྱེད༔ འཁོར་ཡང་མི་མཐུན་དབྱེན་ལ་དགའ༔ བདག་ཀྱང་མི་དགའ་སེམས་ཡིད་འཕྱོ༔ ཡིད་ལ་མི་འདོད་སྣ་ཚོགས་འབྱུང་༔ འཇིག་རྟེན་འདིར་ཡང་གཟའ་འཁྲུགས་དང་༔ སྐར་མདའ་ལྷུང་དང་ས་གཡོས་དང་༔ འབྲུག་དང་ཐོག་ཆོམ་རྒྱུན་མི་འཆད༔ ཁྲག་གི་ཆར་པ་དམར་པོ་འབབ༔ ལྷོ་འུར་སེར་པོ་ནག་པོ་དང་༔ སྔོན་པོ་དམར་པོ་འབྱུང་བར་འགྱུར༔ ཁྲག་གི་ཆར་པས་ཁམས་གསུམ་གང་༔ དུས་མིན་ཁ་ཆར་དྲག་པོ་འབེབས༔ འཚུབ་མ་དམར་ནག་རི་ཀླུང་གང་༔ མི་ལ་སྲོག་ཆགས་ཐམས་ཅད་སྡང་༔ ས་རིམ་པ་དགུ་ཡི་འོག་ཤེད་ནས༔ གཤིན་རྗེ་ཨ་ཝ་གླང་མགོ་ཡང་༔ མཛེ་ནད་རྣམ་པ་སྣ་ཚོགས་གཏོང་༔ གདོན་དང་ནད་ཀྱང་མང་བར་བྱེད༔ དེ་ཚེ་བསྐང་བར་བྱེད་པ་ཡིན༔ བསྐང་ངོ་བསྐལ་པར་ཐུགས་དམ་བསྐང་༔ གཞན་ཡང་མ་མོ་འཁྲུག་པའི་ཚེ༔ ཚད་ནད་འབྲུམ་ནད་སྣ་ཚོགས་གཏོང་༔ རིམས་ནད་སྣ་ཚོགས་གཏོང་བར་བྱེད༔ གློ་བུར་ན་ཚ་འབྱུང་བར་འགྱུར༔ ཕྱུགས་དང་ནོར་ཡང་གདོན་གྱིས་འཁྱེར༔ དེ་ཚེ་བསྐང་བ༴ བསྐང་ངོ་བསྐལ༴ གཞན་ཡང་མ་མོ་འཁྲུག་པའི་རྟགས༔ ཁྲོ་ཞིང་མི་གདུག་གཟུགས་སུ་སྟོན༔ རྒྱབ་ཀྱིས་ཕྱོགས་པར་གཟུགས་སུ་སྟོན༔ འཁང་ར་བྱེད་ཅིང་གྲིབ་མ་བརྡུང་༔ དེ་ཚེ་རྐུབ་དང་བྷ་ག་སྟོན༔ དེ་ཡང་མ་མོ་འཁྲུགས་པའི་རྟགས༔ དེ་ཚེ་བསྐང་བ༴ བསྐང་ངོ་བསྐལ༴ གཞན་ཡང་མ་མོ་འཁྲུགས་པའི་རྟགས༔ རལ་གྲི་ཆག་གམ་བོང་བུ་འཐེང་༔ དྲེལ་གྱིས་འཕྲས་དང་རྨ་བྱ་ནོག༔ ཟླ་བ་རྒས་དང་ཉི་མ་ཐལ༔ མེ་ཡིས་ཚིག་གམ་ཆུ་ཡིས་འཇིག༔ དེ་ལྟར་འཁྲུག་པའི་མ་མོ་ཡང་༔ བསྐང་ངོ་བསྐལ་པར༴ གཞན་ཡང་མ་མོ་འཁྲུགས་རྟགས་ལ༔ བྱ་ནག་གཏོར་མ་མི་ཟ་དང་༔ ཅ་རོག་བྱེད་ཅིང་ཕར་ལ་འབྲོས༔ འཐིབ་འཐིབ་ནོན་དང་ཐལ་ཐལ་སྨྲ༔ རིང་གྲགས་བྱེད་ཅིང་འབྲོས་འགྲོགས་བྱེད༔ བུ་མེད་མང་པོ་ངུ་བ་དང་༔ བཀྲ་མི་ཤིས་པའི་ཚིག་ཀྱང་བརྗོད༔ རང་ཉིད་གཅེར་བུར་འདུག་པ་དང་༔ གོས་ཀྱི་ཁ་དོག་ངན་པ་དང་༔ འཚུབ་མ་ཐུར་དུ་འཁྱིལ་བ་དང་༔ སྐེད་པ་ཆད་དམ་རལ་བ་དང་༔ ཐུར་དུ་རྒྱུག་ཅིང་མུན་པ་ནག༔ དེ་ཡང་མ་མོ་འཁྲུགས་པའི་རྟགས༔ འཁྲུག་པའི་མ་མོ་བསྐང་བར་བྱ༔ བསྐང་ངོ་བསྐལ༴ གཞན་ཡང་མ་མོ་འཁྲུག་རྟགས་ལ༔ འཁྲོ་ཞིང་ངོ་ནག་ཆོ་ངེ་འདེབས༔ མཚོན་ཕྱུང་དགྲ་བྱུང་ངུ་ཞིང་འབོད༔ འཇིག་རྟེན་བུད་མེད་མང་པོ་ནི༔ ངུ་འབོད་ཐལ་མོ་རྡེབ་ཤིང་འབྲོས༔ ངོ་ནག་བྱེད་ཅིང་ཉེ་མི་ཉན༔ དེ་མ་ལྟར་བསྟེན་པའི་ཉམས་རྟགས་ཡིན༔ བསྐང་ངོ་བསྐལ༴ གཞན་ཡང་ཁྲེལ་འཛེམ་བྱེད་ཅིང་ལྐོག་ན་གབ༔ ངོ་ནག་འཐབ་མོ་བྱེད་ཅིང་འོང་༔ དེ་སྲིང་ལྟར་བསྟེན་པའི་ཉམས་རྟགས་ཡིན༔ བསྐང་ངོ་བསྐལ༴ འཐབ་མོ་འཚང་འབྲུ་བསངས་ཤིང་བྱེད༔ མི་གཏམ་ཕར་ལ་བྱོལ་ཞིང་འགྲོ༔ དེ་མཛའ་ལྟར་བསྟེན་པའི་ཉམས་རྟགས་ཡིན༔ བསྐང་ངོ་བསྐལ༴ མཁའ་འགྲོ་བསྐང་བས་མཉེས་གྱུར་ཅིག༔ གཞན་ཡང་མཆུ་འབུག་བྱེད་ཅིང་ལྐོག་ན་གབ༔ ལྟོ་འཁང་བྱེད་ཅིང་ངོ་འཛུམ་ནག༔ འཐབ་མོ་བརྡེག་གོ་ཞེས་ཀྱང་བརྗོད༔ དེ་བྲན་ལྟར་བསྟེན་པའི་ཉམས་རྟགས་ཡིན༔ བསྐང་ངོ་བསྐལ༴ གཞན་ཡང་མ་མོ་འཁྲུགས་པའི་རྟགས༔ བོང་བུ་བུབ་ཅིང་འཆོང་འགྲོས་བྱེད༔ བསད་དོ་བཅད་དོ་རྒོལ་བར་མཐོང་༔ རླུང་ནག་འཚུབ་མ་དྲུང་དུ་འཁྱིལ༔ ཚུར་ལ་མི་འོང་ཕར་ལ་འགྲོ༔ གཅན་གཟན་འཕར་སྤྱང་མང་པོ་ནི༔ ཤ་ཟ་འདོད་ཟེར་ཞིང་ཕར་ལ་འགྲོ༔ འབུད་དུང་བཟུང་བའི་བུ་མེད་ཀྱིས༔ ན་འོང་ཚ་འོང་ཟེར་ཞིང་ཕར་ལ་འགྲོ༔ བུད་མེད་རྐུབ་དང་བྷ་ག་སྟོན༔ ཟ་འདོད་སྦྱོར་འདོད་ཟེར་ཞིང་ངུ་༔ ཚུར་ལ་མི་འོང་ཕར་ལ་ཁྲོ་ཞིང་འགྲོ༔ སྤྱི་ཡི་མ་མོའི་ཉམས་རྟགས་ཡིན༔ དེ་ཚེ་བསྐང་བར་བྱེད་པ་ཡིན༔ བསྐང་ངོ་བསྐལ༴ ཐུགས་དམ་བསྐང་ངོ་དངོས་གྲུབ་སྩོལ༔ གཞན་ཡང་མ་མོ་འཁྲུག་པའི་རྟགས༔ བུད་མེད་ཤིན་ཏུ་ངུ་བ་དང་༔ བོང་བུ་ཤིའམ་ཆག་པ་དང་༔ རལ་གྲི་ཆག་གམ་ནེའུ་ལེ་ཤི༔ མེ་རླུང་ལྕགས་སྒྲོག་ཤིའམ་ཆག༔ སྨྱོ་དང་ན་དང་ཚ་བ་དང་༔ ངུ་འབོད་འཁུན་དང་བསྐྱུག་པ་དང་༔ བརྒྱལ་ནད་གློ་བ་ན་བ་དང་༔ རྣག་ཁྲག་འོང་དང་རྨ་གསར་འབྱུང་༔ ཤི་དང་ན་དང་ཚ་བ་དང་༔ བྱིང་དང་རྨུགས་དང་འཐིབས་པའི་ཚེ༔ དེ་ཚེ་བསྐང་བ་བྱེད༴ བསྐང་ངོ་བསྐལ༴ དགྲ་གཟུགས་མདུན་དུ་བཞག་བྱས་ནས༔ མི་ཁྲག་རྟ་ཁྲག་མང་པོ་སྦྱར༔ ལྷ་གཉན་མང་པོ་དཔང་དུ་བཙུག༔ གནམ་ལ་འོ་དོད་བོས་ནས་ནི༔ ཉིན་མཚན་གྱེར་མོ་བྱས་གྱུར་ཀྱང་༔ དམིགས་བྱ་མི་འཆི་ཡར་ལ་འཕེལ༔ ཡི་ཆད་དང་ནི་ལག་ན་ཡང་༔ དེ་ཚེ་བསྐང་བ༴ བསྐང་ངོ་བསྐལ༴ གཞན་ཡང་བར་ཆད་འོང་བའི་རྟགས༔ རང་ཡང་འཇིགས་ཤིང་འགྲོ་སྙིང་འདོད༔ གཉིད་ཀྱང་མི་འོང་སེམས་མི་དགའ༔ སྐྱོ་ཞིང་བཀྲེས་ལ་ངུ་སྙིང་འདོད༔ བུད་མེད་གཟུགས་མཐོང་སྨད་དང་བྷ་ག་སྟོན༔ དེ་ཚེ་བསྐང་བ༴ བསྐང་ངོ་བསྐལ༴ གཏོར་མ་དུས་ལས་ཡོལ་བའི་ཚེ༔ མོ་མཚན་དང་ནི་སྔོན་གྱི་དབང་རྟགས་སྟོན༔ དུད་པ་འཁྲིག་ཅིང་བུད་མེད་གླལ་བ་མཐོང་༔ དེ་ཚེ་བསྐང་བ༴ བསྐང་ངོ་བསྐལ༴ བུད་མེད་ངུ་བ་མཐོང་ན་ཉམས་རྟགས་ཡིན༔ བུད་མེད་མང་པོ་འདུས་ནས་ནི༔ མིག་ནི་བཙུམ་ན་ཏིང་འཛིན་གཡེལ་བའི་རྟགས༔ ཐལ་མོ་རྡེབ་ན་དམ་རྫས་མ་ཚང་རྟགས༔ ལྕེ་རྩེ་སྟོན་ན་སྙིང་པོ་ཆད་པའི་རྟགས༔ སོ་སྒྲ་བསྒྲིག་ན་འཐབ་མོ་འོང་བའི་རྟགས༔ འཁྲོས་པར་བྱུང་ན་བར་ཆད་འོང་བའི་རྟགས༔ ངོ་ལ་མཆི་རིས་བཀྲ་ན་རིམས་ནད་འོང་བའི་རྟགས༔ དེ་ཚེ་བསྐང་༴ བསྐང་ངོ་བསྐལ༴ སྦྱོར་བ་བྱེད་ན་དངོས་གྲུབ་སྟེར་བའི་རྟགས༔ རྒྱང་གླུ་ལེན་ན་འགྲུབ་རྟགས་ཉེ་བའི་རྟགས༔ གར་སྟབས་བྱེད་ན་ཅི་བསམ་འགྲུབ་པའི་རྟགས༔ གླིང་བུ་བུས་ན་གཏོར་མ་འདོད་པའི་རྟགས༔ འཕྲེང་བ་འདྲེན་ན་སྦྱིན་སྲེག་འདོད་པའི་རྟགས༔ སྙིང་རྣམས་ཐོགས་ན་རང་ལ་ཆགས་པའི་རྟགས༔ མེ་ལོང་ཐོགས་ན་ཆུང་མའི་ལུས་ལ་ཆགས་པའི་རྟགས༔ སྟངས་སྟབས་བྱེད་ན་སློབ་མའི་ལུས་ལ་ཆགས་པའི་རྟགས༔ གོས་ལ་མེ་རིས་བྱུང་ན་སྡོམ་པ་ཉམས་པའི་རྟགས༔ དེ་ཚེ་བསྐང་༴ བསྐང་ངོ་བསྐལ༴ མ་མོ་བསྒྲུབ་ཅིང་དབང་དུ་མ་འདུས་ན༔ མི་སྡུག་གཟུགས་སུ་སྤྲུལ་ཅིང་རྗེ་མོར་སྤྲུལ༔ གཅན་གཟན་ཟར་འོང་མང་པོས་ཕྱག་སྤྲུགས་སོ༔ དེ་ཚེ༴ བསྐང་ངོ་༴ སྒྲུབ་པ་ཐེམས་པའི་རྟགས་སུ་རྒྱང་གླུ་ལེན༔ བར་ཆད་འོང་བའི་རྟགས་སུ་འབག་འབུག་བཟློ༔ དེ་ཚེ༴ བསྐང་ངོ་༴ མ་མོ་བཞད་ན་དགྲ་བགེགས་སྒྲོལ་བའི་རྟགས༔ སྦྱོར་བ་བྱེད་ན་དངོས་གྲུབ་སྟེར་བའི་རྟགས༔ བྲོ་གར་བྱེད་ན་ཅི་བསམ་འགྲུབ་པའི་རྟགས༔ འཛུམ་པར་བཞད་ན་རང་ཉིད་ཚེ་རིང་རྟགས༔ ཤ་བ་ཞོན་ན་དཀོར་ནོར་འཕེལ་བའི་རྟགས༔ དེ་ཚེ༴ བསྐང་ངོ་༴ སྔགས་བཟླས་ནུས་པའི་ཏིང་འཛིན་བསྐྱེད་ཙ་ན༔ རྡོ་རྗེ་རྩ་བ་དབུས་ཀྱི་ནམ་མཁའ་ལ༔ བྱང་ཆུབ་སེམས་ཀྱི་དགའ་བ་བསྐྱེད་ཙ་ན༔ མ་མོ་མཁའ་འགྲོ་རང་ལ་ཤར་བའི་རྟགས༔ དཀར་མོ་རལ་པ་ཅན་ཞིག་བཞད་ཅིང་བྱུང་བ་ན༔ གསང་བ་ཡེ་ཤེས་དངོས་གྲུབ་སྟེར་བའི་རྟགས༔ ནག་མོ་རལ་པ་ཅན་ཞིག་བྱུང་བ་ན༔ འདོད་ཁམས་དབང་སྡུད་མཐུ་རྩལ་སྟེར་བའི་རྟགས༔ དམར་མོ་རལ་པ་ཅན་ཞིག་བྱུང་བ་ན༔ འཇིག་རྟེན་དབང་འདུས་མཐུ་རྩལ་སྟེར་བའི་རྟགས༔ སེར་མོ་ཐོད་ཕྲེང་ཅན་ཞིག་བྱུང་བ་ན༔ ཚེ་དབང་ལོངས་སྤྱོད་དངོས་གྲུབ་སྟེར་བའི་རྟགས༔ དེ་ཚེ༴ བསྐང་ངོ་༴ རྫས་རྣམས་ལུད་དང་མུན་པ་ནག༔ མེ་ཏོག་ཆར་འབབས་འབྲུག་སྒྲ་རླུང་དམར་དང་༔ བུད་མེད་གཟུགས་མཐོང་འཇའ་ཚོན་རླུང་དམར་སྟོན༔ དེ་ཚེ་༴ བསྐང་ངོ་༴ སྣོད་སྟོང་ཐོགས་པ་རྨིས་ན་དོན་མི་འགྲུབ༔ དེ་ཚེ་བསྐང་༴ བསྐང་ངོ་བསྐལ༴ མ་མོའི་གཟུགས་ཀྱི་མཚན་མ་ནི༔ མངོན་སུམ་བྱུང་ངམ་རྟགས་ཀྱི་རྨི་ལམ་གསལ༔ དངོས་གྲུབ་བླང་ཕྱིར་ཡང་ནས་ཡང་དུ་བསྐང་༔ ད་ནི་མ་མོ་འབོད་པའི་དམ་རྫས་ལྔ༔ གཡབ་དར་ཧསྟ་མི་ཚིལ་དང་༔ ལྕོག་ཞུན་བདུག་སྤོས་དག་གིས་བསྐང་༔ མ་མོ་བསྟེན་པའི་རྫས་དྲུག་ནི༔ ཐོད་པ་ལྟག་སྤྲོད་སྐུ་མཁར་དང་༔ ཐོད་ཚལ་རལ་གྲི་གཡང་གཞི་དང་༔ བྱ་ནག་ཤེལ་ནག་གོས་ནག་གིས༔ བསྐང་ངོ་བསྐལ་པར་ཐུགས་དམ་བསྐང་༔ མ་མོ་མཆོག་གི་བསྐང་རྫས་ནི༔ འགོའུ་རི་ཤ་དེ་མོའི་ཤ༔ གྲི་ཤ་དབང་པོ་རྣམ་པ་ལྔ༔ འཆི་ཀའི་མཚལ་ཐིག་མི་སྙིང་དང་༔ ཤ་ཁྲག་སྣ་ཚོགས་བདུད་རྩི་དང་༔ གུར་གུམ་མཚལ་ཁྲག་ཨ་མྲྀ་ཏ༔ ཛ་གད་ཤེལ་ནག་བྱང་ཆུབ་སེམས༔ མ་མོ་རྣམས་ཀྱིས་དམ་ཚིག་བསྐང་༔ མུ་མཐར་ཁྱབ་པས་ཐུགས་དམ་བསྐང་༔ བསྐང་ངོ་བསྐལ༴ མ་ལྟར་བསྟེན་པའི་འཁྲུག་བསྐང་ནི༔ ན་ཆུང་མཚལ་དང་མི་དབང་ཤ༔ རཀྟ་བདུད་རྩི་ཤ་ཆེན་དང་༔ དབུགས་མེད་སྲོག་མེད་ཤ་མེད་དང་༔ རུས་མེད་རྣམས་ཀྱིས་ཐུགས་དམ་བསྐང་༔ བསྐང་ངོ་༴ སྲིང་ལྟར་འཁྲུག་པ་བསྐང་བ་ནི༔ ཁཱ་ཏའི་ཤ་དང་བཞད་ཀྱི་ཤ༔ དཀར་དམར་ཟངས་ཀྱི་ཀླད་པ་དང་༔ མེ་ཏོག་ཤིང་ཐོག་རྣམས་ཀྱིས་ཐུགས་དམ་བསྐང་༔ བསྐང་ང་ོ༴ བྲན་ལྟར་འཁྲུག་པ་བསྐང་བ་ནི༔ དྲེལ་གྱི་ཤ་དང་སྤྱང་མོའི་ཤ༔ རྟ་ནག་ཤ་དང་རཀྟས་བསྐང་༔ བསྐང་ངོ་༴ མཛའ་ལྟར་འཁྲུགས་པ་བསྐང་བ་ནི༔ ངང་བ་དང་ནི་གསོ་བྱ་དང་༔ བྱ་ནག་དང་ནི་ལུག་ནག་དང་༔ ཨ་མྲྀ་ཏ་ཡིས་ཐུགས་དམ་བསྐང་༔ བསྐང་ངོ་༴ རྗེ་ལྟར་འཁྲུག་པ་བསྐང་བ་ནི༔ རཀྟ་སྨན་དང་ཀླད་པ་དང་༔ དམ་བདར་འབོད་ཅིང་ཟིལ་གྱིས་མནན༔ བདུད་རྩི་དྲངས་ཤིང་གསོལ་བ་འདེབས༔ བསྐང་ང་ོ༴ ཐུགས་དམ་བསྐང་ལ་དབང་དང་དངོས་གྲུབ་སྩོལ༔ ཡང་གཅིག་ཐུགས་དམ་བསྐང་བ་ནི༔ ཏྲི་ཤུ་ལ་ཡི་ཕྱག་རྒྱས་ཐུགས་དམ་བསྐང་༔ ཁ་ཊཱ་ཾཏྲི་ཤུ་མུ་ཏྲས་ཐུགས་དམ་བསྐང་༔ འབྲུ་ཟན་ངར་གྱིས་ཐུགས་དམ་བསྐང་༔ བྱ་གཅན་སྣ་དགུའི་གཟུགས་ཀྱིས་ཐུགས་དམ་བསྐང་༔ གོམ་པའི་སྟབས་ཀྱིས་གར་བྱེད་ཐུགས་དམ་བསྐང་༔ བྷནྡྷ་རཀྟས་བཀང་བས་ཐུགས་དམ་བསྐང་༔ བདུད་རྩི་སྨན་དང་བཅས་པའི་ཐུགས་དམ་བསྐང་༔ སྦྱིན་སྲེག་མཆོད་པ་ཆེན་པོས་ཐུགས་དམ་བསྐང་༔ ཤ་ཆེན་སྙིང་དང་དམ་རྫས་དང་༔ གླང་པོ་ཆེ་ཡི་རྣམ་ཁུ་དང་༔ བྱ་རིགས་ཤ་དང་དེ་མོའི་ཤ༔ དེ་མོའི་སྒོ་ང་ལ་སོགས་པ༔ སྒོ་ངའི་ཚོགས་ཀྱིས་ཐུགས་དམ་བསྐང་༔ ཐུགས་དམ་བསྐང་ལ་དངོས་གྲུབ་སྩོལ༔ ཞིང་ཆེན་ཁོག་པ་དུར་ཁྲོད་དང་༔ ཤ་ཁྲག་རྣམ་པ་སྣ་ཚོགས་ཀྱི༔ འཇིག་རྟེན་འདས་དང་མ་འདས་ཀྱིས༔ མ་མོ་མཁའ་འགྲོ་རྣམས་ཀྱི་ཐུགས་དམ་བསྐང་༔ བསྐང་ངོ་༴ རས་སུ་མི་མགོ་གཏུམས་པ་ལ༔ སྨན་མོ་རྣམས་ཀྱི་མིང་བྲིས་ནས༔ བོང་བུ་ཞོན་ནས་སྔགས་པས་བཀུག༔ འབྲས་ཟན་ཤ་ཆེན་ཨ་མྲྀ་ཏ༔ ཤ་ཁྲག་སྙིང་དང་མགོ་ཡིས་ཐུགས་དམ་བསྐང་༔ རིན་ཆེན་རྣམ་པ་སྣ་ཚོགས་པ༔ སྣ་ཚོགས་སྦྱར་བའི་བདུག་སྤོས་དང་༔ ན་ཆུང་སྙིང་དང་མཚལ་གྱིས་ཐུགས་དམ་བསྐང་༔ བསྐང་ངོ་༴ ཐུགས་དམ་བསྐང་ངོ་དངོས་གྲུབ་སྩོལ༔ ཙིཏྟ་རྩ་ལག་མ་ཉམས་དང་༔ བུ་ཆུང་སྦུ་གུ་མ་ཉམས་དང་༔ ན་ཆུང་རང་བྱུང་མཚལ་དང་ནི༔ བྷནྦྷ་མཚན་ལྡན་ནང་དུ་ནི༔ སྨན་དང་མཚལ་གྱིས་བཀང་བས་བསྐང་༔ བསྐང་ངོ་༴ ཐུགས་དམ་བསྐང་ལ་དངོས་གྲུབ༴ གླང་ཆེན་ཀླད་དང་མི་དབང་ཤ༔ ནེའུ་ལེ་དང་རྨ་བྱ་དང་༔ བུ་མོ་གཙང་མར་སྦྱོར་བ་ལས༔ བྱང་ཆུབ་སེམས་ཀྱི་མཆོད་པས་ཐུགས་དམ་བསྐང་༔ བསྐང་ངོ་༴ ཐུགས་དམ་བསྐང་ངོ་དངོས༴ བྱ་ནག་ཤེལ་ནག་བོང་ནག་དང་༔ སྨན་དང་གཏོར་མ་མང་པོ་དང་༔ ཤིང་འབྲས་མེ་ཏོག་སྣ་ཚོགས་དང་༔ ཤ་ཁྲག་མི་དབང་རྡོ་སོལ་དང་༔ རལ་གྲི་ལ་སོགས་རྫས་ཀྱིས་ཐུགས་དམ་བསྐང་༔ བསྐང་ངོ་༔ ཐུགས་དམ་བསྐང་ངོ་དངོས༴ ཡང་གཅིག་ཐུགས་དམ་བསྐང་བ་ནི༔ སྲོག་མེད་མ་ནི་སྲོག་གིས་ཐུགས་་དམ་བསྐང་༔ དབུགས་མེད་མ་ནི་དབུགས་ཀྱིས་ཐུགས་དམ་བསྐང་༔ ཤ་མེད་མ་ནི་ཤ་ཡིས་ཐུགས་དམ་བསྐང་༔ རུས་མེད་མ་ནི་རུས་ཀྱིས་ཐུགས་དམ་བསྐང་༔ ཁྲག་མེད་མ་ནི་ཁྲག་གིས་ཐུགས་དམ་བསྐང་༔ བསྐང་ངོ་བསྐལ་བར༴ ཐུགས་དམ་བསྐང་ངོ་དངོས༴ གཞན་ཡང་ཐུགས་དམ་བསྐང་བ་ནི༔ བྱ་ནག་ལུག་ནག་ལ་སོགས་བ༔ ལྕོགས་ཁྲའི་དབུགས་ཀྱིས་ཐུགས་དམ་བསྐང་༔ མི་དབང་བྱ་ལུག་སྙིང་གིས་ཐུགས་དམ་བསྐང་༔ ཀེང་རུས་རྒྱུས་པས་སྦྲེལ་བས་ཐུགས་དམ་བསྐང་༔ རྒྱུ་མ་ནང་ཁྲོལ་རྣམས་ཀྱིས་ཐུགས་དམ་བསྐང་༔ མོ་རིགས་དག་གི་མངལ་ཁྲག་དང་༔ ན་ཆུང་འབྱུང་བའི་མངལ་ཁྲག་དང་༔ མི་དབང་སྙིང་ཁྲག་རྣམས་ཀྱིས་ཐུགས་དམ་བསྐང་༔ ཐུགས་དམ་བསྐང་ངོ་དངོས༴ ཡང་གཅིག་ཐུགས་དམ་བསྐང་བ་ནི༔ བདག་གི་སྤྱི་བོའི་ཁྲག་དང་ནི༔ སྣ་ཁྲག་བྱ་མོའི་སྙིང་ཁྲག་དང་༔ ཁྲག་སྣ་མང་པོས་ཐུགས་དམ་བསྐང་༔ སྙིང་སྣ་ཚོགས་པས་ཐུགས་དམ་བསྐང་༔ རུས་སྣ་ཚོགས་པས་ཐུགས་དམ་བསྐང་༔ ཤེལ་ནག་སྤྱི་དཀར་དེ་མོའི་རིགས༔ མེད་པ་བསྐང་དང་བསྐང་བར་བཅས༔ བོང་དང་རྟ་དང་གུ་གུ་གླང་༔ ཀླད་པ་རྩ་ཆེན་ཕུག་པའི་ཁྲག༔ སྲིན་ལག་ཁྲག་དང་ཁྲག་སྣའི་ཚོགས༔ གཞན་ཡང་ཁྲག་སྣ་མང་པོ་ཡིས༔ ཡང་ནས་ཡང་དུ་ཐུགས་དམ་བསྐང་༔ ཐུགས་དམ་གཉན་པོ་བསྐང་གྱུར་ཅིག༔ བྱ་ཁྱི་ར་ལུག་གཡག་དང་ནི༔ ཤ་ཁྲག་གཏོར་མ་མང་པོ་དང་༔ སྣ་ཚོགས་སྙིང་གིས་ཐུགས་དམ་བསྐང་༔ ཐུགས་དམ་བསྐང་ངོ་དངོས་གྲུབ་སྩོལ༔ རྡོ་རྗེ་རྒྱལ་པོ་རྒྱལ་ཐེབས་དང་༔ ལས་ཀྱི་གར་མ་གྲོགས་མཆོག་དང་༔ བདག་ཅག་འདིར་འདུས་འཁོར་བཅས་དང་༔ རྒྱུ་སྦྱོར་ཡོན་བདག་འཁོར་བཅས་ལ༔ མི་ལ་ན་ཚ་མ་གཏོང་ཞིག༔ ཕྱུགས་ལ་གོད་ཁ་མ་གཏོང་ཞིག༔ ཞིང་ལ་བཙའ་སད་སེར་གསུམ་མ་གཏོང་ཞིག༔ བདུད་ཀྱི་ཞག་པ་ནག་པོ་ཆོད༔ གཤིན་རྗེའི་ཁྲམ་ཁ་དགྲ་ལ་བསྒྱུར༔ མི་མཐུན་རྐྱེན་དང་བར་ཆད་བཟློག༔ བདག་ཅག་རྣལ་འབྱོར་འཁོར་བཅས་ཀྱི༔ ཚེ་ལ་བར་ཆད་མ་བྱེད་ཅིག༔ སྲོག་ལ་ཧུར་ཐུམ་མ་བྱེད་ཅིག༔ དབུས་ཀྱི་གཙོ་མོ་མ་གཡོ་ལ༔ ཕྱི་ཡི་བསྟན་མ་མ་གཡེལ་ཞིག༔ ཐུགས་དམ་བསྐང་ངོ་དངོས་གྲུབ་སྩོལ༔ བར་ཆད་རྐྱེན་རྣམས་བཟློག་ཏུ་གསོལ༔ བཅོལ་བའི་འཕྲིན་ལས་འགྲུབ་པར་མཛོད༔ གནོད་པར་བྱེད་པའི་དམ་སྲི་དང་༔ དམིགས་པར་བྱེད་པའི་དགྲ་བོ་རྣམས༔ ལོ་དང་ཟླ་བར་མ་བཞག་ཅིག༔ ཞག་དང་ཟ་མར་མྱུར་དུ་སྒྲོལ༔ ད་ལྟ་ཉིད་དུ་མྱུར་དུ་སྒྲོལ༔ མིང་དུ་བྲིས་པའི་དགྲ་བོ་རྣམས༔ མྱུར་དུ་བསྒྲལ་བའི་འཕྲིན་ལས་མཛོད༔ བྱད་ཁ་ཕུར་ཁ་རྦོད་གཏོང་མཐུ༔ ཡས་ཀྱི་བདུད་དང་མས་ཀྱི་སྲི༔ ཕུར་པའི་དབལ་ཟོར་ཆོ་འཕྲུལ་དང་༔ མོ་རྨི་ངན་དང་ལྟས་སྡིག་ངན༔ བན་བོན་ཕུར་ཁ་ངན་བ་དང་༔ མི་ཁ་བྲམ་མཆུ་བཀའ་ཆད་རྣམས༔ སྡང་བྱེད་དགྲ་བོའི་སྟེང་དུ་བཟློག༔ ལོ་ཀག་ཟླ་ཀག་ཟ་མའི་ཀེག༔ དུས་ཚོད་ཀག་དང་གཅོད་འདྲལ་རྣམས༔ སྡང་བྱེད་དགྲ་བོའི་སྟེང་དུ་ཟློག༔ ལྷ་སྲིན་སྡེ་བརྒྱད་དམོད་པའི་མཐུས༔ འཇིག་རྟེན་འདི་ཡི་ལྟས་སྡིག་རྣམས༔ སྡང་བྱེད་དགྲ་བོའི་སྟེང་དུ་ཟློག༔ བདག་ཅག་རྣལ་འབྱོར་འཁོར་བཅས་ཀྱི༔ ཉམས་པ་ཡོད་ན་བསྐང་དུ་གསོལ༔ འགལ་བ་མཆིས་ན་དགྲ་བོའི་སྟེང་དུ་ཟློག༔ ནོར་འཁྲུལ་ཅི་མཆིས་མཐོལ་ལོ་བཤགས༔ ཡེ་ཤེས་ཆེན་པོའི་ངང་དུ་བཞེས་ནས་ཀྱང་༔ ཚངས་པ་མཆོག་གི་དངོས་གྲུབ་སྩལ་དུ་གསོལ༔ ཐུགས་དམ་བསྐང་ལ་རྐྱེན་དབང་ཟློག༔ མི་མཐུན་རྐྱེན་དང་བར་ཆད་སོལ༔ བཅོལ་བའི་འཕྲིན་ལས་འགྲུབ་པར་མཛོད༔ སློབ་དཔོན་པདྨས་མཛད་པའི་མ་མོའི་འཁྲུག་བསྐང་རིན་ཆེན་འཕྲེང་བ་རྫོགས་སོ༔ དེ་ནས་ལྷ་མོའི་བསྐང་བ་བྱེད་དེ་ནས་བཤགས་པ་བྱའོ༔ མ་མོའི་འཁྲུག་བསྐང་ཚར་གྲངས་མང་དུ་བསོག་སྐབས་ཉུང་བསྡུས་ནི༔ བྷྱོ༔ ལྔ་བརྒྱ་དུས་ཀྱི་མཐའ་མ་ལ། །གསང་སྔགས་བོན་གྱེར་དགེ་སྡིག་འཆོལ། དེ་ཚེ་སྲིད་པའི་མ་མོ་ཁྲོས། །མ་མོས་ཁྲོས་པའི་རྟགས་བསྟན་པ། །འཛམ་བུ་གླིང་གི་དབུས་ཕྱོགས་ནས། །བུད་མེད་ནག་མོས་སྟོང་ཁམས་གང་། །ཁ་རླངས་ནག་པོ་གཏོང་བའི་ཚེ། །ནད་ཀྱི་ན་བུན་སྤྲིན་དུ་ཆགས། །དེ་ཚེ་ནད་ཀྱི་བསྐལ་པ་དར། །འབྲུམ་པ་དཀར་ནག་ལྷོག་པ་དང་། །སྐྲངས་ནད་བལ་ལྡག་གཡན་པ་འབྱུང་། །ནད་ཀྱང་མ་མོ་ཁྱོད་ཀྱི་ནད། །རིམས་ཀྱང་མ་མོ་ཁྱོད་ཀྱི་རིམས། །འཁྲུག་པའི་མ་མོའི་ཐུགས་དམ་བསྐང་། །ཐུགས་དམ་བསྐང་བའི་བྱིན་རླབས་ཀྱིས། །བདག་དང་རྒྱུ་སྦྱོར་ཡོན་བདག་ལ། །ནད་ཁ་ཆོད་ལ་རིམས་ཁ་བསྒྱུར། །བར་གཅོད་མི་མཐུན་ཕྱོགས་རྣམས་ཀུན། །སྡང་བའི་དགྲ་བོའི་སྟེང་དུ་ཟློག །བཟློག་བསྒྱུར་འཕྲིན་ལས་དུས་ལ་བབས། །བྷྱོ༔ ལྔ་བརྒྱ་དུས་ཀྱི༴ གསང་སྔགས༴ དེ་ཚེ་སྲིད་པའི༴ མ་མོ་ཁྲོས་པའི༴ འཛམ་བུ་གླིང་གི་ཤར་ཕྱོགས་ནས། བུད་མེད་དཀར་མོས་སྟོང་ཁམས༴ ཁ་རླངས་དཀར་པོ༴ ནད་ཀྱི་ན་བུན༴ དེ་ཚེ་ནད་ཀྱི༴ མཛེ་ནད་ཤུ་བ་གཡན་པ་དང་། །གློ་གཟེར་སྐྱ་རྦབ་རླུང་ནད་འབྱུང་། །ནད་ཀྱང་མ་མོ་ཁྱོད་ཀྱི༴ རིམས་ཀྱང་མ་མོ༴ འཁྲུག་པའི་མ་མོའི༴ ཐུགས་དམ་བསྐང་བའི་༴ བདག་དང་རྒྱུ༴ ནད་ཁ་ཆོད༴ བར་གཅོད་མི་མཐུན༴ སྡང་བའི་དགྲ་བོའི༴ བཟློག་བསྒྱུར༴ བྷྱོ༔ ལྔ་བརྒྱ་དུས་ཀྱི༴ གསང་སྔགས་བོན༴ དེ་ཚེ་སྲིད༴ མ་མོ་ཁྲོས་པའི༴ འཛམ་བུ་གླིང་གི་ལྷོ་ཕྱོགས༴ བུད་མེད་སེར་མོས༴ ཁ་རླངས་སེར་པོ༴ ནད་ཀྱི་ན༴ དེ་ཚེ་ནད་ཀྱི༴ མཁྲིས་པ་ཤ་ཡ་མིག་སེར་དང་། རྒྱ་ནད་ཤ་སེར་ནད་རྣམས་འབྱུང་། །ནད་ཀྱང་མ་མོ༴ རིམས་ཀྱང་མ༴ འཁྲུག་པའི་མ༴ ཐུགས་དམ་བསྐང་བའི་བྱིན༴ བདག་དང་རྒྱུ་སྦྱོར༴ ནད་ཁ་ཆོད༴ བར་གཅོད་མི་མཐུན༴ སྡང་བའི་དགྲ་བོའི༴ བཟློག་བསྒྱུར༴ བྷྱོ༔ ལྔ་བརྒྱ་དུས་ཀྱི༴ གསང་སྔགས་བོན༴ དེ་ཚེ་སྲིད༴ མ་མོ་ཁྲོས༴ འཛམ་བུ་གླིང་གི་ནུབ་ཕྱོགས༴ བུད་མེད་དམར་མོས་སྟོང་༴ ཁ་རླངས་དམར་པོ༴ ནད་ཀྱི་ན་བུན༴ དེ་ཚེ་ནད་ཀྱི༴ ཁྲག་ནད་གཟེར་ཐབས་ལེའུ་བརྒན། རྒྱུ་གཟེར་ཁྲག་སྐྱུག་མཁལ་ནད་འབྱུང་། །ནད་ཀྱང་མ་མོ༴ རིམས་ཀྱང་མ༴ འཁྲུག་པའི་མ༴ ཐུགས་དམ་བསྐང་བའི་བྱིན༴ བདག་དང་རྒྱུ་སྦྱོར༴ ནད་ཁ་ཆོད༴ བར་གཅོད་མི་མཐུན༴ སྡང་བའི་དགྲ་བོའི་༴ བཟློག་བསྒྱུར་འཕྲིན་ལས༴ བྷྱོ༔ ལྔ་བརྒྱ་དུས་ཀྱི༴ གསང་སྔགས་བོན༴ དེ་ཚེ་སྲིད་པའི་མ༴ མ་མོ་ཁྲོས་པའི༴ འཛམ་བུ་གླིང་གི་བྱང་ཕྱོགས༴ བུད་མེད་སྔོན་མོས་སྟོང་༴ ཁ་རླངས་སྔོན་པོ༴ ནད་ཀྱི་ན་བུན༴ དེ་ཚེ་ནད་ཀྱི༴ བལ་ནད་སྨྱོ་འབོགས་རིམས་ནད་དང་། བླ་བརྡོལ་སྨྱོ་སོགས་སྣ་ཚོགས་འབྱུང་༔ ནད་ཀྱང་མ༴ རིམས་ཀྱང་མ་མོ༴ འཁྲུག་པའི་མ་མོའི༴ ཐུགས་དམ་བསྐང་བའི་བྱིན༴ བདག་དང་རྒྱུ་སྦྱོར༴ ནད་ཁ་ཆོད༴ བར་གཅོད་མི༴ སྡང་བའི་དགྲ་བོའི༴ བཟློག་བསྒྱུར་འཕྲིན་ལས༴ བྷྱོ༔ ལྔ་བརྒྱ་དུས་ཀྱི༴ གསང་སྔགས་བོན་གྱེར་དགེ༴ དེ་ཚེ་སྲིད་པའི་མ་མོ༴ མ་མོ་ཁྲོས་པའི་རྟགས༴ འཛམ་བུ་གླིང་གི་དབུས་ཕྱོགས་ནས༔ བུད་མེད་སྨུག་མོས་སྟོང་ཁམས་གང་། ཁ་རླངས་སྨུག་པོ་བཏང་བའི་ཚེ། །མཚོན་གྱི་ན་བུན་སྤྲིན་དུ་ཆགས། །དེ་ཚེ་མཚོན་གྱི་བསྐལ་པ་དར། །གཡུལ་འཁྲུག་འཐབ་རྩོད་སྣ་ཚོགས་དང་། །གྲངས་མེད་མཚོན་ཆའི་འཁོར་ལོ་བསྐོར། །དུས་འཁྲུག་མ་མོ་ཁྱོད་ཀྱི་འཕྲུལ། །མཚོན་ཀྱང་མ་མོ་ཁྱོད་ཀྱི་མཚོན། །འཁྲུག་པའི་མ་མོའི་ཐུགས་དམ་བསྐང་། །ཐུགས་དམ་བསྐང་བའི་བྱིན་རླབས་ཀྱིས། །བདག་དང་རྒྱུ་སྦྱོར་ཡོན་བདག་ལ། །མཚོན་ཁ་ཆོད་ལ་དམག་ཁ་བསྒྱུར། །བར་གཅོད་མི་མཐུན་ཚོགས་རྣམས་ཀུན། །སྡང་བའི་དགྲ་བོའི་སྟེང་དུ་ཟློག །བཟློག་བསྒྱུར་འཕྲིན་ལས་དུས་ལ་བབས།། །།

བསྒྲལ་ལས་ཁྲིགས་སུ་སྡེབས་པ་འཇིགས་རུང་སྤུ་གྲི་འབར་བའི་འཁྲུལ་འཁོར།

དཔལ་སྔགས་ཀྱི་བདག་མོའི་བསྒྲལ་ལས་ཁྲིགས་སུ་སྡེབས་པ་འཇིགས་རུང་སྤུ་གྲི་འབར་བའི་འཁྲུལ་འཁོར་ཞེས་བྱ་བ་བཞུགས་སོ། །རབ་རྣོན་ཡེ་ཤེས་མཚོན་ཆ་གདེངས་ཙམ་གྱིས། །མ་རིག་གཟུང་འཛིན་འཁྲུལ་དགྲ་རྒྱུན་གཅོད་པའི། །ཁྲག་འཐུང་རྒྱལ་པོ་རྡོ་རྗེ་སྟོབས་མཆོག་རྩལ། །སྙིང་ནས་དྲན་ནོ་སྙིང་གི་པདྨོར་རོལ། །གདོད་མའི་དབྱིངས་ལས་སྙིང་རྗེས་ཁྲོས་པའི་ཉམས། །མི་བསྲུན་དྲེགས་ཚོགས་ཡོངས་ཀྱི་གཉེན་པོ་རུ། །རྡོ་རྗེ་སྲིན་པོ་གར་དགུའི་རོལ་པའི་སྐུ། །ལྷག་པའི་ལྷ་མཆོག་ཧེ་རུ་ཀཿལ་འདུད། །དབྱིངས་ཀྱི་ཡུམ་ཆེན་གང་འདུལ་སྒྱུ་འཕྲུལ་གར། །འཇིག་གཟུགས་སྲིན་མོ་ཁྲོས་འདྲའི་རྣམ་འགྱུར་གྱིས། །ལོག་འདྲེན་ཚར་གཅོད་རྒྱལ་བསྟན་སྲུང་བྱེད་མ། །སྲིད་གསུམ་བདག་མོས་དགྱེས་པའི་དཔལ་གྱིས་སྐྱོངས། །གང་གི་ལྷ་སྔགས་ཏིང་འཛིན་རྣོ་ངར་གྱིས། །མི་བཟད་དུག་ཁྲག་རྒྱ་མཚོ་འཁྲུགས་པའི་དབལ། །ལོག་འདྲེན་མཐའ་དག་རྨེག་མེད་བྱེད་པ་ཡི། །རྫས་སྔགས་ལས་ཀྱི་འཕྲུལ་འཁོར་འདིར་མཚུངས་མེད། །དེ་ཕྱིར་རྦོད་གཏོང་མ་མོའི་ཁྲག་ཟོར་གྱིས། །ཞིང་བཅུའི་དགྲ་གདོན་བསྒྲལ་བའི་ལས་ཀྱི་ཁྲིགས། །ལོག་འདྲེན་གདུག་ཅན་སྲོག་དབུགས་རྒྱུན་གཅོད་པའི། །འཇིགས་རུང་སྤུ་གྲི་འབར་བའི་དབལ་དུ་བརྡར། ༈ཅེས་ཚིགས་བཅད་ཅུང་ཟད་ཀྱིས་མདུན་བསུས་ནས། །འདིར་ལས་སུ་བྱ་བ་ཁྲག་ཟོར་ནད་གདོན་ཀུན་འཇོམས་ལག་ལེན་བཀླགས་ཆོག་ཏུ་བསྒྲིགས་པ་ལ་གཉིས་ཏེ། སྦྱོར་བ་ཡོ་བྱད་ཀྱི་བཤམས་དང་། དངོས་གཞི་གྱེར་སྒོམ་གྱི་རིམ་པ་དང་གཉིས་ཀྱི། དང་པོ་ལའང་། ཡར་གཞི་དང་། མར་གཞི་དང་། བསྒྲལ་འདྲེན་གྱི་ཡོ་བྱད་གཞན་བསག་པའོ། །དང་པོ་ནི་སྟེགས་བུ་ཁེབས་ལྡན་གཙང་ཞིང་མཐོ་བའི་ཁར། རིགས་བདག་གི་གཏོར་མ་དང་། ཡི་དམ་གང་ལ་བརྟེན་པའི་མཆོད་གཏོར། དེའི་མདུན་དུ་ལྷ་མོའི་མཆོད་གཏོར་དང་དེའི་གཡས་གཡོན་དུ་བསྐང་མདོས་དང་མངའ་གསོལ་གྱི་གཏོར་མ་མཆོད་གཏོར་ལས་ཟུར་དུ་བཅས་ལ་བཤམས། དེའི་མདུན་ནམ་ཟུར་དུ་བཀའ་སྲུང་མ་མོ་དང་། ཡང་མ་གཞན་ཡང་སྤྱི་སྒོས་ཀྱི་སྲུང་མ་སོ་སོའི་གཏོར་མ་སོགས་མཐོང་རྒྱུད་ལྟར་བྱ་ཞིང་། སྨན་རཀ། ཉེར་སྤྱོད་ལྔ། རྒྱུན་གྱི་གཏོར་འབུལ། སྔོན་འགྲོ་ཆ་གཉིས་ཚོགས་ཀྱི་འཁོར་ལོའི་ཡོ་བྱད་སོགས་མ་ཚང་བ་མེད་པར་ལེགས་པར་བཤམས་བཀོད་བྱའོ། །གཉིས་པ་མར་གཞི་ནི། གཞུང་ནས་བཤད་པ་ལྟར་གྱི་གཡུལ་འཁྲུག་འདྲེ་འཚུབ་ཕུང་ས་སོགས་གདུག་པའི་ས་སྣ་གང་འཛོམ་དུག་ཁྲག་གིས་སྦོལ་ཏེ་སྟེགས་བུ་མདའ་གང་བ་རོ་སོལ་དུག་སྣག་གིས་ནག་པོར་བྱུག་པའི་སྟེང་དུ་དབུས་ཀྱི་ལྟེ་བར་གྲུ་གསུམ་མཐིང་ནག །དེའི་ཕྱི་རིམ་ལ་འཁོར་ལོ་རྩིབས་བདུན་སྔོན་པོ། དེ་རྒྱབ་ཐོད་ར་དང་དེ་རྒྱབ་མེ་རི་དམར་ནག་ཏུ་འབར་བས་བསྐོར་བ་བྲི། དེའི་དབུས་སུ་གཞུང་ལས་བྱད་གདོན་གང་ཡིན་བླ་རྟགས་སྤྲུལ་སྒྱུར་བརྟག་པའི་ཐོད་པར་གསུངས་དེ་བླ་རྟགས་གང་ཡིན། དེའི་གཤེད་དུ་འགྲོ་བའི་ཐོད་པ་དགོས་ཀྱང་། དམིགས་གསལ་མེད་ཚེ་སྤྱི་ཁྱབ་ཙམ་ལ་གྲི་ཐོད་དམ་ཐོད་པ་གླིང་དྲུག་པའམ་དུམ་བུ་དགུ་པ་སོགས་ཡས་མས་ཚང་བའི་ནང་དུ་གཞུང་ནས་བཤད་ལྟར་ཁྲག་སྣ་དུག་སྣ་སོགས་སྦྱར་བའི་ཁྲག་གིས་བཀང་ཞིང་། གཞན་ཡང་བྱ་ནག་གཅན་གཟན་འུག་པ་སོགས་ཀྱི་ཐོད་པ་གང་རྙེད་དུག་ཁྲག་གིས་བཀང་བ་མང་དུ་བཤམས། དེའི་ཁར་ཨམ་དང་ཁྲིའུ་སོགས་ཀྱི་སྟེང་དུ་ཟངས་ལྕགས་ཀྱི་སྣོད་དུ་འབྲུ་ནག་གི་ཕྱེ་ལ་དུག་ཁྲག་གིས་སྦྲུས་པའི་གཏོར་མ་རྩེ་ཁྲུ་གང་ལས་མི་ཆུང་བར་ལྷ་མོའི་ཞལ་གཏོར་རྔམ་བརྗིད་དང་ལྡན་པའི་འཁོར་དུ་དམར་གཏོར་ཟུར་གསུམ་པ་བདུན་དང་། དེའི་རྒྱབ་ཏུ་ཀོང་ཟོར་བཅུ་དྲུག་ཁྲག་དང་རྩང་གིས་བརྒྱན་པས་བསྐོར་ཞིང་དུར་འཇིམ་གྱི་ལྕགས་རིར་རྩང་གི་དྲྭ་བ་དང་རྒྱུ་མའི་ལྡ་ལྡིའི་བརྒྱན་པ་བརྔམ་བརྗིད་མདངས་དང་ལྡན་པར་བྱ་ཞིང་མཚེ་དང་། ཡུངས་དཀར་སྒང་བུ་སོགས་ཀྱང་གཟུག་གོ། །གཙོ་འཁོར་ཚང་མའི་ཙག་གདུགས་དར་ནག་གི་གུར་ཅན་ཡང་གདུགས་ལྟར་ཕུ། དེའི་གཡས་སུ་བཀའ་སྲུང་མ་མོར་དམར་གཏོར་ཟུར་གསུམ་ཁྲག་གིས་བྱུག་ཅིང་མཚེ་ཡུངས་རྩང་གིས་བརྒྱན་པ་མཐེབ་ཀྱུས་བསྐོར་བ་དང་། གཡོན་དུ་ཡང་མ་གཙོ་འཁོར་གསུམ་པ་ཁྲག་རྩང་སོགས་གོང་དང་མཚུངས་པ་སོ་སོའི་སྐུ་ཙག་བཅས། མཐའ་སྐོར་དུ་ཁྲག་གི་ཨརྒཾ་དང་དྲག་པོའི་ཉེར་སྤྱོད་ལྔས་བསྐོར་ཞིང་དྲག་པོའི་ཐུན་གཏོར་ཤ་ཁྲག་གིས་བརྒྱན་པ་རྣམས་བཤམས་པར་བྱ་བ་ནི་མར་གཞིའོ། །བསྒྲལ་འདྲེན་གྱི་ཡོ་བྱད་གཞན་བསག་པ་ནི། མདུན་དུ་གཅན་གཟན་གྱི་ལྤགས་རློན་སོགས་གཡང་གཞིའི་སྟེང་དུ་ལྕགས་སམ་ཕུང་སའི་བྲུབ་ཁུང་ཚད་དང་ལྡན་པའི་ནང་དུ་ཤོག་ལིང་དང་། བྲུབ་ཁུང་གི་ཁར་ལྕགས་སྣོད་དུ་དགྲ་བོའི་ཟག་རྫས་དྲི་མ་དྲུག་དང་གཞུང་ནས་འབྱུང་བའི་མན་ངག་གི་རྫས་སོགས་བསྲེས་པའི་བག་ཟན་ལས་སོ་སོར་བརྒྱད་པ་ཁྲག་གིས་བྱུག་པ་བཤམས་ཤིང་། མཐའ་བསྐོར་དུ་ཐུན་རྫས་དང་མཚོན་ཆ་སྣ་ཚོགས་ཀྱིས་བསྐོར་ཞིང་། གཞན་ཡང་བྱ་འུག་གི་དང་རུ་དང་། གུལ་ཡུངས། གསེར་སྐྱེམ། ཁྲག་ཆང་། རོལ་མོ་སོགས་མངོན་སྤྱོད་ཀྱི་ལས་ལ་འོས་པའི་དགོས་ཆ་ཐམས་ཅད་མ་ཚང་བ་མེད་པར་མངོན་པར་འདུ་བྱ་བ་ནི། སྦྱོར་བ་ཡོ་བྱད་ཀྱི་བཤམས་ཏེ་སྔོན་དུ་འགྲོ་བའི་རིམ་པའོ། །གཉིས་པ་དངོས་གཞི་གྱེར་སྒོམ་གྱི་རིམ་པ་ལའང་དོན་གསུམ་སྟེ། བདག་མདུན་འཛབ་བསྙེན་མཆོད་བསྟོད་བསྐང་གསོལ་ཚོགས་ཀྱི་བྱ་བ་རྣམས་དང་། དངོས་ག །ཞི་བསྒྲལ་ལས་ཟོར་ཟློག །རྗེས་ཟོར་འཕེན་ཚུལ་དང་གསུམ་གྱི། དང་པོ་ནི། ཡི་དམ་གཞན་ལ་བརྟེན་པ་ཡིན་ན། སྔོན་འགྲོའི་ཚིག་བདུན་གསོལ་འདེབས་ནས་བཟུང་བསྙེན་མཚམས་བར་དང་འཛབ་བསྙེན་སོགས་གྲུབ་ནས་ལྷ་མོའི་ལས་བྱང་གནམ་ལྕགས་རལ་གྲི་རྗེ་བླ་མའི་ལྗགས་བསྒྲིགས་ལྟར་གཏོང་སྟེ་ལས་ཀྱི་གཞུང་སྲོང་ཞིང་། བདག་བསྐྱེད་ཡང་དག་གི་བསྙེན་པ་ཅི་མང་དང་། མདུན་བསྐྱེད་ལྷ་མོའི་བསྙེན་པ། སྲུང་ཟློག་གི་བསྒོམ་བཟླས་སོགས་ནན་ཏན་དུ་བྱ་ཞིང་ཐལ་བརྡེབ་བཅས་སོང་ནས། བཀའ་གཏེར་སྤྱི་སྒོས་ཀྱི་གསོལ་མཆོད་དང་། འདི་སྐབས་བཀའ་སྲུང་མ་མོ་དང་ཡང་མའི་གཏོར་མར་འགུགས་བཞུགས་ཙམ་བྱས་ལ་བཞག །བདག་མདུན་སོ་སོའི་ཚོགས་བསྐང་སོགས་མཐོང་བརྒྱུད་ལྟར་བྱ་ཞིང་ཚོགས་ཐ་མ་ཡན་གྲུབ་ནས་ལྷ་མོའི་མངའ་གསོལ་བཅས་མཐར་ཆགས་སུ་བྱའོ། །གཉིས་པ་ནི། གསེར་སྐྱེམས་བཤམས་ཤིང་། ཟན་ལིང་ཁེབས་བསལ། གསེར་སྐྱེམས་བྱིན་གྱིས་རློབ་འདོན་གཏེར་གཞུང་ནས་དམིགས་བསལ་མི་འདུག་ཀྱང་། གཞུང་ལས་མ་ཉེས་ཤགས་འདེབས་གསེར་སྐྱེམས་མཆོད། བདེན་སྟོབས་བརྗོད་ཅིང་དགྲ་བླ་འགུགས། ཅེས་གསུངས་པས་ཡི་དམ་རྟ་མགྲིན་ལྟ་བུ་གང་ཡིན་དེའི་གསེར་སྐྱེམས་གཟུ་དཔང་ཁ་སྒྱུར་བྱ་བའམ། ཡང་ན་ཁོ་བོས་བྱས་པ་ལྟར་རམ། གང་རུང་ཞིག་གཏང་ན་ལེགས་པས་འདི་ལྟར།

གཟུ་དཔང་མ་མོ་ཁྲོས་པའི་གད་རྒྱངས།

གཟུ་དཔང་མ་མོ་ཁྲོས་པའི་གད་རྒྱངས་བདུད་དཔུང་སྙིང་རྩ་འདར་བའི་ང་རོ་ཞེས་བྱ་བ་བཞུགས་སོ། །བགྲངས་ཡས་རྒྱལ་བའི་དཀྱིལ་འཁོར་འབྱམས་ཀླས་པའི། །ཕུལ་བྱུང་མཁྱེན་བརྩེ་ནུས་པའི་མཐུ་སྟོབས་ཅན། །སྣང་སྲིད་ཟིལ་གནོན་རྡོ་རྗེ་ཐོད་ཕྲེང་རྩལ། །འདུད་དོ་གྲུབ་གཉིས་འདོད་འཇོའི་དགའ་སྟོན་སྩོལ། །གསེར་སྐྱེམས་མཆོད་པས་རྩ་གསུམ་མཉེས་བྱས་ནས། །དྲང་ཤན་འབྱེད་ཕྱིར་བདེན་དཔང་གསོལ་བའི་སྨྲེང་། །རབ་འཇིགས་མ་མོ་ཁྲོས་པའི་གད་བརྒྱངས་ཀྱིས། །བདུད་དཔུང་སྙིང་རྩ་འདར་བའི་ང་རོ་བྱ། །དེ་ཡང་གསེར་དངུལ་སོགས་རིན་པོ་ཆེའི་སྣོད་དུ་ཕུད་གཙང་མ་དང་སྦྱར་བའི་གསེར་སྐྱེམས་བཤམས་ཤིང་ཆུ་གཙང་གི་བྲན། བསང་སྦྱངས་བྱིན་རླབས་སྤྱི་ལྟར་བྱས་ལ། ཧཱུྃ། བྱིན་རླབས་བརྒྱུད་ལྡན་རྩ་རྒྱུད་བླ་མ་དང་། །བསླུ་མེད་གཏན་གྱི་སྐྱབས་གནས་དཀོན་མཆོག་གསུམ། །ཁྱད་པར་རེ་ཞིང་ལྟོས་པའི་རྩ་གསུམ་ལྷ། །གསེར་སྐྱེམས་འདི་བཞེས་རྣལ་འབྱོར་གཟུ་དཔང་མཛོད། །དཔལ་ཆེན་ཁྲག་འཐུང་བདུད་སྡེ་འདུལ་བའི་ལྷ། གནས་ཡུལ་མ་མོ་ཞིང་སྐྱོང་དུར་ཁྲོད་བདག །བཀའ་སྡོད་དམ་ཅན་སྲུང་མ་རྒྱ་མཚོའི་ཚོགས། །གསེར་སྐྱེམས་འདི་བཞེས་རྣལ་འབྱོར་གཟུ་དཔང་མཛོད། །ཁྱད་པར་དཔལ་ལྡན་གཉེན་གྱི་རེ་མ་ཏི། །མ་བདུད་ཆེན་མོ་ཤ་ཟ་ཌཱ་ཀིའི་གཙོ། །འཆི་བདག་དྲེགས་པ་ཆེན་པོ་བདུན་དང་བཅས། །གསེར་སྐྱེམས་འདི་བཞེས་རྣལ་འབྱོར་གཟུ་དཔང་མཛོད། །ཡེ་ཤེས་འཇིག་རྟེན་ལས་ལས་གྲུབ་པའི་འཁོར། །མཐུ་སྟོབས་རྩལ་ལྡན་སྣང་སྲིད་དྲེགས་པའི་སྡེ། །མི་སྲུན་རབ་འཇིགས་མ་མོ་བྱེ་བ་འབུམ། །གསེར་སྐྱེམས་འདི་བཞེས་རྣལ་འབྱོར་གཟུ་དཔང་མཛོད། །གཞན་ཡང་དམ་ལྡན་དཀར་ཕྱོགས་སྐྱོང་བའི་ལྷ། །ཕྱོགས་མཚམས་ཡུལ་རིས་སྐྱོང་བའི་གཞི་བདག་དང་། །ལོ་ཟླ་ཞག་དུས་གཟའ་སྐར་ཚེས་ཀྱི་ལྷ། །གསེར་སྐྱེམས་འདི་བཞེས་རྣལ་འབྱོར་གཟུ་དཔང་མཛོད། །ཧཱུྃ། ཆོས་ཉིད་ཞི་བའི་དབྱིངས་ལས་མ་གཡོས་ཀྱང་། །ཐབས་ཀྱིས་གདུག་པ་འདུལ་ཕྱིར་ཞི་ཁྲོའི་སྐུར། །གང་འདུལ་རྣམ་པར་རོལ་པའི་ལྷ་ཚོགས་རྣམས། །མི་མངོན་དབྱིངས་ནས་སེམས་ཅན་དོན་ལ་བསྐུལ། །ཁྱད་པར་དཔལ་ལྡན་ལྷ་མོ་སྔགས་སྲུང་མ། །ཁྱོད་སྔོན་རྡོ་རྗེ་འཆང་གི་སྤྱན་སྔ་རུ། །བསྟན་དང་དེ་འཛིན་སྐྱོང་བར་ཁས་བླངས་བཞིན། །དེང་འདིར་རྣལ་འབྱོར་བདག་གི་གྲོགས་ལ་སྤྱོན། །འགྲོ་ལ་ཐུགས་རྗེ་ཉེ་རིང་མ་མཆིས་ཀྱང་། །ལས་ངན་ཉམས་པ་བདུན་ལྡན་དགྲ་བོ་འདི། །ཚུལ་བཞིན་དམ་ཆོས་སྒྲུབ་པའི་དགྲ་རུ་ལངས། །དེ་ཕྱིར་ཁྱེད་རྣམས་བདག་གིས་ར་མདར་སྦྲན། །རྫོགས་སངས་རྒྱས་ཀྱི་བསྟན་པའི་སྒོར་ཞུགས་ནས། །ཚུལ་གནས་ཐོས་བསམ་སྒོམ་པས་རྒྱུད་སྦྱངས་ཤིང་། །ཁྲིམས་ལྡན་འདུ་འཛི་སྤངས་པའི་རྣལ་འབྱོར་ལ། །གནོད་པའི་དགྲ་བགེགས་བྱུང་ངོ་ར་མདའ་མཛོད། །དགྲ་གཉེན་ཕྱོགས་ཆའི་སྡང་ཞེན་ཀུན་སྤངས་ནས། །རིས་མེད་འགྲོ་ལ་ཕན་པ་ལྷུར་ལེན་པའི། །བྱང་ཆུབ་སེམས་གཉིས་བསྒོམས་པའི་རྣལ་འབྱོར་ལ། །གནོད་པའི་དགྲ་བགེགས་བྱུང་ངོ་ར་མདའ་མཛོད། །མཚན་ལྡན་བླ་མ་མགོ་ཡི་ཐོད་བཞིན་ཁུར། །ཟབ་མོའི་དམ་ཚིག་སྙིང་གི་ཁྲག་བཞིན་བསྲུངས། །གསང་ཆེན་རིམ་གཉིས་བསྒོམས་པའི་རྣལ་འབྱོར་ལ། །གནོད་པའི་དགྲ་བགེགས་བྱུང་ངོ་ར་མདའ་མཛོད། །རང་ཉིད་ཞི་བདེའི་བསམ་པ་རྒྱབ་སྐྱུར་ནས། །འགྲོ་ཀུན་སྐུ་གསུམ་གོ་འཕང་ཐོབ་བྱའི་ཕྱིར། །བཤད་སྒྲུབ་བསྟན་པ་འཛིན་པའི་རྣལ་འབྱོར་ལ། །གནོད་པའི་དགྲ་བགེགས་བྱུང་ངོ་ར་མདའ་མཛོད། །སྙིགས་དུས་སེམས་ཅན་དུག་ལྔས་རྒྱུད་འཁྲུགས་པས། །རྒྱུ་འབྲས་དྲང་དོན་ཆོས་ཀྱིས་མི་ཐུལ་ཚེ། །གསང་སྔགས་ཉེ་ལམ་སྟོན་པའི་རྣལ་འབྱོར་ལ། །གནོད་པའི་དགྲ་བགེགས་བྱུང་ངོ་ར་མདའ་མཛོད། །རྒྱལ་བའི་བཀའ་དང་ལུང་བཞིན་བསྒྲུབ་པའི་ཕྱིར། །ལུས་སྲོག་བློས་བཏང་དཀའ་སྤྱད་དང་བླངས་ནས། །བསྟན་འགྲོའི་ཕན་བདེ་བསྒྲུབས་པའི་རྣལ་འབྱོར་ལ། །གནོད་པའི་དགྲ་བགེགས་བྱུང་ངོ་ར་མདའ་མཛོད། །བྷྱོ་ལྟ་སྒོམ་རྩལ་བསྐྱེད་དམ་རྫས་རི་ལྟར་སྤུངས། །བསྙེན་སྒྲུབ་བཟླས་བརྗོད་ཆུ་བོའི་རྒྱུན་བཞིན་འབད། །དམ་ཅན་ལུས་དང་གྲིབ་མ་ལྟར་བསྟེན་ན། །བརྙས་ཤིང་ཚད་བཙུགས་དགྲ་ལ་མཐུ་མེད་དམ། །ཁྱད་པར་སངས་རྒྱས་བསྟན་པའི་གཞུག་གཉེར་འདིར། །ལོག་རྟོགས་སྐྱེ་བོ་ངན་པས་དབང་བསྒྱུར་ནས། །གསང་ཆེན་བསྟན་དང་བསྟན་འཛིན་ལ་གནོད་ན། །བསྟན་སྲུང་དྲེགས་པའི་སྡེ་ཚོགས་ཐུགས་གཡེལ་ལམ། །ངེས་དོན་མཐར་ཐུག་འོད་གསལ་རྫོགས་པ་ཆེ། །སྐལ་བཟང་སྐུ་བཞིར་བགྲོད་པའི་ཉེ་ལམ་ལ། །མུ་སྟེགས་རྒྱང་འཕེན་གཞུང་ལྟར་སྨོད་བྱེད་ན། །མཐུ་སྟོབས་ནུས་པ་མེད་དམ་ཅི་ཞིག་སྒུག །ཡང་དག་ངེས་པའི་རྡོ་རྗེ་སློབ་དཔོན་གྱི། །ཟབ་མོའི་དམ་ཚིག་བསྟན་པའི་སྲོག་པ་རྩ། །ལོག་སྤྱོད་རྩུབ་མོའི་མཚོན་གྱིས་འདྲལ་བྱེད་ན། །དམ་ཚིག་གཉེན་གྱི་སྲུང་མ་གང་དུ་སོང་། །བསྟན་འགྲོའི་ལེགས་ཚོགས་སྒོ་བརྒྱ་འབྱེད་པའི་ལམ། །གནས་དུས་གང་ཟག་ཆོས་ཀྱི་རྟེན་འབྱུང་སྒོ། །བདུད་རིགས་སྐྱེ་བོས་ལོག་ལམ་དུ་སྒྱུར་ན། །དམར་ཟླུམ་ཡེ་ཤེས་སྤྱན་གྱིས་མི་གཟིགས་སམ། །བསྟན་པའི་རྩ་ལག་ཆོས་དང་གང་ཟག་ལ། །ཡོན་སྦྱོར་སྲི་ཞུས་མཆོད་པའི་སྦྱིན་བདག་དང་། །རྒྱུད་འཛིན་སློབ་མའི་ཚོགས་རྣམས་ཉམས་དམས་ན། །དམ་ལྡན་སྐྱོང་བའི་ཐ་ཚིག་བརྗེད་དམ་ཅི། །ཁྱད་པར་རྒྱ་འདྲེ་འགོང་པོའི་འཚུབས་ལྷོངས་ཀྱིས། །མཐའ་དམག་འཁྲུགས་རྩོད་ནད་ཡམས་མུ་གེ་ཡིས། །སེམས་ཅན་སྡུག་ལ་སྦྱོར་བའི་དུས་ཚོད་འདིར། །ཁྱེད་རྣམས་བཏང་སྙོམས་བཞུགས་ན་སུ་ཞིག་བསྐུལ། །དེ་ཕྱིར་མ་གཡེལ་བསྟན་སྲུང་རྒྱ་མཚོའི་ཚོགས། །མངོན་སྤྱོད་དྲག་པོའི་ཕྲིན་ལས་དུས་ལ་བབས། །མི་མངོན་དབྱིངས་ནས་ཐུགས་རྗེའི་ཤུགས་ཕྱུང་ལ། །ལེགས་ཉེས་གཟིགས་ལ་དྲང་ཤན་སོ་སོར་ཕྱེས། །བསྟེན་པའི་ལྷ་སྲུང་ཁྱེད་རྣམས་ཐུགས་གཡེལ་ན། །དམ་ལྡན་སྒྲུབ་པོའི་རྣལ་འབྱོར་སུ་ལ་རེ། །སྨྲས་ཀྱང་མི་གསན་བསྐུལ་ཡང་མི་མཛད་ན། །རྟག་ཏུ་གསོལ་མཆོད་བརྩོན་པའི་དགོས་པ་ཅི། །དམ་སྲི་རྒྱ་འདྲེ་འགོང་པོ་ཁ་དར་ན། །ཁྱེད་ཀྱི་མཐུ་སྟོབས་ནུས་པ་རྫུན་དུ་ཟད། །དེ་ཕྱིར་མངོན་སྤྱོད་དྲག་པོའི་ལས་ལ་ཆོས། །གོ་གྱོན་མཚོན་ཐོགས་མགྱོགས་པའི་རྟ་ལ་ཞོན། །མཐུ་རྩལ་དྲག་ཤུལ་མྱུར་མགྱོགས་སྟོབས་ཀྱིས་རྒྱུག །དམ་ཉམས་དགྲ་བགེགས་སྒྲོལ་བའི་འཕྲིན་ལས་མཛོད། །ཅེས་བརྗོད་གསེར་སྐྱེམས་མཆོད་ཅིང་གཟུ་དཔང་བྱའོ། །ཞེས་པ་འདི་ནི་ལྷ་མོའི་བསྒྲལ་ལས་སྤུ་གྲིའི་འཁྲུལ་འཁོར་གྱི་ཆ་ལག་ཏུ་རིགས་སྔགས་འཆང་བ་དྲག་པོའི་མིང་གིས་གང་བྱུང་ཤར་མར་སྤེལ་བ་དགེ། །། ༈ །།དེ་ནས་བསྒྲལ་ལས་ལ་འཇུག་པར་བྱ་སྟེ་གཏེར་གཞུང་ལས། །རྦོད་གཏོར་མ་མོའི་ཚོགས་ལ་འདུད༔ ཧོམ་ཁུང་ནང་དུ་ལིངྒ་གཞུག༔ ཐུན་རྫས་སྣ་ཚོགས་ཐ་མར་བསྐོར༔ རྣལ་འབྱོར་ལྟ་བ་གདེང་བསྐྱེད་ཅིང་༔ ཁྲོས་པའི་དབྱངས་ཀྱིས་འདི་སྐད་དོ༔ ཅེས་གསུངས་པ་ལྟར༔ ཧཱུྃ་ཧཱུྃ་བྷྱོ༔ ང་ནི་དཔལ་ཆེན་ཡང་དག་ཧེ་རུ་ཀ༔ མ་མོ་མཁའ་འགྲོ་ཀུན་གྱི་མངའ་བདག་ཆེ༔ ང་ལས་ཆེ་བཙན་དྲེགས་པ་སུ་ཡང་མེད༔ ཐམས་ཅད་ཐམས་ཅད་ང་ཡི་བྲན་དང་འཁོར༔ ཕོ་རྒྱུད་མོ་རྒྱུད་དྲེགས་ཚོགས་ད་འདུས་ཤིག༔ སངས་རྒྱས་བསྟན་པ་གཉེན་པོའི་གཞུག་གཉེར་འདིར༔ བཀའ་ལས་འདས་དང་དམ་ལ་འཁུ་བའི་རིགས༔ དགྲ་བགེགས་གནོད་བྱེད་འདུལ་བའི་དུས་ལ་བབས༔ ལྷ་ཚོགས་ཐམས་ཅད་སྐུ་ཡི་རྩལ་བསྐྱེད་ལ༔ ནུས་པའི་ཤུགས་ཕྱུང་ཐུགས་ཀྱི་ཏིང་འཛིན་གསལ༔ ཨཱོཾ་བཛྲ་ཤྲཱ་ྀཧེ་རུ་ཀཿརུ་ལུ་རུ་ལུ་ཧཱུྃ་བྷྱོ་ཧཱུྃ་ཕཊ༔ ཧཱུྃ་བཛྲ་དྷཀྐི་མ་ཧཱ་ཀཱ་ལི་རེ་མ་ཏཱི་ཧཱུྃ་བྷྱོ་ཧཱུྃ་ཕཊ༔ ཅི་མང་བཟླ། ཧཱུྃ་ཧཱུྃ་ཧཱུྃཿབདག་ཉིད་དཔལ་ཆེན་པོ་འཁོར་བཅས་སུ་གསལ་བའི་མདུན་དུ༔ གནམ་ལྕགས་འབར་བ་ལས་གྲུབ་པའི་ཆོས་འབྱུང་ཟུར་གསུམ་པ༔ རབ་ཏུ་བརྔམས་ཤིང་སྐྱི་བུང་བྱེད་པ༔ རྒྱ་ཆེ་ཞིང་དཔངས་མཐོ་བ༔ ཁ་དོག་ཅིང་གཏིང་ཟབ་པ༔ རིམ་དགུའི་རྟ་རྐན་དང་ལྡན་པ་ཞིག་གི་ནང་དུ༔ ནྲི་དང་ཏྲི་ལས་དགྲ་བགེགས་འབྱུང་པོ་ཁ་དོག་སྔོ་ལ་གཟུགས་བྱད་རིད་པ༔ མྱ་ངན་གྱི་ཕྱག་རྒྱ་དང་ལྡན་པ་ཞིག་ཏུ་གྱུར༔ འགུགས་པའི་ཕྱག་རྒྱ་བཅས་ལ། ཧཱུྃ་ཧཱུྃ་ཧཱུྃ༔ ཆོས་སྐུ་མི་བསྐྱོད་རྡོ་རྗེ་ལ་སོགས་ཆོས་སྐུའི་ལྷ་ཚོགས་རྣམས་ཀྱི་བཀའ་བདེན་པ། ལོངས་སྐུ་དཔལ་ཆེན་ཧེ་རུ་ཀ་ལ་སོགས་ལོངས་སྐུའི་ལྷ་ཚོགས་རྣམས་ཀྱི་བཀའ་བདེན་པ། སྤྲུལ་སྐུ་སངས་རྒྱས་བཅོམ་ལྡན་འདས་ལ་སོགས་ཕྱོགས་བཅུ་དུས་བཞིའི་རྒྱལ་བ་རྣམས་ཀྱི་བཀའ་བདེན་པ། རིགས་གསུམ་གྱི་མགོན་པོ་ལ་སོགས་བྱང་ཆུབ་སེམས་དཔའ་སེམས་མ་རྣམས་ཀྱི་བཀའ་བདེན་པ། སློབ་དཔོན་པདྨ་བཛྲ་ལ་སོགས་གསང་སྔགས་འཆང་བའི་རིག་འཛིན་གྲུབ་ཐོབ་རྣམས་ཀྱི་བཀའ་བདེན་པ། ཡི་དམ་ཆེ་གེ་དཔལ་ཆེན་ཡང་དག་ཧེ་རུ་ཀ་སོགས་རྩ་གསུམ་རྒྱལ་བ་རྒྱ་མཚོའི་ལྷ་ཚོགས་རྣམས་ཀྱི་བཀའ་བདེན་པ། དཔལ་ལྡན་ལྷ་མོ་ནག་མོ་ལ་སོགས་མ་རྒྱུད་མཁའ་འགྲོ་འབུམ་གྱི་ལྷ་ཚོགས་རྣམས་ཀྱི་བཀའ་བདེན་པ། བ་ལམ་དྲེལ་སྣ་མ་ལ་སོགས་སྐུ་དཔལ་ཆེན་རྟ་མགྲིན་ལ་སོགས་ཡི་དམ་དཀྱིལ་འཁོར་གྱི་ལྷ་ཚོགས་རྣམས་ཞེས་སྒྱུར། མཆན། སྤྲུལ་གྱི་མཁའ་འགྲོ་མ་ཉི་ཁྲི་ཆིག་སྟོང་གི་བཀའ་བདེན་པ། སྟག་སྨན་གཟེར་འདེབས་མ་ལ་སོགས་གསུང་སྤྲུལ་གྱི་མཁའ་འགྲོ་མ་ཉི་ཁྲི་ཆིག་སྟོང་གི་བཀའ་བདེན་པ། ཁྲི་སྨན་སི་ལི་མ་ལ་སོགས་ཐུགས་སྤྲུལ་གྱི་མཁའ་འགྲོ་མ་ཉི་ཁྲི་ཆིག་སྟོང་གི་བཀའ་བདེན་པ། རྡོ་རྗེ་བ་ལམ་མ་ལ་སོགས་ཡོན་ཏན་སྤྲུལ་པའི་མ་མོ་ཉི་ཁྲི་ཆིག་སྟོང་གི་བཀའ་བདེན་པ། ཚངས་པ་དུང་གི་ཐོར་ཚུགས་ཅན་ལ་སོགས་རྒྱལ་འགོང་འབུམ་སྡེའི་བཀའ་བདེན་པ། གཤིན་རྗེ་བྷེ་ཝ་ས་ཏ་ལ་སོགས་འཆི་བདག་གཤིན་རྗེ་འབུམ་གྱི་བཀའ་བདེན་པ། བདུད་པོ་བྱེ་བ་དགུ་རིང་ལ་སོགས་བདུད་དམག་བྱེ་བ་འབུམ་གྱི་བཀའ་བདེན་པ། དཔལ་མགོན་དྲེགས་པ་ཕྱི་ནང་གསང་བའི་ལྷ་སྲིན་སྡེ་བརྒྱད་རང་རང་སྤྲུལ་འཁོར་དང་བཅས་པའི་བཀའ་བདེན་པ་དང་བདེན་པ་ཆེན་པོའི་མཐུ་དང་ནུས་པ་ལ་བརྟེན་ནས། ཞིང་བཅུ་ཚང་བའི་སྤྱི་དགྲ། བླ་མའི་སྐུ་དགྲརྣལ་འབྱོར་གྱི་སྒོས་དགྲསངས་རྒྱས་ཀྱི་བསྟན་པ་བཤིགས་པ། དཀོན་མཆོག་གི་དབུ་འཕང་སྨད་པ། དགེ་འདུན་གྱི་འདུ་སྒོ་འཕྲོག་པ། ཆོས་མཛད་ཡོངས་ལ་བརྙས་པ། སེམས་ཅན་ཡོངས་ལ་འཚེ་བ། ཁྱད་པར་དུ་བདག་ཅག་རྣལ་འབྱོར་པ་དཔོན་སློབ་ཡོན་མཆོད་མི་ནོར་འཁོར་དང་བཅས་པ་ཐམས་ཅད་ལ་གནོད་ཅིང་འཚེ་བར་བྱེད་པའི་དགྲ་བོ་བསམ་ངན་སྦྱོར་རྩུབ་འཆང་ཞིང་དོ་བསྡོ་ཕོད་བཙུགས་བྱེད་པ། ཁ་སྨྲས་གླིང་གཞི་བཏང་ཞིང་དགྲ་སྣ་ཁ་མཆུའི་གཞི་འདིང་བ། བརྐུན་ཇག་འཕྲོག་བཅོམ་བྱེད་ཅིང་དམག་འཁྲུག་འཐབ་རྩོད་སློང་བ། ཟས་ངན་དུག་སྦྱོར་ཤོམས་ཤིང་མནན་གཏད་སེལ་གསུམ་བརྩོམས་པ། ཕུང་སྦྱོར་སྣ་ཚོགས་བྱེད་ཅིང་ལུས་དང་སྲོག་ལ་བརྒོལ་བའི་དགྲ་བོ་ལྷ་དང་བཅས་པ་རྣམས་དང་། དགྲ་འདྲེ་བྱུར་གསུམ་གྱི་སྣ་འདྲེན་པའི་འབྱུང་པོ། བཙའ་སད་སེར་གསུམ་ལོ་ཉེས་ཐན་པ་བཏང་བ། མི་ནད་ཕྱུགས་ནད་ཡམས་ནད་གོད་ཁ་བཏང་བ། རི་རུད་ཤྭ་རྦུད་གང་ཐན་བཏང་བའི་གནོད་བྱེད་གདོན་བགེགས་རྒྱ་འདྲེ་འགོང་པོ་རྒྱལ་བསེན་དམ་སྲི་ནད་བདག་ཡམས་བདག་གོད་འདྲེ་ཕོ་མོ་འབྱུང་པོ་ཐེ་རང་སྡོང་ཟླ་དང་བཅས་པ་ཐམས་ཅད་སྐད་ཅིག་རང་དབང་མེད་པར་སྲིད་རྩེ་མནར་མེད་གླིང་བཞི་རི་རབ། ས་འོག་ས་སྟེང་ས་བླ་གར་གནས་ཀྱང་ལས་བྱེད་ཀྱི་ཕོ་ཉ་རྣམས་ཀྱིས་བྱིའུ་ཁྲས་བདས་པའམ། རི་དྭགས་ཤ་ཁྱིས་དེད་པ་བཞིན་དུ་མིང་བྱང་བུ་གཟུགས་ལིངྒ་འདི་ལ་གཉིས་སུ་མེད་པར་ཁུག་ཅིག །ཅེས་བརྗོད་ཅིང་བར་འདིར་འགུགས་གཞུག་བསྡུས་པ། ན་མོ་དཀོན་མཆོག་གསུམ་དང་རྩ་བ་གསུམ་གྱི་སོགས་བརྒྱ་རྩ་དང་འགུགས་སྔགས། ཨཱོཾ་བཛྲ་དྷཀྐི་མ་ཧཱ་ཀཱ་ལི་རེ་མ་ཏཱི་ཧཱུྃ་བྷྱོ་ཧཱུྃ་ཕཊ༔ བྷྱོ་རེ་མ་ཏཱི་མཱ་ར་ཡ་ཛ་ཧཱུྃ་མ་མ་ཏྲག་རཀྴ་རུ་ལུ་རུ་ལུ་ཧཱུྃ་བྷྱོཿཛ་ཛ་ཁུག་ཛཿཨ་ཀར་ཤ་ཡ་ཛཿཛཿ ཞེས་བརྒྱའམ་ཉེར་གཅིག་སྐབས་ཐོབ་ལྟར་བཟླས་ལ་ཕྱག་རྒྱ་བཞིས་རྒྱས་གདབ། ཐུན་གཏོར་བཤམས་བྲན་འགུགས་གཞུག་དང་བྱིན་རླབས་བྱས་ལ་བསྐུལ་ཆེ་ཆུང་གཉིས་ཀ་དངབཀའ་གཏེར་གྱི་བསྐུལ་བཅས་འདོན། དེ་ནས་སྒོ་མ་བཞིའི་ཕྱག་རྒྱ་དང་བཅས་ཕོ་ཉ་སྤྲོ་བ་ནི། ཧཱུྃ་བྷྱོ༔ དཔལ་ཆེན་ཡབ་ཡུམ་ཐུགས་ལས་སྤྲུལ་པའི་ལྷ༔ དགྲ་བགེགས་འབྱུང་པོ་འགུགས་པའི་ཕོ་ཉ་ནི༔ ཛ་ལས་སྤྲུལ་པའི་ལྷ་མོ་ལྕགས་ཀྱུ་མ༔ ལྕགས་ཀྱུ་དཀར་མོའི་ཚོགས་ཀྱི་སྟོང་གསུམ་གང་༔ ཡང་སྤྲུལ་ཕོ་ཉའི་ཚོགས་ཀྱི་སྲིད་གསུམ་གཡོ༔ ཞིང་བཅུ་ཚང་བའི་དམ་ཉམས་དགྲ་དང་བགེགས༔ ལྕགས་ཀྱུ་དཀར་མོས་སྙིང་ནས་དྲོངས་ལ་ཤོག༔ སྲིད་པའི་རྩེ་ནས་ན་རག་དམྱལ་བའི་ཁམས༔ ཡངས་པའི་ནམ་མཁའ་ཉི་ཟླའི་འོད་ཁྱིམ་སོགས༔ གང་དུ་འདུག་ཀྱང་རང་དབང་མེད་པར་ཁུག༔ སྤྲུལ་དུ་མ་འཇུག་ཕྱག་རྒྱས་ཆིངས་ལ་ཤོག༔ གབ་ཏུ་མ་འཇུག་ཕོ་ཉས་དེད་ལ་ཤོག༔ ལ་ཉེས་དེད་ལ་ལས་ཀྱི་དབང་གིས་ཁྲིད༔ མུན་པས་བསུས་ལ་མྱུར་དུ་ཁུག་ཅིག་ཛཿའགྲེས་སོ། ཧཱུྃ་བྷྱོ༔ དཔལ་ཆེན་ཡབ་ཡུམ་ཐུགས་ལས་སྤྲུལ་པའི་ལྷ༔ དགྲ་བགེགས་འབྱུང་པོ་འགུགས་པའི་ཕོ་ཉ་ནི༔ ཧཱུྃ༔ ལས་གྱུར་པའི་ལྷ་མོ་ཞགས་པ་མ༔ ཞགས་པ་སེར་མོའི་ཚོགས་ཀྱིས་སྟོང་གསུམ་གང་༔ ཡང་སྤྲུལ་ཕོ་ཉའི་ཚོགས་ཀྱིས་སྲིད་གསུམ་གཡོ༔ ཞིང་བཅུ་ཚང་བའི་དམ་ཉམས་དགྲ་དང་བགེགས༔ ཞགས་པ་སེར་མོས་སྐེ་ནས་ཆིངས་ལ་ཁུག༔ སྲིད་པའི་རྩེ་ནས་ན་རག་དམྱལ་བའི་ཁམས༔ ཡངས་པའི་ནམ་མཁའ་ཉི་ཟླའི་འོད་ཁྱིམ་སོགས༔ གང་དུ་འདུག་ཀྱང་རང་དབང་མེད་པར་ཁུག༔ སྤྲུལ་དུ་མ་འཇུག་ཕྱག་རྒྱས་ཆིངས་ལ་ཤོག༔ གབ་ཏུ་མ་འཇུག་ཕོ་ཉས་དེད་ལ་ཤོག༔ ལ་ཉེས་དེད་ལ་ལས་ཀྱི་དབང་གིས་ཁྲིད༔ མུན་པས་བསུས་ལ་མྱུར་དུ་ཁུག་ཅིག་ཧཱུྃ༔ ཧཱུྃ་བྷྱོ༔ དཔལ་ཆེན་ཡབ་ཡུམ་ཐུགས་ལས་སྤྲུལ་པའི་ལྷ༔ དགྲ་བགེགས་འབྱུང་པོ་འགུགས་པའི་ཕོ་ཉ་ནི༔ བམ་ལས་སྤྲུལ་པའི་ལྷ་མོ་ལྕགས་སྒྲོག་མ༔ ལྕགས་སྒྲོག་དམར་མོའི་ཚོགས་ཀྱིས་སྟོང་གསུམ་གང་༔ ཡང་སྤྲུལ་ཕོ་ཉའི་ཚོགས་ཀྱིས་སྲིད་གསུམ་གཡོ༔ ཞིང་བཅུ་ཚང་བའི་དམ་ཉམས་དགྲ་དང་བགེགས༔ ལྕགས་སྒྲོག་དམར་མོས་ཡན་ལག་སྡོམས་ལ་ཁུག༔ སྲིད་པའི་རྩེ་ནས་ན་རག་དམྱལ་བའི་ཁམས༔ ཡངས་པའི་ནམ་མཁའ་ཉི་ཟླའི་འོད་ཁྱིམ་སོགས༔ གང་དུ་འདུག་ཀྱང་རང་དབང་མེད་པར་ཁུག༔ སྤྲུལ་དུ་མ་འཇུག་ཕྱག་རྒྱས་ཆིངས་ལ་ཤོག༔ གབ་ཏུ་མ་འཇུག་ཕོ་ཉས་དེད་ལ་ཤོག༔ ལ་ཉེས་དེད་ལ་ལས་ཀྱི་དབང་གིས་ཁྲིད༔ མུན་པས་བསུས་ལ་མྱུར་དུ་ཁུག་ཅིག་བཾ༔ ཧཱུྃ་བྷྱོ༔ དཔལ་ཆེན་ཡབ་ཡུམ་ཐུགས་ལས་སྤྲུལ་པའི་ལྷ༔ དགྲ་བགེགས་འབྱུང་པོ་འགུགས་པའི་ཕོ་ཉ་ནི༔ ཧོཿལས་སྤྲུལ་པའི་ལྷ་མོ་དྲིལ་བུ་མ༔ དྲིལ་བུ་ལྗང་མོའི་ཚོགས་ནི་སྟོང་གསུམ་གང་༔ ཡང་སྤྲུལ་ཕོ་ཉའི་ཚོགས་ཀྱིས་སྲིད་གསུམ་གཡོ༔ ཞིང་བཅུ་ཚང་བའི་དམ་ཉམས་དགྲ་དང་བགེགས༔ དྲིལ་བུ་ལྗང་མོས་མྱོས་པར་གྱིས་ལ་ཁུག༔ སྲིད་པའི་རྩེ་ནས་ན་རག་དམྱལ་བའི་ཁམས༔ ཡངས་པའི་ནམ་མཁའ་ཉི་ཟླའི་འོད་ཁྱིམ་སོགས༔ གང་དུ་འདུག་ཀྱང་རང་དབང་མེད་པར་ཁུག༔ སྤྲུལ་དུ་མ་འཇུག་ཕྱག་རྒྱས་ཆིངས་ལ་ཤོག༔ གབ་ཏུ་མ་འཇུག་ཕོ་ཉས་དེད་ལ་ཤོག༔ ལ་ཉེས་དེད་ལ་ལས་ཀྱི་དབང་གིས་ཁྲིད༔ མུན་པས་བསུས་ལ་མྱུར་དུ་ཁུག་ཅིག་ཧོ༔ བཛྲ་ཀཽ་རི་ཨཀཪྴ་ཡ་ཛཿཛཿ བཛྲ་ཙཽའུ་རི་པྲ་ཝེ་ཤ་ཡ་ཧཱུྃ་ཧཱུྃ༔ བཛྲ་པྲ་མོ་ཧ་སྥོ་ཊ་བཾ༔ བཾ༔ བཛྲ་བཻ་ཏ་ལི་གྷནྡྷེ་མས་ཧོཿཧོ༔ ཞེས་བརྗོད་ཤགས་འདེབས་ཤིང་ཉེས་པ་བསྒྲགས་པ་ནི༔ ཧཱུྃ་བྷྱོ༔ དགོངས་ཤིག་ཕྱོགས་བཅུའི་སངས་རྒྱས་བདེ་བཤེགས་རྣམས༔ རྩ་རྒྱུད་བླ་མ་རྣམས་ཀྱང་དགོངས་སུ་གསོལ༔ ཡི་དམ་ལྷ་ཚོགས་རྣམས་ཀྱང་དགོངས་སུ་གསོལ༔ མཁའ་འགྲོ་ཆོས་སྐྱོང་རྣམས་ཀྱང་དགོངས་སུ་གསོལ༔ དཔལ་ལྡན་ལྷ་མོ་འཁོར་བཅས་དགོངས་སུ་གསོལ༔ འཆི་བདག་དྲེགས་ཆེན་རྣམས་ཀྱང་དགོངས་སུ་གསོལ༔ དཔལ་མགོན་དྲེགས་པའི་ཚོགས་ཀྱང་དགོངས་སུ་གསོལ༔ སྣང་སྲིད་ལྷ་ཀླུ་གཞི་བདག་དགོངས་སུ་གསོལ༔ གནས་ཡུལ་སྲུང་མ་རྣམས་ཀྱང་དགོངས་སུ་གསོལ༔ རྣལ་འབྱོར་བདག་ནི་མ་ལེན་མ་ཉེས་སོ༔ དམ་ཉམས་དགྲ་བོ་སྡིག་ཅན་ལས་ངན་འདིས༔ དང་པོ་སངས་རྒྱས་བསྟན་པ་གཉེན་པོ་བཤིགས༔ བར་དུ་མི་དགེ་བཅུ་ཡི་ལས་ལ་སྤྱད༔ ཐ་མར་རྣལ་འབྱོར་བདག་གི་དགྲ་རུ་ལངས༔ གནོད་བྱེད་འབྱུང་པོ་གདོན་བགེགས་ཕོ་མོ་འདིས༔ དང་པོ་བདེར་གཤེགས་རྣམས་ཀྱི་དམ་དང་འགལ༔ བར་དུ་སེམས་ཅན་ཡོངས་ཀྱི་སྲོག་དབུགས་འགམས༔ ཐ་མར་རིག་འཛིན་བདག་ལ་འཁུས་ཤིང་གདོན༔ ཡེ་ཤེས་སྤྱན་གྱིས་ལེགས་ཉེས་ད་གཟིགས་ལ༔ རྫུ་འཕྲུལ་མཐུ་ཡིས་དྲང་ཤན་སོ་སོར་ཕྱེས༔ ནུས་མཐུའི་སྟོབས་ཀྱིས་དགྲ་བགེགས་ལས་ངན་སྒྲོལ༔ ཐུགས་རྗེའི་ཤུགས་ཀྱིས་རྣམ་ཤེས་དབྱིངས་སུ་སྤོར༔ ལྷ་དང་དབྱེ་བ་ནི༔ བྱ་རོག་དང་འུག་པའི་སྒྲོ་ཐོགས་ལ་རྫས་དུད་དང་བཅས། ཧཱུྃ་བྷྱོ༔ དམ་ཉམས་དགྲ་བགེགས་སྐྱོབས་པའི་ལྷ་སྲུང་རྣམས༔ དཔལ་ཆེན་ཡབ་ཡུམ་བཀའ་ལ་ཚུར་ཉོན་དང་༔ ཉམས་པའི་དགྲ་བོ་སྡིག་ཅན་ལས་ངན་འདིར༔ འགོ་ཞིང་སྲུང་ན་ཁྱེད་རྣམས་ཐུགས་དམ་ཉམས༔ དམ་ཉམས་བསྒྲལ་ཞིང་དམ་ལྡན་སྲུང་བ་ཡི༔ བཀའ་དང་དམ་ཚིག་ཕོག་པ་མི་དྲན་ནམ༔ དེ་ཕྱིར་བྱད་མ་རང་གཤེད་རང་ལ་ཕོབ༔ བཀའ་ལ་མི་ཉན་འགོ་ཞིང་སྐྱོབ་བྱེད་ན༔ བདག་ཉིད་དཔལ་ཆེན་སྤྲུལ་པས་རྡུལ་དུ་བརླག༔ ཧཱུྃ་བྷྱོ༔ ལས་ཀྱི་སྤྲུལ་པའི་དཀྱིལ་འཁོར་གཉེན་པོ་ནས༔ ཕྲ་མེན་ཆེན་མོ་ཁ་ཁ་མུ་ཁ་མ༔ སྐུ་མདོག་ནག་མོ་གནམ་ལྕགས་གཤོག་པ་ཅན༔ བ་དན་ཐོགས་པའི་སྤྲུལ་པས་སྲིད་གསུམ་གཡོ༔ འཇུམ་རྩལ་རེ་རེས་དཔག་ཚད་བརྒྱད་ཁྲིར་བསྒྲོད༔ རྫུ་འཕྲུལ་མཐུ་དང་སྟོབས་ཀྱི་མངའ་བདག་མོ༔ མྱུར་དུ་ཕྱེས་ཤིག་དགྲ་བོ་ལྷ་དང་ཕྱེས༔ སོ་སོར་ཕྲོལ་ཅིག་དགྲ་བོ་ལྷ་དང་ཕྲོལ༔ ཧཱུྃ་བྷྱོ༔ ལས་ཀྱི་སྤྲུལ་པའི་དཀྱིལ་འཁོར་གཉེན་པོ་ནས༔ ཕྲ་མེན་ཆེན་མོ་ཧུ་ལུ་མུ་ཁ་མ༔ སྐུ་མདོག་སེར་མོ་ཟངས་ཀྱི་གཤོག་པ་ཅན༔ མེ་ཆུ་ཐོགས་པའི་སྤྲུལ་པས་སྲིད་གསུམ་གཡོ༔ འཇུམ་རྩལ་རེ་རེས་དཔག་ཚད་བརྒྱད་ཁྲིར་བསྒྲོད༔ རྫུ་འཕྲུལ་མཐུ་དང་སྟོབས་ཀྱི་མངའ་བདག་མོ༔ མྱུར་དུ་ཕྱེས་ཤིག་དགྲ་བོ་ལྷ་དང་ཕྱེས༔ སོ་སོར་ཕྲོལ་ཞིག་དགྲ་བོ་ལྷ་དང་ཕྲོལ༔ དགྲ་བོའི་ལྷ་སྲུང་ཐམས་ཅད་རྡུལ་དུ་རློགས༔ ཉིན་མཚན་དུས་དྲུག་བཅུ་གཉིས་ཆ་ཟུང་ལ༔ དམ་ཉམས་དགྲ་བོ་འདི་ཉིད་ལྷ་དང་ཕྲོལ༔ ཕ་ལྷ་མ་ལྷ་འགོ་ཞིང་སྐྱོབས་པའི་ལྷ༔ མྱུར་དུ་ཕྲལ་བའི་ཐུགས་དམ་དུས་ལ་བབས༔ མེ་ཡི་གཤུར་ལ་ཆུ་ཡིས་འཁྲུད་པར་མཛོད༔ བ་དན་ནག་པོས་གཡོབས་ལ་མྱུར་དུ་ཕྱེས༔ སྤུ་གྲིའི་འདབ་གཤོག་གཡོབས་ལ་མྱུར་དུ་ཕྱེས༔ སྡང་མིག་གློག་ལྟར་འཁྱུགས་ལ་མྱུར་དུ་ཕྱེས༔ ཨོཾ་ས་འདི་མྱུར་དུ་རྒྱུད༔ སྡེ་ཤིག་སྡེ་ཤིག༔ གྲ་མ་ཡ་གྲ་མ་ཡ༔ མེས་ཚིག་ཆུར་སྐྱུར༔ རླུང་གི་གཡོབས༔ དགྲ་བོའི་ལྷ་སྲུང་ཐམས་ཅད་ཤག་ཤག་བྱེར་བྱེར་མཱ་ར་ཡ་ཧཱུྃ་ཧཱུྃ་ཕཊ་ཕཊ༔ མ་མ་ཏྲག་རཀྴ་རུ་ལུ་རུ་ལུ་ཧཱུྃ་ཛ་ཛཿདགྲ་བོ་མཱ་ར་ཡ་ཕྱེས་ཕྱེས༔ མ་ར་ཡ་རུ་ཏྲི་ནི་ཨ་ཕྱེས༔ ཅི་མང་བཟླས་ཤིང་བྱ་རོག་འུག་པའི་སྒྲོ་གཡབ་ལ་ལྷ་དང་དབྱེ་ཞིང་། ཡུངས་ཀར་ནག་ཐུན་གྱིས་བྲབ་བོ། །དེ་ནས་ཚེ་ཁྲུས་ཀྱི་དགོངས་པ་ཟབ་མོ་དང་ལྡན་པས༔ བསྒྲལ་བ་ནི༔ ཧཱུྃ་བྷྱོ༔ ང་ནི་བཅོམ་ལྡན་དཔལ་ཆེན་ཧེ་རུ་ཀ༔ ང་ནི་སྲིད་གསུམ་བདག་མོ་རེ་མ་ཏཱི༔ དམ་ཉམས་དགྲ་བོ་སྡིག་ཅན་ལས་ངན་འདིའི༔ རྣམ་སྨིན་ལས་ལ་གྲུབ་པའི་སྦྲུལ་དཀར་ནག༔ འཁྲིལ་ཞིང་འཛིངས་ནས་མདུད་དེ་སྤྱི་གཙུག་དང་༔ འོག་སྒོ་གཉིས་ནས་མགོ་ཞུགས་སྙིང་ཁྲག་འཇིབས༔ སྲོག་གི་རྩ་བྲེགས་ཚེ་འདིའི་འདུ་བྱེད་སྡུས༔ རྣམ་ཤེས་མཁར་བསྟིམས་ཚེ་བསོད་རང་ལ་བསྡུ༔ ནྲི་པ་ར་ཎ་ཕཊ༔ ཧཱུྃ་མཱ་ར་ཡ་ཛཿཨེ་ས་མ་ཡ་བྷྱོ༔ ཞེས་དང་དེ་ནས་བསད་སྔགས་འདི་ལྟར་བཟླས༔ ཨོཾ་ཏྲཾ་ལེ་སུ་ཧེ་ནི་སྙིང་ལ་ཡ་མ་ཏྲི་ནི་ཁ་ཁ་ཊྭཾ་སརྦ་རྦད་རྦད༔ དགྲ་བོའི་སྙིང་རྩ་ལ་མཱ་ར་ཡ་ཐུན་ཡཱ༔ ཧ་ལ་ཧ་ལ་མ་ཧ་ཀུ་ཀུམ་ལ་དུ་དགྲ་བོ་ཤ་ཏྲ་མ་རྦད༔ གཡག་མོ་ཡས་མོ་སོད༔ ཕྲོལ་དགྲ་བོ་མཱ་ར་ཡ་ཛ་ཛཿཞེས་བཟླས་བསད་རྟགས་གསལ་ནས་ལས་ལ་སྦྱོར༔ ཞེས་གསུངས་པས། ཐུན་ལ་ཕུས་འདེབས་སོ། དེ་ནས་ཐུན་རྣམས་ཐོགས་ཏེ༔ ཧཱུྃ་བྷྱོ༔ དཔལ་གྱི་སྤྲུལ་པ་དཔལ་གྱི་ལས་མཁན་མ༔ ཤ་ཟ་ནག་མོ་བཛྲ་དྷཀྐི་མ༔ ནད་རིགས་བཞི་བརྒྱ་རྩ་བཞི་སྐུ་ལས་འཕྲོ༔ ནད་ཀྱི་ཆར་པས་དམ་ཉམས་དགྲ་བགེགས་རློགས༔ གདོན་རིགས་སྟོང་ཕྲག་བརྒྱད་ཅུ་ཐུགས་ལས་སྤྲུལ༔ གདོན་གྱི་དམག་སྒར་དམ་ཉམས་དགྲ་ལ་ཐོབ༔ བ་སྤུ་རེ་ལས་མཚོན་གྱི་ཆར་པ་འབབས༔ མཚོན་ཆའི་ཆར་པས་དམ་ཉམས་དགྲ་བོ་རློགས༔ ཧཱུྃ་བྷྱོ༔ ཐོད་གཞུ་ནག་པོ་འོད་དུ་ཀྱི་ལི་ལི༔ ཐོད་ཁྲག་དམར་པོའི་མདའ་ནི་ཟངས་སེ་ཟངས༔ དམ་ཉམས་དགྲ་བོའི་དོན་སྙིང་ཚལ་པར་ཁོས༔ ཞག་དང་ཟ་མར་མ་བཞག་རེ་མ་ཏཱི༔ ཧཱུྃ་བྷྱོ༔ བཛྲ་མ་བྷྱོ༔ མ་མ་རུ་ལུ་ཏྲག་རཀྴ་དགྲ་བགེགས་ནྲྀ་ཏྲི་མཱ་ར་ཡ་ཧཱུྃ་ཕཊ༔ ཧཱུྃ་བྷྱོ༔ གནམ་ལྕགས་འབར་བའི་རལ་གྲི་ཟངས་སེ་ཟངས༔ སྤུ་གྲི་དམར་པོ་ཟང་ཡག་འབུམ་འབུམ་འཕྲོ༔ གནོད་བྱེད་དགྲ་བགེགས་རལ་གྲིའི་སོ་ལ་བསྐྱོན༔ དོན་སྙིང་ཕྱུངས་ཤིག་བཛྲ་དྷཀྐི་མ༔ སྔགས། ཧཱུྃ་བྷྱོ་ཏྲི་ཤུལ་བ་དན་ནག་པོ་ལྷབས་སེ་ལྷབ༔ གཡབ་ཀྱིས་འདོར་ཞིང་མཚོན་གྱི་ཆར་པ་འབེབས༔ དགྲ་བགེགས་གཡབ་ཀྱིས་འདོར་ལ་གསལ་ཤིང་བསྣུན༔ སྲོག་རྩ་ཆོད་ཅིག་མ་མོ་སྲོག་བདག་མ༔ སྔགས། ཧཱུྃ་བྷྱོ༔ ཁྲཾ་ཤིང་དམར་པོ་ཁྲག་ལྟར་ཡ་ལ་ལ༔ འཆི་བདག་གཤིན་རྗེའི་ཕོ་ཉ་འབུམ་འབུམ་འཕྲོ༔ གནོད་བྱེད་དགྲ་བགེགས་གཤིན་རྗེའི་ཁྲམ་ལ་ཐོབ༔ སྙིང་རྗེ་མེད་པར་གྲོལ་ཞིག་གཤིན་རྗེ་མོ༔ སྔགས། ཧཱུྃ་བྷྱོ༔ བེ་ཅོན་རྡོ་རྗེའི་གཏུན་བུ་ཧྲི་ལི་ལི༔ རྡོ་རྗེའི་ཆར་འབེབ་དགྲ་བགེགས་ཀླད་ཁྲག་དཀྲུག༔ ཀླད་ཁྲག་ཞོ་ལྟར་དཀྲུག་པའི་དུས་ལ་བབས༔ དབང་པོ་རྡུལ་དུ་རློགས་ཤིག་ཁྲག་འཐུང་མ༔ སྔགས། ཧཱུྃ་བྷྱོ༔ ཟངས་ཀྱི་གྲི་གུག་རྡོ་རྗེའི་ཡུ་བ་ཅན༔ ཁྲོ་ཆུའི་ཚ་ཚ་ཐོག་གི་བུ་ཡུག་འཐིབ༔ དགྲ་བགེགས་རྡུལ་དུ་བརླག་པའི་དུས་ལ་བབས༔ དུས་མཐའ་སྡུས་ཤིག་ཐོག་གི་བུ་ཡུག་མ༔ སྔགས། ཧཱུྃ་བྷྱོ༔ ནད་ཀྱི་རྐྱལ་པ་དུག་གི་རླངས་པ་འཕྲོ༔ མཚོན་གྱི་དྲུ་བུས་ཡན་ལག་གཅོད་ཅིང་གཏུབ༔ དགྲ་བགེགས་མྱུར་དུ་གསོད་པའི་དུས་ལ་བབས༔ རྗེས་ཤུལ་མེད་པར་ཐོང་ཞིག་ནད་བདག་མོ༔ སྔགས། ཧཱུྃ་བྷྱོ༔ ཁྲོ་བོའི་རྒྱལ་པོ་བཛྲ་ཀཱི་ལཱ་ཡ༔ གསོད་བྱེད་ཕོ་བརྒྱུད་གིང་ཚོགས་སེར་ལྟར་འགྲིལ༔ ཟ་བྱེད་མོ་བརྒྱུད་ཤ་ཟ་རྡུལ་ལྟར་འཚུབ༔ ཁྲོ་བོའི་རྒྱལ་པོ་མཁའ་འགྲོའི་དབང་ཕྱུག་གིས༔ དགྲ་བགེགས་རྡུལ་དུ་རློགས་ལ་དུམ་བུར་གཏུབས༔ ཚལ་པར་ཁོས་ལ་སོད་ཅིག་ཀཱི་ལཱ་ཡ༔ ཐུན་སྣ་སྣ་ཚོགས་དགྲ་བོའི་སྟེང་དུ་རྒྱོབ༔ དུས་ལ་བབ་པོ་དྲེགས་ཚོགས་ལྷ་སྲིན་རྣམས༔ བཀའ་ལས་མ་འདའ་མ་མོ་བསྟན་མའི་ཚོགས༔ དམ་ལས་མ་འདའ་དགྲ་བགེགས་མྱུར་དུ་བསྒྲོལ༔ སྔགས་དང་བཅས་ཏེ་ལིངྒ་བསྒྲལ་བར་བྱ༔ ཞེས་པས། ཧཱུྃ་བྷྱོ༔ བརྔམ་ཞིང་བརྔམ་ཞིང་དགྲ་བགེགས་སྲོག་རྩ་གཅོད༔ སྲོག་གཅོད་བདུད་མོ་འབུམ་སྡེའི་དུས་ལ་བབས༔ བགད་ཅིང་བགད་ཅིང་ཤ་ཟ་རུས་ལ་འཆའ༔ ཟ་བྱེད་མ་མོ་འབུམ་སྡེའི་དུས་ལ་བབས༔ འབར་ཞིང་འཁྲུག་སྟེ་ནད་མཚོན་བུ་ཡུག་གཏིབ༔ གསོད་བྱེད་ཌྷཀྐིའི་ཚོགས་རྣམས་དུས་ལ་བབས༔ དུས་ལ་བབ་པོ་དམ་ཉམས་དགྲ་བགེགས་སྒྲོལ༔ ནྲི་ཏྲི་ཤ་ཏྲུཾ་གྷརྫ་གྷརྫ་མྱོགས་མྱོགས་གཏུབས་གཏུབས་འབར་འབར་ཤག་ཤག་མཱ་ར་ཡ་ཧཱུྃ་ཕཊ༔ བྷྱོ་མ་ར་ཡ་ཛ་ཧཱུྃ༔ བྷྱོ་རེ་མ་ཏཱི་མ་ར་ཡ་ཛ་ཕཊཿབྷྱོ་རེ་མ་ཏཱི་མཱ་ར་ཡ་ཛ་ཧཱུྃ་བྷྱོ་ཕཊ༔ བྷྱོ་རེ་མ་ཏཱི་དགྲ་བོ་བྱད་མ་ལྷ་དང་བཅས་པ་མཱ་ར་ཡ་ཛ་ཧཱུྃ་བྷྱོ་ཕཊ༔ མ་བྷྱོ་མ་མ་རུ་ལུ་ཏྲག་རཀྴ་བྷྱོ་རེ་མ་ཏི་དགྲ་བོ་མཱ་ར་ཡ་ཛ་ཧཱུྃ་བྷྱོ་བཛྲ་ཕཊ༔ མ་བྷྱོ་མ་མ་ཏྲག་རཀྴ་བྷྱོ་རེ་མ་ཏཱི་དགྲ་བོ་སརྦ་ཤ་ཏྲུཾ་མཱ་ར་ཡ་ཛ་ཧཱུྃ་བྷྱོ་བཛྲ་ཕཊ༔ མ་བྷྱོ་མ་མ་རུ་ལུ་ཏྲག་རཀྴ་བྷྱོ་རེ་མ་ཏཱི་མ་ར་ཡ་ཛཿམ་མ་ཏྲག་རཀྴ་དགྲ་བོའི་སྙིང་ཁ་རག་ཙིཏྟ་སྲོག་དུང་དུང་ཛ་ཛ་ཧཱུྃ་བྷྱོ་བཛྲ་ཕཊ༔ ཅེས་སྔགས་དམིགས་གསལ་བས་ནན་གྱིས་བསྒྲལ་ལ་མཚོན་ཆས་གཏུབ་ཅིང་། ལིང་རོ་བསྟབས་པ་ནི། ཨཱོཾ་བཛྲ་དྷཀྐི་མ་ཧཱ་ཀཱ་ལི་རེ་མ་ཏི་ཧཱུྃ་བྷྱོ་ཧཱུྃ་ཕཊ༔ དམ་ཉམས་དགྲ་བགེགས་བསྒྲལ་བའི་གཏི་མུག་ཤའི་བྷ་ལིང་ཏ་ལ་ཁཱ་ཧི༔ འདོད་ཆགས་ཁྲག་གི་བྷ་ལིང་ཏ་ལ་ཁཱ་ཧི༔ ཞེ་སྡང་རུས་པའི་བྷ་ལིང་ཏ་ལ་ཁཱ་ཧི༔ དབང་པོ་རྣམ་ལྔའི་བྷ་ལིང་ཏ་ལ་ཁཱ་ཧི༔ དོན་སྙིང་རྣམ་ལྔའི་བྷ་ལིང་ཏ་ལ་ཁཱ་ཧི༔ མ་ཧཱ་མཾ་ས་ལ་ཁཱ་ཧི༔ མ་ཧཱ་ཙིཏྟ་ལ་ཁཱ་ཧི༔ མ་ཧཱ་རཀྟ་ལ་ཁཱ་ཧི། མ་ཧཱ་གོ་རོ་ཙ་ན་ལ་ཁཱ་ཧི༔ མ་ཧཱ་བྷ་སུ་ཏ་ལ་ཁཱ་ཧི༔ མ་ཧཱ་ཀིཾ་ནི་རི་ཏི་ལ་ཁཱ་ཧི༔ ཞེས་དང་། ལྷ་ཚོགས་རྣམས་ཀྱིས་དགྲ་བགེགས་ཤ་ཁྲག་ལ༔ ལྷག་མ་མེད་པར་བཞེས་པས་གཟི་བརྗིད་རྒྱས༔ མཐུ་སྟོབས་དཔལ་འབར་ཁམས་གསུམ་དབང་དུ་བསྒྱུར༔ ནུས་མཐུའི་དཔུང་ལྡན་སྲིད་གསུམ་ཟིལ་གནོན་བསམས༔ དྲེགས་པའི་སྟོབས་བསྐྱེད་དྲེགས་པའི་དགྲ་བགེགས་བཟློག༔ ཞེས་གསུངས་པས། དེ་ནས་ཁྲག་ཟོར་སྒྲུབ་ཏེ༔ དེ་ཡང་གཏེར་གཞུང་དུ་བསྒྲལ་ལས་ཀྱི་གོང་དུ་ཁྲག་ཟོར་སྒྲུབ་པ་འདྲ་ཞིག་གསུངས་འདུག་ཀྱང་། རྗེ་བླ་མའི་ཟིན་བྲིས་སུ་སྐབས་འདིར་སྒྲུབ་པར་གསུངས་འདུག་པས་འདི་བཞིན། བྷྱོ་ནག་མོ་རེ་མ་ཏཱི་ནྲི་ཏྲི་དགྲ་བགེགས་ཆེ་གེ་མཱ་ར་ཡ་ཛཿཁྲག་ཐུན་ནག་པོས་མྱོས་མྱོས༔ ཁྲག་ཐུན་ནག་པོས་མྱོགས་མྱོགས༔ ཆེ་གེ་མོའི་སྲོག་རྩ་ཆོད༔ སྙིང་རྩ་ཕྱུངས༔ བླ་སྲོག་རྣམ་པར་ཤེས་པ་ཐུམ་ཐུམ་རིལ་རིལ་སོད་སོད་ཧཱུྃ་ཧཱུྃ་ཕཊ་ཕཊ༔ ཞེས་པའི་སྔགས་འདི་བརྒྱའམ་ཉེར་གཅིག་སོགས་ཀྱིས་ནུས་ལྡན་དུ་བསྒྲུབ་ཅིང་ཟློག་གཞུང་གྱེར། ཟློག་པ་ཚར་མང་པོ་འདོན་ན་སྔོན་དུ་བསྒྲལ་ལས་བསྡུས་པ་རེ་བྱས་ཀྱང་ལེགས། དེ་ནས་ཟློག་པ་ཚར་ནས་ཐུན་གཏོར་ལ་འགུགས་གཞུགས་དང་བྱིན་རླབས་བྱས། རྒྱུན་གཏོར་སྔོན་ནས་བཤམས་པ་ཡིན་ན་འགུགས་གཞུགས་གོང་དུ་སོང་བས་མི་དགོས་སྨན་རཀ་བྲན་ལ། ཨཱོཾ་བཛྲ་དྷཀྐི་སོགས་སྔགས་ལན་གསུམ་གྱིས་གཏོར་མ་འབུལ་ཞིང་གཉེར་གཏད་གྱེར། ཐུན་གཏོར་འབུལ། ལྷག་མ། ཆད་མདོ༔ བསྟན་སྐྱོང་། རྟ་བྲོ་སོགས་གསང་བ་སྤྱིའི་འགྲོས་བཞིན་ལས་ཀྱི་རྗེས་སྐྱོང་པ་རྣམས་སྒྲུབ་ཞག་ཙམ་བྱེད་ཀྱང་ཉིན་རེ་བཞིན་བྱ་བ་སྟེ། དེ་དག་ནི་དངོས་གཞིའི་རིམ་པའོ། །དེ་ནས་གསུམ་པ་ཟོར་འཕེན་ཚུལ་ནི། སྒྲུབ་ཞག་ཟིན་ནས་དཔོན་སློབ་རྣམས་ཀྱིས་ཁང་སྟེང་སོགས་བླ་གབ་མེད་པའི་གནས་སུ་གསེར་སྐྱེམས་གཏེར་གཞུང་ལྟར་གཏོང་པས་ཟོར་ལམ་ཕྱེ། དེ་ནས་ཐུན་གཏོར་སྔར་ལྟར་འབུལ་ཞིང་གཉེར་གཏད་བྱ། བདག་ཉིད་ཧེ་རུ་ཀཿདང་མདུན་བསྐྱེད་ལྷ་མོ་དམ་ཚིག་གཅིག་ཏུ་འདྲེས་པར་བསམ་ལ་རྩ་སྔགས་ལ་ཀཱ་ཡ་ཝཱཀྐ་ཙིཏྟ་སརྦ་སིདྡྷི་ཧཱུྃ། བཏགས་པ་བརྗོད་ཅིང་གཏོར་གདུགས་ལས་དབང་བླང་ངོ་། །དེ་ནས་ཕྱག་ལེན་ལྟར་གླུད་གཏོང་། རྡོ་རྗེ་སློབ་དཔོན་ཞྭ་ནག་ཕོད་ཀ་སོགས་ཆས་ཀྱིས་སྤྲས་ལ། བསྐུལ་ཆེ་བ་འདོན་ལ་གཏོར་མ་སྤག །གཏོར་མའི་ཡེ་ཤེས་པ་མདུན་གྱི་ནམ་མཁར་བཏེག །གཏོར་ཆེན་སླར་ཡང་ཁྲག་ཟོར་སྔགས་དང་། ཟློག་སྔགས་ཀྱིས་ནུས་ལྡན་དུ་བསྒྲུབ་ཅིང་། ལྷག་མ་བསྔོ། ཆད་མདོར་འགུགས་གཞུག་དང་བཅས་དམག་ལྟོའི་ཚུལ་དུ་གཏོར་ཆེན་ནང་དུ་མཆོད། དར་ནག་དང་ཁྲག་ཟོར་གཏོར་མ་རྣམས་རིམ་པར་ཁྱེར་ལ་སེར་སྦྲེང་དང་བཅས། གནས་ཁང་ནས་གོམ་པ་བདུན་ཅུ་སོགས་ཀྱི་སར་གཏོར་ཚུགས་བྱེད། གསེར་སྐྱེམས་བྱ། ལིངྒ་ཤམས་ལ་ཧོམ་བསྐྱེད་དང་། དགུག་གཞུགས་རྒྱས་པར་ཚར་གསུམ་བསྡུས་པ་དང་འགུགས་སྔགས་ཅི་རིགས་བཟླས་ལ་རྒྱས་གདབ་བྱ། དེ་ནས་ལས་བྱང་ལྟར་བསྒྲལ་ལས་བསྡུས་པ་དང་། བདེ་མཆོག་དམོད་བཅོལ་ལྟར་བཞེས་སྒྲ་དང་བཅས་ཤོག་ལིང་ཧོམ་སྐོར་བྱ་བའམ་ཡང་ན་ཕྱག་ལེན་ལྟར་གཏོར་ཆེན་ནང་དུ་དཔལ་འབར་གྱིས་སྲེག །ཞལ་བསྟབ་བྱ། དེ་ནས་སྲིད་པ་ཧུའི་ཕྱག་རྒྱ་བཙུགས་པའི་དཀར་གཏོར་གྱིས་རྗེས་སུ་དར་དང་ཟོར་རྫས་གཏོར་མ་རྣམས་ཁྱེར་ནས་ཟོར་འཕེན་སར་སླེབས་པ་དང་། སྲིད་པ་ཧུའི་ཙཀླིའི་རྒྱབ་ཡིག་བཀླག །རྗེ་བླ་མས་མཛད་པའི་གསེར་སྐྱེམས་ཚིག་ལྷུག་མ་དེ། རྡོ་རྗེ་སློབ་དཔོན་རང་གཅིག་པུས་གསུང་ཞིང་གསེར་སྐྱེམས་མཆོད། དེ་ནས་ཟོར་བསྐུལ། དེ་ཕྱིར་ནུས་པའི་སྟོབས་བསྐྱེད་ཅིག་ཡན་འདོན། ལིངྒ་ཡོད་ན་ཟོར་གྱི་སྣར་བསྒྲད་ལ་དེའི་སྟེང་དུ་ཟོར་རྣམས་བརྡེག །དེ་ཡང་འཕེན་པ་ཟོར་གྱི་ལས་མཐའ་ལྟར་ཁྲག་ཟོར་འཕང་ཤིང་ཁྲག་ཟོར་སྔགས་དང་། ཟློག་སྔགས་སྦྲེལ་ནས་བཟླ། བན་སྐྱེ་བུད་མེད་སོགས་མི་གྲངས་གཞུང་ལྟར་ཡོད་ན་སྐབས་ཐོབ་ལྟར་དང་། མེད་ཚེ་རྡོ་རྗེ་སློབ་དཔོན་ལས་རྡོར་སོགས་ཀྱིས་འཕེན། དེ་ནས་རིམ་པར་ཡང་མ་དང་། བཀའ་སྲུང་མ་མོ་རྣམས་རང་རང་གི་བསྐུལ་དང་། ཟློག་སྔགས་བཟླ་ཞིང་འཕེན། གཏོར་ཆེན་བསྐུལ་ཆུང་བ་རྦད་བསྐུལ་གྱིས་འཕངས་ལ་ཟློག་སྔགས། རྦད་ཐུམ་རིལ། མ་བྷྱོ་མ་མ་རུ་ལུ་ཏྲག་རཀྴ་བྷྱོ་རེ་མ་ཏི་དགྲ་བགེགས་བྱད་མ་ལྷ་སྲུང་དང་བཅས་པ་མཱ་ར་ཡ་ཧཱུྃ་ཛ་བྷྱོ་ཟློག༔ བྱད་ཕུར་གཏད་ཁྲམ་སྟོན་པའི་བན་བོན་བྱད་མ་ལྷ་སྲུང་དང་བཅས་པའི་བླ་སྲོག་རྣམ་པར་ཤེས་པ་ཆོད་ཅིག །སོད་ཅིག །གཏུབ་ཅིག །ས་མ་ཡ་བྷྱོ་བྷྱོ་ཟློག་ཟློག༔ མ་ར་ཡ་ཧཱུྃ་ཕཊ༔ བྷྱོ་རེ་མ་ཏི་སརྦ་ས་མ་ཡ་ཛ་ཛ་བྷྱོ་བྷྱོ་ཟློག་ཟློག་མཱ་ར་ཡ་བྷྱོ་ཟློག༔ ས་མ་ཡ་བྷྱོ་ཟློག༔ ན་ཤ་ཡ་བྷྱོ་ཟློག༔ ཨེ་ཧུར་ཐུམ་བྷྱོ་ཟློག༔ བྱད་གཏད་ཐན་གསུམ་ནད་གདོན་བགེགས་དང་བཅས་པ་ཐམས་ཅད་བྷྱོ་བྷྱོ་ཟློག་ཟློག༔ རིལ་ཤག་སྲོག་ཁྱེར་བྷྱོ་ཏྲིག་མྱག་ཀཱ་པ་ཡེ། ཞེས་བཟླ་ཞིང་འཕང་ངོ་། །བཤལ་ཆུས་གཏོར་མར་བྲན་ཞིང་བསྟན་མ་སྐྱོང་། མཚམས་གཅོད་སྒོམ་ལ་ཕྱི་མིག་མི་བལྟ་བར་རྡོ་རྗེ་སློབ་དཔོན་གྱི་ཏིང་མནན་ཏེ་ཕྱིར་ལོག །སྒོ་དྲུང་དུ་རྟ་བྲོ་བྱ། དམ་སྲིའི་ལིངྒ་ཡོད་ན་མཉམ་པོར་མནན། དེ་ནས་སྒྲུབ་ཁང་དུ་སླེབས་ནས་ཚེ་བསྙེན་བཟླ་ཞིང་ཚེ་འགུགས་གསང་བ་ཚེ་ཡི་སོགས་འདོན། ཚེ་ཆང་འཐུངས། མཆོད་པ་ཁ་གསོས་ལ་ལས་བྱང་ལྟར་མཆོད་བསྟོད་བྱ། ཡི་གེ་བརྒྱ་པས་ལྷག་ཆད་བཀང་། ཏིང་འཛིན་ཉམས་དང་རྫས་མ་ཚང་། སོགས་ཀྱིས་ནོངས་པ་བཤགས། རྟེན་གཏོར་ཡིན་ན་རྟེན་བཞུགས་དང་མིན་ན་གཤེགས་གསོལ་བྱེད། བསྐང་མདོས་དང་། མངའ་གསོལ་སོགས་གཏོར་མ་རྣམས་ལོང་ཡོད་ན་ཕྱིར་ཉིན་ལས་གཞུང་སྲོང་ཞིང་བསྐང་གསོལ་བྱས་ལ་ཐོག་ཁར་གཤེགས་ན་ལེགས། ལོང་མེད་ན་གོང་གི་གཉེར་གཏད་དུས་སུ་གཤེགས། གཞན་ལས་ཀྱི་རྗེས་མི་མངོན་པར་བསྡུ་བ་སོགས་གསང་བ་སྤྱིའི་འགྲོས་བཞིན་ཤེས་པ་བྱས་ལ་བཀྲ་ཤིས་བསྔོ་སྨོན་སོགས་ཀྱིས་མཐར་བརྒྱན་པར་བྱ་སྟེ་དེ་དག་ནི་རྗེས་ཀྱི་རིམ་པ་ཇི་ལྟར་བྱ་བའི་ཚུལ་ལོ། །འདིར་སྨྲས་པ། རྣོ་མྱུར་ཚན་ཆེ་མངོན་སྤྱོད་དྲག་པོའི་ལས། འཇིགས་རུང་མ་མོའི་ཁྲག་ཟོར་གདུག་པའི་དབལ། དགྲ་བགེགས་གང་ལ་བརྩམ་ཡང་རྨེག་མེད་དུ། འཇོམས་པའི་ཐབས་ཚུལ་འདི་མཚུངས་གཞན་ན་མེད། དེ་ཕྱིར་དམ་ལྡན་རིགས་སྔགས་འཆང་རྣམས་ཀྱིས། བསྟན་འགྲོའི་དོན་དུ་བྱང་ཆུབ་ཐུགས་བསྐྱེད་ནས། འགལ་རྐྱེན་བར་ཆད་དགྲ་འདྲེས་འཚེ་བའི་རྒྱུན། གཅོད་བྱེད་ལས་ཀྱི་སྤུ་གྲི་འདི་ཟུངས་ཤིག །འདི་བྲིས་དགེ་བས་བསྟན་འགྲོའི་དཔལ་འབྱོར་ལ། །འཚེ་བའི་སྐལ་ངན་དགུན་གྱི་གྲང་རེག་ཀུན། །རྒྱང་བསྲིངས་བདེ་སྐྱིད་ཕུན་ཚོགས་དབྱར་གྱི་མཛའ། །འགུགས་བྱེད་དཔྱིད་གྱི་དཔལ་མོ་ཉིད་གྱུར་ཅིག །ཅེས་པ་འདི་ནི་ཆོས་ཀྱི་བདག་པོ་མཆོག་སྤྲུལ་རིན་པོ་ཆེ་འཇིགས་མེད་བསྟན་པའི་སྡེའི་བཀའ་མཆིད་ཀྱི་ལམ་ནས་ཡང་ཡང་ནན་བསྐུལ་གནང་བ་གྱེན་ལྡོག་མ་ནུས་པར། ཕྱོགས་མཚོན་ཙམ་དུ་སྔགས་བཙུན་ངག་དབང་བློ་གྲོས་སམ། གསང་མིང་ནུས་ལྡན་དྲག་པོ་རྩལ་ཞེས་པས་གཡར་ཁྲལ་དུ་ཕུལ་བ་དགེ། །།

དཔལ་ལྡན་སྔགས་ཀྱི་སྲུང་མའི་སྲོག་དབང་བྱ་ཚུལ་ཁྲིགས་སུ་བཀོད་པ་མ་གཅིག་དགྱེས་པའི་དགའ་སྟོན།

དཔལ་ལྡན་སྔགས་ཀྱི་སྲུང་མའི་སྲོག་དབང་བྱ་ཚུལ་ཁྲིགས་སུ་བཀོད་པ་མ་གཅིག་དགྱེས་པའི་དགའ་སྟོན་ཞེས་བྱ་བ་བཞུགས་སོ། །རྒྱལ་བའི་ཡུམ་ཆེན་གང་གི་རྣམ་རོལ་རྩལ། །མི་བསྲུན་དྲག་མོར་ཁྲོས་པའི་རྣམ་འགྱུར་དུ། །ཡོངས་བཞེངས་སྲིད་གསུམ་བདག་མོ་རེ་མ་ཏཱིར། །འདུད་དོ་དུས་ཀུན་མ་ལྟར་བརྩེ་བས་སྐྱོངས། །བསྟན་དང་སྒྲུབ་ལ་འཚེ་བའི་བར་ཆད་ཚོགས། ངེས་པར་བསྲུང་བརྩོན་དཔལ་གྱི་ལྷ་མོ་ཡིས། །བྱིན་རླབས་དབང་བསྐུར་ཟབ་མོ་འཇུག་བདེའི་ཁྲིགས། །སྲིད་གསུམ་བདག་མོ་དགྱེས་པའི་དགའ་སྟོན་བྱ། །དེ་ཡང་སྔགས་སྲུང་དཔལ་གྱི་ལྷ་མོའི་སྲོག་དབང་ཟབ་ཅིང་གཉན་པ་འདི་ཉིད་ཇི་ལྟར་བསྐུར་བའི་ཚུལ་ཅུང་ཟད་འཇུག་བདེར་བགྱིས་པ་ལ། དེ་ཡང་གཞུང་ལས། ༈ སྔགས་བདག་འབར་མའི་ཐུགས་ཐིག་ལས༔ མ་མོ་དྲེགས་པའི་སྲོག་དབང་བཀའ་རྒྱ་ཅན་བཞུགས༔ རྦོད་གཏོར་མ་མོའི་ཚོགས་ལ་འདུད༔ དུར་ཁྲོད་ལ་སོགས་དབེན་གནས་སུ༔ བསྙེན་བསྒྲུབ་ཐེམས་པའི་སློབ་དཔོན་གྱིས༔ སྣོད་དང་ལྡན་པའི་སློབ་མ་ལ༔ ནམ་གྱི་སྲོད་ལ་བབས་པའི་ཚེ༔ དབང་གི་སྨིན་གྲོལ་སྩལ་བར་བྱ༔ ས་མ་ཡཱ༔ རྒྱ་རྒྱ་རྒྱ༔ དུར་ཁྲོད་ས་རྡོའི་སྟེགས་བུའི་ཁར༔ གྲུ་གསུམ་མུ་ཁྱུད་ཐོད་རས་བསྐོར༔ ཕྱི་རིམ་ཁྲག་གི་རྒྱ་མཚོའི་རིས༔ དེ་ཕྱིར་རླུང་གི་རི་མོ་དང་༔ དེ་ཕྱིར་མེ་རིས་བསྐོར་བ་འབྲི༔ དབུས་སུ་བུམ་པར་ཁ་རྒྱན་སྤྲས༔ གཡས་གཡོན་སྨན་རག་དགོད་པར་བྱ༔ རྒྱབ་ཏུ་དབང་གཏོར་མདུན་དུ་མཆོད་གཏོར་བཤམས༔ གཞན་ཡང་དབང་གི་དགོས་རྫས་བསགས༔ ཐ་མར་མཆོད་ཚོགས་ཅི་འབྱོར་བཤམས༔ ལས་བྱང་བསྲང་ཞིང་བསྙེན་ཁ་གསོ༔ ལས་བུམ་སྒྲུབ་ཅིང་ཏིང་འཛིན་གྱིས༔ བདག་འཇུག་བླངས་ཤིང་ལྷ་མོ་ལ༔ སློབ་བུ་འཇུག་པའི་གསོལ་བ་གདབ༔ གནང་བ་བྱིན་ནས་འོད་དུ་ཞུ༔ དབང་རྫས་རྣམས་ལ་ཐིམ་པར་བསྒོམས༔ ས་མ་ཡཱ༔ རྒྱ་རྒྱ་རྒྱ༔ ཞེས་གཞུང་དུ་བཤད་པ་བཞིན༔ དཀྱིལ་འཁོར་གྱི་དབུས་སུ་མཉྫིའམ་ཁྲིའུའི་ཁར། གཡས་གཡོན་སྨན་རག་བུམ་པའི་མདུན་དུ་གཙོ་མོ་རིགས་བདག །དྲེགས་པ་བདུན། བསྟན་མ་བཅུ་གཉིས་ཀྱི་ཙཀླི། མདུན་ངོས་སུ་ཁ་ཊཾ་དར་ནག་གིས་བརྒྱན་པ། རལ་གྲི། གྲི་གུག །བེ་ཅོན། མེ་ལོང་། རྔ་ཐོད་ཕྲེང་གི་རྒྱན་ལྡན། ཉ་བོ་བསྒྲལ་ཆས། གཙང་མའི་གདབ་ཕུར་སོགས། གསེར་སྐྱེམས། རྒྱབ་ཏུ་དབང་གཏོར། མདུན་དུ་མཆོད་གཏོར། མཆོད་ཚོགས་བཅས། གཞན་ཡང་སློབ་དཔོན་མདུན་དུ་ལས་བུམ། ཌཱ་དྲིལ། ནས་ཟེ། སྤོས་ཐུན། བགེགས་གཏོར། མཎྜལ་སོགས་ཉེ་བར་མཁོ་བ་སོགས་འདུ་བྱས་ལ། བཤམས་བཀོད་གྲུབ་ནས་ལས་ཀྱི་གཞུང་བསྲང་ཞིང་འཛབ་བསྙེན་ནུས་ལྡན་དུ་བྱས། བདག་འཇུག་བླངས་ཤིང་གནང་བ་ཞུ་སྟེ་མེ་ཏོག་འཐོར་ལ། སློབ་མ་འཇུག་པར་གསོལ་བ་གདབ། དེ་ནས་ཚོགས་དང་བསྐང་བ་སོགས་རྒྱས་བསྡུས་གང་རུང་བཏང་། བཤགས་པ་ཡན་གྲུབ་ནས། ལས་བུམ་བསངས་སྦྱངས། སྟོང་པའི་ངང་ལས་པད་ཉིའི་སྟེང་དུ་ཧཱུྃ་ལས་བདུད་རྩི་འཁྱིལ་བ་ལྗང་སྔོན་ཕྱག་གཉིས་གཡས་རྡོ་རྗེའི་དབྱུག་པ་དང་། གཡོན་སྡིག་མཛུབ་མཛད་པ། ཁྲོ་བོའི་ཆ་ལུགས་རྫོགས་པའི་གནས་གསུམ་ཨཱོཾ་ཨཱཿཧཱུྃ་གིས་མཚན་པ་ལས་འོད་ཟེར་འཕྲོས་པས་ཡེ་ཤེས་པ་སྤྱན་དྲངས་དམ་ཡེ་དབྱེར་མེད་དུ་གྱུར་པའི་ཐུགས་ཀར་ཧཱུྃ་ལ་སྔགས་ཀྱིས་བསྐོར་བ་དམིགས་ལ། ཨོཾ་བིག་ནན་ཏ་ཀྲིཏ་ཧཱུྃ་ཕཊ༔ ཅེས་བཟླས་པ་བརྒྱ་རྩ་བརྒྱད་ལ་སོགས་པའི་མཐར་བདུད་རྩིར་ཞུ་བར་བསམ། དེ་ནས་གཞུང་ལས། སྣོད་ལྡན་སློབ་བུ་ལྔ་གསུམ་བདུན༔ གསེར་གཡུ་གོ་མཚོན་མནྜལ་ཐོགས༔ མགྲིན་གཅིག་གསོལ་བ་འདི་ལྟར་གདབ༔ ཞེས་གསུངས་པར་སློབ་བུ་རྣམས་སྒོའི་ཡོལ་བའི་ཕྱིར་འཁོད་ལ། ཀྱཻ་དགོངས་ཤིག་རྡོ་རྗེ་རྒྱལ་པོ་དགོངས༔ བདག་ཅག་འདིར་ཚོགས་བུ་རྣམས་ལ༔ མ་གཅིག་ལྷ་མོ་དཔལ་ཆེན་མོའི༔ དབང་དང་བྱིན་རླབས་སྩལ་དུ་གསོལ༔ གསུམ༔ དྲི་བ་ནི༔ ཧོ་ཁྱོད་རྣམས་དམ་ཚིག་ལ་གནས་ཤིང་༔ ལྷ་མོ་ཆེན་མོ་མཆོད་བསྟོད་བསྒྲུབ༔ བསྙེན་སྒྲུབ་ལས་སྦྱོར་རྩམ་ཕོད་དམ༔ དམ་ལ་གནས་ན་སྨིན་པར་བགྱིད༔ ཅེས་དྲིས༔ ལན་གསོལ་བ༔ ཀྱཻ་དགོངས་ཤིག་དཔལ་ལྡན་ཧེ་རུ་ཀཿ བདག་ནི་ཐེག་མཆོག་སྐལ་ལྡན་བུ༔ བཀའ་ལྟར་བསྒྲུབ་ཅིང་དམ་ལ་གནས༔ བདག་ལ་སྨིན་གྲོལ་དངོས་གྲུབ་སྩོལ༔ གསུམ༔ དེ་ནས་ལས་བུམ་གྱིས་བཀྲུས༔ བགེགས་མཚམས་བཅད༔ བསྲུང་བའི་འཁོར་ལོ་བསྒོམ༔ མཎྜལ་ཕུལ་ཞིང་ཕྱག་བྱེད༔ ཞེས་གསུངས་པ་ལྟར་སློབ་བུ་རྣམས་ཁྲུས་བྱས་གྲལ་ལ་འཁོད་བགེགས་གཏོར་གཏོང་ཞིང་རོལ་མོའི་མཚམས་རྔམས་དང་བཅས་བགེགས་བསྐྲད། སྲུང་པའི་འཁོར་ལོ་དྲག་ཏུ་བསྒོམ་ལ། སློབ་དཔོན་གྱིས་ཉན་པར་བསྐུལ་ཞིང་། ནམ་མཁའ་དང་མཉམ་པའི་སེམས་ཅན་ཐམས་ཅད་ཟུང་འཇུག་སྐུ་བཞིའི་ཡེ་ཤེས་ལྔའི་རྒྱལ་བ་ཁྱབ་བདག་གདོད་མའི་མགོན་པོ་རྡོ་རྗེ་འཆང་ཆེན་པོའི་གོ་འཕང་རིན་པོ་ཆེ་མངོན་དུ་བྱེད་པར་བྱ། དེའི་རྒྱུ་རྐྱེན་སངས་རྒྱས་ཀྱི་བསྟན་པ་རིན་པོ་ཆེ་སྒོ་དུ་མ་ནས་མི་ཉམས་ཤིང་རྒྱས་པའི་ཆེད་དུ་འཛིན་སྐྱོང་སྤེལ་ཞིང་བསྲུང་བར་བྱ་བའི་ཕྱིར་དང་། རང་ཉིད་བསྒྲུབ་པའི་བར་ཆད་ཐམས་ཅད་ངེས་པར་བསྲུང་བའི་ཆེད་དུ་དཔལ་ལྡན་སྔགས་ཀྱི་སྲུང་མ་ཆེན་མོའི་སྲོག་དབང་ཟབ་མོ་ཞུ་བར་བགྱིད་སྙམ་དུ་བསམ་པ་བྱང་ཆུབ་ཀྱི་སེམས་དྲི་མ་མེད་པས་ལེགས་པར་གསལ་བཏབ་སྟེ་གསན་པར་ཞུ། དེ་ཡང་སྟོན་པ་ཡང་དག་པར་རྫོགས་པའི་སངས་རྒྱས་ཀྱིས་སྔགས་ཀྱི་རྒྱུད་སྡེ་རྣམས་སུ་ཆོས་སྐྱོང་གི་རྣམ་པ་མང་དུ་གསུངས་པའི་ནང་ནས་དཔལ་གྱི་ལྷ་མོ་ཉིད་དུ་བསྔགས་ཤིང་དེ་ཉིད་ཀྱི་རྒྱུད་ཀྱང་མང་དུ་གསུངས་ཤིང་། སྔགས་གྱི་རྒྱུད་སྡེ་བཞིའི་སྲུང་མར་ཡང་བསྐོས་པ་ཡིན་ལ། དེ་ནས་འཕགས་བོད་ཀྱི་པཎ་གྲུབ་དུ་མས་རྒྱུད་དང་མན་ངག་ལས་བྱུང་བའི་སྒྲུབ་ཐབས་ཀྱང་གྲངས་ཀྱིས་མི་ཆོད་པ་བཞུགས་ཤིང་། དེ་ཉིད་ཀྱི་སྒོ་ནས་ཕྲིན་ལས་རྣམ་པ་བཞིས་བསྟན་འགྲོའི་དོན་མཛད་པ་ཡང་མང་དུ་བྱུང་བ་གསར་རྙིང་རིས་མེད་དུ་གྲུབ་པར་གྱུར་མོད། ཁྱད་པར་དུ་སློབ་དཔོན་ཆེན་པོ་པདྨ་འབྱུང་གནས་ལ་དཔལ་ལྡན་ལྷ་མོ་ཉིད་ཀྱིས་སྲོག་སྙིང་ཕུལ་ཞིང་བསྟན་པ་བསྲུང་བར་ཁས་བླངས་ཤིང་དམ་བཅས་པ་ཉིད་ཕྱིར་སློབ་དཔོན་ཆེན་པོས་ཀྱང་གསང་ཆེན་བསྟན་པའི་སྲུང་མར་ཆེད་དུ་བསྔགས་ཤིང་། སྒྲུབ་ཐབས་དང་ལས་ཚོགས་ཀྱི་རིགས་བསམ་གྱིས་མི་ཁྱབ་པ་ཞིག་མཛད་ནས་གཏེར་ཁ་སོ་སོར་གཏེར་དུ་སྦས་པ་དག་རིམ་པར་སྤྲུལ་པའི་གཏེར་སྟོན་མང་པོའི་གཏེར་ཁ་ཞལ་ཕྱེས་པ་ལས་བྱུང་བའི་གདམས་བསྐོར་མཐའ་ཡས་པར་བཞུགས་མོད་ཀྱི། ད་ལམ་གྱི་སྐབས་སུ་བབས་པ་འདི་ནི། སྔོན་རྒྱ་གར་འཕགས་པའི་ཡུལ་དུ་ཤར་ཕྱོགས་བྷངྒ་ལའི་རྒྱལ་ཁམས་སུ་བསྟན་པ་སྤེལ་བར་མཛད་ཅིང་། འཕགས་པའི་ཡུལ་དུ་གསང་སྔགས་ཐབས་ཀྱི་གཟུངས་མ་བྲམ་ཟེའི་བུ་མོ་དཔལ་སྐྱེས་མ་ཞེས་བྱ་བ་མཚན་བཟང་སུམ་ཅུའི་སྤྲས་པ་ཞིག་ཕྱག་རྒྱར་བསྟེན་པའི་ཚེ། སློབ་དཔོན་ཆེན་པོས་འཕགས་པ་ཀླུ་སྒྲུབ་ཀྱི་ཕྱག་བཟོ་འཕགས་པ་མཆེད་གཉིས་སྔགས་སྲུང་གདམས་བསྐོར་རྣམས་གནང་ནས་སྐྱེ་བའི་མཐའ་མར་བོད་ཡུལ་དུ་འགྲོ་དོན་འབྱུང་བའི་ལུང་བསྟན་བཀའ་རྒྱ་དང་བཅས་རྒྱ་གར་རྩྭ་མཆོག་གྲོང་གི་བྱང་སྒོ་ཧ་ཙོ་ཞེས་པར་གཏེར་དུ་སྦས་པ་ལས། གསང་ཡུམ་ཡེ་ཤེས་ཀྱི་མཁའ་འགྲོ་དེ་ཉིད་ཀྱི་སྐྱེ་བ་རིམ་གྱིས་བརྒྱུད་པའི་མཐར་རིག་འཛིན་ཆེན་པོ་ཉི་མ་གྲགས་པ་རྩལ་དུ་སྐྱེ་བ་བཞེས་ཏེ་སྤྲུལ་པའི་གཏེར་ཆེན་དེ་ཉིད་ཀྱིས་ལུང་བསྟན་དུས་བབས་ལྟར་ཁ་ཕྱེས་ནས་འགྲོ་དོན་རྒྱ་ཆེར་མཛད་པ་ཡིན་ཏེ། དེ་ཡང་རང་གཏེར་ལོ་རྒྱུས་སུ། སྔགས་སྲུང་མཁའ་འགྲོའི་ཚོགས་ལ་འདུད༔ རྒྱ་གར་ཡུལ་གྱི་བྷང་ག་ལར༔ བདག་ཉིད་པདྨ་འབྱུང་གནས་ཀྱིས༔ རཱ་ཛ་ནོར་བུ་འོད་ལྡན་བསྒྲལ༔ རྣམ་ཤེས་མཁའ་སྤྱོད་གནས་སུ་སྦར༔ རྒྱལ་སྲིད་བདག་གིས་བཟུང་བྱས་ནས༔ ཡུལ་དེར་དམ་པའི་ཆོས་ཁྲིམས་བཙུགས༔ དེ་ཚེ་མུ་སྟེགས་སྟོན་པ་འགས༔ ཟག་བཅས་མངོན་ཤེས་སྣ་ཚོགས་ཀྱིས༔ ལེགས་པར་བལྟས་ནས་ཁུངས་བཅད་པས༔ རྒྱལ་པོ་ནོར་བུ་འོད་ལྡན་ལ༔ ཨོ་རྒྱན་རྒྱལ་པོའི་སྲས་པོ་ཡིས༔ བརྟུལ་ཞུགས་ཕོགས་སྟེ་རྒྱལ་པོ་བསྒྲལ༔ གསོབ་འདི་པདྨ་སམ་བྷས་བཟུང་༔ ནང་པའི་བསྟན་པ་བཙུགས་པར་གདའ༔ ད་སྟེ་རང་ཅག་སྟོན་པ་རྣམས༔ དུར་ཁྲོད་ཆེན་པོའི་གནས་སུ་འདོང་༔ དྲག་སྔགས་ཕབ་སྟེ་རྒྱལ་པོ་བསྒྲལ༔ ནང་པའི་བསྟན་པ་ཉམས་པར་བྱེད༔ ཅེས་པར་ཁོང་རྣམས་སེམས་འཆམ་སྟེ༔ དུར་ཁྲོད་འདམ་བུའི་ཚལ་དུ་སོང་༔ དེ་ཚེ་བདག་ཉིད་པད་འབྱུང་ལ༔ སྔགས་བདག་འབར་མས་སྲོག་སྙིང་ཕུལ༔ བསྒོམ་བཟླས་བསྐྱེད་རྫོགས་ལས་ལ་སྦྱར༔ འབོད་རྦད་བསད་གསུམ་ལས་སྦྱོར་གྱིས༔ མུ་སྟེགས་སྟོན་པ་ཁ་ཕུང་བཏང་༔ ཡུལ་དེར་སངས་རྒྱས་བསྟན་པ་རྒྱས༔ དེ་ནས་གདམས་པ་ཟབ་མོ་འདི༔ མཚན་བཟང་སུམ་ཅུའི་སྤྲས་པ་ཡི༔ བྲམ་ཟེའི་བུ་མོ་དཔལ་སྐྱེས་མར༔ བཀའ་རྒྱ་བྱས་ཤིང་སྨོན་ལམ་བཏབ༔ རྩྭ་མཆོག་གྲོང་གི་བྱང་སྒོ་ན༔ རྒྱ་བདུན་བཏབ་ཏེ་གཏེར་དུ་སྦས༔ ལས་འཕྲོ་ཅན་ལ་སྨོན་ལམ་བཞག༔ ཅེས་གསུངས་པ་འདི་ཉིད་རིག་འཛིན་ཆེན་པོ་ཉི་མ་གྲགས་པ་རྩལ་དེ་ཉིད་ཀྱིས་ཤིང་ཕོ་བྱི་བའི་ལོ་ཧོར་ཟླ་དང་པོའི་ཡར་ཚེས་ལ་རྒྱ་གར་རྩྭ་མཆོག་གྲོང་གི་བྱང་སྒོ་ནས་གདན་དྲངས་ཤིང་སྦས་ཡུལ་སྐྱིད་མོ་གཤོང་དུ་ཤོག་སེར་ལས་བོད་ཡིག་ཏུ་བསྒྱུར་ནས་སྐལ་པ་དང་ལྡན་པ་དག་ལ་རིམ་པར་སྤེལ་བར་གནང་བའི་སྲུང་མ་ཁྱད་པར་ཅན་འདི་ཉིད་ཀྱི་སྲོག་གཏད་བྱིན་རླབས་ཟབ་མོ་ཞུ་བའི་ཡོན་དུ་མཎྜལ་འབུལ་བར་ཞུ། ཞེས་བརྡའ་སྦྱར་ནས། དམ་ཆུ་བླུད་པ་ནི༔ ཧཱུྃ༔ གསང་བ་སྔགས་ཀྱི་དམ་ཚིག་དང་༔ ཁྱད་པར་ལྷ་མོ་ཆེན་མོ་ཡི༔ མཆོད་བསྟོད་ལས་སྦྱོར་དམ་ཚིག་བསྲུང་༔ ཉམས་ན་ན་རག་དམྱལ་བར་བསྲེག༔ དེ་བས་གསང་བའི་དམ་ཆུ་འཐུང་༔ ཨོཾ་ཨཱཿཧཱུྃ་ས་མ་ཡཱ༔ སྐྱབས་སུ་འགྲོ་བ་ནི༔ ཧཱུྃ༔ བླ་མ་དཔལ་ཆེན་ཧེ་རུ་ཀ༔ རྩ་གསུམ་བརྒྱུད་ལྡན་དཀྱིལ་འཁོར་ལྷ༔ མ་རྒྱུད་མཁའ་འགྲོའི་ལྷ་ཚོགས་ལ༔ སྐྱབ་ཏུ་གསོལ་ལོ་བྱིན་གྱིས་རློབས༔ བདག་ཅག་སེམས་ཅན་བདེ་ལྡན་དོན༔ བྱང་ཆུབ་སེམས་བསྐྱེད་ལྷ་མོ་བསྒྲུབ༔ བདག་ཅག་ཡང་དག་སྐྱབ་ཏུ་གསོལ༔ དེ་ནས་བསྐྱེད་རིམ་གཏད་སྤོས་གསུར་བདུག་རོལ་མོ་འཁྲོལ་བྱིན་དབབ་བརྟན་པར་བྱ༔ ཏིཥྛ་བཛྲ་ཡེ་སྭཱ་ཧཱ༔ ཞེས་བརྗོད་མེ་ཏོག་འཐོར་རོ༔ ཞེས་གསུངས་པས༔ ཨོཾ་མ་ཧཱ་ཤུ་ནྱ་སོགས་ལས་བུམ་གྱི་ཆུ་འཐོར༔ ཁྱེད་རང་སྐད་ཅིག་གི་དུར་ཁྲོད་ཆེན་པོ་ཁྲག་ཞག་གི་རྒྱ་མཚོ་དང་། ཐོད་མཁར་འབར་བའི་དབུས་སུ་པདྨ་ཉི་མའི་གདན་ལ་བོང་བུ་དམར་ག་མྱུར་མགྱོགས་ཀྱི་རྩལ་དང་ལྡན་པ་སྲིན་ལྤགས་དང་མི་མགོའི་སྒ་སྟན་སྦྲུལ་དང་སྒྱུ་མའི་གོང་རྨེད་བྱས་པའི་ཁར་མ་ཡིག་མཐིང་ནག་ཡོངས་སུ་གྱུར་པ་ལས་དཔལ་ལྡན་ལྷ་མོ་ཆེན་མོ་མཐིང་ནག་ཞལ་གཅིག་དྲག་ཏུ་ཁྲོས་པ་ཕྱག་གཉིས་ཀྱི་གཡས་ཁ་ཊྭཱཾ་བ་དན་གྱིས་མཚན་པ་འཕྱར་ཞིང་། གཡོན་པས་ནད་ཀྱི་རྐྱལ་བ་བསྣམས་པ། སྐུ་སྟོད་ལ་ཞིང་ལྤགས་དང་དར་ནག་སྐུ་སྨད་ལ་སྟག་ལྤགས་དང་མི་རྩིབས་གྱི་རེ་ལྡེ་མིག་མང་རིས་སུ་དཀྲིས་པ། སྤྱི་བོར་རྨ་བྱའི་སྒྲོ་ཕོད་བཙུགས་པ་སྙན་གཡས་ནས་སེང་གེ་འགྱིང་ཞིང་གཡོན་ནས་སྦྲུལ་ནག་གདེངས་པ་ཐོད་པ་སྐམ་རློན་དང་སྦྲུལ་གྱི་དོ་ཤལ་བྱས་པ། སྤྱི་བོའི་གཙུག་ན་ཟླ་བ་རྒྱས་པ་ལྟེ་བའི་དཀྱིལ་ནས་ཉི་མ་འཆར་བ་ཞབས་གཉིས་ཕྱེད་སྐྱིལ་གྱིས་ཆིབས་ལ་རོལ་པ་ནད་མཚོན་དུག་རླངས་ཀྱི་ཆར་པ་འཕྲོ་ཞིང་བལྟར་མི་བཟོད་པའི་སྐུར་གསལ་བའི་འཁོར་དུ་དྲེགས་པ་བདུན་དང་ནག་མོ་འབུམ་སོགས་མ་མོ་དང་མཁའ་འགྲོའི་ཚོགས་ཀྱིས་བསྐོར་བར་བསྐྱེད་པའི་ཐུགས་སྲོག་དང་བླ་མ་ཧེ་རུ་ཀར་གསལ་བའི་མདུན་བསྐྱེད་དང་བཅས་པའི་སྐུ་ལས་འོད་ཟེར་འཕྲོས་པས་ཆོས་ཀྱི་དབྱིངས་དང་གནས་ཡུལ་དུར་ཁྲོད་ཐམས་ཅད་དང་ཁྱད་པར་དུ་རི་རབ་ཀྱི་བྱང་ཤར་མུ་ལེ་མཐིང་མཚོའི་གཏིང་རུམ་ཡོངས་འདུ་ཤིང་གི་ར་བ་ཐོད་མཁར་འབར་བའི་ཕོ་བྲང་ནས་བསྒོམ་པ་དང་འདྲ་བའི་ཡེ་ཤེས་པ་དཔག་ཏུ་མེད་པ་ཁ་ཆར་བུ་ཡུག་འཚུབ་པ་ལྟར་བྱོན་ནས་ཁྱེད་རང་གི་སྒོ་གསུམ་ལ་རྡོ་ཚན་ལ་ཁ་བ་བབས་པ་ལྟར་སིབ་སིབ་ཐིམ་བྱུང་སྙམས་པའི་མོས་པ་དྲག་ཏུ་སྒོམས་ཤིག །ཞེས་སྔགས་དམིགས་དྲག་ཏུ་གཟིར་ཞིང་ཧཱུྃ་བྷྱོ༔ ཕྱོགས་ནི་ཉི་མ་བྱང་ཤར་སོགས། སྤྱན་འདྲེན་བྱེད་ནས་བྱིན་དབབ་པར་བྱའོ། །ཨཱོཾ་བཛྲ་དྷཀྐི་མ་ཧཱ་སོགས་རྩ་སྔགས་མཐར༔ བཛྲ་ས་མ་ཡ་ཨཱ་ཝེ་ཤ་ཡ་ཨ་ཨཱཿ ཞེས་མེ་ཏོག་འཐོར་ཞིང་རྡོ་རྗེ་སྤྱི་བོར་བཞག་ལ༔ ཏིཥྛ་བཛྲ་གྱིས་བརྟན་པར་བྱ་དེ་ནས་དབང་དོན་འདིའི་རྗེས་བཟློས་སྨྲོས༔ ཧཱུྃ༔ བླ་མ་ཡང་དག་དཔལ་ཆེན་པོས༔ མཁའ་འགྲོ་དྲེགས་པའི་སྡེ་ཚོགས་ཀྱི༔ སྲོག་དབང་བདག་ལ་སྩལ་དུ་གསོལ༔ ལན་གསུམ་བྱ༔ བུམ་པ་ཐོགས་ཏེ་སྤྱི་བོར་བསྐུར༔ ཧཱུྃ༔ རིན་ཆེན་སྣ་ཚོགས་བུམ་པའི་གཞལ་ཡས་ན༔ མ་རྒྱུད་གཙོ་མོ་དཔལ་གྱི་ལྷ་མོ་བཞུགས༔ སྐལ་ལྡན་བུ་ལ་དབང་མཆོག་འདི་སྦྱིན་པས༔ སྔགས་སྲུང་མཁའ་འགྲོའི་སྐུ་ཡི་དབང་ཐོབ་ཤོག༔ ཨཱོཾ་བཛྲ་མ་ཧཱ་ཀཱ་ལི་རེ་མ་ཏཱི་ཀཱ་ཡ་ཨ་བྷི་ཥིཉྩ་ཧཱུྃ༔ གཙོ་མོའི་ཙག་ལི་ཐོགས་ཏེ༔ ཧཱུྃ༔ སྐུ་གསུམ་མཁའ་འགྲོ་རྣམས་ཀྱི་བྱིན་རླབས་ལས༔ བསྟན་པའི་བྱ་ར་བྱེད་པའི་སྐུར་བསྟན་པ༔ ཡེ་ཤེས་མཁའ་འགྲོ་དཔལ་ལྡན་རྒྱལ་མོ་ཡི༔ སྐལ་ལྡན་བུ་ལ་དབང་མཆོག་སྦྱིན་པར་བྱ༔ བཛྲ་མ་ཧཱ་ཀ་ལི་རེ་མ་ཏཱི་ཛྙཱ་ན་ཀཱ་ཡ་ཨ་བྷི་ཥིཉྩ་ཧཱུྃ༔ ཧེ་རུ་ཀ་ཐོགས་ཏེ༔ ཧཱུྃ༔ བཅོམ་ལྡན་དཔལ་ཆེན་ཡང་དག་ཧེ་རུ་ཀ༔ རིགས་ཀྱི་བདག་པོ་རྩ་གསུམ་འདུས་པའི་དཔལ༔ སྐལ་ལྡན་རིགས་ཀྱི་བུ་ལ་དབང་བསྐུར་བས༔ ཁྲག་འཐུང་དཔལ་ཆེན་ཡབ་ཡུབ་དབང་ཐོབ་ཤོག༔ ཨཱོཾ་ཤྲི་ཧེ་རུ་ཀ་རུ་ལུ་རུ་ལུ་ཀ་ཡ་ཨ་བྷི་ཥིཉྩ་ཧཱུྃ༔ བ་ལམ་མ་ཐོགས་ཏེ༔ ཧཱུྃ༔ མ་མོ་ཆེན་པོ་བ་ལམ་དྲིལ་སྣ་མ༔ སྐུ་ལས་སྤྲུལ་པའི་ལྷ་མོ་འཁོར་བཅས་ཀྱིས༔ སྐལ་ལྡན་རིགས་ཀྱི་བུ་ལ་དབང་བསྐུར་བས༔ ཀཱ་ཡ་དྷཀྐིའི་ཚོགས་ཀྱི་དབང་ཐོབ་ཤོག༔ བ་ལམ་ཀཱ་ཡ་ཨ་བྷི་ཥིཉྩ་ཧཱུྃ༔ སྟག་སྨན་ཐོགས་ཏེ༔ ཧཱུྃ༔ སྟག་སྨན་ཆེན་མོ་གཟེར་འདེབས་དཔལ་མོ་ཆེ༔ གསུང་ལས་སྤྲུལ་པའི་ལྷ་མོ་འཁོར་བཅས་ཀྱིས༔ སྐལ་ལྡན་རིགས་ཀྱི་བུ་ལ་དབང་བསྐུར་བས༔ ཝཱཀྐ་དྷཀྐིའི་ཚོགས་ཀྱི་དབང་ཐོབ་ཤོག༔ སྟག་སྨན་ཀཱ་ཡ་ཨ་བྷི་ཥིཉྩ་ཧཱུྃ༔ ཁྲི་སྨན་ཐོགས་ཏེ༔ ཧཱུྃ༔ མ་མོ་ཆེན་མོ་ཁྲི་སྨན་སི་ལེ་མ༔ ཐུགས་ལས་སྤྲུལ་བའི་ལྷ་མོ་འཁོར་བཅས་ཀྱིས༔ སྐལ་ལྡན་རིགས་ཀྱི་བུ་ལ་དབང་བསྐུར་བས༔ ཙིདྟ་དྷཀྐིིའི་ཚོགས་ཀྱི་དབང་ཐོབ་ཤོག༔ ཁྲི་སྨན་ཀཱ་ཡ་ཨ་བྷི་ཥིཉྩ་ཧཱུྃ༔ རྡོ་རྗེ་བ་ལམ་མ་ཐོགས་ཏེ༔ ཧཱུྃ༔ མ་མོ་ཆེན་མོ་རྡོ་རྗེ་བ་ལམ་མ༔ ཡོན་ཏན་སྤྲུལ་པའི་ལྷ་མོ་འཁོར་བཅས་ཀྱིས༔ སྐལ་ལྡན་རིགས་ཀྱི་བུ་ལ་དབང་བསྐུར་བས༔ རཏྣ་དྷཀྐིའི་ཚོགས་ཀྱི་དབང་ཐོབ་ཤོག༔ བ་ལམ་ཀཱ་ཡ་ཨ་བྷི་ཥིཉྩ་ཧཱུྃ༔ ཚངས་པ་ཐོགས་ཏེ༔ ཧཱུྃ༔ ཚངས་པ་ཆེན་པོ་དུང་གི་ཐོར་ཚུགས་ཅན༔ འཕྲིན་ལས་སྤྲུལ་པའི་ཆོས་སྐྱོང་འཁོར་བཅས་ཀྱིས༔ སྐལ་ལྡན་རིགས་ཀྱི་བུ་ལ་དབང་བསྐུར་བས༔ ལི་བྱིན་སྐུ་ལྔའི་ཚོགས་ཀྱི་དབང་ཐོབ་ཤོག༔ ཀརྨ་རཱ་ཛ་ཀཱ་ཡ་ཨ་བྷི་ཥིཉྩ་ཧཱུྃ༔ གཤིན་རྗེ་ཐོགས་ཏེ༔ ཧཱུྃ༔ གཤིན་རྗེ་གཤེད་པོ་མི་བཟད་འབར་བའི་སྐུ༔ གཉིས་མེད་སྤྲུལ་པའི་གཤིན་རྗེ་འཁོར་བཅས་ཀྱིས༔ སྐལ་ལྡན་རིགས་ཀྱི་བུ་ལ་དབང་བསྐུར་བས༔ གཤིན་རྗེ་མི་ཟན་ཆེན་པོའི་དབང་ཐོབ་ཤོག །བྷེ་ཝ་ས་ཏཱ་ཀ་ཡ་ཨ་བྷི་ཥིཉྩ་ཧཱུྃ༔ དགུ་རིང་ཐོགས་ལ༔ ཧཱུྃ༔ བདུད་ཀྱི་རྒྱལ་པོ་བརྔམས་བརྗིད་སྟོབས་ལྡན་འབར༔ ཡོངས་འདུས་སྤྲུལ་པའི་བདུད་རྒྱལ་འཁོར་བཅས་ཀྱིས༔ སྐལ་ལྡན་རིགས་ཀྱིས་བུ་ལ་དབང་བསྐུར་བས༔ ནག་པོ་བདུད་ཀྱི་སྡེ་ཚོགས་དབང་ཐོབ་ཤོག༔ བྱེ་བ་དགུ་རིང་ཀཱ་ཡ་ཨ་བྷི་ཥིཉྩ་ཧཱུྃ༔ བསྟན་མ་ཐོགས་ཏེ༔ ཧཱུྃ༔ བསྟན་མ་ཆེན་མོ་བསྟན་པའི་བྱ་ར་བ༔ བསྟན་སྐྱོང་སྲུང་མ་རྒྱ་མཚོ་འཁོར་བཅས་ཀྱིས༔ སྐལ་ལྡན་རིགས་ཀྱི་བུ་ལ་དབང་བསྐུར་བས༔ མ་མོ་བསྟན་བསྲུང་རྒྱ་མཚོའི་དབང་ཐོབ་ཤོག༔ མ་མ་ཏང་ཏང་ཏིང་ཏིང་ཀཱ་ཡ་ཨ་བྷི་ཥིཉྩ་ཧཱུྃ༔ བདུད་རྩི་ཐོགས་ལ༔ ཧཱུྃ༔ གཡུང་དྲུང་མི་འགྱུར་རྡོ་རྗེའི་ཀ་པཱ་ལར༔ རུས་སྦལ་གྱི་ཁོག་པར་མཆན། ར་ས་ཡ་ནའི་བཅུད་ཀྱིས་གཏམས་པ་འདིས༔ སྐལ་ལྡན་རིགས་ཀྱི་བུ་ལ་དབང་བསྐུར་བས༔ དཔལ་ལྡན་ལྷ་མོའི་གསུང་གི་དབང་ཐོབ་ཤོག༔ ཨཱོཾ་མ་ཧཱ་ཀཱ་ལི་ཝཱཀྐ་ཨ་བྷི་ཥིཉྩ་ཧཱུྃ༔ རྩེ་གསུམ་ཐོགས་ལ༔ ཧཱུྃ༔ ཁ་ཊྭཱཾ་རྩེ་གསུམ་དར་ནག་བ་དན་འཕྱོ༔ རལ་གྲི་འབར་བས་དགྲ་བགེགས་དུམ་བུར་གཏུབ༔ གྲི་གུག་འབར་བས་སྐྱེ་ཤི་རྩད་ནས་གཅོད༔ བེ་ཅོན་འབར་བས་དགྲ་བགེགས་ཀླད་ཁྲག་དཀྲུག༔ མེ་ལོང་འབར་བས་ཁམས་གསུམ་གསལ་ལེར་གཟིགས༔ སྐལ་ལྡན་རིགས་ཀྱི་བུ་ལ་དབང་བསྐུར་བས༔ དཔལ་ལྡན་ལྷ་མོའི་ཐུགས་ཀྱི་དབང་ཐོབ་ཤོག༔ ཨཱོཾ་མ་ཧཱ་ཀཱ་ལི་ཙིཏྟ་ཨ་བྷི་ཥིཉྩ་ཧཱུྃ༔ རྔ་ཐོད་ཕྲེང་གི་བརྒྱན་ཅན་ཐོགས་ལ༔ ཧཱུྃ༔ ཐོད་སྐམ་འབར་བའི་རྔ་ཆེན་ཞིང་ལྤགས་ཅན༔ གྲིར་ཤི་མི་ཡི་རྩིབ་མའི་ལྕགས་གིས་བརྒྱན༔ མཐོ་བདུན་པ་ཡི་སྒྲ་ཡིས་ཁམས་གསུམ་འུར༔ སྐལ་ལྡན་རིགས་ཀྱི་བུ་ལ་དབང་བསྐུར་བས༔ དཔལ་ལྡན་ལྷ་མོའི་ཡོན་ཏན་དབང་ཐོབ་ཤོག༔ ཨཱོཾ་མ་ཧཱ་ཀཱ་ལི་རཏྣ་ཨ་བྷི་ཥིཉྩ་ཧཱུྃ༔ དཔལ་གཏོར་བརྒྱན་ལྡན་ཐོགས༔ ཧཱུྃ༔ གཏོར་སྣོད་བྷནྡྷ་ཡངས་པའི་སྣོད་མཆོག་ཏུ༔ དཔལ་གཏོར་སྔགས་སྲུང་ལྷ་མོ་ཆེན་མོའི་སྐུ༔ རྒྱུད་འཛིན་སྐྱེས་བུ་ཁྱོད་ལ་དབང་བསྐུར་བས༔ མ་ཧཱ་ཀཱ་ལིི་ཕྲིན་ལས་དབང་ཐོབ་ཤོག༔ ཨཱོཾ་མ་ཧཱ་ཀཱ་ལི་ཀརྨ་བ་ལིངྟ་ཨ་བྷི་ཥིཉྩ་ཧཱུྃ༔ ལིང་གར་དགྲ་བགེགས་འགུགས་བསྟིམ་བྱ༔ མཚོན་ཆས་གཏུབ་ཅིང་གཏོར་མ་སྦྲན༔ རྒྱས་པར་བསྒྲལ་ལས་གཞུང་ལྟར་བཀབ༔ ས་མ་ཡཱ༔ རྒྱ་རྒྱ་རྒྱ༔ ཞེས་པས་དྲག་པོའི་སྒྲོལ་དབང་ནི། གོང་ནས་སྟ་གོན་བྱས་པའི་ལིངྒ་འབྲུབ་ཁུང་ཐོད་ངན་ལྕགས་ལྡེར་གང་རིགས་སུ་བཅུག་ཅིང་ཁྲག་གིས་སྦག་པ་སློབ་མའི་མདུན་དུ་བཤམ། ཕུར་བུ་དང་རལ་གྲི་གྲི་གུག་ཁ་ཊྭཱཾ་སོགས་ཀྱི་ཕྱག་མཚན་མཚོན་ཆ་ཐུན་རྫས་དང་བཅས་པ་མདུན་དུ་གསལ་ནས་དཔོན་སློབ་གཉིས་ཀ་རིགས་བདག་ལྷ་མོ་ཐ་མི་དད་པར་གསལ་བའི་ངང་ནས། སྤྲོ་ན་འདི་ཉིད་ཀྱི་བསྒྲལ་ལས་རྒྱས་པར་བྱའོ། བསྡུ་ན། ན་མོ་དཀོན་མཆོག་གསུམ་དང་རྩ་བ་གསུམ་གྱི་བདེན་པས་གནོད་བྱེད་དགྲ་བགེགས་ཐམས་ཅད་གཟུགས་ལིངྒ་འདི་ལ་ཁུག་ཅིག །ལན་གསུམ་མཐར། ཛཿཧཱུྃ་བཾ་ཧོ༔ ཕྱག་རྒྱ་བཞིས་རྒྱས་བཏབ་ཅིང་བསྒྲལ་བ་ནི། ཧཱུྃ་བྷྱོ༔ བརྔམས་ཞིང་བརྔམས་ཞིང་དགྲ་བགེགས་སྲོག་རྩ་གཅོད༔ སྲོག་གཅོད་བདུད་མོ་འབུམ་སྡེའི་དུས་ལ་བབས༔ བགད་ཅིང་བགད་ཅིང་ཤ་ཟ་རུས་ལ་འཆའ༔ ཟ་བྱེད་ནག་མོ་འབུམ་སྡེའི་དུས་ལ་བབས༔ འབར་ཞིང་འཁྲུག་སྟེ་ནད་མཚོན་བུ་ཡུག་གཏིབས༔ གསོད་བྱེད་དྷཀྐིའི་ཚོགས་རྣམས་དུས་ལ་བབས༔ དུས་ལ་བབ་བོ་དམ་ཉམས་དགྲ་བགེགས་སྒྲོལ༔ ནྲི་ཏྲི་ཤ་ཏྲུཾ་གྷརྫ་གྷརྫ་མྱོགས་མྱོགས་གཏུབས་གཏུབས་འབར་འབར་ཤག་ཤག་མཱ་ར་ཡ་ཧཱུྃ་ཕཊ༔ ཅེས་པའི་དྲག་སྔགས་ཀྱི་བཟླས་པ་དམོད་ཅིང་ཕྱག་མཚན་དང་ཐུན་གྱིས་བརྡེག་བསྒྲལ་ལས་བྱ་ཞིང་སྟབ་པ་ནི། དམ་ཉམས་དགྲ་བགེགས་བསྒྲལ་བའི་གཏི་མུག་ཤ་ཡི་བྷ་ལིངྟ་ལ་ཁཱ་ཧི༔ འདོད་ཆགས་ཁྲག་གི་བྷ་ལིངྟ་ལ་ཁཱ་ཧི༔ ཞེ་སྡང་རུས་པའི་བྷ་ལིངྟ་ལ་ཁཱ་ཧི༔ དབང་པོ་རྣམ་ལྔའི་བྷ་ལིངྟ་ལ་ཁཱ་ཧི༔ དོན་སྙིང་རྣམ་ལྔའི་བྷ་ལིངྟ་ལ་ཁཱ་ཧི༔ མ་ཧཱ་མཾ་ས་ལ་ཁ་ཧི༔ མ་ཧཱ་ཙིཏྟ་ལ་ཁཱ་ཧི༔ མ་ཧཱ་རཀྟ་ལ་ཁཱ་ཧི༔ མ་ཧཱ་གོ་རོ་ཙ་ན་ལ་ཁཱ་ཧི༔ མ་ཧཱ་བྷ་སུ་ཏ་ལ་ཁཱ་ཧི༔ མ་ཧཱ་ཀེཾ་ནི་རི་ཏི་ལ་ཁཱ་ཧི༔ ཅེས་སྔགས་བཟླ་བཞིན་ལིང་རོ་གཏོར་མར་བསྟབ་པར་བྱའོ། །གཉེར་གཏད་ཕྲིན་ལས་བཅོལ་བ་ལས་བྱང་ལྟར་བཏོན། གཏོར་མར་གཙང་སར་གཤེགས། དེ་ནས་ཤིས་བརྗོད་མེ་ཏོག་འཐོར་ཞིང་། སྨྲ་བསམ་བརྗོད་མེད་ཤེས་རབ་ཕ་རོལ་ཕྱིན། །མ་སྐྱེས་མི་འགགས་ནམ་མཁའི་ངོ་བོ་ཉིད། །སོ་སོ་རང་རིག་ཡེ་ཤེས་སྤྱོད་ཡུལ་བ། །དུས་གསུམ་རྒྱལ་བའི་ཡུམ་གྱི་བཀྲ་ཤིས་ཤོག །ཞེས་དང་སྔོན་ཚེ་སློབ་དཔོན་ཆེན་པོའི་སྤྱན་སྔ་རུ། །ཆོས་བཞིན་བསྒྲུབ་པ་སྐྱོང་བའི་གང་ཟག་ལ། །ཞེས་སོགས་ཤིས་པ་བརྗོད་པ་ཅི་རིགས་དང་། དམ་ཚིག་ཁས་བླངས་གཏང་རག་མཎྜལ་ཡོན་འབུལ་དགེ་བསྔོ་སློབ་བུ་རྣམས་རང་གནས་བཏང་ཞིང་རྗེས་ཀྱི་བྱ་བ་ལས་བྱང་ལྟར་འཕྲོ་སྐྱོང་ཞིང་གསང་བ་སྤྱིའི་འགྲོས་བཞིན་ཤེས་པར་བྱའོ། ༈ཨེ་མ་མ་མོ་དྲེགས་པའི་སྲོག༔ ཤིན་ཏུ་གཉན་རྒྱ་ཐབས་མཁས་སྤྱོད༔ དམ་མེད་འགྲོ་ལ་གསང་བའི་རྒྱ༔ འཆལ་ན་རང་གི་སྲོག་ལ་འོང་༔ ཆིག་བརྒྱུད་བསྟན་འཛིན་བུ་ལ་བྱིན༔ སྤེལ་ལམ་མི་སྤེལ་ཁྱད་པར་ཅན་ལ༔ འཕྲོད་ན་བྱ་ཕན༔ ས་མ་ཡཱ༔ རྒྱ་རྒྱ་རྒྱ༔ གཏེར་ཆེན་ཆོས་ཀྱི་རྒྱལ་པོ་རིག་འཛིན་ཉི་མ་གྲགས་པ་རྩལ་གྱིས་གནས་མཆོག་ཆེན་པོ་ཧ་ཙོ་ནས་གདན་དྲངས་ཤིང་ཤོག་སེར་ལས་ཞལ་བཤུས་པའོ། །འདིར་སྨྲས་པ། རྒྱལ་བའི་བསྟན་དང་སྒྲུབ་པོའི་གང་ཟག་ལ། །ཕྱི་ནང་ལོག་སྒྲུབ་བདུད་དང་བར་ཆད་ཀྱི། འཚེ་བ་ཐམས་ཅད་ངེས་པར་སྲུང་བརྩོན་པར། །བསྟན་སྐྱོང་དབང་མོ་འདི་མཚུངས་གཞན་ཡོད་མིན། །དེ་ཕྱིར་འདི་ཡི་སྲོག་དབང་ཟབ་མོ་ལ། །ཁྲིགས་སུ་གྱིས་ཞེས་ནན་བསྐུལ་ལྡོག་མེད་ངོར། གཞུང་མ་དཀྲུག་པར་མཚམས་སྦྱོར་ཕྱག་བཞེས་ཀྱིས། བརྒྱན་འདི་སྲིད་གསུམ་བདག་མོ་དགྱེས་ཕྱིར་ཡིན། །འོན་ཀྱང་དགོས་མེད་འདྲེ་མིག་ཐུར་མའི་དཔེར། །རྨོངས་པའི་བློ་ཡིས་འདི་བཀོད་ཉེས་མཆིས་ན། །སྔགས་སྲུང་ཆེན་མོའི་བརྩེ་བས་བཞེས་མཛོད་ལ། །རུ་ང་སྤོངས་ལ་སླར་ཡང་དགྱེས་བཞིན་སྐྱོངས། །འདི་བགྱིས་གསང་ཆེན་སྙིང་པོའི་རིངས་ལུགས་ཀྱི། །བསྟན་པ་དྲི་མེད་འཛིན་པའི་བཤེས་གཉེན་དང་། །བཤད་སྒྲུབ་འདུས་པའི་སྡེ་བཅས་རྣམ་ཀུན་ཏུ། །གཡེལ་མེད་དཔལ་ལྡན་ལྷ་མོས་སྲུང་གྱུར་ཅིག །ཅེས་པ་འདི་ཡང་བླ་མ་འགྱུར་མེད་བློ་ལྡན་གྱིས་ནན་བསྐུལ་ངོར་གཏེར་གཞུང་བཅོས་མེད་ལ་དབང་བཤད་དང་ཡེ་ཤེས་དབབ་པའི་དམིགས་རིམ་ཅུང་ཟད་གསར་དུ་བྲིས་ཤིང་གཞན་རང་གཞུང་ནས་ཁྲིགས་སུ་བྱ་བའི་འོས་རྣམས་ཕྱག་བཞེས་བཞིན་བྲིས་པ་འདི་ཡང་རྨོངས་བརྟུལ་ཝ་གིནྜའི་མིང་གིས་བྲིས་པ་ཉེས་གྱུར་སྲིད་ན་དཔལ་ལྡན་སྔགས་ཀྱི་སྲུང་མ་ཉིད་ལ་སྙིང་ནས་བཤགས་སོ་དགེ་བར་གྱུར་ཅིག །ཤུ་བྷམ་མར་རྟུལ་སརྦ་ཛ་ག་སྟམ།

བསྟན་མ་བཅུ་གཉིས་ཀྱི་དབང་།

༈ སྤྲོ་ན་བསྟན་མ་བཅུ་གཉིས་ཀྱི་དབང་ནི་གཏོར་མ་དང་འབྲེལ་ན་བདུད་མོ་བཞི་ལ་ནག་པོ་གྲུ་བཞི་བཞི། གནོད་སྦྱིན་བཞི་ལ་གྲུ་བཞི་རྩེ་ཟླུམ་བཞི། སྨན་བཙུན་བཞི་ལ་ཟླུམ་གཏོར་དཀར་པོ་བཞི་སྟེ་སོ་སོའི་སྐུ་གཟུགས་ཀྱི་ཙཀླི་དར་པཎ་གྱིས་བརྒྱན་པ་ཤར་ནས་རིམ་བཞིན་བཀོད་པ་རྣམས་གཏད་ལ་དང་པོ་བདུད་མོ་བཞི་ནི། བྷྱོ༔ བྱང་གི་གནམ་མཚོ་ཕྱུག་མོ་གསང་བའི་མཚན། །བདག་ཉིད་ཆེན་མོ་རྡོ་རྗེ་ཀུན་གྲགས་མ། །སྐུ་མདོག་མཐིང་ནག་བདུད་ཀྱི་བེར་ཆེན་གསོལ། །ཆུ་སྲིན་རྒྱལ་མཚན་དང་ནི་མེ་ལོང་འཛིན། །འབྲུག་ལ་ཆིབས་ནས་བསྟན་པའི་བྱ་ར་མཛད། །གསོལ་ལོ་མཆོད་དོ་དགྱེས་ཤིང་ཚིམ་གྱུར་ནས། །ནད་གདོན་འགལ་རྐྱེན་བར་ཆད་ཞི་བ་དང་། །མཐུན་རྐྱེན་བསམ་པའི་དོན་རྣམས་འགྲུབ་པར་མཛོད། །སྐལ་ལྡན་རིགས་ཀྱི་བུ་ལ་དབང་བསྐུར་རོ། །ཨཱོཾ་བཛྲ་ལམ་ཧཱུྃ་ཨ་བྷི་ཥིཉྩ་ཧཱུྃ༔ བྷྱོ༔ མོན་ཡུལ་ཇོ་མོ་ལྷ་རི་གསང་བའི་མཚན། །དཔལ་ལྡན་ཧེ་རེ་རྡོ་རྗེ་གཡའ་མ་སྐྱོང་། །སྐུ་མདོག་སྔོ་ལྗང་དར་གྱི་ན་བཟའ་གསོལ། །རྐྱང་ལ་ཆིབས་ནས་བསྟན་པའི་བྱ་ར་མཛད། །གསོལ་ལོ་མཆོད་དོ་དགྱེས་ཤིང་ཚིམ་གྱུར་ནས། །ནད་གདོན་འགལ་རྐྱེན་བར་ཆད་ཞི་བ་དང་། །མཐུན་རྐྱེན་བསམ་པའི་དོན་རྣམས་འགྲུབ་པར་མཛོད། །སྐལ་ལྡན་རིགས་ཀྱི་བུ་ལ་དབང་བསྐུར་རོ། །ཨཱོཾ་བཛྲ་གིརྟ་ཧཱུྃ་ཨ་བྷི་ཥིཉྩ་ཧཱུྃཿབྷྱོ༔ བན་གྱི་བཀྲ་ཤིས་ཚེ་རིང་གསང་བའི་མཚན། །གངས་ཀྱི་ཡུམ་ཆེན་རྡོ་རྗེ་ཀུན་ཏུ་བཟང་། །སྐུ་མདོག་དཀར་མོ་དར་གྱི་ན་བཟའ་གསོལ༔ རྡོ་རྗེ་རྩེ་ལྔ་ཚེ་བུམ་བསྣམས་ནས་ནི། །སིངྒེ་ཆིབས་ནས་བསྟན་པའི་བྱ་ར་མཛད། །གསོལ་ལོ་མཆོད་དོ་དགྱེས་ཤིང་ཚིམ་གྱུར་ནས། །ནད་གདོན་འགལ་རྐྱེན་བར་ཆད་ཞི་བ་དང་། །མཐུན་རྐྱེན་བསམ་པའི་དོན་རྣམས་འགྲུབ་པར་མཛོད། །སྐལ་ལྡན་རིགས་ཀྱི་བུ་ལ་དབང་བསྐུར་རོ། །ཨཱོཾ་བཛྲ་ར་སི་ཧཱུྃ་ཨ་བྷི་ཥིཉྩ་ཧཱུྃ༔ བྷྱོ༔ ཡར་འབྲོག་མཚོ་བདག་ཆེན་མོ་གསང་བའི་མཚན། །འབྲོག་ཆེན་འཁོར་འདུལ་རྡོ་རྗེ་བགེགས་ཀྱི་གཙོ། །སྐུ་མདོག་ལྗང་ནག་དར་གྱི་ན་བཟའ་གསོལ། །རུ་མཚོན་རྩེ་ལྔ་དང་ནི་ཞགས་པ་བསྣམས། །དྲེལ་རྟ་ཆིབས་ནས་བསྟན་པའི་བྱ་ར་མཛད། །གསོལ་ལོ་མཆོད་དོ་དགྱེས་ཤིང་ཚིམ་གྱུར་ནས། །ནད་གདོན་འགལ་རྐྱེན་བར་ཆད་ཞི་བ་དང་། །མཐུན་རྐྱེན་བསམ་པའི་དོན་རྣམས་འགྲུབ་པར་མཛོད། །སྐལ་ལྡན་རིགས་ཀྱི་བུ་ལ་དབང་བསྐུར་རོ། །ཨཱོཾ་བཛྲ་མ་མ་ཧཱུྃ་ཨ་བྷི་ཥིཉྩ་ཧཱུྃ༔ གནོད་སྦྱིན་བཞི་ནི། བྷྱོ༔ ལྷ་ཕུ་གངས་དཀར་མ་ནི་གསང་བའི་མཚན། །གངས་དཀར་ཤ་མེད་རྡོ་རྗེ་སྤྱན་གཅིག་མ། །སྐུ་མདོག་དཀར་ལྗང་དར་གྱི་ན་བཟའ་གསོལ། །ཟོར་བ་དང་ནི་ཞགས་པ་ཐོགས་ནས་སུ། །ཤ་བ་ཆིབས་ནས་བསྟན་པའི་བྱ་ར་མཛད། །གསོལ་ལོ་མཆོད་དོ་དགྱེས་ཤིང་ཚིམ་གྱུར་ནས། །ནད་གདོན་འགལ་རྐྱེན་བར་ཆད་ཞི་བ་དང་། །མཐུན་རྐྱེན་བསམ་པའི་དོན་རྣམས་འགྲུབ་པར་མཛོད། །སྐལ་ལྡན་རིགས་ཀྱི་བུ་ལ་དབང་བསྐུར་རོ། །ཨཱོཾ་བཛྲ་ལ་སྱེ་ཧཱུྃ་ཨ་བྷི་ཥིཉྩ་ཧཱུྃ༔ བྷྱོ༔ རོང་གི་ཇོ་མོ་ཁ་རག་གསང་བའི་མཚན། ཁ་རག་ཁྱུང་བཙུན་རྡོ་རྗེ་དཔལ་གྱི་ཡུམ། །སྐུ་མདོག་ལྗང་སེར་དར་གྱི་ན་བཟའ་གསོལ། །ཌཱ་མ་རུ་དང་མེ་ལོང་བསྣམས་ནས་ནི། །ཁྱུང་ལ་ཆིབས་ནས་བསྟན་པའི་བྱ་ར་མཛད། །གསོལ་ལོ་མཆོད་དོ་དགྱེས་ཤིང་ཚིམ་གྱུར་ནས། །ནད་གདོན་འགལ་རྐྱེན་བར་ཆད་ཞི་བ་དང་། །མཐུན་རྐྱེན་བསམ་པའི་དོན་རྣམས་འགྲུབ་པར་མཛོད། །སྐལ་ལྡན་རིགས་ཀྱི་བུ་ལ་དབང་བསྐུར་རོ། །ཨཱོཾ་བཛྲ་མ་ཏི་ཧཱུྃ་ཨ་བྷི་ཥིཉྩ་ཧཱུྃ༔ བྷྱོ༔ རྨ་ཆེན་སྤོམ་རའི་སྲིང་གཅིག་གསང་བའི་མཚན། །རྨ་རི་རབ་འབྱམས་རྡོ་རྗེ་དྲག་མོ་རྒྱལ། །སྐུ་མདོག་དཀར་གསལ་དར་གྱི་ན་བཟའ་གསོལ། །བེ་ཅོན་དང་ནི་རིན་ཆེན་གཞོང་པ་འཛིན། །འཕར་བ་ཆིབས་ནས་བསྟན་པའི་བྱ་ར་མཛད། །གསོལ་ལོ་མཆོད་དོ་དགྱེས་ཤིང་ཚིམ་གྱུར་ནས། །ནད་གདོན་འགལ་རྐྱེན་བར་ཆད་ཞི་བ་དང་། །མཐུན་རྐྱེན་བསམ་པའི་དོན་རྣམས་འགྲུབ་པར་མཛོད། །སྐལ་ལྡན་རིགས་ཀྱི་བུ་ལ་དབང་བསྐུར་རོ། །ཨཱོཾ་བཛྲ་པྲ་ཀ་མ་ཏི་ཧཱུྃ་ཨ་བྷི་ཥིཉྩ་ཧཱུྃ༔ བྷྱོ༔ བྱང་སྟོད་དམར་གྱི་མཚོ་བདག་གསང་བའི་མཚན། །གསེར་ཆེན་མཁའ་སྡིང་རྡོ་རྗེ་ཀླུ་མོ་ནི། །སྐུ་མདོག་སེར་པོ་དར་ཀྱི་ན་བཟའ་གསོལ། །བེ་ཅོན་དང་ནི་མཁར་གཞོང་བསྣམས་ནས་ནི། །རྟ་མཆོག་ཆིབས་ནས་བསྟན་པའི་བྱ་ར་མཛད། །གསོལ་ལོ་མཆོད་དོ་དགྱེས་ཤིང་ཚིམ་གྱུར་ནས། །ནད་གདོན་འགལ་རྐྱེན་བར་ཆད་ཞི་བ་དང་། །མཐུན་རྐྱེན་བསམ་པའི་དོན་རྣམས་འགྲུབ་པར་མཛོད། །སྐལ་ལྡན་རིགས་ཀྱི་བུ་ལ་དབང་བསྐུར་རོ། །ཨཱོཾ་ཏིང་པ་དྷ་རི་ཧཱུྃ་ཨ་བྷི་ཥིཉྩ་ཧཱུྃ༔ སྨན་བཙུན་བཞི་ནི། བྷྱོ༔ ཀོང་པོའི་ཡུལ་བཙུན་དེ་མོ་གསང་བའི་མཚན། །ཀོང་བཙུན་དེ་མོ་རྡོ་རྗེ་བོད་ཁམས་སྐྱོང་། །སྐུ་མདོག་དཀར་ལྗང་དར་གྱི་ན་བཟའ་གསོལ། །མདའ་དར་དང་ནི་རིན་ཆེན་སྒྲོམ་བུ་འཛིན། །རྟ་མཆོག་ཆིབས་ནས་བསྟན་པའི་བྱ་ར་མཛད། །གསོལ་ལོ་མཆོད་དོ་དགྱེས་ཤིང་ཚིམ་གྱུར་ནས། །ནད་གདོན་འགལ་རྐྱེན་བར་ཆད་ཞི་བ་དང་། །མཐུན་རྐྱེན་བསམ་པའི་དོན་རྣམས་འགྲུབ་པར་མཛོད། །སྐལ་ལྡན་རིགས་ཀྱི་བུ་ལ་དབང་བསྐུར་རོ། །ཨཱོཾ་བཛྲ་སེང་ཨ་བྷི་ཥིཉྩ་ཧཱུྃ༔ བྷྱོ༔ ཨེ་ཉམས་ར་མདོ་སྤེ་ན་གསང་བའི་མཚན། །བཙན་ལ་རོ་ལོ་རྡོ་རྗེ་སྨན་གཅིག་མ། །སྐུ་མདོག་དཀར་ལྗང་དར་གྱི་ན་བཟའ་གསོལ། །ལྷབ་ལྷུབ་དར་དང་དངོས་གྲུབ་འབྲས་རྒྱས་བསྣམས། །མཛོ་མོ་ཆིབས་ནས་བསྟན་པའི་བྱ་ར་མཛད། །གསོལ་ལོ་མཆོད་དོ་དགྱེས་ཤིང་ཚིམ་གྱུར་ནས། །ནད་གདོན་འགལ་རྐྱེན་བར་ཆད་ཞི་བ་དང་། །མཐུན་རྐྱེན་བསམ་པའི་དོན་རྣམས་འགྲུབ་པར་མཛོད། །སྐལ་ལྡན་རིགས་ཀྱི་བུ་ལ་དབང་བསྐུར་རོ། ཨཱོཾ་བཛྲ་ལི་ལི་ཧཱུྃ་ཨ་བྷི་ཥིཉྩ་ཧཱུྃ༔ བྷྱོ༔ གཙང་གི་ཇོ་མོ་ནགས་རྒྱལ་གསང་བའི་མཚན། །སྨན་བཙུན་ཨུག་ཆོས་རྡོ་རྗེ་གཡར་མོ་བསིལ། །སྐུ་མདོག་དམར་སེར་དར་གྱི་ན་བཟའ་གསོལ། །རིན་ཆེན་འབར་བ་སྒྲ་སྙན་ཏིང་ཤག་བསྣམས། །ཤ་ཡུ་ཆིབས་ནས་བསྟན་པའི་བྱ་ར་མཛད། །གསོལ་ལོ་མཆོད་དོ་དགྱེས་ཤིང་ཚིམ་གྱུར་ནས། །ནད་གདོན་འགལ་རྐྱེན་བར་ཆད་ཞི་བ་དང་། །མཐུན་རྐྱེན་བསམ་པའི་དོན་རྣམས་འགྲུབ་པར་མཛོད། །སྐལ་ལྡན་རིགས་ཀྱི་བུ་ལ་དབང་བསྐུར་རོ། །ཨཱོཾ་བཛྲ་ཧེ་ཏ་ཧཱུྃ་ཨ་བྷི་ཥིཉྩ་ཧཱུྃ༔ བྷྱོ༔ བདུད་གྱི་ཇོ་མོ་གཡུང་ཏིང་གསང་བའི་མཚན། །གཡུ་ཡི་དྲིལ་བུ་རྡོ་རྗེ་ཟུ་ལེ་མ། །སྐུ་མདོག་ལྗང་སེར་དར་གྱི་ན་བཟའ་གསོལ། །སྙན་པའི་དྲིལ་བུ་རིན་ཆེན་པདྨ་བསྣམས། །སྟག་ལ་ཆིབས་ནས་བསྟན་པའི་བྱ་ར་མཛད། གསོལ་ལོ་མཆོད་དོ་དགྱེས་ཤིང་ཚིམ་གྱུར་ནས། །ནད་གདོན་འགལ་རྐྱེན་བར་ཆད་ཞི་བ་དང་། །མཐུན་རྐྱེན་བསམ་པའི་དོན་རྣམས་འགྲུབ་པར་མཛོད། །སྐལ་ལྡན་རིགས་ཀྱི་བུ་ལ་དབང་བསྐུར་རོ། །ཨཱོཾ་བཛྲ་པྲི་ཏ་ཡ་ཏི་ཧཱུྃ༔ ཨ་བྷི་ཥིཉྩ་ཧཱུྃ༔ ཞེས་པ་འདི་ཡང་མངའ་རིས་པཎ་ཆེན་པདྨ་དབང་རྒྱལ་གྱི་ཆོག་ཁྲིགས་སྨིན་གླིང་རིག་འཛིན་འགྱུར་མེད་རྡོ་རྗེའི་ཕྱག་བཞེས་འདོད་འཇོ་བུམ་བཟང་གི་བསྟན་མའི་སྲོག་གཏད་ལས་ཁོལ་བུར་ཕྱུངས་པས་སྤྲོས་པ་ལ་དགའ་ན་རང་ལུགས་སྔགས་བདག་མའི་དབང་དང་འབྲེལ་ན་སྙམ་མོ་ཞེས་རྗེ་བླ་མ་རྡོ་རྗེ་འཆང་ཉི་སྤྲུལ་བཞི་པའི་གསུང་གི་བདུད་རྩི་ལས་བྱུང་བཞིན་རིག་འཛིན་དངོས་གྲུབ་རྒྱ་མཚོས་བྲིས་པའོ། །སརྦ་མངྒལཾ།། །།

ལྷ་མོའི་བསྙེན་སྒྲུབ་ལས་སྦྱོར་གསལ་བར་བྱེད་པའི་ཡི་གེ

ལྷ་མོའི་བསྙེན་སྒྲུབ་ལས་སྦྱོར་གསལ་བར་བྱེད་པའི་ཡི་གེ་བཞུགས། བླ་མ་ཧེ་རུ་ཀཿདཔལ་ལ་སྒོ་གསུམ་གུས་པས་ཕྱག་འཚལ་ལོ། །ལྷ་མོ་སྔགས་བདག་འབར་མའི་བསྙེན་བསྒྲུབ་ལས་སྦྱོར་བྱ་བ་ལ་མཁའ་འགྲོ་སྤྱིའི་བསྙེན་བསྒྲུབ་བསྲུང་བཟློག་བསད་པ་སོགས་བྱ་བ་དང་། སྤྲོས་མེད་དྲག་སྒྲུབ་གཉིས་ལས། །དང་པོའི་བརྟེན་གཏོར་བླ་རྡོའི་ཤོག་དྲིལ་ནང་ལྟར་བྱ་ཞིང་། དེ་ལ་བླ་རྡོ་ནི། ལྷ་མོ་ཞོན་པ་མེད་པའི་ལྟོ་བར་འཁོར་ལོ་བྲི་སྟེ། འཁོར་ལོའི་ལྟེ་བར་གྲུ་གསུམ་ནང་དུ་བྷྱོ་ཡིག་གི་མཐར་ཧེ་རུ་ཀ་དང་ལྷ་མོའི་སྔགས་ལས་བྱང་ལྟར་བྲིས་མཐར། དཔལ་ལྡན་ལྷ་མོ་འཁོར་བཅས་རྟེན་འདི་ལ་བརྟན་པར་བཞུགས་ནས་བདག་སྒྲུབ་པ་པོའི་བར་ཆད་སེལ་བ་དང་མཆོག་ཐུན་གྱི་དངོས་གྲུབ་སྩོལ་བར་མཛོད་ཅིག །དེ་ཡི་ཕྱི་རིམ་མུ་ཁྱུད་ལ་བསྙེན་པ་འབྲུ་བཅུ་པ་དང་། དེ་ཡི་སྒྲུབ་སྔགས། དྲག་སྒྲུབ་འབོད་པ་བཅོ་བརྒྱད་པ། དེ་ཡི་སྒྲུབ་སྔགས། དེ་ནས། བྷྱོ་རེ་མ་ཏི་མཱ་ར་ཡ་ཛཿཧཱུྃ་བྷྱོ་ཕཊ༔ ཅེས་ཆ་ཤས་དང་། བྷྱོ་རེ་མ་ཏི་དགྲ་བགེགས་མཱ་ར་ཡ་ཛཿཧཱུྃ་བྷྱོ་ཕཊ༔ ཅེས་ཆ་ཤས་ཤོང་ཚོད་བསྟུན། དེ་ཕྱིར་རྩིབས་བདུན་ལ་བྷྱོའི་མདུན་ནས་གཡས་སྐོར་གྱིས་རྩིབས་རེ་ལ་རིམ་པར། རེ་མ་ཏི་མཱ་ར་ཡ་ཛ་ཞེས་འབྲུ་རེ་བྲིས། རྩིབས་མཆན་ལ་བྷྱོ་རེ་བྲི། དེ་རྒྱབ་མུ་ཁྱུད་ལ། ན་མོ་མཆོག་གསུམ་སྐུ་གསུམ་རྩ་གསུམ་སྲུང་མའི་ཚོགས་ཀྱིས་བདག་རིག་འཛིན་སྒྲུབ་པ་པོ་ལ་དཔལ་ལྡན་སྔགས་སྲུང་ལྷ་མོ་རེ་མ་ཏི་འཁོར་བཅས་མྱུར་དུ་འགྲུབ་པའི་དངོས་གྲུབ་སྩོལ་ཅིག་འགྱུར་བ་མེད་པའི་ཆོས་ཉིད་ལ་དབང་འབྱོར་ཞིང་འཆི་མེད་ཀྱི་ཚེ་མཛད་མེད་ཀྱི་ནོར་རྒྱུན་འཛིན་གྱི་བུ་སློབ་དམ་གཙང་བསོད་ནམས་བསགས་ལྡན་རྒྱུན་མི་ཆད་པ་སོགས་མཆོག་ཐུན་དངོས་གྲུབ་མ་ལུས་མྱུར་དུ་འགྲུབ་ཅིང་སྲུང་མ་དམ་ཅན་རྒྱ་མཚོའི་སྲོག་ལ་དབང་ཐོབ་པའི་དངོས་གྲུབ་སྩོལ་ཅིག །བདག་ནི་སྐྱེ་བ་འདི་དང་སྐྱེ་བ་ཚེ་རབས་ཐམས་ཅད་དུ་དཔལ་ལྡན་ལྷ་མོ་འཁོར་བཅས་ཀྱིས་ཕ་མས་བུ་ཚ་ལྟར་བརྩེ་ཞིང་ལུས་དང་གྲིབ་ལྟར་མི་འབྲལ་བར་འགྲོགས་ནས་འགོ་ཞིང་དཔུང་གཉེན་སྡོང་གྲོགས་རྒྱ་ཆེན་མཛད་དུ་གསོལ༔ བཤད་སྒྲུབ་སྨིན་གྲོལ་གྱི་བསྟན་པ་ནུབ་མེད་དུ་འཕེལ་ཞིང་རྒྱས་པ་དང་བསྟན་པ་བསྲུང་བའི་ནུས་མཐུ་དང་ལྡན་པར་མཛད་དུ་གསོལ། འགལ་རྐྱེན་བར་ཆད་མི་མཐུན་པའི་ཕྱོགས་ཐམས་ཅད་བསྲུང་ཞིང་བཟློག་པ་དང་དགྲ་བགེགས་ལོག་འདྲེན་ཐམས་ཅད་ཚར་གཅོད་པར་མཛད་དུ་གསོལ། མཐུན་རྐྱེན་ཕུན་སུམ་ཚོགས་པའི་བསམ་སྦྱོར་ཐམས་ཅད་ཡིད་བཞིན་དུ་འགྲུབ་ཅིང་རྣམ་བཞིའི་ཕྲིན་ལས་ཐམས་ཅད་ཐོགས་མེད་དུ་སྒྲུབ་པར་མཛད་དུ་གསོལ། ཞེས་བྲིས་ན་རུང་ཙམ་འདྲའོ། །དེའི་ཕྱི་རིམ་མུ་ཁྱུད་ལ་ཨཱ་ལི་ཀཱ་ལི་རྟེན་སྙིང་བྲི་བར་བྱའོ། །གོ་དཀའ་བ་ཟླ་བར་མཚལ་གྱི་ནོར་བུ་རིན་པོ་ཆེའི་དབུས་སུ་མ་བྲིས་པ་ནི་གསང་མཚན་ནོ། །གཞན་ཡང་དངོས་གྲུབ་ཀྱི་རྫས་ཐོད་ཆང་། བསྐང་བའི་གཏོར་མ་ཧོཾ་ལིང་སོགས་མཁོ་བའི་ཡོ་བྱད་རྣམས་འདུ་བར་བྱས་ནས། རྒྱུད་འདེབས་སྐྱབས་སེམས་མཆོད་པ་བྱིན་རླབས་སྔོན་དུ་འགྲོ་བའི་ལས་བྱང་ལྟར་བདག་བསྐྱེད་ཧེ་རུ་ཀའི་བསྙེན་པ་བྱེ་བ་འབུམ་སོགས་རྟགས་ཐོན་བཟླ། མདུན་སྐྱེད་མཆོད་གཏོར་བྱིན་རླབས་འོས་མཐུན་བྱ་བ་ནས་ལས་བྱང་བསྙེན་མཚམས་ལ་ཐུག་གི་བར་གཏོང་ཞིང་། དེ་ནས་བདག་བསྐྱེད་ཧེ་རུ་ཀཿདང་། མདུན་གྱི་གཙོ་མོའི་ཐུགས་ཀར་ཉི་དཀྱིལ་གྱི་སྟེང་དུ་མ་དམར་ནག་གི་མིག་ཏུ་བྷྱོ་ནག་མོ་བདག་བསྐྱེད་ཀྱི་བྷྱོ་མིག་རུ་ཧཱུྃ་མཐིང་ག་བདག་བསྐྱེད་ཀྱིི་མ་མཐར་རེ་མ་ཏི་དེ་རྒྱབ་མཱ་ར་ཡ་ཛཿདེ་རྒྱབ་ཏུ་མ་མ་ཏྲག་རགྴ་སྙིང་ཁ་རག་ཙིཏྟ་སྲོག་དུང་དུང་ཛཿཛཿ ཧཱུྃ༔ ཞེས་གསལ་བ་བསྒོམ། དེ་ནས་བདག་གི་ཧཱུྃ་བྷྱོ་ལས་འོད་ཟེར་དམར་པོ་འཕྲོས་ནང་ནས་རིམ་བཞིན་ཡིག་འབྲུ་རྣམས་བརྒྱུད་ནས་མདུན་གྱི་ལྷ་མོ་ཐུགས་ཀའི་འབྲུ་རྣམས་ཀྱི་ཕྱི་ནས་རིམ་བཞིན་བརྒྱུད་དེ་མ་དང་བྷྱོ་ལ་ཕོག་པ་འོད་ཟེར་འཕྲོས་པས་བྱང་ཤར་དུར་ཁྲོད་སོགས་ནས་ལྷ་མོ་འཁོར་བཅས་སྤྱན་དྲངས་མདུན་བསྐྱེད་ཀྱི་སྐུ་ལ་བསྟིམ་པ་དང་། ཕྱག་མཆོད་བསྟོད་རྣམས་གཞུང་ལྟར་བྱ། འཛབ་ནི། གཞུང་རྣམས་སུ་རྗེ་ལྟར་བསྙེན་པ་འཛབ་ལྟར་སྒྲུབ་པ་བྲན་ལྟར་བསྐུལ་བ་རྣམས་གསུངས་པ་ལྟར། འདིར་ཡང་དེ་བཞིན་བྱས་ན་འོས་པས། དེ་ལ། མ་སྲིང་རྗེ་གསུམ་ཕྱོགས་གཅིག་ཀྱང་དེ་ཡི་དམིགས་པ་ནི། བདག་མདུན་གྱི་སྔགས་ཕྲེང་ཕྱི་ནང་འོད་ཟེར་འཕྲོ་ཚུལ་རྣམས་སྤྱན་འདྲེན་དུས་དང་ཕྱོགས་འདྲ་ལ་དམིགས་པ་ནི། བདག་བསྐྱེད་ཀྱི་ཐུགས་ཀ་ནས་འོད་ཟེར་དམར་པོ་མཆོད་པའི་སྤྲིན་ཕུང་ཅན་མཆོད་པའི་ཚུལ་དུ་འཕྲོས་ལྷ་མོའི་ཐུགས་ཀའི་སྔགས་ཕྲེང་ས་བོན་ལ་ཐིམ་པས་ཐུགས་རྒྱུད་བསྐུལ་དེ་ལས་འཕྲོས་པས་འོད་ཀྱིས་འཕགས་པ་མཆོད་སེམས་ཅན་གྱི་དོན་བྱས། དགྲ་བགེགས་གདུག་པ་ཅན་རྣམས་ཚར་བཅད་འཁོར་འདས་ཀྱི་བྱིན་བཅུད་མཐུ་སྟོབས་སྲོག་སྙིང་བསོད་ནམས་ཐམས་ཅད་ལྷ་མོའི་ཐུགས་ཀར་ཐིམ་མཐུ་རྩལ་གཟི་འོད་རབ་ཏུ་འབར་ལྷ་མོའི་ཐུགས་ཀ་ནས་བསོད་ནམས་བྱིན་བཅུད་མཐུ་སྟོབས་སྲོག་སྙིང་གཟི་བརྗིད་ནུས་རྩལ་ཐམས་ཅད་འོད་དམར་པོའི་རྣམ་པར་ཞལ་ནས་ཐོན་རང་གི་ཞལ་དུ་ཞུགས་ཤིང་ཐུགས་ཀའི་ཧཱུྃ་ལ་ཐིམ་པས་མ་མོའི་མཐུ་སྲོག་མ་ལུས་རང་གིས་ཐོབ་པར་བསམ་ཞིང་གུས་པའི་ཚུལ་གྱིས་ལས་བྱང་ནང་གི་རྩ་སྔགས་དང་སྙིང་ཞུན་སྔགས་སྡེབ་མཇུག་གི་བསྙེན་པ་འབོད་སྔགས་རྟགས་འབྱིན་པར་བཟླ། བསྙེན་པ་སོང་ནས། བསྒྲུབ་པ་ནི། ཆུང་མ་དང་འཛའ་ལྟར་བརྟེན་པ་ཕྱོགས་མཐུན་པའི་དམིགས་པ་རང་གི་ཐུགས་ཀ་ནས་སྔགས་ཕྲེང་འོད་ཟེར་བྱང་སེམས་དཀར་པོའི་རང་བཞིན་ཅན་རྡོ་རྗེའི་ལམ་ནས་མདུན་གྱི་ལྷ་མོའི་བྷ་གར་ཞུགས་ཤིང་ཐུགས་ཀར་ཐིམ་པས་འདོད་ཆགས་ཆེན་པོའི་བརྩེ་དུང་གིས་གང་འདོད་ཕྲིན་ལས་སྒྲུབ་པར་རྒྱུད་བསྐུལ། འོད་ཟེར་སྤྲོ་བསྡུ་གོང་ལྟར་ལ་མ་མོའི་སྲོག་སྙིང་དངོས་གྲུབ་ཐམས་ཅད་འོད་དམར་པོའི་རྣམ་པར་ཐུགས་ཀ་ནས་ཞལ་དུ་ཐོན། རང་ཉིད་ལྷ་ཡི་ཞལ་དུ་ཞུགས་ཤིང་སྙིང་གའི་ཐུགས་སྲོག་ས་བོན་ལ་ཐིམ་པར་བསམ་ཞིང་ཆགས་པའི་ཡིད་ཀྱིས་སྙིང་ཞུན་ལྟར་རྟགས་ཐོན་དུ་བཟླའོ། །བྲན་ལྟར་བསྐུལ་བའི་དམིགས་པ་ནི། རང་གི་ཐུགས་ཀའི་ས་བོན་སྔགས་ཕྲེང་ལས་འོད་ཟེར་འཕྲོས་མ་མོའི་ཐུགས་ཀའི་སྔགས་ཕྲེང་ས་བོན་ལ་ཕོག་པས་མ་མོ་ཡེད་ཀྱིས་དངངས་ཏེ་བྲན་ལྟར་བཀའ་ཉན་ཅིང་འདུ་བའི་ལས་ཀུན་བསྒྲུབ་ནས་སྲོག་སྙིང་དངོས་གྲུབ་མདངས་གཤོམ་ཀྱི་ཚུལ་ཏུ་འབུལ་བར་བསམ་ཞིང་བཟླ་བ་ནི་བྲན་ལྟར་རོ། །ཐུན་མཚམས་རྣམས་སུ་གཏོར་འབུལ་མཆོད་སྟོད་དངོས་གྲུབ་ཡིད་ལེན་ཙམ་བྱེད། བསྙེན་བསྒྲུབ་ཚར་དུས་དང་། གསང་གནས་ནས་ཁྲག་བྱང་སེམས་སོགས་འབབས་པ་ནམ་བྱུང་སྐབས་དེར་རང་རྫས་གང་བྱུང་དེ་ཐོད་པར་བཏབ་ན་དངོས་གྲུབ་ལེན་ཐབས་ནང་ལྟར་བྱ་ཞིང་བསྙེན་པ་རྣམས་དང་ཁྱད་པར་བསྒྲུབ་སྔགས་སརྦ་སིདྡྷི་ཅན་བཟླ་ཞིང་དངོས་གྲུབ་དངོས་སུ་ལེན་པས་ནོད། དེ་ལྟར་བསྙེན་སྒྲུབ་རྟགས་ཐོན་སོང་ནས་ལས་སྦྱོར་ལས་བཞི་ཚེ་ནོར་བསྲུང་བཟློག་རྦད་བསད་ཁྲག་ཟོར་བསྒྲུབ་པ་རྣམས་སོ། །ཞི་རྒྱས་དབང་དྲག་བཞི་ལ་ལྷ་མོ་གཙོ་འཁོར་རང་གཞུང་ལྟར་ལ་སྐུ་མདོག་ཕྱག་མཚན་རྒྱན་ཆ་ལུགས་རྣམས་དཀར་སེར་དམར་ལྗང་འོས་འཐད་དུ་དམིགས་པ་བསྒྱུར་ཞིང་ཞི་བར་རྩ་སྔགས་མཐར། བདག་ཅག་དཔོན་སློབ་མི་ནོར་འཁོར་དང་བཅས་པའི་ནད་གདོན་བར་ཆད་ཐམས་ཅད་ཤནྟཾ་ཀུ་རུ་ཡེ་སྭཱ་ཧཱ། རྒྱས་པ་ལ། བདག་གི་ཚེ་བསོད་དཔལ་འབྱོར་ཐམས་ཅད་པུཥྟིཾ་ཀུ་རུ་ཡེ་སྭཱ་ཧཱ། དབང་ལ་ལྷ་འདྲེ་མི་གསུམ་ཟས་ནོར་ལོངས་སྤྱོད་ཐམས་ཅད་བདག་གི་དབང་དུ་སྡུས་ཤིག་པཱ་ཤཾ་ཀུ་རུ་ཧོ། དྲག་པོ་ལ། གནོད་བྱེད་དགྲ་བགེགས་ཐམས་ཅད་མཱ་ར་ཡ་ཕཊ༔ ཅེས་སོ། །ཚེ་སྒྲུབ་ལ་གཙོ་འཁོར་ཐམས་ཅད་ཞི་བར་དཀར་གསལ་ཚེ་བུམ་མདའ་དར་ཅན་བསྒོམ་ཞིང་སྔགས་མཐར། ཨཱ་ཡུ་ཥེ་ཧཱུྃ་བྷྲུྃ་ནྲི་ཛཿསིདྡྷི་སྭཱ་ཧཱ། ཐུན་མཚམས་སུ་མདའ་དར་གཡབ་ཅིང་ཚེ་འགུགས། ནོར་བསྒྲུབ་ལ་གཙོ་འཁོར་ཐམས་ཅད་ཞི་མཐིང་ནོར་བུ་ནེའུ་ལེ་ཞབས་ཕྱེད་དཀྱིལ་ཅན་དུ་བསྐྱེད་ལ་རྩ་སྔགས་མཐར། པུནྱཻ་བྷ་སུ་ན་དྷེ་སརྦ་སིདྡྷི་ཕ་ལ་པུཥྟིཾ་ཀུ་རུ་ཧཱུྃ་སྭཱ་ཧཱ། ཞེས་བཟླ་ཞིང་ཐུན་མཐར་གཏོར་འབུལ་མཆོད་སྟོད་སོགས་བསྙེན་བསྒྲུབ་དུས་དང་འདྲའོ། །བསྲུང་བ་བདག་མདུན་གཉིས་ལྷ་མོ་བསྒོམ་ཞིང་བཟློག་པ་སོགས་ཀུན་ལ་བདག་བསྐྱེད་ཧེ་རུ་ཀཿདང་མདུན་བསྐྱེད་ལྷ་མོར་བསྒོམས་བསད་པའི་དུས་མིན་པ་ཀུན་ལ་ཁྱད་མེད་ལ་གལ་ཆེན་སྐབས་བབ་བྱུང་ན་བདག་བསྐྱེད་གཙོ་མོ་བསྒོམ་པ་མན་ངག་སྤྱི་འགྲོས་ལུགས་ལྟ་བུའི། ཐུགས་ཀའི་སྔགས་ཕྲེང་བསྒོམས་ལུགས་ནི་ཀུན་ལ་སྙིང་ཞུན་ལྟར་ཁོ་ན་ལ་འོད་ཟེར་འཕྲོ་འདུ་ལས་གང་ཡིན་དང་མཐུན་པར་བསྒྱུར་ན་རུང་བར་སྣང་སྙམ་པ་དཔྱོད་འཚལ། གཏོར་མ་ལ་བརྟེན་གཏོར་དུ་བྱ། ཡང་ན་བྱང་རིའི་སྟེང་ངམ་སྒྲུབ་ཁང་གི་བྱང་ཕྱོགས་སུ་གཏེར་དུ་སྦས་རྗེས་ལ་བསྐང་བ་འདོན། གཏང་རག་གི་མཆོད་པ་ཡང་བྱའོ། །སྨད་ལས་འགབ་འདྲེ་འདུལ་བ་དང་བསད་པ་དྲག་ཟོར་སྒྲུབ་པ་རྣམས་དང་འབྲེལ་དུས་གཞུང་གི་འཛབ་རྗེས་སུ་བསྲུང་བཟློག་བསྒོམ་བཟླས་ཚོགས་བསྐང་གསོལ་ཚོགས་བསྒྲལ་མཆོད་པ་རྣམས་བཏང་ཞིང་། དེ་ནས་གསེར་སྐྱེམས་དྲེགས་པ་ཟིལ་གནོན་སོགས་གང་རུང་ནས་ལེན་ཏེ་གཏོང་། དེ་རྗེས་ཧཱུྃ་ཧཱུྃ་བྷྱོ༔ ང་ནི་ཞེས་སོགས་ནས་ཧོམ་བསྐྱེད་བདེན་བརྡར་རྣམས་དཀྱུས་ལྟར་བྱ་ཞིང་དམར་གཏོར་ལ་འགུགས་བརླབས་བྱས་ནས་རྦད་ཅིང་བསྐུལ་བ་དང་བཀའ་སྲུང་མའི་བསྐུལ་དང་ཕོ་ཉ་སྤྲོ་བ་བཏང་། དེ་ནས་འགུགས་སྔགས་དགྲ་འདྲེ་གང་ཡིན་ཡང་འདྲ་བར་རྦད་པ་ལྕགས་ཀྱུ་དམར་པོའི་དམིགས་པ་དང་ལྡན་པར་བཟླ་ཞིང་རྟགས་འབྱིན་པར་རེམས། དེ་ནས་ཉེས་བསྒྲགས་ལྷ་དབྱེ་བསྒྲལ་ལས་དང་ཤིན་ཏུ་ཟབ་པའི་ལས་སྦྱོར་གོང་ལྟར་བྱེད། དེ་ནས་འགབ་འདྲེ་འདུལ་བསད་སྔགས་སམ་ཁྲག་ཟོར་བསྒྲུབ་སྔགས་སྐབས་བབ་གང་འོས་ལྟར་བཟླ་ཞིང་ཐུན་བརྡེག་ལིང་ཆུང་བསྒྲལ་སྟབ་དང་ཐུན་གཏོར་བསྐུལ་ཞིང་རྦད་པ་གཏོང་ནས་ལྷག་མ་སོགས་བཏང་བའམ་ཐུན་རྡེག་རྗེས་སུ་བསྒྲལ་ལས་རྒྱས་པ་ཞལ་བསྟབ་ཁྲག་ཟོར་གྱེར་ནས་ཐུན་གཏོར་བསྐུལ་བཏོང་བ་སོགས་བྱ་ཞིང་། རྗེས་བསྲེག་འཕང་མནན་པ་རྣམས་ཀྱི་རྗེས་བསྡུ་བ་ཡང་སྐབས་མཐུན་ལྟར་སྤྱད་པར་བྱའོ། ༈སྤྲོས་མེད་དྲག་སྒྲུབ་ནི། སྔོན་དུ་བདག་མདུན་གྱི་བསྙེན་སྒྲུབ་གཞུང་ལྟར་སོང་བ་བཅས་སྒྲུབ་ཐབས་མ་མོའི་སྙིང་ཞུན་ནང་ལྟར་དམར་གཏོར་ཙམ་ལས་གཞན་ལིངྒ་སོགས་མི་དགོས་པ་དངོས་བསྟན་ལྟར་ལས་བསྐང་གསོལ་བསྐུལ་བ་སྤྲོས་མེད་ཡིན་ཀྱང་བྱ་བར་འོས་པས་དེ་ལུགས་ཀྱིས་བཅའ་བཤམས་རྣམས་ཡོད་པར་བྱེད། ཆོ་ག་གཏོང་ལུགས་སྤྲོས་བཅས་དང་ཁྱད་མེད་ཅིང་འབོད་པའི་དམིགས་པ་དང་ལྡན་པའི་སྙིང་སྤེལ་སྔགས་བྱང་ལྟར། བྷྱོ་རེ་མ་ཏི་མཱ་ར་ཡ་ཛ་ཧཱུྃ་བྷྱོ་ཕཊ༔ ཅེས་བཟླ་ཞིང་འབོད་རྟགས་བརྟན་པོར་བྱུང་བ་དང་། རྦད་པ་ནི། བདག་བསྐྱེད་ལྷས་མདུན་བསྐྱེད་ལྷ་བསྐུལ་ལྷ་མོའི་སྐུ་ལས་རང་འདྲའི་སྤྲུལ་པ་ནི་བྱེ་བ་འབུམ་འབུམ་གྲངས་མེད་དགྲ་ཡུལ་སྤྲོས། ཉམས་པའི་དགྲ་བོ་ལས་ངན་དེ༔ ཡུལ་ཕྱོགས་རི་ཁྱིམ་གར་ཡོད་ཀྱང་༔ ནད་མཚོན་ཆར་བབ་བརླག་པར་བསམ༔ རྦད་བསད་གཉིས་ཀར་སྔགས་ནི་འདི་ལྟར་རོ། །བྷྱོ་རེ་མ་ཏི་དགྲ་བགེགས་ཆེ་གེ་མོ་མཱ་ར་ཡ་ཛཿཧཱུྃ་བྷྱོ་ཕཊ༔ ཅེས་བཟླ་བ་ནི། སྒྲུབ་དང་བསད་པ་དག་ལ་ནི༔ མ་ཡི་གླད་དུ་དགྲ་ལིང་བཅུག༔ ཅེས་གསུངས་པ་བཞིན་ནོ། །རྦད་རྟགས་བྱུང་བ་བསད་དམིགས་ནི། རང་ཉིད་དཔལ་གྱི་ལྷ་མོར་བསྐྱེད་ཅིང་གསལ་བ་སོགས་བསད་དམིགས་ངང་ནས་གོང་གི་སྔགས་བཟླའོ། །འབོད་རྟགས་བརྟན་པར་མ་གྱུར་བར་དུ་མཆོད་བསྟོད་བསྐང་བ་མངའ་གསོལ་ལས་བསྐུལ་གཉིས་མི་གཏོང་བ་གནད་ཡིན། རྦད་བསད་དུས་མཆོད་བསྟོད་བསྐང་གསོལ་དང་བསྐུལ་གཉིས་གཏོང་བ་དང་དམོད་བཅོལ་རྣམས་བྱ་བ་གནད་ཆེ་བ་ཡིན་ཞིང་། རྟགས་རྣམས་ལེགས་རྫོགས་བྱུང་དུས་གཏོར་མ་དགྲ་ཕྱོགས་སུ་ཟོར་དུ་འཕངས། རྗེས་སུ་ཡང་གསོལ་མཆོད་བསྐུལ་བ་ཟོར་འཕེན་དགྲ་མ་ཤི་བར་རྒྱུན་མི་བཅད་ཅིང་། དགྲ་ཤི་ནས་གཏང་རག་སོགས་སྤྱི་དང་འདྲའོ། །ཞེས་པ་འདི་ནི་རང་གི་བརྗེད་ཐོ་དང་སྔགས་གསར་བསྟན་པ་བསྲུང་འདོད་ཅན་ལ་མཁོའོ་སྙམས་ནས། ཁམས་སྟོད་ཀྱི་བན་འཁྱམས་ཀྱིས་བྲིས། ལས་བྱང་གི་བསྙེན་མཚམས་སུ་ཁྲག་གཏོར་ལ་གནོད་བྱེད་དགྲ་བགེགས་ནད་གདོན་བར་ཆད་ཐམས་ཅད་འགུགས་བསྒྲལ་བརླབས་ཏེ་རྩ་སྔགས་བརྒྱ་རྩའི་མཐར་གཏོར་སྔགས་བཏགས་པ་གསུམ་གསུམ་དང་བཛྲ་པུཥྤེ་སོགས་དང་བསྟོད་གསོལ་བྱ། དེ་ལྟ་བུའི་ཚུལ་གྱིས་སྔགས་གྲངས་འབུམ་འགྲོ་བར་བྱས་ན་དོན་གནས་ཡོང་བ་མྱོང་གྲུབ་མའོ།། །།སརྦ་མངྒ་ལམ། །

ཁྲག་གཏོར་གྱི་བཅའ་གཞི་ཟིན་བྲིས།

ཁྲག་གཏོར་གྱི་བཅའ་གཞི་ནི། བསྐང་མདོས། མངའ་གསོལ། མཆོད་གཏོར། གཏེར་སྲུང་གི་གཏོར་མ་ཕྱི་ནང་གི་མཆོད་པ་སོགས་མཐོང་རྒྱུད་ལྟར་བཤམས་ལ། དེ་ནས་བརྒྱུད་འདེབས་ནས་བཟུང་བསྟོད་པ་བཅས་རྫོགས་ནས་རྩ་བསྙེན་སྟོང་ཕྲག་ཙམ་དང་། བསྙེན་བསྒྲུབ་ཀྱི་སྔགས་གཞན་རྣམས་ཀྱང་རན་པར་བཟླས་མཐར་མཆོད་གཏོར་སོགས་གསོ་བྲན་བཟླས་པ་སོགས་ནས་བཟུང་། ཐལ་རྡེབ་བཅས་ཁྲིགས་མ་ལྟར་གཏོང་། བཀའ་སྲུང་མའི་གཏོར་མ་འགུགས་བསྟིམ་བརླབས་མཆན་ཐུན་གཏོར་ཡང་བཤམ་ལ་འབུལ་ནས། སྔགས་འབུལ་ཙམ་བྱ། ཚོགས་བཤམས་ནས། ཧཱུྃ་བྷྱོ་གདོད་ནས་དག་པའི་ཞེས་པ་ནས་བསྐང་རྒྱས་འབྲིང་མངའ་གསོལ། ཚོགས་བསྒྲལ་སྟབ་པ་བཅས་རྫོགས་ནས། སླར་ཡང་བདག་བསྐྱེད་གསལ་ཞིང་། བསྙེན་པ་དུམ་ཙམ་བསྐྱལ་ནས་མཆོད་གཏོར་བྱིན་བརླབས་འགུགས་བསྟིམ་བྱས་ནས་བདག་ཉིད་དཔལ་ཆེན་པོ་ཞེས་པ་ནས་ལས་བྱང་དཀྱུས་བཞིན་བསྟོད་པ་བཅས་བར། ལས་བྱང་རྗེས་མ་ཆེར་མདུན་བསྐྱེད་ཚིག་ལྷུག་དེ་འདོན་མི་དགོས་ཤིང་། སྤྱན་འདྲེན་ནས་བཟུང་གོང་བཞིན་ལ། ཁྲག་གཏོར་དང་ཁྲག་གི་སྐྱ་ཟན་ཁྲག་གི་བྲན་པ་བཤམས་ལ། ན་མོ་དཀོན་མཆོག་གསུམ་དང་རྩ་བ་གསུམ་གྱི་བདེན་པས་གནོད་བྱེད་དགྲ་བགེགས་ནད་གདོན་བར་ཆད་ཐམས་ཅད་ཤ་ཁྲག་དམར་གྱི་གཏོར་མ་འདི་དང་གཉིས་སུ་མེད་པར་ཁུག་ཅིག །གསུམ། རཾ་ཡཾ་ཁཾ། ཨོཾ་ཨཱཿཧཱུྃ། རྩ་སྔགས་བརྒྱ་རེའི་མཐར་རྩ་སྔགས་མཐར་གཏོར་སྔགས་བཏགས་པ་གསུམ་གྱིས་འབུལ། མཆོད་བསྟོད་གཞུང་བཞིན། སླར་ཡང་བཤམ་དགུག་བརླབས་འབུམ་སོགས་གོང་བཞིན་ལྟར་ལ་ཚུལ་དེ་ལྟ་བུའི་སྟོང་རྩ་དེ་རྫོགས་མཚམས། ཡོན་ཏན་ཚོགས་འཁོར་ལྷག་མ་ཡན་བཏང་། སླར་སྔར་བཞིན་བདག་བཟླས་ཅུང་ཙམ་དང་། ལྷ་མོ་སྤྱན་འདྲེན་བཤད་མ་ཐག་པ་ལྟར་བྱ་ཞིང་། གནོད་བྱེད་ཀྱི་གཟུགས་བྲིས་པའི་སྙིང་ཁར། ཛ་ཪྣྲི་ཏྲི་ཛཿལྟ་བུའི་ནྲི་ཏྲིའི་མཐར་སྔགས་མགོ་ཕྱིར་བསྟན་ཡིག་མཇུག་ནང་དུ་འཛུད། བྷྱོ་རེ་མ་ཏི་མཱ་ར་ཡ་ཛ་ཧཱུྃ༔ མ་མ་ཏྲག་རཀྴ་རུ་ལུ་རུ་ལུ་ཧཱུྃ་བྷྱོ་ཛ་ཛཿ གནོད་བྱེད་འགབ་འདྲེ་དམ་སྲི་རྒྱ་འདྲེ་འབྱུང་པོ་ནད་གདོན་བར་ཆད་མི་ནད་ཕྱུགས་ནད་ཡམས་རིམས་སིབ་དང་འབྲུམ་བུ་གཏོང་བའི་གདོན་བགེགས་ལོག་འདྲེན་གཅན་གཟན་ཕོ་མོ་ཐམས་ཅད་ཁུག་ཛཿས་ཡི་ལྟེ་ཕུར་ནག་མོ་ཁུག་འབྲོག་ཐིས་ནག་པོ་ཁུག་ཛཿབཛྲ་ཀིའུ་རི་སོགས་རྒྱས་འདེབས་སྔགས་བྲི་གཟུགས་ཀྱི་ཕྱི་རོལ་དུ་ལས་བྱང་གི་བསྒྲལ་བའི་སྐབས་ལྟར། ཪྣྲི་ཏྲི་ཤ་ཏྲུཾ་གརྫ་མཆན་སྔགས་མགོ་ནང་བསྟན་ཡིག་མཇུག་ཕྱིར་ཕུད་ཞེས་པ་ནས་གཡས་མོ་སོད་ཁྲོལ་དགྲ་བགེགས་བྱད་མ་ཐུན་ཐུན་མཱ་ར་ཡ་ཛཿཛཿ ཞེས་དང་། ཁྲག་ཟོར་སྔགས་བྷྱོ་ནག་མོ་རེ་མ་ཏི། སོགས་དང་འགབ་འདྲེ་མནན། སྔགས། ཏྲིའུ་ཏྲིའུ་ཡ་ན་སོགས་མཐར། གནོད་བྱེད་དགྲ་བགེགས་འགབ་འདྲེ་དམ་སྲི་རྒྱ་འདྲེ་འབྱུང་པོ་ནད་གདོན་བར་ཆད་མི་ནད་ཕྱུགས་ནད་ཡམས་རིམས་སིབ་དང་འབྲུམ་བུ་སོགས་གཏོང་བའི་གདོན་བགེགས་ལོག་འདྲེན་གཅན་གཟན་ཕོ་མོ་ཐམས་ཅད་ཁུག་ཅིག་སོད་ཅིག་སྟཾ་བྷ་ཡ་ནན། རུ་དམ་བླ་བྲང་གི་ཕོ་བྲང་དུ་རྗེ་དབོན་དང་མཆོག་སྤྲུལ་རིན་པོ་ཆེ། རྒྱ་རོང་མཆོག་སྤྲུལ་བཅས་དཔོན་སློབ་ཆ་ཤས་ཀྱིས་ཁྲག་གཏོར་འབུམ་ཐེར་བསྔོས་པ་རྗེ་དབོན་རིན་པོ་ཆེའི་འདོན་བསྒྲིགས་རྗེད་ཐོར་རྒྱ་སྤྲུལ་མིང་གིས་ཕྱག་བྲིས་ལས་བཤུས་པ་ལགས་སོ། །བཀྲ་ཤིས་པར་གྱུར་ཅིག། །།

#din1 ནོར་བདག་ཡིད་བཞིན་ནོར་བུའི་སྐོར།

ཁྲོ་བོ་ཕྱག་ན་རྡོ་རྗེའི་སྒྲུབ་ཐབས།

ནོར་བདག་ཡིད་བཞིན་ནོར་བུ་ལས༔ ཁྲོ་བོ་ཕྱག་ན་རྡོ་རྗེའི་སྒྲུབ་ཐབས་བཞུགས༔ རྡོ་རྗེ་འཛིན་ལ་ཕྱག་འཚལ་ལོ༔ དབེན་ཞིང་འཚེ་བ་མེད་པའི་ས༔ ཡང་ན་གདུག་ཅིང་འཚུབ་པའི་ལུང་༔ སྒྲུབ་པོའི་ཉམས་ཀྱི་རིམ་པ་ལྟར༔ སྐབས་སུ་བབས་པའི་གནས་ཉིད་དུ༔ མཎྜལ་དུག་ཁྲག་རོ་སོལ་བྱུག༔ ཆང་དང་ཁྲག་གིས་ཆག་ཆག་གདབ༔ ཐིག་གདབ་ལྟེ་བར་ཧཱུྃ་ཡིག་མཐིང་༔ རྡོ་རྗེ་རྩེ་ལྔས་མཚན་པ་འབྲི༔ ཕྱི་རིམ་མུ་ཁྱུད་ཐོད་ར་རྡོར༔ པདྨ་མེ་རིས་མཚན་པ་འབྲི༔ དབུས་སུ་མཉྫིའི་ཁྲིའུ་ཁར༔ བྷནྦྷའི་སྣོད་དུ་དཔལ་གྱི་བཤོས༔ རྒྱན་ལྡན་ཨུག་སྐྱུ་ཤ་ཁྲག་བརྒྱན༔ རྩེ་ལ་གཏུམ་པོའི་ཙཀ་ལི་དང་༔ དར་མཐིང་གུར་ཕུབ་གཡས་གཡོན་མཐར༔ སྨན་རག་མཆོད་པའི་བྱེ་བྲག་བཤམས་༔ རྣལ་འབྱོར་བདེ་བའི་གདན་ལ་འདུག༔ བདག་གཞན་དོན་དུ་སྐྱབས་སེམས་དང་༔ དཀར་ཕྱོགས་མཆོད་དང་ནག་ཕྱོགས་སྦྱང་༔ བསྲུང་བའི་འཁོར་ལོས་གོ་བསྒོ་ཞིང་༔ བདག་མདུན་མི་དམིགས་སྟོང་པའི་ངང་༔ ཆོས་དབྱིངས་སྣང་སྟོང་ཀུན་ཏུ་ཁྱབ་པའི་དྲག་པོའི་ཕོ་བྲང་ཆེན་པོའི་དབུས་སུ་བདུད་དང་ལོག་འདྲེན་བརྫིས་པའི་སྟེང་དུ་རིག་པའི་ངོ་བོ་ཧཱུྃ་མཐིང་ནག་གིས་མཚན་པ་ལས༔ འོད་འཕྲོས་དགྲ་བགེགས་ཐམས་ཅད་ཚར་བཅད༔ ཁྲོ་བོ་དང་ཁྲོ་མོ་རྣམས་ལ་མཆོད་པ་ཕུལ་བྱིན་རླབས་བསྡུས་ས་བོན་ལ་ཐིམ་པ་ལས༔ སྐད་ཅིག་གིས་ཁྲོ་བོ་ཕྱག་ན་རྡོ་རྗེར་གསལ་བའི་གནས་གསུམ་འབྲུ་གསུམ་གྱིས་མཚན་པ་ལས་འོད་ཟེར་འཕྲོས་པས༔ ལྕང་ལོ་ཅན་ཞེས་འོག་མིན་གྱི་ཞིང་དང་རི་རབ་ཀྱི་བྱང་ནས་སྤྱན་དྲངས༔ བཞུགས་གསོལ་ཕྱག་འཚལ་མཆོད་འབུལ་བསྟོད་པས་བསྟོད་ཅིང་༔ བདག་མདུན་དམ་ཡེ་གཉིས་མེད་དུ་གསལ་བའི་རང་གི་སྙིང་གར་ཉི་མའི་དཀྱིལ་འཁོར་གྱི་སྟེང་དུ་ཧཱུྃ་ཡིག་གིས་མཚན་པའི་མཐར་སྔགས་ཕྲེང་འཁོར༔ རང་གི་ཞལ་ནས་འཐོན་མདུན་བསྐྱེད་ཀྱི་ཞལ་དུ་ཞུགས༔ ཐུགས་ཀའི་སྔགས་འཁོར་ལ་ཐིམ་པས་སྔགས་འབྲུ་དང་ཕྲེང་ཐག་གཡས་གཡོན་དུ་དྲག་ཏུ་འཁོར་བས་བདེ་སྟོང་གི་ཡེ་ཤེས་རབ་ཏུ་རྒྱས་པས༔ སྐུ་གསུང་ཐུགས་ཀྱི་ཡེ་ཤེས་ཀྱི་རྩལ་ལས་འོད་ཟེར་དཀར་དམར་མཐིང་གསུམ་གྱིས་འཇིག་རྟེན་ཐམས་ཅད་ཁྱབ༔ བགེགས་དང་ལོག་འདྲེན་འབྱུང་པོ་གནོད་ཅིང་འཚེ་བའི་གདོན་བགེགས་ཕོ་མོ་དམ་སྲི་སྡེ་བརྒྱད་མ་རུང་པ་ཐམས་ཅད་རྩ་སྦུར་མེ་ལ་བསྲེགས་པ་འམ་བྱ་སྒྲོ་མེ་ལ་བཤུར་བ་ལྟར་བསྲེགས་ཤིང་བརླགས༔ དུས་གསུམ་གྱི་ཁྲོ་བོ་ཁྲོ་མོ་རྒྱལ་བ་ཐམས་ཅད་ཀྱི་ཐུགས་རྗེ་ནུས་མཐུ་ཐམས་ཅད་འོད་ཟེར་མེ་དཔུང་ཁྲོ་བོ་ཁྲོ་མོ་མང་པོའི་རྣམ་པར་བསྡུས༔ བདག་མདུན་རྣམས་ལ་ཐིམ་པས་ནུས་སྟོབས་དང་གཟི་བརྗིད་རབ་ཏུ་འབར་ཞིང་རྒྱས་ཏེ༔ མཆོག་ཐུན་འཕྲིན་ལས་རབ་འབྱམས་ཀྱི་དངོས་གྲུབ་ཐམས་ཅད་སྐད་ཅིག་ཉིད་ལ་ཐོབ་པའི་ངེས་ཤེས་དང་ལྡན་པའི་ངང་ནས༔ ཨཱོཾ་བཛྲ་པཱ་ཎི་མ་ཧཱ་ཀྲོ་ཏ་སརྦ་སིདྡྷིཧཱུྃ་ཧཱུྃ༔ ཞེས་བུང་བ་ཚང་ཞིག་པ་ལྟ་བུ་འམ་འབྱུང་བ་ཚ་གྲང་འཁྲུག་པའི་སྒྲ་དབྱངས་ལྟར་ཟི་ལྷང་ལྷང་བཟླ་ཞིང་༔ སྔགས་དམིགས་ལས་སྐད་ཅིག་ཀྱང་མ་ཡེངས་པར་བརྩོན་པར་བྱའོ༔ ཐུན་མཇུག་རྣམས་སུ་ཁྲོ་ཚོགས་མེ་དཔུང་མཚོན་ཆར་སོགས་དམིགས་རྐང་གསུམ་པོ་ཅིག་ཅར་རམ་རིམ་སྐྱེས་ཀྱིས་དྲག་ཏུ་གཅུན་ཞིང་༔ སརྦ་བྷིགྣན་ཤ་ཏྲཱུཾ་གནོད་བྱེད་མཱ་ར་ཡ་ཧཱུྃ་ཕཊ༔ ཞེས་ཤམ་བུ་དང་བཅས་བཟླ་བར་བྱའོ༔ ཐུན་མཚམས་མཆོད་བསྟོད་རྩ་སྔགས་ཀཱ་ཡ་ཝཱཀྐ་ཙིཏྟ་དབང་བཞི་ལེན༔ འབུམ་ཚོ་བྱེ་བ་ས་ཡ་གང་ཟག་གིས༔ དབང་པོའི་རིམ་པས་བཟླས་པས་དངོས་གྲུབ་གཉིས༔ ངེས་པར་འཐོབ་ཅིང་སྡེ་བརྒྱད་གནོད་སྦྱིན་ཚོགས༔ བཀའ་ལྟར་ལས་ཁོལ་དམ་ལྟར་འཕྲིན་ལས་སྒྲུབ༔ གནོད་བྱེད་སྒབ་འདྲེ་བྲེལ་ཕོངས་བསེ་རགས་སོགས༔ དཔག་ཚད་འམ་ནི་རྒྱང་གྲགས་ཉེ་མི་ནུས༔ འདི་མེད་ནོར་སྒྲུབ་གནོད་སྦྱིན་མཆོད་བསྟོད་བརྟེན༔ དངོས་གྲུབ་ཆེ་ཡང་བར་གཅོད་དེར་མང་ཞིང་༔ བསེ་རགས་བྲེལ་ཕོངས་སྒབ་འདྲེས་གནོད་ཅིང་འཚེ༔ དཀོར་ཟོག་ལྡན་ཡང་ཤི་གོད་ལོངས་སྤྱོད་དབུལ༔ འཕྲལ་རྐྱེན་དེས་སེལ་མཐར་ཐུག་མཆོག་ལ་སྦྱོར༔ དེ་ཕྱིར་སྒྲུབ་པའི་ཡང་སྙིང་གདམས་པ་འདི༔ མ་འོངས་ཐ་མ་རྩོད་ལྡན་མར་ཞབས་སུ༔ སྐལ་ལྡན་ལས་འཕྲོ་ཅན་དང་འཕྲད་ནས་ཀྱང་༔ མཆོག་ཐུན་ཡོན་ཏན་མཐར་ཕྱིན་སྤྱོད་པར་ཤོག༔ རྒྱ་རྒྱ་རྒྱ་༔ ཅེས་ཁམས་པ་ཉི་མ་གྲགས་པས་ས་ཕོ་རྟ་ལ་ཁམས་སྲིང་མོ་རྫོང་མཆོག་ནས་གདན་དྲངས་ཤིང་། ས་མོ་ཡོས་ལ་སྦས་ཀྱི་སྔགས་འཆང་ཨོ་རྒྱན་མགོན་པོས་ནན་ཆེ་བས་སེར་རྫ་ལྷུད་ཐང་ལ་ཧོར་ཟླ་གསུམ་པར་ཤོག་སེར་ལས་ཞལ་བཤུས། །

ཕྱི་སྒྲུབ་ཡིད་བཞིན་ནོར་བུ།

ནོར་བདག་ཡིད་བཞིན་ནོར་བུ་ལས༔ ཕྱི་སྒྲུབ་ཡིད་བཞིན་ནོར་བུ་བཞུགས༔ རྡོ་རྗེ་འཛིན་ལ་ཕྱག་འཚལ་འདུད༔ དབང་ཐོབ་དམ་ལྡན་རྣལ་འབྱོར་པས༔ འགྲུབ་སྦྱོར་གཡང་སྐར་ཉི་ཁྱིམ་ལ༔ ནགས་ཚལ་མེ་ཏོག་ཆུ་བོ་ཕྱུག༔ དཔལ་དང་ལྡན་པའི་གནས་མཆོག་ཏུ༔ རྒྱལ་པོ་རྒྱལ་ཕྲན་སྡེ་དགོན་གནས༔ ཁ་དྲག་བཙན་ཕྱུག་འཕན་དར་ལྡན༔ རྗེས་ས་ཟག་རྫས་ཞྭ་གོས་རྒྱན༔ ས་སྣ་རྡོ་སྣ་ཅི་མང་དང་༔ རིན་ཆེན་སྨན་སྤོས་སྣ་ཚོགས་ཀྱིས༔ མཎྜལ་བྱིལ་བྱིལ་སྐྱང་ནུལ་བྱ༔ རབ་ནི་ཕོ་བྲང་བློས་སྣང་ལ༔ གསེར་དང་པདྨ་རཱ་ག་དང་༔ ཨིནྡྲ་ནཱི་ལའི་ཐོག་གསུམ་པ༔ གྲུ་བཞི་སྒོ་བཞི་རྟ་བབས་བཞི་བཞིར་ལྡན༔ ནོར་བུ་དབང་གི་རྒྱལ་པོ་དང་༔ རིན་ཆེན་དྲ་བ་ཁ་བད་དྲ་ཕྱེད་དང་༔ གདུགས་དང་རྒྱལ་མཚན་གཡེར་ཁའི་ཕྲེང་བས་བརྒྱན༔ ཕྱི་རོལ་ར་བ་སུམ་རིམ་ཁང་ཆེན་བརྒྱད༔ གཏེར་བུམ་བརྒྱད་དང་ཁྲུས་ཀྱི་རྫིང་བུ་བརྒྱད༔ འདོད་འཇོའི་བ་དང་མ་རྨོས་ལོ་ཏོག་ཤིང་༔ མཛེས་པར་བཟོ་ཞིང་ལྷ་ཡང་འབུར་དུ་གཏོད༔ གསེར་དངུལ་འདམ་སོགས་ཡོ་བྱད་འབྱོར་ཚོགས་བསྟུན༔ འབྲིང་ནི་འབྲུ་ལྔ་ཁལ་གཅིག་ཚོམ་བུར་བཀོད༔ ཐ་ན་འབྲུ་ཚོམ་ལྷ་ཡི་གྲངས་ལྟར་དགྲམ༔ དབུས་སུ་རིན་ཆེན་འདམ་སོགས་འདྲ་འབག་གམ༔ འབྲུ་ལྔའི་ཕྱེ་ལ་རིན་ཆེན་སྨན་སྤོས་ལྡན༔ དེ་ལ་ནོར་བུའི་དཔལ་གཏོར་ཙཀ་ལིས་བརྒྱན༔ དར་གོས་ཟ་འོག་མཛེས་པའི་གུར་ཡང་ཕུབ༔ རིན་ཆེན་སྣ་ཚོགས་དར་ཟབ་འདོད་དགུའི་རིགས༔ འདྲ་འབག་གམ་ནི་གཏོར་མའི་ཕྱི་རོལ་བསྐོར༔ མཐའ་ལ་མཆོད་ཚོགས་ཡོ་བྱད་ཕོ་མོའི་ཆས༔ གདུགས་དང་རྒྱལ་མཚན་བ་དན་གོ་ཁྲབ་མཚོན༔ གནམ་རྒྱན་བར་ཡོལ་སྐུ་གསུང་ཐུགས་རྟེན་དགྲམ༔ མཛེས་ཤིང་ཡིད་འོང་བཀོད་པས་ཁྱད་འཕགས་བྱ༔ ས་མ་ཡཱ༔ རྒྱ་རྒྱ་རྒྱ༔ དེ་ནས་དངོས་གཞི་སྒྲུབ་པའི་རིམ་པ་ནི༔ བདག་བསྐྱེད་ལྷ་ཡི་ཐུགས་ཀའི་ས་བོན་ལས༔ བྷྲཱུྃ་ཡིག་འཕྲོ་འདུའི་འོད་ཟེར་སྤྲོ་བསྡུ་བསྒྱུར༔ རྣམ་མང་ཐོས་སྲས་རྒྱལ་པོའི་ཕོ་བྲང་ནི༔ གསེར་ལས་གྲུབ་པའི་རིན་ཆེན་གཞལ་ཡས་ཁང་༔ ཀ་ཆེན་སྟོང་ཕྲག་བརྒྱད་བརྒྱས་བཀོད་མཛེས་སྙོམས༔ པད་རཱག་ཨིནྡྲ་ནཱི་ལ་ཡང་ཐོག་སོགས༔ རྒྱན་ལྡན་ཡིད་འོང་བློ་ཡིས་དཔག་མི་ཕོད༔ ཡོངས་སུ་གསལ་ཞིང་ལྷ་འཁོར་མངོན་སུམ་བསྐྱེད༔ སྤྱན་འདྲེན་བཞུགས་གསོལ་ཕྱག་མཆོད་བསྟོད་པའི་མཇུག༔ བདག་བསྐྱེད་ལྷ་ཡི་དཔྲལ་བའི་ཨཱོཾ་ཡིག་ལས༔ འོད་ཟེར་ལྔ་ལྡན་མདུན་བསྐྱེད་ལྷ་ལ་ཕོག༔ གསལ་སྣང་ཐོབ་པས་ཕྱི་ནང་གནོད་སྦྱིན་ཞིང་༔ ཕོ་བྲང་རྒྱན་ལྡན་རིན་ཆེན་གཞལ་ཡས་ཁང་༔ ཐ་གྲུ་རྒྱ་ཁྱོན་འཛིན་པའི་བློ་འདས་དབྱིངས༔ གནོད་སྦྱིན་འཁོར་བཅས་ལྷ་འཁོར་སྣང་བརྙན་ནི༔ གསལ་ལ་དྭངས་པ་སྒེག་ལྡན་གཟི་འོད་འབར༔ མངོན་སུམ་ལྟ་བུར་གྱ་གྱུ་ལང་ལིང་དུ༔ མོས་འདུན་རྩེ་གཅིག་གཏད་ཅིང་སྔགས་འདིས་བསྙེན༔ ཨཱོཾ་བྷཻ་ཤ་ར་མ་ན་ཡེ་ཡཀྵ་སརྦ་ས་མ་ཡ་ཙིཏྟ་ཧྲིང་ཧྲིང་ཛཿཛཿ སྐབས་སུ་མཆོད་བསྟོད་ཐུན་མཇུག་དབང་བཞི་ལེན༔ ཕྱི་སྒྲུབ་ཡིད་བཞིན་ནོར་བུའི་གདམས་པ་འདི༔ བདུན་འབུམ་བཟླ་ཞིང་ཉམས་སུ་བླང་བར་བྱ༔ དེ་ཚེ་སྒྲུབ་པའི་དྲོད་རྟགས་རིམ་པ་ཡང་༔ སྒྲུབ་པོའི་སྔོན་སྦྱངས་བསོད་ནམས་ཆེ་ཆུང་དང་༔ བརྩོན་འགྲུས་གོ་ཆ་མོས་འདུན་དད་སྟོབས་ལྟར༔ ནམ་མཁར་འཕུར་ཏེ་སྟོང་གསུམ་གླིང་བཞིའི་གླིང་༔ རི་རབ་གསེར་རི་རོལ་མཚོ་རིན་ཆེན་གླིང་༔ ཁང་བཟང་མེ་ཏོག་ལྗོན་ཤིང་འབྲས་དྲུག་སྨིན༔ ལེགས་ལྟས་སྣ་ཚོགས་ཉམས་སྣང་རྨི་ལམ་གསལ༔ དེ་ཚེ་རེ་དོགས་གཉིས་འཛིན་བྲལ་བཞིན་དུ༔ ལྷ་དང་རང་གཉིས་ངོ་བོ་ཉིད་དབྱིངས་ལ༔ དབྱེར་མེད་རིས་སུ་མ་གྲུབ་ཏིང་འཛིན་ངང་༔ ཐུགས་དམ་ཐ་ཚིག་གིས་བསྐུལ་དངོས་གྲུབ་བླང་༔ ཧཱུྃ༔ སྔོན་ཚེ་བསྐལ་པ་བརྒྱད་ཁྲིའི་གོང་རོལ་ནས༔ ཡང་དག་སངས་རྒྱས་མངོན་པར་བྱང་ཆུབ་ཀྱང་༔ དུས་གསུམ་ཚངས་ཆེན་བསྐལ་པ་མ་སྟོངས་བར༔ སྐུ་གསུམ་རྒྱལ་བའི་གདུང་འཛིན་སྐྱོང་བ་དང་༔ དབུལ་བའི་འཇིགས་སྐྱོབས་ས་བརྒྱད་གནོད་སྦྱིན་དབང་༔ འཕགས་མཆོག་མགོན་པོ་ཁྱོད་མིན་གཞན་མི་བདོག༔ དེ་ཕྱིར་སྔོན་གྱི་ཐུགས་དམ་བདག་གིས་བསྐུལ༔ ཡི་ཆད་གདུང་བའི་ང་རོས་ཁྱོད་ལ་འབོད༔ སྔོན་གྱི་ལས་ངན་འཕྲལ་གྱི་རྐྱེན་འཚུབ་ཅིང་༔ ལྔ་བརྒྱའི་བསྐལ་ཞབས་བཀྲེས་ཕོངས་དབུལ་བས་གཟིར༔ ཆོས་བཞིན་བསྒྲུབ་ལ་ལོངས་སྤྱོད་དམན་པ་ཡིས༔ ལྟོ་གོས་དབང་ཤོར་བྱང་ཆུབ་ལམ་བོར་ཚེ༔ རེ་ཞིང་ལྟོས་པའི་མགོན་པོ་འཁོར་བཅས་ཀྱིས༔ དཀའ་བ་སྤྱད་ནས་བསྒྲུབ་ཅིང་མོས་པའི་བུར༔ ཁམས་གསུམ་དབང་དུ་འདུ་བའི་དངོས་གྲུབ་སྩོལ༔ སྲིད་གསུམ་ཟིལ་གྱིས་གནོན་པའི་དངོས་གྲུབ་སྩོལ༔ ཚེ་དཔལ་དབང་ཐང་འབྱོར་བའི་དངོས་གྲུབ་སྩོལ༔ མན་ཤེལ་ཆུ་ཤེལ་ནོར་བུའི་དངོས་གྲུབ་སྩོལ༔ གསེར་དངུལ་ཟངས་ལྕགས་རིན་ཆེན་དངོས་གྲུབ་སྩོལ༔ ནས་འབྲས་གྲོ་སོགས་འབྲུ་ཡི་དངོས་གྲུབ་སྩོལ༔ ཁྲབ་རྨོག་གོ་མཚོན་སྤྱད་ཀྱི་དངོས་གྲུབ་སྩོལ༔ དར་གོས་འཕྲུག་སོགས་གོས་ཀྱི་དངོས་གྲུབ་སྩོལ༔ པྲོག་ཞུ་དོ་ཤལ་རྒྱན་གྱི་དངོས་གྲུབ་སྩོལ༔ བཟའ་བཏུང་ལོངས་སྤྱོད་ཟས་ཀྱི་དངོས་གྲུབ་སྩོལ༔ རྟ་གླང་ར་ལུག་རྐང་བཞིའི་དངོས་གྲུབ་སྩོལ༔ ཕོ་བྲང་ཡུལ་འཁོར་གླིང་གི་དངོས་གྲུབ་སྩོལ༔ རྒྱལ་བློན་འབངས་འཁོར་སྦྱིན་བདག་དངོས་གྲུབ་སྩོལ༔ ཁྱེའུ་བརྒྱུད་འཛིན་རིགས་ཀྱི་དངོས་གྲུབ་སྩོལ༔ ཤེས་ལྡན་དཔའ་བློན་ཕོ་བརྒྱུད་དངོས་གྲུབ་སྩོལ༔ མཛངས་ལྡན་འཕྲུལ་ཆགས་མོ་བརྒྱུད་དངོས་གྲུབ་སྩོལ༔ རྩལ་ལྡན་ཤུགས་རྒྱས་འཁོར་འབངས་དངོས་གྲུབ་སྩོལ༔ གདུགས་སོགས་བཀྲ་ཤིགས་རྟགས་ཀྱི་དངོས་གྲུབ་སྩོལ༔ འཁོར་ལོ་ལ་སོགས་སྲིད་ཀྱི་དངོས་གྲུབ་སྩོལ༔ ཀ་ཅ་དཀོར་གསུམ་རྟེན་གྱི་དངོས་གྲུབ་སྩོལ༔ མདོར་ན་མི་ཟད་རིན་ཆེན་གཏེར་གྱི་བུམ༔ མཆོག་ཐུན་དངོས་གྲུབ་མ་ལུས་བདག་ལ་སྩོལ༔ རྩ་སྔགས་ལ༔ མ་ཧཱ་རཏྣ་བྷ་དྲ་སརྦ་སིདྡྷིཕ་ལ་ཧཱུྃ་ཧཱུྃ༔ ཅེས་བརྗོད་ཚིག་དོན་ལྟ་བུའི་དངོས་གྲུབ་ཚོགས༔ ཐུགས་རྗེའི་སྟོབས་ཀྱིས་རང་ལ་སྩལ་བར་བསམས༔ ལས་ཀྱི་མཇུག་སྐྱོང་སྒྲུབ་རྫས་སྦ་བ་དང་༔ བསྙེན་སྒྲུབ་དམ་ཚིག་མཆོད་བསྟོད་མ་ཆག་བརྩོན༔ ཚུལ་བཞིན་འབད་པས་དོན་གཉིས་དཔལ་ལ་སྤྱོད༔ ས་མ་ཡཱ༔ རྒྱ་རྒྱ་རྒྱ༔ ཀླུ་དབང་སྐྱེ་མཐའ་ང་ཡི་ཐུགས་ཀྱི་སྲས༔ ཁམས་ནས་འབྱུང་བའི་ཉི་མ་གྲགས་པ་ཁྱོད༔ ཟབ་མོའི་གདམས་པ་འདི་དང་འཕྲད་པའི་དུས༔ བདུད་རིགས་མང་པོའི་གཤེ་བཀུར་འུར་བ་དང་༔ བདུད་སྤྲུལ་ཚེ་ཡི་མིང་གིས་སྙིང་ནས་དམོད༔ འགོང་སྤྲུལ་བླ་གཟུགས་སྟག་གི་ལོ་པ་ཡིས༔ སྨོན་ལམ་སྟོབས་ཀྱིས་ངན་མཚམས་མ་འབྱོར་ན༔ གདམས་པ་འདི་དང་ལུང་བྱང་རྫས་གསུམ་པོ༔ ལག་ཏུ་སོན་ན་ས་ཡི་དབང་ཕྱུག་དང་༔ རྟེན་འབྲེལ་འགྲིག་ན་དྲུག་ཅུའི་འཕྲང་སྒྲོལ་ནས༔ བརྒྱད་ཅུའི་བར་དུ་སྲིད་བརྟན་འཕེལ་བ་འབྱུང་༔ བར་ཆད་དབང་གིས་ཞེ་སྐྲག་སེམས་ཚིག་ན༔ བདུད་མོ་གཅིག་དང་འཁོར་གྱི་དམ་ལོག་གི༔ རྐྱེན་སེལ་དབང་གིས་རྡོ་རྗེ་སྨན་ཐོད་ལུང་༔ མ་ལོན་ལུས་ན་གཏེར་གནས་ལྕེ་ཡིས་འཇིགས༔ མ་རུངས་ལྷ་འདྲེ་མི་གསུམ་ཐམས་ཅད་འཚུབ༔ ལས་ཀྱི་དབང་གིས་སོན་བྱེ་བཞག་ཏུ་མེད༔ དེ་དུས་ཅི་བྱས་བྱར་མི་གཏུབ་པའི་ཚེ༔ སྒྲུབ་པ་དང་ལོང་བློ་སྣ་ནང་དུ་བཟླུམ༔ བཟང་བསྟོད་ངན་སྨྲ་བཟང་རྐྱེན་ངན་དབང་སོགས༔ སྒྱུ་མ་རྨི་ལམ་བྲག་ཆ་ལྟ་བུར་སྤྱོད༔ རེ་དོགས་གཉིས་འཛིན་དབང་དུ་མ་འབྲེང་བུ༔ བར་ཆད་གྲོལ་ན་དངོས་གྲུབ་རིམ་གྱིས་ཡོང་༔ ཆོས་འདི་མཁོ་བའི་དུས་ལ་བབས་དུས་སྒྲུབས༔ དོན་གཉིས་འཕྲིན་ལས་ངང་གིས་གསལ་བ་འབྱུང་༔ ས་མ་ཡཱ༔ རྒྱ་རྒྱ་རྒྱ༔ ཅེས་པ་འདི་རྣམས་ཀྱང་སློབ་དཔོན་ཆེན་པོའི་གསུང་བཞིན་ཁོ་མོས་ཡི་གེར་བཏབས་ཏེ་རིན་པོ་ཆེའི་གཏེར་དུ་སྦས་པའོ༔ ལས་འཕྲོ་ཅན་དང་འཕྲད་པར་ཤོག༔ ས་མ་ཡཱ༔ རྒྱ་རྒྱ་རྒྱ༔ ཁམས་པ་ཉི་མ་གྲགས་པས་ཕྱུངས་པའོ། །མངྒ་ལཾ། །

ནང་དང་གསང་བའི་གདམས་པ།

ནོར་བདག་ཡིད་བཞིན་བུ་ལས༔ ནང་དང་གསང་བའི་གདམས་པ་བཞུགས༔ གནོད་སྦྱིན་སྡེ་དཔོན་རྡོ་རྗེ་ཅན་ལ་འདུད༔ གནོད་སྦྱིན་ནོར་བདག་ཆེན་པོའི་ནང་སྒྲུབ་ཀྱི་རིམ་པ་ནི༔ སྟ་གོན་སྒྲུབ་རྫས་སོགས་ཕྱི་སྒྲུབ་སོར་བཞག་གི་སྟེང་ནས་བདག་བསྐྱེད་མགྲིན་པའི་ཨཱཿལས་འོད་ཟེར་དམར་པོ་རེག་བྱ་ཤིན་ཏུ་ཚ་བ་མང་པོ་གློག་འཁྱུག་པ་ལྟར་མདུན་བསྐྱེད་ཀྱི་ལྷ་འཁོར་ཐམས་ཅད་ཀྱི་མགྲིན་པར་ཕོག་པས༔ ལྷ་ཚོགས་ཐམས་ཅད་ཀྱི་གསུང་གི་གད་རྒྱངས་བཞད་སྐུའི་གཟི་བརྗིད་རྒྱས་ཐུགས་ཀྱི་ཏིང་ངེ་འཛིན་དཔལ་དུ་འབར་བས་ནུས་སྟོབས་རབ་ཏུ་རྒྱས་པའི་རྩལ་ལས་འོད་དང་འོད་ཟེར་བསམ་གྱིས་མི་ཁྱབ་པ་ཕྱོགས་བཅུར་འཕྲོས་ཤིང་ཁྱབ་སྟེ་རབ་ཏུ་ཁྱབ་པས་འོག་མིན་སོགས་དག་པའི་ཞིང་ལྔ་ནས་སྐུ་གསུམ་སྟོན་པ་སྤྲུལ་འཁོར་རིགས་ཀྱི་བརྒྱུད་པ་དང་བཅས་པའི་ཐུགས་རྗེ་བྱིན་རླབས་སྟོང་གསུམ་འཇིག་རྟེན་འཁོར་འདས་ལམ་གསུམ་ཐམས་ཅད་ནས༔ ཕྱི་སྣོད་འབྱུང་བཞིའི་དྭངས་མ༔ ནང་བཅུད་འགྲོ་བའི་ཚེ་དཔལ༔ ཚངས་པའི་གནས་རིས་བཅུ་བདུན་གྱི་ཏིང་འཛིན་དགའ་བདེའི་ཡོན་ཏན༔ ཚངས་པ་བརྒྱ་བྱིན་རྒྱལ་ཆེན་སྡེ་བཞི་རྣམས་ཀྱི་བསོད་ནམས་གཟི་བརྗིད་དབང་ཐང་༔ གནོད་སྦྱིན་ཕྱོགས་སྐྱོང་ནོར་ལྷ་རྒྱ་མཚོའི་དཔལ་འབྱོར་དངོས་གྲུབ་རྒྱལ་པོ་རྒྱལ་ཕྲན་བློན་འབངས་བཙུན་མོ་བསོད་ནམས་ཅན་དང་བསགས་ལྡན་ཐམས་ཅད་ཀྱི་ཚེ་དཔལ་འབྱོར་བ་དབང་ཐང་༔ རིན་ཆེན་འབྲུ་ནོར་གསེར་དངུལ་ཟངས་ལྕགས་རྟ་གླང་དུད་འགྲོ་དར་ཟབ་གོ་མཚོན་འདོད་དགུའི་དཔལ་འབྱོར་ཐམས་ཅད་རང་དབང་མེད་པར་འོད་དང་འོད་ཟེར་གྱིས་བསྡུས་ཏེ༔ བདག་མདུན་གཞལ་ཡས་སྒྲུབ་ཁང་ཡུལ་ཕྱོགས་ཐམས་ཅད་དཔལ་འབྱོར་འདོད་དགུ་རབ་ཏུ་རྒྱས་ཤིང་རབ་ཏུ་འཕེལ་ཏེ༔ དངོས་གྲུབ་ཀྱི་ཚོགས་ཐམས་ཅད་སྐད་ཅིག་དེ་ཉིད་ལ་ཐོབ་ཅིང་ནོར་མང་གནོད་སྦྱིན་གྱི་སྡེ་དཔོན་དང་གཉིས་སུ་མེད་པའི་འབྲས་བུ་མངོན་དུ་གྱུར་པར་བསམས་ཤིང་༔ དོན་གཉིས་འགྲུབ་པའི་སྨོན་འཇུག་གི་ངང་ནས་གསང་བའི་སྙིང་པོ་འདི་འབུམ་གསུམ་བཟླ་བར་བྱའོ༔ ཨཱོཾ་བྷཻ་ཤ་ར་མ་ན་ཡེ་ཡཀྵ་ཛྙ་ན་ལོ་ཀ་སརྦ་ས་མ་ཡ་པ་ཤཾ་ཀུ་རུ་ཧཱུྃ་ཧཱུྃ་སྭཱ་ཧཱ༔ སླར་ཡང་བདག་བསྐྱེད་ཀྱི་ཐུགས་ཀའི་ཧཱུྃ་ལས་འོད་ཟེར་ཁ་དོག་ལྔ་ལྡན་རང་མདངས་ཀྱི་ཟེར་དང་ལྡན་པར་འཕྲོས་པས་མདུན་བསྐྱེད་ཀྱི་ལྷ་འཁོར་ཐམས་ཅད་ཀྱི་ཐུགས་ཀར་ཕོག་པས་ཐུགས་རྒྱུད་བསྐུལ་ཏེ་ཡབ་ཡུམ་ཐམས་ཅད་སྙོམས་པར་ཞུགས་པས་བདེ་སྟོང་གི་ཡེ་ཤེས་རབ་ཏུ་རྒྱས་པའི་རྩལ་ལས་འོད་ཟེར་ཁ་དོག་ལྔ་ལྡན་ལྕགས་ཀྱུ་ཞགས་པ་ལྕགས་སྒྲོག་དྲིལ་བུའི་རང་བཞིན་དུ་གྱུར་ནས༔ ཕྱི་སྣོད་ནང་བཅུད་རྒྱལ་བློན་ལྷ་མི་མཁོ་དགུའི་དཔལ་འབྱོར་ཐམས་ཅད་ལྕགས་ཀྱུས་བཟུང་༔ ཞགས་པས་བཅིངས༔ ལྕགས་སྒྲོག་གིས་བསྡམས༔ དྲིལ་བུས་དབང་པོ་ཐམས་ཅད་མྱོས་སུ་བཅུག་ཏེ༔ རང་དབང་མངོན་དུ་གྱུར་ནས་དངོས་གྲུབ་ཐམས་ཅད་ཐོབ་པའི་ཏིང་ངེ་འཛིན་གྱི་ངང་ནས་གོང་གི་སྙིང་པོ་འབུམ་གཅིག་བཟླ༔ ཐུན་མཚམས་རྣམས་སུ་མཆོད་བསྟོད་རྒྱུད་བསྐུལ་དངོས་གྲུབ་ཞུ༔ ས་མ་ཡཱ༔ རྒྱ་རྒྱ་རྒྱ༔ འདི་ནི་ནང་དང་གསང་བའི་གདམས་པའི་གནད༔ ཆིག་བརྒྱུད་བུ་མིན་དཔེ་ཁ་དམ་དུ་གྱིས༔ རྩ་བ་ཡན་ལག་ཆོས་བདག་ཚུར་གཉེར་ན༔ ཡུལ་དང་བསྟུན་ཏེ་གདམས་པ་རིམ་གྱིས་སྦྱིན༔ མན་ངག་ཟགས་སུ་མ་འཇུག་སྙིང་གཏམ་ཡིན༔ ཅེས་གསུངས་པ་རྣམས་ཀྱང་ཁོ་མོས་ཤོག་སེར་དུ་བཏབས་ཏེ་སྲིང་མོ་རྫོང་མཆོག་ཏུ་རྒྱས་བཏབ་བོ༔ ལས་འཕྲོ་ཅན་དང་འཕྲད་པར་ཤོག༔ རྒྱ་རྒྱ་རྒྱ༔ ཁམས་པ་ཉི་མ་གྲགས་པས་ཁམས་སྲིང་མོ་རྫོང་མཆོག་ནས་ས་ཕོ་རྟ་ལ་གདན་དྲངས་ས་མོ་ཡོས་ལ་སྦས་ཨོ་རྒྱན་མགོན་པོས་ནན་ཏན་ཆེ་བས་བྲིས་ཏེ་དཀའ་མོ་བྱུང་། མངྒ་ལཾ།། །།

སྒྲུབ་པའི་གབ་ཡིག

ནོར་བདག་ཡིད་བཞིན་ནོར་བུ་ལས༔ སྒྲུབ་པའི་གབ་ཡིག་བཀའ་རྒྱ་ཅན་བཞུགས༔ གསང་བདག་ནོར་ལྷ་རྒྱ་མཚོར་འདུད༔ ནོར་བདག་སྒྲུབ་པའི་གབ་ཡིག༔ དེ་ལ་རྫས་བསགས་པ་ནི༔ རིན་པོ་ཆེའི་རིགས་ཚོགས་ཚད་དབྱིག་གི་རིགས་མ་གཏོགས་པ་གང་མང་༔ ཀླུ་ལ་གནོད་པའི་རིགས་མ་གཏོགས་པའི་སྨན་རིགས་གང་མང་དང་༔ ཆོས་སྨན་རྒྱ་བོད་ཀྱི་སྒྲུབ་གནས་བྱིན་ཆེན་ཕོ་བྲང་སྡེ་དགོན་གང་ཆེའི་ས་རྡོ་ཡུལ་མཁར་ཞིང་སོགས་དཔལ་གཡང་བཟང་པོའི་ས༔ སྐྱེས་པ་བུད་མེད་རྒྱལ་བློན་བཙུན་མོ་གཡང་ཅན་འཕན་ཕྱུགས་བཙན་གསུམ་ཐམས་ཅད་ཀྱི་རྗེས་ས་བསྡད་མལ་གྱི་ས༔ ཁྱད་པར་ཚོང་འདུས་ཐམས་ཅད་ཀྱི་ས༔ བྱ་གཅན་མཛོ་རྟོལ་དྲེའུ་སོགས་མ་ཡིན་པའི་དུད་འགྲོའི་རིགས་གྱུར་གྱི་ཤ་ཚིལ་ལྤགས་སྤུ་རུས་པ་སོགས་ཚོགས་ཚད༔ བརྒྱུད་པ་སེལ་མེད་ཀྱི་བྱིན་རླབས་རྟེན་རྒྱུན༔ འབྲུ་སྣ་ཅི་མང་༔ ཟས་སྣ་ཚོགས་ཚད༔ དར་གོས་རིགས་གྱུར་ཐམས་ཅད་བསགས་ཤིང་༔ བསྒྲུབ་དུས་དཀྱིལ་འཁོར་བློས་སྣང་གི་སྐུ་སོགས་ཀྱི་གཟུངས་གཞུག་གཡང་དགུའི་སྣོད་སོགས་ལ་སྤྱད་པར་བྱའོ༔ ཡིག་ཆུང་སྒྲུབ་རྫས་ཀྱི་གབ་ཡིག༔ ས་མ་ཡཱ༔ རྒྱ་རྒྱ་རྒྱ༔ བློས་སྣང་ཡོངས་རྫོགས་སམ་སྐུ་རྐྱང་གང་ལའང་གནས་བྱིན་རླབས༔ ནོར་ལྷ་ནོར་རྒྱུན་མ་སོགས་ནོར་ལྷའི་གཟུངས་རིགས་ཅི་ཟབ་སྐུའི་གཟུངས་གཞུག་དང་༔ ཕོ་བརྒྱད་མོ་བརྒྱད་སྟེང་འོག་གི་འཁོར་ལོ་ཆ་རྫས་དང་ལྡན་པའི་སྐུའི་ཞབས་གཟུངས་དང་༔ རབ་གནས་ལ་ནན་ཏན་བྱེད་པ་དང་༔ གཏོར་མ་ལ་བརྟེན་ཀྱང་རིན་ཆེན་སྨན་སྤོས་འབྲུ་སྣ་དར་ཟབ་སོགས་གོང་སྨོས་གང་གྲུབ་གཏོར་མའི་ཕྱི་ལ་བསྲེ་བ་དང་༔ གཟུངས་ལ་འབུལ་ཞིང་འོག་ཏུ་གནོད་སྦྱིན་གྱི་སྲོག་ཡིག་ཛཾཿདགུ་བཾཿདགུའི་ཡིག་འཁོར་འཇོག་པ་སོགས་ལག་ལེན་ཤིན་ཏུ་གསང་བའི་གབ་ཡིག༔ ས་མ་ཡཱ༔ རྒྱ་རྒྱ་རྒྱ༔ དམིགས་བསལ་སྙིང་བྱང་གི་གབ་ཡིག༔ དེ་ཡང་སྐྱེ་འགྲོ་ཕོ་མོ་དམིགས་བསལ་དུ་དབང་དུ་འདོད་ན༔ ཕོ་གཟུགས་མོ་གཟུགས་ཀྱི་རཱུ་པ་ཟག་རྫས་ལྡན་པས་བྲི་ཞིིང་༔ གནས་ཡིག་རྣམས་ལ་སྤྱི་བོའི་རྩ་འཁོར་གཡོས་ཛཿཁུག༔ མིག་གི་དབང་པོ་གཡོས་ཛཿཁུག༔ རྣ་བའི་དབང་པོ་གཡོས་ཛཿཁུག༔ སྣ་ལྕེ་མགྲིན་པ་གཞོག་གཡས་གཡོན་ལག་གཡས་གཡོན་རྐང་པ་གཡས་གཡོན་གཡོས་ཛཿཁུག་ཅེས་འབྲི༔ སྙིང་གར་ནྲིའི་ཁོང་གསེང་དུ་དམིགས་བྱའི་མིང་ཡིག་མགོ་མ་དང་༔ མཐར་ཕོ་གཡས་མོ་གཡོན་བསྐོར་བའི་མིང་རུས་འདི་ཞེས་བྱ་བའི་ཡིད་གཡོས་སྙིང་དཀྲུགས་འགྲམ་པ་ཆོག་མདངས་ཕྲོགས་སྟོབས་ཕྱུངས་རྐང་པ་ཁྱོག་རང་དབང་དུ་དུང་དུང་འདུ་འདུ་སྡུས་སྡུས་ཛཿཛཿ ཁུག་ཀཱ་ཡ་ཝཱཀྐ་ཙིཏྟ་པ་ཤཾ་ཀུ་རུ་ཧཱུྃ་ཧཱུྃ་སྭཱ་ཧཱ༔ ཅེས་སོགས་དགུག་སྔགས་ཀྱིས་བསྐོར་ཞིང་༔ དབྲ་འབྲུ་གདོང་སྒ་གླིང་རི་སྟེ་རུས་ཚོ་དྲུག་གང་ཡིན་ལ་རཱུ་པའི་བརླ་གཡས་གཡོན་གྱི་དཀྱིལ་དུ༔ རྟ་གཡག་ཤ་བ་ལུག་ར་དཀར་པོར་ནག་པོ་སྟེ༔ ཆེ་གེའི་བླ་རྟགས་གང་ཡིན་གྱི་དུད་འགྲོ་ཕོ་མོ་གཉིས་རེ༔ བརླ་གཡས་གཡོན་དཀྱིལ་དུ་སྐྱེ་མཆེད་དོད་པར་འབྲི་ཞིང་༔ དུད་འགྲོའི་རང་གཟུགས་ཀྱི་རྩིབ་ལོགས་གཡས་གཡོན་སྙིང་གི་ཐད་དུ་ཏྲི་ཏེ་བྲིས་པའི་ཁོང་གསེང་དུ་དུད་འགྲོ་རང་མིང་གི་ཡི་གེ་ཐོག་མ་བྲིས་པའི་མཐར་ཆེ་གེའི་བླ་གཡོས་གཡོས་ཁུག་ཛཿཛཿ ཁུག༔ ཅེས་གཡས་གཡོན་གོང་བཞིན་བསྐོར་བ་འབྲི༔ དུད་འགྲོ་ལ་སོགས་ལས་ལ་སྦྱར་ཀྱང་དེ་བཞིན་རིགས་པས་འཁྲོལ་ཞིང་གཟུགས་དང་གནས་ཡིག་གོང་ལྟར་ལ༔ རྩིབ་ལོགས་སྙིང་གི་ཐད་དུ་ཏྲིའི་ཁོང་གསེང་དུ་དུད་འགྲོ་རང་གི་མིང་མགོའི་ཡི་གེ་ལ་འདོད་གསོལ་གྱིས་བསྐོར་བ་གཡས་གཡོན་འཁོར་ལུགས་སྔ་མ་བཞིན་ནོ། །དུད་འགྲོའི་བླ་རྟགས་ས་བོན་ཡིན༔ དེ་དག་རྣམས་ལ་ཤ་སྤུ་ཚིལ་གསུམ་མི་ལ་ཟག་རྫས་སྐྲ་གོས་གང་རྙེད་ལྡན་པ་དགྲ་ལིང་ལྟར་ལྟེབས་ནས༔ སྲད་བུ་དམར་ནག་གིས་བཅིང་ཞིང་ཟངས་ལྕགས་ཀྱི་ག་འུར་བསྡམས་ཏེ་སྐུ་གཟུགས་སམ་སྒྲུབ་གཏོར་གྱི་འོག་ཏུ་དགོད་པར་བྱའོ༔ གསེར་དངུལ་དར་ཟབ་ཀ་ཅའི་རིགས་ལ་ཡང་གཟུགས་འབྲི་བའམ་ཚལ་པ་དུམ་བུ་སོགས་ལ་ཀ་ཅ་ཆེ་གེ་འདི་ཞེས་བསམ་གྱིས་མི་ཁྱབ་པ་བདག་ག །ི་དབང་དུ་སྡུས་རཏྣ་རཏྣ་ཞེས་གཟུགས་སམ་ཚལ་བ་གང་རིགས་ཀྱི་དཀྱིལ་དུ་ཤོག་བུ་ལ་བྲིས་པའི་མཐར༔ འདོད་གསོལ་གོང་བཞིན་རྒྱབ་པ་འགོད་དེ་ཟངས་ཀྱི་སྣོད་དུ་སྔ་མ་བཞིན་བྱའོ༔ དམིགས་པའི་འཕྲུལ་འཁོར་གང་འདོད་ལྟར་བསྒྱུར་ཞིང་༔ ཨཱོཾ་བྷཻ་ཤ་ར་མ་ན་ཡེ་ཡཀྵ་སརྦ་ས་མ་ཡ་ཧྲིང་ཧྲིང་ཛཿཛཿ མིང་ལྟེམ་པ་ཤང་ཀུ་རུ་ཁུག་ཛཿཛཿ ཁུག་སྭཱ་ཧཱ༔ ཅེས་བསྒྲུབ་བྱའི་ཡུལ་དང་བསྟུན་ཏེ་བཟླ་ཞིང་༔ ཐུན་སྐབས་རྣམས་སུ་དགུག་གཞུག་དམིགས་གནད་དུ་བསྣུན༔ འདི་དང་སྦྱིན་སྲེག་སྦྲེལ་ན་ཁབ་ལེན་རྡོ་ལྕགས་སམ་རླུང་ཞགས་དམར་པོ་ཞེས་བྱ་བའི་དབང་བསྡུད་ཡིན་ནོ༔ མ་སྤེལ་སྙིང་གི་དཀྱིིལ་དུ་གབ༔ ཁ་བསགས་སྟོང་ཞུས་ཅན་ལ་སྦོས༔ དམ་མེད་སྣོད་ངན་རྣམས་ལ་སྦོས༔ ལེ་ལོ་རྣམ་གཡེང་མང་ལ་སྦོས༔ འཆལ་ན་མཁའ་འགྲོའི་བཀའ་ཆད་འོང་༔ བོད་ཀྱི་བདེ་སྐྱིད་བསྐྲུན་ནུས་དང་༔ ཆོས་ལྡན་དབུལ་བ་སེལ་ཕྱིར་གདམས༔ མཚོ་རྒྱལ་ཁྱོད་ཀྱིས་ཡི་གེར་ཐོབ༔ མ་འོངས་འགྲོ་ལ་ཕན་ཐོགས་ཤོག༔ ལས་འཕྲོ་ལྡན་པས་སྤྱོད་པར་ཤོག༔ ས་མ་ཡཱ༔ རྒྱ་རྒྱ་རྒྱ༔ ཁམས་པ་ཉི་མ་གྲགས་པས་ཁམས་སྲིང་མོ་རྫོང་མཆོག་ནས་གདན་དྲངས་ཤིང་ཤོག་སེར་ལས་ཞལ་བཤུས༔ མངྒ་ལཾ། །བཀའ་རྒྱ་ཡོད་སུས་མ་བྲི། ༈གཡང་སྒྱེ་ནུ་མ་ལྔ་འབྱུང་བའི་ཁམས་ཕོ་མོ་སྟག་གཟིག་ལྤགས་པ་ནོར་ཟ་འོག་ཟས་སྣ་ལྔའི་སྒྱེ་གྱིས་ཟེར་གྲགས་ལགས། །

དབང་ཆོག་དགོས་འདོད་ཀུན་འབྱུང་།

ནོར་བདག་ཡིད་བཞིན་ནོར་བུ་ལས༔ དབང་ཆོག་དགོས་འདོད་ཀུན་འབྱུང་བཞུགས༔ ཁྲོ་བོའི་རྒྱལ་པོ་ལ་ཕྱག་འཚལ་ལོ༔ དཔལ་བཟང་པོ་དང་ལྡན་པའི་གནས་རི་ནས་གཟའ་སྐར་ལས་མཐུན་ལྟར་དར་བའི་དུས་སུ་གནས་ཁང་གི་ཁྱོན་ལྟར་སྟེགས་བུ་ས་སྣ་ཅི་མང་དང་༔ ཁྱད་པར་སྡེ་དགོན་གནས་གཞི་ཚོང་དུས་ཀྱི་ས་བསྡུས་ལ་དཀྱིིལ་འཁོར་གྱི་བྱ་བ་མཐར་སོན་པར་སྐྱང་ནུལ་བྱ་ཞིང་དྲི་བཟང་གིས་ཆག་ཆག་གདབ༔ ཐིག་ནས་དྲངས་ཤིང་སྒོ་གྲུ་རྟ་བབས་བཞི་བཞིར་ལྡན་པའི་ཕྱི་རོལ་དུ་ཕྱོགས་བཞིར་གཏེར་གྱི་བུམ་པ་བཞི༔ མཚམས་བཞིར་ཁང་པ་བཞི༔ དེ་དག་གི་བར་མཚམས་རྣམས་སུ་དཔག་བསམ་གྱི་ཤིང་མ་རྨོས་པའི་ལོ་ཏོག་འདོད་འཇོའི་བ༔ ཁྲུས་ཀྱི་རྫིང་བུ༔ རིན་པོ་ཆེའི་ར་བ་སུམ་རིམ་དང་ལྡན་པའི་ལྟེ་བར་ལྷ་གྲངས་ཀྱི་པདྨ་མདོག་མཚུངས་ཀྱི་ཚོན་གྱིས་བཅད་ཅིང་༔ ཕྱི་རོལ་གྱི་འཁྱམས་ལ་ཀླུ་བརྒྱད་ཡན་གྱི་མདོག་ལྟར་རྡུལ་ཚོན་གྱི་ཚོམ་བུ་བཀོད་ཅིང་མཛེས་པར་བྱས་པའི་དབུས་སུ༔ གསེར་དང་པད་རཱག་ཨིནྡྲ་གསུམ་གྱི་མདངས་ལྡན་མཁར་ཐབས་གཏོར་མ་སྨན་སྤོས་འབྲུ་སྣའི་ཟན་ལ་གྲུབ་པ་རྒྱན་བཀོད་ཕུན་སུམ་ཚོགས་པ༔ ཤར་དུ་སྒྲུབ་ཡིག༔ ལྷོར་ནེའུ་ལེའི་རྐྱལ་པ༔ ནུབ་ཏུ་ལྗོན་དམར་རམ་ཟངས་བུམ་མགུལ་ཆིངས་སྔོན་པོ་གཟུངས་ཐག་དུང་ཆོས་སྒྲོ་མདོངས་འབྲས་བུ་ཅན་གྱི་ཤིང་སོགས་ཀྱིས་བརྒྱན་པ་དྲི་བཟང་གི་ཆུས་སུམ་ཆ་བཀང་བ་འགོད༔ བྱང་དུ་རྒྱལ་མཚན་མཐའ་བསྐོར་དུ་མཆོད་ཚོགས་སྲུང་མའི་གཏོར་མ་སོགས་བཟང་དུ་འགོད༔ ལས་ཀྱིི་གཞུང་བསྲང་བདག་མདུན་བསྐྱེད་རིམ་གསལ༔ བསྙེན་སྒྲུབ་ཁ་གསོ༔ ཚོགས་ཀྱི་འཁོར་ལོས་བསྐང་༔ དངོས་གྲུབ་ཞུ༔ ལས་བུམ་བསྐྱེད༔ སློབ་མ་ཁྲུས་ནས་ཕྱུངས༔ དཀར་ཕྱོགས་སྐྱོང་བ་མཆོད༔ ནག་ཕྱོགས་བསྐྲད༔ བསྲུང་བའི་འཁོར་ལོས་གོ་བསྒོ༔ ལག་ག །ཡོན་རིན་པོ་ཆེའི་མཎྜལ་ཁྱད་པར་ཅན་རེ་མེད་པ་ལ་རྟེན་འབྲེལ་གྱི་ཆེ་བ་བླ་མ་དང་སློབ་མའི་མཚམས་སྦྱོར་བཟང་པོ་དགོས་པས་དབང་སྦྱིན་པར་མི་བྱ༔ ཁྱད་པར་དུའང་བསྟན་འགྲོའི་དོན་ནུས་པའི་བུ་མ་གཏོགས་དངོས་གྲུབ་ཀྱི་གཏེར་ཁ་གཏད་ཀྱང་བདག་དོན་ནུས་ཀྱང་གཞན་དོན་མི་ནུས་པས༔ སྣོད་ལྡན་ཡིན་ངེས་ལ་ཆིག་བརྒྱུད་ལས་སྤེལ་བར་མི་བྱ་ཕག་ཏུ་སྦོས་ཤིག༔ ས་མ་ཡཱ༔ རྒྱ་རྒྱ་རྒྱ༔ དེ་ནས་སྣོད་དང་ལྡན་ངེས་ཀྱི་བུ་ལ་ཐོ་རངས་རྒྱས་པའི་དུས་སམ་དགོང་མོ་དབང་གི་དུས་སུ་འདི་སྐད་བརྗོད་པར་བྱ་སྟེ༔ ཀྱེ༔ འདིར་ཚོགས་ཀྱི་བུ་ཁྱོད་བྱང་ཆུབ་ཀྱི་སེམས་དང་ལྡན་ནམ༔ བདག་གཞན་གྱི་དོན་སྤྱོད་པར་ནུས་སམ༔ བསྙེན་སྒྲུབ་ཟབ་མོ་ཡལ་བར་མི་གཏོང་ངམ༔ བཀའ་བཞིན་བསྒྲུབ་ཅིང་དམ་ལ་གནས་ན་ཁྱོད་ལ་མཆོག་དང་ཐུན་མོང་གི་དངོས་གྲུབ་ཡང་དག་པར་གཏད་པས་ཇི་ལྟར་བགྱིད༔ སློབ་མས༔ དཔལ་ལྡན་བླ་མ་དགོངས་སུ་གསོལ༔ ལུས་ངག་ཡིད་གསུམ་བྲན་དུ་འབུལ༔ བཀའ་བཞིན་བསྒྲུབ་ཅིང་དམ་ལ་གནས༔ བསྙེན་སྒྲུབ་ཟབ་མོ་དང་དུ་ལེན༔ བདག་གཞན་དོན་གཉིས་དཔལ་ལ་སྤྱོད༔ དཔའ་བོ་ཆེན་པོས་རྗེས་སུ་བཟུང་༔ མཆོག་དང་ཐུན་མོང་དངོས་གྲུབ་སྩོལ༔ གསུམ༔ དམ་ཚིག་གི་ཆུ་སྦྱིན༔ ཧཱུྃ༔ འདི་ནི་དམ་ཚིག་གསང་བའི་ཆུ༔ བུ་ཁྱོད་འཐུང་ལ་དམ་ཚིག་སྲུངས༔ གསང་སྔགས་འདི་ཡི་ལྟ་སྤྱོད་རྣམས༔ གཞན་ལ་མ་སྨྲ་ཉམས་སུ་ལོངས༔ མཆོག་ཐུན་དངོས་གྲུབ་འཐོབ་པར་འགྱུར༔ ཨཱོཾ་ཨཱཿཧཱུྃ་ས་མ་ཡ་སྭཱ་ཧཱ༔ ཆོས་སྨན་ལྡན་པའི་ཆུ་སྦྱིན༔ ད་ཁྱེད་རང་གི་བླ་མ་དང་དཀྱིལ་འཁོར་ལྷག་པའི་ལྷ་དང་གཉིས་སུ་མེད་པའི་འདུན་པས་སྐྱབས་སུ་འགྲོ་བ་སེམས་བསྐྱེད་པ་འདི་བཞིན་སྨྲོས་ཤིག༔ ཧཱུྃ༔ བརྒྱུད་པ་ཀུན་འདུས་རྡོ་རྗེ་འཆང་༔ དཔལ་ལྡན་རྩ་བའི་བླ་མ་དང་༔ རྩ་གསུམ་ནོར་ལྷ་རྒྱ་མཚོ་ལ༔ བྱང་ཆུབ་བར་དུ་སྐྱབས་སུ་མཆི༔ གསུམ་བདག་གཞན་དབུལ་བ་རྒྱུན་གཅོད་ཅིང་༔ མར་གྱུར་འགྲོ་རྣམས་སྒྲོལ་བའི་ཕྱིར༔ ནོར་བདག་ཡིད་བཞིན་ནོར་བུ་ལ༔ བསྙེན་སྒྲུབ་མཆོད་བསྟོད་ཡང་དག་བརྩམ༔ ཀུན་ཀྱང་བྱང་ཆུབ་མངོན་གྱུར་ཅིག༔ གསུམ༔ དེ་ནས་ཤུ་ནྱ་ཏའི་སྔགས་དང་ལས་བུམ་གྱི་ཆུས་སློབ་མ་བསང་སྦྱངས༔ སྟོང་པའི་ངང་ལས་སྣང་བའི་ངོ་བོ་རྣམ་ཐོས་རྒྱལ་པོའི་ཕོ་བྲང་ལ༔ སེམས་ཉིད་ཀྱི་རང་རྩལ་ནོར་བདག་ཡིད་བཞིན་ནོར་བུ༔ རྣམ་ཤེས་དང་དབང་པོ་ཐབས་དང་ཤེས་རབ་ཀྱི་རོལ་པ༔ ཡབ་ཡུམ་སྲས་དང་འཁོར་ཚོགས་ཚང་བར་མངོན་རྟོགས་ལྟར་བསྒོམ༔ སྤྱན་འདྲེན༔ ཡེ་ཤེས་པ་བསྟིམ༔ ཏིཥྛ་བཛྲ་གྱིས་བརྟན་པར་བྱའོ༔ དེ་ནས་གཏོར་མ་གཞལ་ཡས་ལྷ་ཚོགས་འཁོར་བཅས་སྤྱི་བོར་བྱོན༔ སྐུ་ཡོངས་སུ་རྫོགས་པའི་དབང་ཐོབ་པར་བསམས༔ ཧཱུྃ༔ གཏོར་མ་རིན་ཆེན་གཞལ་ཡས་ཁང་བཟང་དུ༔ ནོར་བདག་རྒྱལ་པོ་རྣམ་མང་ཐོས་སྲས་ཀྱི༔ ལྷ་ཚོགས་མ་ལུས་འཁོར་དང་བཅས་པ་བཞུགས༔ སྐལ་ལྡན་རིགས་ཀྱི་བུ་ལ་དབང་བསྐུར་བས༔ ནོར་ལྷ་རྒྱ་མཚོའི་སྐུ་ཡི་དབང་ཐོག་ཤོག༔ རྩ་སྔགས་ཀཱ་ཡ་སོགས༔ ནུབ་ཀྱི་བུམ་པ་མགྲིན་པར་བཞག༔ ཧཱུྃ༔ རིན་ཆེན་བུམ་པ་བཅུད་ཀྱིས་བལྟམས་པ་འདི༔ ནོར་བདག་རྒྱལ་པོ་རྣམ་མང་ཐོས་སྲས་ཀྱིི༔ ལྷ་ཚོགས་རྣམས་ཀྱི་གསུང་དང་གཉིས་སུ་མེད༔ སྐལ་ལྡན་རིགས་ཀྱི་བུ་ལ་དབང་བསྐུར་བས༔ ནོར་ལྷ་རྒྱ་མཚོའི་གསུང་གི་དབང་ཐོབ་ཤོག༔ རྩ་སྔགས་ཝཱཀྐ་སོགས༔ ཤར་གྱི་སྒྲུབ་ཡིག་སྙིང་གར་བཞག༔ ཧཱུྃ༔ དཔེ་བུམ་རིན་ཆེན་དགོས་འདོད་ཀུན་འབྱུང་འདི༔ ནོར་བདག་རྒྱལ་པོ་རྣམ་མང་ཐོས་སྲས་ཀྱི༔ ལྷ་ཚོགས་རྣམས་ཀྱི་ཐུགས་དང་གཉིས་སུ་མེད༔ སྐལ་ལྡན་རིགས་ཀྱི་བུ་ལ་དབང་བསྐུར་བས༔ ནོར་ལྷ་རྒྱ་མཚོའི་ཐུགས་ཀྱི་དབང་ཐོབ་ཤོག༔ རྩ་སྔགས་ཙིཏྟ་སོགས༔ ལྷོ་ཡི་ནེའུ་ལེའུ་རྐྱལ་པ་ལྟེ་བར་བཞག༔ ཧཱུྃ༔ ནོར་དང་ལོངས་སྤྱོད་རིན་ཆེན་རྐྱལ་པ་འདི༔ ནོར་བདག་རྒྱལ་པོ་རྣམ་མང་ཐོས་སྲས་ཀྱི༔ ལྷ་ཚོགས་རྣམས་ཀྱི་ཡོན་ཏན་དབང་མཆོག་སྟེ༔ སྐལ་ལྡན་རིགས་ཀྱི་བུ་ལ་དབང་བསྐུར་བས༔ ནོར་ལྷ་རྒྱ་མཚོའི་ཡོན་ཏན་དབང་ཐོབ་ཤོག༔ རྩ་སྔགས་རཏྣ་སོགས༔ བྱང་གི་རྒྱལ་མཚན་ལག་ཏུ་གཏད་ཅིང་༔ ཧཱུྃ༔ མི་ནུབ་རིན་ཆེན་བསྟན་པའི་རྒྱལ་མཚན་འདི༔ ནོར་བདག་རྒྱལ་པོ་རྣམ་མང་ཐོས་སྲས་ཀྱི༔ ལྷ་ཚོགས་རྣམས་ཀྱི་འཕྲིན་ལས་དབང་མཆོག་སྟེ༔ སྐལ་ལྡན་རིགས་ཀྱི་བུ་ལ་དབང་བསྐུར་བས༔ ནོར་ལྷ་རྒྱ་མཚོའི་འཕྲིན་ལས་དབང་ཐོབ་ཤོག༔ ༴ རྩ་སྔགས་ཀརྨ་སོགས༔ ཡོངས་རྫོགས་གཏོར་མའི་བཀའ་གཏད་དང་༔ སྣ་བདུན་རྟགས་བརྒྱད་དབང་ཡང་བསྐུར༔ སྒྲུབ་པའི་དམ་བཅའ་ཡང་དག་གདབ༔ གདམས་པའི་སྙིང་པོ་དམ་པ་འདི༔ བརྗོད་པར་བཀའ་བའི་ཆོས་ཡིན་ཀྱང་༔ ཆོས་རྒྱལ་སྐུ་ངོ་ཆེ་བ་དང་༔ བོད་འབངས་འགྲོ་བའི་དོན་བསམ་གདམས༔ ཉམས་སུ་ལོངས་ཤིག་སྐལ་ལྡན་རྣམས༔ མ་འོངས་ལྔ་བརྒྱའི་ཡང་མཐའ་ལ༔ ལས་འཕྲོ་ཅན་དང་འཕྲད་པར་ཤོག༔ གདམས་་པ་འདི་ཉིད་སྤེལ་པའི་སྣོད༔ དཀྱིལ་འཁོར་འཛིན་པའི་བུ་བདུན་དང་༔ དངོས་གྲུབ་འཆང་བའི་བུ་དགུ་ལ༔ གདམས་པ་འདི་ཉིད་བྱིན་ཅིག་རྒྱ༔ གཞན་ཡང་དག་སྣང་ཆོས་བཞིན་སྤྱོད༔ ལུང་ཟིན་རིགས་དང་མོས་ལྡན་ལ༔ སྒྲུབ་པའི་དམ་བཅའ་ཕོག་ལ་བྱིན༔ ཟགས་སུ་མ་འཇུག་གདམས་པའི་སྙིང་༔ དཔྲལ་བའི་མིག་བཞིན་བཙའ་མཁས་གྱིས༔ ཆོས་བཀའ་འཆང་བའི་སློབ་མ་ལ༔ ཚོགས་གཉིས་སྤེལ་ཕྱིར་གསང་བཞིན་གདམས༔ ཅེས་གསུངས་པ་རྣམས་བདག་མཚོ་རྒྱལ་གྱིས་ཡི་གེར་བཏབ་སྟེ་རིན་པོ་ཆེའི་གཏེར་དུ་སྦས་པ་ལས་འཕྲོ་ཅན་དང་ཕྲད་པར་ཤོག༔ བཀའ་ཡི་སྲུང་མས་ལེགས་པར་སྲུང་༔ གཏེར་གྱི་སྲུང་མས་བྱ་ར་མཛོད༔ ས་མ་ཡཱ༔ རྒྱ་རྒྱ་རྒྱ༔ ཁམས་པ་ཉི་མ་གྲགས་པས་ཁམས་སྲིང་མོ་རྫོང་མཆོག་ནས་ས་ཕོ་རྟ་ལ་གདན་དྲངས། །ས་མོ་ཡོས་ལ་ཤོག་སེར་ལས་བསྒྱུར་བའོ་མང་ག་ལཾ།། །།

ལས་བྱང་མཆོད་བསྟོད་ཀྱི་ཆོ་ག

ནོར་བདག་ཡིད་བཞིན་ནོར་བུ་ལས༔ ལས་བྱང་མཆོད་བསྟོད་ཀྱི་ཆོ་ག་བཞུགས༔ བཅོམ་ལྡན་འདས་རྡོ་རྗེ་འཛིན་པ་ཆེན་པོ་གནོད་སྦྱིན་གྱི་སྡེ་དཔོན་ལ་ཕྱག་འཚལ་ལོ༔ བསྙེན་སྒྲུབ་ལས་གསུམ་གྱི་ཁ་སྐོང་དུ་ནོར་ལྷ་མཆོད་ཅིང་བསྟེན་པ་ལས་བྱང་གི་རིམ་པ་ནི་སྔོན་འགྲོ་དང་དངོས་གཞི་རྗེས་སོ༔ ས་མ་ཡཱ་རྒྱ་རྒྱ་རྒྱ༔ སྔོན་འགྲོ་རྟེན་གཏོར་ནོར་བུ་འབར་བ་ལ༔ ལྷ་གྲངས་མཉམ་པའི་རིལ་བུས་ཐ་མ་བསྐོར༔ མཆོད་གཏོར་རིན་ཆེན་སྣོད་དུ་ཟླུམ་པོའི་བཤོས༔ ལྷ་གྲངས་མཉམ་པ་ཤ་དུམ་མཐེབ་སྐྱུས་བརྒྱན༔ སྨན་རག་ཕྱི་ནང་མཆོད་ཚོགས་ཡིད་འོང་བཀྲམ༔ སྤྱན་གཟིགས་ཀ་ཆ་དཀོར་ཆ་འབྱོར་ཚད་བཤམས༔ བདེ་བའི་གདན་འཁོད་རྔ་དུང་རོལ་མོ་སྦིར༔ སྙན་པའི་དབྱངས་ཀྱིས་དངོས་གཞི་འདི་ལྟར་རོ༔ ཧཱུྃ༔ ཆོས་དབྱིངས་རྣམ་དག་དཀོན་མཆོག་བདེན་པའི་མཐུས༔ འདུ་བའི་རིགས་རྣམས་མ་གཏོགས་གདོན་དང་བགེགས༔ བསྒྲུབ་ལ་བར་གཅོད་སྒབ་འདྲེ་འབྱུང་པོའི་ཚོགས༔ གནས་འདིར་མ་འདུག་རང་རང་གནས་སུ་དེངས༔ པཱ་ར་ཀུ་མ་ན་ཡ་ཨཱ་གཙྪ་མཱ་ར་ཡ་ཧཱུྃ་ཕཊ༔ མཚམས་གཅོད་ནི༔ ཧཱུྃ༔ སྟེང་འོག་ཕྱོགས་མཚམས་བསྲུང་བའི་འཁོར་ལོའི་གོ༔ རིམ་པ་བདུན་གྱི་གུར་ཁང་འོད་དུ་འཚེར༔ བར་ཆད་བགེགས་ལས་རྣམ་པར་རྒྱལ་བའི་ཞིང་༔ གནོད་སྦྱིན་ཆེན་པོའི་ཕོ་བྲང་ལྟ་ན་སྡུག༔ བཛྲ་པཱ་ཎི་རཏྣ་ཛྙཱ་པྲ་མ་ཏི་ཧཱུྃ་ཕཊ་སྭཱ་ཧཱ༔ བདག་བསྐྱེད་པ་ནི༔ ཧཱུྃ༔ སྣང་སྟོང་ཀུན་ཁྱབ་ཕོ་བྲང་ཆེན་པོའི་དབུས༔ བདུད་བཞི་པདྨ་ཉི་ཟླའི་གདན་སྟེང་དུ༔ བདག་ཉིད་རིག་པའི་ངོ་བོ་ཡི་གེ་ཧཱུྃ༔ འཕྲོ་འདུ་གྱུར་པས་དཔལ་ཆེན་རྡོ་རྗེ་འཛིན༔ མཐིང་ནག་ཞལ་གཅིག་ཕྱག་གཉིས་དོར་སྟབས་འགྱིང་༔ ཞལ་གདངས་ལྗགས་འགྲིལ་སྤྱན་གསུམ་དྲག་ཏུ་འཁྲུགས༔ གཡས་པས་རྡོ་རྗེ་གཡོན་པ་སྡིག་མཛུབ་བསྒྲེངས༔ སྟག་ཤམ་རུས་རྒྱན་དུར་ཁྲོད་ཆས་བརྒྱད་སྤྲས༔ རལ་པ་ཁམ་ནག་གྱེན་མཐུར་ཐོད་པས་བཅིངས༔ སྦྲུལ་རིགས་ལྔས་བརྒྱན་ཡེ་ཤེས་མེ་དཔུང་འབར༔ གར་དགུའི་ཉམས་ལྡན་གནས་གསུམ་འོད་ཟེར་འབར༔ ལྕང་ལོ་ཅན་ནས་གནས་འདིར་སྤྱན་འདྲེན་གཤེགས༔ སྤྱན་འདྲེན་པ་ནི༔ ཧཱུྃ༔ མ་ལུས་སངས་རྒྱས་ཀུན་གྱི་མཐུ་སྟོབས་འཛིན༔ སྲིད་གསུམ་ཟིལ་གནོན་དྲེགས་ཚོགས་ཡོངས་ཀྱི་གཤེད༔ འཇིགས་བྱེད་རྒྱལ་པོ་ཁྲོ་བོ་ཡོངས་ཀྱི་རྒྱལ༔ ཐུགས་རྗེའི་སྟོབས་ཀྱིས་གནས་འདིར་སྤྱན་འདྲེན་གཤེགས༔ མ་ཧཱ་ཀྲོ་དྷ་བཛྲ་པཱ་ཎི་བཛྲ་ས་མ་ཡ་ཛཿཛཿ བཞུགས་གསོལ་ནི༔ ཧཱུྃ༔ དྲེགས་ཆེན་རབ་གཏུམ་འབར་འཁྲུག་ཁྲོ་བོའི་རྗེ༔ གར་དགུའི་ཉམས་ལྡན་དྲག་རྩལ་ཧེ་རུ་ཀ༔ གནས་འདིར་དྲག་པོའི་གདན་ལ་བཞུགས་སུ་གསོལ༔ དབང་དང་བྱིན་རླབས་དངོས་གྲུབ་སྩལ་དུ་གསོལ༔ ཧཱུྃ་བཛྲ་པཱ་ཎི་མ་ཧཱ་ཀྲོ་ཏ་ཏིཥྛ་ཧཱུྃ༔ ཕྱག་མཆོད་ནི༔ ཧཱུྃ༔ ཁྲོ་རྒྱལ་མཆོག་དང་དགོངས་པ་མཉམ་པའི་ཕྱིར༔ དབྱིངས་རིག་འདུ་འབྲལ་མེད་པའི་ཕྱག་གིས་མཆོད༔ ཕྱི་ནང་མཆོད་ཚོགས་དངོས་འབྱོར་ཡིད་ལས་སྤྲུལ༔ མཆོད་པའི་ལྷ་མོས་དབང་གི་འཁོར་ལོར་འབུལ༔ མ་ཧཱ་སརྦ་པཱུ་ཛ་ས་མ་ཡ་ཧོ༔ འཛབ་བསྟོད་ནི༔ ཧཱུྃ༔ དབྱིངས་ནས་ཤར་བའི་དཔལ་ཆེན་ཁྲོ་བོའི་རྒྱལ༔ སྣང་བའི་སྐུ་ལ་སྟོང་པའི་ཡེ་ཤེས་རྒྱས༔ སྔགས་ཀྱི་འཁོར་ལོ་སྒྲ་འོད་ཟེར་དུ་འཁྲུག༔ སྲིད་གསུམ་ཟིལ་གནོན་ཁྲོ་བོའི་རྒྱལ་ལ་བསྟོད༔ ཨཱོཾ་བཛྲ་པཱ་ཎི་མ་ཧཱ་ཀྲོ་ཏ་སརྦ་སིདྡྷིཧཱུྃ་ཧཱུྃ༔ སརྦ་བིགྷ་ནན་ཤ་ཏྲུཾ་མཱ་ར་ཡ་ཧཱུྃ་ཕཊ༔ མ་ཡེངས་ཏིང་འཛིན་སྔགས་འཁོར་ནན་བསྐྱེད་གསལ༔ བརྒྱ་སྟོང་ཁྲི་སོགས་སྐབས་སུ་གང་བབས་བཟླས༔ མདུན་བསྐྱེད་ནི༔ ཧཱུྃ༔ ཐུགས་ཀྱི་ས་བོན་ཧཱུྃ་ཡིག་མཐིང་ནག་ལས༔ བྷྲུྃ་ཡིག་ཆད་པས་རིན་ཆེན་གཞལ་ཡས་ཁང་༔ ཀ་ཆེན་སྟོང་ཕྲག་བརྒྱད་བརྒྱས་བཀོད་ལེགས་མཛེས༔ གསེར་གྱི་གཞལ་ཡས་གྲུ་བཞི་སྒོ་བཞི་པ༔ དེ་སྟེང་རིན་ཆེན་པདྨ་རཱ་གའི་ཐོག༔ དེ་སྟེང་རིན་ཆེན་ཨིནྡྲ་ནཱི་ལའི་ཐོག༔ ནོར་བུ་དབང་གི་རྒྱལ་པོས་རྩེ་རྒྱན་སྤྲས༔ རིན་ཆེན་ཁ་བད་དྲ་བ་དྲ་ཕྱེད་དང་༔ གདུགས་དང་རྒྱལ་མཚན་གཡེར་ཁའི་ཕྲེང་བས་མཛེས༔ རིན་ཆེན་ར་བ་སུམ་རིམ་འདོད་འཇོའི་བ༔ མ་རྨོས་ལོ་ཏོག་དཔག་བསམ་ཤིང་ཆེན་དང་༔ གཏེར་གྱི་ཁང་ཆེན་བརྒྱད་དང་གཏེར་བུམ་བརྒྱད༔ ཁྲུས་ཀྱི་རྫིང་བུ་ཡན་ལག་བརྒྱད་ལྡན་ཆུ༔ རྣམ་མང་ཐོས་སྲས་རྒྱལ་པོའི་ཕོ་བྲང་གསལ༔ བྷྲཱྃ་མཎྜ་ལ་བྷྲཱྃ་སྭཱ་ཧཱ༔ ལྷ་བསྐྱེད་པ་ནི༔ ཧཱུྃ༔ ཕོ་བྲང་རིན་ཆེན་དབང་གི་གཞལ་ཡས་དབུས༔ རིན་ཆེན་ཟུར་བརྒྱད་པདྨ་ཉི་ཟླའི་སྟེང་༔ འདོད་འབྱུང་ནོར་བུ་ས་བོན་བྷཻ་ཡིས་མཚན༔ འོད་ཟེར་འཕྲོ་འདུའི་སྦྱོར་བ་ཡོངས་གྱུར་པས༔ ཡིད་བཞིན་ནོར་བུ་རྒྱལ་པོ་རྣམ་ཐོས་སྲས༔ བཻ་ཌཱུར་མདོག་འདྲ་ཞལ་གཅིག་ཁྲོ་འཛུམ་བཞད༔ གཡས་པས་རིན་ཆེན་རྒྱལ་མཚན་སྐུ་ལ་བརྟེན༔ གཡོན་པས་འདོད་འབྱུང་ནེའུ་ལེའི་རྐྱལ་པ་བསྣམས༔ རིན་ཆེན་རྒྱན་ཕྲེང་ལྷབ་ལྷུབ་དར་ཟབ་དང་༔ པཉྩ་ལི་ཀའི་བེར་ཆེན་དགུ་བརྩེགས་གསོལ༔ རལ་པ་མཐོན་མཐིང་རིན་ཆེན་པྲོག་ཞུས་སྤྲས༔ ཞབས་གཉིས་ཕྱེད་སྐྱིལ་འགྱིང་བག་གཟི་འོད་འབར༔ རིགས་བདག་བཛྲ་པཱ་ཎིས་སྤྱི་གཙུག་བརྒྱན༔ ཕྱི་རོལ་ཕྱོགས་བཞིར་པདྨ་ཉི་ཟླའི་སྟེང་༔ ནོར་སྐྱོང་དཀར་མོ་ནོར་རྒྱུན་སེར་མོ་དང་༔ ཀུ་རུ་ཀུལླེ་དམར་མོ་ཀླུ་མོ་སྔོ༔ ཀུན་ཀྱང་ཞལ་གཅིག་ཕྱག་གཉིས་འགྱིང་བག་ལྡན༔ གཡས་པ་གཏེར་བུམ་གཡོན་པས་ནེའུ་ལེ་བསྣམས༔ བཅུ་དྲུག་ཡིད་འོང་བཞིན་མཛེས་ལྟ་ན་སྡུག༔ རིན་ཆེན་སྣ་ཚོགས་རྒྱན་ཆ་སྐར་ལྟར་མཛེས༔ དར་ཟབ་ན་བཟའ་སྣ་ཚོགས་ཅོད་པན་འཕྱོ༔ དྲི་ཞིམ་ནུ་འབུར་ལང་ཚོའི་འདབ་སྟོང་གཡོ༔ ཆགས་པའི་ཉམས་ལྡན་སྤྱན་རྣམས་ཟུར་མིག་འཕྱོ༔ སྣ་ཚོགས་འོད་ཟེར་གཟི་བརྗིད་ལྡན་པར་བསྐྱེད༔ དེ་ཡི་ཕྱི་རིམ་པདྨ་འདབ་བརྒྱད་ལ༔ ཤར་དུ་རྡོ་རྗེ་རྒྱལ་པོ་རྣམ་ཐོས་སྲས༔ སྐུ་མདོག་དཀར་པོ་འོད་ཟེར་གཟི་བརྗིད་འབར༔ ལྷོ་རུ་རིན་ཆེན་རྒྱལ་པོ་རྣམ་ཐོས་སྲས༔ སྐུ་མདོག་སེར་པོ་འོད་ཟེར་གཟི་བརྗིད་འབར༔ ནུབ་ཏུ་དབང་གི་རྒྱལ་པོ་རྣམ་ཐོས་སྲས༔ སྐུ་མདོག་དམར་པོ་འོད་ཟེར་གཟི་བརྗིད་འབར༔ བྱང་དུ་འཕྲིན་ལས་རྒྱལ་པོ་རྣམ་ཐོས་སྲས༔ སྐུ་མདོག་ལྗང་གུ་འོད་ཟེར་གཟི་བརྗིད་འབར༔ གཡས་པས་རྒྱལ་མཚན་གཡོན་པས་ནེའུ་ལེ་བསྣམས༔ ཞབས་གཉིས་ཕྱེད་སྐྱིལ་རྒྱན་ཕྲེང་གཙོ་ལྟར་བསྐྱེད༔ ཤར་ལྷོར་སྲས་མཆོག་ཛམ་ལྷ་སྐུ་མདོག་སེར༔ ལྷོ་ནུབ་སྲས་མཆོག་ཛམ་ལྷ་སྐུ་མདོག་དམར༔ ནུབ་བྱང་སྲས་མཆོག་ཛམ་ལྷ་སྐུ་མདོག་ནག༔ བྱང་ཤར་སྲས་མཆོག་ཛམ་ལྷ་སྐུ་མདོག་དཀར༔ གཡས་རྣམས་ནོར་བུ་དབང་རྒྱལ་ཐུགས་ཀར་གཏོད༔ གཡོན་རྣམས་འདོད་འབྱུང་ནེའུ་ལེའི་རྐྱལ་པས་སྤྲས༔ རིན་ཆེན་སྣ་ཚོགས་རྒྱན་ལྡན་ཕྱེད་སྐྱིལ་བཞུགས༔ དེ་ཡི་ཕྱི་རིམ་པདྨ་འདབ་བརྒྱད་ལ༔ ཤར་དུ་གནོད་སྦྱིན་རིགས་སྔགས་འཆང་ཆེན་དཀར༔ ལྷོ་རུ་གནོད་སྦྱིན་ལྷ་ཡི་དྲི་ཆེན་སེར༔ ནུབ་ཏུ་གནོད་སྦྱིན་ཆེན་པོ་ཀུན་རྒྱུ་དམར༔ བྱང་དུ་གནོད་སྦྱིན་བུམ་པའི་ལྟོ་ཅན་ལྗང་༔ ཞབས་གཉིས་ཕྱེད་སྐྱིལ་རིན་ཆེན་ཅོད་པན་འཕུར༔ ཕྱག་གཉིས་རིན་ཆེན་སྣ་ཚོགས་གཞོང་པ་ན༔ དགོས་འདོད་ཀུན་འབྱུང་ནོར་བུས་བཀང་བ་བསྣམས༔ འོད་ཟེར་སྣ་ཚོགས་གཟི་བརྗིད་ལྡན་པར་བསྐྱེད༔ ཤར་ལྷོར་གནོད་སྦྱིན་འབྲོག་གནས་ཆེན་པོ་ནི༔ སྐུ་མདོག་ནག་པོ་མདུང་དར་གཡས་ན་འཕྱར༔ ལྷོ་ནུབ་གནོད་སྦྱིན་རྟ་ཚེ་ཆེན་པོ་ནི༔ སེར་སྐྱ་རིན་ཆེན་ཁང་བུ་གཡས་ན་བསྣམས༔ ནུབ་བྱང་གནོད་སྦྱིན་ཆེན་པོ་ཀུཎྜ་ལི༔ སྐུ་མདོག་དཀར་པོ་ཕྱག་གཡས་ནོར་བུ་བསྣམས༔ བྱང་ཤར་གནོད་སྦྱིན་ཆེན་པོ་ཡང་དག་རྒྱལ༔ སྐུ་མདོག་སེར་པོ་རིན་ཆེན་གཞོང་པ་ཐོགས༔ ཀུན་ཀྱང་རྒྱན་ཕྲེང་ཅོད་པན་གཟི་བརྗིད་ལྡན༔ ཞབས་གཉིས་ཕྱེད་སྐྱིལ་གཡོན་པས་ནེའུ་ལེ་བཙིར༔ རིན་ཆེན་འདོད་དགུ་ཆར་ལྟར་འབེབས་པར་བསྒོམ༔ དེ་ཡི་ཕྱི་རིམ་པདྨ་འདབ་བརྒྱད་ལ༔ ནོར་རྒྱས་དཀར་པོ་དུང་སྐྱོང་དཀར་པོ་དང་༔ པད་རྒྱལ་སྔོན་པོ་རིགས་ལྡན་སྔོན་པོ་དང་༔ སྟོབས་ཆེན་དམར་པོ་པདྨ་དམར་སེར་དང་༔ འཇོག་པོ་སེར་པོ་པད་ཆེན་དཀར་སེར་རྣམས༔ སྐུ་སྟོད་མི་གཟུགས་སྐུ་སྨད་སྦྲུལ་དུ་འཁྱིལ༔ ཕྱག་རྣམས་ཐལ་སྦྱར་ནོར་བུའི་མཆོད་པ་འབུལ༔ ཤར་སྒོར་མགོན་དཀར་ལྕགས་ཀྱུ་གཏེར་བུམ་དཀར༔ ལྷོ་སྒོར་ཚོགས་བདག་ཞགས་པ་གཏེར་བུམ་སེར༔ ནུབ་སྒོར་དབང་ཕྱུག་ཁ་ཊྭཱཾ་གཏེར་བུམ་དམར༔ བྱང་སྒོར་ཙིའུ་དམར་མདུང་དར་གཏེར་བུམ་དམར༔ ཀུན་ཀྱང་འབར་ཁྲོ་གཟི་ལྡན་དོར་སྟབས་འགྱིང་༔ བཀའ་ཡི་ལས་མཛད་སྒྲུབ་མཆོག་སྐྱོང་བར་བསྒོམ༔ རིན་ཆེན་གཞལ་ཡས་བར་ཁྱམས་ཁོར་ཡུག་ལ༔ ལྷ་ཀླུ་གནོད་སྦྱིན་བྱེ་བ་འབུམ་འབུམ་ཚོགས༔ སྐུ་མདོག་སྣ་ཚོགས་མདོག་ཅན་གཟི་བརྗིད་འབར༔ རིན་ཆེན་གཞོང་ཐོགས་ཁྲོམ་ཚོགས་ལྟ་བུར་གསལ༔ སྤྱན་འདྲེན་པ་ནི༔ རོལ་མོ་འཁྲོལ་དྲི་བཟང་གཏོང་ཞིང་༔ ཧཱུྃ༔ བདག་ཉིད་ཁྲོ་བོའི་རྒྱལ་པོའི་ཐུགས་ཀ་ནས༔ ལྔ་ལྡན་འོད་ཟེར་ལྕང་ལོ་ཅན་དུ་འཕྲོས༔ རྒྱལ་པོ་ཆེན་པོ་རྣམ་ཐོས་ནོར་མང་བུ༔ མ་ལུས་འཁོར་དང་བཅས་པ་རྣམས་ལ་ཕོག༔ སྔོན་གྱི་དམ་ཚིག་དབང་གིས་རྒྱུད་བསྐུལ་ནས༔ སྒྲུབ་པའི་གནས་འདིར་སྤྱན་འདྲེན་གཤེགས་སུ་གསོལ༔ སྐུ་གསུང་ཐུགས་ཡོན་འཕྲིན་ལས་རྣམ་ཐོས་སྲས༔ ཐུགས་འཛིན་གསང་ཡུམ་སྲས་མཆོག་ཛམ་ལྷའི་ཚོགས༔ གནོད་སྦྱིན་བརྒྱད་དང་ཀླུ་བརྒྱད་གནོད་སྦྱིན་འབུམ༔ བྱེ་བ་དུང་ཕྱུར་བཀའ་ཉན་བྲན་གཡོག་བཅས༔ ཐུགས་རྗེའི་སྟོབས་བསྐྱེད་གནས་འདིར་གཤེགས་སུ་གསོལ༔ ཁམས་གསུམ་དབང་དུ་སྡུད་ཕྱིར་གཤེགས་སུ་གསོལ༔ སྲིད་གསུམ་ཟིལ་གྱིས་གནོན་ཕྱིར་གཤེགས་སུ་གསོལ༔ མཆོག་གི་དངོས་གྲུབ་སྩོལ་ཕྱིར་གཤེགས་སུ་གསོལ༔ ཐུན་མོང་ཆར་ལྟར་འབེབས་ཕྱིར་གཤེགས་སུ་གསོལ༔ གྲུབ་པ་རྣམ་བརྒྱད་སྩོལ་ཕྱིར་གཤེགས་སུ་གསོལ༔ ཨཱོཾ་བྷཻ་ཤྲ་མ་ཎ་ཡེ་བཛྲ་ས་མ་ཡ་ཛཿཛཿ བཞུགས་གསོལ་ནི༔ ཧཱུྃ༔ ཡེ་ཤེས་སེམས་དཔའ་ཆར་སྤྲིན་གཏིབས་འདྲའི་ཚོགས༔ དམ་ཚིག་སེམས་དཔའ་བསྐྱེད་པའི་སྐུ་ལ་ཐིམ༔ བསྒྲུབ་པའི་འབྲས་བུ་མངོན་དུ་མ་གྱུར་བར༔ མ་ལུས་འཁོར་བཅས་གནས་འདིར་བརྟན་པར་བཞུགས༔ མཆོག་དང་ཐུན་མོང་དངོས་གྲུབ་བདག་ལ་སྩོལ༔ ཨོཾ་བྷཻ་ཤྲ་མ་ཎ་ཡེ་ཛཿཧཱུྃ་བཾ་ཧོ་༔ ཏིཥྛ་ལྷན༔ ཕྱག་ནི༔ ཧཱུྃ༔ སྔོན་ཚེ་བསྐལ་མང་གོང་ནས་ཚོགས་གཉིས་རྒྱས༔ ས་བརྒྱད་ཕྱིར་མི་ལྡོག་པའི་བྱང་ཆུབ་སེམས༔ ངལ་བསོས་དགེ་བའི་རྒྱལ་པོ་ཡིད་བཞིན་ནོར༔ མ་ལུས་འཁོར་དང་བཅས་ལ་ཕྱག་འཚལ་བསྟོད༔ མཆོད་པ་ནི༔ ཧཱུྃ༔ པུཥྤེ་དཀར་མོས་སྟོང་གསུམ་འདབ་ལྡན་མཆོད༔ ངྷཱུ་པེ་སེར་མོས་དྲི་ཡི་སྤྲིན་ཚོགས་གཏིབས༔ ངྷི་པཾ་དམར་མོས་སྣང་གསལ་ཉི་ལྟར་བརྡལ༔ གྷནྡྷེ་སེར་མོས་དྲི་ཆབ་མཚོ་ལྟར་བསྐྱིལ༔ ནཻ་ཏེ་ལྗང་མོས་ཞལ་ཟས་རི་ལྟར་སྤུངས༔ ཤཔྟ་སྔོན་མོས་སྟོང་གསུམ་སྒྲ་ཡིས་བཀང་༔ རྣམ་མང་ཐོས་སྲས་འཁོར་དང་བཅས་ལ་མཆོད༔ ཧཱུྃ༔ ཛ་གད་བསྐྱིལ་བའི་རྒྱ་མཚོ་ཆེན་པོ་འདི༔ རྣམ་མང་ཐོས་སྲས་འཁོར་དང་བཅས་ལ་མཆོད༔ རཀྟའི་རྦ་ཀློང་འཁྲུག་ཅིང་འཁྱོམ་པ་འདི༔ རྣམ་མང་༴ རིན་ཆེན་སྣ་ཚོགས་བཅལ་དུ་བཀྲམ་པ་འདི༔ རྣམ་མང་ཐོས་སྲས༴ འབྲུ་ནོར་སྨན་སྣ་ཕྱོགས་སུ་སྤུངས་པ་འདི༔ རྣམ་མང་ཐོས་སྲས༴ དར་ཟབ་ཡོལ་པ་བླ་རེས་བརྒྱན་པ་འདི༔ རྣམ་མང་༴ གདུགས་དང་རྒྱལ་མཚན་བ་དན་བསྒྲེངས་བ་འདི༔ རྣམ་མང་༴ ཀ་ཆ་དཀོར་ཆའི་སྤྱན་གཟིགས་བཀྲམ་པ་འདི༔ རྣམ་མང་༴ ལོངས་སྤྱོད་སྣ་ཚོགས་འདོད་ཡོན་སྤུངས་པ་འདི༔ རྣམ་མང་༴ གཟུགས་སྒྲ་དྲི་རོ་རེག་བྱ་མ་ལུས་པ༔ རྣམ་མང་༴ ཨཱོཾ་བྷཻ་ཤྲ་མ་ཎ་ཡེ་མ་ཧཱ་སརྦ་པཱུ་ཛ་ཁཱ་ཧི་ཁཱ་ཧི༔ གཏོར་མ་ནི༔ ཧཱུྃ༔ རིན་ཆེན་སྣོད་དུ་འབྲུ་སྨན་རྩི་བཅུད་བསྡུས༔ མཆོད་པའི་གཏོར་མ་དཀར་ཐིག་དམར་གྱིས་བརྒྱན༔ ལྷ་ཡི་ཞལ་ཟས་བས་ཀྱང་ཁྱད་པར་འཕགས༔ རོ་མཆོག་བརྒྱ་ལྡན་བྷ་ལིང་མཆོད་པ་འདི༔ རྣམ་མང་ཐོས་སྲས་འཁོར་དང་བཅས་ལ་མཆོད༔ ཅེས་བརྗོད་པ་ཙམ་གྱིས༔ ནོར་མང་རྣམ་ཐོས་ཀྱི་བུ་འཁོར་དང་བཅས་པའི་ལྗགས་རིན་པོ་ཆེའི་སྦུ་གུས་གཏོར་མ་དང་མཆོད་རྫས་ལ་ཟུག་སྟེ་གསོལ་བས་སྐུ་གསུང་ཐུགས་ཡོངས་སུ་དགྱེས་ཏེ་མཉེས་པའི་མདངས་ཕྱུངས་ནས་རྣལ་འབྱོར་པ་ལ་མཆོག་ཐུན་མོང་གི་དངོས་གྲུབ་ཐམས་ཅད་སྐད་ཅིག་ཉིད་ལ་སྩལ་བར་གྱུར༔ ལྷ་སྔགས་ཡོངས་རྫོགས་སམ༔ ཨཱོཾ་བྷཻ་ཤྲ་མ་ཎ་ཡེ་ཡཀྵ་སརྦ་གྲཱི་ཧ་ན་ཨི་དཾ་བྷ་ལིང་ཏ་ཁ་ཁ་ཁཱ་ཧི་ཁཱ་ཧི༔ བདུན་ནམ་ཉེར་གཅིག་བརྗོད༔ བསྙེན་སྒྲུབ་སྙིང་པོ་འཛབ་ལ་འབད༔ ཧཱུྃ༔ གསལ་བའི་ལྷ་མཆོག་ཐུགས་རྗེའི་དབང་གི་ལྷ༔ སྔགས་ཀྱི་འཁོར་ལོའི་འདུ་འཕྲོ་གཟི་བརྗིད་གཡོ༔ ཕྱི་ནང་གསང་གསུམ་ཏིང་འཛིན་བྱེ་བྲག་གི༔ གཅིག་ཏུ་མ་ངེས་ཆོ་རོལ་སྣ་ཚོགས་བསྒྱུར༔ ལས་བཞིའི་འཕྲིན་ལས་མཆོག་ཐུན་དངོས་གྲུབ་འབར༔ རྣལ་འབྱོར་འདོད་པའི་འབྲས་བུ་སྩལ་བར་བསྒོམ༔ མ་ཡེངས་ཏིང་འཛིན་ངང་ནས་འཛབ་འདི་བགྲང་༔ ཨཱོཾ་བྷཻ་ཤྲ་མ་ཎ་ཡེ་ཡཀྴ་སརྦ་ས་མ་ཡ་ཙིཏྟ་ཧྲིཾ་ཧྲིཾ་ཛཿཛཿ སྐབས་སུ་བསྟོད་པ་ནི༔ ཧཱུྃ༔ ཆོས་སྐྱོང་རྒྱལ་པོ་ཆེན་པོ་རྣམ་ཐོས་སྲས༔ ཁྱོད་ནི་སྔོན་ནས་མངོན་པར་བྱང་ཆུབ་ཀྱང་༔ རྫོགས་པའི་སངས་རྒྱས་སྟོང་གི་བསྟན་པ་ལ༔ སྒྲུབ་བའི་གང་ཟག་སྐྱོང་བར་ཐུགས་བསྐྱེད་ནས༔ ས་བརྒྱད་ཕྱིར་མི་ལྡོག་པར་ངལ་བསོས་ཏེ༔ སྒྲུབ་མཆོག་བུ་བཞིན་སྐྱོང་ལ་ཕྱག་འཚལ་བསྟོད༔ མཆོག་དང་ཐུན་མོང་དངོས་གྲུབ་སྩལ་དུ་གསོལ༔ རིན་ཆེན་གླིང་མཆོག་རི་རྒྱལ་བྱང་ཕྱོགས་ན༔ འདོད་འབྱུང་ཕོ་བྲང་རིན་ཆེན་གཏེར་གྱི་ཁང་༔ རྫོགས་ལྡན་བསྐལ་པའི་བསོད་ནམས་འབུམ་ལས་མཐོ༔ དགོས་འདོད་ཆར་འབེབས་མཆོག་ཐུན་དབང་གིས་ཕྱུག༔ ཟད་མི་ཤེས་པའི་དངོས་གྲུབ་སྤྲིན་ཕུང་གཏིབས༔ འདོད་དགུའི་འབྱུང་གནས་མཆོག་ལ་ཕྱག་འཚལ་བསྟོད༔ མཆོག་དང་ཐུན་མོང་༴ ནོར་སྐྱོང་ལྷ་མོ་ནོར་རྒྱུན་ཡིད་བཞིན་མཛོད༔ ཀུ་རུ་ཀུལླེ་དབང་ཆེན་ཌཱཀྐི་མ༔ ཀླུ་མོ་གཟི་འབར་ཀླུ་ཁམས་འབུམ་གྱི་དཔལ༔ ཐུགས་ཀྱི་གསང་འཛིན་བདེ་བའི་ཡུམ་ཆེན་བཞི༔ ཀུན་ཏུ་མི་ཟད་མཆོག་ཐུན་ལྷུན་གྱིས་གྲུབ༔ ཐུགས་འཛིན་ཌཱཀྐི་བཞི་ལ་ཕྱག་འཚལ་བསྟོད༔ མཆོག་དང་ཐུན་མོང་༴ སྤྲུལ་པའི་རྒྱལ་ཆེན་རྣམ་སྲས་སྡེ་བཞི་དང་༔ སྐུ་ཡི་སྲས་མཆོག་ཛམ་ལྷ་རིགས་བཞིར་བཅས༔ གནོད་སྦྱིན་བརྒྱད་དང་ཀླུ་ཆེན་རྣམ་པ་བརྒྱད༔ མགོན་པོ་དཀར་པོ་ཚོགས་བདག་གླང་སྣ་དང་༔ ལྷ་ཆེན་དབང་ཕྱུག་གནོད་སྦྱིན་ཙི་ཏྲ་དམར༔ མ་ལུས་འཁོར་དང་བཅས་ལ་ཕྱག་འཚལ་བསྟོད༔ མཆོག་དང་ཐུན་མོང་༴ ཕོ་བྲང་ཆེན་པོའི་བར་ཁྱམས་ཁོར་ཡུག་ནས༔ ལྷ་མོ་ཀླུ་མོ་ནོར་བདག་གནོད་སྦྱིན་འབུམ༔ སྔོན་ཚེ་རྒྱལ་བ་རྣམས་ཀྱི་སྤྱན་སྔ་རུ༔ ཁས་བླངས་དམ་མནོས་སྲུང་མ་དམ་ཚིག་ཅན༔ སྒྲུབ་ལ་དངོས་གྲུབ་སྩོལ་བའི་ལྷ་ཆེན་པོ༔ མ་ལུས་འཁོར་དང་བཅས་ལ་ཕྱག་འཚལ་བསྟོད༔ མཆོག་དང་ཐུན་མོང་དངོས་གྲུབ་སྩལ་དུ་གསོལ༔ ས་མ་ཡཱ༔ བསྙེན་དམིགས་ཅེས་བརྗོད་ཐུན་སྐབས་མཆོད་ཅིང་ཡིག་བརྒྱས་བཤགས༔ བསྙེན་སྒྲུབ་འབུངས་པས་མཆོག་ཐུན་དངོས་གྲུབ་འཐོབ༔ འདི་ལྟར་ཤིན་ཏུ་ཟབ་པའི་གདམས་པ་འདི༔ ས་སྐྱོང་རྒྱལ་པོའི་ཐུགས་དམ་ལྷ་ཁང་གི༔ མཐུན་རྐྱེན་བསྒྲུབ་ཕྱིར་བདག་གིས་ཉམས་སུ་བླངས༔ མཆིམས་ཕུའི་དགེ་གོང་བྲག་ལ་རྣམ་སྲས་གྲུབ༔ ཐུན་མོང་དངོས་གྲུབ་བོད་ཁམས་ཡོངས་ལ་ཕབ༔ མཆོག་གི་དངོས་གྲུབ་ཆོས་འཁོར་འབྱོངས་པར་བྱས༔ གདམས་པའི་གནད་ཐིག་བརྡ་ཡི་ཡི་གེར་བཏབ༔ ཕྱོགས་བཞི་དབུས་དང་བཅས་པའི་གཏེར་ལྔར་སྦས༔ ཁྱད་པར་འཕགས་པ་གདམས་པའི་སྙིང་པོ་འདི༔ མ་འོངས་དོན་དུ་ཤར་ཕྱོགས་མཐོན་པོའི་རི༔ ཁམས་ཀྱི་སྲིང་མོ་རྫོང་གི་ཤར་ལྷོའི་འདབས༔ སྒྲུབ་གནས་ནོར་བུ་འདྲ་བའི་རི་ལ་སྦེད༔ ལན་གཅིག་བསྐལ་པའི་དུས་ཀྱི་ཐ་མ་ལ༔ ལས་འཕྲོ་ཅན་གྱི་བུ་དང་འདི་འཕྲད་ནས༔ ཆོས་བཞིན་སྤྱོད་པའི་འགྲོ་ལ་ཕན་ཐོགས་ཤོག༔ བཀའ་ཡི་སྲུང་མས་བྱ་ར་གྱིས་ཤིག་རྒྱ༔ ས་མ་ཡཱ༔ རྒྱ་རྒྱ་རྒྱ༔ གཏེར་རྒྱ༔ སྦས་རྒྱ༔ ཁམས་པ་ཉི་མ་གྲགས་པས་ས་ཕོ་རྟའི་ལོ་ལ་ཁམས་སྲིང་མོ་རྫོང་མཆོག་ནས་གདན་དྲངས་ཤིང་། མེ་ཡོས་ལ་གུ་རུ་རྣམ་སྲས་ཀྱིས་བསྐུལ་ངོར་ཆགས་རུ་ཕུག་ནག་ཏུ་ཤོག་སེར་ལས་ཞལ་བཤུས་པའོ༔ མངྒ་ལཾ༔ ཨོཾ་བྷཻ་ཤྲ་མ་ཎ་ཡེ་ཡཀྴ་ཛྙཱ་ན་ལོ་ཀ་སརྦ་ས་མ་ཡ་པཱ་ཤཾ་ཀུ་རུ་ཧཱུྃ་ཧཱུྃ༔

བསྐང་བའི་ལས་རིམ།

ནོར་བདག་ཡིད་བཞིན་ནོར་བུ་ལས༔ བསྐང་བའི་ལས་རིམ་བཞུགས༔ ཁྲོ་བོ་རྡོ་རྗེ་ཅན་ལ་འདུད༔ མ་འོངས་པའི་རྣལ་འབྱོར་པས་བར་ཆད་འབྱང་བ༔ ཉམས་ཆག་སྐོང་བ༔ དངོས་གྲུབ་འཐོབ་པའི་ཆེད་དུ་བསྐང་བའི་རིམ་པར་འདི་བཞིན་བརྩོན་པར་བྱ་སྟེ༔ འབྲུ་ལྔའི་ཕྱེ་ལ་རིན་ཆེན་དྷ་རུ་བརྡར་སྨན་སྤོས་དྲི་བཟང་འབྲུ་སྣ་འབྱོར་ཚད་བཏབ་ཅིང་༔ རི་རབ་བང་རིམ་བཞི་པར་བཟོས་པའི་སྟེང་དུ་ནོར་བདག་གི་རྟེན་གཏོར་ཐ་མ་ལྷ་གྲངས་མཉམ་པའི་བཤོས་ཟླུམ་གྱིས་བསྐོར༔ བར་རིམ་དེའི་འོག་ལ་རྟགས་བརྒྱད༔ དེ་འོག་ལ་རྒྱལ་སྲིད་སྣ་བདུན༔ དེ་འོག་ལ་ཁྲུས་ཀྱི་རྫིང་བུ་གཏེར་གྱི་བུམ་པཏ༔ དཔག་བསམ་གྱི་ཤིང་༔ འབྲས་དྲུག་གི་སྙེ་མ༔ འདོད་འཇོའི་བ༔ ནོར་འབྱུང་གི་ནེའུ་ལེ་ལྔ་བདུན་བཅུ་སོགས་གང་འབྱོར་བསགས་ཤིང་༔ བང་རིམ་འོག་མ་དེའི་ཕྱོགས་མཚམས་ལ་འཁར་ཐབས་བཞི་འམ་བརྒྱད་བ་དན་གྱིས་བརྒྱན་པ་བཟོ༔ ནམ་མཁའ་ལྔ་དང་ཉི་ཟླའི་ཤིང་བྱང་ཡང་གཟུག༔ གཅིག་བཅུ་བརྒྱ་སྟོང་ཁྲི་འབུམ་བྱེ་བ་ས་ཡ་གྲངས་མེད་ཀྱི་རིལ་བུ་དགུ་དཀར་ནག་སྤེལ་ཏེ་ཕྲེང་བར་སྦྲེལ་པ་ཕྱོགས་བཞིར་བཙུགས༔ གྲངས་འཕེལ་གྱི་རྟེན་འབྲེལ༔ དར་ཚོན་སྨན་སྤོས་རིན་ཆེན་འབྲུ་ནོར་འབྱོར་ཚད་བསགས་ཤིང་ཕྱོགས་ཕྱོགས་ནས་སྤུངས༔ ཀ་ཆ་དཀོར་རྟེན་གནམ་ཡོལ་བར་ཡོལ་ས་ཡོལ་གདུགས་དང་རྒྱལ་མཚན་གོ་མཚོན་ལྡ་ལྡི་དྲ་བ་དྲ་ཕྱེད༔ མདོར་ན་འབྱོར་ཚོགས་ཀྱི་ཡོ་བྱད་དཔལ་ལས་གང་གྲུབ་རྒྱན་ཕྲེང་དུ་མས་བརྒྱན་ཅིང་གནས་ཁང་ཡིད་དུ་འོང་བར་བྱས་ཏེ་ཚོགས་ཀྱི་མཆོད་པའི་དུས་སུ་རྔ་དུང་རོལ་མོ༔ རྫ་ཟངས་ཀྱི་རྔ༔ ཕེག་རྡོབ༔ ཆ་ལང་སིལ་སྙན་ཏིང་ཏིང་ཤགས་པི་ཝཾ་གླིང་བུ་སོགས་ཀྱི་སྒྲ་དང་བཅས༔ ལྟ་བའི་གདེང་བསྐྱེད༔ སྒོམ་པའི་གཟེངས་བསྟོད༔ ཉམས་རྟོགས་སྤར་ལ་གདུང་ཞིང་སྙན་པའི་དབྱངས་ཀྱིས་འདི་སྐད་དོ༔ ཧཱུྃ༔ དེ་རིང་བཤམས་པའི་བསྐང་མདོས་ཆེན་པོ་འདི༔ བདག་ཉིད་གསལ་བ་ལྷ་ཡི་ཏིང་འཛིན་གྱིས༔ རཾ་ཡཾ་ཁཾ་འཕྲོས་མ་དག་སྲེག་གཏོར་སྦྱངས༔ རཾ་ཡཾ་ཁཾ༔ གསུམ༔ ཡི་གེ་གསུམ་གྱིས་འདོད་དགུའི་ཕུང་པོར་བསྒྱུར༔ ཨཱོཾ་ཨཱཿཧཱུྃ༔ གསུམ༔ ཧ་ཧོཿཧྲཱིཿཡིས་བསྐང་རྫས་སྣང་སྲིད་སྤེལ༔ ཧ་ཧོཿཧྲཱིཿཕེཾ་ཕེཾ༔ གསུམ༔ ཕྱག་རྒྱ་དང་བཅས༔ ན་མཿསརྦ་ཏ་ཐཱ་ག་ཏ་བྷྱོ་བི་ཤྭ་མུ་ཁེ་བྷྱཿསོགས་བདུན་གྱིས་བྱིན་གྱིས་བརླབ༔ དངོས་སུ་འབྱོར་བཤམས་ཡིད་ཀྱིས་སྤྲུལ་པའི་བསྐང་རྫས་ཀ་ཆ་དཀོར་རྟེན་དང་བཅས་པ་འདི་རྣམས་ནོར་ལྷ་རྒྱ་མཚོའི་ལྷ་ཚོགས་ཐམས་ཅད་མཆོད་པའི་རྫས༔ མཉེས་པའི་རྫས༔ བརྟེན་པའི་རྫས༔ སྒྲུབ་པའི་རྫས༔ བསྐང་བའི་རྫས༔ གཟུགས་སྒྲ་དྲི་རོ་རེག་བྱ་ཕུན་སུམ་ཚོགས་པ་དང་ལྡན་པའི་རང་བཞིན་དུ་གྱུར༔ ཨཱོཾ་ཨཱཿཧཱུྃ་གསུམ་སྤྱན་འདྲེན་པ་ནི༔ ཧཱུྃ༔ འོག་མིན་སྟུག་པོ་བཀོད་པའི་ཞིང་ཁམས་ནས༔ ཆོས་སྐུ་དྲུག་པ་རྡོ་རྗེ་འཆང་ཆེན་ལ༔ ཆོས་སྐུའི་ལྷ་ཚོགས་མ་ལུས་འཁོར་གྱིས་བསྐོར༔ མི་མངོན་དབྱིངས་ནས་བསྐང་བའི་གནས་འདིར་བཤེགས༔ གནས་མཆོག་ལྕང་ལོ་ཅན་གྱི་ཕོ་བྲང་ནས༔ ལོངས་སྐུ་གསང་བདག་ཕྱག་ན་རྡོ་རྗེ་ལ༔ ལོངས་སྐུའི་ལྷ་ཚོགས་མ་ལུས་འཁོར་གྱིས་བསྐོར༔ ཐུགས་རྗེས་བརྩེར་དགོངས་བསྐང་བའི་གནས་འདིར་གཤེགས༔ ལྷོ་ནུབ་པདྨ་འོད་ཀྱི་གཞལ་ཡས་ནས༔ ཨོ་རྒྱན་གུ་རུ་པདྨ་འབྱུང་གནས་ལ༔ སྤྲུལ་སྐུའི་ལྷ་ཚོགས་མ་ལུས་འཁོར་གྱིས་བསྐོར༔ ཐུགས་རྗེའི་དབང་གིས་བསྐང་བའི་གནས་འདིར་གཤེགས༔ རིན་ཆེན་རི་རབ་ལྷུན་པོའི་བྱང་གི་ཕྱོགས༔ ནོར་མང་རྣམ་ཐོས་རྒྱལ་པོའི་ཕོ་བྲང་ནས༔ ནོར་བདག་ཡིད་བཞིན་ནོར་བུའི་ལྷ་ཚོགས་རྣམས༔ ཐུགས་བསྐྱེད་སྨོན་ལམ་དགོངས་ལ་གནས་འདིར་གཤེགས༔ ཚོགས་ཁང་རིན་ཆེན་དབང་གི་གཞལ་ཡས་འདིར༔ མི་གཡོ་དགྱེས་བཞིན་བརྟན་པར་བཞུགས་སུ་གསོལ༔ འདུ་འབྲལ་མེད་པའི་དབྱིངས་སུ་ཕྱག་བགྱིའོ༔ ཕྱི་ནང་གསང་གསུམ་བསྐང་བརྟེན་རྫས་ཀྱིས་མཆོད༔ ལུས་ངག་ཡིད་གསུམ་དད་གུས་ལྡན་པས་བསྟོད༔ མཆོག་དང་ཐུན་མོང་དངོས་གྲུབ་སྩལ་དུ་གསོལ༔ ཧཱུྃ༔ སྐུ་གསུམ་སངས་རྒྱས་རྩ་གསུམ་བརྒྱུད་པར་བཅས༔ དུས་གསུམ་རྒྱལ་བའི་དཀྱིལ་འཁོར་ལྷ་ཡི་ཚོགས༔ ཕྱོགས་བཅུའི་སངས་རྒྱས་བདེ་གཤེགས་བཅོམ་ལྡན་འདས༔ མ་ལུས་འཁོར་དང་བཅས་པའི་ཐུགས་དམ་བསྐང་༔ ཧཱུྃ༔ ཐུགས་དམ་གཉན་པོ་བསྐང་བའི་དམ་རྫས་ནི༔ ཕྱི་མཆོད་འདོད་ཡོན་རྣམ་ལྔས་ཐུགས་དམ་བསྐང་༔ ནང་མཆོད་སྨན་གཏོར་རཀྟས་ཐུགས་དམ་བསྐང་༔ གསང་མཆོད་གྷ་ན་པཱུ་ཛས་ཐུགས་དམ་བསྐང་༔ རིན་ཆེན་རི་རབ་ཆེན་པོས་ཐུགས་དམ་བསྐང་༔ གླིང་དང་གླིང་ཕྲན་ཚོགས་ཀྱིས་ཐུགས་དམ་བསྐང་༔ གསེར་རི་རོལ་མཚོ་རྣམས་ཀྱིས་ཐུགས་དམ་བསྐང་༔ ཉི་ཟླ་རྒྱུ་སྐར་ཕྲེང་བས་ཐུགས་དམ་བསྐང་༔ ལྕགས་རི་མུ་ཁྱུད་རྒྱ་མཚོས་ཐུགས་དམ་བསྐང་༔ བཀྲ་ཤིས་རྫས་བརྒྱད་དཔལ་གྱིས་ཐུགས་དམ་བསྐང་༔ རྒྱལ་སྲིད་རིན་ཆེན་བདུན་གྱིས་ཐུགས་དམ་བསྐང་༔ དཔག་བསམ་ཤིང་ཆེན་རྣམས་ཀྱིས་ཐུགས་དམ་བསྐང་༔ ཡན་ལག་བརྒྱད་ལྡན་རྫིང་བུས་ཐུགས་དམ་བསྐང་༔ འདོད་འབྱུང་གཏེར་གྱི་བུམ་པས་ཐུགས་དམ་བསྐང་༔ མ་རྨོས་ལོ་ཏོག་འབྲུ་སྨན་ཐུགས་དམ་བསྐང་༔ ནོར་འཛིན་ནེའུ་ལེ་ཡིས་ཐུགས་དམ་བསྐང་༔ གཞལ་ཡས་ཁང་པའི་ཚོགས་ཀྱིས་ཐུགས་དམ་བསྐང་༔ སྤྱན་གཟིགས་ཀ་ཅ་དཀོར་ཆས་ཐུགས་དམ་བསྐང་༔ ཡོལ་བ་བླ་བྲེས་ལྡ་ལྡིས་ཐུགས་དམ་བསྐང་༔ པན་དང་དྲ་ཕྱམ་ཕྲེང་བས་ཐུགས་དམ་བསྐང་༔ ཕོ་ཆས་མོ་ཆས་རྒྱན་གྱིས་ཐུགས་དམ་བསྐང་༔ སལ་སིལ་ཆ་ལང་ཕེག་རྡོབ་ཐུགས་དམ་བསྐང་༔ དར་དིར་རྫ་ཟངས་རྔ་ཆེན་ཐུགས་དམ་བསྐང་༔ འར་འུར་ཟངས་དུང་དུང་དཀར་ཐུགས་དམ་བསྐང་༔ ཙར་ཙིར་སིལ་སྙན་ཏིང་ཏིང་ཐུགས་དམ་བསྐང་༔ ཀྱར་ཀྱུར་པི་ཝཾ་གླིང་བུས་ཐུགས་དམ་བསྐང་༔ ཟང་ཟིང་གོ་ཁྲབ་མཚོན་ཆས་ཐུགས་དམ་བསྐང་༔ ཕྱར་ཕྱུར་དྲི་ཞིམ་དུད་པས་ཐུགས་དམ་བསྐང་༔ ཐུགས་དམ་བསྐང་ལ་མཆོག་ཐུན་དངོས་གྲུབ་སྩོལ༔ ཧཱུྃ༔ སྔོན་ཚེ་བསྐལ་པ་བརྒྱད་ཁྲིའི་གོང་རོལ་ནས༔ ཡང་དག་རྫོགས་པའི་བྱང་ཆུབ་མངོན་གྱུར་ཀྱང་༔ རིགས་ལྔའི་ཚངས་ཆེན་བསྐལ་པ་མ་སྟོངས་བར༔ ས་བརྒྱད་ངལ་བསོས་དགེ་བའི་སྟོབས་པོ་ཆེ༔ མགོན་པོ་རྣམ་མང་ཐོས་སྲས་ཐུགས་དམ་བསྐང་༔ ཧཱུྃ༔ ཐུགས་དམ་གཉན་པོ་བསྐང་བའི་དམ་རྫས་ནི༔ སོགས་བསྐང་ཚིག་འགྲེས་བསྒྱུར༔ ཐུགས་དམ་བསྐང་ལ་མཆོག་ཐུན་དངོས་གྲུབ་སྩོལ༔ ཧཱུྃ༔ དྲེགས་ཆེན་རབ་གཏུམ་འདུལ་བ་ཁྲོ་བོའི་རྒྱལ༔ མ་ལུས་སངས་རྒྱས་ཀུན་གྱི་མཐུ་སྟོབས་འཆང་༔ གར་དགུའི་ཉམས་ལྡན་དུར་ཁྲོད་ཆས་བརྒྱད་རྫོགས༔ ཁྲོ་རྒྱལ་ཡོངས་ཀྱི་ཆེ་བཙན་རྡོ་རྗེ་ཅན༔ རིགས་བདག་བཛྲ་པཱ་ཎིའི་ཐུགས་དམ་བསྐང་༔ ཧཱུྃ༔ ཐུགས་དམ་གཉན་པོ་བསྐང་བའི་དམ་རྫས་ནི༔ སོགས༔ ཐུགས་དམ་བསྐང་ལ་མཆོག་ཐུན་དངོས་གྲུབ་སྩོལ༔ ཧཱུྃ༔ ནོར་སྐྱོང་དཀར་མོ་གླིང་བཞིའི་ནོར་གྱི་བདག༔ ནོར་རྒྱུན་སེར་མོ་ནོར་གྱི་གཡང་མཛོད་འཆང་༔ ཀུ་རུ་ཀུ་ལླེ་དམར་མོས་སྲིད་གསུམ་འགུགས༔ ཀླུ་མོ་སྔོན་མོ་ཡིད་བཞིན་ཀླུ་ཡི་དབང་༔ ཐུགས་འཛིན་ཡུམ་མཆོག་བཞི་ཡི་ཐུགས་དམ་བསྐང་༔ ཧཱུྃ༔ ཐུགས་དམ་གཉན་པོ་བསྐང་བའི་དམ་རྫས་ནི༔ སོགས༴ ཐུགས་དམ་བསྐང་ལ་མཆོག་ཐུན་དངོས་གྲུབ་སྩོལ༔ ཧཱུྃ༔ ཤར་དུ་རྡོ་རྗེ་རྒྱལ་པོ་རྣམ་ཐོས་སྲས༔ ལྷོ་རུ་རིན་ཆེན་རྒྱལ་པོ་རྣམ་ཐོས་སྲས༔ ནུབ་ཏུ་དབང་གི་རྒྱལ་པོ་རྣམ་ཐོས་སྲས༔ བྱང་དུ་འཕྲིན་ལས་རྒྱལ་པོ་རྣམ་ཐོས་སྲས༔ གླིང་བཞིའི་འཇིག་རྟེན་དབུལ་བ་སེལ་བའི་ལྷ༔ འཕྲིན་ལས་བཞི་ཡིས་དངོས་གྲུབ་ཆར་ལྟར་འབེབས༔ རྣམ་སྲས་རིགས་བཞིའི་ལྷ་ཚོགས་ཐུགས་དམ་བསྐང་༔ ཧཱུྃཐུགས་དམ་གཉན་པོ་བསྐང་བའི་དམ་རྫས་ནི༔ སོགས༴ ཐུགས་དམ་བསྐང་ལ་མཆོག་ཐུན་དངོས་གྲུབ་སྩོལ༔ ཧཱུྃ༔ དཀར་སེར་དམར་ནག་རིགས་བཞིའི་ཛམ་བྷ་ལ༔ མི་ཟད་རིན་ཆེན་འདོད་དགུའི་གཏེར་གྱི་བདག༔ སྒྲུབ་པ་པོ་ལ་མཆོག་ཐུན་ཆར་དུ་འབེབས༔ སྲས་མཆོག་ཛམ་ལྷ་རིགས་བཞིའི་ཐུགས་དམ་བསྐང་༔ ཧཱུྃ༔ ཐུགས་དམ་གཉན་པོ་བསྐང་བའི་དམ་རྫས་ནི༔ སོགས༴ ཐུགས་དམ་བསྐང་ལ་མཆོག་ཐུན་དངོས་གྲུབ་སྩོལ༔ ཧཱུྃ༔ གཞལ་ཡས་ཁོར་ཡུག་གནོད་སྦྱིན་ནོར་སྐྱོང་བརྒྱད༔ གཙོ་བོའི་བཀའ་བསྒྲུབ་མོས་པའི་འགྲོ་བ་སྐྱོང་༔ གནོད་སྦྱིན་ཡོངས་ཀྱི་རྩལ་འཆང་གླིང་རྣམས་ཉུལ༔ དཔའ་བའི་འོད་འབར་འཇིགས་བའི་ཟིལ་དང་ལྡན༔ རྣམ་སྲས་རྟ་བདག་བརྒྱད་ཀྱི་ཐུགས་དམ་བསྐང་༔ ཧཱུྃ༔ ཐུགས་དམ་གཉན་པོ་བསྐང་བའི་དམ་རྫས་ནི༔ སོགས༴ ཐུགས་དམ་བསྐང་ལ་མཆོག་ཐུན་དངོས་གྲུབ་སྩོལ༔ ཧཱུྃ༔ ཕོ་བྲང་ཆེན་པོའི་ཕྱོགས་བཞིའི་སྒོ་བཞིའི་བདག༔ མགོན་པོ་དཀར་པོས་ཞི་བའི་ཕྲིན་ལས་མཛད༔ ཚོགས་བདག་སེར་པོས་རྒྱས་པའི་འཕྲིན་ལས་བསྒྲུབ༔ དབང་ཕྱུག་དམར་པོས་ཁམས་གསུམ་དབང་མེད་འགུགས༔ ཙི་ཊ་དམར་པོས་དངོས་གྲུབ་བར་ཆད་སྒྲོལ༔ ནོར་བདག་སྒོ་སྐྱོང་འཁོར་བཅས་ཐུགས་དམ་བསྐང་༔ ཧཱུྃ༔ ཐུགས་དམ་གཉན་པོ་བསྐང་བའི་དམ་རྫས་ནི༔ སོགས༴ ཐུགས་དམ་བསྐང་ལ་མཆོག་ཐུན་དངོས་གྲུབ་སྩོལ༔ ཧཱུྃ༔ ཕོ་བྲང་ཕྱི་ནང་བར་ཁྱམས་ཁོར་ཡུག་ནས༔ ལྷ་དང་ཀླུ་དང་ནོར་བདག་གནོད་སྦྱིན་འབུམ༔ རྒྱལ་བ་རྣམས་ལ་དམ་མནོས་དམ་ཚིག་ཅན༔ ཆོས་བཞིན་བསྒྲུབ་ལ་དངོས་གྲུབ་སྩོལ་བའི་ལྷ༔ ནོར་སྲུང་གནོད་སྦྱིན་འབུམ་སྡེའི་ཐུགས་དམ་བསྐང་༔ ཧཱུྃ༔ ཐུགས་དམ་གཉན་པོ་བསྐང་བའི་དམ་རྫས་ནི༔ སོགས༴ ཐུགས་དམ་བསྐང་ལ་མཆོག་ཐུན་དངོས་གྲུབ་སྩོལ༔ བཤགས་པ་ནི༔ ཧཱུྃ༔ ཐོག་མེད་དུས་ནས་དེ་རིང་ཡན་ཆད་དུ༔ རྐུ་འཕྲོག་རློམ་སེམས་སེར་སྣ་ཅི་བགྱིས་དང་༔ བླ་མ་དཀོན་མཆོག་མཆོད་པའི་དཀོར་ལ་འབགས༔ དགེ་བཅུའི་ལམ་བཅད་དགེ་འདུན་དཀོར་ཁ་བགགས༔ གཏོར་ཚོགས་མཆོད་ལ་འབགས་བཙོག་ཕུད་ལྷག་གཞོལ༔ ཉ་སྟོང་དུས་ཀྱི་མཆོད་པ་འགྱངས་པ་དང་༔ འཕྲོག་མའི་ཟན་དང་ཛམ་ལའི་ཆུ་རྒྱུན་བཅད༔ མདོར་ན་ཉེས་བྱས་བསེ་རགས་ཡི་དྭགས་ཀྱི༔ རྒྱུ་བསགས་ཅི་མཆིས་རྣམ་དག་ཀློང་དུ་བཤགས༔ གནོང་འགྱོད་ཉེས་ཚོགས་མ་ལུས་བཟོད་པར་གསོལ༔ ཚངས་པ་མཆོག་ཐུན་དངོས་གྲུབ་སྩལ་དུ་གསོལ༔ ཅེས་བརྗོད་བསྐང་ཚིག་གི་མཚམས་སུ་འབྲུ་སྨན་རིན་ཆེན་གྱི་རིགས་སོགས་ཕྱོགས་ཕྱོགས་ནས་བསྐང་གཏོར་ལ་འཐོར་ཞིང་སྦྲན་པར་བྱའོ༔ བསྐང་མདོས་བྱེད་ན་ཕུད་དང་གསེར་སྐྱེམས་མཆོད༔ འདོད་པའི་དོན་དང་དཔལ་ལ་གསོལ་བ་གདབ༔ འབྲུ་སྣ་མཆོད་ཅིང་དཀར་མངར་ཕུད་ཀྱིས་སྦྲན༔ དཔལ་འབར་གཟུགས་ཅིང་གནས་གཞིའི་སྒྲུབ་ཁང་གི༔ མ་ཉམས་པར་བྱེད་སྟེང་ཁང་བྱང་ལ་བསྐྱལ༔ མཆོད་མདོས་བྱེད་ན་བློས་སྣང་དཀྱིལ་སོགས་ཀྱི༔ དྲུང་དུ་བཞག་ཅིང་རྒྱུན་ཏུ་མཆོད་པ་བྱ༔ བརྟེན་མདོས་ཕུགས་བཅང་སྐྱོར་ཁ་ཐེངས་གསུམ་དུས༔ མཆོད་འབུལ་གཡང་འགུགས་དངོས་གྲུབ་ཆར་ལྟར་འབབས༔ ནོར་སྒྲུབ་གདམས་པ་ཀུན་གྱི་མཐར་ཐུག་པ༔ ཡིན་ནོ་ཆོས་རྒྱལ་ཡབ་སྲས་ཐུགས་ལ་ཆོངས༔ མ་འོངས་དོན་དུ་ཡི་གེའི་རིས་སུ་ཐོབ༔ ཤར་ཕྱོགས་མཐོན་པོ་སྲིང་མོ་རྫོང་གི་ལྷོར༔ སྒྲུབ་གནས་ནོར་བུ་འདྲ་བའི་བྲག་ལ་སྦོས༔ ལས་འཕྲོ་ཅན་གྱི་བུ་དང་འདི་འཕྲད་ཤོག༔ མ་མོ་སྔགས་ཀྱི་སྲུང་མས་བཀའ་འདི་སྲུངས༔ ཡང་མ་སྐྱི་མདངས་མ་ཡིས་གཏེར་འདི་འཚོས༔ ས་མ་ཡ་ཡཱ༔ རྒྱ་རྒྱ་རྒྱ༔ ཅེས་པ་ས་ཕོ་རྟའི་ལོ་ལ་ཁམས་སྲིང་མོ་རྫོང་གི་ལྷོ་ཕྱོགས་སྲིང་མོ་རྫོང་མཆོག་ནས་གདན་དྲངས་ཤིང་། ས་མོ་ཡོས་ལ་སེར་རྫ་ལྷུང་ཐང་དུ་ཤོག་སེར་ལས་ཞལ་བཤུས་པ་འདི་ཡང་སྦས་ཨོ་རྒྱན་མགོན་པོའི་རེ་བ་བཀང་བའི་ཕྱིར་དུའོ། །ཤོག་སེར་ལས་མང་པོ་ཕབ། ཆོས་མང་པོ་ཡོད། ཉམས་སུ་ལེན་མཁན་དཀོན། བླ་མ་གླ་བ། ཆོས་གླ་རྩི། རང་རྔོན་པ་ཧ་ཧ། རྙིང་མ་པ་ཚོ་མཚར།། །།མངྒ་ལཾ།། །།

ཕྱྭ་གཡང་འགུགས་པའི་འཕྲིན་ལ།

ནོར་བདག་ཡིད་བཞིན་ནོར་བུ་ལས༔ ཕྱྭ་གཡང་འགུགས་པའི་འཕྲིན་ལས་བཞུགས༔ ཁྲོ་བོའི་རྒྱལ་ལ་ཕྱག་འཚལ་འདུད༔ མ་འོངས་པ་ན་བོད་ཁམས་འདི་དང་འཛམ་གླིང་ཐམས་ཅད་དུ་དགེ་དང་མི་དགེ་སྣ་ཚོགས་སྤྱོད་པའི་དབང་གིས་སེམས་ཅན་སྤྱིའི་བསོད་ནམས་རིམ་གྱིས་རྒུད་གཟུགས་མེད་རྣམས་ཀྱང་ཟ་འདོད་ཇེ་ཆེར་འགྲོ༔ འཇིག་རྟེན་ཁམས་ཀྱི་གཞི་བདག་རྣམས་ཀྱང་འཕོ་སྐྱས་སྣ་ཚོགས་བྱེད༔ དེའི་རྟགས་ལ་སྔ་མའི་གཞི་བདག་ཡུལ་ལྷ་མཚོ་སྨན་སོགས་གནས་མ་ཟིན་ནས་འཕོས་པ་དང་༔ ཕྱི་མའི་བདག་པོས་མ་ཟིན་གྱི་བར་དེར་ནོར་བདག་མེད་སྟོང་ར་ན་འཁྱམས་པ་ལྟ་བུར་འབྱུང་བཞིའི་བཅུད་མང་པོ་སྔར་མེད་ས་ནས་གསེར་དངུལ་ཟངས་ལྕགས་མཚལ་མཐིང་སྤང་སོགས་རྡོལ་ཞིང་འབྱུང་བའི་བཅུད་ཐམས་ཅད་ཉམས༔ གཡང་གི་དཔལ་རྒུད༔ ཡུལ་ལྷས་འཕོ་བསྐྱས་བྱེད་དགོས་འབྱུང་བས་ཡུལ་མིའི་ཚེ་དཔལ་ཉམས༔ ནད་མུག་འཁྲུགས་རྩོད་མང་༔ ལོངས་སྤྱོད་བསེར༔ འདོད་པ་མང་ཀྱང་མི་འདོད་པ་བུ་ཡུག་ལྟར་འཚུབ་པའི་དུས་བྲག་ཤིང་རི་ཆུ་གངས་གཉན་ཞིག་རལ་སྐམ་ལུད་གང་སྟོང་མང་པོ་ཡོང་༔ ཐན་རིགས་ཀྱང་སྣ་ཚོགས་འབྱུང་༔ འབྱུང་བ་དང་སྣོད་བཅུད་ཐམས་ཅད་ལ་གོ་ལོག་མང་པོ་འབྱུང་༔ འགྲོ་བའི་ཤེས་རྒྱུད་འགྱུར་ལྡོག་མང་སྟེ་བཟང་པོ་ངན་དུ་འགྲོ༔ ངན་པ་བཟང་དུ་འགྲོ༔ དེ་དག་ཀྱང་མི་རྟག་སྣ་ཚོགས་སུ་འགྱུར་ཞིང་༔ བཟང་དུ་རེ་དུས་ངན་སྟེར༔ ངན་དུ་རེ་དུས་བཟང་བྱེད༔ སྤྱོད་ངན་སྣ་ཚོགས་སྤྱོད་དུས་ཕྱྭ་དང་གཡང་འགུགས་པའི་འཕྲིན་ལས་འདི་བཞིན་བརྩོན་པར་བྱའོ༔ དེ་ཡང་གནས་ཁང་གད་བྱ༔ དྲི་བཟང་གི་ཆུ་སོགས་ཀྱིས་ཆག་ཆག་བྱི་དོར་མཛེས་པར་བྱ་ཞིང་༔ གཞི་མ་བཟང་པོའི་སྟེང་དུ་འབྲུ་རིགས་ལྔ་གསུམ་ལྔ་བདུན་ལས་མ་ཉུང་བའི་བྲེ་ཚད་བརྡལ་བའི་དབུས་སུ༔ གམ་ས་འམ་ཟན་ལ་གཞུང་བཞིན་རྫས་རྣམས་བསྲེས་ཏེ་རི་རབ་བང་རིམ་གསུམ་པའི་དབུས་སུ༔ བུམ་པ་བུམ་གཏེར་རྫས་ལྡན་གྱི་སྟེང་དུ་ནོར་བདག་གི་རྟེན་གཏོར་ལྷ་གྲངས་ཀྱི་བཤོས་ཟླུམ་བཀོད༔ དེ་ནས་བང་རིམ་རྣམས་ལ་རྟགས་བརྒྱད་སྣ་བདུན་མཁར་དང་བ་དན་ཡན་ཆད་བསྐང་གཞུང་ལྟར་བསགས༔ ནམ་མཁའ་ལྔ་ཕྱོགས་བཞི་དབུས་ལ་གཟུགས་ཤིང་༔ ནམ་མཁའ་རེ་ལ་གཡས་ཕོ་གདོང་གཡོན་མོ་གདོང་མདུན་མདའ་བཀྲ་རྒྱབ་འཕང་བཀྲ་སྟེ་ཚོམ་བུའི་ཚུལ་དུ་དགོད༔ ཤར་དུ་ཆུ་ཤེལ་ཆུ་སྣ་བརྒྱ་རྩ༔ ལྷོར་གསེར་དང་ས་སྣ་བརྒྱ་རྩ༔ ནུབ་ཏུ་མན་ཤེལ་དང་རིན་ཆེན་འཛོམ་ཚད༔ བྱང་དུ་ནེའུ་ལེའི་རྐྱལ་པ་རི་དྭགས་ཀྱི་སྤུ་མ་གཏོགས་གཡུང་དྭགས་དུད་འགྲོའི་རིགས་གྱུར་གྱི་ཤ་སྤུ་ཚིལ་གསུམ་དར་གོས་རས་ཕྲུག་འཇིག་རྟེན་ཇི་སྲིད་ཀྱི་རྫས་ཀྱིས་བཀང་བ༔ སྨན་རག་གཏོར་མཆོད་རྣམས་ཀྱང་ལས་གཞུང་ལྟར་དགོད༔ རྟ་ཕོ་གྱི་ལིང་ལ་ཕོ་ཆས་སྒ་སྲབ་འཁོར་གསུམ་གོ་ཁྲབ་ཀྱིས་རྒྱན་པ༔ ལྷ་ནོར་གྱི་ལིང་ལ་མོ་ཆས་སྣ་དགུས་བརྒྱན་ཏེ་བཀལ་བ༔ ལྷ་ལུག་གྱི་ལིང་ལ་གཡང་སྒྱེ་ནུ་དགུ་རྫས་སྣ་འདོད་དགུས་བཀང་བ་བཀལ་བ༔ དེ་རྣམས་ལ་ཡང་དར་ཟབ་སྟག་གཟིག་རྔ་མའི་རིགས་ཀྱིས་བརྒྱན་སྤྲས་པ༔ བཟའ་བཏུང་གི་རིགས་ཕྱེ་མར་སྐྱེམས་ཕུད་ཚོགས་ཀྱི་འཁོར་ལོ་སོགས་མདོར་ན་མ་ཚང་བ་མེད་ཅིང་ཚང་ཞིང་ཡིད་དུ་འོང་བར་བྱ༔ དྲི་བཟང་རིགས་དང་བདུད་རྩིའི་ཤིང་ལྔའི་དུད་པ་བཏང་༔ ལས་ཀྱི་གཞུང་བསྲང་བསྙེན་སྒྲུབ་ཏིང་འཛིན་གསལ༔ སྔགས་དྲུག་ཕྱག་རྒྱ་ཏིང་འཛིན་དང་ལྡན་པས་བསངས་སྦྱངས་སྤེལ་ཞིང་གཞུང་བཞིན་མདུན་བསྐྱེད་ཚོགས་བསྐང་ལྷག་མཆོད་ཀྱི་གོང་དུ་དབྱངས་སྙན་རོལ་མོ་དང་བཅས་པས་འདི་སྐད་དོ༔ ཀྱེ༔ སྲིད་པ་དང་པོ་གང་ནས་སྲིད་དང་བྱུང་༔ ཡེ་སྟོང་སྤྲོས་དང་བྲལ་བའི་ནམ་མཁའ་ལ༔ མ་བྱས་ལྷུན་གྲུབ་རང་མདངས་འོད་ལྔར་ཤར༔ འོད་ལ་ཁ་དོག་རིགས་ལྔའི་འཛིན་པ་གྲུབ༔ འཛིན་པའི་རོལ་པ་སྨག་དང་སྨིག་ལ་ཤར༔ འཛིན་པའི་རོལ་པ་འོད་དང་འོད་དུ་འབར༔ འཛིན་པའི་རོལ་པ་ཟར་དང་ཟེར་དུ་འཁྲིགས༔ སྲིད་པའི་མེས་པོ་ཚངས་པས་བཀོས་སུ་བཏབ༔ འོད་ལྔའི་རང་མདངས་ཡུམ་ལྔས་དབང་དུ་བསྒྱུར༔ ཁམས་གསུམ་སྲིད་གསུམ་ཕྱི་སྣོད་ནང་བཅུད་ཆགས༔ མི་སྲིད་སྲིད་པ་ཆགས་པ་དེ་ཡི་ཚེ༔ དྭངས་མ་རྣམས་ལ་རིན་ཆེན་སྣ་ཚོགས་དང་༔ སྙིགས་མ་རྣམས་ལས་ས་རྡོ་རི་བྲག་གྲུབ༔ འདོད་ཁམས་གཟུགས་ཁམས་གཟུགས་མེད་ཁམས་གསུམ་གྱི༔ རང་ལས་རང་མདངས་གང་ཤར་ངོས་སྐལ་སྤྱོད༔ དེ་ཚེ་སྲིད་པའི་གཡང་དགུ་སྲིད་དང་དར༔ རླུང་སྲིད་རླུང་ཁམས་འབྱུང་བ་སྲིད་པའི་གཡང་༔ ཆུ་སྲིད་ཆུ་ཁམས་འབྱུང་བ་སྲིད་པའི་གཡང་༔ ས་སྲིད་ས་ཁམས་འབྱུང་བ་སྲིད་པའི་གཡང་༔ དྲོད་སྲིད་མེ་ཁམས་འབྱུང་བ་སྲིད་པའི་གཡང་༔ མཁའ་སྲིད་ནམ་མཁའི་འབྱུང་བ་སྲིད་པའི་གཡང་༔ གཟུགས་སྲིད་ལང་ཚོའི་འབྱུང་བ་སྲིད་པའི་གཡང་༔ ནོར་སྲིད་ནོར་བུ་འབྱུང་བ་སྲིད་པའི་གཡང་༔ ཕོ་སྲིད་ཕོ་ཡི་འབྱུང་བ་སྲིིད་པའི་གཡང་༔ མོ་སྲིད་མོ་ཡི་འབྱུང་བ་སྲིད་པའི་གཡང་༔ རྫོགས་ལྡན་གཉིས་ལྡན་གསུམ་ལྡན་དུས་གསུམ་དུ༔ གཡང་ཆེན་འདི་དགུ་དར་དང་རྒྱས་པ་ཡི༔ དཔལ་བཅུའི་གཡང་འཕེལ་སྟོབས་བཅུའི་ལུང་གིས་བརྒྱན༔ མི་བདེ་སྡུག་བསྔལ་མེད་ཅིང་བདེ་སྐྱིད་འཛོམ༔ ད་ནི་རྩོད་ལྡན་བསྐལ་པའི་ཞབས་ལ་ཉེ༔ འགྲོ་བ་སྤྱི་དང་འབྱུང་བ་རྒུད་པའི་ཚེ༔ དཀོན་མཆོག་བདེན་པའི་བཀའ་དང་དམ་བདར་ཏེ༔ སྐྱོབས་པའི་ལྷར་འབོད་སྲིད་པའི་གཡང་འགུགས་པས༔ རྩ་གསུམ་ནོར་ལྷ་རྒྱ་མཚོ་མ་གཡེལ་དགོངས༔ མདའ་དར་གཡབ་ཅིང་༔ ཧཱུྃ༔ འོག་མིན་སྟུག་པོ་བཀོད་པའི་ཞིང་ཁམས་ནས༔ ཆོས་སྐུ་རྒྱལ་བ་རྡོ་རྗེ་འཆང་ཆེན་གྱིས༔ བདེ་གཤེགས་སངས་རྒྱས་མཛེས་པ་ཆེན་པོ་ལ༔ གསེར་གྱི་རྡོ་རྗེ་ཕུལ་ཏེ་ཐུགས་བསྐྱེད་ནས༔ རྣམ་དག་སྨོན་ལམ་བཏབ་པ་རྗེས་དགོངས་སྟེ༔ མར་འགྲིབ་བསྐལ་ཁུགས་རྐྱེན་ངན་གསུམ་དར་ཞིང་༔ ནད་མཚོན་མུ་གེའི་བསྐལ་ངན་འདི་ཤར་ཚེ༔ བདག་ཅག་གདུང་བའི་ཡིད་ཀྱིས་འབོད་ལགས་ན༔ རྒྱལ་བ་ཁྱེད་ཀྱི་ཐུགས་བསྐྱེད་རྗེས་དགོངས་ལ༔ རིགས་ལྔའི་སངས་རྒྱས་སྒྱུ་འཕྲུལ་རྒྱ་མཚོ་ཡི༔ སྐུ་གསུམ་ཞིང་དང་ཚངས་ཆེན་བསྐལ་པ་སོགས༔ ཇི་ལྟར་བཀོད་དང་ཇི་ལྟར་སྤྲུལ་པའི་ཞིང་༔ ཁྱད་པར་ཁྱེད་ཀྱི་ཐུགས་བསྐྱེད་སྨོན་ལམ་གྱིས༔ གངས་ཆེན་མཚོ་ཡི་པདྨའི་ཕྲུམ་ཕྲུམ་ལ༔ ཉི་ཤུ་རྩ་ལྔའི་ཞིང་ཁམས་ཆགས་དང་སྲིད༔ མ་ལུས་འཁོར་འདས་ཀུན་གྱི་དཔལ་དང་སྟོབས༔ སྐུ་གསུམ་བྱིན་རླབས་ཐུགས་རྗེའི་ནུས་མཐུ་རྣམས༔ བདག་ཅག་རྣམས་ལ་དེང་འདིར་སྩལ་བ་དང་༔ ཕྱྭ་དང་གཡང་གི་དངོས་གྲུབ་བྱིན་ཆེན་ཕོབ༔ ཆོས་དབྱིངས་ཡེ་ཤེས་ཆེན་པོས་རྒྱས་ཐོབ་ལ༔ འགྱུར་མེད་མཆོག་དང་ཐུན་མོང་དངོས་གྲུབ་སྩོལ༔ ཧཱུྃ༔ ཤར་ཕྱོགས་མངོན་པར་དགའ་བའི་ཞིང་ཁམས་ནས༔ བཅོལ་ལྡན་རྒྱལ་བ་རྡོ་རྗེ་སེམས་དཔའ་ཡིས༔ བདེ་གཤེགས་སངས་རྒྱས་རིག་པའི་མེ་ཏོག་ལ༔ ཤེལ་གྱི་རྡོ་རྗེ་ཕུལ་ཏེ་ཐུགས་བསྐྱེད་ནས༔ རྣམ་དག་སྨོན་ལམ་བཏབ་པ་རྗེས་དགོངས་ཏེ༔ མར་འགྲིབ་བསྐལ་ཁུགས་རྐྱེན་ངན་གསུམ་དར་ཞིང་༔ ནད་མཚོན་མུ་གེའི་བསྐལ་ངན་འདི་ཤར་ཚེ༔ བདག་ཅག་གདུང་བའི་ཡིད་ཀྱིས་འབོད་ལགས་ན༔ རྒྱལ་བ་ཁྱེད་ཀྱི་ཐུགས་བསྐྱེད་རྗེས་དགོངས་ལ༔ རིགས་ལྔའི་སངས་རྒྱས་སྒྱུ་འཕྲུལ་རྒྱ་མཚོ་ཡི༔ སྐུ་གསུམ་ཞིང་ཁམས་ཚངས་ཆེན་བསྐལ་པ་སོགས༔ ཇི་ལྟར་བཀོད་དང་ཇི་ལྟར་སྤྲུལ་པའི་ཞིང་༔ ཁྱད་པར་ཁྱེད་ཀྱི་ཐུགས་བསྐྱེད་སྨོན་ལམ་གྱིས༔ རྡོར་སེམས་རིགས་ལྔའི་པདྨའི་ཕྲུམ་ཕྲུམ་ལ༔ ཉི་ཤུ་རྩ་ལྔའི་ཞིང་ཁམས་ཆགས་དང་སྲིད༔ མ་ལུས་འཁོར་འདས་ཀུན་གྱི་དཔལ་དང་སྟོབས༔ སྐུ་གསུམ་བྱིན་རླབས་ཐུགས་རྗེའི་ནུས་མཐུ་རྣམས༔ བདག་ཅག་རྣམས་ལ་དེང་འདིར་སྩལ་བ་དང་༔ ཕྱྭ་དང་གཡང་གི་དངོས་གྲུབ་བྱིན་ཆེན་ཕོབ༔ མེ་ལོང་ཡེ་ཤེས་ཆེན་པོས་རྒྱས་ཐོབ་ལ༔ འགྱུར་མེད་མཆོག་དང་ཐུན་མོང་དངོས་གྲུབ་སྩོལ༔ ཧཱུྃ༔ ལྷོ་ཕྱོགས་དཔལ་དང་ལྡན་པའི་ཞིང་ཁམས་ནས༔ བཅོལ་ལྡན་རྒྱལ་བ་རིན་ཆེན་འབྱུང་ལྡན་གྱིས༔ བདེ་གཤེགས་སངས་རྒྱས་སྣང་བའི་དཔལ་མཆོག་ལ༔ འདོད་འབྱུང་བསམ་འཕེལ་ཕུལ་ཏེ་ཐུགས་བསྐྱེད་ནས༔ རྣམ་དག་སྨོན་ལམ་བཏབ་པ་རྗེས་དགོངས་ཏེ༔ མར་འགྲིབ་བསྐལ་ཁུགས༴ ནད་མཚོན་མུ་གེའི་བསྐལ་ངན༴ བདག་ཅག་གདུང་བའི༴ རྒྱལ་བ་ཁྱེད་ཀྱི༴ རིགས་ལྔའི་སངས་རྒྱས༴ སྐུ་གསུམ་ཞིང་༴ ཇི་ལྟར་བཀོད་དང་༴ ཁྱད་པར་ཁྱེད་ཀྱི༴ རིན་འབྱུང་རིགས་ལྔའི་པདྨའི༴ ཉི་ཤུ་རྩ་ལྔའི༴ མ་ལུས་འཁོར་འདས༴ སྐུ་གསུམ་བྱིན་རླབས༴ བདག་ཅག་རྣམས་ལ༴ ཕྱྭ་དང་གཡང་གི་དངོས་གྲུབ་བྱིན་ཆེན་ཕོབ༔ མཉམ་ཉིད་ཡེ་ཤེས་ཆེན་པོས་རྒྱས་ཐོབ་ལ༔ འགྱུར་མེད་མཆོག་དང་ཐུན་མོང་དངོས་གྲུབ་སྩོལ༔ ཧཱུྃ༔ ནུབ་ཕྱོགས་བདེ་བ་ཅན་གྱི་ཞིང་ཁམས་ནས༔ བཅོམ་ལྡན་རྒྱལ་བ་སྣང་བ་མཐའ་ཡས་ཀྱིས༔ བདེ་གཤེགས་སངས་རྒྱས་པདྨའི་དབང་པོ་ལ༔ རིན་ཆེན་སྣམ་བུ་ཕུལ་ཏེ་ཐུགས་བསྐྱེད་ནས༔ རྣམ་དག་སྨོན་ལམ༴ མར་འགྲིབ་བསྐལ༴ ནད་མཚོན༴ བདག་ཅག༴ རྒྱལ་བ༴ རིགས་ལྔའི༴ སྐུ་གསུམ༴ ཇི་ལྟར༴ ཁྱད་པར༴ སྣང་མཐའ་རིགས་ལྔའི་པདྨའི་ཕྲུམ་ཕྲུམ་ལ༔ ཉི་ཤུ་རྩ་ལྔའི་ཞིང་ཁམས༴ མ་ལུས༴ སྐུ་གསུམ༴ བདག་ཅག་རྣམས་ལ༴ ཕྱྭ་དང་གཡང་གི༴ སོར་རྟོགས་ཡེ་ཤེས་ཆེན་པོས་རྒྱས་ཐོབ་ལ༔ འགྱུར་མེད་མཆོག་དང་ཐུན་མོང་དངོས་གྲུབ་སྩོལ༔ ཧཱུྃ༔ བྱང་ཕྱོགས་ལས་རབ་རྫོགས་པའི་ཞིང་ཁམས་ནས༔ བཅོམ་ལྡན་རྒྱལ་བ་དོན་ཡོད་གྲུབ་པ་ཡིས༔ ཡང་དག་སངས་རྒྱས་མངོན་བྱུང་ཡེ་ཤེས་ལ༔ རིན་ཆེན་ཕྲེང་བ་ཕུལ་ཏེ་ཐུགས་བསྐྱེད་ནས༔ རྣམ་དག་སྨོན་ལམ༴ མར་འགྲིབ༴ ནད་མཚོན༴ བདག་ཅག༴ རྒྱལ་བ༴ རིགས་ལྔའི་སངས་རྒྱས༴ སྐུ་གསུམ་ཞིང་༴ ཇི་ལྟར་བཀོད་དང་༴ ཁྱད་པར་ཁྱེད་ཀྱི༴ དོན་གྲུབ་རིགས་ལྔའི་པདྨའི་ཕྲུམ་ཕྲུམ་ལ༔ ཉི་ཤུ་རྩ་ལྔའི༴ མ་ལུས་འཁོར་འདས༴ སྐུ་གསུམ་བྱིན་རླབས༴ བདག་ཅག་རྣམས༴ ཕྱྭ་དང་གཡང་གི༴ བྱ་གྲུབ་ཡེ་ཤེས་ཆེན་པོས་རྒྱས་ཐོབ་ལ༔ འགྱུར་མེད་མཆོག་དང་ཐུན་མོང་༴ ཧཱུྃ༔ སྐུ་ལྔའི་རང་འོད་ཡེ་ཤེས་རོལ་པའི་མདངས༔ རིགས་ལྔའི་མཁའ་ལ་ཁྲག་འཐུང་རིགས་ལྔའི་ཞིང་༔ དུར་ཁྲོད་ཆེན་པོ་མེ་རི་འབར་བ་ནས༔ ཁྲག་འཐུང་ཁྲོ་བོ་ཁྲོ་མོ་ཀེ་སེང་དང་༔ དབང་ཕྱུག་བྲན་གཡོག་བཀའ་ཉན་སྒོ་མའི་ཚོགས༔ རྣམ་དག་ཐུགས་རྗེའི་ཀློང་ནས་སྐུར་བཞེངས་ཏེ༔ མར་འགྲིབ་བསྐལ༴ ནད་མཚོན་མུ༴ བདག་ཅག༴ རྒྱལ་བ་ཁྱེད་རྣམས་ཐུགས་རྗེའི་དུས་ལ་བབས༔ རིགས་ལྔའི་ཁྲག་འཐུང་སྒྱུ་འཕྲུལ་རྒྱ་མཚོ་ཡི༔ སྐུ་གསུམ་ཁྲག་འཐུང་ཚངས་ཆེན་བསྐལ་པ་སོགས༔ ཇི་ལྟར་བཀོད་དང་ཇི་ལྟར་སྤྲུལ་པའི་ཞིང་༔ ཁྱད་པར་ཁྱེད་ཅག་ཐུགས་རྗེའི་ནུས་མཐུ་ཡིས༔ ཁྲག་འཐུང་ལྷ་ཚོགས་ཕྱག་མཚན་ཕྲུམ་ཕྲུམ་ལ༔ ཉི་ཤུ་རྩ་ལྔའི་ཞིང་ཁམས་ཆགས་དང་སྲིད༔ མ་ལུས་འཁོར་འདས་ཀུན་གྱི་དཔལ་དང་སྟོབས༔ སྐུ་གསུམ་བྱིན་རླབས་ཐུགས་རྗེའི་ནུས་མཐུ་རྣམས༔ བདག་ཅག་རྣམས་ལ་དེང་འདིར་སྩལ་བ་དང་༔ ཕྱྭ་དང་གཡང་གི་དངོས་གྲུབ་བྱིན་ཆེན་ཕོབ༔ སྐུ་ལྔ་ཡེ་ཤེས་འབར་བས་རྒྱས་ཐོབ་ལ༔ འགྱུར་མེད་མཆོག་དང་ཐུན་མོང་དངོས་གྲུབ་སྩོལ༔ ཧཱུྃ༔ རྒྱལ་བ་འབུམ་ཕྲག་དྲུག་ཅུ་རྩ་བཞི་ཡི༔ རིགས་ལྔའི་ཚངས་ཆེན་བསྐལ་པ་བཀོད་པ་ལ༔ བདེ་གཤེགས་རྫོགས་པའི་སངས་རྒྱས་བཅོམ་ལྡན་འདས༔ ས་ཡ་བཅོ་ལྔས་སྨིན་གྲོལ་ལམ་བཀོད་པའི༔ ཉན་ཐོས་དགྲ་བཅོམ་བྱང་སེམས་རང་རྒྱལ་དང་༔ གནས་བརྟན་འཕགས་པ་ཕྱིར་མི་ལྡོག་པའི་ཚོགས༔ སྔོན་གྱི་ཐུགས་བསྐྱེད་སྨོན་ལམ་རྗེས་དགོངས་ལ༔ མར་འགྲིབ་བསྐལ༴ ནད་མཚོན༴ བདག་ཅག༴ རྒྱལ་བ་སྲས་བཅས་ཐུགས་རྗེ་བྱིན་རླབས་དང་༔ མ་ལུས་འཁོར་འདས་ཀུན་གྱི་དཔལ་དང་སྟོབས༔ སྐུ་གསུམ་བྱིན་རླབས༴ བདག་ཅག༴ ཕྱྭ་དང་གཡང་གི༴ རྒྱུ་འབྲས་རྟེན་འབྲེལ་སྨོན་ལམ༴ འགྱུར་མེད་མཆོག་དང་༴ ཧཱུྃ༔ གླིང་བཞིར་དབང་བསྒྱུར་རྒྱལ་པོ་ཡུལ་འཁོར་བསྲུང་༔ སྲས་སྟོང་བརྫུས་སྐྱེས་གཉིས་དང་བཙུན་མོ་དང་༔ རྒྱལ་བློན་མ་ལུས་འཁོར་བཅས་ཐམས་ཅད་ཀྱིས༔ རྫོགས་པའི་སངས་རྒྱས་ནུས་ལྡན་རྡོ་རྗེ་ལ༔ དང་པོར་སེམས་བསྐྱེད་བར་དུ་ཚོགས་བསགས་ཏེ༔ ཐ་མར་སྒྲིབ་སྦྱངས་མངོན་པར་སངས་རྒྱས་པའི༔ འཁོར་བ་འཇིག་དང་གསེར་ཐུབ་འོད་སྲུང་དང་༔ ཤཱཀ་ཐུབ་བྱམས་མགོན་མོས་པ་སྣང་མཛད་སོགས༔ སངས་རྒྱས་སྟོང་དང་དགྲ་བཅོམ་བྱང་སེམས་དང་༔ ཉན་ཐོས་རང་རྒྱལ་གནས་བརྟན་འཕགས་པའི་སྡེ༔ སྔོན་གྱི་ཐུགས་བསྐྱེད༴ མར་འགྲིབ་བསྐལ༴ ནད་མཚོན༴ བདག་ཅག༴ རྒྱལ་བ་སྲས་བཅས་ཐུགས་རྗེ༴ མ་ལུས་འཁོར་འདས༴ སྐུ་གསུམ་བྱིན་རླབས༴ བདག་ཅག་རྣམས་ལ༴ ཕྱྭ་དང་གཡང་༴ རྒྱུ་འབྲས་རྟེན་འབྲེལ་སྨོན་ལམ་རྒྱས་ཐོབ་ལ༔ འགྱུར་མེད༴ ཧཱུྃ༔ གནས་མཆོག་ཆེན་པོ་ཉི་ཤུ་རྩ་བཞི་དང་༔ ཡུལ་མཆོག་ཆེན་པོ་སུམ་ཅུ་སོ་ལྔ་དང་༔ རབ་ཏུ་འཇིགས་ཤིང་བརྔམ་པའི་དུར་ཁྲོད་བརྒྱད༔ ཞིང་དང་མཐུན་སྤྱོད་ཚནྡྷོ་འདུ་བ་དང་༔ ཉེ་བའི་གནས་དང་ཉེ་བའི་དུར་ཁྲོད་དང་༔ ཉེ་བའི་ཞིང་དང་ཉེ་བའི་མཐུན་སྤྱོད་དང་༔ ཉེ་བའི་ཚནྡྷོ་ཉེ་བའི་འདུ་བ་དང་༔ མཁའ་སྤྱོད་ས་སྤྱོད་ས་འོག་སྤྱོད་ལ་སོགས༔ ཚངས་ཆེན་རིགས་ལྔ་ཕྱོགས་བཅུ་ཐམས་ཅད་ཀྱི༔ མ་ལུས་དེ་དག་རྣམས་ལ་བཞུགས་པ་ཡི༔ རྩ་གསུམ་སྲུང་མ་ཡེ་ཤེས་འཇིག་རྟེན་ཚོགས༔ སྔོན་གྱི་ཐུགས་བསྐྱེད་སྨོན་ལམ་རྗེས་དགོངས་ལ༔ མར་འགྲིབ་བསྐལ༴ ནད་མཚོན༴ བདག་ཅག་གདུང་བའི༴ རྩ་གསུམ་དམ་ཅན་རྒྱ་མཚོའི་ནུས་མཐུ་ཡི༔ མ་ལུས་འཁོར་འདས་ཀུན༴ སྐུ་གསུམ་བྱིན་རླབས༴ བདག་ཅག་རྣམས་ལ༴ ཕྱྭ་དང་གཡང་གི༴ ཐབས་དང་ཤེས་རབ་མཆོག་གི་རྒྱས༴ འགྱུར་མེད་མཆོག་དང་༴ ཧཱུྃ༔ དུས་གསུམ་རྒྱལ་བའི་སྐུ་ཡི་དཀྱིལ་འཁོར་ནས༔ བྱང་ཆུབ་སེམས་དཔའ་འཕགས་པ་འཇམ་དཔལ་དབྱངས༔ འགྲོ་དྲུག་འཁོར་བ་དོང་ནས་མ་སྤྲུགས་བར༔ འགྲོ་བའི་དོན་དུ་ཐུགས་བསྐྱེད་རྗེས་དགོངས་ལ༔ མར་འགྲིབ༴ ནད་མཚོན༴ བདག་ཅག༴ རྒྱལ་བ་སྲས་བཅས༴ བྱང་ཆུབ་སེམས་དཔའ་སེམས་མ་ཐམས་ཅད་དང་༔ སྐུ་གསུམ་ཞིང་དང་ཚངས་ཆེན་བསྐལ་པ་ལ༔ ཅི་ལྟར་སྤྲུལ་པའི་དུས་གསུམ་རིགས་འཛིན་དང་༔ ཁྱད་པར་ཁྱེད་ཀྱི་ཐུགས་བསྐྱེད་སྨོན་ལམ་གྱིས༔ རིགས་ལྔའི་ཞི་བ་ཁྲོ་བོ་ཞི་མ་ཁྲོ༔ ཕྱོགས་བཅུའི་ཞིང་ཁམས་རྡུལ་གྱི་གྲངས་མཉམ་དང་༔ མ་ལུས་འཁོར་འདས་ཀུན་གྱི་དཔལ་དང་སྟོབས༔ སྐུ་གསུམ་བྱིན་རླབས་ཐུགས་རྗེ་ནུས་མཐུ་རྣམས༔ བདག་ཅག་རྣམས་ལ་དེང་འདིར་སྩལ་བ་དང་༔ ཕྱྭ་དང་གཡང་གི་དངོས་གྲུབ་བྱིན་ཆེན་ཕོབ༔ མཁྱེན་རབ་ཡེ་ཤེས་སྩལ་གྱིས་རྒྱས་ཐོབ་ལ༔ འགྱུར་མེད་མཆོག་དང་ཐུན་མོང་དངོས་གྲུབ་སྩོལ༔ ཧཱུྃ༔ དུས་གསུམ་རྒྱལ་བའི་གསུང་གི་དཀྱིལ་འཁོར་ནས༔ བྱང་ཆུབ་སེམས་དཔའ་འཕགས་པ་སྤྱན་རས་གཟིགས༔ འགྲོ་དྲུག་འཁོར་བ་དོང་ནས་མ་སྤྲུགས་བར༔ འགྲོ་བའི་དོན་དུ་ཐུགས་བསྐྱེད་རྗེས་དགོངས་ལ༔ མར་འགྲིབ༴ ནད་མཚོན༴ བདག་ཅག༴ རྒྱལ་བ་ཁྱེད་ཀྱི༴ བྱང་ཆུབ་སེམས་དཔའ་སེམས་མ་ཐམས་ཅད་དང་༔ སྐུ་གསུམ་ཞིང་དང་ཚངས་ཆེན་བསྐལ་པ་ལ༔ ཅི་ལྟར་སྤྲུལ་པའི་དུས་གསུམ་རིགས་འཛིན་དང་༔ ཁྱད་པར་ཁྱེད་ཀྱི་ཐུགས་བསྐྱེད་སྨོན་ལམ་གྱིས༔ རིགས་ལྔ་ཞི་བ་ཁྲོ་བོ་ཞི་མ་ཁྲོ༔ ཕྱོགས་བཅུའི་ཞིང་ཁམས་རྡུལ་གྱི་གྲངས་མཉམ་དང་༔ མ་ལུས་འཁོར་འདས་ཀུན་གྱ་ིདཔལ་དང་སྟོབས༔ སྐུ་གསུམ་བྱིན་རླབས༴ བདག་ཅག་རྣམས་ལ༴ ཕྱྭ་དང་གཡང་གི༴ སྟོང་ཉིད་སྙིང་རྗེའི་ཤུགས་ཀྱིས་རྒྱས་ཐོབ་ལ༔ འགྱུར་མེད༴ ཧཱུྃ༔ དུས་གསུམ་རྒྱལ་བའི་ཐུགས་ཀྱི་དཀྱིལ་འཁོར་ནས༔ བྱང་ཆུབ་སེམས་དཔའ་ལག་ན་རྡོ་རྗེ་ཅན༔ འགྲོ་དྲུག་འཁོར་བ་དོང་ནས་མ་སྤྲུགས་བར༔ འགྲོ་བའི་དོན་དུ་ཐུགས་བསྐྱེད༴ མར་འགྲིབ༴ ནད་མཚོན༴ བདག་ཅག༴ རྒྱལ་བ་སྲས་བཅས༴ བྱང་ཆུབ་སེམས་དཔའ་སེམས་མ་ཐམས་ཅད་དང་༔ སྐུ་གསུམ་ཞིང་དང་ཚངས་ཆེན་བསྐལ་པ་ལ༔ ཅི་ལྟར་སྤྲུལ་པའི་དུས་གསུམ་རིག་འཛིན་དང་༔ ཁྱད་པར་ཁྱེད་ཀྱི་ཐུགས་བསྐྱེད་སྨོན་ལམ་གྱིས༔ རིགས་ལྔའི་ཞི་བ་ཁྲོ་བོ་ཞི་མ་ཁྲོ༔ ཕྱོགས་བཅུའི་ཞིང་ཁམས་རྡུལ་གྱི་གྲངས་མཉམ་དང་༔ མ་ལུས་འཁོར་འདས་ཀུན་གྱི་དཔལ་དང་སྟོབས༔ སྐུ་གསུམ་བྱིན་རླབས༴ བདག་ཅག༴ ཕྱྭ་དང་གཡང་གི༴ མཐུ་སྟོབས་དབང་དང་དྲག་པོས་རྒྱས་ཐོབ་ལ༔ འགྱུར་མེད༴ ཧཱུྃ༔ ལྷོ་ནུབ་པདྨ་འོད་ཀྱི་གཞལ་ཡས་ནས༔ དུས་གསུམ་སངས་རྒྱས་འདུས་པའི་ཐུགས་རྗེ་ཅན༔ འགྲོ་མགོན་པདྨ་འབྱུང་གནས་སྤྲུལ་པའི་སྐུ༔ རྩོད་ལྡན་བསྐལ་ཞབས་དུག་ལྔ་འཇོལ་ཉོག་སྤྱོད༔ འདི་འདྲའི་དུས་སུ་ཐུགས་བསྐྱེད་དུས་ལ་བབས༔ མར་འགྲིབ༴ ནད་མཚོན༴ བདག་ཅག༴ རྒྱལ་བ་སྲས་བཅས༴ ཐོད་ཕྲེང་རིགས་ལྔའི་སྒྱུ་འཕྲུལ་རྒྱ་མཚོ་ཡི༔ ཐུབ་དྲུག་ཞིང་དང་ཚངས་ཆེན་བསྐལ་པ་སོགས༔ ཅི་ལྟར་སྤྲུལ་པའི་དུས་གསུམ་རིག་འཛིན་དང་༔ ཁྱད་པར་ཁྱེད་ཀྱི་ཐུགས་བསྐྱེད་སྨོན་ལམ་མཐུས༔ བླ་མ་སྒྱུ་འཕྲུལ་ཞི་ཁྲོ་ཞི་མ་ཁྲོ༔ ཕྱོགས་བཅུའི་ཞིང་ཁམས་རྡུལ་གྱི་གྲངས་མཉམ་དང་༔ མ་ལུས་འཁོར་འདས་ཀུན་གྱི་དཔལ་དང་སྟོབས༔ སྐུ་གསུམ་བྱིན་རླབས་ཐུགས་རྗེའི་ནུས་མཐུ་རྣམས༔ བདག་ཅག་རྣམས་ལ་དེང་འདིར་སྩལ་བ་དང་༔ ཕྱྭ་དང་གཡང་གི་དངོས་གྲུབ་བྱིན་ཆེན་ཕོབ༔ མྱུར་མགྱོགས་ཐུགས་རྗེའི་སྟོབས་ཀྱིས་རྒྱས་ཐོབ་ལ༔ འགྱུར་མེད་མཆོག་དང་ཐུན་མོང་དངོས་གྲུབ་སྩོལ༔ དེ་ནས་དབུས་ཀྱི་མདའ་དར་གཡབ༔ བུམ་པའི་ནང་དུ་བཅུད་དང་གཡང་རྣམས་འདུས་པར་བསམ་ཞིང་༔ ཧཱུྃ༔ མི་སྲིད་སྲིད་པ་ཆགས་པའི་འཇིག་རྟེན་སྲིད༔ འཇིག་རྟེན་འདི་ནི་ལྷོ་ཕྱོགས་འཛམ་བུའི་གླིང་༔ འདི་འོག་སྟོང་གསུམ་འཇིག་རྟེན་བཅུ་གཉིས་དང་༔ འདི་ཡི་སྟེང་ཕྱོགས་འཇིག་རྟེན་བཅུ་གཉིས་དང་༔ རིགས་ལྔ་ལྔ་ཚན་ལྔ་ཡི་ཚངས་ཆེན་སོགས༔ ནམ་མཁའི་མཐར་ཐུག་གྲངས་འདས་བསམ་ཡས་ཀྱི༔ འཇིག་རྟེན་རབ་འབྱམས་རྒྱ་མཚོ་དཔག་མེད་ན༔ ལྷུན་པོའི་བྱང་ན་གནོད་སྦྱིན་ཕོ་བྲང་རེ༔ དེ་ན་སེམས་ཅན་དབུལ་བ་སེལ་བའི་ལྷ༔ གནོད་སྦྱིན་རྒྱལ་པོ་ཆེན་པོ་ནོར་མང་བུ༔ ས་བརྒྱད་ཕྱིར་མི་ལྡོག་པའི་མགོན་པོ་རེ༔ སེམས་ཅན་སྤྱི་མཐུན་བསོད་ནམས་དཔལ་གྱི་མཛོད༔ སྐུ་གསུམ་བརྒྱུད་འཛིན་ཆོས་ལྡན་སྐྱོང་བའི་མགོན༔ ལྷག་པའི་ལྷ་མཆོག་དེ་དག་ཅི་སྙེད་དང་༔ ཁྱད་པར་སྟོན་པ་སངས་རྒྱས་ཤཱཀ་ཐུབ་སོགས༔ དུས་གསུམ་སངས་རྒྱས་སྟོང་གི་བསྟན་པ་ལ༔ འཛམ་གླིང་ལས་ཀྱི་ས་པ་འདི་ཉིད་ཀྱི༔ བསྟན་འགྲོའི་དབུལ་བ་སེལ་བའི་ལྷ་གཅིག་པུ༔ ནོར་བདག་ཡིད་བཞིན་ནོར་བུ་རྣམ་ཐོས་སྲས༔ མོས་པ་གསུམ་བསྐྱེད་དཀའ་བ་དང་བླངས་ཏེ༔ ཕྱི་ནང་མཆོད་རྫས་བསྐང་རྫས་སྒྲུབ་པའི་རྫས༔ རྟེན་རྫས་ཀ་ཅ་དཀོར་གསུམ་སྤྱན་གཟིགས་བཀྲམས༔ ཕྱྭ་དང་གཡང་གི་རྫས་དང་རྟེན་རྣམས་བསགས༔ དབུལ་ཞིང་ཕོངས་པའི་ཉམ་ཐག་ང་རོ་ཡིས༔ མགོན་པོ་ཁྱོད་ལ་སྙིང་ནས་འབོད་པ་དགོངས༔ སངས་རྒྱས་བསྟན་པ་ལུང་གི་ལྷག་མའི་མཐའ༔ སེམས་ཅན་རྣམས་ཀྱིས་ཉོན་མོངས་འཇོལ་ཉོག་སྤྱོད༔ འབྱུང་བཞིའི་ཁམས་ཉམས་དཔལ་དང་གཡང་རྣམས་རྒུད༔ བཀྲེས་འཕོང་དབུལ་བའི་ལས་ཀྱི་རབ་གདུངས་བས༔ ཁྱོད་མིན་རེ་ས་གཞན་ན་མ་མཆིས་ལགས༔ ཐུགས་བསྐྱེད་དགོངས་ཤིག་རྒྱལ་པོ་རྣམ་ཐོས་སྲས༔ ཐུགས་དམ་བསྐུལ་ལོ་ཐུགས་རྗེའི་འོད་ཟེར་གྱིས༔ གཡང་འགུགས་འགྲེས་གོང་མ། དང་པོ་སྤྱི་ཕུད་སྟོང་གི་འཇིག་རྟེན་དང་༔ གཉིས་པ་བར་མའི་སྟོང་གི་འཇིག་རྟེན་དང་༔ གསུམ་པ་སྟོང་གསུམ་སྟོང་ཆེན་འཇིག་རྟེན་ཏེ༔ འཇིག་རྟེན་རབ་འབྱམས་རྒྱ་མཚོ་དཔག་མེད་དང་༔ རིགས་ལྔ་རྒྱལ་བ་རྒྱ་མཚོ་ཚངས་ཆེན་ཁམས༔ ཕྱོགས་བཅུ་ཇི་སྙེད་ཅི་སྲིད་ཐམས་ཅད་ཀྱི༔ ཕྱི་སྣོད་ནང་བཅུད་འཁོར་འདས་དཔལ་དང་སྟོབས༔ ཚེ་བསོད་དབང་ཐང་འབྱུང་བའི་ཁམས་བཅས་ཀྱི༔ ཕྱྭ་གཡང་བཀྲ་ཤིས་འདོད་འབྱུང་ཆུ་བོའི་རྒྱུན༔ རིན་ཆེན་གཏེར་བུམ་འདི་ཡི་ནང་དུ་ཁུག༔ རིན་ཆེན་གཏེར་བུམ་འདི་ཡི་ནང་དུ་སྟིམས༔ ནོར་བུ་སྣ་བདུན་བཀྲ་ཤིས་རྟགས་བརྒྱད་ལ༔ ཟག་བཅས་ཟག་མེད་ཕྱྭ་གཡང་འདི་ལ་ཁུག༔ ཟག་བཅས་ཟག་མེད་ཕྱྭ་གཡང་འདི་ལ་སྟིམས༔ ཕོ་གདོང་མོ་གདོང་ནམ་མཁའ་མདའ་དང་འཕང་༔ ཕོ་ཆས་མོ་ཆས་འཁོར་གསུམ་སལ་སིལ་རྒྱན༔ ཕོ་གཡང་མོ་གཡང་ཐམས་ཅད་འདི་ལ་ཁུག༔ ཕོ་གཡང་མོ་གཡང་ཐམས་ཅད་འདི་ལ་སྟིམས༔ མེ་ཤེལ་ཆུ་ཤེལ་གསེར་དང་ནེའུ་ལེ་མཛོད༔ རིན་ཆེན་དགོས་འདོད་ནོར་གཡང་འདི་ལ་ཁུག༔ རིན་ཆེན་དགོས་འདོད་ནོར་གཡང་འདི་ལ་སྟིམས༔ འབྲུ་ལྔ་རིན་ཆེན་ཕུང་པོ་གཞི་ལ་སྤུངས༔ འབྲུ་ལྔའི་ཕྱྭ་གཡང་དཔལ་འབྱོར་འདི་ལ་ཁུག༔ འབྲུ་ལྔའི་ཕྱྭ་གཡང་དཔལ་འབྱོར་འདི་ལ་སྟིམས༔ རྟ་ནོར་ལུག་གསུམ་གྱི་ལིང་ནོར་གྱི་གཡང་༔ རྐང་བཞི་དུད་འགྲོའི་ཕྱུགས་གཡང་འདི་ལ་ཁུག༔ རྐང་བཞི་དུད་འགྲོའི་ཕྱུགས་གཡང་འདི་ལ་སྟིམས༔ བཟའ་བཏུང་དཀར་མངར་མར་ཐུད་ཕྲུམ་གྱི་གཡང་༔ གཡང་མཛོད་ཆེན་པོ་ནུ་དགུའི་ནང་དུ་ཁུག༔ གཡང་མཛོད་ཆེན་པོ་ནུ་དགུ་འདི་ལ་བསྟིམ༔ ཕྱྭ་དེ་ཚུར་འདུས་གཞན་དུ་མ་འབྲོས་ཤིག༔ ཕྱྭ་ཐམས་ཅད་ཁུག་ཡེ་ཁུག་ཡེ༔ གཡང་དེ་ཚུར་འདུས་གུད་དུ་མ་ཞེན་ཅིག༔ གཡང་ཐམས་ཅད་ཁུག་ཡེ་ཁུག་ཡེ༔ ཡུམ་བཞིའི་གཡང་འགུགས་རོལ་མོ་དང་བཅས༔ ཧཱུྃ༔ རྣམ་ཐོས་མགོན་པོ་ཆེན་པོའི་དགྱེས་སྡེ་ཡུམ༔ ལྷ་མོ་ནོར་རྒྱུན་མ་ནི་ནོར་གྱི་མཛོད༔ ཀུ་རུ་ཀུལླེ་ཁམས་གསུམ་དབང་བསྒྱུར་ཡུམ༔ ཀླུ་མོ་གཟི་འབར་ཀླུ་ཁམས་དབང་གི་ཡུམ༔ ནོར་སྐྱོང་མ་ནི་ཕྱྭ་གཡང་དཔལ་གྱི་ཡུམ༔ ཡུམ་ཆེན་ལྷ་མོ་ཆེན་མོ་ཁྱེད་བཞི་ཡང་༔ སྔོན་ནས་ཐུགས་བསྐྱེད་སྦྱིན་པའི་ཕ་རོལ་ཕྱིན༔ ཟད་མི་ཤེས་པའི་དངོས་གྲུབ་དཔལ་དགུའི་མཛོད༔ བསྟན་དང་འགྲོ་བའི་དབུལ་བ་སེལ་བའི་མ༔ མོས་པ་གསུམ་བསྐྱེད་དཀའ་བ་དང་བླངས་ཏེ༔ ཕྱི་ནང་མཆོད་རྫས་བསྐང་རྫས་སྒྲུབ་པའི་རྫས༔ རྟེན་རྫས་ཀ་ཆ་དཀོར་གསུམ་སྤྱན་གཟིགས་བཀྲམ༔ ཕྱྭ་དང་གཡང་གི་རྟེན་དང་རྫས་རྣམས་བསགས༔ དབུལ་ཞིང་ཕོངས་པའི་ཉམ་ཐག་ང་རོ་ཡིིས༔ མ་ཆེན་ཁྱེད་བཞིར་སྙིང་ནས་འབོད་པ་དགོངས༔ སངས་རྒྱས་བསྟན་པ་ལུང་གི་ལྷག་མའི་མཐའ༔ སེམས་ཅན་རྣམས་ཀྱིས་ཉོན་མོངས་འཆོལ་ཉོག་སྤྱོད༔ འབྱུང་བཞིའི་ཁམས་ཉམས་དཔལ་དང་གཡང་རྣམས་རྒུད༔ བཀྲེས་འཕོང་དབུལ་བའི་ལས་ཀྱི་རབ་གདུངས་པས༔ ཁྱོད་མིན་རེ་ས་གཞན་ན་མ་མཆིས་ལགས༔ ཐུགས་བསྐྱེད་དགོངས་ཤིག་ཡུམ་ཆེན་རྣམ་པ་བཞི༔ ཐུགས་དམ་བསྐུལ་ལོ་ཐུགས་རྗེའི་འོད་ཟེར་གྱིས༔ དང་པོ་སྤྱི་ཕུད་སྟོང་གི་འཇིག་རྟེན་དང་༔ སོགས་འགྲེས་སྦྱར༴ རྣམ་སྲས་རིགས་བཞིའི་གཡང་འགུགས༔ ཧཱུྃ༔ ལྷག་པའི་ལྷ་མཆོག་སྐུ་བཞི་རིགས་བཞིའི་བདག༔ ཞི་བའི་ལས་མཛད་ཕྱྭ་གཡང་བར་ཆད་སེལ༔ རྒྱས་པའི་ལས་མཛད་ཕྱྭ་གཡང་གོང་དུ་སྤེལ༔ དབང་གི་ལས་མཛད་ཕྱྭ་གཡང་དབང་དུ་སྡུད༔ དྲག་པོའི་ལས་མཛད་བསེ་རགས་འབྱུང་པོ་ཟློག༔ གང་འདུལ་འཕྲིན་ལས་རྣམ་བཞིས་བསྟན་འགྲོ་སྐྱོང་༔ མོས་པ་ཇི་ལྟར་ལྡན་པའི་འགྲོ་བ་ལ༔ དངོས་གྲུབ་དེར་མཐུན་མི་ཟད་ཆར་དུ་འབེབས༔ ཡིད་བཞིན་ནོར་བདག་དབང་གི་རྒྱལ་ཆེན་བཞི༔ ཟད་མི་ཤེས་པའི་དངོས་གྲུབ་དཔལ་དགུའི་མཛོད༔ བསྟན་དང་འགྲོ་བའི་དབུལ་བ་སེལ་བའི་ལྷ༔ མོས་པ་གསུམ་བསྐྱེད་དཀའ་བ་དང་བླངས་ཏེ༔ ཕྱི་ནང་མཆོད་རྫས་བསྐང་རྫས་སྒྲུབ་པའི་རྫས༔ རྟེན་རྫས་ཀ་ཆ་དཀོར་གསུམ་སྤྱན་གཟིགས་བཀྲམ༔ ཕྱྭ་དང་གཡང་གི་རྟེན་དང་རྫས་རྣམས་བསགས༔ དབུལ་ཞིང་ཕོངས་པའི་ཉམ་ཐག་ང་རོ་ཡིས༔ རིགས་བཞིའི་མགོན་པོར་སྙིང་ནས་འབོད་པ་དགོངས༔ སངས་རྒྱས་བསྟན་པ་ལུང་གི་ལྷག་མའི་མཐའ༔ སེམས་ཅན་རྣམས་ཀྱིས་ཉོན་མོངས་འཆོལ་ཉོག་སྤྱོད༔ འབྱུང་བཞིའི་ཁམས་ཉམས་དཔལ་དང་གཡང་རྣམས་རྒུད༔ བཀྲེས་འཕོང་དབུལ་བའི་ལས་ཀྱི་རབ་གདུངས་པས༔ ཁྱེད་མིན་རེ་ས་གཞན་ན་མ་མཆིས་ལགས༔ ཐུགས་བསྐྱེད་དགོངས་ཤིག་རྒྱལ་ཆེན་རྣམ་པ་བཞི༔ ཐུགས་དམ་བསྐུལ་ལོ་ཐུགས་རྗེའི་འོད་ཟེར་གྱིས༔ དང་པོ་སྤྱི་ཕུད་སྟོང་གི་འཇིག་རྟེན་དང་༔ སོགས་འགྲེས་སྦྱར༴ དེ་ནས་ཛམ་ལ་རིགས་བཞིའི་གཡང་འགུགས༔ ཧཱུྃ༔ རྒྱལ་པོ་ཆེན་པོ་རྣམ་མང་ཐོས་སྲས་ཀྱི༔ སྐུ་ཡི་སྲས་མཆོག་མགོན་པོ་ཛམ་བྷ་ལ༔ དཀར་སེར་དམར་ནག་འདོད་དགུའི་ནོར་གྱི་མཛོད༔ དཀོར་མཛོད་རིམ་དགུའི་དཔལ་དགུ་གཡང་གི་བདག༔ ཟད་མི་ཤེས་པའི་དཔལ་འབྱོར་ཆར་དུ་འབེབས༔ བསྟན་འགྲོའི་དབུལ་བ་སེལ་བའི་ལྷ་གཅིག་པུ༔ ནོར་བདག་ཡིད་བཞིན་ནོར་བུ་ཛམ་བྷ་ལ༔ མོས་པ་གསུམ་བསྐྱེད་དཀའ་བ་དང་བླངས་ཏེ༔ ཕྱི་ནང་མཆོད་རྫས་བསྐང་རྫས་སྒྲུབ་པའི་རྫས༔ རྟེན་རྫས་ཀ་ཆ་དཀོར་གསུམ་སྤྱན་གཟིགས་བཀྲམ༔ ཕྱྭ་དང་གཡང་གི་རྫས་དང་རྟེན་རྣམས་བསགས༔ དབུལ་ཞིང་འཕོང་པའི་ཉམ་ཐག་ང་རོ་ཡིས༔ མགོན་པོ་ཁྱོད་ལ་སྙིང་ནས་འབོད་པ་དགོངས༔ སངས་རྒྱས་བསྟན་པ་ལུང་གི་ལྷག་མའི་མཐའ༔ སེམས་ཅན་རྣམས་ཀྱིས་ཉོན་མོངས་འཆོལ་ཉོག་སྤྱོད༔ འབྱུང་བའི་ཁམས་ཉམས་དཔལ་དང་གཡང་རྣམས་རྒུད༔ བཀྲེས་འཕོང་དབུལ་བའི་ལས་ཀྱིས་རབ་གདུངས་བས༔ ཁྱོད་མིན་རེ་ས་གཞན་ན་མ་མཆིས་ལགས༔ ཐུགས་བསྐྱེད་དགོངས་ཤིག་མགོན་པོ་ཛམ་བྷ་ལ༔ ཐུགས་དམ་བསྐུལ་ལོ་ཐུགས་རྗེའི་འོད་ཟེར་གྱི༔ དང་པོ་སྤྱི་ཕུད་སྟོང་གི་འཇིག་རྟེན་དང་༔ སོགས་འགྲེས༴ ཧཱུྃ༔ རྒྱལ་པོ་ཆེན་པོ་རྣམ་མང་ཐོས་སྲས་ཀྱི༔ བཀའ་ཡི་ལུང་འཛིན་ནོར་སྐྱོང་དེད་དཔོན་བརྒྱད༔ གནོད་སྦྱིན་འབུམ་སྡེའི་ཚོགས་ལ་དབང་བསྒྱུར་ཞིང་༔ ས་སྐྱོང་ཡོན་ཏན་ཐམས་ཅད་འབྱུང་བའི་དཔལ༔ འཕྲིན་ལས་མ་ལུས་བསྒྲུབ་པའི་མྱུར་མགྱོགས་ཅན༔ རིག་སྔགས་འཆང་ཆེན་ལྷ་ཡི་དྲི་ཆེན་དང་༔ གནོད་སྦྱིན་ཀུན་རྒྱུ་བུམ་པའི་ལྟོ་ཅན་དང་༔ གནོད་སྦྱིན་འབྲོག་གནས་གནོད་སྦྱིན་རྟ་ཚེ་དང་༔ ཀུན་དྷ་ལི་དང་ཡང་དག་རྒྱལ་བ་སྟེ༔ ཟད་མི་ཤེས་པའི་དཔལ་འབྱོར་ཆར་དུ་འབེབས༔ བསྟན་འགྲོའི་དབུལ་བ་སེལ་བའི་ལྷ་གཅིག་པུ༔ ནོར་བདག་སྐྱ་བརྒྱད་མ་ལུས་བྲན་གཡོག་དགོངས༔ མོས་པ་གསུམ་བསྐྱེད་དཀའ་བ་དང་བླངས་ཏེ༔ ཕྱི་ནང་མཆོད་རྫས་བསྐང་རྫས་སྒྲུབ་པའི་རྫས༔ བརྟེན་རྫས་ཀ་ཆ་དཀོར་གསུམ་སྤྱན་གཟིགས་བཀྲམ༔ ཕྱྭ་དང་གཡང་གི་རྫས་དང་རྟེན་རྣམས་བསགས༔ དབུལ་ཞིང་འཕོང་པའི་ཉམ་ཐག་ང་རོ་ཡིས༔ ནོར་སྐྱོང་བརྒྱད་ལ་སྙིང་ནས་འབོད་པ་དགོངས༔ སངས་རྒྱས་བསྟན་པ་ལུང་གི་ལྷག་མའི་མཐའ༔ སེམས་ཅན་རྣམས་ཀྱིས་ཉོན་མོངས་འཆོལ་ཉོག་སྤྱོད༔ འབྱུང་བའི་ཁམས་ཉམས་དཔལ་དང་གཡང་རྣམས་རྒུད༔ བཀྲེས་འཕོང་དབུལ་བའི་ལས་ཀྱིས་རབ་གདུངས་པས༔ ཁྱོད་མིན་རེ་ས་གཞན་ན་མ་མཆིས་ལགས༔ ཐུགས་བསྐྱེད་དགོངས་ཤིག་ནོར་སྐྱོང་སྐྱ་བརྒྱད་ཚོགས༔ ཐུགས་དམ་བསྐུལ་ལོ་ཐུགས་རྗེའི་འོད་ཟེར་གྱིས༔ དང་པོ་སྤྱི་ཕུད་སྟོང་གི་འཇིག་རྟེན་དང་༔ སོགས་འགྲེས་སྦྱར༴ ཧཱུྃ༔ རྒྱལ་པོ་ཆེན་པོ་རྣམ་མང་ཐོས་སྲས་ཀྱི༔ བཀའ་ཡི་འཁོར་ཚོགས་ཀླུ་ཡི་དེད་དཔོན་ནི༔ ནོར་སྐྱོང་རྒྱལ་པོ་དུང་སྐྱོང་རྒྱལ་པོ་དང་༔ པདྨ་རྒྱལ་དང་རིགས་ལྡན་རྒྱལ་པོ་དང་༔ སྟོབས་ཆེན་རྒྱལ་པོ་པདྨ་རྒྱལ་པོ་དང་༔ འཇོག་པོ་རྒྱལ་པོ་པད་ཆེན་རྒྱལ་པོ་དང་༔ མཐའ་ཡས་ཀླུ་ཡི་ཁམས་ལ་དབང་བསྒྱུར་ཞིང་༔ ནོར་དང་ནོར་བུ་རིན་ཆེན་སྣ་ཚོགས་ནི༔ གྲམ་ལྟར་བརྡལ་ཞིང་ནམ་མཁའི་སྐར་ལྟར་བཀྲ༔ འདོད་ཡོན་འབྱོར་པ་དཔལ་དང་གཡང་དགུ་ཆེ༔ སྟོབས་དང་གཟི་ལྡན་འཁོར་མང་ཚེ་ཡང་བརྟན༔ ཟད་མི་ཤེས་པའི་དཔལ་འབྱོར་ཆར་དུ་འབེབས༔ བསྟན་འགྲོའི་དབུལ་བ་སེལ་བའི་དཔལ་གཅིག་པུ༔ ནོར་བདག་ཡིད་བཞིན་ནོར་བུ་ཀླུ་ཆེན་བརྒྱད༔ མོས་པ་གསུམ་བསྐྱེད་དཀའ་བ་དང་བླངས་ཏེ༔ ཕྱི་ནང་མཆོད་རྫས་བསྐང་རྫས་སྒྲུབ་པའི་རྫས༔ བརྟེན་རྫས་ཀ་ཆ་དཀོར་གསུམ་སྤྱན་གཟིགས་བཀྲམ༔ ཕྱྭ་དང་གཡང་གི་རྫས་དང་རྟེན་རྣམས་བསགས༔ དབུལ་ཞིང་འཕོང་པའི་ཉམ་ཐག་ང་རོ་ཡིས༔ ཀླུ་ཆེན་བརྒྱད་ལ་སྙིང་ནས་འབོད་པ་དགོངས༔ སངས་རྒྱས་བསྟན་པ་ལུང་གི་ལྷག་མའི་མཐའ༔ སེམས་ཅན་རྣམས་ཀྱིས་ཉོན་མོངས་འཆོལ་ཉོག་སྤྱོད༔ འབྱུང་བའི་ཁམས་ཉམས་དཔལ་དང་གཡང་རྣམས་རྒུད༔ བཀྲེས་ཕོངས་དབུལ་བའི་ལས་ཀྱིས་རབ་གདུངས་པས༔ ཁྱོད་མིན་རེ་ས་གཞན་ན་མ་མཆིས་ལགས༔ ཐུགས་བསྐྱེད་དགོངས་ཤིག་ཀླུ་ཆེན་རྣམ་པ་བརྒྱད༔ ཐུགས་དམ་བསྐུལ་ལོ་ཐུགས་རྗེའི་འོད་ཟེར་གྱིས༔ དང་པོ་སྤྱི་ཕུད་སྟོང་གི་འཇིག་རྟེན་དང་༔ སོགས་འགྲེས་སྦྱར༴ ཧཱུྃ༔ རྒྱལ་པོ་ཆེན་པོ་རྣམ་མང་ཐོས་སྲས་ཀྱི༔ བཀའ་དང་བསྟན་སྐྱོང་འཕྲིན་ལས་རྣམ་བཞིའི་བདག༔ མགོན་པོ་དཀར་པོ་བསམ་འཕེལ་ནོར་བུའི་དཔལ༔ ཚོགས་བདག་སེར་མོ་འདོད་འབྱུང་ཡིད་བཞིན་མཛོད༔ དབང་ཕྱུག་དམར་པོ་ཁམས་གསུམ་སྲིད་གསུམ་བདག༔ ཙི་ཊ་དམར་པོས་བགེགས་དང་ནོར་དབྱིག་ཟློག༔ འདི་ལྟར་འཕྲིན་ལས་བཀའ་སྐྱོང་སྲུང་མ་ཆེ༔ དུས་གསུམ་རྒྱལ་བའི་དམ་ཚིག་འཆང་བའི་ལྷ༔ ཟད་མི་ཤེས་པའི་དཔལ་འབྱོར་ཆར་དུ་འབེབས༔ བསྟན་འགྲོའི་དབུལ་བ་སེལ་བའི་ལྷ་གཅིག་པུ༔ བཀའ་སྐྱོང་ནོར་གཡང་སྲུང་བའི་སྒོ་བ་བཞི༔ མོས་པ་གསུམ་བསྐྱེད་དཀའ་བ་དང་བླངས་ཏེ༔ ཕྱི་ནང་མཆོད་རྫས་བསྐང་རྫས་སྒྲུབ་པའི་རྫས༔ བརྟེན་རྫས་ཀ་ཆ་དཀོར་གསུམ་སྤྱན་གཟིགས་བཀྲམ༔ ཕྱྭ་དང་གཡང་གི་རྫས་དང་བརྟེན་རྣམས་བསགས༔ དབུལ་ཞིང་ཕོངས་པའི་ཉམ་ཐག་ང་རོ་ཡིས༔ བཀའ་སྐྱོང་སྡེ་བཞིར་སྙིང་ནས་འབོད་པ་དགོངས༔ སངས་རྒྱས་བསྟན་པ་ལུང་གི་ལྷག་མའི་མཐའ༔ སེམས་ཅན་རྣམས་ཀྱིས་ཉོན་མོངས་འཆོལ་ཉོག་སྤྱོད༔ འབྱུང་བའི་ཁམས་ཉམས་དཔལ་དང་གཡང་རྣམས་རྒུད༔ བཀྲེས་འཕོང་དབུལ་བའི་ལས་ཀྱིས་རབ་གདུངས་པས༔ ཁྱེད་མིན་རེ་ས་གཞན་ན་མ་མཆིས་ལགས༔ ཐུགས་བསྐྱེད་དགོངས་ཤིག་བཀའ་སྐྱོང་སྡེ་བཞིའི་ཚོགས༔ ཐུགས་དམ་བསྐུལ་ལོ་ཐུགས་རྗེའི་འོད་ཟེར་གྱིས༔ དང་པོ་སྤྱི་ཕུད་སྟོང་གི་འཇིག་རྟེན་དང་༔ སོགས་འགྲེས་སྦྱར༴ སྟེང་ཕྱོགས་ལྷ་ཁམས་རྣམས་ཀྱི་གཡང་འགུགས་ནི༔ ཧཱུྃ༔ གླིང་བཞིའི་དབུས་ནས་མངོན་མཐོ་རྟ་རྣ་རི༔ རི་བོ་ཆེན་པོ་གནམ་མདུད་ཅེས་བྱ་དང་༔ རི་བོ་ཆེན་པོ་མུ་ཁྱུད་འཛིན་པའི་རི༔ རི་བོ་ཆེན་པོ་གཉའ་ཤིང་འཛིན་རི་དང་༔ རི་བོ་ཆེན་པོ་གཤོལ་མདའ་འཛིན་པའི་རི༔ རི་བོ་ཆེན་པོ་སེང་ལྡེང་ཅན་གྱི་རི༔ རི་བོ་ཆེན་པོ་བ་གམ་ལྡན་ལ་སོགས༔ རིན་ཆེན་སྣ་ཚོགས་གསེར་གྱི་རི་བདུན་དང་༔ ཡན་ལག་བརྒྱད་ལྡན་ཆུ་ཡི་རྒྱ་མཚོ་དང་༔ ལན་ཚྭས་ཁྱབ་པའི་རྒྱ་མཚོ་ཆེན་པོ་དང་༔ བདུད་རྩི་ཆང་གི་རྒྱ་མཚོ་ཆེན་པོ་དང་༔ རང་བྱུང་འོ་མའི་རྒྱ་མཚོ་ཆེན་པོ་དང་༔ སྙིང་པོ་ཞོ་ཡི་རྒྱ་མཚོ་ཆེན་པོ་དང་༔ འབྲས་བུ་མར་གྱི་རྒྱ་མཚོ་ཆེན་པོ་དང་༔ བཅུད་མཆོག་སྦྲང་རྩིའི་རྒྱ་མཚོ་ཆེན་པོ་སྟེ༔ གསེར་རི་རོལ་མཚོ་ཆེན་པོ་དེ་རྣམས་ལ༔ ལྷུན་གྲུབ་དཔལ་ལ་སྤྱོད་པ་ལྷ་ཡི་རིགས༔ ཀླུ་རིགས་བཞི་དང་ལྔ་སོགས་གང་བཞུགས་དང་༔ དེ་ན་བཞུགས་པ་དཔའ་བོའི་རིགས་རྣམས་དང་༔ དེ་ན་བཞུགས་པ་དཔའ་མོ་མཁའ་འགྲོའི་ཚོགས༔ དེ་ན་བཞུགས་པ་རིག་པ་འཛིན་པའི་སྡེ༔ དེ་ན་བཞུགས་པ་ནོར་ལྷ་གནོད་སྦྱིན་རིགས༔ དེ་ན་བཞུགས་པ་དྲང་སྲོང་རིགས་ལ་སོགས༔ ཕྱི་ནང་སྣོད་བཅུད་བསོད་ནམས་དཔལ་དང་སྟོབས༔ འབྱུང་བའི་དྭངས་མ་འདོད་ཡོན་ལྔ་ཡི་བཅུད༔ ཚེ་དཔལ་ཏིང་འཛིན་ཉམས་དང་རྟོགས་པའི་རྩལ༔ དེ་རིང་འོད་ཟེར་ཕྱྭ་ཡི་དཔལ་དུ་སྡུས༔ དེ་རིང་འོད་ཟེར་གཡང་དང་བཅུད་དུ་ཁུག༔ ཕྱྭ་གཡང་མཆོག་དང་ཐུན་མོང་དངོས་གྲུབ་སྩོལ༔ ལྷ་མིན་གྱི་གཡང་འགུགས་ནི༔ ཧཱུྃ༔ གསེར་ལྡན་གྲོང་ཁྱེར་རིན་ཆེན་སྣ་ཚོགས་མཁར༔ ཕུན་ཚོགས་གླིང་ཆེན་རྩ་གསུམ་ལྷ་ལ་འགྲན༔ མ་རྨོས་འབྲུ་དང་འདོད་འཇོ་དཔག་བསམ་ཤིང་༔ ཁྲུས་ཀྱི་རྫིང་བུ་ལ་སོགས་འདོད་ཡོན་ལྔ༔ རིན་ཆེན་རྣམས་དང་དཔལ་འབྱོར་བཀྲ་ཤིས་ཚོགས༔ དེ་ན་ལྷ་མིན་དབང་པོ་རྣམ་པར་རྒྱལ༔ ཚེ་དཔལ་ལྷ་ཡི་ཁམས་ཀྱི་རིགས་རྣམས་དང་༔ སྟོབས་ཆེན་གནོད་སྦྱིན་ཁམས་ཀྱི་རིགས་རྣམས་དང་༔ གདུག་པ་ཀླུ་ཡི་ཁམས་ཀྱི་རིགས་རྣམས་དང་༔ གསོད་བྱེད་སྲིན་པོའི་ཁམས་ཀྱི་རིགས་རྣམས་དང་༔ རྩུབ་འགྱུར་བདུད་ཀྱི་ཁམས་ཀྱི་རིགས་ལ་སོགས༔ ཚེ་དཔལ་ལོངས་སྤྱོད་དགའ་བདེ་བསམ་མི་ཁྱབ༔ ཚངས་ཆེན་རིགས་ལྔ་ཕྱོགས་བཅུ་གང་དག་ན༔ དེ་འདྲའི་ལྷ་མིན་འཇིག་རྟེན་ཅི་སྲིད་ཀྱི༔ ཕྱི་སྣོད་ནང་བཅུད་བསོད་ནམས་དཔལ་དང་སྟོབས༔ ཚེ་དང་ཏིང་འཛིན་ཉམས་དང་རྟོགས་པའི་རྩལ༔ དེ་རིང་འོད་ཟེར་ཕྱྭ་ཡི་དཔལ་དུ་སྡུས༔ དེ་རིང་འོད་ཟེར་གཡང་དང་བཅུད་དུ་ཁུག༔ ཕྱྭ་གཡང་མཆོག་དང་ཐུན་མོང་དངོས་གྲུ་སྩོལ༔ ཧཱུྃ༔ རིན་ཆེན་རི་བོ་ཆེན་པོའི་ངོས་ཡངས་ལ༔ ལག་ན་ཡོལ་གོ་འཛིན་པའི་ལྷ་རིགས་དང་༔ མེ་ཏོག་པདྨའི་ཕྲེང་བ་ཅན་གྱི་ལྷ༔ སྦྲང་ཆང་བཏུང་བས་མྱོས་པའི་ལྷ་རྣམས་དང་༔ ཡུལ་འཁོར་བསྲུང་དང་རྒྱལ་པོ་འཕགས་སྐྱེས་པོ༔ སྤྱན་མི་བཟང་དང་རྣམ་མང་ཐོས་སྲས་ཏེ༔ རྒྱལ་པོ་ཆེན་པོ་སྡེ་བཞི་ལྷ་ཡི་ཚོགས༔ དེ་ལྟར་སྟེང་ཕྱོགས་ལྷ་ཡི་ཞིང་ཁམས་ན༔ ཚེ་ཡང་དཔག་མེད་བསོད་ནམས་དཔག་ཏུ་མེད༔ ལོངས་སྤྱོད་དཔག་མེད་ཡིད་ལ་དྲན་པ་ཚང་༔ དེ་འདྲའི་ལྷ་ཁམས་ཚངས་ཆེན་ནམ་མཁའི་མཐའ༔ གང་དག་ཇི་སྙེད་ལྷ་ཁམས་རྒྱ་མཚོ་ཡི༔ ཕྱི་ནང་སྣོད་བཅུད་བསོད་ནམས་དཔལ་དང་སྟོབས༔ ཚེ་དང་ཏིང་འཛིན་ཉམས་དང་རྟོགས་པའི་རྩལ༔ དེ་རིང་འོད་ཟེར་ཕྱྭ་ཡི་དཔལ་དུ་སྡུས༔ དེ་རིང་འོད་ཟེར་གཡང་དང་བཅུད་དུ་ཁུག༔ ཕྱྭ་གཡང་མཆོག་དང་ཐུན་མོང་དངོས་གྲུབ་སྩོལ༔ ཧཱུྃ༔ རིན་ཆེན་རི་བོ་ཆེན་པོའི་སྟེང་ཕྱོགས་ལ༔ ལྷ་ཡི་དབང་པོ་ཉེ་དབང་རྩ་གསུམ་དང་༔ གླང་པོ་ཆེན་པོ་ས་བསྲུང་ཞེས་བྱ་བ༔ གསེར་གྱི་མགོ་བོ་སུམ་ཅུ་རྩ་གཉིས་ལ༔ གཡུ་ཡི་མགོ་བོ་གཅིག་དང་རྩ་གསུམ་ལྡན༔ མ་རྨོས་ལོ་ཏོག་འབྲུ་རིགས་སྣ་ཚོགས་དང་༔ འདོད་འཇོའི་བ་མོ་རིན་པོ་ཆེ་ཡི་རིགས༔ བརྫུས་ཏེ་སྐྱེས་པ་རྣམ་པ་སྣ་ཚོགས་དང་༔ དཔག་བསམ་ཤིང་ལ་ལོ་འདབ་འབྲས་ཀྱི་རིགས༔ མངར་སྐྱུར་རེག་འཇམ་སྲབ་ཡང་གོས་འབྱུང་མང་༔ བསིལ་ན་ཚ་དང་ཚ་ན་བསིལ་ངད་ལྡན༔ ཡན་ལག་བརྒྱད་ལྡན་ཁྲུས་རྫིང་སྣ་ཚོགས་དང་༔ གཟུགས་སྒྲ་དྲི་རོ་རེག་བྱ་འདོད་ཡོན་དཔལ༔ དྲན་པས་ཡིད་ཀྱི་གདུང་སེལ་མཆོད་པའི་སྤྲིན༔ འདོད་ཡོན་ལོངས་སྤྱོད་རྣམ་པ་སྣ་ཚོགས་དང་༔ གསེར་དངུལ་ཟངས་ལྕགས་རིན་ཆེན་འབར་བའི་རྒྱུན༔ གོ་དང་མཚོན་ཆ་རྣམ་པ་སྣ་ཚོགས་ཀྱི༔ བགྲོད་པས་གཏམས་ཤིང་འཇིགས་སྐྱོབ་རྩུབ་འགྱུར་གླིང་༔ ཡིད་འོང་ལང་ཚོའི་དཔལ་དང་གཟི་འབར་བའི༔ ལྷ་ཡི་བུ་དང་བུ་མོས་གང་བ་ལ༔ པདྨ་པདྨ་སྟོང་ལྡན་ཀུ་མུ་ཏ༔ རིན་ཆེན་རྒྱན་འཕྲེང་གདུ་བུས་བཀླུབ་པའི་ཚལ༔ ཉམས་ཡང་བདེ་ལ་མཚོ་གླིང་མེ་ཏོག་བཀྲ༔ རིན་ཆེན་ཁང་བརྩེགས་དྲ་བ་དྲ་ཕྱེད་འཕྱོ༔ དྲི་བསུང་ངད་ལྡན་བསིལ་དངས་ཀུན་དགའ་ན༔ བལྟ་བགད་ལག་བཅང་བདེ་དགའ་སྤྱོད་པའི་གླིང་༔ རིན་ཆེན་རྣམ་མང་ལེབ་ལེབ་ཨ་མོ་ལིག༔ དབུས་ན་འདོད་འབྱུང་བུམ་པ་ནོར་བུས་བརྒྱན༔ མཐའ་ནས་རིན་ཆེན་མུ་ཁྱུད་འཁོར་ལོ་ཅན༔ བདེ་ལ་ཡངས་པ་རབ་ཏུ་དགའ་བའི་ཚལ༔ དཔག་མེད་རྒྱུད་བསྐུལ་རང་གྲགས་རོལ་མོའི་སྒྲ༔ ནམ་མཁའི་གློག་ཀྱང་མཇའ་ལྔ་འོད་དུ་འཁྱུག༔ ཆར་ཀྱང་སྦྲང་ཆར་དལ་ལ་ཟིལ་བུར་འབབས༔ འབྲུག་གི་སྒྲ་ཡང་ཏིང་ཏིང་ཤག་དང་ནི༔ པི་ཝཾ་སྒྲ་ལྟར་སྙན་ལ་ཡིད་ཀྱང་འཕྲོག༔ དེ་ལྟར་རྩ་གསུམ་ལྷ་ཡི་ཞིང་ཁམས་ན༔ ཚེ་ཡང་དཔག་མེད་བསོད་ནམས་དཔག་ཏུ་མེད༔ ལོངས་སྦྱོད་མཁོ་དགུ་ཡིད་ལ་དྲན་པས་ཚང་༔ དེ་འདྲའི་ལྷ་ཁམས་ཚངས་ཆེན་ནམ་མཁའི་མཐའ༔ གང་དག་ཇི་སྙེད་ལྷ་ཁམས་རྒྱ་མཚོ་ཡི༔ ཕྱི་ནང་་སྣོད་བཅུད་བསོད་ནམས་དཔལ་དང་སྟོབས༔ ཚེ་དང་ཏིང་འཛིན་ཉམས་དང་རྟོགས་པའི་རྩལ༔ དེ་རིང་འོད་ཟེར་ཕྱྭ་ཡི་དཔལ་དུ་སྡུས༔ དེ་རིང་འོད་ཟེར་གཡང་དང་བཅུད་དུ་ཁུག༔ ཕྱྭ་གཡང་མཆོག་དང་ཐུན་མོང་དངོས་གྲུབ་སྩོལ༔ ཧཱུྃ༔ རྩ་གསུམ་ལྷ་ཡི་སྟེང་ཕྱོགས་ནམ་མཁའ་ལ༔ འཐབ་བྲལ་ཞེས་བྱའི་ལྷ་ཡི་ཞིང་ཁམས་དང་༔ དགའ་ལྡན་ཞེས་བྱའི་ལྷ་ཡི་ཞིང་ཁམས་དང་༔ འཕྲུལ་དགའ་ཞེས་བྱའི་ལྷ་ཡི་ཞིང་ཁམས་དང་༔ གཞན་འཕྲུལ་དབང་བྱེད་ཞེས་བྱའི་ཞིང་ཁམས་ཏེ༔ དེ་ལྟར་སྟེང་ཕྱོགས་ལྷ་ཡི་ཞིང་ཁམས་ནས༔ ཚེ་ཡང་དཔག་མེད་བསོད་ནམས་དཔག་ཏུ་མེད༔ ལོངས་སྤྱོད་མཁོ་དགུ་ཡིད་ལ་དྲན་པས་ཚང་༔ དེ་འདྲའི་ལྷ་ཁམས་ཚངས་ཆེན་ནམ་མཁའི་མཐའ༔ གང་དག་ཇི་སྙེད་ལྷ་ཁམས་རྒྱ་མཚོ་ཡི༔ ཕྱི་ནང་སྣོད་བཅུད་བསོད་ནམས་དཔལ་དང་སྟོབས༔ ཚེ་དང་ཏིང་འཛིན་ཉམས་དང་རྟོགས་པའི་རྩལ༔ དེ་རིང་འོད་ཟེར་ཕྱྭ་ཡི་དཔལ་དུ་སྡུས༔ དེ་རིང་འོད་ཟེར་གཡང་དང་བཅུད་དུ་ཁུག༔ ཕྱྭ་གཡང་མཆོག་དང་ཐུན་མོང་དངོས་གྲུབ་སྩོལ༔ ཧཱུྃ༔ དེ་ཡི་སྟེང་ན་ཚངས་རིས་ཞིང་ཁམས་དང་༔ ཚངས་པ་ཆེན་པོ་མདུན་ན་འདོན་གྱི་ལྷ༔ ཚངས་ཆེན་ཞེས་བྱའི་ལྷ་ཡི་ཞིང་ཁམས་དང་༔ འོད་ཆུང་ཞེས་བྱའི་ལྷ་ཡི་ཞིང་ཁམས་ཏེ༔ དེ་ལྟར་སྟེང་ཕྱོགས་ལྷ་ཡི་ཞིང་ཁམས་ན༔ ཚེ་ཡང་དཔག་མེད་བསོད་ནམས་དཔག་ཏུ་མེད༔ སོགས༴ ཧཱུྃ༔ དེ་ཡི་སྟེང་ན་ཚད་མེད་འོད་ཀྱི་ལྷ༔ འོད་གསལ་ཞེས་བྱའི་ལྷ་ཡི་ཞིང་མཆོག་དང་༔ དགེ་ཆུང་ཞེས་ནི་བྱ་བའི་ཞིང་ཁམས་དང་༔ ཚད་མེ་དགེ་བའི་ལྷ་ཡི་ཞིང་ཁམས་ཏེ༔ དེ་ལྟར་སྟེང་ཕྱོགས་ལྷ་ཡི་ཞིང་ཁམས་ན༔ ཚེ་ཡང་དཔག་མེད་སོགས༴ ཧཱུྃ༔ དེ་ཡི་སྟེང་ན་དགེ་རྒྱས་ཞེས་བྱའི་ལྷ༔ སྤྲིན་མེད་འོད་ཅེས་བྱ་བའི་ཞིང་ཁམས་དང་༔ བསོད་ནམས་སྐྱེས་ཞེས་བྱ་བའི་ཞིང་ཁམས་མཆོག༔ འབྲས་བུ་ཆེ་ཞེས་བྱ་བའི་ཞིང་ཁམས་ཏེ༔ དེ་ལྟར་སྟེང་ཕྱོགས་ལྷ་ཡི་ཞིང་ཁམས་ན༔ ཚེ་ཡང་དཔག་མེད༴ སོགས༴ ཧཱུྃ༔ དེ་ཡི་སྟེང་ན་མི་ཆེ་བ་ཡི་ལྷ༔ མི་གདུང་བ་ཞེས་བྱ་བའི་ཞིང་ཁམས་དང་༔ གྱ་ནོམ་སྣང་ཞེས་བྱ་བའི་ཞིང་གི་མཆོག༔ ཤིན་ཏུ་མཐོན་པོ་ཞེས་བྱའི་ཞིང་ཁམས་ཏེ༔ དེ་ལྟར་སྟེང་ཕྱོགས་ལྷ་ཡི་ཞིང་ཁམས་ན༔ ཚེ་ཡང་དཔག་མེད༴ སོགས༴ ཧཱུྃ༔ དེ་ཡི་སྟེང་ན་འོག་མིན་ཞིང་ཁམས་ཞེས༔ དང་པོའི་རྒྱལ་པོ་ཆེན་པོ་སྡེ་བཞི་ནས༔ ཤིན་ཏུ་མཐོན་པོ་མན་ཆད་ལྷ་ཁམས་ཀྱི༔ བསོད་ནམས་མངའ་ཐང་ཐམས་ཅད་དེ་ན་ཚང་༔ ཚེ་དང་དཔལ་འབྱོར་ཐམས་ཅད་དེ་ན་ཚང་༔ སྟོབས་དང་གཟི་བརྗིད་ཐམས་ཅད་དེ་ན་ཚང་༔ བཀྲ་ཤིས་བདེ་ལེགས་ཐམས་ཅད་དེ་ན་ཚང་༔ དེ་ན་ཁམས་གསུམ་སྲིད་གསུམ་དབང་པོའི་ཏོག༔ གཞོན་ནུ་ཆེན་པོ་རྩེ་གསུམ་འཆང་བའི་ལྷ༔ བསོད་ནམས་དཔལ་གཡང་ཐམས་ཅད་འབྱུང་བའི་མགོན༔ དབང་གི་མགོན་པོ་ཆེན་པོ་དེ་ན་བཞུགས༔ དེ་ལྟར་སྟེང་ཕྱོགས་ལྷ་ཡི་ཞིང་ཁམས་ན༔ ཚེ་ཡང་དཔག་མེད༴ སོགས༴ ཧཱུྃ༔ འོག་མིན་ཞིང་མཆོག་སྟེང་གི་ནམ་མཁའ་ལ༔ རྣམ་ཤེས་མཐའ་ཡས་ཞེས་བྱའི་ལྷ་ཁམས་དང་༔ ནམ་མཁའ་མཐའ་ཡས་ཞེས་བྱའི་ལྷ་ཁམས་དང་༔ ཅུང་ཟད་མེད་པ་ཞེས་བྱའི་ལྷ་ཁམས་དང་༔ ཡོད་མིན་མེད་མིན་ཞེས་བྱའི་ལྷ་ཁམས་དང་༔ དེ་ལྟར་སྟེང་ཕྱོགས་ལྷ་ཡི་ཞིང་ཁམས་ན༔ ཚེ་ཡང་དཔག་མེད་བསོད་ནམས་དཔག་ཏུ་མེད༔ ལོངས་སྤྱོད་མཁོ་དགུ་ཡིད་ལ་དྲན་པས་ཚང་༔ དེ་འདྲའི་ལྷ་ཁམས་ཚངས་ཆེན་ནམ་མཁའི་མཐའ༔ གང་དག་ཇི་སྙེད་ལྷ་ཁམས་རྒྱ་མཚོ་དང་༔ ཕྱི་ནང་སྣོད་བཅུད་བསོད་ནམས་དཔལ་དང་སྟོབས༔ ཚེ་དང་ཏིང་འཛིན་ཉམས་དང་རྟོགས་པའི་རྩལ༔ དེ་རིང་འོད་ཞེར་ཕྱྭ་ཡི་རྣམ་པར་སྡུས༔ དེ་རིང་འོད་ཟེར་གཡང་དང་བཅུད་དུ་ཁུག༔ ཕྱྭ་གཡང་མཆོག་དང་ཐུན་མོང་དངོས་གྲུབ་སྩོལ༔ སོགས༴ ཤར་ཕྱོགས་ཀྱི་གཡང་འབོད་ནི༔ ཧཱུྃ༔ རི་བོ་ཆེན་པོའི་ཤར་གྱི་ཕྱོགས་རོལ་ན༔ ལུས་དང་ལུས་འཕགས་གླིང་ཕྲན་གླིང་མཆོག་གསུམ༔ ཟླ་བའི་གླིང་དང་གྲ་བའི་གླིང་དང་ནི༔ བསམ་འཕེལ་གླིང་དང་གླིང་ཆུང་གསུམ་ལ་སོགས༔ རྗེ་ཡིས་དབང་བསྒྱུར་ཁྲལ་གྱིས་ཆོས་ལ་བཅུག༔ རྩ་བའི་ཁྲིམས་ལྡན་འཕོས་པ་སྤྱི་མཐུན་ལས༔ སྒོང་སྐྱེས་ལུས་འདོམ་ཕྱེད་གཉིས་དཀར་དམར་མདངས༔ འབྲུ་ཡི་ཁ་ཟས་རས་བལ་དཀར་སྔོན་གྱོན༔ དུག་ལྔ་ཤུགས་ཆུང་བཀྲེས་འཕོང་གསོད་གཅོད་མེད༔ ཕྱེད་དང་ཉིས་བརྒྱ་ཚེ་ལ་བར་སྲིད་ཉུང་༔ ནད་གཅོད་ཉུང་དང་བྱུང་ཡང་ཉེ་བར་འཚོ༔ དེ་འདྲའི་གླིང་དང་གླིང་ཕྲན་ཕུན་ཚོགས་སོགས༔ ལྕགས་རི་མུ་ཁྱུད་རྒྱ་མཚོ་དེ་སྲིད་དང་༔ ཚངས་ཆེན་རིགས་ལྔ་ཕྱོགས་བཅུ་སྟོང་གསུམ་གྱི༔ ཤར་ཕྱོགས་འཇིག་རྟེན་རབ་འབྱམས་རྒྱ་མཚོ་ཡི༔ འཁོར་འདས་ལམ་གསུམ་ཚེ་དཔལ་དབང་ཐང་སྟོབས༔ དེ་རིང་ཕྱྭ་འགུགས་དེ་རིང་གཡང་རྣམས་འབོད༔ ཕྱྭ་གཡང་མཆོག་དང་ཐུན་མོང་དངོས་གྲུབ་སྩོལ༔ འབྱུང་བ་ནམ་མཁའི་ཕྱྭ་གཡང་ཕུན་ཚོགས་དཔལ༔ ནམ་མཁའི་སྙིང་པོ་ནམ་མཁའ་དར་ལྔར་བསྟིམ༔ འབྱུང་བ་ཆུ་ཡི་ཕྱྭ་གཡང་ཕུན་ཚོགས་དཔལ༔ ཆུ་ཡི་སྙིང་པོ་ཆུ་ཤེལ་ཆུ་ལ་བསྟིམ༔ འབྱུང་བ་ས་ཡི་ཕྱྭ་གཡང་ཕུན་ཚོགས་དཔལ༔ ས་ཡི་སྙིང་པོ་གསེར་དང་ས་ལ་བསྟིམ༔ འབྱུང་བ་མེ་ཡི་ཕྱྭ་གཡང་ཕུན་ཚོགས་དཔལ༔ མེ་ཡི་སྙིང་པོ་མེ་ཤེལ་མེ་ལ་བསྟིམ༔ འབྱུང་བ་རླུང་གི་ཕྱྭ་གཡང་ཕུན་ཚོགས་དཔལ༔ རླུང་ནོར་སྙིང་པོ་ནེའུ་ལེའི་རྐྱལ་བར་བསྟིམ༔ ཕོ་གཡང་ཕོ་སྲིད་ཕོ་རྩལ་ཕོ་ཡི་སྟོབས༔ ཕོ་གདོང་ཕོ་ཆས་མདའ་བཀྲ་གོ་མཚོན་དང་༔ རྒྱུ་སྦྱོར་ཕོ་ཚོགས་ཕོ་སྐྱེས་རྣམས་ལ་བསྟིམ༔ མོ་གཡང་མོ་སྲིད་མོ་རྩལ་མོ་ཡི་མཛངས༔ མོ་གདོང་མོ་ཆས་འཕང་བཀྲ་སལ་སིལ་རྒྱན༔ རྒྱུ་སྦྱོར་མོ་ཚོགས་མོ་སྐྱེས་རྣམས་ལ་བསྟིམ༔ སྨན་སྤོས་འབྲུ་དང་རིན་ཆེན་དར་ཟབ་གོས༔ ཁ་ཟས་དཔལ་འབྱོར་འདོད་དགུ་ནོར་བུའི་གཡང་༔ བཀྲ་ཤིས་རྟགས་བརྒྱད་རྒྱལ་སྲིད་སྣ་བདུན་དང་༔ གཡང་མཛོད་ཆེན་མོ་ནུ་དགུ་འདི་ལ་བསྟིམ༔ རྐང་བཞི་དུད་འགྲོའི་ཕྱུགས་གཡང་མ་ལུས་པ༔ རྟ་མཆོག་གྱི་ལིང་གཡང་ནོར་གྱི་ལིང་དང་༔ ལྷ་ལུག་གྱི་ལིང་གསུམ་ལ་གཉིས་མེད་བསྟིམ༔ ཁུག་ཡེ་ཁུག་ཡེ་ཕྱྭ་ཁུག་ཡེ༔ ཁུག་ཡེ་ཁུག་ཡེ་གཡང་ཁུག་ཡེ༔ སྡུས་སྡུས་སརྦ་པ་ཤང་ཀུ་རུ་ཡེ་སྭཱ་ཧཱ༔ འཕེལ་འཕེལ་སརྦ་པུཥྟིངྐུ་རུ་ཡེ་སྭཱ་ཧཱ༔ ཧཱུྃ༔ རི་བོ་ཆེན་པོའི་ནུབ་ཀྱི་ཕྱོགས་རོལ་ན༔ བ་ལང་བ་ལང་སྤྱོད་དང་གླིང་མཆོག་གསུམ༔ ཀུན་འབྱུང་གླིང་དང་ལང་ཚོའི་གླིང་དང་ནི༔ སོ་བའི་གླིང་དང་ཕྲེང་བའི་གླིང་ལ་སོགས༔ དགེ་བ་སྤྱི་བསྐུལ་སྦྱིན་པ་རང་རྒྱུད་བཟུང་༔ སྤྱི་མཐུན་ལས་ལ་དྲོད་གཤེར་སྐྱེ་གནས་མང་༔ དཀར་དམར་སེར་མདངས་རས་གོས་སྣལ་ཚོན་གོས༔ འབྲུ་དང་ཤ་ཆང་ཟས་སྐོམ་རིགས་བཞིན་སྤྱོད༔ དུག་ལྔ་ཤུགས་ཆུང་བཀྲེས་ཕོངས་གསོད་གཅོད་མེད༔ ཕྱེད་དང་སུམ་བརྒྱ་ཚེ་ཡི་བར་སྲིད་དཀོན༔ ལུས་འདོམ་ཕྱེད་གསུམ་ནད་གཅོང་འདུ་བ་དཀོན༔ དེ་འདྲའི་གླིང་དང་གླིང་ཕྲན་ཕུན་ཚོགས་སོགས༔ ལྕགས་རི་མུ་ཁྱུད་རྒྱ་མཚོ་དེ་སྲིད་དང་༔ ཚངས་ཆེན་རིགས་ལྔ་ཕྱོགས་བཅུ་སྟོང་གསུམ་གྱི༔ ནུབ་ཕྱོགས་འཇིག་རྟེན་རབ་འབྱམས་རྒྱ་མཚོ་ཡི༔ འཁོར་འདས་ལམ་གསུམ་ཚེ་དཔལ་དབང་ཐང་སྟོབས༔ དེ་རིང་ཕྱྭ་འགུགས་དེ་རིང་གཡང་རྣམས་འབོད༔ ཕྱྭ་གཡང་མཆོག་དང་ཐུན་མོང་དངོས་གྲུབ་སྩོལ༔ འབྱུང་བ་ནམ་མཁའི་ཕྱྭ་གཡང་ཕུན་ཚོགས་དཔལ༔ སོགས་འགྲེས་སྦྱར༴ ཧཱུྃ༔ རི་བོ་ཆེན་པོ་བྱང་གི་ཕྱོགས་རོལ་ན༔ སྒྲ་མི་སྙན་དང་སྒྲ་མི་སྙན་གླིང་མཆོག༔ ཀུན་དགའི་གླིང་དང་བཟང་སྤྱོད་གླིང་དང་ནི༔ ནོར་བུའི་གླིང་དང་དཔལ་འཕེལ་གླིང་ལ་སོགས༔ བདག་མེད་སྟོང་པ་སྒོམ་པ་སྤྱི་མཐུན་ལས༔ བརྫུས་སྐྱེས་ལུས་ཁྲུ་སོ་གཉིས་ལྔ་བརྒྱའི་ཚེ༔ ལོངས་སྤྱོད་དཔག་བསམ་ཤིང་ལས་འདོད་དགུ་འབྱུང་༔ དཀར་སེར་མདངས་ལྡན་བདག་འཛིན་སྡིག་སོགས་མེད༔ བདེ་དགའ་རྒྱ་ཆེ་རྩ་གསུམ་ལྷ་ལ་འཕོ༔ དེ་འདྲའི་གླིང་དང་གླིང་ཕྲན་ཕུན་ཚོགས་སོགས༔ ལྕགས་རི་མུ་ཁྱུད་རྒྱ་མཚོ་དེ་སྲིད་དང་༔ ཚངས་ཆེན་རིགས་ལྔ་ཕྱོགས་བཅུ་སྟོང་གསུམ་གྱི༔ བྱང་ཕྱོགས་འཇིག་རྟེན་རབ་འབྱམས་རྒྱ་མཚོ་ཡི༔ འཁོར་འདས་ལམ་གསུམ་ཚེ་དཔལ་དབང་ཐང་སྟོབས༔ དེ་རིང་ཕྱྭ་འགུགས་དེ་རིང་གཡང་རྣམས་འབོད༔ ཕྱྭ་གཡང་མཆོག་དང་ཐུན་མོང་དངོས་གྲུབ་སྩོལ༔ འབྱུང་བ་ནམ་མཁའི་ཕྱྭ་གཡང་ཕུན་ཚོགས་དཔལ༔ སོགས་འགྲེས༴ ཧཱུྃ༔ རི་བོ་ཆེན་པོའི་ལྷོ་ཡི་ཕྱོགས་རོལ་ན༔ འཛམ་གླིང་རྔ་ཡབ་དང་ནི་རྔ་ཡབ་གཞན༔ གསེར་གླིང་ཟངས་གླིང་ཟླ་བ་ནོར་བུའི་གླིང་༔ འགྲོ་ལྡིང་ཤང་ཤང་སིནྡྷུ་ཤམ་བྷ་ལ༔ སྣ་ཚོགས་ལས་ཀྱི་ས་པ་མངལ་ལས་སྐྱེས༔ སྣ་ཚོགས་་ཁ་ཟས་སྣ་ཚོགས་ལོངས་སྤྱོད་གོས༔ ནད་གཅོང་གདོན་སོགས་སྣ་ཚོགས་ལོ་བརྒྱ་པ༔ ལུས་ཁྲུ་བཞི་པ་སྣ་ཚོགས་མདོག་མཛེས་རྒུད༔ བར་སྲིད་རྣམ་མང་ཡོད་མེད་ཕྱུག་བཀྲེས་མང་༔ དགེ་ཆེ་སྡིག་ལྡན་སྣ་ཚོགས་སྤྱོད་འབྲས་མང་༔ དེ་འདྲའི་གླིང་དང་གླིང་ཕྲན་ཕུན་ཚོགས་སོགས༔ ལྕགས་རི་མུ་ཁྱུད་རྒྱ་མཚོ་དེ་སྲིད་དང་༔ ཚངས་ཆེན་རིགས་ལྔ་ཕྱོགས་བཅུ་སྟོང་གསུམ་གྱི༔ ལྷོ་ཕྱོགས་འཇིག་རྟེན་རབ་འབྱམས་རྒྱ་མཆོ་ཡི༔ འཁོར་འདས་ལམ་གསུམ་ཚེ་དཔལ་དབང་ཐང་སྟོབས༔ དེ་རིང་ཕྱྭ་འགུགས་དེ་རིང་གཡང་རྣམས་འབོད༔ ཕྱྭ་གཡང་མཆོག་དང་ཐུན་མོང་དངོས་གྲུབ་སྩོལ༔ འབྱུང་བ་ནམ་མཁའི་ཕྱྭ་གཡང་ཕུན་ཚོགས་དཔལ༔ སོགས་འགྲེས༴ ཧཱུྃ༔ ནམ་མཁའི་ནོར་བུ་ཉི་ཟླ་སྐར་གསུམ་སྟེ༔ མེ་ཤེལ་ཉི་མ་དཔག་ཚད་ལྔ་བཅུ་གཅིག༔ མུ་ཁྱུད་རིན་ཆེན་གསེར་གྱིས་ཡོངས་སུ་མཛེས༔ ཟླ་བ་ཆུ་ཤེལ་དཔག་ཚད་ལྔ་བཅུ་གཅིག༔ མཐའ་ཡི་མུ་ཁྱུད་རིན་ཆེན་དངུལ་ལས་གྲུབ༔ སྐར་མ་ཆུ་ཤེལ་གསེར་དང་ཟངས་ལྕགས་མཁར༔ རྒྱང་གྲགས་གཅིག་དང་བཅོ་བརྒྱད་རྣམ་མང་གཟུགས༔ འབུམ་ཕྲག་དྲུག་ཅུ་རྩ་བཞིས་གླིང་འདི་བརྒྱན༔ དེ་བཞིན་གླིང་དང་གླིང་ཕྲན་ཆུ་ལ་གསལ༔ རླུང་གིས་བཏེག་ཅིང་རྒྱུ་སྐར་དབུས་ནས་བསྐོར༔ གཟའ་དང་རྒྱུ་སྐར་དབང་ཐང་ཐབས་ཀྱི་གཞུ༔ སྐྱེ་འགྲོའི་ཚེ་དཔལ་བཟང་ངན་ཤེས་རབ་མདའ༔ ལས་འབྲས་བསླུ་མེད་རྟེན་འབྲེལ་ཕྱག་རྒྱ་ཅན༔ བཅུ་གཉིས་གླིང་གི་དཔལ་འཛིན་གཟའ་སྐར་སོགས༔ རིགས་ལྔའི་ཚངས་ཆེན་སྟེང་འོག་ཕྱོགས་བཅུ་ཡི༔ གཟའ་སྐར་དབྱངས་འཆར་ཇི་སྙེད་ཇི་སྲིད་ཀྱི༔ བཀྲ་ཤིས་གཡང་དཔལ་འགྲུབ་སྦྱོར་རྟེན་འབྲེལ་རྣམས༔ དེ་རིང་ཕྱྭ་འགུགས་དེ་རིང་གཡང་རྣམས་འབོད༔ ཕྱྭ་གཡང་མཆོག་དང་ཐུན་མོང་དངོས་གྲུབ་སྩོལ༔ འབྱུང་བ་ནམ་མཁའི་ཕྱྭ་གཡང་ཕུན་ཚོགས་དཔལ༔ སོགས་འགྲེས༴ ཧཱུྃ༔ ས་བདག་དབང་ཆེན་ས་འཛིན་ལག་ཆེན་དང་༔ ས་ཡི་ལྷ་མོ་བསྟན་མ་དཔལ་ལྡན་མ༔ སྤར་ཁ་བརྒྱད་དང་སྨེ་བ་དགུ་ལ་སོགས༔ ལོ་སྐོར་བཅུ་གཉིས་ལོ་རྒན་དྲུག་ཅུ་དང་༔ གནམ་ལོ་ཟླ་ཚེས་ཞག་གསུམ་དུས་ཀྱི་ལྷ༔ ཕྱོགས་སྐྱོང་ལྷ་ཀླུ་གཞི་བདག་དགེ་བསྙེན་དང་༔ མགུར་ལྷ་བསྟན་མ་ཡུལ་འདིའི་དཀར་ཕྱོགས་སྐྱོང་༔ རིགས་ལྔའི་ཚངས་ཆེན་སྟེང་འོག་ཕྱོགས་བཅུ་ཡི༔ ས་སྐྱོང་ས་ལ་དབང་བའི་སྡེ་ཚོགས་ཀྱི༔ བཀྲ་ཤིས་ཕྱྭ་གཡང་དཔལ་འབྱོར་ཅི་སྲིད་ཚོགས༔ དེ་རིང་ཕྱྭ་འགུགས་དེ་རིང་གཡང་རྣམས་འབོད༔ ཕྱྭ་གཡང་མཆོག་དང་ཐུན་མོང་དངོས་གྲུབ་སྩོལ༔ འབྱུང་བ་ནམ་མཁའི་ཕྱྭ་གཡང་ཕུན་ཚོགས་དཔལ༔ སོགས༴ དེ་ནས་གྱི་ལིང་གསུམ་ལ་རང་གཞུང་ལྟར་གྱི་རྒྱན་བཏགས་ཁལ་གྱི་ཡོ་བྱད་རྣམས་བཀལ་རྟ་སྒོ་དྲུང་དུ་འཛིན༔ སྐྱེས་པ་རྣམས་ཀྱིས་དར་ལྕོགས་མདའ་དར་ཐོགས་ལྷ་ལུག་ཁྲིད་ཁང་པ་ལ་གཡས་བསྐོར་དལ་བ་དགུ་བསྐོར༔ བུད་མེད་རྣམས་ཀྱིས་ལྷ་ནོར་མདའ་དར་བལ་ཐག་བལ་ཚོན་དར་རས་རྔ་མ་སོགས་སྣ་ཚོགས་ཀྱིས་བརྒྱན་པ་འདོམ་པ་དགུ་ལྔ་གསུམ་དང་གང་སོགས་འབྱོར་བ་དང་བསྟུན་པ་བཞི་ཁུར་གཡོན་བསྐོར་དགུ་བྱ༔ ཐམས་ཅད་ཀྱི་ངག་ཏུ་ཕྱྭ་ཐམས་ཅད་ཁུག་ཡེ་ཁུག་ཡེ༔ གཡང་ཐམས་ཅད་ཁུག་ཡེ་ཁུག་ཡེ་ཅི་མང་བརྗོད༔ སྔགས་པ་རྣམས་མཁར་གྱི་སྟེང་དུ་གསེར་སྐྱེམས་མཆོད་ཕྱོགས་སྐྱོང་ལོ་ཟླ་ཚེས་ཀྱི་ལྷ་རྣམས་ལ་ཕྱྭ་གཡང་འགུགས་པའི་འཕྲིན་ལས་བཅོལ༔ ཕྱོགས་བཞི་ནས་ཞལ་བསྐོར་རོལ་མོ་སྣ་ཚོགས་མདའ་དར་རིགས་ལྔ་རྒྱལ་མཚན་དར་དང་བཅས་ཏེ་འདི་སྐད་དོ༔ ཧཱུྃ༔ ང་ནི་ཁམས་གསུམ་འཁོར་འདས་སྲིད་གསུམ་དཔལ༔ ང་ནི་ཆེ་བཙན་གསང་བདག་ཁྲོ་བོའི་རྒྱལ༔ ང་ནི་ནོར་བདག་གནོད་སྦྱིན་སྡེ་དཔོན་རྗེ༔ ཐམས་ཅད་མ་ལུས་ང་ཡི་བཀའ་ལ་ཉོན༔ ཡེ་ཤེས་འཁོར་འདས་སྣང་སྲིད་སྣོད་བཅུད་དང་༔ གཟུགས་ཅན་གཟུགས་མེད་ཐམས་ཅད་ཚུར་ཉོན་ཅིག༔ བསྐལ་པ་ཡར་སྲིད་ཡ་ཐོག་རིང་མོ་སྲིད༔ བསྐལ་པ་མར་སྲིད་མ་ཐོག་རིང་མོ་སྲིད༔ བསྐལ་པ་བར་སྲིད་བར་ཁུག་བཅོ་བརྒྱད་སྲིད༔ ཆོས་ཀུན་སྟོང་ཉིད་སྤྲོས་དང་བྲལ་ན་ཡང་༔ མི་སྲིད་སྲིད་པ་ཆགས་པས་ཅི་ཡང་སྲིད༔ ད་དུས་དེང་སང་བར་ཁུག་བསྐལ་པའི་ཞབས༔ སངས་རྒྱས་བསྟན་པ་ལུང་གི་ལྷག་མའི་མཐའ༔ རྩ་གསུམ་ལྷ་ཚོགས་ཡེ་ཤེས་སྤྱན་གྱིས་གཟིགས༔ གདུང་བས་འབོད་པའི་དུས་འདིར་ཐུགས་རྗེས་དགོངས༔ སྐྱབས་དང་མགོན་བྲལ་ཡིད་ཆད་བདག་ཅག་ལ༔ བརྩེ་བས་དགོངས་ཤིག་གསེར་སྐྱེམས་མཆོད་པ་བཞེས༔ ཕྱྭ་གཡང་མཆོག་དང་ཐུན་མོང་དངོས་གྲུབ་སྩོལ༔ གཙང་རིས་དཔལ་མགོན་སྲུང་མ་རྒྱ་མཚོ་དང་༔ རྒྱལ་ཆེན་ཕྱོགས་སྐྱོང་ལྷ་ཀླུ་གཟའ་སྐར་ཚོགས༔ མགུར་ལྷ་དགེ་བསྙེན་བསྟན་མ་ཡུལ་འདིའི་བདག༔ མ་ལུས་འཁོར་དང་བཅས་པ་ཐམས་ཅད་ཀྱིས༔ ཟག་བཅས་ཟག་མེད་སྤྱན་གྱིས་དེ་རིང་གཟིགས༔ ཁྱེད་རྣམས་ལེགས་ཉེས་སྟངས་འཛིན་ལྷ་ཆེན་པོ༔ སྔོན་ཚེ་རྒྱལ་བའི་སྤྱན་སྔར་དམ་མནོས་པ༔ དམ་ཚིག་མ་གཡེལ་དགོངས་པའི་དུས་ལ་བབས༔ སངས་རྒྱས་བསྟན་པའི་མཐའ་ལ་མ་ཐུག་བར༔ བསྟན་འགྲོའི་བདེ་ལེགས་བསྐྲུན་པའི་དམ་མ་བཀྲལ༔ ད་དུས་བསྟན་པ་ལུང་གི་ལྷག་མའི་མཐའ༔ དམ་བཅས་མ་གཡེལ་སྐྱོངས་ཤིག་སྲུང་མ་རྣམས༔ བརྩེ་བས་དགོངས་ཤིག་གསེར་སྐྱེམས་མཆོད་པ་བཞེས༔ ཕྱྭ་གཡང་མཆོག་དང་ཐུན་མོང་དངོས་གྲུབ་སྩོལ༔ ཕ་ལྷ་མ་ལྷ་ཞང་ལྷ་སྲོག་ལྷ་དང་༔ ཡུལ་ལྷ་གཉན་པོ་ལ་སོགས་དགོངས་སུ་གསོལ༔ དང་པོའི་དུས་དང་དེ་རིང་ཡན་ཆད་དུ༔ མ་ཤེས་མ་མཁས་དུག་ལྔ་ཟང་ཟིང་སྤྱད༔ ཤེས་བཞིན་མི་ལྡན་བག་མེད་དབང་གྱུར་ཏེ༔ ཟས་གོས་རྒྱན་ཆ་མི་སྲིད་མ་འོས་སྤྱད༔ དེ་དག་དབང་གིས་མགོན་སྐྱོབ་ལྷ་དང་བྲལ༔ ཚེ་ཐུང་ནད་མང་བཀྲེས་འཕོང་སྡུག་བསྔལ་མང་༔ སྐྱབས་དང་མགོན་བྲལ་ཡིད་ཆད་བདག་ཅག་ལ༔ བརྩེ་བས་དགོངས་ཤིག་མཐོལ་བཤགས་བཟོད་གསོལ་དང་༔ གསེར་སྐྱེམས་མཆོད་པ་དམ་པ་འདི་བཞེས་ལ༔ རྒྱང་ངེ་ཡ་ལེ་མ་མཛད་དུང་སེམས་བསྐྱེད༔ ཉིན་མཚན་དུས་དྲུག་རེ་བའི་ལྷ་ཁྱོས་སྐྱོངས༔ ཁ་འཛིན་མགོན་སྐྱོབས་དཔའ་ཡ་དཔུང་གྲོགས་མཛོད༔ ཕྱྭ་གཡང་མཆོག་དང་ཐུན་མོང་དངོས་གྲུབ་སྩོལ༔ ཅེས་གསེར་སྐྱེམས་མཆོད་བྱང་ཕྱོགས་རི་བོ་ལ་ཁ་གྱུ་སྟེ༔ ཀྱཻ༔ དེ་རིང་ཕྱྭ་འགུགས་དེ་རིང་གཡང་ཞིག་འགུགས༔ ཐུགས་རྗེ་ལྡན་པ་རྩ་གསུམ་རྒྱལ་བ་དང་༔ ནུས་སྟོབས་ལྡན་པ་སྲུང་མ་རྒྱ་མཚོའི་ཚོགས༔ བདེན་ཚིག་འགྲུབ་པ་དྲང་སྲོང་རིག་པ་འཛིན༔ དངོས་གྲུབ་འབྱུང་གནས་ནོར་ལྷ་རྒྱ་མཚོའི་སྡེ༔ ཕྱྭ་གཡང་མཆོག་དང་ཐུན་མོང་དངོས་གྲུབ་སྩོལ༔ ཀྱཻ༔ འབྱུང་བ་རྣམས་ཀྱི་ཨ་མ་ཆེན་མོ་ནི༔ རྣམ་པར་དྭངས་པ་ཞེས་བྱའི་ནམ་མཁའ་སྟེ༔ དབྱིབས་ནི་ཨེ་ལ་ཚུལ་ནི་གྲུ་གསུམ་ཚུལ༔ བརྔམས་ལ་གྲངས་མེད་རྒྱ་ནི་ནམ་མཁའི་མཐའ༔ ནམ་མཁའི་དཔལ་མོ་མཁའ་འགྲོ་དབྱིངས་ཕྱུག་མ༔ ཞལ་གཅིག་ཕྱག་གཉིས་གར་སྟབས་བཻཌཱུརྱའི་མདོག༔ ནམ་མཁའི་རང་མདངས་ན་བཟའི་ཆ་ག་མཛེས༔ སྤྲུལ་པ་ཡང་སྤྲུལ་ནམ་མཁའི་མཐའ་དང་མཉམ༔ ཕྱག་གཡས་མདའ་དར་སྲིད་པའི་ཕྱྭ་རྣམས་འགུགས༔ ཕྱག་གཡོན་བུམ་པའི་ནང་དུ་གཡང་རྣམས་བསྟིམས༔ འབྱུང་བ་ནམ་མཁའི་ཁམས་ལ་དབང་བསྒྱུར་མས༔ རིགས་ལྔའི་ཚངས་ཆེན་ནམ་མཁའི་མཐར་ཁྱབ་ཀྱི༔ སྟེང་འོག་ཕྱོགས་བཅུ་གང་དག་ཇི་སྲིད་ནས༔ འབྱུང་བ་ལྔ་ཡི་ཕྱྭ་རྣམས་དེ་རིང་སྡུས༔ འབྱུང་བ་ལྔ་ཡི་གཡང་རྣམས་དེ་རིང་ཁུག༔ ཕྱྭ་གཡང་མཆོག་དང་ཐུན་མོང་དངོས་གྲུབ་སྩོལ༔ སྟེང་ནས་ཚངས་པ་བརྒྱ་བྱིན་ཚེ་གཡང་ཁུག༔ ཕྱྭ་གཡང་མཆོག་དང་ཐུན་མོང་དངོས་གྲུབ་སྩོལ༔ འོག་ནས་མཐའ་ཡས་དགའ་བོའི་འཕེན་གཡང་ཁུག༔ ཕྱྭ་གཡང་མཆོག་དང་ཐུན་མོང་དངོས་གྲུབ་སྩོལ༔ བར་ནས་གཉན་ཁམས་རྣམས་ཀྱི་རྩལ་གཡང་ཁུག༔ ཕྱྭ་གཡང་མཆོག་དང་༴ རྒྱལ་པོ་སྡེ་བཞིིའི་ཁམས་ཀྱི་དཔལ་གཡང་ཁུག༔ ཕྱྭ་གཡང་༴ རི་རབ་རོལ་མཚོ་རྣམས་ཀྱི་འཕེལ་གཡང་ཁུག༔ ཕྱྭ་གཡང་༴ གླིང་དང་གླིང་ཕྲན་རྣམས་ཀྱི་བཅུད་གཡང་ཁུག༔ ཕྱྭ་གཡང་༴ གནས་ཡུལ་བྱིན་ཆེན་རྣམས་ཀྱི་བྱིན་གཡང་ཁུག༔ ཕྱྭ་གཡང་༴ ཁམས་གསུམ་སྐྱེ་འགྲོ་རྣམས་ཀྱི་སྟོབས་གཡང་ཁུག༔ ཕྱྭ་གཡང་༴ ཕྱོགས་བཅུའི་ཚངས་ཆེན་རྣམས་ཀྱི་སྲིད་གཡང་ཁུག༔ ཕྱྭ་གཡང་༴ རྣམ་ཐོས་ནོར་མང་རྒྱལ་པོའི་ཕྱུགས་གཡང་ཁུག༔ ཕྱྭ་གཡང་༴ རྟ་བདག་རྟ་ལྷ་འཕེན་པོའི་རྟ་གཡང་ཁུག༔ ཕྱྭ་གཡང་༴ མགོན་པོ་གང་བ་བཟང་པོའི་ལུག་གཡང་ཁུག༔ ཕྱྭ་གཡང་༴ ལྷ་མོ་ནོར་རྒྱུན་མ་ཡི་ནོར་གཡང་ཁུག༔ ཕྱྭ་གཡང་༴ ཞིང་ལྷ་ཚངས་པ་ཆེན་པོའི་འབྲུ་གཡང་ཁུག༔ ཕྱྭ་གཡང་༴ རྒྱ་གར་སངས་རྒྱས་བསྟན་པའི་ཆོས་གཡང་ཁུག༔ ཕྱྭ་གཡང་༴ རྒྱ་ནག་འཕེན་ཕྱུག་དར་གསུམ་དཔལ་གཡང་ཁུག༔ ཕྱྭ་གཡང་༴ ཧོར་གྱི་དཔའ་སྐྱེན་བཙན་གསུམ་སྟོབས་གཡང་ཁུག༔ ཕྱྭ་གཡང་༴ སྟག་གཟིག་རིན་ཆེན་སྣ་ཚོགས་ནོར་གཡང་ཁུག༔ ཕྱྭ་གཡང་༴ བོད་ཀྱི་མཁས་བཙུན་གྲགས་གསུམ་མཐོ་གཡང་ཁུག༔ ཕྱྭ་གཡང་༴ ཁུག་ཡེ་ཁུག་ཡེ་ཕྱྭ་ཁུག་ཡེ༔ ཁུག་ཡེ་ཁུག་ཡེ་གཡང་ཁུག་ཡེ༔ སྡུས་སྡུས་སརྦ་པ་ཤཾ་ཀུ་རུ་ཡེ་སྭཱ་ཧཱ༔ འཕེལ་འཕེལ་སརྦ་པུཥྟིང་ཀུ་རུ་ཡེ་སྭཱ་ཧཱ༔ ཁ་བྱང་དུ་ཕྱོགས་མདའ་དར་གཡབ༔ ཀྱཻ༔ དེ་རིང་ཕྱྭ་འགུགས་དེ་རིང་གཡང་གཅིག་འགུགས༔ ཐུགས་རྗེ་ལྡན་པ་རྩ་གསུམ་རྒྱལ་བ་དང་༔ ནུས་སྟོབས་ལྡན་པ་སྲུང་མ་རྒྱ་མཚོའི་ཚོགས༔ བདེན་ཚིག་འགྲུབ་པ་དྲང་སྲོང་རིག་པ་འཛིན༔ དངོས་གྲུབ་འབྱུང་གནས་ནོར་ལྷ་རྒྱ་མཚོའི་སྡེ༔ ཕྱྭ་གཡང་མཆོག་དང་ཐུན་མོང་དངོས་གྲུབ་སྩོལ༔ ཀྱཻ༔ ཁྱབ་འཇུག་སྐྱོད་པ་རླུང་གི་ད་ལ་ནི༔ ཨ་འུ་མ་ཞེས་མིང་གི་གཟུགས་འཛིན་མ༔ སྲུབ་བྱེད་ཆགས་བྱེད་འདེགས་བྱེད་སྡུད་བྱེད་བཞི༔ རྔམས་སུ་ས་ཡ་རྒྱ་ཁྱོན་མཁའ་དང་མཉམ༔ རླུང་གི་དཔལ་མོ་མཁའ་འགྲོ་དམ་ཚིག་སྒྲོལ༔ ཞལ་གཅིག་ཕྱག་གཉིས་གར་སྟབས་ཨིནྟྲིའི་མདོག༔ རླུང་གི་རང་མདངས་ན་བཟའི་ཆ་ག་མཛེས༔ སྤྲུལ་པ་ཡང་སྤྲུལ་རླུང་གིས་གར་ཁྱབ་འཕྱོ༔ ཕྱག་གཡས་མདའ་དར་སྲིད་པའི་ཕྱྭ་རྣམས་འགུགས༔ ཕྱག་གཡོན་བུམ་པའི་ནང་དུ་གཡང་རྣམས་བསྟིམས༔ འབྱུང་བ་རླུང་གི་ཁམས་ལ་དབང་བསྒྱུར་མས༔ རིགས་ལྔའི་ཚངས་ཆེན་ནམ་མཁའི་མཐར་ཁྱབ་ཀྱི༔ སྟེང་འོག་ཕྱོགས་བཅུའི་གང་དག་ཇི་སྲིད་ནས༔ འབྱུང་བ་ལྔ་ཡི་ཕྱྭ་རྣམས་དེ་རིང་སྡུས༔ འབྱུང་བ་ལྔ་ཡི་གཡང་རྣམས་དེ་རིང་ཁུག༔ ཕྱྭ་གཡང་མཆོག་དང་ཐུན་མོང་དངོས་གྲུབ་སྩོལ༔ སྟེང་ནས་ཚངས་པ་བརྒྱ་བྱིན་ཚེ་གཡང་ཁུག༔ སོགས༴ ཁ་ཤར་དུ་ཕྱོགས་མདའ་དར་གཡབ༔ ཀྱཻ༔ དེ་རིང་ཕྱྭ་འགུགས་དེ་རིང་གཡང་ཅིག་འགུགས༔ ཐུགས་རྗེ་ལྡན་པ་རྩ་གསུམ་རྒྱལ་བ་དང་༔ ནུས་སྟོབས་ལྡན་པ་སྲུང་མ་རྒྱ་མཚོའི་ཚོགས༔ བདེན་ཚིག་གྲུབ་པ་དྲང་སྲོང་རིག་པ་འཛིན༔ དངོས་གྲུབ་འབྱུང་གནས་ནོར་ལྷ་རྒྱ་མཚོའི་སྡེ༔ ཕྱྭ་གཡང་མཆོག་དང་ཐུན་མོང་དངོས་གྲུབ་སྩོལ༔ ཀྱེ་ཡོངས་སུ་ཁྱབ་པ་ཆུ་ཡི་དཀྱིལ་འཁོར་ནི༔ ཁྱབ་དང་འཛིན་དང་སྨིན་བྱེད་རྣམ་པ་གསུམ༔ རྔམས་སུ་དཔག་ཚད་འབུམ་ཕྲག་བཅུ་གཅིག་ལ༔ རྒྱ་ཁྱོན་ནམ་མཁའི་ཁམས་ཀྱི་མཐའ་དང་མཉམ༔ ཆུ་ཡི་དཔལ་མོ་མཁའ་འགྲོ་མཱ་མ་ཀི༔ ཞལ་གཅིག་ཕྱག་གཉིས་གར་སྟབས་ཆུ་ཤེལ་མདོག༔ ཆུ་ཡི་རང་མདངས་ན་བཟའི་ཆ་ག་མཛེས༔ སྤྲུལ་པ་ཡང་སྤྲུལ་ཆུ་ཡི་གར་ཁྱབ་ཁྱབ༔ ཕྱག་གཡས་མདའ་དར་སྲིད་པའི་ཕྱྭ་རྣམས་འགུགས༔ ཕྱག་གཡོན་བུམ་པའི་ནང་དུ་གཡང་རྣམས་བསྟིམ༔ འབྱུང་བ་ཆུ་ཡི་ཁམས་ལ་དབང་བསྒྱུར་མས༔ རིགས་ལྔའི་ཚངས་ཆེན་ནམ་མཁའི་མཐར་ཁྱབ་ཀྱི༔ སྟེང་འོག་ཕྱོགས་བཅུ་གང་དག་ཇི་སྲིད་ནས༔ འབྱུང་བ་ལྔ་ཡི་ཕྱྭ་རྣམས་དེ་རིང་སྡུས༔ འབྱུང་བ་ལྔ་ཡི་གཡང་རྣམས་དེ་རིང་ཁུག༔ ཕྱྭ་གཡང་མཆོག་དང་ཐུན་མོང་དངོས་གྲུབ་སྩོལ༔ སྟེང་ནས་ཚངས་པ་བརྒྱ་བྱིན་ཚེ་གཡང་ཁུག༔ སོགས༴ ཁ་ལྷོར་ཕྱོགས་མདའ་དར་གཡབ༔ ཀྱཻ༔ དེ་རིང་ཕྱྭ་འགུགས་དེ་རིང་གཡང་ཞིག་འགུགས༔ ཐུགས་རྗེ་ལྡན་པ་རྩ་གསུམ་རྒྱལ་བ་དང་༔ ནུས་སྟོབས་ལྡན་པ་སྲུང་མ་རྒྱ་མཚོའི་ཚོགས༔ བདེན་ཚིག་གྲུབ་པ་དྲང་སྲོང་རིག་པ་འཛིན༔ དངོས་གྲུབ་འབྱུང་གནས་ནོར་ལྷ་རྒྱ་མཚོའི་སྡེ༔ ཕྱྭ་གཡང་མཆོག་དང་ཐུན་མོང་དངོས་གྲུབ་སྩོལ༔ ཀྱཻ༔ སྲ་ལ་མཁྲེགས་པ་ས་ཡི་དཀྱིལ་འཁོར་ནི༔ སྲུབ་བྱེད་དང་ནི་ཕྲ་དང་རགས་པ་གསུམ༔ རྔམས་སུ་དཔག་ཚད་འབུམ་ཕྲག་བཅུ་གཉིས་ལ༔ རྒྱ་ཁྱོན་ནམ་མཁའི་མཐའ་དང་ཡོངས་སུ་མཉམ༔ ས་ཡི་དཔལ་མོ་མཁའ་འགྲོ་སངས་རྒྱས་སྤྱན༔ ཞལ་གཅིག་ཕྱག་གཉིས་གར་སྟབས་གསེར་གྱི་མདོག༔ ས་ཡི་རང་མདངས་ན་བཟའི་ཆ་ག་མཛེས༔ སྤྲུལ་པ་ཡང་སྤྲུལ་ས་ཡི་གར་ཁྱབ་ཁྱབ༔ ཕྱག་གཡས་མདའ་དར་སྲིད་པའི་ཕྱྭ་རྣམས་འགུགས༔ ཕྱག་གཡོན་བུམ་པའི་ནང་དུ་གཡང་རྣམས་བསྟིམ༔ འབྱུང་བ་ས་ཡི་ཁམས་ལ་དབང་བསྒྱུར་མས༔ རིགས་ལྔའི་ཚངས་ཆེན་ནམ་མཁའི་མཐར་ཁྱབ་ཀྱི༔ སྟེང་འོག་ཕྱོགས་བཅུ་གང་དག་ཇི་སྲིད་ནས༔ འབྱུང་བ་ལྔ་ཡི་ཕྱྭ་རྣམས་དེ་རིང་སྡུས༔ འབྱུང་བ་ལྔ་ཡི་གཡང་རྣམས་དེ་རིང་ཁུག༔ ཕྱྭ་གཡང་༴ སྟེང་ནས༴ སོགས༔ ཁ་ནུབ་ཏུ་ཕྱོགས་ལ་མདའ་དར་གཡབ༔ ཀྱཻ༔ དེ་རིང་ཕྱྭ་འགུགས་དེ་རིང་གཡང་ཞིག་འགུགས༔ ཐུགས་རྗེ༴ ནུས་སྟོབས་ལྡན་པ༴ བདེན་ཚིག༴ དངོས་གྲུབ་འབྱུང་གནས༴ ཕྱྭ་གཡང་༴ ཀྱཻ༔ འབར་བའི་ཤུགས་འཆང་མེ་ཡི་འཁོར་ལོ་ནི༔ འབར་དང་འཚེག་དང་ཚ་ལ་མྱུར་བ་བཞི༔ རྔམས་ནི་རྫོགས་ལྡན་དུས་མཐར་སྲིད་གསུམ་ཁྱབ༔ འཕྲལ་དུ་རྒྱུ་རྐྱེན་རྟེན་འབྲེལ་ཚུལ་སྣང་སྟོན༔ རྒྱ་ནི་འབྱུང་བའི་ཀློང་ཡངས་ཀུན་ལ་ཁྱབ༔ མེ་ཡི་དཔལ་མོ་མཁའ་འགྲོ་གོས་དཀར་མོ༔ ཞལ་གཅིག་ཕྱག་གཉིས་གར་སྟབས་རཱ་གའི་མདོག༔ མེ་ཡི་རང་མདངས་ན་བཟའི་ཆ་ག་མཛེས༔ སྤྲུལ་པ་ཡང་སྤྲུལ་མེ་ཡིས་གར་ཁྱབ་འཕྱོ༔ ཕྱག་གཡས་མདའ་དར་སྲིད་པའི་ཕྱྭ་རྣམས་འགུགས༔ ཕྱག་གཡོན་བུམ་པའི་ནང་དུ་གཡང་རྣམས་བསྟིམས༔ འབྱུང་བ་མེ་ཡི་ཁམས་ལ་དབང་བསྒྱུར་མས༔ རིགས་ལྔའི་ཚངས་ཆེན་ནམ་མཁའི་མཐར་ཁྱབ་ཀྱི༔ སྟེང་འོག་ཕྱོགས་བཅུ་གང་དག་ཇི་སྙེད་ནས༔ འབྱུང་བ་ལྔ་ཡི་ཕྱྭ་རྣམས་དེ་རིང་སྡུས༔ འབྱུང་བ་ལྔ་ཡི་གཡང་རྣམས་དེ་རིང་ཁུག༔ ཕྱྭ་གཡང་༴ སྟེང་ནས༴ སོགས༴ དེ་ནས་བུམ་པའི་སྟེང་གི་གཏོར་མ་བླང་། བུམ་པ་ལ་གཡང་གི་བལ་ཐག་རྣམས་བཏགས་དར་ལྔའི་ན་བཟའ་སྒྲོན། བུ་མོ་མགོ་གཙང་ཁྲུས་ནས་ཕྱུངས་ཆས་གོས་དང་ལྡན་པས་བཏེགས་གཡང་ཐག་རྣམས་ཕྲག་ལ་བཀལ་རི་རབ་སོགས་དང་བཅས་པ་མ་ཉམས་པར་བང་མཛོད་ཀྱི་དབུས་སུ་སྟེགས་སམ་འབྲུ་ཡི་དཀྱིལ་དུ་བཞག༔ བུམ་པ་སྔར་བཞིན་དབུས་སུ་འགོད་ལ། བདུད་རྩི་ཤིང་ལྔ་འམ་ཤུག་པ་སོགས་འབྲས་བུ་ཅན་གྱིས་ཁ་རྒྱན་སྨན་སྤོས་འབྲུ་སྣས་བྱུར་བུར་བཀང་། གཏོར་མ་ཡང་བང་མཛོད་ཀྱི་མཐོ་སར་འགོད། ས་ཆུས་སྦོས་ལ་བང་མཛོད་ཀྱི་ཕུགས་སུ་ནོར་བུ་སུམ་སྒྲོམ་མམ་ནེའུ་ལེའི་གཟུགས་སམ་ཛམ་ལའི་སྐུ་སོགས་ངོས་ལ་འབུར་གཏོད་བྱས་པའི་མདུན་དུ་གོང་གི་རྫས་འགོད། གཡང་སྒྱེ་ནུ་དགུ་ཞིམ་བུའི་པགས་པ་རྫས་ལྡན་བུམ་པའི་སྟེང་གི་ནམ་མཁར་བཏགས། བདུད་རྩི་ཤིང་ལྔ་འབྲས་བུ་ཅན་གྱི་ཤིང་རིགས་སྣ་ཚོགས་ཕྱོགས་བཞིར་བུམ་པའི་གཡང་ཐག་དང་བཅས་ཀ་བ་ལ་སྒྲོགས། སློབ་དཔོན་གྱི་སྔ་མའི་གཞི་ནས་ཕུལ་བ་ནི་བུམ་པའི་ཕྱོགས་བཞིར་གཞལ་ཞིང་། འོ་གཅིག་དུ་ལ་འཕེལ༔ ཅེས་པའི་ལན་དུ་གཞན་རྣམས་ཀྱིས། འོ་གཅིག་བརྒྱ་ལ་འཕེལ་ལགས་བརྗོད། དེ་བཞིན་དུ། འོ་བརྒྱ་དུ་ལ་འཕེལ༔ འོ་བརྒྱ་སྟོང་དུ་འཕེལ་ལགས༔ འོ་སྟོང་དུ་ལ་འཕེལ༔ འོ་སྟོང་ཁྲི་ལ་འཕེལ་ལགས༔ འོ་ཁྲི་དུ་ལ་འཕེལ༔ འོ་ཁྲི་འབུམ་ལ་འཕེལ་ལགས༔ འོ་འབུམ་དུ་ལ་འཕེལ༔ འོ་འབུམ་སྲིད་གསུམ་གང་བར་འཕེལ་ལགས༔ ཅེས་ཐམས་ཅད་ཀྱིས་འབྲུ་སྣ་མཆོད། མཆོག་ཐུན་གྱི་དངོས་གྲུབ་འབྱུང་བའི་གསོལ་བ་གདབ། སྟན་ལ་འཁོད་རོལ་མོ་འཁྲོལ་དྲི་བཟང་བདུག་མདའ་དར་གཡབ་ཅིང་། ཧཱུྃ༔ ཕྱྭ་འགུག་གཡང་འགུགས་གནས་འདིར་འགུགས༔ ཕྱྭ་འཛུགས་གཡང་འཛུགས་གནས་འདིར་འཛུགས༔ ཕྱྭ་བརྟན་གཡང་བརྟན་གནས་འདིར་བརྟན༔ ཧཱུྃ༔ གནས་ཁང་གཞལ་ཡས་བྱིན་རེ་ཆགས༔ ནོར་ལྷ་རྒྱ་མཚོ་བརྟན་པར་བཞུགས༔ རི་རབ་ལྷུན་པོ་བརྗིད་རེ་ཆེ༔ ནོར་ལྷ༴ ཕྱི་ནང་མཆོད་རྫས་བཀོད་རེ་ལེགས༔ ནོར་ལྷ༴ བཀྲ་ཤིས་རྫས་བརྒྱད་མདངས་རེ་ལེགས༔ ནོར་ལྷ༴ རྒྱལ་སྲིད་སྣ་བདུན་དཔལ་རེ་བཟང་༔ ནོར་ལྷ༴ ནམ་མཁའ་རིགས་ལྔ་རྒྱ་རེ་ཆེ༔ ནོར་ལྷ༴ གཞལ་ཡས་ཁང་རྣམས་ལྷུན་རེ་ཆགས༔ ནོར་ལྷ༴ ཕོ་ཐོང་མདའ་བཀྲ་ཕོ་རྩལ་ལྡན༔ ནོར་ལྷ༴ མོ་ཐོང་འཕང་བཀྲ་མོ་རྩལ་ལྡན༔ ནོར་ལྷ༴ འདོད་འབྱུང་བུམ་པ་རྒྱ་རེ་ཆེ༔ ནོར་ལྷ༴ ནང་བཅུད་རིན་ཆེན་འབྲུ་སྣ་སྤུངས༔ ནོར་ལྷ༴ དར་ཚོན་སྣ་ལྔའི་མགུལ་རྒྱན་བཀྲ༔ ནོར་ལྷ༴ ཁ་རྒྱན་དཔག་བསམ་ལོ་འདབ་རྒྱས༔ ནོར་ལྷ༴ གཡང་སྒྱེ་ནུ་དགུ་གཡང་དགུའི་མཛོད༔ ནོར་ལྷ༴ ཞིམ་བུའི་རྐྱལ་པ་འདོད་འབྱུང་དཔལ༔ ནོར་ལྷ༴ ས་ཆུ་ནང་སྦྱོར་སྐུ་བརྙན་ཤར༔ ནོར་ལྷ༴ གཡང་ཐག་འདོམ་དགུ་ཕྱོགས་ཕྱོགས་འཕྱོ༔ ནོར་ལྷ༴ བདུད་རྩིའི་ཤིང་ལྔ་ཕྱོགས་བཞིར་སྤུངས༔ ནོར་ལྷ༴ སྤྱན་གཟིགས་ཀ་ཆ་དཀོར་ཆ་བཟང་༔ ནོར་ལྷ༴ ཕོ་ཆས་མོ་ཆས་དཔལ་དགུ་འཛོམ༔ ནོར་ལྷ༴ བླ་བྲེ་ཕན་དང་ལྡ་ལྡི་འཕྱོ༔ ནོར་ལྷ༴ མདའ་དར་མདུང་དར་བ་དན་མཛེས༔ ནོར་ལྷ་རྒྱ་མཚོ་བརྟན་པར་བཞུགས༔ ཅེས་བརྗོད། བདག་བསྐྱེད་གསལ་གདབ་ཕྱག་རྡོར་བསྙེན༔ མདུན་བསྐྱེད་གསལ་གདབ་ནོར་བདག་བསྙེན༔ འདོད་པའི་དོན་ལ་གསོལ་བ་གདབ༔ བཀྲ་ཤིས་གླུ་བྲོ་ཚོགས་ལ་རོལ༔ བདུད་རྩིའི་གཡང་ཕོར་ཞལ་བསྐོར་ཞིང་༔ ཕུད་ཀྱིས་མདུན་མཆོད་གཏོར་མར་སྦྲེངས༔ ལྷ་ཚོགས་དངོས་སུ་བཞུགས་པར་བསམས༔ འབྲས་སམ་དཀར་མོའི་ནས་རྡོ་སྦུར་མེད་པ་འཐོར་ཞིང་ཤིས་བརྗོད་ནི༔ ཧཱུྃ༔ ཕུན་སུམ་ཚོགས་པ་བཀྲ་ཤིས་དཔལ་གྱི་ཞིང་༔ འོག་མིན་ཆོས་དབྱིངས་སྟུག་པོ་བཀོད་པ་ནས༔ རྡོ་རྗེ་འཆང་ཆེན་ཆོས་སྐུའི་བཀྲ་ཤིས་དཔལ༔ ཆོས་དབྱིངས་རྒྱལ་བ་རྒྱ་མཚོའི་བཀྲ་ཤིས་ཤོག༔ ཕུན་སུམ་ཚོགས་པ་ལྔ་ལྡན་ལོངས་སྐུའི་ཞིང་༔ རིགས་ལྔའི་ཚངས་ཆེན་སྟེང་འོག་ཕྱོགས་བཅུ་ནས༔ རྒྱལ་བ་རིགས་ལྔ་ལོངས་སྐུའི་བཀྲ་ཤིས་དཔལ༔ ལོངས་སྐུའི་རྒྱལ་བ་རྒྱ་མཚོའི་བཀྲ་ཤིས་ཤོག༔ ཕུན་སུམ་ཚོགས་པ་འགྲོ་འདུལ་སྤྲུལ་སྐུའི་ཞིང་༔ ནམ་མཁའ་རབ་འབྱམས་འཇིག་རྟེན་དཔག་མེད་ནས༔ ཕྱོགས་བཅུའི་སངས་རྒྱས་སྟོན་པ་བཅོམ་ལྡན་འདས༔ སྤྲུལ་སྐུའི་རྒྱལ་བ་རྒྱ་མཚོའི་བཀྲ་ཤིག་ཤོག༔ ཕུན་སུམ་ཚོགས་པ་རྨད་བྱུང་འཕྲིན་ལས་ཞིང་༔ གང་ལ་གང་འདུལ་དེ་ལ་དེར་སྟོན་པའི༔ བྱང་ཆུབ་སེམས་དཔའ་རྣམས་དང་སེམས་མར་བཅས༔ འགྲོ་མགོན་སེམས་དཔའ་སེམས་མའི་བཀྲ་ཤིས་ཤོག༔ ཕུན་སུམ་ཚོགས་པ་དགོས་འདོད་དཔལ་གྱི་གནས༔ མཆོག་དང་ཐུན་མོང་དངོས་གྲུབ་ཀུན་གྱི་བདག༔ ནོར་བདག་ཡིད་བཞིན་ནོར་བུ་རྣམ་ཐོས་སྲས༔ ནོར་ལྷ་རྒྱལ་བ་རྒྱ་མཚོའི་བཀྲ་ཤིས་ཤོག༔ ཅེས་ཤིས་པ་བརྗོད། བྱ་སྦོ་སོགས་ཀྱི་གཡང་སྐར་རམ་སྐྱོར་ཁ་བབས་པའི་དུས་ཚིགས་དང་བསྟུན་ཏེ་དང་དུ་བླངས་ན༔ སྔ་མའི་སྦྱིན་འབྲས་མེད་པ་འཕགས་པ་སྒུར་ཆུང་ལྟ་བུ་ཡིན་ཀྱང་། ཚེ་འདི་ལ་ལོངས་སྤྱོད་ཀྱི་དངོས་གྲུབ་འཐོབ་པར་འགྱུར་རོ། དེ་བཞིན་དུ་རྒྱལ་པོའི་བློན་པོ་རྡོ་རྗེ་སྤྲེ་ཆུང་འདིས་དཀོན་མཆོག་དཀོར་ལ་བག་མེད་པར་སྤྱད་ཅིང་པྲ་ཏི་ཧ་ནའི་མཆོད་པ་ལས་འཕྲིས་བས་གང་ནས་གང་དུ་སྐྱེས་ཀྱང་ལོངས་སྤྱོད་ཀྱི་འདུ་བ་མེད་པ་འདི་ལྟ་བུ་ཡིན་ཀྱང་དང་དུ་བླངས་ན་ཡོ་བྱད་དང་ལྡན་པར་ནུས་སོ། དེ་བཞིན་དུ་རླུང་གཉན་པ་ལྟ་བུའི་ཚེ་སྔ་མ་དབང་ཡོད་ཀྱིས་གཞན་ནོར་ཕྲོགས་བཅོམས་དུ་མ་བྱས་པས་བཀྲེན་པོར་གྱུར་པ་ལྟ་བུས་དང་དུ་བླངས་ཀྱང་དཔལ་བཟང་པོ་དང་ལྡན་པར་ནུས་སོ། །དེ་བས་ན་ད་ལྟ་འདིར་ཡང་འབྱུང་བའི་ཁམས་ལ་འདུ་བྱེད་ཀྱི་ལས་བསམ་ཡས་བཞེངས་པས་གཟུགས་མེད་ཁེངས་ལོག་གི་རྔུར་དང་རྒྱལ་པོའི་དཀོར་མཛོད་ཀྱི་གཡང་སྤེལ་བར་བདག་གིས་ཁྱེད་རྣམས་ལ་སྩལ་བ་ཡིན་ཞིང་། འདི་ནས་རིང་ཞིག་འདས་པའི་འོག་ཏུ་བོད་འབངས་རྒྱལ་བློན་རྣམས་ད་ལྟའི་གདམས་པ་འདི་དགོས་པའི་དུས་ཡོང་བས་མཚོ་རྒྱལ་ཁྱོད་ཀྱིས་ཡི་གེར་ཐོབ༔ སྒྲུབ་གནས་ལྔ་ལ་འདྲ་ཙམ་མི་འདྲ་ལྔར་ཕྱེ་ལ་མ་འོངས་པའི་དོན་དུ་སྦོས་ཤིག༔ ཁྱད་པར་འཕགས་པའི་གདམས་པ་ཟབ་མོ་མ་འོངས་ལྔ་བརྒྱའི་ཡང་མཐའ་ལ། ཟོག་ཀྱི་ཆོས་བརྒྱད་འཇིག་རྟེན་ན་འབྱུང་བའི་དུས་གདུལ་བྱ་སེམས་ཅན་གྱི་ཁམས་འདུལ་བྱེད་འཕགས་པའི་ཐུགས་རྗེས་ཀྱང་སྐྱོབས་དཀའ་བའི་ཚེ༔ ད་ལྟའི་རྒྱལ་པོ་ཡབ་སྲས་ཀྱི་སྨོན་ལམ་གྱི་མཐུས་བོད་ལ་ལོག་འདྲེན་ཉམས་དམའ་མངའ་ཐང་འཕེལ་བ་ཞིག་ཡོད་ཀྱང་༔ བདུད་བློན་མ་དག་པ་རྣམས་ཀྱིས་དེའི་ཚེ་སེམས་ཅན་ཐམས་ཅད་ལ་བར་དུ་གཅོད་པ་སྣ་ཚོགས་བྱེད་དེ༔ དཔལ་དགུའི་གཡང་རྣམས་འཕེལ་དུ་མི་འཇུག་ཅིང་དུ་རུ་ཀ་བཅོ་བརྒྱད་ཀྱིས་སྡང་ཞིང་༔ ཟས་ནོར་ས་ཞིང་སོགས་ལ་བར་ཆད་སྣ་ཚོགས་གཏོང་ཞིང་ལྷ་ཀླུ་གཞི་བདག་ཀྱང་དཀར་ཕྱོགས་དུས་ཀྱི་དབང་གིས་གཉའ་དམའ་སྟེ༔ ནག་ཕྱོགས་དར་ནས་འབྱུང་བ་རྣམས་ཀྱིས་ཀྱང་བཅུད་མི་ཐུབ་པ་སོགས་འབྱུང་བའི་དུས་སུ་གདམས་པ་འདི་བཞིན་སྤྱད་པས་དངོས་གྲུབ་ཀྱི་དཔལ་ལ་སྤྱོད་པར་འགྱུར་རོ༔ དེ་བས་ན་ཟབ་མོའི་གཏེར་དུ་སྦ་བར་བྱའོ༔ ཞེས་གསུངས་པ་རྣམ་ཀྱང་མཚོ་རྒྱལ་བདག་གིས་ཡི་གེར་བཏབ་སྟེ་དགོས་པའི་དུས་སུ་སེམས་ཅན་རྣམས་ལ་ཕན་པའི་སྨོན་ལམ་དང་བཅས་རིན་པོ་ཆེའི་གཏེར་དུ་སྦས་པའོ༔ མ་འོངས་ལས་འཕྲོ་ཅན་གྱིས་སྤྱོད་པར་ཤོག༔ སྔགས་ཀྱི་རྒྱལ་མོས་བཀའ་འདི་སྲུངས༔ ཡང་མ་ཆེན་མོས་གཏེར་འདི་འཚོས༔ ས་མ་ཡཱ༔ བདག་ཁམས་པ་ཉི་མ་གྲགས་པས་ཁམས་སྲིང་མོ་རྫོང་མཆོག་ནས་ས་ཕོ་རྟ་ལ་གདན་དྲངས་ཤིང་། སྦས་ཀྱི་སྔགས་འཆང་ཨོ་རྒྱན་མགོན་པོས་ནན་གྱིས་བསྐུལ་ངོར་གཏེར་ནས་གདན་དྲངས་ནས་ལོ་ཉི་ཤུ་རྩ་གཉིས་འདས་པའི་ས་མོ་ཡོས་ལ་ཤོག་སེར་ལས་བསྒྱུར་བའོ། །སྔ་མ་རྩན་སྒོ་གུ་རུ་རྣམ་སྲས་ཀྱིས་བསྐུལ་བ་ལ་ལས་བྱང་གཏད་ཀྱང་ཉམས་ལེན་མི་བྱེད་འདུག་པས་དགོས་ཆེད་མེད་འདྲ་བསམས་ཏེ་བསྐྱུར། རྗེས་སོར་ཨོ་རྒྱན་མགོན་པོས་བསྐུལ་བས་ངོ་མ་ཆོག་བཞིན་དུ་བྲིས། འདི་ནས་གཏོ་ཡི་ཉམས་ལེན་མེད་པས་གཏོ་པ་ཚོས་ཅི་འདྲ་གཟིགས་ལགས། མངྒ་ལཾ། །

བུམ་པའི་གཏེར་སྦ་ཐབས།

ནོར་བདག་ཡིད་བཞིན་ནོར་བུ་ལས༔ བུམ་པའི་གཏེར་སྦ་ཐབས་བཞུགས༔ ཁྲོ་བོའི་རྒྱལ་པོ་ལ་ཕྱག་འཚལ་ལོ༔ བསྟན་དང་འགྲོ་བ་བདེ་བའི་ཕྱིར་དུ་ཡུལ་ཕྱོགས་ཀྱི་ལྷ་ཀླུ་གཞི་བདག་མཉེས་པར་བྱེད་པ་དང་༔ ཡུལ་ཁམས་སྐྱོང་ཞིང་སྡོང་གྲོགས་བྱེད་པའི་ཆེད་དུ་རིན་ཆེན་བུམ་པའི་གཏེར་སྦ་བ་ཞེས་བྱ་བ་འདི་བཞིན་སྤྱད་པར་བྱ་སྟེ༔ གསེར་དངུལ་ཟངས་རྫ་སོགས་འབྱོར་བ་དང་བཏུན་པའི་བུམ་པ་ཁལ་དང་ཁལ་ཕྱེད་ཐ་ནའང་འབྲས་སམ་འབྲུ་སྙིམ་པ་བཅོ་བརྒྱད་ཤོང་བ༔ དབྱིབས་དཔག་བསམ་ཤིང་གི་ཐོག་གུ་ལྟ་བུ་ཚད་དང་ལྡན་པ་བཟོ༔ དེའི་ནང་དུ་ཉི་མ་ལས་མེ་ལེན་པའི་ཤེལ༔ མ་འཛོམ་ན་ཤེལ་སོལ་མང་༔ ཟླ་བ་ལས་ཆུ་ལེན་པའི་ཤེལ༔ ཡང་ན་དབྱིབས་འཇམ་མདོག་ཤིན་ཏུ་དྭངས་པའི་རིགས༔ གསེར་ཞོ་གང་༔ དངུལ་སྲང་གང་༔ གཡུ་རྒོད་བྱུང་ན་རབ༔ གཡུ་རྒོད་སྲང་གང་༔ ཕོ་ཟངས་མོ་ཟངས་སྲང་རེ༔ ཕོ་མོའི་ལྕགས་སམ་ལྕགས་ཞུན་བཟང་པོ་དང་ལྡན་པ་སྲང་གང་༔ རིན་པོ་ཆེ་སྟོང་སྲང་གང་སྟོང་འཕེལ་གྱི་རྟེན་འབྲེལ་རྫས༔ དགུ་འཕེལ་གཟི་མིག་དགུ༔ དུང་འཕེལ་དུང་དཀར༔ དེ་ལ་སོགས་པའི་རིན་པོ་ཆེའི་རིགས་ཚོགས་ཚད་མིག་གི་བུག་པ་སྤྲ་ཚིལ་ལམ་མར་གྱིས་བཀག་པ་ཅི་མང་བསགས༔ ཞོ་ཤ་གསུམ་གྱིས་གཙོར་བྱས་ཀླུ་དང་ས་བདག་ལ་མི་གནོད་པའི་སྨན་རིགས་ཅི་མང་༔ དཀར་གསུམ་མངར་གསུམ་མ་ཧེའམ་མཛོ་མོའི་མར༔ དར་ཁ་མ་ཉམས་པ་གཙང་ལྡན་ལྔ༔ རི་བོང་གི་སྙིང་རྩ་དང་བཅས་ཚང་མ་སྐམ་པོ་ཞིག་བུམ་པའི་དཀྱིལ་དུ་ཡོད་པར་བྱས་ལ༔ འབྲུ་ལྔ་སོགས་རྫས་རྣམས་ཆ་མཉམ་པས་བུམ་པ་བཀང་༔ ཐ་ནའང་རྫས་སྨན་ནོར་རིགས་གང་དག་སྲང་རེ་ལས་མ་ཉུང་བ་ལ་ལྷག་མའི་བུམ་པ་འབྲུས་བཀང་༔ གསེར་དངུལ་སོགས་གཞུང་མཐུན་མེད་ན་ཀླུ་ས་བདག་བསྟོད་ལ་འཁོར་བའི་ཡུལ་མེད་པས་བུམ་གཏེར་བརྩམས་ཀྱང་ཕན་པར་མི་ནུས་སོ༔ ཚུལ་ལྡན་བསགས་ཤིང་སྔགས་དམིགས་ཀྱི་རྒྱས་ཐེབས་ན༔ བསྟན་འགྲོ་སྦྱིན་བདག་སུ་ཡིན་ལ་ཡུལ་ལྷ་ས་བདག་གིས་སྡོང་གྲོགས་ངེས་པར་བྱེད་དེ་གླ་ཟོས་པས་ལས་དགོས་པ་ལྟ་བུའོ༔ བུམ་པ་སྦ་བའི་ཡུལ་ཀྱང་རང་རང་གི་ངོ་བསྐལ་ཏེ༔ དུར་སའི་ཉེས་པ་བསྲུབ་པ་དུར་ས་ལྟ་བུ༔ ཞིང་གཡང་ཉམས་ན་ཞིང་དཀྱིལ༔ ནོར་གཡང་ཉམས་ན་ཕྱུགས་ཀྱི་ར་བ༔ འབྲུ་དང་ནང་ནོར་ཉམས་པ་དཀོར་མཛོད་ཀྱི་ནང་ངམ་གྱང་དང་རྩིག་པའི་དཀྱིལ༔ མི་གཡང་ཉམས་པ་ཡུལ་ལྷའི་རི་བོའི་དཔལ་བཟང་ས༔ དགྲ་ལྷ་གུད་པ་ལྷ་ཚོགས་ཀྱི་ནང་༔ མཁར་ལས་བྱེད་པའི་ཀ་བའི་ཞབས༔ རྟེན་བཞེངས་བྱེད་པའི་གནོད་སྦྱིན་འཁོར་ལོ༔ བསྟན་དོན་བྱེད་ན་མགུར་ལྷ་དགེ་བསྙེན་སོགས་དང་གནས་རྟེན་གང་བཟང་སོ་སོར་དཔྱད་ཤེས་པར་བྱའོ༔ རྫས་བསགས་པ་ནས་གཏེར་སྦ་བའི་དུས་ཡན་ལ་དམ་ལྡན་གྱི་སྔགས་པ༔ ཁྲིམས་ལྡན་གྱི་དགེ་སྦྱོང་སོགས་ཀྱིས་ལས་ཤིང་ཤ་ཆང་སྔོ་སྒོག་སོགས་མི་མཐུན་པའི་ཟས་སྤང་༔ མི་ཚངས་པར་སྤྱོད་པ་སོགས་བག་མེད་ཀྱི་ལས་སྤང་༔ དར་རས་སྣམ་གོས་སོགས་གསར་པའི་རིགས་མ་གཏོགས་རྙིང་གསུམ་པགས་ཕྱིང་སོགས་འོས་མིན་གྱི་གོས་སྤངས༔ ལས་མཐར་མ་ཕྱིན་གྱི་བར་དུ་ཐམས་ཅད་ཀྱི་ཡན་ལག་ལྔ་ཁྲུས་མ་ཆགས་པར་དག་པར་འཁྲུ༔ ཟག་པ་དོར་བའི་སྐབས་སུ་ཡང་ཁྲུས་བྱ༔ ས་བརྐོ་དུས་ལྷམ་མི་གྱོན༔ ས་ཆོག་བརྟག་བླངས་ས་བདག་འཁོར་ཁྱིམ་གཡང་གི་འགྲུབ་སྤྱོར་སོགས་ལེགས་པར་དཔྱད་ཅིང་ཚེས་གྲངས་ཟླ་སྐར་གྱི་མེ་ལོང་དཔང་འཛུགས༔ རྒྱ་ཁྱོན་འདོམ་གང་ལ་རྔམས་སུ་རབ་མདུང་གང་༔ འབྲིང་འདོམ་གང་ཁྲུ་གང་༔ ཐ་ནའང་འདོམ་ཕྱེད་ཁྲུ་གང་བརྐོ་སྟེ༔ གཡམ་པ་བྱ་རོག་མ་ཚད་ལྡན་གྱི་གཡའ་སྒྲོམ་མམ་སོ་ཕག་གི་སྒྲོམ་བརྩེག༔ སྒྲོམ་དང་བུམ་པ་འགོད་པ་སོགས་ཀྱི་ཚེ་མཆིལ་སྣབས་ངན་སྐྱུགས་ཀྱི་རིགས་མ་ཤོར་བར་བྱེད༔ འབྲས་བུ་ཅན་གྱི་ཤིང་གིས་ཁ་བརྒྱན་སྦ་ཚིལ་གྱིས་བཀག༔ གཡམ་པ་སོ་ཕག་སོགས་གང་ཡིན་གྱི་ངོས་ལ་བཀྲ་ཤིས་པའི་རྟགས་བརྒྱད་དང་བུམ་པའི་གདན་ལ་པདྨ་འདབ་བརྒྱད་ལྟེ་བ་ལ་བྷྲཱུྃཿབུམ་པའི་སྟེང་ཁ་རྒྱན་གྱི་ལྗོན་ཤིང་ལ་མ་གནོད་པའི་སྟེང་ནས་འཁོར་ལོ་རྩིབས་བརྒྱད་སྔོན་པོ་ལྟེ་བ་ལ་ཨས་མཚན་པའི་ཡིག་མགོ་བུམ་པའི་མདུན་ལ་ཡོད་པར་བྱ༔ བུམ་པའི་མདུན་སའི་དཔལ་དང་ཡུལ་རྟེན་ཁང་པ་ལྟར་དུ་ཁ་ཕྱོགས༔ རང་གི་ཡི་དམ་གང་ཡིན་ནམ་ཕྱག་ན་རྡོ་རྗེའི་སྒོམ་བཟླས་གཞུང་ལྟར་བྱས་རྗེས་བུམ་པ་དྲི་བཟང་གི་ཆུས་བསངས༔ སྭ་བྷཱ་ཝས་སྦྱངས༔ བུམ་རྫས་མི་དམིགས་པ་སྟོང་པ་ཉིད་དུ་གྱུར༔ སྟོང་པའི་ངང་ལས་བྷྲུྃ་ཡོངས་སུ་གྱུར་པ་ལས་པདྨའི་འཁོར་ལོ་འདབ་མ་བརྒྱད་པའི་ལྟེ་བར་དགོས་འདོད་དཔལ་གྱི་བུམ་པ་ཆེན་པོ་དཔལ་བསམ་ཤིང་གི་འབྲས་བུ་ལྟ་བུ་ལྟོ་བ་རྒྱ་ཆེ་བ་ཞབས་ཞུམ་ཉམས་དང་ལྡན་པ༔ མགྲིན་པའི་རྣམ་པ་བཟང་བ༔ ཁ་ཁྱེར་ཅུང་ཟད་འཕྱང་བའི་ཉམས་ཅན་མཛེས་ཤིང་ཡིད་དུ་འོང་བ་ལྟ་ན་སྡུག་པའི་ནང་དུ་འབྱུང་བ་ཀུན་འདུས་ཀྱི་དབང་པོ་རི་བོང་གི་ཙིཏྟ༔ དེའི་གཡས་སུ་མན་ཤེལ༔ གཡོན་དུ་ཆུ་ཤེལ༔ མདུན་དུ་གསེར༔ རྒྱབ་ཏུ་ལྕགས༔ ཤར་དུ་དངུལ༔ ལྷོར་སྤུ་ཤེལ༔ ནུབ་ཏུ་ཟངས༔ བྱང་དུ་གཡུ༔ ཤར་ལྷོར་མུ་མེན༔ ལྷོ་ནུབ་ཏུ་མུ་ཏིག༔ ནུབ་བྱང་དུ་བྱི་རུ༔ བྱང་ཤར་དུ་འཆོང་༔ དེ་དག་གི་བར་མཚམས་སྟེང་འོག་རྣམས་སུ་ཞོ་ཤ་གསུམ་སྨན་སྣ་སྣ་ཚོགས༔ འབྲུ་ལྔ་སོགས་ལོངས་སྤྱོད་ཀྱི་འབྲུ་རིགས༔ དཀར་གསུམ་སོགས་གཙང་ལྡན་གྱི་རླན་བཅུད༔ མངར་གསུམ་སོགས་བཅུད་བཟང་གི་རོ་མཆོག་རྣམས་འབྱུང་བའི་བཅུད་དུ་སྨིན་པས་འབྱུང་བ་ལྔའི་ཁམས་དང་གཉིས་སུ་མེད་པའི་དཀར་སེར་དམར་ལྗང་མཐིང་གའི་དར་ལྔའི་ན་བཟའ༔ རྫས་བཅུད་འབྱུང་བའི་དཔལ་དང་དབང་ཐང་གོང་འཕེལ་གྱི་གྲངས་འཛིན་གཟི་མིག་དགུ་དགུ་འཕེལ༔ རིན་པོ་ཆེ་སྟོང་སྟོང་འཕེལ༔ དུང་དཀར་པོ་དུང་འཕེལ་གྱི་རྫས་གསུམ་དབུས་སུ་གསལ་ཞིང་༔ སྣང་སྲིད་རབ་འབྱམས་ཀྱི་འདོད་དགུའི་དཔལ་དང་གཟི་བརྗིད་སྟོབས་དང་མངའ་ཐང་ལས་གྲུབ་པའི་ཡོ་བྱད་ཐམས་ཅད་མ་ཚང་བ་མེད་ཅིང་ཚང་ཞིང་ཡིད་དུ་འོང་བ༔ ཚངས་ཆེན་གྱི་བསྐལ་པ་འབུམ་ཕྲག་བརྡལ་བའི་དུས་སུ་ཡང་ཟད་མི་ཤེས་པའི་ཡོན་ཏན་གྱི་དཔལ་ཐམས་ཅད་ཡོངས་སུ་རྫོགས་པའི་རང་བཞིན་དུ་གྱུར༔ སྔགས་དྲུག་ཕྱག་རྒྱ་ཏིང་འཛིན་དང་ལྡན་པས་བྱིན་གྱིས་རླབས་ཅིང་སྤེལ་བར་བྱའོ༔ དེ་ནས་རང་ཉིད་སྐད་ཅིག་གིས་བཅོམ་ལྡན་འདས་འཇིགས་པ་ཐམས་ཅད་དང་ཡོངས་སུ་བྲལ་བར་གསལ་ཞིང་བཛྲ་པཱ་ཎི་བསྙེན༔ ཨརྒྷཾ་སོགས་ཀྱིས་མཆོད་བསྟོད་པས་བསྟོད་ཅིང་འཕྲིན་ལས་བརྩམ༔ དེ་ཡང་དུར་ས་འཆོས་ན་རང་གི་མདུན་དུ་དུར་སའི་ས་བདག་ཀླུ་སོགས་གནས་རིས་དང་མཐུན་པ་དེ་མངོན་སུམ་དུ་སྐུ་ཕྱེད་ས་ལས་འཐོན་ཏེ༔ བུམ་གཏེར་ཉེས་བཤགས་ཀྱི་མཆོད་པར་ཕུལ་བས་དགྱེས་ནས་འགལ་རྐྱེན་བསྒྲུབ་པར་བསམས༔ ཞིང་ས་ལ་ཞིང་ལྷ་ཚངས་པའམ་ཞིང་གི་བདག་པོ་ལུས་ཕྱེད་ས་ལས་འཐོན་ནས་བུམ་རྫས་རྟེན་བཙུགས་པའི་མཆོད་འབུལ་བྱས་པས་ཞིང་བདག་གིས་ཞིང་གི་འབྲུ་སྤེལ་བའི་འཕྲིན་ལས་མཛད་པར་བསམ༔ ཕྱུགས་གཡང་གསོ་བ་དུད་འགྲོའི་ར་བའི་འོས་འཐད་ལ་བུམ་པ་གཞུག་པ་ལྷ་ཚུགས་ཀྱི་བྱད་མཐུན་བཞིན་བསྒྲུབ་ཅིང་ཕྱི་ལྷ་ཚུགས་གཞལ་ཡས་ཁང་གི་ནང་དུ་བུམ་གཏེར་རིན་པོ་ཆེ་འདོད་འབྱུང་ནོར་ལྷ་གཡང་བདག་ལ་གཡང་འཛིན་གཡང་སྐྱོང་གི་རྟེན་འཛུགས་སུ་མཆོད་པའི་རྟེན་བཙུགས་པ་ནོར་ལྷས་ས་བདག་གཡང་གི་ཚོགས་རྣམས་བསྲུང་བར་བསམས༔ ནང་ནོར་གྱི་གཡང་གསོ་བ་བང་མཛོད་ཀྱི་ནང་དུ་གཡང་སྐྱོབས་བཞག་པ་ལྟར་ལ༔ ས་རྡོས་གྲུ་བཞི་ས་མཁར་དབྱིབས་ལྷ་ཚུགས་ལྟ་བུ་འམ༔ གྱང་དང་རྩིག་པ་གང་ཡིན་བསེང་བའི་དཀྱིལ་དུ་བཙས་ཤིང་༔ བུམ་པ་རིན་པོ་ཆེས་ཁེངས་པའི་གཞལ་ཡང་ཁང་གི་ནང་དུ༔ ནོར་ལྷ་གཡང་འཛིན་ཁྱིམ་ལྷ་སྐྱོབས་པའི་ལྷ་ལྔ་སོགས་ཀྱི་ཕོ་བྲང་རྟེན་དང་བཅས་པར་གསལ་གདབ་ཅིང་བརྟན་པར་བཞུགས་ནས་ཉིན་མཚན་དུས་དྲུག་གི་མགོན་སྐྱོབས་མཛད་པར་བསམས༔ མི་གཡང་གསོ་ན་ཡུལ་ལྷའི་རི་དཔལ་བཟང་ལ་གོང་ལྟར་སྦ་ཞིང་༔ ཡུལ་ལྷ་རང་མདུན་དུ་སྤྱན་འདྲེན་རིན་པོ་ཆེའི་བུམ་རྫས་དང་བཅས་པ་མཆོད་ནས་མཉེས་ཏེ་བདག་ཏུ་བཟུང་བས་མཐབ་འཁོན་གྲིབ་དང་འགལ་གྱུར་གྱི་ལས་བསགས་པའི་ཉེས་ཚོགས་སྦྱངས་ཏེ་ལུས་དང་གྲིབ་ལྟར་ཡུལ་ལྷས་སྐྱོབ་པའི་འཕྲིན་ལས་མཛད་པར་བསམས༔ དགྲ་ལྷ་བསྟོད་པ་ལྷ་ཚུགས་གཞལ་ཡས་ཁང་གི་ནང་དུ་དགྲ་ལྷ་བཞུགས་པ་ལ༔ མགོན་སྐྱོབས་སྡོང་གྲོགས་ཀྱི་ཕྱིར་དུ་བུམ་པ་རྫས་ལྡན་ཕུལ་བས་མཉེས་ནས་དགྲ་ལྷའི་ངོ་སོ་ཟླ་ལྟར་རྒྱས་པར་བསམས༔ མཁར་བཟོ་བའི་ཀ་པའི་གཞི་རིན་པོ་ཆེའི་བུམ་པ་འདོད་འབྱུང་གི་གླིང་ཆེན་པོ་ནས༔ ཀ་བ་དཔག་བསམ་གྱི་སྡོང་པོ་སྐྱེས་པ་གཞལ་ཡས་ཁང་གི་དཔལ་གྱིས་བརྒྱན་པ༔ ཤིང་ལོ་དང་ཤིང་འབྲས་རེ་རེ་ལའང་བསམ་གྱིས་མི་ཁྱབ་པའི་ཡོན་ཏན་རྫོགས་པའི་རྩེ་མོས་ཚངས་པའི་ཡུལ་སྙེགས་པས་ལྷ་རྣམས་ཀྱིས་ཀྱང་ཤིས་པ་བརྗོོད་པའི་དགེ་ལེགས་ཀྱིས་སྤྲས་པས༔ མདོར་ན་སྲིད་པ་གསུམ་ན་མངོན་པར་མཐོ་བའི་བུམ་པ་དཔག་བསམ་གྱི་སྡོང་པོའི་གཞལ་ཡས་སུ་བསམས༔ རྟེན་བཞེངས་པའི་གནོད་སྦྱིན་འཁོར་ལོ་དང་ཡོན་ཏན་ཀུན་འབྱུང་བུམ་གཏེར་གཉིས་མེད་ཟུང་འཇུག་ཏུ་བསམས༔ བསྟན་འགྲོའི་བདེ་བ་རྒྱས་པའི་ཕྱིར་དུ་ཡུལ་ལྷ་བཟང་པོའི་རི་ལ་སྦ་ཞིང་༔ མགུར་ལྷ་བསྟན་མ་གང་ཡིན་ལ་སྙིང་པོ་ནོར་གྱི་གཏེར་ཆེན་དེ་ཕུལ་བས་དགྱེས་ཏེ༔ བསྟན་པ་སྐྱོང་བ་དང་ཡམས་ནད་འཁྲུག་རྩོད་མཐའ་དམག་སོགས་བཟློག་སྟེ༔ ཆར་པ་དུས་སུ་ཕབ་འབྲུ་དྲུག་རྟག་ཏུ་སྨིན༔ རྩི་རྒྱས་དཔལ་དང་དབང་ཐང་འཕེལ་བར་བསམ་པ་སོགས་སོ་སོར་འཕྲུལ་ཤེས་པར་བྱའོ༔ ས་སྤྱིའི་དཔལ་གསོ་བ་ལ་ས་བདག་དང་བསྟན་མ་སྤར་སྨེ་ལོ་སྐོར་སོགས་སོར་འདོན་ཞིང་ཐམས་ཅད་ལ་སྤྱི་ནོར་དུ་མཆོད་པའམ༔ སྤྱིའི་བཞུགས་རྟེན་དུ་འཛུགས་པ་གཉིས་ཀྱང་འཕྲལ་དུ་མཆོད་ནས་འདོད་ཞུས་རྟེན་དང་༔ ཕུགས་རྟེན་འཛུགས་ཏེ་རྒྱུན་མཆོད་བྱེད་པ་གང་ཡིན་ལྟར་འདོན་དང་དམིགས་པ་དེ་ལྟར་གསལ༔ ས་མ་ཡཱ་རྒྱ་རྒྱ་རྒྱ༔ ཅེས་པ་འདི་ཡང་བསམ་ཡས་ལས་པའི་བུམ་གཏེར་འབྱུང་བ་གསོས་པའི་དུས་བུམ་གཏེར་གྱི་གདམས་པ་འདི་རྒྱལ་པོ་ཡབ་སྲས་ཀྱིས་གསོལ་བ་བཏབ་པར༔ གུ་རུ་རིན་པོ་ཆེས་ཇི་ལྟར་སྩལ་བཞིན་དུ་བདག་བུད་མེད་ཡེ་ཤེས་མཚོ་རྒྱལ་གྱིས་ཡི་གེར་བཏབ་སྟེ་ནོར་བདག་ཡིད་བཞིན་ནོར་བུའི་ཆོས་སྐོར་དུ་གདམས་པ་མ་འོངས་ལས་འཕྲོ་ཅན་དང་འཕྲད་པར་ཤོག༔ སྔགས་ཀྱི་སྲུང་མས་བཀའ་འདི་སྲུངས༔ ཡང་མ་སྐྱི་མདངས་མ་ཡིས་གཏེར་འདི་འཚོས༔ ས་མ་ཡཱ༔ རྒྱ་རྒྱ་རྒྱ༔ ཁམས་པ་ཉི་མ་གྲགས་པས་ཁམས་སྲིང་མོ་རྫོང་མཆོག་ནས་གདན་དྲུངས་ཤིང་ཤོག་སེར་ལས་བསྒྱུར་བ་མངྒ་ལཾ༔

བསེ་རགས་བཀར་ཐབས།

ནོར་བདག་ཡིད་བཞིན་ནོར་བུ་ལས༔ བསེ་རགས་བཀར་ཐབས་བཞུགས་སོ༔ ཁྲོ་བོ་ཆེན་པོ་གནོད་སྦྱིན་གྱི་སྡེ་དཔོན་ལ་ཕྱག་འཚལ་ལོ༔ དངོས་གྲུབ་ལ་བར་དུ་གཅོད་པའི་བགེགས་བསེ་རགས་བཀར་ཞིང་བསྐྲད་པའི་རིམ་པ་ནི༔ རྫ་ཆག་གི་སྣོད་སྦང་མ་ཇ་ལོ་སོགས་ཀྱིས་བཀང་བའི་སྟེང་དུ། ཕོར་སྡེར་ཆག་པོ་ཞིག་གི་སྣོད་ནང་དུ་ཟན་ལ་བསེ་རགས་ཀྱི་ངར་མི་ཞྭ་གོས་སྐྱ་བོ་གྱོན་པ་སྐེ་རགས་དམ་དུ་བཅིངས་ཤིང་། ལག་གཉིས་ཟས་བླང་བའི་ཚུལ་གྱིས་བཟེད་ཅིང་ཁ་གད་མོ་བགད་པའི་ཚུལ་ཞིག་བཟོ། དེའི་གཡས་ལ་མི་ནོར་ཕོ་རིགས་ཀྱི་གླུད་དྲིལ། གཡོན་དུ་མི་ནོར་མོ་རིགས་ཀྱི་གླུད་དྲིལ། མདུན་དུ་མར་མེ། རྒྱབ་ཏུ་ཏིང་ལོ། ཕོར་སྡེར་རྫ་ཟངས་ཀྱི་ཆག་ཡས་མི་ཁའི་རྫས་སོགས་མང་པོ་བསགས༔ ཕྲག་པ་གཡས་གཡོན་ལ་ཉི་ཟླའི་ཤིང་བྱང་། རྒྱབ་ན་ནམ་མཁའ་དཀར་པོས་བརྒྱན། དར་ཚོན་རས་བལ་རིན་ཆེན་རྫོངས་སུ་གདབ༔ སྔགས་དྲུག་ཕྱག་རྒྱ་ཏིང་འཛིན་དང་ལྡན་པས་བྱིན་གྱིས་བརླབས་ཤིང་ཁྲོ་བོ་ཆེན་པོའི་བསྐྱེད་རིམ་དང་ལྡན་པས་འདི་སྐད་དོ༔ ཀྱཻ༔ རི་བོ་ཆེན་པོའི་ལྷོ་ཡི་ཕྱོགས༔ འཛམ་བུ་གླིང་གི་འཇིག་རྟེན་ཁམས༔ སྣ་ཚོགས་ལས་ཀྱི་གྲོང་ཁྱེར་གྱི༔ མཐའ་དབུས་ཕྱོགས་མཚམས་གར་བཞུགས་ཀྱང་༔ བསེ་རགས་གཞོན་ནུ་རྒྱལ་པོ་ལ༔ བསེ་རགས་སྡེ་ཚོགས་འཁོར་གྱིས་བསྐོར༔ རྫོང་ཡས་མཆོད་སྦྱིན་བཞེས་པའི་ཕྱིར༔ བསྐྱེད་པའི་གནས་འདིར་མྱུར་དུ་གཤེགས༔ བོས་པའི་མགྲོན་ལ་ས་མ་ཛཿགཟུགས་དང་གཉིས་མེད་བརྟན་པར་བཞུགས༔ ཕུད་དང་ནས་འབྲུ་འཐོར་ཞིང་༔ ཀྱཻ༔ བསེ་རགས་གཞོན་ནུ་རྒྱལ་པོ་དང་༔ མ་ལུས་འཁོར་བཅས་ཚུར་ཉོན་ཅིག༔ ཁྲོ་བོ་ཕྱག་ན་རྡོ་རྗེ་ཡི༔ བཀའ་བསྒོས་དམ་ལ་བཞག་པ་ལྟར༔ རྫོང་ཡས་མཆོད་སྤྱིན་འདི་བཞེས་ལ༔ འཁོར་འདིར་གནོད་པ་མ་བྱེད་ཅིག༔ ཐབ་ལ་འཁོར་བའི་བསེ་རགས་ནི༔ དམར་པོ་མེ་ཐུལ་མེ་ལྕེ་ཅན༔ དཀར་ལ་འཁོར་བའི་བསེ་རགས་ནི༔ དཀར་པོ་བལ་ཐུལ་ལྕགས་ལྕེ་ཅན༔ ཟས་ལ་འཁོར་བའི་བསེ་རགས་ནི༔ གོས་ཧྲུལ་དཀར་སྐྱ་ཤིང་ལྕེ་ཅན༔ འབྲུ་ལ་འཁོར་བའི་བསེ་རགས་ནི༔ རེ་གོས་ནག་པོ་རླུང་ལྕེ་ཅན༔ གོམ་པ་རེ་རེས་རྒྱང་གྲགས་བགྲོད༔ ལག་པ་རྐྱང་བས་དཔག་ཚད་ཁྱབ༔ ཡིད་ཀྱིས་བལྟས་པས་ཡུལ་ཁམས་གསལ༔ ཁྱེད་རྣམས་མ་ལུས་འཁོར་བཅས་ལ༔ དེ་རིང་ཡས་དང་རྫོང་འདེབས་པ༔ ནས་འབྲས་ཆང་གི་སྦང་མ་འདི༔ ཟད་མི་ཤེས་པའི་སྐོམ་ཆུ་གྱིས༔ འཁོར་འདིར་གནོད་པ་མ་བྱེད་ཅིག༔ བྲ་ནག་སྲན་ཆུང་རམ་པ་གསུམ༔ ཟད་མི་ཤེས་པའི་འབྲུ་ནོར་གྱིས༔ འཁོར་འདིར༴ ར་ལུག་ནོར་གསུམ་སྲེ་ལོང་འདི༔ ཟད་མི་ཤེས་པའི་རྒྱ་རི་གྱིས༔ འཁོར་འདིར༴ སྒོག་པ་གཡེར་མ་རྒྱ་བ་གསུམ༔ ཟད་མི་ཤེས་པའི་སྤགས་མ་གྱིས༔ འཁོར་འདིར༴ རྒྱ་ཚྭ་རྒྱམ་ཚྭ་ཁ་རུ་ཚྭ༔ ཟད་མི་ཤེས་པའི་རོ་མཆོག་གྱིས༔ འཁོར་འདིར༴ ལྕམ་པ་རུག་པ་ལ་ཕུག་གསུམ༔ ཟད་མི་ཤེས་པའི་རྡོར་གསུམ་གྱིས༔ འཁོར་འདིར༴ ཝ་རིལ་ཁྱི་རིལ་སྤྱང་རིལ་གསུམ༔ ཟད་མི་ཤེས་པའི་དྲི་ཞིམ་གྱིས༔ འཁོར་འདིར༴ ཞྭ་ཧྲུལ་གོས་ཧྲུལ་ལྷམ་ཧྲུལ་གསུམ༔ ཟད་མེད་ཞྭ་ལྷམ་གོས་གསུམ་གྱིས༔ འཁོར་འདིར༴ མདའ་ཆག་མདུང་ཆག་གཞུ་ཆག་གསུམ༔ ཟད་མི་ཤེས་པའི་གོ་མཚོན་གྱིས༔ འཁོར་འདིར༴ རྫ་ཆག་ཕོར་ཆག་སྡེར་ཆག་གསུམ༔ ཟད་དུ་མེད་པའི་ཡོ་བྱད་གྱིས༔ འཁོར་འདིར༴ ཐག་པ་དཀར་ནག་འབྲེང་ཆད་གསུམ༔ ཟད་དུ་མེད་པའི་ཁུར་ཐག་གྱིས༔ འཁོར་འདིར་གནོད་པ་མ་བྱེད་ཅིག༔ དེ་ནས་ཞལ་ཕྱིར་བསྒྱུར་སྒྲོན་མེ་སྦར་ཏེ༔ ཀྱཻ༔ བསེ་རགས་འཁོར་བཅས་ཚུར་ཉོན་དང་༔ ད་ནི་ལམ་སྟོན་ཤར་དུ་བསྟན༔ ཤར་ཕྱོགས་ལུས་འཕགས་གླིང་ལ་གཤེགས༔ གླིང་ཆེན་དེ་ན་དཔལ་རེ་བཟང་༔ གླིང་ཆེན་དེ་ན་ནོར་རེ་ཕྱུགས༔ གླིང་ཆེན་དེ་ན་སྐྱིད་རེ་ཆེ༔ ཁྱེད་ཅག་མ་འདུག་དེ་ན་གཤེགས༔ ནམ་མཁའ་དཀར་པོ་བྱིན་པ་དེ༔ ལུས་འཕགས་གླིང་གི་ནམ་མཁའ་ཡིན༔ རི་བོ་དཀར་པོ་ཤེལ་གྱི་རི༔ ལུས་འཕགས་པོ་ཡི་རི་བོ་ཡིན༔ ཁྱེད་ཅག་འཁོར་བཅས་གླིང་དེར་དེངས༔ ཡུལ་འཁོར་འདི་ལ་མ་ཆགས་ཤིག༔ གནས་ཁང་འདི་ལ་མ་ཞེན་ཅིག༔ མར་མེས་མདུན་གྱི་ལམ་སེལ་གྱིས༔ གཡས་ཀྱི་ཆངས་བུ་ཉིན་གྱི་ལོངས་སྤྱོད་གྱིས༔ གཡོན་གྱི་ཆངས་བུ་མཚན་གྱི་ལོངས་སྤྱོད་གྱིས༔ ཕྲག་པ་གཡས་ཀྱི་ཉི་མ་དེ༔ ཉིན་གྱི་ལམ་སྒྲོན་གྱིས་ལ་གཤེགས༔ ཕྲག་པ་གཡོན་གྱི་ཟླ་བ་དེ༔ མཚན་གྱི་ལམ་སྒྲོན་གྱིས་ལ་གཤེགས༔ རྒྱབ་ན་བཞག་པའི་ཏིང་ལོ་དེ༔ ཕུག་གི་ནང་ཟས་གྱིས་ལ་གཤེགས༔ དར་ཚོན་བལ་རས་སྣ་ཚོགས་དེ༔ ཁྱོད་ཅག་མཁོ་དགུ་གྱིས་ལ་གཤེགས༔ རིན་ཆེན་སྣ་ལྔའི་རྫོང་ཆེན་དེ༔ མེད་ཀྱང་མི་ནས་བཙལ་བ་ཡིན༔ སྲ་ཡང་བྲག་ལས་བརྐོས་པ་ཡིན༔ ཕྱག་ན་རྡོ་རྗེའི་བཀའ་བྱུང་ནས༔ ཕངས་ཀྱང་རྫོང་སུ་བཏབ་པ་ཡིན༔ ཡས་རྫོང་རྣམས་པ་སྣ་ཚོགས་དེ༔ ཁྱེད་ལ་བྱིན་པས་དགའ་བར་གྱིས༔ ཁྱོད་ལ་བྱིན་པས་མགུ་བར་གྱིས༔ རྒྱང་གྲགས་རེ་ལ་གོམ་རེ་གྱིས༔ དཔག་ཚད་རེ་ལ་འདུར་རེ་གྱིས༔ ད་སོང་ད་གཤེགས་དུས་ལ་བབས༔ མྱུར་དུ་དེངས་ཤིག་བསེ་རགས་ཚོགས༔ ཡས་དང་རྫོང་ཆེན་དེ་བཏབ་ནས༔ བཀའ་བཞིན་འགྲོ་བར་མ་བྱས་ན༔ ཕྱག་ན་རྡོ་རྗེའི་ཏིང་འཛིན་གྱིས༔ ཁྲོ་བོ་ཁྲོ་མོ་མཚོན་ཆ་དང་༔ མེ་དཔུང་རྡོ་རྗེའི་ཆར་ཆེན་པོས༔ རྡུལ་དུ་བརླག་པར་གདོན་མི་ཟ༔ ཅེས་བརྗོད་ཤར་ཕྱོགས་གོམ་པ་བརྒྱད་ཅུའི་མཚམས་ན་སྐྱེལ༔ ཕྱི་མིག་མི་བལྟ་སྔགས་པས་ཐུན་གྱིས་ཁྱིམ་ལ་བྲབ༔ ཏིང་འཛིན་གསལ༔ ཧཱུྃ༔ ང་ནི་སྟོབས་ལྡན་ཁྲོ་བོའི་རྒྱལ༔ ཁྲོ་ཚོགས་སྤྲུལ་པ་ཡང་སྤྲུལ་དང་༔ སྣ་ཚོགས་མཚོན་ཆར་མེ་དཔུང་གིས༔ བཀའ་དང་དམ་ལ་མི་བརྩི་བའི༔ གནོད་བྱེད་འབྱུང་པོ་རྡུལ་དུ་བརླག༔ རྩ་སྔགས་སུམ་བྷ་ནི་བརྗོད༔ འཁོར་ལོས་གོ་བསྒོ༔ ནོར་བདག་གི་ལས་མཐའ་འདི་ཡང་སློབ་དཔོན་ཆེན་པོའི་ལུང་ལྟར་ཁོ་མོས་ཤོག་སེར་ལ་བཏབ་སྟེ་རིན་པོ་ཆེའི་གཏེར་དུ་སྦས་པ་ལས་འཕྲོ་ཅན་དང་འཕྲད་པར་ཤོག༔ ས་མ་ཡཱ༔ རྒྱ་ཁམས་པ་ཉི་མ་གྲགས་པས་ཁམས་སྲིང་མོ་རྫོང་མཆོག་ནས་གདན་དྲངས་པའོ།། །།མངྒ་ལཾ། །

ཡང་གསང་བླ་རྡོ་འཁོར་ལོ་ཆོག་བརྒྱུད་མ།

ནོར་བདག་ཡིད་བཞིན་ནོར་བུ་ལས༔ ཡང་གསང་བླ་རྡོ་སྲོག་འཁོར་གྱི་གདམས་པ་གུད་དུ་བཀོད་པ་བཞུགས༔ དཔལ་ཕྱག་ན་རྡོ་རྗེ་ལ་ཕྱག་འཚལ་ལོ༔ ནོར་བདག་ཡིད་བཞིན་ནོར་བུའི་ཡང་གསང་བླ་རྡོ་སྲོག་འཁོར་གྱི་གདམ་པ་གུད་དུ་བཀོད་པ་འདི་ཡིན་ཏེ༔ དེ་ཡང་ར་བ་བཞིའི་ཡར་ངོ་རྒྱུ་སྐར་རྒྱལ་དང་ལྡན་པ་ལ༔ གཞི་མཐིང་ཤོག་གམ་དར་རས་རྒྱ་ཤོག་སོགས་ལ༔ གསེར་དངུལ་མཚལ་ཟངས་རྒྱ་སྣག་སོགས་གང་འབྱོར་གྱིས་འཁོར་ལོ་མུ་ཁྱུད་དགུ་བསྐོར་བའི་ལྟེ་བར་ཧཱུྃ་གི་མཐར་བདག་སྒྲུབ་པ་པོ་ལ་དེང་འདིར་ཚེ་ཆོས་ཟས་ནོར་གོས་ཀྱི་དངོས་གྲུབ་སྩོལ་ཅིག༔ སྲིད་པ་གསུམ་གྱི་ལྷ་འདྲེ་མི་གསུམ་ཟིལ་གྱིས་མནན་ཏེ་དབང་དུ་བསྡུས་ཤིག་པ་ཤཾ་ཀུ་རུ་ཧོ༔ དེའི་ཕྱི་རིམ་མུ་ཁྱུད་ལ༔ ཨཱོཾ་བཛྲ་པཱ་ཎི་མ་ཧཱ་ཀྲོ་ཏ་སརྦ་སིདྡྷིཧཱུྃ་ཧཱུྃ༔ ཡཀྴ་སརྦ་ས་མ་ཡ་ཙིཏྟ་ཧྲིང་ཧྲིང་ཛཿཛཿ ཧཱུྃ་ཧཱུྃ༔ ཨ་ཏྲི་ནྲི་པ་ཤཾ་ཐུན་ཛཿདེའི་ཕྱི་རིམ་མུ་ཁྱུད་ལ༔ ཨོཾ་བྷཻ་ཤྲ་མ་ན་ཡེ་སརྦ་ས་མ་ཡ་ཙིཏྟ་ཧྲིང་ཧྲིང་ཛཿཛཿ སྲིད་གསུམ་སྣང་བ་ར་ག་པ་ཤཾ་ཐུན་ཐུན་སྡུས་སྡུས་ཧཱུྃ་ཧཱུྃ་སྭཱ་ཧཱ༔ དེའི་ཕྱི་རིམ་པདྨ་འདབ་བཞིར༔ ཨོཾ་མ་ཎི་པཱ་ལ་རཏྣ་སརྦ་སིདྡྷིཧཱུྃ་སྭཱ་ཧཱ༔ ཨོཾ་བྷ་སུ་དྷ་རི་ཎྱཻ་རཏྣ་སིདྡྷི་ཧཱུྃ་སྭཱ་ཧཱ༔ ཨོཾ་ཀུ་རུ་ཀུལླེ་རཏྣ་སིདྡྷི་ཧཱུྃ་སྭཱ་ཧཱ༔ ཨོཾ་ན་ག་ངྷ་ར་རཏྣ་སིདྡྷི་ཧཱུྃ་སྭཱ་ཧཱ༔ འཕྱོངས་བཞིར༔ ངྷ་ནཱཾ་མེ་ངྷི་ཧོ༔ དེའི་ཕྱི་རིམ་འདབ་བརྒྱད་ལ༔ ཨོཾ་བཛྲ་ཤ་ར་མ་ཎ་ཡེ་རཏྣ་སིདྡྷིཧཱུྃ་སྭཱ་ཧཱ༔ ཨོཾ་རཏྣ་ཤ་ར་མ་ན་ཡེ་མ་ཎི་སིདྡྷིཏྲཾ༔ ཨོཾ་པདྨ་ཤ་ར་མ་ན་ཡེ་པ་ཤཾ་སིདྡྷིཧྲཱི༔ ཨོཾ་ཀརྨཱ་ཤ་ར་མ་ཎི་ཡེ་སརྦ་སིདྡྷིཨཱ༔ མཚམས་བཞིར༔ ཨོཾ་ཛཾ་བྷ་ལ་ཛ་ལནྡྲ་ཡེ་དྷ་ན་མེ་ངྷི་ཧྲཱི༔ སྭཱ་ཧཱ༔ འཕྱོངས་རྣམས་སུ༔ ཨ་ཡུར་པུཎྱཻ་པུཥྟིཾ་ཀུ་རུ་ཧོ༔ དེའི་ཕྱི་རིམ་མུ་ཁྱུད་ལ༔ ཨོཾ་མ་ཧཱ་ཡཀྵ་མ་ཎི་ངྷ་ར་ཨཥྟ་ས་མ་ཡ་ཙིཏྟ་ཧྲིང་ཧྲིང་ཛཿཛཿ ཨ་ཏྲི་ནྲི་ཛཿསརྦ་ལོ་ཀ་རཏྣ་སིདྡྷིསྡུས་སྡུས་ངྷ་ན་མཻ་དྷི་ཨ་ཡུར་པུཎྱེ་ར་ག་པ་ཤཾ་ཐུན་ཐུན་ཛཿཛཿ བདག་སྒྲུབ་པ་པོ་ལ་སྲིད་གསུམ་ལྷ་འདྲེ་མི་གསུམ་ཟས་ནོར་ལོངས་སྤྱོད་རྟེན་འབྲེལ་ལེགས་ཚོགས་ཐམས་ཅད་དབང་དུ་སྡུས་ཤིག༔ ཡཀྴ་སརྦ་ས་མ་ཡཱ་ཀརྨ་སིདྡྷིཕ་ལ་ཧོ༔ དེའི་ཕྱི་རིམ་མུ་ཁྱུད་ལ༔ ཨོཾ་བྷཻ་ཤ་ར་མ་ན་ཡེ་ཡཀྵ་ཛྙཱ་ན་ལོ་ཀ་སརྦ་ས་མ་ཡཱ་པ་ཤཾ་ཀུ་རུ་ཧཱུྃ་ཧཱུྃ་སྭཱ་ཧཱ༔ ཨོཾ་ན་ག་ངྷ་ར་མ་ཎི་པཱ་ལ་ཡ་ཨཥྟ་ས་མ་ཡཱ་པ་ཤཾ་མ་མ་ཐུན་ཐུན་སྭཱ་ཧཱ༔ བདག་སྒྲུབ་པ་པོ་ལ་ལྷ་ཀླུ་མི་ཡི་ཡིད་ཤེས་བསོད་ནམས་དཔལ་འབྱོར་ཁ་རྗེ་དབང་ཐང་ཟས་ནོར་ལོངས་སྤྱོད་ཐམས་ཅད་དབང་དུ་སྡུས་ཤིག་པ་ཤཾ་ཀུ་རུ་འགུལ་འགུལ་མ་མ་ཁ་ཤི་མི་སྙིང་སྒུལ་སྒུལ་མི་འགྲམ་ཆོག་ཆོག་ཧྲིང་ཧྲིང་སྡུས་སྡུས་མ་མ་ཁ་ཤི་ནི་ཧཱུྃ་ཛཿདེའི་ཕྱི་མུ་ཁྱུད་ལ༔ ཨོཾ་བྷཻ་ཤ་ར་མ་ཎ་ཡེ་ཡཀྴ་སརྦ་ས་མ་ཡཱ་ཙིཏྟ་ཧྲིང་ཧྲིང་ཛཿཛཿ ཨ་ནྲི་ཏྲི་སརྦ་ལོ་ཀ་པ་ཤཾ་ཀུ་རུ་ཁུག་ཛཿཁུག་སྭཱ་ཧཱ༔ ཨོཾ་ནཱ་ཐ་ཀེ་ལ་ཤ་གྷ་ན་པ་ཏི་མ་ཧཱ་ངྷེ་ཝི་ཙིའུ་རཱ་ག་ཡཀྴ་ཙ་དུར་ཙིཏྟ་ཧྲིང་ཧྲིང་ཛཿཛཿ ཨ་ཨ་སྲིད་པ་ལྷ་ཡི་བདེ་སྐྱིད་ཚེ་བསོད་དཔལ་འབྱོར་ལེགས་ཚོགས་ཐམས་ཅད་པ་ཤཾ་མ་མ་ཐུན་ཐུན་ཛཿ་ཛཿཀྵ༔ ཡ་གནོད་སྦྱིན་ནོར་ལྷའི་སྟོབས་དཔལ་དབང་ཐང་སྲིད་འབྱོར་ཐམས་ཅད་པ་ཤཾ༴ ཏྲི་ཏྲི་སྣང་སྲིད་དྲེགས་པའི་སྡེ་ཚོགས་ཐམས་ཅད་ཀྱི་མཐུ་སྟོབས་ནུས་རྩལ་སརྦ་པ་ཤཾ༴ ནྲི་ནྲི་འཛམ་གླིང་སྲིད་པའི་ཆེ་བཙུན་རྒྱལ་བློན་རིགས་བྱེད་མཁས་དབང་མོ་བཙུན་སྐྱེས་པ་ཡ་རབ་འཕྱོ་དགུ་དམངས་རིགས་གཡང་ཅན་སོགས་སྲིད་པ་ཕོ་རྒྱུད་མོ་རྒྱུད་ཐམས་ཅད་པ་ཤཾ༴ ཅེས་སོགས་དང་སྲིད་སྤེལ་ན༔ ཨོཾ་བཛྲ་མ་ཎི་ངྷ་ར་ངྷ་ར་རཱ་ག་ཧེ་ཤ་ཙིཏྟ་པཱ་རི་ཝ་རེ་སྭཱ་ཧཱ༔ ནྲི་བཛྲ་མ་ཧཱ་ཡ་ཤཱ་རི་ལ་ཧེ་ཛཿཛཿ མ་མ་ཀྱེད་ཀྱེད་ཁྱེའུ་སིདྡྷིཛཿཛཿ འཆང་བ་པོ་ལ་དེང་འདིར་སྲིད་པ་ལྷའི་བུ་སྤེལ་ཅིག་ཁྱེའི་ངྷ་ར་སིདྡྷིཛཿཔ་ཤཾ་ཀུ་རུ་ཡེ་སྭཱ་ཧཱ༔ ཅེས་དང་གང་འདོད་ཀྱི་སྔགས་དང་སྤེལ་ཚིག་ཕྱི་ནང་ཐམས་ཅད་དུ་ཁ་བསྒྱུར་བྱ༔ དེའི་ཕྱི་རིམ་དབྱངས་ཡིག་ལ༔ ཡཾ་ཡཾ་རླུང་གི་དཔལ་འབྱོར་ཐམས་ཅད་ཐུན་ཐུན་ཛཿཛཿ གསལ་བྱེད་ལ་ལཾ་ལཾ་ས་གཞིའི་ཁྱོན་གྱི་དཔལ་འབྱོར་ཐམས་ཅད་ཐུན་ཐུན་ཛཿཛཿ རྟེན་འབྲེལ་སྙིང་པོར༔ ཨེ་ཨེ་ནམ་མཁའི་ཁམས་ཀྱི་དཔལ་འབྱོར་ཐམས༴ གནོད་སྦྱིན་ནོར་ལྷ་རྒྱ་མཚོའི་ཚོགས་རྣམས་རྟེན་འབྲེལ་ཆེན་པོའི་འཁོར་ལོ་འདི་ལ་བརྟན་པར་བཞུགས་ནས་དེང་འདིར་དགོས་འབྱུང་དབང་གི་ཕྲིན་ལས་ཐམས་ཅད་ཐོགས་མེད་དུ་འགྲུབ་པར་མཛད་དུ་གསོལ༔ མ་ཧཱ་ཡཀྴ་ས་མ་ཡཱ་མངྒ་ལཾ་ཤྲཱི་ཡ་ཏིཥྛ་ཡ་བྷ་ཝནྟུ་ཡེ་སྭཱ་ཧཱ༔ དེའི་ཕྱི་རིམ་མུ་ཁྱུད་ལ༔ ནོར་བུའི་ལྕགས་ཀྱུ་བཅུ་དྲུག་དང་པདྨའི་ལྕགས་ཀྱུ་བཅུ་དྲུག་སྤེལ་མར་བཀོད༔ དེ་དག་ལ་ཡང་ཨ་ནྲི་ཏྲི་ཛཿབར་མཚམས་ཐམས་ཅད་ལྔ་ལྡན་དམར་པོའི་འོད་ཟེར་ཞིག་གིས་བརྡལ་ཁྱབ་ཏུ་བྲིས༔ གྲུབ་ན་ཕྱི་རིམ་ཕྱག་རྡོར་གྱི་སྐུ་ཁོག་གཞུང་ལྟར་བྲིའོ༔ ས་མ་ཡཱ༔ རྒྱ་རྒྱ་རྒྱ༔ དེ་ནས་རྟེན་འབྲེལ་རྫས་ཀྱི་རིམ་པ་རྣམས་གབ་ཡིག་ཇི་བཞིན་ལས༔ ཁྱད་པར་མེད་དུ་མི་རུང་བའི་རྫས་ལ༔ ས་བཅུད་གཡང་ཅན་ཞིང་དགུའི་ས༔ ཆུ་བཅུད་མར་དང་ལན་ཚྭ་ག་པུར༔ མེ་བཅུད་རྒྱ་མཚལ་བྲག་ཞུན་ལི་གྲི༔ རླུང་བཅུད་བྱ་རྒོད་ཀྱི་སྤུ་སྒྲོ་དང་དར་ཟབ་སྣ་ཚོགས༔ ནམ་མཁའི་བཅུད་གངས་རི་རྩེ་མཐོན་གྱི་ས་རྡོ་དང་གཡུ་མཚོ་བརྟན་འཁྱིལ་གྱི་ཆུ༔ མི་བཅུད་སྐྱེས་པ་བུད་མེད་རིགས་བཟང་གི་བྱང་སེམས༔ མ་འབྱོར་ན་སྲིད་པའི་བྱང་སེམས་དཀར་དམར༔ རྡོ་བཅུད་དངུལ་དང་ཟངས་ལྕགས༔ དཀོར་མཛོད་ཀྱི་བཅུད་གསེར་གཡུ་ཁྲབ་བྱང་༔ ཟས་ཀྱི་བཅུད་རྒྱ་ཐབ་མང་པོའི་དྲེག་པ༔ ཚེ་བཅུད་པཉྩ་ཨ་མྲྀ་ཏ་དང་ཚེ་རིང་གཡང་ཅན་གྱི་སྐྲ་གོས༔ ལྷའི་བླ་རྟེན་ཤེལ་དང་དུང་༔ མིའི་བླ་རྟེན་གཡུ་དང་མུ་ཏིག༔ ལྷ་འདྲེའི་བླ་རྟེན་ཕ་ཝང་ལོང་བུ༔ མཁའ་འགྲོའི་བླ་རྟེན་མགྲོན་བུ༔ ཁྱད་པར་བུ་སྤེལ་ན་བུད་མེད་བུ་བདུན་སྐྱེས་པའི་མའི་ལག་ནས་བླངས་པའི་རིན་ཆེན་ཟས་གོས་དང་བུ་ལྔའི་ཕའི་མདེའུ༔ ཕྱུག་པོའི་སྐྱེས་ཕྲུག་གི་སྐྲ་གོས་སོགས་བསག་གོ༔ ས་མ་ཡཱ༔ རྒྱ༔ དེ་ལྟར་རྫས་འཁོར་ཟུང་དུ་འཇུག་པའི་དར་དམར་མཐིང་གིས་དྲིལ་ཞིང་ཚོན་སྐུད་ཀྱི་རྒྱ་ཆིངས་སྤྲས་པ་གཏེར་བུམ་དུ་གཞུག་ན༔ བུམ་རྫས་གཞུང་བཞིན་མ་གྲུབ་ཀྱང་ཅི་འབྱོར་ཙམ་གྱིས་ཆད་སྐྱོན་དུ་མི་འགྱུར༔ དེ་ལྟར་གཞུང་བཞིན་ལེགས་པར་བསྒྲུབས་ནས་གཏེར་བུམ་མམ་བྷནྡྷར་གཞུག་ནས་མཆོད་ན་ཡིད་བཞིན་གྱི་ནོར་བུ་དང་མཚུངས་ཤིང་གསོལ་བ་གང་བཏབ་འགྲུབ༔ བང་མཛོད་དུ་སྦས་ན་ནོར་རྫས་འཕེལ༔ མེ་ཐབ་ཏུ་སྦས་ན་ཟས་ཚོགས་འདུ༔ རྣལ་འབྱོར་པའི་རྒྱབ་ཡོལ་དུ་སྦས་ན་འཁོར་སློབ་རྒྱས༔ ར་བར་སྦས་ན་རྟ་ཕྱུགས་རྐང་འགྲོས་འཕེལ༔ དུར་སར་སྦས་ན་མི་རྒྱུད་འཕེལ༔ ཁང་རྨིང་དུ་སྦས་ན་ཁ་དྲག་འགྱུར༔ བུད་མེད་ལ་བཏགས་ན་ཁྱེའུ་འཕེལ༔ རྟེན་ལ་གཞུག་ན་མཆོད་ཚོགས་འདུ་ཞིང་རབ་གནས་ལེགས༔ རྒྱལ་མཚན་གྱི་རྩེར་བཏགས་ན་རླུང་གི་ཟེར་ཕོག་ཚད་དབང་དུ་འདུ༔ ཡུལ་གྱི་རྒྱབ་རིར་སྦས་ན་ཡུལ་དེར་མི་ནོར་ལོ་ཕྱུགས་འཕེལ༔ མེ་ལོང་གི་ལོགས་ལ་དྲི་བཟང་གི་ཆུས་ཁྲུས་གསོལ་བའི་ཁྲུས་ཆུ་ཞིང་ལ་གཏོར་ན་ལོ་ལེགས༔ རི་ལ་གཏོར་ན་རྩྭ་ལེགས༔ འབྲོག་ལྷས་ལ་གཏོར་ན་དཀར་གཞོན་འཕེལ༔ ཕུང་ཤུལ་ལ་གཏོར་ན་བཀྲ་ཤིས༔ བང་མཛོད་ལ་གཏོར་ན་སྲིས་སྨེ༔ ཀླུ་གཏོར་དང་སྦྲགས་ནས་ཆུ་མིག་ཏུ་བླུགས་ན་ཆར་འབེབས༔ ཡུལ་ལྷའི་རྟེན་མཁར་ལ་གཏོར་ན་ཕོག་ཐུག་ཞི༔ དེ་སོགས་ས་ཕྱོགས་གང་དུ་གཏོར་ཀྱང་བཀྲ་ཤིས་ཤིང་བྱིན་ཆགས་པར་འགྱུར་རོ༔ སྐབས་སུ་ཡི་དམ་གྱི་ཏིང་ངེ་འཛིན་འཁོར་ལོ་ནོར་བདག་དངོས་སུ་གསལ་ལ༔ བར་སྣང་དུ་ཀླད་ལ་བསྐོར་ནས་གཡུག་པས་ལྷ་ཚོགས་ཐམས་ཅད་གནད་ནས་བསྐུལ་བ་ལྟར་གྱུར་ཏེ༔ དམར་འོད་སྲིད་གསུམ་ཁྱབ་པས་ལྷ་འདྲེ་མི་གསུམ་ཟས་ནོར་དང་བཅས་པ་རབ་ཏུ་མྱོས་པས་བཅུད་དུ་འཁྱིལ་བ་ཟེར་ཞགས་ཀྱིས་འུབ་འུབ་བསྡུས་པར་བསྒོམ་ཞིང་༔ ཟླ་སྟོད་ལ་གཡུགས་པས་ཕོ་རྒྱུད་དབང་དུ་འདུ༔ ཟླ་སྨད་ལ་གཡུགས་པས་མོ་རྒྱུད་དབང་དུ་འདུ༔ ཚེས་བཅོ་ལྔའི་ཐོ་རངས་ལ་གཡུགས་པས་སྣང་སྲིད་ཐམས་ཅད་དབང་དུ་འདུ༔ སྤྱིར་འདི་ཉིད་སྒྲུབ་ཅིང་འཆང་བའི་རྣལ་འབྱོར་པ་ལ་ནོར་དང་ལོངས་སྤྱོད་ཤ་རུས་སྦྲང་བུ་གཏིབ་པ་བཞིན་ཏེ་ཤིན་ཏུ་ཟབ་པས་གསང་བར་གཅེས་སོ༔ ས་མ་ཡཱ༔ རྒྱ་རྒྱ་རྒྱ༔ གཞན་ཡང་སྒྲུབ་པ་ཕྱི་ནང་གསང་གསུམ་གང་ལ་ཡང་རྟགས་འགྱངས་ཤིང་ཞུད་པ་སོགས་ལ༔ ཕྱག་རྡོར་གྱི་རྩ་སྔགས་དང་ནོར་བདག་གི་སྔགས་སྦྲེལ་ལ་བཟླ༔ དེས་ཀྱང་རྟགས་མེད་ན༔ ཨོཾ་བཛྲ་བྷཻ་པཱ་ཎི་ཤ་ར་མ་མ་ཧཱ་ན་ཡེ་ཀྲོ་ཏ་ཡཀྴ་སརྦ་ས་མ་ཡཱ་ཙིཏྟ་སིདྡྷིཧཱུྃ་ཧཱུྃ་ཧྲིང་ཧྲིང་ཛཿཛཿ ལོ་ཀ་སརྦ་ས་མ་ཡ་པཱ་ཤཾ་ཀུ་རུ་ཧཱུྃ་ཧཱུྃ་སྭཱ་ཧཱ༔ ཅེས་སྐབས་སུ་བཟླས་པས་སྤོག་པར་འགྲོ་སྟེ་མི་ཞུད་ཅིང་ལས་མྱུར་རོ༔ འདི་ནི་རྣལ་འབྱོར་པ་ལྟ་དགོངས་དང་མི་ལྡན་ན་བརྩམ་པར་མི་རུང་ངོ་༔ གཞན་ཡང་འཁོར་ལོ་ལུས་ལ་བཅངས་པས་གཏོར་སྔགས་བཟླས་བསྐུལ་གྱི་ཚེ་རང་ཉིད་ཡི་དམ་ཐུགས་ཀར་ནོར་བདག་གི་དཀྱིལ་འཁོར་སྒོམ་པ་ཡིན་ནོ༔ ཡང་གསང་གབ་པའི་སྙིང་བྱང་དམ་པ་བརྒྱུད་འཛིན་གྱི་ཐུགས་སྲས་ལ་ཆིག་བརྒྱུད་དུ་སྦྱིན་པར་བྱའོ༔ ས་མ་ཡཱ༔ རྒྱ་རྒྱ་རྒྱ༔ རིག་འཛིན་ཉི་མ་གྲགས་པའི་གཏེར་མའོ། །མངྒ་ལཾ།། །།

འཛབ་ཟླས་ཀྱི་དམིགས་པ་དང་སྔགས་བྱང་།

འཛབ་ནི༔ བདག་བསྐྱེད་ཕྱག་རྡོར་གྱི་སྐུའི་གནས་གནས་གསུམ་དུ་ཨཱོཾ་ཨཱཿཧཱུྃ་གསུམ་གྱིས་མཚན་པའི་ཧཱུྃ་གི་འོག་ཐུགས་ཀའི་ཆ་སྨད་དུ་ནོར་བདག་གི་དཀྱིལ་འཁོར་ལྷ་སོགས་རྣམས་སྒོམ་པ་དང་༔ མདུན་བསྐྱེད་རྣམ་སྲས་གཙོ་འཁོར་གྱི་གནས་གསུམ་དུ་སྒྲུབ་ཐབས་ཕྱི་ནང་གསང་གསུམ་གྱི་དགོངས་པ་ལྟར་བྱ་དགོས་པ་དང་༔ དང་པོ་ལ་བདག་བསྐྱེད་ཀྱི་དཔྲལ་བའི་ཨཱོཾ་ལས་འོད་ཟེར་ལྔ་ལྡན་འཕྲོས༔ བདག་མདུན་གྱི་རྣམ་སྲས་འཁོར་བཅས་ཀྱི་དཔྲལ་བ་བདེ་ཆེན་འཁོར་ལོ་ཟླ་སྟེང་བྷཻ་ཡིག་ལྷ་མདོག་ཅན་སྔགས་ཕྲེང་གིས་གཡས་སུ་བསྐོར་བ་ལ་ཕོག་པས་སྔགས་ཕྲེང་གཡས་དང་༔ འོད་ཟེར་གྱི་ཕྲེང་ཐག་ག །ཡོན་དུ་འགལ་མེ་ལྟར་འཁོར་བ་ལས་འོད་ཟེར་ལྔའི་ཚོགས༔ ཕྱོགས་བཅུའི་ཞིང་རབ་འབྱམས་གཞལ་དུ་མེད་པར་འཕྲོས་ཤིང་ཁྱབ་པས་འཕགས་པ་མཆོད༔ སེམས་ཅན་གྱི་དོན་བྱས༔ འཁོར་འདས་ལོངས་སྤྱོད་ཀྱི་བྱིན་རླབས་དངོས་གྲུབ་འབྱུང་བའི་དྭངས་བཅུད་འགྲོ་བའི་ཚེ་བསོད་ཐམས་ཅད་སྐུ་ཡིག་ཕྱག་མཚན་བཀྲ་ཤིས་རྫས་རྟགས་སོགས་དང་། འོད་དང་འོད་ཟེར་གྱི་རྣམ་པར་བསྡུས་ཏེ་བདག་མདུན་ལ་ཐིམ་པས་གཟི་འོད་ནུས་སྟོབས་མཆོག་ཏུ་འབར་ཞིང་རྒྱས་ནས། ཕྱི་སྣོད་ནང་བཅུད་ཐམས་ཅད་དག་པ་རབ་འབྱམས། གནོད་སྦྱིན་དབང་གི་གཞལ་ཡས་ཞིང་ཁམས་ཐ་གྲུ་རྒྱ་ཁྱོན་བློ་ལས་འདས་པའི་དབྱིངས་སུ་བརྡལ་ཞིང་། གནོད་སྦྱིན་འཁོར་བཅས་ལྷ་ཚོགས་སྣང་བརྙེན་གསལ་དྭངས། དཔའ་སྒེག་གཟི་འོད་ནུས་སྟོབས་མཆོག་ཏུ་འབར་ཞིང་མངོན་སུམ་ལྟར་གྱ་གྱུ་ལང་ལིང་དུ་གསལ་བའི་ལྷ་ཚོགས་རྣམས་ཀྱི་ཞལ་དང་ཕོ་བྲང་ཞིང་ཁམས་ནམ་མཁའི་མཐའ་ཀླས་ཐམས་ཅད་ནས་སྔགས་ཀྱི་སྒྲ་དབྱངས་བུང་བ་ཚང་ཞིག་པའི་སྒྲ་ལྟར་ཟི་ལྷང་ལྷང་དུ་ཡོད་པར་བསམ་ལ་དམིགས་པ་དེ་རྣམས་ཡང་ཡང་གསལ་ཞིང་སྔགས་འདི་བགྲང་ངོ། ཨཱོཾ་བྷཻ་ཤྲ་མ་ན་ཡེ་ཡཀྴ་སརྦ་ས་མ་ཡ་ཙིཏྟ་ཧྲིང་ཧྲིང་ཛཿཛཿ འདི་ཕྱི་སྒྲུབ་སྟེ་རྩ་བའི་སྙིང་པོའོ། །གཉིས་པ་ནང་བསྒྲུབ་ནི། བདག་བསྐྱེད་ཀྱི་མགྲིན་པའི་ཨཿལས་འོད་ཟེར་དམར་པོ་རེག་བྱ་ཤིན་ཏུ་ཚ་བ་མང་པོ་གློག་འཁྱུག་པ་ལྟར་བདག་དང་མདུན་བསྐྱེད་ཀྱི་ལྷ་འཁོར་ཐམས་ཅད་ཀྱི་མགྲིན་པར་ཉི་སྟིང་བྷཻ་ཡིག་བཟླ་བའི་སྔགས་ཀྱིས་བསྐོར་བ་ལ་ཕོག་པས་སྔགས་ཕྲེང་གཡས་དང་ཕྲེང་ཐག་གཡོན་དུ་འཁོར་ལྷ་ཚོགས་ཐམས་ཅད་གསུང་གི་གད་རྒྱངས་བཞད་སྐུའི་གཟི་རྗིད་རྒྱས། ཐུགས་ཀྱི་ཏིང་འཛིན་དཔལ་དུ་འབར་བས་ནུས་སྟོབས་རབ་ཏུ་རྒྱས་པའི་རྩལ་ལས་འོད་དང་འོད་ཟེར་བསམ་གྱིས་མི་ཁྱབ་པ་ཕྱོགས་བཅུར་འཕྲོས་ཤིང་ཁྱབ་སྟེ། རབ་ཏུ་ཁྱབ་པས་མཆོད་འོས་རྣམས་མཆོད། སེམས་ཅན་གྱི་དོན་བྱས། འོག་མིན་སོགས་དག་པའི་ཞིང་ལྔ་ནས་སྐུ་གསུམ་སྟོན་པའི་སྤྲུལ་འཁོར་རིགས་ཀྱི་བརྒྱུད་པ་དང་བཅས་པའི་ཐུགས་རྗེ་བྱིན་རླབས་སྟོང་གསུམ་འཇིག་རྟེན་འཁོར་འདས་ལམ་གསུམ་ཐམས་ཅད་ནས། ཕྱི་སྣོད་འབྱུང་བཞིའི་དྭངས་མ་ནང་བཅུད་འགྲོ་བའི་ཚེ་དཔལ། ཚངས་པའི་གནས་རིས་བཅུ་བདུན་གྱི་ཏིང་འཛིན་དགའ་བདེའི་ཡོན་ཏན། ཚངས་པ་བརྒྱ་བྱིན་རྒྱལ་ཆེན་སྡེ་བཞི་རྣམས་ཀྱི་བསོད་ནམས་གཟི་བརྗིད་དབང་ཐང་གནོད་སྦྱིན་ཕྱོགས་སྐྱོང་ནོར་ལྷ་རྒྱ་མཚོའི་དཔལ་འབྱོར་དངོས་གྲུབ༔ རྒྱལ་པོ་རྒྱལ་ཕྲན་བློན་འབངས་བཙུན་མོ་བསོད་ནམས་ཅན་དང་བསགས་ལྡན་ཐམས་ཅད་ཀྱི་ལུས་ངག་ཡིད་གསུམ་ཚེ་དཔལ་འབྱོར་བ་དབང་ཐང་རིན་ཆེན་འབྲུ་ནོར་གསེར་དངུལ་ཟངས་ལྕགས་རྟ་གླང་དར་ཟབ་གོ་མཚོན་འདོད་དགུའི་དཔལ་འབྱོར་ཐམས་ཅད་རང་དབང་མེད་པར་འོད་དང་འོད་ཟེར་གྱི་རྣམ་པར་བསྡུས་ཏེ་བདག་མདུན་ལ་བསྟིམ་པས་བདག་མདུན་གཞལ་ཡས་སྒྲུབ་ཁང་ཡུལ་ཕྱོགས་ཐམས་ཅད་དཔལ་འབྱོར་འདོད་དགུ་རབ་ཏུ་རྒྱས་ཤིང་། རབ་ཏུ་འཕེལ་སྟེ་དངོས་གྲུབ་ཀྱི་ཚོགས་ཐམས་ཅད་སྐད་ཅིག་དེ་ཉིད་ལ་ཐོབ་ཅིང་ནོད་ལ། གནོད་སྦྱིན་གྱི་དེད་དཔོན་དང་གཉིས་སུ་མེད་པའི་འབྲས་བུ་མངོན་དུ་གྱུར་པར་བསམ་ཞིང་དོན་གཉིས་འགྲུབ་པའི་སྨོན་འཇུག་གི་ངང་ནས་གསང་བའི་སྙིང་པོ་འདི་བཟླ་བར་བྱའོ༔ ཨཱོཾ་བྷཻ་ཤ་ར་མ་ཎ་ཡེ་ཡཀྴ་ཛྙཱ་ན་ལོ་ཀ་སརྦ་ས་མ་ཡ་པ་ཤཾ་ཀུ་རུ་ཧཱུྃ་ཧཱུྃ་སྭཱ་ཧཱ༔ ཞེས་བཟླ། གསང་སྒྲུབ་ནི། བདག་བསྐྱེད་ཀྱིས་ཐུགས་ཀའི་ཧཱུྃ་ལས་འོད་ཟེར་ཁ་དོག་ལྔ་ལྡན་རང་མདངས་ཟེར་དང་ལྡན་པར་འཕྲོས་པས་བདག་དང་མདུན་བསྐྱེད་ཀྱི་ལྷ་འཁོར་ཐམས་ཅད་ཀྱི་ཐུག་ཀར་ཉི་སྟེང་བྷཻ་ཡིག་སྔགས་ཀྱི་ཕྲེང་བས་བསྐོར་བ་ལ་ཕོག་པས་ཐུགས་བརྒྱུད་བསྐུལ་སྟེ་ཡབ་ཡུམ་ཐམས་ཅད་སྙོམས་པར་ཞུགས་པས་བདེ་སྟོང་གི་ཡེ་ཤེས་རབ་ཏུ་རྒྱས་པའི་རྩལ་ལས་འོད་ཟེར་ཁ་དོག་ལྔ་ལྡན་ལྕགས་ཀྱུ་ཞགས་པ་ལྕགས་སྒྲོགས་དྲིལ་བུའི་རང་བཞིན་དུ་གྱུར་ནས་ཕྱི་སྣོད་ནང་བཅུད་རྒྱལ་བློན་ལྷ་མི་སོགས་མཁོ་དགུའི་དཔལ་འབྱོར་ཐམས་ཅད་ལྕགས་ཀྱུས་བཟུང་། ཞགས་པས་ཆིངས་ལྕགས་སྒྲོག་གིས་སྡོམས་དྲིལ་བུས་དབང་པོ་ཐམས་ཅད་མྱོས་སུ་བཅུག་སྟེ་རང་དབང་མེད་པར་ཟངས་ལྕགས་གའུའི་ལིངྒ་རྣམས་དང་གཉིས་སུ་མེད་པ་རང་མདུན་དུ་བཀུག་པས་སྲོག་བཅུད་ཐམས་ཅད་ལ་ཨ་ནྲི་ཏྲི་དང་ཨོཾ་གྱི་རྣམ་པ་ཅན་བདག་མདུན་གྱི་ཐུགས་ཀར་ས་བོན་གྱི་ཞབས་སུ་ཡང་ཡང་བསྟིམ་པས་བསྒྲུབ་བྱ་རྣམས་བདག་ལ་དད་འདུན་མོས་པ་ཚད་མེད་པ་དང་བཅས་ཐལ་མོ་སྦྱར་ཞིང་ཡིད་ཆགས་མྱོས་ཤིང་བརྒྱལ་ཏེ་རང་དབང་མེད་པར་བདག་གི་དབང་དུ་འདུས་ཤིང་རང་དབང་མངོན་དུ་གྱུར་ནས་དངོས་གྲུབ་ཐོབ་པའི་ཏིང་ངེ་འཛིན་གྱི་ངང་ནས་སྔགས་བགྲངས། སྔགས་ནིཨོཾ་བྷེ་ཤ་ར་མ་ན་ཡེ་ཡཀྴ་ཛྙཱ་ན་ལོ་ཀ་སརྦ་ས་མ་ཡ་པཱ་ཤཾ་ཀུ་རུ་ཧཱུྃ་ཧཱུྃ་སྭཱ་ཧཱ༔ ཞེས་བཟླས་པ་དང་ནང་གསང་གཉིས་སྔགས་གཅིག་གོ། ཡང་གསང་བའི་སྒྲུབ་པ་ནི། བདག་མདུན་དང་འོད་ཟེར་འཕྲོ་འདུ་རྣམས་གསང་སྒྲུབ་ཇི་བཞིན་གྱི་ངང་ནས་དམིགས་པའི་འཕྲུལ་འཁོར་གང་འདོད་བསྒྱུར་ཞིང་། ཨོཾ་བྷཻ་ཤ་ར་མ་ན་ཡེ་ཡཀྴ་སརྦ་ས་མ་ཡཱ་ཙིཏྟ་ཧྲིང་ཧྲིང་ཛཿཛཿ ཨ་ནྲི་ཏྲི་སརྦ་ལོ་ཀ་ཕོ་རྒྱུད་མོ་རྒྱུད་ཡུལ་ཁམས་མངའ་ཐང་ལོངས་སྤྱོད་དཔལ་འབྱོར་ཐམས་ཅད་པཱ་ཤང་ཀུ་རུ་ཡེ་ཁུག་ཛཿཛཿ ཁུག་སྭཱ་ཧཱ༔ ཞེས་བསྒྲུབ་བྱའི་ཡུལ་དང་བསྟུན་ཏེ་བཟླ་ཞིང་གསང་སྒྲུབ་ཀྱི་དམིགས་པ་གོང་འོག་གཉིས་ཚང་བར་བསྒོམས་ནས། སླར་ཡང་སྐབས་རྣམས་སུ་གའུའི་ལིངྒ་སོགས་ལ་དམིགས་ནས་བདེན་སྟོབས་བརྗོད་འགུགས་བཞུག་སྔགས་དམིགས་གནད་དུ་བསྣུན་ཏེ་བཞག། ཨཱ་ལི་ཀཱ་ལི་ཡེ་རྡར་རྣམས་དང་མཆོད་བསྟོད་དངོས་གྲུབ་ལེན་པ་སོགས་བྱེད། ཕྱི་ནང་གསང་གསུམ་གང་ལ་ཡང་ཡུམ་བཞིའི་ས་བོན་ཧ་རི་ནི་ས་བཞིའི་མཐར་སྔགས་གཡོན་བསྐོར་དུ་གསལ་ཡང་མི་འགལ་སེམས། ཁྱད་པར་གསང་སྒྲུབ་ཀྱི་དམིགས་པ་གོང་འོག་ལ་རྣམ་སྲས་ནས་སྒོ་སྐྱོང་བཞི་ཡན་ཆད་ཀྱི་ཐུགས་ཀར་ཉི་སྟེང་བྷཻ་ཡིག་ཕོ་ཐམས་ཅད་ལ་སྒོམ་ཞིང་ཡུམ་བཞིའི་ཐུག་ཀར་སྔགས་ཧ་རི་ནི་ས་དང་། ཡབ་རྣམ་སྲས་རིགས་བཞི་ལྟ་བུ་རེ་རེས་འཁྱུད་པ། ཕོ་ཐམས་ཅད་ལ་རང་འོད་ཀྱི་ཡུམ་གཡས་གཏེར་བུམ་དང་། གཡོན་ནེའུ་ལེ་བསྣམས་པ་རེས་འཁྱུད་ཅིང་སྦྱོར་བ་རྣམས་ཀྱི་ཐུགས་ཀར་ཉི་སྟེང་བམ་ཡིག་རེ་གསལ། སྒོ་སྐྱོང་བཞིའི་ཡུམ་རྣམས་གཡས་ལྕགས་ཀྱུ་ཞགས་པ་ལྕགས་སྒྲོག་དྲིལ་བུ། གཡོན་གཏེར་བུམ་བསྣམས་པ། ཐུགས་ཀར་ཉི་སྟེང་ཛཿཧཱུྃ་བམ་ཧོ༔ སྒོམ་ཞིང་ཕོ་རྣམས་ཀྱི་ཐུགས་སྲོག་མཐར་བཟླ་བའི་སྔགས་གཡས་དང་མོ་རྣམས་ལ་གཡོན་བསྐོར་དུ་གསལ་ཡང་རུང་མཐུན་ལྟ་བུར་སྣང་ཡང་ཤེས་ལྡན་རྣམས་ཀྱིས་དཔྱད་པ་གལ། འདི་སྐོར་རང་བློས་འོལ་ཚོད་བྱས་པ་ལགས་པས་རུང་མི་རུང་ཅིར་འགྱུར་གྱི་ཡོད་མ་ཤེས་སོ། །བདག་མདུན་ཕྱི་ནང་གསང་བ་ཡང་གསང་གང་གི་ཚེ་ཡིན་ཡང་འདྲ་བར་བཟླ་བྱའི་སྔགས་དེ་བདག་མདུན་ལྷ་འཁོར་སྤྲུལ་པ་ཡང་སྤྲུལ་རྣམས་ཀྱི་ཞལ་དང་། ཕོ་བྲང་ཞིང་ཁམས་འཁོར་འདས་ཐམས་ཅད་དུ་སྔགས་ཀྱི་རང་སྒྲ་ལྷང་ལྷང་ཡོད་པར་སྒོམ་པ་ཐམས་ཅད་ལ་འདྲའོ། །རྣམ་སྲས་ཕོ་བྲང་གསེར་གྱི་གཞལ་ཡས་ཀ་ཆེན་སྟོང་ཕྲག་བརྒྱད་བརྒྱས་བཀོད་ཅིང་མཛེས་པ་གྲུ་བཞི་སྒོ་བཞི་རྟ་བབས་བཞི་ལྡན་གྱི་སྟེང་དུ་པད་རག་དང་ཨིནྜའི་ཡང་ཐོག་ཅན་རིན་པོ་ཆེ་སྣ་ཚོགས་ཀྱི་དྲ་བ་དྲ་ཕྱེད་ཀྱིས་བརྒྱན་པ་གཞལ་ཡས་ཀྱི་ཕྱི་རོལ་འཁོར་ས་གསུམ་གྱི་ནང་མར་གཏེར་གྱི་ཁང་ཆེན་བརྒྱད་ཇོ་རྩེའི་རྒྱན་དང་འཕན་གྱིས་མཛེས་པར་བརྒྱན་པ། དེ་རྒྱབ་འཁོར་སར་གཏེར་བུམ་བརྒྱད་ཁ་རྒྱན་དཔག་བསམ་ཤིང་དང་ནོར་ལྷའི་རྒྱན་དང་དེ་རྒྱབ་འཁོར་སར་ཁྲུས་རྫིང་བརྒྱད་མེ་ཏོག་གིས་བརྒྱན་པ། འཁོར་ས་གསུམ་གྱི་ཁང་བཟང་བུམ་པ་ཁྲུས་རྫིང་རྣམས་ཕྱོགས་མཚམས་སུ་གནས་པའི་བར་རྣམས་སུ་འདོད་འཇོའི་བ། མ་རྨོས་པའི་ལོ་ཐོག །དཔག་བསམ་གྱི་ཤིང་། རིན་པོ་ཆེའི་ཕུང་པོ་རྣམས་ཀྱིས་སྤེལ་མར་མཛེས་པར་བསྐོར་བའི་ཕྱི་ནས་རིན་པོ་ཆེའི་དྲ་བ་ར་བ་གྲུ་བཞིས་བསྐོར་བ། ར་བ་འདི་རིགས་མཐུན་ནས་བཤད་པས་དོན་གྱིས་ཐོས་སོ། །འཛབ་སྐོར་ཆ་ཤས་འདི་པདྨ་ཀུན་གྲོལ་རྣམ་རྒྱལ་བཟང་པོས་སོ། །སརྦ་མངྒལཾ། བཀྲ་ཤིས་དཔལ་འབར་འཛམ་གླིང་རྒྱན་དྲུག་ཤོག །དགེའོ།། །།

བཀའ་སྲུང་ཨེ་ཀ་ཙ་ཏིའི་འཕྲིན་ལས།

ནོར་བདག་ཡིད་བཞིན་ནོར་བུ་ལས༔ བཀའ་སྲུང་ཨེ་ཀ་ཙ་ཏིའི་འཕྲིན་ལས་བཞུགས༔ ཁྲོ་བོའི་རྒྱལ་པོ་ཆེན་པོ་ལ་ཕྱག་འཚལ་ལོ༔ ཁྲོའམ་ཟངས་ལྕགས་སྣོད་ནང་དུ༔ དཔལ་བཤོས་ཤ་ཁྲག་ལིངྒས་བརྒྱན༔ སྨན་རག་སྦྲེང་ཞིང་དམིགས་བྱ་ཡི༔ ཤ་ཁྲག་ཕུང་པོར་བྱིན་གྱིས་བརླབས༔ རང་ཉིད་ཡི་དམ་གསལ་བའི་མདུན༔ སྔགས་སྲུང་ལྷ་མོ་འཁོར་བཅས་གསལ༔ གསུར་ཆེན་དྲི་བཟང་དུད་པ་བཏང་༔ རོལ་མོ་རྐང་གླིང་ཐོད་རྔ་འཁྲོལ༔ གདུང་བའི་དབྱངས་ཀྱིས་འདི་སྐད་དོ༔ བྷྱོཿ རང་མདུན་ཆོས་འབྱུང་པད་ཉི་དང་༔ དགྲ་བགེགས་བསྣོལ་བའི་གདན་སྟེང་དུ༔ མ་ཡིག་སྨུག་ནག་ཡོངས་གྱུར་པས༔ སྔགས་བསྲུང་རྒྱལ་མོ་རལ་གཅིག་མ༔ ཞལ་གཅིག་སྤྱན་གཅིག་ཞབས་ཀྱང་གཅིག༔ ནུ་གཅིག་ཚེམས་གཅིག་ཕྱག་གཉིས་ན༔ དགྲ་བོའི་ཙིཏྟ་སྲོག་རྩ་འཛིན༔ སྟག་ལྤགས་ཤམ་ཐབས་སྙིང་ཕྲེང་གསོལ༔ མ་མོ་མཁའ་འགྲོ་བྱེ་བས་བསྐོར༔ འོད་ཟེར་འཕྲོས་པས་འོག་མིན་དང་༔ ནུབ་ཕྱོགས་ཨོ་རྒྱན་དུར་ཁྲོད་ནས༔ ལྷ་མོ་འཁོར་བཅས་སྤྱན་དྲངས་གྱུར༔ བྷྱོ༔ དད་པ་དང་ནི་དམ་ཚིག་གི༔ སྔགས་ཀྱི་བསྲུང་མ་མཐུ་མོ་ཆེ༔ ཨེ་ཀ་ཙ་ཏི་མ་མོའི་ཚོགས༔ འཁོར་དང་བཅས་པ་གཤེགས་སུ་གསོལ༔ དུར་ཁྲོད་དྲག་པོའི་གནས་འདིར་བཞུགས༔ འདུ་འབྲལ་མེད་པའི་ཕྱག་གིས་མཆོད༔ ཕྱི་ནང་མཆོད་གཏོར་ཤ་ཁྲག་རུས༔ དགྲ་བོའི་དབང་པོ་ཚོགས་སུ་རོལ༔ མ་མོ་རཀྨོ་ཨེ་ཀ་ཙ་ཏི་དགྲ་བགེགས་ཀྱི་དབང་པོ་ཤ་ཁྲག་དོན་སྙིང་དང་བཅས་པ་ལ་ཁ་ཁ་ཁཱ་ཧི་ཁཱ་ཧི༔ གསུམ༔ ཧཱུྃ་བྷྱོ༔ ཀུན་ཏུ་བཟང་མོའི་སྤྲུལ་པ་མོ༔ ཞལ་གཅིག་ཆོས་ཉིད་འགྱུར་བ་མེད༔ རལ་གཅིག་རྒྱལ་བའི་དབང་བཞི་རྫོགས༔ སྤྱན་གཅིག་སྲིད་གསུམ་ས་ལེར་གཟིགས༔ ཚེམས་གཅིག་བདུད་བཞིའི་དགྲ་བགེགས་འཇོམས༔ ནུ་གཅིག་སྒྲུབ་མཆོག་བུ་བཞིན་སྐྱོང་༔ ཞབས་གཅིག་སྟོང་གསུམ་ཁྱབ་པར་ཉུལ༔ ཕྱག་གཉིས་ཞིང་བཅུའི་ཙིཏྟ་ཕྱུངས༔ སྙིང་གི་ཕྲེང་བས་སྐུ་ལ་བརྒྱན༔ སྟག་གི་པགས་པའི་ན་བཟའ་ཅན༔ ཡེ་ཤེས་མེ་དཔུང་ཀློང་ན་བཞུགས༔ སྤྲུལ་པའི་མ་མོ་འབུམ་དྲུག་འཕྲོ༔ ལས་སུ་སྔགས་ཀྱི་བསྟན་པ་བསྲུང་༔ ཟས་སུ་དགྲ་བོའི་ཤ་ལ་དགྱེས༔ སྐོམ་དུ་དགྲ་བོའི་ཁྲག་ལ་འཐུང་༔ ཨེ་ཀ་ཙ་ཏི་མ་མོའི་ཚོགས༔ ཤ་ཁྲག་གཏོར་མ་འདི་བཞེས་ལ༔ བཅོལ་བའི་འཕྲིན་ལས་གྲུབ་པར་མཛོད༔ བྷྱོ་དམ་ལ་གནས་པའི་ཐ་ཚིག་ཅན༔ ལས་ལ་མྱུར་བའི་རྫུ་འཕྲུལ་ཅན༔ སྲོག་ལ་རྣོ་བའི་སྤུ་གྲི་མོ༔ དོན་སྙིང་ཕྱུང་བའི་ལྕགས་ཀྱུ་ཅན༔ དབང་དུ་སྡུད་པའི་ཕོ་ཉ་མོ༔ བདུན་བརྒྱུད་གཅོད་པའི་ཤ་ཟན་མོ༔ ཁམས་གསུམ་སྐྱེ་འགྲོའི་དབུགས་བདག་མོ༔ དགྲ་བགེགས་ཐམས་ཅད་མཱ་ར་ཡ༔ རྣམ་ཤེས་ཆོས་ཀྱི་དབྱིངས་སུ་སྤོར༔ སྔགས་སྲུང་ཆེན་མོ་དུས་མ་འགྱངས༔ སྔགས་བསྲུང་ཆེན་མོ་ལས་མ་གཡེལ༔ དམ་བཞིན་བཅོལ་བའི་འཕྲིན་ལས་མཛོད༔ དགྲ་བགེགས་འབྱུང་པོ་ཐམས་ཅད་མཱ་ར་ཡ་ཧཱུྃ་ཧཱུྃ་ཕཊ་ཕཊ་བྷྱོ་བྷྱོ་ཟློག་ཟློག༔ ཅེས་བརྗོད་གཏོར་མ་དགྲ་ཕྱོགས་འཕེན༔ རྒྱུན་ལྡན་མཆོད་གཏོར་མ་འགྱངས་ན༔ འཕྲིན་ལས་དུས་མཐའི་མེ་ལས་ཚ༔ ཅེས་པས་མ་འོངས་ཉམས་སུ་ལོང་༔ ལས་འཕྲོ་ལྡན་པའི་སྲུང་མར་ཤོག༔ སྱ་མྱ་ཡྻཱཿ ཅེས་པ་འདི་ཡང་ཁམས་པ་ཉི་མ་གྲགས་པས་ཁམས་སྲིང་མོ་རྫོང་མཆོག་ནས་ས་ཕོ་རྟ་ལ་གདན་དྲངས་ཤིང་། ས་མོ་ཡོས་ལ་ཤོག་སེར་ལས་བཤུས་པའོ། །མངྒ་ལཾ།། །།

ནོར་བདག་གི་བརྒྱུད་འདེབས།

ནོར་བདག་གི་བརྒྱུད་འདེབས་བཞུགས། ནོར་བདག་གི་རྣལ་འབྱོར་པས་བརྒྱུད་པའི་གསོལ་འདེབས་བྱེད་པར་འདོད་ན། ཧཱུྃ། འོག་མིན་ཆོས་དབྱིངས་སྟུག་པོ་བཀོད་པ་ནས། །ཆོས་སྐུ་རྡོ་རྗེ་འཆང་ལ་གསོལ་བ་འདེབས། །མཆོག་ཐུན་དངོས་གྲུབ་འཐོབ་པར་བྱིན་གྱིས་རློབས། །གནས་མཆོག་ལྕང་ལོ་ཅན་གྱི་ཕོ་བྲང་ནས། །ལོངས་སྐུ་ཕྱག་ན་རྡོ་རྗེ་ལ་གསོལ་བ་འདེབས། །མཆོག་ཐུན༴ ལྷོ་ནུབ་པདྨ་འོད་ཀྱི་གཞལ་ཡས་ནས། །སྤྲུལ་སྐུ་པདྨ་ཐོད་ཕྲེང་ལ་གསོལ་བ༴ མཆོག་ཐུན༴ མཁའ་སྤྱོད་དག་པའི་ཞིང་མཆོག་ཆེན་པོ་ནས། །མཁའ་འགྲོ་ཡེ་ཤེས་མཚོ་རྒྱལ་ལ་གསོལ་བ་འདེབས། །མཆོག་ཐུན༴ ཡེར་པ་ལྷ་རི་སྙིང་པོའི་གཞལ་ཡས་ནས། །ལོ་ཆེན་ཀླུ་ཡི་དབང་པོ་ལ་གསོལ་བ་འདེབས། །མཆོག་ཐུན༴ སྣང་སྲིད་རྣམ་པར་དག་པའི་ཞིང་ཁམས་ནས། །རིག་འཛིན་ཉི་མ་གྲགས་པ་ལ༴ མཆོག་ཐུན༴ ཐེག་མཆོག་ངེས་གསང་སྙིང་པོའི་ཕོ་བྲང་ནས། །རིགས་སྲས་ཨོ་རྒྱན་བསྟན་འཛིན་ལ༴ མཆོག་ཐུན༴ དག་སྣང་ཕྱམ་ཞིག་གདལ་བའི་ཕོ་བྲང་ནས། །རིག་འཛིན་བསྟན་སྐྱོང་རྒྱ་མཚོ་ལ༴ མཆོག་ཐུན༴ སྣང་སྲིད་རྣམ་པར་དག་པའི་ཞིང་ཁམས་ནས། །དྲིན་ཅན་རྩ་བའི་བླ་མ་ལ་གསོལ་བ་འདེབས། །མཆོག་ཐུན༴ བྱང་ཕྱོགས་གནོད་སྦྱིན་ནོར་བུའི་ཕོ་བྲང་ནས། །ནོར་བདག་ཡིད་བཞིན་ནོར་བུ་ལ་གསོལ་བ་འདེབས། །མཆོག་ཐུན༴ སྔགས་ཀྱི་དམ་ཚིག་འབར་བའི་ཕོ་བྲང་ནས། །སྔགས་སྲུང་ཨེ་ཀ་ཙ་ཏི་ལ་གསོལ་བ་འདེབས། །མཆོག་ཐུན༴ བཀའ་ཡི་འཕྲིན་ལས་བསྒྲུབ་པའི་ད་ལ་ནས། །གཏེར་སྲུང་མ་མོ་མཁའ་འགྲོ་ལ་གསོལ་བ་འདེབས། །མཆོག་ཐུན་དངོས་གྲུབ་ཐོབ་པར་བྱིན་གྱིས་རློབས། །ཅེས་པའང་རིག་འཛིན་ཆེན་པོ་ཉི་མ་གྲགས་པས་སྦྱར་བའོ།། །།མངྒ་ལཾ། །ཆོས་སྐུ་དྲུག་པ་རྡོ་རྗེ་འཆང་ཆེན་ཞལ་དུ་ཨཱོཾ་ཨཱཿཧཱུྃ། །ལོངས་སྐུ་ཕྱག་ན་རྡོ་རྗེའི་ཞལ་དུ་ཨཱོཾ་ཨཱཿཧཱུྃ། །སྤྲུལ་སྐུ་པདྨ་ཐོད་འཕྲེང་ཞལ་དུ་ཨཱོཾ་ཨཱཿཧཱུྃ། །མཁའ་འགྲོ་ཡེ་ཤེས་མཚོ་རྒྱལ་ཞལ་དུ་ཨཱོཾ་ཨཱཿཧཱུྃ། །ལོ་ཆེན་ཀླུ་ཡི་དབང་པོའི་ཞལ་དུ་ཨཱོཾ་ཨཱཿཧཱུྃ། །རིག་འཛིན་ཉི་མ་གྲགས་པའི་ཞལ་དུ་ཨཱོཾ་ཨཱཿཧཱུྃ། །ཨོ་རྒྱན་བསྟན་འཛིན་གྲགས་པའི་ཞལ་དུ་ཨཱོཾ་ཨཱཿཧཱུྃ། །ཐེག་མཆོག་བསྟན་པའི་རྒྱལ་མཚན་ཞལ་དུ་ཨཱོཾ་ཨཱཿཧཱུྃ། །དྲིན་ཅན་རྩ་བའི་བླ་མའི་ཞལ་དུ་ཨཱོཾ་ཨཱཿཧཱུྃ། །ནོར་བདག་ཡིད་བཞིན་ནོར་བུའི་ཞལ་དུ་ཨཱོཾ་ཨཱཿཧཱུྃ། །རིགས་བདག་བཛྲ་པཱ་ཎིའི་ཞལ་དུ་ཨཱོཾ་ཨཱཿཧཱུྃ། །གནོད་སྦྱིན་ནོར་ལྷ་རྒྱ་མཚོའི་ཞལ་དུ་ཨཱོཾ་ཨཱཿཧཱུྃ། །སྔགས་སྲུང་ཨེ་ཀ་ཙ་ཏིའི་ཞལ་དུ་ཨཱོཾ་ཨཱཿཧཱུྃ། །གཏེར་སྲུང་ཡང་མ་ཆེན་མོའི་ཞལ་དུ་ཨཱོཾ་ཨཱཿཧཱུྃ། །སྐྱབས་སེམས། སྐྱབས་སེམས་དབང་ཆོག་ལས་བྱུང་བཿ ཧཱུྃ། བརྒྱུད་པ་ཀུན་འདུས་རྡོ་རྗེ་འཆང་༔ དཔལ་ལྡན་རྩ་བའི་བླ་མ་དང་༔ རྩ་གསུམ་ནོར་ལྷ་རྒྱ་མཚོ་ལ༔ བྱང་ཆུབ་བར་དུ་སྐྱབས་སུ་མཆི༔ གསུམ། ཧཱུྃ༔ བདག་གཞན་དབུལ་བ་རྒྱུན་གཅོད་ཅིང་༔ མར་གྱུར་འགྲོ་རྣམས་སྒྲོལ་བའི་ཕྱིར༔ ནོར་བདག་ཡིད་བཞིན་ནོར་བུ་ལ༔ བསྙེན་སྒྲུབ་མཆོད་བསྟོད་ཡང་དག་བརྩམས༔ ཀུན་ཀྱང་བྱང་ཆུབ་མངོན་གྱུར་ཅིག༔ གསུམ། མཆོད་པ་བྱིན་བརླབས་ལྷ་ཆེན་ལྟར་ལ་ཁ་བསྒྱུར་བཿ ཧཱུྃ༔ རང་ཉིད་གསང་བདག་ཐུགས་ཀ་ནས༔ འོད་ཟེར་འཕྲོས་པའི་ཆོ་འཕྲུལ་གྱིས༔ མཆོད་པའི་མ་དག་འབག་ཚོགས་སྦྱངས༔ འདོད་ཡོན་སྤྲིན་ཕུང་བདུད་རྩིར་བསྒྱུར༔ ཨཱོཾ་ཨཱཿཧཱུྃ་སརྦ་ཛྙཱ་ན་པཱུ་ཙ་ས་མ་ཡེ་སྭཱ་ཧཱ༔ ལན་གསུམ།

ནོར་བདག་གི་ཚོགས།

ནོར་བདག་ཡིད་བཞིན་ནོར་བུའི་ཚོགས་བཞུགསཿ རྩ་གསུམ་ནོར་ལྷ་རྒྱ་མཚོར་ཕྱག་འཚལ་ལོཿ སྐྱབས་སུ་མཆིའོ་དངོས་གྲུབ་སྩལ་དུ་གསོལཿ དེ་ཡང་གཞུང་ལསཿ ཚོགས་ཀྱི་ཡོ་བྱད་ཚོགས་པར་བཤམས་ལ་གསུངས་པ་སོགས་མང་པོར་འདུག་ཀྱང་དོན་མ་ངེས་པསཿ དེའི་ཚུལ་ལྷ་ཆེན་ལྟར་ལ་ཁ་ཅུང་ཟད་བསྒྱུར་བ་ནིཿ ཚོགས་རྫས་རྣམས་ལ་བསང་ཆུ་འཐོར་ཞིང་བྱིན་གྱིས་བརླབས་པ་ནིཿ ཧཱུྃ༔ འདོད་ཡོན་ཚོགས་ཀྱི་ཞལ་ཟས་རྣམས༔ དབང་མཛད་ལྷ་ཡི་ཏིང་འཛིན་གྱིས༔ བསྲེགས་གཏོར་སྦྱངས་བཀྲུས་བདུད་རྩིར་བསྒྱུར༔ འདོད་ཡོན་མཆོད་སྤྲིན་རྒྱ་མཚོར་བསྐྱིལ༔ ཧ་ཧོཿགྷ་ན་པཱུ་ཛ་ཧཱུྃ༔ གསུམཿ མཆོད་པ་ནི༔ ཧཱུྃ༔ ཞལ་ཟས་ཚོགས་ཀྱི་མཆོད་པ་འདི༔ འཁོར་འདས་སྟོང་གི་བཅུད་བསྡུས་ཤིང་༔ འབྲུ་བཅུད་སྣ་ཚོགས་རོ་སྦྱར་ནས༔ མཆོད་སྤྲིན་རྒྱ་མཚོར་བསྒྱུར་ཞིང་འབུལ༔ བཞེས་ནས་དངོས་གྲུབ་སྩལ་དུ་གསོལ༔ ཨོཾ་བྷཻ་ཤྲ་མ་ཎ་ཡེ་ཡཀྵ་སརྦ་ས་མ་ཡ་གྷ་ན་པཱུ་ཛ་ཁཱ་ཧི་ཁཱ་ཧི༔ ལྷག་མ་ནི༔ ཧཱུྃ༔ དབང་མཛད་དབང་གི་འཕྲིན་ལས་བདག༔ ལྷ་མོ་ཀླུ་མོ་གནོད་སྦྱིན་མོ༔ སྒོ་སྐྱོང་སྡེ་བཞི་བྲན་གཡོག་འབུམ༔ ལྷག་མའི་གཏོར་མ་འདི་ལོངས་ལ༔ དབང་གི་འཕྲིན་ལས་གྲུབ་པར་མཛོད༔ སརྦ་ས་མ་ཡ་བྷ་ལིངྟ་ཁཱ་ཧི་ཁཱ་ཧི༔ ཐུགས་དམ་བསྐུལ་ཞིང་དངོས་གྲུབ་བླང་བ་ནིཿ གཞུང་ལསཿ དེ་ཚེ་རེ་དོགས་གཉིས་འཛིན་བྲལ་བཞིན་དུཿ ལྷ་དང་རང་གཉིས་ངོ་བོ་ཉིད་དབྱིངས་ལཿ དབྱེར་མེད་རིས་སུ་མ་གྲུབ་ཏིང་འཛིན་ངང་ཿ ཐུགས་དམ་ཐ་ཚིག་གྱིས་བསྐུལ་དངོས་གྲུབ་བླང་ཿ ཞེས་པསཿ ཧཱུྃ༔ སྔོན་ཚེ་བསྐལ་པ་བརྒྱད་ཁྲིའི་གོང་རོལ་ནས༔ ཡང་དག་སངས་རྒྱས་མངོན་པར་བྱང་ཆུབ་ཀྱང་༔ དུས་གསུམ་ཚངས་ཆེན་བསྐལ་པ་མ་སྟོངས་བར༔ སྐུ་གསུམ་རྒྱལ་བའི་གདུང་འཛིན་སྐྱོང་བ་དང་༔ དབུལ་བའི་འཇིགས་སྐྱོབས་ས་བརྒྱད་གནོད་སྦྱིན་དབང་༔ འཕགས་མཆོག་མགོན་པོ་ཁྱོད་མིན་གཞན་མི་བདོག༔ དེ་ཕྱིར་སྔོན་གྱི་ཐུགས་དམ་བདག་གིས་བསྐུལ༔ ཡི་ཆད་གདུང་བའི་ང་རོས་ཁྱོད་ལ་འབོད༔ སྔོན་གྱི་ལས་ངན་འཕྲལ་གྱི་རྐྱེན་འཚུབ་ཅིང་༔ ལྔ་བརྒྱའི་བསྐལ་ཞབས་བཀྲེས་ཕོངས་དབུལ་བས་གཟིར༔ ཆོས་བཞིན་བསྒྲུབ་ལ་ལོངས་སྤྱོད་དམན་པ་ཡིས༔ ལྟོ་གོས་དབང་ཤོར་བྱང་ཆུབ་ལམ་བོར་ཚེ༔ རེ་ཞིང་ལྟོས་པའི་མགོན་པོ་འཁོར་བཅས་ཀྱིས༔ དཀའ་བ་སྤྱད་ནས་བསྒྲུབ་ཤིང་མོས་པའི་བུར༔ ཁམས་གསུམ་དབང་དུ་འདུ་བའི་དངོས་གྲུབ་སྩོལ༔ སྲིད་གསུམ་ཟིལ་གྱིས་ནོན་པའི་དངོས་གྲུབ་སྩོལ༔ ཚེ་དཔལ་དབང་ཐང་འབྱོར་བའི་དངོས་གྲུབ་སྩོལ༔ མེ་ཤེལ་ཆུ་ཤེལ་ནོར་བུའི་དངོས་གྲུབ་སྩོལ༔ གསེར་དངུལ་ཟངས་ལྕགས་རིན་ཆེན་དངོས་གྲུབ་སྩོལ༔ ནས་འབྲས་གྲོ་སོགས་འབྲུ་ཡི་དངོས་གྲུབ་སྩོལ༔ ཁྲབ་རྨོག་གོ་མཚོན་སྤྱད་ཀྱི་དངོས་གྲུབ་སྩོལ༔ དར་གོས་ཕྲུག་སོགས་གོས་ཀྱི་དངོས་གྲུབ་སྩོལ༔ པྲོག་ཞུ་དོ་ཤལ་རྒྱན་གྱི་དངོས་གྲུབ་སྩོལ༔ བཟའ་བཏུང་ལོང་སྤྱོད་ཟས་ཀྱི་དངོས་གྲུབ་སྩོལ༔ རྟ་གླང་ར་ལུག་རྐང་བཞིའི་དངོས་གྲུབ་སྩོལ༔ ཕོ་བྲང་ཡུལ་འཁོར་གླིང་གི་དངོས་གྲུབ་སྩོལ༔ རྒྱལ་བློན་འབངས་འཁོར་སྦྱིན་བདག་དངོས་གྲུབ་སྩོལ༔ ཁྱེའུ་བརྒྱུད་འཛིན་རིགས་ཀྱི་དངོས་གྲུབ་སྩོལ༔ ཤེས་ལྡན་དཔའ་བློན་ཕོ་བརྒྱུད་དངོས་གྲུབ་སྩོལ༔ མཛངས་ལྡན་འཕྲུལ་ཆགས་མོ་བརྒྱུད་དངོས་གྲུབ་སྩོལ༔ རྩལ་ལྡན་ཤུགས་རྒྱས་འཁོར་འབངས་དངོས་གྲུབ་སྩོལ༔ གདུགས་སོགས་བཀྲ་ཤིས་རྟགས་ཀྱི་དངོས་གྲུབ་སྩོལ༔ འཁོར་ལོ་ལ་སོགས་སྲིད་ཀྱི་དངོས་གྲུབ་སྩོལ༔ ཀ་ཅ་དཀོར་གསུམ་རྟེན་གྱི་དངོས་གྲུབ་སྩོལ༔ མདོར་ན་མི་ཟད་རིན་ཆེན་གཏེར་གྱི་བུམ༔ མཆོག་ཐུན་དངོས་གྲུབ་མ་ལུས་བདག་ལ་སྩོལ༔ རྩ་སྔགས་ལ༔ མ་ཧཱ་རཏྣ་བྷ་དྲ་སརྦ་སིདྡྷིཕ་ལ་ཧཱུྃ་ཧཱུྃ༔ ཅེས་བརྗོད་ལྟ་བུའི་དངོས་གྲུབ་ཚོགསཿ ཐུགས་རྗེས་སྟོབས་ཀྱིས་རང་ལ་སྩལ་བར་བསམསཿ དེ་ནས་ཆད་ཐོ་གཏོང་བ་ནིཿ ཧཱུྃ༔ ཆོས་སྐུ་རྡོ་རྗེ་འཆང་ཆེན་དང་ཿ ལོངས་སྐུ་གསང་བདག་ཁྲོ་བོའི་རྒྱལཿ སྤྲུལ་སྐུ་པདྨ་ཐོད་ཕྲེང་རྩལཿ སྐུ་གསུམ་རྒྱལ་བའི་སྤྱན་སྔ་རུཿ བཀའ་དང་དམ་ལ་བཞག་པ་ཡིཿ ཕྱི་རྒྱུད་འཇིག་རྟེན་སྐྱོང་རྣམས་དང་ཿ ཁྱད་པར་གནོད་སྦྱིན་བཀའ་འཁོར་སྐྱོང་ཿ བརྒྱན་པའི་མཆོད་གཏོར་འདི་བཞེས་ལཿ སྐུ་གསུམ་རྒྱལ་བའི་བཀའ་ལུང་བཞིནཿ དམ་བཅས་དགོངས་ལ་འཕྲིན་ལས་མཛོདཿ དཔལ་འབྱོར་ཕུན་ཚོགས་དངོས་གྲུབ་སྩོལཿ ས་མ་ཡཱ་བཱ་ལིངྟ་ཁཱ་ཧི་ཁཱ་ཧི༔ བསྟན་མ་ནིཿ ཧཱུྃ༔ ལྷ་མོ་ཀླུ་མོ་གནོད་སྦྱིན་མོ༔ བདུད་མོ་ལ་སོགས་སྨན་མོ་འབུམ༔ བཤལ་ཆུའི་གཏོང་མ་འདིར་བཞེས་ལ༔ སྔོན་ཚེ་དབང་ཆེན་བཀའ་ལུང་བཞིན༔ དམ་བཅས་དགོངས་ལ་འཕྲིན་ལས་མཛོད༔ ཌཱཀྐི་རཀྨོ་བྷ་ལིངྟ་ས་མ་ཡ་ཁཱ་ཧི་ཁཱ་ཧི༔ གཏོར་བྲོ་ནི། ཧཱུྃ༔ གསང་བདག་ཁྲོས་པའི་ཏིང་འཛིན་གྱི། །ཡེ་ཤེས་རོལ་པའི་བྲོ་བརྡུངས་པས། །འཇུར་གེགས་བསེ་རག་ལན་ཆགས་བགེགས། །ནམ་ཡང་ལྡང་བའི་དུས་སྐབས་མེད། །ཆོས་ཀྱི་དབྱིངས་སུ་རྒྱས་བཏབ་བོ། །ཧཱུྃ་ཧཱུྃ་ལཾ་ལཾ་སྟཾ་བྷ་ཡ་ནནཿ ཤིས་བརྗོད་ནིཿ ཧཱུྃ༔ ཕུན་སུམ་ཚོགས་པ་བཀྲ་ཤིས་དཔལ་གྱི་ཞིང་༔ འོག་མིན་ཆོས་དབྱིངས་སྟུག་པོ་བཀོད་པ་ནས༔ རྡོ་རྗེ་འཆང་ཆེན་ཆོས་སྐུའི་བཀྲ་ཤིས་དཔལ༔ ཆོས་དབྱིངས་རྒྱལ་བ་རྒྱ་མཚོའི་བཀྲ་ཤིས་ཤོག༔ ཕུན་སུམ་ཚོགས་པ་ལྔ་ལྡན་ལོངས་སྐུའི་ཞིང་༔ རིགས་ལྔའི་ཚངས་ཆེན་སྟེང་འོག་ཕྱོགས་བཅུ་ནས༔ རྒྱལ་བ་རིགས་ལྔ་ལོངས་སྐུའི་བཀྲ་ཤིས་དཔལ༔ ལོངས་སྐུའི་རྒྱལ་བ་རྒྱ་མཚོའི་བཀྲ་ཤིས་ཤོག༔ ཕུན་སུམ་ཚོགས་པ་འགྲོ་འདུལ་སྤྲུལ་སྐུའི་ཞིང་༔ ནམ་མཁའ་རབ་འབྱམས་འཇིག་རྟེན་དཔག་མེད་ན༔ ཕྱོགས་བཅུའི་སངས་རྒྱས་སྟོན་པ་བཅོམ་ལྡན་འདས༔ སྤྲུལ་སྐུའི་རྒྱལ་བ་རྒྱ་མཚོའི་བཀྲ་ཤིས་ཤོག༔ ཕུན་སུམ་ཚོགས་པ་རྨད་བྱུང་འཕྲིན་ལས་ཞིང་༔ གང་ལ་གང་འདུལ་དེ་ལ་དེར་སྟོན་པའི༔ བྱང་ཆུབ་སེམས་དཔའ་རྣམས་དང་སེམས་མར་བཅས༔ འགྲོ་མགོན་སེམས་དཔའ་སེམས་མའི་བཀྲ་ཤིས་ཤོག༔ ཕུན་སུམ་ཚོགས་པ་དགོས་འདོད་དཔལ་གྱི་གནས༔ མཆོག་དང་ཐུན་མོང་དངོས་གྲུབ་ཀུན་གྱི་བདག༔ ནོར་བདག་ཡིད་བཞིན་ནོར་བུ་རྣམ་ཐོས་སྲས༔ ནོར་ལྷ་རྒྱལ་བ་རྒྱ་མཚོའི་བཀྲ་ཤིས་ཤོག༔ བསྔོ་སྨོན་ནི། ཧཱུྃ༔ ས་བརྒྱད་དབང་ཕྱུག་འདོད་དགུའི་གཏེར་འཆང་བ། །རྣམ་མང་ཐོས་སྲས་མཆོད་བསྟོད་བསྒྲུབ་པའི་དགེས། །བསྟན་འགྲོའི་བདེ་སྐྱིད་བཀྲ་ཤིས་དཔལ་འབྱོར་རྒྱས། །བསམ་པ་ཆོས་ལྡན་ཡིད་བཞིན་འགྲུབ་གྱུར་ཅིག །ཅེས་བསྔོ་སྨོན་གྱིས་མཚམས་སྦྱར་རོ། །བསྡུ་ཆོག་ནིཿ ཧཱུྃ༔ ལྷ་ཚོགས་སྣང་སྟོང་ཆོས་ཀྱི་སྐུ༔ མ་འགགས་རོལ་པ་རང་སར་གྲོལ༔ གཟུང་འཛིན་ཡོངས་གྲོལ་ཨ་ལ་ལ༔ གཤེགས་བཞུད་མེད་ཀྱང་དབྱིངས་སུ་མུ༔ ཅེས་དང་བསྔོ་སྨོན་གྱིས་རྒྱས་གདབ༔ ཅེས་པ་འདི་ཡང་བསྙེན་སྒྲུབ་མཆོད་བསྟོན་གང་ལ་འང་དགོས་པར་སེམས་ཏེ། ལྷ་ཆེན་ལྟར་ལ་ཁ་ཅུང་ཟད་ཀྱི་གསལ་དགོས་བརྒྱན་པ་གཏེར་ཚགས་ཡོད་མེད་ཀྱིས་གསལ་བ་ལྟར་ཁམས་པ་ཉི་མ་གྲགས་ཀྱིས་སྦྱར་བ། ཆོས་བརྒྱུད་འཛིན་མཁན་མཆོད་གཏོར་ལ་རེམ་དང་ལོངས་སྤྱོད་འོང་པའི་ཞལ་བཞེས་གནོད་སྦྱིན་ལས་ཐོབ་ངེས་ཡིན། གཏོར་བྲོ་དང་བསྔོ་སྨོན་བསྡུས་པ་འདི་པདྨའི་མིང་ཅན་གྱིས་བྲིས་པའོ། །མངྒ་ལཾ།། །།ནོར་བདག་ཡིད་བཞིན་ནོར་བུའི་བུམ་གཏེར་སྦ་བའི་ཟུར་གསལ་བཞུགས། དངོས་གྲུབ་སྩོལ་བའི་ལྷ་ལ་ཕྱག་འཚལ་ལོ། །ནོར་བདག་གི་སྒོ་ནས་བུམ་གཏེར་སྦ་བར་འདོད་པས་འཇིགས་བྲལ་གསལ་ཞིང་བཛྲ་པཱ་ཎི་བསྙེན༔ གསུངས་པའི་དོན་བདག་བསྐྱེད་ནི། ཧཱུྃ༔ ཆོས་དབྱིངས་རྣམ་དག་དཀོན་མཆོག་བདེན་པའི་མཐུས༔ འདུ་བའི་རིགས་རྣམས་མ་གཏོགས་གདོན་དང་བགེགས༔ བསྒྲུབ་ལ་བར་གཅོད་སྒབ་འདྲེ་འབྱུང་པོའི་ཚོགས༔ གནས་འདིར་མ་འདུག་རང་རང་གནས་སུ་དེངས༔ པ་ར་ཀུ་མ་ན་ཡ་ཨ་གཙྪ་མཱ་ར་ཡ་ཧཱུྃ་ཕཊ༔ མཚམས་ནི༔ ཧཱུྃ༔ སྟེང་འོག་ཕྱོགས་མཚམས་བསྲུང་བའི་འཁོར་ལོའི་གོ༔ རིམ་པ་བདུན་གྱི་གུར་ཁང་འོད་དུ་འཚེར༔ བར་ཆད་བགེགས་ལས་རྣམ་པར་རྒྱལ་བའི་ཞིང་༔ གནོད་སྦྱིན་ཆེན་པོའི་ཕོ་བྲང་ལྟ་ན་སྡུག༔ བཛྲ་པཱ་ཎི་རཏྣ་ཛྙཱ་པྲ་མ་ཏི་ཧཱུྃ་ཕཊ་སྭཱ་ཧཱ༔ ཧཱུྃ༔ སྣང་སྟོང་ཀུན་ཁྱབ་ཕོ་བྲང་ཆེན་པོའི་དབུས༔ བདུད་བཞི་པདྨ་ཉི་ཟླའི་གདན་སྟེང་དུ༔ བདག་ཉིད་རིག་པའི་ངོ་བོ་ཡི་གེ་ཧཱུྃ༔ འཕྲོ་འདུ་བསྒྱུར་བས་དཔལ་ཆེན་རྡོ་རྗེ་འཛིན༔ མཐིང་ནག་ཞལ་གཅིག་ཕྱག་གཉིས་དོར་སྟབས་འགྱིང་༔ ཞལ་གདངས་ལྗགས་འདྲིལ་སྤྱན་གསུམ་དྲག་ཏུ་འཁྲུག༔ གཡས་པས་རྡོ་རྗེ་གཡོན་པས་སྡིག་འཛུབ་སྒྲེང་༔ སྟག་ཤམ་རུས་རྒྱན་དུར་ཁྲོད་ཆས་བརྒྱད་སྤྲས༔ རལ་པ་ཁམ་ནག་གྱེན་མཐུར་ཐོད་པས་བཅིངས༔ སྦྲུལ་རིགས་ལྔས་བརྒྱན་ཡེ་ཤེས་མེ་དཔུང་འབར༔ གར་དགུའི་ཉམས་ལྡན་གནས་གསུམ་འོད་ཟེར་འཕྲོས༔ ལྕང་ལོ་ཅན་ནས་གནས་འདིར་སྤྱན་འདྲེན་གཤེགས༔ སྤྱན་འདྲེན་ནི༔ ཧཱུྃ༔ མ་ལུས་སངས་རྒྱས་ཀུན་གྱི་མཐུ་སྟོབས་འཛིན༔ སྲིད་གསུམ་ཟིལ་གནོན་དྲེགས་ཚོགས་ཡོངས་ཀྱི་གཤེད༔ འཇིགས་བྱེད་རྒྱལ་པོ་ཁྲོ་བོ་ཡོངས་ཀྱི་རྒྱལ༔ ཐུགས་རྗེའི་སྟོབས་ཀྱིས་གནས་འདིར་སྤྱན་འདྲེན་གཤེགས༔ མ་ཧཱ་ཀྲོ་ཏ་བཛྲ་པཱ་ཎི་བཛྲ་ས་མ་ཡ་ཛཿཛཿ བཞུགས་གསོལ༔ ཧཱུྃ༔ དྲེགས་ཆེན་རབ་གཏུམ་འབར་འཁྲུག་ཁྲོ་བོའི་རྗེ༔ གར་དགུའི་ཉམས་ལྡན་དྲག་རྩལ་ཧེ་རུ་ཀ༔ གནས་འདིར་དྲག་པོའི་གདན་ལ་བཞུགས་སུ་གསོལ༔ དབང་དང་བྱིན་རླབས་དངོས་གྲུབ་སྩལ་དུ་གསོལ༔ ཧཱུྃ་བཛྲ་པཱ་ཎི་མ་ཧཱ་ཀྲོ་ཏ་ཏིཥྛ་ཧཱུྃ༔ ཕྱག་མཆོད་ནི༔ ཧཱུྃ༔ ཁྲོ་རྒྱལ་མཆོག་དང་དགོངས་པ་མཉམ་པའི་ཕྱིར༔ དབྱིངས་རིག་འདུ་འབྲལ་མེད་པའི་ཕྱག་གིས་མཆོད༔ ཕྱི་ནང་མཆོད་ཚོགས་དངོས་འབྱོར་ཡིད་ལས་སྤྲུལ༔ མཆོད་པའི་ལྷ་མོས་དབང་གི་འཁོར་ལོར་འབུལ༔ མ་ཧཱ་སརྦ་པཱུ་ཙ་ས་མ་ཡ་ཧོ༔ འཛབ་བསྟོད་ནི༔ ཧཱུྃ༔ དབྱིངས་ལས་ཤར་བའི་དཔལ་ཆེན་ཁྲོ་བོའི་རྒྱལ༔ སྣང་བའི་སྐུ་ལ་སྟོང་པའི་ཡེ་ཤེས་རྒྱས༔ སྔགས་ཀྱི་འཁོར་ལོ་སྒྲ་འོད་ཟེར་དུ་འཁྲུག༔ སྲིད་གསུམ་ཟིལ་གནོན་ཁྲོ་བོའི་རྒྱལ་ལ་བསྟོད༔ ཨཱོཾ་བཛྲ་པཱ་ཎི་མ་ཧཱ་ཀྲོ་ཏ་སརྦ་སིདྡྷིཧཱུྃཅི་མང་བཟླས་རྗེས༔ སརྦ་བྷིགྣན་ཤ་ཏྲུཾ་མཱ་ར་ཡ་ཧཱུྃ་ཕཊ༔ འོས་མཚམས། བཛྲ་པུཥྤེ་སོགས་ཀྱིས་མཆོད། གོང་གི་བསྟོད་པས་བསྟོད་རྗེས་བུམ་པ་ལས་གཞུང་གང་ཡིན་ལྟར་འགོད༔ སྭཱ་བྷཱ་ཝ་སོགས་སྔགས་དྲུག་ཕྱག་རྒྱ་དྲུག་གིས་བསངས་སྦྱང་སྤེལ་ཞིང་མདུན་བསྐྱེད་པ་ནི། །བུམ་པ་མི་དམིགས་པ་སྟོང་པ་ཉིད་དུ་གྱུརཿ སྟོང་པའི་ངང་ལས་བྷྲཱུྃ་ཡོངས་སུ་གྱུར་པ་ལས་པདྨའི་འཁོར་ལོ་འདབ་མ་བརྒྱད་པའི་ལྟེ་བར་དགོས་འདོད་དཔལ་གྱི་བུམ་པ་ཆེན་པོ་དཔག་བསམ་ཤིང་གི་འབྲས་བུ་ལྟ་བུ་ལྟོ་བ་རྒྱ་ཆེ་བ༔ ཞབས་ཞུམ་ཉམས་དང་ལྡན་པ༔ མགྲིན་པའི་རྣམ་པ་བཟང་བ༔ ཁ་ཁྱེར་ཅུང་ཟད་འཕྱང་བའི་ཉམས་ཅན༔ མཛེས་ཤིང་ཡིད་དུ་འོང་བ་ལྟ་ན་སྡུག་པའི་ནང་དུ་འབྱུང་བ་ཀུན་འདུས་ཀྱི་དབང་པོ་རི་བོང་གི་ཙིཏྟ༔ དེའི་གཡས་སུ་མན་ཤེལ༔ གཡོན་དུ་ཆུ་ཤེལ༔ མདུན་དུ་གསེར༔ རྒྱབ་ཏུ་ལྕགས༔ ཤར་དུ་དངུལ༔ ལྷོར་སྤོས་ཤེལ༔ ནུབ་ཏུ་ཟངས༔ བྱང་དུ་གཡུ༔ ཤར་ལྷོར་མུ་མེན༔ ལྷོ་ནུབ་ཏུ་མུ་ཏིག༔ ནུབ་བྱང་དུ་བྱི་རུ༔ བྱང་ཤར་དུ་འཆོང་༔ དེ་དག་གི་བར་མཚམས་སྟེང་འོག་རྣམས་སུ་ཞོ་ཤ་གསུམ་སོགས་སྨན་སྣ་སྣ་ཚོགས༔ འབྲུ་ལྔ་སོགས་ལོངས་སྤྱོད་ཀྱི་འབྲུ་རིགས༔ དཀར་གསུམ་སོགས་གཙང་ལྡན་གྱི་རླན་བཅུད༔ མངར་གསུམ་སོགས་བཅུད་བཟང་གི་རོ་མཆོག་རྣམས་འབྱུང་བའི་བཅུད་དུ་སྨིན་པས༔ འབྱུང་བ་ལྔའི་ཁམས་དང་གཉིས་སུ་མེད་པའི་དཀར་སེར་དམར་ལྗང་མཐིང་གའི་དར་ལྔའི་ན་བཟའ༔ རྫས་བཅུད་འབྱུང་བའི་དཔལ་དང་དབང་ཐང་གོང་འཕེལ་གྱི་གྲངས་འཛིན་གཟི་མིག་དགུ་དགུ་འཕེལ༔ རིན་པོ་ཆེ་སྟོང་སྟོང་འཕེལ༔ དུང་དཀར་དུང་འཕེལ་གྱི་རྫས་གསུམ་དབུས་སུ་བཀོད་པ་དང་བཅས་པ་ཐམས་ཅད་སྣང་སྲིད་རབ་འབྱམས་ཀྱི་འདོད་དགུའི་དཔལ་དང་གཟི་བརྗིད་སྟོབས་དང་དབང་ཐང་ལས་གྲུབ་པའི་ཡོ་བྱད་མ་ཚང་བ་མེད་ཅིང་༔ ཚང་ཞིང་ཡིད་དུ་འོང་བ་ཚངས་ཆེན་གྱི་བསྐལ་པ་འབུམ་ཕྲག་བརྡལ་བའི་དུས་སུ་ཡང་ཟད་མི་ཤེས་པའི་ཡོན་ཏན་གྱི་དཔལ་ཐམས་ཅད་ཡོངས་སུ་རྫོགས་པའི་རང་བཞིན་དུ་གྱུར༔ དེ་ལྟར་བུམ་པ་རིན་པོ་ཆེའི་གླིང་གཞལ་ཡས་ཁང་གི་མཚན་ཉིད་ཐམས་ཅད་ཡོངས་སུ་རྫོགས་པའི་དབུས་སུ་ས་བདག་དབང་ཆེན་སྐུ་མདོག་སེར་པོ་ཞལ་གཅིག་ར་བ་བཞིའི་གདེང་ཀ་ཅན། །ཕྱག་བཞིའི་དང་པོ་གཉིས་ཀྱིས་ཐལ་མོ་སྦྱར་བ། །འོག་མ་གཉིས་ཀྱིས་རི་རབ་ལྗོན་ཤིང་འཛིན་པའི་སྐུ་སྨད་སྦྲུལ་དུ་འཁྱིལ་ཞིང་རུས་སྦལ་གྱི་གདན་ལ་བཞུགས་པ་དེའི་མདུན་དུ་ལྷ་མོ་བསྟན་མ་གསེར་གྱི་མདོག་ཅན་ནོར་བུ་དང་བུམ་པ་འཛིན་པ། །དེའི་གཡས་སུ་ཡུལ་འདིའི་གཞི་བདག་ཆེ་གེ་ཕོ་རིགས། །གཡོན་དུ་ཡུལ་འདིའི་གཞི་བདག་ཆེ་གེ་མོ་རིགས། །གཞན་ཡང་བསྟན་མ་བཅུ་གཉིས། །མགུར་ལྷ་བཅུ་གསུམ། །དགེ་བརྙེན་ཉེར་གཅིག་ལ་སོགས། །ལྷ་མིའི་ཁྲོམ་ཚོགས་པ་ལྟར་གསལ་ཞིང་། །དེ་དག་གི་ཕྱི་རོལ་དུ་སྤར་ཁ་བརྒྱད། སྨེ་བ་དགུ། ལོ་སྐོར་བཅུ་གཉིས། །ལོ་རྒན་དྲུག་ཅུ། །ད་ལོའི་ལོ། །ད་ཞག་གི་ཟླ་བ། །དེ་རིང་གི་ཉི་མ། །གཟའ་རྒྱུ་སྐར་ཚེས་གྲངས་དུས་ཚོད་ལ་རྒྱུ་བའི་ཚོགས་ཐམས་ཅད་ཀྱི་གནས་གསུམ་དང་། །རང་རང་གི་ས་བོན་གྱིས་གཙོས་པའི་འབྲུ་གསུམ་ལས་འོད་ཟེར་འཕྲོས་པས་དམ་ཚིག་དབང་གིས་བསྐྱེད་པའི་གནས་འདིར་བཛྲ་ས་མ་ཡ་ཛཿཛཿ རོལ་མོ་འཁྲོལ་གླིང་བུ་འབུད་སྤོས་དཀར་དང་བསངས་དུད་གཏོང་ཞིང་། ཧཱུྃ། བཞེངས་ཤིག་བཞེངས་ཤིག་སྐུ་བཞེངས་ཤིག །ས་བདག་ས་ཡི་ལྷ་མོར་བཅས། །མ་ལུས་འཁོར་བཅས་སྐུར་བཞེངས་ཤིག །ལས་ཀྱི་རྫུ་འཕྲུལ་སྟོབས་ཀྱི་བདག །ས་བདག་དབང་ཆེན་གཤེགས་སུ་གསོལ། །ལྷ་མོ་བསྟན་མ་གཤེགས་སུ་གསོལ། །སྤར་ཁ་བརྒྱད་དང་སྨེ་བ་དགུ། ལོ་སྐོར་བཅུ་གཉིས་ས་བདག་རྣམས། །གནས་འདིར་སྤྱན་འདྲེན་གཤེགས་སུ་གསོལ། །མགུར་ལྷ་དགེ་བསྙེན་བསྟན་མ་དང་། །ཡུལ་འདིའི་གཞི་བདག་འཁོར་བཅས་རྣམས། །གནས་འདིར་སྤྱན་འདྲེན་གཤེགས་སུ་གསོལ། །བསྐྱེད་པའི་གནས་འདིར་བརྟན་པར་བཞུགས། །དམ་ཚིག་དབང་གིས་ཕྱག་འཚལ་མཆོད། །དངོས་འབྱོར་ཡིད་སྤྲུལ་མཆོད་པ་བཞེས། །འདོད་པའི་འབྲས་བུ་བདག་ལ་སྩོལ། །ཨོཾ་བཛྲ་ཨགྷཾ་སོགས། ཤཔྟ་པཱུ་ཙ་ས་མ་ཡེ་སྭཱ་ཧཱ། གཏོར་བསྔོ་ནང་ལྟར་གྱི་གཞི་བདག་ལ་གཏོར་མ་འབུལ། དེ་ནས་བུམ་གཏེར་ལ་འབྲུ་སྣ་འཐོར་ཞིང་རོལ་མོ་དབྱངས་དང་བཅས། ཧཱུྃ། ས་བདག་དབང་ཆེན་ལྷ་མོ་བསྟན་མ་དང་། །སྤར་ཁ་སྨེ་བ་ལོ་ཟླ་ཞག་ཚེས་བདག །ལྷ་ཀླུ་གནོད་སྦྱིན་གཟའ་དང་མགུར་ལྷ་དང་། །བསྟན་མ་དགེ་བསྙེན་ཡུལ་ལྷ་འཁོར་བཅས་ལ། །འདབ་བརྒྱད་བུམ་གདན་པདྨས་སྟོང་གསུམ་ཁྱབ། །བཀོད་ལེགས་ཡིད་འོང་ལྟ་ན་སྡུག་པའི་དབུས། །རིན་ཆེན་བུམ་པ་དཔག་བསམ་འབྲས་བུའི་དབྱིབས། །ལྟོ་བ་རྒྱ་ཆེ་ཞབས་ཞུམ་མགྲིན་པ་བཟང་། །ཁ་ཁྱེར་འཕྱང་ཉམས་དཔག་བསམ་ལྗོན་པས་བརྒྱན། །འདོད་དགུའི་ཡོན་ཏན་རྫོགས་འདི་མཆོད་པར་འབུལ། །ས་བརྐོས་རྡོ་བསློག་ཤིང་བཅད་ཆུ་གཉན་དཀྲུགས། །ཐབ་གཞོབ་འཁོན་གསུམ་འགྲམས་འཁྲུགས་ཅི་མཆིས་བཤགས། །འཁོན་སྦྱངས་བཟོད་གསོལ་ཚང་པ་རྩལ་བ་དང་། །ཚེ་རིང་ཕུན་ཚོགས་བདེ་སྐྱེད་དངོས་གྲུབ་སྩོལ། །ཧཱུྃ། རིན་ཆེན་བུམ་པ་གཞལ་ཡས་ཁང་གི་དབུས། །འབྱུང་བ་ཀུན་འདུས་རི་བོང་ཀེ་ས་ལ། །རི་རབ་ལྷུན་པོ་ལས་ཀྱང་དཔལ་རེ་བཟང་། རྩ་སྦུག་དཀར་དམར་ཐབས་ཤེས་རྒྱན་གྱིས་སྤྲས། །སྙིང་ཚིལ་དཀར་དམར་པདྨ་མདངས་རེ་གསལ། །ཙིཏྟ་ནོར་བུའི་མཆོག་འདི་མཆོད་པར་འབུལ། །ས་བརྐོས་རྡོ་བསློག་ཤིང་བཅད་ཆུ་གཉན་དཀྲུགས། །ཐབ་གཞོབ་འཁོན་གསུམ་འགྲམས་འཁྲུགས་ཅི་མཆིས་བཤགས། །འཁོན་སྦྱང་བཟོད་གསོལ་ཚངས་པ་སྩལ་བ་དང་། །ཚེ་རིང་ཕུན་ཚོགས་བདེ་སྐྱིད་དངོས་གྲུབ་སྩོལ། །ཧཱུྃ། ཙིཏྟ་སྙིང་གི་རི་བོའི་གཡས་ཀྱི་ཕྱོགས། །རིན་ཆེན་མན་ཤེལ་ཉི་མ་འབུམ་ལས་བརྗིད། །གཡོན་གྱི་ཕྱོགས་སུ་རིན་ཆེན་ཆུ་ཡི་ཤེལ། །ཟླ་བ་སྟོང་ཕྲག་སྐར་མ་འོད་རེ་འབར། །མདུན་དུ་རིན་ཆེན་གསེར་གྱི་རི་བོ་མཐོ། །རྒྱབ་ཏུ་བརྟན་པ་ལྕགས་ཀྱི་རྨང་རྡོ་སྲ། །མཆོད་དོ་འབུལ་ལོ་ཡུལ་ལྷ་གཞི་བདག་མཆོད། །ས་བརྐོས་རྡོ༴ སོགས༴ ཧཱུྃ། ཤར་ཕྱོགས་རིན་ཆེན་དངུལ་འདི་ལུས་འཕགས་གླིང་། །ལྷོ་ཕྱོགས་རིན་ཆེན་སྤོས་ཤེལ་འཛམ་བུའི་གླིང་། །ནུབ་ཕྱོགས་རིན་ཆེན་ཟངས་འདི་བ་ལང་སྤྱོད། །བྱང་ཕྱོགས་རིན་ཆེན་གཡུ་འདི་སྒྲ་མི་སྙན། །ཤར་ལྷོར་མུ་མེན་དེ་ཡི་གླིང་ཕྲན་གཉིས། །ལྷོ་ནུབ་མུ་ཏིག་དེ་ཡི་གླིང་ཕྲན་གཉིས། །ནུབ་བྱང་བྱི་རུ་དེ་ཡི་གླིང་ཕྲན་གཉིས། །བྱང་ཤར་རིན་ཆེན་འཆོང་ཡང་གླིང་ཕྲན་གཉིས། །བསམ་མི་ཁྱབ་པའི་བཀོད་པས་བརྒྱན་པ་འདི། །མཆོད་དོ་འབུལ་ལོ་ཡུལ་ལྷ་གཞི་བདག་མཆོད། ས་བརྐོས་སོགས༴ ཧཱུྃ། ཕུན་སུམ་ཚོགས་པའི་གླིང་དང་ཁོར་ཡུག་ཏུ། །ཞོ་ཤ་གསུམ་སོགས་སྨན་སྣ་སྣ་ཚོགས་དང་། །འབྲུ་ལྔ་ལ་སོགས་ལོངས་སྤྱོད་འབྲུ་ཡི་རིགས། །དཀར་གསུམ་ལ་སོགས་གཙང་ལྡན་རླན་གྱི་བཅུད། །མངར་གསུམ་ལ་སོགས་བཅུད་ལྡན་ཟས་ཀྱི་མཆོག །འབྱུང་བ་ཆེན་པོ་ལྔ་ཡི་རང་མདངས་ལས། །ཁ་དོག་རིགས་ལྔའི་དར་ཚོན་ལྷབ་ལྷུབ་འཕྱོ། །བསམ་མི་ཁྱབ་པའི་ཕུན་སུམ་ཚོགས་པ་འདི། །མཆོད་དོ་འབུལ་ལོ་ཡུལ་ལྷ་གཞི་བདག་མཆོད། །ས་བརྐོས་སོགས༴ ཧཱུྃ། འདི་ལྟར་ཕྱི་ནང་གསང་བའི་ཡོ་བྱད་ཚོགས། །མཆོད་པའི་རྫས་སུ་གྱུར་པ་ཇི་སྲིད་དང་། །ཡུལ་ཕྱོགས་རྒྱལ་ཁམས་ཕྱི་ནང་སྣོད་བཅུད་ཀྱི། །དཔལ་དང་དབང་ཐང་དགུ་ནས་དགུ་འཕེལ་རྫས། །མིག་ལྡན་མཆོག་གྱུར་གཟི་ཁྲ་མིག་དགུ་དང་། །སྟོང་ནས་སྟོང་དུ་གོང་འཕེལ་རིན་ཆེན་སྟོང་། །དུང་དཀར་གཡས་འཁྱིིལ་དུང་ནས་དུང་འཕེལ་རྫས། །སྣང་སྲིད་རབ་འབྱམས་འདོད་དགུ་ལྷུན་གྲུབ་པའི། །རིན་ཆེན་བུམ་གཏེར་མཆོད་པ་རྒྱ་ཆེན་པོ། །ཀུན་བཟང་མཆོད་པའི་སྤྲིན་ལས་འཕགས་པ་འདི། །མཆོད་དོ་འབུལ་ལོ་ཡུལ་ལྷ་གཞི་བདག་མཆོད། །ས་བརྐོས་སོགས༴ དེ་ནས་ཐལ་མོ་སྦྱར་མོས་འདུན་རྩེ་གཅིག་གིས། ཧོ་དགོངས་སུ་གསོལ། གསུམ། འོ་གསན་དུ་གསོལ། །སྲིད་པ་ལས་ཀྱི་འཇིག་རྟེན་ཆེན་པོ་འདིར། །ལས་ཀྱི་རྫུ་འཕྲུལ་སྟོབས་ལས་ཤར་བའི་དབང་ཆེན་ས་བདག་གི་རྒྱལ་པོ། ལྷ་མོ་ཆེན་མོ་བསྟན་མ་བློ་གྲོས་མ། ས་འཛིན་ལག་པ་ཆེན་པོ། སྤར་ཁ་བརྒྱད། སྨེ་བ་དགུ། ལོ་སྐོར་བཅུ་གཉིས། ལོ་རྒན་དྲུག་ཅུ། མགུལ་ལྷ་དགེ་བསྙེན་བསྟན་མ་ལྷ་ཀླུ་གཟའ་དང་གནོད་སྦྱིན། ཡུལ་ཕྱོགས་འདི་ཉིད་ཀྱི་གཞི་བདག་སྐུ་འཁོར་དང་བཅས་པ་ཁྱེད་རྣམས་ལ་རིན་ཆེན་འདོད་འབྱུང་གི་བུམ་གཏེར་ཡོན་ཏན་ལྔའི་རྒྱན་དང་ལྡན་པ་ཆེན་པོ་སྔགས་དང་ཕྱག་རྒྱ་ཏིང་ངེ་འཛིན་གྱིས་བྱིན་གྱིས་བརླབས་ཏེ། ཀུན་བཟང་མཆོད་པའི་སྤྲིན་ལས་རྒྱ་ཆེ་བ་འདི་ཉིད་ཁྱེད་རྣམས་འཁོར་དང་བཅས་པ་རྣམས་མཉེས་པའི་མཆོད་པ་འབུལ་ལོ། དགྱེས་པའི་རྫས་སུ་འབུལ་ལོ། །དགོས་པའི་ཡོ་བྱད་དུ་འབུལ་ལོ། །མཁོ་བའི་དཔལ་འབྱོར་དུ་འབུལ་ལོ། །ན་བའི་གསོས་སྨན་དུ་འབུལ་ལོ། །བསགས་པའི་བང་མཛོད་དུ༴ སྙིང་ཟོག་ནང་ནོར་དུ༴ བརྟེན་པའི་སྐུ་མཁར་དུ༴ བཞུགས་པའི་ཕོ་བྲང་དུ༴ འགྲམས་ཤོར་བའི་ཉེས་བཤགས་སུ༴ འཁྲུགས་ཤོར་བའི་འགྱོད་བཤགས་སུ༴ ཐབ་ཤོར་བའི་འཁོན་སྦྱང་དུ༴ གཞོབ་ཤོར་བའི་གྲིབ་སེལ་དུ༴ འཁོན་ཤོར་བའི་བཤགས་སྦྱང་དུ༴ ས་གཉན་བརྐོས་པའི་ངོ་ཚབ་ཏུ༴ ཤིང་གཉན་བཅད་པའི་སྟོང་སྐལ་དུ༴ རྡོ་གཉན་བསློགས་པའི་ཡུས་གཤགས་སུ༴ ཆུ་གཉན་དཀྲུགས་པའིི་བཟོད་གསོལ་དུ༴ དུར་ས་ཉེས་པའི་ཕུང་སེལ་དུ༴ ཁང་ས་ཉེས་པའི་གནོད་སེལ་དུ༴ ཞིང་ས་ཉེས་པའི་རྐྱེན་སེལ་དུ༴ ལྷ་རྟེན་བཞེངས་པའི་བང་མཛོད་དུ༴ ཁང་གསར་བཟོས་པའི་ས་བཅུད་དུ༴ ཟས་ནོར་གསོག་པའི་གཡང་རྟེན་དུ༴ བང་མཛོད་སྤེལ་བའི་དཔལ་རྟེན་དུ༴ དགྲ་ལྷ་ཉམས་པའི་དཔའ་བསྟོད་དུ༴ ཡུལ་ལྷ་གུད་པའི་ཆེ་བསྟོད༴ སྔར་བྱས་ལས་ཀྱི་གཏང་རག་ཏུ༴ ཕྱི་བྱེད་ལས་ཀྱི་ཞུ་སྐྱེམས་སུ༴ ད་ལྟའི་ལས་ཀྱི་མཉེས་བྱེད་དུ་འབུལ་ལོ། །དགྱེས་པར་མཛད་དུ་གསོལ། མཉེས་པར་མཛད་དུ་གསོལ། །ཚིམ་པར་མཛད་དུ་གསོལ། ཧོ་དེ་ལྟར་གྱི་དགྱེས་མཆོད་ཆེན་པོ་འདི་ཕུལ་བའི་མཐུས། སངས་རྒྱས་ཀྱི་བསྟན་པ་རིན་པོ་ཆེ་ཕྱོགས་དུས་ཐམས་ཅད་དུ་དར་ཞིང་རྒྱས་པར་མཛད་དུ་གསོལ། བསྟན་འཛིན་གྱི་སྐྱེས་བུ་རྣམས་ཀྱི་སྐུ་ཚེ་དང་མཛད་ཕྲིན་ཐམས་ཅད་རྒྱས་པར་མཛད་དུ་གསོལ། བསྟན་པའི་སྦྱིན་བདག་རྣམས་ཀྱི་མངའ་ཐང་ཆབ་སྲིད་ཐམས་ཅད་འཕེལ་བར་མཛད་དུ་གསོལ། སེམས་ཅན་ཐམས་ཅད་བདེ་ཞིང་སྐྱིད་པར་མཛད་དུ༴ ནད་མུག་མཚོན་གྱི་བསྐལ་པ་ཐམས་ཅད་ཞི་བར་མཛད་དུ༴ མེད་པར༴ བཟློག་པར༴ ཁྱད་པར་དུ་སྦྱིན་པའི་བདག་པོའམ། ཡུལ་ཕྱོགས་ཆེ་གེ་འདི་ཞེས་བྱ་བར། ཚེ་བསོད་དཔལ་འབྱོར་ཁ་རྗེ་དབང་ཐང་སྙན་གྲགས་ལོངས་སྤྱོད་ཐོས་བསམ་སྒོམ་གསུམ་ཉམས་རྟོགས་ཀྱི་ཡོན་ཏན་ཐམས་ཅད་གོང་ནས་གོང་དུ་ཡར་ངོའི་ཟླ་བ་ལྟར་འཕེལ་ཞིང་རྒྱས་པར་མཛད་དུ་གསོལ། མི་ནད་ཕྱུགས་ནད་ནད་ཡམས་གོད་ཁ་བཙའ་སད་སེར་གསུམ་ཐམས་ཅད་ཞི་བར༴ ཆར་ཆུ་དུས་སུ་འབབས་པ་ལོ་ཕྱུགས་རྟག་ཏུ་ལེགས་པ་འབྱུང་བའི་ཁམས་ཀྱི་དཔལ་དང་དབང་ཐང་ཚེ་དཔལ་འབྱོར་པའི་ལེགས་ཚོགས་ཐམས་ཅད་བཀྲ་ཤིས་དགུ་འཕེལ་གྱི་རྫས་མཆོག་ཕུལ་བའི་རྟེན་འབྲེལ་གྱིས་དགུ་གཅིག་དགུ་འཕེལ་ཁྲི་འབུམ་དུ་འཕེལ་བར་མཛད་དུ་གསོལ། བཀྲ་ཤིས་སྟོང་འཕེལ་གྱི་རྫས་མཆོག་ཕུལ་བའི་རྟེན་འབྲེལ་གྱིས་སྟོང་གཅིག་སྟོང་ནས་སྟོང་ཕྲག་གྲངས་མེད་དུ་འཕེལ་བར་མཛད་དུ་གསོལ། རིན་ཆེན་དུང་འཕེལ་གྱི་རྫས་མཆོག་ཕུལ་བའི་རྟེན་འབྲེལ་གྱིས་དུང་ནས་དུང་འཕེལ་དུང་ཕྱུར་གྲངས་མེད་དུ་འཕེལ་བར་མཛད་དུ་གསོལ། གཏེར་སྦ་བ་ནི། མ་རིག་མུན་སེལ་ལས། ཧཱུྃ༔ འབྱུང་བ་ལྔ་ནི་ཡུམ་ལྔའི་ཀློང་༔ ས་ཡི་ལྷ་མོ་ས་ཡི་བདག༔ བདག་ཅག་རིག་འཛིན་འཁོར་དང་བཅས༔ བསྒྲུབ་པའི་འབྲས་བུ་མངོན་དུ་གྱུར༔ བྱང་ཆུབ་ས་བརྟེན་སྐུ་དྲིན་མཆོད༔ སྨན་སྤོས་འབྲུ་སྣ་དར་ཟབ་ལྔ༔ གསེར་དངུལ་ཟངས་ལྕགས་རིན་པོ་ཆེ༔ རྡུལ་ཚོན་སྨན་གཏོར་རཀྟར་བཅས༔ དངོས་གྲུབ་མཆོག་གི་རིལ་བུས་རྒྱན༔ ལྷ་མོ་ཁྱོད་ལ་མཆོད་པར་འབུལ༔ རིན་ཆེན་ས་ལ་གཏེར་དུ་སྦ༔ འདུས་པའི་མཆེད་ལྕམ་གཙོ་དང་འཁོར༔ འདི་ནས་བྱང་ཆུབ་མ་ཐོབ་བར༔ མཆོག་ཐུན་དངོས་གྲུབ་བསྟན་པའི་བཙས༔ གཏེར་འདི་སྦས་པས་འཐོབ་གྱུར་ཅིག༔ ཡུལ་དང་ཕྱོགས་དང་རྒྱལ་ཁམས་སུ༔ ནད་མཚོན་མུ་གེ་ལ་སོགས་པའི༔ འཇིགས་པ་ཆེན་པོ་བརྒྱད་བཅུ་དྲུག༔ ཐམས་ཅད་མ་ལུས་ཞི་བར་ཤོག༔ བཀྲ་ཤིས་ཐམས་ཅད་འབྱུང་གྱུར་ཅིག༔ དགེ་ལེགས་ཐམས་ཅད་འཕེལ་བར་ཤོག༔ ས་མ་ཡཱ༔ རྒྱ་རྒྱ་རྒྱ༔ གཏེར་རྒྱ༔ སྦས་རྒྱ༔ ས་མ་ཡཱ༔ རྒྱ་རྒྱ་རྒྱ༔ ཚེ་སྒྲུབ་བདུད་བཞིའི་གཡུལ་ལས་རྣམ་རྒྱལ་ལས༔ ཧཱུྃ༔ བཀྲ་ཤིས་ལྷ་མོ་ས་ཡི་བསྟན་མ་དང་༔ ཡུལ་ཕྱོགས་འདིར་གནས་དཀར་ཕྱོགས་གཞི་བདག་རྣམས༔ དགོས་འདོད་འབྱུང་བའི་རིན་ཆེན་བུམ་བཟང་འདི༔ བསྟན་འགྲོའི་བདེ་སྐྱིད་མི་ནུབ་བརྟན་པའི་བཙས༔ བདག་ཅག་རྣལ་འབྱོར་རིག་འཛིན་འཁོར་བཅས་ཀྱི༔ ས་ལམ་ཡོན་ཏན་མི་ཟད་བསྒྲུབ་པའི་རྟེན༔ ལྷ་ཀླུ་གཞི་བདག་བང་མཛོད་ནོར་གྱི་མཆོག༔ གཏེར་ཆེན་འདི་སྦ་གཏེར་གྱི་བསྲུང་མར་བཅོལ༔ བྱང་ཆུབ་སེམས་མཆོག་ཐབས་ཤེས་རྟེན་འབྲེལ་མཐུས༔ སྟོང་གསུམ་འཇིག་རྟེན་ཡུལ་ཕྱོགས་རྒྱལ་ཁམས་སུ༔ ནད་མུག་མཚོན་འཁྲུག་དུས་ཀྱི་ཡོ་ལང་ཞི༔ བཀྲ་ཤིས་ཡོན་ཏན་དཔལ་འབྱོར་སྙན་གྲགས་སྟོབས༔ ཡར་ངོའི་ཟླ་ལྟར་འཕེལ་ཞིང་རྒྱས་གྱུར་ཅིག༔ བླ་མ་བདེ་མཆོག་འཁོར་ལོ་ལས༔ ཧཱུྃ༔ འབྱུང་བཞིའི་དབུས་ན་ལྷ་མོ་བསྟན་མ་བཞུགས༔ རིན་ཆེན་བུམ་པ་སྨན་འབྲུ་གཏོར་མས་བཀང་༔ འདོད་ཡོན་ལྔ་ལྡན་གཏེར་ཆེན་བུམ་པ་འདི༔ ལྷ་མོར་བཅོལ་ལོ་རིན་ཅེན་ས་ལ་སྦ༔ བདག་ཅག་རིག་འཛིན་མཆེད་ལྕམ་འཁོར་བཅས་རྣམས༔ དེང་ནས་བཟུང་སྟེ་བྱང་ཆུབ་མ་ཐོབ་བར༔ མཆོག་ཐུན་དངོས་གྲུབ་བརྟེན་པའི་བཙས་སུ་སྦ༔ འཇིག་རྟེན་ཞིང་ཁམས་གླིང་དང་ཡུལ་ཕྱོས་འདིར༔ ནད་མུག་མཚོན་གསུམ་འཁྲུག་རྩོད་ཞི་བ་དང་༔ ཚེ་དཔལ་དབང་ཐང་ལོངས་སྤྱོད་རྒྱས་པར་ཤོག༔ བདེ་བར་གཤེགས་པ་སངས་རྒྱས་བཅོམ་ལྡན་འདས༔ ཐུགས་རྗེའི་རང་བཞིན་བྱིན་རླབས་བཀྲ་ཤིས་ཤོག༔ སོགས་དེ་ནས་བཀྲ་ཤིས་ཟུར་གསལ་ལྟར་བརྗོད༔ གླུ་བྲོ་ལ་སོགས་ཉམས་སྐྱོང་། ཅེས་པ་འདི་ཡང་གཞུང་དོན་ཁང་ས་དུར་ས་ཞིང་ས་བསྟན་ས་སྤྱི་སྒེར་མང་ཞིག་གི་ལས་མཐའ་བསྒྱུར་འགྲེས་རྣམས་སོ་སོར་མཚམས་སྦྱོར་དགོས་འདུག་ཀྱང་མ་ལྕོགས་ཤིང་། སྤྱི་འགྲོས་འདི་ཙམ་གྱིས་ཀྱང་ཕན་ཐོགས་ཡོང་ངམ་བསམས་ཏེ་ཟུར་གསལ་དུ་བྲིས་ཤིང་། གཞུང་མཐུན་དང་སྤྱི་སྒོས་གང་ནས་ཉེས་གྱུར་མཆིས་ན་གཟུགས་ཅན་གཟུགས་མེད་སྤྱི་ལ་བཟོད་པར་གསོལ། ལག་ལེན་རྫས་དང་དགོས་བཅས་ས་ཡུལ་སོགས་གཞུང་ལྟར་སྤང་བླང་གྱིས། བུམ་རྫས་ཀྱི་བཀོད་བཞིན་འདོན་རི་གླིང་ལ་སྦྱར་བ་ཡིན་པས་ཨི་འཐད་བསམ། ལར་བསྐྱེད་ཆོག་ལས་གཞུང་སོར་བཞག་གི་རྩིས་བྱས་ལགས། བུམ་རྫས་ལ་དྲི་ལྔའི་གླ་རྩི་མེད་གལ་ཆེ། ཅེས་བ་འདི་ཡང་རིག་འཛིན་ཉི་མ་གྲགས་པས་སྦྱར་བ་ཕྱོགས་དུས་བསྟན་པ་དར་ཞིང་རྒྱས་པར་ཤོག། སརྦ་མངྒ་ལཾ། །ཀླུ་རྣམས་ཀྱི་སྙིང་པོ། ཝ་ར་ཎའི་སྙིང་པོ། ཨཱོཾ་ཕུཿ་ཝ་རུ་ཎ་ཡ་ནཱ་ག་རཱ་ཛ་ཕུཿཧཱུྃ་ཕཊ་སྭ་ཧཱ། མཐའ་ཡས་སྙིང་པོའོ། །ཨཱོཾ་ཕུཿཨ་ནནྟ་ཡ་ནཱ་ག་རཱ་ཛ་ཕུཿཧཱུྃ་ཕཊ་སྭཱ་ཧཱ། ནོར་རྒྱས་ཀྱི་སྙིང་བོའོ། །ཨཱོཾ་ཕུཿབ་སུ་ཀཱ་ཡ་ནཱ་ག་རཱ་ཤ་ཛ་ཕུཿཧཱུྃ༴ འཇོག་པོའི་སྙིང་པོའོ། །ཨཱོཾ་ཕུཿརཀྵ་ཡ་ནཱ་ག་རཱ་ཛ༴ སྟོབས་ཀྱི་རྒྱུའི་སྙིང་པོའོ། །ཨཱོཾ་ཕུཿཀ་རྐོ་ཊ་ཡ་ནཱ་ག་རཱ་ཛ༴ པདྨའི་སྙིང་པོའོ། །ཨཱོཾ་ཕུཿཔདྨ་ཡ་ནཱ་ག༴ དུང་སྐྱོང་གི་སྙིང་པོའོ། །ཨཱོཾ་ཕུཿཤཾ་ཁ་པཱ་ལ་ཡ་ནཱ་ག་རཱ་ཛ་ཕུཿཧཱུྃ༴ རིགས་ལྡན་གྱི་སྙིང་པོའོ། །ཨཱོཾ་ཕུཿཀུ་ལི་ཀ་ལ་ཡ་ནཱ་ག་རཱ་ཛ་ཕུཿཧཱུྃ་ཕཊ་སྭཱ་ཧཱ། ཀླུ་རྣམས་ཀྱི་སྙིང་པོ་འདི་ཀློང་ཆེན་སྙིང་ཐིག་གི་ཆར་འབེབས་ཀྱི་ཆོ་ག་རྒྱ་མཚོ་ཡིད་བཞིན་དབང་གི་འཁོར་ལོའི་ཡིན་ནོ། །

ནོར་བདག་ཡིད་བཞིན་ནོར་བུའི་བུམ་གཏེར་སྦ་བའི་ལྷན་ཐབས།

ནོར་བདག་ཡིད་བཞིན་ནོར་བུ་ལས་དཀོར་མཛོད་ཀྱི་གཡང་རྟེན་དུ་བུམ་གཏེར་སྦ་བའི་ལྷན་ཐབས་བཞུགས། དངོས་གྲུབ་སྩོལ་བའི་ལྷ་ལ་ཕྱག་འཚལ་ལོ། །བང་མཛོད་ཀྱི་གཡང་རྟེན་དུ་བུམ་གཏེར་སྦ་བར་འདོད་པས། འཇིགས་བྲལ་བསྒོམ་ཞིང་བཛྲ་པཱ་ཎི་བསྙེནཿ གསུངས་པའི་དོན། ཧཱུྃ༔ ཆོས་དབྱིངས་རྣམ་དག་དཀོན་མཆོག་བདེན་པའི་མཐུས༔ འདུ་བའི་རིགས་རྣམས་མ་གཏོགས་གདོན་དང་བགེགས༔ སྒྲུབ་ལ་བར་གཅོད་རྒབ་འདྲེ་འབྱུང་པོའི་ཚོགས། །གནས་འདིར་མ་འདུག་རང་རང་གནས་སུ་དེངས༔ པཱ་ར་ཀུ་མ་ན་ཡ་ཨ་གཙྪ་མཱ་ར་ཡ་ཧཱུྃ་ཕཊ༔ མཚམས་གཅོད་ནི༔ ཧཱུྃ༔ སྟེང་འོག་ཕྱོགས་མཚམས་བསྲུང་བའི་འཁོར་ལོའི་གོ༔ རིམ་པ་བདུན་གྱི་གུར་ཁང་འོད་དུ་འཚེར༔ བར་ཆད་བགེགས་ལས་རྣམ་པར་རྒྱལ་བའི་ཞིང་༔ གནོད་སྦྱིན་ཆེན་པོའི་ཕོ་བྲང་ལྟ་ན་སྡུག༔ བཛྲ་པཱ་ཎི་རཏྣ་ཛྙཱ་པྲ་མ་ཏི་ཧཱུྃ་ཕཊ་སྭཱ་ཧཱ༔ བདག་བསྐྱེད་པ་ནི། ཧཱུྃ༔ སྣང་སྟོང་ཀུན་ཁྱབ་ཕོ་བྲང་ཆེན་པོའི་དབུས༔ བདུད་བཞི་པདྨ་ཉི་ཟླའི་གདན་སྟེང་དུ༔ བདག་ཉིད་རིག་པའི་ངོ་བོ་ཡི་གེ་ཧཱུྃ༔ འཕྲོ་འདུ་གྱུར་བས་དཔལ་ཆེན་རྡོ་རྗེ་འཛིན༔ མཐིང་ནག་ཞལ་གཅིག་ཕྱག་གཉིས་དོར་སྟབས་འགྱིངས༔ ཞལ་གདངས་ལྗགས་འདྲིལ་སྤྱན་གསུམ་དྲག་ཏུ་འཁྲུག༔ གཡས་པ་རྡོ་རྗེ་གཡོན་པ་སྡིག་མཛུབ་སྒྲེང་༔ སྟག་ཤམ་རུས་རྒྱན་དུར་ཁྲོད་ཆས་བརྒྱད་སྤྲས༔ རལ་པ་ཁམ་ནག་གྱེན་ཐུར་ཐོད་པས་བཅིངས༔ སྦྲུལ་རིགས་ལྔས་བརྒྱན་ཡེ་ཤེས་མེ་དཔུང་འབར༔ གར་དགུའི་ཉམས་ལྡན་གནས་གསུམ་འོད་ཟེར་འབརཿ ལྕང་ལོ་ཅན་ནས་གནས་འདིར་སྤྱན་འདྲེན་གཤེགས༔ སྤྱན་འདྲེན་པ་ནི༔ ཧཱུྃ༔ མ་ལུས་སངས་རྒྱས་ཀུན་གྱི་མཐུ་སྟོབས་འཛིན༔ སྲིད་གསུམ་ཟིལ་གནོན་དྲེགས་ཚོགས་ཡོངས་ཀྱི་གཤེད༔ འཇིག་བྱེད་རྒྱལ་པོ་ཁྲོ་བོ་ཡོངས་ཀྱི་རྒྱལ༔ ཐུགས་རྗེའི་སྟོབས་ཀྱིས་གནས་འདིར་སྤྱན་འདྲེན་གཤེགས༔ མ་ཧཱ་ཀྲོ་ཏ་བཛྲ་པཱ་ཎི་བཛྲ་ས་མ་ཡ་ཛཿཛཿ བཞུགས་གསོལ་ནི༔ ཧཱུྃ༔ དྲེགས་ཆེན་རབ་གཏུམ་འབར་འཁྲུག་ཁྲོ་བོའི་རྗེ༔ གར་དགུའི་ཉམས་ལྡན་དྲག་རྩལ་ཧེ་རུ་ཀ༔ གནས་འདིར་དྲག་པོའི་གདན་ལ་བཞུགས་སུ་གསོལ༔ དབང་དང་བྱིིན་རླབས་དངོས་གྲུབ་སྩལ་དུ་གསོལ༔ ཧཱུྃ་བཛྲ་པཱ་ཎི་མ་ཧཱ་ཀྲོ་ཏ་ཏིཥྛ་ཧཱུྃ༔ ཕྱག་མཆོད་ནི༔ ཧཱུྃ༔ ཁྲོ་རྒྱལ་མཆོག་དང་དགོངས་པ་མཉམ་པའི་ཕྱིར༔ དབྱིངས་རིག་འདུ་འབྲལ་མེད་པའི་ཕྱག་གིས་མཆོད༔ ཕྱི་ནང་མཆོད་ཚོགས་དངོས་འབྱོར་ཡིད་ལས་སྤྲུལ༔ མཆོད་པའི་ལྷ་མོས་དབང་གི་འཁོར་ལོར་འབུལ༔ མ་ཧཱ་སརྦ་པཱུ་ཛ་ས་མ་ཡ་ཧོ༔ འཛབ་བསྟོད་ནི༔ ཧཱུྃ༔ དབྱིངས་ལས་ཤར་བའི་དཔལ་ཆེན་ཁྲོ་བོའི་རྒྱལ༔ སྣང་བའི་སྐུ་ལ་སྟོང་པའི་ཡེ་ཤེས་རྒྱས༔ སྔགས་ཀྱི་འཁོར་ལོ་སྒྲ་འོད་ཟེར་དུ་འཁྲུག༔ སྲིད་གསུམ་ཟིལ་གནོན་ཁྲོ་བོའི་རྒྱལ་ལ་བསྟོད༔ ཨཱོཾ་བཛྲ་པཱ་ཎི་མ་ཧཱ་ཀྲོ་ཏ་སརྦ་སིདྡྷིཧཱུྃ་ཕཊ༔ བསྙེན་པ་ཡང་སོང་ནས་བཛྲ་པུཥྤེ་སོགས་ཀྱིས་མཆོད། གོང་གི་བསྟོད་པས་བསྟོད་རྗེས། བུམ་པ་སྔགས་དྲུག་ཕྱག་རྒྱ་དྲུག་གིས་བསང་སྦྱངས་སྤེལ་ཞིང་། བུམ་པ་མི་དམིགས་པ་སྟོང་པ་ཉིད་དུ་གྱུར། །སྟོང་པའི་ངང་ལས་བྷྲཱུྃ་ཡོངས་སུ་གྱུར་པ་ལས་རིན་པོ་ཆེ་སྣ་ཚོགས་ལས་གྲུབ་པའི་གཞལ་ཡས་ཁང་གི་དབུས་སུ་པདྨའི་འཁོར་ལོ་འདབ་མ་བརྒྱད་པའི་ལྟེ་བར་ནོར་བདག་ཡིད་བཞིན་ནོར་བུ་སྐུ་མདོག་མཐིང་ལ་འོད་ཟེར་འབར་བ། བཻཌཱུརྱ་ཞུན་མའི་མདོག་ལྟར་རབ་ཏུ་འཚེར་བ་ཞལ་གཅིག་ཞི་མ་ཁྲོའི་ཉམས་ལ་འཛུམ་པའི་མདངས་དང་ལྡན་པ། གཡས་རིན་པོ་ཆེའི་རྒྱལ་མཚན་དང་གཡོན་ནེའུ་ལེ་བསྣམས་པ་ཞབས་ཕྱེད་སྐྱིལ། པཉྩ་ལི་ཀའི་བེར་དགུ་བརྩེགས་གསོལ་ཞིང་དབུ་རྒྱན་མགུལ་ཆུན་ཕྱག་ཞབས་གདུ་བུ་རིན་ཆེན་སྣ་ཚོགས་ཀྱིས་བརྒྱན་པའི་ཕྱི་རོལ་དུ་ཐུགས་འཛིན་གྱི་ཡུམ་བཞི། རྣམ་སྲས་རིགས་བཞི། སྲས་མཆོག་ཛམ་ལ་རྣམ་བཞི་གནོད་སྦྱིན་སྐྱ་བརྒྱད་སྒོ་བ་བཀའ་ཉན་ནོར་ལྷ་རྒྱ་མཚོ་མ་ལུས་པ་ཐམས་ཅད་ལྷ་མིའི་ཁྲོམ་ཚོགས་པ་འམ། ཉི་ཟེར་ལ་རྡུལ་འཚུབ་པ་ལྟར་གསལ་བའི་གནས་གསུམ་ལས་འོད་ཟེར་བསམ་གྱིས་མི་ཁྱབ་པ་འཕྲོས་པས་ཁ་བ་བུ་ཡུག་འཚུབ་པ་ལྟར་བྱང་ཕྱོགས་གནོད་སྦྱིན་རྫོང་གི་ཕོ་བྲང་དང་འོག་མིན་ལྕང་ལོ་ཅན་ནས་སྐུ་འཁོར་དང་བཅས་པ་དམ་ཚིག་དབང་གིས་བཛྲ་ས་མ་ཡཱ་ཛཿཛཿ སྤོས་གཏོང་རོལ་མོ་སྣ་ཚོགས་འཁྲོལ་གཡབ་དར་མདའ་དར་བཅས། ཧཱུྃ༔ བདག་ཉིད་ཁྲོ་བོའི་རྒྱལ་པོའི་ཐུགས་ཀ་ནས༔ ལྔ་ལྡན་འོད་ཟེར་ལྕང་ལོ་ཅན་དུ་འཕྲོས༔ རྒྱལ་པོ་ཆེན་པོ་རྣམ་ཐོས་ནོར་མང་བུ༔ མ་ལུས་འཁོར་དང་བཅས་པ་རྣམས་ལ་ཕོག༔ སྔོན་གྱི་ཐུགས་དམ་དབང་གིས་རྒྱུད་བསྐུལ་ནས༔ སྒྲུབ་པའི་གནས་འདིར་སྤྱན་འདྲེན་གཤེགས་སུ་གསོལ༔ སྐུ་གསུང་ཐུགས་ཡོན་འཕྲིན་ལས་རྣམ་ཐོས་སྲས༔ ཐུགས་འཛིན་གསང་ཡུམ་སྲས་མཆོག་ཛམ་ལའི་ཚོགས༔ གནོད་སྦྱིན་བརྒྱད་དང་ཀླུ་བརྒྱད་གནོད་སྦྱིན་འབུམ༔ བྱེ་བ་དུང་ཕྱུར་བཀའ་ཉན་བྲན་གཡོག་བཅས༔ ཐུགས་རྗེའི་སྟོབས་བསྐྱེད་གནས་འདིར་གཤེགས་སུ་གསོལ༔ ཁམས་གསུམ་དབང་དུ་སྡུད་ཕྱིར་གཤེགས་སུ་གསོལ༔ སྲིད་གསུམ་ཟིལ་གྱིས་གནོན་ཕྱིར༴ མཆོག་གི་དགོས་གྲུབ་སྩོལ་ཕྱིར༴ ཐུན་མོང་ཆར་ལྟར་འབེབས་ཕྱིར༴ གྲུབ་པ་རྣམ་བརྒྱད་སྩོལ་ཕྱིར༴ ཨཱོཾ་བྷཻ་ཤྲ་མ་ཎ་ཡེ་བཛྲ་ས་མ་ཡ་ཛཿཛཿ བཞུགས་གསོལ་ནིཿ ཧཱུྃ༔ ཡེ་ཤེས་སེམས་དཔའ་ཆར་སྤྲིན་གཏིབས་འདྲའི་ཚོགས༔ དམ་ཚིག་སེམས་དཔའ་བསྐྱེད་པའི་སྐུ་ལ་ཐིམ༔ སྒྲུབ་པའི་འབྲས་བུ་མངོན་དུ་མ་གྱུར་བར༔ མ་ལུས་འཁོར་བཅས་གནས་འདིར་བརྟན་པར་བཞུགས༔ མཆོག་དང་ཐུན་མོང་དངོས་གྲུབ་བདག་ལ་སྩོལ༔ ཨོཾ་བྷཻ་ཤྲ་མ་ཎ་ཡེ་ཛཿཧཱུྃ་བཾ་ཧོ༔ ཏིཥྛ་ལྷན༔ ཕྱག་ནིཿ ཧཱུྃ༔ སྔོན་ཚེ་བསྐལ་མང་གོང་ནས་ཚོགས་གཉིས་རྒྱས༔ ས་བརྒྱད་ཕྱིར་མི་ལྡོག་པའི་བྱང་ཆུབ་སེམས༔ ངལ་བསོས་དགེ་བའི་རྒྱལ་པོ་ཡིད་བཞིན་ནོར༔ མ་ལུས་འཁོར་དང་བཅས་ལ་ཕྱག་འཚལ་བསྟོད༔ མཆོད་པ་ནིཿ ཧཱུྃ༔ པཱུཥྤེ་དཀར་མོས་སྟོང་གསུམ་འདབ་ལྡན་མཆོད༔ ངྷཱུ་པེ་སེར་མོས་དྲི་ཡི་སྤྲིན་ཚོགས་གཏིབས༔ ངྷི་པཾ་དམར་མོས་སྣང་གསལ་ཉི་ལྟར་བརྡལ༔ གྷནྡྷེ་སེར་མོས་དྲི་ཆབ་མཚོ་ལྟར་བསྐྱིལ༔ ནཻ་ཏེ་ལྗང་མོས་ཞལ་ཟས་རི་ལྟར་སྤུངས༔ ཤཔྟ་སྔོན་མོས་སྟོང་གསུམ་སྒྲ་ཡིས་བཀང་༔ རྣམ་མང་ཐོས་སྲས་འཁོར་དང་བཅས་ལ་མཆོད༔ ཧཱུྃ༔ ཛ་གད་བསྐྱིལ་བའི་རྒྱ་མཚོ་ཆེན་པོ་འདི༔ རྣམ་མང་ཐོས་སྲས་འཁོར་དང་བཅས་ལ་མཆོད༔ རཀྟའི་རྦ་ཀློང་འཁྲུག་ཅིང་འཁྱོམ་པ་འདི༔ རྣམ་མང་༴ རིན་ཆེན་སྣ་ཚོགས་བཅལ་དུ་བཀྲམ་པ་འདི༔ རྣམ་མང་༴ འབྲུ་ནོར་སྨན་སྣ་ཕྱོགས་སུ་སྤུངས་པ་འདི༔ རྣམ་མང་༴ དར་ཟབ་ཡོལ་བ་བླ་རེས་བརྒྱན་པ་འདི༔ རྣམ་མང་ཐོས་སྲས༴ གདུགས་དང་རྒྱལ་མཚན་བ་དན་སྒྲེང་པ་འདི༔ རྣམ་མང་༴ ཀ་ཆ་དཀོར་ཆའི་སྤྱན་གཟིགས་བཀྲམ་པ་འདི༔ རྣམ་མང་༴ ལོངས་སྤྱོད་སྣ་ཚོགས་འདོད་ཡོན་སྤུངས་པ་འདི༔ རྣམ་མང་༴ གཟུགས་སྒྲ་དྲི་རོ་རེག་བྱ་མ་ལུས་པ༔ རྣམ་མང་༴ ཨཱོཾ་བྷཻ་ཤྲ་མ་ཎ་ཡེ་མ་ཧཱ་སརྦ་པཱུ་ཛ་ཁཱ་ཧི་ཁཱ་ཧི་༔ གཏོར་མ་ནི༔ ཧཱུྃ༔ རིན་ཆེན་སྣོད་དུ་འབྲུ་སྨན་རྩི་བཅུད་བསྡུས༔ མཆོད་པའི་གཏོར་མ་དཀར་ཐིག་དམར་གྱིས་བརྒྱན༔ ལྷ་ཡི་ཞལ་ཟས་ལས་ཀྱང་ཁྱད་པར་འཕགས༔ རོ་མཆོག་བརྒྱ་ལྡན་བྷ་ལིང་མཆོད་པ་འདི༔ རྣམ་མང་ཐོས་སྲས་འཁོར་དང་བཅས་ལ་མཆོད༔ ཅེས་བརྗོད་པ་ཙམ་གྱིས་ནོར་མང་རྣམ་ཐོས་ཀྱི་བུ་འཁོར་དང་བཅས་པའི་ལྗགས་རིན་པོ་ཆེའི་སྦུ་གུས་གཏོར་མ་དང་མཆོད་རྫས་ལ་ཟུག་སྟེ་གསོལ་བས་སྐུ་གསུང་ཐུགས་ཡོངས་སུ་དགྱེས་ཏེ་མཉེས་པའི་མདངས་ཕྱུངས་ནས་རྣལ་འབྱོར་པ་ལ་མཆོག་ཐུན་མོང་གི་དངོས་གྲུབ་ཐམས་ཅད་སྐད་ཅིག་ཉིད་ལ་སྩལ་བར་གྱུར༔ ཨོཾ་བྷཻ་ཤྲ་མ་ཎ་ཡེ་ཡཀྵ་སརྦ་གྲཱི་ཧ་ན་ཨི་དམ་བྷ་ལིངྟ་ཁཱ་ཧི་ཁཱ་ཧི༔ བདུན་ནམ་ཉེར་གཅིག་བརྗོདཿ སྐབས་སུ་བསྟོད་པ་ནི༔ ཧཱུྃ༔ ཆོས་སྐྱོང་རྒྱལ་པོ་ཆེན་པོ་རྣམ་ཐོས་སྲས༔ ཁྱོད་ནི་སྔོན་ནས་མངོན་པར་བྱང་ཆུབ་ཀྱང་༔ རྫོགས་པའི་སངས་རྒྱས་སྟོང་གི་བསྟན་པ་ལ༔ བསྒྲུབ་པའི་གང་ཟག་སྐྱོང་བར་ཐུགས་བསྐྱེད་ནས༔ ས་བརྒྱད་ཕྱིར་མི་ལྡོག་པར་ངལ་བསོས་ཏེ༔ སྒྲུབ་མཆོག་བུ་བཞིན་སྐྱོང་ལ་ཕྱག་འཚལ་བསྟོད༔ མཆོག་དང་ཐུན་མོང་དངོས་གྲུབ་སྩལ་དུ་གསོལ༔ རིན་ཆེན་གླིང་མཆོག་རི་རྒྱལ་བྱང་ཕྱོགས་ནཿ འདོད་འབྱུང་ཕོ་བྲང་རིན་ཆེན་གཏེར་གྱི་ཁང་ཿ རྫོགས་ལྡན་བསྐལ་པའི་བསོད་ནམས་འབུམ་ལས་མཐོཿ དགོས་འདོད་ཆར་འབེབས་མཆོག་ཐུན་དབང་གིས་ཕྱུགཿ ཟད་མི་ཤེས་པའི་དངོས་གྲུབ་སྤྲིན་ཕུང་གཏིབསཿ འདོད་དགུའི་འབྱུང་གནས་མཆོག་ལ་ཕྱག་འཚལ་བསྟོདཿ མཆོག་དང་ཐུན་མོང་༴ ནོར་སྐྱོང་ལྷ་མོ་ནོར་རྒྱུན་ཡིད་བཞིན་མཛོདཿ ཀུ་རུ་ཀུལླེ་དབང་ཆེན་ཌཱཀྐི་མཿ ཀླུ་མོ་གཟི་འབར་ཀླུ་ཁམས་འབུམ་གྱི་དཔལཿ ཐུགས་ཀྱི་གསང་འཛིན་བདེ་བའི་ཡུམ་ཆེན་བཞིཿ ཀུན་ཏུ་མི་ཟད་མཆོག་ཐུན་ལྷུན་གྱིས་གྲུབཿ ཐུགས་འཛིན་ཌཱཀི་བཞི་ལ༴ སྤྲུལ་པའི་རྒྱལ་ཆེན་རྣམ་སྲས་སྡེ་བཞི་དང་ཿ སྐུ་ཡི་སྲས་མཆོག་ཛམ་ལྷ་རིགས་བཞིར་བཅསཿ གནོད་སྦྱིན་བརྒྱད་དང་ཀླུ་ཆེན་རྣམ་པ་བརྒྱདཿ མགོན་པོ་དཀར་པོ་ཚོགས་བདག་གླང་སྣ་དང་ཿ ལྷ་ཆེན་དབང་ཕྱུག་གནོད་སྦྱིན་ཙི་ཏྲ་དམརཿ མ་ལུས་འཁོར་དང་བཅས་ལ༴ མཆོག་དང་ཐུན་མོང་༴ ཕོ་བྲང་ཆེན་པོའི་བར་ཁྱམས་ཁོར་ཡུག་ནསཿ ལྷ་མོ་ཀླུ་མོ་ནོར་བདག་གནོད་སྦྱིན་འབུམཿ སྔོན་ཚེ་རྒྱལ་བ་རྣམས་ཀྱི་སྤྱན་སྔར་རུཿ ཁས་བླངས་དམ་མནོས་སྲུང་མ་དམ་ཚིག་ཅནཿ སྒྲུབ་ལ་དངོས་གྲུབ་སྩོལ་བའི་ལྷ་ཆེན་པོཿ མ་ལུས་འཁོར་དང་བཅས་ལ་ཕྱག་འཚལ་བསྟོདཿ མཆོག་དང་ཐུན་མོང་དངོས་གྲུབ་སྩལ་དུ་གསོལཿ ས་མ་ཡཿ བསྙེན་སྒྲུབ་སྙིང་པོ་འཛབ་ལ་འབདཿ ཧཱུྃ༔ གསལ་བའི་ལྷ་མཆོག་ཐུགས་རྗེའི་དབང་གི་ལྷ༔ སྔགས་ཀྱི་འཁོར་ལོའི་འདུ་འཕྲོ་གཟི་བརྗིད་གཡོ༔ ཕྱི་ནང་གསང་གསུམ་ཏིང་འཛིན་བྱེ་བྲག་གི༔ གཅིག་ཏུ་མ་ངེས་ཆོ་རོལ་སྣ་ཚོགས་བསྒྱུར༔ ལས་བཞིའི་འཕྲིན་ལས་མཆོག་ཐུན་དངོས་གྲུབ་འབར༔ རྣལ་འབྱོར་འདོད་པའི་འབྲས་བུ་སྩལ་བར་སྒོམ༔ མ་ཡེངས་ཏིང་འཛིན་ངང་ནས་འཛབ་འདི་བགྲང་༔ ཨོཾ་བྷཻ་ཤྲ་མ་ཎ་ཡེ་ཡཀྴ་སརྦ་ས་མ་ཡ་ཙིཏྟ་ཧྲིཾ་ཧྲིཾ་ཛཿཛཿ འབུམ་ལས་མི་ཉུང་བར་བཟླས། གོང་ལྟར་མཆོད་ཅིང་བསྟོད། ༈དེ་ནས་བུམ་གཏེར་ལ་འབྲུ་སྣ་འཐོར་ཞིང་རོལ་མོ་དབྱངས་དང་བཅས། ཧཱུྃ༔ ནོར་བདག་ཡིད་བཞིན་ནོར་བུ་ཡུམ་སྲས་དང་། །རྣམ་སྲས་རིགས་བཞི་གནོད་སྦྱིན་སྐྱ་བརྒྱད་དང་། །ནོར་ལྷ་གནོད་སྦྱིན་བྱེ་བ་འབུམ་འབུམ་ཚོགས། །མ་ལུས་འཁོར་དང་བཅས་པ་ཐམས་ཅད་ལ། །རིན་ཆེན་ཕོ་བྲང་སྟོང་གསུམ་བཀོད་ཁྱབ་མཛེས། །དེ་དབུས་འདབ་བརྒྱད་པདྨའི་ཟེའུ་འབྲུའི་དཀྱིལ། །རིན་ཆེན་བུམ་བཟང་དཔག་བསམ་འབྲས་བུའི་དབྱིབས། །མཚན་བཟང་ལྟ་ན་སྡུག་པའི་འདོད་འབྱུང་གཏེར། །ནོར་ལྷ་རྒྱ་མཚོ་འཁོར་དང་བཅས་ལ་མཆོད། །མཆོད་པ་འབུལ་ལོ་དགྱེས་པར་བཞེས་ནས་ཀྱང་། །མཆོག་དང་ཐུན་མོང་དངོས་གྲུབ་སྩལ་དུ་གསོལ། །རྒྱལ་སྲིད་དབང་ཐང་སྟོབས་ཀྱི་དངོས་གྲུབ་སྩོལ། བློན་བཙུན་འབངས་འཁོར་བྲན་གྱི༴ རྟ་མཆོག་བ་ལང་ཕྱུགས་ཀྱི༴ བསམ་འཕེལ་ནོར་བུ་ནང་ནོར༴ འབྲུ་དང་དཔལ་འབྱོར་ཟས་ཀྱི༴ དཀར་མངར་ལོངས་སྤྱོད་བཅུད་ཀྱི༴ དར་གོས་རས་ཕྲུག་གོས་ཀྱི༴ ཕོ་བྲང་ཡུལ་གཞི་གནས་ཀྱི༴ བརྒྱུད་འཛིན་ཁྱེའུ་བུ་སློབ༴ ཁམས་གསུམ་དབང་དུ་འདུ་བའི༴ སྲིད་གསུམ་ཟིལ་གྱིས་གནོན་པའི༴ ནད་མེད་ཚེ་རིང་བདེ་སྐྱིད་དངོས་གྲུབ་སྩོལ། །ཧཱུྃ། རིན་ཆེན་བུམ་པ་གཞལ་ཡས་ཁང་གི་དབུས། །ནོར་ལྷ་རྒྱ་མཚོ་ལྷ་མིའི་ཁྲོམ་ལྟར་ཚོགས། །གཞལ་ཡས་ཆེན་པོ་དེ་ཡི་ཤར་གྱི་ཕྱོགས། །རིན་ཆེན་མེ་ཤེལ་ཉི་མ་འབུམ་ལས་བརྗིད། །ནུབ་ཕྱོགས་ཆུ་ཤེལ་ཟླ་བ་སྟོང་ལས་འབར། །མདུན་དུ་རིན་ཆེན་གསེར་གྱི་རི་བོ་མཐོ། །རྒྱབ་ཏུ་བརྟན་པ་ལྕགས་ཀྱི་རྨེངས་རྡོ་བཙུགས། །ནོར་ལྷ་རྒྱ་མཚོ་འཁོར་དང་བཅས་ལ་མཆོད། །མཆོད་པར་འབུལ་ལོ༴ སོགས་འགྲེས་སྦྱར། ཧཱུྃ། ཤར་ཕྱོགས་རིན་ཆེན་དངུལ་འདི་ལུས་འཕགས་གླིང་། །ལྷོ་ཕྱོགས་རིན་ཆེན་པུ་ཤེལ་འཛམ་བུའི་གླིང་། །ནུབ་ཕྱོགས་རིན་ཆེན་ཟངས་འདི་བ་ལང་སྤྱོད། །བྱང་ཕྱོགས་རིན་ཆེན་གཡུ་འདི་སྒྲ་མི་སྙན། །ཤར་ལྷོར་མུ་མེན་དེ་ཡི་གླིང་ཕྲན་གཉིས། །ལྷོ་ནུབ་མུ་ཏིག་དེ་ཡི་གླིང་ཕྲན་གཉིས། །ནུབ་བྱང་བྱི་རུ་དེ་ཡི་གླིང་ཕྲན་གཉིས། །བྱང་ཤར་འཆོང་ཀྱང་དེ་ཡི་གླིང་ཕྲན་གཉིས། །བསམ་མི་ཁྱབ་པའི་བཀོད་པས་བརྒྱན་པ་འདི། །ནོར་ལྷ༴ སོགས་འགྲེས་སོ། ཕུན་སུམ་ཚོགས་པའི་གླིང་དང་ཁོར་ཡུག་ཏུ། །ཨ་བར་སྐྱུར་གསུམ་ལ་སོགས་སྨན་གྱི་རིགས། །འབྲུ་ལྔ་ལ་སོགས་ལོངས་སྤྱོད་འབྲུ་ཡི་ཚོགས། །དཀར་གསུམ་ལ་སོགས་གཙང་ལྡན་རླན་གྱི་རིགས། །མངར་གསུམ་ལ་སོགས་བཅུད་ལྡན་ཟས་ཀྱི་མཆོག །འབྱུང་བ་ཆེན་པོ་ལྔ་ཡི་རང་མདངས་ལས། ཁ་དོག་རིགས་ལྔའི་དར་ཚོན་ལྷབ་ལྷུབ་འཕྱོ། །བསམ་མི་ཁྱབ་པའི་ཕུན་སུམ་ཚོགས་པ་འདི། །ནོར་ལྷ་རྒྱ་མཚོ་འཁོར་དང་བཅས་ལ་མཆོདཿ མཆོད་པ་འབུལ་ལོ༴ སོགས་འགྲེས་སྦྱར། ཧཱུྃ། འདི་ལྟར་ཕྱི་ནང་གསང་བའི་ཡོ་བྱད་ཚོགས། །མཆོད་པའི་རྫས་སུ་གྱུར་པ་ཇི་སྲིད་དང་། །ཡུལ་ཕྱོགས་རྒྱལ་ཁམས་ཕྱི་ནང་སྣོད་བཅུད་ཀྱི། །དཔལ་དང་དབང་ཐང་དགུ་ནས་དགུ་འཕེལ་རྫས། །མིག་ལྡན་མཆོག་གྱུར་གཟི་ཁྲ་མིག་དགུ་དང་། །སྟོང་ནས་སྟོང་དུ་གོང་འཕེལ་རིན་ཆེན་སྟོང་། །དུང་དཀར་གཡས་འཁྱིལ་དུང་ནས་དུང་འཕེལ་རྫས། །སྣང་སྲིད་རབ་འབྱམས་འདོད་དགུ་ལྷུན་གྲུབ་པའི། །རིན་ཆེན་བུམ་གཏེར་མཆོད་པ་རྒྱ་ཆེན་པོ། །ཀུན་བཟང་མཆོད་པའི་སྤྲིན་ལས་འཕགས་པ་འདི། །ནོར་ལྷ་རྒྱ་མཚོ་འཁོར་དང་བཅས་ལ་མཆོད། མཆོད་པ་འབུལ་ལོ༴ སོགས་འགྲེས་སྦྱར། དེ་ནས་ཐལ་མོ་སྦྱར་མོས་འདུན་རྩེ་གཅིག་གིས། ཧོ་དགོངས་སུ་གསོལ། གསུམ། འོ་གསན་དུ་གསོལ་ལོ། བཅུ་གཉིས་གླིང་གི་འཇིག་རྟེན་གྱི་ཁམས་ཆེན་པོ་འདིར། ས་བརྒྱད་ཕྱིར་མི་ལྡོག་པར་ངལ་བསོས་ནས། རིན་ཆེན་ནོར་གྱི་དངོས་གྲུབ་ཆར་འབེབས་པའི་ངལ་བསོས་དགེ་བའི་རྒྱལ་པོ་ནོར་བདག་ཡིད་བཞིན་ནོར་བུ་རིགས་བདག་བཛྲ་པཱ་ཎི་ཐུགས་འཛིན་གསང་བའི་ཡུམ་བཞི་སྤྲུལ་པའི་རྣམ་སྲས་སྡེ་བཞི་སྲས་མཆོག་ཛམ་ལ་རིགས་བཞི། ནང་བློན་ནོར་འཛིན་སྐྱ་བརྒྱད་སྒོ་བ་བཀའ་སྡོད་གནོད་སྦྱིན་བྱེ་བ་ས་ཡ་འབུམ་འབུམ་གྱི་ཚོགས་མཁར་ཞིང་བང་ཐབ་ཟས་ནོར་འབྲུ་དང་ཕོ་མོ་ཁྱེའུ་བརྒྱུད་འཛིན་རྟ་མཆོག་བ་ལང་ར་ལུག་གནག་གི་གཡང་འཛིན་འཁོར་དང་བཅས་པ་ཁྱེད་རྣམས་ལ་རིན་ཆེན་འདོད་འབྱུང་གི་ཡོན་ཏན་ལྔའི་རྒྱན་དང་ལྡན་པ་འདི་ཉིད་སྔགས་དང་ཕྱག་རྒྱ་ཏིང་འཛིན་གྱི་བྱིན་གྱིས་བརླབས་ཏེ། སྐུ་འཁོར་དང་བཅས་པ་ཁྱེད་རྣམས་ལ་མཉེས་པའི་མཆོད་པར་འབུལ་ལོ། དགྱེས་པའི་རྫས་སུ་འབུལ་ལོ། དགོས་པའི་ཡོ་བྱད་དུ་འབུལ་ལོ། མཁོ་བའི་དཔལ་འབྱོར་དུ་འབུལ་ལོ། བསགས་པའི་བང་མཛོད་དུ༴ སྙིང་ཟོག་ནང་ནོར་དུ༴ བརྟེན་པའི་སྐུ་མཁར་དུ༴ བཞུགས་པའི་ཕོ་བྲང་དུ༴ ཚེ་རབས་ནས་མཆོད་སྦྱིན་གཡེལ་བའི་ཉེས་བཤགས་སུ༴ མཆོད་སྦྱིན་ལ་སེར་སྣས་བཅིངས་པའི་འགྱོད་བཤགས་སུ༴ ནོར་ལྷ་རྒྱ་མཚོ་མཆོད་ཅིང་མ་བརྟེན་པའི་གནོངས་བཤགས་སུ༴ ལོ་ཟླ་ཞག་དུས་ཀྱི་མཆོད་བསྟོད་ཆག་པའི་འཁོན་སྦྱང་དུ་འབུལ་ལོ། །སྤངས་བྱའི་དམ་ཚིག་ཉམས་པའི་གྲིབ་སེལ་དུ༴ བླངས་བྱའི་དམ་ཚིག་ཉམས་པའི་བཟོད་གསོལ་དུ༴ བསྐྱེད་རྫོགས་ཀློང་དུ་མ་གྱུར་པའི་ཡུས་བཤགས་སུ༴ བསྐང་བརྟེན་སྒྲུབ་རྫས་མ་འཛོམ་པའི་ངོ་ཚབ་ཏུ༴ བླ་རྡོ་རྟེན་འཁོར་མ་བཅངས་པའི་ཉེས་སེལ་དུ༴ ཐབ་འཁོན་གཞོབ་གསུམ་ཤོར་བའི་གནོད་སེལ་དུ༴ ཁང་ས་ཉེས་པའི་དཔལ་འཕེལ་དུ༴ ཞིང་ས་ཉེས་པའི་འབྲུ་འཕེལ་དུ༴ ཁང་གསར་བཟོས་པའི་ས་བཅུད་དུ༴ ཟས་ནོར་བསོག་པའི་གཡང་རྟེན་དུ༴ བང་མཛོད་འཕེལ་བའི་དཔལ་བརྟེན་དུ༴ ཕོ་བརྒྱུད་དཔའ་བའི་རྫོང་ཆེན་དུ༴ མོ་བརྒྱུད་མཛངས་པའི་བཅུད་ཆེན་དུ༴ རིགས་བརྒྱུད་འཕེལ་བའི་ཆུ་རྒྱུན་དུ༴ བུ་སློབ་རྒྱས་པའི་བསྟན་འཕེལ་དུ༴ དབང་ཐང་རྒྱས་པའི་འཁོར་ལོ་རུ༴ སྔར་བྱས་ལས་ཀྱི་གཏང་རག་ཏུ༴ ཕྱིས་བྱེད་ལས་ཀྱི་ཞུ་སྐྱེམས་སུ༴ ད་ལྟའི་ལས་ཀྱི་མཉེས་བྱེད་དུ་འབུལ་ལོ། དགྱེས་པར་མཛད་དུ་གསོལ་ལོ། མཉེས་པར་མཛད་དུ་གསོལ་ལོ། ཚིམ་པར་མཛད་དུ་གསོལ་ལོ། ཡོངས་སུ་དགྱེས་པ་མཛད་དུ་གསོལ་ལོ། ཧོ་དེ་ལྟར་གྱི་དགྱེས་མཆོད་ཆེན་པོ་འདི་ཕུལ་བའི་མཐུས། མདོ་སྔགས་ཀྱི་བསྟན་པ་རིན་པོ་ཆེ་ཕྱོགས་དུས་ཐམས་ཅད་དུ་དར་ཞིང་རྒྱས་པར་མཛད་དུ་གསོལ། བསྟན་འཛིན་གྱི་སྐྱེས་བུ་རྣམས་ཀྱི་སྐུ་ཚེ་དང་མཛད་འཕྲིན་ཐམས་ཅད་རྒྱས་པར་མཛད་དུ་གསོལ། བསྟན་པའི་སྦྱིན་བདག་རྣམས་ཀྱི་མངའ་ཐང་དང་ཆབ་སྲིད་ཐམས་ཅད་འཕེལ་བར༴ སེམས་ཅན་ཐམས་ཅད་བདེ་ཞིང་སྐྱིད་པར༴ ནད་མུག་མཚོན་གསུམ་གྱི་བསྐལ་པ་ཐམས་ཅད་ཞི་བར༴ ཁྱད་པར་དུ་རྒྱུ་སྦྱོར་བ་སྦྱིན་པའི་བདག་པོའམ་ཡུལ་ཕྱོགས་རྒྱལ་ཁམས་འདི་ཞེས་པའམ། བདག་ཅག་ཡོན་མཆོད་འཁོར་དང་བཅས་པའི་ཚེ་བསོད་དཔལ་འབྱོར་ཁ་རྗེ་དབང་ཐང་ལོངས་སྤྱོད་ཐོས་བསམ་སྒོམ་གསུམ་ཉམས་རྟོགས་ཀྱི་ཡོན་ཏན་ཐམས་ཅད་གོང་ནས་གོང་དུ་ཡར་ངོའི་ཟླ་བ་ལྟར་འཕེལ་ཞིང་རྒྱས་པར་མཛད་དུ་གསོལ། མི་ནད་ཕྱུགས་ནད་ཡམས་ནད་གོད་ཁ་བཙའ་སད་སེར་གསུམ་ཐམས་ཅད་རབ་ཏུ་ཞི་བར་མཛད་དུ་གསོལ། ཆར་ཆུ་དུས་སུ་འབབས་པ་ལོ་ཕྱུགས་རྟག་ཏུ་ལེགས་པ་འབྱུང་བའི་ཁམས་ཀྱི་དཔལ་དང་དབང་ཐང་ཚེ་བསོད་དཔལ་འབྱོར་ལེགས་ཚོགས་ཐམས་ཅད་བཀྲ་ཤིས་དགུ་འཕེལ་གྱི་རྫས་མཆོག་ཕུལ་བའི་རྟེན་འབྲེལ་གྱིས་དགུ་གཅིག་དགུ་འཕེལ་ཁྲི་འབུམ་དུ་འཕེལ་བར་མཛད་དུ་གསོལ། བཀྲ་ཤིས་སྟོང་འཕེལ་གྱི་རྫས་མཆོག་ཕུལ་བའི་རྟེན་འབྲེལ་གྱིས་སྟོང་གཅིག་སྟོང་ནས་སྟོང་ཕྲག་གྲངས་མེད་དུ་འཕེལ་བར་མཛད་དུ་གསོལ། རིན་ཆེན་དུང་འཕེལ་གྱི་རྫས་མཆོག་ཕུལ་བའི་རྟེན་འབྲེལ་གྱིས། དུང་ནས་དུང་འཕེལ་དུང་ཕྱུར་གྲངས་མེད་དུ་འཕེལ་བར་མཛད་དུ་གསོལ། ཞེས་འདོད་གསོལ་འདི་ལན་གསུམ་བརྗོད་དེ་ནོར་བདག་ཡིད་བཞིན་ནོར་བུའི་ལྷ་ཚོགས་ཐམས་ཅད་བརྟན་པར་བཞུགས་པར་བསམས་ཤིང་། ལོ་དུས་བཞིན་གཡང་སྐྱོབས་དང་བསྐང་མདོས་སོགས་ལ་བརྩོན་པར་བྱའོ། ཤིས་པ་བརྗོད་རབ་ཏུ་གནས་པར་བྱའོ། ཕྱག་ལེན་བུམ་གཏེར་གཞུང་ལྟར་ལ་འདི་ཁའི་བཅས་འདོན་ལྟར་བྱའོ། ནོར་བདག་གི་སྐུ་བྲིས་འབུར་བུམ་པའི་གཙོ་བོ་ལ་གལ་ཆེའོ། བཞུགས་ཡུལ་གཞལ་ཡས་ཁང་བུམ་གཏེར་གཡང་སྐྱོབ་ཐུན་མོང་ལྟར་ཅི་མཁས་ཅི་ལེགས་དང་། བློས་སྣང་ཐུབ་ན་ཤིན་ཏུ་ལེགས་པར་འདུག །སྲིང་མོ་རྫོང་ཨོ་རྒྱན་ཆོས་གླིང་དུ་སུག་བྲིས་སུ་སྦྱར་བ་འདི་ཡང་རིག་འཛིན་མིང་གིས་སོ།། །།མངྒ་ལཾ། །

ཀླུ་ལ་གསས་མཁར་བརྩེགས་ཐབས་ཀྱི་ཁ་སྐོང་།

ནོར་བདག་གི་བུམ་གཏེར་ཆ་ལག་ཀླུ་ལ་གསས་མཁར་བརྩེགས་ཐབས་ཀྱི་ཁ་སྐོང་བཞུགས། ཀླུའི་རྒྱལ་པོ་བཅོམ་ལྡན་འདས་ལ་ཕྱག་འཚལ་ལོ། །ཀླུ་ལ་བུམ་གཏེར་འདོད་པས་བུམ་པ་གཞུང་ལྟར་ལས་ཁྱད་པར་ལྟོ་བ་ལྡིར་ཆེར་ལྡན་པའི་ནང་དུ་བྲོ་ག་ལ་རྒྱ་མཚལ་ལམ། མཚལ་གྱི་ཁུ་བ་ཀ་རས་བྱས་ཏེ་པདྨ་འདབ་བརྒྱད་ཕུ་བརྒྱད་ཀྱིས་མཚན་པར་བྲིས་པའི་དབུས་སུ་ཀླུ་ཡི་རྒྱལ་པོ་དགའ་བོ། འདབ་མ་བརྒྱད་ལ་ཀླུ་བརྒྱད་དང་བཅས་སྤྲ་ཚིལ་ལམ་མར་གཙང་མར་ཀླུ་གཟུགས་རྣམས་བཟོ། སོ་སོའི་ཐུགས་ཀར་བྲོ་ག་ལ་མཚལ་གྱིས་ཀླུ་བརྒྱད་ཀྱི་སྙིང་པོ་བྲིས་བའི་ཤོག་དྲིལ་ཀླུ་སྨན་ཁུངས་བཙུན་གྱིས་བྱུགས་པ་གཞུག་ཀླུ་གཟུགས་རྣམས་ཀྱི་མཐའ་དང་བར་མཚམས་རྣམས་ལ། བུམ་གཏེར་གཞུང་གི་རིན་ཆེན་འབྲུ་སྨན་ཀླུ་ལ་མི་འགལ་བའི་རིགས་ཀྱིས་ཁེངས་པར་དགང་། ཀླུ་སྨན་མང་བ་ལེགས། ཡང་ན་ཡུལ་དེའི་ཀླུའི་གཟུགས་ཕྱོགས་བཞིའི་ཆུ་འབབས་ལྟ་ཕྱོགས་རིགས་བཞིའི་ཀླུ་ཆུ་མིག་ཏུ་འདུག་པ་སྦྲུལ་གྱི་གདེང་ཀ་ཕྱག་ན་ནོར་བུ་ཡུམ་དང་འཁྲིལ་བར་བཟོས་པ་བུམ་ནང་དུ་རྫས་དང་བཅས་འགོད། བྱང་བལྟས་ཆུ་ཡི་རིགས་ལ་སྤང་། ཀླུ་འཕེལ་ཡིད་འཐད་པའི་བབས་བསྟུན་བཟོས་པའི་དབུས་སུ་བུམ་པ་རྡོ་ལེབ་པདྨ་འདབ་བརྒྱད་ཀྱི་མཚན་པའི་དབུས་སུ་འགོད་ཅིང་། གཡའ་སྒྲོམ་ཁ་གཅོད་སོགས་གཞུང་ལྟར་ལ་རྩི་ཤིང་སྣ་ཚོགས་གཡང་ཐག་བལ་ཚོན་དར་སྣས་བརྒྱན། སྒྲུབ་པོ་རྣམ་འཇོམས་ཀྱི་ཁྲུས་ནས་ཕྱུངས་ཤིང་གདན་ལ་འཁོད། ཨཱོཾ་སྭཱ་བྷཱ་ཝ་སོགས་སྟོང་པ་ཉིད་དུ་གྱུར། སྟོང་པའི་ངང་ལས་པདྨ་དང་ཟླ་བའི་གདན་ལ་ཧྲཱིཿདཀར་པོ་རིང་ཆ་ཚེག་དྲག་གིས་མཚན་པ་ལས་འོད་ཟེར་འཕྲོས་སེམས་ཅན་གྱི་ཁམས་སྦྱངས། སངས་རྒྱས་དང་བྱང་ཆུབ་སེམས་དཔའ་ཐམས་ཅད་མཆོད་ནས་བྱིན་བརླབས་བསྡུས་ས་བོན་ལ་ཐིམ་ཡོངས་སུ་གྱུར་པ་ལས། ཇོ་བོ་ཐུགས་རྗེ་ཆེན་པོ་དུང་གི་རི་བོ་ལ་ཉི་མ་ཤར་བ་ལྟ་བུ་ཞལ་གཅིག་ཕྱག་བཞི། དང་པོ་གཉིས་ཀྱིས་ཐལ་མོ་སྦྱར་ཞིང་ནོར་བུ་བསྣམས་པ། གཡས་ཕྲེང་བ་གཡོན་པདྨ་ཞབས་སྐྱིལ་ཀྲུང་ལོངས་སྐུ་ཞི་འཛུམ་རྒྱན་ཕྲེང་ཅོད་པན་སྣ་ཚོགས་ཀྱིས་བརྒྱན་ཞིང་འོད་ལྔ་འབར་བའི་ཀློང་དུ་བཞུགས་པར་གསལ་བའི་གནས་གསུམ་འབྲུ་གསུམ་དང་ཐུགས་ཀའི་ཧྲཱིཿལས་འོད་ཟེར་ཕྱོགས་བཅུའི་ཞིང་རབ་འབྱམས་མཐའ་ཡས་ཤིང་མུ་མེད་པ་རྣམས་ལ་ཁྱབ་པར་འཕྲོས། ཁྱད་པར་འོག་མིན་རི་བོ་ཏ་ལ་འཕགས་པ་སྐུ་གསུམ་གྱི་ཕོ་བྲང་ལ་འཕྲོས་པས། སྤྱན་རས་གཟིགས་སྐུ་གསུམ་རྒྱལ་བའི་ལྷ་ཚོགས་ཐམས་ཅད་བསྐྱེད་པའི་གནས་འདིར་བཛྲ་ས་མ་ཡ་ཛཿཛཿ ཧཱུྃ། བཞེངས་ཤིག་བཞེངས་ཤིག་སྟོབས་བཅུ་མངའ་བའི་ལྷ། སོགས་ནས་བཛྲ་ས་མ་ཡ་ཛཿཛཿཛཿ ཧཱུྃ་བཾ་ཧོ༔ ཨརྒྷ྄ཾ་ནསཿ ཤཔྟ་པྲ་ཏིཙྪ་སྭཱ་ཧཱ། དེ་བཞིན་གཤེགས་པ་ཐམས་ཅད་ཀྱིས་དབང་བསྐུར་དུ་གསོལ། ཨཱོཾ་སརྦ་ཏ་ཐཱ་ག་ཏ་སོགས། །དབང་བསྐུར་སྐུ་གང་དྲི་མ་དག་ཆུ་ལྷག་མ་ཡར་ལུད་པ་ལས་འོད་དཔག་མེད་ཀྱིས་དབུ་བརྒྱན་པར་གྱུར། བསྟོད་པར་འོས་པ་སོགས། ཐུགས་ཀར་ཟླ་དཀྱིལ་ས་བོན་སྔགས་ཕྲེང་འཁོར་བའི་འོད་ཀྱིས་ཕྱོགས་བཅུའི་རྒྱལ་བ་འཕགས་པའི་ལྷ་ཚོགས་ཐམས་ཅད་མཆོད་ནས་སྐུ་གསུམ་བྱིིན་རླབས་ཐམས་ཅད་སྔགས་འཕྲེང་གི་རྣམ་པར་སྤྱན་དྲངས་ཏེ་རང་གི་སྙིང་གར་ཐིམ་པར་གྱུར། ཨཱོཾ་མ་ཎི་པདྨེ་ཧཱུྃ་ཧྲཱིཿསྟོང་ལས་མ་ཉུང་བ་བཟླ། ཨཱོཾ་བཛྲ་ཨརྒྷཾ་སོགས། བསྟོད་པར་འོས་པ་ཐམས་ཅད་ལ། །སོགས། ཨཱོཾ་སྭ་བྷཱ་ཝས། མདུན་གྱི་ཀླུ་སྤེའུ་དང་བུམ་པ་མི་དམིགས་པ་སྟོང་པ་ཉིད་དུ་གྱུར། སྟོང་པའི་ངང་ལས་བྷྲུྃ་ཡོངས་སུ་གྱུར་པ་ལས་པདྨའི་འཁོར་ལོ་འདབ་མ་བརྒྱད་པའི་ལྟེ་བར་དགོས་འདོད་དཔལ་གྱི་བུམ་པ་ཆེན་པོ་དཔག་བསམ་ཤིང་གི་འབྲས་བུ་ལྟ་བུ་ལྟོ་བ་རྒྱ་ཆེ་བ། ཞབས་ཞུམ་ཉམས་ལ་མགྲིན་པ་བཟང་བ། མཆུ་འཕྱང་ཞིང་ཡིད་དུ་འོང་བ་ལྟ་ན་སྡུག་པའི་གཞལ་ཡས་ཁང་རྒྱ་ཁྱོན་ཆོས་ཀྱི་དབྱིངས་དང་མཉམ་པའི་དབུས་སུ་ཀླུའི་རྒྱལ་པོ་དགའ་བོའམ། ཡུལ་འདིའི་ཀླུ་ཆེ་གེ་ཡབ་ཡུམ་ལ་འབྱུང་བ་ལྔའི་ཁམས་ཀྱི་ཀླུ་རིགས་བྱེ་བ་དུང་ཕྱུར་ས་ཡ་འབུམ་ཕྲག་གྲངས་མེད་མང་པོས་བསྐོར་བ་མངོན་སུམ་དུ་གསལ་བར་གྱུར། རང་ཉིད་འཕགས་པའི་ཐུགས་ཀ་ནས་ཡེ་ཤེས་ལྔའི་རང་མདངས་འོད་དང་འོད་ཟེར་བསམ་གྱིས་མི་ཁྱབ་པ་འཕྲོས་པས། ཀླུ་འཁོར་དང་བཅས་པ་རྣམས་ལ་ཕོག་པ་ཙམ་གྱིས་འཕགས་པའི་ཐུགས་རྗེས་ཤེས་རྒྱུད་བསྐུལ་ཏེ། སྐད་ཅིག་གིས་བསྐྱེད་པའི་གཞལ་ཡས་བརྟེན་དང་གཉིས་སུ་མེད་པར་མཆིས་ཤིང་། བྱམས་བརྩེའི་གདུང་བ་དང་ལྡན་བཞིན་དམ་ཚིག་གི་རྒྱུད་བསྐུལ་ནས་རྟེན་བཤམས་པ་ལ་བཞུགས་ཏེ། དངོས་འབྱོར་ཡིད་སྤྲུལ་སྣང་སྲིད་རབ་འབྱམས་ཀྱི་ཞིང་ཁམས་མཆོད་ཚོགས་ཐམས་ཅད་བཞེས་ནས་འདོད་པའི་དངོས་གྲུབ་མ་ལུས་པ་ཐམས་ཅད་སྩལ་བར་གྱུར། ཨཱོཾ་བཛྲ་ཨརྒྷཾ་པྲ་ཏིཙྪ་སྭཱ་ཧཱ༔ སོགསགཏོར་མ་ནི། བྷྲུྃ་ལས་རིན་པོ་ཆེའི་སྣོད་ཡངས་ཤིང་རྒྱ་ཆེ་བའི་ནང་དུ་གཏོར་མ་དཀར་གསུམ་མངར་གསུམ་ཀླུ་སྨན་འདོད་ཡོན་ལོངས་སྤྱོད་གཟུགས་སྒྲ་དྲི་རོ་རེག་བྱ་མ་ཚང་བ་མེད་ཅིང་། ཚང་ཞིང་ཡིད་དུ་འོང་བ་བསམ་གྱིས་མི་ཁྱབ་པ་རྣམས་སུ་གྱུར། ཨཱོཾ་ཨཱཿཧཱུྃ་ན་མ༔ སརྦ་ཏ་ཐཱ་ག་ཏ་ཨ་ཝ་ལོ་ཀི་ཏེ་སོགས་བདུན་བརྗོད། འདོད་ཡོན་ལྔ་ལྡན་གྱི་གཏོར་མ་འདི་བསྔོ་ཞིང་འབུལ་བའི་གནས་སུ་གྱུར་པ་ནི། ཀླུའི་རྒྱལ་པོ་དགའ་བོའམ། ཡུལ་འདིར་གནས་པའི་ཀླུ་ཆེ་གེ་ཡབ་ཡུམ་འབྱུང་བ་ཆེན་པོ་ལྔའི་ཁམས་ཀྱི་ཀླུ་རིགས། ཀླུ་ཆེན་བརྒྱད་རྒྱལ་བློན་འབངས་འཁོར་ཡུམ་སྲས་སྐུ་འཁོར་དང་བཅས་པ་རྣམས་ཀྱི་ཞལ་དུ་ཨཱི་དམ་བྷ་ལིངྟ་ཁ་ཁ་ཁཱ་ཧི་ཁཱ་ཧི། བདུན་མཆོད་སྦྱིན་གྱི་གཏོང་མ་འདི་བཞེས་ལ་འདོད་པའི་དངོས་གྲུབ་ཐམས་ཅད་མྱུར་བ་ཉིད་དུ་སྩོལ་ཞིང་བདེ་ལེགས་ཀྱི་ཡོན་ཏན་ཐམས་ཅད་འཕེལ་བར་མཛད་དུ་གསོལ། དྲིལ་བུ་ཏིང་ཤག་རྒྱ་གླིང་བཅས་སྤོས་དཀར་བདུག་ཅིང་དབྱངས་སྙན་པོས། ཧྲཱི༔ ང་ནི་འཕགས་པ་སྤྱན་རས་གཟིགས་ཀྱི་སྐུ། །བྱམས་དང་བརྩེ་བའི་མགྲོན་དུ་གཉེར་བའི་རིགས། ཀླུ་ཡི་རྒྱལ་པོ་ཆེན་པོ་དགའ་བོ་དང་། །ཀླུ་བརྒྱད་ཡབ་ཡུམ་འབྱུང་ལྔའི་ཁམས་ཀྱི་ཀླུ། །ཁྱད་པར་ཡུལ་འདིར་གནས་པའི་ཀླུ་ཆེ་གེ། ཡབ་ཡུམ་ཀླུ་འཁོར་གྲངས་མེད་དགོངས་སུ་གསོལ། །གཞལ་ཡས་གསས་མཁར་སྟོང་གསུམ་ཁྱོན་དང་ལྡན། །དེ་དབུས་དྲི་མེད་མདངས་ལྡན་འདབ་བརྒྱད་སྟེང་། །འཁོར་འདས་ཡོངས་ཀྱི་བཅུད་འཁྱིལ་རིན་ཆེན་བུམ། །རིན་ཆེན་སྣ་ཚོགས་སྐར་ལྟར་བཀྲམ་པ་དང་། །འབྲུ་སྨན་དར་ཟབ་འདོད་དགུའི་ལྷུན་པོ་བརྗིད། །མཛེས་ཤིང་ཡིད་འོང་དམུ་དག་རྩི་ཤིང་སྤུངས། །ལྷ་ཀླུ་མི་ཡི་འདོད་དགུའི་གཏེར་ཆེན་འདི། །ཀླུ་ཡི་རྒྱལ་པོ་ཆེན་པོ་དགའ་བོ་དང་། །ཀླུ་བརྒྱད་ཡབ་ཡུམ་སྲས་འཁོར་འབྱུང་ལྔའི་ཀླུ། །ཁྱད་པར་ཡུལ་འདིའི་ཀླུ་དང་འཛམ་གླིང་ཀླུ། མ་ལུས་འཁོར་དང་བཅས་པ་རྣམས་ལ་འབུལ། །ས་བརྐོས་རྡོ་བསློག་ཤིང་བཅད་ཆུ་གཉན་དཀྲུགས། །ཐབ་གཞོབ་འཁོན་གསུམ་འགྲམས་འཁྲུགས་ཅི་མཆིས་བཤགས། །འཁོན་སྦྱང་བཟོད་གསོལ་ཚངས་པ་སྩལ་བ་དང་། །ཚེ་རིང་ཕུན་ཚོགས་བདེ་སྐྱིད་དངོས་གྲུབ་སྩོལ། ཧྲཱིཿ ཕོ་བྲང་རིན་ཆེན་འདོད་འབྱུང་གཞལ་ཡས་ཀྱི། །མན་ཤེལ་ཆུ་ཤེལ་ཉི་ཟླ་འབུམ་ལས་གསལ། །རིན་ཆེན་གསེར་གྱི་ལྷུན་པོ་བརྗིད་རེ་ཆེ། །རྒྱ་ཆེ་དཔངས་མཐོ་གསེར་རི་རོལ་མཚོས་བརྒྱན། །ཀླུ་རྒྱལ་ཡབ་ཡུམ་འཁོར་བཅས་རྣམས་ལ་འབུལ། ས་བརྐོས་རྡོ་བསློག༴ ཧྲཱིཿ ཤར་ཕྱོགས་རིན་ཆེན་དངུལ་འདི་ལུས་འཕགས་གླིང་། །ལྷོ་ཕྱོགས་རིན་ཆེན་སྤོས་ཤེལ་འཛམ་བུའི་གླིང་། །ནུབ་ཕྱོགས་རིིན་ཆེན་ཟངས་འདི་བ་ལང་སྤྱོད། །བྱང་ཕྱོགས་རིན་ཆེན་གཡུ་འདི་སྒྲ་མི་སྙན། །ཤར་ལྷོ་མུ་མེན་དེ་ཡི་གླིང་ཕྲན་གཉིས། །ལྷོ་ནུབ་མུ་ཏིག་དེ་ཡི་གླིང་ཕྲན་གཉིས། །ནུབ་བྱང་བྱི་རུ་དེ་ཡི་གླིང་ཕྲན་གཉིས། །བྱང་ཤར་རིན་ཆེན་འཆོང་ཡང་གླིང་ཕྲན་གཉིས། །བསམ་མི་ཁྱབ་པའི་བཀོད་པས་བརྒྱན་པ་འདི། །མཆོད་དོ་འབུལ་ལོ་ཀླུ་རྒྱལ་འཁོར་དང་བཅས། །ས་བརྐོས་སོགས། ཧྲཱིཿ ཕུན་སུམ་ཚོགས་པའི་གླིང་དང་འཁོར་ཡུག་ཏུ། །ཞོ་ཤ་གསུམ་སོགས་སྨན་སྣ་སྣ་ཚོགས་དང་། །འབྲུ་སྣ་ལྔ་སོགས་ལོངས་སྤྱོད་འབྲུ་ཡི་རིགས། །དཀར་གསུམ་ལ་སོགས་གཙང་ལྡན་རླན་གྱི་ཚོགས། །མངར་གསུམ་ལ་སོགས་བཅུད་ལྡན་ཟས་ཀྱི་མཆོག །འབྱུང་བ་ཆེན་པོ་ལྔ་ཡི་རང་མདངས་ལས། །ཁ་དོག་རིགས་ལྔའི་དར་ཚོན་ལྷབ་ལྷུབ་འཕྱོ། །བསམ་མི་ཁྱབ་པའི་ཕུན་སུམ་ཚོགས་པ་འདི། །མཆོད་དོ་འབུལ་ལོ་ཀླུ་རྒྱལ་འཁོར་བཅས་མཆོད། །ས་བརྐོས་སོགས། ཧྲཱིཿ འདི་ལྟར་ཕྱི་ནང་མཆོད་པའི་ཡོ་བྱད་ཚོགས། །མཆོད་པའི་རྫས་སུ་གྱུར་པ་ཇི་སྲིད་དང་། །ཡུལ་ཕྱོགས་རྒྱལ་ཁམས་ཕྱི་ནང་སྣོད་བཅུད་ཀྱི། །དཔལ་དང་དབང་ཐང་དགུ་ནས་དགུ་འཕེལ་རྫས། །མིག་ལྡན་མཆོག་གྱུར་གཟི་ཁྲ་མིག་དགུ་དང་། །སྟོང་ནས་སྟོང་དུ་གོང་འཕེལ་རིན་ཆེན་སྟོང་། །དུང་དཀར་གཡས་འཁྱིལ་དུང་ནས་དུང་འཕེལ་རྫས། །སྣང་སྲིད་རབ་འབྱམས་འདོད་དགུ་ལྷུན་གྲུབ་པའི། །རིན་ཆེན་བུམ་གཏེར་གསས་མཁར་རྒྱ་ཆེན་པོ། །ཀུན་བཟང་མཆོད་པའི་སྤྲིན་ལས་འཕགས་པ་འདི། །མཆོད་དོ་འབུལ་ལོ་ཀླུ་རྒྱལ་འཁོར་བཅས་མཆོད། །ས་བརྐོས༴ སོགས། དེ་ནས་ཏིང་འཛིན་གསལ་ཞིང་བརྩེ་བའི་ཤུགས་བསྐྱེད་དེ། ཧོ་དགོངས་སུ་གསོལ། །གསུམ་འོ་གསན་དུ་གསོལ། སྲིད་པ་ལས་ཀྱི་འཇིག་རྟེན་ཆེན་པོ་འདིར། ལས་ཀྱི་རྫུ་འཕྲུལ་སྟོབས་ལས་ཤར་པའི་ཀླུའི་རྒྱལ་པོ་དགའ་བོ་དང་། ཀླུ་བརྒྱད་ཡུམ་སྲས་འབྱུང་བ་ཆེན་པོ་ལྔའི་ཁམས་ཀྱི་ཀླུ་རིགས་ལྔ་གྲངས་མེད་བརྗོད་འདས་འཛམ་གླིང་སྤྱིའི་ཀླུ་དང་། །ཁྱད་པར་ཡུལ་ཕྱོགས་འདིར་གནས་ཀྱི་ཀླུ་ཆེ་གེ་ཡབ་ཡུམ་སྲས་འཁོར་འབངས་དང་བཅས་པ་ཁྱེད་རྣམས་ལ་རིན་ཆེན་འདོད་འབྱུང་གི་བུམ་གཏེར་སྐུ་བརྟན་གསས་མཁར་ཀླུ་འཕེལ་འདོད་ཡོན་ལྔའི་རྒྱན་དང་ལྡན་པ་ཆེན་པོ་འདི། སྔགས་དང་ཕྱག་རྒྱ་ཏིང་ངེ་འཛིན་གྱིས་བྱིན་གྱིས་རླབས་ཏེ་ཀུན་བཟང་མཆོད་པའི་སྤྲིན་ལས་རྒྱ་ཆེ་བ་འདི་ཉིད་ཁྱེད་རྣམས་འཁོར་དང་བཅས་པ་མཉེས་པའི་མཆོད་པར་འབུལ་ལོ། །དགྱེས་པའི་རྫས་སུ་འབུལ་ལོ། །དགོས་པའི་ཡོ་བྱད་དུ་འབུལ་ལོ། །མཁོ་བའི་དཔལ་འབྱོར་དུ༴ ན་བའི་གསོས་སྨན་དུ༴ བསགས་པའི་བང་མཛོད་དུ༴ སྙིང་ཟོག་ནང་ནོར་དུ༴ བརྟན་པའི་སྐུ་མཁར་དུ༴ བཞུགས་པའི་ཕོ་བྲང་དུ༴ འགྲམས་ཤོར་པའི་ཉེས་བཤགས༴ འཁྲུགས་ཤོར་བའི་འགྱོད་བཤགས་སུ༴ ཐབ་ཤོར་པའི་འཁོན་སྦྱང་དུ༴ གཞོབ་ཤོར་བའི་གྲིབ་སེལ་དུ༴ འཁོན་ཤོར་བའི་བཤགས་སྦྱང་དུ༴ ས་གཉན་བརྐོས་པའི་ངོ་ཚབ་ཏུ༴ ཤིང་གཉན་བཅད་པའི་སྟོང་སྐལ་དུ༴ རྡོ་གཉན་བསློག་པའི་ཡུས་བཤགས་སུ༴ ཆུ་གཉན་དཀྲུགས་པའི་བཟོད་གསོལ་དུ༴ དུར་ས་ཉེས་པའི་ཕུང་སེལ་དུ༴ ཁང་ས་ཉེས་པའི་གནོད་སེལ་དུ༴ ཞིང་ས་ཉེས་པའི་སྐྱོན་སེལ་དུ༴ ཁང་གསར་བཟོས་པའི་ས་བཅུད་དུ༴ ཟས་ནོར་བསོག་པའི་གཡང་རྟེན་དུ༴ བང་མཛོད་སྤེལ་བའི་དཔལ་རྟེན་དུ༴ སྔར་བྱས་ལས་ཀྱི་གཏང་རག་ཏུ༴ ཕྱིས་བྱེད་ལས་ཀྱི་ཞུ་རྟེན་དུ༴ ད་ལྟའི་ལས་ཀྱི་མཉེས་བྱེད་དུ་འབུལ་ལོ། །ཐང་ལོ་དང་སྨྱུག་ལོ་ཕུལ་བས་སྐྲ་དང་ཁ་སྤུ་ཉམས་པ་སོས་པར་གྱུར་ཅིག །ཟི་ར་དཀར་ནག་ཕུལ་བས་མིག་གི་ནད་སོས་པར་གྱུར་ཅིག །རྨ་བྱའི་མདོངས་ཕུལ་བས་མདོག་ཉམས་པ་སོས་པར་གྱུར་ཅིག །སྦྲུལ་གྱི་པགས་པ་ཕུལ་བས་པགས་པ་ཉམས་པ་སོས་པར་གྱུར་ཅིག །དབང་པོ་ལག་པ་ཕུལ་བས་ལག་པ་ཉམས་པ༴ ཆུ་སྲིན་སྡེར་མོ་ཕུལ་བས་སྡེར་མོ་ཉམས་པ༴ རྡོ་རྒྱུས་བྱ་བལ་མ་ཕུལ་བས་རྒྱུས་པ་ཉམས་པ་སོས༴ རས་སྐུད་དམར་པོ་དང་སྤུ་ཤེལ་རྩེས་ཆུ་རྒྱུས་ཉམས་པ༴ དུང་ཕོར་མདོག་བཟང་ཕུལ་བས་རྒྱུས་པ་ཉམས་པ༴ རྒྱ་མཚལ་ལྕོག་ལ་ཕུལ་བས་ཁྲག་ཉམས་པ་སོས༴ ཛཱ་ཏི་རྩི་ཤུ་སྤང་སྤོས་ཕུལ་བས་དབུགས་ཉམས་པ་སོས༴ རྒྱ་མཚོའི་སྦུ་བ་ཕུལ་བས་ཁ་ཆུ་ཉམས་པ༴ ཨུཏྤལ་སྔོན་པོ་ཕུལ་བས་ལྕེ་ཉམས་པ༴ གླ་གོར་ཞོ་ཤ་དང་ནཱ་ག་པུས་པས་ཤ་ཉམས་པ༴ སྙིང་ཞོ་ཤ་ཕུལ་བས་སྙིང་ཉམས་པ༴ ནཱ་ག་གེ་སར་དང་། ཏིལ་དཀར་ནག་དང་། ག་པུར་དང་། གུར་གུམ་དང་། ཙན་དན་དང་། ཀ་ར་བུ་རམ་རྣམས་ཕུལ་བས་ནང་རོལ་ཉམས་པ་སོས་པར་གྱུར་ཅིག །རྩི་ཤིང་ལྗོན་པ་སྣ་ཚོགས། ཆུ་སྐྱེས་མེ་ཏོག་སྣ་ཚོགས། སྤོས་དང་དྲི་བཟང་སྣ་ཚོགས། འབྲུ་དང་དར་ཟབ་སྣ་ཚོགས། ཆུ་གནས་གཟུགས་བརྙན་སྣ་ཚོགས། བཤོས་གཙང་སྤྱན་གཟིགས་སྣ་ཚོགས། དཀར་གསུམ་མངར་གསུམ་མཆོད་ཡོན་རྒྱ་མཚོ་རྣམས་ཕུལ་བས་ཀླུ་རྒྱལ་འཁོར་བཅས་ལོངས་སྤྱོད་སྣ་ཚོགས་དང་ལྡན་པར་གྱུར་ཅིག །ཁ་དོག་ཕུན་སུམ་ཚོགས་པ་དང་ལྡན་པར་གྱུར་ཅིག །གཟི་བརྗིད་ཕུན་སུམ་ཚོགས་པ་དང་ལྡན༴ གྲགས་པ་ཕུན༴ སྟོབས་ཕུན་སུམ༴ ལོང་བ་རྣམས་མིག་དང་ལྡན་པར༴ འོན་པ་རྣམས་སྒྲ་ཐོས་པར༴ ལྟོགས་པ་རྣམས་ཟས་དང་ལྡན་པར༴ དབུལ་པ་རྣམས་ནོར་དང་༴ བྱིས་པ་རྣམས་ཡུལ་དང་ལྡན༴ ནམ་མཁའ་ལྡིང་གི་འཇིགས་པ་དང་། བྱ་ཁྱུང་གི་འཇིགས་པ་དང་། མེའི་འཇིགས་པ་དང་། ཆུ་ཡི་འཇིགས་པ་དང་། དགྲའི་འཇིགས་པ་དང་། ཆོམ་རྐུན་གྱི་འཇིགས་པ་དང་། བྱེ་ཚན་གྱི་འཇིགས་པ་དང་། འཇིགས་པ་དེ་དག་ལས་ཐར་བར་གྱུར་ཅིག །གྲོལ་བར་གྱུར་ཅིག །བྲལ་བར་གྱུར་ཅིག །ཀླུ་རྒྱལ་འཁོར་བཅས་དེ་ལྟར་མཆོད་ཅིང་བསྟོད་པས་དགྱེས་པར་མཛད་དུ་གསོལ། མཉེས་པར་མཛད་དུ་གསོལ། ཚིམ་པར་མཛད་དུ་གསོལ། ཧོ་དེ་ལྟར་གྱིས་དགྱེས་མཆོད་ཆེན་པོ་ཕུལ་བའི་མཐུས་སངས་རྒྱས་ཀྱི་བསྟན་པ་རིན་པོ་ཆེ་ཕྱོགས་དུས་གནས་སྐབས་ཐམས་ཅད་དུ་དར་ཞིང་རྒྱས་པར་མཛད་དུ་གསོལ། བསྟན་འཛིན་གྱི་སྐྱེས་བུ་རྣམས་ཀྱི་སྐུ་ཚེ་དང་མཛད་འཕྲིན་ཐམས་ཅད་རྒྱས་པར་མཛད་དུ་གསོལ། བསྟན་པའི་སྦྱིན་བདག་རྣམས་ཀྱི་མངའ་ཐང་དང་ཆབ་སྲིད་ཐམས་ཅད་འཕེལ་བར༴ སེམས་ཅན་ཐམས་ཅད་བདེ་ཞིང་སྐྱིད་པར༴ ནད་མུག་མཚོན་གསུམ་གྱི་བསྐལ་པ་ཐམས་ཅད་ཞི་བར༴ མེད་པར༴ ཟློག་པར༴ ཁྱད་པར་རྒྱུ་སྦྱོར་སྦྱིན་པའི་བདག་པོ་འམ་ཡུལ་ཕྱོགས་རྒྱལ་ཁམས་ཆེ་གེ་འདི་ཞེས་བྱ་བར་ཚེ་བསོད་དཔལ་འབྱོར་ཁ་རྗེ་དབང་ཐང་ཐོས་བསམ་སྒོམ་གསུམ་ཉམས་རྟོགས་ཀྱི་ཡོན་ཏན་ཐམས་ཅད་གོང་དུ་འཕེལ་ཞིང་རྒྱས་པར༴ མི་ནད་ཕྱུགས་ནད་ནད་ཡམས་གོད་ཀ་བཙའ་སད་སེར་གསུམ་ཐམས་ཅད་རབ་ཏུ་ཞི་བར་མཛད༴ ཆར་ཆུ་དུས་སུ་འབབས་པ་ལོ་ཕྱུགས་རྟག་ཏུ་ལེགས་པར་འབྱུང་བའི་ཁམས་ཀྱི་དཔལ་དང་དབང་ཐང་ཚེ་བསོད་དཔལ་འབྱོར་ལེགས་ཚོགས་ཐམས་ཅད་བཀྲ་ཤིས་དགུ་འཕེལ་གྱི་རྫས་མཆོག་ཕུལ་བའི་རྟེན་འབྲེལ་གྱིས་དགུ་གཅིག་དགུ་འཕེལ་ཁྲི་འབུམ་དུ་འཕེལ་བར༴ བཀྲ་ཤིས་སྟོང་འཕེལ་གྱི་རྫས་མཆོག་ཕུལ་བའི་རྟེན་འབྲེལ་གྱིས་སྟོང་གཅིག་སྟོང་ནས་སྟོང་ཕྲག་གྲངས་མེད་དུ་འཕེལ་བར༴ རིན་ཆེན་དུང་འཕེལ་གྱི་རྫས་མཆོག་ཕུལ་བའི་རྟེན་འབྲེལ་གྱིས་དུང་ནས་དུང་འཕེལ་དུང་ཕྱུར་གྲངས་མེད་དུ་འཕེལ་བར་མཛད་དུ་གསོལ། ཤིས་བརྗོད་མེ་ཏོག་འཐོར་ཞིང་ཀླུ་རྒྱལ་འཁོར་བཅས་བརྟན་པར་བཞུགས་པར་གསོལ་ཞིང་ལོ་དུས་ལྟར་ཀླུ་ཐེབས་བཟང་དུས་མཆོད་འབུལ་རྒྱས་པར་བྱའོ། ཀླུ་འབུམ་འདོན། སྤང་སྐོང་སྒྲོག །ཀླུ་གཏོར་གཏོང་། ཀླུ་བསངས་བོན་ལྟར་དང་། བརྔན་འགྱོགས། མངྒ་ལཾ།། །།

ཁ་སྐོང་སྦྱིན་སྲེག

ནོར་བདག་ཡིད་བཞིན་ནོར་བུའི་ཁ་སྐོང་སྦྱིན་སྲེག་བཞུགས། དངོས་གྲུབ་འབྱུང་བའི་མངའ་བདག་ནོར་བདག་ཡིད་བཞིན་ནོར་བུ་ལ་ཕྱག་འཚལ་ལོ། །ནོར་བདག་ཡིད་བཞིན་ནོར་བུ་ལ་བརྟེན་ནས་དབང་གི་སྦྱིན་སྲེག་གི་ཆོ་ག་བྱ་བར་འདོད་པས། དེ་ལ་གསུམ། སྔོན་འགྲོ་དངོས་གཞི་རྗེས་སོ། དང་པོ་ལ། འབྲིང་པོ་བཞིའི་ཉི་ཤུ་ལ་སོགས་པ་དབང་གི་དུས་ཁྱད་པར་ཅན་ལ། གནས་དབེན་ཞིང་ཡིད་དུ་འོང་བའམ། དབང་གི་ལས་དང་རྗེས་སུ་མཐུན་པའི་གནས་ཉིད་དུ་སྒྲུབ་པའི་ཁོག་འབུབ་ཞིག་ནས་འབྱུང་བ་ལྟར་ས་ཆོག་ལེགས་པར་བྱས་པའི་ས་ལ་སྟེགས་བུ་རྒྱར་མདའ་གང་ལ། དཔངས་སུ་ཁྲུ་གང་བར་བྱས་པའི་དབུས་སུ་དབང་གི་ཐབ་ཁུང་དམར་པོ་ཟླ་གམ་རྒྱར་ཁྲུ་གང་དང་དཔངས་སུ་མཐོ་གང་པ་རྐན་གཉེར་རིམ་པ་གསུམ་དང་ལྡན་པའི་ཁ་ཁྱེར་ལ་པདྨའམ་ལྕགས་ཀྱུའི་ཕྲེང་བས་བསྐོར་བ་བརྩེགས། དེའི་ནང་དུ་ལྟེ་བ་ཟླུམ་པོའི་ཕྱི་རིམ་ལ་པདྨའི་འདབ་མ་བཞི་རིམ་མུ་ཁྱུད་ཅན་ལ། ལྷ་རྣམས་ཀྱི་ས་བོན་ནམ་ཕྱག་མཚན་ལྷ་གནས་སུ་ཚོམ་བུ་ལྷ་མདོག་ཅན་འགོད་པ་གང་བདེར་བྱས་ལ། ཐབ་ཁུང་གི་ནང་དུ་ཙན་དན་ནམ་མཛོ་མོ་ཤིང་ངམ། ཨ་ཀ་རུ་སོགས་དབང་ལ་ཤིས་པའི་བུད་ཤིང་རྒྱ་ཚོས་སམ་དྲི་བཟང་བཏབ་པས་མདོག་སྒྱུར་བ་ཟླ་གམ་དུ་བརྩིག །གཡས་ལོགས་སུ་གོང་དུ་བཤད་པའི་ཤིང་ཟླ་གམ་གྱི་དབྱིབས་སུ་གཞོགས་ལ་རིང་ཐུང་སོར་བཅུ་གཉིས། སྦོམ་ཕྲ་སྲིན་ལག་གམ་གུང་མོ་ཙམ་བྱས་པ་ལ་བསྒྲུབ་བྱ་དམིགས་བསལ་ཡོད་ན་མིང་རུས་དང་། མེད་ན་སྣང་སྲིད་ཐམས་ཅད་དབང་དུ་སྡུས་ཤིག་ཝ་ཤཾ་ཀུ་རུ་ཡེ་སྭཱ་ཧཱ། ཞེས་རྒྱ་སྐྱེགས་ཀྱི་ཁུ་བས་བྲིས་པ་གྲངས་ལྡན་ལ་བུ་རམ་དང་ཏིལ་མར་གྱིས་བྱུགས་པ། མར་ཁུ། ཏིལ། ཡུངས་ཀར། ཟས་སྣ། དུརྦ། འབྲས། སོ་བ། ནས། སྲན་མ། གྲོ། ཀུ་ཤ། ཕྲུམ། འབྲུ་སྣ། ཤིང་ཏོག །དར་སྣ། ཟངས། བྱེ་རུ། བུར་སྦྲང་། ཧ་ལོ། ཨུག་ཆོསགླང་སྣ་དམར་པོ། བཙོད། རྒྱ་སྐྱེགས། དར་ཟབ་དམར་པོའི་རིགས་སོགས་དབང་ལ་འོས་པའི་རྫས་གང་ཚོགས། མར་ལ་གོ་ཡུ་བཏབ་པའི་སོ་རྩི། གོས་ཟུང་རྣམས་དང་། གཡོན་དུ་ཉེར་སྤྱོད་སྨན་རག་གཏོར་མ་རྣམས་ཀྱང་དམར་པོའི་ཚོན་གྱིས་བསྒྱུར་བར་འོས་པ་རྣམས་ལ་བསྒྱུར་བ་དང་། མདུན་དུ་རྡོར་དྲིལ་དགང་གཟར་བླུགས། ཀུ་ཤ་ལས་བུམ་སོགས་ཉེ་བར་མཁོ་བ་ཐམས་ཅད་དང་། གཞན་ཡང་གཞུང་མཐུན་ལྟར་གྱི་མཆོད་གཏོར་ཚོགས་མཆོད་སོགས་ཀྱང་བཟང་ཞིང་གྱ་ནོམ་པ། སྣང་བ་གཡོ་བར་ནུས་པའི་རྔམ་བརྗིད་དང་ལྡན་པའི་ས་རྒྱན་གནམ་རྒྱན་སོགས་བཀོད་པའི་རྟེན་འབྲེལ་རབ་ཏུ་ཕུན་སུམ་ཚོགས་པར་བཤམས་ལ། ལས་གཞུང་བསྲང་ཞིང་བསྙེན་པའི་སྐབས་སུ་ཝ་ཤང་ཀུ་རུའི་ཤམ་བུ་ཅན་གྱི་བཟླས་པ་དབང་བསྡུད་ཀྱི་དམིགས་པ་དང་ལྡན་པའི་སྒོ་ནས་ལོང་སྐབས་དང་བསྟུན་ཏེ་བཟླ། ཚོགས་ལྷག་ཡན་སོང་ནས་ལས་བུམ་བསང་། སྟོང་པའི་ངང་ལས་བུམ་པ་ནི། །རིན་པོ་ཆེ་ཡི་གཞལ་ཡས་ཁང་། །མཚན་ཉིད་རྫོགས་པའི་ནང་ཉིད་དུ། །དབང་གི་ཁྲོ་བོ་རྟ་མཆོག་དཔལ། །དམར་པོ་རྡོར་དྲིལ་ཡུམ་ལ་འཁྱུད། །རྟ་མགོས་མཚན་ཞིང་ཁྲོ་ཆས་རྫོགས། །སྐུ་ལས་སྤྲུལ་བའི་ཁྲོ་ཆུང་གིས། །གདོན་བགེགས་བཅོམ་ནས་བུམ་པའི་ཆུར། །ཐིམ་པས་བུམ་ཆུ་ནུས་ལྡན་གྱུར། །ཨཱོཾ་བཛྲ་ཀྲོ་ངྷ་ཧྱ་གྷྲཱི་ཝ་ཧཱུྃ་ཕཊ༔ གང་མང་བཟླས་རྗེས། ཁྲོ་བོ་ཞུ་ནས་བུམ་ཆུར་འདྲེས། །ལས་ཀུན་བསྒྲུབ་པའི་བདུད་རྩིར་གྱུར། །དེ་ནས་སྒྲུབ་པ་པོ་དམར་པོའི་ཆས་གོས་དང་རྒྱན་གྱིས་བརྒྱན་ཏེ་བརྗིད་ཅིང་སྒེག་པའི་ཆ་ལུགས་དང་ལྡན་པས་མེ་ཐབ་བསྐྱོར་ཏེ་རོལ་མོ་རྣམས་སྦིར་ཞིང་། རང་ཉིད་རྡོ་རྗེ་གཏུམ་པོར་གསལ་བའི་སྐུ་ལས་སྤྲོས་པའི་མེ་དཔུང་མཚོན་ཆའི་ཚོགས་ཀྱིས་གདོན་བགེགས་འབྱུང་པོ་ཐམས་ཅད་ཐལ་བར་བརླགས་ཤིང་། སྟེང་འོག་ཕྱོགས་མཚམས་ཐམས་ཅད་ཁྲོ་ཆུང་མཚོན་ཆ་ཐོགས་པ་དང་དམར་ནག་མེ་དཔུང་འཁྱིལ་བའི་བསྲུང་བའི་འཁོར་ལོར་གྱུར་པར་བསམས་ལ། ཧཱུྃ། ནོར་ལྷ་རྒྱ་མཚོའི་ཕོ་བྲང་འདིར། འབྱུང་བ་མེ་ཡི་མཆོད་སྤྲིན་གྱིས། །གསང་བ་མཆོག་ཏུ་བསྒྲུབ་པ་ལ། ཉན་དང་བལྟ་བར་མི་དབང་པའི། གདོན་བགེགས་འབྱུང་པོ་གཞན་དུ་སོང་། །བཀའ་དང་དམ་ལས་འདའ་བྱེད་ན། །གནོད་སྦྱིན་སྡེ་དཔོན་ཐུགས་ཁྲོས་ནས། གཏུམ་པའི་ཁྲོ་བོས་བགེགས་དཔུང་འཇོམས། །འབར་བའི་མེ་ཡིས་གཟུགས་ཕུང་བསྲེག །རྣོ་དབལ་མཚོན་ཆས་དུམ་བུར་གཏོང་། ཡེ་ཤེས་རྡོ་རྗེས་མགོ་བོ་འགེམས། དེ་བས་མ་འདུག་གཞན་དུ་སོང་། །ཨཱོཾ་སུམྦྷཱ་ནི་སོགས་བརྗོད། ཧཱུྃ། སྟེང་ནས་མེ་ཡི་བླ་རེ་ལ། འོག་ཀྱང་འབར་བའི་ཕྲེང་བས་དཀྲིགས། ཕྱོགས་མཚམས་ཀུན་ཀྱང་མེ་རིའི་གུར། བར་སྣང་མེ་ཡི་སྤྲིན་ཕུང་གཏིབས། གཞན་དུ་མེ་ཡི་ཚྭ་ཚྭ་འཕྲོ། མེ་སྒྲ་འུར་འུར་ཆེམས་ཆེམས་ལྡིར། འབར་བ་མེ་ཡི་གུར་ཁང་ལ། སྲིད་ཞི་སུས་ཀྱང་མི་ཚུགས་པའི། མཚམས་ཀྱི་དཀྱིལ་འཁོར་གཞོམ་དུ་མེད། ཨཱོཾ་བཛྲ་རཀྵ་ཛྭ་ལ་རཾ་རཾ། ཞེས་བསྒོ་ཞིང་གྲལ་དུ་འཁོད་ལ། ལས་བུམ་གྱི་ཆུས་རྫས་རྣམས་ལ་འཐོར་ཞིང་། ཨཱོཾ་བཛྲ་ཀྲོ་ཏ་ཧྱ་གྷྲཱི་ཝ་ཧཱུྃ་ཕཊ་ཀྱིས་བསངས། སྭ་བྷཱ་ཝས་སྦྱངས། སྟོང་པའི་ངང་ལས་པཾ་ལས་པདྨ་འབར་བའི་སྣོད་ཡངས་ཤིང་རྒྱ་ཆེ་བའི་ནང་དུ་མཆོད་རྫས་དང་སྲེག་རྫས་ཀྱིས་དངོས་པོ་རྣམས་ཟག་མེད་ཀྱི་བདུད་རྩི་ལ་རྣམ་པ་སོ་སོའི་མཚན་ཉིད་མ་འདྲེས་པར་གསལ་བར་རྫོགས་པ། ཆགས་ལྡན་སྙིང་རྩ་འདར་ཞིང་རྒྱལ་བའི་བསམ་གཏན་གཡོ་བར་ནུས་པའི་རྒྱལ་སྲིད་རིན་ཆེན་བཀྲ་ཤིས་རྫས་རྟགས་འདོད་ཡོན་ཉེར་སྤྱོད་སོགས་མཆོད་པའི་སྤྲིན་གྱི་ཕུང་པོ་མ་ཚང་བའི་དངོས་པོ་མེད་པས་ནམ་མཁའ་ས་གཞི་བར་སྣང་ཐམས་ཅད་ཁེངས་པར་གྱུར་པར་བསམས་ལ། ཨཱོཾ་ཨཱཿཧཱུྃ་སརྦ་པཱུ་ཙ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཧཱུྃ་ཧྲཱིཿཐཱ༔ གསུམ་མམ་བདུན་གྱི་བྱིན་གྱིས་བརླབ། དེ་ནས་རྗེའུ་རིགས་སམ་སྨད་འཚོང་མ་ལས་བླངས་པའི་མེ་སྦར་ལ་རླུང་གཡབ་ཀྱིས་གཡབ་ཅིང་། རཾ། སྤྱི་མཐུན་ལས་ཀྱི་བསོད་ནམས་དང་། །རྒྱལ་བའི་ཐུགས་བསྐྱེད་ལས་གྲུབ་པའི། །ལྗོན་ཤིང་ནགས་ཚལ་བསྲུང་བ་ཡི། །ཤིང་གི་ལྷ་མོས་ཤིང་ཐུས་ལ། །སྐྱེ་དགུ་ཀུན་གྱི་སྲོག་འཛིན་ཅིང་། །སྣང་བ་རབ་ཏུ་གསལ་བའི་སྒྲོན། །མེ་ཡི་ལྷ་མོ་སྲེག་བྱེད་མས། །མེ་ལྷའི་ཡུལ་ནས་མེ་སྤོར་ཞིག །འོག་གཞི་རྡོ་རྗེ་རྒྱ་གྲམ་གྱིས། །ཡང་ཞིང་གཡོ་བའི་བ་དན་འཛིན། །འབྱུང་བ་རླུང་ལ་མངའ་མཛད་མས། །རླུང་ལྷའི་ཡུལ་ནས་རླུང་གཡོབས་ཤིག །ཨཱོཾ་ཨགྣཱེ་ཡེ་སྭཱ་ཧཱ༔ ཞེས་པའི་སྔགས་བདུན་དང་མར་ཁུ་དགང་བླུགས་བདུན་གྱིས་གསོ། དེ་ནས་ཐབ་ཀྱི་ཁ་ཁྱེར་ལ་ཀུ་ཤ་དགྲམ་ཞིང་། ཧཱུྃ། གཙང་ཞིང་དགེ་བ་ཀུ་ཤའི་རྩྭ། །རྒྱལ་བས་བྱང་ཆུབ་བརྙེས་པའི་གདན། །དག་ཅིང་ཚངས་པའི་རྫས་མཆོག་འདིས། །བགེགས་རྣམས་གཞིལ་ཞིང་ཤིས་པར་མཛོད། །ཨཱོཾ་བཛྲ་སཏྭ་ཨཱ༔ ཞེས་བཀྲམ་མོ། དེ་ནས་དངོས་གཞི་ལ་གཉིས་ཀྱི་འཇིག་རྟེན་པའི་མེ་ལྷ་མཆོད་པ་ནི་ལས་བུམ་གྱི་ཆུས་མེ་ཐབ་ལ་འཐོར་ཞིང་བསང་སྦྱང་། མེ་ཐབ་མི་དམིགས་པ་སྟོང་པ་ཉིད་དུ་གྱུར། སྟོང་པའི་ངང་ལས་འབར་བའི་ཐབ་ཁུང་ཟླ་གམ་དམར་པོ་ཡངས་ཤིང་རྒྱ་ཆེ་བ་རྐན་གཉེར་རིམ་པ་གསུམ་དང་ལྡན་ཞིང་ཁ་ཁྱེར་ལ་ལྕགས་ཀྱུ་དམར་པོའི་ཕྲེང་བས་བསྐོར་བ་ཟླ་གམ་དབང་གི་གཞལ་ཡས་ཁང་གི་བཀོད་པ་ཐམས་ཅད་རྫོགས་པ། དེ་དག་གི་དབུས་སུ་པད་ཉིའི་གདན་ལ་རཾ་ཡིག་དམར་པོ་ཡོངས་སུ་གྱུར་པ་ལས། མེ་ལྷ་དམར་པོ་ཞལ་གཅིག་ཕྱག་གཉིས་པ་ཕྱག་གཡས་མེ་ཡི་འཁོར་ལོ་དང་གཡོན་པས་རླུང་གི་འཁོར་ལོ་བསྣམས་པ། ར་སྐྱེས་ཁམ་པ་འཇའ་འོད་གློག་གི་ཕྲེང་བའི་གོང་རྨེད་དང་སྲབ་མཐུར་ཅན་ལ་བཅིབས་པ། རིན་པོ་ཆེ་སྣ་ཚོགས་པ་དང་པདྨའི་ཕྲེང་བས་བརྒྱན་ཞིང་ཞི་འཛུམ་སྒེག་པའི་ཉམས་དང་ལྡན་པ་དེ་ཡི་སྤྱི་བོར་ཨཱོཾ་མགྲིན་པར་ཨཱཿཐུགས་ཀར་ཧཱུྃ་གི་ཁོང་སེང་དུ་ཐུགས་སྲོག་རཾ་གྱིས་མཚན་པ། དེ་ལས་འོད་ཟེར་འཕྲོས་པས་བསྒོམས་པ་དང་འདྲ་བའི་ཡེ་ཤེས་པ་སྤྱན་དྲངས། སྤྱན་འདྲེན་ནི། ཧཱུྃ། དད་པས་སྤྱན་འདྲེན་དྲང་སྲོང་ཆེ། །དམ་ཚིག་དབང་གིས་ད་ཚུར་སྤྱོན། ཁམས་གསུམ་སྲིད་གསུམ་དབང་སྡུད་ཕྱིར། །དྲང་སྲོང་ཆེན་པོ་གཤེགས་སུ་གསོལ། །ཨཱོཾ་ཨགྣཱེ་ཡེ་ཛཿཧཱུྃ་བཾ་ཧོ༔ བཛྲ་ས་མ་ཡ་ཛཿཛཿ བཞུགས་གསོལ་ནི། ཧཱུྃ། དྲང་སྲོང་ཆེན་པོ་འཕྲིན་ལས་བདག །འདོད་པའི་དངོས་གྲུབ་སྤེལ་བའི་ལྷ། །དེང་གི་གནས་མཆོག་དམ་པ་འདིར། འབར་བའི་གདན་ལ་བཞུགས་སུ་གསོལ། ཨཱོཾ་ཨགྣཱེ་ཡེ་བཛྲ་ས་མ་ཡ་ཏིཥྛ་ལྷན། ཕྱག་འཚལ་བ་ནི། ཧཱུྃ། མེ་ཡི་ལྷ་སྟེ་དྲང་སྲོང་ཆེ། །ལས་བཞིའི་འཕྲིན་ལས་སྩོལ་བའི་ལྷ། །མཐུ་སྟོབས་རྫུ་འཕྲུལ་བསམ་མི་ཁྱབ། །འབར་བ་ཁྱོད་ལ་ཕྱག་འཚལ་ལོ། །ཨཱོཾ་ཨགྣཱེ་ཡེ་ས་མ་ཡ་ཨ་ཏི་པུ་ཧོ། མཆོད་པ་ནི། ཧཱུྃ། སྟོང་གསུམ་འཇིག་རྟེན་རབ་འབྱམས་ན། །ཕྱི་ནང་གསང་བའི་མཆོད་པའི་ཚོགས། །དངོས་བཤམས་ཡིད་ཀྱིས་རྣམ་སྤྲུལ་ཏེ། །སྲེག་བྱེད་མེ་ཡི་ལྷ་ལ་འབུལ། །ཨཱོཾ་ཨགྣཱེ་ཡེ་སརྦ་པཱུ་ཙ་ཧོ། ཧཱུྃ། དྲང་སྲོང་ཆེན་པོ་འཁོར་བཅས་ལ། །དངོས་གྲུབ་མྱུར་དུ་སྩོལ་བའི་ཕྱིར། །སྨན་གཏོར་རཀྟའི་མཆོད་པ་འབུལ། །བཞེས་ནས་དངོས་གྲུབ་སྩལ་དུ་གསོལ། །ཨཱོཾ་ཨགྣཱེ་ཡེ་མ་ཧཱ་པཉྩ་རཀྟ་བ་ལིངྟ་པཱུ་ཙ་ཁཱ་ཧི། བསྟོད་པ་ནི། ཧཱུྃ། གཟི་བརྗིད་འབར་བ་མེ་ཡི་ལྷ། །ཚངས་པ་འཇིག་རྟེན་དབང་པོའི་སྲས། །འཕྲིན་ལས་མ་ལུས་ཀུན་གྱི་བདག །འབར་བ་ཁྱོད་ལ་ཕྱག་འཚལ་བསྟོད། །བྱོན་སྐྱེམས་ནི། མེ་ལྷའི་ལྗགས་པདྨ་འདབ་མ་བརྒྱད་པའི་ལྟེ་བར་རཾ་དང་དགང་བླུགས་ཀྱི་རྩེར་བྷཻ་ཡིག་གིས་མཚན་པར་གྱུར་པར་བསམས་ཤིང་། ཧཱུྃ། འབྲུ་མར་རྩི་མར་བཅུད་ལྡན་སྲེག་པའི་རྫས། །དམ་རྫས་བདུད་རྩིའི་མཆོད་པ་བླ་མེད་འདི། །དྲང་སྲོང་ཆེན་པོ་མེ་ཡི་ལྷ་ལ་འབུལ། །བདག་གི་འདོད་དོན་འཕྲིན་ལས་བསྒྲུབ་པར་མཛོད། །ཨཱོཾ་ཨགྣཱེ་ཡེ་སྭཱ་ཧཱ༔ ཨཱོཾ་ཨགྣཱེ་ཡེ་ཨ་དི་བྱ་ཨ་དི་བྱ་ཨ་བི་ཤ་ཨ་བི་ཤ་མ་ཧཱ་ཤྲཱི་ཧ་བྱ་ཀ་བྱ་བཱ་ཧ་ན་ཡེ་ཁམས་གསུམ་སྲིད་གསུམ་དབང་དུ་སྡུས་ཤིག་ཝ་ཤང་ཀུ་རུ་ཡེ་སྭཱ་ཧཱ༔ ཞེས་བདུན་འབུལ། ཡམ་ཤིང་ལ། ཨཱོཾ་བྷོ་ངྷི་བྲིཀྵ་ཡེ་སྭཱ་ཧཱ༔ ཁམས་གསུམ་སྲིད་གསུམ་དབང་དུ་སྡུས་ཤིག་ཝ་ཤང་ཀུ་རུ་ཡེ་སྭཱ་ཧཱ༔ མར་ཁུ་ལ། ཨཱོཾ་ཨགྣཱེ་ཡེ་སྭཱ་ཧཱ༔ ཁམས་གསུམ༴ ཏིལ་ལ། ཨཱོཾ་སརྦ་པཱ་པཾ་ད་ཧ་ན་བཛྲཱ་ཡ་སྭཱ་ཧཱ། ཁམས་གསུམ༴ ཡུངས་ཀར་ལ། ཨཱོཾ་སརྦ་ཨརྠ་ས་ངྷ་ཡ་སྭཱ་ཧཱ༔ ཁམས་གསུམ༴ ཟས་སྣ་ལ། ཨཱོཾ་སརྦ་སཾ་བྷ་དེ་སྭཱ་ཧཱ༔ ཁམས་གསུམ༴ དུརྦཱ་ལ། ཨཱོཾ་བཛྲ་ཨཱ་ཡུ་ཥེ་སྭཱ་ཧཱ༔ ཁམས་གསུམ༴ འབྲས་ལ། ཨཱོཾ་བཛྲ་པུཥྟཱ་ཡ་སྭཱ་ཧཱ༔ ཁམས་གསུམ༴ སོ་བ་ལ། ཨཱོཾ་བཛྲ་བི་ཛཱ་ཡེ་སྭཱ་ཧཱ༔ ཁམས་གསུམ༴ ནས་ལ། ཨཱོཾ་མ་ཧཱ་བེ་གྷ་ཡ་སྭཱ་ཧཱ༔ ཁམས་གསུམ༴ སྲན་མ་ལ། ཨཱོཾ་བཛྲ་མ་ཧཱ་བ་ལཱ་ཡ་སྭཱ་ཧཱ༔ ཁམས་གསུམ༴ གྲོ་ལ། ཨཱོཾ་བཛྲ་གྷསྨ་རེ་སྭཱ་ཧཱ༔ ཁམས་གསུམ༴ ཀུ་ཤ་ལ། ཨཱོཾ་ཨ་པྲ་ཏི་ཧ་ཏ་བཛྲ་ཡ་སྭཱ་ཧཱ༔ ཁམས་གསུམ༴ ཕྲུམ་ལ། ཨཱོཾ་ཨཱ་སྭཱ་ཧཱ༔ ཁམས་གསུམ༴ འབྲུ་སྣ་ལ། ཨཱོཾ་ཛྲཱིཾ་སྭཱ་ཧཱ༔ ཁམས་གསུམ༴ ཤིང་ཏོག་ལ། ཨཱོཾ་བཛྲ་ཤྲི་བ་ཡ་སྭཱ་ཧཱ༔ ཁམས་གསུམ༴ དར་སྣ་ལ། ཨཱོཾ་བཛྲ་ཝསྟྲ་ཡེ་སྭཱ་ཧཱ༔ ཁམས་གསུམ༴ སྲེག་རྫས་སྔགས་མེད་པའི་རིགས་ཐམས་ཅད། ཨཱོཾ་ཀུ་རུ་ཀུ་རུ་སྭཱ་ཧཱ༔ ཁམས་གསུམ༴ ཧཱུྃ། འབར་བ་མེ་ཡི་ལྷ་ཚོགས་ལ། །ཕྱི་ནང་གསང་བའི་སྨན་རག་དང་། །དམ་རྫས་གཏོར་མའི་མཆོད་པ་སོགས། །རབ་འབྱམས་མཆོད་སྤྲིན་རྒྱ་མཚོས་མཆོད། །ཨཱོཾ་ཨགྣཱེ་ཡེ་ས་པ་རི་ཝཱ་ར་སརྦ་པཱུ་ཙ་ཧོ༔ ས་མཆོད། ཧཱུྃ། འབར་བ་མེ་ཡི་ཀློང་དཀྱིལ་ན། །གཟི་བརྗིད་འབར་ཞིང་འཕྲིན་ལས་མཛད། །རྩལ་ལྡན་ར་སྐྱེས་སྟེང་ན་བརྗིད། །འབར་བའི་དཔའ་བོ་ཁྱོད་ལ་བསྟོད། །ཀྱིས་བསྟོད། ཧཱུྃ་ཨགྣཱེ་རཱ་ཛ་མེ་ཡི་ལྷས། །རྫས་རྣམས་ལྷག་པའི་ལྷར་འབུལ་ཞིང་། །མེ་ཡང་ཡེ་ཤེས་མེར་མཛད་ནས། །སྣང་བ་དབང་དུ་བསྡུ་བར་མཛོད། །ཅེས་འཕྲིན་ལས་བཅོལ། བཛྲ་མུ༔ ས་མེ་ལྷའི་ཡེ་ཤེས་པ་ཐབ་ཀྱི་ཤར་ལྷོར་གཤེགས་ནས་མཆོད་བསྟོད་འཕྲིན་ལས་ཀྱི་དཔང་པོ་མཛད་པར་གྱུར། ༈གཉིས་པ་ཡེ་ཤེས་པའི་མེ་ལྷ་མཆོད་པ་ནི། །དམ་ཚིག་མེ་ལྷའི་ལྟོ་བ་ཟབ་ཅིང་ཡངས། །རབ་འབྱམས་ཆོས་ཀྱི་དབྱིངས་དང་མཉམ་པའི་ནང་། ཕོ་བྲང་རིན་ཆེན་དབང་གི་གཞལ་ཡས་དབུས༔ རིན་ཆེན་ཟུར་བརྒྱད་པདྨ་ཉི་ཟླའི་སྟེང་༔ ཞེས་པ་ནས། མ་ལུས་འཁོར་དང་བཅས་ལ་ཕྱག་འཚལ་བསྟོད༔ མཆོག་དང་ཐུན་མོང་དངོས་གྲུབ་སྩལ་དུ་གསོལ༔ ཅེས་པའི་བར་ལས་བྱང་བཞིན་བྱས་རྗེས། དེ་ལྟར་མཆོད་ཅིང་བསྟོད་པས་ལྷ་ཚོགས་རྣམས་ཀྱང་བརྩེ་བའི་ཐུགས་རྗེ་ཆེན་པོས་འགྲོ་བ་ཡོངས་ལ་རྗེས་སུ་ཆགས་པའི་སྐུ་མདོག་པདྨ་རཱ་གའི་ལྷུན་པོ་ལྟར་དམར་ཞིང་འཚེར་བའི་སྐུའི་གཟི་བརྗིད་ཀྱིས་བརྟན་གཡོ་ཐམས་ཅད་དབང་མེད་དུ་དགུག་པར་ནུས་པའི་མཐུ་དང་ལྡན་པར་གྱུར། ལྷ་རྣམས་ཀྱི་ལྗགས་རྡོ་རྗེའི་རྣམས་པ་ཅན་ནམ་པདྨ་དམར་པོ་འདབ་མ་བརྒྱད་པའི་ལྟེ་བར་རཾ་དང་དགང་བླུགས་ཀྱི་ཁར་བྷཻ་ཡིག་དམར་པོ་འོད་དང་བཅས་པས་མཚན་པར་གྱུར་པར་བསམས་ལ། ཧཱུྃ། འབྲུ་མར་རྩི་མར་བཅུད་ལྡན་བསྲེགས་པའི་རྫས། །དམ་རྫས་བདུད་རྩིའི་མཆོད་པ་དམ་པ་འདི། །མེ་ལྷ་ནོར་བདག་རྒྱ་མཚོའི་ཚོགས་ལ་འབུལ། །བདག་གི་འདོད་དོན་འཕྲིན་ལས་བསྒྲུབ་པར་མཛོད། ཨཱོཾ་བྷཻ་ཤ་ར་མ་ན་ཡེ་ཡཀྵ་སརྦ་ས་མ་ཡ་ཙིཏྟ་ཧྲིཾ་ཧྲིཾ་ཛཿཛཿ ཨཱོཾ་ཨགྣཱེ་ཡེ་ཨ་དི་བྱ་ཨ་དི་བྱ་ཨ་བི་ཤ་ཨ་བི་ཤ་མ་ཧཱ་ཤྲཱི་ཧ་བྱ་ཀ་བྱ་བཱ་ཧ་ན་ཡེ་སྭཱ་ཧཱ༔ ཞེས་སམ། ཨཱོཾ་ཨགྣཱེ་ཡེ་སྭཱ་ཧཱ༔ ཞེས་པ་གཉིས་ཀའམ་གང་རུང་རྩ་སྔགས་དང་སྦྲེལ་བ་བདུན་གྱིས་འབུལ། དེ་ནས་ཡམ་ཤིང་ལ། ཨཱོཾ་བྷཻ་ཤ་ར་མ་ན་ཡེ་ཡཀྵ་སརྦ་ས་མ་ཡ་ཙིཏྟ་ཧྲིང་ཧྲིང་ཛཿཛཿ ཨཱོཾ་བོ་བྷི་བྲིཀྵ་ཡེ་སྭཱ་ཧཱ༔ ཁམས་གསུམ་སྲིད་གསུམ་དབང་དུ་སྡུས་ཤིག་ཝ་ཤང་ཀུ་རུ་ཡེ་སྭཱ་ཧཱ༔ མར་ཁུ་ལ། ཨཱོཾ་བྷཻ་ཤ་ར༴ ཨཱོཾ་སརྦ་པཱ་པཾ་ད་ཧ་ན་བཛྲ་ཡ་སྭཱ་ཧཱ༔ ཁམས་གསུམ༴ ཡུངས་ཀར་ལ། ཨཱོཾ་བྷཻ་ཤ་ར༴ ཨཱོཾ་སརྦ་ཨཪྠ་ས་དྷཱ་ཡ་སྭཱ་ཧཱ༔ ཁམས་གསུམ༴ ཟས་སྣ་ལ། ཨཱོཾ་བྷཻ་ཤ་ར༴ ཨཱོཾ་སརྦ་སཾ་བྷ་དེ་སྭཱ་ཧཱ༔ ཁམས་གསུམ༴ དཱུ་རྦ་ལ། ཨཱོཾ་བྷཻ་ཤ་ར༴ ཨཱོཾ་བཛྲ་ཨཱ་ཡུ་ཥེ་སྭཱ་ཧཱ༔ ཁམས་གསུམ༴ འབྲས་ལ། ཨཱོཾ་བྷཻ་ཤ་ར༴ ཨཱོཾ་བཛྲ་པུཥྟ་ཡེ་སྭཱ་ཧཱ༔ ཁམས་གསུམ༴ སོ་བ་ལ། ཨཱོཾ་བྷཻ་ཤ་ར༴ ཨཱོཾ་བཛྲ་བི་ཛ་ཡ་སྭཱ་ཧཱ༔ ཁམས་གསུམ༴ ནས་ལ། ཨཱོཾ་བྷཻ་ཤ་ར༴ ཨཱོཾ་མ་ཧཱ་བྷེ་གྷ་ཡ་སྭཱ་ཧཱ༔ ཁམས་གསུམ༴ སྲན་མ་ལ། ཨཱོཾ་བྷཻ་ཤ་ར༴ ཨཱོཾ་བཛྲ་མ་ཧཱ་བ་ལཱ་ཡ་སྭཱ་ཧཱ༔ ཁམས་གསུམ༴ གྲོ་ལ། ཨཱོཾ་བྷཻ་ཤ་ར༴ ཨཱོཾ་བཛྲ་གྷསྨ་རེ་སྭཱ་ཧཱ༔ ཁམས་གསུམ༴ ཀུ་ཤ་ལ། ཨཱོཾ་བྷཻ་ཤ་ར༴ ཨཱོཾ་ཨ་པྲ་ཏི་ཧ་ཏ་བཛྲ་ཡ་སྭཱ་ཧཱ༔ ཁམས་གསུམ༴ ཕྲུམ་ལ། ཨཱོཾ་བྷཻ་ཤ་ར༴ ཨཱོཾ་ཨཱཿསྭཱ་ཧཱ༔ ཁམས་གསུམ༴ འབྲུ་སྣ་ལ། ཨཱོཾ་བྷཻ་ཤ་ར༴ ཨཱོཾ་ཛྲཱིཾ་སྭཱ་ཧཱ༔ ཁམས་གསུམ༴ ཤིང་ཏོག་ལ། ཨཱོཾ་བྷཻ་ཤ་ར༴ ཨཱོཾ་བཛྲ་ཤྲཱི་བཱ་ཡ་སྭཱ་ཧཱ༔ ཁམས་གསུམ༴ དར་སྣ་ལ། ཨཱོཾ་བྷཻ་ཤ་ར༴ ཨཱོཾ་བཛྲ་ཝསྟྲ་ཡེ་སྭཱ་ཧཱ༔ ཁམས་གསུམ༴ སྲེག་རྫས་སྔགས་མེད་པའི་རིགས་ཐམས་ཅད་ལ། ཨཱོཾ་བྷཻ་ཤ་ར༴ ཨཱོཾ་ཀུ་རུ་ཀུ་རུ་སྭཱ་ཧཱ༔ ཁམས་གསུམ༴ སླར་ཡང་ཨཱོཾ་བྷཻ་ཤ་ར་མ་ན་ཡེ་ཡཀྵ་སརྦ་ས་མ་ཡ་ཙིཏྟ་ཧྲིང་ཧྲིང་ཛཿཛཿ ཨཱོཾ་ཨགྣཱེ་ཡེ་སྭཱ་ཧཱས་བྱོན་སྐྱེམས་ལྟར་གཤེགས་སྐྱེམས་ཀྱང་ཕུལ་ལ། ཧྲཱིཿ དབང་མཛད་དབང་གི་ལྷ་ཚོགས་ལ། །ཕྱི་ནང་གསང་བའི་མཆོད་པ་དང་། །སྨན་རག་གཏོར་སོགས་འཇིག་རྟེན་གྱི། །མཆོད་པའི་རྫས་ཀུན་ཡོངས་སུ་འབུལ། ཨཱོཾ་བྷཻ་ཤ་ར་མ་ན་ཡེ་ཡཀྵ་པ་པ་རི་ཝཱ་ར་ཨརྒྷཾ་ནས། ཤཔྟ་པཉྩ་ཨ་མྲི་ཏ་རཀྟ་བྷ་ལིངྟ་པཱུ་ཙ་ཁཱ་ཧིས་མཆོད། ཨཱོཾ་བཛྲ་ཏམྦུལཱ་ཡེ་སྭཱ་ཧཱས་སོ་རྩི་དང་། ཨཱོཾ་བཛྲ་ཝསྟྲ་ཡེ་སྭཱ་ཧཱས་གོས་ཟུང་དབུལ་ཞིང་། ཧཱུྃ། ཆོས་སྐྱོང་རྒྱལ་པོ་ཆེན་པོ་རྣམ་ཐོས་སྲས༔ ཅེས་པ་ནས། མ་ལུས་འཁོར་དང་བཅས་ལ་ཕྱག་འཚལ་བསྟོད༔ མཆོག་དང་ཐུན་མོང་དངོས་གྲུབ་སྩལ་དུ་གསོལ༔ ཅེས་པའི་བར་ལས་བྱང་བཞིན་བྱ། དེ་ནས་འཕྲིན་ལས་བཅོལ་བ་ནི། ཧོ༔ ནོར་ལྷ་རྒྱ་མཚོའི་ཚོགས་ཀྱི་སྤྱི་གཟུགས། བྱང་ཕྱོགས་གནོད་སྦྱིན་རྣམས་ཀྱི་ཆེ་བཙན། རབ་འབྱམས་དངོས་གྲུབ་རྒྱ་མཚོའི་གཙོ་བོ། དབུལ་བའི་དྲ་བ་བསྡོམ་པའི་མཚོན་ཆ། སྲིད་གསུམ་དབང་མཛད་དབང་གི་དཀྱིལ་འཁོར། ཐུགས་ཀྱི་དགྱེས་སྡེ་ཡུམ་ཆེན་སྡེ་བཞི། རྡོ་རྗེ་འཆང་ཆེན་ལ་སོགས་བརྒྱུད་ལྡན་གྱི་བླ་མ། དབང་ཆེན་ལྷ་ཡི་ལྷ་མཆོག་རྣམ་སྲས་རིགས་བཞི། ཟད་མེད་འདོད་དགུའི་བང་མཛོད་ཛམ་ལ་རིགས་བཞི། མི་ཟད་དངོས་གྲུབ་ཀུན་བདག་གནོད་སྦྱིན་སྐྱ་བརྒྱད། རིན་ཆེན་ནོར་གྱི་གཏེར་འཆང་ཀླུ་ཆེན་རྣམ་བརྒྱད། ལས་བཞི་སྒྲུབ་པའི་སྒོ་སྐྱོང་རྣམ་བཞི། ཕྱྭ་བདག་གཡང་མཛིན་ནོར་ལྷ་རྒྱ་མཚོ། བཀའ་གཏེར་སྲུང་མ་དང་བཅས་པ་ཁྱེད་རྣམས་ལ་སྲེག་བྱེད་མེ་ཡི་མཆོད་པས་མཉེས་པར་བྱས་ཏེ། འདོད་དོན་གྱི་འཕྲིན་ལས་གསོལ་བ་ནི། ཟག་མེད་མྱ་ངན་ལས་འདས་པའི་ཐུགས་རྗེ་དང་འཕྲིན་ལས་ཐམས་ཅད་བླ་ན་མེད་པའི་ཐུགས་རྗེའི་ཤུགས་ཀྱིས་དབང་དུ་སྡུས་ནས་བདག་ལ་སྩལ་ཏེ་ཚེ་འདི་ཉིད་ལ་མངོན་པར་བྱང་ཆུབ་པར་མཛད་དུ་གསོལ། ཚངས་དབང་བརྒྱ་བྱིན་རྒྱལ་ཆེན་བཞི་དང་། འཁོར་ལོས་བསྒྱུར་བའི་རྒྱལ་པོ་ལ་སོགས་ཟག་བཅས་འཁོར་བའི་དཔལ་ཐམས་ཅད་དབང་དུ་བསྡུས་ནས་སྲིད་པའི་ཁམས་འདིར་མངོན་པར་མཐོ་བར་མཛད་དུ་གསོལ། འཇིག་རྟེན་ཁམས་ཀྱི་རྒྱལ་བློན་ཆེ་བཙུན། ཁ་དྲག་མོ་བཙུན་འབངས་དང་བཅས་པ་རྗེས་ཆགས་སྙིང་རྗེའི་སྟོབས་ཀྱིས་དབང་དུ་སྡུས་ལ་བྱང་ཆུབ་ཆེན་པོར་འགོད་པར་མཛད་དུ་གསོལ། སྲིད་པ་གསུམ་གྱི་དཔལ་འབྱོར་ལོངས་སྤྱོད་རིན་ཆེན་དར་ཟབ་འབྲུ་སྨན་རྐང་འགྲོ་སོགས་འབྱོར་བའི་དཔལ་ཐམས་ཅད་དབང་དུ་བསྡུས་ལ་བསོད་ནམས་ཀྱི་ཚོགས་ཡོངས་སུ་རྫོགས་པར་མཛད་དུ་གསོལ། འཁོར་འདས་ཀུན་གྱི་ཚེ་དཔལ་དང་འབྱོར་བ་ཐམས་ཅད་དབང་དུ་བསྡུས་ལ་སྲིད་ཞིའི་ཕུན་ཚོགས་ཐམས་ཅད་རབ་ཏུ་འཕེལ་ཞིང་རྒྱས་པར་མཛད་དུ་གསོལ། ཞེས་གསོལ་ཞིང་དངོས་གྲུབ་བླང་བ་ལ་རྟེན་ཅིང་འབྲེལ་འབྱུང་བཟང་བའི་ཟས་ཀྱི་དངོས་པོ་སྣ་ཚོགས་པ་བཏེགས་ལ། ཧཱུྃ། སྔོན་ཚེ་བསྐལ་པ་བརྒྱད་ཁྲིའི་གོང་རོལ་ནས། །ཅེས་པ་ནས་ཨཱོཾ་བྷཻ་ཤ་ར་མ་ན་ཡེ་ཡཀྵ་སརྦ་ས་མ་ཡ་ཙིཏྟ་ཧྲིང་ཧྲིང་ཛཿཛཿ མ་ཧཱ་རཏྣ་བྷ་དྲ་སརྦ་སིདྡྷིཕ་ལ་ཧཱུྃ་ཧཱུྃ༔ ཞེས་བརྗོད་ཅིང་རྫས་རྣམས་དངོས་གྲུབ་ཏུ་རོལ། ཡི་གེ་བརྒྱ་པས་ལྷག་ཆད་བསྐང་ཞིང་། མ་འབྱོར་བ་དང་ཉམས་པ་དང་། །སོགས་ཀྱིས་ནོངས་པ་བཟོད་པར་གསོལ། ཨཱོཾ་ཁྱེད་ཀྱིས་སེམས་ཅན་དོན་ཀུན་མཛོད། སོགས་ཀྱིས་ཡེ་ཤེས་པ་གཤེགས། །དམ་ཚིག་པ་རང་ལ་བསྡུ། སླར་ཡང་འཇིག་རྟེན་པའི་མེ་ལྷ་ཐབ་ཀྱི་ཤར་ལྷོར་དཔང་པོར་བཞུགས་པ་བཛྲ་ས་མཱ་ཛཿདམ་ཚིག་པ་དང་གཉིས་སུ་མེད་པར་གྱུར་པ་ལ། ཨརྒྷཾ་སོགས་ཀྱིས་མཆོད་ཅིང་། ཧཱུྃ། བསྲེག་པའི་རེག་བྱ་ཚ་བའི་ཀློང་། །འབར་བའི་ནུས་པས་སྲིད་གསུམ་གྱི། །ལོག་པར་འདྲེན་པ་ཀུན་བསྲེག་པའི། །ལྷ་ཡི་ལྷ་མཆོག་ཁྱོད་ལ་བསྟོད། །དེ་ནས་ཨཱོཾ་ཨགྣཱེ་ཡེ་ཨ་དི་བྱ་ཨ་དི་བྱ་ཨ་བི་ཤ་ཨ་བི་ཤ་མ་ཧཱ་ཤྲཱི་ཧ་བྱ་ཀ་བྱ་བཱ་ཧ་ན་ཡེ་སྭཱ་ཧ༔ ཨཱོཾ་ཨགྣཱེ་ཡེ་སྭཱ་ཧཱ༔ ཞེས་འབུལ། ཨཱོཾ་བོ་ངྷི་བྲྀཀྵ་ཡེ་སྭཱ་ཧཱ༔ ཡམ་ཤིང་གིའོ། །ཨཱོཾ་ཨགྣཱེ་ཡེ་སྭཱ་ཧཱ༔ མར་ཁུའོ། །ཨཱོཾ་སརྦ་པཱ་པཾ་ད་ཧ་ན་བཛྲཱ་ཡ་སྭཱ་ཧཱ༔ ཏིལ་གྱིའོ། །ཨཱོཾ་སརྦ་ཨཪྠ་ས་ངྷཱ་ཡ་སྭཱ་ཧཱ༔ ཡུངས་ཀར་གྱིའོ། །ཨཱོཾ་སརྦ་སཾ་བྷ་དེ་སྭཱ་ཧཱ༔ ཟས་སྣའོ། །ཨཱོཾ་བཛྲ་ཨཱ་ཡུ་ཥེ་སྭཱ་ཧཱ༔ དཱུ་རྦའོ། །ཨཱོཾ་བཛྲ་པུཥྟ་ཡེ་སྭཱ་ཧཱ༔ འབྲས་ཀྱིའོ། །ཨཱོཾ་བཛྲ་བི་ཛཱ་ཡ་སྭཱ་ཧཱ༔ སོ་བ་ལའོ། །ཨཱོཾ་མ་ཧཱ་བེ་གྷ་ཡ་སྭཱ་ཧཱ༔ ནས་ཀྱིའོ། །ཨཱོཾ་བཛྲ་མ་ཧཱ་བ་ལཱ་ཡ་སྭཱ་ཧཱ༔ སྲན་མའོ། །ཨཱོཾ་བཛྲ་གྷསྨ་རེ་སྭཱ་ཧཱ༔ གྲོའོ། །ཨཱོཾ་ཨ་པྲ་ཏི་ཧ་ཏ་བཛྲ་ཡ་སྭཱ་ཧཱ༔ ཀུ་ཤའོ། །ཨཱོཾ་ཨཱ༔ སྭཱ་ཧཱ༔ ཕྲུམ་གྱིའོ། །ཨཱོཾ་ཛྲཱིཾ་སྭཱ་ཧཱ༔ འབྲུ་སྣའོ། །ཨཱོཾ་བཛྲ་ཤྲཱི་བ་ཡ་སྭཱ་ཧཱ༔ ཤིང་ཏོག་གོ། ཨཱོཾ་བཛྲ་ཝསྟྲ་ཡེ་སྭཱ་ཧཱ༔ དར་སྣའོ། །ཨཱོཾ་ཀུ་རུ་ཀུ་རུ་སྭཱ་ཧཱ༔ སྲེག་རྫས་སྔགས་མེད་པའི་རིགས་ཐམས་ཅད་ཀྱིའོ། །ཨཱོཾ་བཛྲ་ཏམྦུ་ལ་ཡེ་སྭཱ་ཧཱ༔ སོ་རྩིའོ། །ཨཱོཾ་བཛྲ་ཝསྟྲ་ཡེསྭཱ་ཧཱ༔ གོས་ཟུང་ངོ། །ཞེས་པ་རྣམས་ལ་གསུམ་མམ་བདུན་སོགས་དབུལ། རྒྱས་པར་རེ་རེ་ལའམ། བསྡུ་ན་ཀུན་གྱི་མཐར་འདོད་གསོལ་གཅིག་བྱས་ཀྱང་རུང་། དེ་ནས་གཏོར་མ་ལ། ཨཱོཾ་ཨགྣཱེ་ཡེ་ས་པ་རི་ཝཱ་ར་ཨི་དམ་བྷ་ལིངྟ་ཁ་ཁ་ཁཱ་ཧི་ཁཱ་ཧི། ཅེས་འབུལ། སླར་ཡང་ཨརྒྷཾ་ནསཤཔྟའི་བར་གྱིས་མཆོད་ཅིང་། ཧཱུྃ། གཟི་བརྗིད་ཕུང་པོ་ལྟ་ན་སྡུག །འོད་བཟང་ཉི་མའི་དཔལ་དུ་འབར། །རབ་འབྱམས་འཕྲིན་ལས་རྒྱ་མཚོའི་དཔལ། །ཨགྣི་རཱ་ཛ་ཁྱོད་ལ་བསྟོད། །ཅེས་བསྟོད། ཡི་གེ་བརྒྱ་པ་བརྗོད། མ་འབྱོར་བ་དང་ཉམས་པ་དང་། །གང་ཡང་བདག་རྨོངས་བློ་ཡིས་ནི། །བགྱིས་པ་དང་ནི་བགྱིད་སྩལ་བ། །དེ་ཀུན་མགོན་པོས་བཟོད་པར་མཛོད། །མེ་ལྷའི་རྒྱལ་པོ་གང་ཁྱོད་ཀྱིས། །བདག་གཞན་དོན་གཉིས་ཀུན་མཛོད་ཅིག །ཆོས་ཉིད་ཀློང་དུ་གཤེགས་ནས་ཀྱང་། །གསོལ་བ་བཏབ་ན་སླར་ཡང་སྤྱོན། །ཨགྣེ་ཡེ་མུ༔ ཅེས་ཡེ་ཤེས་བ་གཤེགས། དམ་ཚིག་པ་མེ་ཡི་ཕུང་པོར་གྱུར་པར་བསམ་མོ། དེ་ནས་ཤིས་བརྗོད་ནི། ཧཱུྃ། ཕུན་སུམ་ཚོགས་པ་བཀྲ་ཤིས་དཔལ་གྱི་ཞིང་༔ ནས། ནོར་ལྷ་རྒྱལ་བ་རྒྱ་མཚོའི་བཀྲ་ཤིས་ཤོག༔ ཅེས་སོ། །བསྔོ་སྨོན་ནི། ཟག་བཅས་ཟག་མེད་དགེ་བ་ཡིས། །བདག་སོགས་མཁའ་མཉམ་ལུས་ཅན་ཀུན། ཚོགས་གཉིས་རབ་རྫོགས་བྱང་ཆུབ་ཀྱི། །འབྲས་བུ་མངོན་དུ་འགྱུར་བར་ཤོག །དེ་ནས་ཐལ་བ་ཆུ་བོ་རྒྱུན་བཟང་ལ་ཕབ་བོ། །ཅེས་པ་འདི་ཡང་ཆོས་བརྒྱུད་འཛིན་མི་ལ་ཨེ་ཕན་བསམས་ཏེ་ཁམས་པ་ཉི་མ་གྲགས་པས་བྲིས། །མངྒ་ལཾ།། །།

གཡང་འགུགས་ཀྱི་ལྷན་ཐབས་གོང་མ།

ནོར་བདག་ཡིད་བཞིན་ནོར་བུའི་ཟུར་གསལ་གཡང་འགུགས་ཀྱི་ལྷན་ཐབས་གོང་མ་བཞུགས་སོ། །ཕྱྭ་གཡང་འགུགས་པའི་རྫས་རྣམས་གཞུང་བཞིན་ཚང་བར་བསགས་ནས་བཀོད། དྲི་བཟང་བདུད་རྩི་ཤིང་ལྔའི་དུད་པ་བཏང་ནས། སྔགས་དྲུག་ཕྱག་རྒྱ་དྲུག་ཏིང་ངེ་འཛིན་དང་ལྡན་པས་གཡང་རྫས་བྱིན་གྱིས་བརླབས་ནས། །ཨཱོཾ་སྭཱ་བྷཱ་ཝ་སོགས་ཀྱིས་སྟོང་པར་སྦྱངས། སྟོང་པའི་ངང་ལས་བྷྲཱུྃ་ཡོངས་སུ་གྱུར་པ་ལས་གཡང་གཞི་དཀར་པོའི་དབུས་སུ། རིན་ཆེན་རི་རབ་སྣ་ཚོགས། གཡང་མཛོད་ནུ་དགུ་འདོད་འབྱུང་བུམ་པ་སྣ་ཚོགས། བཀྲ་ཤིས་རྟགས་བརྒྱད། རྒྱལ་སྲིད་སྣ་བདུན་སྣ་ཚོགས། སྤྱན་གཟིག་ཀ་ཆ་དཀོར་ཆ་མཁར་གདུགས་རྒྱལ་མཚན་བླ་བྲེ་འཕན་དར་དང་། དཔག་བསམ་གྱི་ཤིང་། མ་རྨོས་པའི་ལོ་ཏོག །འདོད་འཇོའི་བ། གོ་མཚོན་ཁྲབ་རྨོག་འཁོར་གསུམ་དང་། གཞན་ཡང་མེ་ཤེལ། ཆུ་ཤེལ། སྤུ་ཤེལ། གཟི་མུ་ཏིག །ཟངས་ལྕགས་བྱི་རུ། དུང་གཡུ་རིན་ཆེན་རིགས་དང་། དར་གོས་ཕྲུག་རས་ན་བཟའ་སྣ་ཚོགས། འབྲས་དང་། འབྲུ་སྣ་ཚོགས། སྨན་དང་ཞོ་ཤ་སྣ་ཚོགས། དྲི་ཡི་དུད་པ། ཆང་གི་རྒྱ་མཚོ། འོ་མའི་རྒྱ་མཚོ། ཞོ་ཡི་རྒྱ་མཚོ། མར་ཁུའི་རྒྱ་མཚོ། མར་ཐུད། གཡག་ཤ་ཚིལ་ཆེན། གཡང་གཏོར་འབྲང་རྒྱས་ཞལ་དཀར་མ་ཚང་བ་མེད་པ་ལྷ་མིའི་མཁོ་དགུ་ལོངས་སྤྱོད་ཕུན་སུམ་ཚོགས་པ་ཐམས་ཅད་འུ་རུ་རུ། ཆི་ལི་ལི། མེ་རེ་རེ། ཁྱི་ལི་ལི། དེ་དག་ཐམས་ཅད་གཡང་གཞི་གཡང་རྫས་གཡང་མཛོད་གཡང་བུམ་འདི་ལ་བརྟེན་པར་མཛོད། ཀྱཻ་གཡང་བྲོས་པ་ཐམས་ཅད་དེ་རིང་ཁུག །གཡང་འཐོར་བ་ཐམས་ཅད་དེ་རིང་སྡུད། །གཡང་ཉམས་པ་ཐམས་ཅད་དེ་རིང་གསོ། །གཡང་མནོལ་བ་ཐམས་ཅད་དེ་རིང་བསངས། །གཡང་ཡོ་བ་ཐམས་ཅད་དེ་རིང་བསྲོང་། །གཡང་གས་པ་ཐམས་ཅད་དེ་རིང་སྦྱོར། །གཡང་ཆད་པ་ཐམས་ཅད་དེ་རིང་མཐུད། །དེ་ལྟར་མཁོ་དགུ་ཐམས་ཅད་སྒྲུབས། །ཅེས་བརྗོད་དོ། །དེ་ནས་སྤྱན་འདྲེན་བྱིན་ཆེན་འབེབས་པ་ནི། ཀྱཻ། ཐར་ལམ་འཛིན་པ་ཆོས་སྐུའི་ལྷ། །དེ་རིང་བཀྲ་ཤིས་གཡང་ལ་བྱོན། །ཚེ་བསྲིང་དཔལ་བསྐྱེད་ལོངས་སྐུའི་ལྷ། །དེ་རིང་བཀྲ་ཤིས༴ ཆོས་བྱེད་སྒྲུབ་པ་སྤྲུལ་སྐུའི་ལྷ། །དེ་རིང་༴ བྱིན་རླབས་འབྱུང་གནས་ཡི་དམ་ལྷ། །དེ་རིང་༴ དངོས་གྲུབ་སྩོལ་བ་མ་དང་མཁའ་འགྲོའི་ཚོགས། །དེ་རིང་༴ དབང་ལུང་བརྒྱུད་པའི་བླ་མ་དམ་པ་རྣམས། །དེ་རིང་༴ འགོང་པོ་བསེ་རགས་བཟློག་པ་ཁྲོ་བོའི་རྒྱལ། །དེ་རིང་༴ ལོངས་སྤྱོད་ཆར་འབེབས་རྣམ་ཐོས་སྲས། །དེ་རིང་༴ ཚངས་པ་བརྒྱ་བྱིན་ལྷ་ཡི་ཚོགས། །དེ་རིང་༴ དགའ་བོ་འཇོག་པོ་ཀླུ་ཡི་སྡེ། །དེ་རིང་༴ ནོར་ལྷ་གཏེར་བདག་གནོད་སྦྱིན་རིགས། །དེ་རིང་༴ འབྱུང་བའི་ལྷ་མོ་ཐམས་ཅད་ཀྱང་། །དེ་རིང་༴ སྲིད་པ་ཆགས་པའི་ལྷ་དགུ་ཡང་། །དེ་རིང་༴ ཡོན་མཆོག་ཀུན་གྱི་ཚེ་དང་གཡང་སྐྱོབས་མཛོད། །ཀྱཻ་དེ་རིང་གཡང་རྣམས་བརྟན་པར་མཛོད། །གཞི་མ་དཀར་པོ་གཡང་གི་རྟེན། །གཡང་རྣམས་རྟེན་ལ་འཁོར་བར་མཛོད། །རིན་ཆེན་རི་རབ་གཡང་གི་རྟེན། །གཡང་རྣམས་རྟེན་ལ་འཁོར་བར་མཛོད། །གཡང་མཛོད་ནུ་དགུ་གཡང་གི་རྟེན། །གཡང་རྣམས༴ འདོད་འབྱུང་བུམ་པ་གཡང་གི་རྟེན། །གཡང་རྣམས༴ བཀྲ་ཤིས་རྫས་བརྒྱད་གཡང་གི་རྟེན། །གཡང་རྣམས༴ རྒྱལ་སྲིད་སྣ་བདུན་གཡང་གི་རྟེན། །གཡང་རྣམས༴ དཔག་བསམ་ཤིང་རྣམས་གཡང་གི་རྟེན། །གཡང་རྣམས༴ མ་རྨོས་ལོ་ཏོག་གཡང་གི་རྟེན། །གཡང་རྣམས༴ ནོར་འཛིན་ནེའུ་ལེ་གཡང་གི་རྟེན། །གཡང་རྣམས༴ གཞལ་ཡས་ཁང་པ་གཡང་གི་རྟེན། །གཡང་རྣམས༴ སྤྱན་གཟིག་ཀ་ཅ་གཡང་གི་རྟེན། །གཡང་རྣམས༴ ཡོལ་བ་བླ་བྲེ་གཡང་གི་རྟེན། །གཡང་རྣམས༴ པཎ་དང་བ་དན་གཡང་གི་རྟེན། །གཡང་རྣམས༴ ཕོ་ཆས་མོ་ཆས་གཡང་གི་རྟེན། །གཡང་རྣམས༴ དར་རས་སྣ་ཚོགས་གཡང་གི་རྟེན། །གཡང་རྣམས༴ མདའ་དར་མདུང་དར་གཡང་གི་རྟེན། །གཡང་རྣམས༴ ནོར་བུ་འབར་བ་གཡང་གི་རྟེན། །གཡང་རྣམས༴ མིག་དགུ་གཟི་ནི་གཡང་གི་རྟེན། །གཡང་རྣམས༴ བྱི་རུ་རྒྱལ་ལག་གཡང་གི་རྟེན། །གཡང་རྣམས༴ གཡུ་སྔོན་ནོར་བུ་གཡང་གི་རྟེན། །གཡང་རྣམས༴ དུང་དཀར་ཀཪྴ་གཡང་གི་རྟེན། །གཡང་རྣམས༴ གསེར་ཞུན་དངུལ་ཞུན་གཡང་གི་རྟེན། །གཡང་རྣམས༴ ལྕགས་ཞུན་ཟངས་ཞུན་གཡང་གི་རྟེན། །གཡང་རྣམས༴ མེ་ཤེལ་ཆུ་ཤེལ་གཡང་གི་རྟེན། །གཡང་རྣམས༴ ཆུ་སྣ་རྒྱ་མཚོ་གཡང་གི་རྟེན། །གཡང་རྣམས༴ རོལ་མོ་སྒྲ་སྙན་གཡང་གི་རྟེན། །གཡང་རྣམས༴ ཆང་གི་རྒྱ་མཚོ་གཡང་གི་རྟེན། །གཡང་རྣམས༴ ཞོ་ཡི་རྒྱ་མཚོ་གཡང་གི་རྟེན། །གཡང་རྣམས༴ ཞུན་ལིང་སེར་མོ་གཡང་གི་རྟེན། །གཡང་རྣམས༴ འོ་མའི་རྒྱ་མཚོ་གཡང་གི་རྟེན། །གཡང་རྣམས༴ རྒྱ་ཇ་ཁུ་ལྡན་གཡང་གི་རྟེན། །གཡང་རྣམས་རྟེན་ལ༴ མར་ཐུད་རི་བོ་གཡང་གི་རྟེན། །གཡང་རྣམས༴ ཤ་ཚིལ་རིག་བྱེད་གཡང་གི་རྟེན། །གཡང་རྣམས༴ སྨན་སྣ་རི་བཟང་གཡང་གི་རྟེན། །གཡང་རྣམས༴ འབྲས་དང་འབྲུ་སྣ་གཡང་་གི་རྟེན། །གཡང་རྣམས༴ ཕྱེ་མར་ཕྱར་ཕྱུར་གཡང་གི་རྟེན། །གཡང་རྣམས༴ གོ་ཁྲབ་མཚོན་ཆ་གཡང་གི་རྟེན། །གཡང་རྣམས༴ ལྷ་རྟ་གྱི་ལིང་གཡང་གི་རྟེན། །གཡང་རྣམས༴ ལྷ་ནོར་སྔོན་པོ་གཡང་གི་རྟེན། །གཡང་རྣམས༴ ལྷ་ལུག་དོན་པོ་གཡང་གི་རྟེན། །གཡང་རྣམས༴ འདོད་འཇོའི་བ་མོ་གཡང་གི་རྟེན། །གཡང་རྣམས༴ ཕོ་ཐོང་བཟང་པོ་གཡང་གི་རྟེན། །གཡང་རྣམས༴ མོ་ཐོང་ལྡེམ་མོ་གཡང་གི་རྟེན། །གཡང་རྣམས་རྟེན་ལ་འཁོར་བར་མཛོད། །གནས་ཁང་འདི་ལ་བརྟེན་པར་མཛོད། །གཡང་རྫས་འདི་ལ་བྱིན་ཅིག་ཕོབ། །ཐུགས་རྗེས་བདག་ལ་དངོས་གྲུབ་སྩོལ། །ནུས་པས་བསེ་རགས་འགོང་པོ་བཟློག །ཅེས་བརྗོད་ནས་ཕྱྭ་གཡང་འགུགས་པའི་འཕྲིན་ལས་ལ་འཇུག་གོ། །

རྟེན་བཞུགས་དང་གཡང་ཕུར་སྲུང་འཛུགས་གཡང་སྒོ་བསྡམས་པའི་ལྷན་ཐབས།

ནོར་བདག་གི་རྟེན་བཞུགས་དང་གཡང་ཕུར་སྲུང་འཛུགས་གཡང་སྒོ་བསྡམས་པའི་ལྷན་ཐབས་བཅས་ཕྱོགས་གཅིག་ཏུ་བྲིས་པ་བཞུགས། དེ་ནས་སློབ་དཔོན་གྱིས་སྔ་མའི་གཞི་ནས་ཕུལ་བཞི་བུམ་པའི་ཕྱོགས་བཞིར་གཞལ་ཞིང་འདི་སྐད་དོ། །འོ་གཅིག་ཏུ་ལ་འཕེལ༔ ཅེས་པའི་ལན་དུ་གཞན་རྣམས་ཀྱིས། འོ་གཅིག་བརྒྱ་ལ་འཕེལ༔ བརྗོད་དེ་བཞིན་དུ། འོ་བརྒྱ་དུ་ལ་འཕེལ༔ འོ་བརྒྱ་སྟོང་དུ་འཕེལ་ལགས༔ འོ་སྟོང་དུ་ལ་འཕེལ༔ འོ་སྟོང་ཁྲི་ལ་འཕེལ་ལགས༔ འོ་ཁྲི་དུ་ལ་འཕེལ༔ འོ་ཁྲི་འབུམ་ལ་འཕེལ་ལགས༔ འོ་འབུམ་དུ་ལ་འཕེལ༔ འོ་འབུམ་སྲིད་གསུམ་གང་བར་འཕེལ་ལགས༔ ཅེས་ཐམས་ཅད་ཀྱིས་འབྲུ་སྣ་མཆོད༔ མཆོག་ཐུན་གྱི་དངོས་གྲུབ་འབྱུང་བའི་གསོལ་བ་གདབ༔ རྟེན་ལ་འཁོད་རོལ་མོ་འཁྲོལ་དྲི་བཟང་བདུག་མདའ་དར་གཡབ་ཅིང་༔ ཀྱཻ༔ ཕྱྭ་འགུགས་གཡང་འགུགས་གནས་འདིར་འགུགས༔ ཕྱྭ་འཛུགས་གཡང་འཛུགས་གནས་འདིར་འཛུགས༔ ཕྱྭ་བརྟན་གཡང་བརྟན་གནས་འདིར་བརྟན༔ ཧཱུྃ༔ གནས་ཁང་གཞལ་ཡས་བྱིན་རེ་ཆགས༔ ནོར་ལྷ་རྒྱ་མཚོ་བརྟན་པར་བཞུགས༔ རི་རབ་ལྷུན་པོ་བརྗིད་རེ་ཆེ༔ ནོར་ལྷ༴ ཕྱི་ནང་མཆོད་རྫས་བཀོད་རེ་ལེགས༔ ནོར་ལྷ༴ བཀྲ་ཤིས་རྫས་བརྒྱད་མདངས་རེ་ལེགས༔ ནོར་ལྷ༴ རྒྱལ་སྲིད་སྣ་བདུན་དཔལ་རེ་བཟང་༔ ནོར་ལྷ༴ ནམ་མཁའ་རིགས་ལྔ་རྒྱ་རེ་ཆེ༔ ནོར་ལྷ༴ གཞལ་ཡས་ཁང་རྣམས་ལྷུན་རེ་ཆགས༔ ནོར་ལྷ༴ ཕོ་གདོང་མདའ་བཀྲ་ཕོ་རྩལ་ལྡན༔ ནོར་ལྷ༴ མོ་གདོང་འཕང་བཀྲ་མོ་རྩལ་ལྡན༔ ནོར་ལྷ༴ འདོད་འབྱུང་བུམ་པ་རྒྱ་རེ་ཆེ༔ ནོར་ལྷ༴ ནང་བཅུད་རིན་ཆེན་འབྲུ་སྨན་སྤུངས༔ ནོར་ལྷ༴ དར་མཚོན་སྣ་ལྔའི་མགུལ་རྒྱན་བཀྲ༔ ནོར་ལྷ༴ ཁ་རྒྱན་དཔག་བསམ་ལོ་འདབ་རྒྱས༔ ནོར་ལྷ༴ གཡང་སྒྱེ་ནུ་དགུ་གཡང་དགུའི་མཛོད༔ ནོར་ལྷ༴ ཞིམ་བུའི་རྐྱལ་པ་འདོད་འབྱུང་དཔལ༔ ནོར་ལྷ༴ ས་ཆུ་ནང་སྦྱོར་སྐུ་བརྙན་ཤར༔ ནོར་ལྷ༴ གཡང་ཐག་འདོམ་དགུ་ཕྱོགས་ཕྱོགས་འཕྱོ༔ ནོར་ལྷ༴ བདུད་རྩི་ཤིང་ལྔ་ཕྱོགས་བཞིར་སྤུངས༔ ནོར་ལྷ༴ སྤྱན་གཟིགས་ཀ་ཅ་དཀོར་ཆ་བཟང་༔ ནོར་ལྷ༴ ཕོ་ཆས་མོ་ཆས་དཔལ་དགུ་འཛོམ༔ ནོར་ལྷ༴ བླ་རེ་ཕན་དང་ལྡ་ལྡི་འཕྱོ༔ ནོར་ལྷ༴ མདའ་དར་མདུང་དར་བ་དན་མཛེས༔ ནོར་ལྷ་རྒྱ་འཚོ་བརྟན་པར་བཞུགས༔ ཅེས་བརྗོད། དེ་ནས་གཡང་ཕུར་སྲུང་འཛུགས་པ་ནི་འདི་སྐད་དོ། ཀྱཻ། གཡང་སྐྱོབས་འདི་ཡི་ཤར་ཕྱོགས་ལ། །ལྷ་དཀར་བརྒྱ་ཡི་གཡང་རྣམས་འཚོ། །རྟ་དཀར་བརྒྱ་ཡི་གཡང་རྣམས་སྡུད། །ལྷ་མོ་བརྒྱ་ཡིས་དམུ་ཐག་བྲན། །ཀླུ་མོ་བརྒྱ་ཡིས་གཡང་རྣམས་སྤེལ། །རྒྱ་སྟག་ཁྲ་བོ་བསྲུང་དུ་བསྐོས། །གཡང་ཐག་དཀར་པོས་བརྟན་པར་བཏགས། །གཡང་ཕུར་དཀར་པོ་ཕུར་དུ་བཙུགས། །གཡང་སྐྱོབས་འདི་ཡི་ལྷོ་ཕྱོགས་ལ། །ལྷ་སེར་བརྒྱ་ཡིིས་གཡང་རྣམས་འཚོ། །རྟ་སེར་བརྒྱ་ཡིས་གཡང་རྣམས་སྡུད། །ལྷ་མོ་བརྒྱ་ཡིས་དམུ་ཐག་བྲན། །ཀླུ་མོ་བརྒྱ་ཡིས་གཡང་རྣམས་སྤེལ། །གཡུ་འབྲུག་སྔོན་པོ་སྲུང་དུ་བསྐོས། །གཡང་ཐག་སེར་པོས་བརྟན་པར་བཏགས། །གཡང་ཕུར་སེར་པོ་ཕུར་དུ་བཙུགས། །གཡང་སྐྱོབས་འདི་ཡི་ནུབ་ཕྱོགས་ལ། །ལྷ་དམར་བརྒྱ༴ རྟ་དམར་བརྒྱ༴ ལྷ་མོ་བརྒྱ༴ ཀླུ་མོ་བརྒྱ༴ རྨ་བྱ་སྤུ་མདངས་བསྲུང་༴ གཡང་ཐག་དམར་པོས་བརྟན༴ གཡང་ཕུར་དམར་པོ་ཕུར༴ གཡང་སྐྱོབས་འདི་ཡི་བྱང་ཕྱོགས་ལ། །ལྷ་སྔོན་བརྒྱ་ཡིས༴ རྟ་སྔོན་བརྒྱ་ཡིས༴ ལྷ་མོ་བརྒྱ་ཡིས༴ ཀླུ་མོ་བརྒྱ་ཡིས༴ རུས་སྦལ་སེར་པོ་བསྲུང་༴ གཡང་ཐག་སྔོན་པོས་བརྟན༴ གཡང་ཕུར་སྔོན་པོ་ཕུར༴ ཞེས་ཕུར་པར་གཏད་དོ། །དེ་ནས་གཡང་སྒོ་བསྡམས་པ་ནི། ཀྱཻ། གཡང་སྐྱོབས་ཤར་གྱི་སྒོ་སྲུང་ནི། །གཡང་གི་ལྷ་མོ་སྐུ་མདོག་དཀར། །ཕྱག་གཡས་མདའ་དར་སྒོ་ལྕགས་བསྣམས། །གཡོན་པ་གཡང་གི་བུམ་པ་འཛིན། །སྲིད་པ་རྡོ་རྗེའི་སྒོ་གཏན་བཙུགས། །མགོན་པོ་དཀར་པོས་ཞི་བའི་སྒོ་སྡོམས་ཤིག །གཡང་སྐྱོབས་ལྷོ་ཡི་སྒོ་སྲུང་ནི། །གཡང་གི་ལྷ་མོ་སྐུ་མདོག་སེར། །ཕྱག་གཡས་མདའ༴ གཡོན་པས་གཡང་༴ རིན་ཆེན་འབར་བའི་སྒོ༴ ཚོགས་བདག་སེར་པོས་རྒྱས་པའི་སྒོ༴ གཡང་སྐྱོབས་ནུབ་ཀྱི་སྒོ༴ གཡང་གི་ལྷ་མོ་སྐུ་མདོར་དམར། །ཕྱག་གཡས་མདའ༴ གཡོན་པ་གཡང་༴ པདྨ་རཱ་གའི་སྒོ༴ དབང་ཕྱུག་དམར་པོས་དབང་གི་སྒོ༴ གཡང་སྐྱོབས་བྱང་གི་སྒོ༴ གཡང་གི་ལྷ་མོ་སྐུ་མདོག་ལྗང་། ཕྱག་གཡས་མདའ༴ གཡོན་པ་གཡང་༴ རལ་གྲི་འབར་བའི་སྒོ༴ ཙི་ཊ་ལྗང་གུས་དྲག་པོའི་སྒོ་སྡོམས་ཤིག །ཕྱི་སྒོ་བསྡམས་པས་དགྲ་མ་འཆོར། །བར་སྒོ་བསྡམས་པས་བགེགས་མ་གཏོང་། །ནང་སྒོ་བསྡམས་པས་བཅུད་མ་འཆོར། །སྒོ་བཞི་བསྡམས་པས་གཡང་མ་ཉམས། །སྲུང་མ་ཁྱེད་རྣམས་བརྟན་པར་མཛོད། །བཀྲ་ཤིས་ཕྱྭ་གཡང་འཁྱིལ་བར་མཛོད། །གཡང་སྐྱོབས་བཀྲ་ཤིས་བརྟན་པར་མཛོད། །ཨཱོཾ་བཛྲ་རཀྵ༔ ཨཱ༔ རཏྣ་རཀྵ༔ ཧཱུྃ་པདྨ་རཀྵ༔ ཧྲཱིཿཀརྨ་རཀྵ༔ ཅེས་པས་སྡམ་མོ། །བཀྲ་ཤིས་གླུ་བྲོ་ཚོགས་ལ་རོལ། འདི་ལྟར་དགོས་སོ་སྙམ་ནས། ཨོ་རྒྱན་ཆོས་གླིང་དུ་སུག་བྲིས་སུ་སྦྱར་བ་འདི་ཡང་རིག་འཛིན་མིང་གིས་སོ།། །།

ནོར་བདག་གཏོར་མ་འབུལ་ཐབས།

ནོར་བདག་ལ་གཏོར་མ་འབུལ་ཐབས་བཞུགས། བཛྲ་པཱ་ཎི་ལ་ན་མོ་ཧཱུཾ། མདུན་དུ་བྷཻ་ལས་རྒྱལ་པོ་ཆེན་པོ་རྣམ་མང་ཐོས་སྲས་སྐུ་མདོག་སྔོན་པོ་བཻཌཱུརྱའི་མདོག་ཅན་ཞལ་གཅིག་ཁྲོ་འཛུམ་བཞད་པའི་ཉམས་ཅན་གཡས་རྒྱལ་མཚན་དང་གཡོན་ནེའུ་ལེའི་རྐྱལ་པ་བསྣམ་པ། པཉྩ་ལི་ཀའི་བེར་ཆེན་དགུ་བརྩེགས་གསོལ་བ་འཁོར་དུ་ནོར་ལྷ་རྒྱ་མཚོའི་ལྷ་ཚོགས་ཐམས་ཅད་ཀྱིས་ལྷ་མིའི་ཁྲོམ་ཚོགས་པ་ལྟར་བསྐོར་བར་གསལ་བའི་གནས་གསུམ་ལས་འོད་ཟེར་འཕྲོས་པས་བྱང་ཕྱོགས་གནོད་སྦྱིན་ནོར་བུའི་ཕོ་བྲང་ནས་སྤྱན་དྲངས༔ ཨཱོཾ་བྷཻ་ཤ་ར་མ་ན་ཡེ་ཡཀྴ་སརྦ་ས་མ་ཡ་ཙིཏྟ་ཧྲིང་ཧྲིང་ཛ་ཛ་བཛྲ་ས་མ་ཡ་ཛ་ཏིཥྛ་ལྷན་ཨ་ལ་ལ་ཧོ་བཛྲ་ཨརྒྷཾ་པུཥྤེ་དྷུ་པེ་ཨ་ལོ་ཀེ་གནྡྷེ་ནཻ་ཝི་ཏེ་ཤཔྟ་ཨ་མྲྀ་ཏ་ཁཱ་ཧི་ཁཱ་ཧི། གཏོར་མ་འབུལ་བ་ནི། ཧཱུྃ༔ རིན་ཆེན་སྣོད་དུ་འབྲུ་སྨན་རྩི་བཅུད་བསྡུས༔ མཆོད་པའི་གཏོར་མ་དཀར་ཐིག་དམར་གྱིས་བརྒྱན༔ ལྷ་ཡི་ཞལ་ཟས་བས་ཀྱང་ཁྱད་པར་འཕགས༔ རོ་མཆོག་བརྒྱ་ལྡན་བྷ་ལིང་མཆོད་པ་འདི༔ རྣམ་མང་ཐོས་སྲས་འཁོར་དང་བཅས་ལ་མཆོད༔ ཅེས་བརྗོད་པ་ཙམ་གྱི་ནོར་མང་རྣམ་ཐོས་ཀྱི་བུ་འཁོར་དང་བཅས་པའི་ལྗགས་རིན་པོ་ཆེའི་སྦུ་གུས་གཏོར་མ་དང་མཆོད་རྫས་ལ་ཟུག་སྟེ་གསོལ་བས་སྐུ་གསུང་ཐུངས་ཡོངས་སུ་དགྱེས་ཏེ། མཉེས་པའི་མདངས་ཕྱུངས་ནས་རྣལ་འབྱོར་པ་ལ་མཆོག་ཐུན་མོང་གི་དངོས་གྲུབ་ཐམས་ཅད་སྐད་ཅིག་ལ་སྩལ་བར་གྱུར༔ ལྷ་སྔགས་ཡོངས་རྫོགས་སམ༔ ཨཱོཾ་བྷཻ་ཤ་མ་ན་ཡེ་ཡཀྴ་སརྦ་གྷྲིཧྣ་ཨི་དཾ་བྷ་ལིངྟ་ཁ་ཁ་ཁཱ་ཧི་ཁཱ་ཧི༔ བདུན་ནམ་ཉེར་གཅིག་བརྗོད༔ ཧཱུྃ། བསྐལ་མང་གོང་ནས་བྱང་ཆུབ་མངའ་བརྙེས་ཀྱང་། ཉམ་ཐག་འགྲོ་བའི་དབུལ་བ་འཇིགས་སྐྱོབ་ཕྱིར། །ས་བརྒྱད་ངལ་བསོས་དགོས་འདོད་ཆར་འབེབས་པའི། །ནོར་མང་རྣམ་ཐོས་སྲས་ལ་ཕྱག་འཚལ་བསྟོད། །ཁམས་གསུམ་སྲིད་པའི་ཟས་ནོར་ལོངས་སྤྱོད་དཔལ། །སྙན་གྲགས་གཟི་བརྗིད་མ་ལུས་དབང་དུ་བསྡུས། །དཔལ་དང་འབྱོར་པ་ཚད་མེད་དངོས་གྲུབ་སྩོལ། །འདོད་དགུ་ལྷུན་གྱིས་གྲུབ་པར་མཛད་དུ་གསོལ། །ཅེས་ཕུད་གཏོར་མཆོད། དེ་ལྟར་ནོར་བདག་ཡིད་བཞིན་ནོར་བུའི་ལས་གཞུང་དང་མཐུན་པའི་མཆོད་གཏོར་གྱི་ཕྲིན་ལས་ཉུང་བསྡུས་འདི་ཨོ་རྒྱན་འགྱུར་མེད་བསྟན་འཕེལ་རྒྱ་མཚོས་སྦྱར་བའོ། །

དབང་བཤད་ཉུང་ངུ་སྨྲ་བར་འདོད་པའི་ཁ་རྒྱན།

ནོར་བདག་ཡིད་བཞིན་ནོར་བུའི་དབང་བཤད་ཉུང་ངུ་སྨྲ་བར་འདོད་པའི་ཁ་རྒྱན་ཅེས་བྱ་བ་བཞུགས་སོ། །ནམ་མཁའ་དང་མཉམ་པའི་སེམས་ཅན་ཐམས་ཅད་ཀྱི་དོན་དུ་དགོངས་ཏེ་གསན་པར་ཞུ། དེ་ལ་ཁྱེད་རང་རྣམས་ལ་ནོར་བདག་ཡིད་བཞིན་ནོར་བུའི་དབང་བསྐུར་བའི་ཐོག་མར་ལོ་རྒྱུས་ཅུང་ཟད་ཞུ་ན། སྤྱིར་བདག་ཅག་གི་སྟོན་པ་ཡང་དག་པར་རྫོགས་པའི་སངས་རྒྱས་རྡོ་རྗེ་འཆང་ཆེན་པོའི་སྔགས་ཀྱི་རྒྱུད་སྡེ་རབ་འབྱམས་རྣམས་སུ་ལྷག་པའི་ལྷ་ཡི་སྒྲུབ་ཐབས་ཇི་སྙེད་ཅིག་གསུངས་པ་ཐམས་ཅད་ཀྱང་མཆོག་དང་ཐུན་མོང་གི་དངོས་གྲུབ་རྣམ་གཉིས་སྒྲུབ་པའི་ཐབས་སུ་འགྱུར་བ་ལས་འདིར་ནི་ཕྱི་མ་འཆད་པའི་སྐབས་ཏེ། དེ་ལ་ཡང་གྲུབ་པ་བརྒྱད་དང་ཕྲིན་ལས་བཞི་སོགས་ཀྱིས་མཚོན་པའི་ལས་རབ་འབྱམས་ཀྱི་སྒྲུབ་ཐབས་མཐའ་ཡས་མོད་ཀྱང་གཙོ་བོ་ཕྲིན་ལས་རྣམ་པ་བཞིར་འདུ་ཞིང་དེ་ལས་ད་ལམ་འདི་ནི་རྒྱས་པའི་ཕྱོགས་སུ་གཏོགས་པ་ཡིན་ཏེ། རྒྱས་པ་ལ་ཡང་ནང་གསེས་སུ་ཚེ་དང་བསོད་ནམས་རྒྱས་པར་བྱ་བ་དང་། ཡེ་ཤེས་དང་ཡོན་ཏན་རྒྱས་པ་དང་། ནོར་དང་ལོངས་སྤྱོད་རྒྱས་པར་བྱ་བ་སོགས་ལས། འདི་ནི་ནོར་དང་ལོངས་སྤྱོད་སྒྲུབ་པའི་ཐབས་ཡིན། དེ་ཡང་སྙིགས་མའི་དུས་འདིར། འཚོ་བ་དམན་ཞིང་། ཡོ་བྱད་དཀོན་པའི་ཚེ། རྣལ་འབྱོར་པ་གང་ཞིག་རང་ཉིད་ཆོས་སྒྲུབ་པའི་མཐུན་རྐྱེན་ཚོགས་པར་བྱ་བ་དང་། ཚོགས་གཉིས་ཟུང་དུ་འཇུག་ཕྱིར་བསོད་ནམས་ཀྱི་ཚོགས་ཆེན་པོ་གཞན་དང་གཞན་དག་ཀྱང་རྒྱ་ཆེར་སྤེལ་བའི་ཆེད་དང་། རྒྱལ་བའི་སྲས་ཀྱི་སྦྱོད་པ་རླབས་པོ་ཆེས་བསྡུ་དངོས་བཞིའི་སྒོ་ནས་གདུལ་བྱ་རྗེས་སུ་འཛིན་པས་སེམས་ཅན་གྱི་དོན་སྒྲུབ་པའི་ཕྱིར་དང་། སངས་རྒྱས་ཀྱི་བསྟན་པ་རིན་པོ་ཆེ་སྒོ་དུ་མ་ནས་མི་ཉམས་ཤིང་འཕེལ་ཞིང་རྒྱས་པར་བྱ་བ་སོགས་ཀྱི་ཆེད་དུ་ནོར་སྒྲུབ་ཟབ་མོ་ཉམས་སུ་ལེན་པ་ཤིན་ཏུ་གལ་ཆེ་ཞིང་དགོས་པ་དུ་མ་དང་ལྡན་པ་ཡིན། དཔེར་ན་ནོར་སྒྲུབ་ཀྱི་རིགས་འཇིག་རྟེན་པ་དང་འཇིག་རྟེན་ལས་འདས་པའི་ལྷག་པའི་ལྷའི་སྒྲུབ་ཐབས་ཇི་སྙེད་པ་ཞིག་འབྱུང་མོད་ཀྱང་། ཀུན་གྱི་གཙོ་བོའམ་མཆོག་ཏུ་གྲགས་པ་ནི་རྒྱལ་པོ་རྣམ་ཐོས་སྲས་ཉིད་ཡིན་ཏེ། དེ་ཡང་ངེས་པའི་དོན་དུ་ནི་རིགས་ལྔ་ཚངས་ཆེན་བཀོད་པའི་ཞིང་ཁམས་གྲངས་མེད་ནམ་མཁའི་མཐའ་གཏུགས་པའི་རབ་འབྱམས་རྒྱ་མཚོའི་ཞིང་ཀུན་ཏུ་སངས་རྒྱས་མཆོག་གི་སྤྲུལ་པའི་སྐུའི་མཛད་པ་སྟོན་པའི་གནས་གླིང་བཞི་པའི་འཇིག་རྟེན་གྱི་ཁམས་ཇི་སྙེད་པ་དེ་སྙེད་ཀྱི་རི་རབ་ཀྱི་བྱང་ཕྱོགས་ནས་ལྕང་ལོ་ཅན་གྱི་ཕོ་བྲང་རེ་དང་། བྱང་ཆུབ་སེམས་དཔའ་ཆོས་སྐྱོང་བའི་ལྷའི་རྒྱལ་པོའི་ཚུལ་གྱིས་འགྲོ་བའི་དོན་མཛད་པའི་རྒྱལ་པོ་རྣམ་ཐོས་སྲས་རེ་ཡོད་པར་གསུངས་ཤིང་། ཁྱད་པར་ཞིང་འདིར་སངས་རྒྱས་སྟོང་དང་ཐུབ་པ་ཆེན་པོའི་བསྟན་པ་སྐྱོང་ཤིང་སེམས་ཅན་རྣམས་དབུལ་བའི་སྡུག་བསྔལ་ལས་སྐྱོབ་པར་མཛད་པའི་ཐུགས་བསྐྱེད་དང་སྨོན་ལམ་གྱི་ཁྱད་པར་ཡང་། སྔོན་བསྐལ་པ་རྣམ་པར་བཀྲམ་པ་ཞེས་བྱ་བ་ལ་འཇིག་རྟེན་གྱི་ཁམས་འོད་ཟེར་རྣམ་པར་རྒྱན་ཞེས་པར་དེ་བཞིན་གཤེགས་པ་ཉི་མའི་སྙིང་པོའི་བཀོད་པའི་ཞལ་བྱ་བ་འཇིག་རྟེན་དུ་བྱུང་སྟེ། དེའི་དུས་ན་ས་བརྒྱད་པའི་བྱང་ཆུབ་སེམས་དཔའ་རིན་ཆེན་མང་ཞེས་བྱ་བའི་སྲིད་པ་ཐ་མ་ལ་སྐྱེ་བ་གཅིག་གིས་ཐོགས་པ་ཞིག་ཡོད་པ་དེས་སེམས་ཅན་གྱི་དོན་མཛད་པ་ལ་སངས་རྒྱས་པའམ་མ་རྒྱས་པ་གང་འགྲོ་དོན་ཆེ་བར་དགོངས་པའི་ཚེ་སྙིགས་དུས་ཀྱི་འགྲོ་བ་རྣམས་དབུལ་བའི་འཇིགས་པ་ལས་སྐྱོབ་པའི་ཆེད་དུ་རེ་ཞིག་ས་བརྒྱད་ལ་ངལ་གསོས་པའི་ཚུལ་གྱིས་སེམས་ཅན་གྱི་དོན་མཛད་པར་དགོངས་པའི་ཚེ། དེ་བཞིན་གཤེགས་པ་ཉི་མའི་སྙིང་པོས་ཇི་ལྟར་ལུང་བསྟན་པ་བཞིན་དུ་ལྕང་ལོ་ཅན་དུ་གནོད་སྦྱིན་གྱི་རྒྱལ་པོ་རྣམ་མང་ཐོས་སྲས་སུ་སྐྱེ་བ་བཞེས་པར་མཛད་པ་ཡིན་ཏེ། ད་ཡང་རྒྱལ་པོ་རྣམ་ཐོས་སྲས་ཀྱི་ཕོ་བྲང་ལྕང་ལོ་ཅན་ཞེས་བྱ་བ་ནི་རི་རབ་ཀྱིི་བྱང་ཕྱོགས་ན་རིན་པོ་ཆེའི་གཞལ་ཡས་ཁང་། གསེར་གྱི་ཀ་བ་སྟོང་ཕྲག་བརྒྱད་ཅུས་བརྒྱན་པ་རིན་པོ་ཆེའི་ར་བ་དང་གསེར་གྱི་གཉྫིར་སྟོང་ཕྲག་ལྔ་ཡོད་པ། རྣམ་པར་ཐར་པའི་སྒོ་བཞི་དང་ལྡན་པ། ཕྱོགས་མཚམས་བཞི་ནས་འཕགས་པའི་ནོར་བརྒྱད་ཀྱིས་བརྒྱན་ཏེ། ཤར་ནས་དཔག་བསམ་ཤིང་རིན་པོ་ཆེའི་ཤིང་། ནུབ་ན་བུམ་པ་བཟང་པོ་དང་ཁྲུས་རྫིང་། བྱང་ན་ཅང་ཤེས་རྟ་དང་འདོད་འཇོའི་བ། ལྷོ་ན་ཡིད་བཞིན་གྱི་ནོར་བུ་རིན་པོ་ཆེ་དང་། བསམ་འཕེལ་རིན་པོ་ཆེ་སྟེ། དེ་རྣམས་ཐམས་ཅད་ཀྱི་དབུས་ན་རྒྱལ་པོ་རྣམ་ཐོས་སྲས་མི་འཇིགས་སེང་གེའི་ཁྲི་ལ་བཞུགས་ཏེ་འཁོར་སྟོབས་ཆེན་སུམ་ཅུ་རྩ་གཉིས་ཀྱིས་བསྐོར་བ། དེའི་ཕྱི་རིམ་སྡེ་དཔོན་ཉི་ཤུ་རྩ་བརྒྱད་ཀྱིས་བསྐོར་བ། དེའི་ཕྱི་རོལ་ལྷ་དང་ཀླུ་དང་སྲིན་པོ་མཁའ་འགྲོ་མ་དང་གནོད་སྦྱིན་བྱེ་བས་བསྐོར་ཏེ་ལྕང་ལོ་ཅན་གྱི་ཕོ་བྲང་ཞེས་བྱ་སྟེ་གཞན་ཡང་དང་དུང་དུང་ཆེན་པོ་དང་། པདྨ་དང་པདྨ་ཆེན་པོ་དང་། ཨནྡྲ་རྙིལ་དང་ཨནྡྲ་རྙིལ་ཆེན་པོ་དང་། ཀེ་ས་ར་དང་། ཡིད་བཞིན་གྱི་ནོར་བུ་རིན་པོ་ཆེ་གཉིས་ཏེ་གཏེར་ཆེན་པོ་བརྒྱད་དང་ལྡན་ཞིང་འབྱོར་བ་ཟད་མི་ཤེས་པ་ནམ་མཁའ་མཛོད་ལ་མངའ་བརྙེས་པས། སེམས་ཅན་རྣམས་དབུལ་བའི་འཇིགས་པ་ལས་སྐྱོབ་པར་མཛད་དོ། གཞན་ཡང་སྐུ་ཡི་བཀོད་པ་དང་མཚན་གྱི་རྣམ་གྲངས་ནི་མཐའ་ཡས་ཏེ། སྔོན་ལྷ་ཡི་ཡུལ་དུ་ལྷ་མ་ཡིན་གྱི་རྫུ་འཕྲུལ་གྱིས་དམག་དྲངས་ཏེ་ལྷ་སྲིན་ཕམ་པར་བྱས་པའི་ཚེ། ཕྱག་ན་རྡོ་རྗེས་རྣམ་ཐོས་སྲས་བསྐུལ་བས་སྐུ་ཤིན་ཏུ་ཆེ་བ་གསེར་གྱི་ཡ་ལད་ཅན། རི་རབ་ཀྱི་བང་རིམ་ལ་སྟེགས་བཅས་ནས་བཞུགས་པར་བསྟན་པས། ལྷ་མ་ཡིན་རྣམས་ཀྱིས་རྣམ་སྲས་ཀྱི་གཟི་བརྗིད་མ་བཟོད་པར་ཕྱིར་ལོག་ཅིང་། ལྷ་རྣམས་ངལ་བསོས་པར་གྱུར་པས་ངལ་བསོས་པོར་གྲགས་སོ། །དེ་བཞིན་དུ་སེང་གེ་ཁྲོ་ཞིང་འཇིགས་པ་ལ་ཞོན་པ་ཞིག་ཏུ་སྤྲུལ་ཏེ་ལྷ་ཡི་གནས་སྲུང་བས་གནས་སྲུང་པོར་གྲགས་ཤིང་། ཡང་དཔུང་གི་གདོང་དུ་དུག་སྦྲུལ་ཆེན་པོ་ནམ་མཁའ་དང་ཁ་དོག་འདྲེས་པ་མཐོང་བའི་དུག་ཅན་འཇིགས་སུ་རུང་བ་ཞིག་ཏུ་སྤྲུལ་བས་ལུས་ངན་པོར་གྲགས་སོ། །དེའི་ཚེ་ཁྱབ་འཇུག་གིས་མིས་འདྲེན་པའི་ཤིང་རྟ་བཟང་པོ་ཞིག་བྱིན་པས་མི་ལ་ཞོན་པའི་ཀུ་བེ་ར་ཞེས་གྲགས་སོ། །དེ་ལྟ་བུའི་རྒྱལ་པོ་ཆེན་པོ་རྣམ་ཐོས་སྲས་ཉིད་རི་རབ་ཀྱི་རྩེ་དང་དཔལ་ཡོན་ཅན་གྱི་ཕོ་བྲང་དུ་ཕྱག་ན་རྡོ་རྗེས་དབང་སྐུར་ནས་རྡོ་རྗེ་འཇིགས་བྱེད་དུ་མཚན་ཡང་གསོལ་དེ་གཞིན་དུ་རྡོ་རྗེ་འཆང་གི་འོག་མིན་གྱི་གནས་སུ་འཇམ་དཔལ་རྩ་བའི་དལ་དང་། དོན་ཡོད་ཞགས་པ་དང་། ཕྱག་རྡོར་རིག་མཆོག་གི་དལ་དང་། ཁམས་གསུམ་རྣམ་རྒྱལ་རྣམས་ཀྱི་དཀྱིལ་འཁོར་དུ་དབང་བསྐུར་ཞིང་། གཞན་ཡང་རྡོ་རྗེ་གདན་བཞིའི་དཀྱིལ་འཁོར་དུ་དབང་བསྐུར་བའི་གསང་མཚན་དྲག་པོ་ཆེན་པོར་གྲགས་པ་དང་མཁའ་འགྲོ་རྒྱ་མཚོའི་དཀྱིལ་འཁོར་དུ་དབང་བསྐུར་ནས་བྱང་ཕྱོགས་ཚང་ཚིང་འཁྲིགས་པའི་དུར་ཁྲོད་དུ་ཞིང་སྐྱོང་དུ་མངའ་གསོལ་བ་ལ་སོགས་ཏེ། སྔགས་ཀྱི་རྒྱུད་སྡེ་བཞི་པོ་ཐམས་ཅད་ཀྱི་སྲུང་མར་བཅོམ་ལྡན་འདས་ཀྱིས་མངའ་གསོལ་ཞིང་སེམས་ཅན་རྣམས་དབུལ་བའི་སྡུག་བསྔལ་ལས་སྐྱོབ་པར་ཞལ་གྱིས་བཞེས་ཤིང་རིག་པ་ཕུལ་ནས་དམ་བཅས་པ་སྟེ། སྐུ་ཚེ་ཡང་བསྐལ་པ་གཅིག་ཏུ་བཞུགས་ཤིང་བསྐལ་པ་ཕྱི་མ་ལ་ལེགས་མཆོད་བདུད་རྩིའི་དཔལ་བེའུ་ཞེས་བྱ་བར་སངས་རྒྱ་བར་བྱམས་པས་ལུང་བསྟན་ཏེ་མངོན་པར་རྫོགས་པར་འཚང་རྒྱ་བའི་ཚུལ་མཛད་པར་གྲགས་སོ། །དེས་ན་རྒྱལ་ཆེན་འདི་ཉིད་འཕགས་ཡུལ་དུའང་དཔལ་མགོན་ཀླུ་གྲུབ་སོགས་པཎ་གྲུབ་ཀུན་གྱིས་ཆོས་སྐྱོང་དང་ནོར་ལྷའི་གཙོ་བོར་བསྟེན་ཞིང་སྒྲུབ་ཐབས་མང་དུ་འབྱུང་། ཁྱད་པར་བོད་ཡུལ་འདིར། སློབ་དཔོན་ཆེན་པོ་པདྨ་འབྱུང་གནས་ཀྱིས་སངས་རྒྱས་ཀྱི་བསྟན་པ་སྤེལ་བའི་ཚེ་རྒྱལ་ཆེན་འདི་ཉིད་ལས་ལ་བཀོལ་ཞིང་ཕྲིན་ལས་རྣམ་པ་བཞིས་བསྟན་འགྲོའི་དོན་མཛད་པའི་ལོ་རྒྱུས་ཤིན་ཏུ་མང་ཞིང་། འདི་ཡི་གཞུང་ལས་ཀྱང་། འདི་ལྟར་ཤིན་ཏུ་ཟབ་པའི་གདམས་པ་འདི༔ ས་སྐྱོང་རྒྱལ་པོའི་ཐུགས་དམ་ལྷ་ཁང་གི༔ མཐུན་རྐྱེན་སྒྲུབ་ཕྱིར་བདག་གིས་ཉམས་སུ་བླངས༔ མཆིམས་ཕུའི་དགེ་གོང་བྲག་ལ་རྣམ་སྲས་བསྒྲུབས༔ ཐུན་མོང་དངོས་གྲུབ་བོད་ཁམས་ཡོངས་ལ་ཕབ༔ མཆོག་གི་དངོས་གྲུབ་ཆོས་འཁོར་འབྱོངས་པར་བྱས༔ ཞེས་སོགས་གསུངས་པས་ཀྱང་གསལ་མོད་ཀྱི༔ རྣམ་སྲས་ལྗང་ཡུལ་མའི་ལོ་རྒྱུས་སུའང་། ལྷ་སྲས་མུ་རུབ་བཙན་པོ་བྱང་གི་སོ་ཁ་སྲུང་བར་བྱོན་པའི་ཚེ། སློབ་དཔོན་གྱིས་རྣམ་སྲས་རྟ་བདག་བརྒྱད་མངོན་སུམ་བཀུག་ནས་རྒྱལ་བློན་འཁོར་བཅས་ལ་བསྟན་ནས་བཀའ་བསྒོས་ཤིང་། མཐའ་མི་མགོན་བརྩོན་གྱིས་ཇི་ལྟ་བར་བྲིས་པའི་འཕྱར་དར་ལ་སློབ་དཔོན་གྱིས་རྣམ་སྲས་བསྟིམ་པ་གནང་ནས་ལྷ་སྲས་ཁམས་ཀྱི་གཡར་མོ་ཐང་དུ་བྱོན། སྤྲུལ་བའི་དམག་གྲངས་མེད་པས། རྒྱ་ཧོར་གྲུ་གུ་རྣམས་བཅོམ་ཞིང་ཁྱད་པར་དུ་བྷ་ཏ་ཧོར་གྱི་སྒོམ་གྲྭ་བཅོམ་པའི་རྒྱལ་པོ་པེ་དཀར་སྐྲག་ནས་བྱ་རྒོད་ཞིག་ཏུ་སྤྲུལ་ནས་འབྲོས་པར་བརྩམས་པས། གནོད་སྦྱིན་ཞིག་གིས་མདའ་འཕང་པ་གཤོགས་པ་ལ་ཐེབས་ཏེ་ས་ལ་ལྷུང་བ་རྣམ་སྲས་འཁོར་བཅས་ཀྱིས་བཟུང་ནས་བསམ་ཡས་སུ་བསྐྱལ་བའི་ལོ་རྒྱུས་དང་། གཞན་ཡང་ཉང་གི་གཏེར་ཁའི་རྣམ་སྲས་སྤྲིན་གསེབས་མ་སོགས་ཀྱི་ལོ་རྒྱུས་ལས་ཀྱང་ཞིབ་པ་འབྱུང་བ་ལྟར། མདོར་ན་སློབ་དཔོན་ཆེན་པོའི་ཆོས་སྐྱོང་གི་གཙོ་བོར་མཛད་ཅིང་བོད་ཡུལ་གྱི་སྲུང་མར་བསྐོས་པའི་ཕྱིར། དེས་ན་རྙིང་ལུགས་ཁོ་ན་བྱིན་རླབས་ཆེ་ཞིང་སྒྲུབ་ཐག་ཉེ་བ་ཡིན་ཏེ། སྒྲུབ་ཐབས་དང་གདམས་པའང་། སེར་ཆེ་སྤྲིན་གསེབས་མ། མདུང་དམར་ཅན་དྲག་པོ་རྟ་སྔོན་ཅན་སོགས་ཟབ་ཅིང་རྒྱ་ཆེ་བའི་ལོ་རྒྱུས་གདམས་བསྐོར་དཔག་ཏུ་མེད་པར་གཏེར་ཁ་སོ་སོ་ནས་འབྱུང་མོད་ཀྱི། དེ་ལས་ད་ལམ་གྱི་གདམས་པ་འདི་ཉིད་ཀྱི་ལོ་རྒྱུས་ནི། ཇི་སྐད་དུ། པདྨ་བཀའ་ཡི་ཐང་ཡིག་ལས། མི་ལ་ལུས་ཆས་ཡ་མ་ཟུང་དུ་འོང་༔ བསྟན་པའི་ཆོས་ཀྱང་ཡ་མ་ཟུང་དུ་འགྲོ༔ དགེ་རྒྱས་བྲིས་པའི་རི་མོ་ཤུལ་རྗེས་འབྱུང་༔ ཁམས་ཀྱི་སྲིང་མོ་རྫོང་གསུམ་གཏེར་ཁ་འདི༔ མི་བཞག་འདོན་པའི་རྟགས་དེར་བསྟན་ནས་བྱུང་༔ ཁམས་པ་ཉི་མ་གྲགས་ཀྱི་མང་ཅན་འབྱུང་༔ ཞེས་གསུངས་པ་ལྟར། གནས་དང་གང་ཟག་གཉིས་ཀ་ཨོ་རྒྱན་རྒྱལ་བ་གཉིས་པས་འཁྲུལ་བ་མེད་པའི་རྡོ་རྗེའི་གསུང་གིས་ལུང་དུ་བསྟན་པ་བཞིན། རྩོད་དུས་ཀྱི་རྒུད་པའི་མུན་པ་མཐའ་དག་ཅིག་ཅར་དུ་འཇོམས་ཤིང་། བསྟན་འགྲོའི་ཕན་བདེའི་སྣང་བའི་དགའ་སྟོན་གསར་དུ་སྦྱིན་པའི་ཉི་མ། གཏེར་ཆེན་ཆོས་ཀྱི་རྒྱལ་པོ་གར་དབང་འགྲོ་འདུལ་གླིང་པའམ་རིག་འཛིན་ཆེན་པོ་ཉི་མ་གྲགས་པ་རྩལ་ཞེས་མཚན་ཉི་ཟླ་ལྟར་གྲགས་པ་གང་དེས་ཁམས་ཀྱིི་སྲིང་མོ་རྫོང་གསུམ་དུ་གྲགས་པའི་ཡ་རྒྱལ་སྲིང་མོ་རྫོང་མཆོག་ནས་གཏེར་ནས་གདན་དྲངས་པའི་གདམས་པ་འདི་ནི། གཞུང་ལས། གདམས་པའི་གནད་ཐིག་བརྡ་ཡི་ཡི་གེར་བཏབ༔ ཕྱོགས་བཞི་དབུས་དང་བཅས་པའི་གཏེར་ལྔར་སྦས༔ ཁྱད་པར་འཕགས་པའི་གདམས་པའི་སྙིང་པོ་འདི༔ མ་འོངས་དོན་དུ་ཤར་ཕྱོགས་མཐོན་པོའི་རི༔ ཁམས་ཀྱི་སྲིང་མོ་རྫོང་གི་ཤར་ལྷོའི་འདབས༔ སྒྲུབ་གནས་ནོར་བུ་འདྲ་བའི་རི་ལ་སྦས༔ ཞེས་དང་། ནོར་སྒྲུབ་གདམས་པ་ཀུན་གྱི་མཐར་ཐུག་པ༔ ཡིན་ནོ་ཆོས་རྒྱལ་ཡབ་སྲས་ཐུགས་ལ་ཆོངས༔ མ་འོངས་དོན་དུ་ཡི་གེའི་རིས་སུ་ཐོབ༔ ཤར་ཕྱོགས་མཐོན་པོའི་སྲིང་མོ་རྫོང་གི་ལྷོར༔ སྒྲུབ་གནས་ནོར་བུ་འདྲ་བའི་རི་ལ་སྦོས༔ ཞེས་གསུངས་པ་ལྟར་ནོར་སྒྲུབ་གདམས་པ་ཀུན་གྱི་ཡང་སྙིང་ཁྱད་པར་འཕགས་པའི་གདམས་ཟབ་འདི་ཉིད་གང་གིས་ཉམས་སུ་བླངས་ཀྱང་དངོས་གྲུབ་མི་ཟད་པའི་དཔལ་དང་ལྡན་པར་འབྱུང་ངེས་ཏེ། གཞུང་ལས། སྔ་མའི་སྦྱིན་འབྲས་མེད་པ་འཕགས་པ་རྒུར་ཆུང་ལྟ་བུ་ཡིན་ཀྱང་། ཚེ་འདི་ལ་ལོངས་སྤྱོད་ཀྱི་དངོས་གྲུབ་ཐོབ་པར་འགྱུར་རོ། །དེ་བཞིན་དུ་རྒྱལ་པོའི་བློན་པོ་རྡོ་རྗེ་སྤྲེལ་ཆུང་འདིས་དཀོན་མཆོག་གི་དཀོར་ལ་བག་མེད་པར་སྤྱད་ཅིང་པྲ་ཏི་ཧ་ནའི་མཆོད་པ་ལ་འཕྲིས་པས་གང་ནས་གང་དུ་སྐྱེས་ཀྱང་ལོངས་སྤྱོད་ཀྱི་འདུ་བ་མེད་པ་འདི་ལྟ་བུ་ཡིན་ཀྱང་དང་དུ་བླངས་ན། ལོངས་སྤྱོད་དང་ལྡན་པར་ནུས་སོ། །དེ་བཞིན་དུ་རླངས་གཉན་པ་ལྟ་བུའི་ཚེ་སྔ་མར་དབང་ཡོད་ཀྱིས་གཞན་གྱི་ནོར་བཅོམ་དུ་མ་བྱས་པས། བཀྲེན་བཀྲེན་པོར་གྱུར་པ་ལྟ་བུས་ཀྱང་དང་དུ་བླངས་ནས་དཔལ་བཟང་པོ་དང་ལྡན་པར་ནུས་སོ། །ཞེས་སོགས་གསུངས་པ་ལྟར་གདམས་པ་གཞན་ལས་ཆེས་ཟབ་ཅིང་། ཟབ་ཁྱད་དུ་མ་དང་ལྡན་པ་བྱིན་རླབས་དང་དངོས་གྲུབ་ཀྱི་ཚན་ཁ་གཞན་ལས་ཤིན་ཏུ་ཆེ་ངེས་ཤེས་པ་ལགས། དཔེ་ནས་གདམས་པ་ཟབ་མོ་དེ་ལྟ་བུ་ཉམས་སུ་ལེན་པ་ལ་ཐོག་མར་དབང་བསྐུར་ཐོབ་པ་ཤིན་ཏུ་གལ་ཆེ་སྟེ་ཕྱག་རྒྱ་ཆེན་པོ་ཐིག་ལེ་ལས། དབང་མེད་ན་ནི་དངོས་གྲུབ་མེད། །བྱེ་མ་བཙིར་ན་མར་མེད་བཞིན། །ཞེས་གསུངས་པ་ལྟར། སྔགས་ཀྱི་རིམ་གཉིས་ལ་བརྟེན་པའི་དངོས་གྲུབ་ཇི་འདྲ་ཞིག་བསྒྲུབས་ཀྱང་ཐོག་མར་དབང་བསྐུར་ནས་སྣོད་དུ་རུང་བར་ངེས་པར་བྱ་དགོས་པ་ཡིན། །དེས་ན་ད་ལམ་ཁྱེད་རང་རྣམས་ལ་གདམས་ཟབ་གང་འདིའི་སྒོ་ནས་དབང་བསྐུར་བ་སྐབས་སུ་བབས་པས། ཁྱེད་རང་རྣམས་ཀྱི་དག་པའི་སྣང་བ་བསྐྱེད་དེ། ས་ཕྱོགས་འདི་དག་ཀྱང་ཐ་མལ་གྱི་ཡུལ་འདི་ལྟ་བུ་མ་ཡིན་པར་ལྕང་ལོ་ཅན་གྱི་ཕོ་བྲང་དངོས་ཡིན་སྙམས་པ་དང་། ཆོས་སྟོན་པའི་རྡོ་རྗེ་སློབ་དཔོན་ཀྱང་ཐ་མལ་དུ་མི་བཟུང་ལ་དཔལ་གསང་བའི་བདག་པོ་དངོས་ཡིན་སྙམས་པའི་མོས་པ་རྩེ་གཅིག་ཏུ་མཛོད་ལ་དབང་བསྐུར་ཟབ་མོ་ཞུ་བའི་ཡོན་དུ་དམིགས་ཏེ་མཎྜལ་འབུལ་བར་ཞུ། དབང་བཤད་ཉུང་ངུར་བགྱིས་འདི་རྣམ་འདྲེན་ཆེ། །ཨཀྵ་ར་ཡི་བཞེད་བསྐོང་ཁོ་ནའི་ཆེད། བྱ་བྲལ་རྒན་པོས་ཟིན་ཐོར་ཕུལ་ལགས་ཀྱང་། །རང་ཉིད་དགེ་སྦྱོར་བྱང་རྫི་ལས་གཞན་ཅི། །ཀྱེ་མ། རྒ་བས་ཡིད་སྐྱོ་སྒྲུབ་ལ་བློ་གཞོལ་ཡང་། །ཡང་དག་འཇོག་ལ་གོམ་པར་མི་བྱེད་པར། །དོན་མེད་འཁྲུལ་ཚིག་སྲིན་བུའི་རྗེས་འདྲ་འགའ། འབྲི་ཁྱོད་ཅི་སེམས་འཁྲུལ་པར་ཤེས་མཛོད་ཅིག །ཅེས་པ་ཝཱ་གིནྡྲིས་བརྗོད་པ་མངྒ་ལཾ། །

དབང་ཆོག་ཁྲིགས་སུ་སྡེབས་པ་འདོད་འཇོའི་བུམ་བཟང་།

ནོར་བདག་ཡིད་བཞིན་ནོར་བུའི་དབང་ཆོག་ཁྲིགས་སུ་སྡེབས་པ་འདོད་འཇོའི་བུམ་བཟང་ཞེས་བྱ་བ་བཞུགས་སོ། །ན་མོ྅ངྷི་དཱེ་བ་གུ་ཧྱ་ས་ཏེ་ཡ། ཁྱོད་མཚན་འོད་བརྒྱའི་ཆ་ཤས་ཕྲ་མོས་ཀྱང་། །གདུང་ཅན་མུན་པ་བཅོམ་དང་ལྷན་ཅིག་ཏུ། །ཕན་བདེའི་སྣང་བ་སྦྱིན་བྱེད་རྡོ་རྗེ་ཅན། །བླ་མ་གསང་བའི་བདག་པོས་འགྲོ་འདི་སྲུངས། །དངོས་གྲུབ་རིན་པོ་ཆེ་ཡི་ཁང་བཟང་དུ། །དགེ་ལེགས་འདོད་དགུ་ཆར་དུ་བསྙིལ་བའི་ལྷ། །གནོད་སྦྱིན་རྒྱལ་པོའི་དབང་ཆོག་འཇུག་བདེ་བའི། །ཆོག་ཁྲིགས་འདོད་པ་འཇོ་བའི་བུམ་བཟང་བྱ། འདིར་ནོར་བདག་ཡིད་བཞིན་ནོར་བུའི་དབང་བསྐུར་ཇི་ལྟར་བྱ་བའི་ཚུལ་ཁྲིགས་སུ་སྡེབས་པར་བྱ་སྟེ། དེ་ཡང་གཏེར་གཞུང་རྩ་བར། ནོར་བདག་ཡིད་བཞིན་ནོར་བུ་ལས༔ དབང་ཆོག་དགོས་འདོད་ཀུན་འབྱུང་བཞུགས༔ ཁྲོ་བོའི་རྒྱལ་ལ་ཕྱག་འཚལ་ལོ༔ དཔལ་བཟང་པོ་དང་ལྡན་པའི་གནས་རི་ནས༔ གཟའ་སྐར་ལས་མཐུན་ལྟར་དར་བའི་དུས་སུ༔ གནས་ཁང་གི་ཁྱོན་ལྟར་སྟེགས་བུ་ས་སྣ་ཅི་མང་དང་། ཁྱད་པར་སྡེ་དགོན་གནས་གཞི་ཚོང་དུས་ཀྱི་ས་བསྡུས་ལ༔ དཀྱིལ་འཁོར་གྱི་བྱ་བ་མཐར་སོན་པར༔ རྐྱང་ནུལ་བྱ་ཞིང་དྲི་བཟང་གིས་ཆག་ཆག་གདབ༔ ཐིག་ནས་དྲངས་ཤིང་སྒོ་གྲུ་རྟ་བབས་བཞི་བཞིར་ལྡན་པའི་ཕྱི་རོལ་ཏུ་ཕྱོགས་བཞིར་གཏེར་གྱི་བུམ་པ་བཞི༔ མཚམས་བཞིར་ཁང་པ་བཞི༔ དེ་དག་གིས་བར་མཚམས་རྣམས་སུ་དཔག་བསམ་གྱི་ཤིང་༔ མ་རྨོས་པའི་ལོ་ཏོག༔ འདོད་འཇོའི་བ༔ ཁྲུས་ཀྱི་རྫིང་བུ༔ རིན་པོ་ཆེའི་ར་བ་སུམ་རིམ་དང་ལྡན་པའི་ལྟེ་བར་ལྷ་གྲངས་ཀྱི་པདྨ་མདོག་མཚུངས་ཀྱི་ཚོན་གྱིས་བཅད་ཅིང་༔ ཕྱི་རོལ་གྱི་འཁྱམས་ཀླུ་བརྒྱད་ཡན་གྱི་མདོག་ལྟར་རྡུལ་ཚོན་གྱི་ཚོམ་བུ་བཀོད་ཅིང་མཛེས་པར་བྱས་པའི་དབུས་སུ༔ གསེར་དང་པད་རཱག་ཨིཎྜ་གསུམ་གྱི་མདངས་ལྡན་མཁར་ཐབས་གཏོར་མ་སྨན་སྤོས་འབྲུ་སྣའི་ཟན་ལ་གྲུབ་པ་རྒྱན་བཀོད་ཕུན་སུམ་ཚོགས་པ༔ ཤར་དུ་སྒྲུབ་ཡིག༔ ལྷོར་ནེའུ་ལེའི་རྐྱལ་པ༔ ནུབ་ཏུ་ལྗོན་དམར་རམ་ཟངས་བུམ་མགུལ་ཆིངས་སྔོན་པོ་གཟུངས་ཐག་དུང་ཆོས་སྒྲོ་མདོངས་འབྲས་བུ་ཅན་གྱི་ཤིང་སོགས་ཀྱིས་བརྒྱན་པ་དྲི་བཟང་གི་ཆུས་སུམ་ཆ་བཀང་བ་འགོད༔ བྱང་དུ་རྒྱལ་མཚན་མཐའ་བསྐོར་དུ་མཆོད་ཚོགས་སྲུང་མའི་གཏོར་མ་སོགས་བཟང་དུ་འགོད༔ ལས་ཀྱི་གཞུང་བསྲང་བདག་མདུན་བསྐྱེད་རིམ་གསལ༔ བསྙེན་སྒྲུབ་ཁ་གསོ༔ ཚོགས་ཀྱི་འཁོར་ལོས་བསྐང་༔ དངོས་གྲུབ་ཞུ༔ ལས་བུམ་བསྐྱེད༔ སློབ་མ་ཁྲུས་ནས་ཕྱུངས༔ དཀར་ཕྱོགས་སྐྱོང་བ་མཆོད༔ ནག་ཕྱོགས་བསྐྲད༔ བསྲུང་བའི་འཁོར་ལོས་གོ་བསྒོ༔ ལག་གཡོན་རིན་པོ་ཆེའི་མཎྜལ་ཁྱད་པར་ཅན་རེ་མེད་པ་ལ༔ རྟེན་འབྲེལ་གྱི་ཆེ་བ་བླ་མ་དང་སློབ་མའི་མཚམས་སྦྱོར་བཟང་པོ་དགོས་པས་དབང་སྦྱིན་པར་མི་བྱ༔ ཁྱད་པར་དུའང་བསྟན་འགྲོའི་དོན་ནུས་པའི་བུ་མ་གཏོགས་དངོས་གྲུབ་ཀྱི་གཏེར་ཁ་གཏད་ཀྱང་བདག་དོན་ནུས་ཀྱང་གཞན་དོན་མི་ནུས་པས༔ སྣོད་ལྡན་ཡིན་ངེས་ལ་ཆིག་བརྒྱུད་ལས་སྤེལ་བར་མི་བྱ་ཕག་ཏུ་སྦོས་ཤིག༔ ས་མ་ཡཱ༔ རྒྱ་རྒྱ་རྒྱ༔ དེ་ཡན་གཞུང་ཁ་གསལ་ཟུར་དུ་བྲི་མ་དགོས་པས་དེ་ལྟར་བཤམས་སྒྲུབ་ཚར་ནས་ལས་བུམ་བསངས། སྟོང་པའི་ངང་ལས་བུམ་པ་ནི། །རིན་པོ་ཆེ་ཡི་གཞལ་ཡས་ཁང་། །མཚན་ཉིད་རྫོགས་པའི་ནང་ཉིད་དུ། དབང་གི་ཁྲོ་བོ་རྟ་མཆོག་དཔལ། །དམར་པོ་རྡོར་དྲིལ་ཡུམ་ལ་འཁྱུད། །རྟ་མགོས་མཚན་ཞིང་ཁྲོ་ཆས་རྫོགས། སྐུ་ལས་སྤྲུལ་པའི་ཁྲོ་ཆུང་གིས། །གདོན་བགེགས་བཅོམ་ནས་བུམ་པའི་ཆུར། །ཐིམ་པས་བུམ་ཆུ་ནུས་ལྡན་གྱུར། །ཨཱོཾ་བཛྲ་ཀྲོ་ཏ་ཧྱ་གྷྲི་ཝ་ཧཱུྃ་ཕཊ༔ གང་མང་བཟླས་རྗེས། ཁྲོ་བོ་ཞུ་ནས་བུམ་ཆུར་འདྲེས། །ལས་ཀུན་བསྒྲུབ་པའི་བདུད་རྩིར་གྱུར། །ཞེས་འོད་ཞུ་བྱ། གཞན་ཡང་རྟགས་བརྒྱད་སྣ་བདུན་ཙཀླི་དང་། ཉེ་བར་མཁོ་བའི་ནས་ཟེ། སྤོས་ཐུན། བགེགས་གཏོར། དབང་ཡོན་མཎྜལ་སོགས་ཚོགས་པར་བྱས་ལ། སློབ་བུ་རྣམས་གྲལ་དུ་འཁོད། ཁྲུས་བྱས། བགེགས་བསྐྲད། བསྲུང་བའི་འཁོར་ལོ་བསྒོམ་པ་སོགས་སྦྱི་ལྟར་མཐུས། དེ་ནས་བླ་མས་ཆོས་བཤད་རྒྱས་བསྡུས་ཅི་རིགས་ལ་ཆོས་དང་གདམས་པའི་ལོ་རྒྱུས་འབྲེལ་ཆགས་པ་ཁ་ཤས་འཚམས་པར་བརྗོད་ལ། སློབ་བུ་རྣམས་ཀྱིས་མཎྜལ་ཕུལ། དེ་ནས་སྣོད་དང་ལྡན་ངེས་ཀྱི་བུ་ལ་ཐོ་རངས་རྒྱས་པའི་དུས་སམ་དགོང་མོ་དབང་གི་དུས་སུ་འདི་སྐད་བརྗོད་པར་བྱ་སྟེ༔ ཀྱེ༔ འདིར་ཚོགས་ཀྱི་བུ་ཁྱོད་བྱང་ཆུབ་ཀྱི་སེམས་དང་ལྡན་ནམ༔ བདག་གཞན་གྱི་དོན་སྤྱོད་པར་ནུས་སམ༔ བསྙེན་སྒྲུབ་ཟབ་མོ་ཡལ་བར་མི་གཏོང་ངམ༔ བཀའ་བཞིན་བསྒྲུབ་ཅིང་དམ་ལ་གནས་ན་ཁྱོད་ལ་མཆོག་དང་ཐུན་མོང་གི་དངོས་གྲུབ་ཡང་དག་པར་གཏད་པས་ཇི་ལྟར་བགྱིད༔ སློབ་མས༔ དཔལ་ལྡན་བླ་མ་དགོངས་སུ་གསོལ༔ ལུས་ངག་ཡིད་གསུམ་བྲན་དུ་འབུལ༔ བཀའ་བཞིན་བསྒྲུབ་ཅིང་དམ་ལ་གནས༔ བསྙེན་སྒྲུབ་ཟབ་མོ་དང་དུ་ལེན༔ བདག་གཞན་དོན་གཉིས་དཔལ་ལ་སྤྱོད༔ དཔའ་བོ་ཆེན་པོས་རྗེས་སུ་བཟུང་༔ མཆོག་དང་ཐུན་མོང་དངོས་གྲུབ་སྩོལ༔ གསུམ༔ ད་ཁྱེད་རང་གིས་བླ་མ་དང་དཀྱིལ་འཁོར་ལྷག་པའི་ལྷ་དང་གཉིས་སུ་མེད་པའི་འདུན་པས་སྐྱབས་སུ་འགྲོ་བ་དང་སེམས་བསྐྱེད་པ་འདི་བཞིན་སྨྲོས་ཤིག༔ ཧཱུྃ༔ བརྒྱུད་པ་ཀུན་འདུས་རྡོ་རྗེ་འཆང་༔ དཔལ་ལྡན་རྩ་བའི་བླ་མ་དང་༔ རྩ་གསུམ་ནོར་ལྷ་རྒྱ་མཚོ་ལ༔ བྱང་ཆུབ་བར་དུ་སྐྱབས་སུ་མཆི༔ གསུམ༔ བདག་གཞན་དབུལ་བ་རྒྱུན་གཅོད་ཅིང་༔ མར་གྱུར་འགྲོ་རྣམས་སྒྲོལ་བའི་ཕྱིར༔ ནོར་བདག་ཡིད་བཞིན་ནོར་བུ་ལས༔ བསྙེན་སྒྲུབ་མཆོད་བསྟོད་ཡང་དག་བརྩམས༔ ཀུན་ཀྱང་བྱང་ཆུབ་མངོན་གྱུར་ཅིག༔ གསུམ༔ དེ་ལྟར་ཐུན་མོང་དུ་སྐྱབས་སེམས་ཀྱིས་རྒྱུད་དག་པར་བྱས་ནས་ཐུན་མོང་མ་ཡིན་པར་ཡེ་ཤེས་དབབ་པས་རྒྱུད་སྦྱངས་པའི་ཕྱིར་ཐོག་མར་དམ་ཚིག་ལ་གཅེས་སྤྲས་སུ་བྱ་བའི་ཕྱིར་དམ་ཆུ་བླུད་ཅིང་དམ་ཚིག་ལ་གནས་པར་བསྡོམ་སྟེ༔ དམ་ཚིག་གི་ཆུ་སྦྱིན༔ ཧཱུྃ་འདི་ནི་དམ་ཚིག་གསང་བའི་ཆུ༔ བུ་ཁྱོད་འཐུང་ལ་དམ་ཚིག་བསྲུང་༔ གསང་སྔགས་འདི་ཡི་ལྟ་སྤྱོད་རྣམས༔ གཞན་ལ་མ་སྨྲ་ཉམས་སུ་ལོངས༔ མཆོག་ཐུན་དངོས་གྲུབ་ཐོབ་པར་འགྱུར༔ ཨཱོཾ་ཨཱཿཧཱུྃ་ས་མ་ཡཱ་སྭཱ་ཧཱ༔ ཆོས་སྨན་ལྡན་པའི་ཆུ་སྦྱིན༔ ཡེ་ཤེས་པ་དབབ་པའི་ཕྱིར་དུ་དམིགས་པ་འདི་བཞིན་གྱིས་ཤིག༔ ལས་བུམ་ཆུས་བསངས་ཤིང་། སློབ་དཔོན་གསང་བདག་ཏུ་གསལ་བའི་ཐུགས་ཀའི་འོད་ཀྱིས་སློབ་མའི་རྒྱུད་སྦྱོང་སྟེ། ཨཱོཾ་མ་ཧཱ་ཤུ་ནྱ་ཏཱ་ཛྙཱ་ན་བཛྲ་སྭཱ་བྷཱ་ཝ་ཨཏྨ་ཀོ྅་ཧཾ། ཞེས་བརྗོད་པས་རྣམ་སྨིན་གདོས་བཅས་ཤ་ཁྲག་གི་ལུས་འདིས་མཚོན་པའི་མ་དག་པའི་དངོས་པོ་ཐམས་ཅད་སྟོང་པར་སྦྱངས། སྟོང་པའི་ངང་ལས་སྣང་བའི་ངོ་བོ་རྣམ་མང་ཐོས་སྲས་རྒྱལ་པོའི་ཕོ་བྲང་གཞི་དང་བཀོད་པ་ཚད་མེད་པར་རིན་པོ་ཆེ་གསེར་དང་པདྨ་རཱ་ག་ཨིནྡྲ་ནི་ལ་སྟེ་ཐོག་བརྩེགས་རིམ་པ་གསུམ་གྱི་རྣམ་པ་ལ་སྒོ་དང་རྟ་བབས་མདའ་ཡབ་དང་པུ་ཤུས་མཛེས་པར། རིན་པོ་ཆེ་སྣ་ཚོགས་པའི་དྲ་བའི་ཆུན་འཕྱང་དུ་མས་བརྒྱན་པ་ཤིན་ཏུ་རྒྱ་ཆེ་ཞིང་ཡངས་པ་བ་དན་རྒྱལ་མཚན་ལ་སོགས་པའི་རྒྱན་དང་འདོད་འབྱུང་གི་བུམ་པ་དཔག་བསམ་གྱི་ཤིང་། ཁྲུས་ཀྱི་རྫིང་བུ། ཅང་ཤེས་ཀྱི་རྟ། སྤོས་ཀྱི་གླང་པོ། གཏེར་གྱི་ཁང་ཁྱིམ་ལ་སོགས་བཀོད་པ་ཚད་མེད་པའི་དབུས་སུ་རིན་པོ་ཆེ་དང་པདྨ་དང་ཉི་ཟླའི་གདན་གྱི་སྟེང་དུ་སེམས་ཉིད་ཀྱི་རང་རྩལ་ལས་ནོར་བདག་ཡིད་བཞིན་ནོར་བུ་སྐུ་མདོག་བཻཌཱུར་ཡ་སྔོན་པོ་དྲི་མ་མེད་པ་ལྟ་བུ་ལ་ཞལ་གཅིག་ཁྲོ་འཛུམ་བཞད་པའི་ཉམས་ཅན་ལྷ་ཡི་གོས་པཉྩ་ལི་ཀ་དགུ་བརྩེགས་ཀྱི་འཇོལ་བེར་དང་། དབུ་སྐྲ་རལ་པའི་ཐོར་ཚུགས་ལ་རིན་པོ་ཆེའི་པྲོག་ཞུ་དང་། རིན་པོ་ཆེའི་རྒྱན་ཕྲེང་དུ་མས་བརྒྱན་པ། ཕྱག་གཡས་རིན་པོ་ཆེས་མཚན་པའི་རྒྱལ་མཚན་དང་། གཡོན་འདོད་འབྱུང་ནེའུ་ལེའི་རྐྱལ་པ་བསྣམས་པ། ཞབས་རྒྱལ་པོ་རོལ་པའི་སྟབས་ཀྱིས་བཞུགས་པའི་ཕྱོགས་བཞིར། ཐུགས་འཛིན་གསང་བའི་ཡུམ་བཞི། དེའི་ཕྱི་རོལ་གྱི་ཕྱོགས་བཞིར་རྣམ་སྲས་རིགས་བཞི། མཚམས་བཞིར་སྲས་མཆོག་ཛམ་ལྷ་རིགས་བཞི། དེའི་ཕྱི་རོལ་དུ་གནོད་སྦྱིན་ཆེན་པོ་བརྒྱད། དེའི་ཕྱི་རོལ་དུ་ཀླུ་ཆེན་པོ་བརྒྱད། སྒོ་བཞི་སྒོ་སྐྱོང་བཞི། གཞན་ཡང་གནོད་སྦྱིན་ནོར་ལྷའི་ཚོགས་དཔག་ཏུ་མེད་པ་ལྷ་མིའི་ཁྲོམ་ཚོགས་པ་ལྟར་གསལ་བར་བསྒོམ་ཞིང་། དེ་དག་ཀྱང་རང་གི་རྣམ་ཤེས་དང་དབང་པོ་ཐབས་དང་ཤེས་རབ་ཀྱི་རོལ་པ་ལས་གཞན་དུ་མ་ཡིན་པར་རྩེ་གཅིག་ཏུ་བསྒོམ་ཞིང་ལྷ་ཚོགས་ཐམས་ཅད་ཀྱི་གནས་གསུམ་འབྲུ་གསུམ་རང་རང་གི་ཐུགས་ཀའི་ས་བོན་ལས་འཕྲོས་པའི་འོད་ཟེར་དང་། བླ་མ་གསང་བའི་བདག་པོར་གསལ་བའི་སྐུ་ལས་ཀྱང་འོད་ཟེར་བསམ་གྱིས་མི་ཁྱབ་པར་འཕྲོས་པས་བྱང་ཕྱོགས་ལྕང་ལོ་ཅན་སོགས་རྒྱལ་བའི་ཞིང་ཁམས་རབ་འབྱམས་རྒྱ་མཚོ་ཇི་སྙེད་པ་ནས། ཡེ་ཤེས་པ་དཔག་ཏུ་མེད་པ་བྱུང་ནས་ཁྱེད་རང་ལྷར་གསལ་བ་ལ་གཉིས་མེད་དུ་ཐིམ་བྱུང་སྙམས་པའི་མོས་པ་མཛོད། ཞེས་དམིགས་སྤྲད་དེ། དེའང་གཞུང་ལས། དེ་ནས་ཤུ་ནྱ་ཏའི་སྔགས་དང་ལས་བུམ་གྱི་ཆུས་སློབ་མ་བསངས་སྦྱངས། །སྟོང་པའི་ངང་ལས་སྣང་བའི་ངོ་བོ་རྣམ་ཐོས་རྒྱལ་པོའི་ཕོ་བྲང་ལ། སེམས་ཉིད་ཀྱི་རང་རྩལ་ནོར་བདག་ཡིད་བཞིན་ནོར་བུ། །རྣམ་ཤེས་དང་དབང་པོ་ཐབས་དང་ཤེས་རབ་ཀྱི་རོལ་པ༔ ཡབ་ཡུམ་སྲས་དང་འཁོར་ཚོགས་ཚངས་བར་མངོན་རྟོགས་ལྟར་སྒོམ༔ སྤྱན་འདྲེན༔ ཡེ་ཤེས་པ་བསྟིམ༔ ཞེས་པས་སྤོས་རོལ་དང་བཅས་བྱིན་དབབ༔ ཧཱུྃ༔ བདག་ཉིད་ཁྲོ་བོའི་རྒྱལ་པོའི་ཐུགས་ཀ་ནས༔ ལྔ་ལྡན་འོད་ཟེར་ལྕང་ལོ་ཅན་དུ་འཕྲོས༔ རྒྱལ་པོ་ཆེན་པོ་རྣམ་ཐོས་ནོར་མང་བུ༔ མ་ལུས་འཁོར་དང་བཅས་པ་རྣམས་ལ་ཕོག༔ སྔོན་གྱིདམ་ཚིག་དབང་གིས་རྒྱུད་བསྐུལ་ནས༔ བསྒྲུབ་པའི་གནས་འདིར་སྤྱན་འདྲེན་གཤེགས་སུ་གསོལ༔ སྐུ་གསུང་ཐུགས་ཡོན་ཕྲིན་ལས་རྣམ་ཐོས་སྲས༔ ཐུགས་འཛིན་གསང་ཡུམ་སྲས་མཆོག་ཛམ་ལྷའི་ཚོགས༔ གནོད་སྦྱིན་བརྒྱད་དང་ཀླུ་བརྒྱད་གནོད་སྦྱིན་འབུམ༔ བྱེ་བ་དུང་ཕྱུར་བཀའ་ཉན་བྲན་གཡོག་བཅས༔ ཐུགས་རྗེའི་སྟོབས་བསྐྱེད་གནས་འདིར་གཤེགས་སུ་གསོལ༔ ཁམས་གསུམ་དབང་དུ་བསྡུད་ཕྱིར་གཤེགས་སུ་གསོལ༔ སྲིད་གསུམ་ཟིལ་གྱིས་གནོན་ཕྱིར་གཤེགས༴ མཆོག་གི་དངོས་གྲུབ་སྩོལ་ཕྱིར༴ ཐུན་མོང་ཆར་ལྟར་འབེབས་ཕྱིར༴ གྲུབ་པ་རྣམ་བརྒྱད་སྩོལ་ཕྱིར་གཤེགས་སུ་གསོལ༔ ཨཱོཾ་བྷཻ་ཤ་ར་མ་ཎ་ཡེ་བཛྲ་ས་མ་ཡ་ཛཿཛཿ ཏིཥྛ་བཛྲ་གྱིས་བརྟན་པར་བྱའོ༔ དེ་ནས་གཏོར་མ་གཞལ་ཡས་ལྷ་ཚོགས་འཁོར་བཅས་སྤྱི་བོར་བྱོན༔ སྐུ་ཡོངས་སུ་རྫོགས་པའི་དབང་ཐོབ་པར་བསམས༔ ཧཱུྃ༔ གཏོར་མ་རིན་ཆེན་གཞལ་ཡས་ཁང་བཟང་དུ༔ ནོར་བདག་རྒྱལ་པོ་རྣམ་མང་ཐོས་སྲས་ཀྱི༔ ལྷ་ཚོགས་མ་ལུས་འཁོར་དང་བཅས་པ་བཞུགས༔ སྐལ་ལྡན་རིགས་ཀྱི་བུ་ལ་དབང་བསྐུར་བས༔ ནོར་ལྷ་རྒྱ་མཚོའི་སྐུ་ཡི་དབང་ཐོབ་ཤོག༔ རྩ་སྔགས་ཀཱ་ཡ་ཨ་བྷི་ཥིཉྩ་ཧཱུྃ༔ སོགས༔ ནུབ་ཀྱི་བུམ་པ་མགྲིན་པར་བཞག༔ ཧཱུྃ༔ རིན་ཆེན་བུམ་པ་བཅུད་ཀྱིས་གཏམས་པ་འདི༔ ནོར་བདག་རྒྱལ་པོ་རྣམ་མང་ཐོས་སྲས་ཀྱི༔ ལྷ་ཚོགས་རྣམས་ཀྱི་གསུང་དང་གཉིས་སུ་མེད༔ སྐལ་ལྡན་རིགས་ཀྱི་བུ་ལ་དབང་བསྐུར་བས༔ ནོར་ལྷ་རྒྱ་མཚོའི་གསུང་གི་དབང་ཐོབ་ཤོག༔ རྩ་སྔགས་ཝཱཀྐ་སོགས༔ ཤར་གྱི་སྒྲུབ་ཡིག་སྙིང་གར་བཞག༔ ཧཱུྃ༔ དཔེ་བུམ་རིན་ཆེན་དགོས་འདོད་ཀུན་འབྱུང་འདི༔ ནོར་བདག་རྒྱལ་པོ་རྣམ་མང་ཐོས་སྲས་ཀྱི༔ ལྷ་ཚོགས་རྣམས་ཀྱི་ཐུགས་དང་གཉིས་སུ་མེད༔ སྐལ་ལྡན་རིགས་ཀྱི་བུ་ལ་དབང་བསྐུར་བས༔ ནོར་ལྷ་རྒྱ་མཚོའི་ཐུགས་ཀྱི་དབང་ཐོབ་ཤོག༔ རྩ་སྔགས་ཙིཏྟ་སོགས༔ ལྷོ་ཡི་ནེའུ་ལེའི་རྐྱལ་བ་ལྟེ་བར་བཞག༔ ཧཱུྃ༔ ནོར་དང་ལོངས་སྤྱོད་རིན་ཆེན་རྐྱལ་པ་འདི༔ ནོར་བདག་རྒྱལ་པོ་རྣམ་མང་ཐོས་སྲས་ཀྱི༔ ལྷ་ཚོགས་རྣམས་ཀྱི་ཡོན་ཏན་དབང་མཆོག་སྟེ༔ སྐལ་ལྡན་རིགས་ཀྱི་བུ༴ ནོར་ལྷ་རྒྱ་མཚོའི་ཡོན་ཏན་དབང་ཐོབ་ཤོག༔ རྩ་སྔགས་རཏྣ་སོགས༔ བྱང་གི་རྒྱལ་མཚན་ལག་ཏུ་གཏད་ཅིང་༔ ཧཱུྃ༔ མི་ནུབ་རིན་ཆེན་བསྟན་པའི་རྒྱལ་མཚན་འདི༔ ནོར་བདག་རྒྱལ་པོ་རྣམ་མང་ཐོས་སྲས་ཀྱི༔ ལྷ་ཚོགས་རྣམས་ཀྱི་ཕྲིན་ལས་དབང་མཆོག་སྟེ༔ སྐལ་ལྡན་རིགས་ཀྱི་བུ་ལ་དབང་བསྐུར་བས༔ ནོར་ལྷ་རྒྱ་མཚོའི་ཕྲིན་ལས་དབང་ཐོབ་ཤོག༔ རྩ་སྔགས་ཀརྨ་སོགས༔ ཡོངས་རྫོགས་གཏོར་མའི་བཀའ་གཏད་དང་༔ སྣ་བདུན་རྟགས་བརྒྱད་དབང་ཡང་བསྐུར༔ བསྒྲུབ་པའི་དམ་བཅའ་ཡང་དག་གདབ༔ ཞེས་པས༔ བཀའ་གཏད་ནི་གཏོར་མ་སྤྱི་བོར་བཀོད་ལ༔ ཨཱོཾ་ཨཱཿཧཱུྃ། རྡོ་རྗེ་འཆང་ཆེན་གསང་བདག་ཁྲོ་བོའི་རྒྱལ། །ཐོང་ཕྲེང་རྩལ་སོགས་སྐུ་གསུམ་བླ་མ་ཡིས། །དེང་འདིར་བུ་ལ་དབང་བསྐུར་བྱིན་རླབས་ནས། །མཆོག་ཐུན་དངོས་གྲུབ་མ་ལུས་མྱུར་དུ་སྩོལ། །བདེ་སྐྱོང་མཁའ་སྤྱོད་ཌཱཀྐིའི་དབང་མོ་དང་། མཁོན་སྟོན་ཀླུ་དབང་གཏེར་ཆེན་ཉི་གྲགས་ཀྱིས། །དེང་འདིར་བུ་ལ་དབང་བསྐུར་བྱིན་རླབས་ནས། །མཆོག་ཐུན༴ བསོད་ནམས་བསྟན་འཛིན་པདྨ་བཞད་པའི་སྡེ། །བཀའ་དྲིན་མཉམ་མེད་རྩ་བརྒྱུད་བླ་མའི་ཚོགས། །དེང་འདིར༴ མཆོག་ཐུན༴ ལྷག་པའི་ལྷ་མཆོག་ནོར་བདག་ཡིད་བཞིན་ནོར། །རྩ་གསུམ་ནོར་ལྷ་རྒྱ་མཚོའི་ལྷ་ཚོགས་ཀྱིས༔ དེང་འདིར༴ མཆོག་ཐུན༴ ཞེས་དང་སྤྲོ་ན། ཧཱུྃ༔ སྔོན་ཚེ་བསྐལ་པ་བརྒྱད་ཁྲིའི་གོང་རོལ་ནས༔ ཡང་དག་སངས་རྒྱས་མངོན་པར་བྱང་ཆུབ་ཀྱང་༔ དུས་གསུམ་ཚངས་ཆེན་བསྐལ་པ་མ་སྟོངས་བར༔ སྐུ་གསུམ་རྒྱལ་བའི་གདུང་འཛིན་སྐྱོང་བ་དང་༔ དབུལ་བའི་འཇིགས་སྐྱོབས་ས་བརྒྱད་གནོད་སྦྱིན་དབང་༔ འཕགས་མཆོག་མགོན་པོ་ཁྱོད་མིན་གཞན་མི་བདོག༔ དེ་ཕྱིར་སྔོན་གྱི་ཐུགས་དམ་བདག་གིས་བསྐུལ༔ ཡི་ཆད་གདུང་བའི་ང་རོས་ཁྱོད་ལ་འབོད༔ སྔོན་གྱི་ལས་ངན་འཕྲལ་གྱི་རྐྱེན་འཚུབ་ཅིང་༔ ལྔ་བརྒྱའི་བསྐལ་ཞབས་བཀྲེས་ཕོངས་དབུལ་བས་གཟིར༔ ཆོས་བཞིན་བསྒྲུབ་ལ་ལོངས་སྤྱོད་དམན་པ་ཡིས༔ ལྟོ་གོས་དབང་ཤོར་བྱང་ཆུབ་ལམ་བོར་ཚེ༔ རེ་ཞིང་ལྟོས་པའི་མགོན་པོ་འཁོར་བཅས་ཀྱིས༔ དཀའ་པ་སྤྱད་ནས་སྒྲུབ་ཅིང་མོས་པའི་བུར༔ ཁམས་གསུམ་དབང་དུ་འདུ་བའི་དངོས་གྲུབ་སྩོལ༔ སྲིད་གསུམ་ཟིལ་གྱིས་གནོན་པའི་དངོས༴ ཚེ་དཔལ་དབང་ཐང་འབྱོར་བའི༴ མེ་ཤེལ་ཆུ་ཤེལ་ནོར་བུའི་༴ གསེར་དངུལ་ཟངས་ལྕགས་རིན་ཆེན༴ ནས་འབྲས་གྲོ་སོགས་འབྲུ་ཡི༴ ཁྲབ་རྨོག་གོ་མཚོན་སྤྱད་ཀྱི༴ དར་གོས་འཕྲུག་སོགས་གོས་ཀྱི༴ པྲོག་ཞུ་དོ་ཤལ་རྒྱན་གྱི༴ བཟའ་བཏུང་ལོངས་སྤྱོད་ཟས་ཀྱི༴ རྟ་གླང་ར་ལུག་རྐང་བཞིའི༴ ཕོ་བྲང་ཡུལ་འཁོར་གླིང་གི༴ རྒྱལ་བློན་འབངས་འཁོར་སྦྱིན་བདག༴ ཁྱེའུ་བརྒྱུད་འཛིན་རིགས་ཀྱི༴ ཤེས་ལྡན་དཔའ་བློན་ཕོ་རྒྱུད༴ མཛངས་ལྡན་འཕྲུལ་ཆགས་མོ་བརྒྱུད༴ རྩལ་ལྡན་ཤུགས་རྒྱས་འཁོར་འབངས༴ གདུགས་སོགས་བཀྲ་ཤིས་རྟགས་ཀྱི༴ འཁོར་ལོ་ལ་སོགས་སྲིད་ཀྱི༴ ཀ་ཆ་དཀོར་གསུམ་རྟེན་གྱི༴ མདོར་ན་མི་ཟད་རིན་ཆེན་གཏེར་གྱི་བུམ༔ མཆོག་ཐུན་དངོས་གྲུབ་མ་ལུས་བདག་ལ་སྩོལ༔ ཨཱོཾ་བྷཻ་ཤ་ར་མ་ན་ཡེ་ཡཀྵ་སརྦ་ས་མ་ཡཱ་ཙིཏྟ་ཧྲིང་ཧྲིང་ཛཿཛཿ མ་ཧཱ་རཏྣ་བྷ་དྲ་སརྦ་སིདྡྷིཕ་ལ་ཧཱུྃ་ཧཱུྃ༔ ཅེས་དངོས་གྲུབ་ལེན་ཚིག་ཀྱང་བརྗོད་དོ། །དམ་ཡེ་ཕྲལ་ལ་གཏོར་ཟན་ཅུང་ཟད་བདུད་རྩིར་སྦྱར་ལ་དངོས་གྲུབ་དུ་སྦྱིན་པར་བྱའོ༔ སྐབས་འདིར་ཚོགས་ལ་རོལ། མཐའ་བརྟེན་རྟགས་བརྒྱད་སྣ་བདུན་སྦྱིན་པ་ཚེ་སྒྲུབ་ལྟར་རམ་བསྡུ་ན་རྟགས་བརྒྱད་ཙག་ལི་ཐོག་སྟེ། ཧཱུྃ། ལྷ་ཡི་དབང་པོ་ལྷ་མིན་གཡུལ་རྒྱལ་ནས། བཀྲ་ཤིས་ལྷ་མོ་བརྒྱད་ཀྱི་མཆོད་པ་ལྟར། །བཀྲ་ཤིས་རྟགས་མཆོག་བརྒྱད་ཀྱི་དབང་བསྐུར་བས། །བདུད་ལས་རྣམ་རྒྱལ་མཆོག་ཐུན་དངོས་ཐོབ་ཤོག །ཨཱོཾ་མངྒ་ལཾ་སརྦ་ཨ་བྷི་ཥིཉྩ་ཧཱུྃ། རྫས་བརྒྱད་ཐོགས་ལ། ཧཱུྃ། ཐུབ་པའི་དབང་པོས་བདུད་བཅོམ་རྫོགས་སངས་རྒྱས། །བཀྲ་ཤིས་རྫས་མཆོག་བརྒྱད་ཀྱིས་མཆོད་པ་ལྟར། །དེང་འདིར་རིགས་ཀྱི་བུ་ལ་དབང་བསྐུར་བས། །དོན་གཉིས་མཐར་ཕྱིན་མཆོག་ཐུན་དབང་ཐོབ་ཤོར། །མངྒ་ལཾ་ཨཥྟ་ཨབྷི་ཥིཉྩ་ཧཱུྃ། །རྒྱལ་སྲིད་སྣ་བདུན་ཐོགས་ལ། ཧཱུྃ། མི་ཡི་དབང་པོ་འཁོར་ལོས་བསྒྱུར་རྒྱལ་ལ། །རྒྱལ་སྲིད་སྣ་བདུན་དག་གིས་བཀུར་བ་བཞིན། །དེང་འདིར་རིགས་ཀྱི་བུ་ལ་དབང་བསྐུར་བས། །ལོངས་སྤྱོད་རབ་འཕེལ་མཆོག་ཐུན་དབང་ཐོབ་ཤོག །རཏྣ་སརྦ་ཨ་བྷི་ཥིཉྩ་ཧཱུྃ། ཞེས་བསྐུར་རོ། །འདི་རྣམས་གསར་དུ་བྲིས་པ་ཡིན་པས་ཅི་འཐད་མཛོད། དེ་ནས་ཤིས་བརྗོད་མེ་ཏོག་འཐོར། ཧཱུྃ༔ ཕུན་སུམ་ཚོགས་པ་བཀྲ་ཤིས་དཔལ་གྱི་ཞིང་། འོག་མིན་ཆོས་དབྱིངས་སྟུག་པོ་བཀོད་པ་ནས༔ རྡོ་རྗེ་འཆང་ཆེན་ཆོས་སྐུའི་བཀྲ་ཤིས་དཔལ༔ ཆོས་དབྱིངས་རྒྱལ་བ་རྒྱ་མཚོའི་བཀྲ་ཤིས་ཤོག༔ ཕུན་སུམ་ཚོགས་པ་ལྔ་ལྡན་ལོངས་སྐུའི་ཞིང་༔ རིགས་ལྔའི་ཚངས་ཆེན་སྟེང་འོག་ཕྱོགས་བཅུ་ནས༔ རྒྱལ་བ་རིགས་ལྔ་ལོངས་སྐུའི་བཀྲ་ཤིས་དཔལ༔ ལོངས་སྐུའི་རྒྱལ་བ་རྒྱ་མཚོའི་བཀྲ་ཤིས༴ ཕུན་སུམ་ཚོགས་པ་འགྲོ་འདུལ་སྤྲུལ་སྐུའི་ཞིང་༔ ནམ་མཁའ་རབ་འབྱམས་འཇིག་རྟེན་དཔག་མེད་ནས། ཕྱོགས་བཅུའི་སངས་རྒྱས་སྟོན་པ་བཅོལ་ལྡན་འདས༔ སྤྲུལ་སྐུའི་རྒྱལ་བ་རྒྱ་མཚོའི་བཀྲ་ཤིས་ཤོག༔ ཕུན་སུམ་ཚོགས་པ་རྨད་བྱུང་ཕྲིན་ལས་ཞིང་༔ གང་ལ་གང་འདུལ་དེ་ལ་དེར་སྟོན་པའི༔ བྱང་ཆུབ་སེམས་དཔའ་རྣམས་དང་སེམས་མར་བཅས༔ འགྲོ་མགོན་སེམས་དཔའ་སེམས་མའི་བཀྲ་ཤིས་ཤོག༔ ཕུན་སུམ་ཚོགས་པ་དགོས་འདོད་དཔལ་གྱི་གནས༔ མཆོག་དང་ཐུན་མོང་དངོས་གྲུབ་ཀུན་གྱི་བདག༔ ནོར་བདག་ཡིད་བཞིན་ནོར་བུ་རྣམ་ཐོས་སྲས༔ ནོར་ལྷ་རྒྱལ་བ་རྒྱ་མཚོའི་བཀྲ་ཤིས་ཤོག༔ གཞན་ཡང་འབད་དང་རྩོལ་བ༴ སོགས་ཅི་ལྟར་རིགས་པར་བརྗོད། དེ་ལྟར་ནོར་བདག་ཡིིད་བཞིན་ནོར་བུའི་དབང་བསྐུར་ཟབ་མོ་ཐོབ་པ་ཡིན་པས། སྐབས་དེ་དག་ཏུ་ཁས་བླངས་པའི་དམ་ཚིག་དང་སྡོམ་པའི་རིམ་པ་ཚུལ་བཞིན་བསྲུང་བར་བགྱིད་སྙམས་པས་འདིའི་རྗེས་བཟློས་གྱིས༔ གཙོ་བོས་ཇི་ལྟར་བཀའ་སྩལ་པ། །དེ་དག་ཐམས་ཅད་བདག་གིས་བགྱིད། གཏང་རག་གི་མཎྜལ། སླར་ཡང་ལུས་ལོངས་སྤྱོད་དུས་གསུམ་གྱི་དགེ་ཚོགས་དང་བཅས་པ་འཁོར་ལོས་སྒྱུར་བའི་རྒྱལ་སྲིད་ཀྱི་འབྱོར་བ་ལྟར་སྤྲུལ་ཏེ་འབུལ་སྙམས་པས་འདིའི་རྗེས་བཟློས་གྱིས། དེང་ནས་བརྩམས་ཏེ་བདག་བྲན་དུ། །ཁྱེད་ལ་བདག་ནི་འབུལ་ལགས་ན། །ཁྱེད་ཀྱི་སློབ་མར་འཛིན་པ་དང་། །ཆ་ཡིས་ཀྱང་ནི་བསྐྱེད་དུ་གསོལ། །དེ་ལྟར་དབང་བསྐུར་ཐོབ་པའི་དགེ་རྩ་སེམས་ཅན་གྱི་དོན་དུ་བསྔོ་བར་གྱིས། །བསོད་ནམས་འདི་ཡིས་ཐམས་ཅད་གཟིགས་པ་ཉིད། །ཐོབ་ནས་ཉེས་པའི་དགྲ་རྣམས་ཕམ་བྱས་ནས། །སྐྱེ་རྒ་ན་འཆིའི་རྦ་ཀློང་འཁྲུག་པ་ཡི། །སྲིད་པའི་མཚོ་ལས་འགྲོ་བ་སྒྲོལ་བར་ཤོག །དང་། རིན་ཆེན་དགེ་ཚོགས་འདི་ཡིས་འགྲོ་བ་ཀུན། །རྟག་ཏུ་དམ་པའི་ཆོས་དང་མི་འབྲལ་ཞིང་། །རང་གཞན་དོན་གཉིས་རྫོགས་པའི་མཐའ་ཕྱིན་པ། །ཆོས་རྔ་སྒྲོག་པས་འཇིག་རྟེན་མཛེས་པར་ཤོག །ཅེས་སོགས་བསྔོ་བ་སྨོན་ལམ་གྱིས་རྒྱས་གདབ། སློབ་བུ་རྣམས་རང་གནས་གཏང་༔ ལྷག་གཏོར་བཏང་། བཀའ་གཏེར་བསྐུལ། །ཆད་བསྟན་སོགས་རྗེས་ཀྱི་བྱ་བས་མཇུག་སྐྱོང་། གདམ་པའི་སྙིང་པོ་དམ་པ་འདི༔ བརྗོད་པར་བཀའ་བའི་ཆོས་ཡིན་ཀྱང་༔ ཆོས་རྒྱལ་སྐུ་ངོ་ཆེ་བ་དང་༔ བོད་འབངས་འགྲོ་བའི་དོན་བསམ་གདམས༔ ཉམས་སུ་ལོངས་ཤིག་སྐལ་ལྡན་རྣམས༔ མ་འོངས་ལྔ་བརྒྱའི་ཡང་མཐའ་ལ༔ ལས་འཕྲོ་ཅན་དང་འཕྲད་པར་ཤོག༔ གདམས་པ་འདི་ཉིད་སྤེལ་བའི་སྣོད༔ དཀྱིལ་འཁོར་འཛིན་པའི་བུ་བདུན་དང་༔ དངོས་གྲུབ་འཆང་བའི་བུ་དགུ་ལ༔ གདམས་པ་འདི་ཉིད་བྱིན་ཅིག་རྒྱ༔ གཞན་ཡང་དག་སྣང་ཆོས་བཞིན་སྤྱོད༔ ལུང་ཟིན་རིགས་དང་མོས་ལྡན་ལ༔ སྒྲུབ་པའི་དམ་བཅའ་ཕོག་ལ་བྱིན༔ ཟགས་སུ་མ་འཇུག་གདམས་པའི་སྙིང་༔ དཔྲལ་བའི་མིག་བཞིན་བཙའ་མཁས་གྱིས༔ ཆོས་བཀའ་འཆང་བའི་སློབ་མ་ལ༔ ཚོགས་གཉིས་སྤེལ་ཕྱིར་གསང་བཞིན་གདམས༔ ཅེས་གསུངས་པ་རྣམས་བདག་མཚོ་རྒྱལ་གྱིས་ཡི་གེར་བཏབ་རིན་པོ་ཆེའི་གཏེར་དུ་སྦས་པ་ལས་འཕྲོ་ཅན་དང་འཕྲད་པར་ཤོག༔ བཀའ་ཡི་སྲུང་མས་ལེགས་པར་སྲུངས༔ གཏེར་གྱི་སྲུང་མས་བྱ་ར་མཛོད༔ ས་མ་ཡཱ༔ རྒྱ་རྒྱ་རྒྱ༔ ཁམས་པ་ཉི་མ་གྲགས་པས་ཁམས་སྲིང་མོ་རྫོང་མཆོག་ནས་ས་ཕོ་རྟ་ལ་གདན་དྲངས། ས་མོ་ཡོས་ལ་ཤོག་སེར་ལས་བསྒྱུར་བའོ། །མངྒ་ལཾ། །༈ཆུ་གཏེར་ཆེ་ལས་དཀའ་བས་མ་བླངས་ཤིང་། ཀླུ་རྒྱལ་གཙུག་གི་ནོར་བུ་ཡང་མིན་པར། །བསམ་དགུའི་རེ་བ་ཐམས་ཅད་འབད་མེད་དུ། །སྐོང་བའི་འདོད་གཏེར་ཡིད་བཞིན་ནོར་འདི་མཚར༔ འདི་ཚུལ་པད་འབྱུང་ཐུགས་རྗེའི་ཉིན་བྱེད་དབང་། །དུས་སུ་འདྲེན་པའི་ལས་སྨོན་རྟ་ལྗང་ཅན། །ཉི་མའི་མཚན་ཅན་སྐྱབས་མགོན་བླ་མ་དེའི། །བཀའ་དྲིན་གཞལ་དཀའི་ཡིད་ཀྱིས་ལན་བརྒྱར་བཏུད། །སྨིན་བྱེད་དབང་འདིར་འཇུག་པ་བདེ་བའི་སྐྱེས། །མཚམས་སྦྱོར་ལག་ལེན་ཁྲིགས་སུ་སྡེབས་པའི་དགེས། དབུལ་བའི་འཇིགས་འཕྲོག་ས་བརྒྱད་སེམས་དཔའ་ཆེས། །དངོས་གྲུབ་འདོད་འཇོའི་དཔལ་སྟེར་རྒྱུར་གྱུར་ཅིག །ཅེས་ནོར་བདག་ཡིད་བཞིན་ནོར་བུའི་དབང་ཆོག་བླ་མའི་ཕྱག་གཞེས་ལྟར་ཁྲིགས་སུ་བྱས་པ་འདི་ཡང་རྨོངས་བརྟུལ་ངག་དབང་བློ་གྲོས་སུ་འབོད་པས་བགྱིས་པ་དགེ་ཞིང་ཤིས་པར་གྱུར་ཅིག་བི་ཛ་ཡནྟུ།། །།

གཡང་འགུགས་ཀྱི་ལྷན་ཐབས་དངོས་གྲུབ་བུམ་བཟང་ཞེས་བྱ་བ་བཞུགས་སོ། །རྒྱལ་ཀུན་ཐུགས་རྗེའི་དབང་ཕྱུག་པདྨ་རྒྱལ། །འཆི་མེད་ཚེ་དང་འཛད་མེད་ནོར་གྱི་གཡང་། །མ་ལུས་སྩོལ་མཛད་སྲིད་དང་ཞི་བ་ཡི། །ལྷ་ལ་གུས་བཏུད་བཀའ་ཡི་གནང་བ་སྩོལ། །དེ་ཡང་གཞི་གཙང་མར་ཕྱེ་མར་བཟང་པོ་དང་། ཐོད་པ་དུམ་གསུམ་སྐྱོན་མེད་ནང་དུ་འབྲུ་སྣ་ཟས་སྣ། དར་སྣ་གོས་སྣ་རིན་ཆེན་སྣ་ལྔ་སྨན་སྣ་གནས་བྱིན་ཅན་གྱི་ས་རྡོ་ཆུ་ཤིང་སོགས་གཡང་རྫས་གང་འཛོམ་དང་། ཐོད་པ་མ་རྙེད་ཚེ་རས་ཁུག་དཀར་དམར་གང་རུང་དང་། གཞན་ཡང་ཇ་ཆང་འོད་ཕུད་མར་ཐུད་མདའ་དར་སོགས་བཤམས། མཐའ་མཆོད་པ་སྣ་ལྔ་བཅས་འདུ་བྱས་ལ་རོལ་མོ་དབྱངས་ཀྱི་འགྱུར་བག་དང་ལྡན་པས་འདི་སྐད་དོ། །ཧཱུྃ། བདག་ཉིད་ལྷར་གསལ་ཐུགས་ལས་རཾ་ཡཾ་ཁཾ། །འཕྲོས་པས་མ་དག་འབག་བཙོག་དྲི་མ་སྦྱངས། །འབྲུ་གསུམ་འོད་ཀྱིས་བདུད་རྩིའི་བཅུད་ལྡན་པའི། །ཕུན་ཚོགས་འདོད་དགུའི་རྫས་སུ་ཡོངས་གྲུབ་གྱུར། རཾ་ཡཾ་ཁཾ། ཨཱོཾ་ཨཱཿཧཱུྃ། ཆུ་གཙང་གི་ཆབ་བྲན་ལ། ཀྱཻ། སྲིད་ཞིའི་ཕུན་ཚོགས་ཡོངས་ལ་མངའ་མཛད་པའི། །སྐྱབས་གནས་དཀོན་མཆོག་རིན་ཆེན་རྣམ་པ་གསུམ། །རྒྱལ་ཀུན་ཐུགས་རྗེའི་བྱིན་རླབས་གཅིག་བསྡུས་པ། །སྣང་སྲིད་ཟིལ་གནོན་པདྨ་རྒྱལ་པོ་དང་། །ས་བརྒྱད་ངལ་བསོས་རྣམ་མང་ཐོས་སྲས་མཆོག །ཁམས་གསུམ་ཆེ་བཙན་ལྷ་ཆེན་དབང་ཕྱུག་རྗེ། །ཛམ་ལྷ་དམར་པོ་གནོད་སྦྱིན་རྟ་བདག་བརྒྱད། །ཀུ་རུ་ཀུལླེ་ལྷ་མོ་ནོར་རྒྱུན་མ། །ཡེ་ཤེས་འཇིག་རྟེན་ཕྱྭ་གཡང་དཔལ་གྱི་བདག །ཐམས་ཅད་དེ་རིང་གནས་འདིར་སྤྱན་འདྲེན་གཤེགས། །བཛྲ་ས་མ་ཡ་ཛཿཛཿ ཀྱཻ། དབང་མཛད་ཐུགས་རྗེའི་མངའ་བདག་མ་ལུས་པ། །རང་རང་དགྱེས་པའི་གདན་ལ་བཞུགས་སུ་གསོལ། །དད་དང་གུས་པའི་བློ་ཡིས་འདུད་པར་བགྱི། །པདྨ་ཀ་མ་ལ་ཡེ་སྟྭཾ། ན་མོ་པཱུ་རུ་ཤ་ཡ་ཧོ། ཀྱཻ་རྣམ་བཀྲའི་མེ་ཏོག་སྣ་ཚོགས་དངོས་འབྱོར་དང་། །ཡིད་སྤྲུལ་སྤྱན་གྱི་དབང་པོ་ཚིམ་ཕྱིར་འབུལ། །མ་ལ་ཡ་ཡི་ནགས་ཀླུང་ལ་འགྲན་པའི། །དྲི་ཞིམ་བདུག་སྤོས་སྣ་ཚོགས་ཤངས་ལ་འབུལ། །གསལ་བྱེད་ཟུང་ཡང་མོག་པོར་བགྱི་བ་ཡི། །མུན་སེལ་སྒྲོན་མེ་དམ་པ་ཐུགས་ལ་འབུལ། །ག་བུར་ཞུན་མའི་ངད་ལྡན་སྤོས་ཀྱི་ཆུ། །དྲི་ཡི་ཆབ་བཟང་བྱུགས་པ་སྐུ་ལ་འབུལ། །རི་རྒྱལ་ལྷུན་པོ་ལྟ་བུར་བརྗིད་ལྡན་པའི། །རོ་བརྒྱའི་ཞལ་ཟས་བཟའ་བ་ལྗགས་ལ་འབུལ། །སྙན་བརྗིད་འབར་འབིར་དབྱར་གྱི་རྔ་གསང་བཞིན། །རོལ་མོའི་བྱེ་བྲག་སྣ་ཚོགས་སྙན་ལ་འབུལ། །གཞན་ཡང་མཆོད་པའི་རྫས་སུ་ཡོངས་བཤམས་པའི། །གངས་རིའི་ལྷུན་པོ་ལྟར་སྤུངས་ཕྱེ་མར་དང་། །རོལ་མཚོ་བདུན་ལྟར་ཇ་ཆང་འོ་ཞོའི་ཕུད། །དབང་པོའི་གཞུ་རིས་བཀྲ་བཞིན་རེག་བྱའི་ཚོགས། །འདོད་ཡོན་སྣ་ཚོགས་འབུལ་ལོ་དགྱེས་པར་རོལ། །མཆོག་ཐུན་དངོས་གྲུབ་འབད་མེད་སྩལ་དུ་གསོལ། །བཛྲ་པུཥྤེ་ངྷཱུ་པེ་ཨཱ་ལོ་ཀེ་གནྡྷེ་ནཻ་ཝི་ཏེ་ཤཔྟ་མ་ཧཱ་སརྦ་པཱུ་ཙ་ཧོ། ཀྱཻ་ཕྱྭ་གཡང་དངོས་གྲུབ་སྩོལ་མཛད་ལྷ་ཚོགས་ལ། །དབྱར་སྐྱེས་དྲི་ཞིམ་ལྗོན་པའི་ཕུང་པོ་དང་། །བཟའ་བཅའ་བཏུང་བའི་རིག་བྱེད་ལ་སོགས་པ། །སྲེག་བྱེད་ཀློང་དུ་སྦྱངས་པའི་དུད་པའི་སྤྲིན། །ཆུ་འཛིན་ལྟར་དཀྲིགས་འདོད་ཡོན་ལྔ་ཡི་གཟུགས། །བཀྲ་ཤིས་རྫས་རྟགས་མཆོད་པའི་རྫས་ཆེན་པོ། །སྣང་བརྙན་རི་མོ་མཁན་གྱི་བྱེད་ལས་བཞིན། །ཤར་འདི་དགྱེས་སྐོང་མཐུན་པའི་རྫས་སུ་འབུལ། །བརྩེ་བས་བཞེས་ལ་ཕྱྭ་གཡང་བཀྲ་ཤིས་དཔལ། །མ་ལུས་ལྷོ་སྤྲིན་བཞིན་དུ་གཏིབས་པར་མཛོད། །ཅེས་བསང་ཚར་གསུམ་དང་། དེ་ནས་མདའ་དར་ཐོགས་ལ་སྙན་པའི་དབྱངས་རོལ་དང་བཅས་གཡང་འགུགས་ནི། ཀྱཻ། ཕན་བདེའི་དཔལ་གྱུར་བྱིན་རླབས་ཐུགས་རྗེའི་གཏེར། །མཆོག་གསུམ་རྩ་གསུམ་ཀུན་འདུས་རིན་པོ་ཆེ། །འཆི་མེད་ཚེ་དབང་རིག་འཛིན་གྲུབ་པ་ཡི། །སྣང་སྲིད་ཟིལ་གནོན་པདྨ་རྒྱལ་པོ་དང་། །ཕུན་ཚོགས་འདོད་དགུའི་ཆར་འབེབས་རྣམ་ཐོས་སྲས། །ཁམས་གསུམ་དབང་བྱེད་ལྷ་ཆེན་ཡབ་ཡུམ་གར། །ཛམ་ལྷ་དམར་པོ་གནོད་སྦྱིན་རྟ་བདག་བརྒྱད། །ནོར་རྒྱུན་ལྷ་མོ་ཀུ་རུ་ཀུལླེ་སོགས། །དབང་མཛད་ལྷ་ཚོགས་ཐུགས་དམ་བརྩེར་དགོངས་ལ། །བཀྲ་ཤིས་གནས་འདིར་ཕྱྭ་དང་གཡང་གི་ཚོགས། །ཁབ་ལེན་རྡོ་དང་ལྕགས་ཀྱི་ངང་ཚུལ་བཞིན། །ཁ་ཆར་བུ་ཡུག་འཚུབས་པ་ལྟ་བུར་བྱོན། །བགྲང་ཡས་ཕྱོགས་བཅུའི་ཞིང་ཁམས་རབ་འབྱམས་ན། །བཞུགས་པའི་བདེ་གཤེགས་སྲས་དང་ཉན་རང་དང་། །ཡི་དམ་རྒྱལ་བ་རྒྱ་མཚོའི་བྱིན་རླབས་ཀུན། བཀྲ་ཤིས་གནས་འདིར་ཕྱྭ་དང་གཡང་དུ་བྱོན། །འཆི་མེད་མགོན་པོ་རྣམ་པར་རྒྱལ་མ་དང་། །ཡིད་བཞིན་འཁོར་ལོ་ལ་སོགས་ཚེ་སྦྱིན་པའི། །ལྷ་དང་དྲང་སྲོང་རྣམས་ཀྱི་བྱིན་ནུས་ཀུན། །བཀྲ་ཤིས་གནས༴ རྒྱལ་ཀུན་ཐུགས་ཀྱི་སེམས་དཔའ་འཇམ་དཔལ་དབྱངས། །ཤེས་རབ་ལྷ་མོ་དབྱངས་ཅན་མ་ལ་སོགས། །བློ་གྲོས་མི་ཟད་གཏེར་མངའི་བྱིན་ནུས་ཀུན། །བཀྲ་ཤིས་གནས༴ སྙིང་རྗེའི་བདག་པོ་འཕགས་མཆོག་འཇིག་རྟེན་དབང་། །འགྲོ་བ་མ་ལུས་འདྲེན་པར་དམ་བཅས་པའི། །ཐར་པའི་དེད་དཔོན་མཆོག་གི་བྱིན་ནུས་ཀུན། །བཀྲ་ཤིས་གནས༴ སངས་རྒྱས་ཀུན་གྱི་གསང་བའི་མཛོད་འཛིན་པ། །ལག་ན་རྡོ་རྗེ་ལ་སོགས་ཁྲོ་བོ་ཡི། །མཐུ་སྟོབས་ནུས་པའི་ཡོན་ཏན་མ་ལུས་ཀུན། །བཀྲ་ཤིས་གནས༴ འཕགས་ཡུལ་དམ་ཆོས་ལེགས་ཚོགས་འབྱུང་བའི་གནས། །པཎ་གྲུབ་ཆོས་རྒྱལ་འཛོམ་པའི་བྱིན་རླབས་ཀྱི། །དཔལ་དང་ཡོན་ཏན་མ་ལུས་ཐམས་ཅད་ཀུན། །བཀྲ་ཤིས་གནས༴ རིགས་གསུམ་སྤྲུལ་པའི་གདུལ་ཞིང་བསིལ་ལྡན་ལྗོངས། །མཁས་བཙུན་བཟང་གསུམ་གྲགས་པའི་རྩལ་ཐོན་པའི། །བསྟན་འཛིན་སྐྱེས་བུ་དགེ་འདུན་འདུས་པའི་སྡེའི། །བཀྲ་ཤིས་གནས༴ ༈ཚངས་དང་བརྒྱ་བྱིན་དབང་ཕྱུག་ལ་སོགས་པ། །ལྷ་ཡི་ཆབ་སྲིད་བདེ་དགེའི་དཔལ་མཐའ་དག །དཔག་བསམ་དབང་པོའི་མཐུ་ལས་གྲུབ་པ་ཀུན། །བཀྲ་ཤིས་དཔལ་གཡང་ཐམས་ཅད་འདི་རུ་ཁུག །རིན་ཆེན་རྣམ་བཞིའི་ལྷུན་པོ་བརྗིད་ལྡན་པར། །གསེར་རི་རོལ་མཚོ་བདུན་སོགས་ཁྱད་འཕགས་པའི། །རྟེན་དང་བརྟེན་པའི་སྣོད་བཅུད་དཔལ་ཡོན་ཀུན། །བཀྲ་ཤིས་གནས༴ གླིང་བཞི་གླིང་ཕྲན་ལྕགས་རི་མུ་ཁྱུད་དང་། །རྒྱ་མཚོའི་ཁོར་ཡུག་དག་ལ་གནས་པ་ཡི། །ལྷ་ཀླུ་མི་ཡི་རྗེ་འབངས་སྟོབས་མངའ་ཐང་། །དཔལ་དང་གཟི་བརྗིད་སྲིད་པའི་ཕུན་ཚོགས་ཀྱི། །ཡོན་ཏན་མཐའ་དག་མ་ལུས་ཐམས་ཅད་ཀུན། །བཀྲ་ཤིས་དཔལ༴ རྩིབས་སྟོང་འཁོར་ལོ་རིན་ཆེན་བླ་ན་འཕགས། །གང་གི་རྗེས་སུ་ཐོགས་མེད་བགྲོད་ནུས་པ། །དབང་བསྒྱུར་མི་དབང་དམ་པའི་ཡོན་ཏན་ཀུན། །བཀྲ་ཤིས་དཔལ༴ ཡིད་ལ་ཅི་འདོད་གསོལ་བ་བཏབ་ཙམ་གྱིས། །འབད་མེད་སྩོལ་བར་བྱེད་པའི་དཔལ་མངའ་བ། །ནོར་བུ་རིན་ཆེན་དམ་པའི་ཡོན་ཏན་ཀུན། །བཀྲ་ཤིས་དཔལ༴ མཚར་སྡུག་ལང་ཚོ་རྒྱས་པའི་འཇོ་སྒེག་ཅན། །དགའ་བཞིའི་དཔལ་སྟེར་བདེ་བའི་འབྱུང་གནས་ཆེ། །མཛངས་ལྡན་འཕྲུལ་ཆགས་བཙུན་མོ་རིན་པོ་ཆེའི། །བཀྲ་ཤིས་དཔལ༴ ཤེས་བྱ་ཀུན་ལ་རིགས་པའི་རྣམ་དཔྱོད་ཀྱིས། །ལུགས་བརྒྱའི་འདུན་པ་དམ་པར་རབ་འབྱོར་བའི། །བློན་པོ་རིན་ཆེན་དག་གི་དཔལ་ཡོན་ཀུན། བཀྲ་ཤིས་དཔལ༴ གངས་རིའི་ཕྲེང་བ་དུམ་བུར་ཆད་འདྲ་བ། །གཟུགས་མཛེས་སྟོབས་བཟང་ཐེག་པའི་ཁུར་ཆེན་ལྡན། །ཁྱུ་མཆོག་གླང་པོ་རིན་ཆེན་དཔལ་ཡོན་ཀུན། །བཀྲ་ཤིས་དཔལ༴ བཻཌཱུར་ཞུན་མའི་མདངས་ཀྱི་སྤུ་སྡུག་བཀྲ། །བང་རྩལ་གློག་ལས་མྱུར་བའི་འགྲོས་ལྡན་པ། །རྟ་མཆོག་རིན་ཆེན་དམ་པའི་དཔལ་ཡོན་ཀུན། །བཀྲ་ཤིས་དཔལ༴ རི་དབང་ལྷུན་པོ་གཡོ་བར་བྱེད་པ་བཞིན། །དཔལ་རྩལ་འགྲན་མེད་དཔུང་ཚོགས་ཡན་ལག་བཞིས། །ཕ་རོལ་ཤུགས་ཀྱིས་ཐུལ་བྱེད་དམག་དཔོན་ཆེའི། བཀྲ་ཤིས་དཔལ༴ ཚེ་རིང་ཉི་ཟླ་ལྟ་བུར་འཆི་མེད་གཡང་། །བསོད་ནམས་རི་བོ་ལྟ་བུར་བརྟན་པའི་གཡང་། །དཔལ་འབྱོར་རྒྱ་མཚོ་ལྟ་བུར་འཛད་མེད་གཡང་། །བཀྲ་ཤིས་དཔལ་གཡང་ཐམས་ཅད་འདི་རུ་ཁུག །དབང་ཐང་གླིང་བཞིའི་མུན་སེལ་ལྟ་བུའི་གཡང་། །སྙན་གྲགས་དབྱར་གྱི་རྔ་གསང་ལྟ་བུའི་གཡང་། །རིགས་བརྒྱུད་ཆུ་བོའི་རྒྱུན་ལྟར་འཛད་མེད་གཡང་། །བཀྲ་ཤིས་དཔལ༴ འཛིན་མའི་གཞི་ལ་བཏབ་པའི་འབྲུ་བཟང་པོ། །བང་མཛོད་ཕྱུར་བུར་འགེངས་པའི་གཡང་གི་བདག །ཞིང་ལྷ་ཚངས་པ་ཆེན་པོའི་དཔལ་ཡོན་ཀུན། །བཀྲ་ཤིས་དཔལ༴ དཀར་གསུམ་འདོད་པ་འཇོ་བའི་ཞོལ་མོ་དང་། །ཀ་ཅའི་ཁུར་ཐེག་སྟོབས་ལྡན་ཞོལ་གཡག་སོགས། །གྲངས་མེད་ནོར་རྒྱུན་ལྷ་མོའི་དཔལ་ཡོན་ཀུན། །བཀྲ་ཤིས་དཔལ༴ སྤུ་སྡུག་དར་ལས་འཇམ་ཞིང་དུང་ལས་དཀར། །གཡང་མོ་ལུག་གི་ཁྱུ་ཚོགས་སྤེལ་བ་ཡི། །མགོན་པོ་གང་བ་བཟང་པོའི་དཔལ་གཡང་ཀུན། །བཀྲ་ཤིས་དཔལ༴ འབྱུང་ལྔའི་དྭངས་བཅུད་རིན་ཆེན་རིགས་བྱེད་དང་། །སྲབ་འཇམ་ཡངས་པའི་དར་གོས་བཟང་པོ་སོགས། །མཁོ་རྒུའི་ཡོ་བྱད་ལོངས་སྤྱོད་ཇི་སྙེད་ཚོགས། །བཀྲ་ཤིས་དཔལ་གཡང་ཐམས་ཅད་འདི་རུ་ཁུག །མདོར་ན་འཇིག་རྟེན་འདས་དང་མ་འདས་པའི། སྲིད་ཞིའི་ལེགས་ཚོགས་གང་དང་གང་མཆིས་པ། །དབྱར་གྱི་ཆར་སྤྲིན་ལྟ་བུར་གཏིབས་ནས་ཀྱང་། །ནམ་ཡང་ནུབ་མེད་བཀྲ་ཤིས་དཔལ་འབར་ཤོག །ཅེས་དང་། ཕྱྭ་ཐམས་ཅད་ཁུག་ཡེ་ཁུག་ཡེ། གཡང་ཐམས་ཅད་ཁུག་ཡེ་ཁུག་ཡེ། བརྗོད་བཞིན་གཡང་རྫས་རྣམས་སྣོད་དུ་བླུག་ལ་ཡོན་མཆོད་གཉིས་ཀར་གཡང་རྫས་དང་ཕྱེ་མར་བཀྱེ། འབྲུ་སྣ་འཐོར་བས་འདི་སྐད་དོ། །ཀྱཻ། རྒྱལ་ཀུན་འཆི་མེད་ཚེ་དབང་མ་ལུས་པ། །གཅིག་བསྡུས་སྙིགས་འགྲོའི་མགོན་པོ་པདྨ་རྒྱལ། །པད་རག་ཞུན་མའི་ལྷུན་པོར་ཉི་འོད་ཀྱིས། །འཁྱུད་འདྲའི་མཚན་དཔེའི་དཀྱིལ་འཁོར་རབ་རྒྱས་པས། །འཁོར་འདས་ཡོངས་ལ་དབང་བསྒྱུར་ཁྱོད་ལ་བསྟོད། །འགྲོ་རྣམས་དབུལ་བའི་འཇིགས་ལས་སྐྱོབས་མཛད་ཕྱིར། །ས་བརྒྱད་ངལ་བསོས་རྣམ་མང་ཐོས་པའི་སྲས། བཻཌཱུར་མདངས་ལྡན་རྒྱལ་པོ་གནོད་སྦྱིན་རྗེ། །འདོད་དགུའི་ཆར་འབེབས་ཁྱོད་ལ་གུས་པས་བསྟོད། །འཇིག་རྟེན་དབང་ཕྱུག་འགྲོ་ལ་རྗེས་ཆགས་གར། སྲིད་གསུམ་ཆེ་བཙན་མ་ཧཱ་དེ་ཝ་དང་། །ཨུ་མ་ངྷེ་ཝི་ཟུང་འཇུག་ཐབས་ཤེས་ཚུལ། །བྱི་རུའི་སྡོང་པོར་ཉི་གཞོན་འཁྱུད་འདྲའི་གཟིས། །མ་ལུས་དབང་དུ་མཛད་ལ་དྭངས་བས་བསྟོད། །འཕགས་མཆོག་སྙིང་རྗེའི་གཏེར་ཆེན་སྲིད་པ་ཡི། ཕུན་ཚོགས་འབྱོར་བ་མི་ཟད་གཏེར་སྦྱིན་ཕྱིར། །འབྲུག་དམར་གློག་གི་གར་མཁན་ལ་རོལ་བའི། །མགོན་པོ་ཛམ་ལྷ་དམར་པོ་ཁྱོད་ལ་བསྟོད། །བཅུ་དྲུག་ལང་ཚོ་རྒྱས་པའི་འཇོ་སྒེག་ལྡན། །མི་ཟད་གཏེར་ལ་མངའ་བརྙེས་ནོར་རྒྱུན་མ། །ཁམས་གསུམ་དབང་བྱེད་ཀུ་རུ་ཀུལླེ་དང་། གནོད་སྦྱིན་རྟ་བདག་བརྒྱད་སོགས་ནོར་ལྷའི་ཚོགས། །མ་ལུས་འཁོར་དང་བཅས་ལ་བསྟོད་པར་བགྱི། །དེ་ལྟར་མཆོད་དང་བསྟོད་པའི་མཐུ་བྱིན་གྱིས། །ཚེ་དཔལ་དབང་ཐང་འབྱོར་པའི་ཚོགས་མཐའ་དག །དབྱར་གྱི་ཆུ་གཏེར་ལྟ་བུར་འཕེལ་བ་དང་། །མི་མཐུན་རྒུད་པའི་མིང་ཡང་མི་གྲགས་ཤིང་། །དགེ་མཚན་བཀྲ་ཤིས་རི་མོ་གཡས་འཁྱིལ་དུང་། །སྙན་པའི་གྲགས་པ་སྒྲ་བརྒྱ་པ་ཡི་གཟུགས། །བདེ་སྐྱིད་ལྷ་ལམ་ཡངས་པའི་མཁའ་ངོས་སུ། །གེགས་མེད་ཕྱོགས་མཐར་ཁྱབ་པའི་རྒྱུར་འགྱུར་ཤོག །ཅེས་དང་། སླར་ཡང་བརྟན་བཞུགས་རྒྱས་གདབ་ནི། །ཧཱུྃ། བཀྲ་ཤིས་ཕྱྭ་གཡང་བསྟིམ་པའི་རྫས་མཆོག་འདིར། །དངོས་གྲུབ་སྩོལ་མཛད་ནོར་ལྷ་རྒྱ་མཚོའི་ཚོགས། །བརྟན་པར་བཞུགས་ལ་འདོད་པའི་རེ་སྐོང་མཛོད། །འཇིགས་བརྒྱད་མི་མཐུན་ཞི་བར་བྱེད་པའི་ལྷས། རིན་ཆེན་རྡོ་རྗེ་འབར་བས་རྒྱས་བཏབ་པས། །ཕྱི་ཡི་དབུལ་འདྲེ་ནང་དུ་མི་གཏོང་བར། །ནང་གི་དངོས་གྲུབ་ཕྱི་རུ་མ་གཏོང་ཞིག །འབྱོར་བ་དྲུག་སོགས་རྒྱས་པར་བྱེད་པའི་ལྷས། །ཡིད་བཞིན་ནོར་བུ་འབར་བས་རྒྱས་བཏབ་པས། །དཔལ་དང་འབྱོར་བ་རྒྱས་པར་འགྱུར་བ་དང་། །ཚེ་ལ་བར་ཆད་མ་གཏོང་བསྲུང་བར་མཛོད། །མ་ལུས་དབང་དུ་སྡུད་པར་བྱེད་པའི་ལྷས། །རིན་ཆེན་པདྨ་འབར་བས་རྒྱས་བཏབ་པས། །ཁམས་གསུམ་སྲིད་གསུམ་དབང་དུ་འདུ་བ་དང་། །དབང་ཐང་རྒྱས་ལ་བར་གཅོད་བསྲུང་བར་མཛོད། །དྲག་པོའི་སྟོབས་ཀྱིས་དགྲ་བགེགས་སྒྲོལ་བྱེད་ལྷས། །རིན་ཆེན་རྒྱ་གྲམ་འབར་བས་རྒྱས་བཏབ་པས། །ལས་བཞི་རབ་འབྱམས་ལྷུན་གྱིས་གྲུབ་པ་དང་། མི་མཐུན་བགེགས་ཚོགས་མ་ལུས་བཟློག་པར་མཛོད། །ཧཱུྃ་བཛྲ་རཀྵ༔ སྭཱ་རཏྣ་རཀྵ༔ ཨཱཿཔདྨ་རཀྵ༔ ཧཱ་ཀརྨ་རཀྵ༔ ཞེས་མར་གྱིས་སྲུང་འཛུགས། །དེ་ནས་བཀྲ་ཤིས་ནི། །ཧཱུྃ། བྱིན་རླབས་འབྱུང་གནས་རྩ་བརྒྱུད་བླ་མ་དང་། །དངོས་གྲུབ་ཆར་འབེབས་ནོར་ལྷ་རྒྱ་མཚོའི་ཚོགས། །བར་ཆད་ཀུན་སེལ་དཔའ་བོ་མཁའ་འགྲོར་བཅས། །རྩ་གསུམ་ལྷ་ཡིས་བཀྲ་ཤིས་དེང་འདིར་སྩོལ། །ནུས་མཐུའི་སྟོབས་ཀྱིས་སྲིད་གསུམ་ཟིལ་གྱིས་གནོན། །ཕྲིན་ལས་སྟོབས་ཀྱིས་དགྲ་བགེགས་གདུག་པ་འདུལ། །དམ་པ་ཡེ་ཤེས་བསྟན་སྲུང་རྒྱ་མཚོ་ཡི། །བཀྲ་ཤིས་དམ་པ་དེང་འདིར་བདེ་ལེགས་ཤོག །ཅེས་དང་། གཞན་བཀྲ་ཤིས་ཅི་རིགས་བརྗོད་པར་བྱའོ༔ ཞེས་པ་མོས་ལྡན་ཉེ་གནས་དགེ་སྦྱོང་པ། །ཆོས་དབྱིངས་རང་གྲོལ་མིང་ནས་ལྷ་རེག་བཅས། །ཡང་ཡང་ནན་བསྐུལ་ངོ་མ་ལྡོག་པ་ཡི། །འཇིག་རྟེན་ལུགས་ཟུང་སྲིད་པའི་དཔལ་འབྱོར་ལ། སྙིང་པོ་མེད་ཕྱིར་ཞེན་པ་སུ་ཞིག་གིས། །ལྡོག་པར་ནུས་མིན་འོན་ཀྱང་ཚོགས་བསགས་ཡུལ། །སྐྱབས་གསུམ་དམ་པའི་ཐུགས་རྗེའི་ཡོལ་གོ་རུ། །རྣམ་མཁྱེན་བྱང་ཆུབ་འཐོབ་པའི་རྒྱུ་བསོད་ནམས། །ཚོགས་ཀྱི་བཀྲ་ཤིས་བཅུད་ན་གཡང་འཁྱིལ་ལས། །འཛད་མེད་རེ་བ་སྐོང་བའི་ཆུ་རྒྱུན་ཞིག །འབེབས་ཐབས་ཀླག་ཆོག་མེས་པོའི་སྤུན་ཟླ་འདི། །ཉི་སྤྲུལ་བཞི་པ་ཆོས་དབྱིངས་རྡོ་རྗེ་ཞེས། །གང་དྲན་ཆལ་ཆོལ་སྨྲ་བའི་ཟོལ་ཟོག་ཅན། །གང་དེས་སྲིང་རྫོང་ཨོ་རྒྱན་ཆོས་གླིང་དུ། །ཤིང་ཡོས་ཟླ་བའི་ཚེས་ལ་བཀོད་པའི་དགེས། །འགྲོ་རྣམས་ཆོས་དང་མཐུན་པའི་དབུལ་སེལ་ཤོག། །། མངྒ་ལཾ།། །།

བསང་གི་ཆོ་ག་བཀྲ་ཤིས་དཔལ་འབར།

བསང་གི་ཆོ་ག་བཀྲ་ཤིས་དཔལ་འབར་ཞེས་བྱ་བ་བཞུགས༔ མ་འོངས་དུས་ཀྱི་རྣལ་འབྱོར་པས༔ རྩ་བ་གསུམ་གྱི་ལྷ་ཚོགས་དང་༔ སྣང་སྲིད་ལྷ་སྲུང་གཞི་བདག་རྣམས༔ བསང་ཤིང་བར་ཆད་ཞི་འདོད་ན༔ གཞི་མ་དཀར་པོའི་གདན་སྟེང་དུ༔ དཀར་གྱི་གཏོར་མ་དཀར་གསུམ་དང་མངར་གསུམ་ལ་སོགས་ཕུད་རྣམས་བཤམས༔ དམར་གྱི་གཏོར་མ་ཤ་ཁྲག་དང་༔ ལིངྒ་ཉ་བོས་བརྒྱན་པ་བཤམས༔ སྨན་གཏོར་མཆོད་པ་རཀྟ་དང་༔ ཚོགས་ཀྱི་ལོངས་སྤྱོད་རྒྱས་པར་བཀྲམ༔ བྱིན་གྱིས་བརླབ་ཅིང་བསང་སྦྱངས་སྤེལཿ ཡི་དམ་གང་ཡིན་ལས་གཞུང་བསྲང་༔ བདག་བསྐྱེད་གསལ་ཞིང་ཚོགས་འཁོར་བསྐོརཿ རང་མདུན་ནམ་མཁར་མགྲོན་རྣམས་བསྐྱེདཿ རྩི་ཤིང་སྣ་ཚོགས་དུད་པ་གཏོང་ཿ ཕྱེ་མར་སྐྱེམས་དང་འོ་མས་སྦྲན༔ རོལ་མོ་གླིང་བུ་དུང་སོགས་འབུད༔ སྙན་པའི་དབྱངས་ཀྱིས་འདི་སྐད་དོ༔ ཀྱེ་དེ་རིང་མདུན་གྱི་ནམ་མཁའ་ལཿ སྐྱབས་གནས་ལྷ་ཚོགས་ཐམས་ཅད་དང་༔ ཕོ་རྒྱུད་མོ་རྒྱུད་སྲུང་མའི་ཚོགས༔ གནས་ཡུལ་དུར་ཁྲོད་ཞིང་སྐྱོང་དང་༔ སྣང་ཞིང་སྲིད་པའི་ལྷ་འདྲེ་རྣམས༔ བསང་གི་མཆོད་པ་བཞེས་ཕྱིར་སྤྱོན༔ རང་རང་དགྱེས་པའི་གདན་ལ་བཞུགས༔ ལྷ་དང་སྲུང་མ་ཐམས་ཅད་ལ༔ གུས་པས་ཕྱག་འཚལ་མཆོད་ཅིང་བསྟོད༔ སྣང་སྲིད་ལྷ་ཀླུ་གཞི་བདག་ལ༔ དམ་ཚིག་བསྐུལ་བའི་དགའ་བས་འདུད༔ སྔོན་གྱི་ཐ་ཚིག་རྗེས་དགོངས་ལ༔ གནོད་ཅིང་འཚེ་བའི་བསམ་པ་སྤོངསཿ བྱང་ཆུབ་སེམས་དང་ལྡན་པའི་ངང་༔ བསང་མཆོད་བཞེས་ལ་འཕྲིན་ལས་སྒྲུབས༔ ཀྱེ་དེ་རིང་དུས་བཟང་ཕུན་སུམ་ཚོགས༔ མཆོད་རྫས་ཡོ་བྱད་མཁོ་དགུར་ལྡན༔ དྲི་བཟང་དུད་པ་སྤྲིན་ལྟར་གཏིབས༔ རྔ་གླིང་རོལ་མོ་གསུང་རེ་སྙནཿ མདའ་དར་མདུང་དར་པུ་རུ་རུ༔ རྣལ་འབྱོར་བསྐྱེད་རྫོགས་ཏ་ལ་ལཿ རྩ་གསུམ་ལྷ་ཚོགས་ཀྱི་ལི་ལི༔ དམ་ཅན་བསྲུང་མ་ཤ་ར་ར༔ ཡུལ་ལྷ་གཞི་བདག་ཉི་ལི་ལི༔ བསང་ངོ་མཆོད་དོ་བཞེས་སུ་གསོལ༔ ཀྱེ་རྒྱལ་བ་ཀུན་ཏུ་བཟང་པོ་སོགས༔ ཆོས་སྐུའི་ལྷ་ཚོགས་ཐམས་ཅད་བསང་༔ དྲུག་པ་རྡོ་རྗེ་འཆང་ལ་སོགས༔ ལོངས་སྐུའི་ལྷ་ཚོགས་ཐམས་ཅད་བསང་༔ སྟོན་པ་བཅོམ་ལྡན་འདས་ལ་སོགས༔ སྤྲུལ་སྐུའི་ལྷ་ཚོགས་ཐམས་ཅད་བསང་༔ མཚུངས་མེད་རྩ་བའི་བླ་མ་སོགས༔ སྐྱབས་གནས་དཀོན་མཆོག་ཐམས་ཅད་བསང་༔ དཔལ་ཆེན་ཧེ་རུ་ཀཿལ་སོགས༔ ཡི་དམ་ལྷ་ཚོགས་ཐམས་ཅད་བསང་༔ ཡེ་ཤེས་དབྱིངས་ཀྱི་དྷཀྐི་སོགས༔ མ་སྲིང་མཁའ་འགྲོ་རྒྱ་མཚོ་བསང་༔ དཔལ་ལྡན་མ་ཧཱ་ཀཱ་ལ་སོགས༔ བཀའ་སྲུང་དམ་ཅན་རྒྱ་མཚོ་བསང་༔ ཀྱེ་གླིང་གི་མཆོག་གྱུར་འཛམ་བུ་གླིང་༔ གླིང་ཆེན་བཞི་ཡི་ས་བདག་བསང་༔ རྔ་ཡབ་པདྨ་འོད་ལ་སོགས༔ གླིང་ཕྲན་རྣམས་ཀྱི་ས་བདག་བསང་༔ རི་བོ་རབ་མཆོག་བརྗིད་དང་ལྡན༔ རི་རབ་རྣམས་ཀྱི་ས་བདག་བསང་༔ རྟ་རྣ་རྣམ་མདུད་མུ་ཁྱུད་སོགས༔ གསེར་རི་རྣམས་ཀྱི་ས་བདག་བསང་༔ རབ་འཁྱིལ་དུང་མདོག་ཀུན་ཁྱབ་སོགས༔ རོལ་མཚོ་རྣམས་ཀྱི་ས་བདག་བསང་༔ ལྷ་ཆེན་ཚངས་པ་བརྒྱ་བྱིན་སོགས༔ སྟེང་གི་ལྷ་ཁམས་ཐམས་ཅད་བསང་༔ མཐའ་ཡས་འཇོག་པོ་གཙུག་ན་སོགས༔ འོག་གི་ཀླུ་ཁམས་ཐམས་ཅད་བསང་༔ གཉན་ཆེན་སྡེ་བཞི་གེར་མཛོ་སོགས༔ བར་གྱི་གཉན་ཁམས་ཐམས་ཅད་བསང་༔ ཉི་མ་ཟླ་བ་ལ་སོགས་པའི༔ གཟའ་དང་རྒྱུ་སྐར་ཐམས་ཅད་བསང་༔ གངྒ་སིནྡྷུ་ལ་སོགས་པའི༔ འབབ་པ་ཆུ་ཡི་གནས་བདག་བསང་༔ འཛམ་བུ་པྲིཀྵའི་སྡོང་པོ་སོགས༔ སྐྱེས་པ་ཤིང་གི་གནས་བདག་བསང་༔ མ་ཕམ་གཡུ་མཚོ་སྔོན་པོ་སོགས༔ འཁྱིལ་པ་མཚོ་ཡི་གནས་བདག་བསང་༔ གནམ་གྱི་གནམ་འབྱིན་དཀར་པོ་སོགས༔ སྟོང་ཆེན་ནམ་མཁའི་གནས་བདག་བསང་༔ བར་གྱི་བར་འབྱིན་ཁྲ་བོ་སོགས༔ བར་སྣང་ཁམས་ཀྱི་གནས་བདག་བསང་༔ ས་ཡི་ས་འབྱིན་ནག་པོ་སོགས༔ དབང་ཆེན་ས་ཡི་གནས་བདག་བསང་༔ གྷྲི་ཧ་དྷེ་ཝ་དུང་རི་སོགས༔ རྗེ་ཡི་མགུར་ལྷ་བཅུ་གསུམ་བསང་༔ མ་སངས་རྡོ་རྗེ་ལག་པ་སོགས༔ དགེ་བསྙེན་སུམ་བརྒྱ་དྲུག་ཅུ་བསང་༔ ཇོ་མོ་གངས་དཀར་ཤ་མེད་སོགས༔ བོད་ཁམས་བསྟན་མ་བཅུ་གཉིས་བསང་༔ རི་བོ་བྱ་རྒོད་སྤུངས་པའི་རི༔ རྒྱ་གར་ཡུལ་གྱི་གནས་བདག་བསང་༔ རི་བོ་ཆེན་པོ་གྲུ་འཛིན་སོགས༔ ཟ་ཧོར་ཡུལ་གྱི་གནས་བདག་བསང་༔ རི་བོ་ཆེན་པོ་མ་ལ་ཡ༔ བྷཾ་ག་ལ་ཡི་གནས་བདག་བསང་༔ རི་བོ་ཆེན་པོ་དཔལ་དང་ལྡན༔ བྷེ་ཏའི་ཡུལ་གྱི་གནས་བདག་བསང་༔ དྷ་ན་ཀོ་ཤ་ལ་སོགས་པའི༔ ཨོ་རྒྱན་ཡུལ་གྱི་གནས་བདག་བསང་༔ དབལ་བོ་མདུང་རྩེ་ལ་སོགས་པའི༔ ཏ་ཟིག་ཡུལ་ཀྱི་གནས་བདག་བསང་༔ ཛ་ལན་དྷ་ར་ལ་སོགས་པའི༔ ཁ་ཆེའི་ཡུལ་གྱི་གནས་བདག་བསང་༔ རི་བོ་གླང་རུ་ལ་སོགས་པའི༔ བལ་པོའི་ཡུལ་གྱི་གནས་བདག་བསང་༔ རི་བོ་ལྕོག་ལྷ་ལ་སོགས་པའི༔ ཧོར་གྱི་ཡུལ་གྱི་གནས་བདག་བསང་༔ ལྷ་ཆེན་དྲག་པོ་འགྱིང་བའི་རི༔ ཐོ་གར་ཡུལ་གྱི་གནས་བདག་བསང་༔ རི་བོ་རབ་མཛེས་ལ་སོགས་པའི༔ ལི་ཡི་ཡུལ་གྱི་གནས་བདག་བསང་༔ དུང་རི་དཀར་པོ་ལ་སོགས་པའི༔ མངའ་རིས་སྐོར་གསུམ་གནས་བདག་བསང་༔ ཟུར་ཕུད་ལྔ་པ་ལ་སོགས་པའི༔ དབུས་གཙང་ཡུལ་གྱི་གནས་བདག་བསང་༔ དགེ་བསྙེན་ཆེན་པོ་གདོང་ར་སོགས༔ མདོ་ཁམས་སྒང་དྲུག་གནས་བདག་བསང་༔ ཀླུ་རྒྱལ་འཛམ་བུ་ཀླུ་ཕྲུག་སོགས༔ ཤོད་ཆེན་བཅོ་བརྒྱད་གནས་བདག་བསང་༔ རི་བོ་ཆེན་པོ་འོད་དེ་ཤན༔ རྒྱ་ནག་ཡུལ་གྱི་གནས་བདག་བསང་༔ འཇང་རི་སྨུག་པོ་རྨུ་རྡོ་སོགས༔ འཇང་དང་རོང་གི་གནས་བདག་བསང་༔ རི་བོ་ཆེན་པོ་ཀོ་ཊ་སོགས༔ མོན་གྱི་ཡུལ་གྱི་གནས་བདག་བསང་༔ ཡུལ་ལྷ་གཉན་པོ་ལ་སོགས་པའི༔ ཡུལ་རི་འདི་ཡི་གནས་བདག་བསང་༔ སྲུང་མ་གཞི་བདག །ཀྱེ་ནམ་མཁའ་གང་བའི་ལྷ་རྣམས་བསང་༔ ས་གཞི་གང་བའི་ཀླུ་རྣམས་བསང་༔ བར་སྣང་གང་བའི་གཉན་རྣམས་བསང་༔ སྤར་ཁ་བརྒྱད་ཀྱི་ས་བདག་བསང་༔ ལོ་སྐོར་བཅུ་གཉིས་ས་བདག་བསང་༔ གབ་རྩེ་དགུ་ཡི་ས་བདག་བསང་༔ འབྱུང་བ་ལྔ་ཡི་དགྲ་ལྷ་བསང་༔ གླིང་བཞི་དར་བའི་དགྲ་ལྷ་བསང་༔ ཕ་མེས་བརྒྱུད་ཀྱི་དགྲ་ལྷ་བསང་༔ སློབ་དཔོན་བརྒྱུད་ཀྱི་དགྲ་ལྷ་བསང་༔ ཉིན་མཚན་དུས་དྲུག་དགྲ་ལྷ་བསང་༔ སྨོན་པ་འགྲུབ་པའི་དགྲ་ལྷ་བསང་༔ མྱུར་མགྱོགས་ཆེ་བའི་དགྲ་ལྷ་བསང་༔ དཔའ་རྩལ་ཆེ་བའི་དགྲ་ལྷ་བསང་༔ རང་ལ་ཡོད་པའི་དགྲ་ལྷ་བསང་༔ མི་ནས་ཐོབ་པའི་དགྲ་ལྷ་བསང་༔ ཤུགས་ཀྱིས་འཁོར་བའི་དགྲ་ལྷ་བསང་༔ གནས་རྣམས་ཀུན་གྱི་གནས་བདག་བསང་༔ ཡུལ་རྣམས་ཀུན་གྱི་ཡུལ་བདག་བསང་༔ དུར་ཁྲོད་རྣམས་ཀྱི་ཞིང་སྐྱོང་བསང་༔ མཐོ་བ་གནམ་ལ་གནས་པ་བསང་༔ དམའ་བ་ས་ལ་གནས་པ་བསང་༔ ཉིན་རི་དཀར་ལ་གནས་པ་བསང་༔ སྲིབ་རི་ནགས་ལ་གནས་པ་བསང་༔ འགྲོ་བ་ལམ་ལ་གནས་པ་བསང་༔ སྐྱེས་པ་ཤིང་ལ་གནས་པ་བསང་༔ སྲ་བ་བྲག་ལ་གནས་བསང་༔ འབབ་པ་ཆུ་ལ་གནས་པ་བསང་༔ ཡུལ་གཞིའི་དགོན་ལ་གནས་པ་བསང་༔ མཁར་ལ་གནས་པའི་མཁར་ལྷ་བསང་༔ ཞིང་ལ་གནས་པའི་ཞིང་ལྷ་བསང་༔ མ་ལྷ་བུ་རྫི་ཐམས་ཅད་བསང་༔ སྐྱེས་ལྷ་འཕྲག་ལྷ་ཐམས་ཅད་བསང་༔ བང་མཛོད་ཐབ་ལྷ་ཐམས་ཅད་བསང་༔ ནོར་ལྷ་གཡང་འཛིན་ཐམས་ཅད་བསང་༔ ཡུལ་ལྷ་ཟོ་དོར་ཐམས་ཅད་བསང་༔ ལྷ་དང་སྲུང་མ་ཐམས་ཅད་བསང་༔ ཀླུ་དང་ས་བདག་ཐམས་ཅད་བསང་༔ གཉན་དང་སྡེ་བརྒྱད་ཐམས་ཅད་བསང་༔ རྨུ་དང་དགེ་བསྙེན་ཐམས་ཅད་བསང་༔ ཀྱེ་དེ་རིང་ལྷ་བསྲུང་གཉན་པོ་རྣམས༔ ལྷ་ཤིང་ཤུག་པའི་དུད་པས་བསང་༔ གཉན་ཤིང་འོམ་བུའི་དུད་པས་བསང་༔ ཀླུ་ཤིང་མཁན་པའི་དུད་པས་བསང་༔ གསེར་ཤིང་སྟག་པའི་དུད་པས་བསང་༔ དུང་ཤིང་བ་ལུའི་དུད་པས་བསང་༔ བདུད་རྩི་ཤིང་ལྔའི་དུད་པས་བསང་༔ བཟའ་བ་ཟས་ཕུད་རྣམས་ཀྱིས་བསང་༔ སྐོམ་པ་བཏུང་བའི་ཕུད་ཀྱིས་བསང་༔ དཀར་ཕྱོགས་དཀར་མཆོད་ཕུད་ཀྱིས་བསང་༔ ནགས་ཕྱོགས་དམར་མཆོད་ཕུད་ཀྱིས་བསང་༔ བཟང་དྲུག་སྨན་གྱི་དུད་པས་བསང་༔ དར་ཟབ་སྟག་གཟིག་རས་མོས་བསང་༔ བསང་ངོ་མཆོད་དོ་ལྷ་བསྲུང་རྣམས༔ བསམ་པ་སྒྲུབས་ལ་རེ་བ་སྐོངས༔ བར་དུ་གཅོད་པའི་དགྲ་བགེགས་སྒྲོལ༔ ཀྱེ་དེ་རིང་ལྷ་བསྲུང་ཁྱེད་རྣམས་དང་༔ རྣལ་འབྱོར་བདག་ཅག་འཁོར་བཅས་ལ༔ ཤི་བའི་རོ་གྲིབ་ཕོག་པ་བསང་༔ སྦྲུམ་མའི་བང་གྲིབ་ཕོག་པ་བསང་༔ མི་གཙང་ཁྱིམ་དུ་བླངས་པ་བསང་༔ ལྷ་གྲལ་ནལ་གྱིས་རྩོག་པ་བསང་༔ མི་གྲལ་དམེ་ཡིས་རྩོག་པ་བསང་༔ འཛེ་ཕོག་ནད་གྲིབ་ཕོག་པ་བསང་༔ ཟས་ངན་ཟོས་པའི་ཟས་གྲིབ་བསང་༔ གོས་ངན་གྱོན་པའི་གོས་གྲིབ་བསང་༔ ཡུགས་ས་ཕོག་པའི་ཡུགས་གྲིབ་བསང་༔ དམ་ཚིག་ཉམས་པའི་དམ་གྲིབ་བསང་༔ རྨུག་ཏུ་སྐྱེས་པའི་རྨུག་གྲིབ་བསང་༔ ཐབ་གཞོབ་འཁོན་གསུམ་ཤོར་བ་བསང་༔ ཀྱེ་དེ་ལྟར་བསང་པའི་ཡོན་ཏན་གྱིས༔ རྣལ་འབྱོར་བདག་ཅག་འཁོར་བཅས་ལ༔ མི་མཐུན་གནོད་པ་ཞི་བར་མཛོད༔ རྐྱེན་དང་བར་གཅོད་ཐམས་ཅད་ཟློག༔ རྡོ་རྗེ་ཅན་གྱི་བཀའ་མ་གཅོག༔ རྣལ་འབྱོར་བདག་གི་དམ་མ་བཀྲལ༔ ཉིན་གྱི་དུས་སུ་བྱ་ར་གྱིས༔ མཚན་གྱི་དུས་སུ་མེལ་ཚེ་གྱིས༔ དུས་རྣམས་ཀུན་ཏུ་སྲུང་སྐྱོབ་མཛོད༔ ཡག་ཁ་སྤྲོད་ལ་ཉེས་ཁ་སྣོལ༔ སྐྱེལ་བསུ་རོགས་དན་གྲིབ་ལྟར་འགྲོགས༔ བརྟེན་པ་ཡིན་ནོ་རྒྱང་མ་རིང་༔ མཆོད་པ་ཡིན་ནོ་ངོ་མ་ཆུང་༔ མནའ་ཐོ་བཅད་དོ་མནའ་མ་ཟ༔ ཆད་ཐོ་བྱས་སོ་ཆད་མ་གཏོང་༔ སྒྲུབ་པའི་དུས་ན་གོང་མ་གཡེལ༔ བཀའ་ཉན་སྲུང་མ་རྒྱང་མ་རིང་༔ ཡུལ་ལྷ་གཞི་བདག་ཕྲག་མ་དོག༔ བང་ལྷ་ནོར་ལྷ་གཡང་མ་ཆུང་༔ བྲན་ལྟར་བསྐུལ་ལོ་རྒྱུད་མ་ངན༔ རྗེ་ལྟར་བརྟེན་ནོ་དབང་མ་ཆེ༔ འགོ་བའི་ལྷ་སྲུང་དཔའ་མ་ཞུམ༔ དམ་ཅན་སྲུང་མ་མཐུ་མ་ཆུང་༔ སྡང་བའི་དགྲ་ལ་ལས་མ་འགྱང་༔ གནོད་པའི་བགེགས་ལ་དཔའ་མ་ཞན༔ མི་ལ་ན་ཚ་མ་གཏོང་ཞིག༔ ཞིང་ལ་སད་སེར་མ་གཏོང་ཞིག༔ རྐང་བཞི་དུད་འགྲོ་གོད་མ་འཇུག༔ ཀྱེ་དེ་རིང་ཕྱྭ་དང་གཡང་ཅིག་ལེན༔ རི་ཡི་རྒྱལ་པོ་ལྷུན་རེ་ཆགས༔ དེ་རིང་རྣལ་འབྱོར་གཡང་དུ་ལེན༔ རོལ་པའི་མཚོ་བདུན་གཏིང་རེ་ཟབ༔ དེ་རིང་རྣལ་འབྱོར་གཡང་དུ་ལེན༔ གསེར་གྱི་རི་བདུན་བརྗིད་རེ་ཆེ༔ དེ་རིང་རྣལ་འབྱོར་གཡང་དུ་ལེན༔ དཔག་བསམ་ཤིང་ཆེན་ལོ་འདབ་རྒྱས༔ དེ་རིང་རྣལ་འབྱོར་གཡང་དུ་ལེན༔ རྒྱལ་སྲིད་སྣ་བདུན་དཔལ་རེ་བཟང་༔ དེ་རིང་རྣལ་འབྱོར་གཡང་དུ་ལེན༔ བཀྲ་ཤིས་རྟགས་བརྒྱད་དོན་རེ་གྲུབ༔ དེ་རིང་རྣལ་འབྱོར་གཡང་དུ་ལེན༔ ཚངས་པ་བརྒྱ་བྱིན་མངའ་ཐང་ཆེ༔ དེ་རིང་རྣལ་འབྱོར་གཡང་དུ་ལེན༔ མཐའ་ཡས་ཀླུ་ཁམས་ནོར་རེ་ཕྱུག༔ དེ་རིང་རྣལ་འབྱོར་གཡང་དུ་ལེན༔ སྡེ་བརྒྱད་དྲེགས་པ་དྲག་རྩལ་ཅན༔ དེ་རིང་རྣལ་འབྱོར་གཡང་དུ་ལེན༔ གླིང་བཞི་སྣོད་བཅུད་བཀོད་རེ་ལེགས༔ དེ་རིང་རྣལ་འབྱོར་གཡང་དུ་ལེན༔ སྐྱེ་འགྲོ་སེམས་ཅན་བསོད་ནམས་རྒྱས༔ དེ་རིང་རྣལ་འབྱོར་གཡང་དུ་ལེན༔ རྒྱལ་ཆེན་སྡེ་བཞི་ཁ་དྲག་འཛོམ༔ དེ་རིང་རྣལ་འབྱོར་གཡང་དུ་ལེན༔ ཉི་ཟླ་རྒྱུ་སྐར་བཀྲག་རེ་བཟང་༔ དེ་རིང་རྣལ་འབྱོར་གཡང་དུ་ལེན༔ གྲུབ་པ་ཐོབ་པའི་ཉམས་མྱོང་དེ༔ དེ་རིང་རྣལ་འབྱོར་གཡང་དུ་ལེན༔ མཁས་བཙུན་འཛོམ་པའི་ཡོན་ཏན་དེ༔ དེ་རིང་རྣལ་འབྱོར་གཡང་དུ་ལེན༔ བཀའ་བབས་ལྡན་པའི་བྱིན་རླབས་དེ༔ དེ་རིང་རྣལ་འབྱོར་གཡང་དུ་ལེན༔ སྨོན་ལམ་གྲུབ་པའི་བདེན་ཚིག་དེ༔ དེ་རིང་རྣལ་འབྱོར་གཡང་དུ་ལེན༔ ཐུགས་རྗེ་ལྡན་པའི་ནུས་སྟོབས་དེ༔ དེ་རིང་རྣལ་འབྱོར་གཡང་དུ་ལེན༔ འཆི་མེད་ཚེ་ཡི་རིག་འཛིན་དེ༔ དེ་རིང་རྣལ་འབྱོར་གཡང་དུ་ལེན༔ རྒྱལ་བཙུན་བློན་གྱི་མངའ་ཐང་དེ༔ དེ་རིང་རྣལ་འབྱོར་གཡང་དུ་ལེན༔ འབྱུང་བ་ལྔ་ཡི་དྭངས་མ་དེ༔ དེ་རིང་རྣལ་འབྱོར་གཡང་དུ་ལེན༔ འཁོར་འདས་ཡོངས་ཀྱི་དཔལ་དང་སྟོབས༔ དེ་རིང་རྣལ་འབྱོར་གཡང་དུ་ལེན༔ སངས་རྒྱས་ཀུན་གྱི་བྱིན་རླབས་དེ༔ དེ་རིང་རྣལ་འབྱོར་གཡང་དུ་ལེན༔ ཡི་དམ་ལྷ་ཡི་དངོས་གྲུབ་དེ༔ དེ་རིང་རྣལ་འབྱོར་གཡང་དུ་ལེན༔ མ་སྲིང་རྒྱ་མཚོའི་རྟེན་འབྲེལ་དེ༔ དེ་རིང་རྣལ་འབྱོར་གཡང་དུ་ལེན༔ དམ་ཅན་སྲུང་མའི་མཐུ་སྟོབས་དེ༔ དེ་རིང་རྣལ་འབྱོར་གཡང་དུ་ལེན༔ ཕྱྭ་སྐོར་གཡས་སུ་བསྐོར་བ་ཡིས༔ སྐྱེས་པ་ཕོ་གཡང་ཐམས་ཅད་ལེན༔ ཕྱྭ་སྐོར་གཡོན་དུ་བསྐོར་བ་ཡིས༔ ཟ་མ་མོ་གཡང་ཐམས་ཅད་ལེན༔ ཕྱེ་མར་ཟས་ཕུད་སྐྱེམས་ཀྱིས་མཆོད༔ བཟའ་བཏུང་ལོངས་སྤྱོད་དངོས་གྲུབ་སྩོལ༔ དཀར་དམར་མདངས་ལྡན་ཕུད་ཀྱིས་མཆོད༔ དཔལ་དང་འབྱོར་བའི་དངོས་གྲུབ་སྩོལ༔ འབྲུ་དང་སྨན་སྣ་སྤོས་ཀྱིས་མཆོད༔ འདོད་དགུ་བསམ་འཕེལ་དངོས་གྲུབ་སྩོལ༔ འཕེན་པོ་མི་ཡི་དངོས་གྲུབ་སྩོལ༔ དར་ཟབ་གོས་ཀྱི་དངོས་གྲུབ་སྩོལ༔ རྐང་བཞི་དུད་འགྲོའི་དངོས་གྲུབ་སྩོལ༔ བང་མཛོད་ནོར་གྱི་དངོས་གྲུབ་སྩོལ༔ རྨ་གཡང་ཟས་ཀྱི་དངོས་གྲུབ་སྩོལ༔ མཆོག་དང་ཐུན་མོང་དངོས་གྲུབ་སྩོལ༔ བུ་ཆུང་སྲིའུ་ཚང་ནས་བསྐྱེད༔ ནད་ཁ་ཆོད་ལ་ཤི་ཁ་སྡོམས༔ རྐྱེན་ཁ་སྒྱུར་ལ་བདེ་ལེགས་སྩོལ༔ ཀུན་ཏུ་བླ་མེད་བྱང་ཆུབ་སེམས༔ དམ་པ་མཆོག་ཀྱང་འགྲུབ་པར་ཤོག༔ ཅེས་བརྗོད་བསང་མགྲོན་གཤེགས་ཤིང་བསྐྱེད་རིམ་བསྡུ༔ རྫོགས་རིམ་སྒོམ་བསྔོ་བ་སྨོན་ལམ་མཐའ་རྒྱས་སྐྱོང་༔ ས་མ་ཡཱ༔ རྒྱ་རྒྱ་རྒྱ༔ འདི་ལྟར་ལས་བཞིའི་ཁ་སྐོང་དུ༔ ཞི་བའི་སྦྱིན་སྲེག་བསང་མཆོད་འདི༔ བརྩམས་པས་ནད་གདོན་བར་ཆད་ཞི༔ བདེ་ལེགས་ཡོན་ཏན་ཐམས་ཅད་འཐོབ༔ ལྷ་དང་སྲུང་མ་མཉེས་ཤིང་དགྱེས༔ གདོན་བགེགས་འབྱུང་པོའི་ཕྲག་དོག་གྲོལ༔ དེ་ཕྱིར་ཕྱི་རབས་ཉམས་སུ་ལོངས༔ ས་མ་ཡཱ༔ རྒྱ་རྒྱ་རྒྱ༔ གཏེར་རྒྱ༔ སྦས་རྒྱ༔ ཟབ་རྒྱ༔ ས་མ་ཡཱ༔ རྒྱ་རྒྱ་རྒྱ༔ སཱུརྱ་ཀིརྟིས་རཀྴ་ཀོ་ཊའི་བྱང་འདབས་ཀྱི་གུ་རུ་རིན་པོ་ཆེའི་སྒྲུབ་ཕུག་ནས་ཤིང་ཕོ་སྟག་གི་ལོ་ལ་གདན་དྲངས་ཤིང་ཆུ་ཕོ་ཁྱི་ལོ་ཧོར་ཟླ་ལྔ་བའི་ནང་དུ་ཐུན་སྐབས་ཤིག་ལ་ཤོག་སེར་འཛུབ་གང་ཞེང་མཁྱིད་གང་པ་ཞིག་གི་ཕྱི་ནང་ནས་ཞལ་བཤུས་པའོ། །྅པ་ལུ་ཏ་ཕོགས་མཚམས་མཆོད། དགའ་འཁྱིལ་ཕོགས་སར། ཕྱྭ་ཁུག་ཡེ། གཡང་ཁུག་ཡེ། དབྱངས་སྙན་མོས་སྒྲོགས། གཡུང་དྲུང་ཕོགས་མཚམས་སྐོར། མངྒ་ལཾ།། །།

བསང་མཆོད་བཀྲ་ཤིས་དཔལ་འབར་གྱི་ལྷན་ཐབས་བཀྲ་ཤིས་མྱུ་གུ།

བསང་མཆོད་བཀྲ་ཤིས་དཔལ་འབར་གྱི་ལྷན་ཐབས་བཀྲ་ཤིས་མྱུ་གུ་ཞེས་བྱ་བ་བཞུགས་སོ། །སངས་རྒྱས་ཐམས་ཅད་ཀྱི་ཡེ་ཤེས་ཆེན་པོའི་རང་བཞིན་སློབ་དཔོན་རིན་པོ་ཆེ་མཚོ་སྐྱེས་རྡོ་རྗེའི་སྐུ་ལ་ཕྱག་འཚལ་ལོ། བསང་གི་ཆོ་ག་ལ་འཇུག་པར་འདོད་པས་མཁོ་བའི་ཡོ་བྱད་རྣམས་གཞུང་ལྟར་འདུ་བྱས་ཏེ། གཏེར་གཞུང་ལས། བྱིན་གྱིས་བརླབ་ཅིང་བསང་སྦྱངས་སྤེལ༔ ཡི་དམ་གང་ཡིན་ལས་གཞུང་བསྲང་༔ བདག་བསྐྱེད་གསལ་ཞིང་ཚོགས་འཁོར་བསྐོར༔ རང་མདུན་ནམ་མཁར་མགྲོན་རྣམས་བསྐྱེད༔ ཅེས་པའི་དོན། རྒྱས་པར་རང་གང་བྱེད་ཀྱི་ལྷ་གཞུང་བསྲང་ཞིང་ཚོགས་འཁོར་བསྐོར། དེ་ལྟར་མ་ལྕོགས་པས་བསྡུ་ན། ཧཱུྃ༔ གཏན་གྱི་སྐྱབས་གནས་དཀོན་མཆོག་རིན་ཆེན་ལ། །བྱང་ཆུབ་བར་དུ་བདག་སོགས་གུས་པས་སྐྱབས། །སྲིད་གསུམ་ངེས་ལེགས་གོ་འཕང་ལ་འགོད་ཕྱིར། །གཏན་པ་མེད་པའི་བསང་གི་མཆོད་སྦྱིན་སྤེལ། ཞེས་སྐྱབས་སེམས་བྱ། བདག་བསྐྱེད་ནི། ཧཱུྃ༔ ཆོས་ཀུན་མཚན་མ་བྲལ་བའི་དབྱིངས། །ཀ་དག་བློ་ལས་འདས་པའི་གདངས། ཧྲཱིཿཡིག་དཀར་པོའི་འཕྲོ་འདུ་ལས། །རང་ཉིད་རིགས་འདུས་པདྨ་འབྱུང་། །དཀར་དམར་མདངས་ལྡན་ཞི་འཛུམ་ཁྲོ། །གཞོན་ནུའི་ལང་ཚོ་མཚན་དཔེར་ལྡན། །རྡོ་རྗེ་བྷནྡ་ཁ་ཊྭཱཾ་འཛིན། །སྙན་ཞུ་གསང་ཕོད་ཆོས་གོས་གསོལ། །མདངས་ལྡན་མཚོ་དབུས་པད་ཟླའི་ཁྲིར། །རྒྱལ་ཆེན་རོལ་པའི་སྟབས་སུ་འགྱིང་། །དཔའ་བོ་མཁའ་འགྲོའི་སྤྲིན་དབུས་སུ། །གཟི་བརྗིད་ཉི་མ་བརྒྱར་འབར་བའི། །སྣང་སྲིད་ཟིལ་གནོན་སྣང་སྟོང་སྐུ། །དམ་ཚིག་ཡེ་ཤེས་གཉིས་སུ་མེད། །ཐུགས་ཀར་ཟླ་བ་ཧྲཱིཿམཚན་པར། །སྔགས་ཀྱིས་བསྐོར་བའི་འོད་སྣང་གིས། །དུས་གསུམ་རྒྱལ་བའི་བྱིན་རླབས་བསྡུས། །ཁམས་གསུམ་འཁོར་བའི་ལས་ཉོན་སྦྱངས། །སྣང་སྲིད་ཐམས་ཅད་སྐུ་དང་ཞིང་། །ལྷུན་གྲུབ་གཞིར་བཞེངས་འཁོར་ལོར་རོལ། ཨཱོཾ་ཨཱཿཧཱུྃ་བཛྲ་གུ་རུ་པདྨ་སིདྡྷི་ཧཱུྃ༔ ཞེས་ཅི་ནུས་བཟླ། །དེ་ནས་བསང་རྫས་བྱིན་གྱིས་བརླབ་པ་ནི། ཨཱོཾ་བཛྲ་ཨ་མྲྀ་ཏ་ཀུཎྜ་ལི་ཧ་ན་ཧ་ན་ཧཱུྃ་ཕཊ། །ཨཱོཾ་སྭ་བྷཱ་ཝ་ཤུདྡྷ་སརྦ་དྷརྨ་སྭཱ་བྷཱ་ཝ་ཤུདྡྷོ྅ཧཾ༔ བསང་རྫས་མི་དམིགས་སྟོང་བའི་ངང་ཉིད་ལས། །ཟབ་ཡངས་རིན་ཆེན་སྣོད་དུ་མཆོད་རྫས་རྣམས། །འཆི་བ་མེད་པའི་རྒྱ་མཚོར་འཁྱིལ་བའི་གདངས། །ལྷ་མིའི་བཟའ་བཏུང་གོས་རྒྱན་རིན་ཆེན་འབྲུ། །རྐང་འགྲོ་གནས་ཁང་སྨན་སྤོས་འདོད་ཡོན་ལྔ། །རིན་ཆེན་བདུན་དང་བཀྲ་ཤིས་རྟགས་རྫས་སོགས། །ཕུན་ཚོགས་དཔལ་གྱི་འབྱོར་བར་འཆར་བ་ཡི། །མེ་ཐབ་དབུས་སུ་རཾ་ལས་ཡེ་ཤེས་མེ། །འབར་བའི་དུད་པ་ཡེ་ཤེས་བདུད་རྩིའི་སྤྲིན། །གནམ་ས་བར་སྣང་ཁེངས་པའི་འཇའ་ཟེར་ལས། །དཔག་ཡས་མཆོད་པའི་རྫས་དང་བདུད་རྩིའི་བུམ། །སྨན་གཞོང་ཐོགས་པའི་ལྷ་མོ་དཔག་མེད་འཕྲོ། །མགྲོན་ཀུན་དགྱེས་པ་བསྐྱེད་ཅིང་ཁྲུས་སྨན་གྱིས། །མི་ཙང་གྲིབ་སོགས་ཉམས་པའི་སྐྱོན་སྦྱངས་པས། །རྨུགས་པ་བསངས་ཏེ་ཉེས་ཀུན་གཞིལ་བ་སོགས། །འདོད་འབྱུང་མ་ཚང་མེད་པ་མཆོད་པའི་སྤྲིན། །ཆོས་དབྱིངས་ཀུན་ཁྱབ་ནམ་མཁའ་མཛོད་དུ་གྱུར། །པར་བསམ་ཞིང་། རྒྱས་པར་སྔགས་དྲུག་ཕྱག་རྒྱ་དྲུག་དང་བསྡུ་ན། ན་མཿསརྦ་ཏ་ཐཱ་ག་ཏ་བྷྱོ་བི་ཤྭ་མུ་ཥེ་བྷྱཿསརྦ་ཏ་ཁཾ་ཨུཏྒ་ཏེ་སྥ་ར་ཎ་ཨི་མཾ་ག་ག་ན་ཁཾ་སྭཱ་ཧཱ། གསུམ་མམ་བདུན་གྱིས་བྱིན་གྱིས་བརླབ་བོ། བསངས་མགྲོན་བསྐྱེད་པ་ནི། ཧཱུྃ༔ རང་མདུན་ནམ་མཁའ་བརྡལ་བའི་ཀློང་ཡངས་པར། །གླིང་བཞིའི་ཁྱོན་མཉམ་པད་སྡོང་འདབ་མ་བཞི། །ལྷུན་ཆགས་རྣམ་པར་བཀྲ་བའི་ཟེའུ་འབྲུ་ལ། །སངས་རྒྱས་ཀུན་འདུས་རྒྱལ་དབང་པདྨ་འབྱུང་། །རྩ་བརྒྱུད་དཔལ་ལྡན་བླ་མའི་ཚོགས་ཀྱིས་བསྐོར། །ཤར་གྱི་འདབ་མར་ཐུབ་དབང་བསྟན་པའི་བདག །དཀོན་མཆོག་སྲི་ཞུའི་མགྲོན་རིགས་རྒྱ་མཚོས་བསྐོར། །ལྷོ་ཡི་འདབ་མར་འཇམ་མགོན་སྨྲ་བའི་དབང་། །ཡོན་ཏན་མགྲོན་གྱུར་དཔལ་མགོན་སྲུང་མས་བསྐོར། །ནུབ་གྱི་འདབ་མར་འཕགས་མཆོག་འཇིག་རྟེན་དབང་། །རིགས་དྲུག་འགྲོ་བ་སྙིང་རྗེའི་མགྲོན་གྱིས་བསྐོར། །བྱང་གི་འདབ་མར་གསང་བདག་རྡོ་རྗེ་འཛིན། །བགེགས་རིགས་ལན་ཆགས་མགྲོན་གྱུར་ཡོངས་ཀྱིས་བསྐོར། །པད་སྡོང་སྐེད་པར་སྲིད་པའི་ལྷ་དགུ་སོགས། །སྟོང་གསུམ་གཞི་བདག་ཡུལ་ལྷ་གཉན་པོས་བསྐོར། །རྩ་བར་ས་ཡི་ལྷ་མོ་བསྟན་མ་སོགས། །རྒྱལ་བློན་འབངས་འཁོར་ས་བདག་ཡོངས་ཀྱིས་བསྐོར། །ཀུན་གྱི་གནས་གསུམ་ཡི་གེ་འབྲུ་གསུམ་ལས། །འཕྲོས་པའི་འོད་ཀྱིས་རང་བཞིན་གནས་མཆོག་ནས། །སྲིད་ཞིའི་མགྲོན་རིགས་མ་ལུས་སྤྱན་དྲངས་གྱུར། །རྩི་ཤིང་སྣ་ཚོགས་དུད་པ་གཏོང་༔ ཕྱེ་མར་སྐྱེམས་དང་འོ་མས་སྦྲན༔ རོལ་མོ་གླིང་བུ་དུང་སོགས་འབུད༔ སྙན་པའི་དབྱངས་ཀྱིས་འདི་སྐད་དོ༔ ཀྱེ་དེ་རིང་མདུན་གྱི་ནམ་མཁའ་ལཿ ཞེས་སོགས་ཀྱི་བསངས་བཞུང་གྱེར། གཞན་པའི་གསོལ་མཆོད་མངའ་གསོལ་སོགས་བྱེད་ན་ཁུ་ཡེའི་གོང་དུ་གང་དགོས་བཏོན་ལ་ཁུ་ཡེ་བྱ། དེ་ནས་ཇི་སྐད་དུ། བསང་མགྲོན་གཤེགས་ཤིང་བསྐྱེད་རིམ་བསྡུ༔ རྫོགས་རིམ་སྒོམ་ཞིང་ཤིས་པ་བརྗོད༔ བསྔོ་བ་སྨོན་ལམ་མཐའ་རྒྱས་སྐྱོང་༔ ཞེས་པའི་དོན། ཡིག་བརྒྱས་ལྷག་ཆད་བསྐངས་ལ། ཧཱུྃ༔ མ་རིག་གཏི་མུག་རྨོངས་པའི་དབང་གྱུར་ནས། །བསང་ལ་བོས་པའི་སྲིད་ཞིའི་མགྲོན་རིགས་ཀྱི། །སྐུ་གསུང་ཐུགས་དང་ཡོན་ཏན་འཕྲིན་ལས་སོགས། །འགལ་འཁྲུལ་ཅི་བགྱིས་བཤགས་སོ་བཟོད་པར་མཛོད། ཅེས་ནོངས་པ་བཟོད་པར་གསོལ་ཞིང་། གཤེགས་གསོལ་དང་རྫོགས་རིམ་ནི། ཀྱེ་བསང་དང་ཞི་བའི་མགྲོན་ལ་སྤྱན་དྲངས་པའི། །སྲིད་ལས་འདས་དང་སྲིད་པར་གནས་པ་ཀུན། །དགྱེས་དགུའི་དཔལ་ལ་རོལ་ཏེ་གནས་སུ་བཞུད། །རྩ་རྒྱུད་བླ་མ་དཀོན་མཆོག་སྲི་ཞུའི་མགྲོན། །སྐུ་གསུམ་ལྷུན་གྲུབ་རྒྱལ་བའི་ཞིང་དུ་གཤེགས། ཡོན་ཏན་མགྲོན་རྣམས་སྤྲུལ་སྐུའི་ཞིང་དུ་གཤེགས། །སྙིང་རྗེའི་མགྲོན་རྣས་རིགས་དྲུག་གནས་སུ་གཤེགས། །བགེགས་རིགས་ལན་ཆགས་སོ་སོའི་ཡུལ་དུ་གཤེགས། །སྣང་བའི་མཚན་མ་སྟོང་བའི་དབྱིངས་སུ་གཤེགས། །བསྐྱེད་པའི་ལྷ་སྐུ་སྐྱེ་མེད་ཀློང་དུ་གཤེགས། །ཁྱབ་བརྡལ་ལྷུན་གྲུབ་བུམ་སྐུའི་སྦུབས་སུ་གཤེགས། །ཞེས་སོགས་རྫོགས་རིམ་ལ་མཉམ་པར་བཞག་གོ། ཤིས་བརྗོད་ནི། ཧཱུྃ༔ ཕན་བདེའི་དཔལ་གྱུར་བྱིན་རླབས་ཐུགས་རྗེའི་གཏེར། །དགུ་ལྡན་བརྒྱུད་པའི་བླ་མའི་བཀྲ་ཤིས་ཤོག །གང་འདུལ་ཞི་ཁྲོའི་གར་གྱིས་སྲིད་གསུམ་འདུལ། །ལྷ་རིགས་རབ་འབྱམས་རྒྱ་མཚོའི་བཀྲ་ཤིས་ཤོག །འཕྲིན་ལས་ཐོགས་མེད་གྲུབ་གཉིས་འདོད་དགུའི་སྤྲིན། །སྐུ་གསུམ་མཁའ་འགྲོ་ཡོངས་ཀྱི་བཀྲ་ཤིས་ཤོག །མི་བཟད་གཏུམ་ཆེན་རྔམ་པས་བདུད་དཔུང་འཇོམས། །མཐུ་ལྡན་དམ་ཅན་སྲུང་མའི་བཀྲ་ཤིས་ཤོག །རྣམ་པ་ཀུན་ཏུ་ཕུན་ཚོགས་ཕན་བདེའི་དཔྱིད། །བདེ་དགའ་རྒྱ་མཚོར་རོལ་པའི་བཀྲ་ཤི་ཤོག །ཅེས་དང་གཞན་ཡང་ཤིས་བརྗོད་ཅི་རིགས་པར་སྤེལ་ལོ། །བསྔོ་བ་ནི། འདིས་མཚོན་བདག་གཞན་དུས་གསུམ་རྣམ་དཀར་དགེ། །ལས་ཉོན་དབང་གིས་འཁོར་བའི་མཁའ་ཁྱབ་འགྲོ། །འཇིགས་རུང་སྲིད་པའི་ཆུ་མཚོ་ལས་བརྒལ་ཏེ། །སྐུ་གསུམ་ལྷུན་གྱིས་གྲུབ་པའི་རྒྱུ་རུ་བསྔོ། སྨོན་ལམ་ནི། བསྟན་འཛིན་ཞབས་བརྟན་བསྟན་པ་དར་ཞིང་རྒྱས། །སྐྱེ་དགུ་བདེ་ཞིང་ནད་མུག་མཚོན་འཁྲུག་ཞི། །ཐམས་ཅད་གསང་ཆེན་ཐེག་པའི་ཆོས་ལ་སྤྱོད། །ཚོགས་གཉིས་མཐར་སོན་རྡོ་རྗེ་འཆང་འགྲུབ་ཤོག །ཅེས་དང་གཞན་ཡང་བསྔོ་སྨོན་རྒྱ་ཆེར་བྱའོ། དེ་ལྟར་བསང་མཆོད་བཀྲ་ཤིས་དཔལ་འབར་གྱི་ལྷན་ཐབས་སུ་མེད་མི་རུང་གི་ཆ་རྐྱེན་དུ། །མང་དུ་ཐོས་པའི་རྒྱལ་ཁམས་པ་ཧོར་གྱི་བན་དེས་བྱང་སྒྲ་གཉན་གྱི་ལྷ་ཞོལ་དུ་སྦྱར་བའོ། །མངྒ་ལཾ།། །།

སློབ་དཔོན་པདྨས་མཛད་པའི་རྒྱག་བརྔན།

སློབ་དཔོན་པདྨས་མཛད་པའི་རྒྱག་བརྔན་བཞུགས་སོ། །ན་མོ་གུ་རུ༔ པདྨ་ཐོད་ཕྲེང་རྩལ་ལ་ཕྱག་འཚལ་ལོ། །པདྨ་ཐོད་ཕྲེང་བདག་ཉིད་ཀྱིས། །རི་ཡི་རྒྱལ་པོ་གངས་ཅན་དབུས། །ཆོས་རྒྱལ་ཁྲི་སྲོང་ལྡེའུ་བཙན་གྱི། །ཐུགས་དམ་བསམ་ཡས་བཞེངས་པ་ལ། །ལྷ་སྲིན་སྡེ་བརྒྱད་ཁྲོས་གྱུར་པས། །ཉིན་མོར་མིས་བརྩིགས་མཚན་མོར་ལྷ་འདྲེས་བཤིགས། །རི་རྡོ་ཐམས་ཅད་ཀླུང་ལ་བསྐྱལ། །ཀླུང་རྡོ་ཐམས་ཅད་རི་ལ་བསྐྱལ། །ལོ་ཏོག་རྩི་ཐོག་ཐམས་ཅད་བསྲེགས། །ནད་དང་གནོད་པ་ཐམས་ཅད་ལངས། །བཙད་པོའི་ལྷ་ཁང་བཤོལ་ལ་ཐུག །དེ་ཚེ་པདྨ་ཐོད་ཕྲེང་ངས། །རྡོ་རྗེ་ཕུར་པའི་དཀྱིལ་འཁོར་བཞེངས། ལྷ་འདྲེ་ཐམས་ཅད་དམ་ལ་བཏགས། །དཀོན་མཆོག་གསུམ་ལ་མཆོད་པ་ཕུལ། །ལྷ་དང་སྲུང་མ་ཐམས་ཅད་དང་། །དེ་བཞིན་ལྷ་ཀླུ་གཉན་རྣམས་བརྔན། །དེ་སྟོབས་རྒྱལ་པོའི་བསམ་པ་སྒྲུབ། །བོད་ཁམས་བདེ་ཞིང་བཀྲ་ཤིས་སོ། །རྒྱལ་བློན་སྐུ་ཚེ་རིང་བ་དང་། །སྒྲུབ་པའི་བར་ཆད་ཟློག་པ་དང་། །འཁོར་སྲུང་རྐྱེན་བཟློག་གྲགས་པ་སྤེལ། །ལྷ་ཁང་བཞེངས་དང་དབེན་གནས་བྱེད། །མི་ནོར་སྤེལ་དང་ནད་ཡམས་གཅོད། །ཐག་རིང་འགྲོ་དང་ཆུ་ཆེན་བགྲོད། །ལམ་འཕྲང་བགྲོད་དང་དམག་སྣ་འདྲེན། །རྣལ་འབྱོར་བསམ་པ་ཡིད་བཞིན་འགྲུབ། །ཁྱད་པར་སྡེ་བརྒྱད་ལས་ལ་བསྔགས། །ཆེ་དྲག་བྱ་བ་ཐམས་ཅད་ཀྱི། །སྔོན་དུ་བརྔན་མཆོད་བསང་ལ་འབུང་། །དེ་ཡི་བསམ་དོན་གང་ཡིན་ཀྱང་། འགྲུབ་འགྱུར་དེ་ལ་ཐེ་ཚོམ་མེད། །དེ་ནས་མཆོད་པའི་རིམ་པ་ནི། །ཤིན་ཏུ་གཙང་མའི་གནས་རྣམས་སུ། །གཞི་མ་ལྷ་རྟེན་དཀར་པོའི་སྟེང་། །རིན་ཆེན་འབྲུ་ཡི་གཡུང་དྲུང་དང་། །ཚོམ་བུ་དག་ནི་མང་བཀོད་དེ། །ཁྱད་པར་རིན་ཆེན་སྣོད་ནང་དུ། །རིན་ཆེན་སྣ་ཚོགས་ཕྱེ་གཙང་ལ། །རི་རབ་བང་རིམ་གསུམ་པའི་ཚུལ། །དེ་སྟེང་པདྨ་ཉི་ཟླའི་གདན། །ལེགས་པར་གྲུབ་པའི་སྟེང་ཉིད་དུ། །གཏོར་ཟླུམ་སྤོད་ལྡན་འདབ་ཅན་བཤམས། །བང་རིམ་རྣམས་དང་རྩ་བ་རུ། །གནམ་འཕུར་སར་འཛུལ་རིགས་རྣམས་དང་། །ཁྱད་པར་ཕག་སྦྲུལ་རུས་སྦལ་མི། །སྦལ་བ་ལྕོང་མོ་ཉ་དང་དུང་། །གསེར་བུམ་དངུལ་བུམ་དོང་རྩེ་དང་། །གཡག་ལུག་ར་གསུམ་དཀར་མངར་དང་། །རིན་ཆེན་ལྔ་དང་ཟ་འོག་སོགས། །དྲེའུ་རྟ་མཛོ་གཡག་འབྲོང་དྲེད་དང་། །དོམ་དང་ཤ་བ་བྱ་ཁྱི་ནག །ལྷབ་ལྷུབ་དར་གོས་སྙིང་བཤོས་དང་། །སྡེ་བརྒྱད་རང་རང་ཆོས་སྐྱོང་སོགས། །བརྔན་འོས་དང་མཐུན་གཏོར་མ་དང་། །དཀོན་མཆོག་རྩ་གསུམ་སྤྱི་གཏོར་དང་། །ཕྱེ་མར་ཇ་ཆང་ཕུད་རྒོད་སོགས། །འདོད་ཡོན་ལོངས་སྤྱོད་ཚོགས་ཚད་བཤམས། །ཁྱད་པར་འཕན་གདུགས་ཕྱེ་ཕུར་དང་། །བླ་རེ་རྒྱལ་མཚན་ལ་སོགས་འཕྱར། །རང་ཉིད་པདྨའི་ང་རྒྱལ་གྱིས། །མཆོད་རྫས་ཀུན་ལ་སྤོས་ཆུ་གཏོར། །ཐམས་ཅད་འདོད་དགུའི་མཆོད་སྤྲིན་གཏེར། །ས་གཞི་བར་སྣང་གང་བསམ་ལ། །རོལ་མོའི་སྒྲ་སྒྲོག་འདི་སྐད་དོ། །ཧཱུྃ། བསྟན་པ་འདི་ལ་ངོ་མཚར་རྨད་བྱུང་བའི། །འཇིག་རྟེན་དབང་བསྒྱུར་པདྨ་རྒྱལ་པོ་ནི། །རིགས་ནི་ཟ་ཧོར་རྒྱལ་པོའི་སྲས་སུ་འཁྲུངས། །ཨོ་རྒྱན་ཡུལ་དུ་སྒྲོ་འདོགས་མ་ལུས་བཅད། །བསིལ་བ་ཚལ་དུ་དངོས་གྲུབ་ཐམས་ཅད་བརྙེས། །ཁ་བ་ཅན་དུ་བསྟན་པ་རྒྱས་པར་མཛད། །ལྷོ་ནུབ་མཚམས་སུ་སྲིན་པོའི་ཁ་གནོན་མཛད། །མྱ་ངན་མི་འདའ་འགྲོ་བའི་གཉེན་གཅིག་པུ། །སྐུ་གསུམ་ཆེ་མཆོག་བཛྲ་ཧེ་རུ་ཀཿ། །དུས་གསུམ་མཉམ་ཉིད་བླ་མ་དུས་འདིར་དྲན། །བདག་དང་བླ་མ་དབྱེར་མེད་ཧེ་རུ་ཀཿ། རྒྱལ་བའི་ཞིང་ཁམས་དག་པ་ཆེན་པོ་འདིར། །མི་འགྱུར་ལྷུན་གྲུབ་པདྨ་རྒྱལ་པོ་དང་། །བླ་མ་ཡི་དམ་མཁའ་འགྲོས་བྱིན་གྱིས་རློབས། །ཨོཾ་ཨཱཿཧཱུྃ་བཛྲ་གུ་རུ་པདྨ་སིདྡྷི་ཧཱུྃཿ ཧཱུྃ། བླ་མ་ཡི་དམ་མཁའ་འགྲོ་དང་། །སངས་རྒྱས་ཆོས་དང་དགེ་འདུན་དང་། །ཞི་རྒྱས་དབང་དང་མངོན་སྤྱོད་སོགས། །ཕྱི་ནང་སྲུང་མའི་ཚོགས་རྣམས་དང་། །གསང་སྔགས་རིགས་སྔགས་ལྷ་རྣམས་དང་། །འདས་དང་མ་བྱོན་ད་ལྟར་གྱི། །ལྷ་དང་སྲུང་མ་དམ་ཚིག་ཅན། །མ་མོ་མཁའ་འགྲོ་ཤུགས་འགྲོ་དང་། །འཇིག་རྟེན་གནས་ནི་མཆོག་གྱུར་པའི། །སྒྲུབ་གནས་བྱིན་ཅན་ཐམས་ཅད་དང་། །གཞན་ཡང་ས་འོག་ས་སྟེང་གི། དགེ་སྙེན་ཆེན་པོ་བྱིན་རླབས་ཅན། །འཁོར་དུ་གཏོགས་པའི་སྡེ་བརྒྱད་པོ། །སྟོང་གསུམ་ཁྱབ་པའི་མཐུ་རྩལ་ཅན། །སངས་རྒྱས་བསྟན་པ་བསྲུང་བ་དང་། །སྒྲུབ་པོའི་སྡོངས་གྲོགས་བྱེད་པ་དང་། །མི་མཐུན་བར་གཅོད་སེལ་བ་དང་། །དགྲ་བགེགས་གནས་ནས་འགུགས་པ་དང་། །རྣལ་འབྱོར་འཕྲིན་ལས་བཅོལ་བ་དང་། །ཡོན་བདག་བར་གཅོད་བསལ་བ་དང་། །དགོན་གནས་བར་གཅོད་ཞི་བའི་ཕྱིར། །བླ་མ་ཡི་དམ་མཁའ་འགྲོ་དང་། །ཆོས་སྐྱོང་སྲུང་མ་འཁོར་དང་བཅས། །ས་བདག་ཀླུ་གཉན་བརྔན་པའི་ཕྱིར། །འདིར་གཤེགས་བཤམས་པའི་གཏོར་མ་བཞེས། །བསྟན་པ་དར་ཞིང་རྒྱས་པར་མཛོད། ཧཱུྃ། མ་ལུས་སེམས་ཅན་ཀུན་གྱི་མགོན། །རྒྱལ་བ་ཤཱཀྱ་ཐུབ་པ་ལ། །ཕྱག་འཚལ་མཆོད་པ་སྣ་ཚོགས་འབུལ། །བཅོམ་ལྡན་རྒྱལ་བ་རིགས་ལྔ་ལ། །ཕྱག་འཚལ་མཆོད་པ་སྣ་ཚོགས་འབུལ། །རིགས་ཀྱི་ཡུམ་ཆེན་ལྔ་པོ་ལ། །ཕྱག་འཚལ་མཆོད་པ་སྣ་ཚོགས་འབུལ། །ཕྱོགས་བཅུའི་སངས་རྒྱས་ཐམས་ཅད་ལ། །ཕྱག་འཚལ་མཆོད་པ་སྣ་ཚོགས་འབུལ། །འཕགས་པ་རིགས་གསུམ་མགོན་པོ་ལ། །ཕྱག་འཚལ་མཆོད་པ་སྣ་ཚོགས་འབུལ། །ཞི་ཁྲོ་དཔལ་ཆེན་ལྷ་ཚོགས་ལ། །ཕྱག་འཚལ་མཆོད་པ་སྣ་ཚོགས་འབུལ། །འཕགས་པ་འོད་སྲུང་ལ་སོགས་པའི། །ཉན་ཐོས་ཆེན་པོ་ཐམས་ཅད་ལ། །ཕྱག་འཚལ་མཆོད་པ་སྣ་ཚོགས་འབུལ། །བྷ་ར་དྷྭ་ཛ་ལ་སོགས་པའི། །གནས་བརྟན་ཆེན་པོ་བཅུ་དྲུག་ལ། །ཕྱག་འཚལ་མཆོད་པ་སྣ་ཚོགས་འབུལ། །གདུང་བ་སེལ་བ་ལ་སོགས་པའི། །རང་རྒྱལ་ཆེན་པོ་བཅུ་གཉིས་ལ། །ཕྱག་འཚལ་མཆོད་པ་སྣ་ཚོགས་འབུལ། །ནམ་མཁའི་སྙིང་པོ་ལ་སོགས་པའི། །བྱང་ཆུབ་སེམས་དཔའ་ཐམས་ཅད་ལ། །ཕྱག་འཚལ་མཆོད་པ་སྣ་ཚོགས་འབུལ། །ཀུན་བཟང་རྡོ་རྗེ་འཆང་ལ་སོགས། །རྩ་བ་བརྒྱུད་པའི་བླ་མ་ལ། །ཕྱག་འཚལ་མཆོད་པ་སྣ་ཚོགས་འབུལ། །ཨིནྜ་བོ་དྷི་ལ་སོགས་པའི། །རྣལ་འབྱོར་གྲུབ་ཆེན་ཐམས་ཅད་ལ། །ཕྱག་འཚལ་མཆོད་པ་སྣ་ཚོགས་འབུལ། །ལུ་ཧི་པ་ལ་སོགས་པ་ཡི། །གྲུབ་ཆེན་བརྒྱད་ཅུ་ཐམས་ཅད་ལ། །ཕྱག་འཚལ་མཆོད་པ་སྣ་ཚོགས་འབུལ། །ཀླུ་སྒྲུབ་སྙིང་པོ་ལ་སོགས་པའི། །འཛམ་གླིང་རྒྱན་དྲུག་མཆོག་གཉིས་ལ། །ཕྱག་འཚལ་མཆོད་པ་སྣ་ཚོགས་འབུལ། །ཐེག་པ་རིམ་དགུའི་ལྷ་ཚོགས་ལ། །ཕྱག་འཚལ་མཆོད་པ་སྣ་ཚོགས་འབུལ། །རྡོ་རྗེ་ཕུར་པ་ལ་སོགས་པའི། །བླ་མེད་ལྷ་ཚོགས་ཐམས་ཅད་ལ། །ཕྱག་འཚལ་མཆོད་པ་སྣ་ཚོགས་འབུལ། །སློབ་དཔོན་པདྨ་རྒྱལ་པོ་ལ། །ཕྱག་འཚལ་མཆོད་པ་སྣ་ཚོགས་འབུལ། །ནུབ་ཕྱོགས་ཨོ་རྒྱན་དུར་ཁྲོད་ནས། །མ་སྲིང་མཁའ་འགྲོ་རྒྱ་མཚོ་ལ། །ཕྱག་འཚལ་མཆོད་པ་སྣ་ཚོགས་འབུལ། །གནས་མཆོག་ཉི་ཤུ་རྩ་བཞི་ཡི། །དཔའ་བོ་མཁའ་འགྲོ་ཐམས་ཅད་ལ། །ཕྱག་འཚལ་མཆོད་པ་སྣ་ཚོགས་འབུལ། ཧཱུྃ། ན་བཟའ་ལྷབ་ལྷུབ་སྣ་ཚོགས་དང་། །རིན་ཆེན་སྣ་ལྔའི་ཕྲེང་བ་ཡིས། །ལྷ་ཡི་དབང་པོ་བརྒྱ་བྱིན་བརྔན། །ཚངས་པ་གསེར་གྱི་ཕྱེ་མས་བརྔན། །རྒྱལ་ཆེན་སྡེ་བཞི་སྟག་གིས་བརྔན། །ཤེལ་སྒོང་ནག་པོ་སྤྱི་དཀར་དང་། །ཤ་ཁྲག་དམར་གྱི་གཏོར་མ་ཡིས། །ལེགས་ལྡན་མགོན་པོ་ནག་པོ་བརྔན། །བརྒྱན་པའི་མཆོད་པ་སྣ་ཚོགས་དང་། །བདུད་རྩི་ཤ་ཁྲག་གསེར་སྐྱེམས་དང་། །མཁའ་ལྡིང་ནག་པོ་གསེར་མིག་གིས། །དཔལ་ལྡན་ལྷ་མོ་ནག་མོ་བརྔན། །ལྷ་རྣམས་འདོད་ཡོན་ལྔ་ཡིས་བརྔན། །ལྷ་མིན་མེ་ཏོག་ཕྲེང་བས་བརྔན། །ཀླུ་རྣམས་མངར་གསུམ་གཏོར་མས་བརྔན། །གཉན་རྣམས་དར་ཟབ་སྟག་གིས་བརྔན། །ས་བདག་གསེར་དང་དངུལ་གྱིས་བརྔན། །ལྷ་མོ་བསྟན་མ་བུམ་པས་བརྔན། །དྲི་ཟ་དྲི་དང་གསུར་གྱིས་བརྔན། །སྲིན་པོ་ཤ་ཁྲག་གཏོར་མས་བརྔན། །ལྟོ་འཕྱེ་གྲུལ་བུམ་མིའམ་ཅི། །མཆོད་པ་སྣ་ཚོགས་གཏོར་མས་བརྔན། །པེ་ཧར་སྦ་དང་སྨྱུག་གིས་བརྔན། །དགེ་བསྙེན་ར་ཤ་ཆང་གིས་བརྔན། །ཡིད་ཀྱི་གཟུགས་ཅན་ཐམས་ཅད་ལ། །ཡིད་དང་མཐུན་པའི་གཏོར་མས་བརྔན། །གོང་ཀའི་བཙན་རྣམས་གོང་ཀར་བརྔན། །དམུ་བདུད་སོ་སོའི་གནས་སུ་བརྔན། །རྒྱ་མཚོ་ནང་གི་ཀླུ་ཆེན་བརྒྱད། །ཀླུ་རྟ་རྒྱན་དང་ལྡན་པས་བརྔན། །བར་སྣང་གནས་པའི་བཟའ་ཆེན་བརྒྱད། །གཟའ་ར་རོག་པོའི་སྙིང་གིས་བརྔན། །རྒྱུ་སྐར་ཉི་ཤུ་རྩ་བརྒྱད་དང་། །བློན་པོ་སུམ་ཅུ་རྩ་བདུན་ནི། །རིན་ཆེན་དངུལ་གྱི་ཕྱེ་མས་བརྔན། །འཕྲོག་མ་མ་བུ་ལྔ་བརྒྱ་ནི། །ཆངས་བུ་དག་གི་གཏོར་མས་བརྔན། །རིགས་ཀྱི་སྲུང་མ་ཐམས་ཅད་ལ། །སོ་སོར་མཐུན་པའི་གཏོར་མས་བརྔན། །སྒོ་བཞིའི་སྲུང་མ་དོང་ཙེས་བརྔན། །ལྷ་སྲུང་གཉན་པོ་ཁྱེད་རྣམས་ཀྱིས། །བསམ་པ་སྒྲུབས་ལ་རེ་བ་སྐོངས། །བར་དུ་གཅོད་པའི་དགྲ་བགེགས་ཐུལ། །ཧཱུྃ། དུས་གསུམ་སངས་རྒྱས་ཐམས་ཅད་ཀྱི། །བྱང་ཆུབ་ཐུགས་སུ་ཆུད་པའི་གནས། །རྡོ་རྗེ་གདན་གྱི་ས་བདག་བརྔན། །རྒྱ་གར་ཤར་ནུབ་རི་བོ་ཆེ། །མ་མོ་མཁའ་འགྲོ་འདུ་བའི་གནས། །རི་བོ་ཏ་ལའི་ས་བདག་བརྔན། །བྱ་རྒོད་སྤུངས་པའི་རི་དང་ནི། །སྤོས་ངད་ལྡན་པའི་རི་བོ་བརྔན། །ཙ་རི་ཙ་གོང་ལ་སོགས་པའི། །རྒྱ་གར་ཤར་ཕྱོགས་ས་བདག་བརྔན། བསིལ་བ་ཚལ་གྱི་དུར་ཁྲོད་དང་། །བརྔམ་པ་དང་ནི་སྒྲ་སྒྲོགས་དང་། །ཧ་ཧ་རྒོད་པ་ལ་སོགས་པའི། །དུར་ཁྲོད་བརྒྱད་ཀྱི་ས་བདག་བརྔན། །བལ་ཡུལ་གསེར་ཕུག་ལ་སོགས་པའི། །བལ་བོའི་ས་བདག་ཐམས་ཅད་བརྔན། །ཏེ་སེ་གངས་དཀར་ལ་སོགས་པའི། །རྗེ་ཡི་མགུར་ལྷ་བཅུ་གསུམ་བརྔན། །མ་ཕམ་གཡུ་མཚོའི་མཚོ་སྨན་བརྔན། །རི་བོ་ཏ་ལ་ལ་སོགས་པའི། །མངའ་རིས་སྐོར་གསུམ་ས་བདག་བརྔན། །རི་བོ་འབིགས་བྱེད་ལ་སོགས་པའི། །འཛམ་གླིང་ས་བདག་ཀླུ་གཉན་བརྔན། །ཧཱུྃ། ཡུལ་ནི་རྡོ་རྗེ་བྲག་དམར་གྱི། །སྲིང་གཅིག་གངས་དཀར་ཤ་མེད་མ། །ཆིབས་སུ་དྲེའུ་རྟ་རྐང་གསུམ་བཅིབས། །བཤོས་བུ་སྙིང་དང་གཏོར་མས་བརྔན། །ཧཱུྃ། ཡུལ་ནི་རྨ་ཆེན་སྤོམ་ར་ཡི། །སྲིང་གཅིག་ཁ་རག་ཁྱུང་བཙུན་མ། །ཆིབས་སུ་གྱི་ལིང་ཁ་དཀར་བཅིབས། །བཤོས་བུ་སྙིང་དང་གཏོར་མས་བརྔན། །ཧཱུྃ། ཡུལ་ནི་མ་ཧཱ་དེ་ཝ་ཡི། །སྲིང་གཅིག་རྡོ་རྗེ་ཀུན་གྲགས་མ། །ཆིབས་སུ་ཆུ་གླང་སྔོན་པོ་བཅིབས། །བཤོས་བུ་སྙིང་དང་གཏོར་མས་བརྔན། །ཧཱུྃ། ཡུལ་ནི་དབུ་རུ་སྙིང་ཚལ་གྱི། །སྲིང་གཅིག་རྡོ་རྗེ་གཡུ་སྒྲོན་མ། །ཆིབས་སུ་ཆུ་རྟ་སྔོན་པོ་བཅིབས། །བཤོས་བུ་སྙིང་དང་གཏོར་མས་བརྔན། །ཧཱུྃ། ཡུལ་ནི་ལྷོ་ཕུག་དེ་སྙིང་ན། །སྲིང་གཅིག་སྐྱི་མཐིང་ཡང་མ་སྐྱོང་། །ཆིབས་སུ་གསེར་ཤ་ཡུ་མོ་བཅིབས། །བཤོས་བུ་སྙིང་དང་གཏོར་མས་བརྔན། །ཧཱུྃ། ཡུལ་ནི་སེ་ཤ་དེ་ཝ་ན། །སྲིང་གཅིག་ཨུག་ཆོས་གཡར་མོ་བསིལ། །ཆིབས་སུ་རུས་སྦལ་མགོ་དགུ་བཅིབས། །བཤོས་བུ་སྙིང་དང་གཏོར་མས་བརྔན། །ཧཱུྃ། ཡུལ་ནི་བལ་ཡུལ་གསེར་ཕུག་ན། །ཨེ་ཀ་ཙ་ཏི་རལ་གཅིག་མ། །ཆིབས་སུ་གཡུ་འབྲུག་སྔོན་མོ་བཅིབས། །བཤོས་བུ་སྙིང་དང་གཏོར་མས་བརྔན། །ཧཱུྃ། ཡུལ་ནི་ན་ལན་ཤིང་ལན་ན། །བཙན་ལ་རོལ་པའི་སྨན་གཅིག་མ། །ཆིབས་སུ་དྲེའུ་རྟ་རྐང་གསུམ་བཅིབས། །བཤོས་བུ་སྙིང་དང་གཏོར་མས་བརྔན། །ཧཱུྃ། ཡུལ་ནི་ཀོང་ཡུལ་ཀོང་ཕུག་ན། །གངས་ཀྱི་ཡུམ་ཆེན་གཡུ་བུན་མ། །ཆིབས་སུ་སྟག་མོ་རི་བཀྲ་བཅིབས། །བཤོས་བུ་སྙིང་དང་གཏོར་མས་བརྔན། །ཧཱུྃ། ཡུལ་ནི་མང་ཡུལ་མར་དེངས་ན། །ཆེ་ཞེ་གཙུག་འཆང་འོད་འབར་མ། །ཆིབས་སུ་འབྲོང་བུ་དར་མ་བཅིབས། །བཤོས་བུ་སྙིང་དང་གཏོར་མས་བརྔན། །ཧཱུྃ། ཡུལ་ནི་དབུ་རུ་སྙིང་ཚལ་གྱི། །བྱང་གི་མ་ཏིང་ཏིང་མོ་བཙུན། །ཆིབས་སུ་འབྲོང་ཆེན་འགྱིང་བ་བཅིབས། །བཤོས་བུ་སྙིང་དང་གཏོར་མས་བརྔན། །ཧཱུྃ། ཡུལ་ནི་ནུབ་ཡུལ་དགའ་ཚལ་གྱི། །བར་ལྷ་བཙད་པོ་གདུག་པ་འདུལ། །ཆིབས་སུ་དོམ་བུ་ཐོང་དཀར་བཅིབས། །བཤོས་བུ་སྙིང་དང་གཏོར་མས་བརྔན། ཧཱུྃ། ཁ་རག་ཁྱུང་བཙུན་ལ་སོགས་པའི། །གཙང་གཡས་རུ་གཡོན་རུ་ཉིན་སྲིབ་ཀྱི། །ས་བདག་ཀླུ་གཉན་ཐམས་ཅད་བརྔན། ཡར་ལྷ་ཤམ་པོ་ལ་སོགས་པའི། །དབུ་རུ་ཉིན་སྲིབ་ས་བདག་བརྔན། །གཉན་ཆེན་ཐང་ལྷ་ཡར་ཞུད་དང་། །བར་ལྷ་བཙན་པོ་ལ་སོགས་པའི། །དབུས་གཙང་རུ་བཞིའི་ས་བདག་བརྔན། །ཡར་འབྲོག་གཡུ་མཚོ་ཕྱུག་མོ་བརྔན། །གཙང་གི་ལྷ་རྒོད་མདུང་རྩེ་བརྔན། །འོ་དེ་གུང་རྒྱལ་ལ་སོགས་པའི། །ཉང་པོའི་ས་བདག་ཀླུ་གཉན་བརྔན། །སྒམ་པོ་པ་རི་ལ་སོགས་པའི། །དྭགས་པོའི་ས་བདག་ཐམས་ཅད་བརྔན། །ཀོང་བཙུན་དེ་མོ་ལ་སོགས་པའི། །ཀོང་པོའི་ས་བདག་ཀླུ་གཉན་བརྔན། །ནགས་སོག་ཆུ་རྒྱུད་དགེ་བསྙེན་བརྔན། །རོང་ལྷ་དེ་ནི་རྒྱལ་མཚན་བརྔན། །མོ་མོན་དེ་ནི་མཆེད་བརྒྱད་བརྔན། །རོང་བཙན་ཁ་བ་དཀར་པོ་བརྔན། །རྔུ་ཡི་ས་བདག་ཀླུ་གཉན་བརྔན། །དམག་དཔོན་དགྲ་འདུལ་ལ་སོགས་པའི། །ཚ་བ་སྒང་གི་ས་བདག་བརྔན། །གཟེ་ཡི་མ་ཡོ་ག་པ་དང་། །ཅི་ཡི་ས་བདག་ཐམས་ཅད་བརྔན། །རྩི་ཡི་དཔལ་རྒོད་མཐོན་པོ་སོགས། །ཟླ་སྙིང་དཀར་ནག་ས་བདག་བརྔན། །རྒྱམ་གྱི་མདོ་ཏི་གངས་དཀར་སོགས། །ཟླ་ཡི་ས་བདག་ཐམས་ཅད་བརྔན། །ཀླུ་ཡི་མི་མགོན་དཀར་པོ་སོགས། །མདོ་ཁམས་སྒང་དྲུག་ས་བདག་བརྔན། །ལྷ་ཡི་དགེ་བསྙེན་ཆེན་པོ་སྟེ། །མགྱོགས་ཆེན་གདོང་ར་ལ་སོགས་པའི། །འབྲི་ལུང་ཉིན་སྲིབ་ས་བདག་བརྔན། །ཟླ་ཁྲ་ཝ་སྙིང་མི་འགྱུར་དང་། །གེར་མཛོ་རི་དམར་དབང་ཞུ་སོགས། །ཟླ་བའི་ས་བདག་ཀླུ་གཉན་བརྔན། །ཤར་གྱི་རྨ་ཆེན་སྤོམ་ར་ནི། །རྨ་རིགས་སུམ་བརྒྱ་དྲུག་ཅུ་དང་། །སྲིང་ལྕམ་བཞི་བཅུ་ཞེ་ལྔ་སོགས། །རྨ་ཆུའི་ས་བདག་ཀླུ་གཉན་བརྔན། །བེར་བུ་ཡི་ནི་དུག་མཚོ་དང་། །སྟོང་རི་ཡི་ནི་མཚོ་ནག་དང་། །ད་འུ་ཚ་མཚོ་དཀར་མོ་དང་། །ཁྲི་གཤོག་རྒྱལ་མོའི་མཚོ་དང་ནི། །ཙོང་ཁ་ཡི་ནི་མཚོ་སྔོན་དང་། །མཚོ་སྨན་རྒྱལ་མོ་མཆེད་ལྔ་བརྔན། །སྐྱེ་རི་གཉན་པོ་ལ་སོགས་པའི། །གཙོང་ཁ་ཉིན་སྲིབ་ས་བདག་བརྔན། །ཨན་ཛ་རི་དང་ཧ་ལ་ཤན། །གྷ་ཏ་བྱང་ངོས་ས་བདག་བརྔན། །དམའ་ལུང་དན་ཏིག་དགོན་པ་སོགས། །གཞོན་ནུ་ཀརྟི་དཀར་ཡག་གི། ས་བདག་ཀླུ་གཉན་ཐམས་ཅད་བརྔན། །ཞོ་ཤན་ལ་འོ་ཆེ་ལ་སོགས། །དབྱར་མོ་ཐང་གི་ས་བདག་བརྔན། །ཙི་ཡི་དུང་རི་མཐོན་པོ་སོགས། །པོ་ཏི་བྲག་དམར་སྒང་རྒྱུད་ཀྱི། །ས་བདག་ཀླུ་གཉན་ཐམས་ཅད་བརྔན། །སྤོ་ཟི་ཤེལ་ལུང་ཕྱུག་མོ་བརྔན། །ཁྲི་ཁ་ཡ་ལུང་རལ་གསུམ་བརྔན། །རྨ་ཁྲོམ་རལ་གསུམ་ས་བདག་བརྔན། །སྐུ་བེར་གཞུང་གསུམ་ས་བདག་བརྔན། །གཉན་གོང་གཉན་དམར་ས་བདག་བརྔན། །ཐེབ་བཅུ་ཉིན་སྲིབ་ས་བདག་བརྔན། །ལྷ་སྲིན་མ་མོ་བྱེ་བའི་ཡུལ། །འོ་དེ་རལ་གསུམ་ས་བདག་བརྔན། །ཤིན་ཏུ་ཁྲོ་གཏུམ་ཆེ་བའི་ཡུལ། །རྒྱལ་མོ་རོང་གི་ས་བདག་བརྔན། །འཇང་རི་སྨུག་པོ་ལ་སོགས་པའི། །འཇང་གི་ཡུལ་གྱི་ས་བདག་བརྔན། །རི་བོ་རྩེ་ལྔ་ལ་སོགས་པའི། །རྒྱ་ནག་ཡུལ་གྱི་ས་བདག་བརྔན། །སྐམ་དང་གཤེར་ལ་གནས་པ་ཡི། །ས་བདག་ཀླུ་གཉན་ཐམས་ཅད་བརྔན། །ཆུ་ལ་གནས་པའི་ཀླུ་རྣམས་བརྔན། །རྡོ་ལ་གནས་པའི་གཞི་བདག་བརྔན། །ལམ་ལ་གནས་པའི་བཙན་རྣམས་བརྔན། །ཤིང་ལ་གནས་པའི་གཉན་རྣམས་བརྔན། །ས་ལ་གནས་པའི་ས་བདག་བརྔན། །ཡུལ་རི་འདི་ཡི་གཞི་བདག་བརྔན། །གནས་རི་འདི་ཡི་སྲུང་མ་བརྔན། །མིང་དང་མཚན་དུ་མ་ཐོན་པའི། །ལྷ་དང་སྲུང་མ་ཐམས་ཅད་བརྔན། །ཡུལ་ལྷ་གཞི་བདག་ཐམས་ཅད་བརྔན། །གློ་བུར་ལྷགས་པ་ཐམས་ཅད་བརྔན། །ཁྱེད་རྣམས་ཁ་རྗེ་དབང་ཐང་ཆེ། །མཐུ་དང་ནུས་པ་སོ་སོར་ཆེ། །མཆོད་འོས་བསྟོད་འོས་ཁྱེད་རྣམས་ལ། །བརྔན་དང་མཆོད་པ་ཕུལ་བའི་མཐུས། །མགུ་ཞིང་བསམ་པ་རངས་པ་དང་། །བྱང་ཆུབ་སེམས་མཆོག་རིན་པོ་ཆེ། །གཉིས་མེད་ཡེ་ཤེས་རྟོགས་པར་ཤོག །ཅེས་སོགས་སློབ་དཔོན་པདྨ་འབྱུང་གནས་ཀྱིས། །འདི་སྐད་བརྔན་འདི་མཛད་པ་ཡིས། །བཙན་པོའི་ལྷ་ཁང་ཆོས་འཁོར་འབྱུངས། །ཉིན་མོར་མི་ཡིས་བརྩིགས་པ་ལས། །མཚན་མོ་ལྷ་འདྲེས་བརྩེགས་པ་མཐོ། །རྩི་ཤིང་ལོ་ཏོག་འབྲས་བུ་སྨིན། །མཐའ་འདུལ་གཙུག་ལག་བརྒྱ་རྩ་བརྒྱད། །ཡང་འདུལ་གཙུག་ལག་མཆོད་རྟེན་གྲུབ། །ཡ་མཚན་ངོ་མཚར་སྣ་ཚོགས་བྱུང་། །བཙད་པོ་རྗེ་འབངས་དད་པ་སྐྱེས། །སེམས་ཅན་བདེ་ལ་འཁོད་པར་གྱུར། །དེ་ཕྱིར་ཕྱི་རབས་རྣལ་འབྱོར་པས། །བླ་མེད་བྱང་ཆུབ་སྒྲུབ་པ་དང་། །འབྲི་ཀློག་ཉན་བཤད་བྱེད་པ་དང་། །དགོན་གནས་གསར་པ་འཛིན་པ་དང་། །ཞིང་ཆུ་སོ་ནམས་བྱེད་པ་དང་། །རྒན་གྱི་ཕོ་ཚེ་བསྲིང་བ་དང་། །དམངས་ཀྱི་བུ་ཚེ་བསྲིང་བ་དང་། །འཁོར་གྱི་བུ་རྟ་མགྱོགས་པ་དང་། །སྲིད་པའི་མདོས་ཆེན་སྐྱེལ་བ་དང་། །ཟོར་ཁ་དགྲ་ལ་སྟོནཔ་དང་། །ཐག་རིང་མགྲོན་ལ་འགྲོ་བ་དང་། །མཐའ་དམག་བཟློག་དང་ནད་ཡམས་གཅོད། །གྲ་མ་ཆེན་པོ་མགྱོགས་པ་དང་། །ལས་བཞིའི་ཕྲིན་ལས་སྒྲུབ་པ་སོགས། །ཆེ་དྲག་ལས་ཀ་ཐམས་ཅད་ལ། །འདི་ལྟར་བརྩོན་པས་ཐོགས་མེད་འགྲུབ། །སློབ་དཔོན་པདྨ་འབྱུང་གནས་ཀྱིས་མཛད་པའི་བརྒྱགས་བརྔན་ཆེན་མོ་རྫོགས་སོ། བརྔན་དཔེ་འདི་ཡིག་ཆ་མང་པོར་དག་ཐེར་དུ་མ་བྱས་ཏེ་འགྲམ་འཁྲུག་བཅོས་བསླད་གང་འདུག་བསལ་ནས་ཉི་མ་གྲགས་པས་བྲིས་པའོ། ༈དེ་ནས་བརྔན་བཏེག་སྟེ། ཧཱུྃ། སྔོན་གྱི་བསྐལ་པའི་དང་པོ་ལ། །སློབ་དཔོན་པདྨ་འབྱུང་གནས་ཀྱིས། །བཀའ་དང་དམ་ལ་བཏགས་པ་ཡི། །སྣང་སྲིད་ལྷ་སྲིན་སྡེ་བརྒྱད་རྣམས། །འདིར་གཤེགས་བདག་ལ་དགོངས་སུ་གསོལ། །བརྔན་པའི་དམ་རྫས་འདི་འབུལ་བཞེས། །ཀྱཻ་ཤེལ་ཚིག་དཀར་ནག་མཆོད་པ་དང་། །དཀར་མོ་གཡང་མོ་ལུག་བརྒྱ་འབུལ། །ནག་མོ་ཟལ་མོ་འབྲི་བརྒྱ་འབུལ། །ཁྲ་བོ་མདོག་སྡུག་རྟ་བརྒྱ་འབུལ། །ཁམ་པ་འགྱིང་བ་གཡག་བརྒྱ་འབུལ། །རྩ་ར་རོག་པོ་ར་བརྒྱ་འབུལ། །དཀར་དམར་གཏོར་མའི་ཚོགས་རྣམས་སྤུངས་སེ་སྤུང་། །འབྲང་རྒྱས་ཞལ་དཀར་ཚོགས་ནི་ཟངས་སེ་ཟང་། །འབྲོང་གཡག་རྣམས་ནི་ངར་སྒྲ་ཆེམས་སེ་ཆེམ། །ར་ལུག་རྣམས་ཀྱང་འབའ་སྒྲ་དིར་རི་རི། །བོང་དྲེལ་རྣམས་ཀྱང་འཚེར་སྐད་ཕྲི་ལི་ལི། །ར་སྐྱེས་རྣམས་ཀྱང་རྨིག་སྒྲ་ཤ་ར་ར། །སྙན་བྱ་རྣམས་ཀྱང་གསུང་སྙན་སྐྱུ་རུ་རུ། །མཛོ་ཏོལ་རྣམས་ཀྱང་ངུར་སྒྲ་ཝངས་སེ་ཝང་། །ཅང་ཤེས་རྣམས་ཀྱང་འཚེར་སྐད་ལྷངས་སེ་ལྷང་། །བ་གླང་རྣམས་ཀྱང་འབུ་སྒྲ་དི་རི་རི། །ཕག་རྒོད་རྣམས་ཀྱང་ངུར་སྒྲ་དི་རི་རི། །རི་དྭགས་རྣམས་ཀྱང་རྩེ་རྒྱུག་སྤྲིངས་སེ་སྤྲིང་། །འདབ་ཆགས་རྣམས་ཀྱང་འཕུར་དང་ལྷབས་སེ་ལྷབ། །གཅན་གཟན་རྣམས་ཀྱང་ངར་སྐད་ཆི་ལི་ལི། །ཁྱི་གུ་རྣམས་ཀྱང་ཟུག་སྐད་ཀངས་སེ་ཀང་། །རོ་མངར་བདུད་རྩིའི་རྒྱ་མཚོ་མེ་རེ་རེ། །ཞལ་ཟས་མཆོད་པའི་ཕུང་པོ་ཆི་ལི་ལི། །སྦ་སྨྱུག་རྩི་ཤིང་ཚོགས་ནི་ལྡེམས་སེ་ལྡེམ། །བལ་ཚོན་སྣ་ཚོགས་སྤྲིན་ཕུང་ཐིབས་སེ་ཐིབ། །དར་ཚོན་སྣ་ཚོགས་འཇའ་ཚོན་ཁྱུགས་སེ་ཁྱུག །སྟ་རས་གཟིགས་རས་ཚོགས་ནི་ལྷབས་སེ་ལྷབ། །གསེར་དངུལ་རིན་ཆེན་སྣ་ཚོགས་ཁྲོ་ལོ་ལོ། །དྲི་ཞིམ་སྨན་ངད་སྣ་ཚོགས་ཆི་ལི་ལི། །བསང་གསུར་དུད་པ་དྲི་ཞིམ་ཐུ་ལུ་ལུ། །འཕན་གདུགས་དར་དཔྱང་ཚོགས་ནི་པུ་རུ་རུ། །རྔ་གླིང་རོལ་མོའི་ཚོགས་ནི་འུ་རུ་རུ། །འདི་འདྲའི་དམ་རྫས་མང་པོའི་མཆོད་པ་ཡིས། །སྲུང་མ་ཐམས་ཅད་སོ་སོར་བརྔན། །ཁྱེད་རྣམས་བརྔན་མཆོད་གསོལ་བ་ཡིས། །བདག་ཅག་རྣལ་འབྱོར་འཁོར་བཅས་ཀྱི། །མི་ནོར་ལོངས་སྤྱོད་འཕེལ་བར་མཛོད། །བདག་གི་དགེ་བའི་སྡོངས་གྲོགས་མཛོད། །མི་མཐུན་རྐྱེན་དང་བར་ཆད་ཟློག །བསམ་པ་སྒྲུབ་ལ་རེ་བ་སྐོངས། །བར་དུ་གཅོད་པའི་དགྲ་བགེགས་ཐུལ། །བཅོལ་པའི་མི་ནོར་ཐུབ་པར་སྲུངས། །གང་བསམ་སྒྲུབ་ལ་ཕྲིན་ལས་མཛོད། །བདག་ཅག་རྣལ་འབྱོར་འཁོར་བཅས་ཀྱིས། །ས་བསྐོས་ས་བདག་འགྲས་ན་བརྔན་གྱིས་བསྡུམས། །ཆུ་དཀྲུགས་ཀླུ་དང་འགྲས་ན་བརྔན་གྱིས་བསྡུམས། །ཤིང་བཅད་བདུད་དང་འགྲས་ན་བརྔན་གྱིས་བསྡུམས། །བདུད་ལམ་བཙན་བདུད་འགྲས་ན་བརྔན་གྱིས་བསྡུམས། །བདག་ཅག་རྣལ་འབྱོར་འཁོར་བཅས་དང་། །ལྷ་སྲུང་གཉན་དང་ཡུལ་ལྷ་དང་། །ས་བདག་ལྷ་སྲིན་སྡེ་བརྒྱད་གཉིས། །འཁོན་པ་སྡུམ་ལ་འགྲས་པ་སྦྱངས། །བུ་ལོན་ལན་ཆགས་སོད་གྱུར་ཅིག །ཕྱིན་ཆད་འཁོར་འདིར་གནོད་པ་མ་བྱེད་ཅིག །མི་ལ་ན་ཚ་མ་གཏོང་ཞིག །ཕྱུགས་ལ་གོད་ཡམས་མ་གཏོང་ཞིག །ཞིང་ལ་བཙའ་སད་སེར་གསུམ་མ་གཏོང་ཞིག །ནད་གདོན་འགལ་རྐྱེན་བར་གཅོད་ཞི་བ་དང་། །ཚེ་དབང་བསོད་ནམས་ལོངས་སྤྱོད་རྒྱས་པ་དང་། །མཆོག་དང་ཐུན་མོང་དངོས་གྲུབ་སྩོལ། །བཅོལ་བའི་འཕྲིན་ལས་སྒྲུབས་པར་མཛོད། །ཅེས་བརྔན་གཏོར་གཙང་སར་སྐྱེལ། །སློབ་དཔོན་པདྨས་མཛད་པའི་བརྔན་འགྱོགས་རྫོགས་སོ།། །།

གཉན་ཞི་བ་དཀར་མོའི་བསང་མཆོད།

གཉན་ཞི་བ་དཀར་མོའི་བསང་མཆོད་ཅེས་བྱ་བ་བཞུགས་སོ༔ ན་མོ་གུ་རུ། །བདག་ཅག་ཡོན་མཆོད་གང་དག་གི། ཕྲག་དོག་རིམས་ནད་གཞིལ་བ་དང་། །ཡུལ་རིས་མི་མཐུན་བར་ཆད་དང་། །ནད་ཡམས་རྣམས་ནི་གཞིལ་བའི་ཕྱིར། །གཉན་གྱི་ཞི་བ་དཀར་མོ་བརྩམས། །གཞུང་བཞིན་མཆོད་གཏོར་ཚང་བ་དང་། །རྡོ་ལེབ་བམ་ནི་གཡམ་པ་ལ། །པདྨ་འདབ་བརྒྱད་བྲི་བར་བྱ། །དབུས་སུ་ཨ་རཾ་ལེགས་པར་བཀོད། །དར་སྣ་སྟག་གཟིག་རས་མོ་དང་། །དཀར་གསུམ་མངར་གསུམ་རིན་ཆེན་ལྔ། །བ་ལུ་ཤུག་པ་སྟག་པ་དང་། །གཉན་ཤིང་བསང་རྫས་མཆོད་རྫས་ལ། །སྔགས་དྲུག་ཕྱག་དྲུག་གིས་བྱིན་གྱིས་བརླབ། །རོལ་མོའི་སྒྲ་སྒྲོགས་འདི་སྐད་དོ། །ཨཱོཾ་སྭཱ་བྷ་ཝ་ཤུདྡྷ་སརྦ་དྷརྨཱ་སྭཱ་བྷ་ཝ་བི་ཤུདྡྷོ྅་ཧཾ། ན་མཿསརྦ་ཏ་ཐཱ་ག་ཏ་བྷྱོ་བི་ཤྭ་མུ་ཁེ་བྷྱ༔ སརྦ་ཏཏྑཾ་ཨུཏྒ་ཏེ་སྥ་ར་ཎ་ཨི་མཾ་ག་ག་ན་ཁཾ་སྭཱ་ཧཱ། ཨོཾ་བཛྲ་ཨ་མྲྀ་ཏ་ཀུཎྜ་ལི་ཧ་ན་ཧ་ན་ཧཱུྃ་ཕཊ། ན་མཿསརྦ་ཏ་ཐཱ་ག་ཏ་ཨ་ཝ་ལོ་ཀི་ཏེ། ཨཱོཾ་སམྦྷ་ར་སམྦྷ་ར་ཧཱུྃ། ཨོཾ་ཛྙཱ་ན་ཨ་ཝ་ལོ་ཀི་ཏེ། ན་མཿས་མནྟ་སྥ་ར་ཎ་རསྨི་བྷ་ཝ་མ་ཧཱ་མ་ཎི་དུ་རུ་དུ་རུ་ཧྲཱིཿད་ཡ་ཛྭ་ལ་ནི་སྭཱ་ཧཱ། ན་མཿས་མནྟ་བུདྡྷ་ནཱཾ་གྲ་ཧེ་ཤྭ་རི་པྲ་བྷཉྫ་ན་མ་ཧཱ་ས་མ་ཡ་ཧཱུྃ་ཕཊ། ཧཱུྃ། སངས་རྒྱས་ཆོས་དང་དགེ་འདུན་དང་། །བླ་མེད་འཕགས་པ་དཀོན་མཆོག་གསུམ། །ཕྱོགས་བཅུའི་རྒྱལ་བ་སྲས་བཅས་རྣམས། །སེམས་ཅན་དོན་ལ་དགོངས་མཛོད་ལ། །ཞི་བའི་གནས་འདིར་གཤེགས་སུ་གསོལ། །བདག་དང་རྒྱུ་སྦྱོར་ཡོན་བདག་གི། བག་ཆགས་འཁྲུལ་སྣང་ཞི་བར་མཛོད། །ཧཱུྃ། སློབ་དཔོན་པདྨ་ལ་སོགས་པའི། །རྣལ་འབྱོར་གྲུབ་ཆེན་ཐམས་ཅད་ཀུན། །སེམས་ཅན་དོན་ལ་དགོངས་མཛོད་ལ། །ཞི་བའི་གནས་འདིར་གཤེགས་སུ་གསོལ། །བདག་དང་རྒྱུ་སྦྱོར་ཡོན་བདག་གི། དག་སྣང་བདེ་ཆེན་སྤར་དུ་གསོལ། །ཧཱུྃ། རྡོ་རྗེ་ཕུར་པ་ལ་སོགས་པའི། །ཞི་ཁྲོ་རབ་འབྱམས་ལྷ་ཚོགས་རྣམས། །སེམས་ཅན་དོན་ལ་དགོངས་མཛོད་ལ། །ཞི་བའི་གནས་འདིར་གཤེགས་སུ་གསོལ། །བདག་དང་རྒྱུ་སྦྱོར་ཡོན་བདག་གི། ལོག་རྟོག་འཁྲུལ་སྣང་ཞི་བར་མཛོད། །ཧཱུྃ། གསང་བདག་ཕྱག་རྡོར་ལ་སོགས་པའི། །རྒྱུད་སྡེ་ཕྱི་ནང་ལྷ་ཚོགས་རྣམས། །སེམས་ཅན་དོན་ལ་དགོངས་མཛོད་ལ། །ཞི་བའི་གནས་འདིར་གཤེགས་སུ་གསོལ། །བདག་དང་རྒྱུ་སྦྱོར་ཡོན་བདག་གི། མི་མཐུན་ཚོགས་རྣམས་ཞི་བར་མཛོད། །ཧཱུྃ། རྟ་མཆོག་རྒྱལ་པོ་ལ་སོགས་པའི། །གསང་སྔགས་དབང་གི་ལྷ་ཚོགས་རྣམས། །སེམས་ཅན་དོན་ལ་དགོངས་མཛོད་ལ། །ཞི་བའི་གནས་འདིར་གཤེགས་སུ་གསོལ། །བདག་དང་རྒྱུ་སྦྱོར་ཡོན་བདག་གི། མི་མཐུན་ཚོགས་རྣམས་ཞི་བར་མཛོད། ཧཱུྃ། བླ་མ་ཡི་དམ་མཁའ་འགྲོ་དང་། །ཆོས་སྐྱོང་སྲུང་མའི་ལྷ་ཚོགས་རྣམས། །སེམས་ཅན་དོན་ལ་དགོངས་མཛོད་ལ། །ཞི་བའི་གནས་འདིར་གཤེགས་སུ་གསོལ། །བདག་དང་རྒྱུ་སྦྱོར་ཡོན་བདག་གི། བར་གཅོད་བགེགས་དཔུང་ཞི་བར་མཛོད། །ཧཱུྃ། ཚངས་པ་བརྒྱ་བྱིན་ཕྱོགས་སྐྱོང་བཅུ། །ནོར་ལྷ་མཆེད་བརྒྱད་ལ་སོགས་པའི། །ཕྱི་རྒྱུད་འཇིག་རྟེན་སྲུང་མ་རྣམས། །སེམས་ཅན་དོན་ལ་དགོངས་མཛོད་ལ། །ཞི་བའི་གནས་འདིར་གཤེགས་སུ་གསོལ། །བདག་དང་རྒྱུ་སྦྱོར་ཡོན་བདག་གི། ཕྲག་དོག་རིམས་ནད་ཞི་བར་མཛོད། །ཀྱཻ། དད་པ་དང་ནི་དམ་ཚིག་གིས། །དྲི་ཟ་ཐང་ལྷ་མཐུ་བོ་ཆེ། །འཁོར་དང་བཅས་པ་མ་ལུས་ཀུན། །ཞི་བའི་གནས་འདིར་སྤྱན་འདྲེན་གྱི། །གཡུ་ཤུག་སྔོན་པོའི་བསང་དུད་དང་། །ཞིམ་མངར་གསུར་གྱི་མཆོད་པ་དང་། །དཀར་གསུམ་མངར་གསུམ་ཕུད་ཀྱིས་མཆོད། །བདག་དང་རྒྱུ་སྦྱོར་ཡོན་བདག་གི། ཕྲག་དོག་རིམས་ནད་ཞི་བར་མཛོད། །མི་མཐུན་རྐྱེན་དང་བར་གཅོད་ཟློག །ཀྱཻ། དད་པ་དང་ནི་དམ་ཚིག་གིས། །ཡུམ་ཆེན་ལྷ་མོ་མཚོ་དང་སྨན། །འཁོར་དང་བཅས་པ་མ་ལུས་ཀུན། །ཞི་བའི་གནས་འདིར་སྤྱན་འདྲེན་གྱི། །གཡུ་ཤུག་སྔོན་པོའི་བསང་དུད་དང་། །ཞིམ་མངར་གསུར་གྱི་མཆོད་པ་དང་། །དཀར་གསུམ་མངར་གསུམ་ཕུད་ཀྱིས་མཆོད། །བདག་དང་རྒྱུ་སྦྱོར་ཡོན་བདག་གི། ཕྲག་དོག་རིམས་ནད་ཞི་བར་མཛོད། །མི་མཐུན་རྐྱེན་དང་བར་གཅོད་ཟློག །ཀྱཻ། དད་པ་དང་ནི་དམ་ཚིག་གིས། །གནམ་མཚོ་ཕྱུག་མོ་འཁོར་དང་བཅས། །གཟི་ལྡན་གཡུ་ཤོག་འཁོར་དང་བཅས། །ལྷ་ལྕམ་ཁ་རི་འབྲི་མ་སྨན། །འཁོར་དང་བཅས་པ་མ་ལུས་ཀུན། །ཞི་བའི་གནས་འདིར་སྤྱན་འདྲེན་གྱི། །གཡུ་ཤུག་སྔོན་པོའི་བསང་དུད་དང་། །ཞིམ་མངར་གསུར་གྱི་མཆོད་པ་དང་། །དཀར་གསུམ་མངར་གསུམ་ཕུད་ཀྱིས་མཆོད། །བདག་དང་རྒྱུ་སྦྱོར་ཡོན་བདག་གི། ཕྲག་དོག་རིམས་ནད་ཞི་བར་མཛོད། །མི་མཐུན་རྐྱེན་དང་བར་གཅོད་ཟློག །ཀྱཻ། དད་པ་དང་ནི་དམ་ཚིག་གིས། །ཐང་སྲས་འཕྱོ་བ་འཁོར་དང་བཅས། །ཐང་འབྲི་ནུབ་དཀར་འཁོར་དང་བཅས། །ཟ་རེ་སྐྱེས་དྲུག་འཁོར་དང་བཅས། །ཡོ་བ་གཡས་དམར་འཁོར་དང་བཅས། །ནམ་ར་མཆེད་གསུམ་འཁོར་དང་བཅས། །གཡག་བཙན་ཞལ་དཀར་འཁོར་དང་བཅས། །རྨ་གཉན་སྤོམ་ར་འཁོར་དང་བཅས། །སྨོན་སྐྱེས་གངས་ཞུར་འཁོར་དང་བཅས། །ལྷ་རྒྱལ་གེ་ཁོད་འཁོར་དང་བཅས། །ཡར་ལྷ་ཤམ་པོ་འཁོར་དང་བཅས། །ཞི་བའི་གནས་འདིར་སྤྱན་འདྲེན་གྱི། །གཡུ་ཤུག་སྔོན་པོའི་བསང་དུད་དང་། །ཞིམ་མངར་གསུར་གྱི་མཆོད་པ་དང་། །དཀར་གསུམ་མངར་གསུམ་ཕུད་ཀྱིས་མཆོད། །བདག་དང་རྒྱུ་སྦྱོར་ཡོན་བདག་གི། ཕྲག་དོག་རིམས་ནད་ཞི་བར་མཛོད། །མི་མཐུན་རྐྱེན་དང་བར་གཅོད་ཟློག །ཀྱཻ། དད་པ་དང་ནི་དམ་ཚིག་གིས། །འོ་དེ་གུང་རྒྱལ་འཁོར་དང་བཅས། །འབྲོག་གཉན་འཕྱོ་བ་འཁོར་དང་བཅས། །ཨ་འོ་མ་སངས་འཁོར་དང་བཅས། །མགྱོགས་ཆེན་གདོང་ར་འཁོར་དང་བཅས། །ཞི་བའི་གནས་འདིར་སྤྱན་འདྲེན་གྱི། །གཡུ་ཤུག་སྔོན་པོའི་བསང་དུད་དང་། །ཞིམ་མངར་གསུར་གྱི་མཆོད་པ་དང་། །དཀར་གསུམ་མངར་གསུམ་ཕུད་ཀྱིས་མཆོད། །བདག་དང་རྒྱུ་སྦྱོར་ཡོན་བདག་གི། ཕྲག་དོག་རིམས་ནད་ཞི་བར་མཛོད། མི་མཐུན་རྐྱེན་དང་བར་གཅོད་ཟློག །ཀྱཻ། དད་པ་དང་ནི་དམ་ཚིག་གིས། །ཤར་གཉན་འཛུམ་ཆེན་འཁོར་དང་བཅས། །ལྷོ་གཉན་དབྱིབས་རྒྱལ་འཁོར་དང་བཅས། །ནུབ་གཉན་འབྲི་ཆེན་འཁོར་དང་བཅས། །བྱང་གཉན་དམར་ཟེ་འཁོར་དང་བཅས། །རྩེ་ཆེན་ལྷ་རྒོད་འཁོར་དང་བཅས། །ཞི་བའི་གནས་འདིར་སྤྱན་འདྲེན་གྱི། །གཡུ་ཤུག་སྔོན་པོའི་བསང་དུད་དང་། །ཞིམ་མངར་གསུར་གྱི་མཆོད་པ་དང་། །དཀར་གསུམ་མངར་གསུམ་ཕུད་ཀྱིས་མཆོད། །བདག་དང་རྒྱུ་སྦྱོར་ཡོན་བདག་གི། ཕྲག་དོག་རིམས་ནད་ཞི་བར་མཛོད། །མི་མཐུན་རྐྱེན་དང་བར་གཅོད་ཟློག །ཀྱཻ། དད་པ་དང་ནི་དམ་ཚིག་གིས། །ལྷ་སྲས་ལྕམ་ཆེན་ལྷ་ཡི་སྒོ། །རྟ་ལུག་འབྲི་དང་ནོར་གྱི་བདག །གཉན་གྱི་རྫི་དང་གཡང་གི་སྐྱོབས། །སྒོ་ཁྱིམ་གཡང་འཛིན་གསང་བའི་ལྷ། །རྣོ་མཐོང་གསང་བ་ལས་ཀྱི་ལྷ། །ཞི་བའི་གནས་འདིར་སྤྱན་འདྲེན་གྱི། །གཡུ་ཤུག་སྔོན་པོའི་བསང་དུད་དང་། །ཞིམ་མངར་གསུར་གྱི་མཆོད་པ་དང་། །དཀར་གསུམ་མངར་གསུམ་ཕུད་ཀྱིས་མཆོད། །བདག་དང་རྒྱུ་སྦྱོར་ཡོན་བདག་གི། ཕྲག་དོག་རིམས་ནད་ཞི་བར་མཛོད། །མི་མཐུན་རྐྱེན་དང་བར་གཅོད་ཟློག །ཀྱཻ། དད་པ་དང་ནི་དམ་ཚིག་གིས། །ལྷ་སྲས་ལྕམ་ཆེན་ལྷ་སྒོ་ཡི། །ལྷ་འཁོར་སུམ་བརྒྱ་དྲུག་ཅུ་དང་། །གཉན་འཁོར་སུམ་བརྒྱ་དྲུག་ཅུ་དང་། །ཀླུ་འཁོར་སུམ་བརྒྱ་དྲུག་ཅུ་དང་། །བཙན་འཁོར་སུམ་བརྒྱ་དྲུག་ཅུ་དང་། །བདུད་འཁོར་སུམ་བརྒྱ་དྲུག་ཅུ་དང་། །སྨན་འཁོར་སུམ་བརྒྱ་དྲུག་ཅུ་རྣམས། །ཞི་བའི་གནས་འདིར་སྤྱན་འདྲེན་གྱི། །གཡུ་ཤུག་སྔོན་པོའི་བསང་དུད་དང་། །ཞིམ་མངར་གསུར་གྱི་མཆོད་པ་དང་། །དཀར་གསུམ་མངར་གསུམ་ཕུད་ཀྱིས་མཆོད། །བདག་དང་རྒྱུ་སྦྱོར་ཡོན་བདག་གི། ཕྲག་དོག་རིམས་ནད་ཞི་བར་མཛོད། །མི་མཐུན་རྐྱེན་དང་བར་གཅོད་ཟློག །ཀྱཻ་དད་པ་དང་ནི་དམ་ཚིག་གིས། །སྟོང་གསུམ་སྟོང་གི་ལྷ་འདྲེ་དང་། །དབུས་ཕྱོགས་སྟོང་གི་གཞི་བདག་དང་། །ཕྱོགས་བཞི་སྟོང་གི་གཞི་བདག་དང་། །མཚམས་བཞི་སྟོང་གི་གཞི་བདག་དང་། །དགུང་སྔོན་དབུས་དང་བར་སྣང་ཁམས། །བྲག་དཀར་དང་ནི་བྲག་ནག་དང་། །རྫ་རི་དང་ནི་གངས་རི་དང་། །རི་ཆེན་དང་ནི་རི་ཕྲན་དང་། །ཐང་ཆེན་དང་ནི་ཐང་ཆུང་དང་། །རྒྱ་མཚོ་དང་ནི་འབབ་ཆུ་དང་། །རྫིང་བུ་དང་ནི་ཆུ་མིག་དང་། །ཙན་དན་དང་ནི་ནགས་རི་དང་། །དུར་ཁྲོད་དང་ནི་གཉན་ས་དང་། །ལྷ་ཁང་དངནི་མཆོད་རྟེན་དང་། །ཁང་པ་དང་ནི་ཞིང་ས་དང་། །འཚེར་ས་དང་ནི་བྲས་ཁང་དང་། །འཇིག་རྟེན་ཁམས་ན་གནས་པ་ཡི། །ས་བདག་ཀླུ་གཉན་འཁོར་བཅས་རྣམས། །ཞི་བའི་གནས་འདིར་སྤྱན་འདྲེན་གྱི། །གཡུ་ཤུག་སྔོན་པོའི་བསང་དུད་དང་། །ཞིམ་མངར་གསུར་གྱི་མཆོད་པ་དང་། །དཀར་གསུམ་མངར་གསུམ་ཕུད་ཀྱིས་མཆོད། །བདག་དང་རྒྱུ་སྦྱོར་ཡོན་བདག་གི། ཕྲག་དོག་རིམས་ནད་ཞི་བར་མཛོད། །མི་མཐུན་རྐྱེན་དང་བར་གཅོད་ཟློག །ཀྱཻ། དད་པ་དང་ནི་དམ་ཚིག་གིས། །ནམ་མཁའ་གང་དང་ས་གཞི་གང་། །ཕར་རི་གཡས་དང་ཚུར་རི་གཡོན། །ཅེར་རེ་བལྟ་དང་ཅ་རེ་ཉན། །ཀུ་ལ་རྒྱུག་དང་བསྭོ་ལ་འགྲིམ། །འགྲོ་བ་ལམ་དང་འབབ་པ་ཆུ། །སྐྱེས་པ་ཤིང་ལ་གནས་པ་ཡི། །ས་བདག་ཀླུ་གཉན་འཁོར་བཅས་རྣམས། །ཞི་བའི་གནས་འདིར་སྤྱན་འདྲེན་གྱི། །གཡུ་ཤུག་སྔོན་པོའི་བསང་དུད་དང་། །ཞིམ་མངར་གསུར་གྱི་མཆོད་པ་དང་། །དཀར་གསུམ་མངར་གསུམ་ཕུད་ཀྱིས་མཆོད། །བདག་དང་རྒྱུ་སྦྱོར་ཡོན་བདག་གི། ཕྲག་དོག་རིམས་ནད་ཞི་བར་མཛོད། །མི་མཐུན་རྐྱེན་དང་བར་གཅོད་ཟློག །ཀྱཻ། དད་པ་དང་ནི་དམ་ཚིག་གིས། །ལྷ་ཆེན་བརྒྱད་པོ་འཁོར་དང་བཅས། །ཀླུ་ཆེན་བརྒྱད་པོ་འཁོར་དང་བཅས། །གཟའ་ཆེན་བརྒྱད་པོ་འཁོར་དང་བཅས། །ཕྱོགས་རྣམས་སྐྱོང་བ་འཁོར་དང་བཅས། །འདོད་ཁམས་གནས་རིས་མན་ཆད་ནས། །འཛམ་གླིང་བོད་ཀྱི་གཞི་བདག་རྣམས། །ཞི་བའི་གནས་འདིར་སྤྱན་འདྲེན་གྱི། །གཡུ་ཤུག་སྔོན་པོའི་བསང་དུད་དང་། །ཞིམ་མངར་གསུར་གྱི་མཆོད་པ་དང་། །དཀར་གསུམ་མངར་གསུམ་ཕུད་ཀྱིས་མཆོད། །བདག་དང་རྒྱུ་སྦྱོར་ཡོན་བདག་གི། ཕྲག་དོག་རིམས་ནད་ཞི་བར་མཛོད། །མི་མཐུན་རྐྱེན་དང་བར་གཅོད་ཟློག །ཀྱཻ། ཉོན་ཅིག་ས་བདག་ཀླུ་གཉན་རྣམས། །ད་ནི་མཆོད་པ་འབུལ་བ་ནི། །རྩི་ཤིང་སྣ་ཚོགས་དྲི་ཞིམ་སྤོས། །དཀར་གསུམ་མངར་གསུམ་ཞལ་ཟས་དང་། །ཞོ་དང་འོ་མ་སྦྲང་རྩི་དང་། །ཙན་དན་གུར་གུམ་ཀ་ར་དང་། །ག་བུར་ལ་སོགས་སྨན་རྣམས་དང་། །གསེར་དངུལ་ལ་སོགས་རིན་ཆེན་ལྔ། །གོས་དང་བལ་ཚོན་སྟག་གཟིག་དང་། །འབྲས་ཀྱི་གཡག་ལུག་ར་གསུམ་དང་། །རྟ་དང་མཛོ་དྲེལ་བ་གླང་ཁྱི། །བྱ་སྦྲུལ་ཉ་སྦལ་ཀླུ་བཤོས་དང་། །གཡག་ལུག་སྟོད་ཤ་ཇ་ཆང་དང་། །མེ་ཏོག་བདུག་སྤོས་མཆོད་པ་རྣམས། །ཞལ་ཟས་སྤྱན་གཟིགས་ཕུན་སུམ་ཚོགས། །འཇིག་རྟེན་གང་བར་བཀོད་པ་འདི། །འདོད་ཡོན་ལོངས་སྤྱོད་མཁོ་དགུར་ལྡན། །མཐོང་ཚིམ་རེག་པས་བདེ་བ་དང་། །མྱོང་བས་མི་མཐུན་ནད་རྣམས་ཞི། །དབང་པོ་ལྔ་ཡི་མཁོ་དགུར་ལྡན། །དགོས་འདོད་ཅི་བསམ་འགྲུབ་པ་འདི། །སྟོང་གསུམ་མི་མཇེད་གང་བ་ཡི། །གཞི་བདག་ལྷ་ཀླུ་ཁྱེད་རྣམས་ལ། །དགྱེས་ཤིང་མཉེས་པའི་མཆོད་པ་འབུལ། །དབང་པོའི་སྤྱོད་ཡུལ་ཚིམ་གྱུར་ཅིག །བདག་གི་དགེ་བའི་སྡོང་གྲོགས་མཛོད། །བདག་དང་རྒྱུ་སྦྱོར་ཡོན་བདག་གི། ལྷ་ཡི་ཕྲག་དོག་ཞི་གྱུར་ཅིག །ལྷ་དང་འགལ་བ་མཆིས་གྱུར་ན། །ལྷ་ཡི་དབང་པོ་དྭངས་གྱུར་ཅིག །ལྷ་ནད་ཡོད་ན་སོས་གྱུར་ཅིག །དར་སྣ་སྟག་གཟིག་ཟ་འོག་དང་། །འདོད་ཡོན་དཀར་གསུམ་ཕུད་རྒོད་ཀྱིས། །བར་སྣང་གཉན་རྣམས་མཉེས་གྱུར་ཅིག །གཉན་གྱི་ཕྲག་དོག་ཞི་གྱུར་ཅིག །གཉན་གྱི་དབང་པོ་དྭངས་གྱུར་ཅིག །གཉན་ནད་ཡོད་ན་སངས་གྱུར་ཅིག །ལ་སྨན་བཟང་དྲུག་དྲི་ཞིམ་སྤོས། །ཀ་ར་བུ་རམ་སྦྲང་རྩི་ཡིས། །འོག་ཕྱོགས་ཀླུ་རྣམས་མཉེས་གྱུར་ཅིག །ཀླུ་དང་འགལ་བ་མཆིས་གྱུར་ན། །ཀླུ་ཡི་ཕྲག་དོག་ཞི་གྱུར་ཅིག །ཀླུ་ཡི་དབང་པོ་དྭངས་གྱུར་ཅིག །ཀླུ་ནད་ཡོད་ན་སོས་གྱུར་ཅིག །ཀྱཻ། ད་ནི་བཟོད་པར་གསོལ་བ་ནི། རྣལ་འབྱོར་བདག་ཅག་འཁོར་བཅས་དང་། །རྒྱུ་སྦྱོར་ཡོན་ཀྱི་བདག་པོ་ཡི། །ཕ་མེས་སྔ་རབས་འདས་པ་ནས། །བུ་ཚ་ཕྱི་རབས་ཡན་ཆད་ཀྱི། །མ་རིག་དབང་དུ་གྱུར་པ་ཡིས། །གཞི་བདག་ལྷ་ཀླུ་ཁྱེད་རྣམས་ལ། །ཐུགས་དང་འགལ་བར་གྱུར་པ་ཡི། །ས་གཉན་བསྐོས་དང་ཆུ་གཉན་བརྙོགས། །ཤིང་གཉན་བཅད་དང་རྡོ་གཉན་རློག །གང་ཡང་བྱས་པ་མ་མཆིས་སོ། །གལ་ཏེ་མཆིས་ན་བཅོས་པ་ཡིན། །དེ་ཀུན་གནོད་པ་མེད་པར་མཛོད། །མཁར་ལས་བྱས་དང་ཞིང་གཉན་རྨོས། །རོ་གཉན་ཁུར་དང་མནའ་གཉན་བསྐྱལ། །གང་ཡང་བྱས་པ་མ་མཆིས་སོ། །གལ་ཏེ་མཆིས་ན་བཅོས་པ་ཡིན། །དེ་ཀུན་གནོད་པ་མེད་པར་མཛོད། །དམེ་དང་ནལ་དང་རྨུག་དང་ནི། །གཟའ་སྐར་ངན་དང་ཕྱོགས་མེད་སོང་། །ཐབ་གཞོབ་འཁོན་དང་ཟས་ངན་ཟོས། །གང་ཡང་བྱས་པ་མ་མཆིས་སོ། །གལ་ཏེ་མཆིས་ན་བཅོས་པ་ཡིན། །དེ་ཀུན་གནོད་པ་མེད་པར་མཛོད། །ཁྲག་ཐབས་དང་ནི་ཆུ་ཐབས་དང་། །དཀར་ཐབས་དང་ནི་དམར་ཐབས་དང་། །གང་ཡང་བྱས་པ་མ་མཆིས་སོ། །གལ་ཏེ་མཆིས་ན་བཅོས་པ་ཡིན། །དེ་ཀུན་གནོད་པ་མེད་པར་མཛོད། ཀྱཻ། བསངས་ཀྱི་མཆོད་པ་ཕུལ་རྣམས་གསོན། །ད་ནི་ཕྲིན་ལས་བཅོལ་བ་ནི། །རྣལ་འབྱོར་བདག་ཅག་འཁོར་དང་བཅས། །རྒྱུ་སྦྱོར་ཡོན་གྱི་བདག་པོ་ལ། །གནོད་ཅིང་འཚེ་བར་བྱེད་པ་ཡི། །ལྷ་སྲིན་སྡེ་བརྒྱད་གདུག་པ་ཟློག །མོ་ངན་རྨི་ལམ་ངན་པ་ཟློག །ལྟས་ངན་བརྒྱད་ཅུ་རྩ་གཅིག་ཟློག །ཡེ་འབྲོག་སུམ་བརྒྱ་དྲུག་ཅུ་ཟློག །རྒྱལ་བསེན་འདྲེ་མོའི་གནོད་པ་ཟློག །བྱད་དང་རྦོད་གཏོང་ཐམས་ཅད་ཟློག །ནད་དང་ཉེ་བར་འཚེ་བ་ཟློག །ལོ་སྐག་ཟླ་སྐག་ཞག་སྐག་ཟློག །མི་མཐུན་ཕྱོགས་རྣམས་ཞི་བར་མཛོད། །ཐབ་གཞོབ་འཁོན་གསུམ་ཅི་མཆིས་པ། །ཞི་བར་གྱུར་ཅིག་བསལ་དུ་གསོལ། །རྣལ་འབྱོར་བདག་ཅག་ཡོན་མཆོད་ལ། །ནད་དང་གནོད་པ་ཞི་བར་མཛོད། །ཚེ་དང་དཔལ་འབྱོར་རྒྱས་པར་མཛོད། །མི་དང་མི་མིན་དབང་དུ་བསྡུས། །དགྲ་བགེགས་གདུག་པ་ཟློག་ཏུ་གསོལ། །བདག་དང་རྒྱུ་སྦྱོར་ཡོན་བདག་ལ། །མི་ལ་ན་ཚ་མ་གཏོང་ཞིག །ཕྱུགས་ལ་གོད་ཁ་མ་གཏོང་ཞིག །ཞིང་ལ་བཙའ་སད་སེར་གསུམ་མ་གཏོང་ཞིག །ནད་མེད་ཚེ་དང་ལྡན་པ་དང་། །ལོ་ཡག་མགོ་རུ་འཕེལ་བ་དང་། །རྨངས་པོ་བུ་དང་ལྡན་པར་མཛོད། །རྟག་ཏུ་བཙན་ཞིང་ཕྱུག་པ་དང་། །རྒྱུན་དུ་འཕེལ་ཞིང་དར་བར་མཛོད། །བསམ་པ་ཡིད་བཞིན་དོན་རྣམས་ཀུན། །ད་ལྟ་ཉིད་དུ་སྒྲུབ་པར་མཛོད། །ཡུལ་རི་འདི་དང་རྒྱལ་ཁམས་སུ། །བཀྲ་ཤིས་བདེ་ལེགས་འབྱུང་གྱུར་ཅིག །བདག་ཅག་ཡོན་མཆོད་འཁོར་བཅས་ལ། །དངོས་གྲུབ་མ་ལུས་སྩལ་ཏུ་གསོལ། པདྨ་འབྱུང་གནས་བདག་ཉིད་ཀྱིས། །ཕྱི་རབས་སེམས་ཅན་དོན་སླད་དུ། །ཞི་བ་དཀར་མོ་བྱས་པ་འདི། །དེ་ཡང་འདི་ཉིད་བྱ་བའི་དུས། །དུས་བཟང་ཡར་ངོ་མར་ངོ་དང་། །ནད་པ་ཡོད་དམ་སྲིའུ་གསོ། །ཡམས་ནད་ཚོགས་རྣམས་གཅོད་པ་དང་། །སྲུང་དང་ཟློག་པ་མཁར་ལས་བྱེད། །བཀྲ་ཤིས་ལས་ཀ་གང་བྱེད་ཀྱང་། །ཀུན་གྱི་སྔོན་དུ་འགྲོ་བར་བྱའོ། ས་མ་ཡཱ༔ རྒྱ་རྒྱ་རྒྱ༔

རྟ་ཐུག་དཀར་པོ་ལ་བརྟེན་ནས་དགྲ་ལྷ་གསོལ་བ།

རྟ་ཐུག་དཀར་པོ་ལ་བརྟེན་ནས་དགྲ་ལྷ་གསོལ་བ་ནི། །དགྲ་ལྷའི་སྤྱན་གཟིགས་གོ་མཚོན། །ཕྱེ་མར། ཆང་ཕུད། མདའ་དར། རྟ་སྒ་བཅས། དར་ལྕོག་སོགས་བཤམས། ཤིང་སྣ་དང་སྤོས་སྣ་བསྲེག་པའི་དུད་པ་དང་བཅས། ཀྱཻ། སྔོན་གྱི་དུས་སུ་ལྷ་དབང་བརྒྱ་བྱིན་གྱིས། །བསྟེན་ཅིང་མཆོད་པའི་དགྲ་ལྷ་མཐུ་བོ་ཆེ། །དེ་རིང་རྒྱུ་སྦྱོར་ཡོན་གྱི་བདག་པོ་ཡི། །དགྲ་ལྷར་འབོད་དོ་རྟེན་ལ་བརྟན་པར་བཞུགས། །ལྷ་ཁྱོད་སྐུ་མདོག་དཀར་པོ་འོད་ཟེར་འཕྲོ། །སྲ་བའི་གནམ་ལྕགས་རྨོག་མོ་དབུ་ལ་བརྒྱན། །རིན་ཆེན་གསེར་གྱི་ཁྲབ་ཆེན་སྐུ་ལ་གྱོན། །མཛེས་པའི་སག་ལྷྭམ་ཡུ་རིང་ཞབས་ལ་གསོལ། །རྣོ་བའི་མདས་གང་སྟག་དོང་གཡས་སུ་འཕྱང་། །སྲ་བའི་གཞུ་བཅུག་གཟིག་ཤུབ་གཡོན་ན་ཁྲ། །རྣོ་ངར་འཛོམ་པའི་རལ་གྲི་སྐེད་ལ་བཏགས། །སྦ་ལྕག་དཀར་པོ་ཚིག་གསུམ་ཕྱག་ན་བསྣམས། །རིན་ཆེན་སྒ་སྲབ་མཛེས་པའི་རྟ་ལ་བཅིབས། །ལྕགས་ཀྱི་བྱ་ཁྲ་ཧོར་པ་ཀླད་ལ་ལྡིང་། །ཕྲག་གོང་གཡས་ན་སེང་ཆེན་དཀར་མོ་འགྱིང་། །ཕྲག་གོང་གཡོན་ན་སྟག་ཆེན་དྲུས་མ་འཕྱོ། །ཁྱི་ནག་དོམ་དྲེད་མང་པོ་སྔ་ཕྱིར་རྒྱུག །སྤྲུལ་པ་ཡང་སྤྲུལ་ས་གཞི་མ་ལུས་ཁྱབ། །ཀུན་ཀྱང་དཀར་ཕྱོགས་སྐྱོང་བའི་རུ་མཚོན་སྒྲེང་། །བསྟན་སྲུང་དགྲ་ལྷ་ཆེན་པོ་འཁོར་དང་བཅས། །ཁྱེད་རྣམས་བཞུགས་གནས་མཁར་གྱི་རྩེ་འདི་ཡིན། །ཁྱེད་རྣམས་རྟེན་གནས་སྤྱན་གཟིགས་འདི་དག་ཡིན། །གནས་དང་རྟེན་རྫས་རྣམས་ལ་བརྟན་པར་བཞུགས། །རྒྱུ་སྦྱོར་ཡོན་གྱི་བདག་པོར་སྡོང་གྲོགས་མཛོད། །ལྷ་ཁྱོད་དགྱེས་པའི་མཐུན་རྫས་འབུལ་བ་ནི། །རྣམ་རྒྱལ་ཁང་བཟང་ལྟ་བུའི་ཕོ་བྲང་དང་། །རྨོས་ཞིང་དབྱར་སྐྱེས་མྱུ་གུའི་ཕྲེང་བ་འཁྲིགས། །དཀར་གསུམ་མངར་གསུམ་ཕྱེ་མར་ཤིང་འབྲས་འབྲུ། །བཤོས་བུ་གཙང་སྦྱར་ཇ་དཀར་ཆང་རྒོད་ཕུད། །དར་ཚོན་རིན་ཆེན་དཀོར་ནོར་སྣ་ཚོགས་སྤུངས། །རང་བསྲུང་སྲོག་སྐྱོབ་བཙན་པོའི་གོ་ཆ་དང་། །ཕ་རོལ་འཇོམས་པའི་རྣོ་ངར་མཚོན་ཆའི་རིགས། །མཛེས་པའི་རྟ་མཆོག་རྒྱན་ལྡན་རླུང་ལྟར་འཕྱོ། །མི་གཙང་ཉེས་ཀུན་སེལ་བའི་བསང་མཆོད་རྣམས། །དགྲ་ལྷ་ཆེན་པོ་འཁོར་དང་བཅས་ལ་འབུལ། །དགྱེས་པ་རབ་བསྐྱེད་རྟེན་ལ་བརྟན་པར་བཞུགས། །ཀྱཻ། དགུང་སྔོན་དབྱིངས་སུ་གཡུ་འབྲུག་ལྡིར་བ་བཞིན། །དགྲ་ལྷ་འཁོར་བཅས་མི་དང་མ་འབྲལ་ཞིག །གངས་དཀར་སྤོ་ལ་སེང་ཆེན་འཕྱོ་བ་བཞིན། །དགྲ་ལྷ་འཁོར་བཅས་མི་དང་མ་འབྲལ་ཞིག །ཤ་བ་རྭ་བཅུ་སྤང་ལ་གནས་པ་བཞིན། །དགྲ་ལྷ་འཁོར་བཅས་མི་དང་མ་འབྲལ་ཞིག །ཆུ་ཀླུང་ཆེན་པོར་ཉ་མོ་གནས་པ་བཞིན། །དགྲ་ལྷ་འཁོར་བཅས་མི་དང་མ་འབྲལ་ཞིག །མཚོ་ལ་འདབ་ཆགས་ལུས་དཀར་བསྟེན་པ་བཞིན། །དགྲ་ལྷ་འཁོར་བཅས་མི་དང་མ་འབྲལ་ཞིག །ཕ་མས་བུ་ཚ་གདུང་བརྩེས་སྐྱོང་བ་བཞིན། དགྲ་ལྷ་འཁོར་བཅས་མི་དང་མ་འབྲལ་ཞིག །ཉི་ཟླ་སྣང་བའི་དཔལ་དང་འགྲོགས་པ་བཞིན། །དགྲ་ལྷ་འཁོར་བཅས་མི་དང་མ་འབྲལ་ཞིག །ནོར་བུར་འདོད་འཇོའི་ཡོན་ཏན་ལྡན་པ་བཞིན། །དགྲ་ལྷ་འཁོར་བཅས་མི་དང་མ་འབྲལ་ཞིག །གོ་མཚོན་དཀོར་ནོར་སྤྱན་གཟིགས་ཡུལ་མཁར་ལ། །དགྲ་ལྷ་གཉན་པོ་དཔུང་ཚོགས་རྟེན་བཅས་ཏེ། །དབུ་འཕང་རི་རྒྱལ་ལྷུན་པོ་ལྟ་བུར་བསྟོད། །དགྲ་བོའི་གཡུལ་ལས་རྣམ་པར་རྒྱལ་བར་མཛོད། །འཇིག་རྟེན་མུན་པ་སེལ་བ་ཉི་ཟླའི་གཡང་། །དེ་རིང་བཀྲ་ཤིས་གནས་འདིར་གཡང་དུ་ལེན། །ཡིད་བཞིན་ནོར་བུ་ཕུན་ཚོགས་དགོས་འདོད་གཏེར། །དེ་རིང་བཀྲ་ཤིས་གནས་འདིར་གཡང་དུ་ལེན། །ཚངས་པ་བརྒྱ་བྱིན་ལ་སོགས་ལྷ་ཡི་དཔལ། །དེ་རིང་བཀྲ་ཤིས་གནས་འདིར་གཡང་དུ་ལེན། །འཁོར་ལོས་སྒྱུར་རྒྱལ་ལ་སོགས་མི་ཡི་གཡང་། །དེ་རིང་བཀྲ་ཤིས་གནས་འདིར་གཡང་དུ་ལེན། །དགའ་བོ་འཇོག་པོ་ལ་སོགས་ཀླུ་ཡི་གཡང་། །དེ་རིང་བཀྲ་ཤིས་གནས་འདིར་གཡང་དུ་ལེན། །གནོད་སྦྱིན་ཚོགས་ཀྱི་འཛད་མེད་འབྱོར་བའི་གཡང་། །དེ་རིང་བཀྲ་ཤིས་གནས་འདིར་གཡང་དུ་ལེན། །གེ་སར་དཔའ་རྟུལ་འཛོམས་པ་དམག་གི་གཡང་། །དེ་རིང་བཀྲ་ཤིས་གནས་འདིར་གཡང་དུ་ལེན། །རིགས་བརྒྱུད་བུ་ཚ་གྲངས་མེད་འཕེལ་བའི་གཡང་། །དེ་རིང་བཀྲ་ཤིས་གནས་འདིར་གཡང་དུ་ལེན། །མཚོན་གྱི་མི་ཕིགས་གོ་ཁྲབ་བཙན་པོའི་གཡང་། །དེ་རིང་བཀྲ་ཤིས་གནས་འདིར་གཡང་དུ་ལེན། །གང་བསམ་སྐད་ཅིག་བགྲོད་པ་རྟ་ཡི་གཡང་། །དེ་རིང་བཀྲ་ཤིས་གནས་འདིར་གཡང་དུ་ལེན། །ཕུན་ཚོགས་ཕྱོགས་ལས་རྣམ་པར་རྒྱལ་བའི་གཡང་། །དེ་རིང་བཀྲ་ཤིས་གནས་འདིར་གཡང་དུ་ལེན། །གནས་འདིར་བཀྲ་ཤིས་ཕྱྭ་དང་གཡང་དུ་འཁྱིལ། །དགྲ་ལྷ་གཉན་པོ་འཁོར་དང་བཅས་རྣམས་ཀྱིས། །ཉིན་གསུམ་བྱ་ར་མཚན་གསུམ་མེལ་ཚེ་མཛོད། །རྒྱབ་ཀྱི་བརྟེན་ས་མདུན་གྱི་མཁར་བ་དང་། །ཕར་འགྲོའི་སྐྱེལ་མ་ཚུར་ཡོང་བསུ་མ་མཛོད། །ནད་གདོན་ཆགས་ཆེ་བར་ཆད་ཀུན་ལས་སྐྱོབས། །བསམ་དོན་ལྷུན་གྱིས་འགྲུབ་པའི་བཀྲ་ཤིས་མཛོད། །ཅེས་བསྟན་འཛིན་ཆོས་ཀྱི་རྒྱལ་པོས་རྟ་ཐུག་དཀར་པོ་ལ་བརྟེན་ནས་དགྲ་ལྷ་མཆོད་ཚུལ་ཞིག་དགོས་ཞེས་མཁའ་འགྲོ་བློ་བཟང་བསྟན་སྐྱོང་གིས་བསྐུལ་བ་ལ་བརྟེན་ནས་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་གནས་གསར་འཇམ་དབྱངས་སོ། །དེ་ནས་དགྲ་ལྷ་དཔང་བསྟོད་བྱ་བ་ནི། རུ་དར་ལ་དགྲ་ལྷ་སྐུ་མདོག་དཀར་པོ་དབུ་ལ་ལྕགས་རྨོག་རྒྱལ་མཚན་དར་ལྕོག་སོགས་ཀྱི་སྤྲས་པ། སྐུ་ལ་བསེ་ཁྲབ་སེར་པོ་ཞབས་ལ་སག་ལྷྭམ་གསོལ་བ། སྐེད་པར་སྟག་རལ་གཟིག་ཤུབ་བཅིང་པ། ཕྱག་གཡས་རྦ་ལྕག་དང་གཡོན་སྲབ་མདའ་འཛིན་པ། ལྕགས་ཀྱི་བྱ་ཁྲ་ཀླད་ལ་ལྡིང་བ། ཕྲག་གོང་གཡས་ལ་སེང་ཆེན་དང་། གཡོན་ལ་སྟག་ཆེན་འགྱིང་བ། ཁྱི་ནག་དོམ་དྲེད་རྗེས་སུ་ཁྲིད་པ། མདུན་དུ་སྡེ་བརྒྱད་དང་སྤྲུལ་པའི་འཁོར་སྣ་ཚོགས་བྲིས་པ་ཞིག་བཙུགས་པའི་མདུན་དུ་མཆོད་པ་དང་། ཁྲབ་རྨོག་རལ་གྲི། མདུང་། མདའ་གཞུ། མདའ་དར། སྤྱན་གཟིགས་རྣམས་ཅི་འབྱོར་པ་ཐོག་མ་ནས་བཤམས་པས་བྱིན་རླབས་ཞོར་ལ་འགྲུབ། དེ་ནས་འདི་སྐད་དོ། ཀྱཻ། སེམས་ཅན་སྤྱི་མཐུན་ལས་ཀྱིས་ཡོངས་གྲུབ་པ། །ནམ་མཁའ་སྟོང་པའི་དབྱིངས་སུ་འབྱུང་བཞི་ཡི། །དཀྱིལ་འཁོར་རིམ་ཆགས་སྟེང་དུ་གླིང་གཞི་དང་། །གླིང་ཕྲན་ལྕགས་རིས་ཡོངས་སུ་བསྐོར་བའི་དབུས། །རིན་ཆེན་སྣ་བཞི་ལས་གྲུབ་རི་རབ་རྩེར། །ཕུན་ཚོགས་ལྷ་ཡི་ཕོ་བྲང་གྲོང་ཁྱེར་དང་། །རྩ་བར་ཐགས་བཟང་རིས་སོགས་ལྷ་མིན་གནས། །དཔག་བསམ་ཡོངས་འདུ་ལྗོན་པའི་འབྲས་བུ་ལ། །ལྷ་དང་ལྷ་མིན་ཕན་ཚུན་རྩོད་པའི་མཐུས། །ལེགས་བྲིས་གནས་སུ་སྲ་བའི་གོ་ཆ་དང་། །སྦྱིན་སྐྱེས་ཡུལ་དུ་རྣོ་བའི་མཚོན་ཆ་བརྡུངས། །དཔུང་ཚོགས་ཡན་ལག་རྣམ་བཞིའི་གཡུལ་བཤམས་པ། །དང་པོར་ལྷ་ཡི་དམག་དཔུང་ཕམ་པའི་ཚེ། །མིག་སྟོང་ཅན་གྱིས་གསང་བའི་བདག་པོ་ལ། །གསོལ་བ་བཏབས་པར་ལུང་བསྟན་ཇི་བཞིན་དུ། །གཞན་གྱིས་མ་བཅོས་རང་བྱུང་གོ་མཚོན་དང་། །རྟེན་འབྲེལ་ཤུགས་ཀྱིས་ལྷ་རྒོད་ཐོག་འབེབ་དང་། །ཀླུ་མོ་དུང་སྐྱོང་གཉིས་པོ་བཤོས་པའི་སྲས། །དགྲ་ལྷ་ཆེན་པོ་མཆེད་དགུ་དངོས་སུ་བྱོན། །ལྷ་ཡི་དབང་པོར་ཁྱེད་རྣམས་རྒྱལ་འདོད་ན། །ངེད་ལ་རྟེན་ཚུགས་ཕྱག་དང་མཆོད་བསྟོད་རྣམས། །གྱིས་ཞེས་བསྐུལ་ལྟར་མཐུན་པའི་རྟེན་རྫས་བཙུགས། །རི་རབ་རྩེ་མོར་དགྲ་ལྷ་སྤྱན་དྲངས་ནས། །མཐུན་རྫས་ཀྱིས་མཆོད་བརྡའ་ཡིས་བསྐུལ་བ་ན། །ཧཱུྃ་ཧཱུྃ་ལན་གསུམ་བརྗོད་པས་ལྷ་དམག་རྣམས། །གཟི་བརྗིད་ཕུན་སུམ་ཚོགས་པའི་བཀྲག་མདངས་བྱུང་། །ཀྱེ་ཀྱེ་ལན་གསུམ་བརྗོད་པས་སྲ་བའི་གོ། རྣོན་པོའི་མཚོན་ཆ་རྣམས་ལས་འོད་ཟེར་འབར། །སྭ་སྭ་ལན་གསུམ་བརྗོད་པས་དཔུང་གི་ཚོགས། །ཞུམ་པ་མེད་པ་དཔའ་བོའི་ངར་དང་ལྡན། །བརྡའ་བརྡའ་ལན་གསུམ་བརྗོད་ནས་གཡུལ་བཤམས་པས། །ལྷ་མིན་མགོ་ལག་བྲེགས་ཤིང་གོ་ཆ་རལ། །རུ་དར་རོལ་མོ་ཆག་ཅིང་ཕམ་བྱས་ནས། །ལྷ་རྣམས་རྣམ་པར་རྒྱལ་བའི་རུ་མཚོན་བསླངས། །སྔོན་བྱུང་དེ་བཞིན་དེང་དུས་བདག་ཅག་གིས། །ལྷ་ཁྱོད་སྤྱན་འདྲེན་མཆོད་བསྟོད་བསྐུལ་བྱེད་ན། །ཐོགས་པ་མེད་པར་གནས་འདིར་གཤེགས་ནས་ཀྱང་། །སྐུ་གཟུགས་འདི་ལ་གཡོ་མེད་བརྟན་པར་བཞུགས། །ལྷ་ཡི་དབང་པོས་སྲི་ཞུ་མཛད་པ་ལྟར། །ཡོན་གྱི་བདག་པོའི་མཆོད་པ་བཞེས་སུ་གསོལ། །བརྩིགས་པའི་མཁར་ཁྱིམ་ཕུབ་པའི་གུར་དང་སྦྲ། །རྨོས་ཤིང་བཏབ་པའི་ས་ཞིང་ལོ་ཏོག་དང་། །བསགས་པའི་གསེར་གཡུ་མུ་ཏིག་དངུལ་ཟངས་སོགས། །རིན་ཆེན་སྣ་ཚོགས་བཟང་གོས་དར་རས་ཇ། །པགས་རིགས་སྣ་ཚོགས་ལས་གྲུབ་ཞྭ་གོས་ལྷམ། །རྟ་དྲེལ་རྔ་མོང་གནག་ཕྱུགས་ར་ལུག་བ། །ཇེ་བེ་ཐུན་དང་ཨུབ་ཆི་ཁ་རབ་ཆི། །ཨོ་མོ་རུབ་ཆི་སཽབ་ཆི་སུ་འུབ་ཆི། །ད་བུ་སག་ཆི་ཨལ་ཁྲལ་ཨོར་སྦོག་གོ། །ཐོ་བི་ལྕགས་འབག་རྨོག་ཆེན་འཕྲུ་ཡིས་མཛེས། །རྣོ་ངར་རལ་གྲི་མདུང་རིང་འཕང་མདུང་དང་། །ཨོས་ཐུ་གེ་ཆི་ཁན་སུ་མོ་ཁར་པཱ། །ཇེ་བེ་གོ་དོ་ལི་དང་ཁེས་སུ་མོས། །གང་བའི་སྟག་དོང་རིན་ཆེན་ཕ་གུ་ཅན། །མཆོག་དཀར་གཞུ་མོ་གཟིག་ཤུན་ཤུབ་ལྡན་ཅན། །མེ་ཡི་མདའ་སྒྱོགས་དགྲ་སྟ་སྟ་རེ་སོགས། །སྣ་ཚོགས་མཚོན་ཆའི་ཁྱད་པར་ཇི་སྙེད་པ། །རྫུ་འཕྲུལ་རླུང་གི་ཤུགས་ལྡན་རྟ་མཆོག་ལ། སྒ་སྲབ་གོང་རྨེད་མཛེས་པའི་ཆས་ཀྱིས་སྤྲས། །འཕན་གདུགས་རྒྱལ་མཚན་དར་བཀྲའི་ལྡ་ལྡི་ཡོ། །རུ་མཚོན་དར་ལྕེ་ལྷབ་ལྷུབ་ནམ་མཁའ་འགེང་། །གཏོར་མ་ལྷ་མིའི་བཟའ་བཅའ་རོ་བརྒྱ་ལྡན། །ཇ་ཆང་ཞོ་དར་བཏུང་བ་མཚོ་རུ་བསྐྱིལ། །མེ་ཏོག་སྣ་ཚོགས་སྣང་གསལ་སྒྲོན་མེ་སྤར། །རྫ་རྔ་ཟོམ་རྔ་རྔ་ཟླུམ་དུང་ཆེན་དང་། །སྦུབ་སིལ་པི་ཝཾ་རོལ་མོས་གནམ་ས་ལྡིར། །དགྲ་ལྷ་ཆེན་པོ་དགྱེས་པའི་རྟེན་དུ་འབུལ། །རྟེན་ལས་མ་གཡོ་སྡོང་གྲོགས་དཔུང་གཉེན་མཛོད། །ཀྱཻ། མཁའ་ལ་གཡུ་འབྲུག་འབྲུག་ལ་ཟེ་བ་རྒྱས། །གངས་ལ་སེང་གེ་སེང་ཆེན་རལ་པ་གསིག །སྤང་ལ་ཤ་བ་རྭ་བཅུ་ཕྱོགས་སུ་རྒྱས། །ཆུ་ལ་ཉ་མོ་ཉ་ལ་གསེར་མིག་འཁྱིལ། །མཚོ་ལ་ངང་པ་མ་ཧེས་བེའུ་འཚོ། །ཕ་མས་བུ་ཚ་ལ་ནི་བྱམས་པ་ལྟར། །དགྲ་ལྷ་ཆེན་པོ་མི་དང་མ་འབྲལ་བར། །ཉིན་མཚན་དུས་དྲུག་གཡེལ་མེད་མེལ་ཚེ་མཛོད། །སྲ་བའི་གོ་ཆ་དབུ་རྨོག་གངས་རིའི་མདོག །རྣོ་བའི་མཚོན་ཆ་རྣམས་ལ་དགྲ་ལྷ་བཞུགས། །དཔའ་རྩལ་ལྡན་པའི་མི་ཕོ་བཞོན་པའི་རྟ། །ལས་བྱེད་ཞུབ་ཅན་དམག་གི་དཔུང་ཚོགས་ལ། །དགྲ་ལྷ་ལུས་དང་གྲིབ་མ་ལྟར་འགྲོགས་ཤིག །དགུང་སྔོན་མཐོན་པོ་ས་གཞི་དྲོན་མོ་ལ། །དགྲ་ལྷ་ཆེན་པོ་འབྲལ་བ་མེད་བཞུགས་ནས། །ཕ་རོལ་གཡུལ་ལས་རྣམ་པར་རྒྱལ་བར་མཛོད།། །།སརྦ་མངྒ་ལམ། །དགེའོ། །དགེའོ།