 གསུང་འབུམ་པོད་དང་པོ། རྣམ་ཐར་དང་དབུ་མ།དཔལ་ལྡན་རྒྱལ་བ་ཇོ་ནང་པའི་དཔེ་ཚོགས།དགེ་བཤེས་དངོས་གྲུབ་དཔལ།གངས་ལྗོངས་རིས་མེད་མཐོ་སློབ་ཀྱི་རྩོམ་སྒྲིག་སྡེ་ཚན།མཁོ་རྒུའི་ལོངས་སྤྱོད་འཛོམས་ཀྱང་མ་བསགས་ཤིང་། །འདོད་ཡོན་འཁོར་མང་ཚོགས་ཀྱང་མ་ཞེན་པར། །བསླབ་གསུམ་སྡེ་སྣོད་རིག་པའི་བང་མཛོད་དེ། །སྤོང་དང་ཀློག་པའི་སྙིང་གི་དབུས་སུ་བསྐྱིལ། ། དཔེ་སྐྲུན་གསལ་བཤད།སྙིགས་དུས་ཀྱི་བསྟན་པའི་གསལ་བྱེད་ཆེན་པོ་ངག་དབང་འཇིགས་མེད་དངོས་གྲུབ་དཔལ་བཟང་པོའི་མཛད་བཟང་བསླབ་གསུམ་ནོར་བུའི་གླིང་ཁ།༄༅། །སྙིགས་དུས་ཀྱི་བསྟན་པའི་གསལ་བྱེད་ཆེན་པོ་ངག་དབང་འཇིགས་མེད་དངོས་གྲུབ་དཔལ་བཟང་པོའི་མཛད་བཟང་བསླབ་གསུམ་ནོར་བུའི་གླིང་ཁ་ཞེས་བྱ་བ་བཞུགས་སོ། ། ཨོྃ་སྭ་སྟི༔ ཚོགས་གཉིས་རིན་ཆེན་རྡུལ་མང་སྤུངས་བའི་རྩེར། ། སྤྲིན་བྲལ་སྟོབས་བཅུའི་ནམ་མཁའ་དག་པ་ལས། ། མཚན་དཔེ་གསུང་གི་དཀྱིལ་འཁོར་འོད་བརྒྱ་པ། ། ཐུབ་དབང་ལྷ་ཡི་ལྷ་དེར་ལན་བརྒྱར་འདུད། ། གདོད་གནས་སྟོང་ཆེན་ལྷ་དང་དཀྱིལ་འཁོར་མཚན་མ་ཐིག་ལེ་ཨེ་ཡིག་སྣ་ཚོགས་གཟུགས་ བརྙན་ལ། ། འགྱུར་མེད་མི་ཤིགས་ཐུགས་རྗེ་ཆེན་པོ་བདུན་ཁྲི་ཉིས་སྟོང་བདེ་ཆེན་ཝཾ་ཡིག་དབྱེར་མེད་སྦྱོར། ། སྲིད་དང་ཞི་བའི་དྭངས་མའི་སྲོག་ཆེན་ལྷ་དང་མི་ཡི་རྣལ་འབྱོར་དམ་པས་བསྟེན་བྱ་བ། ། བཅོམ་ལྡན་གཉིས་མེད་དུས་ཀྱི་འཁོར་ལོའི་དཀྱིལ་འཁོར་ཆེན་པོ་མ་བཅོས་སོ་མར་བསྟེན་ བགྱིད་དོ། ། འགྲོ་བློའི་བསམ་པ་མི་མཐུན་སྣ་ཚོགས་རྡུལ་གྱི་གྲངས་བཞིན་བཀྲ་བ་ལ། ། ཐབས་མཁས་གསུང་དབྱངས་སྒྱུ་མའི་འཕྲུལ་གྱིས་འགྲོ་བའི་གཅོང་ནད་སེལ་བའི་སྨན། ། དྲང་ངེས་གསུང་རབ་རྣམ་པར་འབྱེད་ལ་མཁའ་ལྡིང་དབང་པོའི་གཤོག་འགྲོས་ལྟར། ། དབང་དུ་གྱུར་བ་ཤེས་རབ་རྒྱལ་མཚན་ཡབ་སྲས་དང་བཅས་ཀུན་ནས་འདུད། ། འཕགས་བོད་སྐྱེ་བརྒྱུད་དོ་ཤལ་གསར་བའི་ཕྲེང༌། ། རྨད་བྱུང་རྣམ་ཐར་དད་པའི་སྤུ་ལོང་འཛིན། ། གྲུབ་པ་མཆོག་གིས་འཁོར་ལོས་བསྒྱུར་བ་ཆེ། ། སྒྲོལ་བའི་མགོན་པོ་ཡིད་ཀྱི་པད་མཚོར་རོལ། ། ལྔ་བདོའི་ལོག་སྒྲུབ་ཧ་ལའི་དུག་ཆེན་ཟས། ། ཐུགས་སྟོབས་མདངས་ཀྱི་བཅུད་དུ་ལེགས་སོང་བ། ། དུས་བབ་འཕྲིན་ལས་སྨོན་ལམ་མཐུ་གྲུབ་པའི། ། རྒྱལ་ཀུན་སྤྱི་གཟུགས་བཤེས་གཉེན་དམ་པར་འདུད། ། སྨྲ་དབང་ཞེས་ཟེར་ཚིག་སྤྱི་ཤུན་པའི་རོ་ལ་འཐམས་ཏེ་རང་མྱོང་བྲལ་བའི་ཕྱི་ཚུལ་ཙམ། ། མཁས་གྲུབ་མཚན་གྱིས་ཅོད་པན་ཐོགས་པའི་བཅོས་མ་མང་པོ་ཕྱོགས་འདིར་མང་སྟེ་དེ་དག་གིས། ། རྨིག་རྗེས་རྙོག་མས་རྒྱ་མཚོར་འགྲན་པ་ཇི་ལྟ་བུར་ནི་ཡུད་ཙམ་ཞིག་ཀྱང་མི་ཐུབ་པ། ། མཁས་བཙུན་གྲུབ་པ་མཆོག་གི་སར་གནས་བླ་མ་མཆོག་དེར་སླར་ཡང་དུས་རྣམས་ཀུན་ཏུ་འདུད། ། གང་གི་མཚན་ཙམ་རྣ་བར་བསྙེན་པས་བདུད་སྡེའི་ཚོགས་ཀུན་རིང་བྱེད་ཅིང༌། ། དངོ༷ས་གྲུ༷བ་མཆོག་གི་འདོད་དགུའི་དཔ༷ལ་ལས་ཉམས་པ་མེད་པའི་སར་སྦྱོར་བ། ། སྡེ་བཞིའི་དཔ༷ལ་འབྱོར་ལྡ༷ན་གྲོལ་ཆོ༷ས་ཀྱི་དགའ་སྟོན་རོལ་བ་འཕེ༷ལ་བྱེད་མཆོག ། བླ་མའི་མཛད་པ་ཆུ་གཏེར་འཁྲིགས་ལས་ཆུ་ཐིགས་ཙམ་ཞིག་བརྗོད་པར་བྱ། ། ཞེས་བསྟོད་ཚིག་མེ་ཏོག་གི་རྒྱན་འཕྲེང་མཛེས་པས་མདུན་བསུས་ཏེ། དོན་གང་ཞིག་གླེང་བར་བྱ་བ་ལ་འཇུག་པ་ནི། སངས་རྒྱས་དང་སར་གནས་ཀྱི་སེམས་དཔའ་ཆེན་པོ་རྣམས། འགྲོ་བ་སྲིད་པའི་མཚོ་ལས་བསྒྲལ་བའི་ཕྱིར། ལོངས་སྤྱོད་རྫོགས་པ་དང༌། སྤྲུལ་པའི་སྐུ་དང༌། དགེ་སྦྱོང་དང༌། བྲམ་ཟེ་དང༌། ཁྱིམ་བདག་དང༌། དེད་དཔོན་དང༌། བུ་མོ་དང༌། ཁྱེའུ་དང༌། རི་བོང་དང༌། སྟག་དང༌། སེང་གེ་ལ་སོགས་པ་དང༌། ཐ་ན་བུང་བ་དང༌། ཕྱེ་མ་ལེབ་དང༌། ཆུ་མིག་དང༌། ཟམ་པ་དང༌། གྲུ་དང་ལྗོན་ཤིང་ལ་སོགས་པར་བསྟན་ནས་ཀྱང་འགྲོ་དོན་སྤྲུལ་བས་སེམས་ཅན་ཕན་པའི་ཐབས་སྣ་ཚོགས་པ་མཛད་པ་ཡིན་ཏེ། དེས་ན། སངས་རྒྱས་བྱང་སེམས་རྣམས་ཀྱིས་དུས་སྐད་ཅིག་མ་རེ་དང་གནས་རྡུལ་ཕྲ་རབ་རེའི་གོ་སར་བྱ་བ་བྱས་པའི་མཛད་པ་ཡང༌། རང་རེ་རྣམས་ཀྱིས་རྒྱ་མཚོ་ལ་རྩྭའི་མཆོག་མས་བླངས་པའི་ཚོད་ཙམ་ཡང་སྨྲ་བར་ནུས་པ་མ་ཡིན་མོད། སྐབས་འདིར་རང་གི་མེ་ཏོག་གང་ལ་ཕོག་པའི་ལྷ་སྐལ་འདོད་དགུ་མ་ལུས་པ་འབྱུང་བའི་སྡེ་དམིགས་པ་མེད་པའི་ཐུགས་རྗེའི་གཏེར་ཆེན་པོར་གྱུར་པ། ཚུལ་ཁྲིམས་དྲི་མ་མེད་པའི་གསེར་གྱི་ས་གཞི་ཡངས་ཤིང་རྒྱ་ཆེ་བར། མདོ་སྔགས་གཞུང་ལུགས་རྒྱ་མཚོའི་རི་རྒྱལ་ལྷུན་པོ་དཔང་མཐོ་ཞིང་བརྗིད་ཆགས་པ་ལ། སྒྲ་སྙན་སྐར་རྩིས་སོགས་རིག་གནས་ཀྱི་རི་མཚོ་དུ་མས་ཕྱོགས་ཀུན་ནས་ཡོངས་སུ་མཛེས་པར་བྱས་ཤིང༌། ཐུགས་རྗེ་མཐའ་དང་འཇིངས་དཔོག་པར་མི་ནུས་པའི་རྒྱ་མཚོ་ཆེན་པོ་ཀུན་ནས་འཁྲིགས་པའི་ངོགས་ན། བཅུ་ཕྲག་རིག་གནས་སམ་ཆོས་དང་འཇིག་རྟེན་གྱི་ལུགས་གཉིས་འཚོལ་བའི་གདུལ་བྱའི་འགྲོ་བ་ཀུན་གང་འདོད་དུ་སྐྱོང་བའི་རྒྱལ་སྲས་སེམས་དཔའ། ཐབས་ཤེས་ཀྱི་ཉི་ཟླ་བཟང་བོས་འཁོར་ལོ་ཐ་མའི་རང་ལུགས་ས་ཆེན་པོར་ཡོངས་སུ་གསལ་བར་མཛད་པའི་ཤིང་རྟ་བ་ཆེན་པོ། དཔལ་ཇོ་ནང་བའི་ཡང་དར་བསྟན་པའི་བྱེད་པོ་ཟླ་བྲལ་སྨྲ་བའི་དབང་པོ་འགྲོ་བ་མཐའ་དག་གི་མ་འདྲེས་པའི་ཡོངས་འཛིན་དམ་པ་དགེ་བའི་བཤེས་གཉེན་རིན་པོ་ཆེ་༧ངག་དབང་འཇིགས་མེད་དངོས་གྲུབ་དཔལ་ཞེས་བྱ་བ་བཀའ་དྲིན་མཚུངས་པ་བྲལ་བའི་སྡེ་གང་ཉིད་ཀྱི་མཛད་པ་རྒྱ་མཚོ་ལྟ་བུ་ལས་རྩྭ་རྩེའི་ཟིལ་བ་ཙམ་ཞིག་རང་གི་བསོད་ནམས་བསགས་པ་དང༌། སྐལ་མཉམ་ཆོས་མཆེད་དག་ལ་ཡང་ཅུང་ཟད་ཉེ་བར་མཁོ་བའི་གསུང་མོལ་ཕེབས་པ་ལ་བརྟེན་ནས་བརྗོད་པར་བྱ་བ་ཡིན་ནོ། །དེ་ལྟ་ནའང༌། འཕགས་པ་གསེར་འོད་དམ་པ་ལས། རྒྱལ་བའི་ཡོན་ཏན་གང་དག་དགེ་གྱུར་པ། །སྙིང་པོ་མཆོག་རབ་སྣ་ཚོགས་དུ་མ་སྟེ། །བདག་གིས་བསྐལ་པ་སྟོང་དུ་ལྕེ་བརྒྱ་ཡིས། །སངས་རྒྱས་ཡོན་ཏན་བརྗོད་པར་མི་ནུས་སོ། །རྒྱལ་བ་གཅིག་གི་ཡོན་ཏན་རྣམས་ཀྱང་ནི། །ལྕེ་སྟོང་གིས་ཀྱང་ཅུང་ཟད་བརྗོད་མི་ནུས། །བདག་གིས་རྒྱལ་བ་དག་ནི་ཐམས་ཅད་ཀྱི། །ཡོན་ཏན་གཅིག་རྒྱས་བརྗོད་པར་ག་ལ་ནུས། །ལྷར་བཅས་འཇིག་རྟེན་ཐམས་ཅད་མཚོར་གྱུར་ཏེ། །སྲིད་པའི་རྩེ་མོ་མན་ཆད་ཆུས་གང་བ། །སྐྲ་ཡི་རྩེ་མོས་དཔག་པར་ནུས་སྲིད་ཀྱིས། །བདེ་གཤེགས་རྣམས་ཀྱི་ཡོན་ཏན་གཅིག་ལ་མིན། །ལུས་དང་ངག་དང་ཡིད་རབ་དང་བ་ཡིས། །རྒྱལ་བ་ཀུན་ལ་བདག་གིས་བསྔགས་བསྟོད་པས། །བདག་གིས་བསོད་ནམས་འབྲས་བུ་མཆོག་བསགས་གང༌། །དེས་ནི་སེམས་ཅན་རྒྱལ་བ་རེག་གྱུར་ཅིག །ཅེས་དང༌། རྗེ་ཏཱ་ར་ནཱ་ཐས་མཛད་པའི་བཀའ་བབས་བདུན་ལྡན་གྱི་བརྒྱུད་པའི་རྣམ་ཐར་ལས། གྲུབ་པའི་སྐྱེས་བུ་གཅིག་ཉིད་ཁོ་ན་ཡི། །ངོ་མཚར་སྤྱོད་པའང་རྫུ་འཕྲུལ་ལྗགས་ལྡན་པས། །བསྐལ་བརྒྱའི་བར་དུ་བརྗོད་པར་མི་ནུས་མོད། །ཅེས་གསུངས་པ་ལྟར། ང་ལྟ་བུ་མ་དག་ཁོ་ནའི་མིག་ཅན་ཞིག་གིས་ནི་བླ་མ་དམ་པའི་མཛད་རྣམ་ཅི་ཞིག་བརྗོད་ཅིང་གསལ་བར་ནུས། ཁྱད་པར་དུ་གང་སྐུ་འཚོ་ཞིང་བརྟན་པར་བཞུགས་ཏེ་གང་འདུལ་འགྲོ་བའི་དོན་བྱེད་བཞིན་པའི་དུས་སུ་ནི་རྣམ་པར་ཐར་བ་རླབས་པོ་ཆེ་དུ་མ་ཞིག་དབང་པོའི་མངོན་སུམ་གྱི་སྤྱོད་ཡུལ་མཐོང་ཆོས་སུ་ལགས་ན། འབྲི་དགོས་ཀྱང་ཆེར་མ་དམིགས་པ་འདྲ་ཡང༌། ཚེ་ནི་མི་རྟག་རྩྭ་རྩེའི་ཟིལ་བ་འདྲ། །གསུངས་པ་ལྟར། ཁོ་བོ་ལྟ་བུ་ལས་ཉོན་འཐུག་པོའི་རླུང་ནང་གི་མར་མེ་ལྟ་བུའི་ཚེ་སྲོག་ནི་ནམ་འཆི་ངེས་པ་ཅུང་ཟད་ཀྱང་མེད་ན། གློ་བུར་གྱི་རྐྱེན་ངན་པའི་དབང་གིས། རང་གིས་མཐོང་ཐོས་མྱོང་བའི་ཡུལ་དུ་ཐོན་པ་འགའ་རེ་བོར་དུ་དོགས་པ་ཁོ་ན་སྙིང་ལ་ལྕི་ནས། ཅུང་ཟད་ཞིག་བརྗོད་པར་བྱ་བ་ལགས་ན། སྐལ་མཉམ་གཞན་ལ་ཡང་ནི་ཅུང་ཟད་རེ་ཕན་པ་དང༌། མི་འགྱང་པར་ལྔ་ལམ་གཤིན་ཐང་སྙེག་པ་ན་བསོད་ནམས་རྣམ་དཀར་གྱི་དགེ་འབྲས་ཐོབ་བྱེད་ཀྱི་མཆོག་ཀྱང་འདི་ཡིན་ནོ་སྙམ་ནས། ཆོས་མཆེད་དམ་པ་དག་གི་སྐུལ་བ་ཐང་དུ་མ་བོར་བ་ཙམ་ཞིག་གི་དོད་དུ། ཐ་མལ་མ་དག་པའི་བློ་མིག་ཁབ་ཀྱི་བུ་ག་ལྟ་བུ་ནས་ཅི་ཙམ་མཐོང་བ་དེ་ཙམ་ཞིག་བརྗོད་པར་བྱའོ། ། སྐུ་འཁྲུངས་ཤིང་དམ་པས་ལུང་གིས་བསྔགས་པའི་རྣམ་ཐར།རང་ཅག་གི་འདྲེན་པ་བཀའ་དྲིན་ཅན་བླ་མ་དམ་པ་འདི་ཉིད་ནི། འོད་སྲུང་གིས་ཞུས་པའི་མདོར། པད་མ་ཆུ་ལས་སྐྱེས་གྱུར་ཀྱང༌། །ཆུ་ཡི་རྫབ་ཀྱིས་གོས་པ་མེད། །དེ་བཞིན་བྱང་ཆུབ་འཇིག་རྟེན་སྐྱེས་གྱུར་ཀྱང༌། །འཇིག་རྟེན་ཆོས་ཀྱིས་ནམ་ཡང་ཡང་གོས་པ་མེད། ། ཅེས་པ་ལྟར་ཡབ་འཇམ་ཤེར་དང་ཡུམ་ཞེས་ཆུང་གཉིས་ཀྱི་སྲས་སུ་མིང་སྲིང་དགུ་འཁྲུངས་པ་ལས། ཆེ་བ་དཔལ་སྐྱིད། གཉིས་པ་ཤེར་ཕུན། གསུམ་པ་བསམ་གཏན་ཏེ་འདི་ཡང་ཁ་ཏོན་དགེ་སྦྱོར་སྒོམ་ཉམས་ལེན་ལ་བརྩོན་མཁན་གྱི་དགེ་སློང་ཞིག་ཡོད། བཞི་པ་ལག་ཆུང་མ། ལྔ་པ་ལེགས་མཚོ་མ། དྲུག་པ་སྤུ་ལི་མ། བདུན་པ་ད་ལྟ་ཨ་སྐྱོང་དགོན་གྱི་རྡོ་རྗེ་སློབ་དཔོན་དུ་བཞུགས་བཞིན་པ་མཁས་བཙུན་བཟང་གསུམ་གྱི་རང་བཞིན་རྟོགས་པ་མཆོག་དང་ལྡན་པ་བླ་མ་རབ་འབྱོར། བརྒྱད་པ་མདོ་སྔགས་ཆོས་ཚུལ་མ་ལུས་པའི་མངའ་བདག་བཤེས་གཉེན་རིན་པོ་ཆེ་འདི་ཉིད་ཡིན། དགུ་པ་སྒྲུབ་པ་ཉམས་ལེན་ལ་གཅིག་ཏུ་གཞོལ་བའི་བཙུན་མ་ངང་སྐྱིད་རྣམས་ཡོད་པ་ལས། དམ་པ་འདི་ཉིད་ནི་བོད་རབ་རྒྱལ་ལྕགས་ཁྱི་ལོའི་མཇུག་གི་ཆ་ཕྱི་ལོ། ༡༩༧༡ ལོའི་ལོ་འགོ་ཟིན་ཙམ་ན། མགོ་ལོག་པདྨ་རྫོང་ཨ་སྐྱོང་གད་དམར་འགོ་ཞེས་པའི་ས་ཆར་སྐུ་བལྟམས། དེ་ཡང་ལྕགས་ཁྱི་ཞེས་པ་བོད་བྱིངས་ཀྱི་ལོ་སར་མ་ཚེས་པས་ལྕགས་ཁྱི་ཞེས་སུ་སྨྲས་ཀྱི། འབྱུང་རྩིས་རང་གི་ལུགས་ལྟར་ན་བོད་ཟླ་བཅུ་གཅིག་པའམ་བཅུ་གཉིས་པར་ལོ་རྙིང་པ་ལས་གསར་བ་རུ་འཕོ་བ་ཡིན་པས་ལོ་རིས་དངོས་ནི་ཕག་ལ་སྐུ་བལྟམས་པ་ཡིན་ནོ། །སྤྱིར་ཁོང་སྐྱེ་བོ་ཕལ་བ་ཞིག་མ་ཡིན་པར་མཛད་པ་མཐོང་ཆོས་སུ་གྱུར་པ་དག་ལས་ཀྱང་ཅི་དགར་དཔོག་པར་ནུས་མོད་ཀྱི། དེ་ལྟར་སྔོན་བྱོན་གྲུབ་པའི་གཏེར་སྟོན་དག་གིས་ལུང་གིས་ཡང་ཡང་བསྙོན་མེད་དུ་བསྔགས་པའི་ཚུལ་རང་གི་མཐོང་ཆོས་ཙམ་ཞུ་ན། ཨ་གཏེར་དཔའ་བོ་ཆོས་དབྱིངས་རྡོ་རྗེའམ་ཨ་པང་གཏེར་སྟོན་ཞེས་ཡོངས་སུ་གྲགས་པ་གང་ཉིད་ཀྱི་གཏེར་ལུང་ལས། འཇམ་དབྱངས་ནི་མི་ཡི་ཟོལ་བྱུང་བ༔ རྗེ་ཏཱ་ར་ནཱ་ཐ་དཔལ་གྱི་མིང་༔ རང་ལུགས་ཀྱི་བསྟན་པ་ག་དར་བྱེད༔ ཡུལ་ཀུན་ཏུ་ཟབ་ལམ་སྙིང་པོ་རྒྱས༔ ཇོ་ནང་གི་དགོན་ཕྲན་བཅུ་གཉིས་འབྱུང་༔ དེ་ཁ་རྗེ་ཆེ་བའི་ལྷ་ཟབ་དེ༔ བདུད་སྨོན་ལམ་ལོག་པ་དེ་ལྟར་ཡོད༔ ཅེས་ཏེ། ཚིག་རྐང་དང་པོ། འཇམ་དབྱངས་ནི་མི་ཡི་ཟོལ་བྱུང་བ༔ ཞེས་པས་འཇམ་དབྱངས་ཀྱི་རྣམ་སྤྲུལ་དུ་ལུང་བསྟན་པར་གོ་ཡང་ཆོག་མོད། གཙོ་ཆེར་འཇམ་དབྱངས་མི་ཡི་ཟོལ་ཏུ་བྱུང་བ་ལྟར་མཁས་པའི་ཚུལ་ཆེན་བཞེས་པར་བསྟན་པ་དང༌། ཚིག་རྐང་གཉིས་པ། རྗེ་ཏཱ་ར་ནཱ་ཐ་དཔལ་གྱི་མིང་༔ ཞེས་པས་གངས་ཅན་གྲུབ་པའི་འཁོར་བསྒྱུར་ཇོ་ནང་རྗེ་བཙུན་ཏཱ་ར་ནཱ་ཐའི་རྣམ་འཕྲུལ་དང་མཚན་ལ་དཔལ་གྱི་མིང་ཡོད་པར་གསུངས་པ་ཡིན་པས། དེ་ཡང༌། དོན་གྱི་སླད་དུ་མཚན་ནས་སྨོས་ན་ཡོངས་གྲགས་སུ་༧དངོས་གྲུབ་དཔལ་ཞེས་རྩོད་མེད་དུ་གྲགས་པ་དང༌། རབ་ཏུ་བྱུང་བའི་མཚན་ལ་དཔལ་ལྡན་ཆོས་འཕེལ་ཞེས་པ་དང་མཐུན་པར་དཔལ་གྱི་མིང་ཅན་དུ་གསུངས་པར་མ་ཟད། ཁྱད་པར་དུ་རྐང་བ་ཕྱི་མ་རྣམས་ཀྱིས་ཁོང་གི་མཛད་པ་དང་བཅས་པ་གསལ་བར་ལུང་བསྟན་པ་ཡིན་ཏེ། ཚིག་རྐང་གསུམ་པ། རང་ལུགས་ཀྱི་བསྟན་པ་ག་དར་བྱེད༔ ཅེས་པས། ཇོ་ནང་བའི་ལུང་རྟོགས་ཀྱི་བསྟན་པ་ལ་ག་དར་རམ་བསྟན་པ་དག་གཙང་དུ་བྱེད་པར་གསུངས་པ་ཡིན་པས། དེའི་ཚུལ་ནི། ཁོང་རིན་པོ་ཆེ་འཕགས་ཡུལ་སོགས་གྲྭ་ས་མང་པོར་ཕྱིན་ཏེ། ཕྱིར་རང་རེ་གངས་ཅན་གྱི་ལྗོངས་སུ་ལྷགས་པ་ནས། རིམ་པར་དབུ་བཟུང་སྟེ། མགོ་ལོག་དང༌། འཛི་ག །རྒྱལ་མོ་ཚ་བ་རོང་སོགས་སུ་ཇོ་ནང་གི་དགོན་སྡེ་ཕལ་མོ་ཆེར་བཤད་སྒྲུབ་ཀྱི་སྡེ་བཙུགས་པ་དང་སྐུལ་མ་དང་ལམ་སྟོན་གྲངས་ལས་འདས་པ་གནང་བར་མ་ཟད། དེ་སྔོན་དགོན་སྡེ་འགའ་རེ་ན་འཆད་ཉན་གྱི་རྣམ་པ་ཆུང་ངུ་རེ་ཙམ་ཡོད་ན་ཡང༌། ཡང་སྙིང་གཞན་ལུགས་ཀྱི་ཡིག་ཆ་རེ་ལ་འབྲུ་འགྲེལ་འགྲོ་མིན་ཙམ་ལས། ཀུན་མཁྱེན་དོལ་པོ་པ་ཡབ་སྲས་རྣམས་དང༌། རྗེ་བཙུན་ཏཱ་ར་ནཱ་ཐ་ལ་སོགས་པ་རང་ལུགས་འཛིན་པའི་སྐྱེས་ཆེན་སྔོན་མ་དག་གི་གསུང་ལ་འཆད་ཉན་ཉིན་སྐར་གྱི་ཚུལ་དུ་གྱུར་པ་ན། སྐུ་ཚེགས་དང་དཀའ་ངལ་མང་པོ་བརྒྱུད་དེ། རང་ལུགས་གཙང་སེང་ངེ་བའི་འཆད་རྩོད་རྩོམ་གསུམ་གྱིས་དང་པོར་རྨང་བཏང་བ་ནས། ཐ་མར་བཀའ་པོད་ལྔ་སྔགས་དང་བཅས་པའི་འཆད་རྩོད་རྩོམ་གསུམ་པོ་འཐུས་ཚང་བར་བྱས་པ་དང༌། ཇོ་ནང་གི་དགོན་ཁག་སོ་སོར་གྲྭ་ཆས་གྱོན་ལུགས་ནས་ཐོས་བསམ་སྒོམ་གསུམ་གྱི་སྒྲིག་ལམ་ཕན་འབྲས་ལྡན་པ་མང་པོ་དངོས་བརྒྱུད་ཐབས་སྣ་ཚོགས་ཀྱིས་སྤེལ་བའི་མཛད་པ་བསྐྱངས་ཏེ། བསྟན་པ་སྤྱི་དང་ཡང་དགོས་སུ་ཇོ་ནང་པའི་ཆོས་བརྒྱུད་ག་དར་རམ་དག་གཙང་དུ་བྱས་པ་སྟེ། ཁོང་གི་མཛད་སྤྱོད་ལ་རྒྱུས་ཅུང་ཟད་ཡོད་པ་ཚུན་གྱིས་ཤེས་གསལ་ལྟར་ལགས་ལ། འོག་ནས་རགས་བསྡུས་ཙམ་འབྲི་འདུན་ལྟར་ཡིན། ཚིག་རྐང་བཞི་པ། ཡུལ་ཀུན་ཏུ་ཟབ་ལམ་སྙིང་པོ་རྒྱས༔ ཞེས་པས་མདོ་ཕྱོགས་ཤེར་ཕྱིན་ཟབ་མོའི་ལམ་གྱི་སྙིང་པོ་བདེ་གཤེགས་སྙིང་པོ་བསྟན་པའི་གཞན་སྟོང་དབུ་མ་ཆེན་པོ་འཆད་རྩོད་རྩོམ་གསུམ་གྱི་སྒོ་ནས་ཡུལ་གྲུ་ཀུན་ཏུ་སེང་གེའི་སྒྲ་ཆེན་པོས་སྤེལ་བར་མཛད་པ་དང༌། སྔགས་ཕྱོགས་གསང་སྔགས་བླ་ན་མེད་པའི་སྙིང་པོ་དུས་ཀྱི་འཁོར་ལོའི་བསྐྱེད་རྫོགས་ཐིག་རྡུལ་ཚོན་སྐར་རྩིས་དང་བཅས་པའི་འཆད་ཉན་སྒོམ་སྒྲུབ་ཀྱི་སྒོ་འཕར་ཡངས་པོར་ཕྱེས་ཏེ། གོ་རིམ་འཐུས་སྒོ་ཚང་པའི་འཆད་ཉན་གྱི་ཕྱི་རྗེས་རླབས་ཆེན་བཞག་ཡོད་པ་འདི་དག་སྙོན་དུ་མེད་པ་ལྟར་ལགས། ཚིག་རྐང་ལྔ་པ། ཇོ་ནང་གི་དགོན་ཕྲན་བཅུ་གཉིས་འབྱུང་༔ ཞེས་པས་སྤྱིར་ཇོ་ནང་གི་དགོན་སྡེ་ཕལ་ཆེར་ལ་ཁོང་གི་དངོས་བརྒྱུད་ཅི་རིགས་ཀྱི་ཕན་འབྲས་མ་ཐོན་པ་མེད་པའི་ཚོད་དང༌། ལྷག་པར་དུ་སློབ་ཚོགས་ལ་བསམ་ན་ཇོ་ནང་གི་དགོན་པ་སྤྱི་ཁྱོན་ལ་རིས་སུ་མ་ཆད་པའི་མཛད་པ་བསྐྱངས་པ་ཡིན་མོད། སྐུ་དངོས་ཡུན་དུ་ཞབས་སོར་འཁོད་ནས་དཔལ་ཇོ་ནང་བ་ཆེན་པོའི་རང་ལུགས་ཀྱི་ཡིག་ཆ་འཛིན་སྐྱོང་གི་གྲྭ་གསར་དུ་རྒྱ་ཆེར་བཙུགས་པའི་གྲངས་དགོན་སྡེ་བཅུ་གྲངས་ཡོད་པར་ལུང་དུ་བསྟན་པ་ཡིན་པར་མངོན། ཚིག་རྐང་དྲུག་པ་དང་བདུན་པ། དེ་ཁ་རྗེ་ཆེ་བའི་ལྷ་ཟབ་དེ༔ བདུད་སྨོན་ལམ་ལོག་པ་དེ་ལྟར་ཡོད༔ ཅེས་པས་ཁ་རྗེ་དབང་ཐང་གཞན་དང་མི་མཚུངས་པ་དང༌། མཛད་པ་ལ་བར་ཆད་རྩོམ་མཁན་མང་བར་གསུངས་ཏེ། ཁོང་རིན་པོ་ཆེ་ལ་བསམ་ན། སྤྲུལ་མིང་དང༌། དགོན་བདག །གོ་ས་ཆེན་པོ་དང༌། རྒྱབ་རྩ་འཐུག་པོ་སོགས་ཀྱི་དབང་གིས་ཕྱག་ལས་ལ་གྲུབ་འབྲས་ཐོན་པ་མ་ཡིན་པར། གྲྭ་བ་གྲྭ་རྐྱང་གི་ས་ནས། དཀའ་ཁག་དང་བར་ཆད་མང་པོས་བཙན་གྱིས་མནན་ཡང་མ་ནོན་པར། བསྟན་དང་འགྲོ་ལ་ཕན་འབྲས་བསམ་ཡུལ་ལས་འགོངས་པ་མངོན་པར་ཐོན་པའི་གྲུབ་དོན་དབང་པོའི་ཡུལ་དུ་མངོན་པ་ལྟར་རོ། །མགར་ཀློང་གཏེར་ཆེན་བདུད་འདུལ་དབང་ཕྱུག་གླིང་པས་མ་འོངས་ལུང་བསྟན་ལས། ཨ་ཁྱུང་གི་ཇོ་ནང་བསྟན་པ་ལ༔ བསོད་ནམས་ཀྱི་ལེགས་རྐྱེན་ནིརྨ་ཀ༔ ཕག་ལོ་ལ་ཟླ་གཞོན་རཏྣ་རྙེད༔ རྙེད་པ་དེ་ཐབས་ལ་མ་མཁས་ན༔ བསྟན་འགྲོ་ལ་ཕན་བདེ་འཛིན་པ་དཀའ༔ ཞེས་གསུངས་སོ། །རྐང་པ་དང་པོ། ཨ་ཁྱུང་གི་ཇོ་ནང་བསྟན་པ་ལ༔ ཞེས་ཏེ། ཨ་ཁྱུང་ནི་སྐུ་འཁྲུངས་སའི་ས་མིང་སྟེ། དཔེ་རྙིང་པ་ཐམས་ཅད་ན་ཨ་སྐྱོང་ལ་ཨ་ཁྱུང་ཞེས་བྲིས་ཡོད་ལ། དེའི་རྒྱུ་མཚན་ཡང་ཨ་སྐྱོང་དགོན་གྲོང་ཆགས་པའི་ས་དེ་ཁྱུང་གི་དབྱིབས་ལྟ་བུའི་སྟེང་དུ་ཡོད་པས་ཡིན་པར་ངག་རྒྱུན་དང་ལོ་རྒྱུས་ཐམས་ཅད་དུ་རླུང་ལྟར་གྲགས་པ་ཞིག་རེད། ཇོ་ནང་བསྟན་པ་ལ་ཞེས་པས་ཨ་སྐྱོང་དགོན་པ་དེ་ཆོས་བརྒྱུད་གང་དུ་གཏོགས་པར་བསྟན་པར་གསལ། རྐང་བ་གཉིས་པ། བསོད་ནམས་ཀྱི་ལེགས་རྐྱེན་ནིརྨ་ཀ༔ ཞེས་ཏེ། ནིརྨ་ནི་སྤྲུལ་པ་སྟེ་ཀ་ནི་སྐུའི་དོན་དུ་སྣང་བས་སྐྱེ་འགྲོའི་བསོད་ནམས་ཀྱི་ལེགས་བྱས་ཀྱི་མཐུ་ལས་བསམ་བཞིན་སྤྲུལ་བའི་ཟློས་གར་འཛིན་པའི་སྐྱེས་བུ་འཁྲུངས་བར་བསྟན་པ་ཡིན། རྐང་བ་གསུམ་པ། ཕག་ལོ་ལ་ཟླ་གཞོན་རཏྣ་རྙེད༔ ཅེས་ཏེ། དམ་པ་འདི་ཉིད་ལོ་རེས་ཕག་ལ་འཁྲུངས་པ་ཡིན་པར་གསུངས་ཏེ། ལོ་རེས་བཅུ་གཉིས་ནི་འབྱུང་རྩིས་སམ་ནག་རྩིས་ཀྱི་བརྡ་ཆད་ཡིན་པས། དེ་ལ་ལུགས་རྙིང་ལྟར་ན་བོད་ཟླའམ་ཧོར་ཟླ་བཅུ་གཅིག་པ་ནས་ལོ་མགོ་འཛིན་པ་དང༌། ལུགས་གསར་ལྟར་ན་བོད་ཟླའམ་ཧོར་ཟླ་བཅུ་གཉིས་པ་ནས་ལོ་མགོ་འཛིན་པ་ཡིན་ལ། གང་ལྟར་ཡང༌། དམ་པ་ཁོང་ནི་ལུགས་གསར་རྙིང་གང་གི་དབང་དུ་བྱས་ཀྱང་ལོ་རེས་སམ་ལོ་རྙིང་དངོས་དེ་ཕག་གི་མགོ་ཟིན་ཙམ་ན་སྐུ་འཁྲུངས་པ་ཡིན་པས་སྐུ་འཁྲུངས་པའི་དུས་ཚིགས་གསལ་བོར་བསྟན་པ་ཡིན། རྐང་པ་བཞི་པ་དང་ལྔ་པ། རྙེད་པ་དེ་ཐབས་ལ་མ་མཁས་ན༔ བསྟན་འགྲོ་ལ་ཕན་བདེ་འཛིན་པ་དཀའ༔ ཞེས་ཏེ། འགྲོ་བའི་བསོད་ནམས་ཀྱི་མཐུ་ལས་འཁྲུངས་པའི་སྐྱེས་བུ་དེ་ཉིད་རྙེད་པའམ་ཐོབ་ཀྱང༌། ཡུལ་དེས་ཚུལ་བཞིན་ཐབས་ལ་མཁས་པས་བསྟེན་པ་མ་བྱུང་ནའམ། ཐབས་མཁས་རྟེན་འབྲེལ་འགྲིག་པ་མ་བྱུང་ན་ཡུལ་དེ་ལ་དང་པོར་ཅུང་ཟད་ཕན་པར་འགྱུར་ཡང༌། དེའི་རྒྱུན་འཛིན་པའམ་དུས་རིང་པོར་ཕན་པ་གནས་དཀའ་བར་གསུངས་འདུག་ལ། དེ་བཞིན་དུ་བྱུང་ཡང་བྱུང་པ་ཡིན་ཏེ། རང་དགོན་དུ་བཤད་གྲྭ་ཆད་པ་གསོས་ཤིང་རྩོད་གྲྭ་གསར་འཛུགས་དང༌། གཟན་ཤམ་ནབ་ལུགས་ནས་བཟུང་སྟེ་དགོན་ཡོངས་ལ་འགྱུར་བ་སྔར་མེད་པ་ཞིག་བྱུང་ཡོད་ཀྱང༌། ཁོང་ཉིད་ལོ་གསུམ་ཙམ་ལས་རང་ཡུལ་དུ་མ་བཞུགས་པར་ཕྱོགས་སོ་སོར་བཤད་སྒྲུབ་ཀྱི་སྡེ་དུ་མ་བསྐྱངས་ཏེ་ཕེབས་པས། རང་དགོན་དུ་སྔར་ཡོད་ཀྱི་སྒྲིག་ལམ་སོགས་རིམ་པས་ཉམས་དམས་ཆེར་ཕྱིན་སོང་བ་ མངོན་མཐོང་དེ་ག་ཡིན་ནོ། ། སྲིད་པའི་གདུང་བ་མིང་སྐལ་ཙམ་ཡང་ཐོས་པའི་བུ་གར་རབ་དབེན་པའི། ། ཐར་བ་མཆོག་གི་རྒྱལ་སྲིད་དེ་ལ་གོམ་གཅིག་སྟབས་ཀྱིས་དབང་བྱས་ཀྱང༌། ། ཐོས་དང་བསམ་པ་སྒོམ་པའི་ཤུགས་རྣམས་ཡོངས་སུ་དབེན་པའི་སྲིད་པ་འདི། ། ཐུགས་ལ་བརྣགས་པས་བསྟན་འགྲོའི་དཔལ་ཁྱེད་བསོད་ནམས་ཞིང་དུ་བྱོན་པ་ལེགས། ། སྙིགས་དུས་ཀྱི་བསྟན་པའི་གསལ་བྱེད་ཆེན་པོ་ངག་དབང་འཇིགས་མེད་དངོས་གྲུབ་དཔལ་བཟང་པོའི་མཛད་བཟང་བསླབ་གསུམ་ནོར་བུའི་གླིང་ཁ་ཞེས་བྱ་བ་ལས་སྐུ་འཁྲུངས་ཤིང་དམ་པའི་ལུང་གིས་བསྔགས་པའི་རྣམ་ཐར་མདོར་བསྡུས་པ་སྟེ་དང་པོའོ། ། ཆོས་སྒོར་ཞུགས་ཏེ་ངོ་མཚར་བའི་ཡོན་ཏན་རང་ཆས་སུ་མངའ་བའི་རྣམ་ཐར།དེ་ལྟའི་འཁྲུལ་མེད་རྡོ་རྗེའི་བཀའ་ལུང་གིས་གསལ་བར་བསྔགས་པའི་དམ་པ་ཁོང་དགུང་གྲངས་ལྔ་ལ་སླེབས་པའི་སྟོན་ཐོག་ན་མ་ཡུམ་ཞེས་ཆུང་སྐུ་གཤེགས། དགུང་གྲངས་བདུན་བརྒྱད་གཉིས་ཀྱི་སྟེང་རང་གི་ཡབ་ཀྱི་མདུན་ནས་ཡི་གེ་སྦྱོར་ཀློག་ཆོ་ག་ཆོས་སྤྱོད་ཀྱི་རིགས་རྣམས་ལ་མཁས་པར་བསླབས། ཡབ་འཇམ་ཤེར་མཆོག་ནི་དང་པོ་ཆུང་དུས་ནས་རབ་ཏུ་བྱུང་སྟེ་ཁྱབ་བདག་རྡོ་རྗེ་འཆང་ཆེན་པོ་སངས་རྒྱས་རྡོ་རྗེ་མཆོག་གི་ཞབས་དྲུང་དུ་སྦྱོར་བ་ཡན་ལག་དྲུག་ལོ་གསུམ་ཕྱོགས་གསུམ་དང་བཅས་པའི་ཉམས་ལེན་བྱས་ཏེ་རྒྱུན་དུ་དགེ་སྦྱོར་གྱི་བྱ་བ་ལ་བརྩོན་པ་ཞིག་ཡོད་པ་ལ། དུས་ཕྱིས་ཕྱི་ལོ། ༡༩༥༨ རབ་རྒྱལ་ས་ཁྱི་ལོའི་དུས་ཟིང་སྐབས་སྡོམ་པ་ཕུལ་དགོས་བྱུང་སྟེ། རིགས་བརྒྱུད་མང་པོ་བྱུང༌། སླད་ནས་ཀྱང་ཨབ་སྐོང་མཁན་ཆེན་བློ་བཟང་རྡོ་རྗེ་མཆོག་གི་མདུན་དུ་དགེ་ཚུལ་གྱི་སྡོམ་པ་མནོས་ཏེ། བླ་མ་དམ་པ་བཤད་སྒྲུབ་དཔལ་མཆོག་གི་དྲུང་དུ་སྦྱོར་བ་ཡན་ལག་དྲུག་ལོ་གསུམ་ཕྱོགས་གསུམ་གྱི་ཉམས་ལེན་ལ་བསྐྱར་བཞུགས་བྱས། དེ་ནས་བཟུང་དགེ་སྒྲིབ་སྡིག་སྤངས་དང་ཁ་ཏོན་དགེ་སྦྱོར་སྒྲུབ་པ་ཉམས་ལེན་ལ་སྐུ་མ་གཤེགས་ཀྱི་བར་དུ་བརྩོན་འགྲུས་ལྷོད་པ་མེད་པར་བཞུགས་པ་ཞིག་ལགས་སོ། །དེ་ནས་བཤེས་གཉེན་རིན་པོ་ཆེ་དགུང་གྲངས་དགུའི་ཐོག་ནག་པ་ཟླ་བའི་ནང་དུ་རང་དགོན་དུ་ལྷ་དགུའི་སྒྲུབ་མཆོད་སྐབས་སུ་ཐོག་མའི་ཚོགས་ཞུགས་བྱས། ཚོགས་ཞུགས་བྱས་པའི་ཉིན་དེའི་ནུབ་མོར་སྣང་བ་ཐམས་ཅད་གནས་གྱུར་བའི་ཚུལ་གྱིས་ནུབ་མོ་དེར་ནམ་ལངས་ཀྱི་བར་དུ་འཇིག་རྟེན་གྱི་ཁམས་དང་ལས་སྣང་ཐ་དད་པའི་འགྲོ་བ་ཤིན་ཏུ་མང་བོ་གནམ་ས་བར་སྣང་འགེངས་བ་ཙམ་གཟིགས་ཤིང༌། ལ་ལ་ནི་མཁའ་ལ་འགྲོ་བའི་རིགས་ཅན་དང༌། ལ་ལ་ནི་རྒྱལ་པོ་ལ་སོགས་ཀྱི་ཆ་ལུགས་དང༌། ཤིང་རྟ་ལ་གནས་པ་དང༌། ཉམ་ཐག་དབུལ་ཕོངས་བའི་རྣམ་པ་སོགས་རྣམ་པ་སྣ་ཚོགས་པར་མཐོང༌། དེ་ཕན་ཆད་དུ་སྦས་ཡུལ་གྱི་འཇིག་རྟེན་དང་ལས་སྣང་སོ་སོ་བའི་འགྲོ་བ་གཟིགས་པ་ཤིན་ཏུ་མང་པོ་བྱུང་འདུག་སྟེ། ཅི་རིགས་པ་ནི་ཁོ་བོས་ཀྱང་ཐོས་སྟེ་རེ་རེ་བཞིན་སྨྲས་ན་འཚམ་མིན་མི་ཤེས་པས་མི་སྨྲ། འབྲོག་ཁྱིམ་རང་ཡུལ་གྱི་སྐྱ་ཡོང་ལུང་པ་ཞེས་པའི་ཕུ་ན་ཟོག་བར་ཕྱིན་སྐབས། སྤྱི་ལེ་བཅུ་ཕྲག་ལྷག་གིས་ཆོད་པའི་རང་རྫོང་གི་ཚོང་ར་དང་ཁྱིམ་ཚང་དག་གི་འདུས་སྡོད་སོགས་མི་དང་ཚོང་རྫས་ཐམས་ཅད་ཆགས་ཐོགས་མེད་པར་མདུན་ན་གནས་པ་ལྟར་མངོན་སུམ་དུ་མཐོང་ནུས་ཁྱད་པར་ཅན་བར་སྐབས་བར་སྐབས་སུ་མང་དུ་བྱུང་བ་ཡིན་ལ། ཚོང་ཁང་སོགས་ལ་ལྟ་འདོད་པ་ན་ཚོང་ཁང་དང་པོ་གཉིས་པ་སོགས་རིམ་པས་གཟིགས་ནས་ཚོང་རྫས་ཤོམ་ལུགས་དང་འཚོང་བྱ་ཅི་འདུག་སོགས་དངོས་སུ་ཕྱིན་པ་དང་འདྲ་བའི་གསལ་ཉམས་ཁྱད་པར་ཅན་བྱུང་སྟེ། དེ་ཡང་དམ་པའི་ཆོས་འདུལ་བ་དང་མངོན་པ་ནས་བར་སྲིད་དང་ལྷའི་འགྲོ་བ་མཐོང་བ་སོགས་ནི་བསམ་གཏན་གྱི་མངོན་པར་ཤེས་པ་དང་ལྡན་པ་ཁོ་ན་ལ་འབྱུང་བར་གསུངས་པ་དང༌། དཔལ་དུས་ཀྱི་འཁོར་ལོའི་རྒྱུད་ལས། མངོན་པར་ཤེས་པ་ལྔ་ནི་ཐོབ་པར་འགྱུར་ཏེ་མི་ཡི་བདག་པོ་བསམ་གཏན་སྦྱོར་བས་དག་པའོ། །ཞེས་སོགས་ལས་རྩིག་པ་སོགས་ཀྱིས་སྒྲིབ་མེད་དུ་ཡུལ་མཐོང་བ་དང་ལྷའི་འགྲོ་བ་མཐོང་བ་སོགས་ནི་ལྷའི་མིག་གི་མངོན་པར་ཤེས་པ་ཐོབ་པའི་ཡོན་ཏན་དུ་གསུངས་ཤིང༌། ཚེ་འདིར་རྣལ་འབྱོར་བ་ལ་སྐྱེས་ཐོབ་ཀྱི་མངོན་པར་ཤེས་པ་མངའ་བ་དེ་ཚེ་རབས་གཞན་དང་གཞན་དུ་བསམ་གཏན་གྱི་ཏིང་ངེ་འཛིན་ཟབ་མོ་གོམས་པའི་མཐུ་ཡིན་པར། འབྲས་བུ་རྒྱུའི་རྗེས་སུ་འཇུག་པ་ཉིད་ལས་དཔོག་པར་ནུས་སོ། །འོན་ཏེ་སྐྱེས་བུ་དམ་པ་གང་ཉིད་ནི་ཆུང་དུས་ནས་ཡོན་ཏན་ཐམས་ཅད་སྦས་ཏེ་བཞུགས་པ་དམ་པའི་རང་རྟགས་ཐུན་མོངས་མ་ཡིན་པ་ལྷན་སྐྱེས་སུ་མངའ་བ་ཡིན་པས། འགྲོ་བ་ཕལ་གྱིས་ལྟ་ཅི་ཁྱིམ་མི་རྣམས་ཀྱིས་ཀྱང་ཐོས་ཤིང་ཤེས་པ་ཉུང་ངུ་ཡིན། ལོ་ངོ་དྲུག་ཡས་མས་ནས་བཟུང་རབ་ཏུ་བྱུང་གི་བར་ལ་ནུབ་རེ་བཞིན་ཕྱག་བརྒྱ་རེ་དང་ཁྱིམ་མི་རྣམས་དང་མཉམ་དུ་སྐྱབས་འགྲོ་མཚན་གཟུངས་སོགས་རྒྱུན་པར་ཆུ་ཚོད་གཉིས་ཡས་མས་སུ་ཁ་ཏོན་ཆག་མེད་དུ་མཛད་སྲོལ་དང༌། ཡི་གེ་བསླབས་པ་ནས་བཟང་སྤྱོད་བདེ་སྨོན་སོགས་ཀྱང་རྒྱུན་པར་ཁ་ཏོན་ཆད་མེད་དུ་བྱས་པ་ཡིན་འདུག་སྟེ། འདི་དང་འདི་འདྲ་བའི་སྲོལ་ག་བཟང་པོ་མང་དག་ཅིག་བོད་ཆོས་ལྡན་གྱི་ཁྱིམ་ཚང་སོ་སོར་ཉིན་རེ་བཞིན་སྔར་ཡོད་ནའང༌། དེང་སང་ནི་དད་པ་དང་ཡིད་ཆེས་ལ་གས་ཆག་ཤོར་ནས་སམ། འཇིག་རྟེན་ཟང་ཟིང་གི་གཡེང་བ་ཉིན་རེ་བཞིན་ཇེ་ཆེར་སོང་བས་སྔར་སྲོལ་བཟང་པོ་དེ་འདྲ་རྒྱུན་སྐྱོང་མཁན་འགའ་ཙམ་ཡང་མཐོང་རྒྱུ་དཀོན་པོར་གྱུར་བ་ནི་ཡིད་ཕངས་ཀྱང་བྱ་ཐབས་སུ་ལ་ཡོད། ཚེ་རབས་ཚེ་རབས་རྣམས་སུ་ལེགས་གོམས་པས། ། ཚེ་འདིར་ཚེགས་མེད་ཡོན་ཏན་ཤུགས་འབྱུང་གི། ། ཕལ་ལས་འདས་པའི་ཡོན་ཏན་ཆ་ཙམ་འདི། ། དེང་འདིར་མོས་གུས་འཕེལ་བའི་གྲོགས་སུ་སྦྲན། ། སྙིགས་དུས་ཀྱི་བསྟན་པའི་གསལ་བྱེད་ཆེན་པོ་ངག་དབང་འཇིགས་མེད་དངོས་གྲུབ་དཔལ་བཟང་པོའི་མཛད་བཟང་བསླབ་གསུམ་ནོར་བུའི་གླིང་ཁ་ཞེས་བྱ་བ་ལས་ཆོས་སྒོར་ཞུགས་ཏེ་ངོ་མཚར་བའི་ཡོན་ཏན་རང་ཆས་སུ་མངའ་བའི་རྣམ་ཐར་མདོར་བསྡུས་པ་སྟེ་ གཉིས་པའོ། ། ངུར་སྨྲིག་གི་རྒྱལ་མཚན་བཞེས་པའི་རྣམ་ཐར།དགུང་གྲངས་བཅོ་ལྔའི་ས་ག་ཟླ་བར། དགའ་བོ་རབ་ཏུ་འབྱུང་པའི་མདོ་ལས། ཁྱིམ་པ་རྣམས་ནི་མེ་འོབས་ན་གནས་པ་ལྟ་བུའོ། །རབ་ཏུ་བྱུང་པ་རྣམས་ནི་བསིལ་ཁང་ན་གནས་པ་ལྟ་བུའོ། །ཞེས་སོགས་དང༌། དྲག་ཤུལ་ཅན་གྱིས་ཞུས་པའི་མདོ་ལས། ཁྱིམ་ན་གནས་པ་ནི་ཀུན་ཏུ་གནོད་པ་སྟེ་རྡུལ་འབབ་པའོ། །ཁྱིམ་ན་གནས་པ་ནི་ཐིབས་པའོ། །རབ་ཏུ་བྱུང་པ་ནི་འཐིབས་པ་ལས་ཐར་བ་ཡིན་ཏེ་ཞེས་པའི་བར་ཁྱིམ་པ་དང་རབ་ཏུ་བྱུང་པའི་ཁྱད་པར་བརྒྱ་རྩ་བརྒྱད་དུ་གསུངས་པ་དང༌། ཆོ་འཕྲུལ་ཆེན་པོ་བསྟན་པའི་མདོ་ལས། གང་དག་ཁྱིམ་ན་གནས་པར་བྱེད་བཞིན་དུ། །བྱང་ཆུབ་དམ་པ་མཆོག་འདི་ཐོབ་པ་ཡི། །སངས་རྒྱས་གང་ཡང་སྔོན་ཆད་མ་བྱུང་སྟེ། །མ་འོངས་པ་ནའང་མི་འབྱུང་གནས་པ་མེད། །ཅེས་དང༌། དགའ་བོ་རབ་ཏུ་བྱུང་པའི་མདོ་ལས། སྟོང་གསུམ་གྱི་སེམས་ཅན་ཐམས་ཅད་ཀྱིས་བསྐལ་པའི་བར་དུ་བུ་དང་ཆུང་མ་སྦྱིན་པར་གཏང་པའི་བསོད་ནམས་པས། རབ་ཏུ་བྱུང་པའི་བསམ་པས་དགོན་པར་གོམ་པ་གཅིག་བོར་བ་བསོད་ནམས་ཆེ་བར་གསུངས་པ་ལྟར་གྱི་དོན་ཆེན་པོ་ཅན་མཉམ་མེད་ཤཱཀྱའི་རྒྱལ་བོའི་རྗེས་སུ་འཇུག་པའི་རབ་ཏུ་བྱུང་བའི་འདུན་པ་གཞན་གྱིས་བསྐུལ་བ་ལ་མ་ལྟོས་པར་བྱུང་སྟེ། སྤྱིར་ནི་དམ་པ་གང་ཉིད་ཁྱབ་བདག་སྒྲོལ་བའི་མགོན་པོའི་ཞབས་དང་གཉིས་སུ་མ་མཆིས་པ་ལ་ཚེ་རབས་གོམས་པའི་བག་ཆགས་དང་སྨོན་ལམ་གྱི་སྟོབས་ལས་སྐྱེ་བ་མ་མཆིས་ཏེ། བྱང་འཕགས་སྐྱེ་བ་ཐམས་ཅད་ཏིང་ངེ་འཛིན་ལ་དབང་འབྱོར་བས་དང༌། སངས་རྒྱས་བཅོམ་ལྡན་འདས་རྣམས་འབད་མེད་ལྷུན་འགྲུབ་ཀྱིས་སྣ་ཚོགས་པའི་འགྲོ་དོན་བྱེད་པ་ཁོ་ནར་ངེས་པའི་ཕྱིར་རོ། །འོན་ཀྱང་བྱང་སེམས་འཕགས་པ་ཆེན་པོ་འགྲོ་བའི་དོན་དུ་ཉན་ཐོས་སུ་སྤྲུལ་བ་ཤཱ་རིའི་བུ་སྔོན་གྱི་ཚེ་རབས་ ཕྲེང་བ་དུ་མར་རབ་ཏུ་བྱུང་བ་དང་རབ་ཏུ་བྱུང་བར་སྨོན་ལམ་གྱི་སྟོབས་ལས་ཁྱིམ་ནས་ཕྱུང་སྟེ་རབ་ཏུ་འབྱུང་བར་འདོད་པ་ངང་གིས་སྐྱེས་པ་དང་རབ་ཏུ་བྱུང་ནས་ཀྱང་དགྲ་བཅོམ་པའི་འབྲས་བུ་ཚེགས་མེད་པར་ཐོབ་པར་གསུངས་ཏེ། འདུལ་བ་ལུང་གཞི་ལས། རང་སངས་རྒྱས་དེའི་རྐང་པ་གཉིས་ལ་ཕྱག་འཚལ་ཏེ་སྨོན་ལམ་འདི་སྐད་ཅེས། དགེ་བའི་རྩ་བ་འདི་ཡིས་བདག །ཧ་ཅང་ཕྱུག་པའི་ཁྱིམ་དང་ནི། །དབུལ་པོའི་ཁྱིམ་དུ་མི་སྐྱེ་བར། །བར་མའི་ཁྱིམ་དུ་སྐྱེ་འགྱུར་ཞིང༌། །རྟག་པར་རབ་འབྱུང་མང་བར་ཤོག །ཅེས་བཏབ་བོ། །དགེ་སློང་དག་དེ་ལ་དེའི་ཚེ་དེའི་དུས་ན་རྒྱལ་བུ་དེ་གང་ཡིན་པ་དེ་ནི་དགེ་སློང་ཤཱ་རིའི་བུ་འདི་ཉིད་ཡིན་ཏེ། དེས་རང་སངས་རྒྱས་ལ་མཆོད་པ་བྱས་ནས་སྨོན་ལམ་བཏབ་པ་གང་ཡིན་པའི་ལས་དེའི་རྣམ་པར་སྨིན་པས་ད་ལྟར་ཁྱིམ་ཧ་ཅང་ཕྱུག་པར་ཡང་མ་སྐྱེས། ཁྱིམ་ཧ་ཅང་དབུལ་བར་ཡང་མ་སྐྱེས་པར་ཁྱིམ་འབྲིང་པོར་སྐྱེས་ཤིང་རབ་ཏུ་འབྱུང་བ་མང་བར་གྱུར་ཏོ། །དགེ་སློང་དག་དེ་ལྟར་ན་ལས་གཅིག་ཏུ་གནག་པ་རྣམས་ཀྱི་རྣམ་པར་སྨིན་པ་ནི་གཅིག་ཏུ་གནག་པ་ཡིན་ལ། ལས་གཅིག་ཏུ་དཀར་བ་རྣམས་ཀྱི་རྣམ་པར་སྨིན་པ་ཡང་གཅིག་ཏུ་དཀར་བ་ཡིན། ལས་འདྲེས་མ་རྣམས་ཀྱི་རྣམ་པར་སྨིན་པ་ཡང་འདྲེས་མ་ཡིན་ནོ། །དགེ་སློང་དག་དེ་ལྟ་བས་ན་ལས་གཅིག་ཏུ་གནག་པ་རྣམས་དང་འདྲེས་མ་རྣམས་སྤངས་ཏེ། ལས་གཅིག་ཏུ་དཀར་བ་རྣམས་ལ་བརྩལ་བར་བྱ་སྟེ། དགེ་སློང་དག་ཁྱེད་ཀྱིས་དེ་ལྟར་བསླབ་པར་བྱའོ། །ཞེས་པ་ལྟར། དགེ་བའི་བཤེས་གཉེན་མིའི་ཤ་ཚུགས་སུ་ཤར་བ་གང་ཉིད་ཀྱང་རབ་ཏུ་བྱུང་སྟེ་ལུང་རྟོགས་ཀྱི་ཆོས་ལ་བརྩོན་པར་འདོད་པ་འགོག་མེད་དུ་ངང་གིས་དུས་རིང་པོར་བྱུང་ནས། རང་ཡུལ་གྱི་བྱ་བཏང་བ་བླ་མ་ཚུལ་རྒྱམ་དང༌། ཨཱརྱ། སངས་དཔལ། ངག་རྒྱམ་བཅས་དང་ལྷན་དུ་ཞབས་ཐང་ལ་འཛི་ག་ལུང་བའི་བཀྲ་ཤིས་ཆོས་ཐང་དགོན་པར་ཕེབས་ནས། འདུལ་བ་འཛིན་པ་མཁན་ཆེན་རྡོ་རྗེ་འཆང་བློ་བཟང་འཕྲིན་ལས་མཆོག་གི་ཞལ་སྔ་ནས་ཀྱི་ཞབས་དྲུང་དུ་ཡོངས་རྫོགས་དགེ་བསྙེན་དང་བར་མ་རབ་བྱུང་སྔོན་དུ་འགྲོ་བའི་སྒོ་ནས་དགེ་ཚུལ་གྱི་སྡོམ་པ་ཡང་དག་པར་མནོས་ཏེ། མཚན་ལ་དཔལ་ལྡན་ཆོས་འཕེལ་ཞེས་བཏགས། བླ་མ་ཚུལ་རྒྱམ་དང་ཨཱརྱ་གཉིས་ཕྱོགས་འདིར་ཆོས་གོས་གཅིག་ཞབས་སུ་གྲགས་པ་སྟེ་དུས་ཐོག་གཅིག་ལ་ཁོང་དང་བཅས་ཏེ་གསུམ་ཚན་དུ་རབ་བྱུང་དགེ་ཚུལ་དུ་སྒྲུབ་པའི་སྒྲུབ་གྲོགས་ཡིན་ནོ། །དེ་ནས་བཟུང་སྟེ། རྗེ་ཏཱ་ར་ནཱ་ཐའི་རང་རྣམ་མ་བཅོས་ལྷུག་པ་ལས། སྲིད་གསུམ་མ་ལུས་སྐྱེས་སུ་ཐོབ་གྱུར་ཀྱང། །ངུར་སྨྲིག་རྒྱལ་མཚན་ཐོབ་པའི་ཆར་མི་ཕོད། །སྲིད་ཀྱི་འབྱོར་བ་འདི་ནི་ནམ་ཡང་འཇིག །ངུར་སྨྲིག་ཐོབ་པས་འཆི་མེད་གྲོང་དུ་བགྲོད། །ཅེས་པ་ལྟར་འཇིག་རྟེན་གསུམ་དུ་ཐོབ་པར་དཀའ་བའི་ངུར་སྨྲིག་གི་རྒྱལ་མཚན་དྲང་སྲོང་གི་རྟགས་ཀྱིས་ཡང་དག་པར་བརྒྱན་པར་བྱས་ སོ། ། ཞི་བའི་ཐུགས་དང་དུལ་བའི་གསུང་དབྱངས་ཀྱིས། ། འགྲོ་བློའི་དབུལ་སེལ་སྟོབས་བཅུའི་དབང་ཕྱུག་གི། ། བརྟུལ་ཞུགས་གཙང་མས་རབ་ཏུ་བརྒྱན་བྱས་ཏེ། ། ཐར་ལམ་གཞུང་ཤིང་བཙུགས་པའི་རྣམ་ཐར་རོ། ། སྙིགས་དུས་ཀྱི་བསྟན་པའི་གསལ་བྱེད་ཆེན་པོ་ངག་དབང་འཇིགས་མེད་དངོས་གྲུབ་དཔལ་བཟང་པོའི་མཛད་བཟང་བསླབ་གསུམ་ནོར་བུའི་གླིང་ཁ་ཞེས་བྱ་བ་ལས་ངུར་སྨྲིག་གི་རྒྱལ་མཚན་བཞེས་པའི་རྣམ་ཐར་མདོར་བསྡུས་པ་སྟེ་གསུམ་པའོ། ། ལམ་ཟབ་མོ་ཡན་ལག་དྲུག་གི་ཉམས་རྟོགས་བརྙེས་པའི་བསྐོར་གྱི་རྣམ་ཐར།རབ་བྱུང་དགེ་ཚུལ་གྱི་སྡོམ་པ་ཡང་དག་པར་མནོས་ཏེ་ངུར་སྨྲིག་གི་རྒྱལ་མཚན་འཆང་བའི་མཛད་པ་བདག་གིར་བཞེས་ནས་ཕྱིར་ཕ་ཡུལ་ལ་ལོགས་ཏེ། ལོ་དེར་རང་དགོན་དུ་དབྱར་གནས་ལ་བཞུགས། སྟོན་ཁར་རིགས་ཐམས་ཅད་ཀྱི་བདག་པོ། བྱང་ཆུབ་སེམས་དཔའ་ཐམས་ཅད་ཀྱི་ཡབ། གསང་སྔགས་འཛིན་པ་ཀུན་ཀྱི་གཙོ་བོ། རྒྱུད་ཞི་བ་བྱང་ཆུབ་ཀྱི་སེམས་རིན་པོ་ཆེས་ཀུན་ནས་གཏམས་པ། དཔལ་དུས་ཀྱི་འཁོར་ལོའི་རྫོགས་རིམ་རྣལ་འབྱོར་ཡན་ལག་དྲུག་གི་སྲོག་རྩོལ་གྱི་ཡེ་ཤེས་འཁྲུལ་བ་མེད་པར་མངོན་དུ་བྱས་པ་རྗེ་བཙུན་དཔལ་ལྡན་བླ་མ་དམ་པ་མཚན་བརྗོད་པར་དཀའ་ཡང་དོན་གྱི་སླད་དུ་མཚན་ནས་སྨྲོས་ན་༧ངག་དབང་བཤད་སྒྲུབ་དཔལ་གྱི་ཞབས་དྲུང་རྩིབས་སྟོང་མི་ཤིགས་འཁོར་ལོའི་མཚན་མས་ཉེ་བར་མཛེས་པའི་མདུན་སར། ནང་པ་སངས་རྒྱས་པའི་འཇུག་སྒོ་སྐྱབས་འགྲོ་དང་ཕྱག་འབུམ་སྦྲག་མ། ཐེག་ཆེན་ལ་འཇུག་པའི་སྒོ་བྱང་ཆུབ་མཆོག་ཏུ་སེམས་བསྐྱེད་པ། རིམ་པ་གཉིས་ཀྱི་ལམ་སྐྱེ་བའི་མཐུན་རྐྱེན་དུ་ཚོགས་གསོག་པ་མཎྜལ། རྡོ་རྗེ་ཐེག་པའི་མངོན་རྟོགས་ཐམས་ཅད་ཀྱི་ལམ་གྱི་དངོས་གཞི་དང་གེགས་སེལ་བོགས་འདོན་སོགས་རྩ་བའི་གཙོ་བོ་གཅིག་པུར་གྱུར་པ་བླ་མའི་རྣལ་འབྱོར་སྟེ། ཐུན་མོངས་ཀྱི་སྔོན་འགྲོ་ཐམས་ཅད་མ་ལུས་ལུས་པ་མེད་པར་སྔོན་དུ་སོང་བའི་སྒོ་ནས། ཐུན་མོངས་མིན་པ་དཔལ་དུས་ཀྱི་འཁོར་ལོ་ལྷན་སྐྱེས་ཀྱི་སྒོ་ནས་བསྐྱེད་རིམ་དང་ཧཀྵ་ས་ཡ་ཟློ་བ། དཔལ་མཆོག་དུས་ཀྱི་འཁོར་ལོའི་དབང་གོང་མ་བཞིས་ཡོངས་སུ་རྒྱུད་སྨིན་པར་བྱས་པའི་སྒོ་ནས། རྫོགས་རིམ་གཉུག་མ་རང་བྱུང་ལྷན་ཅིག་སྐྱེས་པའི་ཡེ་ཤེས་མ་བཅོས་སོ་མའི་ངོ་བོའི་རང་ཞལ་མཇལ་བའི་སྔོན་འགྲོ་ཐུན་མིན་ཁྱད་པར་ཅན་དབེན་པ་གསུམ་ལྡན་སྒོམ་པ་སྟེ། དེ་ལྟར་ཐུན་མོངས་དང་ཐུན་མོངས་མིན་པའི་སྔོན་དུ་འགྲོ་བ་མཐའ་དག་ཇི་བཞིན་དུ་ཐུགས་ཉམས་སུ་བསྟར་ནས། ལོ་གསུམ་ཕྱོགས་གསུམ་ལ་རྫོགས་རིམ་སྦྱོར་བ་ཡན་ལག་དྲུག་རྗེས་ཀྱི་བྱ་བ་དང་བཅས་པ་ལ་ཉམས་ལེན་ལྷོད་མེད་དུ་མཛད་པར་བྱས་སོ། །དེ་ཡང་ཐུན་མོངས་མིན་པའི་སྔོན་འགྲོ་ཁྱད་པར་ཅན་དབེན་པ་གསུམ་ལྡན་ནམ་ལྟོས་མེད་བཞི་ལྡན་གྱི་ཉམས་ལེན་མུན་ཁང་ལུས་གནད་བྱེད་བཅིང་ལ་རྩེ་གཅིག་ཏུ་གཞོལ་བའི་སྒོ་ནས་བསྒོམས་ཏེ་ཉིན་ཞག་བདུན་སོང་བའི་མཚམས་སུ། སྟོང་གཟུགས་ཀྱི་སྐུ་ཡི་དམ་གྱི་ལྷ་ཡབ་ཡུམ་སྐུ་མདོག་དཀར་བོ་རུས་པ་དང་རིན་པོ་ཆེའི་རྒྱན་རྣམས་མེད་པ་ཁ་སྦྱོར་ཞིག་ཤིན་ཏུ་གསལ་བར་མཐོང་སྟེ། དེ་ནས་བཟུང་སྟོང་གཟུགས་ཀྱི་ལྷ་དང་ཐིག་ལེ་སོགས་མངོན་སུམ་དུ་མཐོང་བ་དཔག་ཏུ་མེད་ཀྱང༌། འགའ་རེ་ཙམ་ད་དུང་ཡང་ཐོས་པ་ཡོད་མོད། གསང་སྔགས་ཐུན་མིན་གྱི་ཉམས་མྱོང་མང་དག་ཅིག་ནི་ཇི་དགར་བརྗོད་དུ་རུང་བ་ཡང་མ་ཡིན་ནོ། །རིགས་ལྡན་པདྨ་དཀར་པོའི་བསྡུས་པའི་རྒྱུད་ཀྱི་རྒྱལ་པོ་དུས་ཀྱི་འཁོར་ལོའི་འགྲེལ་བཤད་རྩ་བའི་རྒྱུད་ཀྱི་རྗེས་སུ་འཇུག་པ་སྟོང་ཕྲག་བཅུ་གཉིས་པ་དྲི་མ་མེད་པའི་འོད་ལས། མཆོག་གི་དང་པོའི་སངས་རྒྱས་སུ་རྡོ་རྗེའི་ཚིག་ཕྱག་རྒྱ་ཆེན་པོ་བསྒོམ་པའི་ལམ་དུ་བ་ལ་སོགས་པ་རབ་ཏུ་གསལ་བ་ཡིན་གྱི་བླ་མ་བརྒྱུད་བའི་རིམ་པས་འོངས་པ་མ་ཡིན་ལ་བླ་མའི་བཀས་བྱིན་གྱིས་བརླབས་པ་ཡང་མ་ཡིན་ནོ། །ལམ་འདི་ལ་ནི་ཡིད་ཆེས་པ་ཡོད་དེ། ཉི་མ་གཅིག་ནི་ཡོངས་སུ་བརྟག་ཅེས་པ་བཅོམ་ལྡན་འདས་ཀྱིས་གསུངས་པའི་ཕྱིར། ཞེས་དང༌། འགྲེལ་ཆེན་དྲི་མ་མེད་པའི་འོད་དུ་དུས་འཁོར་རྩ་བའི་རྒྱུད་ཀྱི་ལུང་དྲངས་པ་ལས། བསམ་པ་ཐམས་ཅད་ཡོངས་སྤངས་ནས། །ཉི་མ་གཅིག་ནི་ཡོངས་སུ་བརྟག །གལ་ཏེ་རྟགས་ནི་མ་བྱུང་ན། །དེ་ཚེ་ང་ཡི་ཚིག་དེ་རྫུན། །ཞེས་གསུངས་ཏེ། རྡོ་རྗེ་ཐེག་པའི་ལམ་མཆོག་དཔལ་དུས་ཀྱི་འཁོར་ལོའི་ལམ་འདི་ལ་བརྟེན་ཏེ་ཡིད་ཆེས་གསུམ་ལྡན་དམ་ཚིག་རྣམ་པར་དག་པའི་གང་ཟག་ཅིག་གིས། དབང་བསྐུར་ཟབ་མོས་རྒྱུད་ཡོངས་སུ་སྦྱངས་ཏེ་བླ་མ་དམ་པའི་མན་ངག་རྒྱུད་དང་མཐུན་པར་སྤྲོས་བྲལ་རྣམ་པར་མི་རྟོག་པའི་ཡེ་ཤེས་གོམས་པ་སྔ་ཕྱི་བསྡོམས་ཏེ་ཉིན་གཅིག་ལོངས་པ་ན། གཉུག་མའི་སེམས་འོད་གསལ་གྱི་རང་མདངས་དོན་དམ་ལྷན་ཅིག་སྐྱེས་པའི་སྟོང་གཟུགས་ཀྱི་སྐུ་མ་མཐོང་ན་བཅོམ་ལྡན་འདས་ཀྱིས་བསླུས་པ་ཡིན་པར་གསུངས་པ་ལྟར། འདི་ཡང་དོན་དམ་གཉུག་མ་འོད་གསལ་སེམས་ཀྱི་རང་མདངས་ཆོས་སྐུ་སྤྲོས་པ་དང་བྲལ་བ་མ་དག་ལས་སྣང་གི་ཤུན་པ་ལས་འདས་པའི་གདོད་མའི་ཆོས་སྐུའི་རང་ཞལ་མངོན་སུམ་དུ་བྱས་པའི་རྣམ་པར་ཐར་བ་ཡིན་ཏེ། སྤྱིར་ནི་རྣམ་པར་ཐར་བ་འདི་ལས་ཆེ་བ་ཞིག་ཅི་དགོས། འདི་ལས་ངོ་མཚར་བ་གཞན་ཅི་ཞིག་ཡོད། གྲུབ་མཆོག་ཐམས་ཅད་ཀྱི་ལམ་མཆོག་གཅིག་པུ་ཡང་འོད་གསལ་སེམས་ཀྱི་རང་ངོ་བདེ་སྟོང་སྣང་བ་སྣ་ཚོགས་པའི་ངོ་བོ་རྩོལ་མེད་དུ་སྐྱོང་བ་འདི་ག་ལས་གཞན་མེད་དེ། གྲུབ་ཐོབ་ཀུན་ཀྱི་སྤྱི་མེས་དཔལ་ས་ར་ཧའི་ལུང་ནཱ་རོའི་ཞབས་ཀྱི་དབང་མདོར་འགྲེལ་བཤད་དོན་དམ་པ་བསྡུས་པར་དྲངས་པ་ལས། རྨོངས་པ་ནམ་མཁའི་ཚད་མ་ནི། །གལ་ཏེ་ཤེས་ན་རྨོངས་ཚོགས་གཅོད། །དང་པོར་རྣམ་དག་ནམ་མཁའ་ལ། །ལྟ་ཞིང་ལྟ་བས་མཐོང་བ་འགག །ཅེས་དང༌། བར་སྣང་ལ་ནི་ཡིད་དང་རླུང་དང་མིག །དུས་གཅིག་ཏུ་ནི་གལ་ཏེ་ངེས་སྦྱར་ན། །རིན་ཆེན་རྒྱལ་བའི་ཡོན་ཏན་ངེས་པར་སྐྱེ། །འདི་དག་མཐའ་དག་དེ་བཞིན་གཤེགས་པས་གསུངས། །སྣ་ཚོགས་རྣམ་རྟོག་བྲལ་ཞིང་མི་སེམས་པར། །གལ་ཏེ་བར་སྣང་ལ་ནི་མིག་བལྟས་ན། །ཕྱོགས་བཅུའི་འཇིག་རྟེན་མཐའ་དག་ཡིན་ནམ་སྙམ། །རྣལ་འབྱོར་དབང་ཕྱུག་མཐའ་དག་འདི་ལས་ཐོབ། །ཅེས་དང༌། དཔལ་མགོན་འཕགས་པ་ཀླུ་སྒྲུབ་ཞབས་ཀྱི་ལུང་ནཱ་རོའི་ཞབས་ཀྱིས་དྲངས་པར་ཡང༌། གང་རྣམས་ཀྱི་བློ་རྟེན་དང་བྲལ། །ཡོད་དང་མེད་ལས་རྣམ་པར་འདས། །ཟབ་མོ་དམིགས་མེད་དེ་རྣམས་ཀྱིས། །མཚན་མའི་དོན་ནི་རྣམ་པར་སྒོམ། །ཞེས་དང༌། དེ་བཞིན་དུ་ཞི་བ་ལྷའི་རྡོ་རྗེའི་གླུ་ལས་ཀྱང། རྨད་བྱུང་ནམ་མཁའི་དཀྱིལ་ཤར་བྷུ་སུ་ཀུ། །སྟོང་ཉིད་གཟུགས་མཛེས་ཤར་རོ་བྷུ་སུ་ཀུ། །དཔེ་མེད་མེ་ཏོག་ཤར་རོ་བྷུ་སུ་ཀུ། །རིན་ཐང་མེད་པའི་མེ་ཏོག་རིན་ཆེན་ལོངས། །མེ་ཏོག་འདི་ནི་ཁ་དོག་སྣ་ཚོགས་ཅན། །མེ་ཏོག་འདི་ནི་སྟོང་ཉིད་དགོན་པར་རྒྱས། །ཞེས་འབྱུང་སྟེ། གཞན་ཡང་གྲུབ་ཆེན་ནག་པོ་སྤྱོད་པ་དང་ལྭ་བའི་གོས་ཅན་ལ་སོགས་པ་གྲུབ་པའི་དབང་ཕྱུག་ཐམས་ཅད་ཀྱི་ཐུན་མོངས་ཀྱི་དགོངས་པ་གཅིག་ཏུ་གྲུབ་པ་ལགས་ཏེ། ལུང་དེ་དག་གི་དོན་ནི་རྒྱས་པར་གསང་སྔགས་ཟབ་མོའི་རྫོགས་རིམ་མན་ངག་དང་ལྡན་པའི་སྒོ་ནས་ཤེས་པར་བྱ་བ་ཁོ་ནའོ། །དེ་ལྟའི་ལམ་མཆོག་ཟབ་མོ་དེ་ཉིད་རྗེ་བཙུན་ཏཱ་ར་ནཱ་ཐའི་ལྷན་ཐབས་འོད་བརྒྱ་འབར་བ་ལས། མྱོང་གྲུབ་ལ་ཡང༌། དཔྱད་སྒོམ་དང༌། རྣམ་རྟོག་ངོ་ལྟའི་སྒོམ་ལ། ཡུན་རིང་བསྒོམས་ཀྱང་སྟོང་གཟུགས་ཡིན་ངེས་ལར་མི་འཆར། ཉམས་ཐན་ཐུན་བྱུང་སྲིད་ནའང་དེ་ཡང་མང་པོ་མི་ཡོང་ལ། བྱེད་བཅིང་དང་ལྡན་པའི་མི་རྟོག་པ་བསྒོམས་ན་སྟོང་གཟུགས་མང་པོ་འཕྲལ་དུ་འབྱུང་བ་ད་ལྟ་སུའི་ལག་ལེན་ལ་བཏབ་ཀྱང་མྱོང་བས་གྲུབ། སྔོན་དུས་བྱུང་ངོ་བ་ལ་ཁག་འཇོག་མི་དགོས། བྲེ་སྲང་འཁྲིས་སུ་བཞེས་ནས་ཕོད་ཚོད་ཀྱིས་ཅི་བྱེད། དགག་སྒྲུབ་མཐའ་བཀོད་མང་པོའི་ཁ་ན་མེད་དོ། །ཞེས་ཉམས་མྱོང་གིས་གྲུབ་པར་གསུངས་པ་འདི་བླ་མ་དམ་པ་བཤེས་གཉེན་མཚུངས་པ་མེད་པའི་སྡེ་འདི་ཉིད་ཀྱིས་ཚེགས་མེད་པར་མངོན་དུ་བྱས་པ་ཡིན་ནོ། །དགག་སྒྲུབ་དང་ཚིག་གི་ཤུན་པ་ལ་མ་ལྟོས་པར་བླ་མའི་མན་ངག་ཟབ་མོས་རང་མྱོང་མངོན་སུམ་དུ་མཛད་པའི་རྐྱེན་གྱིས། ཕྱིས་སུ་གཞུང་ལུགས་སློབ་པ་ན་སྟོང་ཉིད་ཟབ་མོ་མེད་དགག་ཏུ་བསྟན་པ་དང༌། ཅི་མེད་ཅིང་མེད་ཅིག་ཏུ་བཤད་པ་དང༌། གཞན་སྟོང་དབུ་མ་ཆེན་པོའི་གཞི་ལམ་འབྲས་བུའི་རྣམ་བཞག་ལ་དགག་བཞག་བྱས་པ་ཐམས་ཅད་ཅི་ཙམ་མཐོང་ཡང་བློ་སོམ་ཉིས་གཡོ་བ་ཙམ་ཡང་བསྐྱེད་ཐུབ་པ་མ་བྱུང་བར་གསུང་འཕྲོས་ལས་ལན་མང་དུ་ཐོས་ཏེ། འདི་ནི་སྔོན་བྱོན་དམ་པ་མཆོག་རྣམས་ཀྱི་རྣམ་ཐར་ན་ཡང༌། ལྟ་བའི་དཔྱད་པ་རྫོགས་པ་དང་མ་རྫོགས་པའི་སྐབས་ཞེས་སྐུ་ཚེ་སྟོད་སྨད་ཀྱི་གསུང་ལ་ཧེ་བག་འབྱེད་པ་རྣམས་ལས་ཀྱང་རྣམ་ཐར་རྨད་དུ་བྱུང་བ། སྐུ་ན་ཕྲ་བ་དགུང་ལོ་བཅུ་དྲུག་བཞེས་པ་ནས་རྒྱུད་ཀྱི་གསང་བ་ཟབ་མོ་ལས་ཀྱང་ཡང་ཟབ་མངོན་སུམ་དུ་རྟོགས་པའི་རྣམ་པར་ཐར་བ་འགྲན་ཟླ་དང་བྲལ་བ་ཡིན་པས། རྨད་དུ་བྱུང་བ་འདི་ལས་ཡ་མཚན་པ་ཞིག་སུ་ལ་བདོག །ཁོང་ཉིད་དགུང་གྲངས་བཅུ་དྲུག་བཞེས་པ་སྦྱོར་དྲུག་ལོ་གཉིས་པའི་དུས་སུ། མཁས་བཙུན་གྲུབ་པའི་དབང་ཕྱུག་མཁན་ཆེན་བློ་བཟང་འཕྲིན་ལས་མཆོག་ཨ་སྐྱོང་དགོན་དུ་ཕེབས་ཏེ། བོད་ཟླ་བཅུ་བ་སྟེ་དགུན་ཟླ་ར་བའི་ཚེས་གཅིག་ནས་དུས་འཁོར་དབང་ཆེན་དང༌། རྟ་ཕྱག་ཁྱུང་གསུམ་གྱི་རྗེས་གནང༌། མི་འཁྲུགས་པའི་དབང་བསྐུར་གནང་བ་རྣམས་ཞུས། སྐབས་འདིར་བླ་མ་བཤད་སྒྲུབ་དཔལ་མཆོག་དུས་འཁོར་དབང་ཆེན་ཞུ་བར་ཕེབས་པའི་ཞབས་གཡོག་རྣམས་བླ་མ་དམ་པ་འདི་ཉིད་ནས་མཛད། ལོ་དེར་རྡོ་གྲུབ་སྐུ་ཕྲེང་བཞི་པ་ཐུབ་པ་མཆོག་ཨ་སྐྱོང་དགོན་དུ་བྱོན་སྐབས་ཆོས་འབྲེལ་ཞུས། ལོ་དེར་ཡང་ཨ་པང་གཏེར་སྟོན་གྱི་སྲས་མོ་མཁའ་འགྲོ་ཏཱ་རེ་ལྷ་མོ་ལ་ཡང་ཐུགས་རྗེ་ཆེན་པོའི་ཆོས་སྐོར་འགའ་རེ་ཞུས། སྦྱོར་དྲུག་ལོ་གསུམ་པའི་སྐབས་དགུང་གྲངས་བཅོ་བརྒྱད་ཀྱི་དབྱར་མགོ་ཙམ་ན་ཀ༔ཐོག་རྨོག་སྤྲུལ་འཇིགས་བྲལ་ཕྱོགས་ལས་རྣམ་རྒྱལ་མཆོག་ལྕགས་རི་དགོན་དུ་བྱོན་ནས་བདུད་ཀློང་གི་དབང་གསུངས་པ་ན། རྡོ་རྗེ་འཛིན་པ་བླ་མ་བཤད་སྒྲུབ་དཔལ་དབུར་བཞུགས་ཏེ་དམ་པ་འདི་ཉིད་སོགས་སྦྱོར་དྲུག་བ་ལྷན་རྒྱས་ནས་དབང་ཡོངས་རྫོགས་ཞུ་བར་ཕེབས། གཡུ་ཐོག་ཀརྨ་བསོད་ནམས་མཆོག་ཨ་སྐྱོང་དགོན་དུ་ཕེབས་པ་ལ་ཡང་ཐུགས་རྗེ་ཆེན་པོ་འཁོར་བ་དུང་སྤྲུགས་ཀྱི་དབང་གསན། ལོ་དུ་མར་དགུན་དུས་སུ་ལོ་རེ་བཞིན་དུ་བླ་མ་རྡོ་རྗེ་འཆང་བཤད་སྒྲུབ་དཔལ་གྱིས་འོད་དཔག་མེད་ཀྱི་ཞིང་སྒྲུབ་ཟབ་མོ་སྐྱ་སེར་རིས་སུ་མ་མཆིས་པའི་ཐུན་མོང་གི་བགོ་སྐལ་དུ་འཚོགས་བཞིན་པ་ན། ཆགས་མེད་བདེ་སྨོན་གྱི་འགྲེལ་ཆེན་དང༌། སྟོང་ཟ་སིདྡྷིའི་ཞིང་ཁྲིད་སོགས་མཁས་གྲུབ་རཱ་ག་ཨ་སྱའི་བདེ་སྨོན་གྱི་སྟེང་ནས་འཆད་འཁྲིད་ལན་དུ་མ་དང༌། རྣམ་ཆོས་ཞིང་དབང་དང༌། འཇིགས་མེད་གླིང་བའི་ཞིང་དབང་སོགས་ཞིང་སྒྲུབ་ཀྱི་ཆོས་བསྐོར་མང་པོ་ཐོབ། ད་དུང་འོད་མདོ་དང༌། ཇོ་ནང་ཕུར་བའི་ལུང་དང༌། སྒྲོལ་མ་དམར་མོའི་ཆོ་གའི་ལུང་སོགས་ཁྲིད་ལུང་ཕྲན་བུ་འགའ་རེ་དང༌། རྫོགས་པ་ཆེན་པོའི་སེམས་ཁྲིད་སོགས་མན་ངག་ཁ་ཤས་དང་བཅས་པ་གསན། གནས་འགོ་བླ་མ་ཆོས་མཐུན་གྱི་མདུན་ནས་ཡན་ལག་བདུན་པའི་ཁྲིད་དང༌། རྫོགས་ཆེན་གྱི་སེམས་ཁྲིད་རེ་ཡང་ཐོབ་གསུངས་ཏེ། ཆོས་དང་བླ་མ་ལ་ཕྱོགས་དང་རིས་སུ་མ་བཅད་པར་སྐྱེས་བུ་དམ་པ་ཀུན་ཀྱི་ཞབས་རྡུལ་གཙུག་ཏུ་བླངས་ཤིང་ཆོས་དང་གདམས་ངག་ཀུན་ལ་དག་སྣང་ཁྱད་མེད་དུ་བྱས་པ་ཡིན་ནོ། ། འོད་གསལ་ཆོས་སྐུ་ཐིག་ལེ་ཉག་གཅིག་སྣ་ཚོགས་དཀྱིལ་འཁོར་ལྷ་སྔགས་བདེ་བ་ཆེན་པོ་ཐོག་མེད་གདོད་ནས་གནས་པའི་ཞལ། ། མ་བཅོས་གཉུག་མ་རང་བབ་ངང་ནས་མངོན་སུམ་ས་ལེར་གཟིགས་པ་འདི་ག་རྒྱུད་དང་གྲུབ་ཐོབ་ཀུན་གྱི་གསང་ཆེན་ལམ། ། འབད་པའི་ངལ་བ་དབེན་པར་ལྔ་གསུམ་རྫོགས་པའི་གཞོན་ནུའི་དུས་ནས་ཨེ་ཝཾ་ཟུང་འཇུག་རྒྱུད་ཀྱི་དོན་རྟོགས་བྱུང་བ་འདི། ། འུད་དང་རྫུན་གྱིས་སྦག་པ་མེད་པར་དྲང་སྲོང་ཚིག་འདིས་སྐལ་མཉམ་གཞན་ལ་ཡང་ནི་དྭངས་བའི་ཤུགས་རབ་སྩོལ་གྱུར་ཅིག ། སྙིགས་དུས་ཀྱི་བསྟན་པའི་གསལ་བྱེད་ཆེན་པོ་ངག་དབང་འཇིགས་མེད་དངོས་གྲུབ་དཔལ་བཟང་པོའི་མཛད་བཟང་བསླབ་གསུམ་ནོར་བུའི་གླིང་ཁ་ཞེས་བྱ་བ་ལས་ལམ་ཟབ་མོ་ཡན་ལག་དྲུག་གི་ཉམས་རྟོགས་བརྙེས་པའི་བསྐོར་གྱི་རྣམ་ཐར་མདོར་བསྡུས་པ་སྟེ་བཞི་པའོ། ། བླ་མ་དང་ལྷག་པའི་ལྷས་ཐུན་མིན་དག་པའི་སྣང་བར་རྗེས་སུ་བཟུང་ཞིང་རང་དགོན་དུ་སློབ་གཉེར་དབུ་བཟུང་བའི་བསྐོར་གྱི་རྣམ་ཐར།དགུང་གྲངས་བཅོ་བརྒྱད་ཀྱི་སྟོན་ཁར་སྦྱོར་དྲུག་ལོ་གསུམ་ཕྱོགས་གསུམ་གྱི་ཉམས་ལེན་ས་བཅད་ཀྱི་རིམ་པ་མཐའ་དག་ཡོངས་སུ་མཐར་ཕྱིན་པར་མཛད་དེ། དཔལ་མཆོག་དང་པོའི་སངས་རྒྱས་དུས་ཀྱི་འཁོར་ལོའི་ཆོས་ཚུལ་མ་ལུས་པའི་མན་ངག་མཐོང་བ་བརྒྱུད་པའི་ཕྱག་ལེན་མཐའ་དག་གིས་རང་རྒྱུད་གྲོལ་བར་བྱས་པ་ཡིན་ནོ། །སྦྱོར་བ་ཡན་ལག་དྲུག་ལོ་གསུམ་ཕྱོགས་གསུམ་གྱི་ཉམས་ལེན་མཐའ་དག་རྫོགས་པ་དགུང་གྲངས་བཅོ་བརྒྱད་ཀྱི་སྟོན་མཇུག་དེར་ཨ་སྐྱོང་དགོན་དུ་མཁན་ཤེས་རབ་དཔལ་གྱི་སྐུ་མདུན་ནས་བླ་མ་ཚོགས་གཉིས་ཀྱི་བློ་སྦྱོང་དོན་བདུན་མའི་འགྲེལ་བ་གསན་ཞིང༌། ལོ་དེའི་སྟོན་ཟླ་ཐ་ཆུང་གི་ཚེས་ཉེར་གཅིག་གི་དགོང་མོར་ཁྱབ་བདག་རྡོ་རྗེ་འཆང་ངག་དབང་བཤད་སྒྲུབ་དཔལ་མཆོག་དགོངས་པ་མྱ་ངན་ལས་འདས་པའི་ཚུལ་བསྟན་མཛད་ནས་ཞག་བརྒྱད་ལ་ཐུགས་དམ་འོད་གསལ་གཡོ་བ་མེད་པར་བཞུགས་པའི་དྲུང་ནས་བླ་རྣམ་དང་དབང་བཞི་ལེན་པ་སོགས་ཀྱི་སྒོ་ནས་ཐུགས་ཡིད་དབྱེར་མེད་ཀྱི་སྨོན་ལམ་ཕུར་ཚུགས་སུ་བཏབ་པས་ཚེ་རབས་ཀུན་ཏུ་རྗེས་སུ་འཛིན་པའི་མཚན་རྟགས་བྱུང༌། གདུང་མདུན་ནས་ལོ་གཅིག་ལ་ཤ་མི་གསོལ་བར་དམ་བཅའ་གནང༌། དེ་ནས་བཟུང་ད་བར་དུ་བླ་མ་མཆོད་པ་བདེ་ལེགས་རབ་རྒྱས་ཞལ་འདོན་ཆགས་མེད་དུ་མཛད་དེ་དུས་རྒྱུན་གྱི་ཉམས་ལེན་གྱི་མཐིལ་བླ་མའི་རྣལ་འབྱོར་གཙོ་བོར་ད་ལྟའི་བར་དུ་འཛིན་པ་ཡིན་ནོ། །རང་ཅག་སློབ་མ་རྣམས་ལ་ཡང་རྒྱུན་གྱི་གསུང་འཕྲོས་སུ། ཁོ་བོ་ལ་བྱ་བ་ཅི་བྱས་ན་ལས་ལམ་དུ་འགྲོ་བ་ཅུང་ཟད་ཅིག་བྱུང་བ་དེ་ཁ་ཙམ་མིན་པར་བླ་མ་རྣམས་ཀྱི་ཐུགས་རྗེ་ཡིན། ཅུང་ཟད་རེ་བར་ཆད་ལྡང་བ་འདི་དག་རང་ཅག་བསོད་ནམས་དམན་པས་དེ་ལྟ་བུ་རེ་མ་འོང་ན་བསྟན་འགྲོའི་ལས་དོན་ཇི་དགར་སྒྲུབ་པའི་བསོད་ནམས་མེད་པ་རེད། དེས་ན་བར་ཆད་འདྲ་བ་ཚང་མ་ཡང་དོན་གྱིས་སྐུ་རིམ་བླ་ན་མེད་པ་ཡིན། གཞན་གྱིས་སྒྲོ་འདོགས་སྐུར་འདེབས་དང་ར་རི་ཕྲག་དོག་གི་བྱ་བ་མི་འཚམ་པ་ཕྲན་བུ་རེ་བྱེད་ཡོང་དུས། ལུས་ཁམས་མ་བདེ་བའི་ནད་གཞི་རྣམས་ཀྱང་སེང་ངེར་མེད་འགྲོ་བ་མཐོང་ཆོས་སུ་འདུག་པས། རྐྱེན་བཟང་ངན་མཐའ་དག་དོན་ལ་བླ་མའི་འཕྲིན་ལས་སུ་འཁྱེར་ཐུབ་དགོས། ད་སྔོན་ཡན་ཆད་དུ་བསྟན་འགྲོ་ལ་བྱ་བ་ཅི་བྱས་པ་ཚང་མ་རང་གིས་འཇོན་བཞག་བསམ་པ་སྤུ་རྩེ་ཙམ་ཡང་མེད། སྔོན་བྱོན་དམ་པ་གོང་མ་རྣམས་དང་རྩ་བའི་བླ་མ་རྣམས་ཀྱི་ཐུགས་བསྐྱེད་སྨོན་ལམ་གྱི་མཐུ་ཡིན་བསམ་པ་ཁོ་ན་ཡིན། དེས་ན་བླ་མ་ལས་བཀའ་གཉན་པ་དང་བླ་མ་ལས་ཞིང་ཆེ་བ་ཞིག་གཏན་ནས་མེད་པས། ལམ་ཐམས་ཅད་ཀྱི་རྩ་བ་དགེ་བའི་བཤེས་གཉེན་ཚུལ་བཞིན་དུ་བསྟེན་པ་འདི་ཉིད་ཡིན་པས། དང་པོ་བླ་མ་བསྟེན་ཚུལ་མ་ལེགས་ན་ཆུ་མགོ་ནས་རྙོག་པ་དང་འདྲ་བར་ཆོས་ཀྱི་གཞུག་ཚང་མ་དམ་ཚིག་མ་དག་པའི་དབང་གིས་ཡང་དག་པ་ཞིག་འོང་རྒྱུ་མེད་པ་རེད། བླ་མ་སངས་རྒྱས་དངོས་མཐོང་གི་མོས་གུས་བསྐྱེད་འེ་ཐུབ་ལྟ་རོགས་གནང་དགོས་ཞེས་ལན་གྲངས་ཡང་ནས་ཡང་དུ་བཀའ་བསྩལ་ཟབ་མོ་ནན་ཆགས་སུ་ཕེབས་པ་ཡིན། ལོ་དེའི་དགུན་ཟླ་ར་བ་ནས་དེའི་ཕྱི་ལོ་སྟེ་དགུང་གྲངས་བཅུ་དགུའི་དབྱར་མགོ་བར་དུས་འཁོར་གྱི་སྦྱོར་དྲུག་སྤྱི་དོན་བསླབས་ཏེ་སྦྱོར་དྲུག་གི་གཞུང་ལ་གོ་སྟོབས་ཁྱད་པར་ཅན་རྙེད། དེ་ནས་སྟོན་མཇུག་བར་གྱི་ཆོས་མཚམས་སྐབས། རྡོ་རྗེ་འཆང་བླ་མ་བཤད་སྒྲུབ་དཔལ་མཆོག་འདས་ནས་ཟླ་བ་བདུན་བརྒྱད་ཡས་མས་ཐལ་བའི་སྐབས་སུ། སྔོན་བླ་མ་མཆོག་གི་ཞལ་སྔ་ནས། སློབ་མ་སྦྱོར་དྲུག་བ་སྤྱི་ལ་འོད་དཔག་མེད་ཀྱི་མྱུར་ལམ་བྱེ་བའི་སྐུ་མཚམས་རེ་ངེས་པར་གཅད་དགོས་པའི་གསུངས་གནང་ཡོད་པ་བཞིན་དུ་ཞིང་སྒྲུབ་ཀྱི་སྐུ་མཚམས་ལ་བཞུགས། སྐབས་དེར་ཞག་གྲངས་མང་བོར་བསྟུད་མར་དགོང་ནུབ་ན་སྡིག་པའི་བསམ་པ་ཅན་གྱི་མི་མ་ཡིན་པས་གནོད་པ་བྱེད་པར་བརྩམས་པ་ལྟ་བུའི་སྣང་བ་ཡང་ཡང་བྱུང་བ་ན། ལན་གཅིག་བླ་མ་བཤད་སྒྲུབ་དཔལ་ལ་གསོལ་བ་བཏབ་པས། ཁང་བའི་ནང་མཐའ་དག་འོད་ལམ་མེར་སོང་ནས་མཆོད་སྟེགས་ཀྱི་གམ་དུ་ཁྱབ་བདག་འཁོར་ལོའི་མགོན་པོ་བླ་མ་བཤད་སྒྲུབ་དཔལ་ཙན་དན་གྱི་ཕྱག་འཕྲེང་ཕྱག་གཡོན་དུ་བསྣམ་པའི་སྣེ་ཕན་ཚུན་དུ་བསྐྱོད་བཞིན་པ་བཞེངས་སྟབས་སུ་གནས་པ་ཅན་གྱི་གཟིགས་སྣང་གསལ་བར་བྱུང་སྟེ། དེ་ནས་བཟུང་སྟེ་རྩ་བའི་བླ་མ་འདི་ཉིད་དང༌། རྗེ་བཙུན་སྒྲོལ་མས་ལུང་བསྟན་ཞལ་གཟིགས་སྐབས་དང་སྐབས་སུ་ཡོད་པར་ཁོ་བོའི་སྙན་གྱི་དབང་པོ་མ་འཁྲུལ་པ་ལས་ལེགས་པར་ཐོས་པ་ཡིན་པས། སྤོམ་ཡོར་དུ་འུད་བཤད་བྱས་པ་གཏན་ནས་མིན། དེ་ནི་རང་ཅག་ཐུན་མོང་གི་ངོར་བླ་མ་དམ་པ་བཤད་སྒྲུབ་དཔལ་མཆོག་མྱ་ངན་ལས་འདས་པའི་ཚུལ་གནང་ཡང༌། སྐལ་ལྡན་གྱི་སློབ་མ་ཁྱད་པར་ཅན་ལ་ཡེ་ཤེས་སྒྱུ་མའི་སྐུའི་བཀོད་པས་མི་ལ་མི་བཞིན་དུ་རྗེས་སུ་བཟུང་བའི་རྣམ་ཐར་ཁྱད་པར་ཅན་ལགས་པས། བླ་མ་བྱིན་རླབས་ཅན་དང་སློབ་མ་དག་སྣང་ཅན་ཟེར་བ་ཨུ་དུམ་ཝ་རའི་མེ་ཏོག་ལྟར་དཀོན་པ་འཚོགས་པའི་རྣམ་ཐར་ཡིན་ནོ། །དེ་ནས་བཟུང་གནོད་པའི་སྣང་བ་དེ་ཡང་གཏན་དུ་ལྡོག་པར་གྱུར། འདི་ཡང་མོས་གུས་འགྲན་ཟླ་དང་བྲལ་བའི་རྟགས་འཁྲུལ་བ་མེད་པ་ཡིན་པས། དེ་ལྟ་བུའི་བླ་མ་ལ་དད་པ་དང་མོས་གུས་སུ་ལ་ཡོད་ན། རྡོ་རྗེ་ཐེག་པའི་ལམ་མཐའ་དག་ངང་གིས་སྐྱེ་བ་ཡིན་ཏེ། རྗེ་ཏཱ་ར་ནཱ་ཐའི་ལྷན་ཐབས་འོད་བརྒྱ་འབར་བ་ལས། གསང་སྔགས་རྡོ་རྗེ་ཐེག་པའི་ལུགས་ལ་ལམ་ཟབ་མོ་བླ་མའི་རྣལ་འབྱོར་བྱ་བ་ཡོད་ཅིང༌། སྐལ་ལྡན་རྣམས་ཚེ་གཅིག་ལ་སངས་རྒྱས་ཐོབ་པའི་ཐབས་གལ་ཆེ་ཤོས་ཤིག་འདི་ཡིན་ནོ། །ཞེས་ཀུན་ལ་གྲགས་པ་ནི་དོན་ལ་གནས་ངེས་པ་ཞིག་ཡིན་པར་འདུགཅེས་པ་ནས། གདུང་ཤུགས་དྲག་པོ་ཐ་མལ་གྱི་སྣང་བ་གཞན་འགོག་ནུས་པ། རིག་པ་བསྒྱུར་ཐུབ་པ་ཞིག་བྱུང་ན། བྱིན་རླབས་འཕྲལ་དུ་འཇུག །ཉོན་མོངས་གློ་བུར་དུ་འགག །ཡེ་ཤེས་སྐད་ཅིག་གིས་འབེབས། དེ་ལྟ་བུ་ཡང་ཡང་དྲན་པས་རྟག་ཏུ་སྒོམ་པར་འགྲོ། གོམས་པ་ལས་སྐྱོན་ཐམས་ཅད་སྤོང་ཞིང་ཡོན་ཏན་ཐམས་ཅད་སྐྱེ་བ་ཡིན། ཞེས་པར་ཇི་སྐད་བཀའ་བསྩལ་པ་ལྟར་གྱི་བླ་མའི་རྣལ་འབྱོར་ཚད་དུ་ཕེབས་པ་བྱུང་འདུག་སྟེ། བླ་མའི་རྣལ་འབྱོར་ཚད་དུ་ཕྱིན་ན་རྒྱལ་པོ་གཤེགས་པ་ན་ཡན་ལག་བཞི་དང་བཅས་པ་འཁོར་དུ་འབྱུང་བ་ལྟར། རྟོགས་པ་ཁྱད་པར་ཅན་ཐམས་ཅད་གེགས་མེད་དུ་སྐྱེ་བ་ཡིན། དེ་ནས་བཟུང་སྟེ་ལམ་གྱི་ཡོན་ཏན་འཐོབ་པར་མི་འདོད་ཀྱང་ནི་ཐོབ་པ་ཡིན་པས། རང་རེ་དག་གིས་ཀྱང་བླ་མ་དམ་པའི་རྣམ་ཐར་བཞིན་དུ་དང་པོར་བླ་མ་བསྟེན་ཚུལ་ལུས་ངག་ཡིད་གསུམ་ནས་ལེགས་ཕྱོགས་སུ་ཨེ་འགྲུབ་ལྟ་དགོས་ཀྱི། འཇིག་རྟེན་གྱི་རིག་གནས་སློབ་པའི་ཐ་མལ་གྱི་དགེ་སློབ་ཕན་ཚུན་གྱི་འདུ་ཤེས་ཙམ་གྱིས་གསང་སྔགས་ཀྱི་ལམ་སྐྱེ་བར་སེམས་ པ་རི་བོང་གི་རྭ་ཅོ་འཚོལ་བ་དང་དབྱེར་མ་མཆིས་སོ། ། དད་མེད་བྱང་བསྟན་བློ་ངན་ཕུག་པ་རུ། ། འོད་གསལ་ཉི་མའི་ཟེར་བརྒྱ་མི་འཕྲོ་བས། ། བྱིན་རླབས་གངས་ཀྱི་འདབ་མ་བརྩེགས་པ་ལ། ། མོས་གུས་དྲོད་ཀྱིས་ཆབ་རྒྱུན་འབེབས་པ་གལ། ། སྙིགས་དུས་ཀྱི་བསྟན་པའི་གསལ་བྱེད་ཆེན་པོ་ངག་དབང་འཇིགས་མེད་དངོས་གྲུབ་དཔལ་བཟང་པོའི་མཛད་བཟང་བསླབ་གསུམ་ནོར་བུའི་གླིང་ཁ་ཞེས་བྱ་བ་ལས་བླ་མ་དང་ལྷག་པའི་ལྷས་ཐུན་མིན་དག་པའི་སྣང་བར་རྗེས་སུ་བཟུང་ཞིང་རང་དགོན་དུ་སློབ་གཉེར་ དབུ་བཟུང་བའི་བསྐོར་གྱི་རྣམ་ཐར་མདོར་བསྡུས་པ་སྟེ་ལྔ་པའོ། ། ཡུལ་དགོན་དུ་ཐོས་བསམ་གྱི་བྱ་བར་ཞུགས་ནས་འཇིག་རྟེན་ཟང་ཟིང་ལ་བློ་ལོག་པའི་བསྐོར་གྱི་རྣམ་ཐར།བླ་མ་བཤད་སྒྲུབ་དཔལ་གློ་བུར་དུ་སྐུ་གཤེགས་པའི་རྐྱེན་གྱིས་ལོ་གཅིག་ཙམ་གྱི་ཡུན་ལ་ཨ་སྐྱོང་དགོན་དུ་སྦྱོར་བ་ཡན་ལག་དྲུག་གི་སྒྲུབ་གྲྭ་རེ་ཞིག་ཆད་པ་སླར་གསོ་བའི་སླད་དུ། ལོ་དེའི་སྟོན་ཁར་མཁན་ཆེན་བློ་བཟང་འཕྲིན་ལས་མཆོག་ཕེབས་ནས་སྦྱོར་དྲུག་གི་ཁྲིད་མཛད། སྐབས་དེར་མཁན་ཆེན་བློ་བཟང་འཕྲིན་ལས་ཀྱི་སྐུ་མདུན་ནས། སྦྱོར་དྲུག་སྤྱི་དོན། མཐོང་དོན་སོགས་ཀྱི་ཁྲིད་རྣམས་གསན། སྟོན་མཇུག་ནས་རང་དགོན་གྱི་བཤད་གྲྭར་འབའ་མདའི་བསྡུས་གྲྭའི་སྤྱི་དོན་དང་ཟུར་དཔྱད་གཉིས་སྦྲག་ཏེ་སློབ་གཉེར་གྱི་དབུ་བཟུང༌། དེའི་ཕྱི་ལོ་སྟེ་དགུང་གྲངས་ཉི་ཤུའི་སྟེང་དབྱར་མགོ་ནས་སྟོན་མཇུག་བར་བཤད་གྲྭའི་ཆོས་མཚམས་བྱས། སྐབས་དེའི་ཆོས་མཚམས་སྐབས་སུ་མཚམས་བཅད་ནས་ཕྱག་འབུམ་འཚལ་ཞོར། ཞར་ལ་འབའ་མདའི་བསྡུས་གྲྭའི་སྤྱི་དོན་ལ་དཔེ་གཟིགས་ཞིབ་མོར་མཛད། སྟོན་མཇུག་ནས་སླར་ཡང་མུ་མཐུད་དེ་བསྡུས་གྲྭའི་སྤྱི་དོན་དང་ཟུར་དཔྱད་ཀྱི་འཕྲོས་བསྐྱངས་ཏེ་བསླབས་པས་དགུང་གྲངས་ཉེར་གཅིག་གི་དབྱར་དུས་སུ་མཇུག་རྫོགས་པར་བྱས། ལོ་དེའི་དཔྱིད་ཟླ་བར་མའི་སྨད་ཙམ་ན་ཆོས་རྗེ་འཇིགས་མེད་ཕུན་ཚོགས་མཆོག་མགོ་ལོག་ཏུ་ཆིབས་ཁ་བསྒྱུར་ནས། ཨ་སྐྱོང་དགོན་དུ་རྒྱལ་སྲས་ལག་ལེན་སོགས་ཀྱི་ཁྲིད་ལུང་དང༌། སྨར་མདོ་བཀྲ་ཤིས་འཁྱིལ་ཏེ་མདོ་འགབ་མ་ནས་སྙིང་ཐིག་ཡ་བཞིའི་དབང་ཡོངས་སུ་རྫོགས་པར་མནོས། སྟོན་ཀ་ནས་ཨ་སྐྱོང་དགོན་གྱི་བཤད་གྲྭར་རྗེ་འབའ་མདའ་བས་མཛད་པའི་ཕར་ཕྱིན་ཡུམ་དོན་གསལ་བའི་མེ་ལོང་གསན་ཞིང༌། དེའི་ཕྱི་ལོ་སྟེ་དགུང་གྲངས་ཉེར་གཉིས་ཀྱི་དབྱར་མགོ་བར་བསླབས་ཏེ། དེ་ནས་སྟོན་མཇུག་བར་དུ་ཆོས་མཚམས་གྲོལ། སྟོན་མཇུག་ནས་སླར་ཡང་མུ་མཐུད་དེ་སྔར་གྱི་སློབ་གཉེར་གྱི་འཕྲོ་བསྐྱངས་པས། དགུང་གྲངས་ཉེར་གསུམ་པའི་དབྱར་མགོར་ཕར་ཕྱིན་རྫོགས་པར་ཐོབ། སྐབས་དེར་འབའ་མདའི་ཕར་རྒན་མར་གྲགས་པ་པོད་དྲུག་ག་ལ་ཞིབ་གཟིགས་གནང༌། ཞར་ལ་དཀྱིལ་འཁོར་གྱི་ཐིག་རྡུལ་མཚོན་གྱི་བཀོད་པ་དང་བཅས་པ་གཙོ་བོ་རང་སྦྱོང་དང་དོགས་གནས་འགའ་གཞན་ལ་འདྲི་རྟོག་ཅུང་ཟད་རེ་དང་བཅས་ཏེ་ཚེགས་མེད་དུ་མཁྱེན་པར་མཛད། གསུང་རབ་ཟབ་མོ་ལ་ལྟ་རྟོག་ཉན་བཤད་ཀྱིས་དམ་པ་འདི་ཉིད་ཀྱི་ཐུགས་ཡིད་རབ་ཏུ་འཕྲོགས་པས། སྒོར་ཡོད་ཚད་ཀྱིས་འབའ་མདའ་བླ་མ་ཐུབ་བསྟན་དགེ་ལེགས་རྒྱ་མཚོའི་གསུང་འབུམ་སོགས་དཔེ་ཆ་བརྒྱ་ཕྲག་ལྷག་བླུས་ཏེ། འཇིག་རྟེན་སྒྱུ་མའི་ཟང་ཟིང་ཐམས་ཅད་བདུད་ཀྱི་གཡབ་མོ་ཁོ་ནར་གོ་ཞིང༌། ཆུ་ཤིང་ལྟ་བུའི་ཚེ་འདིའི་མངའ་ཐང་ལོངས་སྤྱོད་ཐོབ་པ་ཙམ་མིན་པར། གཞུང་ཟབ་མོ་ལ་ལྟ་རྟོག་བྱས་ན་ཡང་སྙིང་བོ་ཁྱད་པར་ཅན་འཐོབ་རྒྱུ་ཡོད་པའི་འདུ་ཤེས་བཅོས་མ་མིན་པ་འཁྲུངས་པས་ད་ལྟའི་བར་དུ་དཔལ་འབྱོར་ལོངས་སྤྱོད་ལ་རྡོའི་འཆང་བུ་ལྟར་བདག་གིར་ཞེན་པའི་ཆགས་པ་མི་བཞེས་པའི་མཛད་པ་བཅོས་མ་མིན་པ་མངའ་བའི་རྣམ་ཐར་ཁོ་ན་ལྷུར་མཛད་པ་འདི་ག་ཡིན་ནོ། །ཞེན་པ་བཞི་བྲལ་གྱི་གདམས་ངག་གི་ཐོག་མ། ཚེ་འདི་ལ་ཞེན་ན་ཆོས་པ་མིན། ཞེས་བྱ་བ་དང༌། དྭགས་པོའི་ཆོས་བཞིའི་དང་པོ། བློ་ཆོས་སུ་འགྲོ་བ། ཞེས་པ་རྣམས་ཀྱང་ཚེ་འདིའི་སྲིད་འབྱོར་ཕལ་བར་བཟུང་ནས་ཆོས་ལ་དོན་གཉེར་གྱི་བསམ་པ་བཅོས་མ་མིན་པར་སྐྱེས་པའི་དོན་ཡིན་པར་མ་ཟད། གང་ཞིག་ཆོས་པ་ཡིན་མིན་འཇོག་བྱེད་ཀྱི་ཚད་ཀྱང་འདི་ཁོ་ན་ལས་གཞན་མེད་པས། ཐོས་བསམ་ལམ་དུ་སོང་བ་སྐྱེས་བུ་དམ་པ་དག་ནི་སྡེ་སྣོད་གསུམ་དང་དགོངས་འགྲེལ་གྱི་བསྟན་བཅོས་ཐོས་པས་འཇིག་རྟེན་ན་ཞེན་པ་ལོག་པའི་ཚུལ་དེ་ཡང༌། ཡུན་རིང་པོར་རྡོའི་འཆང་བུ་ལ་རིན་པོ་ཆེར་བཟུང་ནས་ཞེན་པའི་མིས། ནམ་ཞིག་ན་རིན་པོ་ཆེའི་དཔྱད་ལེགས་པར་བསླབས་པས་སྔ་མའི་རྡོའི་འཆང་བུ་དེ་ལ་རང་བཞིན་གྱིས་སྲེད་པ་ལྡོག་སྟེ། རིན་པོ་ཆེའི་རིགས་དངོས་ཞིག་རྙེད་པར་བརྩོན་པ་དང་འདྲ་བར། ཐོག་མེད་ནས་ད་བར་དུ་ཚེ་འདིའི་བདེ་དོན་ཁོ་ན་ལ་འབད་ཀྱང༌། བདེ་བ་ཐོབ་པའི་ཐབས་གང་ཡིན་དང་གཏན་གྱི་ཞི་བ་གང་ཡིན་ནི་གསུང་རབ་ཟབ་མོ་ལ་སྙིང་ནས་ཐོས་བསམ་བྱས་པས་གོ་བ་ངང་གིས་འབྱུང་བ་ཡིན་ནོ། །དེ་ཡང་རྗེ་རྒྱལ་བ་གཉིས་པ་ཀུན་མཁྱེན་ཇོ་ནང་པ་ཆེན་པོའི་བཀའ་བསྡུ་བཞི་པ་ལས། ཕ་ཡུལ་ཉེ་འབྲེལ་ནོར་རྫས་ལ་སོགས་པ། །ཆགས་སྡང་སྐྱེ་བའི་དངོས་ཀུན་རབ་སྤངས་ནས། །ཕྱོགས་མེད་རིས་མེད་ཞེན་ཆགས་མི་མཛད་པའི། །ཆོས་སྤྱོད་གང་འཕེལ་བྱེད་ལ་རྣམས་ལའང་དད། །ནོར་གྱི་སོ་ཚིས་འདུ་འགོད་རབ་སྤངས་ནས། །སྒོ་གསུམ་དགེ་བའི་ཕྱོགས་སུ་རབ་བཀོལ་ཏེ། །འཁོར་གསུམ་དག་པས་སྨོན་ལམ་མཆོག་བསྒྲུབས་ནས། །དགེ་བའི་ནོར་མང་སྤེལ་བ་རྣམས་ལའང་དད། །འབད་རྩོལ་མེད་པར་ངང་གིས་བྱུང་བ་ཡི། །ལོངས་སྤྱོད་གཡོ་བ་སྙིང་པོ་མེད་རྣམས་ཀྱང། །ཡར་གྱི་ཞིང་དང་མར་གྱི་ཞིང་དག་ལ། །ལེགས་པར་བཏང་ནས་སྙིང་པོ་ལེན་ལའང་དད། །ཅེས་སྐྱེས་བུ་དམ་པའི་མཛད་སྤྱོད་ཕྱག་འཚལ་བའི་ཡུལ་དུ་གསུངས་པ་དེ་ཇི་བཞིན་དུ་མཛད་པ་བསྐྱངས་པ་ཡིན་ནོ། །དེ་ལྟའི་ཆོས་ལ་དོན་གཉེར་ཆེ་བ་དང་འཇིག་རྟེན་ལ་ཞེནཆགས་མེད་པའི་མཛད་པ་མང་དུ་མངའ་བ་རྣམས་ནི་ཆོས་ལ་ངེས་ཤེས་ཀྱི་དད་པ་ཁྱད་པར་ཅན་འཁྲུངས་པའི་འབྲས་རྟགས་ཡིན་ཏེ། འཕགས་པ་ཐོགས་མེད་ཞབས་ཀྱི་ས་སྡེ་ལས། འཕགས་པ་རྣམས་ལ་ལྟ་འདོད་པ་དང༌། དམ་པའི་ཆོས་ཉན་པ་དང༌། སེར་སྣ་དང་བྲལ་བ་ལས་དད་པ་ཅན་དང༌། ཞེས་དང༌། དེ་བཞིན་གཤེགས་པའི་གསང་བ་བསམ་གྱིས་མི་ཁྱབ་པ་བསྟན་པའི་མདོ་ལས་ཀྱང༌། དད་པ་མང་ཞིང་འཕགས་པ་རྣམས་ལ་ལྟ་འདོད་པ་དང༌། དམ་པའི་ཆོས་ཉན་པར་འདོད་པ་དང༌། སེར་སྣ་མེད་པར་གཏོང་བ་དང༌། ལག་པ་བརྐྱངས་ཏེ་གཏོང་བ་ལ་དགའ་བ་དང༌། མཆོད་སྦྱིན་བྱེད་པའི་ངང་ཅན་དང༌། གཏོང་བ་ཕུན་སུམ་ཚོགས་པ་དང༌། ཞེས་པ་ནས། གྲོགས་པོ་དག །དེ་ལྟར་དད་པ་ལ་གནས་པའི་བྱང་ཆུབ་སེམས་དཔའ་ནི་སངས་རྒྱས་མཐོང་བ་ལས་ཡོངས་སུ་ཉམས་པར་མི་འགྱུར། དམ་པའི་ཆོས་ཉན་པ་དང༌། དགེ་འདུན་ལ་བསྙེན་བཀུར་བྱེད་པ་ལས་ཡོངས་སུ་ཉམས་པར་མི་འགྱུར་རོ། །དེ་གང་དང་གང་དུ་སྐྱེས་པ་དེ་དང་དེར་སངས་རྒྱས་མཐོང་བ་དང༌། ཆོས་ཉན་པ་དང༌། དགེ་འདུན་ལ་བསྙེན་བཀུར་བྱ་བ་དང་བྲལ་བར་མི་འགྱུར་རོ། །སངས་རྒྱས་བཅོམ་ལྡན་འདས་རྣམས་ཀྱི་སྤྱན་སྔར་སྐྱེ་བར་འགྱུར་རོ། །དེར་སྐྱེས་ནས་ཀྱང་བརྩོན་འགྲུས་བརྩམ་པར་འགྱུར། དགེ་བའི་ཆོས་ཡོངས་སུ་བཙལ་པ་ལ་མངོན་པར་བརྩོན་པར་འགྱུར་རོ། །དེ་བརྩོན་འགྲུས་བརྩམས་པས་ཁྱིམ་གྱི་གནས་དོན་དུ་གཉེར་བར་མི་འགྱུར་རོ། །ཆུང་མ་དང༌། བུ་དང༌། བུ་མོ་དང༌། བྲན་ཕོ་དང༌། བྲན་མོ་དང༌། ལས་བྱེད་པ་དང༌། ཞོ་ཤས་འཚོ་བ་ཡོངས་སུ་འཛིན་པས་ཡོངས་སུ་སྤྱོད་པ་དོན་དུ་གཉེར་བར་མི་འགྱུར་བ་སྟེ། དེ་ན་ཚོད་གཞོན་ནུར་རྣམ་པར་རྩེ་བ་ལ་མི་དགའ་བས་ན་ཚོད་མཛེས་པ་ལ་བབ་པའི་ཚེ་སངས་རྒྱས་བཅོམ་ལྡན་འདས་ཀྱི་བསྟན་པ་ལ་དད་པས་ཁྱིམ་ནས་ཁྱིམ་མེད་པར་མྱུར་ཏུ་རབ་ཏུ་འབྱུང་ངོ། །དེ་དད་པས་རབ་ཏུ་བྱུང་ནས་དགེ་བའི་བཤེས་གཉེན་རྣམས་དང༌། དགེ་བའི་གྲོགས་པོ་དགེ་བ་ཐོབ་པར་བྱེད་པ་རྣམས་དང༌། དགེ་བའི་བསམ་པ་འཐོབ་བོ། །དེ་དགེ་བའི་བསམ་པ་དང་ལྡན་པས་དགེ་བའི་ཆོས་རྣམས་ཉན་ཏོ། །སྒྲུབ་པ་སྙིང་པོར་བྱེད་ཀྱི་ཚིག་ལྷུར་ལེན་པའི་བློ་དང་ལྡན་པ་མ་ཡིན་ནོ། །མང་དུ་ཐོས་པ་ཡོངས་སུ་བཙལ་བའི་ཕྱིར་བརྩོན་འགྲུས་བརྩམས་པ་ཡིན་ཏེ། ཇི་ལྟར་ཐོས་པའི་ཆོས་རྣམས་ཀྱང་ཟང་ཟིང་མེད་པའི་སེམས་ཀྱིས་འཐོབ་པ་དང༌། བཀུར་སྟི་དང༌། ཚིགས་སུ་བཅད་པ་ལ་མི་རེ་བར། གཞན་དག་ལ་རྒྱ་ཆེར་ཡང་དག་པར་སྟོན་ཏོ། །བདག་གི་ཚིག་གི་རྗེས་སུ་འབྲང་བར་གཞན་དག་ལ་ཆོས་མི་སྟོན་ཏོ། །དེ་ཇི་ལྟར་ཐོས་པ་དང༌། ཇི་ལྟར་གནས་པ་དེ་བཞིན་དུ་གཞན་དག་ལ་ཆོས་སྟོན་ཏོ། །ཆོས་ཉན་པ་རྣམས་ལ་ནི་བྱམས་པ་ཆེན་པོ་ཐོབ་བོ། །སེམས་ཅན་ཐམས་ཅད་ལ་སྙིང་རྗེ་ཆེན་པོ་བསྐྱེད་དོ། །དེ་མང་དུ་ཐོས་པར་གྱུར་པས་ལུས་དང༌། སྲོག་ལ་མི་ལྟ་བ་ཡིན། འདོད་པ་ཆུང་བ་དང༌། ཆོག་ཤེས་པ་དང༌། རབ་ཏུ་དབེན་པ་དང༌། མགུ་སླ་བ་དང༌། གསོ་སླ་བ་དང༌། དགོན་པ་དང༌། བས་མཐར་མངོན་པར་དགའ་བ་ཡིན། ཇི་ལྟར་ཐོས་པའི་ཆོས་རྣམས་ཀྱི་དོན་ལ་ཡོངས་སུ་རྟོག་པ་ཡིན་ནོ། །དོན་ལ་རྟོན་པ་ཡིན་ཏེ། ཚིག་འབྲུ་ལ་རྟོན་པ་མ་ཡིན་ནོ། །ལྷ་དང༌། མི་དང༌། ལྷ་མ་ཡིན་དང་་བཅས་པའི་འཇིག་རྟེན་གྱི་སྟོན་པར་འགྱུར་བ་ཡིན་ནོ། །ཞེས་སོགས་ལས་གསུངས་པ་ལྟར་དུ་འབྲས་བུའི་རྟགས་དང་ཡོན་ཏན་ཐམས་ཅད་ཐུན་མོང་ཤའི་མིག་གི་ཡུལ་དུ་གྱུར་པ་དེ་ག་ལགས་སོ། །ཁོང་རིན་པོ་ཆེས་ནམ་རྒྱུན་སློབ་མ་ཚོར་བཀའ་སློབ་གནང་བར་ཡང༌། མི་ཞིག་ལ་འཛམ་གླིང་ཡོངས་རྫོགས་ཀྱི་ལོངས་སྤྱོད་ཐོབ་ཀྱང༌། ཇ་ཐུན་གཅིག་ལ་ཟས་སྡེར་གང་དང༌། ཐེངས་མ་གཅིག་ལ་གོས་དྲོ་གྲང་རན་པ་ཞིག་ལས་གཞན་ལོངས་སྤྱོད་ཐབས་ཡོད་པ་མ་རེད་ལ། ལྷག་མ་ཞིག་ལོངས་སྤྱོད་དགོས་ཀྱང་ཡོད་པ་མ་རེད། དེས་ན་ལོངས་སྤྱོད་རྐྱང་པ་སྙིང་པོར་བཟུང་སོང་ན་ཁེ་ཕན་སྤྱིར་མེད་པར་མ་ཟད། རབ་ཏུ་བྱུང་བ་ཞིག་ཡིན་ན་དེ་བས་ཀྱང་མི་འཚམ་པ་དང་དོན་མེད་པའི་བྱ་བ་རེད། ཆོས་འདུལ་བ་ལས་ཀྱང་བྱ་བ་མང་པ་དང་དོན་མང་པ་བཅས་པ་མཛད་དགོས་ཀྱི་དགག་བྱའི་གཙོ་བོ་རེད། རབ་ཏུ་བྱུང་བ་ཞིག་གིས་སྤོང་ཀློག་གི་ལས་ཡག་པོ་བགྱིས་ན་འཚོ་བ་དང་གང་ཅིའི་ཐད་ནས་ཧ་ལམ་དཀའ་ངལ་མེད་པ་ཆགས་ཡོང་གི་རེད། འཇིག་རྟེན་གྱི་གཏམ་དཔེར། ཆོས་པ་རི་ལ་འདུག་ན་ཟན་གོང་གྱེན་ལ་འགྲིལ་ཟེར་བ་ལྟར་རེད། ཅེས་གསུངས་སོ། །སྤྱིར་ལོ་འདི་དག་ཏུ་རང་དགོན་དུ་བཤད་གྲྭ་འཚོགས་ཡུན་གཏན་ཁེལ་ཅན་ཡོད་མི་འདུག་སྟེ། མཚམས་རེར་སྟོན་མཇུག་ནས་དབུ་བཟུང་བ་དང༌། ལན་རེར་དགུན་འབྲིང་བོའི་ནང་ནས་དབུ་བཟུང་བ་འདུག་ལ། ལན་རེར་དཔྱིད་སྨད་ཙམ་ནས་ཆོས་མཚམས་དང༌། ལན་རེར་དབྱར་མགོའི་ཚེས་བཞི་ལྔ་ནས་ཆོས་མཚམས་ཡིན་པ་ལྟ་བུ་སྟེ། དབྱར་ཕལ་ཆེར་དང་སྟོན་ཕལ་ཆེར་ནམ་རྒྱུན་ཆོས་མཚམས་ ཡིན་པར་འདུག ཚེ་སྲོག་ཟིལ་བ་འདྲ་བའི་ཉམ་ཆུང་འདི། ། འགལ་རྐྱེན་གཡོ་ལྡེམ་གཅིག་གིས་འཇིག་པ་ན། ། རྗེས་སུ་འབྲང་བ་དགེ་དང་སྡིག་པའི་ལས། ། ཡིད་ཆེས་ངེས་པ་འདྲོངས་པའི་མཛད་པ་བསྟན། ། སྙིགས་དུས་ཀྱི་བསྟན་པའི་གསལ་བྱེད་ཆེན་པོ་ངག་དབང་འཇིགས་མེད་དངོས་གྲུབ་དཔལ་བཟང་པོའི་མཛད་བཟང་བསླབ་གསུམ་ནོར་བུའི་གླིང་ཁ་ཞེས་བྱ་བ་ལས་ཡུལ་དགོན་དུ་ཐོས་བསམ་གྱི་བྱ་བར་ཞུགས་ནས་འཇིག་རྟེན་ཟང་ཟིང་ལ་བློ་ལོག་པའི་བསྐོར་གྱི་རྣམ་ཐར་བ་མདོར་བསྡུས་པ་སྟེ་དྲུག་པའོ། ། དབང་ལུང་མན་ངག་གི་གཏེར་ཆེན་པོར་གྱུར་ཏེ་སྔོན་སྦྱངས་ཀྱི་བག་ཆགས་བརྟས་པའི་རྣམ་ཐར་བསྐོར།སྔ་མའི་འཕྲོས་ལོ་དེའི་སྟོན་མཇུག་ལ་རྔ་ཡུལ་བསྭེ་དགོན་དུ་ཕེབས་ཏེ། ཇོ་ནང་བའི་དབང་ལུང་མན་ངག་རྒྱ་མཚོ་ལྟ་བུའི་མངའ་བདག་རྟོགས་པ་མཆོག་དང་ལྡན་པ་བླ་མ་ཐུགས་རྗེ་དཔལ་གྱི་སྐུ་མདུན་ནས། ཉིན་འགའ་ལ་གཅོད་དབང་ནམ་མཁའ་སྒོ་འབྱེད་སོགས་དབང་འགའ་རེ་གསན། དབང་ཕལ་ཆེར་དེ་ནས་ཉིན་བཅུ་ལྷག་ན་གཟོད་གསུང་རྒྱུ་བྱས་པས། བར་སྐབས་དེར་བླ་བྲང་བཀྲ་ཤིས་འཁྱིལ་ལ་མཆོད་མཇལ་དུ་ཕེབས། ཉིན་བཅུ་ཡས་མས་ནས་སླར་ཡང་བསྭེ་དགོན་དུ་ཕྱིན་ནས་ཟླ་བ་གཉིས་ཙམ་གྱི་ཡུན་ལ་དབང་དུ་མ་གསན་པར་བྱས། སྐབས་དེར་བླ་མ་ཐུགས་རྗེ་དཔལ་གྱི་མདུན་ནས་ཞུས་པའི་དབང་ལུང་གི་རྣམ་གྲངས་ཐོབ་ཡིག་ཏུ་འཁོད་པ་ནི། མགོན་པོ་བྲག་རྫོང་མའི་དབང༌། ཕུར་བའི་དབང་དང་ལུང་གཉིས་ཀ། ནེ་གུའི་དབང་ཆ་ཚང༌། བདེ་མཆོག་ལུ་དྲིལ་ནག་གསུམ་གྱི་དབང༌། ཕྱག་རྡོར་འཁོར་ལོ་ཆེན་པོའི་དབང༌། སྦྱོང་རྒྱུད་བཅུ་གཉིས་ཀྱི་དབང་སྟེ་ཀུན་རིག་རྩ་བའི་དཀྱིལ་འཁོར་གྱི་དབང༌། ཤཱཀྱ་སེངྒེ་ལྷ་བཅུ་བདུན་པའི་དབང༌། ཕྱག་རྡོར་འཆི་བདག་འཇོམས་པ་ལྷ་བཅུ་གསུམ་པའི་དབང༌། ཚེ་དཔག་མེད་ལྷ་བཅུ་གསུམ་པའི་དབང༌། བཅོམ་ལྡན་འཁོར་ལོའི་བསྒྱུར་རྒྱལ་ལྷ་ཉེར་ལྔའི་དབང༌། བཅོམ་ལྡན་མེ་ལྟར་འབར་བ་ལྷ་བཅུ་བདུན་གྱི་དབང༌། ཕྱག་རྡོར་འཆི་བདག་འཇོམས་པ་ལྷ་དགུའི་དབང༌། ཕྱག་རྡོར་འཆི་བདག་འཇོམས་པ་ལ་ཕྱོགས་སྐྱོང་བཅུས་བསྐོར་བའི་དབང༌། བཅོམ་ལྡན་མེ་ལྟར་འབར་བ་ལ་རྒྱུ་སྐར་ཉེར་བརྒྱད་ཀྱིས་བསྐོར་བའི་དབང༌། ཕྱག་རྡོར་ཀླུ་ཆེན་བརྒྱད་ཀྱིས་བསྐོར་བའི་དབང༌། ཕྱག་རྡོར་ལ་འཇིགས་བྱེད་ཀྱིས་བསྐོར་བའི་དབང༌། ཕྱག་རྡོར་ལ་ཁྲོ་བོ་འཇིག་རྟེན་གསུམ་རྒྱལ་ལྷ་ཆེན་བརྒྱད་ཀྱིས་བསྐོར་བའི་དབང་རྣམས་དང༌། དུས་ཀྱི་འཁོར་ལོའི་མཆོག་དབང་གོང་མ་བཞི། ཚེ་དཔག་མེད་ལྷ་གཅིག་བུམ་གཅིག་གི་དབང༌། མགོན་པོ་ཏྲཀྴད་ཀྱི་རྗེས་གནང་སྲོག་གཏད་དང་བཅས་པ། རྣམ་སྲས་ཀྱི་རྗེས་གནང༌། ཞལ་བཞི་བའི་རྗེས་གནང༌། ཀུན་མཁྱེན་ཡབ་སྲས་ཀྱི་རྗེས་གནང༌། གཟའ་དབང་བཅས་སོ། །ལུང་གི་རྣམ་གྲངས་ལ། ནེ་གུ་ཆོས་དྲུག་གི་ཁྲིད་ཡིག་ཐང་མར་བརྡལ་བ། ལྷན་ཐབས་འོད་བརྒྱ་འབར་བ། འཁྲུལ་འཁོར་རྩ་ཚིག །ནེ་གུའི་སྔོན་འགྲོའི་ངག་འདོན། གཙོ་འདུས་ཀྱི་ཁྲིད་ཡིག་དང་འདོན་ཆོག་རྣམས། དུས་འཁོར་ལྷན་སྐྱེས། བླ་མ་ཛམ་དངོས་ཀྱི་ཞལ་གདམས། མགོན་པོ་ཏྲཀྴད་ཀྱི་བསྐང་བ་རྣམས་སོ། །དེ་ལྟར་བླ་མ་གོང་མ་ནས་ལག་ལེན་ཉམས་མྱོང་གི་རྒྱུན་མ་ཆད་པའི་དབང་ལུང་རྒྱ་མཚོ་ལྟ་བུའི་གན་མཛོད་དུ་གྱུར་ཏོ། །དགུན་སྨད་དུ་མཁན་ཆེན་བློ་བཟང་འཕྲིན་ལས་ཀྱི་གདན་ས་ཆོས་ཐང་དགོན་པར་ཕེབས་ཏེ། གཙང་ཆེན་སྤྲུལ་བའི་སྐུ་བསོད་ནམས་དཔལ་ལྡན་ལགས་དང༌། མཁན་ཤེས་རབ་དཔལ། ལྕམ་མདའི་མཁན་ཆེན་ཤེས་རབ་གསལ་བྱེད། དགོན་པ་ལ་ཁའི་མཁན་སངས་རིན་སོགས་དང་མཉམ་དུ་ཟླ་བ་གཉིས་ཡས་མས་ཀྱི་ཡུན་ལ། རི་ཆོས་ཀྱི་གལ་གནད་ཁག་གི་སྐོར་དང༌། བླ་མ་ཚོགས་གཉིས་ཀྱི་མཐར་འཛིན་གདུང་འཕྲོག་ལས་ཀྱང་ཅུང་ཙམ་རེ་ཁོལ་དུ་བྱུང་བའི་ཚུལ་གྱིས་གསུངས་བ་རྣམས་ལ་སློབ་གཉེར་རྡོ་རུས་ཐུག་པ་གནང༌། མཁན་ཆེན་བློ་བཟང་འཕྲིན་ལས་ཀྱིས་ཉིན་གཅིག་ལ་ཁོང་ལ་ཆོས་ཁྲིད་སྐབས་སུ་དམིགས་ཀྱིས་དྲི་བ་མང་བོ་ཞིག་གནང་བ་ལ། ཐམས་ཅད་ལ་དྲིས་ལན་ཐོགས་མེད་དུ་མཛད་པས་ཐུགས་ཤིན་ཏུ་དགྱེས་ཚོར་གནང་ཞིང༌། བཞུགས་གྲྭལ་ཡང་མཁན་ཆེན་རང་གི་མདུན་དུ་སྤོར་བཅུག །སྐབས་དེའི་ཆོས་གྲོགས་འགའ་རེས་བཤད་རྒྱུར། སྐབས་དེར་ཁོ་བོ་ཅག་ལ་ཆོས་རའི་རྩོད་པ་བྱེད་སྲོལ་མེད་པས། ཁྲིད་གནང་མཁན་འདྲ་མིན་ན་གཅིག་གིས་གཅིག་ལ་སུས་ཤེས་ཀྱིན་ཡོད་མེད་ཀྱང་གསལ་བོར་གོ་ཐུབ་པ་མ་རེད། དངོས་གྲུབ་དཔལ་ལ་མཁན་པོ་བློ་བཟང་འཕྲིན་ལས་མཆོག་ནས་དྲི་བ་གང་གནང་ཐམས་ཅད་མི་ཤེས་པ་དང་མ་ངེས་པ་གཅིག་ཀྱང་མི་འདུག །དེ་ནས་བཟུང་མཁན་པོ་སང་ནས་ཀྱང་ཐུགས་རྩིས་མཛད་དེ། ནམ་ཡིན་ཡང་དྲི་བ་མང་དུ་འདོན་པར་གྱུར། འོན་ཀྱང་ཁོང་ལ་ལན་ཅི་ཡིན་ན་ཐོགས་མེད་དུ་སྨྲ་རྒྱུ་འདུག་པས། རང་ཅག་གིས་མཉམ་མ་བཞག་པས་ཡུན་རིང་འདྲེས་ཀྱང་ཧ་མ་གོ་བ་ཅི་ཡིན་བསམ་དགོས་བྱུང་ཞེས་གླེང་གིན་འདུག །དེ་ནི་ཀུན་མཁྱེན་དོལ་པོ་པའི་རྣམ་ཐར་རྒྱས་པ་ལས་སླར་ཡང་བསྡུས་པ་གྷ་རུང་པ་ལྷའི་རྒྱལ་མཚན་གྱིས་མཛད་པ་ལས། སྐྱེ་ཞིང་སྐྱེ་བ་དག་ནི་ཐམས་ཅད་དུ། །མཁས་པ་མཁས་པ་རུ་ནི་སྔོན་སྦྱངས་པས། །ཚེ་འདིར་ལན་རེ་ཟུང་རེ་ཐོས་ཙམ་གྱིས། །གཞུང་ལུགས་ཀུན་ཤེས་ཤེས་རབ་རྒྱལ་མཚན་དཔལ། །ཞེས་པ་ལྟར་སྔོན་གོམས་བག་ཆགས་ཁྱད་པར་ཅན་བརྟས་པས་ཚེ་འདིར་ལན་རེ་ཙམ་གྱིས་དོན་གྱི་མཐིལ་ནས་བསྔོགས་པར་མཛད་པ་ཡིན་ངེས་ཤིང༌། ཁྱད་པར་དུ་སློབ་གཉེར་བྱེད་པའི་ཐོག་མཐའ་བར་གསུམ་ཚང་མར། གཞུང་འགའ་རེ་ནི་སྔོན་ནས་བསླབས་པ་ཅུང་ཟད་བརྗེད་དུ་ཉེ་བ་བཞིན། མཐོང་ཐོས་ཙམ་གྱིས་ཧད་དེ་དྲན་ཡོང་བ་ལྟ་བུ་ལན་གཅིག་མ་ཡིན་པར་ཡང་ནས་ཡང་དུ་ཐོན་པ་དང༌། ཐ་ན་ཚིག་དང་བཅས་པ་མཐོང་པ་ཙམ་གྱིས་བློ་ལ་ཤར་ཤར་བྱང་འགྲོ་བ་མང་པོ་ཐོན་པ་དང༌། གཞུང་འགའ་རེ་ལ་ནི་ཚིག་དོན་གཉིས་ཅར་ལ་དེ་འདྲ་ཡོང་རྒྱུ་མེད་པར། ཚིག་དོན་གང་གི་ཆ་ནས་འདི་འདྲ་བའི་དཀའ་སླའི་ཁྱད་འབྱུང་བ་ཅི་ཡིན་སྙམ་པ་ལྟ་བུ་མང་པོ་བྱུང་འདུག་སྟེ། དེ་ཐམས་ཅད་སྔོན་གྱི་ལས་འཕྲོ་སད་པའི་རྟགས་འཁྲུལ་བ་མེད་པ་ཡིན་ངེས་ཏེ། རྗེ་ཏཱ་ར་ནཱ་ཐའི་རང་རྣམ་མ་བཅོས་ལྷུག་པར། ཚད་མ་རིགས་པའི་གཏེར་སོགས་གཞུང་འགའ་རེར་བློ་ཐོག་ཏུ་ལོན་པ་དཀའ་དཀའ་བྱུང་བ་དང༌། གཞུང་དང་རྒྱུད་སྡེ་མང་པོ་ནི་རང་ཤེས་སུ་ཡོད་པ་དང༌། ལྟ་རྟོག་གི་ལས་ལ་ཞུགས་པ་ཙམ་ནས་དོན་གྱི་མཐིལ་ཟིན་འགྲོ་བའི་ཁྱད་པར་ཆེན་པོ་ཡོད་པའི་མཛད་ཚུལ་བསྟན་པ་ལྟར་རོ། །ཆོས་ཐང་དུ་བཞུགས་པའི་སྐབས་སུ་ཆོས་རྗེ་དབོན་པོ་འཇིགས་མེད་རྒྱ་མཚོ་མཆོག་གི་མདུན་ནས་ལྷ་བདེ་གཤེགས་མ་སོགས་ཀྱི་ཆོས་འབྲེལ་དང༌། ཀ་ཐོག་བླ་མ་ཐེག་མཆོག་གི་མདུན་ནས་ཆོས་འབྲེལ་རེ་དང༌། བླ་མ་ཡོན་ཏན་བཟང་གི་སྐུ་མདུན་ནས་ན་རོའི་སྤྱི་དོན་དང༌། གཞན་སྟོང་གདོང་ལྔའི་ང་རོ་སོགས་ཀྱི་ལུང་ཞུས། ལོ་འདིར་ཨ་སྐྱོང་དགོན་ནས་བདེ་མཆོག་སྒྲུབ་མཆོད་ཆེན་མོའི་བླ་ཚབ་ཏུ་བསྐོ་བཞག་བྱས། ལོ་དེའི་དགུན་ཟླ་ཐ་ཆུང་གི་མགོ་ཙམ་ན་དམ་པ་གང་ཉིད་ཀྱི་ཡབ་འཇམ་ཤེར་མཆོག་སྐུ་བསྙུན་ཆེར་མེད་པར་བླ་མ་རྣམས་ཀྱི་གསང་གསུམ་གྱི་ཡོན་ཏན་དང་ཆོས་ཀུན་སྒྱུ་མ་ལྟ་བུར་ཐག་ཆོད་པའི་གསུང་མོལ་ཁྱད་པར་ཅན་བརྗོད་འཕྲོས་ལ་དགུང་གྲངས་དྲུག་ཅུ་བཞེས་པའི་སྟེང་དུ་སྐུ་གཤེགས། དེའི་ཕྱི་ལོ་ཁོང་ཉིད་དགུང་གྲངས་ཉེར་བཞི་བཞེས་པའི་ཆོ་འཕྲུལ་ཟླ་བའི་ཚེས་ལྔ་ནས་བཅའ་ཐབ་བཟུང་སྟེ་ས་ཆོག་ཐིག་གདབ་དང་དངོས་བཞི་བཅས་ཁྱོན་ཉིན་བཅུ་གསུམ་ལ་བདེ་མཆོག་སྒྲུབ་མཆོད་ཆེན་པོ་ལེགས་པར་བསྐོལ། དགུང་གྲངས་ཉེར་བཞིའི་དཔྱིད་དུས་སུ་སླར་ཡང་བསྭེ་དགོན་དུ་ཕེབས་ཏེ། བླ་མ་ཐུགས་རྗེ་དཔལ་གྱི་མདུན་ནས། བདེ་མཆོག་རབ་འབྱམས། གཤིན་རྗེ་རབ་འབྱམས་སོགས་རྒྱུད་སྡེ་རབ་འབྱམས་ཆ་ཚང་གི་དབང་དང༌། ཕུར་བའི་དབང་དང་ལུང༌། རྡོ་རྗེ་འཕྲེང་བའི་དབང་སོགས་དབང་ཆེན་དུ་མ་དང༌། གཅོད་དབང་ནམ་མཁའ་སྒོ་འབྱེད་སོགས་དབང་ཕྲན་མང་བོ་གསན། བཤེས་གཉེན་རིན་པོ་ཆེ་ཉིད་ཀྱི་ཞལ་སྔ་ནས། ཇོ་ནང་ཀུན་མཁྱེན་ཡབ་སྲས་དང་རྗེ་བཙུན་ཏཱ་ར་ནཱ་ཐ་ཡབ་སྲས་སོགས་རང་ལུགས་བླ་མ་གོང་མ་རྣམས་ནས་བརྒྱུད་པའི་དབང་ཕལ་ཆེར་བླ་མ་ཐུགས་རྗེ་དཔལ་འདི་ཉིད་ནས་ཐོབ་པ་ཡིན་པས། བྱིན་རླབས་དབང་གི་ཆུ་རྒྱུན་བསྩལ་བའི་བཀའ་དྲིན་ཁོང་ལས་ཆེ་བ་མེད་ཅེས་གསུངས་པ་ཕྲན་ནས་ཀྱང་ཐོས། སྐབས་དེར་སྔ་དྲོ་རྣམས་སུ་ཤར་ཁ་སྤྲུལ་སྐུ་ངག་དབང་དཀོན་མཆོག་དགེ་ལེགས་ཀྱི་སྐུ་མདུན་ནས་ཏཱ་ར་ནཱ་ཐའི་གསུང་འབུམ་གྱི་དབུ་ནས་པོད་བཞིའི་ལུང་གསན། དབང་གྲོལ་རྗེས་སུ་ཡང་ཤར་ཁ་སྤྲུལ་སྐུ་མཆོག་གི་སྒར་ནང་ནས་ལམ་རིམ་བདུད་རྩི་ཉིང་ཁུ་དང༌། གཞན་སྟོང་གི་སྐོར་སོགས་ཞུས། གཞན་ཡང་བུ་རྒྱས་སྤྲུལ་སྐུ་བསྟན་པ་གསལ་བྱེད་ཀྱི་མདུན་ནས་ཀུན་མཁྱེན་གསུང་འབུམ་གྱི་ལུང་རྫོགས་པར་གསན། མཁར་སྤྲུལ་ཤེས་རབ་ཆོས་འཕེལ་གྱི་མདུན་ནས་ཀྱང་ཀོང་སྤྲུལ་ཡོན་ཏན་རྒྱ་མཚོའི་གཞན་སྟོང་ཐུང་ངུ་ཞིག་གི་ཁྲིད་ཉིན་གཉིས་ལ་གསན། ལོ་དེའི་དབྱར་ཟླ་ར་བ་ལ་ཨ་འདུས་སྒར་གོང་མ་ནས་དོ་གོང་དམ་ཆོས་ཀྱི་མདུན་ནས་འདར་ལོའི་དབྱངས་ཅན་སྒྲ་ཊཱིཀ་དང་སྡེབ་སྦྱོར་གཉིས་གསན་ཞིང་ཁུང་དུ་ཆུད་པར་བྱས། ཀུན་བཤད་ཀྱི་མཚན་ལ་དབྱངས་ཅན་ངག་གི་རོལ་མཚོ་ཞེས་གསོལ། ལོ་དེའི་སྟོན་མགོར་ཆོས་ཐང་དུ་ཕེབས་ཏེ་མཁན་རིན་པོ་ཆེ་བློ་བཟང་འཕྲིན་ལས་ཀྱི་མདུན་དུ་མཛོད་འགྲེལ་མངོན་པའི་རྒྱན་གྱི་སྟེང་ནས་ཟླ་དྲུག་ལྷག་ཙམ་ལ་སྦྱང་བརྩོན་ལྷུར་བཞེས་བྱས། མངོན་པ་སྦྱོང་བའི་ཞར་ལ། མཁན་ཆེན་བློ་བཟང་འཕྲིན་ལས་མཆོག་གིས་འབའ་མདའི་ནག་རྩིས་ཀྱི་ཁྲིད་འགོ་ཙམ་བཟུང་ནས་གསུང་འཕྲོས་རྣམས་ཀྱི་གཞུག་ལྷ་རྗེ་ཀུན་བརྩོན་གྱིས་བསྐྱངས་ནས་ནག་རྩིས་ལ་བསླབས། འབའ་མདས་མཛད་པའི་དཔལ་སྤུངས་ལུགས་ཀྱི་བྱེད་གྲུབ་ཟུང་འབྲེལ་གྱི་རྩིས་དཔེའི་སྟེང་ནས་ལྔ་བསྡུས་དང༌། རྒྱ་ནག་གླང་རྩིས་སོགས་སྐར་རྩིས་ཆ་ལག་དང་བཅས་པ་ཡང་ཕྱོགས་མེད་དུ་ལེགས་པར་སྦྱངས་ཏེ། ཐེག་པ་ཆེན་པོ་མདོ་སྡེའི་རྒྱན་ལས། རིག་པའི་གནས་ལྔ་དག་ལ་བརྩོན་པར་མ་བྱས་ན། །འཕགས་མཆོག་གིས་ཀྱང་ཐམས་ཅད་མཁྱེན་ཉིད་མི་འགྱུར་ཏེ། །དེ་ལྟ་བས་ན་གཞན་དག་ཚར་བཅད་རྗེས་གཟུང་དང༌། །བདག་ཉིད་ཀུན་ཤེས་བྱ་ཕྱིར་དེ་ལ་དེ་བརྩོན་བྱེད། །ཅེས་པའི་དོན་སྔ་ཕྱི་ཀུན་ཏུ་ཐུགས་ཉམས་སུ་བསྟར་བ་ཡིན་ནོ། །བཤེས་གཉེན་རིན་པོ་ཆེ་གང་གི་ཞལ་སྔ་ནས་གསུང་འཕྲོས་ཐོས་པར། ཁོ་བོ་ལ་མཚོན་ན་ཡོན་ཏན་ཆེན་པོ་ཅི་ཡང་ཡོད་པ་མ་རེད་དེ། ལོ་ཚོད་བཅོ་ལྔ་ནས་ཉི་ཤུའི་རྩ་གྲངས་བསྐོར་ན་ཚོད་དར་ལ་བབ་དུས་སུ་ཡང༌། དབང་ལུང་རེ་གསུང་གིན་འདུག་ཟེར་ན་ཐོབ་ཐབས་ཤིག་ག་རེ་བསམ་བསྡད་པ་ཅིག་ཡོད་པ་ཡིན། དེ་བསྐོར་འགྲིམ་འགྲུལ་ཡང་དེང་སང་ལྟར་སྟབས་བདེ་པོ་ཡོད་པ་མ་རེད། ཡིན་ན་ཡང༌། དབང་ལུང་རྩ་ཆེན་པོ་རེ་གསུངས་པ་ཐོས་ན། ཡུལ་ནས་རྔ་བ་དང་ཛམ་ཐང་བསྐོར་ལ། རྡོག་ཁྲེས་ཁུར་ནས་རྐང་ཐང་འགྲོ་རྒྱུ་ལ་ཚེགས་ཆེན་པོ་ཞིག་ཡིན་སྙམ་ཡང་སྐྱེས་པ་མི་དྲན། དེང་སང་གྲྭ་བ་ལོ་ཉུང་མང་པོ་ཞིག་གིས་དབང་ལུང་ཟེར་བ་དེ་དགོས་རྒྱུ་ཞིག་ཡིན་སྣང་ཆེར་འཆར་གྱིན་མེད་པ་འདྲ། མིག་གིས་མཐོང་བཞག་རྒྱུ་དང༌། ལག་པས་འཛིན་བཞག་རྒྱུའི་གཟུགས་ལོག་ལོག་ཅིག་ཡོད་ན་ཡོད་པ་རེད་མ་གཏོགས། རྒྱལ་བ་རྡོ་རྗེ་འཆང་ནས་མཁས་གྲུབ་ཟམ་མ་ཆད་པར་བརྒྱུད་དེ་འོང་བའི་གཟུགས་མེད་ཀྱི་བྱིན་རླབས་ནུས་པ་ཞུ་རྒྱུ་དེ་ལ་ཡི་མ་རང་བའི་རྣམ་པ་ཞིག་དོད་འདུག་མིན་སེམས་སྤྱད་ཅིག་འདུག་སྟེ། དབང་གསུང་གིན་འདུག་ཟེར་ན་མང་ཚོགས་ཚོ་འུར་འདྲ་ལངས་ཀྱིན་འདུག་མ་གཏོགས། གྲྭ་བ་ཚོ་ལ་མ་མཁོ་མཁོ་ཞིག་ཡིན་ན་མགོ་རྔ་ལོགས་པའི་ལས་ཀ་རེད། ཅེས་སོགས་ཡང་ནས་ཡང་དུ་བསྐྱར་དུ་གསུངས་སོ། ། ལེགས་བཤད་གོམས་པ་གསེར་གྱི་མདངས་ལྡན་སྨོན་ལམ་སྟོབས་ཀྱི་ཕྱག་རྒྱས་བཏབ་སྟེ་དྲི་མེད་ཐུགས་སུ་སྦས་པའི་གཏེར། ། གཞན་ཟེར་ཐབས་ཀྱི་སྐུལ་བར་མ་ལྟོས་སྡེ་སྣོད་གསུམ་དང་རྡོ་རྗེ་ཐེག་པའི་གཞུང་ལུགས་ཀུན་ལ་རང་དགར་གྱིས། ། མི་ཕྱེད་དད་འདུན་བརྩོན་པའི་ཤིང་རྟ་མཁའ་ལྡིང་ཤུགས་ཀྱི་འགྲོས་ལ་བསྐྱོན་ཏེ་ཤེས་བྱའི་མཁའ་རུ་རྒྱུ་བ་ལ། ། ཕལ་བའི་ལོ་ཟླར་ངལ་བས་འགྲོད་དེ་ཞག་དང་ཟ་མར་ཡུད་ཀྱིས་གཞལ་བའི་ངོ་མཚར་གཏམ་གྱི་སྒྲོན་མེ་མང༌། ། སྙིགས་དུས་ཀྱི་བསྟན་པའི་གསལ་བྱེད་ཆེན་པོ་ངག་དབང་འཇིགས་མེད་དངོས་གྲུབ་དཔལ་བཟང་པོའི་མཛད་བཟང་བསླབ་གསུམ་ནོར་བུའི་གླིང་ཁ་ཞེས་བྱ་བ་ལས་དབང་ལུང་མན་ངག་གི་གཏེར་ཆེན་པོར་གྱུར་ཏེ་སྔོན་སྦྱངས་ཀྱི་བག་ཆགས་བརྟས་པའི་རྣམ་ཐར་ བསྐོར་གྱི་མདོར་བསྡུས་པ་སྟེ་བདུན་པའོ། ། མདོ་སྨད་ཀྱི་གྲྭ་ས་འགར་སྲོག་ལ་མ་ལྟོས་པའི་དཀའ་སྤྱད་དང་དབང་ལུང་གསན་བཞེས་ཀྱི་རྣམ་ཐར་བསྐོར།བཤེས་གཉེན་རིན་པོ་ཆེ་གང་གི་ཞལ་སྔ་ནས་གསུང་ཐོས་བྱུང་བར། ཡུན་རིང་པོ་ལ་སྔར་ནས་རྩོད་པའི་རིགས་ལམ་ཞིག་བསླབ་འདོད་ཀྱི་འདུན་པ་ཧ་ཅང་ཆེ་ཡང༌། ལོ་མང་པོ་ཞིག་ལ་དངོས་སུ་སློབ་པའི་སྐལ་བ་མ་བྱུང་གསུངས། ཁོང་དགུང་གྲངས་ཉེར་ལྔ་ལོན་པའི་ལོ་སར་ཆོས་ཐང་དགོན་དུ་བྱས་ཤིང༌། དེ་ནས་ཐད་ཀར་ཆོ་འཕྲུལ་ཟླ་བའི་ཚེས་བཅུ་བསྐོར་ན་རྔ་ཡུལ་ཨ་མཆོག་མཚན་ཉིད་དགོན་དུ་ཕེབས་ནས། བསྡུས་ཆེན་འཛིན་གྲྭར་ཞུགས། བསྡུས་ཆེན་འཛིན་གྲྭ་ལོ་དེའི་སྟོན་ཀ་ནས་རྟགས་རིགས་འཛིན་གྲྭར་འཕར་རྒྱུར་ཆགས་འདུག་པས། བསྡུས་ཆེན་གྱི་ཞར་ལ་འཛིན་གྲྭ་དེར་རྟགས་རིགས་ཀྱི་ཁྲིད་འགོ་ཡང་འཛིན་གྲྭ་མ་འཕར་བའི་སྔོན་ནས་འཁྲིད་བཞིན་འདུག་པས། ཁོང་ཉིད་ནས་ཀྱང་རིགས་ལམ་ཐོག་མར་སློབ་པ་ན་བསྡུས་རྟགས་གཉིས་ཅར་དཔེ་ཁྲིད་དང་རྩོད་པ་གནང༌། བློ་གྲོས་ཀྱི་འཇུག་པ་ཤིན་ཏུ་མྱུར་བས་ཉིན་ཞག་ཁ་ཤས་ནས་རིགས་ལམ་གྱི་འགྲོས་ཆགས་ཐུབ་པ་བྱུང༌། ལོ་དེའི་དབྱར་དུས་སུ་གོང་ཐང་དྲུག་པ་བསྟན་པའི་དབང་ཕྱུག་མཆོག་གི་སྐུ་མདུན་དུ་བསང་ཁོག་ནས་དུས་འཁོར་དབང་ཆེན་གསན། དགུན་བར་མ་སྟེ་བོད་ཟླ་བཅུ་གཅིག་པའི་ནང་དུ་འཛིན་གྲྭ་རྟགས་རིགས་སུ་འཕར། རྟགས་རིགས་གསར་རྩོད་འཛིན་གྲྭས་རྟགས་རིགས་མཚན་ཕུད་དམ་བཅའ་འཇོག་པ་ན། མཚན་ཕུད་སྐབས་སུ་རིགས་ལུང་བ་རྣམས་ཀྱིས་ཆོས་ར་དང་དཔེ་ཁྲིད་གང་ཡང་མ་སོང་བའི་རྣམ་འགྲེལ་གྱི་སྤྱི་ཁོག་ནས་ས་བཅད་དང་འཆད་ཚུལ་མང་དུ་དྲིས་ཀྱང༌། བཤེས་གཉེན་རིན་པོ་ཆེ་གང་ནི་ལོ་དེར་རྩོད་གྲྭ་གསར་ཞུགས་ཙམ་ལས་མིན་ན་ཡང༌། འཛིན་གྲྭའི་ལན་ཐམས་ཅད་ཁོང་གིས་བཏབ་ཅིང༌། ལན་མ་ཐེབས་པ་དང་གཞུང་གི་ས་བཅད་ཡན་ཆད་མ་ངེས་པ་གཅིག་ཀྱང་མ་བྱུང་བས་ཕལ་ཆེར་ཞིག་ངོ་མཚར་བའི་གནས་སུ་བཀོད། དགེ་བཤེས་འགའ་རེས་ཀྱང་རྟགས་རིགས་གསར་རྩོད་ཀྱི་གཞུང་ངེས་མཁན་གྱི་མགོ་ལོག་གི་སློབ་གཉེར་བ་དེ་ཞེས་གཏམ་གླེང་བྱེད་དགོས་པ་བྱུང༌། དེའི་ཕྱི་ལོ་སྟེ་དགུང་གྲངས་ཉེར་དྲུག་པའི་དགུན་བར་མ་ནས་འཛིན་གྲྭ་བློ་རིག་ཏུ་འཕར། བླ་བྲང་དགེ་བཤེས་སྨད་སོག་བསོད་ནམས་མཆོག་སྐབས་དང་སྐབས་སུ་ཨ་མཆོག་ཏུ་ཕེབས་པའི་མདུན་ནས་ཀྱང་བསྡུས་གྲྭ་རྟགས་རིགས་སོགས་གསན། སྐབས་དེར་ཨ་མཆོག་དགོན་ནས་དཔེ་ཁྲིད་ཞུས་པའི་རྣམ་གྲངས་ཙམ་ནི། སྟོང་བ་ཉིད་ཀྱི་དོན་མངོན་སུམ་དུ་རྟོགས་པར་གྲགས་ཤིང་གྲུབ་པའི་དགེ་བའི་བཤེས་གཉེན་ཀླུ་སྒྲུབ་ཀྱི་མདུན་ནས་བསེ་བསྡུས་ཡོངས་རྫོགས་ཀྱི་ཁྲིད་ལུང༌། རྟགས་རིགས། བློ་རིག །དོན་བདུན་ཅུ། ས་ལམ་སོགས་དང༌། དགེ་བཤེས་ཆེན་པོ་བསྟན་དར་ཀྱི་མདུན་ནས། བསེ་བསྡུས། རིགས་ལམ་འཕྲུལ་ལྡེ། རྟགས་རིགས། བློ་རིག །ས་ལམ། དོན་བདུན་ཅུ། སྒོ་མང་ཕར་ཕྱིན་གྱི་དབུ་ནས་ཤིང་རྟའི་སྲོལ་འབྱེད། བྱམས་གཞུང༌། གཅིག་དུ་བྲལ། ཉན་ཐོས་ཞི་འཚོལ་དང༌། དཔའ་རིས་རབ་གསལ་གྱི་དོན་བདུན་ཅུའི་མུ་བཞི་སོགས་གསན། རིགས་ལམ་གསར་སྦྱོང་གི་འཛིན་གྲྭ་བསྡུས་རྟགས་ཀྱི་སྐབས་ནས་གཞུང་ཆེན་ཁག་ལ་ཡང་ལྷན་གཅིག་ཏུ་ཐོས་བསམ་མཉམ་དུ་བྱས་ཤིང་གོ་སྟོབས་ཆེ་བར་མ་ཟད། སྐབས་དེ་དུས་ནས་མགོ་ལོག་ཕྱོགས་ཀྱི་གྲྭ་བ་དོན་གཉེར་ཅན་རེ་ཟུང་ལ་ས་ལམ་གྱི་དཔེ་ཁྲིད་ཀྱང་བྱས། དེ་སྐབས་ཆོས་གྲོགས་འགའ་རེས་ཁྱོད་ཀྱིས་བཀའ་པོད་ལྔ་ཅིག་ཅར་སྦྱངས་ནས་འོང་གི་མ་རེད་བཤད་ཀྱང༌། མ་ཉན་པར་སློབ་གཉེར་གནང་བ་དེ་ནི། ཆོས་རྗེ་ཀུན་མཁྱེན་དུས་གསུམ་སངས་རྒྱས་ཀྱི་རྣམ་ཐར་གསལ་སྒྲོན་ལས། ཆོས་རྗེ་པས་ཕར་ཚད་མངོན་གསུམ་དུས་གཅིག་ཏུ་མཛད་ནས། མཆེད་གྲོགས་རྣམས་ན་རེ། སློབ་གཉེར་གྱི་སྣ་མང་བས་འགོ་མི་ཐོན། གཅིག་ལ་དྲིལ་བ་དྲག་ཟེར་ཡང་མ་གསན་པར། དེ་རྣམས་ཀྱི་སྟེང་དུ་སྤྱོད་འཇུག་དང༌། སངས་རྒྱས་ཐོད་པའི་རྒྱུད་དང༌། རྡོ་རྗེ་ཕྲེང་བའི་རྒྱུད་རྣམས་བསྣན་ནས་སློབ་གཉེར་དཔག་ཏུ་མེད་པར་མཛད་དོ། །ཞེས་པའི་རྣམ་པར་ཐར་བ་དང་ཆེ་བ་གཉིས་སུ་མེད་པ་ཞིག་གོ། །བོད་ཟླ་བཞི་བའི་ཚེས་དྲུག་ལ་རྟགས་རིགས་འཛིན་གྲྭའི་རང་བཞིན་གྱི་རྟགས་ཀྱི་དཔེ་ཁྲིད་རྫོགས་ནས་དབྱར་གནང་དུ་ངལ་གསོ་བྱས། དབྱར་ཟླ་དང་པོའི་ཚེས་བརྒྱད་ནས་དབྱར་གནང་ལ་རྔ་ཡུལ་ཀིརྟི་དགོན་པར་སོང་ནས་ཨ་ཁུ་བློ་བསྟན་དང༌། དགེ་བཤེས་ལུང་རིགས་དང༌། ཨ་ཁུ་འཇིགས་རྒྱམ་རྣམས་ལས་དྲང་ངེས་ལེགས་བཤད་སྙིང་པོ་ལས་སེམས་ཙམ་བསྐོར་དང༌། གསེར་ཕྲེང་གི་གདམས་ངག་དང་བདེན་གཉིས་སྐྱབས་གསུམ་སོགས་ཟླ་གཅིག་ལྷག་ལ་གསན། དེ་ནས་བོད་ཟླ་ལྔ་བའི་ཚེས་བཅོ་ལྔ་ལ་ཕ་ཡུལ་དུ་ཤར་ཕེབས་ཙམ་བྱས་ཏེ་སླར་ཡང་བོད་ཟླ་དྲུག་པའི་ཚེས་བཅོ་ལྔ་ལ་ཨ་མཆོག་དགོན་དུ་ཕེབས་ནས་རྟགས་རིགས་ཀྱི་མ་དམིགས་པའི་རྟགས་ནས་སློབ་གཉེར་བཙུགས། ཟླ་དེའི་ཚེས་ཉེར་དགུར་གུང་ཐང་རི་ཁྲོད་ནས་གུང་ཐང་སྐུ་ཕྲེང་དྲུག་པ་འཇིགས་མེད་བསྟན་པའི་དབང་ཕྱུག་ལ་མཇལ་ནས་བཀའ་སློབ་ལམ་སྟོན་ཟབ་མོ་ཐོབ། ཆོ་འཕྲུལ་ཟླ་བའི་ཚེས་ལྔ་ལ་མཚན་ཉིད་དགོན་གྱི་སྨོན་ལམ་དམ་བཅའ་ལ་རང་རིག་གི་སྟེང་ནས་གོ་རིགས་མཐའ་ཆོད་པའི་རྟགས་གསལ་གནང༌། ལན་རེར་མཚན་མོར་རྩོད་པ་རྒྱུན་སྐྱོང་གནང་ནས་ནམ་ལངས་བར་དུ་ཆོས་རར་བཞུགས། བཤེས་གཉེན་དམ་པ་གང་གི་སྐབས་དེའི་འཚོ་བའི་མཐུན་རྐྱེན་ཧ་ཅང་ཞན་པས། ཆོས་གྲོགས་འགའ་རེས། ཁྱེད་གྲྭ་ཚང་གི་ཚོགས་སམ་ཁམས་ཚན་དུ་ཞུགས་ན་ཡོང་འབབ་ཐོབ་ཐུབ་པར་འདུག་ཞུས་ཀྱང༌། ཁོང་ཉིད་ཚོགས་དང་ཁམས་ཚན་དུ་གཏན་ནས་མ་ཞུགས། སྐབས་དེར་ཚོགས་ཞུགས་མི་གནང་བའི་རྒྱུ་མཚན་ནི། ཚོགས་དང་ཁམས་ཚན་དུ་ཞུགས་ན་འཚོ་བའི་དཀའ་ངལ་མེད་པར་བཟོ་འགྲོ་བ་ཤེས་ཀྱིན་འདུག་སྟེ། དེ་དག་ཏུ་ཞུགས་ཕྱིན་འདོན་ཆོག་བློ་འཛིན་དང་ལས་ཀ་དང་གཞུང་འཚོགས་སོགས་ཀྱིས་དཔེ་ཆར་ལྟ་བའི་གོ་སྐབས་གང་མང་ཞིག་ཤོར་འགྲོ་བར་འདུག་ཅཻས་གསུངས། སྐབས་དེའི་ཁོང་གི་འཚོ་བའི་གནས་སྟངས་ནི། སྐབས་ཕལ་ཆེར་དུ་རྩམ་ནག་ཙམ་མ་གཏོགས་ཅི་ཡང་མེད་པར་མ་ཟད། རྩམ་པ་དེ་ཡང་སྐབས་དང་སྐབས་སུ་མཐའ་བའི་གྲོང་ནང་ན་སྤྲང་ཁུག་ཁུར་ནས་སློང་མོ་བྱེད་དུ་འགྲོ་དགོས་པ་རེད། ལྕི་བ་དང་བུད་ཤིང་ཡང་སློང་མོ་ལས་ཅུང་ཟད་རྙེད་པ་མ་གཏོགས་ཧ་ཅང་དཀོན་པས་སྟབས་ཀྱིས་ཚ་དེམ་ཞིག་ཉོས་ཏེ། ཆུ་ཚན་ཚ་དེམ་གང་གིས་ཉིན་གསུམ་བཞི་རེ་ལ་བཞུགས་པ་ལས། ཐ་ན་མེ་འབུད་ཇ་བསྐོལ་ཙམ་གྱི་ཡུན་ལ་ཡང་ཆུ་ཚོད་གྲོན་ཆུང་དང་དཀའ་སྤྱད་ཁོ་ན་བྱས་ནས་བཞུགས་རྐྱེན། ལུས་ཀྱི་ཟུངས་ཟད་དེ་ཤ་ཟད་རུས་བཏུམས་ཀྱི་དཔེ་ལྟ་བུར་གྱུར་བས། ཆོས་གྲོགས་འགའ་རེས་ཁྱོད་ཀྱིས་དེ་འདྲ་དཀའ་ལས་མ་གནང་མ་གཏོགས། ནད་གཞི་ཞིག་ཐེབས་པར་ལ་ཐང་མི་འདུག །གལ་སྲིད་ཁྱེད་འདི་ལྟ་བུའི་ལུས་ཟུངས་ཟད་པོ་ཞིག་ལ་ནད་ཅིག་ཐེབས་སོང་ན། སླར་གསོ་རྒྱུ་ནི་གཞི་ནས་རེ་བ་ཡོད་ས་མ་རེད་ཅེས་ཁ་ཏ་སློབ་སྟོན་བྱེད་མི་འགའ་རེ་བྱུང་སྐད། སྐབས་ཤིག་ཏུ་ནུབ་མོར་ཞག་གང་བོར་ཆོས་རར་རྩོད་པ་རྒྱུན་རིང་བྱས་ཏེ་ཆམ་རླུང་ཐེབས་པ་དང་ལུས་ཟུངས་ཟད་པས་ནངས་མོར་ཆོས་ར་ནས་གྲྭ་ཤག་ལ་འགྲོ་བའི་སྐབས་སུ་བརྒྱལ་ནས་ལམ་ཁར་ལོག་པ་ན། དགོན་པར་སྐོར་བ་བྱེད་མི་ཞིག་གིས་རིག་ནས་དགོན་མཐའི་སྨན་ཁང་དུ་བསྐྱལ། འདི་ལྟ་བུའི་དཀའ་སྤྱད་མཛད་པའི་རྣམ་ཐར་འགའ་རྣ་བའི་བུ་གར་བྱུང་བ་ན། ང་དང་ང་ལྟ་བུ་སློབ་གཉེར་བར་ཁས་འཆེ་བ་རྣམས་རང་གིས་རང་ལ་ངོ་ཚ་དགོས་པ་ལྟ་བུའི་གནས་སུ་འདུག་པར་མ་ཟད། ཁོང་གི་སྔ་ཕྱི་བར་གསུམ་དུ་སློབ་གཉེར་དང་སྒྲུབ་པ་གང་ཞིག་མཛད་ཀྱང༌། དཀའ་སྤྱད་བྱས་པ་རྣམས་རྒྱུས་ལོན་ཅུང་ཙམ་རེ་བྱས་པ་ན། དད་པས་བ་སྤུ་གཡོ་བྱེད་དང་སྔོན་བྱོན་གྱི་དམ་པ་འགའ་རེ་རྗེས་སུ་དྲན་པ་ཡང་བཅོས་མིན་དུ་འོང་གིན་འདུག །འཇམ་མགོན་ས་སྐྱ་པཎྜིས། མཁས་པ་སློབ་པའི་དུས་ན་སྡུག །བདེ་བར་སྡོད་ལ་མཁས་མི་སྲིད། །བདེ་བ་ཆུང་ལ་ཆགས་པ་དེས། །ཆེན་པོའི་བདེ་བ་ཐོབ་མི་སྲིད། །ཅེས་གསུངས་པ་ལྟར་དཀའ་སྤྱད་སྙིང་རུས་ཕལ་པས་ཡིད་ལས་འགོངས་པའི་རྣམ་པར་ཐར་བ་འདི་དག་ཉི་མ་འགའ་རེ་དང་ཟླ་བ་ཁ་ཤས་ཙམ་ཞིག་མ་ཡིན་པར། གུང་ཐང་སྐུ་ཕྲེང་གསུམ་པ་བསྟན་པའི་སྒྲོན་མེས། ཉིན་རེ་ཟས་ཀྱང་མི་དྲན་བརྩོན་འགྲུས་རྩོམ། །ཞུགས་མ་ཐག་ཏུ་མཁས་པའི་གོ་འཕང་འདོད། །ཞག་གསུམ་ལོན་ཚེ་རྗེས་མེད་གཡེང་བས་འཁྱེར། །དེ་འདྲ་དེ་ལ་ཅི་ཡང་མི་ཡོང་བས། །བརྩོན་པ་ཆུ་བོའི་རྒྱུན་བཞིན་སྟེན་ཅིག་ཨང༌། །ཞེས་པ་ཇི་བཞིན་དུ་བགྲང་བྱའི་འཁོར་ལོ་བར་མ་ཆད་པ་དུ་མ་ཞིག་ལ་བརྩོན་པའི་རྣམ་པར་ཐར་བ་འདི་སྤྱིར་ངོ་མཚར་བ་ཙམ་ཞིག་ཏུ་མ་ཟད། ཁ་མིན་དོན་གྱི་གཏིང་ནས་ཆོས་ལ་ཡིད་རབ་ཏུ་དྭངས་བའི་ཤུགས་ཁྱད་པར་ཅན་འཁྲུངས་ཤིང༌། འཁོར་བའི་ཕུན་ཚོགས་ཟ་ཉལ་གཡེང་བའི་བདེ་བ་ཐམས་ཅད་སྙིང་པོ་མེད་པར་མ་ཟད་མི་གཙང་བའི་འདམ་རྫབ་ལྟར་གཟིགས་པའི་འབྲས་རྟགས་ཤིག་ཡོད་ན་འདི་ལས་གཞན་གང་ཞིག་ཡིན་ཨང༌། རང་རེ་དང་ལས་སྐལ་མཉམ་པ་སྔོན་གྱི་དེ་བཞིན་གཤེགས་པ་དང་དགྲ་བཅོམ་པ་དག་གི་རྗེས་སུ་འཇུག་པར་ཁས་བླངས་ཤིང་རྟགས་བསྒྱུར་ཏེ། ཆོས་ཕྱིར་ཟས་ཐུན་གཅིག་དང་གཉིད་ཐུན་གཅིག་ཀྱང་གཅོག་པར་མི་ནུས་ཀྱང༌། ལྟོ་གོས་གཏམ་གསུམ་ཆོས་ལ་བརྟེན་ནས་འཚོ་བ་རྣམས་ཀྱིས་རྣམ་པར་ཐར་བ་འདི་ལྟ་བུ་དག་ནི་མི་སྲིད་པའི་བརྩམས་སྒྲུང་ལྟར་མི་སེམས་པར། ཡིད་ལ་བསམས་ཏེ་སྙིང་ནས་དད་པ་དང་དེ་ལྟར་འདོད་པའི་སྨོན་ལམ་ཙམ་བཅོས་མིན་དུ་སྐྱེས་ན་དེ་ཙམ་ཡང་བསོད་ནམས་ཚད་མེད་པ་ཡིན་ཏེ། འོན་ཀྱང༌། ཕལ་བ་རྣམས་ཀྱིས་སྐྱེས་བུ་དམ་པའི་མཛད་པ་ལ་རྗེས་སུ་ཡི་རང་ཙམ་ཡང་མེད་པའི་ཁར། སྐྱོན་མེད་འཕྱས་འདོགས་སྐུར་འདེབས་ཀྱིས་རང་སྡུག་རང་གིས་གསོག་པ་ཐམས་ཅད་ཤིན་ཏུ་སྙིང་ནས་བརྩེ་ཡང་རྗེས་སུ་འཛིན་པའི་ཐབས་ནི་ཅི་ཞིག་ཡོད། ཕྱི་ལོ། ༡༩༩༦ བོད་རབ་གནས་མེ་བྱི་ལོའི་ཆོ་འཕྲུལ་ཟླ་བའི་ཚེས་ཉེར་བཞིའི་ཉིན་པར་བླ་བྲང་བཀྲ་ཤིས་འཁྱིལ་དུ་ཕེབས། དགུང་གྲངས་ཉེར་བདུན་གྱི་སྟོན་དུས་བར་དུ་བླ་བྲང་དགོན་དུ་བཞུགས་ཤིང༌། ཨ་ཁུ་དགེ་འདུན་རྒྱ་མཚོའི་མདུན་ནས་ཀུན་མཁྱེན་འཇམ་དབྱངས་བཞད་པའི་ཕར་ཕྱིན་དང༌། འཇམ་དབྱངས་བཞད་པའི་རྣམ་འགྲེལ་ལེའུ་དང་པོའི་མཐའ་དཔྱོད་ཅུང་ཟད་དང༌། ལམ་རིམ་གླང་སྨྱོན་འདུལ་བའི་ལྕགས་ཀྱུ་དང༌། མདོ་རྒྱན་སྦྱར་ཚུལ་དང༌། མཛོད་རྩ་སྡོམ་རྣམས་ཀྱི་དཔེ་ཁྲིད་དང༌། བཀའ་པོད་ལྔའི་རྩ་བ་བཅས་ཀྱི་ཁྲིད་ལུང༌། ཨ་ཁུ་འཇམ་དབྱངས་རྒྱ་མཚོའི་མདུན་ནས། འགྲེལ་བ་དོན་གསལ་དང་མདོ་སྡུད་པ་སྦྱར་ཚུལ། སྤྱོད་འཇུག་དང༌། དྲང་ངེས་ལེགས་བཤད་སྙིང་པོའི་སེམས་ཙམ་བསྐོར་དང༌། བློ་རིག །དོན་བདུན་ཅུ་སོགས་ཀྱི་དཔེ་ཁྲིད་དང༌། ཨ་ཁུ་གྲགས་པ་སང་གི་མདུན་ནས། མཛོད་རྩ་སྡོམ་དང༌། དབུ་མ་ལུང་རིགས་སྒྲོན་མེ། གཅིག་དུ་བྲལ་སོགས་ཀྱི་དཔེ་ཁྲིད་དང༌། ཨ་ཁུ་དཔལ་ལྡན་སང་གི་མདུན་ནས། སྡོམ་གསུམ་དང༌། གཞི་གསུམ་ལག་ལེན། དབུ་མ་ལུང་རིགས་སྒྲོན་མེ། ཕར་ཕྱིན་མཐའ་དཔྱོད་ཀྱི་ནང་ནས་ཚན་པ་ཁ་ཤས་བཅས་གསན་བསམ་རྒྱ་ཆེར་མཛད། དགུང་ལོ་ཉེར་བདུན་ལ་ཕེབས་པའི་ས་ག་ཟླ་བའི་ཚེས་བརྒྱད་དེ། སངས་རྒྱས་རབ་ཏུ་བྱུང་བའི་དུས་ཆེན་ངོས་འཛིན་མི་འདྲ་བ་བཞུགས་མོད་ཀྱི། རྒྱལ་བ་དགེ་འདུན་གྲུབ་ཀྱི་ལུགས་ལྟར་ན། ས་ག་ཞེས་གྲགས་ཧོར་ཟླ་བཞི་བ་ཡི། །དཀར་བོའི་ཕྱོགས་ཀྱི་ཚེས་པ་བརྒྱད་ལ་ནི། །རབ་ཏུ་བྱུང་བའི་དུས་ཆེན་ཡོད་པར་ངེས། །ཞེས་གསུངས་པ་ལྟར་གྱི་སངས་རྒྱས་བཅོམ་ལྡན་འདས་རྒྱལ་བ་མཉམ་པ་མེད་པ་ཤཱཀྱའི་དབང་པོ་རབ་ཏུ་བྱུང་བའི་དུས་ཆེན་དང་བསྟུན་ནས། གནས་བརྟན་འདུལ་བ་འཛིན་པ་ཆེན་པོ་སྨད་སོག་བསོད་ནམས་ཀྱིས་མཁན་སློབ་སྦྲག་མ་དང༌། གཞན་ཡང་ལས་ཀྱི་ཁ་བསྐོང་གི་དགེ་འདུན་མཚན་ཉིད་ཚང་བའི་དབུས་སུ་སོ་སོར་ཐར་བའི་སྡོམ་པ་ཐམས་ཅད་ཡོངས་སུ་རྫོགས་པ་དགེ་སློང་བསྙེན་པར་རྫོགས་པའི་སྡོམ་པ་ཡང་དག་པར་མནོས་ཏེ། རྗེ་ཏཱ་ར་ནཱ་ཐའི་རང་རྣམ་རྒྱས་པ་ལས། ཁམས་གསུམ་བདག་པོ་སྔོན་ཡང་ལན་བརྒྱར་ཐོབ། །ཚུལ་ཁྲིམས་རིན་ཆེན་རྙེད་པ་བརྒྱ་ལ་འགའ། །སྣམ་སྦྱར་རྒྱལ་མཚན་བསྒྲེང་པའི་འོད་དམར་གྱིས། །མཐའ་དག་ས་འདི་གཅིག་ཅར་ཟིལ་གྱིས་གནོན། །ཞེས་པ་ལྟར་ངུར་སྨྲིག་གི་རྒྱལ་མཚན་སྣམ་སྦྱར་ཐོགས་པ་བླ་ན་མེད་པ་ཐུབ་པ་ཤཱཀྱའི་རྒྱལ་བོའི་རྒྱལ་ཚབ་དམ་པའི་སྐུར་བཞེངས་སོ། །གནས་བརྟན་ཉེ་བར་འཁོར་གཉིས་པ་བཤེས་གཉེན་རིན་པོ་ཆེ་གང་གི་སྡོམ་པའི་མཁན་བརྒྱུད་ཅིག་འགོད་ན། སློབ་མ་སློབ་བརྒྱུད་རྣམས་རང་གི་སྡོམ་བརྒྱུད་གསལ་བའི་དགོས་པ་ཡོད་སྙམ་ནས། མིང་ཙམ་སྨྲོས་ན། སྤྱིར་བོད་ཉིད་ལ། སྨད་འདུལ། སྟོད་འདུལ། བར་འདུལ་ཞེས་བྱུང་བ་ལས། བར་འདུལ་ཁ་ཆེའི་པཎ་ཆེན་ཤཱཀྱ་ཤྲཱི་ནས་བརྒྱུད་པ་དེ་ཉིད་ཡིན། དེའི་རིམ་པ་ནི། སྟོན་པ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པ། ཤཱ་རིའི་བུ། སྲས་སྒྲ་གཅན་འཛིན། བྲམ་ཟེ་སྒྲ་གཅན་འཛིན། མགོན་པོ་ཀླུ་སྒྲུབ། ཡོན་ཏན་བློ་གྲོས། རཏྣ་མི་ཏྲ། དྷརྨཱ་པཱ་ལ། གུ་ན་མ་ཏི། ཆོས་ཀྱི་ཕྲེང་བ། ཞི་བའི་འབྱུང་གནས་སྦས་པ། ཁ་ཆེ་པཎ་ཆེན་ཤཱཀྱ་ཤྲཱི། བྱང་ཆུབ་དཔལ། བདེ་བ་དཔལ། མཁན་ཆེན་གྲགས་པ་གཞོན་ནུ། བུ་སྟོན་རིན་ཆེན་གྲུབ། གྲགས་པ་རྒྱལ་མཚན། ཤེར་འབྱུང་བློ་གྲོས། ཡེ་ཤེས་གྲགས་པ། བློ་གྲོས་ལེགས་བཟང༌། བཀྲ་ཤིས་ལྷུན་པོ་པཎ་ཆེན་དམ་ཆོས་ཡར་འཕེལ། པཎ་ཆེན་སྐུ་ཕྲེང་བཞི་བ་བློ་བཟང་ཆོས་རྒྱན། སྔགས་ཆེན་དཀོན་མཆོག་རྒྱལ་མཚན། པཎ་ཆེན་བློ་བཟང་ཡེ་ཤེས། ཡོངས་འཛིན་བློ་བཟང་བཟོད་པ། དཀའ་ཆེན་བློ་བཟང་ཆོས་འཕེལ། པཎ་ཆེན་སྐུ་ཕྲེང་དྲུག་པ་བློ་བཟང་དཔལ་ལྡན་ཡེ་ཤེས། རྒྱལ་དབང་སྐུ་ཕྲེང་བརྒྱད་པ་བློ་བཟང་འཇམ་དཔལ་རྒྱ་མཚོ། པཎ་ཆེན་སྐུ་ཕྲེང་བདུན་པ་བློ་བཟང་དཔལ་ལྡན་བསྟན་པའི་ཉི་མ་ཕྱོགས་ལས་རྣམ་རྒྱལ། ཀུན་མཁྱེན་འཇམ་དབྱངས་བཞད་པ་སྐུ་ཕྲེང་གསུམ་པ་རྗེ་བཙུན་བློ་བཟང་ཐུབ་བསྟན་འཇིགས་མེད་རྒྱ་མཚོ། ༼འདི་བར་རྗེ་ཤེས་རབ་རྒྱ་མཚོའི་གསན་ཡིག་ལྟར་ཡིན། ༽འདུལ་བ་འཛིན་པ་ཆེན་པོ་བློ་བཟང་ཚུལ་ཁྲིམས་རྒྱ་མཚོ། ༼ཐོབ་ཡིག་ཡོངས་འཛིན་དམ་པའི་ཞལ་ལུང་བདུད་རྩིའི་ཆུ་རྒྱུན་ན་གསལ༽འདུལ་བ་འཛིན་པ་ཆེན་པོ་རྗེ་འཇིགས་མེད་འཕྲིན་ལས་རྒྱ་མཚོ། དགེ་བཤེས་འཇིགས་མེད་རྒྱ་མཚོ། དེ་ནས་གནས་བརྟན་འདུལ་བ་འཛིན་པ་མཁས་པའི་དབང་པོ་སྨད་སོག་བསོད་ནམས་སམ་འཇིགས་མེད་བསོད་ནམས་རྒྱ་མཚོ་ཞེས་བྱ་བའི་ཞལ་སྔ་ནས། བཤེས་གཉེན་དམ་པ་འདི་ཉིད་ཀྱིས་ཡོངས་སུ་མནོས་ཏེ་བརྒྱུད་པ་གསེར་རིའི་ཕྲེང་བ་ལྟ་བུ་བར་མ་ཆད་པ་ཡིན་ནོ། །གཞན་ཡང་དམ་པ་གང་གི་མདུན་ནས། འཇམ་དབྱངས་བཞད་པའི་ཕར་ཕྱིན་མཐའ་དཔྱོད་ནང་ནས་སྡེ་ཚན་ཁ་ཤས་དང། དགེ་འདུན་ཉི་ཤུ་དང༌། བསམ་གཟུགས་སོགས་དང༌། དུས་འཁོར་བ་ཤེས་རབ་ཀྱི་མདུན་ནས། སྒྲ་མདོ་རྩ་བ་དང༌། འདར་ལོའི་སྒྲ་ཊཱིཀ་ཆ་ཚང་དང༌། སྐར་རྩིས་ཀུན་འདུས་ནོར་བུ་དང༌། རྒྱ་རྩིས་སོགས་གསན་བསམ་གནངས། ལ་ལས་ཟུར་ཟ་ལྟ་བུའི་ཚིག་གིས། དངོས་གྲུབ་དཔལ་གྱིས་བཀའ་པོད་ལྔ་ཅིག་ཅར་སྦྱོང་ལུགས་འཛུགས་ཀྱིན་ཡོད་པ་རེད་ཅེས་སྨྲས། འོན་ཀྱང་དུས་འཁོར་གྲྭ་ཚང་གི་རྩིས་ལ་ཆེད་སྦྱོང་པ་དག་གིས་ཀྱང་ཁོང་རིན་པོ་ཆེས་གཞུང་ཆེན་ཁག་དུ་མ་དང་ལྷན་གཅིག་ཏུ་ཞར་ལ་སློབ་པའི་རྗེས་སུ་ཡང་ཟིན་མི་ནུས་པའི་བློ་གྲོས་ཀྱི་འཇུག་པ་རྣོ་མྱུར་ཟབ་པ་འགྲན་ཟླ་དང་བྲལ་བ་ལ་ཡིད་མ་ཆེས་པར། ཁྱོད་ཀྱིས་སྦྱང་བྱ་ཐམས་ཅད་སྔོན་ནས་གཞན་དུ་སློབ་ཟིན་འདུག་ཅེས་གཏམ་གླེང་བྱས། ལོ་དེར་སྨན་པ་གྲྭ་ཚང་གི་ཚོགས་ཁང་ནང་དུ་གུང་ཐང་དྲུག་པ་བསྟན་པའི་དབང་ཕྱུག་མཆོག་གི་མདུན་ནས། མི་འཁྲུགས་པ་དང༌། སྨན་བླ། འཇམ་པའི་དབྱངས་ཀྱི་རྗེས་གནང་སོགས་ཐོབ། འདི་བསྐོར་ལ་དོན་གཉེར་ཅན་འགའ་རེར་བསྭེ་བསྡུས་དང༌། སྐར་རྩིས་ལྔ་བསྡུས་ཀྱི་དཔེ་ཁྲིད་ཀྱང་མཛད། སྐབས་འདིར་བླ་བྲང་བཀྲ་ཤིས་འཁྱིལ་བ་ནས་ཞལ་ཚོར་ཞིང༌། ཕྱིས་གདན་སར་ཡང་ལྷན་གཅིག་ཏུ་བཞུགས་པའི་ལྷ་རམས་དགེ་བཤེས་ཤིག་གི་ཞལ་སྔ་ནས་གསུང་རྒྱུར། ཁོང་བླ་བྲང་དུ་སློབ་གཉེར་མཛད་དུས་ནས་ད་ལྟའི་བར་དུ་ངོ་ཤེས་པ་ཡིན་པས་ཆ་རྒྱུས་ཆེ་ཙམ་པ་ཞིག་ཡོད། ཁོང་གི་བརྩོན་འགྲུས་ལྟ་བུ་ཞིག་ད་ལྟའི་བར་དུ་དངོས་སུ་མཐོང་མ་མྱོང་པ་ཡིན། ཀུན་སྤྱོད་ཡང་ཚང་མ་ལ་ཧ་ལས་སོང་བ་རེད། མཚམས་ལན་རེར་ཁོང་གི་སློབ་གཉེར་སྡུག་རུས་མཛད་ལུགས་མཐོང་ཡོང་དུས་རང་གིས་རང་ལ་ངོ་གནོངས་འོང་པ་ཞིག་དངོས་གནས་ཡིན། མཚམས་ཤིག་ནས་གམ་ལ་བཅར་དགོས་ན་ཡང་དོགས་མ་བདེ་བ་འདྲ་ཞིག་ཆགས་སོང་ཞེས་གསུངས་སོ། ། འགའ་ཞིག་ཆུང་ནས་དམ་པར་བཏགས་ཏེ་ཕྱི་འགྱིང་ནང་ཁེངས་དྲེགས་པས་ནོན་དེ་རྣམ་ཐར་མིན། ། ལ་ལས་མོ་ལུང་རྫུན་གྱིས་ལྟ་སྟངས་བགྲད་དེ་བཅོས་མའི་འགྲོ་དོན་དེ་ཡང་རྣམ་ཐར་མིན། ། སྒྲོ་སྐུར་མེད་པར་ཆོས་ལ་བརྩོན་ཞིང་བསླབ་ལ་དགྱེས་པས་ལུས་དང་སྲོག་ལ་མ་ལྟོས་པའི། ། འདི་འདྲའི་གཏམ་ནི་གང་གིས་དད་པར་བྱས་དེའང་ཐར་ལམ་སྦྱིན་བྱཻད་ཀྱིས་ན་རྣམ་ཐར་ཡིན། ། སྙིགས་དུས་ཀྱི་བསྟན་པའི་གསལ་བྱེད་ཆེན་པོ་ངག་དབང་འཇིགས་མེད་དངོས་གྲུབ་དཔལ་བཟང་པོའི་མཛད་བཟང་བསླབ་གསུམ་ནོར་བུའི་གླིང་ཁ་ཞེས་བྱ་བ་ལས་མདོ་སྨད་ཀྱི་གྲྭ་ས་འགར་སྲོག་ལ་མ་ལྟོས་པའི་དཀའ་སྤྱད་དང་དབང་ལུང་གསན་བཞེས་གྱི་རྣམ་ཐར་བསྐོར་གྱི་མདོར་བསྡུས་པ་སྟེ་བརྒྱད་པའོ། ། རིང་ནས་ཐུགས་ལ་བརྣག་པའི་འདུན་མ་ལྟར་རྒྱ་གར་འཕགས་པའི་ཡུལ་དུ་རྟོལ་བའི་རྣམ་ཐར་བསྐོར།རྒྱ་གར་འཕགས་པའི་ཡུལ་ནི། རང་རེ་དག་གི་སྟོན་མཆོག་ཤཱཀྱའི་དབང་པོས་མི་མཇེད་འཇིག་རྟེན་གྱི་ཞིང་འདིར་གཟིགས་པ་ལྔའི་སྒོ་ནས་འགྲོ་བའི་དོན་དུ་མཆོག་གི་སྤྲུལ་སྐུའི་མཛད་པ་བསྟན་པའི་ཞིང་མཆོག་ཁྱད་པར་ཅན་ཡིན་ལ། སྟོན་པ་བཀའ་དྲིན་ཅན་གྱི་རྣམ་པར་ཐར་བ་ལས་བྱུང་བའི་མཛད་ཆེན་ཐམས་ཅད་སྟོན་པའི་གནས་མཆོག་མ་ལུས་པ་ཡུལ་གྲུ་དེ་ན་ཡོད་པར་མ་ཟད། ཐ་ན་མདོ་སྡེ་ཆེ་ཆུང་གི་གླེང་གཞི་དག་ལས་བྱུང་བའི་གནས་ཕལ་ཆེར་ཞིག་ཀྱང་རྒྱ་གར་གྱི་ཡུལ་ལུང་དེ་ན་ཡོད་པར་སྨོས་ཅི་ལ་དགོས། སྔོན་བྱོན་བོད་ཀྱི་མཁས་གྲུབ་དམ་པ་མང་པོ་ཞིག་ཀྱང༌། ཆོས་ལ་གཞོལ་བ་ན་བཅོམ་ལྡན་འདས་འཁོར་བཅས་ཀྱིས་བྱིན་གྱིས་བརླབས་པའི་གནས་མཆོག་དེར་འགྲོ་འདོད་ཀྱི་འདུན་པ་ཟློག་མེད་དུ་བྱུང་བར་གསུངས་པའི་རྣམ་ཐར་ཧ་ཅང་མོད་པ་དང་ཆ་མཐུན་པ་ལྟར། ཆོས་དང་སློབ་གཉེར་ལ་དམིགས་པ་མ་ཡིན་པར། ཕྱག་བསྐོར་ཙམ་གྱི་སླད་དུ་ཡིན་ཡང་གནས་དེར་བརྟོལ་ཐུབ་པའི་རེ་བ་ནི་ནང་བསྟན་ཆོས་ལུགས་པ་མང་པོ་ཞིག་གི་ཡིད་ཀྱི་རེ་བ་ཐུན་མོངས་པ་ཞིག་ཏུ་སྣང༌། བཤེས་གཉེན་རིན་པོ་ཆེ་གང་ཉིད་ལ་ཡང་རིང་མོའི་དུས་ནས་གནས་མཆོག་འཕགས་པའི་ཡུལ་དེར། མཇལ་བསྐོར་ཙམ་གྱི་སླད་དུ་ཡང་བརྟོལ་འདོད་ཧ་ཅང་ཆེ་བའི་ཁར། ཕྱིས་སུ་སློབ་གཉེར་ལ་བརྩོན་པའི་སྐབས་ན། འཕགས་ཡུལ་གྱི་གདན་ས་ཆེན་པོ་ཁག་གི་མཚན་གྱི་སྙན་པ་མང་པོ་ཞིག་ཡང་ཡང་ཐོས་འཕྲལ། སྔར་ལས་ཀྱང་གནས་དེར་ཕྱིན་འདོད་ཀྱི་རེ་བ་ལྷག་པར་མཆེད་དེ། དེ་ཡང༌། མི་སུ་ལ་ཡིན་པའི་དབང་དུ་བྱས་ཀྱང༌། བདེ་སྡུག་བར་མའི་འཚོ་བ་མང་པོ་ཞིག་རང་གིས་བསགས་པའི་ལས་རིམ་པར་བསྟར་བའི་དབང་གིས་བཟློག་ཏུ་དཀའ་བར་འབྱུང་ངེས་ལྟ་བུའི་ཚུལ་དུ་སྣང་ལ། ད་དུང་གྲོགས་དང་ཉེ་དུ། བླ་མ་དགེ་བའི་བཤེས་གཉེན་ཐམས་ཅད་ཀྱང་ལས་ཀྱིས་གང་ལ་ཕོག་པ་ཞིག་ཡོད་པར་མ་ཟད། ཐོག་མར་གང་ཞིག་ནས་སྐྱེས་པ་དེ་ཡང་ལས་ལ་རག་ལས་པ་དང༌། བར་དུ་གང་ཞིག་ནས་ནར་སོན་དགོས་པ་དང༌། ཐ་མར་གང་དུ་བྱ་བ་ཇི་ལྟ་བུའི་གཞུག་སྐྱོང་དགོས་མིན་ཐམས་ཅད་ཚེ་འདི་དང་ད་ལྟར་བསགས་པའི་ལས་ལས་བྱུང་བ་ཡང་ཡོད་པ་སྲིད་མོད། ཕལ་ཆེར་ནི་སྔར་ནས་བསགས་པའི་ལས་ཀྱིས་ཡོངས་སུ་རིས་སུ་བཅད་ཟིན་འདུག་པ་འདྲ་སྟེ། འདུལ་བའི་གླེང་གཞི་དང༌། མདོ་སྡེ་ལས་བརྒྱ་པ། མདོ་མཛངས་བླུན་སོགས་ལ་བལྟས་པས། གང་ཞིག་གང་གི་ཁྱིམ་དུ་སྐྱེས་པ་དང༌། གང་ཞིག་གང་གི་ཕ་མར་གྱུར་ཅིང་བུ་དང་བུ་མོར་བཙས་པ་དང༌། འཚོ་བ་དབུལ་ཕྱུག་བར་མ་སོ་སོར་རོལ་དགོས་པ་དང༌། བུད་མེད་གང་དག་འཕྱོན་མ་ནས་དགེ་སློང་མའི་བར་དང༌། སྐྱེས་པ་གང་དག་རྐུན་པོ་དང་བཤན་པ་ནས་དགྲ་བཅོམ་པའི་བར་མངོན་དུ་བྱས་པ་ཐམས་ཅད་ལ། སྔོན་འདི་བྱས་པས་ད་ལྟ་འདི་བྱུང་ངོ་ཞེས་སོ་སོར་ལས་ཀྱི་རྣམ་བཞག་རྒྱ་ཆེར་གསུངས་པ་ལྟར། ཟས་ཁམ་གང་དང་གོས་སླན་པ་ཙམ་འབྱུང་བ་ནས། དགེ་སློང་གང་ཞིག་ལ་བསོད་སྙོམས་སུ་རྒྱུ་བ་ན་ཆོས་དང་མཐུན་པའི་རྙེད་པ་བརྙེས་མིན་ཡན་ཆད་ལས་ཀྱིས་བསྐོས་ཐང་ཁོ་ནར་གསུངས་པ་ཐམས་ཅད་ལས་ངེས་པ་འདྲོངས་ཐུབ་པོ། །དེས་ན། སྤྱིར་ནི་མཁས་གྲུབ་བླ་མ་གོང་མ་ཧ་ཅང་མང་པོ་ཞིག་དང༌། བཤེས་གཉེན་བཀའ་དྲིན་ཅན་མཚུངས་པ་མེད་པའི་སྡེ་འདི་ལྟ་བུ་དག་ལ་ལས་ཀྱིས་འཕེན་པ་ཡོད་པར་མི་སྙམ་སྟེ། འོན་ཀྱང༌། ཐུན་མོང་གི་ངོར་ནི་རང་རང་གི་ལས་སྨོན་ཐེབས་པའི་གནས་དང་བླ་མ་སོ་སོར་མི་འདྲ་བ་ཡོད་པ་ལྟར། བླ་མ་སྤྱན་རས་གཟིགས་དབང་གཙོས་དམ་པ་གང་ཉིད་ཀྱི་སྐུ་ཚེ་དེར་ངེས་པར་འཕྲད་དགོས་ངེས་ཀྱི་མཚན་ཉིད་ལྡན་པའི་བཤེས་གཉེན་དུ་མ་ཞིག་འཕགས་ཡུལ་ན་ཡོད་པ་དང༌། སྨོན་ལམ་བསགས་སྦྱངས་ཀྱི་རྟེན་མཆོག་བྱང་ཆུབ་སྙིང་པོ་གཙོ་བོར་གྱུར་བའི་གནས་དང་རྟེན་དུ་མ་ཞིག་ཀྱང་ཡུལ་དེ་ན་ཡོད་པས། སྨོན་ལམ་དང་ལས་ཀྱིས་ཕོག་པ་གང་ཡིན་པ་དེ་ནི། རིང་ན་གནས་ཀྱང་ཉེ་བ་ཡིན་ལ། ལས་སྨོན་དང་མ་འབྲེལ་བ་མང་པོ་ཞིག་ནི་གམ་ན་ཡོད་ཀྱང་རིང་བའི་ངང་ཚུལ་ནི་བསྒྱུར་དུ་མེད་པ་ལས་འབྲས་ཀྱི་ཆོས་ཉིད་གྲུབ་སྟངས་ཤིག་རེད། སྤྱིར་སངས་རྒྱས་ཐམས་ཅད་མཉམ་པ་རྣམ་པ་བཞིས་མཉམ་པ་དང༌། གསང་སྔགས་ཀྱི་དཀྱིལ་འཁོར་ཐམས་ཅད་དོན་དམ་ལྷན་ཅིག་སྐྱེས་པའི་ཡེ་ཤེས་གཅིག་གི་རྣམ་རོལ་ལས་མེད་ཀྱང༌། གང་ཟག་སོ་སོས་ལས་ཀྱིས་གང་ལ་ཕོག་མིན་གྱི་ཧེ་བག་འབྱུང་ན། གཞན་ལ་ལྟ་ཅི་སྨོས་ཡིན་པས། མདོ་སྡེ་ལས་བརྒྱ་པར། སྨོན་ལམ་གྱི་མཐུ་ལས་ཡིན་ཏེ། ཞེས་ལན་དུ་མར་འབྱུང་བ་ལྟར། སྨོན་ལམ་རྣམ་པར་དག་པ་དང་འབྲེལ་བའི་རྣམ་དཀར་བསོད་ནམས་ཀྱི་ཕུང་པོ་ལ་འབད་འབུངས་ནི་སུས་ཀྱང་གནད་ཀྱི་དམ་པར་འཛིན་དགོས་པར་སེམས་པ་ཞིག་རིང་ནས་བརྣག་པའི་དྲན་ཚོད་ཙམ་ཞོར་ལ་ཐལ་བ་ཡིན་ནོ། །བཤེས་གཉེན་རིན་པོ་ཆེ་གང་ལ་ཆུང་དུས་ནས་རྒྱ་གར་འཕགས་པའི་ཡུལ་དུ་བརྟོལ་འདུན་ལྷན་སྐྱེས་སུ་མངའ་ཞིང༌། དེ་ནས་བླངས་པའི་ཆོས་དང་གདམས་པས་རྒྱུད་ཚིམས་པའི་བདུད་རྩིའི་འབྲས་བུས། ད་ལྟའི་ཆར་འགྲོ་བའི་གསོས་སྨན་རྨད་དུ་བྱུང་བར་འགྱུར་བ་ལ་བལྟས་ན། ཐུགས་བསྐྱེད་རྣམ་པར་དཀར་བའི་སྨོན་ལམ་རྒྱ་ཆེན་པོ་ཞིག་དང་འབྲེལ་བའི་དབང་གིས་ཀྱང་བཤེས་གཉེན་གང་ཉིད་འཕགས་ཡུལ་དུ་ཕྱིན་པ་ནི་འགོག་ཏུ་མེད་པ་ཞིག་ཡིན་ནོ་སྙམ་མོ། །དེས་ན། ཕྱི་ལོ། ༡༩༩༧ རབ་གནས་མེ་གླང་ལོ་སྟེ་དགུང་གྲངས་ཉི་ཤུ་རྩ་བདུན་གྱི་ཟླ་བ་བརྒྱད་པའི་དབྱར་མཐོང་གི་སྐབས་སུ་ཡུན་རིང་ནས་ཐུགས་དགོངས་བཏང་བ་ལྟར། རྔ་ཡུལ་མཚན་ཉིད་དགོན་པ་ནས་ལུང་དཀར་དགོན་གྱི་གྲྭ་བ་ཞིག་དང་མཉམ་དུ་རྒྱ་གར་འཕགས་ཡུལ་དུ་འགྲོ་བའི་ལམ་ལ་ཆས་ཤིང༌། ལམ་ཁར་ལྷ་ས་དང་དེའི་ཉེ་འཁོར་གྱི་གནས་ཆེན་ཁག་ཏུ་ཉིན་བཅོ་ལྔ་ཡས་མས་སུ་གནས་མཇལ་དང་མཆོད་འབུལ་སྨོན་ལམ་བྱས། ལྷག་པར་དུ་མདོ་སྔགས་གཞུང་ལུགས་རྒྱ་མཚོ་ལྟ་བུ་ལ་སློབ་གཉེར་གྱི་བར་ཆད་གང་ཡང་མི་འབྱུང་བ་དང༌། སངས་རྒྱས་ཀྱི་བསྟན་པ་དང་འགྲོ་བ་སྤྱི་དང༌། ཡང་དགོས་སུ་ངེས་དོན་སྙིང་པོ་ཕྱིར་མི་ལྡོག་པའི་ཀུན་མཁྱེན་ཇོ་ནང་བ་ཆེན་པོའི་རིང་ལུགས་སླར་ཡང་གསལ་བར་བྱེད་རྒྱུ་དེ། སྐབས་དེ་ནས་ཀྱང་སྨོན་འདུན་གྱི་དྭངས་མར་བཟུང༌། ལྷ་ས་ནས་རྒྱ་གར་དུ་འགྲོ་མི་བཞི་བཅུ་ལྷག་དང་ལྷན་དུ་འདུས་ནས་གཙང་གི་ཕྱོགས་ནས་རིམ་པར་ཤར་ཁུམ་བུ་སོགས་བརྒྱུད་དེ་ཉིན་བཅུ་གཉིས་སུ་ཞབས་ཐང་ལ་བྱོན་ཏེ་བལ་བོའི་རྒྱལ་སར་བོད་ཀྱི་སྣེ་ལེན་ཁང་དུ་འབྱོར། ཉིན་བཅུ་གཉིས་པོའི་རིང་ཕོ་རོགས་ཤིག་འབྲལ་མེད་དུ་སྐྱེལ་མའི་ཚུལ་དུ་བལ་བོའི་བར་དུ་བྱུང༌། དེ་ཡང་ལམ་ལ་འགྲོ་བ་ན་སྔོན་དུ་འཕུར་ནས་ངལ་གསོའི་གནས་སམ། ཇ་བསྐོལ་གནས། ཞག་ལ་སྡོད་ས་སོགས་སུ་སྒུག་འདུག་པ་ལྟ་བུའི་རྣམ་པས་སྐད་སྣ་ཚོགས་སྒྲོག་བཞིན་པ་ཤིན་ཏུ་ངོ་མཚར་བ་ཞིག་མཐུན་སྣང་དུ་གྲུབ། དེ་ནི་གསང་སྔགས་ཀྱི་མཁའ་འགྲོ་རྣམས་འདུས་ན་རྒོད་སྒྲོ་འཐོར་བ་དང་རྒོད་བྱུང་བ་དང༌། ཡེ་ཤེས་ཀྱི་མགོན་པོ་ནག་པོ་ཆེན་པོ་སོགས་ཀྱིས་སྲུང་ན་བྱ་རོག་གིས་ལས་མཛད་པ་ཞིག་བཤད་ཚོད་འདུག་པ་དེ་ཡང༌། བདེན་པའི་ངང་ཚུལ་གྱི་གཏམ་ཞིག་ཏུ་སྣང་སྟེ། རྗེ་ཏཱ་ར་ནཱ་ཐའི་རང་རྣམ་མ་བཅོས་ལྷུག་པར། སྐབས་ཤིག་མཆོད་ཁང་རྩེ་ནས་རྒྱུད་སྡེ་ལྔའི་དཀྱིལ་ཐང་ཆེན་མོ་དེ་བླངས་ནས་ལྟ་ཡིན་ཡོད་སྐབས། ལྷ་མགོན་མྱུར་མཛད་མགོན་པོའི་སྐུ་དང་ངེད་རང་གི་བར་དེར་བྱ་རོག་ཅིག་ལྷུང་ཐབས་སུ་བབས། ཞེས་དང༌། ད་དུང་ལྷ་སའི་ར་མོ་ཆེའི་གཙུག་ལག་ཁང་གི་དར་ཤིང་སློང་པ་ན་ཡང་གློ་བུར་དུ་བྱ་རོག་ལྷག་ནས་སྐད་སྙན་བསྒྲགས་པ་དང༌། རྟག་བརྟན་དམ་ཆོས་གླིང་གསར་འདེབས་སྐབས་སུ་ཡང༌། ཡེ་ཤེས་ཀྱི་མགོན་པོས་གྲོགས་དན་མཛད་ཚུལ་ལ་བྱ་རོག་ཐོན་པ་མང་པོ་གསུངས་པ་དང༌། རྒྱ་གར་ཆོས་འབྱུང་དུ། བྲམ་ཟེ་ཐུབ་དཀའ་ནག་པོས་ཡུལ་དང་ཡུལ་ཐམས་ཅད་དུ་ཕྱིན་ཏེ། སངས་རྒྱས་པའི་བསྟན་པ་རྩོད་པས་ཕམ་པར་བྱས་ནས། དཔལ་ན་ལེནྡྲར་འོངས་པ་ནས་སངས་རྒྱས་པ་རྣམས་ཀྱིས་རྩོད་པར་མ་ནུས་ནས། སློབ་དཔོན་ཨཱརྱ་དེ་ཝ་སྤྱན་དྲང་པའི་ཕྱིར་འཕྲིན་ཡིག་བྲིས་ཏེ་ནག་པོ་ཆེན་པོ་ལ་གཏོར་མ་བྱས་པ་ན། ནག་པོ་ཆེན་པོའི་རྡོ་སྐུ་རང་བྱོན་གྱི་ཐུགས་ཀ་ནས་བྱ་རོག་ཅིག་བྱུང་སྟེ། དེའི་མགུལ་པར་ཡི་གེ་བཏགས་པས་འཕུར་ཏེ་ལྷོ་ཕྱོགས་སུ་སོང་སྟེ་སློབ་དཔོན་ལ་གཏད་པས། སློབ་དཔོན་གྱིས་ཀྱང་འདུལ་བའི་དུས་སུ་མཁྱེན་ནས། ཞེས་སོགས་ལོ་རྒྱུས་མང་དུ་བྱུང་བ་ལྟར། སྟབས་སྟེས་དབང་ཙམ་མ་ཡིན་པའི་ངོ་མཚར་བྱ་རོག་གི་སྐྱེལ་མ་དེ་ཡང་ཆོས་སྐྱོང་གི་སྡོང་གྲོགས་གཡེལ་མེད་དུ་ཡོད་པའི་ལྟས་སུ་འཁུམས་སོ། །བར་ཆད་གང་ཡང་མ་བྱུང་བར་བོད་ཀྱི་སྣེ་ལེན་ཁང་དུ་བདེ་བར་འབྱོར་ནས་དེར་ཞག་གསུམ་ལ་བཞུགས། དེ་ནས་རྒྱ་གར་གྱི་རྒྱལ་ས་རྡི་ལི་ལ་ཕེབས་ཏེ་ཉིན་གཉིས་ཀྱི་སླད་ནས། རྡ་རམ་ས་ལ་གོང་ས་སྤྱན་རས་གཟིགས་དབང་མཇལ་དུ་བྱོན། དུས་སྐབས་དེར་ཐམས་ཅད་གཟིགས་པ་མཆོག་ཕྱི་རྒྱལ་དུ་ཕེབས་པ་དང་ཁེལ་བས་ཉིན་བཅུ་ཙམ་ལ་བསྒུག་དགོས་བྱུང་གསུངས། གོང་ས་ཐམས་ཅད་གཟིགས་པ་ཕྱིར་ཕེབས་པ་ལ་མཇལ་ཁ་དང་ཆོས་འབྲེལ་ཞུས། དེ་ནས་བོད་ཟླ་བཅུ་གཅིག་པར་དགའ་ལྡན་དུ་འཇང་དགུན་ཆོས་ཚོགས་སྐབས་སུ་རྒྱ་གར་ལྷོ་ཕྱོགས་དཔལ་ལྡན་འབྲས་དཀར་སྤུངས་ཀྱི་གདན་ས་སྒོ་མང་གྲྭ་ཚང་དུ་འབྱོར་བ་ཡིན་ནོ། ། སྔོན་བསགས་ལས་ཀྱིས་རིང་མོ་ནས་བསྐུལ་ཏེ། ། ཨུཏྤལ་ལོ་མ་རླུང་གིས་གཡོས་པ་བཞིན། ། གང་དུ་འདུན་པའི་འཕགས་པའི་ཡུལ་གྲུ་དེར། ། སྨོན་ལམ་སྟོབས་ཀྱིས་བདེ་བར་ལྷགས་པ་བྱུང༌། ། སྙིགས་དུས་ཀྱི་བསྟན་པའི་གསལ་བྱེད་ཆེན་པོ་ངག་དབང་འཇིགས་མེད་དངོས་གྲུབ་དཔལ་བཟང་པོའི་མཛད་བཟང་བསླབ་གསུམ་ནོར་བུའི་གླིང་ཁ་ཞེས་བྱ་བ་ལས་རིང་ནས་ཐུགས་ལ་བརྣག་པའི་འདུན་མ་ལྟར་རྒྱ་གར་འཕགས་པའི་ཡུལ་དུ་རྟོལ་བའི་རྣམ་ཐར་མདོར་བསྡུས་པ་སྟེ་དགུ་པའོ། ། ཡོངས་འཛིན་དམ་པའི་ཞབས་ཟུང་གཙུག་ཏུ་ཕོག་སྟེ་གུས་པ་ཆེན་པོས་ཚུལ་བཞིན་བསྟེན་པའི་བསྐོར་གྱི་རྣམ་ཐར།དེ་ནས་སྒོ་མང་གྲྭ་ཚང་གི་ཟུང་ཆུ་ཁམས་ཚན་དུ་ཞུགས་ཏེ། གནས་སྐབས་ཉིན་བཅུ་ཡས་མས་ལ་དོན་བདུན་ཅུའི་འཛིན་གྲྭའི་ནང་དུ་བཞུགས། སྐབས་དེར་གྲྭ་ཚང་ཆེན་མོ་དེའི་སྒྲིག་གཞི་ན། གསར་འབྱོར་བ་སླེབས་ན་དོན་བདུན་ཅུ་འཛིན་གྲྭའི་བར་གང་དུ་ཞུགས་ན་རང་མོས་དང༌། དེའི་གོང་དུ་ཞུགས་དགོས་ན་རྩོད་རྒྱུགས་བླངས་ཏེ་ཚད་གཞིར་ལོངས་མིན་ལྟ་དགོས་པ་ལྟར། རྩོད་རྒྱུགས་ཕུལ་ནས་ཕར་ཕྱིན་ལོ་རིམ་ལྔ་ལས་ལོ་རིམ་གསུམ་པ་གཞུང་གོང་མ་འཛིན་གྲྭར་ཞུགས། དོན་བདུན་ཅུ་དང༌། གཞུང་འོག་མ་འཛིན་གྲྭ་གཉིས་ཀྱི་ལོ་འཁོར་རྒྱུགས་སྤྲོད་རྣམས་ཀྱང་གཞུང་གོང་མ་དང་སྐབས་དང་པོའི་འཛིན་གྲྭའི་སྐབས་སུ་ལོ་རེ་བཞིན་ཉིས་རྒྱུགས་སྤྲད་ནས། རྒྱུགས་འབྲས་ཨང་དང་པོ་བླངས། མཁས་བཙུན་བཟང་པོའི་བདག་ཉིད་བཀའ་དྲིན་གྱི་ཁུར་ཆེན་པོས་ཡོངས་སུ་བསྐྱངས་པ་དགེ་བའི་བཤེས་གཉེན་ལྷ་རམས་པ་བློ་བཟང་དགེ་འདུན་མཆོག་གི་ཞལ་སྔ་ནས་ཀྱི་ཞབས་རྡུལ་སྤྱི་བོས་བླངས་ཏེ་བསམ་སྦྱོར་གཉིས་ཀྱིས་ཚུལ་བཞིན་དུ་བསྟེན། བཤེས་གཉེན་རིན་པོ་ཆེ་འདི་ཉིད་སྤྱིར་བླ་མ་བསྟེན་ཚུལ་གྱི་རྣམ་པར་ཐར་བ་ཧ་ཅང་ཞིབ་པ་དང༌། ཁྱད་པར་དུ་དགེ་བའི་བཤེས་གཉེན་དམ་པ་བློ་བཟང་དགེ་འདུན་འདི་ཉིད་ཀྱི་བཀའ་དྲིན་ལྷག་པར་བརྗོད་རྒྱུ་ཞིག་ཡིན། ཁོང་གིས་ཛ་འགོའི་རི་ཁྲོད་དུ་བཤད་གྲྭ་སྐྱོང་སྐབས་ཤིག་ལ། ཕྲན་ཁོང་གི་མདུན་སར་བཅར་ནས་ཞོར་འཕྲོས་ཀྱི་སྐད་ཆ་ཞིག་ཏུ། འཇམ་དབྱངས་བཞད་པའི་རྟགས་རིགས་ཀྱི་ཆོས་ཁྲིད་ཅིག་ཆོས་གྲོགས་ཤིག་གིས་སྒྲོག་གིན་འདུག་སྟེ། དེ་ཁྱེད་ཀྱི་དགེན་གྱི་གསུང་རེད་ཟེར་གྱིན་འདུག་ཞུས་པ་ན། དེ་ན་ཁོང་ལ་དེ་ཅིག་ལོན་ཐབས་ཀྱིས་དང་ཡིན་མིན་ཞིག་ལྟ་དགོས་གསུངས་པ་ལྟར། ཕྱི་ཉིན་ཞིག་ལ་ཁོང་གི་སར་ཁྱེར་བ་ན་རྩིས་འཕྲུལ་ནང་དུ་བཞག་ནས་བལྟས་དུས། རེད་ངའི་དགེན་གྱི་གསུང་རེད་གསུངས་ཏེ་གསུང་སྐད་ཐོས་པས་སྤྱན་ཆབ་འཁྲིགས་བཞིན་ཞལ་གྱི་མདོག་ཀྱང་སྐྱོ་ཤས་ཀྱི་ཉམས་གློ་བུར་དུ་ལྷགས་ཤིང༌། རིག་བྱེད་ཀྱི་གཟུགས་ལས་རིག་མིན་གྱི་ཐུགས་དཔོག་ནུས་པའི་མོས་གུས་ཁྱད་པར་ཅན་དང་ལྡན་པར་མཐོང་ཞིང༌། དེ་ནས་ཁོང་གི་སར་བཅར་དུས་ཐེངས་ཁ་ཤས་ལ་ངལ་གསོ་ཞོར་དུ་སྒྲ་དེ་བཏང་ནས་འདུག །ལན་གཅིག་ཞལ་སྔ་ནས། ཁྱེད་ཅག་གི་ངོས་ནས་ཀྱང་ཁོང་གིས་གསུང་བའི་སྒྲ་ལ་ཉན་ན་གཞན་དང་མི་གཅིག་པར་ངེས་པ་སྟེར་ཚབ་ཆེ་བ་ཞིག་ཡོད་སྙམ་པ་ཡིན། ཁ་ནས་གསུང་རྒྱུ་གཅིག་ཡིན་ན་ཡང་ཕན་ཐོགས་དང་མི་ཐོགས་ཀྱི་ཁྱད་ཆེན་པོ་ཡོད་པ་རེད། རང་གིས་དོན་རྟོགས་ནས་བརྗོད་པ་དང༌། གོ་ཡུལ་ཙམ་ཞིག་བརྗོད་པ་དང༌། ཚིག་ཟློས་པ་ཁོ་ནས་བཤད་པ་རྣམས་ཕ་རོལ་པོ་ལ་ཡང་གོ་བ་སྟེར་ཐུབ་མིན་ཁྱད་འགྱུར་ཆེན་པོ་ཡོད་པ་ཡིན། དགེ་རྒན་བཀའ་དྲིན་ཅན་འདི་བ་ཚང་གི་གསུང་ནི་ཀུན་ལས་ངེས་པ་སྟེར་ཚབ་ཆེན་པོ་ཅན་ཞིག་ཡིན། ངས་ཀྱང་ཁོང་གི་གསུང་སྐད་ཙམ་རྣ་ལམ་དུ་ཐོས་འདུག་ན་སེམས་ལ་སྤྲོ་མོ་འདྲ་རེད། དེས་ན་མང་པོ་ཞིག་སྒྲོག་བཞིན་པ་ཡིན་གསུངས་སོང༌། དེས་ནི་དེང་སང་གི་བླ་མ་གླ་བའི་འདུ་ཤེས་དང་ཆོས་ལ་གླ་རྩིའི་བསམ་པ་ཅན་གྱི་སློབ་གཉེར་བ་མང་པོ་ཞིག་ཡོངས་སུ་ཟིལ་གྱིས་མནན་པ་ཡིན་ཏེ། ཉིན་གྱི་ཁར་མཚན་བསྣན་ནས་གཞུང་ལུགས་ཁྲིད་པར་མ་ཟད། འགྲོ་ལུགས་འདུག་སྟངས་ཡན་ཆད་ཕ་མས་བུ་ཕྲུག་ལ་སློབ་པ་ལྟར་བྱས་ཀྱང༌། ཤེས་མེད་ཅི་མི་སྙམ་པའི་དཔེ་ཆ་བ་སྐད་པ་མང་པོ་ཞིག་མཐོང་རྒྱུ་འདུག་སྟེ། རྟེན་འབྲེལ་མགོ་ནས་མ་འགྲིག་ཟེར་བ་དེ་ངེས་པར་ཡིན་པ་འདྲ། དགེ་རྒན་བསྟེན་ཚུལ་དྲག་ཤོས་ཡིན་ཟེར་བའི་ནང་ན་ཡང༌། དགེ་རྒན་བཀའ་དྲིན་ཅན་གྱི་གསུང་སྐད་རྣ་བར་གོ་ན། སྐྱོ་བ་སེལ་བྱེད་དུ་འགྲོ་བཞིན་པ་ཇི་འདྲ་འདུག །གླུ་གཞས་དང་སྒྲ་སྙན་མོ་ཞིག་བཏང་ན་ཡིད་གཡོ་གཡོ་བ་བྱེད་པ་ལས། ངལ་གསོ་དུས་དང་རང་དགར་འདུག་དུས་དགེ་རྒན་བཀའ་དྲིན་ཅན་གྱི་གསུང་སྐད་བསྒྲགས་ནས་ཡིད་སེམས་གསོ་མཁན་མང་པོ་ནི་ཡོད་པར་མི་སེམས་ལ། ཁྱད་པར་དུ་ལོག་པར་རྟོག་པའི་མིག་ཅན་ཕྲན་ལྟ་བུས་ཀྱང་ད་སྔོན་བགྲང་བྱ་ཧ་ཅང་མང་པོ་ཞིག་ལ་ཆོས་ཁྲིད་ཞུས་འོང་བ་རེད་དེ། དེང་སང་ཁོང་ལྟ་བུ་ཟ་ངེ་ཟིང་ངེ་ལ་ཐུགས་གཏིང་ནས་ལོགས་པ་གཞན་སུ་ཡོད་སྙམ་པ་ཞིག་ཡིན། གླུ་གཞས་དང་སྒྲ་སྙན་མོ་སྒྲོག་པ་དང་གློག་བརྙན་ལེའུ་གཅིག་ལ་ལྟ་བ་ཕར་ཞོག །ཐ་ན་ཁོང་གི་ཕྱག་ཁྱེར་ཁ་པར་དང་རྩིས་འཕྲུལ་ནང་དུ་དེ་ཚོ་རྡོག་གཅིག་བླངས་པ་ཙམ་ཡང་ཡོད་མྱོང་མི་སྲིད་པ་ཡིན། སློབ་མ་རྣམས་དང་སྤང་ཐང་ན་སྐྱོ་བསང་ལ་ཕྱིན་སྐབས་སུ། རྩེད་མོ་ཁ་ཤས་ལ་ལྟ་བ་དེ་ཡང་སློབ་མ་རྣམས་ཀྱི་ངོར་མཐུན་འཇུག་བྱས་ཏེ་བཞུགས་པ་ལས། ཐུགས་མཚར་སྣང་དང་སྤྲོ་བ་ཤུགས་འབྱུང་དུ་མེད་པ་བལྟས་ཚོད་ཙམ་གྱིས་མངོན་ཐུབ་པ་ཞིག་ཡོད། རྒྱུན་ལྡན་དུ་བཞུགས་དུས་ཀྱང༌། རང་ཅག་ལ་མཚོན་ན་ཁམས་བསང་འདྲ་བྱས་ཏེ། ཕྱི་རོལ་ཀྱི་ཡུལ་ལ་བག་ཡངས་ཀྱི་རྣམ་པ་ལན་རེ་བསྟེན་ན་འཕྲོད་མོ་འདྲ་ཡོད་མོད། བཤེས་གཉེན་རིན་པོ་ཆེ་གང་ནི་ནང་དུ་ཡང་དག་སེམས་པ་ཁོ་ནས་སྐྱོ་བ་སེལ་བ་དང་བག་ཡངས་བྱེད་མཁན་ཞིག་ཡིན་གྱི། ཐ་མལ་རང་ཅག་གིས་དགའ་རྐྱེན་སྡུག་རྐྱེན་ཐམས་ཅད་ལས་རྣམ་པར་ཐར་བའི། ཐུགས་ངོགས་ཀྱི་འཚོ་བ་བསམ་གྱིས་མི་ཁྱབ་པ་ཞིག་གི་དགའ་སྟོན་གྱིས་རྒྱུད་ཡོངས་སུ་འགེངས་པར་རྒྱུས་ཡོད་ཐམས་ཅད་ཀྱིས་ཤེས་ཐུབ་རྒྱུ་ཞིག་ཡིན་པས། ཧ་ཅང་སྤོམ་ཡོར་གྱིས་བསྟོད་པ་བྱས་བཞག་པ་ཞིག་ལར་ནས་མིན་ནོ། །ཞེས་པ་ཞར་ལ་རང་གི་འཆར་སྣང་གི་སྐད་ཆ་ཙམ་འདིར་ཐལ་བ་ཡིན། ཕྱི་ལོ། ༢༠༠༨ བོད་རབ་གནས་ས་བྱི་ལོར་བཤེས་གཉེན་རིན་པོ་ཆེ་གང་ཉིད་ཀྱིས་ལུང་སྐྱ་དགོན་དུ་མཛད་འཕྲིན་རྒྱ་ཆེན་མཛད་པའི་སྐབས་སུ། བཀའ་དྲིན་ཆེ་བའི་དགེ་རྒན་བློ་བཟང་དགེ་འདུན་སྐུ་བསྙུན་བཞེས་ཏེ་དགོངས་པ་ཆོས་ཀྱི་དབྱིངས་སུ་བསྡུས། སྐུ་གྲོངས་རྒྱུར་ཐུག་ཐག་ཆོད་པའི་དུས་ཙམ་ན། བཤེས་གཉེན་རིན་པོ་ཆེ་ཉིད་ལ་ཕྱག་ཁྱེར་ཁ་པར་བརྒྱུད་དེ། ཁོ་བོ་ཡིན་ན་ནད་ཅིག་ཐེབས་པས་ད་ཕན་ཚེ་འདིར་འགྲོ་དོན་རྒྱ་ཆེན་འབྱུང་རྒྱུ་དཀའ་མོ་རེད་དེ། ཁྱོད་ཡིན་ན་མཛད་པ་འཕྲིན་ལས་འགྲོ་དོན་རྒྱ་ཆེན་འབྱུང་གིན་འདུག །མ་འོངས་པར་ཤུགས་བརྒྱབ་ནས་བསྟན་པ་དང་འགྲོ་བའི་བདེ་སྐྱིད་ཀྱི་དོན་དུ་ཕྱག་ལས་ལྷོད་མི་ཉན་ཞེས་སོགས། བླ་སློབ་ཐུགས་ཡིད་འདྲེས་ཤིང་བསྟན་དང་འགྲོ་བ་འབའ་ཞིག་ལ་སེམས་པའི་ངེས་པ་དོན་གྱི་སྐྱེས་བུ་དམ་པའི་རང་རྟགས་མངོན་པའི་གསུང་གི་ཐ་མ་བསྩལ། ཕྱི་ལོ། ༢༠༠༡ རབ་གནས་ལྕགས་སྦྲུལ་ལོ་སྟེ། དབུ་མ་གསར་བའི་ལོ་ནས་སྒོ་མང་མཁན་ཡོན་ཏན་དམ་ཆོས་མཆོག་ཀྱང་བསམ་སྦྱོར་གཉིས་ཀྱིས་ཚུལ་བཞིན་དུ་བསྟེན་པར་བྱས། དགེ་རྒན་འདིས་ནི་བླ་སློབ་ཀྱི་འབྲེལ་བ་མ་བྱུང་གོང་ནས་བཤེས་གཉེན་རིན་པོ་ཆེ་གང་ལ་ཐུགས་བརྩིས་ཆེ་བའི་གསུང་གླེང་མང་པོ་ཕེབས་མྱོང་མཁན་ཞིག་ཡིན་འདུག་ཅིང༌། དུས་ཕྱིས་སུ་ཡང་ཁ་ཁོག་མི་འཛིན་པར་བཀའ་སློབ་གསུང་མོལ་མང་པོས་སྒོ་ནས་ཉེ་བར་སྐྱོང་མཁན་ཞིག་ཡིན་པར་མ་ཟད། སུ་ལ་སྐད་ཆ་གསུང་ན་འཇིག་རྟེན་མཐུན་འཇུག་མེད་པར་ཆོས་པ་གཤའ་མའི་ངང་ཚུལ་ལྷན་སྐྱེས་སུ་མངའ་ཞེས། ཞལ་སྔ་ནས་ཡང་ཡང་གསུངས་པ་ཐོས། བཤེས་གཉེན་རིན་པོ་ཆེ་གང་ཉིད་ཀྱིས་ཆོས་ཐང་དགོན་པར་མཛད་འཕྲིན་སྐྱོང་སྐབས། ཕྱི་ལོ། ༢༠༡༦ རབ་གནས་མེ་སྤྲེལ་ལོའི་སྨད་ཅིག་ལ། མཁན་རིན་པོ་ཆེ་ཡོན་ཏན་དམ་ཆོས་མཆོག་ཞིང་མ་བརྗེས་པའི་ཉིན་ཤས་གོང་དུ། ཁོང་གི་ཉེ་གནས་ཀྱི་ཕྲིན་ཕྲན་ལས་གསུང་སྐད་གསལ་ལ་མི་གསལ་བའི་མཚམས་སུ་བཀའ་གསུང་འགའ་བསྐུར་བ་ཕྲན་ནས་ཐོས་པར། རྒྱལ་བ་རྫོགས་པའི་སངས་རྒྱས་ཀྱི་ལུང་རྟོགས་ཀྱི་བསྟན་པ་རིན་པོ་ཆེ་འདི་ཉིད་འཇིག་རྟེན་གྱི་ཁམས་འདིར་ཕན་བདེ་འབྱུང་བའི་གཞི་གཅིག་པུ་ལགས་ན། ད་ལྟའི་ཆར་བསྟན་པའི་སྙིང་པོ་ཉམ་ཆུང་ཞིང་ཉག་ཕྲ་བའི་གནས་སུ་ལྷགས་འདུག །ཁྱེད་ཀྱིས་ནི་ཐུགས་བསྐྱེད་བླ་ན་མེད་པའི་ངོས་ནས་བསྟན་འགྲོའི་དོན་དུ་འབད་འབུངས་ཡོད་དགུ་བྱེད་བཞིན་བདོག་པས། ཞུ་དགོས་གང་ཡང་མི་འཚལ་ཡང༌། རྒྱལ་བའི་བསྟན་པ་རིན་པོ་ཆེ་འཛིན་སྐྱོང་སྤེལ་གསུམ་བྱེད་པར་ཐུགས་ལྷོད་མ་གཏོང་ཞེས་ཞུ་འདོད་པ་དེ་ཁ་བརྡ་ཞིག་བྱས་པ་ཡིན། ཞེས་བཀའ་གསུང་གི་ཐ་མ་ཕུལ་འདུག་ལ། བཀའ་སློབ་དེ་ཐོས་ཕྲལ་བཤེས་གཉེན་རིན་པོ་ཆེ་ཉིད་ནས་སྤྱན་ཆབ་ཐེངས་མང་པོ་བཏོན་ཞིང༌། སྤྱིར་རྒྱལ་བའི་བསྟན་པ་རིན་པོ་ཆེ་ལ་ཤུགས་ལོས་རྒྱག་སྟེ། ད་སྔོན་ཡན་ཆད་ལ་ནུས་ཤུགས་ཡོད་དགུས་ནུས་པ་ཅི་ཡོད་ཅིག་སྒྲུབ་པའི་ཁུལ་བྱས་ཡོད། ད་ནི་བྱ་བ་ཇེ་ཉུང་དུ་བཏང་ནས་རང་གི་མཚམས་བསྙེན་སྒྲུབ་ཀྱི་ལས་ཀ་རེ་ལ་འབུངས་དགོས་མིན་བསམ་གྱིན་ཡོད་དེ། བླ་མ་བཀའ་དྲིན་ཅན་དག་གིས་གཅིག་རྗེས་གཉིས་མཐུད་ཀྱིས་བསྟན་འགྲོའི་ལས་དོན་བྱེད་དགོས་ཞེས་པའི་གསུང་གི་ཁུར་སྤྱི་བོར་འབོགས་ཀྱིན་འདུག་ན། བཀའ་དྲིན་འཁོར་མཐའ་བྲལ་བའི་དགེ་རྒན་དག་གི་གསུང་ལྡོག་པ་གཏན་ནས་མི་ཕོད་ཅེས་གསུངས་སོ། །དེ་ལྟར་བླ་སློབ་དགོངས་པ་ཆོས་དང་མཐུན་པར་དད་པ་དག་སྣང་གིས་སྣང་བ་འགྱུར་བཞིན་དུ། གཞུང་ཆེན་སློབ་གཉེར་གྱི་ཞར་ལ་དགུང་གྲངས་བཅོ་བརྒྱད་ནས་ཕར་ཕྱིན་དམ་བཅའི་བར་བགྲང་བྱ་བཅུ་བཞིར་ཉེ་བའི་རིང༌། འཇམ་དབྱངས་བསྙེན་པ་ཨ་ར་པ་ཙཱའི་བཟླས་པ་དུང་ཕྱུར་གཅིག་ལྷག་བྱས། མཚུངས་མེད་བཤེས་གཉེན་རིན་པོ་ཆེ་གང་ཉིད་ནི། ད་ལྟའི་ཐོས་བསམ་པ་ཕལ་གྱིས་དཔེ་ཀློག་རེ་དང་ཆོས་སྐད་ཐན་ཐུན་བྱང་རབ་ཙམ་གྱིས་འགྲན་པའི་ཟླ་མེད་པ། ནང་དུ་འོད་གསལ་བདེ་སྟོང་གི་ཉམས་མྱོང་རྒྱུན་ཆད་མེད་པ། དུས་སྐབས་ཐམས་ཅད་དུ་ཚོགས་གསོག་སྒྲིབ་སྦྱང་གི་མཛད་པ་ལྷོད་མ་མྱོང་བ། ཡི་དམ་ལྷག་པའི་ལྷའི་རྣལ་འབྱོར་དང་བཟླས་བརྗོད་ཆགས་མེད་དུ་མཛད་པ་ཞིག་ཡིན་པས། སྔོན་བྱོན་དམ་པ་གོང་མའི་སློབ་གཉེར་གནང་སྟངས་ཐོས་སྒོམ་ཟུང་དུ་འཇུག་པ་ཟཻར་བ་དེ་འདི་འདྲ་ཞིག་ཡིན་ངེས་སོ། །རང་རེ་ཐོས་བསམ་སྒོམ་གསུམ་བྱེད་པོ་སུ་ཡིན་ན་ཡང་ཡ་བྲལ་རྐྱང་བ་ཞིག་ཏུ་མ་སོང་བར་འདི་ལྟའི་རྣམ་ཐར་དངོས་སུ་ལག་ལེན་ལ་མ་ཐེབས་ཀྱང༌། བསམ་པ་དེའི་ཕྱོགས་སུ་འཁོར་ཐུབ་པ་ཞིག་ཅིས་ཀྱང་མེད་དུ་མི་རུང་སྟེ། རྗེ་སྒམ་པོ་ལས། ལར་སློབ་མ་བྱ་བ་དེ་བླ་མའི་རྣམ་ཐར་རྗེས་སུ་སློབ་པ་བྱ་བ་ཡིན་གསུངས་པ་ལྟར་རོ། ། གཟུར་གནས་བློ་ལྡན་དོན་གཉེར་བརྩོན་པ་དང༌། ། བཀའ་བཞིན་སྒྲུབ་ལ་སྙེལ་མེད་རང་བཞིན་སོགས། ། ཚད་ལྡན་སློབ་མའི་མཚན་ཉིད་ཅི་ཙམ་ཀུན། ། གཅིག་ཏུ་བཟླུམས་པ་འདི་འདྲ་མ་ལགས་སམ། སྙིགས་དུས་ཀྱི་བསྟན་པའི་གསལ་བྱེད་ཆེན་པོ་ངག་དབང་འཇིགས་མེད་དངོས་གྲུབ་དཔལ་བཟང་པོའི་མཛད་བཟང་བསླབ་གསུམ་ནོར་བུའི་གླིང་ཁ་ཞེས་བྱ་བ་ལས་ཡོངས་འཛིན་དམ་པའི་ཞབས་ཟུང་གཙུག་ཏུ་ཕོག་སྟེ་གུས་པ་ཆེན་པོས་ཚུལ་བཞིན་བསྟེན་པའི་བསྐོར་གྱི་རྣམ་ཐར་མདོར་བསྡུས་པ་སྟེ་བཅུ་པའོ། ། དཔལ་ལྡན་འབྲས་དཀར་སྤུངས་སུ་སློབ་གཉེར་ཇི་ལྟར་བྱས་པའི་བསྐོར་གྱི་རྣམ་ཐར།དགུང་གྲངས་ཉེར་བརྒྱད་ཀྱི་ལོ་འགོར་འཕགས་ཡུལ་འབྲས་དཀར་སྤུངས་སུ་སློབ་གཉེར་གྱི་དབུ་བཙུག་སྟེ། རྡོ་རུས་ཐུག་པའི་དཔེ་ལྟར་ཉིན་མཚན་ལྷོད་མེད་དུ་བགྲང་བྱ་གསུམ་གྱི་རིང་ལ། ཤེས་རབ་ཀྱི་ཕ་རོལ་ཏུ་ཕྱིན་པའི་གཞུང་ལ་སློབ་གཉེར་ཚུལ་བཞིན་དུ་མཛད་དེ། དཔེ་ཆ་ལྟ་ཟེར་ན་དངོས་གྲུབ་དཔལ་འདྲ་དགོས་པ་རེད་ཅེས་ཐུན་མོངས་མ་བགྲོས་རང་མཐུན་གྱིས་ཚད་འཛིན་ས་དང་དམིགས་དཔེ་བལྟ་ཡུལ་དུ་གྱུར། སྐབས་དེར་གྲྭ་ཚང་གི་ཆོས་ར་ན་དངོས་གྲུབ་དཔལ་གྱིས་ཀུན་མཁྱེན་ཕར་ཕྱིན་མཐའ་དཔྱོད་བློ་འགྲོ་གིན་འདུག་ཅེས་གླེང་རྒྱུར་ཆགས་པ་ཐོས་ཀྱང༌། བཤེས་གཉེན་རིན་པོ་ཆེ་ཁོང་ལ་དྲིས་པར། ཕར་ཕྱིན་མཐའ་དཔྱོད་དབུ་ཞབས་བྱས་ཏེ་བློར་འདོན་ཐུབ་པ་མིན་ཏེ། གལ་གནད་བསྐོར་དང་ལུང་འདྲེན་རྣམས་བློ་ཐོག་ནས་ཧ་ལམ་མི་ཐོན་པ་མེད། ཡིག་འབྲུ་གཉིས་གསུམ་ཙམ་རེ་ཐོས་པས་སྐབས་དེའི་གོང་འོག་འདི་དང་དེ་རེད་བསམ་པར་ནུས་པ་བྱུང་བ་ཡིན་གསུངས། དགུང་གྲངས་སུམ་ཅུ་ཐམ་པ་ཕར་ཕྱིན་ལོ་རིམ་ཐ་མ་ལོའི་བོད་ཟླ་བཅུ་གཅིག་པའི་ནང༌། དགའ་ལྡན་ཤར་རྩེར་དགུན་ཆོས་ཚོགས་སྐབས་སུ་གདན་ས་གསུམ་གྱི་གྲྭ་ཚང་དྲུག་དང༌། ར་སྟོད། རྒྱུད་སྨད་སོགས་ཀྱི་གྲྭ་མང་འདུས་པ་རྒྱ་མཚོའི་དབུས་སུ་ཚད་མ་རྣམ་འགྲེལ་ལུང་འགལ་གྱི་དམ་བཅའ་མཛད་པས། བརྒལ་བརྟག་ཅི་བྱུང་ཡང་ཁས་ལེན་གྱི་ཟུར་ཙམ་ཡང་གཞུང་དང་མཐུན་པའི་སྟེང་ནས་ཉམས་དགོས་མ་བྱུང་བས་མཁས་པའི་སྙན་པ་འབར། དགུན་ཆོས་ཆེན་མོ་དེ་ཅུང་མ་གྲོལ་གོང་ནས་ཕྱིར་དཔལ་ལྡན་འབྲས་དཀར་སྤུངས་སུ་ཕེབས་ཏེ། ཕར་ཕྱིན་དུས་བཟང་དང༌། ཕར་ཕྱིན་དམ་བཅའ་ཆེན་མོ་གནང༌། དེའི་ཕྱི་ལོ་སྟེ་རབ་རྒྱན་ལྕགས་སྦྲུལ་ལོར། དབུ་མ་དགོངས་པ་རབ་གསལ་དང༌། འཇམ་དབྱངས་བཞད་པའི་དབུ་མ་ལུང་རིགས་གཏེར་མཛོད་སོགས་ཀྱི་བདེན་གཉིས་ཡན་ཆད་གསན་བསམ་གནང་ནས་རྒྱུགས་སྤྲོད་ཨང་དང་པོ་བླངས། ལོ་དེར་དགེ་བའི་བཤེས་གཉེན་ཆེན་པོ་བློ་བཟང་དགེ་འདུན་མཆོག་རྒྱུད་སྨད་དུ་ཕེབས་སྟབས། སྒོ་མང་མཁན་ཡོན་ཏན་དམ་ཆོས་མཆོག་གི་མདུན་དུ་དཔེ་ཁྲིད་ལ་ཕེབས། འབོ་ར་དགེ་བཤེས་ཡོན་ཏན་གྱི་མདུན་ནས་མཛོད་རྩ་སྡོམ་དང༌། པོད་ལྔའི་རྩ་བའི་ལུང་ཞུས། དེའི་ཕྱི་ལོ་དབུ་མ་རྙིང་བའི་ལོ་དེར་འབྲས་སྤུངས་སྒོ་མང་གྲྭ་ཚང་ནས་དབུ་མའི་ཚོགས་ལངས་དང༌། དབུ་མའི་ཐལ་བཟློག་གི་མཚན་ཕུད་ཀྱི་དམ་བཅའ་ཆེན་མོར་བཞུགས། དབུ་མའི་ཐལ་བཟློག་མཚན་ཕུད་ཀྱི་དམ་བཅའ་ལ་ཉེ་བའི་ཟླ་གཅིག་ལྷག་གི་ཡུན་ལ་དཔེ་མཚམས་དམ་པོར་བསྡམས་ནས། ཟླ་བ་གྲགས་པའི་རྩ་ཤེས་འགྲེལ་བ་དབུ་མ་ཚིག་གསལ་ལས་ཐལ་བཟློག་བསྐོར་དང༌། རྗེ་བདག་ཉིད་ཆེན་པོའི་དྲང་ངེས་ལེགས་བཤད་སྙིང་པོའི་ཐལ་རང་གི་བསྐོར། འཇུག་ཊཱིཀ་དགོངས་པ་རབ་གསལ་གྱི་ཐལ་བཟློག །རྩ་ཤེས་ཊཱིཀ་ཆེན་གྱི་ཐལ་རང་གི་བསྐོར། དབུ་མ་ལུང་རིགས་གཏེར་མཛོད་ཀྱི་ཐལ་བཟློག་གི་བསྐོར་ཐམས་ཅད་ཤོག་གྲངས་ཉིས་བརྒྱ་ཡས་མས་ཙམ་ཐུགས་འཛིན་གནང༌། ཁྱད་པར་དྲང་ངེས་ལེགས་བཤད་སྙིང་པོ་དབུ་ནས་སེམས་ཙམ་བསྐོར་ཆ་ཚང་སྔོན་ནས་བློ་འཛིན་བྱས་ཚར་ཞིང༌། འོག་མ་རྣམས་ནས་ཀྱང་གལ་གནད་ཐོར་བུ་ཁོལ་དུ་ཕྱུང་སྟེ་བར་མཚམས་འགའ་རེ་མ་གཏོགས་ཕལ་ཆེར་ཐུགས་འཛིན་གནངས་བ་ཡིན་གསུངས། དབུ་མའི་ཐལ་བཟློག་མཚན་ཕུད་དམ་བཅའ་ཆེན་མོ་དབུ་ནས་གཞུག་གི་རིང་ལ་གཞུང་གི་ཚིག་ཟིན་ལྟར་ཁས་ལེན་ཟུར་གཅིག་ཀྱང་མ་ཉམས་པར་བཟུང་བས། ཀུན་ངོ་མཚར་བའི་གནས་སུ་བཀོད་ཅིང༌། དགེ་བཤེས་རྒན་པ་རེས། སྒོ་མང་གྲྭ་ཚང་ལ་འདི་འདྲའི་དཔེ་ཆ་བ་ཡག་པོ་འདུག །ད་ཤི་ཡང་བློ་བདེ་བ་ཡིན་གསུངས་སྐད། མཁས་མཆོག་ཀུན་མཁྱེན་ཉ་དབོན་པས། བླུན་པོས་མཁས་ཞེས་བཀུར་བས་མཁས་པ་མིན། །མཁས་པས་མཁས་ཞེས་བསྟོད་ན་མཁས་པ་ཡིན། །མཁས་སམ་མི་མཁས་རྩོམ་འཆད་རྩོད་ན་མངོན། །བདག་ནི་འཆད་རྩོད་རྩོམ་ལ་སྤོབས་པ་དགེ། །ཞེས་པ་ལྟར་མཚན་དོན་དང་ལྡན་པའི་མཁས་པའི་སྙན་པ་མཁས་མང་འདུས་པའི་དབུས་སུ་ཁྱབ་པར་བྱས་སོ། །དེ་ལྟར་དབུ་མའི་གཞུང་ལ་གཞན་དྲང་མི་འཇོག་པའི་མཁས་པར་བསླབས་ཏེ། ཕྱི་ལོ་ཆུ་མོ་ལུག་གི་ལོར་དམ་པའི་ཆོས་མངོན་པ་མཛོད་ཀྱི་འཛིན་གྲྭར་ཞུགས་ཏེ། ལོ་འཁོར་རྒྱུགས་སྤྲོད་ཆེན་མོར་གྲུབ་འབྲས་ཨང་དང་པོ་བླངས། དེའི་ཕྱི་ལོ་སྟེ་དགུང་ལོ་སུམ་ཅུ་རྩ་བཞི་བཞེས་པ་ན་མཛོད་རྙིང་བའི་འཛིན་གྲྭར་ཞུགས་ནས་སློབ་གཉེར་གནང་ངོ། །སྐབས་དེར་བཤེས་གཉེན་རིན་པོ་ཆེ་དང་ལྷན་དུ་ཆ་རྒྱུས་ཡོད་པའི་རྔ་བའི་མཁན་པོ་རེས་ཁོང་གི་བསྐོར་ནས་གསུང་བཤད་གནང་བར། དངོས་གྲུབ་དཔལ་ཟེར་ན་རུས་པ་མཁྲེགས་པོ་སྡུག་རུས་ཅན་ཡིན་པ་རེད། རང་ཚུགས་དང་དཔེ་ཆ་ལྟ་ལུགས་ལ་གྲྭ་ཚང་ཡོངས་རྫོགས་ཧ་ལས་སོང་བ་རེད། ངལ་གསོ་དང་བར་གསེང་དག་ལ་ཡང་འཁྱམ་འཁྱམ་འགྲོ་རྒྱུ་དང༌། ཐ་མལ་གྱི་ལོང་གཏམ་བཤད་ནས་འདུག་རྒྱུ་ཕལ་ཆེར་སྲིད་རྒྱུ་མ་རེད་ཅེས་བཤད་ན་ཡང་ཆོག་གི་རཻད། མི་ལ་ཁ་མང་བོ་གྲག་མཁན་ཞིག་ཡིན་པ་མ་རེད། ཁོང་ལ་ཞུ་དགོས་རེ་ཡོད་ཚེ་ནང་ལ་འགྲོ་བ་མིན། སྒོའི་ངོ་ལ་ཡི་གེ་སྦྱར་བཞག་པ་ཡིན། དེ་མིན་ནང་ལ་སོང་ན་ནམ་རྒྱུན་ཁོང་གིས་འཛིན་སྦྱོང་ཀློག་གསུམ་བྱས་ནས་བསྡད་ཡོད་པས་བར་ཆད་བྱེད་བཞག་གི་རེད། དོན་དག་མེད་ན་ཁ་བརྡ་བྱེད་གྲོགས་བྱེད་ཀྱང་བྱེད་པ་མ་རེད། ཁོང་ལ་ང་ཚོ་ནང་བཞིན་གྱི་རྣམ་གཡེང་དང་འཁྱམ་ཉུལ་བྱེད་གྲོགས་གཅིག་ཀྱང་ཡོད་མྱོང་བ་མ་རེད། འཛིན་གྲྭ་གོང་འོག་ནས་དངོས་གྲུབ་དཔལ་ལ་སྐད་ཆ་བཤད་གྲོགས་དང་འགྲོ་རོགས་འདུག་རོགས་མི་དགོས་པས། ཕལ་ཆེར་རང་རྒྱལ་རིགས་ཅན་ཡིན་ས་རེད་ཅེས་ལྐོག་ནས་ཁ་མཚར་བཤད་རྒྱུ་ལྟ་བུ་ཡིན། ཁོང་སྐུ་བཙུན་པ་ཡང་དེ་ལས་མཐར་ཐུག་པ་མེད་པའི་ཚོད་ཡིན། དེ་རིང་སུ་ལ་དྲིས་བཞག་ན་ཡང་དངོས་གྲུབ་དཔལ་ཀུན་སྤྱོད་གང་འདྲ་ཡོད་ཟེར་ན། ཧ་མི་ལས་མཁན་གཅིག་ཀྱང་ཡོད་རྒྱུ་མ་རེད་གསུངས་བྱུང༌། སྐབས་དེར་ཡུན་རིང་འདྲེས་པའི་མགོ་ལོག་གི་དགེ་བཤེས་ཤིག་གི་གསུང་རྒྱུར། ཁོང་གྲྭ་ཚང་གི་ལས་ཀར་འགྲོ་ན་ཡང་ཞར་ཞོར་ལ་དཔེ་ཆ་ལྟ་རྒྱུ་བསྐྱུར་གི་མ་རེད། ལས་ཀའི་བར་གསེང་དུ་ངལ་གསོ་ཉུང་ངུ་ཞིག་རྒྱབ་ན་ཐད་ཀར་དཔེ་ཆ་ཀློག་བཞག་གི་རེད། ལས་ཀའི་ཞར་ལ་ལུང་ཚིག་བློ་ལ་འཛིན་ཞོར་བྱེད་རྒྱུ་ལས། ཁོམ་ཁོམ་བྱས་ནས་བསྡད་ཟེར་བ་ཡོད་པ་མ་རེད། གཞན་དང་མི་འདྲ་བ་ཞིག་ལ། ཁོང་གིས་དཔེ་ཆ་གཟིགས་ཚར་བ་དེ་བརྗེད་རྒྱུ་མི་འདུག་ཟེར་སྲོལ་ཞིག་ཡོད། དེ་རིང་གཞུང་གང་ཡིན་ཡང་མཚམས་གང་ཞིག་ནས་དྲིས་ན་ཡང༌། དཔེ་ཆ་རང་ཉིད་ཁ་ཕྱེས་པ་འདྲ་བའི་ངེས་ཆ་ཡོད་པ་རེད། འགའ་རེས་ཨ་མཚར་དང་འདྲེས་མས་དངོས་གྲུབ་དཔལ་སྒོ་མང་གི་ཡིག་ཆ་རེད་ལབ་རྒྱུ་ལྟ་བུ་ཡིན། ད་དུང་དམ་བཅའ་བཞུགས་དུས་དཀའ་གནས་ལ་ཐུན་མོང་མིན་པའི་གོ་བ་བཤད་རྒྱུ་ཡོད་པ་རེད། ཐ་ན་ལོ་སར་དུས་ལྟ་བུ་ལ་ཡང་གསོལ་ཟས་མཆོད་སྐབས་མ་གཏོགས་དཔེ་ཀློག་མཛད་པ་ལས་ངལ་གསོ་མཛད་པའི་གོམས་གཤིས་གཞི་ནས་མེད་པ་ལྟ་བུ་སྟེ། ཟོལ་བསྟོད་དང་ཐག་རིང་གི་སྐད་ཆ་ཙམ་མ་ཡིན་པར་འཛིན་གྲྭ་གོང་འོག་ཡོངས་རྫོགས་ན་ཧ་ལས་སོང་བ་ཞིག་ཡིན་གསུངས་བྱུང༌། བཤེས་གཉེན་རིན་པོ་ཆེ་གང་ཉིད་ཀྱི་ཞལ་སྔ་ནས་ངེད་ཅག་ལ་བཀའ་སློབ་ཅིག་བསྩལ་སྐབས་སུ། དེང་སང་དཔེ་ཆ་ལྟ་མི་མང་ཆེ་བ་ཞིག་གིས་བློ་རྩེ་གཅིག་ཏུ་དྲིལ་ནས་ལྟ་ཐུབ་ཀྱིན་མི་འདུག །ཕྱི་རོལ་གཡེང་རྐྱེན་རྣམ་པ་སྣ་ཚོགས་ལ་སེམས་འཆོར་ཞོར་ནང་པ་སངས་རྒྱས་པའི་གཞུང་ཆེན་ཁག་གི་མཐིལ་ལོན་དགོས་ཟེར་ན་ཧ་ཅང་དཀའ་མོ་རེད། ད་དུང་ཡུལ་བ་ཉེ་དུ་སོགས་ཀྱི་དགྲ་གཉེན་འཁོར་བའི་དོན་དག་ཚང་མ་ལ་འགན་ཁུར་ཞོར་དང༌། སེམས་ཁྲལ་བཟོ་བཞིན་འདུག །རང་ལ་མཚོན་ན་ཡོན་ཏན་ཆེན་པོ་མེད་ན་ཡང༌། དཔེ་ཆ་སློབ་གཉེར་བྱེད་སྐབས་བློ་རྩེ་གཉིས་སུ་མ་བཏང་བར་བསམ་རྒྱུ་དྲན་རྒྱུ་སྣ་གཅིག་ཁོ་ན་ལ་གཏད་པ་ཡིན། རྒྱ་གར་ན་ཡོད་དུས་ལོ་ངོ་བདུན་བརྒྱད་ཅིག་གི་རིང་ལ་ཡུལ་ཕྱོགས་སུ་ཐེངས་གཉིས་འབྲེལ་བ་བྱེད་མྱོང་མ་གཏོགས། ངའི་གནས་ཚུལ་འདི་ཡིན་གན་ཡིན་ཡུལ་ལ་ཟེར་བ་མིན་ལ། ཡུལ་བས་གང་བྱེད་ཀྱིན་ཡོད་ཚུར་ལ་ཡང་འདྲི་བ་མིན། ཞེས་གསུངས་སོ། །གདན་སར་འབྱོར་བའི་ལོ་དེ་ནས་བཟུང་སྟེ། བསྡུས་རྟགས་དང༌། གྲུབ་དོན་ས་གསུམ། དབུ་ཕར་སོགས་ཀྱི་དཔེ་ཁྲིད་ཉིན་རེ་བཞིན་དུ་མཛད། སྔོན་གྱི་སྐབས་ཅི་ཡིན་ཆ་མི་འཚལ་མོད། རིག་གསར་རྗེས་ཀྱི་བསྟན་པ་ཡང་དར་ཚུན་ལ་འཕགས་བོད་ཀྱི་གདན་ས་གསུམ་པོ་གང་ རུང་དུ་ཇོ་ནང་གི་བླ་མ་གཞན་ལ་དཔེ་ཁྲིད་བྱེད་མི་བྱུང་བའི་ཐོག་མ་ཡིན་འདུག་གོ། ། ལས་ཀྱིས་བསྡུས་པའི་ཕ་ཡུལ་རྒྱབ་ཏུ་བསྐྱུར་ཏེ། ། སེམས་ལ་ཉལ་བའི་དགྲ་གཉེན་ཐག་པ་བཀྲོལ་ནས། ། བས་མཐའི་ཡུལ་དུ་སྤོང་དང་ཀློག་པའི་རྣམ་ཐར། ། འགྱུར་མེད་མི་གཞིའི་བརྟན་ལྷིང་འདི་འདྲ་དཀོན་མོ། ། སྙིགས་དུས་ཀྱི་བསྟན་པའི་གསལ་བྱེད་ཆེན་པོ་ངག་དབང་འཇིགས་མེད་དངོས་གྲུབ་དཔལ་བཟང་པོའི་མཛད་བཟང་བསླབ་གསུམ་ནོར་བུའི་གླིང་ཁ་ཞེས་བྱ་བ་ལས་དཔལ་ལྡན་འབྲས་དཀར་སྤུངས་སུ་སློབ་གཉེར་ཇི་ལྟར་བྱས་པའི་བསྐོར་གྱི་རྣམ་ཐར་མདོར་བསྡུས་པ་སྟེ་བཅུ་གཅིག་པའོ། ། འཕགས་མཆོག་མིག་མི་འཛུམས་པའི་སྤྱན་སྔར་ཆོས་བཀའ་ནོད་པའི་རྣམ་ཐར་བསྐོར།བོད་རབ་རྒྱན་ས་ཕོ་སྟག་གི་ལོ་སྟེ། ཕྱི་ལོ། ༡༩༩༨ ལོའི་ལོ་མགོར་རྡ་རམ་ས་ནས། ལམ་རིམ་འབྲིང་དང༌། སྤྱན་རས་གཟིགས་ཐུགས་རྗེ་ཆེན་པོའི་རྗེས་གནང༌། བཀའ་གདམས་ལྷ་བཞིའི་རྗེས་གནང༌། ངན་སོང་ཀུན་གྲོལ་གྱི་རྗེས་གནང༌། མི་འཁྲུགས་པའི་དབང༌། སྒྲོལ་དཀར་ཡིད་བཞིན་འཁོར་ལོའི་རྗེས་གནང༌། བདེ་མཆོག་ལུ་ཡི་པའི་དབང༌། བྱང་ཆུབ་སེམས་སྡོམ་རྣམས་མནོས། དེའི་ཕྱི་ལོ་འབྲས་སྤུངས་སྒོ་མང་ཚོགས་ཆེན་འདུ་ཁང་དུ། རྟོགས་བརྗོད་མདུན་ལེགས་མ་དང༌། ལམ་རིམ་བསྡུས་དོན། ལམ་གཙོ་རྣམ་གསུམ་བཅས་སྦྲགས་ཏེ་བཀའ་ཁྲིད་དང༌། དགའ་ལྡན་ལྷ་བརྒྱ་མའི་སྒོ་ནས་རྗེའི་ཚོགས་ཞིང་གསལ་འདེབས་ཚུལ་དང་བཅས་པའི་ཁྲིད་དང༌། སྒྲོལ་དཀར་ཡིད་བཞིན་འཁོར་ལོའི་ཚེ་དབང་རྣམས་ཞུས། ལོ་དེའི་སྟོན་ཁར་ཉིན་བཅུ་གསུམ་གྱི་ཡུན་དུ་དཔལ་ལྡན་སྨད་རྒྱུད་གྲྭ་ཚང་ནས། རྒྱལ་མཆོག་སྐལ་བཟང་རྒྱ་མཚོས་མཛད་པའི་དབུ་མའི་ལྟ་ཁྲིད་དྲན་པ་བཞི་ལྡན་གྱི་ཁྲིད། བདེ་གསང་འཇིགས་གསུམ་གྱི་དབང་ཆེན། རྗེ་རིན་པོ་ཆེས་མཛད་པའི་གསང་འདུས་འགྲེལ་བ་རིམ་ལྔ་གསལ་སྒྲོན་དང་རིམ་ལྔ་གདན་རྫོགས་གཉིས་སྦྲགས་ཏེ་བཀའ་ཁྲིད་རྒྱས་པ། བླ་མ་ལྔ་བཅུ་པའི་ལུང༌། སྒྲོལ་དཀར་ཡིད་བཞིན་འཁོར་ལོའི་ཚེ་དབང་གཡས་སེང་སྡེང་ནག་ཀྱི་སྒྲོལ་མ་གཡོན་ཁྲོ་གཉེར་ཅན་མ་བཅས་གཙོ་འཁོར་གསུམ་གྱི་དབང༌། བཀའ་གདམས་ཐིག་ལེ་བཅུ་དྲུག་གི་དབང་རྣམས་མནོས། ཕྱི་ལོ། ༢༠༠༠ རབ་གནས་ལྕགས་འབྲུག་ལོའི་ཆོ་འཕྲུལ་ཟླ་བར། རྡ་རམ་ས་ནས་རྗེའི་ལམ་རིམ་ཆེན་མོའི་གསུང་ཆོས་ཞུས། ཕྱི་ལོ། ༢༠༠༡ རབ་གནས་ལྕགས་མོ་སྦྲུལ་གྱི་ལོའི་ཆོ་འཕྲུལ་ཟླ་བའི་ཚེས་བཅུ་བདུན་ནས། རྗེའི་ལམ་རིམ་ཆེན་མོ་དང་ཇོ་བོ་ཆེན་པའི་བྱང་ཆུབ་ལམ་གྱི་སྒྲོན་མ་གཉིས་ཀྱི་ཁྲིད་ལུང་སྦྲགས་མ། རྗེ་རིན་པོ་ཆེའི་བྱང་སའི་ཚུལ་ཁྲིམས་ལེའུའི་རྣམ་བཤད་བྱང་ཆུབ་གཞུང་ལམ་ལས་བྱང་སྡོམ་འབོག་ཆོག་གི་ཆོ་གའི་ལུང༌། བླ་མ་དྷརྨ་རཀྵི་ཏས་མཛད་པའི་བློ་སྦྱོང་མཚོན་ཆའི་འཁོར་ལོའི་ལུང༌། སློབ་དཔོན་ཙནྜ་གོ་མིས་མཛད་པའི་བྱང་ཆུབ་སེམས་དཔའི་སྡོམ་པ་ཉི་ཤུ་བའི་ལུང་རྣམས་མནོས། ལོ་དེའི་དགུན་ཁར་ཉིན་དགུའི་ཡུན་ལ། དགའ་ལྡན་བྱང་རྩེ་ཐོས་བསམ་ནོར་བུ་གླིང་གི་ཚོགས་ཆེན་འདུ་ཁང་དབུ་འབྱེད་དུ། རྒྱུད་སྡེ་བཞིའི་དབང་སྟེ་བྱ་རྒྱུད་ལ་ཐུབ་པ་དམ་ཚིགས་གསུམ་བཀོད། སྤྱོད་རྒྱུད་རྣམ་སྣང་མངོན་བྱང༌། རྣལ་འབྱོར་རྒྱུད་རྡོར་དབྱིངས། བླ་མེད་འཇིགས་བྱེད་ལྷ་བཅུ་གསུམ་མ་བཅས་ཀྱི་དབང་དང༌། སྔགས་རིམ་ཆེན་མོའི་ཁྲིད་ལུང་དང༌། སྒྲོལ་དཀར་གྱི་དབང༌། ལྷ་མོའི་རྗེས་གནང་རྣམས་གསན། ཕྱི་ལོ། ༢༠༠༢ བོད་རབ་གནས་ཆུ་རྟ་ལོའི་སྟོན་ཁར་གདན་ས་ཆེན་པོ་སེ་རར། དྲང་ངེས་ལེགས་བཤད་སྙིང་པོའི་བཀའ་ཆོས་དང༌། སྒྲོལ་དཀར་ཡིད་བཞིན་འཁོར་ལོའི་དབང་དང༌། དགའ་ལྡན་ལྷ་བརྒྱ་མའི་ཁྲིད་དང༌། རིས་མེད་བསྟན་རྒྱས་སྨོན་ལམ། པཎ་གྲུབ་བཅུ་བདུན་གྱི་གསོལ་འདེབས་ཀྱི་ལུང་རྣམས་མནོས། དེ་ནས་སྟོན་དེར་སླར་ཡང་སྒོ་མང་གྲྭ་ཚང་གི་གཙུག་ལག་ཁང་རྟེན་དང་བརྟེན་པར་བཅས་པ་གསར་བཞེངས་ལེགས་གྲུབ་ཀྱི་མཛད་སྒོར། རྗེ་བླ་མའི་རྩ་ཤེས་ཊཱིཀ་ཆེན་དང༌། གུང་ཐང་རིན་པོ་ཆེའི་བསྟོད་པ་དོན་ལྡན་མའི་འགྲེལ་བ་གཉིས་ཀྱི་བཀའ་ཁྲིད་དང༌། སྒྲོལ་དཀར་ཡིད་བཞིན་འཁོར་ལོའི་ཚེ་དབང་རྣམས་ཞུས། ལོ་མཇུག་ཏུ་གནས་མཆོག་རྡོ་རྗེ་གདན་དུ། གོང་ས་མཆོག་གི་སྐྱེས་རབས་དང༌། དཀོན་མཆོག་རྗེས་དྲན། བསྟོད་པ་དོན་བདུན་མའི་རྩ་འགྲེལ་ལྗགས་ལུང༌། བྱང་ཆུབ་ལམ་སྒྲོན་དང་སྦྲགས་ནས་རྒྱལ་སྲས་ལག་ལེན་སོ་བདུན་མའི་བཀའ་ཁྲིད། དགེ་བསྙེན་གྱི་སྡོམ་པ་འབོགས་ཆོག་གི་ལུང༌། བྱང་ཆུབ་སེམས་ཀྱི་སྡོམ་པ་རྣམས་དང༌། ཁྱད་པར་དུ། དཔལ་མཆོག་དང་པོའི་སངས་རྒྱས་དུས་ཀྱི་འཁོར་ལོའི་བྱིས་པ་འཇུག་པའི་དབང་བདུན། དབང་གོང་མ་གོང་ཆེན་རྡོ་རྗེ་སློབ་དཔོན་བདག་པོ་ཆེན་པོའི་དབང་དང་བཅས་མནོས། གཞན་ཡང་ཐུབ་པའི་དབང་པོའི་མཚན་སྔགས། མ་ཎི། སིདྡྷི། ཏཱ་རེ་སོགས་ཀྱི་ལུང་དང༌། སྒྲོལ་དཀར་ཚེ་དབང་དང༌། བླ་མ་ལྔ་བཅུ་པ་དང༌། བསྟན་རྒྱས་སྨོན་ལམ་གྱི་ལུང་བཅས་ཞུས་སོ། །ཕྱི་ལོ། ༢༠༠༣ རབ་གནས་ཆུ་མོ་ལུག་གི་ལོ་སར་ཚེས་པ་ན། རྡ་རམ་ས་ནས། སྐྱབས་སེམས་དང༌། འདུལ་བ་རྒྱ་མཚོའི་ལུང༌། རིག་འཛིན་གདུང་སྒྲུབ་ཀྱི་དབང་སྟ་གོན་དངོས་གཞི་ཡོངས་སུ་རྫོགས་པ་དང༌། རྫོགས་པ་ཆེན་པོ་སེམས་ཉིད་ངལ་གསོའི་ཁྲིད་དང༌། དཔལ་སྤྲུལ་སྔོན་འགྲོ། སྒྲོལ་དཀར་ཚེ་དབང་དང༌། རྗེ་མི་ལའི་གསུང་མགུར་རྣམས་གུས་པ་ཆེན་པོས་ལེགས་པར་མནོས་ཤིང༌། མགོ་ལོག་པ་རྣམས་ཀྱིས་ལོགས་སུ་ཐམས་ཅད་མཁྱེན་པ་ལ་མཇལ་ཁ་དང་བརྟན་བཞུགས་ཕུལ། ཐམས་ཅད་མཁྱེན་པ་མཆོག་གི་ཞལ་སྔ་ནས། ཁྱེད་རང་མགོ་ལོག་པ་ཚོ་ལ་གྲུབ་མཐའ་ཕྱོགས་རིས་མེད་པའི་སྐད་ཆ་ཞིག་ཐོས་སོང༌། མི་ཞིག་ཤི་སོང་ན་ས་དགེ་བཀའ་རྙིང་ཇོ་ནང་གི་བླ་གྲྭ་སུ་ཡིན་ན་ཧེ་བག་མེད་པ་རེད་ཟེར་གིན་འདུག །དེ་ཧ་ཅང་ཡག་པོ་རེད། མུ་མཐུད་དུ་ཆོས་བརྒྱུད་ཕྱོགས་རིས་མེད་པའི་ལམ་ཁ་དེ་གཞུག་བསྐྱངས་ཏེ་འགྲོ་དགོས། གསུངས་པ་ཡིན་ཞེས་བཤེས་གཉེན་རིན་པོ་ཆེས་ཐེངས་གཅིག་མ་ཡིན་པར་བཀའ་སློབ་གསུང་འཕྲོས་སུ་ཐོན་པ་ཐོས་ཤིང༌། རྒྱ་གར་དུ་བརྟོལ་ནས་འཛིན་གྲྭ་དངོས་ཀྱི་སྦྱང་གཞི་མ་གཏོགས་བོད་ཡུལ་ན་ཡོད་དུས་ལྟར། དགེ་རྒན་རྣམ་པའི་མདུན་ནས་གཞུང་མང་པོ་དཔེ་ཁྲིད་ཐོབ་མ་ཐུབ། འོན་ཀྱང༌། བླ་མ་ཐམས་ཅད་མཁྱེན་པའི་ཞལ་སྔ་ནས་ཀྱི་བཀའ་དྲིན་ལ་བརྟེན་ཏེ། དབང་ལུང་མན་ངག་གི་ཆོས་མང་པོ་ཞུ་རྒྱུའི་སྐལ་བ་བཟང་པོ་ཐོབ་སོང་ཞེས་ལན་མང་དུ་གསུངས་སོ། ། སྐབས་དེར་མགོན་པོ་ཐམས་ཅད་གཟིགས་པ་མཆོག་ནས་བཤེས་གཉེན་རིན་པོ་ཆེ་ཉིད་ལ་མཁན་པོར་མངའ་གསོལ་གྱི་མཚན་རྟགས་སྤྱི་བོའི་གཙུག་རྒྱན་དུ་བསྩལ་ལོ། ། གྲུ་འཛིན་མགོན་གྱི་ཐུགས་བརྩེའི་འོ་མཚོ་ལས། ། གོ་ལའི་ཁྱོན་ལ་འཕྲིན་ལས་ཟླ་བྲལ་བ། ། སྤྱན་རས་གཟིགས་དབང་མཚན་གྲངས་བརྒྱ་རྩ་བརྒྱད། ། གང་ལ་མངའ་དེའི་ཞབས་རྡུལ་སྤྱི་བོར་བླངས། ། སྙིགས་དུས་ཀྱི་བསྟན་པའི་གསལ་བྱེད་ཆེན་པོ་ངག་དབང་འཇིགས་མེད་དངོས་གྲུབ་དཔལ་བཟང་པོའི་མཛད་བཟང་བསླབ་གསུམ་ནོར་བུའི་གླིང་ཁ་ཞེས་བྱ་བ་ལས་འཕགས་མཆོག་མིག་མི་འཛུམས་པའི་སྤྱན་སྔར་ཆོས་བཀའ་ནོད་པའི་རྣམ་ཐར་མདོར་བསྡུས་པ་སྟེ་བཅུ་གཉིས་པའོ། ། བསགས་སྦྱང་དང་སྨོན་ལམ་ཁྱད་པར་ཅན་བྱས་ཤིང་བསྟན་འགྲོར་ཕན་པའི་ལྟས་བཟང་གཟིགས་ཏེ་ཕྱིར་བོད་དུ་ཕེབས་པའི་བསྐོར་གྱི་རྣམ་ཐར་བསྐོར།ཕྱི་ལོ། ༢༠༠༠ རབ་རྒྱན་ལྕགས་འབྲུག་ལོའི་སྟོན་ཁ་ན་སེ་རར་ཚད་མའི་དགུན་ཆོས་ལ་ཕེབས་ཤིང༌། རྡོ་རྗེ་གདན་དུ་རྙིང་མའི་སྨོན་ལམ་ཆེན་མོ་ཚོགས་སུ་འགྲོ་བའི་མགོ་ལོག་གི་གྲྭ་བ་ཁ་ཤས་དང་ལྷན་དུ། དགུན་ཆོས་མ་གྲོལ་བའི་ཉིན་བཅུ་ཡས་མས་ཀྱི་སྔོན་དུ། གནས་མཆོག་རྡོ་རྗེ་གདན་གྱི་ཕྱོགས་སུ་བསྐྱོད་དེ། བྱང་ཆུབ་ཆེན་པོའི་གནས་རྡོ་རྗེ་གདན་དང༌། ཝ་རཱ་ཎ་སི། བྱ་རྒོད་སྤུངས་རི། རྩ་མཆོག་གྲོང༌། ནེ་ར་ཉྫ་ན། དུར་ཁྲོད་བསིལ་བའི་ཚལ། ན་ལེནྡྲ་སོགས་གནས་ཆེན་མང་བོ་ལ་མཇལ་བསྐོར་སྨོན་ལམ་རྒྱ་ཆེན་པོ་མཛད་ཅིང༌། ཁྱད་པར་དུ་བསྐལ་བ་བཟང་པོའི་སངས་རྒྱས་སྟོང་རྩ་མངོན་པར་རྫོགས་པར་སངས་རྒྱས་དང་རྒྱ་བར་འགྱུར་བའི་གནས་མཆོག་ཁྱད་པར་བ་དེར། སྟོན་མཆོག་ཤཱཀྱའི་དབང་པོའི་བཀའ་དྲིན་དང་མོས་གུས་ཀྱི་ཐུགས་སྣང་འགྱུར་བཞིན། སྐྱབས་ཚིག་དང་འབྲེལ་ནས་ཕྱག་འབུམ་ཐེར་འཚལ་ཏེ། དེ་ལ་བརྟེན་ནས་གློ་བུར་དུ་སྔར་དང་མི་འདྲ་བའི་རིག་པ་གསལ་བ་དང་གཞུང་དོན་ལ་ངེས་ཤེས་ཀྱི་གོ་སྟོབས་བཟང་པོ་འཕེལ་བ་མཐོང་ཆོས་ལ་བྱུང་གསུངས། དེ་ནས་ཨ་ཅན་ཏ་དང༌། ཨེ་ལོ་རར་ཕེབས་ནས་གྲུབ་ཆེན་བརྒྱད་ཅུའི་སྒྲུབ་ཕུག་སོགས་ལ་མཇལ་ཏེ་བོད་ཟླ་གཉིས་པའི་ནང་གདན་ས་ཆེན་པོ་འབྲས་དཀར་སྤུངས་སུ་ལོགས། ཕྱི་ལོ། ༢༠༠༢ སྟེ། ལྕགས་མོ་སྦྲུལ་གྱི་ལོའི་ལོ་སར་ཕྱི་ནང་དུ་སླར་ཡང་རྡོ་རྗེ་གདན་གྱི་མཆོད་རྟེན་ཆེན་པོའི་མདུན་ནས། སྨོན་ལམ་རྒྱ་ཆེན་པོ་འདེབས་ཀྱིན་རྐྱང་ཕྱག་ལྔ་ཁྲི་ལྷག་འཚལ་ནས་གདན་སར་ལོགས། ཕྱི་ལོ། ༢༠༠༣ རབ་གནས་ཆུ་ལུག་ལོའི་ལོ་སར་བསྐོར་དུ་ཡང་རྡོ་རྗེ་གདན་ནས་སྔར་ལོའི་ཕྱག་གི་འཕྲོས་བསྐྱངས་ཏེ། རྐྱང་ཕྱག་ལྔ་ཁྲི་འཚལ་ནས། སྔ་ཕྱིར་བྱང་ཆུབ་ཆེན་པོའི་མཆོད་རྟེན་གྱི་མདུན་སར་ཕྱག་འབུམ་གཉིས་ལྷག་གྲུབ། དེ་སྔོན་བོད་དུ་ཡོད་དུས་དང་ལྷན་ཕྱག་འབུམ་བདུན་སོང་འདུག །དེ་ལྟར་ཚོགས་གསོག་སྒྲིབ་སྦྱང་སྒོ་དུ་མ་ནས་བརྩོན་པ་ལྷོད་མེད་དུ་མཛད་པ་དེ་ཡང་སྐྱེས་བུ་དམ་པའི་ངང་ཚུལ་དང༌། ཕྱི་རབས་གདུལ་བྱ་རྣམས་ལ་བཞག་པའི་རྣམ་པར་ཐར་བ་བསམ་གྱིས་མི་ཁྱབ་པ་ཡིན་ཏེ། རྒྱ་བོད་མཁས་གྲུབ་མང་པོའི་གསུང་དུ། དཀོན་མཆོག་ལ་ཕྱག་འཚལ་བ་དང་མཆོད་པར་བརྗོད་པས་བསོད་ནམས་ཀྱི་ཚོགས་སྒོ་དུ་མ་ནས་བསགས་པ་དང༌། སྐྱེས་བུ་དམ་པ་མ་ལུས་པའི་མཛད་པ་དང་མཐུན་པར་གསུངས་པ་ལྟར་དང༌། སློབ་དཔོན་དཔའ་བོའི་ཞལ་སྔ་ནས། སྙན་དངགས་རྩོམ་ལ་སྐལ་ཆེན་པོ། །ཁྱོད་ལ་བརྟེན་ནས་བདག་གི་བློ། །དབྱར་གྱི་དུས་ཀྱི་ཆུ་བོ་ལྟར། །ཆུང་ངུའང་ཤིན་ཏུ་འཕེལ་བར་འགྱུར། །ཞེས་པ་ལྟར། རྗེ་ཙོང་ཁ་པ་ཆེན་པོའི་སྤྲིང་ཡིག་ལས། ཐོག་མར་ཞིང་གི་མཐུ་ལ་བརྟེན་ནས་ནི། །ནང་གི་བསམ་པའི་སྟོབས་ནི་སྐྱེ་འགྱུར་བ། །དགེ་བའི་བཤེས་དང་དཀོན་མཆོག་མཆོད་པ་ལ། །རྒྱུན་ཆད་མེད་པའི་སྦྱོར་བ་རྟེན་འཚལ་ལོ། །ཞེས་དང༌། གང་ཉིད་ཀྱི་ལམ་རིམ་ཆེན་མོ་ལས་ཀྱང༌། ཞིང་དམ་པ་ལ་དགེ་རྩ་བསྐྲུན་པའི་མཐུ་ལས་ལམ་གྱི་རིམ་པ་རྣམས་ལ་བློའི་མཐུ་ཇེ་རྒྱས་སུ་འགྲོ་བས། མཉན་ན་ཚིག་མི་ཟིན། བསམས་ན་དོན་མི་གོ། །བསྒོམས་ན་རྒྱུད་ལ་མི་སྐྱེ་བའི་བློའི་མཐུ་ཤིན་ཏུ་ཆུང་བའི་དུས་སུ་ཞིང་གི་མཐུ་ལ་བརྟེན་པ་མན་ངག་ཡིན་ནོ། །ཞེས་སོགས་ལྟར་སྐྱེས་བུ་དམ་པ་རྣམས་ཀྱི་ཚོགས་གསོག་སྒྲིབ་སྦྱོང་སྒོ་དུ་མ་ནས་མཛད་པའི་རྣམ་ཐར་རྣམས་རང་ཅག་ཕྱི་རབས་རྣམས་ཀྱི་དམིགས་དཔེར་བཞག་པ་ཡིན་པར་གོ་བར་བྱས་ཏེ། སྔོན་བྱོན་དམ་པའི་རྣམ་ཐར། །རྗེས་འཇུག་སློབ་མའི་ཉམས་ལེན། །ཞེས་པ་ལྟར་ལག་ལེན་ལ་འབད་པ་ལྷོད་མེད་དུ་བརྩོན་པར་མ་ནུས་ཀྱང༌། ཡོན་ཏན་དུ་བལྟ་བ་དང་ཅི་ནུས་ཤིག་ཅིས་ཀྱང་དོན་ཐོག་ལ་གནས་པ་གལ་ཆེ་བ་ཡིན་ནོ། །འཛམ་གླིང་གནས་ཆེན་ཐམས་ཅད་ཀྱི་རྒྱལ་པོ་འཕགས་ཡུལ་རྡོ་རྗེ་གདན་ནས་བསྟན་འགྲོའི་དོན་དུ་སྨོན་ལམ་གནང་ནས་བཞུགས་ཏེ། ཐེངས་རྗེས་མའི་ཕྱག་འཚལ་སྐབས་ན། བཤེས་གཉེན་རིན་པོ་ཆེ་གང་ཉིད་ཀྱི་འོད་གསལ་མཉམ་བཞག་གི་སྣང་ཆ་ལ། ཤེས་རབ་ཀྱི་རལ་གྲི་སྔོ་སེང་ངེ་བ་ཤིན་ཏུ་ཆེ་བ་ཞིག་ལས། རལ་གྲི་ཤིན་ཏུ་མང་པོ་འཕྲོས་ཏེ་རབ་བྱུང་ངུར་སྨྲིག་གི་འདུས་སྡེ་མང་པོ་ལ་ཐིམ་པའི་གཟིགས་སྣང་གསལ་བར་བྱུང་བས། ཕྱིར་བོད་དུ་ལོག་ན་བསྟན་པ་ལ་ཕན་ཐོགས་འབྱུང་བའི་ལྟས་སུ་གོ། །ཆོས་རྗེ་ཀུན་མཁྱེན་དུས་གསུམ་སངས་རྒྱས་ཀྱི་ཞལ་སྔ་ནས་གསུངས་པའི། བདག་ནི་ཚེ་རབས་ཐམས་ཅད་དུ། །བསྟན་པ་གསལ་བར་བྱེད་གྱུར་ཅིག །བསྟན་པ་གསལ་བར་མ་ནུས་ནའང༌། །བསྟན་པའི་ཁུར་ཆེན་འཁུར་བར་ཤོག །ཁུར་ཆེན་བཀུར་བར་མ་ནུས་ནའང༌། །བསྟན་པའི་སེམས་ཁྲལ་བྱེད་པ་དང༌། །བསྟན་པ་ཉམས་ཀྱིས་དོགས་པ་ཡི། །བྱ་ར་ཙམ་ཡང་བྱེད་པར་ཤོག །ཅེས་པའི་སྨོན་ལམ་དེ་ཉིད་རྟེན་གསུམ་གང་གི་མདུན་དུ་ཐོན་ན་ཐུགས་སྨོན་གཙོ་བོར་མཛད་ཅིང༌། ལྷག་པར་ཏུ་ངེས་དོན་སྙིང་པོའི་རང་ལུགས་གཞན་སྟོང་དབུ་མ་ཆེན་པོའི་ལྟ་གྲུབ་སྣུམ་ཟད་ཀྱི་མར་མེ་བཞིན་གཟིམ་དུ་ཉེ་བར་གྱུར་བ་དེ་ཉིད་སླར་ཡང་གསོ་བར་བསམ་བཞིན་དུ་བྱོན་པ་གང་ཉིད་ཀྱི་སྐུ་ཚེའི་མཛད་པ་གཙོ་བོ་སྐྱོང་བའི་དུས་སུ་བབ། ཀུན་མཁྱེན་ཇོ་ནང་པ་ཆེན་པོས་བོ་དོང་བྱ་རྒོད་གཤོང་དུ་རྟེན་གྱི་མདུན་དུ་བསྟན་འགྲོའི་དོན་དུ་གསོལ་བ་བཏབས་པས་བསྟན་འགྲོར་ཕན་པའི་ལྟས་བཟང་པོ་གཟིགས་པར་གསུངས་པ་དང༌། ཆོས་རྗེ་ཕྱོགས་ལས་རྣམ་རྒྱལ་གྱིས་དགུང་ལོ་སོ་བཞི་བར་ལྷ་ལྡན་གཙུག་ལག་ཁང་གི་ཇོ་བོ་རིན་པོ་ཆེ་ལ་བསྟན་པའི་བྱ་བ་དང་གཞན་ཕན་འགྲུབ་པའི་གསོལ་བ་བཏབ་པས་ཀྱང་ལྟས་བཟང་པོ་བྱུང་བར་གསུངས་པ་སོགས་ཀྱི་རྣམ་པར་ཐར་བ་དག་ཀྱང་ངང་གིས་ཡིད་ལ་འཁོར་བ་བྱུང་ངོ༌། །དེ་ནས་བོད་དུ་ཕེབས་དགོས་ཀྱི་འདུན་པ་ཁྱད་པར་ཅན་འཁྲུངས་སྐབས། ཡུལ་ནས་ཐོན་པའི་བླ་མ་མཁས་བཙུན་བཟང་གསུམ་ལྡན་པ་རེ་དང་ཞལ་བརྡ་གནང་བར། ཁྱེད་ད་དུང་བོད་དུ་ལོགས་ན་བསྟན་འགྲོར་ཕན་པ་དཀའ་མོ་རེད། འུ་ཅག་ཇོ་ནང་བ་སང་ལ་ནི་ཆོས་འཆད་ཉན་ཟེར་དུས་ཞེ་ལོག་འདུག་ཡོད་པ་རེད། ཁྱེད་རང་ལ་མཚོན་ན་ནི་གདན་ས་ན་རྩིས་ཚོད་སོགས་སྒོ་ཀུན་ནས་མི་དམན་པར་འདུག་ན། ཕལ་ཆེར་བོད་དུ་མ་ཕེབས་ན་དགའ་བ་ཨེ་ཡིན་སྙམ་ཞེས་བཤད་ཀྱང༌། ཐུགས་འདུན་གཏན་ནས་མ་ལོག་པར་ཡུལ་དུ་ལོགས་རྒྱུར་ཐུགས་ཐག་བཅད། དགུང་གྲངས་སོ་ལྔ་བཞེས་ཤིང༌། ཕྱི་ལོ། ༢༠༠༤ རབ་རྒྱན་ཤིང་ཕོ་སྤྲེལ་གྱི་ལོའི་ལོ་སར་ཕྱི་ནང་དུ། འཕགས་ཡུལ་ཇོ་ནང་སུམ་ལ་དགོན་ནས། ལྕམ་མདའ་མཁན་ཆེན་ཤེས་རབ་གསལ་བྱེད་ཕེབས་པའི་མདུན་སར། སྦྱོར་དྲུག་སྤྱི་དོན་དང༌། ཏཱ་ར་ནཱ་ཐའི་གསུང་འབུམ་ལས་པོད་ལྔའི་ལུང་དང༌། དུས་འཁོར་བློས་བསླངས་ཀྱི་རྩིག་ཐིག་ལ་བསླབས། བོད་ཟླ་གཉིས་པའི་ཚེས་གཉིས་གསུམ་ལ། རྡ་རམ་ས་ནས་ལིམ་བུའི་ཚལ་དུ་སྨོན་ལམ་ཞིག་བྱས་ཏེ་བལ་ཡུལ་དུ་ཕེབས། བལ་ཡུལ་དུ་ཉིན་བཅུ་ལྷག་ཙམ་བཞུགས་ཤིང༌། ལྷ་སར་ཐོན་སྐབས་བསམ་ཡས་མཆིམ་ཕུ་དང༌། བྲག་གཡེར་བ། ཁྲ་འབྲུག་སྒྲོལ་མ། པོ་ཏ་ལ་རྣམས་སུ་མཇལ་སྐོར་སྨོན་ལམ་གནང་སྟེ། ཟི་ལང་ནས་ཨ་མཁར་སྤྲུལ་སྐུ་འགྲོ་ཕན་རྒྱ་མཚོ་མཆོག་ནས་སྣེ་ལེན་ཟབ་རྒྱས་གནང་ཞིང༌། མཁས་བཙུན་བཟང་པོའི་ཡོན་ཏན་རིན་པོ་ཆེའི་མཛོད་ཆེན་པོ་ཐོགས་ཏེ། བོད་ཟླ་གསུམ་པ་བཅོམ་ལྡན་འདས་དུས་ཀྱི་འཁོར་ལོའི་རྒྱུད་གསུངས་པའི་དུས་ཁྱད་པར་བ་ནག་པ་ཟླ་བའི་ནང་ཕྱིར་ཕ་ཡུལ་དུ་འབྱོར་རོ། ། མང་ཐོས་བསམ་པས་གཞུང་བརྒྱའི་དགོངས་དོན་རྙེད། ། རྩེ་གཅིག་སྒོམ་དང་ཚོགས་བསགས་སྒྲིབ་སྦྱོང་གིས། ། བཀའ་གདམས་གོང་མའི་རྣམ་ཐར་རྗེས་འཆིང་བ། ། མཚན་མཆོག་དོན་ལྡན་བཤེས་གཉེན་སྲིད་ཞིའི་མགོན། ། སྙིགས་དུས་ཀྱི་བསྟན་པའི་གསལ་བྱེད་ཆེན་པོ་ངག་དབང་འཇིགས་མེད་དངོས་གྲུབ་དཔལ་བཟང་པོའི་མཛད་བཟང་བསླབ་གསུམ་ནོར་བུའི་གླིང་ཁ་ཞེས་བྱ་བ་ལས་བསགས་སྦྱང་དང་སྨོན་ལམ་ཁྱད་པར་ཅན་བྱས་ཤིང་བསྟན་འགྲོར་ཕན་པའི་ལྟས་བཟང་གཟིགས་ཏེ་ཕྱིར་བོད་དུ་ཕེབས་པའི་བསྐོར་གྱི་རྣམ་ཐར་མདོར་བསྡུས་པ་སྟེ་བཅུ་གསུམ་པའོ། ། བོད་དུ་ཕེབས་པའི་ཐོག་མར་གསེར་ཐང་བླ་མ་རུང་ནས་གཞན་སྟོང་དབུ་མ་ཆེན་པོའི་དམ་བཅའ་བཞག་པའི་བསྐོར།སྟོན་པ་ཡང་དག་པར་རྫོགས་པའི་སངས་རྒྱས་ཀྱིས་འགྲོ་བ་མ་ལུས་པའི་དོན་དུ་བླ་ན་མེད་པའི་མི་གནས་པའི་བྱང་ཆུབ་ཆེན་པོ་མངོན་དུ་མཛད་དེ། མི་མཇེད་འཇིག་རྟེན་གྱི་ཁམས་འདིར་གདུལ་བྱ་རྣམས་ཀྱི་ཁམས་དང་དབང་པོའི་རིམ་པ་མཐའ་ཡས་པ་མ་ལུས་པ་གཟིགས་ནས་ཆོས་ཀྱི་ཕུང་བོ་མཐའ་ཡས་པ་ཞིག་གསུངས་པ་ལས། ངེས་དོན་ཕྱིར་མི་ལྡོག་པ་ལེགས་པར་རྣམ་པར་ཕྱེ་བའི་ཆོས་ཀྱི་འཁོར་ལོ་རྣམས་གཙོ་བོར་བྱས་ཏེ། འཁོར་ལོ་གསུམ་ཅར་གྱི་དགོངས་པ་ངེས་དོན་སྟོང་པ་ཉིད་ཀྱི་དོན་བདེ་གཤེགས་སྙིང་པོ་དང༌། ལྷག་པར་བླ་མེད་ཀྱི་རྒྱུད་སྡེ་མ་ལུས་པའི་དགོངས་དོན་མཐར་ཐུག་རིམ་པ་ལྔ་དང་རིམ་པ་དྲུག་ལ་སོགས་པའི་རྫོགས་རིམ་གྱི་བསྟན་བྱའི་དེ་ཁོ་ན་ཉིད་ཟབ་མོ། སྒྱུ་ལུས་དང་སྟོང་གཟུགས་རྣམ་ཀུན་མཆོག་ལྡན་སོགས་ཀྱི་གཙོས། མདོ་སྔགས་ཀྱི་ཆོས་ཚུལ་གཞི་ལམ་འབྲས་བུའི་རྣམ་བཞག་ཐབས་ཤེས་ཀྱི་ཡན་ལག་ཕྲ་མོ་ཚུན་ཆད་ཚང་ལ་མ་ནོར་བའི་ལམ་མཆོག་སྟོན་པར་མཛད་པའི་དོན་ལེགས་པར་འགྲེལ་བ་རྒྱ་བོད་མཁས་གྲུབ་དམ་པ་རྣམས་ཀྱི་ཐུགས་བཅུད་བྱིན་རླབས་ཀྱི་ཆུ་བོ་རྒྱུན་མ་ཆད་པའི་ས་གསུམ་ན་འགྲན་ཟླ་དང་བྲལ་བའི་ཆོས་ཀྱི་བརྒྱུད་པ་འདི་ཉིད་ལ། ཐོག་མར་གྲུབ་ཐོབ་ཀུན་ཀྱི་སྤྱི་མེས་རིགས་ལྡན་ཆེན་པོ་ཞང་ཀུན་སྤངས་པ་ཐུགས་རྗེ་བརྩོན་འགྲུས་ནས་ཇོ་ནང་པའི་ཆོས་བརྒྱུད་ཀྱི་མཚན་ཐོགས་པ་ནས། རྒྱལ་བ་གཉིས་པ་ཀུན་མཁྱེན་དོལ་པོ་པ་ཡབ་སྲས་ཀྱིས་གཞི་ལམ་འབྲས་གསུམ་དང་ལྟ་སྒོམ་སྤྱོད་པའི་ཚུལ་ཀུན་ཚང་ལ་མ་ནོར་བར་ཞིབ་རྒྱས་སུ་འཆད་རྩོད་རྩོམ་གསུམ་གྱི་སྒོ་ནས་སྤེལ་བར་མཛད་པ་དེ་ཉིད། ཆོས་རྗེ་ཡབ་སྲས་གང་དག་མྱ་ངན་ལས་འདས་ནས་ལོ་བརྒྱད་ཅུ་ཙམ་ནས་ཉམས་དམས་སུ་ཕྱིན་པར་འདུག་ལ། དེ་ལྟར་དུས་རིང་ཙམ་འདས་པ་ན་གངས་ཅན་གྲུབ་པའི་འཁོར་བསྒྱུར་རྡོ་རྗེ་འཛིན་པ་ཀུན་ཀྱི་གཙོ་བོ་རྗེ་ཏཱ་ར་ནཱ་ཐ་མཆོག་གིས་སླར་ཡང་གསལ་བར་མཛད་མོད། སེམས་ཅན་སྤྱིའི་ལས་སྐལ་དམན་སོང་བའི་རྐྱེན་ལས་དམ་པ་གང་ཉིད་ཀྱི་གཟུགས་སྐུ་ཆོས་ཀྱི་དབྱིངས་སུ་བསྡུས་ནས་བསྟན་པ་འདི་ལ་ཉམས་རྒུད་ཕྱི་ནང་གི་འགལ་རྐྱེན་རུ་འཛིང་བ་མང་དུ་བྱུང་བས། མདོ་སྨད་ཀྱི་དགོན་སྡེ་འགའ་རེར་དུས་འཁོར་སྒྲུབ་གྲྭ་དང༌། ཆོ་གའི་ཕྱག་ལེན་མ་ནུབ་ཙམ་ལས་གཞུང་ལུགས་ལྟ་གྲུབ་ལ་འཆད་རྩོད་རྩོམ་གསུམ་ནི་མི་མངོན་པར་གྱུར་ནས་ཡུན་རིང་ལོན་པའི་དུས་སུ། རྗེ་བཙུན་ཏཱ་ར་ནཱ་ཐའི་སྤྲུལ་བའི་ཟློས་གར་དུ་འཁྲུལ་མེད་རྡོ་རྗེའི་བཀའ་ལུང་གིས་བསྔགས་པ་ཇོ་ནང་ཡང་དར་བསྟན་པའི་བྱེད་པོ་ཞེས་མཚན་དང་དོན་མི་གཉིས་པ་༧ངག་དབང་འཇིགས་མེད་དངོས་གྲུབ་དཔལ་ཞེས་བྱ་བའི་དཔལ་ལྡན་བླ་མ་དམ་པ་གང་གི་ཞབས་ཟུང་མི་མཇེད་ཁ་བའི་ལྗོངས་འདིར་ཉེ་བར་བཀོད་ནས་བསྟན་པའི་མེ་རོ་སླར་ཡང་གསོ་བར་མཛད་པ་ཡིན་ཏེ། རང་རྒྱུད་སྤོང་ཀློག་གིས་རྒྱུད་གྲོལ་བར་བྱས་ཚུལ་གོང་དུ་མདོར་བསྡུས་པ་ཙམ་བཤད་ཟིན་པའི་ཚུལ་ཡིན་ན། ད་ནི་བསྟན་འགྲོའི་ལས་དོན་རྒྱ་མཚོ་ལྟ་བུ་ལས་རགས་རིམ་ལས་ཀྱང་རགས་རིམ་ཙམ་ཞིག་ཉེ་བར་དགོད་པར་བྱ་བ་ཡིན་ནོ། །བཤེས་གཉེན་རིན་པོ་ཆེ་གང་ཉིད་ཀྱིས་སློབ་གཉེར་བྱས་ཏེ་མི་རིང་བ་ནས་གཞན་ལ་ཆོས་སྦྱིན་རྒྱུན་མ་ཆད་པར་བསྩལ་བ་ལགས་མོད། ཁྱད་པར་འཕགས་ཡུལ་ནས་ཕྱིར་ལོགས་ཏེ་གངས་རིའི་ལྗོངས་སུ་བསྟན་འགྲོའི་རྒུད་པ་ལྷག་མེད་དུ་གསོས་པའི་འཕྲིན་ལས་རྒྱ་ཆེན་པོ་བསྒྲུབས་པར་མཛད་པའི་ཚུལ་ནི། འཇུ་མི་ཕམ་ཕྱོགས་ལས་རྣམ་རྒྱལ་གྱིས། དོན་གྱི་ཁུངས་གཅིག་མོས་སྣང་སོ་སོར་ཤར། །སུ་ལ་ཞུགས་ཀྱང་ཚུལ་བཞིན་ཉམས་བླང་ན། །མཁས་དང་གྲུབ་པའི་ཡོན་ཏན་འབྱུང་བའི་ཕྱིར། །ཕ་གཅིག་མ་གཅིག་བུ་ཚ་ཇི་བཞིན་དུ། །ཕན་ཚུན་ཐུགས་མཐུན་མོས་གུས་དག་སྣང་སྒོམས། །རང་ལུགས་གཙོར་བཟུང་གཞན་ལ་གཤེ་བ་སྤོངས། །དེ་ལྟར་མཛད་ན་བསྟན་ཞབས་འདིར་ཡང་ལེགས། །ཞེས་པ་ལྟར་ཆོས་བརྒྱུད་གྲུབ་མཐའ་ཕྱོགས་འཛིན་གྱི་དྲི་མས་ཡོངས་སུ་མ་གོས་པ་ཤེལ་སྒོང་ལྟ་བུ་ལ། རང་ལུགས་གཙང་མའི་ཆོས་ཚུལ་རྣམ་པར་དག་པ་སླར་ཡང་གསལ་བའི་བཀའ་དྲིན་འགྲན་ཟླ་དང་བྲལ་བ་བསྐྱངས་སོ། །དེ་ཡང༌། བཤེས་གཉེན་རིན་པོ་ཆེ་ཁོང་ཉིད། ཕྱི་ལོ། ༢༠༠༤ བོད་རབ་རྒྱན་ཤིང་སྤྲེལ་ལོའི་ནག་པ་ཟླ་བའི་ཡར་ངོ་ལ་ཡུལ་དུ་བདེ་བར་འབྱོར་བ་ལ། ཡུལ་མི་ཐམས་ཅད་ཀྱིས་ཉིན་བསྟུད་མར་སྐུ་ཁམས་བདེ་བའི་མཚམས་འདྲི་བྱས། སྐབས་དེར་བླ་རུང་སྒར་ནས་མཁན་ཆེན་ཚུལ་ཁྲིམས་བློ་གྲོས་མཆོག་གིས་ཀུན་མཁྱེན་དོལ་པོ་པའི་རི་ཆོས་ངེས་དོན་རྒྱ་མཚོ་འཁྲིད་བཞིན་པའི་སྐབས་ཡིན་པས། བོད་ཟླ་བཞི་བའི་ཚེས་བཞི་ལྔ་ཞིག་ནས་དེར་ཡོད་ཇོ་ནང་བ་རྣམས་ཀྱིས་གཞན་སྟོང་དམ་བཅའ་འཇོག་དགོས་པའི་བཀའ་གནང་ཡོད་པ་ལ། སྐབས་དེར་བཤེས་གཉེན་རིན་པོ་ཆེ་དམ་བཅའ་འཇོག་རྒྱུར་གདན་ཞུ་མཛད་མཁན་གྱི་ཇོ་ནང་བ་དག་གིས་གསུང་རྒྱུར། ཁོ་བོ་ཅག་ལ་དམ་བཅའ་དེ་གནོན་ཤུགས་ཆེ་ཞིག་ཏུ་གྱུར་ནས་ཡོད་སྐབས། བཤེས་གཉེན་རིན་པོ་ཆེ་དང་ཕ་ཡུལ་གཅིག་པ་དག་གི་ཁ་ནས་དངོས་གྲུབ་དཔལ་ཟེར་བ་ཞིག་འཕགས་ཡུལ་ནས་གསར་དུ་ཐོན་ཡོད་པ་ཐོས་ཏེ། གཞན་རྣམས་ལྟ་ཅི། ཡུལ་དགོན་གཅིག་པའི་གྲྭ་བ་དག་གིས་ཀྱང་མཁས་པ་ཞིག་ཡིན་རབས་ཡོད་ཅེས་པ་ཙམ་ལས། གདེང་འཇོག་མཐོན་པོ་ཆེར་མེད་མོད། དམ་བཅའ་དེའི་རྐྱེན་གྱིས་ཅི་བྱ་གཏོལ་མེད་དུ་གྱུར་ནས། དངོས་གྲུབ་དཔལ་དམ་བཅའ་འཇོག་རྒྱུར་གདན་ཞུར་འབོད་ཐབས་བྱེད་ཅེས་གྲོས་ཐག་བཅད། སྐབས་དེར་ཛམ་ཐང་གི་གྲྭ་བ་ཁ་ཤས་ནས་རེ་བ་ནན་ཆེར་ཕུལ་ནས་ཁྱེད་ད་ཐེངས་གསེར་རྟ་བླ་རུང་སྒར་དུ་དམ་བཅའ་འཇོག་རྒྱུར་ངེས་པར་ཕེབས་དགོས་ཞུས་པས། ཁོང་ཉིད་ནས་ཀྱང་དེ་ལྟར་བྱ་ཆོག་པའི་ཞལ་བཞེས་གནང་སྟེ། ཟླ་དེའི་ཚེས་བཅོ་བརྒྱད་ཀྱི་ཉིན་བཤེས་གཉེན་རིན་པོ་ཆེ་གང་གི་ཞབས་ཟུང་དགེ་ལེགས་ཀྱི་རེ་ཁ་ཀུན་ནས་རྫོགས་པ་དེ་ཉིད་གསེར་ཐང་བླ་མ་རུང་ལྔ་རིག་ནང་བསྟན་སློབ་གླིང་ཆེན་མོར་ཉེ་བར་བཀོད་ཅིང༌། ཕྱི་ཉིན་ནས་ཉིན་ཁ་ཤས་ལ་ཁྲི་ཤོང་ཀུན་དགའ་ར་བར་ཕེབས་ནས་མཁན་ཆེན་ཡིད་བཞིན་ནོར་བུ་འཇིགས་མེད་ཕུན་ཚོགས་འབྱུང་གནས་དཔལ་བཟང་པོ་མཆོག་གི་ཐུགས་སྲས་མཁན་ཆེན་དམ་པ་མང་པོ་དང་ཐུགས་ཡིད་མཐུན་ཞིང༌། ཕྱོགས་རིས་ཀྱི་ང་ཁྱོད་མེད་པའི་ཆོས་རྩོད་དང་ཆོས་ཀྱི་འབེལ་གཏམ་གྱ་ནོམ་པ་དུ་མ་མཛད། མཁན་ཆེན་དམ་པ་འཆི་མེད་རིག་འཛིན་གྱིས་ཆོས་ཁྲིད་ཀྱི་ཞར་ལ། ད་ཐེངས་ཇོ་ནང་གི་མཁན་པོ་ཁོང་ཕེབས་པར་ང་ཚོས་སློབ་དགོས་མང་པོ་འདུག །ཚང་མས་ཁོང་གིས་རྩོད་པ་བྱེད་སར་འཚང་ཁ་བརྒྱབ་ནས་ལྟད་མོ་བལྟས་པ་ཙམ་མ་ཡིན་པར། ལན་འདེབས་ལུགས་དང་རིགས་ལམ་གྱི་འགྲོས་གཏོང་ལུགས་ལ་ཉོན་དང་ཕན་ཐོགས་ཡོད་ངེས་སུ་འདུག་གསུངས་པ་སོགས། མཁས་པའི་རྣམ་དཔྱོད་དང༌། བཙུན་ཞིང་ཆོག་ཤེས་པའི་སྤྱོད་ལམ་རྣམས་ལ་ཐུགས་ཡིད་མགུ་སྟེ་དམ་པ་མང་པོས་བསྟོད་པའི་མེ་ཏོག་འཐོར་ཞིང༌། དོན་གཉེར་ཅན་གྱི་སློབ་མ་འགའ་རེར་རིགས་ལམ་གྱི་ཆོས་ཁྲིད་ཀྱང་མཛད་ཀྱིན་བཞུགས། སྤྱིར་དམ་བཅའ་ཆེན་མོ་དེ་ཉིད་བོད་ཟླ་བཞི་པའི་ཚེས་བཞི་ལྔ་ནས་འཇོག་འཆར་ཡིན་པ་ལ། ཉིན་ཤས་ཕྱིར་འགྱངས་སུ་བཏང་ནས་ས་ག་ཟླ་བའི་ཚེས་བཅུ་བདུན་གྱི་ཉིན། ཆོས་ཀྱི་རྗེ་མཁན་ཆེན་འཇིགས་མེད་ཕུན་ཚོགས་འབྱུང་གནས་དཔལ་བཟང་པོའི་ཆོས་རྔ་ཆེན་པོས་འཛིན་མའི་ཁྱོན་ལ་འཕྲིན་ལས་གདུགས་དཀར་གཅིག་གིས་ས་ཆེན་པོ་ཡོངས་སུ་ཁྱབ་པར་བྱས་པའི་གནས། ཆོས་ར་ཆེན་པོ་ཁྲི་ཤོང་ཀུན་དགའ་ར་བར་ཆོས་རྗེ་གང་གི་ཐུགས་སྲས་བུ་ཆེན་རྣམས་ཀྱིས་གཙོས། གྲྭ་མང་དང་བཙུན་མ་འདུས་པའི་སྡེ་ཆེན་པོའི་དབུས་སུ་གཞན་སྟོང་དབུ་མ་ཆེན་པོའི་གྲུབ་མཐའི་རྣམ་བཞག་གསལ་བར་སྟོན་པ་རིགས་ལྡན་སྤྲུལ་སྐུ་རྟོན་པ་བཞི་ལྡན་དོལ་པོ་པ་ཤེས་རབ་རྒྱལ་མཚན་དཔལ་བཟང་པོ་མཆོག་གིས་མཛད་པའི་རི་ཆོས་ངེས་དོན་རྒྱ་མཆོའི་དམ་བཅའ་བཞག་སྟེ། སློབ་གླིང་ཆེན་མོ་དེ་ཉིད་ཀྱི་མཁན་པོ་འགས་གསུང་དོན། བླ་རུང་ཆོས་ཀྱི་གྲོང་ཁྱེར་ཚུགས་ནས་ད་བར་དུ་ཕྱི་ནས་གྲྭ་བསྐོར་ཡོང་སྟེ་སློབ་གླིང་གཞུང་ངོས་ནས་དམ་བཅའ་བཞག་པ་གཅིག་པུ་དེ་ཡིན་པར་མ་ཟད། དམ་བཅའ་དེ་ནི་ང་ཁྱོད་གཏན་ནས་མེད་པར་ཐུགས་སྣང་ཤིན་ཏུ་མཐུན་པ་ཞིག་བྱུང་བས་དྲན་ངོགས་སུ་བྱུང་ན་ད་དུང་སྣང་བ་སྤྲོ་བ་ཞིག་བྱུང་གསུངས། བཤེས་གཉེན་རིན་པོ་ཆེ་མཆོག་ནས་ཀྱང་མཁན་ཆེན་ཚུལ་ཁྲིམས་བློ་གྲོས་ཀྱི་ཞལ་སྔར། དབུ་མ་ངེས་ཤེས་སྒྲོན་མེའི་ཁྲིད་ལུང་ཉིན་གསུམ་ལ་གསན། ཆོས་ཀྱི་རྗེ་མཁན་ཆེན་དམ་པ་འཇིགས་མེད་ཕུན་ཚོགས་འབྱུང་གནས་ཀྱིས། ཇོ་ནང་གི་བསྟན་པ་འདི་ཉམས་རྒུད་དུ་ཕྱིན་པ་ལ་ཐུགས་ཁྲལ་མང་པོ་མཛད་མྱོང་བར་མ་ཟད། བླ་རུང་སྒར་ན་ཇོ་ནང་གི་འཛིན་གྲྭ་ཞིག་འཛུགས་ཐབས་བྱུང་ན་གསུངས་ཤིང༌། ཁོང་དགོངས་པ་ཆོས་ཀྱི་དབྱིངས་སུ་ཉེ་བར་བསྡུ་བའི་མཛད་པ་ཐ་མ་བསྟན་པའི་སྐབས་སུ་ཡང༌། སྐུ་བསྙུན་དང་འོ་བརྒྱལ་ཆེན་པོ་བཞེས་ཀྱིན་ཀུན་མཁྱེན་དོལ་པོ་པ་དུས་གསུམ་སངས་རྒྱས་ཀྱིས་མཛད་པའི་རྒྱུད་བླའི་འགྲེལ་བ་ལེགས་བཤད་ཉི་མའི་འོད་ཟེར་གྱི་ཁྲིད་མཛད་ཅིང༌། མྱང་འདས་ཀྱི་མཚམས་སུ་གཞུག་འཕྲོ་བྱས་ཏེ་སྐུ་ཚེ་དེ་ཉིད་ཀྱི་མཛད་པའི་ཐ་མ་བསྟན་པ་ཞིག་རེད། དེ་ནས་ཁོང་གི་བུ་ཆེན་རྣམས་ནས་ཀྱང་ཇོ་ནང་གི་ཡིག་ཆ་མང་པོའི་ཁྲིད་བསྐྱངས་དང་སྐྱོང་བཞིན་བཞུགས་པ་སོགས་བཀའ་དྲིན་ཧ་ཅང་ཆེ་བར་མ་ཟད། རྨོངས་པ་རང་གི་ཡིད་ངོགས་སུ་ནི། བཤེས་གཉེན་རིན་པོ་ཆེ་གང་ཉིད་བོད་དུ་ཕེབས་པའི་ཐོག་མར་གཞན་སྟོང་དབུ་མ་ཆེན་པོའི་སེངྒེའི་སྒྲ་ཆེན་པོ་དེ་ཆོས་རྗེ་འཇིགས་མེད་ཕུན་ཚོགས་འབྱུང་གནས་དཔལ་བཟང་པོའི་གདན་ས་དེ་ནས་སྒྲོག་རྒྱུ་བྱུང་བ་འདི་ཡང་རྟེན་འབྲེལ་གྱི་སྒོ་ཆེན་པོ་ཞིག་མ་བསྒྲིགས་རང་འགྲིག་ཏུ་མངོན་སྣང་སྐྱེས་ཏེ། ཆོས་ཀྱི་རྗེ་དེ་ལ་ཇོ་ནང་གི་བསྟན་པ་ཐུགས་བསྐྱེད་ཟླ་མེད་ཡོད་པ་ཙམ་དུ་མ་ཟད། བཤེས་གཉེན་རིན་པོ་ཆེ་འདི་ཉིད་ཀྱིས་ཀྱང་དབང་བཀའ་མང་པོ་དངོས་སུ་ཐོབ་མྱོང་བའི་བླ་མ་རྩ་ཆེན་པོའི་གྲས་སུ་ཡིན་པ་དང༌། དགུང་གྲངས་བཅོ་ལྔ་བཞེས་པའི་ཐོག་ཟབ་ལམ་སྦྱོར་བ་ཡན་ལག་དྲུག་གི་ཉམས་བཞེས་ལོ་གསུམ་ཕྱོགས་གསུམ་དུ་བཞུགས་སའི་རིགས་ཀྱི་བདག་པོ་རྡོ་རྗེ་འཆང་ངག་དབང་བཤད་སྒྲུབ་དཔལ་བཟང་པོ་མཆོག་ནི། ཉག་བླ་བསོད་རྒྱལ་སྐུ་མ་གྲོངས་པའི་སྔོན་ནས་ཁོང་གི་སྐུ་སྐྱེ་འཁྲུལ་མེད་དུ་ཐུགས་ཐག་བཅད་དེ་བསམ་བཞིན་དུ་བྱོན་པ་ཞིག་ཡིན་པར་མ་ཟད། རྫུན་དང་འུད་སྒྲོག་ཙམ་མ་ཡིན་པར་བླ་མ་ཁོང་གིས་ཀྱང་རིག་འཛིན་རྒོད་ཀྱི་ལྡེམ་འཕྲུ་ཅན་དུ་སྐྱེས་པ་སོགས་སྔོན་གནས་རྗེས་སུ་དྲན་པར་ཡོད་དེ། དེའི་ཚུལ་རྒྱས་པར་མི་སྤྲོ་ལ། དེ་ལྟ་ན། ཆོས་རྗེ་འཇིགས་མེད་ཕུན་ཚོགས་གང་དང་རིགས་བདག་བླ་མ་ངག་དབང་བཤད་སྒྲུབ་དཔལ་རྣམ་གཉིས་ནི་རྣམ་པ་ཐ་དད་ཙམ་ལས་ཐུགས་རྒྱུད་གཅིག་པ་ཡིན་པ་སོགས་ཀྱིས་སོ། །དམ་བཅའ་དེ་བཞག་གྲུབ་པའི་ཉིན་ཁ་ཤས་ནས་ཡུལ་དགོན་དུ་ཕྱིར་ལོགས་སོ། ། ཆོས་ཀྱི་སྒོ་མོ་རྒྱུ་སྐར་རྗེས་འགྲོའི་ནང༌། ། ངེས་དོན་ཟབ་མོ་ཉིན་བྱེད་འོད་ཀྱིས་གཟི། ། གངས་ཅན་ལྗོངས་སུ་སླར་ཡང་གསལ་བྱེད་པའི། ། རྟེན་འབྲེལ་ཐོག་མའི་ཆོས་རྔ་ཆེན་པོ་བསྒྲགས། ། སྙིགས་དུས་ཀྱི་བསྟན་པའི་གསལ་བྱེད་ཆེན་པོ་ངག་དབང་འཇིགས་མེད་དངོས་གྲུབ་དཔལ་བཟང་པོའི་མཛད་བཟང་བསླབ་གསུམ་ནོར་བུའི་གླིང་ཁ་ཞེས་བྱ་བ་ལས་བོད་དུ་ཕེབས་པའི་ཐོག་མར་གསེར་ཐང་བླ་མ་རུང་ནས་གཞན་སྟོང་དབུ་མ་ཆེན་པོའི་དམ་བཅའ་བཞག་པའི་བསྐོར་གྱི་རྣམ་ཐར་མདོར་བསྡུས་པ་སྟེ་བཅུ་བཞི་པའོ། ། རླབས་ཆེན་གྱི་ཕྱག་ལས་མང་པོ་དབུ་ཐོག་མར་འཛུགས་བསྐོར་གྱི་རྣམ་ཐར།བླ་རུང་ཆོས་ཀྱི་གྲོང་ཁྱེར་ནས་ཕྱིར་ཕེབས་ཏེ། ཡུལ་དགོན་དུ་དོན་གཉེར་ཅན་འགའ་ལ། འབའ་མདའི་རྩིས་དཔེའི་སྟེང་ནས་འབྱུང་རྩིས་ཀྱི་ཁྲིད་གནང༌། དགོན་དེར་བཤད་གྲྭ་ཆད་ནས་ལོ་ངོ་དགུ་ཐལ་བ་ལ། བོད་ཟླ་ལྔ་བའི་ཚེས་བཞིའི་ཉིན་དབུ་ཁྲིད་ནས་བཤད་གྲྭ་སླར་གསོའི་ཆེད་དུ་སྐྱ་སེར་ཚང་མ་མཉམ་དུ་བསྡུས་ནས། བཤད་གྲྭ་སླར་གསོ་དགོས་པའི་གྲོས་མོལ་བྱས་ཤིང༌། སེར་སྡེ་མི་སྡེ་དང་བཅས་པས་ཁྱེད་ཀྱིས་ཕྱག་ལས་དེའི་ཁུར་བཞེས་དགོས་ཞེས་རེ་ཞུ་བསྟུད་མར་ཕུལ་བའི་རྐྱེན་གྱིས། ལོ་དེའི་ཕྱི་ལོར་ཟླ་ཚེས་བཟང་པོ་ཞིག་ལ་བཤད་གྲྭའི་དབུ་འཛིན་རྒྱུའི་ཐུགས་ཐག་བཅད། དེ་ཙམ་ན་ལྕམ་མདའ་མཁན་ཆེན་ཤེས་རབ་གསལ་བྱེད་མཆོག་ཨ་སྐྱོང་དགོན་དུ་བྱོན་ཏེ། འདུལ་བ་ལུང་རྣམ་འབྱེད་ལས། གནོད་པ་ཆུང་ངམ། ཉམ་ང་བ་ཆུང་ངམ། བསྐྱོད་པ་ཡང་ངམ། འཚོའམ། སྟོབས་དང་ལྡན་ནམ། བདེའམ། ཁ་ན་མ་ཐོ་བ་མ་མཆིས་སམ། བདེ་བ་ལ་རེག་པར་གནས་སམ། ཞེས་དང༌། གནོད་པ་ཆུང༌། ཉམ་ང་བ་ཉུང༌། བསྐྱོད་པ་ཡང༌། འཚོ། སྟོབས་དང་ལྡན། བདེ། ཁ་ན་མ་ཐོ་བ་མེད། བདེ་བ་ལ་རེག་པར་གནས་སོ། །ཞེས་པ་ལྟར་ཕན་ཚུན་ཐུགས་མཐུན་གུས་བརྩི་ཆེན་པོས་འཚམ་འདྲི་བྱས་ཏེ། བཤེས་གཉེན་རིན་པོ་ཆེ་ལ་ལྕམ་མདའ་དགོན་པར་ཕེབས་ཞུ་ཞུས་པས། འབྱུང་རྩིས་མཇུག་དྲིལ་བ་དང་འབྱོན་རྒྱུར་ཞལ་བཞེས་མཛད་དེ། བོད་ཟླ་དྲུག་པའི་ཚེས་གསུམ་ལ་ལྕམ་མདའ་དགོན་དུ་ཕེབས་ཏེ། ཕྱི་ཉིན་ནས་དབུ་མ་ཐེག་མཆོག་དང་རྟགས་རིགས་སོགས་ཀྱི་ཁྲིད་མགོ་བཟུང་སྟེ། མཁན་རིན་པོ་ཆེ་ཀུན་དགའ་ཤེས་རབ་གསལ་བྱེད་མཆོག་གི་ཞལ་སྔར་ཚེས་ཉེར་གསུམ་ནས་བཟུང་ཕྱི་དྲོ་ལ་ཉིན་རེ་བཞིན་དུ་ཆུ་ཚོད་གཅིག་ལྷག་ཡས་མས་ཀྱི་དུས་ཚོད་ལ་རྗེས་གནང་བརྒྱ་རྩ་ཡོངས་རྫོགས་ཞུས། ཚཻས་ཉེར་ལྔར་མཁན་ཤེས་རབ་གསལ་བྱེད་གཙོས་གྲྭ་མང་ལ་ཚད་མ་རྣམ་འགྲེལ་དང་དབུ་མ་འཇུག་པའི་ལུང་བསྩལ། གྲྭ་རྒྱུན་སློབ་གྲྭ་གཟུགས་རྒྱུའི་གྲོས་དབུ་ཕུལ་ཞིང༌། དགོན་པའི་ལས་སྣེ་སོགས་ལ་བཀའ་སློབ་ལམ་སྟོན་མང་དུ་མཛད་པས། དགོན་པའི་ལས་སྣེ་ཟུར་བ་དང་འགན་ཁུར་བ་མང་པོས་དང་ལེན་གྱིས་གྲྭ་རྒྱུན་སློབ་གྲྭ་བཙུགས་པས་དགོན་དེར་གྲྭ་རྒྱུན་ལ་ཕན་པ་བླ་ན་མེད་པ་ཐོན། དེ་ལྟར་ཟླ་གཉིས་ལྷག་ཏུ་གསུབ་མེད་ཀྱི་འཕྲིན་ལས་རྣམ་པར་དཀར་བའི་ཞབས་རྗེས་ཀྱི་རི་མོ་བཀོད་ནས། སྟོན་སྨད་ན་མདོ་ལིའི་རྡོ་ཁ་དགོན་གྱིས་གདན་ཞུ་མཛད་པ་བཞིན་བྱོན་ཏེ། ད་ལྟར་དགོན་དེའི་རྡོ་རྗེ་སློབ་དཔོན་ཆེན་པོ་མཁན་སྤྲུལ་རིག་པའི་རྡོ་རྗེ་སོགས་ལ་རྗེ་འབའ་མདའ་བའི་བསྡུས་གྲྭའི་སྤྱི་དོན་གྱི་ཁྲིད་མགོ་བཙུགས་ཏེ་བཤད་གྲྭ་གཞི་ནས་གསར་འཛུགས་བྱས། དུས་འཁོར་ལྷ་དགུའི་སྒྲུབ་མཆོད་ཀྱི་འཚོགས་སྲོལ་སྔར་ནས་ཡོད་པ་ལ། རྡུལ་ཚོན་གྱི་དཀྱིལ་འཁོར་བཞེངས་སྲོལ་མེད་པས། དུས་འཁོར་གྱི་ཐིག་གདབ་ཚུལ་ཞིབ་ཁྲིད་གནང་སྟེ། རྡུལ་ཚོན་གྱི་དཀྱིལ་འཁོར་ལ་བརྟེན་པའི་དུས་འཁོར་སྒྲུབ་མཆོད་འཚོགས་སྲོལ་གསར་བཞག་མཛད། གྲྭ་བ་སྤྱི་ལ་རྒྱ་སྟོད་སོགས་སྐྱ་ཆས་ཀྱི་རིགས་ནབ་མི་ཆོག་པ་དང༌། ཤམ་ཐབས་ནག་པོ་སོགས་ཁ་དོག་མ་རུང་བ་གྱོན་མི་ཆོག་པའི་སྒྲིག་ལམ་བཞག་སྟེ། དམ་པའི་ཆོས་འདུལ་བ་དང་མཐུན་པའི་ཕྱག་སྲོལ་བཟང་པོས་ལྷ་དང་བཅས་པའི་འཇིག་རྟེན་དགའ་བར་མཛད་དོ། །དགོན་དེའི་གྲྭ་བ་མི་ཉུང་བ་རེ་ཕྱོགས་ཡར་མར་ཐག་ཉེ་རིང་གི་ཁྱིམ་ཚང་རྣམས་ལ་གྲྭ་རྒྱུན་སློང་བར་མངགས་པས། གྲྭ་བ་བྱེད་མིའི་སློབ་ཕྲུག་མང་དུ་འདུ་ཐུབ་པ་བྱུང་སྟེ་དགོན་པར་གྲྭ་རྒྱུན་གྱི་སློབ་གྲྭ་གསར་འཛུགས་གནང་སྟབས། གྲྭ་གྲངས་དང་དགོན་དེའི་བཤད་སྒྲུབ་ཀྱི་གཞི་རྩ་བརྟན་པར་བྱས། སྐབས་དེར་སྤྱིར་མཛོད་འགྲེལ་ཞིག་བརྩམ་འཆར་བཞག་ནས་ལྟ་ཡིག་དང་བཅས་པ་གྲ་འགྲིག་བྱས་ཡོད་ཀྱང༌། རྡོ་རྗེ་འཆང་བླ་མ་གསལ་ལྡན་མཆོག་གིས་གཞན་སྟོང་ཞིག་བརྩམ་དགོས་ཞེས་ནན་གྱིས་སྐུལ་མ་ལན་གཉིས་སུ་ཕེབས་པས། བཀའ་བསྡུ་བཞི་བའི་འགྲེལ་བ་ལུང་རིགས་གཏེར་མཛོད་ཅེས་བྱ་བ་རབ་གནས་ས་སྐྱོང་ཞེས་པ་ཤིང་བྱ་ལོའི་མཆུ་ཟླ་བའི་ཡར་ངོའི་དགའ་བ་དང་པོའི་ཚེས་ལ་མཇུག་རྫོགས་པར་བརྩམས་ཟིན་པར་བྱས། འབྲོག་པ་ཞིག་གིས་དགོན་ཐོག་དེར་ཟོག་མང་པོ་ཚེ་ཐར་བྱེད་དུ་འོང་ནས། རྡོ་རྗེ་འཛིན་པ་ངག་དབང་གསལ་ལྡན་རྒྱ་མཚོ་མཆོག་གི་ཞབས་ལ་ཚེ་ཐར་གྱི་ནས་ཤིག་སྟོར་དུ་འབྱོན་དགོས་ཞུས་པར། ཁོ་ཏ་ཡོང་ཡང་ཆོག་སྟེ། གཙོ་བོར་ད་ཆར་འུ་ཅག་གི་དགོན་པ་འདིར་བཞུགས་ཡོད་པའི་མཁན་རིན་པོ་ཆེ་དེ་ནི་བྱང་ཆུབ་སེམས་དཔའ་ཆེན་པོ་ཞིག་ཡིན་པས། དེ་ལ་ཚེ་ནས་ཤིག་སྟོར་དུ་གཞུག་དགོས་གསུངས། དགོན་དེར་བཞུགས་སྐབས་བླ་མ་གསལ་ལྡན་གྱི་མདུན་ནས་ཆོས་འབྲེལ་དང༌། ཞར་ལ་ལུང་སྐྱ་དགོན་དུ་གྲུབ་དབང་རྒྱ་བླ་པདྨ་རྣམ་རྒྱལ་མདུན་དུ་སེམས་ཁྲིད་ཅིག་ཞུར་ཕེབས་པ་ན། ཐུགས་མཉེས་ཆེན་པོ་མཛད་དེ་དབྱེར་མི་ཕོད་པ་ལྟ་བུ་བྱས་ཤིང༌། ཕྱི་ལོ། ༢༠༠༥ རབ་རྒྱན་ཤིང་བྱ་ལོའི་བོད་ཟླ་གཉིས་པའི་ནང་བར་དུ་མདོ་ལིའི་རྡོ་ཁ་དགོན་དུ་བཞུགས་ཤིང༌། རྗེས་སུ་ཡང་ཐེངས་མང་པོར་ཞབས་སོར་བཀོད་ནས་བཀའ་སློབ་ལམ་སྟོན་རྒྱ་ཆེན་པོ་གནང་བར་མ་ཟད། མཁན་པོ་དང་སློབ་གཉེར་བ་མང་པོ་གསོ་སྐྱོང་གནང་ནས་སྔ་ཕྱི་ཀུན་ལ་བཀའ་དྲིན་གྱི་ཁུར་ལྕི་བས་བསྐྱངས་པ་ཡིན་ནོ། །བཤེས་གཉེན་རིན་པོ་ཆེ་འདི་ཉིད་ཕེབས་ཡུལ་ཚང་མར་དམ་པའི་ཆོས་འདུལ་བ་གཞིར་བཟུང་གི་སྒྲིག་ཀུན་སྤྱོད་དང༌། ཐོས་བསམ་སྒོམ་གསུམ་གྱི་ཞབས་རྗེས་རེ་བཞག་ནས་ཕེབས་པ་འདི་ནི་ཐུགས་བསྐྱེད་སྨོན་ལམ་དུས་སུ་བབ་པའི་སྐྱེས་བུ་དམ་པའི་རང་རྟགས་ཡིན་ཏེ། རྗེ་ཏཱ་ར་ནཱ་ཐའི་རང་རྣམ་མ་བཅོས་ལྷུག་པ་ལས། སྐྱེས་བུ་དམ་པ་ཕེབས་ན་སྐྱ་སེར་ག་འདྲ་ཅིག་ལ་ཡང་ཆོས་ཀྱི་རྗེས་འཇོག་ཐུབ་པ་ཅིག་དགོས་པ་ཡིན། ཆོས་ཀྱི་རྗེས་ཟེར་བ་དེ་ག་འདྲ་ཅིག་ཡོད་སྙམ་ན། ཡང་ན་སྦྱིན་གཏོང་ལ་འགོད། ཡང་ན་རྟེན་གསུམ་བཞེངས་ཤིང་མཆོད་པ་བྱེད་པ་ལ་འགོད། ཡང་ན་སྡོམ་པ་བསྲུང་བ་ལ་འགོད། ཡང་ན་ཤེས་རབ་འཕེལ་བ་ལ་འགོད། ཡང་ན་བཟླས་བསྒོམ་དང་མོས་པ་སྨོན་ལམ་རྗེས་སུ་ཡི་རང་སོགས་ལ་འགོད་པ་ཅིག་དགོས་པ་ཅིག་ཡིན། བླ་མ་བྱོན་ཤུལ་དུ་འཇིག་རྟེན་པ་རྣམས་དགེ་ལ་དཀར་ཐིང་གིས་སོང༌། རབ་བྱུང་རྣམས་ཆོས་ལ་འདུན་པ་ཆེ་ཐིང་གིས་སོང༌། སྐྱ་སེར་ཐམས་ཅད་རྒྱུད་འཇམ་ཐིང་གིས་འགྲོ། སྔར་མ་གོ་བ་འདྲ་ཁྲ་གསལ་གྱིས་གོ་བ་འདུག་ན། སྐྱེས་བུ་དམ་པ་ཡིན་པའི་རྟགས་ཡིན། ཞེས་པ་ལྟར་རོ། །དེ་ནས་སླར་ཡང་ལྕམ་མདའ་དགོན་པར་ཕེབས་ནས། བསྡུས་རྟགས་དང་དབུ་མ་ཐེག་མཆོག་རྩ་འགྲེལ་གཞིར་བཟུང་ནས་གཞན་སྟོང་གི་ཆོས་ཁྲིད་མཛད། བོད་ཟླ་གསུམ་པའི་ནང་ཛམ་ཐང་དུ་བསྟན་འགྲོ་ཀུན་ཕན་ལྷན་ཚོགས་ཐེངས་དང་བོ་འཚོགས་པར་ཕེབས་ནས། ཚོགས་འདུའི་སྟེང་བཤེས་གཉེན་རིན་པོ་ཆེས་གཞན་སྟོང་བགྲོ་གླེང་ཆེན་མོ་འཚོགས་རྒྱུ་བྱུང་ན་ཕན་འབྲས་དང་དགེ་མཚན་མང་པོ་གླེང་ནས་གྲོས་དབུ་བཏོན་པ་ལ། མཁན་ཆེན་ཤེས་རབ་གསལ་བྱེད་སོགས་དམ་པ་འགའ་ཞིག་གིས་ཀྱང་ཐུགས་མཉེས་ཆེན་པོ་མཛད་དེ། ཕྱི་ལོ། ༢༠༠༦ རབ་གནས་མེ་ཁྱི་ལོར་མགོ་ལོག་ལྕམ་མདའ་དགོན་དུ་གཞན་སྟོང་དབུ་མ་ཆེན་པོའི་བགྲོ་གླེང་ཐེངས་དང་བོ་འཚོགས་རྒྱུའི་གྲོས་ཆོད་བྱུང༌། སྐབས་དེར་ཀུན་ཕན་ལྷན་ཚོགས་ཀྱི་སྟེང་ནས་གཞན་སྟོང་བགྲོ་གླེང་ཆེན་མོའི་ཚོགས་གཙོ་དང༌། ཀུན་ཕན་ལྷན་ཚོགས་ཀྱི་ཚོགས་ཆུང་གཙོ་སྒྲུབ་པར་བསྐོ་བཞག་བྱས། དུས་སྐབས་དེ་ནི་སྔོན་ཇོ་ནང་བའི་དགོན་སྡེ་རེ་ཟུང་ཙམ་མ་གཏོགས་འཆད་ཉན་ཕར་ཞོག །གཟན་ཤམ་གོས་འགྲིག་ཙམ་ཡང་གྱོན་སྲོལ་མེད་པར་ཆགས་ཟིན་པ་ལ། ཐོག་མཐའ་བར་གསུམ་དུ་བཤེས་གཉེན་རིན་པོ་ཆེ་འདི་ཉིད་ཀྱིས་ལས་ཁུར་བཞེས་ཏེ། ཇོ་ནང་གི་དགོན་སྡེ་ཐམས་ཅད་ཀྱི་གྲྭ་མང་སྤྱི་ལ་གཟན་ཤམ་ཆ་ཚང་རྒྱུན་པར་ནབ་དགོས་པའི་སྒྲིག་ཡིག་ཁྱབ་སྤེལ་བྱས་ཏེ། རང་དགོན་ནས་མགོ་བཟུང་སྟེ་དཀའ་ཁག་མང་པོ་བརྒྱུད་དེ་ལག་ལེན་དངོས་སུ་ཐེབས་པར་བྱས། བཤེས་གཉེན་རིན་པོ་ཆེ་གང་ཉིད་ལ་མཚོན་ན་དང་ཐོག་གྲྭ་རྐྱང་དཀྱུས་མ་ཞིག་རང་གྲོ་རང་རྟ་བྱས་ཏེ་གྲྭ་སར་སོང་བ་ཞིག་རེད་ལ། ཕྱིར་ཕ་ཡུལ་དུ་ཐོན་ན་ཡང་གྲྭ་རྐྱང་སློབ་གཉེར་དུ་སོང་བ་ཞིག་རང་ཡུལ་དུ་ལོགས་པ་ལས་ཅི་ཡང་མ་རེད། རྒྱབ་རྩ་དང༌། དཔུང་རོགས། གདན་ཐོབ། འཁོར་འབངས། ལོངས་སྤྱོད་སོགས་ལྟ་ག་ལ་ཞིག །ཐ་ན་རླབས་ཆེན་གྱི་གྲོས་གཞི་ཕུལ་མཁན་གྱི་ནང་མི་སྟོབས་ཆེན་ཞིག་ཀྱང་གཞི་ནས་ཡོད་མ་མྱོང་ཡང༌། བླ་ཆེན་སུ་འདྲ་བ་ཞིག་གིས་སྒྲིག་བཀོད་བྱས་པ་ལས། བཤེས་གཉེན་རིན་པོ་ཆེ་འདི་ཉིད་ཀྱིས་གྲོས་སུ་ཕུལ་ཏེ་སྒྲིག་ཏུ་བཅས་པ་ན། རྒྱུ་རྐྱེན་འདི་ཡིན་མེད་པར་དགོན་སྡེ་ཡོངས་རྫོགས་ལ་ནུས་ཤུགས་རང་བཞིན་གྱིས་ཐེབས་འགྲོ་བ་ཞིག་བྱུང་བར་མཐོང་ཆོས་ལ་བྱུང་པ་ཡིན། འཕགས་པ་དགའ་བོ་ལ་མངལ་ན་གནས་པ་བསྟན་པ་ཞེས་བྱ་བའི་མདོ་ལས། སངས་རྒྱས་བཅོམ་ལྡན་འདས་སྔོན་བྱང་ཆུབ་སེམས་དཔའི་སྤྱད་པ་སྤྱོད་པ་ན་ཡབ་ཡུམ་དང༌། མཁན་པོ་དང༌། སློབ་དཔོན་དང༌། བླ་མའི་གནས་གཞན་རྣམས་ཀྱིས་རྗེས་སུ་བསྟན་པ་དག་དང་ནམ་ཡང་འགལ་བར་མ་མཛད་པའི་ཕྱིར་ད་ལྟར་གང་ཡང་བཀའ་ལས་འགལ་བར་མི་བྱེད་པ་བརྙེས་པར་གྱུར་པ་ཡིན་ནོ། །ཞེས་སོགས་གཅུང་དགའ་བོ་སྙིང་ཐག་པ་ནས་རབ་ཏུ་བྱུང་བར་འདོད་པ་མེད་ཀྱང༌། བཅོམ་ལྡན་འདས་ཀྱི་གསུང་ནི་སྔོན་གྱི་དགེ་རྩ་ཁྱད་པར་ཅན་གྱི་མཐུ་ལས་བྱུང་བས་ན། གསུང་ཟློག་མ་ཐུབ་པས་ངོ་མ་ལྡོག་པར་རབ་ཏུ་བྱུང་བར་གསུངས་པ་ལྟར། བཤེས་གཉེན་རིན་པོ་ཆེ་ལ་དད་མོས་ཡོད་མེད་དང༌། བཀའ་གསུང་གི་དོན་འཐད་མིན་ལ་མ་ལྟོས་པར་རང་བཞིན་གྱིས་བཀའ་གསུང་གི་ལམ་ཁ་དེར་སྙེག་འགྲོ་བ་ཞིག་ཕལ་ཆེར་གྱུར་བ་འདི་ཡང༌། བདེན་ཚིག་གྲུབ་པ་དང༌། སྨོན་ལམ་གྱི་མཐུ་གྲུབ་པ། སྨོན་ལམ་དུས་སུ་བབ་པའི་མཚན་མ་ཁྱད་པར་ཅན་དུ་འཁུམས་སོ། ། རྙཽག་མའི་འདམ་དུ་འབྱིང་པའི་རིན་ཆེན་ནོར་བུ། ། འགྲོ་བློའི་དབུལ་བའི་མིག་ངོར་རིང་ཞིག་ཡིབ་ཀྱང༌། ། ངེས་དོན་ནོར་བུའི་དཔྱད་ཀྱི་ལུང་རིགས་དཔུང་གིས། ། སླར་ཡང་ཐུབ་བསྟན་ནོར་བུའི་མཛོད་དུ་བཞེངས་སོ། ། སྙིགས་དུས་ཀྱི་བསྟན་པའི་གསལ་བྱེད་ཆེན་པོ་ངག་དབང་འཇིགས་མེད་དངོས་གྲུབ་དཔལ་བཟང་པོའི་མཛད་བཟང་བསླབ་གསུམ་ནོར་བུའི་གླིང་ཁ་ཞེས་བྱ་བ་ལས་རླབས་ཆེན་གྱི་ཕྱག་ལས་མང་པོ་དབུ་ཐོག་མར་འཛུགས་བསྐོར་གྱི་རྣམ་ཐར་མདོར་བསྡུས་པ་སྟེ་བཅོ་ལྔ་པའོ། ། ཡུལ་དགོན་དུ་བསྟན་པ་ཉམས་གསོ་དང་འཆད་གྲྭ་མང་པོའི་མ་ཕྱིའི་སྲོལ་ཡིག་གཏན་འབེབས་བྱས་པའི་བསྐོར་གྱི་རྣམ་ཐར།ཕྱི་ལོ། ༢༠༠༥ རབ་གནས་ཤིང་བྱ་ལོའི་བོད་ཟླ་བཞི་པའི་ཚེས་མགོར་ཡུལ་དགོན་དུ་གདན་འཁོད་ནས། གྲྭ་རྒྱུན་སློབ་གྲྭ་དབྱངས་ཅན་དགའ་ཚལ་དངོས་སུ་དབུ་ཚུགས་པར་བྱས་ཤིང༌། ཟླ་དེའི་ཚེས་བཅུ་གཅིག་གི་ཕྱི་དྲོར་འབའ་མདའ་བླ་མ་ཐུབ་བསྟན་དགེ་ལེགས་རྒྱ་མཚོའི་བསྡུས་གྲྭའི་སྤྱི་དོན་རིན་པོ་ཆེའི་སྒྲོན་མེའི་ཁྲིད་དབུ་བཟུང་སྟེ་བཤད་གྲྭ་སླར་གསོ་མཛད་ཅིང༌། རྨད་བྱུང་ཐོས་བསམ་གླིང་ཞེས་མཚན་གསོལ་གནང་སྟེ། རྩོད་གྲྭ་གསར་འཛུགས་ཀྱི་བཀའ་དྲིན་བསྐྱངས། ཕྲན་ཡང་དུས་དེར་མགོན་པོ་གང་གི་ཞབས་ཟུང་རིགས་ཀྱི་མེ་ཏོག་ཏུ་ཐོག་མར་ཕོག་པའི་སྐལ་བཟང་གི་དགའ་སྟོན་ཆེན་པོ་མངོན་པར་ཤར་བ་ལགས་སོ། །དེ་སྔོན་དགོན་པའི་གྲྭ་ཤག་རྣམས་སུ་རྒན་རྒོན་ཁྱིམ་པ་དག་འདུག་གནས་སུ་གྱུར་ཏེ། གྲྭ་བ་རེ་གཉིས་ཙམ་ལས་མེད་པ་ལ། དགོན་ནང་དུ་གྲོང་བའི་གནས་ཚང་བྱས་ཏེ་ཞག་འདུག་མི་ཆོག་པ་དང༌། གྲྭ་བ་རྣམས་ཀྱིས་གཟན་ཤམ་ལེགས་པར་བགོ་དགོས་པའི་ཆོས་འདུལ་བ་ལྟར་གྱི་སྒྲིག་ཁྲིམས་བསྡམས་ཤིང༌། སྐྱ་སར་བབས་ཏེ་བསླབ་པ་ཨ་ཞུ་ཡང་ཞུ་བྱེད་མི་རྣམས་ལ་ཡང་ཕམ་པ་འཆབ་བཅས་ཀྱིས་ཉམས་པ་སླར་གསོ་མི་རུང་བ་དང༌། དགེ་འདུན་པའི་གྲྭལ་དུ་འཚོགས་མི་ཉན་པའི་ཚུལ་ཆོས་འདུལ་བ་དཔང་དུ་བཞག་སྟེ་ཡང་ནས་ཡང་དུ་བཀའ་གསུང་ནན་མོ་ཕེབས། སྤྱིར་བཏང༌། བཤེས་གཉེན་རིན་པོ་ཆེ་འདི་ཉིད་དགོན་པ་གང་དུ་འབྱོན་ཡང༌། ཆོས་འདུལ་བ་ལྟར་གྱི་བསྟན་པ་དག་ཐེར་གྱི་ཕྱོགས་དང༌། བཤད་སྒྲུབ་ཀྱི་སྡེ་དགོས་ཚུལ་གྱི་བཀའ་སློབ་སུ་ལ་འཕྲོད་མིན་མ་ལྟོས་པར་རྒྱུན་ཆགས་སུ་གསུངས་པ་ཡིན་ཏེ། བཤེས་གཉེན་རིན་པོ་ཆེ་འདི་ཉིད་ཀྱི་སྡོམ་གསུམ་བསླབ་བྱའི་གཞུང་དུ་ཡང་ཕམ་པའམ་ཕམ་འདྲ་འཆབ་བཅས་ཀྱིས་ཉམས་ན་རབ་བྱུང་གི་སྡོམ་པ་སླར་གསོ་མི་རུང་བ་རྩལ་འདོན་རྒྱ་ཆེན་མཛད་པའི་དགོས་པ་ཡང་ཡུལ་དུས་ལ་གཟིགས་ནས་གསུངས་པའོ། །ལོ་དེའི་སྟོན་ཁ་ནས་དགུན་ཟླ་བར་མའི་སྨད་བར་དུ། གཞན་སྟོང་དབུ་མའི་རྒྱན་ལུང་སྦྱོར་དང་བཅས་པ། རྒྱུ་འབྲས་དབུ་མའི་ཐིགས་ལེ། དབུ་མ་ཡིད་བཞིན་ནོར་བུ། གཞན་སྟོང་སྙིང་བོ། ཚུལ་གཉིས་རྣམ་འབྱེད། ཟབ་དོན་ཉེར་གཅིག་རྣམས་ཀྱི་ཟབ་ཁྲིད་མཛད། ལོ་དེར་ལམ་རིམ་འཛིན་གྲྭ་ལ་གཞན་སྟོང་འཇིགས་མེད་གདོང་ལྔའི་ང་རོ་དང༌། ཏཱ་ར་ནཱ་ཐའི་བཟང་སྤྱོད་འགྲེལ་བའི་བཀའ་ཁྲིད་ཞིབ་རྒྱས་སུ་བསྩལ་ཏེ། རྗེ་བཙུན་ཏཱ་ར་ནཱ་ཐ་ཡབ་སྲས་རྣམས་སྐུ་གྲོངས་པ་ནས་ད་ལྟའི་བར་དུ་མདོ་ཕྱོགས་དབུ་མ་གཞན་སྟོང་གི་ཆོས་བསྐོར་འདི་རྣམས་ལ་འཆད་ཉན་ཉམས་རྒུད་དུ་བསྟུད་མར་ཕྱིན་ནས། ཕལ་ཆེར་ཁྲིད་རྒྱུན་ཙམ་ཡང་མ་ལུས་པར་མ་ཟད། གླེགས་བམ་དུ་བཞུགས་སུ་གསོལ་བ་ལས་གཞུང་བཟང་འདི་འདྲ་བ་དག་གི་མཚན་ཙམ་གླེང་མོལ་བྱེད་པ་ཡང་མེད་པར་གྱུར་ཅིང༌། འཆད་ལུགས་ཀྱང་ཀུན་མཁྱེན་དོལ་པོ་པ་དུས་གསུམ་སངས་རྒྱས་ཡབ་སྲས་དང༌། རྗེ་སྒྲོལ་མགོན་གྱི་གསུང་སྒྲོས་ལ་བསྟུན་སྲོལ་ཉམས་ནས། ངའི་བླ་མའི་གཞན་སྟོང་དང་ཁོའི་བླ་མའི་གཞན་སྟོང་དང༌། དགོན་པ་ག་གེ་མོའི་གཞན་སྟོང་ཟེར་བ་ལྟ་བུ་ཅི་ཡིན་འདི་མིན་མེད་པའི་གནས་སུ་ལྷགས་པ་ན། འཆད་རྩོད་ཟུང་འབྲེལ་གྱི་སྒོ་ནས་གཞན་སྟོང་དབུ་མ་ཆེན་པོའི་ཤིང་རྟའི་སྲོལ་སླར་ཡང་ཕྱེས་པ་ཡིན་ལ། ད་དུང་ཕྱིས་ཀྱི་བླ་མ་སོ་སོའི་ལུགས་ཡིན་ཟེར་བའི་ངག་སྒྲོས་ཐར་ཐོར་དག་བོར་ནས། ཀུན་མཁྱེན་དོལ་བོ་པ་ཡབ་སྲས་དང་རྗེ་སྒྲོལ་བའི་མགོན་པོ་མཆོག་གི་གཞུང་ཁོ་ན་དཔང་བོར་བྱས་ཏེ། ཆོས་སྐད་དང་ཁས་ལེན་ཐམས་ཅད་བྱས་པས། འཕྲིན་ལས་རྣམ་པར་དཀར་བ་ཆེན་པོ་དེ་ཉིད་ཀྱིས་ཇོ་ནང་གི་དགོན་པ་ཐམས་ཅད་ལ་ཁྱབ་པར་གྱུར། དེ་སྔོན་དུ་གཞན་སྟོང་གི་ཆོས་སྐད་མང་བོ་ཞིག་མི་མངོན་པའི་དབྱིངས་སུ་ཡལ་ཟིན་པ་ལྟ་བུ་ལ། བཤེས་གཉེན་རིན་པོ་ཆེ་འདི་ཉིད་ཀྱིས་སླར་ཡང་མི་མངོན་པའི་དབྱིངས་ནས་འཇིག་རྟེན་སྐྱེ་འགྲོའི་བགོ་སྐལ་དུ་མངོན་པར་བྱས་པ་ཡིན་ནོ། །ཨ་སྐྱོང་དགོན་བཤད་གྲྭ་རྨད་བྱུང་ཐོས་བསམ་གླིང་གི་སྒྲིག་ཡིག་གཏན་འབེབས་བཟོས་ཤིང༌། བཤེས་གཉེན་རིན་པོ་ཆེ་ཕྱོགས་ཡར་མར་དུ་ཕེབས་སྐབས་དགོན་སྡེ་མང་པོར་སྒྲིག་ཡིག་དེ་ཉིད་གཞིར་བཟུང་ནས་ཡུལ་དུས་དང་བསྟུན་ཞིང་རིམ་པས་འཐུས་སྒོ་ཇེ་ཚང་དུ་བཏང་ནས། ད་ལྟའི་ཆར་ཇོ་ནང་གི་དགོན་སྡེ་སློབ་གཉེར་རྐང་ཚུགས་པ་ཕལ་ཆེར་གྱི་སྒྲིག་ཡིག་རྣམས་བཤེས་གཉེན་རིན་པོ་ཆེ་ཉིད་ཀྱིས་དངོས་སུ་གཏན་འབེབས་གནང་བའམ། མ་གཞི་འདི་ལ་བྱས་ཏེ་བཟོས་པ་ཤ་སྟག་ཡིན། ཁྱད་པར་དུ་ཇོ་ནང་གི་འཆད་ཉན་གྱི་སྡེ་ཚང་མར་ཉིན་རེ་བཞིན་ཡིག་བརྒྱ་དང་བཟང་སྤྱོད་སྨོན་ལམ་གསུང་སྲོལ་གྱི་དམིགས་དཔེ་བཟང་པོ་ཞིག་ཡོད་པ་དེ་ཡང༌། བཤེས་གཉེན་རིན་པོ་ཆེ་འདི་ཉིད་ཀྱི་ཕྱག་སྲོལ་འཕྲིན་ལས་ཀྱི་འཇུག་པ་ཁོ་ན་ཡིན་པས། འདི་གཅིག་པུའི་རྣམ་པར་དཀར་བའི་དགེ་ཚོགས་ཀྱི་འཕྲིན་ལས་དེ་ཡང་བསམ་གྱིས་མི་ཁྱབ་པ་ཁོ་ནའི་སྤྱོད་ཡུལ་ཡིན། དེ་ཡང་དགག་དགོས་ཁྱད་པར་ཅན་ལ་བརྟེན་ནས་བཞག་པ་ཡིན་ཏེ། ཉིན་མ་རེ་རེ་བཞིན་དུ་གཉེན་པོ་སྟོབས་བཞི་ཚང་བའི་སྒོ་ནས་ཡི་གེ་བརྒྱ་བ་ཉི་ཤུ་རྩ་གཅིག་རེ་བཏོན་པར་བྱས་ན། ཐོས་བསམ་གྱི་ཤེས་རབ་དང་སྒོམ་པའི་ཉམས་རྟོགས་མི་སྐྱེ་བ་ཚང་མ་ལས་སྒྲིབ་ཀྱིས་གནོད་པ་ཤས་ཆེ་བས། ལས་སྒྲིབ་སྦྱོང་བའི་གནད་ཁྱད་པར་ཅན་ཡིན་པ་དང༌། དེང་སང་སོར་བྱང་སྔགས་གསུམ་གྱི་སྡིག་ལྟུང་མང་པོ་འབྱུང་སླ་ལ་བྱུང་དང་འབྱུང་མཁན་ཧ་ཅང་གྲངས་མང་སྟབས། དམ་ཚིག་ཉམས་ཆགས་ཀྱི་སྡིག་ལྟུང་མང་པོ་རྒྱུད་ལ་འགྲོགས་ན་ཐོས་བསམ་སྒོམ་གསུམ་གང་ལ་ཡང་མཐར་མི་ཕྱིན་པའི་བར་ཆད་འཇུག་པས། ཡི་གེ་བརྒྱ་པ་ལ་བརྟེན་ནས་ལས་སྒྲིབ་སྦྱོང་བ་གལ་ཆེ་ཚུལ་དང༌། སྔོན་བྱོན་སྐྱེས་བུ་དམ་པ་ཚོའི་གསུང་ན། ཉིན་རེར་ཡི་གེ་བརྒྱ་པ་ཉི་ཤུ་རྩ་གཅིག་རེ་སྟོབས་བཞི་ཚང་བས་བཟླས་ན་ལྟུང་བའི་འཕེལ་ཁ་ཆད་པར་གསུངས་ཡོད་པ་དང༌། སློབ་དཔོན་དང་སློབ་མའི་རྒྱུད་སྡིག་ལྟུང་ཆེ་ན་བསྟན་འགྲོའི་ལས་དོན་སྨོན་ལམ་ཇི་སྙེད་བྱས་པའི་སྨོན་ལམ་རྣམས་འགྲུབ་དཀའ་བ་དང༌། རྒྱུད་སྡིག་ལྟུང་ཆེན་པོ་དང་རྟག་པར་གནས་པས་འཇིག་རྟེན་དྲེགས་ཤུལ་ཅན་འགའ་རེ་ལས་གཞན་བཅོམ་ལྡན་འདས་ནས་མཁས་གྲུབ་གོང་མ་དག་གིས་དམ་བཞག་བསྟན་སྲུང་རྣམས་ཀྱི་མེལ་ཚེ་བྱ་ར་ལས་འགོངས་ཏེ། མཁའ་འགྲོ་དང་ཆོས་སྐྱོང་གི་སྡོང་གྲོགས་མེད་པར་མ་ཟད། འཁུ་ལྡོག་བཀའ་ཆད་བཀྲ་མི་ཤིས་པ་མང་དུ་འབྱུང་ཚུལ་དང༌། ཇོ་བོ་རྗེ་ཆེན་པོའི་རྣམ་ཐར་ན་ཡང་སྡིག་ལྟུང་འདག་པར་བྱེད་པ་ཡི་གེ་བརྒྱ་པ་འདི་སྐུ་ཚེའི་རྒྱུན་གྱི་ཉམས་ལེན་དུ་བཟུང་ནས་གལ་ཆེ་བར་གསུངས་ཡོད་པ་དང༌། ཆོས་བརྒྱུད་རིས་སུ་མ་མཆིས་པའི་སྔོན་འགྲོ་སྡིག་སྦྱོང་ཡིག་བརྒྱ་ཚད་ལྡན་གལ་ཆེ་བར་སྔོན་ནས་ད་ལྟའི་བར་དུ་གསུངས་ཤིང་ལག་ལེན་ལ་བསྟར་བཞིན་པ་སོགས་དགག་བྱ་དང་དགོས་པའི་རྒྱུ་མཚན་མང་དུ་གཟིགས་ནས་བཞག་པ་ཡིན་པར་གསུངས་སོ། །བཟང་སྤྱོད་སྨོན་ལམ་ནི། བྱང་ཆུབ་སེམས་དཔའི་སྨོན་ལམ་ཐམས་ཅད་ཀྱི་རྒྱལ་པོ་དང༌། སྨོན་ལམ་ཐམས་ཅད་འདུས་པ་ཡིན་པར་མདོ་སྡེ་དང་བསྟན་བཅོས་རྣམས་ཞལ་གཅིག་པར་མང་དུ་གསུངས་པ་དང༌། རྗེ་ཙོང་ཁ་པ་ཆེན་པོའི་ལམ་རིམ་ཆེན་མོ་ལས། ཞིང་དམ་པ་ལ་དགེ་རྩ་བསྐྲུན་པའི་མཐུ་ལས་ལམ་གྱི་རིམ་པ་རྣམས་ལ་བློའི་མཐུ་ཇེ་རྒྱས་སུ་འགྲོ་བས་མཉན་ན་ཚིག་མི་ཟིན། བསམས་ན་དོན་མི་གོ། བསྒོམས་ན་རྒྱུད་ལ་མི་སྐྱེ་བའི་བློའི་མཐུ་ཤིན་ཏུ་ཆུང་བའི་དུས་སུ་ཞིང་གི་མཐུ་ལ་བརྟེན་པ་ནི་མན་ངག་ཡིན་ནོ། །གསུངས་པ་བཞིན། ཐོས་བསམ་སྒོམ་པ་གང་བྱས་ཀྱང་ཞིང་དམ་པ་ལ་ཚོགས་གསོག་སྨོན་ལམ་གྱི་རྒྱབ་རྟེན་ཡོད་པ་ཞིག་གལ་ཆེ་བ་དང༌། བཤད་སྒྲུབ་ཀྱི་སྡེ་ལ་གནོད་པ་རྣམས་ཀྱང༌། བདུད་དང་མུ་སྟེགས་མང་པོས་དེ་མི་ཐུབ། །ཅེས་གསུངས་པ་ལྟར་གནོད་པ་ཀུན་ཞི་ནས་གཞན་གྱི་གནོད་པས་གླགས་མི་རྙེད་པ་དང༌། སྒྲིབ་སྦྱོང་སྨོན་ལམ་ཅི་བགྱིས་པ་ཐམས་ཅད་དགེ་འདུན་པ་མང་པོ་དང་ལྷན་གཅིག་ཏུ་བགྱིས་པས་ནུས་པ་གཞན་ལས་མཐུ་བཙན་པ་དང༌། སྤྱིར་རྗེས་སུ་ཡི་རང་བྱས་ན་དགེ་རྩ་མཉམ་དུ་ཐོབ་པ་དང༌། ཁྱད་པར་དུ། མཛོད་རྩ་བར། དམག་ལ་སོགས་པར་དོན་གཅིག་ཕྱིར། །ཐམས་ཅད་བྱེད་པ་པོ་བཞིན་ལྡན། །ཞེས་པ་ལྟར་མཉམ་གཅིག་ཏུ་བསམ་པ་མཐུན་པས་བྱས་པ་ཐམས་ཅད་དགེ་སྡིག་ཅི་ཡིན་ཡང་བྱེད་པ་པོ་བཞིན་དུ་ལྡན་པས། ཚོགས་ནས་ཆད་མེད་དུ་བཟང་སྤྱོད་སྨོན་ལམ་སོགས་འདོན་པར་མཛད་པ་གནད་ཆེ་ཚུལ་དང༌། དེང་སང་དཔེ་ཆ་པ་ཟེར་དུས་ཁ་ཏོན་དགེ་སྦྱོར་གཡུག་བཞག་མཁན་མང་པོ་འདུག་པས། དམིགས་ལྟོས་ངན་པ་དེ་ལྟ་བུ་ལ་མི་འགྲོ་བ་སོགས་རྒྱུ་མཚན་མང་པོ་ལ་བརྟེན་ནས་རྒྱུན་ཆགས་སུ་བཟང་སྤྱོད་གསུང་སྲོལ་འདི་བཞག་པར་གསུངས་སོ། །གཞན་ཡང༌། རྒྱུན་གསུང་སྦྱོར་དྲུག་སྨོན་ལམ་དང༌། ལྟུང་བཤགས། མདོ་གདུགས་སྒྲོལ་གསུམ། ཆོས་སྐྱོང་གི་བསྐང་པ་སོགས་རྒྱུན་ཆགས་སུ་ཚོགས་ཀྱི་འདོན་པ་ཚིག་བཞི་ཡན་ལ་དགག་དགོས་དམིགས་བསལ་བ་རེ་གཞི་བྱས་ཏེ་བཤེས་གཉེན་རིན་པོ་ཆེ་རང་ཉིད་ཀྱིས་ཐུགས་བཀོད་བྱས་ཏེ་བཞག་པ་ལས། དབུ་མཛད་ཀྱི་ཁ་ནས་ཅི་ཐོན་འདོན་སྲོལ་ཙམ་མ་ཡིན་པར་ཤེས་པར་བྱས་ཏེ། དུས་ཕྱིས་སུ་ཡང་ཕྱག་སྲོལ་འདི་དག་རྒྱུ་མཚན་དང་བཅས་པ་ཧ་གོ་བར་བྱས་ནས། རང་དགར་བསྒྱུར་ཆད་མི་གཏོང་བ་གལ་ཆེན་ཡིན་སྙམ་ནས། བླ་མ་རིན་པོ་ཆེ་མཆོག་གིས་བཀའ་གསུང་རྒྱས་པར་སྔ་ཕྱིར་བྱུང་བ་རྣམས་གནད་བསྡུས་པའི་ཁུལ་གྱིས་འདིར་བཀོད་པའོ། །ལོ་ཙཱ་བ་བྱང་ཆུབ་རྩེ་མོ་ལ་སོགས་མཁས་པ་བརྒྱ་ཤར་ཙམ་ལ་སྨན་བླའི་རྗེས་གནང་མཛད་པའི་ཚེ་ན། ནམ་མཁར་བདེ་གཤེགས་བརྒྱད་གསལ་བར་བྱོན་ནས་གསུངས་པར་ཀུན་མཁྱེན་ཆེན་པོའི་རྣམ་ཐར་དུ་གསལ་བའི། བདེ་བར་གཤེགས་པ་མཆེད་བརྒྱད་ཀྱི་སྔོན་གྱི་དམ་བཅའ་དང་བཅས་པ་འདུས་པའི་སྨན་བླ་མཆེད་བརྒྱད་དང་རིགས་གསུམ་མགོན་པོ་སོགས་ཀྱི་སྨོན་ལམ་ཁྱད་པར་ཅན་ཚིགས་བཅད་བཅུ་གཅིག་གི་བདག་ཉིད་ཅན་དེ་ཉིད་འཕྲིན་ལས་བག་ལ་ཞ་བ་ལྟ་བུར་གྱུར་པ་ལ། སྐབས་དང་སྐབས་སུ་སྨོན་ལམ་དེ་ཉིད་ཚར་གྲངས་བསགས་ཏེ་འདོན་སྲོལ་བཙུགས་སྟེ། སྨོན་ལམ་དེ་ཉིད་ཀྱི་ནང་དུ་སྨན་བླ་མདོ་ཆོག་ལྟ་བུའི་ཆོ་ག་རྒྱས་པའི་དོན་ཡོངས་བསྡུས་ཡོད་ཚུལ་སོགས་ཡང་ཡང་གསུངས་པས། ད་ལྟའི་ཆར་སླར་ཡང་འཕྲིན་ལས་ཀྱི་འོད་དཀར་འཕྲོ་བཞིན་པ་ཉིད་དོ། །བོད་ཟླ་བཅུ་གཅིག་པའི་མཇུག་ནས་ཆོས་མཚམས་བྱས་ཏེ་ཁྲིན་ཏུའུ་ནས། བཀའ་བསྡུ་བཞི་བའི་འགྲེལ་བ་དང༌། དེའི་ཟུར་མཆན། མཁྱེན་གསུམ་པདྨོ་འབྱེད་པའི་ཟླ་ཟེར། གཞན་སྟོང་ཀུ་མུད་འབྱེད་པའི་ཟླ་ཟེར། གཞན་སྟོང་སྐལ་བཟང་མིག་འབྱེད་རྣམས་ཀྱི་དཔེ་དེབ་པར་བསྐྲུན་མྱུར་རྟབ་ཀྱིས་གྲུབ་པར་བྱས་ཤིང༌། དེ་ནས་ལྕམ་མདའ་དགོན་དུ་བྱོན་ནས་བཀའ་བསྡུ་བཞི་བ་ལས་དུས་བཞི་ཆེ་ཆུང་བསྐོར་དང༌། གཞན་སྟོང་བགྲོ་གླེང་ཐེངས་དང་པོའི་དྲི་ལན་དང༌། ཚད་མའི་དཔེ་ཁྲིད་ཅི་རིགས་པ་མཛད་པའི་ཞར་ལ། ཇོ་ནང་ཤམྦྷ་ལའི་ངེས་གསང་གཞན་སྟོང་དབུ་མ་ཆེན་པོའི་བགྲོ་གླེང་གི་རྩོམ་གཞིའི་དྲིས་ལན་རབ་གསལ་སྣང་བ་བརྩམས་སོ། ། དབུ་ཡི་སྐྲ་ལོ་རྣོན་པོའི་སོ་ཁར་གཏུབ་པ་དེ་ཡི་དོན་དགོས་གང་ཡིན་ངོ་སྤྲད་ཅིང༌། ། འཆད་ཉན་གཟུགས་ཀྱིས་བསགས་སྦྱངས་དགེ་སྦྱོར་དོར་བ་དེ་ཡང་མཐར་སྤྱོད་ཁ་རྐྱང་པར་གསུངས་ཏེ། ། ཚོགས་གསོག་སྒྲིབ་སྦྱོང་སྨོན་ལམ་རྣམ་པར་དག་པའི་མཚམས་སྦྱོར་རྒྱུན་ཁྱེར་གལ་ཆེན་གནད་བཟུང་ནས། ། སྤོང་དང་ཀློག་པའི་ཕྱོགས་འཛིན་གཡོན་ལྷུང་བྲལ་བ་དེ་ཡིས་ངེས་དོན་སྙིང་པོ་གསལ་བར་བྱས། ། སྙིགས་དུས་ཀྱི་བསྟན་པའི་གསལ་བྱེད་ཆེན་པོ་ངག་དབང་འཇིགས་མེད་དངོས་གྲུབ་དཔལ་བཟང་པོའི་མཛད་བཟང་བསླབ་གསུམ་ནོར་བུའི་གླིང་ཁ་ཞེས་བྱ་བ་ལས་ཡུལ་དགོན་དུ་བསྟན་པ་ཉམས་གསོ་དང་འཆད་གྲྭ་མང་པོའི་མ་ཕྱིའི་སྲོལ་ཡིག་གཏན་འབེབས་བྱས་པའི་བསྐོར་གྱི་རྣམ་ཐར་མདོར་བསྡུས་པ་སྟེ་བཅུ་དྲུག་པའོ། ། ཚད་མའི་རིགས་ལམ་གྱི་རྨང་གཞི་ལེགས་པར་བཏིང་ཞིང་རྒྱལ་རོང་དང་ཛཾ་ཐང་ཕྱོགས་སུ་མཛད་འཕྲིན་ཐོག་མར་སྐྱོང་བསྐོར་གྱི་རྣམ་ཐར།ཕྱི་ལོ། ༢༠༠༦ རབ་གནས་མེ་ཁྱི་ལོའི་བོད་ཟླ་དང་པོའི་ཚེས་ཉི་ཤུ་གཉིས་ཉིན་སླར་ཡང་ཡུལ་དགོན་གྱི་བཤད་གྲྭ་འཚོགས་པའི་དབུ་བཟུང་ནས། བཤེས་གཉེན་རིན་པོ་ཆེ་རང་གིས་མཛད་པའི་ཇོ་ནང་ཤམྦྷ་ལའི་ངེས་གསང་གཞན་སྟོང་དབུ་མ་ཆེན་པོའི་བགྲོ་གླེང་གི་རྩོམ་གཞིའི་དྲིས་ལན་རབ་གསལ་སྣང་བའི་སྟེང་ནས་ཁྲིད་བཤད་ཟབ་རྒྱས་དང༌། ད་དུང་བཀའ་བསྡུ་བཞི་བ་དང་དེའི་རང་འགྲེལ། བཤེས་གཉེན་རིན་པོ་ཆེ་རང་ཉིད་ཀྱིས་མཛད་པའི་བཀའ་བསྡུ་བཞི་བའི་འགྲེལ་བ་རྣམས་སྤེལ་མར་བྱས་ནས་རང་ལུགས་ཐུན་མིན་གྱི་ཆོས་སྐད་ཀྱི་གྲ་ཟུར་མ་ཉམས་པའི་ལེགས་བཤད་ཀྱི་དགའ་སྟོན་ཆེན་པོ་སྤེལ། སྐབས་དེར་སློབ་མ་གོ་རྟོགས་ཚད་ཅན་ཡོད་མཁན་ཆེར་མེད་མོད། རྗེ་བཙུན་ཏཱ་ར་ནཱ་ཐའི་རང་རྣམ་མ་བཅོས་ལྷུག་པ་ལས། ཁྱད་པར་རྒྱུད་དོན་ཞིབ་མོར་བཤད་ན་དེར་ཚོགས་མི་རྣམས་ཀྱིས་མ་གོ་རུང༌། དཔའ་བོ་མཁའ་འགྲོ་དང་དཀར་ཕྱོགས་ཀྱི་ལྷ་རྣམས་དགྱེས་པར་ངེས་ཤེས་སྐྱེས་ཏེ། རྒྱུད་དོན་ལྟར་མཐའ་གཅོད་བཤད་པ་ཡང་ཤིན་ཏུ་རྒྱས་པར་བྱས། སྤྱིར་ད་ལྟ་ཡང་ཀུན་མཁྱེན་ཆེན་པོ་ནས་བརྒྱུད་པ་ཆོས་རྗེ་ཕྱོགས་ལས་རྣམ་རྒྱལ་བའི་ཁྲིད་ཡིག་གི་སྟེང་ནས་འཆད་པ་ཙམ་དང༌། དམ་པའི་ཕྱག་ལེན་ཙམ་ཡོད་པ་འགའ་རེ་འདུག་ན་ཡང༌། ཀུན་མཁྱེན་ཇོ་ནང་པ་ཡབ་སྲས་ཀྱི་གྲུབ་མཐའ་ཤེས་བཞིན་དུ་སྐྱོང་བ་ཤིན་ཏུ་དཀོན་པར་འདུག་པ་དང༌། ཇོ་ནང་གི་གདན་སར་ཕེབས་པ་ལའང་རྗེ་ཨོ་རྒྱན་རྫོང་པ་སོགས་འགའ་ཞིག་གིས་ཇོ་ནང་པའི་ལུགས་ཀྱི་དབང་ཁྲིད་སོགས་གནང་ཡང༌། ཀུན་མཁྱེན་ཆེན་པོའི་བཞེད་སྲོལ་རྒྱལ་བ་སྲས་བཅས་ཀྱི་གསང་ཚིག་དོན་དམ་གཞན་སྟོང་དུ་སྟོན་པ་རྡོ་རྗེའི་གསུང་སེང་གེའི་སྒྲར་གྲགས་པ་རྣམས་ལ་ཟུར་ཟ་དང་དགག་སྒྲུབ་མཛད་པས། ཆོས་སྲུང་ཕྱིན་ཆད་མ་མཉེས་པའི་གསུང་ངག་མི་བདེ་བ་སོགས་ཇི་སྙེད་ཞིག་བྱུང་འདུག །སྤྱིར་དངོས་ཅག་གིས་ཤིང་རྟ་ཆེན་པོ་སུ་ལའང་དགག་སྒྲུབ་ནུས་པ་མ་ཡིན་པས་མཆོག་ཏུ་གུས་པར་བྱེད་མོད་ཀྱི་སྐབས་འདི་དག་ཏུ་ནི་རྟོན་པ་བཞི་ལྡན་ཆེན་པོ་ཉིད་ཀྱི་བཞེད་པ་ལྟར་དགག་སྒྲུབ་ཀྱང་མཐའ་ཆོད་པར་བྱས་སོ། །ཞེས་གསུངས་པ་ལྟར། རིང་ནས་ཉམས་པའི་ཀུན་མཁྱེན་ཇོ་ནང་པ་ཆེན་པོའི་བཞེད་ཚུལ་གྱི་ཆོས་སྐད་སེང་གེའི་སྒྲ་ཆེན་པོ་སླར་ཡང་ཇི་ལྟ་བ་བཞིན་དུ་བསྒྲགས་པས། ཆོས་སྲུང་མཁའ་འགྲོ་དང་མི་མངོན་དབྱིངས་ཀྱི་ཐུགས་རྗེའི་བདག་ཉིད་ཐམས་ཅད་དགྱེས་པ་བསྐྱེད་པ་དང༌། ངེས་དོན་ཕྱིར་མི་ལྡོག་པའི་ཆོས་ཚུལ་ཟབ་མོ་འགྲན་ཟླ་དང་བྲལ་པ་འདི་ཉིད་སྤེལ་བའི་རྟེན་འབྲེལ་ཕུན་སུམ་ཚོགས་པ་ལེགས་ཕྱོགས་སུ་འགྲིག་ཡོད་ངེས་སེམས་སོ། །ཇོ་ནང་བསྟན་འགྲོ་ཀུན་ཕན་ལྷན་འཚོགས་སྐབས་སུ་བསྟན་པའི་གཞི་མ་དགེ་འདུན་ཡིན་པའི་ཕྱིར་དགོན་པ་སོ་སོས་གྲྭ་རྒྱུན་སློབ་ཆུང་འཛུགས་དགོས་ཚུལ་དང༌། དགོན་པ་རྣམས་ཁྲིམས་གཙང་ངུར་སྨྲིག་གི་སྡེ་བཅའ་དག་དགོས་པ། སྒྲུབ་གྲྭ་རྣམས་འཐུས་ཇེ་བཟང་དང༌། གྲྭ་མང་སློབ་གཉེར་ལ་སྐུལ་སློང་གི་ཕྱག་ལས་གནང་རྒྱུ་སོགས་གལ་གནད་མང་པོ་ནན་ཆེར་གསུངས་སོ། །བོད་ཟླ་བཞི་པ་སྟེ་ས་ག་ཟླ་བའི་ཚེས་ཉི་ཤུ་ནས་ལྕམ་མདའ་དགོན་དུ་ཉིན་ཉི་ཤུའི་ཡུན་ལ་ཇོ་ནང་གཞན་སྟོང་དབུ་མ་ཆེན་པོའི་བགྲོ་གླེང་ཐེངས་དང་པོ་འཚོགས་པར། བགྲོ་གླེང་གི་རྒྱུགས་སྤྲོད་སོགས་འཚོགས་རིམ་ཡོངས་རྫོགས་ཀྱི་ལས་ཁུར་གཅིག་ཆོག་གིས་བཞེས། དེ་ནས་བཤེས་གཉེན་རིན་པོ་ཆེ་དང་མཁན་ཆེན་ཤེས་རབ་གསལ་བྱེད་རྣམ་གཉིས་ལུང་སྐྱ་དགོན་པའི་སྨོན་ལམ་གྱི་སྐབས་སུ་དགོན་དེར་ཕེབས་ནས། རྟོགས་པའི་དབང་ཕྱུག་རྒྱ་བླ་པདྨ་རྣམ་རྒྱལ་དང་དགོན་དེའི་མཁན་ཚུལ་ཁྲིམས་རྣམ་གཉིས་ལ་ཐུགས་བགྲོས་མཐུན་པར་མཛད་ནས། གྲྭ་མང་དགོན་པར་བཞུགས་ནས་ཐོས་བསམ་སྒོམ་གསུམ་གནང་དགོས་ཚུལ་དང༌། གྲྭ་རྒྱུན་བདག་སྐྱོང་དང་མ་འོངས་པའི་བསྟན་དགོན་གྱི་སུན་རྩ་གྲྭ་ཆུང་བསྐྱེད་བསྲིང་འབྱུང་ཕྱིར། དགོན་པའི་གྲྭ་རྒྱུན་སློབ་གྲྭ་འཛུགས་དགོས་པའི་ལམ་སྟོན་ནན་མོ་བྱས། དེ་ནས་ཡུལ་དགོན་དུ་མུ་མཐུད་དེ་ཆོས་ཁྲིད་སྐྱོང་བཞིན་བཞུགས། བོད་ཟླ་དྲུག་པའི་ཡར་ངོའི་སྐབས་ན་ལྕམ་མདའ་དགོན་གྱི་མཁན་བློ་བཟང་ཆོས་གྲགས་རྒྱ་མཚོ་གཙོས་ཐོས་བསམ་པ་ཡོངས་རྫོགས་དང༌། མདོ་ལིའི་རྡོ་ཁ་དགོན། ལུང་སྐྱ་དགོན། གདོང་སྐོར་དགོན་སོགས་དགོན་སྡེ་དུ་མའི་སློབ་གཉེར་བ་མང་བོ་ཨ་སྐྱོང་དགོན་དུ་ཕེབས་ནས། ཚད་མའི་འཛིན་གྲྭ་ཐེངས་དང་པོ་ཟླ་བ་གཉིས་ཀྱི་ཡུན་ལ་ཟབ་རྒྱས་ངང་འཚོགས། དུས་སྐབས་དེ་ནི་ཇོ་ནང་གི་དགོན་སྡེ་རྣམས་སུ་རིགས་ལམ་གསར་འཛུགས་ཀྱི་དུས་ཚོད་དམིགས་བསལ་བ་ཞིག་ཡིན་པས། གནས་སྐབས་ཀྱི་དགོས་པའི་གཙོ་བོ་རྣམ་ཐར་སྒོ་བཞིའི་ལན་འདོན་ལུགས་ནས་རིགས་ལམ་ལྡན་པའི་ཞིབ་ཆ་འབྱེད་སྟངས་དང༌། དྷཱི༔སྐད་འདོན་ལུགས་དང་རྩོད་པའི་རྣམ་འགྱུར་ནས་རྟགས་སྦྱོར་འགོད་ལུགས་སོགས་རིགས་ལམ་བཅའ་དག་སྤུས་གཙང་ཞིག་འཛུགས་ཐུབ་པའི་ཆེད་དུ་བྱས་པ་ཞིག་ཡིན། བཤེས་གཉེན་རིན་པོ་ཆེས་དེའི་སྐབས་སུ་ནམ་རྒྱུན་གྱི་གསུང་འཕྲོས་སུ། ནང་བ་སངས་རྒྱས་པའི་གཞུང་ལུགས་སྤྱི་དང༌། ཁྱད་པར་དུ་དཔལ་ན་ལེནྜ་ནས་བརྒྱུད་པའི་བོད་བརྒྱུད་ནང་པ་སངས་རྒྱས་པའི་མདོ་སྔགས་ཐེག་པ་གོང་འོག་གི་བཤད་པ་ཐམས་ཅད་རིགས་པའི་རྗེས་སུ་འབྲངས་པ་ཤ་སྟག་ཡིན་པས། ཚད་མའི་རིགས་ལམ་གྱི་འགྲོས་གཙང་མ་ཞིག་ཆགས་མེད་ན། གཞུང་དེའི་གོ་དོན་ཕྲ་ཞིབ་ཤེས་པའི་ཐབས་མེད་པས། མཁས་པ་ཚོའི་གསུང་རྒྱུན་ལ་ཡང༌། དབུ་ཚད་སེང་གེ་མཇིངས་བསྣོལ་ཞེས། དབུ་མའི་སྐབས་ཀྱི་ཀུན་རྫོབ་དང་དོན་དམ་དཔྱོད་པའི་རིགས་པ་རྣམས་ཚད་མའི་རིགས་ལམ་དང་ཁ་འབྲལ་ཐབས་མེད་པ་ཡིན་གཤིས། བོད་བརྒྱུད་ནང་པ་སངས་རྒྱས་པའི་གཞུང་ལུགས་ཤེས་པ་དང༌། འཆད་ཉན་ལུང་གི་བསྟན་པ་འཐུས་འཚང་བ་ཞིག་དགོས་པ་ལ་གྲོང་ནག་གི་ཤགས་འགྱེད་ལྟ་བུ་སྐད་གཟེངས་སུའི་མཐོ་དང༌། ཁ་ལྕེ་སུ་མཁས་ཙམ་གྱིས་མི་འོང་བར་རིགས་ལམ་བཅའ་དག་སྤུས་གཙང་ཞིག་ཆགས་དགོས་ཞེས་ཡང་དང་བསྐྱར་དུ་གསུངས་སོ། །རྩོད་པ་ཇི་ལྟར་རྩོད་པའི་ཚུལ་ཡང༌། བཤེས་གཉེན་རིན་པོ་ཆེ་ཉིད་ཀྱི་རྟགས་རིགས་ལེགས་བཤད་དྲི་མ་མེད་པའི་འོད་ལས། ཇི་ལྟར་རྩོད་ཚུལ་ནི། སྐྱེས་སྟོབས་ཀྱི་ཤེས་རབ་ཆེ་བ་དང༌། སྒྲ་ཚད་ལ་བློ་སྦྱངས་པ་དང༌། རང་གཞན་གྱི་གྲུབ་མཐའ་ལ་ལེགས་པར་སྦྱངས་བ་ནི་རྩོད་པ་ལ་མཁས་པའི་རྒྱུ་ཡིན་ལ། བཞིན་གྱི་དཀྱིལ་འཁོར་འཛུམས་པ་དང༌། དོན་དང་ལྡན་ཞིང་གསལ་ལ་འཇམ་པའི་ངག་དང་ལྡན་པ་དང༌། སྒྱིད་ལུག་པ་དང་ང་རྒྱལ་མེད་པ་ནི། རྩོད་པ་མཛེས་པའི་རྒྱན་ཡིན་པའོ། །རྩོད་པའི་བསམ་པ་ནི། ཕ་རོལ་བོ་དམའ་བར་འདོད་པའི་ཞེ་སྡང་དང༌། རང་ཉིད་མཐོ་བར་འདོད་པའི་འདོད་ཆགས་དང༌། རིགས་ལམ་འདོར་བར་འདོད་པའི་གཡོ་སྒྱུ་རྣམས་ནི་རྩོད་པའི་བསམ་པ་ཐ་ཤལ་ཡིན་ལ། རང་གིས་ཤེས་པར་འདོད་པའི་གུས་པ་དང༌། གཞན་གྱི་ལོག་རྟོག་བསལ་བར་འདོད་པའི་སྙིང་རྗེ་དང༌། ཕ་རོལ་པོ་ལ་ཟབ་མོའི་ཆོས་བསྟན་པར་འདོད་པའི་བྱམས་པ་རྣམས་ནི་རྩོད་པའི་བསམ་པ་ཕུལ་དུ་བྱུང་བ་ཡིན་ནོ། །རྣམ་དག་རྩོད་པའི་དཔེ་ནི། རང་དང་གཞན་གྱི་གཏི་མུག་གཅོད་པ་འཁོར་ལོ་ལྟ་བུ་དང༌། སུན་འབྱིན་པའི་རླུང་གིས་མི་གཡོ་བ་ལྷུན་པོ་ལྟ་བུའོ། །ཚིག་དང་དོན་ལ་མ་རྨོངས་པ་ཐུབ་པའི་དབང་པོའི་སྲས་ལྟ་བུའོ། །རྩོད་པའི་འབྲས་བུ་ཡང་དག་ནི། རྟོགས་པ་འཕེལ་བས་རང་རྒྱུད་ཚིམ་པ་དང༌། སྙན་པའི་གྲགས་པ་ཕྱོགས་ཀུན་ཏུ་ཁྱབ་པ་དང༌། བསྟན་པ་བསྲུངས་པའི་ཆོས་ཀྱི་རྒྱལ་པོ་ཐོབ་པར་འགྱུར་བའོ། །དེས་ན་རྩོད་པའི་སྐྱོན་རྣམས་སྤངས་ནས་རྣམ་པར་དག་པའི་རྩོད་པ་ལ་བདག་ལེགས་སུ་འདོད་པ་རྣམས་ཀྱིས་འབད་པར་བྱའོ། །ཞེས་གསུངས་པ་ལྟར། ངེས་པར་དུ་རྒྱལ་ཕམ་གྱི་བསམ་པ་མེད་པར་ཆོས་སུ་འགྲོ་བ་ཞིག་དགོས་ཞེས་ལན་གཅིག་མ་ཡིན་པར་གསུང་མོལ་རྒྱུན་དུ་ཕེབས་སོ། །ཁྱད་པར་དུ། གཞན་སྟོང་བགྲོ་གླེང་ཆེན་པོ་ཐེངས་དང་པོ་འཚོགས་སྐབས་ཇོ་ནང་གི་དགོན་སྡེ་འཆད་ཉན་ཅུང་ཟད་ཡོད་པ་ཚང་མ་འདུས་ཁུལ་བྱས་ཀྱང༌། ཐ་ན་རྟགས་གསལ་སྒྲོས་དག་གཅིག་འགོ་འཁྱོངས་མི་ཡང་གཞི་འཛིན་ས་དཀོན་པའི་ཚོད་དུ་སླེབས་པ་དང༌། གྲྭ་ཆེ་ཆུང་མེད་པའི་རྩོད་རྒྱུགས་རྣམས་བློ་བླངས་ནས་འཕེན་པ་ལས། རང་འགོ་ཐོན་པའི་རིགས་ལམ་གཏོང་མཁན་ཧ་ལམ་མ་བྱུང་བའི་རྐྱེན་གྱིས། བགྲོ་གླེང་གཞུག་ཏུ་བཤེས་གཉེན་རིན་པོ་ཆེ་མཆོག་གིས་ཚད་མའི་འཛིན་གྲྭ་ཞེས་པ་དེ་འཚོགས་རྒྱུའི་ཐུགས་ཐག་བཅད་པ་ཡིན། ཚད་མ་འཛིན་གྲྭ་ཐེངས་དང་པོའི་སྐབས་སུ་ཁྲིད་གཞུང༌། བསྭེ་བསྡུས་དང༌། འཇམ་དབྱངས་བཞད་པའི་རྟགས་རིགས་རྩོམ་འཕྲོ། བསྭེ་ཁྲི་ཆེན་གྱིས་མཛད་པའི་རང་ལུགས་རྟགས་རིགས། འབའ་བསྡུས་ཀྱི་སྡེ་ཚན་ཁ་ཤས་བཅས་ཡིན། ཟླ་བ་གཉིས་ལྷག་གི་ཡུན་ལ་ཚོགས་ནས་ཆོས་སྟོན་ཉིན་བཞི་དང་བཅས་ལྷ་རྒྱལ་བའི་ངང་ནས་སློབ་གཉེར་བ་ཕལ་ཆེར་རང་རང་གི་དགོན་པར་ཕེབས། སྐབས་དེའི་དབྱར་གནས་ནང་དུ་བདེ་ནང་དགོན་པར་བྱོན་ནས་དགོན་བདག་སྤྲུལ་གོ་པོ་གཙོས་བཀའ་གྲོས་ལམ་སྟོན་ནན་མོ་གནང་ཞིང༌། ཀུན་ཕན་ལྷན་ཚོགས་ཀྱི་ངོས་ནས་གྲྭ་རྒྱུན་སློབ་གྲྭ་འཛུགས་པའི་མཐུན་རྐྱེན་དུ་སྦྱོར་རྒྱུའི་དཔལ་འབྱོར་ཅུང་ཟད་བསླངས་ཏེ་རོགས་སྐྱོར་དང་བཅས། སློབ་ཆུང་དངོས་སུ་དབུ་བཟུང་ཐུབ་པ་བྱུང༌། ཡུལ་དགོན་དུ་འབའ་མདའི་ཕར་ཆུང་ཡུམ་དོན་གསལ་བའི་མེ་ལོང་ཡོངས་རྫོགས་དང༌། ཞར་ལ་བསྭེ་བསྡུས་སོགས་ཀྱི་ཁྲིད་དང༌། བཤད་སྒྲུབ་གཉིས་ཅར་ལ་རི་ཆོས་ངེས་དོན་རྒྱ་མཚོ་དང༌། དུས་འཁོར་ཡོངས་རྫོགས་དང་འཁོར་ལོ་སྡོམ་པའི་ཆོ་གའི་བཀླག་ལུང་བསྩལ། ལོ་དེའི་དགུན་དུས་སུ་འཇམ་དཔལ་རྣམ་རྒྱལ་སོགས་རྒྱལ་རོང་ཕྱོགས་སུ་མངགས་ནས་རྨེ་སྤྲུལ་རྡོ་རྗེ་དགྲ་འདུལ་དང་དགོན་པ་སོ་སའི་ལས་སྣེ་རྣམས་ལ་འབོད་བསྐུལ་བྱས་ཏེ། ཛ་འགོའི་རི་ཁྲོད་དང༌། དགོན་ལག་གི་ལྷ་སྡེ་སོ་སོ། པཱ་ལ་དགོན། ཁང་གསར་དགོན། ཙག་དགེ་བ་དགོན་སོགས་སུ་དངོས་བརྒྱུད་ནས་གྲྭ་རྒྱུན་སློབ་ཆུང་རེ་འཛུགས་ཐུབ་པ་བྱུང་ཞིང༌། དེའི་བདག་རྐྱེན་ལས་སྐད་ཡིག་དང་མི་རིགས་ལ་ཡང་ཞབས་ཏོག་བླ་མེད་བྱུང་ཡོད། བོད་ཟླ་བཅུ་གཅིག་པའི་ཚེས་ཉི་ཤུའི་ནང་དུ་ཕུན་སུམ་ཚོགས་པའི་དགའ་སྟོན་དང་བཅས་ཏེ་ཆོས་མཚམས་བྱས། བྱང་ཆུབ་སྤྱོད་འཇུག་ལས། བདག་ནི་གཞན་གྱི་དབང་གྱུར་ཞེས། །ཡིད་ཁྱོད་དེ་ལྟར་ཤེས་གྱིས་ལ། །སེམས་ཅན་ཀུན་དོན་མ་གཏོགས་པ། །ད་ནི་ཁྱོད་ཀྱིས་གཞན་མི་བསམ། །ཞཻས་པ་ལྟར། ཉིན་མཚན་ལྟོས་མེད་དུ་གཞན་དོན་འབའ་ཞིག་སེམས་ཤིང་བསྟན་འགྲོ་ལ་སྨན་པའི་སྤྱོད་པ་ངལ་མེད་དུ་མཛད་པ་དེ་ཐེག་པ་ཆེན་པོའི་གང་ཟག་ཁྱད་པར་བའི་ཉམས་ལེན་སྤྱོད་པའི་གཙོ་བོ་ཡིན་ནོ། །ཡུལ་དགོན་གྱི་ཆོས་མཚམས་གྲོལ་བ་དང་ལྕམ་མདའ་དགོན་དུ་དཔེ་ཁྲིད་བྱེད་པར་བྱོན་ནས། ལོ་ཕྱི་མའི་གཞན་སྟོང་བགྲོ་གླེང་ཆེན་མོའི་དྲིས་ལན་དང༌། ཚད་མའི་དཔེ་ཁྲིད་མཛད། ཟླ་བ་བཅུ་གཉིས་པ་སྟེ་རྒྱལ་ཟླའི་ཚེས་བཅུ་གསུམ་ནས་གཞན་སྟོང་བགྲོ་གླེང་ཐེངས་གཉིས་པའི་དྲིས་ལན་ལུང་རིགས་འདོད་འཇོའི་དཔག་བསམ་ལྗོན་ཤིང་བརྩམ་པའི་དབུ་བཟུང་ནས་རྒྱལ་ཟླའི་ཚེས་ཉེར་ལྔ་ལ་མཇུག་རྫོགས་པར་བྱས། ཚེས་ཉེར་དྲུག་ནས་སྡོམ་གསུམ་གྱི་བསླབ་བྱ་བདུད་རྩིའི་ཆུ་གཏེར་ཞེས་བྱ་བ་སྤྲུལ་རྡོ་རྗེ་དགྲ་འདུལ་གྱིས་འབྲི་གཞིའི་ཤོག་གུ་དར་དང་བཅས་ཏེ་བསྐུལ་ངོར་དབུ་བཟུང་ནས་མེ་ཕག་ལོའི་མཆུ་ཟླའི་ཚེས་དྲུག་བར་ཏེ་ཉིན་བཅུ་གཅིག་གི་རིང་ལ་རྫོགས་པར་མཛད་དོ། །དེ་ནས་ཕྱི་ལོ། ༢༠༠༧ ལོའི་བོད་ཟླ་དང་བོའི་ཚེས་ཉེར་གཅིག་ནས་སླར་ཡང་རང་དགོན་དུ་འཆད་ཉན་གྱི་དབུ་བཟུང་ནས། གཞན་སྟོང་དབུ་མའི་བགྲོ་གླེང་གི་དྲིས་ལན་དང༌། དབུ་མ་འཇུག་པའི་འགྲེལ་བ་ལུང་རིགས་སྒྲོན་མེ་སོགས་ཀྱི་བཀའ་ཁྲིད་གནང༌། རི་ཆོས་ངེས་དོན་རྒྱ་མཚོར་རྒྱུད་ཚིག་སོགས་གོ་དཀའ་བ་མང་བས། སློབ་གཉེར་བ་སྤྱིར་བཏང་གིས་འཇུག་དཀའ་བར་གཟིགས་ནས། དོན་གྱི་གནད་འདུས་ཤིང་གོ་སླ་བསྡེབས་པའི་སྒོ་ནས་བོད་ཟླ་གཉིས་པ་སྟེ་དབོ་ཟླ་བའི་ལེགས་པ་བརྒྱད་འཛོམ་འཕྲོད་སྦྱོར་ཕུན་སུམ་ཚོགས་པའི་ཚེས་ཉེར་གཉིས་ལ་རི་ཆོས་ངེས་དོན་རྒྱ་མཚོའི་བསྡུས་དོན་རྩོམ་པའི་དབུ་བཟུང་ནས་ཉིན་གསུམ་གྱི་རིང་ལ་རི་ཆོས་ཀྱི་ཡིག་གཟུགས་གློག་རྡུལ་ལས་ཁོལ་དུ་བྱུང་ནས་རྫོགས་པར་བརྩམས། ལྕམ་མདའ་དགོན་གྱི་མཁན་བློ་བཟང་ཆོས་གྲགས་དང་གྲྭ་བསམ་བཟང་གཉིས་ཀྱིས་རྩོམ་སྐུལ་དང༌། ཁྱད་པར་དུ་སྐབས་དེར་རང་ལུགས་ཀྱི་གྲུབ་མཐའི་རྣམ་བཞག་གཞུང་ཆེན་ཁག་ཏུ་མི་གསལ་བ་མིན་ཡང༌། དུས་ཕྱིས་མཁས་པ་རེ་ཟུང་གིས་གཞན་ལུགས་རྗེས་བརྗོད་ཀྱི་གྲུབ་མཐའ་རྩོམ་ཁུལ་བྱས་པའི་རྐྱེན་གྱིས། དབུ་སེམས་ཀྱི་སློབ་དཔོན་སོགས་རང་གཞུང་དང་འགལ་བ་ཁོ་ན་སྨྲ་བ་རྒྱ་འབྱམས་སུ་གྱུར་བའི་ཚུལ་ལ་གཟིགས་ཏེ། གྲུབ་མཐའི་རྣམ་བཞག་ལུང་རིགས་གཏེར་མཛོད་ལེགས་བཤད་འདོད་འཇོ་ཞེས་བྱ་བ་མཛད་དོ། །ལོ་དེར་སླར་ཡང་བསྟན་འགྲོ་ཀུན་ཕན་ལྷན་ཚོགས་ཀྱི་སྟེང་ནས་དམ་པ་གང་གིས་བཀའ་མངགས་བྱས་ཏེ་འཇམ་དཔལ་རྣམ་རྒྱལ་སོགས་སོང་ནས། རྒྱལ་རོང་གི་གྲྭ་རྒྱུན་སློབ་གྲྭ་རྣམས་ལ་ལྟ་རྟོག་དང་སློབ་གསོ། མ་དངུལ་རོགས་རམ་ཅི་ནུས་སུ་མཛད། བོད་ཟླ་བཞི་པ་སྟེ་ས་ག་ཟླ་བའི་ཚེས་ཉི་ཤུ་ལ་ཛམ་ཐང་གཙང་བ་དགོན་དུ་གཞན་སྟོང་དབུ་མའི་བགྲོ་གླེང་ཆེན་མོ་ཐེངས་གཉིས་པའི་ཚོགས་རིམ་ཡོངས་རྫོགས་ཀྱི་ལས་འགན་གཅིག་ཆོག་ཏུ་བཞེས། ཕྱིས་སུ་གཞུག་སྐྱོང་ཐུབ་མེད་ཀྱང་སྐབས་དེར་མཁན་བླ་སྤྲུལ་དུ་མའི་བཀའ་གྲོས་ལ་ཕྱིན་ཆད་ཇོ་ནང་བའི་གཞུང་ལུགས་རྩོད་པ་ན་གཞན་སྟོང་བགྲོ་གླེང་ཆེན་མོའི་སྟེང་ནས་དམ་བཅའ་མཛད་སྲོལ་བྱུང་ན་ཞེས་གསུངས་པ་ལ་བརྟེན་ནས། སྐབས་དེར་སློབ་གཉེར་རྩེ་གྲས་སུ་བརྩི་བའི་དགོན་པ་སོ་སོར་གཞུང་གི་སྟོད་སྨད་བགོས་ནས་བརྒལ་བརྟག་གི་ལས་འགན་བཞག་སྟེ། བཤེས་གཉེན་རིན་པོ་ཆེ་མཆོག་གིས་བགྲོ་གླེང་ཆེན་མོའི་གྲྭ་ཚང་ལྷན་རྒྱས་ཀྱི་དབུས་སུ་ནུབ་ཐུན་གཅིག་ལ་བཀའ་བསྡུ་བཞི་བའི་འགྲེལ་པ་ལུང་རིགས་གཏེར་མཛོད་ཀྱི་སྟེང་ནས་དམ་བཅའ་བཞག་ཅིང༌། མཁས་དབང་དམ་པ་བདེ་ལེགས་རབ་རྒྱས་ཀྱིས་ཚོགས་དབུས་སུ་བསྟོད་བསྔགས་ཀྱི་མེ་ཏོག་ལྷུག་པོར་འཐོར་ཞིང༌། གཞན་སྟོང་དབུ་མ་ཆེན་པོའི་བསྟན་པའི་གསལ་བྱེད་གཅིག་པུར་བསྔགས་པའི་བསྟོད་ཚིག་ཆེད་རྩོམ་ཕུལ། ས་ཕྱོགས་དེར་གཟན་ཤམ་བགོ་ལུགས་དང་བགོ་དགོས་ཚུལ་དང༌། གྲྭ་བའི་འོས་འགན་སོགས་སློབ་སྟོན་མི་བཟད་པ་གནང་བར་མ་ཟད། མཆོག་སྤྲུལ་འཇིགས་མེད་རྡོ་རྗེ་སོགས་ཀྱིས་ཀྱང་གུས་བརྩི་བླ་མེད་མཛད། མི་ཤེས་པ་འགའ་རེས། ཕྱིའི་གཟན་ཤམ་སོགས་གོས་ཀྱི་ཧེ་བག་ཉམས་ལེན་མེད་པ་ག་གེ་མོའི་ལས་ཀ་ཡིན་གྱི། རང་རེ་སྦྱོར་བ་ཡན་ལག་དྲུག་གི་ཉམས་ལེན་མཛད་སྲོལ་ཡོད་པས་ཕྱི་ཚུལ་ལ་གྱོན་པ་ཅི་གོན་ཁྱད་པར་མེད་ཟེར་བ་སོགས་བྱུང་པ་ལ། བཅོལ་ལྡན་འདས་ཀྱིས་ཐོག་མར་ལྔ་སྡེ་བཟང་པོ་ལ། ཤམ་ཐབས་ཟླུམ་པོར་བགོ་བ་ལ་བསླབ་པར་བྱའོ་ཞེས་པ་ནས། འདུལ་བའི་བཅས་པ་རྣམས་བཅོམ་ལྡན་འདས་ཀྱི་འཁོར་དགེ་སློང་གི་དགེ་འདུན་ཆེན་པོ་འཕགས་པ་རྣམས་ལ་བཅས་པ་མཛད་ཅིང༌། དེ་དག་གིས་སྲུང་དགོས་ན་རང་རེ་ལྟ་ཅི་སྨྲོས་ཞེས་དང༌། འདུལ་བ་ལུང་རྣམ་འབྱེད་ལས། ཟག་པ་ཀུན་གྱི་ཆུ་ལོན་འདུལ་བ་ཡིན། །རྒྱལ་བ་སྟོན་པ་དེ་ཡི་བསྟན་བཅོས་གང༌། །མདོ་དང་ཆོས་མངོན་ཡིན་གསུངས་འདུལ་བ་ནི། །སྟོན་དང་བསྟན་བཅོས་དངོས་ཡིན་དེ་ཡི་ཕྱིར། །གཉིས་འགྱུར་ཕྱག་བྱ་སངས་རྒྱས་ཆོས་གཅིག་གཞན། །གང་ལ་བརྟེན་ཏེ་གནས་པའི་སངས་རྒྱས་རྣམས། །དེ་ལ་གུས་བཅས་རྗེ་སར་བཅས་གྱུར་ཅིང༌། །དེ་ནི་མགོན་པས་མགོན་ཡིན་སྐྱབས་གནས་ཡིན། །དེ་ཕྱིར་རབ་བསྒྲིམས་འདུལ་ལ་ཕྱག་ཚོལ་ཅིག །ཅེས་འདུལ་བ་སྡེ་སྣོད་གཞན་གཉིས་ལས་ཀྱང་རྩ་བར་གསུངས་པ་དང༌། གང་ཞིག་སྟོན་པ་ཐུགས་རྗེའི་བསྟན་པ་ལ། །ཡང་བར་སེམས་ཤིང་ཅུང་ཟད་འདའ་བྱེད་པ། །དེ་ནི་དེ་ལས་སྡུག་བསྔལ་གཞན་དབང་ཐོབ། །སྨྱིག་ཚལ་བྲེགས་པས་ཨ་མྲའི་ཚལ་ཉམས་བཞིན། །འདི་ན་ལ་ལས་རྒྱལ་པོའི་ཚིག་ཆེན་ཡང༌། །བཟླས་ན་ལན་འགའ་ཆད་པ་འཐོབ་མི་འགྱུར། །ཐུབ་པའི་བཀའ་ལུང་ཚུལ་མིན་བཟླ་བྱས་ན། །དུད་འགྲོར་འགྲོ་འགྱུར་ཨེ་ལའི་འདབ་ཀླུ་བཞིན། །ཞེས་སོགས་བསླབ་པའི་གཞི་ཕྲ་མོ་ལ་ཁྱད་དུ་གསོད་པའི་ཉེས་པ་གསུངས་པ་དང༌། ཇི་སྲིད་འགྲོ་འདིར་རྒྱལ་བ་ཐམས་ཅད་ཀྱི། །མཛོད་མཆོག་འདུལ་བ་རྫོགས་པ་འདི་གནས་པ། །དེ་སྲིད་ཆོས་སྒྲོན་འདི་ནི་གནས་འགྱུར་ཞིང༌། །ཞེས་སོགས་ཆོས་འདུལ་བའི་ལག་ལེན་རྙོག་པ་མེད་པ་གནས་མིན་ལས་སངས་རྒྱས་ཀྱི་བསྟན་པ་གནས་མིན་འཇོག་པ་སོགས་རྒྱབ་རྟེན་ལུང་རིགས་དང་བཅས་ཏེ་ནན་ཆེར་བཀའ་གསུང་བསྩལ་བས། དེ་དག་རེ་ཞིག་མི་སྨྲ་བའི་བརྟུལ་ཞུགས་འཛིན་པའི་ས་ལ་བཀོད། བོད་ཟླ་ལྔ་བའི་སྨད་ཙམ་ན་སླར་ཡང་ཡུལ་དགོན་དུ་ཚད་མའི་འཛིན་གྲྭ་ཐེངས་གཉིས་པ་ཚོགས་ཏེ། ལོ་སྔ་མ་བཞིན་ཕྱོགས་སོ་སོའི་དགེ་འདུན་པ་དང་དགོན་ཁག་མང་པོའི་སློབ་གཉེར་བ་འདུས་ཏེ་ཟླ་བ་གཉིས་ལྷག་ནས་ཕུན་སུམ་ཚོགས་པའི་ངང་མཇུག་གྲོལ། གཙང་སྤྲུལ་ངག་དབང་འཇིགས་མེད་རྡོ་རྗེ་མཆོག་གིས་ཛམ་ཐང་གཙང་བ་དགོན་ནས་གྲྭ་སུམ་ཅུ་ལ་ཉེ་བ་ཨ་སྐྱོང་དགོན་དུ་བཤེས་གཉེན་རིན་པོ་ཆེ་ཉིད་ཀྱི་མདུན་དུ་སློབ་གཉེར་བྱེད་པར་མངགས། བོད་ཟླ་བཅུ་གཅིག་པ་མགོ་ཟླ་བའི་ཡར་ཚེས་ལ་དབུ་མ་དང་སྡོམ་གསུམ། བསྡུས་གྲྭ་སོགས་དཔེ་ཁྲིད་དུ་མའི་ཞར་ལ་ཉིན་བདུན་གྱི་རིང་ལ་བླ་མ་ངག་བརྩོན་གྱི་རྣམ་ཐར་རྫོགས་པར་བརྩམས། དེ་ནས་བོད་ཟླ་བཅུ་གཅིག་པའི་ཚེས་བཅོ་ལྔའི་ཉིན་སྐྱ་སེར་འདུས་སྡེར་བྱང་ཆུབ་སེམས་སྡོམ་དང༌། ནང་ཆོས་ངོ་སྤྲོད། བཤད་གྲྭའི་ལོ་མཇུག་གི་བྱ་དགའི་མཛད་རིམ་བཅས་གནང༌། ལུང་རྣམ་འབྱེད་ལས། བཅོམ་ལྡན་འདས་ཀྱིས་སྐྱེས་བུ་དམ་པ་ནི་གཉིས་ཏེ། གང་ཁུར་མ་བླངས་པ་ལེན་པར་མི་བྱེད་པ་དང༌། གང་ཁུར་བླངས་པ་མཐར་ཕྱིན་པར་བྱེད་པའོ་ཞེས་བཀའ་སྩལ་པས་ཁུར་བླངས་པ་འདི་མཐར་ཕྱིན་པར་བགྱི་འཚལ་ལོ། །ཞེས་པ་ལྟར་ཨ་སྐྱོང་དགོན་པའི་མཁན་པོ་ལས་ཐོག་པའི་ལས་འགན་ལོ་གསུམ་དུ་བཀའ་དྲིན་བླ་ན་མེད་པ་བསྐྱངས་ཏེ་དགོན་པ་དེར་སྔོན་ཆད་བྱུང་མ་མྱོང་བའི་ལོ་རྒྱུས་ཀྱི་ཟིན་ཐོ་གསར་བ་བཞག་ཅིང༌། དགོན་པ་སྤྱི་ཡོངས་ཀྱི་གྲྭ་ཚང་ལྷན་རྒྱས་ལ་ཀུན་སྤྱོད་དང་ཁ་ཕྱོགས་ཡར་ཐོན་ཧ་ལས་པ་འདྲ་བ་བྱུང་ཡོད་ཀྱང༌། རིམ་པས་རྒྱུན་སྐྱོང་ཐུབ་མི་མ་བྱུང་བས་ད་ལྟའི་ཆར་ནི་ལྷག་མ་ཆེར་ལུས་མེད་པ་ཁོ་བོ་ཅག་ས་དེར་གཏོགས་ཚང་མས་ཡིད་ཕངས་དགོས་པ་ཞིག་ཡིན་ནོ། །ཆོས་མཚམས་སྐབས་སུ་ཀ༔ཐོག་དགོན་ཆེན་གྱི་བཅུ་ཕྲག་རིག་པའི་སློབ་གླིང་གི་དགེ་རྒན་འཛིན་གྲྭ་ཁྲིན་ཏུའུ་ན་འཚོགས་པ་ལ་དགེ་འདུན་ཉི་ཤུ་དང༌། ཚད་མའི་སྐོར་གྱི་སློབ་ཁྲིད་གནངས་ནས་བཞུགས་སོ། ། ཆུ་སྐྱེས་འཇིག་རྟེན་འགེངས་ཀྱང་ཨུ་དུམ་ཝ་རའི་མེ་ཏོག་འབྱུང་བ་དཀོན། ། གཞན་དོན་བརྩོན་པ་དཀོན་ལ་ཐབས་དང་ཤེས་རབ་ཟུང་ལྡན་ལྷག་ཏུ་དཀའ། ། བློ་དང་སྤོབས་པ་འབྱུང་བ་དཀའ་ཞིང་དངོས་སུ་ཕན་འབྲས་མཐོང་ཆོས་ཉུང༌། ། དེ་སླད་དམ་པའི་དམ་པ་མཆོག་གྱུར་བཤེས་གཉེན་འདི་འདྲ་གཞན་སུ་ཞིག ། སྙིགས་དུས་ཀྱི་བསྟན་པའི་གསལ་བྱེད་ཆེན་པོ་ངག་དབང་འཇིགས་མེད་དངོས་གྲུབ་དཔལ་བཟང་པོའི་མཛད་བཟང་བསླབ་གསུམ་ནོར་བུའི་གླིང་ཁ་ཞེས་བྱ་བ་ལས་ཚད་མའི་རིགས་ལམ་གྱི་རྨང་གཞི་ལེགས་པར་བཏིང་ཞིང་རྒྱལ་རོང་དང་ཛཾ་ཐང་ཕྱོགས་སུ་མཛད་འཕྲིན་ཐོག་མར་སྐྱོང་བསྐོར་གྱི་རྣམ་ཐར་མདོར་བསྡུས་པ་སྟེ་བཅུ་བདུན་པའོ། ། མདོ་སྔགས་སློབ་གླིང་གསར་འཛུགས་དང་གཞན་སྟོང་དབུ་མ་ཆེན་པོའི་དུས་ཁྲིད་ཐོག་མར་བྱེད་བསྐོར་གྱི་རྣམ་ཐར།ཕྱི་ལོ། ༢༠༠༨ རབ་གནས་ས་བྱི་ལོའི་བོད་ཟླ་དང་པོའི་ཚེས་བཅུ་བདུན་ཡས་མས་ནས་མགོ་ལོག་ལུང་སྐྱ་དགོན་གྱི་སློབ་གླིང་དུ་ཕེབས། གཙང་ཆེན་སྤྲུལ་བའི་སྐུ་འཇིགས་མེད་རྡོ་རྗེ་མཆོག་གིས་སླར་ཡང་སློབ་གཉེར་བ་གྲྭ་བ་ལྔ་བཅུ་ལྷག་བཤེས་གཉེན་རིན་པོ་ཆེ་མཆོག་གི་སྐུ་རྗེས་སུ་སློབ་གཉེར་བྱེད་པར་མངགས་ཤིང༌། གཞན་ཡང་དགོན་ཁག་དང་ཕྱོགས་སོ་སོ་ནས་སློབ་གཉེར་བ་མང་དུ་འདུས་པ་དང༌། དགོན་དེའི་བསྟན་པའི་བདག་པོ་རྡོ་རྗེ་སློབ་དཔོན་སྤྲུལ་འཇམ་དབྱངས་སྦྱིན་པ་དང༌། མཁན་རིག་དཔལ། མཁན་སྤྲུལ་བསྟན་པའི་རྒྱལ་མཚན་སོགས་ལ། ཚད་མའི་འཛིན་གྲྭ་ཐེངས་གསུམ་པ་ཟླ་གཅིག་ལྷག་གི་ཡུན་དུ་འཚོགས་ཤིང༌། ཐེག་མཆོག་དབུ་མའི་ཟིན་བྲིས་རབ་བྱེད་བཞི་པའི་བར་མགྱོགས་ཁྲིད་དང༌། རབ་བྱེད་ལྔ་བ་ནས་མཇུག་གི་བར་ཟབ་ཁྲིད་བྱས། གཞན་ཡང་བསྡུས་རྟགས། རྣམ་འགྲེལ་གྱི་འགྲེལ་བཤད་རིན་ཆེན་ཕྲེང་བ་ལུང་འགལ་ཡན་ཆད་རྣམས་ཀྱི་ཆོས་ཁྲིད་བསྩལ། ཚད་མའི་བསྟན་བཅོས་བསྡུས་གྲྭ་ཡིད་ཀྱི་མུན་སེལ་སྣྲོན་ཟླ་བ་སྟེ་བོད་ཟླ་ལྔ་བའི་ཚེས་དགུ་ལ་དབུ་བཟུང་ནས་ཉིན་བཅུ་གསུམ་ཙམ་ལ་རྫོགས་པར་སྦྱར། དགོན་དེར་བྱོན་ནས་ཉིན་བདུན་གྱི་འཕྲོར་རྟོགས་པའི་དབང་ཕྱུག་རྒྱ་བླ་པདྨ་རྣམ་རྒྱལ་མཆོག་དགོངས་པ་ཆོས་དབྱིངས་སུ་བསྡུས། སྐབས་དེར་དགོན་དེ་ལ་ལྷ་སྡེ་དམིགས་བསལ་བ་མེད་པར་གྲྭ་བ་ཚང་མ་བླ་མ་གང་ཉིད་ལ་བརྟེན་ནས་འདུས་པ་ཤ་སྟག་ཡིན་སྟབས། གདན་ས་དེ་མ་འོངས་པ་རིམ་པར་ཉམས་ཀྱིས་དོགས་པའི་གླེང་མོལ་མང་པོ་བྱུང་བར། བཤེས་གཉེན་རིན་པོ་ཆེ་མཆོག་གིས། བླ་མ་གང་ཉིད་ཀྱི་སློབ་མ་རྣམས་ལ་གདུང་མདུན་ནས་ཁ་ཏོན་བཟླས་བརྗོད་ཙམ་ཁས་བླངས་པས་བླ་མའི་ཐུགས་དགོངས་རྫོགས་དཀའ་ཚུལ་དང༌། སློབ་མ་ཆེ་ཆུང་མེད་པ་ལ་གདན་ས་སྐྱོང་བའི་འོས་འགན་བབ་ལུགས་དང༌། ཁྱད་པར་དུ་གདུང་མདུན་ནས་དགོན་འདིར་སླར་ཡང་བཤད་སྒྲུབ་རེ་རེ་བཞུགས་རྒྱུའི་དམ་བཅའ་མཛད་པ་བླ་མའི་ཐུགས་དགོངས་མཐར་ཐུག་ཡིན་ཚུལ་སོགས་བཀའ་སློབ་དུས་བབ་གནས་ཚུལ་མཁྱེན་པ་མང་པོ་དངོས་བརྒྱུད་ཀྱིས་གནང་བས་ཕན་པ་རླབས་ཆེན་བཏགས་ཤིང༌། བླ་མ་པདྨ་རྣམ་རྒྱལ་མཆོག་གི་ཐུགས་སློབ་མཁན་རྒན་ཞིག་གིས་གསུང་རྒྱུར། ཁོ་བོ་ཅག་ཅི་བྱ་གཏོལ་མེད་དུ་གྱུར་ནས་ཉམས་ཉེས་ཚབ་ཆེན་སླེབས་པ་ན། ཁོང་གི་བཀའ་གསུང་རེ་རེས་ཀྱང་བྱ་བའི་ལམ་སྟོན་གསལ་བར་མཛད་པ་ཡིན་པས། བཀའ་དྲིན་དེ་ནམ་ཡང་ཁོ་བོ་ཅག་གིས་གསབ་དཀའ་བ་ཡིན་གསུངས་སོ། །བོད་ཟླ་དྲུག་པའི་ཡར་ངོ་ན་ཨ་སྐྱོང་དགོན་དུ་ལོགས་ནས་ཟླ་གཅིག་ལྷག་བཞུགས་པའི་སྐབས་སུ། བོད་ཟླ་དྲུག་པ་སྟེ་ཆུ་སྟོད་ཟླ་བའི་ཚེས་བཅུ་གཉིས་ཉིན་ལ་རྟགས་རིགས་ཀྱི་རྣམ་བཞག་ལེགས་བཤད་དྲི་མ་མེད་པའི་འོད་མཇུག་རྫོགས་པར་བརྩམས། གཙང་སྤྲུལ་ངག་དབང་འཇིགས་མེད་རྡོ་རྗེ་མཆོག་གི་གཙོས་དབུ་ཆོས་ལས་སྣེ་ཡོངས་ནས་ལོ་གཅིག་ལྷག་གི་སྔ་རོལ་ནས་ཛམ་ཐང་གཙང་བ་དགོན་དུ་ཕེབས་པའི་རེ་ཞུ་ནན་མོ་བསྟུད་མར་ཡང་ཡང་བྱུང་བ་བཞིན། བོད་ཟླ་བདུན་པའི་དབུ་ནས་ཛམ་ཐང་གཙང་བ་དགོན་དུ་ཕེབས། སྐབས་དེར་མཁན་འོད་རབ་ཀྱི་མདུན་དུ་ལམ་རིམ་གཟིགས་མཁན་གྲྭ་རྒན་གཞོན་བཅུ་གཉིས་ལ་བཤད་གྲྭའི་མིང་བཏགས་པ་ཙམ་འདུག་པ་ལས། འཆད་ཉན་གྱི་སྒྲིག་སྲོལ་གཏན་ཁེལ་སོགས་ནི་གང་ཡང་མེད་པ་ལ། བཤེས་གཉེན་རིན་པོ་ཉིད་ཞབས་སོར་བཀོད་པ་ཙམ་ནས་འཆད་ཉན་སློབ་གཉེར་བ་བརྒྱ་ལྷག་ལ་ཟིན་པ་བྱུང་ཞིང༌། དེ་ནས་ཀྱང་ཕྱོགས་ཉེ་རིང་མང་པོ་ནས་སློབ་གཉཻེར་པ་ཉིན་རེ་བཞིན་ཇེ་མང་དུ་སོང༌། ཇི་སྐད་དུ། ས་སྐྱ་པཎྜི་ཏས། པདྨའི་མཚོ་ལ་ངང་པ་འདུ། །དྲི་ལྡན་མེ་ཏོག་བུང་བ་སྡུད། །ཤ་ཡི་དྲི་ལ་ཤ་སྦྲང་འདུ། །འབྲོག་བཟང་དུ་ནི་རི་དྭགས་འདུ། །བཟའ་བཏུང་མང་སར་སྐྱེ་བོ་ཚོགས། །གལ་ཏེ་དེ་དག་མི་ལྡན་ན། །བསྡུས་ཀྱང་སྐྱེ་བོ་ཕལ་ཆེར་འབྲོས། །དྲོ་ཞིང་བརླན་སར་ནགས་ཚལ་སྐྱེ། །དེ་སོགས་ཕྱི་ཡི་རྟེན་འབྲེལ་ཡིན། །ཞེས་དང༌། པད་མོའི་འབྱུང་གནས་ཉམས་དགའ་ལ། །ངང་པའི་ཚོགས་འདུ་ཇི་ལྟ་བར། །ཡོན་ཏན་ལྡན་པའི་སྐྱེ་བོ་ལ། །མ་བསྡུས་པར་ཡང་སྐྱེ་བོ་འདུ། །ཞེས་པ་ལྟར་ཐག་ཉེ་རིང་དང་ཆོས་བརྒྱུད་རིས་སུ་མ་མཆིས་པ་ནས་བཤེས་གཉེན་རིན་པོ་ཉིད་ཀྱི་ཞབས་ཟུང་དུ་འདུ་བའི་དོན་གཉེར་ལྡན་པའི་སློབ་ཚོགས་མ་བསྡུས་ངང་གིས་འདུ་བ་བྱུང་སྟེ། ཟླ་གཅིག་ལྷག་ཙམ་གྱི་ཡུན་ལ་གཟིམ་ཁང་ཆེན་མོའི་ནང་དུ་འཚོགས་ཤིང༌། དེ་ནས་སློབ་གླིང་གི་བཞུགས་ཤག་འདུ་ཁང་རྣམས་ལེགས་པར་གྲུབ་ནས། མདོ་སྔགས་སློབ་གླིང་གི་འཆད་ཉན་སྒྲིག་སྲོལ་གཏན་འབེབས་དང༌། འགྲོ་འདུག་སྤྱོད་ལམ་ཕྲན་བུ་དང་བཅས་པ་ལེགས་བཅོས་སུ་བཏང་བའི་བཀའ་དྲིན་བླ་ན་མ་མཆིས་པ་བསྐྱངས་པར་མ་ཟད། དགོན་གཞུང་གི་ཚོགས་ཆེན་ཁག་གི་སྐབས་སུ་ཡང་དང་བསྐྱར་དུ་བཀའ་སློབ་ནན་མོ་མང་དུ་གསུངས་པའི་ཐུགས་རྗེ་ལ་བརྟེན་ནས། གྲྭ་ཚང་སྤྱིའི་རྣམ་པ་ལ་ཡང་ཕྱི་ཚུལ་གྱི་འགྱུར་བ་བཟང་པོ་ཐེབས། སློབ་གླིང་དེའི་མཁན་རབས་དང་པོའི་ལས་ཁུར་སྤྱིར་བཏང་བ་ཙམ་མིན་པར། འཆད་གྲྭའི་མེ་རོ་ཙམ་དེ་ཉིད་སླར་ཡང་མེ་དཔུང་དུ་བསྒྱུར་ཞིང༌། རྩོད་གྲྭ་གསར་བཙུག་དང༌། གནས་དེར་འཆད་ཉན་གྱི་བསྟན་པ་ཉི་མ་ཤར་བ་ལྟར་མཛད་པའི་ཕྱི་རྗེས་རླབས་ཆེན་དགོན་དེའི་ལོ་རྒྱུས་ཁྲོད་གསར་དུ་བཞག་པ་སོགས་བཀའ་དྲིན་འཛད་མཐའ་བྲལ་བ་བཞག་པས། གྲོང་མི་ཕལ་གྱི་ཁ་ན་ཡང༌། སྔོན་ནས་ད་ལྟའི་བར་དུ་བླ་མ་ཁྱད་པར་ཅན་མང་པོ་བྱུང་ཡང་སྒྲིག་སྲོལ་ཆེར་བཅའ་ཡུལ་དུ་མ་སོང་པ། བླ་མ་དང་མི་ཆེན་སུ་ཡིས་གསུངས་ཀྱང་མི་ཐུལ་བ་མི་གཤིས་གྱོང་མཁྲེགས་ཅན་འདི་ལྟ་བུའི་ལུང་བ་ཞིག་ལ་ཞབས་ཀྱིས་བཅག་པ་ཙམ་ནས་ཁ་ལོ་བསྒྱུར་ཐུབ་པ་ངོ་མཚར་ཨང༌། འདི་འཛི་ག་ལུང་ཁོག་འདུལ་བའི་དོན་དུ་བྱོན་པ་ཞིག་ཡིན་འདུག་ཅེས་གླེང་མོལ་བྱེད་རྒྱུ་བྱུང༌། ལོ་དེར་རྣམ་འགྲེལ། གྲུབ་མཐའ། ལམ་རིམ་བློ་སྦྱོང་གི་བསྐོར་གྱི་ཆོས་ཁྲིད་བྱས། བློ་རིག་གི་རྣམ་བཞག་ཉུང་གསལ་ལེགས་བཤད་གསེར་གྱི་ཉི་མ་ཞེས་བྱ་བ་སློབ་གླིང་དེ་དབུ་འཛུགས་སྐབས་ཉིན་ཁ་ཤས་ཀྱི་ཡུན་ལ་བརྩམས་ནས་བོད་ཟླ་བདུན་པ་སྟེ་གྲོ་བཞིན་ཟླ་བའི་ཚེས་དགུ་ལ་རྫོགས་པར་སྦྱར། གཞན་སྟོང་དབུ་མ་ཆེན་པོའི་བགྲོ་གླེང་ཐེངས་གསུམ་པ་ས་ག་ཟླ་བའི་ནང་དུ་རྔ་ཡུལ་རྩི་ནང་དགོན་པར་འཚོག་འཆར་ཡིན་པ་ལ། རྐྱེན་དབང་གིས་མ་འཛོམས་པར་སྟོན་འགོར་མགོ་ལོག་ལུང་སྐྱ་དགོན་དུ་ཉིན་བཅོ་ལྔའི་ཡུན་ལ་འཚོགས་ཤིང་ལོ་སྔ་མ་རྣམས་བཞིན་ཚོགས་གཙོ་དང་ལས་འགན་རྒྱ་ཆེར་གནང༌། གཞན་སྟོང་དབུ་མ་ཆེན་པོའི་བགྲོ་གླེང་ཐེངས་དང་པོ་དང་གཉིས་པར་ལྕམ་མདའ་མཁན་རིན་པོ་ཆེ་ཤེས་རབ་གསལ་བྱེད་མཆོག་གིས་བགྲོ་གླེང་གི་འདུས་སྡེ་སྤྱི་ལ་གཞན་སྟོང་དུས་ཁྲིད་ཆེན་མོ་མཛད་ལ། ལོ་དེར་བགྲོ་གླེང་གི་སྐབས་ཉིན་ཁ་ཤས་ཙམ་ལས་ཕེབས་མ་ཐུབ་ཅིང༌། དུས་ཁྲིད་དགོངས་ཞུ་ཡང་ཡང་ཕུལ་བས། དགོན་ཁག་སོ་སོའི་འཐུས་མི་དང་མཁན་བླ་སྤྲུལ་ཐམས་ཅད་གདན་འཛོམས་ནས་གཞན་སྟོང་དུས་ཁྲིད་ཆེན་མོ་འདི་སྟོང་མི་ཉན་པར་རྒྱུན་སྐྱོང་དགོས་པའི་ཞལ་གྲོས་བྱུང་ནས། དུས་ཁྲིད་མཁན་འདེམས་སྒྲུག་བྱས་པས་བཤེས་གཉེན་རིན་པོ་ཆེ་ཉིད་གཞན་སྟོང་དབུ་མ་ཆེན་པོའི་དུས་ཁྲིད་པར་ཕལ་ཆེར་མི་བརྒྱ་བསམ་པ་གཅིག་མཐུན་ལྟ་བུའི་འདེམས་ཤོག་ཐོན་པས། གཞན་སྟོང་དུས་ཁྲིད་བྱེད་མི་དགུང་ལོ་དྲུག་ཅུ་ཡན་ཆད་ཀྱི་བླ་མ་རྒན་པ་ཞིག་ཡིན་ན་ཡག་རབས་སོགས་མང་དུ་གསུངས་ཀྱང་བཤོལ་ཐབས་མེད་པར་གྱུར་ཏེ། གཞན་སྟོང་དབུ་མ་ཆེན་པོའི་དུས་ཁྲིད་ཀྱི་མཛད་པའི་ཁུར་ཆེན་བདག་གིར་བཞེས་དགོས་བྱུང༌། དེ་ནས་གཙང་བ་དགོན་མདོ་སྔགས་སློབ་གླིང་དུ་བྱོན་ནས་ཆོས་ཁྲིད་ཀྱི་གཞུག་བསྐྱངས་ཏེ། བོད་ཟླ་བཅུ་གཅིག་པའི་ཚེས་ཉི་ཤུའི་ནང་དུ་ལོ་མཇུག་གི་མཛད་སྒོ་དང་བཅས་ཕུན་སུམ་ཚོགས་པའི་ངང་ཆོས་མཚམས་གྲོལ། ཆོས་མཚམས་སུ་བཻ་རོའི་རི་ཁྲོད་དུ་བྱོན་ནས་བྱ་བཏང་བ་སྤྲུལ་རྡོ་རྗེ་དགྲ་འདུལ་གྱི་མདུན་སར་རྒྱུད་བླ་དོལ་ཊཱིཀ་གི་ཁྲིད་ལུང་མནོས་ཤིང༌། ཕར་ལ་ཡང་བཤེས་གཉེན་རིན་པོ་ཆེ་མཆོག་གིས་མཛད་པའི་སྡོམ་གསུམ་གྱི་ཁྲིད་ལུང་བསྩལ། ཕན་ཚུན་དག་སྣང་དབྱེར་མེད་གཅིག་འདྲེས་ཀྱི་གསུང་མོལ་དང༌། བསྟན་འགྲོའི་གནས་ཚུལ་དུ་མ་ལ་ཐུགས་ཁུར་མཛད་ཕྱོགས་མ་བགྲོས་རང་མཐུན་ངང༌། འབྲལ་མི་ཕོད་པ་ལྟ་བུ་བྱུང་ཞིང༌། རྨེ་སྤྲུལ་རྡོ་རྗེ་དགྲ་འདུལ་ནི་རྒྱུས་ཅན་ཀུན་ལ་གསལ་བ་ལྟར་འཇིག་རྟེན་མཐུན་འཇུག་གི་སྤྱོད་པ་མཆིལ་མའི་ཐལ་བ་བཞིན་བོར་ཡོད་པ་ཞིག་ཡིན་མོད། སྐབས་དེར་ཞལ་སྔ་ནས། ད་ནས་བཟུང་རྒྱལ་རོང་ཕྱོགས་སུ་ཁྱེད་ཀྱི་འགྲོ་དོན་དུས་སུ་བབ་པ་ཡིན་པར་ཡང་ཡང་གསུངས་པ་དེ་ལྐོག་གྱུར་གཟིགས་པའི་ལུང་བསྟན་ཁོ་ནར་སོང༌། དེ་ནས་བཤེས་གཉེན་རིན་པོ་ཆེ་ཛ་འགོའི་རི་ཁྲོད་བྱང་ཆུབ་ཆོས་རྫོང་དུ་ཕེབས་ཏེ། ཡུལ་མི་རྣམས་ལ་སྐྱབས་འགྲོ་དང༌། དགེ་སྒྲུབ་སྡིག་སྤང༌། བོད་རང་གི་སྐད་དང་ཡི་གེ། སྲོལ་རྒྱུན་འཛིན་སྐྱོང་སོགས་དུས་བབ་ཀྱི་བཀའ་སློབ་མང་པོ་དང༌། དགོན་པའི་ལས་སྣེ་སོགས་ལ་དགོན་སྡེ་འཛིན་སྐྱོང་བྱེད་ལུགས་སོགས་ལམ་སྟོན་རྒྱ་ཆེན་གནང༌། ལོ་དེའི་རྒྱལ་ཟླ་བ་སྟེ་བོད་ཟླ་བཅུ་གཉིས་པའི་ཚེས་གཅིག་ནས། སྦྱོར་བ་ཡན་ལག་དྲུག་གི་ཁྲིད་ཡིག་མཐོང་དོན་གྱི་སྡོམ་ཚིག་གྲུབ་པའི་དགོངས་རྒྱན་ཞེས་བྱ་བ་ཡང་བསྟན་འགྲོའི་ལས་དོན་དུ་མའི་ཞར་ལ་བརྩམ་པའི་དབུ་བཙུགས། ཕྱི་ལོ། ༢༠༠༩ ལོ་འགོ་ནས་ལུང་སྐྱ་དགོན་གྱི་སྤྲུལ་རབ་རྒྱས་ལ་བསྐུལ་མ་བྱས་ཏེ། ཛ་འགོའི་རི་ཁྲོད་དུ་ཕྱོགས་འདུས་ཀྱི་གྲྭ་བ་རྣམས་ལ་བཞུགས་ཤག་དང༌། ཚོགས་ཁང་གི་བཀོད་སྒྲིག་གནང་བ་སོགས། ད་ལྟའི་ཆར་ས་ཕྱོགས་དེར་ཇོ་ནང་གི་བཤད་སྒྲུབ་ཀྱི་བསྟན་པ་ཅུང་ཟད་འོས་ཙམ་ཡོད་པ་དང༌། གྲྭ་མང་ནས་ཀྱང་འཆད་ཉན་ལ་ཁ་ཕྱོགས་ལེགས་པ་དང༌། ཐ་ན་གོས་རྣམ་གསུམ་གྱོན་ལུགས་ཀྱི་ཀུན་སྤྱོད་ལེགས་པོ་རེ་བྱུང་ཐུབ་ཡོད་པ་ཚུན་ཁོང་དང་རྨེ་སྤྲུལ་རྡོ་རྗེ་དགྲ་འདུལ་རྣམ་གཉིས་ཀྱི་བཀའ་དྲིན་ཉག་གཅིག་ལས་བྱུང་བ་ཡིན་ནོ། །བོད་ཟླ་དང་པོའི་ཚེས་ཉི་ཤུ་གཉིས་ནས་ཛམ་ཐང་གཙང་བ་དགོན་དུ་མདོ་སྔགས་སློབ་གླིང་ཆོས་མཚམས་ཚུར་འདུས་ནས་སློབ་གཉེར་དབུ་བཟུང༌། ཚད་མའི་བསྟན་བཅོས་བསྡུས་གྲྭ་ཡིད་ཀྱི་མུན་སེལ། རྟགས་རིགས་ལེགས་བཤད་དྲི་མ་མེད་པའི་འོད། གཏན་ཚིགས་རིགས་པའི་དོན་བསྡུས། གྲུབ་མཐའ། ཕར་ཕྱིན་མདོ་ལུགས་མ། གཞན་སྟོང་དབུ་མ་ཆེན་པོའི་བགྲོ་གླེང་གི་དྲིས་ལན་སོགས་ཀྱི་ཆོས་ཁྲིད་བསྩལ། ལོ་དེའི་བསྟན་འགྲོ་ཀུན་ཕན་ལྷན་ཚོགས་ཐོག་ནས་བཤེས་གཉེན་རིན་པོ་ཆེ་ཉིད་ཇོ་ནང་མདོ་སྔགས་སློབ་གླིང་གི་མཁན་རབས་དང་བོར་མངའ་གསོལ་མཛད། ས་ག་ཟླ་བའི་ཚེས་ཉི་ཤུ་གཅིག་ཉིན་ནས་དབུ་བཟུང་སྟེ་གཞན་སྟོང་དབུ་མ་ཆེན་པོའི་བགྲོ་གླེང་ཐེངས་བཞི་བ་ཛམ་ཐང་གཙང་བ་དགོན་དུ་ཚོགས་ཏེ། གཙང་ཆེན་སྤྲུལ་བའི་སྐུ་འཇིགས་མེད་རྡོ་རྗེ་མཆོག་དང༌། མཁན་ཆེན་དམ་པ་ཤེས་རབ་གསལ་བྱེད། མཁས་དབང་བདེ་ལེགས་རབ་རྒྱས་སོགས་ཀྱི་གཙོས། ཇོ་ནང་བའི་ཆེ་རྒུ་མཁན་སྤྲུལ་རྡོ་རྗེ་སློབ་དཔོན་མང་པོ་དང༌། དགོན་དེའི་སྦྱོར་དྲུག་ཆོས་ཚན་ཁག་དང༌། གཞན་སྟོང་བགྲོ་གླེང་གི་སྟེང་དུ་ཕེབས་པའི་ལུང་རིགས་སྨྲ་བའི་འདུས་སྡེ་སྤྱི་ལ། རྒྱུད་བླ་དོལ་ཊཱིཀ་གི་དུས་ཁྲིད་ཀུན་མཁྱེན་དུས་གསུམ་སངས་རྒྱས་དོལ་པོ་པ་མཆོག་གི་ཆོས་སྐད་མ་ཉམས་པའི་སྟེང་ནས་མི་འཇིགས་སེང་གེའི་ང་རོ་ཆེན་པོ་བསྒྲགས་པས། བཤེས་གཉེན་རིན་པོ་ཆེ་ལ་རྒྱུས་མངའ་མེད་པའི་སྒོམ་ཆེན་པ་འགའ་ཞིག་ཀྱང་སྐབས་དེར་མི་ཕྱེད་པའི་དད་པ་བརྟན་པོ་འཁྲུངས་ནས་ད་ཕན་དུ་ཁྱེད་ལ་ཤེས་ནས་དད་པ་སྐྱེས་པ་ཡིན་ཞེས་ཞབས་རྡུལ་སྤྱི་བོའི་གཙུག་ཏུ་ཉེ་བར་བསྟེན་པར་བྱས། རྟོགས་པ་དོན་གྱི་དབང་ཕྱུག་ཆེན་པོ་ཤུགས་ནང་བླ་མ་དཀོན་གསལ་གྱིས་བསྐུལ་ངོར་ཐུགས་རྗེ་ཆེན་པོའི་རུས་སྦྱོང་གི་ཆོ་ག་བརྩམས་ཤིང་ལུང་དང་བཅས་པ་ཁོང་ལ་ཕུལ། བླ་མ་གང་གི་མདུན་སར་ལྷན་ཐབས་འོད་བརྒྱ་འབར་བའི་ཁྲིད་ལུང་མནོས། བོད་ཟླ་བཅུ་གཅིག་པའི་ཚེས་བཅོ་བརྒྱད་ལ། གཙང་ཆེན་སྤྲུལ་བའི་སྐུ་འཇིགས་མེད་རྡོ་རྗེ་དང༌། ཆོས་རྗེ་དགོན་མཁན་ཀརྨ་རྡོ་རྗེ་སོགས་སེར་སྐྱ་འདུས་པ་རྒྱ་མཚོ་ལ། བྱང་ཆུབ་སེམས་སྡོམ་དང༌། སྐྱབས་སྡོམ་བཅས་བསྩལ། ཁྱད་པར་དུ་མ་འོངས་པར་བཤད་སྒྲུབ་ཀྱི་བསྟན་པ་འཛིན་དགོས་ཚུལ་དང༌། སློབ་གླིང་འདིའི་གཞུག་ལེགས་པར་བསྐྱངས་པ་ལས་ཉམས་རྒུད་དུ་གཏོང་མི་རུང་བའི་གསུང་བཤད་ནན་ཆེར་གནང༌། ཚེས་བཅུ་དགུའི་ཉིན། ལྕམ་མདའ་དགོན་དཀོན་མཆོག་འཕྲིན་ལས་དང༌། ཨ་སྐྱོང་དགོན་བསམ་བཟང༌། ལྕམ་མདའ་དགོན་ཀརྨ་བློ་བཟང༌། ལྕམ་མདའ་དགོན་དོན་དམ་དཔལ། ཤུགས་ནང་དགོན་ཡིད་བཞིན་ཕུན་ཚོགས། ལུང་སྐྱ་དགོན་བསྟན་པའི་རྒྱལ་མཚན། ཉིན་ཡུལ་དགོན་བསམ་འཕེལ་ནོར་བུ། སྐྱ་པེ་ཕྱོགས་གླང་རྣམས་ལ་མཁན་པོའི་མཚན་རྟགས་དང༌། སློབ་གཉེར་བ་རྣམས་ལ་ལོ་མཇུག་གི་བྱ་དགའ་སྩོལ་བའི་མཛད་སྒོ་བཅས་ལེགས་པར་སྤེལ་ནས་བགྲང་བྱ་གཉིས་ཀྱི་རིང་ལ་བཀའ་དྲིན་གཞལ་བར་དཀའ་བའི་མཛད་བཟང་བསྟན་འགྲོ་ལ་སྨན་པའི་ཞབས་རྗེས་ལོ་རྒྱུས་ཀྱི་རི་མོ་གསར་བའི་རེ་ཁཱ་མཛེས་པར་བཀོད་ནས། བཟང་པོ་སྤྱོད་པའི་སྨོན་ལམ་དང་བསྟན་འབར་མ་སོགས་ཀྱིས་མཐའ་བརྒྱན་ནས་ཕུན་སུམ་ཚོགས་པའི་ངང་མཇུག་གྲོལ་བར་བྱས་སོ། །གཙང་ཆེན་སྤྲུལ་བའི་སྐུ་འཇིགས་མེད་རྡོ་རྗེ་དཔལ་བཟང་པོ་མཆོག་གིས་ཐེངས་མང་པོར་དགོན་དེར་རྒྱུན་བཞུགས་དགོས་པའི་རེ་བ་ཕུལ་ཞིང༌། མི་མང་ལྷ་སྡེ་དག་གི་ངོས་ནས་ཀྱང་ཞུ་སྐུལ་ཚད་མེད་པ་མཛད། ཁྱད་པར་དུ་མཆོག་སྤྲུལ་དམ་པ་འཇིགས་མེད་རྡོ་རྗེ་མཆོག་ནས་ངེས་པར་རྒྱལ་རོང་ཛ་འགོའི་རི་ཁྲོད་དུ་འབྱོན་པར་ལྡོག་ཏུ་མེད་ན། ཁོང་གི་ཕེབས་འཁོར་ཞིག་ཁྱེད་ལ་ཕུལ་བ་ཡིན། དགོན་འདི་དང་རྒྱལ་རོང་གཉིས་ལ་རེས་མོས་ཀྱིས་ཡར་མར་བྱོན་ནས་སྐྱོང་དགོས་ཚུལ་གསུངས་ཀྱང༌། ཁྱེད་རྣམ་པས་རང་ས་ནས་ཤུགས་བརྒྱབ་ན། ད་ནི་དཀྱིལ་འཁོར་བཤམས་ཡག་ཐོག་བུམ་པ་བཞག་ཡག་ཟེར་བ་བཞིན་དུ། བགྲང་བྱ་གཉིས་ཀྱི་རིང་ལ་མི་ཚེ་འདིར་དཀའ་ལས་བརྒྱབ་མ་མྱོང་བ་ལྟ་བུའི་ལས་ཀ་བྱས་ཏེ། གྲུབ་འབྲས་ཀྱང་རང་ཚད་ཀྱིས་ལག་པའི་འཛིན་རྒྱུ་ཡོད་པ་འདི་བྱས་པ་ཡིན། མ་འོངས་པར་རྒྱུན་འཁྱོངས་ཐུབ་པའི་ནུས་པ་ཁྱེད་རྣམ་པ་ལ་ཡོད་པ་ཧ་གོ་ཐུབ་པས། ངའི་སེམས་སུ་ད་དུང་ས་ཁུག་ལུང་ཁུག་མ་ཡོང་མ་ཐུབ་ཡོད་པ་དག་ལ་ཤུགས་རྒྱག་བསམ་པ་དེ་ལྡོག་ཏུ་མེད་པས། རེ་ཞིག་ཞལ་མི་ལྡོག་ཐབས་མེད་པ་ཡིན་གསུངས་ཏེ། ཕན་ཚུན་ཐུགས་འདང་ཆེན་པོས་སྤྱན་ཆབ་འཁྲིགས་བཞིན་བསྟན་འགྲོ་འབའ་ཞིག་ཐུགས་ལ་བརྣག་པའི་ཞལ་བརྡ་མང་པོ་གསུངས་སོ། །ལོ་དེར་ཚད་མའི་བསྟན་བཅོས་བསྡུས་གྲྭ་ཡིད་ཀྱི་མུན་སེལ་གྱི་སྟེང་ནས་མདོ་སྨད་ཇོ་ནང་གི་ཆོས་སྡེའི་ཐོག་མ་ཛཾ་ཐང་ཆོས་རྗེ་དགོན་དུ་རྩོད་གྲྭ་གསར་བཙུགས་བྱས་ཤིང༌། འཆད་ཉན་སློབ་གཉེར་དང་གྲྭ་རྒྱུན་བདག་སྐྱོང་ལྷ་འབངས་བདག་དམ་སོགས་ཀྱི་བསྐོར་ནས་བཀའ་སློབ་གསུང་མོལ་དུས་བབ་གནད་ཁེལ་གྱི་ལམ་སྟོན་སྐུལ་སློང་དུ་མ་མཛད། ཁྱད་པར་དུ་སྔོན་ཆད་ཆོས་རྗེ་དགོན་གྱི་དགོན་ལག་ཡིན་པ་ལ། ཉེ་བའི་ཆར་དགོན་མ་ལག་གི་འབྲེལ་ལམ་རིམ་གྱིས་གོ་མེད་ཚོར་མེད་ངང་ཡལ་བཞིན་པ་མང་པོ་ལ་ཆོས་དང་ལོ་རྒྱུས་ཀྱི་འབྱུང་ཁུངས་ངོ་སྤྲད་དེ། ལྷ་ངོ་མི་ངོ་འཕྲོད་པར་བྱས་པར་མ་ཟད། བཤེས་གཉེན་རིན་པོ་ཆེ་ཉིད་རྒྱལ་རོང་དུ་བཞུགས་སྐབས་སོགས་སྔ་ཕྱི་ཀུན་ཏུ་ཆོས་རྗེ་དགོན་མ་ལག་གི་འབྲེལ་བ་དད་དམ་བསྐྱར་གསོའི་ཕྱག་ལས་ཟམ་མ་ཆད་དུ་བསྒྲུབས་པས། འདི་ཉིད་ཀྱང་ད་ལྟའི་ཆར་སྤྱིར་སངས་རྒྱས་ཀྱི་བསྟན་པ། ཡང་དགོས་དཔལ་ལྡན་ཇོ་ནང་བའི་ཆོས་བརྒྱུད། ལྷག་པར་དུ་ཛམ་ཐང་ཆོས་རྗེ་དགོན་གྱི་བཤད་སྒྲུབ་བསྟན་སྲིད་ཀྱི་ཕྱོགས་ལ་ཕན་འབྲས་རྒྱ་ཆེན་བསྐྲུན་པ་ལགས་སོ། །ཆོས་མཚམས་སྐབས་སུ་ཧྲང་ཧེ་ལ་ཤར་ཕེབས་ཤིག་མཛད་ནས། རྒྱ་ནག་གི་རྒྱལ་ས་པེ་ཅེན་དུ་བྱོན་ཏེ་པེ་ཅིན་མི་རིགས་དཔེ་བསྐྲུན་ཁང་ནས་དམ་པ་ཁོང་གིས་མཛད་པའི་གསུང་འབུམ་པོད་བརྒྱད་པར་བསྐྲུན་བྱས། དེ་ནས་ཁྲིན་ཏུའུ་གྲོང་ཁྱེར་ནས་ཛ་འགོའི་རི་ཁྲོད་བྱང་ཆུབ་ཆོས་རྫོང་དུ་ཇོ་ནང་བརྩེ་ཆེན་སློབ་གླིང་གསར་འཛུགས་བྱེད་འཆར་དུ་སློབ་གཉེར་བ་རྣམས་ལ། གཟན་ཤམ་ཆ་ཚང་དང༌། སྟོད་འགག་དང་སྟོད་པགས་བཅས་འདང་ངེས་མངགས་བཟོ་བྱས། བོད་ཟླ་བཅུ་གཉིས་པའི་ཚེས་བཅུ་གསུམ་ལ་ལྕམ་མདའ་དགོན་དུ་ཕེབས་ནས། གཞན་སྟོང་བགྲོ་གླེང་གི་དྲིས་ལན་དང༌། གཏན་ཚིགས་བསྡུས་དོན་དང༌། ཚད་མའི་བསྟན་བཅོས་བསྡུས་གྲྭ་ཡིད་ཀྱི་མུན་སེལ་རྣམས་ཀྱི་དཔེ་ཁྲིད་ཀྱི་བཀའ་དྲིན་བསྐྱངས་སོ། ། རྟོན་པ་བཞི་ལྡན་ཞལ་གྱི་པདྨོའི་བཀའ་ལུང་མུ་ཏིག་ཕྲེང་བ་ལས། ། ཡུལ་སྤྱིའི་སྐྱེ་འགྲོ་དམུ་རྒོད་དར་ལ་ངེས་དོན་སྙིང་པོའི་བསྟན་པ་འདི། ། དར་བར་བསྔགས་པའི་གནས་མཆོག་དེ་ལ་སླར་ཡང་མུན་ཁང་སྒྲོན་མེ་ལྟར། ། རང་ལུགས་གཙང་མའི་ཆོས་སྒྲ་ཆེན་པོས་ལྷ་དང་བཅས་པ་མགུ་བར་བྱས། ། སྙིགས་དུས་ཀྱི་བསྟན་པའི་གསལ་བྱེད་ཆེན་པོ་ངག་དབང་འཇིགས་མེད་དངོས་གྲུབ་དཔལ་བཟང་པོའི་མཛད་བཟང་བསླབ་གསུམ་ནོར་བུའི་གླིང་ཁ་ཞེས་བྱ་བ་ལས་མདོ་སྔགས་སློབ་གླིང་གསར་འཛུགས་དང་གཞན་སྟོང་དབུ་མ་ཆེན་པོའི་དུས་ཁྲིད་ཐོག་མར་བྱེད་བསྐོར་གྱི་རྣམ་ཐར་མདོར་བསྡུས་པ་སྟེ་བཅོ་བརྒྱད་པའོ། ། རྒྱལ་རོང་དུ་ཇོ་ནང་བརྩེ་ཆེན་མཐོ་སློབ་གསར་དུ་ཕྱག་འདེབས་མཛད་བསྐོར་གྱི་རྣམ་ཐར།རྗེ་ཏཱ་ར་ནཱ་ཐའི་ཐུན་མོང་མ་ཡིན་པའི་སྨོན་ལམ་རྒྱལ་བ་རྒྱ་མཚོ་ལས། སྐྱེ་བ་ཀུན་ཏུ་རྒྱལ་བ་ཇོ་ནང་པ་ཆེན་པོ་ཁྱེད་ཀྱི་རྣམ་ཐར་བཟང་པོ་ལ་འཇུག་པར་གྱུར་ཅིག །ཐུགས་དགྱེས་པའི་ཐབས་ཁོ་ན་སྒྲུབ་པར་གྱུར་ཅིག །དགོངས་པ་སྐྱོང་བའི་ཆོས་ཀྱི་སྒྲས་ཕས་རྒོལ་ཐམས་ཅད་ཟིལ་གྱིས་གནོན་པར་གྱུར་ཅིག །ཁྱེད་ཀྱི་བསྟན་པ་ལ་སྡང་བ་དང་གནོད་པར་བྱེད་པ་ཐམས་ཅད་གང་ལ་གང་འདུལ་གྱི་ཐབས་སྣ་ཚོགས་ཀྱིས་བཏུལ་ནས་ཁྱེད་ཀྱི་བསྟན་པ་ལ་འགོད་པར་གྱུར་ཅིག །མ་དར་བ་རྣམས་སུ་དར་བར་བྱེད་ཅིང༌། དར་བ་རྣམས་དག་ཅིང་འཕེལ་བ་དང༌། ཉམས་པ་རྣམས་སུ་གསོ་ནུས་པར་གྱུར་ཅིག །ལུས་དང་ལོངས་སྤྱོད་དང་སྲོག་ལས་ཀྱང་ཁྱོད་ཀྱི་བསྟན་པ་གཅེས་སྤྲས་སུ་འཛིན་པར་གྱུར་ཅིག །ཅེས་གསུངས་པ་ལྟར། རྒྱལ་བསྟན་རིས་སུ་མ་མཆིས་ཤིང༌། ཡང་དགོས་དུས་གསུམ་སངས་རྒྱས་ཀུན་མཁྱེན་དོལ་པོ་པ་ཤེས་རབ་རྒྱལ་མཚན་དཔལ་བཟང་པོ་དང༌། གསང་བདག་སྒྲོལ་བའི་མགོན་པོ་ཟུང་ཡབ་སྲས་དང་བཅས་པའི་ཆོས་བརྒྱུད་དྲི་མ་མེད་པ་འཛིན་སྐྱོང་སྤེལ་གསུམ་བྱེད་པ་ལ་སྙིགས་དུས་ཀྱི་སྒྲོན་མེ་གཅིག་པུ་བཤེས་གཉེན་རིན་པོ་ཆེ་ལུང་རྟོགས་བསྟན་པའི་སྤྱི་དཔལ་དམ་པ་གང་གི་ཞབས་ཟུང་དྲི་མ་དང་བྲལ་བ་མི་ཤིགས་རྩིབས་སྟོང་གི་རི་མོ་རྫོགས་པར་བཀྲ་བ་དེ་ཉིད། ཕྱི་ལོ། ༢༠༡༠ བོད་རབ་གནས་ལྕགས་ཕོ་སྟག་གི་ལོའི་བོད་ཟླ་དང་པོའི་ཚེས་བཅུ་དགུ་ལ། རྒྱལ་རོང་འབར་ཁམས་རྫོང་གི་མངའ་ཁོངས་ཚ་ཁོ་སྟོད་ཀྱི་ཛ་འགོའི་རི་ཁྲོད་བྱང་ཆུབ་ཆོས་རྫོང་གི་ཕྱོགས་སུ་གནོད་མེད་དུ་བསྐྱོད་དེ། ལམ་ཁར་ཚེས་ཉི་ཤུ་ཐམ་པའི་ཉིན་རྒྱལ་རོང་ཁང་གསར་དགོན་དུ་མི་མང་ལ་ནང་ཆོས་ངོ་སྤྲོད་དང༌། སེར་སྐྱ་འདུས་སྤྱི་ལ་བྱང་ཆུབ་སེམས་སྡོམ་དང་སྐྱབས་སྡོམ་གནང་ཞིང༌། སྐད་ཡིག་དང་རིག་གནས་གོམས་སྲོལ་སོགས་ཀྱི་ཐད་བཀའ་སློབ་ཟབ་རྒྱས་བསྩལ། སྲོག་གཅོད་དང༌། རྐུ་འཕྲོག །མནའ་ཆང་གཅོད་མི་དང༌། མ་ཎི་དུང་དང་འོད་མཚན་བྱེ་བ་ཁས་ལེན་བྱེད་མི་མང་དུ་བྱུང༌། ཚེས་ཉེར་གཅིག་ལ་རྒྱལ་རོང་པཱ་ལ་དགོན་དུ་ཕེབས་ནས་སེར་སྐྱ་འདུས་སྤྱི་ལ་ནང་ཆོས་ངོ་སྤྲོད་དང༌། གྲྭ་མང་ལ་བཤད་སྒྲུབ་སྐུ་མཚམས་གང་རུང་རེར་བཞུགས་རྒྱུའི་ཕྱོགས་ནས་གྲོས་མོལ་དང་བཀའ་སློབ་ཟབ་མོ་གནངས་ཏེ། དགོང་མོར་གདན་སེང་གེ་བསྒྱིང་འདྲའི་སྟེང་ན་རྒྱབ་རི་ཁྲིའི་རྒྱབ་ཡོལ་འདྲ་བ། ཕྱོགས་རྣམས་སུ་བཀྲ་ཤིས་རྟགས་བརྒྱད་ཀྱི་རི་མོ་རང་ཆས་སུ་རྫོགས་པའི་སའི་དཔྱད་ཀུན་ནས་ལེགས་ཤིང༌། བྱ་དང་བྱེའུ་སྣ་ཚོགས་ཀྱི་སྐད་སྙན་ཆད་མེད་དུ་སྒྲོག་པ། འདུ་འཛི་རྣམ་གཡེང་གི་དྲི་མ་བྲལ་ཞིང་དབེན་པའི་ཡོན་ཏན་ཐམས་ཅད་མངའ་བ། དགེ་སྦྱོར་ཏིང་འཛིན་གྱི་རྟོགས་པ་ངང་གིས་འཕེལ་བའི་གནས་མཆོག་ཛ་འགོའི་རི་ཁྲོད་བྱང་ཆུབ་ཆོས་རྫོང་དུ་སྐུ་དངོས་སུ་གདན་སར་འཁོད། དེ་ཙ་ན་ཕྱོགས་དང་རིས་སུ་མ་ཆད་པ་ནས་སློབ་གཉེར་ཐོས་བསམ་པ་མང་པོ་ཉི་མ་རེ་རེ་བཞིན་དུ་འདུ་བ་ནི། པདྨའི་ཚལ་གྱིས་རྣམ་པར་བརྒྱན་པའི་ཉམས་དགའ་ཡིད་འོང་གི་མཚོ་རྫིང་ལ་ངང་བ་དང་ངུར་བའི་ཚོགས་མང་པོ་མ་བསྡུས་པར་འདུ་བ་དང༌། འཁོར་ལོའི་བསྒྱུར་བས་རྒྱལ་པོ་གཤེགས་པ་ན་དཔུང་ཚོགས་ཡན་ལག་བཞི་རྗེས་འབྲངས་དང་བཅས་པ་ལྷན་ཅིག་ཏུ་འབྱུང་བ་ལྟ་བུ་སྟེ། དེ་ཡང༌། སངས་རྒྱས་ཀྱི་བསྟན་པའི་གནས་ཚད་དང༌། སྔོན་ནས་ད་ལྟའི་བར་གྱི་སྣོད་བཅུད་འཇིག་རྟེན་གྱི་འགྱུར་བ་ལ་བལྟས་ན། སྔོན་དགྲ་བཅོམ་པ་ཆེན་པོ་བསྟན་པའི་གཏད་རབས་རྣམས་དང༌། བྱེ་མདོ་དབུ་སེམས་ཀྱི་གནས་བརྟན་མཁས་གྲུབ་མང་པོ་འཁོར་དགེ་སློང་རྗེས་འབྲངས་དང་བཅས་ལྷན་ཅིག་ཏུ་རྒྱུ་ཞིང་སྟབས་གཅིག་ཏུ་བཞུགས་པ་དང༌། གངས་ཅན་གྱི་སྒྲུབ་གནས་གདན་ས་བྱིན་ཆེན་རྣམས་སུ་མཁས་གྲུབ་ཀྱི་བླ་མ་གོང་མ་རྣམས་ལ་ཟང་ཟིང་ལ་ལྟོས་པ་མེད་པར། དམ་པའི་ཡོན་ཏན་ལ་འདུ་བའི་སྣོད་ལྡན་གྱི་སློབ་ཚོགས་རང་བཞིན་གྱིས་བྱུང་བའི་རྣམ་ཐར་ལས་ཀྱང༌། སྙིགས་མའི་ཡང་མཐའ་འདི་ལྟ་བུ་ལ་སྐྱེ་བོ་ཆོས་སེམས་ཞན་ཞིང་ཉོན་མོངས་རྒོད་པ། འཛམ་གླིང་གི་ཟང་ཟིང་ཐམས་ཅད་མི་གཅིག་གི་ལག་པའི་ལྟད་མོ་ལ་བཀྲ་བ། ཡང་དགོས་སུ་ལོ་ངོ་བརྒྱ་ཕྲག་རིམ་པར་ཐོས་བསམ་འཆད་ཉན་གྱི་བསམ་པ་ཀུན་ནས་བྲལ་བའི་ཆོས་བརྒྱུད་དམ་ས་ཕྱོགས་ཤིག་ཏུ། གྲྭ་རྐྱང་གི་འཚོ་བ་ངན་ངོན་ཙམ་ལ་བརྟེན་ཞིང༌། སྐྱེས་ཐོབ་ཀྱི་མིང་དང་གོ་ས་བརྩི་འཇོག་སོགས་ཀྱིས་ཐོབ་ནོར་བྲལ་བའི། རང་དགར་གྱི་ཆོས་པ་དཀྱུས་མ་ཞིག་གི་རྣམ་པ་ལ་ཆོས་བརྒྱུད་ཕྱོགས་རིས་སུ་མ་ཆད་པ་ནས་ཚུལ་ཁྲིམས་དང་དམ་ཚིག་རྣམ་པར་དག་ཅིང་ཉིན་མཚན་སྤོང་ཀློག་ལ་གཞོལ་བའི་རྗེས་འབྲང་གདུལ་བྱའི་ཚོགས་འདི་ལྟ་བུ་ཞིག་ངང་གིས་འདུ་བ་ནི་ལྷག་ཏུ་ངོ་མཚར་བའམ་མཚུངས་པར་བལྟ་བར་རིགས་སོ། །བཤེས་གཉེན་རིན་པོ་ཆེ་ཉིད་ཀྱི་ཞབས་ཟུང་རི་ཁྲོད་བྱང་ཆུབ་ཆོས་རྫོང་དུ་འཁོད་པའི་ཉིན་དེར་རྩི་ཤིང་དང་ནམ་མཁའ་སོགས་ལས་དུང་གི་སྒྲ་དང་རོལ་མོ་དང་སིལ་སྙན་ཁྲོལ་བ་ཁོ་བོས་ཐོས་ཟེར་བ་ཁ་མཐུན་པའི་མི་མང་པོ་བྱུང་སྟེ། དེ་ནི་རྟེན་ཅིང་འབྲེལ་བར་འབྱུང་བ་ཁྱད་པར་ཅན་འགྲིག་པས་ལྷ་དང་བཅས་པ་དགའ་བའི་མཚན་མ་ཡིན་པར་གོར་མ་ཆགས་སོ། །ཚེས་ཉེར་གཅིག་དང་ཉེར་གཉིས་ལ་ཕྱོགས་ཡོང་གི་བཞུགས་ཤག་གཙང་སྦྲ་དང༌། ལས་འགན་པ་རྣམས་ལ་ཚོགས་འདུ་ཐེངས་ཁ་ཤས་ཚོགས་ནས་ལས་ཀའི་བྱེད་ཕྱོགས་རེ་རེ་བྱས་ནས་མཛུབ་སྟོན་གསལ་བར་མཛད། ཚེས་ཉེར་གསུམ་གྱི་ཉིན་རིམ་གྲོ་འཚོགས་ཤིང༌། ཚེས་ཉེར་བཞིའི་སྔ་དྲོར་གྲྭ་ཚང་ཡོངས་ལ་གཟན་ཤམ་སྟོད་འགག་བཅས་རེ་རེར་ཕུལ་ནས། འཛིན་གྲྭ་སོ་སོར་ཐོ་འགོད་བྱས་ཏེ། ཕྱི་དྲོར་བཤེས་གཉེན་རིན་པོ་ཆེ་ཉིད་ཀྱིས་མཛད་པའི་སྐྱབས་འགྲོའི་རྣམ་བཤད་དང༌། ཚད་མའི་བསྟན་བཅོས་བསྡུས་གྲྭ་ཡིད་ཀྱི་མུན་སེལ་གྱི་སྟེང་ནས་ཆོས་ཁྲིད་དངོས་སུ་དབུ་འཛིན་མཛད། ཚེས་ཉེར་ལྔ་ལ་ཕར་ཕྱིན་འཛིན་གྲྭར་ཕར་ཕྱིན་ཉ་ཊཱིཀ་ཡིད་ཀྱི་མུན་སེལ་གྱི་ཁྲིད་དབུ་བཟུང༌། ཚེས་ཉེར་དྲུག་གི་ཉིན་པར་རྟགས་རིགས་འཛིན་གྲྭར་བཤེས་གཉེན་རིན་པོ་ཆེ་ཉིད་ཀྱིས་མཛད་པའི་རྟགས་རིགས་ལེགས་བཤད་དྲི་མ་མེད་པའི་འོད་ཀྱི་ཆོས་ཁྲིད་གནང༌། ཚེས་ཉེར་དགུ་ལ་ལོ་རྒན་གྲས་ཀྱི་ལམ་རིམ་འཛིན་གྲྭར་བླ་མ་ཚོགས་གཉིས་རྒྱ་མཚོའི་བློ་སྦྱོང་དོན་བདུན་མའི་འགྲེལ་བའི་ཆོས་ཁྲིད་བྱས། དེ་ལྟར་ཇོ་ནང་བརྩེ་ཆེན་རྟག་བརྟན་ལྔ་རིག་དར་རྒྱས་གླིང་གི་འཆད་ཉན་སྤྱོད་ལམ་རྒྱུགས་སྤྲོད་སོགས་ཀྱི་སྒྲིག་གཞི་དང་བཅས་གཏན་འབེབས་ཕུན་སུམ་ཚོགས་པར་མཛད། ད་དུང་དགོན་ནང་དུ་ཁྱིམ་པ་རྒན་རྒོན་གྱི་གཞིས་ཆགས་པ་རྣམས་དཀའ་ངལ་ལ་མ་འཛེམས་པར་ཕྱིར་འབུད་བྱ་བར་བསྐུལ་ནས་དགོན་གཙང་བཅའ་དག་ཏུ་བསྒྱུར། སློབ་གླིང་འདིའི་མཚན་འདོགས་ཚུལ་ཡང༌། ཇོ་ནང་ཞེས་པ་ཇོ་ནང་བའི་རྩ་བའི་གདན་ས་ཇོ་ནང་རི་ཁྲོད་ཆེན་མོའི་མིང་དང༌། བརྩེ་ཆེན་ཞེས་པ་ཉ་དབོན་ཀུན་དགའ་དཔལ་གྱི་གདན་ས་བརྩེ་ཆེན་ཆོས་སྡེའི་མཚན་ཟུར་དང༌། རྟག་བརྟན་ཞེས་པ་རྗེ་ཏཱ་ར་ནཱ་ཐའི་ཕྱག་བཏབ་རྟག་བརྟན་དམ་ཆོས་གླིང་གི་མཚན་ཟུར་དང༌། ལྔ་རིག་དར་རྒྱས་གླིང་ཞེས་པ་སྦྱང་བྱ་བོད་ཀྱི་ལྔ་ཟུང་རིག་གནས་དར་བའི་གནས་ཞེས་གསོལ་བ་ཡིན་པར་བཤེས་གཉེན་རིན་པོ་ཆེ་ཉིད་ཀྱི་དངོས་སུ་བཀའ་བསྩལ་ཐོས་པ་ཡིན། བོད་ཟླ་གཉིས་པའི་ཚེས་གཉིས་ཉིན་སློབ་གཉེར་བ་རེ་རེའི་ཕྱག་ཏུ་ཕྱེ་འབྲས་རྒྱ་མ་བརྒྱ་རེ་དང༌། ཕོར་བ་རེ། ཉལ་གོས་བཅས་གནང༌། ཟླ་དེའི་ཚེས་བཅུ་བཞིར་ལམ་རིམ་འཛིན་གྲྭར་གཞན་སྟོང་དབུ་མའི་རྒྱན་གྱི་ཆོས་ཁྲིད་དབུ་བཟུང༌། ཚེས་ཉི་ཤུ་དགུ་ལ་ལམ་རིམ་བློ་སྦྱོང་བསྐོར་ཕྱོགས་བསྒྲིགས་ཀྱི་དཔེ་དེབ་གྲྭ་མང་ལ་གནང་སྦྱིན་མཛད། བོད་ཟླ་གསུམ་པའི་ཚེས་གཅིག་གི་ཉིན་ནས་སློབ་གཉེར་བ་སྤྱི་ལ་ཕྱི་དྲོར་བསྡུས་རྟགས་ཀྱི་ཆོས་ཁྲིད་དང་སྦྲགས་ཏེ་གུང་ཐང་སློབ་གཉེར་བསླབ་བྱའི་ཐོག་ནས་བཀའ་སློབ་བསྩལ། ཚེས་དྲུག་གི་ཉིན་ཕྱི་སོ་སོར་ཐར་བའི་སྡོམ་ཁྲིམས་ཕྲ་མོ་ཡན་ལ་ཐུགས་གཡེལ་མི་མཛད་ཅིང་ནང་དུ་བྱང་ཆུབ་སེམས་དཔའི་ཐུགས་བསྐྱེད་ལ་བློ་སྦྱོང་གི་ལག་ལེན་དོན་འཁྱོངས་གནང་བའི་སྙིགས་དུས་ཀྱི་བཀའ་གདམས་པ་ཆེན་པོ་རྨེ་སྤྲུལ་རྡོ་རྗེ་དགྲ་འདུལ་མཆོག་ཛ་འགོའི་རི་ཁྲོད་བྱང་ཆུབ་ཆོས་རྫོང་དུ་ཞབས་སོར་འཁོད་ནས། ཚེས་བདུན་གྱི་ཉིན་བཤེས་གཉེན་རིན་པོ་ཆེ་ཉིད་ཀྱིས་གཙོས་གྲྭ་མང་ལ་ཆོས་འབྲེལ་ཞིག་སྩོལ་དགོས་ཞུས་ནས་གྲྭ་མང་ཡོང་ཁོང་གི་མདུན་སར་བཅར་བ་ན། ཆོས་འབྲེལ་དམིགས་བསལ་ནི་ཅི་ཡང་མ་གསུངས་པར་བཀའ་སློབ་ཡུན་རིང་ཞིག་མཛད། སྐབས་ཀྱི་གཙོ་བོའི་གསུང་དོན་ལ་ཁོང་གིས་བཤེས་གཉེན་རིན་པོ་ཆེ་འདི་ཉིད་ཀྱི་ཡོན་ཏན་རྐྱང་བ་བརྗོད་དེ། ཁོ་བོ་ལ་མཚོན་ན་ཡུལ་འདི་ཡས་མས་ནས་ཚང་མ་ལ་ཆ་རྒྱུས་ཡོད་པ་ལྟར། མོ་ལུང་བཤད་ཁུལ་དང༌། ཁྱད་པར་དུ་སྤྲུལ་སྐུ་ངོས་འཛིན་བཟོ་ཁུལ་རྣམས་ལ་མོས་པ་མེད་པར་མ་ཟད། ཧ་ཅང་སྡང་མཁན་ཞིག་ཡིན་མོད། དགེ་བཤེས་དངོས་གྲུབ་དཔལ་འདི་ནི་ཛ་འགོའི་རི་ཁྲོད་བྱང་ཆུབ་ཆོས་རྫོང་ཕྱག་འདེབས་པ་པོ་རབ་འབྱམས་པ་དགེ་བཤེས་བློ་བཟང་མཆོག་གྲུབ་རྒྱ་མཚོའི་ཡང་སྤྲུལ་འཁྲུལ་མེད་ཡིན་པས། ད་རེས་ཚང་མས་ཁ་ལེན་ཚིག་བརྩི་གྱིས་དང་རྟེན་འབྲེལ་འགྲིག་ན་ཚ་ཁོ་སྟོད་པ་འདིའི་ཕྱོགས་སུ་ཕན་པ་རྒྱ་ཆེན་འབྱུང་གི་རེད། ཅེས་ཡང་ནས་ཡང་དུ་ནན་ཆེར་གསུངས་ཤིང་ལྗགས་མནའ་བསྐྱལ་བས། ཁོང་གི་སློབ་མ་རྒན་གཞོན་ལྷ་སྡེ་དང་བཅས་པས། ཨ་ཁུ་རྨེ་སྤྲུལ་རིན་པོ་ཆེས་མི་ཞིག་ལ་སྤྲུལ་སྐུ་རེད་མི་གསུང་བ་མ་ཟད། སློབ་མ་ཞིག་ཡིན་རུང་བཟང་ངན་མི་བརྟན་པས་བཤད་སྔ་མི་ཉན་ཞེས་དེང་སང་ལས་ལུགས་དེ་ཅུང་དྲག་ཅེས་པ་ལས། བཟང་རབ་རྒྱན་རབ་གཅིག་ཀྱང་གསུང་མི་སྲིད་པས་ད་རེས་ཀྱི་འདི་ལྟ་བུའི་གསུང་ཟུར་ཞིག་ཀྱང་ད་སྔོན་གཏན་ནས་གོ་མ་མྱངས་ཞེས་ཚང་མ་ལ་ཡིད་ཆེས་ཀྱི་གནས་ཆེན་པོར་བཀོད། ད་དུང་གསུང་འཕྲོས་སུ། ཐོག་དང་བོར་ཁོ་བོས་དངོས་གྲུབ་དཔལ་ཟེར་རྒྱུ་ཞིག་རྒྱ་གར་ནས་ཐོན་ཏེ་ཇོ་ནང་གི་ཐུན་མིན་གྱི་བཞེད་པ་གཞན་སྟོང་གི་འཆད་ཉན་སྤེལ་གྱིན་ཡོད་པའི་ལོ་རྒྱུས་ཐོས་སྐབས། གཞན་སྟོང་དངོས་མ་ཞིག་བཤད་ཐུབ་ཀི་ཨེ་ཡོད་བསམ་པ་སྐྱེས་བྱུང༌། གཞུག་ནས་ཁོང་གི་བཀའ་བསྡུ་བཞི་བའི་འགྲེལ་བ་དང༌། རི་ཆོས་བསྡུས་དོན་རྣམས་ལག་ཏུ་ལོན་ནས་ཅིག་བལྟ་འོང་སྐབས། གཞན་གྱི་ཟེར་སྒྲོས་ཀྱིས་མ་བསླད་པར་གཞན་སྟོང་སྨྲ་བ་དག་མ་དག་རྐྱང་ཞིག་རེད། རྗེས་སུ་ཁོང་འབཻ་རོའི་རི་ཁྲོད་དུ་བྱོན་ནས་ངེད་གཉིས་ངོ་ཤེས་པ་རེད། ད་ཐེངས་ཡང་ང་ཛ་འགོའི་རི་ཁྲོད་དུ་འོང་ནས་ཅིག་ལྟ་ཡོང་སྐབས། དགེ་བཤེས་འདི་འདྲ་ཆེན་པོ་ཞིག་ལྕགས་ཁང་ཚིགས་ལེབ་ཆུང་ཆུང་ཞིག་གི་ནང་བཞུགས་འདུག །འདོད་པ་ཆུང་ལ་ཆོག་ཤེས་པ་ཟེར་བ་དེ་དེ་འདྲ་ཞིག་མིན་ན་གང་ཡིན་བསམས་ནས་ང་དད་པ་སྐྱེས་སོང༌། དེང་སང་བླ་མ་ཅིག་ཅིག་མ་གི་སྤྲུལ་སྐུ་ཉིག་ཉིག་མ་གི་སྤྲུལ་སྐུ་ཟེར་བ་རྣམས་དང་འདྲ་བ་ཞིག་མ་རེད། བསམ་བཞིན་དུ་ཇོ་ནང་གི་བསྟན་པ་སྤེལ་ཕྱིར་དུ་བྱོན་པ་ཡིན་ཁོ་ཐག་རེད། ལྷག་པར་དུ་ཁོང་རྒྱལ་རོང་ཚ་ཁོ་སྟོད་འདི་ལྟ་བུ་ས་ཆ་གང་ངན་དང་དཔལ་འབྱོར་གང་ཞན་གྱི་ཕྱོགས་སུ་ཕེབས་པ་ལས། དགོན་ཆེན་མིང་ཆེན་ཞིག་ལ་མི་བལྟ་བར་བསྟན་འགྲོ་ཁོ་ན་ཐུགས་ལ་བཞག་པ་དེ་བྱང་ཆུབ་སེམས་དཔའ་ཡིན་པའི་རྟགས་རེད། ངས་ཁྱེད་ལ་འོ་བརྒྱལ་ཆེན་པོ་འདུག་བཤད་ནི་ཡིན་ཏ། ཁོང་གིས་དཀའ་ལས་ཡོད་མེད་སེམས་ཀྱིས་ཐུབ་མི་ཐུབ་རེད། སེམས་ཀྱིས་ཐུབ་ན་གང་ལའང་དཀའ་ལས་ཡོད་པ་མ་རེད་གསུངས་བྱུང༌། ངོ་མ་ཅི་མ་བདེན། སེམས་ཀྱིས་ཐུབ་ན་དཀའ་ལས་ཡོད་པ་མ་རེད། འཁོར་བ་པ་དག་གིས་ཉིན་མཚན་གཉིས་ཀ་ལ་འབད་པ་བྱེད་ལུགས་ལ་བལྟས་ན་གོ་ཐུབ་ཀི། ཞེས་སོགས་ཐུགས་གཙིག་འགྲན་ཟླ་དང་བྲལ་བ་མཛད། ཚེས་བརྒྱད་ཀྱི་ཉིན་རྨེ་སྤྲུལ་རིན་པོ་ཆེ་དང་བཤེས་གཉེན་རིན་པོ་ཆེ་གཉིས་ཐུགས་གཅིག་འདྲེས་ཀྱི་ངང་ནས་རྨེ་སྤྲུལ་རིན་པོ་ཆེ་ཕྱིར་འབར་ཁམས་སུ་ཕེབས། བླ་ཆེན་གཞན་ལྟར་སྤྱིར་བཏང་བཤེས་གཉེན་རིན་པོ་ཆེ་མཆོག་ལ་ཞབས་འབྲང་གི་ཕྱག་མཛོད་ཟེར་བ་དང༌། ཞབས་ཕྱི་ཕྱི་ནང་མང་པོ་ད་ལྟའི་བར་དུ་གང་ཡང་མེད་པར་མ་ཟད། རྒྱུན་ལྡན་དུ་གམ་ནས་སྐུ་གཡོག་སྒྲུབ་མི་འདི་རེད་ཅེས་པ་ཞིག་ཀྱང་ལར་ནས་མེད། ད་དུང་ཡར་མར་ཐག་རིང་ཐུང་གི་ས་ཆ་མང་པོར་ཆོས་ཁྲིད་དང་འཚོགས་འདུ་གནས་བསྐོར་སོགས་ཅི་ལ་བྱོན་ཀྱང་ཕལ་ཆེར་དུ་གཅིག་པུར་འགྲོ་བ་ལས་སྐུ་གཡོགས་ཁྲིད་པ་ཤིན་ཏུ་དཀོན། དེང་གི་མི་ཕལ་གྱི་གཤིས་ཀ་ལྟར་མི་ཆེན་བླ་ཆེན་ལ་ཁ་ཡག་ངོ་དགའ་དང་ངོ་སོ་མཐོ་མཐོ། གྲྭ་རྐྱང་དཀྱུས་མ་དང་མང་ཚོགས་ཉམ་ཐག་ལ་ཆེ་ཚུགས་སྦོམ་བཤད་དེ་འདྲ་གཞལ་ཡང་མི་སྲིད། མོ་ལུང་རྫན་རྫུན་སྨྲ་བ་ཕར་ཞོག །མི་མང་དང་གཞན་གྱི་མཐོང་སྔོན་དུ་ཅིག་ཡིན་ཁུལ་གྱིས་ལྟ་སྟངས་ཙམ་ཡང་བྱེད་མི་སྲིད། ཡུན་རིང་བོར་མཉམ་འགྲོ་བྱས་ཏེ་བརྟག་དཔྱད་བྱས་ན་ད་གཟོད་ཁོང་གི་སྦས་པའི་ཡོན་ཏན་ཆ་རེ་ཐབས་མེད་པར་མངོན་ཡོང་པ་ལས། རང་ལ་ཡོན་ཏན་ཅི་ཡོད་ཚང་མ་སྦས་ཏེ་གསང་ཐབས་སུ་བཞུགས་པའི་བཀའ་གདམས་ཀྱི་དགེ་བཤེས་གོང་མ་རྣམས་དང༌། འཕགས་བོད་ཀྱི་སྦས་པའི་རྣལ་འབྱོར་བ་མང་པོ་ཞིག་གི་རྣམ་པར་ཐར་བ་ཇི་བཞིན་དུ། ཚེ་འདིའི་ཆོས་བརྒྱད་ཀྱི་འཆིང་ཐག་དུམ་བུར་བཅད་ཚར་ནས་ལྷག་མ་ཙམ་ཡང་མི་བཞེས་སོ། །བཤེས་གཉེན་རིན་པོ་ཆེ་མཆོག་གི་ཐེངས་ཤིག་གི་བཀའ་སློབ་ལས། དགོན་པ་དང་སློབ་གླིང་གང་ཡིན་ན་ཡང་ཐོས་བསམ་སྒོམ་གསུམ་ལ་དམིགས་པའི་སྒྲིག་ལམ་ཡག་ཐག་ཆོད་ཅིག་དགོས་པ་རེད། སྒྲིག་ལམ་ཡག་པོ་ཞིག་ཡོད་ན་མཐོ་དམན་སུ་ཡིན་ཡང་དགོན་པའི་ནང་དུ་སླེབས་ཚར་ནས་བཟུང༌། རང་བཞིན་གྱིས་གཉོམ་ཆུང་ཚུལ་མཐུན་དང་འདོད་ཆུང་ཆོག་ཤེས་འདུལ་བ་དང་མཐུན་པ་འདྲ་ཧ་ལམ་ཆགས་འགྲོ་གི་རེད། སྔོན་ཆད་ང་རང་གྲྭ་སར་ཡོད་སྐབས་སུ་འཕགས་ཡུལ་གདན་ས་ཆེན་མོ་རྣམས་ལ་མཚོན་ནས་བཤད་ན་གྲྭ་རྐྱང་སློབ་གཉེར་བ་དང་དགེ་བཤེས་ཆེན་པོ་སུ་ཡིན་ན་ཐམས་ཅད་འདྲ་མཉམ་གྱིས་ཕར་བལྟས་ཚོད་ལ་འདོད་ཆུང་ཆོག་ཤེས་ཀྱི་རྣམ་པ་དོད་པོ་འདྲ་བ་ཞིག་ཡོད་པ་རེད། དགོན་པ་ཆེ་ཆུང་མང་པོ་ན་བླ་མ་ལ་ལས་རྒྱུ་སྟོབས་འདྲ་ཕུད་ནས་རྫིག་རྫིག་བཟོས་པས། གྲྭ་པ་དག་གིས་ཀྱང་དེའི་རྗེས་སུ་སློབ་འདོད་བྱུང་ནས་སྒོར་མོ་དང་རླངས་འཁོར་ཞིག་ག་རེ་བསམ་བསྡད་པ་ཞིག་ཏུ་ཆགས་འགྲོ་བཞིན་འདུག །གྲྭ་བ་ལ་ལས་དཔལ་འབྱོར་ཅུང་ཙམ་རེ་རེག་ཡོང་དུས་སློབ་གཉེར་བ་གྲྭ་རྐྱང་འདོད་ཆུང་ཆོག་ཤེས་བྱས་ནས་བཞུགས་ཡོད་པ་རྣམས་ཀྱི་ནང་དུ་འོངས་ནས། རྒྱུ་ངོམ་ཟས་ངོམ་འདྲ་དང༌། རླངས་འཁོར་དང་པར་ཆས་འདྲ་ཁུར་ནས་ཡིན་མདོག་འདྲ་བསྟན་ཡོང་གི་འདུག །དོན་ལ་ཁོག་ན་ཅི་ཡང་མེད་པའི་རྟགས་བསྟན་ཡོང་གི་ཡོད་པ་རེད། འོན་ཀྱང༌། དེ་ལྟར་བྱས་ཡོང་དུས་གྲྭ་བ་མང་པོ་ཞིག་དཔལ་འབྱོར་ལ་ཁ་ཕྱོགས་ནས་ཟ་ངེ་ཟིང་ངེ་ཞིག་ཏུ་བཏང་བཞག་གི་འདུག །དགོན་པ་ལ་ལ་ན་རྒྱ་བླ་བོད་བླ་སུ་ཡིན་ན་དགོན་ནང་དུ་ཐོན་ཕྱིན་གྲྭ་པ་གྲྭ་རྐྱང་བྱས་ནས་འགྲོ་བ་ལས། པར་ཆས་རྫིག་པོ་དང་རླངས་འཁོར་རྫིག་པོ་བསྐོར་མི་ཆོག་པར། དཔལ་འབྱོར་ཡོད་ན་ཡང་མེད་མདོག་བྱས་ཏེ་ཚང་མ་འདྲ་མཉམ་བྱས་ནས་འགྲོ་དགོས་པའི་སྒྲིག་ལམ་འདུག །དེ་ཧ་ཅང་ཡག་པོ་རེད། དབུ་ཁྲིད་རྣམ་པས་རང་ལ་དམིགས་དཔེ་ཡག་པོ་ཡོད་པའི་སྟེང་ནས་སློབ་གསོའི་ཁ་ཕྱོགས་འདོད་ཆུང་ཆོག་ཤེས་དང་སློབ་གཉེར་སྒོམ་སྒྲུབ་ཀྱི་ཕྱོགས་ལ་གཏོང་ཅི་ཐུབ་བྱས་ན། ནམ་ཞིག་ལ་དགོན་པ་དེའི་གྲྭ་མང་ལ་ཡང་གོ་རྟོགས་ཅིག་སད་ཡོང་གི་རེད། གྲྭ་མང་ཕལ་ཆེར་ལ་གོ་རྟོགས་དང་འགྲོ་སྟངས་ཡག་པོ་ཞིག་ཆགས་ན། དཔལ་འབྱོར་ཡོད་པའི་བླ་མ་དང་གྲྭ་པ་འགའ་རེ་བྱུང་ན་ཡང༌། དགོན་ནང་དུ་འཚོ་བ་སྟབས་བདེ་གྲྭ་རྐྱང་རྣམས་དང་འདྲ་བ་མ་བྱས་ན། ཁོ་རང་ཚོར་དོགས་མི་བདེ་བ་ཞིག་ཏན་ཏན་ཆགས་ཡོང་གི་རེད། དེ་འདྲ་ཆགས་ཚར་ཕྱིན་གྲྭ་པ་རྣམས་སྒོམ་སྒྲུབ་སློབ་གཉེར་ལ་ཁ་ཕྱོགས་ལེགས་པ་དང་མཐར་ཕྱིན་པ་ལ་ཕན་པ་རླབས་ཆེན་འདུག །ཅེས་གསུངས་སོ། །དེ་ལྟར་རྒྱུན་དུ་བཀའ་སློབ་གནང་བར་མ་ཟད་ལག་ལེན་དམིགས་ལྟོས་རྒྱུན་འཁྱོངས་ཞལ་དང་ཐུགས་གཅིག་པས། བཤེས་གཉེན་རིན་པོ་ཆེ་གང་ཉིད་ཀྱི་སློབ་མ་རྣམས་མ་ཟད། རྒྱུས་ཡོད་ཀྱི་བླ་ཆེན་རྣམས་ཀྱང་བཤེས་གཉེན་རིན་པོ་ཆེ་ཉིད་ཀྱི་མདུན་སར་བཅར་དུས་རང་བཞིན་གྱིས་ངོ་གནོངས་ནས་གྲྭ་པ་གྲྭ་རྐྱང་གི་འགྲོ་ལུགས་ལྟ་བུ་ལ་བསླབ་དགོས་པ་ཞིག་ཡིན། ཚེས་བཅུ་དྲུག་ནས་ཉིན་གསུམ་ལ་མཐུན་ལམ་དང་ཤེས་ཡོན་དང་ཀུན་སྤྱོད་ཀྱི་སློབ་གསོའི་བསྐོར་ཞར་རྩོམ་གནངས། ཚེས་ཉི་ཤུ་གཅིག་ནས་ཇོ་ནང་བསྟན་འགྲོ་ཀུན་ཕན་ལྷན་ཚོགས་ཐེངས་དྲུག་པའི་ཚོགས་ཐོག་ཏུ་ཕེབས་ནས་གསུང་བཤད་དང་ཕྱག་ལས་རྒྱ་ཆེན་མཛད། ཚེས་ཉི་ཤུ་ལྔའི་ནུབ་མོར་རི་ཁྲོད་ཆེན་མོར་ཕྱིར་ལྷགས། བོད་ཟླ་བཞི་པ་སྟེ་ས་ག་ཟླ་བའི་ཚེས་ཉེར་གཅིག་ནས་ཉིན་བཅོ་ལྔའི་ཡུན་ལ་མགོ་ལོག་ཁང་སར་དགོན་དུ་ཇོ་ནང་གཞན་སྟོང་དབུ་མ་ཆེན་པོའི་བགྲོ་གླེང་ཐེངས་ལྔ་བའི་ཚོགས་གཙོ་དང༌། གྲྭ་མང་རྒྱ་མཚོ་ལྟ་བུའི་འདུས་སྡེ་སྤྱི་ལ་གཞན་སྟོང་དབུ་མའི་རྒྱན་ལུང་སྦྱོར་དང་བཅས་པའི་ཟབ་ཁྲིད་ཀྱི་ཆོས་སྒྲ་ཆེན་པོ་བསྒྲགས་ནས་ཛ་འགོའི་སློབ་གླིང་ཆེན་མོར་ཕྱིར་ཕེབས་སོ། །མདོ་འཛངས་བླུན་ལས། གཞན་རབ་ཏུ་ཕྱུང་ངམ། བདག་རབ་ཏུ་བྱུང་ན། གཅིག་གིས་གཅིག་བསྟན་ཅིང་དྲངས་པས་སེམས་ཅན་གྱི་ཁམས་བསྐལ་པའི་མཐར་བླ་ན་མེད་པའི་ཤེས་རབ་ཀྱི་མིག་ཏུ་འགྱུར་ཏེ། ཤེས་རབ་ཀྱི་མིག་གི་རང་བཞིན་ནི་བསྐལ་པའི་བར་དུ་འཇིག་པར་མི་འགྱུར་རོ། །དེའི་བསོད་ནམས་ཀྱིས་ལྷ་དང༌། མིའི་ནང་ན་བདེ་བའི་ལོངས་སྤྱོད་ཟད་མི་ཤེས་པ། མཐར་ཐུག་པ་མེད་པ་ཡིད་བཞིན་དུ་མྱོང་ཞིང་མཐར་ཡང་མངོན་པར་འཚང་རྒྱའོ། །དེ་ཅིའི་ཕྱིར་ཞེ་ན། རབ་ཏུ་བྱུང་བའི་ཆོས་ནི་བདུད་ཀྱི་འཁོར་མེད་པར་བྱེད་ཅིང༌། སངས་རྒྱས་ཀྱི་གདུང་འཚོབ་པར་བྱེད་དོ། །སྡིག་པ་མི་དགེ་བའི་ཆོས་མེད་པར་བྱེད་ཅིང་དགེ་བའི་ཆོས་བསྐྱེད་པར་བྱེད་དོ། །ཁ་ན་མ་ཐོ་བའི་དྲི་མ་མེད་པར་བྱེད་ཅིང༌། བླ་ན་མེད་པའི་བསོད་ནམས་ཀྱི་ལས་བསྐྱེད་པར་བྱེད་དོ། །དེ་བས་ན་བཅོམ་ལྡན་འདས་ཀྱིས་རབ་ཏུ་འབྱུང་བའི་བསོད་ནམས་ནི་རི་རབ་ལྷུན་པོ་བས་འཕངས་མཐོའོ། །རྒྱ་མཚོ་བས་གཏིང་ཟབ་བོ། །ནམ་མཁའ་བས་རྒྱ་ཆེའོ་ཞེས་གསུངས་སོ། །གལ་ཏེ་སུ་ཞིག་རབ་ཏུ་བྱུང་བའི་བགེགས་དང་བར་ཆད་བྱས་ཏེ། བསམ་པ་ལྟར་མ་གྱུར་ན་དེ་ཁ་ན་མ་ཐོ་བའི་ལས་ཤིན་ཏུ་ལྕི་བ་ནི། དཔེར་ན་མི་ཞིག་མུན་ཁྲོད་དུ་སོང་བ་ཅི་ཡང་མི་མཐོང་བ་དང་འདྲ་བར་དེའི་སྡིག་པའི་རྣམ་པར་སྨིན་པ་ཡང་དེ་དང་འདྲ་སྟེ། ཤིན་ཏུ་མི་སྣང་བའི་མུན་པ་མུན་ནག་ཆེན་པོའི་སེམས་ཅན་དམྱལ་བར་ལྷུང་ངོ༌། །ཞེས་སོགས་གོང་འོག་ཏུ་རབ་ཏུ་བྱུང་བ་དང་རབ་ཏུ་དབྱུང་བའི་ཕན་ཡོན་རྒྱ་ཆེར་གསུངས་པ་ལྟར། བོད་ཟླ་དྲུག་པའི་ཚེས་གཅིག་ལ་གྲྭ་བ་བདུན་ཅུ་ཐམ་པར་བར་མ་རབ་བྱུང་སྔོན་དུ་འགྲོ་བའི་སྒོ་ནས་དགེ་ཚུལ་གྱི་སྡོམ་པ་གནང༌། ཚེས་ཉེར་གཉིས་ནས་ཇོ་ནང་གི་དགོན་སྡེ་ཡོངས་ཀྱི་ཆོས་འབྱུང་ཕྱོགས་བསྡུས་ཤོག་ངོས་དགུ་བརྒྱ་ལྷག་ཙམ་ལས་གྲུབ་པ་དེ་བསྡུ་རུབ་བྱ་བའི་དབུ་བརྩམས། ཚེས་ཉི་ཤུ་རྩ་བརྒྱད་ལ་ཡུམ་མདོ་ལས་བཤད་པའི་རྒྱལ་སྲས་ཞེ་ལྔའི་བཤད་པ་པད་དཀར་ཕྲེང་བ་ཞེས་བྱ་བ་བརྩམས། ཚེས་སུམ་ཅུའི་ཉིན་མང་ཚོགས་ལ་སྐྱབས་སྡོམ་དང་ནང་ཆོས་ངོ་སྤྲོད་སྐད་ཡིག་སློབ་གསོ་མཛད། ལོ་དེར་ཀྱང་སྒང་དགོན་དང༌། གུར་བསམ་སྡེ་བ། རྩེ་ལེ་ལྒང༌། ཅུང་ཟེད། མཁོ་ཡག་སོགས་ལྷ་སྡེ་སོ་སོར་དངོས་སུ་ཕེབས་ནས། ནང་ཆོས་ངོ་སྤྲོད་དང༌། རིག་གནས་སློབ་སྦྱོང༌། བོད་མི་རིགས་ཀྱི་སྲོལ་རྒྱུན་དང་བོད་སྤྱིའི་སྐད་ཡིག་སློབ་སྦྱོང་གི་ཐད་ནས་བཀའ་སློབ་ནན་མོ་མཛད། བོད་ཟླ་བརྒྱད་པའི་ཚེས་བཅུ་གསུམ་ཉིན་རྟགས་རིགས་འཛིན་གྲྭར་རྟགས་རིགས་ཀྱི་དཔེ་ཁྲིད་རྫོགས་ནས་ཚེས་བཅོ་ལྔའི་ཉིན་བཤེས་གཉེན་རིན་པོ་ཆེ་ཉིད་ཀྱིས་བརྩམས་པའི་གྲུབ་མཐའི་ཐོག་ནས་ཆོས་ཁྲིད་གནང༌། བོད་ཟླ་དགུ་བའི་ཚེས་བཅུ་དགུའི་ཉིན་པེ་ཅིན་ནང་བསྟན་སློབ་གྲྭར་རྒྱུགས་སྤྲོད་དཔྱད་ཞིབ་པར་བྱོན་ནས་ཉིན་བཅུ་ལྷག་གིས་དགོན་པར་འབྱོར། ལོ་དེར་ཟླ་བ་བཅུ་གཅིག་པ་གཉིས་ཡོད་པ་ལས་ཕྱི་མའི་ཚེས་བརྒྱད་ལ་ཇོ་ནང་བརྩེ་ཆེན་སློབ་གླིང་དེ་ཉིད་ཀྱི་ལོ་གཅིག་གི་ཆོས་སྤྱོད་ཐམས་ཅད་ཕུན་སུམ་ཚོགས་པའི་ངང་ནས། སློབ་གཉེར་བ་རྣམས་ལ་ལོ་མཇུག་གི་རྒྱུགས་འབྲས་བྱ་དགའ་གནང་ཞིང༌། བཀའ་སློབ་ཞལ་ཏ་དང་བཅས་ཆོས་མཚམས་གྲོལ་ལོ། ། གང་དུ་འཁོས་དམན་མགོན་དང་བྲལ་གྱུར་ཅིང༌། ། རྣམ་དཀར་འཕྲིན་ལས་ནུབ་རིར་ཉེ་བ་དེར། ། རྒྱལ་སྲས་སེམས་དཔའ་དག་གི་འབྱོན་བཞུགས་ཀྱིས། ། ཐུགས་རྗེའི་འགྲོ་དོན་ལྷག་པར་སྐྱོང་བ་ལགས། ། སྙིགས་དུས་ཀྱི་བསྟན་པའི་གསལ་བྱེད་ཆེན་པོ་ངག་དབང་འཇིགས་མེད་དངོས་གྲུབ་དཔལ་བཟང་པོའི་མཛད་བཟང་བསླབ་གསུམ་ནོར་བུའི་གླིང་ཁ་ཞེས་བྱ་བ་ལས་རྒྱལ་རོང་དུ་ཇོ་ནང་བརྩེ་ཆེན་མཐོ་སློབ་གསར་དུ་ཕྱག་འདེབས་མཛད་བསྐོར་གྱི་རྣམ་ཐར་མདོར་ བསྡུས་པ་སྟེ་བཅུ་དགུ་པའོ། ། ཛ་འགོའི་རི་ཁྲོད་དུ་ཕྱག་ལས་རྒྱུན་སྐྱོང་བཞིན་བཞུགས་སྐབས་ཀྱི་རྣམ་ཐར་བསྐོར།ལོ་དེའི་ཆོས་མཚམས་སུ་རྒྱ་ནག་གི་རྒྱལ་ས་པེ་ཅིན་དུ་ཕེབས་ཏེ་ཕར་ཕྱིན་མཐའ་དཔྱོད་རིན་ཆེན་ཕྲེང་བ་སྐབས་གསུམ་པའི་བར་དུ་བརྩམས་གྲུབ་ཟིན་ཙམ་ན། དབུ་སྙུང་ཆེ་ཙམ་བཞེས་པས་དེ་ཉིད་དུ་ལུང་སྐྱ་དགོན་མཁན་ཚུལ་ཁྲིམས་སོགས་ཀྱིས་རོགས་དན་བྱས་ཏེ་ཉིན་ཁ་ཤས་ལ་སྨན་པར་བསྟེན་ནས་བཞུགས། ཅུང་ཟད་ཙམ་དྲག་སྐྱེད་བྱུང་བ་དང་ཞབས་གཡོག་ཙམ་ཡང་མེད་པར་ཕ་ཡུལ་ཨ་སྐྱོང་དགོན་དུ་ཕེབས་ཏེ། དགོན་ནང་དུ་སྙུན་གཞིས་ཐུགས་མི་བདེ་བ་ཅུང་ཟད་ཀྱང་མེད་པར་ཐུགས་ཞི་དུལ་ཤིགས་ཀེར་བསྟན་འགྲོའི་ལས་དོན་འབའ་ཞིག་ཐུགས་ལ་བཅིང་ནས་གསུང་མོལ་གནང་བཞིན་པའི་རྣམ་པ་དེ་ཙམ་ཞིག་ད་ལྟའི་ཆར་ཡིད་ལ་འཆར་ན་བཤེས་གཉེན་རིན་པོ་ཆེ་ཉིད་ལ་མཆོག་ཏུ་ཡིད་མོས་གུས་འཕེལ་འོང་བ་ཞིག་འདུག །ནམ་རྒྱུན་སློབ་མ་ཚོར་གསུང་འཕྲོས་སུ། ཁོ་ད་ལྟ་ཤི་ཡང་གྲྭ་རྐྱང་ཞིག་གི་ངོས་ནས་བསྟན་པ་ལ་ལས་ཀ་མ་འགྲུབ་བསམ་པ་མེད། ད་ལྟའི་སློབ་གླིང་འདི་ཚོ་འཇིག་འགྲོ་བསམས་ནས་སེམས་ཁྲལ་གཞི་ནས་བྱེད་མྱོང་མེད། འཁོར་སློབ་མ་ཚོ་དང་འབྲལ་འགྲོ་དྲན་ནས་སྡུག་མུག་འདོན་རྒྱུ་ཡང་མེད། རྒྱ་གར་འཕགས་པའི་ཡུལ་གྱི་བཅོམ་ལྡན་འདས་ཀྱི་མཛད་པ་ཁྱད་པར་ཅན་མཛད་པའི་གནས་ཆེན་ཁག་མང་པོ་དེ་རིང་སང་ཉིན་འདི་ཡིན་གན་ཡིན་ཟེར་ནས་ངོས་འཛིན་ཙམ་བྱེད་དཀའ་བར་གྱུར་ཡོད་པ་རེད། དཔལ་ན་ལེནྜ་དང༌། འབྲི་ཀཱ་མ་ལ་ཤི་ལའི་གཙུག་ལག་ཁང་སོགས་ཀྱང་ཁང་ཆག་ལྟ་བསྐོར་གྱི་གནས་ཙམ་ཞིག་ཏུ་གྱུར་ཡོད་པ་ལ་ལྟོས་དང༌། བོད་གངས་ཅན་གྱི་གདན་ས་བྱིན་ཅན་མང་པོ་ཡང་དེ་ལྟ་བུ་རེད། དེ་དག་ལ་ལྟོས་ན་ང་ཚོའི་འདི་དག་ལད་མོ་ཙམ་ཡང་མ་རེད། དེས་ན་ལས་དང་སྨོན་ལམ་གྱིས་ཐེབས་ཕྱོགས་ཤིག་གིས་ད་ལྟའི་ཆར་བླ་མ་སློབ་མ་དང་དགེ་རྒན་དགེ་ཕྲུག་བྱེད་རྒྱུ་བྱུང་བའི་དུས་འདིར། གཅིག་གིས་གཅིག་ལ་ཕན་ཅི་ཐོགས་དང་ནུས་པ་ཅི་ཡོད་འདོན་བཞིན་པ་ཡིན། ནམ་ཞིག་ཐབས་ཤེས་མེད་ནས་རྐྱེན་བར་ཆད་ཅི་བྱུང་ཡང་དེའི་སྐབས་ལ་སེམས་ཁྲལ་མེད་པར་དང་ལེན་བཟོ་དགོས་པ་རེད། ལ་ལས་དངོས་སུ་ལག་ལེན་བསྟར་རྒྱུ་ཡོད་སྐབས་ཉི་མ་སྟོང་ཟད་བྱེད་བཞག་གི་རེད། ཐབས་ཤེས་མེད་ས་ལ་ཐོན་དུས་སྡུག་གཏམ་ཞེ་སྨྲེང་གི་བྱ་བ་སྐད་ཆ་སྣ་ཚོགས་མངོན་ནས། རྐྱེན་ངན་བར་ཆད་དང་ལེན་གྱི་ནུས་པ་ཅུང་ཟད་ཙམ་ཡང་མེད་པ་འདུག །དེ་འདྲ་ཉན་གི་མ་རེད། དྲན་པ་ཉེར་བཞག་ལས། མེ་ནི་གྲང་བར་འགྱུར་ཡང་སྲིད། །རླུང་ནི་ཞགས་པས་ཟིན་ཡང་སྲིད། །ཉི་ཟླ་ཐང་ལ་ལྷུང་ཡང་སྲིད། །ལས་ཀྱི་རྣམ་སྨིན་བསླུ་མི་སྲིད། །ཅེས་དང༌། མདོ་སྡེ་ལས་བརྒྱ་པ་ལས། ལུས་ཅན་དག་གི་ལས་རྣམས་ནི། །བསྐལ་བ་བརྒྱར་ཡང་ཆུད་མི་ཟ། །ཚོགས་ཤིང་དུས་ལ་བབ་པ་ན། །འབྲས་བུ་ཉིད་དུ་སྨིན་པར་འགྱུར། །ཞེས་པ་ལྟར་ལས་འབྲས་ཐོག་ཏུ་བབ་དུས་རང་བྱས་ཀྱི་འབྲས་བུར་ཤེས་ཏེ་ཆོས་པའི་ཚུགས་ཀ་ཡོད་དགོས་པ་རེད། རྒྱལ་བའི་སྲས་པོ་དངུལ་ཆུ་ཐོགས་མེད་ཀྱིས་སྐྱིད་སྡུག་ལམ་འཁྱེར་གྱི་གདམས་པ་ལས། བདག་ཞེན་རྒྱུ་ལུས་ཀྱི་ཕུང་པོ་འདི། །ན་ན་ན་སྟེ་ན་བས་དགའ། །སྔར་བསགས་ཀྱི་ལས་ངན་འཛད་པ་ཡིན། །ཆོས་སྤྱོད་ཀྱི་བྱ་བ་སྣ་ཚོགས་ཀྱང༌། །སྒྲིབ་གཉིས་སྦྱོང་བའི་ཆེད་དུ་ཡིན། །ན་བ་མེད་ན་མེད་དེ་དགའ། །ལུས་སེམས་བདེ་ན་དགེ་སྦྱོར་འཕེལ། །མི་ལུས་དོན་ཅན་བྱེད་པ་ཡང༌། ། སྒོ་གསུམ་དགེ་ལ་སྦྱོར་བ་ཡིན། །འབྱོར་པ་མེད་ན་མེད་དེ་དགའ། །བསྲུང་བྲལ་གྱི་བྱ་བྲེལ་དེ་ལ་མེད། །འཐབ་རྩོད་ཀྱི་ཁྲོ་འཁྲུག་ཇི་སྙེད་པ། །འཛིན་ཆགས་ཀྱི་ནོར་ལས་བྱུང་བར་ངེས། །འབྱོར་པ་ཡོད་ན་ཡོད་དེ་དགའ། །བསོད་ནམས་ཀྱི་དགེ་ཚོགས་སྤེལ་བས་ཆོག །འཕྲལ་ཕུགས་ཀྱི་ཕན་བདེ་ཇི་སྙེད་པ། །བསོད་ནམས་ཀྱི་འབྲས་བུ་ཡིན་པར་ངེས། །མྱུར་ཏུ་ཤི་ན་ཤི་བས་དགའ། །རྐྱེན་ངན་གྱི་བར་དུ་མ་ཆོད་ཅིང༌། །འཚམས་སྦྱོར་གྱི་བག་ཆགས་བཟང་འགྲོགས་པའི། །མ་ནོར་གྱི་ལམ་དུ་ཆུད་པར་ངེས། །ཡུན་དུ་གསོན་ན་གསོན་པས་དགའ། །ཉམས་མྱོང་གི་ལོ་ཐོག་སྐྱེས་པ་ལ། །གདམས་ངག་གི་རླན་དྲོད་མ་ཡལ་བར། །ཡུན་དུ་བསྟེན་པས་སྨིན་པར་འགྱུར། །གང་ཡིན་ཡང་དགའ་བ་སྒོམས་ཤིག་ཨང༌། །ཞེས་པ་ལྟར་ཅི་ཐུབ་གང་ཐུབ་ཀྱིས་ཉམས་ལེན་དང་ཡིད་ཆེས་འཕེལ་བ་ཞིག་ཨེ་ཡོང་བལྟ་དགོས་པ་རེད། དེང་སང་ཆོས་སྦྱང་ལོ་ཐོས་ལོ་སྒོམ་ལོ་མང་རུང་ཁ་ཞེ་གཉིས་མེད་ཀྱིས་ལས་འབྲས་ཡིད་ཆེས་ཐུབ་མི་དཀོན་མོ་རེད། ཁོ་བོ་ལ་ནམ་རྒྱུན་ཁྱེད་རྣམ་པའི་ཕྱོགས་ནས་སེམས་ཁྲལ་ཆེ་ཤོས་དེ་གང་ཡིན་ཟེར་ན། དང་ཐོག་སློབ་སྦྱོང་ཡོད་མི་ཞིག་ཨེ་ཡོང་བསམ་པ་ཡང་ཆ་ཤས་གཅིག་ཡིན་ཏེ། སེམས་ཁྲལ་གཙོ་བོའི་གཙོ་བོ་དེ། སྡོམ་ཁྲིམས་གཞུག་འཁྱོངས་ཐུབ་མི་ཞིག་དང༌། དགེ་སེམས་ཡོད་མི། ལས་འབྲས་སྲུང་མི་སྟེ། མདོར་ན་ཆོས་པ་ཞིག་རེད་ཨེ་ཐུབ་བསམས་ནས་ཉིན་མཚན་གཉིས་ཀ་ལ་འདང་རྒྱག་ཤོར་ས་དེ་ཡིན། ཞེས་སོགས་ནན་ནན་ཏིག་ཏིག་གི་གསུང་བཤད་ལན་གཅིག་མིན་པར་ཡང་དང་བསྐྱར་དུ་བསྩལ་བ་ཡིན། དེ་ནས་རིམ་པས་སྙུན་གཞི་རབ་ཇེ་དྭངས་སུ་ཕྱིན་ཏེ་སྤྱིར་ནི་སྐུ་སྙུན་བཞེས་ཞོར་དུ། ཕྱི་ལོ། ༢༠༡༡ བོད་རབ་གནས་ལྕགས་མོ་ཡོས་ཀྱི་ལོའི་ཟླ་བ་དང་པོའི་ཚེས་ལྔ་ལ་ལྕམ་མདའ་དགོན་དུ་ལོ་དེའི་གཞན་སྟོང་བགྲོ་གླེང་གི་དྲིས་ལན་དང༌། ཚད་མའི་དཔེ་ཁྲིད་མཛད། ཞར་ལ་གཞན་སྟོང་བགྲོ་གླེང་ཐེངས་དྲུག་པའི་དྲིས་ལན་བརྩམ་པའི་དབུ་ཙམ་བཟུང་ནས་གཞུག་ཛ་འགོའི་རི་ཁྲོད་ནས་རྫོགས་པར་བྱས། ཚེས་ཉི་ཤུའི་ནང་ལ་ཇོ་ནང་བརྩེ་ཆེན་མཐོ་སློབ་ཀྱི་སློབ་གཉེར་དབུ་བཟུང༌། ལོ་དེར་སྔར་ལོའི་འཛིན་གྲྭ་རྣམས་ཀྱི་སྟེང་དུ། ལོ་སྔ་མའི་ཕར་ཕྱིན་པ་རྣམས་ཕར་ཕྱིན་གཞུང་རྙིང་འཛིན་གྲྭར་འཕར་ནས་འཛིན་གྲྭ་གསར་བ་ཚུགས། ས་ག་ཟླ་བ་སྟེ་བོད་ཟླ་བཞི་པའི་ཚེས་ཉེར་གཅིག་ནས་ཉིན་བཅོ་ལྔའི་རིང་ལ་དགའ་བདེ་རྫོང་གཙང་སྐོར་ཞོལ་མ་དགོན་དུ་གཞན་སྟོང་དབུ་མ་ཆེན་པོའི་བགྲོ་གླེང་ཐེངས་དྲུག་པ་ཚོགས་པར་ཚོགས་གཙོའི་ལས་འགན་བཞེས་ཤིང༌། དགོན་ཁག་སོ་སོ་ནས་བྱོན་པའི་ལུང་རིགས་སྨྲ་བའི་སྡེ་རྒྱ་མཚོ་ལྟ་བུ་ལ་རྗེ་ཏཱ་ར་ནཱ་ཐའི་སྦྱོར་དྲུག་གི་ཁྲིད་ཡིག་མཐོང་བ་དོན་ལྡན་གྱི་ལྷན་ཐབས་འོད་བརྒྱ་འབར་བའི་དུས་ཁྲིད་ཟབ་མོའི་བཀའ་དྲིན་གནང༌། ཇོ་ནང་ཤམ་བྷ་ལའི་ངེས་གསང་གཞན་སྟོང་དབུ་མ་ཆེན་པོའི་བགྲོ་གླེང་དང་པོ་གསར་འཛུགས་བྱེད་རྒྱུའི་ཐུགས་དགོངས་བཏང་སྟེ་ཕྱག་ལས་གནང་པ་ནས་བཟུང༌། དེ་སྔོན་ཡན་དུ་བགྲོ་གླེང་ཐེངས་དྲུག་གི་ཚོགས་གཙོའི་ལས་འགན་བཞེས་པར་མ་ཟད། བགྲོ་གླེང་གི་སྒྲིག་གཞི་ཐམས་ཅད་འཐུས་ཚང་ཕུན་སུམ་ཚོགས་པར་བསྐྲུན། ད་དུང་བགྲོ་གླེང་དེ་ཉིད་བརྒྱུད་ནས་ཇོ་ནང་གི་དགོན་ཁག་མང་པོར་སློབ་གཉེར་གྱི་གཞི་རྐང་ཚུགས་པ་དང༌། ཀུན་མཁྱེན་དོལ་པོ་པ་ཡབ་སྲས་དང༌། རྗེ་ཏཱ་ར་ནཱ་ཐ་སོགས་ཀྱི་གཞུང་ལུགས་གཞིར་བྱས་ནས་སྦྱང་བ་བྱ་རྒྱུའི་ཤུགས་རྐྱེན་ཧ་ཅང་རླབས་ཆེན་ཐོན། དེ་ནས་བཤེས་གཉེན་རིན་པོ་ཆེ་ནས་ཨེ་ཚུགས་ནན་སྐྱེལ་གྱིས་བགྲོ་གླེང་གི་ཚོགས་གཙོ་བརྗེ་སྤོར་དང་དུས་ཁྲིད་ཀྱི་ལས་འགན་ལས་གཡོལ་དགོས་པའི་གསུང་ཡང་ཡང་ཕེབས་རྐྱེན། འུ་ཐུག་ཐབས་ཟད་ཀྱི་སྒོ་ནས་ཚོགས་གཙོའི་ལས་འགན་བརྗེ་དགོས་བྱུང༌། འོན་ཀྱང་དེ་ནས་གཞན་སྟོང་དབུ་མ་ཆེན་པོའི་བགྲོ་གླེང་དུས་ཁྲིད་བྱེད་མི་གཞན་མ་བྱུང་བས་མཚམས་ཆད་དོ། །དང་ཐོག་གི་གྲྭ་རྐྱང་དཀྱུས་མ་ཞིག་མཁས་བཙུན་བཟང་པོའི་ཡོན་ཏན་ཁོ་ནས་ཕྱོགས་ཐམས་ཅད་ལས་རྣམ་པར་རྒྱལ་ཏེ། སྤྱིར་རྒྱལ་བསྟན་ཡོངས་རྫོགས་ལ་ཕྱིས་རྗེས་ཟབ་ཅིང༌། ཡང་དགོས་སུ་ཁ་བ་གངས་ཅན་པའི་བསྟན་སྲིད་རིག་གཞུང་གི་སྲོག་རྩ་འཛིན་པའི་རླབས་ཆེན་གྱི་མི་སྣ། ཁྱད་པར་དུ་ལོ་ངོ་བརྒྱ་ཕྲག་ཁ་ཤས་སུ་བསྟུད་མར་ཉམས་རྒུད་དུ་ཕྱིན་ནས་ཉམ་ཐག་ཉག་ཕྲ་བའི་རྒྱུན་ཆད་ལ་ཁད་པའི་དཔལ་ཇོ་ནང་བའི་བསྟན་པའི་མེ་རོ་སླར་ཡང་གསལ་བར་བྱེད་པའི་ཇོ་ནང་ཡང་དར་བསྟན་པའི་བྱེད་པོ། ཆེ་རྒུ་ཀུན་ཀྱི་གཙུག་གི་ནོར་བུ་ལྟ་བུར་མངོན་པར་བཞེངས་པའི་མཛད་པའོ། །དེ་ནས་ཛ་འགོའི་རི་ཁྲོད་དུ་བྱོན་ནས་མུ་མཐུད་དེ་མཛད་པ་གནང༌། དབྱར་གནས་གྲོལ་བ་ན་སེར་སྐྱ་འདུས་སྡེ་ཡོངས་ལ། ཐུགས་རྗེ་ཆེན་པོའི་རྗེས་གནང་དང༌། དགེ་སྒྲུབ་སྡིག་སྤང་དང༌། སྐད་ཡིག་སློབ་སྦྱང་སོགས་ཀྱི་གསུང་བཤད་གྱ་ནོམ་པ་བསྩལ་ཞིང༌། རྒྱལ་རོང་པཱ་ལ་དགོན་དབང་རྒྱལ་ལ་མཁན་པོའི་མཚན་གསོལ། བོད་ཟླ་དགུ་བའི་ནང་ཉིན་བཅོ་ལྔ་ཡས་མས་སུ་པེ་ཅིན་བོད་བརྒྱུད་མཐོ་རིམ་ནང་བསྟན་སློབ་གླིང་དུ་ནང་བསྟན་དགེ་རྒན་ཆེན་མོའི་རྒྱུགས་སྤྲོད་ཕུལ་བས་རྒྱུགས་འབྲས་ཨང་དང་པོ་ཐོབ་སྟེ། དགེ་རྒན་ཆེན་མོ་རིམ་པ་དང་པོའི་ཕྱག་ཁྱེར་བླངས། སྐབས་དེར་བཤེས་གཉེན་རིན་པོ་ཆེ་ཕེབས་ཤུལ་ནས། དགོན་པ་དེ་དང་ལོ་མང་པོའི་གོང་ནས་བླ་མ་རེ་དང་ཁྱིམ་ཚང་ཁ་ཤས་ཀྱིས་རྐྱེན་པས་གྲྭ་རྒྱུན་གྱི་རྩོད་པ་ཅུང་ཟད་ཡོད་པ་ལ། ཛ་འགོའི་རི་ཁྲོད་དུ་བཤད་སྒྲུབ་ཀྱི་སྡེ་རྒྱས་འོང་ན་ཁྱིམ་ཚང་དེ་ཚོ་རི་ཁྲོད་དེར་རང་བཞིན་གྱིས་འཆོར་འགྲོ་བར་འདུག་སྙམ་ནས། བརྩེ་ཆེན་སློབ་གླིང་ཆེན་མོར་འགལ་རྐྱེན་སྣ་ཚོགས་པ་བཟོས་པས། དགོན་འབངས་གཉིས་ཀྱི་སེམས་ལྷོང་ལྷོང་པོར་གྱུར་ནས་ཡོད་སྐབས། བཤེས་གཉེན་རིན་པོ་ཆེ་བརྩེ་ཆེན་སློབ་གླིང་དུ་ལོགས་ནས་གསུང་བཤད་གནང་བར། ང་ཚོས་ལུང་རྟོགས་བཤད་སྒྲུབ་ཀྱི་སྡེ་འཛིན་སྐྱོང་སྤེལ་གསུམ་བྱེད་པ་དང༌། ཁོ་ཅག་གི་ལས་ཀ་བྱེད་ཕྱོགས་དང་ལམ་ཁ་གཞི་ནས་ཁ་ཁ་རེད། འབྲེལ་བ་སྤུ་རྩེ་ཙམ་ཡང་ཡོད་པ་མ་རེད། ས་སྐྱ་པཎྜིས། སྐྱེ་ངན་རང་ལ་མི་ཕན་ཡང༌། །གཞན་ལ་གནོད་པར་བྱེད་པ་ཡོད། །སྦྲུལ་གདུག་ཟས་སུ་རླུང་ཟ་ཡང༌། །ཕ་རོལ་མཐོང་ན་མི་གསོད་དམ། །ཞེས་པ་དེའི་ངང་ཚུལ་རེད། སྔོན་བཅོམ་ལྡན་འདས་ལ་གཅེན་པོ་ལྷས་བྱིན་གྱིས་གླང་ཆེན་རྦད་པ་དང་སྒྱོགས་རྡོ་འཕངས་པ། ཨོ་རྒྱན་གུ་རུ་རིན་པོ་ཆེ་ཟ་ཧོར་རྒྱལ་པོས་གསོན་བསྲེགས་མཛད་པ། འཕགས་པ་ཀླུ་སྒྲུབ་དབུ་བཅད་དེ་བགྲོངས་པ་སོགས་ཀྱིས་མཚོན། སྙིགས་མའི་མཐའི་སེམས་ཅན་ཟེར་བ་ཕྲག་དོག་ངན་སེམས་ཀྱི་རང་བཞིན་ཅན་ཡིན་པས། བྱ་བ་ཡག་པོ་ཞིག་ཨེ་འཁྱོངས་ལྟ་བ་ལ་ངེས་པར་རྐྱེན་བར་ཆད་ལས་གཡོལ་དུ་མེད་པ་འདྲ་བོ་ཡིན་པ་རེད། དེས་ན། ང་ཚོའི་ངོས་ནས་བླ་སློབ་ཚང་མ་སེམས་བག་ཡོད་པའི་ངང་ནས་ཐོས་བསམ་སྒོམ་གསུམ་ལ་སྔར་ལས་ལྷག་པའི་འབད་འབུངས་གནང་རྒྱུ་དེ་གལ་ཆེན་པོ་ཡིན་ལ། གཞན་ལ་ཡ་ལན་སློག་སྟངས་ཆེས་བཟང་ཤོས་དེ་ཡང་དེ་ཡིན་པ་རེད། ཁོ་ཚོས་བར་ཆད་བརྩམས་པའི་དམིགས་ཡུལ་བཤད་སྒྲུབ་ཀྱི་སྡེ་འདི་འཐོར་ཞིག་ཏུ་སོང་ན་བསམ་པ་རེད། ང་ཚོས་མི་རང་རང་སོ་སོའི་སེམས་ལ་བདག་ཡག་པོ་བརྒྱབས་ནས་ཐོས་བསམ་སྒོམ་གསུམ་ལ་འབུངས་དང་དེ་ལས་བྱེད་དགོས་གཞན་གང་ཡང་མེད། ཅེས་སོགས་གནད་དུ་སྨིན་པའི་བཀའ་སློབ་དུ་མ་བསྩལ། བོད་ཟླ་བཅུ་གཅིག་པའི་ཚེས་ཉི་ཤུ་རྩ་གྲངས་ལ་བར་ཆད་བདུད་ཀྱིས་མ་ཚུགས་པར། ཐོས་བསམ་བསྒོམ་པའི་བྱ་བ་སྔར་ལས་ཀྱང་ཕུན་སུམ་ཚོགས་པའི་འབྲས་བུ་གཡུར་དུ་ཟ་བའི་ངང་ནས། ལོ་འཁོར་རྒྱུགས་སྤྲོད་ཆེན་མོའི་བྱ་དགའི་རིམ་པ་དང་བཅས་ལོ་དེའི་སློབ་མཚམས་རེ་ཞིག་གྲོལ། ཆོས་མཚམས་དེར་ཁྲིན་ཏུའུ་གྲོང་ཁྱེར་དུ་ཀ༔ཐོག་བཅུ་ཕྲག་སློབ་གླིང་གི་དགེ་རྒན་འཛིན་གྲྭར། ཚད་མའི་སྐོར་དང༌། དགེ་འདུན་ཉི་ཤུའི་དཔེ་ཁྲིད་སོགས་ཀྱི་ཆོས་ཁྲིད་གནང༌། ཕྱི་ལོ། ༢༠༡༢ བོད་རབ་གནས་ཆུ་འབྲུག་ལོའི་མཆུ་ཟླ་བ་སྟེ་བོད་ཟླ་དང་པོར་ཆོས་ཁྲིད་ཀྱི་ཞར་ལ་གཞན་སྟོང་དབུ་མ་ཆེན་པོའི་བགྲོ་གླེང་ཐེངས་བདུན་པའི་དྲིས་ལན་རྗེ་བཙུན་བླ་མའི་ཞལ་ལུང་གཟུར་གནས་དགྱེས་པའི་ལེགས་བཤད་ཆོས་ཀྱི་བུམ་བཟང་ཞེས་བྱ་བརྩམས་གནང་མཛད། ཟླ་དེའི་ཚེས་ཉི་ཤུའི་ནང་ཇོ་ནང་བརྩེ་ཆེན་སློབ་གླིང་ཆེན་མོའི་སློབ་ཁྲིད་དབུ་བཟུང༌། ལོ་སྔོན་མའི་ཕར་ཕྱིན་གཞུང་རྙིང་པ་རྣམས་ཕར་ཕྱིན་ཉ་ཊཱིཀ་སྐབས་བརྒྱད་ཀར་སློབ་གཉེར་ལེགས་པར་སོང་སྟེ། བློ་བཟང་མཆོག་གྲུབ་རྒྱ་མཚོས་མཛད་པའི་མཛོད་འགྲེལ་ཟླ་བའི་འོད་ཟེར་གྱི་སྟེང་ནས། མཛོད་རང་འགྲེལ་དང༌། མཛོད་འགྲེལ་མངོན་པའི་རྒྱན་སོགས་ཀྱིས་ཟུར་བརྒྱན་ཏེ་ཆོས་ཁྲིད་གནང་བས་མཛོད་ཀྱི་འཛིན་གྲྭ་གསར་དུ་ཚུགས། ཕྱིན་ཆད་ཕར་ཕྱིན་ལོ་གསུམ་གྱི་རིང་མཐར་ཕྱིན་གྱི་འཆར་གཞི་བཏིང༌། བོད་ཟླ་ལྔ་བའི་ཚེས་ཉེར་གཅིག་ལ་ཁམས་ཡུལ་ཤུལ་ལབ་དགོན་པར་གངས་ཅན་མཁས་པའི་བགྲོ་གླེང་ཐེངས་དགུ་བའི་སྟེང་དུ་ཇོ་ནང་གི་གཞི་ལམ་འབྲས་གསུམ་གྱི་གསུང་བཤད་དང་དྲི་བ་དྲིས་ལན་ཟབ་རྒྱས་མཛད། བོད་ཟླ་དྲུག་པའི་ནང་དུ་དགེ་བསྙེན་དང་རབ་བྱུང་སྔོན་དུ་འགྲོ་བའི་དགེ་ཚུལ་གྱི་སྡོམ་པ་ནོད་མཁན་མང་པོ་ལ་སྡོམ་ཁྲིམས་གནང༌། དབྱར་གནས་ཀྱི་གཞུག་ཏུ་སྐྱ་སེར་མི་མང་ཡོངས་ལ་བྱང་ཆུབ་སེམས་སྡོམ་དང༌། ནང་ཆོས་ངོ་སྤྲོད། རིག་གནས་སློབ་སྦྱོང་སོགས་སྐབས་སུ་བབ་པའི་ལམ་སྟོན་ཟབ་མོ་མཛད། བོད་ཟླ་དགུ་བའི་ཚེས་བཅུ་བཞི་ནས་ཚད་མའི་བསྟན་བཅོས་བསྡུས་གྲྭ་ཡིད་ཀྱི་མུན་སེལ་གྱི་ཁྲིད་རྫོགས་ཏེ་ཉིན་བཅུ་ཟིན་མིན་ཙམ་ལ་ཉིན་གཉིས་རེའི་ནང་དུ་ཕྱི་དྲོ་རེར་བརྡ་སྤྲོད་བློ་གསལ་འཇུག་ངོགས་ཀྱི་རྣམ་དབྱེའི་བསྐོར་གྱི་གལ་ཁྲིད་གནང༌། ཟླ་དེའི་ཚེས་བཅུ་དྲུག་ལ་རྟགས་རིགས་ལེགས་བཤད་དྲི་མ་མེད་པའི་འོད་ཀྱི་ཁྲིད་ཚར་ནས་རྣམ་འགྲེལ་ཐར་ལམ་གསལ་བྱེད་ཀྱི་དབུ་ནས་གཞན་སེལ་བར་ཞིབ་ཁྲིད་མཛད། བོད་ཟླ་བཅུ་གཅིག་པའི་ཚེས་ཉི་ཤུ་ཐམ་པའི་ཉིན་ལོ་འཁོར་རྒྱུགས་སྤྲོད་ཀྱི་བྱ་དགའི་གཟེངས་རྟགས་ཕུལ་ཞིང༌། ལུགས་གཉིས་ཀྱི་བཀའ་སློབ་མི་བཟད་པ་བསྩལ་ཏེ། དེ་ལྟར་བགྲང་བྱ་གསུམ་གྱི་རིང་ལ་མཛད་འཕྲིན་བདུད་རྩིའི་རྒྱུན་གྱིས་ཕྱོགས་དེར་ཕན་པའི་འཕྲིན་ལས་འགྲན་ཟླ་མེད་པར་བསྐྱངས་སོ། །ལོ་ཁ་ཤས་སུ་བསྟུད་མར་མཁན་ཆེན་བློ་བཟང་འཕྲིན་ལས་ཀྱི་གདན་ས་ཛཾ་ཐང་རྫོང་བཀྲ་ཤིས་ཆོས་ཐང་དགོན་གྱི་བླ་མ་ལས་སྣེ་ལྷན་རྒྱས་ནས་ཆོས་ཐང་དགོན་དུ་ཕེབས་ནས་ཐོས་བསམ་གྱི་གཞི་འཛུགས་རོགས་དགོས་ཚུལ་གྱི་རེ་ཞུ་ནན་ཆེར་བྱུང་ཞིང༌། བླ་མ་ལས་སྣེ་ཐམས་ཅད་ཛ་འགོའི་རི་ཁྲོད་དུ་ཡང་ཞུ་བ་བྱེད་མིར་ཐོན་པས། རེ་ཞིག་ཆོས་ཐང་དགོན་དུ་ཕེབས་པར་ཞལ་བཞེས་གནང༌། བླ་མ་དམ་པ་རྨེ་སྤྲུལ་རྡོ་རྗེ་དགྲ་འདུལ་གཙོས། ཛ་འགོའི་རི་ཁྲོད་བྱང་ཆུབ་ཆོས་རྫོང་གི་གྲྭ་མང་ལྷ་སྡེ་དང་བཅས་པས་བཞུགས་དགོས་ཀྱི་ཞུ་བ་མང་དུ་བྱུང་བ་ལ། བཤད་གྲྭ་འདི་ཉམས་རྒུད་དུ་མི་གཏོང་བར་འཛིན་སྐྱོང་དགོས་པའི་བཀའ་སློབ་དང༌། གནས་སྐབས་དགོན་སྡེ་གཞན་དུ་བྱོན་ཀྱང་ཛ་འགོའི་རི་ཁྲོད་བྱང་ཆུབ་ཆོས་རྫོང་གི་སློབ་གླིང་ཆེན་མོའི་བསྟན་སྲིད་ལུགས་གཉིས་ཀྱི་ལས་འགན་ཐམས་ཅད་ཕྲག་ནས་མི་འདོར་བའི་ཞལ་བཞེས་བྱས་སོ། །བོད་ཟླ་བཅུ་གཉིས་པའི་ཚེས་གསུམ་ནས་ཁྲིན་ཏུའུ་གྲོང་ཁྱེར་དུ་ཀཿཐོག་བཅུ་ཕྲག་སློབ་གླིང་གི་དགེ་རྒན་འཛིན་གྲྭར་དཔལ་སྤྲུལ་རིན་པོ་ཆེའི་ཕར་ཕྱིན་སྤྱི་དོན་དང༌། ཡོངས་འཛིན་ཕུར་ལྕོགས་ཀྱི་རྟགས་རིགས་གཉིས་ཀྱི་དཔེ་ཁྲིད་མཛད། བཤེས་གཉེན་རིན་པོ་ཆེས་མདོ་སྔགས་སློབ་གླིང་དབུ་འཛུགས་སྐབས་ཤིག་ནས་ཤུགས་ནང་དགོན་གྱི་རྡོ་རྗེ་སློབ་དཔོན་དཀོན་མཆོག་རབ་གསལ་གྱིས་དངོས་རྫས་དར་བཅས་མདོ་ལུགས་མའི་འགྲེལ་བ་ཞིག་འབྲི་དགོས་ཞེས་དང༌། གཙང་ཆེན་སྤྲུལ་བའི་སྐུ་འཇིགས་མེད་རྡོ་རྗེས་གྲུ་ཚད་དང་ལྡན་པའི་ཆོས་རྗེ་ཀུན་མཁྱེན་གྱི་གསེར་སྐུ་སོགས་དངོས་རྫས་དུ་མ་བཅས་ཏེ་སྐུལ་བ་དང༌། ལྕམ་མདའ་དགོན་པའི་མཁན་དཀོན་མཆོག་འཕྲིན་ལས་སོགས་སློབ་ཚོགས་དུ་མས་ཡང་ཡང་བསྐུལ་ངོར་མདོ་ལུགས་མ་དང་ཉ་ཊཱིཀ་གཉིས་གཞིར་བཟུང་ནས་ཕར་ཕྱིན་གྱི་སྤྱི་དོན་དང་མཐའ་དཔྱོད་རིན་ཆེན་ཕྲེང་བ་ལུང་རིགས་གཏེར་མཛོད་སྐལ་བཟང་ཡིད་ཀྱི་མཛེས་རྒྱན་ཞེས་བྱ་བ་ཇོ་ནང་པའི་ཆོས་བརྒྱུད་འཛིན་པའི་སློབ་གཉེར་བ་ཐམས་ཅད་ཀྱི་དཔྲལ་བའི་མིག་ལྟར་གྱུར་བའི་གཞུང་བཟང་རིན་པོ་ཆེའི་ཕུང་པོ་ལྟ་བུ་འདི་ཉིད་སྐབས་བཞི་པ་ནས་གཞུག་གི་བར་བརྩམས་གྲུབ་པར་བྱས་སོ། །བརྩམས་གྲུབ་པ་ན་འོད་གསལ་གྱི་ཉམས་སྣང་བ་ལ་ཡུལ་ཕྱོགས་མང་པོ་འོད་ཀྱིས་འགེངས་པའི་གསལ་སྣང་ཁྱད་པར་ཅན་བྱུང་བ་དེ། མཐའ་དཔྱོད་འདི་ལ་བརྟེན་ནས་གཞན་ལ་ཕན་པ་འབྱུང་ཐུབ་པའི་ལྟས་སུ་གོ། ། མཛད་འཕྲིན་སྙན་པའི་དབྱར་རྔ་ཀུན་ལ་འཕྲོ་བཞིན། ། ཚེ་འདིའི་ཕུན་ཚོགས་ད་ལྟ་རང་དུ་འབྲལ་ཡང༌། ། ཕྱི་མིག་ཞེན་པ་ཕྲ་མོ་ཙམ་ཡང་མེད་པའི། ། ཆོས་པའི་རང་རྟགས་འཁྲུལ་མེད་རྣམ་ཐར་མང་པ། ། སྙིགས་དུས་ཀྱི་བསྟན་པའི་གསལ་བྱེད་ཆེན་པོ་ངག་དབང་འཇིགས་མེད་དངོས་གྲུབ་དཔལ་བཟང་པོའི་མཛད་བཟང་བསླབ་གསུམ་ནོར་བུའི་གླིང་ཁ་ཞེས་བྱ་བ་ལས་ཛ་འགོའི་རི་ཁྲོད་དུ་ཕྱག་ལས་རྒྱུན་སྐྱོང་བཞིན་བཞུགས་སྐབས་ཀྱི་རྣམ་ཐར་མདོར་བསྡུས་པ་སྟེ་ཉི་ཤུ་པའོ། ། ཆོས་ཐང་དགོན་དུ་ཞབས་སོར་བཀོད་ནས་རིས་མེད་སློབ་གླིང་གི་འགྲོ་ཕྱོགས་ལམ་སྟོན་དང་སྔོན་འགྲོ་བསགས་སྦྱང་གི་སྲོལ་བཙུགས་པའི་བསྐོར་གྱི་རྣམ་ཐར།ཕྱི་ལོ། ༢༠༡༣ རབ་གནས་ཆུ་སྦྲུལ་ལོའི་བོད་ཟླ་དང་བོའི་ཚེས་ཉི་ཤུ་གསུམ་གྱི་ཉིན་པར་བཤེས་གཉེན་རིན་པོ་ཆེའི་ཞབས་ཟུང་བྱིན་རླབས་ཀྱི་གཟི་འོད་འབར་བ་དེ་ཉིད་ཆོས་ཐང་དགོན་དུ་ཉེ་བར་བཀོད་པ་ན། ཕྱོགས་དང་ཕྱོགས་ནས་བུང་བ་མེ་ཏོག་གི་ཚལ་ལ་འདུ་བ་བཞིན་དུ་སྐལ་ལྡན་སློབ་གཉེར་བའི་ཚོགས་མང་པོ་ཆོས་བརྒྱུད་སོ་སོ་དང་ས་ཕྱོགས་དང་དགོན་ཁག་མི་གཅིག་པ་ཐག་ཉེ་རིང་ཀུན་ནས་ངང་གིས་འདུས་ཏེ། ཚེས་ཉེར་ལྔའི་ཉིན་ནང་པ་སངས་རྒྱས་པའི་ཆོས་ཐམས་ཅད་ཀྱི་འཇུག་སྒོ་སྐྱབས་འགྲོ་ཡིན་པས། བཤེས་གཉེན་རིན་པོ་ཆེ་ཉིད་ཀྱིས་མཛད་པའི་སྐྱབས་འགྲོའི་རྣམ་བཤད་མ་ནོར་ལམ་བཟང་གསལ་བའི་ཉི་མ་ཞེས་བྱ་བའི་སྟེང་ནས་ཆོས་ཁྲིད་ཀྱི་དབུ་བཟུང༌། ད་ལྟའི་ཆར་གངས་ལྗོངས་རིས་མེད་མཐོ་སློབ་གཙུག་ལག་སློབ་གཉེར་ཁང་གི་སྒྲིག་ཡིག་གམ་སྲོལ་ཡིག་གཏན་འབེབས་ནང་དུ་ཡང༌། ལོ་རེའི་སློབ་འགོ་ཚུགས་པ་ན་སྐྱབས་འགྲོའི་ཆོས་ཁྲིད་བྱེད་དགོས་ཀྱི་གཏན་ཁེལ་དེ་ཉིད་ཀྱང་སྒོ་གསུམ་ཆོས་དང་མཐུན་པའི་བཤེས་གཉེན་རིན་པོ་ཆེ་མཆོག་གི་ཐུགས་བཀོད་བདུད་རྩིའི་ཟེགས་མ་ལྟ་བུ་ཡིན་ནོ། །ཚེས་ཉི་ཤུ་བདུན་གྱི་ཉིན་ཚད་མའི་བསྟན་བཅོས་བསྡུས་གྲྭ་ཡིད་ཀྱི་མུན་སེལ་གྱི་ཆོས་ཁྲིད་དང༌། ཚེས་ཉེར་བརྒྱད་ཉིན་ལོ་ན་རྒན་གྲས་ཆོས་རར་ཕེབས་མི་ཐུབ་པ་རྣམས་ལ་ལམ་རིམ་གྱི་ཁྲིད་དང༌། ཕར་ཕྱིན་གསར་སྦྱང་སྟེ་གཞུང་གསར་འཛིན་གྲྭ་ལ་ས་ལམ་གྱི་རྣམ་བཞག་ཤེལ་དཀར་མེ་ལོང་དང༌། ཕར་ཕྱིན་ལོ་རིམ་གཉིས་པ་སྟེ་སྐབས་དང་པོའི་འཛིན་གྲྭ་དང༌། ལོ་རིམ་གསུམ་པ་སྐབས་བཞི་བ་འཛིན་གྲྭའི་ཁྲིད་རྣམས་དབུ་བཙུགས། ཚེས་ཉེར་དགུའི་ཉིན་མཛོད་གསར་སྦྱང་གི་འཛིན་གྲྭ་ལ་མཛོད་འགྲེལ་ཟླ་བའི་འོད་ཟེར་གྱི་སྟེང་ནས་མཆིམས་མཛོད་སོགས་ཀྱིས་ཟུར་བརྒྱན་ཏེ་ཁྲིད་འགོ་བཟུང་ཞིང༌། ཛ་འགོའི་རི་ཁྲོད་ནས་ལོ་སྔ་མར་མཛོད་མཐར་ཕྱིན་རྣམས་ཀྱི་གཙོས་ཕར་ཕྱིན་དང་མཛོད་སྦྱངས་ཟིན་དག་ལ། བོད་གངས་ཅན་གྱི་ཉེ་བར་འཁོར་ཆེན་པོ་འདུལ་བ་འབུམ་སྡེའི་མངའ་བདག་ཀུན་མཁྱེན་མཚོ་སྣ་བ་ཤེས་རབ་བཟང་པོས་མཛད་པའི་འདུལ་ཊཱིཀ་ཉི་མའི་འོད་ཟེར་གྱི་སྟེང་ནས་ཁྲིད་གནང་སྟེ་འདུལ་བའི་འཛིན་གྲྭ་གསར་དུ་ཚུགས། རྣམ་འབྱེད་དགེ་འདུན་ལྷག་མའི་བར་གཞུང་ཆེན་དེ་ཉིད་ཀྱི་སྟེང་ནས་དང༌། ལྟུང་བྱེད་ནས་ལྟུང་བའི་སྡེ་ལྷག་མ་རྣམས་བཤེས་གཉེན་རིན་པོ་ཆེ་ཉིད་ཀྱིས་མཛད་པའི་སྡོམ་གསུམ་གྱི་རྣམ་བཞག་གི་ཐོག་ནས་ཁྲིད་མཛད་དེ། ལོ་དེར་ཞུ་བ་སྤྱིར་བསྟན་གྱི་དབུ་བར་དུ་ཁྲིད། ཛ་འགོ་བརྩེ་ཆེན་སློབ་གླིང་དུ་ཨ་སྐྱོང་དགོན་མཁན་བསམ་བཟང་དཔེ་ཁྲིད་བྱེད་མིར་མངགས། བཀྲ་ཤིས་ཆོས་ཐང་དགོན་དུ་འཆད་གྲྭ་རྐྱང་བའི་ལམ་ནས་འབའ་མདའ་ཡབ་སྲས་ཀྱི་གསུང་ལ་སློབ་གཉེར་བྱེད་པའི་བཤད་གྲྭ་ལྔ་རིག་དར་རྒྱས་གླིང་ཞེས་པ་དེ་ཉིད་ཆད་པ་བསྐྱར་གསོ་དང་ལྷན་དུ། ཕྱིན་ཆད་བཤེས་གཉེན་རིན་པོ་ཆེ་ཉིད་ཀྱི་དགོན་པ་དང་ས་ཕྱོགས་གང་དུ་ཕེབས་ན་ཡང་ཁོང་གིས་གཙོ་སྐྱོང་གི་སློབ་གླིང་དེའི་མིང་ལ་གངས་ལྗོངས་རིས་མེད་ལྔ་རིག་མཐོ་སློབ་གཙུག་ལག་སློབ་གཉེར་ཁང་ཞེས་མཚན་གསོལ་ནས། གནས་སྐབས་དགོན་པ་གང་དུ་ཆགས་ཀྱང་དགོན་པ་དེ་ཉིད་ཀྱི་བཤད་གྲྭ་ཡོད་ན་དེ་དང་གཞི་གཅིག་ཏུ་གནས་སྐབས་འབྲེལ་བ་ལས། གངས་ལྗོངས་རིས་མེད་ལྔ་རིག་མཐོ་སློབ་གཙུག་ལག་སློབ་གཉེར་ཁང་ཞེས་པའི་མཚན་གནས་སྐབས་ཙམ་གྱི་དབང་གིས་དགོན་པ་སོ་སོར་མཚན་དེ་བདག་དབང་མེད་པར་གཏན་ཁེལ་བྱས། སློབ་གླིང་དེ་ཉིད་ཀྱི་མཚན་འདོགས་ཚུལ་ཡང་ཞལ་སྔ་ནས། གངས་ལྗོངས་གསོལ་བ་དེ་སྒང་བ་བོད་ཀྱི་ནང་བསྟན་རིག་གཞུང་རྩ་བར་བཟུང་སྟེ་ཆོས་རིག་གི་སྒོ་ཀུན་ལ་ཉམས་པ་སླར་གསོ་དང་མ་ཉམས་གོང་འཕེལ་གྱི་ཆེད་དུ་དམིགས་པས་ཡིན་པ་དང༌། རིས་མེད་ཅེས་གསོལ་བ་ནི། ཁོ་བོར་མཚོན་ན་ཆུང་དུས་ནས་བཟུང་ད་བར་དུ་ཆོས་བརྒྱུད་ཕྱོགས་མེད་དུ་བླ་མ་བསྟེན་ཞིང༌། དབང་བཀའ་ཐམས་ཅད་རིས་མེད་དུ་ནོད་པ་ཡིན། ཁྱད་པར་དུ་བོད་ཀྱི་ཆོས་བརྒྱུད་ཐམས་ཅད་ལ་དག་སྣང་གི་ཁྱད་པར་སྤུ་ཙམ་ཡང་མེད། ཡིན་ན་ཡང་ད་ཐེངས་མེ་ཏོག་ལྷ་ལ་ཕཽག་པའི་ལྷ་སྐལ་ཀུན་མཁྱེན་ཇོ་ནང་བ་ཡིན་པ་དང༌། ཆོས་བརྒྱུད་འདི་ཤིན་ཏུ་ཉམ་ཆུང་ཉག་ཕྲ་བའི་རྒྱུ་མཚན་གྱིས་གཙོ་བོར་འདི་ལ་སྟོང་བརྐོས་ཤིག་འདུག་བསམས་ནས་རང་ནུས་ཅི་ཡོད་ཀྱིས་འབད་འབུངས་བྱས་པ་ཡིན་པ་ལས། ཕྱོགས་རིས་བྱས་པ་མིན་ལ་བྱེད་བསམ་པ་ཡང་སྐྱེ་མྱོང་མེད། དེས་ན་སློབ་གླིང་འདིར་སློབ་གཉེར་བ་ཕལ་ཆེར་ཇོ་ནང་བ་ཡིན་པ་སོགས་ཀྱི་རྐྱེན་གྱིས་ཇོ་ནང་གི་ཡིག་ཆ་རྩལ་འདོན་གནང་བཞིན་པ་ཡིན་ལ། མ་འོངས་པ་རིམ་པས་ཆོས་བརྒྱུད་གཞན་པ་དག་གི་གཞུང་ཡང་ཁྲིད་རྒྱུ་བྱུང་ན་བསམ་ནས་རེ་བ་ཆེན་པོ་འཆིང་བཞིན་ཡོད། དཔེ་ཆ་བ་རྣམས་པས་ཀྱང་དཔེ་ཀློག་ཕྱོགས་མེད་དུ་བྱེད་དགོས། ལྷག་པར་དུ་འཛིན་གྲྭ་མཐོ་ཤོས་ལ་སླེབས་ཏེ་གཞུང་ལྟ་ཀློག་གི་ནུས་པ་རྒྱས་ཡོད་པ་རྣམ་པས་ངེས་པར་དུ་དཔེ་ཆ་ཕྱོགས་མེད་དུ་བལྟ་དགོས། དེང་སང་རང་རང་གི་ཡིག་ཆའི་གསུང་སྒྲོས་ཙམ་རེ་ལ་ཧ་ཅང་བྱང་ཆུབ་པ་ཡིན་ཡང༌། ཆོས་བརྒྱུད་གྲུབ་མཐའ་གཞན་གྱི་གསུང་སྒྲོས་ལ་རྒྱུས་མེད་པས། སྐུར་འདེབས་བྱེད་མི། མཁས་གྲུབ་གཞན་ལ་སྡང་ཞུགས་བྱེད་མཁན། རང་གི་ཡིག་ཆའི་གསུང་ཟིན་ཙམ་རེ་དང་ཅུང་མ་འདྲ་ན་ཧང་སང་འགྲོ་མཁན་ཡང་མི་ཉུང་རེ་འདུག་པས། དེ་འདྲ་ནམ་ཡང་གནང་མི་རུང༌། རྗེ་ཙོང་ཁ་བའི་ལེགས་བཤད་གསེར་ཕྲེང་ལས། གཞུང་ལུགས་རྣམས་ལ་འདོད་པ་དུ་མ་ཡོད་པས། དེ་དག་ཕྱོགས་གཅིག་ཏུ་གྲིལ་བར་མི་ནུས་པས་རང་གང་འཆད་པའི་གཞུང་དེ་ཚད་མར་བྱའོ་ཞེས་པ་ལྟར། གཞུང་གང་ལ་ལྟ་ན་གཞུང་དེ་དང་དེའི་གསུང་ཟིན་དགོངས་པ་གང་ལ་གནས་ཞིབ་ཏུ་ཨེ་གོ་བལྟས་ཏེ། གནས་སྐབས་ཚིག་གི་འཛིན་མཚམས་ཕྱོགས་གཅིག་ཏུ་གྲིལ་མ་ནུས་ན། རང་གི་གོ་བ་ལེན་སླ་བའམ་རྩ་བའི་སྦྱང་གཞིའི་ཡིག་ཆ་དེའི་གསུང་ཟིན་ལྟར་སྨྲས་ཏེ། དད་པ་དག་སྣང་ཁྱད་མེད་དུ་མཛད་དགོས་པ་རེད། ཀུན་ལས་བཏུས་ཀྱི་འགྲེལ་བར་ས་བཟང་མ་ཏི་པཎ་ཆེན་གྱིས། བཤད་ཟིན་པ་དང་འཆད་པར་འགྱུར་བའི་དགག་སྒྲུབ་ཀྱི་སྐབས་མང་པོར་རང་གཞན་གྱི་ཕྱོགས་གཉི་ག་སྨོས་པ་ནི། རྣམ་གྲངས་ལ་མཁས་པས་ཤེས་རབ་འཕེལ་བའི་ཆེད་དུ་བསྟན་པ་ཡིན་གྱི། འདི་ནི་བདེན་གྱི་གཞན་ནི་གཏི་མུག་གོ་ཞེས་བྱ་བར་ནི་མཐའ་གཅིག་ཏུ་མི་གཟུང་ཞིང༌། གང་ལུང་རིགས་དང་མཐུན་པ་དེ་ཉིད་འཐད་ལྡན་དུ་གཟུང་བར་བྱའོ། །ཞེས་པ་ལྟར། འདི་བདེན་གཞན་གཏི་མུག་གོ་ཞེས་མཐའ་གཅིག་ཏུ་དོར་ན་རང་གི་ཤེས་རབ་མི་འཕེལ་བ་དང༌། ཆོས་སྤོང་གི་ལས་སུ་ཡང་འགྱུར་ཉེན་ཆེ་བ་རེད། དཀོན་མཆོག་དཔང་བཙུགས་ཏེ་འཇིག་རྟེན་པ་དག་གིས་མནའ་ཟོས་པ་དེ་ཡང༌། མཁས་གྲུབ་ཀརྨ་ཆགས་མེད་ཀྱིས་བདེ་སྨོན་ལས། དཀོན་མཆོག་ལྷ་ཁང་གསུང་རབ་རྟེན་གསུམ་སོགས། །དཔང་ཞེས་ཚད་བཙུགས་མནའ་ཟོས་ལ་སོགས་པ། །ཆོས་སྤངས་ལས་ངན་བསགས་པ་མཐོལ་ལོ་བཤགས། །ཞེས་པ་ལྟར་ཆོས་སྤོང་གི་ལས་ཚབ་ཆེན་ཡིན་པར་གསུང་ཡོད་པ་ལྟར་ལོས་ཡིན་ཏེ། ད་དུང་ཆོས་བརྒྱུད་གྲུབ་མཐའི་ཞེན་པ་བྱས་ཏེ་བསྟན་བཅོས་རྣམ་དག་ལ་བསྟན་བཅོས་མ་དག་པ་རེད་ཅེས་དང༌། ལྟ་བ་རྣམ་དག་ལ་ལྟ་བ་ཕྱིན་ཅི་ལོག་པ་རེད་ཅེས་དང༌། བོད་གངས་ཅན་གྱི་ཆོས་བརྒྱུད་འཛིན་པའི་སྐྱེས་ཆེན་གོང་མ་ཐམས་ཅད་གཅིག་སློབ་གཅིག་གིས་བྱས་ཏེ་དམ་ཚིག་འོ་ཆུ་གཅིག་འདྲེས་བྱས་ཏེ་འོངས་བ་ལ། ཆོས་བརྒྱུད་གཞན་གྱི་བླ་མ་ཞེས་དམ་པ་གོང་མ་དག་ལ་ཕྱོགས་སུ་བཅད་དེ་ཆགས་སྡང་བྱས་ན། རང་གི་བརྒྱུད་པའི་བླ་མ་གོང་མ་ལ་སྐྱོན་ནས་སྨྲས་པ་ཡིན་པས། ཆོས་སྤོང་དང་ཉམས་ཆགས་ཚབ་པོ་ཆེ་ཅིག་ཅར་དུ་བསགས་པ་ཡིན། རང་ལེགས་སུ་འདོད་པ་རྣམས་ཀྱིས་གནས་དེ་ལྟ་བུ་ལ་ཧ་ཅང་གཟབ་པ་གལ་ཆེ། དེས་ན་སློབ་གླིང་འདིའི་ནང་ཆོས་བརྒྱུད་གྲུབ་མཐའི་ཞེན་ཕྱོགས་ཀྱི་སྐད་ཆ་ཨ་མཚར་རྩེད་མོ་ཙམ་དུ་ཡང་སྨྲ་མི་ཆོག །ཁ་རབ་གནས་མ་ཐང་བ་ཁ་ཤས་ཆོས་བརྒྱུད་ཅིག་ཅིག་ཟེར་ནས་ཨ་མཚར་རྩེ་འདུག་པ་གོ་སོང༌། ཕྱིན་ཆད་རྩ་བ་ཉིད་ནས་ཨ་མཚར་ཙམ་ཡང་འདིའི་ཕྱོགས་ནས་བཤད་མི་ཆོག །སྤྱིར་བཏང༌། བན་ཆོས་མེད་ལ་གྲུབ་མཐའི་ལོ་རྒྱུས། །མགོ་སྤུ་མེད་ལ་རལ་བའི་ལོ་རྒྱུས་ཟེར་བའི་གཏམ་དཔེ་ཞིག་ཡོད་པ་རེད། དགོས་ངེས་ལུང་རིགས་ཀྱི་བརྡར་ཤ་བཅད་ནས་གྲུབ་མཐའ་བཞག་མི་ཤེས། ཅིག་བྱེད་ཡོང་དུས་ཆགས་སྡང་གིས་བརྫི་འདུག་པ་དེ་ཚོ་ངོ་མ་བན་ཆོས་མེད་ལ་གྲུབ་མཐའི་ལོ་རྒྱུས་ཞེས་པ་དེ་རེད། ཕྱིན་ཆད་ཀྱང་སློབ་གླིང་འདི་ཉིད་ཀྱང་འདིའི་ནང་གི་སློབ་གཉེར་བ་ཚང་མས་ཡིན་པ་ལས། དམིགས་བསལ་ཇོ་ནང་གཅིག་པུའི་ཡིན་ཟེར་བ་དེ་འདྲ་གཏན་ནས་མེད། ད་ལྟ་སློབ་གཉེར་གྱི་རྐང་འཛུགས་བཞིན་པ་ཡིན་པས། སློབ་གཉེར་གྱི་རྐང་འཐུས་ཚང་བརྟན་པོ་འདྲ་ཞིག་ཡོང་ཕྱིན་ཆད་ལྷག་པར་དུ་རིས་མེད་ཀྱི་གཞུང་ལ་འཆད་ཉན་ནུས་པ་ཇེ་ཆེར་གཏོང་རྒྱུའི་རེ་བ་ཡོད། དེར་མ་ཟད། ཀུན་མཁྱེན་དོལ་པོ་པ་དུས་གསུམ་སངས་རྒྱས་ཀྱི་མཚན་ལ་ཕྱོགས་མེད་རིས་མེད་པ་རྟོན་པ་བཞི་ལྡན་ཞེས་ཁོང་རང་གིས་བརྩམས་པའི་གཞུང་ལུགས་ཁག་གི་གཞུག་ཏུ་རང་ལ་མཚན་གསོལ་ཡོད་པ་རེད། སྐུ་ཚེའི་མཛད་པ་ལ་བལྟས་ན་ཡང་དེ་འདྲ་རེད། ཁོང་གི་མཚན་ཟུར་ལས་གྲས་ཏེ་གསོལ་བ་ཡིན་ཟེར་ནའང་མི་ཆོག་པ་མེད། སྤྱིར་གདན་ས་བྱིན་ཆེན་དང༌། མཁས་གྲུབ་ཁྱད་པར་ཅན་གྱི་མཚན་ཟུར་གྲས་ཏེ་མིང་གསོལ་ལུགས་ཤིག་སྔོན་ནས་བྱུང་འདུག །དེ་ལྟར་བྱས་ན་བྱིན་རླབས་ཀྱི་སྒོ་ཁྱད་ཅིག་ཀྱང་ཡོད་པར་མཐོང༌། ཆོས་འདུལ་བ་ནས་ཀྱང་མཁན་པོའི་མིང་ནས་གྲས་ཏེ་སློབ་མ་ལ་མིང་འདོགས་པར་བཤད་པ་ལྟ་བུ་རེད། ལྔ་རིག་ཅེས་པ་ནི་བསླབ་བྱ་རིག་པའི་གནས་ཆེ་ཆུང་ལྔ་ཕྲག་གཉིས་ཀྱི་སྒོ་ནས་བཏག་པ་ཡིན། མཐོ་སློབ་ཞེས་པ་ཡོན་ཚད་རེད། དེང་སང་བྱེས་ཀྱི་དགོན་སྡེ་ཁག་ན་ཡང་མཐོ་སློབ་བཏག་བཞག་པ་ཁ་ཤས་འདུག །ཅེས་གསུངས་སོ། །ལོ་དེའི་ས་ག་ཟླ་བའི་ནང་དུ་དགོས་གལ་མང་པོ་ལ་གཟིགས་ཏེ། གངས་ལྗོངས་རིས་མེད་ལྔ་རིག་མཐོ་སློབ་གཙུག་ལག་སློབ་གཉེར་ཁང་ཆེན་མོ་ནས། ཕྱག་དང༌། སེམས་བསྐྱེད། རྡོར་སེམས་བསྒོམ་བཟླས། མཎྜལ་འབུལ་བ། བླ་མའི་རྣལ་འབྱོར་བཅས་སྔོན་འགྲོའི་ཆོས་ལྔ་ཐོས་བསམ་སློབ་གཉེར་བ་རྣམས་ཀྱིས་ཚོམས་བུ་གཅིག་སྒྲུབ་ཀྱིས་ལོ་རེ་བཞིན་ཆད་མེད་དུ་བྱེད་པའི་དབུ་འཛུགས་མཛད། མགོན་པོ་གང་ཉིད་ནི་དཔེ་ཁྲིད་ཙམ་ཞིག་བྱས་ཏེ། འགན་ཁུར་མཐའ་དག་འགྲུབ་ཡོད་ཡོད་ཀྱིས་བཞུགས་པའི་རིགས་གཏན་ནས་མ་ཡིན་པར། སློབ་མ་རྣམས་ཀྱི་འཚོ་བ་དང་སྒྲིག་ཀུན་སྤྱོད་མ་ལུས་པར་སྐུ་ཚེགས་འཛེམས་མེད་དང༌། ཐ་ན་ལུས་དང་སྲོག་ལ་ཡང་ལྟོས་པ་མེད་ཅིང་ཕངས་པ་མེད་པར་རྗེས་སུ་འབྲངས་པའི་སློབ་མ་ཚོའི་དོན་དུ་ཕུལ་བར་བྱེད་པའི་ཤ་ཚ་སྙིང་ཉེ་བ་ཞིག་ཡིན་པར་མ་ཟད། ནམ་རྒྱུན་གྱི་བཀའ་སློབ་ལས། ཐོས་པ་ཐོས་རྐྱང་དུ་སོང་ན་སེམས་རྒྱུད་ཆོས་དང་མི་འདྲེས་ཤིང་ཕན་པ་མེད་པར་འགྱུར་ཉེན་ཡོད་ལ། ལྷག་པར་དུ་སྙིགས་མའི་རང་མཚང་མ་ལུས་ལུས་པ་མེད་པར་ཤེད་ཀྱིས་འཕྱུར་བའི་དུས་སྐབས་སུ། དུས་དང་བསོད་ནམས་གང་གི་ཆ་ནས་ཡིན་ཡང༌། སྐྱེ་བོ་ཐམས་ཅད་ཉོན་མོངས་རྒོད་ལ། དྲན་འགྱུ་མང་ཞིང་མི་བརྟན་པ་རྩྭ་འགོའི་ཟིལ་བ་དང་སྒང་ཁའི་དར་ལྕོགས་ཀྱི་དཔེ་ལ་སྙེག་པའི་དུས་འདི་ལྟ་བུ་ལ། སེམས་རྒྱུད་ཆོས་དང་འདྲེས་པ་ཞིག་ཡོང་རྒྱུ་ཧ་ཅང་དཀའ་བའི་ཚོད་ཡིན་པས། རང་རེ་རྣམས་ཀྱིས་ཀྱང་སྒོ་ཀུན་ནས་རང་སེམས་བསྐོར་བ་མ་བརྒྱབ་ན། ཆོས་པའི་གཟུགས་ཀྱིས་ཆོས་མིན་དུ་དུས་འདའ་བ། ཁ་ནས་ཆོས་སྐད་ཤ་ར་ར་འཐེན་ཡང༌། རྒྱུད་དཀོན་མཆོག་དང་ལས་འབྲས་སོགས་ལ་ཡིད་མི་ཆེས་པ་ཞིག་ཏུ་གྱུར་སོང་ན་ཕན་པ་ཅི་འདུག་ལྟོས་དང༌། དེས་ན། རང་རེ་དག་གིས་གཞུང་ཆེན་ཁག་གི་སློབ་གཉེར་དང་ལྷན་དུ་ལམ་རིམ་བློ་སྦྱོང་རེ་ཆག་མེད་དུ་ཁྲིད་བཞིན་པ་འདི་ཡང༌། གལ་ཆུང་ཞིག་ཏུ་མི་འཛིན་པར་ཐུགས་དམ་གྱི་མཐིལ་ཏུ་འཛིན་རྒྱུའི་རེ་བ་ཡོད། འཕགས་ཡུལ་ན་ཡོད་དུས། བླ་མ་སྤྱན་རས་གཟིགས་དབང་གི་ཞལ་སྔ་ནས་ཀྱང༌། དེང་གི་དུས་འདིར་ལམ་རིམ་བློ་སྦྱོང་གི་འཆད་ཉན་འདི་གལ་ཆེ་ཚུལ་དང༌། གཞུང་ལ་སློབ་གཉེར་བྱེད་པའི་ཞར་ལ་ལམ་རིམ་བློ་སྦྱོང་གི་ཆོས་བསྐོར་རེ་འཆད་ཉན་བྱེད་རྒྱུའི་བཀའ་གསུང་ཐེངས་འགའ་ལ་ལྷུག་པར་བསྩལ་མྱོང་པ་ཡིན། ད་ལན་ལམ་རིམ་བློ་སྦྱོང་དེ་ཡང་བཤད་པ་ཙམ་དུ་མ་བཞག་པར། རྒྱུད་ལ་ཅུང་ཟད་ཅིག་འེ་འབྱོར་སྙམ་པའི་རེ་བ་ཆེན་པོ་བྱས་ཏེ། ད་ལོ་ནས་བཟུང་སྟེ་ལོ་རེ་ལ་སློབ་གླིང་འདི་ནས་ཚོམས་བུ་གཅིག་སྒྲུབ་ཀྱི་ཚུལ་དུ་སྔོན་འགྲོའི་ཆོས་ལྔ་ཆ་ཚང་རེ་མ་ཆད་པར་ལག་ལེན་ལ་བསྟར་ཐུབ་པའི་འཆར་གཞི་ཙམ་བཟོས་པ་ཡིན། ད་དུང་གཞུང་ཆེན་པོ་ལ་ལྟ་རྟོག་བྱེད་མི་ཤ་སྟག་ཡིན་ན། གཞུང་གི་དོན་གྱི་མཐིལ་ལོན་པ་དང༌། གང་གོ་བ་དེ་རང་རྒྱུད་འདུལ་བྱེད་དང༌། གཞན་རྒྱུད་རྗེས་སུ་འཛིན་པའི་ལམ་འགྲོ་ཡག་པོ་ཞིག་འབྱུང་པ་ལ། བསོད་ནམས་རྒྱ་ཆེན་པོ་ཞིག་དགོས་པ་རེད། མདོ་ལས། བསོད་ནམས་ལྡན་པའི་མི་ཡི་བསམ་པ་རྣམས་ཀྱང་འགྲུབ། །ཅེས་གསུངས་པ་དང༌། རྗེ་བདག་ཉིད་ཆེན་པོས། ཐོག་མར་ཞིང་གི་མཐུ་ལ་བརྟེན་ནས་ནི། །ནང་གི་བསམ་པའི་སྟོབས་ནི་སྐྱེ་འགྱུར་བ། །དགེ་བའི་བཤེས་དང་དཀོན་མཆོག་མཆོད་པ་ལ། །རྒྱུན་ཆད་མེད་པའི་སྦྱོར་བ་བསྟེན་འཚལ་ལོ། །དེ་ལྟར་རྩ་བ་བརྟེན་ལ་གཙོར་འབད་ན། །ཟབ་ཅིང་རྒྱ་ཆེའི་ཆོས་རྣམས་མ་ལུས་པ། །ཁ་ཅིག་ད་ལྟ་ལག་ཏུ་བླང་བ་དང༌། །གཞན་དག་སྨོན་ལམ་ཡུལ་དུ་བྱས་གྱུར་ཏེ། །གཅིག་ཀྱང་མི་སྤོང་ཀུན་ཀྱང་སངས་རྒྱས་ཐབས། །དེ་ལྟར་རྒྱལ་བའི་བསྟན་པ་ཡོངས་རྫོགས་པ། །ལམ་དུ་བསྲེལ་བ་ཤེས་ན་མཁས་པའི་ཕུལ། །ཞེས་དང༌། བྱང་ཆུབ་ལམ་རིམ་ཆེན་མོ་ལས་ཀྱང༌། ཞིང་དམ་པ་ལ་དགེ་རྩ་བསྐྲུན་པའི་མཐུ་ལས་ལམ་གྱི་རིམ་པ་རྣམས་ལ་བློའི་མཐུ་ཇེ་རྒྱས་སུ་འགྲོ་བས། མཉན་ན་ཚིག་མི་ཟིན། བསམས་ན་དོན་མི་གོ །བསྒོམས་ན་རྒྱུད་ལ་མི་སྐྱེ་བའི་བློའི་མཐུ་ཤིན་ཏུ་ཆུང་བའི་དུས་སུ་ཞིང་གི་མཐུ་ལ་བརྟེན་པ་མན་ངག་ཡིན་ནོ། །ཞེས་གསུངས་པ་ལྟར། ཚོགས་གསོག་སྒྲིབ་སྦྱོང་གི་མཐུ་ལ་བརྟེན་ནས་འགྲོ་རྒྱུ་གལ་ཆེན་ཡིན་པ་རེད་མ་གཏོགས། དཔྱད་པ་རྐྱང་བས་གཞུང་དོན་ལ་སྦྱངས་ན་ཤེས་རབ་འཆལ་བའི་གང་ཟག་ཏུ་འགྱུར་རྒྱུ་ལ་ཉེན་ཁ་ཆེན་པོ་རེད། དེས་ན། དད་པའི་ཚོམས་ལས། དད་དང་ཤེས་རབ་སྟེན་བྱེད་པ། །དེ་དག་དེ་ཡི་ནོར་མཆོག་སྟེ། །དེ་ཡི་ནོར་གཞན་ཕལ་པར་ཟད། །ཅེས་དང༌། ཁྲོན་པ་སྐམ་པོ་ཇི་ལྟ་བར། །དད་པ་མེད་པ་བསྟེན་མི་བྱ། །ཇི་སྟེ་དེ་ལ་ཡོངས་བརྐོས་ཀྱང༌། །འདམ་ཆུ་དྲི་ང་འབྱུང་བར་འགྱུར། །ཆུ་མང་རྣམ་པར་དང་བ་དང༌། །བསིལ་བར་གྱུར་ཅིང་རྙོག་མེད་པའི། །མཚོ་ལ་ཆུ་འདོང་ཇི་ལྟ་བར། །ཤེས་རབ་ཅན་གྱིས་དད་ལྡན་བསྟེན། །ཞེས་དད་པ་དང་ཤེས་རབ་ཟུང་དུ་འཇུག་དགོས་པའི་གདམས་ངག་མང་དུ་བསྩལ་བ་ལྟར། དད་པ་མེད་ཚར་ནས་བཟུང་ཤེས་རབ་ཡོད་པས་རྒྱུད་ལ་ཕན་པ་འབྱུང་གི་མ་རེད། དེང་སང་གི་ཆར་ཆོས་ཤེས་མི་དཀོན་མོ་རེད་དེ། དེ་ལས་ཀྱང་ཆོས་ལ་དད་པ་ཅན་ཇེ་དཀོན་དུ་འགྲོ་བའི་དུས་ངན་ཞིག་ཡིན་པས། དད་པ་གཙང་སེང་ངེ་བ་ཞིག་ཨེ་འཁྱོངས་བལྟ་རྒྱུ་གལ་འགངས་གནད་ཆེན་པོ་རེད་སྙམ་གྱིན་ཡོད། ཕྱག་འཚལ་ཤེས་རྒྱུ་རྩ་བ་ཡིན་ཡང༌། ཕྱག་འཚལ་ཚུལ་འདི་རེད་གན་རེད་ཟེར་ནས་ཕྱག་རྡོག་གཅིག་ཀྱང་མ་འཚལ་ན་ཇི་འདྲ་འདུག །གཞི་དང་ལམ་དང་འབྲས་བུའི་རྣམ་བཞག་མང་པོ་ཚིག་ཁ་ནས་ཁྱེར་ཡང༌། སེམས་ཐོག་ལ་ཅུང་ཟད་ཀྱང་མ་ལོན་ན། ཉིང་དགོས་སྟོར་ཏེ་མེད་པར་གྱུར་སོང་བ་རེད། དེས་ན། ནང་པ་སངས་རྒྱས་པའི་བསྟན་པའི་འཇུག་སྒོ་སྐྱབས་འགྲོ་རྣམ་པར་དག་པ་འདི་རེད། དེ་ལྟར་ཞུ་འོང་དུས་སློབ་གཉེར་བྱེད་པ་དེ་གལ་ཆུང་ཞིག་ཏུ་བཤད་པ་དང༌། མ་སྦྱངས་མ་བསླབས་པར་ཉམས་ལེན་ཞེས་ཅང་འཇུ་བྱེད་བཞག་ས་ཞིག་ཡོད་པའི་དོན་གཏན་ནས་མིན། ཤེས་པ་དང་སྒོམ་པ་ཟུང་དུ་འཇུག་པ་ཞིག་ཅེས་ཀྱང་གལ་ཆེ་བ་ཡིན། ཚོམས་བུ་གཅིག་ཏུ་འདུན་པ་གཅིག་གྲིལ་གྱིས་དགེ་བ་སྒྲུབ་ན་སྡིག་པ་འདག་ཚབ་ཆེ་བ་དང་དགེ་བ་འཕེལ་སྟོབས་ཆེ་བ་ཡོང་ཐུབ་པས། སྔོན་འགྲོའི་ཆོས་ལྔ་ཚོམས་སྒྲུབ་འདི་དགོས་ཉིང་དགོས་མང་པོ་ལ་བལྟས་ཏེ་བཙུགས་པ་ཡིན་པས། ཚང་མས་ཆོས་གཤའ་མ་ཞིག་ཏུ་འགྲོ་རྒྱུའི་ཐུགས་འདུན་གནངས་རོགས་བྱེད་དགོས་ཞེས། ལག་ཐལ་མོ་སྦྱར་ནས་ཞུས་པ་ཡིན། ཞེས་སོགས་གསུངས་སོ། །བཤེས་གཉེན་རིན་པོ་ཆེ་ཉིད་ནས་བརྩམས་པའི། དགེ་བ་མང་པོ་དང་སྟོབས་ཆེན་ཚེགས་ཆུང་ངུས་བསག་ཚུལ། ཞེས་པ་འདིར་འགོད་ན། དགེ་འདུན་པ་ཡིན་ན་འདྲ། སྐྱ་སེར་སུ་ཡིན་ན་དགེ་བ་སྒྲུབ་ཚེ་མང་པོས་འདུན་པ་གཅིག་པའི་དགེ་བ་སྒྲུབ་ན་ཐམས་ཅད་ལ་བྱེད་པོ་ནང་བཞིན་དགེ་བ་ཐོབ་པ་དང་དགེ་བ་སྟོབས་ཆེན་གྱི་ལས་བསགས་ཐུབ་པ་ཡིན་ཏེ། ས་བཟང་མ་ཏི་པཎ་ཆེན་ནམ་ལོ་ཙཱ་བ་བློ་གྲོས་རྒྱལ་མཚན་གྱི་བླང་དོར་རབ་གསལ་ལས། གནས་སྐབས་ཀྱི་ཀུན་སྤྱོད་ཟབ་མོ་བསྟེན་ཚུལ་ནི། ཆེན་པོའི་གོ་འཕང་ཐོབ་ཚེ་དགེ་བ་དང༌། །མི་དགེ་གང་ལ་འཇུག་ཀྱང་སྟོབས་ཆེ་བས། །རྣམ་དག་དགེ་བ་རྒྱ་ཆེར་སྤེལ་བ་དང༌། །སྡིག་པར་འགྱུར་བའི་ལས་རྣམས་སྤང་འཚལ་ལོ། །དེ་ཡང༌། ཆོས་མངོན་པ་ལས། སྐྱེ་བོ་མང་པོས་ཀྱང་སྟོབས་དང་ལྡན་པའི་ལས་སུ་རིག་པར་བྱའོ། །ཞེས་པ་དང༌། འོག་མ་ལས། དམག་ལ་སོགས་པ་མང་པོ་ཚོགས་པས་གྲོས་བཏབས་ནས་གཅིག་གིས་ཕ་རོལ་པོ་གསོད་པར་བྱེད་ན་གསོད་པའི་དོན་ལ་གྲོས་བྱས་རུང་མ་བྱས་རུང་སྦྱོར་བ་གཅིག་ཅིང་མཐུན་པའི་ཕྱིར། །འདུན་པ་ལོག་པ་མ་གཏོགས་པ་ཐམས་ཅད་བྱེད་པ་པོ་བཞིན་དངོས་གཞི་མ་ཡིན་པའི་སྲོག་གཅོད་ཀྱིས་སྡིག་པ་དང་ལྡན་ནོ། །ཞེས་གསུངས་པ་ལྟར། དགེ་མི་དགེ་གང་བྱེད་ཀྱང་མང་པོ་འདུན་པ་གཅིག་པ་སྟེ་སྟོབས་ཆེ་བར་གསུངས་པས་བཀའ་འབངས་སུ་གཏོགས་པ་མང་པོ་རྣམས་བསྟན་པ་སྤྱིའི་རིམ་གྲོ་ལ་སོགས་པ་ལས་བརྩམས་ཏེ་སྐུ་གཟུགས་བཞེངས་པ་ལ་སོགས་པ་དང་གསུང་རབ་ཀློག་པ་དང་ཉེའུ་འདོན་པ་ལ་སོགས་པའི་དགེ་བ་རྣམ་དག་རྣམས་ལ་རིམ་གྱིས་བསྐུལ་བ་དང༌། དམག་དང་ལིངས་དང་སྲོག་བཅད་པའི་མཆོད་སྦྱིན་ལ་སོགས་པ་སྡིག་པར་འགྱུར་བའི་ལས་ལ་བཟློག་པ་ལའང་འབད་པར་བྱའོ། །ཞེས་གསུངས་པ་ཡིད་ལ་ངེས་ནས་མང་པོ་མཉམ་དུ་དགེ་བ་སྒྲུབ་པར་བྱ་དགོས། དེ་ལྟར་ས་བཟང་མ་ཏིས་མཛད་པའི་བློ་སྦྱོང་དོན་བདུན་མའི་འགྲེལ་པ་རབ་གསལ་སྣང་བ་ལས། དམག་ལ་སོགས་པ་དོན་གཅིག་ཕྱིར། །ཐམས་ཅད་བྱེད་པ་པོ་བཞིན་ལྡན། །ཞེས་པ་ལྟར་རང་ཡང་བྱེད་གཞན་ཡང་བྱེད་དུ་འཇུག་པ་ལ་རྗེས་སུ་ཡི་རངས་པའི་མི་དགེ་བ་དང་དགེ་བ་ལ་ཡང་དེ་བཞིན་དུ་སྦྱར་བ་ནི་སྐྱེ་བོ་མང་པོས་ཀྱང་སྟོབས་དང་ལྡན་པའི་ལས་ལ་སོགས་པའོ། །ཞེས་དང༌། ཚོགས་ཆོས་བདེན་བཞི་གསལ་བ་ལས། མི་དགེ་བའི་ལས་ལམ་བཅུ་པོ་དེ་བདག་ཉིད་ཀྱིས་སྤྱད་པ་ལས་ལས་ཀྱི་ལམ་རྫོགས་པར་འགྱུར་བར་མ་ཟད་བསམ་སྦྱོར་མཚུངས་ན་དམག་གི་འདུ་བའི་ནང་དུ། མི་གཅིག་གིས་སྲོག་གཅོད་ཀྱི་ལས་བྱས་པ་ན། དེར་འདུས་པ་ཐམས་ཅད་ལ་ལས་ལམ་རྫོགས་པར་འགྱུར་ཏེ། དམག་ལ་སོགས་པ་དོན་གཅིག་ཕྱིར། །ཐམས་ཅད་བྱེད་པ་པོ་བཞིན་ལྡན། །ཞེས་འབྱུང་བའི་ངེས་པ་ལས་ཏེ། མ་བྱིན་པར་ལེན་པའི་ཆེད་དུ། ཇག་ཆོམས་སོགས་ལ་འདུས་པ་རྣམས་ལའང་མཚུངས་ལ། ལོག་གཡེམ་མ་གཏོགས་ལས་ཀྱི་ལམ་དེ་རྣམས་གཞན་བགྱིད་དུ་རྩལ་བ་ལས་ཀྱང་ལས་ལམ་རྫོགས་པར་འགྱུར་ཞིང༌། གཞན་གྱིས་བགྱིས་པ་ལ་རྗེས་སུ་ཡི་རང་བ་ལས་ཀྱང་ཆ་མཐུན་གྱི་ལས་ཀྱིས་གོས་པར་འགྱུར་ཏེ། ཇི་ལྟར་དགེ་བ་གཞན་གྱིས་སྤྱད་པ་ལ་རྗེས་སུ་ཡི་རང་བསྒོམས་པས་དགེ་རྩ་མཉམ་དུ་ཐོབ་པ་ལྟ་བུའོ། །ཞེས་དང༌། འཕགས་པ་བཟང་པོ་སྤྱོད་པའི་སྨོན་ལམ་གྱི་རྒྱ་ཆེར་འགྲེལ་པ་འཕགས་མཆོག་རྣམས་ཀྱི་གསང་བའི་མཛོད་ལས། དེས་ན་ས་བཅུའི་དབང་ཕྱུག་གིས་ཆོས་སྟོན་པ་དེ་ཉིད་སངས་རྒྱས་ཀྱི་ཆོས་ཀྱི་འཁོར་ལོ་བསྐོར་བའང་ཡིན་ལ། སངས་རྒྱས་ཀྱི་ཞལ་སྔ་ནས་ཆོས་སྟོན་པ་ཀུན་ལའང༌། བྱང་ཆུབ་སེམས་དཔའ་དེའི་འཕྲིན་ལས་འཇུག་སྟེ། དོན་གཅིག་ལ་བློ་གྲོས་དང་འདུན་པ་གཅིག་ཏུ་བསྒྲིལ་པའི་དམག་ལ་སོགས་པའི་བྱ་བ་བཞིན་ནོ། །ཞེས་གསུངས་ལ། ས་བཟང་གི་དྲིས་ལན་བླང་དོར་རབ་གསལ་སྣང་བ་ཡི་འགྲེལ་བཤད་རྣམ་དག་ལུང་དང་མཐུན་པ་ལས། སངས་རྒྱས་སྐུ་གསུམ་བརྙེས་པའི་བྱིན་རླབས་དང༌། །ཆོས་ཉིད་མི་འགྱུར་བདེན་པའི་བྱིན་རླབས་དང༌། །དགེ་འདུན་རྣམས་དབྱེན་གྱིས་མི་ཕྱེད་པ་ཐུགས་མཐུན་པའི་བྱིན་རླབས་ཀྱིས། །དགེ་བ་དེ་དག་བསྔོས་ཤིང་སྨོན་ལམ་བཏབ་པ་བཞིན་དུ་འགྲུབ་པར་ཤོག །ཅེས་པས་བདེན་པའི་སྟོབས་ཀྱང་བརྗོད་པར་བྱའོ། །ཞེས་དང༌། འཕགས་པ་བགྲེས་མོས་ཞུས་པ་ཞེས་བྱ་བ་ཐེག་པ་ཆེན་པོའི་མདོ་ལས། ཆོས་ཉིད་མི་འགྱུར་བདེན་པའི་བྱིན་བརླབས་དང༌། །དགེ་འདུན་མི་ཕྱེད་འདུས་པའི་བྱིན་བརླབས་ཀྱིས། །ཇི་ལྟར་བསྔོ་བ་སྨོན་ལམ་འགྲུབ་པར་ཤོག །ཞེས་གསུངས་པ་ལྟར་ཡིད་ལ་ངེས་པར་བྱས་ནས་མང་པོས་འདུན་པ་གཅིག་གིས་དགེ་སྦྱོར་ལ་བརྩོན་པར་བྱའོ། །ཞེས་མཆན་བུ་དང་བཅས་པ་དམ་པ་ཁོང་ཉིད་ནས་བཞག་པ་རང་སོར་ཡིན་ནོ། །དེ་ལྟར་སྤྱིར་ཚོགས་གསོག་སྒྲིབ་སྦྱོང་དང་ཁ་ཏོན་དགེ་སྦྱོར་སོགས་གལ་ཆེ་བར་མ་ཟད། ཚོགས་པའི་ནུས་པ་ཆུ་བོའི་གཞུང་དང་འདྲ། །ཞེས་པ་ལྟར། ཚོམས་སྒྲུབ་ཀྱི་དགེ་བ་རྣམས་སྟོབས་ཆེ་བ་ལ་སོགས། དགོས་པ་ཁྱད་པར་ཅན་དུ་མ་གཟིགས་ནས། ལོ་རེ་བཞིན་ཆག་མེད་དུ་སྔོན་འགྲོའི་བསགས་སྦྱང་གི་ལེགས་སྲོལ་ཕན་པ་རླབས་པོ་ཆེ་བཙུགས་པ་ཡིན་ནོ། ། འཆོས་པ་མེད་ན་ཆོས་སུ་མི་འདོགས་པས། ། དད་དང་ཤེས་རབ་གཅིག་གྲོགས་གཅིག་སོང་བས། ། ཚོགས་གསོག་སྒྲིབ་པ་སྦྱོང་བའི་ཐབས་ཚུལ་གྱི། ། གདམས་པའི་སྙིང་གཏམ་གདུལ་བྱའི་ཁམས་སུ་སྦྲན། ། སྙིགས་དུས་ཀྱི་བསྟན་པའི་གསལ་བྱེད་ཆེན་པོ་ངག་དབང་འཇིགས་མེད་དངོས་གྲུབ་དཔལ་བཟང་པོའི་མཛད་བཟང་བསླབ་གསུམ་ནོར་བུའི་གླིང་ཁ་ཞེས་བྱ་བ་ལས་ཆོས་ཐང་དགོན་དུ་ཞབས་སོར་བཀོད་ནས་རིས་མེད་སློབ་གླིང་གི་འགྲོ་ཕྱོགས་ལམ་སྟོན་དང་སྔོན་འགྲོ་བསགས་སྦྱང་གི་སྲོལ་བཙུགས་པའི་བསྐོར་གྱི་རྣམ་ཐར་མདོར་བསྡུས་པ་སྟེ་ཉེར་གཅིག་པའོ། ། རིས་མེད་མཐོ་སློབ་ཏུ་ཕར་ཕྱིན་དམ་བཅའ་ཆེན་མོ་ཐོག་མར་ཚུགས་པའི་བསྐོར་གྱི་རྣམ་ཐར།སྔ་མའི་འཕྲོས་ཉིད་ནས་ས་ག་ཟླ་བའི་ཚེས་བཅུ་བདུན་ཉིན་མགོ་ལོག་རྨ་ཆེན་རྫོང་བྱ་བྲལ་ཆོས་དབྱིངས་དགོན་དུ་མགོ་ལོག་དགུན་ཆོས་ཆེན་མོར་གདན་ཞུས་ལྟར་གངས་ལྗོངས་རིས་མེད་མཐོ་སློབ་ཀྱི་སློབ་མ་བཞི་བཅུ་ཙམ་དང་བཅས་བྱོན་ནས་གྲྭ་མང་ལ་བཀའ་སློབ་ཟབ་རྒྱས་བསྩལ། ཚེས་ཉི་ཤུ་ལྔའི་ཉིན་ཆོས་ཐང་དགོན་དུ་ལོགས། བོད་ཟླ་ལྔ་བའི་ཚེས་བདུན་ཉིན་ངེས་གསང་གཞན་སྟོང་དབུ་མ་ཆེན་པོའི་བགྲོ་གླེང་ཛམ་ཐང་རྫོང་བཀྲ་ཤིས་ཆོས་ཐང་དགོན་དུ་ཚོགས་ཏེ། ཚེས་བརྒྱད་ཉིན་གྲྭ་མང་ལ་བཀའ་སློབ་དང༌། ཚེས་བཅོ་ལྔའི་ཉིན་མང་ཚོགས་རྣམས་ལ་སྐྱབས་སྡོམ་དང་ཆོས་ཁྲིད་གནང༌། བགྲོ་གླེང་ཆེན་མོའི་གཞུག་ནས་མུ་མཐུད་དེ་ཆོས་ཁྲིད་ཕྱག་ལས་མཛད་བཞིན་བཞུགས། ལན་གྲངས་དུ་མར་གདན་ཞུ་ཕུལ་བ་ལྟར་བོད་ཟླ་བདུན་པའི་ཡར་ངོའི་ཚེས་བདུན་ཉིན་ཁམས་ནང་ཆེན་བཀའ་བརྒྱུད་གོ་ཆེའི་དགེ་འཕེལ་གླིང་དུ་བྱོན་ནས། ཚེས་དགུའི་སྔ་དྲོར་ཀུན་མཁྱེན་རྟོན་པ་བཞི་ལྡན་གྱིས་མཛད་པའི་རི་ཆོས་ངེས་དོན་རྒྱ་མཚོ་དང༌། རྗེ་ཏཱ་ར་ནཱ་ཐས་མཛད་པའི་གཞན་སྟོང་དབུ་མའི་རྒྱན་ལུང་སྦྱོར་དང་བཅས་པའི་ཆོས་ཁྲིད་དབུ་བཟུང་སྟེ། ཕྱི་དྲོར་ཀརྨ་པ་སྐུ་ཕྲེང་བདུན་པ་ཆོས་གྲགས་རྒྱ་མཚོས་མཛད་པའི་ཚད་མ་རྣམ་འགྲེལ་གྱི་འགྲེལ་པ་ཚད་མ་རིག་གཞུང་རྒྱ་མཚོ་ཞེས་པའི་ལེའུ་དང་པོ་རང་དོན་རྗེས་སུ་དཔག་པའི་ལེའུའི་ཆོས་ཁྲིད་བསྩལ། ཚེས་ཉི་ཤུ་ཐམ་པའི་ཉིན་གོ་ཆེའི་དགོན་གྱི་སྒྲུབ་གྲྭ་བ་རྣམས་ལ་ཆོས་འབྲེལ་བྱས། ཚེས་ཉེར་གཉིས་ཉིན་རི་ཆོས་ངེས་དོན་རྒྱ་མཚོ་དང༌། གཞན་སྟོང་དབུ་མའི་རྒྱན་ལུང་སྦྱོར་དང་བཅས་པའི་ཁྲིད་རྫོགས་པར་གྲུབ་སྟེ། དུས་ཚོད་ཧ་ཅང་མི་རིང་ཡང་ལྟ་གྲུབ་བཞེད་མཚམས་ཀྱི་གནད་ཕྱིན་ཅི་མ་ལོག་པར་བཀྲལ་བས་གོ་བདེ་སེམས་ལ་ཕན་ཐོགས་ངེས་པར་བྱུང༌། དེ་ནས་དགོན་པ་དེའི་གྲྭ་མང་སྤྱི་ལ་བཀའ་སློབ་ཟབ་རྒྱས་གནང་ནས། ཕྱིར་ལོགས་པའི་ལམ་ཁར་ཡུལ་ཤུལ་དུ་ཕེབས་ཏེ་ཞག་བཞུགས་མཛད། དེར་རི་ཁྲོད་པ་འགའ་རེར་སེམས་ཁྲིད་བྱས། ས་པཎ་རིགས་གཏེར་བགྲོ་གླེང་ཐེངས་བརྒྱད་པ་ས་སྒང་དགོན་དུ་ཚོགས་པར་གདན་ཞུས་ལྟར་ཚེས་ཉི་ཤུ་བཞིའི་ཕྱི་དྲོར་རིགས་གཏེར་བགྲོ་གླེང་ཐེངས་བརྒྱད་པའི་བགྲོ་གླེང་ཐོག་ཏུ་ཕེབས་ཏེ་དམ་བཅའི་སྟེང་དུ་རྟགས་གསལ་གཏོང་བ་དང༌། དཔལ་ལྡན་ས་སྐྱའི་མཁན་པོ་རྣམས་དང་བགྲོ་གླེང་ལྷུག་པོར་གནང༌། ཚེས་ཉེར་དྲུག་ལ་ཆོས་ཐང་དགོན་སློབ་གླིང་དུ་ལོགས་ནས་སྔར་གྱི་ཆོས་ཁྲིད་ཁག་ཡོངས་དང༌། སྦྱོར་དྲུག་པ་བཤད་གྲྭར་གསར་ཞུགས་རྣམས་ལ་བསྡུས་གྲྭའི་ཁྲིད་གསར་དུ་བཟུང༌། བོད་ཟླ་བརྒྱད་པའི་ཚེས་གཅིག་ཉིན་ཕར་ཕྱིན་གཞུང་རྙིང་སང་ལ་ཉ་ཊཱིཀ་གི་དཔེ་ཁྲིད་ཡོངས་སུ་རྫོགས་ནས། མཛོད་འགྲེལ་ཟླ་བའི་འོད་ཟེར་གྱི་སྟེང་ནས་མཛོད་ཀྱི་ཆོས་ཁྲིད་དབུ་བཟུང་སྟེ་འཛིན་གྲྭ་མཛོད་དུ་འཕར། ཟླ་དེའི་ཚེས་ཉེར་ལྔ་མཁའ་འགྲོ་འདུ་བའི་དུས་བཟང་ལ་འཛིན་གྲྭ་དེའི་དགེ་འདུན་པ་ལ་ཇ་ཐུག་དང་བཅས་གངས་ལྗོངས་རིས་མེད་ལྔ་རིག་མཐོ་སློབ་གཙུག་ལག་སློབ་གཉེར་ཁང་ཆེན་མོའི་ཕར་ཕྱིན་མཚན་ཕུད་ཀྱི་དམ་བཅའ་ཆེན་མོ་ཐེངས་དང་པོ་གསར་དུ་བཞག་སྟེ། འདི་ནི་ཇོ་ནང་རང་གི་གདན་ས་ཞིག་ནས་འཛིན་གྲྭ་རིམ་བགྲོད་ཀྱིས་ཕར་ཕྱིན་དམ་བཅའ་བཞག་པ་ད་སྔོན་ལོ་རྒྱུས་སུ་གསལ་བའི་ཐོག་དང་པོ་ཡིན། དེ་ཡང་ཤེས་རབ་ཀྱི་ཕ་རོལ་ཏུ་ཕྱིན་པ་སྟོང་ཕྲག་ཉི་ཤུ་ལྔ་པ་ལས། ཤཱ་ར་དྭ་ཏིའི་བུ་དེ་ལྟར་ཤེས་རབ་ཀྱི་ཕ་རོལ་དུ་ཕྱིན་པ་ཟབ་མོ་འདི་ལྷོ་ཕྱོགས་ཀྱི་རྒྱུད་དང༌། བྱང་ཕྱོགས་ཀྱི་རྒྱུད་ན། ཕྱི་མའི་དུས་ཕྱི་མའི་ཚེ། ལྔ་བརྒྱ་ཐ་མ་ལ། སངས་རྒྱས་ཀྱི་བྱ་བ་བྱེད་པར་འགྱུར་རོ། །དེ་ཅིའི་ཕྱིར་ཞེ་ན། ཤཱ་ར་དྭ་ཏིའི་བུ་དེ་ནི་འདི་ལྟར་དེ་བཞིན་གཤེགས་པའི་དགོངས་པ་གང་ཡིན་པ་དེ་ནི། ཤེས་རབ་ཀྱི་ཕ་རོལ་དུ་ཕྱིན་པའོ། །ཤེས་རབ་ཀྱི་ཕ་རོལ་དུ་ཕྱིན་པ་གང་ཡིན་པ་དེ་ནི་དེ་བཞིན་གཤེགས་པའི་དགོངས་པའོ། །ཤཱ་ར་དྭ་ཏིའི་བུ་ཆོས་དང་འདུལ་བ་དར་ལ་བབ་པའི་ཚེ། དམ་པའི་ཆོས་ནུབ་པར་མི་འགྱུར་ཏེ། ཆོས་དེ་ཡང་གང་ཞེ་ན་འདི་ལྟ་སྟེ། ཤེས་རབ་ཀྱི་ཕ་རོལ་དུ་ཕྱིན་པ་འདིའོ། །ཞེས་དང༌། བཅོམ་ལྡན་འདས་ཤེས་རབ་ཀྱི་ཕ་རོལ་ཏུ་ཕྱིན་པ་ཟབ་མོ་འདི་སླད་མའི་དུས་སླད་མའི་ཚེ་ན། བྱང་ཕྱོགས་སུ་རྒྱས་པར་འགྱུར་རོ། །བཅོམ་ལྡན་འདས་ཀྱིས་བཀའ་སྩལ་པ། ཤཱ་ར་དྭ་ཏིའི་བུ་དེ་དེ་བཞིན་ནོ། །དེ་དེ་བཞིན་ཏེ། ཤཱ་ར་དྭ་ཏིའི་བུ་ཤེས་རབ་ཀྱི་ཕ་རོལ་ཏུ་ཕྱིན་པ་ཟབ་མོ་འདི་ཕྱི་མའི་དུས་ཕྱི་མའི་ཚེ་ན། བྱང་ཕྱོགས་སུ་རྒྱས་པར་འགྱུར་ཏེ། དེ་ལ་ཤཱ་ར་དྭ་ཏིའི་བུ་ཕྱི་མའི་དུས་ཕྱི་མའི་ཚེ་ན་རིགས་ཀྱི་བུ་དང་རིགས་ཀྱི་བུ་མོ་དེ་དག་ཤེས་རབ་ཀྱི་ཕ་རོལ་ཏུ་ཕྱིན་པ་ཟབ་མོ་འདི་ཉན་པར་འགྱུར་ཏེ། ཐོས་ནས་ཀྱང་མོས་པར་འགྱུར་རོ། །མོས་པར་བྱས་ནས་ཀྱང་འབྲི་བ་དང༌། འཛིན་པ་དང་འཆང་བ་དང་ཀློག་པ་དང་ཀུན་ཆུབ་པར་བྱེད་པ་དང༌། ཚུལ་བཞིན་དུ་ཡིད་ལ་བྱེད་ཅིང་དེ་བཞིན་ཉིད་དུ་ནན་ཏན་དུ་བྱེད་པར་འགྱུར་རོ། །ཞེས་པ་ལྟར། ཡུམ་རྒྱས་པ་དང་བསྡུས་པ། རྡོ་རྗེ་གཅོད་པ་སོགས་ཐམས་ཅད་ལས་ཤེར་ཕྱིན་དར་བར་ལུང་བསྟན་པའི་འཕགས་ཡུལ་གྱི་བྱང་ཕྱོགས་བོད་གངས་ཅན་གྱི་ལྗོངས་སུ་ཤེར་ཕྱིན་ཟབ་མོའི་འཆད་ཉན་ཐོས་བསམ་གྱི་བསྟན་པ་ལ་ལྷག་པར་བྱ་བ་རླབས་ཆེན་བྱས་པ་ཡིན་ནོ། །ལོ་དེའི་བོད་ཟླ་བརྒྱད་པ་ཕྱི་མའི་ཚེས་ཉེར་གསུམ་ཉིན་པེ་ཅིན་བོད་བརྒྱུད་ནང་བསྟན་སློབ་གླིང་དུ་རབ་འབྱམས་པའི་རྒྱུགས་སྤྲོད་ཀྱི་རྒྱུགས་ལེན་བྱས་ཤིང༌། རྒྱུགས་འབྲས་དཔྱད་ཞིབ་པའི་ཕྱག་ཁྱེར་བླངས། བོད་ཟླ་དགུ་བའི་ཚེས་གཅིག་གི་ཉིན་པེ་ཅིན་དུ་སངས་རྒྱས་ཤཱཀྱ་ཐུབ་པའི་ཚེམས་གདུང་མཇལ་བར་ཕེབས་ཏེ། ཚེས་ལྔའི་ཉིན་སློབ་གླིང་དུ་འབྱོར་ནས་མུ་མཐུད་དུ་མཛད་པ་བསྐྱངས་ཏེ་བཞུགས། དེ་ནས་ལོ་འཁོར་རྒྱུགས་སྤྲོད་ཁག་མཐའ་དག་ལེགས་པར་གྲུབ་ནས། བོད་ཟླ་བཅུ་གཅིག་པའི་ཚེས་བཅུ་གསུམ་ཉིན་ལོ་མཇུག་གི་བྱ་དགའི་མཛད་རིམ་དང་བཅས་ཆོས་མཚམས་ལེགས་པར་གྲོལ། དེར་ཆོས་མཚམས་བྱས་པ་དང་ཡུལ་ཤུལ་ནང་ཆེན་རྫོང་བཀའ་བརྒྱུད་གོ་ཆེ་དགེ་འཕེལ་དགོན་དུ་བྱོན་ནས། བསྟན་བཅོས་རྒྱུད་བླ་མ་དང༌། མངོན་པ་མཛོད། རྟགས་རིགས་རྣམས་ཀྱི་ཆོས་ཁྲིད་གནང་ནས་བཞུགས་སོ། །ཕྱི་ལོ། ༢༠༡༤ རབ་རྒྱན་ཤིང་རྟ་ལོའི་བོད་ཟླ་དང་བོའི་ཚེས་ཉི་ཤུ་ཁ་ཤས་ནས་ཆོས་ཐང་དགོན་དུ་ཕེབས་ནས་སླར་ཡང་སློབ་གླིང་གི་ལོ་གཅིག་གི་ཐོས་བསམ་གྱི་བྱ་བའི་སློབ་གཉེར་དབུ་བཟུང༌། ལོ་དེའི་ས་ག་ཟླ་བའི་ཚེས་ཉི་ཤུ་གསུམ་ནས་ཉིན་བདུན་གྱི་རིང་ལ་དགོན་པ་དེ་ཉིད་ནས་རྒྱལ་བ་སངས་རྒྱས་བཅོམ་ལྡན་འདས་ཀྱིས་ཡང་ཡང་ལུང་གིས་བསྔགས་པ་དུས་གསུམ་སངས་རྒྱས་ཀུན་མཁྱེན་དོལ་པོ་པའི་གསུང་འབུམ་གྱི་བཀླག་ལུང་གནང༌། ལུང་གསུངས་གྲུབ་པ་དང་ཛ་འགོའི་རི་ཁྲོད་བྱང་ཆུབ་ཆོས་རྫོང་གི་སློབ་གླིང་དུ་ཕེབས་ནས། སློབ་གླིང་གི་འཛིན་སྐྱོང་ཐད་ཀྱི་བཀའ་སློབ་མང་པོ་བསྩལ་ཞིང༌། ཕྲན་ཟླ་བ་གཉིས་ལྷག་ཡས་མས་ལ་དཔེ་ཁྲིད་བྱེད་མིར་བཏང༌། དེ་ནས་ཟླ་བ་གཉིས་ཙམ་གསང་ལུང་རྣམ་སྲས། དེ་ནས་གྱང་སྒང་རབ་གསལ་བཅས་ལོ་དེར་ངེད་ཅག་ཀྱང་གནས་སྐབས་འཛིན་གྲྭ་དངོས་གཞི་མཐར་མ་ཕྱིན་པར་སློབ་སྦྱོང་གི་སྐབས་ཡིན་པས་རེས་མོས་སུ་མངགས་པ་ཡིན། བཤེས་གཉེན་རིན་པོ་ཆེ་ཛ་འགོ་ནས་ཚུར་ཛམ་ཐང་གཙང་བ་དགོན་དུ་གཞན་སྟོང་བགྲོ་གླེང་ཆེན་མོ་འཚོགས་པའི་སྟེང་དུ་ཕེབས་ནས་བཀའ་སློབ་མཛད། ལོ་ཕྱེད་ལྷག་ཙམ་ན་འདུལ་བ་འཛིན་གྲྭར་མཚོ་ཊཱིཀ་སྤྱིར་བསྟན་ནས་གཞུག་ཡོངས་སུ་ཁྲིད་ཚར་ཏེ། དཀོན་མཆོག་འཇིག་མེད་དབང་པོའི་དབུ་མའི་མཐའ་དཔྱོད་ལུང་རིགས་སྒྲོན་མེ་ཁྲིད་དབུ་བཟུང་སྟེ་དབུ་མ་འཛིན་གྲྭ་གསར་དུ་ཚུགས། ལོ་དེར་ཕྱི་ཚུལ་ཙམ་མ་ཡིན་པར་སློབ་གཉེར་སྤུས་དག་ཚད་ལྡན་གྱི་སྟེང་ནས་གངས་ལྗོངས་རིས་མེད་ལྔ་རིག་མཐོ་སློབ་ཀྱི་གཞུང་ཆེན་པོད་ལྔའི་འཛིན་གྲྭ་ཡོངས་སུ་ཆ་ཚང་བར་གྲུབ་པ་ཡིན་ནོ། །བོད་ཟླ་བདུན་པའི་ཚེས་ཉེར་གཅིག་ལ་ཁྲིན་ཏུའུ་ནས་བོད་ཀྱི་ཆོས་བརྒྱུད་དྲུག་དང་སྔ་འགྱུར་རྙིང་མའི་གདན་ས་དྲུག་ཆོས་སྡེ་གཉིས་ཀྱི་གྲྭ་ཇོའི་ཀུན་སྤྱོད་ཡར་བསྐུལ་ཐེངས་དང་པོའི་ཚོགས་འདུར་ཕེབས་ནས་བཀའ་སློབ་ཟབ་རྒྱས་གནང༌། བོད་ཟླ་བརྒྱད་པའི་ཚེས་གཅིག་ལ་རྔ་ཡུལ་ཨ་འདུས་སྒར་གོང་མའི་ཚོགས་ཁང་ཆོས་སྟོན་དུ་བྱོན་ནས་བཀའ་སློབ་མཛད། འདི་བསྐོར་ཞིག་ནས་ལམ་རིམ་འཛིན་གྲྭ་དང་ཟུར་ཉན་པ་ཁ་ཤས་ལ་རྗེ་འཇམ་དཔལ་དབྱངས་དངོས་འབའ་མདའ་བླ་མ་ཐུབ་བསྟན་དགེ་ལེགས་རྒྱ་མཚོས་མཛད་པའི་དུས་འཁོར་ཡོངས་རྫོགས་ཀྱི་བསྐྱེད་རིམ་རྒྱས་པའི་ཁྲིད་ཡིག་དང༌། རྫོགས་རིམ་སྦྱོར་བ་ཡན་ལག་དྲུག་གི་སྤྱི་དོན་གཉིས་ཀ་རྫོགས་པར་ཟབ་ཁྲིད་གནངས། བོད་ཟླ་དགུ་པའི་ཚེས་ཉེར་གཉིས་ལ་སྟོན་པ་ཐུབ་པའི་དབང་པོ་འཁོར་དང་བཅས་པ་སུམ་ཅུ་རྩ་གསུམ་གྱི་གནས་ནས་འཛམ་བུའི་གླིང་དུ་བྱོན་པའི་དུས་ཆེན་ཁྱད་པར་བ་ལ། ལོ་དེའི་ཕར་ཕྱིན་གཞུང་རྙིང་སང་ལ་ཕར་ཕྱིན་ཉ་ཊཱིཀ་ཡིད་ཀྱི་མུན་སེལ་ཡོངས་སུ་ཁྲིད་གྲུབ་ནས། གངས་ལྗོངས་རིས་མེད་མཐོ་སློབ་ཀྱི་ཕར་ཕྱིན་དམ་བཅའ་ཆེན་མོ་ཐེངས་གཉིས་པའི་མཚན་ཕུད་ཀྱི་དམ་བཅའ་སྔར་ལས་ཀྱང་རྒྱས་པར་བཞག །འདི་དུས་ཙམ་ན་ཆོས་མངོན་པ་མཛོད་ཀྱི་དོགས་གཅོད་ལམ་བཟང་གསལ་བའི་སྒྲོན་མེ་ཞེས་བྱ་ཆོས་མངོན་པར་འཇུག་པའི་སྒོ་ལྟ་བུའི་གཞུང་བཟང་དེ་ཉིད་ཡོངས་སུ་ལེགས་པར་བརྩམས་གྲུབ། བོད་ཟླ་བཅུ་པའི་ཚེས་ཉི་ཤུ་གཉིས་ནས་ཉིན་འགའ་ལ་བདེ་ཆེན་ཁུལ་དུ་ཕེབས་ཏེ་ཆོས་བརྒྱུད་དྲུག་གི་མི་སྣ་དང་ཆེད་མཁས་པ་རྣམས་དང་ཁོར་ཡུག་གཙང་སྦྲའི་སྐོར་ནས་ཞལ་བརྡ་མང་པོ་མཛད་ཅིང༌། གནས་མཆོག་ཁ་བ་དཀར་པོ་ལ་མཇལ་བསྐོར་བྱས། དེ་ནས་སློབ་གླིང་དུ་ལོགས་ནས་ཕྱི་དྲོར་ཀུན་མཁྱེན་དུས་གསུམ་སངས་རྒྱས་ཀྱི་བཀའ་བསྡུ་བཞི་བའི་དོན་བསྟན་རྩིས་ཆེན་མོ་སློབ་གླིང་གི་དགེ་འདུན་སྤྱི་ལ་དུས་ཁྲིད་དུ་གནང་ནས། བོད་ཟླ་བཅུ་གཅིག་པའི་ཚེས་བཅུ་བཞིའི་ཉིན་མཇུག་ཡོངས་སུ་གྲུབ། དེ་ནས་ལོ་འཁོར་རྒྱུགས་སྤྲོད་དང་བཅས་པ་ཡོངས་སུ་རྫོགས་ཏེ་ཟླ་དེའི་ཚེས་བཅུ་དགུའི་ཉིན་བྱ་དགའི་མཛད་སྒོ་དང་སྤེལ་ནས་སློབ་གཉེར་བ་རྣམས་ལ་ཆོས་མཚམས་ལེགས་པར་བཏང་ངོ༌། །ལོ་འདི་ནས་བཟུང་རྒྱུགས་ཆུང་ཚོགས་པ་ཟུར་དུ་བཙུགས་ནས་རྒྱུགས་སྤྲོད་ཀྱི་ལས་རིམ་ཕལ་ཆེར་ཚོགས་ཆུང་ལ་འགན་དབང་གཉིས་ཀ་ཡོད་པར་བྱས། དེ་སྔོན་དུ་སློབ་གཉེར་བ་འཛིན་གྲྭ་སྤྱིའི་རྒྱུགས་སྤྲོད་ཀྱི་ལས་ཀ་ཡན་ཆད་ཕལ་ཆེར་བཤེས་གཉེན་རིན་པོ་ཆེ་ཉིད་གཅིག་པུས་ཕྱག་ལས་བསྐྱངས་ནས་བཞུགས་པ་ཡིན། ཕྱི་ལོ། ༢༠༡༥ རབ་གནས་ཤིང་མོ་ལུག་གི་ལོའི་བོད་ཟླ་དང་པོའི་ཚེས་ཉེར་གཅིག་ལ་ཆོས་ཐང་དགོན་དུ་སླར་ཡང་ལོ་དེའི་སློབ་གཉེར་གྱི་དབུ་བཟུང༌། ལོ་འདིར་དམིགས་བསལ་གྱིས་ལག་ཁྱེར་ཁ་པར་བཀོལ་སྤྱོད་ཀྱིས་སློབ་གཉེར་ལ་བར་ཆད་བཟོ་བཞིན་པའི་བསྐོར་ནས་བཀའ་སློབ་གསུངས། ཐེངས་ཤིག་གི་གསུང་འཕྲོས་ཙམ་འགོད་ན། དེང་སང་དུས་རབས་ཉེར་གཅིག་པར་སླེབས་པ་ན་ས་ཆ་ག་ས་གང་དུ་འཕྲུལ་ཆས་ཀྱི་རིགས་ཤིན་ཏུ་མང་བོ་དར་བའི་དུས་སྐབས་ཤིག་རེད། ཡང་དགོས་སུ་མི་རེ་རེ་བཞིན་དུ་ཁ་པར་རེ་མེད་མཁན་སྲིད་མཐའ་ཙམ་མ་གཏོགས་དཔེ་མི་སྲིད་པ་རེད། སྤྱིར་བཏང་ནས་བཤད་ན། ཁ་པར་དང་རླངས་འཁོར་སོགས་འཕྲུལ་ཆས་ཀྱི་རིགས་འདི་ཚོས་མིའི་རིགས་ལ་སྟབས་བདེ་གང་མང་ཞིག་བཟོས་ཡོད་པ་ཡིན་ནའང༌། དེ་དག་ཐམས་ཅད་ལ་ཚད་འཛིན་མེད་ན་ཉེན་ཁ་ཚབ་ཆེན་སྐྲུན་པ་ཚང་མ་འདྲ་འདྲ་ཡིན་པ་བཞིན། ཁ་པར་ལ་ཡང་གཡེང་ཆེས་པ་ལས་མི་ཚེ་དང་དཔལ་འབྱོར་ཡོད་ཚད་འཕྲོ་བརླག་ཏུ་བྱེད་པར་མ་ཟད་ནད་ཀྱི་རིགས་མང་པོ་ཞིག་བསྐྱེད་བཞིན་ཡོད་པ་རེད། མི་ཚེ་འཕྲོ་བརླག་བྱེད་པའི་ཚུལ་གང་འདྲ་རེད་ཟེར་ན། མི་ལ་ལ་ཁ་པར་ཁོ་ན་ལ་མགོ་འཁོར་ནས། ཟ་མ་ཟ་ཁོམ་ཙམ་ཡང་མེད་པར་མ་ཟད། སློབ་སྦྱོང་གི་གོ་སྐབས་ཡང་འགོག་བཞིན་ཡོད་པ་རེད། ལ་ལས་ཁྱིམ་ནས་མ་ཟད་སྒོ་ཁ་རུ་འགྲོ་བའི་ཞར་ཞོར་ཡང་ཁ་པར་རྩེད་བཞིན་ཡོད་པ་རེད། འདི་ལྟར་བྱས་ན་ཁྱིམ་མི་དང་གྲོགས་པོ་ཞིག་དང་མཉམ་དུ་གསོལ་ཟས་ཙམ་མཆོད་ནའང༌། བྲོ་བ་ཅི་ཡང་མེད་ལ་སུས་མ་དལ་བ་དང་མཉམ་འཛོམས་ཀྱི་སྤྲོ་སྣང་ཅི་ཡང་འཁོར་མི་ཐུབ་པ་འོང་གིན་ཡོད་པ་རེད། དེ་ལས་ཀྱང་འབྲུས་ཤོར་ཆེ་ཤོས་དེ་གང་རེད་ཟེར་ན། རྙེད་དཀའ་བའི་མི་ཚེ་འཕྲོ་བརླག་བྱེད་བཞིན་པ་འདི་རེད། མི་ཚེ་གང་འདྲ་བྱས་ནས་འཕྲོ་བརླག་གཏོང་གིན་ཡོད་པ་རེད་ཟེར་ན། དོན་དག་ཡོད་ས་ཞིག་ནས་ཁ་པར་བེད་སྤྱོད་བྱེད་པ་ལས་གཞན། དཔེར་ན། ཕྲིན་ཕྲན་སོགས་ལས་ཚོགས་པ་འདྲ་མི་འདྲ་མང་བོར་ཞུགས་པ་དང༌། དོན་མེད་ཀྱི་དྲྭ་གྲོགས་ཟེར་བ་ལྟ་བུ་མང་པོ་ལ་སྐད་ཆ་ཟད་མེད་ཀྱི་ལབ་བརྡོལ་ནས་འདུག་པ་དང༌། གཞན་ཡང་བརྙན་དང་པར་རིས་སྣ་ཚོགས། སྐད་ཕྲིན་དང་ཁྱེའུ་ཕྲིན་ཟེར་བ་ལྟ་བུ་གཡེང་སྒོ་གང་མང་མང་གི་སྒོ་མང་དུ་སྐྲུན་པ་སོགས་འགལ་རྐྱེན་འདི་མེད་བྱ་བ་གཅིག་ཀྱང་མེད་པ་འདྲ་ཡིན་པ་མཁྱེན་གསལ་ལྟར་ལོས་ཡིན་སྙམ་གྱི་ཡོད། དཔལ་འབྱོར་འཕྲོ་བརླག་ཀྱང་དཔེ་མི་སྲིད་པ་རེད། དཔེར་མཚོན་ཏེ་བཤད་ན། སློབ་གླིང་འདི་ལྟ་བུ་ལ་གྲྭ་བའི་འབོར་གྲངས་བཞི་བརྒྱ་ལས་བརྒལ་བ་རྒྱུན་སྡོད་ཆགས་ཡོད་པ་ཡིན་ན་འདི་ཚང་མས། ཟླ་རེར་སྒོར་བརྒྱ་རེ་འགྲོ་བའི་དབང་དུ་བཏང་ན། ང་ཚོ་ཟླ་བ་བཅུ་ཙམ་འཚོགས་པ་འདིའི་རིང་ལ་དམངས་སྒོར་ཁྲི་བཞི་བཅུ་ཡས་མས་སོང་ཡོད་པ་རེད། འདང་ཞིབ་ཏུ་བཏང་ཡོང་ན། སྤྱིར་དཔལ་འབྱོར་བརླག་པ་ཕར་ཞོག །ང་ཚོའི་འདི་ཡོང་ཁུངས་གང་ཞིག་ནས་ཡོང་བར་འདུག །འདི་ནད་པ་གཟེར་ལོག་གེ་བ་ཞིག་གམ། ཡང་ན་ཤི་བོ་འཁྱག་ལོག་གེ་ཞིག་གི་སྐྱབས་ཡོན་བྱས་ནས་ཡོང་བ་རེད། ཁ་ཤས་ཤིག་གིས་གང་བསམ་བསམ་གྱིས་བེད་སྤྱོད་བཏང་ནས་འདང་རྩ་བ་ཉིད་ནས་བརྒྱབ་ཀྱིན་མི་འདུག །དཀོར་ཟེར་བ་དེ་བཟའ་ཚུལ་གཟབ་གཟབ་མ་བྱས་ན་ཟ་རྒྱུ་ཞིམ་པོ་ཞིག་ཡིན་ས་མ་རེད། སངས་རྒྱས་བཅོམ་ལྡན་འདས་ཀྱིས་ཀྱང་ལྕགས་གོང་མེ་འབར་བ་ཟོས་པ་ལས་ཐུ་བ་གསུངས་འདུག །འདུལ་བ་ལས་སྦྱིན་བདག་གི་རྒྱུ་ཆུད་གཟན་པ་མི་རུང་པའི་ཚུལ་གང་འདྲ་མང་བོ་གསུངས་ཡོད་པ་རེད། དཔེར་ན། གོས་རྙ་རྙིང་ཧྲུལ་བོར་གྱུར་ནས་ལོངས་སྤྱོད་དུ་མི་རུང་བར་ཆགས་ཚེ། སྦྱིན་བདག་གི་རྒྱུ་ཆུད་གཟོན་པར་མི་འགྲོ་བའི་ཕྱིར་དུ་གཙུག་ལག་ཁང་སོགས་ཀྱི་གས་ཁ་བསུམ་བྱེད་དུ་བྱེད་པའམ། མལ་སྟན་སོགས་ཀྱི་ནང་ཚངས་བྱ་བར་གསུངས་འདུག་པ་ལྟ་བུ་ཇི་འདྲའི་ནན་ཏན་གྱིས་བཤད་འདུག །ད་ང་ཚོ་ལ་བསམ་གཞིག་ཅིག་ཐོངས་དང༌། སངས་རྒྱས་བཅོམ་ལྡན་འདས་ཞལ་བཞུགས་པ་ཡིན་ན། ཡོན་བདག་གི་རྒྱུ་ཟ་ཚུལ་འདི་རྐྱང་བའི་སྟེང་ནས་ཀྱང་ལུགས་དང་མི་མཐུན་པ་ག་ཚོད་ཡོད་སྲིད་ཀྱི་རེད། ད་དུང་གྲྭ་བ་རེ་ཟུང་གིས་ཁ་པར་ནང་ནས་ངོ་ཚ་ཁྲེལ་ཡོད་ཚང་མ་གཡུགས་ཏེ། ངོ་ཤེས་མི་ཤེས་ཀྱི་རིགས་འདྲ་མི་འདྲའི་བུད་མེད་མང་བོ་ལ་འབྲེལ་འདྲིས་བྱེད་ཀྱི་ཡོད་པ་རེད་ཟེར་འདུག །འདི་ལྟར་སོང་ཚེ་བོད་ཀྱི་རབ་བྱུང་བའི་སྡེ་འདི་འགྲོ་བ་མིའི་སེམས་ནང་ན་གང་འདྲ་ཞིག་འགྱུར་སྲིད་པ་རེད། དེང་སང་མཚོན་ན། མི་གཅིག་གིས་ལས་ཀ་བྱེད་ཚུལ་ཉེས་སོང་ན། འཛམ་བུ་གླིང་ལ་སྐར་ཆ་ཁ་ཤས་ཀྱིས་ཁྱབ་སྤེལ་འགྲོ་ཐུབ་པའི་དུས་རེད། ཚང་མས་ས་ཆ་གང་ན་སོང་ཡང་རབ་བྱུང་བ་ཞིག་ཡིན་པ་དང༌། རབ་བྱུང་བའི་མཚན་སྙན་ལ་གནོད་པ་མི་བྱེད་རྒྱུའི་ལ་རྒྱ་མ་བོར། ང་ཚོ་སུ་ཞིག་རེད། སངས་རྒྱས་ཤཱཀྱ་ཐུབ་པའི་རྗེས་འཇུག་རེད། སངས་རྒྱས་ཤཱཀྱ་ཐུབ་པའི་རྒྱལ་ཚབ་ཀྱང་རེད། སངས་རྒྱས་ཀྱི་བསྟན་པ་ལ་བློ་དཀར་གཞུངས་དྲང་ཡིན་དགོས་པ་རེད། ང་ཚོའི་ལྟོ་གོས་ཚང་མ་རབ་བྱུང་གི་མིང་འདི་ལ་བརྟེན་ནས་ཡོང་གིན་ཡོད་པའི་ཚུལ་ཚང་མས་ཐུགས་ལ་ངེས་ངེས་རང་ལོས་ཡིན། སྔོན་བྱོན་གྱི་བླ་མ་གོང་མ་ཚོའི་རབ་བྱུང་གི་སྤྱོད་པ། ནང་རྟོགས་ཀྱི་ཡོན་ཏན་གྱིས་ད་ལྟ་ང་ཚོ་ལ་རྩིས་ཐང་འདི་འདྲ་བ་ཞིག་བཞག་ཡོད་པ་སེམས་ནས་མ་འབོར་རོགས་ཞུས་པ་ཡིན། སངས་རྒྱས་བཅོམ་ལྡན་འདས་ཀྱིས་ཀྱང༌། ང་མིན་ང་འདྲ་ཞིག་གིས་བཤིག །ཅེས་སངས་རྒྱས་ཀྱི་བསྟན་པ་བཤིག་མཁན་རབ་བྱུང་གི་ཆ་ལུགས་ཅན་འགའ་ཞིག་ལུང་བསྟན་པ་དེ་དངོས་གནས་བདེན་པ་བདེན་རྐྱང་རེད། དེས་ན་མི་རང་ཚུགས་ཐུབ་པ་རེ་ཟུང་མ་གཏོགས། ཐོས་བསམ་སྒོམ་གསུམ་བྱེད་མི་ཞིག་ལ་ཁ་པར་ལས་གནོད་ཆེ་བ་ཧ་ལམ་མེད་ཚོད་རེད། འདིའི་ཐད་ནས་ཚང་མས་ནན་ཏན་བྱེད་རྒྱུ་མ་འཆུག །ད་ལོ་ནས་དགེ་བསྐོས་སོགས་ཀྱིས་ཀྱང་དཔེ་ཆ་དཔེ་ཀློག་གི་དུས་ཚོད་གཏན་འབེབས་ཀྱི་ནང་དུ་ཁ་པར་བཀོལ་སྤྱོད་བྱེད་པ་མཐོང་ཚེ་ངེས་པར་དུ་ཆད་པ་རྒྱག་འོང་གི་ཡིན། དེང་སང་རྒྱལ་ཁབ་ཀྱི་སློབ་གྲྭ་ཁག་གི་ནང་དུ་ཡང་ཁ་པར་ལ་ཅི་འདྲའི་དམ་འཛིན་གནང་བཞིན་འདུག །ང་ཚོས་ཀྱང་རིམ་པས་ཁ་པར་འདིའི་ཕྱོགས་ལ་སྒྲིག་ལམ་ཇེ་དམ་དུ་འགྲོ་བ་ལས། དུས་རབས་དང་ཅིག་ཅིག་ཉིག་ཉིག་ཟེར་ནས་ལྷོད་ཡངས་སུ་གཏོང་རྒྱུ་རྩ་བ་ནས་མེད། ཅེས་གསུངས་སོ། །ལོ་དེའི་བོད་ཟླ་ལྔ་བའི་ཚེས་ཉེར་གཅིག་ནས་ཉིན་བཞིའི་རིང་ལ་ཛཾ་ཐང་ཆོས་སྒར་གོང་མའི་རྡོ་རྗེ་སློབ་དཔོན་བླ་མ་ཆོས་བསམ་གྱི་མདུན་ནས། དཔལ་དུས་ཀྱི་འཁོར་ལོའི་བསྡུས་པའི་རྒྱུད་ཀྱི་རྒྱལ་པོ་དང༌། དུས་ཀྱི་འཁོར་ལོའི་འགྲེལ་ཆེན་སྟོང་ཕྲག་བཅུ་གཉིས་པ་ཆོས་རྒྱལ་ཕྱོགས་ལས་རྣམ་རྒྱལ་གྱི་མཆན་བུ་དང་བཅས་པའི་བཀླག་ལུང་གསན། བོད་ཟླ་དྲུག་པའི་གནམ་གང་གི་ཉིན་པར་མཁན་ཆེན་དམ་པ་ཚུལ་ཁྲིམས་བློ་གྲོས་མཆོག་གངས་ལྗོངས་རིས་མེད་སློབ་གླིང་དུ་བཀའ་སློབ་གནང་བར་གདན་ཞུས་ལྟར་ཕེབས་ནས། རིས་མེད་ལྔ་རིག་མཐོ་སློབ་ལ་ཡོང་ཐུབ་པར་དགའ་སྤྲོ་ཡོད་ཚུལ་དང༌། ཇོ་ནང་བ་རྣམས་ཀྱིས་རང་ལུགས་ཀྱི་གཞུང་ལ་ཐོས་བསམ་བྱེད་དགོས་པ་སོགས་ལུགས་གཉིས་ཀྱི་སློབ་གསོ་ཟབ་རྒྱས་གནང༌། བོད་ཟླ་བརྒྱད་པའི་ཚེས་གཉིས་ལ་གདན་ཞུས་ལྟར་རིགས་སྨྲ་བ་གྲྭ་འཁོར་ལྔ་བཅུ་ཙམ་དང་རྔ་ཡུལ་དྷཱིཿཕུ་དགོན་དུ་ས་སྐྱའི་རིགས་གཏེར་བགྲོ་གླེང་ཐེངས་དགུ་བ་ཚོགས་པར་ཕེབས་ཏེ། མཐུན་ལམ་གྱི་བསྐོར་དང་རིགས་ལམ་གྱི་གལ་ཆེན་རང་བཞིན་སོགས་གསུང་བཤད་གྱ་ནོམ་པ་གནང་བར་མ་ཟད། ལུང་རིགས་ཀྱི་བརྒལ་བརྟག་ཀྱང་མང་པོ་མཛད། སློབ་གླིང་གི་གྲྭ་ཚང་ལྷག་མ་ལོ་དེར་རྐྱེན་དབང་གིས་གཞན་སྟོང་བགྲོ་གླེང་ཆེན་མོ་ཐེངས་བཅུ་པ་དུས་ཐོག་ཏུ་འཚོགས་མ་ཐུབ་པས་བོད་ཟླ་བརྒྱད་པའི་ཚེས་གསུམ་ནས་ཛམ་ཐང་གཙང་བ་དགོན་དུ་འཚོགས་པར་ཕེབས་ཤིང༌། དེ་སྐབས་ཤིག་ལ་ཇོ་ནང་པར་གཏོགས་ཚོད་ལ་འཆད་ཉན་གལ་ཆེ་བའི་གསུང་ཡིག་ཇོ་ནང་སང་ལ་སྐད་ཅིག་བཏང་པ་ཡིན་ཞེས་པ་ཞིག་སྤེལ་བ་ནི། ཇོ་ནང་གི་སྡེར་གཏོགས་པ་ཀུན་ལ་ཞུ་གསོལ། དཔལ་ལྡན་རྒྱལ་བ་ཇོ་ནང་པའི་བསྟན་པ་དར་འཕེལ་མི་འགྲོ་བའི་གནད་འགག་ནི་འཆད་ཉན་མེད་པའམ་བསྟན་པ་ལ་འཇུག་རིམ་ཆ་མ་ཚང་བའི་དབང་གིས་རེད། ང་ཚོ་ཇོ་ནང་པའི་བླ་རྒན་རྣམས་ཀྱིས་སློབ་གསོ་ལ་བརྟེན་ནས་ཐོས་བསམ་སྒོམ་གསུམ་ལས་ཉམས་པར་འགྱུར་བའི་གནས་ཚུལ་མང་པོ་མཐོང་རྒྱུ་འདུག །སྤྱིར་ཆོས་གང་སྒོམ་ན་དེ་ཤེས་དགོས་ཤིང༌། སྤང་བྱ་གང་སྤང་ནའང་དེ་ངོས་ཟིན་དགོས་པ་དང༌། བྱ་བ་གང་ཞིག་བསྒྲུབ་ནའང་བྱ་བའི་གནས་བབ་ལ་རྒྱུས་ལོན་པའམ་ལེགས་པར་རྟོགས་པ་དང༌། དེར་མ་ཟད་བསྟན་པ་གཞན་ལ་འཆད་ནའང་བསྟན་པ་ཤེས་དགོས་པ་དང༌། རང་གིས་ཉམས་སུ་བླང་ནའང་ཉམས་སུ་བླང་བྱ་དེ་ཤེས་དགོས་པ་རེད། ཐ་ན་དམངས་ཚོགས་ལ་ནང་ཆོས་ངོ་སྤྲོད་ཙམ་བྱེད་པ་ལ་ཡང་རང་གིས་ནང་ཆོས་ཤེས་དགོས་པ་གཞིར་བཞག་རེད། འཇིག་རྟེན་ན་གཞན་གྱིས་དྲི་བ་ཞིག་དྲིས་ནས་ལན་ཙམ་ཞིག་བྱ་བ་ལའང་ཤེས་རབ་ལ་མ་བརྟེན་ཐབས་མེད་རེད། མདོར་ན་སྤང་བྱ་མ་རིག་པ་སེལ་བ་དང་ཐམས་ཅད་གཟིགས་པ་གང་ལ་བསམ་ནའང་ཤེས་རབ་གཤིས་ཕྱིན་པ་ཞིག་སློབ་དགོས་པ་སྨོས་མ་དགོས་པ་རེད། གལ་ཏེ་ཤེས་རབ་ཀྱི་སྤྱན་མེད་ན་གང་ལ་བརྩོན་ན་མིག་ལོང་གིས་ལས་ཀ་བྱས་པ་དང་འདྲ་བར་རང་མགོ་ཐོན་པ་ཞིག་འོང་མི་སྲིད་པ་རེད། རང་ཅག་ཇོ་ནང་བ་ལ་མཚོན་ན་དུས་འཁོར་གྱི་རྒྱུད་དོན་ཆ་ཚང་བ་ཞིག་འཆད་མཁན་ཉིན་སྐར་གྱི་དོད་དུ་སླེབས་ཡོད་པ་ཡིན་ནའང༌། རྡོ་རྗེ་སློབ་དཔོན་རྣམས་ཀྱི་བཀའ་དྲིན་ལ་བརྟེན་ནས་དུས་འཁོར་གྱི་དབང་ལུང་མན་ངག་ཅུང་ཟད་རེ་བཞུགས་ཡོད་པས་དེ་ལ་འཆད་ཉན་སྒོམ་སྒྲུབ་བྱེད་དགོས་པ་ནི་ང་ཚོའི་ལས་འགན་གཙོ་བོ་ཞིག་ཏུ་ཆགས་འདུག་དྲན། སྔོན་བྱོན་དམ་པ་འགའ་ཞིག་གིས་ཐོས་བསམ་མ་བྱས་པར་ཉམས་རྟོགས་རྒྱུད་ལ་འཁྲུངས་སོང་བ་རེད། དེས་ན་ཐོས་བསམ་བྱེད་པ་ལ་དགོས་པ་མེད་པར་སྒོམ་བརྒྱབ་བཞག་ན་དེས་འགྲིག་པ་རེད་བཤད་མཁན་མ་མང་ན་མི་ཉུང་བ་ཞིག་ཡོད་པ་རེད། འདིར་དེ་ལ་གསལ་བཤད་མདོར་མཚོན་ཞིག་ཞུ་སེམས་པ་སྐྱེས་བྱུང༌། སྤྱིར་ཐོས་བསམ་མ་བྱས་པར་སྒོམ་གྲུབ་པ་ནི་རྒྱུ་འབྲས་མི་བསླུ་བས་མི་སྲིད་མོད། ཚེ་འདིར་ཐོས་བསམ་གཙོ་ཆེར་མ་བྱས་ན་ཐོས་བསམ་གྱི་སྦྱངས་པ་སྔོན་དུ་སོང་ནས་ད་ལྟ་ཉམས་རྟོགས་སྐྱེ་བ་ཡོད་པ་རེད། དེས་ན་སྤྱིར་བཏང་ཐོས་བསམ་དཔེ་ཀློག་མི་དགོས་བཤད་པ་ནི་སྒོམ་མི་དགོས་ཟེར་བར་དོན་གྱིས་སོང་འདུག་པ་ཡིན་ཏེ། མ་ཤེས་ན་སྒོམ་རྒྱུ་མེད་པའི་རིགས་པ་ཙམ་གྱིས་ཀྱང་གྲུབ་པས་སོ། །སྟོང་སྐད་པ་ཁ་ཅིག་གིས་མདོ་རྒྱུད་ཀྱི་ཁུངས་ཅི་ཡང་འདྲེན་དུ་མེད་པར་འདི་ཐོས་པ་ཙམ་གྱིས་གྲོལ་འགྲོ། འདི་སྒོམ་པ་ཙམ་གྱིས་འཚང་རྒྱ་འགྲོ་བ་རེད། འདི་ལས་གཞན་པའི་ཆོས་མེད། འདི་དང་བྲལ་ན་ཆོས་དང་བྲལ་བ་ཡིན་ཞེས་ཤར་ཚོད་དྲན་ཚོད་པོ་བཤད་འདུག་པ་ནི། ཆོས་ལ་བརྟེན་ནས་ཆབ་སྲིད་སྒྲུབ་པ་ཡིན་པས་དོར་བར་རིགས་ཞེས་བློ་གསལ་དག་ལ་གསལ་འདེབས་ཤིག་ཞུ། སངས་རྒྱས་བྱང་སེམས་ས་མཐོན་པ་ལ་གནས་པ་འགའ་རེ་སེམས་ཅན་གྱི་དོན་བྱེད་པར་བསམ་བཞིན་དུ་བྱོན་པ་རེ་ཟུང་གིས་ཐོས་བསམ་མཛད་པའི་ཚུལ་མི་གནང་བ་སྲིད་ཀྱང༌། དེས་མཚོན་ནས་སོ་སྐྱེ་འཆང་བ་ཀུན་ལྡན་བདག་ལྟ་བུ་རྣམས་ཀྱིས་ཐོས་བསམ་བྱེད་མི་དགོས་པར་བཤད་པ་ནི་ཞྭ་དཔེ་ལྷམ་ལ་དགབ་པ་དང་འདྲ་བར་བདོག །སྔགས་བླ་ན་མེད་པ་ནི་དམ་ཆོས་ཀུན་གྱི་མཆོག་ཏུ་གྱུར་བ་ཡིན་པས་འདི་ཁོ་ན་སྒོམ་པས་འཐུས་ཀྱི། ཐུན་མོང་གི་གཞུང་ལ་སྦྱང་བ་གཏན་མི་དགོས་པར་བཤད་ཀྱིན་ཡོད་པ་ནི་དཔེར་བཞག་ཏེ་བཤད་ན། རིན་པོ་ཆེའི་མཆོག་ཏུ་གྱུར་བ་གསེར་ཡིན་ཡང༌། ཁྱི་ལ་གསེར་གོང་ཞིག་བྱིན་པས་ཕན་མི་ཐོགས་པ་རེད། དེ་ལས་གཞན་དུ་རང་ལ་འཚམས་པའི་ཁ་ཟས་འགའ་རེ་གཡུག་ན་ཏན་ཏན་ཕན་འགྲོ་བ་བཞིན་དུ། གང་ཟག་རང་རང་གི་རྒྱུད་ཚོད་དང་བསྟུན་ནས་ཆོས་བཤད་པ་དང་སྒྲུབ་པ་གལ་ཆེ་བ་ཁོ་ན་ཡིན། དེའང་ཇོ་བོ་རྗེ་བོད་དུ་ཕེབས་པ་ན་བླ་མ་སྐྱབས་འགྲོ་བ་དང་བླ་མ་ལས་འབྲས་པ་ཞེས་མིང་ཐོགས་སོང་བ་ཡང༌། ཇོ་བོ་ཆེན་པོས་གསང་སྔགས་བསྟན་མ་ཤེས་པ་ག་ལ་ཡིན། གསང་སྔགས་བླ་མེད་ཀྱི་བསྐྱེད་རྫོགས་བཤད་ན་རྒྱུད་ལ་སྐྱེ་བ་ཡོད་པ་དང་བག་ཆགས་འཇོག་པ་སོགས་དགོས་པ་བླ་ན་མེད་པ་ཡོད་པ་གཞིར་བཞག་རེད། འོན་ཏེ། གཞུང་ལུགས་ཆེན་པོ་དག་ལ་འཆད་ཉན་གང་ཡང་མི་དགོས་ཟེར་བ་དེ་གདུལ་བྱ་ཁམས་དབང་མི་འདྲ་བ་མང་པོར་སངས་རྒྱས་ཀྱིས་ཆོས་ཀྱི་ཕུང་པོ་བརྒྱད་ཁྲི་བཞི་སྟོང་གསུངས་བ་དོན་མེད་དུ་སྨྲས་པར་འགྱུར་བས། རང་ཅག་ཇོ་ནང་གི་བསྟན་ལ་ལྷག་བསམ་ལྡན་པ་དག་གིས་ངེས་པར་དུ་བརྟག་དཔྱད་གཏོང་དགོས་པར་གྲུབ་འདུག །ཐོས་པ་བ་རྣམས་ཀྱིས་སྒོམ་གྲྭ་བ་ལ་བླུན་སྒོམ་པ་ཞེས་འབོད་པ་དང༌། སྒོམ་གྲྭ་བ་དག་གིས་ཐོས་པ་བ་དག་ལ་ང་རྒྱལ་ཅན་སོགས་སུ་འདོགས་པའི་སྒོ་ནས། ཕན་ཚུན་ངན་སྨོད་ཁོ་ན་བྱེད་པ་ནི་བདུད་སྡིག་ཅན་གྱི་ཆོ་འཕྲུལ་རང་དུ་འདུག་པས་གཟབ་འཚལ་བ་གཅིག་ལགས། ཇོ་ནང་གི་འདས་པའི་ལོ་རྒྱུས་ལ་ཕྱིར་མིག་ཅིག་བལྟས་ཡོང་བ་ན་ཇོ་ནང་ཀུན་མཁྱེན་ཡབ་སྲས་དང་རྗེ་ཏཱ་ར་ནཱ་ཐའི་སྐུ་རིང་ལ་ཐོས་བསམ་སྒོམ་གསུམ་ཡ་མ་བྲལ་བར་ཡོད་པའི་དབང་གིས་ཇོ་བསྟན་འདི་ཅུང་ཟད་དར་འཕེལ་བྱུང་བར་ཆགས་འདུག་མོད། དེའི་རྗེས་ནས་རིམ་གྱིས་མིང་ཙམ་ལ་ཕལ་ཆེར་ཆགས་སོང་བ་འདི། ཐོས་བསམ་སྒོམ་གསུམ་ཉམས་ཆགས་འདི་ཁོ་ན་ལས་བྱུང་འདུག་དྲན། འགའ་ཞིག་གིས་བཤད་པ་ལྟར། སྒོམ་པ་ལ་བསྒོམ་རྒྱུ་དེ་ཤེས་མི་དགོས་པ་ཡིན་ན། དེའི་ཁུངས་བཀའ་འགྱུར་པོད་བརྒྱ་ལྷག་དང་བསྟན་འགྱུར་པོད་ཉིས་བརྒྱ་མཆིས་པ་དག་ལས་ལུང་ཚིག་གཅིག་ཙམ་རེ་ཡོད་ན་གསུངས་རོགས་ཞུ། དེ་མེད་ན་གཏེར་རྫུན་གྲུབ་རྫུན་སྒོམ་རྫུན་རེའི་ལུང་རྫུན་ཙམ་ལ་ཡིད་རྟོན་དང་བྲལ་བས་ཁུངས་སུ་མི་ཆེ། དེས་ན་ད་ནི་ང་ཚོ་ཇོ་ནང་བ་རྣམས་ཀྱིས་བཤད་སྒྲུབ་ཀྱི་བསྟན་པ་ཟུང་འབྲེལ་དུ་བསྐྱང་དགོས་པ་དང༌། དེ་ཡང་ཉམས་སུ་བླང་བྱ་ཤེས་ནས་ཉམས་སུ་བླང་དགོས་པ་ཡིན་པས་ཇོ་ནང་གི་དགོན་བདག་དང་རྡོ་རྗེ་སློབ་དཔོན་མཁན་པོ་ཐོས་བསམ་སྒོམ་གསུམ་ལ་བརྩོན་པའི་གྲྭ་རྐྱང་དང་གྲོང་ཆོག་པ་སོགས་ཇོ་ནང་བར་གཏོགས་པ་ཀུན་ལ་ལག་ཐལ་མོ་སྦྱར་ནས་སྤྲང་འཁྱམ་པ་དངོས་གྲུབ་དཔལ་གྱིས་ཞུས་པའོ། །ཕྱིན་ཅི་ལོག་ཏུ་མི་འགྲེལ་བར་ཞུ། ཞེས་གསུངས་སོ། །ཚེས་བདུན་ལ་མགོ་ལོག་པདྨ་རྫོང་རིག་གཞུང་དར་སྤེལ་བགྲོ་གླེང་ཆེན་མོའི་སྟེང་མི་སྐྱ་འདུས་ཚོགས་ཆེན་མོ་ལ་ལུགས་གཉིས་ཀྱི་བཀའ་སློབ་གནང༌། ཚེས་བཅུ་དྲུག་ཉིན་ཇོ་ནང་ཉིན་ཡུལ་དགོན་དུ་བྱང་ཆུབ་ལོ་མའི་གསར་རྙིང་ཇོ་གསུམ་གྱི་རྒྱུགས་སྤྲོད་བྱ་དགའི་མཛད་སྒོར་ཕེབས་ནས་གསུང་བཤད་གནང༌། བོད་ཟླ་དགུ་བའི་ཚེས་གཅིག་ཉིན་གྱི་སྔ་དྲོའི་ཆར་བཀྲ་ཤིས་ཆོས་ཐང་དགོན་དུ། རྒྱལ་རོང་གྱང་སྒང་དགོན་རབ་གསལ། མགོ་ལོག་ལུང་སྐྱ་དགོན་པདྨ་བློ་གསལ། སྔ་འགྱུར་གསང་ལུང་དགོན་རྣམ་སྲས། ཉིན་ཡུལ་ཁང་སར་དགོན་བསམ་གཏན་རྒྱ་མཚོ། མགོ་ལོག་མདོ་ལིའི་རྡོ་ཁ་དགོན་རིན་ཆེན་རྒྱ་མཚོ་རྣམས་གཞུང་ཆེན་བཀའ་པོད་ལྔ་ལ་གཟིགས་རྟོགས་ཡངས་པ་གཞིར་བྱས་ཏེ། ལྷག་བསམ་དང་ཀུན་སྤྱོད་སོགས་ཀྱི་ཕུན་སུམ་ཚོགས་པའི་ཡན་ལག་མང་པོ་དང་ལྡན་པར་གཟིགས་ཏེ། ཚོགས་མང་གི་དབུས་སུ་ཁྲི་འདོན་དང་པཎ་ཞྭ་གནང་ནས་མཁན་པོའི་མཚན་རྟགས་བསྩལ། ཉིན་དེའི་དགོང་མོར་གངས་ལྗོངས་རིས་མེད་མཐོ་སློབ་ཕར་ཕྱིན་མཐར་ཕྱིན་མཚན་ཕུད་དམ་བཅའ་ཆེན་མོ་ཐེངས་གསུམ་པ་ཟབ་རྒྱས་སུ་འཚོགས། ཚེས་བཅུ་གསུམ་ཉིན་བཤེས་གཉེན་རིན་པོ་ཆེ་ཉིད་ཀྱིས་མཛད་པའི་ཕར་ཕྱིན་མཐའ་དཔྱོད་རིན་ཆེན་ཕྲེང་བའི་ཆོས་ཁྲིད་མཇུག་རྫོགས་ནས། ཚེས་བཅོ་ལྔའི་ཉིན་རྗེ་ཏཱ་ར་ནཱ་ཐའི་ཤེར་འགྲེལ་སྔོན་མེད་ལེགས་བཤད་ཀྱི་ཆོས་ཁྲིད་དབུ་བཟུང༌། ཚེས་ཉེར་གཅིག་ཉིན་སེར་སྐྱ་འདུས་པ་མང་པོས་ཆིབས་བསུ་རྒྱ་ཆེན་དང་བཅས་རྔ་ཡུལ་བསེ་དགོན་ཕྱོགས་ལས་རྣམ་རྒྱལ་གླིང་དུ་ཞབས་སོར་བཀོད་ནས། ཕྱི་ཉིན་པར་རིས་མེད་མ་ཎི་ཆོས་ཚོགས་ཆེན་མོར་ལུགས་གཉིས་བླང་དོར་གྱི་ཆོས་བཀའ་ཟབ་ཅིང་རྒྱ་ཆེ་བར་བསྩལ་ཏེ་ཕྱིར་སློབ་གླིང་དུ་ཕེབས། བོད་ཟླ་བཅུ་བའི་ཚེས་ལྔའི་ཉིན་པར་བཤེས་གཉེན་རིན་པོ་ཆེ་གང་ཉིད་ཀྱིས་དེ་སྔོན་བརྩམས་ཟིན་པའི་གསུང་རྣམས་དེབ་བཅུ་གསུམ་གྱི་བདག་ཉིད་ཅན་གྱི་གསུང་འབུམ་ཁམས་ཕྱོགས་ཀྱི་སློབ་གཉེར་བ་གྲྭ་རྐྱང་དཀྱུས་མ་ཞིག་གི་ལྷག་བསམ་གྱིས་པར་དུ་བསྐྲུན་པ་སློབ་གླིང་དུ་ལེགས་པར་འབྱོར་རོ། ། མང་དུ་ཐོས་པའི་རྩ་བ་བརྟན་པ་རུ། ། བསམ་པའི་མྱུ་གུ་གནོད་པ་མེད་པ་ལས། ། སྒོམ་བྱུང་འབྲས་བུ་གྱ་ནོམ་འབྱུང་འགྱུར་བས། ། ཐོས་བསམ་སྒོམ་གསུམ་ཡ་བྲལ་མི་རུང་གསུངས། ། སྙིགས་དུས་ཀྱི་བསྟན་པའི་གསལ་བྱེད་ཆེན་པོ་ངག་དབང་འཇིགས་མེད་དངོས་གྲུབ་དཔལ་བཟང་པོའི་མཛད་བཟང་བསླབ་གསུམ་ནོར་བུའི་གླིང་ཁ་ཞེས་བྱ་བ་ལས་རིས་མེད་མཐོ་སློབ་ཏུ་ཕར་ཕྱིན་དམ་བཅའ་ཆེན་མོ་ཐོག་མར་ཚུགས་པའི་བསྐོར་གྱི་རྣམ་ཐར་མདོར་བསྡུས་པ་སྟེ་ཉེར་གཉིས་པའོ། ། བདེ་ཆེན་ཞིང་སྒྲུབ་ཆེན་མོ་བཙུགས་ཏེ་སེར་སྐྱ་རིས་སུ་མ་མཆིས་པར་ཞིང་སྒྲུབ་ལ་སྐུལ་མ་བྱས་པའི་བསྐོར་གྱི་རྣམ་ཐར།བོད་ཟླ་བཅུ་བའི་ཚེས་བཅུ་གཅིག་ཉིན་ནས་བཟུང་ཆོས་ཐང་དགོན་དུ་བདེ་ཆེན་ཞིང་སྒྲུབ་ཆེན་མོ་ཉིན་བརྒྱད་ཀྱི་ཡུན་ལ་འཚོགས་ཏེ། མཁས་གྲུབ་ཀརྨ་ཆགས་མེད་ཀྱི་བདེ་སྨོན་དང་སྟོང་ཟ་སིདྡྷིའི་ཞིང་ཁྲིད་རྣམས་གཞིར་བྱས་ནས། ཞིང་ཁམས་བདེ་བ་ཅན་དུ་སྐྱེ་བའི་རྒྱུ་ཚོགས་སྒྲུབ་ལུགས་གཙོ་བོར་བྱས་ཏེ་ལུགས་གཉིས་ཀྱི་ཐུགས་བརྩེའི་ཆོས་བཀའ་འཛད་མེད་དུ་བསྩལ་ཞིང༌། ཞིང་ཁམས་བདེ་བ་ཅན་དུ་སྐྱེ་བའི་སྨོན་ལམ་རྣམ་དག་གི་མཚམས་སྦྱར་ཚོམས་བུ་གཅིག་སྒྲུབ་ཀྱིས་ཉིན་རྒྱུན་དུ་ཆད་མེད་མཛད་ལ། ཉིན་ཐ་མར་དགོན་དེའི་བསྟན་པའི་བདག་པོ་རྡོ་རྗེ་སློབ་དཔོན་བླ་མ་སྣང་སྟོང༌། མཁན་རྒན་སྣང་བ་དཔལ་སོགས་སྐྱ་སེར་རིས་སུ་མ་མཆིས་པར་བདེ་ཆེན་ཞིང་དབང་ཆེན་མོ་བསྐུར་ཏེ་བཀྲ་ཤིས་ཕུན་སུམ་ཚོགས་པའི་ངང་གཞུག་ལེགས་པར་གྲོལ། བོད་ཟླ་བཅུ་གཅིག་པའི་ཚེས་བརྒྱད་ལ་ཤེར་འགྲེལ་སྔོན་མེད་ལེགས་བཤད་ཀྱི་ཁྲིད་རྫོགས། ཚེས་བཅུ་གཉིས་ཉིན་གྲྭ་མང་སྤྱི་ལ་བླ་མ་ལྔ་བཅུ་པའི་འགྲེལ་བའི་ཆོས་ཁྲིད་རྫོགས། སྤྱིར་བཏང་དགེ་བའི་བཤེས་གཉེན་རིན་པོ་ཆེ་གང་ཉིད་ཀྱིས་བླ་མ་བསྟེན་ཚུལ་འདི་ཁེ་ཉེན་ཤིན་ཏུ་ཆེ་བའི་བཀའ་སློབ་ནན་ཆེར་ཆག་མེད་དུ་མཛད་པ་ཡིན་ལ། དེ་ཡང་ཞལ་སྔ་ནས། ང་འདི་ནས་ཤིང་ཁྲི་ཞིག་གི་སྟེང་ནས་ཁྱེད་ཚོ་ལ་ཐུར་དུ་འཁོར་ནས་ཆོས་གསུང་ཁུལ་བྱེད་བཞིན་པས་བཤད་པ་མིན། མ་ཤེས་ཐབས་མེད་ཀྱི་གལ་ཆེན་དོན་སྙིང་ཞིག་ཡིན་པས་བཤད་པ་ཡིན། ང་ལྟ་བུ་ཞིག་གིས་བླ་མ་བསྟེན་ཚུལ་ལེགས་དགོས་པ་རེད་ཅེས་ནམ་རྒྱུད་འཆད་འདུག་ན། མཚམས་ལ་རེར་མི་རེ་ཟུང་གིས་ཁོ་རང་ལ་ཡག་པོ་བྱེད་དགོས་ཀྱིན་ཡོད་པ་རེད་སེམས་མི་སྲིད་པ་མ་རེད། ཡིན་ན་ཡང་བླ་མ་བསྟེན་ཚུལ་འདི་མ་ཤེས་ཐབས་མེད་ཡིན་པས་མི་འཆད་ཐབས་མེད་རེད། འཆད་དགོས་ན་བླ་མས་འཆད་དགོས་པ་རེད་མ་གཏོགས་གཞན་སུ་ཡང་འཆད་འོང་མཁན་ཞིག་ཡོད་པ་མ་རེད། བླ་མ་ལ་ལས་བླ་མ་བསྟེན་ཚུལ་བཤད་དགོས་ན་ང་རང་ལ་ཞབས་གཡོག་གྱིས་ཤོག་ཟེར་བ་འདྲ་བས་འཆད་པ་མིན་རབས་གསུང་གིན་འདུག །དེ་ནི་རེ་དོགས་ཆེ་སོང་བ་རེད། ང་ལ་ཅིག་ཟེར་ཡོང་བསམས་ནས་མ་བཤད་ན། དེ་སློབ་མ་ལ་ཤ་ཚ་ལུགས་ཤིག་མ་རེད། རང་ཉིད་འགེབས་སྲུང་བྱེད་ལུགས་ཤིག་རེད། རྗེ་གུང་ཐང་བསྟན་པའི་སྒྲོན་མེའི་ཞལ་སྔ་ནས། སྒོ་གསུམ་དགེ་ལ་སྦྱོར་ཕྱིར་མིང་དང་དོན། །མཐུན་པའི་བཤེས་ཤིག་རང་གི་དགེ་རྒན་དུ། །བསྟེན་ནས་ཆོས་ཀྱི་བྱ་བ་མ་ལུས་པའི། །རྩ་བར་མཐོང་ནས་བཀའ་བཞིན་སྒྲུབ་པ་ཡིས། །རྟེན་འབྲེལ་མགོ་ནས་འགྲིག་པར་གྱིས་ཤིག་ཨང༌། །ཞེས་དང༌། རྗེ་བདག་ཉིད་ཆེན་པོས་ཀྱང༌། ཡོན་ཏན་ཀུན་གྱི་གཞིར་གྱུར་དྲིན་ཅན་རྗེ། །ཚུལ་བཞིན་བསྟེན་པ་ལམ་གྱི་རྩ་བ་རུ། །ལེགས་པར་མཐོང་ནས་འབད་པ་དུ་མ་ཡིས། །གུས་པ་ཆེན་པོས་བསྟེན་པར་བྱིན་གྱིས་རློབས། །ཞེས་གསུངས་པ་ནང་ལྟར་བླ་མ་བསྟེན་ཚུལ་མ་ལེགས་ན་ལམ་གྱི་རྩ་བ་མ་ལེགས་པ་ཡིན་པས། རྩ་བ་བྲལ་བའི་སྡོང་བོ་དང་ཡལ་ག་ལོ་འདབ་སོགས་འབྱུང་ལུགས་ཤིག་གཞི་ནས་མེད་པ་རེད། མཁས་པ་རེ་ཟུང་དང་གྲུབ་མཐའ་དང་ཆོས་བརྒྱུད་ཕྱོགས་རེ་བའི་ལུགས་ཙམ་མ་ཡིན་པར། བླ་མ་བསྟེན་ཚུལ་འདི་ཉིད་མདོ་སྔགས་ཀྱི་ལམ་ཐམས་ཅད་ཀྱི་རྩ་བ་ཡིན་ལུགས་རྗེ་བཙུན་ཏཱ་ར་ནཱ་ཐའི་ལྷན་འཐབ་འོད་བརྒྱ་འབར་བ་ལས་འདི་ལྟར་གསུངས་ཏེ། དེ་ཡང་སྒྱུ་འཕྲུལ་དྲྭ་བ་ལས་ཀྱང༌། སློབ་དཔོན་ཇི་ལྟར་བལྟ་ཞེ་ན། །བླ་མ་སངས་རྒྱས་ཀུན་དང་མཉམ། །དེ་ཉིད་རྟག་ཏུ་རྡོ་རྗེ་འཆང༌། །དེ་བཞིན་གཤེགས་པ་རིན་ཆེན་ཏོག །དེ་ཉིད་ཡེ་ཤེས་རྒྱ་མཚོ་སྟེ། །ཡིད་བཞིན་ནོར་བུ་རིན་ཆེན་སྦྱིན། །སློབ་དཔོན་གྱི་ནི་ཡོན་ཏན་གཟུང༌། །སྐྱོན་ནི་ནམ་ཡང་མ་ཡིན་ནོ། །ཡོན་ཏན་གཟུང་བས་དངོས་གྲུབ་ཅིང༌། །སྐྱོན་རྣམས་ཀྱིས་ནི་དངོས་གྲུབ་ཉམས། །དེ་ཡི་གྲིབ་མའང་མི་འགོམ་སྟེ། །མཆོད་རྟེན་བཤིག་དང་འདྲ་བར་གསུངས། །ཞེས་དང༌། དཔལ་དྲི་མ་མེད་པའི་འོད་ལས། དུས་ཀྱི་འཁོར་ལོའི་རྒྱུད་སྟོན་པ་པོ་རྡོ་རྗེ་སློབ་དཔོན་ནི་བཅོམ་ལྡན་འདས་འཇམ་དཔལ་ཇི་ལྟ་བ་དང༌། དུས་ཀྱི་འཁོར་ལོ་དང་པོའི་སངས་རྒྱས་ཇི་ལྟ་བ་བཞིན་དུ། ཐར་པ་དོན་དུ་གཉེར་བ་རྣམས་ཀྱིས་བལྟ་བར་བྱའོ། །ཞེས་པ་དང༌། སློབ་དཔོན་གྱིས་ནི་སྡིག་པ་འཕྲོག །སློབ་དཔོན་གྱིས་ནི་འཇིགས་པ་སེལ། །སློབ་དཔོན་གྱིས་ནི་སྡུག་བསྔལ་གྱི། །རྒྱ་མཚོའི་འཇིངས་ལས་སྒྲོལ་བར་འགྱུར། །ཞེས་གསུངས་ཤིང༌། དཔལ་ས་ར་ཧས་ཀྱང༌། བླ་མས་སྨྲས་པ་གང་གི་སྙིང་ཞུགས་པ། །ལག་པའི་མཐིལ་ན་གནས་པའི་གཏེར་མཐོང་འདྲ། །ཞེས་དང༌། ཨིནྡྲ་བྷུ་ཏིའི་ཡེ་ཤེས་གྲུབ་པ་ལས་ཀྱང༌། སྐྱ་བ་འཛིན་པ་མེད་པར་ནི། །གྲུ་ཡིས་ཕ་རོལ་འགྲོ་མི་འགྱུར། །ཡོན་ཏན་ཐམས་ཅད་རབ་རྫོགས་ཀྱང༌། །བླ་མ་མེད་པར་སྲིད་མཐར་མིན། །ཞེས་དང༌། མཐུ་སྟོབས་དབང་ཕྱུག་བིར་བས་ཀྱང༌། བླ་མ་དང་ནི་རྡོ་རྗེ་སེམས། །ཐ་དད་པར་ནི་མི་བྱ་སྟེ། །བླ་མ་སངས་རྒྱས་ཆོས་དང་ནི། །དེ་བཞིན་དགེ་འདུན་བླ་མ་སྟེ། །དངོས་གྲུབ་གོ་འཕང་མཆོག་འདོད་པས། །ཀུན་ནས་བླ་མ་མཉེས་པར་བྱ། །སངས་རྒྱས་ཀུན་དངོས་རྡོ་རྗེ་འཆང༌། །རྩོད་པའི་དུས་འདིར་བདག་དོན་དུ། །ཀུན་དང་མཐུན་པར་སྟོན་མཛད་པ། །དེ་ལྟར་ཤེས་ནས་དངོས་ཀུན་གྱིས། །བསྟེན་བྱ་དུས་གསུམ་སངས་རྒྱས་ཀྱི། །དངོས་གྲུབ་བདེ་ཆེན་ཐོབ་པར་འགྱུར། །ཞེས་པ་ལ་སོགས་པ་སྟེ། མདོར་ན་དངོས་གྲུབ་ཐམས་ཅད་ཀྱི་རྩ་བ་བླ་མར་གསུངས་པའི་ལུང་ཁུངས་མཐའ་ཡས་སོ། །ད་ལྟ་མངོན་སུམ་གྱིས་གྲུབ་པ་ཡང༌། རྩ་བའི་བླ་མ་ལ་དད་པ་མེད་པ་རྣམས། མི་འདོད་པ་དུ་མ་ཐོག་ཏུ་འབབ་པ་དང༌། བླ་མ་གུས་པས་བསྟེན་པ་རྣམས་ལ། བདེ་སྐྱིད་སྙན་གསུམ་རང་ཤུགས་ཀྱིས་འབྱུང་བ་མཐོང་ངོ། །གཞན་ཡང༌། བླ་མ་དམ་པ་རྣམས་ཀྱི་གསུང་ལས་འདི་སྐད་ཅེས། བླ་མ་སངས་རྒྱས་སུ་མཐོང་ན་སངས་རྒྱས་ཀྱི་བྱིན་རླབས་འཇུག །བྱང་ཆུབ་སེམས་དཔར་མཐོང་ན་བྱང་ཆུབ་སེམས་དཔའི་བྱིན་རླབས་དང༌། གྲུབ་ཐོབ་ཏུ་མཐོང་ན་གྲུབ་ཐོབ་ཀྱི་བྱིན་རླབས། སོ་སོ་སྐྱེ་བོའི་དགེ་བཤེས་བཟང་པོར་མཐོང་ན། དེ་དང་མཐུན་པར་བྱིན་རླབས་འཇུག་སྟེ། ལར་མོས་གུས་མེད་ན་བྱིན་རླབས་ཡེ་མི་འཇུག་གོ། །ཞེས་སོགས་རྒྱ་ཆེར་གསུངས་པ་རྣམས་ཞིབ་ཏུ་ལྟོས་དང༌། ང་ལྟ་བུའི་གང་ཟག་ཅིག་གིས་བཤད་པ་ལ་ཡིན་མིན་ཡོད་ཆོག་རུང༌། སྐྱེས་བུ་དམ་པ་དེ་དག་གི་གསུང་ལ་འཁྲུལ་བ་མི་སྲིད་པ་རེད། དེས་ན། མདོ་ལས། དད་པ་མེད་པའི་མི་རྣམས་ལ། །དཀར་བོའི་ཆོས་ནི་མི་འབྱུང་སྟེ། །ས་བོན་མེ་ཡིས་ཚིག་པ་ལ། །མྱུ་གུ་སྔོན་པོ་ཇི་བཞིན་ནོ། །ཞེས་དང༌། འབྲི་གོང་སྐྱོབས་པ་རིན་པོ་ཆེས། བླ་མ་སྐུ་བཞིའི་གངས་རི་ལ། །མོས་གུས་ཀྱི་ཉི་མ་མ་ཤར་ན། །བྱིན་རླབས་ཀྱི་ཆུ་རྒྱུན་མི་འབེབས་པས། །སེམས་མོས་གུས་འདི་ལ་ནན་ཏན་མཛོད། །ཅེས་གསུངས་པ་ལྟར། ཆོས་དང་བླ་མ་ལ་དད་པ་མེད་པའི་གང་ཟག་ཅིག་ལ་ཆོས་ཀྱི་བྱིན་རླབས་འཇུག་དགོས་ཟེར་བ་དེ་དཔེ་མི་སྲིད་པའི་སྟོང་བསམ་རེད་ཅེས་སོགས་ལུང་འདྲེན་དང་བཅས་པ་གང་ཉིད་ཀྱི་ཞབས་ལ་ཡུན་རིང་བསྟེན་མྱོང་མཁན་གྱི་སློབ་མ་ཞིག་ཡིན་པ་ནས་བཟུང༌། ཕལ་ཆེར་གྱི་སེམས་སུ་བློ་ཐོག་ཤར་མར་ཐོན་ཡོང་རྒྱུ་ལྟ་བུའི་གལ་པོ་ཆེ་ལ་ནན་བཤད་གནང་བ་ཡིན་ནོ། །ཟླ་དེའི་ཚེས་བཅུ་གསུམ་གྱི་སྔ་དྲོར་འདུལ་བ་འཛིན་གྲྭར་འདུལ་ཊཱིཀ་ཆེན་མོ་ལེགས་བཤད་ཉི་མའི་འོད་ཟེར་རམ་འདུལ་བ་མཚོ་ཊཱིཀ་ཀི་ཆོས་ཁྲིད་མཇུག་གྲུབ། ཕྱི་དྲོར་གྲྭ་མང་སྤྱི་ལ་སློབ་དཔོན་སེངྒེ་བཟང་པོའི་འགྲེལ་ཆུང་དོན་གསལ་གྱི་ཁྲིད་ལུང་སྦྲགས་མ་གནང༌། ཚེས་བཅུ་བཞིའི་ཉིན་སྤྱོད་འཇུག་ཁྲིད་ལུང་སྦྲགས་མའི་དབུ་བཟུང་ནས་ཚེས་བཅུ་བདུན་ཉིན་རྫོགས་པར་བྱས། ཚེས་བཅོ་བརྒྱད་ཉིན་འདུལ་བ་མདོ་རྩའི་བཀླག་ལུང་གསུངས་ཏེ། ཚེས་ཉི་ཤུ་ཐམ་པའི་ཉིན་གུང་ལ་ཉེ་བར་གངས་ལྗོངས་རིས་མེད་ལྔ་རིག་མཐོ་སློབ་ཀྱི་ལོ་འཁོར་རྒྱུགས་སྤྲོད་ཆེན་པོའི་རྒྱུགས་འབྲས་དང་བྱ་དགའི་མཛད་སྒོ་བཅས་ཕུན་སུམ་ཚོགས་པའི་ངང་ལོ་གཅིག་གི་སློབ་གླིང་གི་དངོས་གཞིའི་སློབ་ཡུན་ལེགས་པར་གྲུབ་ནས་ཆོས་མཚམས་གྲོལ་ལོ། །ཚེས་ཉེར་གཅིག་ལ་རྒྱལ་རོང་པཱ་ལར་བྱོན་ནས་བཤེས་གཉེན་རིན་པོ་ཆེ་ཉིད་ཀྱི་ཐུགས་དགོངས་ལྟར་ས་གནས་དེའི་དགོན་ཁག་འགའི་མཁན་བླ་སྤྲུལ་འགའ་རེས་གཙོ་སྒྲུབ་གནང་བའི་རྒྱལ་རོང་བདེ་ཆེན་ཞིང་སྒྲུབ་ཆེན་མོའི་སྟེང་ནས། དད་ལྡན་འདུས་པའི་སྡེ་ལ་བདེ་བ་ཅན་དུ་སྐྱེ་བའི་རྒྱུ་ཚོགས་གཙོ་བོར་མཛད་དེ། མི་རིགས་རང་གི་སྐད་ཡིག་སློབ་གཉེར་སོགས་དུས་སུ་བབ་པའི་ཆོས་བཀའ་མང་པོ་དང༌། བདེ་ཆེན་ཞིང་དབང་བཅས་ཀྱི་བཀའ་དྲིན་འཛད་མེད་བསྐྱངས་སོ། །དེང་གི་ཆར་ཆོས་ཀྱི་མིང་ཐོག་ནས་མཁས་པའི་མིང་གི་ཁུར་ཆེན་པོ་བླངས་ཀྱང༌། འཇིག་རྟེན་པའི་བསྟན་བཅོས་ལ་མཁས་པ་རྣམས་དང་ཁྱད་པར་མེད་པ་ལྟ་བུར། འཆད་རྩོད་རྩོམ་པ་ཚང་མ་ཞིབ་འཇུག་གི་ལས་ཀ་ཙམ་གྱི་འདུ་ཤེས་དང༌། སྤྱིར་བཏང་གི་རིག་གཞུང་ཙམ་ལ་སྦྱོང་བཞིན་པའི་བསམ་པ་ལས་མེད་པ་མང་དུ་སྣང་སྟེ། དེ་དག་ནི་ཕྱི་མར་ཕན་པའི་ཆོས་པ་མ་ཡིན་ཏེ། ཆོས་ཀྱི་རྩ་བ་དད་པ་ཡིན་པས། དེ་དག་ལ་ལྟོས་ན་ནི་ལས་འབྲས་དང་དཀོན་མཆོག་ལ་སོམ་ཉི་ཆུང་བའི་རང་རེའི་མི་རྒན་ཕོ་མོ་ཕྱག་བསྐོར་ལ་བརྩོན་པ་རྣམས་བརྒྱ་འགྱུར་གྱིས་ཁྱད་དུ་འཕགས་པ་ཡིན་ནོ། །བཤེས་གཉེན་རིན་པོ་ཆེ་ཉིད་ཀྱི་ཞལ་སྔ་ནས། མི་སྐྱ་ཕོ་མོ་ཞིག་ཡིན་ན་བདེ་ཆེན་ཞིང་སྒྲུབ་འདི་ལ་བརྩོན་པ་གལ་ཆེན་ཡིན་པ་ཙམ་མ་ཡིན་པར། རབ་ཏུ་བྱུང་བ་རྣམས་ཀྱིས་ཀྱང་བརྩོན་པ་ཆེན་པོས་བདེ་བ་ཅན་དུ་སྐྱེ་བའི་རྒྱུ་ཚོགས་ལ་སློབ་པ་གལ་ཤིན་ཏུ་ཆེ་སྟེ། ལམ་རིམ་གཉིས་ཀྱི་བཙན་ས་ཆེན་པོ་རེ་ཟིན་ན་ཡང་རབ་ཁྱད་འཕགས་ལོས་ཡིན་ཏེ། དེ་འདྲ་ཡོང་མཁན་ཡང་མེད་པ་མ་ཡིན་མོད། ཕལ་ཆེར་ལ་ཤིན་ཏུ་དཀའ་མོ་ཡིན་པ་རེད། དེས་ན། མདོ་ཡི་མྱུར་ལམ་ཉེ་ལམ་ཁྱད་པར་ཅན་ཞིང་ཁམས་བདེ་བ་ཅན་དུ་སྐྱེ་བའི་རྒྱུ་ཚོགས་ལ་འབད་རྒྱུ་གལ་ཆེ་རབས་ལན་གཅིག་མ་ཡིན་པར་སློབ་ཚོགས་རིས་སུ་མ་མཆིས་པར་ནམ་རྒྱུན་དུ་བཀའ་གསུང་ཕེབས་པ་ལགས་ཤིང༌། ཉིད་ནས་ཀྱང་ལན་དུ་མར་བདེ་ཆེན་ཞིང་དབང་དང་ཞིང་ཁྲིད་མང་དུ་གསན་ཞིང༌། བདེ་ཆེན་ཞིང་སྒྲུབ་ཆེན་མོའི་སྒོ་ནས་ཐེངས་འགའ་ལ་སྐུ་མཚམས་བཅས་བརྩོན་པར་མཛད་པ་ཡིན་ནོ། །བོད་གངས་ཅན་གྱི་ལྗོངས་སུ་སྔོན་ནས་ད་ལྟའི་བར་མཁས་གྲུབ་ཟམ་མ་ཆད་པ་དག་གིས་བདེ་ཆེན་ཞིང་སྒྲུབ་འདི་ཉིད་ཚེགས་ཆུང་ཞིང་དོན་ཆེ་བར་གཟིགས་ཏེ། ཆོས་འདིའི་འཕྲིན་ལས་འགྲོ་བ་རིས་སུ་མ་མཆིས་པར་སྤེལ་བར་བྱས་མོད། སྔོན་ནས་ད་ལྟའི་བར་དུ་རེ་ཟུང་གིས་ནི། ཞིང་ཁམས་བདེ་བ་ཅན་ན་སོ་སྐྱེ་རྣམས་སྐྱེ་མི་ཐུབ་ལུགས་དང༌། མདོ་ལས་བདེ་བ་ཅན་དུ་སྐྱེ་བར་ཡིད་འགྱུར་བ་བཅུས་སྨོན་ལམ་ཡང་དག་པར་གཏབ་པ་རྣམས་སྐྱེ་བར་གསུངས་པ་དུས་གཞན་ལ་དགོངས་པའི་དྲང་དོན་ཡིན་ཚུལ་སོགས་ཀྱི་བཤད་པ་བྱས་དང་བྱེད་བཞིན་འདུག་སྟེ། དེ་དག་གིས་ཀྱང་སྐལ་བ་དམན་པ་རྣམས་བར་དུ་གཅོད་པའི་ལས་ཆེན་པོར་འགྱུར་བ་མཐོང་ཞིང༌། གཞུང་གི་དོན་མ་རྟོགས་པའི་སློབ་གཉེར་བ་ལ་ལས། དགོངས་པ་ཅན་གྱི་མདོ་བཞིའི་ནང་གི་དུས་གཞན་ལ་དགོངས་པའི་མཚན་གཞི་དང༌། གཉེན་པོ་ལྡེམ་དགོངས་བརྒྱད་ཀྱི་གསུམ་པ་ལེ་ལོའི་གཉེན་པོར་གསུངས་པའི་མཚན་གཞིར། བདེ་བ་ཅན་དུ་སྐྱེ་བར་སྨོན་ལམ་བཏབ་ན་དེར་སྐྱེའོ་ཞེས་པ་མཚན་གཞིར་མདོ་སྡེ་རྒྱན་འགྲེལ་བ་འགྲེལ་བཤད་དང་ཤེར་ཕྱིན་ཀྱི་ཊཱིཀྐ་ཆེན་པོ་དག་ལས་འབྱུང་བའི་ཕྱིར་ན། རང་ཅག་སོ་སོའི་སྐྱེ་བོ་དག་གིས་རྒྱུ་ཚོགས་ལ་འབད་ཀྱང་སྐྱེ་བ་མེད་དོ་སེམས་པ་ཡང་སྣང་སྟེ། དེ་དག་ནི་དོན་མ་གོ་བ་ཡིན་ཏེ། ཀུན་མཁྱེན་དུས་གསུམ་སངས་རྒྱས་རྟོན་པ་བཞི་ལྡན་ཤེས་རབ་རྒྱལ་མཚན་གྱི་རང་གཞན་བདེ་བ་ཅན་དུ་སྐྱེ་བའི་ཐབས་མཆོག་ཅེས་བྱ་ལས། འདིར་དགེ་བའི་བཤེས་གཉེན་ལ་ལ་དག །བདེ་བ་ཅན་དུ་སོ་སོའི་སྐྱེ་བོ་མི་སྐྱེ་བས་ད་ལྟ་སོ་སོའི་སྐྱེ་བོར་ཡོད་པ་རྣམས་ཀྱིས་འབད་ཀྱང་དེར་མི་སྐྱེའོ། །ཞེས་འདོད་པ་ནི། ལོག་རྟོག་དང་ཐེ་ཚོམ་སྐྱེ་བའི་གནས་མ་ཡིན་པ་ལ་སྐྱེ་བར་འགྱུར་བས་སེམས་ཅན་ལ་གནོད་པར་འགྱུར་ཏེ། དེ་ནི་དགེ་སློང་བྱང་ཆུབ་སེམས་དཔའ་ཆོས་ཀྱི་འབྱུང་གནས་ཀྱི་སྨོན་ལམ་བཞི་བཅུ་རྩ་དགུའི་ནང་ནས་བཅོ་བརྒྱད་པས་ལེགས་པར་བསལ་ཏེ། ཇི་ལྟར་བསལ་ཞེ་ན། གང་ཟག་དེ་འཆི་བའི་དུས་བྱེད་པའི་ཚེ། སངས་རྒྱས་འོད་དཔག་མེད་པ་འཁོར་དང་བཅས་པ་མདུན་དུ་བྱོན་པའི་སྣང་བ་ཤར་ནས་དགའ་ཞིང་དད་པ་དང་བཅས་ཏེ་བདེ་བ་ཅན་དུ་འགྲོ་བར་གསལ་ལ། སངས་རྒྱས་ཤཱཀྱ་ཐུབ་པས་ཀྱང་དེ་དང་མཐུན་པར་བཀའ་སྩལ་པས། འཆི་ཁ་བར་དོའི་གནས་སྐབས་དེར་འཕགས་པར་འགྱུར་བའི་ཕྱིར་རོ། །འདི་ནི་སངས་རྒྱས་ཕལ་པོ་ཆེའི་མདོར། བདག་ནི་འཆི་བའི་དུས་བྱེད་གྱུར་པ་ན། །སྒྲིབ་པ་ཐམས་ཅད་དག་ནི་ཕྱིར་བསལ་ཏེ། །མངོན་སུམ་སྣང་བ་མཐའ་ཡས་དེ་མཐོང་ནས། །བདེ་བ་ཅན་གྱི་ཞིང་དེར་རབ་ཏུ་འགྲོ། །ཞེས་སོགས་གསུངས་པ་དང་ཡང་དོན་གཅིག་གོ །ཡང་ལ་ལ་དག་ན་རེ། ཚིགས་སུ་བཅད་པ་གཉིས་པའི་གཟུངས་ཀྱི་འགྲེལ་པ་སློབ་དཔོན་མཛེས་བཀོད་ཀྱིས་མཛད་པ་དང༌། མདོ་སྡེ་རྒྱན་གྱི་འགྲེལ་པ་དང་འགྲེལ་བཤད་དུ། བདེ་བ་ཅན་དུ་སྨོན་ལམ་བཏབ་པས་སྐྱེ་ཞེས་པ་ནི་དུས་གཞན་ལ་དགོངས་པའི་དཔེ་བརྗོད་དུ་གསུངས་པས། མདོ་འདི་ནས་གསུངས་པ་བཞིན་བསྒྲུབས་ཀྱང་ཚེ་ཕྱི་མར་ཞིང་དེར་སྐྱེ་བ་མ་ཡིན་ནོ། །ཞེས་སྨྲས་པ་ཡང་ཆོས་སྤོང་གིས་ལས་དང་ཐེ་ཚོམ་གྱི་རྒྱུར་འགྱུར་བའི་ཕྱིར་སེམས་ཅན་ལ་གནོད་པ་ཡིན་ཏེ། དེ་ནི་སྨོན་ལམ་བཅུ་དགུ་པས་བསལ་བ་ཡིན་ནོ། །ཇི་ལྟར་བསལ་ཞེ་ན། འདི་ནས་ཀྱང་སྨོན་ལམ་བཏབ་པས་མི་ཆོག་པར་མཚམས་མེད་པ་དང༌། དམ་པའི་ཆོས་སྤོང་བའི་ལས་ལས་རིང་དུ་གྱུར་པ་དགོས་ཤིང་དགེ་བའི་རྩ་བ་ཐ་ནའང་སེམས་བསྐྱེད་པའི་འགྱུར་བ་བཅུ་དགོས་པར་གསུངས་པ་སྨོན་ལམ་ཙམ་གྱིས་མི་འགྲུབ་པར་གསུངས་པའི་ཕྱིར་དང༌། དུས་གཞན་ལ་དགོངས་པའི་དཔེ་བྱས་པ་དེ་ཡང་སྨོན་ལམ་ཙམ་ལ་དགོངས་པའི་ཕྱིར་རོ། །དེས་ན་འདི་དང་དེ་ལ་འགལ་བ་ཅུང་ཟད་ཙམ་ཡང་མེད་ཀྱི་དགོངས་པ་མཐུན་པ་ཡིན་ནོ། །གཞན་ཡང༌། དགེ་སློང་དེའི་སྨོན་ལམ་བཞི་བཅུ་རྩ་དགུ་པོ་ཐམས་ཅད་གྲུབ་བམ་མ་གྲུབ། གྲུབ་ན་ནི་བཅོ་བརྒྱད་པ་དང༌། བཅུ་དགུ་པ་ཡང་གྲུབ་པས་དེ་དག་ལ་ལོག་རྟོག་དང་ཐེ་ཚོམ་བྱར་མི་རུང་ལ། མ་གྲུབ་ན་ནི་དགེ་སློང་དེ་བདེ་བ་ཅན་དུ་མངོན་པར་རྫོགས་པར་སངས་རྒྱས་ནས་བསྐལ་བ་བཅུ་ལོན་པར་བཀའ་སྩལ་པ་དང་འགལ་ཞིང༌། འགྲུབ་མི་འགྲུབ་བརྟག་པའི་ཚེ་འགྲུབ་པའི་མཚན་རྟགས་ཤར་བ་དང་ཡང་འགལ་ལ། རྒྱལ་སྲས་ཆེན་པོ་རྣམས་དམིགས་གསལ་གསུམ་པོ་མ་རྫོགས་པར་ཡང་དག་པའི་མཐའ་མངོན་དུ་མི་མཛད་པར་གསུངས་པ་དང་འགལ་བ་ཡིན་ནོ། །དེའི་ཕྱིར་འདི་ལ་ལོག་རྟོག་དང་ཐེ་ཚོམ་སྐྱེས་ཀྱི་དོགས་ནས་སངས་རྒྱས་ཤཱཀྱ་ཐུབ་པས་ཐེ་ཚོམ་ཡོད་མེད་ཀྱི་སྐྱོན་ཡོན་དང་དཔེ་དོན་ལ་སོགས་པ་རྣམ་པ་མང་པོས་རྒྱལ་སྲས་མ་ཕམ་པ་ལ་ལེགས་པར་གདམས་ཤིང་ཕྱོགས་བཅུའི་སངས་རྒྱས་གྲངས་མེད་དཔག་ཏུ་མེད་པས་ཀྱང་དེ་ལྟར་གསུང་བར་བཀའ་བསྩལ་པའི་ཕྱིར། ཉེས་པ་དེ་དག་སྤངས་ནས་རྒྱལ་བས་ཇི་ལྟར་བཀའ་བསྩལ་པ་ལ་ཡིད་ཆེས་པར་བྱ་སྟེ། དགེ་བའི་རྩ་བ་མང་པོ་དཔག་ཏུ་མེད་པ་ཡང་དང་ཡང་དུ་བསགས་ནས་སྨོན་ལམ་རྣམ་དག་ཡང་དང་ཡང་དུ་སྒྲུབ་པ་ལ་བསམ་པ་ཐག་པ་ནས་འབད་པར་བྱའོ། །དེ་ལྟར་བྱས་ན་བདེ་བ་ཅན་དུ་པད་མ་ལ་བརྫུས་ཏེ་སྐྱེ་བར་ཐེ་ཚོམ་མེད་ཅིང་སྨོན་ལམ་བཞི་བཅུ་རྩ་དགུ་དང་མཐུན་པའི་ཡོན་ཏན་མང་པོ་འཐོབ་པར་ཡང་ཐེ་ཚོམ་མེད་དོ། །ཞེས་དང༌། ཐེ་ཚོམ་མེད་པར་མདོ་བཞིན་བསྒྲུབས་ན་ནི། །འཆི་ཁའམ་བར་དོར་འཕགས་པ་ཉིད་གྱུར་ནས། །ཞིང་མཆོག་འདིར་སྐྱེས་གཏན་གྱི་དོན་ཀུན་འགྲུབ། །དེ་སླད་འཆིང་བ་ཀུན་ལས་གྲོལ་འདོད་ཅིང༌། །ཐར་པའི་བདེ་དགའ་ཐོབ་འདོད་ཐམས་ཅད་དང༌། །ཁྱད་པར་བདག་ལ་བླ་མར་འཛིན་རྣམས་ཀྱིས། །དོན་འདི་བསྒྲུབ་ལ་མྱུར་བར་བརྩོན་འཚལ་ལོ། །ཞེས་གསུངས་སོ། །འཆི་ཁའམ་བར་དོར་བཅོམ་ལྡན་འདས་འོད་དཔག་མེད་མཐོང་སྟེ་ཆོས་དང་ལམ་བསྟན་པ་མཐོང་བའི་མོད་ལམ་མྱུར་དུ་རྫོགས་ཏེ་འཕགས་པའི་ས་བརྙེས་ནས་ཞིང་ཁམས་བདེ་བ་ཅན་དུ་སྐྱེ་བར་གསུངས་པ་འདི་ཡང༌། གོང་དུ་དྲངས་པ་ལྟར་སངས་རྒྱས་ཕལ་པོ་ཆེའི་མདོར། བདག་ནི་འཆི་བའི་དུས་བྱེད་གྱུར་པ་ན། །སྒྲིབ་པ་ཐམས་ཅད་དག་ནི་ཕྱིར་བསལ་ཏེ། །མངོན་སུམ་སྣང་བ་མཐའ་ཡས་དེ་མཐོང་ནས། །བདེ་བ་ཅན་གྱི་ཞིང་དེར་རབ་ཏུ་འགྲོ། །ཞེས་པའི་དོན་མ་ནོར་བ་ཁོ་ན་ཡིན་ཏེ། སྐབས་ཀྱི་དོན་སྒྲིབ་པར་འགྱུར་སྙམ་ནས་ལུགས་གཞན་དང་གོ་བསྡུར་ནས་ལུང་རིགས་ཀྱི་སྤྲོས་པ་དོར་བར་བྱའོ། །དེ་ནས་ཁྲིན་ཏུའུ་གྲོང་ཁྱེར་དུ་ཕེབས་ནས་འདུལ་བའི་མཐའ་དཔྱོད་ཀྱི་འཕྲོ་མཐུད་ནས་བརྩམས། དེ་སྐབས་བོད་ཟླ་བཅུ་གཉིས་པའི་ཚེས་བཅུ་ལ་ཨ་ཁུ་སྟོན་པ་ཞེས་པའི་ལས་སྒྲུབ་མི་སྣ་རྣམས་དང་གསུང་མོལ་ཅུང་ཟད་མཛད་དེ། ཟླ་དེའི་ཚེས་བཅུ་བདུན་ལ་མགོ་ལོག་ལུང་སྐྱ་དགོན་གྱིས་གདན་ཞུས་ལྟར་ཕེབས་ནས། ཚེས་བཅོ་བརྒྱད་ཀྱི་སྔ་དྲོར་གྲྭ་མང་ལ་བཀའ་སློབ་དང༌། ཕྱི་དྲོར་མང་ཚོགས་རྣམས་ལ་ནང་ཆོས་ངོ་སྤྲོད་ཀྱི་གསུང་བཤད་ཟབ་མོ་གནང༌། ཉིན་དེའི་དགོང་མོར་དགོན་བར་མའམ་མདོ་ལུའི་རྡོ་ཁ་དགོན་དུ་ཕེབས་ནས་སྔར་དགོན་དེའི་རྡོ་རྗེ་སློབ་དཔོན་བླ་མ་རྡོར་འཛིན་ལགས་ཀྱིས་བསྐུལ་ངོར་དགེ་བའི་བཤེས་གཉེན་རིན་པོ་ཆེ་ཉིད་ཀྱིས་བརྩམས་གནང་མཛད་གྲུབ་པའི་བླ་མ་ལྔ་བཅུ་པའི་འགྲེལ་བ་ཉིན་གསུམ་གྱི་ཡུན་ལ་སེར་སྐྱ་འདུས་སྤྱི་ལ་བཀའ་ཁྲིད་རྫོགས་པར་གནང་ཞིང༌། ཉིན་ཐ་མ་ལ་བྱང་ཆུབ་སེམས་སྡོམ་དང་བསྔོ་བ་སྨོན་ལམ་གྱིས་མཐའ་བརྒྱན་ཏེ། དེ་ནས་རང་དགོན་དུ་ཕེབས་ནས་སྔར་གྱི་འདུལ་བའི་འཕྲོ་མཐུད་ནས་བརྩམས་ཏེ་བཞུགས་སོ། ། བྱེ་བ་ཁྲག་ཁྲིག་བརྒྱད་ཅུ་རྩ་བཞྀའི་སངས་རྒྱས་ཞིང་ཁམས་བཀོད་པ་རྣམས། ། ཡོངས་སུ་བཟླུམས་པ་བདེ་བ་ཅན་ཞེས་སྟོབས་བཅུ་ལྡན་པའི་ཞལ་སྔ་ནས། ། བདེན་གསུང་བསྟོད་པའི་འབྲུག་གི་སྒྲ་ཆེན་དགུན་གྱི་དུས་སུའང་ཆེར་གྲགས་པ། ། འོད་མཐའ་ཡས་པའི་ཞིང་ཁམས་དེ་ལ་རྣམ་དག་རྒྱུ་ཚོགས་བསྐུལ་མ་གནངས། ། སྙིགས་དུས་ཀྱི་བསྟན་པའི་གསལ་བྱེད་ཆེན་པོ་ངག་དབང་འཇིགས་མེད་དངོས་གྲུབ་དཔལ་བཟང་པོའི་མཛད་བཟང་བསླབ་གསུམ་ནོར་བུའི་གླིང་ཁ་ཞེས་བྱ་བ་ལས་བདེ་ཆེན་ཞིང་སྒྲུབ་ཆེན་མོ་བཙུགས་ཏེ་སེར་སྐྱ་རིས་སུ་མ་མཆིས་པར་ཞིང་སྒྲུབ་ལ་སྐུལ་མ་བྱས་པའི་བསྐོར་གྱི་རྣམ་ཐར་མདོར་བསྡུས་པ་སྟེ་ཉེར་གསུམ་པའོ། ། ཆོས་བརྒྱུད་དག་གཙང་གི་གསུང་བཤད་དང་རིས་མེད་མཐོ་སློབ་ལོ་ཕྱེད་རྒྱུགས་སྤྲོད་ཚུགས་བསྐོར་གྱི་རྣམ་ཐར།ཕྱི་ལོ། ༢༠༡༦ བོད་རབ་རྒྱན་མེ་སྤྲེལ་ལོའི་ཟླ་དང་པོའི་ཚེས་དགུ་ལ་སི་ཁྲོན་ཏུའུ་ཅིང་ཡན་དུ་ཕེབས་ནས། དེར་ཆོས་བརྒྱུད་དྲུག་དང་རྙིང་མའི་གདན་ས་ཁག་གི་ཀུན་སྤྱོད་ཡར་བསྐུལ་ཚོགས་ཆེན་ཐེངས་གཉིས་པར་ཕེབས་ནས་དོན་ཚན་གསུམ་གྱི་བཀའ་གསུང་གནང་བ་ནི། དང་པོ། ནང་པ་སངས་རྒྱས་པའི་རྒྱལ་བསྟན་ལ་རང་གིས་མགོ་བཟུང་ནས་ཞབས་ཞུ་བསྒྲུབ་དགོས་པ་དེ་ཡིན། ནང་པ་སངས་རྒྱས་པ་ཞིག་ཡིན་ན་ནང་བསྟན་གྱི་དོན་བསམ་ཕོད་པ། བཤད་ཕོད་པ། སྒྲུབ་ཕོད་པ་དགོས། དེ་ཡང་བོད་ཀྱི་ནང་བསྟན་གྱི་སྣེ་ཁྲིད་པ་མཁན་སྤྲུལ་ཚོས་འདོད་ཆུང་ཆོག་ཤེས་དགོས་པ་ལས། ངག་ནས་འདོད་ཆུང་ཆོག་ཤེས་ཞེས་བཤད་ནས་རང་ཉིད་ཁང་བ་རྫིག་པོ་རླངས་འཁོར་རྫིག་པོ་མཛའ་ན་མོ་མང་པོས་མཐའ་སྐོར་བ་ཡིན་ན་བསྡུ་བའི་དངོས་པོ་བཞི་ལས་དོན་སྤྱོད་པ་དོན་མཐུན་པ་ཞིག་མ་འོངས་པ་རེད། དེང་སང་ཆོས་དང་ཆབ་སྲིད་ནོར་བ། བསྟན་པ་དང་ས་རྡོ་ནོར་བ་མང་བའི་དུས་ཚོད་ལ་རང་གིས་འདོད་ཆུང་ཆོག་ཤེས་བྱས་ནས་ཀུན་སྤྱོད་ཡག་པོ་བྱེད་དགོས། ཀུན་མཁྱེན་མཚོ་སྣ་བས། ཚངས་པར་སྤྱོད་པ་ཉམས་པའི་རྒྱུའི་གཙོ་བོ་ཡོ་བྱད་བསགས་པ་ཡིན་ལ། ཞེས་གསུངས་པ་ལྟར་ཡིན་པས། དཔལ་འབྱོར་ཁོ་ནའི་ཆེད་དུ་བརྩོན་པ་ཡིན་ན་དེས་མི་གསོད་དགོས་ན་རྫུན་བཤད་དགོས་ན་ཉོག་དྲ་བྱེད་དགོས་ན་བྱེད་ངེས་ཡིན་པས་ཀུན་སྤྱོད་ཡག་པོ་རྩ་བ་ནས་མེད་འགྲོ་བར་མ་ཟད། ནང་བསྟན་ལ་བསམ་ན་འདོད་ཆུང་ཆོག་ཤེས་རྩ་བ་ནས་མེད་པར་འགྱུར་འགྲོ་བ་རེད། དོན་ཚན་དང་པོ་འདི་གྲྭ་བ་སྤྱི་དང་བྱེ་བྲག་ཏུ་གཙོ་བོ་དགོན་སྡེའི་སྣེ་ཁྲིད་པ་མཁན་པོ་དང་སྤྲུལ་སྐུ་རྣམས་ལ་ཞུས་པ་ཡིན། དེ་ཡང་དགོན་དཔོན་སོགས་བླ་རྒན་མང་པོས་གནས་ལུགས་ཧ་མ་གོ་བའི་དབང་གིས་སྤྲུལ་སྐུ་དང་རྒྱ་བླ་རྣམས་ལ་རྒྱབ་བརྟེན་བྱས་ནས་ཁྲི་འདོན་དང་སེར་ཕྲེང་གིས་བསུ་བ་དང་རྒྱབ་གཉེར་གྱི་ཡི་གེ་འབྲི་བ་སོགས་རྫུན་མས་རྫུན་མ་བཟོ་བཞིན་པ་འདི་ནི་སྤྱིར་རྒྱལ་བསྟན་ལ་གནོད་པ་ཚབ་ཆེན་པོ་ཡིན་པ་བླ་རྒན་དབང་འཛིན་པ་རྣམས་ཀྱིས་ཤེས་དགོས། གཉིས་པ། ལྟ་སྤྱོད་ཡང་དག་ཡོང་བ་ལ་ཤེས་ཡོན་སློབ་སྦྱོང་ལ་རག་ལས་པ་རེད། གྲྭ་བ་ཞིག་ཡིན་ན་ཐོས་བསམ་སྒོམ་གསུམ་ཡ་མ་བྲལ་བར་དགོས་ལ། དེ་ཡང་འབྲོམ་སྟོན་པ་རྒྱལ་བའི་འབྱུང་གནས་ཀྱིས། ང་ཐོས་དུས་ཙ་ན་བསམ་སྒོམ་འདུག །ང་བསམ་དུས་ཙ་ན་ཐོས་སྒོམ་འདུག །ང་སྒོམ་དུས་ཙ་ན་ཐོས་བསམ་འདུག །ང་བཀའ་བརྒྱུད་ཕྱོགས་སུ་མ་ལྷུང་བ། །ཞེས་གསུངས་པ་ལྟར་དགོས་ལ། དེ་ལྟར་སློབ་སྦྱང་ལེགས་པ་ཡོད་ན་ལྟ་སྤྱོད་ཡག་པོ་ཡོང་ཞིང༌། མེད་ན་ཆོས་པ་ཆོས་པའི་ས་མི་འདུག །དད་པ་དད་པའི་སར་མི་གནས་ལ། དེ་མ་གནས་ན་གང་ཟག་གི་ཆགས་སྡང་ཆོས་ལ་བསྲེས་ནས་བོད་བརྒྱུད་ནང་བསྟན་བསྲེ་སླད་ཅན་དུ་བྱས་དང་བྱེད་བཞིན་པ་རེད། དེ་ཡང་རྒྱ་བརྒྱུད་ནང་བསྟན་སོགས་ཀྱིས་བོད་བརྒྱུད་ནང་བསྟན་ནི་ནང་བསྟན་མ་ཡིན་པར་བླ་མའི་ཆོས་རེད་ཅེས་སྐྱོན་རྗོད་བྱེད་བཞིན་ཡོད་པ་རེད། དེའི་རྒྱུ་མཚན་ནང་ཆོས་ལས་བཤད་པའི་བྱམས་སྙིང་རྗེ་བྱང་ཆུབ་ཀྱི་སེམས་དང་བདག་མེད་གཉིས་སོགས་ལ་མ་ཡིན་པར་ཆོས་ཆོས་ཀྱི་ས་ལ་མ་བཞག་ནས་སྐུ་གསུང་ཐུགས་རྟེན་སོགས་བཞེངས་རྒྱུ་ཟེར་ནས་གཡོ་སྒྱུ་སྣ་ཚོགས་པས་ཡོན་བདག་གི་ལག་ནས་དཔལ་འབྱོར་བསྡུ་ལེན་བྱེད་པ་དང༌། ཆོས་ལ་བརྟེན་ནས་ཆབ་སྲིད་སྒྲུབ་པ་དང༌། ཆོས་ལ་བརྟེན་ནས་ཆོས་བརྒྱད་སྒྲུབ་པ་དང༌། ཆོས་ལ་བརྟེན་ནས་དཔལ་འབྱོར་སྒྲུབ་པ་དང༌། ཚུལ་འཆལ་བ་རེ་ཟུང་གིས་ཆང་དུད་དང་བུད་མེད་བརྟེན་ན་དགོས་པ་ཡོད་ཚུལ་བཤད་ནས་གཞན་མགོ་སྐོར་བ་སོགས་ལ་སྐྱོན་རྗོད་བྱེད་བཞིན་ཡོད་པ་རེད། དེས་ན། སློབ་སྦྱོང་མེད་ན་དགོན་སྡེ་འགའ་ཞིག་གི་དགོན་དཔོན་བཞིན་སྤྱིར་ཡར་རྒྱས་དང་དགོས་སུ་བསྟན་པའི་བཀག་རྡོ་ཆེན་པོ་ཆགས་ཡོད། ད་ཕྱིན་ཆད་དགོན་དཔོན་ལ་སྡེ་སྣོད་འཛིན་པ་བརྟན་མཁས་གཉིས་ལྡན་གྱི་མཁས་དབང་ཞིག་མང་གཙོའི་ལམ་ནས་བཞག་ན་དགོན་སྡེའི་བྱ་བ་སྡེ་སྣོད་འཛིན་པ་དང་དགེ་འདུན་པའི་མང་གཙོ་བྱེད་དགོས་གསུངས་ཡོད་པས་དམ་ཆོས་འདུལ་བ་དང་མཐུན་ལ། དུས་རབས་ཉེར་གཅིག་པའི་འཛམ་གླིང་སྤྱིའི་འགྲོས་དང་མཐུན་པ་ཞིག་རེད། སྤྱིར་བྱ་བ་གང་སྒྲུབ་ན་ཤེས་ཡོན་དང་ལྷག་བསམ་ཉམས་མྱོང་དགོས་པ་རེད། དགོན་དཔོན་བླ་མ་མཚན་ཉིད་ཚང་བ་ཞིག་མེད་པའི་དབང་གིས་དགོན་སྡེ་འགའ་ཞིག་ལ་ཉོག་འཛིང་ཆེས་ཆེ་བ་ཡོང་གི་འདུག །རང་གི་ཁོར་ཡུག་ན་བཤེས་གཉེན་ཚད་ལྡན་སོགས་སློབ་གཉེར་འཐུས་སྒོ་ཚང་བ་མེད་བཞིན་དུ་གྲྭ་ས་འགྲོ་བ་ལ་བཀག་སྡོམ་བྱེད་བཞིན་འདུག །དེ་ལྟའི་བསམ་བློ་ནི་རང་ལ་གཡོག་འཁོར་རེ་དང་རང་དགོན་དུ་བཤད་སྒྲུབ་ཀྱི་མིང་ཙམ་རེའི་ཆེད་དུ་གཞན་གྱི་མི་ཚེའི་མདུན་ལམ་བརླགས་པར་བྱས་པ་རེད། དེར་མ་ཟད། དེང་སང་གི་ལྟ་བ་ངན་པ་མང་པོ་ཞིག་ཀྱང་སློབ་སྦྱོང་མེད་པའི་དབང་གིས་བྱུང་སྟེ། ཟབ་པ་དང་རྒྱ་ཆེ་བའི་གནས་རྣམས་ལ་རྨོངས་བའི་དབང་གིས་རང་གིས་མི་ཤེས་པ་རྒྱུ་མཚན་དུ་བྱས་ནས་ཚེ་སྔ་ཕྱི་དང་ལས་འབྲས་ལ་བསྐུར་བ་བཏབ་མཁན་མང་པོ་ཉིན་རེ་ལས་ཉིན་རེ་ཇེ་མང་དུ་འགྲོ་བཞིན་པ་འདི་ཡང་ཤེས་ཡོན་མེད་པའི་དབང་གིས་ཡིན་པ་རེད། དེ་དག་ལ་ཤེས་ཡོན་མེད་པར་མ་ཟད་ཤེས་འཆལ་གྱི་རྒྱུ་རིག་གནས་གསར་རྗེའི་སྐབས་སུ་དངོས་གཙོ་སྨྲ་བའི་སློབ་གསོ་དེ་གཞུང་གི་སློབ་གྲྭའི་དགེ་རྒན་དང་སློབ་གྲྭ་སོགས་ལས་ཐེབས་ནས། རིམ་གྱིས་གྲྭ་བའི་ནང་བློ་གྲོས་དང་བསོད་ནམས་མི་ལྡན་པ་དག་ལ་སློབ་གསོ་ངན་པས་མགོ་རྨོངས་བར་བྱས་པ་རེད། མདོར་ན་ལྟ་སྤྱོད་ཡར་རྒྱས་འགྲོ་བ་ལ་སློབ་སྦྱོང་དགོས་པ་རེད། གསུམ་པ། རབ་བྱུང་བ་དག་རྫུན་ལས་བརྩམས་ནས་ཞུས་ན། ཕམ་པ་འཆབ་བཅས་བྱུང་བའམ་ཕམ་འདྲ་བྱུང་བ་སོགས་རབ་བྱུང་གི་སྡོམ་པ་མེད་པའི་རབ་བྱུང་གི་ཆ་ལུགས་ཅན་གྱི་གང་ཟག་དེ་དག་ནི་རབ་བྱུང་རྫུན་མ་ཡིན་ལ། རབ་བྱུང་གི་སྡོམ་པ་མེད་པ་དག་གིས་རབ་བྱུང་གི་གོས་ངུར་སྨྲིག་མ་གྱོན་ན་ཡག་པོ་འདུག །རྒྱུ་མཚན་ནི་ལུང་ལས། བསླབ་ལ་མི་གནས་དེ་དག་ཀུན། །གཟུགས་པོ་ཁྱིམ་པར་གནས་པ་མཆོག །ཅེས་སྟོན་པ་ཐུགས་རྗེ་ཅན་གྱིས་བསླབ་པ་ལ་མི་གནས་པ་དག་གིས་རབ་བྱུང་བྱེད་པ་ལས་ཁྱིམ་པ་བྱེད་པ་མཆོག་ཡིན་པར་གསུངས་པ་དང༌། ཀུན་མཁྱེན་དོལ་པོ་པ་ཤེས་རབ་རྒྱལ་མཚན་གྱིས། ཚུལ་ཁྲིམས་འཆལ་བའི་ལུས་ཅན་གཞོན་ནུ་ཁྱོད། །དགེ་སློང་ཚུལ་དུ་མ་འཆོས་དཀར་པོ་གྱོན། །ཚུལ་ཁྲིམས་འཆལ་བའི་ཉེས་པས་མི་ཆོག་པར། །ཚུལ་ཆོས་ཉེས་པས་གོས་ན་མི་རུང་ངོ། །ཞེས་ཚུལ་ཁྲིམས་དང་མི་ལྡན་བཞིན་དུ་རབ་བྱུང་གི་གོས་གྱོན་ན་ཚུལ་འཆལ་གྱི་ཉེས་པས་གོས་པ་མ་ཟད་ཚུལ་ཆོས་ཀྱི་ཉེས་པས་གོས་པར་འགྱུར་བ་ནི་མི་རུང་བར་གསུངས་ལ། གཞན་ཡང་བླ་མ་མི་ཕམ་རྒྱ་མཚོས། གཏེར་སྟོན་པའམ་སྔགས་པར་ཁས་འཆེ་ན། །གྲུབ་མཐུ་ནུས་མེད་ཀུན་གྱི་བཞད་གད་འགྱུར། །རབ་བྱུང་བསླབ་ལ་ལེགས་གནས་དེ་གཅིག་པུས། །གྲུབ་མཚན་མེད་ཀྱང་ཀུན་ཀྱི་མཆོད་འོས་ཡིན། །ཞེས་གསུངས་པ་ལྟར་གྲུབ་པའི་རྟགས་མཚན་མངོན་དུ་གྱུར་བའི་གང་ཟག་མ་ཡིན་ན་ཕྱི་རབ་བྱུང་གི་སྤྱོད་པས་ཞི་ཞིང་དུལ་བ་བྱེད་ན་ལེགས་པར་གསུངས་པ་དང༌། འདུལ་བ་ལུང་ལས། གང་ཞིག་རབ་ཏུ་བྱུང་ཡང་ཡོན་ཏན་སྣོད་མ་གྱུར། །སྐྲ་དང་ཁ་སྤུ་བྲེགས་ཀྱང་དགེ་སྦྱོང་ཚུལ་མ་ཞུགས། །རབ་བྱུང་དེ་ནི་རབ་བྱུང་མ་ཡིན་ཁྱིམ་པའང་མིན། །ཆུ་མེད་ཁྲོན་པ་རི་མོའི་མར་མེ་ཇི་བཞིན་ནོ། །ཞེས་གསུངས་པ་ལྟར་ཤེས་པ་གལ་ཆེ་བ་ལས་ལོང་བས་ལོང་བ་ཁྲིད་པའི་ངང་ཚུལ་ལྟར་བླ་མ་རེ་ཟུང་གིས་སློབ་སྟོན་ངན་པའམ་ཡུལ་སྲོལ་ངན་པ་སོགས་ཀྱི་དབང་གིས་རབ་བྱུང་གི་སྡོམ་པ་ཉམས་ཀྱང་སེར་མོའི་གོན་པ་གྱོན་ན་བཟང་མདོག་བཤད་པའི་དབང་གིས་སྐྱ་སེར་གཉིས་ཀའི་གཞི་མཐུན་ལྟ་བུར་བྱེད་པ་དང༌། ཁ་ཅིག་ཁ་ཟེར་ལ་འཛེམས་ནས་ཁྱིམ་པའི་གོས་གྱོན་མ་ནུས་པ་ཡང་ཉུང་ཤོས་སྲིད་ལ། གཙོ་བོ་ལས་ཀ་བྱས་ནས་རང་ཁ་གསོ་བ་དཀའ་ནས་ཆོས་ལ་བརྟེན་ཏེ་ལྟོ་རྒྱབ་ཚོལ་བའམ་དཀོར་ཟ་བའི་ཆེད་ཙམ་ལ་དམིགས་ནས་རབ་བྱུང་གི་གོན་པ་གྱོན་པ་ནི་བསྟན་པ་ལ་ཤིན་ཏུ་མི་འོས་པའི་ལས་ཡིན་པས། བདག་ལེགས་སུ་འདོད་པ་རྣམས་ཀྱིས་གནས་དེ་ལྟ་བུ་ལ་གཟབ་དགོས་ཏེ། སྟོན་པ་ཐུགས་རྗེ་ཅན་གྱིས། ང་མིན་ང་འདྲ་ཞིག་གིས་བཤིག །ཅེས་གསུངས་པ་ལྟར་འགྱུར་བའི་གནས་སུ་སྣང་ངོ། །རྒྱུ་མཚན་དེས་ན་སྤྱིར་བསླབ་པ་ཕུལ་བ་དགག་བྱའི་བསླབ་བྱ་ཡིན་ཡང་སྡོམ་པ་གཏན་ནས་སྲུང་མ་ནུས་ན་བསླབ་པ་ཕུལ་བ་ལ་འདས་མ་ད་གསུམ་གྱི་དགོས་པ་ཡོད་དེ། སྔར་སྡོམ་པ་བསྲུངས་བའི་བསོད་ནམས་མི་ཉམས་པ་དང༌། ད་ལྟ་ཕམ་པ་མི་འབྱུང་བ་དང༌། མ་འོངས་པ་ན་སྡོམ་པ་སླར་གསོ་བའི་སྐལ་བ་ཡོད་པ་རེད། ནང་པ་སངས་རྒྱས་པ་ཞིག་ཡིན་པ་ནས་བཟུང་ནང་བསྟན་ལ་ཕན་མ་ཐོགས་ན་རང་ལ་བརྟེན་ནས་མི་གནོད་པ་རེ་བྱེད་དགོས་པ་རེད། དེང་སང་བརྡ་ཕྲིན་གྱི་དུས་ཚོད་ཡིན་པས་གང་ཟག་སྒེར་བ་ཞིག་གིས་བྱ་བ་བྱེ་བྲག་པ་ཞིག་ལ་བརྟེན་ནས་ནང་བསྟན་དང་དགེ་འདུན་པ་སྤྱི་ལ་སྨོད་པ་འབྱུང་གིན་ཡོད་པ་ཁྱེད་རྣམ་པས་མཁྱེན་གསལ་ལྟར་རེད། དད་ལྡན་མང་ཚོགས་རྣམས་ཀྱིས་གྲྭ་བ་དག་རྫུན་ཤེས་ནས་བླང་དོར་འབྱེད་དགོས་པ་ལས། ཤི་གསོན་གྱི་ཆེད་འཁོར་བ་ཁ་གསོ་བའི་ཆ་རྐྱེན་དུ་ཡོན་སྦྱར་ན་ཡག་པོ་རྩ་བ་ནས་མི་འདུག །ཁ་ཅིག་གིས་རང་སྐྱོན་འགེབས་པའི་ཕྱིར་སྔགས་ཀྱི་དམ་ཚིག་མི་སྲུང་བའི་ངུར་སྨྲིག་གྱོན་པ་དག་ལ་སངས་རྒྱས་མ་གཏོགས་གང་ཟག་གི་ཚོད་གང་ཟག་གིས་མི་ཟིན་པ་རེད་ཅེས་བཤད་པ་དེ་ནི་མི་རིགས་ཏེ། དེའི་དོན་མ་གོ་བ་ལས་བདག་ཅག་གི་སྟོན་པ་རང་གིས་ཚོད་བཟུང་ནས། ཇི་སྐད་དུ། ཚུལ་ཁྲིམས་འཆལ་ལ་ཐུབ་དབང་གིས། །སྔགས་སྒྲུབ་པར་ནི་མ་གསུངས་ཏེ། །ཞེས་དང༌། བྱང་ཆུབ་སེམས་དཔའ་བློ་ལྡན་གྱི། །རིགས་ནི་མཚན་མ་དག་ལས་ཤེས། །ཞེས་སོགས་གསུངས་ཡོད་པ་དང༌། དེར་མ་ཟད་གང་ཟག་གི་ཚོད་གང་ཟག་གིས་མི་ཟིན་པ་ཡིན་ན་དེ་དག་བཟང་བ་ཡིན་པ་ཁྱེད་ཀྱིས་ཤེས་པ་འགལ་བར་འགྱུར་ལ། ཡང་ཁ་ཅིག་གིས་ཚུལ་ཁྲིམས་འཆལ་བ་ལ་གོས་ངུར་སྨྲིག་གྱོན་དུ་མ་བཅུག་ན་གོས་ངུར་སྨྲིག་འཕྲོག་པའི་རྩ་ལྟུང་འབྱུང་ཟེར་བ་དེ་ནི་ཧ་ཅང་བློ་རྩིང་བའི་སྐྱོན་ཡིན་ཏེ། གོས་ངུར་སྨྲིག་འཕྲོག་པའི་རྩ་ལྟུང་གཞན་ལ་ཕྲག་དོག་དང་ཞེ་སྡང་གི་དབང་གིས་གོས་ངུར་སྨྲིག་འཕྲོག་ན་འབྱུང་བ་ཡོད་ཀྱང༌། བསྟན་པ་ལ་ལྷག་བསམ་གྱི་དབང་གིས་བསྟན་པའི་མིག་ལྟོས་ལ་མི་ཡག་པ་དང་བསྟན་པ་སྤྱིའི་མཚན་སྙན་གྱི་ཆེད་དུ་སློབ་གསོ་བྱེད་པ་ལ་རྩ་ལྟུང་འབྱུང་བའི་གནས་མེད། སྟོན་པ་ཐུགས་རྗེ་ཅན་གྱིས། ཚུལ་ཁྲིམས་འཆལ་བ་གནས་ནས་སྤྲད་དགོས་པར་གསུངས་བ་དང༌། སངས་རྒྱས་གཉིས་པ་སློབ་དཔོན་དབྱིག་གཉེན་རྒྱ་གར་ནས་བལ་ཡུལ་དུ་ཕེབས་སྐབས་ངུར་སྨྲིག་གྱོན་པ་དག་གིས་ཞིང་རྨོ་བ་སོགས་གཟིགས་པས་ཐུགས་སྐྱོ་ནས་སྐུ་མྱ་ངན་ལས་འདས་པའི་ལོ་རྒྱུས་ཡོད་པས་ཚུལ་ཁྲིམས་འཆལ་བས་རབ་བྱུང་གི་གོས་ངུར་སྨྲིག་གྱོན་མི་རུང་བ་སངས་རྒྱས་སམ་དམ་ཆོས་འདུལ་བའི་དགོངས་པ་ཡིན་པ་རེད། ཁ་ཅིག་གིས་དེ་དག་ལ་དག་སྣང་སྦྱང་ཁུལ་བྱེད་པ་དག་སྣང་ནོར་བ་རེད། སྤྱིར་ཁྱིམ་པ་རྣམས་ཀྱིས་རབ་བྱུང་ནང་བཞིན་མདོ་སྔགས་ཡོངས་རྫོགས་ལ་ཐོས་བསམ་བྱེད་མ་ནུས་ན་ཡང་ནང་ཆོས་ཀྱི་གོ་བ་རགས་རིམ་དང་དགེ་འདུན་པ་མཚན་ཉིད་པ་ཡིན་མིན་གྱི་ཁྱད་པར་ཤེས་དགོས། དཔེར་ན། ཚོང་ར་ཞིག་ལ་སོང་ནས་བཅའ་ལག་དག་རྫུན་ཁྱད་པར་ཤེས་ན་དག་མ་དེ་ཉོ་ཤེས་ལ་མ་ཤེས་ན་རྫུན་མས་མགོ་གཡོག་པ་མང་བ་ལྟར་ཡིན་པ་རེད། དེས་ན་ཁྱིམ་པ་ལ་ནང་ཆོས་ངོ་སྤྲོད་གལ་ཆེ། གྲྭ་བ་རྣམས་ཀྱིས་རང་ལ་ཡིད་ཆེས་བྱེད་པའི་དད་ལྡན་མང་ཚོགས་མི་བསླུ་བ་གལ་ཆེན་རེད་མ་གཏོགས་སྤྱིར་མི་སུ་ཡིན་ན་རང་ལ་ཡིད་ཆེས་བྱེད་མི་ཞིག་ཡིན་ན་བསླུ་ཐུབ་ལ་རང་ལ་ཡིད་ཆེས་མེད་པའི་གང་ཟག་ཞིག་བསླུ་མི་ཐུབ་པ་ཡིན་པས་ན། ང་ཚོས་རང་ལ་ཡིད་ཆེས་པའི་དད་ལྡན་མང་ཚོགས་མི་བསླུ་བ་དགོས། དེ་མི་བསླུ་བ་ལ་ལུང་སྡེ་སྣོད་གསུམ་ལ་འཆད་ཉན་དང་བསླབ་པ་གསུམ་ལ་ཉམས་ལེན་དགོས་པ་རེད། ཅེས་སྐབས་དེའི་གསུང་ཟིན་ཕབ་པའོ། །དེ་ནས་ཚེས་བཅོ་བརྒྱད་ལ་ཡུལ་དགོན་དུ་བདེ་མཆོག་སྒྲུབ་མཆོད་ཀྱི་སྐབས་སུ་གྲྭ་མང་ལ་བཀའ་སློབ་དང་དགོན་གཞུང་གི་ཞིབ་ཕྲའི་རྩིས་ཁྲ་སྙན་ཞུ་གནང༌། ཚེས་ཉི་ཤུ་གཉིས་ཉིན་ཆོས་ཐང་དགོན་དུ་ཞབས་སོར་བཀཽད་དེ་གངས་ལྗོངས་རིས་མེད་མཐོ་སློབ་ཀྱི་འཛིན་གྲྭ་ཁག་སོ་སོའི་ལོ་གཅིག་གི་སློབ་གཉེར་གྱི་བྱ་བའི་དབུ་བཟུང༌། བོད་ཟླ་གཉིས་པའི་ཚེས་བཅོ་ལྔ་ལ་ཨ་མདོ་བརྙན་འཕྲིན་ཁང་ནས་གདན་ཞུ་ལྟར་མཚོ་སྔོན་ཟི་ལང་གྲོང་ཁྱེར་དུ་ཕེབས་ཏེ་ཚེས་བཅུ་བདུན་ཉིན་ཁ་བརྡ་ལེའུ་ཚན་ནས་སྲོལ་རྒྱུན་གྱི་ཤེས་བྱའི་གླེང་མོལ་མཛད་ཅིང༌། ཕྱི་ཉིན་ནས་སློབ་གླིང་དུ་བྱོན། བོད་ཟླ་གསུམ་པའི་ཚེས་ཉེར་གཉིས་ཉིན་ཇོ་ནང་བསྟན་འགྲོ་ཀུན་ཕན་ལྷན་ཚོགས་ཐོག་ཏུ་ཕེབས་ནས་སྤྱིར་རྒྱལ་བསྟན་དང་ཇོ་ནང་བའི་བཤད་སྒྲུབ་ཟུང་གི་བསྟན་པ་ལ་གལ་ཆེན་གྱི་སྙན་ཞུ་དོན་ཚན་ཉི་ཤུ་རྩ་གཅིག་གི་ཞུ་བ་ཕུལ། བོད་ཟླ་བཞི་སྔ་མའི་ཚེས་ཉེར་གསུམ་ཉིན་རིགས་སྨྲ་བ་གྲྭ་འཁོར་ཉི་ཤུ་དང་བཅས་མགོ་ལོག་ལུང་དཀར་དགོན་དུ་ཚད་མའི་དགུན་ཆོས་ཆེན་མོར་གདན་ཞུས་ལྟར་ཞབས་སོར་བཀོད་ཅིང༌། གྲྭ་མང་འདུས་པ་རྒྱ་མཚོར་བཀའ་སློབ་ལམ་སྟོན་དང་ལུང་རིགས་ཀྱི་བརྒལ་བརྟག་གྱ་ནོམ་པ་མཛད། དེ་སྐབས་སུ་བཤེས་གཉེན་རིན་པོ་ཆེ་ཉིད་ཀྱི་སྐུ་སྲིང་ལེགས་མཚོ་མ་ཞེས་པ་ཞིག་ཡོད་པ་དེ་ཚེའི་དུས་བྱས་པས། ཡུལ་དུ་ཕེབས་ནས་དབང་དང་འཕོ་བ་བསྔོ་བ་སྨོན་ལམ་སོགས་གསུངས་ཏེ་ཞག་ཁ་ཤས་ལ་བཞུགས། དེ་ནས་རྔ་ཡུལ་ཨ་དཔའ་དགོན་དུ་གཞན་སྟོང་བགྲོ་གླེང་ཐེངས་བཅུ་གཅིག་པ་འཚོགས་པར་ཕེབས་ནས་བཀའ་སློབ་ཟབ་རྒྱས་གནང་ཞིང་ཕྱིར་སློབ་གླིང་དུ་ཕེབས། བོད་ཟླ་བཞི་པའི་ཚེས་ཉེར་གཅིག་ལ་གངས་ལྗོངས་རིས་མེད་མཐོ་སློབ་གཙུག་ལག་སློབ་གཉེར་ཁང་ཆེན་མོའི་ལོ་ཕྱེད་རྒྱུགས་སྤྲོད་ཆེན་མོ་ཐེངས་དང་པོ་དབུ་བརྙེས། དགེ་བའི་བཤེས་གཉེན་རིན་པོ་ཆེ་ཉིད་ཀྱི་ཞལ་སྔ་ནས། སྤྱིར་སློབ་སྦྱོང་གང་ཡིན་ན་ཡང་རྒྱུགས་འབྲས་ཙམ་གྱི་ཆེད་ཡིན་མི་རུང་ལ། ལྷག་པར་ནང་པ་སངས་རྒྱས་པའི་ཆོས་ལ་སློབ་གཉེར་བྱེད་པ་དེ་རྒྱུགས་འབྲས་ཀྱི་ཆེད་ཡིན་པ་དེ་བས་ཀྱང་ག་ལ་རུང༌། འོན་ཀྱང་དེང་གི་ཆར་འཛམ་བུ་གླིང་གི་སློབ་གྲྭ་ཆེ་འབྲིང་ཆུང་གསུམ་གང་ཡིན་ཡང་རྒྱུགས་སྤྲོད་མེད་ས་ཞིག་ཧ་ལམ་ཡོད་རྒྱུ་མ་རེད། རང་བཞིན་གྱིས་སློབ་གཉེར་ལ་བརྩོན་འགྲུས་དང་དོན་གཉེར་རབ་ཡོད་མཁན་ཞིག་ལ་རྒྱུགས་སྤྲོད་འདི་དགོས་གལ་ཆུང་ངུ་རེད། ཡིན་ན་ཡང་དེ་འདྲ་བའི་མི་བརྒྱ་ལ་གཅིག་ཙམ་ཡིན་རྒྱུ་རེད། དེང་སང་ལྷག་པར་དུ་གཡེང་རྐྱེན་ཤིན་ཏུ་ཆེ་བས་རང་མོས་རང་འདུན་ཁོ་ནས་སྟེང་ནས་སློབ་གཉེར་ཆ་ཚང་ལ་སྤུས་དག་པ་ཞིག་འོང་དགོས་ན་དཀའ་ལས་ཁག་པོ་རེད། དེར་མ་ཟད་རྒྱུགས་སྤྲོད་ཀྱི་སྟེང་ནས་བརྒྱ་ཆ་བརྒྱའི་ཚོད་ཐིག་མོ་འོང་རྒྱུ་དཀའ་ན་ཡང༌། སློབ་འབྲས་ཀྱང་ཧ་ལམ་ཞིག་འཛིན་ཐུབ་པ་རེད། གྲྭ་ས་ན་གསུང་སྲོལ་ཞིག་ལ། ལོ་གཅིག་གི་ནང་དགེ་རྒན་ཆེན་མོ་གཉིས་ཡོད་པ་རེད། གཅིག་ཕྱོགས་ཆེན་མོའི་འཛིན་གྲྭ་གཏུག་རྒྱུ་དང་གཉིས་ལོ་འཁོར་རྒྱུགས་སྤྲོད་ཆེན་མོ་རེད། དེ་གཉི་གའི་སྐབས་སུ་དོན་གཉེར་མེད་མཁན་ཞིག་ཡིན་ན་ཡང་ཤུགས་ཅུང་ཟད་ཅིག་མ་བརྒྱབ་རང་རྒྱབ་ཆགས་ཡོད་པ་རེད། ང་ཚོས་ཀྱང་འདང་བརྒྱབ་པ་ཡིན་ཏེ། འདིའི་ནང་གི་ཁ་ཤས་ལ་རྒྱུགས་སྤྲོད་ཅིག་གཞི་ནས་མི་དགོས་པ་ལྟ་བུའི་དོན་གཉེར་ཅན་འདུག །ལྷག་པར་དུ་དེ་ཚོ་ལ་ལོ་ཕྱེད་སོགས་ཀྱི་རྒྱུགས་སྤྲོད་ཇེ་མང་ལ་བཏང་ན་ཕན་པ་ཆེ་མིན་དང་གནོད་པ་ཡོང་མིན་བཤད་དཀའ་མོ་རེད། ཡིན་ན་ཡང་གྲྭ་མང་སྤྱི་ལ་བསམ་ན་དགོས་གལ་དང་ཕན་ཐོགས་ཆེན་པོ་འདུག་བསམས་ནས་བཞག་པ་ཡིན་གསུངས་སོ། །ལོ་དེར་མདོ་ལིའི་རྡོ་ཁ་དགོན་ལྷ་དབང་གྲགས་པ་དང༌། རྒྱལ་རོང་ཁང་སར་དགོན་ཤེས་རབ་རིན་ཆེན་གཉིས་མཁན་པོར་མཚན་གསོལ་མཛད་པ་ཡིན་ནོ། ། ཁྲིམས་གཙང་རབ་བྱུང་ཀླུ་དབང་ཕོ་བྲང་ན། ། ཁྲིམས་མེད་སྦལ་བ་རྨ་ཅན་གཅིག་བྱུང་པས། ཀླུ་ཚོགས་ཀུན་ལ་ནད་ཀྱིས་འདེབས་པ་ལྟར། ། བསྟན་ཞབས་གཙང་མར་རྒྱུན་དུ་ཕྱག་ལས་མཛད། ། སྙིགས་དུས་ཀྱི་བསྟན་པའི་གསལ་བྱེད་ཆེན་པོ་ངག་དབང་འཇིགས་མེད་དངོས་གྲུབ་དཔལ་བཟང་པོའི་མཛད་བཟང་བསླབ་གསུམ་ནོར་བུའི་གླིང་ཁ་ཞེས་བྱ་བ་ལས་ཆོས་བརྒྱུད་དག་གཙང་གི་གསུང་བཤད་དང་རིས་མེད་མཐོ་སློབ་ལོ་ཕྱེད་རྒྱུགས་སྤྲོད་ཚུགས་བསྐོར་གྱི་རྣམ་ཐར་མདོར་བསྡུས་པ་སྟེ་ཉེར་བཞི་པའོ། ། ཆོས་བརྒྱུད་དག་གི་ལྟ་བའི་གནད་གཅིག་ཚུལ་གྱི་གསུང་བཤད་དང་གསེར་ལྡན་རྒྱལ་ཁབ་ལ་ཕེབས་བསྐོར་གྱི་རྣམ་ཐར།བོད་ཟླ་བཞི་པ་ཕྱི་མའི་ཚེས་ཉེར་བཞི་ལ། ཕྱི་བསྐྱོད་ལམ་ཡིག་ལེན་ཆེད་རྒྱལ་ཁབ་ཀྱི་སྣེ་ཤན་འོག་ཟི་ཁྲོན་ཁྲིན་ཏུའུ་གྲོང་ཁྱེར་ནས་ཐའེ་ལན་ནམ་གསེར་ལྡན་རྒྱལ་ཁབ་ཏུ་ཉིན་ཁ་ཤས་སུ་མཆོད་མཇལ་དང་ཡུལ་ལྗོངས་སོགས་ལ་གཟིགས་མོར་མཛད། ཁོང་དང་སྐབས་དེར་ལྷན་དུ་ཁེལ་བའི་དབུས་ཀྱི་བཀའ་བརྒྱུད་པའི་བླ་མ་ཞིག་གི་གསུང་དོན། ཁོ་གཉིས་གནམ་གྲུ་ལ་བསྡད་དུས་འདུག་ས་ལྷན་དུ་ཁེལ་འདུག །གནམ་གྲུའི་ནང་ན་རྒྱ་བོད་མང་པོ་དང༌། བོད་པའི་གྲྭ་པ་ཡང་འགའ་ཤས་འདུག །ཕར་བལྟས་ཚོད་ཙམ་ལ་ཚང་མ་རྫིག་པོ་དང་སྣང་བ་མཐོ་མཐོ་འདྲ་གནང་འདུག་མཁན་གྱི་རྣམ་པ་འདྲ་བ་ཞིག་འདུག །ཁོང་ལ་བལྟས་དུས་གཉོམ་ཆུང་ཚུལ་མཐུན་དང་ལྟོ་སྐྱ་གོས་ཧྲུལ་འདྲ་བ་ཞིག་འདུག་ལ། ཁ་བརྡ་ཉུང་ཙམ་མོལ་བ་ཡིན་ཏེ་གྲྭ་བ་གྲྭ་རྐྱང་ཁོ་ན་ཞིག་རེད་བསམ་པ་ལས། བླ་མ་ཆེ་ཞིག་ཡིན་སྙམ་གྱི་ཚོར་སྣང་ཅུང་ཟད་ཀྱང་སྦྱིན་མ་སོང༌། ངས་ཀྱང་ཉིན་ཁ་ཤས་དེའི་རིང་ལ་ཁོང་ལ་གོང་བཀུར་སོགས་གང་ཡང་མ་ཞུས་ཀྱང༌། སེམས་སུ་གྲྭ་བ་ཡག་པོ་ཞིག་འདུག་བསམ་ནས་སེམས་ནས་ཁས་ལེན་འདྲ་ཞིག་རང་བཞིན་གྱིས་ཐོབ་འོང་ཐལ། ང་ལ་ནི་རྐང་པ་ཡང་བདེ་པོ་མེད་པས་ཡར་མར་འགྲོ་འདུག་སྐབས་ཚང་མ་ཁོང་གིས་ང་ལ་ཞབས་གཡོགས་རྐྱང་པ་བྱས་ཡོང་བ་ཡིན། དེ་ནས་ཕྱིར་ལོག་ནས་ཤེས་ཡོན་གནམ་ཐང་ལ་འབྱོར་དུས་བོད་པ་ཁ་ཤས་ཀྱིས་ཁོང་ལ་ཁ་ཏག་བཟུང་ནས་བླ་མ་སང་ཟེར་ནས་གུས་བཀུར་འདྲ་བཟོ་གི་འདུག །དེ་དུས་ངས་བླ་མ་ཞིག་ཡིན་འདུག་ག་བསམས་ནས་གཟོད་ཅུང་ཟད་ཅིག་ཧ་གོ་བ་ཡིན། ཁོང་གིས་སྤྱོད་ཚུལ་གྱིས་ངའི་སེམས་ལ་སྔོན་ནས་ཁས་ལེན་དང་དད་པ་བྱིན་ཚར་ཡོད་པའི་རྐྱེན་གྱིས། ངས་ཀྱང་ཁོང་ལ་སྐྱབས་ཞུ་ཞིག་གི་དོད་ཡིན་ཟེར་ནས་སྒོར་སྟོང་དང་ལྔ་བརྒྱ་ཕུལ་ནས་སོ་སོར་སོང་བ་ཡིན། ག་ལེ་ག་ལེར་བལྟས་འོང་དུས་ཁོང་ནི་དེང་གི་ཆར་ཆོས་བརྒྱུད་ཅིག་གི་བསྟན་པའི་མེ་རོ་སླར་ཡང་གསོ་བར་མཛད་པའི་བླ་ན་མེད་པའི་སྐྱེས་བུ་ཆེན་པོ་ཞིག་ཡིན་པ་གོ་སོང་བས། དད་པ་དང་དུང་བ་ཆེས་ཆེར་སྐྱེས་ཏེ་རྒྱུན་དུ་ཁོང་ལ་འབྲེལ་བ་བྱེད་བཞིན་པ་ཡིན་གསུངས་སོ། །ཐའེ་ལན་ནས་ཕྱིར་ཐོན་ཏེ་ཆོས་ཁྲིད་སོགས་ཆགས་མེད་དུ་གནང་ཞིང༌། བོད་ཟླ་ལྔ་བའི་ཚེས་བཞི་ལ་མགོ་ལོག་ནང་བསྟན་མཐུན་ཚོགས་ཀྱིས་གཙོ་སྒྲུབ་བྱས་ནས་དར་ལག་རྫོང་གི་ཉེ་འདབ་རྨ་གཞུང་ན་མགོ་ལོག་རྫོང་ཁག་དྲུག་གི་ཆོས་ལུགས་མི་སྣ་གཙོས་ས་གནས་གཞན་ནས་ཕེབས་པའི་ཚོགས་མི་མང་པོ་ཞལ་འཛོམས་པའི་ཚོགས་ཐེངས་དང་པོའི་སྟེང་དུ་རབ་སྔགས་གཉིས་ཀྱི་ཀུན་སྤྱོད་རྣམ་དག་དགོས་ཚུལ་སྐོར་ནས་གསུང་བཤད་དང་དྲི་བ་དྲི་ལན་བཅས་མཛད། བཤེས་གཉེན་རིན་པོ་ཆེ་གང་ཉིད་ཀྱི་ཞལ་སྔ་ནས། སྤྱིར་མི་ཆོས་ཀྱི་རྩ་བ་ཀུན་དང་མཐུན་པ་ཞེས་གསུངས་པ་ལྟར་ཡིན་ན་ཡང༌། སངས་རྒྱས་ཀྱི་བསྟན་པ་རིན་པོ་ཆེའི་དོན་དག་ཏུ་མི་ངོ་རྒྱུ་ངོ་ལྟ་རྒྱུ་ཅི་ཡང་མེད། ཆེ་མཐོ་ས་ནས་ཡིན་ནའང་རུང༌། ཆུང་དམའ་ས་ནས་ཡིན་ཡང་ཆོག །སུས་བཤིག་ན་ངོ་སྲུང་རྒྱུ་དང་འདང་མང་པོ་གཏོང་རྒྱུ་མེད། རང་གི་ནུས་པ་ཐོན་ཚོད་ཀྱིས་ཞུ་ཡོང་གི་ཡིན། དེས་རྐྱེན་གྱིས་སྔོན་ཆད་ཡིན་ཡང་སྒྲོ་འདོགས་སྐུར་འདེབས་བྱེད་མི་རེ་ཟུང་བྱུང་བ་རེད་ལ། བར་ཆད་ཀྱི་ལས་ཀ་ཡང་མང་པོ་ཙམ་བརྩམས་མྱངས་པ་རེད། ཡིན་ན་ཡང༌། དེ་ཙམ་གྱིས་འཇིགས་རྒྱུ་སྐྲག་རྒྱུ་ཁྱོན་ནས་མེད། མ་འོངས་པར་ཡང་བདེན་པ་ཨུ་ཚུགས་མཐར་སྐྱེལ་བྱས་ཏེ་དཀའ་ངལ་གང་ལ་ཡང་གདོང་གཏད་འདུན་ཡིན། བསྟན་པ་རིན་པོ་ཆེའི་དོན་དུ་རང་ནུས་ཀྱིས་ལྷག་བསམ་རྣམ་དག་གི་ལས་ཀ་སྒྲུབ་ཡོང་ན། མི་གཞན་གྱིས་ཁ་ལ་བཟང་ངན་ཅི་བཤད་རུང་རྣ་བ་གཏད་འདོད་མེད་ཅིང༌། གཞན་པའི་ཁ་ནང་གི་ཚིག་སྙན་མོ་ཙམ་ལ་དེ་ཙམ་རེ་བ་ཆེན་པོ་བྱེད་ཀྱིན་མེད། སྙིགས་མའི་དུས་འདིར་བསྟན་པ་དང་འགྲོ་བའི་དོན་ཅུང་ཟད་ཨེ་འགྲུབ་སྙམ་ནས། ངག་གིས་བཤད་ཅིང་ལུས་ཀྱིས་བྱ་བ་བསྒྲུབས་ན་འགལ་རྐྱེན་ཡོད་ངེས་པས་ང་ལ་རེ་ལྟོས་གནང་མཁན་ཚོས་དོན་མེད་པའི་སྡིག་པ་མི་རུང༌། བྱང་ཆུབ་སྤྱོད་པ་ལ་འཇུག་པ་ལས། བདག་ལ་སྨོད་པ་གཞན་ཡོད་ན། །བསྟོད་པས་བདག་དགར་ཅི་ཞིག་ཡོད། །བདག་ལ་བསྟོད་པ་གཞན་ཡོད་ན། །སྨད་པས་མི་དགར་ཅི་ཞིག་ཡོད། །སེམས་ཅན་མོས་པ་སྣ་ཚོགས་པ། །རྒྱལ་བས་ཀྱང་ནི་མི་མགུ་ན། །བདག་འདྲ་ངན་པས་སྨོས་ཅི་དགོས། །ཞེས་གསུངས་པ་ལྟར་ཐུགས་བསམ་བཞེས་དགོས་ཞེས་ཞལ་གདམས་ལན་གཅིག་མ་ཡིན་པར་ཡང་ནས་ཡང་དུ་གསུངས་པས། ཁོ་བོ་ལྟ་བུར་ཡང་དོན་ལག་ལེན་ལ་རྗེས་སུ་སློབ་པ་མེད་ཀྱང་གསུངས་དེ་རང་བཞིན་གྱིས་རྣ་བར་འཇགས་འགྲོ་བ་ཞིག་བྱུང་ངོ༌། །བོད་ཟླ་དྲུག་པའི་ཚེས་བཅུ་དྲུག་ཉིན་པེ་ཅིན་ནང་བསྟན་སློབ་གླིང་དུ་ཉིན་བདུན་གྱི་སློབ་སྦྱོང་ཞིག་ཏུ་ཕེབས། བོད་ཟླ་བདུན་པའི་ཚེས་བདུན་ལ་ཚབ་ཚ་དགོན་དུ་གངས་ལྗོངས་བཀའ་བརྒྱུད་བགྲོ་གླེང་ཆེན་མོར་ཕེབས་ནས་བཀའ་བརྒྱུད་པའི་བསྟན་པ་འཛིན་སྐྱོང་སྤེལ་གསུམ་བྱེད་ཕྱོགས་ལས་བརྩམས་ཏེ་བཀའ་སློབ་ཟབ་རྒྱས་དང༌། དམ་བཅའ་དང་ཆོས་རའི་སྐབས་རྣམས་སུ་ལུང་རིགས་ཀྱི་འབེལ་གཏམ་གནད་སྨིན་དང༌། གཞན་ཡང་དད་ལྡན་མང་ཚོགས་ལ་ནང་ཆོས་ངོ་སྤྲོད་བཅས་མཛད། སྐབས་དེར་མཁས་པ་ཁ་ཤས་ཀྱིས། གཞན་སྟོང་བདེ་བར་གཤེགས་པའི་སྙིང་པོ་བདེན་པར་གྲུབ་པ་ཡིན་ན། གཞན་སྟོང་རྟོགས་པའི་བློ་དེ་བདེན་འཛིན་གྱི་གཉེན་པོར་ཇི་ལྟར་འགྱུར་དྲིས་པར། གཞན་སྟོང་བདེན་པར་གྲུབ་ལུགས་དང་བདེན་འཛིན་གྱི་འཛིན་སྟངས་གྲུབ་ལུགས་སོ་སོ་བ་རེད། བློ་རྣམ་ཤེས་ཀྱིས་བཟུང་བ་ལྟར་ཡུལ་རང་ངོས་ནས་གྲུབ་གྲུབ་འདྲ་བ་ཞིག་འཛིན་པ་ལྟར་དུ་ཡོད་ན་བདེན་འཛིན་གྱིས་འཛིན་པ་ལྟར་གྲུབ་ལུགས་རེད། དོན་དམ་གཞན་སྟོང་བདེན་པར་གྲུབ་ལུགས་ནི་དེ་ལྟར་མ་ཡིན་པར། འཕགས་པའི་མཉམ་བཞག་ཡེ་ཤེས་ལ་སྣང་གནས་མཐུན་པའི་དོན་གྱིས་ན་བདེན་པར་གྲུབ་ཅེས་པ་རེད། ཤེས་རབ་སྙིང་པོའི་མདོ་ལས། མི་རྫུན་པས་ན་བདེན་པར་ཤེས་པར་བྱ་སྟེ། ཞེས་པ་ལྟར་མི་བསླུ་བ་སྣང་གནས་མཐུན་པའི་ཆོས་ཡིན་པས་ན་བདེན་པར་གྲུབ་པ་རེད། དོན་དམ་པའི་སྟོང་པ་ཉིད་བདེན་པར་མ་གྲུབ་ཅིང་བདེན་པ་ཡིན་པའི་ཁྱད་འབྱེད་མཁན་ཡང་ཡོད་པ་རེད་དེ། ཇོ་ནང་བའི་ལུགས་ལ་བདེན་པ་ཡིན་ན་བདེན་པར་གྲུབ་དགོས་ཏེ། དངོས་པོ་ཡིན་ན་དངོས་པོར་གྲུབ་དགོས་པ་བཞིན་རེད། གཞན་སྟོང་རྟོགས་པའི་བློ་དེ་མ་རིག་པ་བདེན་འཛིན་གྱི་གཉེན་པོར་འགྱུར་ལུགས་ནི། བདེན་འཛིན་ཞེས་པ་རྣམ་རྟོག་གི་ནང་ཚན་ཞིག་རེད། གཞན་སྟོང་དབུ་མ་ཆེན་པོ་ལ་མཉམ་པར་འཇོག་པའི་བློ་དེས་རྟོག་མེད་སྤྲོས་བྲལ་ཏུ་མཉམ་པར་བཞག་པ་ཡིན་པས། རྣམ་རྟོག་ཐམས་ཅད་འཇོམས་པར་བྱཻད་པ་ཡིན་ན། བདེན་འཛིན་ཞེས་པའི་ལྷག་འགྲོ་རྒྱུ་ཞིག་ཡོད་པ་མ་རེད། ཤེས་པ་མེད་ན་མིག་ཤེས་ཡོད་མེད་རྩད་གཅོད་དགོས་དོན་མི་འདུག་པ་བཞིན་དུ། རྣམ་རྟོག་བྲལ་ན་བདེན་འཛིན་ཇི་ལྟར་ལུས། རྒྱུད་སཾ་བཱུ་ཊི་ལས། རྣམ་རྟོག་མ་རིག་ཆེན་པོ་སྟེ། །འཁོར་བའི་རྒྱ་མཚོར་ཁྲིད་བྱེད་ཡིན། །རྟོག་མེད་ཏིང་འཛིན་ལ་གནས་ན། །མཁའ་བཞིན་དྲི་མ་མེད་པར་གནས། །ཞེས་གསུངས་པ་བཞིན་རེད། དཔེར་ན། མཐོང་ལམ་བར་ཆད་མེད་ལམ་གྱིས་བདག་མེད་ལ་མཉམ་པར་བཞག་པ་ན། མི་རྟག་སྡུལ་བསྔལ་སོགས་ལ་མཉམ་པར་མ་བཞག་ཀྱང༌། རྟག་འཛིན་དང་འཁོར་བ་བདེ་བར་འཛིན་པའི་མཐོང་སྤང་རྣམས་ཀྱི་རྩ་བ་བདག་འཛིན་ལ་གནོད་པས། གཙོ་བོ་བཅོམ་པ་ན་འཁོར་བྲོས་པ་བཞིན་སྤང་པར་འགྱུར་པ་ལྟར། གཞན་སྟོང་དབུ་ཆེན་པོ་ལ་མཉམ་པར་བཞག་པའི་བློས། ཐ་ན་རྣམ་པར་རྟོག་པའི་གཉིས་སྣང་ཕྲ་མོ་དང་ཀུན་གཞི་རྣམ་ཤེས་ཀྱི་མྱོང་སྣང་བསྲབས་མོ་ཡན་སྤོང་པར་བྱེད་ན། བདེན་འཛིན་ལྟ་ཅི་དགོས། ཡང་གཅིག་ཏུ་ན། གཞན་སྟོང་རྟོགས་པའི་བློས་སྤྲོས་པ་ཐམས་ཅད་ཀྱིས་སྟོང་བར་རྟོགས་པས། བདེན་པའི་སྤྲོས་བྲལ་ཡང་མ་རྟོགས་པ་ག་ལ་ཡིན། ཞེས་སོགས་གནད་ཆེ་བའི་གསུངས་ལན་དུ་མ་གནང༌། བོད་ཟླ་བདུན་པའི་ཚེས་བཅུའི་ཉིན་ཀིརྟི་སྟག་ཚང་ལྷ་མོར་དྲང་ངེས་ལེགས་བཤད་སྙིང་པོའི་བགྲོ་གླེང་སྟེང་དུ་ཕེབས་ནས་ཆོས་བརྒྱུད་རིས་མེད་ཀྱི་མཁས་པ་མང་པོ་ཚོགས་པའི་དབུས་སུ་གཞན་སྟོང་དབུ་མའི་གཞི་ལམ་འབྲས་གསུམ་གྱི་གསུང་བཤད་དང་དྲི་བ་དྲིས་ལན་གྱ་ནོམ་པ་མཛད་དེ་མཁས་པ་རྒྱུ་སྐར་གྱི་ཕྲེང་བ་ལྟ་བུའི་དབུས་ན་ཉ་རྒྱས་ཀྱི་ཟླ་བ་ལྟར་ལྷམ་མེ་ལྷང་ངེར་མངོན་པའི་རྣམ་ཐར་རྨད་དུ་བྱུང་བ་བདག་གིར་བཞེས། ཟླ་བརྒྱད་པའི་ཚེས་གཉིས་ཉིན་རྔ་ཡུལ་འབྲོག་དགེ་དགོན་དུ་སློབ་གྲྭ་དང་སྒྲུབ་ཁང་ལེགས་འགྲུབ་ཀྱི་དགའ་སྟོན་རབ་གནས་མཛད་སྒོ་ལ་ཕེབས་ཤིང༌། རབ་གནས་དང་སྨོན་ལམ་གསུངས་ཏེ། སེར་སྐྱ་འདུས་སྡེ་ལ་བཀའ་སློབ་ཟབ་རྒྱས་མཛད་ཅིང༌། དགོན་དེར་བཞུགས་སུ་གསོལ་བའི་རྗེ་བཙུན་ཏཱ་ར་ནཱ་ཐའི་སྐུ་ཆོས་དང་དབུ་ཞྭ་བཅས་ལ་མཇལ་ཁ་ཞུས། བོད་ཟླ་བརྒྱད་པའི་ཚེས་གསུམ་ཉིན་རྔ་ཡུལ་ཀརྟི་དགོན་ཆེན་དུ་རིས་མེད་ཚད་མའི་དགུན་ཆོས་སྟེང་དུ་ཞབས་སོར་བཀོད་ཅིང་ཕྱི་ཉིན་པར་སློབ་གླིང་དུ་ཕེབས། ལོ་དེར་མགོ་ལོག་པདྨ་རིག་གཞུང་དར་སྤེལ་མཐུན་ཚོགས་ཐེངས་བརྒྱད་པའི་ཚོགས་གཙོའི་ལས་འགན་ཡོད་པས། བོད་ཟླ་བརྒྱད་པའི་ཚེས་བརྒྱད་ཀྱི་ཉིན་ཕ་ཡུལ་དུ་ལོགས་ནས་བགྲོ་གླེང་གི་འཆར་བཀོད་ཀྱི་ཕྱག་ལས་མཛད་དེ། ཚེས་བཅུ་ཐམ་པའི་ཕྱི་དྲོར་དཀར་མཛེས་དགོན་ཆེན་དུ་མདོ་ཁམས་དབུ་མའི་བགྲོ་གླེང་སྟེང་དུ་ཕེབས་ནས། ཚེས་བཅུ་གཅིག་ཉིན་གཞན་སྟོང་གི་ལྟ་སྒོམ་སྤྱོད་གསུམ་གྱི་གསུང་བཤད་ལས་བརྩམས་ཏེ། གཙོ་བོར་ལྟ་གྲུབ་ཀྱི་གནད་མང་པོ་ཚིག་རིས་ཙམ་ལས་འབབ་ས་གཅིག་ཡིན་ཚུལ་གྱི་ངོ་མཚར་བའི་ལེགས་བཤད་བླ་ན་མེད་པ་བསྩལ། དཔེར་མཚོན་ཙམ་འགོད་ན། བོད་ཉིད་ལ་ལྟ་བ་གྲགས་ཆེ་བ་གསུམ་ཙམ་གྱི་ནང་དུ་དབུ་མའི་བཞེད་མཚམས་རགས་བསྡུས་ཤིག་འདུས་ཡོད་པ་རེད། དང་པོ། སྔ་འགྱུར་སྐབས་ཀྱི་ལོ་ཙཱ་བ་ཀ་བ་དཔལ་བརྩེགས་སོགས་དང་ཕྱིས་ཀྱི་དཔལ་ས་སྐྱ་བའི་མཁས་པ་གོ་རམས་སོགས་ཀྱི་བཞེད་པ་སྟེ། ཡོད་མེད་ཡིན་མིན་གང་ཡང་ཁས་མི་ལེན་པའི་ལྟ་བ་རེད། ཤེར་ཕྱིན་གྱི་མདོ་རྒྱས་འབྲིང་བསྡུས་པ་ཐམས་ཅད་ན་འདི་འདྲ་བའི་ཚིག་ཟིན་ཧ་ཅང་མང་པོ་རེད། གཉིས་པ། འཁོར་ལོ་ཐ་མ་དང༌། དེའི་ནང་ནས་ཀྱང་གསང་སྔགས་བླ་མེད་ཀྱི་ཚིག་ཟིན་དང༌། ཁྱད་པར་དུ་བྱང་ཆུབ་སེམས་དཔའི་འགྲེལ་པ་བསྐོར་གསུམ་སོགས་ཀྱི་དགོངས་པ་སྒྲ་ཇི་བཞིན་པ། གཞི་འབྲས་དབྱེར་མེད་སྐུ་གསུམ་ལྷུན་འགྲུབ་ཀྱི་ཡེ་ཤེས་འོད་གསལ་ཕྱག་རྒྱ་ཆེན་པོ་གཉུག་མ་རང་བྱུང་གི་ཤེས་པ་ཆོས་ཉིད་དུ་བཞེད་པའི་ལྟ་བ་གཞན་སྟོང་དབུ་མ་ཞེས་ཡོངས་སུ་གྲགས་པ་དེ་རེད། ཇོ་ནང་ཀུན་མཁྱེན་དུས་གསུམ་སངས་རྒྱས་ཀྱིས་མདོ་རྒྱུད་ཀྱི་དགོངས་པ་བཞིན་བསྩལ་འདོན་གནང་པས། ཇོ་ནང་བའི་འདོད་ཚུལ་ཐུན་མོངས་མིན་པར་འདོད་པ་མང་མོད་དེ། སྔ་འགྱུར་རྙིང་མའི་ཕྱོགས་ནས་ཀུན་མཁྱེན་རོང་ཀློང་རྣམ་པ་གཉིས་དང༌། རིག་འཛིན་འཇིགས་མེད་གླིང་པ། ཀཿ་ཐོག་དགེ་རྩེ་པཎྜི་ཏ་སོགས་བཀའ་གཏེར་བླ་མ་དམ་པ་ཕལ་ཆེར་དང༌། འཇུ་མི་ཕམ་ལ་ཐུན་མོང་ཙམ་གྱི་ལྟ་བ་གནས་སྐབས་པ་བཤད་པའི་གཞུང་ཡང་ཁ་ཤས་བཞུགས་མོད། གཞུང་སྤྱིའི་བབ་སོ་ལ་བལྟས་ན་ལྟ་བ་གཞན་སྟོང་དབུ་མ་ཆེན་པོ་ཁོ་ན་དོན་དམ་ཆོས་ཉིད་དུ་བཞེད་པ་ཡིན། རྗེ་ཀརྨ་པ་རང་བྱུང་རྡོ་རྗེ་དང༌། སི་ཏུ་གཙུག་ལག་སྣང་བ། ཀོང་སྤྲུལ་ཡོན་ཏན་རྒྱ་མཚོ་སོགས་ཀྱིས་ཀྱང་གཞན་སྟོང་ཁོ་ན་བཞེད་ཅིང༌། དཔལ་ལྡན་ས་སྐྱའི་ཁྲོད་ན་པཎ་ཆེན་ཤཱཀ་མཆོག་ཞབས་ཀྱིས་གཞན་སྟོང་བཞེད་ཀྱང་སྒྲས་ཟིན་གྱི་འཆད་ཚུལ་མི་འདྲ་བ་ཅུང་ཟད་ཡོད་པ་ཡིན། དགེ་ལྡན་པའི་ནང་ན་གུང་རུ་རྒྱལ་མཚན་བཟང་པོ་དང༌། འཇམ་དབྱངས་ཆོས་རྗེ་བཀྲ་ཤིས་དཔལ་ལྡན་པ་རྣམ་གཉིས་གཞན་སྟོང་བཞེད་པའི་ངག་རྒྱུན་ད་ལྟའི་བར་གནས་པར་མ་ཟད། རྗེའི་གསུང་འབུམ་ན་བཞུགས་པའི་ལྷོ་བྲག་གྲུབ་ཆེན་ལས་ཀྱི་རྡོ་རྗེའི་གསུངས་པའི་ཕྱག་རྡོར་དང་ཞུ་བ་ཞུས་ལན་གྱི་གཞུང་དེ་ན་ནི་གཞན་སྟོང་དབུ་མའི་ལུགས་དང་མཐུན་པར་གསུངས་འདུག །གསུམ་པ། མཉམ་མེད་རི་བོ་དགེ་ལྡན་པའི་ཡོངས་གྲགས་ཀྱི་ལྟ་བ་བདེན་པའི་སྟོང་པ་མེད་དགག་ཉིད་ཆོས་ཉིད་དུ་བཞེད་པ་སྟེ་གསུམ་གྱི་ནང་དུ་མ་འདུས་པ་ཧ་ལམ་ཆེར་མེད་པ་འདྲ་བ་ཞིག་རེད། སྤྱིར་རང་ལུགས་རྩལ་འདོན་དང་གཞན་ལ་ལུང་རིགས་ཀྱི་དགག་པ་བརྗོད་ཀྱིན་ལྟ་གྲུབ་གླེང་པ་དང༌། རང་ལུགས་མ་བོར་ཞིང་གཞན་གྱི་གནད་ཐམས་ཅད་དོན་གཅིག་ལ་འབབ་པའི་སྒོ་ནས་དགོངས་པ་གཅིག་གྲུབ་ཀྱི་ཚུལ་དུ་བགྲོ་བ་སྟེ་ཚུལ་གཉིས་ཡོད་པ་ལས། དེ་རིང་འདིར་དགོངས་པའི་བབ་སོ་གཅིག་ཚུལ་ཅུང་ཟད་བརྗོད་ན། ཀུན་མཁྱེན་ཇོ་ནང་པ་ཡབ་སྲས་ཀྱི་གཞུང་ལུགས་ན་རྟག་ཏུ་གསུངས་ཡོད་པ་ཞིག་ལ། མཉམ་བཞག་ཏུ་ལ་ཟློ། རྗེས་ཐོབ་ཏུ་ཤན་འབྱེད། ཅེས་གསུངས་པ་ལྟར་མཉམ་བཞག་སྤྲོས་བྲལ་རྣམ་པར་མི་རྟོག་པའི་ཡེ་ཤེས་མཐའ་དང་འཛིན་པ་མེད་པར་བཞག་རྒྱུ་དང༌། རྗེས་ཐོབ་ན་ཀུན་རྫོབ་སྒྱུ་མར་ཤེས་པ་དང་ཡོད་མེད་ཡིན་མིན་གྱི་གྲུབ་མཐའ་མ་འཁྲུལ་པ་སྨྲ་དགོས་པར་གསུངས་པ་ལྟར། ཁས་ལེན་མེད་པའི་ལྟ་བ་རྩལ་འདོན་གནང་བ་དག་གི་ཁས་ལེན་མེད་པ་དེ་མཉམ་བཞག་ཟབ་མོའི་མཉམ་པར་བཞག་ཚུལ་ལྟར་གྱི་གནས་སྟངས་དང་མཐུན་པ་རེད། མགོན་པོ་ཀླུ་སྒྲུབ་ཀྱིས་རྩོད་བཟློག་ལས། ང་ལ་ཁས་ལེན་མེད་པས་ན། །ང་ནི་སྐྱོན་མེད་ཁོ་ན་ཡིན། །ཞེས་པ་དེ་མཉམ་བཞག་གི་སྐབས་ལ་དགོངས་པར་ཀུན་མཁྱེན་དོལ་པོ་པ་རང་གིས་གསུངས་པ་ལྟར་རེད། རི་བོ་དགེ་ལྡན་པས་ཆོས་ཐམས་ཅད་བདེན་པར་མེད་ཟེར་བ་དེ་དང༌། ཇོ་ནང་བས་ཆོས་ཉིད་བདེན་གྲུབ་འདོད་པ་དེ་ཚིག་གི་ངོས་ནས་མི་མཐུན་པ་སྣང་ན་ཡང༌། དགེ་ལྡན་པས་གང་དགག་རྒྱུའི་བདེན་གྲུབ་དེ་ཇོ་ནང་པས་ཀྱང་བཞེད་པ་མ་རེད་ལ། ཇོ་ནང་པས་གང་འདོད་པའི་བདེན་གྲུབ་དེ་དགེ་ལྡན་པས་ཀྱང་ཁས་བླངས་ཡོད་པ་རེད། ཇི་ལྟར་ཞེ་ན། ཇོ་ནང་བའི་བདེན་གྲུབ་ཅེས་པ་དེ། ཤེར་རབ་སྙིང་པོའི་མདོར། མི་རྫུན་པས་ན་བདེན་པར་ཤེས་པར་བྱ་སྟེ། ཞེས་པ་དང༌། མགོན་པོ་ཀླུ་སྒྲུབ་ཀྱིས། མྱ་ངན་འདས་པ་བདེན་གཅིག་པུ། །གསུངས་པ་ལྟར། བདེན་པ་དང་སྣང་གནས་མཐུན་པའི་དོན་ལས་གཞན་སྤྲོས་པའི་བདག་ཏུ་གྲུབ་པ་ཞིག་ཁས་ལེན་པ་མ་རེད། དེ་ལྟར་རྗེའི་འཇུག་ཊཱིཀ་དགོངས་པ་རབ་གསལ་ན་ཡང༌། དོན་དམ་པར་གྲུབ་ཟེར་བའི་དོན་དམ་ལ། སྔ་མའི་དོན་དམ་དང་ཕྱི་མའི་དོན་དམ་གཉིས་བཞག་ནས། ཅིག་ཤོས་བདེན་པ་འཕགས་པའི་མཉམ་བཞག་ཡེ་ཤེས་ཀྱི་ཡུལ་དུ་གྲུབ་པ་ཡོད་པ་དང༌། ཅིག་ཤོས་དགག་བྱ་བདག་རང་བཞིན་གྱིས་གྲུབ་པའི་དབང་དུ་བྱས་ཏེ་དོན་དམ་པར་གྲུབ་པའི་ཆོས་མེད་པར་གསུངས་པ་ལྟར་རེད། ལ་ལས་བདེན་གྲུབ་འདོད་ན་ཧང་སང་བ་འདྲ་ཞིག་བྱེད་ཀྱིན་འདུག་སྟེ། གནད་གོ་ན་འུར་ལངས་དགོས་དོན་གང་ཡང་ཡོད་པ་མ་རེད། ཅེས་སོགས་གསུངས་སོ། །དེ་ནས་སླར་པདྨའི་རིག་གཞུང་དར་སྤེལ་ཆོས་ཚོགས་སུ་ཕེབས་ནས། གྲྭ་མང་ལ་སློབ་སྦྱོང་གི་གལ་ཆེན་རང་བཞིན་ཐད་ནས་བཀའ་སློབ་ཟབ་རྒྱས་དང༌། དད་ལྡན་མང་ཚོགས་ལ་ནང་ཆོས་ངོ་སྤྲོད་བཅས་ཞུས་ཤིང༌། ཆོས་ཚོགས་ཀྱི་ཐོག་མཐའ་བར་གྱི་གཙོ་འགན་ཕྱག་ལས་རྒྱ་ཆེར་བསྒྲུབས་སོ། །སྐབས་འདི་མཚམས་ཤིག་ལ་ངེད་ཅག་འཛིན་གྲྭ་ལ་འདུལ་ཊཱིཀ་ཉི་མའི་འོད་ཟེར་གྱི་ཁྲིད་ཡོངས་སུ་རྫོགས་ནས། སྔགས་འཛིན་གྲྭ་གསར་དུ་བཙུགས་ཏཻ། སྦྱོར་བ་ཡན་ལག་དྲུག་གི་སྤྱི་དོན་རྡོ་རྗེ་བདུད་རྩིའི་ཆུ་གཏེར་དང༌། དུས་ཀྱི་འཁོར་ལོའི་བསྐྱེད་རིམ་རྒྱས་པ་དངོས་གྲུབ་བདུད་རྩིའི་བུམ་བཟང་རྣམ་པ་གཉིས་ཀྱི་ཟབ་ཁྲིད་མཛད། དེ་ཡང་སྦྱོར་བ་ཡན་ལག་དྲུག་གི་སྤྱི་དོན་ལས་གཞིའི་རྣམ་བཞག་སྟེ། སྐྱེ་འཆི་བར་དོ་རྩ་རླུང་ཐིག་ལེའི་རྣམ་བཞག་རྣམས་སོང་མཚམས་ནས། བསྐྱེད་རིམ་གྱི་ཁྲིད་ཡོངས་རྫོགས་ཚར་བ་དང༌། སྤྱི་དོན་གྱི་སྟེང་ནས་རྫོགས་རིམ་དངོས་གཞི་ལམ་གྱི་རིམ་པ་རྣམས་ཁྲིད་པ་ཡིན་ནོ། །ལོ་དེར་བསྐྱེད་རིམ་གྱི་དཀྱིལ་འཁོར་རྒྱལ་མཆོག་གི་ནང་བར་དུ་ཁྲིད་གྲུབ་པ་ཡིན། དུས་འཁོར་གྱི་རྒྱུད་ལ་ལྟ་བ་ལ་སྐར་རྩིས་ཤིག་ཅུང་ཟད་མ་ཤེས་ཐབས་མེད་ཅེས་གསུངས་ནས། ཞར་ལ་ལྔ་བསྡུས་དང་གཟའ་ལྔའི་རྩིས་ཀྱི་ཁྲིད་གནང་ཞིང༌། དུས་ཀྱི་འཁོར་ལོའི་དཀྱིལ་འཁོར་ཡོངས་རྫོགས་ཀྱི་ཐིག་དང་བཅས་པ་སློབ་ཏུ་བཅུག །འདི་ནི་ཇོ་ནང་བར་མཚོན་ན་རྗེ་བཙུན་ཏཱ་ར་ནཱ་ཐ་སྐུ་གཤེགས་པ་ནས་བཟུང་ལོ་ངོ་བརྒྱ་ཕྲག་ཁ་ཤས་ན་དུས་ཀྱི་འཁོར་ལོའི་འཆད་ཉན་གྱི་ཐོས་བསམ་འཛིན་གྲྭ་ཚུགས་པའི་ཐོག་མ་དེ་ཡིན། དེའི་ཚེས་ཉི་ཤུ་གཉིས་ཏེ་སྟོན་པ་ལྷ་ལས་བབ་པའི་དུས་བཟང་ཁྱད་པར་བ་ལ་གངས་ལྗོངས་རིས་མེད་མཐོ་སློབ་ཀྱི་ཕར་ཕྱིན་མཚན་ཕུད་དམ་བཅའ་ཆེན་མོ་བཞག །བོད་ཟླ་དགུ་བའི་ཚེས་བཞི་ལ་མངོན་པར་རྟོགས་པའི་རྒྱན་གྱི་འགྲེལ་བ་བཤད་སྦྱར་ཡིད་ཀྱི་མུན་སེལ་དང༌། རྟགས་རིགས་ཀྱི་རྣམ་བཞག་ལེགས་བཤད་དྲི་མ་མེད་པའི་འོད་དང༌། ཚེས་ལྔའི་སྔ་དྲོར་ཤེས་རབ་ཀྱི་ཕ་རོལ་ཏུ་ཕྱིན་པའི་མན་ངག་གི་བསྟན་བཅོས་མངོན་པར་རྟོགས་པའི་རྒྱན་གྱི་འགྲེལ་བ་བཤད་སྦྱར་ཡིད་ཀྱི་མུན་སེལ་གྱི་ཁྲིད་རྫོགས་ཏེ། ཕྱི་དྲོར་རྒྱལ་རོང་དུ་ཕེབས་ནས། ཚེས་དྲུག་ལ་ཅུང་ཟེད་ཚོ་བའི་ནང་དུ་རྒྱལ་རོང་ཞིང་སྒྲུབ་ཆེན་མོའི་སྟེང་ནས་དད་ལྡན་མང་ཚོགས་ལ་བདེ་བ་ཅན་གྱི་རྒྱུ་བཞི་སོགས་བཀའ་སློབ་ལམ་སྟོན་རྒྱ་ཆེན་གནང༌། སྐབས་དེའི་ནམ་གཤིས་དགུན་གྱི་དུས་སྐབས་གྲང་རླུང་ཆེ་སྒང་ལ། ནུབ་ཕྱོགས་ནས་ཚུར་སྤྲིན་གྱི་གསེབ་ན་འཇའ་ཟེར་ཁ་དོག་སྣ་ཚོགས་པ་ཕྱི་དྲོ་གཅིག་གི་ཡུན་ལ་འཆར་ནས་ཕྱི་རྟགས་ཐུན་མོངས་ཀྱི་མཐོང་ཆོས་སུ་གྱུར་བས་དད་ལྡན་མང་པོའི་དད་པ་ཕྱིར་མི་ལྡོག་པ་དང་མ་དད་པ་རྣམས་དད་པའི་ས་ལ་གཞོལ་བར་བྱས། སྐབས་དེར་རྙིང་མའི་བླ་མ་ཆོས་གསུང་ཡུལ་དེར་ཡོད་པ་ཞིག་གིས། ཉིན་དེར་ཆོས་ཁྲིད་གསུང་མཁན་གྱི་དགེ་བཤེས་དེས་ཆོས་གསུང་ཡུན་ཡོངས་རྫོགས་ལ་སྐུ་ཆོས་ན་བཟའ་སོགས་ལས་འཇའ་ཟེར་ཁ་དོག་སྣ་ཚོགས་པ་བར་མ་ཆད་དུ་འཕྲོ་བཞིན་འདུག་པས། བླ་མ་ཁྱད་མཚར་བ་ཞིག་འདུག་ཅེས་ཕྱིས་རང་དང་འབྲེལ་ཡོད་མང་པོ་ལ་སྨྲས་འདུག་ཅིང༌། ལྷག་པར་བཤེས་གཉེན་རིན་པོ་ཆེ་ངོ་ཤེས་མཁན་དང་མདུན་དུ་ངོ་བསྟོད་སྨྲར་འོང་བ་ནི་གང་ཡང་མ་རེད། སྔོན་ཆད་ཅིག་ལ་མགོ་ལོག་གི་དགོན་པ་ཞིག་ཏུ་ཕེབས་སྐབས་ཀྱང༌། སེར་ཕྲེང་གིས་བསུས་འོང་པ་ན་བླ་མ་ཉམས་ལེན་པ་ཞིག་གིས་ཀུན་མཁྱེན་དོལ་པོར་མཐོང་བས། སྔོན་ཆད་དད་པ་མེད་ཀྱང་ད་ནས་བཟུང་ཐུགས་རྗེས་འཛིན་དགོས་ཞེས་བཤད་པ་སོགས་འགའ་རེ་ཐོས་ཏེ། རང་རང་སོ་སོ་ལ་མཐོང་སྣང་དེ་འདྲ་བ་བྱུང་བར་ནི་འགོག་ཏུ་མེད་པ་ཡིན། ཚེས་བདུན་ཉིན་རྣམ་ཆོས་ཞིང་དབང་བཅས་ཀྱི་སྒོ་ནས་འགྲོ་རྣམས་བདེ་ཆེན་ཞིང་དུ་སྐྱེ་བའི་ཐུགས་སྨོན་རྟེན་འབྲེལ་བཟང་པོ་མཛད་དོ། །ཚེས་དགུའི་ཉིན་རྟགས་རིགས་འཛིན་གྲྭ་ལ་རྣམ་འགྲེལ་ཐར་ལམ་གསལ་བྱེད་ལས་ལེའུ་དང་པོའི་ཉེར་མཁོ་འགའ་བདམས་ཏེ་ཆོས་ཁྲིད་བསྐྱངས། ཚེས་ཉི་ཤུ་བརྒྱད་ལ་དགོན་དེར་བདེ་ཆེན་ཞིང་སྒྲུབ་ཆེན་མོ་འཚོགས་ཤིང༌། ཚེས་ཉེར་དགུའི་ཉིན་སེར་སྐྱ་ཡོངས་སུ་རྫོགས་པ་ལ་བདེ་ཆེན་ཞིང་དབང་བཅས་གསུངས་ཏེ། གཞན་ཡང་བླ་སྤྲུལ་མཁན་གསུམ་ཅི་རིགས་པས་ཆོས་དང་སློབ་སྟོན་ཟབ་རྒྱས་ཕུན་སུམ་ཚོགས་པའི་ངང་ཉིན་བདུན་གྱི་རིང་ལ་འཚོགས། བོད་ཟླ་བཅུ་པའི་ཚེས་བཅུའི་ཉིན་ཨ་སྐྱོང་དགོན་གྱི་བཤད་གྲྭ་རྨད་བྱུང་ཐོས་བསམ་གླིང་དུ་ལོ་གསུམ་གྱི་ཡུན་ལ་མཁན་བསམ་བཟང་ནས་ལས་ཐོག་གི་འགན་མཐར་ཕྱིན་ཏེ་ལོ་མཇུག་བྱ་དགའི་མཛད་སྒོ་དང་ཚོགས་འཁོར་ལ་རེ་ཞུས་ལྟར་ཞབས་སོར་བཀོད་དེ། སེར་སྐྱ་ཡོངས་ལ་བཀའ་སློབ་ལམ་སྟོན་གྱི་གསུང་བཤད་མང་པོ་གནང་སྟེ་ཕྱིར་སློབ་གླིང་དུ་ལོགས་ནས། ཚེས་བཅུ་གཉིས་ཉིན་རྗེ་ཏཱ་ར་ནཱ་ཐའི་མཛད་པའི་བློ་སྦྱོང་དོན་བདུན་མའི་འགྲེལ་བའི་ཁྲིད་རྫོགས། བོད་ཟླ་བཅུ་གཅིག་པའི་ཚེས་བདུན་གྱི་ཉིན་གངས་ལྗོངས་རིས་མེད་མཐོ་སློབ་ཀྱི་ལོ་འཁོར་རྒྱུགས་སྤྲོད་རྣམས་ཡོངས་སུ་རྫོགས་ནས སློབ་གཉེར་བ་རྣམས་ལ་ལོ་མཇུག་གི་བྱ་དགའི་གཟེངས་རྟགས་བཅས་བསྩལ་ཏེ། བཀའ་སློབ་ལམ་སྟོན་དང་བསྟན་པ་རྒྱས་པའི་སྨོན་ལམ་བཅས་བཀྲ་ཤིས་ཕུན་སུམ་ཚོགས་པའི་ངང་ཆོས་མཚམས་གྲོལ། བོད་ཟླ་བཅུ་གཅིག་པའི་ཚེས་དགུ་ལ་ཙོང་ཁ་པ་རིག་གནས་སྒྱུ་རྩལ་ཚོགས་པས་གཙོ་སྒྲུབ་བྱས་ནས་ཟི་ལིང་གྲོང་ཁྱེར་དུ་པཎ་ཆེན་སྐུ་ཕྲེང་བཅུ་བའི་རྗེས་དྲན་ཚོགས་འདུ་འཚོགས་པར་ཕེབས་ཏེ། པཎ་ཆེན་སྐུ་ཕྲེང་བཅུ་བ་མཆོག་གིས་བོད་སྤྱི་དང་ཡང་དགོས་ཇོ་ནང་ཕྱོགས་ལ་མཛད་པ་གལ་ཆེན་ཅི་ཞིག་གནང་ཡོད་བསྐོར་ནས་གསུངས་བཤད་མཛད། ཟླ་དེའི་ཚེས་བཅུ་གཉིས་ནས་བཟུང་ཛམ་ཐང་ཆོས་སྒར་གོང་མའི་རྡོ་རྗེ་སློབ་དཔོན་བླ་མ་ཆོས་བསམ་གྱི་མདུན་ནས། རྗེ་བཙུན་ཏཱ་ར་ནཱ་ཐའི་གསུང་འབུམ་ལས་སྔོན་ཐོབ་ཟིན་པའི་པོད་ལྔ་ལས་གཞན་པ་ཡོངས་རྫོགས་ཞུས། དེའི་ཞར་ལ་འདུལ་བའི་མཐའ་དཔྱོད་ཀྱི་རྩོམ་འཕྲོ་ཡོངས་སུ་རྫོགས་པར་མཇུག་གྲུབ་པར་བྱས་སོ། །ཚེས་ཉི་ཤུ་བདུན་ཉིན་རྡོ་ཁོག་གི་བར་གདོང་དུ་མ་ཎིའི་ཆོས་ཚོགས་ལ་བྱོན་ནས་ནང་ཆོས་ངོ་སྤྲོད་བྱས། བོད་ཟླ་བཅུ་གཉིས་པའི་ཚེས་གཉིས་ཉིན་གསུང་འབུམ་གྱི་ལུང་ལེགས་པར་ནོད་གྲུབ་སྟེ། ཚེས་ལྔ་ལ་མི་ཉག་དགོན་ཆེན་དུ་བྱོན་ནས་གྲྭ་མང་ལ། སྤྱོད་འཇུག་ཤེར་ཕྱིན་ལེའུ་དང༌། གཞན་སྟོང་ལྟ་བ་ཁས་ལེན་སེང་གེའི་ང་རོ་གཉིས་ཀྱི་ཁྲིད་དང༌། བཙུན་མ་གྲྭ་ཚང་ལ་དབུ་མ་འཇུག་པའི་ཆོས་ཁྲིད་གནང༌། སྐབས་དེར་འབའ་ལྷ་རྒང་གི་ཇོ་བོ་ལ་ཡང་མཇལ་དུ་ཕེབས་ཏེ་ཐུགས་སྨོན་ཟབ་མོ་མཛད། ཟླ་དེའི་ཚེས་ཉེར་དྲུག་ལ་མགོ་ལོག་ཁུལ་སྲིད་གྲོས་ཀྱི་ཚོགས་ཆེན་ལ་ཞུགས་ནས་མང་ཚོགས་ཀྱི་དཀའ་ངལ་གྱི་རིམ་པ་མང་པོ་ཡིག་ངག་གཉིས་ནས་ཡར་ཞུ་ཕུལ་ལོ། ། མཁས་པའི་མཁས་པ་སྐར་ཚོགས་བྱེ་བས་རྒྱ་བོད་འཆི་མེད་ལམ་བཟང་གི། ། ལྷ་རྩེན་མཁའ་ཡི་མཐོང་ག་རབ་ཡངས་མཛེས་པའི་ངོས་ན་མངོན་བཀྲ་བའི། ། བདེ་འབྱུང་གཙུག་རྒྱན་རྒྱུ་སྐར་ཕྲེང་བ་འོད་ཟེར་མདངས་ལྡན་ཇི་སྙེད་ཀུན། ། འགྱུར་མེད་བདེ་ཆེན་གཏན་སྲིད་ས་ལ་གཅིག་ཏུ་གཞོལ་ཚུལ་མཐུན་པར་བཀྲལ། ། སྙིགས་དུས་ཀྱི་བསྟན་པའི་གསལ་བྱེད་ཆེན་པོ་ངག་དབང་འཇིགས་མེད་དངོས་གྲུབ་དཔལ་བཟང་པོའི་མཛད་བཟང་བསླབ་གསུམ་ནོར་བུའི་གླིང་ཁ་ཞེས་བྱ་བ་ལས་ཆོས་བརྒྱུད་དག་གི་ལྟ་བའི་གནད་གཅིག་ཚུལ་གྱི་གསུང་བཤད་དང་གསེར་ལྡན་རྒྱལ་ཁབ་ལ་ཕེབས་བསྐོར་གྱི་རྣམ་ཐར་མདོར་བསྡུས་པ་སྟེ་ཉེར་ལྔ་པའོ། ། འགལ་རྐྱེན་མཐུན་གྲོགས་སུ་བཀུག་ཅིང་ལས་འབྲས་བསླུ་མེད་ཀྱི་གསུང་ཁྱད་པར་བ་གནང་བའི་རྣམ་ཐར་བསྐོར།ཕྱི་ལོ། ༢༠༡༧ སྟེ་བོད་རབ་བྱུང་བཅུ་བདུན་པའི་མེ་བྱ་ལོའི་བོད་ཟླ་དང་པོའི་ཚེས་བཅུ་དྲུག་ལ་གངས་ལྗོངས་རིས་མེད་མཐོ་སློབ་ཀྱི་ལོ་དེའི་སློབ་གཉེར་དབུ་བཟུང༌། ཁོ་བོ་ལོ་དེར་ཡུལ་དགོན་ནས་མཁན་པོ་ལས་ཐོག་གི་མིང་སྟོང་ཞིག་བཙན་འདོགས་བྱས་པས། ཚེས་བརྒྱད་ལ་སློབ་གླིང་དུ་དཔེ་ཆ་སོགས་བཅའ་ལག་འགའ་ཕྱིར་ལེན་དུ་སོང་བར། གང་ལྟར་ཁྱོད་ཀྱིས་ལས་ཐོག་ཞིག་ཁུར་དགོས་བྱུང་སོང་ན། འདི་ནས་བཟང་སྤྱོད་སྨོན་ལམ་གྱི་རྗེས་སུ་དགེ་རྒན་དུ་མངགས་ཚུལ་གྱི་རྟེན་འབྲེལ་ཙམ་ཞིག་སྒྲིག་ཆོག་གསུངས་པ་ལས་མཁན་པོར་མིང་འདོགས་རྒྱུའི་ཟུར་ཙམ་ཡང་མ་ཐོན་ཡང༌། བཟང་སྤྱོད་གསུངས་གྲུབ་པ་ན་ཚོགས་ནས་མཁན་པོར་མིང་བཏགས་པ་ཡིན་གསུངས་ཏེ་མཁན་ཞྭ་བཅས་གནང་པ་ཡིན། བོད་ཟླ་གཉིས་པའི་ཚེས་བདུན་ལ་ཨ་སྐྱོང་ཁང་རྒན་གཙོ་བོར་གྱུར་པའི་ལོ་རྒྱུས་ཚོགས་འདུའི་སྟེང་ནས་བོད་ཀྱི་སྲོལ་རྒྱུན་གྱི་རྩོམ་ལུགས་སོགས་ཀྱི་གསུང་བཤད་གནང༌། ཟླ་དེའི་ཚེས་བཅུ་བདུན་ལ་མགོ་ལོག་ལུང་སྐྱ་དགོན་མཁན་པདྨ་བློ་གསལ་མཆོག་གངས་ལྗོངས་རིས་མེད་མཐོ་སློབ་ཀྱི་ལས་ཐོག་མཁན་པོར་མངའ་གསོལ་མཛད། བཤེས་གཉེན་རིན་པོ་ཆེ་བསྟན་འགྲོའི་ཁུར་ཁྱེར་གང་གིས་དགེ་རྒན་གཞན་དང་རྣམ་ཐར་མི་གཅིག་པ། ཆོས་ཁྲིད་ཙམ་དུ་མ་ཟད་པར་སློབ་གླིང་གི་སྒྲིག་ལམ་ཐམས་ཅད་དགེ་བསྐོས་ནས་ཞོགས་འདེགས་ཙམ་ལས་དཀའ་ལས་སྐུ་ཚེགས་ཐམས་ཅད་ཁོང་གཅིག་པུའི་ཕྲག་ཏུ་བཞེས་པ་ཡིན། སྐབས་དེར་ལས་ཐོག་བཞག་པ་དེ་ཡང་གཞོགས་འདེགས་པ་ཙམ་ལས། སྐུ་ངལ་གང་ཆེ་དང་གནད་གང་ཐུ་མ་ལུས་པ་ད་ལྟའི་བར་དུ་ཁོང་གི་ཁུར་དུ་བཞེས་ཤིང་བཞེས་མུས་སུ་གནས་པ་ཡིན། ད་དུང་དགེ་འདུན་པའི་འཚོ་བ་དང་བཅས་པ་ལ་ཕ་དང་འདྲ་ལ་མ་དང་མཚུངས་པའི་བཤེས་གཉེན་རིན་པོ་ཆེ་ཉིད་ནས་ཡར་མར་འཚོལ་བ་ལས། དེ་སྔོན་དུ་ངེད་སློབ་མ་དག་གིས་ནི་དྲང་པོར་ཞུས་ན་སྒྲིག་ལམ་མ་སྟོར་ནས་འདུག་ན་ཨང་དང་པོ་ལས་ཅི་ཡང་འཇོན་མྱངས་མེད་ལ། ང་དང་འདྲ་བ་མང་ཙམ་ཞིག་གིས་ནི་ཁོང་གི་སྐུ་ངལ་དང་དཀའ་ཚེགས་འདི་ཙམ་ཞིག་བསྐྱོན་པ་ཡིན་སྙམ་པའི་དྲིན་ཤེས་ཙམ་ཡང་སྐྱེ་ཡོད་དམ་མེད་སྙམ་དོགས་པ་ཟ། འོན་ཏེ། བྱང་ཆུབ་སེམས་དཔའ་རྣམས་ཀྱི་ལྷག་བསམ་ནི་ལན་ལ་མི་ལྟོས་པ་ཡིན་པས། བཤེས་གཉེན་རིན་པོ་ཆེ་ཉིད་ཀྱིས་ཉིན་གཅིག་ལ་ཡང་ཡི་ཆད་འཁང་ར་བྱས་ཏེ་ཕྱག་ལས་ཟུར་གཅིག་ཀྱང་བཅགས་མྱངས་མེད། དམ་པའི་ཆོས་འདུལ་བ་ན། གནས་དང་གནས་པའི་ཚུལ་ཁྲིམས་བསྟན་པར། སློབ་མས་བླ་མ་ལ་ཕའི་འདུ་ཤེས་དང༌། བླ་མས་ནི་སློབ་མ་ལ་བུའི་འདུ་ཤེས་བསྐྱེད་པར་བྱས་ཏེ། ཕན་ཚུན་གྱི་ནད་པ་ནད་གཡོག་གི་ལས་རྣམས་བྱ་བར་གསུངས་པ་དང༌། ལུང་མ་མོ་ལས། མཁན་པོའམ་སློབ་དཔོན་ལ་སྟོན་པའོ་སྙམ་དུ་འདུ་ཤེས་མངོན་དུ་བཞག་པར་བྱ། ཞེས་གསུངས་ཏེ། འཇིག་རྟེན་གྱི་ཕ་ལྟ་བུ་དང་ཆོས་ཚུལ་ལས་སྟོན་པ་ལྟ་བུའི་བླ་མ་དེ་དེང་གི་ཆར་འདི་ལས་གཞན་དུ་སུ་ཞིག་འཚོལ་དུ་ཡོད། དེང་སང་འདུལ་བའི་ཆོ་ག་བཞིན་གནས་ཀྱི་བླ་མ་བསྟེན་སྲོལ་ཉམས་ཟིན་ཡང༌། གནས་ཀྱི་བླ་མ་ཕུན་སུམ་ཚོགས་པའི་བྱ་བ་ཐམས་ཅད་རྒྱུན་དུ་བྱེད་པ་ཡིན་ཞིང༌། དེས་རྐྱེན་པས་གནས་ཀྱི་བླ་མ་བསྟེན་པའི་དགོས་པ། དགེ་བ་འཕེལ་བར་འགྱུར་བ་དང༌། ཁྲེལ་ཡོད་ཀྱི་བསམ་པ་སྐྱེ་བ་དང༌། བྱ་བ་ཡིན་མིན་ཤེས་པར་འགྱུར་བ་སོགས། ཡོན་ཏན་ཀུན་ཀྱི་གཞིར་གྱུར་དྲིན་ཅན་རྗེ། །ཞེས་གསུངས་པ་དེ་མངོན་སུམ་མིག་གི་ཡུལ་བསྟན་པས་མིག་བཙུམ་ནས་དག་སྣང་སྒོམ་པའི་ངལ་བ་མེད་པར་བྱས་སོ། །འཛིན་གྲྭ་རྒན་རིམ་ཁ་ཤས་འཚོགས་སྐབས་སུ་ཞོར་འཕྲོས་ཀྱི་གླེང་མོལ་བྱུང་སྟེ། ཆོས་གྲོགས་ཤིག་གིས། དགེ་རྒན་རིན་པོ་ཆེ་འདི་ཚང་དང་མ་འཕྲད་ན་ཁྱོད་ད་སྐབས་དཔེ་ཆར་བལྟས་ཡོད་རྒྱུ་ཨེ་རེད་ཅེས་དྲིས་སོང༌། ང་དགེ་བཤེས་ཡིད་བཞིན་གྱི་ནོར་བུ་འདི་དང་འཕྲད་མེད་ན་དཔེ་ཆ་ཏ་གང་ནས་བལྟས་ཡོད་དེ། རང་ཚོད་རང་ལ་ལྐོག་ཏུ་མ་གྱུར་པ་ཡིན་པས། སྤྱིར་གྲྭ་བའི་ལམ་ཁ་འདི་ལ་དང་ཐོག་ནས་ཞུགས་མེད་སེམས་ཐག་ཡིན། དེ་ནས་ངེད་ཅག་མང་པོ་ཞིག་དེ་ལྟར་ཕན་ཚུན་གླེང་མོལ་བྱས་པས། དགེ་རྒན་འདི་དང་འཕྲད་མེད་ན་གྲྭ་བ་ཙམ་ཡང་བྱས་མེད་ཟེར་བ་དང༌། སློབ་གཉེར་བྱེད་དགོས་ཀྱི་བསམ་པ་ཙམ་ཡང་སྐྱེ་མྱངས་མེད་ཟེར་བ་དང༌། སེར་འགོ་ཙམ་ཡང་ཐོན་ཨེ་ཡོད་མི་ཤེས་ཟེར་མི་ཕལ་ཆེར་རེད་འདུག །ད་དུང་འདི་ལྟར་གླེང་བ་ཡིན། བཤེས་གཉེན་རིན་པོ་ཆེ་འདི་གལ་སྲིད་འཇིག་རྟེན་འདིར་གཞི་ནས་འཁྲུངས་མྱོང་མེད་ན། ཇོ་ནང་པའི་གནས་བབ་འདི་ད་ལྟ་ལས་ཁྱད་འགྱུར་ག་ཙམ་ཡོད་རྒྱུ་རེད་ཅེས་པ་ཡིན། དེ་ནི་བསམ་མི་ཕོད་པ་ལྟ་བུ་སྟེ། ཡིག་ཆའི་འཆད་ཉན་ཕར་ཞོག །སྒྲིག་འགྲོ་སྟངས་འོས་ཙམ་ཞིག་ཡོང་ཡོད་རྒྱུ་ཡང་དཀའ་མོ་ཡིན། ག་ས་གང་ནས་ཁོང་གིས་སྐུ་ངལ་དང་དངོས་དང་བརྒྱུད་པའི་ཕྱག་ལས་བྱས་པས། མར་མེ་གཅིག་ལས་གཉིས་ཆད་ལྟ་བུའི་ཚུལ་དུ་བྱུང་བ་ལས། བློ་གཟུར་གནས་ཀྱིས་བཤད་ན་རང་སྐྱ་ཁེར་ཕེར་ཞིག་སུས་ཀྱང་བྱུང་མེད་པ་རྒྱུས་མངའ་ཆེ་བ་ལྟར་རེད་ཅེས་ཕན་ཚུན་མོལ་བ་ཡིན་ནོ། །ཚེས་ཉི་ཤུ་དྲུག་ཉིན་རྔ་ཡུལ་བསེ་དགོན་པར། གྲྭ་མང་ལྷ་འབངས་དང་བཅས་པས་བསུ་མ་རྒྱ་ཆེར་བྱས་ཏེ། ཞི་བར་གཤེགས་པ་རྡོ་རྗེ་སློབ་དཔོན་གསང་མཐའ་སྤྲུལ་སྐུ་དང༌། དགོན་བདག་བསྭེ་སྤྲུལ་སྐུ་སོགས་རྒན་རིམ་མང་པོ་དང༌། དགོན་དེར་སློབ་གཉེར་ལ་བཞུགས་མི་རྣམས་ལ་དབུ་མ་ཡིད་བཞིན་ནོར་བུའི་ཆོས་ཁྲིད་ཉིན་བཞི་ལ་མཛད་དེ། བཤད་གྲྭ་སླར་གསོ་མཛད་ཅིང༌། ཁང་སར་ཉིན་ཡུལ་དགོན་མཁན་སྤྲུལ་བསམ་གཏན་རྒྱ་མཚོ་ཁོང་ཅག་གི་རེ་བ་ལྟར་དགོན་དེར་མཁན་པོར་བཞག་ནས་ཕྱིར་ཕེབས། བོད་ཟླ་གསུམ་པའི་ཚེས་བཅོ་བརྒྱད་ལ་པེ་ཅིན་ནང་བསྟན་སློབ་གླིང་དུ་མཐོ་རིམ་པའི་དཔྱད་འདེམས་པར་ཕེབས་ཤིང༌། སངས་རྒྱས་ཀྱི་ཚེམ་གདུང་ལ་མཇལ། བླ་མ་དམ་པ་རྨེ་སྤྲུལ་རྡོ་རྗེ་དགྲ་འདུལ་དང་མཇལ་འཕྲད་གསུང་གླེང་གནང་སྟེ། ཚེས་ཉེར་དྲུག་ཉིན་མཚོ་སྔོན་ཞིང་ཆེན་དུ་ལོགས་ནས། ཕྱི་ཉིན་པར་ཨ་མདོ་བརྙན་འཕྲིན་ཁང་ཁ་བརྡ་ལས་ཚན་ལས་ཇོ་ནང་གི་ཆོས་འབྱུང་བསྐོར་ནས་གླེང་མོལ་བྱས་ཏེ་ཕྱིར་སློབ་གླིང་དུ་འབྱོར། བོད་ཟླ་བཞི་པའི་ཚེས་བཅོ་ལྔ་སྟེ། སངས་རྒྱས་ཤཱཀྱ་ཐུབ་པ་ལྷུམས་སུ་ཞུགས་པ་དང༌། མངོན་པར་རྫོགས་པར་སངས་རྒྱས་པ་དང༌། སྐུ་མྱ་ངན་ལས་འདས་པ་སྟེ་དུས་ཆེན་སུམ་འཛོམས་ཀྱི་ཉིན་ལ། གངས་ལྗོངས་རིས་མེད་མཐོ་སློབ་ནས་མི་དྲུག་ཅུ་ལ་དགེ་ཚུལ་སློང་གི་སྡོམས་ཁྲིམས་འབོགས་པར་བྱས། ཚེས་ཉི་ཤུ་གསུམ་ཉིན་རྔ་སྟོད་རྩི་ནང་དགོན་དུ་གཞན་སྟོང་བགྲོ་གླེང་ཐེངས་བཅུ་གཉིས་པའི་མཚན་ཕུད་དམ་བཅའ་ལ་ཕེབས་ཏེ། བཀའ་སློབ་གྱ་ནོམ་པ་དང་ལུང་རིགས་ཀྱི་བརྒལ་བརྟག་མཛད། བོད་ཟླ་ལྔ་པའི་ཚེས་བཅུ་བཞི་ལ། ཁྲིན་ཏུའུ་གྲོང་ཁྱེར་དུ་མདོ་དབུས་ཁམས་གསུམ་གྱི་སེར་སྐྱ་མཁས་དབང་མང་པོ་ཞལ་འཛོམས་ཏེ། ཧི་མ་ལའི་རིག་མཛོད་ཀྱི་ཚོགས་འདུ་འཚོགས་པར་ཕེབས་ཤིང༌། གསུང་བཤད་ཟབ་རྒྱས་གནང༌། ཚེས་བཅུ་བདུན་ཉིན་གངས་ལྗོངས་རིས་མེད་མཐོ་སློབ་ཀྱི་ལོ་ཕྱེད་མཚན་ཉིད་ཤོག་རྒྱུགས་བླངས། ཚེས་བཅོ་བརྒྱད་ཀྱི་ཉི་བཟང་སྐར་བཟང་ལ། ཛམ་ཐང་ཆོས་རྗེ་དགོན་དོན་དམ་དཔལ་དང༌། སྡེ་དགེ་པ་ས་སྐྱ་ལྷ་སྟེང་དགོན་ཀུན་དགའ་བློ་གྲོས་དང༌། སྔ་འགྱུར་གསང་ལུང་དགོན་ཤེས་རབ་ལྡན། ཉིན་ཡུལ་ཇོ་ནང་དགོན་འཕྲིན་ལས་རྒྱ་མཚོ། རྔ་ཡུལ་བསེ་དགོན་འཇམ་དབྱངས་བསྟན་པ། རྒྱལ་རོང་པཱ་ལ་དགོན་རིག་རྒྱས། རྒྱལ་རོང་ཁང་སར་དགོན་བཟང་ལྡན། ཛ་འགོའི་རི་ཁྲོད་དཀོན་མཆོག་དཔལ་བཅས་མི་བརྒྱད་མཁན་པོར་མངའ་གསོལ་གྱི་འདེམས་ཐོན་བྱུང་བ་ལྟར་ཁྲི་འདོན་མཛད། བོད་ཟླ་དྲུག་པའི་བཅོ་ལྔ་ལ་དགེ་ཕྲུག་ཆུང་ངུ་འགའ་ལ་བར་མ་རབ་བྱུང་དང་དགེ་ཚུལ་གྱི་སྡོམ་པ་བསྒྲུབས། ཚེས་བཅོ་བརྒྱད་ལ་མཚོ་སྔོན་ཞིང་ཆེན་དུ་ཕེབས་ནས་དགེ་རྒན་དཔྱད་ཞིབ་པའི་མཚན་རྟགས་བཞེས། ཚེས་ཉི་ཤུ་ལྔའི་ཉིན་རྡོ་སྟོད་མཁའ་སྣང་དགོན་པ་སོགས་དགོན་པ་གསུམ་གྱི་ནང་དུ་ཕེབས་ཤིང་སློབ་གཉེར་དང་རབ་བྱུང་བསྟན་པ་དག་ཐེར་ཕྱོགས་ནས་བཀའ་སློབ་མཛད། བོད་ཟླ་བརྒྱད་པའི་ཚེས་བདུན་ནས་བཟུང་ཉིན་བརྒྱད་ཀྱི་ཡུན་ལ་མགོ་ལོག་པདྨའི་རིག་གཞུང་དར་སྤེལ་ཆོས་ཚོགས་ཐེངས་བཅུ་པའི་ཚོགས་གཙོ་རྒན་པའི་ལས་ཁུར་བཞེས་ཤིང༌། གྲྭ་མང་ལ་གྲྭ་བའི་འོས་འགན་གང་ཡིན་དང་སྤོ་ལོ་རྩེ་བ་སོགས་དགེ་འདུན་པའི་ཞབས་འདྲེན་མི་རུང་ཚུལ་གྱི་གསུང་བཤད་དང༌། དད་ལྡན་མང་ཚོགས་ལ་ཡང་ནང་ཆོས་ངོ་སྤྲད་གནང༌། བཅོམ་ལྡན་འདས་ཀྱིས། སཱ་ལའི་ཤིང་ལ་འཁྲི་ཤིང་བཞིན། །དམ་པ་རྣམས་ནི་བསྟེན་གྱུར་པ། །བཟང་པོའི་དཔལ་གྱིས་འཁྱུད་པར་བྱེད། །ཅེས་དང༌། གང་ཞིག་གསེར་གྱི་རི་ལ་བརྟེན་བཅས་པ། །དེ་ཡིས་བྱ་ཚོགས་ཐམས་ཅད་གསེར་དུ་འགྱུར། །ཞེས་དང༌། ཇི་ལྟར་མ་ལ་ཡ་ཡི་ནགས་ཀླུང་དུ། །རྣམ་པར་འཁྱམས་པའི་སྡོང་དུམ་ཕལ་པ་ཡང༌། །ཡལ་འདབ་བརླན་པས་ཙནྡན་དྲི་བསུང་ལྟར། །གང་ལ་བརྟེན་པ་དེ་ཡི་རྗེས་སུ་འགྲོ། །ཞེས་ཏེ། ཙནྡན་གྱི་ནགས་ཚལ་ལ་སྐྱེས་པའི་ཤིང་དུམ་གཞན་ཡང་ཙནྡན་གྱི་བསུང་ངད་ཐུལ་བ་དང༌། གསེར་གྱི་རི་ལ་གནས་པའི་བྱ་བྱེའུ་རྣམས་ཀྱང་གསེར་གྱི་མདོག་ལྟར་དུ་སྣང་བར་གསུངས་པ་ལྟར། བཤེས་གཉེན་རིན་པོ་འདི་ཉིད་ལ་དད་གུས་ཀྱིས་བསྟེན་པ་རྣམས་ལེགས་པའི་ལམ་དུ་བསྒྱུར་བར་མ་ཟད། ཡུལ་ཕྱོགས་གང་དུ་བཞུགས་པ་ཙམ་གྱིས་ཀྱང་ཡུལ་དེའི་ལམ་ཕྱོགས་ལ་བཟང་པོའི་འགྱུར་བ་ཐེབས་ཐུབ་པ་ནི། སྔོན་གྱི་ཐུགས་བསྐྱེད་བླ་ན་མེད་པ་དུས་སུ་སྨིན་པའི་མཐུ་ལས་གྲུབ་པ་ཡིན་གྱི། རང་ཅག་ཕལ་བ་དག་གིས་ཤ་ཐང་ཐང་དུ་འབད་ཀྱང་འགྲུབ་པ་ཞིག་ལར་ནས་མིན། དང་ཐོག་ཡུལ་དགོན་ཨ་སྐྱོང་དགོན་བཤད་གྲྭ་རྨད་བྱུང་ཐོས་བསམ་གླིང་དུ་རྩོད་གྲྭ་བཙུགས་དུས། ཧ་ལམ་མགོ་ལོག་པདྨ་རྫོང་གཅིག་གི་ཁོངས་ན་རྩོད་གྲྭ་གཅིག་པུ་དེ་ཡིན་ཚོད་ཡོད། ལྷག་པར་དུ་ཡུལ་དགོན་དེར་གྲྭ་གོས་གྱོན་ལུགས་ནས་བཟུང་ཀུན་སྤྱོད་ལེགས་བཅོས་བསྐོར་བཤད་ཟིན་ལྟར་བྱས་པའི་རྐྱེན་ལས། མཐའ་མཐའ་ཟ་ཟུར་ཚང་མ་ལ་རང་བཞིན་ཤུགས་ཀྱིས་བཟང་པོའི་ཤན་ཐེབས་ནས་སྔར་ལ་ལྟོས་ན་དགོན་སྡེ་མང་པོ་ཞིག་ཕན་ཚུན་འགྲན་པ་བཞིན་དུ་སྒོ་ཀུན་ནས་ཇེ་ལེགས་སུ་སོང་དང་འགྲོ་མུས་སུ་མངོན་པ་ཡིན་ནོ། །དེ་ནས་ཚེས་བཅྭ་བརྒྱད་ཉིན་སྔ་འགྱུར་གསང་ལུང་དགོན་མཁན་ཤེས་རབ་ལྡན་དར་སྐུ་དགོན་པར་དཔེ་ཁྲིད་དགེ་རྒན་དུ་མངགས། ཡུམ་བརྒྱད་སྟོང་པར། རབ་འབྱོར་དེ་ལྟར་ཤེས་རབ་ཀྱི་ཕ་རོལ་དུ་ཕྱིན་པ་འདི་ཡི་གེར་འདྲི་བ་དང་ཀུན་ཆུབ་པར་བྱེད་པ་དང་སློབ་པར་བྱེད་པ་ལ་བདུད་སྡིག་ཅན་གྱི་བདུད་ཀྱི་ལས་གཞན་དང་གཞན་དག་མང་དུ་འབྱུང་པར་འགྱུར་ཏེ། དེ་དག་བྱང་ཆུབ་སེམས་དཔའ་སེམས་དཔའ་ཆེན་པོས་རྟོགས་པར་བྱའོ་རྟོགས་ནས་ཡོངས་སུ་སྤང་བར་བྱའོ་བསྟེན་པར་མི་བྱའོ་གཞན་དུ་ན་བརྩོན་འགྲུས་བརྩམས་ཤིང་དྲན་པ་དང་ཤེས་བཞིན་དང་ཡང་ལྡན་པར་བྱའོ། །དེ་སྐད་ཅེས་བཀའ་སྩལ་པ་དང༌། བཅོམ་ལྡན་འདས་ལ་ཚེ་དང་ལྡན་པ་རབ་འབྱོར་གྱིས་འདི་སྐད་ཅེས་གསོལ་ཏོ། །བཅོམ་ལྡན་འདས་དེ་དེ་བཞིན་ནོ་བདེ་བར་གཤེགས་པ་དེ་དེ་བཞིན་ཏེ། བཅོམ་ལྡན་འདས་ནོར་བུ་རིན་པོ་ཆེ་ཆེན་པོ་གང་ལགས་པ་དེ་དག་ལ་དགྲ་མང་ངོ༌། །དེ་ཅིའི་སླད་དུ་ཞེ་ན། བཅོམ་ལྡན་འདས་འདི་ལྟ་སྟེ། རྙེད་པར་དཀའ་ཞིང་རིན་ཆེ་བའི་སླད་དུ་སྟེ་དེ་དག་དབྱིག་ལགས་པས་ན་དེའི་སླད་དུ་དེ་དག་ལ་དགྲ་མང་བར་འགྱུར་རོ། །གསུངས་པ་ལྟར། ཆོས་སྲིད་ལེགས་ཉེས་ཀྱི་རླབས་པོ་ཆེའི་མཛད་པ་བསྐྱངས་པ་ལ་གང་དུ་སུ་ལ་ཡིན་ཡང་བར་ཆད་དང་གནོད་པ་ཡོད་པ་ནི་སྤྱིའི་ལུགས་ཡིན་པ་ལྟར། དགོན་དེའི་སྤྲུལ་སྐུ་རེ་ཁྲི་འདོན་ཐད་ནས་དོ་དམ་ཁང་དང་ཁོང་ཚོར་ནང་ཕན་ཚུན་ཡིད་མི་མཐུན་པ་རེ་ཡོད་པ་དང༌། དོ་དམ་ཁང་གིས་བཤད་གྲྭའི་ལས་འགན་ཞིག་ཐོག་ཏུ་བཀལ་བ་དང་ཐོག་ཁས་བླངས་ཀྱང་ཕྱིས་མ་བསྒྲུབས་པའི་རྐྱེན་བྱས་ཏེ། སྡུག་ཡོས་བཤེས་གཉེན་རིན་པོ་ཆེ་ལ་ཕོས་ཏེ། འགའ་རེས་མི་འཚམ་པའི་ལས་ཀ་སྣ་ཚོགས་ཤིག་བྱུང་ཡང༌། དེ་ཙམ་གྱིས་བག་ཞ་བ་ལྟ་ཅི། ཐུགས་སྟོབས་བླ་ལྷག་ཏུ་འཕེལ་བའི་རྐྱེན་དུ་གྱུར་བ་ཡིན་ཏེ། དེ་སྐབས་ཤིག་ལ་བཤེས་གཉེན་བཀའ་དྲིན་ཅན་ཉིད་ནས་བཀའ་སློབ་གནང་དོན། ཁོ་བོ་ལ་ནམ་རྒྱུན་གཞན་གྱིས་འདྲ་མིན་སྣ་ཚོགས་ཀྱི་སྒོ་ནས་སྒྲོ་འདོགས་སྐུར་འདེབས་མི་འཚམ་པ་མང་པོ་བྱེད་ཡོང་དུས། གློ་བུར་ཕྲལ་ཕྲལ་ལ་ཅུང་ཟད་ཀྱང་མི་གནོད་པ་ཞིག་རེད་ཡོད་པ་མིན་ན་ཡང༌། སེམས་ཁྲལ་ཆེ་ཤོས་དེ་ཁོ་བོ་ལ་རེ་ལྟོས་འཆའ་བའི་སློབ་མ་ཁྱེད་ཅག་གིས་ཁོང་ཁྲོ་ཞེ་སྡང་གི་ལས་ངན་གསོག་རྐྱེན་དུ་འགྱུར་ཨེ་འགྲོ་དྲན་པ་དེ་ཁ་ཞེ་གཉིས་མེད་ཡིན། བདག་ལ་མཚོན་ན་རང་གིས་ཐུབ་ཚོད་ཀྱིས་བྱ་བ་ཞིག་སྒྲུབ་ཁུལ་བྱེད་ཀྱིན་ཡོད་པ་ཡིན་པས། གཞན་ལ་ཁོང་ཁྲོ་སློང་བ་དང་དམའ་འབེབས་པ་ཅི་ཡང་མིན་ན་ཡང༌། སྐབས་རེར་བདེན་པ་ཨེ་ཚུགས་མཐར་སྐྱེལ་བྱས་ཏེ་བཤད་པ་དང་སྒྲུབ་པ་འདྲ་མ་བྱས་ཐབས་མེད་རེད། དེས་རྐྱེན་པས་ད་དུང་ཡང་འགལ་རྐྱེན་ཇི་འདྲ་བ་ཞིག་བྱུང་རུང༌། ཁྱེད་རྣམ་པའི་ངོས་ནས་ཐོས་བསམ་སྒོམ་གསུམ་ལ་འབད་པ་མ་གཏོགས་ཆགས་སྡང་གི་རོགས་རམ་ཞིག་གཏན་ནས་དགོས་པ་མེད། བྱ་བ་ཆེ་ཞིག་སྒྲུབ་ན་བར་ཆད་དང་དཀའ་ལས་གང་ཐད་ནས་ཆེ་ཞིག་ཡོད་པ་དང༌། བྱ་བ་ཆུང་ཆུང་ཞིག་སྒྲུབ་ན་བར་ཆད་དང་དཀའ་ལས་ཆུང་ངུ་ཞིག་ལས་ཡོད་པ་མ་རེད། དེ་ནི་འཇིག་རྟེན་གྱི་ཆོས་ཉིད་ཅིག་ཡིན་པས། སེམས་སྐྱོ་སྐྱོ་གནང་དགོས་ས་ཞིག་དང་བག་འཁུམས་དགོས་ཡུལ་ཞིག་ལར་ནས་མིན་པ་རེད། དཀའ་ལས་དང་བར་ཆད་ཅི་བྱུང་རུང་རང་ཚུགས་མི་འབོར་བར་བརྩོན་པ་བསྐྱེད་དེ་འགྲོ་དགོས་པ་རེད། ཡར་ལངས་ནས་འགྲོ་ཐུབ་ན་ལངས་ནས་འགྲོ་བ་དང༌། དེ་མ་ཐུབ་ན་ནུར་ནས་ཡིན་ཡང་མདུན་བསྐྱོད་བྱེད་དགོས་པ་ལས། ཏ་བར་ཆད་མང་དྲགས། སེམས་པ་སྐྱོ་སོང་ཞེས་མཚམས་འཇོག་བྱས་བཞག་ན་བར་ཆད་དངོས་མ་དེ་རང་གིས་རང་ལ་བཟོས་པ་རེད། ཁྲོ་ཐུང་ཁྲོ་མ་ཐུང་ན་གེ་སར་གེ་སར་གི་མ་རེད་ཅེས་པའི་དཔེ་ལྟར། འཛམ་གླིང་བྱེ་བ་ཕྲག་བརྒྱ་ན་བཅོམ་ལྡན་འདས་བྱེ་བ་ཕྲག་བརྒྱ་དང༌། དེ་རེ་རེའི་འཁོར་ན་ལྷས་བྱིན་བྱེ་བ་ཕྲག་བརྒྱ་ཡོད་གསུངས་པ་རེད། དེ་ཡང་དགོས་རྒྱུ་ཞིག་ཡིན་པས་རེད། དེས་ན་བར་ཆད་ཉུང་ངུ་རེ་རྩོམ་མཁན་ཡོད་ན་དགའ་བ་ལས་མེད་པར་རེ་བ་བྱེད་དགོས་དོན་ཅི་ཞིག་ཡོད། ལ་ལས་བསྟོད་ཅིང་འགའ་རེས་སྨད་ནས་འགྲོ་ན་ད་གཟོད་ནུས་པ་དང་ལྡན་ཞིང་ཀུན་ཀྱིས་བློ་ཁ་ཕྱོགས་པ་ཞིག་ཡོང་གི་རེད་མ་གཏོགས། བྱ་བ་རླབས་ཆེན་ཞིག་ཡོང་དགོས་ན་འཇམ་ཐང་ཐང་གིས་གནས་འདུག་པས་འགྲུབ་རྒྱུ་གང་ཡང་ཡོད་པ་མ་རེད། རིན་པོ་ཆེ་ལ་དགྲ་མང་པ་རེད་མ་གཏོགས། རྡོའི་འཆང་བུ་ཞིག་རྐུན་པོ་རྒྱག་མཁན་སུ་ཞིག་ཡོད། ཐང་བདེ་བདེ་ཞིག་གི་ནང་ལ་རི་འབུར་འབུར་ཞིག་ཡོད་ན་ནམ་ཡང་རླུང་གིས་དེ་ལ་ཕོག་གི་རེད། རི་མཐོ་དང་མཐོ་བཞིན་རླུང་དེ་དང་དེར་བསྟུན་རྒོད་ཀི་རེད། སྤྱིར་སྒྲོ་འདོགས་སྐུར་འདེབས་དང་བར་ཆད་ཉེས་པ་ཅི་བྱུང་རུང༌། གཞན་ཁོ་ནས་ཉེས་པར་ཡང་བསམ་དུ་མེད་པ་རེད། མདོ་དྲན་པ་ཉེར་བཞག་ལས། མེ་ནི་གྲང་བར་འགྱུར་ཡང་སྲིད། །རླུང་ནི་ཞགས་པས་ཟིན་ཡང་སྲིད། །ཉི་ཟླ་ཐང་ལ་ལྷུང་ཡང་སྲིད། །ལས་ཀྱི་རྣམ་སྨིན་བསླུ་མི་སྲིད། །ཅེས་དང༌། མདོ་སྡེ་ལས་བརྒྱ་པར། ལས་བྱས་ཤིང་བསགས་པ་རྣམས་ནི། ཕྱི་རོལ་གྱི་སའི་ཁམས་ལ་རྣམ་པར་སྨིན་པར་མི་འགྱུར། ཆུའི་ཁམས་དང་མེའི་ཁམས་དང་རླུང་གི་ཁམས་ལ་རྣམ་པར་སྨིན་པར་མི་འགྱུར་ཏེ། ལས་དགེ་བ་དང་མི་དགེ་བ་བྱས་ཤིང་བསགས་པ་རྣམས་ནི་ཟིན་པའི་ཕུང་པོ་དང་ཁམས་དང་སྐྱེ་མཆེད་རྣམས་འབའ་ཞིག་ལ་རྣམ་པར་སྨིན་པར་འགྱུར་རོ། །ལུས་ཅན་དག་གི་ལས་རྣམས་ནི། །བསྐལ་པ་བརྒྱར་ཡང་ཆུད་མི་ཟ། །ཚོགས་ཤིང་དུས་ལ་བབ་པ་ན། །འབྲས་བུ་ཉིད་དུ་སྨིན་པར་འགྱུར། །ཞེས་ལན་དུ་མར་གསུངས་པ་ལྟར། འཕགས་པ་མོ་འགལ་གྱི་བུ་གཞན་གྱིས་བཀྲོངས་པ་དང༌། འཆར་ཀ་དགྲ་བཅོམ་པར་གྱུར་ནས་བསད་པ་དང༌། རྒུར་ཆུང་དགྲ་བཅོམ་པ་ཐོབ་ཀྱང་ཐལ་སྐྱ་གསོལ་ནས་འདས་པ་དང༌། དགེ་སློང་གྱད་པུ་ནོར་ལན་མང་དུ་ཚུལ་ཁྲིམས་འཆལ་བའི་སྐུར་བ་བྱུང་པ་སོགས། ཚེ་འདིར་བྱ་བ་ཉེས་པ་མཐོང་ཆོས་སུ་བྱས་པ་མེད་ཀྱང༌། དེ་ཐམས་ཅད་ལ་ཚེ་རབས་སྔོན་གྱི་ལས་འདི་དང་འདི་བྱས་པས་རེད་ཅེས་བཅོམ་ལྡན་འདས་ཐུགས་ཤེས་བྱ་མ་ལུས་པ་མཁྱེན་པ་གང་གི་ཞལ་སྔ་ནས་གསུངས་ཡོད་ན། རང་ཅག་ལ་ལྟ་སྨོས་ཀྱང་ཅི་དགོས་རེད། ཅེས་སོགས་ཆོས་དང་འཇིག་རྟེན་གཉིས་ཅར་གྱི་ཐད་ནས་བཀའ་གསུང་རིན་ཐང་དང་བྲལ་བ་གསུངས་སོ། །བོད་ཟླ་དགུ་པའི་ཚེས་དགུ་ཉིན་རྒྱལ་རོང་ཞིང་སྒྲུབ་ཆེན་མོར་ཕེབས་ནས་བདེ་བ་ཅན་གྱི་རྒྱུ་བཞི་སོགས་གསུངས་ཤིང༌། ཕྱི་ཉིན་ཚེས་བཅུ་ལ་མཚོ་བདུན་དགོན་པར་ཚད་མའི་བགྲོ་གླེང་དུ་བྱོན་ནས་ལུང་རིགས་ཀྱི་བརྒལ་བརྟག་གནང༌། ཚེས་བཅུ་གཉིས་ལ་ཙག་དགེ་བ་དགོན་དུ་བྱོན་ནས་ནང་ཆོས་ངོ་སྤྲོད་དང་རིག་གནས་སློབ་སྦྱོང་བསྐོར་ནས་གསུང་བཤད་དང༌། ཚེས་བཅུ་གསུམ་ཉིན་རྒྱལ་རོང་ཁང་སར་དགོན་དུ་ཕེབས་ནས་བློ་ལྡོག་རྣམ་པ་བཞིའི་ཆོས་ཁྲིད་གསུངས་སོ། ། གལ་ལ་མེད་པ་ལྦུ་བ་ལྟ་བུའི་བྲག་ཆའི་ཆོས་གཏམ་མ་ཡིན་པར། ། རང་ལ་བབ་ན་ལས་འབྲས་བསླུ་མེད་སྨིན་པ་ཡིན་ཞེས་བློ་བདེ་བའི། ། བཀའ་གདམས་གོང་མའི་རྣམ་པར་ཐར་ལ་རྗེས་སུ་སྙེག་པའི་མཛད་སྤྱོད་རེས། ། དིང་འདིར་ཆོས་དང་ཆོས་པའི་མིང་གིས་འཁེངས་པ་ཁོ་ནར་སྤྱོད་ཀུན་ཁྲེལ། ། སྙིགས་དུས་ཀྱི་བསྟན་པའི་གསལ་བྱེད་ཆེན་པོ་ངག་དབང་འཇིགས་མེད་དངོས་གྲུབ་དཔལ་བཟང་པོའི་མཛད་བཟང་བསླབ་གསུམ་ནོར་བུའི་གླིང་ཁ་ཞེས་བྱ་བ་ལས་འགལ་རྐྱེན་མཐུན་གྲོགས་སུ་བཀུག་ཅིང་ལས་འབྲས་བསླུ་མེད་ཀྱི་གསུང་ཁྱད་པར་བ་གནང་བའི་རྣམ་ཐར་བསྐོར་མདོར་བསྡུས་པ་སྟེ་ཉེར་དྲུག་པའོ། ། ཇོ་ནང་ཡང་དར་བསྟན་པའི་བྱེད་པོ་ཞེས་པའི་མཚན་ཐོགས་ཤིང་ཆོས་ཐང་དགོན་དུ་ལོ་ལྔར་བཀའ་དྲིན་བསྐྱངས་གྲུབ་བསྐོར་གྱི་རྣམ་ཐར།སྔ་མའི་འཕྲོས་ཉིད་ནས་འདི་སྐབས་ཤིག་ལ་མཁས་པའི་དབང་པོ་ཞི་བར་གཤེགས་པ་སེར་བྱེས་ལྷ་རམས་པ་འཇམ་དཔལ་བློ་ཤེས་མཆོག་གི་ཞལ་སྔ་ནས་བཤེས་གཉེན་རིན་པོ་ཆེ་ཉིད་ལ་ཞབས་བརྟན་སྨོན་ཚིག་ཕུལ་བར། ཟབ་མོ་མདོ་སྔགས་གཞུང་བརྒྱ་སྨྲ་བ་ལ། །ལུང་རིགས་གད་རྒྱངས་གཞན་ལས་མཐོ་བ་ཅན། །དེ་དོན་བརྩེ་བས་གཞན་ལ་འདོམས་མཁས་པ། །མཉམ་མེད་དགེ་བའི་བཤེས་ཉིད་རྒྱལ་གྱུར་ཅིག །ཀུན་མཁྱེན་རྒྱལ་བའི་གསུང་རབ་རྒྱ་མཚོ་ལ། །རྣམ་དཔྱོད་བློ་གྲོས་རྩལ་གྱིས་བསྲུབས་པ་ལས། །བྱུང་བའི་གང་གསུང་ཟླ་བ་ནོར་བུའི་འོད། །ཇོ་ནང་བསྟན་པ་གསལ་བའི་རྒྱན་དུ་ཆེ། །ཁྱད་པར་བསྟན་ལ་གཅིག་ཏུ་དད་པ་དང༌། །གཞན་ཕན་འོད་ཟེར་ཕྱོགས་བརྒྱར་འཕྲོ་བ་ཡི། །ཐོས་བསམ་སྒོམ་པའི་ཉི་མ་འོད་པོ་ཆེས། །རྒྱལ་བསྟན་ཉིན་མོར་བྱེད་འདིར་ལྷག་པར་དད། །དཔལ་ལྡན་དུས་ཀྱི་འཁོར་ལོའི་རིམ་གཉིས་ཀྱི། །དངོས་གྲུབ་རྣམ་གཉིས་སྒྲུབ་པའི་ལས་སྨོན་ཅན། །མཁས་བཙུན་བཟང་པོའི་དཔལ་མངའ་ཆོས་ཀྱི་གྲོཊ། །སྐུ་ཚེ་བརྟན་ཞིང་མཛད་འཕྲིན་རྒྱས་གྱུར་ཅིག །ཅེས་ཇོ་ནང་དགེ་བཤེས་དངོས་གྲུབ་དཔལ་མཆོག་གི་མཛད་འཕྲིན་ཕྱོགས་མང་པོ་ལ་རྒྱུན་དུ་ཡི་རང་དཔག་མེད་ཅིག་ཡོད་མུས་ལ། ལྷག་པར་རྒྱལ་བ་ཇོ་ནང་པའི་བསྟན་པ་ལ་ཁ་ཙམ་ཚིག་ཙམ་མིན་པར་གོ་རིམ་ལྡན་པའི་སློབ་གཉེར་གྱི་རྨང་གཞི་བཙུགས་ཤིང༌། འཆད་རྩོད་རྩོམ་གསུམ་གྱི་སྒོ་ནས་ལུང་རྟོགས་ཀྱི་བསྟན་པ་འཛིན་སྐྱོང་སྤེལ་གསུམ་གནང་སྟེ་རྒྱལ་བ་ཇོ་ནང་བའི་ཡང་དར་བསྟན་པའི་བྱེད་པོ་ཉིད་དུ་བཞེངས་པར་དགའ་གུས་ཡི་རང་ཚད་མེད་ངང༌། ཁོང་གི་སྐུ་ཚེ་བརྟན་ཅིང་མཛད་འཕྲིན་དབྱར་མཚོ་ལྟར་རྒྱས་པའི་སྨོན་འདུན་བཅས། སེར་བྱེས་དགེ་བཤེས་འཇམ་དཔལ་བློ་ཤེས་ཀྱིས། ཞེས་ཇོ་ནང་ཡང་དར་བསྟན་པའི་བྱེད་པོ་ཞེས་པའི་མཚན་དོན་དང་མི་གཉིས་པ་བསྩལ་པ་ལས། རིམ་པར་གཞི་བྱེས་གཉིས་ཀར་དུ་མཚན་གྱི་གདུགས་དཀར་དེ་ཉིད་ཡོངས་སུ་གྲགས་པར་གྱུར་པ་ཡིན་ནོ། །དེ་ནས་མཚོ་སྔོན་ཟི་ལིང་དུ་རེ་བའི་གཟེངས་རྟགས་ཀྱི་སྲོལ་ཡིག་གསར་བཟོའི་མཁས་མང་དཔྱད་བསྡུར་བགྲོ་གླེང་གི་སྟེང་དུ་ཕེབས། དགུ་པའི་ཉེར་གཉིས་ཏེ་སྟོན་པ་ལྷ་ལས་བབ་པའི་དུས་ཆེན་ཁྱད་པར་བ་ལ་གངས་ལྗོངས་རིས་མེད་མཐོ་སློབ་ཀྱི་ཕར་ཕྱིན་དམ་བཅའ་ཆེན་མོ་ཐེངས་ལྔ་པ་བཞག །བོད་ཟླ་བཅུ་པའི་ཚེས་བཅུ་བཞི་ནས་བཟུང་སྟེ་ཉིན་བརྒྱད་ཀྱི་ཡུན་ལ་གངས་ལྗོངས་རིས་མེད་ལྔ་རིག་སློབ་གླིང་གི་བདེ་ཆེན་ཞིང་སྒྲུབ་ཆེན་མོ་ཚོགས་ནས་མི་མང་ལ་བདེ་བ་ཅན་དུ་སྐྱེ་བའི་རྒྱུ་ཚོགས་སྒྲུབ་ལུགས་རྩ་བར་བྱས་ཏེ་སྐབས་སུ་སྨན་པའི་གསུང་ཆོས་དུ་མས་ཚིམས་པར་བྱས་ཤིང༌། འགྲོ་ཀུན་བདེ་ཆེན་ཞིང་དུ་སྐྱེ་བའི་ཐུགས་སྨོན་ཚོམས་བསྒྲུབས་བྱས། སྐབས་དེར་ཛམ་ཐང་ཆོས་རྗེ་དགོན་དུ་ཕེབས་ནས་ཀྱང་དད་ལྡན་མང་ཚོགས་ལ་ནང་ཆོས་ངོ་སྤྲོད་གནང༌། ཟླ་དེའི་གནམ་གང་གི་ཉིན་མཚོ་སྔོན་དུ་སྟོན་པའི་མཛད་རྣམ་མུ་འབྲེལ་བརྙན་འཕྲིན་ལེའུ་ང་བཞི་ཅན་འགྲེམ་སྤེལ་གྱི་སྒོ་འབྱེད་ཚོགས་སྟེང་དུ་ཕེབས་ནས། སྟོན་པའི་མཛད་པ་བཅུ་གཉིས་ལས་བརྩམས་ཏེ་གཏམ་བཤད་བྱས། བོད་ཟླ་བཅུ་གཅིག་པའི་ཚེས་བཞི་ལ་ཆོས་བརྒྱུད་དྲུག་གི་ཚོགས་མི་དང་རྙིང་མའི་གདན་ས་དྲུག་དང་ཆོས་སྡེ་རྣམ་པ་གཉིས་བཅས་ཀྱི་གྲྭ་བཙུན་སྔགས་གསུམ་ཀུན་སྤྱོད་ཡར་བསྐུལ་ཚོགས་ཆེན་ཐེངས་གསུམ་པའི་སྟེང་ནས་བསྟན་པ་འཛིན་སྐྱོང་སྤེལ་གསུམ་གྱི་ཐད་ནས་གཏམ་བཤད་དང་བགྲོ་གླེང་མཛད། དེ་ནས་ཕྱིར་ཕེབས་ཏེ་ས་དམར་དགོན་རྡོ་རྗེ་སློབ་དཔོན་བླ་མ་དཀོན་མཆོག་རབ་གསལ་གྱི་མདུན་ནས་རྟ་ཕྱག་ཁྱུང་གསུམ་གྱི་རྗེས་གནང་ཞུས་ཤིང༌། གསུང་མོལ་ལྷུག་པོར་མཛད་དེ་ཐུགས་དགོངས་མཐུན་ཞིང་ཕན་ཚུན་དག་སྣང་གི་མོས་གུས་འཕེལ་བའི་གསུང་གླེང་མང་དུ་ཕེབས། ཚེས་བཅུ་དྲུག་ལ་རྡོ་ཁོག་བར་གདོང་དགོན་དུ་མ་ཎི་དུང་སྒྲུབ་ཚོགས་པར་བྱོན་ནས་ཆོས་ཁྲིད་མཛད་ཅིང༌། དར་སྐུ་དགོན་པར་བྱོན་ནས་གྲྭ་མང་དང་མང་ཚོགས་ལ་བཀའ་སློབ་དང་ཆོས་ཀྱི་གྲུ་ཆར་ལྷུག་པོར་ཕབ། ཟླ་དེའི་ཚེས་ཉི་ཤུ་ཐམ་པའི་ཉིན་གངས་ལྗོངས་རིས་མེད་མཐོ་སློབ་ཀྱི་ལོ་འཁོར་རྒྱུགས་སྤྲོད་ཆེན་མོ་ཡོངས་སུ་རྫོགས་པར་གྲུབ་ཅིང༌། བཀྲ་ཤིས་ཕུན་སུམ་ཚོགས་པའི་ངང་སློབ་གཉེར་བ་རྣམས་ལ་བྱ་དགའི་གཟེངས་རྟགས་བསྩལ་ཏེ། གྲྭ་བ་ཞིག་ཡིན་ཕྱིན་སྤོང་པ་བསམ་གཏན་དང་ཀློག་པ་ཐོས་བསམ་གྱི་བྱ་བས་དུས་འདའ་དགོས་པའི་གསུང་བཤད་གནང༌། ལོ་ལྔའི་ཡུན་ལ་བཀྲ་ཤིས་ཆོས་ཐང་དགོན་དེར་ཡང་སྔོན་ཆད་བྱུང་མྱོང་མེད་པའི་འཆད་རྩོད་རྩོམ་གསུམ་གྱི་བསྐལ་པ་རྫོགས་ལྡན་གྱི་དགའ་སྟོན་མངོན་པར་མཛད་པའི་བཀའ་དྲིན་མཚོན་བྱེད་དུ་མཎྜལ་ཕུལ་བ་རྣམས། མཁན་པོ་དགེ་རྒན་སོགས་ལ་ཅི་ཐོབ་ཐོབ་ཏུ་བགོས་ནས་ཕུལ་བར་བྱས། སྔོན་གྱི་བླ་མ་གོང་མའི་གསུང་ན། ཆོས་ཕར་བཤད་དགོས། ཞབས་ཏོག་ཕར་བྱེད་དགོས། ཕྱག་ཕར་ལ་སྟོབ་དགོས། དྲིན་ཚུར་ལ་འདེད་དུ་འོང༌། ང་ལ་ནི་བཙུན་པའི་སློབ་མས་དགོས་པ་མེད། གསུངས་པ་ལྟར། བཤེས་གཉེན་རིན་པོ་ཆེ་འདི་ཉིད་ཀྱིས་ཆོས་དང་ཟང་ཟིང་ཡོངས་སུ་རྫོགས་པས་བཀའ་དྲིན་ཆེན་པོས་ཕར་ཡོད་ཚད་བཏང་ནས་བསྐྱངས་པ་ལས། སློབ་མ་ལས་ཚུར་རྒྱུ་དང་ཟས་གོས་མངའ་ཐང་བསྡུ་ཐབས་དོགས་པ་བསྐྱེད་པའི་ཟུར་ཙམ་ཡང་བྱེད་མྱོང་མེད། འཁང་ར་དང་ཡོས་འདོན་མེད་པར་དེ་ཚོ་ཁོའི་ལས་འགན་རེད་ཅེས་རྒྱུན་དུ་བཀའ་གསུང་གནང་བར་མཛད་པའི་བཀའ་དྲིན་གྱི་ཁུར་འགྲན་ཟླ་མེད་པའི་རང་བཞིན་ཅན་ཞིག་སྟེ། རང་ཅག་སློབ་མ་རྣམས་ཀྱིས་ཀྱང་དམིགས་དཔེ་འདི་སེམས་ནས་མི་འབོར་བར་འདོད་ཆེན་དཀོར་ཀྱི་ནང་དུ་མགོ་བོ་འཁོར་བ་ཞིག་མི་བྱེད་རྒྱུ་གལ་འགངས་ཆེ་བར་སེམས་སོ། །རྗེ་ཏཱ་ར་ནཱ་ཐའི་རང་རྣམ་མ་བཅོས་ལྷུག་པ་ལས། ད་ལྟའི་བར་དུ་ཁ་ཟས་ཉུང་ངུ་ཙམ་ཟ། མང་པོ་ཡོག་པའི་ཚང་ཡང་མིན། ཞིམ་ལྟོ་ལ་དགའ་ཤོས་ཀྱང་མིན། བཟའ་བཏུང་ལ་རུ་ང་པོ་དེ་འདྲའི་ཚང་ཡང་མིན། གོས་ཀྱང་རིན་ཐང་ཆེ་ཆེ་མོ་དང་བཟང་བཟང་མོ་མ་བྱས། ཆེ་ཁྱད་དང་སྣང་ཤས་ཀྱི་ཤེས་འདོད་ཀྱང་མི་ཡོང་བ་འདུག །འདོད་ཆུང་ཆོག་ཤེས་རང་ཏ་མ་ལགས་ཏེ། འདོད་ཆེན་ཆོག་མི་ཤེས་ལ་ཁ་ཐལ་བ་རང་མིན་ཙམ་བདོག །ཟ་མི་ནུས་གོན་མི་ནུས་པའི་སེར་སྣ་རང་ཡང་མིན། ཟས་གོས་ཐམས་ཅད་གཞན་ལ་བྱིན་པ་ཀུན་གྱི་དགོངས་མོད། གསུངས་པ་ལྟར་རྒྱུ་རྫས་ལོངས་སྤྱོད་ལ་ཞེན་པ་མེད་པའི་མཚན་གཞི་གཅིག་འཇོག་དགོས་ན་མགྲིན་པ་གཟེངས་བསྟོད་དེ་སྨྲ་བར་སྤོབས་པའི་གནས་བརྟན་ཆེན་པོ་ཞིག་ཡིན་ལ། ཁོང་ཉིད་ནས་ཀྱང་འདོད་ཆུང་ཆོག་ཤེས་དགོས་ཚུལ་གྱི་བཀའ་སློབ་རྒྱུན་དུ་ཕེབས་པ་ཡིན་ནོ། །བོད་ཟླ་བཅུ་གཉིས་པའི་ཚེས་བཅུ་གཉིས་ལ་བདེ་ཐང་ལམ་སྟོན་ཞེས་པའི་ཚོགས་འདུའི་སྟེང་དུ་བདེ་ཐང་གི་ཕྱོགས་ནས་སློབ་སྟོན་མཛད། བོད་ཟླ་བཅུ་གཉིས་ཀྱི་ཚེས་ཉེར་གཅིག་ལ་མགོ་ལོག་པདྨ་སྨར་མདོ་བཀྲ་ཤིས་དགའ་འཁྱིལ་ཐུབ་བསྟན་བཤད་སྒྲུབ་གླིང་དུ་རྒྱུགས་སྤྲོད་དཔང་བཞུགས་དང་བཀའ་སློབ་གནང༌། ཚེས་ཉེར་གཅིག་ལ་སྨིན་ཐང་ཤར་བླ་རུང་ཉམས་རྟོགས་རང་ཤར་གླིང་དུ་ལོ་འཁོར་རྒྱུགས་སྤྲོད་ཀྱི་སྟེང་དུ་ཕེབས་ནས། ལུང་རིགས་ཀྱི་བརྒལ་བརྟག་དང༌། རྒྱུགས་སྤྲོད་ཀྱི་དཔང་བཞུགས། བཀའ་སློབ་ཟབ་རྒྱས་དང་བཅས་པའི་བཀའ་དྲིན་བསྐྱངས། ཕྱི་ལོ། ༢༠༡༨ སྟེ་བོད་རབ་བྱུང་བཅུ་བདུན་པའི་ས་ཕོ་ཁྱི་ལོའི་བོད་ཟླ་དང་པོའི་ཚེས་གཅིག་གི་ཉིན་མགོ་ལོག་ལྕམ་མདའ་དགོན་པར་དཔེ་ཁྲིད་དུ་ཕེབས་ནས། གཞན་སྟོང་བགྲོ་གླེང་གི་དྲིས་ལན་གྱི་ཁྲིད་མཛད་ཅིང༌། ཚེས་བཅུ་དགུའི་ཉིན་དགོན་དེའི་ས་ཏྭ་དུང་སྒྲུབ་ཀྱི་ཆོས་ཚོགས་སྐབས་གྲྭ་མང་དང་དད་ལྡན་མང་ཚོགས་རྣམས་ལ་ནང་ཆོས་ངོ་སྤྲོད་མཛད། འདི་སྔོན་དུ་ལྕམ་མདའ་དགོན་དུ་དཔེ་ཁྲིད་ཐེངས་བརྒྱད་ལ་བཀའ་དྲིན་བསྐྱངས་པ་ཡིན། བདེན་གཉིས་ཆོས་ཚུལ་ལེགས་པར་བཤད་པའི་ཟག་བྲལ་ངག་གི་ཕུན་ཚོགས་ཀུན། ། དབང་བསྒྱུར་གདུལ་བྱའི་མོས་བློར་གང་འཚམས་དངོས་སུ་ཞི་བར་ཁྲིད་མཁས་ཞེས། ། དོན་གྲུབ་གྲགས་སྙན་དཔལ་སྟུག་དབྱར་རྔ་གཟུར་གནས་འབུམ་གྱིས་རྡུང་བའི་ཞིང༌། ། ཇོ་ནང་ཡང་དར་བསྟན་པའི་བྱེད་པོའི་མཚན་གྱི་སྙན་པ་གཞི་བྱེས་གཉིས་སུ་གྲགས་པ་འབར། ། སྙིགས་དུས་ཀྱི་བསྟན་པའི་གསལ་བྱེད་ཆེན་པོ་ངག་དབང་འཇིགས་མེད་དངོས་གྲུབ་དཔལ་བཟང་པོའི་མཛད་བཟང་བསླབ་གསུམ་ནོར་བུའི་གླིང་ཁ་ཞེས་བྱ་བ་ལས་ཇོ་ནང་ཡང་དར་བསྟན་པའི་བྱེད་པོ་ཞེས་པའི་མཚན་ཐོགས་ཤིང་ཆོས་ཐང་དགོན་དུ་ལོ་ལྔར་བཀའ་དྲིན་བསྐྱངས་གྲུབ་བསྐོར་གྱི་རྣམ་ཐར་མདོར་བསྡུས་པ་སྟེ་ཉེར་བདུན་པའོ། ། ཁང་སར་ཉིན་ཡུལ་ན་སློབ་གླིང་འཚོགས་འཆར་བསྒྱུར་ནས་བསྭེ་དགོན་དུ་ཕེབས་པའི་བསྐོར་གྱི་རྣམ་ཐར།ཚེས་ཉི་ཤུ་གཉིས་ཉིན་ཞབས་ཟུང་ཐབས་ཤེས་ཀྱི་འཁོར་ལོ་མགོ་ལོག་ཁང་སར་ཉིན་ཡུལ་ཇོ་ནང་དགོན་དུ་ཉེ་བར་བཀོད་དེ། སློབ་གླིང་གསར་བ་ཕྱི་ནང་ཡོངས་ལེགས་པར་གྲུབ་པ་ལ་ཕྱོགས་མཐའ་ཡོངས་ནས་བུང་བ་ཚང་ལ་འདུ་བ་ལྟར་ཆོས་བརྒྱུད་རིས་སུ་མ་མཆིས་པའི་སློབ་གཉེར་བ་བརྒྱ་ཕྲག་མང་པོ་འདུས་ཏེ། ལོ་སྔ་མ་ནས་གཏན་ལ་ཁེལ་ཚར་བ་ལྟར་རྒྱལ་རོང་གྱང་སྒང་དགོན་རབ་གསལ་མཁན་ལས་ཐོག་པར་བཞག །ཉིན་ཁ་ཤས་མཚམས་སུ་མདོ་ལིའི་རྡོ་ཁ་དགོན་མི་རྟོག་རྡོ་རྗེ་མཁན་པོའི་མཚན་གསོལ་ནས། ཛ་འགོའི་རི་ཁྲོད་བྱང་ཆུབ་ཆོས་རྫོང་དུ་མཁན་པོར་མངགས། ལྷ་ཟབ་སར་བདུད་ཟབ་ཅེས་པའི་དཔེ་ལྟར། སློབ་གཉེར་བ་ཐོག་གཅིག་ལ་འདུ་བ་མང་དྲགས་པས་གོང་རིམ་ནས་ཆོག་མཆན་མ་སྤྲད་པ་སོགས་ཕྱི་ནང་གི་རྐྱེན་གྱིས་ཟླ་བ་གཅིག་གི་ཡུན་ཙམ་ནས་གྲོལ་དགོས་བྱུང༌། སྐབས་དེར་བཀའ་སློབ་ཕེབས་པར། མང་པོ་ཞིག་གིས་ད་ཅི་བྱེད་དགོས་པ་རེད་ཟེར་ནས་སེམས་མ་བདེ་བ་བྱུང་བའི་སྐད་ཆ་མང་པོ་ཤོད་ཡོང་གིན་འདུག་སྟེ། རྒྱལ་སྲས་ཞི་བ་ལྷས། གལ་ཏེ་བཅོས་སུ་ཡོད་ན་ནི། །དེ་ལ་མི་དགར་ཅི་ཞིག་ཡོད། །གལ་ཏེ་བཅོས་སུ་མེད་ན་ནི། །དེ་ལ་མི་དགའ་བྱས་ཅི་ཕན། །ཞེས་གསུངས་པ་ལྟར། ང་ཚོའི་ངོས་ནས་ནུས་པ་དང་ཐབས་ཤེས་གང་ཡོད་ཅིག་བཏོན་པ་རེད། དེ་ཚོ་ཚང་མ་བསྟན་པ་དང་འགྲོ་བའི་བདེ་སྐྱིད་ཀྱི་ཆེད་དུ་ལས་ཀ་བྱེད་བཞིན་པ་ཡིན་མ་གཏོགས། ང་རང་ལ་མཚོན་ན་དང་ཐོག་རྒྱ་གར་འཕགས་པའི་ཡུལ་ནས་མར་ལོགས་ཡོང་དུས་ནས། རང་གཅིག་པུས་ཕྲེང་རྡོག་རེ་བགྲངས་ནས་འདུག་སྐབས་ཤིག་ལ་ཤི་བོ་ཆོས་ལ་འཁྲེང་པ་ལྟ་བུ་ཞིག་ཞེ་གཏིང་ནས་ཡོད་པ་ཡིན། སྤྱིར་འདུས་བྱས་ཐམས་ཅད་མི་རྟག་པ་རེད། དབུགས་རླངས་པ་འདྲ་བོ་དང་དྲོད་མེ་སྟག་འདྲ་བོ་ཡལ་དུས་འཇིག་རྟེན་ཕ་རོལ་ཟེར་བ་དེར་ཐོན་ཚར་བ་རེད། ང་ཚོ་ཚང་མ་བཤོལ་ཏུ་མེད་པར་འཇིག་རྟེན་འདིའི་ཡོད་ཚད་ནས་ཡོད་ཚད་བློས་བཏང་སྟེ་དེ་སང་འགྲོ་གནང་འགྲོའི་མགྲོན་པོ་མིན་མཁན་སུ་ཞིག་ཡོད། སློབ་གླིང་ཚོགས་རྒྱུ་མ་བྱུང་ན་དེ་ལ་ང་ཚོར་ཐབས་ཤེས་གཞན་མི་འདུག །རྒྱལ་ཁབ་ཟེར་ན་གནམ་སྔོན་པོ་ལ་མཆིལ་མས་ཐེབས་ས་ཞིག་མ་རེད་དེ། སོ་སོས་ངོས་ནས་བློ་བདེ་མོ་མི་རྟག་པའི་དྲན་སྐུལ་ཅིག་ལ་འགྲོ་དགོས་པ་རེད། ད་སྔ་ཡན་ཆོད་ཀྱི་ཆོས་རའི་ནང་གི་སྒྲ་མི་རྟག་པ་དེ། དེ་རིང་འཚོ་བའི་ཁྲོད་ཀྱི་མི་རྟག་པ་དང་སྦྱར་རྒྱུ་ཡོད་དགོས་པ་རེད། ཝ་ར་ནཱ་སི་དང་བྱ་རྒོད་སྤུངས་པོའི་རི་དང་རི་མ་ལ་ཡ་ལ་སོགས་པར་སངས་རྒྱས་བཅོམ་ལྡན་འདས་ཀྱིས་ཆོས་འཁོར་བསྐོར་བ་རེད་དེ། ད་ལྟ་ས་སྟོང་ལོང་སྟོང་ཙམ་ལས་མ་ལྷག་པ་རེད། འཛམ་གླིང་གི་སྟེང་ན་མཚན་སྙན་འབར་བ་དཔལ་ན་ལེནྜའི་དགོན་པ་དང༌། འབྲི་ཀ་མ་ལ་ཤཱི་ལའི་གཙུག་ལག་ཁང་སོགས་ན་པནྚིཏ་སྟོང་ཕྲག་རེ་རེ་གདན་གཅིག་ལ་འཛོམས་མྱོང་པ་ཡིན་ཡང༌། ད་ལྟ་ས་རོ་རྡོ་རོ་ཙམ་ལས་ཅི་ཞིག་འདུག །བོད་ཡུལ་ལ་བསམ་ན་ཡང༌། དབུས་ཀྱི་གདན་ས་ཆེན་པོ་དྲུག་ཅེས་མཚན་གྱི་སྙན་པ་འབར་བ་མཐའ་དག་ད་ལྟ་ཅི་ཙམ་ཉམས་ཆག་ཕྱིན་ཡོད་པ་རེད། དཔེར་ན་རབ་བྱུང་དང་པོའི་ནང་རྔོག་ལེགས་པའི་ཤེས་རབ་ཀྱི་ཕྱག་བཏབ་གནང་བའི་གསང་ཕུའི་ཆོས་གྲྭ་ལ་མཚོན་ན། རྔོག་བློ་ལྡན་ཤེས་རབ་སོགས་ཀྱི་སྐབས་སུ་གྲྭ་ཚང་ཁྲི་ཁྲག་ལས་བརྒལ་མྱོང་པ་རེད་ལ། རིགས་པའི་སེང་ཆེན་བརྒྱད་ལ་སོགས་པ་མཁས་གྲུབ་མུ་ཏིག་བསྟར་ལ་བརྒྱུས་པ་ལྟ་བུ་ཟམ་མ་ཆད་པར་བྱོན་པའི་གདན་ས་རེད། སྔ་འགྱུར་གྱི་ཤིང་རྟ་ཆེན་པོ་ཀུན་མཁྱེན་ཀློང་ཆེན་རབ་འབྱམས་དང༌། ཇོ་ནང་པ་ལ་མཚོན་ན་ཀུན་མཁྱེན་ཡབ་སྲས་བཅོ་ལྔ། དགེ་ལྡན་པའི་རྗེ་ཡབ་སྲས་རྣམ་པ་གསུམ་སོགས་ཀྱིས་ཀྱང་འཆད་ཉན་བྱེད་ཡུལ་རེད་དེ། དེ་རིང་ནི་མིང་གི་ལྷག་མ་ཙམ་ལས་གང་ཡང་ལྷག་ཡོད་པ་མ་རེད། ཇོ་ནང་པ་ལ་མཚོན་ན་རི་ཁྲོད་ཆེན་མོ་ན་ལུང་པ་ཡོངས་རྫོགས་སྒྲུབ་པ་ཕོ་མོའི་མཚམས་སྤྱིལ་གྱིས་འགེངས་ཤིང༌། དཔལ་ལྡན་ཤམ་བྷ་ལ་གཉིས་པར་ཐོགས་པ་རེད། ཡིན་ཡང་ད་ལྟ་ནི་ཐ་ན་མཐོང་གྲོལ་མཆོད་རྟེན་གཅིག་པུ་དེ་ཡང་ཞིག་རལ་ཕྱིན་ནས་ཉམས་གསོ་མི་ནུས་པའི་མཚམས་ལ་སླེབས་ཡོད་པ་ལ་ལྟོས་ན། ང་ཚོའི་སློབ་གླིང་འདི་འདྲ་བ་ཏ་བྱ་བྱེའུའི་ཚང་འདྲ་བ་ལས་ཅི་ཞིག་ཡོད། ད་སྔོན་ཡན་ཆད་དུ་མི་གཅིག་ཙམ་ལ་ཕན་ཐོགས་བྱུང་ཡོད་ན་དོན་ཡོད་སོང་བ་རེད། ང་རང་གི་ངོས་ནས་བཤད་ན། དེ་རིང་མ་ཤི་ནས་ལྷག་ཡོད་ན་དེ་རིང་སུ་ལ་ཕན་ཐོགས་ན་ལས་ཀ་ལ་ཕྱི་བཤོལ་སྒྱིད་ལུག་མི་བྱཻད་བསམ་པ་ལས། རྟག་བརྟན་ཆེན་པོར་བཟུང་ནས་ཤི་ཡང་མིག་བཙུམ་མི་ཐུབ་པའི་ཞེན་ཆགས་གང་ཡང་བྱེད་མྱོང་མེད་ལ། དེ་འདྲ་ཞེན་པ་ཆེན་པོ་ཞིག་ཡོད་ཕྱིན། མགོ་གསེར་སྐུས་བཅག་དང་རྡོ་ལིས་བཅག །དོན་བྱིན་རླབས་མེད་ན་འདྲ་འདྲ་ཟེར་བའི་དཔེ་ལྟར་དུ། བསྟན་དོན་འགྲོ་དོན་ཟེར་བ་དེ་ཁྱིམ་པ་དག་གི་ལས་ཀ་ལྟར་འཆིང་མི་འཆིང་ཁྱད་མེད་དུ་གྱུར་སོང་བ་རེད། མཉམ་མེད་དྭགས་པོ་རིན་པོ་ཆེས། ཆགས་ན་ལྷ་ལ་ཆགས་ཀྱང་མི་གྲོལ་ཏེ། །ཞེན་ན་ཆོས་ལ་ཞེན་ཡང་འཆིང་བའི་རྒྱུ། །ཕྱུག་པོ་གསེར་སྲང་སྟོང་ལ་ཆགས་པ་དང༌། །དབུལ་པོ་ཁབ་སྐུད་ཙམ་ལ་ཆགས་པ་གཉིས། །ལམ་གྱི་བར་ཆད་བྱེད་ལ་ཁྱད་པར་མེད། །དེས་ན་གང་ལའང་ཆགས་པར་མི་བྱའོ། །གསུངས་པ་ལྟར་རེད། ཅེས་སོགས་བཀའ་སློབ་ཐོས་ཕྲལ། བློ་སྦྱོང་དོན་བདུན་མར། ཡིད་བདེ་འབའ་ཞིག་རྒྱུན་དུ་བསྟེན། ཞེས་པ་དེ་འདི་ཁོ་ནར་འདུག་སྙམ་པའི་བཀའ་སློབ་མང་པོ་བསྩལ། དེ་ཙ་ན་ཁོང་གི་གསུང་བཤད་དེས། རྗེ་བཙུན་ཏཱ་ར་ནཱ་ཐའི་རང་རྣམ་ལས་འཆི་བ་ལ་འགྱོད་མེད་ཀྱི་གསུང་འདི་ཡིད་ལ་ཝལ་ཝལ་འཆར་དུ་བཅུག་ཡོང་སྟེ། རང་རྣམ་མ་བཅོས་ལྷུག་པ་ལས། ཁོ་བོ་ཅག་ནི། ལུགས་གཉིས་དང་འབྲེལ་བའི་བཟང་བཟང་མོ་དང༌། འཆོར་འཆོར་པོ་དང༌། རྔམ་རྔམ་མོ་དང༌། མངོན་པར་མཐོ་མཐོ་མོ་ལ་ཤེས་འདོད་ཆེ་བ་ཙམ་མེད་པས། དེ་རྣམས་མ་བྱུང་ཀྱང་བློ་སྐྱོ་བ་ཡོང་གིན་མེད། འོན་ཀྱང་རང་རེ་ལ་ལྟོས་ཚོད་ཀྱི་དེ་དག་ཕལ་ཆེར་བྱུང་ཡང་བྱུང་བྱུང་བ་ཙམ་དུ་མ་ཟད་སྐྱུག་ལོག་ལོག་བྱུང་བས་བློ་ཁ་མ་ཚིམ་པ་ཅིག་ཀྱང་མེད། དེ་ཡང་ཆོས་མང་པོ་ཐོས་ཀྱང་ཐོས། ཤེས་ཀྱང་ཤེས། མ་ཤེས་མ་ཐོས་སྙམ་འགྱོད་དགོས་པ་མ་བྱུང༌། ཆོས་ཞུ་མཁན་ནི་ཞེ་ལོག་ལོག་ཁམས་གཤིས་ལངས་ལངས་ཀྱང་བྱུང༌། ཡུན་རིང་ལ་དར་དྲགས་པ་ཆོས་བཤད་ཀྱང་བཤད། རང་ཚོད་དང་མཐུན་པར་སྒོམ་ཀྱང་བསྒོམས། ལྟ་བ་ཟབ་མོ་དང་ནི་འཕྲད། འགྱོད་པ་མེད་པའི་སྤྱོད་པ་ནི་བྱས། སྐྱེ་བོ་མང་པོ་ལ་ཆོས་དང་ཟང་ཟིང་གིས་ཕན་ནི་བཏགས། མདོ་ལས། ཕོ་ཤལ་བཀུར་བསྟིས་ཕོངས་བར་འགྱུར་གསུངས་པ་ལྟར་མ་བྱུང་ཡང༌། ཆོག་པའི་མི་མཐོང་དང༌། རྙེད་བཀུར་དང། གྲགས་པ་ཡང་ཆེ་ཚད་བྱུང༌། བྱུང་བ་ལ་རློམ་སེམས་དང་དགའ་དྲགས་པའང་ཡེ་མེད། རང་རེས་ཕར་འཁྱོངས་ན་རབ་ལ་མི་འཁྱོངས་པ་ཙམ་གྱི་སློབ་མ་དང༌། ཡོན་བདག་ཀྱང་བསྡུས། ལྷ་ཁང་དང་དགེ་འདུན་ལ་ཡང་མཆོད་པ་བྱས། ལག་རྗེས་གནས་གཞི་ཡང་མང་དུ་ཐིངས། རྟེན་གསུམ་མང་པོའང་བཞེངས་ཟིན། ད་ཅིག་ཅིག་བྱེད་དགོས་པ་ཡོད་དེ་ཅེས་བྱ་བ་འཕྲོ་ལུས་པ་ཡང་མེད། ཟས་ནོར་ལོངས་སྤྱོད་གྲྭ་རིགས་ཡོན་བདག་སོགས་ལ་བསམས་ནས། འདི་ལ་དེ་འདྲ་ཅིག་དགོས་པ་ཡོད་དེ། ད་ཤི་ན་ཅི་འདྲ་ཞེས་ཤུལ་དུ་འཕྲེང་དགོས་པ་ཅུང་ཟད་ཀྱང་མེད་པ་འདི་ནི་རྒྱུ་མཚན་བཞི་པ་ཡིན། ཞེས་དང༌། ང་གཞན་དོན་དུ་ནི། སྡུག་བསྔལ་ཅན་གྱི་སེམས་ཅན་དང༌། ཆོས་ལ་འགོད་མི་ཐུབ་པའི་རྨུ་རྒོད་རྣམས་མཐོང་བས། སྔར་ཡང་འདོད་ཁ་མ་འཁེངས། ད་དུང་བསྐལ་པ་མཐའ་ཡས་པ་འདོད་པ་མ་འགྲུབ་པ་དེ་ག་ལ་འགྲོ་བར་འདུག །རང་དོན་དུ་ནི་འདོད་ཁ་མ་རྫོགས་པ་གཅིག་ཀྱང་མེད་དེ། ཡིད་བདེ་འབའ་ཞིག་རྒྱུན་དུ་བསྟེན་བྱ་བ་དེ་ལགས་སོ། །ཞེས་གསུངས་སོ། །ལོ་དུ་མ་ཞིག་ལ་རྔ་ཡུལ་བསྭེ་དགོན་ཐུབ་བསྟན་ཕྱོགས་ལས་རྣམ་རྒྱལ་གླིང་གི་བླ་མ་ལས་སྣེ་བསྟན་པའི་སྦྱིན་བདག་བཅས་པས། བཤེས་གཉེན་རིན་པོ་ཆེ་འདི་ཉིད་ཀྱི་ཞལ་སྔར་བཅར་ནས། བསྭེ་དགོན་ཐུབ་བསྟན་ཕྱོགས་ལས་རྣམ་རྒྱལ་གླིང་དུ་འཆད་ཉན་འཛུགས་པར་ཕེབས་དགོས་ཞེས་ལན་དུ་མར་རེ་བསྐུལ་ཞུས་ཤིང༌། ཉིད་ནས་ཀྱང་ཕྱིས་སུ་གོ་སྐབས་བྱུང་ན་ཕེབས་རྒྱུ་ཞལ་བཞེས་གནངས་ཡོད་པའི་དབང་གིས། དགོན་དེའི་བླ་མ་ལས་སྣེ་ལྷན་རྒྱས་ནས། སྤྱིར་སངས་རྒྱས་ཀྱི་བསྟན་པ་དང༌། ཡང་དགོས་དཔལ་ལྡན་རྒྱལ་པ་ཇོ་ནང་པའི་བསྟན་པ་རིན་པོ་ཆེ་དང༌། བྱེ་བྲག་བསེ་དགོན་ཐུབ་བསྟན་ཕྱོགས་ལས་རྣམ་པར་རྒྱལ་བའི་གླིང་གི་བསྟན་པ་རིན་པོ་ཆེ་ཉམས་པ་སླར་གསོ་ཞིང་མ་ཉམས་པ་གོང་དུ་འཕེལ་ཕྱིར་འབྱོན་པར་ཞུས་པས། ཞལ་བཞེས་བཟང་པོ་གནང་སྟེ། གནས་སྐབས་ཙམ་དུས་གཅིག་ལ་སློབ་གཉེར་བ་མང་པོ་འདུ་དྲགས་ན་དུས་ཚོད་དམིགས་བསལ་བ་ཡིན་པའི་རྐྱེན་གྱིས་མི་ལེགས་པ་འདྲ་གསུངས་ཏེ། རྒྱལ་རོང་ཕྱོགས་ནས་དགོན་ཁག་མང་པོའི་སློབ་གཉེར་བ་རྣམས། ས་ཕྱོགས་དེའི་མཁན་པོ་དང་དགེ་རྒན་རྣམས་ཀྱི་སྒྲིག་ལམ་དང་ཆོས་ཁྲིད་སོགས་ཡོངས་རྫོགས་འགན་ཁུར་བཞེས་དགོས་གསུངས་ནས། ཛ་འགོའི་རི་ཁྲོད་བརྩེ་ཆེན་སློབ་གླིང་དུ་ལོགས་ཏེ། དེ་དག་དགོན་དེར་གཞིས་ཆགས་པ་དང་བཤེས་གཉེན་རིན་པོ་ཆེ་གང་ཉིད་དེར་ཕེབས་ནས། བློ་ལྡོག་རྣམ་བཞིའི་ཆོས་ཁྲིད་ཀྱི་ཞར་ལ་བཀའ་སློབ་ལམ་སྟོན་དུ་མ་དང༌། འདུལ་བའི་མཐའ་དཔྱོད་ཀྱི་ལུང་གནང་བཞིན་ཉིན་དྲུག་བདུན་ཙམ་ལ་བཞུགས། མགོ་ལོག་གི་དགོན་པ་སོ་སོ་ནས་ཐོན་པའི་སློབ་གཉེར་བ་རྣམས་སློབ་གླིང་དེ་ཉིད་དུ་ས་དེའི་དགེ་འདུན་ཡིན་ཁུལ་གྱིས་ཤུལ་ཏུ་བཞུགས། གྲྭ་ས་སོ་སོར་ཕེབས་མི་དང་རང་དགོན་དུ་ལོགས་མི་རྣམས་རང་འདུན་ལྟར་བྱས། ལྷག་མ་རྣམས་བོད་ཟླ་གསུམ་པའི་ཚེས་ཉི་ཤུ་ཐམ་པའི་ཉིན་བསྭེ་དགོན་ཐུབ་བསྟན་ཕྱོགས་ལས་རྣམ་རྒྱལ་གླིང་དུ་བྱོན་ཏེ། ཛ་འགོའི་རི་ཁྲོད་ན་གྱང་སྒང་དགོན་མཁན་རབ་གསལ་དང༌། ཉིན་ཡུལ་ཇོ་ནང་དགོན་དུ་མཁན་བསམ་བཟང༌། བསྭེ་དགོན་ན་མཁན་དཀོན་མཆོག་དཔལ་བཅས་ཀྱིས་ལས་ཐོག་གི་འགན་བཞེས་ཤིང༌། མཁན་པོ་དང་དགེ་རྒན་གྲྭ་རྒན་གཞོན་བར་མ་ཡོངས་ཀྱིས་གཞོགས་འདེགས་ཕན་ཚུན་བྱས་ཏེ་བཞུགས། ཛ་འགོའི་རི་ཁྲོད་དུ་སློབ་གཉེར་བ་རྣམས་གཞི་བརྟན་པོར་འཁོད་གྲུབ་ནས། བཤེས་གཉེན་དམ་པ་འགྲོ་བ་ཡོངས་ཀྱི་མ་འདྲེས་པའི་མཛའ་བཤེས་ཆེན་མོ་གང་ཉིད་བསྭེ་དགོན་དུ་ཞབས་ཀྱི་པདྨོ་ཉེ་བར་བཀོད་དེ། དུས་སུ་བབ་པའི་བཀའ་སློབ་དུ་མ་བསྩལ་ཞིང༌། འཛིན་གྲྭ་ཡོངས་རྫོགས་ཀྱི་ཁྲིད་མཐར་ཆགས་སུ་གནང༌། མགོ་ལོག་ལུང་སྐྱ་དགོན་མཁན་པདྨ་བློ་གསལ་རང་དགོན་ན་ལས་ཐོག་མཁན་པོར་མངགས། རྒྱལ་རོང་ཁང་སར་དགོན་མཁན་ཤེས་རབ་རིན་ཆེན་དར་སྐུ་དགོན་པར་དགེ་རྒན་དུ་བཏང༌། ཞག་ཉི་ཤུ་ཡས་མཚམས་ནས་ཉིན་ཡུལ་དགོན་དུ་བཞུགས་པའི་མགོ་ལོག་གི་ཕྱོགས་སོ་སོའི་སློབ་གཉེར་བ་རྣམས་རིམ་པར་བསྭེ་དགོན་དུ་ཕེབས་ཐུབ་པ་བྱུང༌། བོད་ཟླ་གསུམ་པའི་ཚཻས་བདུན་ལ་པེ་ཅིན་མཐོ་རིམ་ནང་བསྟན་སློབ་གླིང་དུ་མཐོ་རིམ་པའི་དཔྱད་འདེམས་པར་ཕེབས་སོ། ། གལ་ཆེན་གནད་ཀྱི་དོན་ལ་མཁྱེན་རབ་ཡངས་ཤིང༌། ། རླབས་ཆེན་མཛད་པའི་ཁུར་ལ་སྤོབས་པས་བརྒྱན་ཏེ། ། ཡང་དག་གསུང་ངག་རེས་ཀྱང་བྱེད་ཐབས་གསལ་བའི། ། ལུགས་གཉིས་མཁྱེན་པའི་རྩལ་གྱིས་ས་གཞི་སྐྱོང་བ། ། སྙིགས་དུས་ཀྱི་བསྟན་པའི་གསལ་བྱེད་ཆེན་པོ་ངག་དབང་འཇིགས་མེད་དངོས་གྲུབ་དཔལ་བཟང་པོའི་མཛད་བཟང་བསླབ་གསུམ་ནོར་བུའི་གླིང་ཁ་ཞེས་བྱ་བ་ལས་ཁང་སར་ཉིན་ཡུལ་ན་སློབ་གླིང་འཚོགས་འཆར་བསྒྱུར་ནས་བསྭེ་དགོན་དུ་ཕེབས་པའི་བསྐོར་གྱི་རྣམ་ཐར་མདོར་བསྡུས་པ་སྟེ་ཉེར་བརྒྱད་པའོ། ། ཕྱོགས་ཞེན་ཁ་འཛིན་ཟེར་བ་སྐྱིད་ཀྱི་ཡན་ལག་ཏུ་སྡུག་འཚོལ་བ་ཡིན་ཚུལ་སོགས་ཀྱི་རྣམ་ཐར་བསྐོར།ལོ་དེའི་བོད་ཟླ་བཞི་པ་ས་ག་ཟླ་བར་དཀར་ཟས་ཀྱི་སྐོར་ནས་དགོངས་འཆར་ཞུས་པར། གསུང་ལན་བརྗོད་པ་གནད་བསྡུས་ཙམ་ནི། ནང་བ་སངས་རྒྱས་པའི་ཆོས་འདི་འཚེ་བ་མེད་པ་སྙིང་རྗེས་རབ་ཏུ་ཕྱེ་བ་ཞིག་ཡིན་པས་ན་དཀར་ཟས་བསྟེན་པ་དེ་ཡག་པོ་འདུག །སྤྱིར་བཏང་ཤའི་གནང་བཀག་གི་ཐད་ནས་མདོར་མཚོན་ཙམ་ཞུ་ན། དམ་ཆོས་འདུལ་བའི་ནང་དུ་ཤ་ཆེན་གྱི་རིགས་དང་མི་སྒེར་བ་རང་གི་དོན་དུ་མཐོང་ཐོས་དོགས་གསུམ་ཡོད་པའི་ཤ་མ་གནང་བ་གསལ་བོ་གསལ་རྐྱང་དང༌། གསང་སྔགས་རྒྱུད་སྡེ་འོག་མ་གསུམ་དུ་ཡང་ཤ་གནང་བ་མེད་པར་མཁྱེན་གསལ་ལྟར་རེད། རྒྱུད་སྡེ་འོག་མ་གསུམ་ན་ཤ་བཀག་ལ་དེ་གཙོ་བོ་གཙང་སྦྲའི་དབང་གིས་རེད། སྔགས་བླ་མེད་ན་ཁག་མང་བོ་ཞིག་སླེབས་ཀྱིན་ཡོད་པ་རེད། ཐེག་ཆེན་གྱི་མདོ་སྡེ་འགའ་ཞིག་ན་བྱེ་བྲག་ཕྱེས་ཏེ་བཀག་པ་དང་སྤྱིར་དགག་པའི་རྣམ་པ་ལྟ་བུ་མང་པོ་ཞིག་ཡོད་པ་རེད་དེ། སྤྱིའི་ཆ་ནས་རྣམ་གསུམ་མ་དག་པའི་བསད་ཤ་དེ་དགག་གིན་ཡོད་པ་རེད། ཁྱོན་ཡོངས་ནས་བསམ་ན་ཤ་མ་གསོལ་ན་འཛམ་གླིང་གི་མིག་ལྟོས་དང༌། མི་མང་བོ་ཞིག་ལ་རང་གི་བདེ་ཐང་སོགས་ཆ་གང་ཐད་ནས་ཡག་པོ་འདུག །ལྷག་པར་དུ་འདུལ་བ་ལས་གསུངས་བ་བཞིན་རང་གི་དོན་དུ་ཡིན་པའི་མཐོང་ཐོས་དོགས་གསུམ་ཡོད་པ་དང་ཤ་ཆེན་གྱི་རིགས་རྣམས་མ་གསོལ་ན་ཧ་ཅང་བཟང་བོ་འདུག་ལ། དེ་འདྲ་བསྒྲུབ་མི་ཐུབ་པ་ཞིག་ཀྱང་མ་རེད་སེམས། འོན་ཀྱང་ཤ་འགོག་གི་ཐབས་ལམ་དེ་ལ་སློབ་གསོ་གལ་ཆེན་པོ་རེད་མ་གཏོགས། མིའི་སེམས་ཁམས་དང་དཀའ་ངལ་གང་ལ་ཡང་བསམ་བློ་མེད་པར་ཐལ་ཆེ་བའི་རིགས་དེ་མ་བྱས་ན་ཡག་པོ་ཡོད་པ་རེད། དཔེར་ན་ཤ་ཟོས་ཚར་ནས་སྡོམ་པ་ཡོད་པ་མ་རེད་དང༌། ནང་བ་སངས་རྒྱས་པ་མ་རེད། བྱམས་སྙིང་རྗེ་རྩ་བ་ནས་བྲལ་བ་རེད་ལྟ་བུ་ཧ་ཅང་ཐལ་དྲགས་པ་རེད། འཛམ་བུ་གླིང་མི་ཡོངས་ཀྱི་བསམ་བློ་གཅིག་མཐུན་ཡོང་ས་ནས་བྱ་བ་བསྒྲུབ་རྒྱུ་ཏན་ཏན་རྙཻད་རྒྱུ་ཡོད་པ་མ་རེད་དེ། དཀར་ཟས་འདི་ལ་བསམ་བློ་བཏང་ན་འཛམ་གླིང་ན་མིང་སྙན་པོ་དང་དགའ་མོས་ཡོད་སའི་བྱ་བཞག་ཅིག་ཆགས་ཡོད་པ་ཡིན་པས། སྤྱི་སྒེར་གང་གི་ཐད་ནས་ཤུགས་བརྒྱབ་ན་ཡག་པོ་རེད། དཀར་ཟས་གསོལ་བ་དེ་གཙོ་ཆེ་བ་གཞན་གྱི་ཚེ་སྲོག་ལ་གནོད་པ་མི་དགོས་པའི་ཆེད་དུ་ཡིན་ན། ང་ཚོ་མཐོ་བོད་རང་གི་ས་ཆ་ན་སྔོ་ཚལ་གྱི་རིགས་གང་མང་འདེབས་ཐུབ་རྒྱུ་རྩ་བའི་རྩ་དོན་ཞིག་རེད། རྒྱ་ནང་གི་དྲོད་ཁོལ་ཆེ་སའི་ས་ཆ་ཞིག་ནས་དང་བོ་འབུ་གསོད་འདེབས་པ་དང༌། བར་ཏུ་ཡང་འབུ་ཕྲ་རྒྱུན་པར་གསོད་ཀྱིན་ཡོད་པ་རེད། ད་དུང་རྫས་སྦྱོར་ལ་བརྟེན་ནས་ལུས་པོ་ལ་ཡང་གནོད་པ་ཆེན་པོ་ཆགས་ཀྱིན་ཡོད་པ་ཡིན་པས། ང་ཚོའི་ས་ནས་སྔོ་ཚལ་བཏབ་ན་ཡང་འབུ་སྲིན་གཏན་ནས་གསོད་མི་དགོས་པ་ཞིག་ཏ་འགྱུར་ཐུབ་གི་མ་རེད་དེ། ཆེད་དུ་དུག་རྫས་ཀྱིས་འབུ་གསོད་པ་དང་རྒྱ་ཡུལ་གྱི་གྲངས་ལྟ་བུ་མང་བོ་གསོད་དགོས་ཀྱི་ཡོད་པ་མ་རེད། དེ་འདྲ་ཡིན་དུས་བསམ་བཞིན་དུ་སྲོག་གཅོད་པ་མེད་པས་སྲོག་གཅོད་ཀྱི་དངོས་གཞི་ཡང་རྫོགས་མེད་པ་རཻད། དེས་ན་རང་ས་ནས་སྔོ་ཚལ་འདེབས་ཐུབ་རྒྱུ་བྱུང་ན་འབུ་སྲིན་གྱི་ཚེ་སྲོག་དང་མིའི་ལུས་པོའི་འཕྲོད་བསྟེན་དང་དཔལ་འབྱོར་ཚོང་ལས་ཀྱི་ཐད་གང་ལ་ཡང་ཕན་པ་རླབས་ཆེན་པོ་འདུག །ཅེས་ཕྱོགས་ལྷུང་བྲལ་བའི་གསུངས་བཤད་བཟང་པོ་གནང༌། བོད་ཟླ་བཞི་པའི་ཚེས་བཅུ་དགུར་ཁྲིན་ཏུའུ་གྲོང་ཁྱེར་དུ་རྫོགས་ཆེན་པད་མ་སྐལ་བཟང་གི་གསུང་འབུམ་འགྲེམས་སྟོན་གྱི་མཛད་སྒོ་ལ་བྱོན་ནས། མཛད་པ་ཀུན་ལས་མཆོག་ཏུ་གྱུར་བ་གསུང་གི་མཛད་པ་ཡིན་ཚུལ་སོགས་ཀྱི་གཏམ་བཤད་གནང༌། དེར་གཟན་དཀར་རིན་པོ་ཆེ་དང་མཇལ་འཕྲད་གནང་ནས་ཆོས་འབྲེལ་ཞུས། ཚེས་ཉི་ཤུ་བཞིའི་ཉིན་ཇོ་ནང་ཤམ་བྷ་ལའི་ངེས་གསང་དབུ་མ་གཞན་སྟོང་གི་བགྲོ་གླེང་ཐེངས་བཅུ་གསུམ་པ་མགོ་ལོག་ལུང་སྐྱ་དགོན་དུ་འཚོགས་པར་ཕེབས་ནས་བཀའ་སློབ་སྔ་ཕྱིར་ཐེངས་གཉིས་དང༌། མཚན་ཕུད་དམ་བཅའ་སོགས་ཀྱི་སྐབས་ལུང་རིགས་ཀྱི་བརྒལ་བརྟག་ལྷུག་པོར་མཛད། དགོན་དེའི་བཙུན་མ་རྣམས་ཡང་བཀའ་སློབ་ཟབ་རྒྱས་བསྩལ། མདོ་ལུའི་རྡོ་ཁ་དགོན་དུ་ཕེབས་ནས་གྲྭ་ཇོ་ཡོངས་ལ་བཀའ་སློབ་ཟབ་རྒྱས་གསུངས། བོད་ཟླ་ལྔ་བའི་ཚེས་བཅུ་བཞིའི་ཉིན་རྫ་ཆུ་ཁའི་བ་རོལ་དགོན་དུ་གངས་ཅན་མཁས་པའི་བགྲོ་གླེང་ཚོགས་ཆེན་ལ་བྱོན་ནས། བོད་བརྒྱུད་ནང་བསྟན་གྱི་ལྟ་སྒོམ་སྤྱོད་གསུམ་དང་འབྲེལ་བའི་གསུང་བཤད་རིན་ཐང་དང་བྲལ་བ་བསྩལ་ཞིང༌། དད་ལྡན་མང་ཚོགས་རྣམས་ལ་ཡང་ནང་ཆོས་ངོ་སྤྲོད་ཞུས། བོད་ཟླ་དྲུག་པའི་ཚེས་ཉེར་གཉིས་ཀྱི་དུས་བཟང་ཕུན་སུམ་ཚོགས་པ་ལ། གངས་ལྗོངས་རིས་མེད་མཐོ་སློབ་ནས་འདེམས་ཐོན་ལྟར། ཛ་འགོའི་ཉི་མ། འཛི་ཉིན་བདེ་ལེགས། གསང་ལུང་ཉི་འབུམ། ཉིན་ཡུལ་ཀུན་པོ། རྒྱལ་རོང་གསལ་ལྡན་བཅས་མི་ལྔ་མཁན་པོར་མངའ་གསོལ་མཛད། མཁན་པོ་རྣམས་ལ་གསུང་བཤད་གནང་དོན། སྤྱིར་མཁན་པོ་དང་སྤྲུལ་སྐུ་གང་ཡིན་ན་ཡང་དེང་སང་གི་ཆར་ཧ་ཅང་མོད་པོ་འདྲ་ཞིག་ཡོད་པ་རེད། ཡིན་ན་ཡང༌། གུང་ཐང་བསྟན་པའི་སྒྲོན་མེས། སྐུ་སྐྱེས་བསྟན་དོན་དུ་བྱོན་ན། །བཤད་སྒྲུབ་ལག་རྗེས་ལ་འཇོག་དགོས། །ཞེས་གསུངས་པ་ལྟར། མཁན་པོ་ཡིན་ན་ཡང་མིང་སྟོང་ཙམ་ཁུར་བས་ཡོང་གི་མ་རེད། ང་ཚོའི་འདི་ནས་ལོ་རེ་བཞིན་དུ་མི་ཆ་རེ་ལ་མཁན་པོའི་མིང་རེ་འདོགས་བཞིན་པའི་དམིགས་ཡུལ་དེ། སངས་རྒྱས་ཀྱི་བསྟན་པ་ལ་ཞབས་ཕྱི་ཞིག་ཨེ་ཡོང་བསམ་པ་ལས་དམིགས་ཡུལ་གཞན་ཅི་ཡང་ཡོད་པ་མ་རེད། འཇིག་རྟེན་ཐམས་ཅད་རྟོག་པས་བཏགས་ཙམ་ལ་ལྟོས་ནས་འགྲོ་བཞིན་པ་ཡིན་པས། ཁྱེད་རྣམ་པ་ཡིན་ན་ཡང་མཁན་པོ་ཞེས་པའི་མིང་ཙམ་ལ་བརྟེན་ནས་ཀྱང་ཅུང་ཟད་རེ་ཕན་ཐོགས་མི་སྲིད་པ་མ་རེད། དེས་ན། མིང་འདི་ལ་བརྟེན་ནས་བསྟན་འགྲོ་ཕན་པ་རེ་ཨེ་ཡོང་བལྟ་རྒྱུ་དང༌། རང་རང་སོ་སོའི་ངོས་ནས་ཀྱང་ཀུན་སྤྱོད་ཀུན་སློང་གང་གི་ཕྱོགས་ནས་ཡིན་ན་ཡང༌། སྔར་ལས་ཇེ་ལེགས་ཇེ་བཟང་དུ་བཏང་སྟེ། མིང་དེ་རང་ལ་དྲན་ཤེས་བག་ཡོད་བསྟེན་པའི་རྐྱེན་དུ་འགྱུར་ཐུབ་པའི་སྒོ་ནས། རང་གཞན་གཉིས་ཀ་ལ་ཕན་ཐོགས་ཡོད་པ་ཞིག་བཟོ་རྒྱུ་དེ་གལ་ཆེན་རེད་མ་གཏོགས། ཞབས་འདྲེན་རྩ་བ་ནས་ཞུ་ཉན་གི་མ་རེད། ད་དུང་དུ་ཡང་སློབ་གཉེར་ལ་མཚམས་འཇོག་ཁྱོན་ནས་བྱེད་མི་རུང༌། སྔོན་ཆད་གུང་ཐང་སྐུ་ཕྲེང་དྲུག་པ་མཆོག་གི་ཞལ་སྔ་ནས། མི་ཚེ་དཔེ་ཆ་དང་མ་འབྲལ་ན་དགེ་བཤེས་ཡོང་སོང་བ་རེད། མི་ཚེའི་ནང་ལ་དཔེ་ཆ་དཔེ་ཀློག་མཚམས་འཇོག་བྱས་བཞག་ན་དེ་སྔོན་ཇི་ལྟར་སྦྱངས་ཡོད་མིན་ལ་མ་ལྟོས་པར་དགེ་བཤེས་མ་འོང་པ་རེད་གསུངས་སོང༌། དེ་ནང་བཞིན་དེང་སང་སྤྲུལ་སྐུ་ཙམ་མ་ཡིན་པར་མཁན་པོ་དང་དགེ་བཤེས་ནང་ལ་ཡང་མིང་དེ་ལ་བརྟེན་ནས། རྒྱ་ཡུལ་དང་ཕྱི་རྒྱལ་ཁག་ན་ཡར་ཉུལ་མར་ཉུལ་བྱེད་བཞིན་པ་མང་པོ་ཡོད་པ་རེད། དེ་འདྲ་ཞིག་ལོགས་ཚར་ནས་ང་ཚོའི་ངོས་ནས་ཀྱང་མིང་བཏགས་པའི་དགོས་པ་མ་འགྲུབ་པར་མ་ཟད་གནོད་དུ་བུད་སོང་བ་རེད། ཅེས་སོགས་གསུངས་སོ། །བོད་ཟླ་ལྔ་བའི་ཚེས་ཉེར་བརྒྱད་ཉིན་གངས་ལྗོངས་རིས་མེད་ལྔ་རིག་མཐོ་སློབ་ཀྱི་ལོ་ཕྱེད་རྒྱུགས་སྤྲོད་ཆེན་མོ་བླངས། ཚེས་ཉི་ཤུ་དགུའི་ཉིན་ལ་མགོ་ལོག་གཙང་གོང་མའི་བཟང་སྤྱོད་ཆོས་ཚོགས་ལ་ཕེབས་ནས་སྐྱ་སེར་གཉིས་ལ་ལུགས་གཉིས་ཀྱི་བཀའ་སློབ་དང་ཆོས་འབྲེལ་ཟབ་མོ་གནང༌། བོད་ཟླ་དྲུག་པའི་ཚེས་བཅུ་གཉིས་ཉིན་ནས་བཟུང་མགོ་ལོག་ཁུལ་ནང་བསྟན་མཐུན་ཚོགས་ཀྱི་སྟེང་དུ་ཉིན་བཞིའི་རིང་ཉིན་རེར་སྔ་དྲོ་དང་ཕྱི་དྲོ་བསྡོམས་ཏེ་ཆུ་ཚོད་དྲུག་གི་ཡུན་ལ། མགོ་ལོག་རྫོང་ཁག་དྲུག་གི་རིས་མེད་དགོན་སྡེ་སོ་སོས་འཐུས་མི་རྣམས་ལ་ཇོ་ནང་གི་གཞི་ལམ་འབྲས་གསུམ་གྱི་རྣམ་བཞག་གསལ་ཞིང་རྒྱས་པར་གསུངས་པས། སྐབས་དེར་འདུས་པའི་བླ་ཆེན་འགའ་རེས་ཀྱང་དད་གུས་ཀྱི་བ་སྤུ་གཡོས་ཏེ་གུས་པའི་གཙུག་གི་ནོར་བུར་བསྟེན་པར་གྱུར་ཏོ། །ཚེས་བཅོ་ལྔའི་ཉིན་གངས་ལྗོངས་དར་རྒྱས་ཀུན་ཕན་སྨན་རྩིས་སློབ་གླིང་གི་སློབ་མ་རྣམས་ལ་ནང་བསྟན་གྱི་ལྟ་གྲུབ་རགས་བསྡུས་ངོ་སྤྲོད་ཀྱི་གསུང་བཤད་གནང་སྟཻ་ཕྱིར་སློབ་གླིང་དུ་ལོགས། བོད་ཟླ་བརྒྱད་པའི་ཚེས་ལྔ་ནས་ཉིན་བདུན་གྱི་རིང་ལ་མགོ་ལོག་པདྨའི་རིག་གཞུང་དར་སྤེལ་མཐུན་ཚོགས་ཀྱི་རྒྱུགས་སྤྲོད་གཙོ་འགན་པའི་ཕྱག་ལས་མཛད་ཅིང༌། མི་མང་ལ་ཕར་ཕྱིན་དྲུག་གི་གོ་བདེ་བའི་ཆོས་ཁྲིད་དང༌། གྲྭ་མང་ལ་དང་པོ་ཚུལ་ཁྲིམས་རྣམ་པར་དག་པའི་སྟེང་ནས་ཐོས་པ་གལ་ཆེ་བ་དང༌། བར་དུ་བསམ་པས་ངེས་པ་བསྐྱེད་པར་བྱ་དགོས་པ་དང༌། མཐར་སྒོམ་པས་ཉམས་སུ་བླངས་ལུགས་སོགས་ཀྱི་སྒོ་ནས། བསྟན་པའི་འཇུག་རིམ་ཇི་ལྟར་དགོས་མིན་ཐད་ནས་གསུང་བཤད་བསྩལ། བཤེས་གཉེན་རིན་པོ་ཆེ་ཉིད་ནས་ནམ་ཞར་ཞར་དུ་འདྲེན་པར་མཛད་པའི་ཐོས་པའི་བསྐོར་གྱི་གལ་ཆེན་ལུང་འགའ་ཙམ་བཀོད་དེ་གསུང་ཟིན་མདོར་བསྡུས་ཤིག་ཕབ་ན། བཤེས་སྤྲིང་ལས། ཁྱོད་ཀྱི་ཚུལ་ཁྲིམས་མ་ཉམས་མོད་མི་དམའ། །མ་འདྲེས་མ་སྦགས་པ་དག་བསྟེན་པར་མཛོད། །ཁྲིམས་ནི་རྒྱུ་དང་མི་རྒྱུའི་ས་བཞིན་དུ། །ཡོན་ཏན་ཀུན་གྱི་གཞི་རྟེན་ལེགས་པར་གསུངས། །ཞེས་པ་ལྟར་དང་པོ་ཚུལ་ཁྲིམས་རྣམ་པར་དག་པ་ས་ལྟ་བུ་དེ་ལེགས་པར་ཡོད་ན། ས་ལ་བརྟེན་པའི་རྒྱུ་བ་སེམས་ཅན་དང་མི་རྒྱུ་བ་རྩི་ཤིང་ནགས་ཚལ་སོགས་འབྱུང་བ་ལྟར། ཚུལ་ཁྲིམས་ལ་བརྟེན་ནས་ཐོས་བསམ་སྒོམ་པའི་ཤེས་རབ་འབྱུང་དགོས་པ་རཻད། སངས་རྒྱས་གཉིས་པ་དབྱིག་གི་གཉེན་པོའི་ཞལ་སྔ་ནས། ཚུལ་གནས་ཐོས་དང་བསམ་ལྡན་པས །བསྒོམ་པ་ལ་ནི་རབ་ཏུ་སྦྱོར། །ཞེས་དང༌། རྗེ་ཙོང་ཁ་བ་ཆེན་པོའི་རྟོགས་བརྗོད་འདུན་ལེགས་མ་ལས། དང་པོར་རྒྱ་ཆེན་མང་དུ་ཐོས་པ་བཙལ། །བར་དུ་གཞུང་ལུགས་ཐམས་ཅད་གདམས་པར་ཤར། །ཐ་མར་ཉིན་མཚན་ཀུན་ཏུ་ཉམས་སུ་བླངས། །ཀུན་ཀྱང་བསྟན་པ་རྒྱས་པའི་ཆེད་དུ་བསྔོས། །ཚུལ་འདི་བསམས་ཤིང་མདུན་མ་ལེགས་ནས་གདའ། །བཀའ་དྲིན་ཆེའོ་རྗེ་བཙུན་མཁྱེན་པའི་གཏེར། །ཞེས་གསུངས་པ་བཞིན་ཐོས་བསམ་སྒོམ་གསུམ་ཡ་མ་བྲལ་ཞིང་རྒྱུ་འབྲས་ཀྱི་འཇུག་རིམ་ཡོད་པ་ཅིག་གལ་ཆེ་སྟེ། མདོ་སྡེའི་རྒྱན་ལས། གལ་ཏེ་ཐོས་པ་ཙམ་གྱིས་དོན་མཐོང་འགྱུར་ན་བསྒོམ་པ་དོན་མེད་འགྱུར། །གལ་ཏེ་མ་ཐོས་པར་ཡང་སྒོམ་འཇུག་འགྱུར་ན་བསྟེན་པ་དོན་མེད་འགྱུར། །ཞེས་དང༌། འཕགས་པ་བརྒྱད་སྟོང་པར། མ་དད་པ་ནི། མི་ཉན་ཏོ། །མ་ཉན་པས་ནི། མི་ཤེས་སོ། །མ་ཤེས་པས་ནི། མི་མཐོང་ངོ། །མ་མཐོང་བས་ནི། ཁོང་དུ་མི་ཆུད་དོ། །ཁོང་དུ་མ་ཆུད་པ་ནི། ཆོས་ཀྱིས་ཕོངས་པར་འགྱུར་བ་དང༌། ཞེས་དང༌། ཆེད་དུ་བརྗོད་པའི་ཚོམས་ལས། ཐོས་པ་གཏི་མུག་མུན་སེལ་སྒྲོན་མེ་ཡིན། །རྐུན་པོ་ལ་སོགས་མི་ཁྱེར་ནོར་གྱི་མཆོག །ཀུན་ཏུ་རྨོངས་པའི་དགྲ་འཇོམས་མཚོན་ཆ་ཡིན། །ཐབས་ཚུལ་མན་ངག་སྟོན་པའི་གྲོགས་ཀྱི་མཆོག །ཕོངས་པར་གྱུར་ཀྱང་མི་འགྱུར་མཛའ་བོ་ཡིན། །གནོད་པ་མེད་པའི་མྱ་ངན་ནད་ཀྱི་སྨན། །ཉེས་པ་ཆེན་པོ་ཡི་ནི་དཔུང་འཇོམས་པ། །གྲགས་དང་དཔལ་གྱི་གཏེར་གྱི་མཆོག་ཀྱང་ཡིན། །ཞེས་དང༌། ཐོས་པའི་རྗེས་འཇུག་བསྒྲུབ་པ་སྙིང་པོར་བྱེད། །སྐྱེ་བའི་རྫོང་ལས་ཚེགས་ཆུང་ཐར་བར་འགྱུར། །ཞེས་སོགས་རྒྱ་ཆེར་གསུངས་པ་ལྟར། དང་པོ་ཐོས་པ་བྱེད་དགོས་པ་རེད། བཅོམ་ལྡན་འདས་ཀྱིས་ཀྱང༌། ལེགས་པར་ཉོན་ལ་ཡིད་ལ་ཟུངས་ཤིག་དང་ངས་བཤད་དོ། །གསུངས་ནས་དང་པོ་ཆོས་ཐོས་པའམ་ཉན་པ་དང༌། དེ་ནས་ཡིད་ལ་བཟུང་སྟེ་བསམ་སྒོམ་བྱ་བར་སྐབས་ཐམས་ཅད་དུ་མཐུན་པར་བཀའ་བསྩལ་ཡོད་ཀྱང༌། དེང་སང་ལ་ལས་རང་གི་མ་བྱས་པ་དང་མི་ཤེས་པ་རྒྱུ་མཚན་དུ་རློམས་ནས་ཐོས་བསམ་མི་དགོས་སྒོམ་པ་ཁོ་ནས་ཆོག་ཟེར་བ་ནི། རྡོ་གྲུབ་བསྟན་པའི་ཉི་མས། སྔར་ཞིག་ཐོས་པ་ལུང་གི་མེ་ཏོག་འདིས། །ཡང་དག་ལྟར་སྣང་ཐང་ཤ་བཅད་མོད་དེ། །ད་ནི་སྟོན་ཆེན་རྟ་ཐོག་རྙེད་བཀུར་འདིས། །ཟོག་པོ་གྲུབ་རྫུའི་དབུ་འཕངས་མཐོ་བ་ལགས། །སྔར་ཞིག་ཐོས་པ་རིགས་པའི་རལ་གྲི་འདི། །ཆོས་མིན་ཞགས་པ་གཅོད་པའི་མཚོན་ཆ་སྟེ། །ད་ནི་གཟུ་ལུམ་བསྟན་སེལ་སྡེ་འཁྲུགས་འདིས། །ཆོས་མིན་སྨྲ་བ་ཤེད་ཀྱིས་བཀུར་བ་མང༌། །སྔར་ཞིག་ལེགས་བཤད་ཐོས་པའི་མེ་ཏོག་འདིས། །བློ་གསལ་སྟོང་གིས་དུས་སྟོན་བྱས་སྐད་དེ། །ད་ནི་ཐོས་སྒོག་ཚིག་གི་སྦུན་པ་ཞེས། །སྒོམ་ཆེན་སྟོང་གིས་རྣ་བ་རྟག་ཏུ་འགེབས། །སྔར་ཞིག་ཐོས་པ་ཉམས་ལེན་གཏེར་མཛོད་དེ། །དགྲ་བཅོམ་ཁྲི་ཁྲག་ཁྲི་བརྒྱའི་གཤེགས་ཤུལ་ཉིད། །ད་ནི་ཐོས་པ་སྒོམ་གྱི་གཤེད་མ་རུ། །མཐོང་བའི་རྟོགས་ལྡན་ས་ཡི་དྲེག་པ་ཙམ། །ཞེས་སྔོན་དང་ད་ལྟའི་སྒོམ་ཆེན་རྣམས་ལ་ཐོས་པ་ལ་ལྟ་ཚུལ་གྱི་ཧེ་བག་དང་ཐོས་པའི་གལ་ཆེན་ཉིང་དོན་གསུངས་པ་ལྟར་རེད། གུང་ཐང་བསྟན་པའི་སྒྲོན་མེས། དོན་གྱི་རྒན་པོ་ཚིག་གི་འཁར་བ་ལ། །བརྟེན་ཕྱིར། ཞེས་པ་ལྟར་དང་པོ་སྒྲ་སྤྱིའི་སྒོ་ནས་གོ་བ་ལེགས་པར་རྙེད་པ་དང༌། དེ་ནས་སྒྲ་སྤྱི་ཟད་པའི་སྒོམ་གྲུབ་དགོས་པ་རེད་མ་གཏོགས། དང་པོ་ཉིད་ནས་གོམས་པ་ཀློང་དུ་གྱུར་འགྲོ་ཡིན་ན། ཚད་མ་རྣམ་འགྲེལ་ལས། དེའི་ཕྱིར་ཡང་དག་ཡང་དག་མིན། །གང་གང་ཤིན་ཏུ་གོམས་པ་ལས། །བསྒོམ་པའི་སྟོབས་ནི་རྫོགས་པ་ན། །དེ་གསལ་མི་རྟོག་བློ་འབྲས་ཅན། །ཞེས་གང་གང་ཤིན་ཏུ་གོམས་གྱུར་གསུངས་མི་དགོས་ཏེ། ཐོས་པ་དང་སྒྲ་སྤྱི་སོགས་ལ་མ་བརྟེན་པར་དང་པོ་ཉིད་ནས་སྒོམ་གྲུབ་འགྲོ་བ་ཡིན་པའི་ཕྱིར་རོ། །ཁ་ཅིག་གིས། ཉོན་མོངས་པ་མ་འདུལ་བའམ་ཉམས་ལེན་མ་བྱས་ན་བཀའ་མདོ་རྒྱུད་ཐམས་ཅད་བློ་ལ་སོང་ན་ཕན་པ་མེད། ཅེས་བཤད་མཁན་གྱི་བློ་ཕུགས་ཀྱི་གཏད་སོ་ལ་བཟང་ངན་གཉིས་ལས། གཅིག་གིས་ཐོས་བསམ་རྐྱང་བ་མ་ཡིན་པར་དེའི་སྟེང་དུ་སྒོམ་པའི་ཉམས་ལེན་བྱེད་ཆེད་དུ་བཤད་པ་གདམས་ངག་རྣམ་དག་རེད། གཅིག་གིས་རང་ལ་ཐོས་བསམ་མེད་པས་ཐོས་བསམ་པ་ལ་དམའ་འབེབས་ཀྱི་ཆེད་དུ་བཤད་པ་དེ་ཐོས་བསམ་སྤངས་བ་མ་ཟད་ལུང་གི་ཆོས་སྤངས་པ་ཡིན་པས་མི་རུང་ལ། གཞུང་གི་ཚིག་ཙམ་ཐོས་པ་ལ་ཕན་ཡོན་བསམ་གྱིས་མི་ཁྱབ་པ་ཡོད་དེ། མདོ་སྡེ་ས་བཅུ་བའི་ཚིག་ཙམ་ཕུག་རོན་ཞིག་གི་གསན་ནས་ཚེ་འཕོས་ནས་འཕགས་པ་བློ་གྲོས་བརྟན་པའི་སྐྱེ་བ་བཞེས་པར་གསུངས་པ་ལྟ་བུ་རེད། ཚིག་ཙམ་འདོན་ན་ཕན་ཡོན་ཡོད་ན་ཐོས་བསམ་ལ་ཕན་ཡོན་ཡོད་པ་ལྟ་ཅི་སྨོས། ཁ་ཅིག་དགེ་སློང་ལེགས་པའི་སྐར་མ་དཔེ་འགོད་ཁུལ་བྱེད་པ་རྨོངས་བ་ཆེན་པོའི་གནས་སུ་གྱུར་ཏེ། སྤྲིན་ཆེན་པོའི་མདོ་ན་སངས་རྒྱས་ཀྱི་འཁོར་ལྷས་སྦྱིན་ཡན་ཆད་སངས་རྒྱས་ཀྱི་སྤྲུལ་བ་ཡིན་པར་གསུངས་པས་བསམ་གྱི་མི་ཁྱབ་པའི་གནས་དག་བློ་དམན་འཁྲུལ་བའི་གཞི་ཡིན་ལ། གསུང་རབ་ཡན་ལག་བཅུ་གཉིས་བློར་འགྲོ་བ་ལ་མི་བརྗེད་པའི་གཟུངས་མ་ཐོབ་ན་ཡོང་རྒྱུ་མེད་པར་རང་གིས་ཚོད་ལྟ་གྱིས་དང་གསལ་བོར་གོ་འོང་པ་རེད། དེས་ན་ཀུན་མཁྱེན་ཆེན་པོ་ཉ་དབོན་པའི་གཞི་ལམ་འབྲས་གསུམ་གྱི་དྲིས་ལན་གྱི་གཞུག་ཏུ། མན་ངག་བསྒོམ་པའི་ལུང་དང་རབ་ལྡན་ཡང༌། །ཡང་དག་ཐོས་པའི་མིག་དང་མི་ལྡན་ན། །མདོ་རྒྱུད་བསྟན་བཅོས་ལེགས་བཤད་རྩོད་པ་གསུམ། །དམུས་ལོང་མྱ་ངན་གང་དུ་འཁྱམས་དང་མཚུངས། །ཐོས་དང་བསྒོམ་པའི་ནམ་མཁའ་ཡངས་ཡོད་ཀྱང༌། །ཐོས་དོན་བསམ་བྱུང་ཉི་འོད་མེད་གྱུར་ན། །གསུང་རབ་དགོངས་དོན་གཏན་ལ་འབེབས་པའི་ཚེ། །གནས་ལུགས་འཇིག་རྟེན་གསལ་བར་ག་ལ་འགྱུར། །ཐོས་བསམ་འཛིན་མ་རབ་ཏུ་རྒྱ་ཆེ་ཡང༌། །བསྒོམ་པའི་དག་བྱེད་རྒྱུན་དང་བྲལ་གྱུར་ན། །རང་རྒྱུད་ཆགས་སྡང་རྨོངས་པ་ལ་སོགས་པའི། །དྲི་མ་མ་ལུས་སེལ་བར་ག་ལ་འགྱུར། །བསྟན་པ་གསལ་བར་ནུས་པའི་ཐོས་པ་དང༌། །གསུང་རབ་དོན་བཞིན་ངེས་པའི་བསམ་པ་དང། །གོལ་མེད་ཉམས་སུ་ལེན་པའི་སྒོམ་པ་གསུམ། །གང་ལ་མངའ་བའི་ཞབས་རྡུལ་སྤྱི་བོའི་ལོངས། །ཞེས་ཐོས་བསམ་སྒོམ་གསུམ་དང༌། འཆད་རྩོད་རྩོམ་གསུམ་གྱི་དགོས་གལ་གསུངས་པ་དེ་ལ་བསམ་མནོ་གཏོང་དགོས་པ་རེད། རང་དགར་དཀོར་ཟས་དཀོར་ཆུ་ཟོས་བསྡད་པ་ཙམ་གྱིས་རབ་ཏུ་བྱུང་བའི་དོན་པོ་གང་ཡང་འགྲུབ་མེད་པ་ཡིན་ཏེ། བཅོམ་ལྡན་འདས་ཀྱི་ཞལ་སྔ་ནས། གང་ཞིག་ངུར་སྨྲིག་བགོས་ཀྱང་སེམས་ཀྱི་སྐྱོན་མ་སྤངས། །ལག་ཏུ་ལྷུང་བཟེད་ཐོགས་ཀྱང་ཡོན་ཏན་སྣོད་མ་གྱུར། །སྐྲ་དང་ཁ་སྤུ་བྲེགས་ཀྱང་དགེ་སྦྱོང་ཚུལ་མ་ཞུགས། །རབ་ཏུ་བྱུང་ཡང་དངོས་པོ་ཀུན་ལས་ངེས་མ་བྱུང༌། །དགེ་སྦྱོང་དེ་ནི་དགེ་སྦྱོང་མ་ཡིན་ཁྱིམ་པའང་མིན། །དེ་ནི་ཆུ་མེད་ཁྲོན་པ་རི་མོའི་མར་མེ་བཞིན། །ཞེས་པ་ལྟར་གྱུར་ཡོད་པ་རེད། ཅེས་སོགས་གསུངས་སོ། །བོད་ཟླ་བརྒྱད་པའི་ཚེས་ལྔ་ཉིན་གཡུང་དྲུང་བོན་གྱི་དགོན་ཆེན་སྣང་ཞིག་དགོན་དུ་འཆད་ཉན་གྱི་དབུ་བརྙེས་ནས་ལོ་འཁོར་བརྒྱ་ལོན་པའི་མཛད་སྒོར་གངས་ལྗོངས་རིས་མེད་མཐོ་སློབ་ཀྱི་སློབ་གཉེར་བ་བརྒྱ་ལྷག་དང་བཅས་ཕེབས་ནས་རྩོད་པ་དང༌། བཤེས་གཉེན་རིན་པོ་ཆེ་ཉིད་ནས་མཐུན་ལམ་གྱི་སྐོར་བཀའ་སློབ་རྒྱ་ཆེན་གནང་བ་གནད་བསྡུས་ཙམ་ནི། དེ་ཡང༌། རྗེ་བཙུན་ཀུན་དགའ་གྲོལ་མཆོག་གིས། ཕ་ནི་ཡོངས་སུ་གསོ་བའི་ཆེད། །མ་དག་བཀུམ་པ་སྲིད་མིན་ལྟར། །རང་གི་བསྟན་པ་སྤེལ་བའི་ཕྱིར། །གཞན་གྱི་བསྟན་པ་ཇི་ལྟར་བཤིག །ཅེས་གསུངས་པ་ལྟར། རང་གི་ཆོས་བརྒྱུད་གྲུབ་མཐའ་འཛིན་སྐྱོང་སྤེལ་གསུམ་བྱེད་རྒྱུ་འོས་འགན་ཡིན་ཡང༌། གཞན་གྱི་ལྟ་གྲུབ་དང་རིག་གནས་ལ་མཐོང་ཆུང་དང༌། སྟོར་བརླག་བྱེད་པ་དེ་བྱམས་དང་སྙིང་རྗེའི་རང་བཞིན་ཅན་གྱི་ཆོས་ལུགས་ཤིག་མ་ཟད། འཛམ་གླིང་གི་འཁོར་ཕྱོགས་ཙམ་ལ་ཡང་མི་མཐུན་པ་རེད། གཞན་ལ་གནོད་པའི་ལས་ཀྱིས་རང་ཉིད་དར་རྒྱས་སུ་འགྲོ་འདོད་པ་དེ་རྩ་བ་ཉིད་ནས་ཆོས་ཤིག་ཏ་གང་ནས་ཡིན་ཏེ། འཇིག་རྟེན་ཡ་རབ་ཀྱི་ཚུལ་ལ་ཡང་གཏན་དུ་རྒྱབ་འགལ་ཁོ་ན་རེད། དེས་ན། རྒྱལ་སྲས་ཞི་བ་ལྷས། དེ་བཞིན་སེམས་ཅན་གནོད་པ་བྱས་ན་ཡང༌། །ཐུགས་རྗེ་ཆེ་རྣམས་དགྱེས་པའི་ཐབས་མེད་དོ། །ཞེས་གསུངས་པ་བཞིན་དུ། གཞན་ལ་གནོད་པའི་ལས་ཀྱིས་རྒྱལ་བ་སྲས་དང་བཅས་པའི་ཐུགས་དགོངས་གང་ཡང་སྒྲུབ་ཚུལ་མེད་པ་རེད། བློ་སྦྱོང་དོན་བདུན་མ་ལས། སྐྱིད་ཀྱི་ཡན་ལག་ཏུ་སྡུག་མ་འཚོལ། གསུངས་པ་དེའི་དོན་གང་རེད་ཅེ་ན། རྗེ་ཏཱ་ར་ནཱ་ཐའི་དེའི་འགྲེལ་བ་ལས། སྐྱིད་ཀྱི་ཡན་ལག་ཏུ་སྡུག་མ་ཚོལ་ཞེས་པ་ནི། ཡོན་བདག་ལ་ན་ཚ་ཤི་ཆད་བྱུང་ན་ཚོགས་གསོག་ཡོང༌། གྲྭ་རོགས་གྲོགས་མཆེད་ཤི་ན་དཔེ་ཆ་ལྷ་རྟེན་སོགས་འོང༌། རང་དང་མཉམ་པ་ཤི་ན་ང་གཅིག་པུ་ལ་བསོད་ནམས་འོང༌། དགྲ་ཤི་ན་འཚེང་སྙམ་པ་དང༌། མདོར་ན་རང་སྐྱིད་པའི་ཕྱིར་དུ་གཞན་ལ་སྡུག་བསྔལ་དང་མི་འདོད་པ་ཡོང་དུ་རེ་བ་དེ་སྤོང་བའོ། །ཞེས་གསུངས་པ་དེ་ཉིད་གནད་ཆེན་པོ་རེད། རང་གི་གྲུབ་མཐའ་དང་ཆོས་བརྒྱུད་མི་རིགས་སོགས་གང་ཡིན་ཡང༌། དེའི་དོན་དུ་གཞན་ལ་ཆགས་སྡང་དང་ཉམས་དམས་སུ་ཕྱིན་པར་འདོད་པ་དེ་སྐྱིད་ཀྱི་ཡན་ལག་ཏུ་སྡུག་འཚོལ་བ་རེད། འཇིག་རྟེན་གྱི་ཕྱོགས་ནས་བསམ་ན་ཡང༌། ཆེ་བ་འཛམ་གླིང་གི་ལོ་རྒྱུས་ནས་བཟུང་སྟེ། ཉེ་བ་རང་རེ་བོད་གངས་ཅན་གྱི་རྒུད་ཚོགས་ཇི་སྙེད་པ་ཚང་མ་མཐུན་འབྲེལ་མ་ཐུབ་པ་ལས་བྱུང་བ་མ་ཡིན་པ་གཅིག་ཀྱང་མེད་པ་རེད། དང་པོ་དོན་དག་མེད་ས་ནས་དོན་དག་བཟོ་བ་དང༌། སྐད་རྒྱག་མི་དགོས་ས་ནས་འུར་ཆེན་པོ་བརྒྱབ་སྟེ། དོན་མེད་ཀྱི་དཀྲུག་ཤིང་བཟོ་འདུག་ན་སུ་ཡིན་ཡང་ཡག་པོ་གཞི་ནས་ཡོད་པ་མ་རེད། དང་པོ་ཆུང་ཆུང་ཞིག་གི་སྐབས་ལ་ཚང་མ་ཁ་མི་ཉན་ཁུལ་དང༌། དོན་དག་ཆེན་པོ་ཞིག་ལ་འགྱུར་ཚར་ཕྱིན་སུས་ཀྱང་འགན་མི་འཁྱག་པར་མཐུན་ཐབས་ཤིག་ག་རེ་ཟེར་བ་དེ། ཆུང་བ་ཁྱིམ་ཚང་ནས་ཁྱིམ་ཚང་གི་བར་གྱི་དོན་དག་ནས་བཟུང་སྟེ། ཆེ་བ་རྒྱལ་ཁབ་དང་རྒྱལ་ཁབ་ཀྱི་བར་ལ་འདྲ་འདྲ་རེད། དེས་ན། ཚང་མས་མཐུན་ལམ་རྡོག་རྩ་གཅིག་སྒྲིལ་ལ་འབད་འབུངས་མི་ཞན་པ་བྱེད་རྒྱུ་རེ་བ་ཡིན། སོགས་གསུངས་སོ། །ཚེས་དགུ་ལ་ཁམས་ནང་ཆེན་བཀའ་བརྒྱུད་གོ་ཆེ་དགེ་འཕེལ་གླིང་དུ་གངས་ལྗོངས་བཀའ་བརྒྱུད་བགྲོ་གླེང་ཆེན་མོའི་སྟེང་དུ་ཕེབས་ནས་བཀའ་སློབ་དང་བརྒལ་བརྟག་གི་ཆོས་གྱི་སྐྱེས་གྱ་ནོམ་པས་ཚིམ་པར་མཛད་དོ། །བོད་ཟླ་དགུ་པའི་ཚེས་དགུའི་ཉིན་མཐོ་ལས་དགོན་དུ་མདོ་སྨད་དགུན་ཆོས་ཆེན་མོ་ཐེངས་ཉི་ཤུ་རྩ་བཞི་པའི་སྟེང་དུ་ཞབས་སོར་བཀོད་དེ། ཆོས་རར་དམ་བཅར་བཞུགས་ནས་མཁས་པ་མང་པོ་ཕན་ཚུན་ལུང་རིགས་ཀྱི་བགྲོ་གླེང་དང་བརྒལ་བརྟག་བརྒལ་ལན་གནང་སྟེ། ཉ་དབོན་ཀུན་དགའ་དཔལ་གྱི་ཞལ་སྔ་ནས། བླུན་པོས་མཁས་ཞེས་བཀུར་བས་མཁས་པ་མིན། །མཁས་པས་མཁས་ཞེས་བསྟོད་ན་མཁས་པ་ཡིན། །མཁས་སམ་མི་མཁས་རྩོམ་འཆད་རྩོད་ན་མངོན། །ཞེས་པ་ལྟར་གྱི་མཁས་པའི་སྤོབས་པ་གཞན་ལས་མཐོ་བའི་རྣམ་ཐར་བཟང་པོ་མངོན་པར་འཕགས་སོ། །བཤེས་གཉེན་རིན་པོ་ཆེ་ཉིད་གང་དུ་ཕེབས་ཀྱང་ལུང་རིགས་ཀྱིས་མངོན་པར་རྒྱལ་བའི་རྔ་ཆེན་རྣམ་པ་ཀུན་ཏུ་བརྡུང་པར་མཛད་མོད་ཀྱི། ཁོང་ནས་ནི་ང་རྒྱལ་དང་ཆེ་བསྟོད་ཅུང་ཟད་ཀྱང་མི་གནང་སྟེ། ཁོ་བོ་དང་ཐོག་སློབ་གཉེར་བྱེད་སྐབས་སུ་ཡང་རྒྱུགས་སྤྲོད་ལ་ལམ་འགྲོ་ཡོང་བ་ཡིན། མི་འགའ་རེར་སྤྱིར་མཁས་པའི་ཡོན་ཏན་ཆེན་པོ་ཡོད་ན་ཡང༌། རྒྱུགས་སྤྲོད་དང་འདུ་འཚོགས་ཆེ་ས་ན་རླུང་རྟ་མི་རྒྱུགས་པ་མང་པོ་ཡོད་པ་རེད། མ་འོངས་པ་ཅི་ཤེས་ཏེ། དེ་སྔོན་ཡིན་ན་ལས་ཤིག་གིས་ལོས་ཡིན་ལམ་འགྲོ་བཟང་པོ་རེ་ཡོང་བ་ཡིན་གསུངས་སོ། ། ང་རྒྱལ་གཞན་ཕམ་རིས་གཅོད་སྡང་ཞེན་གྱིས། ། ཆོས་སྲིད་ལུགས་གཉིས་གཞི་རྩ་ཀུན་སྟོར་བའི། ། འདས་པའི་ཉམས་མྱོང་མ་འོངས་བླང་དོར་གྱི། ། གསལ་འདེབས་ཤིག་ཏུ་དགོས་པའི་སྐུལ་མ་གནང༌། ། སྙིགས་དུས་ཀྱི་བསྟན་པའི་གསལ་བྱེད་ཆེན་པོ་ངག་དབང་འཇིགས་མེད་དངོས་གྲུབ་དཔལ་བཟང་པོའི་མཛད་བཟང་བསླབ་གསུམ་ནོར་བུའི་གླིང་ཁ་ཞེས་བྱ་བ་ལས་ཕྱོགས་ཞེན་ཁ་འཛིན་ཟེར་བ་སྐྱིད་ཀྱི་ཡན་ལག་ཏུ་སྡུག་འཚོལ་བ་ཡིན་ཚུལ་བསྐོར་གྱི་རྣམ་ཐར་མདོར་བསྡུས་པ་སྟེ་ཉེར་དགུ་པའོ། ། སྤྱི་ཚོགས་ནང་ཆོས་ཅན་དུ་བསྒྱུར་དགོས་པར་གསུང་པའི་བསྐོར་སོགས་ཟླ་ངོ་ཁ་ཤས་ཀྱི་རྣམ་ཐར།བོད་ཟླ་དགུ་བའི་ཚེས་བཅུ་དགུའི་ཉིན་གངས་ལྗོངས་རིས་མེད་མཐོ་སློབ་གྱི་ཕར་ཕྱིན་མཚན་ཕུད་དམ་བཅའ་ཆེན་མོ་ཐེངས་དྲུག་པ་བཞག །ཚེས་ཉེར་གཉིས་ཀྱི་ཉིན་རྔ་ཡུལ་བསེ་དགོན་གྱི་རིས་མེད་མ་ཎིའི་ཆོས་ཚོགས་སུ་ཆོས་ཁྲིད་བསྩལ། གནམ་གང་གི་ཉིན་ཞབས་ཟུང་ཐབས་ཤེས་ཀྱི་རྐང་པ་ཛ་འགོའི་རི་ཁྲོད་ཀྱི་ལྷ་འབངས་རྒྱལ་རོང་ཅུང་ཟེད་དུ་གནོད་པ་མེད་པར་བཀོད་ནས། ཉིན་གཉིས་གྱི་ཡུན་ལ་རྒྱལ་རོང་ཞིང་སྒྲུབ་ཆེན་པོའི་སྟེང་དུ་ཞིང་ཁམས་བདེ་བ་ཅན་གྱི་རྒྱུ་བཞི་གོ་བདེ་གསལ་བ་དང༌། སྐྱབས་སུ་འགྲོ་ལུགས་སོགས་ནང་ཆོས་ངོ་སྤྲོད་མཛད། ཛ་འགོའི་རི་ཁྲོད་དུ་བྱོན་ནས་གྲྭ་མང་ལ་བཀའ་སློབ་གནང༌། བོད་ཟླ་བཅུ་པའི་ཚེས་གསུམ་ཉིན་རྒྱལ་རོང་ཁང་སར་དགོན་དང༌། ཚེས་བཞི་ལ་ཙག་དགེ་བ་དགོན་རྣམས་སུ་ཆོས་དང་སྲིད་ཀྱི་ལུགས་གཉིས་བླངས་དོར་ཟབ་མོ་བསྩལ་ཞིང་དམ་པའི་ཆོས་ཀྱིས་ཡོངས་སུ་ཚིམས་པར་མཛད་དོ། །ཚེས་བཅོ་ལྔའི་དགོང་མོར་ཆོས་ཐང་དགོན་དུ་ཕར་ཕྱིན་མཚན་ཕུད་དམ་བཅའི་སྟེང་དུ་ཆིབ་བསྒྱུར་བསྐྱངས། ཚེས་བཅུ་དྲུག་ཉིན་ཛམ་ཐང་ཆོས་རྗེ་དགོན་ཆེན་གྱི་མི་ཕམ་ཆོས་ཚོགས་ཀྱི་སྟེང་བྱོན་ནས་ལུགས་གཉིས་ཀྱི་བསླབ་བྱ་དང་ལས་འབྲས་ཀྱི་རྣམ་བཞག་སོགས་ལས་བརྩམས་ཏེ་ཆོས་ཁྲིད་གནང༌། ཚེས་ཉེར་ལྔའི་ཉིན་རྔ་ཡུལ་བོན་པོ་རྟོགས་ལྡན་དགོན་དུ་ཕེབས་ནས། མི་མང་ལ་བདེ་བ་ཅན་དུ་སྐྱེ་བའི་རྒྱུ་བཞིའི་ཆོས་ཁྲིད་གནང༌། བོད་ཟླ་བཅུ་གཅིག་པའི་ཚེས་དགུ་ལ་ཆོས་བརྒྱུད་དྲུག་མཁན་བླ་སྤྲུལ་མང་པོ་དང་མཉམ་དུ། གྲྭ་ཇོ་སྔགས་གསུམ་གྱི་ཀུན་སྤྱོད་ཡར་བསྐུལ་ཚོགས་ཐེངས་བཞི་བར་བྱོན་ནས་གསུང་བཤད་ཟབ་རྒྱས་གནང༌། ཚེས་བཅུ་ཐམ་པར་རྔ་ཡུལ་དྷཱི༔ཕུ་དགོན་དུ་ས་སྐྱ་པནྚིཏ་ཀུན་དགའ་རྒྱལ་མཚན་གྱི་འདས་མཆོད་སྟེང་དུ་གངས་ལྗོངས་རིས་མེད་མཐོ་སློབ་ཀྱི་སློབ་གཉེར་བ་བཞི་བཅུ་ཡས་མས་དང་བཅས་ཞབས་སོར་བཀོད་དེ་ཐུགས་མཐུན་ཁྲིམས་གཙང་གི་རྩ་བ་བྱས་ཏེ་ཕན་ཚུན་ལུང་རིགས་ཀྱི་བརྒལ་བ་བརྒལ་ལན་བྱས། བོད་ཟླ་བཅུ་གཉིས་པའི་ཚེས་བརྒྱད་ཀྱི་ཉིན་ཀུན་གཟིགས་པན་ཆེན་རིན་པོ་ཆེའི་རྗེས་དྲན་ཐེངས་གཉིས་པའི་ཚོགས་སྟེང་ནས་པཎ་ཆེན་སྐུ་ཕྲེང་བཅུ་བ་མཆོག་གིས་ཇོ་ནང་བ་ལ་བཀའ་དྲིན་སྐྱོང་ཚུལ་དང་བོད་སྤྱི་ལ་ཕྱི་རྗེས་གསབ་ཏུ་མེད་པ་བཞག་པའི་བསྐོར་ནས་གསུངས་བཤད་གནང༌། ཚེས་བཅོ་ལྔའི་ཉིན་ལོ་འཁོར་རྒྱུགས་སྤྲོད་ཆེན་མོའི་བྱ་དགའི་གཟེངས་རྟགས་ཕུལ་ནས། སེར་སྐྱ་འདུས་སྡེ་ཡོངས་ལ་ཚེ་དཔག་མེད་ལྷ་གཅིག་བུམ་གཅིག་གི་དབང་དང༌། སྤྱི་ཚོགས་ནང་ཆོས་ཅན་དུ་བསྒྱུར་བ་ཞེས་པའི་བཀའ་སློབ་རིན་ཐང་དང་བྲལ་བ་གསུངས་ཏེ། གནད་བསྡུས་ཙམ་འགོད་ན། ཁྱེད་དད་ལྡན་མང་ཚོགས་རྣམ་པ་ཚོས་ཀྱང་ནང་ཆོས་ལ་སློབ་སྦྱོང་ཡག་པོ་བྱེད་དགོས་ཀི་རེད། སྤྱིར་བཏང༌། ཕྱག་འཚལ་བ་དང༌། བསྐོར་བ་བྱེད་པ། ཡོན་འབུལ་བ་ལ་སོགས་པ་དགེ་བ་ལོས་ཡོད་དེ། ཤེས་ནས་བྱས་པ་དང་ཁྱད་འགྱུར་གནམ་ས་ལྟ་བུ་རེད། མི་མང་འཁོར་བ་པ་རྣམས་ལ་ལས་ཀ་མང་པོ་རེད། དེས་ན། གྲྭ་བ་ཚོ་ནང་བཞིན་གྱི་ཁོམ་པ་དང་གོ་སྐབས་མེད་ན་ཡང༌། ནང་ཆོས་ཀྱི་རྒྱུན་ཤེས་ཙམ་ཞིག་ངེས་པར་ཡོད་དགོས་པར་ཆགས་འདུག །དཔེར་ན། བློ་ལྡོག་རྣམ་པ་བཞི། སྐྱབས་འགྲོ། སྦྱོར་དངོས་རྗེས་གསུམ། བདེ་བ་ཅན་གྱི་རྒྱུ་བཞི། བདེན་པ་བཞིའི་གོ་བ་རགས་བསྡུས་ལྟ་བུས་མཚོན་ཏེ། རྒྱུན་ཤེས་ཙམ་ཡང་མེད་པར་ཆགས་སོང་ན། ཁྱེད་ཅག་ལ་གཞན་པ་ཞིག་གིས་དྲིས་ཏེ་ནང་པ་སངས་རྒྱས་པ་ཨེ་ཡིན་བཤད་ན་ནི། ཡིན་ཤག་ཤག་འདྲ་བོ་ལན་འདོན་པ་རེད། ཡིན་ན་ཡང༌། ནང་པ་སངས་རྒྱས་པའི་ཆོས་དེ་གང་འདྲ་ཞིག་ཡིན་པ་རེད་ཟེར་ན་ནི། གཅིག་ཀྱང་གོ་ཡོད་པ་མ་རེད། དཔེར་ན། ང་སྨན་པ་ཡིན་ཏ་སྨན་ཁྱོན་ནས་མི་ཤེས་ལབ་ན་ཚང་མས་སྨན་པ་རྫུན་མ་ཞིག་རེད་ཟེར་བ་རེད། མི་རིགས་གཞན་ཡིན་ན་རྒྱལ་ཕྱི་ནང་ཚང་མ་ནས་ནང་ཆོས་ལ་དད་པ་བྱས་ཕྱིན་ཕལ་ཆེ་བའི་ནང་ཆོས་རགས་བསྡུས་རེ་ཨེ་ཤེས་ལྟ་བཞིན་ཡོད་པ་རེད། ང་ཚོས་ཀྱང་དེ་བཞིན་བྱེད་དགོས་པ་རེད་མ་གཏོགས། ཆོས་ཚོགས་ཤིག་འཚོགས་ན་ཡང༌། ཆོས་ངོ་སྤྲོད་ཞུས་ན་ཉན་མི་གང་ཡང་མེད་པར། འདོན་པ་ཏག་ཏག་འདོན་བསྡད་ན་དེ་ཡང་ཕྱོགས་གཅིག་ནས་ཧ་ཅང་ཡག་པོ་ཞིག་ཡོང་གིན་མེད་པ་རེད། དེང་སང་བོད་གངས་ཅན་གྱི་སྐྱབས་མགོན་རྣམ་པ་ཚོས་ཇི་ལྟར་གསུང་གིན་ཡོད་པ་རེད་ཅེ་ན། སྤྱི་ཚོགས་ནང་ཆོས་ཅན་དུ་བསྒྱུར་དགོས་གསུང་བཞིན་ཡོད་པ་རེད། སྤྱི་ཚོགས་ནང་ཆོས་ཅན་དུ་བསྒྱུར་བ་ཞེས་པ་ཆོས་དད་མི་མང་ལ་ནང་ཆོས་ཀྱི་སློབ་སྦྱོང་ཡག་པོ་སྤྲད་པ་ལ་ཟེར་བ་རེད། ང་ཚོའི་ས་ནས་མི་མང་མ་ཟད། གྲྭ་བ་བརྒྱ་ཆ་མང་པོ་ཞིག་ལ་ཡང་དེ་རིང་སྐྱབས་འགྲོ་ཞིག་འགྲེལ་བཤད་བསྐྱོན་ཤོག་ཟེར་ན་ཡོད་པ་མ་རེད། གྲྭ་གོས་ཇོ་གོས་གྱོན་ནས་དགྲ་འདུལ་གཉེན་སྐྱོང་ཚོང་ཁེ་སྤོག་ཁོ་ན་ལ་གཡེངས་བསྡད་ན། བཅོམ་ལྡན་འདས་ཀྱིས་མགོ་བོ་བྲེག་ཙམ་དགེ་སྦྱོང་མིན་གསུངས་ཡོད་པ་རེད། ཕ་མ་ལ་ལས། བུ་ཕྲུག་དེ་དང་པོར་གྲྭ་བ་བྱེད་དུ་བཅུག་སྟེ། དེ་ནས་ཁྱེད་རང་དགོན་ནང་རེ་སོང་འདུག་དང༌། བསླབ་པ་སློབ་གཉེར་དང་མཚམས་བསྙེན་སྒྲུབ་འདྲ་བོ་མ་ནུས་ན་ཡང་སྐྱོན་མེད། ང་ཤི་དུས་གསུར་ཞིག་ཕུད་མི་ཡོང་ན་ཕ་ལོ་མ་ལོ་དེས་ཆོག་ཟེར་བ་རེད། བུ་ཕྲུག་འཕྲོ་བརླག་གཏོང་སྟངས་སྡུག་ཤོས་ཤིག་རེད། ནང་ན་ལུང་རྟོགས་ཀྱི་ཡོན་ཏན་ཅི་ཡང་མེད་ན། བསུར་བསྔོ་བྱེད་མི་ལ་གཟན་ཤམ་གྱོན་ཡོད་པས་ཅི་ཡང་ཕན་པ་མ་རེད། ད་དུང་ལྒང་ལེ་བརྩེ་བ་དང་སྤྱོད་པ་འཆལ་ལེ་འཆོལ་ལེ་མང་པོས་བསྟན་པའི་ཞབས་འདྲེན་ཞུས། སངས་རྒྱས་ཀྱི་བསྟན་པ་བཤིག་མཁན་ཞིག་གསོས་བཞག་པ་དང་བསྐྱངས་བཞག་པ་རེད། སངས་རྒྱས་ཀྱིས་ཁོང་གི་བསྟན་པ་དེ་ང་མིན་ང་འདྲ་ཞིག་གིས་བཤིག་གསུངས་པ་དེ་འདི་འདྲ་ལ་ཟཻར་བ་རེད། བོད་ཀྱི་སྐྱབས་མགོན་ཚོས། གྲྭ་བ་བྱས་ན་གྲྭ་བ་ཡག་ཐག་ཆོད་བྱེད་དགོས་པ་རེད། དེ་མིན་ན་གྲོང་བ་ཡག་ཐོག་ཆོད་བྱེད་དགོས་པ་རེད་གསུང་གིན་ཡོད་པ་རེད། སློབ་སྦྱོང་གང་ཡང་མེད། ཉམས་ལེན་གང་ཡང་མེད། ཐ་ན་གྲྭ་བ་ཞིག་གི་འགྲོ་ལུགས་འདུག་སྟངས་ཙམ་ཡང་མི་ཤེས་ཤིང་མེད་པར་གྱུར་སོང་ན། དད་ལྡན་མང་ཚོགས་ཀྱི་ཤ་དང་ཁྲག་གི་རིན་དཀོར་ཟས་ཟ་མཁན་ཙམ་ལ་དགོས་པ་མི་འདུག །དེ་འདྲ་ཞིག་ཡིན་ཚར་ནས་བཟུང༌། ཁྱིམ་ཚང་ཞིག་གི་དབང་དུ་བཏང་ན་ཡང༌། གྲྭ་བ་དེ་ཁྱིམ་ཚང་དེའི་གཟའ་ལྷག་འདྲ་བོ་རེད། དཀོར་ཟ་བྱེད་ཀྱི་ཡོན་ཏན་མེད་ན། མི་སོ་སོས་ངོས་ནས་ཀྱང་ཚེ་ཕྱི་མ་ཤ་དང་ཁྲག་གིས་འཚབ་དགོས་པ་རེད་མ་གཏོགས། ཟ་ཆོག་ཆོག་དང་འཐུང་རུང་རུང་ཞིག་མིན་པ་ཤེས་དགོས་འདུག །མི་ཞིག་ཤི་སོང་ན་འདོན་པ་འདོན་མི་ཙམ་གྱིས་གྲྭ་བའི་དགོས་པ་འགྲུབ་ཡོད་པ་མ་རེད། དོན་བསམ་རྒྱུ་དང་ཐུགས་སྨོན་གནང་རྒྱུ་མེད་ན། འདོན་པའི་སྒྲ་ཙམ་ཏ་སྒྲ་སྒམ་བཏང་བཞག་ན་ཆོག་གི་རེད། དེང་སང་སྟབས་བདེ་པོ་རེད། དྲྭ་ཐོག་ནས་ས་ཆ་རྣམ་པ་སྣ་ཚོགས་ནས་ཆོས་ཡག་པོ་བཤད་ཡོད་པ་ཚོ་ཉན་ནས་སློབ་ན་མཐུན་རྐྱེན་འཛོམས་པོ་རེད། དེ་ལྟར་ནང་ཆོས་ལ་སློབ་གཉེར་ཅི་ཐུབ་རེ་མང་ཚོགས་ཀྱི་ངོས་ནས་ཡིན་ན་ཡང་བྱེད་རྒྱུ་རེ་བ་ཡིན། ཞེས་གསུངས་སོ། །དེ་ལྟར་བཅོམ་ལྡན་འདས་ཀྱིས་ཀྱང་ཆེད་དུ་བརྗོད་པའི་ཚོམས་ལས། མགོ་བོ་སྐྱ་བོར་གྱུར་བར་དུ། །ད་དུང་རྒན་རབ་མ་ཆུད་པ། །དེ་ནི་ལང་ཚོ་གཏུགས་པ་སྟེ། །དེ་ནི་རྒན་བླུན་ཞེས་བྱའོ། །གང་ཞིག་དགེ་དང་སྡིག་པ་དག །སྤངས་ཤིང་ཚངས་པར་སྤྱོད་པ་དང༌། །སྡེ་ཚོགས་སྤངས་ནས་སྤྱོད་བྱེད་པ། །དེ་ནི་རྒན་རབ་ཞེས་བྱའོ། །བརྟུལ་ཞུགས་མེད་ཅིང་བརྫུན་སྨྲ་ན། །མགོ་བོ་བྲེགས་ཙམ་དགེ་སྦྱོང་མིན། །རྨོངས་པ་འདོད་ལ་ཞུགས་པ་དག །ཇི་ག་དགེ་སྦྱོང་ཡིན་ནམ་ཀྱེ། །བརྟུལ་ཞུགས་མེད་ཅིང་བརྫུན་སྨྲ་ན། །མགོ་བོ་བྲེགས་ཙམ་དགེ་སྦྱོང་མིན། །གང་ཞིག་སྡིག་པ་ཞི་གྱུར་ཏེ། །མཁས་པས་དགེ་སྦྱོང་ཡིན་པར་ཤེས། །བརྟུལ་ཞུགས་མེད་ཅིང་བརྫུན་སྨྲ་ན། །མགོ་བོ་བྲགས་ཙམ་དགེ་སྦྱོང་མིན། །གང་དག་སྡིག་པ་ཆེ་ཕྲ་དགྲ། ཀུན་ལ་བརྟགས་ནས་བྱེད་པ་དང༌། །སྡིག་པ་ཞི་བ་དེ་དག་ནི། །དགེ་སྦྱོང་ཉིད་ཅེས་བརྗོད་པར་བྱ། །སྡིག་པ་སྤངས་པ་བྲམ་ཟེ་སྟེ། །ཞི་བར་བྱེད་པ་དགེ་སྦྱོང་ཡིན། །བདག་གི་དྲི་མ་རབ་སྤངས་པ། །དེས་ན་རབ་ཏུ་བྱུང་ཞེས་བརྗོད། །ཅེས་གསུངས་སོ། །ཚེས་བཅོ་བརྒྱད་ཀྱི་ཉིན་གཙང་གོང་སྤྲུལ་འཇམ་དབྱངས་སོགས་ཀྱིས་ཞུ་བ་ཕུལ་བ་བཞིན་མགོ་ལོག་དགའ་བདེ་རྫོང་ཁྱི་འབྲི་ཡུལ་ཚོར་བྱོན་ནས། ཚེས་བཅུ་དགུའི་ཉིན་གུང་ཆུ་ཚོད་དང་བོ་ནས་ཆུ་ཚོད་བཞི་ལྷག་བར་དུ་དད་ལྡན་སེར་སྐྱ་ཡོངས་ལ་སྐྱབས་གསུམ་ཀྱི་སྟེང་ནས་ནང་ཆོས་ངོ་སྤྲོད་དང་བྱང་ཆུབ་སེམས་སྡོམ་གནང༌། དེ་ནས་གཙང་གོང་མ་དགོན་ཐོག་ཏུ་སེར་ཕྲེང་གི་བསུ་བ་དང་བཅས་ཕེབས་ཏེ། སྒྲུབ་གྲྭ་བ་རྣམས་ལ་བཀའ་སློབ་དང༌། ལམ་རིམ་བདུད་རྩིའི་ཉིང་ཁུའི་མཇུག་སྡོམ་ཚིགས་བཅད་ཀྱི་འགྲེལ་བ་བཤེས་གཉེན་རིན་པོ་ཆེ་གང་ཉིད་ནས་མཛད་པ་དེའི་ལུང་གནང༌། མདོ་ལིའི་རྡོ་ཁ་དགོན་གྱི་བླ་གྲྭ་ཡོངས་ནས་ནན་ཞུ་མཛད་པའི་དབང་གིས། ཚེས་ཉི་ཤུའི་ནངས་མོ་ཆུ་ཚོད་དྲུག་ལྷག་ནས་དགོན་དེར་ཕེབས་ཏེ། ཆུ་ཚོད་དགུ་ཙམ་ན་དེ་གའི་ཐུན་པ་ཆོས་ཚན་གསུམ་དང༌། བཙུན་མ་ཡོངས་རྫོགས་ལ་བཀའ་སློབ་ཟབ་རྒྱས་གནང་ནས། ཕྱིར་ཁྱི་འབྲི་ཡུལ་ཚོར་ལོགས་ཏེ་ཆུ་ཚོད་བཅུ་གཉིས་སྟེང་དབང་བསྒྲུབས་ཤིང༌། ཆུ་ཚོད་གཅིག་དང་ཕྱེད་ཀ་ཙམ་ན་སེར་སྐྱ་སྟོང་ཕྲག་ལྔ་ཡས་མས་ཙམ་ཡོད་ཚོད་ལ་ཚེ་དཔག་མེད་ལྷ་གཅིག་བུམ་གཅིག་གི་དབང་སྐུར་ཟབ་མོའི་བཀའ་དྲིན་བསྐྱངས། དེ་ནས་བདེ་བ་ཅན་དུ་སྐྱེ་བའི་རྒྱུ་བཞི་མདོར་བསྡུས་ཤིག་གསུངས་ཏེ། མི་མང་གི་རེ་བ་བཞིན་མཇལ་ཁ་དང་ཕྱག་དབང་གནང༌། དེའི་ནུབ་མོར་རྒན་འཁོག་འགའ་ཁོང་གི་མདུན་དུ་འཕོ་ལུང་ཞིག་བསྩལ་རོགས་ཞུས་པ་བཞིན་འཕོ་ལུང་གསུངས་ཤིང༌། མི་གཅིག་གཉིས་ཙམ་མ་གཏོགས་ཚང་མ་ལ་འཕོ་རྟགས་ཀྱང་ཁྱད་པར་བ་ཐོན། ཚེས་ཉེར་གཅིག་གི་ཉིན་དད་ལྡན་སྐྱ་སེར་མང་བོ་ནས་སྐུ་གསུང་ཐུགས་རྟེན་དང་གདན་གོས་སོགས་འབུལ་དངོས་མང་དུ་ཕུལ་བ་གཅིག་ཀྱང་མ་ལུས་པར་གཙང་གོང་མའི་དགོན་པར་བསྐུར་ཏེ་ཕ་ཡུལ་དུ་ལོགས་སོ། ། གངས་ཅན་མགོན་སོགས་ཞལ་གྱི་པདྨོ་ལས། ། དད་དང་སློབ་པ་ཡ་བྲལ་མ་སོང་བར། ། བསྟན་དང་སྟོན་པའི་རྣམ་བཞག་རང་འཚམ་ཞིག ། སློབ་དགོས་གསུང་གི་འཕྲིན་ལས་ཕོ་ཉ་བྱས། ། སྙིགས་དུས་ཀྱི་བསྟན་པའི་གསལ་བྱེད་ཆེན་པོ་ངག་དབང་འཇིགས་མེད་དངོས་གྲུབ་དཔལ་བཟང་པོའི་མཛད་བཟང་བསླབ་གསུམ་ནོར་བུའི་གླིང་ཁ་ཞེས་བྱ་བ་ལས་སྤྱི་ཚོགས་ནང་ཆོས་ཅན་དུ་བསྒྱུར་དགོས་པར་གསུང་པའི་བསྐོར་སོགས་ཟླ་ངོ་ཁ་ཤས་ཀྱི་རྣམ་ཐར་མདོར་བསྡུས་པ་སྟེ་སུམ་ཅུ་པའོ། ། དབུས་ལྷ་ལྡན་དང་གཙང་ཇོ་མོ་ནང་སོགས་སུ་མཆོད་མཇལ་ཕེབས་པ་སོགས་ཀྱི་རྣམ་ཐར་བསྐོར།ཕྱི་ལོ། ༢༠༡༩ བོད་རབ་གནས་ས་ཕག་ལོའི་བོད་ཟླ་དང་པོའི་ཚེས་དྲུག་ལ། གྲྭ་འཁོར་གཅིག་ཀྱང་མེད་པར་ཕ་ཡུལ་ནས་ལམ་ལ་ཆས་ཏེ། ཚེས་བརྒྱད་ཀྱི་ཉིན་ལྷ་ལྡན་གཙུག་ལག་ཁང་དུ་བཞུགས་པའི་བོད་གངས་ཅན་གྱི་རྟེན་གཙོ་སྟོན་པ་ཤཱཀྱ་ཐུབ་པ་ལོ་གྲངས་བཅུ་གཉིས་པའི་ཚད་དང་མཐུན་པའི་ཇོ་བོ་ཤཱཀྱ་མུ་ནེ་ལ་གསེར་ཆབ་ཕུལ་ཞིང༌། བསྟན་འགྲོའི་དོན་དུ་ཐུགས་སྨོན་རྒྱ་ཆེར་མཛད། ཉིན་ཁ་ཤས་ལ་ཕོ་བྲང་པོ་ཏ་ལ་དང་གདན་ས་ཆེན་པོ་གསུམ་སོགས་ལ་མཆོད་མཇལ་སྨོན་ལམ་ཟབ་རྒྱས་བྱས་ཤིང༌། ཚེས་བཅུ་གཅིག་ཉིན་གཞི་ཀ་རྩེའི་བཀྲ་ཤིས་ལྷུན་པོར་མཆོད་མཇལ་དང་བཅས། སྒྲུབ་གནས་བྱེ་བ་འབུམ་གྱི་དབུས་ན་བྱིན་རླབས་ཀྱི་གཟི་འོད་འབར་བ་བྱང་ཤམ་བྷ་ལ་དང་གཉིས་སུ་མེད་པ་མཁས་དང་གྲུབ་པ་གྲངས་ལས་འདས་པའི་གདན་ས། ད་ལྟ་འཛམ་བུ་གླིང་ཡོངས་ན་དཔལ་དུས་ཀྱི་འཁོར་ལོའི་དབང་སྐུར་རྒྱུད་བཤད་མན་ངག་དང་བཅས་ཇི་སྙེད་མཆིས་སོ་ཅོག་གི་ཆུ་མགོ་གངས་ལ་ཐུག་པ་ལྟར་ལུང་ཕུ་འདིར་མ་ཐུག་པ་གཅིག་ཀྱང་མེད་པ། རིགས་ལྡན་ས་བཅུའི་དབང་ཕྱུག་དགེ་སློང་གི་གར་དུ་རྣམ་པར་བྱོན་པ། མཚན་བརྗོད་པར་དཀའ་ཡང་དོན་གྱི་སླད་དུ་མཚན་ནས་སྨོས་ན་རྒྱལ་བ་སངས་རྒྱས་བཅོམ་ལྡན་འདས་ཀྱིས་མདོ་རྒྱུད་དུ་མ་ནས་ལུང་གིས་འཁྲུལ་མེད་དུ་བསྔགས་པ་ཀུན་མཁྱེན་རྟོན་པ་བཞི་ལྡན་ཤེས་རབ་རྒྱལ་མཚན་སྲིད་གསུམ་དབང་བསྒྱུར་མཚུངས་པ་མེད་པའི་སྡེ་གང་ཉིད་ཀྱིས་བྱིན་གྱིས་བརླབས་ཤིང༌། མདོ་སྔགས་ཀྱི་ཆོས་སྒྲ་ཆེན་པོས་འགྲོ་བ་གྲངས་མེད་པ་སྒྲོལ་བའི་གནས་མཆོག །ཇོ་མོ་ནགས་རྒྱལ་གྱི་དབེན་གནས་རི་ཁྲོད་ཆེན་མོ་ལ། ཀུན་མཁྱེན་རྒྱལ་བ་གཉིས་པ་གང་ཉིད་ཀྱི་བསྟན་པ་དུས་ཀྱི་མཐའ་འདིར་གསལ་བར་བྱེད་པའི་མཁས་བཙུན་བཟང་པོའི་ཡོན་ཏན་མ་ལུས་ལུས་པ་མེད་པས་གང་གི་ཐུགས་གསུང་སྐུའི་ཁོ་ལག་ཡོངས་སུ་རྒྱས་པ་སྙིགས་དུས་འགྲོ་བའི་འདྲེན་པ་བཤེས་གཉེན་རིན་པོ་ཆེ་མཆོག་གི་ཞབས་སོར་ཉེ་བར་བཀོད་པ་ན། གང་ཐུགས་ལུང་རྟོགས་ཡོན་ཏན་དུ་མས་རི་དབང་ལྟར་བརྟན་པ་དེ་ཡང༌། ཆོས་ཀྱི་རྗེ་དུས་གསུམ་སངས་རྒྱས་ཡབ་སྲས་དང་བཅས་པ་དྲན་གདུང་གི་དད་པའི་བསྐལ་བའི་རླུང་ཆེན་ལྡང་པས་རབ་ཏུ་གཡོས་ཤིང༌། ལུང་བའི་ཕུ་མདོ་མ་ལུས་པ་ན་སྒོམ་ཆེན་བདེ་སྟོང་འོད་གསལ་ལྷན་སྐྱེས་ཀྱི་རྣལ་འབྱོར་བ་ཤ་སྟག་གི་མཚམས་སྤྱིལ་གྱིས་གང་བའི་དུས་ལ་བསམ་ན། འགྲོ་བ་སྤྱིའི་བསོད་ནམས་ཀྱི་སྐལ་པ་རབ་ཏུ་ཉམས་པས། ད་ལྟ་ཤུལ་ཙམ་ཡང་སྟོང་བར་གྱུར་ཏེ། བྱིན་རླབས་རྡོ་རྗེ་གདན་གྱི་བྱང་ཆུབ་ཆེན་པོའི་མཆོད་རྟེན་དང་མི་དབྱེར་བ་མཐོང་གྲོལ་སྐུ་འབུམ་ཆེན་པོ་ལ་སོགས་པ་ཞིག་རལ་ཏུ་ཕྱིན་པ་སྤྱན་ཟུང་ལ་མངོན་པས། ཐུགས་དགོངས་སྤྲོས་པ་དང་བྲལ་བ་ལས་སྐྱོ་ཤས་དང་གདུང་ཤུགས་ཀྱི་ཆུ་འཛིན་ལྕུགས་ལྕུགས་སུ་བརྡོལ་བས། འགོག་མེད་སྤྱན་ཟུང་གི་བུ་ག་ནས་དྭངས་གཙང་བདུད་རྩིའི་ཆབ་རྒྱུན་རྩོལ་མེད་དུ་བབས་ཤིང༌། མཐོང་གྲོལ་ཆེན་མོ་དང༌། གཟིམ་ཁང་བདེ་བ་ཅན། སྒྲུབ་ཕུག་འགའ་རེ་དང་བཅས་པར་བསྟན་འགྲོའི་ཐུགས་སྨོན་རྒྱ་ཆེན་མཛད་ཅིང༌། ཐུགས་འོད་གསལ་ལྷན་གཅིག་སྐྱེས་པ་གཉུག་ཁམས་བདེ་བར་གཤེགས་པའི་ཡེ་ཤེས་ཀྱི་རང་ཞལ་ལ་མ་བཅོས་ལྷུན་འགྲུབ་ཀྱི་ལྟ་བའི་ངང་བསྐྱངས་ཏེ་སྐུ་རྣམ་སྣང་ཆོས་བདུན་དང་ལྡན་པའི་ལྟ་སྟངས་གཡོ་མེད་ཀྱིས་བག་ཙམ་རེར་ལན་དུ་མར་བཞུགས་སོ། །ལུང་མདའ་དེར་འཕགས་བོད་མཁས་གྲུབ་ཀྱི་སྐྱེ་བརྒྱུད་མུ་ཏིག་བསྟར་ལ་བརྒྱུས་པ་ལྟ་བུའི་མདོ་སྔགས་ཡོངས་སུ་རྫོགས་པའི་བཤད་སྒྲུབ་འཁོར་ལོ་གསུམ་གྱི་མངའ་བདག །རྡོ་རྗེ་འཛིན་པ་ས་གསུམ་ན་འགྲན་པའི་ཟླ་དང་བྲལ་བ་ཟུང་འཇུག་རྡོ་རྗེ་འཆང་གི་གཏན་སྲིད་ལ་མངའ་དབང་བསྒྱུར་བ་རྗེ་ཏཱ་ར་ནཱ་ཐ་ཞེས་མཚན་གྱི་སྙན་པ་འོག་མིན་གྱི་བར་དུ་གྲགས་པ་དེ་ཉིད་ཀྱིས་བཞེངས་བསྐྲུན་མཛད་པའི། སྔོན་ཆད་ཇོ་ནང་རྟག་བརྟན་དམ་ཆོས་གླིང་ཞེས་བྱ་བ། ད་ལྟའི་ཆར་དགའ་ལྡན་ཕུན་ཚོགས་གླིང་དུ་གྱུར་བ་དེར། གཙུག་ལག་ཁང་སྟེང་ཤོད་བར་གསུམ་དང་བཅས་པ་སོགས་ལ་མཇལ་ཁ་དང་སྨོན་ལམ་རྒྱ་ཆེན་མཛད་དོ། །དེ་ནས་ངམ་རིང་དུ་བྱོན་ཏེ་ཇོ་ནང་གི་དགོན་སྡེ་ལྔ་ལ་མཆོད་མཇལ་དང༌། མཇལ་ཁ་ལེན་མི་བྱུང་བ་རྣམས་ལ་བཀའ་སློབ་དང་ཆོས་འབྲེལ་ཕྱག་དབང་བཅས་གནང༌། ལྷ་རྩེ་རྫོང་ཁོངས་སུ་ཡང་ཇོ་ནང་གི་དགོན་པ་དྲུག་གི་ནང་དུ་ཕེབས་ཏེ། སྐྱ་སེར་འདུས་པ་ཐམས་ཅད་ལ་ཆོས་འབྲེལ་དང་སློབ་སྟོན་མཛད། དེ་ནས་ཕྱིར་ལྷ་ལྡན་དུ་བྱོན་ནས་ཇོ་བོ་ཤཱཀྱ་མུ་ནེ་ལ་སླར་ཡང་ཞལ་གསེར་ཕུལ་ཞིང༌། རིགས་དྲུག་སྡུག་བསྔལ་བའི་སེམས་ཅན་རྣམས་ཀྱི་དོན་དུ་ལྟོས་པ་མེད་པའི་སྨོན་ལམ་དང་རིས་མེད་རྒྱལ་བསྟན་རིན་པོ་ཆེ་ཡུན་ནས་ཡུན་དུ་བླ་ནས་བླ་རུ་འཕེལ་བའི་ཐུགས་སྨོན་སྐྱབས་འཇུག་རྒྱ་གང་ཆེ་དུ་མ་མཛད་ཅིང༌། ཚེས་ཉི་ཤུ་གཉིས་ཉིན་ཁྲི་ཏུའུ་གྲོང་ཁྱེར་དུ་བྱོན་ནས། བརྩེ་ཆེན་དཀར་སྐྱོང་གི་བགྲོ་གླེང་ཐེངས་གཉིས་པའི་སྟེང་དུ་སངས་རྒྱས་ཀྱི་བཀའ་མདོ་རྒྱུད་ཀྱི་དགོངས་དོན་དུ་མ་དང་སྦྱར་བའི་སྟེང་ནས་དཀར་ཟས་སྐོར་གྱི་བཀའ་སློབ་ཕྱོགས་ལྷུང་དང་བྲལ་བའི་གསུང་བཤད་བྱས། ཚེས་ཉེར་བཞི་ལ་རྒྱལ་མོ་རྔུལ་ཆུ་བཙན་ལྷ་རྫོང་ཁོངས་རོང་འབྲོག་གི་ས་ཆ་གཉིས་སུ་ཕེབས་ནས་ཆོས་ཀྱི་ངོ་སྤྲོད་དང༌། བོད་རང་གི་འདུ་ཤེས་རིག་གནས་སོགས་ཀྱི་གལ་ཆེན་དོན་ཉིང་མང་པོ་གསུངས། དེ་ནས་ཆུ་ཆེན་རྫོང་རྒྱལ་རོང་སྐྱ་པེ་དགོན་དུ་ཉིན་གཉིས་ལ་ཆོས་འབྲེལ་དང་རིག་གནས་སློབ་སྦྱོང་དང༌། ལྷག་པར་བོད་མཐའ་མཚམས་ཀྱི་རྒྱལ་རོང་གི་མི་རྣམས་བོད་ཀྱི་ལྕགས་རི་ལྟ་བུ་དང༌། གལ་སྲིད་ལྕགས་རི་ཞིག་སོང་ན་ནང་གི་དངོས་པོ་སྲུང་བྱེད་མེད་པ་ལྟར། མཐའ་མཚམས་ཀྱི་རྒྱལ་རོང་གི་ས་ཆ་འདི་དང་གཞན་དག་གི་བོད་པ་རྣམས་ཀྱི་འགན་འཁྲི་གཞན་ལས་ཆེན་པོ་ཡོད་པ་དང༌། ཆོས་རིག་སྲིད་གསུམ་ཕྱོགས་གང་ཐད་ནས་ཤུགས་རྒྱག་དགོས་ཚུལ་མང་དུ་བསྩལ་ཏེ་ཡུལ་དུ་ལོགས། བོད་ཟླ་དང་པོ་ཕྱི་མའི་ཚེས་བཅུ་བཞི་ནས་མགོ་ལོག་པདྨ་རྫོང་གི་སྲིད་གྲོས་འཚོགས་འདུར་ཞུགས། ཚེས་ཉི་ཤུ་ཐམ་པར་མགོ་ལོག་ཁུལ་སྲིད་གྲོས་ཀྱི་འཐུས་མི་ཚོགས་ཆེན་སྐབས་བཅུ་བཞི་པའི་ཚོགས་འདུ་ལ་བྱོན། ཚེས་ཉེར་ལྔའི་ཉིན་གངས་ལྗོངས་རིས་མེད་མཐོ་སློབ་གཙུག་ལག་སློབ་གཉེར་ཁང་ཆེན་མོའི་ལོ་གཅིག་གི་སློབ་གཉེར་དབུ་བཟུང་སྟེ་འཛིན་གྲྭ་བཅུ་གསུམ་སོ་སོར་སློབ་ཁྲིད་གནང༌། བོད་ཟླ་གཉིས་པའི་ཚེས་བཞི་ལ་ལྕམ་མདའ་དགོན་གྱི་ས་ཏྭ་དུང་སྒྲུབ་ཆེན་མོའི་ཆོས་ཚོགས་སུ་ཕེབས་ནས། ཡན་ལག་བདུན་པའི་ཆོས་ཁྲིད་གནང༌། བོད་ཟླ་གསུམ་པའི་ཚེས་བདུན་ནས་ཉིན་བཅུ་ཙམ་གྱི་ཡུན་ལ་པེ་ཅིན་ནང་བསྟན་སློབ་གླིང་ནས་མཐོ་རིམ་རབ་འབྱམས་པའི་དཔྱད་ཞིབ་ཚོགས་འདུར་ཕེབས། ཚེས་བཅོ་ལྔའི་ཉིན་སངས་རྒྱས་ཚེམས་གདུང་ལ་མཇལ། ཚེས་ཉི་ཤུ་གཉིས་ལ་བསྟན་འགྲོ་ཀུན་ཕན་ལྷན་ཚོགས་ཐེངས་བཅོ་ལྔ་པར་ཤར་བྱོན་བྱས་ནས་འཐུས་ཤོར་དང་མ་འོང་ས་དུ་མར་མཛུབ་མོ་བཙུགས་ཏེ་ཤ་ཚ་བའི་བཀའ་སློབ་གནང༌། ཚེས་ཉི་ཤུ་དགུ་ལ་ཛམ་ཐང་གཙང་བ་དགོན་དུ་གཞན་སྟོང་དམ་བཅའི་སྟེང་དུ་ཕེབས་ནས་ལུང་རིགས་ཀྱི་བརྒལ་བརྟག་གནང༌། ཕྱི་ཉིན་པར་གངས་ལྗོངས་རིས་མེད་མཐོ་སློབ་ཀྱི་སློབ་གཉེར་བ་ཁ་ཤས་དང་བཅས་མགོ་ལོག་ལྕམ་མདའ་དགོན་དུ་ཕར་ཕྱིན་དམ་བཅའ་ལ་ཕེབས་ནས་བཀའ་སློབ་དང་བརྒལ་བརྟག་མཛད། འདི་ཙམ་གྱི་སྐབས་ཤིག་ན་ལོ་གཅིག་ལྷག་གི་རིང་ལ་བཤེས་གཉེན་རིན་པོ་ཆེ་གང་ཉིད་ཀྱི་ཐུགས་བཀོད་དང་ཕྱག་ལས་མི་ཉུང་བ་གནང་ནས་བསྒྲིགས་ཞུ་བྱས་པའི། གངས་ལྗོངས་རིས་མེད་ལྔ་རིག་མཐོ་སློབ་གཙུག་ལག་སློབ་གཉེར་ཁང་ཆེན་མོའི་སློབ་དེབ་ཕྱོགས་བསྒྲིགས་དེབ་ཕྲེང་ཉི་ཤུ་ཐམ་པ་དཔར་བསྐྲུན་ལེགས་པར་གྲུབ་པའི་མཛད་སྒོ་དང༌། སློབ་མ་ཡོངས་ལ་སློབ་དེབ་ཆ་ཚང་རེ་ཕུལ། སྤྱིར་ཁོང་གིས་དེ་སྔོན་ཡན་ལ་བཤད་གྲྭ་སྐྱོང་སྐབས་སྔོན་བྱོན་དམ་པ་གོང་མའི་གསུང་རབ་ཁྱད་འཕགས་དེབ་ལྔ་བཅུ་ཡས་མས་དཔར་དུ་བསྐྲུན་པ་དང༌། སློབ་མ་རྣམས་ལ་རིན་མེད་གཟིགས་འབུལ་གྱིས་དེབ་དྲུག་ཅུ་རྩ་གྲངས་ཤིག་བགྲང་རྒྱུ་རྙེད་ན་ཡང༌། རེ་རེ་བཞིན་མངས་སུ་དྭོགས་ནས་མ་སྨོས། ཞལ་སྔ་ནས་ནམ་རྒྱུན་གསུང་དོན། མཛད་པ་ཐམས་ཅད་ཀྱི་གཙོ་བོ་གསུང་གི་མཛད་པ་ཡིན་པར་མ་ཟད། ལྷ་བྲི་རྟེན་བཞེངས་གཞན་དང་མི་འདྲ་བར་སེམས་ཅན་གཞན་གྱི་སྲོག་གཅོད་པ་སོགས་གནོད་པའི་ལས་དང་གཏན་དུ་མ་འབྲེལ་བ་གསུང་རབ་ཆོས་སྦྱིན་པར་སྐྲུན་འདི་ཧ་ཅང་དགེ་བ་ཆེ་ཞིང་ཕན་པ་ཡོད་ཚུལ་གསུངས། བོད་ཟླ་བཞི་པའི་ཚེས་ལྔ་ལ་མཚོ་སྔོན་ནང་བསྟན་མཐུན་ཚོགས་དང་ནང་བསྟན་སློབ་གྲྭ་གཉིས་ཀྱི་དགེ་རྒན་དཔྱད་འདེམས་ཀྱི་ཚོགས་འདུར་བྱོན། ཚེས་བརྒྱད་ཀྱི་ཉིན་དགེ་ཚུལ་སློང་གི་སྡོམ་ཁྲིམས་ནོད་མི་ལྔ་བཅུ་ལྷག་ལ་སྡོམ་པ་གནང༌། ཚེས་བཅུ་བཞི་ལ་སྔ་འགྱུར་རྙིང་མའི་གདན་ས་དྲུག་གི་ཡ་གྱལ་ཞེ་ཆེན་དགོན་གྱི་བཤད་གྲྭ་ལེགས་བཤད་ཉི་ཟླའི་དགའ་ཚལ་གྱི་ཧི་མ་ལའི་རིག་གཞུང་བགྲོ་གླེང་ཐེངས་ཉེར་བདུན་པར་བྱོན་ཏེ། ཇོ་ནང་གི་གཞི་ལམ་འབྲས་གསུམ་གྱི་གསུང་བཤད་དྲི་ལན་དང་བཅས་པ། བཅར་འདྲི་དང་ལེན། ལུང་རིགས་ཀྱི་བརྒལ་བརྟག་སོགས་གྱ་ནོམ་པའི་ཆོས་ཀྱི་མཛད་པ་བསྐྱངས། ཚེས་བཅུ་བདུན་ཉིན་ཡ་ཆེན་ཆོས་སྒར་དུ་ཕེབས་ནས། སྤྲུལ་གསང་སྔགས་བསྟན་འཛིན་ནམ་ཨ་གསང་མཆོག་དང་ཐུགས་དགོངས་འདྲེས་པའི་ངང་མཇལ་ཕྲད་གནང༌། དེ་ནས་གངས་ལྗོངས་རིས་མེད་མཐོ་སློབ་དུ་ཕེབས་ཏེ་དུས་འཁོར་འཛིན་གྲྭ་དང་དབུ་མ་འཛིན་གྲྭ་སོགས་ལ། དབང་གི་བརྡ་དོན་དང་དམིགས་པ་གསལ་འདེབས་དང་བཅས་པ་སྦྲགས་ནས་དཔལ་དུས་ཀྱི་འཁོར་ལོའི་མཆོག་དབང་གོང་མ་བཞི་ལེགས་པར་བསྐུར་བའི་བཀའ་དྲིན་བསྐྱངས། དབུས་གཙང་ནས་ཡོང་བའི་ཇོ་སེར་བྱེད་མི་ལྔ་བཅུ་ཡས་མས་ལ་དགེ་ཚུལ་གྱི་སྡོམ་པ་བསྩལ། སྐབས་དེར་བསེ་དགོན་ཐུབ་བསྟན་ཕྱོགས་ལས་རྣམ་རྒྱལ་གླིང་དུ་གཞན་སྟོང་དབུ་མ་ཆེན་པོའི་བགྲོ་གླེང་ཐེངས་བཅུ་བཞི་པའི་ཚོགས་སྟེང་ནས། བློ་གསལ་དག་ལ་བཀའ་སློབ་དང་བརྒལ་བརྟག་གི་སྐྱེས་གྱ་ནོམ་པས་ཡོངས་སུ་ཚིམ་པར་མཛད་ཅིང༌། མི་མང་ལ་ཡང་བཀའ་སློབ་དང་ཆོས་ཁྲིད་བྱས་སོ། ། དྲང་དོན་ཆུ་ཕྲན་བྱེ་བ་འབུམ་ཕྲག་གི། ། དགོས་དང་དགོངས་པའི་གནད་རྣམས་འབབ་པའི་གཞི། ། ངེས་དོན་གཏམ་གྱི་གཏེར་ཁ་རྡོལ་བའི་གནས། ། ཇོ་ནང་ཕུ་ནས་ཐུགས་སྨོན་རླབས་ཆེན་མཛད། ། སྙིགས་དུས་ཀྱི་བསྟན་པའི་གསལ་བྱེད་ཆེན་པོ་ངག་དབང་འཇིགས་མེད་དངོས་གྲུབ་དཔལ་བཟང་པོའི་མཛད་བཟང་བསླབ་གསུམ་ནོར་བུའི་གླིང་ཁ་ཞེས་བྱ་བ་ལས་དབུས་ལྷ་ལྡན་དང་གཙང་ཇོ་མོ་ནང་སོགས་སུ་མཆོད་མཇལ་ཕེབས་པ་སོགས་ཀྱི་རྣམ་ཐར་བསྐོར་མདོར་བསྡུས་པ་སྟེ་སོ་གཅིག་པའོ། ། མདོ་སྔགས་རབ་འབྱམས་པའི་དགེ་བཤེས་དམ་བཅའ་དང་བརྒྱད་གཏུག་དམ་བཅའ་གསར་ཚུགས་བསྐོར་གྱི་རྣམ་ཐར།སྔ་མའི་འཕྲོས་ཉིད་ནས་ཚེས་ཉི་ཤུ་ལྔ་སྟེ་གཞན་སྟོང་བགྲོ་གླེང་ཆེན་མོའི་ཞར་ལ་གངས་ལྗོངས་རིས་མེད་མཐོ་སློབ་ནས་མདོ་སྔགས་རབ་འབྱམས་པའི་དགེ་བཤེས་ཀྱི་མཚན་ཕུད་དམ་བཅའ་ཆེན་མོ་ཐེངས་དང་པོ་བཞག་སྟེ། སྔ་ན་མེད་པའི་ལོ་རྒྱུས་ཀྱི་ཞབས་རྗེས་གསར་བས་བསྟན་འགྲོ་ལ་ཕན་པར་མཛད། སྐབས་དེར་མཚན་གནས་འདོགས་ལུགས་ཀྱི་སྟེང་ནས་གསུང་བཤད་གནད་བསྡུས་ནི། སངས་རྒྱས་ཀྱི་སྐུ་དུས་སུ་མཁན་པོ་ཞེས་པ་དེ། ཆོས་འདུལ་བ་ནས་གསུངས་པ་ལྟར། རབ་བྱུང་དང་བསྙེན་རྫོགས་ཀྱི་སྡོམ་པ་འབོགས་པ་པོ་ཞིག་ལ་མཁན་པོ་ཟེར་བ་རེད། དུས་ཕྱིས་ན་ལེཎྜའི་མཁན་པོ་དང༌། འབྲི་ཀ་མ་ལ་ཤཱི་ལིའི་གཙུག་ལག་ཁང་གི་མཁན་པོ་ཟེར་བ་ལྟ་བུ་སྟེ། དགོན་པ་དང་གཙུག་ལག་ཁང་དེའི་དགེ་འདུན་པ་རྣམས་ལ་ཆོས་ཕྱོགས་ཀྱི་དབུ་ཁྲིད་མཁན་ལ་མཁན་པོ་ཞེས་པའི་མིང་ཆགས་ཡོད་པ་ལྟར། ད་ལྟའི་ཆར་དགེ་ལྡན་པའི་དགོན་པ་ཁག་ན་ཡང་ལུགས་སྲོལ་དེ་ཉིད་ཀྱི་མིང་འདོགས་ལུགས་དེ་ཡོད་བསྡད་པ་ལྟར་རེད། བོད་ཀྱི་ཆོས་བརྒྱུད་གཞན་པའི་ཁྲོད་ན་མཁན་པོ་ཞེས་པ་དེ་མཁས་པའི་མཚན་གྱི་ཆོ་ལོ་ཞིག་ཏུ་གྱུར་ཡོད་པ་རེད། དགེ་བཤེས་ཞེས་པ་དེ་དགེ་བའི་བཤེས་གཉེན་ཞེས་པ་རེད། དེ་ནི་བླང་དོར་གྱི་གནས་སྟོན་པའི་བླ་མ་དང་སྐྱེས་བུ་དམ་པ་སྤྱིའི་མིང་དུ་བྱས་ཏེ། མདོ་དང་བསྟན་བཅོས་མང་པོ་ན་ཐོན་ཡོད་པ་རེད་ལ། བོད་གངས་ཅན་ཀྱི་ལྗོངས་སུ་ཡང་བཀའ་གདམས་པའི་དགེ་བཤེས་ཞེས་པ་སོགས་བཀའ་གདམས་པའི་ཆོས་ཉམས་སུ་བཞེས་པའི་བླ་མ་ཁག་ཐམས་ཅད་ཀྱི་མིང་ལས། དམིགས་བསལ་མཚན་ཐོབ་བྱས་ཏེ་བསྩལ་འོང་པ་ཞིག་མིན་ཚོད་རེད། ཡིན་ན་ཡང༌། དུས་ཕྱིས་རི་བོ་དགེ་ལྡན་པའི་ནང་དུ། ལྷ་རམས་པའི་དགེ་བཤེས་དང། ཚོགས་རམས་པའི་དགེ་བཤེས། བཀའ་བཅུའི་དགེ་བཤེས། རྡོ་རམས་པའི་དགེ་བཤེས། གླིང་བསྲེའི་དགེ་བཤེས་སོགས་དགེ་བཤེས་ཀྱི་མཚན་མི་འདྲ་བ་མང་པོ་འདོགས་སྲོལ་ཆགས་པ་རེད། ད་དུང་གསང་ཕུ་དང་ས་སྐྱའི་བསྟན་པ་ལྷག་པར་དར་སྐབས་སུ། བཀའ་བཞི་པ་དང༌། བཀའ་བཅུ་པ་སོགས་ཀྱི་མཚན་འདོགས་ལུགས་མང་པོ་བྱུང་ཡོད་འདུག །ཇོ་ནང་པའི་མཁས་པ་ལ་མཚོན་ན་སྤྱིར་བཀའ་བཅུ་དང་བཀའ་བཞི་ཚང་མ་བྱུང་མྱངས་ཡོད་ན་ཡང༌། ཇོ་ནང་གི་གདན་ས་རང་ཞིག་ནས་མིང་འདོགས་གསར་བ་ཆེར་བྱུང་མེད་པ་འདྲ། ད་ལན་འདིར་མདོ་སྔགས་རབ་འབྱམས་པའི་དགེ་བཤེས་དམ་བཅའ་ཞེས་པ་དེའི་སྟེང་ནས། མདོ་སྔགས་རབ་འབྱམས་པའི་དགེ་བཤེས་མཚན་གསོལ་རྒྱུའི་ལུགས་སྲོལ་གསར་དུ་བཞག་པ་ཡིན། དེའི་དམིགས་ཡུལ་དང་དགོས་པ་གང་འདྲ་ཡིན་ཟེར་ན། གཞན་པ་ཞིག་ལ་ཅིག་འདུག་ང་ཚོ་ལ་ཡང་དེ་དགོས་ཟེར་ནས་ཡོན་ཚད་གང་ཡང་མེད་ན་ཞབས་འདྲེན་ཞུས་པ་ལས་ཕན་ཐོགས་ཡོད་པ་མ་རེད། ལྷག་པར་དུ་ཡོན་ཚད་མི་ལྡན་པ་མང་པོ་ལ་མིང་ཆེན་པོ་བཏགས་མང་ན། ཡོན་གནས་དག་ལ་མཐོང་མེད་པར་འགྱུར་རྒྱུ་རེད། ཡིན་ན་ཡང༌། གཞུང་ཆེན་བཀའ་པོད་ལྔ་འཛིན་གྲྭ་རིམ་བགྲོད་ཀྱི་སྟེང་ནས་རྒྱུགས་སྤྲོད་དང་བཅས་པ་མ་ལུས་པ་བཏང་ཚར་བ་ཡིན་ཞིང་སྔགས་ལ་ལྟ་བཞིན་པའམ་གཟིགས་ཚར་བ་ཡིན་ན། དེའི་སྟེང་དུ་དགེ་བཤེས་དམ་བཅའི་ཆ་རྐྱེན་ཁ་ཤས་འདོན་ཡོད་པ་རེད། དེ་དག་ཚང་མ་ལྡན་སོང་ན་མདོ་སྔགས་རབ་འབྱམས་པའི་མཚན་གསོལ་རྒྱུ་བྱས་པ་ཡིན། ཇོ་ནང་པ་ལ་མཚོན་ན། རབ་འབྱམས་པའི་མཚན་གསོལ་རྒྱུ་དང༌། དཔེ་ཁྲིད་དགེ་རྒན་གྱི་མཚན་གསོལ་རྒྱུ་སོགས་ཀྱང་སྔོན་གསར་བཞག་བྱས་པ་ཡིན། འོན་ཏེ། དཔེ་ཁྲིད་དགེ་རྒན་གྱི་མཚན་གསོལ་རྒྱུ་ལ་དམིགས་བསལ་ཆ་རྐྱེན་འདི་ཡིན་དང༌། རྒྱུགས་སྤྲོད་འདི་ཡིན་གྱི་གཏན་ཁེལ་བྱས་མེད་དུས། མི་སྒེར་བ་རེ་རེ་གཉིས་རེ་ལ་སྐབས་དང་དགོས་མཁོ་བསྟུན་ནས་དཔེ་ཁྲིད་དགེ་རྒན་མཚན་གསོལ་མྱོང་པ་ཡིན། མཁན་པོའི་མཚན་འདོགས་རྒྱུ་སྔར་ནས་ཡོད་པ་དེ་ཉམས་གསོ་དང་གོང་འཕེལ་སྤུས་ལེགས་སུ་བཏང་བ་ལྟ་བུའི་སྒོ་ནས། རྒྱུན་སྐྱོང་བཞིན་པ་དེ་ཡིན། ད་ཐེངས་མདོ་སྔགས་རབ་འབྱམས་པའི་དགེ་བཤེས་དམ་བཅའ་ཞིག་བཙུགས་པ་ལ་བརྟེན་ནས། མ་འོངས་པར་སློབ་གཉེར་གྱི་ཕྱོགས་ལ་སྒུལ་ཤུགས་ཤིག་ཐོན་པའི་ཆ་རྐྱེན་དུ་འགྱུར་ཐུབ་པའི་རེ་བས་སྒྲུབ་པ་ཡིན། དཔེར་ན། ཉན་ཐོས་ལ། རྒྱུན་ཞུགས་དང༌། ཕྱིར་འོངས། ཕྱིར་མི་འོངས། དགྲ་བཅོམ་པ་ཞེས་པའི་འབྲས་བུའི་རྣམ་བཞག་མང་པོ་ཞིག་ཡོད་པ་དེ། ལམ་ལ་སྒྱིད་མི་ལུག་པ་དང་བརྩོན་པ་ལྷག་པར་འཕེལ་བའི་ཕྱིར་དུ་བཞག་པ་རེད་ཅེས་གཞུང་ལུགས་དག་ན་གསུངས་པ་ལྟར་རེད། ཅེས་སོགས་གསུངས་སོ། །ཚེས་ཉེར་བདུན་ལ་ཁམས་ཡུལ་ཤུལ་སྒྲུབ་བརྒྱུད་དགོན་ཆེན་དུ། འབྲི་གུང་དགོངས་གཅིག་གི་བགྲོ་གླེང་སྟེང་དུ་ཕེབས་ནས་བགྲོ་གླེང་གནངས། བོད་ཟླ་དྲུག་པའི་ཚེས་བདུན་ལ་གངས་ལྗོངས་རིས་མེད་ལྔ་རིག་མཐོ་སློབ་ཀྱི་ལོ་ཕྱེད་རྒྱུགས་སྤྲོད་བླངས། ཚེས་ཉི་ཤུ་བཞིའི་ཉིན་དུས་འཁོར་འཛིན་གྲྭ་ལ་དཔལ་དུས་ཀྱི་འཁོར་ལོའི་དཀྱིལ་འཁོར་གྱི་ཐིག་རྩ་ཁྲིད། བོད་ཟླ་བདུན་པའི་ཚེས་བརྒྱད་ཀྱི་ཉིན་རྒྱལ་ཡོངས་བོད་ཡིག་དཔེ་རྙིང་ལེགས་བསྒྲིགས་དཔེ་དེབ་ཞིབ་འཇུག་འགྲིམ་སྤེལ་གྱི་མཐོ་རིམ་བགྲོ་གླེང་ཐེངས་གསུམ་པའི་ཚོགས་འདུར་ཕེབས་ཏེ། བོད་ཀྱི་རྩོམ་ཡིག་གི་རྣམ་བཞག་ཐད་ནས་གསུང་བཤད་མཛད། བོད་ཟླ་བརྒྱད་པའི་ཚེས་གསུམ་ཉིན། གངས་ལྗོངས་རིས་མེད་མཐོ་སློབ་ནས་སྔགས་ཀྱི་དམ་བཅའ་ཐེངས་དང་པོ་གསར་དུ་བཞག་པའི་སྐལ་བཟང་གི་དགའ་སྟོན་གསར་བ་མངོན་དུ་གྱུར། སྔ་འགྱུར་གསང་ལུང་དགོན་རིན་ཆེན་དཔལ་དང༌། གཞོན་ནུ་གཉིས་ལ་མཁན་པོའི་མཚན་རྟགས་གསོལ། ཚེས་བཞིའི་ཉིན་གངས་ལྗོངས་རིས་མེད་མཐོ་སློབ་ཀྱི་བརྒྱད་གཏུག་དམ་བཅའ་ཆེན་པོ་གསར་དུ་ཚུགས། བརྒྱད་གཏུག་དམ་བཅའ་ཞེས་པ་ནི་བོད་ཟླ་བརྒྱད་པའི་ནང་གཏན་ཁེལ་བྱས་ཏེ། འཛིན་གྲྭ་གོང་འོག་གཏུག་ནས་དམ་བཅའ་འཇོག་རྒྱུ་ཞིག་གི་མིང་ཡིན་པ་རེད། དམ་བཅའ་འདི་ནི་འཛིན་གྲྭ་དེའི་བསླབ་གཞུང་དངོས་གཞི་གང་ཡིན་པ་དེའི་སྟེང་ནས། ས་བཅད། གྲངས་འདྲེན། རང་གཞན་གྱི་འདོད་པ་ངོས་འཛིན། གལ་ཆེན་གྱི་ལུང་འདྲེན་སོགས་ཕན་ཚུན་རྒྱུགས་ལེན་གྱི་རྣམ་པས་བགྲོ་བ་ལས། དམ་བཅའ་གཞན་དག་ལྟར་དོགས་དཔྱོད་ཀྱི་ལམ་ནས་རྩོད་པ་གནང་རྒྱུ་མེད་པར། གཞུང་ལ་ངེས་ཆ་འགྲོ་རྒྱུའི་ཐབས་ལ་བཞག་པ་ཞིག་རེད། ཚེས་དགུའི་ཉིན་རྙིང་མའི་གདན་ས་དྲུག་གི་ནང་ཚན་དཔལ་ཡུལ་དགོན་དུ་ནང་བསྟན་མཁས་པའི་བགྲོ་གླེང་ཐེངས་བདུན་པར་ཕེབས་ནས། གཞན་སྟོང་རང་ལུགས་ཀྱི་དྲང་ངེས་དང་སྦྲགས་ཏེ་བདེན་གཉིས་ཀྱི་རྣམ་བཞག་གསུང་བཤད་དྲི་ལན་བཅས་མཛད། ཚེས་བཅུ་གཉིས་ལ་ཕ་ཡུལ་པདྨའི་རིག་གཞུང་དར་སྤེལ་སྟེང་ཕེབས་ནས་རྒྱུགས་ལེན་ཚན་ཆུང་གི་གཙོ་འགན་ཕྱག་ལས་གནང༌། བཅོ་ལྔའི་ཉིན་རྫ་སེར་ཤུལ་དགོན་དུ་གངས་རྒྱན་སྨོན་ལམ་ཆེན་མོ་ཐེངས་བཅུ་དྲུག་པའི་སྟེང་དུ་ཞབས་སོར་བཀོད་དེ། གྲྭ་མང་འདུས་པའི་སྡེ་ཆེན་པོ་ལ། སྟོན་པའི་རྗེས་འཇུག་གི་ཉམས་ལེན། ཞེས་པའི་སྟེང་ནས་བཀའ་སློབ་དང༌། དད་ལྡན་མང་ཚོགས་ལ་ཡང་བཀའ་སློབ་ཟབ་རྒྱས་མཛད་དེ། པདྨའི་རིག་གཞུང་དར་སྤེལ་མཐུན་ཚོགས་ཀྱི་ཉིན་བདུན་པར་རྒྱུགས་སྤྲོད་ཀྱི་བྱ་དགའི་གཟེངས་རྟགས་ཕུལ། ཚེས་ཉེར་ལྔའི་ཉིན་གངས་ལྗོངས་རིས་མེད་མཐོ་སློབ་ཀྱི་ཕར་ཕྱིན་དམ་བཅའ་ཐེངས་བདུན་པའི་མཚན་ཕུད་ཀྱི་དམ་བཅའ་ཆེན་མོ་བཞག །བོད་ཟླ་དགུ་བ་སྔོན་མའི་ཚེས་བཅུའི་ཉིན་རྒྱལ་རོང་ཞིང་སྒྲུབ་ཆེན་པོར་བྱོན་ནས། ཉིན་དང་པོའི་སྔ་དྲོར་ཡན་ལག་བདུན་པའི་ཆོས་ཁྲིད་དང༌། ཕྱི་དྲོར་ཛ་འགོའི་རི་ཁྲོད་ནས་གྲྭ་མང་ལ་བཀའ་སློབ་བསྩལ། ཉིན་གཉིས་པའི་སྔ་དྲོར་བདེ་བ་ཅན་གྱི་རྒྱུ་བཞི་དང༌། ཕྱི་དྲོར་ཚེ་དཔག་མེད་ལྷ་ཅིག་བུམ་གཅིག་གི་དབང་བསྐུར་ཟབ་མོ་གནང༌། ཕྱི་ཉིན་པར་རྒྱལ་རོང་ཁང་སར་དགོན་དང༌། ཙག་དགེ་བ་དགོན་གཉིས་ནས་ཀྱང་ཆོས་བཀའ་ཟབ་མོ་བསྩལ་ཏེ། ཚེས་བཅོ་ལྔའི་ཉིན་ཁྲི་ཏུའུ་གྲོང་ཁྱེར་དུ་རྨེ་སྤྲུལ་རྡོ་རྗེ་དགྲ་འདུལ་ལ་ཐུགས་མཐུན་དག་སྣང་འཕེལ་བའི་མཇལ་འཕྲད་གནང་ཞིང༌། ཕྱི་ཉིན་པེ་ཅིན་དུ་ཕེབས་ཏེ་ནང་བསྟན་སློབ་གྲྭར། ཆོས་དོན་དགོངས་འགྲེལ། དབུལ་སེལ་རྒུད་སྐྱོབ། དགེ་སྨོན་མཉམ་འཇུག་ཅེས་པའི་བཞུགས་མོལ་ཚོགས་འདུའི་སྟེང༌། ནང་ཆོས་ལ་བརྟེན་ནས་སྤྱི་ཚོགས་ལ་ཞབས་ཞུ་ཇི་ལྟར་འབྱུང་གིན་ཡོད་པའི་གསུང་བཤད་བླ་ན་མེད་པ་མཛད་དེ་ཕྱིར་སློབ་གླིང་དུ་ཕེབས། བོད་ཟླ་དགུ་བའི་ཚེས་བརྒྱད་ཀྱི་ཉིན། མཚོ་སྔོན་ནང་བསྟན་མཐུན་ཚོགས་ཀྱིས་བོད་བརྒྱུད་ནང་བསྟན་དགོན་སྡེའི་ཆེས་མཐོའི་དགེ་རྒན་གཏམ་འབེབས་ཞེས་པའི་ཕྱག་ཁྱེར་བསྩལ། བོད་ཟླ་དགུ་བ་ཕྱི་མའི་ཚེས་ཉི་ཤུ་ལྔའི་ཉིན་བསེ་དགོན་དུ་རིས་མེད་མ་ཎི་ཆོས་ཚོགས་ཆེན་མོའི་སྟེང་ནས་ཆོས་ཁྲིད་དང་སློབ་སྟོན་གལ་ཆེན་གསུངས་ཤིང༌། བོད་ཟླ་བཅུ་བའི་ཚེས་དྲུག་ལ་འབྲོག་དགེ་དགོན་གྱི་ཕར་ཕྱིན་དམ་བཅའ་བཞག་པར་ཆིབ་བསྒྱུར་བསྐྱངས། བོད་ཟླ་བཅུ་གཅིག་པའི་ཚེས་ཉེར་དྲུག་ལ། གངས་ལྗོང་རིས་མེད་ལྔ་རིག་མཐོ་སློབ་གཙུག་ལག་སློབ་གཉེར་ཁང་ཆེན་མོའི་ལོ་གཅིག་གི་ཐོས་བསམ་སློབ་གཉེར་གྱི་བྱ་བའི་གཞུག་ལེགས་པར་གྲུབ་སྟེ། ལོ་མཇུག་གི་བྱ་དགའི་མཛད་རིམ་རྣམས་ཕུལ་ཏེ། ཆོས་མཚམས་ཀྱི་སྐབས་ལ་ཡར་མར་འཁྱམས་ཉུལ་འགྲོ་རྒྱུ་དང༌། དཀོར་ཁ་གྲོང་ཆོག་ཅིག་ལ་ཉི་མ་གཟད་མི་འཇོག་པར། དཔེ་མཚམས་རེ་བསྡད་ན་ཕན་ཐོགས་ཆེན་པོ་ཡོད་པ་ཡིན། སྤྱིར་བཏང་ཡིན་ན་འཆད་གྲྭ་ཞིག་གི་ནང་ལོ་ཁ་ཤས་བསྡད་པ་ལས། འཆད་རྩོད་ཚང་མ་སྤུས་དག་ཡིན་ས་ཞིག་ནས་ཟླ་བ་འགའ་ཙམ་ཤུ་རེམ་བྱས་ན་ཡང་ཕན་ཐོགས་ཆེན་པོ་ཡོད་པ་ང་རང་གིས་ཉམས་མྱོང་གིས་གྲུབ་པ་ཡིན། དང་ཐོག་ལོ་བཞི་ཡས་མས་ཤིག་ལ་འཆད་གྲྭ་རེ་ནས་བསྡད་མྱོང་པ་རེད། བླ་མ་རྣམ་པ་དང་གཞུང་ལུགས་ཀྱིས་མ་འཇོན་པ་ཏ་གང་ཡང་མ་རེད་དེ། འཁོར་ཡུག་ན་དཔེ་ཆ་ལྟ་རོགས་མང་པོ་མེད་པ་དང༌། རྩོད་པ་གནང་རྒྱུའི་ལུགས་སྲོལ་མ་བྱུང་བའི་དབང་གིས། ཡར་རྒྱས་ཆེན་པོ་འགྲོ་ཐུབ་མ་སོང༌། དུས་ཕྱིས་རྩོད་གྲྭ་འགྲིམས་ནས་ས་ལམ་ཞིག་སྦྱངས་པས། སྔར་དང་མ་འདྲ་བའི་གོ་ལུགས་དང་ཡར་རྒྱས་འདྲ་ཕྱིན་སོང་སྣང་འཆར་བ་ཡིན། ཡིན་ན་ཡང༌། རྒྱུན་དུ་རྩོད་པ་དང་དཔེ་ཁྲིད་ལ་འགྲོ་བཞིན་པའི་དུས་སུ། ཁོམ་སྐབས་རེ་དང་བསྟུན་ནས་དཔེ་མཚམས་ཅུང་ཟད་རེ་བསྡད་དེ། དཔེ་ཀློག་ཞིབ་མོ་རེ་གནང་ན་ཡང་གསལ་ཡོང་རྒྱུ་དང་གོ་སྟོབས་འཕེལ་ཡོང་རྒྱུ་མང་པོ་ཡོད་པ་རེད། ང་རང་ཡིན་ན་གདན་ས་ཁག་ཏུ་ཡོད་དུས་ལ་ཕལ་ཆེ་བ་ཆོས་རར་འགྲིམས་ནས་སྦྱངས་པ་རེད་དེ། ཆོས་ར་དང་དཔེ་ཁྲིད་མེད་པའི་བར་གསེང་བྱུང་བ་རྣམས་སུ་ཧ་ལམ་དཔེ་ཆ་བལྟས་ཏེ་གྲྭ་ཤག་ན་ལྷོད་ལྷོད་བསྡད་པ་ཡིན། དེ་ཧ་ཅང་ཕན་པ་ཆེན་པོ་ཡོད་པ་རེད། དེས་ན། ད་རེས་ཀྱི་གོ་སྐབས་ལྟ་བུའི་དུས་ཚོད་དེ་བེད་སྤྱད་ནས་དཔེ་གཟིགས་ལྷོད་ལྷོད་གནང་རྒྱུ་དང༌། ཡང་མིན་ན་རྗེ་བཙུན་འཇམ་དཔལ་དབྱངས་ལ་སོགས་པའི་ཡི་དམ་ལྷག་པའི་ལྷའི་ལྗགས་བསྙེན་རེ་བཟླ་ཐུབ་ན་དོན་ཆེན་པོ་ཡོད་པ་རེད། དེར་བརྟེན་སྔོན་མ་ཡང་བསྐུར་མྱོང་བ་ཡིན་ཏེ། ཆོས་དང་བསླན་པ་བརྩེགས་ན་དགའ་ཟེར་བ་ལྟར་དང༌། འདིའི་ནང་གི་ད་ལོ་གསར་ཞུགས་ཁག་མང་པོ་ཞིག་ལ་སྤྱིར་བཏང་དབང་ཐོབ་ཡང་མ་མྱོང་པ་མང་པ་རེད། དེས་ན། འཇམ་དབྱངས་ཨ་ར་པ་ཙ་ནའི་རྗེས་གནང་ཞིག་བསྐུར་རྒྱུ་བྱ་གསུངས་ཏེ། སེར་སྐྱ་འདུས་པ་ཡོངས་ལ་རྗེས་གནང་ཟབ་མོ་སྐུར་བའི་བཀའ་དྲིན་བསྐྱངས་ཏེ། ཕྱི་ཉིན་ནངས་མོ་ནས་ཆོས་མཚམས་གྲོལ་བ་ཡིན། ལོ་དེའི་ཆོས་མཚམས་ནི་རྒྱ་ནག་གི་ཡུལ་སོ་སོར་ནད་ཡམས་ཀྱི་འཇིགས་དངངས་རབ་ཏུ་བསླངས་པས། ལམ་ཁ་དང་ཕྱི་ནང་གི་མགྲིམ་འགྲུལ་ཕལ་ཆེར་བཀག་བསྡོམས་བྱས་པའི་ལོ་དེ་རེད། བཤེས་གཉེན་རིན་པོ་ཆེ་ཉིད་ཀྱང་སློབ་གླིང་གི་བཞུགས་ཤག་ན་ཟླ་བ་གཅིག་ཙམ་དང༌། དེ་ནས་ཡུལ་དུ་ལོགས་ཏེ་གྲྭ་ཤག་ན་སྐུ་མཚམས་ཉམས་བཞེས་གཙོར་བོར་མཛད་དེ་བཞུགས་སོ། ། དུས་ཀྱི་ཀློང་ཆེན་དལ་གྱིས་བཞུར་བའི་སླད། ། སྔོན་མེད་རླབས་ཆེན་ཞབས་རྗེས་གཙང་མ་ཡི། ། གཏམ་གླེང་མང་པོ་གཟུར་གནས་མགྲིན་རྒྱན་དུ། ། བསྩལ་བའི་བྱུང་བ་སུ་ཡིས་མཐའ་དག་གླེང༌། ། སྙིགས་དུས་ཀྱི་བསྟན་པའི་གསལ་བྱེད་ཆེན་པོ་ངག་དབང་འཇིགས་མེད་དངོས་གྲུབ་དཔལ་བཟང་པོའི་མཛད་བཟང་བསླབ་གསུམ་ནོར་བུའི་གླིང་ཁ་ཞེས་བྱ་བ་ལས་མདོ་སྔགས་རབ་འབྱམས་པའི་དགེ་བཤེས་དམ་བཅའ་དང་བརྒྱད་གཏུག་དམ་བཅའ་གསར་ཚུགས་བསྐོར་གྱི་རྣམ་ཐར་མདོར་བསྡུས་པ་སྟེ་སོ་གཉིས་པའོ། ། ལོ་ན་གཞོན་དུས་ནས་སྒོམ་གལ་ཆེ་ཚུལ་དང་ཐེངས་བརྒྱད་པའི་ཕར་ཕྱིན་དམ་བཅའ་འཇོག་བསྐོར་གྱི་རྣམ་ཐར།ཕྱི་ལོ། ༢༠༢༠ བོད་རབ་རྒྱན་ལྕགས་ཕོ་བྱི་བའི་ལོའི་བོད་ཟླ་གཉིས་པའི་ཚེས་ཉི་ཤུ་རྩ་གཉིས་ལ་གངས་ལྗོངས་རིས་མེད་ལྔ་རིག་མཐོ་སློབ་ཀྱི་ལོ་གཅིག་གི་སློབ་གཉེར་དབུ་བཟུང༌། བོད་ཟླ་བཞི་པའི་དུས་ཆེན་གསུམ་འཛོམས་ལ། སྡོམ་ཁྲིམས་ནོད་མི་མང་པོ་ལ་དགེ་བསྙེན་དང་བར་མ་རབ་བྱུང་སྔོན་དུ་འགྲོ་བའི་དགེ་ཚུལ་སློང་གི་སྡོམ་པ་གནང༌། ཚེས་བཅུ་བདུན་ལ་མགོ་ལོག་ལུང་སྐྱ་དགོན་དུ་བཤད་སྒྲུབ་འདུས་པའི་སྡེ་རིན་པོ་ཆེ་ལ་མཇལ་ཁ་དང་ལུགས་གཉིས་དུས་བབ་ཀྱི་བཀའ་སློབ་ལམ་སྟོན་མཛད། བོད་ཟླ་དྲུག་པའི་ཚེས་བཅུ་དྲུག་ཉིན་གངས་ལྗོངས་རིས་མེད་ལྔ་རིག་མཐོ་སློབ་ནས་མདོ་སྔགས་རབ་འབྱམས་པའི་དགེ་བཤེས་དམ་བཅའི་མཛད་སྒོ་ཐེངས་གཉིས་པ་བཞག །སྤྱིར་རྟག་ཏུ་བཤེས་གཉེན་དམ་པ་མཆོག་ནས་ཞལ་གསུང་བསྩལ་པ་ཞིག་སྟེ། དེ་མཚམས་ཤིག་ན་ལོ་ཉུང་དུས་ཉམས་ལེན་དགོས་ཚུལ་གསུངས་པ་མདོར་བསྡུས་འཁོད་ན། ཁྱེད་ཅག་ཚང་མས་ད་ལྟ་ནས་སྒོམ་རྒྱག་རྒྱུའི་ཕྱོགས་ལ་བསམ་བློ་གཏོང་དགོས་པར་མ་ཟད། སྒོམ་རྒྱག་རྒྱུའི་གོམས་གཤིས་ཆགས་དགོས་པ་རེད། དེ་ལྟ་མ་ཡིན་པར། སང་ཕོད་དང་གནང་ཕོད་སོགས་ལ་བསྒོམ་བྱ་སྙམ་ན་ཕྱི་བཤོལ་གྱི་ལེ་ལོ་རེད། ལོ་ཆུང་དུས་སུ་སྒོམ་རྒྱག་ན་རིག་པ་གསལ་བ་དང༌། རྩ་ཁམས་དྭངས་བ། ལུས་སེམས་ཀྱི་སྟོབས་རྒྱས་པ་སོགས་དུས་སྐབས་དམིགས་བསལ་བ་ཡིན་པས། སྒོམ་རྒྱུད་ལ་སྐྱེ་བའི་རེ་བ་ཆེན་པོ་ཡོད་པ་རེད། ལོ་ན་བགྲེས་སོང་ཆགས། འབྱུང་བ་རྒུད། རིག་པ་འཐིབ་པའི་དུས་སུ་སྒོམ་རྒྱག་ན་ཡང༌། སྔོན་ནས་གོམས་པ་མེད་ན་གསར་དུ་སྐྱེ་བ་ལ་ཚེགས་ཆེན་པོ་འདྲ་ཞིག་ཡིན་པ་རེད། དེས་ན། ལོ་ཆུང་རྣམ་པས། ཁ་པར་རྩེ་རྒྱུ་དང༌། རྣམ་གཡེང་གི་ངང་དུ་མི་ཚེ་འཛད་པར་བྱེད་པའི་ཕྱོགས་ལ་མགོ་འཁོར་མི་འདུག་པར། དཔེ་ཆར་བལྟ་རྒྱུ་དང༌། སྒོམ་རྒྱག་རྒྱུའི་གོམས་གཤིས་འཆགས་སུ་འཇུག་དགོས་པ་ཡིན། སྒོམ་ཉམས་རྟོགས་ཟ་ཟི་རེ་བྱུང་ན། ལམ་སང་ཁོག་ནས་མི་ཤོང་བར། མི་གཞན་ལ་སྒྲོག་འདོན་བྱས་བཞག་ན། ཕྱི་ནང་གི་བར་ཆད་མང་པོ་འཇུག་པ་དང༌། རིམ་གྱིས་མི་ཆོས་བླ་མའི་རྫུན་དང་དེའི་ཕྱོགས་གཏོགས་མང་པོས་གོས་ཏེ། རང་རྒྱུད་བརླག་པའི་ཉེན་ཁ་ཆེན་པོ་ཡོད་པ་རེད། དེས་ན། རང་རྒྱུད་ཀྱི་ས་ལམ་གྱི་ཡོན་ཏན་ཆེ་ཆུང་ཚང་མ་སྦེད་མཁས་པ་ཞིག་ཀྱང་ངེས་པར་དགོས་པ་ཡིན། འོན་ཀྱང༌། ཕྱིའི་བྱ་སྤྱོད་ཀྱི་སྟེང་ནས། གཞན་ལ་དད་པ་འཕེལ་བ་དང༌། བསྟན་པ་དང་དགེ་འདུན་པའི་ཞབས་འདྲེན་མ་ཞུས་པ་ཞིག་གི་སྟེང་ནས། སྒོ་གསུམ་བག་ཡོད་ཀྱི་སྤྱོད་པ་དང་དུ་བླངས་ཏེ། གཞན་ལ་མཐོང་སྣང་ཡག་ཤོས་བསྐྲུན་དགོས་པ་རེད། དེ་ལས་ལྡོག་སྟེ། རང་ལ་འཚུལ་འཆོས་མེད་མདོག་དང༌། ཡོན་ཏན་མི་ངོམ་པའི་ཟོལ་གྱིས། སྤྱོད་པ་འཆལ་འཆོལ་ཉ་ཉོག་ཏུ་གྱུར་ན་སངས་རྒྱས་ཀྱི་བསྟན་པ་བཤིག་པ་ཡིན་པས། ཉེས་དམིགས་དེ་ལས་ཐུ་བ་མེད་པ་ལྟ་བུ་ཡིན། དེས་ན། ཕྱི་ལུས་ངག་སྒོ་གསུམ་བག་ཡོད་ཚུལ་མཐུན་གྱི་སྤྱོད་པ་གཞན་ལ་ཡང་མངོན་པར་བྱེད་དགོས་པ་ཡིན། ཞེས་གསུངས་སོ། །བོད་ཟླ་དྲུག་པའི་ཚེས་བརྒྱད་ལ། པེ་ཅིན་བོད་བརྒྱུད་མཐོ་རིམ་ནང་བསྟན་སློབ་གླིང་གི་བཀོད་བསྒྲིགས་ལྟར། ཀན་སུའུ་ནང་བསྟན་སློབ་གླིང་ནས། དབུལ་སེལ་རྒུད་སྐྱོབ། དགེ་སྨོན་མཉམ་འཇུག་ཅེས་པའི་ཆོས་དོན་དགོངས་འགྲེལ་གྱི་དཔྱད་འབྲས་ཚོགས་འདུའི་བགྲོ་གླེང་ཐོག་ཆིབས་བསྒྱུར་གནང་ནས་གཏམ་བཤད་སྤེལ། བོད་ཟླ་བདུན་པའི་ཉེར་བརྒྱད་ཉིན། འདེམས་སྒྲུག་ལྟར་གངས་ལྗོངས་རིས་མེད་མཐོ་སློབ་ནས་གཞུང་ཆེན་བཀའ་པོད་ལྔ་ཡོངས་སུ་མཐར་ཕྱིན་ཅིང༌། འཆད་རྩོད་རྩོམ་གསུམ་གྱིས་གཞན་རྗེས་སུ་འཛིན་པར་ནུས་པ། ཇོ་ནང་བསེ་དགོན་ཚུལ་ཁོ། སྔ་འགྱུར་གསང་ལུང་བདེ་ཆེན་ཡེ་ཤེས། སྔ་འགྱུར་གྱེན་ལ་དགོན་ཆོས་ཀྱི་བློ་གྲོས། མགོ་ལོག་གདོང་བསྐོར་དགོན་སྙིང་རྗེ་རྒྱ་མཚོ་སྟེ་མི་བཞི་ལ་མཁན་པོའི་མཚན་གསོལ་མཛད། བོད་ཟླ་བརྒྱད་པའི་ཚེས་གསུམ་ཉིན་ཨ་སྐྱོང་དགོན་མཁན་བསམ་བཟང་མཁན་པོ་ལས་ཐོག་གི་འགན་ཡོངས་སུ་རྫོགས་ཏེ། རྒྱལ་རོང་ཁང་སར་དགོན་ཤེས་རབ་རིན་ཆེན་མཁན་ལས་ཐོག་ཏུ་བསྐོ་བཞག་མཛད། ཚེས་ཉི་ཤུ་ཐམ་པ་ལ། སྔ་འགྱུར་རྙིང་མ་སྡེ་དགེ་ཞེ་ཆེན་ལྔ་རིག་ནང་བསྟན་སློབ་གླིང་གི་རེ་འབོད་ཞུས་པ་བཞིན། ཁོ་བོ་ཡང་གྲལ་དུ་ཐེ་བའི་ཆོས་གྲོགས་ལུང་རིགས་སྨྲ་བ་ལྔ་ཞེ་ཆེན་དགོན་ལེགས་བཤད་ཉི་ཟླའི་དགའ་ཚལ་གྱི་ཧི་མ་ལ་ཡའི་རིག་གཞུང་བགྲོ་གླེང་ཆེན་མོ་ཐེངས་ཉེར་བརྒྱད་པར་ཕེབས། ཚེས་ཉེར་གཅིག་སྟེ་ཕྱི་ཉིན་པར་གངས་ལྗོངས་རིས་མེད་མཐོ་སློབ་ཀྱི་སློབ་མ་བྱིངས་མགོ་ལོག་དགའ་སྡེ་རྫོང་གཙང་བསྐོར་ཞོལ་མ་དགོན་དུ། ཇོ་ནང་ཤམ་བྷ་ལའི་ངེས་གསང་དབུ་མ་ཆེན་པོའི་བགྲོ་གླེང་ཐེངས་བཅོ་ལྔ་པར་ཕེབས་ཤིང༌། བཤེས་གཉེན་རིན་པོ་ཆེ་སོགས་གྲྭ་འཁོར་ཁ་ཤས། སྔ་འགྱུར་རྙིང་མའི་གདན་ས་དྲུག་གི་ཡ་གྱལ་དཀར་མཛེས་དཔལ་ཡུལ་དགོན་དུ་ནང་བསྟན་མཁས་དབང་བགྲོ་གླེང་ཐེངས་བརྒྱད་པར་བྱོན་ནས། དེར་བཤེས་གཉེན་རིན་པོ་ཆེ་མཆོག་ནས་ལྟ་གྲུབ་དཔྱད་གླེང་དམ་བཅའ་ཆེན་མོ་མཛད། ཚེས་ཉེར་བཞིའི་ཉིན་ཕ་ཡུལ་ལ་ལོགས་ནས་མགོ་ལོག་པདྨ་རིག་གཞུང་དར་སྤེལ་མཐུན་ཚོགས་ཐེངས་བཅུ་གསུམ་པའི་སྟེང་དུ། མི་མང་ལ་བཀའ་སློབ་ལམ་སྟོན་གྱི་ཆོས་བཀའ་དཔག་མེད་ཀྱི་བཀའ་དྲིན་མཛད་ཅིང༌། དེ་ནས་གཞན་སྟོང་བགྲོ་གླེང་ཆེན་མོ་ཐེངས་བཅོ་ལྔ་པའི་སྟེང་དུ་བཀའ་སློབ་ཟབ་རྒྱས་དང༌། མཚན་ཕུད་དམ་བཅར་ལུང་རིགས་དྲི་མ་མེད་པའི་བརྒལ་བརྟག་གྱ་ནོམ་པ་བྱས། བོད་ཟླ་དགུ་བའི་ཚེས་ཉེར་གསུམ་ཉིན། གངས་ལྗོངས་རིས་མེད་མཐོ་སློབ་གཙུག་ལག་སློབ་གཉེར་ཁང་ཆེན་མོའི་ཐེངས་བརྒྱད་པའི་ཕར་ཕྱིན་མཚན་ཕུད་དམ་བཅའ་ཆེན་མོ་བཞག །སྐབས་དེར་བཀའ་སློབ་མདོར་བསྡུས་གསུང་པར། ཤེར་ཕྱིན་གྱི་མདོ་ན། སྟོང་གསུམ་མཻས་གང་བ་ལས་བརྒལ་ཏེ་ཤེར་ཕྱིན་ཉན་དགོས་པར་གསུངས་པ་དང༌། བྱང་ཆུབ་སེམས་དཔའ་རྟག་ཏུ་ངུས་བྱང་སེམས་ཆོས་འཕགས་བསྟེན་པ་ན་རུས་པའི་རྐང་བཙོང་བའི་རིན་གྱིས་བླ་མར་མཆོད་དེ། ཤེར་ཕྱིན་ཀྱི་ཚིག་བཞི་པའི་ཚིགས་སུ་བཅད་པ་རེ་རེ་མཉན་པར་གསུངས་ཡོད་པ་སོགས། རྙེད་པ་དང་འཕྲད་པར་དཀའ་བའི་རྒྱལ་བའི་ཡུམ་ཆེན་པོ་ལ་ཐོས་བསམ་སྒོམ་གསུམ་གྱིས་འཇུག་རྒྱུ་བྱུང་བ། ཨེ་མ་ཧོ་རྨད་བྱུང་སྐལ་པ་བཟང་པོ་སྙམ་དགོས་པ་རེད་ལ། སྐལ་བཟང་ཁྱད་པར་ཅན་ཡིན་ཡང་ཡིན་པ་རེད། ད་ལོ་དང་ལོ་སྔོན་མ་སོགས་གང་ཡིན་ན་ཡང༌། དཔེ་ཆ་ཡག་པོ་བལྟས་ཏེ། གྲ་འགྲིག་ཕུན་སུམ་ཚོགས་པ་གནང་སོང༌། ཧ་ཅང་བཀའ་དྲིན་ཆེ། ལོ་རྗེས་མའི་དམ་བཅའ་བ་ཚོས་ཀྱང༌། བཟང་ཕྱོགས་ལ་དམིགས་དཔེ་བལྟ་དགོས་པ་རེད། དམ་བཅའ་བ་རྣམ་པས་ཀྱང་དེ་རིང་རང་གི་གྲྭ་བ་བྱས་པའི་དོན་དགོས་དམིགས་བསལ་བ་ཐོན་པའི་ཉི་མ་ཞིག་ཏུ་བཟུང་རིགས་སྙམ། ཞེས་སོགས་གསུངས་སོ། །ཚེས་ཉེར་བདུན་ལ་པེ་ཅིན་བོད་བརྒྱུད་མཐོ་རིམ་ནང་བསྟན་སློབ་གླིང་དུ་རྒྱུགས་འབྲས་དཔྱད་འདེམས་པར་ཕེབས། བོད་ཟླ་དགུ་བའི་ཚེས་ཉེར་གསུམ་ལ། མཚོ་སྔོན་འབའ་རྫོང་དུ་ཟབ་དོན་དབུ་མའི་བགྲོ་གླེང་ཐེངས་དགུ་བར་དགེ་བཤེས་མང་པོ་དང་མཉམ་དུ་ལུང་རིགས་ཀྱི་བགྲོ་བ་མཛད། བོད་ཟླ་བཅུ་བའི་ཚེས་བཞི་ནས་ཉིན་ཁ་ཤས་རིང་རྒྱལ་རོང་བདེ་ཆེན་ཞིང་སྒྲུབ་ཆེན་མོར་འདོད་ཆོས་མང་པོ་བསྩལ་ཞིང༌། རྒྱལ་རོང་སྔ་འགྱུར་དགའ་འཁྱིལ་བསམ་གཏན་དར་རྒྱས་དགོན་དང༌། ཛ་འགོའི་རི་ཁྲོད་བྱང་ཆུབ་ཆོས་རྫོང་དང༌། ཁང་སར་དགོན་སོགས་སུ་ཡང་ཆིབས་བསྒྱུར་བསྐྱངས་ཏེ་ཆོས་བཀའ་མང་པོ་གནང༌། དེ་ནས་རྔ་ཡུལ་བསེ་དགོན་མ་ཎི་ཆོས་ཚོགས་ཆེན་མོར་ཡང་ཆོས་བཀའ་རྒྱ་ཆེན་ཕུལ་ལོ། ། མ་ངེས་ལ་འུར་གཤིན་ཡུལ་འགྲིམ་དགོས་ན། ། སང་བྱ་གནངས་སྒྲུབ་བཞག་པས་མི་ཕན་ལ། ། ལུས་ལ་སྟོབས་དང་སེམས་ཤུགས་ཆེ་བའི་དུས། ། སྒོམ་པའི་དུས་བཟང་དམིགས་བསལ་ཡིན་གསུངས་སོ། ། སྙིགས་དུས་ཀྱི་བསྟན་པའི་གསལ་བྱེད་ཆེན་པོ་ངག་དབང་འཇིགས་མེད་དངོས་གྲུབ་དཔལ་བཟང་པོའི་མཛད་བཟང་བསླབ་གསུམ་ནོར་བུའི་གླིང་ཁ་ཞེས་བྱ་བ་ལས་ལོ་ན་གཞོན་དུས་ནས་སྒོམ་གལ་ཆེ་ཚུལ་དང་ཐེངས་བརྒྱད་པའི་ཕར་ཕྱིན་དམ་བཅའ་འཇོག་བསྐོར་གྱི་རྣམ་ཐར་མདོར་བསྡུས་པ་སྟེ་སོ་གསུམ་པའོ། ། ཞིང་ཆེན་ཡོངས་ནས་དཔྱད་རྩོམ་ཨང་དང་པོའི་གཟེངས་རྟགས་བཞེས་པའི་བསྐོར་གྱི་རྣམ་ཐར།བོད་ཟླ་བཅུ་བའི་ཚེས་ཉི་ཤུ་གསུམ་གྱི་ཉིན་སློབ་གླིང་ནས་ལམ་ལ་ཆས་ཏེ། ཚེས་ཉེར་བཞི་ལ་མཚོ་སྔོན་ཞིང་ཆེན་དུ་ཞིང་ཆེན་ཡོངས་ཀྱི་ཁུལ་དྲུག་གི་མཁས་དབང་དགེ་བཤེས་སོགས་རྩོམ་པ་པོ་དང་མཁས་པའི་མཚན་གནས་མཐོ་བ་བརྒྱ་རྩ་ལྷག་གི་ནང་ནས། གྲྭ་བ་གྲྭ་རྐྱང་གི་ས་ནས་སློབ་གཉེར་འབད་བརྩོན་གྱིས་ནར་སོན་པའི་ངེས་པ་དོན་གྱི་མཁས་སྤྱོད་ཟུང་གི་བདག་ཉིད་བཤེས་གཉེན་རིན་པོ་ཆེ་གང་ཉིད་ཀྱི། ནང་བསྟན་རིག་གཞུང་སྤྱི་ཚོགས་ཀྱི་ལམ་ལུགས་དང་མཐུན་ཚུལ་ཅུང་ཟད་བརྗོད་པ། ཞེས་བྱ་བའི་དཔྱད་བརྗོད་ཀྱི་རྩོམ་ལ་བྱ་དགའ་ཨང་དང་པོའི་གཟེངས་རྟགས་ཐོབ། བཤེས་གཉེན་རིན་པོ་ཆེ་གང་ཉིད་ཀྱི་སྐབས་དེའི་འགྲུལ་བཞུད་ཀྱི་རྣམ་པ་ནི། ཚེས་ཉེར་གསུམ་གྱི་ཞོགས་ཀ་ཆུ་ཚོད་བདུན་ནས་ཕར་ཕྱིན་དང༌། འདུལ་བ། གསང་སྔགས་བཅས་ཀྱི་སློབ་ཁྲིད་བསྟུད་མར་གནང་བ་གྲུབ་མ་ཐགཆུ་ཚོད་བཅུ་དང་ཕྱེད་ཀྱི་སྟེང་གངས་ལྗོངས་རིས་མེད་ལྔ་རིག་མཐོ་སློབ་གཙུག་ལག་སློབ་གཉེར་ཁང་ཆེན་མོ་ནས། གཞུང་ཆེན་བཀའ་པོད་ལྔ་ཆ་ལག་དང་བཅས་པ་དང༌། གསང་ཆེན་སྔགས་ཀྱི་ལམ་རིམ་པ་གཉིས་ཀྱི་རྒྱུད་བཤད་མན་ངག་གི་རིམ་པ་མ་ལུས་པ་ལ་སློབ་གཉེར་མཐར་ཕྱིན་འཛིན་གྲྭ་གསུམ་པ་ཚང་གི་སྔགས་ཀྱི་དམ་བཅའ་ཆེན་མོར་དབུ་བཞུགས་དང༌། དགོང་མོ་ཆུ་ཚོད་དྲུག་ལྷག་ནས་དམ་བཅའ་མཇུག་གྲུབ་མི་རྣམ་ལ་གསུང་བཤད་བཀའ་སློབ་བསྩལ་ཞིང༌། དགེ་སློབ་མཉམ་པར་བཅས་སྒྲོན་ཏེ། གྲྭ་འཁོར་གང་ཡང་མེད་པར་ཐད་ཀར་ལམ་ལ་ཆས་ཏེ་ནུབ་མོར་གཅིག་སྒྲིལ་རྫོང་དུ་ཞག་བཞུགས་མཛད། ཁང་སར་ཉིན་ཡུལ་དགོན་གྱི་བཤད་གྲྭ་བ་རྣམས་ཀྱིས་མཇལ་ཁ་ཞུས། ཕྱི་ཉིན་ནངས་མོར་གླ་གཏོང་རླངས་འཁོར་ཞིག་གི་ནང་འཚང་ཁ་ཤིག་ཤིག་གིས་མཚོ་སྔོན་ཞིང་ཆེན་དུ་འབྱོར། ཕྱི་ཉིན་ཁོང་གི་དཔྱད་རྩོམ་ལ་ཞིང་ཆེན་ཡོངས་ཀྱི་ཁུལ་དྲུག་གི་མངའ་ཁོངས་ནས་བསྡུས་པའི་དཔྱད་རྩོམ་ཐམས་ཅད་ཀྱི་ནང་ནས་ཨང་དང་པོར་བདམས་ཐོན་བྱུང་བར་མ་ཟད། དཔྱད་རྩོམ་དེའི་སྟེང་ནས་གསུང་བཤད་མདོར་བསྡུས་ཤིག་ཀྱང་གནང༌། ཕྱི་དྲོའི་མཛད་རིམ་ཐ་མར། མཚོ་སྔོན་ནང་བསྟན་མཐུན་ཚོགས་དང་ཐབས་ཕྱོགས་གཅིག་གྱུར་པུས་མཉམ་འབྲེལ་གྱི་འོག་ནས། ཚོགས་མང་གི་དབུས་སུ་དཔྱད་རྩོམ་ཨང་དང་པོའི་གཟེངས་རྟགས་བྱ་དགའ་བསྩལ་ཞིང༌། ཚེས་ཉེར་ལྔའི་ཞོགས་པར་སླར་ཡང་གྲྭ་འཁོར་གང་ཡང་མེད་པར་གླ་གཏོང་ཞིག་གི་ནང་དུ་ཚང་ཁ་ཤིག་ཤིག་གིས་ཕྱིར་ལོགས། ཐེངས་དེར་ཕེབས་པའི་བླ་མ་དགེ་བཤེས་མཁན་པོ་དགེ་རྒན་སོགས་གང་ཡིན་ནའང་འདྲ། ད་དུང་ལས་བྱེད་འགོ་ཁྲིད་ཐམས་ཅད་ཕེབས་འཁོར་རྫིག་པོ་དང་གཡོག་པོ་ཡང་གཡོག་མང་པོ་བྱས་ཏེ་སླེབས་འདུག་པའི་ཁྲོད། ཐད་ཀར་བལྟས་ཙམ་ན་ཇི་འདྲའི་ཐབས་ཆག་པོ་འདྲ་ཞིག་གི་རྣམ་པས་ཐོན་འདུག་སྙམ་བྱེད་ཅིག་ཡིན་པ་ལ། དོན་ལ་ནི་དེ་ཡང་ནང་གི་དཔལ་ཡོན་གྱི་རྣམ་པ་ཕྱི་ལ་འཆར་བ་ཞིག་མ་ཡིན་ནམ། ལམ་བར་དུ་གླ་གཏོང་ནང་གི་རྒད་པོ་ཞིག་གིས་ཁྱེད་མཁན་པོ་ཞིག་ཡིན་འདུག་ན། དེང་སང་བླ་མ་ཁག་ལ་རླངས་འཁོར་དང་འཁོར་གཡོག་སྒེར་གཉེར་མེད་མཁན་སུ་ཡོད་པ་རེད་ཅེས་པར། ཁོང་གིས་དེ་ལ། འདི་འདྲའི་རིགས་མང་པོ་མི་མང་གི་གོ་རྟོག་མ་སད་པའི་སྐྱོན་ཆ་ལས་ཡོང་བ་རེད། དཔེར་ན། བླ་མ་ཞིག་གིས་རླངས་འཁོར་དང་གཡོག་འཁོར་རྫིག་པོ་བྱས་ཏེ་ཕེབས་ཤིང༌། ཁང་བ་སོགས་རྒྱས་སྤྲོས་བྱས་ན་མི་མང་གིས་དད་པ་འཇོག་གི་རེད། དེ་ལས་ལྡོག་སྟེ་གཉོམ་ཆུང་ཆོག་ཤེས་བྱས་སོང་ན་མི་མང་ཡིན་ཡང་རང་བཞིན་གྱིས་སྡང་འོང་པ་འདྲ་ཞིག་ཡོད་པས་རེད། དེ་ད་ལྟ་ང་ཚོའི་མི་མང་གི་གོ་རྟོག་མ་སད་པའི་སྐྱོན་ཆ་ཆེ་ཞིག་ཡིན་པ་རེད་ཅེས་ལབ་གླེང་ཞིབ་མོ་མཛད་རབས་ཤིག་ཀྱང་ཐོས་ཏེ། གསུང་བཤད་དེ་གཅིག་པུས་ང་ཚོ་ལ་བསམ་གཞིག་གཏོང་དགོས་པའི་གོ་བརྡ་ཆེ་ཞིག་སྤྲད་ཡོད་པ་མིན་ནམ་སྙམ། འདི་ནི་ཞོར་འཕྲོས་ཙམ་སྟེ། སྤྱིར་གང་ཉིད་ས་ཆ་གང་དུ་བཞུགས་ཀྱང༌། སློབ་གཉེར་བ་སྤྱིར་བཏང་བ་དག་དང་གསོལ་ཆས་འདྲ་འདྲ་དང༌། བཞུགས་ཤག །ན་བཟའ་སོགས་ཡོད་ཚད་ནས་ཡོད་ཚད་དཀྱུས་མ་ལས་ཀྱང་དཀྱུས་མའི་ངང་ཚུལ་ཁོ་ན་འཛིན་པ་ལས། ཐ་ན་ལག་འདོགས་ཆུ་ཚོད་ཙམ་ཡང་བཏག་པ་མི་སྲིད་དེ། རྒྱས་སྤྲོས་ཆེ་ཆེ་གཉན་གཉན་བཟོ་རྒྱུར་ཐུགས་གཏིང་ནས་སུན་པོ་ཡོད་པ་ཞིག་ཡིན། ནམ་རྒྱུན་གྱི་གསུང་གླེང་ན། གྲྭ་བ་གྲྭ་རྐྱང་གི་འཚོ་བ་ལས་སྐྱིད་པ་ཞིག་གཞི་ནས་རོལ་ཐབས་ཡོད་པ་མ་རེད། དེས་ན། ཁོ་བོ་ལ་མཚོན་ན་ཡང་ཚང་མས་ལོགས་བཀར་འདྲ་ཞིག་བཟོས་ནས་ཡར་ག་ཞིག་ལ་ཕུད་བཞག་ན། གུས་བཀུར་བྱས་མདོག་ཅན་པོ་ཡིན་རྒྱུ་རེད་དེ། གཙོ་བོ་སེམས་ཀྱི་ཁ་ཐག་ཉེ་དགོས་པ་རེད། བླ་མ་སློབ་མ་དགེ་རྒན་དགེ་ཕྲུག་ཅེས་པ་དེ་སེམས་པའི་བར་ཐག་ཉེ་མོ་ཡོད་དགོས་པ་རེད་མ་གཏོགས། གཅིག་གིས་གཅིག་ལ་རྒྱང་ནས་བཀྱེད་འདུག་ན་ཡག་པོ་མི་འདུག །མཚམས་ལན་རེར་ཁྱེད་ཅག་ལ་སྒྲིག་ལམ་བལྟ་དགོས་པའི་དབང་གིས་བར་ཐག་གཏན་ནས་མེད་ན་མི་ཡོང་ས་འགའ་རེ་འདུག་མ་གཏོགས། སྒྲིག་ལམ་དེ་ངའི་ཕྲག་པ་ལ་ཁུར་མ་དགོས་ན། མི་སུ་ལ་ཡང་རྒྱུས་མི་མངོན་པ་འདྲ་དང་ཅིག་ཡིན་ཡིན་འདྲ་འགྲོ་རྒྱུ་དགའ་མོས་རྩ་བ་ནས་མེད། ལ་ལས། བླ་མ་ཟཻར་དུས་རྒྱང་ལ་བཅད་བཞག་གི་འདུག །ཕྱི་མི་དངོས་མ་ཞིག་ཏུ་བཟུང་ནས་འཛེམས་དགོས་ས་དང་འབྲོ་དགོས་ས་ཞིག་ཡིན་སྙམ་གྱིན་ཡོད་པ་འདྲ། འགའ་རེས་རིག་བཞག་ན་ཉེན་རྟོག་པ་ཐོན་བཞག་པ་འདྲ་བའི་ལྟ་ཚུལ་བཟུང་གི་འདུག །ས་ཆ་ཐག་རིང་ཞིག་ནས་ངོ་ཐུག་བཞག་པ་ཡིན་ན་ཕན་ཚུན་མཚམས་འདྲི་འདྲ་བོ་བྱས་ཏེ། བློ་ཐག་ཉེ་མོ་འདང་ཡོད་པ་ཞིག་དགོས་པ་རེད་དེ། རིག་མ་ཐག་ཡིབ་སེར་འབྲོས་འགྲོ་ཁུལ་བྱེད་ཀི་འདུག །དེ་བརྩི་འཇོག་བྱེད་སྟངས་ཤིག་རེད་དམ། གཅིག་གིས་གཅིག་ལ་ཤ་ཚ་གྲོས་འདེབས་དགོས་པ་རེད། རང་རང་གི་དོན་དག་ལ་སེམས་པ་དཀར་པོས་སློབ་གསོ་བཏང་ན་ལག་ལེན་ཨེ་འཁྱོངས་བྱེད་དགོས་པ་རེད་མ་གཏོགས། མ་འོངས་པ་ཞིག་ལ། ངས་སློབ་གཉེར་ཞིག་བྱས་མྱོང་པ་ཡིན། དགེ་རྒན་འདི་དང་འདི་བསྟེན་མྱོང་པ་ཡིན་ཏེ། ཕར་སེམས་ཐག་ཉེ་ཉེ་ཐེངས་མ་གཅིག་ཀྱང་བྱེད་མ་མྱོང༌། ཁ་བརྡ་ལྷོད་པོ་ཞིག་ཀྱང་བྱེད་མྱོང་མེད་བསམ་ན་ཡག་པོ་ཞིག་ཡིན་རྒྱུ་ཨེ་ཡིན་ནམ། ཞེས་སོགས་བླ་སློབ་སེམས་ཐག་ཉེ་དགོས་པའི་གསུང་མོལ་ནམ་ཞར་ཞར་དུ་ཕེབས་པ་ཡིན། བོད་ཟླ་བཅུ་གཅིག་པའི་ཚེས་བཅོ་ལྔ་དང་བཅུ་དྲུག་གཉིས་ལ། གངས་ལྗོངས་རིས་མེད་མཐོ་སློབ་ཀྱི་གྲྭ་མང་ཡོངས་དང༌། ཕྱོགས་སོ་སོ་ནས་ཕེབས་པའི་རིས་མེད་ཀྱི་གྲྭ་བ་བདུན་བརྒྱ་ལྷག་ལ། སློབ་དཔོན་སེང་བཟང་གིས་མཛད་པའི་འགྲེལ་བ་དོན་གསལ་དང༌། གངས་ཅན་མཁས་གྲུབ་ཀུན་གྱི་གཙུག་ནོར་ཉ་དབོན་ཀུན་དགའ་དཔལ་གྱི་ཕར་ཕྱིན་བཤད་སྦྱར་ཡིད་ཀྱི་མུན་སེལ་གྱི་ལུང་གནང༌། བོད་ཟླ་བཅུ་གཉིས་པའི་ཚེས་དགུ་ལ། ལོ་འཁོར་གཅིག་གི་སློབ་གཉེར་ཐོས་བསམ་སྒོམ་གསུམ་གྱི་བྱ་བ་ཐམས་ཅད་མཇུག་ལེགས་པར་གྲུབ་ནས་སློབ་གཉེར་བ་རྣམས་ལ་བྱ་དགའ་ཕུལ་བ་དང༌། གངས་ལྗོངས་རིས་མེད་ལྔ་རིག་མཐོ་སློབ་གཙུག་ལག་སློབ་གཉེར་ཁང་ཆེན་མོའི་ལོ་འཁོར་གཅིག་གི་སློབ་གཉེར་ཐོས་བསམ་སྒོམ་གསུམ་གྱི་བྱ་བ་ཐམས་ཅད་མཇུག་ལེགས་པར་གྲུབ་ནས། རྡོ་རྗེ་མི་འཁྲུགས་པའི་དབང་སྐུར་ཟབ་མོ་དང༌། ཚེ་དབང་ཚེ་འགུག་བསྔོ་བ་སྨོན་ལམ་བཀྲ་ཤིས་ཀྱིས་མཐའ་བརྒྱན་ཏེ་ཆོས་མཚམས་གྲོལ་ལོ། ། སྡེབས་ལེགས་སྙན་འཇེབས་རྩོམ་པའི་དཔྱིད་གླུ་ལས། ། དོན་ཟབ་བརྗོད་བྱའི་བཅུད་ཀྱིས་ཡོངས་གཏམས་པ། ། སྙན་དང་ཡིད་ཀྱི་གསོས་སུ་ཉེར་ཕབ་པས། ། མཁས་པའི་རྣམ་ཐར་མཁས་པའི་བླ་ན་འཕགས། ། སྙིགས་དུས་ཀྱི་བསྟན་པའི་གསལ་བྱེད་ཆེན་པོ་ངག་དབང་འཇིགས་མེད་དངོས་གྲུབ་དཔལ་བཟང་པོའི་མཛད་བཟང་བསླབ་གསུམ་ནོར་བུའི་གླིང་ཁ་ཞེས་བྱ་བ་ལས་ཞིང་ཆེན་ཡོངས་ནས་དཔྱད་རྩོམ་ཨང་དང་པོའི་གཟེངས་རྟགས་བཞེས་པའི་བསྐོར་གྱི་རྣམ་ཐར་མདོར་བསྡུས་པ་སྟེ་སོ་བཞི་པའོ། ། ལྷ་ས་དང་ལྷོ་བྲག་གྲཽ་བོ་ལུང་དུ་ཕེབས་ཏེ་མཛད་འཕྲིན་སྐྱོང་བའི་བསྐོར་གྱི་རྣམ་ཐར།དེ་ནས་བོད་ཟླ་བཅུ་བའི་ཚེས་བཅུའི་ཉིན། བཤེས་གཉེན་རིན་པོ་ཆེ་ལ་སྒྲ་སྒྱུར་མར་པ་ལོ་ཙཱའི་གདན་ས་ལྷོ་བྲག་གྲོ་བོ་ལུང་གི་དགོན་པས། རྗེ་བཙུན་ཏཱ་ར་ནཱ་ཐའི་གསུང་འབུམ་གྱི་ལུང་བསྩལ་དགོས་པའི་རེ་ཞུ་ནན་ཆེར་ཕུལ་པ་ལ་བརྟེན་ནས། རེ་ཞིག་གསུང་འབུམ་ལས་པོད་ཁ་ཤས་གསུང་རྒྱུའི་ཞལ་བཞེས་གནངས་ཏེ། ཕྲན་ཕྱག་ཕྱིར་འབྲངས་ཏེ་རྔ་ཡུལ་གནམ་ཐང་ནས། ལྷ་སར་བསྐྱོད་དེ་ལྷ་སའི་གནམ་ཐང་དང་ཐག་མི་རིང་བའི་མཚམས་ཤེད་ཅིག་ནས་རླུང་རྒོད་པས་གནམ་གྲུ་ཕྱིར་ལོགས་ཏེ། ཁྲི་ཏུའུ་གྲོང་ཁྱེར་དུ་ཞག་སྡོད་བྱེད་དགོས་བྱུང༌། ཕྱི་ཉིན་ཉིན་གུང་ན་བདེ་བར་ལྷ་སར་འབྱོར། ཉིན་དེ་ཉིད་ནས་གྲོ་བོ་ལུང་གི་སྤྲུལ་རིན་པོ་ཆེ་ཀརྨ་གཞན་ཕན་དང༌། སྐུ་སྤུན་མཁན་པོ་གཉིས་སོགས་ལ། རྗེ་བཙུན་ཏཱ་ར་ནཱ་ཐའི་གསུང་འབུམ་གྱི་ལུང་གསུང་རྒྱུའི་དབུ་བཙུགས། ཚེས་བཅུ་བདུན་ཉིན་ལུང་གསུང་པའི་ཞར་ལ་ཉིན་གུང་གི་ཇ་སྐབས་དང་བསྟུན་ནས། ཆུ་ཚོད་བཅུ་གཉིས་ན་ལྷ་ལྡན་གཙུག་ལག་ཁང་དུ་ཇོ་བོ་ཡིད་བཞིན་ནོར་བུ་སྐུ་ལུས་ཡོངས་རྫོགས་ལ་གསེར་ཆབ་གཉིས་དང༌། ཀུན་མཁྱེན་དོལ་པོ་པ་དུས་གསུམ་སངས་རྒྱས་དང༌། ཚེ་དཔག་མེད་གཉིས་ལ་ཞལ་གསེར་རེ་རེ་ཕུལ་ཞིང༌། བཟང་སྤྱོད་སྨོན་ལམ་དང༌། རྗེ་བཙུན་ཏཱ་ར་ནཱ་ཐའི་ལྷ་ལྡན་གཙུག་ལག་ཁང་དུ་བརྩམས་པའི་སྨོན་ལམ་རྒྱལ་བ་རྒྱ་མཚོ་བཅས་ཀྱི་སྒོ་ནས་སྨོན་ལམ་རྒྱ་ཆཻར་བཏབ། ཚེས་བཅུ་དགུ་དང་ཉི་ཤུ་གཉིས་ཀྱི་དགོང་མོ་ཆུ་ཚོད་ལྔ་ལྷག་ཙམ་ན་བཤེས་གཉེན་དམ་པ་རང་གིས་ལུང་གསུང་མཚམས་བཞག་པ་དང༌། དཔལ་ལྡན་ས་སྐྱའི་མཁན་རིན་པོ་ཆེ་འཆི་མེད་ཚེ་རིང་མཆོག་གི་ཞལ་སྔར། རྔོག་ལོ་ཡབ་སྲས་ནས་བརྒྱུད་པའི་བྱམས་ཆོས་སྡེ་ལྔ་དང༌། ས་བཟང་མ་ཏི་པཎ་ཆེན་གྱི་རྒྱུད་བླ་མའི་འགྲེལ་པ་དང༌། མདོ་སྡེ་རྒྱན་གྱི་འགྲེལ་བ་ཐེག་ཆེན་རབ་གསལ་སྣང་བ། བཟང་སྤྱོད་སྨོན་ལམ། ཞེན་པ་བཞི་བྲལ་གྱི་ཆོས་བསྐོར་ཡོངས་རྫོགས་ཀྱི་ལུང་མནོས། ཚེས་ཉེར་གཉིས་ལ་རེ་ཞིག་ལུང་གནང་མཚམས་བཞག་ནས། ཕྱི་ཉིན་ཞོགས་པ་ཆུ་ཚོད་བདུན་པར། ལྷ་ས་གྲོང་ནས་ལམ་ལ་ལངས་ཏེ་གོང་དཀར་རྫོང་དང༌། སྣ་དཀར་རྩེ་རྫོང་གི་ཡར་འགྲོ་གཡུ་མཚོ་སོགས་བརྒྱུད་དེ་ཉིན་གུང་ཆུ་ཚོད་གཉིས་ལྷག་ན། ལྷོ་བྲག་རྫོང་གི་མངའ་ཁོངས་པཎ་ཆེན་ནཱ་རོ་པས་ལུང་གིས་བསྟན་པ་དཔལ་མཉམ་མེད་འགྲོ་མགོན་བཀའ་བརྒྱུད་ཀྱི་རྩ་བའི་གདན་ས་ཆེན་པོ་སྒྲ་བསྒྱུར་མར་པ་ལོ་ཙཱས་དུས་རབས་བཅུ་གཅིག་པར་ཕྱག་བཏབ་པའི་འོག་མིན་དཔལ་གྱི་ལྷོ་གྲོ་བོ་ལུང་གི་དགོན་པ། སྲས་དར་མ་མདོ་སྡེ། ཡུམ་བདག་མེད་མ། གཞུང་གི་རྔོག་ཆོས་སྐུ་རྡོ་རྗེ་དང༌། དོལ་གྱི་ཚུར་སྟོན་དབང་ངེ། གཙང་རོང་གི་མེས་སྟོན་ཚོན་པོ། གུང་ཐང་གི་མི་ལ་རས་པ་ལ་སོགས་བཀའ་བརྒྱུད་བླ་མ་རྣམས་ཀྱི་བྱིན་གྱིས་བརླབས་པའི་གནས་མཆོག་ཁྱད་པར་བ་དེར་སེར་ཕྲེང་གི་བསུ་བ་དང་བཅས་འབྱོར་ཞིང༌། ཉིན་དེར་སྒྲ་བསྒྱུར་མར་པ་ལོ་ཙཱའི་སྐུ་མཁར་ཆེན་མོ་ལྔ་ཐོག་དང༌། ལྷ་ཁང་གཞན་གཉིས་སུ་མར་པའི་རྡོ་ཀ་མ་ལེབ་ཀྱི་བཞུགས་ཁྲི་སེང་གེ་རང་བྱོན་ཅན་དང༌། རྗེ་བཙུན་མི་ལ་རས་པ་ལ་བདེ་མཆོག་གི་དཀྱིལ་འཁོར་མངོན་སུམ་དུ་ནམ་མཁར་བསྟན་པའི་ལྷ་ཁང་སོགས་རྟེན་ཁྱད་པར་བ་དང༌། ཞབས་རྗེས་རང་བྱོན་མང་པོར་མཇལ། ཕྱི་ཉིན་ཆུ་ཚོད་དགུ་པ་ནས། རྗེ་མི་ལའི་སྒྲུབ་ཕུག་དང༌། ནཱ་རོའི་ཟངས་ཕུག །མར་བའི་གཟིམ་ཆུང༌། རྗེ་བཙུན་མི་ལ་ཐོག་མར་མར་པ་ལོ་ཙཱར་མཇལ་བའི་ཞིང་ཁ་སོགས་བྱིན་རྟེན་ཁྱད་མཚར་བ་མང་པོར་མཇལ་ཞིང༌། གྲོ་བོ་ལུང་གི་གྲྭ་ཚང་དང༌། གྲོ་བོ་ལུང་གི་བཙུན་མའི་སྡེ་སོ་སོར་ཞབས་སོར་བཀོད་ནས། དུས་འཁོར་ལྷན་སྐྱེས་དང༌། རྫོགས་རིམ་ཡན་ལག་དྲུག་གི་སྨོན་ལམ། ཤམ་བྷ་ལའི་སྨོན་ལམ་བཅས་ཀྱི་ཆོས་འབྲེལ་དང༌། བཀའ་བརྒྱུད་དང་ཇོ་ནང་བར་གྱི་འབྲེལ་ལམ་དང༌། བཀའ་བརྒྱུད་དང་ཇོ་ནང་བར་གྱི་ལྟ་གྲུབ། གྲྭ་ཇོའི་འོས་འགན་སོགས་ནས་གསུང་བཤད་གྱ་ནོམ་པ་གནང་ཞིང༌། དེ་ནས་རྗེ་མི་ལའི་གསེར་མཁར་དགུ་ཐོག་མ་སོགས་ལ་མཆོད་མཇལ་སྨོན་ལམ་གནང་སྟེ། ཕྱིར་ལོགས་དགོང་མོ་ཆུ་ཚོད་བརྒྱད་དང་ཕྱེད་ཀར་ལྷ་ས་གྲོང་དུ་འབྱོར། ཚེས་ཉེར་དྲུག་ལ་སླར་ཡང་རྗེ་བཙུན་ཏཱ་ར་ནཱ་ཐའི་ལམ་རིམ་བདུད་རྩིའི་ཉིང་ཁུའི་ཁྲིད་ལུང་ཕུལ་ནས། རེ་སྐུལ་བཞིན་ཕྱིས་ནས་ཀྱང་ལུང་ལྷག་མ་རྣམས་ཀྱང་གསུང་སྐབས་བྱུང་ན་མི་བརྗེད་པར་བྱེད་འོང་གསུངས་ཏེ་ལོ་དེར་གསུངས་མཚམས་བཞག །ཉིན་གུང་ར་མོ་ཆེའི་གཙུག་ལག་ཁང་གི་རྟེན་གཙོ་བལ་བཟའ་ཁྲི་བཙུན་གྱི་རྟེན་སྐལ་དུ་བྱུང་བའི་སངས་རྒྱས་ཤཱཀྱ་ཐུབ་པ་དགུང་ལོ་བརྒྱད་པའི་སྐུ་ཚད་དང་མཚུངས་པའི་ཇོ་བོ་མི་བསྐྱོད་རྡོ་རྗེ་ལ་ཞལ་གསེར་ཕུལ། དེ་ནས་ལྷོ་བྲག་གྲོ་བོ་ལུང་གི་སྤྲུལ་རིན་པོ་ཆེ་ཀརྨ་གཞན་ཕན་མཆོག་དང་ལྷན་དུ་སྙེ་ཐང་ལྷ་ཆེན་པོ་ཐུབ་པ་རང་བྱོན་དང་མཚེའུ་རྣམས་མཇལ་བསྐོར་དང༌། ནུབ་མོ་དགོན་པ་དེ་སང་ནས་བཀའ་དྲིན་དྲན་པའི་མནྜལ་དང༌། སྒྲ་བསྒྱུར་མར་པའི་སྐུ་རུས་འཁྲུལ་མེད་ཀྱི་རྟེན་རྩ་ཆེན་ཕུལ། ཚེས་ཉེར་བདུན་ཉིན་གྱི་སྔ་དྲོ་ཆུ་ཚོད་བརྒྱད་དང་ཕྱེད་ཙམ་ན་ཕོ་བྲང་པོ་ཏ་ལར་བསྐོར་བ་ཞིག་དང༌། ད་ལྟར་པོ་ཏ་ལར་བཞུགས་པའི་རྗེ་ཏཱ་ར་ནཱ་ཐའི་ཐུགས་བཀོད་འོག་བཟོས་པར་གྲགས་པའི་དུས་འཁོར་ཡོངས་རྫོགས་ཀྱི་དཀྱིལ་འཁོར་བློས་བསླངས་ཆེན་མོར་ཞིབ་མཇལ་ཞིག་བྱེད་དུ་ཕྱིན་ཞིང༌། རྟེན་མང་པོ་ལ་མཆོད་མཇལ་དང༌། ཕོ་བྲང་གི་རྩེའི་ཇོ་བོ་ལོ་ཀི་ཤོ་རར་ཞལ་གསེར་དང་སྨོན་ལམ་གནང༌། རྗེ་ཏཱ་ར་ནཱ་ཐའི་ཐུགས་བཀོད་འོག་བཞེངས་པར་གྲགས་པའི་དུས་འཁོར་ཡོངས་རྫོགས་ཀྱི་བློས་བསླངས་དེར། རྗེ་བཙུན་རང་གི་གཞུང་དང་མི་མཐུན་ལ་འགའ་རེ་འདི་དང་འདི་འདུག་གསུངས། དེར་ཁྱིམ་བརྒྱུད་མི་རབས་དུ་མར་ལྷ་བཟོ་བྱས་འོང་བའི་བཟོ་བོ་ཞིག་ཉིན་དེར་བཤེས་གཉེན་རིན་པོ་ཆེ་ལ་མཇལ་ཁ་ཞུ་ཞོར་རྗེས་སུ་འབྲངས་ཏེ། དེར་མཉམ་དུ་མཆོད་མཇལ་ལ་འོང་ཡོད་པ་དེས། དེ་ཧ་ལམ་ཡིན་ཚོད་ཡོད། བློས་བསླངས་འདི་མ་གཞི་སྔོན་མ་རང་སོར་མ་ཞིག་པ་རེད་དེ། གསར་བརྗེས་སྐབས་སྟོར་བརླགས་བྱུང་བ་ཡིན་ནམ་གང་ལྟར་ལྷ་འགའ་རེ་ཁོ་བོའི་ངོ་ཤེས་ཀྱི་བཟོ་བོ་འགའ་རེས་གསར་བཟོ་བྱེད་དགོས་བྱུང་ཡོད་པ་རེད་ཅེས་ཞུས་སོང༌། ཕྱི་ཉིན་ཚུ་ཚོད་བཅུ་གཅིག་པར་ལྷ་ས་གྲོང་ནས་ལམ་ལ་ཆས་ཏེ་ཆུ་ཚོད་གསུམ་དང་ཕྱེད་ཀ་ན་མགོ་ལོག་ཁུལ་གནམ་ཐང་དུ་སླེབས་ཏེ། དེ་ནས་དགོང་མོ་ཚུ་ཚོད་བརྒྱད་ཀྱི་སྟེང་ཕ་ཡུལ་དུ་བདེ་ལེགས་ངང་འབྱོར་བ་ཡིན་ནོ། ། ཇོ་ཤཱཀ་རྣམ་གསུམ་རྟེན་ལ་མཆོད་འབུལ་དང༌། ། ལྷོ་བྲག་དཔལ་གྱི་གདན་ས་ལ་སོགས་སུ། ། མཛད་པའི་གདུགས་དཀར་ངེས་དོན་སྙིང་པོའི་གཏམ། ། ཆོས་ཀྱི་གྲུ་ཆར་འབེབས་པའི་མཛད་བསྡུས་ཙམ། ། སྙིགས་དུས་ཀྱི་བསྟན་པའི་གསལ་བྱེད་ཆེན་པོ་ངག་དབང་འཇིགས་མེད་དངོས་གྲུབ་དཔལ་བཟང་པོའི་མཛད་བཟང་བསླབ་གསུམ་ནོར་བུའི་གླིང་ཁ་ཞེས་བྱ་བ་ལས་ལྷ་ས་དང་ལྷོ་བྲག་གྲོ་བོ་ལུང་དུ་ཕེབས་ཏེ་མཛད་འཕྲིན་སྐྱོང་བའི་བསྐོར་གྱི་རྣམ་ཐར་མདོར་བསྡུས་པ་སྟེ་སོ་ལྔ་པའོ། ། རྒྱལ་བསྟན་རིས་མེད་བགྲོ་གླེང་ཆེན་མོ་ཐེངས་དང་པོ་དབུ་ཚུགས་པའི་བསྐོར་སོགས་ལོ་ཕྱེད་རིང་གི་རྣམ་ཐར།ཕྱི་ལོ། ༢༠༢༡ བོད་རབ་གནས་ལྕགས་གླང་ལོའི་བོད་ཟླ་གཉིས་པའི་ཚེས་བཅུ་ནས། གངས་ལྗོངས་རིས་མེད་ལྔ་རིག་མཐོ་སློབ་གཙུག་ལག་སློབ་གཉེར་ཁང་གི་ལོ་དེའི་ཐོས་བསམ་སྒོམ་གསུམ་གྱི་བྱ་བ་ཐམས་ཅད་བཀྲ་ཤིས་པའི་ངང་དབུ་བཟུང༌། བཤེས་གཉེན་དམ་པ་ཉིད་ཀྱི་ཞལ་སྔ་ནས། ད་ལན་ཟླ་བ་གཉིས་ཙམ་ལ་ཆོས་མཚམས་བྱས་པ་རེད། ཁ་ཤས་ཀྱིས་དེའི་ཡུན་ལ་ཡང༌། དཔེ་མཚམས་བསྡད་པ་དང༌། མཚམས་བསྙེན་སྒྲུབ། གྲྭ་བསྐོར་ལ་སོགས་པ་བྱས་ཡོད་འདུག །དེ་ཚོ་ལ་མཚོན་ན་ཆོས་མཚམས་ཟེར་བ་དེ་ངལ་གསོ་ཙམ་ཞིག་མ་ཡིན་པར། དགོས་པ་ཡོད་པ་དང་དེ་ཡོད་ན་ཕན་ཐོགས་ལྡན་པ་ཞིག་ཀྱང་རེད་འདུག །དེ་འདྲ་མ་ཡིན་པར་ཁྱིམ་པ་སུན་འབྱིན་དང་སངས་རྒྱས་ཀྱི་བསྟན་ལ་ཞབས་འདྲེན་མ་ཞུས་པའི་ཐོག་ནས། ངལ་གསོ་ཏོག་ཙམ་བྱས་ཡོད་ན་ཡང་མི་འགྲིག་རྒྱུ་ཅི་ཡང་ཡོད་པ་མ་རེད། ཡིན་ན་ཡང༌། ད་ནས་བཟུང་ངལ་གསོའི་སྐབས་ཀྱི་རྩེ་དགོད་དག་གི་གོམས་གཤིས་སུ་འགྲོར་མི་འཇུག་པར། སྤོང་ཀློག་གི་ལས་ལ་གཅིག་ཏུ་བརྩོན་དགོས་པ་རེད། མདོ་ལས་ཀྱང༌། བསམ་གཏན་ཀློག་པའི་ལས་དག་གིས། །ལུས་ལ་སྙིང་པོ་བླང་བར་བྱ། །ངུར་སྨྲིག་གྱོན་ཙམ་གྱིས་ཆོག་པའི། །བསམ་པ་ནམ་ཡང་མི་བྱའོ། །ཞེས་གསུངས་པ་བཞིན་རེད། གོང་ཐང་བསྟན་པའི་སྒྲོན་མེའི་ཞལ་སྔ་ནས། སོས་བདེ་གུ་ཡངས་ཤིག་འདོད་ན། །སྣ་ཐག་རང་མགོ་ལ་དཀྲི་དགོས། །མི་ཁོམ་སྟོང་འུར་ལ་གཟད་ན། །ཆེ་ཆེ་མཐོ་མཐོའི་རྩར་རྒྱུག་ཅིག །ཅེས་པ་ལྟར། མ་ཁོམ་མ་ཡོང་བས་ཟ་ངེ་ཟིང་ངེ་ཞིག་གི་སེམས་ཁམས་ཀྱིས་དཔེ་ཆ་ཡག་པོ་བལྟ་ཐུབ་རྒྱུ་དང་ཤེས་ཐུབ་ཀྱི་མ་རེད། དེས་ན། བསམ་པ་ཐམས་ཅད་གཅིག་ཏུ་དྲིལ་ནས་དཔེ་ཆ་ལྟ་བ་ལས། དྲན་རྒྱུ་བསམ་རྒྱུ་མང་པོ་མི་བྱེད་པ་གལ་ཆེ་བ་ཡིན། ཞེས་སོགས་གསུངས་སོ། །བོད་ཟླ་གསུམ་པའི་ཚེས་ཉི་ཤུ་གཅིག་དང་གཉིས་ལ། བཤེས་གཉེན་རིན་པོ་ཆེ་མཆོག་གིས་ཚོགས་གཙོ་སོགས་ཐོག་མཐའ་བར་གསུམ་གྱི་ཐུགས་འགན་གཙང་བཞེས་འོག །ཆོས་བརྒྱུད་རིས་སུ་མཆིས་པའི་མཁས་པ་མང་པོ་གདན་འཛོམས་ཏེ། གངས་ལྗོངས་རིས་མེད་རྒྱལ་བསྟན་མཐོ་རིམ་བགྲོ་གླེང་ཐེངས་དང་པོ། ཡུལ་དགོན་ཨ་སྐྱོང་དགོན་ངེས་དོན་རྟག་བརྟན་བཤད་སྒྲུབ་འཕེལ་རྒྱས་གླིང་དུ་དབུ་འཛུགས་མཛད་ཅིང༌། སྲོལ་ཡིག་དང་བཅས་འཐུས་ཚང་བའི་ལམ་སྲོལ་བཞག །རིས་སུ་མ་མཆིས་པའི་ཆོས་བརྒྱུད་ཁག་ནས་ཞབས་སོར་འཁོད་པའི་མཁས་མང་བླ་ཆེན་རྣམས་ལ་ཐུགས་དགོངས་མཐུན་པའི་མཇལ་འཕྲད་དང༌། ལུང་རིགས་ཀྱི་བརྒལ་བརྟག་འབེལ་གཏམ་གྱ་ནོམ་པ་མཛད་ཅིང༌། དཔལ་མཉམ་མེད་རི་བོ་དགེ་ལྡན་པའི་འཕགས་ཡུལ་གདན་ས་ཆེན་པོ་ནས་ཕེབས་པའི། མཁས་དབང་ལྷ་རམས་པ་འགའ་རེས་གསུང་བཤད་གནང་བར། དགེ་བཤེས་ཁོང་ལ་མཚོན་སོང་ན་མཁས་པ་ཙམ་ཞིག་མ་རེད། བོད་གངས་ཅན་གྱི་རླབས་ཆེ་བའི་སྐྱེས་བུ་དམ་པ་ཞིག་རེད། རྒྱུ་མཚན་གང་ཡིན་ཞེ་ན། ཇོ་ནང་པ་ཟེར་བའི་ཆོས་བརྒྱུད་གྲུབ་མཐའ་འདི་བོད་གངས་རིའི་ལྗོངས་ཀྱི་ནང་པ་སངས་རྒྱས་པའི་ཆོས་བརྒྱུད་ལྔའི་ཡ་གྱལ་གཅིག་རེད། ཉམས་གུད་དུ་སོང་ན་ཇོ་ནང་བའི་གྱོང་གུད་ཟེར་ནས་འདུག་རྒྱུ་ཡོད་པ་མ་རེད། བོད་པ་ཚང་གི་གྱོང་གུད་ཆེན་པོ་ཞིག་ཏན་ཏན་ཆགས་ཡོད་པ་རེད། དེས་ན། ཁོང་གིས་ཆོས་བརྒྱུད་གྲུབ་མཐའ་ཆེན་མོ་ཞིག་སླར་གསོ་མཛད་བཞག་པ་ཡིན་ན། དེ་ལས་ཆེ་བའི་ཕྱི་རྗེས་ཤིག་འཇོག་རྒྱུ་རྙེད་མི་སྲིད་པ་རེད། དེ་ཡང༌། ལྷ་ཁང་ཞིག་བཞེངས་བཞག་པ་དང༌། གསེར་སྐུ་ཞིག་བཟོས་བཞག་པ་དང་གཏན་ནས་མི་འདྲ་བ་རེད། གང་ཡིན་ཞེ་ན། གཞི་ལམ་འབྲས་བུའི་རྣམ་བཞག་ཡོངས་སུ་རྫོགས་པའི་བཤད་སྲོལ་གྱི་ཤིང་རྟའི་སྲོལ་ཆེན་པོ་ཞིག་སླར་ཡང་གསལ་བར་བྱས་པ་རེད། ད་དུང་ཆོས་བརྒྱུད་འདི་བ་སང་ལ་མཁས་པ་ཁ་གྲགས་རྒྱུ་ཡོད་པའི་མི་གསོན་གོབ་ཆོད་པ་ཤིན་ཏུ་མང་པོ་ཞིག་བསྐྱེད་བསྲིངས་བྱས་ཡོད་པ་ཡིན་དུས། ཁོང་གིས་བཞག་པའི་མཛད་རྗེས་དེ་ཕྱི་རབས་ནས་ཕྱི་རབས་ལ་ཇེ་མངོན་ཇེ་གསལ་ཡོང་རྒྱུའི་ཕྱག་ལས་རླབས་པོ་ཆེ་བཞག་འདུག །བླ་མ་སྤྱན་རས་གཟིགས་ཀྱིས་གསུང་བཞིན་པའི་མི་སྣ་དེ་ཏན་ཏན་ཏིག་ཏིག་གིས་འདི་འདྲ་ལ་ཆགས་ཡོད་རེད་དྲན་གྱིན་ཡོད། ཅེས་སོགས་མཁས་མང་རིས་སུ་མ་མཆིས་པའི་བསྟོད་པའི་མེ་ཏོག་གི་འདབ་མ་ལྷུག་པོར་བརྡོལ་ཡང༌། མང་དུ་དོགས་ནས་དེ་ཙམ་དུ་བྱ། བོད་ཟླ་བདུན་པའི་ཚེས་བཅུ་གཉིས་ཉིན་ཁམས་མི་ཉག་དགོན་ཆེན་དུ་ཕེབས་ཏེ། ཇོ་སེར་མི་མང་འདུས་པ་རྒྱ་མཚོ་ལ་ཆོས་བཀའ་རྒྱ་ཆེན་བསྩལ་ཞིང༌། ཟབ་མོ་གཅོད་ཚོགས་ཆེན་མོའི་དབུ་བཞུགས་མཛད། ཟླ་དེའི་ཚེས་ཉེར་གཉིས་ལ། གངས་ལྗོངས་རིས་མེད་སློབ་གླིང་གི་སློབ་མ་རྒྱ་མཚོ་ལྟ་བུའི་འཁོར་གྱི་སྣ་དྲངས་ཏེ། ཛམ་ཐང་གཙང་བ་དགོན་དུ་གཞན་སྟོང་དབུ་མ་ཆེན་པོའི་བགྲོ་གླེང་ཐེངས་བཅུ་དྲུག་པར་ཆིབ་བསྒྱུར་བསྐྱངས་ཏེ། ཕྱི་ཉིན་གྲྭ་ཚང་འདུས་པ་རྒྱ་མཚོ་ལ་བཀའ་སློབ་གསུངས་པ་རེག་ཟིག་ཏུ་གནད་བསྡུས་འགོད་ན། ཐུགས་མཐུན་ཁྲིམས་གཙང་གི་སྒོ་ནས་བཤད་སྒྲུབ་ཀྱི་བསྟན་པའི་སྙིང་པོ་ལ་འབད་བརྩོན་བྱེད་དགོས། ཞེས་པའི་གླེང་གཞི་ཞིག་གཏན་ཁེལ་བྱས་ཏེ་ཞུ་རྒྱུ་དེ་ཡིན། ཐུགས་མཐུན་ཁྲིམས་གཙང་གི་སྒོ་ནས་བཤད་སྒྲུབ་ཀྱི་བསྟན་པ་འཛིན་དགོས་པ་ཡིན་ན། དང་པོ། ཐུགས་མཐུན་པ་དེ་ཧ་ཅང་གལ་ཆེན་པོ་རེད། འོན་ཀྱང༌། ཐུགས་མཐུན་ཞེས་པ། དེང་སང་རང་རང་སོ་སོའི་ལས་འབྲས་དྲང་བདེན་དང༌། གནས་ལུགས་གཙིགས་སུ་བཟུང་ནས་གཞན་ལ་ཕན་མ་ཐོགས་ན་གནོད་མི་བྱེད་རྒྱུ་དེ་རེད། དེ་ཡང༌། ལས་འབྲས་དང་མཐུན་པ། ཆོས་འདུལ་བའི་བཅས་ཁྲིམས་དང་མཐུན་པ། འཇིག་རྟེན་མི་ཆོས་སམ་རྒྱལ་ཁབ་ཀྱི་རྩ་ཁྲིམས་དང་མཐུན་པ་ཞིག་གི་སྟེང་ནས་འགྲོ་དགོས་པ་རེད་མ་གཏོགས། ཀུན་དང་མཐུན་པ་མི་ཆོས་ཀྱི་རྩ་བ། །ཞེས་པ་དེ། རྐུན་མ་དང་མཐུན་པ། གཡོ་སྒྱུ་ཁྲམ་གསུམ་དང་མཐུན་པ། ཆབ་སྲིད་ཀྱི་གཡོ་སྒྱུ་ཅན་དང་མཐུན་པ་ཞིག་ལ་གོ་བ་མ་རེད། དེས་ན་རང་རང་སོ་སོའི་རང་ཚུགས་མ་ཤོར་བའི་ངང་ནས། གནས་ལུགས་དང་དྲང་བདེན་གལ་ཆེན་རང་བཞིན་དུ་བཟུང་ནས་འགྲོ་དགོས་པ་རེད་མ་གཏོགས་མི་ཐམས་ཅད་དང་མཐུན་པ་ཞིག་ཡོང་ཐབས་བྲལ་བ་རེད། བདག་ཅག་གི་སྟོན་པ་མཉམ་མེད་ཐུབ་པའི་དབང་པོ་ཡང་འཛམ་བུ་གླིང་འདིར་བྱོན་པ་རེད་དེ། ཐམས་ཅད་དང་མཐུན་པ་ཞིག་མ་ཡོང་པ་རེད། ཁོང་ཐབས་ལ་མ་མཁས་པ་དང༌། བྱམས་སྙིང་རྗེ་མེད་པ་མ་རེད་ཏ། སེམས་ཅན་སོ་སོའི་ཁམས་དང་མོས་པ་སོ་སོ་བ་ཡིན་པ་དང༌། བསོད་ནམས་དང་སྨོན་ལམ་ཡོད་མེད་སྣ་ཚོགས་ཤིག་གིས་ཀུན་དང་མཐུན་པ་ཞིག་ཡོང་ཐབས་བྲལ་བ་རེད། སངས་རྒྱས་ཀྱིས་ནི་མི་མགུ་ན། །བདག་འདྲ་ངན་པའི་སྨོས་ཅི་དགོས། །ཞེས་རྒྱལ་སྲས་ཆེན་པོ་ཞི་བ་ལྷས་གསུངས་པ་བཞིན། ང་རང་ལྟ་བུར་མཚོན་ན་ཐམས་ཅད་དང་མཐུན་པ་ཞིག་དགོས་བསམ་ཀྱང་དེ་ནི་སྟོང་བསམ་ཁོ་ན་མ་གཏོགས་ཀུན་དང་མཐུན་པ་ཞིག་ཆགས་ཡོང་བའི་ཐབས་ཡོད་པ་མ་རེད། འོན་ཀྱང༌། གོང་དུ་ཞུས་པ་ནང་བཞིན། གནས་ལུགས་དང་དྲང་བདེན། ལྷག་ཏུ་ང་ཚོ་རབ་བྱུང་བ་ཞིག་ལ་མཚོན་ན། ཆོས་འདུལ་བའི་བསྟན་པ་ཡང་སྙིང་དུ་བཟུང་དགོས་པ་གལ་ཆེན་པོ་རེད་བསམ། རང་གི་ངོས་ནས་བསམ་བློ་བཏང་ན་ད་སྔ་ཡན་ལ། ཆོས་བརྒྱུད་རིས་སུ་མེད་པའི་མཁས་དབང་རྣམས་ཀྱི་མདུན་ནས་དབང་ལུང་ཁྲིད་གསུམ་ཞུས་ཏེ། གང་ལ་གང་འཚམས་ཀྱི་གཞུང་ལུགས་ལ་ཡང་བལྟས། ཆོས་བརྒྱུད་དག་ལ་རང་ནུས་གང་ཡོད་ཀྱིས་ཞབས་ཕྱི་བསྒྲུབས་ནས་སོང་པ་ཡིན་མ་གཏོགས། ཁ་རྐྱང་བ་ཙམ་གྱིས་མཐུན་སྒྲིལ་དང་རིས་མེད་ཟེར་ནས་ཞུས་པ་མེད། བྱ་བ་ཆེ་ཆུང་གང་སྒྲུབ་ན། དེ་ལ་འགལ་ཟླ་ཟེར་ན་འདྲ། ལྡོག་ཕྱོགས་ཤིག་ཡོད་པ་རེད། ལྷ་ཟབ་སར་བདུད་ཟེར་བ་རེད། སྤྱིར་བཏང༌། ཐང་བདེ་མོའི་སྟེང་གི་རི་མཐོན་པོ་ལ་རླུང་རྒྱབ་པ་དེ་དངོས་པོའི་ཆོས་ཉིད་ཅིག་ཡིན་པས་བྱ་བ་གང་སྒྲུབ་ན་རང་ལ་གནས་ལུགས་དང་དྲང་བདེན་ཡོད་ན། གཞན་གྱི་བར་ཆད་དང་འགལ་བ་ཡོད་ན་ཡང་རང་གི་གཟི་བརྗིད་ཅིག་རེད། གནས་ལུགས་ཡོད་པའི་རྟགས་མཚན་ཞིག་ཀྱང་རེད། ང་རང་གྲྭ་བ་གྲྭ་རྐྱང་ཟླ་གམ་ཁེར་རྐྱང་ཞིག་རེད། ངའི་མི་ཚེའི་བརྒྱུད་རིམ་ལ་བསམ་བློ་བཏང་ན། ལོ་བཅུ་ཕྲག་ཁ་ཤས་ལ་དཔེ་ཆ་ཞིག་ལྟ་ཁུལ་བྱས་པས། གཞན་ལ་གཡོ་སྒྱུའི་སྒོ་ནས་མགོ་གཡོགས་དང་མགོ་སྐོར་དང་དེའི་རིགས་ལ་བྱ་བ་སྒྲུབ་རོགས་གང་ཡང་མ་བྱས་པ་ཡིན། རང་ནུས་གང་ཡོད་ཀྱིས་ལས་འབྲས་གཙིགས་སུ་འཛིན་ཁུལ་བྱས་ཏེ་ཡོང་བ་ཡིན། ང་ཚོ་རབ་ཏུ་བྱུང་བ་ཞིག་ན། ལས་འབྲས་གཙིགས་སུ་བཟུང་ནས། ལྟོ་གོས་ཆས་གསུམ་ནང་པ་སངས་རྒྱས་པའི་བསྟན་པ་ལ་བརྟེན་ནས་ཡོང་གི་ཡོད་པས། ནང་ཆོས་དེ་རྩ་ཆེན་དང་མཐོང་ཆེན་བྱེད་རྒྱུ་ནི་གལ་ཆེན་པོ་རེད། ཐུགས་མཐུན་ཁྲིམས་གཙང་ཞེས་པ་ལས། ཁྲིམས་གཙང་བ་དེ་བཤད་ན། ཚུལ་ཁྲིམས་ལ་རིགས་མང་པོ་ཡོད་པ་རེད། ཡིན་ན་ཡང་དེ་རིང་འདིར་འདུས་པ་ཐམས་ཅད་ནི་གྲྭ་བ་ཤ་སྟག་ཡིན་པས་དགེ་ཚུལ་སློང་གི་སྡོམ་པའི་ཕྱོགས་ནས་ཉུང་ཙམ་ཞུ་རྒྱུ་ཡིན། རབ་ཏུ་བྱུང་བའི་སྡེ་ཞིག་ལ་མཚོན་ན་རང་རང་སོ་སོ་དགེ་ཚུལ་སློང་གང་ཡིན་ན་དེའི་ཚུལ་ཁྲིམས་དེ་སྲུང་དགོས་པ་རེད། སྲུང་པ་དེ་ཡང༌། དང་པོ། སྡོམ་པ་མ་ཐོབ་པ་ཐོབ་པར་བྱེད་པ། ཐོབ་པ་མི་ཉམས་པར་བྱེད་པ་སོགས་ཡོད་པ་ལས། དེ་རིང་འདི་ནས་ཞུ་རྒྱུ་ནི་སྡོམ་པ་མ་ཐོབ་པ་འཐོབ་པར་བྱེད་རྒྱུ་ཧ་ཅང་གལ་ཆེན་པོ་རེད་བསམ་ཡོད། རང་གི་བསམ་ཚུལ་འདི་འདྲ་ཞིག་རེད། དགེ་སློང་ཞིག་སྒྲུབ་པ་ཡིན་ན། ལོ་ཉི་ཤུ་མ་ལོན་སྔོན་ནས་དགེ་སློང་སྒྲུབ་མཁན་ཇོ་ནང་གི་དགོན་སྡེ་མང་པོ་ན་ཡོང་གི་ཡོད་པ་རེད། འོན་ཀྱང་ལོ་ཉི་ཤུ་མ་ལོན་ནས་དགེ་སློང་གི་སྡོམ་པ་དེ་ཆགས་ཀི་ཡོད་པ་མ་རེད། འདུལ་བ་མདོ་རྩའི་སྤྱི་བསྟན་གྱི་མདོ་ཚན་དྲུག་ཅུ་རེ་ལྔ་ལས་དང་པོའི་སྐབས་སུ། ཉམས་པ་དང་མ་ཆགས་པ་གཉིས་ལྟུང་བ་ལ་སྦྱོར་ན་ཉེས་བྱས་སོ། །ཞེས་གསུངས་པ་ལྟར། མ་ཆགས་པ་ཞིག་ཡོང་གི་ཡོད་པ་རེད། དེས་ན་དགེ་སློང་སྒྲུབ་པ་ལ་ཆ་རྐྱེན་རྣམས་ཚང་དགོས་པ་གལ་ཆེན་པོ་རེད། དགེ་ཚུལ་སློང་སྒྲུབ་པ་ལ་དགེ་ཚུལ་སློང་ལྔ་ཚོགས་ངེས་པར་དུ་དགོས་པ་རེད་དེ། དགེ་སློང་ལྔ་ཚོགས་ཕར་ཞོག །སྔོན་དུས་སུ་གསེར་སྐུ་རེ་དགེ་སློང་གི་ཚབ་ཏུ་བྱས་པ་དང་མི་གཅིག་ཙམ་གྱིས་བསྒྲུབས་པ་སོགས་ཉ་ཉོག་མང་པོ་ཞིག་ཤོད་རྒྱུ་འདུག །དེའི་དབང་གིས་སྡོམ་རྒྱུད་ཆད་འགྲོ་བ་དེ་ཡང་ཡོང་གི་ཡོད་པ་རེད། ཕྱོགས་གཞན་ཞིག་ཏུ། མི་ཚངས་སྤྱོད་ཀྱི་ཕམ་པས་མ་གོས་ན་ཡང༌། བླ་ཆེན་མང་པོས་མི་ཆོས་བླ་མའི་རྫུན་བཤད་པ་གོམས་གཤིས་ལྟ་བུར་གྱུར་ཡོད་པ་དང༌། ཐབས་ཤེས་སྣ་ཚོགས་བཏང་ནས་དཔལ་འབྱོར་སྒྲུབ་ཡོང་དུས་མ་བྱིན་ལེན་པའི་ཕམ་པ་བྱུང་སྟེ། དེ་ནས་ད་དུང་སྡོམ་པ་སྒྲུབ་བསྡད་མཁན་ཡང་ཡོད་ཡོད་འདྲ་རེ་སྣང་གི་འདུག །དེ་ལྟ་ཡོད་ན་ནི། སྡོམ་པ་སྦྱིན་མཁན་ཕར་ཞོག །སྡོམ་རྒྱུད་གཅོད་མཁན་དུ་གྱུར་ཡོད་པ་རེད། དེས་ན། དང་པོ་ནས་ཆོས་འདུལ་བ་ལ་སློབ་སྦྱོང་ཡག་པོ་ཞིག་བྱེད་རྒྱུ་གལ་ཆེན་པོ་རེད། ཚུལ་ཁྲིམས་སྲུང་བའི་སྐབས་སུ། རང་ཉིད་དགེ་ཚུལ་སློང་ཡིན་པའི་འདུ་ཤེས་ཡོད་རྒྱུ་དང༌། ཕམ་པས་མ་གོས་པ་དང་རང་བཞིན་གྱི་ཁ་ན་མ་ཐོ་བ་ལ་འཛེམས་པ་ཡིན་ན་དགེ་སློང་རྣམ་དག་ཡིན་ཞེས་ཆོས་འདུལ་བའི་སྐབས་སུ་གསུངས་པ་བཞིན། རང་རང་སོ་སོ་དགེ་ཚུལ་སློང་རྣམ་དག་ཡིན་པའི་འདུ་ཤེས་ཡོད་པའི་སྒོ་ནས། ནམ་རྒྱུན་སྲུང་སེམས་ཡོད་རྒྱུ་གལ་ཆེན་པོ་རེད་མ་གཏོགས། སྲུང་སེམས་ལྐོག་གྱུར་ཏུ་སོང་ན་སྡོམ་པ་ཡང་ལྐོག་གྱུར་ཏུ་བུད་སོང་རེད། དེ་ལྟ་ན་སྡོམ་པ་དེ་ལས་ཐོབ་པའི་དགེ་རྩ་ཡང་ནུས་པ་ཆུང་ཆུང་འགྱུར་འགྲོ་བ་རེད། བསླབ་ལ་མི་གནས་དེ་དག་ནི། །གཟུགས་པོ་ཁྱིམ་པར་གནས་པ་མཆོག །ཅེས་སངས་རྒྱས་བཅོམ་ལྡན་འདས་ཀྱིས་གསུང་པ་བཞིན། ཕམ་པས་གོས་པ་ནས་བཟུང༌། རབ་བྱུང་ངུར་སྨྲིག་གི་གོས་མི་གྱོན་རྒྱུ་གལ་ཆེན་རེད། ཆོས་རྗེ་ཀུན་མཁྱེན་རིན་པོ་ཆེས། ཚུལ་ཁྲིམས་འཆལ་བའི་ལུས་ཅན་གཞོན་ནུ་ཁྱོད། །དགེ་སློང་ཚུལ་དུ་མ་འཆོས་དཀར་པོ་གྱོན། །ཚུལ་ཁྲིམས་འཆལ་བའི་ཉེས་པའི་མི་ཆོག་པར། །ཚུལ་འཆལ་ཉེས་པའི་གོས་ན་མི་རུང་ངོ༌། །ཞེས་གསུངས་པ་ནང་བཞིན་རེད། དིང་སང་དགོན་སྡེ་མང་པོའི་ནང་དུ་རྒྱུད་ལ་སྡོམ་པ་མེད་ཀྱང་ངུར་སྨྲིག་གི་གོས་གྱོན་མཁན་དང༌། རབ་བྱུང་གི་སྡེར་ཞུགས་ཡོད་མཁན་མང་པོ་ཞིག་ཡོང་གི་ཡོད་པ་རེད། དེའི་རིགས་ཀྱིས་ཁེ་བཟང་རེག་གི་ཡོད་བསམ་ན་ཐང་ཏ། དོན་དངོས་སུ་ཚུལ་ཁྲིམས་འཆལ་བ་དེས་དགེ་འདུན་པའི་གནས་མལ་སྐད་ཅིག་ཙམ་ལ་ཡང་ལོངས་སུ་སྤྱད་ན་དམྱལ་བ་འགྲོ་བའི་རྒྱུ་ཡིན་པ་རེད། དེས་ན་ཚང་མས་དེའི་རིགས་ལ་གཟབ་གཟབ་གྱིས། བསྟན་པ་དག་ཐེར་གྱི་ཕྱོགས་ལ་ང་ཚོས་འབད་འབུངས་བྱེད་དགོས་པ་རེད། དེ་ཡང་སློབ་དཔོན་དབྱིག་གཉེན་གྱིས། སྟོན་པའི་དམ་ཆོས་རྣམ་གཉིས་དེ། །ལུང་དང་རྟོགས་པའི་སྡེ་སྣོད་དོ། །དེ་འཛིན་སྒྲུབ་པ་སྨྲ་བྱེད་པ། །སྒྲུབ་པར་བྱེད་པ་ཁོ་ན་འོ། །ཞེས་གསུངས་པ་ལྟར། སངས་རྒྱས་ཀྱི་བསྟན་པ་ལུང་རྟོགས་གཉིས་ཡིན་པ་ངོས་ཟིན་ཏེ། ས་རྡོ་རི་བྲག་གི་ལས་ཀ་ལྟ་བུའི་བསྟན་པའི་ཕྱི་གཟུགས་བརྙན་ཙམ་ལས། ལྷ་ཁང་གསེར་ཁང་སོགས་ཀྱིས་འཆད་ཉན་མི་བྱེད་ལ། ཐོས་བསམ་སྒོམ་གསུམ་མི་བྱེད། དེའི་རྒྱུ་མཚན་གྱིས། ང་ཚོས་སངས་རྒྱས་ཀྱི་བསྟན་པའི་སྙིང་པོ་གང་ཡིན་ངོས་ཟིན་དགོས་པ་གལ་ཆེན་རེད། དགེ་འདུན་པའི་བཞུགས་གནས་ཤིག་དང༌། གཙུག་ལག་ཁང་ཞིག་དགོས་ཀི་ཡོད་པ་རེད་མ་གཏོགས། དིང་སང་ལྷ་ས་ཕྱོགས་ཡིན་ན་འདྲ། གཞན་དག་ལ་བསམ་བློ་བཏང་ན། སྔོན་གྱི་སྒྲུབ་གནས་ཆེན་མོ་ཁ་ཅིག་མར་ཉམས་ནས་ནང་དུ་བཙུན་མ་གཅིག་གཉིས་ཙམ་ལས་མེད་པ་ལྟ་བུ་རེད། ཡང་ཁ་ཅིག་གིས་འཛུགས་སྐྲུན་རྒྱ་ཆེན་པོ་བྱས་པས་རྐྱེན་གྱིས། སྒྲུབ་གནས་ཆེན་པོ་དག་ད་ཆར་ཡུལ་བསྐོར་ལྟེ་གནས་སུ་བསྒྱུར་བ་ཧ་ཅང་ཡིད་ཕངས་པ་མང་པོ་ཡོང་གི་ཡོད་པ་རེད། ལུང་རྟོགས་ཀྱི་བསྟན་པ་འཛིན་སྐྱོང་བྱེད་པ་ལ་ཡང༌། ལུང་གི་བསྟན་པ་ལ་ཐོས་བསམ་སྒོམ་གསུམ་བྱས་ཏེ་འགྲོ་དགོས་པ་དང༌། ཐོས་བསམ་སྒོམ་གསུམ་པོ་རྒྱུ་འབྲས་ཀྱི་གོ་རིམ་ཞིག་ཡིན་པ་དང༌། སྔགས་བླ་མེད་ཀྱི་སྐབས་སུ་ཡང༌། པདྨའི་རིགས་ཀྱི་དམ་ཚིག་གསུངས་ཡོང་དུས། ཕྱི་ནང་གསང་བ་ཐེག་པ་གསུམ། །དམ་པའི་ཆོས་རྣམས་མ་ལུས་བཟུང༌། །ཞེས་གསུངས་པ་རེད། ཕྱི་ནང་གསང་བ་ཞེས་པ། བྱ་རྒྱུད། སྤྱོད་རྒྱུད། རྣལ་འབྱོར་གྱི་རྒྱུད། གསུམ་དང༌། ཐེག་པ་གསུམ་ཞེས་མདོ་ལུགས་ཀྱི་ཐེག་པ་གསུམ་གསུངས་པ་རེད། དེ་མ་ལུས་པར་ཡོངས་སུ་བཟུང་ཞེས། དམ་ཚིག་གི་གྲངས་སུ་བཞག་གི་ཡོད་པ་རེད། ཡང་དིང་སང་འཆད་ཉན་བྱེད་ཡོང་དུས། ང་རང་ལས་སྣང་མ་དག་པ་ཡིན་ན་འདྲ། རང་ལ་ཆོས་རབ་ཏུ་རྣམ་འབྱེད་ཀྱི་ཤེས་རབ་མེད་པའི་དབང་གིས་ཡིན་ན་ཡང་ཐང་མོད། མང་པོ་ཞིག་གིས་མ་བརྟག་མ་དཔྱད་པར་བྱུང་རྒྱལ་དུ་རང་བཟོ་བྱས་ཏེ། རང་རང་སོ་སོའི་ཡིག་ཆ་ན་ཡོད་པ་དེ་མི་ལབ་པར། མེད་པ་དེ་ལབ་འགྲོ་བ་ཧ་ཅང་མང་པོ་ཡོང་གི་འདུག །དེ་ཧ་ཅང་ཉེན་ཁ་ཚ་བོ་ཞིག་ཆགས་འདུག །བླ་མ་དགེ་བའི་བཤེས་གཉེན་ཚོས། ཆོས་འཆད་ཉན་སྐབས་སུ་བརྟག་དགོས་རེད་མ་གཏོགས། བདུད་ཀྱི་བཤེས་གཉེན་ཞེས་པ་མགོ་ལ་རྭ་སྐྱེས་འདུག་ཡོད་པ་ཞིག་ལོགས་སུ་ཡོད་པ་མ་རེད། རང་གི་སློབ་མ་ཚོ་ལོག་པའི་ལམ་དུ་ཁྲིད་འགྲོ་ན། བདུད་ཀྱི་བཤེས་གཉེན་ཆགས་སོང་བ་རེད། དེ་སོགས་འཆད་པའི་སྐབས་སུ་བསམ་བློ་གཏོང་དགོས་པ་མང་པོ་འདུག །རྩོད་པའི་སྐབས་སུ། དམ་བཅའ་འདུག་པ་ཡིན་ན། གཞན་སྟོང་བགྲོ་གླེང་ལྟ་བུ་དམ་བཅའ་ཁག་འཚོགས་ཡོང་དུས། ཆོས་ཀྱི་གནད་དྲིལ་བ་ཞིག་དང༌། གྲུབ་མཐའ་སྤྱི་དང་གཞུང་སྤྱིའི་བབ་དང་མཐུན་པའི་དཀའ་གནས་ཤིག་གི་ཐོག་ནས་རྟགས་གསལ་གཏོང་དགོས་པ་རེད་མ་གཏོགས། ངག་སྒོ་ཡངས་པ་ཙམ་གྱི་སྒོ་ནས། ཡིན་ཏེ། མིན་ཏེ། ཟེར་བ་ཙམ་ཆོས་ར་ནས་བསྡུས་གྲྭ་ཅུང་ཙམ་སྦྱངས་ཟིན་པ་ཡིན་ན་དངོས་འགལ་ཞིག་གཏོང་ཐུབ་ཀི་ཡོད་པ་རེད། དཔེར་ན། ནས་ཀྱི་རྩམ་པ་ཆོས་ཅན། རྩམ་པ་ཡིན་ཏེ། ཟེར་ན་རྟགས་འགོད་དཀའ་བ་དང༌། མེ་ཡིན་ན་ཚ་བ་ཡིན་དགོས་ཏེ་ཟེར་ན་ཡང་རྟགས་འགོད་ཁག་པོ་འདྲ་ཆགས་རྒྱུ་རེད་དེ། དེ་འདྲ་ཞིག་ལ་གནད་འགག་བཏང་ཟེར་བ་མ་རེད། འཇིག་རྟེན་གྱི་ཁ་དཔེར། ཉི་མ་འགྲོ་ཐབས། ཐང་མ་སྐམ་ཐབས། ཟེར་བ་ལྟ་བུ་ཞིག་ཡོང་གི་ཡོད་པ་རེད། ངག་སྒོ་ཡངས་བ་རེ་ཡིན་ན། སྐད་མཐོན་པོ་ཅན་ཚོས་མཆོང་ལྡིང་བྱས་འདུག་ན། ཚང་མས་མཁས་པ་རེད་ཟེར་བ་ཞིག་ཡོང་གི་ཡོད་ན་ཐང་སྟེ། དོན་གྱི་མཁས་པ་དེ་ཡོང་ཐུབ་ཀི་མི་འདུག །གདན་ས་ཁག་ཏུ་འདི་འདྲ་ཞིག་རེད། ཚང་མས་འཚང་ཁ་མི་རྒྱབ་པར། དཔེ་ཆ་ཡག་པོ་ཅན། གོ་རྒྱུ་ཡོད་པར་གཏོང་མཁན་ཚོས་དོགས་དཔྱོད་ཡག་པོ་གཏོང་དུས་ཚང་མས་དེ་ལ་གསན་ནས། དེ་ལ་རྟགས་གསལ་གཏོང་དུ་འཇུག་གི་ཡོད་པ་རེད། དེ་ལས་གཞན། ཡིན་ཏེ། མིན་ཏེ། ཟེར་ནས་དངོས་འགལ་ཙམ་གཏོང་བ་ལ། ཉི་མ་འགྲོ་ཐབས་ཙམ་ལས་ཕན་པ་ཆེན་པོ་ཡོད་པ་མ་རེད། དེས་ན་ངས་གང་ཞུ་གི་ཡོད་ཞུ་ན། རྩོད་པ་རྩོད་པའི་སྐབས་སུ། ལུང་རིགས་ཀྱི་རྒྱབ་ལྗོངས་ཡོད་པའི་སྟེང་ནས། གཞུང་སྤྱིའི་བབ། གྲུབ་མཐའ་སྤྱིའི་བབ། མདོར་ན། ཆོས་གཞུང་གི་དཀའ་གནས་ཤིག་གོང་འོག་བསྒྲིགས་ཏེ། འདི་འདྲའི་མཁས་དབང་མང་པོ་འཛོམས་ས་དེ་རྩོད་པ་རྩོད་དགོས་ཀི་འདུག་ཞུས་པ་ཡིན། རྟོགས་པའི་བསྟན་པ་ཡིན་ན། སྤྱིར་བསླབ་པ་གསུམ་གྱི་ཉམས་ལེན་དང༌། ཡང་དགོས་སུ་དཔལ་ལྡན་རྒྱལ་བ་ཇོ་ནང་པར་མཚོན་ན། དུས་འཁོར་གྱི་སྒྲུབ་བརྒྱུད་དེ་ཧ་ཅང་ཡག་པོ་ཞིག་ཡོད་པ་རེད། སྤྱིར་བཏང་ཡིན་ན། བཤད་སྒྲུབ་གཉིས་པོ་འགལ་མེད་གྲོགས་སུ་བརྟེན་ནས་འགྲོ་དགོས་པ་རེད། གང་ཤེས་པ་དེ་སྒོམ། གང་མ་ཤེས་པ་དེ་ཐོས་བསམ་བྱེད་རྒྱུ་ཧ་ཅང་གལ་ཆེན་པོ་རེད། མི་ཚེ་ཐུང་ཐུང་ཞིག་ལ་ཐམས་ཅད་ཤེས་མི་ཐུབ་ན་ཡང༌། བློ་ལྡོག་རྣམ་བཞི་ཡིན་ན་འདྲ། གང་སྒོམ་དགོས་ན་དེ་ལ་སློབ་སྦྱོང་དགོས་པ་རེད། ལས་འབྲས་ལ་ཡིད་ཆེས་ཡོད་པའི་སྟེང་ནས། ཟག་བཅས་ཉེར་ལེན་གྱི་ཕུང་པོ་འདི་མི་རྟག་པ་ཡིན་པར་ཤེས། སྡུག་བསྔལ་བ་དེ་སྡུག་བསྔལ་བ་ཡིན་པར་ཤེས་ཏེ། འཆི་བ་མི་རྟག་པའི་བློ་རྒྱུད་ལ་སྐྱེས་སོང་བ་ཡིན་ན། ཆོས་མ་བསྒྲུབ་རང་བསྒྲུབ་ཡིན་པ་ཆགས་འདུག་ཡོད་པ་རེད། ལས་འབྲས་ལ་ཡིད་ཆེས་ཡོད། རྒྱུ་མི་དགེ་བ་བྱས་པ་ལས། འབྲས་བུ་སྡུག་བསྔལ་བ་འབྱུང༌། དགེ་བ་བྱས་པ་ལས་འབྲས་བུ་བདེ་བ་འབྱུང་གི་ཡོད་པ་རེད། སྡུག་བསྔལ་ནི་མི་འདོད། བདེ་བ་ནི་འདོད་པ་དེ་ཆགས་ཡོད་པ་རེད། ཡུན་རིང་པོ་ཞིག་ལ་བསྡད་དབང་མེད་པར་འཆི་བ་མི་རྟག་པ་ཡིན་པར་ཧ་གོ་འདུག་ཡོད་པ་རེད། དེ་འདྲ་ཞིག་ལ་བསམ་བློ་གཏོང་ཡོང་ན་ད་གཟོད་ང་ཚོས་ཆོས་མ་བསྒྲུབ་རང་བསྒྲུབ་ཡིན་པ་རང་གོ་རང་ལ་འཕྲོད་ཡོང་གི་རེད། མདོར་ན། ཐོས་བསམ་སྒོམ་གསུམ་གྱི་བསྟན་པ་བཤད་སྒྲུབ་གཉིས་པོ་འགལ་མེད་དུ་བཟུང་དགོས་པ་རེད། སློབ་གཉེར་བ་རྣམ་པ་ཡིན་ན་ཡང༌། གང་ལ་གང་འཚམ་གྲྭ་ས་ཁག་ཏུ་ཡང་གྲྭ་སར་འགྲོ་དགོས་པ་རེད། དིང་སང་གྲྭ་རྐྱང་ཚོ་ཉམ་ཆུང་བ། ཁེ་དབང་མེད་པ། བཤད་དབང་མེད་པ། འགྲོ་དབང་འདུག་དབང་མེད་པ། ཐ་ན་དཔེ་ཆ་ཞིག་ལྟ་འདོད་ཀྱང་ལྟ་དབང་མེད་པ་ལྟ་བུ་ཞིག་ཆགས་འདུག །དཔེ་ཆར་ལྟ་བའི་དུས་ཚོད་དེ་ཕལ་ཆེར་ལོ་བཅོ་ལྔ་ནས་ཉི་ཤུའི་ནང་བར་ཙམ་ལས་ཡོང་གི་ཡོད་པ་མ་རེད། དེ་འདྲའི་དུས་ཚོད་རྩ་ཆེན་པོ་ཞིག་ཁོར་ཡུག་ཆུང་ས་ཞིག་ལ་འདུག་བཞག་པ་ཡིན་ན་གྱོང་གུད་རེད། འཛམ་གླིང་གི་སློབ་གྲྭ་ཆེ་ཆུང་གང་ཡིན་ན། དང་པོ། སློབ་ཆུང་ལ་འགྲོ་དགོས་པ་དང༌། དེ་ནས་སློབ་འབྲིང༌། དེ་ནས་སློབ་ཆེན་དང་ཞིབ་འཇུག་སློབ་མར་འགྲོ་གི་ཡོད་པ་རེད། རབ་བྱུང་ན། ཕྱི་རྒྱལ་གྱི་སློབ་གྲྭ་ཆེ་ཁག་ཏུ་ཡང་སློབ་སྦྱོང་ལ་འགྲོ་གི་ཡོད་པ་དེ་ཚང་མར་མཁྱེན་གསལ་ལྟར་རེད། དེས་ན། བླ་མ་རེ་ཟུང་གིས། རང་གི་འཁོར་གཡོགས་ཙམ་གྱི་ཆེད་དང༌། རང་གི་བསམ་བློ་ཙམ་ལ་ཤེས་རྟོགས་བཅོལ་ནས། ཚེ་འདི་ཕྱིའི་རེ་ལྟོས་འཆའ་བའི་སློབ་མ་ཚོའི་མི་ཚེ་འཕྲོ་བརླག་བཏང་བཞག་པ་རྣམས་ཧ་གོ་ན་དངོས་གནས་ཡིད་མི་བདེ་བ་ཡོང་གི་འདུག །དཔེར་ན། ན་ཆུ་ལྟ་བུའི་ཆུ་ཆུང་ངུ་ཞིག་ཏུ་ཉ་ཆེན་པོ་ཞིག་ཡོང་མི་ཐུབ་པ་དང༌། རྒྱ་མཚོ་དང་ཆུ་ཆེན་པོའི་ནང་དུ་ཉ་ཆེན་པོ་ཡོང་གི་ཡོད་པ་ནང་བཞིན་རེད། རང་དགོན་གཅིག་པུར་བསྡད་ནས་མཁས་པ་ཆེན་པོ་ཆགས་སོང་བའི་ལོ་རྒྱུས་མེད་པ་ལྟ་བུ་ཞིག་རེད། སྤྱིར་བཏང༌། དགོན་པ་ཆུང་ཆུང་ཚོར་གྲྭ་སར་མངག་ན་རང་དགོན་དུ་བཤད་གྲྭ་འཛིན་མི་ཐུབ་པའི་དཀའ་ངལ་ཡོང་གི་རེད་དེ། གསེར་ནག་གི་ཕུལ་ཁ་མི་ལྟ་བར། རམ་ནག་གི་བྲེ་ཁ་ལྟ་སོང་བ་ཡིན་ན། ཅུང་འགྲིག་གི་མེད་པ་ཨེ་ཡིན་བསམས་ནས་ཅིག་ཞུས་པ་དེ་ཡིན། ཞེས་སོགས་གནད་དུ་སྨིན་པའི་བཀའ་སློབ་ཏུ་མ་ལྷུག་པོར་བསྩལ་ལོ། །བོད་ཟླ་བདུན་པའི་ཚེས་ཉེར་བདུན་གྱི་དགོང་མོར། གངས་ལྗོངས་རིས་མེད་ལྔ་རིག་མཐོ་སློབ་ཀྱི་སྐབས་གསུམ་པའི་མདོ་སྔགས་རབ་འབྱམས་པའི་དགེ་བཤེས་དམ་བཅའ་ཆེན་མོ་བཞག་ཅིང༌། སྐབས་དེར། ཉིན་ཡུལ་དགོན་ལུང་རྟོགས་རྒྱ་མཚོ། ཇོ་ནང་བསེ་དགོན་ཀུན་ཆོས། རྒྱལ་རོང་ཁང་སར་དགོན་དཀོན་མཆོག་བསྟན་འཛིན། རྒྱལ་རོང་ཛ་འགོ་དགོན་འོད་ཟེར། རྒྱལ་རོང་དར་སྐུ་དགོན་བསྟན་འཕེལ། མདོ་སྨད་ཇོ་ནང་གི་རྩ་བའི་འབྱུང་གནས་ཛཾ་ཐང་ཆོས་རྗེ་དགོན་མཐར་ཕྱིན་དཔལ་བཅས་ལ། འདེམས་ཐོན་ལྟར་མཁན་པོར་མངའ་གསོལ་མཛད། བོད་ཟླ་བརྒྱད་པའི་ཚེས་གཉིས་ལ། ཁྲིན་ཏུའུ་གྲོང་ཁྱེར་དུ་གྲྭ་ཇོ་སྔགས་གསུམ་གྱི་ཀུན་སྤྱོད་ཡར་སྐུལ་གྱི་བགྲོ་གླེང་སྟེང་དུ་ཕེབས་ནས། ཕྱི་ཉིན་མི་ལ་དགོས་པ་སྤྱོད་ཤེས་གཉིས་ཞེས་པའི་བརྗོད་གཞིའི་སྟེང་ཀུན་སྤྱོད་ཡར་སྐུལ་གྱི་གསུང་བཤད་གྱ་ནོམ་པ་གནང༌། ཚེས་བརྒྱད་པའི་ཉིན་སྔ་འགྱུར་རྙིང་མའི་གདན་ས་དྲུག་གི་དཔལ་ཡུལ་དགོན་ཆེན་གྱི་ནང་བསྟན་མཁས་དབང་བགྲོ་གླེང་མཐུན་ཚོགས་ཐེངས་དགུ་བའི་ཉིན་གཉིས་པའི་དགོང་མོར་གདན་ས་དེ་ཉིད་དུ་ཆིབས་བསྒྱུར་བསྐྱངས་ནས་ཆོས་རར་ཕེབས་ཏེ། གཞན་སྟོང་དབུ་མ་ཆེན་མོ་རྣམ་པ་ཀུན་ལྡན་དུ་དམ་བཅའ་མཛད་པ་ལ་ས་དགེ་བཀའ་རྙིང་གི་མཁས་དབང་རྣམ་པས་དོགས་འདྲི་དང་བརྒལ་བརྟག་གནང་བར་ཀུན་མཁྱེན་ཡབ་སྲས་སོགས་ཀྱི་དགོངས་པ་ཇི་བཞིན་དུ་ལན་གནང་ནས་གཞན་སྟོང་དབུ་མ་ཆེན་མོའི་སེངྒེའི་ངར་སྒྲ་བསྒྲགས་ཤིང༌། ཕྱི་ཉིན་ཡང་མཁས་པ་མཁས་པའི་ཁྲོད་ན་མཛེས་གསུངས་པ་བཞིན། མཁས་པ་ཕན་ཚུན་བར་གྱི་བགྲོ་གླེང་དྲི་མ་མེད་པའི་དུས་འདའ་བར་བྱས། ཚེས་བཅུ་ཐམ་པའི་ཉིན། གཞན་སྟོང་སྤྲོས་བྲལ་གྱི་དབྱིངས་རིག་ཡིན་པ་ཞེས་པའི་བརྗོད་གཞིའི་སྟེང་སྐར་མ་སུམ་ཅུའི་རིང་ལྟ་གྲུབ་དཔྱད་གླེང་དང༌། དེའི་རྗེས་སུ་སྐར་མ་སུམ་ཅུའི་རིང་རིས་མེད་མཁས་དབང་རྣམ་པས་ལུང་རིགས་ཀྱིས་བརྒལ་བརྟག་གནང་བ་ལ། སྐབས་བབ་ཀྱི་དྲིས་ལན་དང༌། བཅར་འདྲི་བྱས་པར། མ་འོངས་པར་གང་དྲན་དྲན་དུ་ལུང་དོན་མི་འཇོག་པར་ལུང་རྩ་ཆེན་བྱེད་རྒྱུ་གལ་ཆེན་པོ་ཡིན་པ་སོགས་ཀྱིས་བཀའ་སློབ་ལྷུག་པོར་བསྩལ། ཚེས་བཅུ་གཅིག་ཉིན་མདོ་སྟོད་དགུན་ཆོས་ཐེངས་ཉི་ཤུ་རྩ་གཅིག་པ་འབྲོམ་དགོན་དུ་ཚོགས་པར་ཕེབས་ཏེ། ཉིན་དེ་དང་ཕྱི་ཉིན་གཉིས་ཀྱི་སྲོད་ཆོས་དམ་བཅའ་ཆེན་མོའི་སྐབས་སུ། ལུང་རིགས་ཀྱི་བརྒལ་བརྟག་དང༌། མི་མང་ལ་བཀའ་སློབ་དང་ནང་ཆོས་ངོ་སྤྲོད་གནང༌། ཚེས་བཅུ་དྲུག་གི་ཉིན་གདན་ས་ཆེན་པོ་དཔལ་ལྡན་འབྲས་དཀར་སྤུངས་ནས་བཀའ་བཅུའི་མཚན་གནས་བསྩལ་ཞིང༌། གངས་ཅན་ཆོས་རིག་ལ་ཕྱིས་རྗེས་འཛད་མེད་བསྐྲུན་པར་གདན་སའི་ལས་འཛིན་མཁན་རིན་པོ་ཆེ་སོགས་ཀྱིས་ཆེད་བསྔགས་ཀྱི་ཕྲེང་བ་དུ་མའི་འཕྲིན་བཟང་བསྟུད་མར་བྱུང༌། བོད་ཟླ་དགུ་བའི་ཚེས་བཅུ་བཞིའི་ཉིན་ལོ་དེར་ཕར་ཕྱིན་མཐར་ཕྱིན་གྱི་མི་བཞི་བཅུ་རྩ་གཉིས་ཀྱིས་གངས་ལྗོངས་རིས་མེད་ལྔ་རིག་མཐོ་སློབ་གཙུག་ལག་སློབ་གཉེར་ཁང་གི་ཕར་ཕྱིན་དམ་བཅའ་ཆེན་མོ་ཐེངས་དགུ་བའི་མཚན་ཕུད་བཞག །ཚེས་ཉི་ཤུ་གཉིས་ལ་གདན་ས་ཆེན་པོ་དཔལ་ལྡན་འབྲས་དཀར་སྤུངས་སུ་དགེ་བཤེས་གཏོང་སྒོའི་གྲྭ་ཇ་བསྐོལ་ཞིང༌། ཡུལ་དགོན་དུ་མཆོད་མེ་ཁྲི་མཆོད་ལྷག་དང༌། གངས་ལྗོངས་རིས་མེད་མཐོ་སློབ་ནས་ཉིན་དེ་ནས་བཟུང་ཞག་ལྔ་ལ་སྐྱ་སེར་རིས་སུ་མ་མཆིས་པར་ཐེག་པ་ཆེན་པོའི་བསྙུང་གནས་ཀྱི་སྡོམ་པ་གནང་ལ། སྐབས་དེར་ཐེག་ཆེན་གསོ་སྦྱོང་གི་ཆོ་གའི་ཚིག་དོན་དང་ཕན་ཡོན་མདོར་བསྡུས་ཞེས་པ་དེ་ཉིད་བརྩམས། ཚེས་ཉེར་ལྔའི་ཉིན་བསེ་དགོན་རིས་མེད་མ་ཎི་ཆོས་ཚོགས་སྟེང་ནས་མི་མང་ལ་བཀའ་སློབ་ལམ་སྟོན་དང༌། སྐྱབས་སྡོམ་དང་སྐྱབས་འགྲོའི་བསླབ་བྱ་བཅས་ཀྱི་བཀའ་དྲིན་ཉེ་བར་བསྐྱངས། ཚེས་ཉེར་དྲུག་ཉིན་གང་གི་ཞབས་ཟུང་བསྟན་འགྲོའི་ཉེར་འཚོའི་དཔལ་དུ་གྱུར་བ་དེ་ཉིད་རྒྱལ་རོང་ཁང་སར་དགོན་དུ་ཉེ་བར་བཀོད་དེ། ཕྱི་ཉིན་ཞོགས་པར་ཐེག་པ་ཆེན་པོའི་གསོ་སྦྱོང་གི་སྡོམ་པ་དང༌། སྔ་དྲོར་ནང་ཆོས་ངོ་སྤྲོད་དང་བཀའ་སློབ་ལམ་སྟོན་དུ་མ་དང༌། ཕྱི་དྲོར་དགུང་གྲངས་བརྒྱད་ཅུ་རྩ་བརྒྱད་ལ་ཕེབས་པའི་དགོན་དེའི་རྡོ་རྗེ་སློབ་དཔོན་བླ་མ་ཤང་ཐར་སོགས་འདུས་སྤྱི་ལ་ཚེ་དཔག་མེད་ལྷ་གཅིག་བུམ་གཅིག་གི་དབང་བཅས་གནང༌། དེ་ནས་ཚེས་ཉེར་བརྒྱད་ལ་རྒྱལ་རོང་ཙག་དགེ་བ་དགོན་དུ་ཕེབས་ནས་མི་སྡེ་ཡོངས་ལ་ཆོས་འབྲེལ་ཟབ་མོ་དང་བཀའ་སློབ་རྒྱ་ཆེར་མཛད། ཚེས་ཉེར་དགུ་དང་ནམ་གང་གཉིས་ལ་པཱ་ལ་དགོན་དུ་རྒྱལ་རོང་བདེ་ཆེན་ཞིང་སྒྲུབ་ཆེན་མོའི་སྟེང་ནས། སྦྱོར་དངོས་རྗེས་གསུམ་དང༌། སྐྱབས་འགྲོ། བདེ་བ་ཅན་གྱི་རྒྱུ་ཚོགས་སྒྲུབ་ཚུལ་སོགས་ཆོས་ཁྲིད་དུ་མ་དང༌། བོད་རང་གི་སྤྱི་སྐད་གལ་ཆེ་ཚུལ་སོགས་ཆོས་དང་སློབ་སྟོན་དུ་མ་མཛད་ཅིང༌། གནམ་གང་གི་ཕྱི་དྲོར་ཛ་འགོའི་རི་ཁྲོད་དང་དགོན་དེའི་གྲྭ་མང་གིས་གཙོས། དད་ལྡན་མི་སྐྱ་འདུས་པ་ཡོངས་ལ་ངན་སོང་ཐམས་ཅད་རྣམ་པར་སྦྱོང་བ་རྒྱལ་བ་མི་འཁྲུགས་པ་ལྷ་དགུའི་དབང་བསྐུར་ཟབ་མོའི་བཀའ་དྲིན་བླ་ན་མེད་པ་བསྐྱངས་ཤིང༌། རྡོ་རྗེ་སློབ་དཔོན་ཆེན་པོ་བླ་མ་རྟོགས་ལྡན་མཆོག་དང་མཇལ་འཕྲད་གསུང་གླེང་གནང་ཞིང༌། ཐུགས་མཐུན་དག་གི་མོས་གུས་འཕེལ་བའི་རྐྱེན་ལས། བཤེས་གཉེན་རིན་པོ་ཆེ་ཕེབས་ཁར་བླ་མ་རྟོགས་ལྡན་རིན་པོ་ཆེ་བཤུམས་ནས་འབྲལ་མི་ཕོད་པ་ལྟ་བུར་མཛད། བླ་མ་གང་ཉིད་ནི་སྤྱིར་བཏང་རྟོགས་ལྡན་འཇིག་རྟེན་དང་མི་མཐུན་པའི་དཔེ་ལྟར། ཐུགས་སུ་དྲན་པ་ཤར་མར་གསུང་པ་ལས་བཅའ་བཅོས་གཏན་མི་གནང་པ་ཡིན་པ་ལ། ཛམ་ཐང་གཙང་བ་དགོན་དུ་མདོ་སྔགས་སློབ་གླེང་གསར་འཛུགས་བསྐོར་ཞིག་ལ་ཐོག་མར་མཇལ་སྐབས་ཀྱང༌། འཕྲད་མ་ཐག་ཐུགས་སྣང་འདྲེས་ཏེ་བཤུམ་པ་འབའ་ཞིག་མཛད་ཅིང༌། བཤེས་གཉེན་དམ་པ་གང་ཉིད་ཕེབས་ཤུལ་ནས་སློབ་མ་འགའ་རེར། ཁོ་བོས་ཚང་མའི་ཁ་ནས་དགེ་བཤེས་སང་ཟེར་ནས་མང་པོ་ཞིག་གླེང་འདུག་དུས། འདི་ཚོ་ཁ་མཁས་ལྕེ་མཁས་ཤིག་ཡིན་རྒྱུ་རེད་བསམ་པ་ལས། བླ་མ་འདི་འདྲ་ཁྱད་པར་བ་ཞིག་ཡིན་སྣང་མ་ཤར་ཞེས་ཐུགས་མོས་ཁྱད་པར་ཅན་མཛད་ཅིང༌། ཕྱིས་སུ་ཡང་འཚམ་རྟགས་སོགས་སྐབས་དང་སྐབས་སུ་བསྐུར་མ་མང་དུ་མཛད། ཉིན་དེའི་ནུབ་མོར་རྔ་ཡུལ་བསེ་དགོན་དུ་གངས་ལྗོངས་རིས་མེད་ལྔ་རིག་མཐོ་སློབ་གཙུག་ལག་སློབ་གཉེར་ཁང་ཆེན་མོར་གནོད་པ་མེད་པར་ཕེབས་སོ། ། ཁྲི་གདུགས་ཉ་གང་གཅིག་གི་སྣང་བ་ཡིས། ། གླིང་བཞིའི་ཁྱོན་ལ་ངལ་མེད་བསྐོར་བ་ལྟར། ། རླབས་ཆེན་སེམས་དཔའ་གཅིག་གི་ཕྱག་ལས་ཀྱིས། ། སེམས་སྟོར་དྭ་ཕྲུག་འབུམ་ལ་བློ་གྲོས་བསྩལ། ། སྙིགས་དུས་ཀྱི་བསྟན་པའི་གསལ་བྱེད་ཆེན་པོ་ངག་དབང་འཇིགས་མེད་དངོས་གྲུབ་དཔལ་བཟང་པོའི་མཛད་བཟང་བསླབ་གསུམ་ནོར་བུའི་གླིང་ཁ་ཞེས་བྱ་བ་ལས་རྒྱལ་བསྟན་རིས་མེད་བགྲོ་གླེང་ཆེན་མོ་ཐེངས་དང་པོ་དབུ་ཚུགས་པའི་བསྐོར་སོགས་ལོ་ཕྱེད་རིང་གི་རྣམ་ཐར་མདོར་བསྡུས་པ་སྟེ་སོ་དྲུག་པའོ། ། གནས་ལ་ཞེན་ཆགས་མེད་པར་དགོན་གནས་དུ་མར་ཕེབས་པའི་མཛད་འཕྲིན་གྱི་ཕན་འབྲས་གང་ཡིན་གྱི་རྣམ་ཐར།གོང་སྨོས་ལྟར་བཤེས་གཉེན་རིན་པོ་གང་ཉིད་དགོན་པ་དང་ས་ཕྱོགས་གཏན་སྡོད་མེད་པར་གང་དུ་བཤད་སྒྲུབ་ལུང་རྟོགས་ཀྱི་བསྟན་པ་འཁོས་དམན་ཞིང༌། ཕན་པའི་སྐལ་བ་ཡོད་མེད་བརྟགས་ནས་དེ་དང་དེར་ཞབས་སོར་བཀོད་དེ་ལུང་རྟོགས་ཀྱི་བསྟན་པ་རིན་པོ་ཆེ་འཛིན་སྐྱོང་སྤེལ་གསུམ་གྱི་ཕྱག་ལས་འཛད་མེད་གནང་མཐར། སླར་ཡང་དགོན་པ་ག་གེ་མོར་ཕེབས་འགྲོ་བ་ལས། གནས་ལ་ཆགས་པ་ཅུང་ཟད་ཀྱང་མི་མཛད་པར་མ་ཟད། ཉིན་མཚན་ལྟོས་མེད་དུ་རང་གིས་འབད་དེ་བཙུགས་པའི་བཤད་སྒྲུབ་འདུས་པའི་སྡེ་ཆེ་ཆུང་གང་ཡིན་ཡང་རང་རྐྱ་ཕེར་ཚོད་དུ་ཐོན་པ་ན། འདི་ངས་བྱས་ཡོང་པ་དང་འབད་ཡོང་པ་ཡིན་ཟེར་ནས། རང་ཉིད་ཀྱི་མངའ་ཐང་ཁ་འཛིན་གྱི་རྟེན་གནས་སུ་ཞེན་པ་ཕྲ་མོ་ཙམ་ཡང་མི་བཞེས་པར། གནས་དང་གྲུབ་པའི་བྱ་བ་གང་ལ་ཡང་ཆགས་པ་བྲལ་ཞིང་འཛིན་པ་མེད་པ་འདིས་ནི། ཕྱག་ལས་ཆེ་ཆུང་ཚང་མ་བསྟན་འགྲོ་འབའ་ཞིག་ཐུགས་སུ་བཏགས་པ་ལས་རང་དོན་འཇིག་རྟེན་པའི་བསམ་པ་ཡོངས་སུ་དག་པ་ཡིན་པར་རྟགས་ཡང་དག་གིས་དཔོག་པར་ནུས་སོ། །དེར་མ་ཟད། དགོན་པ་དང་ཡུལ་ཕྱོགས་མང་པོར་ཕེབས་པའི་རྐྱེན་ལས། དགོན་གཞིས་གཅིག་ཏུ་བཤད་སྒྲུབ་ཀྱི་སྡེ་བསྐྱངས་པ་ཙམ་གྱི་ཕན་འབྲས་མ་ཡིན་པར། དགོན་པ་ཆེ་འབྲིང་ཆུང་གསུམ་དུ་མ་ན་བཤད་སྒྲུབ་ཀྱི་བསྟན་པ་དང༌། ན་བཟའ་གྱོན་ལུགས་ནས་ཆོས་འདུལ་བ་ལྟར་གྱི་སྒྲིག་ཀུན་སྤྱོད། ཐ་ན་དགོན་པའི་སློབ་ཆུང་དང་སྐབས་སྐབས་སུ་གསབ་སྦྱོང་འཛིན་གྲྭ་བསྡུ་བ་དང༌། བདེ་ཆེན་ཞིང་སྒྲུབ་དང་བསྙུང་གནས་ཡན་ཆད་ཀྱིས་སྐྱ་སེར་རྒན་གཞོན་ཐམས་ཅད་ལ་སྐལ་པ་དང་འཚམ་པའི་བགོ་སྐལ་དུ་མ་འཛད་མེད་དུ་བསྐྲུན་པའི་རྣམ་དཀར་འཕྲིན་ལས་ཀྱི་སྣང་བ་རྒྱ་ཆེན་པོ་འདི་ཉིད་འཇིག་རྟེན་ན་མངོན་པར་གསལ་བ་ལགས་ཏེ། དེ་ལྟར་ཡང༌། མདོ་སྡེ་རིན་པོ་ཆེ་རྣམས་ཀྱི་གླེང་གཞི་ལས། འདི་སྐད་བདག་གིས་ཐོས་པ་དུས་གཅིག་ན་རྒྱལ་པོའི་ཁབ། ཅེས་སོགས་དུས་གཅིག་ན་ཞེས་པའི་དོན་འཆད་ཅིང་དགོས་པ་བཤད་པར། རྣམ་བཤད་རིགས་པ་ལས། ཡུལ་གཞན་གདུལ་བར་བྱ་ཕྱིར་དང༌། །ཆགས་པ་མེད་པར་བསྟན་པ་དང༌། །ཡུལ་རྣམས་མཆོད་རྟེན་བྱ་ཕྱིར་དང༌། །འགྲོ་བའི་བསོད་ནམས་དོན་ཉིད་དང༌། །ཡམས་ལ་སོགས་པ་ཞི་དོན་དུ། །སངས་རྒྱས་རྒྱུ་བར་མཛད་པ་ཡིན། །ཞེས་བཅོམ་ལྡན་འདས་ཡུལ་གཅིག་ལ་གཏན་དུ་མི་སྡོད་པར་ཡུལ་གཞན་དང་གཞན་དུ་གཤེགས་པ་དེ། ཡུལ་ལ་ཆགས་པ་མེད་པར་བསྟན་པའི་དོན་དང༌། ཡུལ་མང་པོར་ཕེབས་པས་ས་ཕྱོགས་མང་པོར་ཉན་ཐོས་ཏེ་དགེ་འདུན་གྱི་སྡེ་ཚུགས་ཤིང་སངས་རྒྱས་ཀྱི་བསྟན་པ་ཡུལ་མང་པོར་འཕེལ་བ་སོགས་དགོས་པ་དྲུག་ཇི་སྐད་བཀའ་བསྩལ་པ་ལྟར་དང༌། ཕ་ཡུལ་སྤོང་པ་རྒྱལ་སྲས་ལག་ལེན་ཡིན། །ཞེས་པའང་གནས་གཅིག་ལ་སྡོད་ཡུན་རིང་ན་ཡུལ་ལ་ཆགས་སྡང་ཁ་འཛིན་གྱི་ལས་མང་པོ་འཕེལ་བའི་དབང་གིས་གསུངས་པ་ཡིན་ལ། བླ་མ་གོང་མ་འགའ་རེའི་རྣམ་ཐར་ན་ཡང་འཇིག་རྟེན་གྱི་ཁ་འཛིན་ཆགས་པ་ལ་འབྲོས་ཕྱིར་ཡུལ་ངེས་མེད་དུ་གཤེགས་ནས་ཐོས་བསམ་སྒོམ་པའི་མཛད་པ་བསྐྱངས་པའི་ལོ་རྒྱུས་དུ་མ་གསལ་བ་བཞིན་ནོ། །ལྟ་སྤྱོད་གཙང་མ་སངས་རྒྱས་བཅོམ་ལྡན་འདས་ཀྱི་དམ་པའི་ཆོས་འདུལ་བ་ལས་ཇི་སྐད་བཀའ་བསྩལ་པ་ལྟར་གྱི་རབ་བྱུང་ངུར་སྨྲིག་གི་སྡེ་ཕྱག་བྱར་འོས་པ་སྤུས་དག་ཅིག་འོང་པ་ལ་ཁ་ནས་བཤད་པ་ཡམས་ཡམས་ཙམ་མིན་པར། ཕྱག་ལས་དང་གསུང་བཀའ་མང་པོ་བསྩལ་བའི་རྐྱེན་ལས། ལོག་པར་མོས་པ་འགའ་རེར་ཡིད་ལ་མི་འཐད་པ་འབྱུང་པ་ནི་བཟློག་ཏུ་མེད་ཀྱང༌། དགོན་པ་གང་ཞིག་ཡིན་ཡང་དེར་ཆོས་པ་རྣལ་མ་གཉོམ་ཆུང་ཚུལ་མཐུན་དང༌། བསྟན་པ་རིན་པོ་ཆེ་ལ་ཤ་ཚ་གྲོས་འདེབས་ཀྱི་དམ་པ་ཐམས་ཅད་དང་ཐུགས་དགོངས་མཐུན་པ་ཁོ་ན་བྱུང་པ་ལས། ཕན་ཚུན་རྩོད་པ་ཕྲན་བུ་ཙམ་ཡང་བྱུང་པ་མེད་དེ། སོ་སོར་ཐར་བའི་མདོ་ལས། ཇི་ལྟར་བུང་བ་མེ་ཏོག་ལས། །ཁ་དོག་དྲི་ལ་མི་གནོད་པར། །ཁུ་བ་གཞིབས་ནས་འཕུར་བ་ལྟར། །དེ་བཞིན་ཐུབ་པ་གྲོང་དུ་རྒྱུ། །ཞེས་གསུངས་པ་ལྟར་རོ། །སྤྱིར་ནི། བྱང་ཆུབ་ཀྱི་སེམས་རིན་པོ་ཆེ་བདག་བས་གཞན་གཅེས་ཀྱི་བྱམས་སྙིང་རྗེའི་ཏིང་ངེ་འཛིན་ལས་གནས་པ་ལ་ཡང༌། བདུད་རྣམས་ཞེ་སྡང་ཞིང་བར་ཆད་རྩོམ་པ་ཡིན་ལ། ཐུབ་པ་ཆེན་པོས་བསྐལ་པ་གྲངས་མེད་པར་དབུ་དང་སྲོག་གི་སྦྱིན་པ་བྱས་ཏེ་བདག་གཞན་བརྗེ་བའི་ཕྱིན་དྲུག་གི་ཉམས་ལེན་ལྷུར་བཞེས་པ་ལ། བར་ཆད་དང་མི་མཐུན་པའི་སྦྱོར་བ་མཚམས་མ་ཆད་པར་བྱུང་པ་སྐྱེས་རབས་རྣམས་སུ་གསལ་བ་ལྟར་དང༌། བྱང་ཆུབ་ཤིང་དྲུང་དུ་འགྲོ་བ་རྣམས་འདུལ་བའི་དོན་དུ་རང་ཉིད་ཅིག་པུར་རྡོ་རྗེ་ལྟ་བུའི་ཏིང་ངེ་འཛིན་ལ་མཉམ་པར་བཞག་པ་ན། གཞན་འཕྲུལ་དབང་བྱེད་བར་གྱི་བདུད་རྣམས་ཡིད་འཁྲུགས་ཤིང་ལྷགས་ནས་བར་ཆད་བརྩམས་པ་སོགས། ལས་གང་ཞིག་བྱས་ཀྱང་མི་མཐུན་པའི་ཕྱོགས་རེ་ངེས་པར་ཡོད་ཀྱང༌། སྐྱེས་བུ་དམ་པ་དག་དང་ལས་རྒྱུ་འབྲས་དང་ཁས་བླངས་པའི་སྡོམ་པ་གསུམ་དང་འགལ་མིན་ལྟ་བ་འདི་ཁོ་ན་གནད་ཀྱི་དམ་པ་ཡིན་ཏེ། རྒྱུ་རྐྱེན་ལས་སྐྱེས་ཚད་ཀྱི་དངོས་པོ་མ་ལུས་པར་རང་དང་ལྷན་གཅིག་མི་གནས་འགལ་དུ་གྱུར་བའི་འགལ་ཟླ་མེད་པ་སུ་ཡང་མེད་ལ། ཐམས་ཅད་མགུ་བ་བཅོམ་ལྡན་འདས་ཀྱིས་ཀྱང་མ་བྱུང་པར་རྒྱལ་སྲས་ཞི་བ་ལྷས་གསུངས་པ་བཞིན་ནོ། །རྗེས་ཤུལ་བརྟག་ཐབས་ལ་མཁས་པའི་མིས་རྗེས་ལ་བརྟེན་ནས། གཅན་ཟན་དང་རྟ་ནོར་རི་བོང་བྱ་བྱེའུ་སོགས་མ་འདྲེས་པར་སོ་སོར་དཔོག་ནུས་པ་ལྟར། ཡུལ་དགོན་གང་ཞིག་ནས་ཕེབས་ཤིང་གང་ཞིག་ཏུ་གཤེགས་པའི་རྗེས་ཤུལ་དུ་བཤད་སྒྲུབ་ལུང་རྟོགས་ཀྱི་བསྟན་པ་ཆོས་འདུལ་བ་གཞིར་བཟུང་གི་སྒྲིག་ཀུན་སྤྱོད་ཀྱི་ཞབས་རྗེས་རེ་རེ་མངོན་པ་ནི། བསྟན་འཛིན་དམ་པའི་རང་རྟགས་ཐུན་མོངས་མིན་པའི་འབྲས་རྟགས་ཡིན་ལ། སྤྱིར་བཏང་ཡང༌། འཇིག་རྟེན་གྱི་མི་ཞིག་གི་རིན་ཐང་ནི་བྱས་པའི་རྗེས་ཤུལ་ལས་ཚད་འཛིན་དགོས་ཀྱི། གཡོ་སྒྱུ་ཕྱི་ནང་མི་མཚུངས་པ་ལུགས་གཉིས་དང་འགལ་བར་སྤྱོད་པ་འགའ་རེ་ཡང་གནས་སྐབས་སུ་ཡུལ་ལུང་རེ་ན་ཤེད་ཆེ་བ་དང་འཁོར་ལོངས་སྤྱོད་འདུ་བ་ཙམ་ཡོད་ཀྱང༌། དེ་ཙམ་གྱིས་རླབས་ཆེན་དང་དམ་པར་འཛམ་གླིང་གི་དཔྱོད་ལྡན་སུས་ཀྱང་བལྟ་བ་མ་ཡིན་ནོ། །དེས་ན། གཞན་ཕན་རྣལ་མའི་སྤྱོད་པ་རང་དོན་གྱི་འཁྲི་བ་ཆུང་བའི་བསྟན་ཞབས་ཀྱི་ཕྱག་ལས་ནུས་ཚོད་དང་བསྟུན་ནས་བསྒྲུབ་པ་ལ། རྗེས་ཞུགས་དག་གིས་ཀྱང་ལེ་ལོ་སྒྱིད་དང་བར་ཆད་ཀྱིས་སྐྱོ་ངལ་བག་འཁུམས་མེད་པ་གལ་ཆེ་སྟེ། ཇོ་བོ་གསེར་གླིང་པའི་ཞལ་སྔ་ནས། རྟོག་པ་ཐམས་ཅད་འབུར་འཇོམས་ཡིན། །གཉེན་པོ་ཐམས་ཅད་བཅོམ་བརྡེག་ཡིན། །འདུན་མ་ཐམས་ཅད་ཆིག་དྲིལ་ཏེ། །ལས་རྣམས་ཐམས་ཅད་ཆིག་ཆོད་ཡིན། །གཉེན་པོ་རྣམ་བྱང་གི་ཆོས་བཞི་སྟེ། །མཐའ་འཁོབ་འདུལ་ན་དགོས་པ་ཡིན། །འཁོར་ངན་ལོག་སྒྲུབ་བཟོད་པ་ལ། །སྙིགས་མའི་དུས་སུ་མཁོ་བ་ཡིན། །ཞེས་ལོག་སྒྲུབ་དང་རྐྱེན་གྱིས་སྐྱོ་ངལ་མེད་ཅིང༌། ལས་དང་འདུན་པ་མ་ལུས་པ་རིགས་གཅིག་རྐང་འཛིན་བྱེད་དགོས་པ་དང༌། དེའི་ཆ་ལག་ཏུ་བློ་སྦྱོང་གི་བསམ་པ་རང་དོན་གྱི་ཞེན་པ་གཅོད་པའི་མན་ངག་སྤྱིར་ཟབ་པར་མ་ཟད། སྙིགས་མའི་དུས་དེང་གི་ཆར་ལྷག་པར་བསྟེན་དགོས་གསུངས་པ་ལྟར། རྣམ་པར་ཐར་བའི་མཛད་བཟང་ལྷད་མེད་པ་འདི་ལྟ་བུ་དང༌། གཞན་ཡང་རིན་པོ་ཆེ་ལྟ་བུའི་སྐྱེས་བུ་དམ་པ་གཞན་དག་གི་སྤྱོད་ཚུལ་རྣམས་ཀྱང་ཇི་རིགས་པར་བསམས་ཏེ་འབད་པར་བྱ་བ་གལ་ཆེན་པོར་འདུག་སྙམ་མོ། ། ཐབས་ཤེས་ཟུང་ལྡན་འཕུར་ལྡིང་གར་གྱིས་འགྲོ་སེམས་གཙང་མའི་ནམ་མཁའ་རུ། ། ཕན་བདེ་གསུང་གི་དབྱར་རྔ་སྒྲོག་བཞིན་བདུད་རྩི་སིམ་པའི་ཆབ་རྒྱུན་གྱིས། ། རིས་མེད་འགྲོ་བའི་ཞིང་ས་གཤིན་པོར་ཆོས་རིག་འབྲས་ཁུར་སྦྱིན་བྱེད་པའི། ། རང་དོན་འཁྲི་བྲལ་ཐུགས་སྟོབས་བརྟན་པོའི་བྱང་སེམས་སྤྱོད་པས་ས་ཆེན་མཛཻས། ། སྙིགས་དུས་ཀྱི་བསྟན་པའི་གསལ་བྱེད་ཆེན་པོ་ངག་དབང་འཇིགས་མེད་དངོས་གྲུབ་དཔལ་བཟང་པོའི་མཛད་བཟང་བསླབ་གསུམ་ནོར་བུའི་གླིང་ཁ་ཞེས་བྱ་བ་ལས་གནས་ལ་ཞེན་ཆགས་མེད་པར་དགོན་གནས་དུ་མར་ཕེབས་པའི་མཛད་འཕྲིན་གྱི་ཕན་འབྲས་གང་ཡིན་གྱི་རྣམ་ཐར་མདོར་བསྡུས་པ་སྟེ་སོ་བདུན་པའོ། ། རྣམ་ཐར་འདི་ཇི་ལྟར་བྲིས་པའི་བསྐོར་གྱི་གསལ་བཤད།དྲི་མ་མེད་པར་གྲགས་པས་ཞུས་པའི་མདོ་ལས། རབ་འབྱོར། གང་ལ་ལ་ཞིག་གིས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདིར། རིན་པོ་ཆེ་སྣ་བདུན་གྱིས་རབ་ཏུ་གང་བར་བྱས་ཏེ། སྦྱིན་པ་བྱིན་ན་བསོད་ནམས་མང་དུ་བསྐྱེད་དམ། རབ་འབྱོར་གྱིས་གསོལ་པ། བཅོམ་ལྡན་འདས་མང་ལགས་སོ། །བདེ་བར་གཤེགས་པ་མང་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། རབ་འབྱོར། གང་ལ་ལ་ཞིག་གིས་བླ་མའི་རྣམ་ཐར་གྱི་ཚིགས་བཞི་པའི་ཕྱེད་ཙམ་སྟོན་ན། དེ་བས་བསོད་ནམས་མང་དུ་བསྐྱེད་པར་འགྱུར་རོ། །ཞེས་དང༌། གཞོན་ནུ་ལུང་བསྟན་པའི་མདོ་ལས། གཞོན་ནུ་སློབ་དཔོན་གྱི་མཚན་ཉིད་བཤད་པར་བྱའོ། །མཁན་པོའི་ཡོན་ཏན་གྱི་བཤད་པ་ལ་བརྩོན་ཅིག །ཅེས་དང༌། འཕགས་པ་གཎྜི་རྒྱས་པའི་མདོར། སློབ་དཔོན་མཚན་ཉིད་སུས་བཤད་པ། །བསོད་ནམས་མཐའ་ཡས་དཔག་མེད་ཐོབ། །ལྷ་ཡིས་བསྲུང་ལ་བར་ཆད་མེད། །དེ་ཕྱིར་བླ་མ་ལ་གུས་ཤིག །ཅེས་དང༌། བྱང་ཆུབ་ཤིང་དྲུང་དུ་འཇུག་པའི་མདོར། འོད་སྲུང་བླ་མའི་རྣམ་ཐར་ལ་རྟོགས་ཤིང་བཤད་པར་གྱིས་ཤིག །མཁན་པོའི་མཚན་ཉིད་ལ་ནན་ཏན་གྱིས་ཤིག །ཅེས་སོགས་བླ་མའི་རྣམ་ཐར་འཆད་པའི་ཕན་ཡོན་བསམ་མཐའ་ཡས་པར་གསུངས་པ་དག་སེམས་ལ་བཞག་ནས། ལྔ་ལམ་དུ་འགྲོ་བའི་བསོད་ནམས་རྣམ་དཀར་གྱི་རིམ་གྲོ་ཞིག་ཏུ་རེ་ནས་བྱས་པ་ཡིན་ལ། ཆོས་མཆེད་གྲོགས་པོ་མང་པོས་ཀྱང་རང་ཅག་བཤེས་གཉེན་རིན་པོ་ཆེའི་མཛད་པ་ཕྱོགས་གཅིག་ཏུ་འཁོད་པ་ཞིག་ཕྲིས་ཤིག་ཅེས་རེ་བ་བསྩལ་ཞིང༌། ད་སྔོན་རང་གི་ཤེས་ཚོད་ཀྱི་ཕྱག་ལས་མཛད་པ་དག་རང་དགར་བོར་དུ་ཕངས་པ་ཁོ་ནས་བྱས་ཀྱི། བཤེས་གཉེན་བཀའ་དྲིན་མཚུངས་པ་མེད་པའི་སྡེ་གང་གི་སློབ་མ་སློབ་བརྒྱུད་ཀྱིས་རྒྱལ་ཕྱི་ནང་འགེངས་བཞིན་པ་ཡིན་ན། ང་ནི་ཆོས་གྲོགས་མཁས་བཙུན་བཟང་པོའི་ཡོན་ཏན་གྱིས་བརྗིད་པ་དག་གི་གསེབ་ན་སྲིན་འབུ་མེ་ཁྱེར་གྱི་རྣམ་པ་ཞིག་ལས་ཅི་ཡང་མ་ཡིན་པས། འབྲི་བའི་ཁུར་བབ་རྒྱུ་ཅི་ཞིག་ཡོད་དེ། ཁོང་བསླབ་གསུམ་གྱི་ཡོན་ཏན་ལྡན་པའི་གཙུག་ནོར་དག་གི་མཛད་པ་ཆོས་པའི་ཐོ་ཡོར་ཞིག་གིས་བྱས་ན་མི་འཚམ་པ་ཤེས་མོད། རང་གིས་གོ་ཐོས་རྣམས་ས་བོན་དུ་བསྡུས་ནས་བསྟན་པ་ཙམ་ཡིན། སྤྱིར་ཡོན་ཚད་མེད་པའི་ཁར། ད་ལན་ཟང་ཟིང་བྲེལ་བྲེལ་ཚུབ་ཚུབ་ཅིག་གི་ནང་དུ་རྟབ་རྟབ་པོར་བྲིས་པའི་རྐྱེན་ལས། ཕྱིར་འཁོར་ནས་བལྟས་པ་ན་ཡིད་མ་ཚིམས་པའི་ཆ་མང་པོ་མཐོང་རྒྱུ་འདུག་ལ། ལྷག་པར་དུ་འཚོགས་འདུ་དང་ཕེབས་བཞུད་རྣམས་ཤེས་ཚོད་ཐམས་ཅད་བྲིས་པ་མང་དྲགས་པས་ཉོག་ཆེས་པའི་སྣང་བ་ཞིག་ངང་གིས་བྱུང་ཡང༌། རེ་ཞིག་བསྒྱུར་བཅོས་མ་བྱས་པར་རང་སོར་བཞག་པ་ཡིན། སྤྱིར་སློབ་མས་བྲིས་པའི་རྣམ་ཐར་ཕལ་ཆེར་ལ་སྤོམ་ཡོར་གྱི་བཤད་པ་ཐལ་ཆེ་བའི་སྐྱོན་ཡོད་པའི་བཤད་སྲོལ་ལྟར་མི་འགྲོ་བའི་ཐད་ལ་བསམ་མནོ་གཟུར་བོར་བཏང་བའི་ཁུལ་ཡིན་པས། སློབ་གསོ་རེ་ཟུང་རེག་ཟིག་ཏུ་བཀོད་པའི་ནང་ཚིག་སྣེ་རེ་སྟབས་བདེ་བར་བཅོས་པ་ཡོད་ཀྱི། དེ་ལས་གཞན་སྐུར་འདེབས་སུ་སོང་ཡོད་པའི་དོགས་པ་ལས་སྒྲོ་བཏགས་པ་ཡོད་པར་མི་སེམས་ཀྱང༌། སྒྲོ་སྐུར་ཇི་སྙེད་བྱུང་ངོ་ཅོག་ཚང་མ་ནོངས་པ་ཁོ་ནས་དབང་གིས་ཡིན་གྱི། ཆེད་དུ་རྫུན་སྣེ་རྫུན་བསྒྲིགས་ཀྱིས་བློ་བཟོ་བྱས་བཞག་པ་ནི་གཅིག་ཀྱང་མེད་དེ། སྐུར་འདེབས་མི་རུང་ན་སྒྲོ་འདོགས་པའང་ཅི་སྟེ་ཆོག །ཁྱད་པར་དུ། ཡར་མར་ཕེབས་བཞུད་རྣམས་བྲིས་ཏེ་སློབ་གླིང་དུ་དཔེ་ཁྲིད་དང་ཕྱག་ལས་ཅི་གནང་བསྐོར་ཆ་མ་ཚང་བའི་སྐྱོན་ཆ་ཞིག་ཀྱང་འདུག་སྟེ། སློབ་གླིང་དུ་འཛིན་གྲྭ་བཅུ་གསུམ་བཅུ་བཞིའི་རེའི་ཆོས་ཁྲིད་ཚང་མ་ཉིན་མཚན་ཐོ་སྤྲད་དེ་སྐུ་ངལ་ཆེན་པོའི་སྒྲུབ་བཞིན་པ་སྨོས་མ་དགོས་པའི་ཚུལ་དུ་བཞག་ནས། ཞར་བྱུང་གི་མཛད་འཕྲིན་ཐར་ཐོར་རྣམས་གུང་བསྒྲིགས་ཏེ་བཀོད་པ་གཙོ་བོར་བཟུང་བ་ཡིན། ད་དུང་ནང་གི་ཡོན་ཏན་དུ་མ་ཞིག་ནི་ཞལ་སྔ་ན་དྲིས་ཏེ་རྟོགས་འདོད་དང་འདིར་འཁོད་པར་འདུན་པ་ཡོད་ན་ཡང༌། སྐུ་གམ་དུ་བཅར་བ་ན་སྤོབས་པ་བག་ལ་ཞ་ནས་ནན་ཆེར་ཞུ་བར་མ་ནུས་ལ། ཅུང་ཟད་ཙམ་རེ་དྲིས་ཀྱང་སྔར་ནས་གསུང་འཕྲོས་སུ་གོ་བ་ལས་གཞན་གང་ཡང་གསུང་ངག་མ་འབྱིན་པར་མ་ཟད། ཕྲན་རང་ལ་ཡང་འུར་འགོ་ཆེ་ལུགས་ཀྱི་བཀའ་གསུང་མི་བརྙེས་པའི་རྣམ་པ་ཅུང་ཟད་རེ་ཐོན་པས་འབྲི་བར་མ་ནུས་ཤིང༌། ཚོད་དཔག་དང་དག་སྣང་གི་སྐད་ཆ་མང་པོ་ཞིག་གིས་ངོ་མཚར་བའི་བརྩམས་སྒྲུང་ཞིག་ནི་བྱེད་པར་ཡང་མ་འདོད་དོ། །ཆོས་གྲོགས་རྣམས་ཀྱི་ཞལ་ནས་ནང་གི་ཡོན་ཏན་ངོ་མཚར་བའི་བྱུང་བ་འགའ་རེ་ཐོས་ཀྱང༌། ཕལ་ཆེར་ལ་ནི་ཡིད་ཆེས་མ་འཕེལ་བ་མིན་ཡང་འདིར་རང་གིས་ཟིན་ཚོད་ཁོ་ན་བྲིས་ཏེ་དཔང་པོ་རང་གིས་བྱེད་ནུས་པ་རྣམས་ལས་གཞན་གང་ཡང་མ་བྲིས་པའི་ཁུལ་ཡིན། གཞན་ཡང༌། རྣམ་ཐར་བླ་མ་ཞལ་བཞུགས་དུས་འབྲི་བ་མི་རུང་ཚུལ་གསུང་མཁན་ཡང་བྱུང་མོད། ཁུངས་དང་རྒྱུ་མཚན་འཆད་དུ་མེད་པར་མ་ཟད། རང་རྣམ་ཐམས་ཅད་སྐུ་དུས་ཉིད་ན་བྲིས་པ་མ་ཡིན་ནམ། ལོ་རྒྱུས་ནི་དུས་ཀྱིས་ཆོད་ཀྱིན་ཆོད་ཀྱིན་གསལ་ལ་མི་གསལ་བ་ཞིག་ཏུ་གྱུར་ཏེ། མཐར་ཚོད་དཔག་དང་བདེན་མི་བདེན་མི་ཤེས་པའི་ངག་ཚིག་ཁོ་ན་ཁུངས་སུ་སྐྱེལ་དགོས་པའི་གནས་སུ་ལྷགས་པ་མང་དུ་མཐོང་བས། བྱ་བ་དངོས་དང་ཅི་ཙམ་བར་ཐག་ཉེ་བ་དེ་ཙམ་ཁུངས་སུ་ཆེ་སྙམ་དུ་སེམས་སོ། ། དཔྱིད་ཚུགས་སྟོན་པ་ཁུ་བྱུག་བབ་ཀྱི་བྱེ་འུ་ཁྱོད་ཀྱིས་ཅི་ཞིག་དགོས། ། འོད་སྟོང་བདག་པོ་མཁའ་ནས་ཤར་བཞིན་སྒྲོན་མེས་འོད་ཀྱིས་ཅི་བྱ་སྟེ། ། རི་དྭགས་རྒྱལ་པོའི་བསྒྱིང་འགྲོས་དལ་བས་རི་བོང་འགྲོས་མགྱོགས་སྔ་ལངས་ནས། ། རང་བློར་གསལ་བའི་བྱུང་བ་འགའ་ཙམ་མཛུབ་རྩེའི་རི་མོར་བཀོད་འདི་བྱས། ། སྙིགས་དུས་ཀྱི་བསྟན་པའི་གསལ་བྱེད་ཆེན་པོ་ངག་དབང་འཇིགས་མེད་དངོས་གྲུབ་དཔལ་བཟང་པོའི་མཛད་བཟང་བསླབ་གསུམ་ནོར་བུའི་གླིང་ཁ་ཞེས་བྱ་བ་ལས་རྣམ་ཐར་འདི་ཇི་ལྟར་བྲིས་པའི་བསྐོར་གྱི་གསལ་བཤད་དེ་སོ་བརྒྱད་པའོ། ། སྨྲས་པ། ཕན་བདེའི་སྤྲིན་དཀར་ལྕུགས་ལྕུགས་ཆགས་པ་ཡི། ། འོད་གསལ་སྟོན་ཁའི་སྔོ་བསང་རྗེས་འགྲོ་དེའི། ། བས་མཐའི་ས་མཚམས་མཁའ་ལྡིང་གིས་མིན་ན། ། སྦལ་བས་མཆོང་གོམ་རྨི་འཁྲུལ་ཁོ་ནར་ཟད། ། འོན་ཏེ་ཁྲོན་པའི་སྦལ་བ་ཅི་བཞིན་དུ། ། རང་མཐོང་མཁའ་ལ་སོར་མོས་གཞལ་འདི་ཡང༌། ། ཀུན་ཉོན་ལོག་པའི་བསམ་སྤྱོད་མ་སྦག་ན། ། བསོད་ནམས་ནོར་སྐལ་ཅུང་ཟད་ལོས་ཡོད་སྙམ། ། ཁོ་བོའི་ཀུན་གཞིའི་ཟ་མ་ཏོག་ཆེན་རྡོ་རྗེ་ལྟ་བུའི་ཏིང་འཛིན་གཟེགས་མས་མ་བཅོམ་བར། ། གསུམ་ལྡན་བླ་མའི་འཁོར་དང་མྱང་འདས་སྒྱུ་མའི་རྣམ་ཐར་གར་གྱི་རྗེས་འགྲོ་ཇི་སྙེད་ཀུན། ། རྙོག་མེད་ཡིད་ཀྱི་དྭངས་མའི་མཚོ་རུ་རྨི་ལམ་ན་ཡང་གཟིམས་པ་བྲལ་བའི་སྣང་བརྙན་གྱིས། ། ཆོས་རྔ་ལྷ་ཡི་དགའ་བའི་སྟོན་མོ་བདེ་ཆེན་རོལ་བས་ངོམས་པ་མེད་པའི་སྲས་སུ་སྐྱོངས། ། ཟག་པ་ཀུན་བྲལ་དགྲ་བཅོམ་དུ་མས་ཐུབ་པའི་བཀའ་ལུང་ཏོ་ཀེར་བཅིངས་ཏེ་བསྟན་ཞབས་སྟོང་ཡང་མི་འདའ་གསུངས། ། གསང་ཆེན་ལམ་གྱི་འབྲས་བུའི་དུས་སུ་གྲོང་དང་གྲོང་ཁྱེར་རྡོ་རྗེའི་སྐུ་བརྙེས་བསྐལ་བ་འཇིག་ཀྱང་འཆི་མེད་ཀྱི། ། གོ་འཕང་ནོན་དེའི་བདེན་པའི་སྟོབས་ཀྱིས་སྙིགས་མའི་དམུས་ལོངས་ང་དང་ང་འདྲའི་ཉམ་ཐག་འགྲོ་བའི་སྤྱི་དཔལ་ཆེ། ། རིགས་ཀྱི་བདག་པོ་དྲིན་ཆེན་རྗེ་དེའི་མཛད་པའི་ཐ་མ་སྒྱུ་མའི་ཁམས་སུ་མིང་སྐལ་ཙམ་ཡང་སྲིད་མིན་ཤོག ། འགྲོ་བའི་ཡིད་ཀྱི་གཅུང་ནད་དེ་སྲིད་གསོ་བྱེད་རྒྱལ་པོ་ཐུབ་པའི་ཞལ་སྐྱིན་བཤེས་གཉེན་དམ་པ་ཡུན་བཞུགས་ཏེ། ། ཉམ་ཐག་འགྲོ་བའི་མཆི་མའི་མིག་གིས་རེ་བའི་ལྟོས་ས་སྟོང་པའི་དབྱིངས་སུ་འགོག་པའི་ཞི་ལ་མི་ཆགས་པར། ། སྡུག་མུག་དུཿཁས་ཕྱི་ནང་གཙེས་ཀྱང་ཡིད་ཀྱི་གཏད་སོ་བླ་མའི་སྐུ་ལ་འཕོ་འགྱུར་དབེན་པ་སེང་གེའི་ཁྲིར། ། རྡོ་རྗེའི་རང་བཞིན་ལྷང་ངེར་བཞུགས་པའི་སྨོན་འདུན་ཐལ་མོ་ལན་གཅིག་མིན་པར་སྙིང་གི་གམ་དུ་བཅོས་མིན་ཟུམ། ། འདིར་བསགས་རྣམ་དཀར་དངུལ་ཆུའི་གཟེགས་མ་ཡིས། ། ཉེས་ཚོགས་དྲི་མའི་ས་འཛིན་ཆེན་པོ་དེར། ། རེག་པའི་མོད་ལ་ཡེ་ཤེས་ཕུང་པོ་ཆེར། ། གནས་འགྱུར་མཐར་ཕྱིན་འགྲོ་ཀུན་ཐོབ་གྱུར་ཅིག ། རིས་མེད་རྒྱལ་བསྟན་ཀུན་ལ་གུས་པས་བསླབས། ། ཕྱོགས་མེད་བསྟན་འཛིན་ཀུན་ཀྱི་ཞབས་པད་གཏུགས། ། གང་འདུལ་འགྲོ་བ་ཀུན་ལ་ཐུགས་རྗེས་སྐྱོང༌། ། རིས་མེད་མཚན་ཅན་བླ་མའི་འཕྲིན་ལས་འཕེལ། ། སྒྲོ་འདོགས་སྐུར་བའི་གྱལ་གཏམ་ངན་པ་ཡིས། ། གང་གི་མཛད་བཟང་མ་རུང་བྱས་གྱུར་ན། ། ནོངས་འགྱོད་ཆུ་དྭངས་ནོར་བུའི་ནུས་པ་ཡིས། ། རྣམ་སྨིན་བརྣག་དཀའི་ལས་སུ་མི་འགྱུར་ཤོག ། ཅེས་སྙིགས་དུས་ཀྱི་བསྟན་པའི་གསལ་བྱེད་ཆེན་པོ་ངག་དབང་འཇིགས་མེད་དངོས་གྲུབ་དཔལ་བཟང་པོའི་མཛད་བཟང་བསླབ་གསུམ་ནོར་བུའི་གླིང་ཁ་ཞེས་བྱ་བ་འདི་ནི། ད་ལྟ་བསྟན་འགྲོའི་དཔལ་དུ་མི་འགྱུར་རྡོ་རྗེའི་གཤིས་སུ་མངོན་པར་བཞེངས་པ་མཁས་བཙུན་བཟང་པོའི་བདག་ཉིད་གང་གི་དགུང་གྲངས་ལྔ་བཅུ་ང་གཉིས་ལོའི་རབ་བྱུང་བཅུ་བདུན་པ་ལྕགས་མོ་གླང་གི་བོད་ཟླ་དགུ་པ་ཡན་གྱི་མཛད་བསྡུས་ས་བོན་ཙམ་དུ་ཉེ་བར་སྦྱར་བ་སྟེ། བཀའ་དྲིན་འཁོར་མཐའ་བྲལ་བའི་སྡེ་གང་ཉིད་ཀྱི་ཐུགས་རྗེའི་གཟེགས་མ་སྤྱི་བོར་ཕོག་པས་ཆོས་པའི་གཟུགས་བརྙན་ལ་ངེས་དོན་ཟབ་མོའི་ཚིག་ཙམ་ཟློ་བའི་སྐལ་བ་ཅན་དུ་གྱུར་པ། དཔལ་འབྱོར་ཚེ་རིང་ནས་གུས་པ་ཆེན་པོས་སྦྱར་བའོ། །སརྦ་མངྒ་ལཾ། བཀའ་བསྡུ་བཞི་བའི་འགྲེལ་བ་ལུང་རིགས་གཏེར་མཛོད་ངེས་གསང་ཀུན་གསལ་ཐུབ་བསྟན་མཛེས་རྒྱན།མཚན་གྱི་དོན།༄༅། །བཀའ་བསྡུ་བཞི་བའི་འགྲེལ་བ་ལུང་རིགས་གཏེར་མཛོད་ངེས་གསང་ཀུན་གསལ་ཐུབ་བསྟན་མཛེས་རྒྱན་ཞེས་བྱ་བ་བཞུགས་སོ། ། ན་མོ་གུ་རུ་བྷྱཿ ཚོགས་གཉིས་རིན་ཆེན་རྣམ་མང་ལས་གྲུབ་མཚན་དཔེས་རྒྱན་སྤྲས་རབ་མཛེས་སྐུ། ། ཡན་ལག་དྲུག་ཅུའི་དབྱངས་ཀྱིས་སྐྱེ་དགུ་མ་ལུས་ལམ་བཟང་སྟོན་པའི་གསུང༌། ། གློ་བུར་དྲི་བྲལ་ཏིང་འཛིན་བྱེ་བས་རབ་གཏམ་རྣམ་ཀུན་གཟིགས་པའི་ཐུགས། ། འགྲོ་རྣམས་སྲིད་མཚོ་ལས་སྒྲོལ་ཤཱཀྱ་སེང་གེའི་ཞབས་པད་གཙུག་ན་མཛེས། ། རྒྱ༵ལ་ཟླ་རྣམ་གནོན་རྒྱ༵ལ་སྲས་བྱང་སེམས་ཚུལ། ། རྒྱ༵ལ་གསུང་འགྲེལ་ལ་རྒྱ༵ལ་བའི་ཤེས་རབ་གཏམ། ། རྒྱ༵ལ་བའི་ལུང་བསྟན་རྒྱ༵ལ་བའི་མཚན་འཛིན་པས། ། རྒྱ༵ལ་དགོངས་སྨྲ་ལ་རྒྱ༵ལ་བ་ཇི་བཞིན་མཛོད། ། དཔལ་ལྡན་ནག་པོ་སྤྱོད་པའི་སྒྱུ་འཕྲུལ་གྱིས། ། ཐུབ་བསྟན་ཕན་བདེའི་སྙིང་པོ་ངེས་གསང་མཆོག ། རྒྱལ་བ་གཉིས་པའི་བསྟན་པ་ས་གསུམ་དུ། ། སྤེལ་མཛད་ཏཱ་ར་ནཱ་ཐའི་ཞབས་ལ་འདུད། ། བདག་ལ་སྔོན་མེད་ལེགས་བཤད་མ་མཆིས་ཀྱང༌། ། ཕྱོགས་སུ་འཛིན་པའི་དཀྲུགས་པའི་ཡིད་བོར་ཏེ། ། ལུང་རིགས་ཉི་མ་བྱེ་བའི་འོད་ལྡན་པའི། ། རྟོན་པ་བཞི་ལྡན་གསུང་མཆོག་ལ་བརྟེན་ནས། ། གཟུར་གནས་བློ་མཆོག་དགའ་སྐྱེད་དམན་འབྲིང་གི ། རབ་རིབ་སོམ་ཉི་བསལ་ཏེ་ཟབ་གསང་གནད། ། རིན་ཆེན་སྒྲོན་མེ་བཞིན་དུ་གསལ་བྱེད་པའི། ། ལུང་རིགས་འབུམ་གྱི་འོད་སྟོང་འགྱེད་ལ་སྤྲོ། ། དེ་ལ་འདིར་བདག་ཅག་གི་སྟོན་པ་སངས་རྒྱས་བཅོམ་ལྡན་འདས་དཔེ་ཟླ་དང་བྲལ་བ་དེ་ཉིད་ཀྱིས་འགྲོ་བ་རྣམས་མྱ་ངན་ལས་འདས་པའི་གོ་འཕང་ལ་འགོད་པའི་སླད་དུ། དྲང་བ་དང་ངེས་པའི་དོན་གྱི་གསུང་རབ་མཐའ་ཡས་པ་ཞིག་བཀའ་བསྩལ་པ། དེ་དག་ཐམས་ཅད་ཆོས་འཁོར་རིམ་པ་གསུམ་དུ་འདུས་ལ། དེ་ཡང་འཁོར་ལོ་དང་པོ་གཉིས་དྲང་དོན་དང༌། ཐ་མ་ངེས་དོན་གྱི་མདོ་སྡེ་ཡིན་པར་རྒྱལ་བ་རང་ཉིད་ཀྱིས་བཀའ་སྩལ་པ་འདི་ལྟར། མདོ་སྡེ་དགོངས་པ་ངེས་འགྲེལ་ལས། བཅོམ་ལྡན་འདས་ཀྱིས་དང་པོ་ཡུལ་བ་ར་ཎཱ་སིར། ཞེས་པ་ནས། ཆོས་ཀྱི་འཁོར་ལོ་རབ་ཏུ་བསྐོར་བ་ཡང་བླ་ན་མཆིས་པ་སྐབས་མཆིས་པ་དྲང་བའི་དོན། ཞེས་དང༌། ངོ་མཚར་རྨད་དུ་བྱུང་བའི་ཆོས་ཀྱི་འཁོར་ལོ་གཉིས་པ་བསྐོར་ཏེ་བཅོམ་ལྡན་འདས་ཀྱིས་ཆོས་ཀྱི་འཁོར་ལོ་བསྐོར་བ་དེ་ཡང་བླ་ན་མཆིས་པ་སྐབས་མཆིས་པ་དྲང་བའི་དོན་རྩོད་པའི་གཞིའི་གནས་སུ་གྱུར་བ་ཞེས་དང༌། ལེགས་པར་རྣམ་པར་ཕྱེ་བ་དང་ལྡན་པ་ངོ་མཚར་རྨད་དུ་བྱུང་བའི་ཆོས་ཀྱི་འཁོར་ལོ་གསུམ་པ་བསྐོར་ཏེ། བཅོམ་ལྡན་འདས་ཀྱིས་ཆོས་ཀྱི་འཁོར་ལོ་བསྐོར་བ་འདི་ནི་བླ་ན་མ་མཆིས་པ་སྐབས་མ་མཆིས་པ་ངེས་པའི་དོན་ལགས་ཏེ། རྩོད་པའི་གཞིའི་གནས་སུ་གྱུར་བ་མ་ལགས་སོ། །ཞེས་གསུངས་པ་དང༌། བློ་གྲོས་མི་ཟད་པའི་མདོ་ལས། མདོ་སྡེ་གང་དག་ཀུན་རྫོབ་སྒྲུབ་པར་བསྟན་པ་དེ་ནི་དྲང་བའི་དོན་ཅེས་བྱའོ། །མདོ་སྡེ་གང་དག་དོན་དམ་སྒྲུབ་པར་བསྟན་པ་དེ་དག་ནི་ངེས་པའི་དོན་ཅེས་བྱའོ་ཞེས་སོགས་གསུངས་པ་དང༌། མྱང་འདས་ཆེན་པོ་ལས། གང་ཞིག་རྟག་པ་གནས་པ་མི་འགྱུར་མི་འཕོ་བའོ། །ཞེས་སྨྲ་བ་ནི་ངེས་པའི་དོན་ཅེས་བྱའོ། །ཞེས་གསུངས་པའི་ཕྱིར་ན་འཁོར་ལོ་ཐ་མ་ངེས་དོན་ཕྱིར་མི་ལྡོག་པའི་འཁོར་ལོ་ཡིན་པར་ལེགས་པར་གྲུབ་པ་ཡིན་ནོ། །དེས་ན་ལེགས་པར་རྣམ་པར་ཕྱེ་བའི་འཁོར་ལོ་ཐ་མ་དེ་དང་དེའི་དགོངས་འགྲེལ་བྱམས་ཆོས་སོགས་དང༌། སྔགས་བླ་མེད་ཀྱི་རྒྱུད་སྡེ་དུ་མ་དང༌། སེམས་འགྲེལ་སྐོར་གསུམ་སོགས་ཀྱིས་ཡང་ཡང་ལེགས་པར་བསྟན་པའི་སྙིང་པོ་ནི། ངེས་གསང་བླ་ན་མ་མཆིས་པའི་གཞན་སྟོང་དབུ་མ་ཆེན་པོ་འདི་ཉིད་དུ་ངེས་ལ། དེ་ཡང་ཐོག་མར་མཉམ་མེད་ཐུབ་པའི་དབང་པོ་ནས་རྗེ་བཙུན་བྱམས་མགོན་ལ་བརྒྱུད། དེས་ངེས་དོན་ཟབ་རྒྱས་ཀྱི་ལམ་གཙོ་བོར་སྟོན་པའི་བྱམས་ཆོས་ལྔ་གསུངས་ནས་ངེས་དོན་གྱི་ལུགས་འདི་རྒྱས་པར་ཕྱེས་ལ། དེ་ནས་རྒྱལ་བ་རང་ཉིད་ཀྱིས་འཇམ་དཔལ་རྩ་རྒྱུད་ལས། ཐོགས་མེད་ཅེས་བྱའི་དགེ་སློང་ནི། །བསྟན་བཅོས་དེ་ནི་དོན་ལ་མཁས། །མདོ་སྡེ་ངེས་དོན་དྲང་བའི་དོན། །རྣམ་པ་མང་པོ་རབ་ཏུ་འབྱེད། །ཅེས་དྲང་ངེས་འབྱེད་པར་ལུང་བསྟན་པ་ལྟར། མདོ་སྡེ་དགོངས་པ་ངེས་འགྲེལ་ལ་སོགས་པའི་ངེས་དོན་གྱི་མདོ་སྡེ་དུ་མ་ལས་གསུངས་པ་ལྟར་ས་སྡེ་དང་སྡོམ་རྣམ་གཉིས་དང་ཁྱད་པར་དུ་རྒྱུད་བླ་མའི་འགྲེལ་བ་སོགས་མཛད་ནས་དྲང་ངེས་ལེགས་པར་རྣམ་པར་ཕྱེས་ནས་ངེས་དོན་དབུ་མའི་ལུགས་འདི་རྒྱ་ཆེར་གསུངས་སོ། །དེ་ནས་སློབ་དཔོན་ཆེན་པོ་དབྱིག་གཉེན་དང་གངྒ་མེཏྲིའི་ཞབས་སོགས་ལ་རིམ་པར་བརྒྱུད་ནས་བྲམ་ཟེ་སཛྫནའི་བར་འཕགས་ཡུལ་དུ་བྱུང་ལ། དེ་ནས་བོད་འདིར་གཟི་ལོ་ཙཱ་བ་དགའ་བའི་རྡོ་རྗེ་ནས་རྒྱལ་བ་རང་ཉིད་ཀྱིས་གཙུག་ཏོར་རྣམ་པར་རྒྱལ་མའི་རྒྱུད་ལས། བདེ་གཤེགས་མྱ་ངན་འདས་འོག་ནས། །ལོ་ནི་སྟོང་ཕྲག་ཕྱེད་རང་ཚེ། །གདོང་དམར་ཡུལ་དུ་ང་འདྲ་བའི། །བསྟན་པ་འཛིན་པའི་དགེ་སློང་ཞིག །ཆུ་བོ་ལྗོན་ཤིང་ཕྲེང་མཛེས་སུ། །ཀ་ཡོ་རི་ཡི་གྲོང་ཁྱེར་དུ། །ཡབ་ནི་ཡེ་ཤེས་དབང་ཕྱུག་ཆེ། །ཡུམ་ནི་ཚུལ་ཁྲིམས་རྒྱན་ཞེས་གྲགས། །སྲས་ནི་སངས་རྒྱས་མིང་ཅན་འབྱུང༌། །ང་ཡི་བསྟན་པའི་རྒྱལ་མཚན་འཛུག །ཆོས་ཀྱི་དུང་འབུད་དར་ཕྱར་འགྱུར། །ཞེས་སོགས་མདོ་རྒྱུད་དུ་མ་ནས་ལུང་བསྟན་པའི་ཀུན་མཁྱེན་དོལ་པོ་པ་ཤེས་རབ་རྒྱལ་མཚན་དཔལ་བཟང་བོའི་བར་དུ་རིམ་པར་བརྒྱུད་པ་ཡིན་ལ། དེའི་སྔ་རོལ་ཏུ་གཞན་སྟོང་དབུ་མའི་བཤད་སྲོལ་འདི་གསང་ཆོས་སུ་བྱས་ནས་རིམ་པར་བརྒྱུད་པ་ཡིན་ཞིང་ཀུན་མཁྱེན་ཇོ་ནང་པ་འདི་ཉིད་ཀྱིས་རི་ཆོས་ངེས་དོན་རྒྱ་མཚོ་དང་བཀའ་བསྡུ་བཞི་བ་སོགས་མཛད་ནས་གངས་ཅན་གྱི་ལྗོངས་འདིར་གཞན་སྟོང་དབུ་མ་ཆེན་པོའི་ཤིང་རྟའི་སྲོལ་རྒྱ་ཆེར་ཕྱེས་པ་ཡིན་ནོ། །རྒྱུད་པ་གཞན་ཡང་སྟོན་པ་ཤཱཀྱ་སེང་གེ་ནས་ཕྱག་ན་རྡོ་རྗེ་སྒྲ་གཅན་འཛིན་བཟང་པོ། ཀླུ་སྒྲུབ་ཤ་བ་རི། མཻ་དྲི་བ་སོགས་ལ་རིམ་པར་བརྒྱུད་ཚུལ་དང༌། སྔགས་ལུགས་ལ་ཐུབ་པ་སངས་རྒྱས་བཅོམ་ལྡན་འདས་ནས་ཆོས་རྒྱལ་ཟླ་བ་བཟང་བོ་སོགས་ལ་བརྒྱུད་ཚུལ་སོགས་ཇོ་ནང་ཆོས་འབྱུང་ཟླ་བའི་སྒྲོན་མེ་དང་དུས་འཁོར་ཆོས་འབྱུང་སོགས་ལ་སྤྱན་རས་གཡོ་བར་ཞུ། དེ་ལྟ་བུའི་རྒྱུད་པ་བར་མ་ཆད་དུ་བྱུང་བའི་ངེས་དོན་གཞན་སྟོང་ཆེན་པོའི་ཟབ་དོན་བླ་ན་མ་མཆིས་པའི་དོན་གསལ་བར་བྱེད་པའི་བསྟན་བཅོས་ཆེན་པོ་བཀའ་བསྡུ་བཞི་བའི་དོན་འཆད་པ་ལ། མཚན་དོན་དང༌། གཞུང་དོན། མཇུག་གི་དོན་དང་གསུམ། དང་པོ་ནི། བཀའ་བསྡུ་བཞི་བའི་དོན་བསྟན་རྩིས་ཆེན་པོ་ཞེས་བྱ་བ། ཞེས་བྱུང༌། དེའི་དོན་ནི། བསྟན་བཅོས་འདིས་ནི་སངས་རྒྱས་ཀྱི་བསྟན་པ་རབ་འབྲིང་མཐའ་གསུམ་དུ་གནས་པ་རྟོགས་པར་བྱས་ནས་རྫོགས་ལྡན་ཀྱི་ཆོས་དཔང་དུ་གྱུར་པ་དང༌། གསུམ་ལྡན་མར་བཅད་ཀྱི་ཆོས་ནི་དཔང་དུ་གྱུར་པ་མ་ཡིན་པར་མཁས་པར་བྱས་ནས་བསྟན་པ་ལ་བྱ་ར་མཛད་པ་རྣམས་ཀྱི་དགོངས་པ་གལ་ཆེ་ཞིང་གང་ཟག་གི་བློ་སྐྱོན་གྱིས་བསྟན་པ་སྐྱོན་བསྲེས་པ་རྣམས་བསལ་ནས་ལྟ་སྒོམ་སྤྱོད་པ་ཡང་དག་གི་ལམ་ལ་འགོད་པར་བྱེད་པས་ན། བཀའ༵་བསྡུ་༵བ་དང༌། བཀའ་བསྡུ་བ༵ཞི་བ་ལ་བསྟན་རྩིས་ཆེན་པོ་ཡིན་པས་ན་བསྟན་རྩིས་ཆེན་པོ་ཡང་ཡིན་ཏེ། ཆོས་རྗེ་ཀུན་མཁྱེན་གྱི་ཞལ་ནས། འདིས་ནི་སངས་རྒྱས་བསྟན་པ་ཞེས་པ་ནས་ལྟ་སྒོམ་སྤྱོད་པ་ཡང་དག་གི་ལམ་ལ་འགོད་པ་ནི་བཀའ་བསྡུ་བ༵འི་དོ༵ན་ཡང་ཡིན་ཏེ། སྔར་བཀའ་བསྡུ་བ་གསུམ་སོང་ནས་འདི་ནི་བཞི་བ་ལ་བསྟ༵ན་རྩི༵ས་ཆེ༵ན་པོ༵་ཡིན། ཞེས་གསུངས་པའི་ཕྱིར་རོ། ། གཞུང་གི་དོན།གཉིས་པ་གཞུང་དོན་ལ། བསྟན་བཅོས་རྩོམ་པ་ལ་འཇུག་པ་དང༌། བརྩམ་པའི་བསྟན་བཅོས་ཀྱི་ལུས་དངོས། བསྟན་བཅོས་བརྩམས་པའི་མཇུག་སྨོན་དང་གསུམ། དང་པོ་ལ་མཆོད་པར་བརྗོད་པ་དང༌། རྩོམ་པར་དམ་བཅའ་བ་དང་གཉིས། དང་པོ་ལ་བླ་མ་སངས་རྒྱས་བྱང་སེམས་རྣམས་ལ་མཆོད་པར་བརྗོད་པ་དང༌། དོན་དམ་པའི་སངས་རྒྱས་དེ་བཞིན་ཉིད་ལ་མཆོད་པར་བརྗོད་པ་དང་གཉིས། དང་པོ་ནི། ཨོཾ་གུ་རུ་བུདྡྷབྷོ་དྷི་ས་ཏྭ་བྷྱོཿན་མོ་ན་མཿ ཞེས་བྱུང༌། དེའི་ཚིག་དོན་ནི་ཨོཾ༷་ཞེས་པའི་དོན་ཕྱག་འཚལ་ཞེས་པའི་དོན་དུ་སྒྲ་བ་དག་གིས་འཆད་པ་ལ་བརྟེན་ནས་ཙ་མི་ལོ་ཙྭ་བས་དུས་འཁོར་འགྲེལ་ཆེན་དུ་ཕྱག་འཚལ་ཞེས་པར་བསྒྱུར་བར་སྣང༌། གཞན་དུ་བཤད་པ་ཡོད་མོད་འདིར་ཡང་ཕྱག་འཚལ་བའི་དོན་དུ་རུང་ཡང༌། ངེས་དོན་ལ་སྦྱར་ན། གསང་འདུས་སྒྲོན་གསལ་ལས། ཡི་གེ་ཨོཾ་ནི་དེ་བཞིན་གཤེགས་པའི་སྙིང་པོ་སྟེ། ཞེས་གསུངས་པ་ལྟར་རྒྱུད་སྡེ་མང་པོ་ལས་གསུངས་པས་ཡི་གེ་ཨོཾ་སྔགས་ཐམས་ཅད་ཀྱི་མགོར་སྦྱར་ནས་བདེ་གཤེགས་སྙིང་པོས་ལུས་ཅན་ཐམས་ཅད་ལ་ཁྱབ་པར་སྟོན་པའོ། །ཡང་ན་རྒྱུད་སཾ་པུ་ཊ་ལས། །ཡི་གེ་ཨ་ནི་གསུང་ཞེས་བྱ། །ཡི་གེ་ཨུ་ནི་སྐུུ་རུ་བརྗོད། །མ་ཡིག་ཐུགས་ཀྱི་རྡོ་རྗེ་སྟེ། །རྡོར་གསུམ་གཅིག་གི་རང་བཞིན་ཨོཾ། །ཞེས་གསུངས་པ་ལྟར་བྱས་ན་རུང་སྙམ། གུ༵་རུ་༵ཞེས་པ་ལྕི་བའི་དོན་དེ་ཐུགས་རྒྱུད་ཡོན་ཏན་གྱི་ཚོགས་ཀྱིས་གང་བས་གུ་རུ་ཞེས་པ་སྟེ། མདོ་སྡེ་རྒྱན་ལས། བཤེས་གཉེན་དུལ་བ་ཞི་བ་ཉེར་ཞི་བ། །ཡོན་ཏན་བརྩོན་བཅས་ལྷག་པར་ལུང་གིས་ཕྱུག །དེ་ཉིད་རབ་ཏུ་རྟོགས་པ་སྨྲ་མཁས་ལྡན། །བརྩེ་བའི་བདག་ཉིད་སྐྱོ་བ་སྤངས་ལ་བསྟེན། ཞེས་པ་ལྟར་རོ། །ཡང་ཆེད་དུ་བརྗོད་པའི་ཚོམས་ལས། སྲེད་པའི་ཟུག་རྔུ་གཅོད་མཛད་ཅིང༌། །ཐེ་ཚོམ་ཐམས་ཅད་སེལ་བ་ཡི། །ལམ་འདི་ཁྱོད་ལ་ངས་བསྟན་བྱ། །ཁྱོད་ཉིད་ཀྱིས་ནི་བསྒྲུབ་བྱ་སྟེ། །དེ་བཞིན་གཤེགས་པ་སྟོན་མཛད་ཡིན། །ཞེས་དང༌། དེའི་འགྲེལ་བར། ཐུབ་རྣམས་སྡིག་པ་ཆུ་ཡིས་བཀྲུ་བར་མི་མཛད་ཅིང༌། འགྲོ་བའི་སྡུག་བསྔལ་ཕྱག་གིས་ཀྱང་ནི་སེལ་མི་མཛད། །ཉིད་ཀྱི་རྟོགས་པ་གཞན་ལ་སྤོས་པ་མ་ཡིན་ཏེ། །ཆོས་ཉིད་ཞི་བ་བསྟན་པས་གྲོལ་བར་མཛད་པ་ཡིན། །ཞེས་མདོ་ལུང་དྲངས་ནས་གསུངས་པ་ལྟར། འཁོར་བ་ལས་ཐར་བའི་རྒྱུའི་གཙོ་བོ་དམ་པའི་ཆོས་བསྒྲུབ་པ་ཡིན་ལ། སངས་རྒྱས་འཇིག་རྟེན་བྱོན་པ་ཡང་གདུལ་བྱ་འདྲེན་པའི་ཕྱིར་ཏེ། འཕྲིན་ལས་ཀྱི་གཙོ་བོ་དམ་པའི་ཆོས་སྟོན་པ་ཡིན་པའི་ཕྱིར། རང་ལ་དངོས་སུ་ཆོས་སྟོན་པ་ལ་སོགས་པ་སངས་རྒྱས་ཀྱི་མཛད་པ་བསྒྲུབས་པས་ཤིན་ཏུ་བཀའ་དྲིན་ལྕི་བས་ན་གུ་རུ་སྟེ། དེ་སྔོན་གྱིས་བརྡ་རྙིང་དག་ལས་བླ་མ་ཞེས་འབྱུང་ཞིང༌། མཚན་བརྒྱ་ལས། བླ་མ་ཞེས་པ་སྟེ། གོང་མ་ཞེས་རང་བས་མཐོ་བར་བཟུང་བར་བྱ་བ་མཆོད་ཅིང་བཀུར་བའི་གནས་སོ། །བུ༵དྡྷ༵་ཞེས་པ་གཉིད་སངས་པ་དང༌། པད་འདབ་རྒྱས་པ་གཉིས་ཀ་ལ་འཇུག་ཀྱང༌། དོན་འགྱུར་དུ་གཉིས་ཀ་བསྡོམས་པས། སངས་རྒྱས་ཞེས་པ་སྟེ། ཇི་སྐད་དུ། མ་རིག་གཉིད་ལས་སངས་ཕྱིར་དང༌། །ཤེས་བྱ་ལ་ཡང་བློ་རྒྱས་ཕྱིར། །སངས་རྒྱས་པདྨ་ལྟར་སངས་རྒྱས། །དེ་ཕྱིར་སངས་རྒྱས་མཚན་གསོལ་ཏེ། །ཞེས་པ་དང༌། དཔལ་ལྡན་ཟླ་བ་གྲགས་པས། མ་རིག་གཉིད་ནི་རྒྱུན་ཆད་ཅིང༌། །ཡང་དག་ཡེ་ཤེས་ངེས་འབྱུང་བས། །གང་ཞིག་རྣམ་སད་དེ་སངས་རྒྱས། །སྐྱེས་བུ་གཉིད་སངས་ཇི་བཞིན་ནོ། །ཞེས་གསུངས་པ་ལྟར་རོ། །བོ༵་དྷི༵་ས༵་ཏྭ༵་ཞེས་པ་བྱང་ཆུབ་སེམས་དཔའ་ཞེས་པ་ཡིན་ཏེ། བྱང་ཆུབ་ནི། དོན་དམ་ཆོས་སྐུ་སྟེ་དེ་ཐོབ་པའི་ཆེད་དུ་སེམས་པས་ན་བྱང་ཆུབ་སེམས་དཔའ་ཞེས་ཤེར་འབྱུང་བློ་གྲོས་ཀྱིས་གསུངས་ཤིང༌། ཡང་མཐར་ཐུག་རྫོགས་བྱང་ནི་བྱང་ཆུབ་ཡིན་ལ། དེ་སེམས་ཤིང་སྒྲུབ་པ་ལ་དཔའ་བས་བྱང་ཆུབ་སེམས་དཔའ་ཞེས་པ་སོགས༌། རྒྱ་གར་མཁས་པས་བཤད་ཚུལ་མང་ངོ༌། །བྷྱོ༵་ནི་རྣམ་དབྱེ་བཞི་བའི་མང་ཚིག་རྣམས་ཞེས་པའོ། །ན༵་མོ༵་ཕྱག་འཚལ་པ། ན༵་མ༵་ཞེས་པ་མཆོད་པ་ཞེས་པ་ཡིན་ནོ། །གཉིས་པ་ནི། དོན་དམ་རྫོགས་པའི་སངས་རྒྱས་བཅོམ་ལྡན་འདས། །གཙང་བདག་བདེ་ཆེན་རྟག་པའི་མཐར་ཐུག་པ། །དེ་བཞིན་ཉིད་ལ་གུས་པས་ཕྱག་འཚལ་ནས། །དོན་དམ་རྫོགས་པའི་སངས་རྒྱས་ཞེས་པ་ནས་ཕྱག་འཚལ་ཞེས་པའི་བར་བྱུང༌། དེའི་ཚིག་དོན་ནི། དོ༵ན་ད༵མ་པའི་སྤངས་རྟོགས་ཡོངས་སུ་རྫོ༵གས་པ༵འི་སང༵ས་རྒྱས༵་བཅོ༵མ་ལྡ༵ན་འ༵དས་ཆོས་ཀྱི་སྐུ་དེ་ཉིད་གཙ༷ང་བའི་ཕ་རོལ་ཏུ་ཕྱིན་པ་དང༌། བད༵ག་དམ་པའི་ཕ་རོལ་ཏུ་ཕྱིན་པ་དང༌། བ༵དེ་བ་ཆེ༵ན་པོའི་ཕ་རོལ་ཏུ་ཕྱིན་པ་དང༌། རྟ༵ག་པ༵འི་ཕ་རོལ་ཏུ་ཕྱིན་པ་མཐ༵ར་ཐུ༵ག་པའི་རང་བཞིན་དུ་གྲུབ་པ༵་ཡིན་ཏེ། མདོ་ལས། བཅོམ་ལྡན་འདས་དེ་བཞིན་གཤེགས་པའི་ཆོས་ཀྱི་སྐུ་ཉིད་ནི། རྟག་པའི་ཕ་རོལ་ཏུ་ཕྱིན་པ། བདེ་བའི་ཕ་རོལ་ཏུ་ཕྱིན་པ་ཞེས་སོགས་གསུངས་བའི་ཕྱིར། དེ་ལྟ་བུའི་གཙང་བདེ་རྟག་བདག་གི་ཕར་ཕྱིན་བཞི་ནི། ཕྱིན་ཅི་ལོག་བཞི་ལས་བཟློག་པའི་གཉེན་པོ་བཞིའི་བྲལ་འབྲས་ཡིན་ཏེ། རྒྱུད་བླ་མ་ལས། གཙང་བདག་བདེ་དང་རྟག་ཉིད་ཀྱི། །ཡོན་ཏན་ཕ་རོལ་ཕྱིན་པ་འབྲས། །སྡུག་བསྔལ་ཡིད་འབྱུང་ཞི་ཐོབ་པར། །འདུན་དང་སྨོན་པའི་ལས་ཅན་ནོ། །འདི་དག་འབྲས་ནི་མདོར་བསྡུས་ན། །ཆོས་ཀྱི་སྐུ་ལ་ཕྱིན་ཅི་ལོག །རྣམ་པ་བཞི་ལས་བཟློག་པ་ཡི། །གཉེན་པོའི་རབ་དུ་ཕྱེ་བ་ཉིད། །ཅེས་གསུངས་བའི་ཕྱིར། དེ་ཡང་རྒྱུ་གཉིས་གཉིས་ཀྱིས་འབྲས་བུུ་རེ་རེ་ཐོབ་སྟེ། རྒྱུད་བླ་མ་ལས། དེ་ནི་རང་བཞིན་དག་ཕྱིར་དང༌། །བག་ཆགས་སྤངས་ཕྱིར་གཙང་བ་ཡིན། །བདག་དང་བདག་མེད་སྤྲོས་པ་དག །ཉེ་བར་ཞི་བས་དམ་པའི་བདག །ཡིད་ཀྱི་རང་བཞིན་ཕུང་པོ་དང༌། །དེ་རྒྱུ་ལོག་ཕྱིར་བདེ་བ་ཉིད། །འཁོར་བ་དང་ནི་མྱ་ངན་འདས། །མཉམ་པ་ཉིད་དུ་རྟོགས་ཕྱིར་རྟག །ཞེས་གསུངས་པ་སོགས་རྒྱས་པར་རྒྱུད་བླ་རྩ་འགྲེལ་ལས་ཤེས་པར་བྱའོ། །དེ་འདྲའི་ཡོན་ཏན་དང་ལྡན་པའི་ཆོས་དབྱིངས་དེ༵་བཞི༵ན་ཉི༵ད་ལ༵་སྒོ་གསུམ་གུས༵་པས༵་ཕྱག༵་འཚ༵ལ་ཞེས་པས་མཐར་ཐུག་གི་སངས་རྒྱས་རང་བྱུང་དེ་བཞིན་ཉིད་ལ་མཆོད་པར་བརྗོད་པའོ། ། རྩོམ་པར་དམ་བཅའ་བ།གཉིས་པ་རྩོམ་པར་དམ་བཅའ་བ་ནི། དུས་བཞི་གཉིས་ཀྱི་རབ་དབྱེ་རབ་བཤད་བྱ། །ཞེས་བྱུང༌། དེའི་ཚིག་དོན་ནི། རྫོགས་ལྡན་ལ་སོགས་པའི་དུས༵་བཞི༵་ཆེ་བ་དང་ཆུང་བ་གཉི༵ས་ཀྱི༵་ར༵བ་དབྱེ༵་རྣམས་ར༵བ་ཏུ་བཤ༵ད་པར་བྱ༵་ཞེས་པས་རྩོམ་པར་དམ་བཅའ་བའོ། །མཆོད་པར་བརྗོད་པ་དང༌། རྩོམ་པར་དམ་བཅའ་བའི་དགོས་པ་གཞུང་སྤྱི་དང་མཐུན་པར་ཤེས་པར་བྱའོ། །གཉིས་པ་བསྟན་ཆོས་བརྩམ་པའི་ལུས་དངོས་ལ། དུས་བཞི་གཉིས་ཀྱི་ངོ་བོ་སོགས་བཤད་པ། བདེན་གཉིས་ཀྱི་རྣམ་བཞག་བཤད་པ། ཤེས་བྱའི་རབ་དབྱེ་སོགས་ལ་ལྟ་ངན་དུ་མ་དགག་ནས་རྫོགས་ལྡན་ཆོས་ཀྱི་ལུགས་བསྟན་པ། འགྱུར་མེད་ཡོངས་གྲུབ་དབུ་མ་ཆེན་པོའི་རྣམ་བཞག་བཤད་པ། གསུམ་ལྡན་མར་བཅད་སྐྱོན་ཅན་ལ་བརྟེན་པའི་ལྟ་ངན་དུ་མ་དགག་པ་དང་ལྔ། དང་པོ་ལ། དུས་བཞི་གཉིས་ཀྱི་ངོ་བོ་དང༌། ལོ་གྲངས་དང༌། དུས་བཞི་ཆུང་བའི་ངོས་འཛིན་བྱེ་བྲག་ཏུ་བསྟན་པ། དཔང་དུ་རུང་བ་དང་མི་རུང་པ་བསྟན་པ། རྫོགས་ལྡན་གྱི་ཆོས་སྐྱོན་མེད་རྣམ་དག་ཏུ་བསྟན་པ་དང་ལྔ། དང་པོ་ནི། རྩ་བར། དུས་བཞི་ཆེན་པོ་བསྐལ་དུས་བཟང་ངན་ཏེ། །དུས་བཞི་ཆུང་བ་བསྟན་པའི་བཟང་ངན་ཡིན། །ཞེས་རྐང་བ་གཉིས་བྱུང༌། དེའི་ཚིག་དོན་ནི། དུ༵ས་བ༵ཞི་ཆེ༵ན་པོ༵་ཞེས་པ་ནི་བསྐ༵ལ་དུ༵ས་བཟ༵ང་བ་དང་ང༵ན་པའི་ཁྱད་པར་ཏེ༵། དུ༵ས་བཞི༵་ཆུང༵་བ༵་ཞེས་པ་ནི་འཆད་འགྱུར་ལྟར་བསྟ༵ན་པ༵འི་བཟ༵ང་ང༵ན་ཡི༵ན་ནོ། །གཉིས་པ་དུས་བཞི་གཉིས་ཀྱི་ལོ་གྲངས་ནི། དང་པོའི་ལོ་ནི་ས་ཡ་ཕྲག་བཞི་དང༌། །སུམ་འབུམ་ཉི་ཁྲིའོ་དེའི་བཅུ་ཆ་ནི། །རྐང་པ་ཞེས་གསུངས་རྐང་པ་གཅིག་དང་གཉིས། །གསུམ་དང་བཞི་ལ་རིམ་བཞིན་རྩོད་ལྡན་དང༌། །གཉིས་ལྡན་གསུམ་ལྡན་རྫོགས་ལྡན་ཞེས་གསུངས་སོ། །དུས་བཞི་ཆུང་བ་བསྟན་པའི་བཟང་ངན་ནི། །མི་ལོ་ཉི་ཁྲི་གཅིག་སྟོང་དྲུག་བརྒྱའི་བར། །དེ་ཡི་བཞི་ཆ་དུས་བཞི་སོ་སོའི་ཚད། །རྩ་བར། དང་པོའི་ལོ་ནི་ས་ཡ་ཕྲག་བཞི་དང༌། །ཞེས་པ་ནས། སོ་སོའི་ཚད་ཞེས་པའི་བར་ཤོ་ལོ་ཀ་གཉིས་བྱུང༌། དེའི་ཚིག་དོན་ནི་དཔལ་མཆོག་དང་པོའི་རྒྱུད་འགྲེལ་དྲི་མེད་འོད་ལྟར་བཤད་ན། དུས་བཞི་ཆེ་ཆུང་གཉིས་ལས། ད༵ང་པོའི༵་ལོ༵་གྲངས་ནི༵་ས༵་ཡ༵་ཕྲག༵་བཞི་༵དང༵་སུམ༵་འབུམ༵་ཉི༵་ཁྲི༵འོ༵། །དེ༷འི༷་བཅུ༷་ཆ༷་ནི༷་ལོ་གྲངས་བཞི་འབུམ་སུམ་ཁྲི་ཉིས་སྟོང་ཡིན་ལ། དེ་ནི་རྫོགས་ལྡན་དེ་ཡི་བཞི་ཆ་ཡིན་ནོ། །བཞི་ཆ་དེ་ནི༵་རྐ༵ང་བ༵་གཅིག་ཡིན་ཞེ༵ས་གསུང༵ས་ཤིང༌། ལོ་གྲངས་འབུམ་ཕྲག་བཞི་དང་སུམ་ཁྲི་ཉིས་སྟོང་ནི་རྐང༵་བ༵་ག༵ཅིག་ད༵ང༌། ལོ་གྲངས་འབུམ་ཕྲག་བརྒྱད་དང་དྲུག་ཁྲི་བཞི་སྟོང་ནི་རྐང་བ་གཉི༵ས་དང༌། ལོ་གྲངས་འབུམ་ཕྲག་བཅུ་གཉིས་དགུ་ཁྲི་དྲུག་སྟོང་ནི་རྐང་གསུ༷མ་ད༵ང༌། འབུམ་ཕྲག་བཅུ་བདུན་ཉིས་ཁྲི་བརྒྱད་སྟོང་ནི་རྐང་བ་བ༵ཞི་ཡིན་ལ༵། དེ་རྣམས་རི༵མ་བཞི༵ན་རྩོད༵་ལྡན༵་ད༵ང་གཉི༵ས་ལྡ༵ན། གསུ༵མ་ལྡ༵ན། རྫོ༵གས་ལྡ༵ན་ཞེས་འཇོག་དགོས་པ་ཡིན་ཏེ། རྒྱུད་ཀྱི་རྒྱལ་པོ་དཔལ་དུས་ཀྱི་འཁོར་ལོ་ལས། མི་རྣམས་ཀྱི་ནི་ལོ་བརྒྱ་དག་ཀྱང་གཟའ་རྣམས་དག་གི་ལོ་ཡི་ལོངས་སྤྱོད་ཀྱིས་ནི་བསྒྱུར་བར་བྱ། །གནས་གཉིས་ཕྱོགས་ཀྱི་ཆས་ཐོབ་དེ་ནི་བུ་ལོན་དུ་འགྱུར་སྟེང་གི་ཕུང་པོ་དག་ལ་སྦྱང་བར་བྱ། །འབུམ་ཕྲག་ཉི་ཤུ་གཅིག་དང་ཁྲི་ཕྲག་དྲུག་གི་ལོ་གྲངས་གང་དག་རྣམས་ནི་དུས་ཀྱི་ཕྱེད་ལའོ། །སླར་ཡང་ཕུང་པོ་གཉིས་ཀྱིས་ངེས་པར་བཞི་པོ་རྣམས་ཀྱི་ལོ་ཡི་གྲངས་དག་ཏུ་ནི་རབ་ཏུ་འགྱུར། །སྟོང་བ་སྟོང་བ་ནམ་མཁའ་ཀླུ་དང་ལག་པ་ཐུབ་པ་རི་བོང་ཅན་རྣམས་རྫོགས་ལྡན་དུས་ཀྱི་ཚད། །གསུམ་ལྡན་ལ་ནི་ནམ་མཁའ་མཁའ་སྟོང་རོ་དང་དགུ་དང་ཉིན་བྱེད་ལོ་ཡི་གྲངས་སུ་རབ་ཏུ་གྲགས། །སྟོང་བ་སྟོང་བ་མཁའ་དང་རིག་བྱེད་རོ་དང་ལག་འགྲོ་ཞེས་པ་གཉིས་ལྡན་ལོར་ནི་ཡང་དག་སྟེ། །སྟོང་བ་ནམ་མཁའ་མཁའ་མིག་ཡོན་ཏན་ཆུ་གཏེར་རྣམས་ཀྱི་ལོ་ཡི་གྲངས་ནི་རྩོད་པའི་དུས་ལ་འགྱུར། །ལོ་ནི་འདི་དག་རྣམས་ཀྱིས་དུས་ཀྱི་མཐའ་རུ་གཟའ་ཚོགས་རྒྱུ་བ་ཁྱིམ་ནི་སྟོང་བ་དག་ལ་གནས། །སླར་ཡང་ཐ་སྐར་ལ་སོགས་དག་དང༌། ཞེས་དང༌། རིགས་ལྡན་པད་དཀར་གྱི་དང་པོའི་རྒྱུད་ཀྱི་རྒྱས་འགྲེལ་དྲི་མེད་འོད་ལས། ད་ནི་གཟའ་ཐམས་ཅད་ཀྱི་རྒྱུ་བ་དུས་བཞིའི་མཐར་སྟོང་པ་ལ་འཇུག་པ་གསུངས་པ། མི་རྣམས་ཀྱི་ནི་ཞེས་པ་ལ་སོགས་པ་སྟེ། མི་རྣམས་ཀྱི་ལོ་བརྒྱ་གང་ཡིན་པ་དེ་དག་གཟའ་རྣམས་དག་གི་ལོའི་ལོངས་སྤྱོད་ཀྱི་ནི་བསྒྱུར་བར་བྱ་ཞེས་པ་ནི་དུས་ཀྱི་འཁོར་ལོ་དང་བཅས་པའི་གཟའ་རྣམས་ཀྱིས་ཉིན་ཞག་ཕྱེད་དང་གཉིས་ཀྱིས་ལོ་བརྒྱ་ལོངས་སྤྱོད་དོ། །ཉིན་ཞག་གསུམ་གྱིས་ཉིས་བརྒྱའོ། །ཉིན་ཞག་སུམ་ཅུས་སྟོང་ཕྲག་གཉིས་སོང༌། ཉིན་ཞག་སུམ་བརྒྱ་དྲུག་ཅུས་ལོ་སྟོང་ཕྲག་ཉི་ཤུ་རྩ་བཞི་ལོངས་སྤྱོད་པར་འགྱུར་ཏེ་དེས་ལོ་བརྒྱ་བསྒྱུར་བའོ། །གནས་གཉིས་ཕྱོགས་ཀྱི་ཆས་ཐོབ་བཅུའི་ཆས་ཐོབ་པ་སྟེང་གི་ཕུང་པོ་དག་ལ་བུ་ལོན་སྦྱང་བར་བྱ་བར་འགྱུར་ཏེ། ལྷག་མ་འབུམ་ཕྲག་ཉི་ཤུ་གཅིག་དང་ཞེས་པ་ནི། འབུམ་ཕྲག་ཉི་ཤུ་རྩ་གཅིག་དང༌། ཁྲི་ཕྲག་དྲུག་གི་ལོ་གྲངས་གང་དག་རྣམས་ནི་དུས་ཀྱི་ཕྱེད་ལ་འགྱུར་རོ། །དུས་ཀྱི་ཕྱེད་ཀྱི་མཐའ་ལ་རྐང་བ་ལྔ་སྟེ་རྫོགས་ལྡན་གྱི་རྐང་བ་བཞི་དང༌། གསུམ་ལྡན་གྱི་རྐང་བ་གཅིག་གོ །དུས་ཀྱི་ཕྱེད་ནི་ནམ་མཁའ་དང་རླུང་དང་མེ་དང་ཆུ་དང་སའི་དཀྱིལ་འཁོར་གྱི་བདག་ཉིད་དེ་རིམ་པ་བཞིན་དུ་གཙོ་བོའི་རྩ་གཡོན་པ་ལ་སྲོག་ཡང་དག་པར་རྒྱུ་བའོ། །སླར་ཡང་ཕུང་པོ་གཉིས་ཀྱིས་ཞེས་པ་སླར་ཡང་གཉིས་པའི་ཕུང་པོ་རྐང་བ་ལྔའི་བདག་ཉིད་ཀྱིས་ཏེ། དེ་ལ་གསུམ་ལྡན་གྱི་རྐང་བ་གཉིས་དང༌། གཉིས་ལྡན་གྱི་རྐང་བ་གཉིས་དང༌། རྩོད་ལྡན་གྱི་རྐང་བ་གཅིག་སྟེ། ས་དང་ཆུ་དང་མེ་དང་རླུང་དང་སྟོང་པའི་བདག་ཉིད་ནི་གོ་རིམ་བཞིན་དུ་གཙོ་བོའི་རྩ་གཡས་པ་ནས་སྲོག་ཡང་དག་པར་རྒྱུ་བའི་དཀྱིལ་འཁོར་ལྔའི་བདག་ཉིད་དོ། །དེ་ལྟར་ན་རྩ་གཉིས་ཀའི་དཀྱིལ་འཁོར་གྱི་ལོའི་ཕུང་པོ་གཉིས་ཀྱིས་དུས་བཞི་པོ་རྣམས་ཀྱི་ལོ་ཡི་གྲངས་ཏེ། མི་རྣམས་ཀྱི་ལོ་ཁྲི་ཕྲག་གཉིས་ལྷག་པའི་འབུམ་ཕྲག་བཞི་བཅུ་རྩ་གསུམ་སྟེ། གཙོ་བོའི་དུས་སྦྱོར་གཉིས་གཡོན་དང་གཡས་ཀྱི་རྩའི་དཀྱིལ་འཁོར་ཡང་དག་པར་རྒྱུ་བ་ལས་སོ། །འདིར་དུས་སོ་སོ་རྣམས་ཀྱི་ཚད་ནི་སྟོང་བ་སྟོང་བ་ནམ་མཁའ་ཀླུ་དང་ལག་པ་ཐུབ་པ་རི་བོང་ཅན་རྣམས་ཞེས་པ་ནི། ལོ་སྟོང་ཕྲག་ཉི་ཤུ་རྩ་བརྒྱད་ལྷག་པའི་འབུམ་ཕྲག་བཅུ་བདུན་རྫོགས་ལྡན་དུས་ཀྱི་ཚད་དེ། དཀྱིལ་འཁོར་བཞིའི་རྐང་པ་ཉེ་བར་ལོངས་སྤྱོད་པའི་ཕྱིར་རོ། །གསུམ་ལྡན་ལ་ནི་ནམ་མཁའ་མཁའ་སྟོང་རོ་དང་དགུ་དང་ཉིན་བྱེད་ཅེས་པ་སྟོང་ཕྲག་དགུ་བཅུ་རྩ་དྲུག་ལྷག་པའི་འབུམ་ཕྲག་བཅུ་གཉིས་ཀྱི་ལོ་ཡི་གྲངས་སུ་རབ་ཏུ་གྲགས་སོ། །སྟོང་བ་སྟོང་བ་མཁའ་དང་རིག་བྱེད་རོ་དང་ལག་འགྲོ་ཞེས་པ་ནི། སྟོང་ཕྲག་དྲུག་ཅུ་རྩ་བཞི་ལྷག་པའི་འབུམ་ཕྲག་བརྒྱད་དེ་གཉིས་ལྡན་ལོར་ནི་ཡང་དག་པར་འགྱུར་རོ། །སྟོང་བ་ནམ་མཁའ་མཁའ་མིག་ཡོན་ཏན་ཆུ་གཏེར་རྣམས་ཞེས་པ་ནི། སྟོང་ཕྲག་སུམ་ཅུ་རྩ་གཉིས་ལྷག་པའི་འབུམ་ཕྲག་བཞི་རྣམས་ཀྱི་ལོའི་གྲངས་ནི་རྩོད་པའི་དུས་ལ་འགྱུར་རོ། །དེ་ལྟར་ན་གསུམ་ལྡན་གྱི་རྐང་པ་གསུམ་དང༌། གཉིས་ལྡན་གྱི་གཉིས་དང༌། རྩོད་ལྡན་གྱི་རྐང་བ་གཅིག་གོ། །དཀྱིལ་འཁོར་གསུམ་དང༌། གཉིས་དང་གཅིག་གི་བདག་ཉིད་དེ། དཀྱིལ་འཁོར་སོ་སོ་ནི། རྩོད་ལྡན་གྱི་དུས་ཀྱི་ལོའི་ཚད་དེ། ལོ་ནི་འདི་དག་རྣམས་ཀྱིས་དུས་ཀྱི་མཐའ་རུ་གཟའ་ཚོགས་རྒྱུ་བ་ཁྱིམ་ནི་སྟོང་བ་དག་ལ་གནས། ཞེས་པ་ལ་ལོ་ནི་སྔར་བརྗོད་པ་འདི་དག་རྣམས་ཀྱིས་དུས་ཀྱི་མཐའ་རུ་སྟེ། དུས་བཞིའི་མཐར་གཟའ་ཚོགས་རྒྱུ་བ་ནམ་གྲུའི་མཐར་ཁྱིམ་ནི་སྟོང་བ་དག་ལ་གནས་སོ། །སླར་ཡང་ཐ་སྐར་ལ་སོགས་པའི་རྒྱུ་སྐར་དག་གཟའ་རྣམས་ཀྱི་ལོངས་སྤྱོད་དུ་འགྱུར་རོ། །ཞེ༵ས་གསུ༵ངས་སོ༵། །དུ༵ས་བཞི༵་ཆུང༵་བ༵་བསྟ༵ན་པའི༵་བཟ༵ང་ང༵ན་ནི༵། མི༵འི་ལོ༵་གྲངས་ཉི༵་ཁྲི༵་གཅི༵ག་སྟོ༵ང་དྲུ༵ག་བརྒྱ༵འི་བ༷ར་ཡིན་ལ། ལོ་གྲངས་དེ༵་ཡི་༵བཞི༵་ཆ༵་ལྔ་སྟོང་བཞི་བརྒྱ་རེ་རེ་ནི་དུས༵་བཞི༵་སོ༵་སོ༵འི་ཚ༷ད་ཡིན་ཏེ། རྒྱུད་ཀྱི་རྒྱལ་པོ་དཔལ་དུས་ཀྱི་འཁོར་ལོ་ལས། དུས་རྣམས་དག་གི་ལོ་ཡི་ཚད་ནི་སྟོང་ཕྲག་ཉི་ཤུ་རྩ་གཅིག་རོ་བརྒྱ་དག་དང་བཅས་པ་སྟེ། །རེ་རེ་ཚད་ནི་དུས་དང་མདའ་ཡིས་བསྒྱུར་བའི་མི་རྣམས་དག་གི་ལོ་བརྒྱ་གང་ཡིན་པའོ། །ཞེས་དང༌། རིགས་ལྡན་པད་དཀར་གྱི་དུས་འཁོར་ཀྱི་རྒྱས་འགྲེལ་དྲི་མེད་འོད་ལས། དུས་བཞི་པོ་རྣམས་དག་གི་ལོའི་ཚད་ནི་སྟོང་ཕྲག་ཉི་ཤུ་རྩ་གཅིག་རོ་བརྒྱ་དག་དང་བཅས་པ་སྟེ། རོ་བརྒྱ་ཞེས་པ་དྲུག་བརྒྱ་ལྷག་པའི་སྟོང་ཕྲག་ཉི་ཤུ་རྩ་གཅིག་གི་ཚད་དེར་འགྱུར་རོ། །རེ་རེ་དག་གི་ཚད་ནི་དུས་དང་མདའ་ཡིས་བསྒྱུར་བའི་ཞེས་པ་ལ། དུས་ནི་བཞིའོ། །མདའ་ནི་ལྔ་སྟེ་ལྔ་བཅུ་རྩ་བཞི་པོ་དེ་དག་གིས་བསྒྱུར་བ་ནི། དུས་དང་མདའ་ཡིས་བསྒྱུར་བའོ། །མི་རྣམས་དག་གི་ལོ་བརྒྱ་གང་ཡིན་པའོ་ཞེས་པ་ལོ་བརྒྱ་བསྒྱུར་བ་བཞི་བརྒྱ་ལྷག་པའི་སྟོང་ཕྲག་ལྔར་འགྱུར་ཏེ། དུས་སོ་སོའི་ཚད་མཉམ་མོ། །ཞེས་གསུངས་པའི་ཕྱིར་རོ། ། དུས་བཞི་ཆུང་བའི་ངོས་འཛིན་བྱེ་བྲག་ཏུ་བསྟན་པ།གསུམ་པ་དུས་བཞི་ཆུང་བའི་ངོས་འཛིན་བྱེ་བྲག་ཏུ་བསྟན་པ་ནི། སྐྱོན་མེད་ཡོན་ཏན་ཚང་བ་རྫོགས་ལྡན་ཆོས། །དེ་ནས་བཞི་ཆ་ཉམས་པ་གསུམ་ལྡན་སྟོད། །ཕྱེད་ཉམས་གྱུར་ན་གསུམ་ལྡན་སྨད་དུ་འགྱུར། །བཞི་གསུམ་ཉམས་པའི་ལྷག་མ་གཉིས་ལྡན་ཡིན། །བཞི་ཆ་གཅིག་ཀྱང་མེད་ན་རྩོད་ལྡན་ཏེ། །ལྷ་མིན་ཀླ་ཀློ་ནག་པོའི་ཆོས་སུ་གསུངས། །རྩ་བར། སྐྱོན་མེད་ཡོན་ཏན་ཚང་པ་རྫོགས་ལྡན་ཆོས། །ཞེས་པ་ནས། ཆོས་སུ་གསུངས་ཞེས་པའི་བར་ཤོ་ལོ་ཀ་གཅིག་དང་རྐང་བ་གཉིས་བྱུང༌། དེའི་དོན་ནི། བསྟན་པར་བསྲེ་བསླད་ཀྱིས་སྐྱོན༵་མེ༵ད་ཅིང་ཡོ༵ན་ཏ༵ན་ཐམས་ཅད་ཚང༵་བ༵་ནི་སངས་རྒྱས་ཀྱི་བསྟན་པ་རབ་འབྲིང་མཐའ་གསུམ་ལས་རབ་རྫོ༵གས་ལྡ༵ན་གྱི་ཆོ༵ས་དང༌། དེ༵འི་རྗེས་ན༵ས་བཞི༵་ཆ༵་གཅིག་ཉམ༵ས་པ༵་ནི་གསུམ་༵ལྡ༷ན་སྟོ༵ད་ཀྱི་ཆོས་དང༌། བཞི་ཆ་གཉིས་ཉམས་པའམ་ཕྱེ༵ད་ཉམ༵ས་པར་གྱུ༵ར་བ་དེའི་ཚེ་ན༵་གསུ༵མ་ལྡ༵ན་སྨད༵་དུ༵་འགྱུར༵་བ་དང༌། གསུམ་ལྡན་གྱི་ཆོས་ནི་སངས་རྒྱས་ཀྱི་བསྟན་པ་འབྲིང་ཞེས་བྱའོ། །དེ་ནས་བཞི༵་ཆ་གསུམ༵་ཉམ༵ས་པ༵འི་ལྷ༵ག་མ༵་གཉི༵ས་ལྡན༵་གྱི་ཆོས་ཡི༵ན་ལ་དེ་ནི་སངས་རྒྱས་ཀྱི་བསྟན་པ་མཐའ་མ་ཞེས་བྱའོ། །བཞི༵་ཆ༵་བཞི་ཀ་ཉམས་ནས་བཞི་ཆ་གཅི༵ག་ཀྱ༵ང་མེ༵ད་པར་གྱུར་བའི་ཚེ་ན༵་རྩོད༵་ལྡན༵་གྱི་ཆོས་ཏེ༵། དེ་ནི་ལྷ༵་མིན༵་ཀླ༵་ཀློའི༵་ནག༵་པོའི༵་ཆོས༵་སུ༵་གསུ༵ངས་པ་ཡིན་ཏེ། རྒྱུད་ཀྱི་རྒྱལ་པོ་དཔལ་དུས་ཀྱི་འཁོར་ལོ་ལས། ལྷུན་པོ་རྒྱབ་ཀྱི་ཕྱོགས་རྣམས་སུ་ནི་ས་གཞི་དག་ལ་ལྷ་མིན་རྣམས་ཀྱིས་རྒྱལ་བར་དཀའ་བ་འཁོར། །གང་དུ་ཆོས་ནི་རྣམ་པར་ཉམས་ཤིང་རྩོད་དུས་འཇུག་པ་དེ་དང་དེར་ནི་རབ་ཏུ་བགྲོད་པར་བྱེད། །ཀླ་ཀློ་རྣམས་ཀྱང་གཡུལ་དུ་བཅོམ་སྟེ་རང་གི་ཆོས་ལ་འགོད་པ་བྱས་ནས་མདུན་དུ་རྣམ་པར་རྒྱུ། །རྫོགས་ལྡན་གསུམ་ལྡན་གཉིས་ལྡན་དག་དང་རྩོད་དུས་གཞན་ནི་དུས་ཀྱི་སྦྱོར་བ་དག་གིས་འབྱུང་བར་བྱ། །དུམ་བུ་གང་དུ་སྟོབས་ལྡན་འཁོར་ལོ་ཅན་དེ་རབ་ཏུ་ཞུགས་པ་དེར་ནི་རྫོགས་ལྡན་དུས་བགྲོད་དེ། །རྒྱལ་པོའི་རྒྱབ་ཏུ་གསུམ་ལྡན་རྩོད་པའི་དུས་ཀྱང་མདུན་དག་ཏུ་སྟེ་གཉིས་ཀྱི་བར་དུ་གཉིས་ལྡན་ནོ། །ཞེས་དང༌། དཔལ་མཆོག་དང་པོའི་རྒྱུད་འགྲེལ་དྲི་མེད་འོད་ལས། སའི་དུམ་བུ་གང་དུ་དེ་བཞིན་གཤེགས་པའི་ཆོས་ནི་རྣམ་པར་ཉམས་ཤིང་དེ་དག་ལས་བཟློག་པའི་ཆོས་འཇུག་པའི་ས་གཞི་དེར་འཁོར་ལོ་ཅན་ཏེ། རྩོད་དུས་ལ་ཆོས་མིན་རབ་ཏུ་འཇུག་པ་དེ་ཉིད་རྩོད་དུས་འཇུག་པ་ཞེས་པའི་དོན་ཏོ། །ཆོས་མ་ཡིན་པའི་བདག་ཉིད་རྩོད་པའི་དུས་སོ། །དུམ་བུ་གང་དང་གང་དུ་ཀླ་ཀློའི་ཆོས་ཞུགས་པའི་དུམ་བུ་དེ་དང་དེ་ཉིད་དུ་རབ་ཏུ་གྱུར་བས་བགྲོད་པར་བྱེད་པ་ནི་རབ་ཏུ་བགྲོད་པར་བྱེད་པའོ། །ཞེས་དང༌། རྫོགས་ལྡན་གསུམ་ལྡན་གཉིས་ལྡན་དག་དང་རྩོད་དུས་གཞན་ནི་དུས་ཀྱི་སྦྱོར་བ་དག་གིས་འབྱུང་བར་འགྱུར་ཞེས་པས་ནི་འདིར་རྫོགས་ལྡན་ལ་སོགས་པ་དུས་བཞི་གཞན་ཏེ། རྫོགས་ལྡན་ཆེན་པོ་ལ་སོགས་པ་མ་ཡིན་ནོ་ཞེས་པའི་དོན་ཏོ། །དུས་བཞི་འདི་ནི་དུས་ཀྱིས་སྦྱོར་བས་འབྱུང་བར་འགྱུར་ཏེ་དུས་ནི་ཁྱིམ་གྱི་འཁོར་ལོ་རྩིབས་བཅུ་གཉིས་པའོ། །དེའི་སྦྱོར་བ་ནི་དུས་ཀྱི་སྦྱོར་བ་སྟེ་ མཚམས་བཞིའི་དབྱེ་བས་འབྱུང་བར་འགྱུར་རོ། །དུམ་བུ་གང་དུ་སྟོབས་ལྡན་འཁོར་ལོ་ཅན་ཏེ་རབ་ཏུ་ཞུགས་པ་དེར་ནི་རྫོགས་ལྡན་དུས་བགྲོད་དེ། རྫོགས་ལྡན་དུས་ཞེས་བྱ་བ་ནི་ཡང་དག་པར་རྫོགས་པའི་སངས་རྒྱས་ཀྱི་ཆོས་བགྲོད་དོ་ཞེས་པའི་དོན་ཏེ། རྒྱལ་པོའི་རྒྱབ་ཏུ་གསུམ་ལྡན་ཞེས་པ་ནི་རྒྱལ་པོའི་རྒྱབ་ཏུ་རྫོགས་ལྡན་གྱི་མཐར་ཆོས་ཀྱི་རྐང་བ་གཅིག་མེད་པ་དང༌། གསུམ་ལྡན་གྱི་མཐར་རྐང་བ་གཉིས་མེད་པ་ནི་གསུམ་ལྡན་དུ་འགྱུར་རོ། །རྩོད་པའི་དུས་ཀྱང་རྒྱལ་པོའི་མདུན་དག་ཏུ་སྟེ་བསྐལ་བའི་མཐར་ཆོས་ཀྱི་རྐང་པ་བཞི་མེད་པའོ། །གཉིས་ཀྱི་བར་དུ་གཉིས་ལྡན་ནོ། །ཞེས་པ་ནི། རྩོད་དུས་དང་གསུམ་ལྡན་གཉིས་ཀྱི་བར་དུ་ཆོས་ཀྱི་རྐང་བ་གསུམ་མེད་པའི་གཉིས་ལྡན་ནོ། །ཞེས་གསུངས་པའི་ཕྱིར་རོ། ། དཔང་དུ་རུང་བ་བཤད་པ།བཞི་བ་ལ་དཔང་དུ་རུང་བ་བཤད་པ་དང༌། དཔང་དུ་མི་རུང་བ་བཤད་པ་དང་གཉིས། དང་པོ་ནི། དེ་དང་དེའི་རྣམ་དབྱེ་རབ་ཤེས་ནས། །བསྟན་ལ་བྱི་དོར་བྱ་བ་འདོད་པ་དང༌། །རང་གཞན་ལེགས་པའི་ལམ་ལ་འཇུག་འདོད་པས། །རྫོགས་ལྡན་ཆོས་མཆོག་དཔང་གྱུར་གཙུག་གིས་བླང༌། །དེ་དང་དེ་ཡི་རྣམ་དབྱེ་རབ་ཤེས་ནས། ཞེས་པ་ནས། དཔང་གྱུར་གཙུག་གིས་བླང་ཞེས་པའི་བར་ཤོ་ལོ་ཀ་གཅིག་བྱུང༌། དེའི་ཚིག་དོན་ནི། དུས་བཞི་ཆེ་བ་དང་ཆུང་བ་དེ༵་དང༵་དེའི༵་རྣམ༵་དབྱེ༵་གོང་དུ་བཤད་པ་ལྟར། རབ༵་ཏུ་ཤེས༵་པར་བྱས་ནས༵། སངས་རྒྱས་ཀྱི་བསྟན༵་པ་རིན་པོ་ཆེ་ལ༵་བྱི་དོར༵་ལེགས་པར་བྱ༵་བ༵་རུ་འདོད༵་པ༵་དང༵༌། ར༵ང་གཞན༵་ཐམས་ཅད་ལམ་ངན་པ་དང་དམན་པ་ལས་བཟློག་སྟེ། ངེས་པར་ལེགས༵་པའི༵་ལམ༵་ལ༵་འཇུག༵་པའམ་འགོད་པར་འདོད༵་པ༵འི་སྐྱེས་བུ་རྣམས་ཀྱིས་ནི། རྫོགས༵་ལྡན༵་ཆོ༵ས་ཀྱི་མཆོག༵་དཔང༵་ཏུ་གྱུར༵་བ་རྣམས་གཙུ༵ག་གིས༵་བླང༵་བར་བྱ་ཞེས་རྫོགས་ལྡན་གྱི་ཆོས་གང་ཡིན་དཔང་དུ་གྱུར་བ་ཡིན་པར་བསྟན་ཏོ། ། དཔང་དུ་མི་རུང་བ་བཤད་པ།གཉིས་པ་དཔང་དུ་མི་རུང་བ་བཤད་པ་ནི། གསུམ་ལྡན་མར་བཅད་སྐྱོན་དང་བཅས་གྱུར་ཞིང༌། །ཚོང་འདུས་འོ་མ་ལྟ་བུར་བསླད་པའི་གཞུང༌། །གང་ན་འདུག་ཀྱང་དཔང་དུ་བྱར་མི་རུང༌། །གོང་མ་གོང་མས་འོག་མ་འོག་མར་གནོད། །གྲུབ་མཐའ་གོང་མས་འོག་མར་གནོད་པ་བཞིན། །གསུམ་ལྡན་མར་བཅད་སྐྱོན་དང་བཅས་གྱུར་ཞིང༌། །ཞེས་པ་ནས། གནོད་པ་བཞིན་ཞེས་པའི་བར་ཤོ་ལོ་ཀ་གཅིག་དང་རྐང་བ་གཅིག་བྱུང༌། དེའི་ཚིག་དོན་ནི། གསུམ༵་ལྡན༵་མར༵་བཅད༵་གསུམ་ལྡན་གཉིས་ལྡན་རྩོད་ལྡན་རྣམས་ཀྱི་ཆོས་ནི་སྐྱོན༵་དང༵་བཅ༵ས་པར་གྱུར༵་བ་ཡིན་ཞིང༵༌། ཚོང༵་འདུས༵་ཀྱི་འོ༵་མ་༵ལྟ༵་བུར༵་བསྲེ་བསླ༵ད་དང་བཅས་པའི༵་གཞུང༵་ཡུལ་ཕྱོགས་གང༵་ན༵་འདུག༵་ཀྱང༵་དཔང༵་དུ༵་བྱར༵་མི༵་རུང༵་སྟེ། བསྟན་པ་གོང༵་མ༵་གོ༵ང་མས༵་བསྟན་པ་འོག༵་མ༵་འོག༵་མར༵་གནོད༵་པའི་ཕྱིར། དཔེར་ན་གྲུབ༵་མཐའ༵་གོང་མ་གོང༵་མའི༵་ལུང་རིགས་ཀྱིས་གྲུབ་མཐའ་འོག་མ་འོག༵་མ༵་ལ་གནོ༷ད་པ༷་བཞི༷ན་ཡིན་ཏེ། སྤྱོད་འཇུག་ལས། རྣལ་འབྱོར་པ་ཡང་བློ་ཁྱད་ཀྱིས། །གོང་མ་གོང་མ་རྣམས་ཀྱིས་གནོད། །ཅེས་གསུངས་བའི་ཕྱིར། དེས་ན་གསུམ་ལྡན་མར་བཅད་གཞུང་ལུགས་ལ་སྐྱོན་ཞུགས་པས་དེ་ལས་བཤད་པ་ཐམས་ཅད་བདེན་པའི་ངེས་པ་མེད་པ་ཡིན་ནོ། ། རྫོགས་ལྡན་གྱི་ཆོས་སྐྱོན་མེད་རྣམ་དག་ཏུ་བསྟན་པ།ལྔ་བ་རྫོགས་ལྡན་གྱི་ཆོས་སྐྱོན་མེད་རྣམ་དག་ཏུ་བསྟན་པ་ནི། རྫོགས་ལྡན་ཆོས་ནི་དྲི་མེད་རྒྱལ་བའི་བཀའ། །ས་བཅུའི་དབང་ཕྱུག་རྣམས་དང་ཤིང་རྟ་ཡི། །སྲོལ་འབྱེད་ཆེན་པོ་རྣམས་ཀྱི་ལེགས་གསུངས་པ། །སྐྱོན་མེད་ཡོན་ཏན་མཆོག་མངའ་རྣམས་ཡིནན། །དེ་ཡི་ལུགས་ལ་ཐམས་ཅད་རང་སྟོང་མིན། །རང་སྟོང་གཞན་སྟོང་ལེགས་པར་རྣམ་ཕྱེ་ནས། །ཀུན་རྫོབ་གང་ཡིན་ཐམས་ཅད་རང་སྟོང་དང༌། །དོན་དམ་གང་ཡིན་གཞན་སྟོང་ཉིད་དུ་གསུངས། །རྩ་བར། རྫོགས་ལྡན་ཆོས་ནི་དྲི་མེད་རྒྱལ་བའི་བཀའ། ཞེས་པ་ནས་དོན་དམ་གང་ཡིན་གཞན་སྟོང་ཉིད་དུ་གསུངས། ཞེས་པའི་བར་ཤོ་ལོ་ཀ་གཉིས་བྱུང༌། དེའི་དོན་ནི། རྫོ༵གས་ལྡ༵ན་གྱི་ཆོ༵ས་ནི༵་དྲི༵་མ་མེད༵་པའི་རྒྱལ༵་བའི༵་ལེགས་པར་གསུང་བའི་བཀ༵འ་དང༌། རྗེ་བཙུན་བྱམས་མགོན་སོགས་ས༵་བཅུ༵འི་དབང༵་ཕྱུག༵་རྣམས༵་ད༵ང༌། དབུ་མ་པ་ཆེན་པོ་ཐོགས་མེད་སོགས་ངེས་དོན་དབུ་མ་ཆེན་པོའི་ཤིང༵་རྟ༵འི༵་སྲོ༵ལ་འབྱེད༵་ཆེན༵་པོ༵་རྣམས༵་ཀྱིས༵་ལེགས༵་པར་གསུ༵ངས་པ༵་ཡིན་པ་དང་ཉེས་སྐྱོན༵་མེད༵་ཅིང་ཡོན༵་ཏན༵་མཆོག༵་ཏུ་མངའ༵་བ་རྣམ༷ས་དེ་ཡིན༵་ནོ༵། །དེ་ཡང་འཇམ་དཔལ་གྱི་རང་གི་ལྟ་བ་མདོར་བསྟན་སོགས་དང༌། ཀླུ་སྒྲུབ་ཀྱི་བསྟོད་ཚོགས་དྲུག་སོགས་དང༌། རིགས་ལྡན་པད་དཀར་གྱི་རྒྱས་འགྲེལ་དྲི་མེད་འོད་དང༌། བྱམས་མགོན་གྱི་བྱམས་ཆོས་སྡེ་ལྔ་དང༌། ཐོགས་མེད་ཀྱི་རྒྱུད་བླ་ཐོགས་འགྲེལ་སོགས་ནས་ངེས་གསང་དབུ་མ་ཆེན་པོ་རྫོགས་ལྡན་གྱི་ཆོས་འདི་རྒྱ་ཆེར་བསྟན་པ་ཡིན་ནོ། །རྫོགས་ལྡན་ཆོས་མཆོག་དེ༵་ཡི༵་ལུགས༵་ལ༵་ཆོས་དང་ཆོས་ཉིད་ཐམས༵་ཅད༵་རང༵་སྟོང༵་མིན༵་པས་ན་རང༵་སྟོང༵་དང་གཞན་༵སྟོང༵་ལེགས༵་པར༵་རྣམ༵་པར་ཕྱེ༵་ནས༵་ཀུན༵་རྫོབ༵་གང༵་ཡིན༵་པ་ཐམས་༵་ཅད༵་ར༷ང་སྟོང༵་ཡིན་པ་དང༵༌། དོན༵་དམ༵་བདེན་པ་གང༵་ཡིན༵་པ་དེ་ནི་རང་སྟོང་མ་ཡིན་པར་གཞན༵་སྟོང༵་ཉིད༵་དུ༵་རྫོགས་ལྡན་ཆོས་ལས་གསུ༵ངས་ཏེ། རྗེ་བཙུན་བྱམས་པས་ངོ་བོ་ཉིད་དང་བོ་གཉིས་ཀུན་རྫོབ་རང་སྟོང་དང་ཕྱི་མ་དོན་དམ་གཞན་སྟོང་ཡིན་པ་ལ་དགོངས་ནས་དབུས་མཐར། གང་ཟག་དང་ནི་ཆོས་རྣམས་ཀྱི། །དངོས་པོ་མེད་འདིར་སྟོང་བ་ཉིད། །དངོས་མེད་པ་ཡི་དངོས་ཡོད་པ། །དེ་ནི་དེ་ལས་སྟོང་ཉིད་གཞན། །ཞེས་དང༌། རྒྱུད་བླ་མ་ལས། རྣམ་དབྱེ་བཅས་པའི་མཚན་ཉིད་ཅན། །གློ་བུར་དག་གིས་ཁམས་སྟོང་གི། །རྣམ་དབྱེ་མེད་པའི་མཚན་ཉིད་ཅན། །བླ་མེད་ཆོས་ཀྱིས་སྟོང་མ་ཡིན། །ཞེས་གསུངས་པ་དང༌། རྒྱུད་བླ་ཐོགས་འགྲེལ་དུ་མདོ་དྲངས་པ་ལས། གང་ཞིག་གང་ན་མེད་པ་དེ་ནི་དེས་སྟོང་ངོ༌། །གང་ཞིག་ལྷག་མར་གྱུར་པ་དེ་ནི་དེ་ལ་རྟག་པར་ཡོད་དོ། །ཞེས་གསུངས་པ་དང༌། སྟོང་པ་ཉིད་ཆེན་པོའི་མདོ་ལས། གང་ན་གང་མེད་པ་དེ་ནི་དེས་སྟོང་ངོ༌། །ཞེས་ཡང་དག་པ་ཇི་ལྟ་བ་དེ་བཞིན་དུ་རབ་ཏུ་ཤེས་ལ་དེ་ལ་ལྷག་མར་གྱུར་པ་གང་ཡིན་པ་དེ་ནི་འདི་ན་ཡོད་དོ། །ཞེས་ཡང་དག་པར་ཇི་ལྟ་བ་བཞིན་དུ་རབ་ཏུ་ཤེས་སོ། །ཞེས་དང༌། མྱང་འདས་ཆེན་པོའི་མདོ་ལས། མྱ་ངན་ལས་འདས་པ་ནི་མི་སྟོང་བ་ཉིད་དོ། །དེ་ལས་གཞན་ནི་སྟོང་བའི་སྟོང་བ་ཉིད་དོ། །ཞེས་དང༌། དཀོན་མཆོག་སྤྲིན་མདོ་ལས། རིགས་ཀྱི་བུ་གལ་ཏེ་དོན་དམ་པ་མེད་ཟིན་ན་ཚངས་པར་སྤྱོད་པ་དོན་མེད་པར་འགྱུར་རོ། །དེ་བཞིན་གཤེགས་པ་རྣམས་འབྱུང་བ་ཡང་དོན་མེད་པར་འགྱུར་རོ། །གང་གི་ཕྱིར་དོན་དམ་པ་ཡོད་པས་ན། བྱང་ཆུབ་སེམས་དཔའ་རྣམས་དོན་དམ་པ་ལ་མཁས་པ་ཞེས་བྱའོ། །ཞེས་ཀུན་རྫོབ་རང་སྟོང་དང༌། དོན་དམ་གཞན་སྟོང་དུ་གསུངས་པ་དང༌། འཕགས་པ་ཀླུ་སྒྲུབ་ཀྱི་ཆོས་དབྱིངས་བསྟོད་པ་ལས། སྟོང་པ་ཉིད་ནི་སྟོན་པའི་མདོ། །རྒྱལ་བས་ཇི་སྙེད་གསུངས་པ་གང༌། །དེ་དག་ཀུན་གྱིས་ཉོན་མོངས་ལྡོག །ཁམས་ཏེ་ཉམས་པར་བྱེད་མ་ཡིན། །ཞེས་ཉོན་མོངས་ཀུན་རྫོབ་རང་སྟོང་དང༌། ཁམས་དོན་དམ་གཞན་སྟོང་ལ་དགོངས་ཏེ་གསུངས་པ་དང༌། སྒོམ་རིམ་ལས། མ་སྐྱེས་པ་ཡི་སྟོང་ཉིད་གཅིག །གཅིག་ནི་སྐྱེས་པའི་སྟོང་པ་སྟེ། །མ་སྐྱེས་པ་ཡི་སྟོང་ཉིད་མཆོག །སྐྱེས་པའི་སྟོང་བ་འཇིག་པ་ཡིན། །ཞེས་དང༌། ཀླུ་སྒྲུབ་ཀྱི་བྱང་ཆུབ་སེམས་འགྲེལ་ལས། །དགེ་དང་མི་དགེ་རྣམ་རྟོག་ནི། །རྒྱུན་ཆད་པ་ཡི་མཚན་ཉིད་ཅན། །སངས་རྒྱས་རྣམས་ཀྱིས་སྟོང་ཉིད་གསུངས། །གཞན་ནི་སྟོང་བར་མི་བཞེད་དོ། །ཞེས་དོན་དམ་མ་སྐྱེས་པའི་སྟོང་ཉིད་གཞན་སྟོང༌། ཀུན་རྫོབ་སྐྱེས་པའི་སྟོང་ཉིད་རང་སྟོང་ཉིད་ཀྱི་དབྱེ་བ་གསུངས་པ་དང༌། མགོན་པོ་བྱམས་པས་ངོ་བོ་ཉིད་གསུམ་ལ་རིམ་པར་དགོངས་ཏེ། དབུས་མཐར། དངོས་མེད་དེ་ཡི་དངོས་མ་ཡིན། །རང་བཞིན་གྱིས་ནི་སྟོང་བར་འདོད། །ཅེས་དང༌། མདོ་སྡེ་རྒྱན་དུ། མེད་པའི་སྟོང་བ་ཉིད་ཤེས་ཤིང༌། །དེ་བཞིན་ཡོད་པའི་སྟོང་ཉིད་དང༌། །རང་བཞིན་སྟོང་བ་ཉིད་ཤེས་ན། །སྟོང་ཉིད་ཤེས་པ་ཞེས་བརྗོད་དོ། །ཞེས་སོགས་རྒྱ་ཆེར་གསུངས་པའི་ཕྱིར་རོ། ། བདེན་གཉིས་ཀྱིས་རྣམ་བཞག་བཤད་པ།གཉིས་པ་བདེན་གཉིས་ཀྱིས་རྣམ་བཞག་བཤད་པ་ལ། བདེན་གཉིས་ཀྱི་གནས་ལུགས་བསྟན་པ། བདེན་གཉིས་ཀྱི་ངོ་བོ་དེ་ཉིད་དང་གཞན་དུ་བརྗོད་དུ་མེད་པར་བསྟན་པ། གཞན་ལུགས་ཧ་ཅང་ཐལ་ཆེས་ཤིང་རང་ལུགས་སྐྱོན་མེད་པར་བསྟན་པ་དང་གསུམ། དང་པོ་ནི། གང་ཕྱིར་བདེན་པ་གཉིས་ལ་བདེན་ལུགས་གཉིས། །སྣང་ལུགས་གཉིས་དང་སྟོང་ལུགས་གཉིས་གསུངས་ཤིང༌། །སྒྲོ་འདོགས་སྐུར་འདེབས་རྣམ་པ་མང་པོ་དང༌། །འགལ་འདུས་སྐྱོན་ཡོད་སྐྱོན་མེད་ལ་སོགས་དང༌། །ཆོས་དང་ཆོས་ཉིད་འདུས་བྱས་འདུས་མ་བྱས། །རྒྱལ་ཁམས་ཆེན་པོ་གཉིས་སུ་གསུངས་པའི་ཕྱིར། །རྩ་བར། གང་ཕྱིར་བདེན་པ་གཉིས་ལ་བདེན་ལུགས་གཉིས། །ཞེས་པ་ནས། གཉིས་སུ་གསུངས་པའི་ཕྱིར་ཞེས་པའི་བར་རྐང་བ་དྲུག་བྱུང༌། དེའི་ཚིག་དོན་ནི། གང༵་ཕྱིར༵་ཤེས་པར་བྱ་བ་ལ་དབྱེ་ན་དོན་དམ་དུ་བདེན་པ་དང༌། ཀུནརྫོབ་ཏུ་བདེན༵་པ༵་གཉིས༵་ལས་མི་འདའ་བ་ཡིན་ཏེ། ཡབ་སྲས་མཇལ་བའི་མདོ་ལས། ཤེས་པར་བྱ་བ་ཡང་ཀུན་རྫོབ་དང་དོན་དམ་པའི་བདེན་པ་གཉིས་པོ་འདིར་ཟད་དོ། །ཞེས་དང༌། ཏིང་ངེ་འཛིན་གྱི་མདོ་ལས་ཀྱང༌། གང་ཞིག་ཀུན་རྫོབ་དེ་བཞིན་དོན་དམ་སྟེ། །བདེན་པ་གསུམ་པ་གང་ཡང་མ་མཆིས་སོ། །ཞེས་དང༌། དབུ་མ་རྩ་ཤེས་ལས། སངས་རྒྱས་རྣམས་ཀྱིས་ཆོས་བསྟན་པ། །བདེན་པ་གཉིས་ལ༵་ཡང་དག་བརྟེན། །ཞེས་དང༌། དེ་ཉིད་ཀྱི་འགྲེལ་བ་ལས། བདེན་པ་གང་ཡིན་ལ་ཕྱེ་ན་དོན་དམ་དུ་བདེན་པ་དང༌། ཀུན་རྫོབ་ཏུ་བདེན་པ་གཉིས་ལས་མི་འདའ་ཞིང༌། ཞེས་གསུངས་བའི་ཕྱིར། བདེན༵་ལུག༷ས་ཀྱང་གཉི༷ས་ཏེ། དོན་དམ་པའི་ཆོས་རྣམས་དོན་དམ་དུ་མི་བསླུུ་བ་དང༌། ཀུན་རྫོབ་བདེན་པའི་ཆོས་རྣམས་ཀུན་རྫོབ་ཏུ་མི་བསླུ་བ་ཡིན་པར་འདིའི་འགྲེལ་བར་གསུངས་པ་དང༌། ཐེག་མཆོག་དབུ་མའི་ཟིན་བྲིས་ལས། དོན་དམ་པའི་ཡེ་ཤེས་རྣམ་པ་ཐམས་ཅད་པ་གནས་ལུགས་ཀྱི་དོན་དེ་ནི་འཕགས་པ་རྣམས་ཀྱི་སོ་སོར་རང་གི་རིག་པའི་ངོ་བོར་བྱུང་ཞིང་གནས་ལུགས་ལ་གྲུབ་པས་ན་དོན་དམ་པར་བདེན་པ་དང༌། གློ་བུར་འཁོར་བའི་ཆོས་རྣམས་ནི་བྱིས་པ་རྣམས་ཀྱི་ངོ་བོར་བདེན་པས་ན་ཀུན་རྫོབ་ཏུ་བདེན་པའོ། །ཞེས་གསུངས་བའི་ཕྱིར། འདིའི་སྐབས་སུ་དཔྱད་པར་བྱ་བ་འདི་ཡོད་དེ། འདི་ཉིད་ཀྱི་འགྲེལ་བ་ཕྱོགས་མེད་རིས་མེད་ལས། ཟླ་བ་གཉིས་སྣང་ལ་སོགས་པ་ཀུན་རྫོབ་དུ་ཡང་བསླུ་བ་རྣམས་ནི་ལོག་པའི་ཀུན་རྫོབ་དང་ཀུན་རྫོབ་ཙམ་ཞེས་གསུངས་ཀྱི་ཡང་དག་ཀུན་རྫོབ་དང་ཀུན་རྫོབ་ཀྱི་བདེན་པ་ནི་མ་ཡིན་ཏེ། སྣང་དུ་འདྲ་ཡང་དོན་བྱེད་དག །ནུས་པའི་ཕྱིར་དང་མི་ནུས་ཕྱིར། །ཡང་དག་ཡང་དག་མ་ཡིན་པའི། །ཀུན་རྫོབ་ཀྱི་ནི་དབྱེ་བ་བྱས། ཞེས་སོགས་གང་གསུངས་པའོ། །དེས་ན་ཀུན་རྫོབ་དེ་གཉིས་ལ་ཁྱད་པར་ཡོད་ཀྱང་འཁོར་དང་བཅས་པ་ལ་དགོངས་ནས་སྐབས་མང་པོར་ཀུན་རྫོབ་བདེན་པ་ཞེས་པ་དང༌། འཇིག་རྟེན་ཀུན་རྫོབ་ཀྱིས་ཞེས་པ་དང༌། འཇིག་རྟེན་གྱི་བདེན་པས་ཞེས་སོགས་གསུངས་སོ། །ཞེས་དང༌། རི་ཆོས་ལས། ཀུན་བཏགས་ངོ་བོ་ཉིད་མེད་པ་ནི། རང་གི་མཚན་ཉིད་ཀྱིས་མེད་པ་སྟེ་ཀུན་རྫོབ་ཙམ་མམ་ལོག་པའི་ཀུན་རྫོབ་ཏུ་གྲུབ་པ་ཙམ་ལས་ཀུན་རྫོབ་བདེན་པའམ་ཡང་དག་ཀུན་རྫོབ་ཏུ་ཡང་མ་གྲུབ་པོ། །ཞེས་གསུངས་པ་དང༌། ཐེག་མཆོག་དབུ་མའི་རབ་བྱེད་དང་པོ་ལས། ཀུན་བརྟགས་ནམ་ཡང་མེད་མོད་འཁྲུལ་ངོར་སྣང༌། །ཀུན་རྫོབ་ཙམ་ལ་ལྟོས་པའི་དབུ་མའོ། །ཞེས་དང༌། དེའི་རབ་བྱེད་ལྔ་བ་ལས། ཐེག་པ་ཆེན་པོར་ཆོས་ལྔ་བསྟན་པ་ནི། །ཞེས་པ་ནས། དང་པོ་གཉིས་ནི་ཀུན་རྫོབ་ཙམ་ཡིན་ལ། །གསུམ་པ་ཀུན་རྫོབ་བདེན་པ་ཉིད་དུ་བཤད། །ཐ་མ་གཉིས་ནི་དོན་དམ་དངོས་རྣམ་གྲངས། །ཞེས་དང༌། ཡང་དེའི་རབ་བྱེད་བདུན་པ་ལས། རང་ལུགས་ཀུན་རྫོབ་ཙམ་དང་ཀུན་རྫོབ་བདེན། །ཀུན་བཏགས་གཞན་དབང་གཉིས་ལ་རིམ་བཞིན་སྦྱོར། །ཞེས་སོགས་ཀྱིས་གསུང་ཟིན་ལ་ལོག་པའི་ཀུན་རྫོབ་དང༌། ཀུན་བཏགས་ཀྱི་ཆོས་རྣམས་ཀུན་རྫོབ་བདེན་པ་མ་ཡིན་པ་ལྟ་བུར་གསུངས་པ་དང༌། ཡང་བདེན་གཉིས་གསལ་བའི་ཉི་མ་ལས། རྣམ་ཤེས་ཀྱི་ཡུལ་གང་ཞིག །གཤིས་ལ་རང་གི་ངོ་བོ་བདེན་པས་སྟོང་བ་ནི། ཀུན་རྫོབ་བདེན་པའི་མཚན་ཉིད་དང༌། འཕགས་པའི་ཡེ་ཤེས་དམ་པའི་ཡུལ་གང་ཞིག །གཤིས་ལ་རང་གི་ངོ་བོ་བདེན་པས་མི་སྟོང་བ་ནི། དོན་དམ་བདེན་པའི་མཚན་ཉིད་དེ། བདེན་གཉིས་ལས། ཀུན་རྫོབ་དང་ནི་བདེན་པའི་དོན། །བདེན་གཉིས་ཐུབ་པའི་གསུངས་པ་ལ། །ཇི་ལྟར་སྣང་བ་འདི་ཁོ་ན། །ཀུན་རྫོབ་གཞན་ནི་གཅིག་ཤོས་ཞེས་དབུ་མ་བདེན་གཉིས་ཀྱི་ལུང་ཤེས་བྱེད་དང་བཅས་ཏེ་གསུངས་པ་དང༌། ཡང་བདེན་གཉིས་གསལ་བའི་ཉི་མ་ལས། གྲངས་ངེས་ནི་ཤེས་བྱ་ཐམས་ཅད་དོན་དམ་དཔྱོད་པའི་རིགས་པས་དཔྱད་མི་བཟོད་པ་རྣམ་ཤེས་ཀྱི་ཡུལ་དང༌། བཟོད་པ་ཡང་དག་ཡེ་ཤེས་ཀྱི་ཡུལ་གཉིས་སུ་གྲངས་ངེས་པས་དོན་དམ་བདེན་པ་དང༌། ཀུན་རྫོབ་བདེན་པ་གཉིས་སུ་གྲངས་ངེས་སོ། །ཞེས་དང༌། ཤེར་ཌཱིཀ་སྔོན་མེད་ལེགས་བཤད་ལས། མཚན་ཉིད་གསུམ་བདེན་པ་གཉིས་སུ་འདུས་ལ་ཞེས་གསུངས་པ་སོགས་ཀྱིས་ཀུན་རྫོབ་ཀྱི་ཆོས་ལ་ཀུན་རྫོབ་བདེན་པ་ཡིན་པས་ཁྱབ་པ་ལྟ་བུར་གསུངས་པ་ཡིན་ནོ། །དམ་པ་དེ་དག་གི་གསུང་ཟིན་གྱི་དགོངས་པ་གཅིག་ཏུ་དྲིལ་ན་སྦྱིར་བདེན་གཉིས་གསལ་བའི་ཉི་མ་ལྟར་ཀུན་རྫོབ་ཀྱི་ཆོས་རྣམས་རྣམ་ཤེས་ཀྱི་ཡུལ་ཡིན་པ་ཙམ་གྱིས་ཀུན་རྫོབ་བདེན་པར་འཇོག་སྟེ། བདེན་པ་གཉིས་སུ་ཕྱེ་བའི་ཀུན་རྫོབ་བདེན་པ་དང༌། ཡང་དག་ཀུན་རྫོབ་དང་ལོག་པའི་ཀུན་རྫོབ་གཉིས་སུ་ཕྱེ་བའི་ཀུན་རྫོབ་ཀྱི་བདེན་པ་གཉིས་མི་འདྲ་བའི་ཕྱིར་ཏེ། སྔ་མ་ནི་རྣམ་ཤེས་ཀྱི་ངོར་བདེན་པའམ་རྟོག་པའི་ཞེན་ངོ་དང༌། མངོན་སུམ་གྱི་སྣང་ངོ་གང་དུ་བདེན་ཀྱང་ཀུན་རྫོབ་ཏུ་བདེན་པར་འཇོག་དགོས་པ་གང་ཞིག །ཕྱི་མ་ནི། གསལ་སྣང་ཅན་གྱི་ཤེས་པ་ལ་དོན་བྱེད་ནུས་སུ་སྣང་བ་ལྟར་དོན་བྱེད་ནུས་སུ་བདེན་པ་ལ་བྱེད་པའི་ཕྱིར། རྟགས་དང་བོ་གྲུབ་སྟེ། ཐེག་མཆོག་དབུ་མ་ལས། ཀུན་རྫོབ་བདེན་པ་ཀུན་རྫོབ་ཁོ་ནར་བདེན། །དོན་དམ་ཁོ་ནར་བདེན་པ་དོན་དམ་སྟེ། །ཞེན་ངོར་བདེན་པ་སྣང་ངོར་བདེན་པ་གཉིས། །ཀུན་རྫོབ་ཡིན་ཕྱིར་ཞེས་དང༌། ཐེག་མཆོག་དབུ་མའི་ཟིན་བྲིས་ལས། གློ་བུར་འཁོར་བའི་ཆོས་རྣམས་ནི། བྱིས་པ་རྣམས་གྱི་ངོ་བོར་བདེན་པས་ན་ཀུན་རྫོབ་ཏུ་བདེན་པའོ། །ཞེས་གསུངས་བའི་ཕྱིར། རྟགས་གཉིས་པ་གྲུབ་སྟེ། ཐེག་མཆོག་དབུ་མ་ལས། ཐོག་མེད་བསགས་པའི་མ་རིག་བག་ཆགས་ལ། །འཕྲལ་གྱི་འཁྲུལ་རྒྱུས་མ་སླད་གསལ་སྣང་ཅན། །བླང་དོར་བྱེ་བའི་ཡུལ་དུ་འོས་པ་ནི། །ཡང་དག་ཀུན་རྫོབ་ཅེས་བྱར་མཁས་རྣམས་འདོད། །ཅེས་གསུངས་པ་དང༌། དབུ་མ་བདེན་གཉིས་ལས། སྣང་དུ་འདྲ་ཡང་དོན་བྱེད་དག །ནུས་པའི་ཕྱིར་དང་མི་ནུས་ཕྱིར། །ཡང་དག་ཡང་དག་མ་ཡིན་པའི། །ཀུན་རྫོབ་ཀྱི་ནི་དབྱེ་བ་བྱས། །ཞེས་གསུངས་བའི་ཕྱིར། དེ་ལྟར་ན་སྔར་བཀོད་པའི་བཀའ་བསྡུ་བཞི་བའི་འགྲེལ་བ་དང༌། ཐེག་མཆོག་དབུ་མའི་གསུང་ཟིན་ལ། ལོག་པའི་ཀུན་རྫོབ་དང༌། ཀུན་བཏགས་ཀྱི་ཆོས་རྣམས་ཀུན་རྫོབ་བདེན་པ་མ་ཡིན་པ་ལྟ་བུར་གསུངས་པ་ནི། སྤྱིར་ཀུན་རྫོབ་བདེན་པ་མ་ཡིན་པར་གསུངས་པ་མིན་པར་ཡང་དག་ཀུན་རྫོབ་དང་ལོག་པའི་ཀུན་རྫོབ་གཉིས་སུ་ཕྱེ་བའི་ཡང་དག་ཀུན་རྫོབ་བམ་ཀུན་རྫོབ་ཀྱི་བདེན་པ་མ་ཡིན་པར་གསུངས་པ་ཡིན་ཞེས་བྱས་ན། བདེན་གཉིས་གསལ་བའི་ཉི་མར། བདེན་གཉིས་ཀྱི་མཚན་ཉིད་བཞག་པ་དེ་དང༌། དབུ་མ་བདེན་གཉིས་ཀྱི་ཡང་ལོག་སྟོན་བྱེད་ཀྱི་གཞུང་བཀོད་པ་དང༌། ཡབ་སྲས་མཇལ་བའི་མདོ་སོགས་གཞུང་སྤྱི་དང་མཐུན་སྙམ། འོན་ཀྱང་བདག་ལྟ་བུའི་མཐའ་གཅིག་ཏུ་ཁ་ཚོན་གཅོད་དཀའ་བས་གཟུར་གནས་མཁས་པ་རྣམས་ཀྱིས་སླར་དཔྱད་པར་མཛོད་ཅིགཡང་བདེན་པ་གཉིས་ལ་སྣང༵་ལུགས༵་གཉི༵ས་ཡོད་དེ། དོན་དམ་བདེན་པ་ནི། སྤྲོས་བྲལ་རྣམ་པར་མི་རྟོག་པའི་ཡེ་ཤེས་ལ་སྣང་བ་ཡིན་གྱི་ཀུན་རྟོག་རྣམ་ཤེས་ལ་སྣང་མི་སྲིད་པ་དང༌། ཀུན་རྫོབ་ནི། རྣམ་ཤེས་ལ་སྣང་བ་དང༌། དབང་བོ་གཟུགས་ཅན་པ་ལ་སྣང་བ་ཡོད་པར་ཆོས་རྗེ་ཀུན་མཁྱེན་ཆེན་པོས་གསུངས་པ་དང༵༌། གཞན་ཡང་བྱིས་པ་སོ་སོའི་སྐྱེ་བོ་རྣམས་ལ་ཡང་དག་པ་ཉིད་དྲི་མས་བསྒྲིབས་ནས་ཡང་དག་པ་མ་ཡིན་པ་ཀུན་རྫོབ་ཀྱི་གཟུགས་སོགས་ཀུན་ཏུ་སྣང་བ་ཡིན་ལ། བྱང་སེམས་འཕགས་པ་རྣམས་ཀྱིས་རྣམ་ཤེས་ཀྱི་སྒྲིབ་གཡོག་དེ་བསལ་ནས་གནས་ལུགས་དེ་བཞིན་ཉིད་སྣང་བ་ཡིན་ཏེ། མདོ་སྡེ་རྒྱན་ལས། བྱིས་པ་ཡང་དག་ཉིད་བསྒྲིབས་ནས། །ཡང་དག་མ་ཡིན་ཀུན་ཏུ་སྣང༌། །བྱང་ཆུབ་སེམས་དཔའ་དེ་བསལ་ནས། །ཡང་དག་ཉིད་ནི་ཀུན་ཏུ་སྣང༌། །ཞེས་གསུངས་པའི་ཕྱིར། ཡང་བདེན་པ་གཉིས་ལ་སྟོང༵་ལུགས༵་གཉིས༵་སུ་མཆིས་སྟེ། འདི་ཉིད་ཀྱི་འགྲེལ་བ་ལས། དོན་དམ་ནི། གཤིས་ལུགས་ལ་རང་གིས་མི་སྟོང་ཞིང༌། ཀུན་རྫོབ་ཀྱི་ཆོས་ཐམས་ཅད་ཀྱིས་སྟོང་བའི་གཞི་ཡིན་པའི་ཕྱིར། གཞན་སྟོང་ཟབ་མོ་ཆོས་ཉིད་ཀྱི་སྟོང་ལུགས་ཏེ། མེད་དགག་མ་ཡིན་པའི་སྟོང་བ་ཉིད་དང༌། ཞེས་པ་ནས། ཀུན་རྫོབ་ནི། གཤིས་ལུགས་ལ་རང་རང་ངོ་བོས་སྟོང་བའི་ཕྱིར། ཞེས་གསུངས་པ་དང༌། ཀུན་མཁྱེན་ཆེན་པོའི་དོན་གསལ་ལས། ཀུན་རྫོབ་བདེན་པ་རང་གིས་སྟོང༌། །དོན་དམ་བདེན་པ་གཞན་སྟོང་སྟེ། །སྟོང་ཚུལ་དེ་ལྟར་མ་ཤེས་ན། །རྒྱལ་བའི་བཀའ་ལ་རྨོངས་པ་ཡིན། །ཞེས་སོགས་གསུངས༵་ཤིང༵༌། ཀུན་རྫོབ་སྣང་གྲགས་ཀྱི་ཆོས་འདི་རྣམས་གཤིས་ལུགས་ལ་གྲུབ་ཅེས་པ་དང༌། དེ་དག་ཆོས་ཉིད་ཆོས་སྐུ་ཕྱག་རྒྱ་ཆེན་པོར་རང་བྱུང་ཡིན་ཞེས་སོགས་སུ་འདོད་ན། སྒྲོ༵་འདོག༷ས་པའི་མཐར་ལྟུང་བ་དང༌། དོན་དམ་ཆོས་སྐུ་ཕྱག་རྒྱ་ཆེན་པོ་རང་བྱུང་ཡེ་ཤེས་ལ་སོགས་པའང་རང་སྟོང་ཡིན་པས་གཤིས་ལུགས་ལ་མ་གྲུབ་པ་དང་མེད་དགག་ཡིན་ཞེས་འདོད་ན་སྐུར༵་འདེབ༷ས་ཀྱི་མཐར་ལྟུང་བས་ན། དེ་འདྲའི་སྒྲོ་འདོགས་སྐུར་འདེབས་ཀྱི་རྣམ༵་པ༵་མང༵་པོ༵་དག་ཤེས་པར་བྱས་ནས་མཐའ་ཐམས་ཅད་དང༵་བྲལ་དགོས་ཀྱི་གང་རུང་དང་བྲལ་བས་མི་ཆོག་སྟེ་འཕགས་པ་ཀླུ་སྒྲུབ་ཀྱིས་མེད་པའི་མཐའ་འགོགས་པ་ལ་བསྟོད་པའི་ཚོགས་གསུངས་པའི་རྗེས་སུ། ཡོད་པའི་མཐའ་འགོག་པ་ལ་རིགས་པའི་ཚོགས་གསུངས་ཏེ། རིགས་པ་དྲུག་ཅུ་པར། རེ་ཞིག་ཉེས་ཀུན་འབྱུང་བའི་གནས། །མེད་ཉིད་རྣམ་པར་བཟློག་ཟིན་གྱིས། །རིགས་པ་གང་གིས་ཡོད་ཉིད་ཀྱང༌། །བཟློག་པར་འགྱུར་པ་མཉན་པར་གྱིས། །ཞེས་གསུངས་བའི་ཕྱིར། ཀུན་རྫོབ་བདེན་པ་ནི། འགལ༵་བ་འདུས༵་ན་སྐྱོན༵་ཡོད༵་པ་ཡིན་ཏེ། གཟུགས་མེད་གཟུགས་བཟང་དང་ལུས་མེད་པའི་ལུས་དང༌། སྲིད་པ་མེད་པའི་སྲིད་པ་སོགས་ཀུན་རྫོབ་ལ་མི་སྲིད་པའི་ཕྱིར། དོན་དམ་བདེན་པ་ནི་འགལ་བ་འདུས་ཀྱང་སྐྱོན༵་མེད༵་པ་ཡིན་ཏེ། དེ་ནི་གཟུགས་མེད་གཟུགས་བཟང་དང་རྣམ་པ་ཀུན་ལྡན་རྣམ་པ་མེད་པ་སོགས་ཡིན་པའི་ཕྱིར། ལ༵་སོགས༵་པས་སྒྲས་རྟོག་གེ་ཅན་གྱི་སྤྱོད་ཡུལ་དང༵༌། རྣལ་འབྱོར་ཅན་གྱི་སྤྱོད་ཡུལ་དང༌། ཐུན་མོང་དང་ཐུན་མོང་མ་ཡིན་པ་དང༌། རྣམ་པར་བརྟགས་པའི་གཟུགས་སོགས་དང༌། ཆོས་ཉིད་ཀྱི་གཟུགས་ལ་སོགས་པ་རྒྱ་ཆེར་གསུངས་པ་རྣམས་བཟུང༌། ཞེས་གསུངས་སོ། །ཀུན་རྫོབ་བདེན་པ་ནི། ཆོས༵་ཅན་དང༵༌། དོན་དམ་བདེན་པ་ནི་ཆོས༵་ཉིད༵་བདེ་བར་གཤེགས་པའི་སྙིང་པོ་ཡིན་ནོ། །འདུས་བྱས་འདུས་མ་བྱས་ཞེས་པའི་དོན་ནི། འདི་ཉིད་ཀྱི་རང་འགྲེལ་ལས། ཤེས་བྱ་ལ་ཕྱེ་ན་འདུས༵་བྱས༵་དང་འདུས༵་མ༵་བྱས༵་སོ། །འདུས་བྱས་ལ་ཕྱེ་ན་བེམ་པོ་དང་རིག་པ་སྟེ༑ འདུས་མ་བྱས་ལ་ཕྱེ་ན་ཡང་བེམ་པོ་དང་རིག་པའོ། །དེ་ལ་འདུས་བྱས་ཡིན་པའི་བེམ་པོ་ནི། བྲག་རི་ལ་སོགས་པའོ། །འདུས་བྱས་ཡིན་པའི་རིག་པ་ནི། རྣམ་ཤེས་ཚོགས་བརྒྱད་འཁོར་དང་བཅས་པ་དང༌། གཞན་བྱུང་ཡེ་ཤེས་རྣམས་སོ། །ཞེས་པ་ནས། ཤེས་བྱ་ལ་ཕྱེ་ན་རང་མི་རིག་པ་དང་རང་རིག་པ་དག་ཏུ་ཁ་ཚོན་ཆོད་པའི་ཕྱིར་རོ། །དེ་ལྟ་བས་ན་འདུས་མ་བྱས་ནམ་མཁའ་བེམ་པོ་ཡིན་ན། དངོས་པོར་ཐལ། ཞེས་པ་དང༌། ཆོས་དབྱིངས་རིག་པའམ་ཤེས་པ་ཡིན་ན་མི་རྟག་པར་ཐལ། ཞེས་པ་ལ་སོགས་པ་སྨྲ་བ་རྣམས་ཀྱིས་ནི། རྫོགས་ལྡན་གྱི་ཆོས་མཆོག་ཁྱད་འཕགས་རྣམས་ཀྱི་ཁུངས་མ་ཆོད་ཅིང་དོན་མ་རྟོགས་པ་ཉིད་དུ་བས་སོ། །རིག་པའམ་ཤེས་པ་གང་ཡིན་མི་རྟག་པ་ཡིན་ན། ཆོས་དབྱིངས་དེ་བཞིན་ཉིད་ཀྱང་མི་རྟག་པ་ཡིན་པར་འགྱུར་ཏེ་རིག་པའི་མཆོག་དང་ཤེས་པའི་མཆོག་ཡིན་པའི་ཕྱིར་རོ། །དེ་འདོད་ན་འདུས་མ་བྱས་ཡིན་པར་འགལ་ལོ། །དེ་རིག་པའམ་ཤེས་པ་མ་ཡིན་ན་ནི་གཤིས་ལུགས་མཐར་ཐུག་པའི་ཤེར་ཕྱིན་དང༌། ཡོངས་གྲུབ་བཅུ་གཉིས་ཀྱང་མ་ཡིན་པར་འགྱུར་ལ། ཞེས་པ་ནས། དོན་དམ་པ་མཚན་བརྗོད་དུ་གསུངས་བའི་དོན་ཐམས་ཅད་མ་ཡིན་པར་འགྱུར་ལ། འདོད་མི་ནུས་ཏེ། དེ་ལས་བཟློག་པ་ཡིན་པར་རྫོགས་ལྡན་གྱི་ཆོས་མཆོག་ཁྱད་འཕགས་རྣམས་ལས་གསལ་བར་གསུངས་ཤིང་ཡང་དང་ཡང་དུ་གསུངས་བའི་ཕྱིར་རོ། །ཞེས་གསུངས་པའི་ཕྱིར་རོ། །དེང་སང་གཞན་སྟོང་བར་ཁས་འཆེ་བ་དག་གིས་ཆགས་སྡང་དཀྲུགས་པའི་ཡིད་བོར་ནས་ལེགས་པར་དཔྱོད་དང༌། ལེགས་བཤད་བླ་ན་མ་མཆིས་པའི་ལུང་འདི་དག་གིས་ཁྱེད་ཅག་གི་ལོག་རྟོག་གི་བུ་ག་བརྒྱ་དུས་གཅིག་ཏུ་གཅོད་པ་མ་ཡིན་ནམ། ལུང་འདིའི་ཕྱོགས་སྔ་གང་ཟག་སུ་ལུང་གིས་ཟིན་པ་ཡིན་ལན་ལེགས་པར་སྨྲོས་ཤིག །རྒྱལ༵་ཁམས༵་ཆེན༵་པོ༵་གཉིས༵་སུ༵་གསུངས༵་པའི༵་ཕྱིར༵། ཞེས་པ་ནི། དོན་དམ་བདེ་བར་གཤེགས་པའི་ཡེ་ཤེས་ནི། དོན་དམ་གྱི་རྒྱལ་ཁམས་ཆེན་པོ་དང་ཀུན་རྫོབ་ཀྱི་ཆོས་རྣམས་ཀུན་རྫོབ་ཀྱི་རྒྱལ་ཁམས་ཆེན་པོ་ཡིན་ཏེ། འདི་ཉིད་ཀྱི་རང་འགྲེལ་ལས། དོན་དམ་གྱི་རྒྱལ་ཁམས་ཆེན་པོ་དང༌། ཀུན་རྫོབ་ཀྱི་རྒྱལ་ཁམས་ཆེན་པོའོ། །ཞེས་གསུངས་བའི་ཕྱིར། ཐེག་མཆོག་དབུ་མ་ལས། རྣམ་ཤེས་ཡེ་ཤེས་རྒྱལ་ཁམས་སོ་སོ་དང༌། །ཞེས་པ་དང༌། དེ་ཉིད་ཀྱི་ཟིན་བྲིས་ལས། རྣམ་ཤེས་ཀྱི་ཡུལ་གཟུགས་སྒྲ་སོགས་དང་ཡུལ་ཅན་རྣམ་ཤེས་ནི་རྣམ་ཤེས་ཀྱི་རྒྱལ་ཁམས་དང༌། ཡེ་ཤེས་ཀྱི་གཟུགས་དང་སྒྲ་དང་དྲི་སོགས་ཡུལ་དང༌། ཡུལ་ཅན་ཡེ་ཤེས་ནི། ཡེ་ཤེས་ཀྱི་རྒྱལ་ཁམས་སོ། །ཞེས་གསུངས་པས་བཀའ་བསྡུ་བཞི་པ་དང༌། ཐེག་མཆོག་དབུ་མའི་ལུང་དེ་གཉིས་དོན་མཐུན་ནམ་སྙམ་མོ། ། བདེན་གཉིས་ཀྱི་ངོ་བོ་དེ་ཉིད་དང་གཞན་དུ་བརྗོད་དུ་མེད་པར་བསྟན་པ།གཉིས་པ་བདེན་གཉིས་ཀྱི་ངོ་བོ་དེ་ཉིད་དང་གཞན་དུ་བརྗོད་དུ་མེད་པར་བསྟན་པ་ནི། བདེན་གཉིས་ངོ་བོ་གཅིག་པ་མི་སྲིད་ལ། །ངོ་བོ་ཐ་དད་པ་ཡང་མ་ཡིན་ཞིང༌། །ཐ་དད་གཏན་ནས་མེད་པའང་མ་ཡིན་ཏེ། །ངོ་བོ་གཅིག་པ་བཀག་པའི་ཐ་དད་དོ། །འདི་ཉིད་ལ་ནི་ངོ་བོ་གཅིག་ཉིད་དང༌། །གཞན་དུ་བརྗོད་དུ་མེད་ཅེས་གསུངས་པ་སྟེ། །ཆོས་དང་ཆོས་ཉིད་ལ་ཡང་ཚུལ་འདི་ཉིད། །འཁོར་དང་མྱང་འདས་མཐའ་དང་དབུ་མ་དང༌། །གློ་བུར་གཉུག་མ་བཅོས་མ་རང་བཞིན་དང༌། །ཤུན་པ་སྙིང་པོ་ལ་ཡང་ཚུལ་འདི་ཉིད། ། རྩ་བར། བདེན་གཉིས་ངོ་བོ་གཅིག་པ་མི་སྲིད་ལ། །ཞེས་པ་ནས། ཚུལ་འདི་ཉིད། ཅེས་པའི་བར་རྐང་བ་བཅུ་བྱུང༌། དེའི་ཚིག་དོན་ནི། ཀུན་རྫོབ་བདེན་པ་དང༌། དོན་དམ་བདེན༵་པ་གཉིས༵་ངོ༵་བོ༵་གཅིག༵་པ༵་མི༵་སྲིད༵་ལ༵། ངོ༵་བོ༵་ཐ༵་དད༵་པ༵་ཡང༵་མ༵་ཡིན༵་ཏེ། དོན་དམ་ཡེ་ཤཻས་འགྱུར་བ་མེད་པའི་ཆོས་དབྱིངས་ནི། རང་གི་ངོ་བོས་མི་སྟོང་བར་ཡོད་པ་ཡིན་ཞིང༵༌། གཅིག་ཤོས་ཀུན་རྫོབ་ཀྱི་ཆོས་རྣམས་གདོད་མ་ནས་ནམ་ཡང་རང་གི་ངོ་བོས་གྲུབ་པ་མེད་པའི་ཕྱིར། ཁྱབ་སྟེ། ཐེག་མཆོག་དབུ་མ་ལས། ཡེ་ཤེས་འགྱུར་མེད་ངོ་བོ་ཡོད་ན་ཡང༌། །གཅིག་ཤོས་ནམ་ཡང་གྲུབ་པ་མེད་པའི་ཕྱིར། །མེད་ལ་གཅིག་དང་ཐ་དད་གང་ཡང་མེད། །ཅེས་གསུངས་བའི་ཕྱིར། རྣམ་གྲངས་གང་གི་ཐ༵་དད༵་གཏན༵་ནས༵་མེད༵་པ༵འང༵་མ༵་ཡིན༵་ཏེ། ངོ༵་བོ༵་གཅི༵ག་པ༵་བཀ༵ག་པའི༵་ཐ༵་དད༵་ཡིན་པའི་ཕྱིར། དེར་ཐལ། ངོ་བོའི་སྒོ་ནས་གཅིག་དང་ཐ་དད་གང་ཡང་མ་ཡིན་པའི་ཆོས་ཡིན་པའི་ཕྱིར་ཏེ། བདེན་གཉིས་གསལ་བའི་ཉི་མ་ལས། བདེན་གཉིས་ངོ་བོ་དེ་ཉིད་དང༌། །གཞན་དུ་བརྗོད་དུ་མེད་པ་གཅིག་པ་བཀག་པའི་ཐ་དད་པ། ཞེས་དང༌། ཐེག་མཆོག་དབུ་མ་ལས། བདེན་པ་འདི་དག་གཅིག་པ་བཀག་པ་སྟེ། །ངོ་བོའི་སྒོ་ནས་གཅིག་དང་ཐ་དད་མིན། །ཞེས་བསྟན་ཏོ༵། །རྒྱུ་མཚན་དེ་ལྟ་བུ་དང་ལྡན་པའི་བདེན་པ་གཉིས་པོ་འདི༵་ཉིད༵་ལ༵་ནི༵་ངོ༵་བོ༵་གཅིག༵་ཉིད༵་དང༵་གཞན༵་དུ༵་བརྗོ༵ད་དུ༵་མེད༷་ཅེས༵་རྫོགས་ལྡན་ཆོས་མཆོག་རྣམས་སུ་གསུངས༵་པ༵་སྟེ༵། དེ་བཞིན་དུ་ཆོས༵་ཅན་དང༵་ཆོས་ཉིད༵་ལ༵་ཡང༵༌། དེ་ཉིད་དང་གཞན་དུ་བརྗོད་དུ་མེད་པའི་ཚུལ༵་འདི༵་ཉིད༵་ཡིན་ལ། དེ་ལྟར་འཁོར༵་བ་དང༵་དོན་དམ་པའི་མྱང༵་འདས༵་གཉིས་དང༌། ཡོད་མེད་ཀྱི་མཐའ༵་དང༵༌། མཐའ་དེ་དང་བྲལ་བའི་དབུས༵་མ༵་གཉིས་དང༵༌། ཀུན་རྫོབ་གློ༵་བུ༵ར་དང་གཉུ༵ག་མ༵་གཉིས་དང༌། བཅོ༵ས་མ༵་དང་ར༵ང་བཞི༵ན་གཉིས་ད༵ང། ཤུན༵་པ༵་དང་སྙིང༵་པོ༵་དེ་དག་ལ༵་ཡང༵་ངོ་བོ་གཅིག་ཉིད་དང་གཞན་དུ་བརྗོད་དུ་མེད་པར་གཅིག་པ་བཀག་པའི་ཐ་དད་ཀྱི་ཚུལ༵་འདི༵་ཉིད༵་ལེགས་པར་གྲུབ་པ་ཡིན་ཏེ། མདོ་སྡེ་དགོངས་འགྲེལ་ལས། འདུ་བྱེད་ཁམས་དང་དོན་དམ་མཚན་ཉིད་ནི། །གཅིག་དང་ཐ་དད་བྲལ་བའི་མཚན་ཉིད་དེ། །གཅིག་དང་ཐ་དད་ཉིད་དུ་གང་རྟོག་པ། །དེ་དག་ཚུལ་བཞིན་མ་ཡིན་ཞུགས་པ་ཡིན། །ཞེས་དང༌། རི་ཆོས་ངེས་དོན་རྒྱ་མཚོ་ལས། །ལུང་དེས་བདེན་གཉིས་ངོ་བོ་གཅིག་པ་དང༌། །ངོ་བོ་ཐ་དད་བཀག་པ་ཡིན་ཏེ། ཞེས་དང༌། ཆོས་ཉིད་རྣམ་འབྱེད་ལས། གཉིས་པོ་དག་ནི་གཅིག་ཉིད་དང༌། །སོ་སོ་བ་ཡང་མ་ཡིན་ཏེ། །ཡོད་པ་དང་ནི་མེད་པ་དག །ཁྱད་པར་ཡོད་དང་མེད་ཕྱིར་རོ། །ཞེས་དང༌། ཡང་རི་ཆོས་ལས། འདིས་ནི་ཆོས་དང་ཆོས་ཉིད་ངོ་བོ་གཅིག་ལ་ལྡོག་པ་ཐ་དད་དུ་འདོད་པ་དང༌། ཐ་དད་གཏན་མེད་དུ་འདོད་པ་ཡང་བསལ་བ་ཡིན་ཏེ། དེ་གཉིས་ངོ་བོ་གཅིག་པ་བཀག་པའི་ཐ་དད་ཡིན་པའི་ཕྱིར་རོ། །ཞེས་གསུངས་པའི་ཕྱིར་རོ། །ལུང་འདི་དག་ནི། དཔལ་ལྡན་རྒྱལ་བ་ཇོ་ནང་བའི་རང་ལུགས་ལ་བདེན་གཉིས་ངོ་བོ་གཅིག་ལ་ལྡོག་པ་ཐ་དད་དུ་འདོད་ཟེར་བ་དག་ལ་གནོད་བྱེད་ཡང་དག་ཏུ་འགྱུར་བའི་ཕྱིར་རོ། ། གཞན་ལུགས་ཧ་ཅང་ཐལ་ཆེས་ཤིང་རང་ལུགས་སྐྱོན་མེད་པར་བསྟན་པ།གསུམ་པ་གཞན་ལུགས་ཧ་ཅང་ཐལ་ཆེས་ཤིང་རང་ལུགས་སྐྱོན་མེད་པར་བསྟན་པ་ལ། གཞན་ལུགས་བརྗོད་པ་དང༌། ལུགས་དེ་ཧ་ཅང་ཐལ་ཆེས་པ་དང༌། རང་ལུགས་སྐྱོན་མེད་པར་བསྟན་པ་དང་གསུམ། དང་པོ་གཞན་ལུགས་བརྗོད་པ་ནི། གསུམ་ལྡན་མར་བཅད་དེ་ལས་གཞན་དུ་སྨྲ། །རང་རང་ངོ་བོས་སྟོང་པ་མ་གཏོགས་པ། །གཞན་སྟོང་རྣམས་ཀྱིས་སྟོང་ཉིད་གོ་མི་ཆོད། །དེ་ཕྱིར་དོན་དམ་ཆོས་དབྱིངས་དེ་བཞིན་ཉིད། །རང་བཞིན་འོད་གསལ་རང་བཞིན་ལྷན་སྐྱེས་དང༌། །རང་བཞིན་འགྱུར་མེད་མཐར་ཐུག་ཆོས་ཀྱི་སྐུ། །མཐར་ཐུག་ཤེར་ཕྱིན་མཐར་ཐུག་དབུ་མ་དང༌། །མཐར་ཐུག་མྱང་འདས་མཐར་ཐུག་བྱང་ཆུབ་ཆེ། །མཐར་ཐུག་སངས་རྒྱས་མཐར་ཐུག་ཆོས་དང་ནི། །མཐར་ཐུག་དགེ་འདུན་མཐར་ཐུག་ལྷ་དང་སྔགས། །མཐར་ཐུག་རྒྱུད་དང་དཀྱིལ་འཁོར་ལ་སོགས་པ། །གཤིས་ལུགས་ཟབ་མོ་མཐར་ཐུག་གསུངས་པ་གང༌། །དེ་རྣམས་ཐམས་ཅད་རང་སྟོང་ཉིད་དུ་སྨྲ། །རང་སྟོང་གང་ཡིན་དོན་དམ་བདེན་པ་དང༌། །ཆོས་དབྱིངས་ཆོས་ཉིད་དེ་བཞིན་ཉིད་ལ་སོགས། །གཤིས་ལུགས་ཟབ་མོ་མཐར་ཐུག་རྣམས་སུ་འདོད། །བདེན་གཉིས་རྒྱལ་ཁམས་གཉིས་སུ་མི་འབྱེད་པར། །སྣང་བ་གང་ཡིན་ཀུན་རྫོབ་བདེན་པ་དང༌། །སྟོང་པ་གང་ཡིན་དོན་དམ་བདེན་པར་འདོད། །སྣང་སྟོང་དེ་དག་ངོ་བོ་དབྱེར་མེད་པས། །ངོ་བོ་གཅིག་ལ་ལྡོག་པ་ཐ་དད་སྨྲ། །འཁོར་འདས་རྒྱལ་ཁམས་གཉིས་སུ་མི་འབྱེད་པར། །སྣང་ཆ་འཁོར་བ་སྟོང་ཆ་མྱང་འདས་ཞེས། །འཁོར་འདས་དབྱེར་མེད་དོན་ཡང་དེ་ལྟར་འདོད། །འགལ་འདུས་སྐྱོན་ཡོད་ཀུན་རྫོབ་བདེན་པ་དང༌། །འགལ་འདུས་སྐྱོན་མེད་དོན་དམ་བདེན་པ་ཞེས། །དེ་ལྟར་རྒྱལ་ཁམས་གཉིས་སུ་མི་འབྱེད་པར། །སྣང་ཆ་འཁོར་བ་སྟོང་ཆ་མྱང་འདས་ཞེས། །སྣང་སྟོང་གང་ཡིན་བདེན་པ་གཉིས་སུ་སྨྲ། །རྟོག་གེ་ཅན་གྱི་སྤྱོད་ཡུལ་འཁོར་བ་དང༌། །རྣལ་འབྱོར་ཅན་གྱི་སྤྱོད་ཡུལ་མྱང་འདས་ཞེས། །དེ་ལྟར་རྒྱལ་ཁམས་གཉིས་སུ་མི་འབྱེད་པར། །སྣང་སྟོང་གཉིས་ལ་འཁོར་འདས་དོན་དུ་འདོད། །རྩ་བར། གསུམ་ལྡན་མར་བཅད་དེ་ལས་གཞན་དུ་སྨྲ། །ཞེས་པ་ནས། སྣང་སྟོང་གཉིས་ལ་འཁོར་འདས་དོན་དུ་འདོད། །ཅེས་པའི་བར་ཤོ་ལོ་ཀ་བརྒྱད་དང་རྐང་པ་གཅིག་བྱུང༌། དེའི་ཚིག་དོན་ནི། གསུམ༵་ལྡན༵་མར༵་བཅ༵ད་རྣམས་ཀྱིས་གོང་དུ་བཤད་པའི་རྫོགས་ལྡན་གྱི་ལུགས་དེ་༵ལས༵་གཞ༵ན་དུ༵་སྨྲ༵་བ་ཡིན་ཏེ། གཟུགས་ནས་རྣམ་མཁྱེན་གྱི་བར་གྱི་ཆོས་རང༵་རང༵་ངོ༵་བོའི༵་གྲུབ་པས་སྟོང༵་པ༵་དེས་སྟོང་ཉིད་ཀྱི་གོ་ཆོད་པ་མ༵་གཏོགས༵་པ༵། གཞན༵་སྟོང༵་རྣམས༵་ཀྱི༵ས་སྟོང༵་ཉིད༵་ཀྱི་གོ༵་མི༵་ཆོད༵་པར་འདོད་པའི་ཕྱིར། རྒྱུ་མཚན་དེ༵་ཉིད་ཀྱི་ཕྱིར༵་འཕགས་པའི་ཡེ་ཤེས་དམ་པའི་ཡུལ་དུ་གྱུར་བའི་དོན༵་དམ༵་དང༌། འཕགས་པའི་ཆོས་རྣམས་ཀྱི་རྒྱུ་ཡིན་པའི་ཆོས༵་ཀྱི་དབྱིངས༵་དང༌། གཞན་མ་ཡིན་པའི་དེ༵་བཞིན༵་ཉིད༵་དང༌། གདོད་ནས་དྲི་མ་དང་བྲལ་བའི་རང༵་བཞིན༵་གྱི་འོ༵ད་གསལ༵་དང༌། རང༵་བཞི༵ན་ལྷན༵་སྐྱེས༵་ཀྱི་བདེ་སྟོང་དང༵༌། རང༵་བཞི༵ན་འགྱུར༵་བ་མེད༵་པའི་ཆོས་དང༌། མཐར་༵ཐུག༵་དོན་དམ་ཆོ༵ས་ཀྱི་༵སྐུ༵་དང༌། མཐ༵ར་ཐུ༵ག་རང་བཞིན་གྱི་ཤེ༵ར་ཕྱི༵ན་དང༌། མཐ༵ར་ཐུ༵ག་པའི་དབུ༵་མ༵་ད༵ང༌། མཐ༵ར་ཐུ༵ག་པའི་རང་བཞིན་གྱི་མྱ༵ང་འད༵ས་དང༌། མཐ༵ར་ཐུ༵ག་པའི་བྱ༵ང་ཆུ༵བ་ཆེ༵་བ་དང༌། མཐ༵ར་ཐུ༵ག་པའི་དོན་དམ་པའི་སང༵ས་རྒྱ༵ས་དང༌། མཐ༵ར་ཐུ༵ག་དོན་དམ་པའི་འགོག་ལམ་གྱི་ཆོས༵་དང༵་ནི༵། མཐར༵་ཐུག༵་པའི་དགེ༵་འདུན༵་དང༌། མཐར༵་ཐུག༵་གི་ལྷ༵་དང༵་སྔགས༵་དང༌། མཐར༵་ཐུག༵་གི་རྒྱུད༵་དང༵་དཀྱིལ༵་འཁོར༵་ལ༵་སོགས༵་པ༵། མདོར་ན་གཤིས༵་ལུགས༵་ཟབ༵་མོ༵་མཐར༵་ཐུག༵་པ། མདོ་སྔགས་ཀྱི་གསུང་རབ་རྣམས་ལས་གསུངས༵་པ༵་གང༵་ཡིན་པ་དེ༵་རྣམས༵་ཐམས༵་ཅད་༵རང་སྟོང༵་ཉིད་དུ༵་སྨྲ༵་བར་བྱེད་ལ། རང༵་སྟོང༵་གང༵་ཡིན༵་པ་དེ་ནི་དོན༵་དམ༵་བདེན༵་པ༵་དང༵༌། ཆོས༵་དབྱིངས༵་ཆོས༵་ཉིད༵་དེ༵་བཞིན༵་ཉིད༵་ལ༵་སོགས༵་པ། ཁོ་རང་གི་འདོད་པའི་གཤིས༵་ལུགས༵་ཟབ༵་མོ༵་མཐར༵་ཐུག༵་རྣམས༵་སུ༵་ཡིན་པར་འདོ༵ད་པ་དང༌། བདེན༵་གཉིས་༵རྒྱལ༵་ཁམས༵་གཉིས༵་སུ༵་མི༵་འབྱེད༵་པར༵། སྣང༵་བ༵་གང༵་ཡིན༵་ཀུན༵་རྫོ༵བ་བདེན༵་པ༵་ཡིན་པ་དང༵༌། སྟོང༵་བ༵་གང༵་ཡིན༵་དོན༵་དམ༵་བདེན༵་པར༵་འདོད༵་པ་དང༌། དེ་འདྲའི་སྣང༵་སྟོང༵་གི་ཆོས་དེ༵་དག༵་གི་ངོ༵་བོ༵་དབྱེར༵་མེད༵་པ་ཡིན་པས༵། སྣང་སྟོང་ངམ་བདེན་གཉིས་ངོ༵་བོ༵་གཅིག༵་ལ༵་ལྡོག༵་པ༵་ཐ༵་དད༵་ཡིན་པར་སྨྲ༵་བ་དང༌། འཁོར༵་བ་དང་མྱང་འདས༵་རྒྱལ༵་ཁམས༵་གཉིས༵་སུ༵་མི༵་འབྱེད༵་པར༵། སྣང༵་བའི་ཆ༵་གང་ཡིན་འཁོར༵་བ༵་དང༌། སྟོང༵་བའི་ཆ༵་གང་ཡིན་མྱང༵་འདས༵་ཡིན་ཞེས༵་འདོད་པ་མ་ཟད། འཁོར༵་འདས༵་དབྱེར༵་མེད༵་ཀྱི་དོན༵་ཡང༵་དེ༵་ལྟར༵་འདོད༵་པ་དང༌། འགལ༵་འདུས༵་སྐྱོ༵ན་ཡོད༵་ནི། ཀུན༵་རྫོབ༵་བདེན༵་པ༵་དང༵༌། འགལ༵་འདུས༵་སྐྱོ༵ན་མེད༵་ནི། དོན༵་དམ༵་བདེན༵་པ༵་ཡིན་ཞེས༵་དེ༵་ལྟར༵་བདེན་གཉིས་རྒྱལ༵་ཁམས༵་གཉིས༵་སུ༵་མི༵་འབྱེད༵་པར༵། སྣང༵་ཆ༵་འཁོར༵་བ༵་སྟོང༵་ཆ༷་མྱང༵་འདས༵་ཡིན་ཞེས༵་འདོད་པ་དང༌། སྣ༵ང་བ་དང་སྟོང༵་བ་གང༵་ཡིན༵་པ་ནི། བདེན༵་པ༵་གཉིས༵་སུ༵་སོ་སོར་སྨྲ༵་བར་བྱེད་པ་དང༌། རྟོག༵་གེ༵་ཅན༵་གྱི༵་སྤྱོད༵་ཡུལ༵་འཁོར༵་བ༵་ཡིན་པ་དང༵༌། རྣལ༵་འབྱོར༵་ཅན༵་རྣམས་ཀྱི༵་སྤྱོད༵་ཡུལ༵་མྱ༵ང་འད༵ས་ཡིན་ཞེ༵ས་དེ༵་ལྟར༵་རྒྱལ༵་ཁམས༵་གཉིས༵་སུ༵་མི༵་འབྱེད༵་པར༵་སྣང༵་བ་དང་སྟོང༵་བ་གཉིས༵་ལ༵་རིམ་བཞིན་འཁོར༵་བ་དང་མྱང་འདས༵་ཀྱི་དོན༵་དུ༵་འདོ༵ད་ཅེས་གསུམ་ལྡན་མར་བཅད་ཀྱི་འདོད་ལུགས་བསྟན་ཏོ། ། ལུགས་དེ་ཧ་ཅང་ཐལ་ཆེས་པར་བསྟན་པ།གཉིས་པ་ལུགས་དེ་ཧ་ཅང་ཐལ་ཆེས་པར་བསྟན་པ་ལ། སྣང་བ་གང་ཡིན་ཀུན་རྫོབ་དང༌། སྟོང་བ་གང་ཡིན་དོན་དམ་དུ་འདོད་པ་ལ་ཧ་ཅང་ཐལ་ཆེས་པའི་སྐྱོན་བསྟན་པ་དང༌། བདེན་གཉིས་འཁོར་འདས་ངོ་བོ་གཅིག་ཏུ་འདོད་པ་ལ་ཧ་ཅང་ཐལ་ཆེས་པའི་སྐྱོན་བསྟན་པ་དང་གཉིས། དང་པོ་ནི། སྣང་ཚད་ཀུན་རྫོབ་འཁོར་བ་ཡིན་ན་ནི། །དོན་དམ་སྣང་བའང་ཀུན་རྫོབ་འཁོར་བར་འགྱུར། །སྟོང་ཚད་དོན་དམ་མྱང་འདས་ཡིན་ན་ནི། །རང་སྟོང་ཐམས་ཅད་དོན་དམ་མྱང་འདསའགྱུར། །འདོད་ན་སྡུག་བསྔལ་ཀུན་འབྱུང་ཐམས་ཅད་ཀྱང༌། །དོན་དམ་མྱང་འདས་ཡིན་པར་ཐལ་བར་འགྱུར། །དེ་ཡང་འདོད་ན་ཟག་མེད་ཡིན་པར་འགྱུར། །གཙང་བདག་བདེ་ཆེན་རྟག་པའང་ཡིན་པར་འགྱུར། །གང་གའི་ཀླུང་གི་རྡུལ་སྙེད་དོན་དམ་གྱི། །སྟོབས་སོགས་ཡོན་ཏན་ཀུན་ཡང་ཚང་བར་འགྱུར། །དེ་དག་བླང་བྱའི་མཐར་ཐུག་ཡིན་པར་འགྱུར། །འགྲོ་བའི་མགོན་སྐྱབས་མཐར་ཐུག་ཡིན་པར་འགྱུར། །རྣམ་མཁྱེན་ཡེ་ཤེས་མཐར་ཐུག་ཡིན་པར་འགྱུར། །མི་ཤིགས་རྡོ་རྗེའི་སྐུ་ཡང་ཡིན་པར་འགྱུར། །རྡོ་རྗེའི་ལྷ་སྔགས་རྒྱུད་ཀྱང་ཡིན་པར་འགྱུར། །སྟོང་པ་ཆེན་པོ་འགྱུར་མེད་ལྔ་དང་ནི། །ཐིག་ལེ་སྟོང་པ་འགྱུར་མེད་དྲུག་ལསོགས། །གཤིས་ལུགས་ཟབ་མོའི་ཨེ་ཝཾ་མཐར་ཐུག་དང༌། །ཨ་ཧཾ་མཐར་ཐུག་ཧཾ་ཀྵ་མཐར་ཐུག་དང༌། །རྡོ་རྗེ་པད་མ་རྡོ་རྗེ་སེམ་དཔའ་དང༌། །རྡོ་རྗེ་བྷ་ག་རྡོ་རྗེ་རྩེ་མོ་དང༌། །རྡོ་རྗེ་དབྱིངས་དང་ཐིག་ལེ་གྲུ་གསུམ་དང༌། །རྡོ་རྗེའི་ཨཱའ་ལི་ཀཱ་ལི་ལ་སོགས་པ། །རང་བཞིན་གཉུག་མའི་ཆོས་ཀུན་ཡིན་པར་འགྱུར། །གཉེན་པོས་སྤང་དུ་གཏན་ནས་མི་རུང་འགྱུར། །དེ་སྤང་དོན་དུ་ལམ་བདེན་དོན་མེད་འགྱུར། །སངས་རྒྱས་ཐོབ་པ་གཏན་ནས་མི་སྲིད་འགྱུར། །ཆོས་དང་དགེ་འདུན་རྣམས་ཀྱང་མི་སྲིད་འགྱུར། །འདི་ལ་ཉེས་སྐྱོན་གཞན་ཡང་དཔག་མེད་དོ། །རྩ་བར། སྣང་ཚད་ཀུན་རྫོབ་འཁོར་བ་ཡིན་ན་ནི། །ཞེས་པ་ནས། འདི་ལ་ཉེས་སྐྱོན་དཔག་མེད་དེ། ཞེས་པའི་བར་ཤོ་ལོ་ཀ་བདུན་དང་རྐང་བ་གཅིག་བྱུང༌། དེའི་ཚིག་དོན་ནི། གང་སྣ༵ང་ཚད༵་ཐམས་ཅད་ཀུ༵ན་རྫོབ༵་འཁོར༵་བ༵་ཡིན་༵པར་འདོད་པ་ལྟར་ན༵་ནི༵། དེའི་ལུགས་ལ། དོན༵་དམ༵་བདེན་པ་སྣ༵ང་བ༵འ༵ང་ཀུ༵ན་རྫོ༵བ་འཁོ༵ར་བ་ཡིན་པར་ཐལ་བ༵ར་འགྱུ༵ར་རོ། །སྟོ༵ང་ཚ༵ད་ཐམས་ཅད་དོ༵ན་ད༵མ་པའི་མྱང༵་འདས༵་ཡིན༵་པར་འདོད་པ་ལྟར་ན༵་ནི༵། ཀུན་རྫོབ་རང༵་སྟོང༵་ཐམས་༵ཅད༵་དོན༵་དམ༵་པའི་མྱང༵་འདས༵་སུ་འགྱུར༵་བར་ཐལ། འདོད་པའི་ཕྱིར། དེ་ཡང་འདོ༵ད་ཟེར་ན༵། སྡུ༵ག་བསྔ༵ལ་བདེན་པ་དང༌། ཀུ༵ན་འབྱུ༵ང་བདེན་པ་ཐ༵མས་ཅ༵ད་ཀྱ༵ང་དོ༵ན་ད༵མ་མྱ༵ང་འད༵ས་ཡི༵ན་པ༵ར་ཐ༵ལ་བར༵་འགྱུར༵་ལ། དེ༵་ཡང༵་འདོ༵ད་ཅེས་ཟེར་ན༵། སྡུག་བསྔལ་ཀུན་འབྱུང་དེ་དག་ཟ༵ག་མེ༵ད་ཀྱི་ཡེ་ཤེས་ཡི༵ན་པ༵ར་འགྱུ༵ར་བར་ཐལ། དོན་དམ་མྱང་འདས་ཡིན་པར་འདོད་པའི་ཕྱིར། གཞན་ཡང་སྡུག་ཀུན་དེ་དག་དོན་དམ་པའི་གཙ༵ང་བད༵ག་བ༵དེ་ཆེ༵ན་རྟ༵ག་པ༵འ༵ང་ཡི༵ན་པ༵ར་འགྱུ༵ར་བ་དང༌། སྡུག་ཀུན་དེ་དག་ག༵ང་གའི༵་ཀླུ༵ང་གི༵་རྡུ༵ལ་གྱི་གྲངས་ཇི་སྙེད༵་ཀྱི་དོན༵་དམ༵་གྱི༵་སྟོབ༵ས་དང༌། སོག༵ས་སྒྲས་བསྡུས་པ་མི་འཇིགས་པ་དང༌། སོ་སོར་ཡང་དག་པར་རིག་པ་རྣམས་དང༌། སངས་རྒྱས་ཀྱི་ཆོས་མ་འདྲེས་པ་རྣམས་སོགས་དོན་དམ་པའི་ཡོ༵ན་ཏ༵ན་ཀུ༵ན་ཡ༵ང་ཚ༵ང་བར༵་ཐལ་བར་འགྱུ༵ར་བ་དང༌། སྡུག་ཀུན་དེ༵་ད༵ག་བླ༵ང་བྱ༵་མཐ༵ར་ཐུག༵་ཡི༵ན་པ༵ར་ཐལ་བར་འགྱུ༷ར་བ་དང༌། འགྲོ༵་བ༵འི་མགོ༵ན་སྐྱ༵བས་མཐ༵ར་ཐུ༵ག་ཡི༵ན་པ༵ར་འགྱུ༵ར་བ་དང༌། རྣ༵མ་མཁྱེན༵་གྱི་ཡེ༵་ཤེས༵་མཐར༵་ཐུག༵་ཡི༵ན་པ༵ར་འགྱུ༵ར་བ་དང༌། ཀུན་རྫོབ་སྤྲོས་པ་གང་གིས་མི༵་ཤི༵གས་པའི་རྡོ༵་རྗེ༵འི་སྐུ༵་ཡང༵་ཡི༵ན་པ༵ར་འགྱུ༵ར་བ་དང༌། རྒྱུད་སྡེ་དུ་མ་ནས་གསུངས་བའི་མི་ཆོད་མི་ཕྱེད་མི་འགྱུར་བའྀ་རྡོ༵་རྗེ༵འི་ལྷ༵་དང་སྔ༵གས་དང་རྒྱུད༵་ཀྱ༵ང་ཡི༵ན་པར་འགྱུ༵ར་བ་དང༌། གཟུགས་སོགས་ཕུང་པོ་དྲུག་དང༌། ས་ལ་སོགས་པའི་ཁམས་དྲུག་དང༌། མིག་སོགས་དབང་པོ་དྲུག་དང༌། གཟུགས་སྒྲ་ལ་སོགས་པའི་ཡུལ་དྲུག་དང༌། ངག་སོགས་ལས་ཀྱི་དབང་བོ་དྲུག་དང༌། བརྗོད་པ་ལ་སོགས་པའི་ལས་ཀྱི་དབང་པོའི་བྱ་བ་དྲུག་གིས་སྟོ༵ང་བ༵་ཆེ༵ན་པོ༵་ནི། དོན་དམ་འགྱུ༵ར་བ་མེ༵ད་པའི་ཡི་གེ་ཨ་ཨི་རི་ཨུ་ལི་ལྔ༵་ཡིན་ལ། དེ་ཡང་ཨ་ཆོས་དབྱིངས་ཡེ་ཤེས། ཨུ་བྱ་གྲུབ་ཡེ་ཤེས། རི་མཉམ་ཉིད་ཡེ་ཤེས། ཨུ་སོར་རྟོག་ཡེ་ཤེས། ལི་མེ་ལོང་ཡེ་ཤེས་ལྔ་ད༵ང༌། དོན་དམ་བྱང་ཆུབ་ཀྱི་སྙིང་པོའི་ཐིག་ལེའི་ངོ་བོ་སྐུ་བཞི་ནི༵། ཀུན་རྫོབ་ཀྱི་ཐིག༵་ལེ༵་འཛག་བཅས་ཀྱི་སྟོ༵ང་བ༵་འགྱུ༵ར་བ་མེ༵ད་པའི་ཀ་ཙ་ཊ་པ་ཏ་ས་སྟེ། དེ་དག་གོ་རིམ་བཞིན། ནམ་མཁའ་རླུང་མེ་ཆུ་ས་ཡེ་ཤེས་ཀྱི་ཁམས་དྲུ༵ག་ཚན་པ་དྲུག་སྟེ། དེ་ལྟར་ཤེས་རབ་སྙིང་པོའི་རིགས་སུམ་ཅུ་སོ་དྲུག་གི་བདག་ཉིད་ལ༵་སོག༵ས་པ་དང༌། གཤི༵ས་ལུག༵ས་ཟ༵བ་མོའི༵་རྣམ་ཀུན་མཆོག་ལྡན་གྱི་སྟོང་བ་ཉིད་ཨེ༵་ཡིག་དང༌། དམིགས་མེད་སྙིང་རྗེ་ཆེན་པོ་བདེ་བ་ཆེན་པོའི་ཡེ་ཤེས་ཝ༷ཾ་ཡིག་མཐར༵་ཐུག༵་དང༵༌། ཨ༵་ཧ༵ཾ་མཐ༵ར་ཐུག༵་ཧ༵ཾ་ཀྵ༵་མཐར༵་ཐུ༵ག་དང༵༌། བདེ་བ་ཆེན་པོའི་རྡོ༵་རྗེ༵་ཤེས་རབ་སྟོང་བ་ཉིད་ཀྱི་པ༵དྨ༵་དང༌། རྡོ་༵རྗེ༵་ནི་མཆོག་གི་བདེ་བ་དང༌། སེམ༵ས་དཔའ༵་ནི། རྣམ་པ་ཐམས་ཅད་པའི་ཤེས་རབ་ཀྱི་གཟུགས་སོགས་ཡིན་པ་དང༵༌། ཕྱག་རྒྱ་ཆེན་མོ་རྡོ༵་རྗེ༵་བྷ༵་ག༵་དང༌། རྡོ༵་རྗེ༵་རྩེ་༵མོ༵་དང༵༌། རྡོ༵་རྗེ༵་དབྱི༵ངས་ད༵ང༌། ཐི༵ག་ལེ༵་གྲུ༵་གསུ༵མ་ད༵ང༌། རྡོ༵་རྗེ༵འི་ཐབས་ཤེས་ཀྱི་ངོ་བོ་ཨཱ༵་ལི༵་ཀཱ༵་ལི༵་ལ༵་སོག༵ས་པ༵་དོན་དམ་པའི་མཚན་གྱི་རྣམ་གྲངས་ཀྱི་ར༵ང་བཞི༵ན་གཉུ༵ག་མའི༵་ཆོ༵ས་ཀུ༵ན་ཡི༵ན་པར༵་ཐལ་བར་འགྱུ༵ར་བ་དང་གཉེ༵ན་པོ༵ས་སྤ༵ང་བྱ་ཡིན་དུ་༵གཏ༵ན་ན༵ས་མི༵་རུ༵ང་བར་འགྱུ༵ར་བ་དང༌། སྡུག་ཀུན་དེ༵་དག་སྤང༵་བའི་དོ༵ན་དུ༵་ལམ༵་བདེ༵ན་སྒོམ་པ་དོན༵་མེད༵་པར་འགྱུ༵ར་བ་དང༌། ལམ་སྒོམ་པ་སོགས་དོན་མེད་ན་སང༵ས་རྒྱ༵ས་ཐོ༵བ་པ༵་ཡང་གཏན༵་ནས༵་མི༵་སྲིད༷་པར་འགྱུ༵ར་བ་དང༌། ཆོས༵་དཀོན་མཆོག་དང༵༌། འཕགས་པའི་དགེ༵་འདུན༵་རྣམ༵ས་ཀྱང༵་མི༵་སྲིད༵་པར་ཐལ་བར་འགྱུ༵ར་རོ། །ད་དུང་སྣང་བ་གང་ཡིན་ཀུན་རྫོབ་བདེན་པ་དང༌། སྟོང་བ་གང་ཡིན་དོན་དམ་བདེན་པར་འདོད་པ་འདི༵་ལ༵་ཉེས༵་སྐྱོ༵ན་གཞན༵་ཡང༵་དཔ༵ག་ཏུ་མེད་༵པ་ཡོད་དོ༵། ། བདེན་གཉིས་འཁོར་འདས་ངོ་བོ་གཅིག་ཏུ་འདོད་པ་ལ་ཧ་ཅང་ཐལ་ཆེས་པའི་སྐྱོན་བསྟན་པ།གཉིས་པ་བདེན་གཉིས་འཁོར་འདས་ངོ་བོ་གཅིག་ཏུ་འདོད་པ་ལ་ཧ་ཅང་ཐལ་ཆེས་པའི་སྐྱོན་བསྟན་པ་ནི། བདེན་གཉིས་འཁོར་འདས་ངོ་བོ་གཅིག་ན་ནི། །བདེ་གཤེགས་སྙིང་པོ་གློ་བུར་དྲི་མ་དག །འབྲལ་དུ་རུང་ངམ་མི་རུང་བརྟག་པར་མཛོད། །གློ་བུར་དྲི་མ་གཞོམ་དུ་རུང་བ་ལྟར། །བདེ་གཤེགས་སྙིང་པོའང་གཞོམ་དུ་རུང་ངམ་ཅི། །གློ་བུར་དྲི་མ་འདུས་བྱས་ཡིན་པ་ལྟར། །བདེ་གཤེགས་སྙིང་པོའང་འདུས་བྱས་ཡིན་ནམ་ཅི། །གློ་བུར་དྲི་མ་ཀུན་རྫོབ་ཡིན་པ་ལྟར། །བདེ་གཤེགས་སྙིང་པོའང་ཀུན་རྫོབ་ཡིན་ནམ་ཅི། །གློ་བུར་དྲི་མ་ཀུན་བརྟགས་ཡིན་པ་ལྟར། །བདེ་གཤེགས་སྙིང་པོའང་ཀུན་བརྟགས་ཡིན་ནམ་ཅི། །གློ་བུར་དྲི་མ་ཕྱི་ནང་ཡིན་པ་ལྟར། །བདེ་གཤེགས་སྙིང་པོའང་ཕྱི་ནང་ཡིན་ནམ་ཅི། །བདེ་གཤེགས་སྙིང་པོའང་དོན་དམ་ཡིནཔ་ལྟར། །གློ་བུར་དྲི་མའང་དོན་དམ་ཡིན་ནམ་ཅི། །བདེ་གཤེགས་སྙིང་པོ་རྟག་པ་ཡིན་པ་ལྟར། །གློ་བུར་དྲི་མའང་རྟག་པ་ཡིན་ནམ་ཅི། །བདེ་གཤེགས་སྙིང་པོ་ཡོངས་གྲུབ་ཡིན་པ་ལྟར། །གློ་བུར་དྲི་མའང་ཡོངས་གྲུབ་ཡིན་ནམ་ཅི། །བདེ་གཤེགས་སྙིང་པོ་གཤེགས་སྙིང་པོ་མྱང་འདས་ཡིན་པ་ལྟར། །གློ་བུར་དྲི་མའང་མྱང་འདས་ཡིན་ནམ་ཅི། །བདེ་གཤེགས་སྙིང་པོ་ཤེར་ཕྱིན་ཡིན་པ་ལྟར། །གློ་བུར་དྲི་མའང་ཤེར་ཕྱིན་ཡིན་ནམ་ཅི། །བདེ་གཤེགས་སྙིང་པོ་དབུ་མ་ཡིན་པ་ལྟར། །གློ་བུར་དྲི་མའང་དབུ་མ་ཡིན་ནམ་ཅི། །བདེ་གཤེགས་སྙིང་པོ་གཞན་སྟོང་ཡིན་པ་ལྟར། །གློ་བུར་དྲི་མའང་གཞན་སྟོང་ཡིན་ནམ་ཅི། །བདེ་གཤེགས་སྙིང་པོ་སྟོང་གཞི་ཡིན་པ་ལྟར། །གློ་བུར་དྲི་མའང་སྟོང་གཞི་ཡིན་ནམ་ཅི། །བདེ་གཤེགས་སྙིང་པོ་གཞན་མཆོག་ཡིན་པ་ལྟར། །གློ་བུར་དྲི་མའང་གཞན་མཆོག་ཡིན་ནམ་ཅི། །བདེ་གཤེགས་སྙིང་པོ་འགོག་བདེན་ཡིན་པ་ལྟར། །གློ་བུར་དྲི་མའང་འགོག་བདེན་ཡིན་ནམ་ཅི། །བདེ་གཤེགས་སྙིང་པོ་འགོག་གཞི་ཡིན་པ་ལྟར། །གློ་བུར་དྲི་མའང་འགོག་གཞི་ཡིན་ནམ་ཅི། །བདེ་གཤེགས་སྙིང་པོ་བྲལ་གཞི་ཡིན་པ་ལྟར། །གློ་བུར་དྲི་མའང་བྲལ་གཞི་ཡིན་ནམ་ཅི། །བདེ་གཤེགས་སྙིང་པོ་དབེན་གཞི་ཡིན་པ་ལྟར། །གློ་བུར་དྲི་མའང་དབེན་གཞི་ཡིན་ནམ་ཅི། །བདེ་གཤེགས་སྙིང་པོ་དག་གཞི་ཡིན་པ་ལྟར། །གློ་བུར་དྲི་མའང་དག་གཞི་ཡིན་ནམ་ཅི། །བདེ་གཤེགས་སྙིང་པོ་མེད་གཞི་ཡིན་པ་ལྟར། །གློ་བུར་དྲི་མའང་མེད་གཞི་ཡིན་ནམ་ཅི། །དེ་ལྟར་འདོད་ན་ཉེས་སྐྱོན་དཔག་མེད་དོ། །རྩ་བར། བདེན་གཉིས་འཁོར་འདས་ངོ་བོ་གཅིག་ན་ནི། །ཞེས་པ་ནས། །དེ་ལྟར་འདོད་ན་ཉེས་སྐྱོན་དཔག་མེད་དོ། །ཞེས་པའི་བར་ཤོ་ལོ་ཀ་བཅུ་བྱུང༌། དེའི་ཚིག་དོན་ནི། དོན་དམ་བདེན་པ་དང་ཀུན་རྫོབ་བདེ༵ན་པ་གཉི༵ས་ངོ་བོ་གཅིག་དང༌། འཁོ༵ར་བ་དང་མྱང་འད༵ས་གཉིས་ངོ༵་བོ༵་གཅི༵ག་ཡིན་པར་འདོད་པ་ལྟར་ཡིན་ན༵་ནི༵། བདེ་གཤེགས་སྙིང་པོ་དང་གློ་བུར་གྱི་དྲི་མའང་དབྱེར་མེད་གཅིག་ཡིན་དགོས་ལ། གཅིག་ཡིན་ན། འབྲལ་དུ་རུང་མི་རུང་གི་ཆ་གཉིས་འགལ་བའི་ཕྱིར། དེས་ན་དོན་དམ་བདེ༵་གཤེག༵ས་སྙིང༵་པོ༵་ལ་ཀུན་རྫོབ་གློ༵་བུར༵་གྱི་དྲི༵་མ༵་དག༵་འབྲལ༵་དུ༷་རུ༵ང་ང༵མ་མི༵་རུང༵་བརྟག༵་པར༵་མཛོད༵་དང་ལམ་བདེན་གྱིས་ཀུན་རྫོབ་གློ༵་བུར༵་གྱི་དྲི༵་མ༵་གཞོ༵མ་དུ༵་རུང༵་བ༵་ལྟར༵། བདེ༵་གཤེག༵ས་སྙིང༵་པོ༷འང༵་གཞོ༵མ་དུ༷་རུང༵་ངམ༵་ཅི༵་སྟེ། མི་སྲིད་པའི་ཕྱིར། ཀུན་རྫོབ་གློ༵་བུར༵་གྱི་དྲི༵་མ༵་དག་འདུ༵ས་བྱ༵ས་ཡི༵ན་པ༵་ལྟར༵། དོན་དམ་བདེ༵་གཤེག༵ས་སྙི༵ང་པོ༵འང༵་འདུས༵་བྱས༵་ཡི༵ན་ནམ༵་ཅི༵། གློ༵་བུ༵ར་དྲི༵་མ༵་རྣམས་ཀུན༵་རྫོབ༵་ཡི༵ན་པ༵་ལྟར༵། བདེ༵་གཤེག༵ས་སྙིང༵་པོ༷འང༵་ཀུན༵་རྫོབ༷་ཡིན༷་ནམ༷་ཅི༷་སྟེ་མ་ཡིན་པའི་ཕྱིར་གློ༵་བུར༵་དྲི༵་མ༵་རྣམས་ཀུན༵་བཏག༷ས་ཡི༷ན་པ༷་ལྟར༷། བདེ༵་གཤེག༵ས་སྙིང༵་པོ༵འང༵་ཀུན༵་བརྟག༵ས་ཡིན༵་ནམ༵་ཅི༵་སྟེ་མ་ཡིན་པའི་ཕྱིར། གློ༵་བུར༵་དྲི༵་མ༵་ཕྱི༵་དང་ནང༵་ཡིན༵་པ༵་ལྟར༵། བདེ༵་གཤེག༵ས་སྙིང༵་པོ༵འང༵་ཕྱི༵་ན༵ང་ཡིན༵་ན༵མ་ཅི༵་སྟེ་མ་ཡིན་པའི་ཕྱིར། བདེ༵་གཤེག༵ས་སྙིང༵་པོ༵འང་འཕགས་པའི་ཡེ་ཤེས་དམ་པའི་ཡུལ་དུ་གྱུར་བའི་དོན༵་དམ༵་བདེན་པ་ཡིན༵་པ༵་ལྟར༵། གློ་༵བུར༵་དྲི༵་མ༵འང༵་དོན༵་དམ༵་ཡིན༵་ན༵མ་ཅི༵་སྟེ་མ་ཡིན་པའི་ཕྱིར། བདེ༵་གཤེག༵ས་སྙི༵ང་པོ༵་ནི། རྒྱུད་བླ་མ་ལས། ཇི་ལྟར་སྔར་ཡོད་ཕྱིས་དེ་བཞིན། །འགྱུར་བ་མེད་པའི་ཆོས་ཉིད་དོ། །ཞེས་གསུངས་པ་བཞིན་འགྱུར་མེད་རྟག༵་པ༵་ཡིན༵་པ༵་ལྟར༵། གློ༵་བུར༵་དྲི༵་མ༷འང༷་རྟག༵་པ༵་ཡི༵ན་ནམ༷་ཅི༵་སྟེ་མ་ཡིན་ཏེ། མི་རྟག་པ་ཡིན་པའི་ཕྱིར། བདེ༵་གཤེག༵ས་སྙིང༵་པོ༵་ཡོང༵ས་གྲུ༵བ་ཡི༵ན་པ༵་ལྟར༵། གློ༵་བུར༵་དྲི༵་མ༷འ༵ང་ཡོང༵ས་གྲུབ༵་ཡི༵ན་ནམ༵་ཅི༵་སྟེ་མ་ཡིན་ཏེ། གནས་ལུགས་མཐར་ཐུག་མ་ཡིན་པའི་ཕྱིར། བདེ༵་གཤེག༵ས་སྙིང༵་པོ༵་སངས༵་རྒྱས༵་ཡི༵ན་པ༵་ལྟར༵། གློ༵་བུར༵་དྲི༵་མ༵་སངས༵་རྒྱས༵་ཡི༵ན་ནམ༵་ཅི༵་སྟེ་མ་ཡིན་ཏེ། གདོད་ནས་དྲི་མ་དང་བྲལ་བའི་དབྱིངས་དང་ཀུན་རྫོབ་གསར་བྱུང་གི་སངས་རྒྱས་གང་ཡང་མ་ཡིན་པའི་ཕྱིར། བདེ༵་གཤེག༵ས་སྙིང༵་པོ༵་རང༵་བྱུང༵་ཡིན༵་པ༵་ལྟར༵། གློ༵་བུར༵་དྲི༵་མའང༵་རང༵་བྱུང༵་ཡི༵ན་ནམ༵་ཅི༵་སྟེ་མ་ཡིན་ཏེ། རྒྱུ་རྐྱེན་གཞན་གྱི་དབང་གིས་བྱུང་བའི་ཕྱིར། བདེ༵་གཤེག༵ས་སྙིང༵་པོ༷་ཡེ༷་ཤེས༵་ཡི༵ན་པ༵་ལྟར༵། གློ༵་བུར༵་དྲི༵་མའང༵་ཡེ༵་ཤེས༵་ཡིན༵་ནམ༵་ཅི༵་སྟེ་མ་ཡིན་པའི་ཕྱིར། བ༵དེ་གཤེ༵གས་སྙི༵ང་པོ༵་རྣ༵མ་མཁྱེ༵ན་ཡི༵ན་པ༵་ལྟ༵ར། གློ༵་བུ༵ར་དྲི༵་མ༵འ༵ང་རྣ༵མ་མཁྱེ༵ན་ཡི༵ན་ན༵མ་ཅི༵་སྟེ་མ་ཡིན་པའི་ཕྱིར། བདེ༵་གཤེག༵ས་སྙི༵ང་པོ༵་ཆོ༵ས་ཀྱི་དབྱི༵ངས་ཡིན༵་པ༷་ལྟར༵། གློ༵་བུར༵་དྲི་མ༵འང༵་ཆོས༷་དབྱིང༵ས་ཡི༵ན་ནམ༵་ཅི༵་སྟེ་མི་སྲིད་པའི་ཕྱིར། བདེ༵་གཤེག༵ས་སྙིང༵་པོ༵་བདེ༵་བ་ཆེན༵་པོ་ཡིན༵་པར་གྲུབ་པ༵་ལྟ༵ར། གློ༵་བུ༵ར་དྲི༵་མ༵འ༵ང་བདེ༵་ཆེན༵་ཡིན༵་ནམ༵་ཅི༵་སྟེ་མ་ཡིན་པའི་ཕྱིར། བདེ༵་གཤེག༵ས་སྙིང༵་པོ༵་དོན་དམ་པའི་མྱང༵་འདས༵་མཐར་ཐུག་ཡི༵ན་པ༵་ལྟར༵། གློ༵་བུ༵ར་དྲི༵་མའང༵་མྱང༵་འདས༵་ཡིན༵་ནམ༵་ཅི༵་སྟེ་མི་སྲིད་པའི་ཕྱིར། བདེ༵་གཤེག༵ས་སྙིང༵་པོ༵་ཤེ༵ར་ཕྱི༵ན་ཡིན༵་པ༵་ལྟར༵། གློ༵་བུར༵་དྲི༵་མ༵འང༵་ཤེ༵ར་ཕྱི༵ན་ཡིན༵་ནམ༵་ཅི༵་སྟེ་མ་ཡིན་ཏེ། ཤེར་ཕྱིན་གྱི་མི་མཐུན་ཕྱོགས་ཡིན་པའི་ཕྱིར། བདེ༵་གཤེག༵ས་སྙིང༵་པོ༵་མཐའ་ཐམས་ཅད་དང་བྲལ་བའི་དབུ༵་མ༵་ཡིན༵་པ༵་ལྟ༵ར། གློ༵་བུར༵་དྲི༵་མའང༵་དབུ༵་མ༵་ཡི༵ན་ནམ༵་ཅི༷་སྟེ་མ་ཡིན་ཏེ། སྤྲོས་པའི་མཐའ་དང་མ་བྲལ་བའི་ཕྱིར། བདེ༵་གཤེག༵ས་སྙི༵ང་པོ༵༵་ནི། རང་ངོས་ནས་མི་སྟོང་ཞིང་ཀུན་རྫོབ་གློ་བུར་བ་རྣམས་ཀྱིས་སྟོང་བའི་གཞ༵ན་སྟོང༵་ཡི༵ན་པ༵་ལྟར༵། གློ༵་བུར༵་དྲི༵་མ༵འ༵ང་གཞ༵ན་སྟོ༵ང་ཡིན༵་ནམ༵་ཅི༵་སྟེ་མ་ཡིན་པའི་ཕྱིར། ཡང་སྐྱབས་མགོན་བློ་གྲོས་གྲགས་པའི་གཞན་སྟོང་ལས། གཞི་གྲུབ་ན་གཞན་སྟོང་ཡིན་པའི་ཁྱབ་ཅེས་སྒྲས་ཟིན་ལ་གསུངས་པ་ཡིན་ཏེ། ཇི་སྐད་དུ། ཀུན་རྫོབ་རྣམས་རང་སྟོང་གཞན་སྟོང་གཉིས་ཀ་ཡིན་པ་གང་ཞིག་དོན་དམ་ཉིད་གཞན་སྟོང་ཁོ་ནར་ངེས་པའི་ཕྱིར་ཞེས་སོགས་གསུངས་པའི་ཕྱིར་དང༌། ཉ་དབོན་པའི་བསྟན་པ་སྤྱི་འགྲེལ་གྱི་རྣམ་བཤད་ལས་ཀྱང༌། དེས་ན་སྔ་རབས་པ་རྣམས་ཀྱི་རང་སྟོང་གི་འཆད་ཚུལ་དེ་ཐད་སོར་བཞག་ནས་ཀུན་རྫོབ་ཐམས་ཅད་རང་སྟོང་ཞེས་བཞེད་ཀྱི་དོན་ལ་ཀུན་རྫོབ་ཐམས་ཅད་གཞན་སྟོང་དུ་བཞེད་དེ། སྔར་གྱི་སྟོང་ཚུལ་དེ་ཉིད་གཞན་སྟོང་གི་སྟོང་ཚུལ་དངོས་ཡིན་པའི་ཕྱིར་རོ། །དེས་ན་དོན་དམ་ཐམས་ཅད་གཞན་སྟོང་ཡིན་གྱི་རང་སྟོང་མིན་ལ། ཀུན་རྫོབ་ཐམས་ཅད་སྔ་རབས་པའི་འཆད་ཚུལ་དང་བསྟུན་ནས་རང་སྟོང་དང་དོན་ལ་གཞན་སྟོང་སྟེ་གཉིས་ཀའོ། །ཞེས་གསུངས་པ་དེ་དང༌། བཀའ་བསྡུ་བཞི་བ་ལས། བདེ་གཤེགས་སྙིང་པོ་གཞན་སྟོང་ཡིན་པ་ལྟར། །གློ་བུར་དྲི་མ་གཞན་སྟོང་ཡིན་ནམ་ཅི། །ཞེས་དང༌། རྣམ་ཤེས་ཡིན་ན་གཞན་སྟོང་ཟབ་མོ་མིན། །ཞེས་དང༌། རང་སྟོང་གཞན་སྟོང་ལེགས་པར་ཕྱེ་ནས་གསུངས། །ཞེས་གསུངས་པ་དག་གསུང་ཟིན་མི་མཐུན་པ་ཡིན་ལ། འོ་ན་དེ་གཉིས་གང་གི་གསུང་ཟིན་ལྟར་ཁས་ལེན་ཞེ་ན། ཀུན་མཁྱེན་ཇོ་ནང་པའི་རིང་ལུགས་ཀྱི་ལྟ་གྲུབ་རྣམ་དག་ཁས་ལེན་པ་རྣམས་ཀྱིས་ནི། ཇི་སྐད་དུ་བདག་ནི་སངས་རྒྱས་ཕྱོགས་མི་འཛིན། །སེར་སྐྱ་སོགས་ལ་མི་སྡང་ཡང༌། །གང་ཞིག་རིགས་པར་ལྡན་པའི་ཚིག །དེ་ཉིད་སྟོན་པར་འཛིན་པ་ཡིན། །ཞེས་གསུངས་པ་ལྟར། ཀུན་མཁྱེན་དོལ་པོ་པ་དང་ཐམས་ཅད་མཁྱེན་པ་ཏཱ་ར་ནཱ་ཐའི་གསུང་ཟིན་ལྟར་ཁས་བླང་ན། ལུང་རིགས་དང་ཡང་མི་འགལ་བས་ན་སྐབས་འདིར་ཡང་བཀའ་བསྡུ་བཞི་བའི་གསུང་ཟིན་ལྟར་ཁས་ལེན་པར་བྱའོ། །བསྟན་པ་སྤྱི་འགྲེལ་གྱི་རྣམ་བཤད་སོགས་ཀྱི་ལུང་གི་དགོངས་པ་ནི། ཆོས་ཐམས་ཅད་གཞན་གྱི་ངོ་བོས་སྟོང་པ་ཡིན་པས་གཞན་སྟོང་ཞེས་པའི་སྒྲ་བཤད་ཚང་བ་ཙམ་ལ་དགོངས་པ་ཡིན་ནམ་དཔྱད་པར་བྱའོ། །ད་ནི་ལྷག་མའི་ཚིག་དོན་ནི་བདེ༵་གཤེག༵ས་སྙིང༵་པོ༵་ཀུན་རྫོབ་གློ་བུར་གྱི་ཆོས་རྣམས་ཀྱི་སྟོང༵་པའི་གཞི༵་ཡིན༵་པ༵་ལྟར༵་གློ༵་བུར༵་དྲི༵་མ༵་སྟོང༵་གཞི༵་ཡིན༵་ནམ༵་ཅི༵་སྟེ་མ་ཡིན་ཏེ། རྫུན་པ་བསླུ་བའི་ཆོས་རྣམས་ནི། སྐབས་འདིའི་སྟོང་གཞི་མ་ཡིན་པར་གང་ལ་གང་མེད་རྒྱུ་དེ་ཡིན་པའི་ཕྱིར། བདེ༵་གཤེག༵ས་སྙིང༵་པོ༵་རྣམ་ཤེས་ཀྱི་སྣང་བ་འདི་ལས་གཞན༵་མཆོག༵་དོན་དམ་པ་ཡིན༵་པ༵་ལྟར༵། གློ༵་བུར༵་དྲི༵་མ༵འང༵་གཞ༵ན་མཆོ༵ག་ཡིན༵་ནམ༵་ཅི༵་སྟེ་མ་ཡིན་པའི་ཕྱིར། ཡང་གཟུངས་རྒྱལ་གྱི་མདོ་ལས། ཟད་པ་གཉེན་པོས་ཟད་པ་མ་ཡིན་ཏེ། །སྔོན་ནས་ཟད་པས་དེ་ཕྱིར་ཟད་ཅེས་བསྟན། །ཞེས་དང༌། རྒྱུད་བླ་མར། རང་བཞིན་གྱིས་ནི་ཡོངས་དག་ཕྱིར། །ཉོན་མོངས་གདོད་ནས་ཟད་ཕྱིར་རོ། །ཞེས་དོན་དམ་བདེ༵་གཤེག༵ས་སྙིང༵་པོ༵་གདོད་ནས་རང་བཞིན་གྱི་དྲི་མས་དག་པའི་འགོག༵་བདེན༵་ཡི༵ན་པར་གསུངས་པ༵་ལྟར༵། གློ༵་བུར༵་དྲི༵་མ༵འང༵་འགོག༵་བདེ༵ན་ཡི༵ན་ནམ༵་ཅི༵་སྟེ་མ་ཡིན་ཏེ། གདོད་ནས་དྲི་མ་དང་བྲལ་བའི་དབྱིངས་མ་ཡིན་པའི་ཕྱིར། བདེ༵་གཤེ༵གས་སྙི༵ང་པོ༵་གློ་བུར་དྲི་མ་འགོག༵་པའི་གཞི༵་ཡི༵ན་པ༵་ལྟར༵། གློ༵་བུར༵་དྲི༵་མ༵འང༵་འགོ༵ག་གཞི༵་ཡི༵ན་ནམ༵་ཅི༵་སྟེ། མ་ཡིན་ཏེ། དེ་སྤང་བྱ་ཡིན་པའི་ཕྱིར། བདེ༵་གཤེག༵ས་སྙིང༵་པོ༵་སྒྲིབ་པ་བྲལ༵་བའི་གཞི༵་ཡིན༵་པ༵་ལྟར༵། གློ༵་བུར༵་དྲི༵་མ༵འང༵་བྲལ༵་གཞི༵་ཡིན༵་ནམ༵་ཅི༵་སྟེ་མ་ཡིན་ཏེ། དེ་བྲལ་བྱ་ཡིན་པའི་ཕྱིར། བདེ༵་གཤེག༵ས་སྙིང༵་པོ༵་སྤྲོས་པས་དབེན༵་པའི་གཞི༵་ཡིན༵་པ༵་ལྟར༵་གློ༵་བུར༵་དྲི༵་མ༵འང༵་དབེན༵་གཞི་ཡིན༵་ནམ༵་ཅི་༵སྟེ་མ་ཡིན་པའི་ཕྱིར། བདེ༵་གཤེག༵ས་སྙིང༵་པོ༵་སྒྲིབ་པ་དག༵་པའི་གཞི༵་ཡིན༵་པ༵་ལྟར༵་གློ༵་བུར༵་དྲི༵་མ༵འང༵་དག༵་གཞི༵་ཡིན༵་ནམ༵་ཅི༵་སྟེ་མ་ཡིན་ཏེ། དག་བྱ་ཡིན་པའི་ཕྱིར། བདེ༵་གཤེག༵ས་སྙིང༵་པོ༵་གཟུང་འཛིན་གྱི་སྤྲོས་པ་མེད༵་པའི་གཞི༵་ཡིན༵་པ༵་ལྟར༵། གློ༵་བུར༵་དྲི༵་མ༵འང༵་མེད༵་གཞི༵་ཡིན༵་ནམ༵་ཅི༵་སྟེ་ཁྱོད་ལྟར་ན་དེ་ལྟར་འགྱུར་བར་ཐལ་བ་ལ་དེ་འདྲ་མི་སྲིད་པའི་ཕྱིར། དེ༵་ལྟར༵་བདེན་གཉིས་འཁོར་འདས་ངོ་བོ་གཅིག་ཏུ་འདོད༵་ན༵་ཧ་ཅང་ཐལ་ཆེས་པའི་ཉེས༵་སྐྱོན་༵དཔག༵་མེད༵་ཡོད་དོ༵། །ཞེས་བསྟན་པ་ཡིན་ཏེ། འདི་ཉིད་ཀྱི་རང་འགྲེལ་ལས། དེ་དག་གཅིག་མ་ཡིན་གྱི་ཐ་དད་འབྲེལ་མེད་ཡིན་པར་རྫོགས་ལྡན་གྱི་དགོངས་པ་ཡང་དག་ལ་གནས་པའི་ཕྱིར། །ཞེས་གསུངས་པའི་ཕྱིར་རོ། ། རང་ལུགས་ལ་སྐྱོན་མེད་པར་བསྟན་པ།གསུམ་པ་རང་ལུགས་ལ་སྐྱོན་མེད་པར་བསྟན་པ་ནི། རྩ་བར། རྫོགས་ལྡན་ལུགས་ལ་ཉེས་སྐྱོན་དེ་རྣམས་མེད། །ཅེས་བྱུང༌། དེའི་ཚིག་དོན་ནི། རྫོག༵ས་ལྡན༵་ཆོས་མཆོག་གི་རང་ལུག༵ས་ལ༵། གཞན་ལུགས་ལ་སྨྲས་པའི་ཉེས་༵སྐྱོན༵་དེ་༵རྣམ༵ས་མེད༵་ཅིང་རྣམ་པར་དག་པའི་ལུགས་བཟང་ཡིན་ཞེས་པའོ། ། ཤེས་བྱའི་རབ་དབྱེ་སོགས་ལ་ལྟ་ངན་དུ་མ་དགག་ནས་རྫོགས་ལྡན་ཆོས་ཀྱི་ལུགས་བསྟན་པ།གསུམ་པ་ཤེས་བྱའི་རབ་དབྱེ་སོགས་ལ་ལྟ་ངན་དུ་མ་དགག་ནས་རྫོགས་ལྡན་ཆོས་ཀྱི་ལུགས་བསྟན་པ་ལ། ཤེས་བྱ་ཐམས་ཅད་དངོས་པོ་དངོས་མེད་གཉིས་སུ་མ་འདུས་པར་བསྟན་པ། ཤེས་བྱ་ཐམས་ཅད་བེམ་རིག་གཉིས་སུ་འདུས་པར་བསྟན་པ། ལྷ་སྔགས་སོགས་གསར་བྱུང་གི་འདུས་བྱས་སུ་འདོད་པ་ལ་ལུང་རིགས་ཀྱིས་གནོད་བྱེད་བསྟན་པ། མཐར་ཐུག་སངས་རྒྱས་རྟག་བརྟན་གསུངས་པ་རྣམས་དྲང་དོན་དུ་འདོད་པ་ལ་སྒྲུབ་བྱེད་མེད་ཅིང་གནོད་བྱེད་ཡོད་པར་བསྟན་པ། དེ་རྣམས་ཀུན་རྫོབ་ཏུ་ཡོད་ཀྱི་དོན་དམ་པར་ཅིར་ཡང་མ་གྲུབ་པར་འདོད་པ་ལ་གནོད་བྱེད་བསྟན་པ། སེམས་ཅན་ཐམས་ཅད་ལ་ཆོས་ཟབ་ཁྱད་འཕགས་ཀྱི་བྱིན་རླབས་འཇུག་པར་སྨོན་པ། རྫོགས་ལྡན་ལུགས་ཀྱི་ཁྱད་འཕགས་རྣམས་བསྟན་པ། ཆོས་དབྱིངས་ཤེར་ཕྱིན་ཟབ་མོ་གསུངས་པའི་དགོངས་པ་བསྟན་པ། ལྟ་ངན་གྱི་འདོད་ལུགས་བརྗོད་དེ་ལྟ་བའི་སྙིགས་མ་བདོ་བར་བསྟན་པ། རྫོགས་ལྡན་ལུགས་ལ་དེ་ལས་ཁྱད་འཕགས་ཡོད་པར་བསྟན་པ། ཀུན་གཞིའི་རྣམ་བཞག་བསྟན་པ་དང་བཅུ་གཅིགདང་པོ་ལ་ལུགས་གཞན་བསྟན་པ་དང༌། རང་ལུགས་བསྟན་པ་དང་གཉིས། དང་པོ་ནི། རྩ་བར། ཤེས་བྱ་ཐམས་ཅད་དངོས་པོ་དངོས་མེད་དུ། །འདུས་པར་འདོད་པ་གསུམ་ལྡན་མར་བཅད་ལུགས། །ཞེས་བྱུང༌། དེའི་དོན་ནི། ཤེས༵་བྱ༵་ཐམ༵ས་ཅད༵་དངོས༵་པོ༵་དང་དངོས༵་མེད༵་དུ༵་འདུ༵ས་པར༵་འདོད༵་པ༵་ནི་གསུ༵མ་ལྡན༵་མར༵་བཅ༵ད་ཀྱི་ལུག༵ས་ཡིན་ལ་དེ་ནི་སྐྱོན་དང་བཅས་པའོ། །གཉིས་པ་རང་ལུགས་བསྟན་པ་ནི། ཤེས་བྱ་ཐམས་ཅད་དངོས་པོ་དངོས་མེད་དུ། །འདུས་པར་འདོད་པ་གསུམ་ལྡན་མར་བཅད་ལུགས། །ཆོས་ཉིད་དབུ་མ་ཤེས་བྱའི་མཆོག་ཡིན་ཡང༌། །དངོས་པོ་དངོས་མེད་གང་ཡང་མ་ཡིན་གྱི། །ཕུང་པོ་གསུམ་པར་བཞེད་པ་རྫོགས་ལྡན་ལུགས། །རྩ་བར། ཆོས་ཉིད་དབུ་མ་ཤེས་བྱའི་མཆོག་ཡིན་ཡང༌། །ཞེས་པ་ནས། ཕུང་གསུམ་ཡོད་པའི་ཕྱིར། །ཞེས་པའི་བར་ཤོ་ལོ་ཀ་གཅིག་དང་རྐང་བ་གཅིག་བྱུང༌། དེའི་ཚིག་དོན་ནི། ཆོ༵ས་ཉི༵ད་དོན་དམ་པའི་དབུ༵་མ༵་ཤེ༵ས་བྱ༵འི་མཆོ༵ག་ཡི༵ན་པར་ཡ༵ང་གྲུབ་ཏེ། བསྟན་པ་སྤྱི་འགྲེལ་གྱི་རྣམ་བཤད་ལས། སྟོང་ཉིད་ཟབ་མོ་དེ་མངོན་སུམ་དུ་རྟོགས་བྱ་ཡིན་པས་ཤེས་བྱའི་མཆོག་དང༌། ཞེས་གསུངས་པའི་ཕྱིར། དེ་ནི་དངོ༵ས་པོ་ད༵ང་དངོ༵ས་མེད༵་གང༵་ཡང༵་མ༵་ཡི༵ན་གྱི༵་སྟེ་མ་ཡིན་པའི་ཕུ༵ང་པོ༵་གསུ༵མ་པ་ཡིན་པར༵་བཞེད༵་པ༷་རྫོག༵ས་ལྡན༵་གྱི་ལུག༵ས་ཡིན་ཏེ། རྩ་ཤེས་ལས། དངོས་དང་དངོས་མེད་འདུས་བྱས་ཡིན། །མྱ་ངན་འདས་པ་འདུས་མ་བྱས། །ཞེས་དང༌། ཇི་སྐད་དུ། དངོས་དང་དངོས་པོ་མེད་པ་དང༌། །གདོད་ནས་གྲོལ་བའི་དེ་བཞིན་གཤེགས། །ཞེས་དང༌། དངོས་དང་དངོས་མེད་ཟད་པའི་གཙོ། །ཐོག་མཐའ་མེད་ཅིང་ཞི་བ་ཡི། །བྱང་ཆུབ་སེམས་དེ་ལ་ཕྱག་འཚལ། །ཞེས་དང༌། དཔལ་རྡོ་རྗེ་ཕྲེང་བའི་རྒྱུད་ལས། དངོས་དང་དངོས་མེད་ལས་གྲོལ་ཞིང༌། །ཞེས་གསུངས་བའི་ཕྱིར། རྒྱུ་མཚན་དེ༵་དག་གི་ཕྱི༵ར་ན་ཤེས་བྱ་ཐམ༵ས་ཅད༵་དངོ༵ས་པོ༵་དངོ༵ས་མེད༵་གཉིས་ཀྱི་ནང་དུ༵་འདུ༵ས་པ༵་ནི་མི༵ན་ཏེ༵། དེ་གཉིས་གང་ཡང་མ་ཡིན་པའི་ཕུང༵་གསུ༵མ་ཡོ༵ད་པའི༵་ཕྱི༵ར་རོ། །གཉིས་པ་ཤེས་བྱ་ཐམས་ཅད་བེམ་རིག་གཉིས་སུ་འདུས་པར་བསྟན་པ་ལ། རྫོགས་ལྡན་གྱི་ལུགས་དང༌། གཞན་གྱི་འདོད་པ་བརྗོད་ནས་དེ་དགག་པ་དང༌། དེ་ལ་རྩོད་ སྤོང་དང་གསུམ། དང་བོ་ནི། རྩ་བར། ཐམས་ཅད་བེམ་རིག་གཉིས་སུ་ཁ་ཚོན་ཆོད། །དེ་ཕྱིར་དེ་ལ་ཕུང་པོ་གསུམ་པ་མེད། །ཅེས་པ་འདི་ནི་རྫོགས་ལྡན་ཆོས་ལུགས་ཡིན། །ཞེས་བྱུང༌། དེའི་ཚིག་དོན་ནི། ཤེས་བྱ་ཐམ༵ས་ཅ༵ད་བེ༵མ་པོ་དང་རིག༵་པ་གཉི༵ས་སུ༵་ཁ༵་ཚོན༵་ཆོད༵་དེ། ཤེས་བྱ་ཡིན་ན་རང་རིག་པ་དང་མི་རིག་པ་གཉིས་ལས་མ་འདས་པའི་ཕྱིར་ཏེ། རང་རིག་ན་རང་མི་རིག་པ་དང་འགལ་ལ་རང་མི་རིག་ན་རིག་པར་འགལ་བས་ཕུང་པོ་གསུམ་པ་མེད་པའི་ཕྱིར་རོ། །དེ༵་ཕྱིར༵་དེ༵་ལ༵་ཕུ༵ང་བོ༵་གསུ༵མ་པ༵་མེད༵་ཅེས༵་པ༵་འདི༵་ནི༵་རྫོག༵ས་ལྡ༵ན་གྱི་ཆོ༵ས་ལུག༵ས་ཡིན༵་ལ། འོན་ཀྱང་གསུམ་ལྡན་མར་བཅད་ཀྱི་སྤྱོད་ཡུལ་མ་ཡིན་པས་བློར་ཤོང་བ་དཀའ་ཞེས་རྟོན་པ་བཞི་ལྡན་གྱིས་གསུངས་སོ། །གཉིས་པ་གཞན་གྱི་འདོད་པ་བརྗོད་ནས་དེ་དགག་པ་ལ། གཞན་གྱི་འདོད་པ་བརྗོད་པ་དང༌། ལུགས་དེ་དགག་པ་དང་གཉིས། དང་པོ་ནི༌། རྩ་བར། གསུམ་ལྡན་མར་བཅད་ཆོས་ཉིད་དེ་བཞིན་ཉིད། །བེམ་རིག་གང་ཡང་མིན་པའི་ཕུང་གསུམ་འདོད། །ཅེས་བྱུང༌། དེའི་དོན་ནི་གསུ༵མ་ལྡན༵་མ༵ར་བཅ༵ད་ཀྱི་ལུགས་ལ་ཆོ༵ས་ཉི༵ད་དེ༷༷་བཞི༵ན་ཉི༵ད་ནི། བེ༵མ་པོ་དང་རི༵ག་པ་གང༵་ཡ༵ང་མི༵ན་པའི༵་ཕུ༵ང་པོ་གསུ༵མ་པ་ཡིན་པར་འདོ༵ད་དོ། །གཉིས་པ་ལུགས་དེ་དགག་པ་ལ། ཆོས་དབྱིངས་ཤེས་པ་ཡིན་པའི་སྒྲུབ་བྱེད་བསྟན་པ། དེ་ཡེ་ཤེས་ཡིན་ཡང་མི་རྟག་པ་མ་ཡིན་པ་བསྟན་པ། དོན་དམ་རིག་པ་མ་ཡིན་པ་ལ་གནོད་བྱེད་བསྟན་པ། དོན་དམ་རིག་པ་ཡིན་ན་གཤེགས་སྙིང་རྟག་བརྟན་གྱི་ཤེས་པ་ཡིན་པར་གྲུབ་པར་བསྟན་པ། དོན་དམ་ཤེས་པ་མ་ཡིན་པ་ལ་ལུང་དང་འགལ་བར་བསྟན་པ་དང་ལྔ། དང་པོ་ནི། གལ་ཏེ་ཆོས་དབྱིངས་རིག་པ་མ་ཡིན་ན། །དབྱིངས་རིག་དབྱེར་མེད་ཡེ་ཤེས་གང་ལ་བགྱི། །ཆོས་ཀྱི་དབྱིངས་ཀྱི་ཡེ་ཤེས་གང་ལ་བགྱི། །དོན་དམ་རང་བྱུང་ཡེ་ཤེས་གང་ལ་བགྱི། །དོན་དམ་སོ་སོ་རང་རིག་མི་གཡོ་བ། །དོན་དམ་བདག་རིག་གཞན་རིག་ཐམས་ཅད་པ། །དོན་དམ་ཀུན་ཤེས་ཀུན་རིག་དམ་པ་པོ། །དོན་དམ་ཁྱབ་བདག་ཡེ་ཤེས་ལྔ་ཡི་བདག །དོན་དམ་ཡེ་ཤེས་སྐུ་སྟེ་རང་བྱུང་བ། །དོན་དམ་ཐམས་ཅད་མཁྱེན་པའི་ཡེ་ཤེས་མཚོ། །དོན་དམ་ཀུན་མཁྱེན་ཡེ་ཤེས་མཛོད་འཛིན་པ། །དོན་དམ་ཡེ་ཤེས་ཡེ་ཤེས་འབྱུང་གནས་ཆེ། །དོན་དམ་ཡེ་ཤེས་ལྡན་ལ་ཡོད་མེད་ཤེས། །དོན་དམ་ཡེ་ཤེས་སྐུ་རྣམས་མ་ལུས་འཆང༌། །དོན་དམ་ཀུན་དུ་བཟང་པོ་བློ་གྲོས་བཟང༌། །དོན་དམ་སངས་རྒྱས་ཀུན་གྱི་སྙིང་པོ་ཆེ། །དོན་དམ་མཆོད་པ་ཆེན་པོ་འདོད་ཆགས་ཆེ། །དོན་དམ་མཆོད་པ་ཆེན་པོ་ཞེ་སྡང་ཆེ། །དོན་དམ་མཆོད་པ་ཆེན་པོ་གཏི་མུག་ཆེ། །དོན་དམ་མཆོད་པ་ཆེན་པོ་ཁྲོ་བ་ཆེ། །དོན་དམ་མཆོད་པ་ཆེན་པོ་ཆགས་པ་ཆེ། །དོན་དམ་མཆོད་པ་ཆེན་པོ་བདེ་བ་ཆེ། །དོན་དམ་དགའ་བ་ཆེན་པོ་མགུ་བ་ཆེ། །དོན་དམ་མཁས་པ་སྒྱུ་འཕྲུལ་ཆེན་པོ་འཆང༌། །དོན་དམ་སྒྱུ་འཕྲུལ་ཆེན་པོ་དགའ་བའི་དགའ། །དོན་དམ་བསམ་གཏན་ཆེན་པོ་ཏིང་འཛིན་གནས། །དོན་དམ་ཤེས་རབ་ཆེན་པོའི་ལུས་འཆང་བ། །དོན་དམ་སྨོན་ལམ་ཡེ་ཤེས་རྒྱ་མཚོ་སྟེ། །དོན་དམ་བྱམས་ཆེན་རང་བཞིན་དཔག་ཏུ་མེད། །དོན་དམ་སྙིང་རྗེ་ཆེན་པོ་བློ་ཡི་མཆོག། དོན་དམ་ཤེས་རབ་ཆེན་པོ་བློ་ཆེན་ལྡན། །དོན་དམ་མཁས་པ་ཆེན་པོ་ཐབས་ཆེ་བ། །དོན་དམ་ཤེས་བཅུ་རྣམ་དག་བདག་ཉིད་ཅན། །དོན་དམ་ཤེས་བཅུ་རྣམ་དག་འཆང་བ་པོ། །དོན་དམ་ཤེས་པ་འབའ་ཞིག་ངེས་གསལ་བ། །དོན་དམ་ཤེས་པ་བརྒྱད་པོ་རྟོགས་པ་འཆང༌། །དོན་དམ་ཤེས་རབ་ཡེ་ཤེས་མེ་བོ་ཆེ། །དོན་དམ་ཡེ་ཤེས་སྣང་བ་ལམ་མེ་བ། །དོན་དམ་ཡེ་ཤེས་མེ་ལྕེ་འོད་རབ་གསལ། །དོན་དམ་སངས་རྒྱས་བྱང་ཆུབ་བླ་ན་མེད། །དོན་དམ་སངས་རྒྱས་རྣམ་པར་སྣང་མཛད་ཆེ། །དོན་དམ་རྫོགས་པའི་སངས་རྒྱས་འཇིག་རྟེན་འདྲེན། དོན་དམ་གསུམ་རིག་གཙང་མ་དག་པ་སྟེ། །དོན་དམ་མངོན་ཤེས་དྲུག་ལྡན་རྗེས་དྲན་དྲུག །དོན་དམ་ཤེས་རབ་ཕ་རོལ་ཕྱིན་པའི་མཐའ། །དོན་དམ་ཐུབ་དབང་སྟོབས་བཅུ་ཁྱབ་པའི་བདག། དོན་དམ་འཇམ་དཔལ་དཔལ་དང་ལྡན་པའི་མཆོག །དོན་དམ་ཡེ་ཤེས་སྐུ་ཉིད་ཁྱོད་ལ་འདུད། །ཅེས་སོགས་རྣམ་པ་མང་པོ་དོན་དམ་ནི། །ཤེས་པ་རིག་པ་ཡེ་ཤེས་ཡིན་པར་སྟོན། །རྩ་བར། གལ་ཏེ་ཆོས་དབྱིངས་རིག་པ་མ་ཡིན་ན། །ཞེས་པ་ནས། ཤེས་པ་རིག་པ་ཡེ་ཤེས་ཡིན་པར་སྟོན། །ཞེས་བྱུང༌། དེའི་ཚིག་དོན་ནི། ག༵ལ་ཏེ༵་ཕྱོགས་སྔ་མའི་འདོད་པ་ལྟར་ཆོ༵ས་ཀྱི་དབྱིང༵ས་རི༵ག་པ༵་མ༵་ཡི༵ན་ན༵། འོ་ན། དབྱིང༵ས་རི༵ག་དབྱེ༵ར་མེད༵་ཀྱི་ཡེ༵་ཤེས༵་གང༵་ལ༵་བགྱི༵། ཆོ༵ས་ཀྱི༵་དབྱིང༵ས་ཀྱི༵་ཡེ༵་ཤེ༵ས་གང༵་ལ༷་བགྱི༵། དོ༵ན་དམ༵་རང༵་བྱུ༵ང་ཡེ༵་ཤེས༵་གང༵་ལ༵་བགྱི༵་འམ་གང་ལ་བྱེད་ཅེས་གནོད་བྱེད་བསྟན་ལ། དེའི་ཕྱོགས་སྔ་མས་ཡེ་ཤེས་དེ་དག་ནི་འདུས་བྱས་མི་རྟག་པ་ཡིན་པའི་ཡེ་ཤེས་རྣམས་ལ་བྱེད་པ་ཡིན་ཞེ་ན། དེའི་ལན་དུ་དེ་ནི། རིགས་པ་མ་ཡིན་ཏེ། དོ༵ན་དམ༵་པའི་མཚན་ཡང་དག་པར་བརྗོད་པ་ལས་གསུངས་པ་འདི་ལྟར་དོན་དམ་པ་ནི་སོ༵་སོ༵་རང༵་རི༵ག་མི༵་གཡོ༵་བ༵་ཡིན་ཞེས་དང༌། དོ༵ན་དམ༵་བདེན་པས་ནི། ཇི་ལྟ་བ་མཁྱེན་པས་བད༵ག་རི༵ག་ཅིང་ཇྀ་སྙེད་པ་མཁྱེན་པས་གཞན༵་མཆོག་ཆོས་ཅན་རིག༵་ལ་དོན་དམ་གྱི་མིག་གི་དབང་པོས་ཀྱང་བྱ་བ་ཐམས་ཅད་བྱེད་ཅིང་གཟུགས་སྒྲ་ལ་སོགས་པའི་ཡུལ་ཐམས་ཅད་རྟོགས་པའི་ཕྱིར། དབང་བོ་ཐམ༵ས་ཅ༵ད་པ༵་ཡིན་ཞེས་པ་དང༌། དོ༵ན་ད༵མ་པ་ནི་ཆོས་ཉིད་ཇི་ལྟ་བ་ཀུན་༵ཤེ༵ས་ཤིང༌། ཆོས་ཅན་ཇི་སྙེད་པ་ཀུ༵ན་རི༵ག་པའི་སྐྱེས་བུ་དམ༵་པ༵་པོ༵་ཡིན་ཞེས་པ་དང༌། དོ༵ན་དམ༵་ནི་བརྟན་གཡོ་ཀུན་ལ་ནམ་མཁའ་ལྟར་ཁྱ༵བ་པའི་བདག༵་པོ་རང་བྱུང་ཡེ༵་ཤེས༵་ལྔ༵འི༵་བད༵ག་ཉིད་ཅན་ཡིན་ཞེས་པ་དང༌། དོ༵ན་ད༵མ་ནི། སངས་རྒྱས་ཀུན་གྱི་ངོ་བོ་ཡེ༵་ཤེ༵ས་ཀྱི་སྐུ༵་སྟེ༵་འདི་བསྐྱེད་པའི་རྒྱུ་རྐྱེན་མེད་ཅིང་སྐྱེ་འགག་གནས་གསུམ་དང་བྲལ་བར་གདོད་ནས་རང༵་བྱུང༵་ཡེ་ཤེས་ཀྱི་ངོ་བོར་གནས་པ༵་ཡིན་ཞེས་པ་དང༌། དོ༵ན་དམ༵་པ་ནི། ཐམ༵ས་ཅད༵་མཁྱེན༵་པའི༵་ཡེ༵་ཤེས༵་ཀྱི་ཕུན་སུམ་ཚོགས་པ་རྒྱ་མཚོ༵་དང་འདྲ་བའི་བང་མཛོད་བརྙེས་པ་ཡིན་ཞེས་པ་དང༌། དོ༵ན་དམ༵་ནི། དཔལ་ལྡན་སངས་རྒྱས་ཐབས་བདེ་བ་ཆེན་པོ་པད་མ་ཤེས་རབ་ཆེན་པོ་སྟོང་བ་ཉིད་ལས་སྐྱེས་པ་ནི་ཀུན༵་མཁྱེ༵ན་ཡེ༵་ཤེས༵་ཀྱི་མཛོད༵་ནམ་མཁའ་དང་མཉམ་པ་འཛི༵ན་པ༵་པོ་ཡིན་ཞེས་པ་དང༌། དོ༵ན་དམ༵་ནི། ཆོས་དབྱིངས་ཡེ༵་ཤེ༵ས་ཀྱི་ཚོགས་ཆེན་པོ་དེ་ཉིད་ཡེ༵་ཤེས༵་ཀྱི་ཚོགས་ནམ་མཁའ་གང་བའི་འབྱུང༵་གནས༵་ཆེ༵་བ་ཡིན་ཞེས་པ་དང༌། དོ༵ན་དམ༵་ནི། ཇི་ལྟ་བ་ཆོས་ཉིད་དང་ཇི་སྙེད་པ་ཆོས་ཅན་མཁྱེན་པའི་ཡེ༵་ཤེས༵་དང་ལྡན༵་པའི་ཕྱིར། དོན་དམ་གྱི་ཡོན་ཏན་ཐམས་ཅད་གདོད་ནས་རྫོགས་པར་ཡོད་པ་ལ༵་ཡོ༵ད་པར་ཡང་དག་པ་ཅི་ལྟ་བ་བཞིན་དུ་ཤེས་པ་དང༌། རྣམ་ཤེས་ཀུན་རྫོབ་ཀྱི་སྐྱོན་རྣམས་དོན་དམ་པར་མེད་པ་ལ་མེད༵་པར་ཡང་དག་པ་ཇི་ལྟ་བ་བཞིན་དུ་ཤེས༵་པས་སྐུར་འདེབས་དང་སྒྲོ་འདོགས་གྱི་མཐའ་ལས་གྲོལ་བའི་དབུ་མ་ཡིན་ཞེས་དང༌། དོན༵་དམ༵་ནི། ཡེ༵་ཤེ༵ས་ལུས་ཅན་གྱི་སྐུ༵་རྣམ༵ས་མ༵་ལུས་༵པར་གདོད་ནས་འཆང༵་པ་པོ་ཡིན་ཞེས་དང༌། དོ༵ན་ད༵མ་ཆོས་སྐུའི་ཡིད་ཀུ༵ན་ཏུ༵་བཟ༵ང་པོ༵་ནི་སོ་སོར་ཡང་དག་པར་རིག་པའི་བློ༵་གྲོ༵ས་བཟ༵ང་པོ་ཡིན་ཞེས་པ་དང༌། དོ༵ན་དམ༵་ནི། འཁོར་འདས་ཐམས་ཅད་ཀྱི་སྙིང་པོ་ཡིན་པས་སང༵ས་རྒྱས༵་ཀུ༵ན་གྱི༵་སྙིང༵་པོ༵་ཆེ༵་བ་ཡིན་ཞེས་པ་དང༌། དོན༵་དམ༵་ཡེ་ཤེས་ཀྱི་རང་སྣང་ནམ་མཁའ་མཛོད་ཀྱི་མཆོད༵་པ༵་ཆེན༵་པོ༵་དོན་དམ་གྱི་འདོད༵་ཆག༵ས་ཆེ༵་བ་འོད་དཔག་མེད་ཡིན་ཞེས་པ་དང༌། དོ༵ན་ད༵མ་པའི་མཆོ༵ད་པ༵་ཆེ༵ན་པོ༵་ཞེ༵་སྡ༵ང་ཆེ༵་བ་མི་བསྐྱོད་པ་ནི། ཉོན་མོངས་ཀྱི་ཞེ་སྡང་ཀུན་འཇོམས་པར་ནུས་པས་དེའི་དགྲ་ཆེན་པོ་ཡིན་ཞེས་པ་དང༌། དོ༵ན་དམ༵་པའི་མཆོད༵་པ༵་ཆེན༵་པོ༵་གཏི༵་མུག༵་ཆེ༵་བ་རྣམ་པར་སྣང་མཛད་གཏི་མུག་བློ་ནི་ཉོན་མོངས་ཀྱི་གཏི་མུག་མུན་པ་སེལ་བར་བྱེད་པ་ཡིན་ཞེས་པ་དང༌། དོན༵་དམ༵་པའི་མཆོད༵་པ༵་ཆེ༵ན་པོ༵་འཕྲག་ཏོག་གི་ཆོས་ཉིད་འཕྲག་ཏོག་ཆེན་པོ་ནི་དོན་ཡོད་གྲུབ་པ་ཉོན་མོངས་ཀུན་གྱི་འཕྲག་ཏོག་ཁྲོ༵་བ༵་ཆེན་པོ་འཇོམས་པར་ནུས་པས་དེའི་དགྲ་ཆེ༵་བ་ཡིན་ཞེས་དང༌། དོན༵་དམ༵་པའི་མཆོ༵ད་པ༵་ཆེ༵ན་པོ༵་ཆོས་ཉིད་ཀྱི་སེར་སྣ་ཆགས༵་པ༵་ཆེ༵་བ་རིན་ཆེན་འབྱུང་ལྡན་ནི། ཉོན་མོངས་ཀྱི་ཆགས་པ་ཐམས་ཅད་སེལ་བར་བྱེད་པ་ཡིན་ཞེས་དང༌། དོ༵ན་དམ༵་པའི་མཐར་ཐུག་གི་མཆོད༵་པ༵་ཆེན༵་པོ༵་བདེ་༵བ༵་ཆེ༵་རྡོ་རྗེ་སེམས་དཔའ་ནི། དོ༵ན་དམ༵་པའི་ཆོས་ཉིད་ཀྱི་དག༵འ་བ༵་ཆེན༵་པོའི༵་རང་བཞིན་མགུ༷་བ༵་ཆེ༵་བ་ཡིན་ཞེས་དང༌། དོ༵ན་དམ༵་ནི༌། གང་ལ་གང་འདུལ་དེ་ལ་དེར་སྟོན་པའི་ཐབས་ལ་མཁ༵ས་པའི་རྣམ་པ༵་སྒྱུ༵་མ་དང༌། མིག་འཕྲུལ༵་ལྟ་བུར་སྐུ་གསུང་ཐུགས་ཀྱི་སྤྲུལ་བ་ཆེན༵་པོ༵་ནམ་མཁའ་དང་མཉམ་པར་འཆ༵ང་བ་ཡིན་ཞེས་དང༌། དོན༵་དམ༵་པའི་སྒྱུ༵་འཕྲུལ་༵ཆེན༵་པོ༵འི་འཕྲིན་ལས་ཀྱི་གང་ལ་ཡང་ཞེན་པ་མེད་པར་སྲིད་པ་ཇི་སྲིད་གྱི་བར་དུ་འགྲོ་བའི་དོན་འགྲུབ་པར་བྱེད་པ་དེ་ཉིད་སྒྱུ་འཕྲུལ་ཆེན་པོའི་དག༵འ་བ་ཡིན་པའི༵་རྒྱུ་མཚན་གྱིས་དག༵འ་བའི་རྣམ་འཕྲུལ་བསམ་གྱི་མི་ཁྱབ་པའི་ཕྱིར། ཞེས་པ་དང༌། དོ༵ན་དམ༵་ནི། འཇིག་རྟེན་ཆོས་བརྒྱད་ཀྱི་རྣམ་གཡེང་བག་ཆགས་དང་བཅས་པ་ཡེ་ནས་ཟད་པའི་ཕྱིར་བདེ་བའི་བས༵མ་གཏ༵ན་ཆེན༵་པོ༵་དཔའ་བར་འགྲོ་བའི་ཏིང༵་ངེ་འཛིན༵་ལ་སོགས་པའི་གན༵ས་ཡིན་ལ་དོན༵་དམ༵་པའི་ཤེས༵་རབ༵་ཆེན༵་པོའི༵་ལུས༵་ནམ་མཁའ་དང་མཉམ་པ་འཆང༵་བ༵་ཡིན་ཞེས་དང༌། དོན༵་དམ༵་ནི། ཆོས་ཉིད་ཀྱི་སྨོན༵་ལམ༵་ནམ་མཁའ་དང་མཉམ་པར་རྫོགས་པའི་ཕྱིར་སྨོན་ལམ་གྱི་ཕ་རོལ་དུ་ཕྱིན་པ་ཆེན་པོ་སྟེ་མུན་པ་དང་འདྲ་བའི་རྣམ་ཤེས་གདོད་ནས་སྤངས་བའི་ཕྱིར་ཡེ༵་ཤེས༵་ཀྱི་ཕ་རོལ་ཏུ་ཕྱིན་པའི་རྒྱ༵་མཚོ༵་ཆེན་པོ་སྟེ༵་ཡིན་ཞེས་དང༌། དོན༵་དམ༵་ནི། སེམས་ཅན་ཐམས་ཅད་བདེ་བ་དང་འཕྲད་པར་དགོངས་པའི་བྱམ༵ས་པ་ཆེན༵་པོ་རང༵་བཞི༵ན་སེམས་ཅན་གྱི་ཁམས་ལྟར་དཔག༵་ཏུ༵་མེད༵་ཅིང༌། སེམས་ཅན་དེ་སྙེད་སྡུག་བསྔལ་དང་བྲལ་བར་དགོངས་པའི་དོན༵་དམ༵་པའི་སྙིང༵་རྗེ༵་ཆེན༵་པོ༵་དེ་སྙེད་ཡོད་ལ། སེམས་ཅན་དེ་སྙེད་བདེ་བ་དང་མི་འབྲལ་བར་དགོངས་པའི་དགའ་བ་ཆེན་པོའི་བློ༵་ཡི༷་མཆོ༵ག་སྟེ་སེམས་ཅན་ཐམས་ཅད་ཚོར་བ་བདེ་སྡུག་དང་བྲལ་བར་དགོངས་པ་བཏང་སྙོམས་ཀྱི་དོན༵་དམ༵་ཤེས༵་རབ༵་ཆེན༵་པོ༵་གནས་ལུགས་ཆེན་པོའི་བློ༵་གྲོས་ཆེ༵ན་པོ་དང་ལྡན༵་པ་འགྲོ་བའི་དོན་ལ་དོན༵་དམ༵་པར་མཁ༵ས་པ༵་ཆེན༵་པོ༵་ཐབས༵་ཆེ༵་བ༵་ཡིན་པ་སྟེ་ཚད་མེད་བཞི་ཡིན་ཞེས་པ་དང༌། དོ༵ན་དམ༵་པའི་རང་བྱུང་ཡེ་ཤེས་ལྔ་པོ་ཐབས་དང་ཤེས་རབ་གཉིས་མེད་ལ་ཕྱེ་བའི་ཡེ་ཤེ༵ས་བཅུ༵་དང༌། དེ་བཞིན་དུ་ཐབས་དང་ཤེས་རབ་གཉིས་ཀྱི་ཕུང་པོ་བཅུ་དང༌། ཁམས་བཅུ་དང་དབང་པོ་བཅུ་དང༌། ཡུལ་བཅུ་དང༌། ལས་ཀྱི་དབང་པོ་དང་ལས་ཀྱི་དབང་པོའི་བྱ་བ་བཅུ་རྣམས་ནི། རྣམ༵་པར་དག༵་པའི་ཆོས་དབྱིངས་ཡེ་ཤེས་ཀྱི་བདག༵་ཉིད༵་ཅན༵་དོ༵ན་དམ༵་པའི་ཡེ་ཤེས༵་བཅུ༵་རྣམ༵་པར་དག༵་པ་གདོད་ནས་འཆང༵་བ༵་པོ༵་ཡང་ཡིན་ཞེས་པ་དང༌། དོན༵་དམ༵་ནི་ཤེས༵་པ༵འམ་ཡེ་ཤེས་འབའ༵་ཞིག༵་ཏུ་གནས་ཤིང་རྣམ་ཤེས་ངེ༵ས་པར་གདོད་ནས་བསལ༵་བའི་གསལ་བ༵་ཡིན་ཞེས་པ་དང༌། དོན་དམ༵་ནི་ཀུན་གཞིའི་རྣམ་པར་ཤེས༵་པ༵་སོགས་རྣམ་ཤེས་ཚོགས་བརྒྱད༵་པོའི༵་གནས་ལུགས་རྟོག༵ས་པའི༵་འཕགས་པའི་ལམ་འཆང༵་བ་ཡིན་ཞེས་དང༌། དོན༵་དམ༵་ནི་ཤེས༵་རབ༵་ཡེ༵་ཤེ༵ས་ཀྱི་མེ་བོ༵་ཆེ༵་བ་སྟེ། ལྗང་གུ་འབར་བ་ལ་སོགས་པར་སྣང་བ་ཡིན་ཞེས་དང༌། དོན༵་དམ༵་ནི་ཡེ༵་ཤེས༵་ཀྱི་སྣང༵་བ༵་ལམ༵་མེ༵་བ༵་སྟེ་རྡོ་རྗེ་ཟླ་བ་དྲི་མེད་འོད་སྣང་བ་ཡིན་ཞེས་དང༌། དོ༵ན་དམ༵་པའི་སངས་རྒྱས་མི་སྐྱོད་པ་མི་གཡོ་བ་ནི་སངས་རྒྱས་ཀུན་གྱི་སྐུ་ཐམས་ཅད་མངོན་སུམ་དུ་གྱུར་བའི་ཡེ༵་ཤེས༵་མེ༵་ལྕེ༵འམ་རྩེ་མོ་ནམ་མཁའི་མཐར་ཐུག་པར་འོད༵་རབ༵་ཏུ་གསལ༵་ཞིང་སྣང་བར་བྱེད་པ་པོ་ཡིན་ཞེས་དང༌། དོན༵་དམ༵་ནི། ཆོས་སྐུ་སང༵ས་རྒྱས་༵ཀུན་གྱི་ངོ་བོར་གྱུར་བའི་བྱང༵་ཆུབ༷་བླ༵་ན༵་མེད༵་པ་ཡིན་ཞེས་དང༌། དོན༵་དམ༵་ནི། ཆོས་ཀྱི་དབྱིངས་ཀྱི་ཡེ་ཤེས་ཀྱི་སྐུ་རྡོ་རྗེ་སང༵ས་རྒྱ༵ས་རྣ༵མ་པ༵ར་སྣ༵ང་མཛ༵ད་ཆེ༵་བ་ཡིན་ཞེས་དང༌། དོན༵་དམ༵་པའི་རྫོ༵གས་པ༵འི་སང༵ས་རྒྱ༵ས་ཉིད་ནི་འཇི༵ག་རྟེ༵ན་པ་རྣམས་མངོན་པར་མཐོ་བ་དང༌། ངེས་པར་ལེགས་པ་ལ་འདྲེ༵ན་པ་པོ་ཡིན་ཞེས་དང༌། དོན༵་དམ༵་པའི་ཡེ་ཤེས་ནི། འདས་མ་འོངས་ཟག་པ་ཟད་པ་གསུ༵མ་རི༵ག་པའི་སྐུ་གསུང་ཐུགས་ཀྱི་སྒྲིབ་པ་དང་བྲལ་བའི་གཙང༵་མ༵་དག༵་པ༵་སྟེ༵། དོན༵་དམ༵་པའི་རྫུ་འཕྲུལ་དང། ལྷའི་རྣ་བ་དང༌། གཞན་གྱི་སེམས་ཤེས་པ་དང༌། སྔོན་གྱི་གནས་རྗེས་སུ་དྲན་པ་དང༌། ལྷའི་མིག་དང༌། ཟག་པ་ཟད་པའི་མངོན༵་ཤེ༵ས་དྲུག༷་དང་ལྡན༷་ཞིང་སངས་རྒྱས་ཆོས་དགེ་འདུན་ཚུལ་ཁྲིམས་སྦྱིན་པ་གཏོང་བ། ལྷ་རྗེ༵ས་སུ་དྲན༵་པ་སྟེ་དེ་དྲུག༵་དང་ལྡན་པའི་ཡེ་ཤེས་འཁོར་འདས་ཐམས་ཅད་རྣམ་པ་ཀུན་དང་ལྡན་པ་ཡིན་ཞེས་དང༌། དོན༵་དམ༵་པའི་སྐུ་བཞིའི་རྫུ་འཕྲུལ་ཆེན་པོ་ནི་འཇིག་རྟེན་ལས་འདས་པའི་ཤེ༵ས་རབ༵་ཀྱི་ཕ༵་རོལ༵་ཏུ་ཕྱིན༵་པ་ཡང་དག་པའི༵་མཐ༵འ་ཡིན་ཞེས་དང༌། དོན༵་དམ༵་པ་དེ་ནི་ཐུབ༵་པའི་དབང༵་པོའི་མཁྱེན་པའི་སྟོབ༵ས་བཅུ༵་ནམ་མཁའ་ལྟར་ཁྱ༵བ་པའི༵་བད༵ག་ཉིད་ཡིན་ཞེས་དང༌། དོ༵ན་ད༵མ་ཡེ་ཤེས་ཀྱི་སྐུ་ནི་བྱམས་པས་མཐའ་དག་ཁྱབ་པ་འཇམ༵་པའི་ངང་ཚུལ་ཅན་དཔལ༷་ཐམས་ཅད་ཀྱི་འབྱུང་གནས་ཀུན་གྱི་དཔ༵ལ་དང༵་ལྡ༵ན་པའི༵་མཆོག༵་དོན་དམ་པའི་འབྱོར་བ་ཕུན་སུམ་ཚོགས་པའི་ཡེ་ཤེས་ཡིན་ཞེས་དང༌། དོན༵་དམ༵་པའི་སངས་རྒྱས་ཐམས་ཅད་ཀྱི་དུས་གསུམ་གཅིག་ཆར་དུ་མཁྱེན་པའི་ཡེ༵་ཤེས༵་ཀྱི་སྐུ༵་ནམ་མཁའ་ལྟ་བུར་ཁྱབ་པའི་བདག་ཉིད༵་ཀྱི་ཆོས་སྐུ་ཁྱོད༵་ལ༵་རྟག་ཏུ་སྒོ་གསུམ་གུས་པས་འདུད༵་ཅེ༵ས་སོག༵ས་རྣམ༵་པ༵་མང༵་པོས་དོན༵་དམ༵་བདེན་པ་ནི༷་ཤེས༵་པ༷་དང་རིག༵་པ༵་དང་ཡེ༵་ཤེས༷་ཡིན༵་པར༵་སྟོན༷་ཅིང་བདག་རིག་གཞན་རིག་དང་ཀུན་ཤེས་ཀུན་རིག་དང་ཡེ་ཤེས་ལྔའི་བདག་ཉིད་དང་ཤེས་བཅུ་རྣམ་དག་ཡེ་ཤེས་སྐུ་སྟེ་རང་བྱུང་བ་དང༌། ཐམས་ཅད་མཁྱེན་པའི་ཡེ་ཤེས་རྒྱ་མཚོ་ལ་སོགས་པའི་གཞུང་ནས་ཇི་ལྟར་འབྱུང་བ་བཞིན་དོན་དམ་དུ་དོན་ལ་གནས་པའི་ཕྱིར་འདི་ལ་འདུས་བྱས་མི་རྟག་པ་དང་རྣམ་ཤེས་ཀྱི་ཆོས་འགའ་ཙམ་ཡང་འདྲེས་པ་མེད་ཅིང་རྒྱུད་འདི་ནི་དོན་དམ་ཀྱི་མཚན་ཡང་དག་པར་ཇི་ལྟ་བ་བཞིན་བརྗོད་པ་ཡིན་གྱི་ཀུན་རྫོབ་ཀྱི་མཚན་བརྗོད་པ་ནི་མ་ཡིན་པས་འདྀའི་དོན་འདུས་བྱས་མི་རྟག་པ་དང་རྟེན་ཅིང་འབྲེལ་འབྱུང་དང་རྣམ་ཤེས་སྐད་ཅིག་མ་ལ་འཆད་པ་ནི་ལོག་པར་བཤད་པ་འབའ་ཞིག་ཡིན་ནོ་ཞེས་ཆོས་རྗེ་ཀུན་མཁྱེན་གྱིས་འདི་ཉིད་ཀྱི་འགྲེལ་བར་གསུངས་སོ། །འདི་དང་འོག་ཏུ་ཡང་ཆོས་དབྱིངས་ཤེས་པ་ཡིན་པའི་སྒྲུབ་བྱེད་རྒྱས་པར་སྟོན་པས། གཞན་སྟོང་བར་ཁས་འཆེ་བ་ཆོས་དབྱིངས་ཤེས་པ་མ་ཡིན་པར་འདོད་པ་རྣམས་ཀྱིས་གནས་འདི་ལ་ལེགས་པར་དཔྱད་དགོས་སོ། །གཉིས་པ་ཆོས་དབྱིངས་ཡེ་ཤེས་ཡིན་ཡང་མི་རྟག་པ་མ་ཡིན་པར་བསྟན་པ་ནི། རྩ་བར། དེ་ཕྱིར་སྐད་ཅིག་ལས་འདས་ཡེ་ཤེས་ནི། །ཆོས་རྣམས་ཀུན་གྱི་མཐར་ཐུག་དེ་ཁོ་ན། །ཉིད་ཅེས་རྒྱལ་བ་རྣམས་ཀྱིས་གསུངས་པ་ཡིན། །ཞེས་བྱུང༌། དེའི་ཚིག་དོན་ནི། དོན་དམ་པའི་ཤེས་པ་ཡིན་པ་དེའི༵་ཕྱིར༵་སྐད༵་ཅིག༵་མ་གཅིག་ལས༵་འདས༵་པའི་ཡེ༵་ཤེས༵་ནི༵། ཆོས༵་རྣམ༵ས་ཀུན༵་གྱི༵་གནས་ལུགས་མཐ༵ར་ཐུ༵ག་དེ༵་ཁོ༵་ན༵་ཉི༵ད་ཅེ༵ས་རྒྱལ༵་བ༵་སངས་རྒྱས་བཅོམ་ལྡན་འདས་རྣམ༵ས་ཀྱིས༵་གསུ༵ངས་པ༵་ཡིན༵་ཏེ། བཅོམ་ལྡན་འདས་སྤྱན་རས་གཟིགས་དབང་ཕྱུག་གིས་ཞལ་སྔ་ནས་མཐར་ཐུག་དེ་ཁོ་ན་ཉིད་ངོས་འཛིན་པའི་སྐབས་སུ་རྒྱས་འགྲེལ་དྲི་མེད་འོད་ལས། སྐད་ཅིག་གཅིག་དང་དུ་མ་དང་བྲལ་བའི་ཡེ་ཤེས་ནི་རྒྱལ་བ་རྣམས་ཀྱིས་དེ་ཁོ་ན་ཉིད། ཅེས་གསུངས་བའི་ཕྱིར་རོ། །གསུམ་པ་དོན་དམ་རིག་པ་མ་ཡིན་པ་ལ་གནོད་བྱེད་བསྟན་པ་ནི། གལ་ཏེ་དོན་དམ་རིག་པ་མ་ཡིན་ན། །དོན་དམ་ཆོས་སྐུ་ངོ་བོ་ཉིད་སྐུ་དག །རིག་པ་མིན་ཕྱིར་ཀུན་མཁྱེན་མིན་པར་འགྱུར། །ཀུན་མཁྱེན་མིན་ན་སངས་རྒྱསམིན་པར་འགྱུར། །སངས་རྒྱས་མིན་ན་ཆོས་སྐུ་མིན་པར་འགྱུར། །འདོད་ན་ཆོས་ཅན་དང་ཡང་འགལ་བར་འགྱུར། །རྩ་བར། གལ་ཏེ་དོན་དམ་རིག་པ་མ་ཡིན་ན། །ཞེས་པ་ནས་འགལ་བར་འགྱུར། ཞེས་པའི་བར་རྐང་བ་དྲུག་བྱུང༌། དེའི་དོན་ནི། གལ༵་དེ༵་དོན༵་དམ༵་བདེན་པ་རིག༵་པ༵་མ༵་ཡིན༵་ན༵་དོན༵་དམ༵་ཆོས༵་སྐུ༵་དང་ངོ༵་བོ༵་ཉི༵ད་སྐུ༵་དག༵་རིག༵་པ༵་མིན༷་པའི་ཕྱིར༵། ཀུན༵་མཁྱེ༵ན་མིན༵་པར༵་འགྱུར༵་ལ། དེ་ཀུན༵་མཁྱེན༵་མིན༵་པར་འདོད་ན༵་སང༵ས་རྒྱས༵་མིན་༵པར༵་འགྱུར༵་ལ། སང༵ས་རྒྱས༵་མིན༵་པར་ཡང་འདོད་ན༵། དེ་ཆོ༵ས་སྐུ༵་མིན༵་པར༵་ཐལ་བར་འགྱུར༵་ལ་དེ་ཡང་འདོ༵ད་ན༵། ཆོས༵་ཅན༵་ལ་དོན་དམ་ཆོས་སྐུ་བཞག་པ་དང༵་ཡང༵་འགལ༵་བར༵་འགྱུར༵་ཞེས་ཆོས་དབྱིངས་རིག་པ་མིན་པར་འདོད་པ་ལ་ཧ་ཅང་ཐལ་བས་གནོད་བྱེད་བསྟན་པ་ཡིན་ནོ། །བཞི་བ་དོན་དམ་རིག་པ་ཡིན་པས་གཤེགས་སྙིང་རྟག་བརྟན་གྱི་ཤེས་པ་ཡིན་པར་གྲུབ་པ་བསྟན་པ་ནི། གལ་ཏེ་དོན་དམ་རིག་པ་ཡིན་ན་ནི། །འདུས་མ་བྱས་ཀྱི་རིག་པ་ཁུར་ནས་འོང༌། །རྟག་ཅིང་བརྟན་པའི་རིག་པའང་ཁུར་ནས་འོང༌། །ཐེར་ཟུག་གཡུང་དྲུང་རིག་པའང་ཁུར་ནས་འོང༌། །བདེ་གཤེགས་སྙིང་པོ་རིག་པའང་ཁུར་ནས་འོང༌། །ཡོངས་གྲུབ་དགུ་ཡི་རིག་པའང་དེ་བཞིན་ནོ། །རྩ་བར། གལ་ཏེ་དོན་དམ་རིག་པ། ཞེས་པ་ནས། དེ་བཞིན་ནོ། །ཞེས་པའི་བར་རྐང་བ་དྲུག་བྱུང༌། དེའི་ཚིག་དོན་ནི། གལ༵་ཏེ༵་དོ༵ན་དམ༵་རིག༵་པ༵་ཡིན༵་པར་འདོད་པའི་རྫོགས་ལྡན་གྱི་ལུགས་ལྟར་ན༵་ནི༵་དོན་དམ་འདུས༵་མ༵་བྱས༵་ཀྱི༵་རིག༵་པ༵་ཡིན་པར་ཁུར༵་ནས༵་འོང༵༌། དེ་རྟག༵་ཅིང༵་བརྟན༵་པའི༵་རིག༵་པ༵འང༵་ཡིན་པར་ཁུར༵་ན༵ས་འོང༵༌། ཐེར༵་ཟུག༵་གཡུ༵ང་དྲུང༵་རིག༵་པ༵འང༵་ཡིན་པར་ཁུར༵་ནས༵་འོང༵༌། བདེ༵་གཤེག༵ས་སྙིང༵་པོ༵་རིག༵་པ༵འང༵་ཡིན་པར་ཁུར༵་ནས༵་འོང༵༌། ཡོང༵ས་གྲུབ༵་དགུ༵་ཡིས༵་རིག༵་པ༵འང་ཡིན་པར་གྲུབ་པ་དེ༵་བཞིན༵་ནོ༵། །ཞེས་པས་ཆོས་དབྱིངས་བདེ་གཤེགས་སྙིང་པོ་རྟག་བརྟན་གྱི་ཤེས་པ་གྲུབ་པར་བསྟན་ཏོ། །ཡོངས་གྲུབ་དགུ་ནི་ཆོས་རྣམས་ཀྱི་གཤིས་ཇི་བཞིན་པ་དེ་ཁོ་ན་ལྟར་གྱི་དེ་བཞིན་ཉིད་དང༌། ཕྱིན་ཅི་མ་ལོག་པའི་མ་ནོར་བ་དང༌། གནས་ལུགས་གཞན་དུ་མི་འགྱུར་བའི་གཞན་མ་ཡིན་པ་དང༌། ཆོས་རྣམས་ཀྱི་རང་བཞིན་དེ་ཁོ་ན་ཉིད་དུ་ངེས་པའི་ཆོས་ཉིད་དང༌། གདོད་ནས་རྣམ་པར་དག་པའི་ཆོས་མཐའ་ཡས་པའི་ཀློང་དུ་གྱུར་བའི་ཆོས་དབྱིངས་དང༌། དོན་གྱི་གནས་ལུགས་སུ་བཞུགས་པའི་ཆོས་ཀྱི་གནས་དང༌། ཀུན་རྫོབ་སྤྲོས་པའི་མ་གོས་པའི་ཆོས་སྐྱོན་མེད་པ་དང༌། གནས་ལུགས་ཀུན་གྱི་མཐར་ཐུག་ཏུ་གྱུར་བའི་ཡང་དག་མཐའ་དང༌། སྒྲ་རྟོག་གི་སྤྱོད་ཡུལ་ལས་འདས་པའི་བསམ་གྱི་མི་ཁྱབ་པའི་དབྱིངས་རྣམས་ཡིན་ཏེ། ཡུམ་མདོ་ལས། དེ་བཞིན་གཤེགས་པ་རྣམས་བྱུང་ཡང་རུང༌། དེ་བཞིན་གཤེགས་པ་རྣམས་མ་བྱུང་ཡང་རུང་སྟེ་ཆོས་དེ་དག་གི་དེ་བཞིན་ཉིད་དང༌། མ་ནོར་བ་དེ་བཞིན་ཉིད་དང་གཞན་མ་ཡིན་པ་དེ་བཞིན་ཉིད་དང་ཆོས་ཉིད་དང་ཆོས་ཀྱི་དབྱིངས་དང་ཆོས་ཀྱི་གནས་ཉིད་དང༌། ཆོས་སྐྱོན་མེད་པ་ཉིད་དང༌། ཡང་དག་པའི་མཐའ་དང༌། བསམ་གྱི་མི་ཁྱབ་པའི་དབྱིངས་ནི་དེ་བཞིན་དུ་གནས་ཏེ། ཞེས་གསུངས་པའི་ཕྱིར་རོ། ། དོན་དམ་ཤེས་པ་མ་ཡིན་པ་ལ་ལུང་དང་འགལ་བར་བསྟན་པ།ལྔ་པ་དོན་དམ་ཤེས་པ་མ་ཡིན་པ་ལ་ལུང་དང་འགལ་བར་བསྟན་པ་ནི། གལ་ཏེ་དོན་དམ་ཤེས་པ་མ་ཡིན་ན། །གཤིས་ལུགས་ཟབ་མོ་སྟོན་པའི་རྫོགས་ལྡན་ཆོས། །མདོ་རྒྱུད་ཟབ་མོ་ཀུན་དང་འགལ་བར་འགྱུར། །རྩ་བར། གལ་ཏེ་དོན་དམ་ཤེས་པ། ཞེས་པ་ནས་ཀུན་དང་འགལ་བར་འགྱུར། ཞེས་པའི་བར་རྐང་བ་གསུམ་བྱུང༌། དེའི་དོན་ནི་ག༵ལ་ཏེ༵་དོན༵་དམ༵་ཤེས༵་པ༵་མ༵་ཡི༵ན་པར་ཕྱོགས་སྔ་མའི་འདོད་པ་ལྟར་ཡིན་ན༵་ནི། གཤི༵ས་ལུག༵ས་ཟབ༵་མོ༵་སྟོ༵ན་པའི༵་རྫོ༵གས་ལྡན༵་གྱི་ཆོ༵ས་མདོ༵་དང་རྒྱུ༵ད་སྡེ་ཟབ༵་མོ༵་ཀུན༵་དང༵་འགལ༵་བར༵་འགྱུ༵ར་ཏེ། རྒྱུད་བླ་མ་ལས། སངས་རྒྱས་ཡེ་ཤེས་སེམས་ཅན་ཚོགས་ཞུགས་ཕྱིར། །ཞེས་དང༌། ཆོས་དབྱིངས་བསྟོད་པ་ལས། ས་ཡི་ནང་ན་གནས་པའི་ཆུ། །དྲི་མ་མེད་པར་ཡང་དག་གནས། །ཉོན་མོངས་ནང་ན་ཡེ་ཤེས་ཀྱང༌། །དེ་བཞིན་དྲི་མ་མེད་པར་གནས། །ཞེས་དང༌། འདི་ཉིད་གྱིས་འགྲེལ་བ་ལས། དེ་རྣམས་ལས་ནི་དོན་དམ་ཆོས་ཉིད་གང་ཡིན་ཐམས་ཅད་རིག་པ་དང་རང་རིག་དང་བདེ་བ་དང་ཤེས་པ་དང་ཡེ་ཤེས་དང་རྟག་པ་དང་འདུས་མ་བྱས་དང་ཁྱབ་བདག་ལ་སོགས་པར་ཡང་ཡང་གསུངས་པས་གནོད་དེ་མགོ་བོར་ཐོག་ལྷུང་བ་བཞིན་ནོ། །ཞེས་གསུངས་བའི་ཕྱིར་རོ། ། དེ་ལ་རྩོད་པ་སྤོང་བ།གསུམ་པ་དེ་ལ་རྩོད་པ་སྤོང་བ་ལ། རྩོད་པ་འགོད་པ་དང༌། དེའི་ལན་དང་གཉིས། དང་པོ་ནི། རྩ་བར། གལ་ཏེ་དོན་དམ་ཤེས་པ་ཡིན་ན་ནི། །འདུས་བྱས་མི་རྟག་པར་ཡང་འགྱུར་ཞེ་ན། །ཞེས་བྱུང༌། དེའི་དོན་ནི་གསུམ་ལྡན་མར་བཅད་རྣམས་ཀྱིས་གལ༵་ཏེ༵་དོ༵ན་དམ༵་ཤེས༵་པ༵་ཡི༵ན་ན༵་ནི༵། འདུ༵ས་བྱས༵་ཡིན་པར་འགྱུར་ཞིང་མི༵་རྟག༵་པ་ཡིན་པ༵ར་ཡ༷ང་འགྱུ༵ར་རོ་ཞེ༵་ན༵་ཞེས་རྩོད་པ་ཡིན་ནོ། །གཉིས་པ་དེའི་ལན་ནི། གལ་ཏེ་དོན་དམ་ཤེས་པ་ཡིན་ན་ནི། །འདུས་བྱས་མི་རྟག་པར་ཡང་འགྱུར་ཞེ་ན། །དེ་འདྲ་གསུམ་ལྡན་མར་བཅད་ལུགས་ཡིན་གྱི། །རྫོགས་ལྡན་ཆོས་མཆོག་ཁྱད་འཕགས་ལུགས་ལ་ནི། །ཤེས་པ་ལ་ཡང་འདུས་བྱས་འདུས་མ་བྱས། །ཡེ་ཤེས་ལ་ཡང་འདུས་བྱས་འདུས་མ་བྱས། །དཀོན་མཆོག་གསུམ་སོགས་ཀུན་ལའང་བདེན་གཉིས་དང༌། །འདུས་བྱས་འདུས་མ་བྱས་སུ་ཕྱེ་ནས་གསུངས། །མི་རྟག་པ་དང་རྟག་པར་ཕྱེ་ནས་གསུངས། །རང་སྟོང་གཞན་སྟོང་ལེགས་པར་ཕྱེ་ནས་གསུངས། །རྣམ་ཤེས་ཡེ་ཤེས་ལེགས་པར་ཕྱེ་ནས་གསུངས། །གཞན་བྱུང་རང་བྱུང་ལེགས་པར་ཕྱེ་ནས་གསུངས། །ཆོས་དང་ཆོས་ཉིད་མཐའ་དབུས་ཕྱེ་ནས་གསུངས། །བཅོས་མ་རང་བཞིན་ལེགས་པར་ཕྱེ་ནས་གསུངས། །གློ་བུར་གཉུག་མ་ལེགས་པར་ཕྱེ་ནས་གསུངས། །ཀུན་བརྟགས་ཡོངས་གྲུབ་ལེགས་པར་ཕྱེ་ནས་གསུངས། །རྗེས་ཐོབ་མཉམ་བཞག་ལེགས་པར་ཕྱེ་ནས་གསུངས། །ཤན་འབྱེད་ལ་ཟློ་ལེགས་པར་ཕྱེ་ནས་གསུངས། །དབྱེར་ཡོད་དབྱེར་མེད་ལེགས་པར་ཕྱེ་ནས་གསུངས། །འཁྲུལ་ལུགས་གཤིས་ལུགས་ལེགས་པར་ཕྱེ་ནས་གསུངས། །འདོད་ལུགས་ཡིན་ལུགས་ལེགས་པར་ཕྱེ་ནས་གསུངས། །སྲོལ་འབྱེད་སྲོལ་འགོག་ལེགས་པར་ཕྱེ་ནས་གསུངས། །ཕུང་གསུམ་ཡོད་མེད་ལེགས་པར་ཕྱེ་ནས་གསུངས། །དུས་བཞི་ཆེ་ཆུང་ལེགས་པར་ཕྱེ་ནས་གསུངས། །ཆུང་བ་ལ་ཡང་རྫོགས་ལྡན་ཆོས་མཆོག་དང༌། །གསུམ་ལྡན་མར་བཅད་དམན་པར་རབ་ཕྱེ་ནས། །དཔང་དུ་རུང་དང་མི་རུང་ཕྱེ་ནས་གསུངས། །ངོ་བོ་ཉིད་གསུམ་ལེགས་པར་ཕྱེ་ནས་གསུངས། །བདག་གསུམ་རྣམ་དབྱེ་ལེགས་པར་ཕྱེ་ནས་གསུངས། །སྟོང་ཉིད་གསུམ་གྱི་རྣམ་དབྱེ་ཕྱེ་ནས་གསུངས། །ཕྱི་ནང་གཞན་མཆོག་ལེགས་པར་ཕྱེ་ནས་གསུངས། །བདེན་བཞི་ཆོས་བཞི་ཆོས་ལྔ་ལ་སོགས་པ། །ལེགས་པར་ཕྱེ་བའི་ཆོས་འཁོར་གསུངས་པ་ལྟར། །རྫོགས་ལྡན་ཆོས་མཆོག་རྣམས་ལ་གོམས་བྱས་ན། །མཚུངས་པ་མེད་པའི་མཁས་པ་ཆེན་པོར་འགྱུར། །རྒྱལ་བ་སྲས་བཅས་ཐམས་ཅད་དགྱེས་པར་འགྱུར། །རྒྱལ་བའི་གོ་འཕང་མྱུར་དུ་ཐོབ་པར་འགྱུར། །རྩ་བར། དེ་འདྲ་གསུམ་ལྡན་མར་བཅད་ལུགས་ཡིན་གྱི། །ཞེས་པ་ནས། མྱུར་དུ་ཐོབ་པར་འགྱུར། ཞེས་པའི་བར་ཤོ་ལོ་ཀ་བརྒྱད་དང་རྐང་བ་གསུམ་བྱུང༌། དེའི་ཚིག་དོན་ནི་ཤེས་པ་ཡིན་ན་འདུས་བྱས་སོགས་ཡིན་པས་ཁྱབ་པ་ཡོད་པ་དེ༵་འདྲ༵་འདོད་པ་ནི། གསུ༵མ་ལྡན༵་མར༵་བཅད༵་སྐྱོན་ཅན་རྣམས་ཀྱི་ལུག༵ས་ཡི༵ན་གྱི༵་རྫོག༵ས་ལྡན༵་ཆོས༵་མཆོ༵ག་ཁྱ༵ད་པར་དུ་འཕག༵ས་པའི་ལུག༵ས་ལ༵་ནི༵། འདུས་མ་བྱས་དང་རྟག་པ་ཡིན་པའི་ཤེས་པ་དང་རིག་པ་དང་ཡེ་ཤེས་དང་རང་རིག་དང་བདེ་བ་དང་འདོད་ཆགས་ཆེན་པོ་དང་དགའ་བ་ཆེན་པོ་མགུ་བ་ཆེ་ལ་སོགས་པ་ཤིན་ཏུ་མང་བར་བཤད་ཅིང་འཆད་པར་ཡང་འགྱུར་རོ། །དེས་ན་འདིར་ནི་ཤེས༵་པ༵་ལ༵་ཡང༵་འདུས༵་བྱ༵ས་འདུས༵་མ༵་བྱ༵ས་གཉིས་ཕྱེ་བ་དང༌། ཡེ༵་ཤེས༵་ལ་༵ཡང༵་འདུ༵ས་བྱ༵ས་འདུ༵ས་མ༵་བྱ༵ས་གཉིས་ཕྱེ་བ་དང༌། དཀོ༵ན་མཆོ༵ག་གསུམ༵་དང་སོག༵ས་སྒྲས་བསྡུས་པ་བདེན་བཞི་ཕྱིན་དྲུག་སོགས་ཀུ༵ན་ལ༵འང༵་ཀུན་རྫོབ་བདེན་པ་དང༌། དོན་དམ་བདེ༵ན་པ་གཉི༵ས་གཉི༵ས་དང༵༌། འདུ༵ས་བྱ༵ས་འདུ༵ས་མ༵་བྱ༵ས་སུ༵་ལེགས་པར་ཕྱེ༵་ན༵ས་གསུ༵ངས་པ་དང༌། མི༵་རྟག༵་པ༵་དང༵་རྟག༵་པའི་ཁྱད་པ༵ར་ཕྱེ༵་ནས༵་གསུང༵ས་པ་དང༌། རང༵་སྟོང༵་གཞན༵་སྟོང༵་ལེགས༵་པར༵་ཕྱེ༵་ནས༵་གསུ༵ངས་པ་དང༌། ཀུན་རྫོབ་ཀྱི་རྣམ༵་ཤེས༵་དང་དོན་དམ་གྱི་ཡེ༵་ཤེས༵་ལེག༵ས་པར༵་ཕྱེ༵་ནས༵་གསུང༵ས་པ་དང༌། རྒྱུ་རྐྱེན་གཞན༵་ལས་བྱུང༵་བ་དང༌། གདོད་ནས་རང༵་བྱུང༵་གཉིས་ལེག༵ས་པར༵་ཕྱེ༵ས་ན༵ས་གསུང༵ས་པ་དང༌། ཆོས༵་ཅན་ཀུན་རྫོབ་དང༵་ཆོས༵་ཉི༵ད་དོན་དམ་བདེན་པ་གཉིས་ཕྱེ་བ་དང༌། སྤྲོས་པའི་མཐ༵འ་དང༌། མཐའ་དང་བྲལ་བའི་དབུ༵ས་གཉིས་ལེགས་པར་ཕྱེ༵་ནས༵་གསུང༵ས་པ་དང༌། བཅོས༵་མ༵་དང་ར༵ང་བཞི༵ན་ལེ༵གས་པ༵ར་ཕྱེ༵་ན༵ས་གསུ༵ངས་པ་དང༌། ཀུན་རྫོབ་གློ༵་བུ༵ར་བ་དང་རང་བཞིན་གཉུག༵་མ༵་ལེགས༵་པར༵་ཕྱེ༵་ནས༵་གསུང༵ས་པ་དང༌། ཀུན༵་བཏགས༵་ཀྱི་མཚན་ཉིད་དང་ཡོང༵ས་གྲུ༵བ་ཀྱི་མཚན་ཉིད་ལེག༵ས་པར༵་ཕྱེ༵་ནས་གསུང༵ས་པ་དང༌། འདིའི་ཀུན་བཏགས་ཞེས་པས་གཞན་དབང་ཡང་ཀུན་བཏགས་ཀྱི་ནང་དུ་བསྡུས་ནས་བསྟན་པ་ཡིན་ལ། གཞན་དབང་ཀུན་བཏགས་ནང་དུ་འདུས་ཚུལ་ནི། ཐེག་མཆོག་དབུ་མ་ལས། རྣམ་པར་དཔྱད་ན་གཞན་དབང་ཀུན་བཏགས་སུ། །འདུས་ཕྱིར་མཚན་ཉིད་གཉིས་སུ་འགྱུར་བ་ཡིན། །གཞན་དབང་གི་ནི་སྣང་ཆ་ཀུན་བཏགས་ཏེ། །ཞེས་དང༌། དོན་ལ་སྣང་ཆ་ལས་གཞན་སྣང་བ་མེད། །གཞན་དབང་ལ་ནི་རང་ངོའི་ཚུགས་ཐུབ་བྲལ། །ཞེས་གསུངས་པ་དང༌། མདོ་ལང་གཤེགས་ལས། གང་བཏགས་པ་ཡི་དངོས་པོ་འདི། །གཞན་གྱི་དབང་ཡང་དེ་ཉིད་དེ། །བཏགས་པ་སྣ་ཚོགས་སྣང་བ་ནི། །གཞན་གྱི་དབང་ཞེས་རྟོག་པར་བྱེད། །ཅེས་གསུངས་པའི་ཕྱིར་དང༌། དབྱིག་གཉེན་གྱི་ཡུམ་གསུམ་གནོད་འཇོམས་ལས་ཀྱང་ཆོས་ཐམས་ཅད་མཚན་ཉིད་གཉིས་སུ་བསྡུས་པར་བསྟན་པ་སྤྱི་འགྲེལ་གྱི་རྣམ་བཤད་ལས་གསུངས་སོ། །རྗེ༵ས་ཐོབ༵་ཡེ་ཤེས་དང་སྤྲོས་བྲལ་རྣམ་པར་མི་རྟོག་པའི་མཉམ༵་བཞག༵་ལེགས༵་པར༷་ཕྱེ༵་ནས༵་གསུང༵ས་པ་དང༌། རྗེས་ཐོབ་ཤན༵་འབྱེད༵་སྐབས་དང་མཉམ་བཞག་ལ༵་ཟློ༵་བའི་སྐབས་གཉིས་ལེ༵གས་པ༵ར་ཕྱེ༵་ན༵ས་གསུ༵ངས་པའི་ཕྱིར། ཤན་འབྱེད་དང་ལ་ཟློ་བ་ཕྱེ་ཚུལ་ནི། རི་ཆོས་ངེས་དོན་རྒྱ་མཚོ་ལས། དེའི་ཕྱིར་འཁོར་ལོ་ཕྱི་མ་གཉིས་དང་རྡོ་རྗེ་ཐེག་པའི་དོན་གཅིག་མོད་ཀྱི་ཉམས་སུ་ལེན་པ་ན་ལ་ཟློ་བ་ཆོས་ཉིད་ཟབ་མོ་ལ་འཁོར་ལོ་བར་བ་དང་མཐུན་པར་རྟོག་མེད་སྤྲོས་བྲལ་དུ་མཉམ་པར་བཞག་ནས་རྗེས་ཐོབ་དུ་ཤན་འབྱེད་པའི་ཚེ་ཆོས་རྣམས་ལ་ཡང་དག་པར་སོ་སོར་རྟོག་པ་ན་འཁོར་ལོ་ཐ་མ་དང་རྡོ་རྗེ་ཐེག་པ་ལས་གསུངས་པ་བཞིན་དུ་ལེགས་པར་རྣམ་པར་ཕྱེ་སྟེ་ངོ་སྤྲད་ན་ཐེག་པ་ཆེན་པོའི་གསུང་རབ་ཐམས་ཅད་ཀྱི་དོན་ཟབ་མོ་ཉམས་སུ་ལེན་པ་ཚང་ལ་མ་ནོར་ཞིང་ཡོངས་སུ་དག་པ་ཉིད་དུ་འགྱུར་རོ། །དེས་ན་འདིར་གནས་ལུགས་ལ་ཡོད་མེད་དང་རང་རང་གི་ངོ་བོས་སྟོང་མི་སྟོང་དང་རྣམ་གཅོད་ཡོངས་གཅོད་དང་མེད་དགག་མ་ཡིན་དགག་དང་སྤངས་པ་དང༌། རྟོགས་པ་ལ་སོགས་པ་གཤིས་ལ་ཅི་ལྟར་གནས་པ་བཞིན་དུ་ལེགས་པར་ཕྱེ་སྟེ། ཞེས་གསུངས་པ་དང༌། བཀའ་བསྡུ་བཞི་བའི་འགྲེལ་བ་ཕྱོགས་མེད་རིས་མེད་ལས། ལ་ཟློ་བའི་སྐབས་སུ་ནི་ཅིར་ཡང་མི་ལྟ་ཞིང་གང་དུ་ཡང་མི་འཛིན་པ་དགོས་པས་དོན་དང་མཐུན་པར་ལྟ་ཞིང་འཛིན་ན་སྐྱོན་དུ་འགྱུར་ན་དོན་དང་མི་མཐུན་པར་ལྟ་ཞིང་འཛིན་པ་ལྟ་སྨོས་ཀྱང་ཅི་དགོས། ཞེས་གསུངས་པའི་ཕྱིར་རོ། །ཁ་ཅིག་གིས་རི་ཆོས་ཀྱི་ལུང་འདི་སྟོང་ཉིད་མེད་དགག་ཡིན་པའི་ཤེས་བྱེད་དུ་འདྲེན་པ་ནི་རྒྱུ་མཚན་ཅུང་ཟད་ཙམ་ཡང་མ་མཐོང་ངོ༌། །དབྱེ༵ར་ཡོ༵ད་ཀྱི་སྡེ་དང་དབྱེར༵་མེད༵་ཀྱི་སྡེ་གཉིས་ལེག༵ས་པ༵ར་ཕྱེ༵་ནས༵་གསུང༵ས་པའི་ཕྱིར། དེ་ལ་དབྱེར་ཡོད་ཀྱི་སྡེ་ནི་བདེན་གཉིས་མཚན་ཉིད་པ་དང་འཁོར་འདས་མཚན་ཉིད་པ་དང་སྲིད་ཞི་མཚན་ཉིད་པ་དང་བདེན་བཞི་མཚན་ཉིད་པ་དང་ངོ་བོ་ཉིད་གསུམ་མཚན་ཉིད་པ་ལ་སོགས་པ་རྣམས་སོ། །དབྱེར་མེད་གྱི་སྡེ་ནི་དུས་འཁོར་བདེ་དགྱེས་གསང་འདུས་ལ་སོགས་པ་ཆོས་ཉིད་ཀྱི་རྒྱུད་སྡེ་བཞིའི་ལྷ་དང་དཀྱིལ་འཁོར་ལ་སོགས་པ་རིགས་ཀྱི་དབྱེ་བསྡུ་ཇི་སྙེད་གསུངས་པ་ཐམས་ཅད་ལ་མིང་དང་རྣམ་པའི་དབྱེ་བ་ཡོད་ཀྱང་དོན་གྱི་ངོ་བོ་དབྱེར་མེད་པ་སྟེ་ཕྱག་རྒྱ་ཆེན་པོ་དང་མྱང་འདས་ཆེན་པོ་དང༌། འོད་གསལ་ཆེན་པོ་དང་སྲོག་ཆེན་པོ་དང་མཆོད་པ་ཆེན་པོ་དང༌། འདོད་ཆགས་ཆེན་པོ་དང་གཟུགས་ཆེན་པོ་ལ་སོགས་པ་དང་ཤིན་ཏུ་རྣལ་འབྱོར་དང་ཤིན་ཏུ་སྤྲོས་མེད་དང༌། ཤེར་ཕྱིན་ཟབ་མོ་དང་ཡོངས་གྲུབ་བཅུ་གཉིས་ལ་སོགས་པ་ཤིན་ཏུ་མང་པོ་རྣམས་དོན་གྱི་ངོ་བོ་དབྱེར་མེད་པའོ། །དེ་རྣམས་དངོས་པོ་སོ་སོ་ཐ་དད་དུ་འདོད་པ་ལ་ནི་རྫོགས་ལྡན་གྱི་ལུང་གིས་གནོད་དེ། ཇི་སྐད་དུ། གཟུགས་རྣམ་པར་དག་པ་གང་ཡིན་པ་དེ་ནི་ཤེར་ཕྱིན་རྣམ་པར་དག་པའོ། །ཤེར་ཕྱིན་རྣམ་པར་དག་པ་གང་ཡིན་པ་དེ་ནི་གཟུགས་རྣམ་པར་དག་པ་སྟེ། དེ་ལྟར་ན་གཟུགས་རྣམ་པར་དག་པ་དང་ཤེར་ཕྱིན་རྣམ་པར་དག་པ་འདི་ལ་གཉིས་སུ་མེད་དེ་གཉིས་སུ་བྱར་མེད་སོ་སོ་མ་ཡིན་ཐ་མི་དད་དོ་ཞེས་སོགས་རྒྱ་ཆེར་བཀའ་སྩལ་བ་ཡིན་གྱི། གཉིས་སུ་ཡོད་དོ། །གཉིས་སུ་བྱར་ཡོད་དོ་སོ་སོ་ཡིན་ནོ་ཐ་དད་དོ་ཞེས་མ་གསུངས་པའི་ཕྱིར་ཞེས་རྟོན་པ་བཞི་ལྡན་གྱིས་གསུངས་སོ། །འཁྲུ༵ལ་ལུག༵ས་དང༌། གཤི༵ས་ལུག༵ས་གཉིས་ལེག༵ས་པར༵་ཕྱེ༵་ནས༵་གསུང༵ས་པ་སྟེ་འཁྲུལ་ལུགས་ནི་རྣམ་ཤེས་འཁྲུལ་པ་ཐམས་ཅད་ཡིན་པའི་ཕྱིར་དཔེར་ན་དུང་སེར་པོར་སྣང་བ་བཞིན་ནོ། །གཤིས་ལུགས་ནི། གཤིས་ཀྱི་གནས་ལུགས་ཟབ་མོ་ཆོས་ཉིད་ཀྱི་བཞུགས་ཚུལ་ཏེ་རང་བྱུང་ཡེ་ཤེས་མཁའ་ཁྱབ་དེ་ཡིན་ནོ། །འདོ༵ད་ལུག༵ས་དང་ཡི༵ན་ལུག༵ས་གཉིས་ལེག༵ས་པར༵་ཕྱེ༵་ནས༵་གསུང༵ས་པའི་ཕྱིར། དེ་ལ་ཡིན་ལུགས་ནི་དོན་དམ་གྱི་གནས་ལུགས་སོ། །འདོད་ལུགས་ནི་གང་ཟག་སྣ་ཚོགས་ཀྱི་འདོད་ལུགས་སྣ་ཚོགས་ཏེ་དོན་དང་མཐུན་པའི་ངེས་པ་མེད་དོ། །རྫོགས་ལྡན་ཆོས་མཆོག་གི་སྲོལ༵་འབྱེད༵་དང༌། སྲོལ༵་འགོག༵་ལེ༵གས་པ༵ར་ཕྱེ༵་ནས༵་གསུང༵ས་པའི་ཕྱིར། སྲོལ་འབྱེད་ནི་རྫོགས་ལྡན་གྱི་སྐྱེས་མཆོག་དམ་པ་རྣམས་ཀྱིས་རང་སྟོང་གཞན་སྟོང་དང་རྣམ་ཤེས་ཡེ་ཤེས་དང་ཀུན་བཏགས་ཡོངས་གྲུབ་དང་ཕྱི་ནང་གཞན་གསུམ་དང༌། རང་བཞིན་རྣམ་གསུམ་དང་བདག་གསུམ་རྣམ་དབྱེ་དང༌། སྟོང་ཉིད་གསུམ་གྱི་རྣམ་དབྱེ་ལ་སོགས་པ་དང༌། སྟོང་ཉིད་དང་ཡོངས་གྲུབ་དགུ་ལ་སོགས་པ་གཤིས་ལུགས་མཐར་ཐུག་ཀུན་དང༌། མུ་གཉིས་གཉིས་སུ་གནས་པ་སྟོན་པར་བྱེད་པ་དེ་ཡིན་ནོ། །སྲོལ་འགོག་ནི་ཐམས་ཅད་རང་སྟོང་ཡིན་པས་ཡོངས་གྲུབ་དགུ་དང་བཅུ་གཉིས་ལ་སོགས་པ་གཤིས་ལུགས་ཟབ་མོ་ཐམས་ཅད་རང་སྟོང་ཡིན་ཞིང་རང་སྟོང་གང་ཡིན་ཐམས་ཅད་དོན་དམ་པར་ཅིར་ཡང་མ་གྲུབ་པས་ཡང་དག་པར་ན་སངས་རྒྱས་དང་བྱང་ཆུབ་དང་བྱང་ཆུབ་ཀྱི་སེམས་དང་ལྷ་དང་སྔགས་སོགས་གང་ཡང་མ་གྲུབ་པས་ཐམས་ཅད་མིང་ཙམ་ཁོ་ན་ཡིན་ཞེས་སོགས་སུ་འདོད་པས་གསུམ་ལྡན་མར་བཅད་སྐྱོན་ཅན་གྱི་འདོད་ལུགས་རྣམས་ཀྱི་སྲོལ་འབྱེད། སྔར་གྱི་སྲོལ་བཟང་པོ་དེ་ཉམས་པར་བྱས་ནས་ཕྱིས་ཀྱི་སྲོལ་ངན་འདི་དར་ཞིང་རྒྱས་པར་བྱས་པ་དེ་ཡིན་ནོ། །དེས་ན་བསྟན་པ་ལ་ཐུགས་ཁྲལ་མཛད་པའི་མཁས་པ་རྣམས་ཀྱིས་སྲོལ་འབྱེད་དང་སྲོལ་འགོག་ལ་སྣང་མུན་བས་ཀྱང་ཁྱད་པར་ཆེ་བ་ཡོད་པས་ཁོངས་ཆོད་པར་མཛད་པར་ཞུ། ཞེས་གསུངས་སོ། །ཕུང༵་པོ་གསུ༵མ་པ་ཡོད༵་པ་དང་མེད༵་པ་ལེག༵ས་པར༵་ཁྱད་ཕྱེ༵་ནས༵་གསུང༵ས་པ་ཡིན་ཏེ། འདི་ཉིད་ཀྱི་འགྲེལ་བ་ལས། དངོས་པོ་དངོས་མེད་ལ་ཕུང་པོ་གསུམ་པ་ཡོད་དེ། དེ་གཉིས་གང་ཡང་མ་ཡིན་པའི་དེ་བཞིན་ཉིད་ནི་ཕུང་པོ་གསུམ་པར་རྟག་ཏུ་བཞུགས་པའི་ཕྱིར་ཞེས་པ་ནས་བེམ་པོ་དང་རིག་པ་ལ་ནི་ཕུང་པོ་གསུམ་པ་མེད་དེ་བེམ་རིག་གཉིས་སུ་མི་འདུས་པའི་ཤེས་བྱའི་ཁྱད་པར་འགའ་ཡང་མེད་པའི་ཕྱིར་རོ། །ངེས་དོན་གྱི་གནད་ཟབ་མོ་འདི་དག་ནི་རྫོགས་ལྡན་གྱི་ཆོས་དང་གང་ཟག་ལ་གྲགས་ཀྱི་གསུམ་ལྡན་མར་བཅད་ཀྱི་ཆོས་དང་གང་ཟག་ལ་དེ་ལྟ་མ་ཡིན་པས་དེང་སང་གི་མི་རྣམས་ཀྱི་བློར་ཤོང་བ་དཀའོ། །ཞེས་གསུངས་པའི་ཕྱིར། དུས༵་བཞི༵་ཆེ༵་ཆུང༵་ལ་སོགས་པ་ལེག༵ས་པར༵་ཕྱེ༵་ནས༵་གསུང༵ས་པ་ནི། དཔལ་དུས་ཀྱི་འཁོར་ལོའི་རྒྱུད་འགྲེལ་ཆེན་པོར་དུས་བཞི་ཆེན་པོ་ནི། བསྐལ་དུས་བཟང་ངན་ཡིན་ལ་དུས་བཞི་ཆུང༵་བ༵་ལ༵་ཡང༵་བསྟན་པའི་བཟང་ངན་ཏེ། སངས་རྒྱས་ཀྱི་ཆོས་ལ་ངན་པ་མེད་ཀྱང་གང་ཟག་གི་དབང་གིས་སྐྱོན་དང་ལྷད་ཞུགས་པའི་སྐྱོན་ཇེ་ཆེ་ཇེ་ཆེར་གྱུར་བ་ལས་གསུམ་ལྡན་དང་གཉིས་ལྡན་དང་མཐར་རྩོད་ལྡན་དུ་ཡང་འགྱུར་བས་རྫོག༵ས་ལྡན༵་ཆོ༵ས་མཆོག༵་དང༵༌། གསུ༵མ་ལྡན༵་མར༵་བཅད༵་དམན༵་པ་ལེགས་པར༵་ར༵བ་ཏུ་ཕྱེ༵་ནས༵་དེ་རྣམས་ལས་ཡིད་ཆེས་ཀྱི་དཔང་པོ་རུང་བ་དང༌། མི་རུང་བ་གང་ཞེ་ན་རྫོགས་ལྡན་གྱི་ཆོས་ནི་ཡིད་ཆེས་ཀྱི་དཔང་པོར་རུང་བ་སྟེ། དེར་ཇི་སྐད་གསུངས་བ་བཞིན་དོན་ལ་གནས་པའི་ཕྱིར་རོ། །གསུམ་ལྡན་མར་བཅད་ལ་སྲོལ་འགོག་གི་སྐྱོན་མང་དུ་འདྲེས་པའི་ཕྱིར་ཡིད་ཆེས་ཀྱི་དཔང་པོར་མི་རུང་ངོ༌། །དེས་ན་དཔ༵ང་དུ༵་རུང༵་བ་དང༵་མི༵་རུ༵ང་བ་ལེགས་པར་ཕྱེ༵་ནས༵་གསུ༵ངས་སོ། །ཀུན་བཏགས་མཚན་ཉིད་ངོ་བོ་ཉིད་མེད་པ་དང༌། གཞན་དབང་སྐྱེ་བ་ངོ་བོ་ཉིད་མེད་པ་དང༌། ཡོངས་གྲུབ་དོན་དམ་པ་ངོ༵་བོ༵་ཉིད༷་མེད་པ་དང་གསུམ༵་ལེག༵ས་པར༵་ཕྱེ༵་ནས༵་གསུང༵ས་ཏཻ། སངས་རྒྱས་བཅོམ་ལྡན་འདས་རང་ཉིད་ཀྱིས་གསུངས་པའི་ཤེར་ཕྱིན་དང༌། དབུ་མ་ལ་སོགས་པའི་རང་འགྲེལ་རྣམས་སུ་གསུངས་པའི་ཕྱིར་ཏེ། ཁྲི་བརྒྱད་སྟོང་བའི་ལེའུ་བརྒྱད་ཅུ་རྩ་གསུམ་པ་དང༌། ཉི་ཁྲི་ལྔ་སྟོང་པའི་ལེའུ་བདུན་ཅུ་རྩ་གཉིས་པར་གཟུགས་ནས་སངས་རྒྱས་ཀྱི་ཆོས་རྣམས་ཀྱི་བར་ཚན་པ་གསུམ་དུ་ལེགས་པར་ཕྱེ་ནས་ཀུན་བཏགས་ཡིན་པའི་གཟུགས་སོགས་ཆོས་རྣམས་ནི་ཤེས་པར་བྱ་བ་དང༌། གཞན་དབང་ཡིན་པའི་གཟུགས་སོགས་ཆོས་རྣམས་ནི་སྤང་བར་བྱ་བ་དང༌། ཆོས་ཉིད་ཡོངས་གྲུབ་ཡིན་པའི་གཟུགས་སོགས་ཆོས་རྣམས་ནི་དྲི་མ་བསལ་ནས་ཐོབ་པར་བྱ་བ་ཉིད་དུ་གསུངས་པ་དང༌། ཤེར་ཕྱིན་ལྔ་བརྒྱ་པར་ཡང༌། དངོས་པོ་མེད་པའི་གཟུགས་སོགས་ནི་ཀུན་བཏགས་ཀྱི་ཆོས་ཡིན་པས་ཤེས་པར་བྱ་བ་དང༌། དངོས་པོ་ངན་པའི་གཟུགས་སོགས་ནི་གཞན་དབང་ཡིན་པས་སྤང་བར་བྱ་བ་དང༌། གཤིས་ལ་དངོས་པོ་ཡོད་པའི་གཟུགས་སོགས་ནི་ཡོངས་གྲུབ་ཡིན་པས་དྲི་མ་བསལ་བ་ནས་ཐོབ་པར་བྱ་བ་ཉིད་དོ། །དེ་ལྟར་ལེའུ་གསུམ་པར་གནས་པ་དེ་རྣམས་ཤེས་པ་དང་སྤང་པ་དང་དྲི་མ་བསལ་ནས་མངོན་དུ་བྱས་པར་གསུངས་པ་དང༌། དབུ་མ་ཆེན་པོ་མདོ་སྡེ་རྒྱན་ལས། རྟག་ཏུ་གཉིས་བྲལ་འཁྲུལ་བའི་རྟེན་གང་ཡིན་དང་གང་ཞིག་རྣམ་ཀུན་ཏུ། །བརྗོད་པར་ནུས་མ་ཡིན་ཞིང་སྤྲོས་པ་མེད་པའི་བདག་ཉིད་དེ་ཁོ་ན། །ཤེས་བྱ་སྤང་བྱ་རང་བཞིན་དྲི་མེད་འདོད་གང་རྣམ་པར་སྦྱང་བྱ་སྟེ། །དེ་བཞིན་ནམ་མཁའ་གསེར་དང་ཆུ་ལྟར་ཉོན་མོངས་པ་ལས་རྣམ་དག་འདོད། །ཅེས་དང༌། དབུ་མ་ཆེན་པོའི་གཞུང་དབུས་མཐའ་རྣམ་འབྱེད་ལས། ཡོངས་སུ་ཤེས་དང་སྤང་བ་དང༌། །ཐོབ་པར་མངོན་སུམ་བྱ་བས་ནི། །ཞེས་དང༌། གསེར་འོད་དམ་པ་ལ་སོགས་པ་རྫོགས་ལྡན་དབུ་མའི་གཞུང་མཆོག་ཆེས་ཤིན་ཏུ་མང་བ་རྣམས་སུ་དེ་ལྟར་གསུངས་སོ། །རྫོགས་ལྡན་ཆོས་མཆོག་རྣམས་སུ་གཞན་དབང་སྤང་བྱར་གསུངས་པའི་དགོངས་པ་ནི་གཞན་དབང་གི་བྱེ་བྲག་གློ་བུར་དྲི་མ་ལ་དགོངས་པ་ཡིན་ལ་གཞན་བྱུང་ཡེ་ཤེས་དང་གཟུགས་སྐུ་གཉིས་སོགས་སྤང་བྱ་མ་ཡིན་ནོ། །གང་ཟག་གི་བདག་དང༌། ཆོས་ཀྱི་བདག་དང༌། དག་པའི་བདག༵་དང་གསུ༵མ་དུ་རྣམ༵་པར་དབྱེ༵་བ་ལེག༵ས་པར༵་ཕྱེ༵་ནས༵་གསུང༵ས་པ་དང་འདི་ཉིད་ཀྱི་འགྲེལ་བར་དེ་གསུམ་མཚན་ཉིད་གསུམ་ལ་སྦྱར་ཚུལ་ཡང་གསུངས་སོ། །ཡང་མེད་པའི་སྟོང་བ་ཉིད་དང༌། ཡོད་པའི་སྟོང་བ་ཉིད་དང༌། རང་བཞིན་སྟོང་བ་ཉིད་སྟེ་སྟོ༵ང་ཉིད༵་གསུམ༵་གྱི༵་རྣ༵མ་དབྱེ༵་ལེགས་པར་ཕྱེ༵་ནས༵་གསུང༵ས་བ་ཡིན་ཏེ། དབུ་མ་ཆེན་པོ་མདོ་སྡེ་རྒྱན་གདམས་ངག་རྗེས་སུ་བསྟན་པའི་ལེའུ་ལས། མེད་པའི་སྟོང་བ་ཉིད་ཤེས་ཤིང༌། །དེ་བཞིན་ཡོད་པའི་སྟོང་ཉིད་དང༌། །རང་བཞིན་སྟོང་བ་ཉིད་ཤེས་ན། །སྟོང་བ་ཤེས་པ་ཞེས་བརྗོད་དོ། །ཞེས་དང༌། ཤེར་ཕྱིན་ལྔ་བརྒྱ་བ་ལ་སོགས་པ་རྫོགས་ལྡན་གྱི་དབུ་མའི་གཞུང་མང་པོར་དེ་ལྟར་ཕྱེ་ནས་གསུངས་པ་ལས་སྔ་མ་གཉིས་ནི་ཀུན་བཏགས་དང་གཞན་དབང་གཉིས་ལ་རིམ་བཞིན་སྦྱར་ནས་རང་སྟོང༵་ཟབ་མོ་མ་ཡིན་པ་དང༌། ཕྱི་མ་ནི་གཞན་སྟོང་ཟབ་མོ་ཡིན་ནོ། །ཀུན་བཏགས་ནི། བདེན་པ་གཉིས་ཀྱི་སྐབས་སུ་ཡང་དག་ཀུན་རྫོབ་དང་དོན་དམ་གང་དུ༵་མེད་ཅིང་རང་གི་མཚན་ཉིད་ཀྱིས་གྲུབ་པ་མེད་པའི་ཕྱིར་མེད་པའི་སྟོང་བ་ཉིད་དང༌། གཞན་དབང་ནི་དོན་དམ་པར་མེད་ཅིང་ཀུན་རྫོབ་བདེན་པའི་ངོ་བོར་ཡོད་པས་ན་ཡོད་པའི་སྟོང་བ་ཉིད་དང༌། ཡོངས་གྲུབ་ནི་རང་གི་ངོ་བོ་རང་བཞིན་གྱིས་ཡོད་ཅིང༌། དེ་ལ་ཀུན་བཏགས་གཞན་དབང་གཉིས་ཀྱིས་སྟོང་བའི་གཞི་ཡིན་པའི་ཕྱིར་རང་བཞིན་སྟོང་བ་ཉིད་ཡིན་ནོ། །དེས་ན་ལུགས་འདིར་ཆོས་ཡིན་ན་སྟོང་བ་ཉིད་ཡིན་པས་ཁྱབ་པ་ཡོད་པས། ཆོས་ཐམས་ཅད་སྟོང་བ་ཉིད་ཅེས་པ་ཡང་ལུགས་འདི་ལ་ཤིན་ཏུ་འགྲིགས་པར་ཐེག་མཆོག་དབུ་མའི་ཟིན་བྲིས་ལས་གསུངས་སོ། །ས་སྐྱ་བ་དང་བཀའ་བརྒྱུད་པ་དང༌། སྔ་འགྱུར་རྙིང་མ་རྣམས་ཀྱིས་གཞི་གྲུབ་ན་སྟོང་ཉིད་ཡིན་པས་ཁྱབ་བ་བཞེད་ལ། དགེ་ལུགས་པ་རྣམས་ཀྱིས་ནི། གཞི་གྲུབ་ན་སྟོང་ཉིད་ཡིན་པས་མ་ཁྱབ་སྟེ། སྟོང་ཉིད་དང་དོན་དམ་བདེན་པ་དོན་གཅིག་པར་བཞེད་པའི་ཕྱིར། སྔ་འགྱུར་རྙིང་མ་རྣམས་ཀྱིས་སྣང་བ་ཀུན་རྫོབ་དང་སྟོང་བ་དོན་དམ་བདེན་པར་འདོད་ལ། འོན་ཀྱང་སྣང་བ་གང་ཡིན་ཀུན་རྫོབ་དང་སྟོང་བ་གང་ཡིན་དོན་དམ་བདེན་པར་འདོད་པ་ཡིན་མིན་དང་སྣང་བ་དགག་བྱ་ཡིན་མིན་དང༌། བདེན་གཉིས་ཀྱི་མཚན་ཉིད་གང་འཇོག་སོགས་ལ་དཔྱད་པར་བྱའོ། །ཕྱི༵་ནང༵་སྣོད་བཅུད་དམན་པ་ཀུན་རྫོབ་འདི་དང༌། འདི་ལས་གཞན༵་མཆོག༵་ཕ་རོལ་དམ་པ་དང་པོའི་སངས་རྒྱས་ཏེ། རྫོགས་ལྡན་གྱི་རྒྱུད་མཆོག་ཟབ་མོ་མང་པོར། ཇི་ལྟར་ཕ་རོལ་དེ་བཞིན་ནང༌། །ཇི་ལྟར་ནང་ལ་དེ་བཞིན་གཞན། །ཞེས་གསུངས་སོ། །དེ་ལ་ཕྱི་ནང་བརྟན་གཡོ་འདི་ནི་རང་སྟོང་ཟབ་མོ་མ་ཡིན་པ་དང༌། འདི་ལས་གཞ༵ན་མཆོ༵ག་ཕ་རོལ་དང་པོའི་སངས་རྒྱས་ནི་གཞན་སྟོང་ཟབ་མོ་ཡིན་ཞེས་ལེག༵ས་པ༵ར་ཕྱེ༵་ནས༵་གསུང༵ས་སོ། །བདེ༵ན་བཞི༵་དབྱེར་ཡོད་ནི་རབ་ཏུ་གྲགས་པ་སྟེ། འགོག་བདེན་ནི་གཞན་སྟོང་ཟབ་མོ་དང༌། ལྷག་མ་གསུམ་ནི་རང་སྟོང་མི་ཟབ་པའོ། །བདེན་བཞི་དབྱེར་མེད་ནི་དོན་དམ་བདེན་པ་གཅིག་ཉིད་བདེན་བཞིའི་ཚུལ་གྱི་རྣམ་པ་ཅན་དེ། བཞི་ཀའང་གཞན་སྟོང་ཟབ་མོ་ཡིན་པ་དང༌། ཡང་བདེན་བཞི་ལས་འགོག་བདེན་ཁོ་ན་དོན་དམ་བདེན་པ་དང༌། གཞན་རྣམས་ཀུན་རྫོབ་ཡིན་ཏེ། ཟབ་དོན་ཉེར་གཅིག་ལས། བདེན་པ་བཞིར་ཕྱེ་བའི་འགོག་བདེན་དོན་དམ་དང༌། བདེན་པ་གཞན་གསུམ་ཀུན་རྫོབ་ཏུ་བཞེད། ཞིབ་མོར་ན། འགོག་བདེན་མཚན་ཉིད་པ་གདོད་མའི་འགོག་བདེན་ལ་དོན་དམ་ཁོ་ན་དང༌། གཞན་བདེན་པ་གསུམ་དང་སོ་སོར་བརྟགས་འགོག་ལ་ཀུན་རྫོབ་ཀྱིས་ཁྱབ་པར་དོན་ལ་གནས་པས། ལམ་བདེན་མཚན་ཉིད་པ་ལ་ཀུན་རྫོབ་ཀྱིས་ཁྱབ། འགོག་བདེན་མཚན་ཉིད་པ་ལ་དོན་དམ་གྱིས་ཁྱབ། དོན་དམ་པའི་ལམ་བདེན་ནི་གདོད་མ་དང་གཅིག་པའི་ཕྱིར། འགོག་བདེན་ཉིད་ཡིན་པས་ལམ་བདེན་བཏགས་པ་བ་ཡིན། ཞེས་གསུངས་པའི་ཕྱིར། ཡང་འགོག་བདེན་འདུས་མ་བྱས་དང༌། བདེན་པ་གཞན་གསུམ་འདུས་བྱས་ཡིན་ཏེ། དཔལ་ཕྲེང་གི་ཞུས་པའི་མདོ་ལས། བཅོམ་ལྡན་འདས་འཕགས་པའི་བདེན་པ་བཞི་པོ་དེ་དག་ལས་བདེན་པ་གསུམ་ནི་མི་རྟག་པ་ལེགས་སོ། །བདེན་པ་གཅིག་རྟག་པ་ལགས་སོ། །ཞེས་དང༌། ཚུལ་གཉིས་རྣམ་འབྱེད་ལས། སྡུག་ཀུན་ལམ་བདེན་གསུམ་པོ་ཀུན་རྫོབ་འདུས་བྱས་བདེན་མེད། འགོག་བདེན་དོན་དམ་འདུས་མ་བྱས་པ་ཞེས་གསུངས་པའི་ཕྱིར། ཡང་ཆོས༵་བཞི༵་ནི་སྦྱང་གཞི་དང་སྦྱང་བྱ་སྦྱོང་བྱེད་དང༌། སྦྱང་འབྲས་ཏེ། ནམ་མཁའ་དང༌། དེ་ལ་གནས་པའི་སྤྲིན་དང༌། དེ་འཐོར་བའི་རླུང་དང་སྤྲིན་སངས་པའི་ནམ་མཁའ་རྣམས་ཀྱི་དཔེའི་སྒོ་ནས་ཤེས་པར་བྱའོ། །དེ་ཡང་མཐར་ཐུག་གི་སྦྱང་གཞི་སྦྱང་འབྲས་ནི་གཞན་སྟོང་ཟབ་མོ་ཡིན་ཞིང་ལྷག་མ་རྣམས་ནི་རང་སྟོང་མི་ཟབ་པ་ཡིན་པར་ཆོས་རྗེ་ཀུན་མཁྱེན་རིན་པོ་ཆེས་གསུངས་སོ། །ཆོས༵་ལྔ༵་ནི་མིང་དང་རྒྱུ་མཚན་དང་རྣམ་པར་རྟོག་པ་དང༌། དེ་བཞིན་ཉིད་དང༌། ཡང་དག་པའི་ཡེ་ཤེས་རྣམས་ཡིན་ཏེ། ཐེག་མཆོག་དབུ་མའི་རབ་བྱེད་ལྔ་བ་ལས། ཐེག་པ་ཆེན་པོར་ཆོས་ལྔ་བསྟནཔ་ནི། སྒྲ་དང་ཡིད་ཀྱི་གཡོ་བའི་རང་བཞིན་གྱི། །བརྗོད་པའི་གནས་ཀྱི་སྤྱི་ནི་རྒྱུ་མཚན་ཏེ། །དེ་ལ་བླ་དྭགས་ཚིག་སྤྱི་མིང་དུ་བརྗོད། །སེམས་དང་སེམས་བྱུང་ཆོས་རྣམས་རྣམ་རྟོག་ཡིན། །དེ་བཞིན་ཉིད་ནི་བརྗོད་པའི་ཡུལ་ལས་འདས། །འཕགས་པའི་ཡེ་ཤེས་ཁོ་ནའི་སྤྱོད་ཡུལ་ལོ། །ཡང་དག་ཤེས་པ་མཉམ་བཞག་རྗེས་ཐོབ་གཉིས། །ཞེས་སོགས་གསུངས་པའི་ཕྱིར་རྒྱས་པར་ཐེག་མཆོག་དབུ་མའི་རབ་བྱེད་ལྔ་བའི་རྩ་འགྲེལ་ལ་ལྟ་བར་བྱའོ། །ཆོས་ལྔ་པོ་དེ་དག་ལས། དེ་བཞིན་ཉིད་ནི་གཞན་སྟོང་ཟབ་མོ་ཡིན་ལ། ལྷག་མ་བཞི་ནི་རང་སྟོང་ཡིན་པར་གསུངས་སོ། །ལ༵་སོགས༵་པའི༵་སྒྲས་སྡུད་བྱེད་གསུམ་བསྡུས་ལ་དེ་གསུམ་ནི་གཟུགས་ཀྱི་ཕུང་བོ་དང༌། ཆོས་ཀྱི་ཁམས་དང་ཡིད་ཀྱི་སྐྱེ་མཆེད་དེ་དེ་རྣམས་སུ་མི་འདུ་བའི་ཆོས་འགའ་ཡང་མེད་པའི་ཕྱིར། དེ་ལ་འདུས་མ་བྱས་རྣམས་ཆོས་ཀྱི་ཁམས་སུ་འདུ་ཞིང༌། དེ་བཞིན་ཉིད་ཀྱང་འདུས་མ་བྱས་སུ་འདུས་སོ། །དེ་ལྟར་ལེག༵ས་པར༵་རྣམ་པར་ཕྱེ༵་བའི༵་ཆོས༵་ཀྱི་འཁོར༵་ལོ་གསུང༵ས་པ༵་ལྟར༵། རྫོག༵ས་ལྡན༵་ཆོས༵་མཆོག༵་རྣམ༵ས་ལ༵་གོམ༵ས་པར་བྱ༵ས་ན༵། མཚུང༵ས་པ༵་མེད༵་པའི༵་དོན་གྱི་མཁས༵་པ༷་ཆེན༵་པོ༵ར་འགྱུ༵ར་ལ་རྒྱ༵ལ་བ༵་སྲས༵་བཅས༵་ཐམས༵་ཅད༵་དགྱེ༵ས་པ༵ར་འགྱུ༵ར་བ་དང༌། རྒྱལ༵་བའི༵་གོ༵་འཕང༵་མྱུར༵་དུ༵་ཐོབ་པར༵་འགྱུར༵་ཞེས་པའོ། །གསུམ་པ་ལྷ་སྔགས་སོགས་གསར་བྱུང་གི་འདུས་བྱས་སུ་འདོད་པ་ལ་ལུང་རིགས་ཀྱིས་གནོད་བྱེད་བསྟན་པ་ནི། རྫོགས་ལྡན་ཆོས་མཆོག་ཁྱད་པར་འཕགས་རྣམས་སུ། །སྙིང་པོའི་དཀྱིལ་འཁོར་ལྷ་དང་སྔགས་དང་རྒྱུད། །རིགས་ཀྱི་དབྱེ་བསྡུ་ཇི་སྙེད་གསུངས་པ་ཀུན། །དབྱིངས་རིག་དབྱེར་མེད་དོན་དམ་འདུས་མ་བྱས། །ཆ་མེད་ཀུན་འགྲོ་ཁྱབ་བདག་ཡིན་མོད་ཀྱང༌། །གསུམ་ལྡན་མར་བཅད་སྐྱོན་ཅན་རྣམས་ན་རེ། །དེ་རྣམས་ཐམས་ཅད་འདུས་བྱས་ཡིན་ནོ་ལོ། །འོ་ན་དེ་རྣམས་ཀུན་རྫོབ་ཡིན་པར་འགྱུར། །མཐར་ཐུག་གཏན་གྱི་སྐྱབས་མཆོག་མིན་པར་འགྱུར། །བརྫུན་པ་བསླུ་བའི་ཆོས་ཀྱང་ཡིན་པར་འགྱུར། །སྙིང་པོ་མདོ་ལྔ་མདོ་བཅུ་ལ་སོགས་སུ། །མཐར་ཐུག་སྐྱབས་མཆོག་གསུམ་པོ་ཐམས་ཅད་ཀྱང༌། །རྟག་བརྟན་ཐེར་ཟུག་གཡུང་དྲུང་འདུས་མ་བྱས། །དོན་དམ་བདེན་པར་ཡང་ཡང་གསུངས་པས་གནོད། །རྩབར། རྫོགས་ལྡན་ཆོས་མཆོག་ཁྱད་པར་འཕགས་རྣམས་སུ། །ཞེས་པ་ནས། དོན་དམ་བདེན་པ་ཡང་ཡང་གསུངས་པས་གནོད། །ཅེས་པའི་བར་ཤོ་ལོ་ཀ་གསུམ་དང་རྐང་བ་གཉིས་བྱུང༌། དེའི་ཚིག་དོན་ནི། རྫོག༵ས་ལྡན༵་ཆོས༵་མཆོག༵་ཁྱད༵་པར༵་འཕགས༵་པ་རྣམ༵ས་སུ༵་སྙི༵ང་པོའི༵་དཀྱིལ༵་འཁོར༵་དང༌། ལྷ༵་དང༵་སྔགས༵་དང༵་རྒྱུད༵་དང༌། དང་པོའི་རྒྱུད་སོགས་ལས་རིགས༵་ཀྱི༵་དབྱེ༵་བསྡུ༵་དུ་མ་གསུངས་པ་རི་ཆོས་ངེས་དོན་རྒྱ་མཚོར་བཀོད་པ་ལྟར་ཇི༵་སྙེད༵་གསུང༵ས་པ༵་ཀུན༵་ནི། དབྱིང༵ས་རིག༵་དབྱེ༵ར་མེད༵་དང་དོན༵་དམ༵་འདུས༵་མ༵་བྱ༵ས་དང༌། ཆ༵་མེད༵་དང་ཀུན༵་འགྲོ༵་དང་ཁྱབ༵་པ་དང་དག་པའི་བདག༵་ཡིན༵་མོད༵་ཀྱང༵་གསུམ༵་ལྡན༵་མར༵་བཅད༵་སྐྱོ༵ན་ཅན༵་རྣམ༵ས་ན༵་རེ༵། ལྷ་སྔགས་སོགས་དེ༵་རྣམས༵་ཐམས༵་ཅད༵་འདུས༵་བྱས༵་ཡིན༵་ནོ༵་ཞེས་འདོད་པ་དང༌། ལོ༵་ཞེས་པ་ནི་མ་རངས་བའི་ཚིག་ཡིན་ནོ། །འོ༵་ན༵་ཕྱོགས་སྔ་ཁྱོད་ལྟར་ན་ལྷ་སྔགས་དེ༵་རྣམ༵ས་ཀུ༵ན་རྫོབ༵་ཡིན༵་པར་༵འགྱུ༵ར་བ་དང་མཐར༵་ཐུག༵་གཏ༵ན་གྱི༵་སྐྱབ༵ས་མཆོག༵་མིན༵་པར༵་འགྱུར༵་བ་དང༌། བརྫུན༵་པ༵་བསླུ༵་བའི༵་ཆོས༵་ཀྱང༵་ཡིན༵་པར༷་འགྱུ༵ར་བར་ཐལ། དེ་དག་འདུས་བྱས་ཡིན་པའི་ཕྱིར། རྟགས་ཁས། ཁྱབ་སྟེ། རྒྱུད་བླ་མ་ལས། སྤང་ཕྱིར་བསླུ་བའི་ཆོས་ཅན་ཕྱིར། །མེད་ཕྱིར་འཇིགས་དང་བཅས་པའི་ཕྱིར། །ཆོས་རྣམས་གཉིས་དང་འཕགས་པའི་ཚོགས། །གཏན་གྱི་སྐྱབས་མཆོག་མ་ཡིན་ནོ། །ཞེས་དང༌། རྩ་ཤེས་ལས། འདུས་བྱས་ཐམས་ཅད་བསླུ་བའི་ཆོས། །དེས་ན་དེ་དག་བརྫུན་པ་ཡིན། །ཞེས་གསུངས་པའི་ཕྱིར། ཡང་མདོ་སྡེ་དགོངས་འགྲེལ་ལས། རྟག་པ་རྟག་པའི་དུས་དང་ཐེར་ཟུག་ཐེར་ཟུག་གི་དུས་སུ་ཆོས་ཉིད་དེ་ཉིད་ཀྱི་རྣམ་པར་གནས་པ་འདུས་མ་བྱས་པ་གང་ཡིན་པ་དེ་ནི་འདུས་མ་བྱས་ཡིན་པའི་ཕྱིར། ཞེས་སོགས་སྙིང༵་པོའི༵་མདོ༵་ལྔ༵་མདོ༵་བཅུ་ལ༵་སོགས༵་པ་རྣམས་སུ༵་མཐར༵་ཐུ༵ག་སྐྱབ༵ས་མཆོག༵་གསུམ༵་པོ༵་ཐམས༵་ཅད་ཀྱ༵ང་འགྱུར་བ་མེད་པས་རྟག༵་བརྟན༵་དང༌། ཕྱི་མའི་དུས་སུ་འགྱུར་བ་མེད་པའི་ཆོས་ཉིད་ལ་ཐེར༵་ཟུག༵་ཅེས་རྒྱ་ནག་འགྲེལ་ཆེན་ལས་གསུངས་པ་ལྟར་དང་རྟག་བརྟན་ཡིན་པས་གཡུང༵་དྲུང༵་སྟེ་དེའི་སྐད་དོད་ཤ་ཤྭ་ ར་ཞེས་པ་ཡྀན་པ་ལ་དེས་ན་གཡུང་བ་ནི་རྟག་པའི་བརྡ་ཉིད་དང་དྲུང་ནི་བརྟན་པའི་བརྡ་དང་རྒྱུ་རྐྱེན་གྱིས་འདུས༵་མ༵་བྱས༵་དང་དོན༵་དམ༵་བདེན༵་པར༵་ཡང༵་ཡང༵་གསུང༵ས་པས༵་གནོད༵་ཅེས་པའོ། །དེ་དག་གི་སྐབས་སུ་དོན་དམ་པའི་དཀྱིལ་འཁོར་དང་ལྷ་སྔགས་དང་རྒྱུད་དང་རིགས་དང་དཀོན་མཆོག་གང་ཡིན་ཐམས་ཅད་སྔར་མེད་ཕྱིས་འབྱུང་བའི་འདུས་བྱས་སུ་འདོད་པ་ལ་ལུང་རིགས་ཀྱི་གནོད་བྱེད་བསྟན་ཏོ། །གོང་གི་སྙིང་པོའི་མདོ་ལྔ་ཞེས་པ་ནི། དེ་བཞིན་གཤེགས་པའི་སྙིང་པོའི་མདོ། རྣམ་པར་མི་རྟོག་པ་ལ་འཇུག་པའི་གཟུངས༌། ལྷ་མོ་དཔལ་ཕྲེང་སེང་གེའི་སྒྲའི་མདོ། རྔ་བོ་ཆེན་པོའི་མདོ། སོར་མོའི་ཕྲེང་བ་ལ་ཕན་པའི་མདོ་རྣམས་སོ། །དེ་རྣམས་ཀྱི་སྟེང་དུ་སྟོང་ཉིད་ཆེན་པོའི་མདོ། དེ་བཞིན་གཤེགས་པའི་ཐུགས་རྗེ་ཆེན་པོ་བསྟན་པའི་མདོ། དེ་བཞིན་གཤེགས་པའི་ཡོན་ཏན་དང༌། ཡེ་ཤེས་བསམ་གྱི་མི་ཁྱབ་པ་བསྟན་པའི་མདོ། སྤྲིན་ཆེན་པོའི་མདོ་རྒྱས་པ། མྱང་འདས་ཆེན་པོའི་མདོ་རྒྱས་བསྡུས་གསུམ་གཅིག་ཏུ་བྱས་པ་སྟེ། སྙིང་པོའི་མདོ་བཅུ་དང༌། ཡང་ངེས་དོན་མདོ་ལྔ་ནི། ཤེར་ཕྱིན་ལྔ་བརྒྱ་བ། བྱང་ཆུབ་སེམས་དཔའི་བསླབ་པ་རབ་ཏུ་དབྱེ་བའི་ལེའུ་ཆ་བཅུ་གཉིས་བྱམས་ཞུས་སུ་གྲགས་པ་གཉིས་གཅིག་ཏུ་བསྡུས་པ། རྒྱན་སྡུག་པོ་བཀོད་པའི་མདོ། རབ་ཏུ་ཞི་བ་རྣམ་པར་ངེས་པའི་ཆོ་འཕྲུལ་གྱི་ཏིང་ངེ་འཛིན་གྱི་མདོ། དཀོན་མཆོག་སྤྲིན་གྱི་མདོ་རྣམས་སོ། །དེ་རྣམས་ཀྱི་སྟེང་དུ་གསེར་འོད་དམ་ཆེན། དགོངས་པ་ངེས་པར་འགྲེལ་བ། ལང་ཀར་གཤེགས་པ། ཡེ་ཤེས་སྣང་བ་རྒྱན་གྱི་མདོ། སངས་རྒྱས་ཕལ་པོ་ཆེ་རྣམས་ངེས་དོན་མདོ་བཅུ་ཡིན་པར་ཆོས་རྗེ་ཀུན་མཁྱེན་གྱིས་གསུངས་སོ། ། མཐར་ཐུག་སངས་རྒྱས་རྟག་བརྟན་དུ་གསུངས་པ་རྣམས་དྲང་དོན་དུ་འདོད་པ་ལ་སྒྲུབ་བྱེད་མེད་ཅིང་གནོད་བྱེད་ཡོད་པར་བསྟན་པ།བཞི་བ་མཐར་ཐུག་སངས་རྒྱས་རྟག་བརྟན་དུ་གསུངས་པ་རྣམས་དྲང་དོན་དུ་འདོད་པ་ལ་སྒྲུབ་བྱེད་མེད་ཅིང་གནོད་བྱེད་ཡོད་པར་བསྟན་པ་ནི། གསུངས་པ་དེ་རྣམས་དྲང་དོན་ཡིན་ཞེ་ན། །དྲང་དོན་ཡིན་པའི་ཤེས་བྱེད་འགའ་ཡང་མེད། །གནོད་བྱེད་ལུང་རིགས་རྣམ་དག་ཤིན་ཏུ་མང༌། །དེ་ཕྱིར་ལོག་བཤད་དེ་འདྲ་སྤོང་གྱུར་ཅིག། རྩ་བར། གསུངས་པ་དེ་རྣམས་དྲང་དོན་ཡིན་ཞེ་ན། །ཞེས་པ་ནས། དེ་འདྲ་སྤོང་གྱུར་ཅིག་ཅེས་པའི་བར་ཤོ་ལོ་ཀ་གཅིག་བྱུང༌། དེའི་ཚིག་དོན་ནི། མཐར་ཐུག་སངས་རྒྱས་ལ་སོགས་རྟག་བརྟན་ཡིན་པར་གསུང༵ས་པ༵་དེ༷༷་རྣམས༵་དྲ༵ང་དོན༵་དགོངས་པ་ཅན་ཡིན༵་ཞེ༵་ན༵། དེའི་ལན་དུ། དེ་རྣམས་དྲང༵་དོན༷་ཡིན༵་པའི༵་ཤེས༵་བྱེད༵་ལུང་དང་རིགས་པ་འགའ༵་ཡང༵་མེད༵་པ་མ་ཟད་དེ་ལ་གནོད༵་བྱེད༵་ཀྱི་རྫོགས་ལྡན་གྱི་ལུ༵ང་དང་རིག༵ས་པ་རྣམ༵་དག༵་ཤིན༵་ཏུུ༵་མང༵་བ་ཡོད་པའི་ཕྱིར་ཏེ། དེ་རྣམས་དྲང་དོན་ཡིན་ན་རྗེ་བཙུན་བྱམས་མགོན་གྱི་དྲང་དོན་དུ་བཀྲལ་དགོས་ཀྱང་དེ་ལྟར་མ་བཀྲལ་བར་རྒྱལ་བའི་ངེས་དོན་ཀྱི་མདོ་རྣམས་སུ་ཇི་ལྟར་བཀའ་སྩལ་བ་ལྟར་གྱི་དགོངས་འགྲེལ་མཛད་པའི་ཕྱིར་ཏེ། རྒྱུད་བླ་མ་ལས། གང་ཕྱིར་དེ་ནི་ཆོས་སྐུ་དེ་ནི་དེ་བཞིན་གཤེགས། །དེ་ནི་འཕགས་པའི་བདེན་པ་དོན་དམ་མྱ་ངན་འདས། །དེ་ཕྱིར་ཉི་དང་ཟེར་བཞིན་ཡོན་ཏན་དབྱེར་མེད་པས། །སངས་རྒྱས་ཉིད་ལས་མ་གཏོགས་མྱ་ངན་འདས་པ་མེད། །ཅེས་གསུངས་པའི་ཕྱིར། དེ༵་ཕྱིར༵་ལོག༵་པར་བཤད༵་པ་དེ༵་འདྲ༵་སྤོང༵་གྱུར༵་ཅིག༵ ཅེས་པའོ། །ལྔ་བ་དེ་རྣམས་ཀུན་རྫོབ་ཏུ་ཡོད་ཀྱི་དོན་དམ་པར་ཅིར་ཡང་མ་གྲུབ་པར་འདོད་པ་ལ་གནོད་བྱེད་བསྟན་པ་ལ། ཕྱོགས་སྔའི་འདོད་པ་བརྗོད་པ་དང་དེ་ལ་གནོད་བྱེད་བསྟན་པ་དང་གཉིས། དང་བོ་ནི། གལ་ཏེ་དེ་རྣམས་ཐམས་ཅད་ཀུན་རྫོབ་ཡིན། །དོན་དམ་བདེན་པ་ཅིར་ཡང་མ་གྲུབ་པས། །སྙིང་པོ་དཀྱིལ་འཁོར་སོགས་ཀྱང་མིན་ཞེ་ན། །རྩ་བར། གལ་ཏེ་དེ་རྣམས་ཐམས་ཅད་ཀུན་རྫོབ་ཡིན། །ཞེས་པ་ནས། མིན་ཞེ་ན་ཞེས་པའི་བར་རྐང་བ་གསུམ་བྱུང༌། དེའི་ཚིག་དོན་ནི་གསུམ་ལྡན་མར་བཅད་རྣམས་ན་རེ། གལ༵་ཏེ༵་སྙིང་པོའི་དཀྱིལ་འཁོར་དང་ལྷ་སྔགས་རིགས་ཀྱི་དབྱེ་བསྡུ་སོགས་མཐར་ཐུག་གི་ཡོན་ཏན་དེ༵་རྣམ༵ས་ཐམས༵་ཅད༵་ཀུན༵་རྫོབ༵་ཏུ་ཡོད་པ་ཡིན༵་གྱི་དོན༵་དམ༵་བདེན༵་པ༵་ནི་ཅི༵ར་ཡང༵་མ༵་གྲུ༵བ་པ་ཡིན་པས༵་དོན་དམ་པའི་སྙིང༵་པོ༵འི་དཀྱིལ༵་འཁོར༵་དང་སོགས༵་སྒྲས་བསྡུས་པ་ལྷ་སྔགས་རིགས་ཀྱི་དབྱེ་བསྡུ་སོགས་ཀྱང༵་མིན༵་ཞེ༵་ན༵། ཞེས་གསུམ་ལྡན་མར་བཅད་ཀྱི་འདོད་ལུགས་བརྗོད་པའོ། །གཉིས་པ་ལུགས་དེ་ལ་གནོད་བྱེད་བསྟན་པ་ནི། ཁྱབ་བྱེད་ཁེགས་ན་ཁྱབ་བྱ་ཁེགས་ཕྱིར་དང༌། །རྟེན་ཁེགས་ན་ཡང་རྟེན་པ་ཁེགས་པའི་ཕྱིར། །དོན་དམ་ཁེགས་ན་ཀུན་རྫོབ་ཁེགས་འགྱུར་ལ། །ཆོས་ཉིད་ཁེགས་ན་ཆོས་རྣམས་ཁེགས་འགྱུར་ཞིང༌། །དབུས་མ་ཁེགས་ན་མཐའ་མ་ཁེགས་འགྱུར་ལ། །ཡོངས་གྲུབ་ཁེགས་ན་ཀུན་བརྟགས་ཁེགས་འགྱུར་ཞིང༌། །རང་བཞིན་ཁེགས་ན་བཅོས་མ་ཁེགས་འགྱུར་ལ། །གཉུག་མ་ཁེགས་ན་གློ་བུར་ཁེགས་འགྱུར་ཞིང༌། །གཞན་སྟོང་ཁེགས་ན་རང་སྟོང་ཁེགས་འགྱུར་ལ། །སྙིང་པོ་ཁེགས་ན་དྲི་མ་ཁེགས་འགྱུར་ཞིང༌། །གཙང་བ་ཁེགས་ན་མི་གཙང་ཁེགས་འགྱུར་ལ། །བདག་མཆོག་ཁེགས་ན་ཆོས་ཀུན་ཁེགས་འགྱུར་ཞིང༌། །བདེ་ཆེན་ཁེགས་ན་སྡུག་བསྔལ་ཁེགས་འགྱུར་ལ། །རྟག་པ་ཁེགས་ན་མི་རྟག་ཁེགས་འགྱུར་ཞིང༌། །སངས་རྒྱས་མེད་ན་སེམས་ཅན་མེད་པར་འགྱུར། །ཡེ་ཤེས་མེད་ན་རྣམ་ཤེས་མེད་པར་འགྱུར། །རང་བྱུང་མེད་ན་གཞན་བྱུང་མེད་པར་འགྱུར། །གཞན་མཆོག་མེད་ན་ཕྱི་ནང་མེད་པར་འགྱུར། །འགོག་བདེན་མེད་ན་བདེན་པ་མེད་པར་འགྱུར། །སྦྱང་གཞི་མེད་ན་སྦྱང་བྱ་སྦྱོང་བྱེད་དང༌། །སྦྱང་འབྲས་ལ་སོགས་གང་ཡང་མེད་པར་འགྱུར། །དེ་བཞིན་ཉིད་ནི་གལ་ཏེ་མེད་གྱུར་ན། །མིང་སོགས་ཆོས་གཞན་ཀུན་ཡང་མེད་པར་འགྱུར། །འདི་འདྲ་གཞན་ཡང་ཤིན་ཏུ་མང་བར་ཡོད། །རྩ་བར། ཁྱབ་བྱེད་ཁེགས་ན་ཁྱབ་བྱ་ཁེགས་ཕྱིར་དང༌། །ཞེས་པ་ནས། ཤིན་ཏུ་མང་བར་ཡོད། ཅེས་པའི་བར་ཤོ་ལོ་ཀ་དྲུག་བྱུང༌། དེའི་ཚིག་དོན་ནི། ཁྱོད་ལྟར་ན་དོན་དམ་བདེན་པ་ཅིར་ཡང་མ་གྲུབ་པ་ཡིན་ན་དེ་མེད་དགོས་ལ་དེ་ཡང་འདོད་ན་བརྟན་གཡོ་ཀུན་ལ་ཁྱབ་པའི་ཁྱབ༵་བྱེ༵ད་དོན་དམ་བདེན་པ་ཁེག༵ས་ན༵་ཁྱབ༵་བྱ༵་ཀུན་རྫོབ་ཀྱི་ཆོས་རྣམས་ཁེག༵ས་པར་འགྱུར་བའི་ཕྱི༵ར་དང༵༌། དེ་ལྟར་རྟེ༵ན་དོན་དམ་ཁེག༵ས་ན༵་ཡང༵་བརྟེན༵་པ༷་ཀུན་རྫོབ་ཁེག༵ས་པའི༵་ཕྱིར༵་དང༌། དོ༵ན་དམ༵་ཁེག༷ས་ན༵་ཀུ༵ན་རྫོ༵བ་ཁེག༵ས་པར་འགྱུར༵་ལ༵་ཆོས༷་ཉིད་ཁེགས༵་ན༵་ཆོས༵་ཅན་རྣམ༵ས་ཁེག༵ས་པར་འགྱུར༵་ཞིང༵༌། མཐའ་བྲལ་དབུ༵ས་མ༵་ཁེ༵གས་ན༵་མཐའ༵་མ༵་ཁེགས༵་པར་འགྱུར༵་ལ༵། དོན་དམ་ཡོང༵ས་གྲུབ༵་ཁེགས༵་ན༵་ཀུ༵ན་བཏ༵གས་ཁེགས༵་པར་འགྱུར༵་ཞི༵ང༌། རང༵་བཞིན་ཁེགས༵་ན༵་བཅོས་༵མ༵་ཁེག༵ས་པར་འགྱུར༵་ལ༵། གདོད་ནས་གྲུབ་པའི་གཉུག༵་མ་ཁེགས༵་ན༵་གློ༵་བུར༵་ཁེགས༵་པར་འགྱུར༵་ཞིང༵། དོན་དམ་གཞན༵་སྟོང༵་ཁེགས༵་ན༵་རང༵་སྟོང༵་ཁེགས༵་པར་འགྱུར༵་ལ༵། སྙིང༵་པོ༵་ཁེགས༵་ན༵་དྲི༵་མ༵་ཁེགས༵་པར་འགྱུར༵་བ་ཡིན་ཞིང༵་དོན་དམ་པའི་གཙང༵་བ༵་ཁེགས༵་ན༵་ཀུན་རྫོབ་མི༵་གཙ༵ང་བ་ཡང་ཁེགས༵་པར་འགྱུར༵་ལ༵། དག་པའི་བདག༵་མཆོག༵་ཁེགས༵་ན་༵ཆོས༵་ཀུན༵་ཁེགས༵་འགྱུར༵་ཞིང༵༌། བདེ༵་ཆེ༵ན་ཁེ༵གས་ན༵་སྡུ༵ག་བསྔ༵ལ་ཁེ༵གས་པར་འགྱུར༵་ལ༵། རྟག༵་པ༵་ཁེགས༵་ན༵་མི༵་རྟག༵་པ་ཁེགས༵་པར་འགྱུར༵་ཞིང༵༌། སང༵ས་རྒྱ༵ས་མེད༵་ན༵་སེམ༵ས་ཅན༵་མེད༵་པར༵་འགྱུར༵་བ་ཡིན་ཞིང་ཡེ༵་ཤེས༵་མེད༵་ན༵་རྣམ༵་ཤེས༵་མེད༵་པར༵་འགྱུར༵་ཞིང༌། རང༵་བྱུང༵་མེད༵་ན༵་གཞན༵་བྱུང༵་མེད༵་པར༵་འགྱུར༵་ཞིང༌། གཞན༵་མཆོ༵ག་མེད༵་ན༵་ཕྱི༵་ནང༵་མེད༵་པ༵ར་འགྱུར༵་ལ། འགོག༵་བདེ༵ན་མེད༵་ན༵་བདེ༵ན་པ༵་མེད༵་པར༵་འགྱུར༵་ཞིང༌། སྦྱང༷་གཞི༵་དོན་དམ་མེད༵་ན༵་སྦྱང༵་བྱ༵་དྲི་མ་དང་སྦྱོང༵་བྱེད༵་ལམ་དང༵་སྦྱང༵་འབྲས༵་སྐུ་བཞི་ལ༵་སོག༷ས་པ་གང༵་ཡང༷་མེད༷་པར༵་འགྱུར༵་བ་ཡིན་ལ། དེ༵་བཞིན༵་ཉིད༵་ནི༵་གལ༵་ཏེ༵་མེད༵་པར་གྱུར༵་བ་ཡིན་ན༵་ནི་མིང༵་སོགས༵་ཆོས༵་གཞན༵་ཀུན༵་ཡང༵་མེད༵་པར༵་ཐལ་བར་འགྱུར༵་བའི་ཕྱིར། དོན་དམ་ཅིར་ཡང་མེད་པར་འདོད་ན་སྐྱོན་འདི༵་འདྲ༵་གཞན༵་ཡང༵་ཤིན༵་ཏུ༵་མང༵་བར༵་ཡོད༵་ཅེས་ཁྱབ་བྱེད་ཁེགས་ན་ཁྱབ་བྱ་ཁེགས་པ་ལ་སོགས་པས་དོན་དམ་མེད་ན་ཀུན་རྫོབ་ཀྱང་མེད་པར་འགྱུར་བའི་ཧ་ཅང་ཐལ་བའི་སྐྱོན་གྱིས་གནོད་པ་བསྟན་པའི་ཕྱིར་རོ། ། སེམས་ཅན་ཐམས་ཅད་ལ་ཆོས་ཟབ་ཁྱད་འཕགས་ཀྱི་བྱིན་རླབས་འཇུག་པར་སྨོན་པ།དྲུག་པ་སེམས་ཅན་ཐམས་ཅད་ལ་ཆོས་ཟབ་ཁྱད་འཕགས་ཀྱི་བྱིན་རླབས་འཇུག་པར་སྨོན་པ་ནི། རྩ་བར། དེ་ཕྱིར་འགྲོ་བ་ཀུན་ལ་རྫོགས་ལྡན་གྱི། །ཆོས་མཆོག་ཟབ་མོའི་བྱིན་རླབས་འཇུག་གྱུར་ཅིག །ཅེས་བྱུང༌། དེའི་ཚིག་དོན་ནི་རྒྱུ་མཚན་དེ༵་དག་གི་ཕྱིར༵་ན་འགྲོ༵་བ༵་ཀུན༵་ལ༵་རྫོག༵ས་ལྡན༵་གྱི༵་ཆོས༵་མཆོག༵་ཏུ་གྱུར་བའི་གཤེགས་སྙིང་རིགས་འདུས་ཀྱི་ཟབ༵་མོའི༵་བྱིན༵་རླབས༵་འཇུ༵ག་པར་གྱུར༵་ཅིག༵་ཅེས་སྨོན་པའོ། ། རྫོགས་ལྡན་ལུགས་ཀྱི་ཁྱད་འཕགས་རྣམས་བསྟན་པ།བདུན་པ་རྫོགས་ལྡན་ལུགས་ཀྱི་ཁྱད་འཕགས་རྣམས་བསྟན་པ་ནི། ཤེས་བྱ་ལ་ནི་འདུས་བྱས་འདུས་མ་བྱས། །བེམ་རིག་གཉིས་སུ་འབྱེད་པ་རྫོགས་ལྡན་ལུགས། །བེམ་པོ་ལ་ཡང་འདུས་བྱས་འདུས་མ་བྱས། །རིག་པ་ལ་ཡང་འདུས་བྱས་འདུས་མ་བྱས། །ཤེས་པ་ལ་ཡང་རྣམ་ཤེས་ཡེ་ཤེས་དང༌། །ཡེ་ཤེས་ལ་ཡང་རང་བྱུང་གཞན་བྱུང་དང༌། །རྟག་པ་དང་ནི་མི་རྟག་ཡེ་ཤེས་དང༌། །འདུས་མ་བྱས་དང་འདུས་བྱས་ཡེ་ཤེས་སུ། །ལེགས་པར་འབྱེད་པ་རྫོགས་ལྡན་ལུགས་ལ་ཡོད། །དེ་ཕྱིར་ཆོས་དབྱིངས་ཡེ་ཤེས་གང་ཡིན་ཏེ། །རྟག་པ་འདུས་མ་བྱས་ཀྱི་ཡེ་ཤེས་དང༌། །དོན་དམ་དབྱིངས་རིག་དབྱེར་མེད་ཡེ་ཤེས་དང༌། །འགལ་འདུས་སྐྱོན་མེད་དཔེ་བྲལ་ཡེ་ཤེས་དང༌། །རང་བཞིན་ལྷན་ཅིག་སྐྱེས་པའི་ཡེ་ཤེས་དང༌། །རང་བཞིན་འགྱུར་མེད་ཡོངས་གྲུབ་ཡེ་ཤེས་དང༌། །རང་བཞིན་བདེ་བ་ཆེན་པོའི་ཡེ་ཤེས་ཡིན། །རྩ་བར། ཤེས་བྱ་ལ་ནི་འདུས་བྱས་འདུས་མ་བྱས། །ཞེས་པ་ནས། རང་བཞིན་བདེ་བ་ཆེན་པོའི་ཡེ་ཤེས་ཡིན། །ཞེས་པའི་བར་ཤོ་ལོ་ཀ་བཞི་བྱུང༌། དེའི་ཚིག་དོན་ནི། སྤྱིར་ཤེས༵་བྱ༵་ཙམ་ལ༵་དབྱེ་བ་ནི༵་འདུས༵་བྱས༵་དང་འདུས༵་མ༵་བྱས༵་གཉིས་དང༌། བེམ༵་པོ་དང་རིག༵་པ་གཉིས༵་སུ༵་འབྱེད༵་པ༵་ནི་རྫོགས༵་ལྡན༵་ཆོས་མཆོག་གི་ལུགས༵་ཡིན་ཞིང་བེམ༵་པོ༷་ལ༵་ཡ༵ང་བྲག་རི་ལ་སོགས་པའི་འདུས༵་བྱས༵་དང༌། ནམ་མཁའ་ལ་སོགས་པའི་འདུས༵་མ༷་བྱས༵་གཉིས་སུ་གསུངས་ལ། འདི་ཉིད་ཀྱི་འགྲེལ་བར། འདུས་མ་བྱས་ནམ་མཁའ་བེམ་པོ་ཞེས་གསུངས་པ་ནི་ཡོངས་གྲགས་ཀྱི་དབང་དུ་བྱས་པའམ་འདུས་མ་བྱས་བཏགས་པ་བའི་དབང་དུ་བྱས་པ་ཡིན་ཏེ། ཟབ་དོན་ཉེར་གཅིག་ལས། དོན་དམ་འདུས་མ་བྱས་དངོས་ཡིན། ནམ་མཁའ་སོགས་འདུས་མ་བྱས་བཏགས་པ་བ་ཡིན། ཞེས་གསུངས་པའི་ཕྱིར། དེས་ན་རྩ་ཤེས་ལས། དངོས་དང་དངོས་མེད་འདུས་བྱས་ཡིན། མྱ་ངན་འདས་པ་འདུས་མ་བྱས། ཞེས་གསུངས་པ་ལྟར་རང་ལུགས་ཐུན་མོང་མ་ཡིན་པའི་འདུས་མ་བྱས་ནི་དོན་དམ་པའི་མྱང་འདས་འགོག་བདེན་ཁོ་ནར་ངེས་ལ། དངོས་དང་དངོས་མེད་ཀྱི་ཆོས་རྣམས་ནི་འདུས་བྱས་ཡིན་ནོ། །འདུས་བྱས་སམ་རྟེན་འབྲེལ་འཇོག་ཚུལ་ལ་བསྐྱེད་བྱ་སྐྱེད་བྱེད་ཀྱི་དབང་དུ་བྱས་པ་དང༌། རྣམ་པར་བཞག་བྱ་འཇོག་བྱེད་ཀྱི་དབང་དུ་བྱས་པ་གཉིས་ལས་གཞན་དབང་ནི་དང་པོ་དང༌། ཀུན་བཏགས་ནི་གཉིས་པ་ཡིན་ཏེ། ཐེག་མཆོག་དབུ་མ་ལས། དེ་ནི་གཉིས་ཏེ་བསྐྱེད་བྱ་སྐྱེད་བྱེད་དང༌། །བཞག་བྱ་འཇོག་བྱེད་དབང་བྱས་རྟེན་འབྱུང་ངོ༌། །དང་བོ་གཞན་དབང་གཉིས་པ་ཀུན་བཏགས་ཡིན། །ཞེས་གསུངས་པའི་ཕྱིར། དེ་ཡང་གཞན་དབང་ལ་བསྐྱེད་བྱ་སྐྱེད་བྱེད་ཀྱི་རྟེན་འབྲེལ་དང་ཀུན་བཏགས་ལ་བཞག་བྱ་འཇོག་བྱེད་ཀྱི་རྟེན་འབྲེལ་གཙོ་བོར་འཇོག་པའི་དོན་ཡིན་གྱི་ཁྱབ་མཐའ་བཟུང་བ་མ་ཡིན་པར་གསུངས་ལ་རྒྱས་པར་ཐེག་མཆོག་དབུ་མའི་རབ་བྱེད་ལྔ་བའི་ཟིན་བྲིས་ལས་ཤེས་པར་བྱའོ། །དཀྱུས་ཀྱི་ཚིག་དོན་ནི། རིག༵་པ༵་ལ༵་ཡང༵་འདུས༵་བྱས༵་འདུས༵་མ༷་བྱས༵་གཉིས་དང༌། ཤེས༵་པ༵་ལ༵་ཡང༵་རྣམ༵་ཤེས༵་ཡེ༵་ཤེས༵་གཉིས་དང༵༌། ཡེ༵་ཤེས༵་ལ༵་ཡང༵་རང༵་བྱུང༵་ཡེ་ཤེས་དང༌། གཞན༵་བྱུང༵་ཡེ་ཤེས་གཉིས་དང༷༌། རྟག༵་པའི༵་ཡེ་ཤེས་དང༵་ནི༵་མི༵་རྟག༵་པའི་ཡེ༵་ཤེས༵་གཉིས་དང༵༌། འདུས༵་མ༵་བྱ༷ས་ཀྱི་ཡེ་ཤེས་དང༵་འདུས༵་བྱས༵་ཀྱི་ཡེ༵་ཤེ༵ས་གཉིས་སུ༵་ལེགས༵་པར༵་འབྱེད༵་པ༵་ནི་རྫོག༵ས་ལྡན༵་ལུགས༵་ལ༵་ཡོད༵་དེ། སངས་རྒྱས་ཕལ་བོ་ཆེའི་མདོ་ལས། འདུས་མ་བྱས་ཀྱི་ཡེ་ཤེས་ཐོབ་པར་འགྱུར་བ་དང༌། ཞེས་དང༌། དེ་བཞིན་གཤེགས་པའི་ཡེ་ཤེས་འདུས་མ་བྱས་པའི་མཐར་ཐུག་པར་འགྱུར་བ་དང༌། ཞེས་དང༌། མདོ་ལས། རྣམ་ཤེས་ནི་མི་རྟག་པའོ། །ཡེ་ཤེས་ནི་རྟག་པའོ། །ཞེས་དང༌། རྒྱུད་བླ་མ་ལས། སངས་རྒྱས་ཡེ་ཤེས་སེམས་ཅན་ཚོགས་ཞུགས་ཕྱིར། །རང་བཞིན་དྲི་མེད་དེ་ནི་གཉིས་མེད་དེ། །ཞེས་དང༌། ཟག་པ་མེད་པ་ཤེས་པ་སྦྲང་མའི་རྩི་དང་འདྲ། །ཞེས་གསུངས་པའི་ཕྱིར་རོ། །རྒྱུ་མཚན་དེ༵་ཡི་ཕྱིར༵་ན་ཆོས༵་དབྱིང༵ས་ཡེ༷་ཤེས༵་གང༵་ཡིན༵་པ་དེ༷་ནི་རྟག༵་པ༵་འདུས༵་མ༵་བྱས༵་ཀྱི༵་ཡེ༵་ཤེས༵་ཡིན་པ་དང༵་དོན༵་དམ༵་དབྱིང༵ས་རིག༵་དབྱེ༵ར་མེད༵་ཀྱི་ཡེ༵་ཤེས༵་ཡིན་པ་དང༵༌། འག༵ལ་འདུ༵ས་སྐྱོ༵ན་མེད༵་དཔེ༵་བྲ༵ལ་གྱི་ཡེ༵་ཤེ༵ས་ཡིན་པ་ད༵ང༌། རང༵་བཞིན༵་ལྷན༵་ཅིག༵་སྐྱེས༵་པའི༵་ཡེ༵་ཤེས༵་ཡིན་པ་ད༵ང༌། རང༵་བཞིན༵་འགྱུར༵་བ་མེད༵་པའི་ཡོངས༵་གྲུབ༵་ཀྱི་ཡེ༵་ཤེས༵་ཡིན་པ་དང༵༌། རང༵་བཞིན༵་བདེ༵་བ༵་ཆེན༵་པོའི༵་ཡེ༵་ཤེས༵་ཡིན༵་པར་གྲུབ་པ་ཡིན་ཞེས་སྤྱིར་ཤེས་བྱ་ཙམ་གྱི་རྣམ་དབྱེ་དང༌། ཁྱད་པར་དུ་ཤེས་པ་དང་ཡེ་ཤེས་ཀྱི་རྣམ་དབྱེ་ལ་སོགས་པ་རྫོགས་ལྡན་གྱི་ཆོས་ལུགས་ཁྱད་འཕགས་རྣམས་བསྟན་པ་ཡིན་ནོ། ། བརྒྱད་པ་ཆོས་དབྱིངས་ཤེར་ཕྱིན་ཟབ་མོ་གསུངས་པའི་དགོངས་པ་བསྟན་པ་ནི། རྫོགས་ལྡན་ཆོས་མཆོག་ཁྱད་པར་འཕགས་རྣམས་སུ། །ཆོས་དབྱིངས་དེ་བཞིན་ཉིད་ལ་མཐར་ཐུག་ག། །ཤེར་ཕྱིན་ཟབ་མོར་གསུངས་པ་གང་ཡིན་རྣམས། །རྟག་པ་འདུས་མ་བྱས་ཀྱི་ཡེ་ཤེས་དང༌། །སྟོང་པ་ཆེན་པོ་འགྱུར་མེད་ལྔ་དང་ནི། །རྟག་པ་འདུས་མ་བྱས་ཀྱི་རྒྱལ་བ་ལྔ། །རྟག་བརྟན་ཐེར་ཟུག་གཡུང་དྲུང་རིག་མ་ལྔ། །སངས་རྒྱས་ལྔ་བདག་སངས་རྒྱས་སྐུ་ལྔ་དང༌། །ཁྱབ་བདག་ཡེ་ཤེས་ལྔ་ཡིབདག་དང་ནི། །ཤེས་བཅུ་རྣམ་དག་བདག་ལ་དགོངས་པ་ཡིན། །རྩ་བར། རྫོགས་ལྡན་ཆོས་མཆོག་ཁྱད་པར་འཕགས་རྣམས་སུ། །ཞེས་པ་ནས། ཤེས་བཅུ་རྣམ་དག་བདག་ལ་དགོངས་པ་ཡིན། །ཞེས་པའི་བར་ཤོ་ལོ་ཀ་གཉིས་དང་རྐང་བ་གཉིས་བྱུང༌། དེའི་དོན་ནི། རབ་རྩལ་རྣམ་གནོན་གྱིས་ཞུས་པའི་མདོ་ལས། ཆོས་ཐམས་ཅད་ཤེར་ཕྱིན་མ་ཡིན་གྱི། ཞེས་པ་ནས། དེ་བཞིན་ཉིད་དེ་ཤེས་རབ་ཀྱི་ཕ་རོལ་ཏུ་ཕྱིན་པའོ། །ཞེས་དང༌། ཡུམ་བར་མ་ལས། ཀོའུ་ཤི་ཀ་དེ་ནི་འདི་ལྟར་ཆོས་ཀྱི་དབྱིངས་དང༌། ཤེས་རབ་ཀྱི་ཕ་རོལ་ཏུ་ཕྱིན་པ་འདི་ལ་གཉིས་སུ་མེད་དེ་གཉིས་སུ་བྱར་མེད་དོ། །ཞེས་དང༌། ཤེར་ཕྱིན་མཚན་བརྒྱ་རྩ་བརྒྱད་པ་ལས། རྣམ་མཁྱེན་དང༌། ཡང་དག་པའི་མཐའ་དང༌། དེ་བཞིན་ཉིད་དང༌། མ་ནོར་བ་དེ་བཞིན་ཉིད་དང༌། གཞན་མ་ཡིན་པ་དེ་བཞིན་ཉིད་དང༌། བདེན་པ་དང༌། དེ་ཁོ་ན་ཉིད་དང༌། ཡང་དག་པ་དང༌། ཕྱིན་ཅི་མ་ལོག་པ་དང༌། ཆོས་ཉིད་དང༌། ཆོས་ཀྱི་དབྱིངས་དང༌། ཆོས་ཀྱི་གནས་ཉིད་དང༌། ཆོས་སྐྱོན་མེད་པ་ཉིད་དང༌། ཞེས་དང༌། འཇམ་དཔལ་ཞལ་ལུང་ལས། དེ་ནི་དེ་བཞིན་ཉིད་འདི་ལས། །གཞན་ནི་ཅི་ཡང་མ་གསུངས་སོ། །ཞེས་དང༌། རབ་ཏུ་ཞི་བ་རྣམ་པར་ངེས་པའི་ཆོ་འཕྲུལ་གྱི་མདོ་ལས། ཆོས་ཀྱི་དབྱིངས་སངས་རྒྱས་ཏེ། སངསརྒྱས་ནི་ཡང་དག་པའི་མཐའོ། །ཞེས་སོགས་དང༌། ཤེར་ཕྱིན་བདུན་བརྒྱ་བ་ལས། ཆོས་ཀྱི་དབྱིངས་ཉིད་བཅོམ་ལྡན་འདས་ཡིན་པའི་ཕྱིར་རོ། །ཞེས་དང༌། ཆོས་ཀྱི་དབྱིངས་དེ་ཉིད་བྱང་ཆུབ་པོ། །ཞེས་དང༌། བརྒྱད་སྟོང་བ་ལས། དེ་བཞིན་ཉིད་གང་ཡིན་པ་དེ་ནི་དེ་བཞིན་གཤེགས་པའོ། །ཞེས་དང༌། ཤེས་རབ་གྱི་ཕ་རོལ་ཏུ་ཕྱིན་པ་འདུས་མ་བྱས་ཏེ། གང་དང་ཡང་བྲལ་བས་མ་ཡིན་ནོ། །ཞེས་དང༌། རབ་འབྱོར་དེ་བཞིན་གཤེགས་པ་ཞེས་བྱ་བ་ནི། ཡང་དག་པ་དེ་བཞིན་ཉིད་ཀྱི་ཚིག་བླ་དྭགས་སོ། །ཞེས་གནོད་འཇོམས་སུ་དྲངས་བ་དང༌། རབ་ཞི་རྣམ་ངེས་ལས། གང་མི་བདེན་པ་དེ་དེ་བཞིན་ཉིད་མ་ཡིན་ནོ། །ཞེས་དང༌། རྒྱན་སྡུག་པོ་བཀོད་པ་ལས། དེ་བཞིན་གཤེགས་པ་ནི། རྟག་པ་བརྟན་པ་ཐེར་ཟུག་མི་འཇིགས་པ་སྟེ། སངས་རྒྱས་རྗེས་སུ་དྲན་པ་བསྒོམ་པའི་རྣལ་འབྱོར་ཅན་རྣམས་ཀྱི་ཡུལ་ཡིན་ཏེ། དེ་བཞིན་གཤེགས་པའི་སྙིང་པོ་ཞེས་བསྒྲགས་པ། མྱ་ངན་ལས་འདས་པའི་དབྱིངས་དང༌། ཞེས་པ་ནས། ཆོས་རྣམས་ཀྱི་ཆོས་ཉིད་དང༌། ཆོས་ཀྱི་གནས་ཉིད་དང༌། ཆོས་ཀྱི་དབྱིངས་དང༌། ཆོས་སྐྱོན་མེད་པ་ཉིད་འདི་ནི། དེ་བཞིན་གཤེགས་པའོ། །ཞེས་དང༌། མངོན་རྟོགས་རྒྱན་ལས། བྱང་ཆུབ་དེ་བཞིན་ཉིད་མཚན་ཉིད། །དེ་ཡང་དེ་ཡི་མཚན་ཉིད་བཞེད། །ཅེས་དང༌། མཚན་བརྗོདལས། དོན་དམ་བདེན་པ་ཉིད་ཅེས་བྱ། །སངས་རྒྱས་སྐུ་ལྔའི་བདག་ཉིད་ཅན། །ཁྱབ་བདག་ཡེ་ཤེས་ལྔ་ཡི་བདག །ཅེས་དང༌། མདོ་སྡེ་རྒྱན་ལས། དེ་བཞིན་ཉིད་ནི་སངས་རྒྱས་འདོད། །ཅེས་དང༌། དཀོན་མཆོག་སྤྲིན་མདོ་ལས། དེ་ནི་དེ་བཞིན་ཉིད་ཅེས་བྱའོ། །ཡང་དག་པའི་མཐའ་ཞེས་བྱའོ། །ཐམས་ཅད་མཁྱེན་པ་ཉིད་ཅེས་བྱའོ། །རྣམ་པ་ཐམས་ཅད་མཁྱེན་པ་ཉིད་ཅེས་བྱའོ། །ཞེས་དང༌། སངས་རྒྱས་ཕལ་བོ་ཆེའི་མདོ་ལས། ཆོས་དབྱིངས་དམ་པ་དེ་བཞིན་གཤེགས་པ་སྟེ། །ཞེས་དང༌། ཆོས་དབྱིངས་མཐར་ཐུག་བདེ་བར་གཤེགས་པའི་སྐུ། །ཞེས་དང༌། བདེ་གཤེགས་སྙིང་པོ་བྱང་ཆུབ་འདི་ལ་ལྟོས། །ཞེས་དང༌། འདུས་མ་བྱས་ཀྱི་ཡེ་ཤེས་ཐོབ་པར་འགྱུར་བ་དང༌། ཞེས་དང༌། དེ་བཞིན་གཤེགས་པའི་ཡེ་ཤེས་འདུས་མ་བྱས་མཐར་ཐུག་པར་འགྱུར་བ་དང༌། ཞེས་དང༌། དེ་བཞིན་གཤེགས་པའི་ཐུགས་རྗེ་ཆེན་པོ་བསྟན་པའི་མདོ་ལས། དེ་བཞིན་ཉིད་ཀྱི་དོན་གང་ཡིན་པ་དེ་དེ་བཞིན་གཤེགས་པའི་དོན་ཏོ། །ཞེས་དང༌། ཡུམ་རྒྱས་པ་ལས། རབ་འབྱོར་ཡང་དག་པའི་དོན་ནི་སངས་རྒྱས་ཤེས་བྱ་སྟེ། ཞེས་དང༌། ཤེར་ཕྱིན་བདུན་བརྒྱ་བའི་འགྲེལ་བ་སློབ་དཔོན་བི་མ་ལ་མི་དྲས་མཛད་པ་ལས། ཆོས་ཀྱི་དབྱིངས་ཉིད་བཅོམ་ལྡན་འདས་ཡིན་ཏེ། ཞེས་སོགས་རྫོགས༵་ལྡ༵ན་ཆོས༵་མཆོག༵་ཁྱད༵་པར༵་དུ་འཕག༵ས་པའི་ལུང་དེ་རྣམ༵ས་སུ༵་ཆོ༵ས་དབྱིངས༵་དེ༵་བཞིན༵་ཉིད༵་ལ༵་མཐར༵་ཐུག༵་གི༵་ཤེར༵་ཕྱིན༵་ཟབ༵་མོར༵་གསུང༵ས་པ༵་གང༵་ཡི༵ན་པ་དེ་རྣམས༵། རྟག༵་པ༵་འདུས༵་མ༵་བྱས༵་ཀྱི༵་རང་བྱུང་གི་ཡེ༵་ཤེས༵་ལ་དགོངས་པ་ད༵ང༌། སྟོང༵་བ༵་ཆེན༵་པོ༵་འགྱུར༵་བ་མེད༵་པ་དོན་དམ་པའི་ཡི་གེ་ཨ་ཨི་རི་ཨུ་ལི་ལྔ༵་དང༵་ནི༵། རྟག༵་པ༵་འདུས༵་མ༵་བྱས༵་ཀྱི༵་མི་བསྐྱོད་པ། དོན་ཡོད་གྲུབ་པ། རིན་ཆེན་འབྱུང་ལྡན། སྣང་བ་མཐའ་ཡས། རྣམ་པར་སྣང་མཛད་སྟེ། རྒྱལ་༵བ༵་རིགས་ལྔ༵་དང༌། རྟག༵་བརྟན༵་ཐེར༵་ཟུག༵་གཡུང༵་དྲུང༵་གི་རྡོ་རྗེ་དབྱིངས་ཀྱི་དབང་ཕྱུག་མ། སྤྱན་མ། མཱ་མ་ཀཱི། གོས་དཀར་མོ། སྒྲོལ་མ་སྟེ། རིག༵་མ༵་ལྔ༵་དང༌། སང༵ས་རྒྱས༵་ལྔ༵་བདག༵་དང༌། སྐུ་རྡོ་རྗེ་དབྱིངས་ཀྱི་རྣལ་འབྱོར་སྤྲུལ་བའི་སྐུ་དང༌། གསུང་རྡོ་རྗེ་སྔགས་ཀྱི་རྣལ་འབྱོར་ལོངས་སྤྱོད་རྫོགས་སྐུ་དང༌། ཐུགས་རྡོ་རྗེ་ཆོས་ཀྱི་རྣལ་འབྱོར་གྱི་སྐུ་དང་ཡེ་ཤེས་རྡོ་རྗེ་དག་པའི་རྣལ་འབྱོར་ངོ་བོ་ཉིད་སྐུ་དང༌། ཡེ་ཤེས་ཀྱི་སྐུ་སྟེ་སངས༵་རྒྱས༵་སྐུ༵་ལྔ་༵དང༵༌། ཆོས་ཅན་བརྟན་གཡོ་ཀུན་ལ་ཁྱབ༵་པའི་བད༵ག་པོ་རང་བྱུང་གི་ཡེ༵་ཤེས༵་ལྔ༵་ཡི༵་བདག༵་ཉིད་དང༵་ནི༵། རང་བྱུང་ཡེ་ཤེས་ལྔ་ལ་ཐབས་ཤེས་ཀྱིས་ཕྱེ་བའི་ཡེ་ཤེས༵་བཅུ༷་རྣམ༵་པར་དག༵་པའི་བདག་༵ལ༵་དགོང༵ས་པ༵་ཡིན༵་ཞེས་པ་སྟེ། འདི་ཉིད་ཀྱི་འགྲེལ་བ་ལས། རྫོགས་ལྡན་གྱི་ལུང་དེ་རྣམས་ཤིན་ཏུ་མང་པོས་གནོད་པ་ཆེན་པོ་འབབ་པའི་ཕྱིར། ལྟ་ངན་དེ་དག་དོར་ནས་རྟག་པ་དང་འདུས་མ་བྱས་ཀྱི་ཡེ་ཤེས་སྐད་ཅིག་གཅིག་དང་དུ་མ་དང་བྲལ་བའི་ཡེ་ཤེས་དང༌། དབྱིངས་རིག་དབྱེར་མེད་པའི་ཡེ་ཤེས་ལ་དད་ཅིང་གུས་པར་མཛད་ན་རྫོགས་ལྡན་གྱི་དགོངས་པ་དང་མཐུན་པར་གདའ་བས་དེ་ཁོ་ན་བཞིན་མཛད་པར་ཞུ། ཆོས་དབྱིངས་དེ་བཞིན་ཉིད་ལ་མཐར་ཐུག་གི་ཤེར་ཕྱིན་ཟབ་མོར་གསུངས་པ་ཤིན་ཏུ་མང་པོ་གང་ཡིན་པ་དེ་རྣམས་ཀྱང་རྟག་པ་འདུས་མ་བྱས་ཀྱི་ཡེ་ཤེས་ནས་ཤེས་བཅུ་རྣམ་དག་དག་པའི་བདག་གི་བར་ལ་དགོངས་པ་ཡིན་པས། དེ་ལྟར་རྟོགས་ན་རྫོགས་ལྡན་དང་མཐུན་པར་རྟོགས་པ་ལེགས་པའི་ཕྱིར། དེ་བཞིན་དགོངས་པར་མཛད་དུ་གསོལ། ཞེས་གསུངས་པའི་ཕྱིར་རོ། །དགུ་པ་ལྟ་ངན་གྱི་འདོད་ལུགས་བརྗོད་དེ་ལྟ་བའི་སྙིགས་མ་བདོ་བར་བསྟན་པ་ནི། གསུམ་ལྡན་མར་བཅད་དེ་སྐད་མི་སྨྲ་སྟེ། །ཤེས་རབ་གང་ཡིན་འདུས་བྱས་དངོས་པོ་ཡིན། །དེ་ཕྱིར་ཤེར་ཕྱིན་ཟབ་མོ་མཐར་ཐུག་ཀྱང༌། །འདུས་བྱས་མི་རྟག་སྐད་ཅིག་མར་ཡང་འདོད། །དེའི་ཀྱང་ལྟ་བའི་སྙིགས་མ་བདོ་བར་འགྱུར། །རྒྱུ་ལ་སྐྱེད་བྱེད་དང་ནི་བྲལ་བྱེད་ཀྱི། །རྒྱལ་ཁམས་གཉིས་སུ་འབྱེད་པ་མི་ཤེས་པར། །རྒྱུ་རྣམས་ཐམས་ཅད་སྐྱེད་བྱེད་ཁོ་ནར་འདོད། །འབྲས་བུ་ལ་ཡང་སྐྱེད་འབྲས་བྲལ་འབྲས་ཀྱི། །རྒྱལ་ཁམས་གཉིས་སུ་འབྱེད་པ་མི་ཤེསཔ། །འབྲས་བུ་གང་ཡིན་བསྐྱེད་འབྲས་ཁོ་ནར་འདོད། །དེ་ཕྱིར་རྟག་པའི་རྒྱུ་འབྲས་མི་འདོད་ཅིང། །འདུས་མ་བྱས་ཀྱི་རྒྱུ་འབྲས་མི་འདོད་ལ། །རྒྱུ་འབྲས་ངོ་བོ་གཅིག་པ་མི་འདོད་ཅིང༌། །གཞི་འབྲས་ངོ་བོ་གཅིག་པའང་མི་འདོད་ལ། །རྒྱུ་འབྲས་གཞན་མཆོག་ཕ་རོལ་མི་འདོད་པའང། །གསུམ་ལྡན་མར་བཅད་སྐྱོན་ཅན་བསླད་པའི་ལུགས། །རྩ་བར། གསུམ་ལྡན་མར་བཅད་དེ་སྐད་མི་སྨྲ་སྟེ། །ཞེས་པ་ནས། བསླད་པའི་ལུགས། ཞེས་པའི་བར་ཤོ་ལོ་ཀ་བཞི་དང་རྐང་བ་གཅིག་བྱུང༌། དེའི་ཚིག་དོན་ནི། གསུམ༵་ལྡན༵་མར༵་བཅ༵ད་རྣམས་ཀྱིས་ཆོས་དབྱིངས་ཤེར་ཕྱིན་ཟབ་མོར་གསུངས་པའི་དགོངས་པ་དེ༵་སྐད༵་མི༵་སྨྲ༵་སྟེ༵། དེའི་ལུགས་ལ་ཤེས༵་རབ༵་གང༵་ཡིན༵་པ་ཐམས་ཅད་འདུས༵་བྱས༵་ཀྱི་དངོས༵་པོ༷་ཡིན༵་པར་འདོད་པ་ཡིན་ལ། དེའི༵་ཕྱིར༷་ཤེར༵་ཕྱིན༵་ཟབ༵་མོ༵་མཐར༵་ཐུག༵་ཀྱང༵་འདུས༵་བྱས༵་མི༵་རྟག༵་པ་དང༌། སྐད༵་ཅིག༵་མར༵་ཡང༵་འདོད༵་དེ། དེས༵་ཀྱང༵་ལྟ༵་བའི༵་སྙིག༵ས་མ༵་བདོ༵་བར༵་འགྱུར༵་བར་བྱས་སོ། །ཡང་རྒྱུ༵་དེ་ལ༵་སྐྱེ༵ད་བྱེད༵་ཀྱི་རྒྱུ་དང༵་ནི༵་བྲལ༵་བྱེད༵་ཀྱི༵་རྒྱུའི་རྒྱལ༵་ཁམས༵་གཉིས༵་སུ༵་འབྱེད༵་པ༷་མི༵་ཤེས༵་པར༵་རྒྱུ༵་རྣམ༵ས་ཐམས༵་ཅད༷་སྐྱེད༵་བྱེད༵་ཁོ༵་ནར༵་འདོད༵་པ་དང། འབྲས༵་བུ༵་ལ༵་ཡང༵་སྐྱེད༵་བྱའི་འབྲ༵ས་བུུ་དང༌། བྲལ༵་འབྲས༵་ཀྱི༵་རྒྱལ༵་ཁམ༵ས་གཉི༵ས་སུ༵་འབྱེད༵་པ༵་མི༵་ཤེས༵་པར༵། འབྲས༵་བུ༵་ཞེས་གསུངས་པ་གང༵་ཡིན༵་བསྐྱེད༵་བྱའི་འབྲས༵་བུ་ཁོ༵་ན༵ར་འདོ༵ད་པ་དེ༵འི་ཕྱིར༷་རྟ༵ག་པའི༷་བྲལ་བྱེད་ཀྱི་རྒྱུ༵་དང་བྲལ་འབྲས༵་མི༷་འདོད༵་ཅི༵ང༌། འདུ༵ས་མ༵་བྱ༵ས་ཀྱི༵་དོན་དམ་པའི་རྒྱུ༵་འབྲ༵ས་མི༵་འདོ༵ད་ལ༵། དོན་དམ་ཀྱི་རྒྱུ༵་འབྲས༵་ངོ༵་བོ༵་གཅི༵ག་པ༵་མི༵་འདོད༵་ཅིང༵༌། གཞི༵་དང་འབྲས༵་བུ་ངོ༵་བོ༵་གཅི༵ག་པ༵འང༵་མི༵་འདོད༵་ལ༵། རྒྱུ༵་འབྲས༵་གཞན༵་མཆོ༵ག་ཕ༵་རོལ༵་དོན་དམ་རང་བྱུང་གི་ཡེ་ཤེས་སོགས་མི༵་འདོད༵་པ༵འང༵་གསུམ༵་ལྡན༵་མར༵་བཅད༵་སྐྱོན༵་ཅན༵་བསྲེ་སླད༵་ཞུགས་པའི༵་ལུགས༵་ཡིན་ནོ། ། རྫོགས་ལྡན་ལུགས་ལ་དེ་ལས་ཁྱད་འཕགས་ཡོད་པར་བསྟན་པ།བཅུ་བ་རྫོགས་ལྡན་ལུགས་ལ་དེ་ལས་ཁྱད་འཕགས་ཡོད་པར་བསྟན་པ་ནི། རྩ་བར། རྫོགས་ལྡན་ལ་ནི་དེ་དང་དེ་དག་ལས། །བཟློག་པའི་ཆོས་ལུགས་ཁྱད་པར་འཕགས་པ་ཡོད། །ཅེས་རྐང་བ་གཉིས་བྱུང༌། དེའི་ཚིག་དོན་ནི། སྤྱིར་རྫོགས་ལྡན་ཞེས་པ་བཀའ་འཁོར་ལོ་ཐ་མའི་མདོ་རྣམས་ནས་དོན་དམ་ཆོས་དབྱིངས་ཀྱི་གནས་ལུགས་རྫོགས་པར་སྟོན་པའི་ཕྱིར་རྫོགས་ལྡན་གྱི་ཆོས་དང༌། གཞན་རྣམས་ནས་ཆོས་དབྱིངས་ཀྱི་ཆ་ཤས་རེ་རེ་ཙམ་སྟོན་པ་ལ་རིམ་བཞིན་གསུམ་ལྡན་གཉིས་ལྡན་ཞེས་འཇོགཡང་ན་བསྟན་པ་ལ་ལྟོས་པའི་དབང་དུ་བྱས་ནས་སངས་རྒྱས་ཞལ་བཞུགས་པའི་གནས་སྐབས་སུ་ནི་རྫོགས་ལྡན་ཡིན་ལ་དེའི་དུས་སུ་ངེས་དོན་གྱི་ཆོས་འདི་ལ་གཙོ་བོར་སྤྱོད་པའི་ཕྱིར་དེ་སྐད་ཅེས་བྱའོ། །ཞེས་ཐེག་མཆོག་དབུ་མའི་ཟིན་བྲིས་ལས་གསུངས་ལ། དེ་འདྲའི་རྫོག༵ས་ལྡན༵་གྱི་ཆོས་ལ༵་ནི༵། གསུམ་ལྡན་སོགས་དེ༵་དང༵་དེ༵་དག༵་ལས༵་བཟློག༵་པའི༵་ཆོས༵་ལུག༵ས་ཁྱད༵་པར༵་འཕག༵ས་པ༵་ཡོད༵་དེ། འདི་ཉིད་ཀྱི་རང་འགྲེལ་ལས། རྒྱུ་དེ་ལ་སྐྱེད་བྱེད་ཀྱི་རྒྱུ་དང༌། བྲལ་བྱེད་ཀྱི་རྒྱུའི་རྒྱལ་ཁམས་གཉིས་དང༌། འབྲས་བུ་ལ་བསྐྱེད་པའི་འབྲས་བུ་དང༌། བྲལ་བའི་འབྲས་བུའི་རྒྱལ་ཁམས་གཉིས་སུ་གནས་ཡོད་ཅིང་འདུས་མ་བྱས་ཀྱི་རྒྱུ་འབྲས་ཟབ་མོ་དང༌། རྟག་ཅིང་བརྟན་པའི་རྒྱུ་འབྲས་ཟབ་མོ་དང༌། རྒྱུ་འབྲས་ངོ་བོ་གཅིག་པ་དང༌། གཞི་འབྲས་ངོ་བོ་གཅིག་པ་དང༌། རྒྱུ་འབྲས་གཞན་མཆོག་ཕ་རོལ་དམ་པ་དང་པོའི་སངས་རྒྱས་ཀྱི་རྒྱུ་འབྲས་ཀྱང་ཡོད་དོ། །དེ་ལ་འདུས་མ་བྱས་སུ་གཏོགས་པའི་རྒྱུ་འབྲས་ནི། །རྒྱུ་འབྲས་གཞན་དོན་དམ་ཆོས་ཉིད་ཀྱི་རྒྱུ་འབྲས་ཏེ། ཞེས་པ་ནས། རང་སྟོང་དང་རྟེན་འབྲེལ་གྱི་ཆོས་ནི་འགའ་ཙམ་ཡང་འདྲེས་པ་མེད་ལ། ཀུན་བཏགས་ཐམས་ཅད་དང་བྲལ་བའི་གཞི་འགྱུར་མེད་ཡོངས་གྲུབ་བཅོས་མ་གློ་བུར་བ་ཐམས་ཅད་དང་བྲལ་བའི་གཞི་རང་བཞིན་གཉུག་མ་མཐའ་ཐམས་ཅད་དང་བྲལ་བའི་གཞི་དབུས་མ་བར་མ་ཕུང་བོ་གསུམ་པ་རྡོ་རྗེ་སེམས་དཔའ་མ་ནིང་གི་གོ་འཕང་འགལ་འདུས་སྐྱོན་མེད་འཇིག་རྟེན་དཔེ་ལས་འདས་ཤིང། དཔེར་བྱ་ཀུན་ལས་འདས་པ་བསམ་གྱི་མི་ཁྱབ་པའི་དབྱིངས་རིག་དབྱེར་མེད་པའི་ཁྱབ་བདག་དུ་མ་རོ་གཅིག་ནི་རྒྱུ་འབྲས་དབྱེར་མེད་ཀྱང་ཡིན་པར་རྫོགས་ལྡན་གྱི་ཆོས་དང་གང་ཟག་ལ་གྲགས་ཀྱང༌། གསུམ་ལྡན་མར་བཅད་ཀྱི་བློར་ཤོང་བ་དཀའ་འོ། །ཞེས་གསུངས་པའི་ཕྱིར་རོ། །སྐབས་འདིར་འདུས་མ་བྱས་པའི་རྒྱུ་འབྲས་སུ་གསུངས་པ་ནི། དོན་དམ་པའི་འགལ་འདུས་སྐྱོན་མེད་ཀྱི་རྒྱུ་འབྲས་ཀྱི་དབང་དུ་བྱས་ཀྱི། འདུས་མ་བྱས་དོན་དམ་ལ་རྒྱུ་འབྲས་མཚན་ཉིད་པ་མེད་དེ། དེ་ལ་རྒྱུ་རྐྱེན་གྱིས་གསར་དུ་བསྐྱེད་པའི་འབྲས་བུ་ནི་མེད་པའི་ཕྱིར་ཏེ། ཚོགས་ཆོས་བདེན་བཞི་གསལ་བ་ལས། དོན་དམ་པ་ཡོངས་གྲུབ་ཆོས་ཀྱི་དབྱིངས་ཤིན་ཏུ་རྣམ་པར་དག་པ་དེ་རྒྱུ་རྐྱེན་གྱིས་གསར་དུ་བསྐྱེད་པའི་འབྲས་བུར་ནི་ཡོད་པ་མ་ཡིན་ཏེ། ནམ་ཡང་གཞན་དུ་མི་འགྱུར་ཞིང་འདུས་མ་བྱས་པའི་རང་བཞིན་ཡིན་པའི་ཕྱིར། ཞེས་དང༌། གཞན་སྟོང་སྙིང་པོ་ལས། ལམ་ཡང་དེའི་བྲལ་རྒྱུ་ཞེས་རྒྱུ་འབྲས་བཏགས་པ་ཡིན་གྱི་དངོས་མ་ཡིན་ནོ། །ཞེས་དང༌། ཆོས་རྣམ་འབྱེད་ལས། ཡང་ཁ་ཅིག་དོན་དམ་གཞན་སྟོང་རྟེན་འབྲེལ་ལས་འདས་ན་ལས་རྒྱུ་འབྲས་དོན་ལ་མི་བདེན་པར་འགྱུར་ཏེ། དེ་ཡང་ལེགས་པར་ཕྱེ་སྟེ་བཤད་པར་བྱའོ། །དེ་ལ་ལས་རྒྱུ་འབྲས་དོན་དམ་གྱི་དོན་ལ་མི་བདེན་པར་འགྱུར་རོ་ཞེ་ན་འདོད་པ་ཁོ་ན་སྟེ། དོན་དམ་ནི་འདུས་མ་བྱས་ཡིན་པས་རྒྱུ་འབྲས་ལས་འདས་པར་ཡང་གསུངས་པའི་ཕྱིར་རོ། །ཞེས་དང༌། ཐེག་མཆོག་དབུ་མ་ལས། དོན་དམ་ལ་ནི་རྟེན་འབྲེལ་ནམ་ཡང་མེད། །དེ་ལ་རྒྱུ་འབྲས་དང་ནི་རྣམ་བཞག་བྲལ། །ཞེས་དང༌། དེའི་ཟིན་བྲིས་ལས། རང་བཞིན་འོད་གསལ་དེ་ལ་ནི། རྒྱུ་འབྲས་བསྐྱེད་བྱ་སྐྱེད་བྱེད་ཀྱི་རྟེན་འབྲེལ་དང༌། རྣམ་པར་བཞག་བྱ་འཇོག་བྱེད་ཀྱི་རྟེན་འབྲེལ་དང་བྲལ་བའི་ཕྱིར། ཞེས་གསུངས་པའི་ཕྱིར་རོ། །ཡང་ཀུན་རྫོབ་ཀྱི་རྒྱུ་འབྲས་ནི། ནམ་ཡང་རྟག་པར་མི་རུང་བ་དཔལ་ཆོས་ཀྱི་གྲགས་པའི་རྣམ་འགྲེལ་སོགས་ལས་ལེགས་པར་བཤད་པ་ལྟར་རོ། །བཅུ་གཅིག་པ་ཀུན་གཞིའི་རྣམ་བཞག་བསྟན་པ་ལ། རྫོགས་ལྡན་གྱི་ལུགས་བསྟན་པ། སྐྱོན་ཅན་གྱི་འདོད་པ་བསྟན་པ། ཀུན་གཞིའི་ཡེ་ཤེས་མདོ་སྔགས་ཀྱི་ངེས་དོན་མཐར་ཐུག་ཡིན་པར་བསྟན་པ། དེ་ལྟར་མ་རྟོགས་པའི་སྐྱོན་བསྟན་པ། ཀུན་གཞི་གཉིས་ཀྱི་ཁྱད་པར་མི་འདྲ་བས་ལེགས་པར་འབྱེད་དགོས་པར་བསྟན་པ། དེ་གཉིས་གཅིག་ཏུ་བསྲེས་པའི་ཉེས་དམིགས་བསྟན་པ། སྦྱང་གཞི་སོགས་ཆོས་དཔེ་དང་བཅས་ཏེ་བསྟན་པ། སྦྱང་བྱ་སྦྱང་གཞི་གཅིག་ཡིན་ན་ཧ་ཅང་ཐལ་ཆེས་པའི་སྐྱོན་བསྟན་པ་དང་བརྒྱད། དང་པོ་རྫོགས་ལྡན་གྱི་ལུགས་བསྟན་པ་ནི། རྫོགས་ལྡན་ལ་ནི་དེ་དང་དེ་དག་ལས། །བཟློག་པའི་ཆོས་ལུགས་ཁྱད་པར་འཕགས་པ་ཡོད། །ཀུན་གཞི་ལ་ཡང་རྣམ་ཤེས་ཡེ་ཤེས་དང༌། །ཀུན་རྫོབ་དོན་དམ་ཆོས་དང་ཆོས་ཉིད་དང༌། །འདུས་བྱས་འདུས་མ་བྱས་སུ་འབྱེད་པ་དང༌། །སྦྱོང་བྱ་དང་ནི་སྦྱང་གཞིར་འབྱེད་པ་དང། །གློ་བུར་བ་དང་གཉུག་མར་འབྱེད་པ་དང༌། །བཅོས་མ་རང་བཞིན་འཁྲུལ་ལུགས་གཤིས་ལུགས་དང༌། །ཤུན་པ་སྙིང་པོ་མི་རྟག་རྟག་པ་དང༌། །མཐའ་དང་དབུས་སུ་འབྱེད་པ་ལ་སོགས་པའི། །རྣམ་བཞག་ལེགས་པ་རྫོགས་ལྡན་ལུགས་ལ་ཡོད། །རྩ་བར། ཀུན་གཞི་ལའང་རྣམ་ཤེས་ཡེ་ཤེས་དང༌། །ཞེས་པ་ནས། ལུགས་ལ་ཡོད། ཅེས་པའི་བར་ཤོ་ལོ་ཀ་གཉིས་དང་རྐང་བ་གཅིག་བྱུང༌། དེའི་ཚིག་དོན་ནི། ཀུན༵་གཞི༵་དེ་ལ༵་ཡང༵་དབྱེ་བའི་ཚུལ་དུ་མ་ཡོད་དེ། ཀུན་གཞིའི་རྣམ༵་ཤེས༵་དང་ཡེ༵་ཤེས༵་གཉིས་སུ་འབྱེད་པ་དང༷༌། ཀུན༵་རྫོ༵བ་ཀྱི་ཀུན་གཞི་དང༵༌། དོ༵ན་ད༵མ་གྱི་ཀུན་གཞི་གཉིས་དང༌། ཆོ༵ས་ཅན་རྣམ་ཤེས་ཀྱི་ཀུན་གཞི་དང༵༌། ཆོས༵་ཉིད༵་ཡེ་ཤེས་ཀྱི་ཀུན་གཞི་གཉིས་དང༵༌། འདུས༵་བྱས༵་དང༌། འདུས༵་མ་༵བྱ༵ས་གཉིས་སུ༵་འབྱེད༵་པ༵་དང༵༌། སྦྱང༵་བྱ༵་ཀུན་གཞིའི་རྣམ་ཤེས་དང༵་ནི༵་སྦྱང༵་གཞིར༵་ཀུན་གཞིའི་ཡེ་ཤེས་འབྱེད༵་པ༵་དང༵༌། གློ༵་བུར༵་བ༵་དང༵༌། གཉུག༵་མར༵་འབྱེད༵་པ༵་དང༵༌། བཅོས༵་མ༵་དང་རང༵་བཞིན༵་གཉིས་སུ་འབྱེད་པ་དང༌། འཁྲུལ༵་ལུག༵ས་གཤི༵ས་ལུགས༵་གཉིས་སུ་འབྱེད་པ་དང༵༌། ཤུན༵་པ༵་སྙིང༵་པོ༵་གཉིས་སུ་འབྱེད་པ་དང༌། མི་༵རྟག༵་པ་དང་རྟག༵་པ༵་གཉིས་སུ་འབྱེད་པ་དང༵༌། མཐའ༵་དང༵་དབུས༵་སུ༵་འབྱེད༵་པ༵་ལ༵་སོག༵ས་པའི༷་ཀུན་གཞིའི་རྣམ༵་དབྱེ་བཞག༵་ཚུལ་ལེགས༵་པ༵་ནི་རྫོག༵ས་ལྡན༵་གྱི་ལུག༵ས་ལ༵་ཡོད༵་དེ། རྒྱུད་བླ་ཐོགས་འགྲེལ་དུ་མདོ་དྲངས་པ་ལས། ཐོག་མ་མེད་དུས་ཅན་གྱི་དབྱིངས། །ཆོས་རྣམས་ཀུན་གྱི་གནས་ཡིན་ཏེ། །དེ་ཡོད་པས་ན་འགྲོ་ཀུན་དང༌། །མྱ་ངན་འདས་པའང་ཐོབ་པར་འགྱུར། །ཞེས་དང༌། རྒྱན་སྡུག་པོ་བཀོད་པའི་མདོ་ལས། ས་རྣམས་སྣ་ཚོགས་ཀུན་གཞི་སྟེ། །བདེ་གཤེགས་སྙིང་པོ་དགེ་བའང་དེ། །སྙིང་པོ་དེ་ལ་ཀུན་གཞིའི་སྒྲས། །དེ་བཞིན་གཤེགས་རྣམས་སྟོན་པར་མཛད། །སྙིང་པོ་ཀུན་གཞིར་བསྒྲགས་པ་ཡང༌། །བློ་ཞན་རྣམས་ཀྱིས་མི་ཤེས་སོ། །ཞེས་དང༌། ཀུན་གཞི་སྙིང་པོ་བསྒྲགས་པ་ནི། །རྟོག་པའི་སེམས་ཀྱི་ཡུལ་མ་ཡིན། །རང་བཞིན་རྣམ་པར་བརྟགས་པ་ན། །བརྟག་པར་ནུས་པ་མ་ཡིན་དང༌། །ཡོངས་སུ་གྲུབ་པའི་རང་བཞིན་ཡང༌། །རྣལ་འབྱོར་ཐུབ་ཅན་རྟག་ཏུ་མཐོང༌། །ཞེས་དང༌། དགོངས་འགྲེལ་ལས། ལེན་པའི་རྣམ་པར་ཤེས་པ་ཟབ་ཅིང་ཕྲ། །ས་བོན་ཐམས་ཅད་ཆུ་བོའི་རྒྱུན་བཞིན་འབབ། །བདག་ཏུ་རྟོག་པར་གྱུར་ན་མི་རུང་ཞེས། །འདི་ནི་བྱིས་པ་རྣམས་ལ་ངས་མ་བསྟན། །ཞེས་གསུངས་པའི་ཕྱིར། ཆོས་མངོན་པའི་མདོའི་ལུང་དེ་ཐེག་བསྡུས་སུ་ཀུན་གཞི་རྣམ་ཤེས་སྒྲུབ་བྱེད་དུ་བཀོད་པ་དང༌། རྒྱུད་བླ་ཐོགས་འགྲེལ་དུ་ཆོས་དབྱིངས་སམ་ཀུན་གཞི་ཡེ་ཤེས་སྒྲུབ་བྱེད་དུ་བཀོད་པ་གཉིས་ཀ་མི་འགལ་ཏེ། གསུང་གཅིག་ཉིད་དུ་གསུང་ན་ཡང༌། །དུ་མ་ཉིད་དུ་སོ་སོར་གོ །ཞེས་པ་ལྟར་དེས་གཉིས་ཀ་སྟོན་པར་ས་བཟང་གི་ཀུན་བཏུས་འགྲེལ་བར་གསུངས་སོ། །འདིར་ཀུན་གཞི་རྣམ་ཤེས་དང་ཡེ་ཤེས་གཉིས་ཡོད་པའི་སྔ་མའི་མཚན་ཉིད་སོགས་སློབ་དཔོན་དབྱིག་གཉེན་གྱི་སུམ་ཅུ་པ་ལས་གསུངས་པ་འདི་ལྟ་སྟེ། ཇི་སྐད་དུ། དེ་ལ་ཀུན་གཞི་རྣམ་ཤེས་ནི། །རྣམ་སྨིན་ས་བོན་ཐམས་ཅད་པ། །དེ་ནི་ལེན་པ་དག་དང་གནས། །རྣམ་པར་རིག་པ་མི་རིག་པ། །རྟག་ཏུ་རེག་དང་ཡིད་བྱེད་པ། །རིག་དང་འདུ་ཤེས་སེམས་པར་ལྡན། །དེ་ལ་ཚོར་བ་བཏང་སྙོམས་ཏེ། །དེ་ནི་མ་སྒྲིབ་ལུང་མ་བསྟན། །རེག་ལ་སོགས་པ་དེ་བཞིན་ནོ། །དེ་ནི་རྒྱུན་འབབ་ཆུ་བོ་བཞིན། །དགྲ་བཅོམ་ཉིད་ནི་དེ་བཟློག་གོ །ཞེས་གསུངས་ཤིང༌། དེའི་ཚིག་དོན་དང་ཀུན་གཞིའི་རྣམ་ཤེས་ཀྱི་རྣམ་བཞག་རྒྱས་པར་ཐེག་མཆོག་དབུ་མའི་རབ་བྱེད་བཞི་བའི་ཟིན་བྲིས་དང༌། ས་བཟང་མ་ཏི་པཎ་ཆེན་གྱི་ཀུན་བཏུས་འགྲེལ་བ་ལས་ཤེས་པར་བྱའོ། །ཀུན་གཞི་ཡེ་ཤེས་ནི། གཞི་འབྲས་དབྱེར་མེད་དུ་བཞུགས་པའི་གཞི་དབྱིངས་དོན་དམ་པའི་ཡེ་ཤེས་དེ་ཡིན་ལ། དེ་ལ་ཀུན་གཞི་གསུངས་བའི་རྒྱུ་མཚན་ནི། ཐེག་མཆོག་དབུ་མ་ལས། འཁོར་འདས་ཀུན་གྱི་གཞི་ཡིན་དོན་དམ་ཕྱིར། །ཀུན་གཞི་ཡེ་ཤེས་ཉིད་དུ་དམ་པའི་དགོངས། །ཞེས་དང༌། དེའི་ཟིན་བྲིས་ལས། མདོ་སྡེ་མང་པོ་ལས་ཀུན་གཞི་ཡེ་ཤེས་གསུངས་པ་དེ་ཅི་ཡིན་སྙམ་ན། དེ་ནི་དོན་དམ་དབྱིངས་ཉིད་ཡིན་ཏེ་ཀུན་གཞི་ཡེ་ཤེས་ཀྱི་དོན་ཚང་བའི་ཕྱིར། དེ་ཡང་དོན་དམ་དབྱིངས་དེ་ཀུན་གཞི་ཡིན་ཏེ། འཁོར་འདས་ཀུན་གྱི་གཞི་ཡིན་པའི་ཕྱིར། ཡེ་ཤེས་ཡིན་ཏེ། དོན་དམ་བདེན་པ་ཡིན་པའི་ཕྱིར། དེས་ན་དབྱིངས་ཉིད་ཀུན་གཞི་ཡེ་ཤེས་སུ་སྐྱེས་བུ་དམ་པ་རྣམས་ཀྱི་དགོངས་སོ། །ཞེས་དང༌། འོ་ན་དོན་དམ་དབྱིངས་དེ་འཁོར་འདས་ཀུན་གྱི་གཞི་ཡིན་ན། མྱ་ངན་ལས་འདས་པའི་གཞི་ཡིན་ཚུལ་ཅི་ལྟ་བུ་ཞེ་ན། ཆོས་དབྱིངས་རང་གི་ངོ་བོ་དོན་དམ་པའི་མྱ་ངན་ལས་འདས་པ་ཡིན་ཞིང༌། དེ་ལ་དམིགས་ཏེ། ལམ་ཉམས་སུ་བླངས་པ་ལ་བརྟེན་ནས་ཞི་བ་མྱ་ངན་ལས་འདས་པ་ཐོབ་པར་འགྱུར་བ་ཡིན་པས་ན། མྱ་ངན་ལས་འདས་པའི་གཞི་ཡིན་ཚུལ་དེ་ལྟར་ཡིན་ནོ། །འཁོར་བའི་གཞི་ཡིན་ཚུལ་ནི། དོན་དམ་དབྱིངས་དེ་འཁོར་བའི་རྒྱུ་དངོས་མ་ཡིན་ཡང༌། དཔེར་ན་གསེར་ཡོད་ན་གཡའ་ཡང་འབྱུང་བ་དང་སྐྱེས་བུ་ལུས་ཀྱིས་དངོས་སུ་བསྐྱེད་པ་མ་ཡིན་ཡང་ལུས་ཡོད་པའི་རྟེན་འབྲེལ་ལས་ལུས་དེའི་གྲིབ་མ་འབྱུང་བ་ལྟར་ཐོག་མ་དང་ཐ་མ་མེད་པའི་འཁོར་བ་ཡང་དབྱིངས་དེ་ཡོད་པའི་མཐུ་ལས་ཤར་རོ། །ཞེས་གསུངས་པའི་ཕྱིར་རོ། །དེ་ལྟ་བུའི་ཀུན་གཞི་ཡེ་ཤེས་ནི། དཔལ་དུས་ཀྱི་འཁོར་ལོའི་རྒྱུད་སོགས་ལས། གཉུག་སེམས་ཕྲ་མོའམ་གཉུག་མའི་ཡེ་ཤེས་གསུངས་པ་འདི་གཉིས་འདྲ་བ་ཡིན་ལ། སྔ་འགྱུར་རྙིང་མའི་བཞེད་པའི་གཉུག་སེམས་དང་འདི་གཉིས་ཁྱད་པར་ཅུང་ཟད་ཀྱང་མེད་སྙམ། འོན་ཀྱང་ཕྱིས་སུ་རྙིང་མའི་མཁས་དབང་གི་ཁྲོད་ན་གཉུག་སེམས་འདུས་བྱས་སུ་ཁས་ལེན་མཁན་བྱུང་བ་འདྲའོ། །ཡང་དགེ་ལུགས་ཀྱི་མཁས་དབང་རྣམས་ཀྱིས་དགོངས་འགྲེལ་གྱི་མདོ་སོགས་ལས་ཀུན་གཞི་གསུངས་པ་སྒྲ་ཇི་བཞིན་མིན་པར་སྟོང་ཉིད་ལ་དགོངས། ཞེས་པ་དང༌། རྒྱུད་སྡེ་རྣམས་སུ་ཀུན་གཞི་གསུངས་པ་རླུང་ལ་ཀུན་གཞི་ཞེས་བཏགས་པར་བཞེད། འོན་ཀྱང་གསང་འདུས་སྐབས་སུ་རྒྱུ་ལུས་གཉུག་སེམས་ཀྱི་སྟེང་ནས་སྒྲུབ་པར་གསུངས་པས་གཉུག་སེམས་འདུས་བྱས་ཞིག་བཞེད་དོ། །གཉིས་པ་སྐྱོན་ཅན་གྱི་འདོད་པ་བསྟན་པ་ནི། གསུམ་ལྡན་མར་བཅད་དེ་འདྲའི་ཆོས་སྐད་ནུབ། །ཀུན་གཞི་གང་ཡིན་མ་སྒྲིབས་ལུང་མ་བསྟན། །ལེན་པའི་རྣམ་ཤེས་ཉིད་ལ་འདོད་པ་བྱུང༌། །དེས་ཀྱང་ལྟ་བའི་སྙིགས་མ་བདོ་བར་བྱས། །རྩ་བར། གསུམ་ལྡན་མར་བཅད། ཅེས་པ་ནས་སྙིགས་མ་བདོ་བར་བྱས། ཞེས་པའི་བར་ཤོ་ལོ་ཀ་གཅིག་བྱུང༌། དེའི་ཚིག་དོན་ནི། གསུ༵མ་ལྡ༵ན་མར༵་བཅད༵་ཀྱི་ལུགས་ལ་དེ༵་འདྲའི༵་རྫོགས་ལྡན་གྱི་ཆོས༵་སྐད༵་ནུབ༵་ནས་ཀུན་གཞི་ཡེ་ཤེས་ཁས་མི་ལེན་པར་ཀུན༵་གཞི༵་གང༵་ཡི༵ན་པ་དེ་ནི་མ༵་སྒྲིབ༵་ལུང༵་མ༵་བསྟ༵ན་གྱི་ལེན༵་པའི༵་རྣམ༵་པར་ཤེས༵་པ་ཉིད༵་ལ༵་འདོད༵་པ༵་བྱུང༵་བ་དེས༵་ཀྱང༵་ལྟ༵་བའི༵་སྙིག༵ས་མ༵་བདོ༵་བར༵་བྱ༵ས་པ་ཡིན་ནོ། །ཡང་ཁ་ཅིག་ཀུན་བཏུས་སོགས་ཀུན་གཞི་སྟོན་པའི་རྒྱུ་མཚན་གྱིས་སེམས་ཙམ་པའི་རང་གཞུང་ཡིན་ཟེར་ན་དེ་ཡང་མི་འཐད་དེ། རི་ཆོས་ངེས་དོན་རྒྱ་མཚོ་ལས། ཆོས་མངོན་པ་ཀུན་ལས་བཏུས་པ་ལ་སོགས་པར་ཀུན་གཞི་རྣམ་ཤེས་སྟོན་པའི་རྒྱུ་མཚན་ཀྱིས་སེམས་ཙམ་གྱི་རང་གཞུང་དུ་འདོད་པ་ཡང་འཁྲུལ་ཏེ། རྒྱུད་སྡེ་ཟབ་མོ་རྣམས་དང༌། སེམས་འགྲེལ་སྐོར་གསུམ་ལ་སོགས་པ་དབུ་མའི་གཞུང་ལུགས་མཐར་ཐུག་པ་རྣམས་སུ་ཡང་ཀུན་གཞི་རྣམ་ཤེས་ཡང་ནས་ཡང་དུ་བསྟན་པའི་ཕྱིར་རོ། །ཞེས་གསུངས་བའི་ཕྱིར་རོ། །གསུམ་པ་ཀུན་གཞི་ཡེ་ཤེས་དེ་མདོ་སྔགས་ཐམས་ཅད་ཀྱི་ངེས་དོན་མཐར་ཐུག་ཡིན་པར་བསྟན་པ་ནི། བདེ་གཤེགས་སྙིང་པོར་གསུངས་བའི་ཀུན་གཞི་དང༌། །ཟག་མེད་དགེ་བར་གསུངས་པའི་ཀུན་གཞི་དང༌། །ས་རྣམས་སྣ་ཚོགས་ཡིན་པའི་ཀུན་གཞི་དང༌། །རང་བཞིན་འོད་གསལ་ཡིན་པའི་ཀུན་གཞི་ནི། །འགྱུར་མེད་ཡོངས་གྲུབ་དབུ་མ་ཆེན་པོ་དང༌། །མྱང་འདས་ཆེན་པོ་ཕྱག་རྒྱ་ཆེན་པོ་དང༌། །བྱང་ཆུབ་ཆེན་པོ་ཨེ་ཝཾ་མཐར་ཐུག་དང། །དུས་འཁོར་མཐར་ཐུག་བདེ་དགྱེས་མཐར་ཐུག་དང༌། །གསང་འདུས་ལ་སོགས་ལྷ་སྔགས་རྒྱུད་ཀུན་དང༌། །དཀྱིལ་འཁོར་མཐར་ཐུག་ལ་སོགས་མཐར་ཐུག་ཀུན། །ཀུན་ནས་འདུས་པ་དུ་མ་རོ་གཅིག་དབྱིངས། །ཤེས་རབ་ཕ་རོལ་ཕྱིན་པའི་མཐའ་ལ་དགོངས། །དེ་ཉིད་དང་པོའི་སངས་རྒྱས་རིས་མེད་དང༌། །གདོད་ནས་གྲོལ་བའི་དེ་བཞིན་གཤེགས་པ་དང༌། །གཙང་བདག་བདེ་དང་རྟག་པའི་འགོག་བདེན་དང༌། །བདེན་དོན་བཅུ་གཉིས་དེ་ཉིད་བཅུ་དྲུག་དང༌། །རྡོ་རྗེ་སེམས་དཔའ་དོན་དམ་བྱང་ཆུབ་སེམས། །འདུས་མ་བྱས་ཀྱི་སྟོང་ཉིད་སྙིང་རྗེ་དང༌། །རྟག་ཅིང་བརྟན་པའི་ཐབས་ཤེས་དབྱེར་མེད་དང༌། །སངས་རྒྱས་ཀུན་བས་སྔར་སངས་རྒྱས་ཀྱང་ཡིན། །རྩ་བར། བདེ་གཤེགས་སྙིང་པོར་གསུངས་པའི་ཀུན་གཞི་དང༌། །ཞེས་པ་ནས། སངས་རྒྱས་ཀྱང་ཡིན་ཞེས་པའི་བར་ཤོ་ལོ་ཀ་ལྔ་བྱུང། དེའི་ཚིག་དོན་ནི། རྒྱན་སྡུག་པོ་བཀོད་པའི་མདོ་ལས། ས་རྣམས་སྣ་ཚོགས་ཀུན་གཞི་སྟེ། །བདེ་གཤེགས་སྙིང་པོའི་དགེ་བའང་དེ། །སྙིང་པོ་དེ་ལ་ཀུན་གཞི་སྒྲས། །དེ་བཞིན་གཤེགས་རྣམས་སྟོན་པར་མཛད། །ཅེས་དང༌། མདོ་སྡེ་ལང་ཀར་གཤེགས་པ་ལས། དེ་བཞིན་གཤེགས་པའི་སྙིང་པོ་དགེ །རྟོག་གེ་ཅན་གྱི་སྤྱོད་ཡུལ་མིན། །ཞེས་དང༌། སེམས་ནི་རང་བཞིན་འོད་གསལ་ཏེ། །དེ་བཞིན་གཤེགས་པའི་སྙིང་པོའི་དགེ །ཞེས་དང༌། དབུ་མ་བ་ཆེན་པོ་འཕགས་པ་ཐོགས་མེད་ཀྱི་ཞལ་སྔ་ནས་དོན་དམ་པའི་དགེ་བ་གང་ཞེ་ན། དེ་བཞིན་ཉིད་དེ་ཞེས་པ་ལ་སོགས་པ་རྣམས་སུ། བདེ༵་གཤེག༵ས་སྙིང༵་པོར༵་གསུ༵ངས་པའི༵་ཀུ༵ན་གཞི༵་དང༵༌། དོན་དམ་པའི་ཟག༵་མེད༵་དགེ༵་བར༵་གསུང༵ས་པའི༵་ཀུན༵་གཞི༵་དང༵༌། ས༵་རྣམ༵ས་སྣ༵་ཚོག༵ས་ཡི༵ན་པར་གསུངས་པའི༵་ཀུན༵་གཞི༵་དང༵༌། རང༵་བཞིན༵་འོད༵་གསལ༵་ཡིན༵་པར་གསུངས་པའི༵་ཀུན༷་གཞི༵་ནི༵། ལེན་པའི་རྣམ་ཤེས་རྣམས་དང་ས་བོན་ཐམས་ཅད་པའི་རྣམ་ཤེས་དང་རྩ་བའི་རྣམ་ཤེས་ལ་སོགས་པ་དང་མི་གཅིག་ཅིང༌། དེ་ནི་ནམ་ཡང་འགྱུར༵་བ་མེད༵་པའི་ཡོང༵ས་གྲུབ༵་དབུ༵་མ༵་ཆེན༵་པོ༵་དང༵༌། དྲི་མ་གདོད་ནས་ཟད་པའི་དོན་དམ་པའི་མྱང༵་འདས༵་ཆེན༵་པོ༵་དང༌། རྣམ་ཀུན་མཆོག་ལྡན་གྱི་སྟོང་གཟུགས་ཕྱག༵་རྒྱ༵་ཆེན༵་པོ༵་དང༵༌། མཐར་ཐུག་པའི་དོན་དམ་པའི་བྱང༵་ཆུབ༵་ཆེ༵ན་པོ༵་དང༌། དཔལ་རྡོ་རྗེ་ཕྲེང་བའི་རྒྱུད་ལས། ཨེ་ཝཾ་ཞེས་བྱའི་ཡི་གེ་གཉིས། །ཨེ་ནི་སྟོང་བ་ཉིད་དུ་གསུངས། །དེ་བཞིན་ཝཾ་ནི་ཐུགས་རྗེ་ཐབས། །ཞེས་གསུངས་པ་ལྟར་གྱི་བདེ་སྟོང་ངམ་ཨེ༵་ཝཾ༷་མཐར༵་ཐུག༵་པ་དང༵༌། རིགས་ལྡན་པད་དཀར་གྱི་དང་པོའི་རྒྱུད་འགྲེལ་ལས། དུས་ནི་འགྱུར་མེད་བདེ་ཡེ་ཤེས། །ཐབས་དང་སྙིང་རྗེའི་བདག་ཉིད་དོ། །འཁོར་ལོ་ཤེས་བྱའི་རྣམ་འགྲོ་དཔལ། །ཤེས་རབ་སྟོང་ཉིད་བདག་ཉིད་དོ། །ཞཻས་གསུངས་པ་ལྟར་གྱི་དུས༵་འཁོར༵་མཐར༵་ཐུག༵་དང༌། བདེ༵་དགྱེས༵་རྡོ་རྗེ་མཐར༵་ཐུག༵་དང༵༌། གས༵ང་འདུ༵ས་མཐར་ཐུག་ལ༵་སོགས༵་པའི་ལྷ༵་སྔག༵ས་རྒྱུད༵་ཀུན༵་དང༵༌། དཀྱིལ༵་འཁོ༵ར་མཐར༵་ཐུག༵་ལ༵་སོག༵ས་པ་མཐ༵ར་ཐུག༵་ཀུན༵། ཀུན༵་ནས༵་འདུ༵ས་པ༵་དོན་དམ་པའི་རྣམ་པ་དུ༵་མ༵་ངོ་བོ་དབྱེར་མེད་རོ༵་གཅི༵ག་པའི་དབྱིང༵ས་ཤེས༵་རབ༵་ཀྱི་ཕ༵་རོལ༵་ཏུ་ཕྱིན༵་པའི༵་མཐའ༵་ལ༵་དགོང༵ས་ནས་གསུངས་པ་དང༌། དེ་འདྲའི་དགོངས་པ་མཐར་ཐུག་པ་དེ༵་ཉི༵ད་ནི། དང༵་པོའི༵་སངས༵་རྒྱས༵་རིས༵་མེད༵་ཡིན་པ་དང༵༌། གདོད༵་ནས༵་སྒྲིབ་པ་ལས་གྲོལ༵་བའི༵་དེ༵་བཞིན༵་གཤེགས༵་པ༷་ཡིན་པ་དང༷༌། གཙང༵་བ་དང་དམ་པའི་བདག༵་དང་བདེ༵་ཆེན་དང༵་འགྱུར་མེད་རྟག༵་པའི༵་འགོ༵ག་བདེ༵ན་ཡིན་པ་དང༵༌། བདེ༵ན་དོན༵་བཅུ༵་གཉི༵ས་ཡིན་པ་དང༌། དེ༵་ཉི༵ད་བཅུ༵་དྲུག༵་ཡིན་པ་དང༵༌། རྡོ༵་རྗེ༵་སེམ༵ས་དཔའ༵་ཡིན་པ་དང༌། དོན༵་དམ༵་པའི་བྱ༵ང་ཆུ༵བ་གྱི་སེམ༵ས་ཡིན་པ་དང་འདུ༵ས་མ༵་བྱས༵་ཀྱི༵་སྟོང༵་ཉིད༵་སྙི༵ང་རྗེ༵་ཡིན་པ་དང༵༌། རྟག༵་ཅིང༵་བརྟན༵་པའི༵་ཐབ༵ས་ཤེས༵་དབྱེར༵་མེད༵་ཡིན་པ་དང༵༌། སངས༵་རྒྱ༵ས་ཀུན༵་བས༵་སྔར༵་སང༵ས་རྒྱས༵་ཀྱ༵ང་ཡིན༵་ཏེ། དེ་སྟོང་གཞི་དོན་དམ་པའི་རྣམ་པ་དུ་མ་དབྱེར་མེད་པའི་དེ་བཞིན་ཉིད་ཡིན་པའི་ཕྱིར་རོ། ། དེ་ལྟར་མ་རྟོགས་པའི་སྐྱོན་བསྟན་པ།བཞི་བ་དེ་ལྟར་མ་རྟོགས་པའི་སྐྱོན་བསྟན་པ་ནི། གསུམ་ལྡན་མར་བཅད་དེ་འདྲའི་རྣམ་བཞག་ནུབ། །དེས་ཀྱང་ལྟ་བའི་སྙིགས་མ་བདོ་བར་བྱས། །རྩ་བར། གསུམ་ལྡན་མར་བཅད། ཅེས་པ་ནས། བདོ་བར་བྱས་ཞེས་པའི་བར་རྐང་བ་གཉིས་བྱུང༌། དེའི་ཚིག་དོན་ནི། གསུ༵མ་ལྡན༵་མ༵ར་བཅ༵ད་ཀྱི་ལུགས་ལ་གོང་དུ་བཤད་པའི་དེ༵་འདྲའི༷་རྣ༵མ་བཞ༵ག་ཁྱད་འཕགས་རྣམས་ནུབ༵་པ་ཡིན་ལ་དེས༵་ཀྱང༵་ལྟ༵་བའི༵་སྙི༵གས་མ༵་བདོ༵་བར༵་བྱས༵་པ་ཡིན་ནོ། །ལྔ་བ་ཀུན་གཞི་གཉིས་ཀྱི་ཁྱད་པར་མི་འདྲ་བས་ལེགས་པར་འབྱེད་དགོས་པར་བསྟན་པ་ནི། རྫོགས་ལྡན་ཆོས་མཆོག་ཁྱད་འཕགས་རྣམས་སུ་ནི། །རྒྱུད་སྡེར་རྒྱུད་ཡི་རྒྱུད་ཅེས་གསུངས་པ་རྣམས། །བདེ་གཤེགས་སྙིང་པོ་ཀུན་གཞི་ཡེ་ཤེས་ལ། །དགོངས་པ་ཡིན་གྱི་ཀུན་གཞི་རྣམ་ཤེས་ལ། །དགོངས་པ་གཏན་ནས་མིན་ཏེ་གང་གི་ཕྱིར། །རྒྱུད་སྡེ་ཟབ་མོ་གང་ཡིན་ཆོས་ཀྱི་དབྱིངས། །དོན་དམ་འདུས་མ་བྱས་ལ་གསུངས་ཕྱིར་དང༌། །ཀུན་གཞི་རྣམ་ཤེས་ཡིན་ན་དོན་དམ་མིན། །རང་བཞིན་གཉུག་མ་འདུས་མ་བྱས་ཀྱང་མིན། །གཙང་བདག་བདེ་ཆེན་རྟག་པའི་མཆོག་ཀྱང་མིན། །རང་བཞིན་རིགས་དང་ངོ་བོ་ཉིད་སྐུའང་མིན། །ཡོངས་གྲུབ་དགུ་འམ་བཅུ་གཉིས་གང་ཡང་མིན། །དེ་རྣམས་མིན་ན་གཤིས་ལུགས་ཟབ་མོ་ཡི། །ལྷ་སྔགས་རྒྱུད་དང་དཀྱིལ་འཁོར་གང་ཡང་མིན། །གཞི་འབྲས་དབྱེར་མེད་རྒྱུད་ཀྱང་མ་ཡིན་ནོ། །དེ་རྣམས་མིན་ན་རང་བཞིན་འོད་གསལ་མིན། །རང་བཞིན་ལྷན་སྐྱེས་བདེ་བའང་མ་ཡིན་ལ། །དང་པོའི་སངསརྒྱས་སོགས་ཀྱང་མ་ཡིན་ལ། །རྒྱུ་ཡི་རྒྱུད་དང་འབྲས་བུའི་རྒྱུད་ཀྱང་མིན། །ཀུན་གཞི་རྣམ་ཤེས་རང་བཞིན་འོད་གསལ་དུ། །བཞེད་པ་རྣམས་ལ་བདག་ནི་མ་ཕོད་པས། །ཐལ་མོ་སྦྱར་ནས་གྲོསའདེབས་ཞུ་བ་འབུལ། །ཀུན་གཞི་རྣམ་ཤེས་མ་བསྒྲིབས་ལུང་མ་བསྟན། །གློ་བུར་དྲི་མས་བསྡུས་པ་ཡིན་ཕྱིར་དང༌། །རང་བཞིན་འོད་གསལ་དགེ་བ་ཡིན་ཕྱིར་དང༌། །དྲི་མ་གདོད་ནས་དག་པ་ཡིན་ཕྱིར་རོ། །ཀུན་གཞི་རྣམ་ཤེས་འདུས་བྱས་ཡིན་ཕྱིར་དང༌། །རང་བཞིན་འོད་གསལ་འདུས་མ་བྱས་ཡིན་ཕྱིར། །རྣམ་ཤེས་ཡིན་ན་རང་བཞིན་འོད་གསལ་མིན། །རྣམ་ཤེས་ཡིན་ན་རང་བྱུང་ཡེ་ཤེས་མིན། །རྣམ་ཤེས་ཡིན་ན་རྟག་བརྟན་ཐེར་ཟུག་མིན། །རྣམ་ཤེས་ཡིན་ན་བདེ་གཤེགས་སྙིང་པོ་མིན། །རྣམ་ཤེས་ཡིན་ན་དབུ་མ་ཆེན་པོ་མིན། །རྣམ་ཤེས་ཡིན་ན་ཕྱག་རྒྱ་ཆེན་པོ་མིན། །རྣམ་ཤེས་ཡིན་ན་མྱང་འདས་ཆེན་པོ་མིན། །རྣམ་ཤེས་ཡིན་ན་ལྷན་ཅིག་སྐྱེས་སྐུ་མིན། །རྣམ་ཤེས་ཡིན་ན་ཤེར་ཕྱིན་ཟབ་མོ་མིན། །རྣམ་ཤེས་ཡིན་ན་གཞན་སྟོང་ཟབ་མོ་མིན། །རྣམ་ཤེས་ཡིན་ན་ཡོངས་གྲུབ་ཐམས་ཅད་མིན། །དེ་རྣམས་མིན་ན་རྒྱུ་ཡི་རྒྱུད་ཀྱང་མིན། །རང་བཞིན་འོད་གསལ་ཡིན་ན་རྣམ་ཤེས་མིན། །རྣམ་ཤེས་ཡིན་ན་ཀུན་གཞི་ཡེ་ཤེས་མིན། །ཡེ་ཤེས་རྣམ་ཤེས་སྣང་མུན་ཇི་བཞིན་དང༌། །བདུད་རྩི་དང་ནི་དུག་བཞིན་གནས་པའི་ཕྱིར། །དེ་དག་གཞི་མཐུན་གཏན་ནས་མི་སྲིད་པས། །དེ་དག་གཅིག་ཏུ་བསྲེ་བར་མ་གྱུར་ཅིག །རྩ་བར། རྫོགས་ལྡན་ཆོས་མཆོག་ཁྱད་འཕགས་རྣམས་སུ་ནི། །ཞེས་པ་ནས། དེ་དག་གཅིག་ཏུ་བསྲེ་བར་མ་གྱུར་ཅིག། ཅེས་པའི་བར་ཤོ་ལོ་ཀ་བཅུ་གཅིག་དང་རྐང་བ་གཉིས་བྱུང༌། དེའི་ཚིག་དོན་ནི། ཡང་རྫོག༵ས་ལྡན༵་ཆོས༵་མཆོག༵་ཁྱད༵་པར་དུ་འཕགས༵་པ་རྣམ༵ས་སུ༵་ནི༵། དཔལ་གསང་བ་འདུས་པའི་རྒྱུད་ལས། རིགས་ནི་རྒྱུད་ཅེས་བྱ་བར་བཤད། །རྒྱུད་ནི་ཐོག་མ་ཞེས་བརྗོད་དེ། །མི་འཇིགས་སྐྱེ་བ་མེད་གང་ཡིན། །མགོན་པོ་དེ་ནི་ཡིན་པར་བཤད། །ཅེས་དང༌། རྒྱུད་ནི་རྒྱུན་ཆགས་སུ་བརྗོད་དེ། །ཞེས་དང༌། ཇི་སྐད་དུ། རྒྱུད༵་སྡེར་རྒྱུ༵་ཡི༵་བརྒྱུད༵་ཅེས༵་གསུང༵ས་པ༵་རྣམ༵ས་ནི། བདེ༵་གཤེགས༵་སྙིང༵་པོ༵་ཀུན༵་གཞི༵་ཡེ༵་ཤེས༵་ལ༵་དགོང༵ས་པ༵་ཡིན༵་གྱི༵་དེ་ལས་གཞན་ཀུན༵་གཞི༵་རྣམ༵་ཤེས༵་ལ༵་དགོང༵ས་པ༵་གཏ༵ན་ནས༵་མིན༵་ཏེ༵། རྒྱུ་མཚན་གང༵་གི༵་ཕྱིར༵་ཞེ་ན་རྒྱུ༵ད་སྡེ༵་ཟབ༵་མོ༵་གང༵་ཡིན༵་པ་རྣམས་སུ་ཆོས༵་ཀྱི༵་དབྱིང༵ས་དང༌། དོན༵་དམ༵་འདུས༵་མ༵་བྱས༵་པ་ལ༷་གསུང༵ས་པའི་ཕྱིར༵་དང༵༌། ཀུ༵ན་གཞི༵་རྣ༵མ་ཤེ༵ས་ཡི༵ན་ན༵་ནི་དོ༵ན་ད༵མ་མི༵ན་པ་དང༌། ར༵ང་བཞི༵ན་གཉུག༵་མ༵་དང་འདུས༵་མ༵་བྱས༵་ཀྱང༵་མིན༵་པ་དང༌། གཙང༵་བདག༵་བདེ༵་ཆེན༵་རྟག༵་པའི༵་མཆོག༵་རྣམས་ཀྱང༵་མིན༵་པ་དང༌། རང༵་བཞིན༵་གྱི་རིག༵ས་དང༵་དབྱིངས་ངོ༵་བོ༵་ཉིད༵་སྐུ༵འང༵་མིན༵་པ་དང༌། གོང་དུ་བཤད་ཟིན་པའི་ཡོང༵ས་གྲུབ༵་དགུ༵་འམ༵་ཡང་ན། ཡོངས་གྲུབ་བཅུ༵་གཉིས༵་གང༵་ཡང༵་མིན༵་པ་དང༌། དེ༵་རྣམ༵ས་མིན༵་ན༷་གཤི༵ས་ལུགས༵་ཟབ༵་མོ༵་ཡི༵་ལྷ༵་སྔགས༵་རྒྱུད༵་དང༵་དཀྱིལ༵་འཁོར༵་གང༵་ཡང༵་མིན༵་པ་དང་གཞི༵་འབྲ༵ས་དབྱེར༵་མེད༵་ཀྱི་རྒྱུ༵ད་ཀྱང༵་མ༵་ཡི༵ན་པར་འགྱུར་བ་ཡིན་ནོ༵། །ལྷ་སྔགས་སོགས་དེ༵་རྣམ༵ས་མིན༵་ན༵་རང༵་བཞིན༵་འོད༵་གསལ༵་མིན༵་པ་དང༌། རང༵་བཞིན༵་ལྷན༵་སྐྱེས༵་བདེ༵་བ༵འང༵་མ༵་ཡི༵ན་པར་འགྱུར་ལ༵། དང༵་བོའི༵་སང༵ས་རྒྱས༵་སོགས༵་ཀྱང༵་མ༵་ཡིན༵་པར་འགྱུར་བ་ཡིན་ནོ། །གཞིའམ་རྒྱུ༵་ཡི༵་རྒྱུད༵་དང༵་འབྲས༵་བུའི༵་རྒྱུད༵་ཀྱང༵་མིན༵་པར་འགྱུར་རོ། །དེས་ན་ཀུ༵ན་གཞི༵་རྣམ༵་ཤེས༵་རང༵་བཞི༵ན་འོད༵་གསལ༵་དུ༵་བཞེད༵་པ༵་རྣམ༵ས་ལ༵་ཆོས་རྗེ་རྟོན་པ་བཞི་ལྡན་བདག༵་ནི༵་མ༵་ཕོད༵་པས༵་ལག་ཐ༵ལ་མོ༵་སྦྱར༵་ནས༵་གྲོ༵ས་འདེ༵བས་པ་དང་ཞུ༵་བ༵་འབུལ༵་བ་ཡིན་ཞེས་པའོ། །ཀུན༵་གཞི༵་རྣམ༵་ཤེས༵་ནི་དབྱིག་གཉེན་གྱི་སུམ་ཅུ་པ་ལས། དེ་ནི་མ་སྒྲིབ་ལུང་མ་བསྟན། །ཞེས་གསུངས་པ་ལྟར་མ༷་སྒྲི༵བ་པ་ལུང༵་མ༷་བསྟ༵ན་དང༌། གློ༵་བུར༵་དྲི༵་མས༵་བསྡུས༵་པ༵་ཡིན༵་ཕྱིར༵་དང༵༌། ཀུན་གཞི་ཡེ་ཤེས་སམ་རང༵་བཞིན༵་འོད༵་གསལ༵་ནི་ལང་གཤེགས་ལས། སེམས་ནི་རང་བཞིན་འོད་གསལ་ཏེ། །དེ་བཞིན་གཤེགས་པའི་སྙིང་པོ་དགེ །ཞེས་གསུངས་པ་ལྟར་དགེ༵་བ༵་ཡིན༵་པའི་ཕྱིར༵་དང༵༌། གདོད་ནས་ཟད་པའི་ཟད་ཅེས་བྱ་ཞེས་པ་ལྟར། དྲི༵་མ༵་གདོ༵ད་ནས༵་དག༵་པ༵་ཡིན༵་པའི་ཕྱི༵ར་རོ༵། །ཀུན༵་གཞི༵་རྣམ༵་ཤེས༵་ནི་འཕགས་པ་ཀླུ་སྒྲུབ་ཀྱིས་བྱང་ཆུབ་སེམས་འགྲེལ་ལས། དེ་བཞིན་ཀུན་གཞི་རྣམ་ཤེས་ཀྱང༌། །བརྫུན་ཡང་བདེན་པ་ལྟ་བུར་ནི། །འགྲོ་དང་འོང་བས་རྣམ་གཡོ་ཞིང༌། །རྟག་ཏུ་སྲིད་པ་གསུམ་པོ་ལེན། །ཞེས་པ་ལྟར་འདུས༵་བྱས༵་ཡི༵ན་པའི་ཕྱི༵ར་དང༵༌། རང༵་བཞིན༵་འོད༵་གསལ༵་གྱི་ཡེ་ཤེས་ནི། མྱང་འདས་ཆེན་པོའི་མདོ་ལས། སངས་རྒྱས་ཀྱི་རང་བཞིན་ནི་འདུས་མ་བྱས་པས་ན་རྟག་པ་ཞེས་བྱའོ། །ཞེས་གསུངས་པ་ལྟར་འདུས༵་མ༵་བྱས༵་ཡིན༵་པའི་ཕྱིར༵། དེས་ན་རྣམ༵་པར་ཤེས༵་པ་ཡིན༵་ན༵་རང༵་བཞི༵ན་འོད༵་གསལ༵་མིན༵་པས་ཁྱབ་པ་དང༌། རྣམ༵་ཤེས༵་ཡིན༵་ན་ར༵ང་བྱུ༵ང་ཡེ༵་ཤེ༵ས་མི༵ན་པས་ཁྱབ་པ་དང༌། རྣ༵མ་ཤེ༵ས་ཡི༵ན་ན༵་རྟག༵་བརྟན༷་ཐེར༵་ཟུག༵་མིན༵་པས་ཁྱབ་པ་དང༌། རྣམ༵་ཤེས༵་ཡིན༵་ན༵་དོན་དམ་བདེ༵་གཤེག༵ས་སྙིང༵་པོ༵་མིན༵་པས་ཁྱབ་པ་དང༌། རྣམ༵་ཤེས༵་ཡི༵ན་ན༵་དབུ༵་མ༵་ཆེན༵་པོ༵་མི༵ན་པས་ཁྱབ་པ་དང༌། རྣམ༵་ཤེས༵་ཡི༵ན་ན༵་སྟོང་གཟུགས་ཕྱ༵ག་རྒྱ༵་ཆེ༵ན་པོ༵་མིན༵་པས་ཁྱབ་པ་དང༌། རྣམ༵་ཤེ༵ས་ཡིན༵་ན༵་མྱང༵་འདས༵་ཆེན༵་པོ༵་མིན༷་པས་ཁྱབ་པ་དང༌། རྣམ༵་ཤེས༷་ཡིན༵་ན༷་བདེ་སྟོང་ལྷ༵ན་ཅིག༵་སྐྱེས༵་པའི་སྐུ༵་མིན༵་པས་ཁྱབ་པ་དང། རྣམ༵་ཤེས༵་ཡིན༵་ན༵་ཤེར༵་ཕྱི༵ན་ཟབ༵་མོ༵་མིན༵་པས་ཁྱབ་པ་དང༌། རྣམ༵་ཤེས༵་ཡིན༵་ན༷་གཞན༷་སྟོང༷་ཟབ༵་མོ༵་མིན༵་པས་ཁྱབ་པ་དང༌། རྣ༵མ་ཤེས༵་ཡིན༵་ན༵་དེ་བཞིན་ཉིད་ལ་སོགས་པའི་ཡོངས༵་གྲུབ༵་ཐམས༵་ཅད༵་མིན༵་པས་ཁྱབ་པ་དང༌། རང་བཞིན་འོད་གསལ་སོགས་དེ༵་རྣམ༵ས་མིན༵་ན༵་རྒྱུ༵་ཡི༵་རྒྱུད༵་ཀྱང༵་མིན༵་པས་ཁྱབ་པའི་ཕྱིར། རང༵་བཞི༵ན་འོ༵ད་གས༵ལ་ཡིན༵་ན༵་རྣམ༵་པར་ཤེས༵་པ་མི༵ན་པས་ཁྱབ་པ་དང༌། རྣམ༵་ཤེས༵་ཡིན༵་ན༵་ཀུན༵་གཞི༷་ཡེ༵་ཤེས༵་མིན༵་པས་ཁྱབ་པ་དང༌། ཡེ༵་ཤེས༵་དང་རྣམ༵་ཤེས༵་གཉིས་སྣང༵་མུན་ཇི༵་བཞི༵ན་དང༵་བདུད༵་རྩི༵་དང༵་ནི༵་དུག༵་བཞིན༵་འགལ་བར་གན༵ས་པའི༵་ཕྱིར༵། རྣམ་ཤེས་དང་རང་བཞིན་འོད་གསལ་སོགས་དེ༵་དག༵་གཞི༵་གཅིག་གི་སྟེང་དུ་མཐུན༵་པར་གནས་པ་གཏན༵་ནས༷་མི༵་སྲིད༵་པ་ཡིན་པས༵། ཀུན་རྫོབ་རྣམ་ཤེས་སོགས་དང་རང་བཞིན་འོད་གསལ་སོགས་དེ༵་དག༵་གཅིག༵་ཏུ༵་བསྲེ༵་བར༷་མ༷་གྱུར༵་ཅིག༷ ཅེས་གདམས་ཏེ་ཀུན་གཞི་རྣམ་ཤེས་ནི་རྒྱུའི་རྒྱུད་དང་རང་བཞིན་འོད་གསལ་སོགས་མ་ཡིན་གྱི། ཀུན་གཞི་ཡེ་ཤེས་ནི་རྒྱུའི་རྒྱུད་དང་རང་བཞིན་འོད་གསལ་སོགས་ཡིན་པའི་ཀུན་གཞི་གཉིས་པོ་སོ་སོར་ལེགས་པར་འབྱེད་དགོས་པར་བསྟན་ཏོ། ། དེ་གཉིས་གཅིག་ཏུ་བསྲེས་པའི་ཉེས་དམིགས་བསྟན་པ་ནི།དྲུག་པ་དེ་གཉིས་གཅིག་ཏུ་བསྲེས་པའི་ཉེས་དམིགས་བསྟན་པ་ནི། རྩ་བར། གལ་ཏེ་བསྲེས་ན་སངས་རྒྱས་བསྟན་པ་ནི། །ཉམས་པར་བྱས་ཀྱི་གསལ་བར་བྱས་པ་མིན། །ཞེས་བྱུང༌། དེའི་ཚིག་དོན་ནི། གལ༵་ཏེ༵་རྣམ་ཤེས་དང་རང་བཞིན་འོད་གསལ་སོགས་གཅིག་དུ་བསྲེས༵་ན༷་སང༵ས་རྒྱས༵་བཅོམ་ལྡན་འདས་ཀྱི་བསྟན༵་པ༵་ནི༵་ཉམ༵ས་པར༵་བྱས༵་པ་ཡིན་གྱི༵་དེ་གསལ༵་བར༵་བྱ༵ས་པ༵་མིན༵་ཞེས་ཀུན་གཞི་རྣམ་ཤེས་དང་ཡེ་ཤེས་གཉིས་གཅིག་ཏུ་བསྲེས་པའི་ཉེས་དམིགས་བསྟན་ཏོ། ། སྦྱང་གཞི་སོགས་ཆོས་དཔེ་དང་བཅས་ཏེ་བསྟན་པ།བདུན་པ་སྦྱང་གཞི་སོགས་ཆོས་དཔེ་དང་བཅས་ཏེ་བསྟན་པ་ནི། རྫོགས་ལྡན་ཆོས་མཆོག་ཁྱད་པར་འཕགས་རྣམས་སུ། །སྦྱང་གཞི་ཀུནགཞི་ཡེ་ཤེས་ནམ་མཁའ་འདྲ། །སྦྱང་བྱ་གློ་བུར་དྲི་མ་སྤྲིན་དང་འདྲ། །སྦྱོང་བྱེད་ལམ་བདེན་མི་ཟད་རླུང་དང་འདྲ། །སྦྱང་འབྲས་བྲལ་འབྲས་སྤྲིན་སངས་ནམ་མཁའ་འདྲ། །རྩ་བར། རྫོགས་ལྡན་ཆོས་མཆོག་ཁྱད་པར་འཕགས་རྣམས་སུ། །ཞེས་པ་ནས། སྤྲིན་སངས་ནམ་མཁའ་འདྲ། ཞེས་པའི་བར་ཤོ་ལོ་ཀ་གཅིག་དང་རྐང་བ་གཅིག་བྱུང༌། དེའི་ཚིག་དོན་ནི། རྫོག༵ས་ལྡན༵་ཆོས༵་མཆོག༵་ཁྱད༵་པར༵་འཕག༵ས་པ་རྣམ༵ས་སུ༵་སྦྱང༵་གཞི༵་ཀུན༵་གཞི༵་ཡེ༵་ཤེས༵་ནི་དཔེ་ན༵མ་མ༵ཁའ་དང་འདྲ༵་བར་གསུངས་པ་དང༌། སྦྱང༵་བྱ༵་གློ༵་བུ༵ར་གྱི་དྲི༵་མ༵་ནི་སྤྲི༵ན་དང༵་འདྲ༵་བར་གསུངས་པ་དང༌། སྦྱོ༵ང་བྱེ༵ད་ལ༵མ་བདེ༵ན་ནི་མི༵་ཟ༵ད་པའི་རླུ༵ང་ད༵ང་འདྲ༵་བར་གསུངས་པ་དང༌། སྦྱང༵་འབྲས༵་སམ་བྲལ༵་འབྲས༵་ནི་སྤྲིན༵་སངས༵་པའི་ནམ༵་མཁ༷འ་དང་འདྲ༵་བར་ཆོས་དཔེ་དང་བཅས་ཏེ་ལེགས་པར་གསུངས་སོ། ། སྦྱང་བྱ་སྦྱང་གཞི་གཅིག་ཡིན་ན་ཧ་ཅང་ཐལ་ཆེས་པའི་སྐྱོན་བསྟན་པ།བརྒྱད་པ་སྦྱང་བྱ་སྦྱང་གཞི་གཅིག་ཡིན་ན་ཧ་ཅང་ཐལ་ཆེས་པའི་སྐྱོན་བསྟན་པ་ནི། དེ་ལྟར་གསུངས་ཀྱང་དེ་ལ་མི་མཁས་པ། །གསུམ་ལྡན་མར་བཅད་སྐྱོན་ཅན་མང་པོནི། །སྦྱང་བྱ་དང་ནི་སྦྱང་གཞི་གཅིག་ཏུ་འདོད། །སྤྲིན་དང་ནམ་མཁའ་གཅིག་ཏུ་འདོད་དང་མཚུངས། །འདིར་ནི་སྦྱང་གཞི་དྲི་བཅས་དེ་བཞིན་ཉིད། །ཀུན་གཞི་ཡེ་ཤེས་འདུས་མ་བྱས་ཡིན་ལ། །སྦྱང་བྱ་དྲི་མ་འདུས་བྱས་ཡིན་པའི་ཕྱིར། །དེ་གཉིས་གཅིག་གམ་མི་གཅིག་དགོངས་པར་ཞུ། །སྦྱང་གཞི་རྟག་པ་སྦྱང་བྱ་མི་རྟག་པ། །དེ་གཉིས་གཅིག་གམ་མི་གཅིག་དགོངས་པར་ཞུ། །སྦྱང་གཞི་ཟག་མེད་སྦྱང་བྱ་ཟག་པ་ཡིན། །དེ་གཉིས་གཅིག་གམ་མི་གཅིག་དགོངས་པར་ཞུ། །སྦྱང་གཞི་རྣམ་བྱང་སྦྱང་བྱ་ཀུན་ཉོན་མོངས། །དེ་གཉིས་གཅིག་གམ་མི་གཅིག་དགོངས་པར་ཞུ། །དེ་འདྲ་གཞན་ཡང་ཤིན་ཏུ་མང་བར་མཆིས། །རྩ་བར། དེ་ལྟར་གསུངས་ཀྱང་དེ་ལ་མི་མཁས་པ། །ཞེས་པ་ནས། ཤིན་ཏུ་མང་བར་མཆིས། ཞེས་པའི་བར་ཤོ་ལོ་ཀ་གསུམ་དང་རྐང་བ་གསུམ་བྱུང༌། དེའི་ཚིག་དོན་ནི། སྦྱང་གཞི་སོགས་ཆོས་དཔེ་དང་བཅས་ཏེ་དེ༵་ལྟར༵་གསུ༵ངས་ཀྱང༷་དེ༵་ལ༵་མི༵་མཁས༵་པ༵་གསུམ༵་ལྡན༵་མར་༵བཅ༵ད་སྐྱོན༵་ཅན༵་མང༵་པོ༷་ནི༵། སྦྱང༵་བྱ༵་དྲི་མ་དང༵་ནི༵་སྦྱང༵་གཞི༵་ཀུན་གཞི་ཡེ་ཤེས་གཅི༵ག་ཏུ༵་འདོ༵ད་པ་ནི་མི་འཐད་དེ། དཔེར་ན་སྤྲི༵ན་དང༵་ནམ༵་མཁའ༵་གཅིག༵་ཏུ༷་འདོད༵་པ་དང༵་ཀུན་ནས་མཚུང༵ས་པའི་ཕྱིར་རོ། །རྫོགས་ལྡན་ཆོས་མཆོག་གི་ལུགས་འདི༵ར་ནི༵། སྦྱང༵་གཞི༵་གློ་བུར་བའི་དྲི༵་མ་དང་བཅ༵ས་པའི་དེ༵་བཞིན༵་ཉིད༵་ནི་ཀུ༵ན་གཞི༵་ཡེ༵་ཤེས༵་འདུས༵་མ༵་བྱས༵་ཡིན༵་ལ༵། སྦྱང༵་བྱ༵་གློ་བུར་དྲི༵་མ༵་ནི་འདུས༵་བྱས༵་ཡིན༵་པའི༵་ཕྱིར༵་ན་སྦྱང་གཞི་དང་སྦྱང་བྱ་དེ༷་གཉིས༵་གཅིག༵་གམ༵་མི༵་གཅིག༵་དགོང༵ས་པར༷་ཞུ༵། སྦྱང༵་གཞི༵་རྟག༵་པ༵་སྦྱང༵་བྱ༵་མི༵་རྟག༵་པ༵་ཡིན་པའི་ཕྱིར་ན། དེ༵་གཉི༵ས་གཅིག༵་གམ༵་མི༵་གཅིག༵་དགོང༵ས་པར༵་ཞུ། སྦྱང༵་གཞི༵་ཟག་༵མེད༵་སྦྱང༵་བྱ༵་ཟག༵་པ་དང་བཅས་པ༵་ཡིན༵་པས་དེ༵་གཉིས༵་གཅི༵ག་གམ༵་མི༵་གཅི༵ག་དགོང༵ས་པར༵་ཞུ། སྦྱང༵་གཞི༵་རྣ༵མ་བྱང༵་སྦྱང༵་བྱ༵་ཀུ༵ན་ནས་ཉོ༵ན་མོང༵ས་ཡིན་པའི་ཕྱིར་ན་དེ༵་གཉི༵ས་གཅིག༵་གམ༵་མི༵་གཅི༵ག་དགོང༵ས་པར༷་ཞུ༵་དང་དེ་གཉིས་མི་གཅིག་པའི་ཕྱིར། དེ༵་འདྲ༵་གཞ༵ན་ཡང༵་སྦྱང་གཞི་དེ་བཞིན་ཉིད་ནི་ཡེ་ཤེས་དོན་དམ་པའི་རྣམ་པ་ཀུན་དང་ལྡན་ལ་སྦྱང་བྱ་དྲི་མ་ནི་རྫུན་པ་བསླུ་བའི་ཆོས་གནས་ལུགས་སམ་དོན་ལ་ཅི་ཡང་མ་གྲུབ་པ་ཡིན་པས་དེ་གཉིས་མི་འདྲ་བ་སོགས་ཤི༵ན་ཏུ༵་མང༵་བ༵ར་མཆིས༵་པ་ཡིན་ནོ། ། འགྱུར་མེད་ཡོངས་གྲུབ་དབུ་མ་ཆེན་པོའི་རྣམ་བཞག་བཤད་པ་ལ་འགྱུར་མེད་ཡོངས་གྲུབ་དང་དབུ་མ་ཆེན་པོ་གཅིག་ཏུ་བསྟན་ནས་ལུགས་གཞན་དགག་པ།བཞི་བ་འགྱུར་མེད་ཡོངས་གྲུབ་དབུ་མ་ཆེན་པོའི་རྣམ་བཞག་བཤད་པ་ལ་འགྱུར་མེད་ཡོངས་གྲུབ་དང་དབུ་མ་ཆེན་པོ་གཅིག་ཏུ་བསྟན་ནས་ལུགས་གཞན་དགག་པ། དབུ་མའི་རྣམ་དབྱེ་བསྟན་པ། གཞན་ལུགས་གྱི་དབུ་མའི་དོན་བཀག་ནས་རང་ལུགས་བསྟན་པ། རྟེན་འབྲེལ་ལ་བདེན་གཉིས་ཀྱི་རྣམ་དབྱེ་ཕྱེས་ནས་བསྟན་པ། འཁོར་ལོ་བར་བའི་བརྗོད་བྱའི་་གཙོ་བོ་ཡང་རང་སྟོང་མེད་དགག་ཙམ་མ་ཡིན་པར་དོན་དམ་པའི་རྣམ་པ་ཀུན་ལྡན་ཡིན་པར་བསྟན་པ། འཁོར་ལོ་བར་ཐ་དང་རྒྱུད་སྡེ་བཞིའི་བརྗོད་བྱའི་སྟོང་ཉིད་ཟབ་མོ་ལ་ཀུན་རྫོབ་མི་སྲིད་ཅིང༌། དོན་དམ་པའི་རྣམ་པ་ཀུན་ལྡན་ཡིན་པར་བསྟན་པ། བདེན་གཉིས་ཀྱི་རྣམ་དབྱེ་ཕྱེས་ནས་དོན་དམ་པའི་བྱང་ཆོས་སོགས་འགོག་བདེན་ཟབ་མོ་ཡིན་པར་བསྟན་པ། ངེས་དོན་གྱི་མདོ་སྡེ་དུ་མའི་དགོངས་པ་བསྟན་པ། རྫོགས་ལྡན་ཆོས་ལས་ལྟ་སྒོམ་གསུངས་པ་གཞན་ལ་ཉམས་ཤིང་རང་ལུགས་ཀྱི་ལྟ་སྒོམ་རྣམ་དག་བསྟན་པ། སྦྱོར་བ་རྣམ་དག་དང་ལྟ་སྒོམ་སྤྱོད་པ་རྣམ་དག་མཛད་པ་རྣམས་ལ་རྗེས་སུ་ཡི་རང་བར་བསྟན་པ་དང་བཅུ། འགྱུར་མེད་ཡོངས་གྲུབ་དང་དབུ་མ་ཆེན་པོ་གཅིག་ཉིད་དུ་བསྟན་པ་དང་ལུགས་གཞན་དགག་པ།དང་པོ་ལ་འགྱུར་མེད་ཡོངས་གྲུབ་དང་དབུ་མ་ཆེན་པོ་གཅིག་ཉིད་དུ་བསྟན་པ་དང་ལུགས་གཞན་དགག་པ་དང་གཉིས། དང་པོ་ནི། རྩ་བར། ཡོངས་གྲུབ་དབུ་མ་མིང་ཙམ་ཐ་དད་གྱི། །དོན་ལ་ཐ་དད་མེད་པ་རྫོགས་ལྡན་ལུགས། །ཞེས་བྱུང༌། དེའི་ཚིག་དོན་ནི། དོན་དམ་འགྱུར་བ་མེད་པའི་ཡོང༵ས་གྲུབ༵་དང་དབུ༵་མ༵་ཆེན་པོ་གཉིས་ཀྱི་མིང༵་ཡོངས་གྲུབ་ཅེས་པ་དང༌། དབུ་མ་ཞེས་པ་མིང་ཙམ༵་ཐ༵་དད༵་ཡིན་གྱི༵་དོན༵་ལ༵་དེ་གཉིས་ཐ༵་དད༵་མེད༵་པ༵་ཡིན་པར་གྲུབ་པ་ནི། རྫོག༵ས་ལྡན༵་ཆོས་མཆོག་གི་ལུགས༵་ཡིན་ནོ། ། ལུགས་གཞན་དགག་པ།གཉིས་པ་ལུགས་གཞན་དགག་པ་ལ། རང་བཞིན་གསུམ་སེམས་ཙམ་ཁོ་ནའི་ཆོས་སྐད་ཡིན་པར་འདོད་པ་ལ་སྒྲུབ་བྱེད་མེད་ཅིང་གནོད་བྱེད་ཡོད་པར་བསྟན་པ། གྲུབ་མཐའི་རྣམ་བཞག་མ་ཤེས་པའི་དབང་གིས་དབུ་སེམས་ཀྱི་ལུགས་ཕྱིན་ཅི་ལོག་འདོད་པ་ལྟ་ངན་དུ་བསྟན་པ། དོན་དམ་མེད་ན་ཀུན་རྫོབ་མེད་པར་འགྱུར་བ་སོགས་ཧ་ཅང་ཐལ་ཆེས་པར་བསྟན་པ་དང་གསུམ། དང་པོ་ནི། གསུམ་ལྡན་མར་བཅད་སྐྱོན་ཅན་ལུགས་ལ་ནི། །འགྱུར་མེད་ཡོངས་གྲུབ་སེམས་ཙམ་ཁོ་ནར་འདོད། །རང་བཞིན་གསུམ་ཀའང་སེམས་ཙམ་ཁོ་ན་ལའོ། །སྐྱོན་མེད་རྫོགས་ལྡན་དབུ་མའི་གཞུང་རྣམས་སུ། །ངོ་བོ་ཉིད་གསུམ་ཡང་ཡང་གསུང་ཕྱིར་དང༌། །སེམས་ཙམ་གཞུང་དུ་དེ་སྐད་མ་གསུངས་ཤིང༌། །དེ་ལ་གནོད་བྱེད་མང་པོ་ཡོད་པའི་ཕྱིར། །ངོ་བོ་ཉིད་གསུམ་དབུ་མ་ཁོ་ན་ཡི། །ཆོས་ལུགས་ཡིན་པར་རྫོགས་ལྡན་ལུགས་ལས་བྱུང༌། །རྩ་བར། གསུམ་ལྡན་མར་བཅད་སྐྱོན་ཅན་ལུགས་ལ་ནི། །ཞེས་པ་ནས། རྫོགས་ལྡན་ལུགས་ལས་བྱུང༌། ཞེས་པའི་བར་ཤོ་ལོ་ཀ་གཉིས་དང་རྐང་བ་གཅིག་བྱུང༌། དེའི་ཚིག་དོན་ནི། ཡང་གསུ༵མ་ལྡན༵་མར༵་བཅད༵་སྐྱོན༵་ཅན༵་གྱི་ལུག༵ས་ལ༵་ནི༵། འགྱུར༵་མེད༵་ཡོང༵ས་གྲུབ༵་ནི་སེམས་༵ཙམ༵་པ་ཁོ༷༷་ནའི༵་འདོ༵ད་པ་ཡིན་པར་འདོད་པ་དང༌། ཀུན་བཏགས་གཞན་དབང་ཡོངས་གྲུབ་སྟེ་རང༵་བཞིན༵་གསུམ༵་ག༵འ༵ང་སེམས༷་ཙམ༷་ཁོ༷༷་ནའི༷་འདོད་པའོ་༷ཞེས་འདོད་པ་མི་འཐད་དེ། སྐྱོན༵་མེད༵་རྫོགས༵་ལྡ༵ན་དབུ༵་མའི༵་གཞུང༵་ཡུམ་བར་མའི་བྱམས་ཞུས་ཀྱི་ལེའུ་ལས། བཅོམ་ལྡན་འདས་ཀྱིས་བྱང་ཆུབ་སེམས་དཔའ་བྱམས་པ་ལ་བཀའ་སྩལ་བ། བྱམས་པ་ཤེས་རབ་ཀྱི་ཕ་རོལ་ཏུ་ཕྱིན་པ་ལ་སྤྱོད་ཅིང་ཆོས་རབ་ཏུ་དབྱེ་བ་ལ་མཁས་པ་ལ་གནས་པའི་བྱང་ཆུབ་སེམས་དཔའ་རྣམ་པ་གསུམ་གྱིས་གཟུགས་རབ་ཏུ་དབྱེ་བ་གདགས་པ་རྗེས་སུ་ཤེས་པར་བྱའོ། །ཞེས་པ་ནས། འདི་ལྟར་འདི་ནི་ཡོངས་སུ་བརྟགས་པའི་གཟུགས་འདི་ནི་རྣམ་པར་བརྟགས་པའི་གཟུགས། འདི་ནི་ཆོས་ཉིད་ཀྱི་གཟུགས་སོ། །ཞེས་པ་ལ་སོགས་པ་དེ་རྣམ༵ས་སུ་ངོ༵་བོ༵་ཉིད༵་གསུམ༵་ཡང༵་ཡང༵་གསུང༷ས་པའི་ཕྱིར༵་དང༵༌། སེམས༵་ཙམ༵་པའི་གཞུ༵ང་དུ༵་རྫོགས་ལྡན་ཆོས་མཆོག་གི་ཆོས་ལས་ངོ་བོ་ཉིད་གསུམ་གསུངས་པ་དེ༵་སྐད༵་མ༵་གསུངས༵་ཤིང༵༌། དེས་ན་རང་བཞིན་གསུམ་སོགས་སེམས་ཙམ་ཁོ་ནའི་ཆོས་སྐད་ཡིན་པར་འདོད་པ་དེ༵་ལ༵་གནོ༵ད་བྱེད༵་མང༵་པོ༵་ཡོད༵་པའི༵་ཕྱིར༵། དེས་ན་ངོ༵་བོ༵་ཉིད༵་གསུམ༵་དབུ༵་མ༵་ཁོ༵་ན༵་ཡི༵་ཆོས༵་ལུག༵ས་ཡིན༵་པར༵་རྫོག༵ས་ལྡན༵་ལུགས༵་ལས༵་བྱུང༵་བ་ཡིན་ནོ། །ངོ་བོ་ཉིད་གསུམ་དབུ་མ་ཁོ་ནའི་ཆོས་སྐད་ཡིན་ཡང་སེམས་ཙམ་པས་ཁོ་རང་གི་ལུགས་ཀྱི་ཀུན་བཏགས་གཞན་དབང་ཡོངས་གྲུབ་གསུམ་མམ་མཚན་ཉིད་གསུམ་འདོད་པའི་ཕྱིར་རོ། །གཞན་ཡང་ངོ་བོ་ཉིད་གསུམ་དབུ་མ་ཁོ་ནའི་ཆོས་ཡིན་ཞེས་པ་ནི་འགྱུར་མེད་ཡོངས་གྲུབ་དང་སེམས་ཙམ་གྱི་གྲུབ་མཐའ་འགལ་བ་ཡིན་ཏེ། སེམས་ཙམ་པ་ནི་རྣམ་ཤེས་སྐད་ཅིག་མ་དོན་དམ་དུ་བདེན་པར་འདོད་ཅིང༌། འགྱུར་མེད་ཡོངས་གྲུབ་ནི་རྣམ་ཤེས་དང་སྐད་ཅིག་མ་ལས་འདས་པ་དོན་དམ་འདུས་མ་བྱས་ཀྱི་དབྱིངས་རིག་དབྱེར་མེད་ཡིན་པའི་ཕྱིར་དང༌། རྣམ་ཤེས་སྐད་ཅིག་མ་ནི་འདུས་བྱས་མི་རྟག་པ་བཅོས་མ་གློ་བུར་བ་མཐའ་མའི་ཆོས་ཡིན་པའི་ཕྱིར་ཞེས་ཆོས་རྗེ་ཀུན་མཁྱེན་གྱིས་གསུངས་སོ། །ཡང་རི་ཆོས་ངེས་དོན་རྒྱ་མཚོ་ལས། ངོ་བོ་ཉིད་གསུམ་སྟོན་པའི་རྒྱུ་མཚན་གྱིས་སེམས་ཙམ་གྱི་རང་གཞུང་དུ་མི་འགྱུར་ཏེ། དབུ་མ་ཆེན་པོའི་གཞུང་ལུགས་ཡུམ་རྒྱས་པ་དང་བར་མ་དང་ཁྲི་བརྒྱད་སྟོང་བ་རྣམས་འགྲེལ་བ་དང་འབུམ་པ་རྒྱ་ཆེར་བཤད་པ་ལ་སོགས་པ་གཞན་དང་གཞན་མང་བོར་ཡང་ངོ་བོ་ཉིད་གསུམ་གྱི་རྣམ་བཞག་ཡང་དང་ཡང་དུ་གསུངས་ཤིང་ཞེས་སོགས་རྒྱ་ཆེར་གསུངས་པ་དང༌། གཞན་སྟོང་དབུ་མའི་རྒྱན་ལས། མཚན་ཉིད་གསུམ་དང་བདེན་གཉིས་འདོད་མི་འདོད། །དེ་དག་སེམས་ཙམ་དབུ་མའི་ཁྱད་པར་མིན། །གྲུབ་མཐའ་བཞི་ཀའི་བདེན་གཉིས་རྣམ་བཞག་བྱས། །མཚན་ཉིད་གསུམ་པོ་ཤེར་ཕྱིན་ལས་ཀྱང་བསྟན། །འཕགས་པའི་བྱང་ཆུབ་སེམས་འགྲེལ་དུ་ཡང་གསུངས། །ཞེས་སོགས་གསུངས་པས་རྒྱས་པར་གཞུང་དེ་དག་ལས་ཤེས་པར་བྱའོ། ། གྲུབ་མཐའི་རྣམ་བཞག་མ་ཤེས་པའི་དབང་གིས་དབུ་སེམས་ལུགས་ཕྱིན་ཅི་ལོག་འདོད་པ་ལྟ་ངན་དུ་བསྟན་པ།གཉིས་པ་གྲུབ་མཐའི་རྣམ་བཞག་མ་ཤེས་པའི་དབང་གིས་དབུ་སེམས་ལུགས་ཕྱིན་ཅི་ལོག་འདོད་པ་ལྟ་ངན་དུ་བསྟན་པ་ནི། དེ་ཕྱིར་དེ་འདྲའི་རྣམ་བཞག་མ་ཤེས་ཤིང༌། །རྣམ་པར་འཁྲུགས་པས་ལྟ་བའི་སྙིགས་མ་བྱུང། །ཡོངས་གྲུབ་ལ་སོགས་རང་བཞིན་གསུམ་སྟོན་པའི། །དབུ་མ་རྣམས་ཀྱང་སེམས་ཙམ་གཞུང་དུ་ཕབ། །དེ་སྟོན་མཁས་པ་ཆེན་པོ་དབུ་མ་པ། །ཆེན་པོ་དག་ཀྱང་སེམས་ཙམ་པ་རུ་ཕབ། །དོན་དམ་དབུ་མ་ཅིར་ཡང་མ་གྲུབ་ཅེས། །སྟོན་པའི་གཞུང་ངན་སྐུར་འདེབས་མཐར་ལྟུང་ཞིང༌། །མེད་པ་ཆད་པའི་ཕྱོགས་སུ་ལྷུང་རྣམས་ལ། །དབུ་མ་ཡིན་ཞེས་བསྟོདབཀུར་བསྔགས་བྱེད་པ། །དེ་མ་ཡིན་ལ་དེར་འཛིན་བདུད་ཀྱི་ཚིག །གསུམ་ལྡན་མར་བཅད་བྱུང་གི་རྫོགས་ལྡན་ལ། །དེ་འདྲའི་ལྟ་ངན་རི་བོང་རྭ་དང་མཚུངས། །རྩ་བར། དེ་ཕྱིར་དེ་འདྲའི་རྣམ་བཞག་མ་ཤེས་ཤིང༌། །ཞེས་པ་ནས། རི་བོང་རྭ་དང་མཚུངས། ཞེས་པའི་བར་ཤོ་ལོ་ཀ་གསུམ་དང་རྐང་བ་གཅིག་བྱུང༌། དེའི་ཚིག་དོན་ནི། རྒྱུ་མཚན་དེ༵་དག་གི་ཕྱིར༵་རྫོགས་ལྡན་ཆོས་མཆོག་ལུགས་ལ་ངོ་བོ་ཉིད་གསུམ་གྱི་དེ༵་འདྲའི༵་རྣམ༵་བཞག༵་ཡོད་པར་མ༵་ཤེས༵་ཤིང༵༌། ཆོས་ཀྱི་གནས་ཚུལ་རྣམ༵་པར་༵འཁྲུག༵ས་པ་ཡིན་པས༵་ལྟ༵་བའི༵་སྙིག༵ས་མ༵་བྱུང༵་བ་དང༌། ཡོང༵ས་གྲུབ༵་དང༌། གཞན་དབང་ལ༵་སོག༵ས་པའི་རང༵་བཞིན༵་གསུམ༵་སྟོན༵་པའི༵་བཀའ་འཁོར་ལོ་གསུམ་པ་དང༌། མདོ་སྡེ་རྒྱན་དང༌། དབུས་མཐའ་རྣམ་འབྱེད་སོགས་དབུ༵་མ༵་ཆེན་པོའི་གཞུང་རྣམ༵ས་ཀྱང༵་སེམས་ཙམ༵་པའི༵་གཞུང༵་དུ༵་ཕབ༵་པ་དང༌། རང་བཞིན་གསུམ་པོ་དེ༵་སྟོ༵ན་པའི་མཁས༵་པ༵་ཆེན༵་པོ༵་ཐོགས་མེད་སློབ་དཔོན་དབྱིག་གཉེན་ཕྱོགས་གླིང་སོགས་དབུ༵་མ༵་པ༵་ཆེན༵་པོ༵་དག༵་ཀྱང༵་སེམས༵་ཙམ༵་པ༵་རུ༷་ཕབ༵་པ་དང༌། ཡང་བྱང་ས་ལས། དོན་དམ་པར་ཡོད་པ་ཡང་དག་པའི་དངོས་པོ་ལ་ཐམས་ཅད་ཀྱི་ཐམས་ཅད་དུ་མེད་དོ་ཞེས་སྐུར་བ་འདེབས་ཤིང༌། ཞེས་དང༌། བསྡུ་བ་ལས། ཐེག་པ་ཆེན་པོ་བ་ལ་ལ་རང་གི་ཉེས་པར་བཟུང་བའི་འདི་སྐད་ཅེས་ཀུན་རྫོབ་ཏུ་ཐམས་ཅད་ཡོད་ལ་དོན་དམ་པར་ནི་ཐམས་ཅད་མེད་དོ་ཞེས་ཟེར་རོ་ཞེས་གསུངས་པ་ལྟར་དོན༵་དམ༵་དབུ༵་མ༵་ཅིར༵་ཡང༵་མ༵་གྲུ༵བ་ཅེ༵ས་སྟོ༵ན་པའི༵་གཞུང༵་ངན༵་སྐུ༵ར་འདེ༵བས་ཀྱི་མཐར༵་ལྟུང༵་ཞིང༵་མེད༵་པ༵་ཆད༵་པའི༵་ཕྱོག༵ས་སུ༵་ལྷུང༷་བ་རྣམ༵ས་ལ༵་དབུ༵་མ༵་ཆེན་པོ་ཡིན༵་ཞེས༵་བསྟོད༵་བཀུར༵་བསྔག༵ས་གསུམ་བྱེད༵་པ༵་དང༌། དེ་ལྟར་གཞུང་རྩོམ་པ་པོ་དང༌། དེ་ལྟར་སྟོན་པར་བྱེད་པ་རྣམས་ལ་ཡང་དབུ་མ་ཆེན་པོ་ཡིན་ཟེར་བ་སོགས་ཆོས་ཀྱི་གནས་ཚུལ་དེ༵་མ༵་ཡིན༵་ལ༵་དེར༵་འཛིན༵་པར་བྱེད་པའི་བདུད༵་ཀྱི༵་གསང་ཚིག༷་ནི། གསུམ༵་ལྡ༵ན་མ༵ར་བ༵ཅད་ཀྱི་ལུགས་ལ་བྱུང༵་གི༵་རྫོགས༵་ལྡན༷་ཆོས་མཆོག་གི་ལུགས་ལ༵་དེ་འདྲ༵འི་ལྟ༷་བ་ངན༷་པ་དག་གཏན་ནས་མི་སྲིད་པ་དཔེར་ན་རི༵་བོ༵ང་རྭ༵༵་དང་མཚུ༵ངས་པའོ། ། དོན་དམ་མེད་ན་ཀུན་རྫོབ་མེད་པར་་འགྱུར་བ་སོགས་ཧ་ཅང་ཐལ་ཆེས་པར་བསྟན་པ།གསུམ་པ་དོན་དམ་མེད་ན་ཀུན་རྫོབ་མེད་པར་་འགྱུར་བ་སོགས་ཧ་ཅང་ཐལ་ཆེས་པར་བསྟན་པ་ནི། གསུམ་ལྡན་མར་བཅད་སྐྱོན་ཅན་རྣམས་ན་རེ། །དོན་དམ་བདེན་པ་ཅིར་ཡང་མ་གྲུབ་ཀྱང༌། །ཀུན་རྫོབ་ལས་འབྲས་སླུ་བ་མེད་པའི་ཕྱིར། །ཡོད་མེད་སྒྲོ་བསྐུར་མཐའ་ལས་གྲོལ་ཞེ་ན། །དོན་དམ་མེད་པའི་ཀུན་རྫོབ་སྲིད་ལགས་སམ། །ཁྱབ་བྱེད་མེད་པའི་ཁྱབ་བྱ་སྲིད་ལགས་སམ། །གཞི་རྟེན་མེད་པའི་རྟེན་པ་སྲིད་ལགས་སམ། །གཉུག་མ་མེད་པའི་གློ་བུར་སྲིད་ལགས་སམ། །ཆོས་ཉིད་མེད་པའི་ཆོས་ཅན་སྲིད་ལགས་སམ། །སྲིད་ན་ཆོས་ཉིད་ཀུན་འགྲོ་མ་ལགས་སམ། །གལ་ཏེ་དོན་དམ་མེད་པ་མི་སྲིད་ན། །དོན་དམ་ཅིར་མ་གྲུབ་དང་མི་འགལ་ལམ། །རྩ་བར། གསུམ་ལྡན་མར་བཅད་སྐྱོན་ཅན་རྣམས་ན་རེ། །ཞེས་པ་ནས། མི་འགལ་ལམ། ཞེས་པའི་བར་ཤོ་ལོ་ཀ་གསུམ་བྱུང༌། དེའི་ཚིག་དོན་ན། གསུམ༵་ལྡན༵་མར༵་བཅད༵་སྐྱོན༵་ཅན༵་རྣམ༵ས་ན༷་རེ༷། དོ༵ན་དམ༵་བདེན༵་པ༷་ཅིར་༵ཡང༷་མ༵་གྲུབ༵་ཀྱང༵་ཀུན༵་རྫོབ༵་ཀྱི་ལས༵་འབྲས༵་བསླུ༵་བ༵་མེད༵་པ་ཡིན་པའི༵་ཕྱི༵ར་ན། ཡོད༵་པ་དང་མེད༵་པའི་མཐའ་དང༌། སྒྲོ༵་འདོགས་དང༌། སྐུར༵་འདེབས་ཀྱི་མཐའ༵་ལས༵་གྲོལ༵་བ་ཡིན་ཞེ༵་ན༵། དེ་ནི་མི་འཐད་དེ། དོན༵་དམ༵་ཅི་ཡང་མ་གྲུབ་པའམ་མེད༵་པའི༵་ཀུན༵་རྫོབ༵་སྲི༵ད་ལགས༵་སམ༵། ཁྱབ༵་བྱེད༵་དོན་དམ་མེད༵་པའི༵་ཁྱ༵བ་བྱ༵་ཀུན་རྫོབ་སྲི༵ད་ལགས༵་སམ༵། དོན་དམ་འདུས་མ་བྱས་པའི་གཞི༵་རྟེན༵་མེད༵་པའི༷་བརྟེན༵་པ༵་སྲིད༵་ལགས༵་སམ༵། རང་བཞིན་གཉུག༵་མ༵་མེད་༵པའི༵་བཅོས་མ་གློ༵་བུར༵་བ་ཞིག་ཡོད་སྲིད༵་ལགས༵་སམ༵། ཆོས༵་ཉིད༵་མེད༵་པའི༵་ཆོས༵་ཅན༵་ཡོད་པ་སྲིད༵་ལགས༵་སམ༵། དེ་དག་སྲིད༵་པར་ཡིན་པར་འདོད་ན༵་ཆོས༵་ཉིད༵་ཀུ༵ན་འགྲོ༵་མ༵་ཡིན་པ་ལགས༵་སམ༵། གལ༵་ཏེ༵་ཁྱོད་ཀྱི་ལུགས་ལ་དོན༵་དམ༵་མེད༵་པ༵་མི༵་སྲིད༵་པར་འདོད་ན༵། དོ༵ན་དམ༵་ཅི༵ར་ཡང་མ༵་གྲུབ༵་པར་འདོད་པ་དང༵་ཁས་བླངས་སྔ་ཕྱི་དངོས་སུ་མི༵་འགལ༵་ལམ༵་སྟེ་འགལ་བ་ཡིན་པའི་ཕྱིར་རོ། ། དབུ་མའི་རྣམ་དབྱེ་བསྟན་པ།གཉིས་པ་དབུ་མའི་རྣམ་དབྱེ་བསྟན་པ་ལ། གཞན་གྱི་དབུ་མའི་དབྱེ་བ་བཞག་པ་བཀག་ནས་རིང་ལུགས་ཀྱི་དབུ་མའི་དབྱེ་བ་བསྟན་པ་དང་ཐལ་འགྱུར་དང་རང་རྒྱུད་གཉིས་དབུ་མའི་དབྱེ་བ་མི་རིགས་པར་བསྟན་པ་དང་གཉིས། དང་པོ་ནི། དབུ་མ་པ་ནི་རང་རྒྱུད་ཐལ་འགྱུར་ཞེས། །འབྱེད་པ་དབུ་མའི་དབྱེ་བར་མི་རུང་སྟེ། །དེ་བཞིན་ཉིད་ཀྱི་དབྱེ་བར་མི་རུང་ཕྱིར། །དེ་འདྲ་རྫོགས་ལྡན་གཞུང་དུ་མ་གསུངས་ཀྱང༌། །གསུམ་ལྡན་མར་བཅད་སྐྱོན་ཅན་གཞུང་དུ་བྱུང༌། །དེས་ཀྱང་ལྟ་བའི་སྙིགས་མ་བདོ་བར་བྱ། །རྫོགས་ལྡན་ལུགས་ལ་དབུ་མའི་དབྱེ་བ་ནི། །ཡོངས་གྲུབ་དགུ་ལ་སོགས་པའི་དབྱེ་བ་དང༌། །རྒྱུད་སྡེར་གསུངས་པའི་རིགས་ཀྱི་དབྱེ་བ་དང༌། །དོན་དམ་མཚན་བརྗོད་རྒྱུད་དུ་ལེགས་གསུངས་པའི། །མཚན་གྱི་དབྱེ་བས་བསྟན་པ་ཐམས་ཅད་ཀྱང༌། །མཐའ་བྲལ་དབུ་མ་ཆེན་པོ་དབྱེ་བ་ཡིན། །དེ་བཞིན་གཤིས་ལུགས་ཟབ་མོ་མཐར་ཐུག་གི །དབྱེ་བ་ཇི་སྙེད་གསུངས་པ་ཐམས་ཅད་ཀྱང༌། །མཐའ་བྲལ་དབུ་མ་ཆེན་པོའི་དབྱེ་བར་འགྱུར། །འདི་ལ་འདུས་བྱས་གཅིག་ཀྱང་འདྲེས་པ་མེད། །ཆོས་དབྱིངས་འདུས་མ་བྱས་ཀྱི་དབྱེ་བར་འགྱུར། །འདི་ལ་མི་རྟག་འདྲེས་པ་ཅུང་ཟད་མེད། །རྟག་བརྟན་ཐེར་ཟུག་དབྱིངས་ཀྱི་དབྱེ་བར་འགྱུར། །འདི་ལ་ཀུན་རྫོབ་གཅིག་ཀྱང་འདྲེས་པ་མེད། །དོན་དམ་ཡོངས་གྲུབ་ཁོ་ནའི་དབྱེ་བ་སྟེ། །ངོ་བོ་དབྱེ་བ་ཅུང་ཟད་ཙམ་ཡང་མེད། །མིང་དང་རྣམ་པའི་དབྱེ་བ་ཤིན་ཏུ་མང༌། །གང་ཕྱིར་ཆོས་དབྱིངས་དུ་མ་རོ་གཅིག་དོན། །མིང་ནི་དུ་མ་དོན་ནི་རོ་གཅིག་དང༌། །རྣམ་པ་དུ་མ་ངོ་བོ་རོ་གཅིག་གོ །དེ་ཕྱིར་འདི་ནི་ཤེར་ཕྱིན་མཐར་ཐུག་དང༌། །མྱང་འདས་ཆེན་པོ་ཕྱག་རྒྱ་ཆེན་པོ་དང༌། །ཤིན་ཏུ་རྣལ་འབྱོར་རྡོ་རྗེ་རྣལ་འབྱོར་དང༌། །ལྷན་ཅིག་སྐྱེས་སྦྱོར་དུས་འཁོར་བདེ་དགྱེས་སོགས། །ཟབ་མོ་མཐར་ཐུག་ཀུན་གྱི་དབྱེ་བར་འགྱུར། །དེ་ལྟར་ཤེས་ན་གཅིག་ཤེས་ཀུན་ཤེས་ཡིན། །གཤིས་ལུགས་ཟབ་མོ་མཐར་ཐུག་ཐམས་ཅད་ལ། །རྨོངས་པ་མེད་པའི་མཁས་པ་ཆེན་པོ་འགྱུར། །རྩ་བར། དབུ་མ་པ་ནི་རང་རྒྱུད་ཐལ་འགྱུར་ཞེས། །ཞེས་པ་ནས། མཁས་པ་ཆེན་པོ་འགྱུར། །ཞེས་པའི་བར་ཤོ་ལོ་ཀ་བརྒྱད་དང་རྐང་བ་གཉིས་བྱུང༌། དེའི་ཚིག་དོན་ནི། ཁ་ཅིག་གིས་དབུ༵་མ༵་པ༵་ལ་ནི༵་རང༵་རྒྱུད༵་དང་ཐལ༷་འགྱུར༵་གཉིས་ཞེ༵ས་འབྱེད༵་པ༵་དེ་ནི་དབུ༵་མའི༵་དབྱེ༵་བར༵་མི༵་རུང༵་སྟེ༵། དེ་གཉིས་དེ༵་བཞིན༵་ཉི༵ད་ཀྱི༵་དབྱེ༵་བར༵་མི༵་རུང༵་བའི་ཕྱི༵ར་ཏེ། དབྱེ་བ་དེ༵་འདྲ༵་རྫོགས༵་ལྡན༵་གྱི་གཞུང༵་གང་དུ༵་མ༵་གསུང༵ས་པ་ཡིན་པར་གྲུབ་ཀྱང༵༌། གསུམ༵་ལྡན༵་མར༵་བཅད༵་སྐྱོ༵ན་ཅན༵་རྣམས་ཀྱི་གཞུང༵་དུ༵་བྱུང༵་བ་ཡིན་ཞིང༌། དེ༵ས་ཀྱ༵ང་ལྟ༵་བ༵འི་སྙི༵གས་མ༵་བདོ༵་བ༵ར་བྱ༵ས་པ་ཡིན་ནོ། །རྫོ༵གས་ལྡ༵ན་ཆོས་མཆོག་ངེས་གསང་དབུ་མ་ཆེན་པོའི་ལུགས༵་ལ༷་དབུ༵་མའི༵་དབྱེ༵་བ༵་ནི༵། དེ་བཞིན་ཉིད་སོགས་ཡོངས༵་གྲུབ༵་དགུ༵་ལ༵་སོག༵ས་པའི༵་དབྱེ༵་བ༵་དང༵༌། རྒྱུད༵་སྡེ༵ར་གསུང༵ས་པའི༵་རིགས་ཀྱི༵་དབྱེ༵་བ༵་གཉིས་དང་གསུམ་སོགས་དང༵༌། དོན་༵དམ༵་པའི་མཚ༵ན་བརྗོ༵ད་པའི་རྒྱུད༵་དུ༵་ལེག༵ས་པར་གསུང༵ས་པའི༵་དོན་དམ་པའི་མཚ༵ན་གྱི༵་དབྱེ༵་བས༵་བསྟན༵་པ༵་ཐམ༵ས་ཅད༵་ཀྱང༵་སྤྲོས་མཐའ༵་ཐམས་ཅད་དང་བྲལ༵་བའི་དབུ༵་མ༵་ཆེན༵་པོ༵འི་རྣམ་པའིདབྱེ༵་བ༵་ཡི༵ན་ནོ། །དེ་དག་དབུ་མའི་དབྱེ་བ་ཡིན་པ་དེ༵་བཞི༵ན་དུ་གཤིས༵་ལུག༵ས་ཟབ༵་མོ༵་མཐར༵་ཐུག༵་གི༵་དབྱེ༵་བ༵་མདོ་རྒྱུད་ནས་ཇི༵་སྙེ༵ད་གསུང༵ས་པ་ཐམས༵་ཅད༵་ཀྱང༵་མཐའ༵་བྲལ༵་དབུ༵་མ༵་ཆེན༵་པོ༵འི་དབྱེ༵་བར༵་འགྱུ༵ར་ཞིང། དབུ་མའི་དབྱེ་བ་འདི༵་ལ༵་འདུས༵་བྱས༵་གཅིག༵་ཀྱང༵་འདྲེ༵ས་པ༵་མེ༵ད་དེ། ཆོ༵ས་དབྱིང༵ས་འདུ༵ས་མ༵་བྱ༵ས་ཀྱི༵་དབྱེ༵་བར༵་འགྱུ༵ར་བའི་ཕྱིར། དབུ་མའི་དབྱེ་བ་འདི༵་ལ༵་མི༵་རྟ༵ག་པ་དང་འདྲེ༵ས་པ༵་ཅུ༵ང་ཟ༵ད་ཀྱང་མེ༵ད་དེ། རྟ༵ག་བརྟ༵ན་ཐེ༵ར་ཟུ༵ག་ཆོས་ཀྱི་དབྱི༵ངས་ཀྱི༵་དབྱེ༵་བ༵ར་འགྱུ༵ར་བའི་ཕྱིར། དབུ་མའི་དབྱེ་བ་འདི༵་ལ༵་ཀུ༵ན་རྫོ༵བ་གཅི༵ག་ཀྱ༵ང་འདྲེ༵ས་པ༵་མེ༵ད་དེ། དོ༵ན་ད༵མ་ཡོ༵ངས་གྲུ༵༵བ་ཁོ༵་ན༵འི་དབྱེ༵་བ༵་ཡིན་པ་སྟེ༵། དེ་ཡང་ངོ༵་བོ༵་དབྱེ༵་བ༵་ཅུ༵ང་ཟ༵ད་ཙ༵མ་ཡ༵ང་མེ༵ད་པའི་ཕྱིར་ཏེ། མངོན་པར་རྟོགས་པའི་རྒྱན་ལས། ཆོས་ཀྱི་དབྱིངས་ལ་དབྱེར་མེད་ཕྱིར། །རིགས་ནི་ཐ་དད་རུང་མ་ཡིན། །ཞེས་གསུངས་པའི་ཕྱིར། འོན་ཀྱང་མི༵ང་ད༵ང་རྣ༵མ་པ༵འི་ད༵བྱེ་བ༵་ཤིན༵་ཏུ༵་མ༵ང་སྟེ། ག༵ང་ཕྱི༵ར་ཆོ༵ས་ཀྱི་དབྱི༵ངས་དུ༵་མ༵་ངོ་བོ་དབྱེར་མེད་རོ༵་གཅི༵ག་གི་དོ༵ན་མི༵ང་ནི༵་རྣམ་གྲངས་དུ༵་མ༵་ཡོད་ཀྱང་དོ༵ན་ནི༵་དབྱེར་མེད་རོ༵་གཅི༵ག་པ་ད༵ང༌། རྣ༵མ་པ༵འི་དབྱེ་བ་དུ༵་མ༵་ཡོད་ཀྱང་ངོ༵་བོ༵་དབྱེར་མེད་རོ༵་གཅི༵ག་གོ༵ །དེ༵་ཕྱི༵ར་དབྱེ་བ་འ༵དི་ནི༵་ཤེ༵ར་ཕྱི༵ན་མཐ༵ར་ཐུ༵ག་ད༵ང་མྱ༵ང་འད༵ས་ཆེ༵ན་པོ༵་དང་ཕྱ༵ག་རྒྱ༵་ཆེ༵ན་པོ༵་ད༵ང༌། ཤི༵ན་ཏུ༵་རྣ༵ལ་འབྱོ༵ར་དང༌། རྡོ༵་རྗེ༵འི་རྣ༵ལ་འབྱོ༵ར་ད༵ང༌། ལྷ༵ན་གཅི༵ག་སྐྱེ༵ས་སྦྱོ༵ར་དང༌། དུ༵ས་ཀྱི་འཁོ༵ར་ལོ་དང༌། བ༵དེ་དགྱེ༵ས་སོག༵ས་ཟ༵བ་མོ༵་མཐ༵ར་ཐུ༵ག་ཀུ༵ན་གྱི༵་དབྱེ༵་བ༵ར་འགྱུ༵ར་བ་ཡིན་ནོ། །དེ༵་ལྟ༵ར་ལེགས་པར་ཤེས༵་ན༵་གཅི༵ག་ཤེ༵ས་པས་ཀུན༵་ཤེས༵་པར་འགྱུར་བ་ཡི༵ན་ཅིང༌། གཤི༵ས་ལུག༵ས་ཟ༵བ་མོ༵་མཐ༵ར་ཐུ༵ག་ཐམ༵ས་ཅ༵ད་ལ༵་རྨོང༵ས་པ༵་མེ༵ད་པའི༵་མཁ༵ས་པ༵་ཆེ༵ན་པོ༵ར་འགྱུ༵ར་བ་ཡིན་ནོ། །དེ་དག་གི་དོན་མདོར་བསྡུས་ན་ཐལ་འགྱུར་དང་རང་རྒྱུད་གཉིས་དབུ་མའི་དབྱེ་བར་འདོད་པ་བཀག་ནས། དེ་བཞིན་ཉིད་སོགས་དོན་དམ་པའི་ལྷ་སྔགས་ཐམས་ཅད་དབུ་མའི་དབྱེ་བ་ཡིན་པར་ལུང་རིགས་ཀྱིས་གྲུབ་པར་བསྟན་པ་ཡིན་ནོ། ། ཐལ་འགྱུར་དང་རང་རྒྱུད་གཉིས་དབུ་མའི་དབྱེ་བར་མི་རིགས་པར་བསྟན་པ།གཉིས་པ་ཐལ་འགྱུར་དང་རང་རྒྱུད་གཉིས་དབུ་མའི་དབྱེ་བར་མི་རིགས་པར་བསྟན་པ་ནི། རང་རྒྱུད་ཐལ་འགྱུར་གཉིས་ཀ་འདུས་བྱས་ཡིན། །དེ་ཕྱིར་དེ་དག་དངོས་པོའི་མཐར་ལྟུང་ཞིང༌། །ཡོད་པའི་ཕྱོགས་སུ་ཆད་ཕྱིར་དབུ་མ་མིན། །དབུ་མ་མིན་པ་དབུ་མའི་དབྱེ་གཞི་དང༌། །ཕྱེ་བ་ཡ་ཀྱལ་གང་དུ་ཡང་མི་རུང་སྟེ། །ཚད་མ་མིན་པ་ཚད་མའི་དབྱེ་གཞི་དང༌། །ཕྱེ་བའི་ཡ་ཀྱལ་གང་དུའང་མི་རུང་བཞིན། །བདེན་པ་མིན་པ་བདེན་པའི་དབྱེ་གཞི་དང༌། །ཕྱེ་བའི་ཡ་ཀྱལ་གང་དུའང་མི་རུང་བཞིན། །རྫོགས་ལྡན་ལུགས་ནི་དེ་ལྟར་ཡིན་མོད་ཀྱང༌། །རྩ་བར། རང་རྒྱུད་ཐལ་འགྱུར་གཉིས་ཀ་འདུས་བྱས་ཡིན། ཞེས་པ་ནས། དེ་ལྟར་ཡིན་མོད་ཀྱང༌། །ཞེས་པའི་བར་ཤོ་ལོ་ཀ་གཉིས་དང་རྐང་བ་གཉིས་བྱུང༌། དེའི་ཚིག་དོན་ནི། རང༵་རྒྱུ༵ད་དུ་སྒྲུབ་པ་དང༌། ཐ༵ལ་འགྱུ༵ར་དུ་འཕེན་པ་གཉི༵ས་ཀ༵འང་འདུ༵ས་བྱ༵༵ས་ཀྱི་དངོས་པོ་ཡི༵ན་པ་དེའི༵་ཕྱི༵ར་དེ༵་ད༵ག་དངོ༵ས་པོ༵འི་མཐ༵ར་ལྟུང་ཞི༵ང་ཡོ༵ད་པ༵འི་ཕྱོག༵ས་སུ༵་ཆ༵ད་པའི་ཕྱི༵ར་ན་ད༵བུ་མ༵་བར་མ་ཕུང་པོ་གསུམ་པ་མ་ནིང་གི་གོ་འཕང་མི༵ན་ནོ། །ད༵བུ་མ༵་མི༵ན་པ༵་ཞིག་དབུ༵་མའི༵་དབྱེ༵་ག༵ཞི་ད༵ང་དབུ་མ་ལ་ཕྱེ༵་བ༵འི་ཡ༵་གྱ༵ལ་ག༵ང་དུ༵་ཡ༵ང་མི༵་རུ༵ང་སྟེ༵། དཔེར་ན་ཚ༵ད་མ༵་མི༵ན་པ༵་ཚ༵ད་མ༵འི་དབྱེེ༵་གཞི༵་ད༵ང༌། དེ་ལ་ཕྱེ༵་བ༵འི་ཡ༵་གྱ༵ལ་ག༵ང་དུ༷འ༵ང་མི༵་རུ༵ང་བ་བཞི༵ན་དང༌། བདེ༵ན་པ༵་མི༵ན་པ༵་བདེ༵ན་པ༵འི་ད༵བྱེ་གཞི༵་ད༵ང༌། ཕྱེ༵་བའི༵་ཡ༵་གྱ༵ལ་ག༵ང་དུ༵འ༵ང་མི༵་རུ༵ང་བ་བཞི༵ན་རྫོ༵གས་ལྡ༵ན་ལུག༵ས་ལ་ནི༵་དེ༵་ལྟ༵ར་ཡི༵ན་མོ༵ད་ཀྱ༵ང་གཞན་ལུགས་ལ་དེ་ལྟར་མ་ཡིན་པའི་ཕྱིར་རོ། །དེའི་དོན་མདོར་བསྡུས་ན་ཐལ་འགྱུར་དང་རང་རྒྱུད་གཉིས་ཀ་ཡོད་པའི་ཕྱོགས་སུ་ལྷུང་བས་དབུ་མ་ལས་དབྱེ་བའི་ཡ་གྱལ་ཡིན་པར་མི་རིགས་པ་དཔེ་དོན་དང་བཅས་ཏེ་བསྟན་ཏོ། །གསུམ་པ་གཞན་ལུགས་ཀྱི་དབུ་མའི་དོན་བཀག་ནས་རང་ལུགས་བསྟན་པ་ལ། གཞན་གྱི་འདོད་ལུགས་བསྟན་པ། དེ་ལྟར་འདོད་པ་དེ་སྡིག་ལྟ་ཆེན་པོ་ཡིན་པར་བསྟན་པ། སྟོང་ཉིད་ཟབ་མོ་གསུངས་པ་ཐམས་ཅད་སྟོང་གཞི་ཟབ་མོ་ལ་དགོངས་པར་བསྟན་པ། སྟོང་གཞི་ཉིད་ཟབ་མོ་མཐར་ཐུག་ཡིན་པས་དེ་སྟོན་པའི་མདོ་སྔགས་ཐམས་ཅད་དབུ་མའི་གཞུང་དུ་བསྟན་པ་དང་བཞི། དང་པོ་ནི། གསུམ་ལྡན་མར་བཅད་སྐྱོན་ཅན་རྣམས་ན་རེ། །མཐའ་དང་བྲལ་བ་ཙམ་ལ་དབུ་མ་ཞེས། །བཏགས་པར་ཟད་ཀྱི་དོན་ལ་དབུ་མ་མེད། །དབུ་མའང་དབུ་མས་སྟོང་པ་ཡིན་ཕྱིར་ལོ། །རྩ་བར། གསུམ་ལྡན་མར་བཅད་སྐྱོན་ཅན་རྣམས་ན་རེ། །ཞེས་པ་ནས། སྟོང་བ་ཡིན་ཕྱིར་ལོ། ཞེས་པའི་བར་ཤོ་ལོ་ཀ་གཅིག་བྱུང༌། དེའི་ཚིག་དོན་ནི། གསུ༵མ་ལྡ༵ན་མ༵ར་བཅ༵ད་སྐྱོ༵ན་ཅ༵ན་རྣམ༵ས་ན༵་རེ༵། མཐ༵འ་ད༵ང་བྲལ༵་བ༵་ཙ༵མ་དེ་ལ༵་དབུ༵་མ༵་ཞེ༵ས་བཏག༵ས་པ་ཡིན་པར༷་ཙམ་དུ་ཟ༵ད་ཀྱི༷་དོ༵ན་ལ༵་ད༵བུ་མ༵་མེ༵ད་པ་ཡིན་པས་དབུ༵་མ༷འ༵ང་དབུ༵་མ༵ས་སྟོ༵ང་བ༵་ཡི༵ན་པའི་ཕྱི༵ར་ཞེས་འདོད་པ་དང༌། ལོ༵་ཞེས་པ་ནི་ཕ་རོལ་བོའི་འདོད་པ་ལ་མ་རངས་བར་བྱས་པའོ། །དེ་ལྟར་འདོད་པ་ལ་འདིའི་སྐབས་སུ་འདི་ཉིད་ཀྱི་འགྲེལ་བ་ལས། ཡིད་འབྱུང་བ་དང་སྐྱོ་ཤས་སྐྱེ་བ་དང་སྙིང་རྗེ་ཆེན་པོ་སྐྱེ་བ་ཡང་མ་ཡིན་ནོ། །ཞེས་གསུངས་སོ། ། དེ་ལྟར་འདོད་པ་དེ་སྡིག་ལྟ་ཆེན་པོ་ཡིན་པར་བསྟན་པ་ནི།གཉིས་པ་དེ་ལྟར་འདོད་པ་དེ་སྡིག་ལྟ་ཆེན་པོ་ཡིན་པར་བསྟན་པ་ནི། དེ་ལྟ་ཡིན་ན་དོན་དམ་ཆོས་སྐུ་དང༌། །ངོ་བོ་ཉིད་སྐུ་ལྷན་ཅིག་སྐྱེས་སྐུ་དང༌། །རྟག་བརྟན་ཐེར་ཟུག་གཡུང་དྲུང་མཁའ་ཁྱབ་ཀྱི། །སངས་རྒྱས་ཆོས་དང་དགེ་འདུན་ཐམས་ཅད་ལ། །སྐུར་བ་བཏབ་པའི་སྡིག་ལྟ་ཆེན་པོར་འགྱུར། །གང་ཕྱིར་དེ་རྣམས་རང་གིས་མི་སྟོང་པའི། །གཞན་སྟོང་ཟབ་མོ་ཡིན་པར་གསུངས་ཕྱིར་རོ། །རྩ་བར། དེ་ལྟ་ཡིན་ན་དོན་དམ་ཆོས་སྐུ་དང༌། །ཞེས་པ་ནས། གསུངས་ཕྱིར་རོ། །ཞེས་པའི་བར་ཤོ་ལོ་ཀ་གཅིག་དང་རྐང་བ་གསུམ་བྱུང༌། དེའི་ཚིག་དོན་ནི་འདོད་པ་དེ༵་ལྟ༵་ཡི༵ན་ན༵་དོ༵ན་ད༵མ་ཆོ༵ས་ཀྱི་སྐུ༵་ད༵ང༌། ངོ༵་བོ༵་ཉིད༵་སྐུ༵་དང༌། བདེ་སྟོང་ལྷ༵ན་ཅི༵ག་སྐྱེ༵ས་པའི་སྐུ༵་ད༵ང༌། རྟ༵ག་བརྟ༵ན་ཐེ༵ར་ཟུག༵་གཡུ༵ང་དྲུ༵ང་མཁ༵འ་ཁྱ༵བ་ཀྱི༵་དོན་དམ་པའི་སང༵ས་རྒྱ༵ས་དང་ཆོ༵ས་དཀོན་མཆོག་ད༵ང༌། ད༵གེ་འདུ༵ན་དཀོན་མཆོག་ཐམ༵ས་ཅ༵ད་ལ༵་མེད་པར་བསྐུ༵ར་བ༵་བཏ༵བ་པ༵འི་སྡི༵ག་ལྟ༵་ཆེ༵ན་པོ༵ར་འགྱུ༵ར་བའི་ཕྱིར། རྒྱུ་མཚན་ག༵ང་གི་ཕྱི༵ར་ཞེ་ན། དོན་དམ་པའི་ཆོས་སྐུ་སོགས་དེ༵་རྣམ༵ས་ར༵ང་གི༵ས་མི༵་སྟོ༵ང་བ༵འི་གཞ༵ན་སྟོ༵ང་ཟ༵བ་མོ༵་ཡི༵ན་པ༵ར་གསུང༵ས་བའི་ཕྱི༵ར་ཏེ། དཀོན་མཆོག་སྤྲིན་མདོ་ལས། རིགས་ཀྱི་བུ་གལ་ཏེ་དོན་དམ་པ་མེད་དུ་ཟིན་ན་ཚངས་པར་སྤྱོད་པ་དོན་མེད་པར་འགྱུར་རོ༵། །གང་གི་ཕྱིར་དོན་དམ་པ་ཡོད་པས་ན། དེའི་ཕྱིར་བྱང་ཆུབ་སེམས་དཔའ་རྣམས་དོན་དམ་ལ་མཁས་པ་ཞེས་བྱའོ། །ཞེས་དང༌། རྒྱུད་བླ་མ་ལས། རྣམ་དབྱེ་བཅས་པའི་མཚན་ཉིད་ཅན། །གློ་བུར་དག་གིས་ཁམས་སྟོང་གི། །རྣམ་དབྱེ་མེད་པའི་མཚན་ཉིད་ཅན། །བླ་མེད་ཆོས་ཀྱིས་སྟོང་མ་ཡིན། །ཞེས་དང༌། རྒྱུད་བླ་ཐོགས་འགྲེལ་ལས། །དེས་ན་དེ་བཞིན་གཤེགས་པའི་སྙིང་པོ་ནི། རྣམ་པར་དབྱེ་བ་ཡོད་པ། བྲལ་ཤེས་པ་ཉོན་མོངས་པའི་སྦུབས་ཐམས་ཅད་ཀྱིས་ནི་སྟོང་བ་ཡིན་ལ། རྣམ་པར་དབྱེ་བ་མེད་པ། བྲལ་མི་ཤེས་པ། བསམ་གྱི་མི་ཁྱབ་པའི་སངས་རྒྱས་ཀྱི་ཆོས་གང་གཱའི་ཀླུང་གི་བྱེ་མ་ལས་འདས་པ་ནི་མི་སྟོང་ངོ༌། །ཞེས་གསུངས་སོ། །དེ་ལྟར་ན་གང་ཞིག་གང་ན་མེད་པ་དེ་ནི་དེས་སྟོང་ངོ། །ཞེས་ཡང་དག་པར་རྗེས་སུ་མཐོང་ལ། གང་ཞིག་ལྷག་མར་གྱུར་བ་དེ་ནི་དེ་ལ་རྟག་པར་ཡོད་དོ། །ཞེས་ཡང་དག་པ་ཇི་ལྟ་བ་བཞིན་དུ་ཤེས་སོ། །ཚིགས་སུ་བཅད་པ་འདི་གཉིས་ཀྱིས་ནི་སྒྲོ་འདོགས་པ་དང༌། སྐུར་བ་འདེབས་པའི་མཐའ་དང་བྲལ་བའི་ཕྱིར་ཕྱིན་ཅི་མ་ལོག་པ་སྟོང་བ་ཉིད་ཀྱི་མཚན་ཉིད་བསྟན་ཏོ། །ཞེས་གསུངས་པའི་ཕྱིར་རོ། ། སྟོང་ཉིད་ཟབ་མོ་གསུངས་པ་ཐམས་ཅད་སྟོང་གཞི་ཟབ་མོ་ལ་དགོངས་པར་བསྟན་པ།གསུམ་པ་སྟོང་ཉིད་ཟབ་མོ་གསུངས་པ་ཐམས་ཅད་སྟོང་གཞི་ཟབ་མོ་ལ་དགོངས་པར་བསྟན་པ་ནི། མདོ་རྒྱུད་རྣམ་དག་ཟབ་མོ་ཐམས་ཅད་དུ། །སྟོང་ཉིད་ཟབ་མོ་གསུངས་པ་ཐམས་ཅད་ནི། །སྒྲོ་སྐུར་གཉིས་ཀྱི་སྟོང་བའི་གཞི་ལ་དགོངས། །དེ་བཞིན་ཡོད་མེད་གཉིས་ཀྱི་སྟོང་གཞི་དང༌། །དངོས་པོ་དངོས་མེད་གཉིས་ཀྱི་སྟོང་གཞི་དང༌། །ཀུན་རྫོབ་ཀུན་གྱིས་སྟོང་བའི་གཞི་ལ་དགོངས། །རྩ་བར། མདོ་རྒྱུད་རྣམ་དག་ཟབ་མོ་ཐམས་ཅད་དུ། །ཞེས་པ་ནས། སྟོང་བའི་གཞི་ལ་དགོངས། །ཞེས་པའི་བར་ཤོ་ལོ་ཀ་གཅིག་དང་རྐང་བ་གཉིས་བྱུང༌། དེའི་ཚིག་དོན་ནི། མ༵དོ་རྒྱུ༵ད་རྣམ༵་ད༵ག་ཟ༵བ་མོ༵་ཐ༵མས་ཅ༵ད་དུ༵་སྟོ༵ང་ཉི༵ད་ཟ༵བ་མོ༵་གསུང༵ས་པ༵་གང་ཡིན་པ་ཐམ༵ས་ཅ༵ད་ནི༵། སྒྲོ༵་འདོགས་པ་དང་སྐུ༵ར་འདེབས་གཉི༵ས་ཀྱི༵ས་སྟོ༵ང་བ༵འི་གཞི༵་ལ༵་དགོང༵ས་པ་དང༌། དེ༵་བཞི༵ན་དུ་ཡོ༵ད་མེ༵ད་ཀྱི་མཐའ་གཉི༵ས་ཀྱི༵ས་སྟོ༵ང་བའི་གཞི༵་ལ་དགོངས་པ་ད༵ང༌། དངོ༵ས་པོ༵་དངོ༵ས་མེ༵ད་གཉི༵ས་ཀྱི༵ས་སྟོ༵ང་བའི་ག༵ཞི་ལ་དགོངས་པ་ད༵ང༌། ཀུ༵ན་རྫོ༵བ་ཀུ༵ན་གྱི༵ས་སྟོ༵ང་བ༷འི་གཞི༵་བདེ་གཤེགས་སྙིང་པོ་ལ་༵དགོང༵ས་པ་ཡིན་ནོ། །དེ་ལྟར་སྟོང་ཉིད་ཟབ་མོ་མཐར་ཐུག་དེ་མཐའ་ཐམས་ཅད་ཀྱིས་སྟོང་བའི་གཞི་ཡིན་གྱི་མཐའ་བྲལ་ཙམ་གྱི་རང་སྟོང་མེད་དགག་ནི་མ་ཡིན་པར་བསྟན་ཏོ། །བཞི་བ་སྟོང་གཞི་ཉིད་ཟབ་མོ་མཐར་ཐུག་ཡིན་པས་དེ་སྟོན་པའི་མདོ་སྔགས་ཐམས་ཅད་དབུ་མའི་གཞུང་དུ་བསྟན་པ་ནི། སྟོང་གཞི་དེ་ཉིད་བདེ་གཤེགས་སྙིང་པོ་དང༌། །རང་བཞིན་རིགས་དང་རང་བཞིན་སངས་རྒྱས་དང༌། །རང་བཞིན་ཆོས་དང་རང་བཞིན་དགེ་འདུན་དང༌། །རང་བཞིན་ལྷུན་གྱིས་གྲུབ་པའི་དཀྱིལ་འཁོར་དང༌། །རང་བཞིན་ལྷ་དང་རང་བཞིན་རྒྱུད་དང་སྔགས། །རང་བཞིན་མྱང་འདས་རང་བཞིན་འོད་གསལ་དང༌། །རང་བཞིན་གྱིས་དག་གདོད་ནས་རྣམ་དག་དང༌། །རྣམ་པར་དག་པའི་གཟུགས་ནས་རྣམ་མཁྱེན་པར། །ཆོས་ཉིད་འགྱུར་བ་མེད་པའི་ཡོངས་གྲུབ་ཀྱི། །གཟུགས་ནས་སངས་རྒྱས་ཆོས་ཀྱི་བར་ལ་སོགས། །འདུས་མ་བྱས་ཀྱི་སྟོབས་བཅུ་ལ་སོགས་པ། །ཡོན་ཏན་མཐའ་ཡས་ཚང་བའི་དེ་བཞིན་ཉིད། །གཞི་ཡི་སངས་རྒྱས་དང་པོའི་སངས་རྒྱས་ཡིན། །གདོད་ནས་གྲོལ་བའི་དེ་བཞིན་གཤེགས་པ་དང༌། །ནམ་མཁའི་རང་བཞིན་གཟོད་ནས་རྣམ་གྲོལ་ཐུགས། །སངས་རྒྱས་ཀུན་བས་སྔར་སངས་རྒྱས་ཀྱང་ཡིན། །དེ་ཕྱིར་དེ་བཞིན་ཉིད་སོགས་ལེགས་སྟོན་པའི། །མདོ་རྒྱུད་ཟབ་མོ་ཀུན་གྱི་མཐར་ཐུག་ནི། །གཞན་སྟོང་ཡིན་གྱི་རང་སྟོང་གཏན་མ་ཡིན། །དོན་དམ་ཡིན་གྱི་ཀུན་རྫོབ་གཏན་མ་ཡིན། །ཆོས་ཉིད་ཡིན་གྱི་ཆོས་ཅན་གཏན་མ་ཡིན། །དབུ་མ་ཡིན་གྱི་མཐའ་མ་གཏན་མ་ཡིན། །མྱང་འདས་ཡིན་གྱི་འཁོར་བ་གཏན་མ་ཡིན། །ཡེ་ཤེས་ཡིན་གྱི་རྣམ་ཤེས་གཏན་མ་ཡིན། །གཙང་བ་ཡིན་གྱི་མི་གཙང་གཏན་མ་ཡིན། །བདག་མཆོག་ཡིན་གྱི་ཅང་མེད་གཏན་མ་ཡིན། །བདེ་ཆེན་ཡིན་གྱི་སྡུག་བསྔལ་གཏན་མ་ཡིན། །རྟག་བརྟན་ཡིན་གྱི་མི་རྟག་གཏན་མ་ཡིན། །རང་བྱུང་ཡིན་གྱི་གཞན་བྱུང་གཏན་མ་ཡིན། །ཡོངས་གྲུབ་ཡིན་གྱི་ཀུན་བརྟགས་གཏན་མ་ཡིན། །རང་བཞིན་ཡིན་གྱི་བཅོས་མ་གཏན་མ་ཡིན། །གཉུག་མ་ཡིན་གྱི་གློ་བུར་གཏན་མ་ཡིན། །སངས་རྒྱས་ཡིན་གྱི་སེམས་ཅན་གཏན་མ་ཡིན། །སྙིང་པོ་ཡིན་གྱི་ཤུན་པ་གཏན་མ་ཡིན། །ངེས་དོན་ཡིན་གྱི་དྲང་དོན་གཏན་མ་ཡིན། །མཐར་ཐུག་ཡིན་གྱི་གནས་སྐབས་གཏན་མ་ཡིན། །གཞི་འབྲས་ཡིན་གྱི་ལམ་བདེན་གཏན་མ་ཡིན། །སྦྱང་གཞི་ཡིན་གྱི་སྦྱང་བྱ་གཏན་མ་ཡིན། །གཤིས་ལུགས་ཡིན་གྱི་འཁྲུལ་ལུགས་གཏན་མ་ཡིན། །གཞན་མཆོག་ཡིན་གྱི་ཕྱི་ནང་གཏན་མ་ཡིན། །བདེན་པ་ཡིན་གྱི་བརྫུན་པ་གཏན་མ་ཡིན། །ཡང་དག་ཡིན་གྱི་ལོག་པ་གཏན་མ་ཡིན། །སྟོང་གཞི་ཡིན་གྱི་སྟོང་ཙམ་གཏན་མ་ཡིན། །བྲལ་གཞི་ཡིན་གྱི་བྲལ་ཙམ་གཏན་མ་ཡིན། །མེད་གཞི་ཡིན་གྱི་མེད་ཙམ་གཏན་མ་ཡིན། །སྒྲུབ་ཆོས་ཡིན་གྱི་མེད་དགག་གཏན་མ་ཡིན། །དགེ་བ་ཡིན་གྱི་མི་དགེ་གཏན་མ་ཡིན། །ཚད་མ་ཡིན་་གྱི་ཚད་མིན་གཏན་མ་ཡིན། །རིགས་པ་ཡིན་གྱི་མི་རིགས་གཏན་མ་ཡིན། །དྲི་མེད་ཡིན་གྱི་དྲི་མ་གཏན་མ་ཡིན། །དེ་ཕྱིར་དེ་དག་དབུ་མ་ཆེན་པོར་མཚུངས། །ཆོས་འཁོར་གསུམ་པའི་མདོ་མཆོག་ཐམས་ཅད་དང༌། །བྱམས་ཆོས་ཐམས་ཅད་དབུ་མ་ཆེན་པོར་མཚུངས། །རྣམ་དག་རྒྱུད་སྡེ་རྣམས་ཀྱང་དེ་བཞིན་ནོ། །རྩ་བར། སྟོང་གཞི་དེ་ཉིད་བདེ་གཤེགས་སྙིང་པོ་དང༌། །ཞེས་པ་ནས། རྣམ་དག་རྒྱུད་སྡེ་རྣམས་ཀྱང་དེ་བཞིན་ནོ། །ཞེས་པའི་བར་ཤོ་ལོ་ཀ་བཅུ་གསུམ་དང་རྐང་བ་གཉིས་བྱུང༌། དེའི་ཚིག་དོན་ནི། ཀུན་རྫོབ་གཟུང་འཛིན་གྱིས་སྟོ༵ང་བའི་གཞི༵་དེ༵་ཉི༵ད་ནི། བདེ༵་གཤེ༵གས་སྙི༵ང་པོ༵་ད༵ང་ར༵ང་བཞི༵ན་གྱི་རིག༵ས་ད༵ང༌། ར༵ང་བཞི༵ན་གྱི་སང༵ས་རྒྱ༵ས་ད༵ང༌། ར༵ང་བཞི༵ན་གྱི་ཆོ༵ས་ད༵ང༌། ར༵ང་བཞི༵ན་གྱི་ད༵གེ་འདུ༵ན་ད༵ང༌། ར༵ང་བཞི༵ན་འབད་མེད་ལྷུ༵ན་གྱི༵ས་གྲུ༵བ་པ༵འི་དཀྱི༵ལ་འཁོ༵ར་ད༵ང༌། ར༵ང་བཞི༵ན་གྱི་ལྷ༵་ད༵ང༌། ར༵ང་བཞི༵ན་གྱི་རྒྱུ༵ད་ད༵ང་སྔག༵ས་དང༌། རང༵་བཞི༵ན་གྱི་མྱ༵ང་འད༵ས་དང༌། ར༵ང་བཞི༵ན་འོ༵ད་གས༵ལ་དང༵༌། ར༵ང་བཞི༵ན་གྱི༵་དྲི་མས་དག༵་པའི་གདོ༵ད་ན༵ས་རྣ༵མ་ད༵ག་ད༵ང༌། གཞན་དབང་དང་ཀུན་བཏགས་གཉིས་ཀྱི་རྣ༵མ་པ༵ར་ད༵ག་པའི༵་གཟུ༵གས་ན༵ས་རྣ༵མ་མཁྱེ༵ན་བ༵ར་དང༌། ཆོ༵ས་ཉི༵ད་འགྱུ༵ར་བ༵་མེ༵ད་པ༵འི་ཡོ༵ངས་གྲུ༵བ་ཀྱི༵་གཟུ༵གས་ན༵ས་སང༵ས་རྒྱ༵ས་ཀྱི་ཆོ༵ས་ཀྱི༵་བ༵ར་ལ༵་སོག༵ས་པ་རྣམས་ཡིན་པ་དང༌། འདུས༵་མ༵་བྱ༵ས་ཀྱི༵་སྟོབ༵ས་བཅུ༵་ལ༵་སོག༵ས་པ༵་རྣམས་དང༌། ཡོ༵ན་ཏ༵ན་མཐ༵འ་ཡ༵ས་ཚ༵ང་བ༵འི་དེ༵་བཞི༵ན་ཉི༵ད་ཡིན་པ་དང༌། ག༵ཞི་ཡི༵་སང༵ས་རྒྱ༵ས་ད༵ང་པོ༵འི་ས༵ངས་རྒྱ༵ས་ཡི༵ན་པ་དང༌། གདོ༵ད་ན༵ས་གྲོ༵ལ་བ༵འི་དེ༵་བཞི༵ན་གཤེ༵གས་པ༵་ཡིན་པ་ད༵ང༌། ན༵མ་མཁ༵འི་ར༵ང་བ༵ཞིན་གཟོ༵ད་ན༵ས་རྣ༵མ་པར་གྲོ༵ལ་བའི་ཐུག༵ས་ཡིན་པ་དང༌། སང༵ས་རྒྱ༵ས་ཀུ༵ན་བ༵ས་སྔ༵ར་སང༵ས་རྒྱ༵ས་ཀྱ༵ང་ཡི༵ན་པ་ལུང་རིགས་དུ་མས་གྲུབ་པ་ཡིན་ནོ། །རྒྱས་པར་རི་ཆོས་ངེས་དོན་རྒྱ་མཚོ་སོགས་ལས་ཤེས་པར་བྱའོ། །དེ་ལྟར་སྟོང་གཞི་དེ་ཟབ་མོ་མཐར་ཐུག་པ་ཐམས་ཅད་ཡིན་པ་དེ༵འི་ཕྱི༵ར་དེ༵་བཞི༵ན་ཉི༵ད་སོག༵ས་ཟབ་མོ་མཐར་ཐུག་ཐམས་ཅད་ལེག༵ས་པར་སྟོན༵་པ༵འི་མ༵དོ་རྒྱུ༵ད་ཟ༵བ་མོ༵་ཀུ༵ན་གྱི༵་དགོངས་པ་མཐ༵ར་ཐུ༵ག་ནི༵། གཞ༵ན་སྟོ༵ང་དབུ་མ་ཉིད་ཡི༵ན་གྱི༵་དེ་ལས་གཞན་ར༵ང་སྟོ༵ང་གཏ༵ན་མ༵་ཡི༵ན་པ་དང༌། དེ༵་ནི༵་དོ༵ན་ད༵མ་ཡི༵ན་གྱི༵་ཀུ༵ན་རྫོ༵བ་གཏ༵ན་མ༵་ཡི༵ན་པ་དང༌། དེ་ནི་ཆོ༵ས་ཉི༵ད་ཡི༵ན་གྱི༵་ཆོ༵ས་ཅ༵ན་གཏ༵ན་མ༵་ཡི༵ན་པ་དང༌། དེ་ནི་དབུ༵་མ༵་ཆེན་པོ་ཡི༵ན་ཀྱི༵་མཐ༵འ་མ༵་ག༵ཏན་མ༵་ཡིན༵་པ་དང༌། དེ་ནི་མྱ༵ང་འད༵ས་ཆེན་པོ་ཡི༵ན་གྱི༵་འཁོ༵ར་བ༵་གཏ༵ན་མ༵་ཡི༵ན་པ་དང༌། དེ་ནི་ཡེ༵་ཤེ༵ས་ཡི༵ན་གྱི༵་རྣམ༵་ཤེས༵་གཏ༵ན་མ༵་ཡི༵ན་པ་དང༌། དེ་ནི་གཙ༵ང་བ༷་ཡི༵ན་གྱི༵་མི༵་གཙ༵ང་བ་གཏ༵ན་མ༵་ཡི༵ན་པ་དང༌། དེ་ནི་བ༵དག་མཆོ༵ག་ཡི༵ན་གྱི༵་ཅ༵ང་མེ༵ད་སྟོང་རྐྱང་ཙམ་གཏ༵ན་མ༵་ཡི༵ན་པ་དང༌། དེ་ནི་བདེ༵་བ་ཆེ༵ན་པོ་ཡི༵ན་གྱི༵་སྡུ༵ག་བསྔ༵ལ་གཏ༵ན་མ༵་ཡི༵ན་པ་དང༌། དེ་ནི་རྟ༵ག་བརྟ༵ན་ཡི༵ན་གྱི༵་མི༵་རྟ༵ག་པ་གཏ༵ན་མ་༵ཡི༵ན་པ་དང༌། དེ་ནི་ར༵ང་བྱུ༵ང་ཡི༵ན་གྱི༵་གཞ༵ན་བྱུ༵ང་གཏ༵ན་མ༵་ཡི༵ན་པ་དང༌། དེ༵་ནི༵་ཡོང༵ས་གྲུ༵བ་ཡི༵ན་གྱི༵་ཀུ༵ན་བཏ༵གས་གཏན༵་མ༵་ཡི༵ན་པ་དང༌། དེ་ནི་ར༵ང་བཞི༵ན་ཡི༵ན་གྱི༵་བཅོ༵ས་མ༵་གཏ༵ན་མ༵་ཡི༵ན་པ་དང༌། དེ་ནི་ག༵ཉུག་མ༵་ཡིན༵་གྱི༵་གློ༵་བུ༵ར་གཏ༵ན་མ༵་ཡི༵ན་པ་དང༌། དེ་ནི་སང༵ས་རྒྱ༵ས་ཡི༵ན་གྱི༵་སེམ༵ས་ཅ༵ན་གཏ༵ན་མ༵་ཡིན༵་པ་དང༌། དེ་ནི་སྙི༵ང་པོ༵་ཡི༵ན་གྱི༵་ཤུ༵ན་པ༵་གཏ༵ན་མ༵་ཡི༵ན་པ་དང༌། དེ་ནི་ངེས༵་དོ༵ན་ཡི༵ན་གྱི༵་དྲ༵ང་དོན༵་གཏ༵ན་མ༵་ཡི༵ན་པ་དང༌། དེ་ནི་མཐ༵ར་ཐུ༵ག་ཡི༵ན་གྱི༵་གན༵ས་སྐ༵བས་གཏ༵ན་མ༵་ཡི༵ན་པ་དང༌། དེ་ནི་ག༵ཞི་འབྲ༵ས་ཡི༵ན་གྱི༵་ལ༵མ་བདེ༵ན་འདུས་བྱས་གཏ༵ན་མ༵་ཡི༵ན་པ་དང༌། དེ་ནི་སྦྱ༵ང་ག༵ཞི་ཡི༵ན་གྱི༵་སྦྱ༵ང་བྱ༵་གཏ༵ན་མ༵་ཡི༵ན་པ་དང༌། དེ་ནི་གཤི༵ས་ལུག༵ས་ཡི༵ན་གྱི༷་འཁྲུ༵ལ་ལུ༵གས་གཏ༵ན་མ༵་ཡི༵ན་པ་དང༌། དེ་ནི་གཞ༵ན་མཆོ༵ག་ཡིན༵་གྱི༵་ཕྱི༵་ན༵ང་གཏ༵ན་མ༵་ཡི༵ན་པ་དང༌། དེ་ནི་བདེ༵ན་པ༵་ཡི༵ན་གྱི༵་བརྫུ༵ན་པ༵་གཏ༵ན་མ༵་ཡི༵ན་པ་དང༌། དེ་ནི་ཡང༵་ད༵ག་པ་ཡི༵ན་གྱི༵་ཕྱིན་ཅི་ལོ༵ག་པ༵་གཏ༵ན་མ༵་ཡི༵ན་པ་དང༌། དེ་ནི་ཀུན་བརྟགས་དང་གཞན་དབང་གི་སྟོ༵ང་བའི་གཞི༵་ཡི༵ན་གྱི༵་སྟོང་ཙ༵མ་གཏ༵ན་མ༵་ཡི༵ན་པ་དང༌། དེ་ནི་དྲི་མ་བྲ༵ལ་བའི་ག༵ཞི་ཡི༵ན་གྱི༵་བྲ༵ལ་ཙ༵་གཏ༵ན་མ༵་ཡི༵ན་པ་དང༌། དེ་ནི་བདག་སོགས་མེད༵་པའི་གཞི༵་ཡི༵ན་གྱི༵་མེད༵་ཙམ་༵གཏན༵་མ༵་ཡིན༵་པ་དང༌། དེ་ནི་དོན་དམ་པ་སྒྲུབ་༵པར་བྱ་བའི་ཆོས༵་ཡི༵ན་གྱི༵་མེད༷་དག༵ག་གཏ༵ན་མ༵་ཡི༵ན་པ་དང༌། དེ་ནི་དོན་དམ་པའི་ད༵གེ་བ༵་ཡི༵ན་གྱི༵་མི༵་དགེ༵་བ་གཏ༵ན་མ༵་ཡི༵ན་པ་དང༌། དེ་ནི་ཚ༵ད་མ༵་ཡི༵ན་གྱི༵་ཚ༵ད་མི༵ན་གཏ༵ན་མ༵་ཡི༵ན་པ་དང༌། དེ་ནི་རིག༵ས་པ༵་ཡི༵ན་གྱི༵་མི༵་རིག༵ས་པ་གཏ༵ན་མ༵་ཡི༵ན་པ་དང༌། མདོ་རྒྱུད་ཀུན་གྱི་བསྟན་བྱ་དེ་ནི་དྲི༵་མེ༵ད་ཡི༵ན་གྱི༵་དྲི༵་མ༵་དང་བཅས་པ་གཏ༵ན་མ༵་ཡི༵ན་ནོ། །རྒྱུ་མཚན་དེ༵འི་ཕྱི༵ར་ན་དོན་དམ་གྱི་ཆོས་དེ༵་ད༵ག་དབུ༵་མ༵་ཆེན༵་པོ༵་ཡིན་པར་མཚུང༵ས་སོ། །དེས་ན་བཀའ་ཐ་མ་ལེགས་པར་རྣམ་པར་ཕྱེ་བའི་ཆོ༵ས་ཀྱི་འཁོ༵ར་ལོ་གསུ༵མ་པའི༵་མདོ༵་སྡེ་མཆོ༵ག་ཐམ༵ས་ཅ༵ད་དང༵༌། དེའི་དགོངས་འགྲེལ་བྱམ༵ས་ཆོ༵ས་ཐམ༵ས་ཅ༵ད་ད༵བུ་མ༵་ཆེ༵ན་པོ༵འི་གཞུང་ཡིན་པར་མཚུ༵ངས་པ་དང་རྣ༵མ་ད༵ག་རྒྱུ༵ད་སྡེ༵་ཟབ་མོ་རྣམ༵ས་ཀྱ༵ང་དབུ་མ་ཆེན་པོའི་གཞུང་ཡིན་པ་ཡང་དེ༵་བཞི༵ན་ཡིན་ནོ༷། །དེའི་དོན་བསྡུ་ན། མདོ་རྒྱུད་ཀུན་གྱི་བསྟན་བྱའི་སྟོང་གཞི་ཆོས་དབྱིངས་ཟབ་མོ་དེ་ནི་ཀུན་རྫོབ་ཀྱི་ཆོས་འདི་ཐམས་ཅད་གཏན་ནས་མ་ཡིན་གྱི་གནས་ལུགས་བདེ་བ་ཆེན་པོའི་ཡེ་ཤེས་གཞན་སྟོང་ཟབ་མོ་དོན་དམ་པའི་ལྷ་དང་རྒྱུད་ལ་སོགས་པ་ཟབ་མོ་མཐར་ཐུག་ཐམས་ཅད་ཡིན་པས་དེ་སྟོན་པའི་བཀའ་བསྟན་བཅོས་ཐམས་ཅད་ཀྱང་དབུ་མ་ཆེན་པོའི་གཞུང་ཡིན་པར་འགྱུར་བ་ཡིན་པའི་ཕྱིར་རོ། ། རྟེན་འབྲེལ་ལ་བདེན་གཉིས་ཀྱི་རྣམ་དབྱེ་ཕྱེས་ནས་བསྟན་པ་ལ་རྟེན་འབྲེལ་དབུ་མ་འདོད་པ་དང་དབུ་མ་རྟེན་འབྲེལ་འདོད་པ་ལ་འདུས་བྱས་རྣམས་དབུ་མར་ཐལ་བའི་སྐྱོན་བརྗོད་པ།བཞི་བ་རྟེན་འབྲེལ་ལ་བདེན་གཉིས་ཀྱི་རྣམ་དབྱེ་ཕྱེས་ནས་བསྟན་པ་ལ་རྟེན་འབྲེལ་དབུ་མ་འདོད་པ་དང་དབུ་མ་རྟེན་འབྲེལ་འདོད་པ་ལ་འདུས་བྱས་རྣམས་དབུ་མར་ཐལ་བའི་སྐྱོན་བརྗོད་པ་དང༌། རྟེན་འབྲེལ་ལ་བདེན་གཉིས་ཀྱི་རྣམ་དབྱེ་ཤེས་དགོས་པར་བསྟན་པ། རྟེན་འབྲེལ་རྟོགས་པ་དབུ་མར་འཇུག་པའི་ལམ་ཡིན་པར་བསྟན་པ། དོན་དམ་རྟེན་འབྲེལ་དེ་ཀུན་རྫོབ་རྟེན་འབྲེལ་རྣམས་གདོད་ནས་འགག་པའི་གཞི་བདེན་དོན་བཅུ་གཉིས་སོགས་ཡིན་པར་བསྟན་པ། དོན་དམ་རྟེན་འབྲེལ་དེ་སེམས་ཙམ་ལས་འདས་པས་དེ་སྟོན་ཞིང་འདོད་པ་རྣམས་སེམས་ཙམ་ལས་འདས་པར་བསྟན་པ་དང་ལྔ། དང་པོ་ནི། གསུམ་ལྡན་མར་བཅད་མཁས་པ་ཕལ་ན་རེ། །ཀུན་རྫོབ་རྟེན་འབྲེལ་དབུ་མ་ཆེན་པོ་སྟེ། །དབུ་མ་གང་ཡིན་རྟེན་འབྲེལ་ཡིན་ནོ་ལོ། །དེ་ལྟ་ཡིན་ན་འདུས་བྱས་མི་རྟག་པའང༌། །རྟེན་འབྲེལ་ཡིན་པས་དབུ་མ་ཡིན་པར་འགྱུར། །འདོད་ན་དོན་དམ་ཆོས་དབྱིངས་ཡིན་པར་འགྱུར། །དེ་ཡང་འདོད་ན་འདུས་མ་བྱས་སུ་འགྱུར། །འདོད་ན་ཆོས་ཅན་དང་ཡང་འགལ་བར་འགྱུར། །རྩ་བར། གསུམ་ལྡན་མར་བཅད་མཁས་པ་ཕ༵ལ་ཆེར་ན་རེ། །ཞེས་པ་ནས། འགལ་བར་འགྱུར། ཞེས་པའི་བར་ཤོ་ལོ་ཀ་གཉིས་བྱུང༌། དེ་ལ་ཚིག་དོན་དང་མཐའ་དཔྱད་གཉིས། དང་པོ་ནི། གསུ༵མ་ལྡ༵ན་མ༵ར་བཅ༵ད་མཁ༵ས་པ༵་ཕ༵ལ་ཆེར་ན༵་རེ༵། ཀུ༵ན་རྫོ༵བ་ཀྱི་རྟེན༵་འབྲེ༵ལ་གང་ཡིན་པ་དབུ༵་མ༵་ཆེན༵་པོ༵་ཡིན་པ་སྟེ༵། ད༵བུ་མ༵་ག༵ང་ཡི༵ན་པ་ཡང་རྟེ༵ན་འབྲེ༵ལ་ཡི༵ན་པས་དེ་གཉིས་ཁྱབ་མཉམ་ངོ་བོ་གཅིག་པ་ཡིན་ནོ༵་ཟེར། ལོ༵་ཞེས་པ་ཕ་རོལ་བོའི་འདོད་པ་ལ་མ་རངས་པའོ། །དེ་ཡན་ཆད་དུ་གཞན་ལུགས་བརྗོད་ནས་དེ་དགག་པ་ལ་དེ༵་ལྟ༵ར་ཡི༵ན་ན་འདུ༵ས་བྱ༵ས་མི༵་རྟག༷་པ༷འ༵ང་རྟེ༵ན་འབྲེ༵ལ་ཡི༵ན་པ༵ས་དབུ༵་མ༵་ཡི༵ན་པ༵ར་འགྱུ༵ར་ལ། དེ་ཡང་འདོ༵ད་ན༵་འདུས་བྱས་དེ་དོ༵ན་ད༵མ་ཆོ༵ས་དབྱི༵ངས་ཡི༵ན་པ༵ར་འགྱུ༵ར་བ་ཡིན་ཏེ། དབུ་མ་ཡིན་པར་འདོད་པའི་ཕྱིར། དེ༵་ཡ༵ང་འདོ༵ད་ན༵་འདུས་བྱས་དག་འདུ༵ས་མ༵་བྱ༵ས་སུ༵་འགྱུ༵ར་བར་ཐལ། དོན་དམ་ཆོས་དབྱིངས་ཡིན་པའི་ཕྱིར། འདུས་མ་བྱས་ཡིན་པར་འདོ༵ད་ན༵། ཆོས༵་ཅ༵ན་འདུས་བྱས་མི་རྟག་པ་བཟུང་བ་ད༵ང་ཡང༵་དངོས་སུ་འག༵ལ་བ༵ར་འགྱུ༵ར་ཞེས་དེ་དག་སུན་བྱུང་བ་ཡིན་ནོ། །གཉིས་པ་རྟེན་འབྲེལ་ལ་མཐའ་ཅུང་ཟད་དཔྱད་ན། ཁ་ཅིག་དབུ་མ་དང་རྟེན་འབྲེལ་ཡིན་ཁྱབ་མཉམ་ཡིན་ཟེར་བ་དང༌། ཡང་ཁ་ཅིག་གཞི་གྲུབ་ན་རྟེན་འབྲེལ་ཡིན་པས་ཁྱབ་ཟེར་བ་གཉིས་ཀའང་མི་རིགས་ཏེ། འདི་ཉིད་ཀྱི་འགྲེལ་བ་ཕྱོགས་མེད་རིས་མེད་ལས། འདུས་མ་བྱས་ཡིན་པའི་ཡོངས་གྲུབ་བཅུ་གཉིས་ཀྱང་རྟེན་འབྲེལ་ཡིན་པར་འགྱུར་ཏེ་དབུ་མ་ཡིན་པའི་ཕྱིར། འདོད་ན་འདུས་བྱས་མི་རྟག་པ་ཡིན་པར་འགྱུར་ཏེ་རྟེན་འབྲེལ་འདི་ཡིན་པའི་ཕྱིར་རོ། །དེ་ཡང་འདོད་ན་བརྫུན་པ་བསླུ་བའི་ཆོས་སུ་ཡང་འགྱུར་ཏེ། དབུ་མ་རྩ་ཤེར། བཅོམ་ལྡན་འདས་ཀྱི་ཆོས་གང་ཞིག། བསླུ་བ་དེ་ནི་བརྫུན་ཞེས་གསུངས། །འདུས་བྱས་ཐམས་ཅད་བསླུ་བའི་ཆོས། །དེས་ན་དེ་དག་རྫུན་པ་ཡིན། །ཞེས་དང༌། ཆོས་ཀྱི་ཤན་འབྱེད་ལས། ཁྱོད་ཀྱི་ལུགས་ཀྱི་དོན་དམ་པའི་བདེན་པ་རྟེན་འབྲེལ་ལས་མ་འདས་ན་རྟེན་འབྲེལ་དུ་འདོད་དགོས་ཤིང་འདུས་བྱས་སུ་འདོད་དགོས་པ་དང༌། མི་རྟག་པ་དང་བརྫུན་པ་བསླུ་བ་ལ་སོགས་པར་ཡང་འདོད་དགོས་ལ་དེ་ཡང་རིགས་པ་མ་ཡིན། ཞེས་དང༌། ཡང་དེ་ཉིད་ལས། དེས་ན་རྟེན་འབྲེལ་གང་ཡིན་སྟོང་ཉིད་ཡིན་པ་ལྟར་སྟོང་ཉིད་གང་ཡིན་རྟེན་འབྲེལ་དུ་བཞེད་པ་འདི་ཡང༌། བོད་ཀྱི་སློབ་དཔོན་འགའ་ཞིག་དང་མཐུན་གྱི་སངས་རྒྱས་དང་བྱང་ཆུབ་སེམས་དཔའ་ཆེན་པོ་རྣམས་ཀྱི་དགོངས་པ་དང་ནི་ཤིན་ཏུ་མི་མཐུན་ནོ། །སངས་རྒྱས་དང་བྱང་ཆུབ་སེམས་དཔའ་རྣམས་ཀྱིས་ནི་རྟེན་འབྲེལ་གང་ཡིན་སྟོང་ཉིད་དུ་གསུངས་ཀྱི་སྟོང་ཉིད་གང་ཡིན་རྟེན་འབྲེལ་དུ་གསུངས་པ་ནི་མེད་དོ། །ཞེས་གསུངས་པ་དང༌། འདི་ཉིད་ཀྱི་འགྲེལ་བ་ལས། གཞན་ཡང་རྟེན་འབྲེལ་དང་སྟོང་ཉིད་ངོ་བོ་གཅིག་ཏུ་འདོད་པ་ལ་སོགས་པ་ལྟ་བ་ངན་པ་གཟིང་གཟིང་པ་ནང་འགལ་གྱི་ཚོགས་འདུས་པ་འདི་རྣམས་ཐམས་ཅད་ལ་ཡང་རྫོགས་ལྡན་གྱི་ལུང་རིགས་ཡང་དག་ཐེ་ཚོམ་གྱི་དྲ་བ་ཐམས་ཅད་གཅོད་པར་བྱེད་པ་ཁྱད་པར་འཕགས་པ་རྣམས་བསྟན་པར་བྱའོ། །ཞེས་གསུངས་པའི་ཕྱིར། ཡང་ཁ་ཅིག་གཞན་སྟོང་རང་ལུགས་ལ་གཞི་གྲུབ་ན་རྟེན་འབྲེལ་ཡིན་པས་ཁྱབ་ཟེར་ན། འོ་ན་དོན་དམ་བདེན་པ་ཆོས་ཅན། རྟེན་འབྲེལ་ཡིན་པར་ཐལ། གཞི་གྲུབ་པའི་ཕྱིར། ཁྱབ་པ་ཁས། འདོད་མི་ནུས་ཏེ། རི་ཆོས་ངེས་དོན་རྒྱ་མཚོ་ལས། སྟོང་ཉིད་གང་ཡིན་ཐམས་ཅད་རྟེན་འབྲེལ་དུ་འདོད་པ་ནི་འཁྲུལ་ཏེ། དོན་དམ་སྟོང་ཉིད་རྟེན་འབྲེལ་ལས་འདས་ཀྱང་ཤིན་ཏུ་མཐར་ཐུག་པའི་སྟོང་ཉིད་ཟབ་མོ་ཡིན་པའི་ཕྱིར་རོ། །ཞེས་གསུངས་པའི་ཕྱིར་རོ། །གཞན་ཡང་རྟེན་འབྲེལ་དེ་བདེན་གཉིས་ཀྱི་དབྱེ་གཞི་ཡིན་པར་ཐལ། གཞི་གྲུབ་ན་རྟེན་འབྲེལ་ཡིན་པས་ཁྱབ་པའི་ཕྱིར། འདོད་ན། དེ་མི་འཐད་པར་ཐལ། བདེན་གཉིས་གསལ་བའི་ཉི་མ་ལས། ཁ་ཅིག་རྟེན་འབྲེལ་དབྱེ་གཞིར་བྱེད་པ་མི་རིགས་ཏེ། དོན་དམ་རྟེན་འབྲེལ་ལས་འདས་པའི་ཕྱིར། ཞེས་གསུངས་པའི་ཕྱིར་རོ། །གཞན་ཡང་དོན་དམ་པའི་རང་བཞིན་ནི་གང་ལ་ཡང་མི་ལྟོས་པས་རྟེན་འབྲེལ་ལས་འདས་པ་ཡིན་ཏེ། ཐེག་མཆོག་དབུ་མ་ལས། དོན་དམ་ལ་ནི་རྟེན་འབྲེལ་ནམ་ཡང་མེད། །ཅེས་དང༌། དོན་དམ་རྟེན་འབྲེལ་དེ་ནི་རྟེན་འབྱུང་མིན། །གང་ལས་ཀྱང་ནི་མ་བྱུང་མ་ལྟོས་ལ། །མི་འགྱུར་སྤྲོས་བྲལ་རྟག་པ་ཡིན་ཕྱིར་རོ། །ཞེས་དང༌། རི་ཆོས་ངེས་དོན་རྒྱ་མཚོ་ལས། རང་བཞིན་ནི་རྒྱུ་རྐྱེན་ལས་མ་བྱུང་ཞིང༌། མ་བཅོས་ལ་གཞན་གང་ལ་ཡང་མི་ལྟོས་པར་གསུངས་ཏེ། འཕགས་པ་ཀླུ་སྒྲུབ་ཞབས་ཀྱི་ཞལ་སྔ་ནས། རང་བཞིན་རྒྱུ་དང་རྐྱེན་ལས་ནི། །འབྱུང་བར་རིགས་པ་མ་ཡིན་ནོ། །རྒྱུ་དང་རྐྱེན་ལས་བྱུང་བ་ཡི། །རང་བཞིན་བྱས་པ་ཅན་དུ་འགྱུར། །རང་བཞིན་བྱས་པ་ཅན་ཞེས་བྱར། །ཇི་ལྟ་བུར་ན་རུང་བར་འགྱུར། །རང་བཞིན་དག་ནི་བཅོས་མིན་དང༌། །གཞན་ལ་ལྟོས་པ་མེད་པ་ཡིན། །ཞེས་གསུངས་པའི་ཕྱིར། རང་བཞིན་ཞེས་པ་ནི་ཆོས་ཉིད་ལ་གོ་དགོས་ཏེ། རང་བཞིན་གྱི་སྐད་དོད། སྭ་བྷ་ཝཏཱ་ངོ་བོ་ཉིད་དང་རང་བཞིན་གཉིས་ཀར་འཇུག་པ་ཡིན་ནོ། །ཡང་རྩ་ཤེས་ལས་གསུངས་པ་ལྟར། ཆོས་རྣམས་ཀྱི་རང་བཞིན་ནམ་ཆོས་ཉིད་ནི། གཞན་ལ་ལྟོས་པ་མེད་པ་ཡིན་ཏེ། བུདྡྷ་པཱ་ལི་ཏ་ལས། ངོ་བོ་ཉིདནི་བཅོས་མིན་ཡང༌། །གཞན་ལ་ལྟོས་པ་མེད་པ་ཡི། །གང་བྱ་བས་བསྒྲུབ་པར་མི་འགྱུར་བ་དང༌། རྒྱུ་དང་རྐྱེན་ལ་ཡང་ལྟོས་པར་མི་འགྱུར་བ་དང༌། ཞེས་སོགས་དང། ཚིག་གསལ་ལས། གང་གི་ཕྱིར་དེ་ལྟར་བཅོས་མ་དང༌། གཞན་ལ་ལྟོས་པ་ནི། རང་བཞིན་ཉིད་དུ་མི་འདོད་པ་དེ་ཉིད་ཀྱི་ཕྱིར་ཚ་བ་ཉིད་མེ་ཡི་རང་བཞིན་ཡིན་ནོ། །ཞེས་བྱ་བ་འདི་མི་རིགས་ཏེ་རྒྱུ་དང་རྐྱེན་ལ་རག་ལས་པའི་ཕྱིར་དང༌། སྔར་མ་བྱུང་བ་ལས་ཕྱིས་འབྱུང་བས་བྱས་པ་ཡིན་པའི་ཕྱིར་རོ། །ཞེས་དང༌། དེ་ཉིད་ལས། གང་ཞིག་སྔར་མ་བྱུང་བ་ལས་ཕྱིས་འབྱུང་བ་མ་ཡིན་པ་ཆུའི་ཚ་བའམ་ཚུར་རོལ་དང༌། ཕ་རོལ་ལམ་རིང་བོ་དང་ཐུང་ངུ་ལྟར་རྒྱུ་དང་རྐྱེན་ལ་ལྟོས་པ་དང་བཅས་པར་མ་གྱུར་པ་གང་ཡིན་པ་དེ་རང་བཞིན་ཡིན་པར་བརྗོད་དོ། །ཞེས་དང༌། སྤྱོད་བསྡུས་སྒྲོན་མར་དོན་དམ་པའི་བདེན་པ་དེ་ཡང་མ་བཅོས་པ་ནམ་མཁའ་དང་མཉམ་པ་དྲི་མ་མེད་པའི་ངོ་བོ་ཉིད་དོ། །ཞེས་གསུངས་པའི་ཕྱིར་རོ། །མཁས་པ་གཞན་གྱིས་ལུང་འདི་དག་གིས་རང་བཞིན་དེ་རྟེན་འབྲེལ་མ་ཡིན་པར་བསྟན་པ་མ་ཡིན་པར་རྒྱུ་རྐྱེན་ལ་མ་ལྟོས་པ་ཙམ་བཤད་པ་ཡིན་ཞེས་འདོད་པ་ཡང་མི་འཐད་དེ། སྤྱིར་རྟེན་འབྲེལ་ཞེས་པའི་རྟེན་པའམ་ལྟོས་པ་ཡིན་མིན་ནི་རྒྱུ་རྐྱེན་ལ་ལྟོས་མ་ལྟོས་ལ་བྱེད་དགོས་པའི་ཕྱིར་ཏེ། རྟེན་འབྲེལ་སྟོན་པའི་མདོ་དང་བསྟན་ཆོས་དག་ལས་གསུངས་པའི་ཕྱིར་ཏེ། མ་དྲོས་པའི་ཞུས་པའི་མདོ་ལས། གང་ཞིག་རྐྱེན་ལས་སྐྱེས་པ་དེ་མ་སྐྱེས། །དེ་ལ་སྐྱེ་བའི་རང་བཞིན་ཡོད་མ་ཡིན། །རྐྱེན་ལ་རག་ལས་གང་དེ་སྟོང་བར་བཤད། །གང་ཞིག་སྟོང་ཉིད་ཤེས་དེ་བག་ཡོད་ཡིན། །ཞེས་དང༌། མདོ་ལས། བཅོམ་ལྡན་འདས་ཀྱི་དེ་ལ་ཆོས་ཀྱི་བརྡ་ནི་འདི་ཡིན་ཏེ། འདི་ལྟ་སྟེ་འདི་ཡོད་ན་འདི་འབྱུང་འདི་སྐྱེས་པའི་འདི་སྐྱེ་སྟེ། གང་འདི་མ་རིག་པའི་རྐྱེན་གྱིས་འདུ་བྱེད། ཅེས་དང༌། དགོངས་པ་ངེས་པར་འགྲེལ་བའི་མདོ་ལས། ཡོན་ཏན་འབྱུང་གནས་ཆོས་རྣམས་ཀྱི་གཞན་གྱི་དབང་གི་མཚན་ཉིད་གང་ཞེ་ན། གང་ཆོས་རྣམས་ཀྱི་རྟེན་ཅིང་འབྲེལ་བར་འབྱུང་བ་དེཉིད་དེ་འདི་ལྟར། འདི་ཡོད་པའི་འདི་འབྱུང་འདི་སྐྱེས་པའི་ཕྱིར་འདི་སྐྱེ་བ་སྟེ། ཞེས་དང༌། མདོ་དེ་ཉིད་ལས། དོན་དམ་ཡང་དག་འཕགས་ཆོས་རྣམས་ཀྱི་སྐྱེ་བ་ངོ་བོ་ཉིད་མེད་པ་གང་ཞེ་ན། གང་ཆོས་རྣམས་ཀྱི་གཞན་གྱི་དབང་གི་མཚན་ཉིད་དོ། །དེ་ཅིའི་ཕྱིར་ཞེ་ན། འདི་ལྟར་དེ་ནི་གཞན་གྱི་རྐྱེན་གྱི་སྟོབས་ལས་བྱུང་གི་བདག་ཉིད་ཀྱི་མ་ཡིན་པས་ན་དེའི་ཕྱིར་དེ་ནི་སྐྱེ་བ་ངོ་བོ་ཉིད་མེད་པ་ཞེས་བྱའོ། །ཞེས་དང༌། འཕགས་པ་ལས་གྱི་སྒྲིབ་པ་རྒྱུན་གཅོད་པའི་མདོ་ལས། ཤཱ་རིའི་བུ་དེ་བཞིན་གཤེགས་པ་ཆོས་ཐམས་ཅད་ནི་རྟེན་ཅིང་འབྲེལ་བར་འབྱུང་བའོ། །ཞེས་གསུངས་པའི་ཕྱིར་ཏེ། རྒྱུ་དང་རྐྱེན་གཞན་དང་གཞན་གྱིས་གཞན་སྐྱེའོ། །གཞན་འགག་གོ །ཞེས་གསུངས་པ་དང༌། ཁྱེའུ་བཞི་ཏིང་ངེ་འཛིན་ཅེས་བྱ་བའི་ཐེག་པ་ཆེན་པོའི་མདོ་ལས། གང་རྟེན་ཅིང་འབྲེལ་པ་ལས་བྱུང་བ་དེ་ནི་མི་རྟག་པའོ། །ཞེས་པ་ནས་ཡང་དག་པ་མ་ཡིན་པ་དེ་བརྫུན་པ་བསླུ་བའི་ཆོས་སོ། །གང་བརྫུན་པ་བསླུ་བའི་ཆོས་དེ་མི་བདེན་པའོ། །གང་མི་བདེན་པ་དེ་བཞིན་ཉིད་མ་ཡིན་ནོ། །གང་དེ་བཞིན་ཉིད་མ་ཡིན་པ་དེ་དེ་བཞིན་གཤེགས་པ་མ་ཡིན་ནོ། །དེ་བཞིན་གཤེགས་པ་ནི་བདེན་པ་ཡང་དག་པ་དེ་བཞིན་ཉིད་མ་ནོར་བ་དེ་བཞིན་ཉིད་གཞན་མ་ཡིན་པ་དེ་བཞིན་ཉིད། ཅེས་གསུངས་པ་དང༌། དབུ་མ་རིན་ཆེན་ཕྲེང་བ་ལས། འདི་ཡོད་པས་ན་འདི་འབྱུང་དཔེར། །རིང་པོ་ཡོད་པས་ཐུང་ངུ་བཞིན། །འདི་སྐྱེས་པས་ན་འདི་སྐྱེ་དཔེར། །མར་མེ་འབྱུང་བས་འོད་བཞིན་ནོ། །ཞེས་དང༌། རྩ་ཤེས་ལས། བྱེད་པོ་ལས་ལ་བརྟེན་བྱས་ཤིང༌། །ལས་ཀྱང་བྱེད་པོ་དེ་ཉིད་ལ། །བརྟེན་ནས་བྱུང་བ་མ་གཏོགས་པར། །གྲུབ་པའི་རྒྱུ་ནི་མ་མཐོང་ངོ། །དེ་བཞིན་ཉེར་ལེན་ཤེས་པར་བྱ། །ལས་དང་བྱེད་པོ་གསལ་ཕྱིར་རོ། །ལས་དང་བྱེད་པ་པོ་དག་གིས། །དངོས་པོ་ལྷག་མ་ཤེས་པར་བྱ། །ཞེས་དང༌། རིགས་པ་དྲུག་ཅུ་བ་ལས། །དེ་དང་དེ་རྟེན་གང་བྱུང་བ། །རང་གི་ངོ་བོ་དེར་མ་སྐྱེས། །རང་གི་ངོ་བོར་གང་མ་སྐྱེས། །དེ་ནི་སྐྱེས་ཞེས་ཇི་ལྟར་བྱ། །ཞེས་དང༌། རྩ་ཤེས་ལས། རྟེན་ཅིང་འབྲེལ་བར་འབྱུང་བ་གང༌། །དེ་ནི་སྟོང་བ་ཉིད་དུ་བཤད། །དེ་ནི་རྒྱུར་བྱས་གདགས་པ་སྟེ། །དེ་ནི་དབུ་མའི་ལམ་ཡིན་ནོ། །ཞེས་གསུངས་པའི་ཕྱིར། ལུང་འདི་དག་གིས་རྟེན་འབྲེལ་ཞེས་པ་རྒྱུ་རྐྱེན་ལ་སྦྱར་ནས་གསལ་བར་བཤད་པ་དེའི་ཕྱིར་རྒྱས་པར་རྟེན་འབྲེལ་ཀྱི་མདོ་དང༌། རྩ་ཤེས་ཀྱི་རྒྱུ་བརྟག་པ་དང་རྐྱེན་བརྟག་པ་སོགས་ལས་ཤེས་པར་འཚལ། གཞན་ཡང་མཁས་མཆོག་ཉ་དབོན་པས་འདི་ལྟར་གསུངས་ཏེ། བསྟན་པ་སྤྱི་འགྲེལ་གྱི་རྣམ་བཤད་ཡིད་ཀྱི་མུན་སེལ་ལས། དོན་དམ་ཆོས་སྐུ་ནི་རྒྱུ་རྐྱེན་གྱིས་མ་བསྐྱེད་པས་རང་བྱུང་བ་སྟེ་གདོད་ནས་རང་བཞིན་གྱིས་གྲུབ་པའི་ཆོས་དབྱིངས་ཡེ་ཤེས་ཡིན་པའི་ཕྱིར་ན་རྟེན་ཅིང་འབྲེལ་བར་འབྱུང་བ་ཡིན་པ་ལས་འདས་པ་སྟེ། དེ་མིན་ནོ། །ཞེས་དང༌། ཡང་དེ་ལས། རྩ་ཤེར། གང་གི་རྟེན་ཅིང་འབྲེལ་བར་འབྱུང་ཞེས་འཆད་པའི་དབུ་མ་ཚིག་གསལ་གྱི་སྐབས་སུ་ཡང་རྟེན་ཅིང་འབྲེལ་བར་འབྱུང་བའི་དོན་འདུས་བྱས་ཉིད་ལ་བཤད་ཅིང༌། རྟེན་ཅིང་འབྲེལ་འབྱུང་མ་གཏོགས་པའི། །ཆོས་འགའ་ཡོད་པ་མ་ཡིན་ནོ། །ཞེས་ཀླུ་སྒྲུབ་ཀྱིས་གསུངས་པ་ཡང་འདུས་བྱས་ཀྱི་ཆོས་ལ་དགོངས་སྟེ་བདེན་དངོས་དགག་པའི་སྐབས་ཡིན་གྱི་འདུས་མ་བྱས་ཀྱི་ཆོས་བདེན་པ་དགག་པའི་སྐབས་མ་ཡིན་ནོ། །ཞེས་སོགས་གསུངས་སོ། །ཡང་དཔལ་ལྡན་ཐལ་འགྱུར་བའི་ལུགས་ལ་གཞི་གྲུབ་ན་རྟེན་འབྲེལ་ཡིན་པས་ཁྱབ་མ་ཁྱབ་དཔྱད་དགོས་ཏེ། གོང་དུ་དྲངས་བའི་ཚིག་གསལ་དང་བུདྡྷ་པཱ་ལི་ཏ་གཉིས་ཐལ་འགྱུར་བའི་རང་གཞུང་ཡིན་ལ་དེ་གཉིས་ཀྱི་སྐབས་སུ་རང་བཞིན་རྟེན་འབྲེལ་མ་ཡིན་པར་གསུངས་པའི་ཕྱིར་རོ། །ཡང་ཁ་ཅིག་གིས་གཞི་གྲུབ་ན་རྟེན་འབྲེལ་ཡིན་པས་ཁྱབ་པ་དང་རྟེན་འབྲེལ་ཡིན་ན་རང་སྟོང་ཡིན་པས་ཁྱབ་སྟེ། རྩ་ཤེས་ལས། གང་ཕྱིར་རྟེན་འབྱུང་མ་ཡིན་པའི། ཆོས་འགའ་ཡོད་པ་མ་ཡིན་པ། །དེ་ཕྱིར་སྟོང་ཉིད་མ་ཡིན་པའི། །ཆོས་འགའ་ཡོད་པ་མ་ཡིན་ནོ། །ཞེས་གསུངས་པའི་ཕྱིར་ཞེ་ན་དེའི་ལན་དུ། རི་ཆོས་ངེས་དོན་རྒྱ་མཚོ་ལས། །འོ་ན་རྩ་བ་ཤེས་རབ་ཏུ་གང་ཕྱིར་རྟེན་འབྱུང་མ་གཏོགས་པའི། །ཆོས་འགའ་ཡོད་པ་མ་ཡིན་པ། །དེ་ཕྱིར་སྟོང་ཉིད་མ་ཡིན་པའི། །ཆོས་འགའ་ཡོད་པ་མ་ཡིན་ནོ། །ཞེས་གསུངས་པའི་ཕྱིར། རྟེན་འབྲེལ་གང་ཡིན་སྟོང་ཉིད་ཡིན་པ་ལྟར་སྟོང་ཉིད་གང་ཡིན་ཡང་རྟེན་འབྲེལ་ཡིན་དགོས་ལ་རྟེན་འབྲེལ་གང་ཡིན་རང་སྟོང་ཡིན་པའི་སྟོང་ཉིད་ཐམས་ཅད་རང་སྟོང་ཁོ་ན་ཡིན་ནོ། །སྙམ་དུ་འགའ་ཞིག་སེམས་པར་གྱུར་ན་དེ་ཕྱིར་བརྗོད་པར་བྱ་སྟེ། ལུང་དེས་རྟེན་འབྲེལ་གང་ཡིན་སྟོང་ཉིད་དུ་གསུངས་པ་ཡིན་གྱི་སྟོང་ཉིད་གང་ཡིན་རྟེན་འབྲེལ་དུ་གསུངས་པ་ནི་མ་ཡིན་ནོ། །གལ་དེ་སྟོང་ཉིད་གང་ཡིན་ཐམས་ཅད་རྟེན་འབྲེལ་ཡིན་པར་འདོད་ན་ནི་དོན་དམ་ཆོས་ཉིད་ཡང་དག་པའི་མཐའ་ལ་སོགས་པ་སྟོང་གཞིའི་རྣམ་གྲངས་ཐམས་ཅད་སྟོང་ཉིད་ཡིན་པའི་ཕྱིར་རྟེན་འབྲེལ་ཡིན་པར་འགྱུར་ཞིང༌། འདུས་བྱས་མི་རྟག་པ་རྫུན་པ་བསླུ་བ་ལ་སོགས་པར་ཡང་འདོད་དགོས་ལ་དེ་ཡང་རིགས་པ་མ་ཡིན་ཏེ། རྒྱལ་བའི་ཡུམ་ལས། རབ་འབྱོར་ཀུན་རྫོབ་ཀྱི་བདེན་པ་ཚད་མར་བྱས་ཏེ། འབྲས་བུ་རྣམ་པར་དགོད་པ་བསྟན་གྱི་དོན་དམ་པས་ནི་འབྲས་བུ་རྣམ་པར་འགོད་པ་བསྟན་པར་མི་ནུས་སོ། །ཞེས་སོགས་དང༌། དགོངས་འགྲེལ་གྱི་མདོར་ཡང་རབ་འབྱོར་འདི་ལྟ་སྟེ་དེ་བཞིན་ཉིད་དོན་དམ་པ་ཆོས་ལ་བདག་མེད་པ་ནི་རྒྱུ་ལས་འབྲེལ་ཏེ་བྱུང་བ་མ་ཡིན་ལ་འདུས་བྱས་མ་ཡིན་ཏེ། །དོན་དམ་ཡང་མ་ཡིན་པར་ཡང་མི་འགྱུར་ལ་དོན་དམ་པ་དེ་ལས་དོན་དམ་པ་གཞན་ཡོངས་སུ་བཙལ་བར་མི་བྱ་སྟེ། རྟག་པ་རྟག་པའི་དུས་དང་ཐེར་ཟུག་ཐེར་ཟུག་གི་དུས་སུ་དེ་བཞིན་གཤེགས་པ་རྣམས་བྱུང་ཡང་རུང་མ་བྱུང་ཡང་རུང་སྟེ། ཆོས་རྣམས་གྱི་ཆོས་ཉིད་ཆོས་གནས་པའི་དབྱིངས་དེ་ནི་འདུག་པ་ཡིན་གྱི་གཞན་དུ་མ་ཡིན་ནོ། །ཞེས་སོགས་རྒྱ་ཆེར་གསུངས་པ་རྣམས་དང་འགལ་བའི་ཉེས་པ་ཆེན་པོ་འགྱུར་བའི་ཕྱིར་རོ། །ཞེས་གསུངས་པའི་ཕྱིར་རོ། །སྐབས་འདིར་རང་ལུགས་ལ་དཔྱད་པར་བྱ་བ་འདི་ཡོད་དེ། རི་ཆོས་ལས། མཐར་ཐུག་འགོག་པའི་བདེན་པ་ཡང་རྟེན་འབྲེལ་ལས་མ་འདས་པར་འགྱུར་ལ་འདོད་ན་འདུས་བྱས་ལས་མ་འདས་པར་འགྱུར་ཞིང་དེ་ལྟ་ན་ཡང་མི་རྟག་པ་དང་རྫུན་པ་དང་བསླུ་བའི་ཆོས་ཅན་དང༌། ཞེས་དང༌། དེ་ཉིད་ལས། གལ་ཏེ་སྟོང་ཉིད་གང་ཡིན་ཐམས་ཅད་རྟེན་འབྲེལ་ཡིན་པར་འདོད་ན་ནི། ཞེས་པ་ནས། རྟེན་འབྲེལ་ཡིན་པར་འགྱུར་ཞིང་འདུས་བྱས་མི་རྟག་པ་རྫུན་པ་བསླུ་བ་ལ་སོགས་པར་ཡང་འདོད་དགོས་ལ་ཞེས་རྟེན་འབྲེལ་དང་འདུས་བྱས་དོན་གཅིག་ཡིན་པར་གསུངས་ཏེ་རྟེན་འབྲེལ་ཡིན་ན་འདུས་བྱས་ཡིན་པས་ཁྱབ་པ་སོགས་གསུངས་པའི་ཕྱིར་དང༌། ཡང་རི་ཆོས་ལས། སྐབས་འདིའི་སྟོང་ཉིད་ནི་རྟེན་འབྲེལ་རང་སྟོང་ཡིན་ལ། དེ་ནི་རྟེན་འབྲེལ་དང་ཁྱབ་མཉམ་ངོ་བོ་གཅིག་ཡིན་པར་བསྟན་ཅིང༌། དེ་ནི་ཁོ་བོ་ཅག་ཀྱང་དེ་ལྟར་འདོད་པའི་ཕྱིར་རོ། །ཞེས་རྟེན་འབྲེལ་དང་རང་སྟོང་ཁྱབ་མཉམ་ངོ་བོ་གཅིག་པར་བསྟན་ལ་དེ་ལྟར་ན་ཀུན་བཏགས་ཀྱི་ཆོས་རྣམས་ཆོས་ཅན། རྟེན་འབྲེལ་ཡིན་པར་ཐལ། རང་སྟོང་ཡིན་པའི་ཕྱིར། འདོད་ན། འདུས་བྱས་ཡིན་པར་ཐལ། རྟེན་འབྲེལ་ཡིན་པའི་ཕྱིར་ཟེར་ན། རང་ལུགས་ལ་འདོད་ཟེར་དགོས་ཏེ། འདུས་མ་བྱས་ལ་རང་བཞིན་མྱང་འདས་ལས་གཞན་མེད་ལ་འདུས་བྱས་འཇོག་ཚུལ་གཉིས་གོང་དུ་བཤད་ཟིན་པ་ལྟར་ཡིན་པའི་ཕྱིར། དེ་ལྟར་བྱས་པ་ལ་འོ་ན་ཀུན་བཏགས་ཀྱི་ཆོས་རྣམས་ཆོས་ཅན། གཞན་དབང་ཡིན་པར་ཐལ། རྟེན་འབྲེལ་ཡིན་པའི་ཕྱིར། རྟགས་གྲུབ་སྟེ། ཐེག་མཆོག་དབུ་མ་ལས། ཀུན་བཏགས་གཞན་དབང་རྟེན་འབྲེལ་ཉིད་དུ་བརྗོད། ཅེས་གསུངས་པའི་ཕྱིར། རྩ་བའི་ཐལ་འགྱུར་ལ་ཁྱབ་པ་ཡོད་དེ། རྟེན་འབྲེལ་དང་གཞན་དབང་དོན་གཅིག་ཡིན་པའི་ཕྱིར་ཏེ། ཆོས་རྗེ་ཀུན་མཁྱེན་གྱིས་མཛད་པའི་ཆོས་ཀྱི་ཤན་འབྱེད་ལས། རྟེན་འབྲེལ་དང་གཞན་དབང་དོན་གཅིག་པའི་ཕྱིར་རོ་ཞེས་དང༌། རྟེན་འབྲེལ་དང་གཞན་དབང་དང་གཞན་སྐྱེ་རྣམས་ནི་དོན་ཅིག་པ་ཁོ་ནའོ། །ཅེས་གསུངས་པའི་ཕྱིར་ཞེ་ན། མ་ཁྱབ་སྟེ། འདིའི་སྐབས་ཀྱི་གཞན་དབང་ནི་ཀུན་བཏགས་དང་གཞན་དབང་གཉིས་སུ་ཕྱེ་བའི་དེ་མ་ཡིན་པར་རྒྱུ་རྐྱེན་གཞན་ལས་སྐྱེས་པ་ཙམ་ལ་གཞན་དབང་བཞག་པ་དེ་ཡིན་པ་འདྲའོ། །འོན་ཀྱང་འདིས་སྐབས་སུ་མདོ་སྡེ་དགོང་འགྲེལ་གྱི་གཞན་དབང་དང་རྟེན་འབྲེལ་གསུངས་ཚུལ་ལ་དཔྱད་པར་བྱའོ། །ཡང་རྟེན་འབྲེལ་དང་རང་སྟོང་དོན་གཅིག་པ་ལ། མཚན་ཉིད་ཡོངས་ཆད་ཀྱི་ཀུན་བཏགས་གཏན་མེད་ཡིན་པས་རྟེན་འབྲེལ་མ་ཡིན་དགོས་ཀྱང་རང་སྟོང་ཡིན་ཟེར་བ་ལྟར་ན་ཞིབ་ཆ་ཅུང་ཟད་དགོས་སོ། ། རྟེན་འབྲེལ་ལ་བདེན་གཉིས་ཀྱི་རྣམ་དབྱེ་ཤེས་དགོས་པར་བསྟན་པ།གཉིས་པ་རྟེན་འབྲེལ་ལ་བདེན་གཉིས་ཀྱི་རྣམ་དབྱེ་ཤེས་དགོས་པར་བསྟན་པ་ནི། རྩ་བར། དེ་ཕྱིར་རྟེན་ཅིང་འབྲེལ་འབྱུང་གསུངས་པ་ལ། །བདེན་གཉིས་རྣམ་དབྱེ་རྫོགས་ལྡན་ཆོས་ལས་གསུངས། །ཞེས་རྐང་བ་གཉིས་བྱུང༌། དེའི་ཚིག་དོན་ནི། དེའི༵་ཕྱི༵ར་རྟེ༵ན་ཅི༵ང་འབྲེ༵ལ་བར་འབྱུ༵ང་བར་གསུ༵ངས་པ༵་ལ༵། ཀུན་རྫོབ་ཀྱི་རྟེན་འབྲེལ་དང་དོན་དམ་པའི་རྟེན་འབྲེལ་སྟེ། བདེ༵ན་གཉི༵ས་ཀྱི་རྣ༵མ་དབྱེ༵་རྫོག༵ས་ལྡ༵ན་གྱི་ཆོ༵ས་ལ༵ས་གསུ༵ངས་ཞེས་བདེན་གཉིས་ཀྱི་རྣམ་དབྱེ་ལེགས་པར་ཤེས་དགོས་པར་བསྟན་པ་ཡིན་ནོ། ། རྟེན་འབྲེལ་རྟོགས་པ་དབུ་མར་འཇུག་པའི་ལམ་ཡིན་པར་བསྟན་པ།གསུམ་པ་རྟེན་འབྲེལ་རྟོགས་པ་དབུ་མར་འཇུག་པའི་ལམ་ཡིན་པར་བསྟན་པ་ནི། རྩ་བར། ཀུན་རྫོབ་རྟེན་འབྲེལ་ལེགས་པར་རྟོགས་པ་ནི། །དབུ་མ་ཆེན་པོའི་གྲོང་དུ་འཇུག་པའི་ལམ། །ཞེས་རྐང་བ་གཉིས་བྱུང༌། དེའི་ཚིག་དོན་ནི། ཀུ༵ན་རྫོ༵བ་ཡིན་པའི་རྟེ༵ན་འབྲེ༵ལ་ལེག༵ས་པ༵ར་རྟོག༵ས་པ༵་ནི༵་འདུས་བྱས་ཀྱི་ཆོས་ཐམས་ཅད་ཡང་དག་པར་ན་ཅིར་ཡང་མ་གྲུབ་ཀྱང་ཐ་སྙད་ཀུན་རྫོབ་ཏུ་མི་བསླུ་བར་རྟོགས་ནས་བླང་དོར་ཕྱིན་ཅི་མ་ལོག་པ་བྱེད་པའི་ཕྱིར་ན་ད༵བུ་མ༵་ཆེ༵ན་པོའི༵་གྲོ༵ང་ཁྱེར་དུ༷་འཇུག༵་པའི༷་ལ༵མ་ཡིན་ནོ། །འོན་ཀྱང་ལམ་གྱི་རྟེན་འབྲེལ་ལས་མ་འདས་པ་ཡིན་པས་དབུ་མ་དངོས་ནི་མ་ཡིན་ཏེ། ཐེག་མཆོག་དབུ་མ་ལས། དེ་ནི་དོན་དམ་པ་ལ་འཇུག་ཚུལ་གྱི། །ཀུན་རྫོབ་བདེན་པའི་རིམ་པ་གཅིག་ཏུ་འདོད། །དོན་དམ་ལ་ནི་རྟེན་འབྲེལ་ནམ་ཡང་མེད། །ཅེས་གསུངས་པའི་ཕྱིར། ཡང་ཁ་ཅིག་ན་རེ་སྟོང་དང་རྟེན་འབྱུང་དོན་གཅིག་ཡིན་ཏེ། རྩོད་ཟློགས་ལས། གང་གིས་སྟོང་དང་རྟེན་འབྱུང་དང༌། །དབུ་མའི་ལམ་དུ་དོན་གཅིག་པར། །གསུང་མཆོག་མཚུངས་པ་མེད་པ་ཡི། །སངས་རྒྱས་དེ་ལ་ཕྱག་འཚལ་ལོ། །ཞེས་གསུངས་པའི་ཕྱིར་ན། མ་ཁྱབ་སྟེ། སངས་རྒྱས་བྱང་སེམས་ལ་གྲགས་པའི་རང་སྟོང་དང་རྟེན་འབྱུང་གཉིས་ལེགས་པར་རྟོགས་ན་དབུ་མ་ཆེན་པོའི་གྲོང་ཁྱེར་དུ་འཇུག་པའི་ལམ་དུ་དོན་གཅིག་པ་ཡིན་ཞེས་པ་ཡིན་ནམ་སྙམ་མོ། །དེ་ལྟར་ཤེར་ཕྱིན་དང༌། ཕྱག་རྒྱ་ཆེན་པོ་དང་དུས་འཁོར་བདེ་དགྱེས་གསང་འདུས་ལ་སོགས་པ་ཟབ་མོ་མཐར་ཐུག་ཐམས་ཅད་ལ་གཞི་དང་བྲལ་འབྲས་གང་ཡིན་པ་འདུས་མ་བྱས་པ་རྟེན་འབྲེལ་ལས་འདས་པ་ཡིན་པ་དང༌། ལམ་གང་ཡིན་འདུས་བྱས་རྟེན་འབྲེལ་ལས་མ་འདས་པ་ཡིན་པའི་ཚུལ་ལེགས་པར་རྟོགས་པར་བྱས་ནས་དབུ་མ་ཆེན་པོའི་གྲོང་ཁྱེར་ལ་འཇུག་དགོས་པ་ཡིན་ནོ། ། དོན་དམ་རྟེན་འབྲེལ་དེ་ཀུན་རྫོབ་རྟེན་འབྲེལ་རྣམས་གདོད་ནས་འགག་པའི་གཞི་བདེན་དོན་སོགས་ཡིན་པར་བསྟན་པ།བཞི་བ་དོན་དམ་རྟེན་འབྲེལ་དེ་ཀུན་རྫོབ་རྟེན་འབྲེལ་རྣམས་གདོད་ནས་འགག་པའི་གཞི་བདེན་དོན་སོགས་ཡིན་པར་བསྟན་པ་ནི། དོན་དམ་རྟེན་འབྲེལ་ཆོས་དབྱིངས་ཟབ་མོ་ནི། །རྟེན་འབྲེལ་འདི་མིན་རྟེན་འབྲེལ་གཞན་མཆོག་ཡིན། །ཡན་ལག་བཅུ་གཉིས་སྲིད་རྩ་བཏོན་པ་ཡིན། །དག་པ་རྣམ་པ་བཅུ་གཉིས་འཆང་བ་ཡིན། །བདེན་དོན་བཅུ་གཉིས་ཆགས་སོགས་བཅུ་གཉིས་ཡིན། །དུས་སྦྱོར་ཉི་མའི་དབུགས་རྣམས་འགག་པ་ཡིན། །ཡུམ་དང་ཕལ་ཆེན་སྔགས་ལས་གསུངས་པ་ཡིན། །རྫོགས་ལྡན་མཁས་མཆོག་རྣམས་ཀྱི་གསུངས་པ་ཡིན། །གསུམ་ལྡན་མར་བཅད་ཕལ་གྱི་སྤྱོད་ཡུལ་མིན། །རྩ་བར། དོན་དམ་རྟེན་འབྲེལ་ཆོས་དབྱིངས་ཟབ་མོ་ནི། །ཞེས་པ་ནས་སྤྱོད་ཡུལ་མིན། །ཞེས་པའི་བར་ཤོ་ལོ་ཀ་གཉིས་དང་རྐང་བ་གཅིག་བྱུང༌། དེའི་ཚིག་དོན་ནི། དོ༵ན་ད༵མ་རྟེ༵ན་འབྲེ༵ལ་ཆོ༵ས་ཀྱི་དབྱི༵ངས་ཟ༵བ་མོ༵་ནི༵། ཕྱི་ནང་ཀུན་རྫོབ་ཀྱི་རྟེ༵ན་འབྲེ༵ལ་འདི༵་མིན༷་གྱི། འདི་ལས་རྟེ༵ན་འབྲེ༵ལ་གཞ༵ན་མཆོ༵ག་ཕ་རོལ་དམ་པ་དང་པོའི་སངས་རྒྱས་ཀྱི་རྟེན་འབྲེལ་ཡིན༷་ལ། དེ་ཡང་འགལ་འདུས་སྐྱོན་མེད་འཇིག་རྟེན་དཔེ་ལས་འདས་པའི་རྟེན་འབྲེལ་ཡིན་ནོ། །དེ་ནི་རྟེན་འབྲེལ་ཡ༵ན་ལ༵ག་བ༵ཅུ་གཉི༵ས་ཀྱི་སྲི༵ད་རྩ༵་གདོད་ནས་རང་བཞིན་གྱིས་བཏོ༵ན་པ༵འི་གཞི་ཡི༵ན་ཞིང༌། དྲི་མ་དེ་རྣམས་ཀྱིས་གདོད་ནས་རང་བཞིན་གྱིས་ད༵ག་པ༵འི་གཞིའི་རྣ༵མ་པ༵་དོན་དམ་གྱི་ས་བཅུ༵་གཉི༵ས་དབྱེར་མེད་དུ་འཆ༵ང་བ༵་ཡང་ཡི༵ན་ལ། དེ་རྣམས་ཉིད་དོན་དམ་དུ་བདེ༵ན་པའི་དོན༷་རྡོ་རྗེ་བཞིའི་ཞལ་བཅུ༵་གཉི༵ས་ཡིན་པ་དང༌། ཆག༷ས་སོག༷ས་བཅུ༵་གཉི༵ས་ཡིན༷་ཞེས་པས་བཅུ་གཉིས་ནི་མ་རིག་པ་གཞན་ནས་རྒ་ཤི་གཞན་གྱི་བར་བཅུ་གཉིས་དང༌། གདོད་ནས་རང་བཞིན་གྱིས་དག་པ་དང༌། རྣམ་པར་དག་པ་དང༌། ཤིན་ཏུ་རྣམ་པར་དག་པའི་མ་རིག་པ་ནས་རྒ་ཤིའི་བར་ཡང་ཡིན་ཞིང༌། དེ་རྣམས་ཉིད་དོན་དམ་གྱི་གནས་དང་ཉེ་བའི་གནས། ཞིང་དང་ཉེ་བའི་ཞིང༌། འདུ་བ་དང་ཉེ་བའི་འདུ་བ། ཚན་དོ་དང་ཉེ་བའི་ཚན་དོ་ཧ། དུར་ཁྲོད་དང་ཉེ་བའི་དུར་ཁྲོད། མཐོང་གཅོད་དང་ཉེ་བའི་མཐོང་གཅོད་དེ། དོན་དམ་གྱི་གནས་བཅུ་གཉིས་ཀྱང་ཡིན་པར་ཆོས་རྗེ་ཀུན་མཁྱེན་གྱིས་གསུངས་སོ། །ཡང་དོན་དམ་དེ་དུ༵ས་སྦྱོ༵ར་ཉི༵་མ༵་སྟེ། ལུགགླང༌། འཁྲིག་པ། ཀར་ཊ། སེང་གེ བུ་མོ། སྲང༌། སྡིག་པ། གཞུ། ཆུ་སྲིན། བུམ་པ། ཉ་དང་བཅུ་གཉིས་པོ་རེ་རེ་ལ་འཕོ་ཆེན་གྱི་དབུག༵ས་སྟོང་དང་བརྒྱད་བརྒྱ་རེ་ཡོད་པས་འཕོ་ཆེན་བཅུ་གཉིས་ཀྱི་དབུགས་ཉི་ཁྲི་གཅིག་སྟོང་དྲུག་བརྒྱ་རྣམ༵ས་གདོད་ནས་རང་བཞིན་གྱིས་འག༵ག་པ༵་དེའི་གཞི་ཡང་ཡི༵ན་ཞིང༌། ཡུམ༵་ལས་ཀྱང་དེ་ལྟར་གསུངས་པ་ཡིན་ཏེ། ཡུམ་རྒྱས་པ་ལས། མ་རིག་པ་འདུས་མ་བྱས་པ་སྟེ། གང་ད༵ང་ཡང་བྲལ་བས་མ་ཡིན་ནོ། །ཞེས་སོགས་གསུངས་པ་དང༌། ཕལ༷་ཆེན༷་གྱི་མདོར། འདུས་མ་བྱས་ཀྱི་རྟེན་འབྲེལ་གསུངས་པ་ཡང་འདི་དང་དགོངས་པ་གཅིག་ཡིན་ལ། ཡང་སྔ༵གས་དཔལ་དུས་ཀྱི་འཁོར་ལོའི་རྒྱས་འགྲེལ་དྲི་མེད་འོད་ལས༵། བདེན་པ་བཅུ་གཉིས་ནི། མ་རིག་པ་དང༌། འདུ་བྱེད་དང༌། རྣམ་པར་ཤེས་པ་དང༌། མིང་དང༌། གཟུགས་དང༌། སྐྱེ་མཆེད་དྲུག་དང༌། རེག་པ་དང༌། ཚོར་བ་དང༌། སྲེད་པ་དང༌། ལེན་པ་དང༌། སྲིད་པ་དང༌། སྐྱེ་བ་དང༌། རྒ་ཤི་སྟེ། བདེན་པ་བཅུ་གཉིས་ནི། མངལ་སྐྱེས་རྣམས་ཀྱི་སྒྲིབ་པ་དང་བཅས་པ་ཡིན་ལ། སངས་རྒྱས་རྣམས་ཀྱི་ནི་སྒྲིབ་པ་དང་བྲལ་བའོ། །འཕོ་བ་བཅུ་གཉིས་ཀྱི་སྲོག་གི་རླུང་རྒྱུ་བའི་ཕྱིར་མངལ་ནས་སྐྱེས་པ་རྣམས་ཀྱི་སྒྲིབ་པ་དང་བཅས་པ་ཡིན་ལ། ཡན་ལག་བཅུ་གཉིས་འགག་པའི་ཕྱིར། སངས་རྒྱས་རྣམས་ནི་སྒྲིབ་པ་དང་བྲལ་བའོ། །ཞེས་དང༌། རྡོ་རྗེ་སྙིང་པོ་རྒྱན་གྱི་རྒྱུད་ལས། ཀུན་ཏུ་འོད་ཀྱི་ས་ཆེན་ནོ། །དེ་ཉིད་ཉི་མའི་དཀྱིལ་འཁོར་འདྲ། །བདུད་རྩིའི་འོད་ནི་གཉིས་པ་སྟེ། །ཤིན་ཏུ་འོད་གསལ་ཟླ་བ་འདྲ། །ནམ་མཁའ་འོད་ནི་གསུམ་པ་སྟེ། །ནམ་མཁའ་ཇི་བཞིན་རབ་ཏུ་གནས། །རྡོ་རྗེ་འོད་ནི་བཞི་བ་སྟེ། །ས་དེའི་འདི་ནི་ཡིད་དགའ་བའོ། །ལྷག་པའི་བསམ་པ་བརྟན་སྦྱོར་བས། །རྡོ་རྗེ་ཞེས་ནི་ཡོངས་སུ་བཏགས། །ལྔ་པ་རིན་ཆེན་འོད་ཅེས་བྱ། །དབང་བསྐུར་བ་ལ་རབ་ཏུ་གནས། །པདྨའི་འོད་ནི་དྲུག་པ་སྟེ། པདྨ་བཞིན་དུ་རབ་ཏུ་སྐྱེ། །རང་བཞིན་དག་པའི་སེམས་ཉིད་ཀྱིས། །དྲི་མ་མེད་པ་ཡོངས་སུ་འཛིན། །བདུན་པ་ལས་ཀྱི་འོད་ཅེས་པ། །སངས་རྒྱས་འཕྲིན་ལས་བྱེད་པར་འདོད། །བརྒྱད་པ་དཔག་མེད་ཅེས་པ་སྟེ། །དེ་ལ་དཔེ་ནི་ཡོད་མ་ཡིན། །དཔེ་ལྡན་ཞེས་པ་དགུ་བ་སྟེ། །ཐམས་ཅད་དཔེ་ནི་རྟོགས་པར་བྱེད། །བཅུ་བ་ཤེས་རབ་འོད་ཅེས་པ། །སངས་རྒྱས་ས་ནི་བླ་ན་མེད། །བཅུ་གཅིག་ཐམས་ཅད་མཁྱེན་པ་ཉིད། །ས་ཆེན་རབ་ཏུ་འོད་གསལ་བ། །བཅུ་གཉིས་སོ་སོ་བདག་ཉིད་རིག །རྣལ་འབྱོར་ཡེ་ཤེས་རབ་ཏུ་རྫོགས། །ཞེས་གསུ༵ངས་པ༵་ཡི༵ན་ཞིང༌། དེ་རྣམས་ནི། དོན་དམ་འགོག་བདེན་གྱིས་བསྡུས་པའི་ས་བཅུ་གཉིས་སོ། །རབ་ཏུ་དགའ་བ་ལ་སོགས་པའི་ས་རྣམས་ནི་ཀུན་རྫོབ་ལམ་བདེན་གྱིས་བསྡུས་པར་གསུངས་སོ། །འདིའི་སྐབས་སུ་འདི་ཉིད་ཀྱི་རང་འགྲེལ་ལས། རྒྱུད་ནི་རྒྱུད་གཞན་གྱིས་ཤེས་བྱ། །མདོ་ནི་མདོ་གཞན་གྱིས་ཤེས་བྱ། །མདོ་ཡང་རྒྱུད་ཀྱིས་ཤེས་པར་བྱ། །རྒྱུད་ཀྱང་མདོ་ཡི་ཤེས་པར་བྱ། །གཉིས་ཀས་གཉིས་ཀ་ཤེས་པར་བྱ། །དེ་ཡང་ཐོས་བསམ་སྒོམ་པ་དང༌། །བཤད་སྒྲུབ་རྣམ་པར་དག་པས་སོ། །དེས་ན་གསུང་རབ་ཟབ་དགུ་ཡི། །གཞི་ལམ་འབྲས་བུ་ཟབ་དགུ་རྟོགས། །ངེས་པའི་དོན་གྱི་གཞི་འབྲས་ཀུན། །བདེ་གཤེགས་སྙིང་པོ་ཉིད་དུ་གཅིག །ལམ་ནི་དེ་ཡི་རྣལ་འབྱོར་རོ། །དྲང་དོན་གཞི་ལམ་འབྲས་བུ་རྣམས། །དེ་རྣམས་སོ་སོ་འཁོར་དུ་གཏོགས། །དེ་ལྟར་རྫོགས་ལྡན་ཆོས་མཆོག་དང༌། །རྒྱལ་བའི་རང་འགྲེལ་ལས་ཤེས་བྱ། །ཞེས་པ་ནི་མན་ངག་གི་ཚིགས་སུ་བཅད་པའོ། །ཞེས་གསུངས་སོ། །རྫོག༵ས་ལྡ༵ན་གྱི་མཁ༵ས་མཆོ༵ག་ས་བཅུའི་དབང་ཕྱུག་རྣམས་དང་མཁས་གྲུབ་ནཱ་རོ་པཎ་ཆེན་ལ་སོགས་པ་རྣམ༵ས་ཀྱི༵་གསུང༵ས་པ༵་བཞིན་ཡི༵ན་ནོ། །འོན་ཀྱང་གསུ༵མ་ལྡ༵ན་མ༵ར་བཅ༵ད་ཕ༵ལ་གྱི༵་སྤྱོ༵ད་ཡུ༵ལ་མི༵ན་ཏེ། དེ་རྣམས་ཀྱིས་ནི་དེ་ལྟར་མ་རྟོགས་ཤིང་དེ་ལས་ལོག་པར་འཆད་པ་མང་དུ་སྣང་བའི་ཕྱིར་རོ། ། ལྔ་བ་དོན་དམ་རྟེན་འབྲེལ་དེ་སེམས་ཙམ་ལས་འདས་པས་དེ་ལྟར་སྟོན་ཞིང་འདོད་པ་རྣམས་སེམས་ཙམ་ལས་འདས་པར་བསྟན་པ་ནི། དེ་རྣམས་སེམས་ཙམ་མིན་པའི་རྒྱུ་མཚན་ནི། །མཐའ་བྲལ་སྟོང་གཞི་ཕུང་གསུམ་ཡིན་ཕྱིར་དང༌། །སེམས་ཙམ་ཡིན་ན་དངོས་སྨྲ་ཡིན་པའི་ཕྱིར། །སྟོང་གཞི་དེ་རྣམས་རྣམ་ཤེས་ཆོས་ལས་འདས། །གཉིས་མེད་ཡེ་ཤེས་ཚུལ་འཆང་ཡིན་ཕྱིར་དང༌། །སྐད་ཅིག་གཅིག་དང་དུ་མ་དང་བྲལ་ཕྱིར། །དེ་དག་དངོས་སྨྲའི་ཆོས་སུ་ག་ལ་རུང། །རྩ་བར། དེ་རྣམས་སེམས་ཙམ་མིན་པའི་རྒྱུ་མཚན་ནི། །ཞེས་པ་ནས། ག་ལ་རུང་ཞེས་པའི་བར་ཤོ་ལོ་ཀ་གཅིག་དང་རྐང་བ་གསུམ་བྱུང༌། དེའི་ཚིག་དོན་ནི། འགྱུར་མེད་ཡོངས་གྲུབ་ཀྱི་དོན་དམ་དེ༵་རྣམ༵ས་སེ༵མས་ཙ༵མ་མི༵ན་པ༵འི་རྒྱུ༵་མཚ༵ན་ནི༵། མཐ༵འ་ཐམས་ཅད་དང་བྲ༵ལ་བའི་གཞི་ཡིན་པའི་ཕྱིར་དང་ཀུན་རྫོབ་ཀྱི་ཆོས་ཐམས་ཅད་ཀྱི་སྟོ༵ང་བའི་ག༵ཞི་ཡིན་པའི་ཕྱིར་དང༌། དངོས་དང་དངོས་མེད་གང་ཡང་མ་ཡིན་གྱི་དབུས་མ་བར་མ་ཕུ༵ང་པོ་གསུ༵མ་པ་ཡི༵ན་པའི་ཕྱི༵ར་ན་དངོས་སྨྲ་མ་ཡིན་པ་ད༵ང༌། དངོས་སྨྲ་མ་ཡིན་ན། སེམས་ཙམ་གྱི་གྲུབ་མཐའ་མི་རུང་སྟེ། སེམ༵ས་ཙ༵མ་ཡི༵ན་ན༵་དངོ༵ས་སྨྲ༵་ཡི༵ན་དགོས་པ༵འི་ཕྱི༵ར་རོ། །གཞན་ཡང་ཀུན་རྫོབ་གྱི་ཆོས་ཐམས་ཅད་ཀྱིས་སྟོ༵ང་བའི་གཞི༵་དེ༵་རྣམ༵ས་ཐམས་ཅད་རྣ༵མ་ཤེ༵ས་ཀྱི་ཆོ༵ས་ལ༵ས་འད༵ས་པའི་གཟུང་འཛིན་གཉི༵ས་མེ༵ད་ཀྱི་ཡེ༵་ཤེ༵ས་དབྱེར་མེད་ཀྱི་ཚུ༵ལ་དུ་འཆ༵ང་བ་ཡི༵ན་པའི་ཕྱི༵ར་ད༵ང༌། སྐ༵ད་ཅི༵ག་གཅི༵ག་ད༵ང་དུ༵་མ༵་ད༵ང་བྲ༵ལ་བ་ཡིན་པའི་ཕྱིར༷། སྟོང་གཞི་དེ༵་དག༵་དངོ༵ས་སྨྲ༵འི་ཆོ༵ས་སུ༵་ག༵་ལ༵་རུ༵ང་སྟེ་མི་རུང་བའི་ཕྱིར་རོ། །མདོར་ན་ཀུན་རྫོབ་ཐམས་ཅད་ཀྱིས་གདོད་ནས་སྟོང་ཞིང་དབེན་པ་ལ་དག་པའི་གཞི་དོན་དམ་དེ་བཞིན་ཉིད་འགྱུར་མེད་ཡོངས་གྲུབ་དེ་སེམས་ཙམ་ལས་ཤིན་ཏུ་འདས་པས་དེ་ལྟར་སྟོན་ཞིང་འདོད་པ་རྣམས་ཀྱང་སེམས་ཙམ་ལས་ཤིན་ཏུ་འདས་པར་བསྟན་ཏོ། །ལྔ་བ་འཁོར་ལོ་བར་བའི་བརྗོད་བྱའི་གཙོ་བོ་ཡང་རང་སྟོང་མེད་དགག་ཙམ་མ་ཡིན་པར་དོན་དམ་པའི་རྣམ་པ་ཀུན་ལྡན་ཡིན་པར་བསྟན་པ་ནི། ཆོས་འཁོར་གཉིས་པའི་དོན་ཡང་དེ་བཞིན་ཉིད། །ཡོན་ཏན་དཔག་ཡས་ཚང་བ་ཡིན་པའི་ཕྱིར། །མེད་དགག་མ་ཡིན་དེ་ཕྱིར་རང་སྟོང་དང༌། །ཅང་མེད་སྟོང་པ་ཆད་པའི་སྟོང་པ་མིན། །རྣམ་ཀུན་མཆོག་ལྡན་སྟོང་གཞི་ཡིན་ཕྱིར་དང༌། །འགྱུར་མེད་མཆོག་གི་བདེ་ཆེན་ཡིན་ཕྱིར་དང༌། །པྲ་ཕབ་བརྒྱད་དང་མཚུངས་པའི་ཕྱག་རྒྱ་ཆེ། །དོན་དམ་ཨེ་ཝཾ་ཡི་གེ་ཡིན་ཕྱིར་དང༌། །པྲ་ཕབ་བརྒྱད་དང་མཚུངས་པའི་ཡེ་ཤེས་སྐུ། །དོན་དམ་ཐིག་ལེ་གྲུ་གསུམ་ཡིན་ཕྱིར་དང༌། །པྲ་ཕབ་བརྒྱད་དང་མཚུངས་པའི་རྡོ་རྗེའི་སྐུ། །དོན་དམ་རྡོ་རྗེ་བྷ་ག་ཡིནཕྱིར་དང༌། །པྲ་ཕབ་བརྒྱད་དང་མཚུངས་པའི་སྔགས་ཀྱི་སྐུ། །དོན་དམ་ཨཱ་ལི་ཀཱ་ལི་ཡིན་ཕྱིར་དང༌། །པྲ་ཕབ་བརྒྱད་དང་མཚུངས་པའི་གཡུང་དྲུང་སྐུ། །དོན་དམ་རྡོ་རྗེ་པད་མ་ཡིན་ཕྱིར་དང༌། །པྲ་ཕབ་བརྒྱད་དང་མཚུངས་པའི་ཐེར་ཟུག་སྐུ། །དོན་དམ་རྡོ་རྗེ་ཟླ་ཉི་ཡིན་ཕྱིར་དང༌། །པྲ་ཕབ་བརྒྱད་དང་མཚུངས་པའི་ཆོས་ཉིད་སྐུ། །དོན་དམ་རྡོ་རྗེའི་ཁུ་རྡུལ་ཡིན་ཕྱིར་དང༌། པྲ་ཕབ་བརྒྱད་དང་མཚུངས་པའི་རྡོ་རྗེའི་དབྱིངས། །དོན་དམ་ཆ་མེ་ཀུན་འགྲོ་ཡིན་ཕྱིར་དང༌། །པྲ་ཕབ་བརྒྱད་དང་མཚུངས་པའི་སྔགས་ཀྱི་དབྱིངས། །དོན་དམ་རྣམ་བཅུ་དབང་ལྡན་ཡིན་ཕྱིར་དང༌། །པྲ་ཕབ་བརྒྱད་དང་མཚུངས་པའི་བདེ་བའི་དབྱིངས། །དོན་དམ་ལུས་མེད་རྡོ་རྗེ་ཡིན་ཕྱིར་དང༌། །པྲ་ཕབ་བརྒྱད་དང་མཚུངས་པའི་དབུ་མ་ཆེ། །དོན་དམ་རྡོ་རྗེ་སྙིང་པོ་ཡིན་ཕྱིར་དང༌། །པྲ་ཕབ་བརྒྱད་དང་མཚུངས་པའི་རྡོ་རྗེ་འཆང༌། །དོན་དམ་རྡོ་རྗེ་སེམས་དཔའ་ལ་སོགས་དང༌། །དོན་དམ་རྒྱལ་བའི་ཡུམ་གྱུར་ཤེར་ཕྱིན་སོགས། །ཟབ་མོ་མཐར་ཐུག་ཐམས་ཅད་ཡིན་ཕྱིར་རོ། །རྩ་བར། ཆོས་འཁོར་གཉིས་པའི་དོན་ཡང་དེ་བཞིན་ཉིད། །ཅེས་པ་ནས། ཐམས་ཅད་ཡིན་ཕྱིར་རོ། །ཞེས་པའི་བར་ཤོ་ལོ་ཀ་བརྒྱད་བྱུང༌། དེའི་ཚིག་དོན་ནི། དེ་ལྟར་ཆོས་འཁོར་གསུམ་པའི་དོན་གྱི་གཙོ་བོ་དེ་བཞིན་ཉིད་ཡིན་པར་མ་ཟད། ཆོ༵ས་འཁོ༵ར་གཉི༵ས་པ༵འི་དོ༵ན་གྱི་གཙོ་བོ་ཡ༵ང་དེ༵་བ༵ཞིན་ཉི༵ད་ཡིན་ལ། དེབཞིན་ཉིད་ཀྱང་དོན་དམ་འདུས་མ་བྱས་ཀྱི་སྟོབས་སོགས་ཡོ༵ན་ཏ༵ན་དཔ༵ག་ཏུ་ཡ༵ས་པ་ཚ༵ང་བ༵་ཡི༵ན་པ༵འི་ཕྱི༵ར། དགག་པ་གཉིས་པོ་གང་རུང་གང་ཞིག །མེ༵ད་དག༵ག་མ༵་ཡི༵ན་པ་དེ༵འི་ཕྱི༵ར་ར༵ང་སྟོ༵ང་ད༵ང་ཅ༵ང་མེ༵ད་སྟོ༵ང་བ༵་ཆ༵ད་པ༵འི་སྟོ༵ང་བ༵་མི༵ན་ལ། རྣ༵མ་ཀུ༵ན་མཆོ༵ག་ལྡ༵ན་གྱི་སྟོ༵ང་ག༵ཞི་ཡི༵ན་པའི་ཕྱི༵ར་དང༷༌། འགྱུར་བཅས་ཀྱི་བདེ་བ་མ་ཡིན་པར་འགྱུ༵ར་མེ༵ད་མཆོ༵ག་གི༵་བདེ༵་ཆེ༵ན་ཡི༵ན་པའི་ཕྱི༵ར་ད༵ང༌། པྲ༵་ཕ༵བ་བརྒྱ༵ད་ད༵ང་མཚུ༵ངས་པ༵འི་ཕྱ༵ག་རྒྱ༵་ཆེ༵་བ་དོ༵ན་ད༵མ་པའི་བདེ་སྟོང་ངོ་བོ་ཨེ༵་ཝ༵ཾ་གི་ཡི༷་གེ༵་ཡི༵ན་པའི་ཕྱི༵ར་ད༵ང༌། དེ་ལ་པྲ་ཕབ་བརྒྱད་ནི་བསྟན་པ་སྤྱི་འགྲེལ་གྱི་རྣམ་བཤད་ལས། པྲ་ཕབ་བརྒྱད་ནི། མེ་ལོང་མཐེ་བོང་སྒྲོན་མེ་ཟླ། །ཉི་མ་ཆུ་དང་རལ་གྲི་མིག །པྲ་འབེབས་འཛུགས་པ་བརྒྱད་རྣམས་ནི། །རྒྱལ་བ་རྣམས་ཀྱིས་པྲ་འབེབས་གསུངས། །ཞེས་གསུངས་སོ། །ཡང་པྲ༵་ཕ༵བ་བརྒྱ༵ད་ད༵ང་མཚུ༵ངས་པ༵འི་ཡེ༵་ཤེ༵ས་ཆོས་ཀྱི་སྐུ༵་དོ༵ན་ད༵མ་པའི་ཐི༵ག་ལེ༵་གྲུ༵་གསུ༵མ་ཡི༵ན་པའི་ཕྱི༵ར་དང༵༌། པྲ༵་ཕ༵བ་བརྒྱ༵ད་ད༵ང་མཚུ༵ངས་པ༵འི་རྡོ༵་རྗེ༵འི་སྐུ༵་དོན༵་ད༵མ་རྡོ༵་རྗེ༵་བྷ༵་ག༵་ཡི༵ན་པའི་ཕྱི༵ར་ད༵ང༌། པྲ༵་ཕ༵བ་བརྒྱ༵ད་ད༵ང་མཚུ༵ངས་པའི༵་སྔག༵ས་ཀྱི༵་སྐུ༵་དོ༵ན་ད༵མ་པའི་ཨཱ༵་ལཱི༵་ཀཱ༵་ལི༵་ཡི༵ན་པའི་ཕྱི༵ར་ད༵ང༌། པྲ༵་ཕ༵བ་བརྒྱ༵ད་ད༵ང་མཚུང༵ས་པ༵འི་གཡུ༵ང་དྲུ༵ང་སྐུ༵་དོ༵ན་ད༵མ་རྡོ༵་རྗེ༵འི་པ༵ད་མ༵་ཡི༵ན་པའི་ཕྱི༵ར་དང༵༌། པྲ༵་ཕ༵བ་བརྒྱ༵ད་ད༵ང་མཚུང༵ས་པ༵འི་ཐེ༵ར་ཟུ༵ག་སྐུ༵་དོ༵ན་ད༵མ་པའི་རྡོ༵་རྗེ༵་ཟླ༵་བ་ཉི༵་མ་ཡི༵ན་པའི་ཕྱི༵ར་ད༵ང༌། པྲ༵་ཕ༵བ་བརྒྱ༵ད་ད༵ང་མཚུང༵ས་པ༵འི་ཆོ༵ས་ཉིད༵་ཀྱི་སྐུ༵་དོ༵ན་ད༵མ་པའི་རྡོ༵་རྗེ༵འི་ཁུ༵་བ་དང་རྡུ༵ལ་གཉིས་ཡི༵ན་པའི་ཕྱི༵ར་ད༵ང༌། པྲ༵་ཕ༵བ་བརྒྱ༵ད་ད༵ང་མཚུ༵ངས་པ༵འི་རྡོ༵་རྗེ༵འི་དབྱི༵ངས་དོ༵ན་ད༵མ་ཆ༵་མེ༵ད་ཀུ༵ན་འགྲོ༵་ཡི༵ན་པའི་ཕྱིར༵་ད༵ང༌། པྲ༵་ཕ༵བ་བརྒྱ༵ད་ད༵ང་མཚུ༵ངས་པ༵འི་སྔ༵གས་ཀྱི༵་དབྱི༵ངས་དོ༵ན་ད༵མ་པའི་རྣ༵མ་བ༵ཅུ་དབ༵ང་ལྡ༵ན་ཡི༵ན་པའི་ཕྱི༵ར་ད༵ང༌། པྲ༵་ཕ༵བ་བརྒྱ༵ད་ད༵ང་མཚུ༵ངས་པ༵འི་བ༵དེ་བ༵འི་དབྱིང༵ས་དོ༵ན་ད༵མ་ཀུན་རྫོབ་ཀྱི་ལུ༵ས་མེ༵ད་པའི་རྡོ༵་རྗེ༵་ཡི༵ན་པའི་ཕྱི༵ར་ད༵ང༌། པྲ༵་ཕ༵བ་བརྒྱ༵ད་ད༵ང་མཚུང༵ས་པ༵འི་ད༵བུ་མ༵་ཆེ༵་བ༵་དོན༵་དམ༵་པའི་རྡོ༵་རྗེ༵འི་སྙི༵ང་པོ༵་ཡི༵ན་པའི་ཕྱི༵ར་ད༵ང༌། པྲ༵་ཕ༵བ་བརྒྱ༵ད་དང་མཚུང༵ས་པ༵འི་རྡོ༵་རྗེ༵་འ༵ཆང་དོ༵ན་ད༵མ་རྡོ༵་རྗེ༵་སེམ༵ས་དཔ༵འ་ལ༵་སོ༵གས་པ་ཡིན་པ་ད༵ང༌། དོ༵ན་ད༵མ་རྒྱ༵ལ་བ༵འི་ཡུ༵མ་གྱུ༵ར་ཤེ༵ར་ཕྱི༵ན་སོག༵ས་མདོར་ན། དོན་དམ་པའི་ཟ༵བ་མོ༵་མཐ༵ར་ཐུ༵ག་ཐམ༵ས་ཅ༵ད་ཡི༵ན་པའི་ཕྱི༵ར་ཏེ། འདི་ཉིད་ཀྱི་བསྡུས་དོན་འགྲེལ་བ་ལས། འཁོར་ལོ་བར་བའི་བརྗོད་བྱའི་གཙོ་བོ་ཡང་གཞན་སྟོང་ཟབ་མོ་དེ་བཞིན་ཉིད་ཡིན་ཞིང༌། དེ་ཡང་རང་སྟོང་བེམ་སྟོང་ཆད་སྟོང་མེད་དགག་ཡོངས་གཅོད་དུ་ཅི་ཡང་མ་གྲུབ་ཙམ་པ་དེ་འདྲ་གཏན་ནས་མ་ཡིན་གྱི། ཡོན་ཏན་དཔག་ཡས་ཚང་བ་རྣམ་ཀུན་མཆོག་ལྡན་གྱི་སྟོང་ཉིད་དོན་དམ་པའི་ཨེ་ཝཾ་ཡེ་ཤེས་སྐུ་རང་བཞིན་འོད་གསལ། ཡུམ་ཆེན་མོ། རྡོ་རྗེ་སེམས་དཔའ་རྡོ་རྗེ་འཆང་ཤེར་ཕྱིན་ཟབ་མོ་ལ་སོགས་པ་ཟབ་མོ་མཐར་ཐུག་ཐམས་ཅད་ཡིན་པར་བསྟན་ཏོ། །ཞེས་གསུངས་པའི་ཕྱིར་རོ༵། །གོ་རམས་པས་ཀུན་མཁྱེན་ཇོ་ནང་བས་འཁོར་ལོ་བར་བས་བསྟན་བྱའི་སྟོང་ཉིད་ནི་ཅང་མེད་སྟོང་རྐྱང་ཉི་ཚེ་བའི་སྟོང་ཉིད་དུ་འདོད། ཅེས་བཤད་པ་དང༌། གུང་ཐང་བསྟན་པའི་སྒྲོན་མེའི་དྲང་ངེས་མཆན་འགྲེལ་ལས་འདིས་ཁོ་རང་གི་ལུགས་ཀྱི་གཞན་སྟོང་ཆེན་མོ་དེ་འཁོར་ལོ་ཐ་མར་གསུངས་ཡང་བར་བ་ཆད་སྟོང་མེད་དགག་ཙམ་གྱི་རང་སྟོང་ཞིག་ལས་མ་གསུངས་ལ་རང་སྟོང་དེ་སྟོང་ཉིད་དངོས་མ་ཡིན་པར་འདོད་པའི་ཕྱིར། ཞེས་གསུངས་པ་དང༌། སེ་ར་རྗེ་བཙུན་པའི་ཀར་ལན་ཀླུ་གྲུབ་དགོངས་རྒྱན་ལས། ཡུམ་རྒྱས་འབྲིང་བསྡུས་གསུམ་ལས་ཆད་སྟོང་མེད་དགག་ཙམ་ཞིག་བསྟན་གྱི་སྔར་བཤད་པའི་གཞན་སྟོང་ཆེན་མོ་བདེན་གྲུབ་དེ་མ་བསྟན་པར་བཞེད། ཅེས་དང༌། ཡང་དེ་ལས་སྟོང་ཉིད་ཡིན་ན་གཞན་སྟོང་ཆེན་མོ་ཡིན་པས་ཁྱབ་ཅེས་ཀུན་མཁྱེན་ཇོ་ནང་བ་དང༌། ཀརྨ་བའི་དེ་ལྟར་འདོད་ཅེས་བཀོད་འདུག་ཀྱང༌། ཇོ་ནང་རང་ལུགས་ལ་དེ་ལྟར་ཁས་མི་ལེན་ཏེ་གོང་དུ་བཤད་ཟིན་པའི་བཀའ་བསྡུ་བཞི་བ་ལས། ཆོས་འཁོར་གཉིས་པའི་དོན་ཡང་དེ་བཞིན་ཉིད། །ཡོན་ཏན་དཔག་ཡས་ཚང་བ་ཡིན་པའི་ཕྱིར། །མེད་དགག་མ་ཡིན་དེ་ཕྱིར་རང་སྟོང་དང༌། །ཅང་མེད་སྟོང་བ་ཆད་པའི་སྟོང་བ་མིན། །ཞེས་དང། འདི་ཉིད་ཀྱི་རང་འགྲེལ་ལས། ཆོས་འཁོར་གསུམ་པའི་དོན་གྱི་གཙོ་བོ་ཡང་དེ་བཞིན་ཉིད་ཡིན་པར་མ་ཟད་ཆོས་འཁོར་གཉིས་པའི་དོན་གྱི་གཙོ་བོ་ཡང་དེ་བཞིན་ཉིད་ཡིན་ལ། དེ་བཞིན་ཉིད་ཀྱང་དོན་དམ་འདུས་མ་བྱས་ཀྱི་སྟོབས་སོགས་ཡོན་ཏན་དཔག་ཡས་ཚང་བ་ཡིན་པའི་ཕྱིར། མེད་དགག་མ་ཡིན་དེ་ཕྱིར་རང་སྟོང་དང་ཅང་མེད་སྟོང་བ་ཆད་པའི་སྟོང་བ་མིན་ཞེས་དང༌། ཡང་བཀའ་བསྡུ་བཞི་བ་ལས། དེ་ཕྱིར་རྒྱལ་ཡུམ་རྒྱས་འབྲིང་བསྡུས་ལ་སོགས། །ཆོས་འཁོར་གཉིས་པའི་སྟོང་ཉིད་ཟབ་མོ་དང༌། །སྙིང་པོའི་མདོ་ལྔ་མདོ་བཅུ་ལ་སོགས་པ། །ཆོས་འཁོར་གསུམ་པའི་སྟོང་ཉིད་ཟབ་མོ་དང༌། རྒྱུད་སྡེ་རྣམ་བཞིའི་སྟོང་ཉིད་ཟབ་མོ་སྟེ། །མདོ་རྒྱུད་ཟབ་མོའི་སྟོང་ཉིད་ཟབ་མོ་ཀུན། །ཀུན་རྫོབ་མ་ཡིན་དོན་དམ་བདེན་པ་ཡིན། །ཞེས་དང༌། ཆོས་རྗེ་ཀུན་མཁྱེན་གྱི་འདི་ཉིད་ཀྱི་བསྡུས་འགྲེལ་ལས། །བཀའ་འཁོར་ལོ་ཐ་མ་གཉིས་དང༌། རྒྱུད་སྡེ་བཞིའི་བརྗོད་བྱའི་གཙོ་བོར་སྟོང་ཉིད་ཟབ་མོ་དེར་གཅིག་ཅིང་ཞེས་པ་ལ་སོགས་པའི་ལུང་རིགས་དུ་མས་གྲུབ་པ་དང༌། གཞན་ཡང་རང་སྟོང་དེ་སྟོང་ཉིད་དངོས་མ་ཡིན་པར་འདོད་ཟེར་བ་དང༌། སྟོང་ཉིད་ཡིན་ན་གཞན་སྟོང་ཡིན་པས་ཁྱབ་པ་འདོད་ཟེར་བ་གཉིས་མི་འཐད་དེ་ཇོ་ནང་རང་ལུགས་ལ་གོང་དུ་རྒྱས་པར་ལུང་རིགས་ཀྱི་སྒོ་ནས་བཤད་ཟིན་པ་ལྟར་གཞི་གྲུབ་ན་སྟོང་ཉིད་ཡིན་པས་ཁྱབ་པ་ཁས་བླངས་ནས། སྟོང་ཉིད་ལ་མེད་པའི་སྟོང་བ་ཉིད་དང༌། ཡོད་པའི་སྟོང་པ་ཉིད་དང༌། རང་བཞིན་སྟོང་བ་ཉིད་གསུམ་ཡོད་ཅིང༌། དེས་ན་སྟོང་ཉིད་ཡིན་ན་གཞན་སྟོང་ཡིན་པས་མ་ཁྱབ་པར་རང་བཞིན་སྟོང་ཉིད་ཡིན་ན་གཞན་སྟོང་ཡིན་པས་ཁྱབ་པ་བཞེད་དོ། །སྐབས་འདིར་ཁྱད་པར་འདི་ཤེས་པར་བྱ་དགོས་སྟེ། ཇོ་ནང་རང་ལུགས་ལ་འཁོར་ལོ་བར་བ་རུ་གཙོ་བོར་བསྟན་པའི་སྟོང་ཉིད་དེ་ཟབ་མོ་ཡིན་ཀྱང༌། དེང་སང་རང་སྟོང་བར་གྲགས་པ་རྣམས་ཀྱིས་འཁོར་ལོ་བར་བའི་དགོངས་པ་ཡིན་ཞེས་ཁས་བླངས་པའི་རང་སྟོང་ནི་ཅང་མེད་སྟོང་རྐྱང་མེད་དགག་ཙམ་ཡིན་པ་དང་དེ་འཁོར་ལོ་བར་བའི་དགོངས་དོན་མཐར་ཐུག་མ་ཡིན་པར་བཞེད་པ་ཡིན་ཏེ། ཐམས་ཅད་མཁྱེན་པ་ཏཱ་ར་ནཱ་ཐའི་ཟབ་དོན་ཉེར་གཅིག་ལས། ཀུན་མཁྱེན་ཇོ་ནང་པ་ཆེན་པོ་ནི་ཐལ་རང་གི་ལྟ་བ་འདི་འཁོར་ལོ་བར་བ་དང་རིགས་ཚོགས་ཀྱི་དགོངས་པར་རློམ་པ་ཡིན་ཀྱང༌། དགོངས་པ་རྨ་མེད་པ་མ་ཡིན་ལ། རིགས་ཚོགས་དངོས་བསྟན་གྱི་ཚིག་ཕལ་ཆེར་ལ་འབྱོར་བ་ལྟར་སྣང་ཡང༌། མི་འབྱོར་བ་ཡང་མང་དུ་ཡོད་ལ། འཁོར་ལོ་བར་བའི་གཞུང་ཚིག་མང་པོས་གཞན་སྟོང་གསལ་བར་སྟོན་པས་འཁོར་ལོ་བར་བ་དང་རིགས་ཚོགས་ཀྱི་དངོས་བསྟན་སྒྲ་ཇི་བཞིན་པ་མ་ཡིན་ནོ། །དེ་ལ་འཁོར་ལོ་བར་བ་དང་རིགས་ཚོགས་ཀྱི་ཚིག་ཕལ་ཆེར་གྱི་དངོས་བསྟན་ནི་ཐལ་རང་དང་གཞན་སྟོང་གཉིས་ཀ་ལ་མི་འགལ་ཡང༌། རང་སྟོང་བར་གྲགས་པའི་ཐུན་མོང་མ་ཡིན་པའི་གྲུབ་མཐའི་ཁུངས་ལ་འདྲེན་པ་རྣམས་ནི། དེ་རྣམས་ཉིད་ལ་འཁྲུལ་གཞི་བྱུང་བ་ཡིན་གྱི་གྲུབ་མཐའ་དེ་དང༌། མི་སྟོན་ཅིང་དེ་ལས་གཞན་དེའི་ལུགས་དང་འགལ་ཞིང་གཞན་སྟོང་ཁོ་ན་སྟོན་པ་ཐུན་མོང་མ་ཡིན་པ་རྣམས་གསལ་ཞིང་རྒྱས་པར་འབྱུང་བ་ཡིན་ལ། ཐལ་རང་གི་ཐུན་མོང་མ་ཡིན་པའི་གྲུབ་མཐའ་དེང་སང་རང་སྟོང་གི་ལྟ་བར་གྲགས་པ་དེ་མི་སྟོན་ཀྱང་རྒྱལ་བ་སྲས་བཅས་ཀྱི་དགོངས་པའི་རང་སྟོང་དེ་རྒྱས་པར་བསྟན་ཏོ། །ཞེས་གསུངས་པའི་ཕྱིར་རོ། །འོ་ན་འཁོར་ལོ་བར་བ་ངེས་དོན་གྱི་མདོ་ཡིན་པར་འགྱུར་རོ་ཞེ་ན། དེ་ཡང་མ་ཡིན་ཏེ། འཁོར་ལོ་བར་བའི་སྒྲས་ཟིན་ཐམས་ཅད་སྒྲ་ཇི་བཞིན་པར་ཁས་བླངས་མི་རུང་བའི་ཕྱིར་ཏེ་རྒྱལ་བའི་ཡུམ་ལས། ཆོས་ཀྱི་དབྱིངས་ནི་ཆོས་ཀྱི་དབྱིངས་ཀྱིས་སྟོང་དེ་བཞིན་ཉིད་ནི་དེ་བཞིན་ཉིད་ཀྱིས་སྟོང་ཞེས་སོགས་ཀྱིས་རང་སྟོང་མ་ཡིན་པ་དག་རང་སྟོང་དུ་སྒྲས་ཟིན་དུ་སྟོན་པ་གང་ཞིག་དེ་སྒྲ་ཇི་བཞིན་དུ་ཁས་བླངས་མི་རུང་བའི་ཕྱིར་ཏེ། ཡུམ་མདོ་ལས་རང་སྟོང་མ་ཡིན་པ་དག་རང་སྟོང་དུ་སྒྲའི་ཟིན་ལ་གསུངས་བའི་མདོ་ཚིག་དག་དགོས་པ་དགོངས་གཞི་དངོས་སམ་སྒྲའི་ཟིན་ལ་གནོད་བྱེད་དང་གསུམ་གྱི་སྒོ་ནས་དྲང་དོན་དུ་བཀྲལ་བའི་ཚུལ་དབུ་མ་ཆེན་པོའི་གཞུང་རི་ཆོས་ངེས་དོན་རྒྱ་མཚོ་ལས་གསུངས་པ་འདི་ལྟ་སྟེ། ཇི་སྐད་དུ། གལ་ཏེ་འཁོར་ལོ་གཉིས་པར་ཤེར་ཕྱིན་སྟོན་པའི་ཕྱིར་ངེས་པའི་དོན་དང་བླ་ན་མེད་པ་ཡིན་པ་ལ་དེ་ལས་བཟློག་པར་བསྟན་པ་ཉིད་ཀྱི་ཕྱིར་ལུང་འདི་དྲང་དོན་དགོངས་པ་ཅན་ཡིན་ནོ་ཞེ་ན། འདི་ནི་ལེགས་པར་མ་བརྟགས་པའི་ཚིག་སྟེ་ཤེར་ཕྱིན་སྟོན་པའི་རྒྱུ་མཚན་གྱིས་དྲང་དོན་དང་བླ་ན་ཡོད་པ་ལ་སོགས་པར་སྟོན་པ་མ་ཡིན་གྱི་རང་སྟོང་མ་ཡིན་པ་རང་སྟོང་དུ་སྟོན་པ་ལ་སོགས་པའི་རྒྱུ་མཚན་གཞན་རྣམས་ཀྱིས་དེ་ལྟར་སྟོན་པའི་ཕྱིར་རོ། །མ་སྐྱེས་མ་འགགས༵་གཟོད་མ་ནས་ཞི་བ་ལ་སོགས་པ་དང༌། ཤེར་ཕྱིན་ནི་འཁོར་ལོ་གསུམ་པར་ཡང་སྟོན་ཅིང་རྡོ་རྗེ་ཐེག་པར་ཡང་སྟོན་ཏེ་མི་གསལ་བ་དང་རབ་ཏུ་གསལ་བ་སྟོན་པའི་རྒྱུ་མཚན་གྱིས་དེ་དག་གི་དོན་ལ་རྨོངས་པ་དང་མ་རྨོངས་པ་ལ་སོགས་པའི་ཁྱད་པར་ཆེ་བ་དང་ཤིན་ཏུ་ཆེ་བར་ཡང་ཡོད་དོ། །ཞེས་དང༌། གལ་ཏེ་ཆོས་ཀྱི་དབྱིངས་དང་དེ་བཞིན་ཉིད་དང༌། ཡང་དག་པའི་མཐའ་ལ་སོགས་པ་རང་སྟོང་མ་ཡིན་ན། རྒྱལ་བའི་ཡུམ་ལས་ཆོས་ཀྱི་དབྱིངས་ནི་ཆོས་ཀྱི་དབྱིངས་ཀྱིས་སྟོང༌། དེ་བཞིན་ཉིད་ནི་དེ་བཞིན་ཉིད་ཀྱིས་སྟོང༌། ཡང་དག་པའི་མཐའ་ནི་ཡང་དག་པའི་མཐས་སྟོང༌། བསམ་གྱིས་མི་ཁྱབ་པའི་དབྱིངས་ནི་བསམ་གྱིས་མི་ཁྱབ་པའི་དབྱིངས་ཀྱིས་སྟོང༌། ཞེས་དང༌། ཤེས་རབ་ཀྱི་ཕ་རོལ་ཏུ་ཕྱིན་པ་ནི་ཤེས་རབ་ཀྱི་ཕ་རོལ་ཏུ་ཕྱིན་པའི་སྟོང་སྟེ་གང་སྟོང་པ་དེ་ནི་ཤེས་རབ་གྱི་ཕ་རོལ་ཏུ་ཕྱིན་པ་མ་ཡིན་ཏེ་སྐྱེ་བ་མེད་དོ། །ཞེས་པ་ནས་རྣམ་པ་ཐམས་ཅད་མཁྱེན་པ་ཉིད་ཀྱི་བར་དུ་རྣམ་པ་ཐམས་ཅད་མཁྱེན་པ་ཉིད་ཀྱིས་སྟོང་སྟེ། གང་སྟོང་པ་དེ་ནི་རྣམ་པ་ཐམས་ཅད་མཁྱེན་པ་ཉིད་མ་ཡིན་ཏེ་སྐྱེ་བ་མེད་དོ། །ཞེས་དང༌། ཤེས་རབ་ཀྱི་ཕ་རོལ་ཏུ་ཕྱིན་པ་ཉིད་ཀྱང་ཤིན་ཏུ་མེད་ན་དེ་ལ་འགྲོ་བའམ་འོང་བ་ལྟ་ག་ལ་ཡོད། ཅེས་པ་ལ་སོགས་པ་རྒྱ་ཆེར་གསུངས་པའི་དགོངས་པ་གང་ཞེ་ན། དེ་ནི་དྲང་བའི་དོན་དུ་དགོངས་ནས་གསུངས་པ་སྟེ། དགོངས་པ་ངེས་པར་འགྲེལ་བའི་མདོར་བཅོམ་ལྡན་འདས་ཀྱིས་ཆོས་རྣམས་ཀྱི་ངོ་བོ་ཉིད་མ་མཆིས་པ་ཉིད་ལས་བརྩམས། སྐྱེ་བ་མ་མཆིས་པ་ཉིད་དང༌། འགག་པ་མ་མཆིས་པ་ཉིད་དང༌། གཟོད་མ་ནས་ཞི་བ་ཉིད་དང༌། རང་བཞིན་གྱིས་ཡོངས་སུ་མྱ་ངན་ལས་འདས་པ་ཉིད་ལས་བརྩམས་ཏེ་ཐེག་པ་ཆེན་པོ་ལ་ཡང་དག་པར་ཞུགས་པ་རྣམས་ལ་སྟོང་པ་ཉིད་སྨོས་པའི་ཚུལ་གྱིས་ཆེས་ངོ་མཚར་རྨད་དུ་བྱུང་བའི་ཆོས་ཀྱི་འཁོར་ལོ་གཉིས་པ་བསྐོར་ཏེ། བཅོམ་ལྡན་འདས་ཀྱིས་ཆོས་ཀྱི་འཁོར་ལོ་བསྐོར་བ་དེ་ཡང་བླ་ན་མཆིས་པ། སྐབས་མཆིས་པ་དྲང་བའི་དོན་རྩོད་པའི་གཞིའི་གནས་སུ་གྱུར་པ་ལགས་སོ་ཞེས་གསུངས་བའི་ཕྱིར་རོ། །དེ་བཞིན་དུ། འཁོར་ལོ་བར་བའི་གཞུང་གཞན་དང་གཞན་དུ་ཡང༌། རང་སྟོང་མ་ཡིན་པ་ལ་རང་སྟོང་དུ་གསུངས་པ་ཐམས་ཅད་དྲང་དོན་དགོངས་པ་ཅན་ཉིད་དུ་ཁོང་དུ་ཆུད་པར་བྱ་སྟེ། ལེགས་པར་རྣམ་པར་ཕྱེ་བའི་མན་ངག་ཐུན་མོང་མ་ཡིན་པའི་སྒྲོན་མེ་ལ་བརྟེན་ནས་སོ། །འདིར་དེ་ལྟར་དགོངས་ཏེ་གསུངས་པའི་དགོས་པ་ནི་ཆོས་ཀྱི་དབྱིངས་ལ་སོགས་པ་དེ་དང་དེར་འཛིན་པ་དང་འདུ་ཤེས་པ་དང་རྣམ་པར་རྟོག་པ་ཉེ་བར་ཞི་བར་བྱ་བའི་ཕྱིར་རོ། །དེ་ངེས་དོན་ཡིན་པ་ལ་གནོད་བྱེད་ནི། ཆོས་ཀྱི་དབྱིངས་དང་དེ་བཞིན་ཉིད་དང་ཡང་དག་པའི་མཐའ་ལ་སོགས་པ་གང་ཡིན་པ་དེ་རྣམས་ཉིད་མཐར་ཐུག་གི་སངས་རྒྱས་སྐུ་བཞི་དང་ཡེ་ཤེས་ལྔ་དང་ཨེ་ཡིག་དང་བྷ་ག་དང་ཆོས་འབྱུང་དང་ཆུ་སྐྱེས་དང་གསང་བ་དང་གསང་ཆེན་དང་ཨ་ཡིག་དང་ཤེས་རབ་ཀྱི་ཕ་རོལ་ཏུ་ཕྱིན་མ་དང་སྣ་ཚོགས་ཡུམ་དང་རྡོ་རྗེ་ཕག་མོ་ལ་སོགས་པ་དང༌། ཝཾ་ཡིག་དང་བདེ་བ་ཆེན་པོ་དང་ཐིག་ལེ་དང་རྡོ་རྗེ་དང་ཧེ་རུ་ཀ་དང་དེ་ཁོ་ན་ཉིད་དང་རང་བྱུང་གི་སངས་རྒྱས་ལ་སོགས་པ་དང༌། རྡོ་རྗེ་འཆང་དང་རྡོ་རྗེ་སེམས་དཔའ་དང་ཨེ་ཝཾ་ཡི་གེ་དང་དུས་ཀྱི་འཁོར་ལོ་དང་རྡོ་རྗེ་འཇིགས་བྱེད་དང་རྡོ་རྗེ་དབང་ཕྱུག་དང་འཁོར་ལོ་སྡོམ་པ་དང་གསང་བ་འདུས་པ་དང་ཀྱེའི་རྡོ་རྗེ་ལ་སོགས་པ་དོན་དམ་པའི་ལྷ་དང་སྔགས་དང་རྒྱུད་དང་དཀྱིལ་འཁོར་དང་ཕྱག་རྒྱ་ཐམས་ཅད་ཡིན་པར་གསུངས་ཤིང་དེ་རྣམས་ཉིད་ཀྱང་ཆོས་ཉིད་དེ་བཞིན་ཉིད་ལ་སོགས་པ་ཡིན་པར་གསུངས་པའི་ཕྱིར་དང༌། དེ་རྣམས་རང་སྟོང་མ་ཡིན་པའི་ཡོན་ཏན་གྱི་ཆོས་སྟོབས་དང་མི་འཇིགས་པ་ལ་སོགས་པ་མཐའ་ཡས་པའི་བདག་ཉིད་དུ་གསུངས་པའི་ཕྱིར་རོ། །འདིར་དགོངས་གཞི་ནི་ཆོས་ཀྱི་དབྱིངས་ལ་སོགས་པ་དེ་རྣམས་སུ་འཛིན་པ་དང༌། དེ་རྣམས་ཀྱི་ཁྱབ་པའི་ཆོས་ཅན་ཀུན་རྫོབ་ཐམས་ཅད་རང་སྟོང་ཡིན་པ་ལ་དགོངས་ནས་དེ་སྐད་གསུངས་པ་སྟེ། གཟུགས་སོགས་ཆོས་ཐམས་ཅད་ལ་ཚན་པ་གསུམ་དུ་གསུངས་པ་ལས་རང་སྟོང་དུ་གསུངས་པ་རྣམས་ཀུན་བརྟགས་གཞན་དབང་གི་གཟུགས་སོགས་ལ་དགོངས་པའི་ཕྱིར་རོ། །དེ་བཞིན་དུ་ཆོས་ཀྱི་དབྱིངས་མེད་པའི་ཕྱིར་བྱང་ཆུབ་སེམས་དཔའ་སྔོན་གྱི་མཐར་མི་དམིགས་སོ། །དེ་བཞིན་ཉིད་དང་ཡང་དག་པའི་མཐའ་དང་བསམ་གྱིས་མི་ཁྱབ་པའི་དབྱིངས་མེད་པའི་ཕྱིར་བྱང་ཆུབ་སེམས་དཔའ་སྔོན་གྱི་མཐར་མི་དམིགས་སོ་ཞེས་གསུངས་པ་གང་ཡིན་པ་དེ་ཡང་སྔ་མ་བཞིན་དུ་དྲང་དོན་དགོངས་པ་ཅན་ཡིན་ཏེ། ཆོས་དབྱིངས་དེ་བཞིན་ཉིད་མེད་པ་མ་ཡིན་ཡང༌། དེ་ལ་གློ་བུར་བའི་ཆོས་རྣམས་དབྱེར་མེད་དུ་མེད་པ་ལ་དགོངས་ནས་དེ་སྐད་གསུངས་ཏེ། དེ་དང་དེར་འདུ་ཤེས་པ་དང་རྣམ་པར་རྟོག་པ་ཞི་བར་བྱ་བའི་དོན་དུའོ། །དེ་བཞིན་དུ་ཆོས་ཀྱི་དབྱིངས་ངོ་བོ་ཉིད་མེད་པའི་ཕྱིར་བྱང་ཆུབ་སེམས་དཔའ་སྔོན་གྱི་མཐར་མི་དམིགས་སོ། །དེ་བཞིན་ཉིད་དང་ཡང་དག་པའི་མཐའ་དང་བསམ་གྱིས་མི་ཁྱབ་པའི་དབྱིངས་ངོ་བོ་ཉིད་མེད་པའི་ཕྱིར། བྱང་ཆུབ་སེམས་དཔའ་སྔོན་གྱི་མཐར་མི་དམིགས་སོ་ཞེས་གསུངས་པ་ཡང༌། ཆོས་དབྱིངས་དེ་བཞིན་ཉིད་རང་གི་ངོ་བོ་མེད་པ་ལ་དགོངས་པ་མ་ཡིན་གྱི་གཞན་གློ་བུར་བའི་ཆོས་རྣམས་ཀྱི་ངོ་བོ་ཉིད་མེད་པ་ལ་དགོངས་ནས་དེ་སྐད་གསུངས་ཏེ། འདིར་ཡང་དགོས་པ་ནི་སྔ་མ་བཞིན་ནོ། །དེ་དག་ངེས་དོན་ཡིན་པ་ལ་གནོད་བྱེད་ནི། རྒྱལ་བའི་ཡུམ་ཉིད་ལས་ཀྱང༌། དེ་བཞིན་གཤེགས་པ་རྣམས་བྱུང་ཡང་རུང་དེ་བཞིན་གཤེགས་པ་རྣམས་མ་བྱུང་ཡང་རུང་སྟེ། ཆོས་དེ་དག་གི་དེ་བཞིན་ཉིད་དང༌། མ་ནོར་བ་དེ་བཞིན་ཉིད་དང་གཞན་མ་ཡིན་པ་དེ་བཞིན་ཉིད་དང༌། ཆོས་ཉིད་དང་ཆོས་ཀྱི་དབྱིངས་དང་ཆོས་ཀྱི་གནས་ཉིད་དང་ཆོས་སྐྱོན་མེད་པ་ཉིད་དང་ཡང་དག་པའི་མཐའ་དང་བསམ་གྱིས་མི་ཁྱབ་པའི་དབྱིངས་ནི་དེ་བཞིན་དུ་གནས་ཏེ་དེ་ལ་བདག་ཀྱང་མེད། སེམས་ཅན་དང་སྲོག་དང་འགྲོ་བ་དང་གསོ་བ་དང་སྐྱེས་བུ་དང་གང་ཟག་དང་ཤེད་ཅན་དང་ཤེད་བདག་དང་བྱེད་པ་པོ་དང་ཚོར་བ་པོ་དང་ཤེས་པ་པོ་དང་མཐོང་བ་པོ་ཡང་མེད་ན། དེ་ལ་གཟུགས་ལྟ་ག་ལ་ཡོད་ཅེས་པ་ནས། རྒ་ཤའི་བར་དུ་ལྟ་ག་ལ་ཡོད། རྟེན་ཅིང་འབྲེལ་བར་འབྱུང་བའི་ཆོས་རྣམས་ལྟ་ག་ལ་ཡོད་དེ། ཆོས་དེ་དག་མེད་ན་འགྲོ་བ་ལྔའི་འཁོར་བ་གང་ནས་སེམས་ཅན་རྣམས་དགྲོལ་བར་བྱ་བ་དེ་ལྟ་བུ་དག་ལྟ་ག་ལ་ཡོད། ཅེས་པ་དང༌། དཀོན་མཆོག་བརྩེགས་པར་བྱང་ཆུབ་སེམས་དཔའི་སྡེ་སྣོད་དུ་ཡང༌། གཞན་ཡང་ཐམས་ཅད་དུ་སོང་བའི་སྟོང་བ་ཉིད་ནི་ཡོད་དོ། །འདི་ན་བདག་དང་སེམས་ཅན་དང་སྲོག་དང་སྐྱེས་བུ་དང་གང་ཟག་གོ་ཞེས་བྱ་བ་དེ་ནི་མེད་དོ། །ཞེས་གསུངས་པའོ། །འདིས་སྟོང་གཞི་དེ་བཞིན་ཉིད་ནི་ནམ་ཡང་མེད་པ་མ་ཡིན་པ་དང་དེ་ལ་ཀུན་བརྟགས་གཞན་དབང་གི་ཆོས་རྣམས་གདོད་ནས་མེད་པའི་ཕྱིར་དེ་རྣམས་ཀྱིས་སྟོང་བར་བསྟན་ཏེ། དེས་ན་གཞན་སྟོང་ངོ༌། །ཚུལ་འདིས་ནི། ཡུམ་ཉིད་ལས། དེ་ལ་གཞན་གྱི་དངོས་པོ་སྟོང་བ་ཉིད་གང་ཞེ་ན། དེ་བཞིན་གཤེགས་པ་རྣམས་བྱུང་ཡང་རུང་དེ་བཞིན་གཤེགས་རྣམས་མ་བྱུང་ཡང་རུང་སྟེ་ཆོས་ཀྱི་གནས་ཉིད་དང་ཆོས་ཉིད་དང་ཆོས་ཀྱི་དབྱིངས་ཉིད་དང་ཆོས་སྐྱོན་མེད་པ་ཉིད་དང་དེ་བཞིན་ཉིད་དང་མ་ནོར་བ་དེ་བཞིན་ཉིད་དང་གཞན་མ་ཡིན་པ་དེ་བཞིན་ཉིད་དང་ཡང་དག་པའི་མཐའ་ནི་དེ་བཞིན་དུ་གནས་པ་སྟེ། དེ་ལྟར་ཆོས་དེ་དག་གི་གཞན་གྱི་དངོས་པོ་སྟོང་པ་གང་ཡིན་པ་དེ་ནི་གཞན་གྱི་དངོས་པོ་སྟོང་པ་ཉིད་ཅེས་བྱ། ཞེས་དང༌། དེའི་འགྲེལ་བར་ཡང༌། དེ་དག་ལ་ཕུང་པོ་ལ་སོགས་པ་ཆོས་གཞན་རྣམས་ཀྱི་དངོས་པོ་མེད་པ་དེ་ཉིད་གཞན་གྱི་དངོས་པོ་སྟོང་པ་ཉིད་ཅེས་བྱའོ་ཞེས་གསུངས་པ་ཡང་ལེགས་པར་བཤད་པ་ཡིན་ཏེ། དེ་ལྟར་ཆོས་ཉིད་དེ་བཞིན་ཉིད་ཀྱི་སྟོང་ལུགས་ནི་རང་གིས་མི་སྟོང་ལ་ཆོས་གཞན་གྱིས་སྟོང་པའི་གཞིར་གྱུར་པའོ། །འདིར་ཆོས་ཀྱི་གནས་ཉིད་ལ་སོགས་པ་རྣམ་གྲངས་མང་པོ་ཅན་ཡང་དག་པའི་མཐའ་ནི་སངས་རྒྱས་གཟུགས་ཀྱི་སྐུ་འཇིག་རྟེན་ཏུ་བྱོན་རུང་མ་བྱོན་རུང༌། གང་ཟག་རྣམས་ཀྱིས་རྟོགས་རུང་མ་རྟོགས་རུང་མཐོང་རུང་མ་མཐོང་རུང་ནམ་ཡང་གཞོམ་དུ་མེད་ཅིང་སྤང་དུ་མི་རུང་བར་དེ་བཞིན་ཉིད་དུ་འགྱུར་བ་མེད་ཅིང་སྔ་ཕྱི་ཁྱད་པར་མེད་པར་རྟག་ཏུ་ཆ་མེད་ཀུན་འགྲོ་ཀུན་ཁྱབ་ཏུ་བཞུགས་པ་སྟེ་དེ་ནི་རང་གི་ངོ་བོས་མི་སྟོང་བའི་དོན་ཡིན་ནོ། །དེ་ལ་གཞན་གྱི་དངོས་པོ་རྣམས་ཀྱིས་སྟོང་པ་ནི། བདག་དང་སེམས་ཅན་དང་སྲོག་དང་འགྲོ་བ་དང་གསོ་བ་དང་སྐྱེས་བུ་ལ་སོགས་པ་ཀུན་བརྟགས་ཀྱི་ཆོས་རྣམས་ཀྱིས་སྟོང་ཞིང་གཞན་དབང་གི་གཟུགས་ལ་སོགས་ཀུན་རྫོབ་ཀྱི་ཕུང་པོ་དང་ཁམས་དང་སྐྱེ་མཆེད་དང་རྟེན་ཅིང་འབྲེལ་བར་འབྱུང་བའི་ཆོས་རྣམས་དང༌། འགྲོ་བ་ལྔའི་འཁོར་བར་འཁོར་བའི་སེམས་ཅན་རྣམས་ཀྱིས་ཀྱང་གདོད་ནས་སྟོང་པ་ནི་གཞན་གྱི་དངོས་པོ་རྣམས་ཀྱིས་སྟོང་པའི་དོན་ཡིན་ལ། གང་ཞིག་གང་ན་མེད་པ་དེ་དེས་སྟོང་པ་དང་སྟོང་པའི་ལྷག་མའམ་གཞི་གང་ཡིན་པ་དེ་ནམ་ཡང་ཡོད་པའི་དོན་ཡང་དེ་ཡིན་ནོ། །ཚུལ་འདི་ནི། ཡུམ་ཉིད་ལས། ཆོས་ཀྱི་དབྱིངས་སྟོང་པ་ཉིད་ཀྱི་ཕྱིར་བྱང་ཆུབ་སེམས་དཔའ་སྔོན་གྱི་མཐར་མི་དམིགས་སོ། །དེ་བཞིན་ཉིད་དང༌། ཡང་དག་པའི་མཐའ་དང༌། བསམ་གྱི་མི་ཁྱབ་པའི་དབྱིངས་སྟོང་པ་ཉིད་ཀྱི་ཕྱིར་བྱང་ཆུབ་སེམས་དཔའ་སྔོན་ཀྱི་མཐར་མི་དམིགས་སོ། །ཞེས་གསུངས་པའི་སྟོང་ཚུལ་ཡང་ལེགས་པར་བཤད་པ་ཡིན་ནོ། །དེ་བཞིན་དུ་ཆོས་ཀྱི་དབྱིངས་དབེན་པའི་ཕྱིར་བྱང་ཆུབ་སེམས་དཔའ་སྔོན་གྱི་མཐར་མི་དམིགས་སོ། །དེ་བཞིན་ཉིད་དང་ཡང་དག་པའི་མཐའ་དང་བསམ་གྱིས་མི་ཁྱབ་པའི་དབྱིངས་དབེན་པའི་ཕྱིར་བྱང་ཆུབ་སེམས་དཔའ་སྔོན་གྱི་མཐར་མི་དམིགས་སོ་ཞེས་གསུངས་པ་ལ་ཡང༌། རང་གིས་དབེན་པ་མ་ཡིན་ཡང་གཞན་གྱིས་དབེན་པའི་ཚུལ་ཁོང་དུ་ཆུད་པར་བྱ་ཞིང༌། མ་གྲུབ་པ་དང་དག་པ་དང་རྣམ་པར་དག་པ་དང་ཡོངས་སུ་དག་པ་དང་འགག་པ་དང་འགོག་པ་དང་ཟད་པ་དང་བྲལ་བ་དང་རྣམ་པར་བྲལ་བ་དང་རྣམ་པར་བྱང་བ་དང་སྤངས་པ་ཞེས་པ་ལ་སོགས་པའི་སྐབས་མང་པོར་ཡང་ལེགས་པར་བཤད་པའི་མན་ངག་གི་གནད་ཟབ་མོ་ཐུན་མོང་མ་ཡིན་པ་འདི་ཡང་དང་ཡང་དུ་དྲན་པར་བྱས་ནས་རང་གི་དངོས་པོ་སྟོང་པ་ཉིད་དང༌། གཞན་གྱི་དངོས་པོ་སྟོང་པ་ཉིད་ཀྱི་དོན་དང༌། སྟོང་པའི་སྟོང་པ་ཉིད་དང་མི་སྟོང་པའི་སྟོང་པ་ཉིད་ཀྱི་དོན་དང༌། དངོས་པོ་མེད་པ་སྟོང་པ་ཉིད་དང༌། དངོས་པོ་མེད་པའི་ངོ་བོ་ཉིད་སྟོང་བ་ཉིད་ཀྱི་དོན། དགག་བྱའི་ཆོས་ཀྱིས་སྟོང་ཙམ་དང༌། སྟོང་པའི་གཞི་ཆོས་ཉིད་དེ་བཞིན་ཉིད་ལ་སོགས་པ་རྣམས་གྲངས་མང་པོ་ཅན་གྱི་སྟོང་པ་ཉིད་ལེགས་པར་ཁོང་དུ་ཆུད་པར་བྱའོ། །དེ་བཞིན་དུ་ཐམས་ཅད་ཤེས་པ་ཉིད་ནི་ཐམས་ཅད་ཤེས་པ་ཉིད་ཀྱིས་སྟོང༌། ལམ་གྱི་རྣམ་པར་ཤེས་པ་ཉིད་ནི་ལམ་གྱི་རྣམ་པར་ཤེས་པ་ཉིད་ཀྱིས་སྟོང༌། རྣམ་པ་ཐམས་ཅད་མཁྱེན་པ་ཉིད་ནི་རྣམ་པ་ཐམས་ཅད་མཁྱེན་པ་ཉིད་ཀྱིས་སྟོང༌། །ཞེས་དང༌། དེ་བཞིན་གཤེགས་པའི་སྟོབས་བཅུ་དང༌། མི་འཇིགས་པ་བཞི་དང་སོ་སོར་ཡང་དག་པར་རིག་པ་བཞི་དང་སངས་རྒྱས་ཀྱི་ཆོས་མ་འདྲེས་པ་བཅོ་བརྒྱད་ཤིན་ཏུ་མེད་ཅིང་མི་དམིགས་ན་དེ་མངོན་པར་འགྲུབ་པར་འགྱུར་བ་ལྟ་ག་ལ་ཡོད། ཅེས་དང༌། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཤིན་ཏུ་མེད་ཅིང་མི་དམིགས་ན་དེ་མངོན་པར་འགྲུབ་པར་འགྱུར་བ་ལྟ་ག་ལ་ཡོད། ཅེས་དང༌། དེ་བཞིན་གཤེགས་པའི་སྟོབས་རྣམས་དང་མི་འཇིགས་པ་རྣམས་དང་སོ་སོར་ཡང་དག་པར་རིག་པ་རྣམས་དང༌། སངས་རྒྱས་ཀྱི་ཆོས་མ་འདྲེས་པ་རྣམས་ནི་སངས་རྒྱས་ཀྱི་ཆོས་མ་འདྲེས་པ་རྣམས་ཀྱིས་སྟོང་སྟེ། དེ་ཅིའི་ཕྱིར་ཞེ་ན། སྟོང་བ་ཉིད་ལ་འཕགས་པའི་བདེན་པ་དང༌། སངས་རྒྱས་ཀྱི་ཆོས་མ་འདྲེས་པ་རྣམས་ཀྱི་བར་དུ་མེད། བྱང་ཆུབ་སེམས་དཔའ་མེད་དོ། །ཞེས་སོགས་དང༌། ཐམས་ཅད་མཁྱེན་པ་མེད་པའི་ཕྱིར་བྱང་ཆུབ་སེམས་དཔའ་སྔོན་གྱི་མཐར་མི་དམིགས་སོ། །ཐམས་ཅད་མཁྱེན་པ་སྟོང་པ་ཉིད་དང་དབེན་པ་དང་ངོ་བོ་ཉིད་མེད་པའི་ཕྱིར་བྱང་ཆུབ་སེམས་དཔའ་སྔོན་གྱི་མཐར་མི་དམིགས་སོ་ཞེས་སོགས་རྣམས་ལ་ཡང་རང་སྟོང་དངོས་པོ་མེད་པ་སྟོང་པ་ཉིད་དང༌། གཞན་སྟོང་དངོས་པོ་མེད་པའི་ངོ་བོ་ཉིད་སྟོང་པ་ཉིད་ཀྱི་ཚུལ་ལེགས་པར་རྟོགས་དགོས་སོ། །དེ་ལ་ཐམས་ཅད་ཤེས་པ་ཉིད་དང༌། ལམ་གྱི་རྣམ་པ་ཤེས་པ་ཉིད་དང༌། རྣམ་པ་ཐམས་ཅད་མཁྱེན་པ་ཉིད་དང་སྟོབས་དང་མི་འཇིགས་པ་དང་སོ་སོར་ཡང་དག་པར་རིག་པ་དང༌། སངས་རྒྱས་ཀྱི་ཆོས་མ་འདྲེས་པ་རྣམས་དང་སངས་རྒྱས་དང་བྱང་ཆུབ་དང་བྱང་ཆུབ་སེམས་དཔའ་ལ་སོགས་པ་རྣམས་ལ་བདེན་པ་གཉིས་ཀྱི་རྣམ་དབྱེ་ཤེས་ན་ཐུབ་པའི་བཀའ་ལ་མི་རྨོངས་པར་འགྱུར་རོ། །དེ་ལ་དོན་དམ་པའི་སྟོབས་བཅུ་ལ་སོགས་པ་ནི་སྟོང་གཞི་ཆོས་ཉིད་འདུས་མ་བྱས་ཀྱི་དབྱིངས་ཉིད་ཡིན་པའི་ཕྱིར་མཐར་ཐུག་འགོག་པའི་བདེན་པའོ། །ཀུན་རྫོབ་ཀྱི་སྟོབས་བཅུ་ལ་སོགས་པ་ནི་འདུས་བྱས་མི་རྟག་པ་ལམ་གྱི་བདེན་པར་གཏོགས་པ་ཡིན་པའི་ཕྱིར་རང་སྟོང་ངོ་ཞེས་པ་དོན་ལ་གནས་པའོ། །དེ་ལྟ་བས་ན་རང་སྟོང་དུ་གནས་པ་རྣམས་རང་སྟོང་དུ་སྟོན་པ་ལ་ནི་འགལ་བ་ཅུང་ཟད་ཀྱང་མེད་ཅིང་རང་སྟོང་མ་ཡིན་པ་ལ་རང་སྟོང་དུ་གསུངས་པ་ཇི་སྙེད་ཡོད་པ་རྣམས་ནི་སྔར་བསྟན་པ་བཞིན་དུ་དྲང་དོན་དགོངས་པ་ཅན་ཉིད་དུ་རིག་པར་བྱའོ། །འདི་ལ་དགོངས་ནས་འཕགས་པ་རྔ་བོ་ཆེ་ཆེན་པོའི་མདོར་ཡང༌། བཅོན་ལྡན་འདས་ཐེག་པ་ཆེན་པོ་ལ་ཡང་སྟོང་པ་ཉིད་ཀྱི་དོན་སྟོན་པའི་མདོ་མང་དུ་མཆིས་ལགས་སོ། །བཅོན་ལྡན་འདས་ཀྱིས་བཀའ་སྩལ་པ་སྟོང་པ་ཉིད་སྟོན་པ་གང་ཅི་ཡང་རུང་བ་དེ་ཐམས་ཅད་ནི་དགོངས་པ་ཅན་དུ་རིག་པར་བྱ་ལ། བླ་ན་མེད་པའི་མདོ་འདི་ལྟ་བུ་འདི་དག་ནི་དགོངས་པ་ཅན་མ་ཡིན་པར་རིག་པར་བྱའོ། །ཞེས་པ་ལ་སོགས་པ་གསུངསསོ། །དེ་ལ་འདུས་བྱས་མི་རྟག་པར་གཏོགས་པ་ནི། ཡུམ་ཆེན་མོར། རབ་འབྱོར་འདུས་བྱས་ཀྱིས་ཆོས་ཞེས་བྱ་བ་ནི་འདོད་པའི་ཁམས་དང་གཟུགས་ཀྱི་ཁམས་དང་གཟུགས་མེད་པའི་ཁམས་དང༌། གཞན་ཡང་དེ་མ་ཡིན་པའི་འདུས་བྱས་ཀྱི་ཁམས་སུ་གཏོགས་པའི་ཆོས་རྣམས་དང་དྲན་པ་ཉེ་བར་བཞག་པ་བཞི་དང་ཡང་དག་པར་སྤོང་བ་བཞི་དང་རྫུ་འཕྲུལ་གྱི་རྐང་བ་བཞི་དང་དབང་པོ་ལྔ་དང༌། སྟོབས་ལྔ་དང༌། བྱང་ཆུབ་ཀྱི་ཡན་ལག་བདུན་དང༌། འཕགས་པའི་ལམ་ཡན་ལག་བརྒྱད་དང༌། འཕགས་པའི་བདེན་པ་བཞི་དང༌། བསམ་གཏན་བཞི་དང༌། ཚད་མེད་པ་བཞི་དང༌། གཟུགས་མེད་པའི་སྙོམས་པར་འཇུག་པ་བཞི་དང༌། རྣམ་པར་ཐར་པ་བརྒྱད་དང༌། མཐར་གྱི་གནས་པའི་སྙོམས་པར་འཇུག་པ་དགུ་དང༌། སྟོང་པ་ཉིད་དང༌། མཚན་མ་མེད་པ་དང་སྨོན་པ་མེད་པ་དང༌། མངོན་པར་ཤེས་པ་ལྔ་དང༌། ཕ་རོལ་ཏུ་ཕྱིན་པ་དྲུག་དང༌། སྟོང་པ་ཉིད་ཐམས་ཅད་དང་ཏིང་ངེ་འཛིན་ཐམས་ཅད་དང༌། གཟུངས་ཀྱི་སྒོ་ཐམས་ཅད་དང༌། དེ་བཞིན་གཤེགས་པའི་སྟོབས་བཅུ་དང༌། མི་འཇིགས་པ་བཞི་དང༌། སོ་སོར་ཡང་དག་པར་རིག་པ་བཞི་དང༌། བྱམས་པ་ཆེན་པོ་དང༌། སྙིང་རྗེ་ཆེན་པོ་དང༌། སངས་རྒྱས་ཀྱི་ཆོས་མ་འདྲེས་པ་བཅོ་བརྒྱད་དག་སྟེ། དེ་དག་ནི་འདུས་བྱས་ཀྱི་ཆོས་ཞེས་བྱའོ་ཞེས་གསུངས་ཏེ། འདིར་འདུས་བྱས་ཀྱི་དྲན་པ་ཉེར་བཞག་ནས་སངས་རྒྱས་ཀྱི་ཆོས་མ་འདྲེས་པའི་བར་ནི་ལམ་གྱི་བདེན་པར་གཏོགས་པའི་ཕྱིར་རང་སྟོང་ངོ༌། །དེ་བཞིན་དུ་དཀོན་མཆོག་བརྩེགས་པའི་ཡབ་སྲས་མཇལ་བའི་མདོར་ཡང༌། སངས་རྒྱས་བརྡའ་ཙམ་ཉིད་ལགས་ཏེ། །དེ་བཞིན་སྟོབས་དང་ཡེ་ཤེས་དང༌། །མི་འཇིགས་བཞི་ཡང་དེ་བཞིན་དུ། །ཀུན་རྫོབ་ཅེས་ནི་ཐུབ་པས་གསུངས། །ཞེས་དང༌། ཡུམ་ལས་ཀྱང༌། ཤེས་རབ་ཀྱི་ཕ་རོལ་ཏུ་ཕྱིན་པ་མི་རྟག་པ་སྟེ། གང་དང་ཡང་བྲལ་བས་མ་ཡིན་ནོ། །ཞེས་པ་ནས། སངས་རྒྱས་ཀྱི་ཆོས་མ་འདྲེས་པ་བཅོ་བརྒྱད་ཀྱི་བར་དུུ་མི་རྟག་པ་སྟེ་གང་དང་ཡང་བྲལ་བའི་མ་ཡིན་ནོ། །ཞེས་སོགས་དང༌། སྦྱིན་པའི་ཕར་ཕྱིན་ནས། སངས་རྒྱས་ཀྱི་ཆོས་མ་འདྲེས་པ་བཅོ་བརྒྱད་ཀྱི་བར་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་རྫོགས་པར་འཚང་མི་རྒྱའོ། །རབ་འབྱོར་དེ་ཅིའི་ཕྱིར་ཞེ་ན། འདི་ལྟར་ཆོས་དེ་དག་ནི་ཐམས་ཅད་ཀྱང་འདུས་བྱས་པ་མངོན་པར་འདུས་བྱས་པ་སྟེ་འདུས་བྱས་པ་དང་མངོན་པར་འདུས་བྱས་པའི་ཆོས་ཀྱི་ནི་རྣམ་པ་ཐམས་ཅད་མཁྱེན་པ་ཉིད་ཐོབ་པར་མི་ནུས་སོ། །རབ་འབྱོར་འོན་ཀྱང་ཆོས་དེ་དག་ནི་ཐམས་ཅད་ཀྱང་ལམ་སྒྲུབ་པ་དང༌། ལམ་བསྐྱེད་པའི་རྒྱུར་འགྱུར་བ་སྟེ། འབྲས་བུ་ཐོབ་པའི་ཕྱིར་ནི་མ་ཡིན་ནོ། །ཞེས་གསུངས་སོ། །འདི་ལ་དོན་དམ་འདུས་མ་བྱས་འགོག་པའི་བདེན་པས་བསྡུས་པའི་སྟོབས་བཅུ་ལ་སོགས་པ་ནི། བཅོམ་ལྡན་འདས་འཇིག་རྟེན་དབང་ཕྱུག་གི་ཞལ་སྔ་ནས། ཕྱག་རྒྱ་ཆེན་པོ་ནི་རང་བཞིན་མེད་པའི་ཆོས་ཐམས་ཅད་ཀྱི་མཚན་ཉིད་རྣམ་པ་ཐམས་ཅད་ཀྱི་མཆོག་དང་ལྡན་པ། ཤེས་རབ་ཀྱི་ཕ་རོལ་ཏུ་ཕྱིན་མ་སངས་རྒྱས་ཐམས་ཅད་བསྐྱེད་པར་མཛད་པའོ། །ཆོས་འབྱུང་གི་སྒྲས་ཀྱང་དེ་བརྗོད་དེ། ཆོས་འབྱུང་གང་ལས་རང་བཞིན་མེད་པའི་ཆོས་ཐམས་ཅད་འབྱུང་བར་འགྱུར་བའོ། །རང་བཞིན་མེད་པའི་ཆོས་རྣམས་ནི་སྟོབས་བཅུ་དང་མི་འཇིགས་པ་ལ་སོགས་པ་ཆོས་ཀྱི་ཕུང་པོ་བརྒྱད་ཁྲི་བཞི་སྟོང་རྣམས་སོ། །དེ་རྣམས་འབྱུང་བར་འགྱུར་བ་ནི་ཆོས་འབྱུང་སྟེ་སངས་རྒྱས་ཀྱི་ཞིང་ངོ། །སངས་རྒྱས་དང་བྱང་ཆུབ་སེམས་དཔའ་རྣམས་ཀྱི་གནས་ཏེ་བདེ་བའི་གནས་དང་སྐྱེ་བའི་གནས་སོ། །གང་ལས་ཁྲག་དང་གཅི་བ་དང་ཁུ་བ་རྣམས་འབྱུང་བ་དེ་ནི་ཆོས་འབྱུང་མ་ཡིན་ནོ། །འདིར་འཁོར་བ་པ་རྣམས་ཀྱི་ཆགས་པ་དང་ཆགས་བྲལ་གྱི་ཞིང་ནི་དེ་བཞིན་གཤེགས་པ་རྣམས་ཀྱི་མ་ཡིན་ནོ། །དེའི་ཕྱིར་ཆོས་འབྱུང་ནི་ཆོས་ཀྱི་དབྱིངས་ཀྱི་རང་བཞིན་ཅན་སྣ་ཚོགས་ཡུམ་བཅོམ་ལྡན་འདས་དུས་ཀྱི་འཁོར་ལོས་འཁྱུད་པ་དུས་ཐམས་ཅད་དུ་སྒྲུབ་པ་ཐམས་ཅད་དང་བྲལ་བའོ་ཞེས་སོགས་དང༌། རྒྱལ་བ་བྱམས་པའི་ཞལ་སྔ་ནས་ཀྱང༌། དང་པོའི་སྐུ་ནི་སྟོབས་ལ་སོགས། །བྲལ་བའི་ཡོན་ཏན་རྣམས་དང་ལྡན། །ཞེས་ཆོས་སྐུ་འདུས་མ་བྱས་ཀྱི་ཡོན་ཏན་ཐམས་ཅད་གློ་བུར་དྲི་མ་བྲལ་བ་ཙམ་གྱིས་ཐོབ་པའི་ཕྱིར་བྲལ་བའི་ཡོན་ཏན་ཏེ་འདིར་སུམ་ཅུ་རྩ་གཉིས་ནི་གཙོ་བོ་བསྡུས་པའོ། །རྣམ་པའི་རབ་ཏུ་དབྱེ་བ་རྒྱས་པར་ནི་བགྲང་བ་ལས་འདས་ཤིང་མཐའ་ཡས་པར་གསུངས་ཏེ། འོད་གསལ་བྱས་མིན་དབྱེར་མེད་པར། །འཇུག་ཅན་གང་གཱའི་ཀླུང་གི་ནི། །རྡུལ་ལས་འདས་པའི་སངས་རྒྱས་ཀྱི། །ཆོས་རྣམས་ཀུན་དང་ལྡན་པ་ཉིད། །ཅེས་དང༌། རྣམ་དབྱེ་མེད་པའི་མཚན་ཉིད་ཅན། བླ་མེད་ཆོས་ཀྱི་སྟོང་མ་ཡིན། །ཞེས་དང། དེའི་འགྲེལ་བར་ཡང༌། དེས་ན་དེ་བཞིན་གཤེགས་པའི་སྙིང་པོ་ནི་རྣམ་པར་དབྱེར་ཡོད་པ། བྲལ་ཤེས་པ། ཉོན་མོངས་པའི་སྦུབས་ཐམས་ཅད་ཀྱིས་ནི་སྟོང་པ་ཡིན་ལ། རྣམ་པར་དབྱེར་མེད་པ་བྲལ་མི་ཤེས་པ། བསམ་གྱིས་མི་ཁྱབ་པའི་སངས་རྒྱས་ཀྱི་ཆོས་གང་གཱའི་ཀླུང་གི་བྱེ་མ་སྙེད་ལས་འདས་པའི་ནི་མི་སྟོང་ངོ༌། །ཞེས་དཔལ་ཕྲེང་གི་མདོ་དྲངས་ཤིང་རྣམ་པར་དབྱེ་བ་མེད་ཆོས་ཕྱིར་ཞེས་པའི་འགྲེལ་བར་ཡང༌། དེ་ལ་དྲི་མ་མེད་པའི་སངས་རྒྱས་ཀྱི་ཡོན་ཏན་ནི་གཅིག་ཏུ་ཀུན་ནས་ཉོན་མོངས་པའི་སོ་སོ་སྐྱེ་བོའི་ས་ལ་ཡང་རྣམ་པར་དབྱེར་མེད་པར། ཆོས་ཉིད་སྔ་ཕྱི་ཁྱད་པར་མེད་པར་ཡོད་པའི་ཕྱིར་གནས་འདི་བསམ་གྱིས་མི་ཁྱབ་སྟེ། ཞེས་དབུ་མ་པ་ཆེན་པོ་འཕགས་པ་ཐོགས་མེད་ཞབས་ཀྱི་ཞལ་སྔ་ནས་གསུངས་སོ། །དེ་ལྟར་ཆོས་འབྱུང་ཕྱག་རྒྱ་ཆེན་མོ་ཤེས་རབ་ཀྱི་ཕ་རོལ་ཏུ་ཕྱིན་མ་སྣ་ཚོགས་ཡུམ། ཆོས་དབྱིངས་དེ་བཞིན་ཉིད་དང་དབྱེར་མེད་ཅིང་འབྲལ་མི་ཤེས་ལ། རང་བཞིན་མེད་པའི་སྟོབས་བཅུ་ལ་སོགས་པ་དོན་དམ་པའི་ཆོས་ཀྱི་ཕུང་པོ་བརྒྱད་ཁྲི་བཞི་སྟོང་ངམ་བསམ་གྱིས་མི་ཁྱབ་པའི་སངས་རྒྱས་ཀྱི་ཆོསགང་གཱའི་ཀླུང་གི་བྱེ་མ་སྙེད་ལས་འདས་པ་ནི་ཆོས་ཉིད་འདུས་མ་བྱས་ཡང་དག་པའི་མཐའི་ཡོན་ཏན་ཡིན་པའི་ཕྱིར། རང་སྟོང་མ་ཡིན་གྱི། སྟོང་གཞི་དངོས་པོ་མེད་པའི་ངོ་བོ་ཉིད་སྟོང་པ་ཉིད་དང་གཞན་གྱི་དངོས་པོ་སྟོང་པ་ཉིད་དང་མི་སྟོང་བའི་སྟོང་བ་ཉིད་དོ། །ཡུམ་ཆེན་མོར་ཡང༌། རབ་འབྱོར་འདུས་མ་བྱས་ཀྱི་ཆོས་ཞེས་བྱ་བ་ནི། གང་ལ་སྐྱེ་བ་མེད་ཅིང་འཇིག་པ་མེད་པ་དང༌། གནས་པ་ལས་གཞན་དུ་འགྱུར་བ་མེད་པ་སྟེ་འདོད་ཆགས་ཟད་པ། ཞེ་སྡང་ཟད་པ། གཏི་མུག་ཟད་པ། དེ་བཞིན་ཉིད་མ་ནོར་བ་དེ་བཞིན་ཉིད། གཞན་མ་ཡིན་པ་དེ་བཞིན་ཉིད། ཆོས་ཉིད། ཆོས་ཀྱི་དབྱིངས་ཆོས་སྐྱོན་མེད་པ་ཉིད་བསམ་གྱིས་མི་ཁྱབ་པའི་དབྱིངས་ཡང་དག་པའི་མཐའ་སྟེ་རབ་འབྱོར་དེ་དག་ནི་འདུས་མ་བྱས་ཀྱི་ཆོས་ཞེས་བྱའོ། །ཞེས་དང་ཚེ་དང་ལྡན་པ་ཤཱ་ར་དྭ་ཏིའི་བུ་གཞན་ཡང་ཆོས་ཐམས་ཅད་ནི་དགེ་བ། ཆོས་ཐམས་ཅད་ནི་ཁ་ན་མ་ཐོ་བ་མེད་པ། ཆོས་ཐམས་ཅད་ནི་ཟག་པ་མེད་པ། ཆོས་ཐམས་ཅད་ནི་ཉོན་མོངས་པ་མེད་པ། ཆོས་ཐམས་ཅད་ནི་རྣམ་པར་བྱང་བ། ཆོས་ཐམས་ཅད་ནི་འཇིག་རྟེན་དཔེ་ལས་འདས་པ། ཆོས་ཐམས་ཅད་ནི་འདུས་མ་བྱས་པ་སྟེ། གང་དང་ཡང་བྲལ་བའི་མ་ཡིན་ནོ་ཞེས་པས། རང་བཞིན་གྱིས་འཇིག་རྟེན་ལས་འདས་ཤིང་རྣམ་པར་བྱང་བ། དོན་དམ་པའི་དགེ་བ། འདུས་མ་བྱས་པའི་ཡོན་ཏན་གྱི་ཆོས་གང་གཱའི་ཀླུང་གི་བྱེ་མ་སྙེད་ལས་འདས་པ་ཞེས་གང་གསུངས་པ་དེ་དག་ཁོང་དུ་ཆུད་པར་བྱའི་འདི་དག་ཀུན་རྫོབ་ཀྱི་ཆོས་ནི་མ་ཡིན་ནོ། །དེ་བཞིན་དུ་དཀོན་མཆོག་བརྩེགས་པར། སངས་རྒྱས་ཀྱི་ཡུལ་བསམ་གྱིས་མི་ཁྱབ་པའི་མདོར་ཡང༌། དགེ་སློང་དག་མ་སྐྱེས་པ་དང༌། མ་བྱུང་བ་དང༌། མ་བྱས་པ་དང༌། མངོན་པར་འདུས་མ་བྱས་པ་དང༌། མངོན་པར་འདུ་མི་བྱེད་པ་ནི་ཡོད་དེ། དགེ་སློང་དག །མ་སྐྱེས་པ་དང༌། མ་བྱུང་བ་དང༌། མ་བྱས་པ་དང༌། མངོན་པར་འདུས་མ་བྱས་པ་དང༌། མངོན་པར་འདུ་མི་བྱེད་པ་ནི་མེད་པ་མ་ཡིན་ནོ། །ཞེས་པ་ལ་སོགས་པའི་དོན་ཡང་སྔར་བཤད་པ་དེ་དག་ཉིད་ཀྱིས་ལེགས་པར་བཤད་པ་ཡིན་ནོ། །དེ་ལྟར་རང་བཞིན་མེད་པའི་སྟོབས་བཅུ་ལ་སོགས་པ་དོན་དམ་པའི་སངས་རྒྱས་ཀྱི་ཆོས་གང་གཱའི་ཀླུང་གི་བྱེ་མ་སྙེད་ལ་སོགས་པ་རང་བཞིན་གྱིས་ལྷུན་གྲུབ་ཏུ་ཚང་པའི་བདག་ཉིད་ཆོས་ཉིད་ཀྱི་གཟུགས་སོགས་ནི་གློ་བུར་དྲི་མའི་གཟུགས་སོགས་འགགས་པས་ཐོབ་པར་གསུངས་ཏེ། མྱ་ངན་འདས་ཆེན་དུ། བཅོམ་ལྡན་འདས་ཀྱི་ཚེ་དང་ལྡན་པ་ཀུན་ཤེས་ཀོའུ་དི་ནྱ་ལ་འདི་སྐད་ཅེས་བཀའ་བསྩལ་ཏོ། །གཟུགས་ནི་མི་རྟག་པ་སྟེ་གཟུགས་འགགས་པའི་རྐྱེན་གྱིས་རྣམ་པར་གྲོལ་བ་རྟག་ཏུ་གནས་པའི་གཟུགས་ཐོབ་པར་འགྱུར་རོ། །ཚོར་བ་དང་འདུ་ཤེས་དང་འདུ་བྱེད་དང་རྣམ་པར་ཤེས་པ་ཡང་མི་རྟག་པ་སྟེ་རྣམ་པར་ཤེས་པ་འགགས་་པའི་རྐྱེན་གྱིས་རྣམ་པར་གྲོལ་བ་རྟག་ཏུ་གནས་པའི་རྣམ་པར་ཤེས་པ་ཐོབ་པར་འགྱུར་རོ། །ཀོའུ་དི་ནྱ་གཟུགས་ནི་སྡུག་བསྔལ་བ་སྟེ། གཟུགས་འགགས་པའི་རྐྱེན་གྱིས་རྣམ་པར་གྲོལ་བའི་གཟུགས་བདེ་བ་ཐོབ་པར་འགྱུར་རོ། །ཚོར་བ་དང་འདུ་ཤེས་དང་འདུ་བྱེད་དང་རྣམ་པར་ཤེས་པའི་བར་དུ་ཡང་དེ་བཞིན་དུ་རྒྱས་པར་རིག་པར་བྱའོ། །ཀོའུ་དི་ནྱ་གཟུགས་ནི་སྟོང་བའོ། །སྟོང་བའི་གཟུགས་འགགས་པའི་རྐྱེན་གྱིས་སྟོང་བ་མ་ཡིན་པའི་གཟུགས་ཀྱི་རྣམ་པར་གྲོལ་བ་ཐོབ་པར་འགྱུར་ཏེ། ཚོར་བ་དང་འདུ་ཤེས་དང་འདུ་བྱེད་དང་རྣམ་པར་ཤེས་པའི་བར་དུ་ཡང་དེ་བཞིན་དུ་རྒྱས་པར་རིག་པར་བྱའོ། །ཀོའི་དི་ནྱ་གཟུགས་ནི་བདག་མེད་པའོ། །གཟུགས་འགགས་པའི་རྐྱེན་གྱིས་རྣམ་པར་གྲོལ་བའི་གཟུགས་ཡང་དག་པའི་བདག་ཐོབ་པར་འགྱུར་ཏེ་ཚོར་བ་དང་འདུ་ཤེས་དང་འདུ་བྱེད་དང་རྣམ་པར་ཤེས་པའི་བར་དུ་ཡང་དེ་བཞིན་དུ་རྒྱས་པར་རིག་པར་བྱའོ། །ཀོའུ་དི་ནྱ་གཟུགས་ནི་ཡོངས་སུ་མ་དག་པའོ། །གཟུགས་འགགས་པའི་རྐྱེན་གྱིས་རྣམ་པར་གྲོལ་བའི་གཟུགས་ཡོངས་སུ་དག་པ་ཐོབ་པར་འགྱུར་ཏེ་ཚོར་བ་དང་འདུ་ཤེས་དང་འདུ་བྱེད་དང་རྣམ་པར་ཤེས་པའི་བར་དུ་དེ་བཞིན་དུ་རྒྱས་པར་རིག་པར་བྱའོ། །ཀོའུ་དི་ནྱ་གཟུགས་ནི་སྐྱེ་བ་དང༌། རྒ་བ་དང༌། ན་བ་དང༌། འཆི་བའོ། །གཟུགས་འགགས་པའི་རྐྱེན་གྱིས་རྣམ་པར་གྲོལ་བའི་གཟུགས་སྐྱེ་བ་དང་རྒ་བ་དང་ན་བ་དང་འཆི་བ་མ་ཡིན་པ་འཐོབ་པར་འགྱུར་ཏེ། ཚོར་བ་དང་འདུ་ཤེས་དང་འདུ་བྱེད་དང་རྣམ་པར་ཤེས་པ་ཡང་དེ་བཞིན་དུ་རྒྱས་པར་རིག་པར་བྱའོ། །ཀོའུ་དི་ནྱ་གཟུགས་ནི་མ་རིག་པའོ། །གཟུགས་འགགས་པའི་རྐྱེན་གྱིས་རྣམ་པར་གྲོལ་བའི་གཟུགས་མ་རིག་པ་མ་ཡིན་པ་འཐོབ་པར་འགྱུར་ཏེ། ཚོར་བ་དང་འདུ་ཤེས་དང་འདུ་བྱེད་དང་རྣམ་པར་ཤེས་པ་ཡང་དེ་བཞིན་དུ་རྒྱས་པར་རིག་པར་བྱའོ། །ཀོའུ་དི་ནྱ་གཟུགས་ནི་སྐྱེ་བའི་རྒྱུར་འགྱུར་རོ། །གཟུགས་འགགས་པའི་རྐྱེན་གྱིས་རྣམ་པར་གྲོལ་བའི་གཟུགས་སྐྱེ་བ་མ་ཡིན་པ་ཐོབ་པར་འགྱུར་ཏེ། ཚོར་བ་དང་འདུ་ཤེས་དང་འདུ་བྱེད་དང་རྣམ་པར་ཤེས་པ་ཡང་དེ་བཞིན་དུ་རྒྱས་པར་རིག་པར་བྱའོ། །ཀོའུ་དི་ནྱ་གཟུགས་ནི་ཕྱིན་ཅི་ལོག་བཞིའི་རྒྱུར་འགྱུར་རོ། །གཟུགས་འགགས་པའི་རྐྱེན་གྱིས་རྣམ་པར་གྲོལ་བའི་གཟུགས་ཕྱིན་ཅི་ལོག་གི་རྒྱུ་མ་ཡིན་པ་འཐོབ་པར་གྱུར་ཏེ། ཚོར་བ་དང་འདུ་ཤེས་དང་འདུ་བྱེད་དང་རྣམ་པར་ཤེས་པའི་བར་དུ་ཡང་དེ་བཞིན་དུ་རྒྱས་པར་རིག་པར་བྱའོ། །ཀོའུ་དི་ནྱ་གཟུགས་ནི་མི་དགེ་བའི་ཆོས་ཚད་མེད་པའི་རྒྱུ་ཡིན་ནོ། །འདི་ལྟ་སྟེ་ཕོ་དང་མོ་ལ་སོགས་པའི་ལུས་དང་ཟས་ལ་འདོད་པ་དང༌། འདོད་ཆགས་དང་ཞེ་སྡང་དང་གཏི་མུག་དང་སེར་སྣ་དང་ཕྲག་དོག་དང་མི་དགེ་བའི་སེམས་དང་འཇུངས་བའི་སེམས་དང་བཅངས་བའི་ཟས་དང་རྣམ་པར་ཤེས་པའི་ཟས་དང་བསམ་པའི་ཟས་དང་རེག་པའི་ཟས་དང༌། སྒོ་ང་ལས་སྐྱེས་པ་དང་མངལ་ནས་སྐྱེས་པ་དང་དྲོད་གཤེར་ལས་སྐྱེས་པ་དང་བརྫུས་ཏེ་སྐྱེས་པ་དང༌། འདོད་པ་ལྔ་དང་སྒྲིབ་པ་ལྔ་ལ་སོགས་པའི་ཆོས་ནི་གཟུགས་ལས་གྱུར་ཏོ། །གཟུགས་འགགས་པའི་རྐྱེན་གྱིས་རྣམ་པར་གྲོལ་བའི་གཟུགས་ཉེས་པའི་སྐྱོན་ཚད་མེད་པ་དེ་སྙེད་མེད་པའི་ལུས་ཐོབ་པར་འགྱུར་ཏེ་ཚོར་བ་དང་འདུ་ཤེས་དང་འདུ་བྱེད་དང་རྣམ་པར་ཤེས་པའི་བར་དུ་ཡང་དེ་བཞིན་དུ་རྒྱས་པར་རིག་པར་བྱའོ། །ཀོའུ་དི་ནྱ་གཟུགས་ནི་འཆིང་བས་རྣམ་པར་བཅིངས་པའོ། །འཆིང་བའི་གཟུགས་འགགས་པའི་རྐྱེན་གྱིས་རྣམ་པར་གྲོལ་བའི་གཟུགས་བཅིངས་པ་མེད་པ་ཐོབ་པར་འགྱུར་ཏེ་ཚོར་བ་དང་འདུ་ཤེས་དང་འདུ་བྱེད་དང་རྣམ་པར་ཤེས་པའི་བར་དུ་ཡང་དེ་བཞིན་དུ་རྒྱས་པར་རིག་པར་བྱའོ། །ཀོའུ་དི་ནྱ་གཟུགས་ནི་རྒྱུན་མི་འཆད་པའི་རྒྱུ་ཡིན་ནོ། །རྒྱུན་གྱི་གཟུགས་འགགས་པའི་རྐྱེན་གྱིས་རྣམ་པར་གྲོལ་བའི་གཟུགས་རྒྱུན་མ་ཡིན་པ་ཐོབ་པར་འགྱུར་ཏེ། ཚོར་བ་དང་འདུ་ཤེས་དང་འདུ་བྱེད་དང་རྣམ་པར་ཤེས་པའི་བར་དུ་ཡང་དེ་བཞིན་དུ་རྒྱས་པར་རིག་པར་བྱའོ། །ཀོའུ་དི་ནྱ་གཟུགས་ནི་སྐྱབས་སུ་འགྲོ་བའི་རྒྱུ་མ་ཡིན་ནོ། །གཟུགས་འགགས་པའི་རྐྱེན་གྱིས་རྣམ་པར་གྲོལ་བའི་གཟུགས་སྐྱབས་སུ་འགྲོ་བ་ཐོབ་པར་འགྱུར་ཏེ། ཚོར་བ་དང་འདུ་ཤེས་དང་འདུ་བྱེད་དང་རྣམ་པར་ཤེས་པའི་བར་ཏུ་ཡང་དེ་བཞིན་དུ་རྒྱས་པར་རིག་པར་བྱའོ། །ཀོའུ་དི་ནྱ་གཟུགས་ནི་རྨ་ལྟ་བུའོ། །གཟུགས་འགགས་པའི་རྐྱེན་གྱིས་རྣམ་པར་གྲོལ་བའི་གཟུགས་རྨ་མེད་པ་ཐོབ་པར་འགྱུར་ཏེ། ཚོར་བ་དང་འདུ་ཤེས་དང་འདུ་བྱེད་དང་རྣམ་པར་ཤེས་པའི་བར་དུ་ཡང་དེ་བཞིན་དུ་རྒྱས་པར་རིག་པར་བྱའོ། །ཀོའུ་དི་ནྱ་གཟུགས་ནི་རབ་ཏུ་ཞི་བ་མ་ཡིན་ནོ། །གཟུགས་འགགས་པའི་རྐྱེན་གྱིས་ཡོངས་སུ་མྱ་ངན་ལས་འདས་པའི་གཟུགས་རབ་ཏུ་ཞི་བ་ཐོབ་པར་འགྱུར་ཏེ། ཚོར་བ་དང་འདུ་ཤེས་དང་འདུ་བྱེད་དང་རྣམ་པར་ཤེས་པའི་བར་དུ་ཡང་དེ་བཞིན་དུ་རྒྱས་པར་རིག་པར་བྱའོ། །ཀོའུ་དི་ནྱ་གང་ཟག་སུ་ཞིག་དེ་ལྟ་བུའི་ཚུལ་དུ་ཤེས་ན་དེ་ནི་དགེ་སྦྱོང་ཞེས་ཀྱང་བྱ་བྲམ་ཟེ་ཞེས་ཀྱང་བྱ། དེ་ནི་དགེ་སྦྱོང་གི་ཆོས་དང་བྲམ་ཟེའི་ཆོས་དང་ལྡན་པ་ཞེས་ཀྱང་བྱའོ། །ཀོའུ་དི་ནྱ་སངས་རྒྱས་ཀྱི་ཆོས་མ་གཏོགས་པར་ལོགས་ཤིག་ན་དགེ་སྦྱོང་མེད་བྲམ་ཟེ་མེད་དེ་དགེ་སྦྱོང་དང་བྲམ་ཟེའི་ཆོས་ཀྱང་མེད་དོ། །མུ་སྟེགས་ཅན་ཐམས་ཅད་ནི་རྫུན་དུ་སྨྲ་བར་ཟད་ཀྱི་ཡང་དག་པའི་སྤྱོད་པ་མེད་དོ། །རྣམ་པ་དེ་གཉིས་ལྟར་ཚུལ་འཆོས་མོད་ཀྱི་རྣམ་པ་དེ་གཉིས་ཀྱི་གནས་མེད་དོ། །དེ་ཅིའི་ཕྱིར་ཞེ་ན། དགེ་སྦྱོང་དང་བྲམ་ཟེའི་ཆོས་མེད་པར་ཅིའི་ཕྱིར་དགེ་སྦྱོང་དང་བྲམ་ཟེ་ཡོད་དོ་ཞེས་སྨྲ། ངས་ཀྱང་རྟག་ཏུ་འཁོར་གྱི་དཀྱིལ་འཁོར་འདིར་སེང་གེའི་སྒྲ་བསྒྲགས་ཀྱིས་ཁྱེད་ཀྱང་རྟག་ཏུ་འཁོར་གྱི་དཀྱིལ་འཁོར་ཆེན་པོར་སེང་གེའི་སྒྲ་སྒྲོགས་ཤིག་ཅེས་གསུངས་ཏེ། འདིར་དགག་བྱའི་གཟུགས་སོགས་དེ་རྣམས་ནི་སྤང་དུ་རུང་བའི་དྲི་མ་ཡིན་པའི་ཕྱིར་རང་སྟོང་ངོ༌། །དེ་རྣམས་འགགས་པའི་གཞི་ལ་རྟག་ཏུ་བཞུགས་པ་ཐོབ་བྱ་དོན་དམ་བདེ་གཤེགས་སྙིང་པོའི་གཟུགས་སོགས་ནི་སྤང་དུ་མི་རུང་བའི་རང་བཞིན་འོད་གསལ་ཡིན་པའི་ཕྱིར་གཞན་སྟོང་ངོ༌། །ཞེས་ཆོས་རྗེ་ཀུན་མཁྱེན་ཇོ་ནང་བ་ཆེན་པོས་ལེགས་པར་གསུངས་པའི་ཕྱིར་རོ། །གཞན་ཡང་འཁོར་ལོ་བར་བ་ངེས་དོན་དང་འཁོར་ལོ་ཐ་མ་དྲང་དོན་གྱི་མདོ་ཡིན་པའི་ཤེས་བྱེད་མེད་ལ། བར་བ་དྲང་དོན་དང་ཐ་མ་ངེས་དོན་ཡིན་པའི་ཤེས་བྱེད་དུ་མ་དང་བཅས་པ་ཡིན་ཏེ། གཞན་སྟོང་དབུ་མའི་རྒྱན་ལས། བར་བ་ངེས་དོན་ཕྱི་མ་དྲང་དོན་དུ། །སྟོན་བྱེད་མདོ་སྡེ་གསལ་བོ་གང་ནའང་མེད། །བར་བ་དྲང་དོན་ཕྱི་མ་ངེས་དོན་དུ། །དགོངས་པ་ངེས་འགྲེལ་མྱང་འདས་ཆེན་པོ་དང༌། །སོར་ཕྲེང་སོགས་ཀྱི་མདོ་ལས་གསལ་བར་བཤད། །ལང་ཀར་གཤེགས་པར་སྙིང་པོ་དྲང་དོན་དུ། །གསུངས་བར་འདོད་པ་རི་བོང་ཅལ་དང་མཚུངས། །མུ་སྟེགས་བདག་དང་མཚུངས་སམ་ཞུས་པ་ལ། །སྟོང་ཉིད་ཡིན་ཕྱིར་མཚུངས་པ་མིན་ཞེས་གསུངས། །ཞེས་གསུངས་པའི་ཕྱིར་རོ། །ཡང་སྐབས་འདིར་མཁས་བླུན་དུ་མ་ལ་དོགས་པ་སྐྱེ་བའི་གནས་ཆོས་ཉིད་དོན་དམ་བདེན་པ་དེ། བདེན་པར་གྲུབ་ཚུལ་དང་རིགས་པའི་དཔྱད་བཟོད་དུ་གྲུབ་ཚུལ་ཅུང་ཟད་བརྗོད་པ་ལ། རིགས་པ་དང༌། ལུང་གཉིས་ལས། དང་པོ་ནི། ཆོས་ཉིད་དོན་དམ་བདེ་གཤེགས་སྙིང་པོ་ཆོས་ཅན། བདེན་པར་གྲུབ་པ་ཡིན་ཏེ། དོན་དམ་བདེན་པ་ཡིན་པའི་ཕྱིར། ཁྱབ་སྟེ། དོན་དམ་བདེན་པ་ཡིན་ན་སྣང་ཚུལ་དང་གནས་ཚུལ་མཐུན་པའི་མི་བསླུ་བ་ཡིན་པ་གང་ཞིག །མི་བསླུ་བ་ཡིན་ན་བདེན་པ་ཡིན་དགོས་པའི་ཕྱིར། ཁྱབ་སྟེ། བདེན་པ་ཡིན་པར་གྲུབ་པ་དང༌། བདེན་པར་གྲུབ་པ་གཉིས་དོན་ལ་ཁྱད་པར་མེད་པའི་ཕྱིར། རྟགས་གྲུབ་སྟེ། ཡོད་པ་ཡིན་པར་གྲུབ་པ་དང༌། ཡོད་པར་གྲུབ་པ་གཉིས་ལ་ཁྱད་པར་མེད་པ་གང་ཞིག །དེ་གཉིས་ཁྱོད་གྱི་ཞེ་འདོད་ཙམ་ལས་རྣམ་པ་ཀུན་ཏུ་མཚུངས་པའི་ཕྱིར་རོ། །གཞན་ཡང་རྣམ་དག་ལམ་གྱི་དམིགས་པ་མཐར་ཐུག་གི་ཆོས་ཉིད་དོན་དམ་བདེན་པ་ཆོས་ཅན། རིགས་པའི་དཔྱད་བཟོད་དུ་གྲུབ་པ་ཡིན་ཏེ། དོན་དམ་དཔྱོད་བྱེད་ཀྱི་རིགས་པས་བརྟག་ཅིང་དཔྱད་པ་ན་གནས་ལུགས་སུ་གྲུབ་པས་ན་དཔྱད་བཟོད་པ་གང་ཞིག །ཀུན་རྫོབ་རྣམས་འཁྲུལ་ངོ་ཙམ་ལས་དོན་ལ་མ་གྲུབ་པའམ་གཤིས་ལ་མ་གྲུབ་པས་དོན་དམ་དཔྱོད་པའི་རིགས་པས་དཔྱད་མི་བཟོད་པའི་ཕྱིར་རོ། །གཉིས་པ་ལུང་ནི། བྱང་ཆུབ་སེམས་དཔའི་སྡེ་སྣོད་ལས། བདེན་པ་ནི་གཅིག་པུ་གཉིས་མ་ཡིན་ཏེ། འདི་ལྟ་སྟེ། འགོག་པའི་བདེན་པའོ། །ཞེས་དང༌། གསེར་འོད་དམ་པའི་མདོ་ལས༌། དེ་བཞིན་གཤེགས་པའི་ཆོས་ཀྱི་སྐུ་ནི། ཡང་དག་པས་བདེན་པ་དེ་ཉིད་ཡིན་པས། དེ་ལ་མྱ་ངན་ལས་འདས་པ་ཞེས་བྱའོ། །ཞེས་དང༌། ཡབ་སྲས་མཇལ་བའི་མདོ་ལས། བྱང་ཆུབ་ཞེས་བགྱི་བ་འདི་ནི། ཡང་དག་པའི་མཐའ་སྟེ། ཞེས་དང༌། དཔལ་ཕྲེང་གི་མདོ་ལས། སྡུག་བསྔལ་འགོག་པའི་བདེན་པ་འདི་ནི། ཡང་དག་པར་ན་བདེན་པ་དང་རྟག་པ་དང་སྐྱབས་ལགས་སོ། །ཞེས་དང༌། སོར་ཕྲེང་གི་མདོ་ལས། འཇམ་དཔལ་ཤིན་ཏུ་སྟོང་བ་ཉིད་ལ་བསྒོམས་ཤིང་སྟོང་བར་ཟབ་ཏུ་བསམ་ནས་ཆོས་ཐམས་ཅད་ཞིག་པ་མི་བཟོད་པར་མཐོང་ངོ༌། །ཐར་བ་སྟོང་བ་མ་ཡིན་པ་ཡང་སྟོང་བར་མཐོང་ཞིང་རྟོག་གོ །ཞེས་དང༌། ཐར་བ་ཐམས་ཅད་ཀྱིས་སྟོང་བ་མ་ཡིན་གྱི། ཉེས་པ་ཐམས་ཅད་དང་བྲལ་བའི་ཕྱིར་ཐར་བ་སྟོང་བ་ཞེས་བྱའོ། །ཞེས་དང༌། མྱང་འདས་ཆེན་པོ་ལས། ཡང་དག་པར་རྣམ་པར་གྲོལ་བ་ནི་དེ་ལྟ་བུ་མ་ཡིན་པས་མི་སྟོང་བའི་སྟོང་བའོ། །མི་སྟོང་བའི་སྟོང་བ་ནི་ཡང་དག་པའི་རྣམ་པར་གྲོལ་བའོ། །ཞེས་དང༌། རྒྱུད་བླ་མ་ལས། རྣམ་དབྱེར་མེད་པའི་མཚན་ཉིད་ཅན། །བླ་མེད་ཆོས་ཀྱིས་སྟོང་མ་ཡིན། །ཞེས་དང༌། རྩ་ཤེས་རང་འགྲེལ་ག་ལས་འཇིག་མེད་ལས། དོན་དམ་པའི་བདེན་པ་ནི། འཕགས་པ་རྣམས་ཀྱིས་ཆོས་ཐམས་ཅད་ཕྱིན་ཅི་མ་ལོག་པར་ཐུགས་སུ་ཆུད་པས་ཆོས་ཐམས་ཅད་སྐྱེ་བ་མེད་པར་གཟིགས་པ་གང་ཡིན་པ་སྟེ། དེ་ནི་དེ་དག་ཉིད་ལ་དོན་དམ་པར་བདེན་པ་ཉིད་ཡིན་པས་དོན་དམ་པའི་བདེན་པའོ། །ཞེས་དང༌། དབུ་མ་ཚིག་གསལ་ལས། བཅོམ་ལྡན་འདས་ཀྱི་དགེ་སློང་དག་འདི་ནི་བདེན་པ་དམ་པ་སྟེ། འདི་ལྟ་སྟེ། བསླུ་བ་མེད་པའི་ཆོས་ཅན་མྱ་ངན་ལས་འདས་པའོ། །ཞེས་དང༌། རི་ཆོས་ངེས་དོན་རྒྱ་མཚོ་ལས། དོན་དམ་བདེན་པ་གང་ཡིན་པ་དེ་ནི། དོན་དམ་དུ་བདེན་ནོ། །ཞེས་དང༌། ཚུལ་གཉིས་རྣམ་འབྱེད་ལས། །དོན་དམ་གྱི་དབྱིངས་ནི། བདེན་པར་གྲུབ་པའི་ཕྱིར་རང་གི་ངོ་བོས་མི་སྟོང་ལ། འོན་ཀྱང་སྟོང་ཉིད་ནི་ཡིན་ཏེ། གཞན་གཟུང་འཛིན་སོགས་སྤྲོས་པ་ཐམས་ཅད་ཀྱིས་སྟོང་བའི་ཕྱིར། ཞེས་གསུངས་བའི་ཕྱིར། དེ་ལྟར་མདོ་དང་བསྟན་བཅོས་མཐའ་ཡས་པ་མཆིས་ཀྱང་འདིར་དེ་ཙམ་ལས་ཚིག་ཚོགས་མང་དོགས་ནས་མ་སྤྲོས་སོ། །འདི་དག་གི་སྐབས་སུ་ཞིབ་ཆ་འདི་ལྟར་ཤེས་པར་བྱ་སྟེ། རང་ལུགས་ལ་ཆོས་ཉིད་དེ་བཞིན་ཉིད་དེ་བདེན་པར་གྲུབ་ཀྱང་དགག་བྱའི་བདེན་གྲུབ་བམ་སྤྲོས་པའི་བདེན་གྲུབ་ཏུ་མི་བཞེད་དེ། ཐམས་ཅད་མཁྱེན་པ་ཏཱ་ར་ནཱ་ཐའི་གཞན་སྟོང་དབུ་མའི་རྒྱན་ལས། མཚན་མ་སྤྲོས་པའི་བདེན་གྲུབ་ངེད་མི་འདོད། །སྤྲོས་པའི་དབེན་པའི་བདེན་ཚུལ་འདི་ལྟ་བུ། །ཞེས་དང༌། ཡོངས་གྲུབ་དེ་ལ་སྤྲོས་པའི་བདེན་པ་མེད། །སྤྲོས་པའི་བདེན་པ་ཡོད་ན་ཀུན་རྫོབ་སྟེ། །དོན་དམ་ངོ་བོ་ཉིད་མེད་ཅེས་བཤད་དོ། །ཞེས་གསུངས་པའི་ཕྱིར་རོ། །ཡང་རྒྱུད་བླ་མ་ལས། བདག་དང་བདག་མེད་སྤྲོས་པ་དག །ཉེ་བར་ཞི་བའི་དམ་པའི་བདག །ཅེས་གསུངས་པ་ལྟར། དོན་དམ་རང་བྱུང་འདུས་མ་བྱས་པའི་ཆོས་དབྱིངས་དེ་ཉིད་དག་པའི་བདག་གམ་དམ་པའི་བདག་ཏུ་གྲུབ་ཀྱང༌། གང་ཟག་གི་བདག་དང༌། ཆོས་བདག་གིས་སྟོང་བ་ཡིན་ཏེ། ཆོས་རྗེ་ཀུན་མཁྱེན་གྱིས་ཆོས་ཉིད་བདེ་གཤེགས་སྙིང་པོ་དེ་དགག་བྱ་བདག་གཉིས་ཀྱིས་སྟོང་པའི་ཕྱིར་མུ་སྟེགས་པའི་སྒྲོ་བཏགས་པའི་བདག་དང་མི་འདྲ་བར་གསུངས་པ་ཡིན་ཏེ། རི་ཆོས་ངེས་དོན་རྒྱ་མཚོ་ལས། བདག་གཉིས་ཀྱིས་སྟོང་བའི་ཆོས་ཉིད་ཡོངས་གྲུབ་སངས་རྒྱས་ཀྱི་རང་བཞིན་དང༌། བདག་གི་དབྱིངས་སུ་གང་གསུངས་པ། ཞེས་དང༌། བདག་གཉིས་ཀྱི་དངོས་པོ་གདོད་ནས་མེད་པའི་གཞིའི་ངོ་བོ་དོན་དམ་སྟོང་ཉིད་རང་བཞིན་འོད་གསལ་བ་རྣམ་པ་ཐམས་ཅད་པ་རང་བཞིན་ལྷན་ཅིག་སྐྱེས་པའི་ཡེ་ཤེས། ཞེས་གསུངས་པའི་ཕྱིར། དེ་འདྲའི་གྲུབ་མཐའི་གནད་ལེགས་པར་མཁྱེན་པའི་གོང་སྤྲུལ་ཡོན་ཏན་རྒྱ་མཚོས་མཛད་པའི་རྒྱུད་བླའི་འགྲེལ་བར། ཇོ་ནང་བའི་དེ་བཞིན་གཤེགས་པའི་སྙིང་པོ་གཙང་བདེ་རྟག་བདག་དམ་པའི་ཕ་རོལ་ཏུ་སོན་པ་སྒྲ་ཇི་བཞིན་དུ་འཆད་པ་ལ། བོད་མང་པོས་བློས་བཞག་པའི་བདེན་གྲུབ་ལ་བཟུང་ནས་དགག་པ་བྱས་ཀྱང་བློས་བཞག་པའི་བདེན་གྲུབ་དང༌། ཆོས་བདག་སོགས་མ་གྲུབ་ཀྱང༌། རྒྱུད་བླ་མ་ལས། གཙང་བདག་བདེ་དང་རྟག་ཉིད་ཀྱི། །ཡོན་ཏན་ཕ་རོལ་ཕྱིན་པ་འབྲས། །ཞེས་གསུངས་པ་ལྟར་གྲུབ་ཀྱང་འགལ་བ་མེད་ཅེས་གསུངས་པ་ནི་ལེགས་བཤད་གཟུར་གནས་དགྱེས་པའི་གཏམ་ཡིན་ནོ། །ཞིབ་ཆ་དེ་ལྟར་མཛད་ན་ཀུན་མཁྱེན་ཡབ་སྲས་དང་ཐམས་ཅད་མཁྱེན་པ་ཏཱ་ར་ནཱ་ཐའི་དགོངས་པར་འབྱོར་ངེས་པས། རྒྱལ་བ་དགྱེས་པའི་མཆོད་སྤྲིན་ཡིན་ནོ། །དེང་སྐབས་སུ་རྒྱལ་བ་སྲས་བཅས་ཀྱིས་མ་དགོངས་པའི་ཞིབ་ཆ་དུ་མ་འཛེམ་མེད་དུ་སྤྲོ་བ་ནི། བསྟན་པའི་ཉིན་བྱེད་སྒྲིབ་པའི་བདུད་ཀྱི་གསང་ཚིག་ལ་ཉེ་བར་འགྱུར་རོ། །གཞན་ཡང་གངས་ལྗོངས་འདིར་པཎ་ཆེན་ཤཱཀྱ་མཆོག་ལྡན་དང༌། ཆ་བ་ཆོས་ཀྱི་སེངྒེ་སོགས་ཆོས་ཉིད་བདེན་གྲུབ་འདོད་མཁན་ས་སྐྱ་བ་དང༌། བཀའ་རྒྱུད་པ་དུ་མ་བྱུང་ལ། ཆེ་བ་དྲུག་ལྡན་གྱི་སྔ་འགྱུར་རྙིང་མས་ཀྱང་ཆོས་ཉིད་བདེན་གྲུབ་ཏུ་བཞེད་པ་འདྲ་སྟེ། འཇུ་མི་ཕམ་འཇམ་དབྱངས་རྣམ་རྒྱལ་མཆོག་གིས་མཛད་པའི་གཞན་སྟོང་སེངྒེའི་ང་རོ་ལས། དེས་ན་དོན་དམ་རང་གི་ངོ་བོས་མི་སྟོང་སྟེ་དོན་དམ་མ་འཁྲུལ་བའི་ཡུལ་ཡུལ་ཅན་གཉིས་ཀ་ཡོད་པའི་ཕྱིར། ཞེས་དང༌། སྤྲོས་བྲལ་ནི་མཐར་ཐུག་དཔྱོད་པའི་རིགས་པས་བསྒྲུབ་བྱ་ཡིན་གྱི་དགག་བྱ་མ་ཡིན་པས། ཞེས་དང༌། ངེད་འཁྲུལ་བ་ཀུན་རྫོབ་དང་མ་འཁྲུལ་བ་དོན་དམ་དུ་འདོད་པའི་ལུགས་ལའང་མ་འཁྲུལ་བའི་དོན་དམ་དང༌། དེ་མ་འཁྲུལ་བའི་བདེན་པར་གྲུབ་པ་དགག་མི་རུང་བར། ཞེས་དང༌། དམ་ཆོས་དོགས་སེལ་ལས། དོན་དམ་པར་གྲུབ་ན་བདེན་པར་གྲུབ་པའང་ཡིན་ཏེ། དོན་དམ་དཔྱོད་བྱེད་ཀྱི་རིགས་པས་རྙེད་དོན་མཐར་ཐུག་ཡིན་པ་གང་ཞིག །མཐར་ཐུག་དཔྱོད་པའི་རིག་ངོར་བདེན་ཞིང༌། དེ་ཡོངས་གཅོད་སྒྲུབ་པའི་ཚུལ་གྱིས་དེའི་ཡུལ་དུ་གྲུབ་པའི་ཕྱིར། ཞེས་གསུངས་པའི་ཕྱིར། འོན་ཀྱང་དོན་དམ་དེ་སྤྲོས་པའི་བདེན་གྲུབ་དང༌། དགག་བྱའི་བདེན་གྲུབ་དུ་ཁས་མི་ལེན་པ་ཡིན་ནོ། །གཞན་ཡང་ཆོས་ཉིད་བདེན་པར་མ་གྲུབ་ན་དོན་དཔྱོད་ཀྱི་རིགས་པས་དགག་བྱ་ཡིན་དགོས་ཀྱང་དེའི་དགག་བྱ་མ་ཡིན་ཏེ། གཞུང་སྤྱིའི་དཀའ་འགྲེལ་རིན་པོ་ཆེའི་ཟ་མ་ཏོག་ལས། མུ་བཞི་ནི་དོན་དཔྱོད་ཀྱི་རིགས་པའི་དགག་བྱ་ཡིན་ལ་ལམ་ཀྱི་དགག་བྱ་མིན་པ་མེད་དེ། ལྟ་སྒོམ་ཀུན་གྱིས་སོ། །ཐ་སྙད་དཔྱོད་པས་ཡོད་པ་ཁེགས་པ་རི་བོང་རྭ་ལྟ་བུ་རིགས་པས་དགག་བྱ་ཡིན་ཡང་ལམ་གྱི་མིན་ནོ། །ལམ་གྱི་དགག་བྱ་བདག་འཛིན་གཉིས་དང༌། དེ་ལས་བྱུང་བ་རྣམས་དང༌། གཉིས་ཀའི་དགག་བྱ་བདག་གཉིས་ལྟ་བུ། །གཉིས་ཀའི་དགག་བྱ་མིན་པ་གནས་ལུགས་ཆོས་ཉིད་དམ་བདག་མེད་རྟོགས་མཁྱེན་ལྟ་བུའོ། །ཞེས་གསུངས་པའི་ཕྱིར་རོ། ། འཁོར་ལོ་བར་ཐ་དང༌རྒྱུད་སྡེ་བཞིའི་བརྗོད་བྱའི་སྟོང་ཉིད་ཟབ་མོ་ལ་ཀུན་རྫོབ་མི་སྲིད་ཅིང་དོན་དམ་རྣམ་པ་ཀུན་ལྡན་ཡིན་པར་བསྟན་པ།དྲུག་པ་འཁོར་ལོ་བར་ཐ་དང༌། རྒྱུད་སྡེ་བཞིའི་བརྗོད་བྱའི་སྟོང་ཉིད་ཟབ་མོ་ལ་ཀུན་རྫོབ་མི་སྲིད་ཅིང་དོན་དམ་རྣམ་པ་ཀུན་ལྡན་ཡིན་པར་བསྟན་པ་ནི། དེ་ཕྱིར་རྒྱལ་ཡུམ་རྒྱས་འབྲིང་བསྡུས་ལ་སོགས། །ཆོས་འཁོར་གཉིས་པའི་སྟོང་ཉིད་ཟབ་མོ་དང༌། །སྙིང་པོའི་མདོ་ལྔ་མདོ་བཅུ་ལ་སོགས་པ། །ཆོས་འཁོར་གསུམ་པའི་སྟོང་ཉིད་ཟབ་མོ་དང༌། །རྒྱུད་སྡེ་རྣམ་བཞིའི་སྟོང་ཉིད་ཟབ་མོ་སྟེ། །མདོ་རྒྱུད་ཟབ་མོའི་སྟོང་ཉིད་ཟབ་མོ་ཀུན། །ཀུན་རྫོབ་མ་ཡིན་དོན་དམ་བདེན་པ་ཡིན། །འདུས་བྱས་མ་ཡིན་འདུས་མ་བྱས་དབྱིངས་ཡིན། །མི་རྟག་མ་ཡིན་རྟག་བརྟན་ཐེར་ཟུག་ཡིན། །བརྫུན་པ་མ་ཡིན་བདེན་པ་ཡང་དག་ཡིན། །བསླུ་བ་མ་ཡིན་བསླུ་མེད་སྐྱབས་མཆོག་ཡིན། །འགྱུར་བ་མ་ཡིན་འགྱུར་མེད་ཡོངས་གྲུབ་ཡིན། །ཚད་མ་འདི་མིན་དོན་དམ་ཚད་མ་ཡིན། །རིག་པ་འདི་མིན་ཆོས་ཉིད་རིག་པ་ཡིན། །སེམས་ཙམ་འདི་མིན་སེམས་ཙམ་གཞན་མཆོག་ཡིན། །རང་རིག་འདི་མིན་རང་རིག་གཞན་མཆོག་ཡིན། །རང་གསལ་འདི་མིན་རང་གསལ་གཞན་མཆོག་ཡིན། །རྣམ་རིག་འདི་མིན་རྣམ་རིག་གཞན་མཆོག་ཡིན། །རྣམ་ཤེས་མ་ཡིན་རང་བྱུང་ཡེ་ཤེས་ཡིན། །ཀུན་བརྟགས་མ་ཡིན་ཡོངས་གྲུབ་ཡེ་ཤེས་ཡིན། །དངོས་སྨྲ་མ་ཡིན་དབུ་མ་ཆེན་པོ་ཡིན། །བེམ་པོ་མ་ཡིན་ཀུན་ཤེས་ཀུན་རིག་ཡིན། །རྣམ་རྟོག་མ་ཡིན་མི་རྟོག་ཡེ་ཤེས་ཡིན། །རྟོག་གེ་མ་ཡིན་རྣལ་འབྱོར་སྤྱོད་ཡུལ་ཡིན། །ཕུང་པོ་འདི་མིན་ཕུང་པོ་གཞན་མཆོག་ཡིན། །ཁམས་ཀྱང་འདི་མིན་ཁམས་གཞན་ཕ་རོལ་མཆོག། སྐྱེ་མཆེད་འདི་མིན་སྐྱེ་མཆེད་གཞན་མཆོག་ཡིན། །ལས་དབང་འདི་མིན་ལས་དབང་གཞན་མཆོག་ཡིན། །དེའི་བྱ་བ་རྣམས་ཀྱང་དེ་བཞིན་ནོ། །ཁམས་གསུམ་འདི་མིན་ཁམས་གསུམ་གཞན་མཆོག་ཡིན། །སྲིད་གསུམ་འདི་མིན་སྲིད་གསུམ་གཞན་མཆོག་ཡིན། །དུས་གསུམ་འདི་མིན་དུས་གསུམ་གཞན་མཆོག་ཡིན། །ཐེག་གསུམ་འདི་མིན་ཐེག་གསུམ་གཞན་མཆོག་ཡིན། །བརྟན་གཡོ་འདི་མིན་བརྟན་གཡོ་གཞན་མཆོག་ཡིན། །རྒྱུ་འབྲས་འདི་མིན་རྒྱུ་འབྲས་གཞན་མཆོག་ཡིན། །སྐྱེ་འགག་འདི་མིན་སྐྱེ་འགག་གཞན་མཆོག་ཡིན། །སྣང་སྟོང་འདི་མིན་སྣང་སྟོང་གཞན་མཆོག་ཡིན། །གཙོ་འཁོར་འདི་མིན་གཙོ་འཁོར་གཞན་མཆོག་ཡིན། །ཡབ་ཡུམ་འདི་མིན་ཡབ་ཡུམ་གཞན་མཆོག་ཡིན། །ཕོ་མོ་འདི་མིན་ཕོ་མོ་གཞན་མཆོག་ཡིན། །མ་ནིང་འདི་མིན་མ་ནིང་གཞན་མཆོག་ཡིན། །རྟེན་འབྲེལ་འདི་མིན་རྟེན་འབྲེལ་གཞན་མཆོག་ཡིན། །ཕར་ཕྱིན་འདི་མིན་ཕར་ཕྱིན་གཞན་མཆོག་ཡིན། །སྟོང་ཉིད་འདི་མིན་སྟོང་ཉིད་གཞན་མཆོག་ཡིན། །རྩ་བར། དེ་ཕྱིར་རྒྱལ་ཡུམ་རྒྱས་འབྲིང་བསྡུས་ལ་སོགས། །ཞེས་པ་ནས། སྟོང་ཉིད་གཞན་མཆོག་ཡིན། །ཞེས་པའི་བར་ཤོ་ལོ་ཀ་བཅུ་གཅིག་བྱུང༌། དེའི་ཚིག་དོན་ནི། ཆོས་འཁོར་གཉིས་པའི་བསྟན་བྱའི་གཙོ་བོའི་དེ་བཞིན་ཉིད་ཟབ་མོ་མཐར་ཐུག་ཐམས་ཅད་ཡིན་པ་དེ༵འི་ཕྱི༵ར་ན་རྒྱ༵ལ་ཡུ༵མ་རྒྱ༵ས་འབྲི༷ང་བསྡུ༵ས་པ་ལ༵་སོག༵ས་པ་ཆོ༵ས་འཁོ༵ར་གཉི༵ས་པ༵འི་བསྟན་བྱའི་སྟོ༵ང་ཉི༵ད་ཟ༵བ་མོ༵་དང༷༌། སྙི༵ང་པོ༵འི་མ༵དོ་ལྔ༵་མདོ༵་བཅུ༵་ལ༵་སོག༵ས་པ༵་ཆོས༵་འཁོ༵ར་གསུ༵མ་པ༵འི་བསྟན་བྱའི་སྟོ༵ང་ཉི༵ད་ཟ༵བ་མོ༵་ད༵ང༌། བཤད་རྒྱུད་སྤྱོད་རྒྱུད་རྣལ་འབྱོར་གྱི་རྒྱུད་རྣལ་འབྱོར་བླ་མེད་ཀྱི་རྒྱུད་དང་རྒྱུ༵ད་སྡེ༵་རྣམ༵་པ་བཞི༵འི་བསྟན་བྱའི་སྟོ༵ང་ཉི༵ད་ཟ༵བ་མོ༵་སྟེ༵། མདོ༵་རྒྱུ༵ད་ཟ༵བ་མོ༵འི་བསྟན་བྱའི་སྟོ༵ང་ཉི༵ད་ཟ༵བ་མོ༵་ཀུ༵ན་ནི། ཀུ༵ན་རྫོ༵བ་མ༵་ཡི༵ན་པར་དོ༵ན་ད༵མ་བདེ༵ན་པ༵་ཡི༵ན་པ་དང༌། དེ་ནི་འདུ༵ས་བྱ༵ས་མ༵་ཡི༵ན་པར་འདུ༵ས་མ༵་བྱ༵ས་པའི་དབྱི༵ངས་ཡི༵ན་པ་དང༌། དེ་ནི་མི༵་རྟ༵ག་པ་མ༵་ཡི༵ན་པར་རྟ༵ག་བརྟ༵ན་ཐེ༵ར་ཟུ༵ག་ཡི༵ན་པ་དང༌། དེ་ནི་བརྫུ༵ན་པ༵་རྣམ་ཤེས་ཀྱི་སྣང་བ་འདི་མ༵་ཡི༵ན་པར་བདེ༵ན་པ༷་ཡ༵ང་ད༵ག་གམ་ཕྱིན་ཅི་མ་ལོག་པ་ཡི༵ན་པ་དང༌། དེ་ནི་སྣང་ཚུལ་དང་གནས་ཚུལ་མི་མཐུན་པའི་བསླུ༵་བ༵་མ༵་ཡི༵ན་པར་བསླུ༵་བ་མེ༵ད་པའི་སྐྱབ༵ས་མཆོ༵ག་ཡི༵ན་པ་དང༌། དེ་ནི་འགྱུ༵ར་བ༵་མ༵་ཡི༵ན་པར་འགྱུ༵ར་མེ༵ད་ཡོང༵ས་གྲུ༵བ་ཡི༵ན་པ་དང༌། དེ་ནི་ཀུན་རྫོབ་འདུས་བྱས་ཀྱི་ཚད༵་མ༵་འདི༵་མི༵ན་པར་དོ༵ན་ད༵མ་པའི་ཚ༵ད་མ༵་ཡི༵ན་པ་དང༌། རི༵ག་པ༵་རྣམ་ཤེས་འ༵དི་མི༵ན་པར་ཆོ༵ས་ཉི༵ད་ཀྱི་རི༵ག་པ༵་ཡི༵ན་པ་དང༌། དེ་ནི་སེམ༵ས་ཙ༵མ་འ༵དི་མི༵ན་པར་སེམ༵ས་ཙ༵མ་གཞ༵ན་མཆོ༵ག་ཡི༵ན་པ་དང༌། དེ་ནི་ཀུན་རྫོབ་ཀྱི་ར༵ང་རི༵ག་འདི༵་མི༵ན་པར་ར༵ང་རི༵ག་གཞ༵ན་མཆོ༵ག་ཡི༵ན་པ་དང༌། དེ་ནི་ར༵ང་གས༵ལ་རྣམ་ཤེས་ལ་སྣང་བ་འདི༵་མི༵ན་པར་ར༵ང་གས༵ལ་གཞ༵ན་མཆོ༵ག་ཡི༵ན་པ་དང༌། དེ་ནི་རྣ༵མ་རི༵ག་རྣམ་ཤེས་ལ་སྣང་བ་འདི༵་མི༵ན་པར་རྣ༵མ་རི༵ག་གཞ༵ན་མཆོ༵ག་ཡི༵ན་པ་དང༌། དེ་ནི་རྣ༵མ་ཤེ༵ས་མ༵་ཡི༵ན་པར་ར༵ང་བྱུ༵ང་ཡེ༵་ཤེ༵ས་ཡི༵ན་པ་དང༌། དེ་ནི་ཀུ༵ན་བརྟ༵གས་མ༵་ཡི༵ན་པར་ཡོང༵ས་གྲུ༵བ་ཡེ༵་ཤེ༵ས་ཡི༵ན་པ་དང༌། དེ་ནི་དངོ༵ས་སྨྲ༵་མ༵་ཡི༵ན་པར་དབུ༵་མ༵་ཆེ༵ན་པོ༵་ཡི༵ན་པ་དང༌། དེ་ནི་བེ༵མ་པོ༵་མ༵་ཡི༵ན་པར་ཀུ༵ན་ཤེ༵ས་ཀུ༵ན་རི༵ག་དམ་པ་ཡི༵ན་པ་དང༌། དེ་ནི་རྣ༵མ་རྟོ༵ག་མ༵་ཡི༵ན་པར་མི༵་རྟོ༵ག་པའི་ཡེ༵་ཤེ༵ས་ཡི༵ན་པ་དང༌། དེ་ནི་རྟོ༵ག་གེ༵འི་སྤྱོད་ཡུལ་མ༵་ཡི༵ན་པར་རྣ༵ལ་འབྱོ༵ར་གྱི་སྤྱོ༵ད་ཡུ༵ལ་ཡི༵ན་པ་དང༌། དེ་ནི་ཕུ༵ང་པོ༵་འདི༵་མི༵ན་པར་ཕུ༵ང་པོ༵་གཞ༵ན་མཆོ༵ག་ཡི༵ན་པ་དང༌། དེ་ནི་ཀུན་རྫོབ་ཀྱི་ཁམ༵ས་ཀྱ༵ང་འདི༵་མི༵ན་པར་ཁམ༵ས་གཞ༵ན་ཕ༵་རོ༵ལ་གཞན་མཆོ༵ག་ཡིན་པ་དང༌། དེ་ནི་སྐྱེ༵་མཆེ༵ད་རྣམ་ཤེས་ལ་སྣང་བ་འ༵དི་མི༵ན་པར་སྐྱེ༵་མཆེ༵ད་གཞ༵ན་མཆོ༵ག་ཡི༵ན་པ་དང༌། དེ་ནི་ངག་གི་དབང་པོ་ལ་སོགས་པ་ལ༵ས་ཀྱི་དབ༵ང་པོ་འ༵དི་མི༵ན་པར་ལ༵ས་ཀྱི་དབ༵ང་པོ་གཞ༵ན་མཆོ༵ག་ཡི༵ན་པ་དང༌། དེ་ནི་ངག་གི་དབང་པོའི་བྱ་བ་སྨྲ་བའམ་བརྗོད་པ་སོགས་ལས་དབང་དེ༵འི་བྱ༵་བ༵་རྣམ༵ས་ཀྱ༵ང་རྣམ་ཤེས་ལ་སྣང་བ་འདི་མིན་པར་ལས་དབང་གི་བྱ་བ་གཞན་མཆོག་ཡིན་པ་ཡང་དེ༵་བཞི༵ན་ནོ༵། །དེ་ནི་ཁམ༵ས་གསུ༵མ་འདི༵་མི༵ན་པར་ཁམ༵ས་གསུ༵མ་གཞ༵ན་མཆོ༵ག་ཡི༵ན་པ་དང༌། དེ་ནི་སྲི༵ད་གསུ༵མ་འདི༵་མི༵ན་པར་སྲི༵ད་གསུ༵མ་གཞ༵ན་མཆོ༵ག་ཡི༵ན་པ་དང༌། དེ་ནི་དུ༵ས་གསུ༵མ་འ༵དི་མི༵ན་པར་དུ༵ས་གསུ༵མ་གཞ༵ན་མཆོ༵ག་ཡི༵ན་པ་དང༌། དེ་ནི་ཐེ༵ག་གསུ༵མ་འ༵དི་མི༵ན་པར་ཐེ༵ག་གསུ༵མ་གཞ༵ན་མཆོ༵ག་ཡི༵ན་པ་དང༌། དེ་ནི་བརྟ༵ན་པ་སྣོད་དང་གཡོ༵་བ་བཅུད་ཀྱི་སེམས་ཅན་འ༵དི་མི༵ན་པར་བརྟ༵ན་གཡོ༵་གཞ༵ན་མཆོ༵ག་ཡི༵ན་པ་དང༌། དེ་ནི་རྒྱུ་འབྲ༵ས་འདི༵་མི༵ན་པར་རྒྱུ༵་འབྲ༵ས་གཞ༵ན་མཆོ༵ག་ཡི༵ན་པ་དང༌། དེ་ནི་སྐྱེ༵་འག༵ག་འ༵དི་མི༵ན་པར་སྐྱེ༵་འག༵ག་གཞ༵ན་མཆོ༵ག་ཡི༵ན་པ་དང༌། དེ་ནི་སྣ༵ང་སྟོ༵ང་རྣམ་ཤེས་ལ་སྣང་བ་འ༵དི་མི༵ན་པར་དོན་དམ་པའི་ཡོན་ཏན་རྣམས་སྣང་བའི་ཆོས་དང་བདག་གཉིས་ཀྱིས་སྟོང་བའི་གཞི་སྣ༵ང་སྟོ༵ང་གཞ༵ན་མཆོ༵ག་ཡི༵ན་པ་དང༌། དེ་ནི་ག༵ཙོ་འཁོ༵ར་རྣམ་ཤེས་ལ་སྣང་བ་འ༵དི་མི༵ན་པར་ག༵ཙོ་འཁོ༵ར་གཞ༵ན་མཆོ༵ག་ཡི༵ན་པ་དང༌། །དེ་ནི་ཀུན་རྫོབ་གྱི་ཡ༵བ་ཡུ༵མ་འ༵དི་མི༵ན་པར་ཡ༵བ་ཡུ༵མ་གཞ༵ན་མཆོ༵ག་ཡི༵ན་པ་དང༌། །དེ་ནི་ཕོ༵་མོ༵་འདི༵་མི༵ན་པར་ཕོ༵་མོ༵་གཞ༵ན་མཆོ༵ག་ཡི༵ན་པ་དང༌། དེ་ནི་མ༵་ནི༵ང་འདི༵་མི༵ན་པར་མ༵་ནི༵ང་གཞ༵ན་མཆོ༵ག་ཡི༵ན་པ་དང༌། དེ་ནི་རྟེ༵ན་འབྲེ༵ལ་འ༵དི་མི༵ན་པར་རྟེ༵ན་འབྲེ༵ལ་གཞ༵ན་མཆོ༵ག་ཡི༵ན་པ་དང༌། དེ་ནི་གཞུང་ལམ་ཕ༵ར་ཕྱི༵ན་འདི༵་མི༵ན་པར་གཉིས་མེད་ཡེ་ཤེས་ཀྱི་ཕ༵ར་ཕྱི༵ན་གཞ༵ན་མཆོ༵ག་ཡི༵ན་པ་དང༌། དེ་ནི་སྟོ༵ང་ཉི༵ད་རྣམ་ཤེས་ལ་སྣང་བ་འ༵དི་མི༵ན་པར་སྟོ༵ང་ཉི༵ད་གཞ༵ན་མཆོ༵ག་ཡི༵ན་པར་གྲུབ་སྟེ། འདི་ཉིད་ཀྱི་བསྡུས་དོན་འགྲེལ་བ་ལས། བཀའ་འཁོར་ལོ་ཐ་མ་གཉིས་དང༌། རྒྱུད་སྡེ་བཞིའི་བརྗོད་བྱའི་གཙོ་བོར་སྟོང་ཉིད་ཟབ་མོ་དེར་གཅིག་ཅིང༌། དེ་ཡང་རྣམ་ཤེས་དང་རང་སྟོང་ལ་སོགས་ཀུན་རྫོབ་ཀྱི་ཆོས་གང་ཡང་ཡིན་མི་སྲིད་ཀྱི་རང་བྱུང་ཡེ་ཤེས་དོན་དམ་པའི་ཚད་མ་ཕུང་པོ་ཁམས་སོགས་བདག་རིག་གཞན་རིག་ཐམས་ཅད་པ་ཆ་མེད་ཀུན་འགྲོ་འགྱུར་མེད་ཡོངས་གྲུབ་ལ་སོགས་ཟབ་མོ་མཐར་ཐུག་ཐམས་ཅད་ཡིན་པར་བསྟན་ཏོ། །ཞེས་གསུངས་པའི་ཕྱིར་རོ། །འདིའི་གོང་གི་དངོས་སྨྲ་མ་ཡིན་དབུ་མ་ཆེན་པོ་ཡིན། ཞེས་སོགས་ལ། གཞན་ཕྱོགས་ཀྱི་མཁས་པ་གུང་ཐང་བསྟན་པའི་སྒྲོན་མེའི་དྲང་ངེས་མཆན་འགྲེལ་རྣམ་རིག་གཞུང་བརྒྱའི་སྣང་བ་ལས། ཡང་ཁ་ཅིག་དེའི་ཡོངས་གྲུབ་དངོས་པོར་མི་འདོད་དེ་སྟོང་ཐུན་ལས་སྟོང་གཞི་བདེ་གཤེགས་སྙིང་པོ་དངོས་མེད་དེ་ཉིད་གཞན་དབང་དངོས་པོ་འདུས་བྱས་ཀྱི་ཚོགས་ཀྱིས་སྟོང་གཞི་གཞན་སྟོང་གཞུང་དེ་དག་གིས་བསྟན་ནོ་སྙམ་དུ་བཟུང་ནས། ཞེས་གསུངས་པའི་ཕྱིར་ན་མ་ཁྱབ་སྟེ། དེས་དངོས་པོར་འདོད་ཀྱང་ཞེས་ཇོ་ནང་པའི་དོན་དམ་བདེ་གཤེགས་སྙིང་པོ་དངོས་པོ་ཡིན་པར་འདོད་པར་བཤད་ལ་དེ་ཡང་མཆན་དེར་བཀའ་བསྡུ་བཞི་བར་དངོས་སྨྲ་མ་ཡིན་དབུ་མ་ཆེན་པོ་ཡིན། ཞེས་པའི་ལུང་ཡི་གེ་ནོར་ནས་དངོས་མེད་མ་ཡིན་དབུ་མ་ཆེན་པོ་ཡིན་ཞེས་དྲངས་འདུག་པས་དེ་ལ་ཐུགས་བསམ་བཏང་བ་འདྲའོ། །འོན་ཀྱང་ཇོ་ནང་བའི་དོན་དམ་བདེ་གཤེགས་སྙིང་པོ་དངོས་པོ་ཡིན་པར་ཁས་མི་ལེན་ཏེ། དེས་དེ་དངོས་དང་དངོས་མེད་ལས་འདས་པའི་ཕུང་གསུམ་པ་ཡིན་པར་ཁས་ལེན་པ་ཡིན་པའི་ཕྱིར་ཏེ། བཀའ་བསྡུ་བཞི་བ་ལས། ཤེས་བྱ་ཐམས་ཅད་དངོས་དང་དངོས་མེད་དུ། །འདུས་པར་འདོད་པ་གསུམ་ལྡན་མར་བཅད་ལུགས། །ཆོས་ཉིད་དབུ་མ་ཤེས་བྱའི་མཆོག་ཡིན་ཡང༌། །དངོས་པོ་དངོས་མེད་གང་ཡང་མ་ཡིན་གྱི། །ཕུང་བོ་གསུམ་པར་བཞེད་པ་རྫོགས་ལྡན་ལུགས། །ཞེས་སོགས་དང༌། རི་ཆོས་ལས། དེ་ལྟ་བས་ན་ཤེས་བྱ་ཐམས་ཅད་དངོས་པོ་དང་དངོས་མེད་གཉིས་སུ་ཁ་ཚོན་ཆོད་པར་སྨྲ་བ་རྣམས་ཀྱིས་ནི་ཆོས་ཉིད་དོན་དམ་པའི་གནས་ལུགས་མ་རྟོགས་པ་ཉིད་དུ་ཟད་དེ། དེ་ཤེས་བྱ་ཡིན་ཡང་དངོས་པོ་དང་དངོས་མེད་གང་ཡང་མ་ཡིན་པའི་ཕྱིར་རོ། །ཞེས་གསུངས་སོ། །དེ་ལྟར་བཞེད་པ་ཡང༌། ཀྱེའི་རྡོ་རྗེའི་རྒྱུད་ལས། ངེས་པར་དངོས་པོ་ཐམས་ཅད་དག་པ་དེ་བཞིན་ཉིད་དུ་བརྗོད། །ཅེས་དང༌། དཔལ་རྡོ་རྗེ་ཕྲེང་བ་ལས། དངོས་དང་དངོས་མེད་ལས་གྲོལ་ཞིང༌། །གང་དུའང་ལྷག་པར་མི་གནས་པ། །དངོས་པོ་ཐམས་ཅད་ནུབ་པའོ། །ཞེས་དང༌། ཇི་སྐད་དུ། ཐོག་མཐའ་མེད་ཅིང་ཞི་བ་སྟེ། །དངོས་དང་དངོས་མེད་ཟད་པའི་གཙོ། །སྟོང་ཉིད་སྙིང་རྗེ་དབྱེར་མེད་ཀྱང༌། །བྱང་ཆུབ་སེམས་ཞེས་བསྟན་པའོ། །ཞེས་སོགས་ལ་བརྟེན་ནས་གསུངས་པའོ། །བདུན་པ་བདེན་གཉིས་ཀྱི་རྣམ་དབྱེ་ཕྱེས་ནས་དོན་དམ་པའི་བྱང་ཆོས་སོགས་འགོག་བདེན་ཟབ་མོ་ཡིན་པར་བསྟན་པ་ནི། བྱང་ཆུབ་ཕྱོགས་ཀྱི་ཆོས་རྣམས་ཐམས་ཅད་ཀྱང༌། །ལམ་བདེན་འདི་མིན་དོན་དམ་འགོག་བདེན་ཡིན། །འཕགས་པའི་བདེན་པ་བསམ་གཏན་ཚད་མེད་དང། །གཟུགས་མེད་སྙོམས་འཇུག་རྣམ་ཐར་སྙོམས་འཇུག་དགུ། །རྣམ་ཐར་སྒོ་གསུམ་ཏིང་འཛིན་གཟུངས་ཀྱི་སྒོ། །དེ་བཞིན་གཤེགས་པའི་སྟོབས་བཅུ་མི་འཇིགས་བཞི། །སོ་སོར་རིག་བཞི་བྱམས་ཆེན་སྙིང་རྗེ་ཆེ། །མ་འདྲེས་བཅོ་བརྒྱད་མཁྱེན་གསུམ་འཕགས་རྣམས་ཀྱང༌། །ཀུན་རྫོབ་འདུས་བྱས་ལམ་བདེན་འདི་མིན་གྱི། །འདི་ལས་གཞན་མཆོག་ཕ་རོལ་འགོག་བདེན་ཏེ། །རྩ་བར། བྱང་ཆུབ་ཕྱོགས་ཀྱི་ཆོས་རྣམས་ཐམས་ཅད་ཀྱང༌། །ཞེས་པ་ནས། འགོག་བདེན་ཏེ། །ཞེས་པའི་བར་ཤོ་ལོ་ཀ་གཉིས་དང་རྐང་བ་གཉིས་བྱུང༌། དེའི་ཚིག་དོན་ན།ི དོན་དམ་པའི་བྱང༵་ཆུ༵བ་ཀྱི་ཕྱོག༵ས་ཀྱི༵་ཆོ༵ས་རྣམ༵ས་ཐམ༵ས་ཅ༵ད་ཀྱ༵ང་ལ༵མ་བདེ༵ན་འ༵དི་མི༵ན་པར་དོ༵ན་ད༵མ་པའི་འགོ༵ག་བདེ༵ན་ཡི༵ན་པ་དང༌། དེ་བཞིན་དུུ་དོན་དམ་པའི་འཕ༵གས་པ༵འི་བདེ༵ན་པ༵་བཞི་དང༌། དོན་དམ་གྱི་བས༵མ་གཏ༵ན་དང༌། དོན་དམ་གྱི་ཚ༵ད་མེ༵ད་ད༵ང༌། དོན་དམ་གྱི་གཟུ༵གས་མེ༵ད་སྙོམ༵ས་འཇུ༵ག་དང༌། དོན་དམ་པའི་རྣ༵མ་ཐ༵ར་དང༌། དོན་དམ་གྱི་སྙོ༵མས་འཇུ༵ག་ད༵གུ་དང༌། དོན་དམ་པའི་རྣ༵མ་ཐ༵ར་སྒོ༵་གསུ༵མ་དང༌། དོན་དམ་གྱི་ཏི༵ང་ངེ་འཛི༵ན་དང༌། དོན་དམ་གྱི་གཟུང༵ས་ཀྱི༵་སྒོ༵་དང་དོན་དམ་པའི་དེ༵་བཞི༵ན་གཤེག༵ས་པ༵འི་སྟོབ༵ས་བཅུ༵་མི༵་འཇིག༵༵ས་པ་བཞི༵་དང༌། དོན་དམ་པའི་སོ༵་སོ༵་རི༵ག་པ་བཞི༵་དང༌། དོན་དམ་པའི་བྱམ༵ས་ཆེ༵ན་སྙི༵ང་རྗེ༵་ཆེ༵་བ་དང༌། དོན་དམ་པའི་མ༵་འདྲེ༵ས་པའི་ཆོས་བ༵ཅོ་བརྒྱ༵ད་དང༌། རང་བཞིན་གྱི་མཁྱེ༵ན་པ་གསུ༵མ་དང་དོན་དམ་པའི་འཕག༵ས་པ་རྣམ༵ས་ཀྱ༵ང༌། ཀུ༵ན་རྫོ༵བ་འ༵དུས་བྱ༵ས་ལ༵མ་གྱི་བདེ༵ན་པ་འ༵དི་མི༵ན་གྱི༵་འ༵དི་ལ༵ས་གཞ༵༵ན་མ༵ཆོག་ཕ༵་རོ༵ལ་གྱི་འགོ༵ག་བ༵དེན་ཏེ༵། ཟབ་མོ་མཐར་ཐུག་གི་རང་བཞིན་མྱང་འདས་ཀྱི་འགོག་བདེན་ཡིན་པར་བསྟན་པ་ཡིན་ཞིང༌། དེ་ཡང་བྱང་ཆུབ་ཕྱོགས་ཀྱི་ཆོས་སོགས་ལ་ཡང་བདེན་གཉིས་ཀྱི་རྣམ་དབྱེ་ཕྱེས་ནས་དོན་དམ་བྱང་ཆུབ་ཀྱི་ཕྱོགས་ཀྱི་ཆོས་སོགས་ཀུན་རྫོབ་གཏན་མ་ཡིན་པར་འགོག་བདེན་ཟབ་མོ་ཡིན་པར་བསྟན་ཞེས་རྟོགས་པའི་དབང་ཕྱུག་ཆོས་རྗེ་ཀུན་མཁྱེན་རང་ཉིད་ཀྱིས་གསུངས་སོ། །བརྒྱད་པ་ངེས་དོན་གྱི་མདོ་སྡེ་དུ་མའི་དགོངས་པ་བསྟན་པ་ལ་ནམ་མཁའ་དང་ཆོས་ཉིད་གཉིས་དཔེ་དཔེ་ཅན་དུ་གསུངས་པའི་དགོངས་པ་བསྟན་པ། ཆོས་དབྱིངས་སྟོང་ཉིད་ཡིན་པའི་སྟོང་ཚུལ་གྱི་དཔེ་དོན་གྱི་དགོངས་པ་བསྟན་པ། ལ་ལ་སྣང་མི་སྣང་གི་དཔེ་དོན་སྦྱར་ཏེ་གསུངས་པའི་དགོངས་པ་བསྟན་པ། ཆོས་དབྱིངས་བདེ་བ་ཆེན་པོ་དཔེ་དོན་སྦྱར་ཏེ་གསུངས་པའི་དགོངས་པ་བསྟན་པ། དར་ཡུག་ཆེན་པོའི་དཔེས་མཚོན་པའི་དགོངས་པ་བསྟན་པ། ཆོས་ཉིད་རྟག་པར་གནས་ཀྱང་རྣམ་ཤེས་ཀྱིས་མཐོང་བ་མེད་པ་དཔེས་མཚོན་པའི་དགོངས་པ་བསྟན་པ། ཆོས་དབྱིངས་དཔེ་ལས་འདས་པའི་དགོངས་པ་བསྟན་པ། བུམ་ནང་མར་མེ་དབུལ་པོའི་གཏེར་ཆེན་ལ་སོགས་པའི་དཔེས་མཚོན་པའི་དགོངས་པ་བསྟན་པ། ཆུ་ཁམས་གསེར་དང་ནམ་མཁའི་དཔེས་མཚོན་པའི་དགོངས་པ་བསྟན་པ། ནམ་མཁའ་མི་ཟད་པ་ལ་སོགས་པའི་དཔེས་མཚོན་པའི་དགོངས་པ་བསྟན་པ། སྤྲིན་ཡོད་མེད་ཀྱི་ནམ་མཁའ་ཡང་ནམ་མཁའ་གཅིག་པས་དགོངས་པ་བསྟན་པ། སྤྲིན་ཡོད་ཀྱི་ནམ་མཁའ་སྤྲིན་སངས་སུ་གྱུར་པའི་དཔེས་མཚོན་པའི་དགོངས་པ་བསྟན་པ། དཔེ་མེད་དང་དཔེ་དང་བཅས་པར་གསུངས་པའི་དགོངས་པ་བསྟན་པ་དང་བཅུ་གསུམ། དང་པོ་ནི། རྒྱུ་རྐྱེན་མེད་ཅིང་འཕོ་འགྱུར་མེད་པ་དང༌། །ཆ་མེད་ཀུན་འགྲོ་ཀུན་ལ་ཁྱབ་པ་སོགས། །ནམ་མཁའ་འདུས་མ་བྱས་ཀྱི་དཔེ་ཡིས་གསུངས། །རྩ་བར། རྒྱུ་རྐྱེན་མེད་ཅིང་འཕོ་འགྱུར་མེད་པ་དང༌། །ཞེས་པ་ནས་དཔེ་ཡིས་གསུངས༌། ཞེས་པའི་བར་རྐང་བ་གསུམ་བྱུང༌། དེའི་ཚིག་དོན་ནི། ཆོས་ཉིད་དེ་རྒྱུ༵་དང་རྐྱེ༵ན་མེ༵ད་ཅི༵ང་འ༵ཕོ་འགྱུ༵ར་མེ༵ད་པ༵་ད༵ང༌། ཆ༵་མེ༵ད་ཀུ༵ན་འ༵གྲོ་ཀུ༵ན་ལ༵་ཁྱ༵བ་པ༵་སོག༵ས་ཡིན་པ་ནི་ན༵མ་མཁ༵འ་འདུ༵ས་མ༵་བྱ༵ས་ཀྱི༵་ད༵པེ་ཡི༵ས་ལེགས་པར་གསུང༵ས་པ་ཡིན་ཏེ། མྱང་འདས་ཆེན་པོའི་མདོ་ལས། དེ་བཞིན་གཤེགས་པ་ནི་སྐྱེ་བ་མེད་པ་རིགས་མེད་པ་སྟེ་སྐྱེ་བ་དང་རིགས་མེད་པས་ན་རྟག་པའོ། །རྟག་པའི་ཆོས་ནི་ཐམས་ཅད་ཀུན་ཏུ་ཁྱབ་སྟེ། ཇི་ལྟར་ནམ་མཁའ་ཀུན་ཏུ་ཁྱབ་པ་བཞིན་ནོ། །ཞེས་དང༌། རྒྱུད་བླ་མ་ལས། སེམས་ཀྱི་རང་བཞིན་ནམ་མཁའ་ཡི། །ཁམས་ལྟར་རྒྱུ་མེད་རྐྱེན་མེད་དེ། །ཚོགས་པ་མེད་ཅིང་སྐྱེ་བ་དང༌། །འཇིག་དང་གནས་པའང་ཡོད་མ་ཡིན། །སེམས་ཀྱི་རང་བཞིན་འོད་གསལ་གང་ཡིན་པ། །དེ་ནི་ནམ་མཁའ་བཞིན་དུ་འགྱུར་མེད་དེ། །ཡང་དག་མིན་རྟོག་ལས་བྱུང་འདོད་ཆགས་སོགས། །གློ་བུར་དྲི་མའི་དེ་ཉོན་མོངས་མི་འགྱུར། །ཞེས་དང༌། ཡང་དེ་ལས། ཇི་ལྟར་རྟོག་མེད་བདག་ཉིད་ཅན། །ནམ་མཁའ་ཀུན་དུ་རྗེས་སོང་ལྟར། །སེམས་ཀྱི་རང་བཞིན་དྲི་མེད་དབྱིངས། །དེ་བཞིན་ཀུན་ཏུ་འགྲོ་བ་ཉིད། །དེ་སྤྱིའི་མཚན་ཉིད་ཉེས་པ་དང༌། །ཡོན་ཏན་མཐར་ཐུག་ཁྱབ་པ་སྟེ། །གཟུགས་ཀྱི་རྣམ་པ་དམན་པ་དང༌། །བར་མ་མཆོག་ལ་ནམ་མཁའ་བཞིན། །ཞེས་སོགས་གསུངས་པའི་ཕྱིར་རོ། །གཉིས་པ་ཆོས་དབྱིངས་སྟོང་ཉིད་ཡིན་པའི་སྟོང་ཚུལ་གྱི་དཔེ་དོན་གྱི་དགོངས་པ་བསྟན་པ་ནི། རྩ་བར། རང་གིས་མི་སྟོང་གཞན་གྱི་སྟོང་བ་ནི། །གྲོང་སྟོང་བུམ་པ་སྟོང་གསུམ་དཔེ་ཡིས་གསུངས། །ཞེས་རྐང་བ་གཉིས་བྱུང༌། དེའི་ཚིག་དོན་ནི། ཆོས་ཉིད་ར༵ང་གི༵ས་མི༵་སྟོང༵་བར་གཞ༵ན་ཀུན་རྫོབ་གློ་བུར་གྱི༵ས་སྟོ༵ང་བ༵་ནི༵་གྲོ༵ང་ཁྱེར་མིས་སྟོ༵ང་བ་དང༌། བུ༵མ་པ༵་ཆུས་སྟོང་བ་དང༌། ཀླུང་ཆུ་མི་འབབ་པས་སྟོང་བ་སྟེ། སྟོ༵ང་གསུ༵མ་དཔེ༵་ཡི༵ས་ཆོས་ཉིད་བདེ་གཤེགས་སྙིང་པོ། གློ་བུར་བའི་ཉེས་ཚོགས་ཀྱིས་སྟོང་ཉིད་རང་གི་ངོ་བོས་མི་སྟོང་བར་རྣམ་པ་ཀུན་ལྡན་ཡིན་པར་གསུ༵ངས་པ་ཡིན་ཏེ། སོར་ཕྲེང་གི་མདོ་ལས། བཙུན་པ་འཇམ་དཔལ་ཤིན་ཏུ་སྟོང་བ་ཉིད་ལ་བསྒོམས་ཤིང་སྟོང་པར་ཟབ་ཏུ་བསམ་ནས་ཆོས་ཐམས་ཅད་ཞིག་པ་མི་བཟོད་པར་མཐོང་ངོ། །ཐར་བ་སྟོང་བ་མ་ཡིན་པ་ཡང༌། སྟོང་བར་མཐོང་ཞིང་རྟོག་གོ །འདི་ལྟ་སྟེ། དཔེར་ན་སེར་བའི་རིལ་བུ་ནོར་བུའོ་སྙམ་དུ་བསམ་ནས་ནོར་བུ་ཡང་སྟོང་བར་སྒོམ་པ་དེ་བཞིན་དུ། ཁྱོད་ཀྱང་སྟོང་བ་མ་ཡིན་པའི་ཆོས་ལ་སྟོང་བར་སེམས་དེ་ཆོས་སྟོང་བར་མཐོང་ནས་སྟོང་བ་མ་ཡིན་པའི་ཆོས་ལ་ཡང་སྟོང་བར་འཇིག་པར་བྱེད་དོ། །སྟོང་བའི་ཆོས་ཀྱང་གཞན། སྟོང་པ་མ་ཡིན་པའི་ཆོས་རྣམས་ཀྱང་གཞན་ཏེ། སེར་བའི་རིལ་བུ་ལྟ་བུར་ཉོན་མོངས་པ་བྱེ་བ་ནི་སྟོང་བའོ། །སེར་བའི་རིལ་བུ་ལྟ་བུར་མི་དགེ་བའི་ཕྱོགས་ཀྱི་ཆོས་རྣམས་ནི་མྱུར་དུ་འཇིག་གོ །ནོར་བུ་བཻ་ཌཱུརྱ་བཞིན་དུ་སངས་རྒྱས་ནི་རྟག་པ་སྟེ་ཐར་བའི་མཐའ་ཡང་ནོར་བུ་བཻ་ཌཱུརྱ་བཞིན་ནོ་ཞེས་པ་ནས། འཇམ་དཔལ་གང་གྲོང་ཁྱེར་བརྩེགས་པའི་ཁྱིམ་སྟོང་པ་ནི་མི་མེད་པས་སྟོང་ངོ༌། །བུམ་པ་ནི་ཆུ་མེད་པས་སྟོང་ངོ༌། །ཀླུང་ནི་ཆུ་མི་འབབ་པས་སྟོང་ངོ༌། །ཅི་གྲོང་གི་བར་སྐབས་ཁྱིམ་མེད་པ་ལ་སྟོང་བ་སྟོང་བ་ཞེས་བྱའམ་ཅི་ཁྱིམ་ཐམས་ཅད་སྟོང་བ་ཡིན་ནམ། ཐམས་ཅད་སྟོང་བ་མ་ཡིན་གྱི། མི་མེད་པས་སྟོང་བ་ཞེས་བྱའོ། །ཅི་བུམ་པ་ཐམས་ཅད་སྟོང་བ་ཡིན་ནམ། ཐམས་ཅད་སྟོང་བ་མ་ཡིན་གྱི། །ཆུ་མེད་པས་སྟོང་བ་ཞེས་བྱའོ། །ཅི་ཀླུང་ཐམས་ཅད་སྟོང་བ་ཡིན་ནམ། །ཐམས་ཅད་སྟོང་བ་མ་ཡིན་གྱི་ཆུ་མི་འབབ་པའི་ཕྱིར་སྟོང་བ་ཞེས་བྱ་སྟེ། དེ་བཞིན་དུ་ཐར་བ་ཐམས་ཅད་ཀྱིས་སྟོང་བ་མ་ཡིན་གྱི་ཉེས་པ་ཐམས་ཅད་དང་བྲལ་བའི་ཕྱིར་ཐར་བ་སྟོང་བ་ཞེས་བྱའོ། །སངས་རྒྱས་བཅོམ་ལྡན་འདས་ནི་སྟོང་བ་མ་ཡིན་ཏེ་ཉེས་པ་ཐམས་ཅད་དང་བྲལ་ཞིང་ཉོན་མོངས་པ་བྱེ་བའི་མི་དང་ལྷ་མེད་པའི་ཕྱིར་སྟོང་བ་ཞེས་བྱའོ། །ཞེས་གསུངས་པ་ཡིན་པའི་ཕྱིར་རོ། །གསུམ་པ་ལ་སྣང་མི་སྣང་གི་དཔེ་དོན་སྦྱར་ཏེ་གསུངས་པའི་དགོངས་པ་བསྟན་པ་ནི། རྩ་བར། རྟོག་ལ་མི་སྣང་མི་རྟོག་ཡེ་ཤེས་ལ། །མངོན་སུམ་སྣང་བ་པྲ་ཕབ་དཔེ་ཡིས་གསུངས། །ཞེས་རྐང་བ་གཉིས་བྱུང༌། དེའི་ཚིག་དོན་ནི། དོན་དམ་པའི་ཆོས་རྣམས་རྣམ་ཤེས་སམ་རྟོ༵ག་པ་ལ༵་མི༵་སྣ༵ང་བར་སྤྲོས་བྲལ་མི༵་རྟོ༵ག་པའི་ཡེ༵་ཤེ༵ས་ལ༵་མངོ༵ན་སུ༵མ་དུ་སྣ༵ང་བ༵་ཡིན་པ་དེ་པྲ༵་ཕ༵བ་ད༵པེ་ཡི༵ས་གསུང༵ས་པ་ཡིན་ཏེ། མྱང་འདས་ཆེན་པོའི་མདོ་ལས། བཅོམ་ལྡན་འདས་གལ་ཏེ་སེམས་ཅན་ཐམས་ཅད་ལ་སངས་རྒྱས་ཀྱི་རང་བཞིན་རྡོ་རྗེ་མཐུ་བོ་ཆེ་ལྟ་བུ་མཆིས་ན་དོན་ཅིའི་སླད་དུ། སེམས་ཅན་ཐམས་ཅད་ཀྱིས་མི་མཐོང༌། བཅོམ་ལྡན་འདས་ཀྱི་བཀའ་སྩལ་པ། རིགས་ཀྱི་བུ་དཔེར་ན་གཟུགས་ནི་སྔོན་པོ་དང་སེར་པོ་དང་དམར་པོ་དང་དཀར་པོ་དང་རིང་པོ་དང་ཐུང་ངུ་ཐ་དད་པ་ཡོད་ཀྱང༌། དམུས་ལོང་གིས་མི་མཐོང་ངོ༌། །དེ་ལྟར་མི་མཐོང་མོད་ཀྱང༌། སྔོན་པོ་དང༌། སེར་པོ་དང༌། དམར་པོ་དང༌། དཀར་པོ་ཐ་དད་པ་དང་དབྱིབས་རིང་ཐུང་མེད་ཅེས་བྱ་མི་རུང་ངོ། །དེ་ཅིའི་ཕྱིར་ཞེ་ན། དམུས་ལོང་གིས་མི་མཐོང་ཡང་མིག་ཅན་གྱིས་མི་མཐོང་བ་མ་ཡིན་ནོ། །སངས་རྒྱས་ཀྱི་རང་བཞིན་ཡང་དེ་དང་འདྲ་སྟེ། སེམས་ཅད་ཐམས་ཅད་ཀྱིས་མི་མཐོང་མོད་ཀྱི་བྱང་ཆུབ་སེམས་དཔའ་ས་བཅུ་པས་ཕྱོགས་ཙམ་ཞིག་མཐོང་ལ། དེ་བཞིན་གཤེགས་པས་ནི་མ་ལུས་པར་གཟིགས་སོ། །བྱང་ཆུབ་སེམས་དཔའ་ས་བཅུ་པས་སངས་རྒྱས་ཀྱི་རང་བཞིན་ལ་མཚན་མོའི་གཟུགས་ལྟ་བུར་མཐོང༌། དེ་བཞིན་གཤེགས་པས་ཉིན་པར་གྱི་གཟུགས་ལྟ་བུར་གཟིགས་སོ། །རིགས་ཀྱི་བུ་དཔེར་ན་ཞར་བའི་ནི་གཟུགས་གསལ་བར་མི་མཐོང་སྟེ། དེ་ལ་སྨན་པ་མཁས་པས་མིག་བཅོས་ན་སྨན་དེའི་སྟོབས་ཀྱིས་གསལ་བར་མཐོང་བར་འགྱུར་རོ། །བྱང་ཆུབ་སེམས་དཔའ་ས་བཅུ་པ་ཡང་དེ་དང་འདྲ་སྟེ། སངས་རྒྱས་ཀྱི་རང་བཞིན་མཐོང་མོད་ཀྱང་མི་གསལ་ལོ། །དེ་ལ་དཔའ་བར་འགྲོ་བའི་ཏིང་ངེ་འཛིན་གྱི་སྟོབས་ཀྱིས་རབ་ཏུ་གསལ་བར་མཐོང་བར་འགྱུར་རོ། །ཞེས་དང༌། ཤེས་ལ་མི་མཐོང་བ་ཡོད་དོ། །ཞེས་དང༌། ཤེས་ལ་ཅུང་ཟད་མཐོང་བ་ཡོད་དོ། །ཞེས་སོགས་གསུངས་པའི་ཕྱིར་རོ། །བཞི་བ་ཆོས་དབྱིངས་བདེ་བ་ཆེན་པོར་དཔེ་དོན་སྦྱར་ཏེ་གསུངས་པའི་དགོངས་པ་བསྟན་པ་ནི། རྩ་བར། རང་བཞིན་བདེ་ཆེན་སོ་སོར་རང་རིག་ནི། །ཀུན་ཏུ་རུ་སྐྱེས་བདེ་བའི་དཔེ་ཡིས་གསུངས། །ཞེས་རྐང་བ་གཉིས་བྱུང༌། དེའི་ཚིག་དོན་ནི། དོན་དམ་པའི་ར༵ང་བཞི༵ན་འགྱུར་མེད་བ༵དེ་བ་ཆེ༵ན་པོ་སོ༵་སོ༵ར་ར༵ང་རི༵ག་ནི༵་ཀུན༵་ཏུ༵་༼དུ་༽རུ༷་སྐྱེ༵ས་བ༵དེ་བ༵འི་ད༵པེ་ཡི༵ས་གསུ༵ངས་པ་ཡིན་ཏེ། དཔལ་ཀྱེའི་རྡོ་རྗེ་ལས། བདེ་བ་ནག་ཅིང་བདེ་བ་སེར། །བདེ་བ་དམར་པོ་བདེ་བ་དཀར། །བདེ་བ་ལྗང་ཁུ་བདེ་བ་སྔོ། །བདེ་བ་རྒྱུ་དང་མི་རྒྱུ་ཀུན། །བདེ་བ་ཤེས་རབ་བདེ་བ་ཐབས། །ཀུན་ཏུ་རུ་སྐྱེས་བདེ་དེ་བཞིན། །བདེ་བ་དངོས་དང་དངོས་མེད་བདེ། །བདེ་བ་རྡོ་རྗེ་སེམས་དཔར་བརྗོད། །ཅེས་གསུངས་པའི་ཕྱིར། ཀུན་དུ་རུ་ནི་དབང་པོ་ཉིས་སྦྱོར་ཡིན་ནོ། །ལྔ་བ་དར་ཡུག་ཆེན་པོའི་དཔེས་མཚོན་པའི་དགོངས་པ་བསྟན་པ་ནི། བདེན་གཉིས་རྒྱ་མཉམ་རྣམ་པ་མཚུངས་པ་དང༌། །རྣམ་པ་མང་ཞིང་ཡོན་ཏན་མང་པོ་དང༌། །དྲི་མའི་སྦུབས་སུ་ཆུད་པར་དཀའ་བ་སོགས། །དར་ཡུག་ཆེན་པོའི་དཔེ་ཡིས་གསལ་བར་གསུངས། །རྩ་བར། བདེན་གཉིས་རྒྱ་མཉམ་རྣམ་པ་མཚུངས་པ་དང༌། །ཞེས་པ་ནས། གསལ་བར་གསུངས་ཞེས་པའི་བར་ཤོ་ལོ་ཀ་གཅིག་བྱུང༌། དེའི་ཚིག་དོན་ནི། ཀུན་རྫོབ་བདེན་པ་དང༌། དོན་དམ་བདེ༵ན་པ་ག༵ཉིས་རྒྱ༵་མཉ༵མ་པའ༵མ་ཀུན་རྫོབ་ཀྱི་རང་བཞིན་ལ་དོན་དམ་གྱིས་ཁྱབ་པ་དང་རྣ༵མ་པ༵་མཚུང༵ས་པ༵་ད༵ང༌། རྣམ༵་པ༵་གྲངས་མ༵ང་ཞི༵ང་ཡོ༵ན་ཏ༵ན་མ༵ང་པོ༵འམ་མཐའ་ཡས་པ་དང་ལྡན་པ་ད༵ང༌། གློ་བུར་དྲི༵་མ༵འི་སྦུབ༵ས་སུ༵་ཆུ༵ད་པ༵ར་དཀ༵འ་བ༵་ལ་སོག༵ས་པ་རྣམས་སྟོང་གསུམ་ད༵ར་ཡུ༵ག་ཆེ༵ན་པོ༵འི་ད༵པེ་ཡི༵ས་གས༵ལ་བ༵ར་གསུ༵ངས་པ་ཡིན་ཏེ། སྟོང་གསུམ་དར་ཡུག་གི་མདོ་ལས། ཀྱེ་རྒྱལ་བའི་སྲས་འདི་ལྟ་སྟེ་དཔེར་ན་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཀྱི་ཚད་དང་ལྡན་པའི་དར་ཡུག་ཆེན་པོ་གཅིག་ཡོད་པར་གྱུར་ལ། དར་ཡུག་ཆེན་པོ་དེ་ལ་ཡང༌། སྟོང་གསུམ་གྱི་སྟོང་ཆེན་པོ་འཇིག་རྟེན་གྱི་ཁམས་ཐམས་ཅད་རྫོགས་པར་བྲིས་པར་གྱུར་ཏེ། འདི་ལྟ་སྟེ་ཁོར་ཡུག་ཆེན་པོའི་ཚད་དུ་ནི་ཁོར་ཡུག་ཆེན་པོ་བྲིས། ས་ཆེན་པོའི་ཚད་དུ་ནི་ས་ཆེན་པོ། སྟོང་གཉིས་པའི་འཇིག་རྟེན་གྱི་ཁམས་ཀྱི་ཚད་དུ་ནི། སྟོང་གཉིས་པའི་འཇིག་རྟེན་གྱི་ཁམས། སྟོང་གི་འཇིག་རྟེན་གྱི་ཁམས་ཀྱི་ཚད་དུ་ནི་སྟོང་གི་འཇིག་རྟེན་གྱི་ཁམས་གླིང་བཞི་བའི་འཇིག་རྟེན་ཀྱི་ཁམས་ཀྱི་ཚད་དུ་ནི་གླིང་བཞི་བའི་འཇིག་རྟེན་གྱི་ཁམས། ཞེས་པ་ནས། ཇི་ལྟར་རྡུལ་ཕྲ་རབ་ཀྱི་རྡུལ་གཅིག་ཏུ་དར་ཡུག་ཆེན་པོ་བཅུག་པ། དེ་བཞིན་དུ་རྡུལ་ཕྲ་རབ་གྱི་རྡུལ་མ་ལུས་པ་རྣམས་སུ་དེའི་ཚད་ཙམ་གྱི་དར་ཡུག་ཆེན་པོ་བཅུག་པར་གྱུར་ཏོ། །དེ་ནས་མཁས་པ་མཛངས་པ། གསལ་བ་ཡིད་གཞུང་པ་དེར་ཉེ་བར་བཞུགས་པའི་དཔྱོད་པ་དང་ལྡན་པའི་སྐྱེས་བུ་འགའ་ཞིག་སྐྱེས་ཏེ། དེ་ཡི་མིག་ལྷ་ཡིད་གྱུར་ཅིང༌། ཡོངས་སུ་དག་པ་འོད་གསལ་བར་གྱུར་པ་ཞིག་ལ་དེའི་ལྷའི་མིག་གིས་རྣམ་པར་བལྟས་ཏེ་འདི་ལྟ་བུར་གྱུར་བའི་དར་ཡུག་ཆེན་པོ་འདི་རྡུལ་ཕྲ་རབ་ཀྱི་རྡུལ་ཆུང་ངུ་འདི་ཉིད་ལ་གནས་ཏེ་སེམས་ཅན་འགའ་ལ་ཡང་ཉེ་བར་མཁོ་བར་མ་གྱུར་ཏོ། །དེ་འདི་སྙམ་དུ་སེམས་ཏེ། ཀྱེ་མའོ། །གང་བདག་གིས་བརྩོན་པ་ཆེན་པོའི་སྟོབས་དང༌། མཐུས་རྡུལ་ཕྲ་རབ་ཀྱི་རྡུལ་འདི་ཕྱེ་སྟེ་དར་ཡུག་ཆེན་པོ་འདི་འགྲོ་བ་ཐམས་ཅད་ཀྱི་ཉེ་བར་འཚོ་བར་བྱའོ་སྙམ་པས། དེ་བརྩོན་པ་ཆེན་པོའི་སྟོབས་ཀྱིས་མཐུ་བསྐྱེད་ཏེ། རྡོ་རྗེ་ཕྲ་མོས་རྡུལ་ཕྲ་རབ་ཀྱི་རྡུལ་དེ་ཕྱེ་ནས་བསམ་པ་ཇི་ལྟ་བ་བཞིན་དུ་དར་ཡུག་ཆེན་པོ་དེ་འགྲོ་བ་མཐའ་དག་ལ་ཉེ་བར་འཚོ་བར་བྱེད་ཅིང་གཅིག་ལ་ཇི་ལྟ་བ་བཞིན་དུ་རྡུལ་ཕྲ་རབ་ལུས་པ་མེད་པ་མཐའ་དག་ལ་དེ་ཁོ་ན་བཞིན་བྱེད་དོ། །ཀྱེ་རྒྱལ་བའི་སྲས་དེ་བཞིན་དུ་དེ་བཞིན་གཤེགས་པའི་ཡེ་ཤེས་ཚད་མེད་པའི་ཡེ་ཤེས། སེམས་ཅད་ཐམས་ཅད་ཉེ་བར་འཚོ་བའི་ཡེ་ཤེས་ཀྱང་སེམས་ཅན་ཐམས་ཅད་ཀྱི་སེམས་ཀྱི་རྒྱུད་ལ་མ་ཚང་བ་མེད་པར་རྗེས་སུ་བཞུགས་ཏེ༑ སེམས་ཅན་ཐམས་ཅད་ཀྱི་སེམས་རྒྱུད་དེ་དག་ཀྱང་དེ་བཞིན་གཤེགས་པའི་ཡེ་ཤེས་དང་འདྲ་བར་ཚད་མེད་དོ། །དེ་ལྟར་མོད་ཀྱི་འདུ་ཤེས་ཀྱི་འཛིན་པས་བཅིང་པའི་བྱིས་པ་རྣམས་ཀྱིས་དེ་བཞིན་གཤེགས་པའི་ཡེ་ཤེས་མི་ཤེས་རབ་ཏུ་མི་ཤེས་ཤིང༌། ཉམས་སུ་མི་མྱོང་མངོན་དུ་མི་བྱེད་དོ། །དེས་ན་དེ་བཞིན་གཤེགས་པའི་ཆགས་པ་མེད་པའི་ཡེ་ཤེས་ཀྱིས། ཞེས་པ་ནས། གང་ཡང་ངས་སེམས་ཅན་འདི་དག་ལ་འཕགས་པའི་ལམ་ཉེ་བར་བསྟན་པས། འདུ་ཤེས་ཀྱིས་བྱས་པའི་འཆིང་བ་མཐའ་དག་བསལ་བར་བྱ་སྟེ། ཞེས་པ་ནས། འདུ་ཤེས་ཀྱི་འཆང་བ་ཐམས་ཅད་ལོག་པ་དག་ལ་ནི་དེ་བཞིན་གཤེགས་པའི་ཡེ་ཤེས་ཚད་མེད་པ་དེ་འགྲོ་བ་མཐའ་དག་གི་ཉེ་བར་འཚོ་བར་འགྱུར་རོ། །ཞེས་གསུངས་པའི་ཕྱིར་རོ། །དྲུག་པ་ཆོས་ཉིད་རྟག་པར་གནས་ཀྱང་རྣམ་ཤེས་ཀྱིས་མཐོང་བ་མེད་པ་དཔེས་མཚོན་པའི་དགོངས་པ་བསྟན་པ་ནི། ཀུན་ཏུ་ཁྱབ་ཅིང་མདུན་ན་རྟག་གནས་ཀྱང༌། །རྣམ་ཤེས་ཀུན་གྱིས་མཐོང་བ་མེད་པའི་དཔེ། །འཇིག་རྟེན་ལིང་ཏོག་མིག་གིས་སྐྱོན་རྣམས་དང༌། །ཁྲོན་པ་རྐོ་བ་ལ་སོགས་མང་པོས་གསུངས། །རྩ་བར། ཀུན་ཏུ་ཁྱབ་ཅིང་མདུན་ན་རྟག་གནས་ཀྱང༌། །ཞེས་པ་ནས། མང་པོར་གསུངས། ཞེས་པའི་བར་ཤོ་ལོ་ཀ་གཅིག་བྱུང༌། དེའི་ཚིག་དོན་ནི། ཆོས་ཉིད་གཤེགས་སྙིང་དོན་དམ་པའི་ཡེ་ཤེས། བརྟན་གཡོ་ཀུ༵ན་ཏུ༵་ཁྱ༵བ་ཅི༵ང་ལུས་ཅན་རྣམས་ཀྱི་མདུ༵ན་ན༵་རྟ༵ག་ཏུ་གན༵ས་ཀྱ༵ང་རྣ༵མ་པར་ཤེ༵ས་པ་ཀུ༵ན་གྱི༵ས་མཐོ༵ང་བ༵་མེ༵ད་པ༵འི་དཔེ༵་ལ། འཇི༵ག་རྟེ༵ན་ན་ལི༵ང་ཏོ༵ག་གིས་རབ་རིབ་ཏུ་འགྱུར་བའི་མི༵ག་གི༵་སྐྱོ༵ན་རྣ༵མས་ད༵ང༌། ཁྲོ༵ན་པ༵་རྐོ༵་བ༵་ལ༵་སོག༵ས་པ་དཔེ་མ༵ང་པོ༵འི་གསུང༵ས་པ་ཡིན་ཏེ། རྔ་བོ་ཆེའི་མདོ་ལས༌། འོད་སྲུང་བཞི་པོ་འདི་དག་ནི་སེམས་ཅན་གྱི་ཁམས་ན་སྒྲིབ་པའི་རྒྱུ་དང་གཏན་ཚིགས་ཀྱི་དཔེ་ཡིན་ཏེ། བཞི་གང་ཞེ་ན། མིག་ལིང་ཏོག་སེར་པོ་དང༌། སྔོན་པོས་རབ་རིབ་ཏུ་གྱུར་པ་ལྟ་བུ་དང༌། ཟླ་བ་སྤྲིན་གྱིས་ཁེབས་པ་ལྟ་བུ་དང༌། ཁྲོན་པ་རྐོ་བ་ལྟ་བུ་དང༌། བུམ་པའི་ནང་གི་སྒྲོན་མེ་ལྟ་བུའོ། །འོད་སྲུང་བཞི་པོ་འདི་དག་ནི་སྙིང་པོ་ཡོད་དོ། །ཞེས་བྱ་བའི་རྒྱུ་དང་གཏན་ཚིགས་ཡིན་ཏེ་རྒྱུ་དང་གཏན་ཚིགས་དེ་དག་གིས་སེམས་ཅན་ཐམས་ཅད་དང་སྲོག་ཆགས་ཐམས་ཅད་ལ་སངས་རྒྱས་ཀྱི་ཁམས་ཡོད་དེ་མཚན་དང་དཔེ་བྱད་བཟང་པོ་མཐའ་ཡས་པས་བརྒྱན་པ་སྣང་བར་འགྱུར་ཞིང༌། ཁམས་དེས་སེམས་ཅན་རྣམས་ཀྱིས་མྱ་ངན་འདས་པ་ཐོབ་པར་འགྱུར་རོ། །དེ་ལ་མིག་རབ་རིབ་ཅན་ཞེས་བྱ་བ་ནི་ལིང་ཏོག་སེར་པོ་དང༌། སྔོན་པོས་གཡོགས་ནས་རབ་རིབ་དུ་གྱུར་བ་བཅོས་སུ་རུང་བ་ནི། ཇི་སྲིད་དུ་སྨན་པ་མ་རྙེད་པ་དེ་སྲིད་དུ་ལོང་བར་འགྱུར་ཞིང་སྨན་པ་རྙེད་ན་ཡང་མྱུར་དུ་མཐོང་བར་འགྱུར་རོ། །སྔོན་པོས་གཡོག་ནས་རབ་རིབ་ཏུ་གྱུར་བ་དེ་བཞིན་དུ་ཉོན་མོངས་པ་བྱེ་བའི་སྦུབས་ཀྱི་ཁེབས་པའི་ཁམས་འདི་ཇི་སྲིད་ཉན་ཐོས་དང་རང་སངས་རྒྱས་རྣམས་ལ་དགའ་བར་བྱེད་པ་དེ་སྲིད་དུ་བདག་ནི་བདག་མ་ཡིན་པར་འགྱུར་ཞིང༌། བདག་གི་བདག་ཏུ་འགྱུར་རོ། །གང་གི་ཚེ་སངས་རྒྱས་བཅོམ་ལྡན་འདས་རྣམས་ལ་དགའ་བར་འགྱུར་བ་དེའི་ཚེ་བདག་ཏུ་འགྱུར་ཞིང་དེའི་འོག་ཏུ་སྒྲུབ་ཏུ་རུང་བའི་མིར་འགྱུར་རོ། །མི་དེའི་མིག་ནད་ལིང་ཏོག་སེར་པོ་དང༌། སྔོན་པོའི་རབ་རིབ་གང་ཡིན་པ་ལྟར་ཉོན་མོངས་པ་རྣམས་བལྟ་བར་བྱའོ། །དེ་བཞིན་གཤེགས་པའི་སྙིང་པོ་ནི། མིག་བཞིན་དུ་ངེས་པར་ཡོད་དོ། །ཟླ་བ་སྤྲིན་གྱིས་ཁེབས་པ་ཞེས་བྱ་བ་ནི། ཇི་ལྟར་སྤྲིན་སྡུག་པོའི་ཁེབས་པའི་ཟླ་བའི་དཀྱིལ་འཁོར་མི་སྣང་བ་དེ་བཞིན་དུ་ཉོན་མོངས་པའི་སྦུབས་ཀྱིས་ཁེབས་པའི་ཁམས་མི་སྣང་ངོ༌། །གང་གི་ཚེ་ཉོན་མོངས་པའི་ཚོགས་སྤྲིན་བཞིན་དུ་བྲལ་བར་གྱུར་ན་དེའི་འོག་དུ་ཟླ་བ་ཉ་བ་བཞིན་དུ་ཁམས་སྣང་བར་འགྱུར་རོ། །དེ་ལ་ཁྲོན་པ་རྐོ་བ་ཞེས་བྱ་བ་ནི། དཔེར་ན་མི་ཞིག་ཁྲོན་པ་རྐོ་ཞིང་རྐོ་བ་ན་ཇི་ཙམ་ཇི་ཙམ་དུ་ས་སྐམ་པོ་བྱུང་བ་དེ་ཙམ་དེ་ཙམ་དུ་རྟགས་དེས་ན་འདི་ནས་ཆུ་རིང་ངོ་སྙམ་དུ་སེམས་ཤིང༌། གང་གི་ཚེ་འཇིམ་པ་བྱུང་བ་དེའི་ཚེ་རྟགས་དེས་ན་འདི་ནས་ཆུ་ཉེ་འོ་ཞེས་ཤེས་པར་འགྱུར་རོ། གང་གི་ཚེ་ཆུ་ལ་ཐུག་པ་དེའི་ཚེ་རྐོ་བའི་མཐར་ཕྱིན་པ་ཡིན་ནོ། །དེ་བཞིན་དུ་ཉན་ཐོས་དང་རང་སངས་རྒྱས་རྣམས་དེ་བཞིན་གཤེགས་པ་རྣམས་བརྙེས་པར་བྱེད་ཅིང་ལེགས་པར་སྤྱད་པ་སྤྱོད་པ་བསྟེན་པས་ཉོན་མོངས་པ་རྐོ་བར་བྱེད་དེ། བརྐོས་ནས་ཆུ་བཞིན་དུ་དེ་བཞིན་གཤེགས་པའི་སྙིང་པོ་རྙེད་པར་འགྱུར་རོ། །ཞེས་པ་ནས་འདི་དག་གིས་ཇི་ལྟར་ང་ལ་སེམས་ཅན་གྱི་ཁམས་ཡོད་པ་དེ་བཞིན་དུ་སེམས་ཅན་ཐམས་ཅད་ལ་ཡོད་པར་རིག་པར་བྱའོ། །ཞེས་གསུངས་པའི་ཕྱིར་རོ། །བདུན་པ་ཆོས་དབྱིངས་དཔེ་ལས་འདས་པའི་དགོངས་པ་བསྟན་པ་ནི། གཟུགས་མེད་གཟུགས་བཟང་ལུས་མེད་ལུས་མཆོག་སོགས། །འགལ་འདུས་སྐྱོན་མེད་མང་པོ་སྟོན་པའི་དཔེ། །འཇིག་རྟེན་འདི་ན་ཡོད་མེད་དེ་ཡི་ཕྱིར། །འཇིག་རྟེན་དཔེ་ལས་འདས་སོ་ཞེས་པ་དང༌། །དཔེར་བྱ་ཀུན་ལས་འདས་ཞེས་ལེགས་པར་གསུངས། །རྩ་བར། གཟུགས་མེད་གཟུགས་བཟང་ལུས་མེད་ལུས་མཆོག་སོགས། །ཞེས་པ་ནས། ལེགས་པར་གསུངས་ཞེས་པའི་བར་ཤོ་ལོ་ཀ་གཅིག་དང་རྐང་བ་གཅིག་བྱུང༌། དེའི་ཚིག་དོན་ནི་གཤེགས་སྙིང་འོད་གསལ་གྱི་ཆོས་ཉིད་འདི་ནི་ཀུན་རྫོབ་ཀྱི་གཟུ༵གས་མེ༵ད་པའི་གཟུག༵ས་བཟ༵ང་ཡིན་པ་དང༌། དེ་ནི་ཀུན་རྫོབ་ཀྱི་ལུ༵ས་མེ༵ད་ཅིང༌། དེ་ལས་འདས་པའི་ལུ༵ས་ཀྱི་མཆོ༵ག་དང་ལྡན་པ་སོ༵གས། འག༵ལ་འདུ༵ས་སྐྱོ༵ན་མེ༵ད་མ༵ང་པོ༵་སྟོན༵་པའམ་མཚོན་པའི༵་ད༵པེ་འཇི༵ག་རྟེ༵ན་འ༵དི་ན༵་ཡོ༵ད་པ་དེ་ནི་མེ༵ད་པ་དེ༵་ཡི༵་ཕྱི༵ར། དེས་ན་མདོ་རྒྱུད་དུ་མ་ལས་འཇི༵ག་རྟེ༵ན་དཔེ༵་ལ༵ས་འད༵ས་སོ༵། །ཞེ༵ས་གསུངས་པ༵་ད༵ང༌། དཔེ༵ར་བྱ༵་ཀུན༵་ལ༵ས་འད༵ས་ཞེ༵ས་ལེག༵ས་པ༵ར་གསུང༵ས་པའི་ཕྱིར་རོ། །བརྒྱད་པ་བུམ་ནང་མར་མེ་དབུལ་བོའི་གཏེར་ཆེན་ལ་སོགས་པའི་དཔེའི་མཚོན་པའི་དགོངས་པ་བསྟན་པ་ནི། ཀུན་ལ་ཡོད་ཀྱང་སེམས་ཅན་ཉོན་མོངས་ཀྱིས། །བསྒྲིབ་པའི་དཔེ་ནི་བུམ་ནང་མར་མེ་དང༌། །དབུལ་པོར་གཏེར་ཆེན་ལ་སོགས་མང་པོས་གསུངས། །རྩ་བར། ཀུན་ལ་ཡོད་ཀྱང་སེམས་ཅན་ཉོན་མོངས་ཀྱིས། །ཞེས་པ་ནས། མང་པོས་གསུངས་ཞེས་པའི་བར་རྐང་བ་གསུམ་བྱུང༌། དེའི་ཚིག་དོན་ནི། དོན་དམ་པའི་མཚན་དཔེ་ཡོངས་སུ་རྫོགས་པའི་སངས་རྒྱས་ནི་ལུས་ཅན་ཀུ༵ན་ལ༵་ཡོ༵ད་ཀྱ༵ང་སེམ༵ས་ཅ༵ན་རྣམས་ལ་ཉོ༵ན་མོང༵ས་ཀྱི༵ས་བསྒྲི༵བས་པ༵འི་ད༵པེ་ནི༵་བུ༵མ་ན༵ང་གི་མ༵ར་མེ༵་ད༵ང༌། དབུ༵ལ་པོ༵ར་གཏེ༵ར་ཆེ༵ན་གནས་པ་ལ༵་སོག༵ས་པ་དཔེ་མ༵ང་པོ༵ས་གསུ༵ངས་པ་ཡིན་ཏེ། རྔ་བོ་ཆེའི་མདོ་ལས། བུམ་ནང་གི་སྒྲོན་མེ་ཞེས་བྱ་བ་ནི་ཇི་ལྟར་བུམ་པའི་ནང་ན་སྒྲོན་མེ་ཡོད་པའི་འོད་ལམ་མེར་མ་ཡིན། ལྷན་ནེར་མ་ཡིན་ཞིང་སེམས་ཅན་རྣམས་ལ་ཅི་ཡང་མི་བྱེད་པ་བཞིན་དུ། དེ་བཞིན་གཤེགས་པའི་སྙིང་པོ་མཚན་དང་དཔེ་བྱད་བཟང་པོ་མཐའ་ཡས་པ་དང་ལྡན་པར་གསུངས་པ་ཡང་སེམས་ཅན་རྣམས་ཀྱི་དོན་མི་བྱེད་དོ། །གང་གི་ཚེ་ཡང་བུམ་པ་ཆག་ནས་དེ་ནས་སྒྲོན་མ་རང་སྣང་བས་སྲོག་ཆགས་རྣམས་ཀྱི་དོན་བྱེད་པར་གྱུར་པ་དེ་བཞིན་དུ་ཉོན་མོངས་པ་བྱེ་བའི་སྤུབས་ཅན་འཁོར་བའི་བུམ་པ་ན་དེ་བཞིན་གཤེགས་པའི་སྙིང་པོ་གནས་པ་སྒྲོན་མ་བཞིན་དུ་རབ་ཏུ་འབར་བའི་འཁོར་བའི་ཉོན་མོངས་པ་ཟད་པའི་ཚེ་བུམ་པ་ཆག་པའི་སྒྲོན་མ་བཞིན་དུ་དེ་བཞིན་གཤེགས་པ་སེམས་ཅན་རྣམས་ཀྱྀ་དོན་བྱེད་པར་འགྱུར་རོ། །ཞེས་དང༌། མགོན་པོ་ཀླུ་སྒྲུབ་ཀྱི་ཆོས་དབྱིངས་བསྟོད་པ་ལས། ཇི་ལྟར་མར་མེ་བུམ་ནང་གནས། །ཅུང་ཞིག་སྣང་བར་མི་འགྱུར་བ། །དེ་བཞིན་ཉོན་མོངས་བུམ་ནང་གནས། །ཆོས་ཀྱི་དབྱིངས་ཀྱང་མི་མཐོང་ངོ༌། །ཕྱོགས་ནི་གང་དང་གང་དག་གནས། །བུམ་པ་བུ་ག་གཏོད་གྱུར་པ། །དེ་དང་དེ་ཡི་ཕྱོགས་ཉིད་ནས། །འོད་ཀྱི་རང་བཞིན་འབྱུང་བར་འགྱུར། །གང་ཚེ་ཏིང་འཛིན་རྡོ་རྗེ་ཡིས། །བུམ་པ་དེ་ནི་བཅག་གྱུར་ན། །དེ་ཚེ་དེ་ནི་ནམ་མཁའ་ཡི། །མཐར་ཐུག་བར་དུ་སྣང་བར་བྱེད། །ཆོས་ཀྱི་དབྱིངས་ནི་སྐྱེ་མ་ཡིན། །ནམ་ཡང་འགག་པར་འགྱུར་བ་མེད། །དུས་རྣམས་ཀུན་དུ་ཉོན་མོངས་མེད། །ཐོག་མ་བར་མཐའ་དྲི་མ་བྲལ། །ཇི་ལྟར་རིན་ཆེན་བཻ་ཌཱུརྱ། །དུས་རྣམས་ཀུན་ཏུ་འོད་གསལ་ཡང༌། །རྡོ་ཡི་ནང་ན་གནས་གྱུར་ན། །དེ་ཡི་འོད་ནི་གསལ་མ་ཡིན། །དེ་བཞིན་ཉོན་མོངས་ཀྱིས་བསྒྲིབས་པའི། །ཆོས་དབྱིངས་ཤིན་ཏུ་དྲི་མེད་པའང༌། །འཁོར་བའི་འོད་ནི་གསལ་མ་ཡིན། །མྱ་ངན་འདས་ན་འོད་གསལ་འགྱུར། །ཞེས་དང༌། ཇི་སྐད་དུ། ཇི་ལྟར་མར་མེ་བུམ་ནང་གནས། །ཕྱི་རོལ་ཏུ་ནི་སྣང་མི་འགྱུར། །བུམ་པ་དེ་ཉིད་བཅག་གྱུར་ན། །དེ་འོག་མར་མེའི་འོད་སྣང་འགྱུར། །དེ་བཞིན་བུམ་པ་རང་ལུས་ཉིད། །དེ་ཉིད་མར་མེ་ལྟ་བུར་ཉིད། །བླ་མའི་ཁ་ཡིས་ལེགས་བཅག་ན། །སངས་རྒྱས་ཡེ་ཤེས་གསལ་བར་འགྱུར། །ཞེས་དང༌། དེ་བཞིན་གཤེགས་པའི་སྙིང་པོའི་མདོ་ལས། རིགས་ཀྱི་བུ་དག་གཞན་ཡང༌། འདི་ལྟ་སྟེ། དཔེར་ན་དབུལ་བོ་ཞིག་གི་ཁྱིམ་གྱི་ནང་གི་མཛོད་ཀྱི་འོག་གི་ས་ལ་གཏེར་ཆེན་པོ་དབྱིག་དང༌། གསེར་གྱིས་གང་བ་མཛོད་ཀྱི་ཚད་ཙམ་ཞིག་མི་བདུན་སྲིད་ཀྱི་སས་གཡོགས་པའི་འོག་ན་ཡོད་ལ། གཏེར་ཆེན་པོ་དེས་མི་དབུལ་བོ་དེ་ལ་འདི་སྐད་དུ། ཀྱེ་མི་ང་ནི་གཏེར་ཆེན་པོ་སྟེ་སས་གཡོགས་ཤིང་འདུག་གོ་ཞེས་མི་སྨྲ་སྟེ། འདི་ལྟ་སྟེ་གཏེར་ཆེན་པོ་ནི་སེམས་ཀྱི་ངོ་བོ་ཉིད་ཀྱིས་སེམས་ཅན་མ་ཡིན་པའོ། །མི་དབུལ་བོ་ཁྱིམ་གྱི་བདག་པོ་དེ་ནི་དབུལ་བའི་སེམས་ཀྱི་རྗེས་སུ་སེམས་ཤིང༌། དེ་ཉིད་ཀྱི་སྟེང་ན་རྣམ་པར་རྒྱུ་ཡང་སའི་འོག་ན་གཏེར་ཆེན་པོ་ཡོད་པ་དེ་མ་ཐོས་མི་ཤེས་མ་མཐོང་ངོ༌། །རིགས་ཀྱི་བུ་དག་དེ་བཞིན་དུ་སེམས་ཅན་ཐམས་ཅད་ཀྱི་མངོན་པར་ཞེན་པའི་ཡིད་ལ་བྱེད་པ་ཁྱིམ་ལྟ་བུར་གྱུར་བའི་འོག་ན་དེ་བཞིན་གཤེགས་པའི་སྙིང་པོ་སྟོབས་དང་མི་འཇིགས་པ་དང་མ་འདྲེས་པ་དང་སངས་རྒྱས་ཀྱི་ཆོས་ཐམས་ཅད་ཀྱི་མཛོད་ཀྱི་གཏེར་ཆེན་པོ་ཡོད་ཀྱང༌། སེམས་ཅན་དེ་དག་གཟུགས་དང་སྒྲ་དང་དྲི་དང་རོ་དང་རེག་པ་ལ་ཆགས་པའི་སྡུག་བསྔལ་བས་འཁོར་བ་ན་འཁོར་ཏེ་ཆོས་ཀྱི་གཏེར་ཆེན་པོ་དེ་མ་ཐོས་པས་ཐོབ་པར་མ་གྱུར་ཅིང༌། ཡོངས་སུ་སྦྱོང་བའི་ཕྱིར་བརྩོན་པར་ཡང་མི་བྱེད་དོ། །རིགས་ཀྱི་བུ་དག་དེ་ནས་དེ་བཞིན་གཤེགས་པ་འཇིག་རྟེན་དུ་བྱུང་སྟེ། བྱང་ཆུབ་སེམས་དཔའི་ནང་དུ་འདི་ལྟ་བུའི་ཆོས་ཀྱི་གཏེར་ཆེན་པོ་ཡང་དག་པར་རབ་ཏུ་སྟོན་ཏེ། ཞེས་པ་ནས། སྟོབས་དང༌། མི་འཇིགས་པ་དང༌། སངས་རྒྱས་ཀྱི་ཆོས་མང་པོའི་མཛོད་དུ་གྱུར་པ་ཡིན་ནོ། །ཞེས་དང༌། མྱང་འདས་ཆེན་པོ་ལྷའི་ཟླ་བའི་བསྒྱུར་བ་ལས། སངས་རྒྱས་ཀྱི་ཁམས་ནི་སེམས་ཅན་ཐམས་ཅད་ལ་ཡོད་མོད་ཀྱི། ཞེས་པ་ནས་དབུལ་པོའི་ཁྱིམ་ཞིག་ན། གསེར་གྱི་གཏེར་ཟད་མི་ཤེས་པ་ཞིག་ཡོད་ལ། ཞེས་པ་ནས། རིགས་ཀྱི་བུ་དེ་བཞིན་གཤེགས་པའི་སྙིང་པོ་ནི། སེམས་ཅན་ཐམས་ཅད་ལ་ཡོད་ལ་མཐོང་བར་མ་ནུས་པ་ཙམ་དུ་ཟད་དེ། བུད་མེད་དབུལ་མོ་དེ་ཉིད་ལ་གཏེར་ཡོད་པ་དང་འདྲའོ། །རིགས་ཀྱི་བུ་ད་ངས་སེམས་ཅན་ཐམས་ཅད་ལ་དེ་བཞིན་གཤེགས་པའི་སྙིང་པོ་ཡོད་དོ་ཞེས་ཡང་དག་པར་བསྟན་པར་བྱ་སྟེ། ཞེས་སོགས་དང༌། མྱང་འདས་ཆེན་པོ་རྒྱ་ནས་བསྒྱུར་བ་ལས། རིགས་ཀྱི་བུ་ངས་ཡང་འདི་སྐད་དུ། སེམས་ཅན་གྱིས་སངས་རྒྱས་ཀྱི་རང་བཞིན་ནི་དཔེར་ན་བུད་མེད་དབུལ་མོའི་ཁྱིམ་གྱི་རིན་པོ་ཆེའི་གཏེར་དང༌། སྟོབས་པོ་ཆེའི་དཔྲལ་བའི་རིན་པོ་ཆེའི་ནོར་བུ་རྡོ་རྗེ་དང༌། འཁོར་ལོས་བསྒྱུར་བའི་རྒྱལ་པོའི་ཟིལ་མངར་གྱི་ཆུ་མིག་དང་མཚུངས་སོ། །ཞེས་སོགས་རྒྱས་པར་གསུངས་པ་དང༌། རྒྱུད་བླ་མ་ལས། ཇི་ལྟར་མི་དབུལ་ཁྱིམ་ནང་ས་འོག་ན། །མི་ཟད་པ་ཡི་གཏེར་ནི་ཡོད་གྱུར་ལ། །མི་དེས་དེ་མ་ཤེས་ཤིང་གཏེར་དེ་ཡང༌། །དེ་ལ་ང་འདིར་ཡོད་ཅེས་མི་སྨྲ་ལྟར། །དེ་བཞིན་ཡིད་ཀྱི་ནང་ཆུད་རིན་ཆེན་གཏེར། །དྲི་མེད་བཞག་དང་བསལ་མེད་ཆོས་ཉིད་ཀྱང༌། །མ་རྟོགས་པས་ནི་དབུལ་བའི་སྡུག་བསྔལ་ནི། །རྣམ་མང་རྒྱུན་དུ་སྐྱེ་དགུ་འདིས་མྱོང་ངོ༌། །ཞེས་གསུངས་པའི་ཕྱིར་རོ། །དགུ་པ་ཆུ་ཁམས་གསེར་དང་ནམ་མཁའི་དཔེས་མཚོན་པའི་དགོངས་པ་བསྟན་པ་ནི། རྩ་བར། དྲི་མ་སྤངས་ནས་མངོན་དུ་གྱུར་བའི་དཔེ། །ཆུ་ཁམས་གསེར་དང་ནམ་མཁའ་ལ་སོགས་གསུངས། །ཞེས་རྐང་བ་གཉིས་བྱུང༌། དེའི་ཚིག་དོན་ནི། གློ་བུར་སྒྲིབ་གཉིས་ཀྱི་དྲི༵་མ༵་སང༵ས་ན༵་གཞྀ་འབྲས་དབྱེར་མེད་དུ་བཞུགས་པའི་ཆོས་ཉིད་བདེ་གཤེགས་སྙིང་པོ་མངོ༵ན་དུ༵་གྱུ༵ར་བ་ཡིན་ལ་དེ་ཡིན་པའི༵་དཔེ༵་ནི། ཆུའི་རང་བཞིན་ལ་རྡུལ་གྱི་དྲི་མ་མ་ཞུགས་པས་ཆུ་རྡུལ་གྱིས་རྙོག་པ་དྭངས་བའི་ཚེ་ཆུའི༵་ཁམས༵་དང༌། གསེ༵ར་གྱི་རང་བཞིན་ལ་གཡའ་མ་ཞུགས་པའི་གཡའ་དག་པ་ན་གསེར་གྱི་ཁམས་དང༵༌། ནམ་མཁའི་རང་བཞིན་ལ་གློ་བུར་གྱི་སྤྲིན་མ་ཞུགས་པའི། སྤྲིན་དྭངས་པ་ན་ན༵མ་མཁ༵འ་དྭངས་བ་ལ༵་སོག༵ས་པ་དཔེ་དུ་མ་གསུང༵ས་པ་ཡིན་ཏེ། གསེར་འོད་དམ་པའི་མདོ་ལས། ཇི་ལྟར་གསེར་བཟང་པོ་བཞུ་ཞིང་བཏུལ་ཏེ་སྦྱངས་པ་ན་རྡུལ་དང་དྲི་མས་ཕྱིར་མི་གོས་ཤིང་རང་བཞིན་རྣམ་པར་དག་པའི་གསེར་ཉིད་དུ་སྣང་སྟེ། གསེར་གྱི་དངོས་པོ་རྣམ་པར་དག་པ་ཡང་མེད་པར་འགྱུར་བ་མ་ཡིན་པ་བཞིན་དང་དཔེར་ན་ཆུ་རྙོག་མ་ཅན་དྭངས་ཏེ་རྣམ་པར་དྭངས་ན་ཆུའི་རང་བཞིན་གསལ་བར་གྱུར་པ་ཡིན་གྱི་ཆུ་དེ་ཉིད་མེད་པར་གྱུར་པ་ཡང་མ་ཡིན་ནོ། །དེ་བཞིན་དུ་ཆོས་ཀྱི་སྐུ་ཡང་ཉོན་མོངས་པ་དང་སྡུག་བསྔལ་སྣ་ཚོགས་འདུས་པ་སྤངས་ན་བག་ཆགས་མ་ལུས་པ་བསལ་ཏེ་སངས་རྒྱས་ཀྱི་ངོ་བོ་རྣམ་པར་དག་པ་ཉིད་སྣང་བར་གྱུར་བ་ཡིན་གྱི་དངོས་པོ་མེད་པར་གྱུར་བ་ཉིད་ནི་མ་ཡིན་ནོ། །ཡང་དཔེར་ན་ནམ་མཁའ་ལ་དུ་བ་དང་སྤྲིན་དང་རྡུལ་དང་ན་བུན་གྱིས་བསྒྲིབས་པ་དེ་མེད་པར་གྱུར་བ་ན་ནམ་མཁའི་ཁམས་ཏེ་རྣམ་པར་དག་པར་གྱུར་བ་ཡིན་གྱི་ནམ་མཁའ་དེ་ཉིད་མེད་པར་གྱུར་བ་ནི་མ་ཡིན་ནོ། །དེ་བཞིན་དུ་ཆོས་ཀྱི་སྐུ་ཉོན་མོངས་པ་ཐམས་ཅད་ཟད་པའི་ཕྱིར་རྣམ་པར་དག་པ་ཞེས་བྱ་བའི་སྐུ་ཉིད་མེད་པར་གྱུར་པ་ནི་མ་ཡིན་ནོ། །ཞེས་དང༌། དབུས་མཐའ་རྩ་འགྲེལ་ལས། ཆུ་ཁམས་གསེར་དང་ནམ་མཁའ་རྣམས། །དག་པ་བཞིན་དུ་དག་པར་འདོད། །གློ་བུར་གྱི་དྲི་མ་དང་བྲལ་བ་ལ་བྱའི། དེའི་ངོ་བོ་ཉིད་གཞན་དུ་འགྱུར་བ་ནི་མ་ཡིན་ནོ། །ཞེས་དང༌། མདོ་སྡེ་རྒྱན་ལས། རྟག་ཏུ་གཉིས་བྲལ་འཁྲུལ་བའི་རྟེན་གང་ཡིན་དང་གང་ཞིག་རྣམ་ཀུན་ཏུ། །བརྗོད་པར་ནུས་མ་ཡིན་ཞིང་སྤྲོས་པ་མེད་པའི་བདག་ཉིད་དེ་ཁོ་ན། །ཤེས་བྱ་སྤང་བྱ་རང་བཞིན་དྲི་མེད་འདོད་གང་རྣམ་པར་སྦྱང་བྱ་སྟེ། །དེ་ནི་ནམ་མཁའ་གསེར་དང་ཆུ་ལྟར་ཉོན་མོངས་པ་ལས་རྣམ་དག་འདོད། །ཅེས་དང༌། དེ་ཉིད་ལས། ཅི་ལྟར་ཆུ་རྙོག་པ་ལས་དྭངས་པ་ན། །དང་བ་ཉིད་དེ་དེ་ལས་སྐྱེས་མིན་གྱི། །དེ་ནི་དེ་ལ་དྲི་མ་བྲལ་བར་ཟད། །དེ་བཞིན་རང་སེམས་དག་ལ་ཚུལ་དེ་ཉིད། །སེམས་ནི་རྟག་ཏུ་རང་བཞིན་འོད་གསལ་འདོད། །ཅེས་དང༌། དེའི་འགྲེལ་བ་ལས། ཇི་ལྟར་ཆུ་རང་བཞིན་གྱི་དང་བ་ལས་གློ་བུར་གྱི་རྙོག་པས་རྙོགས་པ་ཡིན་པ་དེ་བཞིན་དུ་སེམས་རང་བཞིན་གྱིས་འོད་གསལ་བར་འདོད་པ་ལས་གློ་བུར་གྱི་ཉེས་པས་མ་རུང་བར་བྱས་སོ། །ཞེས་པ་ནས། དེ་ལྟ་བས་ན་སེམས་ནི་འདིར་ཆོས་ཉིད་ཀྱི་སེམས་ཁོ་ན་ཡིན་པར་རིག་པར་བྱའོ། །ཞེས་གསུངས་པའི་ཕྱིར་རོ། །བཅུ་བ་ནམ་མཁའ་མི་ཟད་པ་ལ་སོགས་པའི་དཔེས་མཚོན་པའི་དགོངས་པ་བསྟན་པ་ནི། རྩ་བར། དྲི་མ་ཟད་ཀྱང་སྙིང་པོ་མི་ཟད་པའི། །དཔེ་ཡང་ནམ་མཁའ་ལ་སོགས་མང་པོས་གསུངས། །ཞེས་རྐང་བ་གཉིས་བྱུང༌། དེའི་ཚིག་དོན་ནི། གློ་བུར་གྱི་དྲི༵་མ༵་གཉེན་པོའི་སྟོབས་ཀྱིས་ཟ༵ད་ཀྱ༵ང༌། དོན་དམ་བདེ་གཤེགས་སྙི༵ང་པོ༵་མི༵་ཟ༵ད་པར་གནས་པ༵འི་ད༵པེ་ཡ༵ང་ན༵མ་མཁ༵འ་དང་རྡོ་རྒྱུས་ཀྱི་གོས་དང༌། ལྗོན་ཤིང་རྙིང་པ་དང༌། མར་མེ་ཟད་པ་དང༌། ལྕགས་གྲང་བ་དང༌། ཟླ་བའི་དཀྱིལ་འཁོར་ལ༵་སོག༵ས་པ་དཔེ་མང༵་པོས༵་གསུང༵ས་པ་ཡིན་ཏེ། རྔ་བོ་ཆེའི་མདོ་ལས། ནམ་མཁའ་ལ་རྟེན་པའི་ཁང་པའམ་རིགས་གང་དང་གང་ཡིན་པ་ཞིག་ཀྱང་ནམ་མཁའ་མི་འཇིག་པ་ལྟར་མྱ་ངན་ལས་འདས་པའི་དབྱིངས་ཀྱིས་འགྲོ་བ་ཐམས་ཅད་ལ་ཁྱབ་པ་ཡང་དེ་དང་འདྲའོ། །ཞེས་དང༌། མྱང་འདས་ཆེན་པོའི་མདོ་ལས། བཅོམ་ལྡན་འདས་དཔེར་ན་གྲོང་ཁྱེར་ཆེན་པོ་ཞིག་གི་ཕྱི་རོལ་ན་ཤིང་ས་ལའི་ཚལ་གྱི་ནང་ན་ཤིང་གཅིག་སྔར་སྐྱེས་ཏེ་ལོ་བརྒྱ་ལོན་ནོ། །དེའི་ཚེ་ཚལ་གྱི་བདག་པོ་དེ་དུས་སུ་ཆུ་འཆུ་ཞིང་ལས་བགྱིད་དོ། །ཤིང་དེའི་ཤུན་པ་རུལ་ནས་ཤུན་པ་དང་ལོ་མ་དང་ཡལ་ག་ཀུན་ས་ལ་ལྷུང་སྟེ་ནང་གི་སྙིང་པོ་འབའ་ཞིག་ལུས་སོ། །དེ་བཞིན་གཤེགས་པ་ཡང་དེ་དང་འདྲ་སྟེ། ཇི་ཙམ་དུ་རུལ་བར་གྱུར་བ་ཐམས་ཅད་ཟད་ནས་ཡང་དག་པའི་ཆོས་འབའ་ཞིག་ལུས་སོ། ཞེས་དང༌། ཡང་མདོ་དེ་ལས། རིགས་ཀྱི་བུ་འདི་ལྟ་སྟེ། དཔེར་ན་སྐྱེས་པའམ་བུད་མེད་ཅིག་མེ་མར་འཛུགས་ན་མེ་མར་གྱི་སྣོད་ཆེ་ཆུང་ལས་མར་གྱི་བཀང་སྟེ་གཟུགས་སོ། །ཇི་སྲིད་མར་ཡོད་ཀྱི་བར་དུ་ནི་སྣང་བ་ཡང་ཡོད་དོ་ཇི་ལྟར་མར་ཟད་ན་སྣང་བ་ཡང་མེད་པར་འགྱུར་རོ། །སྣང་བ་མེད་པར་གྱུར་བ་ནི་ཉོན་མོངས་པ་ཟད་པ་ལྟ་བུའོ། །སྣང་བ་ཟད་དེ་མེད་པར་སོང་ཡང་མེ་མར་གྱི་སྣོད་མེད་པར་གྱུར་པ་མ་ཡིན་ནོ། །དེ་བཞིན་གཤེགས་པ་ཡང་དེ་དང་འདྲ་སྟེ། ཉོན་མོངས་པ་ཟད་དེ་མེད་ཀྱང་ཆོས་ཀྱི་སྐུ་ནི་རྟག་ཏུ་ཡོད་དོ། །ཞེས་དང༌། ལྷའི་ཟླ་བའི་བསྒྱུར་བའི་མྱང་འདས་ཆེན་པོའི་མདོ་ལས། ཇི་ལྟར་ལྕགས་ཀྱི་མེ་གྲང་བར་གྱུར་བ་དེ་བཞིན་དུ། དེ་བཞིན་གཤེགས་པ་ཡང་བསྐལ་བ་མང་པོ་གྲངས་མེད་པ་བྱེ་བ་སྙེད་དུ་བསགས་པའི་ཉོན་མོངས་པ་རྣམས་ཟད་ནས་རྟག་པ་དང་བརྟན་པ་དང༌། ཐེར་ཟུག་པར་འགྱུར་ཏེ། དེ་ལྟར་ན་ཡང་དག་པར་གྲོལ་བའི་དེ་བཞིན་གཤེགས་པ་ནི་རྟག་པ་དང་བརྟན་པ་ཐེར་ཟུག་པ་ཡིན་ནོ། །ཞེས་དང༌། དཔལ་མཆོག་དང་པོའི་རྒྱུད་དབང་མདོར་བསྟན་ལས། ཇི་ལྟར་ཟླ་ཤར་རིམ་པ་ཡིས། །ཆ་རྣམས་ཀྱིས་ནི་རྫོགས་པར་འགྱུར། །གྲིབ་མ་ཉམས་པ་རྫོགས་པ་སྟེ། །ཟླ་བ་ཆད་དང་རྫོགས་པ་མིན། །དེ་བཞིན་ཡེ་ཤེས་ཤར་རིམ་པས། །ས་རྣམས་ཀྱིས་ནི་རྫོགས་པར་གྱུར། །ཉོན་མོངས་ལ་སོགས་ཉམས་པ་རྫོགས། །ཡེ་ཤེས་ཆད་དང་རྫོགས་པ་མིན། །ཞེས་དང༌། ཆོས་དབྱིངས་བསྟོད་པ་ལས། ཇི་ལྟར་མེ་ཡིས་དག་པའི་གོས། །སྣ་ཚོགས་དྲི་མས་དྲི་མ་ཅན། །ཇི་ལྟར་མེ་ཡི་ནང་བཅུག་ན། །དྲི་མ་ཚིག་འགྱུར་གོས་མིན་ལྟར། །དེ་བཞིན་འོད་གསལ་བ་ཡི་སེམས། །འདོད་ཆགས་ལ་སོགས་དྲི་མ་ཅན། །ཡེ་ཤེས་མེ་ཡིས་དྲི་མ་སྲེག །དེ་ཉིད་འོད་གསལ་མ་ཡིན་ནོ། །ཞེས་གསུངས་པའི་ཕྱིར་རོ། ། སྤྲིན་ཡོད་མེད་ཀྱི་ནམ་མཁའ་ཡང་ནམ་མཁའ་གཅིག་པས་དགོངས་པ་བསྟན་པ།བཅུ་གཅིག་པ་སྤྲིན་ཡོད་མེད་ཀྱི་ནམ་མཁའ་ཡང་ནམ་མཁའ་གཅིག་པས་དགོངས་པ་བསྟན་པ་ནི། མཐར་ཐུག་གཞི་འབྲས་ངོ་བོ་དབྱེར་མེད་ཅིང༌། །རང་བཞིན་རྣམ་དག་ཉིད་དུ་ཁྱད་མེད་ཀྱང༌། །དྲི་བཅས་གཞི་དང་དྲི་བྲལ་འབྲས་བུ་ཞེས། །སྤྲིན་ཡོད་སྤྲིན་མེད་ནམ་མཁའི་དཔེ་ཡིས་གསུངས། །རྩ་བར། མཐར་ཐུག་གཞི་འབྲས་ངོ་བོ་དབྱེར་མེད་ཅིང༌། །ཞེས་པ་ནས། དཔེ་ཡིས་གསུངས་ཞེས་པའི་བར་ཤོ་ལོ་ཀ་གཅིག་བྱུང༌། དེའི་ཚིག་དོན་ནི། རང་བཞིན་གནས་ལུགས་མཐ༵ར་ཐུ༵ག་པའི་ཆོས་ཉིད་འདུས་མ་བྱས་པའི་རང་བྱུང་ཡེ་ཤེས་རང་གི་ངོ་བོ་ནི་ག༵ཞི་དང་འབྲ༵ས་བུ་ངོ༵་བོ༵་དབྱེ༵ར་མེ༵ད་ཅི༵ང༌། ར༵ང་བཞི༵ན་ལ་དྲི་མ་གདོད་ནས་རྣམ༵་པར་ད༵ག་པ་ཉི༵ད་དུ༵་ཁྱ༵ད་པར་ཅུང་ཟད་ཙམ་ཡང་མེ༵ད་ཀྱ༵ང༌། སེམས་ཅན་ལ་ལྟོས་ནས་དྲི༵་བཅ༵ས་ཀྱི་དེ་བཞིན་ཉིད་ལ་ག༵ཞི་ད༵ང༌། དྲི༵་བྲ༵ལ་གྱི་དེ་བཞིན་ཉིད་ལ་འབྲ༵ས་བུ༵་ཞེ༵ས་བརྗོད་པ་ནི་དཔེར་ན་སྤྲི༵ན་ཡོ༵ད་ཀྱི་ནམ་མཁའ་དང༌། སྤྲི༵ན་མེ༵ད་ཀྱི་ན༵མ་མཁ༵འི་ད༵པེ་ཡི༵ས་ལེགས་པར་གསུང༵ས་པ་ཡིན་པའི་ཕྱིར་རོ། ། སྤྲིན་ཡོད་ཀྱི་ནམ་མཁའ་སྤྲིན་སངས་སུ་གྱུར་བའི་དཔེས་མཚོན་པའི་དགོངས་པ་བསྟན་པ།བཅུ་གཉིས་པ་སྤྲིན་ཡོད་ཀྱི་ནམ་མཁའ་སྤྲིན་སངས་སུ་གྱུར་བའི་དཔེས་མཚོན་པའི་དགོངས་པ་བསྟན་པ་ནི། ངེས་དོན་མཐར་ཐུག་ཟབ་མོའི་གནས་གྱུར་ཀྱང༌། །ངོ་བོ་མི་འགྱུར་དྲི་བཅས་དྲི་མེད་དུ། །གྱུར་པ་དྲི་བྲལ་འབྲས་བུ་ཐོབ་པ་སྟེ། །ནམ་མཁའི་སྤྲིན་སངས་གྱུར་པ་དཔེ་ཡིས་གསུངས། །རྩ་བར། ངེས་དོན་མཐར་ཐུག་ཟབ་མོ་གནས་གྱུར་ཀྱང༌། །ཞེས་པ་ནས། དཔེ་ཡིས་གསུངས་ཞེས་པའི་བར་ཤོ་ལོ་ཀ་གཅིག་བྱུང༌། དེའི་ཚིག་དོན་ནི། ངེ༵ས་དོ༵ན་མཐ༵ར་ཐུ༵ག་པའི་ཟ༵བ་མོ༵་དེ་ཉིད་དྲི་མ་དང་བྲལ་བ་དེའི་ཚེ་གན༵ས་གྱུ༵ར་ཀྱ༵ང་ངོ༵་བོ༵་མི༵་འགྱུ༵ར་ཞིང་དྲི༵་བཅ༵ས་ཀྱི་དེ་བཞིན་ཉིད་དྲི༵་མེ༵ད་ཀྱི་དེ་བཞིན་ཉིད་དུ༵་གྱུ༵ར་བ༵་ཡིན་ལ། དེའི་ཚེ་དྲི༵་མ་དང་བྲ༵ལ་བའི་འབྲ༵ས་བུ༵་ཐོབ༵་པ༵་ཡིན་པ་སྟེ༵། ན༵མ་མཁ༵འི་སྤྲི༵ན་སང༵ས་གྱུ༵ར་པ༵་དཔེ༵་དེ་ཡི༵ས་ལེགས་པར་གསུ༵ངས་པ་ཡིན་ཏེ། རྒྱུད་བླ་མ་ལས། ཡོན་ཏན་རིན་ཆེན་མཆོག་ཚོགས་དང་ལྡན་ཡེ་ཤེས་ཆུ་མཚོ་བསོད་ནམས་ཡེ་ཤེས་ཉི་འོད་ཅན། །ཐེག་པ་མ་ལུས་ངེས་པར་བསྒྲུབས་ཏེ་མཐའ་དང་དབུས་མེད་རྒྱ་ཆེ་ནམ་མཁའ་ལྟར་ཁྱབ་པ། །སངས་རྒྱས་ཉིད་ནི་ཡོན་ཏན་དྲི་མ་མེད་གཏེར་སེམས་ཅན་ཀུན་ལ་ཁྱད་མེད་རྣམ་གཟིགས་ནས། །ཉོན་མོངས་ཤེས་བྱའི་སྤྲིན་གྱི་དྲ་བ་སངས་རྒྱས་རྣམས་ཀྱི་ཐུགས་རྗེའི་རླུང་གིས་རྣམ་པར་གཏོར། །ཞེས་གསུངས་པའི་ཕྱིར་རོ། ། དཔེ་མེད་དང༌དཔེ་དང་བཅས་པར་སྟོན་པའི་དགོངས་པ་བསྟན་པ།བཅུ་གསུམ་པ་དཔེ་མེད་དང༌། དཔེ་དང་བཅས་པར་སྟོན་པའི་དགོངས་པ་བསྟན་པ་ནི། རྩ་བར། ཇི་བཞིན་རྫོགས་པར་སྟོན་པའི་དཔེ་མེད་ཀྱང༌། །ཕྱོགས་ཙམ་སྟོན་པའི་དཔེ་ནི་མང་པོ་དང༌། །ཞེས་རྐང་བ་གཉིས་བྱུང༌། དེའི་ཚིག་དོན་ནི། བསམ་མི་ཁྱབ་པའི་ཆོས་དབྱིངས་དེ་བཞིན་ཉིད་ཀྱི་ངོ་བོ་ཇི༵་ལྟར་གནས་པ་བཞི༵ན་རྫོག༵ས་པ༵ར་སྟོ༵ན་པ༵འི་དཔེ༵་མེ༵ད་པས་ན། ཇི་སྐད་དུ། དཔེར་བྱ་ཀུན་ལས་འདས། ཞེས་དང༌། དང་པོའི་རྒྱུད་ལས། འཇིག་རྟེན་དཔེ་ལས་འདས་པ་སྟེ། །ཤེས་དང་ཤེས་བྱའི་བདག་པོ་མཆོག །ཅེས་གསུངས་ཀྱ༵ང༌། དེའི་ངོ་བོ་ཕྱོག༵ས་ཙ༵མ་སྟོ༵ན་པ༵འི་ད༵པེ་ནི༵་ནམ་མཁའ་ལ་སོགས་པ་མ༵ང་པོ༵་གསུངས་པ་ཡིན་ཞིང༌། དེས་ན། དཔེ་མེད་པར་གསུངས་པ་ད༵ང༌། དཔེ་དུ་མ་གསུངས་པ་གཉིས་མི་འགལ་བའི་ཕྱིར་རོ། །དགུ་བ་རྫོགས་ལྡན་ཆོས་ལས་ལྟ་སྒོམ་གསུངས་པ་གཞན་ལ་ཉམས་ཤིང་རང་ལུགས་ཀྱི་ལྟ་སྒོམ་རྣམ་དག་བསྟན་པ་ནི། རྒྱུ་མཚན་ཡང་དག་ཤིན་ཏུ་མང་པོ་ཡིས། །གཤིས་ལུགས་འཁྲུལ་ལུགས་འཁྲུལ་སྤོང་འཁྲུལ་སངས་དང༌། །སྦྱང་གཞི་སྦྱང་བྱ་སྦྱོང་བྱེད་སྦྱང་འབྲས་ཀྱིས། །གཞི་ལམ་འབྲས་བུ་འཁོར་བཅས་བསྡུས་པ་དང༌། །ལྟ་སྒོམ་སྤྱོད་པ་རྣམ་དག་བསྡུས་པའི་དོན། །རྫོགས་ལྡན་ཆོས་ལས་གསལ་བར་གསུངས་མོད་ཀྱང༌། །གསུམ་ལྡན་མར་བཅད་དེ་འདྲའི་རྣམ་བཞག་ཉམས། །གཤིས་ལུགས་ཇི་བཞིན་རྟོགས་པའི་ལྟ་བ་དང༌། །གནས་ལུགས་ཇི་བཞིན་མཐོང་བའི་བསྒོམ་པ་ནི། །རྩ་བར། རྒྱུ་མཚན་ཡང་དག་ཤིན་ཏུ་མང་བོ་ཡིས། །ཞེས་པ་ནས། སྒོམ་པ་ནི། ཞེས་པའི་བར་ཤོ་ལོ་ཀ་གཉིས་དང་རྐང་བ་གཅིག་བྱུང༌། དེའི་ཚིག་དོན་ནི། རྒྱུ༵་མཚ༵ན་ཡ༵ང་ད༵ག་ཤི༵ན་ཏུ༵་མ༵ང་པོ༵་ཡི༵ས། གཤི༵ས་ལུག༵ས་དོན་དམ་དང༌། འཁྲུ༵ལ་ལུག༵ས་ཀུན་རྫོབ་དང༌། འཁྲུ༵ལ་སྤོ༵ང་དང་འཁྲུལ༵་སང༵ས་ད༵ང༌། སྦྱ༵ང་ག༵ཞི་དང་སྦྱ༵ང་བྱ་༵དང་སྦྱོ༵ང་བྱེ༵ད་དང༌། སྦྱང༵་འབྲ༵ས་རྣམས་ཀྱི༵ས། དོན་དམ་པའི་གཞི༵་ལམ༵་འབྲས༵་བུ༵་དང་ཀུན་རྫོབ་ཀྱི་གཞི་ཕུང་ཁམས་སྐྱེ་མཆེད་དང་ལམ་འདུས་བྱས་དང་འབྲས་བུ་ཀུན་རྫོབ་གཟུགས་སྐུ་སོགས་འཁོ༵ར་དང་བཅ༵ས་པ་བསྡུ༵ས་པ༵་དང༵༌། ཡང་དེ་རྣམས་ཀྱིས་ལྟ༵་སྒོ༵མ་སྤྱོ༵ད་པ༵་རྣམ༵་དག༵་བསྡུས༵་པའི༵་དོན༵་རྣམས་རྫོག༵ས་ལྡ༵ན་ཆོས༵་ལས༵་གས༵ལ་བར༵་གསུང༵ས་མོ༵ད་ཀྱ༵ང་གསུ༵མ་ལྡ༵ན་མ༵ར་བཅ༵ད་ཀྱི་ལུགས་ལ་དེ༵་འདྲ༵འི་རྣ༵མབཞ༵ག་རྣམས་ཉམ༵ས་པའོ། །གཤི༵ས་ལུག༵ས་ཇི༵་ལྟ་བ་བཞི༵ན་རྟོ༵གས་པའི༵་ལྟ༵་བ༵་ད༵ང༌། གན༵ས་ལུག༵ས་ཇི༵་ལྟ་བ་བཞི༵ན་མཐོ༵ང་བའི༵་སྒོམ༵་པ༵་གཉིས་ནི༵་ལྟ་སྒོམ་རྣམ་པར་དག་པ་ཡིན་ནོ། །བཅུ་པ་སྦྱོར་བ་རྣམ་དག་དང་ལྟ་སྒོམ་སྤྱོད་པ་རྣམ་དག་མཛད་པ་རྣམས་ལ་རྗེས་སུ་ཡི་རང་བར་བསྟན་པ་ནི། ཕལ་ཆེར་ཉམས་ཀྱང་ཕལ་ཆེར་བསགས་པ་ཡི། །སྐྱེས་མཆོག་རྣམས་ལ་ཉམས་མྱོང་བཟང་པོ་དང༌། །སྤྱོད་པ་བཟང་པོ་མངའ་བའང་མང་དུ་བྱོན། །དེ་རྣམས་ལ་ནི་བདག་ཀྱང་ཐལ་མོ་སྦྱར། །སྦྱིན་དང་ཚུལ་ཁྲིམས་བཟོད་དང་བརྩོན་འགྲུས་དང༌། །བསམ་གཏན་ཤེས་རབ་ཐབས་སྟོབས་སྨོན་ལམ་སོགས། །དགེ་བ་བསྒྲུབ་པ་ཇི་སྙེད་མཆིས་རྣམས་ལ། །བདག་ཀྱང་དགའ་བས་རྗེས་སུ་ཡི་རང་ཞིང༌། །དད་དང་གུས་པའི་གཙུག་གིས་ཕྱག་འཚལ་འདུད། །དཀོན་མཆོག་གསུམ་ལ་དད་ཅིང་གུས་པ་དང༌། །རྟེན་གསུམ་ལ་ཡང་དད་ཅིང་གུས་པ་ཡིས། །ཞབས་ཐོག་བཀུར་སྟི་ཕུ་དུད་མཛད་རྣམས་ལ། །རང་གཞན་སྦྱོར་བར་མཛད་པ་རྣམས་ལའང་དད། །སེམས་ཅན་ཐམས་ཅད་དྲིན་ཅན་ཕ་མ་དང༌། །སངས་རྒྱས་སྙིང་པོ་ཅན་དུ་ངེས་རྟོགས་ནས། །བྱམས་དང་སྙིང་རྗེས་བདག་གཞན་བརྗེ་བ་དང༌། །ཀུན་ལ་སྟོན་པ་བཞིན་དུ་གུས་རྣམས་ལ། །བསམ་པ་ཐག་པས་བདག་ནི་ཕྱག་འཚལ་ལོ། །སྣང་གྲགས་འདི་ཀུན་གཤིས་ཀྱི་གནས་ལུགས་ལ། །རི་བོང་རྭ་བཞིན་གཏན་ནས་མ་གྲུབ་ཀྱང༌། །ཐ་སྙད་འཁྲུལ་ངོར་རྨི་ལམ་སྒྱུ་མ་བཞིན། །སྣང་སྟོང་ཟུང་འཇུག་དབྱེར་མེད་རྟོགས་པ་དང༌། །རྒྱུ་འབྲས་སླུ་བ་མེད་པར་རྟོགས་པ་ཡིས། །ལས་ངན་སྤོང་ཞིང་ལས་བཟང་ལེགས་བསྒྲུབ་ནས། །འགྲོ་ཀུན་བསྒྲལ་ཕྱིར་སྨོན་ལམ་མཆོག་བསྒྲུབ་པ། །དེ་རྣམས་ཀུན་གྱི་ཞབས་རྡུལ་སྦྱི་བོས་ལེན། །ཀུན་རྫོབ་ཆོས་ཅན་རང་རང་ངོ་བོ་ཡིས། །སྟོང་པར་རྟོགས་ནས་མེད་བཞིན་སྣང་བ་ཡི། །བརྟན་གཡོ་འདི་ཀུན་འཁྲུལ་སྣང་འབའ་ཞིག་ཏུ། །ལེགས་པར་རྟོགས་ནས་ཞེན་ཆགས་མི་མཛད་པའི། །སྐྱེས་མཆོག་རྣམས་ལ་གུས་པས་ཕྱག་འཚལ་ལོ། །བདག་འཛིན་ལས་བྱུང་ཉོན་མོངས་རྣམ་རྟོག་ཀུན། །དགྲ་བཞིན་རྟོགས་ནས་རབ་ཏུ་འདུལ་མཛད་ཅིང༌། །ཞི་ཞིང་དུལ་བར་གནས་པ་རྣམས་ལའང་དད། །འདོད་ཆགས་གཉེན་པོར་མི་སྡུག་པ་དང་ནི། །ཞེ་སྡང་གཉེན་པོར་བྱམས་པ་བསྒོམ་པ་དང༌། །གཏི་མུག་གཉེན་པོར་རྟེན་ཅིང་འབྲེལ་འབྱུང་དང༌། །ང་རྒྱལ་གཉེན་པོར་ཁམས་ཀྱི་རབ་དབྱེ་དང༌། །རྣམ་རྟོག་གཉེན་པོར་དབུགས་ཀྱི་འབྱུང་འཇུག་སོགས། །སྤང་བྱ་སོ་སོའི་གཉེན་པོར་རབ་བསྒོམ་ནས། །ཉོན་མོངས་རྣམ་རྟོག་དགྲ་ལས་རྣམ་རྒྱལ་བའི། །སྐྱེས་མཆོག་རྣམས་ལ་གུས་པའི་ཕྱག་འཚལ་ལོ། །རྣམ་ཤེས་གཞོན་པ་ལས་རླུང་འགྱུ་བ་རྣམས། །དབུ་མར་ཡེ་ཤེས་རླུང་དུ་སྒྱུར་མཛད་པ། །རྣམ་པར་མི་རྟོག་གཉིས་མེད་ཡེ་ཤེས་ཀྱི། །རྣལ་འབྱོར་སྤྱོད་པ་རྣམས་ལ་བདག་ཕྱག་འཚལ། །ཕྱི་ནང་ཀུན་རྫོབ་གློ་བུར་དྲི་མ་ཡིས། །སྣང་པ་འཁྲུལ་སྣང་ཁོ་ནར་ལེགས་རྟོགས་ནས། །འདི་ལས་གཞན་མཆོག་ཕ་རོལ་དོན་དམ་གྱི། །སྣང་བ་མངོན་དུ་གྱུར་ལ་བདག་དང་ལགས། །ཕ་ཡུལ་ཉེ་འབྲེལ་ནོར་རྫས་ལ་སོགས་པ། །ཆགས་སྡང་སྐྱེ་བའི་དངོས་ཀུན་རབ་སྤངས་ནས། །ཕྱོགས་མེད་རིས་མེད་ཞེན་ཆགས་མེད་པའི་གནས། །ཆོས་སྤྱོད་གང་འཕེལ་བསྟེན་པ་རྣམས་ལའང་དད། །ནོར་གྱི་སོ་ཚིས་འདུ་འགོད་རབ་སྤངས་ནས། །སྒོ་གསུམ་དགེ་བའི་ཕྱོགས་སུ་རབ་བཀོལ་ཏེ། །འཁོར་གསུམ་དག་པས་སྨོན་ལམ་མཆོག་བསྒྲུབ་ནས། །དགེ་བའི་ནོར་མང་སྤེལ་བ་རྣམས་ལའང་དད། །འབད་རྩོལ་མེད་པར་ངང་གིས་བྱུང་བ་ཡི། །ལོངས་སྤྱོད་གཡོ་བ་སྙིང་བོ་མེད་རྣམས་ཀྱང༌། །ཡར་གྱི་ཞིང་དང་མར་གྱི་ཞིང་དག་ལ། །ལེགས་པར་བཏང་ནས་སྙིང་པོ་ལེན་ལའང་དད། །རྫོགས་ལྡན་ཆོས་མཆོག་ཁྱད་པར་འཕགས་རྣམས་ལ། །ཡི་གེར་འབྲི་སོགས་ཆོས་སྤྱོད་རྣམ་པ་བཅུ། །ལེགས་པར་བསྒྲུབ་ཅིང་བསྒྲུབ་ཏུ་འཇུག་པ་དང༌། །གཞན་དག་བསྐུལ་བར་མཛད་པར་རྣམས་ལའང་དད། །མཁན་སློབ་བླ་མ་དགེ་བའི་བཤེས་རྣམས་དང༌། །གྲོགས་མཆོད་ལ་སོགས་ཆོས་མཛད་ཐམས་ཅད་ཀྱི། །སྐྱོན་ལ་མི་རྟོག་སྐྱོན་ལ་མི་བརྗོད་ཅིང༌། །ཕྲག་དོག་མེད་པར་དད་གུས་མཛད་ལའང་དད༌། །ཆོས་མེད་སྡིག་ཅན་ལམ་ངན་ཞུགས་རྣམས་ལ། །ཕན་སེམས་ཆེན་པོས་ལེགས་པའི་གྲོས་འདེབས་ཤིང༌། །ལམ་བཟང་ཞུགས་ནས་དགེ་བ་སྒྲུབ་རྣམས་ལ། །དགའ་བའི་རྗེས་སུ་ཡི་རང་མཛད་ལའང་དད། །མཉམ་བཞག་ཟབ་མོ་ལ་ཟློའི་སྐབས་སུ་ནི། །ཆོས་ཀྱང་སྤང་ན་ཆོས་མིན་ལྟ་ཅི་སྨོས། །རྗེས་ཐོབ་ཤན་འབྱེད་སྐབས་སུ་ཡོད་མེད་སོགས། །ལེགས་པར་ཕྱེ་ནས་སྟོན་མཛད་རྣམས་ལའང་དད། །ཞུ་བདེ་འགྱུར་བཅས་གང་ཡིན་སྤང་བྱ་དང༌། །ཞུ་བདེ་འགྱུར་མེད་གང་ཡིན་བསྟེན་བྱ་དང༌། །རང་བཞིན་འགྱུར་མེད་གང་ཡིན་ཐོབ་བྱར་ནི། །ལེགས་རྟོགས་ལེགས་བསྒྲུབ་ལེགས་སྟོན་རྣམས་ལའང་དད། །མདོར་ན་རྫོགས་ལྡན་ཆོས་དང་མཐུན་པ་ཡི། །གཞི་ལམ་འབྲས་བུའི་ལྟ་བསྒོམ་སྤྱོད་པ་རྣམས། །ལེགས་རྟོགས་ལེགས་བསྒྲུབ་ལེགས་པར་སྟོན་མཛད་པ། །དེ་དག་ཀུན་ལ་གུས་པས་ཕྱག་འཚལ་ལོ། །རྩ་བར། ཕལ་ཆེར་ཉམས་ཀྱང་ཕལ་ཆེར་བསགས་པ་ཡི། །ཞེས་པ་ནས། དེ་དག་ཀུན་ལ་གུས་པའི་ཕྱག་འཚལ་ལོ། །ཞེས་པའི་བར་ཤོ་ལོ་ཀ་ཉེར་གཅིག་དང་རྐང་བ་གཉིས་བྱུང༌། དེའི་ཚིག་དོན་ནི། དེ་ལྟར་བཤད་པའི་རྫོགས་ལྡན་ཆོས་མཆོག་གི་ལུགས་ཀྱི་ལྟ་སྒོམ་རྣམ་པར་དག་པ་ཕལ་ཆེ༵ར་ཉམ༵ས་ཀྱ༵ང༌། དེའི་ནང་ནས་ཕ༵ལ་ཆེ༵ར་བསག༵ས་པ༵་ཡི༵་སྐྱེ༵ས་བུ་མཆོ༵ག་རྣམ༵ས་ལ༵་ཉམ༵ས་མྱོ༵ང་བཟ༵ང་པོ༵་ད༵ང༌། སྤྱོ༵ད་པ༵་བཟ༵ང་པོ༵་མང༵འ་བ༵འ༵ང་མ༵ང་དུ༵་བྱོན༵་པ་དེ༵་རྣམ༵ས་ལ༵་ནི༵་ཆོས་རྗེ་དོལ་པོ་པ་ཀུན་མཁྱེན་ཤེས་རབ་རྒྱལ་མཚན་བད༵ག་ཀྱ༵ང་ཕྱག་ཐལ༵་མོ༵་སྦྱ༵ར་ནས་རྗེས་སུ་ཡི་རང་བར་བྱེད་པ་ཡིན་ནོ། །ཡང་སྦྱི༵ན་པ་དང༵༌། ཚུལ༵་ཁྲིམ༵ས་དང༌། བཟོ༵ད་པ་དང༵༌། བརྩོ༵ན་འགྲུ༵ས་ད༵ང༌། བས༵མ་གཏ༵ན་དང༌། ཤེ༵ས་ར༵བ་དང༌། ཐབ༵ས་དང༌། སྟོབ༵ས་དང༌། སྨོ༵ན་ལ༵མ་སོག༵ས་ཚུལ་བཞིན་དུ་དགེ༵་བ༵་བསྒྲུ༵བ་པ༵་ཇི༵་སྙེ༵ད་མཆི༵ས་པ་རྣམ༵ས་ལ་༵རྒྱལ་བ་གཉིས་པ་ཀུན་མཁྱེན་ཇོ་ནང་བ་བད༵ག་ཀྱ༵ང་དག༵འ་བ༵ས་རྗེ༵ས་སུ༵་ཡི༵་རང༵་ཞི༵ང་ད༵ད་པ་ད༵ང་གུ༵ས་པའི༵་གཙུ༵ག་གི༵ས་ཕྱ༵ག་འཚ༵ལ་ཞིང་འདུ༵ད་པར་བྱེད་པ་ཡིན་པ་དང༌། སྐྱབས་གནས་བསླུ་བ་མེད་པའི་དཀོ༵ན་མཆོ༵ག་གསུ༵མ་ལ༵་དད༵་ཅིང༷་གུ༵ས་པ༵་དང༵༌། སྐུུ་གསུང་ཐུགས་ཀྱི་རྟེ༵ན་གསུ༵མ་ལ༵་ཡང༵་དད༵་པ་བྱེད་ཅིང༵༌། སྒོ་གསུམ་གུ༵ས་པ༵་ཡི༵ས་ཞབ༵ས་ཐོ༵ག་བཀུ༵ར་སྟི༵་ཕུ༵་དུ༵ད་དམ་གུས་པར་མཛ༵ད་པ་རྣམ༵ས་ལ༵་ར༵ང་དང་ག༵ཞན་སྦྱོ༵ར་བ༵ར་མཛ༵ད་པའི་སྐྱེས་བུ་དམ་པ༵་རྣམ༵ས་ལ༵འང༵་ད༵ད་པ་ཡིན་ཞེས་དང་ནམ་མཁའི་མཐའ་དང་མཉམ་པའི་སེམ༵ས་ཅ༵ན་ཐམ༵ས་ཅ༵ད་རང་གི་དྲི༵ན་ཆེ༵ན་ཕ༵་མ༵་མ་གྱུར་བ་མེད་པ་ད༵ང༌། དེ་རྣམས་དོན་དམ་སང༵ས་རྒྱ༵ས་ཀྱི་སྙི༵ང་པོ༵་ཅ༵ན་དུ༵་ངེས༵་པ་ཡིན་པར་ལེགས་པར་རྟོག༷ས་ནས༷། བྱ༵མས་པ༵་ད༵ང་སྙི༵ང་རྗེ༵ས་བད༵ག་གཞ༵ན་བརྗེ༵་བ༵་ད༵ང༌། ཀུན༵་ལ༵་སྟོ༵ན་པ༵་བཞི༵ན་དུ༵་གུས༵་པའི་རྒྱལ་སྲས་བྱང་སེམས་རྣམ༵ས་ལ༵་བས༵མ་པ༵་ཐག༵་པས༵་ཀུན་མཁྱེན་ཆོས་རྗེ་བད༵ག་ནི༵་ཕྱག༵་འཚ༵ལ་ལོ༵་ཞེས་པའོ། །རྣམ་ཤེས་ལ་སྣ༵ང་ཞིང་སྒྲ་དང་རྣམ་པར་རྟོག་པའི་ངོ་བོར་གྲག༵ས་པའི་ཀུན་རྫོབ་ཀྱི་ཆོས་འ༵དི་ཀུན༵་གཤིས༵་ཀྱི༵་གན༵ས་ལུག༵ས་ལ༵་རི༵་བོང༵་གི་རྭ༵་བཞིན༵་གཏ༵ན་ནས༵་མ༵་གྲུབ༵་ཀྱང༵༌། ཐ༵་སྙ༵ད་འཁྲུ༵ལ་བའི་ངོ༵ར་རྨི༵་ལ༵མ་དང་སྒྱུ༵་མ༵་བཞིན༵་དུ་གྲུབ་པའི་སྣ༵ང་སྟོ༵ང་ཟུ༵ང་འཇུ༵ག་དབྱེ༵ར་མེ༵ད་ཡིན་པར་རྟོག༵ས་པ༵་ད༵ང༌། ཀུན་རྫོབ་ཏུ་རྒྱུ༵་འབྲ༵ས་བསླུ༵་བ༵་མེད༵་པར༵་ལེགས་པར་རྟོག༵ས་པ༵་དེ་ཡི༵ས་ལ༵ས་ང༵ན་རྣམས་སྤོ༵ང་ཞི༵ང་དཀར་པོ་དགེ་བའི་ལ༵ས་བཟ༷ང་རྣམས་ལེག༵ས་པར་ཚུལ་བཞིན་དུ་བསྒྲུ༵བས་ནས༵། འགྲོ༵་ཀུ༵ན་སྲིད་མཚོ་སོགས་ལས་བསྒྲ༵ལ་ཕྱི༵ར་དུ་སྨོ༵ན་ལ༵མ་མཆོ༵ག་དུ་བསྒྲུབ༵་པའི་སྐྱེས་བུ་དམ་པ༵་དེ༵་རྣམ༵ས་ཀུ༵ན་གྱི༵་ཞབ༵ས་རྡུ༵ལ་སྤྱི༵་བོ༵ས་ལེ༵ན་ཞེས་པའོ། །ཀུ༵ན་རྫོ༵བ་ཆོ༵ས་ཅ༵ན་རྣམས་ར༵ང་ར༵ང་གི་ངོ༵་བོ༵་དེ་ཡིས༵་སྟོ༵ང་པ༵ར་རྟོག༵ས་ནས༵་གནས་ལུགས་སམ་སྣང་ཙམ་ལས་དོན་ལ་མེ༵ད་བཞི༵ན་དུ་རྣམ་ཤེས་ལ་སྣ༵ང་བ༵་ཡི༵་བརྟ༵ན་པ་སྣོད་དང༌། གཡོ༵་བ་བཅུད་ཀྱི་སེམས་ཅན་འདི༵་ཀུ༵ན་འཁྲུ༵ལ་བའི་སྣ༵ང་བ་འབ༵འ་ཞིག༵་ཏུ༵་ལེག༵ས་པ༵ར་རྟོག༵ས་ན༵ས། དེ་རྣམས་ལ་ཞེ༵ན་ཆག༵ས་མི༵་མཛ༵ད་པ༵འི་སྐྱེ༵ས་བུ་མཆོ༵ག་རྣམ༵ས་ལ༵་གུས༵་པ༵ས་ཕྱ༵ག་འཚ༵ལ་ལོ༵། །ཞེས་པའོ། །ཆོས་དང་གང་ཟག་གི་བད༵ག་འཛི༵ན་ལ༵ས་བྱུ༵ང་བའི་ཉོ༵ན་མོང༵ས་རྣ༵མ་རྟོག༵་ཀུ༵ན་དགྲ༵་བཞི༵ན་དུ་ལེགས་པར་རྟོག༵ས་ན༵ས་ཉོན་མོངས་རྣམ་རྟོག་གི་སེམས་ར༵བ་ཏུ་འདུལ༵་བར་མཛ༵ད་ཅི༵ང༌། ཉོན་མོངས་པའི་རྟོག་ཚོགས་རྣམས་ཞི༵་ཞི༵ང་དུལ་བ༵ར་གན༵ས་པའི་དམ་པ༵་རྣམ༵ས་ལ༵འ༵ང་དད༵་པ་བྱེད་པ་ཡིན་ནོ། །ཡང་དཔུང་བཟང་གིས་ཞུས་པའི་རྒྱུད་ལས། །འདོད་ཆགས་ཤས་ཆེན་མི་གཙང་ཤ་ཚིལ་དང༌། །ལྤགས་པ་ཀེང་རུས་ལྟ་བའི་རྣམ་པར་བཟློག །བྱམས་དང་སྙིང་རྗེའི་ཆུས་གདབ་ཞེ་སྡང་ལ། །གཏི་མུག་ལ་ནི་རྟེན་འབྲེལ་ལམ་གྱིས་སོ། །ཞེསགསུངས་པ་ལྟར། འདོ༵ད་ཆག༵ས་ཀྱི་གཉེ༵ན་པོ༵ར་མི༵་སྡུ༵ག་པ་བསྒོམ་པ༵་དང༵་ནི༵། ཞེ༵་སྡ༵ང་གི་གཉེ༵ན་པོ༵ར་བྱ༵མས་པ༵་བསྒོ༵མ་པ༵་དང༵༌། གཏི༵་མུ༵ག་གི་གཉེ༵ན་པོ༵ར་རྟེ༵ན་ཅི༵ང་འབྲེ༵ལ་འབྱུ༵ང་བསྒོམ་པ་ད༵ང༌། ང༵་རྒྱ༵ལ་གྱི་གཉེ༵ན་པོ༵ར་ཁམ༵ས་ཀྱི༵་རབ༵་དབྱེ༵་བསྒོམ་པ་ད༵ང༌། རྣམ༵་རྟོ༵ག་གི་གཉེ༵ན་པོར༵་དབུག༵ས་ཀྱི༵་འབྱུ༵ང་འཇུ༵ག་སོག༵ས། སྤ༵ང་བྱ༵་སོ༵་སོ༵འི་གཉེ༵ན་པོ༵ར་ར༵བ་ཏུ་བསྒོ༵མས་ན༵ས་ཉོ༵ན་མོང༵ས་རྣམ༵་རྟོ༵ག་གི་དགྲ༵་ལས༵་རྣམ༵་པར་རྒྱལ༵་བ༵འི་སྐྱེས༵་བུ་མཆོ༵ག་རྣམ༵ས་ལ༵་གུས༵་པ༵ས་ཕྱ༵ག་འཚ༵ལ་ལོ༵། །ཞེས་པའོ། །རྣ༵མ་ཤེ༵ས་ཀྱི་གཞོ༵ན་པ༵་ཡིན་པའི་མ་དག་པའི་ལ༵ས་རླུ༵ང་ཉི་ཁྲི་ཅིག་སྟོང་དྲུག་བརྒྱའི་འགྱུ༵་བ༵་རྣམ༵ས་ལུས་བྱེད་བཅིང་གི་གནད་ལ་བརྟེན་ནས་དབུ༵་མ༵ར་ཡེ༵་ཤེ༵ས་ཀྱི་རླུ༵ང་དུ༵་སྒྱུ༵ར་བར་མཛ༵ད་པ༵་སྤྲོས་བྲལ་རྣམ༵་པ༵ར་མི༵་རྟོ༵ག་པའི་གཉི༵༵ས་མེད་ཡེ༵་ཤེ༵ས་ཀྱི༵་རྣ༵ལ་འབྱོ༵ར་དུ་སྤྱོད༵་པ༵་རྣམ༵ས་ལ༵་རྟོན་པ་བཞི་ལྡན་བད༵ག་ཕྱ༵ག་འཚ༵ལ་བ་ཡིན་ནོ། །ཕྱི༵་ཉི་ཟླ་གཟའ་སྐར་ལ་སོགས་པ་དང༌། །ན༵ང་སྐྱེས་བུའི་རྒྱུད་ཀྱི་གནས་པ་རྩ་གཡོ་བ་རླུང་ཁམས་ཀུན་ད་བྱང་ཆུབ་སེམས་ཀྱི་ཐིག་ལེ་སོགས་ཀུ༵ན་རྫོ༵བ་གློ༵་བུ༵ར་གྱི་དྲི༵་མ༵་དེ་ཡི༵ས་སྣ༵ང་བ༵་ཀུན་འཁྲུ༵ལ་བའི་སྣ༵ང་བ་ཁོ༵་ན༵ར་ལེག༵ས་པར་རྟོག༵ས་ན༵ས། སྣང་བ་འདི༵་ལ༵ས། གཞ༵ན་མཆོ༵ག་ཕ༵་རོ༵ལ་དོ༵ན་ད༵མ་གྱི༵་སྣ༵ང་བ༵་མངོན༵་དུ༵་གྱུ༵ར་བ་རྣམས་ལ༵་རྟོགས་པའི་དབང་ཕྱུག་ཀུན་མཁྱེན་བད༵ག་ཡིད་དང༵་བ་ལེག༵ས་སོ། །ཕ༵་ཡུ༵ལ་ཉེ་༵འབྲེ༵ལ་ནོ༵ར་རྫ༵ས་ལ༵་སོག༵ས་པ༵་ཆག༵ས་སྡ༵ང་སྐྱེ༵་བའི༵་དངོ༵ས་པོ་ཀུ༵ན་ར༵བ་ཏུ་སྤང༵ས་ན༵ས་གང་གི་ཕྱོགས་སུ་མ་ལྷུང་པར་ཕྱོག༵ས་མེ༵ད་རི༵ས་མེ༵ད་དང༌། ཞེ༵ན་ཆག༵ས་མེ༵ད་པ༵འི་གན༵ས་སུ་ཆོས༵་སྤྱོ༵ད་ཀྱི་ཡོན་ཏན་ག༵ང་འཕེ༵ལ་བསྟེ༵ན་པ༵་རྣམ༵ས་ལ༵འ༵ང་དད༵་པ་ཡིན་ནོ། །ནོ༵ར་གྱི༵་སོ༵་ཚི༵ས་འ༵དུ་འགོ༵༵ད་ར༵བ་ཏུ་སྤང༵ས་ན༵༵ས་སྒོ་༵གསུ༵མ་ད༵གེ་བ༵འི་ཕྱོག༵ས་སུ༵་རབ༵་ཏུ་བཀོ༵ལ་ཏེ༵། །འཁོ༵ར་གསུ༵མ་ད༵ག་པ༵ས་སྨོ༵ན་ལ༵མ་མཆོ༵ག་བསྒྲུ༵བས་ན༵ས། །ད༵གེ་བ༵འི་ནོ༵༵ར་མང༵་དུ་སྤེ༵ལ་བ༵་རྣམ༵ས་ལ༵འ༵ང་དད༵་པ་ཡིན་ནོ། །འབ༵ད་རྩོ༵ལ་མེ༵ད་པར༵་རང་ཤུགས་སམ་ང༵ང་གི༵ས་བྱུ༵ང་བ༵་ཡི༵་རྒྱུ་ནོར་ལོང༵ས་སྤྱོ༵ད་ག༵ཡོ་བ༵་སྙི༵ང་པོ༵་མེ༵ད་པ་རྣམ༵༵ས་ཀྱ༵ང་ཡ༵ར་གྱི༵་དཀོན་མཆོག་གི་ཞི༵ང་ད༵ང་མར༵་གྱི༵་བཀྲེས་སྐོམ་དབུལ་ཕོང་གི་ཞི༵ང་ད༵ག་ལ༵་ལེག༵ས་པ༵ར་བཏ༵ང་ན༵ས་དལ་འབྱོར་སྙི༵ང་པོ༵་ལེ༵ན་པར་བྱེད་པ་རྣམས་ལ༵འ༵ང་དད༵་པ་ཡིན་ཞེས་པའོ། །རྫོག༵ས་ལྡ༵ན་ཆོ༵ས་མཆོ༵ག་ཁྱ༵ད་པ༵ར་དུ་འཕག༵ས་པ་རྣ༵མས་ལ༵་ཡི༵་གེ༵ར་འབྲི༵་བ་སོ༵གས། །ཇི་སྐད་དུ། ཡི་གེ་འབྲི་མཆོད་སྦྱིན་པ་དང༌། །ཉན་དང་ཀློག་དང་ལེན་པ་དང༌། །འཆད་དང་ཁ་ཏོན་བྱེད་པ་དང༌། །དེ་སེམས་པ་དང་སྒོམ་པ་སྟེ། །སྤྱོད་པ་དེ་བཅུའི་བདག་ཉིད་ནི། །བསོད་ནམས་ཕུང་པོ་དཔག་ཏུ་མེད། །ཅེས་གསུངས་པ་ལྟར་ཆོ༵ས་སྤྱོ༵ད་རྣ༵མ་པ༵་བ༵ཅུ་ལེག༵ས་པ༵ར་རང་གིས་བ༵སྒྲུབ་ཅི༵ང་གཞན་ལ་བསྒྲུ༵བ་ཏུ༵་འཇུ༵ག་པ༵་ད༵ང༌། གཞ༵ན་ད༵ག་བསྐུ༵ལ་བ༵ར་མ༵ཛད་པ༵་རྣམ༵ས་ལ༵འ༵ང་ད༵ད་པ་ཡིན་ཞེས་པའོ། །མཁ༵ན་པོ་དང་སློ༵བ་དཔོན་དང་བླ༵་མ༵་དང་དགེ༵་བ༵འི་གཤེ༵ས་གཉེན་རྣ༵མས་དང༵༌། གྲོག༵ས་མཆོད་ལ༵་སོ༵གས་པ་ཆོ༵ས་ཚུལ་བཞིན་མཛ༵ད་པ་ཐ༵མས་ཅ༵ད་ཀྱི༵་སྐྱོ༵ན་ལ༵་མི༵་རྟོ༵ག་པར་སྐྱོ༵ན་ལ༵་མི༵་བརྗོ༵ད་ཅི༵ང་ཕྲ༵ག་དོ༵ག་མེ༵ད་པ༵ར་ད༵ད་གུ༵ས་མ༵ཛད་པ་རྣམས་ལ༵འ༵ང་ད༵ད་པ་ཡིན་ཞེས་པའོ། །དམ་པའི་ཆོ༵ས་མེ༵ད་སྡི༵ག་ཅ༵ན་ལོག་པའི་ལ༵མ་ང༵ན་ཞུ༵གས་པ་རྣ༵མས་ལ༵་ཕ༵ན་སེ༵མས་ཆེ༵ན་པོ༵འི་ལེ༵གས་པ༵འི་གྲོ༵ས་འདེ༵བས་ཤི༵ང་ཡང་དག་པའི་ལ༵མ་བཟ༵ང་ལ་ཞུག༷ས་ན༵ས་དགེ༵་བ༵་སྒྲུ༵བ་པར་བྱེད་པ་རྣ༵མས་ལ༵་དག༵འ་བ༵འི་རྗེ༵ས་སུ་ཡི༵་ར༵ང་མཛ༵ད་པ་རྣམས་ལ༵འ༵ང་ད༵ད་པ་ཡིན་ཞེས་པའོ། །མཉ༵མ་བཞ༵ག་ཟ༵བ་མོ༵་ལ་༵ཟློ༵་བའི་གནས་སྐབ༵ས་སུ༵་ནི༵། སྤྲོས་བཅས་ཀྱི་ཆོ༵ས་ཀྱ༵ང་སྤ༵ང་ན༵་ཆོ༵ས་མི༵ན་པ་སྤང་བ་ལྟ༵་ཅི༵་སྨྲོ༵ས་ཡིན་ལ། རྗེ༵ས་ཐོ༵བ་ཤ༵ན་འབྱེ༵ད་ཀྱི་གནས་སྐབ༵ས་སུ༵་འཁོར་ལོ་ཐ་མ་དང་རྡོ་རྗེ་ཐེག་པ་ལས་གསུངས་པ་བཞིན་དུ་ཡོ༵ད་པ་ལ་ཡོད་ཅེས་དང་མེ༵ད་པ་ལ་མེད་ཅེས་སོག༵ས། ཁ་ཚོན་བཅད་ནས་ཇི་ལྟར་གནས་པ་བཞིན་ལེག༵ས་པ༵ར་ཕྱེ༵་ན༵ས་སྟོ༵ན་པར་མཛ༵ད་པ་རྣམ༵ས་ལ༵འང༵་ད༵ད་ཅེས་པའོ། །ཁམས་ཀུན་ད་བྱང་སེམས་ཀྱི་ཐིག་ལེ་ཞུ༵་བ་ལས་སྐྱེས་པའི་ཟག་བཅས་ཀྱི་བདེ༵་བ་འགྱུ༵ར་བཅ༵ས་ག༵ང་ཡི༵ན་སྤ༵ང་བྱ༵་ཡིན་པ་ད༵ང༌། ཁམས་ཀུན་ད་བྱང་སེམས་ཀྱི་ཐིག་ལེ་ཞུ༵་བ་འཕོ་མེད་དུ་བཅིང་པ་ལ་བརྟེན་ནས་སྐྱེས་པའི་བདེ༵་བ་ཆེན་པོ་འགྱུ༵ར་བ་མེ༵ད་པ་ག༵ང་ཡི༵ན་པ་དེ་ནི་བསྟེ༵ན་བྱ༵་ཡིན་པ་ད༵ང༌། ར༵ང་བཞི༵ན་འགྱུ༵ར་མེ༵ད་ཀྱི་བདེ་ཆེན་ག༵ང་ཡི༵ན་པ་ནི་ཐོ༵བ་བྱ༵ར་གང་ཡིན་པ་དེ་ནི༵། ལེག༵ས་པར་རྟོག༵ས་ཤིང་རང་གིས་ལེག༵ས་པར་བསྒྲུབ༷ས་ནས་གཞན་ལ་ལེག༵ས་པར་སྟོ༵ན་པ་རྣམ༵ས་ལ༵འ༵ང་ཆོས་རྗེ་ཀུན་མཁྱེན་བདག་དད༵་ཅེས་པའོ། །མདོ༵ར་ན༵་རྫོག༵ས་ལྡ༵ན་ཆོ༵ས་མཆོག་གི་ལུགས་དང༵་མཐུ༵ན་པ༵་ཡི༵་གཞི༵་ལ༵མ་འབྲ༵ས་བུ༵འི་ལྟ༵་སྒོ༵མ་སྤྱོ༵ད་པ༵་རྣམ༵ས་ལེག༵ས་པར་རྟོག༵ས་ཤིང་རང་གི་ཚུལ་བཞིན་དུ་ལེག༵ས་པར་བསྒྲུབ༷ས་ནས་གཞན་ལ་ལེག༵ས་པ༵ར་སྟོ༵ན་པར་མཛ༵ད་པ༵་དེ༵་དག༵་ཀུ༵ན་ལ༵་གུ༵ས་པ༵ས་ཕྱ༵ག་འཚ༵ལ་ལོ༵་ཞེས་པ་ལྟར་བསྟན་པ་ཡིན་ཏེ། འདི་ཉིད་ཀྱི་འགྲེལ་བ་བསྡུས་དོན་ལས། ངེས་དོན་ཟབ་མོའི་ལྟ་སྒོམ་མེད་ཅིང་གཙོ་བོར་མི་སྐྱོང་ཡང་ཚུལ་ཁྲིམས་བསྲུང་བ་ལ་སོགས་པ་སྦྱོར་བ་རྣམ་དག་མངའ་བའི་ཆ་ལ་རྗེས་སུ་ཡི་རང་ཞིང་ལྟ་སྒོམ་སྤྱོད་པ་ཐམས་ཅད་ཕྱིན་ཅི་མ་ལོག་པར་མཛད་པ་ཐམས་ཅད་ལ་ཡང་དད་ཅིང་གུས་པས་རྗེས་སུ་ཡི་རང་བར་བསྟན་ཏོ། །ཞེས་གསུངས་པའི་ཕྱིར་རོ། །ལྔ་བ་གསུམ་ལྡན་མར་བཅད་སྐྱོན་ཅན་ལ་བརྟེན་པའི་ལྟ་ངན་དུ་མ་དགག་པ་ལ། ༡ ལྟ་སྒོམ་ལོག་པ་དེ་དག་སྤོང་བར་གདམས་པ། ༢ ཡོངས་གྲུབ་རྟག་ཏུ་དེ་བཞིན་ཉིད་དུ་གནས་པ་ངེས་དོན་དུ་གསུངས་པས་དོན་དམ་ཅང་མེད་དུ་སྨྲ་བ་དགག་པ། ༣ ཉོན་མོངས་རྣམ་རྟོག་འདི་ཆོས་སྐུར་འདོད་པ་སོགས་དགག་པ། ༤ གཞི་མེད་རྩ་བྲལ་དུ་འདོད་པ་དགག་པ། ༥ ཤེས་བྱ་ཐམས་ཅད་དངོས་པོ་དང་དངོས་མེད་གཉིས་སུ་ཁ་ཚོན་ཆོད་པར་འདོད་པ་དགག་པ། ༦ བདེན་པ་ཡང་དག་མེད་པར་འདོད་པ་དགག་པ། ༧ རྟག་ཆད་མ་ཡིན་པ་དག་རྟག་ཆད་ཀྱི་ལྟ་བ་ཡིན་པར་སྒྲོ་འདོགས་པ་དགག་པ། ༨ གཤིས་ལུགས་ཀྱི་སངས་རྒྱས་མེད་པར་འདོད་པ་དགག་པ། ༩ གཤིས་ལུགས་ལ་ཡེ་ཤེས་སོགས་མེད་པར་འདོད་པ་དགག་པ། ༡༠ བདེ་གཤེགས་སྙིང་པོ་དྲང་དོན་ཡིན་པར་འདོད་པ་དགག་པ། ༡༡ བདེ་གཤེགས་སྙིང་པོ་ངེས་དོན་ཡིན་ཡང་དེའི་ཡོན་ཏན་དྲང་དོན་འདོད་པ་དགག་པ། ༡༢ སངས་རྒྱས་རྟག་པ་མི་སྲིད་པར་འདོད་པ་ལ་གནོད་བྱེད་བསྟན་པ། ༡༣ རང་ངོ་ཤེས་པ་ཙམ་གྱིས་སངས་རྒྱས་ཐོབ་ཅེས་འདོད་པ་ལ་གནོད་བྱེད་བསྟན་པ། ༡༤ རང་སེམས་རྣམ་ཤེས་ཆོས་སྐུ་རུ་རྟོགས་ན་སངས་རྒྱས་ཐོབ་པར་འདོད་པ་ལ་ཧ་ཅང་ཐལ་ཆེས་པའི་སྐྱོན་བསྟན་པ། ༡༥ ཆོས་སྐུ་སྟོང་ཉིད་ཁྱབ་མཉམ་འདོད་པ་དགག་ནས་དེ་གཉིས་ཀྱི་རྣམ་དབྱེ་ལེགས་པར་བསྟན་པ། ༡༦ རྟེན་གསུམ་བཞེངས་པ་དོན་མེད་པར་འདོད་པ་དགག་ནས་དོན་ཡོད་པར་སྒྲུབ་པ་དང་བཅུ་དྲུག །དང་པོ་ནི། གསུམ་ལྡན་མར་བཅད་སྐྱོན་ཅན་ལ་བརྟེན་ནས། །ཐམས་ཅད་རང་སྟོང་ཉིད་དུ་བཞེད་པ་དང༌། །རང་སྟོང་དོན་དམ་ཡིན་པར་བཞེད་པ་དང༌། །དོན་དམ་རང་སྟོང་ཡིན་པར་བཞེད་པ་དང༌། །རྣམ་རྟོག་ཆོས་སྐུ་ཡིན་པར་བཞེད་པ་དང༌། །དུག་ལྔ་ཡེ་ཤེས་ཡིན་པར་བཞེད་པ་དང༌། །རྣམ་ཤེས་སངས་རྒྱས་ཡིན་པར་བཞེད་པ་དང༌། །ལས་སྣང་སངས་རྒྱས་ཡིན་པར་བཞེད་པ་དང༌། །སངས་རྒྱས་མིང་སྟོང་ཙམ་དུ་བཞེད་པ་དང༌། །སངས་རྒྱས་གཏན་ནས་མེད་པར་བཞེད་པ་དང༌། །དོན་དམ་སངས་རྒྱས་མེད་པར་བཞེད་པ་དང༌། །བདེན་གཉིས་ངོ་བོ་གཅིག་ཏུ་བཞེད་པ་དང༌། །འཁོར་འདས་ངོ་བོ་གཅིག་ཏུ་བཞེད་པ་དང༌། །སྤང་གཉེན་ངོ་བོ་གཅིག་དུ་བཞེད་པ་དང༌། །སྦྱང་བྱ་སྦྱང་གཞི་གཅིག་ཏུ་བཞེད་པ་དང༌། །ཀུན་འབྱུང་ལས་བྱུང་སྡུག་བསྔལ་འཁོར་བ་འདི། །རྟོགས་ན་སངས་རྒྱས་མ་རྟོགས་འཁོར་བ་ཞེས། །བཞེད་པ་རྣམས་ལ་བདག་ནི་མ་ཕོད་པས། །བྱ་གཏོང་བཞིན་ཏུ་ལེགས་པའི་སྐད་འདིར་གཏོང༌། །རྩ་བར། གསུམ་ལྡན་མར་བཅད་སྐྱོན་ཅན་ལ་བརྟེན་ནས། །ཞེས་པ་ནས། །སྐད་འདིར་གཏོང་ཞེས་པའི་བར་ཤོ་ལོ་ཀ་བཞི་དང་རྐང་བ་གསུམ་བྱུང༌། དེའི་ཚིག་དོན་ནི། གསུ༵མ་ལྡ༵ན་མ༵ར་བ༵ཅད་སྐྱོ༵ན་ཅ༵ན་ལ༵་བརྟེ༵ན་ན༵ས། ཆོས་དང་ཆོས་ཉིད་ཐམ༵ས་ཅ༵ད་ར༵ང་སྟོ༵ང་ཉི༵ད་དུ༵་བཞེ༵ད་པ༵་ད༵ང༌། ར༵ང་སྟོ༵ང་དོ༵ན་ད༵མ་བདེན་པར་ཡི༵ན་པ༵ར་བཞེད༵་པ༵་ད༵ང༌། དོ༵ན་ད༵མ་བདེན་པ་ར༵ང་སྟོ༵ང་ཡི༵ན་པར༵་བཞེད༵་པ༵་ད༵ང༌། རྣམ༵་རྟོ༵ག་རྣམས་ཆོ༵ས་སྐུ༵་ཡི༵ན་པ༵ར་བཞེ༵ད་པ༵་དང༵༌། ཆགས་སོགས་དུ༵ག་ལྔ༵་དེ་དག་ཡེ༵་ཤེ༵ས་ཡི༵ན་པ༵ར་བཞེ༵ད་པ༵་དང༵༌། རྣ༵མ་ཤེ༵ས་འདི་སང༵ས་རྒྱ༵ས་ཡིན༵་པ༵ར་བཞེ༵ད་པ༵་དང༵༌། ལ༵ས་ཀྱི་སྣ༵ང་བ་སང༵ས་རྒྱས༷་ཡི༵ན་པ༵ར་བཞེ༵ད་པ༵་ད༵ང༌། སང༵ས་རྒྱ༵ས་ཀྱང་མི༵ང་སྟོ༵ང་ཙ༵མ་དུ༵་བཞེ༵ད་པ༵་དང༵༌། སང༵ས་རྒྱས༵་གཏ༵ན་ན༵ས་མེ༵ད་པ༵ར་བཞེ༵ད་པ༵་ད༵ང༌། དོན༵་དམ༵་རང་བྱུང་གི་སང༵ས་རྒྱ༵ས་མེད༵་པ༵ར་བཞེ༵ད་པ༵་ད༵ང༌། ཀུན་རྫོབ་བདེན་པ་དང་དོན་དམ་བདེ༵ན་པ་གཉིས༵་ངོ༵་བོ༵་གཅི༵ག་ཏུ༵་བཞེ༵ད་པ༵་ད༵ང༌། འཁོ༵ར་བ་དང་མྱང་འད༵ས་ངོ༵་བོ༵་གཅི༵ག་ཏུ༵་བཞེ༵ད་པ༵་ད༵ང༌། སྤ༵ང་བྱ་དང་གཉེ༵ན་པོ་ངོ༵་བོ༵་གཅི༵ག་ཏུ༵་བཞེ༵ད་པ༵་ད༵ང༌། སྦྱ༵ང་བྱ༵་དང་སྦྱ༵ང་ག༵ཞི་གཅི༵ག་ཏུ༵་བཞེ༵ད་པ༵་ད༵ང༌། ཀུ༵ན་འབྱུ༵ང་བདེན་པ་ལ༵ས་བྱུ༵ང་བའི་སྡུ༵ག་བསྔ༵ལ་འཁོ༵ར་བ༵་འདི༵་རྟོག༵ས་ན༵་སང༵ས་རྒྱས༵། མ༵་རྟོག༵ས་འཁོ༵ར་བ༵་ཞེ༵ས་བཞེ༵ད་པའི་ལམ་ལོག་པ༵་ལ་ཞུགས་པ་རྣམ༵ས་ལ༵་བད༵ག་ནི༵་མ༵་ཕོ༵ད་པ༵ས། ཇི་ལྟར་དགྲ་ཡིས་འཇོམས་པར་རིག་ནས་བྱ༵་གཏོ༵ང་བ་བཞི༵ན་དུ༵་ཕན་འདོད་ཕན་སེམས་ཆེན་པོས་ལེ༵གས་པ༵འི་སྐ༵ད་འདི༵ར་གཏོ༵ང་ཞེས་གྲོས་འདེབས་པ་ཡིན་ནོ། །དེའི་དོན་བསྡུ་ན་ལྟ་སྒོམ་ལོག་པར་ཞུགས་པ་རྣམས་ལ་བྱང་ཆུབ་སེམས་ཀྱིས་ཀུན་ནས་བསླང་ཏེ། ལྟ་སྒོམ་ལོག་པ་དེ་དག་སྤོངས་ཤིག་ཅེས་མ་ཕོད་པའི་གྲོས་འདེབས་པའོ། །གཉིས་པ་ཡོངས་གྲུབ་རྟག་ཏུ་དེ་བཞིན་ཉིད་དུ་གནས་པ་ངེས་དོན་དུ་གསུངས་པས་དོན་དམ་ཅང་མེད་དུ་སྨྲ་བ་དགག་པ་ནི། དེ་བཞིན་གཤེགས་པ་བྱོན་རུང་མ་བྱོན་རུང༌། །ཡོངས་གྲུབ་དགུ་ནི་རྟག་ཏུ་དེ་བཞིན་དུ། །འགྱུར་བ་མེད་པ་ཉིད་དུ་གནས་སོ་ཞེས། །རྫོགས་ལྡན་ཆོས་ལས་གསུངས་པ་དགོངས་སུ་གསོལ། །རྩ་བར། དེ་བཞིན་གཤེགས་པ་བྱོན་རུང་མ་བྱོན་རུང༌། །ཞེས་པ་ནས། དགོངས་སུ་གསོལ་ཞེས་པའི་བར་ཤོ་ལོ་ཀ་གཅིག་བྱུང༌། དེའི་ཚིག་དོན།དེའི་ཚིག་དོན་ནི། ཡུམ་མདོ་ལས། དེ་བཞིན་གཤེགས་པ་རྣམས་བྱུང་ཡང་རུང་དེ་བཞིན་གཤེགས་པ་རྣམས་མ་བྱོན་ཡང་རུང་སྟེ་ཆོས་དེ་དག་གི་དེ་བཞིན་ཉིད་དང༌། མ་ནོར་བ་དེ་བཞིན་ཉིད་དང༌། གཞན་མ་ཡིན་པ་དེ་བཞིན་ཉིད་དང༌། ཆོས་ཉིད་དང༌། ཆོས་ཀྱི་དབྱིངས་དང༌། ཆོས་ཀྱི་གནས་ཉིད་དང༌། ཆོས་སྐྱོན་མེད་པ་ཉིད་དང༌། ཡང་དག་པའི་མཐའ་དང༌། བསམ་གྱིས་མི་ཁྱབ་པའི་དབྱིངས་ནི་དེ་བཞིན་ཉིད་དུ་གནས་ཏེ། ཞེས་སོགས་གསུངས་པ་ལྟར་དེ༵་བཞི༵ན་གཤེག༵ས་པ༵་བྱོ༵ན་ཡང་རུ༵ང་མ༵་བྱོ༵ན་ཡང་རུ༵ང་ཡོང༵ས་གྲུ༵བ་དགུ༵་ནི༵་རྟ༵ག་ཏུ༵་དེ༵་བཞི༵ན་དུ༵་འགྱུ༵ར་བ༵་མེ༵ད་པ༵་ཉི༵ད་དུ༵་གན༵ས་སོ༵་ཞེ༵ས་རྫོག༵ས་ལྡ༵ན་ཆོ༵ས་མཆོག་རྣམས་ལ༵ས་གསུ༵ངས་པ༵་དགོང༵ས་སུ༵་གསོ༵ལ་ནས་དོན་དམ་ཅང་མེད་དུ་མ་སྨྲ་ཤིག་ཅེས་གདམས་པ་ཡིན་ཏེ། འདི་ཉིད་ཀྱི་འགྲེལ་བ་བསྡུས་དོན་ལས། འགྱུར་མེད་ཡོངས་གྲུབ་དགུ་དང་བཅུ་གཉིས་ལ་སོགས་རྟག་ཏུ་དེ་བཞིན་དུ་གནས་པ་ངེས་དོན་དུ་གསུངས་པས་དོན་དམ་ཅང་མེད་དུ་མ་སྨྲ་ཤིག་ཅེས་བསྟན་ཏོ། །ཞེས་གསུངས་བའི་ཕྱིར་རོ། །དེ་བཞིན་གཤེགས་པ་བྱོན་རུང་མ་བྱོན་རུང་ཞེས་པའི་གསུང་གི་ནུས་པས་ནི་གང་ཟག་རྣམས་ཀྱིས་རྟོགས་རུང་མ་རྟོགས་རུང་མཐོང་རུང་མ་མཐོང་རུང༌། །ཡིད་ཆེས་རུང་མ་ཆེས་རུང་ཐོབ་རུང་མ་ཐོབ་རུང་ཞེས་པ་ལ་སོགས་པར་ཡང་དོན་གྱི་བསྟན་ཞེས་ཆོས་རྗེ་ཀུན་མཁྱེན་གྱིས་གསུངས་སོ། །གསུམ་པ་ཉོན་མོངས་རྣམ་རྟོག་ཆོས་སྐུར་འདོད་པ་སོགས་དགག་པ་ནི། ཉོན་མོངས་རྣམ་རྟོག་རྣམ་ཤེས་ཚོགས་འདི་ཡང༌། །རྟོགས་ན་ཆོས་སྐུ་མ་རྟོགས་དྲི་མ་ཞེས། །བཞེད་པ་རྣམས་ལ་བདག་ནི་མ་ཕོད་པས། །རྫོགས་ལྡན་ཆོས་དང་མཐུན་པར་བཟོད་ཅིག་ཅེས། །ཐལ་མོ་སྦྱར་ནས་སྐད་གཏོང་གྲོས་འདེབས་སོ། །རྟོགས་ན་གསེར་ཡིན་མ་རྟོགས་ར་གན་ཡིན། །རྟོགས་ན་རྟ་ཡིན་མ་རྟོགས་བ་ལང་ཡིན། །རྟོགས་ན་སྣང་བ་མ་རྟོགས་མུན་པ་ཡིན། །རྟོགས་ན་སྨན་ཡིན་མ་རྟོགས་དུག་ཡིན་ཞེས། །འདོད་པ་རྣམས་དང་ཁྱད་པར་ཅི་མཆིས་གཟིགས། །དེ་ལྟར་གསུངས་པའི་ལུང་རིགས་མན་ངག་ཀྱང༌། །རྣམ་དག་མཆིས་ནའང་བདག་ལ་བསྟན་དུ་གསོལ། །རྩ་བར། ཉོན་མོངས་རྣམ་རྟོག་རྣམ་ཤེས་ཚོགས་འདི་ཡང༌། །ཞེས་པ་ནས། བསྟན་དུ་གསོལ། ཞེས་པའི་བར་ཤོ་ལོ་ཀ་གསུམ་བྱུང༌། དེའི་ཚིག་དོན་ནི། ཁ་ཅིག་གིས་ཉོ༵ན་མོང༵ས་ཀྱི་རྣ༵མ་རྟོ༵ག་རྣ༵མ་ཤེ༵ས་ཀྱི་ཚོག༵ས་འདི༵་ཡ༵ང་རྟོག༵ས་ན༵་ཆོ༵ས་སྐུ༵་ཡིན་ཞེས་དང༌། མ༵་རྟོ༵གས་ན་གློ་བུར་དྲི༵་མ་༵ཡིན་ཞེ༵ས་བཞེ༵ད་པ༵་རྣམ༵ས་ལ༵་ཆོས་རྗེ་ཀུན་མཁྱེན་བད༵ག་ནི༵་མ༵་ཕོ༵ད་པ༵ས་ཁྱེད་རྣམས་ཀྱིས་ཀྱང་རྫོག༵ས་ལྡ༵ན་ཆོ༵ས་མཆོག་ད༵ང་མཐུ༵ན་པ༵ར་བཟོ༵ད་ཅི༵ག་ཅེ༵ས་ལག་ཐ༵ལ་མོ༵་སྦྱ༵ར་ན༵ས་ལེགས་པའི་སྐ༵ད་གཏོ༵ང་གྲོ༵ས་འདེ༵བས་པར་བྱས་སོ༵། །དེ་ཡང་ཁྱོད་ལྟར་ན་རྟོ༵གས་ན༵་གསེ༵ར་ཡི༵ན། མ༵་རྟོག༵ས་ན་ར༵་ག༵ན་ནམ་རག་ཡི༵ན་པར་འདོད་པ་དང༌། རྟོག༵ས་ན༵་རྟ༵་ཡི༵ན་མ༵་རྟོག༵ས་ན་བ༵་ལ༵ང་ཡི༵ན་པར་འདོད་པ་དང༌། རྟོག༵ས་ན༵་སྣ༵ང་བ༵་དང་མ༵་རྟོག༵ས་ན་མུ༵ན་པ༵་ཡི༵ན་པར་འདོད་པ་དང༌། རྟོག༵ས་ན༵་སྨ༵ན་ཡི༵ན་མ༵་རྟོག༵ས་ན་དུ༵ག་ཡི༵ན་ཞེ༵ས་འདོ༵ད་པ༵་རྣམ༵ས་ད༵ང་ཁྱ༵ད་པ༵ར་ཅི༵་མཆི༵ས་གཟིག༵ས་དང་ཁྱད་པར་མེད་པའི་ཕྱིར། ཉོན་མོངས་རྣམ་རྟོག་དེ་རྟོགས་ན་ཆོས་སྐུ་དང་མ་རྟོགས་ན་དྲི་མ་ཡིན་པར་འདོད་པ་དེ༵་ལྟ༵ར་གསུང༵ས་པ༵འི་ལུ༵ང་དང་རིག༵ས་པ་མ༵ན་ང༵ག་ཀྱ༵ང་རྣམ༵་པར་དག༵་པ་མཆི༵ས་ན༵འ༵ང་ཆོས་རྗེ་ཀུན་མཁྱེན་བད༵ག་ལ༵་བསྟ༵ན་དུ༵་གསོ༵ལ་དང་དེ་འདྲ་མི་སྲིད་པའི་ཕྱིར་རོ། །དེའི་དོན་བསྡུ་ན། ཁྱད་པར་དུ་ཉོན་མོངས་འདི་ཉིད་མཐར་ཐུག་ཡེ་ཤེས་སུ་སྟོན་པའི་ལུང་རིགས་རྣམ་དག་མེད་པས་ཉོན་མོངས་རྣམ་རྟོག་འདི་ཡེ་ཤེས་སམ་ཆོས་སྐུ་འདོད་པའི་ལྟ་ལོག་སྤངས་པར་གདམས་པ་ཡིན་པའི་ཕྱིར་རོ། ། གཞི་མེད་རྩ་བྲལ་དུ་འདོད་པ་དགག་པ།བཞི་པ་གཞི་མེད་རྩ་བྲལ་དུ་འདོད་པ་དགག་པ་ནི། ཐམས་ཅད་གཞི་མེད་རྩ་བྲལ་ཡིན་ནོ་ཞེས། །བཞེད་པ་རྣམས་ནའང་བདག་ནི་མ་ཕོད་པས། །ཐལ་མོ་སྦྱར་ནས་སྐད་གཏོང་གྲོས་འདེབས་ཏེ། །ཀུན་གཞི་ཡེ་ཤེས་དེ་བཞིན་ཉིད་ཀྱི་དབྱིངས། །ཆོས་རྣམས་ཀུན་གྱི་གཞི་དང་གནས་དང་རྟེན། །ཆ་མེད་ཀུན་འགྲོ་ཀུན་ཁྱབ་ཡིན་པར་ནི། །རྫོགས་ལྡན་ཆོས་ལས་གསུངས་པའང་དགོངས་སུ་གསོལ། །རྩ་བར། ཐམས་ཅད་གཞི་མེད་རྩ་བྲལ་ཡིན་ནོ་ཞེས། །ཞེས་པ་ནས། དགོངས་སུ་གསོལ། །ཞེས་པའི་བར་ཤོ་ལོ་ཀ་གཅིག་དང་རྐང་བ་གསུམ་བྱུང༌། དེའི་ཚིག་དོན་ནི། ཆོས་དང་ཆོས་ཉིད་ཐམ༵ས་ཅ༵ད་གཞི༵་མེ༵ད་རྩ༵་བྲ༵ལ་ཡི༵ན་ནོ༵་ཞེ༵ས་བཞེ༵ད་པ༵་རྣམ༵ས་ན༵འ༵ང༌། ཆོས་རྗེ་ཀུན་མཁྱེན་བད༵ག་ནི༵་མ༵་ཕོ༵ད་པ་ཡིན་པས༵་ཐ༵ལ་མོ༵་སྦྱ༵ར་ན༵ས་སྐ༵ད་གཏོ༵ང་གྲོ༵ས་འདེབ༵ས་ཏེ༵། དེ་ཡང་ཀུ༵ན་ག༵ཞི་ཡེ༵་ཤེ༵ས་དང་དེ༵་བཞི༵ན་ཉི༵ད་ཀྱི༵་དབྱི༵ངས་ནི་ཆོ༵ས་རྣམ༵ས་ཀུ༵ན་གྱི༵་གཞི༵་དང༵་གན༵ས་དང༵་རྟེན༵་དང་ཆ༵་མེད༵་ཀུ༵ན་འགྲོ༵་ཀུ༵ན་ཁྱ༵བ་ཡི༵ན་པ༵ར་ནི༵་རྫོག༵ས་ལྡ༵ན་ཆོ༵ས་ལ༵ས་གསུ༵ངས་པའང༵་ཡིན་ཏེ། ཆོས་མངོན་པའི་མདོ་ལས། ཐོག་མ་མེད་དུས་ཅན་གྱི་དབྱིངས། །ཆོས་རྣམས་ཀུན་གྱི་གནས་ཡིན་ཏེ། །དེ་ཡོད་པས་ན་འགྲོ་ཀུན་འང༌། །མྱ་ངན་འདས་པ་ཐོབ་པ་ཡིན། །ཞེས་དང༌། འཕགས་པ་དཀོན་མཆོག་ཐེར་ཟུག་གི་མདོ་ལས། བཅོམ་ལྡན་འདས་དེའི་སླད་དུ་དེ་བཞིན་གཤེགས་པའི་སྙིང་པོ་ནི། འབྲེལ་བ་རྣམ་པར་དབྱེ་བ་མེད་པ། བྲལ་མི་ཤེས་པ་འདུས་མ་བྱས་ཀྱི་ཆོས་རྣམས་ཀྱི་གནས་དང་གཞི་དང་རྟེན་ལགས་ལ་བཅོམ་ལྡན་འདས་དེ་བཞིན་གཤེགས་པའི་སྙིང་པོ་ནི་མ་བྲལ་བར་རྣམ་པར་དབྱེ་བ་དང་བཅས་པའི་ཆོས་བྲལ་ཤེས་པ་འདུས་བྱས་ཀྱི་ཆོས་རྣམས་ཀྱི་ཡང་གཞི་དང་གནས་དང་རྟེན་ལགས་སོ། །ཞེས་དང༌། འཕགས་པ་ཀླུ་སྒྲུབ་ཀྱི་ཞལ་སྔ་ནས། ས་བོན་གྱུར་བ་དབྱིངས་དེ་ཉིད། །ཆོས་རྣམས་ཀུན་ཀྱི་རྟེན་དུ་འདོད། །རིམ་གྱིས་སྦྱངས་པར་གྱུར་པ་ལས། །སངས་རྒྱས་བྱང་ཆུབ་ཐོབ་པར་འགྱུར། །ཞེས་གསུངས་པའི་ཕྱིར་རོ། །དེ་ལྟར་གསུངས་པ་རྣམས་ལེགས་པར་དགོ༵ངས་སུ༵་གསོ༵ལ་ནས་ཐམས་ཅད་གཞི་མེད་རྩ་བྲལ་དུ་མ་སྨྲ་ཤིག་ཅེས་བརྩེ་བས་གདམས་པ་ཡིན་ནོ། ། ཤེས་བྱ་ཐམས་ཅད་དངོས་པོ་དང་དངོས་མེད་གཉིས་སུ་ཁ་ཚོན་ཆོད་པར་འདོད་པ་དགག་པ།ལྔ་བ་ཤེས་བྱ་ཐམས་ཅད་དངོས་པོ་དང་དངོས་མེད་གཉིས་སུ་ཁ་ཚོན་ཆོད་པར་འདོད་པ་དགག་པ་ནི། ཤེས་བྱ་ཐམས་ཅད་དངོས་པོ་དངོས་མེད་དུ། །ཁ་ཚོན་ཆོད་པར་བཞེད་པ་ཐམས་ཅད་དང༌། །བེམ་རིག་གང་ཡིན་དངོས་པོར་བཞེད་རྣམས་ལའང༌། །བདག་ནི་ཐལ་མོ་སྦྱར་ནས་སྐད་གཏོང་སྟེ། །གཤིས་ལུགས་མཐར་ཐུག་ཕུང་པོ་གསུམ་པ་དང༌། །དབུས་མ་བར་མ་མ་ནིང་མཆོག་ཏུ་གསུངས། །འདུས་མ་བྱས་ཀྱི་བདེ་བ་ཤེས་པ་དང༌། །ཡེ་ཤེས་རིག་པ་ཕུང་པོ་ཁམས་ལ་སོགས། །གཟུགས་ནས་མ་འདྲེས་ཆོས་ཀྱི་བར་དང་ནི། །རྟག་བརྟན་ཐེར་ཟུག་གཡུང་དྲུང་མི་འགྱུར་བའི། །གཟུགས་ནས་རྣམ་མཁྱེན་བར་གྱི་ཆོས་ཀུན་དང༌། །ཆོས་ཉིད་འགྱུར་བ་མེད་པའི་ཡོངས་གྲུབ་ཀྱི། །གཟུགས་ནས་སངས་རྒྱས་ཆོས་ཀྱི་བར་རྣམས་ཀྱང༌། །ཤེས་བྱའི་མཐར་ཐུག་དོན་དམ་བདེན་པ་ཡིན། །འདུས་མ་བྱས་ཡིན་འདུས་བྱས་དངོས་པོ་མིན། །དེ་ལྟར་གསུངས་པའི་གཞུང་མཆོག་གཟིགས་སུ་གསོལ། །ཀུན་རྫོབ་འདི་ལས་གཞན་མཆོག་ཕ་རོལ་གྱི། །རོ་དང་ཁམས་ཀྱི་རྣམ་འགྱུར་སོ་དྲུག་དང༌། །ཕུང་པོའི་རྣམ་འགྱུར་སུམ་ཅུ་རྩ་དྲུག་དང༌། །ཕུང་པོ་ཁམས་སོགས་སུམ་ཅུ་དྲུག་ལ་སོགས། །ཤེས་བྱའི་མཐར་ཐུག་དེ་བཞིན་ཉིད་ཡིན་ཡང༌། །དངོས་པོ་དངོས་མེད་གང་ཡང་མ་ཡིན་པར། །གསུངས་པའི་གཞུང་མཆོག་རྣམས་ཀྱང་གཟིགས་སུ་གསོལ། །རྩ་བར། ཤེས་བྱ་ཐམས་ཅད་དངོས་པོ་དངོས་མེད་དུ། །ཞེས་པ་ནས། གཟིགས་སུ་གསོལ། ཞེས་པའི་བར་ཤོ་ལོ་ཀ་ལྔ་དང་རྐང་བ་གསུམ་བྱུང༌། དེའི་ཚིག་དོན་ནི། ཤེ༵ས་བྱ༵་ཐམ༵ས་ཅ༵ད་དངོ༵ས་པོ༵་དང་དངོ༵ས་མེ༵ད་དུ༵་ཁ༵་ཚོ༵ན་ཆོ༵ད་པར༵་བཞེ༵ད་པ༵་ཐ༵མས་ཅད༵་དང༵༌། བེམ༵་རིག༵་ག༵ང་ཡི༵ན་དངོ༵ས་པོ༵ར༵་བཞེ༵ད་པ་རྣམ༵ས་ལ༵འ༵ང་ཆོས་རྗེ་ཀུན་མཁྱེན་བད༵ག་ནི༵་ཐ༵ལ་མོ༵་སྦྱ༵ར་ན༵ས་ལེགས་པའི་སྐ༵ད་འདི་གཏོ༵ང་སྟེ༵། གཤི༵ས་ལུག༵ས་མཐ༵ར་ཐུག༵་ནི་དངོས་དང་དངོས་མེད་གང་ཡང་མ་ཡིན་པའི་ཕུ༵ང་པོ༵་གསུ༵མ་པ༵་དང༵༌། དབུ༵ས་མ༵་དང༌། བ༵ར་མ༵་དང་མ༵་ནི༵ང་མཆོ༵ག་ཏུ༵་གྲུབ་པར་གོང་དུ་བཤད་པ་ལྟར་རྫོགས་ལྡན་གྱི་ཆོས་ལས་གསལ་བར་གསུང༷ས་པ་དང་དོན་དམ་འདུ༵ས་མ༵་བྱ༵ས་ཀྱི༵་བདེ༵་བ༵་དང་ཤེ༵ས་པ༵་དང༵༌། ཡེ༵་ཤེ༵ས་དང༌། རིག༵་པ༵་དང། ཕུང༵་པོ༵་ཁམ༵ས་ལ༵་སོག༵ས་པ་དང་གཟུ༵གས་ན༵ས་སངས་རྒྱས་ཀྱི་མ༵་འདྲེ༵ས་པའི་ཆོ༵ས་ཀྱི༵་བ༵ར་གྱི་འགྲེས་རྐང་བརྒྱ་དང་ཉེར་བདུན་ཐམས་ཅད་ད༵ང་ནི༵། རྟ༵ག་བརྟ༵ན་ཐེ༵ར་ཟུ༵ག་གཡུ༵ང་དྲུ༵ང་མི༵་འགྱུ༵ར་བ༵འི་གཟུག༵ས་ན༵ས་རྣ༵མ་མཁྱེ༵ན་གྱི་བ༵ར་གྱི༵་འགྲེས་རྐང་བརྒྱ་དང་རྩ་བརྒྱད་ཀྱི་ཆོ༵ས་ཀུ༵ན་ད༵ང༌། ཆོ༵ས་ཉི༵ད་འགྱུ༵ར་བ༵་མེད༵་པའི༵་ཡོང༵ས་གྲུ༵བ་ཀྱི༵་གཟུག༵ས་ན༵ས་ས༵ངས་རྒྱ༵ས་ཀྱི་ཆོ༵ས་ཀྱི༵་བ༵ར་འགྲེས་རྐང་བརྒྱ་དང་ཉེར་བདུན་རྣམ༵ས་ཀྱ༵ང་ཤེ༵ས་བྱ༵འི་མཐ༵ར་ཐུ༵ག་དོ༵ན་ད༵མ་བདེ༵ན་པ༵་ཡི༵ན་པའི་འདུ༵ས་མ༵་བྱ༵ས་ཡི༵ན་གྱི་འདུ༵ས་བྱ༵ས་དངོ༵ས་པོ༵་མི༵ན་པའི་ཕྱིར། དེ༵་ལྟ༵ར་ལེགས་པར་གསུང༵ས་པ༵འི་གཞུ༵ང་མཆོ༵ག་རྣམས་ལ་གཟིག༵ས་སུ༵་གསོ༵ལ་བ་དང༌། ཀུ༵ན་རྫོ༵བ་རྣམ་ཤེས་ལ་སྣང་བ་འདི༵་ལ༵ས་གཞ༵ན་མཆོ༵ག་ཕ༵་རོ༵ལ་ཀྱི༵་རོ༵་དང༵་ཁམ༵ས་ཀྱི༵་རྣ༵མ་འགྱུ༵ར་སོ༵་དྲུ༵ག་ད༵ང་ཕུ༵ང་པོ༵འི་རྣ༵མ་འགྱུ༵ར་སུ༵མ་ཅུ་རྩ༵་དྲུ༵ག་ད༵ང༌། ཕུང༵་པོ༵་ཁམ༵ས་སོག༵ས་སུ༵མ་ཅུ༵་རྩ་དྲུ༵ག་ལ༵་སོག༵ས་པ་ཤེ༵ས་བྱའི༵་མཐ༵ར་ཐུ༵ག་དེ༵་བཞི༵ན་ཉི༵ད་ཡི༵ན་ཡ༵ང་དངོ༵ས་པོ་ད༵ང་དངོ༵ས་མེ༵ད་ག༵ང་ཡ༵ང་མ༵་ཡི༵ན་པ༵ར་གསུང༵ས་པ༵འི་གཞུ༵ང་མཆོ༵ག་རྣམ༵ས་ལ༵་གཟིག༵ས་སུ༵་གསོ༵ལ་དང༌། དོན་དམ་མཐར་ཐུག་གང་ཡིན་ཐམས་ཅད་དངོས་དང་དངོས་མེད་གང་ཡང་མ་ཡིན་པའི་ཕུང་པོ་གསུམ་པ་ཡིན་པས་ཤེས་བྱ་ཐམས་ཅད་དངོས་པོ་དང་དངོས་མེད་གཉིས་སུ་ཁ་ཚོན་མ་ཆོད་པ་ཡིན་པའི་ཕྱིར་རོ། །ཡང་གོང་གི་རོ་དང་ཁམས་ཀྱི་རྣམ་འགྱུར་སོ་དྲུག་དང་ཕུང་པོའི་རྣམ་འགྱུར་སུམ་ཅུ་རྩ་དྲུག་གཉིས་ཀ་ཡང་དུས་འཁོར་ཀྱི་རྒྱུད་འགྲེལ་དྲི་མེད་འོད་ལས། རོ་དྲུག་དང་ཁམས་ཀྱི་རྣམ་པར་འགྱུར་བའི་དབྱེ་བས་ཁམས་སུམ་ཅུ་རྩ་དྲུག་ཏུ་འགྱུར་བ་དང༌། ཕུང་པོ་དྲུག་དབང་པོ་དྲུག་གི་དབྱེ་བས་ཕུང་པོ་སུམ་ཅུ་རྩ་དྲུག་ཏུ་འགྱུར་བ་འདི་ལྟ་སྟེ། རོ་དྲུག་དང༌། ཁམས་དྲུག་དང༌། དབང་པོ་དྲུག་དང༌། ཡུལ་དྲུག་དང་ལས་ཀྱི་དབང་པོ་དྲུག་དང༌། ལས་ཀྱི་དབང་པོའི་ཡུལ་དྲུག་ནི་རོ་དྲུག་དང་ཁམས་ཀྱི་རྣམ་པར་འགྱུར་བའོ། །རྣ་བའི་རྣམ་པར་ཤེས་པ་ལ་སོགས་པ་རྣམ་པར་ཤེས་པ་དང༌། དེབཞིན་དུ་འདུ་བྱེད་དྲུག་དང༌། ཚོར་བ་དྲུག་དང༌། འདུ་ཤེས་དྲུག་དང༌། གཟུགས་ཀྱི་ཕུང་པོ་དྲུག་དང༌། ཡེ་ཤེས་ཀྱི་ཕུང་པོ་དྲུག་ནི་ཕུང་པོའི་རྣམ་པར་འགྱུར་བའོ། །ཞེས་གསུངས་པའི་ཕྱིར་རོ། །ཡང་ཕུང་པོ་དང་ཁམས་རྣམ་པར་འགྱུར་བ་སོ་དྲུག་ནི། རོ་དང་ཁམས་ཀྱི་རྣམ་པར་འགྱུར་བ་སོ་དྲུག་གི་རོ་དྲུག་ཞེས་པའི་ཚབ་ཏུ་ཕུང་པོ་དྲུག་ཞེས་བགྲང་བ་མ་གཏོགས་ལྷག་མ་འདྲ་བར་སེམས་ཏེ། རྒྱུད་འགྲེལ་དྲི་མེད་འོད་ལས། །གང་དུ་ཕུང་པོ་རྣམས་སུམ་ཅུ་རྩ་དྲུག་གི་དབྱེ་བས་ཐ་དད་པར་འགྱུར་བ་དེར་ཕུང་པོའི་གནས་སུ་རོ་དྲུག་བཟུང་བར་བྱ་སྟེ། སྐྱུར་བ་དང། བསྐ་བ་དང། ཁ་བ་དང༌། ཚ་བ་དང༌། མངར་བ་དང། ལན་ཚ་རྣམས་སོ། །ཞེས་གསུངས་པའི་ཕྱིར་རོ། །དྲུག་པ་བདེན་པ་ཡང་དག་མེད་པར་འདོད་པ་དགག་པ་ནི། བདེན་པ་ཡང་དག་མེད་པར་བཞེད་རྣམས་ལའང༌། །བདག་ནི་མ་ཕོད་སྐད་གཏོང་གྲོས་འདེབས་ཏེ། །མྱང་འདས་ཆེན་པོ་བདེན་པར་གསུངས་པ་དང༌། །འགོག་བདེན་བདེནཔའི་མཆོག་ཏུ་གསུངས་པ་དང༌། །དེ་བཞིན་ཉིད་བདེན་གཞན་ནི་བརྫུན་པ་དང༌། །བདེན་དོན་བཅུ་གཉིས་ལ་སོགས་གཤིས་ལུགས་ཀྱི། །བདེན་པ་མཐར་ཐུག་རྫོགས་ལྡན་ཆོས་ལས་གསུངས། །དེ་དག་རྣམས་ཀྱང་ལེགས་པར་གཟིགས་སུ་གསོལ། །རྩ་བར། བདེན་པ་ཡང་དག་མེད་པར་བཞེད་རྣམས་ལའང༌། །ཞེས་པ་ནས། གཟིགས་སུ་གསོལ། ཞེས་པའི་བར་ཤོ་ལོ་ཀ་གཉིས་བྱུང༌། དེའི་ཚིག་དོན་ནི། བདེ༵ན་པ༵་ཡ༵ང་ད༵ག་མེ༵ད་པ༵ར་བཞེ༵ད་པ་རྣམ༵ས་ལ༵འང༵༌། ཀུན་མཁྱེན་དོལ་པོ་པ་བད༵ག་ནི༵་མ༷་ཕོ༵ད་པས་ལེགས་པའི་སྐ༵ད་གཏོ༵ང་གྲོ༵ས་འདེ༵བས་པ་ཡིན་ཏེ༵། མདོ་ལང་ཀར་གཤེགས་པ་ལས། མྱ་ངན་འདས་པར་ཡིད་སྤངས་པ། །གཅིག་པུ་དེ་ནི་བདེན་པ་སྟེ། །འཇིག་རྟེན་བརྟགས་པ་སྒྱུ་མ་དང༌། །ཆུ་སྐྱེས་ཤིང་ལྟར་བལྟ་བར་བྱ། །ཞེས་པ་ལ་སོགས་པའི། མྱང༵་འད༵ས་ཆེ༵ན་པོ༵་བདེ༵ན་པ༵ར་གསུ༵ངས་པ༵་དང༵༌། བདེན་པ་གཅིག་སྟེ་གཉིས་མེད་པ་སྟེ། ཞེས་དང༌། བདེན་པ་ནི་གཅིག་པུ་གཉིས་མ་ཡིན་སྟེ། འདི་ལྟ་སྟེ། འགོག་པའི་བདེན་པའོ། །ཞེས་སོགས་ཀྱིས་འགོ༵ག་བདེ༵ན་བདེ༵ན་པ༵འི་མཆོ༵ག་ཏུ༵་གསུང༵ས་པ༵་དང༵༌། ཆོས་ཡང་དག་པར་སྡུད་པའི་མདོ་ལས། །དེ་བཞིན་ཉིད་ནི་བདེན་པ་སྟེ། དེ་བཞིན་ཉིད་མ་གཏོགས་པའི་ཆོས་གཞན་རྣམས་ནི་བརྫུན་པའོ། །ཞེས་པ་ལ་སོགས་པས། དེ༵་བཞི༵ན་ཉི༵ད་བདེ༵ན་པ་ཡིན་གྱི་དེ་ལས་གཞ༵ན་ནི༵་རྫུ༵ན་པ༵་ཡིན་པར་གསུངས་པ་དང༵༌། དོན་དམ་པའི་མཚན་ཡང་དག་པར་བརྗོད་པ་ལས། བདེན་དོན་རྣམ་པ་བཅུ་གཉིས་ལྡན་ཞེས་པ་ལ་སོགས་པས་བདེ༵ན་དོ༵ན་བ༵ཅུ་གཉི༵ས་གསུངས་པ་ལ༵་སོག༵ས་པ་གཤི༵ས་ལུག༵ས་ཀྱི༵་བདེ༵ན་པ༵་མཐ༵ར་ཐུག༵་རྫོག༵ས་ལྡན༵་ཆོ༵ས་ལ༵ས་གསུང༵ས་པ་དེ༵་ད༵ག་རྣམ༵ས་ཀྱང༵་ལེག༵ས་པ༵ར་གཟིག༵ས་སུ༵་གསོ༵ལ་དང༌། ཆོས་ཅན་ཀུན་རྫོབ་ཐམས་ཅད་མི་བདེན་ཡང་ཆོས་ཉིད་དེ་བཞིན་ཉིད་བདེན་པའི་མཆོག་དུ་ངེས་དོན་གྱི་གསུང་རབ་དུ་མ་ལས་གསུངས་པ་ལྟར་བདེན་པ་ཡིན་པའི་ཕྱིར་རོ། ། རྟག་ཆད་མ་ཡིན་པ་དག་རྟག་ཆད་ཀྱི་ལྟ་བ་ཡིན་པར་སྒྲོ་འདོགས་པ་དགག་པ།བདུན་པ་རྟག་ཆད་མ་ཡིན་པ་དག་རྟག་ཆད་ཀྱི་ལྟ་བ་ཡིན་པར་སྒྲོ་འདོགས་པ་དགག་པ་ནི། རྟག་པར་རྟོག་ཚད་རྟག་ལྟའི་སྐྱོན་ཅན་དང། །ཆད་པར་རྟོག་ཚད་ཆད་ལྟའི་སྐྱོན་ཅན་དང༌། །ཡོད་པར་རྟོག་ཚད་ཡོད་ལྟའི་སྐྱོན་ཅན་དང༌། །མེད་པར་རྟོག་ཚད་མེད་ལྟའི་སྐྱོན་ཅན་དུ། །བཞེད་པ་རྣམས་ལའང་བདག་ནི་མ་ཕོད་པས། །ཐལ་མོ་སྦྱར་ནས་བྱ་གཏོང་གྲོས་འདེབས་ཏེ། །རྟག་པར་རྟོགས་ལའང་སྐྱོན་དང་ཡོན་ཏན་གཉིས། །མི་རྟག་རྟོགས་ལའང་སྐྱོན་དང་ཡོན་ཏན་གཉིས། །གཙང་བར་རྟོགས་ལའང་སྐྱོན་དང་ཡོན་ཏན་གཉིས། །མི་གཙང་རྟོགས་ལའང་སྐྱོན་དང་ཡོན་ཏན་གཉིས། །བདེ་བར་རྟོགས་ལའང་སྐྱོན་དང་ཡོན་ཏན་གཉིས། །སྡུག་བསྔལ་རྟོགས་ལའང་སྐྱོན་དང་ཡོན་ཏན་གཉིས། །བདག་ཡོད་རྟོགས་ལའང་སྐྱོན་དང་ཡོན་ཏན་གཉིས། །བདག་མེད་རྟོགས་ལའང་སྐྱོན་དང་ཡོན་ཏན་གཉིས། །ཡོད་པར་རྟོགས་ལའང་སྐྱོན་དང་ཡོན་ཏན་གཉིས། །མེད་པར་རྟོགས་ལའང་སྐྱོན་དང་ཡོན་ཏན་གཉིས། །ཆད་པར་རྟོགས་ལའང་སྐྱོན་དང་ཡོན་ཏན་གཉིས། །རྫོགས་ལྡན་ཆོས་ལས་གསུངས་པས་གཟིགས་སུ་གསོལ། །རྩ་བར། རྟག་པར་རྟོགས་ཚད་རྟག་ལྟའི་སྐྱོན་ཅན་དང༌། །ཞེས་པ་ནས་གཟིགས་སུ་གསོལ། ཞེས་པའི་བར་ཤོ་ལོ་ཀ་བཞི་དང་རྐང་བ་གཉིས་བྱུང༌། དེའི་ཚིག་དོན་ནི། ཁ་ཅིག་གྀིས་རྟག༵་པ༵ར་རྟོག༵ས་ཚ༵ད་དམ་འཛིན་ཚད་རྟ༵ག་ལྟའི༵་སྐྱོ༵ན་ཅ༵ན་དུ་འདོད་པ་དང༵༌། ཆད༵་པ༵ར་རྟོག༵ས་ཚ༵ད་ཆ༵ད་ལྟ༵འི་སྐྱོ༵ན་ཅན༵་དུ་འདོད་པ་དང༵༌། ཡོ༵ད་པ༵ར་རྟོག༵ས་ཚ༵ད་ཡོད༵་ལྟ༵འི་སྐྱོ༵ན་ཅན་དུ་འདོད་པ་དང༵༌། མེ༵ད་པར༵་རྟོག༵ས་ཚ༵ད་མེ༵ད་ལྟ༵འི་སྐྱོ༵ན་ཅ༵ན་དུ༵་བཞེད༵་པ༵་རྣམ༵ས་ལ༵འ༵ང༌། ཆོས་རྗེ་ཀུན་མཁྱེན་བད༵ག་ནི༵་མ༵་ཕོ༵ད་པ༵ས་ཐུགས་བརྩེ་བས་ཐ༵ལ་མོ༵་སྦྱ༵ར་ན༵ས་བྱ༵་གཏོ༵ང་གྲོ༵ས་འདེ༵བས་པ་ཡིན་ཏེ༵། ཐམས་ཅད་རྟག༵་པ༵ར་རྟོག༵ས་པ་ལ༷འ༵ང་སྐྱོ༵ན་ད༵ང་ཡོ༵ན་ཏ༵ན་གཉི༵ས་ཡོད་པའི་ཕྱིར་ཏེ། འདུས་བྱས་ཐམས་ཅད་མི་རྟག་པ་ཡིན་པས་དེ་དག་རྟག་པར་ལྟ་བ་ལ་སྐྱོན་དང༌། དོན་དམ་ཆོས་སྐུ་རྟག་པ་ཡིན་པས་དེ་རྟག་པར་ལྟ་བ་ལ་ཡོན་ཏན་ཡོད་པའི་ཕྱིར། རྟགས་ཕྱི་མ་གྲུབ་སྟེ། སངས་རྒྱས་རྟག་ཏུ་བཞུགས་པར་རྟོགས་ན་བདེ་གཤེགས་སྙིང་པོ་ལ་ཤེས་ནས་དད་པ་ཐོབ་པའི་ཕྱིར་རོ། །ཐམས་ཅད་མི༵་རྟག༵་པར་རྟོ༵གས་པ་ལ༵འ༵ང་སྐྱོན༵་དང༵་ཡོ༵ན་ཏ༵ན་གཉི༵ས་ཡོད་དེ། འདུས་མ་བྱས་རྣམས་མི་རྟག་པར་ལྟ་བ་ལ་སྐྱོན་དང༌། འདུས་བྱས་རྣམས་མི་རྟག་པར་ལྟ་བ་ལ་ཡོན་ཏན་ཡོད་པའི་ཕྱིར། རྟགས་ཟུར་ཕྱི་མ་གྲུབ་སྟེ། འདུས་བྱས་རྣམས་མི་རྟག་པར་ལྟ་བ་ནི་བློ་དོན་དང་མཐུན་ཞིང་རྟག་འཛིན་ལྡོག་པ་ལ་སོགས་པའི་དགོས་པ་ཡོད་པའི་ཕྱིར་རོ། །ཐམས་ཅད་གཙ༵ང་བ༵ར་རྟོག༵ས་པ་ལ༵འ༵ང་སྐྱོ༵ན་ད༵ང་ཡོ༵ན་ཏ༵ན་གཉི༵ས་ཡོད་དེ། ཟག་བཅས་ཐམས་ཅད་མི་གཙང་བ་ཡིན་པས་གཙང་བར་ལྟ་བ་ལ་སྐྱོན་དང༌། བདེ་གཤེགས་སྙིང་པོ་གཙང་བར་རྟོགས་པ་ལའང་ཡོན་ཏན་ཡོད་པའི་ཕྱིར། བདེ་གཤེགས་སྙིང་པོ་གཙང་བར་རྟོགས་པ་ལ་དགོས་པ་ཡོད་དེ། གདོད་ནས་རང་བཞིན་གྱིས་དག་པ་དང༌། ཡོངས་སུ་དག་པ་དང་རྣམ་པར་དག་པ་དང༌། ཤིན་ཏུ་རྣམ་པར་དག་པའི་དོན་རྟོགས་པའི་དགོས་པ་ཡོད་པའི་ཕྱིར་རོ། །ཐམས་ཅད་མི༵་གཙ༵ང་བར་རྟོག༵ས་པ་ལ༵འང༵་སྐྱོན༵་ད༵ང་ཡོ༵ན་ཏ༵ན་གཉི༵ས་ཡོད་དེ། ཆོས་ཀྱི་དབྱིངས་གདོད་ནས་གཙང་བར་རྟག་ཏུ་བཞུགས་པས་དེ་མི་གཙང་བར་ལྟ་བ་ལ་སྐྱོན་དང༌། ཉེར་ལེན་ཀྱི་ཕུང་པོ་མི་གཙང་བས་དེ་མི་གཙང་བར་རྟོགས་པ་ལ་ཡོན་ཏན་ཡོད་པའི་ཕྱིར། ཉེར་ཕུང་མི་གཙང་བར་ལྟ་བ་ལ་ཡོན་ཏན་ཡོད་དེ། དེ་ལ་ཞེན་ཆགས་ལྡོག་པའི་ཕྱིར། དེའི་དོན་དུ་མི་སྡུག་པའི་འདུ་ཤེས་བསྒོམ་པ་ཡང་གསུངས་སོ། །ཐམས་ཅད་བ༵དེ་བ༵ར་རྟོག༵ས་པ་ལ༵འང༵་སྐྱོ༵ན་ད༵ང་ཡོ༵ན་ཏ༵ན་གཉི༵ས་ཡོད་དེ། འཁོར་བ་སྡུག་བསྔལ་ཡིན་པས་དེ་བདེ་བར་འཛིན་ན་འཁོར་བ་ལ་སྐྱོ་ཤས་དང་ཡིད་འབྱུང་མི་སྐྱེ་བའི་སྐྱོན་དང༌། ཆོས་དབྱིངས་བདེ་བར་རྟོགས་པ་ལ་ཡོན་ཏན་ཡོད་པའི་ཕྱིར། ཆོས་དབྱིངས་བདེ་བར་འཛིན་པ་ནི་བློ་དོན་དང་མཐུན་ཞིང་ཆོས་དབྱིངས་བསྒོམ་པ་ལ་དགའ་སྤྲོ་སྐྱེ་བའི་ཕྱིར་རོ། །ཐམས་ཅད་སྡུག༵་བསྔ༵ལ་དུ་རྟོག༵ས་པ་ལ༵འ༵ང་སྐྱོ༵ན་དང༵་ཡོ༵ན་ཏ༵ན་གཉི༵ས་ཡོད་དེ། གཤིས་ལུགས་ཟབ་མོ་ཐམས་ཅད་བདེ་བ་ཆེན་པོ་ཡིན་པས་དེ་སྡུག་བསྔལ་དུ་འཛིན་པ་ལ་སྐྱོན་དང༌། འཁོར་བ་སྡུག་བསྔལ་དུ་རྟོགས་པ་ལ་ཡོན་ཏན་ཡོད་པའི་ཕྱིར། འཁོར་བ་སྡུག་བསྔལ་དུ་འཛིན་པས་ཞེན་ཆགས་ལྡོག་ཅིང་ངེས་འབྱུང་དང་སྐྱོ་ཤས་སྐྱེ་བའི་ཕྱིར་རོ། །བད༵ག་ཡོ༵ད་པར་རྟོག༵ས་པ་ལ༵འང་སྐྱོ༵ན་ད༵ང་ཡོ༵ན་ཏ༵ན་གཉི༵ས་ཡོད་དེ། གང་ཟག་དང་ཆོས་ཀྱི་བདག་ཡོད་པར་རྟོགས་པ་ལ་སྐྱོན་དང་དེ་བཞིན་ཉིད་ཀྱི་བདག་གམ་དག་པའི་བདག་ཡོད་པར་རྟོགས་པ་ལ་ཡོན་ཏན་ཡོད་པའི་ཕྱིར་རོ། །བད༵ག་མེ༵ད་པར་རྟོག༵ས་པ་ལ༵འང༵་སྐྱོ༵ན་ད༵ང་ཡོ༵ན་ཏ༵ན་གཉི༵ས་ཡོད་དེ། དག་པའི་བདག་གམ་དེ་བཞིན་ཉིད་ཀྱི་བདག་མེད་པར་རྟོགས་པ་ལ་སྐྱོན་དང༌། གང་ཟག་དང་ཆོས་ཀྱི་བདག་མེད་པར་རྟོགས་པ་ལ་ཡོན་ཏན་ཡོད་པའི་ཕྱིར་རོ། །གཤིས་ལ་ཡོ༵ད་པ༵ར་རྟོག༵ས་པ་ལ༵འ༵ང་སྐྱོ༵ན་ད༵ང་ཡོན༵་ཏ༵ན་གཉི༵ས་ཡོད་དེ། ཀུན་རྫོབ་ཀྱི་ཆོས་ཐམས་ཅད་གཤིས་ལ་ཡོད་པར་རྟོགས་ན་སྐྱོན་དང༌། དོན་དམ་གྱི་ཆོས་ཐམས་ཅད་གཤིས་ལ་ཡོད་པར་རྟོགས་ན་ཡོན་ཏན་ཡོད་པའི་ཕྱིར་རོ། །གཤིས་ལ་མེ༵ད་པ༵ར་རྟོ༵གས་པ་ལ༵འ༵ང་སྐྱོ༵ན་ད༵ང་ཡོ༵ན་ཏ༵ན་གཉི༵ས་ཡོད་དེ། ཡོན་ཏན་མང་པོ་དང་ལྡན་པའི་བདེ་གཤེགས་སྙིང་པོ་མེད་པར་རྟོགས་ན་སྐྱོན་དང༌། གློ་བུར་དྲི་མ་ཐམས་ཅད་གཤིས་ལ་མེད་པར་རྟོགས་ན་ཡོན་ཏན་ཡོད་པའི་ཕྱིར་རོ། །གཤིས་ལ་ཆ༵ད་པ༵ར་རྟོག༵ས་པ་ལ༵འ༵ང་སྐྱོ༵ན་དང༵་ཡོ༵ན་ཏ༵ན་གཉི༵ས་ཡོད་དེ། རང་བཞིན་གཉུག་མའི་ཡོན་ཏན་ཐམས་ཅད་གཤིས་ལ་ཆད་པར་རྟོགས་ན་སྐྱོན་དང༌། བཅོས་མ་གློ་བུར་བའི་ཆོས་ཐམས་ཅད་གཤིས་ལ་ཆད་པར་རྟོགས་ན་ཡོན་ཏན་ཡོད་པའི་ཕྱིར། དེ་ལྟར་ཆོས་ཀྱི་གནད་ཆེ་ཞིང་འགག་དམ་པོ་དེ་རྣམས་ཀྱི་དོན་ནི་རྫོ༵གས་ལྡ༵ན་གྱི་ཆོ༵ས་ལ༵ས་གསུ༵ངས་པ་ཡིན་ཏེ། ལྷ་མོ་དཔལ་ཕྲེང་གི་སེང་གེའི་སྒྲ་ཆེན་པོའི་མདོ་ལས། བཅོམ་ལྡན་འདས་འདི་གཉིས་མཐར་ལྟ་བ་ཞེས་བགྱི་སྟེ་གཉིས་གང་ཞེ་ན། ཆད་པར་ལྟ་བ་དང་རྟག་པར་ལྟ་བ་ལགས་སོ། །བཅོམ་ལྡན་འདས་གལ་ཏེ་འདུ་བྱེད་རྣམས་ལ་མི་རྟག་པར་ལྟ་ན། དེ་ནི་དེའི་ཆད་པར་ལྟ་བ་མ་ལགས་ཏེ་དེ་ནི་དེའི་ཡང་དག་པའི་ལྟ་བ་ལགས་སོ། །བཅོམ་ལྡན་འདས་གལ་ཏེ་མྱ་ངན་ལས་འདས་པ་རྟག་པར་ལྟ་ན་དེ་ནི་དེའི་རྟག་པར་ལྟ་བ་མ་ལགས་ཏེ་དེ་ནི་དེའི་ཡང་དག་པའི་ལྟ་བ་ལགས་སོ། །དེ་ཅིའི་ཕྱིར་ཞེ་ན། བཅོམ་ལྡན་འདས་རྟོག་གེ་བ་དག་གི་ལྟ་བ་ནི་འདི་ལྟ་བུ་ལགས་ཏེ། ལུས་དང་དབང་བོ་དང་ཚོར་བ་དང་སེམས་པ་རྣམས་ཚེ་འདི་ཉིད་ལ་འཇིག་པར་མཐོང་ནས་སྲིད་པའི་མཚམས་སྦྱོར་བ་འཇུག་པར་མི་བགྱིད་ཅིང་མ་འཚལ་བས། སྟོང་བར་འགྱུར་བ་སྐད་དེ། ཆད་པར་ལྟ་བར་འགྱུར་རོ། །བཅོམ་ལྡན་འདས་རྟོག་གེ་བ་དག་གི་ལྟ་བ་ནི་སེམས་ཀྱི་རྒྱུད་ལ་རྨོངས་ཤིང་སེམས་ཀྱི་སྐད་ཅིག་འཇིག་པ་ལ་ཡང་འཇིག་པར་མི་བགྱིད་ལ་རྣམ་པར་ཤེས་པའི་སྤྱོད་ཡུལ་དུ་མ་གྱུར་པ་སྐད་དེ་རྟག་པར་ལྟ་བར་འགྱུར་རོ། །བཅོམ་ལྡན་འདས་དེ་ལྟར་རྟོག་གེ་བ་དག་གིས་ལྟ་བ་ནི་དེ་ལྟ་བུ་དག་ལགས་པ་སྐད་དེ་དེ་དག་ནི་དོན་དམ་དེ་ལས་ཐལ་བའི་ལྟ་བ་དང༌། དོན་དེའི་ཐ་ཆད་གྱི་ལྟ་བ་དང༌། གཞན་གྱི་མཚན་ཉིད་དང༌། འདྲེས་པའི་ལྟ་བའི་ཆད་པར་རློམ་སེམས་བགྱིད་པ་དང༌། རྟག་པར་རློམ་སེམས་བགྱིད་པ་ལགས་སོ། །བཅོམ་ལྡན་འདས་སེམས་ཅན་རྣམས་ནི་ཟིན་པའི་ཕུང་བོ་ལྔ་པོ་དག་ལ་ཕྱིན་ཅི་ལོག་པར་འགྱུར་ཏེ། བཅོམ་ལྡན་འདས་དེ་དག་ནི་མི་རྟག་པ་ལ་རྟག་པར་འདུ་ཤེས་པ་དང་སྡུག་བསྔལ་བ་ལ་བདེ་བར་འདུ་ཤེས་པ་དང༌། བདག་མ་མཆིས་པ་ལ་བདག་ཏུ་འདུ་ཤེས་པ་དང། མི་གཙང་བ་ལ་གཙང་བར་འདུ་ཤེས་པ་ལགས་སོ། །བཅོམ་ལྡན་འདས་ཐམས་ཅད་མཁྱེན་པའི་ཡེ་ཤེས་ཀྱི་ཡུལ་དང། དེ་བཞིན་གཤེགས་པའི་ཆོས་ཀྱི་སྐུ་ནི། ཉན་ཐོས་དང་རང་སངས་རྒྱས་ཐམས་ཅད་ཀྱི་ཤེས་པ་དག་པས་ཀྱང་སྔོན་མ་མཐོང་བ་ལགས་སོ། །བཅོམ་ལྡན་འདས་སེམས་ཅན་རྣམས་ནི་དེ་བཞིན་གཤེགས་པ་ལ་ཐ་དད་པའི་རྟག་པར་འདུ་ཤེས་པ་དང༌། བདེ་བར་འདུ་ཤེས་པ་དང༌། གཙང་བར་འདུ་ཤེས་པའི་སེམས་ཅན་དག་ནི་བཅོམ་ལྡན་འདས་ཕྱིན་ཅི་ལོག་ཏུ་གྱུར་པ་མ་ལགས་ཏེ་བཅོམ་ལྡན་འདས་སེམས་ཅན་དེ་དག་ནི་ཡང་དག་པའི་ལྟ་བ་ཅན་དུ་འགྱུར་བ་ལགས་སོ། །དེ་ཅིའི་སླད་དུ་ཞེ་ན། བཅོམ་ལྡན་འདས་དེ་བཞིན་གཤེགས་པའི་ཆོས་ཀྱི་སྐུ་ཉིད་རྟག་པའི་ཕ་རོལ་ཏུ་ཕྱིན་པ་དང༌། བདེ་བའི་ཕ་རོལ་ཏུ་ཕྱིན་པ་དང༌། བདག་གི་ཕ་རོལ་ཏུ་ཕྱིན་པ་དང༌། གཙང་བའི་ཕ་རོལ་ཏུ་ཕྱིན་པ་ལགས་པའི་སླད་དུའོ། །བཅོམ་ལྡན་འདས་སེམས་ཅན་གང་དག་དེ་བཞིན་གཤེགས་པའི་ཆོས་ཀྱི་སྐུ་ལ་དེ་ལྟར་མཐོང་བ་དེ་དག་ནི། ཡང་དག་པར་མཐོང་བ་ལགས་སོ། །བཅོམ་ལྡན་འདས་ཡང་དག་པར་མཐོང་བ་གང་དག་ལགས་པ་དེ་དག་ནི་བཅོམ་ལྡན་འདས་ཀྱི་སྲས་ཐུགས་ལས་སྐྱེས་པ་དང༌། ཞལ་ནས་སྐྱེས་པ་དང༌། ཆོས་ལས་སྐྱེས་པ་དང་ཆོས་ཀྱི་སྤྲུལ་པ་དང༌། ཆོས་ཀྱི་བགོ་སྐལ་སྤྱོད་པ་ཞེས་བགྱིའོ། །ཞེས་གསུངས་པའི་ཕྱིར། དེ་ལྟར་སྤྲིན་ཆེན་མདོ་སོགས་ལས་གསུ༵ངས་པ༵ས་དེ་དག་ལ་ལེགས་པར་གཟིག༵ས་སུ༵་གསོ༵ལ་ཞེས་མ་ཕོད་པའི་ཞུ་བ་ཕུལ་བའོ། །བརྒྱད་པ་གཤིས་ལུགས་ལ་སངས་རྒྱས་སོགས་མེད་པར་འདོད་པ་དགག་པ་ནི། གཤིས་ལུགས་སངས་རྒྱས་མེད་པར་བཞེད་པ་དང༌། །འདུས་མ་བྱས་ཀྱི་སངས་རྒྱས་མི་བཞེད་ཅིང༌། །རྟག་བརྟན་ཐེར་ཟུག་སངས་རྒྱས་མི་བཞེད་པ། །དེ་རྣམས་ལ་ཡང་བདག་གིས་མ་ཕོད་པས། །ཐལ་མོ་སྦྱར་ནས་གྲོས་འདེབས་ཞུ་བ་ཕུལ། །དོན་དམ་བདེན་པ་དབྱིངས་རིག་དབྱེར་མེད་ནི། །དང་པོའི་སངས་རྒྱས་གཞི་ཡི་སངས་རྒྱས་ཏེ། །རྟག་བརྟན་ཐེར་ཟུག་གཡུང་དྲུང་མཁའ་ཁྱབ་ཀྱི། །དེ་བཞིན་ཉིད་ལ་སངས་རྒྱས་བྱང་ཆུབ་ཅེས། །རྫོགས་ལྡན་ལས་གསུངས་དེ་ཡང་གཟིགས་སུ་གསོལ། །རྩ་བར། གཤིས་ལུགས་སངས་རྒྱས་མེད་པར་བཞེད་པ་དང༌། །ཞེས་པ་ནས། དེ་ཡང་གཟིགས་སུ་གསོལ། ཞེས་པའི་བར་ཤོ་ལོ་ཀ་གཉིས་དང་རྐང་བ་གཉིས་བྱུང༌། དེའི་ཚིག་དོན་ནི། གཤི༵ས་ལུག༵ས་ཟབ་མོའི་སང༵ས་རྒྱས༵་མེ༵ད་པ༵ར་བཞེ༵ད་པ༵་དང༵༌། དོན་དམ་འདུ༵ས་མ༵་བྱ༵ས་ཀྱི༵་སང༵ས་རྒྱ༵ས་མི༵་བཞེ༵ད་ཅིང༵༌། རྟག༵་པ་བརྟ༵ན་པ་ཐེ༵ར་ཟུ༵ག་པའི་སང༵ས་རྒྱ༵ས་མི་༵བཞེ༵ད་པ༵་དེ༵་རྣམ༵ས་ལ་༵ཡ༵ང་ཆོས་རྗེ་ཀུན་མཁྱེན་བད༵ག་གིས༵་མ༵་ཕོ༵ད་པ༵ས་ཕྱག་ཐལ༵་མོ༵་སྦྱ༵ར་ན༵ས་གྲོ༵ས་འདེབ༵ས་ཞུ༵་བ༵་ཕུ༵ལ་བ་འདི་ལྟ་སྟེ། དོ༵ན་ད༵མ་བདེ༵ན་པ༵་དབྱིང༵ས་དང་རི༵ག་པ་དབྱེ༵ར་མེ༵ད་ཟུང་འཇུག་ནི༵། དང༵་བོ༵འི་སང༵ས་རྒྱས༵་དང༌། གཞི༵་ཡི༵ས་སང༵ས་རྒྱ༵ས་ཡིན་ཏེ༵། རྟག༵་བརྟ༵ན་ཐེ༵ར་ཟུ༵ག་གཡུ༵ང་དྲུ༵ང་མཁ༵འ་ཁྱ༵བ་ཀྱི༵་དེ༵་བཞི༵ན་ཉིད༵་ལ༵་སང༵ས་རྒྱས༵་དང་བྱ༵ང་ཆུ༵བ་ཅེ༵ས་རྫོག༵ས་ལྡ༵ན་ཆོས་མཆོག་ལ༵ས་གསུ༵ངས་པ་དེ༵་ཡ༵ང༌། ལེགས་པར་གཟི༵གས་སུ༵་གསོ༵ལ་དང༌། གཤིས་ལུགས་ཀྱི་སངས་རྒྱས་དང༌། འདུས་མ་བྱས་ཀྱི་སངས་རྒྱས་དང༌། རྟག་བརྟན་ཐེར་ཟུག་གི་སངས་རྒྱས་རྣམས་གྲུབ་པ་ཡིན་པའི་ཕྱིར། དེ་བས་ན་དོན་དམ་པའི་སངས་རྒྱས་མེད་པར་མ་སྨྲ་ཞིག་ཅེས་ཐུགས་བརྩེ་བས་གདམས་པའོ། །དགུ་བ་གཤིས་ལུགས་ལ་ཡེ་ཤེས་མེད་པར་འདོད་པ་དགག་པ་ནི། གཤིས་ལ་ཡེ་ཤེས་མེད་པར་འདོད་པ་དང༌། །རང་བྱུང་ཡེ་ཤེས་རྟག་པར་མི་བཞེད་པ། །དེ་རྣམས་ལ་ཡང་བདག་ནི་ཞུ་བ་འབུལ། །སྐད་ཅིག་གཅིག་དང་དུ་མ་དང་བྲལ་བའི། །ཡེ་ཤེས་ལ་ནི་རྒྱལ་བ་མཆོག་རྣམས་ཀྱིས། །དེ་ཁོ་ན་ཉིད་ཅེས་ནི་རྫོགས་ལྡན་གྱི། །ཆོས་ལས་གསུངས་པས་དེ་ཡང་གཟིགས་སུ་གསོལ། །རྩ་བར། གཤིས་ལ་ཡེ་ཤེས་མེད་པར་འདོད་པ་དང༌། །ཞེས་པ་ནས། གཟིགས་སུ་གསོལ་ཞེས་པའི་བར་ཤོ་ལོ་ཀ་གཅིག་དང་རྐང་བ་གསུམ་བྱུང༌། དེའི་ཚིག་དོན་ནི། གཤི༵ས་ཀྱི་གནས་ལུགས་ལ༵་ཡེ༵་ཤེ༵ས་མེ༵ད་པ༵ར་འདོ༵ད་པ༵་ད༵ང༌། དོན་དམ་ར༵ང་བྱུ༵ང་གི་ཡེ༵་ཤེ༵ས་རྟ༵ག་པ༵ར་མི༵་བཞེ༵ད་པ༵་དེ༵་རྣམ༵ས་ལ༵་ཡ༵ང་རྟོགས་པའི་དབང་ཕྱུག་ཀུན་མཁྱེན་བད༵ག་གིས་ནི༵་ཞུ༵་བ༵་འབུ༵ལ་བ་འདི་ལྟར་སྐ༵ད་ཅི༵ག་གཅི༵ག་ད༵ང་དུ༵་མ༵་ད༵ང་བྲ༵ལ་བ༵འི་ཡེ༵་ཤེ༵ས་རྟག་བརྟན་དེ་ལ༵་ནི༵་རྒྱ༵ལ་བ༵་མཆོ༵ག་རྣམ༵ས་ཀྱི༵ས་དེ༵་ཁོ༵་ན༵་ཉི༵ད་ཡིན་པར་གྲུབ་ཅེ༵ས་པ་ནི༵་རྫོག༵ས་ལྡ༵ན་ངེས་དོན་གྱི༵་ཆོ༵ས་གསུང་རབ་དུ་མ་ལས༵་གསུང༵ས་པ༵ས། དེ༵་ཡ༵ང་ལེགས་པར་གཟིག༵ས་སུ༵་གསོ༵ལ་ཏེ། དོན་ལ་ཡེ་ཤེས་མེད་པར་མ་སྨྲ་ཞིག་ཅེས་བརྩེ་བས་གདམས་པའོ། ། བདེ་གཤེགས་སྙིང་པོ་དྲང་དོན་ཡིན་པར་འདོད་པ་དགག་པ།བཅུ་བ་བདེ་གཤེགས་སྙིང་པོ་དྲང་དོན་ཡིན་པར་འདོད་པ་དགག་པ་ལ། ཧ་ཅང་ཐལ་ཆེས་པར་གནོད་པ་བསྟན་པ། དེ་དྲང་དོན་ཡིན་པའི་སྒྲུབ་བྱེད་མེད་པར་བསྟན་པ། དེ་ངེས་དོན་ཡིན་པ་ལ་སྒྲུབ་བྱེད་ཡོད་པར་བསྟན་པ་དང་གསུམ། དང་པོ་ནི། བདེ་གཤེགས་སྙིང་པོ་དྲང་དོན་ཡིན་ནོ་ཞེས། །བཞེད་པ་རྣམས་ལའང་བདག་ནི་མ་ཕོད་པས། །ཐལ་མོ་སྦྱར་ནས་སྐད་གཏོང་ཞུ་བ་འབུལ། །བདེ་གཤེགས་སྙིང་པོ་དེ་བཞིན་ཉིད་ཡིན་ཞིང༌། །དེ་བཞིན་ཉིད་ཀྱང་བདེ་གཤེགས་སྙིང་ཡིན་པས། །བདེ་གཤེགས་སྙིང་པོ་དྲང་དོན་ཡིན་ན་ནི། །དེ་བཞིན་ཉིད་ཀྱང་དྲང་དོན་ཡིན་པར་འགྱུར། །དོན་དམ་ཆོས་སྐུའང་དྲང་དོན་ཡིན་པར་འགྱུར། །ངོ་བོ་ཉིད་སྐུ་འང་དྲང་དོན་ཡིན་པར་འགྱུར། །རང་བཞིན་རིགས་ཀྱང་དྲང་དོན་ཡིན་པར་འགྱུར། །ཤེར་ཕྱིན་ཟབ་མོ་འང་དྲང་དོན་ཡིན་པར་འགྱུར། །དབུ་མ་ཆེན་པོའང་དྲང་དོན་ཡིན་པར་འགྱུར། །མྱང་འདས་ཆེན་པོའང་དྲང་དོན་ཡིན་པར་འགྱུར། །ཕྱག་རྒྱ་ཆེན་པོའང་དྲང་དོན་ཡིན་པར་འགྱུར། །འོད་གསལ་ཆེན་པོའང་དྲང་དོན་ཡིན་པར་འགྱུར། །བདེ་དགྱེས་དུས་འཁོར་གསང་འདུས་ལ་སོགས་པ། །གཤིས་ལུགས་ཟབ་མོའི་ལྷ་སྔགས་དཀྱིལ་འཁོར་དང༌། །རྒྱུད་དང་ཕྱག་རྒྱ་མཐར་ཐུག་ཐམས་ཅད་ཀྱང༌། །དྲང་དོན་ཡིན་པར་ཧ་ཅང་ཐལ་བའི་གནོད། །རྩ་བར། བདེ་གཤེགས་སྙིང་པོ་དྲང་དོན་ཡིན་ནོ་ཞེས། །ཞེས་པ་ནས། ཧ་ཅང་ཐལ་བས་གནོད། ཅེས་པའི་བར་ཤོ་ལོ་ཀ་བཞི་དང་རྐང་བ་གསུམ་བྱུང༌། དེའི་ཚིག་དོན་ནི། བདེ༵་གཤེ༵གས་སྙི༵ང་པོ༵་དྲ༵ང་བའི་དོ༵ན་ཡི༵ན་ནོ༵་ཞེ༵ས་བཞེ༵ད་པ༵་རྣམ༵ས་ལ༵འ༵ང༌། ཆོས་རྗེ་ཀུན་མཁྱེན་བད༵ག་ནི༵་མ༵་ཕོ༵ད་པ་ཡིན་པ༵ས་ཐལ༵་མོ༵་སྦྱ༵ར་ན༵ས་སྐ༵ད་གཏོ༵ང་ཞུ༵་བ༵་འབུ༵ལ་བ་ནི། དོན་དམ་བ༵དེ་གཤེ༵གས་སྙི༵ང་པོ༵་ནི་དེ༵་བཞི༵ན་ཉི༵ད་ཡི༵ན་ཞི༵ང་དེ༵་བཞི༵ན་ཉི༵ད་ཀྱ༵ང་བ༵དེ་གཤེ༵གས་སྙི༵ང་པོ་ཡི༵ན་པ༵ས་ན། གལ་ཏེ་བ༵དེ་གཤེག༵ས་སྙིང༵་པོ༵་དྲ༵ང་དོ༵ན་ཡི༵ན་ན༵་ནི༵་དེ༵་བཞི༵ན་ཉི༵ད་ཀྱ༵ང་དྲ༵ང་དོ༵ན་ཡི༵ན་པ༵ར་འགྱུ༵ར་བ་དང་དོ༵ན་ད༵མ་ཆོ༵ས་སྐུ༵འང༵་དྲ༵ང་དོ༵ན་ཡི༵ན་པ༵ར་འགྱུ༵ར་བ་དང༌། ངོ༵་བོ༵་ཉི༵ད་སྐུ༵འ༵ང་དྲ༵ང་དོ༵ན་ཡི༵ན་པ༵ར་འགྱུ༵ར་བ་དང༌། ར༵ང་བཞི༵ན་གནས་རིག༵ས་ཀྱ༵ང་དྲ༵ང་དོ༵ན་ཡི༵ན་པ༵ར་འགྱུ༵ར་བ་དང༌། ཤེ༵ར་ཕྱི༵ན་ཟ༵བ་མོ༵འ༵ང་དྲ༵ང་དོ༵ན་ཡི༵ན་པ༵ར་འགྱུ༵ར་བ་དང༌། དབུ༵་མ༵་ཆེན༵་པོ༵འང༵་དྲ༵ང་དོ༵ན་ཡི༵ན་པ༵ར་འགྱུ༵ར་བ་དང༌། མྱང༵་འད༵ས་ཆེ༵ན་པོ༵འ༵ང་དྲ༵ང་དོ༵ན་ཡི༵ན་པ༵ར་འགྱུ༵ར་བ་དང༌། ཕྱག༵་རྒྱ༵་ཆེ༵ན་པོ༵འ༵ང་དྲང༵་དོ༵ན་ཡི༵ན་པ༵ར་འགྱུ༵ར་བ་དང༌། འོད༵་གས༵ལ་ཆེ༵ན་པོ༵འ༵ང་དྲ༵ང་དོ༵ན་ཡི༵ན་པར༵་འགྱུ༵ར་བ་དང༌། བདེ༵་དགྱེ༵ས་དུས༵་འཁོ༵ར་གས༵ང་འདུ༵ས་ལ༵་སོག༵ས་པ༵་གཤི༵ས་ལུག༵ས་ཟབ༵་མོ༵འི་ལྷ༵་དང་སྔག༵ས་དང་དཀྱི༵ལ་འཁོ༵ར་དང༵་རྒྱུ༵ད་ད༵ང་ཕྱ༵ག་རྒྱ༵་མཐ༵ར་ཐུག༵་ཐམ༵ས་ཅ༵ད་ཀྱ༵ང་དྲང་དོན་ཡིན་པར་འགྱུར་བའི་ཕྱིར་ཏེ། དོན་དམ་པའི་རྣམ་པ་དེ་དག་བདེ་གཤེགས་སྙིང་པོ་ཡིན་པས་བདེ་གཤེགས་སྙིང་པོ་དྲང་དོན་ཡིན་ན་དེ་དག་དྲང་དོན་དུ་འགྱུར་བ་ཡིན་ནོ། །དེས་ན་བདེ་གཤེགས་སྙིང་པོ་དྲ༵ང་དོ༵ན་ཡི༵ན་པ༵་ལ་ཧ༵་ཅ༵ང་ཐ༵ལ་བ༵ས་གནོ༵ད་པ་ཡོད་པའི་ཕྱིར་རོ། །གཉིས་པ་དེ་དྲང་དོན་ཡིན་པའི་སྒྲུབ་བྱེད་མེད་པར་བསྟན་པ་ནི། རྩ་བར། བདེ་གཤེགས་སྙིང་པོ་དྲང་དོན་ཡིན་པར་ནི། །སྟོན་པའི་ལུང་རིགས་མཆིས་ན་བསྟན་དུ་གསོལ། །ཞེས་རྐང་བ་གཉིས་བྱུང༌། དེའི་ཚིག་དོན་ནི། ཁྱོད་ལྟར་བ༵དེ་གཤེ༵གས་སྙི༵ང་པོ༵་དྲ༵ང་དོ༵ན་ཡི༵ན་པ༵ར་ནི༵་སྟོ༵ན་པའི༵་ལུ༵ང་དང་རིག༵ས་པ་རྣམ་དག་མཆི༵ས་ན༵་བསྟ༵ན་དུ༵་ག༵སོལ་དང༌། བདེ་གཤེགས་སྙིང་པོ་དྲང་དོན་ཡིན་པར་སྒྲུབ་བྱེད་ཀྱི་ལུང་རིགས་རྣམ་དག་ཤེས་བྱ་ལ་མི་སྲིད་པའི་ཕྱིར་རོ། །གསུམ་པ་དེ་ངེས་དོན་ཡིན་པ་ལ་སྒྲུབ་བྱེད་ཡོད་པར་བསྟན་པ་ནི། རྩ་བར། ངེས་དོན་ཡིན་པར་སྟོན་པའི་ལུང་རིགས་དང༌། །མན་ངག་ཟབ་མོ་ཤིན་ཏུ་མང་བར་མཆིས། །ཞེས་རྐང་བ་གཉིས་བྱུང༌། དེའི་ཚིག་དོན་ནི། དོན་དམ་བདེ་གཤེགས་སྙིང་པོ་ངེ༵ས་དོ༵ན་ཡི༵ན་པ༵ར་སྟོ༵ན་པར་བྱེད་པའི༵་ལུ༵ང་དང་རིག༵ས་པ་རྣམ་དག་ད༵ང༌། སེམས་འགྲེལ་སྐོར་གསུམ་སོགས་ཀྱི་མ༵ན་ངག༵་ཟ༵བ་མོ༵་ཤི༵ན་ཏུ༵་མ༵ང་བ༵ར་མཆི༵ས་པ་ཡིན་ཏེ། འདི་ཉིད་ཀྱི་འགྲེལ་བ་བསྡུས་དོན་ལས༌། ངེས་དོན་ཡིན་པར་ལུང་རིགས་རྣམ་དག་གི་གྲུབ་པས་ངེས་དོན་ཡིན་པ་ལ་གནོད་བྱེད་མེད་པར་བསྟན་ཏོ། །ཞེས་གསུངས་པའི་ཕྱིར་རོ། །བཅུ་གཅིག་པ་ནི། གཤེགས་སྙིང་ངེས་དོན་ཡིན་ཡང་དེའི་ཡོན་ཏན་དྲང་དོན་འདོད་པ་དགག་པ་ནི། བདེ་གཤེགས་སྙིང་པོ་དྲང་དོན་ཡིན་པར་ནི། །སྟོན་པའི་ལུང་རིགས་མཆིས་ན་བསྟན་དུ་གསོལ། །ངེས་དོན་ཡིན་པར་སྟོན་པས་ལུང་རིགས་དང༌། །མན་ངག་ཟབ་མོ་ཤིན་ཏུ་མང་བར་མཆིས། །གལ་ཏེ་ལ་ལའི་ལོག་རྟོག་འདི་སྙམ་དུ། །བདེ་གཤེགས་སྙིང་པོ་དྲང་དོན་མ་ཡིན་ཡང༌། །དེ་ཡི་ཡོན་ཏན་ཐམས་ཅད་དྲང་དོན་ཡིན། །དེ་ཕྱིར་ཡོན་ཏན་མང་པོ་ཚང་བ་ཡི། །བདེ་གཤེགས་སྙིང་པོ་དོན་ལ་མེད་ཅེ་ན། །རྒྱལ་བའི་ཡུམ་ལས་ཡོངས་གྲུབ་རྣམ་དགུ་པོ། །རེ་རེའི་ཡོན་ཏན་ལ་ཡང་ཚད་མེད་ཅེས། །ལེགས་པར་གསུངས་ཤིང་སྙིང་པོའི་མདོ་བཅུ་དང༌། །ངེས་དོན་མདོ་བཅུ་ལ་སོགས་རྫོགས་ལྡན་གྱི། །ཆོས་གཞན་ལས་ཀྱང་དོན་དམ་རྟོགས་པ་ཡི། །ཡོན་ཏན་བགྲངས་ཡས་གསུངས་པས་གཟིགས་སུ་གསོལ། །རྩ་བར། གལ་ཏེ་ལ་ལའི་ལོག་རྟོག་འདི་སྙམ་དུ། །ཞེས་པ་ནས། གཟིགས་སུ་གསོལ། ཞེས་པའི་བར་ཤོ་ལོ་ཀ་གཉིས་དང་རྐང་བ་གསུམ་བྱུང༌། དེའི་ཚིག་དོན་ནི། ག༵ལ་ཏེ༵་གང་ཟག་ལ༵་ལ༵འི་ལོ༵ག་པར་རྟོ༵ག་པ་ལ་འ༵དི་སྙ༵མ་དུ༵་བ༵དེ་གཤེ༵གས་སྙི༵ང་པོ༵་ངེས་དོན་ཡིན་པས་དྲ༵ང་དོ༵ན༵་མ༵་ཡི༵ན་ཡ༵ང༌། བདེ་གཤེགས་སྙིང་པོ་དེ༵་ཡི༵་ཡོ༵ན་ཏ༵ན་དུ་མ་གསུངས་པ་ཐམ༵ས་ཅད༵་ངེས་པའི་དོན་མ་ཡིན་པར་དྲ༵ང་བའི་དོན༵་ཡི༵ན་པ་དེ༵འི་ཕྱི༵ར་ཡོ༵ན་ཏ༵ན་མ༵ང་པོ༵་ཚ༵ང་བ༵་ཡི༵་བདེ༵་གཤེག༵ས་སྙི༵ང་པོ༵་དོན༵་ལ༵་མེ༵ད་ཅེ༵་ན༵། ཞེས་གསུམ་ལྡན་མར་བཅད་འཁྲུལ་བའི་འདོད་ལུགས་ཡིན་ལ། དེ་སུན་བྱུང་བ་ནི། རྒྱ༵ལ་བ༵འི་ཡུ༵མ་ལ༵ས། དེ་བཞིན་ཉིད་ཀྱི་ཡོན་ཏན་ལྟ་ཇི་སྙེད་ཅིག་བརྗོད་པར་བགྱི་སྟེ། དེ་བཞིན་ཉིད་ཀྱི་ཡོན་ཏན་ནི་ཚད་མ་མཆིས་ཏེ། དེ་བཞིན་དུ་སྦྱར་ཏེ། མ་ནོར་བ་དེ་བཞིན་ཉིད་དང༌། གཞན་མ་ཡིན་པའི་དེ་བཞིན་ཉིད་དང༌། ཆོས་ཉིད་དང༌། ཆོས་ཀྱི་དབྱིངས་དང༌། ཆོས་ཀྱི་གནས་ཉིད་དང༌། ཆོས་མི་འགྱུར་བ་ཉིད་དང༌། ཡང་དག་པའི་མཐའ་དང༌། བསམ་གྱི་མི་ཁྱབ་པའི་དབྱིངས་ཀྱི་ཡོན་ཏན་ནི་ཚད་མ་མཆིས་སོ། །ཞེས་ཡོང༵ས་གྲུ༵བ་རྣམ༵་པ་དགུ༵་པོ༵་རེ༵་རེ༵འི་ཡོ༵ན་ཏ༵ན་ལ༵་ཡ༵ང་ཚད་མེ༵ད་ཅེ༵ས་གསུངས་ལ། དེ་ལྟར་ཡུམ་བར་མར་ཡང་ལེག༵ས་པ༵ར་གསུ༵ངས་ཤི༵ང༌། མྱ་ངན་ལས་འདས་པའི་མདོ་ལས། དེ་བཞིན་གཤེགས་པའི་སངས་རྒྱས་ཀྱི་རང་བཞིན་ནི་རྣམ་པ་གཉིས་ཏེ། ཡོད་པ་དང་མེད་པའོ། །དེ་ལ་ཡོད་པ་ནི། འདི་ལྟ་སྟེ། མཚན་སུམ་ཅུ་རྩ་གཉིས་དང༌། དཔེ་བྱད་བཟང་པོ་བརྒྱད་ཅུ་དང༌། སྟོབས་བཅུ་དང༌། མི་འཇིགས་པ་བཞི་དང༌། དྲན་པ་ཉེ་བར་བཞག་པ་གསུམ་དང༌། བྱམས་པ་ཆེན་པོ་དང༌། སྙིང་རྗེ་ཆེན་པོ་དང༌། དཔའ་བར་འགྲོ་བའི་ཏིང་ངེ་འཛིན་ལ་སོགས་པ་ཏིང་ངེ་འཛིན་ཚད་མེད་པ་སྙེད་དང༌། རྡོ་རྗེ་ལྟ་བུའི་ཏིང་ངེ་འཛིན་ལ་སོགས་པ་ཚད་མེད་པ་སྙེད་དང༌། ཐབས་ལ་མཁས་པ་ལ་སོགས་པའི་ཏིང་ངེ་འཛིན་ཚད་མེད་པ་སྙེད་དང༌། ཡེ་ཤེས་ལྔ་ལ་སོགས་པའི་ཏིང་ངེ་འཛིན་ཚད་མེད་པ་སྙེད་ནི་ཡོད་པ་ཞེས་བྱའོ། །དེ་ལ་མེད་པ་ནི། འདི་ལྟ་སྟེ། དེ་བཞིན་གཤེགས་པ་ལས་འདས་པ་དགེ་བ་རྣམས་དང༌། ལུང་དུ་མི་སྟོན་པ་དང༌། ལས་དང་རྒྱུ་དང་འབྲས་བུ་དང༌། རྣམ་པར་སྨིན་པ་དང༌། ཉོན་མོངས་པ་དང༌། ཕུང་པོ་ལྔ་དང༌། རྟེན་ཅིང་འབྲེལ་ཏེ་བྱུང་བ་བཅུ་གཉིས་ནི་མེད་པ་ཞེས་བྱའོ། །ཞེས་དང༌། རྒྱུད་བླ་མ་ལས། འོད་གསལ་བྱས་མིན་དབྱེར་མེད་པར། །འཇུག་ཅན་གངྒཱའི་ཀླུང་གི་ནི། །རྡུལ་ལས་འདས་པའི་སངས་རྒྱས་ཀྱི། །ཆོས་རྣམས་ཀུན་དང་ལྡན་པ་ཉིད། །ཅེས་པ་ལ་སོགས་པ་སྙི༵ང་པོ༵འི་མ༵དོ་བཅུ༵་ད༵ང་ངེ༵ས་དོ༵ན་མ༵དོ་བཅུ༵་ལ༵་སོག༵ས་པ་རྫོ༵གས་ལྡ༵ན་གྱི༵་ཆོ༵ས་གཞ༵ན་ལ༵ས་ཀྱ༵ང་དོ༵ན་ད༵མ་རྟོག༵ས་པ༵་ཡི༵་ཡོ༵ན་ཏ༵ན་བ༵གྲང་ཡ༵ས་གསུ༵ངས་པ་ཡིན་པ༵ས། དེ་དག་ལ་ལེགས་པར་གཟི༵གས་སུ༵་གསོ༵ལ་ཏེ། དེ་སྐད་མ་སྨྲ་ཞིག་ཅེས་པའོ། །བཅུ་གཉིས་པ་སངས་རྒྱས་རྟག་པ་མི་སྲིད་པར་འདོད་པ་ལ་གནོད་བྱེད་བསྟན་པ་ནི། གལ་ཏེ་སངས་རྒྱས་རྟག་པ་མི་སྲིད་པས། །རྟག་པར་གསུངས་བ་དྲང་དོན་ཡིན་ཞེ་ན། །འོ་ན་འདུས་མ་བྱས་སུ་གསུངས་པ་ཡང༌། །དྲང་དོན་ཡིན་ནམ་མིན་ཞེས་ཁྱེད་ལ་འདྲི། །འདུས་མ་བྱས་དང་རྟག་པ་ཁྱབ་མཉམ་གཅིག། མི་རྟག་པ་དང་འདུས་བྱས་ཁྱབ་མཉམ་གཅིག། དེས་ན་གཅིག་ཁེགས་གཉིས་ཀ་ཁེགས་འགྱུར་བས། །རྟག་པ་ཁེགས་ནས་འདུས་མ་བྱས་ཁེགས་ཕྱིར། །དོན་དམ་ཆོས་ཀྱི་དབྱིངས་ཀྱང་ཁེགས་འགྱུར་བས། །ཨེ་མ་ཆོས་རྣམས་ཐམས་ཅད་ཁེགས་པར་འགྱུར། །ཁྱབ་བྱེད་ཁེགས་ན་ཁྱབ་བྱ་ཁེགས་ཕྱིར་དང༌། །རྟེན་ཁེགས་ན་ཡང་བརྟེན་པ་ཁེགས་ཕྱིར་དང༌། །དོན་དམ་རྟེན་དང་ཀུན་རྫོབ་བརྟེན་པ་དང༌། །ཆོས་ཉིད་རྟེན་དང་ཆོས་རྣམས་བརྟེན་པ་དང༌། །དོན་དམ་ཁྱབ་བྱེད་ཀུན་རྫོབ་ཁྱབ་བྱ་དང༌། །དབུས་མཐའ་ལ་སོགས་རྟེན་དང་བརྟེན་པ་དང༌། །ཁྱབ་བྱེད་ཁྱབ་བྱར་གནས་པ་ཤིན་ཏུ་མང༌། །དེ་རྣམས་ཀུན་གྱིས་ཞིབ་དུ་དགོངས་པར་ཞུ། །བདེ་གཤེགས་སྙིང་པོས་འགྲོ་ཀུན་ཡོངས་ལ་ཁྱབ། །ཅེས་སོགས་ཁྱབ་བྱེད་ཁྱབ་བྱ་མང་པོ་དང༌། །རྟེན་དང་བརྟེན་པ་མང་པོ་གསུངས་རྣམས་ལ། །ཁྱབ་བྱེད་ཁེགས་ན་ཁྱབ་བྱ་ཁེགས་པ་དང༌། །རྟེན་མེད་གྱུར་ན་བརྟེན་པ་མེད་པའང་དགོངས། །གལ་ཏེ་སངས་རྒྱས་རྟག་པ་མི་སྲིད་ན། །དེ་ཡིས་ཤེས་བྱེད་ལུང་རིགས་བསྟན་དུ་གསོལ། །སྲིད་པ་ལ་ནི་ལུང་རིགས་དཔག་ཡས་མཆིས། །རྩ་བར། གལ་ཏེ་སངས་རྒྱས་རྟག་པ་མི་སྲིད་པས། །ཞེས་པ་ནས། ལུང་རིགས་དཔག་ཡས་མཆིས། ཞེས་པའི་བར་ཤོ་ལོ་ཀ་དྲུག་དང་རྐང་བ་གཉིས་བྱུང༌། དེའི་ཚིག་དོན་ནི། ག༵ལ་ཏེ་༵སང༵ས་རྒྱས༵་རྟག༵་པ༵་མི༵་སྲིད༵་པ་ཡིན་པ༵ས་མདོ་སྡེ་རྣམས་ལས་སངས་རྒྱས་རྟ༵ག་པ༵ར་གསུང༵ས་བ༵་དྲ༵ང་དོ༵ན་དགོངས་པ་ཅན་ཡི༵ན་ཞེ༵་ན༵་ཞེས་ཕྱོགས་སྔའི་འདོད་པ་བསྟན་ནས། དེ་ལ་འོ༵་ན༵་སངས་རྒྱས་འདུ༵ས་མ་༵བྱ༵ས་སུ༵་གསུང༵ས་པ༵་ཡ༵ང་དྲ༵ང་དོ༵ན་ཡི༵ན་ན༵མ་མི༵ན་ཞེ༵ས་ཕྱོགས་སྔ་ཁྱེད༵་ལ༵་འདྲི༵་སྟེ། སངས་རྒྱས་རྟག་པ་མི་སྲིད་ན་འདུས་མ་བྱས་ཀྱི་སངས་རྒྱས་ཀྱང་མེད་པར་མཚུངས་པའི་ཕྱིར་ཏེ། འདུ༵ས་མ༵་བྱ༵ས་ཀྱི་ཆོས་ད༵ང་རྟག༵་པ༵་གཉིས་ཡིན་ཁྱ༵བ་མཉ༵མ་དོན་གཅི༵ག་པ་ཡིན་པ་གང་ཞིག །མི༵་རྟ༵ག་པ༵་དང༵་འདུ༵ས་བྱ༵ས་གཉིས་ཡིན་ཁྱ༵བ་མཉ༵མ་དོན་གཅི༵ག་པ་ཡིན་པའི་ཕྱིར། དེ༵ས་ན༵་དེ་གཉིས་གཅི༵ག་ཁེག༵ས་ན་གཉི༵ས་ཀ༵་ཁེག༵ས་པར་འགྱུ༵ར་བ་ཡིན་པ༵ས་ན། རྟག༵་པ༵་ཁེག༵ས་ན༵ས་འདུ༵ས་མ༵་བྱ༵ས་ཁེག༵ས་པར་འགྱུར་བའི་ཕྱི༵ར། དེ་ཁེགས་ན་དོ༵ན་ད༵མ་ཆོས༵་ཀྱི༵་དབྱི༵ངས་ཀྱང༵་ཁེག༵ས་པར་འགྱུར༷་བ་ཡིན་པ༵ས། ཨེ༵་མ༵་ཆོ༵ས་ཅན་ཀུན་རྫོབ་རྣམ༵ས་ཐམ༵ས་ཅ༵ད་ཁེག༵ས་པར༵་འགྱུ༵ར་བའི་ཕྱིར་ཏེ། ཁྱ༵བ་བྱེ༵ད་ཆོས་དབྱིངས་ཁེག༵ས་ན༵་ཁྱབ༵་བྱ༵་ཆོས་རྣམས་ཁེག༵ས་པའི་ཕྱི༵ར་ད༵ང༌། རྟེ༵ན་ཆོས་ཉིད་ཁེག༵ས་ན༵་ཡ༵ང་བརྟེ༵ན་པ༵་ཆོས་རྣམས་ཁེག༵ས་པར་འགྱུར་བའི་ཕྱི༵ར་དང༵༌། དེ་ཡང་དོ༵ན་ད༵མ་བདེན་པ་རྟེན༵་ད༵ང་ཀུ༵ན་རྫོ༵བ་བརྟེ༵ན་པ༵་ད༵ང༌། ཆོ༵ས་ཉི༵ད་རྟེན༵་ད༵ང་ཆོས༵་རྣམ༵ས་བརྟེ༵ན་པ༵་ཡིན་པ་དང༵༌། དོ༵ན་ད༵མ་བདེན་པ་ཁྱ༵བ་བྱེ༵ད་དང་ཀུ༵ན་རྫོ༵བ་རྣམས་ཁྱ༵བ་བྱ༵་ཡིན་པ་དང༵༌། དབུ༵ས་དང་མཐ༵འ་ལ༵་སོག༵ས་པ་རྟེ༵ན་ད༵ང་བརྟེན༵་པ༵་དང༵༌། ཁྱབ༵་བྱེ༵ད་ཁྱ༵བ་བྱ༵ར་གན༵ས་པ༵་ཤིན༵་ཏུ༵་མང༵་བ་དེ༵་རྣམ༵ས་ལ་མཁས་བླུན་ཀུ༵ན་གྱི༵ས་ཞི༵བ་ཏུ༵་དགོང༵ས་པ༵ར་ཞུ༵། གཞན་ཡང་རྫོགས་ལྡན་གྱི་ཆོས་ལས། བདེ༵་གཤེ༵གས་སྙིང༵་པོ༵ས་འགྲོ༵་ཀུ༵ན་ཡོང༵ས་ལ༵་ཁྱ༵བ། །ཅེ༵ས་སོག༵ས་ཁྱ༵བ་བྱེ༵ད་ཁྱ༵བ་བྱ༵་མ༵ང་པོ༵་དང༵་རྟེན༵་ད༵ང་བརྟེ༵ན་པ༷་མ༵ང་པོ༵་གསུ༵ངས་པ་རྣམ༵ས་ལ༷་ཁྱ༵བ་བྱེ༵ད་ཁེག༵ས་ན༵་ཁྱ༵བ་བྱ༵་ཁེག༵ས་པ༵་དང༵༌། རྟེ༵ན་མེ༵ད་པར་གྱུ༵ར་ན༵་བརྟེ༵ན་པ༵་མེ༵ད་པ༵འ༵ང་ལེགས་པར་དགོ༵ངས་ཏེ། བརྟེན་པ་ཀུན་རྫོབ་ཀྱི་སངས་རྒྱས་ཡོད་པས་རྟེན་དོན་དམ་པའི་སངས་རྒྱས་ཀྱང་ཡོད་པའི་ཕྱིར་རོ། །གལ༵་ཏེ༵་ཁྱོད་ལྟར་སང༵ས་རྒྱ༵ས་རྟ༵ག་པ༵་མི༵་སྲི༵ད་ན༵། དེ༵་ཡི༵་ཤེ༵ས་བྱེ༵ད་ལུ༵ང་དང་རིག༵ས་པ་ཡོད་ན་བསྟ༵ན་དུ༵་གསོ༵ལ་དང༌། ལུང་རིགས་རྣམ་དག་མི་སྲིད་པའི་ཕྱིར། སངས་རྒྱས་རྟག་པ་སྲི༵ད་པ༵་ལ༵་ནི༵་ལུང༵་རིག༵ས་དཔ༵ག་ཡས༵་མཆི༵ས་པ་ཡིན་ཏེ། མྱང་འདས་ཆེན་པོའི་མདོ་ལས། དེ་བཞིན་གཤེགས་པ་ནི་འདུས་མ་བྱས་པའོ། །འདུས་མ་བྱས་པ་ནི་རྟག་པའོ་རྟག་པ་ནི་ཆོས་སོ། །ཆོས་ནི་དགེ་འདུན་ནོ། །དགེ་འདུན་ནི་འདུས་མ་བྱས་སོ། །འདུས་མ་བྱས་ནི་རྟག་པའོ། །ཞེས་དང༌། རྒྱུད་བླ་མ་ལས། འདུས་མ་བྱས་ཤིང་ལྷུན་གྱིས་གྲུབ། །གཞན་གྱི་རྐྱེན་གྱིས་རྟོགས་མིན་པ། །མཁྱེན་དང་བརྩེ་དང་ནུས་པར་ལྡན། །དོན་གཉིས་ལྡན་པའི་སངས་རྒྱས་ཉིད། །ཅེས་གསུངས་པའི་ཕྱིར་རོ། །བཅུ་གསུམ་པ་རང་ངོ་ཤེས་པ་ཙམ་གྱིས་སངས་རྒྱས་ཐོབ་ཅེས་འདོད་པ་ལ་གནོད་བྱེད་བསྟན་པ་ནི། རང་ངོ་ཤེས་པས་སངས་རྒྱས་ཐོབ་པའི་ཕྱིར། །ཚོགས་གཉིས་གསོག་དང་སྒྲིབ་གཉིས་སྦྱང་མི་དགོས། །རང་ངོ་ཤེས་པས་མ་སྤངས་གནས་དག་ཅེས། །བཞེད་པ་རྣམས་ལའང་བདག་ནི་མ་ཕོད་པས། །ཐལ་མོ་སྦྱར་ནས་གྲོས་འདེབས་ཞུ་བ་འབུལ། །རང་རིག་མེད་པའི་སེམས་ཅན་མི་སྲིད་ཅིང༌། །རང་རིག་ཡོད་ན་རང་ངོ་ཤེས་པ་ཡོད། །གལ་དེ་རང་གཞན་གང་ཡང་མི་རིག་ན། །རིག་པ་ཡིན་པར་འགལ་ཏེ་འབྱུང་ཆེན་བཞིན། །དེ་ཕྱིར་སེམས་ཅན་ཀུན་ལ་སེམས་ཡོད་ཅིང༌། །སེམས་ཡོད་ཀུན་ལ་རང་རིག་ཡོད་པའི་ཕྱིར། །རང་ངོ་ཤེས་པ་སྐྱེས་ཙམ་ཉིད་ན་ཡོད། །ཚུལ་འདི་ལུང་རིགས་མཁྱེན་པ་རྣམས་ལ་གྲགས། །བླུན་པོ་ཐོས་ཆུང་མངོན་པའི་ང་རྒྱལ་ཅན། །ཆོས་ལ་དབང་ཟ་གཟུུ་ལུམས་རང་བཟོ་མཁན། །ཤིན་ཏུ་མང་ཡང་ཚུལ་འདི་རྟོགས་པའམ། །ཐོས་དང་མཐོང་བ་ཙམ་ཡང་ཡོད་རེ་སྐན། །དེ་ཕྱིར་རང་ངོ་ཤེས་པས་ཆོག་པ་ཡི། །ལྟ་ལོག་དེ་འདྲ་བདུད་ཀྱི་གསང་ཚིག་ཡིན། །དེ་ལྟར་རྟོགས་དང་མ་རྟོགས་པ་ལས་ནི། །ཡང་དག་ལམ་དང་ལོག་པའི་ལམ་དུ་འཇུག། དེ་ཕྱིར་རང་ངོ་ཤེས་པས་གྲོལ་ཞེས་པའི། །སྡིག་ལྟ་བདུད་ལས་དེ་འདྲ་སྤོང་གྱུར་ཅིག །རྩ་བར། རང་ངོ་ཤེས་པའི་སངས་རྒྱས་ཐོབ་པའི་ཕྱིར། །ཞེས་པ་ནས། དེ་འདྲ་སྤོང་གྱུར་ཅིག། ཅེས་པའི་བར་ཤོ་ལོ་ཀ་ལྔ་དང་རྐང་བ་གསུམ་བྱུང༌། དེའི་ཚིག་དོན་ནི། གཞན་དག་གིས་སེམས་ཀྱི་ར༵ང་ངོ༵་ཤེས༵་པ༵ས་སང༵ས་རྒྱ༵ས་ཐོ༵བ་པ་ཡིན་པ༵འི་ཕྱི༵ར་ན། ཚོ༵གས་གཉི༵ས་གསོ༵གས་པ་ད༵ང་སྒྲི༵བ་གཉི༵ས་སྦྱ༵ང་མི༵་དགོ༵ས་ཞེས་འདོད་པ་དང༌། རང༵་ངོ༵་ཤེ༵ས་པ༵ས་སྒྲིབ་པ་མ༵་སྤ༵ངས་གན༵ས་ད༵ག་ཅེ༵ས་བཞེ༵ད་པ༵་རྣམ༵ས་ལ༵འ༵ང་བད༵ག་ནི༵་མ༵་ཕོད༵་པ་ཡིན་པ༵ས། ལག་ཐ༵ལ་མོ༵་སྦྱ༵ར་ན༵ས་གྲོ༵ས་འདེབ༵ས་ཞུ༵་བ༷་འབུ༵ལ་བ་ནི། ར༵ང་རི༵ག་མེ༵ད་པ༵འི་སེམ༵ས་ཅན༵་མི༵་སྲི༵ད་ཅི༵ང༌། རང༵་རི༵ག་ཡོ༵ད་ན༵་ར༵ང་ངོ༵་ཤེས༵་པ༵་ཡོ༵ད་པ་ཡིན་ནོ། །ག༵ལ་ཏེ༵་ར༵ང་དང་གཞ༵ན་ག༵ང་ཡ༵ང་མི༵་རི༵ག་པ་ཡིན་ན༵། རི༵ག་པ༵་ཡི༵ན་པ༵ར་འག༵ལ་ཏེ༵། དཔེར་ན་འབྱུ༵ང་བ་ཆེ༵ན་པོ་བཞི་བཞི༵ན། རྒྱུ་མཚན་དེ༵འི་ཕྱི༵ར་ན་སེམ༵ས་ཅ༵ན་ཀུན༵་ལ༵་སེམ༵ས་ཡོ༵ད་ཅི༵ང༌། སེམ༵ས་ཡོ༵ད་པ་ཀུན༵་ལ༵་ར༵ང་རིག༵་ཡོ༵ད་པ་ཡིན་པ༵འི་ཕྱི༵ར་ན། རང༵་ངོ༵་ཙམ་ཤེ༵ས་པ༷་སྐྱེ༵ས་ཙ༵མ་ཉི༵ད་ན༵་ཡོ༵ད་ལ། དེ་ལྟར་ཡོད་པའི་ཚུ༵ལ་འདི༵་ལུང༵་དང་རིག༵ས་པ་རྣམ་དག་མཁྱེ༵ན་པ༵་རྣམ༵ས་ལ༵་གྲ༵གས་པ་ཡིན་ནོ། །བླུ༵ན་པོ༵་ཐོ༵ས་ཆུ༵ང་མངོ༵ན་པ༵འི་ང༵་རྒྱ༵ལ་ཅ༵ན་ཆོ༵ས་ལ༵་དབ༵ང་ཟ༵་ཞིང་གཟུ༵་ལུམ༵ས་ར༵ང་བཟོ༵་བྱེད་མཁ༵ན་ནི། དེང་དུས་སུ་ཤི༵ན་ཏུ༵་མ༵ང་བ་ཡིན་ཡ༵ང༌། ཆོས་ཚུ༵ལ་འདི༵་རྟོག༵ས་པ༵འམ༵། ཐོས༵་པ་ད༵ང་མཐོ༵ང་བ༵་ཙམ༵་ཡ༵ང་ཡོ༵ད་རེ༵་སྐ༵ན་ནམ་ཡོད་པ་མི་སྲིད་པའི་ཕྱིར། རྒྱུ་མཚན་དེ༵་དག་གི་ཕྱི༵ར་ན་ར༵ང་ངོ༵་ཤེ༵ས་པ༵ས་ཆོ༵ག་པར་འཛིན་པ༵་ཡི༵་ལྟ༵་ལོག༵་དེ༵་འདྲ༵་བ་ནི་བདུ༵ད་ཀྱི༵་གས༵ང་ཚི༵ག་ཡིན༵་ནོ། །དེ༵་ལྟ༵ར་རྟོག༵ས་པ་ད༵ང་མ༵་རྟོ༵གས་པ༵་ལ༵ས་ནི༵་རིམ་བཞིན་ཡ༵ང་ད༵ག་པའི་ལ༵མ་ད༵ང༌། ཕྱིན་ཅི་ལོ༵ག་པ༵འི་ལ༵མ་དུ༵་འཇུ༵ག་པ་ཡིན་ནོ། །དེ༵འི་ཕྱི༵ར་ར༵ང་ངོ༵་ཤེ༵ས་པ༵ས་རྣམ་གྲོ༵ལ་ཐར་བ་ཐོབ་ཞེ༵ས་པ༵འི་སྡི༵ག་ལྟ༵་བདུ༵ད་ལ༵ས་དེ༵་འདྲ༵་སྤོང༵་གྱུ༵ར་ཅིག༵་ཅེས་དེ་ལྟར་གནོད་བྱེད་བསྟན་པ་ཡིན་ཏེ། འདི་ཉིད་ཀྱི་བསྡུས་དོན་འགྲེལ་བ་ལས། ཚོགས་གཉིས་མ་བསགས་ཀྱང་རང་ངོ་ཤེས་པ་ཙམ་གྱིས་སངས་རྒྱས་ཐོབ་ཅེས་འདོད་པ་ལ་ཤེས་པ་ཐམས་ཅད་ཀྱིས་རང་ངོ་ཤེས་པས་སེམས་ཅན་ཐམས་ཅད་སངས་རྒྱས་ཐོབ་ཟིན་པར་འགྱུར་ཞེས་པའི་གནོད་བྱེད་བསྟན་ཏོ། །ཞེས་གསུངས་པའི་ཕྱིར་རོ། །བཅུ་བཞི་བ་རང་སེམས་རྣམ་ཤེས་ཆོས་སྐུ་རུ་རྟོགས་ན་སངས་རྒྱས་པར་འདོད་པ་ལ་ཧ་ཅང་ཐལ་ཆེས་པའི་སྐྱོན་བསྟན་པ་ནི། གལ་ཏེ་རང་ངོ་རང་གིས་ཤེས་པའི་དོན། །རང་སེམས་རྣམ་ཤེས་འདི་ནི་ཆོས་ཀྱི་སྐུ། །ཡིན་པར་རྟོགས་པ་ཉིད་ལ་བྱེད་ཅེ་ན། །རྣམ་ཤེས་འདི་ནི་ཆོས་སྐུའི་མི་མཐུན་ཕྱོགས། །ཡིན་ཕྱིར་ཆོས་སྐུ་གཏན་ནས་མ་ཡིན་ནོ། །གལ་ཏེ་ཡིན་ན་དུག་ཀྱང་བདུད་རྩི་འམ། །མུན་ནག་སྡུག་པོའང་སྣང་བ་ཡིན་ནམ་ཅི། །ནག་ཕྱོགས་རྣམས་ཀྱང་དཀར་ཕྱོགས་ཡིན་ནམ་ཅི། །སྤང་བྱ་རྣམས་ཀྱང་གཉེན་པོ་ཡིན་ནམ་ཅི། །གཤེད་མ་རྣམས་ཀྱང་གཉེན་མཆོག་ཡིན་ནམ་ཅི། །བདུད་རིགས་ཐམས་ཅད་བླ་མ་ཡིན་ནམ་ཅི། །སྡིག་པ་ཐམས་ཅད་དགེ་བ་ཡིན་ནམ་ཅི། །ངན་འགྲོ་ཐམས་ཅད་བདེ་འགྲོ་ཡིན་ནམ་ཅི། །འདུས་བྱས་ཐམས་ཅད་རྟག་པ་ཡིན་ནམ་ཅི། །འཁོར་བ་ཐམས་ཅད་བདེ་ཆེན་ཡིན་ནམ་ཅི། །རྣམ་ཤེས་ཐཤེས་ཐམས་ཅད་ཡེ་ཤེས་ཡིན་ནམ་ཅི། །འཛག་བཅས་ཐམས་ཅད་འཛག་མེད་ཡིན་ནམ་ཅི། །བཅོས་མ་ཐམས་ཅད་རང་བཞིན་ཡིན་ནམ་ཅི། །གློ་བུར་ཐམས་ཅད་གཉུག་མ་ཡིན་ནམ་ཅི། །དྲི་མ་ཐམས་ཅད་སྙིང་པོ་ཡིན་ནམ་ཅི། །ཀུན་རྫོབ་ཐམས་ཅད་དོན་དམ་ཡིན་ནམ་ཅི། །ཆོས་རྣམས་ཐམས་ཅད་ཆོས་ཉིད་ཡིན་ནམ་ཅི། །ལས་གཟུགས་ཐམས་ཅད་འོད་གསལ་ཡིན་ནམ་ཅི། །སྐྱོན་རྣམས་ཐམས་ཅད་ཡོན་ཏན་ཡིན་ནམ་ཅི། །བྱུར་ངན་ཐམས་ཅད་དཔལ་ཆེན་ཡིན་ནམ་ཅི། །ཉེས་པ་ཐམས་ཅད་ལེགས་པ་ཡིན་ནམ་ཅི། །དམའ་མོ་ཐམས་ཅད་མཐོན་པོ་ཡིན་ནམ་ཅི། །ངན་པ་ཐམས་ཅད་བཟང་པོ་ཡིན་ནམ་ཅི། །རིང་བ་ཐམས་ཅད་ཉེ་བ་ཡིན་ནམ་ཅི། །ཟག་བཅས་ཐམས་ཅད་ཟག་མེད་ཡིན་ནམ་ཅི། །ཐོགས་བཅས་ཐམས་ཅད་ཐོགས་མེད་ཡིན་ནམ་ཅི། །གཟུགས་ཅན་ཐམས་ཅད་གཟུགས་མེད་ཡིན་ནམ་ཅི། །བསྟན་ཡོད་ཐམས་ཅད་བསྟན་མེད་ཡིན་ནམ་ཅི། །དྲང་དོན་ཐམས་ཅད་ངེས་དོན་ཡིན་ནམ་ཅི། །ཆོས་ལོག་ཐམས་ཅད་ཆོས་མཆོག་ཡིན་ནམ་ཅི། །ལམ་ལོག་ཐམས་ཅད་ལམ་མཆོག་ཡིན་ནམ་ཅི། །གཡང་ས་ཐམས་ཅད་བདེ་ས་ཡིན་ནམ་ཅི། །ནག་པོ་ཐམས་ཅད་དཀར་པོ་ཡིན་ནམ་ཅི། །གྲུ་བཞི་ཐམས་ཅད་ཟླུམ་པོ་ཡིན་ནམ་ཅི། །མདོག་དབྱིབས་གཞན་རྣམས་ལ་ཡང་མཚུང་པར་སྦྱར། །དེ་འདྲའི་ཤེས་བྱ་ཐམས་ཅད་ལ་ཡང་སྦྱར། །གང་ཕྱིར་ཆོས་སྐུའི་མི་མཐུན་ཕྱོགས་ཡིན་ཡང༌། །ཆོས་སྐུ་ཡིན་ན་རིགས་པ་མཚུངས་པའི་ཕྱིར། །འདུས་བྱས་འདུས་མ་བྱས་ཀྱི་ཆོས་ཀུན་ལ། །ཚུལ་འདི་རིགས་པ་འདི་འདྲ་མཁས་པས་རིག། བླུན་པོ་རང་བཟོ་མཁན་གྱི་སྤྱོད་ཡུལ་མིན། །རྩ་བར། གལ་ཏེ་རང་ངོ་རང་གིས་ཤེས་པའི་དོན། །ཞེས་པ་ནས། སྤྱོད་ཡུལ་མིན། ཞེས་པའི་བར་ཤོ་ལོ་ཀ་བཅུ་གཅིག་དང་རྐང་བ་གཉིས་བྱུང༌། དེའི་ཚིག་དོན་ནི། ག༵ལ་ཏེ༵་རང༵་ངོ༵་ར༵ང་གི༵ས་ཤེ༵ས་པ༵འི་དོ༵ན་ནི། ར༵ང་སེམ༵ས་རྣ༵མ་ཤེ༵ས་འ༵དི་ནི༵་ཆོ༵ས་ཀྱི༵་སྐུ༵་ཡི༵ན་པ༵ར་རྟོག༵ས་པ༵་ཉི༵ད་ལ་༵བྱེ༵ད་པ་ཡིན་པར་འདོད་ཅེ༵་ན༵། ཀུན་རྫོབ་རྣ༵མ་ཤེ༵ས་འདི༵་ནི༵་ཆོ༵ས་སྐུ༵འི་མི༵་མཐུ༵ན་ཕྱོ༵གས་ཡི༵ན་པའི་ཕྱི༵ར་ན་ཆོ༵ས་སྐུ༵་གཏ༵ན་ན༵ས་མ༵་ཡི༵ན་ནོ༵། །ག༵ལ་ཏེ་༵ཆོས་སྐུའི་མི་མཐུན་ཕྱོགས་ཡི༵ན་ཡང་ཆོས་སྐུ་ཡིན་པར་འདོད་ན༵། འོ་ན་དུ༵ག་ཀྱ༵ང་བདུད༵་རྩི་ཡིན་པའ༵མ་ཁྱོད་ལྟར་ན་ཡིན་དགོས་ཀྱང་དེ་འདྲ་མི་སྲིད་པའི་ཕྱིར། དེ་ལྟར་མུན༵་ན༵ག་སྟུ༵ག་པོ༵འང༵་སྣ༵ང་བ༵་ཡི༵ན་ན༵མ་ཅི། ན༵ག་ཕྱོ༵གས་རྣ༵མས་ཀྱ༵ང་དཀ༵ར་ཕྱོ༵གས་ཡི༵ན་ན༵མ་ཅི༵། སྤ༵ང་བྱ༷འི་གློ་བུར་དྲི་མ་རྣམ༷ས་ཀྱ༷ང་སྤོང་བྱེད་གཉེ༷ན་པོ༷་ཡི༷ན་ན༷མ་ཅི༷། གཤེ༷ད་མ༷་རྣམ༷ས་ཀྱ༷ང་གཉེ༷ན་གྱི་མཆོ༷ག་ཏུ་གྱུར་བ་ཡི༷ན་ན༷མ་ཅི༷། བདུ༷ད་རི༷གས་ཐ༷མས་ཅ༷ད་ཐར་བའི་ལམ་བཟང་སྟོན་པའི་བླ༷་མ༷་ཡི༷ན་ནམ་ཅི༷། སྡི༵ག་པ༵་ཐ༵མས་ཅ༵ད་དགེ༵་བ༵་ཡི༵ན་ན༵མ་ཅི༵། ང༵ན་འགྲོ༵་ཐམ༵ས་ཅ༵ད་བ༵དེ་འགྲོ༵་ཡི༵ན་ན༵མ་ཅི༵། འདུ༵ས་བྱས༵་ཐམ༵ས་ཅ༵ད་རྟག༵་པ༵་ཡི༵ན་ན༵མ་ཅི༵། འཁོ༵ར་བ༵་ཐམ༵ས་ཅ༵ད་བ༵དེ་ཆེ༵ན་ཡི༵ན་ན༵མ་ཅི༵། རྣམ༵་ཤེ༵ས་ཐ༵མས་ཅ༵ད་ཡེ༵་ཤེ༵ས་ཡི༵ན་ན༵མ་ཅི༵། འཛ༵ག་བཅ༵ས་ཐམ༵ས་ཅ༵ད་འཛ༵ག་མེ༵ད་ཡི༵ན་ན༵མ་ཅི༵། བཅོ༵ས་མ༵་ཐམ༵ས་ཅ༵ད་རང༵་བཞི༵ན་ཡི༵ན་ན༵མ་ཅི༵། གློ༵་བུ༵ར་ཐམ༵ས་ཅ༵ད་གཉུ༵ག་མ༵་ཡི༵ན་ན༵མ་ཅི༵། དྲི༵་མ༵་ཐམ༵ས་ཅ༵ད་སྙི༵ང་པོ༵་ཡི༵ན་ན༵མ་ཅི༵། ཀུ༵ན་རྫོ༵བ་ཐམ༵ས་ཅ༵ད་དོ༵ན་ད༵མ་ཡི༵ན་ན༵མ་ཅི༵། ཆོ༵ས་རྣ༵མས་ཐ༵མས་ཅ༵ད་ཆོ༵ས་ཉི༵ད་ཡི༵ན་ན༵མ་ཅི༵། ལ༵ས་གཟུ༵གས་ཐམ༵ས་ཅ༵ད་འོ༵ད་གས༵ལ་ཡི༵ན་ན༵མ་ཅི༵། སྐྱོ༵ན་རྣམ༵ས་ཐམ༵ས་ཅ༵ད་ཡོ༵ན་ཏ༵ན་ཡི༵ན་ན༵མ་ཅི༵། བྱུ༵ར་ང༵ན་ཐམ༵ས་ཅ༵ད་དཔ༵ལ་ཆེ༵ན་ཡི༵ན་ན༵མ་ཅི༵། ཉེས༵་པ༵་ཐམ༵ས་ཅད༵་ལེག༵ས་པ༵་ཡི༵ན་ན༵མ་ཅི༵། དམ༵འ་མོ༵་ཐམ༵ས་ཅ༵ད་མཐོ༵ན་པོ༵་ཡི༵ན་ན༵མ་ཅི༵། ངན༵་པ༵་ཐམ༵ས་ཅད༵་བཟ༵ང་པོ༵་ཡི༵ན་ན༵མ་ཅི༵། རི༵ང་བ༵་ཐམ༵ས་ཅ༵ད་ཉེ༵་བ༵་ཡི༵ན་ན༵མ་ཅི༵། ཟ༵ག་བཅ༵ས་ཐམ༵ས་ཅ༵ད་ཟ༵ག་མེ༵ད་ཡི༵ན་ན༵མ་ཅི༵། ཐོག༵ས་བཅ༵ས་ཐམ༵ས་ཅད༵་ཐོག༵ས་མེ༵ད་ཡི༵ན་ནམ༵་ཅི༵། གཟུག༵ས་ཅ༵ན་ཐམ༵ས་ཅ༵ད་གཟུག༵ས་མེ༵ད་ཡི༵ན་ན༵མ་ཅི༵། བསྟ༵ན་ཡོ༵ད་ཐམ༵ས་ཅ༵ད་བསྟ༵ན་མེ༵ད་ཡི༵ན་ན༵མ་ཅི༵། དྲང༵་དོ༵ན་ཐམ༵ས་ཅད༵་ངེ༵ས་དོ༵ན་ཡི༵ན་ན༵མ་ཅི༵། ཆོ༵ས་ལོ༵ག་ཐམ༵ས་ཅ༵ད་ཆོ༵ས་མཆོ༵ག་ཡི༵ན་ན༵མ་ཅི༵། ལམ༵་ལོ༵ག་ཐམ༵ས་ཅ༵ད་ལ༵མ་མཆོ༵ག་ཡི༵ན་ན༵མ་ཅི༵། གཡ༵ང་ས༵་ཐམ༵ས་ཅ༵ད་བ༵དེ་ས༵་ཡི༵ན་ན༵མ་ཅི༵། ནག༵་པོ༵་ཐམ༵ས་ཅ༵ད་དཀ༵ར་པོ༵་ཡི༵ན་ན༵མ་ཅི༵། གྲུ༵་བ༵ཞི་ཐམ༵ས་ཅ༵ད་ཟླུམ༵་པོ༵་ཡིན་ན༵མ་ཅི༵་སྟེ། ཁྱོད་ལྟར་ན་ཡིན་དགོས་ཀྱང་དེ་འདྲ་མི་སྲིད་པའི་ཕྱིར། མདོ༵ག་དབྱི༵བས་གཞ༵ན་རྣམ༵ས་ལ༵་ཡ༵ང་དེ་དག་དང་མཚུང༵ས་པ༵ར་སྦྱ༵ར་བ་དང༌། དེ༵་འདྲ༵འི་ཤེ༵ས་བྱ༵་ཐམ༵ས་ཅ༵ད་ལ༵་ཡ༵ང་སྦྱ༵ར་ལ། རྒྱུ་མཚན་ག༵ང་གི་ཕྱི༵ར་དེ་འདྲ་ཡིན་ཞེ་ན་རྣམ་ཤེས་ཆོ༵ས་སྐུ༵འི་མི༵་མཐུ༵ན་ཕྱོ༵གས་ཡི༵ན་ཡ༵ང༌། ཆོ༵ས་སྐུ༵་ཡི༵ན་པར་ཁྱོད་ཀྱི་ཁས་བླངས་བའི་ཕྱིར་ན༵་རིག༵ས་པ༵་མཚུང༵ས་བ༵འི་ཕྱི༵ར། འདུ༵ས་བྱ༵ས་འདུ༵ས་མ༵་བྱ༵ས་ཀྱི༵་ཆོ༵ས་ཀུ༵ན་ལ༵་གོང་སྨོས་ལྟར་གྱི་ཚུ༵ལ་འདི༵་རིག༵ས་པ༵་འདི༵་འདྲ༵་བ་ནི་མཁ༵ས་པ༵ས་རི༵ག་པ་ཡིན་གྱི། བླུ༵ན་པོ༵་ར༵ང་བཟོ༵་མཁ༵ན་གྱི༵་སྤྱོ༵ད་ཡུ༵ལ་མི༵ན་པའི་ཕྱིར་རོ། །དེ་དག་གི་དོན་བསྡུ་ན། རང་སེམས་རྣམ་ཤེས་འདི་ཆོས་སྐུར་རྟོགས་པས་སངས་རྒྱས་ཐོབ་པར་འདོད་པ་ལ། སྣང་བ་ཐམས་ཅད་མུན་པར་ཐལ་བ་ལ་སོགས་པ་ཧ་ཅང་ཐལ་ཆེས་པའི་སྐྱོན་དུ་བསྟན་ཏོ། །བཅོ་ལྔ་པ་ཆོས་སྐུ་སྟོང་ཉིད་ཁྱབ་མཉམ་འདོད་པ་དགག་ནས་དེ་གཉིས་ཀྱི་རྣམ་དབྱེ་བསྟན་པ་ནི། གལ་ཏེ་རང་སེམས་རྣམ་ཤེས་ཚོགས་འདི་དག། ཆོས་སྐུ་མིན་ན་སྟོང་ཉིད་མིན་པར་འགྱུར། །ཆོས་དབྱིངས་མིན་ནའང་སྟོང་ཉིད་མིན་པར་འགྱུར། །ཆོས་ཉིད་མིན་ནའང་སྟོང་ཉིད་མིན་པར་འགྱུར། །དེ་སྐད་སྨྲ་ན་བླུན་རྟགས་བསྟན་པ་ཡིན། །གང་ཕྱིར་སྟོང་པ་ཉིད་དང་ཆོས་སྐུ་ལ། །མུ་གཉིས་ཡོད་ཀྱི་ཁྱབ་མཉམ་གཏན་མ་ཡིན། །ཆོས་དབྱིངས་ལ་སོགས་ཡོངས་གྲུབ་ཐམས་ཅད་དང༌། །སྟོང་པ་ཉིད་ལ་མུ་གཉིས་ཡོད་པ་ཡི། །མན་ངག་ཟབ་མོས་དབེན་ཞིང་ལོག་བཤད་ཀྱི། །དུག་ཆུས་རབ་ཏུ་མྱོས་པའི་བརླབ་བཅོལ་ལོ། །དེ་ཕྱིར་མུ་གཉིས་མུ་གསུམ་མུ་བཞི་ཡིས། །ཆོས་ཀུན་གཏན་ལ་འབེབས་པའི་རྫོགས་ལྡན་དང༌། །རྣམ་པ་ཀུན་ཏུ་འབྲལ་བར་མ་གྱུར་ཅིག། རྩ་བར། གལ་ཏེ་རང་སེམས་རྣམ་ཤེས་ཚོགས་འདི་དག། ཅེས་པ་ནས། འབྲལ་བར་མ་གྱུར་ཅིག །ཅེས་པའི་བར་ཤོ་ལོ་ཀ་གསུམ་དང་རྐང་བ་གཉིས་བྱུང༌། དེའི་ཚིག་དོན་ནི། ག༵ལ་ཏེ༵་ཁ་ཅིག་གིས་ར༵ང་སེམ༵ས་རྣ༵མ་ཤེ༵ས་ཀྱི་ཚོག༵ས་འདི༵་ད༵ག་ཆོ༵ས་སྐུ༵་མིན༵་པར་འདོད་ན༵་སྟོ༵ང་ཉི༵ད་མི༵ན་པ༵ར་འགྱུ༵ར་བ་དང༌། ཆོ༵ས་དབྱིང༵ས་མི༵ན་པར་འདོད་ན༵འ༵ང་སྟོ༵ང་ཉི༵ད་མི༵ན་པ༵ར་འགྱུ༵ར་བ་དང༌། ཆོ༵ས་ཉི༵ད་མི༵ན་པར་འདོད་ན༵འང༵་སྟོང༵་ཉིད༵་མིན༵་པ༵ར་འགྱུ༵ར་ཏེ། ཆོས་ཉིད་དང་སྟོང་ཉིད་ཡིན་ཁྱབ་མཉམ་གཅིག་པའི་ཕྱིར། དེ༵་སྐ༵ད་སྨྲ༵་ན༵་བླུ༵ན་རྟག༵ས་བསྟ༵ན་པ༵་ཡི༵ན་ནོ། རྒྱུ་མཚན་ག༵ང་གི་ཕྱི༵ར་ཞེ་ན། དེ་སུན་བྱུང་བ་ནི། སྟོ༵ང་བ༵་ཉི༵ད་ད༵ང་ཆོ༵ས་སྐུ༵་གཉིས་ལ༵། དང་པོ་ཡིན་ལ་ཕྱི་མ་མ་ཡིན་པ་དང༌། གཉིས་ཀ་ཡིན་པའི་མུ་གཉིས་ཡོད་དེ། མུ་དང་པོ་ནི་རང་སྟོང་གི་ཆོས་རྣམས་དང༌། མུ་གཉིས་པ་ནི་དོན་དམ་བདེ་གཤེགས་སྙིང་པོ་ཡིན་ནོ། །དེ་ལྟར་མུ༵་གཉི༵ས་ཡོ༵ད་ཀྱི༵་ཁྱ༵བ་མཉ༵མ་གཏ༵ན་ནས་མ༵་ཡིན༵་ལ། ཆོ༵ས་ཀྱི་དབྱིང༵ས་ལ༵་སོག༵ས་པ་ཡོང༵ས་གྲུ༵བ་ཐམ༵ས་ཅད༵་དང༷༌། སྟོ༵ང་བ༵་ཉིད༵་ལ༵་སྔར་ལྟར་སྟོང་ཉིད་ཡིན་ལ་ཡོངས་གྲུབ་མ་ཡིན་པ་དང༌། གཉིས་ཀ་ཡིན་པའི་མུ༵་གཉི༵ས་ཡོ༵ད་པ༵་ཡི༵ན་པས་ཡོངས་གྲུབ་དག་དང་སྟོང་ཉིད་ཁྱབ་མཉམ་གཏན་མ་ཡིན་པའི་ཕྱིར། དེས་ན་དེ་གཉིས་ཁྱབ་མཉམ་འདོད་པ་ནི། མ༵ན་ངག༵་ཟ༵བ་མོ༵ས་དབེ༵ན་ཞི༵ང་ལོ༵ག་བཤ༵ད་ཀྱི༷་དུ༵ག་ཆུ༵ས་ར༵བ་ཏུ༵་མྱོ༵ས་པ༵འི་བརླ༵བ་བཅོ༵ལ་ལོ༵། །རྒྱུ་མཚན་དེ༵་དག་གི་ཕྱི༵ར་ན་མུ༵་གཉི༵ས་མུ༵་གསུ༵མ་མུ༵་བ༵ཞི་ཡི༵ས། ཆོ༵ས་ཀུ༵ན་གཏ༵ན་ལ༵་འབེབ༵ས་པ༵འི་རྫོ༵གས་ལྡ༵ན་གྱི་ལུགས་ད༵ང་རྣམ༵་པ༵་ཀུ༵ན་ཏུ༵་འབྲལ༵་བ༵ར་མ༵་གྱུ༵ར་ཅི༵ག །འདིའི་སྐབས་སུ་འདི་ཉིད་ཀྱི་འགྲེལ་བ་ལས། སྟོང་ཉིད་ཀྱི་རབ་ཏུ་དབྱེ་བའི་བསྟན་བཅོས་ཟུར་ན་ཡོད་པ་ལས་རྟོགས་པར་གྱུར་ཅིག །ཅེས་གསུངས་པས། སྟོང་ཉིད་ཀྱི་རབ་དབྱེ་ལས་ཆ་ཤས་ཤིག་བརྗོད་ན། ཇི་སྐད་དུ། སྟོང་ཉིད་གསུངས་པ་ཐམས་ཅད་རང་སྟོང་ཁོ་ན་མ་ཡིན་གྱི། གཞན་སྟོང་ཟབ་མོ་ཡིན་པའི་སྟོང་ཉིད་དང༌། རང་སྟོང་མི་ཟབ་པ་ཡིན་པའི་སྟོང་ཉིད་དུ་དབྱེར་ཡོད་དོ། །ཡང་རྣམ་པ་གཉིས་ཏེ། །དོན་དམ་ཡིན་པའི་སྟོང་ཉིད་དང༌། ཀུན་རྫོབ་ཡིན་པའི་སྟོང་ཉིད་དོ། །ཡང་རྣམ་པ་གཉིས་ཏེ། ཡོངས་གྲུབ་ཡིན་པའི་སྟོང་ཉིད་དང༌། ཀུན་བཏགས་ཡིན་པའི་སྟོང་ཉིད་དོ། །ཡང་རྣམ་པ་གཉིས་ཏེ། དབུ་མ་ཡིན་པའི་སྟོང་ཉིད་དང༌། མཐའ་མ་ཡིན་པའི་སྟོང་ཉིད་དོ། །ཡང་རྣམ་པ་གཉིས་ཏེ། རང་བཞིན་གཉུག་མ་ཡིན་པའི་སྟོང་ཉིད་དང༌། བཅོས་མ་གློ་བུར་ཡིན་པའི་སྟོང་ཉིད་དོ། །ཡང་རྣམ་པ་གཉིས་ཏེ། ཆོས་ཉིད་ཟབ་མོ་ཡིན་པའི་སྟོང་ཉིད་དང༌། ཆོས་ཅན་མི་ཟབ་པ་ཡིན་པའི་སྟོང་ཉིད་དོ། །ཡང་རྣམ་པ་གཉིས་ཏེ། མ་སྐྱེས་པའི་སྟོང་ཉིད་དང༌། སྐྱེས་པའི་སྟོང་ཉིད་དོ། །ཡང་རྣམ་པ་གཉིས་ཏེ། མི་སྟོང་བའི་སྟོང་ཉིད་དང༌། སྟོང་བའི་སྟོང་ཉིད་དོ། །ཡང་རྣམ་པ་གཉིས་ཏེ། གཞན་གྱི་དངོས་པོ་སྟོང་བ་ཉིད་དང༌། རང་གི་དངོས་པོ་སྟོང་བ་ཉིད་དོ། །ཡང་རྣམ་པ་གཉིས་ཏེ། དངོས་པོ་མེད་པའི་ངོ་བོ་ཉིད་སྟོང་བ་ཉིད་དང༌། དངོས་པོ་མེད་པ་སྟོང་ཉིད་དོ། །ཡང་རྣམ་པ་གཉིས་ཏེ། རྣམ་པ་ཀུན་གྱི་མཆོག་དང་ལྡན་པའི་སྟོང་བ་ཉིད་དང༌། ཕུང་པོ་རྣམ་པར་དཔྱད་པའི་སྟོང་བ་ཉིད་དོ། །ཡང་རྣམ་པ་གཉིས་ཏེ། གཞན་མཆོག་ཕ་རོལ་དམ་པ་དང་པོའི་སངས་རྒྱས་ཡིན་པའི་སྟོང་བ་ཉིད་དང༌། ཕྱི་ནང་ཀུན་རྫོབ་གློ་བུར་བ་འདི་ཡིན་པའི་སྟོང་བ་ཉིད་དོ། །ཡང་རྣམ་པ་གཉིས་ཏེ། སྟོང་གཞི་ཡོན་ཏན་མང་པོ་ཅན་མ་ཡིན་དགག་ཡིན་པའི་སྟོང་ཉིད་དང༌། སྟོང་ཙམ་གྲུབ་ཆོས་ཙམ་གྱིས་དོར་བ་མེད་དགག་ཡིན་པའི་སྟོང་ཉིད་དོ། །ཡང་རྣམ་པ་གཉིས་ཏེ། རང་གིས་མི་སྟོང་ལ་གཞན་ཆོས་ཐམས་ཅད་ཀྱིས་སྟོང་བའི་སྟོང་ཉིད་དང༌། རང་རང་ངོ་བོས་སྟོང་བའི་སྟོང་ཉིད་དོ། །དེ་བཞིན་ཏུ་ཆོས་རྣམས་ཀྱི་ཆོས་ཉིད་ཡིན་མིན་གྱི་སྟོང་ཉིད་གཉིས་དང་ཞེས་སོགས་སྟོང་ཉིད་ཀྱི་རབ་དབྱེ་རྒྱས་པར་གསུངས་པ་རྣམས་ཤེས་པར་བྱའོ། །བཅུ་དྲུག་པ་རྟེན་བཞེངས་པ་དོན་མེད་པར་འདོད་པ་དགག་ནས་དོན་ཡོད་པར་སྒྲུབ་པ་ནི། གསུམ་ལྡན་མར་བཅད་སྐྱོན་ཅན་རྣམས་ན་རེ། །སངས་རྒྱས་བྱང་ཆུབ་ཡེ་ཤེས་མིང་ཙམ་ཡིན། །ཡོན་ཏན་མང་པོ་གསུངས་པའང་དྲང་དོན་ཡིན། །དེ་ཕྱིར་རྟེན་གསུམ་བཞེངས་པ་དོན་མེད་དེ། །ཞོར་ལ་སེམས་ཅན་འཆི་ཞིང་བཞེངས་པ་ཡི། །དགེ་བ་བས་ཀྱང་ཞིག་པའི་སྡིག་པ་ལྕི། །ས་ནི་སྡིག་མེད་མཆོད་རྟེན་སྡིག་ཅན་ཡིན། །དེས་ན་དགེ་བ་རྗེས་ཅན་མ་བྱེད་པར། །མཆོད་པ་ཐམས་ཅད་ཁ་ལ་རབ་ཕུལ་ནས། །དགེ་བ་ཐམས་ཅད་རྗེས་མེད་ཀྱིས་ཤིག་ཅེས། །གསུང་བ་རྣམས་ལའང་བདག་ནི་མ་ཕོད་པས། །ཐལ་མོ་སྦྱར་ནས་གྲོས་འདེབས་ཞུ་བ་འབུལ། །དོན་དམ་སངས་རྒྱས་དོན་དམ་བདེན་པར་ཡོད། །དེ་ཡི་བྱིན་གྱིས་བརླབས་དང་དགེ་ཚོགས་ལས། །ལེགས་པར་འཁྲུངས་པའི་ཀུན་རྫོབ་སངས་རྒྱས་ཀྱང༌། །ཀུན་རྫོབ་ཙམ་ཏུ་ཡོད་པར་རྒྱལ་བས་གསུངས། །ཀུན་རྫོབ་སངས་རྒྱས་རང་སྟོང་ཡིན་མོད་ཀྱང༌། །ནོར་བུ་དཔག་བསམ་ཤིང་བཞིན་གཞན་ཕན་འབྱུང༌། །དོན་དམ་ཆོས་སྐུ་ཡོན་ཏན་དཔག་ཡས་པས། །རྒྱལ་སྲས་མཆོག་དང་དགྲ་བཅོམ་དཔག་ཡས་ལ། །གཞན་དོན་མཛད་པར་རྫོགས་ལྡན་ཆོས་ལས་གསུངས། །དེ་འདྲ་མ་ཐོས་མ་མཐོང་རང་བཟོ་མཁན། །གཟུ་ལུམས་མཁན་གྱི་རྒྱལ་ལ་སྐུར་བཏབ་ལས། །དེ་ཡི་རྟེན་གསུམ་ལ་ཡང་སྐུར་བཏབ་ནས། །དགེ་བའི་སྒོ་ཆེན་མང་པོ་རབ་ཏུ་བཀག། དེ་རྣམས་ཀྱིས་ཀྱང་རྫོགས་ལྡན་ཆོས་མཆོག་རྣམས། །མྱུར་དུ་མཐོང་ནས་ལྟ་ངན་རབ་སྤངས་ཏེ། །དགེ་བའི་སྒོ་ཆེན་མང་དུ་འབྱེད་གྱུར་ཅིག། རྒྱལ་བ་སྐྱོན་མེད་ཡོན་ཏན་ཐམས་ཅད་རྫོགས། །དེ་ཕྱིར་དེ་ལ་ཕན་གནོད་གང་བྱས་པའི། །འབྲས་བུ་གཞན་པས་ལྷག་པར་ཆེ་བར་གསུངས། །དེ་ཕྱིར་ཆེད་ཏུ་རྟེན་གསུམ་བཤིག་ན་ནི། །སྡིག་ཆེན་འགྱུར་གྱི་རང་བཞིན་ཞིག་པ་ནི། །སྡིག་ཆེན་ཡིན་པར་གསུངས་པ་མ་མཐོང་ངོ༌། །རྩ་བར། གསུམ་ལྡན་མར་བཅད་སྐྱོན་ཅན་རྣམས་ན་རེ། །ཞེས་པ་ནས། མ་མཐོང་ངོ༌། །ཞེས་པའི་བར་ཤོ་ལོ་ཀ་བརྒྱད་དང་རྐང་བ་གཉིས་བྱུང༌། དེའི་ཚིག་དོན་ནི། གསུ༵མ་ལྡ༵ན་མ༵ར་བཅ༵ད་སྐྱོ༵ན་ཅ༵ན་རྣ༵མས་ན༵་རེ༵། སང༵ས་རྒྱ༵ས་དང༌། བྱ༵ང་ཆུ༵བ་དང༌། ཡེ༵་ཤེ༵ས་དང༌། ཡོན་ཏན་ལ་སོགས་པ་ཡང་རང་སྟོང་ཡིན་པའི་ཕྱིར་ན་གཤིས་ལ་མ་གྲུབ་པས་མིང༵་ཙམ༵་དུ་ཟད་པ་ཡི༵ན་ཞིང༌། མདོ་རྒྱུད་རྣམས་སུ་དཀོན་མཆོག་གསུམ་ཡོ༵ན་ཏ༵ན་མ༵ང་པོ༵་གསུང༵ས་པ༵འང༵་དྲང༵་དོ༵ན་ཡི༵ན་པ་དེ༵འི་ཕྱི༵ར་སྐུ་གསུང་ཐུགས་ཀྱི་རྟེ༵ན་གསུ༵མ་བཞེང༵ས་པ༵་ལ་དོ༵ན་མེ༵ད་དེ༵། ཞོར༵་ལ༵་སེམ༵ས་ཅན༵་དུ་མ་འ༵ཆི་བ་ཡིན་ཞི༵ང༌། རྟེན་དེ་བཞེང༵ས་པ༵་ཡི༷་དགེ༵་བ༵་འབྱུང་བ་བ༵ས་ཀྱ༵ང་རྟེན་དེ་ཞི༵ག་པ༵འི་སྡི༵ག་པ༵་ལྕི༵་སྟེ། ཞིག་ན་མཚམས་མེད་དང་ཉེ་བའི་ལས་སུ་འགྱུར་བའི་ཕྱིར་རོ། །དེས་ན་ས༵་ནི༵་སྡི༵ག་མེ༵ད་ཡིན་པས་དེ་ཀ་ལ་བཞག་ན་སྡིག་པ་མེད་པ་ཡིན་གྱི་མཆོ༵ད་རྟེ༵ན་སོགས་སུ་བཞེངས་ན་མཐར་འཇིག་པ་ལས་མ་འདས་པའི་ཕྱིར། སྡི༵ག་པ་ཅ༵ན་ཡི༵ན་པ་དེ༵ས་ན༵་དགེ༵་བ༵་རྗེ༵ས་ཅ༵ན་མ༵་བྱེ༵ད་པ༵ར་མཆོ༵ད་པ༵་ཐམ༵ས་ཅ༵ད་ཁ༵་ལ༵་རབ༵་ཏུ་ཕུལ༵་ན༵ས་དགེ༵་བ༵་ཐམ༵ས་ཅ༵ད་རྗེ༵ས་མེ༵ད་ཀྱི༵ས་ཤི༵ག་ཅེ༵ས་གསུ༵ངས་བ༵་དེ་ཡན་གྱིས་གཞན་གྱི་འདོད་པ་བརྗོད་ནས། དེ་དགག་པ་ལ་དེ་སྐད་ཟེར་བ་རྣམ༵ས་ལ༵འང༵་ཕན་སེམས་ཀྱིས་ཀུན་ནས་བསླངས་ཏེ་ཆོས་རྗེ་ཀུན་མཁྱེན་བད༵ག་ནི༵་མ༵་ཕོད༵་པ༵ས་ཐ༵ལ་མོ༵་སྦྱར༵་ནས༵་དེ་སྐད་མ་སྨྲ་ཞིག་ཅེས་གྲོ༵ས་འདེབ༵ས་ཞུ༵་བ༵་འབུ༵ལ་བ་ཡིན་པའི་ཕྱིར་རོ། །དོན་གྱི་ཡིན་ལུགས་ལ་ནི། དོ༵ན་ད༵མ་གྱི་སང༵ས་རྒྱ༵ས་དོ༵ན་ད༵མ་བདེ༵ན་པ༵ར་ཡོ༵ད་ཅིང༌། དེ༵་ཡི༵་བྱིན༵་གྱི༵ས་བརླ༵བས་དང༵་དགེ༵་ཚོག༵ས་ལས༵་ལེག༵ས་པ༵ར་འཁྲུང༵ས་པ༵འི་ཀུན༵་རྫོ༵བ་སང༵ས་རྒྱ༵ས་ཀྱ༵ང་ཀུན༵་རྫོ༵བ་ཙ༵མ་དུ༵་ཡོ༵ད་པ༵ར་རྒྱལ༵་བ་སྲས་དང་བཅས་པ༵འི་ཡང་ཡང་གསུང༵ས་པ་ཡིན་པས། ཀུན༵་རྫོ༵བ་ཀྱི་སང༵ས་རྒྱ༵ས་རང༵་སྟོང༵་ཡི༵ན་མོ༵ད་ཀྱ༵ང་སྔོན་གྱི་སྨོན་ལམ་དང་ཚོགས་གཉིས་བསགས་པའི་སྟོབས་ཀྱིས་རྣམ་པར་རྟོག་པ་མེད་བཞིན་དུ་ཡིད་བཞིན་གྱི་ནོ༵ར་བུ༵་དང་དཔག༵་བས༵མ་གྱི་ཤི༵ང་བཞི༵ན་དུ་གཞ༵ན་ཕན༵་འབད་མེད་ལྷུན་གྲུབ་དུ་འབྱུ༵ང་བ་ཡིན་ཏེ། །རྒྱུད་བླ་མ་ལས། སྣ་ཚོགས་དམ་ཆོས་འོད་ཟེར་མངའ་བའི་སྐུས། །འགྲོ་བའི་རྣམ་གྲོལ་དོན་སྒྲུབ་ལ་བརྩོན་པ། །མཛད་པ་ཡིད་བཞིན་ནོར་བུའི་རྒྱལ་བཞིན་ཏེ། །ཞེས་དང༌། ཡང་དེ་ལས། ཇི་ལྟར་ཡིད་བཞིན་ནོར་བུ་ནི། །རྟོག་པ་མེད་ཀྱང་ཅིག་ཆར་དུ། །སྤྱོད་ཡུལ་གནས་པ་རྣམས་ཀྱི་ནི། །བསམ་ཀུན་སོ་སོར་རྫོགས་བྱེད་ལྟར། །དེ་བཞིན་སངས་རྒྱས་ཡིད་བཞིན་ལ། །བརྟེན་ནས་བསམ་པ་ཐ་དད་རྣམས། །སྣ་ཚོགས་ཆོས་ནི་ཐོས་གྱུར་ཀྱང༌། །དེ་ནི་དེ་ལ་རྣམ་མི་རྟོག །ཅེས་སོགས་དང༌། ཡང་དེ་ལས། ཆོས་སྐུ་རྣམ་གཉིས་ཤེས་བྱ་སྟེ། །ཆོས་དབྱིངས་ཤིན་ཏུ་དྲི་མེད་དང༌། །དེ་ཡི་རྒྱུ་མཐུན་ཟབ་པ་དང༌། །སྣ་ཚོགས་ཚུལ་ནི་སྟོན་པའོ། །ཞེས་དང༌། ཡང་དེ་ལས། གཞན་གྱི་དབང་གི་ངེས་འབྱུང་དང༌། །བདག་དང་སེམས་ཅན་མཚུངས་གཟིགས་དང༌། །མཛད་པ་ཡོངས་སུ་མ་རྫོགས་ཕྱིར། །འཁོར་བ་སྲིད་དུ་མཛད་མི་འཆད། །ཅེས་དང༌། མངོན་རྟོགས་རྒྱན་ལས། དེ་བཞིན་འཁོར་བ་ཇི་སྲིད་འདིའི། །ལས་ནི་རྒྱུན་མི་འཆད་པར་འདོད། །ཅེས་དང༌། གསེར་འོད་དམ་པའི་མདོ་ལས། རིགས་ཀྱི་བུ་ཇི་ལྟར་ན་ཆོས་ཀྱི་དེ་བཞིན་ཉིད་དང༌། དེ་བཞིན་ཉིད་ཀྱི་ཡེ་ཤེས་ལ་རྣམ་པར་རྟོག་པ་མི་མངའ་བཞིན། འཕྲིན་ལས་ལ་མངའ་བརྙེས་པ་ཡིན་ཞེ་ན། རིགས་ཀྱི་བུ་དཔེར་ན་དེ་བཞིན་གཤེགས་པ་མྱ་ངན་ལས་འདས་ཀྱང་སྨོན་ལམ་ལ་མངའ་བརྙེས་པས་འཕྲིན་ལས་ཀྱི་ཐམས་ཅད་ཀྱང་མཛད་དོ། །དེ་བཞིན་ཉིད་དང༌། དེ་བཞིན་ཉིད་ཀྱི་ཡེ་ཤེས་ཀྱི་དོན་ཐམས་ཅད་གྲུབ་པར་མངའ་མཛད་པ་ཡང་དེ་བཞིན་ནོ། །ཞེས་སོགས་གསུངས་པའི་ཕྱིར་རོ། །རྒྱས་པར་རྒྱུད་བླ་མ་དང༌། མདོ་སྡེ་རྒྱན་སོགས་ལས་ཤེས་པར་བྱའོ། །དོ༵ན་ད༵མ་ཆོ༵ས་སྐུ༵་རང་སྟོང་མ་ཡིན་ཡང༌། སྟོང་ཉིད་ཟབ་མོ་མཐར་ཐུག་པ་ཡང་ཡིན་ཞིང༌། དོན་དམ་འདུས་མ་བྱས་ཀྱི་སྟོབས་བཅུ་ལ་སོགས་པ་ཡོ༵ན་ཏ༵ན་དཔ༵ག་ཡ༵ས་ནམ་མཁའ་དང་མཉམ་པ་དབྱེར་མེད་དུ་མངའ་བ་ཡིན་པ༵ས། རྒྱ༵ལ་སྲ༵ས་མཆོ༵ག་དང༵་དགྲ༵་བཅོ༵མ་དཔ༵ག་ཏུ་ཡ༵ས་པ་ལ༵། གཞ༵ན་དོ༵ན་མཛ༵ད་པ༵ར་རྫོག༵ས་ལྡ༵ན་ཆོ༵ས་ལ༵ས་གསུ༵ངས་པ་ཡིན་ཏེ། དཔལ་དུས་ཀྱི་འཁོར་ལོའི་རྒྱུད་ཀྱི་རྒྱལ་པོར། གང་ལ་གང་འདུལ་གྱིས་གཞན་དོན་མཐའ་ཡས་པ་མཛད་པའི་སྐབས། མཁའ་ལ་རྒྱལ་བའི་སྲས་སོགས་དགྲ་བཅོམ་རྣམས་ལ་ཆོས་སྐུ་ཡིས། །ཞེས་ལེགས་པར་བཀའ་སྩལ་བའི་ཕྱིར་རོ། །ཚུལ་དེ༵་འདྲ༵་མ༵་ཐོས༵་མ༵་མཐོ༵ང་བའི་ཟབ་མོའི་གནས་ལ་ར༵ང་བཟོ༵་མཁ༵ན་གཟུ༵་ལུམ༵ས་བྱེད་མཁ༵ན་རྣམས་ཀྱི༵ས་རྒྱ༵ལ་བ་རྣམས་ལ༵་སྐུ༵ར་བ་བཏ༵བ་པ་དེ་ལ༵ས། རྒྱལ་བ་དེ༵་ཡི༵་རྟེ༵ན་གསུ༵མ་ལ༵་ཡ༵ང་སྐུ༵ར་བ་བཏ༵བ་ན༵ས། དགེ༵་བ༵འི་སྒོ༵་ཆེ༵ན་མ༵ང་པོ༷་ར༵བ་ཏུ་༵བཀ༵ག་པར་བྱེད་དོ། །དེ༵་ལྟར་བྱེད་པ་རྣམ༵ས་ཀྱི༵ས་ཀྱ༵ང་རྫོག༵ས་ལྡ༵ན་ཆོ༵ས་མཆོ༵ག་རྣམ༵ས་མྱུ༵ར་ཏུ༵་མཐོ༵ང་ནས༷་ལྟ༵་བ་ང༵ན་པ་དེ་དག་ར༵བ་ཏུ་སྤང༵ས་ཏེ༵་དགེ༵་བ༵འི་སྒོ༵་ཆེ༵ན་མ༵ང་དུ༵་འབྱེ༵ད་པར་གྱུ༵ར་ཅི༵ག །ཅེས་པའོ། །དེའི་དོན་བསྡུ་ན། བདེན་གཉིས་ཀྱིས་བསྡུས་པའི་དཀོན་མཆོག་ཐམས་ཅད་ལ་བྱིན་རླབས་ནུས་མཐུ་དཔག་ཡས་མངའ་བས་དེའི་རྟེན་གསུམ་བཞེངས་བ་ལ་བསོད་ནམས་དཔག་མེད་འབྱུང་བར་ལུང་རིགས་ཀྱིས་གྲུབ། ཅེས་པའོ། །ཡང་རྒྱལ༵་བ༵་ལ་ཉོན་ཤེས་ལ་སོགས་པའི་སྐྱོན༵་མེ༵ད་ཅིང་ཡོ༵ན་ཏ༵ན་ཐམ༵ས་ཅ༵ད་ཡོངས་སུ་རྫོ༵གས་པ་དེ༵འི་ཕྱི༵ར་རྒྱལ་བ་དེ༵་ལ༵་ཕན༵་༵པ་དང་གནོ༵ད་པ་ག༵ང་བྱ༵ས་པའི༵་འབྲ༵ས་བུ༵་ནི་གཞ༵ན་ལ་ཕན་གནོད་བྱས་པའི༵་འབྲས་བུ་ལས་ལྷ༵ག་པ༵ར་ཆེ༵་བ༵ར་གསུ༵ངས་ཏེ། མདོ་རྒྱུད་བསྟན་ཆོས་རྣམ་པར་དག་པ་རྣམས་སུའོ། །བཞེངས་ན་ཕན་ཡོན་ཆེ་ཞིང་བཤིག་ན་ཉེས་དམིགས་ཆེ་བ་དེ༵འི་ཕྱི༵ར་ཆེ༵ད་དུ༵་གཏད་ནས་རྟེ༵ན་གསུ༵མ་བཤི༵ག་ན༵་ནི༵་སྡིག༵་པ་ཆེ༵ན་པོ་བསགས་པར་འགྱུ༵ར་གྱི༵་མ་བཤིག་པར་ར༵ང་བཞི༵ན་གྱིས་ཞི༵ག་པ༵་ནི༵་སྡིག་ཆེན་དུ་མི་འགྱུར་ཏེ། དཔེར་ན་སྲོག་ཆགས་བསད་པས་སྲོག་གཅོད་ཀྱི་སྡིག་པར་འགྱུར་གྱི། མ་བསད་པར་རང་ཤི་བ་ནི་སྲོག་གཅོད་ཀྱི་སྡིག་པར་མི་འགྱུར་བ་བཞིན་ནོ། །དེ་བས་ན་རང་བཞིན་དུུ་ཞིག་པའི་སྡི༵ག་ཆེ༵ན་ཡི༵ན་པ༵ར་གསུ༵ངས་པ༵་ཆོས་རྗེ་ཀུན་མཁྱེན་ངས་ནི་མ༵་མཐོ༵ང་ངོ༌། །ཁྱེད་རྣམས་ཀྱིས་གསུང་རབ་གཟིགས་པ་དག་ལ་དེ་འདྲ་ཡོད་ན་སྟོན་པར་ཞུའོ། །གསུམ་ལྡན་མར་བཅད་ཐམས་ཅད་རང་སྟོང་ཉིད་དུ་འདོད་པ་རྣམས་ཀྱིས་སངས་རྒྱས་ལ་སྐུར་བ་བཏབ་པ་ལ་བརྟེན་ནས། དེའི་རྟེན་གསུམ་ལ་ཡང་བསྐུར་བ་འདེབས་པ་རྣམས་ནི། མུ་སྟེགས་གཅེར་བུ་བའི་གྲུབ་མཐའ་དང་མཐུན་ཏེ། ལྷ་ལས་ཕུལ་བྱུང་གི་བསྟོད་པར་གཅེར་བུ་ཀུན་དགའ་ར་བ་སོགས། །བཞེངས་པ་སྡིག་པའི་རྒྱུ་ཞེས་ཟེར། །ཐམས་ཅད་མཁྱེན་པ་ཁྱོད་ཀྱི་ནི། །དེ་ཉིད་བསོད་ནམས་རྒྱུ་ཞེས་གསུངས། །ཞེས་སོགས་གསུངས་སོ། །དེ་དག་ཆོས་པ་ཀུན་གྱིས་མཐོང་ཞིང་རྟོགས་ནས་རང་གཞན་ཐམས་ཅད་ལ་ཕན་པ་བྱེད་པར་གྱུར་ཅིག །གསུམ་པ་བསྟན་ཆོས་རྩོམ་པའི་མཇུག་སྨོན་ལ་ཚེ་རབས་ཐམས་ཅད་དུ་བསྟན་འགྲོའི་དོན་བྱེད་ནུས་པར་སྨོན་པ་དང༌། ལོག་པར་བཤད་པ་དག་སྤོང་བར་སྨོན་པ་དང་གཉིས། དང་པོ་ནི། བདག་ནི་སྐྱེ་ཞིང་སྐྱེ་བ་ཐམས་ཅད་དུ། །བསྟན་པ་གསལ་བར་བྱེད་གྱུར་ཅིག། བསྟན་པ་གསལ་བར་མ་ནུས་ནའང། །བསྟན་པའི་ཁུར་ཆེན་འཁུར་བར་ཤོག། ཁུར་ཆེན་ཁུར་བར་མ་ནུས་ནའང༌། །བསྟན་པ་སེམས་ཁྲལ་བྱེད་པ་དང༌། །བསྟན་པ་ཉམས་ཀྱི་དོགས་པ་ཡི། །བྱ་ར་ཙམ་ཡང་བྱེད་པར་ཤོག། མཁའ་ཁྱབ་ཕ་མ་ཐམས་ཅད་ཀྱི། །སྡུག་བསྔལ་ཐམས་ཅད་སེལ་བར་ཤོག། སྡུག་བསྔལ་སེལ་བར་མ་ནུསུ་ནའང༌། །སྡུག་གྲོགས་ཙམ་ཡང་བྱེད་པར་ཤོག། རྩ་བར། བདག་ནི་སྐྱེ་ཞིང་སྐྱེ་བ་ཐམས་ཅད་དུ། །ཞེས་པ་ནས། སྡུག་གྲོགས་ཙམ་ཡང་བྱེད་པར་ཤོག །ཅེས་པའི་བར་ཤོ་ལོ་ཀ་གསུམ་བྱུང༌། དེའི་ཚིག་དོན་ནི། ཀུན་མཁྱེན་རྟོན་པ་བཞི་ལྡན་བད༵ག་ནི༵་སྐྱེ༵་ཞི༵ང་སྐྱེ༵་བ༵འམ་ཚེ་རབས་ཐམ༵ས་ཅ༵ད་དུ། ལུང་རྟོགས་ཀྱི་བསྟ༵ན་པ༵་རིན་པོ་ཆེ་ལེགས་པར་གས༵ལ་བ༵ར་བྱེ༵ད་པར་གྱུ༵ར་ཅི༵ག །གལ་ཏེ་ལུང་རྟོགས་ཀྱི་བསྟ༵ན་པ༵་གས༵ལ་བ༵ར་བྱེད་པར་མ༵་ནུ༵ས་ན༵འ༵ང་བཤད་སྒྲུབ་ལས་གསུམ་གྱི་བསྟ༵ན་པ༵འི་ཁུ༵ར་ཆེ༵ན་འཁུ༵ར་བ༵ར་ཤོ༵ག །གལ་ཏེ་བསྟན་པའི་ཁུ༵ར་ཆེ༵ན་འཁུ༵ར་བ༵ར་མ༵་ནུ༵ས་ན༵འ༵ང་སངས་རྒྱས་ཀྱི་བསྟ༵ན་པ༵་ལ་སེམ༵ས་འཁྲ༵ལ་རྒྱ་ཆེར་བྱེ༵ད་པ༵་དང༵་མ་རྟོགས་པ་དང་ལོག་པར་རྟོགས་པ་སོགས་ཀྱིས་བསྟ༵ན་པ༵་རིན་པོ་ཆེ་ཉམ༵ས་ཀྱི༵་དོག༵ས་པ༵་ཡི༵་སྒོ་ནས་བསྟན་པ་ལ་བྱ༵་ར༵་ཙ༵མ་ཡ༵ང་ལེགས་པར་བྱེ༵ད་པ༵ར་ཤོ༵ག །ཅེས་ཚེ་རབས་ཐམས་ཅད་དུ་བསྟན་པ་རིན་པོ་ཆེ་ལ་བྱ་བ་བྱེད་ནུས་པར་སྨོན་པའོ། །ཡང་ནམ་མཁ༵འ་ལྟར་ཁྱ༵བ་པའི་དྲིན་ཅན་གྱི་ཕ༵་མ༵ར་གྱུར་བའི་སེམས་ཅན་ཐམ༵ས་ཅ༵ད་ཀྱི༵་སྡུ༵ག་བསྔ༵ལ་ཕྲ་རགས་མ་ལུས་པ་ཐ༵མས་༵ཅད་སེ༵ལ་བ༵ར་བྱེད་པར་ཤོ༵ག་ཅིག །གལ་ཏེ་སེམས་ཅན་དེ་དག་གི་སྡུ༵ག་བསྔ༵ལ་སེ༵ལ་བ༵ར་བྱེད་པར་མ༵་ནུས་ན༵འ༵ང་སེམས་ཅན་ཐམས་ཅད་ཀྱི་སྡུག་བསྔལ་མ་ལུས་པ་མ་སྤངས་བར་དུ་དེ་དག་ལ་སྡུ༵ག་གྲོ༵གས་ཙ༵མ་ཡ༵ང་བྱེ༵ད་པ༵ར་ཤོ༵ག་ཅིག །ཅེས་ཚེ་རབས་ཀུན་ཏུ་འགྲོ་བའི་དོན་ལ་བརྩོན་པར་སྨོན་པའོ། །གཉིས་པ་ལོག་པར་བཤད་པ་དག་སྤོང་བར་སྨོན་པ་ནི། ངོ་བོ་ཉིད་གསུམ་འདོད་དང་མི་འདོད་ལས། །སེམས་ཙམ་དབུ་མར་ལོག་བཤད་བྱེད་པ་དང༌། །ཀུན་གཞི་རྣམ་ཤེས་འདོད་དང་མི་འདོད་པས། །སེམས་ཙམ་དབུ་མར་ལོག་བཤད་བྱེད་པ་དང༌། །རྣམ་ཤེས་ཚོགས་བརྒྱད་འདོད་དང་མི་འདོད་ལས། །སེམས་ཙམ་དབུ་མར་ལོག་བཤད་བྱེད་པ་དང༌། །རིགས་ཆད་འདོད་དང་མི་འདོད་པ་ལས་ཀྱང༌། །སེམས་ཙམ་དབུ་མར་ལོགས་བཤད་བྱེད་ལ་སོགས། །རྫོགས་ལྡན་ཆོས་དང་འགལ་བའི་ལོག་བཤད་རྣམས། །བདག་གཞན་ཀུན་གྱིས་རྟག་ཏུ་སྤོང་གྱུར་ཅིག །རྩ་བར། ངོ་བོ་ཉིད་གསུམ་འདོད་དང་མི་འདོད་ལས། །ཞེས་པ་ནས། བདག་གཞན་ཀུན་གྱི་རྟག་ཏུ་སྤོང་གྱུར་ཅིག །ཅེས་པའི་བར་ཤོ་ལོ་ཀ་གཉིས་དང་རྐང་བ་གཉིས་བྱུང༌། དེའི་ཚིག་དོན་ནི། གསུམ་ལྡན་མར་བཅད་ཁ་ཅིག་གིས། མཚན་ཉིད་ངོ་བོ་ཉིད་མེད་པ་དང༌། སྐྱེ་བ་ངོ་བོ་ཉིད་མེད་པ་དང༌། དོན་དམ་པ་ངོ༵་བོ༵་ཉི༵ད་མེད་པ་གསུ༵མ་འདོ༵ད་པ་དང༵་མི༵་འདོ༵ད་ཀྱི་ཁྱད་པར་ལ༵ས་རིམ་བཞིན་སེམ༵ས་ཙ༵མ་པ་དང༌། དབུ༵་མ༵ར་བཞག་པའི་ལོ༵ག་པར་བཤ༵ད་པ་བྱེ༵ད་པ༵་ད༵ང༌། ཡང་ཀུ༵ན་གཞི༵་རྣ༵མ་པར་ཤེ༵ས་པ་འདོ༵ད་པ་ད༵ང་མི༵་འདོ༵ད་པ༵ས་སེམ༵ས་ཙ༵མ་པ་དང༌། དབུ༵་མ༵ར་སོ་སོར་བཞག་པའི་ལོ༵ག་པར་བཤ༵ད་པ་བྱེ༵ད་པ༵་ད༵ང༌། ཡང་རྣ༵མ་ཤེ༵ས་ཚོག༵ས་བརྒྱ༵ད་འདོ༵ད་པ་ད༵ང་མི༵་འདོ༵ད་པའི་ཁྱད་པར་ལ༵ས་རིམ་བཞིན་སེམ༵ས་ཙ༵མ་པ་དང་ད༵བུ་མ༵ར་བཞག་པའི་ལོ༵ག་བཤ༵ད་བྱེ༵ད་པ༵་དང༵༌། ཡང་རིག༵ས་ཆ༵ད་འདོ༵ད་ད༵ང་མི༵་འདོ༵ད་པ༵་ལ༵ས་ཀྱ༵ང་རིམ་བཞིན་སེམ༵ས་ཙམ༵་པ་དང་དབུ༵་མ༵ར་བཞག་པའི་ལོ༵ག་པར་བཤ༵ད་པ་བྱེ༵ད་པ་ལ༵་སོག༵ས་པ་རྫོག༵ས་ལྡ༵ན་ཆོ༵ས་ད༵ང་འག༵ལ་བ༵འི་ལོ༵ག་པར་བཤ༵ད་པ་རྣ༵མས་བད༵ག་གཞ༵ན་ཀུན༵་གྱི༵་རྟ༵ག་ཏུ༵་སྤོ༵ང་གྱུ༵ར་ཅི༵ག་ཅེས་པའོ། །དེའི་དོན་བསྡུ་ན། གསུང་རབ་ཀྱི་གནད་ཟབ་མོ་མ་རྟོགས་པའི་གཞན་གྱི་འདོད་ལུགས་ལོག་པར་བཤད་པ་རྣམས་སྤང་བར་གདམས་ཏེ་སྤོང་བར་སྨོན་པའོ། །འདིའི་སྐབས་སུ་འདི་ཉིད་ཀྱི་འགྲེལ་བ་ཕྱོགས་མེད་རིས་མེད་ལས། དེ་ལྟར་ལེགས་པར་རྣམ་པར་ཕྱེ་ནས་བསྟན་པ་ལ་སྐྱོན་མེད་པ་དང་སྐྱོན་ཡོད་པར་ལེགས་པར་རྟོགས་ལ། དེ་རྟོགས་པས་དཔང་དུ་རུང་བ་དང་མི་རུང་བ་ལེགས་པར་རྟོགས་ཤིང༌། དེ་ལྟར་རྟོགས་ནས་དཔང་དུ་མི་རུང་བ་རྣམས་དོར་ཏེ། དཔང་དུ་རུང་བ་རྣམས་ལ་དད་གུས་དང་ཉམས་ལེན་བྱས་ན་ཕ་ཆོས་དང་མཐུན་ཏེ། ཆོས་པ་རྣམས་ཀྱི་ཕ་ནི་སངས་རྒྱས་ཡིན། །དེ་ཡིས་གསུངས་པའི་ཆོས་ནི་ཕ་ཆོས་ཡིན། །དེ་ཕྱིར་མདོ་རྒྱུད་རྣམ་དག་ཐམས་ཅད་ནི། །བདག་ཅག་རྣམས་ཀྱི་ཕ་ཆོས་ཡང་དག་ལགས། །ཕ་ཆོས་དེ་དག་བྲལ་བར་མ་གྱུར་ཅིག །འཇིག་རྟེན་གྲགས་སྡེའི་ཕ་ཆོས་མེད་ཀྱང་བླ། །ཕ་ཆོས་མཆོག་དེ་ཀུན་གྱིས་རྟོགས་གྱུར་ཅིག །ཕ་ཆོས་དེ་དང་མཐུན་ན་གཏན་དུ་ལེགས། །ཕ་ཆོས་དེ་དང་འགལ་ན་གཏན་དུ་ཉེས། །དེ་ཕྱིར་མཐུན་པ་རྣམས་ལ་དད་གུས་བགྱིད། །འགལ་བ་རྣམས་ལ་བདག་གཞན་བརྗེ་བ་བསྒོམ། །དགེ་བ་ཐམས་ཅད་བྱང་ཆུབ་ཆེན་པོར་བསྔོ། །ཞེས་གསུངས་སོ། །གསུམ་པ་མཇུག་གི་དོན་ནི། བཀའ་བསྡུ་བཞི་པའི་དོན་བསྟན་རྩིས་ཆེན་པོ་ཞེས་བྱ་བ་ཕྱོགས་མེད་ཀྱི་བསྟན་བཅོས་འདི་ནི་དཔལ་ལྡན་བླ་མ་དམ་པ་བསོད་ནམས་རྒྱལ་མཚན་དཔལ་བཟང་པོས་གནང་སྦྱིན་བཟང་ལ་མང་བ་མཛད་དེ། འདི་ལྟ་བུའི་བསྟན་བཅོས་མང་དུ་རྩོམས་གསུངས་པ་ལ་བརྟེན་ནས། བརྟོན་པ་བཞི་ལྡན་གྱིས་སྦྱར་བ་རེ་ཞིག་རྫོགས་སོ། །བསྟན་པ་དང་སེམས་ཅན་ཐམས་ཅད་ལ་ཕན་པར་གྱུར་ཅིག །རྩ་བར། བཀའ་བསྡུ་བཞི་བའི་དོན་བསྟན་རྩིས་ཆེན་པོ་ཞེས་པ་ནས། ཐམས་ཅད་ལ་ཕན་པར་གྱུར་ཅིག་ཅེས་པའི་བར་བྱུང༌། དེའི་ཚིག་དོན་ནི། གང་ཟག་རྣམས་ཀྱི་མ་རྟོགས་པ་དང་ལོག་པར་རྟོགས་པའི་དྲི་མའི་བློ་སྐྱོན་གྱིས་སངས་རྒྱས་ཀྱི་བསྟན་པ་རྣམ་པར་དག་པ་ལ་སྐྱོན་བསྲེས་པ་དང་ལྷད་བཅུག་པ་རྣམས་ལུང་རིགས་རྣམ་དག་གིས་བསལ་ནས། རྟག་ཆད་སྤྲོས་མཐའ་བྲལ་བའི་ལྟ་བ་དང༌། ཞི་ལྷག་ཟུང་དུ་འཇུག་པའི་སྒོམ་པ་དང༌། སྤྱོད་པ་བླང་དོར་མ་ནོར་རྒྱལ་བའི་བཀའ་བཞིན་སྒྲུབ་པའི་ཡང་དག་པའི་ལམ་ལ་འགོད་པ་ནི། བཀ༵འ་བསྡུ༵་བའི་དོན་ཡིན་ལ། སྔར་བཀའ་བསྡུ་བ་གསུམ་དགྲ་བཅོམ་པ་དུ་མས་བྱས་ཟིན་ནས་འདི་ནི་བ༵ཞི་པ༵འི་དོ༵ན་ལ་བསྟ༵ན་རྩི༵ས་ཆེ༵ན་པོ༵་ཞེ༵ས་བྱ༵་བ༵་ཡིན་ཞིང༌། དད་གུས་དང༌། དག་སྣང་དང༌། མ་ཕོད་པའི་གྲོས་འདེབས་དང༌། ཞུ་འབུལ་དང༌། བྱམས་སྙིང་རྗེ་ཆེན་པོའི་ཕྱོགས་མེད་རིས་མེད་དུ་གནས་ཀྱི་གང་གི་ཡང་ཕྱོགས་སུ་ལྷུང་བ་མེད་པའི་ཕྱིར། ཕྱོག༵ས་མེ༵ད་རིས་མེད་ཅེས་བྱའོ། །སྔར་གྱི་བཀའ་བསྡུ་བ་རྣམས་ནི། དགྲ་བཅོམ་པ་མང་པོ་འདུས་པར་གྲགས་མོད། འདིར་དགྲ་བཅོམ་དུ་འདུས་ཞེ་ན། དགྲ་བཅོམ་ཆེན་པོ་སངས་རྒྱས་བཅོམ་ལྡན་འདས་ཀྱི༵་རྫོགས་ལྡན་གྱི་ཆོས་མཆོག་རྣམས་སུ་འདིའི་དོན་རབ་ཏུ་གསལ་བར་སྟོན་པའི་ལུང་ཟབ་མོ་སྟོང་ཕྲག་མང་པོ་གདའ་བ་དེ་རྣམས་དགྲ་བཅོམ་ཆེན་པོ་དང་མཚུངས་པར་གདའ་བས་དེའི་ལུང་བཞིན་བསྡུས་པའོ། །ཕྱིའི་བསྡུས་པ་རྣམས་ཀྱིས་ཀྱང་དེ་བཞིན་དུ་མཛད་པར་ཞུ་ཞིང༌། ལུང་གི་དགོངས་པ་ལེན་པ་ལ་མ་མཐུན་ན། སངས་རྒྱས་ཉིད་ཀྱི་རང་འགྲེལ་རྣམས་དཔང་དུ་མཛད་པར་ཞུ། ཞེས་ཆོས་རྗེ་ཀུན་མཁྱེན་ཉིད་ཀྱིས་གསུངས་ལ། ཡང་གསུངས་རྒྱུན་ལ་བཀའ་བསྡུ་བཞི་བའི་བསྟན་བཅོས་མཛད་པའི་ཚེ་ཕྱོགས་ཀྱི་དགེ་བཤེས་དུ་མས་སྔར་བཀའ་བསྡུ་བ་རྣམས་ལ་དགྲ་བཅོམ་ལྔ་བརྒྱ་སོགས་དཔང་པོར་ཡོད་ལ་བཀའ་བསྡུ་བཞི་བ་ལ་དཔང་པོར་དགྲ་བཅོམ་དུ་ཡོད་ཞུས་པའི་ལན་ཏུ། ད་ལན་བཀའ་བསྡུ་བཞི་བ་ལ་དཔང་པོར་དགྲ་བཅོམ་པ་ཆེན་པོ་སངས་རྒྱས་བཅོམ་ལྡན་འདས་ཀྱིས་མཛད་པའི་བསྟན་ཆོས་ལྔ་བརྒྱ་དཔང་པོར་ཡོད་ཅེས་གསུངས་པར་གྲགས་སོ། ་ །དེ་ལྟ་བུའི་བསྟ༵ན་བཅོ༵ས་ཆེན་པོ་འ༵དི་ནི༵་དཔ༵ལ་ལྡན༵་བླ༵་མ༵་དམ༵་པ༵་བསོད༵་ནམ༵ས་རྒྱལ༵་མཚ༵ན་དཔ༵ལ་བཟ༵ང་པོ༵ས་གན༵ང་སྦྱི༵ན་བཟ༵ང་ལ༵་མ༵ང་བ༵་མཛ༵ད་དེ༵་འདི༵་ལྟ་བུ༵འི་བསྟ༵ན་བཅོ༵ས་མ༵ང་དུ༵་རྩོམ༵ས་ཤིག་ཅེས་གསུང༵ས་པ༵་ལ༵་བརྟེ༵ན་ནས༵། རྟོ༵ན་པ༵་བཞི༵་ལྡ༵ན་དོལ་པོ་པ་ཤེས་རབ་རྒྱལ་མཚན་གྱི༵ས་སྦྱ༵ར་བ༵་རེ༵་ཞི༵ག་རྫོ༵གས་སོ༵། །བསྟན་བཅོས་འདིས་བསྟ༵ན་པ༵་ད༵ང་སེམ༵ས་ཅ༵ན་ཐམ༵ས་ཅ༵ད་ལ༵་ཕ༵ན་པ༵ར་གྱུ༵ར་ཅི༵ག། །ཅེས་སྨོན་པའོ། །དེ་ལྟར་ཀུན་མཁྱེན་ཆོས་རྗེ་དོལ་པོ་པ་ཤེས་རབ་རྒྱལ་མཚན་དཔལ་བཟང་པོས་ངེས་གསང་གཞན་སྟོང་དབུ་མ་ཆེན་པོའི་ཤིང་རྟའི་སྲོལ་གངས་ལྗོངས་འདིར་ཆེས་ཆེར་ཕྱེ་བ་དེ་ཡང་ཀུན་མཁྱེན་རང་ཉིད་ཀྱིས་གཞུང་ལུགས་ཆེན་པོ་ལ་ཐོས་བསམ་བྱས། གདམས་ངག་ཟབ་མོ་ལ་ཉམས་ལེན་བྱས་ནས་ཉམས་རྟོགས་ཀྱི་འབྲས་བཟང་སྨིན། ངེས་དོན་གྱི་མདོ་རྒྱུད་དུ་མ་ཁུངས་སུ་བྱས་ནས་གསུངས་པ་ཡིན་ཏེ། ཆོས་རྗེ་ཀུན་མཁྱེན་རང་ཉིད་ཀྱིས་བཀའ་སྩལ་བ་འདི་ལྟར། ཇི་སྐད་དུ། མ་རྟོགས་པའི་རྒྱུ་ནི། བློ་གྲོས་དམན་པ་དང༌། དམ་པའི་གདམས་ངག་དང་བྲལ་བ་དང༌། སྒོམ་པའི་ཉམས་རྟོགས་མེད་པ་དང༌། ང་རྒྱལ་དང༌། རློམས་པའི་ཁེངས་པ་དང༌། སྐྱོ་མ་སྔ་བཙན་དང༌། ཁ་མང་ཉུང་གི་བདེན་རྫུན་དུ་འཇོག་པ་ལ་སོགས་པ་ཡིན་མོད་ཀྱི་བདག་གིས་ནི་དང་པོར་གཞུང་ལུགས་ཆེན་པོ་རྣམས་ལ་མང་དུ་ཐོས་པ་བགྱིས་ཤིང༌། དེ་ནས་རྒྱ་བོད་ཀྱི་གདམས་ངག་ཟབ་པར་གྲགས་པ་རྣམས་ལ་ཉམས་ལེན་བགྱིས་ནས། སོ་སོའི་ཉམས་རྟོགས་ཀྱང་ཐད་ཀ་ཐད་ཀར་སྐྱེས་ལ། དེ་ནས་རྩ་རྒྱུད་ཆེན་པོ་རྣམས་ཀྱི་ངེས་དོན་དཔལ་ལྡན་ཀ་ལ་པའི་གདམས་ངག །རིགས་ལྡན་ས་བཅུ་བ་རྣམས་ཀྱི་སྙིང་གཏམ་ཟབ་མོ་ཐུན་མོང་མ་ཡིན་པ་དང་མཇལ་བའི་བྱིན་རླབས་ཅུང་ཟད་ཞུགས་པ་ལ་བརྟེན་ནས། བདག་འཛིན་ཅན་གྱི་པནྚི་ཏ་རྣམས་དང༌། ཉམས་རྟོགས་ཅན་གྱི་སྒོམ་ཆེན་པ་ཕལ་དང༌། གསང་སྔགས་འཛིན་པ་ཆེན་པོར་རློམ་པ་ཕལ་གྱིས་མ་རྙེད་མ་རྟོགས་ལ་ཁུངས་མ་ཆོད་པའི་གནད་ཟབ་མོ་མང་དུ་རྙེད་ཅིང༌། རྟོགས་པ་བཟང་པོ་ནང་ནས་རྡོལ་བའི་ཕྱིར། ཉམས་རྟོགས་ཅན་གྱི་སྒོམ་ཆེན་པ་ཕལ་དང༌། གསང་སྔགས་འཛིན་པ་ཆེན་པོར་རློམ་པ་རྣམས་མ་ཟད་དོན་འདི་ལ་སངས་རྒྱས་ཀྱིས་ཀྱང་ངེས་པར་བཟློག་པར་མི་སྤྱོད་ཅིང༌། ཐེ་ཚོམ་དྲི་རྒྱུ་མེད་པའི་ངེས་ཤེས་ཁྱད་པར་ཅན་མཆིས་པའི་ཕྱིར་རོ། །ཅི་སྟེ་ཡང་ངེས་ཤེས་དེ་ཀུན་རབ་རིབ་མུན་སྒོམ་མམ་ལོག་ཤེས་ཡིན་གྱི་ཤེས་བྱེད་ཀྱི་ལུང་ཡང་དག་མེད་དོ་སྙམ་ན་མེད་པ་མ་ཡིན་ཏེ། ས་བཅུ་གཉིས་པ་རྣམས་དང༌། ས་བཅུ་བ་རྣམས་དང༌། ཀླུ་སྒྲུབ་ཡབ་སྲས་དང༌། ནཱ་རོ་པཎ་ཆེན་ལ་སོགས་པ་མཁས་གྲུབ་དམ་པ་རྣམས་ཀྱི་ལུང་གསལ་བོ་རིགས་པ་དང་བཅས་ཤིང་མན་ངག་དང་བཅས་པ་ཤིན་ཏུ་མང་བར་ཡོད། ཅེས་དང༌། ཡང་འདི་རྣམས་ལ་གསང་བ་ཟབ་མོ་ཐུན་མོང་མ་ཡིན་པའི་གདམས་ངག་ཏུ་བདོག་པས། དེ་རྣམས་བློར་ཤོང་བ་ལ་ཐོས་པ་དང༌། བསམ་པ་དང༌། བསྒོམ་པ་ལས་བྱུང་བའི་ཤེས་རབ་ཀྱི་ནོར་གྱི་ཕྱུག་ཅིང་ཕྱོགས་ཞེན་དང་སྐྱོ་མ་སྔ་བཙན་ལ་སོགས་པའི་གཅུང་ནད་དང་བྲལ་ལ། ཁ་མང་ཉུང་གི་བདེན་རྫུན་དུ་འཇོག་པ་ལ་སོགས་པ་ལུགས་ངན་པའི་གདོན་ལས་གྲོལ། ཞེས་དང༌། སངས་རྒྱས་བཅོམ་ལྡན་འདས་དང༌། རིགས་གསུམ་མགོན་པོ་དང༌། རྡོ་རྗེ་སྙིང་པོ་དང༌། མགོན་པོ་བྱམས་པ་ལ་སོགས་པ་ས་བཅུའི་དབང་ཕྱུག་དམ་པ་རྣམས་དང༌། འཕགས་པ་ཐོགས་མེད་དང༌། བྲམ་ཟེ་ཆེན་པོ་ས་ར་ཧ་པ་དང༌། ནཱ་རོ་པཎ་ཆེན་ལ་སོགས་པ་ཤིང་རྟ་ཆེན་པོ་རྣམས་དང༌། མཁས་གྲུབ་དམ་པ་རྣམས་ཀྱི་བཞེད་པ་དཔང་དུ་བྱས་པའི་ཕྱིར་དང༌། དེ་རྣམས་ཀྱི་དགོངས་པ་ཇི་ལྟ་བ་བཞིན་ལེགས་པར་ཁུང་དུ་ཆུད་ནས་སྒྲོ་སྐུར་སྤངས་ཏེ་བྲིས་པའི་ཕྱིར་རོ། །ཞེས་སོགས་གསུངས་པའི་ཕྱིར་རོ། །དེ་དག་གིས་ཀུན་མཁྱེན་ཇོ་ནང་བ་ཤེསརབ་རྒྱལ་མཚན་དང༌། ཐམས་ཅད་མཁྱེན་པ་ཏཱ་ར་ནཱ་ཐའི་གསུང་མཆོག་རྣམས་ལ་བརྟེན་ནས་བཀའ་བསྡུ་བཞི་བའི་བསྟན་བཅོས་ཀྱི་ཚིག་དོན་ཅུང་ཟད་བཤད་ཟིན་ཏོ། །སྨྲས་པ། རྒྱལ་བསྟན་སྤྱི་དང་ཀུན་མཁྱེན་ཇོ་ནང་བའི། །ངེས་གསང་དབུ་མའི་མདོ་སྔགས་བསྟན་པ་དང༌། །ཕྲད་པའི་སྐལ་བཟང་རྨད་དུ་བྱུང་སྙམ་དུ། །འཆད་རྩོད་རྩོམ་པའི་སྙིང་པོ་ལེན་ལ་བྲེལ། །ཐུབ་བསྟན་ཀུན་གསལ་སྟོང་བའི་མཁའ་ཁམས་དབྱིངས། །ལྟ་ངན་ཆུ་འཛིན་སྟུག་པོས་མི་སྣང་བ། །ལུང་རིགས་བསྐལ་བའི་རླུང་གིས་རབ་བསལ་ནས། །རྫོགས་ལྡན་ཆོས་ཀྱི་འོད་སྟོང་གཟི་འོད་འབར། །བདག་བློ་དམན་པའི་རང་བཟོ་སྤངས་བྱས་ནས། །རྟོན་པ་བཞི་ལྡན་ཀུན་མཁྱེན་ཡབ་སྲས་དང༌། །རྗེ་བཙུན་ཀུན་དགའ་སྙིང་པོའི་གསུང་ཇི་བཞིན། །ལུང་རིགས་ཞིབ་མོའི་ལེགས་བཤད་སྒྲ་བརྒྱ་འབར། །རྒྱལ་བསྟན་ཟབ་རྒྱས་ཕྲ་ཞིང་རྟོགས་པར་དཀའ། །བདག་ནི་བློ་གྲོས་ཉམ་ཆུང་སྦྱངས་བའང་དམན། །མ་བཤད་ལོག་པར་བཤད་པ་མཆིས་སྲིད་ན། །བརྩེ་ལྡན་དོལ་པོ་པ་ལ་བཟོད་པར་གསོལ། །འདིར་འབད་ལེགས་བཤད་དགེ་ཚོགས་ཇི་སྙེད་ཀྱིས། །ནམ་མཁའི་མཐའི་གཏུགས་གྱུར་བའི་མ་རྣམས་ཀུན། །རྫོགས་ལྡན་ཆོས་ཀྱི་དགོངས་དབྱིངས་མངོན་གྱུར་ཞིང༌། །དོན་དམ་སྐུ་བཞིའི་རྒྱལ་བའི་གནས་ཐོབ་ཤོག །བདག་ཀྱང་དེང་ནས་ཚེ་རབས་ཐམས་ཅད་དུ། །ངེས་དོན་དབུ་མའི་ལྟ་དང་མི་འབྲལ་ཞིང༌། །ཐུབ་པའི་བསྟན་པ་ཕྱོགས་བཅུར་སྤེལ་བ་དང༌། །རྒྱལ་བ་རྣམས་ཀྱི་ཆོས་ཀུན་འཛིན་གྱུར་ཅིག །སྤྱན་རས་གཟིགས་མགོན་བསྟན་སྲུང་སྐུར་བཞེངས་པའི། །དཔལ་ལྡན་དྲཀྴད་མགོན་པོ་འཁོར་བཅས་ཀྱིས། །ངེས་དོན་སྙིང་པོ་གསང་ཆེན་ཟབ་མོའི་བསྟན། །ཕྱོགས་ཀུན་དར་རྒྱས་ཡུན་རིང་གནས་པར་མཛོད། །ཅེས་བཀའ་བསྡུ་བཞི་པའི་འགྲེལ་བ་ལུང་རིགས་གཏེར་མཛོད་ངེས་གསང་ཀུན་གསལ་ཐུབ་བསྟན་མཛེས་རྒྱན་ཞེས་བྱ་བ་འདི་ནི། སྔར་མཁན་འཇམ་དཔལ་བློ་གྲོས་ཀྱིས་བསྐུལ་བ་དང༌། ཁྱབ་བདག་རྡོ་རྗེ་འཆང་བླ་མ་གསལ་ལྡན་རྒྱ་མཚོ་ནས་གཞན་སྟོང་ཞིག་འབྲི་དགོས་ཞེས་བཀས་བསྐུལ་བ་དང༌། རྗེས་ནས་ཡང་པོ་ཏ་ལའི་མཚོན་རྟགས་བཅས་པའི་སྒོར་ལྔ་བཅུ་དར་བཅས་གནང་བ་ལ་བརྟེན་ནས། འབྲས་རབ་འབྱམས་པའི་མིང་ཙམ་འཛིན་པ་ངག་དབང་དངོས་གྲུབ་དཔལ་ལམ་མིང་གཞན་དབྱངས་ཅན་ངག་གི་རོལ་མཚོས་མདོ་ལིའི་རྡོ་ཁ་དགོན་ངེས་དོན་ཆོས་འཁོར་གླིང་ནས་སྤྱི་དོན་རིན་ཆེན་སྒྲོན་མེ་སོགས་དཔེ་ཁྲིད་ཀྱི་ཞར་ལ། རབ་གནས་ས་སྐྱོང་ཞེས་པ་ཤིང་བྱ་ལོའི་མཆུ་ཟླ་བའི་ཡར་ངོའི་དགའ་བ་དང་པོའི་ཚེས་ལ་མཇུག་རྫོགས་པར་བྲིས་པའོ། །འདིས་ཀྱང་རྒྱལ་བསྟན་སྤྱི་དང་ཁྱད་པར་ངེས་གསང་གཞན་སྟོང་དབུ་མ་ཆེན་པོ་ཕྱོགས་ཀུན་དར་རྒྱས་ཡུན་རིང་དུ་གནས་པར་གྱུར་ཅིག །དགེའོ། །མངྒ་ལཾ།། །། པར་བྱང་སྨོན་ཚིགཆོས་ཚུལ་ཟབ་མོའི་གནས་ཀུན་རབ་གསལ་བའི། ། རྒྱལ་བསྟན་མི་ནུབ་རྒྱལ་མཚན་འཛིན་པའི་དཔྱིད། ། སྐྱེས་བུུ་དམ་པའི་མཛད་འཕྲིན་ཡང་སྙིང་ཉིད། ། གསུང་གི་རྣམ་དཀར་པདྨ་དཀར་བོའི་ཕྲེང༌། ། སྐལ་ལྡན་གདུལ་བྱའི་བློ་གྲོས་གསོས་སྨན་དུ། ། པར་བསྐྲུན་བྱས་པའི་རྣམ་དཀར་ཆུ་ཀླུང་འདི། ། དུས་གསུམ་བསགས་པའི་མཚོ་ཆེན་དང་འདྲེས་ནས། ། འགྲོ་རྣམས་སྲིད་པའི་ཚ་གདུང་སེལ་བར་སྨོན། ། ཞེས་པ་འདི་ཡང་བཙུན་པ་ངག་དབང་དངོས་གྲུབ་དཔལ་གྱིས་སྨྲས་པའོ། |