 གསུང་འབུམ་པོད་གསུམ་པ། ཚད་མ།དཔལ་ལྡན་རྒྱལ་བ་ཇོ་ནང་པའི་དཔེ་ཚོགས།དགེ་བཤེས་དངོས་གྲུབ་དཔལ།གངས་ལྗོངས་རིས་མེད་མཐོ་སློབ་ཀྱི་རྩོམ་སྒྲིག་སྡེ་ཚན།མཁོ་རྒུའི་ལོངས་སྤྱོད་འཛོམས་ཀྱང་མ་བསགས་ཤིང་། །འདོད་ཡོན་འཁོར་མང་ཚོགས་ཀྱང་མ་ཞེན་པར། །བསླབ་གསུམ་སྡེ་སྣོད་རིག་པའི་བང་མཛོད་དེ། །སྤོང་དང་ཀློག་པའི་སྙིང་གི་དབུས་སུ་བསྐྱིལ། ། ཚད་མའི་དགོངས་དོན་ཕྱོགས་གཅིག་ཏུ་དྲིལ་བ་བསྟན་བཅོས་བསྡུས་གྲྭའི་རྣམ་བཞག་གཞུང་བརྒྱ་གསལ་བའི་རིགས་ལམ་བློ་གསལ་ཡིད་ཀྱི་མུན་སེལ།དཀར་ཆག ཚད་མའི་དགོངས་དོན་ཕྱོགས་གཅིག་ཏུ་དྲིལ་བ་བསྟན་བཅོས་བསྡུས་གྲྭའི་རྣམ་བཞག་གཞུང་བརྒྱ་གསལ་བའི་རིགས་ལམ་བློ་གསལ་ཡིད་ཀྱི་མུན་སེལ། བསྡུས་ཚན་དང་པོ་གཟུགས་ཀྱི་རྣམ་བཞག་བཤད་པ། གཉིས་པ་ཡོད་རྟོགས་མེད་རྟོགས་ཀྱི་རྣམ་བཞག་བཤད་པ། གསུམ་པ་ཡིན་ལོག་མིན་ལོག་གི་རྣམ་བཞག་བཤད་པ། བཞི་བ་ལྡོག་པ་ངོས་འཛིན་གྱི་རྣམ་བཞག་བཤད་པ། ལྔ་བ་གཅིག་དང་ཐ་དད་ཀྱི་རྣམ་བཞག་བཤད་པ། དྲུག་པ་རྒྱུ་འབྲས་ཆུང་ངུའི་རྣམ་བཞག་བཤད་པ། བདུན་པ་ཡུལ་དང་ཡུལ་ཅན་གྱི་རྣམ་བཞག་བཤད་པ། བརྒྱད་པ་སྤྱི་དང་བྱེ་བྲག་གི་རྣམ་བཞག་བཤད་པ། དགུ་པ་འགལ་འབྲེལ་ཆུང་ངུའི་རྣམ་བཞག་བཤད་པ། བཅུ་བ་མཚན་མཚོན་གྱི་རྣམ་བཞག་བཤད་པ། བཅུ་གཅིག་པ་ཆ་བའི་ལུགས་ཀྱི་རྫས་ལྡོག་གི་རྣམ་བཞག་བཤད་པ། བཅུ་གཉིས་པ་རང་ལུགས་ཀྱི་རྫས་ལྡོག་གི་རྣམ་བཞག་བཤད་པ། བཅུ་གསུམ་པ་ཁྱབ་པ་སྒོ་བརྒྱད་ཀྱི་རྣམ་བཞག་བཤད་པ། བཅུ་བཞི་པ་ཁས་ལེན་སོང་ཚུལ་གྱི་རྣམ་བཞག་བཤད་པ། བཅོ་ལྔ་བ་དྲུག་སྒྲའི་རྣམ་བཞག་མདོར་བསྡུས་ཙམ་བཤད་པ། བཅུ་དྲུག་པ་ཐལ་འགྱུར་ཆུང་ངུའི་རྣམ་བཞག་མདོར་བསྡུས་ཙམ་བཤད་པ། བཅུ་བདུན་པ་དུས་གསུམ་གྱི་རྣམ་བཞག་བཤད་པ། བཅོ་བརྒྱད་པ་རང་མཚན་སྤྱི་མཚན་གྱི་རྣམ་བཞག་བཤད་པ། བཅུ་དགུ་བ་སེལ་འཇུག་དང་སྒྲུབ་འཇུག་གི་རྣམ་བཞག་བཤད་པ། ཉི་ཤུ་པ་བརྗོད་བྱ་རྗོད་བྱེད་ཀྱི་རྣམ་བཞག་བཤད་པ། ཉེར་གཅིག་པ་དགག་སྒྲུབ་ཀྱི་རྣམ་བཞག་བཤད་པ། ཉེར་གཉིས་པ་འགལ་འབྲེལ་ཆེ་བའི་རྣམ་བཞག་བཤད་པ། ཉེར་གསུམ་པ་ཐལ་འགྱུར་ཆེ་བའི་རྣམ་བཞག་བཤད་པ། ཉེར་བཞི་པ་རྒྱུ་འབྲས་ཆེ་བའི་རྣམ་བཞག་བཤད་པ། ཐལ་འགྱུར་གྱི་ཁྱབ་སྒོ་རེ་གཉིས་ཀྱི་རེ་མིག ཆ་བའི་ལུགས་ཀྱི་རྫས་ལྡོག་བརྒྱད་ཀྱི་མུ་བཞི་བརྩི་ཚུལ། བློ་རིག་གི་རྣམ་བཞག་ཉུང་གསལ་ལེགས་བཤད་གསེར་གྱི་ཉི་མ། བློ་རིག་གི་རྣམ་བཞག་བཤད་པ་ལ་གཉིས། དང་པོ་ཡུལ་ཅན་བློའི་རྣམ་བཞག་བཤད་པ་ལ་གཉིས། དང་པོ་མ་གྲུབ་པའི་གཏན་ཚིགས་བཤད་པ། གཉིས་པ་འགལ་བའི་གཏན་ཚིགས་བཤད་པ། གསུམ་པ་མ་ངེས་པའི་གཏན་ཚིགས་བཤད་པ། རྩ་བའི་ས་བཅད་གཉིས་པ་གཞན་དོན་རྗེས་དཔག་བཤད་པ་ལ་གཉིས། གཞན་དོན་རྗེས་དཔག་དངོས་བཤད་པ། དེའི་ཤུགས་བསྟན་བསྒྲུབ་བྱ་བཤད་པ༌། ཕྱོགས་སྒྲའི་རྩོད་ལན་མདོར་བསྡུས་གསལ་བའི་སྒྲོན་མེ། ཕྱོགས་ཆོས་འཁོར་ལོའི་གཏན་ཚིགས་དགུའི་རེའུ་མིག ལུང་འགལ་གྱི་རྣམ་བཞག་བློ་གསལ་ཡིད་ཀྱི་རྒྱན། དོན་བདུན་ཅུའི་རྣམ་བཞག ཚད་མའི་དགོངས་དོན་ཕྱོགས་གཅིག་ཏུ་དྲིལ་བ་བསྟན་བཅོས་བསྡུས་གྲྭའི་རྣམ་བཞག་གཞུང་བརྒྱ་གསལ་བའི་རིགས་ལམ་བློ་གསལ་ཡིད་ཀྱི་མུན་སེལ་ཞེས་བྱ་བ་བཞུགས་སོ། ། མཛད་པ་པོ་འབྲས་རབ་འབྱམས་པ་དངོས་གྲུབ་དཔལ། ན་མོ་གུ་རུ་བྷྱཿ རྗེ་བཙུན་འཇམ་པའི་དབྱངས་ལ་ཕྱག་འཚལ་ལོ། །གྲུབ་མཐའ་རྒྱ་མཚོའི་དེ་ཉིད་རིག་པ་ཡི། །གཞུང་ལུགས་རྒྱ་མཚོའི་རིགས་ལམ་ཉིན་བྱེད་ཀྱིས། །ལྟ་ངན་མུན་པའི་དྲ་བ་རྣམ་བསལ་བའི། །ཕྱོགས་གླང་གྲགས་པའི་ཞབས་ལ་ཕྱག་འཚལ་ལོ། །ཐོས་བསམ་སྒོམ་པས་གཞུང་ལུགས་འཇུག་པ་ལ། །མེད་དུ་མི་རུང་རིགས་ལམ་ཕྲ་ཞིབ་ཀྱི། །གན་མཛོད་ཚད་མའི་རིགས་པའི་སྒོ་བརྒྱ་དབྱེ། །བློ་གསལ་དོན་གཉེར་ཡིད་ཀྱི་རྒྱན་འདི་ལོངས། དེ་ལ་འདིར་བདག་ཅག་གི་རྙེད་པར་དཀའ་ཞིང་དོན་ཆེ་བའི་དལ་བའི་རྟེན་བཟང་རྙེད། འཕྲད་པར་དཀའ་བའི་རྒྱལ་བསྟན་རིན་པོ་ཆེ་དང་མཇལ། དམ་ཆོས་ལེགས་བཤད་ཚུལ་བཞིན་དུ་སྟོན་པའི་དགེ་བའི་བཤེས་གཉེན་གྱི་ཐུགས་བརྩེ་བས་རྗེས་སུ་བཟུང་བའི་སྐལ་བཟང་གི་དུས་འདིར་ཚེ་འདི་ཙམ་ལ་ཞེན་པ་མ་ཡིན་པར་རྣམ་གྲོལ་གྱི་ལམ་བཟང་ལ་ཞུགས་དགོས། དེ་ཡང་རྒྱལ་བསྟན་ལ་ཚུལ་བཞིན་དུ་ཞུགས་པར་རག་ལས་ཤིང༌། དེར་ཞུགས་པ་ནི། རྗེ་ཏཱ་ར་ནཱ་ཐའི་ཞལ་སྔ་ནས། ཇི་ལྟར་འཇུག་ཚུལ་ཇི་ཞེ་ན། །ཚད་མའི་ལུང་གི་རྗེས་འབྲང་ཞིང༌། །རིགས་པའི་ཡན་ལག་ཚང་བའི་འཇུག །ཅེས་གསུངས་པ་ལྟར་ཚད་མ་སྡེ་བདུན་མདོ་དང་བཅས་པ་ལ་སོགས་པའི་རིགས་པའི་བསྟན་བཅོས་དྲི་མ་མེད་པ་ལ་བརྟེན་ནས་བསྟན་པ་དང་སྟོན་པ་སྐྱོན་མེད་དུ་རྟོགས་ནས་འཇུག་དགོས་སོ། །དེ་ལྟར་འཇུག་པ་ལ་གཞུང་ལུགས་ཆེན་པོ་རྣམས་ཀྱི་ཚིག་དོན་ཐོས་བསམ་གྱིས་ལེགས་པར་གཏན་ལ་ཕབ་ནས་ཚད་མའི་ངེས་པ་རྙེད་པ་ཞིག་དགོས་ལ། དེ་ཡང་རིགས་པ་ཡང་དག་ལ་བརྟེན་དགོས། དེས་ན་ཐོག་མར་དྲི་མ་མེད་པའི་རིགས་ལམ་ཕྲ་ཞིབ་བདེ་བླག་ཏུ་འབྱེད་པ་ལ་ཚད་མའམ་བསྡུས་གྲྭའི་རིགས་པ་འདི་ཉིད་ལ་མཁས་གྲུབ་བྱེ་བས་བསྔགས་བརྗོད་ཀྱི་སྒྲ་དབྱངས་སྲིད་འདིར་འབར། འོན་ཀྱང་རིགས་ལམ་ཕྲ་ཞིབ་མི་ཤེས་པ་རྣམས་ཀྱིས་རང་གི་མི་ཤེས་པ་རྒྱུ་མཚན་བྱས་ནས་སྣ་ཚོགས་སྨྲ་མོད། དེ་ནི་རིགས་པའི་དབང་ཕྱུག་གིས། ཇི་སྐད་དུ། ལོག་པའི་ལམ་ལ་མཐའ་མེད་ཕྱིར། །དེ་དག་འདིར་ནི་སྤྲོ་བྱ་མིན། །ཞེས་པ་ལྟར་ཡིན་པས་མ་སྤྲོས་སོ། ། བསྡུས་གྲྭའི་རིགས་ལམ་འདི་ཉིད་བོད་གངས་ཅན་གྱི་ལྗོངས་འདིར་རིགས་པ་སྨྲ་བའི་དབང་ཕྱུག་ཆ་བ་ཆོས་ཀྱི་སེང་གེས་དབུ་མ་དང༌། བྱམས་ཆོས། མཛོད་སོགས་གཞུང་ཆེན་རྣམས་ཀྱི་ལེགས་བཤད་རྣམས་ཕྱོགས་གཅིག་ཏུ་བསྡུས་པའི་བསྡུས་གཞུང་མཛད་པར་གྲགས། དེ་ནས་མཁས་གྲུབ་རིམ་བྱོན་གྱི་སྐྱེས་བུ་དམ་པ་རྣམས་ཀྱིས་བསྡུས་གྲྭའི་རིགས་ལམ་ཕྲ་ཞིང་འཛངས་པའི་གྲུ་གཟིངས་འདི་ཉིད་ལ་བརྟེན་ནས་གཞུང་ལུགས་ཀྱི་རྒྱ་མཚོར་ཞུགས་ཏེ་ཡིད་བཞིན་གྱི་ནོར་བུའི་གཞུང་དོན་རྙེད་པའི་ཐབས་མཆོག གསུང་རབ་དགོངས་འགྲེལ་དང་བཅས་པའི་དགོངས་དོན་རིགས་པ་དྲི་མ་མེད་པས་འབྱེད་པར་བྱེད་པའི་ལྡེ་མིག་ལྟ་བུ་ཡིན་ནོ། །སྔོན་བྱོན་གྱི་སྐྱེས་བུ་དམ་པ་རྣམས་ཀྱིས་བསྡུས་ཚན་མཛད་ཚུལ་མི་འདྲ་བ་དུ་མ་བྱུང་མོད། འདིར་བསྡུས་ཚན་ཉེར་བཞིར་བྱས་ནས་བཤད་པར་བྱ་ལ། བསྡུས་ཚན་དང་པོ་གཟུགས་ཀྱི་རྣམ་བཞག་བཤད་པ་ལ། དེ་ཡང་ཚད་མ་རྣམ་འགྲེལ་ལས། དཀར་པོ་ལ་སོགས་ས་སོགས་པ། །ཞེས་དང༌། ལ་ལ་ཆད་འགྱུར་དཀར་སོགས་བཞིན། །གཟུགས་སོགས་བཞིན་དུ་ངེས་མིན་ཏེ། །དེ་དག་འབྱུང་དང་འབྱེར་མེད་ཕྱིར། །ཞེས་ཁ་དོག་དང་གཟུགས་དང་འབྱུང་བ་སོགས་འཆད་པ་དང༌། མཛོད་ལས། གཟུགས་རྣམ་གཉིས་དང་རྣམ་ཉི་ཤུ། །སྒྲ་ནི་རྣམ་པ་བརྒྱད་ཡོད་དེ། །རོ་ནི་རྣམ་དྲུག་དྲི་རྣམ་བཞི། །རེག་བྱ་བཅུ་གཅིག་བདག་ཉིད་དོ། །ཞེས་པའི་གཞུང་འདི་བྱུང༌། དེ་ཡང་ཐོག་མར་ཆོས་ཀྱི་དུང་འབུད་པ་དང༌། ཆོས་དུང་དེ་བཀྲ་ཤིས་པའི་རྫས་ཡིན་པས་བཀྲ་ཤིས་པའི་རྟེན་འབྲེལ་བསྒྲིགས་པ་དང༌། བློ་གསར་བ་དག་ཀློག་སློབ་པའི་ཐོག་མར་ཀ་ཁ་སོགས་སློབ་པ་བཞིན་ཁ་དོག་གི་དབྱེ་བ་ནས་བཟུང་རིམ་གྱི་འཆད་ན་འཆད་པ་པོས་བརྡ་སྤྲོད་སླ་ཞིང། ཉན་པ་པོ་རྣམས་ཀྱི་བློ་ལ་འཆར་སླ་ཞིང༌། བདག་ཅག་གི་སྟོན་པ་ཐུགས་རྗེ་ཅན་གྱིས་ཐོག་མར་བློ་གསལ་བ་རྣམས་ལ་བདེན་བཞིའི་ཆོས་འཁོར་སྐོར། དེ་ཡང་དང་པོ་ཕུང་པོ་ལྔའི་ནང་ནས་གཟུགས་ཕུང་བརྩམས་གཞིར་བཟུང་ནས་གསུངས་པ་དེའི་དབང་དུ་བྱས་ཏེ་འཆད་པར་བྱའོ། ། དེ་ལ་དགག་བཞག་སྤོང་གསུམ་ལས། དང་པོ་ནི། ཁ་ཅིག་ན་རེ། ཁ་དོག་ཡིན་ན་དམར་པོ་ཡིན་པས་ཁྱབ་ཟེར་ན། ཆོས་དུང་དཀར་པོའི་ཁ་དོག་ཆོས་ཅན། དམར་པོ་ཡིན་པར་ཐལ། ཁ་དོག་ཡིན་པའི་ཕྱིར། ཁྱབ་པ་ཁས། མ་གྲུབ་ན། ཆོས་དུང་དཀར་པོའི་ཁ་དོག་ཆོས་ཅན། ཁ་དོག་ཡིན་པར་ཐལ། དཀར་པོ་ཡིན་པའི་ཕྱིར། མ་གྲུབ་ན། དེ་ཆོས་ཅན། དཀར་པོ་ཡིན་པར་ཐལ། ཆོས་དུང་དཀར་པོའི་ཁ་དོག་ཡིན་པའི་ཕྱིར། མ་གྲུབ་ན། ཆོས་དུང་དཀར་པོའི་ཁ་དོག་ཆོས་དུང་དཀར་པོའི་ཁ་དོག་ཡིན་པར་ཐལ། ཆོས་དུང་དཀར་པོའི་ཁ་དོག་ཡོད་པའི་ཕྱིར། མ་གྲུབ་ན། དེ་ཡོད་པར་ཐལ། ཆོས་དུང་ཡོད་པའི་ཕྱིར། མ་གྲུབ་ན། དེ་ཡོད་པར་ཐལ། འཕགས་པ་རྔ་བོ་ཆེའི་མདོ་ལས། ཆོས་ཆེན་པོའི་དུང་འབུད་པར་འགྱུར། ཆོས་ཀྱི་རྒྱལ་མཚན་འཛུག་པར་འགྱུར་རོ། །ཞེས་གསུངས་སོ། །རྩ་བར་འདོད་ན། ཆོས་དུང་དཀར་པོའི་ཁ་དོག་ཆོས་ཅན། དམར་པོ་མ་ཡིན་པར་ཐལ། དཀར་པོ་ཡིན་པའི་ཕྱིར། མ་ཁྱབ་ན་ཁྱབ་པ་ཡོད་པར་ཐལ། དཀར་པོ་དང་དམར་པོ་གཉིས་འགལ་བ་ཡིན་པའི་ཕྱིར། མ་གྲུབ་ན། དཀར་པོ་དང་དམར་པོ་གཉིས་འགལ་བ་ཡིན་པར་ཐལ། དེ་གཉིས་ཐ་དད་ཅིང་གཞི་མཐུན་མི་སྲིད་པ་ཡིན་པའི་ཕྱིར་རོ། །ཡང་ཁ་ཅིག་ན་རེ། ཁ་དོག་ཡིན་ན་དཀར་པོ་ཡིན་པས་ཁྱབ་ཟེར་ན། སངས་རྒྱས་ཚེ་དཔག་མེད་ཀྱི་ཁ་དོག་ཆོས་ཅན། དཀར་པོ་ཡིན་པར་ཐལ། ཁ་དོག་ཡིན་པའི་ཕྱིར། ཁྱབ་པ་ཁས། མ་གྲུབ་ན། སངས་རྒྱས་ཚེ་དཔག་མེད་ཀྱི་ཁ་དོག་ཆོས་ཅན། ཁ་དོག་ཡིན་པར་ཐལ། དམར་པོ་ཡིན་པའི་ཕྱིར། མ་གྲུབ་ན། སངས་རྒྱས་ཚེ་དཔག་མེད་ཀྱི་ཁ་དོག་ཆོས་ཅན། དམར་པོ་ཡིན་པར་ཐལ། སངས་རྒྱས་ཚེ་དཔག་མེད་ཀྱི་ཁ་དོག་དང་གཅིག་ཡིན་པའི་ཕྱིར། རྩ་བར་འདོད་ན།སངས་རྒྱས་ཚེ་དཔག་མེད་ཀྱི་ཁ་དོག་ཆོས་ཅན། དཀར་པོ་མ་ཡིན་པར་ཐལ། དམར་པོ་ཡིན་པའི་ཕྱིར། མ་ཁྱབ་ན་ཁྱབ་པ་ཡོད་པར་ཐལ། དཀར་དམར་གཉིས་ཀྱི་གཞི་མཐུན་མེད་པའི་ཕྱིར། ཡང་ཁ་ཅིག་ན་རེ། རྩ་བའི་ཁ་དོག་ཡིན་ན་ རྩ་བའི་ཁ་དོག་བཞི་བོ་གང་རུང་ཡིན་པས་ཁྱབ་ཟེར་ན། སངས་རྒྱས་ཀྱི་དབུ་སྐྲ་བུང་བ་ལྟར་གནག་གི་ཁ་དོག་ཆོས་ཅན། རྩ་བའི་ཁ་དོག་བཞི་བོ་གང་རུང་ཡིན་པར་ཐལ། རྩ་བའི་ཁ་དོག་ཡིན་པའི་ཕྱིར། ཁྱབ་པ་ཁས། མ་གྲུབ་ན། དེ་ཆོས་ཅན། རྩ་བའི་ཁ་དོག་ཡིན་པར་ཐལ། སངས་རྒྱས་ཀྱི་དབུ་སྐྲ་བུང་བ་ལྟར་གནག་གི་ཁ་དོག་དང་གཅིག་ཡིན་པའི་ཕྱིར། རྩ་བར་འདོད་ན། སངས་རྒྱས་ཀྱི་དབུ་སྐྲ་བུང་བ་ལྟར་གནག་གི་ཁ་དོག་ཆོས་ཅན། རྩ་བའི་ཁ་དོག་བཞི་བོ་གང་རུང་མ་ཡིན་པར་ཐལ། སྔོན་པོ་མ་ཡིན་པ་གང་ཞིག སེར་པོ་ཡང་མ་ཡིན། དཀར་པོ་ཡང་མ་ཡིན། དམར་པོ་ཡང་མ་ཡིན་པའི་ཕྱིར། རྟགས་དང་པོ་མ་གྲུབ་ན། སངས་རྒྱས་ཀྱི་དབུ་སྐྲ་བུང་བ་ལྟར་གནག་གི་ཁ་དོག་ཆོས་ཅན། སྔོན་པོ་མ་ཡིན་པར་ཐལ། ནག་པོ་ཡིན་པའི་ཕྱིར། མ་ཁྱབ་ན་ཁྱབ་པ་ཡོད་པར་ཐལ། སྔོན་པོ་དང་ནག་པོ་གཉིས་ཀྱི་གཞི་མཐུན་མེད་པའི་ཕྱིར། རྟགས་ཕྱི་མ་གསུམ་ལ་རིགས་འདྲ། ཡན་ལག་གི་ཁ་དོག་ཡིན་ན་ཡན་ལག་གི་ཁ་དོག་བརྒྱད་པོ་གང་རུང་ཡིན་པས་ཁྱབ་ཟེར་ན། འཇམ་དབྱངས་དམར་སེར་གྱི་ཁ་དོག་ཆོས་ཅན། ཡན་ལག་གི་ཁ་དོག་བརྒྱད་པོ་གང་རུང་ཡིན་པར་ཐལ། ཡན་ལག་གི་ཁ་དོག་ཡིན་པའི་ཕྱིར། ཁྱབ་པ་ཁས། མ་གྲུབ་ན། དེ་ཆོས་ཅན། དེར་ཐལ། དམར་སེར་ཡིན་པའི་ཕྱིར། རྩ་བར་འདོད་ན། དེ་ཆོས་ཅན། ཡན་ལག་གི་ཁ་དོག་བརྒྱད་པོ་གང་རུང་མ་ཡིན་པར་ཐལ། སྤྲིན་དང་དུ་བ་རྡུལ་དང་ཁུག་སྣ་བཞི་བོ་གང་རུང་མ་ཡིན་པ་གང་ཞིག སྣང་བ་དང་མུན་པ་གྲིབ་མ་དང་ཉི་མའི་འོད་ཟེར་བཞི་བོ་གང་རུང་མ་ཡིན་པའི་ཕྱིར། རྟགས་རེ་རེ་ནས་གྲུབ་སྟེ། འཇམ་དབྱངས་དམར་སེར་གྱི་ཁ་དོག་དང་གཅིག་ཡིན་པའི་ཕྱིར། ཁ་ཅིག་ན་རེ། གཟུགས་ཡིན་ན་གཟུགས་ཀྱི་སྐྱེ་མཆེད་ཡིན་པས་ཁྱབ་ཟེར་ན། དབང་པོ་གཟུགས་ཅན་པ་རྣམས་ཆོས་ཅན། དེར་ཐལ། དེའི་ཕྱིར། ཁྱབ་པ་ཁས། མ་གྲུབ་ན། དེ་ཆོས་ཅན། གཟུགས་ཡིན་པར་ཐལ། ཐོགས་བཅས་ཀྱི་གཟུགས་ཡིན་པའི་ཕྱིར། མ་གྲུབ་ན། དབང་པོ་གཟུགས་ཅན་པ་རྣམས་ཐོགས་བཅས་ཀྱི་གཟུགས་ཡིན་པར་ཐལ། མཛོད་རྩ་བར། ཐོགས་དང་བཅས་པ་གཟུགས་ཅན་བཅུ། །ཞེས་གསུངས་སོ། །གཞན་ཡང་སྒྲ་ཆོས་ཅན། གཟུགས་ཀྱི་སྐྱེ་མཆེད་ཡིན་པར་ཐལ། གཟུགས་ཡིན་པའི་ཕྱིར། ཁྱབ་པ་ཁས། མ་གྲུབ་ན། དེ་ཆོས་ཅན། གཟུགས་ཡིན་པར་ཐལ། གཟུགས་རུང་ཡིན་པའི་ཕྱིར། མ་ཁྱབ་ན་ཁྱབ་པ་ཡོད་པར་ཐལ། གཟུགས་རུང་གཟུགས་ཀྱི་མཚན་ཉིད་ཡིན་པའི་ཕྱིར། རྩ་བར་འདོད་ན། སྒྲ་ཆོས་ཅན། གཟུགས་ཀྱི་སྐྱེ་མཆེད་མ་ཡིན་པར་ཐལ། མིག་ཤེས་ཀྱི་གཟུང་བྱ་མ་ཡིན་པའི་ཕྱིར། མ་གྲུབ་ན། སྒྲ་ཆོས་ཅན། མིག་ཤེས་ཀྱི་གཟུང་བྱ་མ་ཡིན་པར་ཐལ། རྣ་ཤེས་ཀྱི་གཟུང་བྱ་ཡིན་པའི་ཕྱིར། མ་གྲུབ་ན། སྒྲ་ཆོས་ཅན། རྣ་ཤེས་ཀྱི་གཟུང་བྱ་ཡིན་པར་ཐལ། སྒྲའི་སྐྱེ་མཆེད་ཡིན་པའི་ཕྱིར་རོ། ། ཡང་ཁ་ཅིག་ན་རེ། དོན་དམ་པའི་གཟུགས་ཡིན་ན་གཟུགས་ཡིན་པས་ཁྱབ་ཟེར་ན། རྣམ་ཀུན་མཆོག་ལྡན་གྱི་གཟུགས་ཕུང་ཆོས་ཅན། གཟུགས་ཡིན་པར་ཐལ།དོན་དམ་པའི་གཟུགས་ཡིན་པའི་ཕྱིར། ཁྱབ་པ་ཁས། མ་གྲུབ་ན། དེ་ཆོས་ཅན། དོན་དམ་པའི་གཟུགས་ཡིན་པར་ཐལ། གཟུགས་ཀྱི་གནས་ལུགས་མཐར་ཐུག་ཡིན་པའི་ཕྱིར། རྩ་བར་འདོད་ན། རྣམ་ཀུན་མཆོག་ལྡན་གྱི་གཟུགས་ཕུང་ཆོས་ཅན། གཟུགས་ཕུང་མ་ཡིན་པར་ཐལ། སྔོན་མེད་ལེགས་བཤད་ལས། འདི་ནི་དངོས་གནས་ལ་ཕུང་ཁམས་སྐྱེ་མཆེད་གང་ཡང་མ་ཡིན་ལ། རྟེན་འབྲེལ་ལས་གྲོལ་བའོ། །ཞེས་གསུངས་སོ། ། གཉིས་པ་རང་ལུགས་བཤད་པ།གཉིས་པ་རང་ལུགས་བཤད་པ་ལ། གཟུགས་ཀྱི་མཚན་ཉིད་ཡོད་དེ། གཟུགས་རུང་དེ་ཡིན་པའི་ཕྱིར། གཟུགས་དང་རྡུལ་གྲུབ་ཀྱི་བེམ་པོ་གཉིས་དོན་གཅིགསྤྱིར་གཞི་གྲུབ་ན་བེམ་ཤེས་གང་རུང་ཡིན་པས་ཁྱབ་པོ། །འཆད་འགྱུར་གྱི་སྐབས་དུ་མར་མངོན་ཚད་ཀྱི་ཆོས་སྐད་ཀྱི་དབང་དུ་བྱས་ནས་བཤད་ཡོད་པ་ཤེས་པར་བྱའོ། །གཟུགས་ལ་དབྱེ་ན་གཉིས་ཡོད་དེ། ཕྱིའི་གཟུགས་དང་ནང་གི་གཟུགས་གཉིས་ཡོད་པའི་ཕྱིར། ཕྱིའི་གཟུགས་ཀྱི་མཚན་ཉིད་ཡོད་དེ། སྐྱེས་བུའི་ཤེས་རྒྱུད་ཀྱིས་མ་བསྡུས་པའི་གཟུགས་དེ་ཡིན་པའི་ཕྱིར། ཕྱིའི་གཟུགས་ལ་དབྱེ་ན་ལྔ་ཡོད་དེ། གཟུགས་ཀྱི་སྐྱེ་མཆེད་དང༌། སྒྲའི་སྐྱེ་མཆེད་དང༌། དྲིའི་སྐྱེ་མཆེད་དང༌། རོའི་སྐྱེ་མཆེད་དང༌། རེག་བྱའི་སྐྱེ་མཆེད་དང་ལྔ་ཡོད་པའི་ཕྱིར། གཟུགས་ཀྱི་སྐྱེ་མཆེད་ཀྱི་མཚན་ཉིད་ཡོད་དེ། མིག་ཤེས་ཀྱི་གཟུང་བྱ་དེ་ཡིན་པའི་ཕྱིར། གཟུགས་ཀྱི་སྐྱེ་མཆེད་ལ་དབྱེ་ན་གཉིས་ཡོད་དེ། དབྱིབས་དང་ཁ་དོག་གཉིས་ཡོད་པའི་ཕྱིར། དབྱིབས་ཀྱི་མཚན་ཉིད་ཡོད་དེ། དབྱིབས་སུ་རུང་བ་དེ་ཡིན་པའི་ཕྱིར། དབྱེ་ན་བརྒྱད་ཡོད་དེ། རིང་བོ་དང་ཐུང་ངུ༌། མཐོ་བ་དང་དམའ་བ། ལྷམ་པ་དང་ཟླུམ་པོ། ཕྱ་ལེ་བ་དང་ཕྱ་ལེ་བ་མ་ཡིན་པ་དང་བརྒྱད་ཡོད་པའི་ཕྱིར། མཐོ་བ་ནི་རི་རབ་ཀྱི་དབྱིབས་ལྟ་བུའོ། །དམའ་བ་ནི་ས་གཞིའི་དབྱིབས་ལྟ་བུའོ། །ལྷམ་པ་བཞག་དུ་ཡོད་དེ། གྲུ་བཞི་ལྟ་བུའི་དབྱིབས་དེ་ཡིན་པའི་ཕྱིར། ཟླུམ་པོ་བཞག་དུ་ཡོད་དེ། གོར་གོར་རམ་སྒོ་ང་ལྟ་བུའི་དབྱིབས་དེ་ཡིན་པའི་ཕྱིར། ཕྱ་ལེ་བ་བཞག་དུ་ཡོད་དེ། ངོས་མཉམ་པའི་དབྱིབས་དེ་ཡིན་པའི་ཕྱིར། ཕྱ་ལེ་བ་མ་ཡིན་པ་བཞག་དུ་ཡོད་དེ། ངོས་མི་མཉམ་པའི་དབྱིབས་དེ་ཡིན་པའི་ཕྱིར།དབྱིབས་བརྒྱད་དུ་མ་འདུས་པའི་དབྱིབས་མེད་དོ། །ཁ་དོག་གི་མཚན་ཉིད་ཡོད་དེ། མདོག་དུ་རུང་བ་དེ་ཡིན་པའི་ཕྱིར། དབྱེ་ན་གཉིས་ཡོད་དེ། རྩ་བའི་ཁ་དོག་དང་ཡན་ལག་གི་ཁ་དོག་གཉིས་ཡོད་པའི་ཕྱིར། རྩ་བའི་ཁ་དོག་ལ་དབྱེ་ན་བཞི་ཡོད་དེ། སྔོན་པོ་དང་སེར་པོ། དཀར་པོ་དང་དམར་པོ་བཞི་ཡོད་པའི་ཕྱིར། ཡན་ལག་གི་ཁ་དོག་ལ་དབྱེ་ན་བརྒྱད་ཡོད་དེ། སྤྲིན་དང་དུ་བ། རྡུལ་དང་ཁུག་སྣ། སྣང་བ་དང་མུན་པ། གྲིབ་མ་དང་ཉི་མའི་འོད་ཟེར་བརྒྱད་ཡོད་པའི་ཕྱིར། རྡུལ་ནི་རྡུལ་སྤྱི་མ་ཡིན་པར་རླུང་ཚུབ་ཀྱི་རྡུལ་ལྟ་བུའོ། །ཁུག་སྣ་ནི། ལྷོ་འུར་མའམ་ཐལ་ཆར་ལྟ་བུའོ། །གྲིབ་མ་ནི། རང་འགྲེལ་ལས། གྲིབ་མ་ནི་གང་ན་གཟུགས་རྣམས་སྣང་བའོ། །ཞེས་སོ། །ཉི་མ་ནི། ཉི་འོད་དོ། །སྣང་བ་ནི། ཟླ་བ་དང་སྐར་མ་དང་ནོར་བུའི་འོད་ལྟ་བུའོ། །མུན་པ་ནི་གཟུགས་མི་སྣང་བར་བྱེད་པ་ཁ་དོག་ནག་པོ་དཔེར་ན་མཚན་མོའི་མུན་པ་ལྟ་བུའོ། །དེ་བཅུ་གཉིས་སུ་མ་འདུས་པའི་ཁ་དོག་དུ་མ་ཡོད་དེ། ནག་པོ་དང༌། ལྗང་ཁུ་དང༌། དུར་ཁ་དང༌། སྐྱ་བོ་སོགས་དུ་མ་ཡོད་དོ། ། གཟུགས་ཀྱི་སྐྱེ་མཆེད་ལ་དབྱེ་བ་འཇོག་ཚུལ་དེ་ལྟར་འཐད་དེ། མཛོད་ལས། གཟུགས་རྣམ་གཉིས་དང་རྣམ་ཉི་ཤུ། །ཞེས་དང༌། རྣམ་གྲངས་མདོ་སློབ་ལས། སྔོ་སེར་དཀར་དམར་རིང་ཐུང་དང༌། །ལྷམ་པ་ཟླུམ་པོ་མཐོ་དམའ་དང༌། །ཕྱ་ལེ་ཕྱ་ལེ་མ་ཡིན་དང༌། །སྤྲིན་དང་དུ་བ་རྡུལ་སྣ་དང༌། །གྲིབ་མ་ཉི་མ་སྣང་མུན་ནོ། །ཞེས་གསུངས་སོ། །མངོན་པ་ཀུན་བཏུས་ལྟར་ན། གཟུགས་ཀྱི་སྐྱེ་མཆེད་ལ་དབྱེ་བ་ཉི་ཤུ་རྩ་ལྔ་ཡོད་དེ། དེ་ཉིད་ལས། འདི་ལྟ་སྟེ། སྔོན་པོ་དང་སེར་པོ་དང་དམར་པོ་དང་དཀར་པོ་དང་རིང་པོ་དང་ཐུང་ངུ་དང་ལྷམ་པ་དང་ཟླུམ་པོ་དང་རྡུལ་ཕྲ་མོ་དང་རགས་པ་དང་ཕྱ་ལེ་བ་དང་ཕྱེ་ལེ་བ་མ་ཡིན་པ་དང་མཐོན་པོ་དང་དམའ་བ་དང་གྲིབ་མ་དང་ཉི་མ་དང་སྣང་བ་དང་མུན་པ་དང༌། སྤྲིན་དང་དུ་བ་དང་རྡུལ་དང་ཁུག་སྣ་དང་མངོན་པར་སྐབས་ཡོད་པ་དང༌། རྣམ་པར་རིག་བྱེད་དང་ནམ་མཁའ་ཁ་དོག་གཅིག་པའོ། །ཞེས་གསུངས་སོ། །ཁ་དོག་དང་དབྱིབས་གཉིས་ལ་ཡིན་མིན་གྱི་མུ་བཞི་ཡོད་དེ། མུ་དང་པོ་ནི། མཛོད་རང་འགྲེལ་ལས། གཟུགས་ཀྱི་སྐྱེ་མཆེད་དང་ཁ་དོག་ཏུ་ཡོད་ལ། དབྱིབས་སུ་མེད་པ་ཡང་ཡོད་དེ། སྔོན་པོ་དང་སེར་པོ་དང་དམར་པོ་དང་དཀར་པོ་དང་གྲིབ་མ་དང་ཉི་མ་དང་སྣང་བ་དང་མུན་པ་ཞེས་བྱའོ། །ཞེས་གསུངས་སོ། །མུ་གཉིས་པ་ནི། རང་འགྲེལ་ལས། དབྱིབས་སུ་ཡོད་ལ་ཁ་དོག་མེད་པ་ཡང་ཡོད་དེ། རིང་པོ་ལ་སོགས་པའི་ཕྱོགས་ལུས་ཀྱི་རྣམ་པ་རིག་བྱེད་ཀྱི་ངོ་བོ་ཉིད་དོ། །ཞེས་གསུངས་སོ། མུ་གསུམ་པ་ཡོད་དེ། རང་འགྲེལ་ལས། གཉིས་ཀར་ཡོད་པ་ཡང་ཡོད་དེ། གཟུགས་ཀྱི་སྐྱེ་མཆེད་ལྷག་མའོ། །ཞེས་དང༌། རྒྱལ་སྲས་མ་ལས། གཟུགས་ཀྱི་སྐྱེ་མཆེད་ལྷག་མའོ་ཞེས་བྱ་བ་ནི་རིང་པོ་ལ་སོགས་པ་བསལ་བ་གང་ཡིན་པ་དང་སྤྲིན་དང་དུ་བ་དང་རྡུལ་དང་ཁུག་སྣ་དག་གོ །ཞེས་གསུངས་པའི་ཕྱིར་རོ། །མུ་བཞི་བ་ནི། འབྱུང་བཞི་ལྟ་བུའོ། །གཟུགས་ཀྱི་སྐྱེ་མཆེད་དང༌། གཟུགས་ཀྱི་ཁམས་དང༌། བསྟན་ཡོད་ཀྱི་གཟུགས་གསུམ་དོན་གཅིག དབྱིབས་དང་ཁ་དོག་གཉིས་ལ་བསྟན་ཡོད་ཀྱི་གཟུགས་ཞེས་བརྗོད་པའི་རྒྱུ་མཚན་ཡོད་དེ། མིག་གི་ཡུལ་དུ་བསྟན་དུ་ཡོད་པས་ན་དེ་ལྟར་བརྗོད་པའི་ཕྱིར། མཛོད་རྩ་ལས། བསྟན་ཡོད་འདིར་ནི་གཟུགས་གཅིག་པུ། །ཞེས་སོ། །སྒྲའི་སྐྱེ་མཆེད་ཀྱི་མཚན་ཉིད་ཡོད་དེ། རྣ་ཤེས་ཀྱི་གཟུང་བྱ་དེ་ཡིན་པའི་ཕྱིར། དེ་ལ་རྩ་བའི་སྒོ་ནས་དབྱེ་ན་གཉིས་ཡོད་དེ། ཟིན་པའི་འབྱུང་བ་ལས་གྱུར་བའི་སྒྲ་དང་མ་ཟིན་པའི་འབྱུང་བ་ལས་གྱུར་བའི་སྒྲ་གཉིས་ཡོད་པའི་ཕྱིར། དང་པོ་ཡོད་དེ། སྐྱེས་བུས་ཐལ་མོ་བརྡབ་པའི་སྒྲ་ལྟ་བུའོ། །གཉིས་པ་ཡོད་དེ། ཆུ་སྒྲ་ལྟ་བུའོ། །ཡན་ལག་གི་སྒོས་དབྱེ་ན་བཞི་ཡོད་དེ། དེ་རེ་རེ་ལ་སེམས་ཅན་དུ་སྟོན་མི་སྟོན་གཉིས་ཏེ་བཞི་ཡོད་པའི་ཕྱིར། སེམས་ཅན་དུ་སྟོན་པའི་སྒྲ་དང་རྗོད་བྱེད་ཀྱི་སྒྲ་གཉིས་དོན་གཅིག མཚན་གཞི་ནི་ཡོད་དེ། བདེ་གཤེགས་སྙིང་པོ་ཞེས་བརྗོད་པའི་སྒྲ་ལྟ་བུའོ། །སེམས་ཅན་དུ་མི་སྟོན་པའི་སྒྲ་དང་རྗོད་བྱེད་ཀྱི་སྒྲ་མ་ཡིན་པའི་སྒྲ་གཉིས་དོན་གཅིག མཚན་གཞི་ནི། རྔ་སྒྲ་དང་དུང་སྒྲ་ལྟ་བུའོ། །ཉིང་ལག་གི་སྒོ་ནས་བརྒྱད་ཡོད་དེ། སྔ་མ་བཞི་པོ་རེ་རེ་ལ་སྙན་མི་སྙན་གཉིས་རེ་ཡོད་པའི་ཕྱིར་རོ། །སྙན་པའི་སྒྲ་ནི། སྐྱེས་བུས་ཆོས་འཆད་པའི་སྒྲ་ལྟ་བུའོ། །མི་སྙན་པའི་སྒྲ་ནི་སྐྱེས་བུའི་ཚིག་རྩུབ་སྨྲ་བའི་སྒྲ་ལྟ་བུའོ། །སྒྲའི་སྐྱེ་མཆེད་ལ་དབྱེ་བ་འཇོག་ཚུལ་དེ་ལྟར་འཐད་དེ། མཛོད་རྩ་ལས། སྒྲ་ནི་རྣམ་པ་བརྒྱད་ཡོད་དེ། །ཞེས་དང༌། རྣམ་གྲངས་མདོ་སློབ་ལས། ཟིན་དང་མ་ཟིན་དེ་གཉིས་ལ། །སྟོན་དང་མི་སྟོན་གཉིས་གཉིས་བཞི། །དེ་ཡང་སྙན་དང་མི་སྙན་བརྒྱད། །ཅེས་གསུངས་སོ། ། རྗོད་བྱེད་ཀྱི་སྒྲའི་དབྱེ་བ་མིང་ཚིག་སོགས་འཆད་པར་འགྱུར་རོ། །དྲིའི་སྐྱེ་མཆེད་ཀྱི་མཚན་ཉིད་ཡོད་དེ། སྣ་ཤེས་ཀྱི་མྱོང་བྱ་དེ་ཡིན་པའི་ཕྱིར། དེ་ལ་རྩ་བའི་དབྱེ་བ་གཉིས་ཡོད་དེ། དྲི་ཞིམ་པ་དང་མི་ཞིམ་པ་གཉིས་ཡོད་པའི་ཕྱིར། ཡན་ལག་གི་དབྱེ་ན་དེ་རེ་རེ་ལ་མཉམ་མི་མཉམ་གཉིས་ཏེ་བཞི་ཡོད་པའི་ཕྱིར། ཡང་ན་དྲི་ཞིམ་མི་ཞིམ་རེ་རེ་ལ་ལྷན་སྐྱེས་དང་སྦྱར་བྱུང་གི་དྲི་གཉིས་རེ་སྟེ་བཞི་ཡོད་པའི་ཕྱིར། །ཞིམ་པའི་ལྷན་སྐྱེས་ཀྱི་དྲི་བཞག་ཏུ་ཡོད་དེ། ཙནྡན་གྱི་དྲི་ལྟ་བུའོ། །མི་ཞིམ་པའི་ལྷན་སྐྱེས་ཀྱི་དྲི་བཞག་དུ་ཡོད་དེ། མུ་ཟིའི་དྲི་ལྟ་བུའོ། །ཞིམ་པའི་སྦྱར་བྱུང་གི་དྲི་བཞག་དུ་ཡོད་དེ། སྦྱར་སྤོས་ཀྱི་དྲི་ལྟ་བུའོ། །མཛོད་ལས། དྲི་རྣམ་བཞི། །ཞེས་དང༌། རྣམ་གྲངས་མདོ་སློབ་ལས། དྲི་ཞིམ་མི་ཞིམ་མཉམ་མི་མཉམ། །ཡང་ན་ལྷན་སྐྱེས་སྦྱར་བྱུང་བཞི། །ཞེས་གསུངས་སོ། །རོའི་སྐྱེ་མཆེད་ཀྱི་མཚན་ཉིད་ཡོད་དེ། ལྕེ་ཤེས་ཀྱི་མྱོང་བྱ་དེ་ཡིན་པའི་ཕྱིར། རོ་ལ་དབྱེ་ན་དྲུག་ཡོད་དེ། མངར་བ་དང་སྐྱུར་བ། ཁ་བ་དང་བསྐ་བ། ཚྭ་བ་དང་ལན་ཚྭ་བ་དང་དྲུག་ཡོད་པའི་ཕྱིར། བུ་རམ་གྱི་རོ་དང༌། འོ་མའི་རོ་ལྟ་བུ་མངར་བ་དང༌། སྟར་བུ་ལྟ་བུུ་སྐྱུར་བ་དང༌། ཏིག་ཏ་ལྟ་བུ་ཁ་བ་དང༌། ཨ་རུ་རའི་རོ་ལྟ་བུ་བསྐ་བ་དང༌། པི་པི་ལང་ལྟ་བུ་ཚ་བ་དང༌། ཚྭ་ལྟ་བུ་ལན་ཚྭ་བའོ། །རོ་ལ་དབྱེ་བ་འཇོག་ཚུལ་དེ་ལྟར་འཐད་དེ། མཛོད་ལས། རོ་ནི་རྣམ་དྲུག །ཅེས་དང༌། རྣམ་གྲངས་མདོ་སློབ་ལས། མངར་སྐྱུར་ལན་ཚྭ་ཁ་ཚ་བསྐ །རོ་དྲུག ཅེས་གསུངས་སོ། །རེག་བྱའི་སྐྱེ་མཆེད་ཀྱི་མཚན་ཉིད་ཡོད་དེ། ལུས་ཤེས་ཀྱི་མྱོང་བྱ་དེ་ཡིན་པའི་ཕྱིར། རེག་བྱ་ལ་དབྱེ་ན་གཉིས་ཡོད་དེ། འབྱུང་བར་གྱུར་བའི་རེག་བྱ་དང༌། །འབྱུང་འགྱུར་དུ་གྱུར་བའི་རེག་བྱ་གཉིས་ཡོད་པའི་ཕྱིར། འབྱུང་བར་གྱུར་བའི་རེག་བྱ་ལ་དབྱེ་ན་བཞི་ཡོད་དེ། ས་ཆུ་མེ་རླུང་བཞི་ཡོད་པའི་ཕྱིར། སའི་མཚན་ཉིད་ཡོད་དེ། སྲ་ཞིང་འཐས་པའི་འབྱུང་བ་དེ་ཡིན་པའི་ཕྱིར། ཆུའི་མཚན་ཉིད་ཡོད་དེ། རླན་ཞིང་གཤེར་བའི་འབྱུང་བ་དེ་ཡིན་པའི་ཕྱིར། མེའི་མཚན་ཉིད་ཡོད་དེ། ཚ་ཞིང་སྲེག་པའི་འབྱུང་བ་དེ་ཡིན་པའི་ཕྱིར། རླུང་གི་མཚན་ཉིད་ཡོད་དེ། ཡང་ཞིང་གཡོ་བའི་འབྱུང་བ་དེ་ཡིན་པའི་ཕྱིར། འབྱུང་བཞིའི་མཚན་ཉིད་འཇོག་ཚུལ་དེ་ལྟར་འཐད་དེ། རྒྱུད་བླའི་འགྲེལ་བ་ལེགས་བཤད་ཉི་མའི་འོད་ཟེར་ལས། སའི་མཚན་ཉིད་སྲ་བ་དང༌། ཆུའི་མཚན་ཉིད་གཤེར་བ་དང༌། མེའི་མཚན་ཉིད་དྲོ་བ་དང༌། རླུང་གི་མཚན་ཉིད་གཡོ་བ་གང་ཡིན་པ། ཞེས་གསུངས་སོ། །འབྱུང་འགྱུར་གྱི་རེག་བྱ་ལ་དབྱེ་ན་བདུན་ཡོད་དེ། འཇམ་པ་དང་རྩུབ་པ། ལྕི་བ་དང་ཡང་བ། གྲང་བ་དང་བཀྲེས་པ། སྐོམ་པ་དང་བདུན་པོ་དེ་ཡིན་པའི་ཕྱིར། དེ་ལྟར་རེག་བྱ་ལ་དབྱེ་ན་བཅུ་གཅིག་ཡོད་དེ། མཛོད་ལས། རེག་བྱ་བཅུ་གཅིག་བདག་ཉིད་དོ། །ཞེས་དང༌། རྣམ་གྲངས་མདོ་སློབ་ལས། འབྱུང་བཞི་འཇམ་རྩུབ་དང༌། ལྕི་ཡང་གྲང་བཀྲེས་སྐོམ་རེག་བྱ། །བཅུ་གཅིག་ཏུ་ནི་བརྗོད་པ་ཡིན། །ཞེས་གསུངས་སོ། །གཉིས་པ་ནང་གི་གཟུགས་ཀྱི་མཚན་ཉིད་ཡོད་དེ། སྐྱེས་བུའི་ཤེས་རྒྱུད་ཀྱིས་བསྡུས་པའི་གཟུགས་དེ་ཡིན་པའི་ཕྱིར། ནང་གི་གཟུགས་ལ་དབྱེ་ན་ལྔ་ཡོད་དེ། མིག་གི་དབང་པོ་དང༌། རྣ་བའི་དབང་པོ་དང༌། སྣའི་དབང་པོ་དང༌། ལྕེའི་དབང་པོ་དང༌། ལུས་ཀྱི་དབང་པོ་དང་ལྔ་ཡོད་པའི་ཕྱིར་རོ། །མིག་གི་དབང་པོའི་མཚན་ཉིད་ཡོད་དེ། རང་འབྲས་མིག་ཤེས་ཀྱི་ཐུན་མོང་མ་ཡིན་པའི་བདག་རྐྱེན་བྱེད་པའི་རིགས་སུ་གནས་པའི་ནང་གི་གཟུགས་ཅན་དྭངས་བ་དེ་ཡིན་པའི་ཕྱིར། མིག་གི་དབང་པོ་དང་མིག་གི་ཁམས་གཉིས་དོན་གཅིག དབྱེ་ན་རྟེན་བཅས་དེ་མཚུངས་གཉིས་རེ་ཡོད། རྟེན་བཅས་ཀྱི་མིག་དབང་བཞག་དུ་ཡོད་དེ། དཀར་པོ་འཛིན་བཞིན་པའི་མིག་དབང་ལྟ་བུའོ། །དེ་མཚུངས་ཀྱི་མིག་དབང་བཞག་དུ་ཡོད་དེ། གཉིད་ལོག་པའི་རྒྱུད་ཀྱི་མིག་དབང་ལྟ་བུའོ། །རྣ་བའི་དབང་པོའི་མཚན་ཉིད་ཡོད་དེ། རང་འབྲས་རྣ་ཤེས་ཀྱི་ཐུན་མོང་མ་ཡིན་པའི་བདག་རྐྱེན་བྱེད་པའི་རིགས་སུ་གནས་པའི་ནང་གི་གཟུགས་ཅན་དྭངས་བ་དེ་ཡིན་པའི་ཕྱིར། དབྱེ་ན་རྟེན་བཅས་དེ་མཚུངས་གཉིས། སྣའི་དབང་པོའི་མཚན་ཉིད་ཡོད་དེ། རང་འབྲས་སྣ་ཤེས་ཀྱི་ཐུན་མོང་མ་ཡིན་པའི་བདག་རྐྱེན་བྱེད་པའི་རིགས་སུ་གནས་པའི་ནང་གི་གཟུགས་ཅན་དྭངས་བ་དེ་ཡིན་པའི་ཕྱིར། དབྱེ་ན་རྟེན་བཅས་དེ་མཚུངས་གཉིས། ལྕེའི་དབང་པོའི་མཚན་ཉིད་ཡོད་དེ། རང་འབྲས་ལྕེ་ཤེས་ཀྱི་ཐུན་མོང་མ་ཡིན་པའི་བདག་རྐྱེན་བྱེད་པའི་རིགས་སུ་གནས་པའི་ནང་གི་གཟུགས་ཅན་དྭངས་བ་དེ་ཡིན་པའི་ཕྱིར། དབྱེ་ན་རྟེན་བཅས་དེ་མཚུངས་གཉིས། ལུས་ཀྱི་དབང་པོའི་མཚན་ཉིད་ཡོད་དེ། རང་འབྲས་ལུས་ཤེས་ཀྱི་ཐུན་མོང་མ་ཡིན་པའི་བདག་སྐྱེན་བྱེད་པའི་རིགས་སུ་གནས་པའི་ནང་གི་གཟུགས་ཅན་དྭངས་བ་དེ་ཡིན་པའི་ཕྱིར། དབྱེ་ན་རྟེན་བཅས་དེ་མཚུངས་གཉིས་ཡོད་པའི་ཕྱིར་རོ། །གཏན་ཚིགས་རིགས་པའི་བསྡུས་དོན་དུ་དབང་པོ་དེ་དག་གི་མཚན་ཉིད་ལ་རིགས་གནས་མ་སྦྱར་བས་དཔྱད་པར་བྱའོ། །དབང་པོ་ལྔའི་མཚན་ཉིད་འཇོག་ཚུལ་དེ་ལྟར་འཐད་དེ། མཛོད་ལས། དེ་དག་རྣམས་ཀྱི་རྣམ་ཤེས་རྟེན། །མིག་ལ་སོགས་གཟུགས་དང་བ་རྣམས། །ཞེས་གསུངས་སོ། ། གསུམ་པ་དེ་ལ་རྩོད་པ་སྤོང་བ།གསུམ་པ་དེ་ལ་རྩོད་པ་སྤོང་བ་ལ། ཁ་ཅིག་ན་རེ། དབྱིབས་དང་ཁ་དོག་གང་རུང་ཡིན་ན་མིག་ཤེས་ཀྱི་བཟུང་བྱ་ཡིན་པས་ཁྱབ་པར་ཐལ། དབྱིབས་དང་ཁ་དོག་གཉིས་མིག་ཤེས་ཀྱི་བཟུང་བྱ་ཡིན་པའི་ཕྱིར་ན་མ་ཁྱབ། འདོད་ན། རྡུལ་ཕྲ་རབ་ཀྱི་དབྱིབས་ཆོས་ཅན། མིག་ཤེས་ཀྱི་བཟུང་བྱ་ཡིན་པར་ཐལ། དབྱིབས་ཡིན་པའི་ཕྱིར། ཁྱབ་པ་ཁས། འདོད་མི་ནུས་ཏེ། རྡུལ་ཕྲ་རབ་ཀྱི་དབྱིབས་དབང་པོའི་སྤྱོད་ཡུལ་དུ་གྱུར་མི་ནུས་པའི་ཕྱིར། རྣམ་འགྲེལ་ལས། དབང་ཡུལ་དེ་ཕྱིར་རྡུལ་ཕྲན་མིན། །ཞེས་གསུངས་པའི་ཕྱིར། ཁ་ཅིག་ན་རེ། སྒྲ་ཆོས་ཅན། མིག་ཤེས་ཀྱི་བཟུང་བྱ་ཡིན་པར་ཐལ། འཛམ་བུ་གླིང་བའི་སྦྲུལ་ཉིད་དང་བ་ལང་སྤྱོད་ཀྱི་མི་རྣམས་ཀྱི་མིག་གིས་སྒྲ་འཛིན་ཅིང་ཐོས་པ་ཡིན་པའི་ཕྱིར་ན་མ་ཁྱབ། རྟགས་གྲུབ་སྟེ། མདོ་དྲན་པ་ཉེར་བཞག་ལས། འཛམ་བུ་གླིང་ན་སྦྲུལ་ཉིད་ཀྱིས་མིག་གིས་སྒྲ་ཐོས་པ་དེ་བཞིན་དུ་བ་ལང་སྤྱོད་ན་མིག་ཉིད་ཀྱིས་ཐོས་པའོ། །ཞེས་གསུངས་སོ། །ཁ་ཅིག་ན་རེ། རླུང་ཆོས་ཅན། འབྱུང་འགྱུར་ཡིན་པར་ཐལ།འབྱུང་འགྱུར་གྱི་རེག་བྱ་བདུན་པོ་གང་རུང་ཡིན་པའི་ཕྱིར། མ་གྲུབ་ན། འབྱུང་འགྱུར་གྱི་རེག་བྱ་བདུན་པོ་གང་རུང་ཡིན་པར་ཐལ། ཡང་བ་ཡིན་པའི་ཕྱིར་ན་མ་ཁྱབ། ཁྱབ་པར་ཐལ། ཡང་བ་དེ་འབྱུང་འགྱུར་གྱི་རེག་བྱ་བདུན་པོ་གང་རུང་ཡིན་པའི་ཕྱིར་ན་མ་ཁྱབ། རྩ་བར་འདོད་ན། རླུང་ཆོས་ཅན། འབྱུང་འགྱུར་མ་ཡིན་པར་ཐལ། འབྱུང་བ་ཡིན་པའི་ཕྱིར། མ་གྲུབ་ན། རླུང་ཆོས་ཅན། འབྱུང་བ་ཡིན་པར་ཐལ། འབྱུང་བ་བཞི་བོ་གང་རུང་ཡིན་པའི་ཕྱིར། མ་གྲུབ་ན། རླུང་ཆོས་ཅན། འབྱུང་བ་བཞི་བོ་གང་རུང་ཡིན་པར་ཐལ། རླུང་ཡིན་པའི་ཕྱིར། ཁ་ཅིག་ན་རེ། རྟ་དཀར་པོ་ཆོས་ཅན། ཁ་དོག་ཡིན་པར་ཐལ། རྩ་བའི་ཁ་དོག་བཞི་བོ་གང་རུང་ཡིན་པའི་ཕྱིར། མ་གྲུབ་ན། རྟ་དཀར་པོ་ཆོས་ཅན། རྩ་བའི་ཁ་དོག་བཞི་བོ་གང་རུང་ཡིན་པར་ཐལ། དཀར་པོ་ཡིན་པའི་ཕྱིར། མ་གྲུབ་ན། རྟ་དཀར་པོ་ཆོས་ཅན། དཀར་པོ་ཡིན་པར་ཐལ། ཁྱོད་རྟ་དཀར་པོ་ཡིན་པའི་ཕྱིར་ན་མ་ཁྱབ། རྩ་བར་འདོད་ན། རྟ་དཀར་པོ་ཆོས་ཅན། ཁ་དོག་མ་ཡིན་པར་ཐལ། གཟུགས་མ་ཡིན་པའི་ཕྱིར། མ་གྲུབ་ན། རྟ་དཀར་པོ་ཆོས་ཅན། གཟུགས་མ་ཡིན་པར་ཐལ། གང་ཟག་ཡིན་པའི་ཕྱིར། མ་གྲུབ་ན། རྟ་དཀར་པོ་ཆོས་ཅན། གང་ཟག་ཡིན་པར་ཐལ། ཕུང་པོ་ལྔའི་ཚོགས་པ་ལ་བཏགས་པའི་སྐྱེས་བུ་ཡིན་པའི་ཕྱིར། ཁྱབ་སྟེ། བཀའ་བཞི་བ་བསོད་ནམས་བཟང་པོའི་གཏན་ཚིགས་རིགས་པའི་དོན་བསྡུས་ལས། གང་ཟག་གི་མཚན་ཉིད། ཕུང་པོ་བཞིའམ་ལྔའི་རྒྱུན་དུ་གྱུར་བའོ། །ཀུན་གཞི་ཁས་ལེན་ན་ཀུན་གཞི་རྣམ་ཤེས་སམ་ཡེ་ཤེས་ཀྱི་རྒྱུན་དུ་གྱུར་བའོ། །ཞེས་གསུངས་སོ།། །། གཉིས་པ་ཡོད་རྟོགས་མེད་རྟོགས་ཀྱི་རྣམ་བཞག་བཤད་པ།གཉིས་པ་ཡོད་རྟོགས་མེད་རྟོགས་ཀྱི་རྣམ་བཞག་བཤད་པ་ལ། ཚད་མ་རྣམ་འགྲེལ་ལས། དེ་ལ་དམིགས་རུང་རྣམས་ཀྱི་ནི། །ཡོད་པ་དམིགས་པ་ལས་གཞན་མིན། །དེ་ཕྱིར་མ་ཤེས་ཤེས་བྱའི་ཕྱིར། །མི་དམིགས་དཔེ་གཅིག་བཞེད་པ་ཡིན། །ཞེས་པས་ཡོད་པའི་དོན་དང་ཐ་སྙད་གཉིས་བཤད། དམིགས་སུ་རུང་བའི་མེད་པ་ནི། །མི་དམིགས་པ་ལས་གཞན་མ་ཡིན། །དེ་ཕྱིར་དེ་ཡོད་པ་ལས་དེའི། །རྒྱུ་མཚན་ཅན་གྱི་སྒྲ་ཞེས་སྒྲུབ། །ཅེས་མེད་པ་དང་མེད་པའི་ཐ་སྙད་གཉིས་བཤད་པའི་གཞུང་འདི་བྱུང༌། །དེ་ལ་མཐའ་དཔྱད་པ་ལ། དགག་བཞག་སྤོང་གསུམ་ལས། དང་པོ་ནི། ཁ་ཅིག་ན་རེ། ཡོད་པ་མིན་ན་མེད་པ་ཡིན་མི་དགོས་པར་དེ་གཉིས་གང་ཡང་མ་ཡིན་པའི་ཕུང་སུམ་པ་ཡོད་ཟེར་ན། དེ་ལ་ཀུན་མཁྱེན་རིན་པོ་ཆེས་འདི་ལྟར་གསུངས་ཏེ། ལྟ་བ་ཤན་འབྱེད་ལས། ཡོད་པ་མིན་ཞེས་བརྗོད་པ་ཡིས། །དོན་དེ་མེད་པར་མི་སྟོན་ན། །དབུལ་བའི་ཕུང་བོ་གསེར་རྣམས་དག །ཡོད་མེད་དྲིས་པས་ཡོད་མིན་ཞེས། །སྨྲ་ན་གསེར་མེད་མི་ཤེས་སམ། །མེད་པ་མིན་ཞེས་བརྗོད་པ་ཡིས། །ཆོས་དེ་ཡོད་པར་མི་སྟོན་ན། །ཕྱུག་པོ་དག་ལ་ལོངས་སྤྱོད་དག །ཡོད་མེད་དྲིས་པས་མེད་མིན་ཞེས། སྨྲ་ན་ནོར་ཡོད་མི་ཤེས་སམ། །ཞེས་དང༌། ཡོད་མེད་བར་ན་ཕུང་སུམ་མེད། །དེ་ཕྱིར་ཡོད་མེད་མེད་མིན་གྱི། །རྒོལ་འདི་སྤོང་ལ་གང་རུང་སྨྲོས། །ཞེས་སོགས་གསུངས་སོ། །གཞུང་དེར་ཡོད་མེད་གང་ཡང་མ་ཡིན་པའི་ཕུང་སུམ་འདོད་པ་རྒྱས་པར་བཀག་ཡོད་པས་དེར་ཤེས་པར་བྱའོ། །ཁ་ཅིག་ན་རེ། ཡོད་པར་རྟོགས་པའི་ཚད་མ་ཡོད་ན། དངོས་པོར་རྟོགས་པའི་ཚད་མ་ཡོད་པས་ཁྱབ་ཟེར་ན། ཆོས་ཉིད་དེ་བཞིན་གཤེགས་པའི་སྙིང་པོ་ཆོས་ཅན། དངོས་པོར་རྟོགས་པའི་ཚད་མ་ཡོད་པར་ཐལ། ཡོད་པར་རྟོགས་པའི་ཚད་མ་ཡོད་པའི་ཕྱིར། ཁྱབ་པ་ཁས། མ་གྲུབ་ན། དེ་ཆོས་ཅན། ཡོད་པར་རྟོགས་པའི་ཚད་མ་ཡོད་པར་ཐལ། ཡོད་པ་ཡིན་པའི་ཕྱིར། མ་གྲུབ་ན། དེ་ཆོས་ཅན། ཡོད་པ་ཡིན་པར་ཐལ། ཤེས་བྱ་ཡིན་པའི་ཕྱིར། མ་གྲུབ་ན། དེར་ཐལ། བཀའ་བསྡུ་བཞི་བ་ལས། ཆོས་ཉིད་དབུ་མ་ཤེས་བྱའི་མཆོག་ཡིན་ཀྱང༌། །ཞེས་གསུངས་སོ། །རྩ་བར་འདོད་ན། ཆོས་ཉིད་དེ་བཞིན་གཤེགས་པའི་སྙིང་པོ་ཆོས་ཅན། དངོས་པོར་རྟོགས་པའི་ཚད་མ་མེད་པར་ཐལ། དངོས་པོ་མ་ཡིན་པའི་ཕྱིར། མ་གྲུབ་ན། དེ་ཆོས་ཅན། དངོས་པོ་མ་ཡིན་པར་ཐལ། དངོས་དང་དངོས་མེད་ལས་འདས་པ་ཡིན་པའི་ཕྱིར། རྒྱུད་ལས། དངོས་དང་དངོས་མེད་ཟད་པའི་གཙོ། །ཞེས་གསུངས་སོ། །ཁ་ཅིག་ན་རེ། དངོས་མེད་དུ་རྟོགས་པའི་ཚད་མ་ཡོད་ན། རྟག་པར་རྟོགས་པའི་ཚད་མ་ཡོད་པས་ཁྱབ་ཟེར་ན། རི་བོང་རྭ་ཆོས་ཅན། རྟག་པར་རྟོགས་པའི་ཚད་མ་ཡོད་པར་ཐལ། དངོས་མེད་དུ་རྟོགས་པའི་ཚད་མ་ཡོད་པའི་ཕྱིར། ཁྱབ་པ་ཁས། མ་གྲུབ་ན། དེ་ཆོས་ཅན། དངོས་མེད་དུ་རྟོགས་པའི་ཚད་མ་ཡོད་པར་ཐལ། དངོས་མེད་ཡིན་པའི་ཕྱིར། མ་གྲུབ་ན། དེ་ཆོས་ཅན། དངོས་མེད་ཡིན་པར་ཐལ། མེད་པ་ཡིན་པའི་ཕྱིར། རྩ་བར་འདོད་ན། རི་བོང་རྭ་ཆོས་ཅན། རྟག་པར་རྟོགས་པའི་ཚད་མ་མེད་པར་ཐལ། རྟག་པ་མ་ཡིན་པའི་ཕྱིར། མ་གྲུབ་ན། དེ་ཆོས་ཅན། རྟག་པ་མ་ཡིན་པར་ཐལ། ཆོས་དང་སྐད་ཅིག་མ་མ་ཡིན་པའི་གཞི་མཐུན་པ་མ་ཡིན་པའི་ཕྱིར། མ་གྲུབ་ན། དེ་ཆོས་ཅན། ཆོས་དང་སྐད་ཅིག་མ་མ་ཡིན་པའི་གཞི་མཐུན་པ་མ་ཡིན་པར་ཐལ། ཆོས་མ་ཡིན་པའི་ཕྱིར། མ་གྲུབ་ན། དེ་ཆོས་ཅན། ཆོས་མ་ཡིན་པར་ཐལ། གཏན་མེད་ཡིན་པའི་ཕྱིར། མ་ཁྱབ་ན་ཁྱབ་པ་ཡོད་པར་ཐལ། ཆོས་དང་ཡོད་པ་གཉིས་དོན་གཅིག་ཡིན་པའི་ཕྱིར། ཁ་ཅིག་ན་རེ། མ་བྱས་པར་རྟོགས་པའི་ཚད་མ་མ་བྱས་པར་རྟོགས་པའི་ཚད་མ་ཡོད་ན། མ་བྱས་པར་རྟོགས་པའི་ཚད་མ་ཡོད་པས་ཁྱབ་ཟེར་ན། རྙེད་དཀའི་དལ་འབྱོར་ཆོས་ཅན། མ་བྱས་པར་རྟོགས་པའི་ཚད་མ་ཡོད་པར་ཐལ། མ་བྱས་པར་རྟོགས་པའི་ཚད་མ་མ་བྱས་པར་རྟོགས་པའི་ཚད་མ་ཡོད་པའི་ཕྱིར། ཁྱབ་པ་ཁས། མ་གྲུབ་ན། དེ་ཆོས་ཅན། མ་བྱས་པར་རྟོགས་པའི་ཚད་མ་མ་བྱས་པར་རྟོགས་པའི་ཚད་མ་ཡོད་པར་ཐལ། མ་བྱས་པར་རྟོགས་པའི་ཚད་མ་བྱས་པར་རྟོགས་པའི་ཚད་མ་མེད་པའི་ཕྱིར། མ་གྲུབ་ན། དེ་ཆོས་ཅན། མ་བྱས་པར་རྟོགས་པའི་ཚད་མ་བྱས་པར་རྟོགས་པའི་ཚད་མ་མེད་པར་ཐལ། དངོས་པོ་ཡིན་པའི་ཕྱིར། རྩ་བར་འདོད་ན། རྙེད་དཀའི་དལ་འབྱོར་ཆོས་ཅན། མ་བྱས་པར་རྟོགས་པའི་ཚད་མ་མེད་པར་ཐལ། མ་བྱས་པ་མ་ཡིན་པའི་ཕྱིར། མ་གྲུབ་ན། དེ་ཆོས་ཅན། མ་བྱས་པ་མ་ཡིན་པར་ཐལ། བྱས་པ་ཡིན་པའི་ཕྱིར། མ་གྲུབ་ན། དེ་ཆོས་ཅན། བྱས་པ་ཡིན་པར་ཐལ། ལྡན་མིན་་ཡིན་པའི་ཕྱིར། མ་ཁྱབ་ན་ཁྱབ་པ་ཡོད་པར་ཐལ། གཟུགས་དང་ཀུན་རྫོབ་ཀྱི་ཤེས་པ་དང་ལྡན་མིན་གང་རུང་ཡིན་ན་བྱས་པ་ཡིན་པས་ཁྱབ་པའི་ཕྱིར་རོ། །ཁ་ཅིག་ན་རེ། མེད་པར་རྟོགས་པའི་ཚད་མ་མེད་པར་རྟོགས་པའི་ཚད་མ་ཡོད་ན་མེད་པར་རྟོགས་པའི་ཚད་མ་ཡོད་པས་ཁྱབ་ཟེར་ན། སངས་རྒྱས་ཀྱི་གསུང་ཆོས་ཅན། མེད་པར་རྟོགས་པའི་ཚད་མ་ཡོད་པར་ཐལ། མེད་པར་རྟོགས་པའི་ཚད་མ་མེད་པར་རྟོགས་པའི་ཚད་མ་ཡོད་པའི་ཕྱིར། ཁྱབ་པ་ཁས། མ་གྲུབ་ན། སངས་རྒྱས་ཀྱི་གསུང་ཆོས་ཅན། མེད་པར་རྟོགས་པའི་ཚད་མ་མེད་པར་རྟོགས་པའི་ཚད་མ་ཡོད་པར་ཐལ། གཞི་གྲུབ་པའི་ཕྱིར། རྩ་བར་འདོད་ན། སངས་རྒྱས་ཀྱི་གསུང་ཆོས་ཅན། མེད་པར་རྟོགས་པའི་ཚད་མ་མེད་པར་ཐལ། ཡོད་པར་རྟོགས་པའི་ཚད་མ་ཡོད་པའི་ཕྱིར། མ་གྲུབ་ན། དེ་ཆོས་ཅན། ཡོད་པར་རྟོགས་པའི་ཚད་མ་ཡོད་པར་ཐལ། ཡོད་པ་ཡིན་པའི་ཕྱིར། མ་གྲུབ་ན། དེ་ཆོས་ཅན། ཡོད་པ་ཡིན་པར་ཐལ། རྟག་མི་རྟག་གང་རུང་ཡིན་པའི་ཕྱིར། མ་གྲུབ་ན། སངས་རྒྱས་ཀྱི་གསུང་ཆོས་ཅན། རྟག་མི་རྟག་གང་རུང་ཡིན་པར་ཐལ། འདུས་བྱས་ཡིན་པའི་ཕྱིར། ཁྱབ་སྟེ། འདུས་བྱས་ཐམས་ཅད་མི་རྟག་པ་ཡིན་པའི་ཕྱིར་རོ། །ཁ་ཅིག་ན་རེ། རྟག་པར་རྟོགས་པའི་ཚད་མ་མེད་པར་རྟོགས་པའི་ཚད་མ་ཡོད་ན། རྟག་པར་རྟོགས་པའི་ཚད་མ་དང་མེད་པར་རྟོགས་པའི་ཚད་མ་གང་རུང་ཡོད་པས་ཁྱབ་ཟེར་ན། སྡུག་བདེན་ཆོས་ཅན། རྟག་པར་རྟོགས་པའི་ཚད་མ་དང་མེད་པར་རྟོགས་པའི་ཚད་མ་གང་རུང་ཡོད་པར་ཐལ། རྟག་པར་རྟོགས་པའི་ཚད་མ་མེད་པར་རྟོགས་པའི་ཚད་མ་ཡོད་པའི་ཕྱིར། མ་གྲུབ་ན། སྡུག་བདེན་ཆོས་ཅན། རྟག་པར་རྟོགས་པའི་ཚད་མ་མེད་པར་རྟོགས་པའི་ཚད་མ་ཡོད་པར་ཐལ། རྟག་པ་མ་ཡིན་པའི་ཕྱིར། མ་གྲུབ་ན། དེ་ཆོས་ཅན། རྟག་པ་མ་ཡིན་པར་ཐལ། མི་རྟག་པ་ཡིན་པའི་ཕྱིར། མ་གྲུབ་ན། སྡུག་བདེན་ཆོས་ཅན། མི་རྟག་པ་ཡིན་པར་ཐལ། འདུས་བྱས་ཡིན་པའི་ཕྱིར། རྟགས་ཁྱབ་ནང་བ་སངས་རྒྱས་པ་ཐམས་ཅད་ཀྱི་ཐུན་མོང་དུ་ཁས་བླངསཀྱིས་གྲུབ། རྩ་བར་འདོད་ན། སྡུག་བདེན་ཆོས་ཅན། རྟག་པར་རྟོགས་པའི་ཚད་མ་དང་མེད་པར་རྟོགས་པའི་ཚད་མ་གང་རུང་མེད་པར་ཐལ། རྟག་པར་རྟོགས་པའི་ཚད་མ་མེད་པ་གང་ཞིག མེད་པར་རྟོགས་པའི་ཚད་མ་མེད་པའི་ཕྱིར། རྟགས་དང་པོ་མ་གྲུབ་ན། སྡུག་བདེན་ཆོས་ཅན། རྟག་པར་རྟོགས་པའི་ཚད་མ་མེད་པར་ཐལ། རྟག་པ་མ་ཡིན་པའི་ཕྱིར། མ་གྲུབ་ན། དེ་ཆོས་ཅན། རྟག་པ་མ་ཡིན་པར་ཐལ། ཆོས་དང་སྐད་ཅིག་མ་མ་ཡིན་པའི་གཞི་མཐུན་པ་མ་ཡིན་པའི་ཕྱིར། མ་གྲུབ་ན། དེ་ཆོས་ཅན། ཆོས་དང་སྐད་ཅིག་མ་མ་ཡིན་པའི་གཞི་མཐུན་པ་མ་ཡིན་པར་ཐལ། ཆོས་དང་སྐད་ཅིག་མའི་གཞི་མཐུན་ཡིན་པའི་ཕྱིར། མ་གྲུབ་ན། དེ་ཆོས་ཅན། དེར་ཐལ། ཆོས་ཡིན་པ་གང་ཞིག སྐད་ཅིག་མ་ཡིན་པའི་ཕྱིར། རྟགས་དང་པོ་མ་གྲུབ་ན། དེ་ཆོས་ཅན། ཆོས་ཡིན་པར་ཐལ། རང་གི་ངོ་བོ་འཛིན་པ་ཡིན་པའི་ཕྱིར། མ་ཁྱབ་ན་ཁྱབ་པ་ཡོད་པ་ཡིན་པར་ཐལ། རང་གི་ངོ་བོ་འཛིན་པ་ཆོས་ཀྱི་མཚན་ཉིད་ཡིན་པའི་ཕྱིར། རྟགས་གཉིས་པ་མ་གྲུབ་ན། དེ་ཆོས་ཅན། སྐད་ཅིག་མ་ཡིན་པར་ཐལ། མི་རྟག་པ་ཡིན་པའི་ཕྱིར། ཁྱབ་སྟེ། སྐད་ཅིག་མ་མི་རྟག་པའི་མཚན་ཉིད་ཡིན་པའི་ཕྱིར་རོ། །གོང་གི་རྟགས་གཉིས་པ་མ་གྲུབ་ན། སྡུག་བདེན་ཆོས་ཅན། མེད་པར་རྟོགས་པའི་ཚད་མ་མེད་པར་ཐལ། མེད་པ་མ་ཡིན་པའི་ཕྱིར། མ་གྲུབ་ན། དེ་ཆོས་ཅན། མེད་པ་མ་ཡིན་པར་ཐལ། ཚད་མས་དམིགས་པ་ཡིན་པའི་ཕྱིར། མ་གྲུབ་ན། དེ་ཆོས་ཅན། ཚད་མས་དམིགས་པ་ཡིན་པར་ཐལ། ཡོད་པ་ཡིན་པའི་ཕྱིར། ཁྱབ་སྟེ། ཚད་མས་དམིགས་པ་ཡོད་པའི་མཚན་ཉིད་ཡིན་པའི་ཕྱིར་རོ། ། གཉིས་པ་རང་ལུགས་བཤད་པ།གཉིས་པ་རང་ལུགས་བཤད་པ་ལ། ཡོད་པའི་མཚན་ཉིད་ཡོད་དེ། ཚད་མས་དམིགས་པ་དེ་ཡིན་པའི་ཕྱིར་ཏེ། རྣམ་འགྲེལ་ལས། ཡོད་པ་དམིགས་པ་ལས་གཞན་མིན། །ཞེས་གསུངས་པའི་ཕྱིར། བདག་མེད་དུ་རྟོགས་པའི་ཚད་མ་ཡོད་པ་དང་བདག་མེད་གཉིས་ཡིན་ཁྱབ་མཉམ་ཡིན་ཏེ། བདག་མེད་དུ་རྟོགས་པའི་ཚད་མ་ཡོད་པ་ཡིན་ན་བདག་མེད་ཡིན་པས་ཁྱབ། བདག་མེད་ཡིན་ན་བདག་མེད་དུ་རྟོགས་པའི་ཚད་མ་ཡོད་པ་ཡིན་པས་ཁྱབ་པའི་ཕྱིར། ཡོད་པར་རྟོགས་པའི་ཚད་མ་ཡོད་པ་དང་ཡོད་པ་གཉིས་ཡིན་ཁྱབ་མཉམ་ཡིན་ཏེ། ཡོད་པར་རྟོགས་པའི་ཚད་མ་ཡོད་པ་ཡིན་ན་ཡོད་པ་ཡིན་པས་ཁྱབ། ཡོད་པ་ཡིན་ན་ཡོད་པར་རྟོགས་པའི་ཚད་མ་ཡོད་པ་ཡིན་པས་ཁྱབ་པའི་ཕྱིར། མེད་པར་རྟོགས་པའི་ཚད་མ་ཡོད་པ་དང༌། མེད་པ་གཉིས་ཡིན་ཁྱབ་མཉམ་ཡིན་ཏེ། མེད་པར་རྟོགས་པའི་ཚད་མ་ཡོད་པ་ཡིན་ན་མེད་པ་ཡིན་པས་ཁྱབ། མེད་པ་ཡིན་ན་མེད་པར་རྟོགས་པའི་ཚད་མ་ཡོད་པ་ཡིན་པས་ཁྱབ་པའི་ཕྱིར་རོ། །མི་རྟག་པར་རྟོགས་པའི་ཚད་མ་ཡོད་པ་དང་མི་རྟག་པ་གཉིས་ཡིན་ཁྱབ་མཉམ་ཡིན་ཏེ། མི་རྟག་པར་རྟོགས་པའི་ཚད་མ་ཡོད་པ་ཡིན་ན་མི་རྟག་པ་ཡིན་པས་ཁྱབ། མི་རྟག་པ་ཡིན་ན་མི་རྟག་པར་རྟོགས་པའི་ཚད་མ་ཡོད་པ་ཡིན་པས་ཁྱབ་པའི་ཕྱིར་རོ། །མེད་པར་རྟོགས་པའི་ཚད་མ་མེད་པར་རྟོགས་པའི་ཚད་མ་ཡོད་པ་དང་ཡོད་པ་གཉིས་ཡིན་ཁྱབ་མཉམ་ཡིན་ཏེ། ཡོད་པ་ཡིན་ན་མེད་པར་རྟོགས་པའི་ཚད་མ་མེད་པར་རྟོགས་པའི་ཚད་མ་ཡོད་པ་ཡིན་པས་ཁྱབ། མེད་པར་རྟོགས་པའི་ཚད་མ་མེད་པར་རྟོགས་པའི་ཚད་མ་ཡོད་པ་ཡིན་ན་ཡོད་པ་ཡིན་པས་ཁྱབ་པའི་ཕྱིར་རོ། །མ་གྲུབ་ན། མེད་པར་རྟོགས་པའི་ཚད་མ་མེད་པར་རྟོགས་པའི་ཚད་མ་ཡོད་པ་ཡིན་ན། ཡོད་པ་ཡིན་པས་ཁྱབ་པར་ཐལ། མེད་པར་རྟོགས་པའི་ཚད་མ་མེད་པར་རྟོགས་པའི་ཚད་མ་གཉིས་དང་བཞི་དང་དྲུག་དང་བརྒྱད་སོགས་ཆ་བྱུང་ན་ཡོད་པ་ཡིན་པས་ཁྱབ་པའི་ཕྱིར་རོ། །རྟག་པར་རྟོགས་པའི་ཚད་མ་དངོས་པོར་རྟོགས་པའི་ཚད་མ་ཡོད་པ་དང་རྟག་པ་གཉིས་ཡིན་ཁྱབ་མཉམ་ཡིན་ཏེ། རྟག་པ་ཡིན་ན་རྟག་པར་རྟོགས་པའི་ཚད་མ་དངོས་པོར་རྟོགས་པའི་ཚད་མ་ཡོད་པས་ཁྱབ། རྟག་པར་རྟོགས་པའི་ཚད་མ་དངོས་པོར་རྟོགས་པའི་ཚད་མ་ཡོད་པ་ཡིན་ན་རྟག་པ་ཡིན་པས་ཁྱབ་པའི་ཕྱིར་རོ། །ཡོད་པར་རྟོགས་པའི་ཚད་མ་ཡོད་པ་དང་ཡོད་པར་རྟོགས་པའི་ཚད་མ་ཡོད་པར་རྟོགས་པའི་ཚད་མ་ཡོད་པ་གཉིས་ཡིན་ཁྱབ་མཉམ་ཡིན་ཏེ། ཡོད་པར་རྟོགས་པའི་ཚད་མ་ཡོད་ན་ཡོད་པར་རྟོགས་པའི་ཚད་མ་ཡོད་པར་རྟོགས་པའི་ཚད་མ་ཅི་ཙམ་བརྩེགས་ཀྱང་ཡོད་པ་ཡིན་པས་ཁྱབ་པའི་ཕྱིར་རོ། །ཡོད་པར་རྟོགས་པའི་ཚད་མ་དངོས་པོར་རྟོགས་པའི་ཚད་མ་ཡོད་པར་ཐལ། ཡོད་པར་རྟོགས་པའི་ཚད་མ་དངོས་པོ་ཡིན་པའི་ཕྱིར། ཤེས་བྱའི་མཚན་ཉིད་ཡོད་དེ། བློའི་ཡུལ་དུ་བྱ་རུང་དེ་ཡིན་པའི་ཕྱིར། རྣམ་མཁྱེན་བློའི་ཡུལ་དུ་བྱ་རུང༌། རྣམ་མཁྱེན་ཤེས་བྱ་ཡིན་པའི་མཚན་ཉིད། དེ་བཞིན་དུ་གཞན་ལ་རིགས་འགྲེ་སྦྱར་བར་བྱའོ། །ཤེས་བྱ་དང༌། ཡོད་པ་དང༌། གཞི་གྲུབ་དང༌། གཞལ་བྱ་དང༌། ཆོས་དང༌། ཡུལ་རྣམས་དོན་གཅིག གཞི་གྲུབ་ཀྱི་མཚན་ཉིད་ཡོད་དེ། ཚད་མས་གྲུབ་པ་དེ་ཡིན་པའི་ཕྱིར། ཆོས་ཀྱི་མཚན་ཉིད་ཡོད་དེ། རང་གི་ངོ་བོ་འཛིན་པ་དེ་ཡིན་པའི་ཕྱིར། ཡོད་པ་ལ་དབྱེ་ན། ཐུན་མོང་དུ་རྟག་དངོས་གཉིས། དངོས་པོའི་མཚན་ཉིད་ཡོད་དེ། དོན་བྱེད་ནུས་པ་དེ་ཡིན་པའི་ཕྱིར། དངོས་པོ་དང་མི་རྟག་པ་དང་བྱས་པ་རྣམས་དོན་གཅིག ཐུན་མོང་མ་ཡིན་པའི་ལུགས་ལ་ཡོད་པ་ལ་དབྱེ་ན། དངོས་དངོས་མེད་རྟག་པ་དང་གསུམ། དངོས་མེད་ཀྱི་མཚན་ཉིད་ཡོད་དེ། དོན་བྱེད་མི་ནུས་པའི་རྟོག་བརྟགས་དེ་ཡིན་པའི་ཕྱིར། རྟག་པའི་མཚན་ཉིད་ཡོད་དེ། མི་འཇིག་པའི་ཆོས་དེ་ཡིན་པའི་ཕྱིར། དངོས་པོ་ལ་དབྱེ་ན་གསུམ་ཡོད་དེ། གཟུགས་དང་ཀུན་རྫོབ་ཤེས་པ་དང་ལྡན་མིན་འདུ་བྱེད་དང་གསུམ་ཡོད་པའི་ཕྱིར། བེམ་པོའི་མཚན་ཉིད་ཡོད་དེ། རྡུལ་དུ་གྲུབ་པ་དེ་ཡིན་པའི་ཕྱིར། རྫོགས་ལྡན་ཆོས་མཆོག་གི་ལུགས་ལ། རིག་པ་མ་ཡིན་པའི་ཆོས་དེ་བེམ་པོའི་མཚན་ཉིད་ཡིན་ནོ། །གཟུགས་ཀྱི་དབྱེ་བ་སྔར་བཤད་ཟིན་པ་ལྟར་རོ། །ཤེས་པའི་མཚན་ཉིད་ཡོད་དེ། གསལ་ཞིང་རིག་པའམ་མྱོང་བར་སྐྱེས་པ་དེ་ཡིན་པའི་ཕྱིར། ཤེས་པ་དང་རིག་པ་བློ་གསུམ་དོན་གཅིག མཚན་གཞི་ནི་ཡོད་དེ། ཀུན་གཞི་རྣམ་ཤེས་དང་ཡེ་ཤེས་དེ་ཡིན་པའི་ཕྱིར། རྟག་པ་ལ་དབྱེ་ན། མངོན་པ་མཛོད་ལྟར་ན་འདུས་མ་བྱས་གསུམ་ཡོད་དེ། གཏན་ཚིགས་རིགས་པའི་དོན་བསྡུས་ལས། འདུས་མ་བྱས་ལ་དབྱེ་ན། འདུས་མ་བྱས་ཀྱི་ནམ་མཁའ་དང༌། སོ་སོར་བརྟགས་འགོག་དང༌། སོ་སོར་བརྟགས་མིན་གྱི་འགོག་པ་སྟེ་གསུམ་མོ། །ཞེས་གསུངས་སོ། །རྫོགས་ལྡན་ལུགས་ལ་རྟག་པའམ་འདུས་མ་བྱས་ལ་དངོས་བཏགས་གཉིས་ཡོད་དེ། ཟབ་དོན་ཉེར་གཅིག་ལས། དོན་དམ་འདུས་མ་བྱས་དངོས་ཡིན། ནམ་མཁའ་སོགས་འདུས་མ་བྱས་བཏགས་པ་བ་ཡིན་གསུངས། །ཞེས་གསུངས་སོ། ། གསུམ་པ་དེ་ལ་རྩོད་པ་སྤོང་བ།གསུམ་པ་དེ་ལ་རྩོད་པ་སྤོང་བ་ལ། ཁ་ཅིག་ན་རེ། དོན་དམ་བདེན་པ་ཡོད་པ་མ་ཡིན་པར་ཐལ། སྤྱོད་འཇུག་ལས། དོན་དམ་བློ་ཡི་སྤྱོད་ཡུལ་མིན། །ཞེས་གསུངས་པའི་ཕྱིར་ཟེར་ན་མ་ཁྱབ་སྟེ། རྣམ་ཤེས་ཀྱི་སྤྱོད་ཡུལ་མ་ཡིན་པའི་དོན་ནོ། །རྩ་བར་འདོད་ན། དོན་དམ་དབྱིངས་ཆོས་ཅན། ཡོད་པ་ཡིན་པར་ཐལ། ཤེས་བྱ་ཡིན་པའི་ཕྱིར། ཡབ་སྲས་མཇལ་བའི་མདོ་ལས། ཤེས་པར་བྱ་བ་ཡང་ཀུན་རྫོབ་དང་དོན་དམ་པའི་བདེན་པ་གཉིས་པོ་འདིར་ཟད་དོ། །ཞེས་གསུངས་པའི་ཕྱིར་རོ། །ཁ་ཅིག་ན་རེ། ཟག་བཅས་ཉེར་ལེན་གྱི་ཕུང་པོ་ཆོས་ཅན། རྟག་པ་ཡིན་པར་ཐལ། རྟག་པར་རྟོགས་པའི་ཚད་མ་དངོས་པོར་རྟོགས་པའི་ཚད་མ་ཡོད་པའི་ཕྱིར། མ་གྲུབ་ན། ཟག་བཅས་ཉེར་ལེན་གྱི་ཕུང་པོ་ཆོས་ཅན། རྟག་པར་རྟོགས་པའི་ཚད་མ་དངོས་པོར་རྟོགས་པའི་ཚད་མ་ཡོད་པར་ཐལ། རྟག་པར་རྟོགས་པའི་ཚད་མ་དངོས་པོར་རྟོགས་པའི་ཚད་མ་མེད་པར་རྟོགས་པའི་ཚད་མ་ཡོད་པའི་ཕྱིར་ན་འགལ་ཁྱབ་ལ་འཕུད། ཁ་ཅིག་ན་རེ། ཤེས་བྱ་ཆོས་ཅན། དངོས་པོ་ཡིན་པར་ཐལ། དངོས་པོར་རྟོགས་པའི་ཚད་མ་མེད་པར་རྟོགས་པའི་ཚད་མ་ཡོད་པར་རྟོགས་པའི་ཚད་མ་ཡོད་པའི་ཕྱིར་ན་འགལ་ཁྱབ་ལ་འཕུད་དོ། །མ་གྲུབ་ན། ཤེས་བྱ་ཆོས་ཅན། དངོས་པོར་རྟོགས་པའི་ཚད་མ་མེད་པར་རྟོགས་པའི་ཚད་མ་ཡོད་པར་རྟོགས་པའི་ཚད་མ་ཡོད་བར་ཐལ། དངོས་པོ་མ་ཡིན་པའི་ཕྱིར་རོ།། །། གསུམ་པ་ཡིན་ལོག་མིན་ལོག་གི་རྣམ་བཞག་བཤད་པ།གསུམ་པ་ཡིན་ལོག་མིན་ལོག་གི་རྣམ་བཞག་བཤད་པ་ལ། ཚད་མ་རྣམ་འགྲེལ་ལས། དེ་ཕྱིར་གང་དང་གང་ལས་དོན། །ལྡོག་པ་དེ་ཡི་རྒྱུ་ཅན་གྱི། །རིགས་དབྱེ་དེ་ཡི་ཁྱད་པར་གྱིས། །རྟོགས་གྱུར་བ་དག་རབ་ཏུ་བྱེད། །ཅེས་སོགས་ཀྱི་གཞུང་འདི་བྱུང༌། དེའི་མཐའ་དཔྱད་པ་ལ། དགག་བཞག་སྤོང་གསུམ་ལས།དང་པོ་ནི། ཁ་ཅིག་ན་རེ། དངོས་པོ་མ་ཡིན་པ་ལས་ལོག་པ་ཡིན་ན་ཤེས་པ་མ་ཡིན་པ་ལས་ལོག་པ་ཡིན་པས་ཁྱབ་ཟེར་ན། སྐྱབས་གནས་ཀུན་འདུས་རྗེ་བཙུན་བླ་མའི་གཟུགས་སྐུ་ཆོས་ཅན། ཤེས་པ་མ་ཡིན་པ་ལས་ལོག་པ་ཡིན་པར་ཐལ།དངོས་པོ་མ་ཡིན་པ་ལས་ལོག་པ་ཡིན་པའི་ཕྱིར། ཁྱབ་པ་ཁས། མ་གྲུབ་ན། དེ་ཆོས་ཅན། དངོས་པོ་མ་ཡིན་པ་ལས་ལོག་པ་ཡིན་པར་ཐལ། དངོས་པོ་ཡིན་པའི་ཕྱིར། མ་གྲུབ་ན། དེ་ཆོས་ཅན། དངོས་པོ་ཡི་ན་པརཐལ། གཟུགས་ཡིན་པའི་ཕྱིར། མ་གྲུབ་ན། དེ་ཆོས་ཅན། གཟུགས་ཡིན་པར་ཐལ། ཆོས་ཅན་དེའི་ཕྱིར། རྩ་བར་འདོད་ན། སྐྱབས་གནས་ཀུན་འདུས་རྗེ་བཙུན་བླ་མའི་གཟུགས་སྐུ་ཆོས་ཅན། ཤེས་པ་མ་ཡིན་པ་ལས་ལོག་པ་མ་ཡིན་པར་ཐལ། ཤེས་པ་ཡིན་པ་ལས་ལོག་པ་ཡིན་པའི་ཕྱིར། མ་གྲུབ་ན། དེ་ཆོས་ཅན། ཤེས་པ་ཡིན་པ་ལས་ལོག་པ་ཡིན་པར་ཐལ། ཤེས་པ་མ་ཡིན་པའི་ཕྱིར། མ་གྲུབ་ན། དེ་ཆོས་ཅན། ཤེས་པ་མ་ཡིན་པར་ཐལ། གཟུགས་ཡིན་པའི་ཕྱིར། མ་ཁྱབ་ན་ཁྱབ་པ་ཡོད་པར་ཐལ། གཟུགས་ཤེས་གཉིས་ཀྱི་གཞི་མཐུན་མེད་པའི་ཕྱིར། ཁ་ཅིག་ན་རེ། གཟུགས་མ་ཡིན་པ་ལས་ལོག་པ་ཡིན་ན། བུམ་པ་མ་ཡིན་པ་ལས་ལོག་པ་ཡིན་པས་ཁྱབ་ཟེར་ན། སྒྲ་རང་མཚན་པའི་ངེས་དོན་གྱི་མདོ་ཆོས་ཅན། བུམ་པ་མ་ཡིན་པ་ལས་ལོག་པ་ཡིན་པར་ཐལ། གཟུགས་མ་ཡིན་པ་ལས་ལོག་པ་ཡིན་པའི་ཕྱིར། ཁྱབ་པ་ཁས། མ་གྲུབ་ན། དེ་ཆོས་ཅན། གཟུགས་མ་ཡིན་པ་ལས་ལོག་པ་ཡིན་པར་ཐལ།གཟུགས་ཡིན་པའི་ཕྱིར། མ་གྲུབ་ན། དེ་ཆོས་ཅན། གཟུགས་ཡིན་པར་ཐལ། སྒྲ་ཡིན་པའི་ཕྱིར། མ་ཁྱབ་ན་ཁྱབ་བ་ཡོད་པར་ཐལ། སྒྲ་དེ་གཟུགས་ཀྱི་དབྱེ་བ་ཡིན་པའི་ཕྱིར། རྩ་བར་འདོད་ན། སྒྲ་རང་མཚན་པའི་ངེས་དོན་གྱི་མདོ་ཆོས་ཅན། བུམ་པ་མ་ཡིན་པ་ལས་ལོག་པ་མ་ཡིན་པར་ཐལ། བུམ་པ་ཡིན་པ་ལས་ལོག་པ་ཡིན་པའི་ཕྱིར། མ་གྲུབ་ན། དེ་ཆོས་ཅན། བུམ་པ་ཡིན་པ་ལས་ལོག་པར་ཐལ། བུམ་པ་མ་ཡིན་པའི་ཕྱིར། མ་གྲུབ་ན། དེ་ཆོས་ཅན། བུམ་པ་མ་ཡིན་པར་ཐལ། སྒྲ་ཡིན་པའི་ཕྱིར། མ་ཁྱབ་ན་ཁྱབ་བ་ཡོད་པར་ཐལ། སྒྲ་དང་བུམ་པ་གཉིས་ཀྱི་གཞི་མཐུན་མེད་པའི་ཕྱིར། ཁ་ཅིག་ན་རེ། དངོས་པོ་ཡིན་པ་ལས་ལོག་པ་ཡིན་པ་ལས་ལོག་པ་ཡིན་ན། དངོས་པོ་ཡིན་པ་ལས་ལོག་པ་ཡིན་པས་ཁྱབ་ཟེར་ན། རྣམ་མཁྱེན་ཆོས་ཅན། དངོས་པོ་ཡིན་པ་ལས་ལོག་པ་ཡིན་པར་ཐལ། དངོས་པོ་ཡིན་པ་ལས་ལོག་པ་ཡིན་པ་ལས་ལོག་པ་ཡིན་པའི་ཕྱིར། ཁྱབ་པ་ཁས།མ་གྲུབ་ན། རྣམ་མཁྱེན་ཆོས་ཅན། དངོས་པོ་ཡིན་པ་ལས་ལོག་པ་ཡིན་པ་ལས་ལོག་པ་ཡིན་པར་ཐལ། དངོས་པོ་ཡིན་པའི་ཕྱིར། མ་ཁྱབ་ན་ཁྱབ་བ་ཡོད་པར་ཐལ། དངོས་པོ་ཡིན་པ་ལས་ལོག་པ་ཡིན་པ་ལས་ལོག་པ་དང་དངོས་པོ་གཉིས་ཡིན་ཁྱབ་མཉམ་ཡིན་པའི་ཕྱིར། རྩ་བར་འདོད་ན། རྣམ་མཁྱེན་ཆོས་ཅན། དངོས་པོ་ཡིན་པ་ལས་ལོག་པ་མ་ཡིན་པར་ཐལ། དངོས་པོ་མ་ཡིན་པ་ལས་ལོག་པ་ཡིན་པའི་ཕྱིར། མ་གྲུབ་ན། རྣམ་མཁྱེན་ཆོས་ཅན། དངོས་པོ་མ་ཡིན་པ་ལས་ལོག་པ་ཡིན་པར་ཐལ། དངོས་པོ་ཡིན་པའི་ཕྱིར། མ་གྲུབ་ན། རྣམ་མཁྱེན་ཆོས་ཅན། དངོས་པོ་ཡིན་པར་ཐལ། ཀུན་རྫོབ་ཀྱི་ཤེས་པ་ཡིན་པའི་ཕྱིར། མ་གྲུབ་ན། རྣམ་མཁྱེན་ཆོས་ཅན། ཀུན་རྫོབ་ཀྱི་ཤེས་པ་ཡིན་པར་ཐལ། ཀུན་རྫོབ་ཀྱི་ཚད་མ་ཡིན་པའི་ཕྱིར། མ་གྲུབ་ན། རྣམ་མཁྱེན་ཆོས་ཅན། ཀུན་རྫོབ་ཀྱི་ཚད་མ་ཡིན་པར་ཐལ། ཀུན་རྫོབ་གང་ཞིག ཚད་མ་ཡིན་པའི་ཕྱིར། རྟགས་དང་པོ་མ་གྲུབ་ན། རྣམ་མཁྱེན་ཆོས་ཅན། ཀུན་རྫོབ་ཡིན་པར་ཐལ། ཁྱོད་དང་ཀུན་རྫོབ་ཀྱི་གཞི་མཐུན་ཡོད་པའི་ཕྱིར། རྟགས་གཉིས་པ་མ་གྲུབ་ན། རྣམ་མཁྱེན་ཆོས་ཅན། ཚད་མ་ཡིན་པར་ཐལ། རྣམ་མཁྱེན་ཡིན་པའི་ཕྱིར། མདོ་སྡེ་བའི་ལུགས་ལ་རྣམ་མཁྱེན་སོགས་དངོས་པོ་དུ་མ་ཞིག་དོན་དམ་བདེན་པར་འདོད་པས་སྐབས་འདི་དང་མི་འདྲའོ། །གཞན་ཡང་སྡུག་བདེན་མི་རྟག་པ་ཆོས་ཅན། དངོས་པོ་ཡིན་པ་ལས་ལོག་པ་ཡིན་པར་ཐལ། དངོས་པོ་ཡིན་པ་ལས་ལོག་པ་ཡིན་པ་ལས་ལོག་པ་ཡིན་པའི་ཕྱིར། ཁྱབ་པ་ཁས། མ་གྲུབ་ན། སྡུག་བདེན་མི་རྟག་པ་ཆོས་ཅན། དངོས་པོ་ཡིན་པ་ལས་ལོག་པ་ཡིན་པ་ལས་ལོག་པ་ཡིན་པར་ཐལ། དངོས་པོ་ཡིན་པ་ལས་ལོག་པ་མ་ཡིན་པའི་ཕྱིར། མ་གྲུབ་ན། སྡུག་བདེན་མི་རྟག་པ་ཆོས་ཅན། དངོས་པོ་ཡིན་པ་ལས་ལོག་པ་མ་ཡིན་པར་ཐལ། དངོས་པོ་ཡིན་པའི་ཕྱིར། མ་གྲུབ་ན། སྡུག་བདེན་ཆོས་ཅན། ཁྱོད་མི་རྟག་པ་དངོས་པོ་ཡིན་པར་ཐལ། ཁྱོད་དངོས་པོ་ཡིན་པའི་ཕྱིར། རྩ་བར་འདོད་ན། སྡུག་བདེན་མི་རྟག་པ་ཆོས་ཅན། དངོས་པོ་ཡིན་པ་ལས་ལོག་པ་མ་ཡིན་པར་ཐལ། དངོས་པོ་མ་ཡིན་པ་ལས་ལོག་པ་ཡིན་པའི་ཕྱིར། མ་གྲུབ་ན། སྡུག་བདེན་མི་རྟག་པ་ཆོས་ཅན། དངོས་པོ་མ་ཡིན་པ་ལས་ལོག་པ་ཡིན་པར་ཐལ། དངོས་པོ་ཡིན་པའི་ཕྱིར། མ་གྲུབ་ན། སྡུག་བདེན་མི་རྟག་པ་ཆོས་ཅན། དངོས་པོ་ཡིན་པར་ཐལ། ལྡན་མིན་འདུ་བྱེད་ཡིན་པའི་ཕྱིར། མ་གྲུབ་ན། སྡུག་བདེན་ཆོས་ཅན། ཁྱོད་མི་རྟག་པ་ལྡན་མིན་འདུ་བྱེད་ཡིན་པར་ཐལ། ཁྱོད་དངོས་པོ་ཡིན་པའི་ཕྱིར། ཁ་ཅིག་ན་རེ། དངོས་མེད་མ་ཡིན་པ་ལས་ལོག་པ་ཡིན་ན། མེད་པ་མ་ཡིན་པ་ལས་ལོག་པ་ཡིན་པས་ཁྱབ་ཟེར་ན། འདུས་མ་བྱས་ཀྱི་ནམ་མཁའ་ཆོས་ཅན། མེད་པ་མ་ཡིན་པ་ལས་ལོག་པ་ཡིན་པར་ཐལ། དངོས་མེད་མ་ཡིན་པ་ལས་ལོག་པ་ཡིན་པའི་ཕྱིར། ཁྱབ་པ་ཁས། མ་གྲུབ་ན། འདུས་མ་བྱས་ཀྱི་ནམ་མཁའ་ཆོས་ཅན། དངོས་མེད་མ་ཡིན་པ་ལས་ལོག་པ་ཡིན་པར་ཐལ། དངོས་མེད་ཡིན་པའི་ཕྱིར། མ་གྲུབ་ན། དེ་ཆོས་ཅན། དངོས་མེད་ཡིན་པར་ཐལ། དོན་བྱེད་ནུས་སྟོང་དུ་གྱུར་བའི་རྟོག་བཏགས་ཡིན་པའི་ཕྱིར། ཁྱབ་སྟེ། གཏན་ཚིགས་རིགས་པའི་དོན་བསྡུས་ལས། དངོས་མེད་དང་དངོས་པོ་ལ་མཚན་ཉིད་རིམ་པ་བཞིན། དོན་བྱེད་ནུས་སྟོང་དང་དོན་བྱེད་ནུས་པའོ། །ཞེས་གསུངས་སོ། །གོང་གི་མ་ཁྱབ་མཚམས་ཀྱི་རྟགས་མ་གྲུབ་ཟེར་ན། འདུས་མ་བྱས་ཀྱི་ནམ་མཁའ་ཆོས་ཅན། དོན་བྱེད་ནུས་སྟོང་དུ་གྱུར་བའི་རྟོག་བཏགས་ཡིན་པར་ཐལ། དོན་བྱེད་ནུས་པ་མ་ཡིན་པ་གང་ཞིག རྟོག་བཏགས་ཡིན་པའི་ཕྱིར། ཕྱི་མ་སླ། དང་པོ་མ་གྲུབ་ན། དེ་ཆོས་ཅན། དེར་ཐལ། རང་གི་འབྲས་བུ་བསྐྱེད་ནུས་པ་མ་ཡིན་པའི་ཕྱིར། མ་གྲུབ་ན། དེ་ཆོས་ཅན། རང་གི་འབྲས་བུ་བསྐྱེད་ནུས་པ་མ་ཡིན་པར་ཐལ། ཁྱོད་ཀྱི་འབྲས་བུ་མེད་པའི་ཕྱིར། མ་གྲུབ་ན། དེ་ཆོས་ཅན། ཁྱོད་ཀྱི་འབྲས་བུ་མེད་པར་ཐལ། དངོས་མེད་ཡིན་པའི་ཕྱིར། རྩ་བར་འདོད་ན། འདུས་མ་བྱས་ཀྱི་ནམ་མཁའ་ཆོས་ཅན། མེད་པ་མ་ཡིན་པ་ལས་ལོག་པ་མ་ཡིན་པར་ཐལ། མེད་པ་ཡིན་པ་ལས་ལོག་པ་ཡིན་པའི་ཕྱིར། མ་གྲུབ་ན། དེ་ཆོས་ཅན། མེད་པ་ཡིན་པ་ལས་ལོག་པ་ཡིན་པར་ཐལ། མེད་པ་མ་ཡིན་པའི་ཕྱིར། མ་གྲུབ་ན། དེ་ཆོས་ཅན། མེད་པ་མ་ཡིན་པར་ཐལ། ཚད་མས་མི་དམིགས་པ་མ་ཡིན་པའི་ཕྱིར། མ་གྲུབ་ན། དེ་ཆོས་ཅན། ཚད་མས་མི་དམིགས་པ་མ་ཡིན་པར་ཐལ། ཚད་མས་དམིགས་པ་ཡིན་པའི་ཕྱིར། མ་གྲུབ་ན། དེ་ཆོས་ཅན། ཚད་མས་དམིགས་པ་ཡིན་པར་ཐལ། ཚད་མའི་གཞལ་བྱ་ཡིན་པའི་ཕྱིར། མ་གྲུབ་ན། འདུས་མ་བྱས་ཀྱི་ནམ་མཁའ་ཆོས་ཅན། ཚད་མའི་གཞལ་བྱ་ཡིན་པར་ཐལ། རྣམ་མཁྱེན་གྱི་གཞལ་བྱ་ཡིན་པའི་ཕྱིར། མ་གྲུབ་ན། དེ་ཆོས་ཅན། རྣམ་འཁྱེན་གྱི་གཞལ་བྱ་ཡིན་པར་ཐལ། གཞི་གྲུབ་པའི་ཕྱིར། ཁ་ཅིག་ན་རེ། མ་བྱས་པ་མ་ཡིན་པ་ལས་ལོག་པ་ཡིན་ན་མེད་པ་མ་ཡིན་པ་ལས་ལོག་པ་ཡིན་པས་ཁྱབ་ཟེར་ན། རྟག་པ་ཆོས་ཅན། མེད་པ་མ་ཡིན་པ་ལས་ལོག་པ་ཡིན་པར་ཐལ། མ་བྱས་པ་མ་ཡིན་པ་ལས་ལོག་པ་ཡིན་པའི་ཕྱིར། ཁྱབ་བ་ཁས། མ་གྲུབ་ན། རྟག་པ་ཆོས་ཅན། མ་བྱས་པ་མ་ཡིན་པ་ལས་ལོག་པ་ཡིན་པར་ཐལ། མ་བྱས་པ་ཡིན་པའི་ཕྱིར། མ་གྲུབ་ན། རྟག་པ་ཆོས་ཅན། མ་བྱས་པ་ཡིན་པར་ཐལ། བྱས་པ་མ་ཡིན་པའི་ཕྱིར། མ་གྲུབ་ན། རྟག་པ་ཆོས་ཅན།བྱས་པ་མ་ཡིན་པར་ཐལ། མི་རྟག་པ་མ་ཡིན་པའི་ཕྱིར། མ་གྲུབ་ན། རྟག་པ་ཆོས་ཅན། མི་རྟག་པ་མ་ཡིན་པར་ཐལ། སྐད་ཅིག་མ་མ་ཡིན་པའི་ཕྱིར། མ་ཁྱབ་ན་ཁྱབ་པ་ཡོད་པར་ཐལ། སྐད་ཅིག་མ་མི་རྟག་པའི་མཚན་ཉིད་ཡིན་པའི་ཕྱིར། རྩ་བར་འདོད་ན། རྟག་པ་ཆོས་ཅན། མེད་པ་མ་ཡིན་པ་ལས་ལོག་པ་མ་ཡིན་པར་ཐལ། མེད་པ་ཡིན་པ་ལས་ལོག་པ་ཡིན་པའི་ཕྱིར། མ་གྲུབ་ན། རྟག་པ་ཆོས་ཅན། མེད་པ་ཡིན་པ་ལས་ལོག་པ་ཡིན་པར་ཐལ། མེད་པ་མ་ཡིན་པའི་ཕྱིར། མ་གྲུབ་ན། རྟག་པ་ཆོས་ཅན། མེད་པ་མ་ཡིན་པར་ཐལ། གཞི་གྲུབ་པའི་ཕྱིར། ཁ་ཅིག་ན་རེ། རྟག་པ་ཡིན་པ་ལས་ལོག་པ་མ་ཡིན་པ་ལས་ལོག་པ་ཡིན་པ་ལས་ལོག་པ་མ་ཡིན་པ་ལས་ལོག་པ་ཡིན་ན། རྟག་པ་ཡིན་པ་ལས་ལོག་པ་མ་ཡིན་པ་ལས་ལོག་པ་ཡིན་པས་ཁྱབ་ཟེར་ན། འདུས་མ་བྱས་པའི་ཡེ་ཤེས་ཆོས་ཅན། རྟག་པ་ཡིན་པ་ལས་ལོག་པ་མ་ཡིན་པ་ལས་ལོག་པ་ཡིན་པར་ཐལ། རྟག་པ་ཡིན་པ་ལས་ལོག་པ་མ་ཡིན་པ་ལས་ལོག་པ་ཡིན་པ་ལས་ལོག་པ་མ་ཡིན་པ་ལས་ལོག་པ་ཡིན་པའི་ཕྱིར། ཁྱབ་པ་ཁས། མ་གྲུབ་ན། འདུས་མ་བྱས་པའི་ཡེ་ཤེས་ཆོས་ཅན། རྟག་པ་ཡིན་པ་ལས་ལོག་པ་མ་ཡིན་པ་ལས་ལོག་པ་ཡིན་པ་ལས་ལོག་པ་མ་ཡིན་པ་ལས་ལོག་པ་ཡིན་པར་ཐལ། རྟག་པ་ཡིན་པ་ལས་ལོག་པ་མ་ཡིན་པ་ལས་ལོག་པ་ཡིན་པ་ལས་ལོག་པ་ཡིན་པའི་ཕྱིར། མ་གྲུབ་ན། འདུས་མ་བྱས་པའི་ཡེ་ཤེས་ཆོས་ཅན། རྟག་པ་ཡིན་པ་ལས་ལོག་པ་མ་ཡིན་པ་ལས་ལོག་པ་ཡིན་པ་ལས་ལོག་པ་ཡིན་པར་ཐལ། རྟག་པ་ཡིན་པ་ལས་ལོག་པ་ཡིན་པ་ལས་ལོག་པ་ཡིན་པའི་ཕྱིར། མ་ཁྱབ་ན་ཁྱབ་བ་ཡོད་པར་ཐལ། རྟག་པ་ཡིན་པ་ལས་ལོག་པ་ཡིན་པ་ལས་ལོག་པ་དང༌། རྟག་པ་ཡིན་པ་ལས་ལོག་པ་མ་ཡིན་པ་ལས་ལོག་པ་ཡིན་པ་ལས་ལོག་པ་གཉིས་པོ་ཡིན་ཁྱབ་མཉམ་ཡིན་པའི་ཕྱིར། རྩ་བར་འདོད་ན། འདུས་མ་བྱས་པའི་ཡེ་ཤེས་ཆོས་ཅན། རྟག་པ་ཡིན་པ་ལས་ལོག་པ་མ་ཡིན་པ་ལས་ལོག་པ་མ་ཡིན་པར་ཐལ། རྟག་པ་ཡིན་པ་ལས་ལོག་པ་ཡིན་པ་ལས་ལོག་པ་ཡིན་པའི་ཕྱིར། མ་གྲུབ་ན། དེ་ཆོས་ཅན། རྟག་པ་ཡིན་པ་ལས་ལོག་པ་ཡིན་པ་ལས་ལོག་པ་ཡིན་པར་ཐལ། རྟག་པ་ཡིན་པ་ལས་ལོག་པ་མ་ཡིན་པའི་ཕྱིར། མ་གྲུབ་ན། འདུས་མ་བྱས་པའི་ཡེ་ཤེས་ཆོས་ཅན། རྟག་པ་ཡིན་པ་ལས་ལོག་པ་མ་ཡིན་པར་ཐལ། རྟག་པ་ཡིན་པའི་ཕྱིར། མ་གྲུབ་ན། འདུས་མ་བྱས་པའི་ཡེ་ཤེས་རྟག་པ་ཡིན་པར་ཐལ། འདུས་མ་བྱས་པའི་ཡེ་ཤེས་ཡོད་པའི་ཕྱིར། འགྲེལ་ཆེན་དྲི་མེད་འོད་ལས། སྐད་ཅིག་གཅིག་དང་དུ་མ་དང་བྲལ་བའི་ཡེ་ཤེས་ནི་རྒྱལ་བ་རྣམས་ཀྱིས་དེ་ཁོ་ན་ཉིད། ཅེས་གསུངས་པའི་ཕྱིར། ཁ་ཅིག་ཡོད་པ་ཡིན་ན་རྟག་པ་ཡིན་པས་ཁྱབ་ཟེར་ན། མི་སློབ་ལམ་ཆོས་ཅན། རྟག་པ་ཡིན་པར་ཐལ། ཡོད་པ་ཡིན་པའི་ཕྱིར། ཁྱབ་པ་ཁས། མ་གྲུབ་ན། མི་སློབ་ལམ་ཆོས་ཅན། ཡོད་པ་ཡིན་པར་ཐལ། ཆོས་ཐམས་ཅད་ཅིག་ཆར་དུ་མངོན་སུམ་གྱིས་རྟོགས་པའི་མཐར་ཐུག་གི་མཁྱེན་པ་ཡིན་པའི་ཕྱིར། རྩ་བར་འདོད་ན། མི་སློབ་ལམ་ཆོས་ཅན། རྟག་པ་མ་ཡིན་པར་ཐལ། ཟག་མེད་འདུས་བྱས་གང་ཞིག འགོག་བདེན་གྱི་བྲལ་རྒྱུ་ཡིན་པའི་ཕྱིར། མ་གྲུབ་ན། མི་སློབ་ལམ་ཆོས་ཅན། ཟག་མེད་འདུས་བྱས་སུ་གྱུར་བའི་འགོག་བདེན་གྱི་བྲལ་རྒྱུ་ཡིན་པར་ཐལ། ལམ་བདེན་ཡིན་པའི་ཕྱིར། མ་ཁྱབ་ན་ཁྱབ་པ་ཡོད་པར་ཐལ། དེ་གཉིས་མཚན་མཚོན་ཡིན་པའི་ཕྱིར། ཉ་ཊཱིཀ་ཡིད་ཀྱི་མུན་སེལ་ལས། ཟག་མེད་འདུས་བྱས་གང་ཞིག འགོག་བདེན་གྱི་བྲལ་རྒྱུ་དེ། ལམ་བདེན་གྱི་མཚན་ཉིད། ཅེས་གསུངས་པའི་ཕྱིར་རོ། །ཁ་ཅིག་ན་རེ། དངོས་པོ་མ་ཡིན་པ་ལས་ལོག་པ་མ་ཡིན་པ་ལས་ལོག་པ་ཡིན་ན། དངོས་པོ་མ་ཡིན་པ་ལས་ལོག་པ་དངོས་པོ་མ་ཡིན་པ་ལས་ལོག་པ་ཡིན་པས་ཁྱབ་ཟེར་ན། འཁོར་བ་ཆོས་ཅན། དངོས་པོ་མ་ཡིན་པ་ལས་ལོག་པ་དངོས་པོ་མ་ཡིན་པ་ལས་ལོག་པ་ཡིན་པར་ཐལ། དངོས་པོ་མ་ཡིན་པ་ལས་ལོག་པ་མ་ཡིན་པ་ལས་ལོག་པ་ཡིན་པའི་ཕྱིར། ཁྱབ་པ་ཁས། མ་གྲུབ་ན།འཁོར་བ་ཆོས་ཅན། དངོས་པོ་མ་ཡིན་པ་ལས་ལོག་པ་མ་ཡིན་པ་ལས་ལོག་པ་ཡིན་པར་ཐལ། དངོས་པོ་ཡིན་པའི་ཕྱིར། རྩ་བར་འདོད་ན། འཁོར་བ་ཆོས་ཅན། དངོས་པོ་མ་ཡིན་པ་ལས་ལོག་པ་དངོས་པོ་མ་ཡིན་པ་ལས་ལོག་པ་མ་ཡིན་པར་ཐལ། དངོས་པོ་མ་ཡིན་པ་ལས་ལོག་པ་དངོས་པོ་ཡིན་པ་ལས་ལོག་པ་ཡིན་པའི་ཕྱིར། མ་གྲུབ་ན། འཁོར་བ་ཆོས་ཅན། དངོས་པོ་མ་ཡིན་པ་ལས་ལོག་པ་དངོས་པོ་ཡིན་པ་ལས་ལོག་པ་ཡིན་པར་ཐལ། དངོས་པོ་མ་ཡིན་པ་ལས་ལོག་པ་དངོས་པོ་མ་ཡིན་པའི་ཕྱིར། མ་གྲུབ་ན། འཁོར་བ་ཆོས་ཅན། དངོས་པོ་མ་ཡིན་པ་ལས་ལོག་པ་དངོས་པོ་མ་ཡིན་པར་ཐལ། དངོས་པོ་མ་ཡིན་པ་ལས་ལོག་པ་དངོས་མེད་ཡིན་པའི་ཕྱིར། མ་གྲུབ་ན། འཁོར་བ་ཆོས་ཅན། ཁྱོད་མ་ཡིན་པ་ལས་ལོག་པ་དངོས་མེད་ཡིན་པར་ཐལ། ཁྱོད་མ་ཡིན་པ་ལས་ལོག་པ་ཡོད་པའི་ཕྱིར། ཡང་མངོན་ཚད་ཀྱི་ཐ་སྙད་ལྟར། འཁོར་བ་ཆོས་ཅན། ཁྱོད་མ་ཡིན་པ་ལས་ལོག་པ་རྟག་པ་ཡིན་པར་ཐལ། ཁྱོད་མ་ཡིན་པ་ལས་ལོག་པ་ཡོད་པའི་ཕྱིར་རོ། ། གཉིས་པ་རང་ལུགས་བཤད་པ།གཉིས་པ་རང་ལུགས་བཤད་པ་ལ། བདག་མེད་མ་ཡིན་པ་ལས་ལོག་པ་དང་བདག་མེད་གཉིས་དོན་གཅིག་ཡིན་ཁྱབ་མཉམ་ཡིན་ཏེ། བདག་མེད་མ་ཡིན་པ་ལས་ལོག་པ་ཡིན་ན། བདག་མེད་ཡིན་པས་ཁྱབ། བདག་མེད་ཡིན་ན་བདག་མེད་མ་ཡིན་པ་ལས་ལོག་པ་ཡིན་པས་ཁྱབ་པའི་ཕྱིར། བདག་མེད་ཡིན་པ་ལས་ལོག་པ་དང་བདག་མེད་མ་ཡིན་པ་གཉིས་ཡིན་ཁྱབ་མཉམ་ཡིན་ཏེ། བདག་མེད་ཡིན་པ་ལས་ལོག་པ་ཡིན་ན་བདག་མེད་མ་ཡིན་པས་ཁྱབ། བདག་མེད་མ་ཡིན་ན་བདག་མེད་ཡིན་པ་ལས་ལོག་པས་ཁྱབ་པའི་ཕྱིར། ཡོད་པ་མ་ཡིན་པ་ལས་ལོག་པ་དང་ཡོད་པ་གཉིས་ཡིན་ཁྱབ་མཉམ་ཡིན་ཏེ། ཡོད་པ་མ་ཡིན་པ་ལས་ལོག་པ་ཡིན་ན་ཡོད་པ་ཡིན་པས་ཁྱབ། ཡོད་པ་ཡིན་ན་ཡོད་པ་མ་ཡིན་པ་ལས་ལོག་པ་ཡིན་པས་ཁྱབ་པའི་ཕྱིར་རོ། །བདག་མེད་ཐམས་ཅད་ལ་རིགས་འགྲེའོ། །ཤེས་བྱ་ཡིན་པ་ལས་ལོག་པ་གཅིག་དང་གསུམ་སོགས་ཡ་རྣམས་མེད། གཉིས་དང་བཞི་སོགས་ཆ་རྣམས་ཡོད་པར་སྦྱོར་ཚུལ་ཤེས་པར་བྱའོ། ། གསུམ་པ་དེ་ལ་རྩོད་པ་སྤོང་བ་ལ། ཁ་ཅིག་ན་རེ། དོན་དམ་བདེན་པ་ཆོས་ཅན། ཡིན་མིན་གང་ཡང་མ་ཡིན་པར་ཐལ། ཡིན་མིན་སོགས་སྤྲོས་པ་མཐའ་དག་དང་བྲལ་བ་ཡིན་པའི་ཕྱིར་ན་མ་ཁྱབ། རྒྱས་པར་དབུ་མ་གཞན་སྟོང་གི་གཞུང་དུ་ཤེས་པར་བྱའོ།། །། བཞི་བ་ལྡོག་པ་ངོས་འཛིན་གྱི་རྣམ་བཞག་བཤད་པ།བཞི་བ་ལྡོག་པ་ངོས་འཛིན་གྱི་རྣམ་བཞག་བཤད་པ་ལ། ཚད་མ་རྣམ་འགྲེལ་ལས། གང་ཕྱིར་དངོས་ཀུན་རང་བཞིན་གྱི། །རང་རང་ངོ་བོ་ལ་གནས་ཕྱིར། །མཐུན་དངོས་གཞན་གྱི་དངོས་དག་ལས། །ལྡོག་པ་ལ་ནི་རྟེན་པ་ཅན། །ཞེས་པའི་གཞུང་འདི་བྱུང༌། དེའི་མཐའ་དཔྱད་པ་ལ། དགག་བཞག་སྤོང་གསུམ་ལས། དང་པོ་ལ། ཁ་ཅིག་ན་རེ། མི་རྟག་པའི་གཞི་ལྡོག་ཡིན་ན། མི་རྟག་པའི་ལྡོག་པ་ཡིན་པས་ཁྱབ་ཟེར་ན། གཟུགས་ཆོས་ཅན། མི་རྟག་པའི་ལྡོག་པ་ཡིན་པར་ཐལ། མི་རྟག་པའི་གཞི་ལྡོག་ཡིན་པའི་ཕྱིར། ཁྱབ་པ་ཁས། མ་གྲུབ་ན། གཟུགས་ཆོས་ཅན། མི་རྟག་པའི་གཞི་ལྡོག་ཡིན་པར་ཐལ། མི་རྟག་པའི་མཚན་གཞི་ཡིན་པའི་ཕྱིར། རྩ་བར་འདོད་ན། གཟུགས་ཆོས་ཅན། མི་རྟག་པའི་ལྡོག་པ་མ་ཡིན་པར་ཐལ། མི་རྟག་པ་དང་ཐ་དད་ཡིན་པའི་ཕྱིར། ཁྱབ་སྟེ། མི་རྟག་པའི་ལྡོག་པ་ལ་ནི་མི་རྟག་པ་ལས་གཞན་མེད་པ་གང་ཞིག མི་རྟག་པ་མི་རྟག་པ་དང་ཐ་དད་མ་ཡིན་པའི་ཕྱིར། ཡང་ཁ་ཅིག་ན་རེ། ཤེས་བྱའི་དོན་ལྡོག་ཡིན་ན་ཤེས་བྱའི་ལྡོག་པ་ཡིན་པས་ཁྱབ་ཟེར་ན། བློའི་ཡུལ་དུ་བྱ་རུང་ཆོས་ཅན། ཤེས་བྱའི་ལྡོག་པ་ཡིན་པར་ཐལ། ཤེས་བྱའི་དོན་ལྡོག་ཡིན་པའི་ཕྱིར། ཁྱབ་པ་ཁས། མ་གྲུབ་ན། བློའི་ཡུལ་དུ་བྱ་རུང་ཆོས་ཅན། ཤེས་བྱའི་དོན་ལྡོག་ཡིན་པར་ཐལ། ཤེས་བྱའི་མཚན་ཉིད་ཡིན་པའི་ཕྱིར། མ་གྲུབ་ན། བློའི་ཡུལ་དུ་བྱ་རུང་ཆོས་ཅན། ཤེས་བྱའི་མཚན་ཉིད་ཡིན་པར་ཐལ། གཏན་ཚིགས་རིགས་པའི་དོན་བསྡུས་ལས། མཚན་ཉིད་ནི་བློའི་ཡུལ་དུ་བྱ་རུང༌། ཞེས་གསུངས་པའི་ཕྱིར། རྩ་བར་འདོད་ན། བློའི་ཡུལ་དུ་བྱ་རུང་ཆོས་ཅན། ཤེས་བྱའི་ལྡོག་པ་མ་ཡིན་པར་ཐལ། ཤེས་བྱ་དང་གཅིག་མ་ཡིན་པའི་ཕྱིར། མ་གྲུབ་ན། བློའི་ཡུལ་དུ་བྱ་རུང་ཆོས་ཅན། ཤེས་བྱ་དང་གཅིག་མ་ཡིན་ཐལ། ཤེས་བྱ་དང་ཐ་དད་ཡིན་པའི་ཕྱིར། མ་གྲུབ་ན། བློའི་ཡུལ་དུ་བྱ་རུང་ཆོས་ཅན། ཤེས་བྱ་དང་ཐ་དད་ཡིན་པར་ཐལ། མཚན་ཉིད་ཡིན་པའི་ཕྱིར། མ་ཁྱབ་ན་ཁྱབ་པ་ཡོད་པར་ཐལ། ཤེས་བྱ་དང་གཅིག་ཡིན་ན་མཚོན་བྱ་ཡིན་དགོས་པའི་ཕྱིར། མ་གྲུབ་ན། ཤེས་བྱ་ཆོས་ཅན། ཁྱོད་དང་གཅིག་ཡིན་ན་མཚོན་བྱ་ཡིན་དགོས་པར་ཐལ། ཁྱོད་མཚོན་བྱ་ཡིན་པའི་ཕྱིར།ཁ་ཅིག་ན་རེ། རྣམ་མཁྱེན་དང་གཅིག་ཏུ་གྱུར་བའི་རྣམ་མཁྱེན་དེ་རྣམ་མཁྱེན་གྱི་ལྡོག་པ་ཡིན་ཟེར་ན། རྣམ་མཁྱེན་དང་གཅིག་ཏུ་གྱུར་བའི་རྣམ་མཁྱེན་ཆོས་ཅན། རྣམ་མཁྱེན་གྱི་ལྡོག་པ་མ་ཡིན་པར་ཐལ། རྣམ་མཁྱེན་དང་གཅིག་མ་ཡིན་པའི་ཕྱིར། མ་གྲུབ་ན། རྣམ་མཁྱེན་དང་གཅིག་ཏུ་གྱུར་བའི་རྣམ་མཁྱེན་ཆོས་ཅན། རྣམ་མཁྱེན་དང་གཅིག་མ་ཡིན་པར་ཐལ། རྣམ་མཁྱེན་དང་ཡིན་ཁྱབ་མཉམ་མ་ཡིན་པའི་ཕྱིར། མ་ཁྱབ་ན། རྣམ་མཁྱེན་ཆོས་ཅན། ཁྱོད་དང་གཅིག་ཡིན་ན་ཁྱོད་དང་ཡིན་ཁྱབ་མཉམ་ཡིན་པས་ཁྱབ་པར་ཐལ། ཁྱོད་གང་ཟག་གི་བདག་མེད་ཡིན་པའི་ཕྱིར། གོང་གི་མ་ཁྱབ་མཚམས་ཀྱི་རྟགས་མ་གྲུབ་ཟེར་ན། རྣམ་མཁྱེན་དང་གཅིག་ཏུ་གྱུར་བའི་རྣམ་མཁྱེན་ཆོས་ཅན། རྣམ་མཁྱེན་དང་ཡིན་ཁྱབ་མཉམ་མ་ཡིན་པར་ཐལ། རྣམ་མཁྱེན་ཡིན་ན་ཁྱོད་ཡིན་པས་ཁྱབ་པ་མེད་པའི་ཕྱིར། མ་གྲུབ་ན། སྟོན་པ་ཤཱཀ་ཐུབ་ཀྱི་རྣམ་མཁྱེན་ཆོས་ཅན། རྣམ་མཁྱེན་དང་གཅིག་ཏུ་གྱུར་བའི་རྣམ་མཁྱེན་ཡིན་པར་ཐལ། རྣམ་མཁྱེན་ཡིན་པའི་ཕྱིར། ཁྱབ་པ་ཁས། མ་གྲུབ་ན། སྟོན་པ་ཤཱཀ་ཐུབ་ཀྱི་རྣམ་མཁྱེན་ཆོས་ཅན། རྣམ་མཁྱེན་ཡིན་པར་ཐལ། ཆོས་ཐམས་ཅད་ཅིག་ཆར་དུ་མངོན་སུམ་གྱིས་རྟོགས་པའི་མཐར་ཐུག་གི་མཁྱེན་པ་ཡིན་པའི་ཕྱིར། མ་ཁྱབ་ན་ཁྱབ་བ་ཡོད་པར་ཐལ། ཆོས་ཐམས་ཅད་ཅིག་ཆར་དུ་མངོན་སུམ་གྱིས་རྟོགས་པའི་མཐར་ཐུག་གི་མཁྱེན་པ་དེ་རྣམ་མཁྱེན་གྱི་མཚན་ཉིད་ཡིན་པའི་ཕྱིར། མཁྱེན་པའི་སྐད་ཅིག་གཅིག་གིས་ཀྱང༌། །ཤེས་བྱའི་དཀྱིལ་འཁོར་ཀུན་ཁྱབ་ཅན། །ཞེས་གསུངས་པའི་ཕྱིར། གོང་དུ་འདོད་ན། སྟོན་པ་ཤཱཀ་ཐུབ་ཀྱི་རྣམ་མཁྱེན་ཆོས་ཅན། རྣམ་མཁྱེན་དང་གཅིག་ཏུ་གྱུར་བའི་རྣམ་མཁྱེན་མ་ཡིན་ཐལ། རྣམ་མཁྱེན་དང་གཅིག་མ་ཡིན་པའི་ཕྱིར། མ་གྲུབ་ན། སྟོན་པ་ཤཱཀ་ཐུབ་ཀྱི་རྣམ་མཁྱེན་ཆོས་ཅན། རྣམ་མཁྱེན་དང་གཅིག་མ་ཡིན་པར་ཐལ། རྣམ་མཁྱེན་དང་ཐ་དད་ཡིན་པའི་ཕྱིར། མ་གྲུབ་ན། དེ་ཆོས་ཅན། རྣམ་མཁྱེན་དང་ཐ་དད་ཡིན་པར་ཐལ། སྟོན་པ་ཤཱཀ་ཐུབ་ཀྱི་རྣམ་མཁྱེན་ཡིན་པའི་ཕྱིར། ཡང་ཁ་ཅིག་ན་རེ། མི་རྟག་པ་དང་གཅིག་དེ་མི་རྟག་པའི་ལྡོག་པ་ཡིན་ཟེར་ན། མི་རྟག་པ་དང་གཅིག་ཆོས་ཅན། མི་རྟག་པའི་ལྡོག་པ་མ་ཡིན་པར་ཐལ། མི་རྟག་པ་དང་གཅིག་མ་ཡིན་པའི་ཕྱིར། མ་གྲུབ་ན། མི་རྟག་པ་དང་གཅིག་ཆོས་ཅན། མི་རྟག་པ་དང་གཅིག་མ་ཡིན་པར་ཐལ། མི་རྟག་པ་དང་ཐ་དད་ཡིན་པའི་ཕྱིར། མ་གྲུབ་ན། མི་རྟག་པ་དང་གཅིག་ཆོས་ཅན། མི་རྟག་པ་དང་ཐ་དད་ཡིན་པར་ཐལ། དངོས་མེད་ཀྱི་ཆོས་ཡིན་པའི་ཕྱིར། མ་གྲུབ་ན། མི་རྟག་པ་ཆོས་ཅན། ཁྱོད་དང་གཅིག་དངོས་མེད་ཀྱི་ཆོས་ཡིན་པར་ཐལ། ཁྱོད་འདུས་བྱས་ཕྱིར། ཁ་ཅིག་ན་རེ། བདག་མེད་ཀྱི་ལྡོག་པ་དེ་བདག་མེད་ཀྱི་ལྡོག་པ་ཡིན་ཟེར་ན། བདག་མེད་ཀྱི་ལྡོག་པ་ཆོས་ཅན། བདག་མེད་པའི་ལྡོག་པ་མ་ཡིན་པར་ཐལ། བདག་མེད་དང་གཅིག་མ་ཡིན་པའི་ཕྱིར། མ་གྲུབ་ན། བདག་མེད་པའི་ལྡོག་པ་ཆོས་ཅན། བདག་མེད་དང་གཅིག་མ་ཡིན་པར་ཐལ། ཁྱོད་བདག་མེད་དང་ཡིན་ཁྱབ་མཉམ་མ་ཡིན་པའི་ཕྱིར། མ་གྲུབ་ན། བདག་མེད་པའི་ལྡོག་པ་ཆོས་ཅན། ཁྱོད་དང་བདག་མེད་གཉིས་ཡིན་ཁྱབ་མཉམ་མ་ཡིན་པར་ཐལ། བདག་མེད་ཡིན་ན་ཁྱོད་ཡིན་པས་ཁྱབ་པ་མེད་པའི་ཕྱིར། མ་གྲུབ་ན། སྡུག་བདེན་ཆོས་ཅན། བདག་མེད་ཀྱི་ལྡོག་པ་ཡིན་པར་ཐལ། བདག་མེད་ཡིན་པའི་ཕྱིར། ཁྱབ་པ་ཁས། འདོད་མི་ནུས་ཏེ། བདག་མེད་དང་ཐ་དད་ཡིན་པའི་ཕྱིར། ཁ་ཅིག་ན་རེ། འཆི་བ་མི་རྟག་པ་མ་ཡིན་པ་ལས་ལྡོག་ན་འཆི་བ་མི་རྟག་པའི་ལྡོག་པ་ཡིན་པས་ཁྱབ་ཟེར་ན། དམ་བཅའ་བའི་འཆི་བ་མི་རྟག་པ་ཆོས་ཅན། འཆི་བ་མི་རྟག་པའི་ལྡོག་པ་ཡིན་པར་ཐལ། འཆི་བ་མི་རྟག་པ་མ་ཡིན་པ་ལས་ལྡོག་པའི་ཕྱིར། ཁྱབ་པ་ཁས། མ་གྲུབ་ན། དམ་བཅའ་བའི་འཆི་བ་མི་རྟག་པ་ཆོས་ཅན། འཆི་བ་མི་རྟག་པ་མ་ཡིན་པ་ལས་ལྡོག་པར་ཐལ། འཆི་བ་མི་རྟག་པ་མ་ཡིན་པ་ལས་ལོག་པའི་ཕྱིར། མ་གྲུབ་ན། དམ་བཅའ་བའི་འཆི་བ་མི་རྟག་པ་ཆོས་ཅན། ཁྱོད་འཆི་བ་མི་རྟག་པ་མ་ཡིན་པ་ལས་ལོག་པར་ཐལ། ཁྱོད་འཆི་བ་མི་རྟག་པ་ཡིན་པའི་ཕྱིར། རྩ་བར་འདོད་ན། དམ་བཅའ་བའི་འཆི་བ་མི་རྟག་པ་ཆོས་ཅན། འཆི་བ་མི་རྟག་པའི་ལྡོག་པ་མ་ཡིན་པར་ཐལ། འཆི་བ་མི་རྟག་པ་དང་ཐ་དད་ལས་མི་ལྡོག་པའི་ཕྱིར། མ་ཁྱབ་ཟེར་ན། འཆི་བ་མི་རྟག་པ་ཆོས་ཅན། ཁྱོད་དང་ཐ་དད་ལས་མི་ལྡོག་ན་ཁྱོད་ཀྱི་ལྡོག་པ་མ་ཡིན་པས་ཁྱབ་པར་ཐལ། ཁྱོད་ཁྱོད་དང་ཐ་དད་ལས་ལྡོག་པའི་ཕྱིར། མ་གྲུབ་ན། དེ་ཆོས་ཅན། ཁྱོད་ཁྱོད་དང་ཐ་དད་ལས་ལྡོག་པར་ཐལ། ཁྱོད་གང་ཟག་གི་བདག་མེད་ཡིན་པའི་ཕྱིར། གོང་གི་མ་ཁྱབ་མཚམས་ཀྱི་རྟགས་མ་གྲུབ་ཟེར་ན། དམ་བཅའ་བའི་འཆི་བ་མི་རྟག་པ་ཆོས་ཅན། འཆི་བ་མི་རྟག་པ་དང་ཐ་དད་ལས་མི་ལྡོག་པར་ཐལ། འཆི་བ་མི་རྟག་པ་དང་ཐ་དད་ཡིན་པའི་ཕྱིར། ཁ་ཅིག་ན་རེ། སྐྱབས་འགྲོ་དང་ཐ་དད་ལས་ལྡོག་ན་སྐྱབས་འགྲོའི་ལྡོག་པ་ཡིན་པས་ཁྱབ་ཟེར་ན། རྟག་གཅིག་རང་དབང་གི་བདག་ཆོས་ཅན། སྐྱབས་འགྲོའི་ལྡོག་པ་ཡིན་པར་ཐལ། སྐྱབས་འགྲོ་དང་ཐ་དད་ལས་ལྡོག་པའི་ཕྱིར། ཁྱབ་པ་ཁས། མ་གྲུབ་ན། རྟག་གཅིག་རང་དབང་ཅན་གྱི་བདག་ཆོས་ཅན། སྐྱབས་འགྲོ་དང་ཐ་དད་ལས་ལྡོག་པར་ཐལ། སྐྱབས་འགྲོ་དང་ཐ་དད་མ་ཡིན་པའི་ཕྱིར། མ་གྲུབ་ན། རྟག་གཅིག་རང་དབང་གི་བདག་ཆོས་ཅན། སྐྱབས་འགྲོ་དང་ཐ་དད་མ་ཡིན་པར་ཐལ། སྐྱབས་འགྲོ་དང་ཐ་མི་དད་ཡིན་པའི་ཕྱིར། མ་གྲུབ་ན། རྟག་གཅིག་རང་དབང་གི་བདག་ཆོས་ཅན། སྐྱབས་འགྲོ་དང་ཐ་མི་དད་ཡིན་པར་ཐལ། མེད་པ་ཡིན་པའི་ཕྱིར། མ་གྲུབ་ན། རྟག་གཅིག་རང་དབང་གི་བདག་ཆོས་ཅན། མེད་ངེས་ཡིན་པར་ཐལ། གཞི་གྲུབ་ན་ཁྱོད་མེད་པ་ཡིན་པས་ཁྱབ་པའི་ཕྱིར་རོ། རྩ་བར་འདོད་ན། རྟག་གཅིག་རང་དབང་གི་བདག་ཆོས་ཅན། སྐྱབས་འགྲོའི་ལྡོག་པ་མ་ཡིན་པར་ཐལ། སྐྱབས་འགྲོ་དང་གཅིག་མ་ཡིན་པ་ལས་མི་ལྡོག་པའི་ཕྱིར། མ་ཁྱབ་ཟེར་ན། སྐྱབས་འགྲོ་ཆོས་ཅན། ཁྱོད་ཀྱི་ལྡོག་པ་ཡིན་ན་ཁྱོད་དང་གཅིག་མ་ཡིན་པ་ལས་ལྡོག་པས་ཁྱབ་བར་ཐལ། ཁྱོད་ཁྱོད་དང་གཅིག་མ་ཡིན་པ་ལས་ལྡོག་པའི་ཕྱིར། མ་གྲུབ་ན། སྐྱབས་འགྲོ་ཆོས་ཅན། ཁྱོད་ཁྱོད་དང་གཅིག་མ་ཡིན་པ་ལས་ལྡོག་པར་ཐལ། ཁྱོད་ཁྱོད་དང་གཅིག་མ་ཡིན་པ་ལས་ལོག་པའི་ཕྱིར། མ་གྲུབ་ན། སྐྱབས་འགྲོ་ཆོས་ཅན། ཁྱོད་ཁྱོད་དང་གཅིག་མ་ཡིན་པ་ལས་ལོག་པ་ཡིན་པར་ཐལ། ཁྱོད་ཁྱོད་དང་གཅིག་ཡིན་པའི་ཕྱིར། མ་གྲུབ་ན། སྐྱབས་འགྲོ་ཆོས་ཅན། ཁྱོད་ཁྱོད་དང་གཅིག་ཡིན་པར་ཐལ། གཞི་གྲུབ་པའི་ཕྱིར་རོ། ། གཉིས་པ་རང་ལུགས་བཤད་པ།གཉིས་པ་རང་ལུགས་བཤད་པ་ལ། ཆོས་དེ་དང་ཐ་དད་ལས་ལོག་པའི་ཆོས་དེ། ཆོས་དེའི་ལྡོག་པའི་མཚན་ཉིད། གཟུགས་དང་ཐ་དད་ལས་ལོག་པའི་ཆོས་དེ། གཟུགས་ཀྱི་ལྡོག་པའི་མཚན་ཉིད། མཚན་གཞི་ནི་གཟུགས་དེ་ཡིན་པའི་ཕྱིར། རྣམ་མཁྱེན་གྱི་ལྡོག་པ་བཞག་ཏུ་ཡོད་དེ། རྣམ་མཁྱེན་དེ་ཡིན་པའི་ཕྱིར། བདག་མེད་ཀྱི་ལྡོག་པ་བཞག་ཏུ་ཡོད་དེ། བདག་མེད་དེ་ཡིན་པའི་ཕྱིར། གཞན་ལ་རིགས་འགྲེ། བུམ་པའི་ལྡོག་པ་དང༌། བུམ་པ་དང་གཅིག་གཉིས་ཡིན་ཁྱབ་མཉམ་ཡིན་ཏེ། གཞི་གྲུབ་ན་ཁྱོད་ཁྱོད་ཀྱི་ལྡོག་པ་ཡིན་པས་ཁྱབ་པ་དང༌། གཞི་གྲུབ་ན། ཁྱོད་ཁྱོད་དང་གཅིག་ཡིན་པས་ཁྱབ་པའི་ཕྱིར། མ་གྲུབ་ན། གཞི་གྲུབ་ན་ཁྱོད་ཁྱོད་དང་གཅིག་ཡིན་པས་ཁྱབ་པར་ཐལ། གཞི་གྲུབ་ན་ཁྱོད་ཁྱོད་དང་ཐ་དད་མ་ཡིན་པས་ཁྱབ་པའི་ཕྱིར་རོ། ། གསུམ་པ་རྩོད་པ་སྤོང་བ།གསུམ་པ་རྩོད་པ་སྤོང་བ་ལ། ཁ་ཅིག་ན་རེ། སྒྲ་ལྟ་བུའི་ཆོས་གཅིག་ལ་སྒྲ་མ་ཡིན་པའི་ཤེས་བྱ་ཇི་སྙེད་ཡོད་པ་དེ་སྙད་ཀྱི་གྲངས་དང་མཉམ་པའི་དེ་དག་ལས་ལོག་པའི་ལྡོག་པ་ཡོད་པར་ཐལ། རྣམ་འགྲེལ་ལས། གང་ཕྱིར་དངོས་ཀུན་རང་བཞིན་གྱི། །རང་རང་ངོ་བོ་ལ་གནས་ཕྱིར། །མཐུན་དངོས་གཞན་གྱི་དངོས་དག་ལ། །ལྡོག་པ་ལ་ནི་རྟེན་པ་ཅན། །ཞེས་གསུངས་པའི་ཕྱིར། འདོད་ན། སྒྲ་ལ་ལྡོག་པ་དུ་མ་ཡོད་པར་ཐལ། སྒྲ་ལྟ་བུའི་ཆོས་གཅིག་ལ་སྒྲ་མ་ཡིན་པའི་ཤེས་བྱ་ཇི་སྙེད་ཡོད་པ་དེ་སྙེད་ཀྱི་གྲངས་དང་མཉམ་པའི་དེ་དག་ལས་ལོག་པའི་ལྡོག་པ་ཡོད་པའི་ཕྱིར་ན་མ་ཁྱབ་སྟེ། སྒྲ་ལ་རྟག་པ་ལས་ལྡོག་པ་དང༌། མ་བྱས་པ་ལས་ལྡོག་པ་སོགས་སྒྲ་མ་ཡིན་པའི་ཤེས་བྱ་ཇི་སྙེད་ཡོད་པ་དེ་དག་ལས་ལོག་པའི་ལྡོག་པ་མཐའ་ཡས་པ་ཡོད་ཀྱང་དེ་དག་སྒྲའི་ལྡོག་པ་ཡིན་པར་མ་གསུངས་པའི་ཕྱིར་རོ།། །། ལྔ་བ་གཅིག་དང་ཐ་དད་ཀྱི་རྣམ་བཞག་བཤད་པ།ལྔ་བ་གཅིག་དང་ཐ་དད་ཀྱི་རྣམ་བཞག་བཤད་པ་ལ། རྣམ་འགྲེལ་ལས། དེ་ཕྱིར་ཁྱད་པར་གང་གི་ཆོས། །གང་གི་གོ་བར་གྱུར་བ་དེ། །དེ་ལས་གཞན་གྱིས་ནུས་མ་ཡིན། །དེས་ན་ཐ་དད་རྣམ་པར་གནས། །ཞེས་ཐ་དད་ཀྱི་དོན་དང། གང་ཕྱིར་དངོས་ཀུན་རང་བཞིན་གྱི། །རང་རང་ངོ་བོ་ལ་གནས་ཕྱིར། །མཐུན་དངོས་གཞན་གྱི་དངོས་དག་ལ། །ལྡོག་པ་ལ་ནི་རྟེན་པ་ཅན། །ཞེས་པའི་རིགས་གཅིག་དང་ཐ་དད་ཀྱི་དོན་བཤད། དངོས་པོའི་ངོ་བོ་ཉིད་གཅིག་ཕྱིར། །ངོ་བོ་ཐ་དད་བློ་གང་བློས། །ཞེས་པས་ངོ་བོ་གཅིག་དང་ཐ་དད་ཀྱི་དོན་བཤད་པ་སོགས་སོ། །དེའི་མཐའ་དཔྱད་པ་ལ། དགག་བཞག་སྤོང་གསུམ་ལས།དང་པོ་ནི། ཁ་ཅིག་ན་རེ། གཞི་གྲུབ་ན་ངོ་བོ་གཅིག་དང་ཐ་དད་གང་རུང་ཡིན་པས་ཁྱབ་ཟེར་ན། དོན་དམ་བདེན་པ་དང་ཀུན་རྫོབ་བདེན་པ་གཉིས་ཆོས་ཅན། ངོ་བོ་གཅིག་དང་ཐ་དད་གང་རུང་ཡིན་པར་ཐལ། གཞི་གྲུབ་པའི་ཕྱིར། ཁྱབ་པ་ཁས། མ་གྲུབ་ན། དོན་དམ་བདེན་པ་དང་ཀུན་རྫོབ་བདེན་པ་གཉིས་ཆོས་ཅན། གཞི་གྲུབ་པར་ཐལ། ཤེས་བྱའི་དབྱེ་བ་ཡིན་པའི་ཕྱིར། མ་གྲུབ་ན། དོན་དམ་བདེན་པ་དང་ཀུན་རྫོབ་བདེན་པ་གཉིས་ཆོས་ཅན། ཤེས་བྱའི་དབྱེ་བ་ཡིན་པར་ཐལ། ཤེས་བྱ་ཁྱོད་ཀྱི་དབྱེ་གཞི་ཡིན་པའི་ཕྱིར། བདེན་གཉིས་གསལ་བའི་ཉི་མ་ལས། དབྱེ་གཞི་ནི་ཤེས་བྱ་ཙམ་མོ། །ཞེས་གསུངས་པའི་ཕྱིར། རྩ་བར་འདོད་ན། དོན་དམ་བདེན་པ་དང་ཀུན་རྫོབ་བདེན་པ་གཉིས་ཆོས་ཅན། ངོ་བོ་གཅིག་དང་ཐ་དད་གང་རུང་མ་ཡིན་པར་ཐལ། ངོ་བོ་གཅིག་མ་ཡིན་པ་གང་ཞིགངོ་བོ་ཐ་དད་ཀྱང་མ་ཡིན་པའི་ཕྱིར། རྟགས་དང་པོ་མ་གྲུབ་ན། དོན་དམ་བདེན་པ་དང་ཀུན་རྫོབ་བདེན་པ་གཉིས་ཆོས་ཅན། ངོ་བོ་གཅིག་མ་ཡིན་པར་ཐལ། ངོ་བོ་གཅིག་པ་བཀག་པའི་ཐ་དད་ཡིན་པའི་ཕྱིར། རྟགས་གཉིས་པ་མ་གྲུབ་ན། དོན་དམ་བདེན་པ་དང་ཀུན་རྫོབ་བདེན་པ་གཉིས་ཆོས་ཅན། ངོ་བོ་ཐ་དད་མ་ཡིན་པར་ཐལ། གཅིག་ཤོས་ཆོས་ཅན་དང་གཅིག་ཤོས་ཆོས་ཉིད་ཡིན་པའི་ཕྱིར། ཁ་ཅིག་ན་རེ། བདག་ཉིད་གཅིག་ཡིན་ན་གཅིག་ཡིན་པས་ཁྱབ་ཟེར་ན། བྱས་མི་རྟག་གཉིས་ཆོས་ཅན། གཅིག་ཡིན་པར་ཐལ། བདག་ཉིད་གཅིག་ཡིན་པའི་ཕྱིར། ཁྱབ་པ་ཁས། མ་གྲུབ་ན། བྱས་མི་རྟག་གཉིས་ཆོས་ཅན། བདག་ཉིད་གཅིག་ཡིན་པར་ཐལ། ངོ་བོ་གཅིག་ཡིན་པའི་ཕྱིར། མ་ཁྱབ་ན་ཁྱབ་པ་ཡོད་པར་ཐལ། བདག་ཉིད་གཅིག་པ་ངོ་བོ་གཅིག་པ་རང་བཞིན་གཅིག་པ་རྣམས་དོན་གཅིག་ཡིན་ཁྱབ་མཉམ་ཡིན་པའི་ཕྱིར། རྩ་བར་འདོད་ན། བྱས་མི་རྟག་གཉིས་ཆོས་ཅན། གཅིག་མ་ཡིན་པར་ཐལ། ཕན་ཚུན་ཐ་དད་ཡིན་པའི་ཕྱིར། མ་གྲུབ་ན། བྱས་མི་རྟག་གཉིས་ཕན་ཚུན་ཐ་དད་ཡིན་པར་ཐལ། བྱས་པ་མི་རྟག་པ་དང་ཐ་དད། མི་རྟག་པ་བྱས་པ་དང་ཐ་དད་ཡིན་པའི་ཕྱིར། ཁ་ཅིག་ན་རེ། ངོ་བོ་གཅིག་ཡིན་ན་རྫས་གཅིག་ཡིན་པས་ཁྱབ་ཟེར་ན། ཡོད་པ་དང་ཤེས་བྱ་གཉིས་ཆོས་ཅན། རྫས་གཅིག་ཡིན་པར་ཐལ། ངོ་བོ་གཅིག་ཡིན་པའི་ཕྱིར། ཁྱབ་པ་ཁས། མ་གྲུབ་ན། ཡོད་པ་དང་ཤེས་བྱ་གཉིས་ཆོས་ཅན། ངོ་བོ་གཅིག་ཡིན་པར་ཐལ། རང་བཞིན་གཅིག་ཡིན་པའི་ཕྱིར། མ་གྲུབ་ན། ཡོད་པ་དང་ཤེས་བྱ་གཉིས་རང་བཞིན་གཅིག་ཡིན་པར་ཐལ། ཡོད་པ་ཤེས་བྱ་དང་རང་བཞིན་གཅིག་ཡིན་པ་གང་ཞིག ཤེས་བྱ་ཡོད་པ་དང་བདག་ཉིད་གཅིག་ཡིན་པའི་ཕྱིར། རྟགས་དང་པོ་མ་གྲུབ་ན། ཡོད་པ་ཆོས་ཅན། ཤེས་བྱ་དང་རང་བཞིན་གཅིག་ཡིན་པར་ཐལ། དོན་དམ་མ་ཡིན་པའི་ཤེས་བྱ་ཡིན་པའི་ཕྱིར། རྟགས་གཉིས་པ་མ་གྲུབ་ན། ཤེས་བྱ་ཆོས་ཅན། ཡོད་པ་དང་རང་བཞིན་གཅིག་ཡིན་པར་ཐལ། དོན་དམ་མ་ཡིན་པའི་ཡོད་པ་ཡིན་པའི་ཕྱིར། །རྩ་བར་འདོད་ན། ཡོད་པ་དང་ཤེས་བྱ་གཉིས་ཆོས་ཅན། རྫས་གཅིག་མ་ཡིན་པར་ཐལ། རྫས་མ་ཡིན་པའི་ཕྱིར། མ་གྲུབ་ན། ཡོད་པ་དང་ཤེས་བྱ་གཉིས་ཆོས་ཅན། རྫས་མ་ཡིན་པར་ཐལ། བཏགས་ཡོད་འབའ་ཞིག་པ་ཡིན་པའི་ཕྱིར། མ་ཁྱབ་ན་ཁྱབ་པ་ཡོད་པར་ཐལ། བཏགས་ཡོད་འབའ་ཞིག་པ་དང་རྫས་གཉིས་འགལ་བའི་ཕྱིར། ཁ་ཅིག་ན་རེ། གཟུགས་དང་རྫས་གཅིག་ཡིན་ན་རྫས་གཅིག་ཡིན་པས་ཁྱབ་ཟེར་ན། ཀ་བ་དང་བུམ་པ་གཉིས་ཆོས་ཅན། རྫས་གཅིག་ཡིན་པར་ཐལ། གཟུགས་དང་རྫས་གཅིག་ཡིན་པའི་ཕྱིར། ཁྱབ་པ་ཁས། མ་གྲུབ་ན། ཀ་བ་དང་བུམ་པ་གཉིས་ཆོས་ཅན། གཟུགས་དང་རྫས་གཅིག་ཡིན་པར་ཐལ། གཟུགས་ཀྱི་བྱེ་བྲག་ཡིན་པའི་ཕྱིར། རྩ་བར་འདོད་ན། ཀ་བ་དང་བུམ་པ་གཉིས་ཆོས་ཅན། རྫས་གཅིག་མ་ཡིན་པར་ཐལ། རྫས་ཐ་དད་ཡིན་པའི་ཕྱིར། མ་གྲུབ་ན། ཀ་བ་དང་བུམ་པ་གཉིས་ཆོས་ཅན། རྫས་ཐ་དད་ཡིན་པར་ཐལ། རྫས་ཡོད་གང་ཞིག རྫས་ཕན་ཚུན་འབྲེལ་མེད་དོན་གཞན་ཡིན་པའི་ཕྱིར། ཁ་ཅིག་ན་རེ། ཤེས་བྱ་དང་བདག་ཉིད་གཅིག་ཡིན་ན་བདག་ཉིད་གཅིག་ཡིན་པས་ཁྱབ་ཟེར་ན། ཀ་བ་དང་བུམ་པ་གཉིས་ཆོས་ཅན། བདག་ཉིད་གཅིག་ཡིན་པར་ཐལ། ཤེས་བྱ་དང་བདག་ཉིད་གཅིག་ཡིན་པའི་ཕྱིར། ཁྱབ་པ་ཁས། མ་གྲུབ་ན། ཀ་བ་དང་བུམ་པ་གཉིས་ཆོས་ཅན། ཤེས་བྱ་དང་བདག་ཉིད་གཅིག་ཡིན་པར་ཐལ། ཤེས་བྱ་དང་བདག་ཉིད་སོ་སོ་མ་ཡིན་པའི་གཟུགས་ཡིན་པའི་ཕྱིར། ཁྱབ་སྟེ། ཤེས་བྱ་དང་བདག་ཉིད་སོ་སོ་མ་ཡིན་པའི་ཆོས་དེ་ཤེས་བྱ་དང་བདག་ཉིད་གཅིག་གི་མཚན་ཉིད་ཡིན་པའི་ཕྱིར། རྩ་བར་འདོད་ན། ཀ་བ་དང་བུམ་པ་གཉིས་ཆོས་ཅན། བདག་ཉིད་གཅིག་མ་ཡིན་པར་ཐལ། འབྲེལ་མེད་དོན་གཞན་ཡིན་པའི་ཕྱིར། ཁ་ཅིག་ན་རེ། རིགས་གཅིག་ཡིན་ན་བདག་ཉིད་གཅིག་ཡིན་པས་ཁྱབ་ཟེར་ན། བ་ལང་དཀར་ཟལ་དང་ནག་རྒུར་གཉིས་ཆོས་ཅན། བདག་ཉིད་གཅིག་ཡིན་པར་ཐལ། རིགས་གཅིག་ཡིན་པའི་ཕྱིར། ཁྱབ་པ་ཁས། མ་གྲུབ་ན། བ་ལང་དཀར་ཟལ་དང་ནག་རྒུར་གཉིས་ཆོས་ཅན། རིགས་གཅིག་ཡིན་པར་ཐལ། ལྡོག་པ་རིགས་གཅིག་ཡིན་པའི་ཕྱིར། མ་གྲུབ་ན། བ་ལང་དཀར་ཟལ་དང་ནག་རྒུར་གཉིས་ཆོས་ཅན། ལྡོག་པ་རིགས་གཅིག་ཡིན་པར་ཐལ། གང་ཟག་གང་དང་གང་གིས་ཡིད་གཏད་པས་མཐོང་ཙམ་ཉིད་ནས་འདི་དང་འདི་འདྲའོ་སྙམ་པའི་བློ་ངང་གིས་སྐྱེད་ནུས་པའི་ཆོས་ཡིན་པའི་ཕྱིར། རྩ་བར་འདོད་ན། བ་ལང་དཀར་ཟལ་དང་ནག་རྒུར་གཉིས་ཆོས་ཅན། བདག་ཉིད་གཅིག་མ་ཡིན་པར་ཐལ། བདག་ཉིད་ཐ་དད་ཡིན་པའི་ཕྱིར། མ་གྲུབ་ན། བ་ལང་དཀར་ཟལ་དང་ནག་རྒུར་གཉིས་ཆོས་ཅན། བདག་ཉིད་ཐ་དད་ཡིན་པར་ཐལ། ཕན་ཚུན་འབྲེལ་མེད་དོན་གཞན་ཡིན་པའི་ཕྱིར། ཁ་ཅིག་ན་རེ། ཤེས་བྱར་རིགས་གཅིག་ཡིན་ན་རིགས་གཅིག་ཡིན་པས་ཁྱབ་ཟེར་ན། རྟ་དང་བ་ལང་གཉིས་ཆོས་ཅན། རིགས་གཅིག་ཡིན་པར་ཐལ། ཤེས་བྱར་རིགས་གཅིག་ཡིན་པའི་ཕྱིར། ཁྱབ་པ་ཁས། མ་གྲུབ་ན། རྟ་དང་བ་ལང་གཉིས་ཆོས་ཅན། ཤེས་བྱར་རིགས་གཅིག་པར་ཐལ། ཁྱོད་ཤེས་བྱ་ཡིན་པར་རིགས་འདྲ་བའི་ཕྱིར། རྩ་བར་འདོད་ན། རྟ་དང་བ་ལང་གཉིས་ཆོས་ཅན། རིགས་གཅིག་མ་ཡིན་པར་ཐལ། རིགས་ཐ་དད་ཡིན་པའི་ཕྱིར། མ་གྲུབ་ན། རྟ་དང་བ་ལང་གཉིས་ཆོས་ཅན། རིགས་ཐ་དད་ཡིན་པར་ཐལ། རིགས་མི་མཐུན་པ་ཡིན་པའི་ཕྱིར། མ་གྲུབ་ན། དེ་ཆོས་ཅན། རིགས་མི་མཐུན་པ་ཡིན་པར་ཐལ། རིགས་མི་འདྲ་བ་ཡིན་པའི་ཕྱིར། མ་གྲུབ་ན།སྤྱིར་རྟ་དང་བ་ལང་གཉིས་རིགས་མི་འདྲ་བར་ཡིན་པར་ཐལ། དེ་གཉིས་རིགས་མི་འདྲ་བར་མི་འཇོག་ན་གཞན་རིགས་མི་འདྲ་བ་འཇོག་རྒྱུ་མི་རྙེད་པའི་ཕྱིར། ཁ་ཅིག་ན་རེ། རིགས་གཅིག་ཡིན་ན་སྒྲུབ་པར་གྱུར་བའི་ལྡོག་པ་རིགས་གཅིག་ཡིན་པས་ཁྱབ་ཟེར་ན། བུམ་པའི་བདག་མེད་དང་ཀ་བའི་བདག་མེད་གཉིས་ཆོས་ཅན། སྒྲུབ་པར་གྱུར་བའི་ལྡོག་པ་རིགས་གཅིག་ཡིན་པར་ཐལ། རིགས་གཅིག་ཡིན་པའི་ཕྱིར། ཁྱབ་པ་ཁས། མ་གྲུབ་ན། བུམ་པའི་བདག་མེད་དང་ཀ་བའི་བདག་མེད་གཉིས་ཆོས་ཅན། རིགས་གཅིག་ཡིན་པར་ཐལ། དགག་བྱ་རིགས་གཅིག་ཡིན་པའི་ཕྱིར། མ་གྲུབ་ན། བུམ་པའི་བདག་མེད་དང་ཀ་བའི་བདག་མེད་གཉིས་ཆོས་ཅན། དགག་བྱ་རིགས་གཅིག་ཡིན་པར་ཐལ། ཐ་དད་གང་ཞིག དགག་བྱ་རིགས་གཅིག་བཀག་ཙམ་གྱི་མེད་དགག་ཡིན་པའི་ཕྱིར། རྟགས་དང་པོ་སླ། གཉིས་པ་མ་གྲུབ་ན། བུམ་པའི་བདག་མེད་དང་ཀ་བའི་བདག་མེད་གཉིས་ཆོས་ཅན། དགག་བྱ་རིགས་གཅིག་བཀག་ཙམ་གྱི་མེད་དགག་ཡིན་པར་ཐལ། དགག་བྱ་བདག་བཀག་ཙམ་གྱི་མེད་དགག་ཡིན་པའི་ཕྱིར། མ་གྲུབ་ན། བུམ་པའི་བདག་མེད་དང་ཀ་བའི་བདག་མེད་གཉིས་ཆོས་ཅན།དགག་བྱ་བདག་བཀག་ཙམ་གྱི་མེད་དགག་ཡིན་པར་ཐལ། ཁྱོད་ཀྱི་དགག་བྱ་བདག་མི་འཇོག་ན་གཞན་འཇོག་རྒྱུ་མེད་པ་གང་ཞིག ཁྱོད་མེད་དགག་ཡིན་པའི་ཕྱིར། རྩ་བར་འདོད་ན། བུམ་པའི་བདག་མེད་དང་ཀ་བའི་བདག་མེད་གཉིས་ཆོས་ཅན། སྒྲུབ་པར་གྱུར་བའི་ལྡོག་པ་རིགས་གཅིག་མ་ཡིན་པར་ཐལ། སྒྲུབ་པ་མ་ཡིན་པའི་ཕྱིར། མ་གྲུབ་ན། བུམ་པའི་བདག་མེད་དང་ཀ་བའི་བདག་མེད་གཉིས་ཆོས་ཅན། སྒྲུབ་པ་མ་ཡིན་པར་ཐལ། དགག་པ་ཡིན་པའི་ཕྱིར། མ་གྲུབ་ན། དེ་ཆོས་ཅན། དགག་པ་ཡིན་པར་ཐལ། མེད་དགག་ཡིན་པའི་ཕྱིར། གཞན་ཡང་བུམ་པའི་ནམ་མཁའ་དང་ཁང་བའི་ནམ་མཁའ་ལ་རིགས་བསྒྲེ་བར་བྱའོ། །ཁ་ཅིག་གྲུབ་བདེ་གཅིག་ཡིན་ན། གྲུབ་བདེ་རྫས་གཅིག་ཡིན་པས་ཁྱབ་ཟེར་ན། བུ་རམ་གྱི་དྲི་རོ་གཉིས་ཆོས་ཅན། གྲུབ་བདེ་རྫས་གཅིག་ཡིན་པར་ཐལ། གྲུབ་བདེ་གཅིག་ཡིན་པའི་ཕྱིར། ཁྱབ་པ་ཁས། མ་གྲུབ་ན། བུ་རམ་གྱི་དྲི་རོ་གཉིས་ཆོས་ཅན། གྲུབ་བདེ་གཅིག་ཡིན་པར་ཐལ། གྲུབ་པ་དུས་མཉམ་གནས་པ་དུས་མཉམ་ལྡོག་པ་དུས་མཉམ་ཡིན་པའི་ཕྱིར། མ་གྲུབ་ན། བུ་རམ་ཆོས་ཅན། ཁྱོད་ཀྱི་དྲི་རོ་གཉིས་གྲུབ་པ་དུས་མཉམ་གནས་པ་དུས་མཉམ་ལྡོག་པ་དུས་མཉམ་ཡིན་པར་ཐལ། ཁྱོད་རྡུལ་རྫས་བརྒྱད་འདུས་ཀྱི་གོང་བུ་ཡིན་པའི་ཕྱིར། རྩ་བར་འདོད་ན། བུ་རམ་གྱི་དྲི་རོ་གཉིས་ཆོས་ཅན། གྲུབ་བདེ་རྫས་གཅིག་མ་ཡིན་པར་ཐལ། རྫས་གཅིག་མ་ཡིན་པའི་ཕྱིར། མ་གྲུབ་ན། བུ་རམ་གྱི་དྲི་རོ་གཉིས་ཆོས་ཅན། རྫས་གཅིག་མ་ཡིན་པར་ཐལ། རྫས་ཐ་དད་ཡིན་པའི་ཕྱིར། མ་གྲུབ་ན། བུ་རམ་ཆོས་ཅན། ཁྱོད་ཀྱི་དྲི་རོ་གཉིས་རྫས་ཐ་དད་ཡིན་པར་ཐལ། ཁྱོད་རྡུལ་རྫས་བརྒྱད་འདུས་ཀྱི་གོང་བུ་ཡིན་པའི་ཕྱིར། ཁ་ཅིག་ན་རེ། རྫས་རིགས་གཅིག་ཡིན་ན་རྫས་གཅིག་ཡིན་པས་ཁྱབ་ཟེར་ན། ཉེར་ལེན་ནས་ལྡོག་གཅིག་ལས་སྐྱེས་པའི་ནས་འབྲུ་ཆེ་ཆུང་གཉིས་ཆོས་ཅན། རྫས་གཅིག་ཡིན་པར་ཐལ། རྫས་རིགས་གཅིག་ཡིན་པའི་ཕྱིར། ཁྱབ་པ་ཁས། མ་གྲུབ་ན། ཉེར་ལེན་ནས་ལྡོག་གཅིག་ལས་སྐྱེས་པའི་ནས་འབྲུ་ཆེ་ཆུང་གཉིས་ཆོས་ཅན། རྫས་རིགས་གཅིག་ཡིན་པར་ཐལ། ཐ་དད་གང་ཞིག རང་གི་ཉེར་ལེན་གཅིག་ལས་སྐྱེས་པ་ཡིན་པའི་ཕྱིར། མ་ཁྱབ་ན་ཁྱབ་པ་ཡོད་པར་ཐལ། ཆོས་དེ་གཉིས་རྫས་རིགས་གཅིག་མི་གཅིག་ཉེར་ལེན་གཅིག་མི་གཅིག་ལ་བྱེད་དགོས་པའི་ཕྱིར། རྩ་བར་འདོད་ན། ཉེར་ལེན་ནས་ལྡོག་གཅིག་ལས་སྐྱེས་པའི་ནས་འབྲུ་ཆེ་ཆུང་གཉིས་ཆོས་ཅན། རྫས་གཅིག་མ་ཡིན་པར་ཐལ། བདག་ཉིད་གཅིག་མ་ཡིན་པའི་ཕྱིར། མ་གྲུབ་ན། དེ་གཉིས་ཆོས་ཅན། བདག་ཉིད་གཅིག་མ་ཡིན་པར་ཐལ། ངོ་བོ་ཐ་དད་ཡིན་པའི་ཕྱིར། མ་གྲུབ་ན། དེ་གཉིས་ཆོས་ཅན། ངོ་བོ་ཐ་དད་ཡིན་པར་ཐལ། ཕན་ཚུན་འབྲེལ་མེད་དོན་གཞན་ཡིན་པའི་ཕྱིར་རོ། ། གཉིས་པ་རང་ལུགས་བཤད་པ།གཉིས་པ་རང་ལུགས་བཤད་པ་ལ། གཅིག་གི་མཚན་ཉིད་ཡོད་དེ། སོ་སོ་བ་མ་ཡིན་པའི་ཆོས་དེ་ཡིན་པའི་ཕྱིར། ཡང་ན། གཏན་ཚིགས་རིགས་པའི་དོན་བསྡུས་ལས། གཅིག་དང་ཐ་དད་ལ། མཚན་ཉིད་ནི་རིམ་པ་ལྟར། ཆོས་གང་མིང་གཅིག་ལ་བརྟེན་ནས་དོན་སྤྱི་གཅིག་ཏུ་འཆར་དུ་རུང་བ་དང༌། མིང་སོ་སོ་ལ་བརྟེན་ནས་དོན་སྤྱི་སོ་སོར་འཆར་དུ་རུང་བའོ། །ཞེས་གསུངས་པའི་ཕྱིར། གཅིག་ལ་མིང་རིགས་ཀྱི་དབྱེ་ན། རང་ལྡོག་གཅིག་པ་དང༌། ངོ་བོ་གཅིག་པ་དང༌། རིགས་གཅིག་པ་དང་གསུམ། རང་ལྡོག་གཅིག་གི་མཚན་ཉིད་ཡོད་དེ། རང་ལྡོག་སོ་སོ་བ་མ་ཡིན་པའི་ཆོས་དེ་ཡིན་པའི་ཕྱིར། མཚན་གཞི་ནི། ལམ་དང་ལམ་ལྟ་བུའོ། ། མི་རྟག་པ་དང་རང་ལྡོག་གཅིག་གི་མཚན་ཉིད་ཡོད་དེ། མི་རྟག་པ་དང་རང་ལྡོག་སོ་སོ་བ་མ་ཡིན་པའི་ཆོས་དེ་ཡིན་པའི་ཕྱིར། མཚན་གཞི་ནི་ཡོད་དེ། མི་རྟག་པ་དེ་ཡིན་པའི་ཕྱིར། དེས་གཞན་ལ་ཡང་རིགས་བསྒྲེ། ངོ་བོ་གཅིག་གི་མཚན་ཉིད་ཡོད་དེ། ངོ་བོ་སོ་སོ་བ་མ་ཡིན་པའི་ཆོས་ཅན་དེ་ཡིན་པའི་ཕྱིར། ངོ་བོ་གཅིག་པ་དང༌། རང་བཞིན་གཅིག་པ་དང༌། བདག་ཉིད་གཅིག་པ་རྣམས་དོན་གཅིག་གོ །ཤེས་བྱ་དང་ངོ་བོ་གཅིག་གི་མཚན་ཉིད་ཡོད་དེ། ཤེས་བྱ་དང་ངོ་བོ་སོ་སོ་བ་མ་ཡིན་པའི་ཆོས་དེ་ཡིན་པའི་ཕྱིར། མཚན་གཞི་ནི་ཡོད་དེ།ཡོད་པ་དེ་ཡིན་པའི་ཕྱིར། གཞན་ལ་རིགས་བསྒྲེ་བར་བྱ། རྫས་གཅིག་གི་མཚན་ཉིད་ཡོད་དེ། རྫས་ཀྱི་སྒོ་ནས་སོ་སོ་བ་མ་ཡིན་པར་སྐྱེས་པའི་རྫས་དེ་ཡིན་པའི་ཕྱིར། མཚན་གཞི་ནི་ཡོད་དེ། བུམ་པ་དང་བུམ་པའི་མཆུ་གཉིས་དེ་ཡིན་པའི་ཕྱིར། རིགས་གཅིག་གི་མཚན་ཉིད་ཡོད་དེ། རིགས་སོ་སོ་བ་མ་ཡིན་པའི་ཆོས་དེ་ཡིན་པའི་ཕྱིར། རིགས་གཅིག་ལ་དབྱེ་ན། ལྡོག་པ་རིགས་གཅིག་པ་དང༌། རྫས་རིགས་གཅིག་པ་གཉིས་ཡོད་པའི་ཕྱིར། ལྡོག་པ་རིགས་གཅིག་པ་ལ་དབྱེ་ན་གཉིས་ཡོད་དེ། སྒྲུབ་པར་གྱུར་བའི་ལྡོག་པ་རིགས་གཅིག་པ་དང༌། དགག་པར་གྱུར་བའི་ལྡོག་པ་རིགས་གཅིག་པ་གཉིས་ཡོད་པའི་ཕྱིར། སྒྲུབ་པར་གྱུར་བའི་ལྡོག་པ་རིགས་གཅིག་གི་མཚན་ཉིད་ཡོད་དེ། གང་ཟག་གང་དང་གང་གིས་ཡིད་གཏད་པས་མཐོང་ཙམ་ཉིད་ནས་འདི་དང་འདི་འདྲའོ་སྙམ་པའི་བློ་ངང་གིས་བསྐྱེད་ནུས་པའི་ཆོས་དེ་ཡིན་པའི་ཕྱིར། མཚན་གཞི་ནི་ཡོད་དེ། གསེར་བུམ་ཟངས་བུམ་གཉིས་དེ་ཡིན་པའི་ཕྱིར། སྒྲུབ་པར་གྱུར་བའི་ལྡོག་པ་རིགས་གཅིག་ལ་དབྱེ་ན་གསུམ་ཡོད་དེ། ཤེས་པར་གྱུར་བའི་ལྡོག་པ་རིགས་གཅིག་པ་དང༌། གཟུགས་སུ་གྱུར་བའི་ལྡོག་པ་རིགས་གཅིག་པ་དང༌། ལྡན་མིན་འདུ་བྱེད་དུ་གྱུར་བའི་ལྡོག་པ་རིགས་གཅིག་པ་དང་གསུམ་ཡོད་པའི་ཕྱིར། དང་པོ་ཡོད་དེ། ལྷས་སྦྱིན་གྱི་མིག་ཤེས་དང༌། མཆོད་སྦྱིན་གྱི་མིག་ཤེས་གཉིས་དེ་ཡིན་པའི་ཕྱིར། གཉིས་པ་ཡོད་དེ། ཙནྡན་གྱི་ཀ་བ་དང༌། ཤུག་པའི་ཀ་བ་གཉིས་དེ་ཡིན་པའི་ཕྱིར། གསུམ་པ་ཡོད་དེ། དམ་བཅའ་བའི་འཆི་བ་དང༌། རིགས་ལུང་བའི་འཆི་བ་གཉིས་དེ་ཡིན་པའི་ཕྱིར། དགག་པར་གྱུར་བའི་ལྡོག་པ་རིགས་གཅིག་གི་མཚན་ཉིད་ཡོད་དེ། དགག་བྱ་རིགས་གཅིག་བཀག་པའི་ཐ་དད་པའི་དགག་པ་དེ་ཡིན་པའི་ཕྱིར། རྫས་རིགས་གཅིག་གི་མཚན་ཉིད་ཡོད་དེ། རང་གི་ཉེར་ལེན་གཅིག་ལས་སྐྱེས་པའི་ཐ་དད་པའི་འདུས་བྱས་དེ་ཡིན་པའི་ཕྱིར། རྫས་རིགས་གཅིག་ལ་དབྱེ་ན་གསུམ་ཡོད་དེ། ཤེས་པར་གྱུར་བའི་རྫས་རིགས་གཅིག་པ་དང༌། གཟུགས་སུ་གྱུར་བའི་རྫས་རིགས་གཅིག་པ་དང༌། ལྡན་མིན་འདུ་བྱེད་དུ་གྱུར་བའི་རྫས་རིགས་གཅིག་པ་དང་གསུམ་ཡོད་པའི་ཕྱིར། དང་པོ་ཡོད་དེ། ཉེར་ལེན་གཅིག་ལས་སྐྱེས་པའི་རྣམ་ཤེས་ཐ་དད་པ་གཉིས་དེ་ཡིན་པའི་ཕྱིར། གཉིས་པ་ཡོད་དེ། རང་གི་ཉེར་ལེན་འཇིམ་གོང་གཅིག་ལས་སྐྱེས་པའི་རྫ་བུམ་དཀར་དམར་གཉིས་དེ་ཡིན་པའི་ཕྱིར། གསུམ་པ་ཡོད་དེ། སྡུག་བདེན་གྱི་མི་རྟག་པ་དང་སྡུག་བདེན་གྱི་བྱས་པ་ལྟ་བུའོ། །ཐ་དད་ཀྱི་མཚན་ཉིད་ཡོད་དེ། སོ་སོ་བའི་ཆོས་དེ་ཡིན་པའི་ཕྱིར། མཚན་གཞི་ནི་ཡོད་དེ། བདེན་པ་གཉིས་དེ་ཡིན་པའི་ཕྱིར། ཆོས་ཀྱི་ཤན་འབྱེད་ལས། ཐ་དད་ཀྱང་ཡིན་པའི་ཕྱིར་ཏེ། ངོ་བོ་གཅིག་པ་བཀག་པའི་ཐ་དད་ཡིན་ཏེ། དེ་ཉིད་དང་གཞན་དུ་བརྗོད་དུ་མེད་པའི་ཐ་དད་དོ། །ཞེས་གསུངས་སོ། །ཐ་དད་ལ་དབྱེ་ན་གསུམ་མམ་བཞི་ཡོད་དེ། ཆོས་ཀྱི་ཤན་འབྱེད་ལས། གཞུང་ལུགས་རྣམས་ཀྱི་སྐབས་སུ་ཐ་དད་ཀྱི་རྣམ་བཞག་གསུམ་མམ་བཞི་གསུངས་པའི། ཞེས་པ་ནས། ངོ་བོ་ཐ་དད་པ་དང༌། ངོ་བོ་གཅིག་ལ་ལྡོག་པ་ཐ་དད་པ་དང༌། མིང་གི་རྣམ་གྲངས་ཙམ་གྱི་ཐ་དད། ཞེས་པ་ནས། ངོ་བོ་གཅིག་པ་བཀག་པའི་ཐ་དད། ཅེས་གསུངས་པའི་ཕྱིར། ཡང་ན་རང་ལྡོག་ཐ་དད་པ་དང༌། ངོ་བོ་ཐ་དད་པ་དང༌། རིགས་ཐ་དད་པ་དང་གསུམ་ཡོད་པའི་ཕྱིར། རང་ལྡོག་ཐ་དད་ཀྱི་མཚན་ཉིད་ཡོད་དེ། རང་ལྡོག་སོ་སོ་བའི་ཆོས་དེ་ཡིན་པའི་ཕྱིར། མཚན་གཞི་ནི་ཡོད་དེ། བྱས་མི་རྟག་ལྟ་བུ་དེ་ཡིན་པའི་ཕྱིར། ཤེས་བྱ་དང་རང་ལྡོག་ཐ་དད་ཀྱི་མཚན་ཉིད་ཡོད་དེ། ཤེས་བྱ་དང་རང་ལྡོག་སོ་སོ་བའི་ཆོས་དེ་ཡིན་ཕྱིར། མཚན་གཞི་ནི་ཡོད་དེ། སྙིང་རྗེ་དེ་ཡིན་པའི་ཕྱིར། ཆོས་གཞན་ལ་རིགས་འགྲེ། ངོ་བོ་ཐ་དད་ཀྱི་མཚན་ཉིད་ཡོད་དེ། ངོ་བོ་སོ་སོ་བའི་ཆོས་དེ་ཡིན་པའི་ཕྱིར། མཚན་གཞི་ནི་ཡོད་དེ། བདག་འཛིན་དང་བདག་མེད་རྟོགས་པའི་ཤེས་རབ་ལྟ་བུའོ། །ངོ་བོ་ཐ་དད་པ་དང༌། རང་བཞིན་ཐ་དད་པ་དང༌། བདག་ཉིད་ཐ་དད་པ་རྣམས་དོན་གཅིག རིགས་ཐ་དད་ཀྱི་མཚན་ཉིད་ཡོད་དེ། རིགས་སོ་སོ་བའི་ཆོས་དེ་ཡིན་པའི་ཕྱིར། རིགས་ཐ་དད་པ་དང༌། རིགས་མི་མཐུན་པའི་ཆོས་དང༌། རིགས་མི་འདྲ་བའི་ཆོས་དང༌། རིགས་མི་གཅིག་པའི་ཆོས་རྣམས་དོན་གཅིག རིགས་མི་འདྲ་བ་ལ་དབྱེ་ན་གཉིས་ཡོད་དེ། ལྡོག་པ་རིགས་མི་འདྲ་བ་དང༌། རྫས་རིགས་མི་འདྲ་བ་གཉིས་ཡོད་པའི་ཕྱིར། ལྡོག་པ་རིགས་མི་འདྲ་བ་བཞག་ཏུ་ཡོད་དེ། རྟ་དང་བ་ལང་གཉིས་དེ་ཡིན་པའི་ཕྱིར། རྫས་རིགས་མི་འདྲ་བ་བཞག་ཏུ་ཡོད་དེ། གཟུགས་ཤེས་གཉིས་དེ་ཡིན་པའི་ཕྱིར། གསུམ་པ་དེ་ལ་རྩོད་པ་སྤོང་བ།གསུམ་པ་དེ་ལ་རྩོད་པ་སྤོང་བ་ལ། ཁ་ཅིག་ན་རེ། ཙནྡན་གྱི་ཀ་བ་དང་ཤུག་པའི་ཀ་བ་གཉིས་ཆོས་ཅན། རིགས་གཅིག་ཡིན་པར་ཐལ། ལྡོག་པ་རིགས་གཅིག་ཡིན་པའི་ཕྱིར། འདོད་ན། ཙནྡན་གྱི་ཀ་བ་དང་ཤུག་པའི་ཀ་བ་གཉིས་ཆོས་ཅན། རིགས་གཅིག་མ་ཡིན་པར་ཐལ། རིགས་ཐ་དད་ཡིན་པའི་ཕྱིར། མ་གྲུབ་ན། ཙནྡན་གྱི་ཀ་བ་དང་ཤུག་པའི་ཀ་བ་གཉིས་ཆོས་ཅན། རིགས་ཐ་དད་ཡིན་པར་ཐལ། རྫས་རིགས་ཐ་དད་ཡིན་པའི་ཕྱིར་ན་མ་ཁྱབ། མ་གྲུབ་ན། ཙནྡན་གྱི་ཀ་བ་དང་ཤུག་པའི་ཀ་བ་གཉིས་ཆོས་ཅན། རྫས་རིགས་ཐ་དད་ཡིན་པར་ཐལ། རང་གི་ཉེར་ལེན་ཐ་དད་ལས་སྐྱེས་པའི་འདུས་བྱས་ཡིན་པའི་ཕྱིར། མ་གྲུབ་ན། དེ་གཉིས་ཆོས་ཅན། རང་གི་ཉེར་ལེན་ཐ་དད་ལས་སྐྱེས་པའི་འདུས་བྱས་ཡིན་པར་ཐལ། རང་གི་ཉེར་ལེན་སོ་སོ་ལས་སྐྱེས་པ་གང་ཞིག ཐ་དད་པའི་འདུས་བྱས་ཡིན་པའི་ཕྱིར། རྟགས་དང་པོ་མ་གྲུབ་ན། ཙནྡན་གྱི་ཀ་བ་དང་ཤུག་པའི་ཀ་བ་གཉིས་ཉེར་ལེན་སོ་སོ་ལས་སྐྱེས་པ་ཡིན་པར་ཐལ། ཙནྡན་གྱི་ཀ་བ་དེ་རང་རྒྱུ་ཙནྡན་ལས་སྐྱེས་པ་ཡིན་ཀྱང༌། ཤུག་པ་ལས་སྐྱེས་པ་མིན། ཤུག་པའི་ཀ་བ་དེ་རང་རྒྱུ་ཤུག་པ་ལས་སྐྱེས་པ་ཡིན་ཀྱང་ཙནྡན་ལས་སྐྱེས་པ་མ་ཡིན་པའི་ཕྱིར། ཁ་ཅིག་ན་རེ། ཤེས་བྱ་དང་རྟག་པ་གཉིས་ཆོས་ཅན། རྫས་གཅིག་ཡིན་པར་ཐལ། རྫས་སོ་སོ་བ་མ་ཡིན་པའི་ཆོས་ཡིན་པའི་ཕྱིར་ན་མ་ཁྱབ། མ་གྲུབ་ན། ཤེས་བྱ་དང་རྟག་པ་གཉིས་ཆོས་ཅན། རྫས་སོ་སོ་བ་མ་ཡིན་པའི་ཆོས་ཡིན་པར་ཐལ། རྫས་སོ་སོ་བ་མ་ཡིན་པ་གང་ཞིག ཆོས་ཡིན་པའི་ཕྱིར། རྟགས་དང་པོ་མ་གྲུབ་ན། ཤེས་བྱ་དང་རྟག་པ་གཉིས་ཆོས་ཅན། རྫས་སོ་སོ་བ་མ་ཡིན་པར་ཐལ། རྫས་ཐ་དད་མ་ཡིན་པའི་ཕྱིར། མ་གྲུབ་ན། དེ་གཉིས་ཆོས་ཅན། རྫས་ཐ་དད་མ་ཡིན་པར་ཐལ། རྫས་མ་ཡིན་པའི་ཕྱིར། མ་གྲུབ་ན། དེ་གཉིས་ཆོས་ཅན། རྫས་མ་ཡིན་པར་ཐལ། དངོས་མེད་ཀྱི་ཆོས་ཡིན་པའི་ཕྱིར། ཁ་ཅིག་ན་རེ། བདག་མེད་དང་བདག་གཉིས་ཆོས་ཅན། རང་ལྡོག་ཐ་དད་ཡིན་པར་ཐལ། རང་ལྡོག་སོ་སོ་བའི་ཆོས་ཡིན་པའི་ཕྱིར། མ་གྲུབ་ན། བདག་མེད་དང་བདག་གཉིས་ཆོས་ཅན། རང་ལྡོག་སོ་སོ་བའི་ཆོས་ཡིན་པར་ཐལ། རང་ལྡོག་སོ་སོ་བ་ཡིན་པའི་ཕྱིར། མ་གྲུབ་ན། དེ་གཉིས་ཆོས་ཅན། རང་ལྡོག་སོ་སོ་བ་ཡིན་པར་ཐལ། རང་ལྡོག་གཅིག་མ་ཡིན་པའི་ཕྱིར་ན་མ་ཁྱབ། མ་གྲུབ་ན། དེ་གཉིས་ཆོས་ཅན། རང་ལྡོག་གཅིག་མ་ཡིན་པར་ཐལ། ཁྱོད་ཀྱི་རང་ལྡོག་མེད་པའི་ཕྱིར། མ་གྲུབ་ན། བདག་མེད་དང་བདག་གཉིས་ཆོས་ཅན། ཁྱོད་ཀྱི་རང་ལྡོག་མེད་པར་ཐལ། ཁྱོད་མེད་པའི་ཕྱིར། ཁ་ཅིག་ན་རེ། དངོས་པོ་ཁོ་ན་དང་དངོས་པོ་གཉིས་ཆོས་ཅན། རྫས་ཐ་དད་ཡིན་པར་ཐལ། རྫས་གཅིག་མ་ཡིན་པའི་ཕྱིར་ན་སྤྱིར་མ་ཁྱབ། མ་གྲུབ་ན། དངོས་པོ་ཁོ་ན་དང་དངོས་པོ་གཉིས་ཆོས་ཅན། རྫས་གཅིག་མ་ཡིན་པར་ཐལ། རྫས་མ་ཡིན་པའི་ཕྱིར་རོ།། །། དྲུག་པ་རྒྱུ་འབྲས་ཆུང་ངུའི་རྣམ་བཞག་བཤད་པ།དྲུག་པ་རྒྱུ་འབྲས་ཆུང་ངུའི་རྣམ་བཞག་བཤད་པ་ལ། རྣམ་འགྲེལ་ལས། རྒྱུ་ལ་རང་བཞིན་ཇི་སྙེད་ཅིག །མེད་ན་མི་འབྱུང་འབྲས་བུ་ནི། །གཏན་ཚིགས། ཞེས་དང༌། རྒྱུ་ཚོགས་པ་ལས་འབྲས་སྐྱེ་བར། །རྗེས་སུ་དཔོག་པ་གང་ཡིན་པ། །ཞེས་དང༌། མེ་ཡི་འབྲས་བུ་དུ་བ་སྟེ། །ཞེས་པ་ནས། རྟག་ཏུ་ཡོད་པ་མེད་པར་འགྱུར། །ཞེས་གསུངས་པ་སོགས་གཞུང་དུ་མ་བྱུང༌། དེའི་མཐའ་དཔྱད་པ་ལ། དགག་བཞག་སྤོང་གསུམ་ལས། དང་པོ་ནི། ཁ་ཅིག་ན་རེ། གཞི་གྲུབ་ན་རྒྱུ་འབྲས་གང་རུང་ཡིན་པས་ཁྱབ་ཟེར་ན། དོན་དམ་བདེན་པ་ཆོས་ཅན། རྒྱུ་འབྲས་གང་རུང་ཡིན་པར་ཐལ། གཞི་གྲུབ་པའི་ཕྱིར། ཁྱབ་པ་ཁས། འདོད་ན། དོན་དམ་བདེན་པ་ཆོས་ཅན། རྒྱུ་འབྲས་གང་རུང་མ་ཡིན་པར་ཐལ། རྒྱུ་མ་ཡིན་པ་གང་ཞིག འབྲས་བུ་མ་ཡིན་པའི་ཕྱིར། རྟགས་དང་པོ་མ་གྲུབ་ན། དེ་ཆོས་ཅན། རྒྱུ་མ་ཡིན་པར་ཐལ། ཁྱོད་ཀྱི་འབྲས་བུ་མེད་པའི་ཕྱིར། མ་གྲུབ་ན། ཁྱོད་ཀྱི་འབྲས་བུ་མེད་པར་ཐལ། ཁྱོད་རྟག་པ་ཡིན་པའི་ཕྱིར། རྟགས་གཉིས་པ་མ་གྲུབ་ན། དོན་དམ་བདེན་པ་ཆོས་ཅན། འབྲས་བུ་མ་ཡིན་པར་ཐལ། ཁྱོད་ཀྱི་རྒྱུ་མེད་པའི་ཕྱིར། མ་གྲུབ་ན། དོན་དམ་བདེན་པ་ཆོས་ཅན། ཁྱོད་ཀྱི་རྒྱུ་མེད་པར་ཐལ། ཁྱོད་མ་སྐྱེས་པའི་ཕྱིར། མ་གྲུབ་ན། དོན་དམ་བདེན་པ་ཆོས་ཅན། ཁྱོད་མ་སྐྱེས་པར་ཐལ། ཁྱོད་རྟག་པ་ཡིན་པའི་ཕྱིར། ཁ་ཅིག་ན་རེ། རྒྱུ་ཡིན་ན་འབྲས་བུ་མ་ཡིན་པས་ཁྱབ་ཟེར་ན། ངེས་འབྱུང་གི་བསམ་པ་ཆོས་ཅན། འབྲས་བུ་མ་ཡིན་པར་ཐལ། རྒྱུ་ཡིན་པའི་ཕྱིར། ཁྱབ་པ་ཁས། མ་གྲུབ་ན། ངེས་འབྱུང་གི་བསམ་པ་ཆོས་ཅན། རྒྱུ་ཡིན་པར་ཐལ། ཁྱོད་ཁྱོད་ཀྱི་ཕྱི་ལོགས་སུ་བྱུང་བའི་རྒྱུ་ཡིན་པའི་ཕྱིར། མ་གྲུབ་ན། ངེས་འབྱུང་གི་བསམ་པ་ཆོས་ཅན། ཁྱོད་ཁྱོད་ཀྱི་ཕྱི་ལོགས་སུ་བྱུང་བའི་རྒྱུ་ཡིན་པར་ཐལ། ཁྱོད་དངོས་པོ་ཡིན་པའི་ཕྱིར། རྩ་བར་འདོད་ན། ངེས་འབྱུང་གི་བསམ་པ་ཆོས་ཅན། འབྲས་བུ་ཡིན་པར་ཐལ། ཁྱོད་ཀྱི་རྒྱུ་ཡོད་པའི་ཕྱིར། མ་གྲུབ་ན། དེ་ཆོས་ཅན། ཁྱོད་ཀྱི་རྒྱུ་ཡོད་པར་ཐལ། རང་རྒྱུ་ལས་སྐྱེས་པ་ཡིན་པའི་ཕྱིར། མ་གྲུབ་ན། དེ་ཆོས་ཅན། རང་རྒྱུ་ལས་སྐྱེས་པ་ཡིན་པར་ཐལ།འདུས་བྱས་ཡིན་པའི་ཕྱིར། ཁ་ཅིག་ན་རེ། རྒྱུ་ཡིན་ན་ཉེར་ལེན་གྱི་རྒྱུ་ཡིན་པས་ཁྱབ་ཟེར་ན། རྒྱུན་འཆད་ཁ་མའི་ཉོན་མོངས་པ་ཆོས་ཅན། ཉེར་ལེན་གྱི་རྒྱུ་ཡིན་པར་ཐལ། རྒྱུ་ཡིན་པའི་ཕྱིར། ཁྱབ་པ་ཁས། མ་གྲུབ་ན། རྒྱུན་འཆད་ཁ་མའི་ཉོན་མོངས་པ་ཆོས་ཅན། རྒྱུ་ཡིན་པར་ཐལ། ཁྱོད་ཀྱི་འབྲས་བུ་ཡོད་པའི་ཕྱིར། མ་གྲུབ་ན། དེ་ཆོས་ཅན། ཁྱོད་ཀྱི་འབྲས་བུ་ཡོད་པར་ཐལ། ཁྱོད་དངོས་པོ་ཡིན་པའི་ཕྱིར། མ་གྲུབ་ན། དེ་ཆོས་ཅན། ཁྱོད་དངོས་པོ་ཡིན་པར་ཐལ། ཁྱོད་ཉོན་མོངས་པ་ཡིན་པའི་ཕྱིར། རྩ་བར་འདོད་ན། རྒྱུན་འཆད་ཁ་མའི་ཉོན་མོངས་པ་ཆོས་ཅན། ཉེར་ལེན་གྱི་རྒྱུ་མ་ཡིན་པར་ཐལ། རང་གི་རྫས་རྒྱུན་ཕྱི་མ་གཙོ་བོར་སྐྱེད་བྱེད་མ་ཡིན་པའི་ཕྱིར། མ་གྲུབ་ན། དེ་ཆོས་ཅན། རང་གི་རྫས་རྒྱུན་ཕྱི་མ་གཙོ་བོར་སྐྱེད་བྱེད་མ་ཡིན་པར་ཐལ། རང་གི་རྫས་རྒྱུན་ཕྱི་མ་མེད་པའི་ཕྱིར། མ་གྲུབ་ན། དེ་ཆོས་ཅན། རང་གི་རྫས་རྒྱུན་ཕྱི་མ་མེད་པར་ཐལ། ཁྱོད་རྫས་རྒྱུན་འཆད་ཁ་མ་ཡིན་པའི་ཕྱིར། གཞན་ཡང་རྒྱུན་འཆད་ཁ་མའི་གློག་དང༌། ཁོང་ཁྲོས་བཅོམ་ཁ་མའི་དགེ་རྩ་སོགས་ཀྱིས་མ་ངེས་སོ། །ཁ་ཅིག་ན་རེ། བུམ་པའི་རྒྱུ་ཡིན་ན་བུམ་པའི་ཉེར་ལེན་ཡིན་པས་ཁྱབ་ཟེར་ན། བུམ་པའི་རྒྱུར་གྱུར་བའི་སྐྱེས་བུ་ཆོས་ཅན། བུམ་པའི་ཉེར་ལེན་ཡིན་པར་ཐལ། བུམ་པའི་རྒྱུ་ཡིན་པའི་ཕྱིར། ཁྱབ་པ་ཁས། མ་གྲུབ་ན། བུམ་པའི་རྒྱུར་གྱུར་བའི་སྐྱེས་བུ་བུམ་པའི་རྒྱུ་ཡིན་པར་ཐལ། བུམ་པའི་རྒྱུར་གྱུར་བའི་སྐྱེས་བུ་ཡོད་པའི་ཕྱིར། མ་གྲུབ་ན། བུམ་པ་ཆོས་ཅན། ཁྱོད་ཀྱི་རྒྱུར་གྱུར་བའི་སྐྱེས་བུ་ཡོད་པར་ཐལ། ཁྱོད་སྐྱེས་བུའི་རྩོལ་བ་ལས་བྱུང་བ་ཡིན་པའི་ཕྱིར། རྩ་བར་འདོད་ན། བུམ་པའི་རྒྱུར་གྱུར་བའི་སྐྱེས་བུ་ཆོས་ཅན། བུམ་པའི་ཉེར་ལེན་མ་ཡིན་པར་ཐལ། རང་གི་རྫས་རྒྱུན་དུ་བུམ་པ་རྫས་སུ་གཙོ་བོར་སྐྱེད་བྱེད་མ་ཡིན་པའི་ཕྱིར། མ་གྲུབ་ན། བུམ་པའི་རྒྱུར་གྱུར་བའི་སྐྱེས་བུ་ཆོས་ཅན། རང་གི་རྫས་རྒྱུན་དུ་བུམ་པ་རྫས་སུ་གཙོ་བོར་སྐྱེད་བྱེད་མ་ཡིན་པར་ཐལ། བུམ་པ་ཁྱོད་ཀྱི་རྫས་རྒྱུན་ཕྱི་མ་མ་ཡིན་པའི་ཕྱིར། མ་གྲུབ་ན། དེ་ཆོས་ཅན། བུམ་པ་ཁྱོད་ཀྱི་རྫས་རྒྱུན་ཕྱི་མ་མ་ཡིན་པར་ཐལ། བུམ་པ་ཁྱོད་ཀྱི་རྒྱུན་ཕྱི་མ་མ་ཡིན་པའི་ཕྱིར། མ་གྲུབ་ན། དེ་ཆོས་ཅན། བུམ་པ་ཁྱོད་ཀྱི་རྒྱུན་ཕྱི་མ་མ་ཡིན་པར་ཐལ། ཁྱོད་གང་ཟག་ཡིན་པ་གང་ཞིག བུམ་པ་རྡུལ་གྲུབ་ཀྱི་བེམ་ཆོས་ཡིན་པའི་ཕྱིར། ཁ་ཅིག་ན་རེ། མི་རྟག་པའི་རྒྱུར་གྱུར་བའི་བུམ་པ་ཡོད་ཟེར་ན། མི་རྟག་པའི་རྒྱུར་གྱུར་བའི་བུམ་པ་ཆོས་ཅན། མི་རྟག་པའི་རྒྱུ་ཡིན་པར་ཐལ། ཆོས་ཅན་དེའི་ཕྱིར། འདོད་ན། མི་རྟག་པའི་རྒྱུར་གྱུར་བའི་བུམ་པ་ཆོས་ཅན། མི་རྟག་པ་ཁྱོད་ཀྱི་འབྲས་བུ་ཡིན་པར་ཐལ། ཁྱོད་མི་རྟག་པའི་རྒྱུ་ཡིན་པའི་ཕྱིར། འདོད་ན། མི་རྟག་པའི་རྒྱུར་གྱུར་བའི་བུམ་པ་ཆོས་ཅན། ཁྱོད་མེད་ན་མི་རྟག་པ་མེད་དགོས་པར་ཐལ། མི་རྟག་པ་ཁྱོད་དང་རྟེན་བྱུང་འབྲེལ་ཡིན་པའི་ཕྱིར། རྟགས་ཁས། འདོད་ན། བུམ་པའི་དགག་གཞི་ཆོས་ཅན། མི་རྟག་པ་མེད་པར་ཐལ། མི་རྟག་པའི་རྒྱུར་གྱུར་བའི་བུམ་པ་མེད་པའི་ཕྱིར། མ་གྲུབ་ན། བུམ་པའི་དགག་གཞི་ཆོས་ཅན། མི་རྟག་པའི་རྒྱུར་གྱུར་བའི་བུམ་པ་མེད་པར་ཐལ། བུམ་པ་མེད་པའི་ཕྱིར། མ་གྲུབ་ན། བུམ་པའི་དགག་གཞི་ཆོས་ཅན། བུམ་པ་མེད་པར་ཐལ། བུམ་པའི་དགག་གཞི་ཡིན་པའི་ཕྱིར། གོང་དུ་འདོད་ན། བུམ་པའི་དགག་གཞི་ཆོས་ཅན། མི་རྟག་པ་ཡོད་པར་ཐལ། མི་རྟག་པའི་དགག་གཞི་མ་ཡིན་པའི་ཕྱིར། ཁ་ཅིག་ན་རེ། ཤུག་པའི་མེ་དེ་དུ་བའི་རྒྱུ་ཡིན་ཟེར་ན། ཤུག་པའི་མེ་ཆོས་ཅན། དུ་བའི་རྒྱུ་མ་ཡིན་པར་ཐལ། དུ་བ་ཁྱོད་ཀྱི་འབྲས་བུ་མ་ཡིན་པའི་ཕྱིར། མ་གྲུབ་ན། ཤུག་པའི་མེ་ཆོས་ཅན། དུ་བ་ཁྱོད་ཀྱི་འབྲས་བུ་མ་ཡིན་པར་ཐལ། དུ་བ་ཁྱོད་དང་རྟེན་བྱུང་འབྲེལ་མ་ཡིན་པའི་ཕྱིར། མ་གྲུབ་ན། ཤུག་པའི་མེ་ཆོས་ཅན། དུ་བ་ཁྱོད་དང་རྟེན་བྱུང་འབྲེལ་མ་ཡིན་པར་ཐལ། ཁྱོད་མེད་ན་དུ་བ་མེད་མི་དགོས་པའི་ཕྱིར། མ་གྲུབ་ན། ཤུག་པ་མེད་པའི་ས་ཕྱོགས་ཆོས་ཅན། དུ་བ་མེད་པར་ཐལ། ཤུག་པའི་མེ་མེད་པའི་ཕྱིར། ཁྱབ་པ་ཁས། མ་གྲུབ་ན། ཤུག་པ་མེད་པའི་ས་ཕྱོགས་ཆོས་ཅན། ཤུག་པའི་མེ་མེད་པར་ཐལ། ཤུག་པ་མེད་པའི་ཕྱིར། མ་གྲུབ་ན། ཤུག་པ་མེད་པའི་ས་ཕྱོགས་ཆོས་ཅན། ཤུག་པ་མེད་པར་ཐལ། ཤུག་པའི་དགག་གཞི་ཡིན་པའི་ཕྱིར། གོང་དུ་འདོད་ན། ཤུག་པ་མེད་པའི་ས་ཕྱོགས་ཆོས་ཅན། དུ་བ་ཡོད་པར་ཐལ། ཙནྡན་གྱི་མེའི་དུ་བ་ཡོད་པའི་ཕྱིར། མ་གྲུབ་ན། ཤུག་པ་མེད་པའི་ས་ཕྱོགས་དེར་ཙནྡན་གྱི་མེའི་དུ་བ་ཡོད་པར་ཐལ། ཤུག་པ་མེད་པའི་ས་ཕྱོགས་དེར་ཙནྡན་གྱི་མེ་ཡོད་པའི་ཕྱིར། ཁ་ཅིག་ན་རེ། བུམ་པར་འགྱུར་ངེས་ཡིན་ན། བུམ་པའི་རྒྱུ་ཡིན་པས་ཁྱབ་ཟེར་ན། རྫ་བུམ་གྱི་ཉེར་ལེན་དུ་གྱུར་བའི་འཇིམ་པ་ཆོས་ཅན། བུམ་པའི་རྒྱུ་ཡིན་པར་ཐལ། བུམ་པར་འགྱུར་ངེས་ཡིན་པའི་ཕྱིར། ཁྱབ་པ་ཁས། མ་གྲུབ་ན། རྫ་བུམ་གྱི་ཉེར་ལེན་དུ་གྱུར་བའི་འཇིམ་པ་ཆོས་ཅན། བུམ་པར་འགྱུར་ངེས་ཡིན་པར་ཐལ། རྫ་བུམ་དུ་འགྱུར་ངེས་ཡིན་པའི་ཕྱིར། མ་གྲུབ་ན། རྫ་བུམ་ཆོས་ཅན། ཁྱོད་ཀྱི་ཉེར་ལེན་དུ་གྱུར་བའི་འཇིམ་པ་ཁྱོད་དུ་འགྱུར་ངེས་ཡིན་པར་ཐལ། ཁྱོད་ཀྱི་ཉེར་ལེན་དུ་གྱུར་བའི་འཇིམ་པ་ཡོད་པའི་ཕྱིར། མ་གྲུབ་ན། རྫ་བུམ་ཆོས་ཅན། ཁྱོད་ཀྱི་ཉེར་ལེན་དུ་གྱུར་བའི་འཇིམ་པ་ཡོད་པར་ཐལ། ཁྱོད་རྫ་བུམ་ཡིན་པའི་ཕྱིར། རྩ་བར་འདོད་ན། རྫ་བུམ་གྱི་ཉེར་ལེན་དུ་གྱུར་བའི་འཇིམ་པ་ཆོས་ཅན། བུམ་པའི་རྒྱུ་མ་ཡིན་པར་ཐལ། བུམ་པ་ཁྱོད་ཀྱི་འབྲས་བུ་མ་ཡིན་པའི་ཕྱིར། མ་གྲུབ་ན། དེ་ཆོས་ཅན། བུམ་པ་ཁྱོད་ཀྱི་འབྲས་བུ་མ་ཡིན་པར་ཐལ། ཁྱོད་མེད་ན་བུམ་པ་མེད་པས་མ་ཁྱབ་པའི་ཕྱིར། མ་གྲུབ་ན། རྫ་བུམ་མེད་པའི་ས་ཕྱོགས་ཆོས་ཅན། བུམ་པ་མེད་པར་ཐལ། རྫ་བུམ་གྱི་ཉེར་ལེན་དུ་གྱུར་བའི་འཇིམ་པ་མེད་པའི་ཕྱིར། ཁྱབ་པ་ཁས། མ་གྲུབ་ན། རྫ་བུམ་མེད་པའི་ས་ཕྱོགས་ཆོས་ཅན། རྫ་བུམ་གྱི་ཉེར་ལེན་དུ་གྱུར་བའི་འཇིམ་པ་མེད་པར་ཐལ། རྫ་བུམ་གྱི་དགག་གཞི་ཡིན་པའི་ཕྱིར། གོང་དུ་འདོད་ན། རྫ་བུམ་མེད་པའི་ས་ཕྱོགས་ཆོས་ཅན། བུམ་པ་ཡོད་པར་ཐལ། གསེར་བུམ་ཡོད་པའི་ཕྱིར། མ་གྲུབ་ན། རྫ་བུམ་མེད་པའི་ས་ཕྱོགས་ཆོས་ཅན། གསེར་བུམ་ཡོད་པར་ཐལ། གསེར་བུམ་གྱི་དགག་གཞི་མ་ཡིན་པའི་ཕྱིར་རོ། ། རྫ་བུམ་མེད་ན་རྫ་བུམ་གྱི་ཉེར་ལེན་དུ་གྱུར་བའི་འཇིམ་པ་མེད་དགོས་མིན་ཅུང་ཟད་དཔྱད་རྒྱུ་སྣང་མོད་བསྡུས་གཞུང་དུ་མར་ཁྱབ་པ་ཡོད་པར་གསུངས་པས་རེ་ཞིག་དེ་ཙམ་མོ། །ཁ་ཅིག་ན་རེ། རྣམ་འགྲེལ་ལས། རྣམ་ཤེས་མིན་པ་རྣམ་ཤེས་ཀྱི། །ཉེར་ལེན་མིན་པའི་ཕྱིར་ཡང་འགྲུབ། །ཅེས་པའི་ལུང་གི་དོན་དུ་བསམ་ནས། རྣམ་ཤེས་ཀྱི་ཉེར་ལེན་ཡིན་ན་རྣམ་ཤེས་ཡིན་པས་ཁྱབ་ཟེར་ན། རྣམ་ཤེས་ཀྱི་ས་བོན་ཆོས་ཅན། རྣམ་ཤེས་ཡིན་པར་ཐལ། རྣམ་ཤེས་ཀྱི་ཉེར་ལེན་ཡིན་པའི་ཕྱིར། ཁྱབ་པ་ཁས། མ་གྲུབ་ན། རྣམ་ཤེས་ཀྱི་ས་བོན་ཆོས་ཅན། རྣམ་ཤེས་ཀྱི་ཉེར་ལེན་ཡིན་པར་ཐལ། རང་གི་རྫས་རྒྱུན་དུ་རྫས་སུ་གཙོ་བོར་རྣམ་ཤེས་སྐྱེད་བྱེད་ཡིན་པའི་ཕྱིར། མ་གྲུབ་ན། རྣམ་ཤེས་ཆོས་ཅན། ཁྱོད་ཀྱི་ས་བོན་རང་གི་རྫས་རྒྱུན་དུ་རྫས་སུ་གཙོ་བོར་ཁྱོད་སྐྱེད་བྱེད་ཡིན་པར་ཐལ། ཁྱོད་རྣམ་ཤེས་ཡིན་པའི་ཕྱིར། རྩ་བར་འདོད་ན། རྣམ་ཤེས་ཀྱི་ས་བོན་ཆོས་ཅན། རྣམ་ཤེས་མ་ཡིན་པར་ཐལ། ཤེས་པ་མ་ཡིན་པའི་ཕྱིར། མ་གྲུབ་ན། རྣམ་ཤེས་ཀྱི་ས་བོན་ཆོས་ཅན། ཤེས་པ་མ་ཡིན་པར་ཐལ། ལྡན་མིན་འདུ་བྱེད་ཡིན་པའི་ཕྱིར། མ་གྲུབ་ན། རྣམ་ཤེས་ཆོས་ཅན། ཁྱོད་ཀྱི་ས་བོན་ལྡན་མིན་འདུ་བྱེད་ཡིན་པར་ཐལ། ཁྱོད་ཀྱི་ས་བོན་ཡོད་པའི་ཕྱིར། མ་གྲུབ་ན། རྣམ་ཤེས་ཆོས་ཅན། ཁྱོད་ཀྱི་ས་བོན་ཡོད་པར་ཐལ། ཁྱོད་དངོས་པོ་ཡིན་པའི་ཕྱིར། ཁ་ཅིག་ན་རེ། ཁྱོད་དངོས་པོའི་དངོས་འབྲས་ཡིན་ན་ཁྱོད་ཡིན་ན་དངོས་པོའི་དངོས་འབྲས་ཡིན་པས་ཁྱབ་ཟེར་ན། དངོས་པོའི་ཕྱི་ལོགས་སུ་བྱུང་བ་ཆོས་ཅན། ཁྱོད་ཡིན་ན་དངོས་པོའི་དངོས་འབྲས་ཡིན་པས་ཁྱབ་པར་ཐལ། ཁྱོད་དངོས་པོའི་དངོས་འབྲས་ཡིན་པའི་ཕྱིར། ཁྱབ་པ་ཁས། མ་གྲུབ་ན། དངོས་པོའི་ཕྱི་ལོགས་སུ་བྱུང་བ་ཆོས་ཅན། ཁྱོད་དངོས་པོའི་དངོས་འབྲས་ཡིན་པར་ཐལ། དངོས་པོ་ཁྱོད་ཀྱི་དངོས་རྒྱུ་ཡིན་པའི་ཕྱིར། མ་གྲུབ་ན། དངོས་པོ་ཆོས་ཅན། ཁྱོད་ཁྱོད་ཀྱི་ཕྱི་ལོགས་སུ་བྱུང་བའི་དངོས་རྒྱུ་ཡིན་པར་ཐལ། ཁྱོད་དངོས་པོ་ཡིན་པའི་ཕྱིར། རྩ་བར་འདོད་ན། དངོས་པོའི་ཕྱི་ལོགས་སུ་བྱུང་བ་ཆོས་ཅན། ཁྱོད་ཡིན་ན་དངོས་པའི་དངོས་འབྲས་ཡིན་པས་མ་ཁྱབ་པར་ཐལ། ཁྱོད་ཡང་ཡིན་དངོས་པོའི་དངོས་འབྲས་མ་ཡིན་པ་ཡོད་པའི་ཕྱིར། མ་གྲུབ་ན། དངོས་པོའི་ཕྱི་ལོགས་སུ་བྱུང་བ་ཆོས་ཅན། ཁྱོད་ཡང་ཡིན་དངོས་པོའི་དངོས་འབྲས་མ་ཡིན་པ་ཡོད་པར་ཐལ། དངོས་པོའི་ཕྱི་ལོགས་སུ་བྱུང་བའི་ཕྱི་ལོགས་སུ་བྱུང་བ་དེ་ཡིན་པའི་ཕྱིར། མ་གྲུབ་ན། དངོས་པོའི་ཕྱི་ལོགས་སུ་བྱུང་བའི་ཕྱི་ལོགས་སུ་བྱུང་བ་ཆོས་ཅན། དངོས་པོའི་ཕྱི་ལོགས་སུ་བྱུང་བ་དང་དངོས་པོའི་དངོས་འབྲས་མ་ཡིན་པ་གཉིས་ཀ་ཡིན་པར་ཐལ། དངོས་པའི་ཕྱི་ལོགས་སུ་བྱུང་བ་གང་ཞིག དངོས་པོའི་དངོས་འབྲས་མ་ཡིན་པའི་ཕྱིར། དང་པོ་སླ། གཉིས་པ་མ་གྲུབ་ན། དངོས་པོའི་ཕྱི་ལོགས་སུ་བྱུང་བའི་ཕྱི་ལོགས་སུ་བྱུང་བ་ཆོས་ཅན། དངོས་པོའི་དངོས་འབྲས་མ་ཡིན་པར་ཐལ། དངོས་པོའི་བརྒྱུད་འབྲས་ཡིན་པའི་ཕྱིར། མ་གྲུབ་ན། དངོས་པོ་ཆོས་ཅན། ཁྱོད་ཀྱི་ཕྱི་ལོགས་སུ་བྱུང་བའི་ཕྱི་ལོགས་སུ་བྱུང་བ་ཁྱོད་ཀྱི་བརྒྱུད་འབྲས་ཡིན་པར་ཐལ། ཁྱོད་དངོས་པོ་ཡིན་པའི་ཕྱིར་རོ། ། གཉིས་པ་རང་ལུགས་བཤད་པ།གཉིས་པ་རང་ལུགས་བཤད་པ་ལ། རྒྱུའི་མཚན་ཉིད་ཡོད་དེ། ཕན་འདོགས་བྱེད་དམ་སྐྱེད་བྱེད་དེ་ཡིན་པའི་ཕྱིར། རྣམ་འགྲེལ་ལས། ཕན་འདོགས་གང་ཡིན་སྐྱེད་པ་ཡིན། །ཞེས་གསུངས་པའི་ཕྱིར། མངོན་ཚད་ཀྱི་ཐ་སྙད་ལྟར་ན་རྒྱུ་དང་འབྲས་བུ་དངོས་པོ་གསུམ་དོན་གཅིག གཟུགས་ཀྱི་རྒྱུའི་མཚན་ཉིད་ཡོད་དེ། གཟུགས་ཀྱི་ཕན་འདོགས་བྱེད་དེ་ཡིན་པའི་ཕྱིར། དེར་ཐལ། དངོས་པོ་ཡིན་ན་ཁྱོད་ཀྱི་སྐྱེད་བྱེད་ཁྱོད་ཀྱི་རྒྱུའི་མཚན་ཉིད་ཡིན་པས་ཁྱབ་པའི་ཕྱིར། རྒྱུ་ལ་དབྱེ་ན་གཉིས་ཡོད་དེ། དངོས་རྒྱུ་དང་བརྒྱུད་རྒྱུ་གཉིས་ཡོད་པའི་ཕྱིར། དངོས་རྒྱུའི་མཚན་ཉིད་ཡོད་དེ། དངོས་སུ་ཕན་འདོགས་བྱེད་དེ་ཡིན་པའི་ཕྱིར། བརྒྱུད་རྒྱུའི་མཚན་ཉིད་ཡོད་དེ། བརྒྱུད་ནས་ཕན་འདོགས་བྱེད་དེ་ཡིན་པའི་ཕྱིར། འཆི་བ་མི་རྟག་པའི་དངོས་རྒྱུའི་མཚན་ཉིད་ཡོད་དེ། འཆི་བ་མི་རྟག་པའི་དངོས་སུ་སྐྱེད་བྱེད་དེ་ཡིན་པའི་ཕྱིར། འཆི་བ་མི་རྟག་པའི་བརྒྱུད་རྒྱུའི་མཚན་ཉིད་ཡོད་དེ། འཆི་བ་མི་རྟག་པའི་བརྒྱུད་ནས་སྐྱེད་བྱེད་དེ་ཡིན་པའི་ཕྱིར། དེས་གཞན་ལ་རིགས་བསྒྲེ་སྦྱར། ཉེར་ལེན་གྱི་རྒྱུའི་མཚན་ཉིད་ཡོད་དེ། རང་གི་རྫས་རྒྱུན་དུ་རྫས་སུ་གཙོ་བོར་སྐྱེད་བྱེད་དེ་ཡིན་པའི་ཕྱིར། ལྷན་ཅིག་བྱེད་རྐྱེན་གྱི་མཚན་ཉིད་ཡོད་དེ། རང་གི་རྫས་རྒྱུན་མ་ཡིན་པར་གཙོ་བོར་སྐྱེད་བྱེད་དེ་ཡིན་པའི་ཕྱིར། རྫ་བུམ་གྱི་ཉེར་ལེན་གྱི་མཚན་ཉིད་ཡོད་དེ། རང་གི་རྫས་རྒྱུན་དུ་རྫ་བུམ་གཙོ་བོར་སྐྱེད་བྱེད་དེ་ཡིན་པའི་ཕྱིར། མཚན་གཞི་ནི་རྫ་བུམ་གྱི་རྒྱུར་གྱུར་བའི་འཇིམ་པ་དེ་ཡིན་པའི་ཕྱིར། རྫ་བུམ་གྱི་ལྷན་ཅིག་བྱེད་རྐྱེན་གྱི་མཚན་ཉིད་ཡོད་དེ། རང་གི་རྫས་རྒྱུན་མ་ཡིན་པར་རྫ་བུམ་སྐྱེད་བྱེད་དེ་ཡིན་པའི་ཕྱིར། མཚན་གཞི་ནི། རྫ་བུམ་གྱི་རྒྱུར་གྱུར་བའི་གང་ཟག་དེ་ཡིན་པའི་ཕྱིར། འབྲས་བུའི་མཚན་ཉིད་ཡོད་དེ། བསྐྱེད་བྱའམ་ཕན་འདོགས་བྱ་དེ་ཡིན་པའི་ཕྱིར། དབྱེ་ན་དངོས་འབྲས་བརྒྱུད་འབྲས་གཉིས། དང་པོ་དངོས་འབྲས་ཀྱི་མཚན་ཉིད་ཡོད་དེ། དངོས་སུ་བསྐྱེད་བྱ་དེ་ཡིན་པའི་ཕྱིར། གཉིས་པ་བརྒྱུད་འབྲས་ཀྱི་མཚན་ཉིད་ཡོད་དེ། བརྒྱུད་ནས་བསྐྱེད་བྱ་དེ་ཡིན་པའི་ཕྱིར། གཞི་ལ་སྦྱར་ན། བྱམས་པའི་དངོས་འབྲས་ཀྱི་མཚན་ཉིད་ཡོད་དེ། བྱམས་པས་དངོས་སུ་བསྐྱེད་བྱ་དེ་ཡིན་པའི་ཕྱིར། མཚན་གཞི་ནི་ཡོད་དེ། བྱམས་པའི་ཕྱི་ལོགས་སུ་བྱུང་བ་དེ་ཡིན་པའི་ཕྱིར། བྱམས་པའི་བརྒྱུད་འབྲས་ཀྱྀ་མཚན་ཉིད་ཡོད་དེ། བྱམས་པས་བརྒྱུད་ནས་བསྐྱེད་བྱ་དེ་ཡིན་པའི་ཕྱིར། མཚན་གཞི་ནི་ཡོད་དེ། བྱམས་པའི་ཕྱི་ལོགས་སུ་བྱུང་བའི་ཕྱི་ལོགས་སུ་བྱུང་བ་དེ་ཡིན་པའི་ཕྱིར། དེས་ཆོས་གཞན་དང་གཞན་གྱི་དངོས་འབྲས་དང་བརྒྱུད་འབྲས་ལ་རིགས་བསྒྲེ་བར་བྱའོ། ། གསུམ་པ་དེ་ལ་རྩོད་པ་སྤོང་བ།གསུམ་པ་དེ་ལ་རྩོད་པ་སྤོང་བ་ལ། ཁ་ཅིག་ན་རེ། སྤྱིར་ཆོས་ཅན། རྒྱུ་ཡིན་པར་ཐལ། སྐྱེད་བྱེད་ཡིན་པའི་ཕྱིར། མ་གྲུབ་ན། དེ་ཆོས་ཅན། སྐྱེད་བྱེད་ཡིན་པར་ཐལ། འབྲས་བུ་སྐྱེད་བྱེད་ཡིན་པའི་ཕྱིར་ན་མ་ཁྱབ་སྙམ། ཁ་ཅིག་ན་རེ། སྤྱིར་ཆོས་ཅན། དངོས་པོའི་རྒྱུ་ཡིན་པར་ཐལ། དངོས་པོའི་སྐྱེད་བྱེད་ཡིན་པའི་ཕྱིར། མ་གྲུབ་ན། སྤྱིར་ཆོས་ཅན། དངོས་པོའི་སྐྱེད་བྱེད་ཡིན་པར་ཐལ།དངོས་པོ་སྐྱེད་བྱེད་ཡིན་པའི་ཕྱིར་ན། མ་ཁྱབ། མ་གྲུབ་ན། སྤྱིར་ཆོས་ཅན། དངོས་པོ་སྐྱེད་བྱེད་ཡིན་པར་ཐལ། དངོས་པོ་རྒྱུ་ཡིན་པའི་ཕྱིར། མ་གྲུབ་ན། དངོས་པོ་ཆོས་ཅན། རྒྱུ་ཡིན་པར་ཐལ། དངོས་པོའི་ཕྱི་ལོགས་སུ་བྱུང་བའི་རྒྱུ་ཡིན་པའི་ཕྱིར། མ་གྲུབ་ན། སྤྱིར་ཆོས་ཅན། དངོས་པོ་དངོས་པོའི་ཕྱི་ལོགས་སུ་བྱུང་བའི་རྒྱུ་ཡིན་པར་ཐལ། དངོས་པོ་ཡོད་པའི་ཕྱིར། ཁ་ཅིག་ན་རེ། དངོས་པོ་ཆོས་ཅན། དངོས་པོའི་ཕྱི་ལོགས་སུ་བྱུང་བའི་རྒྱུ་མ་ཡིན་པར་ཐལ། དངོས་པོ་དང་དུས་མཉམ་དུ་བྱུང་བའི་རྒྱུ་ཡིན་པའི་ཕྱིར། མ་གྲུབ་ན། དངོས་པོ་ཆོས་ཅན། དངོས་པོ་དང་དུས་མཉམ་དུ་བྱུང་བའི་རྒྱུ་ཡིན་པར་ཐལ། དངོས་པོ་དང་དུས་མཉམ་དུ་བྱུང་བའི་དངོས་པོ་ཡིན་པའི་ཕྱིར་ན་མ་ཁྱབ། མ་གྲུབ་ན། དངོས་པོ་ཆོས་ཅན། ཁྱོད་ཁྱོད་དང་དུས་མཉམ་དུ་བྱུང་བའི་དངོས་པོ་ཡིན་པར་ཐལ། ཁྱོད་དངོས་པོ་ཡིན་པའི་ཕྱིར། ཁ་ཅིག་ན་རེ། དངོས་པོའི་ཕྱི་ལོགས་སུ་བྱུང་བ་ཆོས་ཅན། དངོས་པོའི་ཕྱི་ལོགས་སུ་བྱུང་བའི་འབྲས་བུ་ཡིན་པར་ཐལ། དངོས་པོའི་ཕྱི་ལོགས་སུ་བྱུང་བ་གང་ཞིག འབྲས་བུ་ཡིན་པའི་ཕྱིར་ན་མ་ཁྱབ། རྟགས་དང་པོ་མ་གྲུབ་ན། དངོས་པོའི་ཕྱི་ལོགས་སུ་བྱུང་བ་ཆོས་ཅན། དངོས་པོའི་ཕྱི་ལོགས་སུ་བྱུང་བ་ཡིན་པར་ཐལ། དངོས་པོའི་འབྲས་བུ་ཡིན་པའི་ཕྱིར། རྟགས་གཉིས་པ་མ་གྲུབ་ན། དངོས་པོའི་ཕྱི་ལོགས་སུ་བྱུང་བ་ཆོས་ཅན། འབྲས་བུ་ཡིན་པར་ཐལ། དངོས་པོ་ཡིན་པའི་ཕྱིར། རྩ་བར་འདོད་ན། དངོས་པོའི་ཕྱི་ལོགས་སུ་བྱུང་བ་ཆོས་ཅན། ཁྱོད་ཁྱོད་ཀྱི་འབྲས་བུ་མ་ཡིན་པར་ཐལ། ཁྱོད་གང་ཟག་གི་བདག་མེད་ཡིན་པའི་ཕྱིར། ཁ་ཅིག་ན་རེ། ཀྭ་བུམ་གཉིས་ཆོས་ཅན། ཁྱོད་ཀྱི་སྔ་ལོགས་སུ་བྱུང་བ་ཁྱོད་ཀྱི་རྒྱུ་ཡིན་པར་ཐལ། ཁྱོད་དངོས་པོ་ཡིན་པའི་ཕྱིར་ཟེར་ན་འདོད་བྱས་པ་ལ། ཀྭ་བུམ་གཉིས་ཀའི་སྔ་ལོགས་སུ་བྱུང་བ་ཆོས་ཅན། བུམ་པའི་རྒྱུ་ཡིན་པར་ཐལ། ཀྭ་བུམ་གཉིས་ཀའི་རྒྱུ་ཡིན་པའི་ཕྱིར་ན་འགལ་ཁྱབ་ལ་འཕུད། འདོད་ན། ཀྭ་བུམ་གཉིས་ཀའི་སྔ་ལོགས་སུ་བྱུང་བ་ཆོས་ཅན། བུམ་པའི་རྒྱུ་མ་ཡིན་པར་ཐལ། བུམ་པ་ཁྱོད་ཀྱི་འབྲས་བུ་མ་ཡིན་པའི་ཕྱིར། མ་གྲུབ་ན། ཀྭ་བུམ་གཉིས་ཀའི་སྔ་ལོགས་སུ་བྱུང་བ་ཆོས་ཅན། བུམ་པ་ཁྱོད་ཀྱི་འབྲས་བུ་མ་ཡིན་པར་ཐལ། ཁྱོད་མེད་ན་བུམ་པ་མེད་པས་ཁྱབ་པ་མེད་པའི་ཕྱིར། མ་གྲུབ་ན། ཀ་བའི་དགག་གཞི་ཆོས་ཅན། བུམ་པ་མེད་པར་ཐལ། ཀྭ་བུམ་གཉིས་ཀའི་སྔ་ལོགས་སུ་བྱུང་བ་མེད་པའི་ཕྱིར། མ་གྲུབ་ན། ཀ་བའི་དགག་གཞི་ཆོས་ཅན། ཀྭ་བུམ་གཉིས་ཀའི་སྔ་ལོགས་སུ་བྱུང་བ་མེད་པར་ཐལ། ཀྭ་བུམ་གཉིས་མེད་པའི་ཕྱིར། མ་གྲུབ་ན། ཀ་བའི་དགག་གཞི་ཆོས་ཅན། ཀྭ་བུམ་གཉིས་མེད་པར་ཐལ། ཀ་བ་མེད་པའི་ཕྱིར། མ་གྲུབ་ན། ཀ་བའི་དགག་གཞི་ཆོས་ཅན། ཀ་བ་མེད་པར་ཐལ། ཀ་བའི་དགག་གཞི་ཡིན་པའི་ཕྱིར། གོང་དུ་འདོད་ན། ཀ་བའི་དགག་གཞི་ཆོས་ཅན། བུམ་པ་ཡོད་པར་ཐལ། བུམ་པའི་དགག་གཞི་མ་ཡིན་པའི་ཕྱིར། ཁ་ཅིག་ན་རེ། རང་ལུགས་ལ་གཞི་གཅིག་གི་རྒྱུ་འབྲས་དུས་མཉམ་པ་ཡོད་པར་ཐལ། ཐེག་མཆོག་དབུ་མ་ལས། དུས་མཉམ་བག་ཆགས་བགོ །ཞེས་དང༌། ངོ་བོ་སྐྱེད་པའི་རྒྱུ་འབྲས་སྔ་ཕྱི་སྟེ། ། ཁྱད་པར་བསྐྱེད་དང་རྟེན་ལ་ངེས་པ་མེད། །ཅེས་དང༌། ས་བཟང་གི་ཀུན་བཏུས་འགྲེལ་བ་ལས། རང་ལུགས་ལ་དཔེར་ན་ཚོགས་པ་ཚར་གཅིག་ལས་སྐྱེས་པའི་རོ་གཟུགས་རྒྱུ་འབྲས་ཀྱང་ཡིན་ལ་དུས་མཉམ་པའང་མི་འགལ་བ། ཞེས་གསུངས་པའི་ཕྱིར་ན་མ་ཁྱབ་སྙམ་སྟེ། རྒྱུ་འབྲས་དུས་མཉམ་པ་གསུངས་ཟིན་ལ་གསུངས་པ་ནི། ས་བཟང་གི་ཀུན་བཏུས་འགྲེལ་བར་ལུང་དེའི་གོང་དུ། དེ་ཉིད་༼༨༠༽ལས། ཁ་ཅིག་རྒྱུ་འབྲས་མཚན་ཉིད་པ་ཡིན་ཡང་དུས་མཉམ་པ་མི་འགལ་ཏེ། འདི་ཉིད་དུ་སེམས་བྱུང་ཕན་ཚུན་ལྷན་གཅིག་འབྱུང་བ་དང༌། མཚུངས་ལྡན་གྱི་རྒྱུར་གསུངས་པ་དང༌། ཐེག་བསྡུས་སུ་ཡང༌། ཀུན་གཞིའི་རྣམ་པར་ཤེས་པ་དང༌། ཀུན་ནས་ཉོན་མོངས་པའི་ཆོས་རྣམས་དུས་མཉམ་དུ་གཅིག་གི་རྒྱུར་གཅིག་འགྱུར་བ། མར་མེའི་མེ་ལྕེ་འབྱུང་བ་དང་སྙིང་པོ་འཚིག་པ་དུས་མཉམ་པ་དང༌། མདུང་ཁྱིམ་དུས་མཉམ་པ་ཕན་ཚུན་བརྟེན་ནས་མི་འགྱེལ་བའི་དཔེར་གསུངས་པའི་ཕྱིར། ཞེས་པ་ནས། དུས་མཉམ་པའི་རྒྱུ་འབྲས་དུ་མ་དམིགས་པའི་ཕྱིར་ཞེས་གསུངས་མོད། དེའང་བརྟགས་ན་མི་འཐད་དེ། རྒྱུ་འབྲས་གཉིས་ཀ་མ་སྐྱེས་ན་རྒྱུས་འབྲས་བུ་ལ་ཕན་འདོགས་མི་ནུས་པའི་ཕྱིར་དུས་མི་མཉམ་ལ། གཉིས་ཀ་སྐྱེས་པ་ན་རྒྱུས་འབྲས་བུ་ལ་ཕན་འདོགས་མི་དགོས་པའི་ཕྱིར་དུས་མི་མཉམ་ཞིང༌། རྒྱུ་གང་ཡིན་པ་དེ་འབྲས་བུའི་སྔར་ཡོད་པ་ཁོ་ན་ཡིན་པའི་ཕྱིར་རོ། །དེ་ལྟར་ཡང་རྣམ་འགྲེལ་ལས། མེད་པ་སྔར་ནུས་མེད་ཕྱིར་དང༌། །ཕྱིས་ཀྱང་ཉེར་སྦྱོར་མེད་པའི་ཕྱིར། །རྒྱུ་རྣམས་ཐམས་ཅད་སྔར་ཡོད་ཡིན། །ཞེས་གསུངས་པ་བཞིན་ནོ། །ཐེག་བསྡུས་སུ་གསུངས་པ་ནི། བར་མ་ཆད་དུ་བྱུང་བ་ལ་དུས་མཉམ་དུ་དགོངས་ཏེ་འཇིག་རྟེན་པའི་བློ་དང་མཐུན་པར་མཛད་པའམ། ཡང་ན་རྒྱུ་འབྲས་བཏགས་པ་བ་སྟེ། དེ་ཉིད་ཀྱི་བཤད་སྦྱར་ལས། ལྷན་ཅིག་འབྱུང་བའི་རྒྱུ་ཉིད་ནི་བཏགས་པ་བ་སྟེ། དུས་གཅིག་ཏུ་འབྱུང་བ་རྣམས་ལ་རྒྱུ་དང་འབྲས་བུའི་དངོས་པོ་མི་རུང་བའི་ཕྱིར། ཞེས་པ་ནས། དུས་མཉམ་པའི་རྒྱུ་འབྲས་ནི་མ་ཡིན་ནོ། །རང་ལུགས་ལ་དཔེར་ན་ཚོགས་པ་ཚར་གཅིག་ལས་སྐྱེས་པའི་རོ་གཟུགས་རྒྱུ་འབྲས་ཀྱང་ཡིན་ལ་དུས་མཉམ་པའང་མི་འགལ་བ། ཞེས་གསུངས་པའི་ཕྱིར་རོ། །གཞན་ཡང་ས་བཟང་གི་ཀུན་བཏུས་འགྲེལ་བ་༼༢༤༣༽ལས། བསྡུ་བར་ཡང་དུས་མི་མཉམ་པ་ཁོ་ན་རྐྱེན་དུ་གསུངས་པས་འདིར་སྔར་ཡང་བཤད་པ་ལྟར་རྒྱུ་འབྲས་མཚན་ཉིད་པ་ནི་དུས་མི་མཉམ་པ་ཁོ་ནའོ། །ཞེས་གསུངས་སོ། །ཡང་འཕགས་པ་ཐོགས་མེད་ཀྱི་རྟོག་དཔྱོད་ཀྱི་ས་ལས། སྐྱེས་ལ་འགོགས་པས་རྒྱུ་བྱེད་ཀྱི་མ་སྐྱེས་ལ་མ་འགགས་པས་ནི་མ་ཡིན་ནོ། །ཞེས་གསུངས་པ་དང༌། ཐེག་མཆོག་དབུ་མ་ལས། དེ་ཡང་ས་རྡུལ་སྐད་ཅིག་དང་པོ་དེ། །ཆུ་མེ་རླུང་གསུམ་གཉིས་པའི་ལྷན་ཅིག་རྒྱུ། །དེ་བཞིན་ཕན་ཚུན་རེ་རེར་སྦྱར་བར་བྱ། །འོན་ཀྱང་དངོས་འབྲས་དངོས་རྒྱུ་ཐོགས་མེད་ནུས། །དུས་མཉམ་བྱུང་བར་སྣང་བའང་དེ་ཡིན་ནོ། །ཞེས་གསུངས་པ་ལ་སོགས་པ་དེ་དག་གིས་རྒྱུ་འབྲས་དུས་མཉམ་པ་གསུངས་ཟིན་གསུངས་པའི་དགོངས་པ་གསལ་བར་བྱས་པ་འདྲ། རེ་ཞིག་ནི་དེ་ཙམ་མོ། །ཁ་ཅིག་ན་རེ། དངོས་པོའི་སྔ་ལོགས་སུ་བྱུང་བ་ཆོས་ཅན། ཁྱོད་ཀྱི་དུས་སུ་དངོས་པོ་མེད་པར་ཐལ། དངོས་པོ་ཁྱོད་ཀྱི་འབྲས་བུ་ཡིན་པའི་ཕྱིར། །འདོད་ན། དངོས་པོའི་སྔ་ལོགས་སུ་བྱུང་བ་ཆོས་ཅན། ཁྱོད་ཀྱི་དུས་སུ་དངོས་པོ་ཡོད་པར་ཐལ། དངོས་པོའི་སྔ་ལོགས་སུ་བྱུང་བ་དེ་དངོས་པོ་ཡིན་པ་གང་ཞིག དེ་ཡོད་པའི་ཕྱིར་ན་མ་ཁྱབ། རྟགས་དང་པོ་མ་གྲུབ་ན། དངོས་པོའི་སྔ་ལོགས་སུ་བྱུང་བ་ཆོས་ཅན། དངོས་པོ་ཡིན་པར་ཐལ། དངོས་པོའི་རྒྱུ་ཡིན་པའི་ཕྱིར། རྟགས་གཉིས་པ་མ་གྲུབ་ན།དངོས་པོའི་སྔ་ལོགས་སུ་བྱུང་བ་ཆོས་ཅན། ཁྱོད་ཀྱི་དུས་སུ་ཁྱོད་ཡོད་པར་ཐལ། ཁྱོད་དངོས་པོ་ཡིན་པའི་ཕྱིར། ཁ་ཅིག་ན་རེ། དངོས་པོའི་ཉེར་ལེན་མེད་པར་ཐལ།དངོས་པོའི་སྔ་ལོགས་སུ་བྱུང་བ་དེ་མ་ཡིན་པའི་ཕྱིར། མ་གྲུབ་ན། དངོས་པོའི་སྔ་ལོགས་སུ་བྱུང་བ་ཆོས་ཅན། དངོས་པོའི་ཉེར་ལེན་མ་ཡིན་པར་ཐལ། དངོས་པོར་འགྱུར་ངེས་མ་ཡིན་པའི་ཕྱིར། མ་གྲུབ་ན། དངོས་པོའི་སྔ་ལོགས་སུ་བྱུང་བ་ཆོས་ཅན། དངོས་པོར་འགྱུར་ངེས་མ་ཡིན་པར་ཐལ། དངོས་པོར་གྱུར་ཟིན་པའི་ཕྱིར་ན་མ་ཁྱབ། མ་གྲུབ་ན། དངོས་པོའི་སྔ་ལོགས་སུ་བྱུང་བ་ཆོས་ཅན། དངོས་པོར་གྱུར་ཟིན་པར་ཐལ། དངོས་པོ་ཡིན་པའི་ཕྱིར་རོ།། ། བདུན་པ་ཡུལ་དང་ཡུལ་ཅན་གྱི་རྣམ་བཞག་བཤད་པ།བདུན་པ་ཡུལ་དང་ཡུལ་ཅན་གྱི་རྣམ་བཞག་བཤད་པ་ལ། རྣམ་འགྲེལ་མངོན་སུམ་ལེའུ་ལས། དེ་ཕྱིར་མིག་དང་གཟུགས་དག་ལ། །བརྟེན་ནས་མིག་བློ་སྐྱེ་བར་འགྱུར། །ཞེས་སོགས་གཞུང་དུ་མ་བྱུང༌། དེའི་མཐའ་དཔྱད་པ་ལ། དགག་བཞག་སྤོང་གསུམ་ལས། དང་པོ་ནི། ཁ་ཅིག་ན་རེ། ཡོད་པ་ཡིན་ན་ཡུལ་དང་ཡུལ་ཅན་གཉིས་ཀ་ཡིན་པས་ཁྱབ་ཟེར་ན། བུམ་པ་ཆོས་ཅན། ཡུལ་དང་ཡུལ་ཅན་གཉིས་ཀ་ཡིན་པར་ཐལ། ཡོད་པ་ཡིན་པའི་ཕྱིར། ཁྱབ་པ་ཁས། མ་གྲུབ་ན། བུམ་པ་ཆོས་ཅན། ཡོད་པ་ཡིན་པར་ཐལ། ཚད་མས་དམིགས་པ་ཡིན་པའི་ཕྱིར། མ་ཁྱབ་ན་ཁྱབ་བ་ཡོད་པར་ཐལ། ཚད་མས་དམིགས་པ་ཡོད་པའི་མཚན་ཉིད་ཡིན་པའི་ཕྱིར། རྩ་བར་འདོད་ན། བུམ་པ་ཆོས་ཅན། ཡུལ་དང་ཡུལ་ཅན་གཉིས་ཀ་མ་ཡིན་པར་ཐལ། ཡུལ་ཅན་མ་ཡིན་པའི་ཕྱིར། མ་གྲུབ་ན། དེ་ཆོས་ཅན། ཡུལ་ཅན་མ་ཡིན་པར་ཐལ། གཟུགས་སུ་གྱུར་བའི་ཡུལ་ཅན་དང༌། ཤེས་པར་གྱུར་བའི་ཡུལ་ཅན་དང༌། ལྡན་མིན་འདུ་བྱེད་དུ་གྱུར་བའི་ཡུལ་ཅན་གང་ཡང་མ་ཡིན་པའི་ཕྱིར། ཡང་ཁ་ཅིག་ན་རེ། ཡོད་པ་ཡིན་ན་ཡུལ་དང་ཡུལ་ཅན་གཉིས་ཀ་མ་ཡིན་པས་ཁྱབ་ཟེར་ན། ནམ་འཆི་ཆ་མེད་ཅེས་བརྗོད་པའི་སྒྲ་ཆོས་ཅན། ཡུལ་དང་ཡུལ་ཅན་གཉིས་ཀ་མ་ཡིན་པར་ཐལ། ཡོད་པ་ཡིན་པའི་ཕྱིར། ཁྱབ་པ་ཁས། རྟགས་སླ། འདོད་ན། ནམ་འཆི་ཆ་མེད་ཅེས་བརྗོད་པའི་སྒྲ་ཆོས་ཅན། ཡུལ་དང་ཡུལ་ཅན་གཉིས་ཀ་ཡིན་པར་ཐལ། ཡུལ་ཡིན་པ་གང་ཞིག ཡུལ་ཅན་ཡིན་པའི་ཕྱིར། རྟགས་དང་པོ་མ་གྲུབ་ན། ནམ་འཆི་ཆ་མེད་ཅེས་བརྗོད་པའི་སྒྲ་ཆོས་ཅན། ཡུལ་ཡིན་པར་ཐལ། གཞི་གྲུབ་པའི་ཕྱིར། ཁྱབ་སྟེ།ཡུལ་དང་གཞི་གྲུབ་སོགས་དོན་གཅིག་ཡིན་པའི་ཕྱིར། རྟགས་གཉིས་པ་མ་གྲུབ་ན། ནམ་འཆི་ཆ་མེད་ཅེས་བརྗོད་པའི་སྒྲ་ཆོས་ཅན། ཡུལ་ཅན་ཡིན་པར་ཐལ། གཟུགས་སུ་གྱུར་བའི་ཡུལ་ཅན་ཡིན་པའི་ཕྱིར། མ་གྲུབ་ན། ནམ་འཆི་ཆ་མེད་ཆོས་ཅན། ཁྱོད་ཅེས་བརྗོད་པའི་སྒྲ་གཟུགས་སུ་གྱུར་བའི་ཡུལ་ཅན་ཡིན་པར་ཐལ། རྟག་གཅིག་རང་དབང་བས་སྟོང་བ་ཡིན་པའི་ཕྱིར། ཁ་ཅིག་ན་རེ། བློ་གང་ཡང་རུང་བ་ཞིག་གི་ཡུལ་ན། ཡུལ་ཡིན་པས་ཁྱབ་ཟེར་ན། རི་བོང་རྭ་ཆོས་ཅན། ཡུལ་ཡིན་པར་ཐལ། བློ་གང་ཡང་རུང་བ་ཞིག་གི་ཡུལ་ཡིན་པའི་ཕྱིར། ཁྱབ་པ་ཁས། མ་གྲུབ་ན། རི་བོང་རྭ་ཆོས་ཅན། བློ་གང་ཡང་རུང་བ་ཞིག་གི་ཡུལ་ཡིན་པར་ཐལ། རང་འཛིན་རྟོག་པའི་ཡུལ་ཡིན་པའི་ཕྱིར། མ་གྲུབ་ན། རི་བོང་རྭ་ཆོས་ཅན། རང་འཛིན་རྟོག་པའི་ཡུལ་ཡིན་པར་ཐལ། ཡོད་མེད་གང་རུང་ཡིན་པའི་ཕྱིར། རྩ་བར་འདོད་ན། རི་བོང་རྭ་ཆོས་ཅན། ཡུལ་མ་ཡིན་པར་ཐལ། གཞལ་བྱ་མ་ཡིན་པའི་ཕྱིར། མ་ཁྱབ་ན་ཁྱབ་པ་ཡོད་པར་ཐལ། ཡུལ་དང་གཞལ་བྱ་གཉིས་དོན་གཅིག་ཡིན་པའི་ཕྱིར། གཏན་ཚིགས་རིགས་པའི་དོན་བསྡུས་ལས། དེ་དང་ཁྱབ་མཉམ་དོན་གཅིག་པ་ནི། ཡུལ་དང་གཞལ་བྱ་དང་བདག་མེད་དང་གཞི་གྲུབ་གཞན་སེལ་ཡོད་པ་སོགས་སོ། །ཞེས་གསུངས་པའི་ཕྱིར་རོ། །ཁ་ཅིག་ན་རེ། ཡུལ་ཅན་ཡིན་ན་ཤེས་པ་ཡིན་པས་ཁྱབ་ཟེར་ན། འཆི་ཚེ་ཆོས་མ་གཏོགས་གང་གིས་ཕན་པ་མེད་ཅེས་པའི་སྒྲ་ཆོས་ཅན། ཤེས་པ་ཡིན་པར་ཐལ། ཡུལ་ཅན་ཡིན་པའི་ཕྱིར། ཁྱབ་པ་ཁས། མ་གྲུབ་ན། དེ་ཆོས་ཅན། ཡུལ་ཅན་ཡིན་པར་ཐལ། ཁྱོད་ཀྱི་ཡུལ་ཡོད་པའི་ཕྱིར། མ་གྲུབ་ན། དེ་ཆོས་ཅན། ཁྱོད་ཀྱི་ཡུལ་ཡོད་པར་ཐལ། ཁྱོད་ཀྱི་བརྗོད་བྱ་ཡོད་པའི་ཕྱིར། མ་གྲུབ་ན། དེ་ཆོས་ཅན། ཁྱོད་ཀྱི་བརྗོད་བྱ་ཡོད་པར་ཐལ། འཆི་ཚེ་ཆོས་མ་གཏོགས་གང་གིས་ཕན་པ་མེད་པ་དེ་ཡིན་པའི་ཕྱིར། མ་གྲུབ་ན། འཆི་ཚེ་ཆོས་མ་གཏོགས་གང་གིས་ཕན་པ་མེད་པ་ཆོས་ཅན། ཁྱོད་ཁྱོད་ཅེས་བརྗོད་པའི་སྒྲའི་བརྗོད་བྱ་ཡིན་པར་ཐལ། གང་ཟག་གི་བདག་མེད་ཡིན་པའི་ཕྱིར། རྩ་བར་འདོད་ན། འཆི་ཚེ་ཆོས་མ་གཏོགས་གང་གིས་ཕན་པ་མེད་ཅེས་པའི་སྒྲ་ཆོས་ཅན། ཤེས་པ་མ་ཡིན་པར་ཐལ། གསལ་ཞིང་རིག་པ་མ་ཡིན་པའི་ཕྱིར། མ་གྲུབ་ན། དེ་ཆོས་ཅན། གསལ་ཞིང་རིག་པ་མ་ཡིན་པར་ཐལ། བེམ་པོ་ཡིན་པའི་ཕྱིར། ཁྱབ་སྟེ། ཐེག་མཆོག་ཟིན་བྲིས་ལས། སེམས་ཀྱི་མཚན་ཉིད་གསལ་ཞིང་རིག་པ་ལ་སོགས་པ་བེམ་པོར་གྱུར་བའི་ཆོས་རྣམས་ལ་མེད་པའི་ཕྱིར། ཞེས་གསུངས་པའི་ཕྱིར་རོ། །གཞན་ཡང་སངས་རྒྱས་འཕགས་པ་ཆོས་ཅན། ཤེས་པ་ཡིན་པར་ཐལ། ཡུལ་ཅན་ཡིན་པའི་ཕྱིར། ཁྱབ་པ་ཁས། མ་གྲུབ་ན། སངས་རྒྱས་འཕགས་པ་ཆོས་ཅན། ཡུལ་ཅན་ཡིན་པར་ཐལ། ཁྱོད་ཀྱི་ཡུལ་ཡོད་པའི་ཕྱིར། མ་གྲུབ་ན། སངས་རྒྱས་འཕགས་པ་ཆོས་ཅན། ཁྱོད་ཀྱི་ཡུལ་ཡོད་པར་ཐལ། ཁྱོད་ཀྱི་གཞལ་བྱ་ཡོད་པའི་ཕྱིར། མ་གྲུབ་ན། སངས་རྒྱས་འཕགས་པ་ཆོས་ཅན། ཁྱོད་ཀྱི་གཞལ་བྱ་ཡོད་པར་ཐལ། གཞི་གྲུབ་ན་ཁྱོད་ཀྱི་གཞལ་བྱ་ཡིན་པས་ཁྱབ་པའི་ཕྱིར། རྩ་བར་འདོད་ན། སངས་རྒྱས་འཕགས་པ་ཆོས་ཅན། ཤེས་པ་མ་ཡིན་པར་ཐལ། ལྡན་མིན་འདུ་བྱེད་ཡིན་པའི་ཕྱིར། མ་གྲུབ་ན། སངས་རྒྱས་འཕགས་པ་ཆོས་ཅན། ལྡན་མིན་འདུ་བྱེད་ཡིན་པར་ཐལ། གང་ཟག་བཏགས་ཡོད་པ་ཡིན་པའི་ཕྱིར། ཁ་ཅིག་ན་རེ། མདོ་སྡེ་བའི་ལུགས་ལ་གཞི་གྲུབ་ན། མངོན་སུམ་ཚད་མའི་དངོས་གཞལ་ཡིན་པས་ཁྱབ་ཟེར་ན། ནམ་མཁའ་ཆོས་ཅན། མངོན་སུམ་ཚད་མའི་དངོས་གཞལ་ཡིན་པར་ཐལ། གཞི་གྲུབ་པའི་ཕྱིར། ཁྱབ་པ་ཁས། རྟགས་སླ། རྩ་བར་འདོད་ན། ནམ་མཁའ་ཆོས་ཅན། མངོན་སུམ་ཚད་མའི་དངོས་གཞལ་མ་ཡིན་པར་ཐལ།དངོས་མེད་ཡིན་པའི་ཕྱིར། ཁྱབ་སྟེ། མངོན་སུམ་ཚད་མའི་དངོས་གཞལ་ཡིན་ན། རང་མཚན་ཡིན་དགོས་པའི་ཕྱིར། རྣམ་འགྲེལ་ལས། གཞལ་བྱ་གཉིས་ཕྱིར་ཚད་མ་གཉིས། །ཞེས་སོགས་གསུངས་པའི་ཕྱིར། ཁ་ཅིག་ན་རེ། རང་ལུགས་ལ་གཞི་གྲུབ་ན་རྣམ་མཁྱེན་གྱི་དངོས་གཞལ་ཡིན་པས་ཁྱབ་ཟེར་ན།ཀུན་རྫོབ་རྣམས་ཆོས་ཅན། རྣམ་མཁྱེན་གྱི་དངོས་གཞལ་ཡིན་པར་ཐལ། གཞི་གྲུབ་པའི་ཕྱིར། ཁྱབ་པ་ཁས། རྟགས་སླ། འདོད་ན། ཀུན་རྫོབ་རྣམས་ཆོས་ཅན། རྣམ་མཁྱེན་གྱི་དངོས་གཞལ་མ་ཡིན་པར་ཐལ། རྣམ་མཁྱེན་གྱི་ཤུགས་གཞལ་ཡིན་པའི་ཕྱིར། བདེན་གཉིས་གསལ་བའི་ཉི་མ་ལས། སངས་རྒྱས་ལ་ཆོས་རྣམས་དངོས་སུ་མི་སྣང་ཡང་ཆོས་ཉིད་དངོས་སུ་སྣང་ནས་མཁྱེན་སྟོབས་ཀྱིས་ཆོས་རྣམས་ཤུགས་ལ་མཁྱེན་པ་ཡིན་ཏེ། ཞེས་གསུངས་པའི་ཕྱིར་རོ། །ཁ་ཅིག་ན་རེ། བུམ་འཛིན་རྟོག་པའི་སྣང་ཡུལ་ཡིན་ན་བུམ་འཛིན་རྟོག་པའི་ཞེན་ཡུལ་ཡིན་པས་ཁྱབ་ཟེར་ན། བུམ་འཛིན་རྟོག་པ་ལ་བུམ་པ་མ་ཡིན་པ་ལས་ལོག་པར་སྣང་བ་ཆོས་ཅན། བུམ་འཛིན་རྟོག་པའི་ཞེན་ཡུལ་ཡིན་པར་ཐལ། བུམ་འཛིན་རྟོག་པའི་སྣང་ཡུལ་ཡིན་པའི་ཕྱིར། ཁྱབ་པ་ཁས། མ་གྲུབ་ན། བུམ་འཛིན་རྟོག་པ་ལ་བུམ་པ་མ་ཡིན་པ་ལས་ལོག་པར་སྣང་བ་ཆོས་ཅན། བུམ་འཛིན་རྟོག་པའི་སྣང་ཡུལ་ཡིན་པར་ཐལ། བུམ་འཛིན་རྟོག་པ་ལ་སྣང་ནས་རིག་པར་བྱ་བ་ཡིན་པའི་ཕྱིར། མ་ཁྱབ་ན་ཁྱབ་པ་ཡོད་པར་ཐལ། བུམ་འཛིན་རྟོག་པའི་སྣང་བའི་སྒོ་ནས་རིག་པར་བྱ་བ་དེ་བུམ་འཛིན་རྟོག་པའི་སྣང་ཡུལ་གྱི་མཚན་ཉིད་ཡིན་པའི་ཕྱིར། གོང་གི་མ་ཁྱབ་མཚམས་ཀྱི་རྟགས་མ་གྲུབ་ཟེར་ན། བུམ་པ་ཆོས་ཅན། ཁྱོད་ཁྱོད་འཛིན་རྟོག་པ་ལ་ཁྱོད་མ་ཡིན་པར་ལོག་པར་སྣང་བ་ཁྱོད་འཛིན་རྟོག་པའི་སྣང་ཡུལ་ཡིན་པར་ཐལ། ཁྱོད་བདག་ཏུ་མ་གྲུབ་པ་ཡིན་པའི་ཕྱིར། རྩ་བར་འདོད་ན། བུམ་འཛིན་རྟོག་པ་ལ་བུམ་པ་མ་ཡིན་པ་ལས་ལོག་པར་སྣང་བ་ཆོས་ཅན། བུམ་འཛིན་རྟོག་པའི་ཞེན་ཡུལ་མ་ཡིན་པར་ཐལ། བུམ་འཛིན་རྟོག་པའི་འཛིན་སྟངས་ཀྱི་ཡུལ་མ་ཡིན་པའི་ཕྱིར། མ་གྲུབ་ན། བུམ་འཛིན་རྟོག་པ་ལ་བུམ་པ་མ་ཡིན་པ་ལས་ལོག་པར་སྣང་བ་ཆོས་ཅན། བུམ་འཛིན་རྟོག་པའི་འཛིན་སྟངས་ཀྱི་ཡུལ་མ་ཡིན་པར་ཐལ། བུམ་འཛིན་རྟོག་པའི་སྣང་ཡུལ་ཡིན་པའི་ཕྱིར། མ་ཁྱབ་ན་ཁྱབ་པ་ཡོད་པར་ཐལ། བུམ་འཛིན་རྟོག་པའི་འཛིན་སྟངས་ཀྱི་ཡུལ་དང་བུམ་འཛིན་རྟོག་པའི་སྣང་ཡུལ་གཉིས་འགལ་བ་ཡིན་པའི་ཕྱིར། མ་གྲུབ་ན། བུམ་པ་ཆོས་ཅན། ཁྱོད་འཛིན་རྟོག་པའི་འཛིན་སྟངས་ཀྱི་ཡུལ་དང་ཁྱོད་འཛིན་རྟོག་པའི་སྣང་ཡུལ་གཉིས་འགལ་བ་ཡིན་པར་ཐལ། ཁྱོད་གང་ཟག་གི་བདག་ཏུ་མ་གྲུབ་པའི་ཕྱིར། ཁ་ཅིག་ན་རེ། བུམ་འཛིན་རྟོག་པ་ལ་བུམ་པ་མ་ཡིན་པ་ལས་ལོག་པར་སྣང་བ་བུམ་འཛིན་རྟོག་པའི་བཟུང་ཡུལ་ཡིན་ཟེར་ན། བུམ་འཛིན་རྟོག་པ་ལ་བུམ་པ་མ་ཡིན་པ་ལས་ལོག་པར་སྣང་བ་ཆོས་ཅན། བུམ་འཛིན་རྟོག་པའི་བཟུང་ཡུལ་མ་ཡིན་པར་ཐལ། བུམ་འཛིན་རྟོག་པའི་མ་བཟུང་པའི་ཕྱིར། མ་གྲུབ་ན། བུམ་འཛིན་རྟོག་པ་ལ་བུམ་པ་མ་ཡིན་པ་ལས་ལོག་པར་སྣང་བ་ཆོས་ཅན། བུམ་འཛིན་རྟོག་པའི་མ་བཟུང་བར་ཐལ། བུམ་འཛིན་རྟོག་པའི་སྣང་ཡུལ་ཡིན་པའི་ཕྱིར། ཁ་ཅིག་ན་རེ། རྟོག་པ་ཡིན་ན་ཁྱོད་ཀྱི་ཞེན་ཡུལ་ཡོད་པས་ཁྱབ་ཟེར་ན། ཚེ་འདི་རྟག་པར་འཛིན་པའི་རྟོག་པ་ཆོས་ཅན། ཁྱོད་ཀྱི་ཞེན་ཡུལ་ཡོད་པར་ཐལ། རྟོག་པ་ཡིན་པའི་ཕྱིར། ཁྱབ་པ་ཁས། མ་གྲུབ་ན། ཚེ་འདི་ཆོས་ཅན། ཁྱོད་རྟག་པར་འཛིན་པའི་རྟོག་པ་རྟོག་པ་ཡིན་པར་ཐལ། ཁྱོད་རྟག་པར་འཛིན་པའི་རྟོག་པ་ཡོད་པའི་ཕྱིར། མ་གྲུབ་ན། ཚེ་འདི་ཆོས་ཅན། ཁྱོད་རྟག་པར་འཛིན་པའི་རྟོག་པ་ཡོད་པར་ཐལ། ཁྱོད་གང་ཟག་གི་བདག་མེད་ཡིན་པའི་ཕྱིར། རྩ་བར་འདོད་ན། ཚེ་འདི་རྟག་པར་འཛིན་པའི་རྟོག་པ་ཆོས་ཅན། ཁྱོད་ཀྱི་ཞེན་ཡུལ་མེད་པར་ཐལ། ཁྱོད་ཀྱི་འཛིན་སྟངས་ཀྱི་ཡུལ་མེད་པའི་ཕྱིར། མ་གྲུབ་ན། ཚེ་འདི་རྟག་པར་འཛིན་པའི་རྟོག་པ་ཆོས་ཅན། ཁྱོད་ཀྱི་འཛིན་སྟངས་ཀྱི་ཡུལ་མེད་པར་ཐལ། ཁྱོད་ལོག་ཤེས་ཡིན་པའི་ཕྱིར། མ་གྲུབ་ན། ཚེ་འདི་ཆོས་ཅན། ཁྱོད་རྟག་པར་འཛིན་པའི་རྟོག་པ་ལོག་ཤེས་ཡིན་པར་ཐལ། ཁྱོད་རྟག་པ་མ་ཡིན་པའི་ཕྱིར། ཁ་ཅིག་ན་རེ། སྒྲ་རྟག་པར་འཛིན་པའི་རྟོག་པ་ཆོས་ཅན། ཁྱོད་ཀྱི་འཛིན་སྟངས་ཀྱི་ཡུལ་ཡོད་པར་ཐལ། ཁྱོད་ཀྱི་དམིགས་ཡུལ་ཡོད་པའི་ཕྱིར་ན་མ་ཁྱབ། མ་གྲུབ་ན། སྒྲ་རྟག་འཛིན་རྟོག་པ་ཆོས་ཅན། ཁྱོད་ཀྱི་དམིགས་ཡུལ་ཡོད་པར་ཐལ། སྒྲ་དེ་ཡིན་པའི་ཕྱིར། མ་གྲུབ་ན། སྒྲ་ཆོས་ཅན། ཁྱོད་སྒྲ་རྟག་པར་འཛིན་པའི་དམིགས་ཡུལ་ཡིན་པར་ཐལ། ཁྱོད་སྒྲ་མི་རྟག་པར་རྟོགས་པའི་རྗེས་དཔག་གི་དམིགས་ཡུལ་ཡིན་པའི་ཕྱིར། མ་ཁྱབ་ན་ཁྱབ་པ་ཡོད་པར་ཐལ། སྒྲ་རྟག་པར་འཛིན་པའི་རྟོག་པ་དང༌། སྒྲ་མི་རྟག་པར་རྟོགས་པའི་རྗེས་དཔག་གཉིས་དམིགས་པ་གཅིག་ལ་དམིགས་ནས་འཛིན་སྟངས་དངོས་འགལ་དུ་ཞུགས་པའི་བློ་ཡིན་པའི་ཕྱིར། ཁ་ཅིག་ན་རེ། བུམ་འཛིན་རྟོག་པ་ཡིན་ན་བུམ་པ་ཁྱོད་ཀྱི་ཞེན་ཡུལ་ཡིན་པས་ཁྱབ་ཟེར་ན། བུམ་པ་ཤུགས་ལ་རྟོགས་པའི་རྟོག་པ་ཆོས་ཅན། དེར་ཐལ། དེའི་ཕྱིར། ཁྱབ་པ་ཁས། མ་གྲུབ་ན། བུམ་པ་ཆོས་ཅན། ཁྱོད་ཤུགས་ལ་རྟོགས་པའི་རྟོག་པ་ཁྱོད་འཛིན་རྟོག་པ་ཡིན་པར་ཐལ། ཁྱོད་ཤུགས་ལ་རྟོགས་པའི་རྟོག་པ་ཡོད་པའི་ཕྱིར། རྩ་བར་འདོད་ན། བུམ་པ་ཤུགས་ལ་རྟོགས་པའི་རྟོག་པ་ཆོས་ཅན། བུམ་པ་ཁྱོད་ཀྱི་ཞེན་ཡུལ་མ་ཡིན་པར་ཐལ། བུམ་པ་ཁྱོད་ཀྱི་ཤུགས་ཡུལ་ཡིན་པའི་ཕྱིར། ཁ་ཅིག་ན་རེ། ཤེས་པ་ཡིན་ན་སེམས་སེམས་བྱུང་གང་རུང་ཡིན་པས་ཁྱབ་ཟེར་ན། སྔོ་འཛིན་མིག་ཤེས་ཉམས་མྱོང་གི་རང་རིག་ཆོས་ཅན། སེམས་སེམས་བྱུང་གང་རུང་ཡིན་པར་ཐལ། ཤེས་པ་ཡིན་པའི་ཕྱིར། ཁྱབ་པ་ཁས། མ་གྲུབ་ན། སྔོ་འཛིན་མིག་ཤེས་ཉམས་མྱོང་གི་རང་རིག་ཆོས་ཅན། སེམས་སེམས་བྱུང་གང་རུང་མ་ཡིན་པར་ཐལ། རང་རིག་ཡིན་པའི་ཕྱིར། མ་གྲུབ་ན། སྔོ་འཛིན་མིག་ཤེས་ཆོས་ཅན། ཁྱོད་ཉམས་མྱོང་གི་རང་རིག་དེ་རང་རིག་ཡིན་པར་ཐལ། ཁྱོད་ཉམས་མྱོང་གི་རང་རིག་ཡོད་པའི་ཕྱིར། མ་གྲུབ་ན། སྔོ་འཛིན་མིག་ཤེས་ཆོས་ཅན། ཁྱོད་ཉམས་མྱོང་གི་རང་རིག་ཡོད་པར་ཐལ། ཁྱོད་གཞན་རིག་གི་ཤེས་པ་ཡིན་པའི་ཕྱིར། རྩ་བར་འདོད་ན། སྔོ་འཛིན་མིག་ཤེས་ཉམས་མྱོང་གི་རང་རིག་ཆོས་ཅན། སེམས་སེམས་བྱུང་གང་རུང་མ་ཡིན་པར་ཐལ། སེམས་མ་ཡིན་པ་གང་ཞིག སེམས་བྱུང་མ་ཡིན་པའི་ཕྱིར། རྟགས་རེ་རེ་ནས་གྲུབ་སྟེ། འཛིན་རྣམ་ཡིན་པའི་ཕྱིར། གཞན་ཡང་རང་བྱུང་ཡེ་ཤེས་ཀྱིས་ཁྱབ་པ་མ་ངེས། ཁ་ཅིག་ཡིད་ཤེས་དང་ཡིད་གཉིས་དོན་གཅིག་ཟེར་ན། ཡིད་དང་ཡིད་ཤེས་གཉིས་དོན་མི་གཅིག་པར་ཐལ། དེ་གཉིས་ལ་ཡིན་མིན་གྱི་མུ་བཞི་ཡོད་པའི་ཕྱིར། མ་གྲུབ་ན། དེར་ཐལ། ཡིད་ཡིན་ལ་ཡིད་ཤེས་མ་ཡིན་པའི་མུ། ཡིད་ཤེས་ཡིན་ལ་ཡིད་མ་ཡིན་པའི་མུ། གཉིས་ཡིན་གྱི་མུ། གཉིས་ཀ་མ་ཡིན་པའི་མུ་དང་བཞི་ཡོད་པའི་ཕྱིར། མུ་དང་པོ་ཡོད་དེ། མིག་གི་རྣམ་པར་ཤེས་པ་དེ་ཡིན་པའི་ཕྱིར། མུ་གཉིས་པ་ཡོད་དེ། ཡིད་ཀྱི་རྣམ་ཤེས་ཀྱི་འཁོར་དུ་བྱུང་བའི་ཚོར་སོགས་དེ་ཡིན་པའི་ཕྱིར། མུ་གསུམ་པ་ཡོད་དེ། ཡིད་ཀྱི་རྣམ་པར་ཤེས་པ་དེ་ཡིན་པའི་ཕྱིར། མུ་བཞི་བ་ཡོད་དེ། མིག་གི་རྣམ་ཤེས་ཀྱི་འཁོར་དུ་བྱུང་བའི་སེམས་བྱུང་དེ་ཡིན་པའི་ཕྱིར། གཙོ་སེམས་དང༌། སེམས་དང༌། ཡིད་རྣམས་དོན་གཅིག ཁ་ཅིག་ན་རེ། ཤེས་པ་ཡིན་ན་ཚད་མ་ཡིན་པས་ཁྱབ་ཟེར་ན། དུང་སེར་སྣང་གི་དབང་ཤེས་ཆོས་ཅན། ཚད་མ་ཡིན་པར་ཐལ། ཤེས་པ་ཡིན་པའི་ཕྱིར། ཁྱབ་ཁས། མ་གྲུབ་ན། དུང་སེར་སྣང་གི་དབང་ཤེས་ཆོས་ཅན། ཤེས་པ་ཡིན་པར་ཐལ། དབང་ཤེས་ཡིན་པའི་ཕྱིར། རྩ་བར་འདོད་ན། དུང་སེར་སྣང་གི་དབང་ཤེས་ཆོས་ཅན། ཚད་མ་མ་ཡིན་པར་ཐལ། ལོག་ཤེས་ཡིན་པའི་ཕྱིར། ཁ་ཅིག་ན་རེ། ཚད་མ་ཡིན་ན་མངོན་སུམ་ཚད་མ་ཡིན་པས་ཁྱབ་ཟེར་ན། འཆི་བ་རྟོགས་པའི་རྗེས་དཔག་ཚད་མ་ཆོས་ཅན། མངོན་སུམ་ཚད་མ་ཡིན་པར་ཐལ། ཚད་མ་ཡིན་པའི་ཕྱིར། ཁྱབ་པ་ཁས། མ་གྲུབ་ན། འཆི་བ་རྟོགས་པའི་རྗེས་དཔག་ཚད་མ་ཆོས་ཅན། ཚད་མ་ཡིན་པར་ཐལ། གསར་དུ་མི་བསླུ་བའི་རིག་པ་ཡིན་པའི་ཕྱིར། མ་ཁྱབ་ན་ཁྱབ་པ་ཡོད་པར་ཐལ། རྣམ་འགྲེལ་ལས། ཚད་མ་བསླུ་མེད་ཅན་ཤེས་པ། །ཞེས་དང༌། མ་ཤེས་དོན་གྱི་གསལ་བྱེད་གང༌། །ཞེས་གསུངས་པའི་ཕྱིར། རྩ་བར་འདོད་ན། འཆི་བ་རྟོགས་པའི་རྗེས་དཔག་ཚད་མ་ཆོས་ཅན། མངོན་སུམ་ཚད་མ་མ་ཡིན་པར་ཐལ། མངོན་སུམ་མ་ཡིན་པའི་ཕྱིར། མ་གྲུབ་ན། དེ་ཆོས་ཅན། མངོན་སུམ་མ་ཡིན་པར་ཐལ། རྟོག་བྲལ་གྱི་ཤེས་པ་མ་ཡིན་པའི་ཕྱིར། མ་གྲུབ་ན། དེ་ཆོས་ཅན། རྟོག་བྲལ་གྱི་ཤེས་པ་མ་ཡིན་པར་ཐལ། རྟོག་པ་ཡིན་པའི་ཕྱིར། མ་གྲུབ་ན། འཆི་བ་རྟོགས་པའི་རྗེས་དཔག་ཚད་མ་ཆོས་ཅན། རྟོག་པ་ཡིན་པར་ཐལ། རྗེས་དཔག་ཡིན་པའི་ཕྱིར་རོ། ། གཉིས་པ་རང་ལུགས་བཤད་པ།གཉིས་པ་རང་ལུགས་བཤད་པ་ལ། ཡུལ་དང་ཡུལ་ཅན་གྱི་མཚན་ཉིད་ཡོད་དེ། གཏན་ཚིགས་རིགས་པའི་དོན་བསྡུས་ལས། ཡུལ་དང་ཡུལ་ཅན་དུ་དབྱེ་བ་ལ། མཚན་ཉིད་རིམ་པ་ལྟར་རིག་པར་བྱ་བ་དང༌། རིག་བྱེད་དམ་སྟོན་བྱེད་ཡིན་པའོ། །ཞེས་གསུངས་པའི་ཕྱིར། དེ་ལས། ཡུལ་ལ་དབྱེ་ན། ཡུལ་དུ་བྱས་ཚུལ་མི་འདྲ་བའི་སྒོ་ནས་དང༌། རྟོགས་དཀའ་སླའི་སྒོ་ནས་དབྱེ་ཚུལ་དང་གཉིས། དང་པོ་ལ་དབྱེ་ན། སྣང་ཡུལ། བཟུང་ཡུལ། ཞེན་ཡུལ། འཇུག་ཡུལ་དང་བཞིའོ། །མཚན་ཉིད་ནི་རིམ་པ་ལྟར། སྣང་ནས་རིག་པར་བྱ་བ་དང༌། རང་འཛིན་ཤེས་པ་མ་འཁྲུལ་བ་ལ་རང་འདྲ་བའི་རྣམ་པ་དངོས་སུ་སྐྱེད་བྱེད་ཀྱི་བེམ་པོ་དང༌། ཞེན་ནས་རིག་པར་བྱ་བ་དང༌། ཚད་མའི་གཞལ་བ་ལས་བླང་དོར་བྱར་རུང་བའོ། །སྣང་ཡུལ་ཤེས་པ་ཀུན་ལ་ཡོད། །བཟུང་ཡུལ་དོན་རིག་གཉིས་ཀྱིས་འཛིན། །ཞེན་ཡུལ་རྟོག་པ་ཁོ་ནས་ཞེན། །འཇུག་ཡུལ་ལ་ནི་ཚད་མ་དང༌། །དཔྱད་ཤེས་སྐྱེས་བུ་གསུམ་གྱིས་འཇུག །ཅེས་གསུངས་པའི་ཕྱིར། གཞན་ལུགས་ལ་རྟོག་པའི་སྣང་ཡུལ་དེ་བཟུང་ཡུལ་དུ་བཞེད་ཀྱང་གོང་གི་མཚན་ཉིད་བཞག་ཚུལ་དང་བསྟུན་ན་བཟུང་ཡུལ་ལ་རྟོག་མེད་ཤེས་པའི་གཟུང་དོན་དགོས་པའོ། །དེ་ལས། རྟོགས་དཀའ་སླའི་སྒོ་ནས་དབྱེ་ན། གཞལ་བྱ་མངོན་གྱུར་ལྐོག་གྱུར་ཤིན་ཏུ་ལྐོག་གྱུར་གསུམ་མོ། །མཚན་ཉིད་རིམ་པ་ལྟར། རྟོགས་པ་པོའི་མངོན་སུམ་དང༌། རྗེས་དཔག་མཚན་ཉིད་པས་དང༌། ལུང་ཙམ་གྱིས་གྲུབ་པའི་དོན་ཞེས་པའོ། །ཞེས་གསུངས་སོ། །ཡང་ཡུལ་ལ་དབྱེ་ན། ཕུང་པོ་ཁམས་སྐྱེ་མཆེད་དང་གསུམ། དེ་དག་གི་མཚན་ཉིད་སོགས་ནི། གཏན་ཚིགས་རིགས་པའི་དོན་བསྡུས་ལས། ཕུང་པོ་དང་ཁམས་དང་སྐྱེ་མཆེད་ལ་མཚན་ཉིད་རིམ་པ་ལྟར་དུ་མ་སྤུངས་པའི་དངོས་པོ་དང༌། རིགས་ཀྱི་དོན་བྱེད་པ་དང༌། རྣམ་ཤེས་སྐྱེ་བའི་སྒོར་གྱུར་པ་ཞེས་པའོ། ། དང་པོ་ཕུང་པོ་ནི་ལྔ་སྟེ། གཟུགས་ཀྱི་ཕུང་པོ་དང༌། ཚོར་བའི་དང༌། འདུ་ཤེས་ཀྱི་དང༌། འདུ་བྱེད་ཀྱི་དང༌། རྣམ་པར་ཤེས་པའི་ཕུང་པོ་དང་ལྔའོ། ། མཚན་ཉིད་རིམ་པ་ལྟར། དུ་མ་སྤུངས་པ་གང་ཞིག འབྱུང་བ་བཞིའམ་འབྱུང་བཞི་རྒྱུར་བྱས་པའི་བེམ་དངོས་དང༌། གང་ཞིག རང་ཡུལ་ཉམས་སུ་མྱོང་བའི་སེམས་བྱུང་དང༌། གང་ཞིག ཡུལ་ལ་ཚད་མར་འཛིན་པའི་སེམས་བྱུང་དང༌། གང་ཞིག གཟུགས་སེམས་ཚོར་འདུ་བཞི་ལས་གཞན་དུ་གྱུར་བའི་འདུས་བྱས་དང༌། གང་ཞིག དོན་གྱི་ངོ་བོ་རང་སྟོབས་ཀྱིས་རིག་པ་ཞེས་པའོ། །དབྱེ་ན། དང་པོ་ལ། དབང་པོ་ལྔ་དང༌། དོན་ལྔ་དང༌། རྣམ་པར་རིག་བྱེད་མ་ཡིན་པའི་གཟུགས་དང་བཅུ་གཅིག་གོ །གཉིས་པ་ཚོར་བ་བདེ་སྡུག་བཏང་སྙོམས་གསུམ་མོ། །གསུམ་པ་ཆུང་ངུ་དང་རྒྱ་ཆེན་པོར་གྱུར་བ་དང་ཚད་མེད་པ་གསུམ་མོ། །བཞི་བ་ལ་ལྡན་པའི་འདུ་བྱེད་རྣམས་དང༌། ལྡན་པ་མ་ཡིན་པའི་འདུ་བྱེད་གཉིས་སོ། ། ལྔ་བ་རྣམ་ཤེས་ཚོགས་དྲུག་གམ་བརྒྱད་དེ་སྔ་མ་བཞིན་ནོ། །ཞེས་གསུངས་པའི་ཕྱིར། མཚན་ཉིད་དེ་དག་དང་དབྱེ་བ་ལ་ཅུང་ཟད་ཞིབ་ཆ་དགོས་སོ། །རང་རིག་འདུ་བྱེད་ཀྱི་ཕུང་པོའི་ནང་དུ་འདུས་ཀྱང་མཚུངས་ལྡན་འདུ་བྱེད་དང་མཚུངས་ལྡན་མ་ཡིན་པའི་འདུ་བྱེད་གང་ཡིན་མཁས་པ་རྣམས་བཞེད་པ་མི་འཐུན་མོད། བདག་གི་རྣམ་པར་རྟོག་པ་ལ་ཕུང་པོ་ལྔའི་རྣམ་བཞག་གཙོ་ཆེར་འཁོར་ལོ་དང་པོའི་སྐབས་སུ་གསུངས་ལ། འཁོར་ལོ་དང་པོའི་སྐབས་སུ་རང་རིག་གསལ་བར་མ་བསྟན་ལ། དེའི་དབང་དུ་བྱས་ན་རང་རིག་ཕུང་པོ་གང་ཡིན་དཔྱད་མི་དགོས་ལ། བཀའ་འཁོར་ལོ་ཐ་མའི་དགོངས་འགྲེལ་རྣམས་ལས་རང་རིག་གསུངས་པས་དེ་ལྟར་ན་རང་རིག་མཚུངས་པར་ལྡན་པ་མ་ཡིན་པའི་འདུ་བྱེད་ཡིན་ཀྱང་གཟུགས་ཤེས་གང་རུང་མ་ཡིན་པའི་ལྡན་མིན་མ་ཡིན་ནམ་སྙམ། རང་རིག་ཡིན་ན་འདུ་བྱེད་ཀྱི་ཕུང་པོ་ཡིན་པས་མ་ཁྱབ་སྟེ། དོན་དམ་སོ་སོར་རང་རིག་པའི་ཡེ་ཤེས་གཞི་གྲུབ་པའི་ཕྱིར། ལྡན་མིན་འདུ་བྱེད་ཀྱི་མཚན་ཉིད་ཡོད་དེ། གཟུགས་དང་སེམས་དང་སེམས་ལས་བྱུང་བ་གང་རུང་གི་གནས་སྐབས་ལ་བཏགས་པའི་དེ་ཉིད་གཞན་བརྗོད་མེད་པའི་དངོས་པོ་དེ་ཡིན་པའི་ཕྱིར། གཉིས་པ་ཁམས་ལ་དབྱེ་ན། གཟུགས་ཀྱི་ཁམས་དང༌། སྒྲའི་ཁམས་དང། དྲིའི་ཁམས་དང༌། རོའི་ཁམས་དང༌། རེག་བྱའི་ཁམས་དང༌། ཆོས་ཁམས་དང་བཟུང་བ་ཡུལ་གྱི་ཁམས་དྲུག མིག་གི་ཁམས་དང༌། རྣ་བའི་ཁམས་དང༌། སྣའི་ཁམས་དང༌། ལྕེའི་ཁམས་དང༌། ལུས་ཀྱི་ཁམས་དང༌། ཡིད་ཀྱི་ཁམས་ཏེ་རྟེན་དབང་པོའི་ཁམས་དྲུག མིག་གི་རྣམ་པར་ཤེས་པའི་ཁམས་དང༌། རྣ་བའི་རྣམ་པར་ཤེས་པའི་ཁམས་དང༌། སྣའི་རྣམ་པར་ཤེས་པའི་ཁམས་དང༌། ལྕེའི་རྣམ་པར་ཤེས་པའི་ཁམས་དང༌། ལུས་ཀྱི་རྣམ་པར་ཤེས་པའི་ཁམས་དང༌། ཡིད་ཀྱི་རྣམ་པར་ཤེས་པའི་ཁམས་ཏེ་བརྟེན་པ་རྣམ་ཤེས་ཀྱི་ཁམས་དྲུག་དང་བཅོ་བརྒྱད་དོ། །གསུམ་པ་སྐྱེ་མཆེད་ལ་དབྱེ་ན། གཟུགས་ཀྱི་སྐྱེ་མཆེད་ནས་ཆོས་ཀྱི་སྐྱེ་མཆེད་བར་ཕྱིའི་སྐྱེ་མཆེད་དྲུག་དང༌། མིག་གི་སྐྱེ་མཆེད་ནས། ཡིད་ཀྱི་སྐྱེ་མཆེད་བར་ནང་གི་སྐྱེ་མཆེད་དྲུག་སྟེ་བཅུ་གཉིས་སོ། །རྒྱས་པར་ཆོས་མངོན་པ་སོགས་ལས་ཤེས་པར་བྱའོ། །ཡུལ་ཅན་ལ་དབྱེ་ན། གཏན་ཚིགས་རིགས་པའི་དོན་བསྡུས་ལས། ཡུལ་ཅན་ལ་བློ་མིན་པ་དང་ཡིན་པའི་ཡུལ་ཅན་གཉིས་སོ། །དང་པོ་ལ་གང་ཟག་དང་རྗོད་བྱེད་གཉིས་སོ། །ཞེས་གསུངསལ། ལྡན་མིན་འདུ་བྱེད་དུ་གྱུར་བའི་ཡུལ་ཅན་ཡོད་དེ། གང་ཟག་དེ་ཡིན་པའི་ཕྱིར། གཟུགས་སུ་གྱུར་བའི་ཡུལ་ཅན་ཡོད་དེ། དབང་པོ་གཟུགས་ཅན་པ་དང༌། རྗོད་བྱེད་ཀྱི་སྒྲ་དེ་ཡིན་པའི་ཕྱིར། བློ་ཡིན་པའི་ཡུལ་ཅན་ལ། རྟོག་པ་དང་རྟོག་མེད་གཉིས་དང༌། ཚད་མ་དང་ཚད་མིན་གྱི་བློ་གཉིས་དང༌། སེམས་སེམས་བྱུང་གཉིས་དང་གསུམ། དང་པོ་རྟོག་པ་དང་རྟོག་མེད་ཀྱི་ཤེས་པ་གཉིས་ཀྱི་མཚན་ཉིད་ནི་རིམ་པ་ལྟར། བརྗོད་བྱ་རྗོད་བྱེད་འདྲེས་རུང་དུ་སྣང་བའི་ཞེན་རིག་དང༌། རང་ཡུལ་གྱི་རྣམ་པ་གསལ་བར་སྣང་བའི་བློའོ། །གཉིས་པ་ཚད་མ་དང་ཚད་མིན་གྱི་ཤེས་པའི་མཚན་ཉིད་རིམ་པ་ལྟར། རང་གི་གཞལ་བྱ་ལ་གསར་དུ་མི་བསླུ་བའི་ཤེས་པ་དང༌། རང་གི་གཞལ་བྱ་ལ་གསར་དུ་མི་བསླུ་བ་མིན་པའི་ཤེས་པའོ། །དང་པོ་ལ་དབྱེ་ན། མངོན་སུམ་ཚད་མ་དང༌། རྗེས་དཔག་ཚད་མ་གཉིས། དེ་གཉིས་ཀའི་མཚན་ཉིད་ནི་རིམ་པ་ལྟར། རྟོག་པ་དང་བྲལ་ཞིང་འཕྲལ་རྐྱེན་གྱིས་མ་འཁྲུལ་བའི་གསར་དུ་མི་བསླུ་བའི་ཤེས་པ་དང༌། ཚུལ་གསུམ་པའི་རྟགས་ལས་རང་གི་གཞལ་བྱ་ལྐོག་གྱུར་ལ་གསར་དུ་མི་བསླུ་བའི་ཤེས་པའོ། །དང་པོ་ལ་མངོན་སུམ་ཡང་དག་དང་མངོན་སུམ་ལྟར་སྣང་གཉིས། དང་པོ་ལ། དབང་པོའི་མངོན་སུམ་ཚད་མ་དང༌། ཡིད་ཀྱི་དང༌། རང་རིག་དང༌། རྣལ་འབྱོར་མངོན་སུམ་ཚད་མ་དང་བཞི། མཚན་ཉིད་ནི་རིམ་པ་ལྟར། རྟོག་པ་དང་བྲལ་ཞིང་འཕྲལ་རྐྱེན་གྱིས་མ་འཁྲུལ་བའི་གསར་དུ་མི་བསླུ་བའི་དབང་པོའི་ཤེས་པ་དང༌། རྟོག་པ་དང་བྲལ་ཞིང་འཕྲལ་རྐྱེན་གྱིས་མ་འཁྲུལ་བའི་གསར་དུ་མི་བསླུ་བའི་ཡིད་ཀྱི་ཤེས་པ་དང༌། རྟོག་པ་དང་བྲལ་ཞིང་འཕྲལ་རྐྱེན་གྱིས་མ་འཁྲུལ་བའི་གསར་དུ་མི་བསླུ་བའི་ཁ་ནང་ལྟས་ཀྱི་ཤེས་པ་དང༌། རང་གི་བདག་རྐྱེན་ཞི་ལྷག་ཟུང་འབྲེལ་ལ་བརྟེན་ནས་རང་ཡུལ་ཡང་དག་པའི་དོན་ལ་རྟོག་པ་དང་བྲལ་ཞིང་འཕྲལ་རྐྱེན་གྱིས་མ་འཁྲུལ་བའི་གསར་དུ་མི་བསླུ་བའི་ཤེས་པའོ། །དང་པོ་ལ་མིག་གི་མངོན་སུམ་ཚད་མ་སོགས་ལྔའོ། །མཚན་ཉིད་ནི་རིམ་པ་ལྟར། རང་གི་ཐུན་མོང་མ་ཡིན་པའི་བདག་རྐྱེན་མིག་དབང་ལ་བརྟེན་ནས་རྟོག་པ་དང་བྲལ་ཞིང་འཕྲལ་རྐྱེན་གྱིས་མ་འཁྲུལ་བའི་གསར་དུ་མི་བསླུ་བའི་ཤེས་པ་ཞེས་སོགས་འདོན་པ་བསྒྱུར་རོ། །གཉིས་པ་མངོན་སུམ་ལྟར་སྣང་གི་མཚན་ཉིད་ནི། གཏན་ཚིགས་རིགས་པའི་དོན་བསྡུས་ལས། མངོན་སུམ་ལྟར་སྣང་ལ་མཚན་ཉིད། རང་གི་སྣང་ཡུལ་ལ་འཁྲུལ་བའི་བློ། དབྱེ་ན་རྟོག་པ་དང་རྟོག་མེད་མངོན་སུམ་ལྟར་སྣང་གཉིས་སོ། །མཚན་ཉིད་ནི་རིམ་པ་ལྟར། རང་གི་སྣང་ཡུལ་ལ་འཁྲུལ་བའི་ཞེན་བློ་དང༌། རང་གི་བདག་རྐྱེན་དབང་པོ་སླད་པ་ལས་སྐྱེས་པའི་ཞེན་བྲལ་གྱི་བློའོ། །དབྱེ་ན། དང་པོ་ལ། འཁྲུལ་དང་ཀུན་རྫོབ་ཤེས་པ་དང༌། །རྗེས་དཔག་རྗེས་སུ་དཔག་ལས་བྱུང༌། །དྲན་དང་མངོན་འདོད་ཅེས་བྱའོ། །ཞེས་པ་ལྟར་དྲུག་གོ །གཉིས་པ་ལ་ཡིད་ཤེས་དང༌། དབང་ཤེས་ཀྱི་དབང་གིས་གཉིས་སོ། །ཞེས་གསུངས་སོ། །གཉིས་པ་རྗེས་དཔག་ཚད་མ་ལ་དབྱེ་ན་གསུམ་ཡོད་དེ། དངོས་སྟོབས་རྗེས་དཔག་ཚད་མ་དང༌། གྲགས་པའི་རྗེས་དཔག་ཚད་མ་དང༌། ཡིད་ཆེས་ཀྱི་རྗེས་དཔག་དང་གསུམ་ཡོད་པའི་ཕྱིར། དངོས་སྟོབས་རྗེས་དཔག་ཚད་མ་བཞག་ཏུ་ཡོད་དེ། སྡུག་བདེན་མི་རྟག་པ་རྟོགས་པའི་རྗེས་དཔག་ལྟ་བུའོ། །གཉིས་པ་གྲགས་པའི་རྗེས་དཔག་བཞག་ཏུ་ཡོད་དེ། རི་བོང་ཅན་ལ་ཟླ་བ་ཞེས་བརྗོད་པའི་སྒྲས་བརྗོད་རུང་དུ་རྟོགས་པའི་རྗེས་དཔག་ཚད་མ་ལྟ་བུའོ། །ཡིད་ཆེས་རྗེས་དཔག་ཚད་མ་བཞག་ཏུ་ཡོད་དེ། ལུང་གི་ཚད་མ་དེ་ཡིན་པའི་ཕྱིར། གཉིས་པ་ཚད་མིན་ལ་དབྱེ་ན། མ་རྟོགས་ལོག་རྟོག་ཐེ་ཚོམ་དཔྱད་ཤེས་དང་བཞི། མ་རྟོགས་པའི་བློའི་མཚན་ཉིད། རང་ཡུལ་ལ་ངེས་པ་འདྲེན་མི་ནུས་པའི་བློ། ལོག་རྟོག་གི་མཚན་ཉིད་ཡོད་དེ། དེ་མ་ཡིན་ལ་དེར་ཞེན་པའི་བློ། ཐེ་ཚོམ་གྱི་བློའི་མཚན་ཉིད། རང་ཡུལ་གཏན་ལ་མ་ཕབ་པར་ཡིད་གཉིས་གྱུར་བའི་བློ། དཔྱད་ཤེས་ཀྱི་མཚན་ཉིད། རང་གི་ཚད་མ་སྔ་མའི་བཟུང་ཟིན་གྱི་དོན་ལ་བསྣན་ནས་འཇུག་པའི་ཤེས་པ་དེའོ། །གསུམ་པ་སེམས་སེམས་བྱུང་གཉིསཀྱི་མཚན་ཉིད་ནི། ། གཏན་ཚིགས་དོན་བསྡུས་ལས། སེམས་སེམས་བྱུང་གི་མཚན་ཉིད་ནི་རིམ་པ་ལྟར། དོན་གྱི་ངོ་བོ་རང་སྟོབས་ཀྱིས་རིག་ཅིང་དོན་གྱི་ཁྱད་པར་གཞན་སྟོབས་ཀྱིས་རིག་པའི་བློ་དང༌། དོན་གྱི་ཁྱད་པར་རང་སྟོབས་ཀྱིས་རིག་ཅིང་དོན་གྱི་ངོ་བོ་གཞན་སྟོབས་ཀྱིས་རིག་པའི་བློ་ཞེས་པའོ། །ཞེས་གསུངས་པའི་ཕྱིར། ས་བཟང་གི་ཀུན་བཏུས་འགྲེལ་བ་ལྟར་ན་མཚན་ཉིད་དེ་གཉིས་ལ་ཞིབ་ཆ་དགོས་སོ། །དང་པོ་སེམས་ལ་དབྱེ་ན། མིག་གི་རྣམ་ཤེས་ནས་ཡིད་ཀྱི་རྣམ་ཤེས་བར་རྣམ་ཤེས་ཚོགས་དྲུག་དང༌། ཀུན་གཞིའི་རྣམ་ཤེས་དང་ཉོན་ཡིད་དང་བརྒྱད་དོ། །མིག་གི་རྣམ་པར་ཤེས་པའི་མཚན་ཉིད་ཡོད་དེ། རང་གི་ཐུན་མོང་མ་ཡིན་པའི་བདག་རྐྱེན་མིག་དབང་ལ་བརྟེན་ནས་གཟུགས་ཀྱི་སྐྱེ་མཆེད་ཀྱི་ངོ་བོ་མཐོང་བའི་གཙོ་སེམས་དེ་ཡིན་པའི་ཕྱིར། རྣ་བའི་རྣམ་པར་ཤེས་པ་སོགས་གཞན་ལྔ་ལ་རང་གི་ཐུན་མོང་མ་ཡིན་པའི་བདག་རྐྱེན་རྣ་བའི་དབང་པོ་དང༌། སྣ་དབང་དང༌། ལྕེ་དབང་དང༌། ལུས་དབང་དང༌། ཡིད་དབང་ཞེས་སོགས་རིགས་འགྲེས་སྦྱར། ཀུན་གཞི་རྣམ་པར་ཤེས་པའི་མཚན་ཉིད་ཡོད་དེ། རང་གི་ངོ་བོ་མ་བསྒྲིབས་ལུང་མ་བསྟན་གྱི་བག་ཆགས་བགོ་བའི་གཞིར་གྱུར་བའི་འཁོར་ཀུན་འགྲོ་ལྔ་ཁོ་ན་དང་མཚུངས་པར་ལྡན་པའི་རྣམ་སྨིན་རྣམ་ཤེས་དེ་ཡིན་པའི་ཕྱིར། ཉོན་ཡིད་ཀྱི་མཚན་ཉིད་ཡོད་དེ། རང་གི་ངོ་བོ་བསྒྲིབས་ལུང་མ་བསྟན་དམིགས་པ་ཀུན་གཞི་ལ་དམིགས་ནས་བདག་ཏུ་རློམ་སེམས་ཀྱི་འཁོར་ཉོན་མོངས་པ་བཞི་དང་མཚུངས་པར་ལྡན་པའི་རྣམ་པར་ཤེས་པ་དེ་ཡིན་པའི་ཕྱིར། གཉིས་པ་སེམས་བྱུང་ལ་དབྱེ་ན་ལྔ་བཅུ་རྩ་གཅིག་སྟེ། སྡོམ་ནི། གཏན་ཚིགས་རིགས་པའི་དོན་བསྡུས་ལས། ཚོར་བ་འདུ་ཤེས་སེམས་པ་དང༌། །རེག་པ་ཡིད་བྱེད་ཀུན་འགྲོ་ལྔའོ། །འདུན་མོས་དྲན་དང་ཏིང་འཛིན་དང༌། །ཤེས་རབ་ཅེས་བྱ་ཡུལ་ངེས་ལྔའོ། །དད་དང་ཁྲེལ་ཡོད་ངོ་ཚ་ཤེས། །བརྩོན་འགྲུས་ཤིན་ཏུ་སྦྱངས་བ་དང༌། །འདོད་ཆགས་ཞེ་སྡང་གཏི་མུག་མེད། །བག་ཡོད་བཏང་སྙོམས་རྣམ་མི་འཚེ། །དེ་རྣམས་བཅུ་གཅིག་དགེ་བའོ། །འདོད་ཆགས་ཁོང་ཁྲོ་ང་རྒྱལ་དང༌། །མ་རིག་ཐེ་ཚོམ་ལྟ་བ་སྟེ། །དེ་དྲུག་རྩ་བའི་ཉོན་མོངས་སོ། །ཁྲོ་བ་འཁོན་འཛིན་འཆབ་པ་དང༌། །འཚིག་པ་ཕྲག་དོག་སེར་སྣ་དང༌། །གཡོ་སྒྱུ་རྒྱགས་པ་རྣམ་འཚེ་དང༌། །ངོ་ཚ་མེད་དང་ཁྲེལ་མེད་དང༌། །རྨུགས་དང་རྒོད་དང་མ་དད་དང༌། །ལེ་ལོ་བག་མེད་བརྗེད་ངས་དང༌། ཤེས་བཞིན་མ་ཡིན་རྣམ་གཡེང་སྟེ། །ཉི་ཤུ་ཉེ་བའི་ཉོན་མོངས་སོ། །གཉིད་དང་འགྱོད་དང་རྟོག་དཔྱོད་དེ། །བཞི་ནི་གཞན་དུ་འགྱུར་བའོ། །དེ་ལྟར་སེམས་བྱུང་ལྔ་བཅུ་གཅིག །དམིགས་རྣམ་རྫས་དུས་རྟེན་དང་ལྔས། །སེམས་དང་སེམས་བྱུང་མཚུངས་ལྡན་ནོ། །ཞེས་གསུངས་པའི་ཕྱིར་རོ། །ལྟ་བ་ལ་དབྱེ་ན་ལྔ་སྟེ། འཇིག་ལྟ་དང༌། མཐར་ལྟ་དང༌། ལོག་ལྟ་དང༌། ལྟ་བ་མཆོག་འཛིན་དང༌། ཚུལ་ཁྲིམས་བརྟུལ་ཞུགས་མཆོག་འཛིན་གྱི་ལྟ་བ་དང་ལྔ་ཡོད་པའི་ཕྱིར་རོ། ། གསུམ་པ་དེ་ལ་རྩོད་པ་སྤོང་བ།གསུམ་པ་དེ་ལ་རྩོད་པ་སྤོང་བ་ལ། གཟུགས་ཀྱི་སྐྱེ་མཆེད་ཆོས་ཅན། རྣམ་མཁྱེན་གྱིས་དངོས་སུ་རྟོགས་པར་བྱ་བ་ཡིན་པར་ཐལ། མངོན་སུམ་ཚད་མའི་དངོས་སུ་རྟོགས་པར་བྱ་བ་ཡིན་པའི་ཕྱིར་ན་མ་ཁྱབ། མ་གྲུབ་ན། གཟུགས་ཀྱི་སྐྱེ་མཆེད་ཆོས་ཅན། མངོན་སུམ་ཚད་མའི་དངོས་སུ་རྟོགས་པར་བྱ་བ་ཡིན་པར་ཐལ། དབང་མངོན་གྱི་དངོས་སུ་རྟོགས་པར་བྱ་བ་ཡིན་པའི་ཕྱིར། མ་གྲུབ་ན། གཟུགས་ཀྱི་སྐྱེ་མཆེད་ཆོས་ཅན། དབང་མངོན་གྱི་དངོས་སུ་རྟོགས་པར་བྱ་བ་ཡིན་པར་ཐལ། མིག་ཤེས་ཀྱི་བཟུང་བྱ་ཡིན་པའི་ཕྱིར། མ་གྲུབ་ན། གཟུགས་ཀྱི་སྐྱེ་མཆེད་ཆོས་ཅན། མིག་ཤེས་ཀྱི་བཟུང་བྱ་ཡིན་པར་ཐལ། གཟུགས་ཀྱི་སྐྱེ་མཆེད་ཡིན་པའི་ཕྱིར། ཁྱབ་སྟེ། མིག་ཤེས་ཀྱི་བཟུང་བྱ་དེ་གཟུགས་ཀྱི་སྐྱེ་མཆེད་ཀྱི་མཚན་ཉིད་ཡིན་པའི་ཕྱིར། ཁ་ཅིག་ན་རེ། གདམས་ངག་གི་མཆོག་རྟག་ཏུ་རང་སེམས་ལ་ལྟ་བ་ཡིན། ཞེས་པའི་ལུང་ཆོས་ཅན། ཚད་མ་ཡིན་པར་ཐལ། ལུང་གི་ཚད་མ་ཡིན་པའི་ཕྱིར། མ་གྲུབ་ན། དེ་ཆོས་ཅན། ལུང་གི་ཚད་མ་ཡིན་པར་ཐལ། ལུང་ཚད་མ་ཡིན་པའི་ཕྱིར་ན་མ་ཁྱབ། གདམས་ངག་གི་མཆོག་རྟག་ཏུ་རང་སེམས་ལ་ལྟ་བ་ཡིན། ཞེས་པའི་ལུང་ཆོས་ཅན། ལུང་ཚད་མ་ཡིན་པར་ཐལ། བསྟན་བཅོས་རྣམ་དག་ཡིན་པའི་ཕྱིར། ཁ་ཅིག་ན་རེ། ཉན་རང་དགྲ་བཅོམ་པའི་རྒྱུད་ཀྱི་ཆོས་བདག་ཏུ་གྲུབ་བམ་མ་གྲུབ་སྙམ་པའི་རྩེ་གཉིས་པའི་བློ་ཆོས་ཅན། ཐེ་ཚོམ་ཡིན་པར་ཐལ། རང་ཡུལ་གཏན་ལ་མ་ཕབ་པར་ཡིད་གཉིས་གྱུར་བའི་བློ་ཡིན་པའི་ཕྱིར། འདོད་ན། དེ་ཆོས་ཅན། རྩ་ཉོན་ཡིན་པར་ཐལ། ཐེ་ཚོམ་ཡིན་པའི་ཕྱིར་ན་གཏན་ཚིགས་རིགས་པའི་དོན་བསྡུས་དང་ས་བཟང་གི་ཀུན་བཏུས་འགྲེལ་བ་ལྟར་ན་མ་ཁྱབ་སྙམ། ཁྱབ་སྟེ། རྩ་ཉོན་དྲུག་གྲངས་འདྲེན་ཚེ་ཐེ་ཚོམ་དེ་འདྲེན་དགོས་པའི་ཕྱིར་ཟེར་ན། མ་གྲུབ་སྟེ། རྩ་ཉོན་ཀྱི་ཐེ་ཚོམ་དེ་རྩ་ཉོན་ཡིན་ཀྱང་ཐེ་ཚོམ་དེ་རྩ་ཉོན་མ་ཡིན་ཞེས་བྱ་དགོས་ཏེ། དཔེར་ན་མ་རིག་པ་དེ་རྩ་ཉོན་མ་ཡིན་པར་ཉོན་མོངས་ཅན་གྱི་མ་རིག་པ་རྩ་ཉོན་ཡིན་པ་བཞིན་ཡིན་སྙམ་མོ། །འོན་ཀྱང་གཟུར་གནས་བློ་ལྡན་རྣམས་ཀྱིས་སླར་དཔྱད་པར་བྱའོ།། །། བརྒྱད་པ་སྤྱི་དང་བྱེ་བྲག་གི་རྣམ་བཞག་བཤད་པ།བརྒྱད་པ་སྤྱི་དང་བྱེ་བྲག་གི་རྣམ་བཞག་བཤད་པ་ལ། རྣམ་འགྲེལ་རང་དོན་ལེའུ་ལས། དེ་སྤྱི་ཁྱད་པར་ཞེས་བྱ་བའི། །བྱེ་བྲག་འདི་ནི་བློ་དོན་ལ། །དེ་ཉིད་ལས་གཞན་ལས་ལྡོག་པས། །ཆོས་ཀྱི་བྱེ་བྲག་རབ་ཏུ་བརྟག །ཅེས་དང༌། དེ་ནི་སྤྱི་དང་ཁྱད་པར་གྱི། །རྣམ་སོགས་ཅིར་ཡང་བཟུང་བྱ་མིན། །བྱེ་བྲག་ཁྱད་པར་མང་པོ་རྣམས། །ཞེས་དང༌། མངོན་སུམ་ལེའུ་ལས། གོ་བྱེད་རྗེས་འགྲོ་བ། །སྤྱི་ཡི་ངོ་བོ་ཉིད་དུ་རྟོགས། །ཞེས་པའི་གཞུང་འདི་བྱུང༌། དེའི་མཐའ་དཔྱད་པ་ལ། དགག་བཞག་སྤོང་གསུམ་ལས། དང་པོ་ནི། ཁ་ཅིག་ན་རེ། བདག་ཏུ་མ་གྲུབ་པ་ཡིན་ན་སྤྱི་དང་བྱེ་བྲག་གང་རུང་ཡིན་པས་ཁྱབ་ཟེར་ན། གང་ཟག་གི་བདག་ཆོས་ཅན། སྤྱི་དང་བྱེ་བྲག་གང་རུང་ཡིན་པར་ཐལ། བདག་ཏུ་མ་གྲུབ་པ་ཡིན་པའི་ཕྱིར། ཁྱབ་པ་ཁས། འདོད་ན། གང་ཟག་གི་བདག་ཆོས་ཅན། ཡོད་པར་ཐལ། སྤྱི་དང་བྱེ་བྲག་གང་རུང་ཡིན་པའི་ཕྱིར། མ་ཁྱབ་ན་ཁྱབ་པ་ཡོད་པར་ཐལ།སྤྱི་ཡིན་ན་ཡོད་པ་ཡིན་པས་ཁྱབ་པ་གང་ཞིག བྱེ་བྲག་ཡིན་ན་ཡོད་པ་ཡིན་པས་ཁྱབ་པའི་ཕྱིར། རྟགས་རེ་རེ་ནས་སླ། ཁ་ཅིག་ན་རེ། སྤྱི་ཡིན་ན་བྱེ་བྲག་མ་ཡིན་པས་ཁྱབ་ཟེར་ན། བུམ་པ་ཆོས་ཅན། བྱེ་བྲག་མ་ཡིན་པར་ཐལ། སྤྱི་ཡིན་པའི་ཕྱིར། ཁྱབ་པ་ཁས། མ་གྲུབ་ན། བུམ་པ་ཆོས་ཅན། སྤྱི་ཡིན་པར་ཐལ། རང་གི་གསལ་བ་ལ་ཐུན་མོང་དུ་རྗེས་འགྲོ་བྱེད་པའི་ཕྱིར། མ་ཁྱབ་ན་ཁྱབ་པ་ཡོད་པར་ཐལ། གཏན་ཚིགས་རིགས་པའི་དོན་བསྡུས་ལས། སྤྱི་དང་བྱེ་བྲག་ལ་མཚན་ཉིད་རིམ་པར་ལྟར། རང་གི་གསལ་བ་ལ་ཐུན་མོང་དུ་རྗེས་འགྲོ་བྱེད་པ་དང༌། རིགས་ལྡན་གང་ཞིག ལྡོག་པ་གཉིས་ཀྱི་ཟིན་པའོ། །ཞེས་གསུངས་པའི་ཕྱིར། རྩ་བར་འདོད་ན། བུམ་པ་ཆོས་ཅན། བྱེ་བྲག་ཡིན་པར་ཐལ། ཤེས་བྱའི་བྱེ་བྲག་ཡིན་པའི་ཕྱིར། མ་གྲུབ་ན། བུམ་པ་ཆོས་ཅན། ཤེས་བྱའི་བྱེ་བྲག་ཡིན་པར་ཐལ། ཁྱོད་ཤེས་བྱ་ཡིན། ཁྱོད་ཤེས་བྱ་དང་བདག་གཅིག་འབྲེལ་ཡིན། ཁྱོད་མ་ཡིན་ཞིང་ཤེས་བྱ་ཡིན་པའི་གཞི་མཐུན་པ་དུ་མ་གྲུབ་པའི་ཕྱིར། རྟགས་དང་པོ་མ་གྲུབ་ན། བུམ་པ་ཆོས་ཅན། ཤེས་བྱ་ཡིན་པར་ཐལ། གཞི་གྲུབ་པའི་ཕྱིར། རྟགས་གཉིས་པ་མ་གྲུབ་ན། བུམ་པ་ཆོས་ཅན། ཤེས་བྱ་དང་བདག་གཅིག་འབྲེལ་ཡིན་པར་ཐལ། ཤེས་བྱ་དང་བདག་ཉིད་གཅིག་པའི་སྒོ་ནས་ཐ་དད། ཤེས་བྱ་མེད་ན་ཁྱོད་མེད་དགོས་པའི་ཕྱིར། རྟགས་ཟུར་དང་པོ་མ་གྲུབ་ན། བུམ་པ་ཆོས་ཅན། ཤེས་བྱ་དང་བདག་ཉིད་གཅིག་ཡིན་པར་ཐལ། ཤེས་བྱར་གྱུར་བའི་གཟུགས་ཡིན་པའི་ཕྱིར། རྟགས་ཟུར་གཉིས་པ་མ་གྲུབ་ན། བུམ་པ་ཆོས་ཅན། ཤེས་བྱ་དང་ཐ་དད་ཡིན་པར་ཐལ། གཟུགས་ཡིན་པའི་ཕྱིར། རྟགས་ཟུར་གསུམ་པ་མ་གྲུབ་ན། བུམ་པ་ཆོས་ཅན། ཤེས་བྱ་མེད་ན་ཁྱོད་མེད་དགོས་པར་ཐལ། ཤེས་བྱ་མེད་ལ་ཁྱོད་ཡོད་པ་མི་སྲིད་པའི་ཕྱིར། གོང་གི་རྟགས་གསུམ་པ་མ་གྲུབ་ན། བུམ་པ་ཆོས་ཅན། ཁྱོད་མ་ཡིན་ཞིང་ཤེས་བྱ་ཡིན་པའི་གཞི་མཐུན་པ་དུ་མ་གྲུབ་པར་ཐལ། རྟག་པ་དེ་ཡང་དེ་ཡིན། ཚེ་མི་རྟག་པ་དེ་ཡང་དེ་ཡིན་པའི་ཕྱིར། ཁ་ཅིག་ན་རེ། གཟུགས་ཀྱི་སྤྱི་ཡིན་ན་གཟུགས་རུང་གི་སྤྱི་ཡིན་པས་ཁྱབ་ཟེར་ན། མཚོན་བྱ་ཆོས་ཅན། གཟུགས་རུང་གི་སྤྱི་ཡིན་པར་ཐལ། གཟུགས་ཀྱི་སྤྱི་ཡིན་པའི་ཕྱིར། །ཁྱབ་པ་ཁས། མ་གྲུབ་ན། མཚོན་བྱ་ཆོས་ཅན། གཟུགས་ཀྱི་སྤྱི་ཡིན་པར་ཐལ། གཟུགས་ཁྱོད་ཀྱི་བྱེ་བྲག་ཡིན་པའི་ཕྱིར། མ་གྲུབ་ན། གཟུགས་ཆོས་ཅན། ཁྱོད་མཚོན་བྱའི་བྱེ་བྲག་ཡིན་པར་ཐལ། ཁྱོད་མཚོན་བྱ་ཡིན། ཁྱོད་མཚོན་བྱ་དང་བདག་གཅིག་ཏུ་འབྲེལ། ཁྱོད་མ་ཡིན་ཞིང་མཚོན་བྱ་ཡིན་པའི་གཞི་མཐུན་པ་དུ་མ་གྲུབ་པའི་ཕྱིར། རྟགས་དང་པོ་མ་གྲུབ་ན། གཟུགས་ཆོས་ཅན། མཚོན་བྱ་ཡིན་པར་ཐལ། ཁྱོད་ཀྱི་མཚན་ཉིད་ཡོད་པའི་ཕྱིར། རྟགས་གཉིས་པ་མ་གྲུབ་ན། གཟུགས་ཆོས་ཅན། མཚོན་བྱ་དང་བདག་གཅིག་འབྲེལ་ཡིན་པར་ཐལ། མཚོན་བྱ་དང་བདག་ཉིད་ཅིག་པའི་སྒོ་ནས་ཐ་དད། མཚོན་བྱ་མེད་ན་ཁྱོད་མེད་དགོས་པའི་ཕྱིར། རྟགས་ཟུར་དང་པོ་མ་གྲུབ་ན། གཟུགས་ཆོས་ཅན། མཚོན་བྱ་དང་བདག་ཉིད་གཅིག་ཡིན་པར་ཐལ། མཚོན་བྱར་གྱུར་བའི་ཆོས་ཅན་ཡིན་པའི་ཕྱིར། རྟགས་ཟུར་གཉིས་པ་སླ། རྟགས་ཟུར་གསུམ་པ་མ་གྲུབ་ན། གཟུགས་ཆོས་ཅན། མཚོན་བྱ་མེད་ན་ཁྱོད་མེད་དགོས་པར་ཐལ། མཚོན་བྱ་མེད་ལ་ཁྱོད་ཡོད་པ་མི་སྲིད་པའི་ཕྱིར། གོང་གི་རྟགས་གསུམ་པ་མ་གྲུབ་ན། གཟུགས་ཆོས་ཅན། ཁྱོད་མ་ཡིན་ཞིང་མཚོན་བྱ་ཡིན་པའི་གཞི་མཐུན་པ་དུ་མ་ཡོད་པར་ཐལ། ཡོད་པ་དེ་ཡང་དེ་ཡིན། ཤེས་བྱ་དེ་ཡང་དེ་ཡིན་པའི་ཕྱིར། རྩ་བར་འདོད་ན། མཚོན་བྱ་ཆོས་ཅན། གཟུགས་རུང་ཁྱོད་ཀྱི་བྱེ་བྲག་ཡིན་པར་ཐལ། ཁྱོད་གཟུགས་རུང་གི་སྤྱི་ཡིན་པའི་ཕྱིར། རྟགས་ཁས། འདོད་ན། གཟུགས་རུང་ཆོས་ཅན། ཁྱོད་མཚོན་བྱ་ཡིན། ཁྱོད་མཚོན་བྱ་དང་བདག་གཅིག་ཏུ་འབྲེལ། ཁྱོད་མ་ཡིན་ཞིང་མཚོན་བྱ་ཡིན་པའི་གཞི་མཐུན་པ་དུ་མ་གྲུབ་པར་ཐལ། ཁྱོད་མཚོན་བྱའི་བྱེ་བྲག་ཡིན་པའི་ཕྱིར། རྟགས་ཁས། གཟུགས་རུང་ཆོས་ཅན། ཁྱོད་མཚོན་བྱ་ཡིན་པར་ཐལ། ཁྱོད་མཚོན་བྱ་ཡིན། ཁྱོད་མཚོན་བྱ་དང་བདག་གཅིག་ཏུ་འབྲེལ། ཁྱོད་མ་ཡིན་ཞིང་མཚོན་བྱ་ཡིན་པའི་གཞི་མཐུན་པ་དུ་མ་གྲུབ་པའི་ཕྱིར། རྟགས་ཁས། འདོད་ན། གཟུགས་རུང་ཆོས་ཅན། མཚན་ཉིད་མ་ཡིན་པར་ཐལ། མཚོན་བྱ་ཡིན་པའི་ཕྱིར། རྟགས་ཁས། འདོད་མི་ནུས་ཏེ། མཚན་ཉིད་ཡིན་པའི་ཕྱིར། མ་གྲུབ་ན། དེར་ཐལ། གཟུགས་ཀྱི་མཚན་ཉིད་ཡིན་པའི་ཕྱིར། ཁ་ཅིག་ན་རེ། དངོས་པོའི་སྤྱི་ཡིན་ན་མི་རྟག་པའི་སྤྱི་ཡིན་པས་ཁྱབ་ཟེར་ན། མི་རྟག་པ་དང་ཐ་དད་ཆོས་ཅན། མི་རྟག་པའི་སྤྱི་ཡིན་པར་ཐལ། དངོས་པོའི་སྤྱི་ཡིན་པའི་ཕྱིར། ཁྱབ་པ་ཁས། མ་གྲུབ་ན། མི་རྟག་པ་དང་ཐ་དད་ཆོས་ཅན། དངོས་པོའི་སྤྱི་ཡིན་པར་ཐལ། དངོས་པོ་ཁྱོད་ཀྱི་བྱེ་བྲག་ཡིན་པའི་ཕྱིར། རྩ་བར་འདོད་ན། མི་རྟག་པ་དང་ཐ་དད་ཆོས་ཅན། མི་རྟག་པའི་སྤྱི་མ་ཡིན་པར་ཐལ། མི་རྟག་པ་ཁྱོད་ཀྱི་བྱེ་བྲག་མ་ཡིན་པའི་ཕྱིར། མ་གྲུབ་ན། མི་རྟག་པ་ཆོས་ཅན། མི་རྟག་པ་དང་ཐ་དད་ཀྱི་བྱེ་བྲག་མ་ཡིན་པར་ཐལ། མི་རྟག་པ་དང་ཐ་དད་མ་ཡིན་པའི་ཕྱིར། མ་གྲུབ་ན། མི་རྟག་པ་ཆོས་ཅན། ཁྱོད་ཁྱོད་དང་ཐ་དད་མ་ཡིན་པར་ཐལ། ཁྱོད་གང་ཟག་གི་བདག་མེད་ཡིན་པའི་ཕྱིར། ཁ་ཅིག་ན་རེ། སྤྱིའི་སྤྱི་ཡང་ཡིན། བྱེ་བྲག་གི་བྱེ་བྲག་ཡང་ཡིན་པའི་གཞི་མཐུན་པ་མེད་ཟེར་ན། དེ་ཡོད་པར་ཐལ། མཚོན་བྱ་དེ་ཡིན་པའི་ཕྱིར། མ་གྲུབ་ན། མཚོན་བྱ་ཆོས་ཅན། ཁྱོད་སྤྱིའི་སྤྱི་ཡང་ཡིན། བྱེ་བྲག་གི་བྱེ་བྲག་ཀྱང་ཡིན་པའི་གཞི་མཐུན་པ་ཡིན་པར་ཐལ། ཁྱོད་སྤྱིའི་སྤྱི་ཡིན་པ་གང་ཞིག བྱེ་བྲག་གི་བྱེ་བྲག་ཀྱང་ཡིན་པའི་ཕྱིར། རྟགས་དང་པོ་མ་གྲུབ་ན། མཚོན་བྱ་ཆོས་ཅན། ཁྱོད་སྤྱིའི་སྤྱི་ཡིན་པར་ཐལ། སྤྱི་ཁྱོད་ཀྱི་བྱེ་བྲག་ཡིན་པའི་ཕྱིར། མ་གྲུབ་ན། སྤྱི་ཆོས་ཅན། ཁྱོད་མཚོན་བྱའི་བྱེ་བྲག་ཡིན་པར་ཐལ། ཁྱོད་མཚོན་བྱ་ཡིན། ཁྱོད་མཚོན་བྱ་དང་བདག་གཅིག་ཏུ་འབྲེལ། ཁྱོད་མ་ཡིན་ཞིང་མཚོན་བྱ་ཡིན་པའི་གཞི་མཐུན་པ་དུ་མ་གྲུབ་པའི་ཕྱིར། རྟགས་དང་པོ་གཉིས་སྔ་མ་རྣམས་དང་རིགས་འགྲེ་སྦྱར་ན་སླ། རྟགས་གསུམ་པ་མ་གྲུབ་ན། སྤྱི་ཆོས་ཅན། ཁྱོད་མ་ཡིན་ཞིང་མཚོན་བྱ་ཡིན་པའི་གཞི་མཐུན་པ་དུ་མ་གྲུབ་པར་ཐལ། བུམ་པ་དང་གཅིག་དེ་ཡང་དེ་ཡིན། མི་རྟག་པ་དང་གཅིག་དེ་ཡང་དེ་ཡིན་པའི་ཕྱིར། གོང་གི་རྟགས་གཉིས་པ་མ་གྲུབ་ན། མཚོན་བྱ་ཆོས་ཅན། བྱེ་བྲག་གི་བྱེ་བྲག་ཡིན་པར་ཐལ། ཁྱོད་བྱེ་བྲག་ཡིན། ཁྱོད་བྱེ་བྲག་དང་བདག་གཅིག་ཏུ་འབྲེལ། ཁྱོད་མ་ཡིན་ཞིང་བྱེ་བྲག་ཡིན་པའི་གཞི་མཐུན་པ་དུ་མ་གྲུབ་པའི་ཕྱིར། རྟགས་དང་པོ་མ་གྲུབ་ན། མཚོན་བྱ་ཆོས་ཅན། བྱེ་བྲག་ཡིན་པར་ཐལ། ཤེས་བྱའི་བྱེ་བྲག་ཡིན་པའི་ཕྱིར། མ་གྲུབ་ན། མཚོན་བྱ་ཆོས་ཅན། ཤེས་བྱའི་བྱེ་བྲག་ཡིན་པར་ཐལ། ཁྱོད་ཤེས་བྱ་ཡིན། ཁྱོད་ཤེས་བྱ་དང་བདག་གཅིག་ཏུ་འབྲེལ། ཁྱོད་མ་ཡིན་ཞིང་ཤེས་བྱ་ཡིན་པའི་གཞི་མཐུན་པ་དུ་མ་གྲུབ་པའི་ཕྱིར། རྟགས་རེ་རེ་ནས་སླ། རྟགས་གཉིས་པ་མ་གྲུབ་ན། མཚོན་བྱ་ཆོས་ཅན། བྱེ་བྲག་དང་བདག་གཅིག་འབྲེལ་ཡིན་པར་ཐལ། བྱེ་བྲག་དང་བདག་ཉིད་གཅིག་པའི་སྒོ་ནས་ཐ་དད་བྱེ་བྲག་མེད་ན་ཁྱོད་མེད་དགོས་པའི་ཕྱིར། རྟགས་གསུམ་པ་མ་གྲུབ་ན། མཚོན་བྱ་ཆོས་ཅན། ཁྱོད་མ་ཡིན་ཞིང་བྱེ་བྲག་ཡིན་པའི་གཞི་མཐུན་པ་དུ་མ་གྲུབ་པར་ཐལ། དོན་བྱེད་ནུས་པ་དེ་ཡང་དེ་ཡིན། སྐད་ཅིག་མ་དེ་ཡང་དེ་ཡིན་པའི་ཕྱིར། ཁ་ཅིག་ན་རེ། དངོས་པོའི་སྤྱི་དང་བྱེ་བྲག་གཉིས་ཀ་མ་ཡིན་པའི་སྤྱི་དང་བྱེ་བྲག་གཉིས་ཀའི་གཞི་མཐུན་པ་ཡོད་ཟེར་ན། དངོས་པོའི་སྤྱི་དང་བྱེ་བྲག་གཉིས་ཀ་མ་ཡིན་པའི་སྤྱི་དང་བྱེ་བྲག་གཉིས་ཀའི་གཞི་མཐུན་པ་མེད་པར་ཐལ། དངོས་པོའི་སྤྱི་དང་བྱེ་བྲག་གཉིས་ཀ་མ་ཡིན་པའི་སྤྱི་མེད་པའི་ཕྱིར། མ་གྲུབ་ན། དངོས་པོའི་སྤྱི་དང་བྱེ་བྲག་གཉིས་ཀ་མ་ཡིན་པའི་སྤྱི་མེད་པར་ཐལ། དངོས་པོའི་སྤྱི་དང་བྱེ་བྲག་གཉིས་ཀ་མ་ཡིན་པ་བྱེ་བྲག་མ་ཡིན་པའི་ཕྱིར། མ་གྲུབ་ན། དངོས་པོའི་སྤྱི་དང་བྱེ་བྲག་གཉིས་ཀ་མ་ཡིན་པ་བྱེ་བྲག་མ་ཡིན་པར་ཐལ། དངོས་པོའི་སྤྱི་དང་བྱེ་བྲག་གཉིས་ཀ་མ་ཡིན་པ་ཤེས་བྱའི་བྱེ་བྲག་མ་ཡིན་པའི་ཕྱིར། མ་གྲུབ་ན། དངོས་པོའི་སྤྱི་དང་བྱེ་བྲག་གཉིས་ཀ་མ་ཡིན་པ་ཆོས་ཅན། ཤེས་བྱའི་བྱེ་བྲག་མ་ཡིན་པར་ཐལ། ཁྱོད་མ་ཡིན་ཞིང་ཤེས་བྱ་ཡིན་པའི་གཞི་མཐུན་པ་དུ་མ་མ་གྲུབ་པའི་ཕྱིར། མ་གྲུབ་ན། དེར་ཐལ། དངོས་པོའི་སྤྱི་དང་བྱེ་བྲག་གཉིས་ཀ་མ་ཡིན་པ་མ་ཡིན་ཞིང༌། ཤེས་བྱ་ཡིན་པའི་གཞི་མཐུན་པ་དུ་མ་མ་གྲུབ་པའི་ཕྱིར། ཁ་ཅིག་ན་རེ། སྤྱི་དང་བྱེ་བྲག་གང་རུང་མ་ཡིན་པའི་སྤྱི་དང་བྱེ་བྲག་གང་རུང་མ་ཡིན་པའི་བྱེ་བྲག་མེད་ཟེར་ན། དེ་ཡོད་པར་ཐལ། དངོས་པོ་དེ་ཡིན་པའི་ཕྱིར། མ་གྲུབ་ན། དངོས་པོ་ཆོས་ཅན། སྤྱི་དང་བྱེ་བྲག་གང་རུང་མ་ཡིན་པའི་སྤྱི་དང་བྱེ་བྲག་གང་རུང་མ་ཡིན་པའི་བྱེ་བྲག་ཡིན་པར་ཐལ། ཁྱོད་སྤྱི་དང་བྱེ་བྲག་གང་རུང་མ་ཡིན་པའི་སྤྱི་དང་བྱེ་བྲག་གང་རུང་མ་ཡིན་པ་ཡིན། ཁྱོད་སྤྱི་དང་བྱེ་བྲག་གང་རུང་མ་ཡིན་པའི་སྤྱི་དང་བྱེ་བྲག་གང་རུང་མ་ཡིན་པ་དང་བདག་གཅིག་ཏུ་འབྲེལ། ཁྱོད་མ་ཡིན་ཞིང་སྤྱི་དང་བྱེ་བྲག་གང་རུང་མ་ཡིན་པའི་སྤྱི་དང་བྱེ་བྲག་གང་རུང་མ་ཡིན་པ་ཡིན་པའི་གཞི་མཐུན་པ་དུ་མ་གྲུབ་པའི་ཕྱིར། རྟགས་དང་པོ་མ་གྲུབ་ན། དངོས་པོ་ཆོས་ཅན། ཁྱོད་སྤྱི་དང་བྱེ་བྲག་གང་རུང་མ་ཡིན་པའི་སྤྱི་དང་བྱེ་བྲག་གང་རུང་མ་ཡིན་པར་ཐལ། བདག་མེད་ཡིན་པའི་ཕྱིར། རྟགས་གཉིས་པ་སླ། རྟགས་གསུམ་པ་མ་གྲུབ་ན། དངོས་པོ་ཆོས་ཅན། ཁྱོད་མ་ཡིན་ཞིང༌། སྤྱི་དང་བྱེ་བྲག་གང་རུང་མ་ཡིན་པའི་སྤྱི་དང་བྱེ་བྲག་གང་རུང་མ་ཡིན་པ་ཡིན་པའི་གཞི་མཐུན་པ་དུ་མ་གྲུབ་པར་ཐལ། གང་ཟག་གི་བདག་མེད་དེ་ཡང་དེ་ཡིན། ཤེས་བྱ་དེ་ཡང་དེ་ཡིན་པའི་ཕྱིར་རོ། ། གཉིས་པ་རང་ལུགས་བཤད་པ།གཉིས་པ་རང་ལུགས་བཤད་པ་ལ། སྤྱིའི་མཚན་ཉིད་ཡོད་དེ། རང་གི་གསལ་བ་ལ་རྗེས་སུ་འགྲོ་བའི་ཆོས་དེ་ཡིན་པའི་ཕྱིར། སྤྱི་དེ་ལ་དབྱེ་ན། དངོས་དང་དངོས་མེད་གཉིས། སྒྲས་བརྗོད་རིགས་ཀྱི་དབྱེ་ན་གསུམ་ཡོད་དེ། ཚོགས་སྤྱི་རིགས་སྤྱི་དོན་སྤྱི་གསུམ་ཡོད་པའི་ཕྱིར། ཚོགས་སྤྱིའི་མཚན་ཉིད་ཡོད་དེ། རང་གི་ཆ་ཤས་དུ་མ་འདུས་པའི་གཟུགས་རགས་པ་དེ་ཡིན་པའི་ཕྱིར། མཚན་གཞི་ནི་ཡོད་དེ། ཁང་བ་དེ་ཡིན་པའི་ཕྱིར། རིགས་སྤྱིའི་མཚན་ཉིད་ཡོད་དེ། རང་གི་རིགས་ཅན་དུ་མ་ལ་རྗེས་སུ་འགྲོ་བའི་ཆོས་དེ་ཡིན་པའི་ཕྱིར། རིགས་སྤྱི་དང་སྤྱི་དོན་གཅིག་པའོ། །མཚན་གཞི་ནི་ཡོད་དེ། ཤེས་བྱ་དེ་ཡིན་པའི་ཕྱིར། མི་རྟག་པའི་དོན་སྤྱིའི་མཚན་ཉིད་ཡོད་དེ། མི་རྟག་པ་འཛིན་པའི་རྟོག་པ་ལ་མི་རྟག་པ་དང་གཅིག་མ་ཡིན་བཞིན་དུ་གཅིག་ལྟ་བུར་སྣང་བའི་སྒྲོ་བཏགས་ཀྱི་ཆ་དེ་ཡིན་པའི་ཕྱིར། ཡོད་མེད་ཐམས་ཅད་ཀྱི་དོན་སྤྱིའི་མཚན་ཉིད་རིགས་འདྲ།རིགས་སྤྱི་དང་ཚོགས་སྤྱི་གཉིས་ལ་མུ་བཞི་ལས། མུ་དང་པོ་རིགས་སྤྱི་ཡིན་ལ་ཚོགས་སྤྱི་མ་ཡིན་པའི་མུ་ཡོད་དེ། ཡོད་པ་དེ་ཡིན་པའི་ཕྱིར། མུ་གཉིས་པ་ཚོགས་སྤྱི་ཡིན་ལ་རིགས་སྤྱི་མ་ཡིན་པའི་མུ་ཡོད་དེ། ཀྭ་བུམ་གཉིས་སམ། བུམ་པ་དང་གཅིག་ཏུ་གྱུར་བའི་བུམ་པ་དེ་ཡིན་ནོ། །གཉིས་ཀ་ཡིན་པའི་མུ་ཡོད་དེ། བུམ་པ་དེ་ཡིན་པའི་ཕྱིར། གཉིས་ཀ་མ་ཡིན་པའི་མུ་ཡོད་དེ། འཆི་ཚེ་ཕན་ངེས་ཀྱི་ཆོས་ཀྱི་ལྡོག་པ་དེ་ཡིན་པའི་ཕྱིར། བྱེ་བྲག་གི་མཚན་ཉིད་ཡོད་དེ། རིགས་དང་ལྡན་ཞིང་ལྡོག་པ་གཉིས་ཀྱིས་ཟིན་པ་དེ་ཡིན་པའི་ཕྱིར། ཤེས་བྱའི་བྱེ་བྲག་གི་མཚན་ཉིད་ཡོད་དེ། རང་གི་རིགས་ཤེས་བྱ་དང་ལྡན་ཞིང་ལྡོག་པ་གཉིས་ཀྱིས་ཟིན་པ་དེ་ཡིན་པའི་ཕྱིར། གཞན་ལ་རིགས་འགྲེའོ། ། གསུམ་པ་དེ་ལ་རྩོད་སྤོང་ལ།།གསུམ་པ་དེ་ལ་རྩོད་སྤོང་ལ། ཁ་ཅིག་ན་རེ། ཁྱོད་ཤིང་གི་སྤྱི་ཡིན་ན་ཤིང་ཁྱོད་ཡིན་པས་མ་ཁྱབ་པར་ཐལ། ཤིང་གི་དོན་སྤྱི་ཤིང་གི་སྤྱི་ཡིན་པ་གང་ཞིག་ཤིང་ཤིང་གི་དོན་སྤྱི་མ་ཡིན་པའི་ཕྱིར་ཟེར་ན། རྟགས་དང་པོ་མ་གྲུབ་སྙམ། ཁ་ཅིག་རྟགས་དང་པོ་དེར་ཐལ། གཏན་ཚིགས་རིགས་པའི་དོན་བསྡུས་ལས། ཤིང་གི་དོན་སྤྱི་ལྟ་བུ་ཤིང་གི་སྤྱི་ཡིན་ཡང་ཤིང་གི་སྤྱི་མཚན་མིན་པ་དང༌། ཞེས་གསུངས་པའི་ཕྱིར་ཟེར་ན་མ་ཁྱབ་སྟེ། དེའི་དོན་ནི། ཤིང་གི་སྤྱི་གཞན་སེལ་ལ་དགོངས་པ་འདྲའོ། །ཁོ་ན་རེ། ཤེས་བྱ་དང་གཅིག་དང་བདག་མེད་དང་གཅིག་གང་རུང་ཆོས་ཅན། རིགས་སྤྱི་ཡིན་པར་ཐལ། རང་གི་རིགས་ཅན་དུ་མ་ལ་རྗེས་སུ་འགྲོ་བའི་ཆོས་ཡིན་པའི་ཕྱིར། མ་གྲུབ་ན། དེ་ཆོས་ཅན། དེར་ཐལ། རང་ཉིད་ཡིན་པ་དུ་མ་ལ་རྗེས་སུ་འགྲོ་བའི་ཕྱིར་ན་མ་ཁྱབ་སྙམ། མ་གྲུབ་ན། དེར་ཐལ། རང་ཉིད་ཡིན་པ་དུ་མ་ཡོད་པའི་ཕྱིར། མ་གྲུབ་ན། དེ་ཡོད་པར་ཐལ། ཤེས་བྱ་དེ་ཡང་དེ་ཡིན། བདག་མེད་དེ་ཡང་དེ་ཡིན་པའི་ཕྱིར། རྩ་བར་འདོད་ན། ཤེས་བྱ་དང་གཅིག་དང་བདག་མེད་དང་གཅིག་གང་རུང་ཆོས་ཅན། རིགས་སྤྱི་མ་ཡིན་པར་ཐལ། སྤྱི་མ་ཡིན་པའི་ཕྱིར། མ་གྲུབ་ན། དེ་ཆོས་ཅན། དེར་ཐལ། རང་གསལ་བ་ལ་རྗེས་སུ་འགྲོ་བའི་ཆོས་མ་ཡིན་པའི་ཕྱིར། མ་གྲུབ་ན། དེ་ཆོས་ཅན། དེར་ཐལ། རང་གི་གསལ་བ་མེད་པའི་ཕྱིར། མ་གྲུབ་ན། དེ་ཆོས་ཅན། དེར་ཐལ། རང་གི་བྱེ་བྲག་མེད་པའི་ཕྱིར་རོ། ། སྤྱི་ཡིན་ན་རང་གི་གསལ་བ་དུ་མ་གྲུབ་པས་ཁྱབ་མ་ཁྱབ་དང༌། རྡུལ་ཕྲ་རབ་བརྒྱ་ཚོགས་སྤྱི་ཡིན་མིན་དཔྱད་པར་བྱའོ།། །། དགུ་པ་འགལ་འབྲེལ་ཆུང་ངུའི་རྣམ་བཞག་བཤད་པ།དགུ་པ་འགལ་འབྲེལ་ཆུང་ངུའི་རྣམ་བཞག་བཤད་པ་ལ། དང་པོ་འགལ་བ་ནི། རྣམ་འགྲེལ་ལས། འགལ་དང་འབྲས་བུ་དག་སྒྲུབ་དང༌། །ཞེས་པའི་འགལ་ཞེས་པ་དང༌། དེ་ཉིད་ལས། གནོད་བྱ་གནོད་བྱེད་ངོ་བོའི་ཕྱིར། །འདི་ནི་སྒྲོ་འདོགས་དབེན་པ་ལ། །འཇུག་ཅེས་བྱ་བར་ཤེས་པ་ཡིན། །ཞེས་དང༌། ཚད་མ་གྲུབ་པ་ལས། འགལ་བ་གང་ཡིན་འདིར་བཤད་བྱ། །སྟོང་ཉིད་ལྟ་དང་དེ་འགལ་ཕྱིར། །ཞེས་སོགས་གཞུང་དུ་མ་བྱུང༌། གཉིས་པ་འབྲེལ་བ་ནི། རྣམ་འགྲེལ་ལས། མེད་ན་མི་འབྱུང་ངེས་ཕྱིར་རོ། །ཞེས་དང༌། རང་བཞིན་ལ་ཡང་མེད་མི་འབྱུང༌། །ཡོད་པ་ཙམ་དང་འབྲེལ་བ་ཡིན། །དེ་མེད་ན་ནི་ཡོད་པའི་བདག །མེད་འགྱུར་ཐ་དད་མེད་བཞིན་ནོ། །ཞེས་སོགས་ཀྱི་གཞུང་འདི་བྱུང༌། དེའི་མཐའ་དཔྱད་པ་ལ། དགག་བཞག་སྤོང་གསུམ་ལས། དང་པོ་ནི། ཁ་ཅིག་ན་རེ། འཆི་བ་དང་འགལ་བ་དང་འགལ་བ་ཡིན་ན་འཆི་བ་དང་འགལ་བ་ཡིན་པས་ཁྱབ་ཟེར་ན། འཆི་བ་དང་གཅིག་ཆོས་ཅན། འཆི་བ་དང་འགལ་བར་ཐལ། འཆི་བ་དང་འགལ་བ་དང་འགལ་བ་ཡིན་པའི་ཕྱིར། ཁྱབ་པ་ཁས། མ་གྲུབ་ན། འཆི་བ་དང་གཅིག་ཆོས་ཅན། འཆི་བ་དང་འགལ་བ་དང་འགལ་བ་ཡིན་པར་ཐལ། ཁྱོད་འཆི་བ་དང་འགལ་བ་དང་ཐ་དད། ཁྱོད་ཡང་ཡིན་འཆི་བ་དང་འགལ་བ་ཡིན་པའི་གཞི་མཐུན་པ་མེད་པའི་ཕྱིར། རྟགས་དང་པོ་སླ། རྟགས་གཉིས་པ་མ་གྲུབ་ན། འཆི་བ་ཆོས་ཅན། ཁྱོད་དང་གཅིག་ཀྱང་ཡིན་ཁྱོད་དང་འགལ་བ་ཡིན་པའི་གཞི་མཐུན་པ་མེད་པར་ཐལ། ཁྱོད་ཡོད་པ་ཡིན་པའི་ཕྱིར། རྩ་བར་འདོད་ན། འཆི་བ་དང་གཅིག་ཆོས་ཅན། འཆི་བ་དང་འགལ་བ་མ་ཡིན་པར་ཐལ། འཆི་བ་དང་མི་འགལ་བ་ཡིན་པའི་ཕྱིར། མ་གྲུབ་ན། འཆི་བ་དང་གཅིག་ཆོས་ཅན། འཆི་བ་དང་མི་འགལ་བར་ཐལ། ཁྱོད་ཀྱང་ཡིན་འཆི་བ་ཡིན་པའི་གཞི་མཐུན་པ་ཡོད་པའི་ཕྱིར། མ་གྲུབ་ན། དེར་ཐལ། འཆི་བ་དེ་ཡིན་པའི་ཕྱིར། འཆི་བ་ཆོས་ཅན། ཁྱོད་ཁྱོད་དང་གཅིག་ཀྱང་ཡིན། ཁྱོད་ཁྱོད་དང་མི་འགལ་བ་ཡིན་པའི་གཞི་མཐུན་པ་ཡིན་པར་ཐལ། ཁྱོད་གཞི་གྲུབ་པའི་ཕྱིར། ཁ་ཅིག་ན་རེ། འདོད་ཆུང་ཆོག་ཤེས་དང་འགལ་བ་ཡིན་ན་འདོད་ཆུང་ཆོག་ཤེས་དང་འགལ་བ་དང་འགལ་བ་ཡིན་པས་ཁྱབ་ཟེར་ན། ཆོག་མི་ཤེས་པ་དང་གཅིག་ཆོས་ཅན། འདོད་ཆུང་ཆོག་ཤེས་དང་འགལ་བ་དང་འགལ་བ་ཡིན་པར་ཐལ། འདོད་ཆུང་ཆོག་ཤེས་དང་འགལ་བ་ཡིན་པའི་ཕྱིར། ཁྱབ་པ་ཁས། མ་གྲུབ་ན། ཆོག་མི་ཤེས་པ་དང་གཅིག་ཆོས་ཅན། འདོད་ཆུང་ཆོག་ཤེས་དང་འགལ་བ་ཡིན་པར་ཐལ། ཁྱོད་འདོད་ཆུང་ཆོག་ཤེས་དང་ཐ་དད་ཁྱོད་ཀྱང་ཡིན་འདོད་ཆུང་ཆོག་ཤེས་ཀྱང་ཡིན་པའི་གཞི་མཐུན་པ་མེད་པའི་ཕྱིར། ཆོག་མི་ཤེས་པ་ཆོས་ཅན། ཁྱོད་དང་གཅིག་ཀྱང་ཡིན། འདོད་ཆུང་ཆོག་ཤེས་ཀྱང་ཡིན་པའི་གཞི་མཐུན་པ་མེད་པར་ཐལ། ཡོད་ན་ཆོག་མི་ཤེས་པ་དེ་ཡིན་དགོས་ལ་མ་ཡིན་པའི་ཕྱིར། རྩ་བར་འདོད་ན། ཆོག་མི་ཤེས་པ་དང་གཅིག་ཆོས་ཅན། འདོད་ཆུང་ཆོག་ཤེས་དང་འགལ་བ་དང་འགལ་བ་མ་ཡིན་པར་ཐལ། འདོད་ཆུང་ཆོག་ཤེས་དང་འགལ་བ་དང་མི་འགལ་བ་ཡིན་པའི་ཕྱིར། མ་གྲུབ་ན། ཆོག་མི་ཤེས་པ་དང་གཅིག་ཆོས་ཅན། འདོད་ཆུང་ཆོག་ཤེས་དང་འགལ་བ་དང་མི་འགལ་བ་ཡིན་པར་ཐལ། ཁྱོད་ཀྱང་ཡིན་འདོད་ཆུང་ཆོག་ཤེས་དང་འགལ་བ་ཡིན་པའི་གཞི་མཐུན་པ་ཡོད་པའི་ཕྱིར། མ་གྲུབ་ན། ཆོག་མི་ཤེས་པ་དང་གཅིག་ཆོས་ཅན། ཁྱོད་ཀྱང་ཡིན་འདོད་ཆུང་ཆོག་ཤེས་དང་འགལ་བ་ཡིན་པའི་གཞི་མཐུན་པ་ཡོད་པར་ཐལ། ཆོག་མི་ཤེས་པ་དེ་ཡིན་པའི་ཕྱིར། མ་གྲུབ་ན། ཆོག་མི་ཤེས་པ་ཆོས་ཅན། ཁྱོད་ཆོག་མི་ཤེས་པ་དང་གཅིག་ཀྱང་ཡིན་འདོད་ཆུང་ཆོག་ཤེས་དང་འགལ་བ་ཡིན་པའི་གཞི་མཐུན་པ་ཡིན་པར་ཐལ། ཁྱོད་ཆོག་མི་ཤེས་པ་དང་གཅིག་ཡིན་པ་གང་ཞིག འདོད་ཆུང་ཆོག་ཤེས་དང་འགལ་བ་ཡིན་པའི་ཕྱིར། རྟགས་དང་པོ་མ་གྲུབ་ན། ཆོག་མི་ཤེས་པ་ཆོས་ཅན། ཁྱོད་ཁྱོད་དང་གཅིག་ཡིན་པར་ཐལ། གཞི་གྲུབ་པའི་ཕྱིར། རྟགས་གཉིས་པ་མ་གྲུབ་ན། ཆོག་མི་ཤེས་པ་ཆོས་ཅན། འདོད་ཆུང་ཆོག་ཤེས་དང་འགལ་བ་ཡིན་པར་ཐལ། ཁྱོད་འདོད་ཆུང་ཆོག་ཤེས་དང་ཐ་དད། ཁྱོད་ཡང་ཡིན་འདོད་ཆུང་ཆོག་ཤེས་ཀྱང་ཡིན་པའི་གཞི་མཐུན་པ་མེད་པའི་ཕྱིར། ཁ་ཅིག་ན་རེ། ཤེས་བྱ་དང་འགལ་བ་དང་འགལ་བ་ཡང་ཡིན། ཤེས་བྱ་དང་མི་འགལ་བ་དང་མི་འགལ་བ་ཡང་ཡིན། ཤེས་བྱ་དང་འབྲེལ་བ་དང་འབྲེལ་བ་ཡང་ཡིན། ཤེས་བྱ་དང་མ་འབྲེལ་བ་དང་མ་འབྲེལ་བ་ཡང་ཡིན་པའི་གཞི་མཐུན་པ་མེད་ཟེར་ན། དེ་ཡོད་པར་ཐལ། ཤེས་བྱ་དང་མ་འབྲེལ་བ་དེ་ཡིན་པའི་ཕྱིར། མ་གྲུབ་ན། ཤེས་བྱ་དང་མ་འབྲེལ་བ་ཆོས་ཅན། ཁྱོད་ཤེས་བྱ་དང་འགལ་བ་དང་འགལ་བ་ཡང་ཡིན། ཤེས་བྱ་དང་མི་འགལ་བ་དང་མི་འགལ་བ་ཡང་ཡིན། ཤེས་བྱ་དང་འབྲེལ་བ་དང་འབྲེལ་བ་ཡང་ཡིན། ཤེས་བྱ་དང་མ་འབྲེལ་བ་དང་མ་འབྲེལ་བ་ཡང་ཡིན་པའི་གཞི་མཐུན་པ་ཡིན་པར་ཐལ། ཁྱོད་ཤེས་བྱ་དང་འགལ་བ་དང་འགལ་བ་ཡིན་པ་གང་ཞིག ཤེས་བྱ་དང་མི་འགལ་བ་དང་མི་འགལ་བ་ཡང་ཡིན། ཤེས་བྱ་དང་འབྲེལ་བ་དང་འབྲེལ་བ་ཡང་ཡིན། ཤེས་བྱ་དང་མ་འབྲེལ་བ་དང་མ་འབྲེལ་བ་ཡང་ཡིན་པའི་གཞི་མཐུན་པ་ཡིན་པའི་ཕྱིར། མ་གྲུབ་ན། ཤེས་བྱ་དང་མ་འབྲེལ་བ་ཆོས་ཅན། ཤེས་བྱ་དང་འགལ་བ་དང་འགལ་བ་ཡིན་པར་ཐལ། ཁྱོད་ཤེས་བྱ་དང་འགལ་བ་དང་ཐ་དད། ཁྱོད་ཀྱང་ཡིན་ཤེས་བྱ་དང་འགལ་བ་ཡིན་པའི་གཞི་མཐུན་པ་མེད་པའི་ཕྱིར། རྟགས་དང་པོ་སླ། རྟགས་གཉིས་པ་མ་གྲུབ་ན། ཤེས་བྱ་དང་མ་འབྲེལ་བ་ཡང་ཡིན། ཤེས་བྱ་དང་འགལ་བ་ཡིན་པའི་གཞི་མཐུན་པ་མེད་པར་ཐལ། ཤེས་བྱ་དང་འགལ་བ་ཡིན་ན་ཤེས་བྱ་དང་འབྲེལ་བ་ཡིན་པས་ཁྱབ་པའི་ཕྱིར། མ་གྲུབ་ན། དེར་ཐལ། ཤེས་བྱ་དང་ཐ་དད་ཡིན་ན་ཤེས་བྱ་དང་འབྲེལ་བ་ཡིན་པས་ཁྱབ་པའི་ཕྱིར། རྩ་རྟགས་གཉིས་པ་མ་གྲུབ་ན། ཤེས་བྱ་དང་མ་འབྲེལ་བ་ཆོས་ཅན། ཤེས་བྱ་དང་མི་འགལ་བ་དང་མི་འགལ་བ་ཡིན་པར་ཐལ། ཁྱོད་ཡང་ཡིན། ཤེས་བྱ་དང་མི་འགལ་བ་ཡིན་པའི་གཞི་མཐུན་པ་ཡོད་པའི་ཕྱིར། མ་གྲུབ་ན། དེར་ཐལ། ཤེས་བྱ་དེ་ཡིན་པའི་ཕྱིར། ཤེས་བྱ་ཆོས་ཅན། ཁྱོད་ཁྱོད་དང་མ་འབྲེལ་བ་ཡང་ཡིན། ཁྱོད་ཁྱོད་དང་མི་འགལ་བ་ཡིན་པའི་གཞི་མཐུན་པ་ཡིན་པར་ཐལ། ཤེས་བྱ་ཡིན་པའི་ཕྱིར། རྩ་རྟགས་གསུམ་པ་མ་གྲུབ་ན། ཤེས་བྱ་དང་མ་འབྲེལ་བ་ཆོས་ཅན། ཤེས་བྱ་དང་འབྲེལ་བ་དང་འབྲེལ་བ་ཡིན་པར་ཐལ། ཤེས་བྱ་དང་འབྲེལ་བ་དང་བདག་གཅིག་འབྲེལ་ཡིན་པའི་ཕྱིར། མ་གྲུབ་ན། ཤེས་བྱ་དང་མ་འབྲེལ་བ་ཆོས་ཅན། ཤེས་བྱ་དང་འབྲེལ་བ་དང་བདག་གཅིག་འབྲེལ་ཡིན་པར་ཐལ། ཤེས་བྱའི་བྱེ་བྲག་ཡིན་པའི་ཕྱིར། རྩ་རྟགས་བཞི་བ་མ་གྲུབ་ན། ཤེས་བྱ་དང་མ་འབྲེལ་བ་ཆོས་ཅན། ཁྱོད་ཁྱོད་དང་མ་འབྲེལ་བར་ཐལ། གང་ཟག་གི་བདག་མེད་ཡིན་པའི་ཕྱིར། ཁ་ཅིག་ན་རེ། བྱམས་པ་དང་ཞེ་སྡང་གཉིས་དང་འགལ་བ་དང་མི་འགལ་བ་ཡང་ཡིན། བྱམས་པ་དང་ཞེ་སྡང་གཉིས་དང་མི་འགལ་བ་དང་འགལ་བ་ཡང་ཡིན། བྱམས་པ་དང་ཞེ་སྡང་གཉིས་དང་འབྲེལ་བ་དང་མ་འབྲེལ་བ་ཡང་ཡིན། བྱམས་པ་དང་ཞེ་སྡང་གཉིས་དང་མ་འབྲེལ་བ་དང་འབྲེལ་བ་ཡང་ཡིན་པའི་གཞི་མཐུན་པ་མེད་ཟེར་ན། དེ་ཡོད་པར་ཐལ། རྟག་པ་དང་གཅིག་དེ་ཡིན་པའི་ཕྱིར། མ་གྲུབ་ན། རྟག་པ་དང་གཅིག་ཆོས་ཅན། བྱམས་པ་དང་ཞེ་སྡང་གཉིས་དང་འགལ་བ་དང་མི་འགལ་བ་ཡང་ཡིན། བྱམས་པ་དང་ཞེ་སྡང་གཉིས་དང་མི་འགལ་བ་དང་འགལ་བ་ཡང་ཡིན། བྱམས་པ་དང་ཞེ་སྡང་གཉིས་དང་འབྲེལ་བ་དང་མ་འབྲེལ་བ་ཡང་ཡིན། བྱམས་པ་དང་ཞེ་སྡང་གཉིས་དང་མ་འབྲེལ་བ་དང་འབྲེལ་བ་ཡང་ཡིན་པའི་གཞི་མཐུན་པ་ཡིན་པར་ཐལ། བྱམས་པ་དང་ཞེ་སྡང་གཉིས་དང་འགལ་བ་དང་མི་འགལ་བ་ཡིན་པ་གང་ཞིག བྱམས་པ་དང་ཞེ་སྡང་གཉིས་དང་མི་འགལ་བ་དང་འགལ་བ་ཡང་ཡིན། བྱམས་པ་དང་ཞེ་སྡང་གཉིས་དང་འབྲེལ་བ་དང་མ་འབྲེལ་བ་ཡང་ཡིན། བྱམས་པ་དང་ཞེ་སྡང་གཉིས་དང་མ་འབྲེལ་བ་འབྲེལ་བ་ཡང་ཡིན་པའི་གཞི་མཐུན་པ་ཡིན་པའི་ཕྱིར། རྟགས་དང་པོ་མ་གྲུབ་ན། རྟག་པ་དང་གཅིག་ཆོས་ཅན། བྱམས་པ་དང་ཞེ་སྡང་གཉིས་དང་འགལ་བ་དང་མི་འགལ་བ་ཡིན་པར་ཐལ། ཁྱོད་ཀྱང་ཡིན། བྱམས་པ་དང་ཞེ་སྡང་གཉིས་དང་འགལ་བ་ཡིན་པའི་གཞི་མཐུན་པ་ཡོད་པའི་ཕྱིར། དེར་ཐལ། རྟག་པ་དེ་ཡིན་པའི་ཕྱིར། མ་གྲུབ་ན། རྟག་པ་ཆོས་ཅན། ཁྱོད་ཁྱོད་དང་གཅིག་ཀྱང་ཡིན། བྱམས་པ་དང་ཞེ་སྡང་གཉིས་དང་འགལ་བ་ཡིན་པའི་གཞི་མཐུན་པ་ཡིན་པར་ཐལ། ཁྱོད་བྱམས་པ་དང་ཞེ་སྡང་གཉིས་དང་འགལ་བ་ཡིན་པའི་ཕྱིར། རྩ་རྟགས་གཉིས་པ་མ་གྲུབ་ན། རྟག་པ་དང་གཅིག་ཆོས་ཅན། བྱམས་པ་དང་ཞེ་སྡང་གཉིས་དང་མི་འགལ་བ་དང་འགལ་བ་ཡིན་པར་ཐལ། ཁྱོད་བྱམས་པ་དང་ཞེ་སྡང་གཉིས་དང་མི་འགལ་བ་དང་ཐ་དད། ཁྱོད་ཀྱང་ཡིན་བྱམས་པ་དང་ཞེ་སྡང་གཉིས་དང་མི་འགལ་བ་ཡིན་པའི་གཞི་མཐུན་པ་མེད་པའི་ཕྱིར། མ་གྲུབ་ན། རྟག་པ་དང་གཅིག་ཆོས་ཅན། ཁྱོད་ཀྱང་ཡིན། བྱམས་པ་དང་ཞེ་སྡང་གཉིས་དང་མི་འགལ་བ་ཡིན་པའི་གཞི་མཐུན་པ་མེད་པར་ཐལ། གལ་ཏེ་ཡོད་ན་རྟག་པ་དེ་ཡིན་དགོས་ལ་མ་ཡིན། དེ་ལས་གཞན་གཅིག་མེད་པའི་ཕྱིར། རྟགས་གཉིས་པ་སླ། རྟགས་དང་པོ་མ་གྲུབ་ན། རྟག་པ་ཆོས་ཅན། ཁྱོད་རྟག་པ་དང་གཅིག་ཀྱང་ཡིན། བྱམས་པ་དང་ཞེ་སྡང་གཉིས་དང་མི་འགལ་བ་ཡིན་པའི་གཞི་མཐུན་པ་མ་ཡིན་པར་ཐལ། ཁྱོད་བྱམས་པ་དང་ཞེ་སྡང་གཉིས་དང་མི་འགལ་བ་མ་ཡིན་པའི་ཕྱིར། མ་གྲུབ་ན། རྟག་པ་ཆོས་ཅན། ཁྱོད་བྱམས་པ་དང་ཞེ་སྡང་གཉིས་དང་མི་འགལ་བ་མ་ཡིན་པར་ཐལ། ཁྱོད་བྱམས་པ་དང་ཞེ་སྡང་གཉིས་དང་འགལ་བ་ཡིན་པའི་ཕྱིར། མ་གྲུབ་ན། རྟག་པ་ཆོས་ཅན། ཁྱོད་བྱམས་པ་དང་ཞེ་སྡང་གཉིས་དང་འགལ་བ་ཡིན་པར་ཐལ། ཁྱོད་བྱམས་པ་དང་ཞེ་སྡང་གཉིས་དང་ཐ་དད། ཁྱོད་ཀྱང་ཡིན་བྱམས་པ་དང་ཞེ་སྡང་གཉིས་ཡིན་པའི་གཞི་མཐུན་པ་མེད་པའི་ཕྱིར། རྩ་རྟགས་གསུམ་པ་མ་གྲུབ་ན། རྟག་པ་དང་གཅིག་ཆོས་ཅན། བྱམས་པ་དང་ཞེ་སྡང་གཉིས་དང་འབྲེལ་བ་དང་མ་འབྲེལ་བ་ཡིན་པར་ཐལ། བྱམས་པ་དང་ཞེ་སྡང་གཉིས་དང་འབྲེལ་བ་དང་འབྲེལ་བ་མ་ཡིན་པའི་ཕྱིར། མ་གྲུབ་ན། རྟག་པ་དང་གཅིག་ཆོས་ཅན། བྱམས་པ་དང་ཞེ་སྡང་གཉིས་དང་འབྲེལ་བ་དང་འབྲེལ་བ་མ་ཡིན་པར་ཐལ། བྱམས་པ་དང་ཞེ་སྡང་གཉིས་དང་འབྲེལ་བ་མེད་ན་ཁྱོད་མེད་མི་དགོས་པའི་ཕྱིར། མ་གྲུབ་ན། ཞེ་སྡང་གི་དགག་གཞི་ཆོས་ཅན། རྟག་པ་དང་གཅིག་མེད་པར་ཐལ། བྱམས་པ་དང་ཞེ་སྡང་གཉིས་དང་འབྲེལ་བ་མེད་པའི་ཕྱིར། ཁྱབ་པ་ཁས། རྩ་རྟགས་བཞི་བ་མ་གྲུབ་ན། རྟག་པ་དང་གཅིག་ཆོས་ཅན། བྱམས་པ་དང་ཞེ་སྡང་གཉིས་དང་མ་འབྲེལ་བ་དང་འབྲེལ་བ་ཡིན་པར་ཐལ། ཁྱོད་བྱམས་པ་དང་ཞེ་སྡང་གཉིས་དང་མ་འབྲེལ་བ་དང་བདག་གཅིག་འབྲེལ་ཡིན་པའི་ཕྱིར། མ་གྲུབ་ན། རྟག་པ་དང་གཅིག་ཆོས་ཅན། བྱམས་པ་དང་ཞེ་སྡང་གཉིས་དང་མ་འབྲེལ་བ་དང་བདག་གཅིག་འབྲེལ་ཡིན་པར་ཐལ། བྱམས་པ་དང་ཞེ་སྡང་གཉིས་དང་མ་འབྲེལ་བ་དང་བདག་ཉིད་གཅིག་པའི་སྒོ་ནས་ཐ་དད། བྱམས་པ་དང་ཞེ་སྡང་གཉིས་དང་མ་འབྲེལ་བ་མེད་ན་ཁྱོད་མེད་དགོས་པའི་ཕྱིར། རྟགས་རེ་རེ་ན་སླའོ། །གཉིས་པ་རང་ལུགས་བཤད་པ་ལ། འགལ་བའི་མཚན་ཉིད་ཡོད་དེ། ཐ་དད་ཅིང་གཞི་མཐུན་མི་སྲིད་པ་དེ་ཡིན་པའི་ཕྱིར། མཚན་གཞི་ནི་ཡོད་དེ། རྟག་མི་རྟག་དང༌། སྣང་མུན་ལྟ་བུའོ། །མི་རྟག་པ་དང་འགལ་བའི་མཚན་ཉིད་ཡོད་དེ། མི་རྟག་པ་དང་ཐ་དད་ཅིང་གཞི་མཐུན་མི་སྲིད་པ་དེ་ཡིན་པའི་ཕྱིར། མཚན་གཞི་ནི་ཡོད་དེ། ཀྭ་བུམ་གཉིས་དེ་ཡིན་པའི་ཕྱིར། དེས་གཞན་ལ་རིགས་འདྲ་སྦྱར། ཞེ་སྡང་དང་འགལ་བ་དང་འགལ་བའི་མཚན་ཉིད་ཡོད་དེ། ཁྱོད་ཞེ་སྡང་དང་འགལ་བ་དང་ཐ་དད། ཁྱོད་ཀྱང་ཡིན་ཞེ་སྡང་དང་འགལ་བ་ཡིན་པའི་གཞི་མཐུན་པ་མི་སྲིད་པ་དེ་ཡིན་པའི་ཕྱིར། བྱམས་པ་དང་མི་འགལ་དང་འགལ་བའི་མཚན་ཉིད་ཡོད་དེ། ཁྱོད་བྱམས་པ་དང་མི་འགལ་བ་དང་ཐ་དད། ཁྱོད་ཀྱང་ཡིན་བྱམས་པ་དང་མི་འགལ་བ་ཡང་ཡིན་པའི་གཞི་མཐུན་པ་མི་སྲིད་པ་དེ་ཡིན་པའི་ཕྱིར། མི་འགལ་བའི་མཚན་ཉིད་ཡོད་དེ། ཁྱོད་ཀྱི་ཡིན་པ་ཡོད་པ་དེ་ཡིན་པའི་ཕྱིར། བུམ་པ་དང་མི་འགལ་བའི་མཚན་ཉིད་ཡོད་དེ། ཁྱོད་བུམ་པ་དང་ཐ་མི་དད་དང༌། ཁྱོད་ཡང་ཡིན་བུམ་པ་ཡིན་པའི་གཞི་མཐུན་པ་ཡོད་པ་གང་རུང་དེ་ཡིན་པའི་ཕྱིར། ཀྭ་བུམ་གཉིས་དང་མི་འགལ་བའི་མཚན་ཉིད་ཡོད་དེ། ཀྭ་བུམ་གཉིས་དང་ཐ་མི་དད་དང༌། ཁྱོད་ཀྱང་ཡིན་ཀྭ་བུམ་གཉིས་ཡིན་པའི་གཞི་མཐུན་པ་ཡོད་པ་གང་རུང་དེ་ཡིན་པའི་ཕྱིར། བུམ་པ་དང་འགལ་བ་དང་མི་འགལ་བའི་མཚན་ཉིད་ཡོད་དེ། ཁྱོད་བུམ་པ་དང་འགལ་བ་དང་ཐ་མི་དད་དང༌། ཁྱོད་ཀྱང་ཡིན་བུམ་པ་དང་འགལ་བ་ཡིན་པའི་གཞི་མཐུན་པ་ཡོད་པ་གང་རུང་དེ་ཡིན་པའི་ཕྱིར། བུམ་པ་དང་མི་འགལ་བ་དང་མི་འགལ་བའི་མཚན་ཉིད་ཡོད་དེ། ཁྱོད་བུམ་པ་དང་མི་འགལ་བ་དང་ཐ་མི་དད་དང༌། ཁྱོད་ཀྱང་ཡིན་བུམ་པ་དང་མི་འགལ་བའི་གཞི་མཐུན་པ་ཡོད་པ་གང་རུང་དེ་ཡིན་པའི་ཕྱིར། འབྲེལ་བའི་མཚན་ཉིད་ཡོད་དེ། ཕན་ཚུན་ཐ་དད་ཅིང་དེ་བཀག་སྟོབས་ཀྱིས་དེ་ཁེགས་པ་དེ་ཡིན་པའི་ཕྱིར། གཏན་ཚིགས་དོན་བསྡུས་ལས། འགལ་བ་དང་འབྲེལ་བ་ལ་མཚན་ཉིད་རིམ་པ་ལྟར། མི་མཐུན་པར་གནས་པ་དང༌། ཕན་ཚུན་ཐ་དད་ཅིང་དེ་བཀག་ནས་དེ་ཁེགས་པའོ། །ཞེས་གསུངས་སོ། །དངོས་པོ་དང་འབྲེལ་བའི་མཚན་ཉིད་ཡོད་དེ། ཁྱོད་དངོས་པོ་དང་ཐ་དད། དངོས་པོ་བཀག་སྟོབས་ཀྱིས་ཁྱོད་ལྡོག་པར་ངེས་པ་དེ་ཡིན་པའི་ཕྱིར། དངོས་པོ་དང་འབྲེལ་བ་ལ་དབྱེ་ན་གཉིས་ཡོད་དེ། དངོས་པོ་དང་བདག་གཅིག་འབྲེལ་དང༌། དངོས་པོ་དང་དེ་བྱུང་འབྲེལ་གཉིས་ཡོད་པའི་ཕྱིར། དངོས་པོ་དང་བདག་གཅིག་འབྲེལ་གྱི་མཚན་ཉིད་ཡོད་དེ། དངོས་པོ་དང་བདག་ཉིད་གཅིག་པའི་སྒོ་ནས་ཐ་དད། དངོས་པོ་མེད་ན་ཁྱོད་མེད་དགོས་པ་དེ་ཡིན་པའི་ཕྱིར། མཚན་གཞི་ནི་ཡོད་དེ། བུམ་པ་དེ་ཡིན་པའི་ཕྱིར། དངོས་པོ་དང་རྟེན་བྱུང་འབྲེལ་གྱི་མཚན་ཉིད་ཡོད་དེ། ཁྱོད་དངོས་པོ་ལ་བརྟེན་ནས་བྱུང་བ་གང་ཞིག དངོས་པོ་མེད་ན་ཁྱོད་མེད་དགོས་པ་དེ་ཡིན་པའི་ཕྱིར། མཚན་གཞི་ནི་ཡོད་དེ། དངོས་པོའི་ཕྱི་ལོགས་སུ་བྱུང་བ་དེ་ཡིན་པའི་ཕྱིར། དངོས་པོ་གཞན་རྣམས་ལ་རིགས་འགྲེའོ། ། གསུམ་པ་དེ་ལ་རྩོད་པ་སྤོང་བ།གསུམ་པ་དེ་ལ་རྩོད་པ་སྤོང་བ་ལ། ཡོད་པ་དང་མེད་པ་གཉིས་ཆོས་ཅན། འགལ་བ་ཡིན་པར་ཐལ། ཐ་དད་ཅིང་གཞི་མཐུན་མི་སྲིད་པ་ཡིན་པའི་ཕྱིར། ཁྱབ་པ་ཁས། མ་གྲུབ་ན། ཡོད་པ་དང་མེད་པ་གཉིས་ཆོས་ཅན། ཐ་དད་ཅིང་གཞི་མཐུན་མི་སྲིད་པ་ཡིན་པར་ཐལ། ཐ་དད་གང་ཞིག གཞི་མཐུན་མི་སྲིད་པའི་ཕྱིར་ཟེར་ན། རྟགས་དང་པོ་མ་གྲུབ་སྟེ། དེ་གཉིས་སོ་སོ་བའི་ཆོས་མ་ཡིན་པའི་ཕྱིར། མ་གྲུབ་ན། ཡོད་པ་དང་མེད་པ་གཉིས་ཆོས་ཅན། སོ་སོ་བའི་ཆོས་མ་ཡིན་པར་ཐལ། ཆོས་མ་ཡིན་པའི་ཕྱིར། ཁ་ཅིག་ན་རེ། དུ་བ་ཆོས་ཅན། རྟེན་བྱུང་འབྲེལ་ཡིན་པར་ཐལ། མེ་དང་རྟེན་བྱུང་འབྲེལ་ཡིན་པའི་ཕྱིར། མ་ཁྱབ་ན། འོ་ན་དུ་བ་ཆོས་ཅན། རྟེན་འབྲེལ་མ་ཡིན་པར་ཐལ། རྟེན་བྱུང་འབྲེལ་མ་ཡིན་པའི་ཕྱིར། རྟགས་ཁས་ཟེར་ན། ཅུང་ཟད་དཔྱད་རྒྱུ་སྣང༌། ཁ་ཅིག་ན་རེ། མི་རྟག་པ་ཆོས་ཅན། བུམ་པ་དང་བདག་གཅིག་འབྲེལ་ཡིན་པར་ཐལ། བུམ་པ་དང་བདག་ཉིད་གཅིག་པའི་སྒོ་ནས་ཐ་དད་ཡིན་པའི་ཕྱིར་ན་ཁ་ཅིག་མ་ཁྱབ་ཟེར། མ་གྲུབ་ན། མི་རྟག་པ་ཆོས་ཅན། བུམ་པ་དང་བདག་ཉིད་གཅིག་གི་སྒོ་ནས་ཐ་དད་ཡིན་པར་ཐལ། བུམ་པ་དང་བདག་ཉིད་གཅིག་ཡིན་པ་གང་ཞིག ཐ་དད་ཡིན་པའི་ཕྱིར། རྟགས་རེ་རེ་ནས་གྲུབ་སྟེ། བུམ་པའི་སྤྱི་ཡིན་པའི་ཕྱིར་ན་མ་ཁྱབ་སྙམ། ། རྩ་བར་འདོད་ན། མི་རྟག་པ་ཆོས་ཅན། བུམ་པ་དང་བདག་གཅིག་འབྲེལ་མ་ཡིན་པར་ཐལ། བུམ་པ་མེད་ན་ཁྱོད་མེད་པས་མ་ཁྱབ་པའི་ཕྱིར། ཁ་ཅིག་ན་རེ། བུམ་པ་ཆོས་ཅན། ཁྱོད་ཡང་ཡིན་བུམ་པ་ཡིན་པའི་གཞི་མཐུན་པ་ཡོད་པར་ཐལ། ཁྱོད་བུམ་པ་དང་མི་འགལ་བ་ཡིན་པའི་ཕྱིར་ན་མ་ཁྱབ། འདོད་ན། བུམ་པ་དང་བུམ་པ་གཉིས་ཆོས་ཅན། ཁྱོད་ཀྱི་གཞི་མཐུན་མེད་པར་ཐལ། ཁྱོད་གཅིག་ཡིན་པའི་ཕྱིར། མ་ཁྱབ་ན་ཁྱབ་བ་ཡོད་པར་ཐལ། ཆོས་དེ་གཉིས་ཀྱི་གཞི་མཐུན་འཇོག་པ་ལ་ཆོས་དེ་གཉིས་ཐ་དད་ཡིན་དགོས་པའི་ཕྱིར་རོ།། །། བཅུ་བ་མཚན་མཚོན་གྱི་རྣམ་བཞག་བཤད་པ།བཅུ་བ་མཚན་མཚོན་གྱི་རྣམ་བཞག་བཤད་པ་ལ། རྣམ་འགྲེལ་མངོན་སུམ་ལེའུ་ལས། བྱ་བ་སྒྲུབ་པར་བྱེད་ཅེས་ཏེ། །ཞེས་པ་ནས། གང་ཡིན་དེ་ནི་དེ་སྒྲུབ་བྱེད། །ཞེས་པའི་བར་དང༌། དེ་ཕྱིར་གཞལ་བྱ་རྟོགས་པ་ཡིས། །སྒྲུབ་བྱེད་གཞལ་བྱའི་རང་བཞིན་ཉིད། །ཅེས་སོགས་ཀྱི་གཞུང་འདི་བྱུང༌། དེའི་མཐའ་དཔྱད་པ་ལ། དགག་བཞག་སྤོང་གསུམ་ལས། དང་པོ་ནི། ཁ་ཅིག་ན་རེ། གཞི་གྲུབ་ན་མཚན་མཚོན་གང་རུང་ཡིན་པས་ཁྱབ་ཟེར་ན། བདག་འཛིན་དང་བདག་མེད་རྟོགས་པའི་ཤེས་རབ་གཉིས་ཆོས་ཅན། མཚན་མཚོན་གང་རུང་ཡིན་པར་ཐལ། གཞི་གྲུབ་པའི་ཕྱིར། ཁྱབ་པ་ཁས། མ་གྲུབ་ན། བདག་འཛིན་དང་བདག་མེད་རྟོགས་པའི་ཤེས་རབ་གཉིས་ཆོས་ཅན། གཞི་གྲུབ་པར་ཐལ། ཤེས་པ་ཡིན་པའི་ཕྱིར། རྩ་བར་འདོད་ན། བདག་འཛིན་དང་བདག་མེད་རྟོགས་པའི་ཤེས་རབ་གཉིས་ཆོས་ཅན། མཚན་མཚོན་གང་རུང་མ་ཡིན་པར་ཐལ། མཚན་ཉིད་མ་ཡིན་པ་གང་ཞིག མཚོན་བྱ་མ་ཡིན་པའི་ཕྱིར། དང་པོ་མ་གྲུབ་ན། དེ་ཆོས་ཅན། མཚན་ཉིད་མ་ཡིན་པར་ཐལ། ཁྱོད་ཀྱི་མཚོན་བྱ་མེད་པའི་ཕྱིར། མ་གྲུབ་ན། དེ་ཆོས་ཅན། ཁྱོད་ཀྱི་མཚོན་བྱ་མེད་པར་ཐལ། ཁྱོད་ཀྱི་བཏགས་ཡོད་ཆོས་གསུམ་མམ་རྣམ་བཞག་ཆོས་གསུམ་ཚང་བ་མེད་པའི་ཕྱིར། མ་གྲུབ་ན། དེ་ཆོས་ཅན། ཁྱོད་ཀྱི་རྣམ་བཞག་ཆོས་གསུམ་མེད་པར་ཐལ། ཁྱོད་ཀྱི་མཚན་གཞི་མེད་པའི་ཕྱིར། མ་གྲུབ་ན། དེ་ཆོས་ཅན། ཁྱོད་ཀྱི་མཚན་གཞི་མེད་པར་ཐལ། ཁྱོད་ཀྱི་ཡིན་པ་མེད་པའི་ཕྱིར། རྩ་རྟགས་གཉིས་པ་མ་གྲུབ་ན། བདག་འཛིན་དང་བདག་མེད་རྟོགས་པའི་ཤེས་རབ་གཉིས་ཆོས་ཅན། མཚོན་བྱ་མ་ཡིན་པར་ཐལ། ཁྱོད་ཀྱི་མཚན་ཉིད་མེད་པའི་ཕྱིར། མ་གྲུབ་ན། དེ་ཆོས་ཅན། ཁྱོད་ཀྱི་མཚན་ཉིད་མེད་པར་ཐལ། ཁྱོད་ཀྱི་རྫས་ཡོད་ཆོས་གསུམ་མམ་རྣམ་འཇོག་ཆོས་གསུམ་མེད་པའི་ཕྱིར། མ་གྲུབ་ན། དེ་ཆོས་ཅན། ཁྱོད་ཀྱི་རྣམ་འཇོག་ཆོས་གསུམ་མེད་པར་ཐལ། ཁྱོད་ཀྱི་མཚན་གཞི་མེད་པའི་ཕྱིར། མ་གྲུབ་ན། དེ་ཆོས་ཅན། དེར་ཐལ། ཡིན་པ་མི་སྲིད་པའི་ཤེས་བྱ་ཡིན་པའི་ཕྱིར། ཁ་ཅིག་ཁྱོད་ཀྱི་ཡིན་པ་ཡོད་ན། ཁྱོད་མཚན་མཚོན་གང་རུང་ཡིན་པས་ཁྱབ་ཟེར་ན། མི་རྟག་པ་དང་སྐད་ཅིག་མ་གཉིས་ཆོས་ཅན། དེར་ཐལ། དེའི་ཕྱིར། འདོད་མི་ནུས་ཏེ། མཚན་ཉིད་མ་ཡིན་པ་གང་ཞིག མཚོན་བྱ་མ་ཡིན་པའི་ཕྱིར། རྟགས་རེ་རེ་ནས་གྲུབ་སྟེ། ཁྱོད་མཚན་མཚོན་ཡིན་པའི་ཕྱིར། ཁ་ཅིག་ན་རེ། བཏགས་ཡོད་ཆོས་གསུམ་ཚང་བ་ཡིན་ན་བཏགས་ཡོད་ཡིན་པས་ཁྱབ་ཟེར་ན། ཤེས་པ་ཆོས་ཅན། བཏགས་ཡོད་ཡིན་པར་ཐལ། བཏགས་ཡོད་ཆོས་གསུམ་ཚང་བ་ཡིན་པའི་ཕྱིར། ཁྱབ་པ་ཁས། མ་གྲུབ་ན། དེ་ཆོས་ཅན། དེར་ཐལ། མཚོན་བྱ་ཡིན་པའི་ཕྱིར། མ་གྲུབ་ན། དེ་ཆོས་ཅན། དེར་ཐལ། ཁྱོད་ཀྱི་མཚན་ཉིད་ཡོད་པའི་ཕྱིར། རྩ་བར་འདོད་ན། དེ་ཆོས་ཅན། བཏགས་ཡོད་མ་ཡིན་པར་ཐལ། རྫས་ཡོད་ཡིན་པའི་ཕྱིར། མ་གྲུབ་ན། དེ་ཆོས་ཅན། དེར་ཐལ། རང་རྒྱུ་ལས་སྐྱེས་པའི་རིག་པ་ཡིན་པའི་ཕྱིར། ཁ་ཅིག་ན་རེ། གསལ་ཞིང་རིག་པའི་ལྡོག་པ་དང་ཡིན་ཁྱབ་མཉམ་ཡིན་ན་མཚན་ཉིད་ཡིན་པས་ཁྱབ་ཟེར་ན། ཤེས་པའི་མཚན་ཉིད་ཆོས་ཅན། མཚན་ཉིད་ཡིན་པར་ཐལ། གསལ་ཞིང་རིག་པའི་ལྡོག་པ་དང་ཡིན་ཁྱབ་མཉམ་ཡིན་པའི་ཕྱིར། ཁྱབ་པ་ཁས། མ་གྲུབ་ན། ཤེས་པའི་མཚན་ཉིད་ཆོས་ཅན། དེར་ཐལ། ཁྱོད་ཡིན་ན་གསལ་ཞིང་རིག་པའི་ལྡོག་པ་ཡིན་པས་ཁྱབ། གསལ་ཞིང་རིག་པའི་ལྡོག་པ་ཡིན་ན་ཁྱོད་ཡིན་པས་ཁྱབ་པའི་ཕྱིར། རྩ་བར་འདོད་ན། ཤེས་པའི་མཚན་ཉིད་ཆོས་ཅན། མཚན་ཉིད་མ་ཡིན་པར་ཐལ། མཚོན་བྱ་ཡིན་པའི་ཕྱིར། མ་གྲུབ་ན། དེ་ཆོས་ཅན། མཚོན་བྱ་ཡིན་པར་ཐལ། ཁྱོད་ཀྱི་མཚན་ཉིད་ཡོད་པའི་ཕྱིར། མ་གྲུབ་ན། དེ་ཆོས་ཅན། ཁྱོད་ཀྱི་མཚན་ཉིད་ཡོད་པར་ཐལ། ཤེས་པའི་རྣམ་འཇོག་ཆོས་གསུམ་ཚང་བ་དེ་ཡིན་པའི་ཕྱིར། མ་གྲུབ་ན། ཤེས་པ་ཆོས་ཅན། ཁྱོད་ཀྱི་མཚན་ཉིད་ཁྱོད་ཀྱི་རྣམ་འཇོག་ཆོས་གསུམ་ཚང་བའི་མཚོན་བྱ་ཡིན་པར་ཐལ། ཁྱོད་མཚོན་བྱ་ཡིན་པའི་ཕྱིར། ཁ་ཅིག་ན་རེ། དོན་བྱེད་ནུས་པའི་ལྡོག་པ་དང་ཡིན་ཁྱབ་མཉམ་ཡིན་ན་མཚོན་བྱ་ཡིན་པས་ཁྱབ་ཟེར་ན། དངོས་པོའི་རྣམ་འཇོག་ཆོས་གསུམ་ཚང་བ་ཆོས་ཅན། དེར་ཐལ། དེའི་ཕྱིར། ཁྱབ་པ་ཁས། མ་གྲུབ་ན། དེ་ཆོས་ཅན། དེར་ཐལ། ཁྱོད་ཡིན་ན་དོན་བྱེད་ནུས་པའི་ལྡོག་པ་ཡིན་པས་ཁྱབ། དོན་བྱེད་ནུས་པའི་ལྡོག་པ་ཡིན་ན་ཁྱོད་ཡིན་པས་ཁྱབ་པའི་ཕྱིར། རྩ་བར་འདོད་ན། དངོས་པོའི་རྣམ་འཇོག་ཆོས་གསུམ་ཚང་བ་ཆོས་ཅན། མཚོན་བྱ་མ་ཡིན་པར་ཐལ། མཚན་ཉིད་ཡིན་པའི་ཕྱིར། མ་གྲུབ་ན། དེ་ཆོས་ཅན། དེར་ཐལ། དངོས་པོའི་མཚན་ཉིད་ཀྱི་མཚན་ཉིད་ཡིན་པའི་ཕྱིར། མ་གྲུབ་ན། དངོས་པོ་ཆོས་ཅན། ཁྱོད་ཀྱི་རྣམ་འཇོག་ཆོས་གསུམ་ཚང་བ་ཁྱོད་ཀྱི་མཚན་ཉིད་ཀྱི་མཚན་ཉིད་ཡིན་པར་ཐལ། ཁྱོད་མཚོན་བྱ་ཡིན་པའི་ཕྱིར། ཁ་ཅིག་ན་རེ། དོན་བྱེད་ནུས་པའི་བཏགས་ཡོད་ཆོས་གསུམ་ཚང་བ་དོན་བྱེད་ནུས་པའི་མཚོན་བྱའི་མཚན་ཉིད་ཡིན་ལ། དོན་བྱེད་ནུས་པའི་རྣམ་བཞག་ཆོས་གསུམ་ཚང་བ་འདྲེན་པའི་ཚེ་ན་སྤྱིར་མཚོན་བྱ་ཡིན་པ། རང་གི་མཚན་གཞིའི་སྟེང་དུ་གྲུབ་པ། དོན་བྱེད་ནུས་པ་མ་ཡིན་པར་གྱུར་བའི་གཞན་གྱི་མཚོན་བྱ་མ་ཡིན་དང་གསུམ་པོ་དེ་འདྲེན་པ་ཡིན་ཟེར་ན། གཟུགས་ཆོས་ཅན། དོན་བྱེད་ནུས་པའི་མཚོན་བྱ་ཡིན་པར་ཐལ། དོན་བྱེད་ནུས་པའི་རྣམ་བཞག་གི་ཆོས་གསུམ་ཚང་བ་ཡིན་པའི་ཕྱིར། མ་གྲུབ་ན། གཟུགས་ཆོས་ཅན། དོན་བྱེད་ནུས་པའི་རྣམ་བཞག་གི་ཆོས་གསུམ་ཚང་བ་ཡིན་པར་ཐལ། སྤྱིར་མཚོན་བྱ་ཡིན་པ། རང་གི་མཚན་གཞིའི་སྟེང་དུ་གྲུབ་པ། དོན་བྱེད་ནུས་པ་མ་ཡིན་པར་གྱུར་བའི་གཞན་གྱི་མཚོན་བྱ་མ་ཡིན་པ་དང་གསུམ་པོ་དེ་ཡིན་པ་གང་ཞིག ཁྱོད་ཀྱིས་དེའི་རྣམ་བཞག་ཆོས་གསུམ་འདྲེན་པའི་ཚེ་ན་དེ་ལྟར་དྲངས་པའི་ཕྱིར། རྟགས་ཕྱི་མ་ཁས། རྟགས་དང་པོ་མ་གྲུབ་ན། གཟུགས་ཆོས་ཅན། སྤྱིར་མཚོན་བྱ་ཡིན་པ། རང་གི་མཚན་གཞིའི་སྟེང་དུ་གྲུབ་པ། དོན་བྱེད་ནུས་པ་མ་ཡིན་པར་གྱུར་བའི་གཞན་གྱི་མཚོན་བྱ་མ་ཡིན་དང་གསུམ་པོ་དེ་ཡིན་པར་ཐལ། སྤྱིར་མཚོན་བྱ་ཡིན་པ་གང་ཞིག རང་གི་མཚན་གཞིའི་སྟེང་དུ་གྲུབ་པ། དོན་བྱེད་ནུས་པ་མ་ཡིན་པར་གྱུར་བའི་གཞན་གྱི་མཚོན་བྱ་མ་ཡིན་པའི་ཕྱིར། རྟགས་དང་པོ་མ་གྲུབ་ན། གཟུགས་ཆོས་ཅན། མཚོན་བྱ་ཡིན་པར་ཐལ། ཁྱོད་ཀྱི་མཚན་ཉིད་ཡོད་པའི་ཕྱིར། དེར་ཐལ། གཟུགས་རུང་དེ་ཡིན་པའི་ཕྱིར། རྟགས་གཉིས་པ་མ་གྲུབ་ན། གཟུགས་ཆོས་ཅན། རང་གི་མཚན་གཞིའི་སྟེང་དུ་གྲུབ་པ་ཡིན་པར་ཐལ། རང་གི་མཚན་གཞི་ཡོད་པའི་ཕྱིར། མ་གྲུབ་ན། གཟུགས་ཆོས་ཅན། ཁྱོད་ཀྱི་མཚན་གཞི་ཡོད་པར་ཐལ། ཁ་དོག་དེ་ཡིན་པའི་ཕྱིར། རྟགས་གསུམ་པ་མ་གྲུབ་ན། གཟུགས་ཆོས་ཅན། དོན་བྱེད་ནུས་པ་མ་ཡིན་པར་གྱུར་བའི་གཞན་གྱི་མཚོན་བྱ་མ་ཡིན་པར་ཐལ། དོན་བྱེད་ནུས་པ་མ་ཡིན་པར་གྱུར་བའི་ཁྱོད་ཀྱི་མཚན་ཉིད་འཇོག་རྒྱུ་མེད་པའི་ཕྱིར། རྩ་བར་འདོད་ན། དོན་བྱེད་ནུས་པ་ཆོས་ཅན། ཁྱོད་ཀྱི་མཚོན་བྱ་དོན་མི་གཅིག་པ་དུ་མ་གྲུབ་པར་ཐལ། དངོས་པོ་དེ་ཁྱོད་ཀྱི་མཚོན་བྱ་ཡིན་པ་གང་ཞིག གཟུགས་དེ་ཁྱོད་ཀྱི་མཚོན་བྱ་ཡིན་པའི་ཕྱིར། རྟགས་ཕྱི་མ་ཁས། རྟགས་དང་པོ་མ་གྲུབ་ན། དོན་བྱེད་ནུས་པ་ཆོས་ཅན། དངོས་པོ་ཁྱོད་ཀྱི་མཚོན་བྱ་ཡིན་པར་ཐལ། ཁྱོད་དངོས་པོའི་མཚན་ཉིད་ཡིན་པའི་ཕྱིར། གོང་དུ་འདོད་ན། དོན་བྱེད་ནུས་པ་ཆོས་ཅན། ཁྱོད་གྱི་མཚོན་བྱ་དོན་མི་གཅིག་པ་དུ་མ་མ་གྲུབ་བར་ཐལ། ཁྱོད་མཚན་ཉིད་ཡིན་པའི་ཕྱིར། ཁ་ཅིག་ན་རེ། དོན་བྱེད་ནུས་པའི་རྣམ་བཞག་ཆོས་གསུམ་གང་རུང་ཡིན་ན་བློས་ཡུལ་དུ་བྱ་རུང་གི་རྣམ་བཞག་ཆོས་གསུམ་གང་རུང་མ་ཡིན་པས་ཁྱབ་ཟེར་ན། སྤྱིར་མཚོན་བྱ་ཡིན་པ་ཆོས་ཅན། བློས་ཡུལ་དུ་བྱ་རུང་གིརྣམ་བཞག་ཆོས་གསུམ་གང་རུང་མ་ཡིན་པར་ཐལ། དོན་བྱེད་ནུས་པའི་རྣམ་བཞག་ཆོས་གསུམ་གང་རུང་ཡིན་པའི་ཕྱིར། ཁྱབ་པ་ཁས། མ་གྲུབ་ན། སྤྱིར་མཚོན་བྱ་ཡིན་པ་ཆོས་ཅན། དོན་བྱེད་ནུས་པའི་རྣམ་བཞག་ཆོས་གསུམ་གང་རུང་ཡིན་པར་ཐལ། དོན་བྱེད་ནུས་པའི་རྣམ་བཞག་ཆོས་གསུམ་པོ་འདྲེན་པའི་ཚེ་ན་ཁྱོད་གཅིག་ལ་འདྲེན་དགོས་པའི་ཕྱིར། ཁ་ཅིག་ན་རེ། རི་བོང་རྭའི་རྣམ་འཇོག་ཆོས་གསུམ་མ་ཚང་བའི་ལྡོག་པ་དང་ཡིན་ཁྱབ་མཉམ་ཡང་ཡིན། མཚན་ཉིད་ཡིན་པའི་གཞི་མཐུན་པ་མེད་ཟེར་ན། དེ་ཡོད་པར་ཐལ། རི་བོང་རྭའི་མཚན་ཉིད་མ་ཡིན་པའི་རྣམ་འཇོག་ཆོས་གསུམ་ཚང་བ་དེ་ཡིན་པའི་ཕྱིར། མ་གྲུབ་ན། རི་བོང་རྭའི་མཚན་ཉིད་མ་ཡིན་པའི་རྣམ་འཇོག་ཆོས་གསུམ་ཚང་བ་ཆོས་ཅན། ཁྱོད་རི་བོང་རྭའི་རྣམ་འཇོག་ཆོས་གསུམ་མ་ཚང་བའི་ལྡོག་པ་དང་ཡིན་ཁྱབ་མཉམ་ཡང་ཡིན། མཚན་ཉིད་ཡིན་པའི་གཞི་མཐུན་པ་ཡིན་པར་ཐལ། ཁྱོད་རི་བོང་རྭའི་རྫས་ཡོད་ཆོས་གསུམ་མ་ཚང་བའི་ལྡོག་པ་དང་ཡིན་ཁྱབ་མཉམ་ཡིན་པ་གང་ཞིག མཚན་ཉིད་ཡིན་པའི་ཕྱིར། རྟགས་དང་པོ་མ་གྲུབ་ན། རི་བོང་རྭའི་མཚན་ཉིད་མ་ཡིན་པའི་རྣམ་འཇོག་ཆོས་གསུམ་ཚང་བ་ཆོས་ཅན། ཁྱོད་རི་བོང་རྭའི་རྣམ་འཇོག་ཆོས་གསུམ་མ་ཚང་བའི་ལྡོག་པ་དང་ཡིན་ཁྱབ་མཉམ་ཡིན་པར་ཐལ། ཁྱོད་ཡིན་ན་རི་བོང་རྭའི་རྣམ་འཇོག་ཆོས་གསུམ་མ་ཚང་བའི་ལྡོག་པ་ཡིན་པས་ཁྱབ། རི་བོང་རྭའི་རྣམ་འཇོག་ཆོས་གསུམ་མ་ཚང་བའི་ལྡོག་པ་ཡིན་ན་ཁྱོད་ཡིན་པས་ཁྱབ་པའི་ཕྱིར། རྟགས་དང་པོ་མ་གྲུབ་ན། རི་བོང་རྭའི་མཚན་ཉིད་མ་ཡིན་པ་ཆོས་ཅན། ཁྱོད་ཀྱི་རྣམ་འཇོག་ཆོས་གསུམ་ཚང་བ་ཡིན་ན། རི་བོང་རྭའི་རྣམ་འཇོག་ཆོས་གསུམ་མ་ཚང་བའི་ལྡོག་པ་ཡིན་པས་ཁྱབ་པར་ཐལ། ཁྱོད་ཀྱི་མཚན་ཉིད་ཡིན་ན། རི་བོང་རྭའི་རྣམ་འཇོག་ཆོས་གསུམ་མ་ཚང་བའི་ལྡོག་པ་ཡིན་པས་ཁྱབ་པའི་ཕྱིར། མ་གྲུབ་ན། རི་བོང་རྭའི་མཚན་ཉིད་མ་ཡིན་པ་ཆོས་ཅན། ཁྱོད་ཀྱི་མཚན་ཉིད་ཡིན་ན། རི་བོང་རྭའི་རྣམ་འཇོག་ཆོས་གསུམ་མ་ཚང་བའི་ལྡོག་པ་ཡིན་པས་ཁྱབ་པར་ཐལ། ཁྱོད་རི་བོང་རྭའི་རྣམ་འཇོག་ཆོས་གསུམ་མ་ཚང་བའི་མཚོན་བྱ་ཡིན་པའི་ཕྱིར། མ་གྲུབ་ན། རི་བོང་རྭ་ཆོས་ཅན། ཁྱོད་ཀྱི་མཚན་ཉིད་མ་ཡིན་པ། ཁྱོད་ཀྱི་རྣམ་འཇོག་ཆོས་གསུམ་མ་ཚང་བའི་མཚོན་བྱ་ཡིན་པར་ཐལ། ཁྱོད་ཡོད་མེད་གང་རུང་ཡིན་པའི་ཕྱིར། རྟགས་གཉིས་པ་མ་གྲུབ་ན། རི་བོང་རྭའི་རྣམ་འཇོག་ཆོས་གསུམ་མ་ཚང་བ་ཆོས་ཅན། ཁྱོད་ཀྱི་ལྡོག་པ་ཡིན་ན་རི་བོང་རྭའི་མཚན་ཉིད་མ་ཡིན་པའི་རྣམ་འཇོག་ཆོས་གསུམ་ཚང་བ་ཡིན་པས་ཁྱབ་པར་ཐལ། ཁྱོད་རི་བོང་རྭའི་མཚན་ཉིད་མ་ཡིན་པའི་རྣམ་འཇོག་ཆོས་གསུམ་ཚང་བ་ཡིན་པའི་ཕྱིར། མ་གྲུབ་ན། རི་བོང་རྭའི་རྣམ་འཇོག་ཆོས་གསུམ་མ་ཚང་བ་ཆོས་ཅན། ཁྱོད་རི་བོང་རྭའི་མཚན་ཉིད་མ་ཡིན་པའི་རྣམ་འཇོག་ཆོས་གསུམ་ཚང་བ་ཡིན་པར་ཐལ། ཁྱོད་རི་བོང་རྭའི་མཚན་ཉིད་མ་ཡིན་པའི་མཚན་ཉིད་ཡིན་པའི་ཕྱིར། མ་གྲུབ་ན། རི་བོང་རྭ་ཆོས་ཅན། ཁྱོད་ཀྱི་རྣམ་འཇོག་ཆོས་གསུམ་མ་ཚང་བ་ཁྱོད་ཀྱི་མཚན་ཉིད་མ་ཡིན་པའི་མཚན་ཉིད་ཡིན་པར་ཐལ། ཁྱོད་གང་ཟག་གི་བདག་ཏུ་མ་གྲུབ་པའི་ཕྱིར། གོང་གི་རྟགས་གཉིས་པ་མ་གྲུབ་ན། རི་བོང་རྭའི་མཚན་ཉིད་མ་ཡིན་པའི་རྣམ་འཇོག་ཆོས་གསུམ་ཚང་བ་ཆོས་ཅན། མཚན་ཉིད་ཡིན་པར་ཐལ། རི་བོང་རྭའི་མཚན་ཉིད་མ་ཡིན་པའི་མཚན་ཉིད་ཀྱི་མཚན་ཉིད་ཡིན་པའི་ཕྱིར། མ་གྲུབ་ན། རི་བོང་རྭའི་མཚན་ཉིད་མ་ཡིན་པ་ཆོས་ཅན། ཁྱོད་ཀྱི་རྣམ་འཇོག་ཆོས་གསུམ་ཚང་བ་ཁྱོད་ཀྱི་མཚན་ཉིད་ཀྱི་མཚན་ཉིད་ཡིན་པར་ཐལ། ཁྱོད་མཚོན་བྱ་ཡིན་པའི་ཕྱིར་རོ། ། གཉིས་པ་རང་ལུགས་བཤད་པ།གཉིས་པ་རང་ལུགས་བཤད་པ་ལ། མཚོན་བྱའི་མཚན་ཉིད་ཡོད་དེ། རྣམ་བཞག་ཆོས་གསུམ་ཚང་བ་དེ་ཡིན་པའི་ཕྱིར། རྣམ་བཞག་ཆོས་གསུམ་ཚང་བ་དང༌། བཏགས་ཡོད་ཆོས་གསུམ་ཚང་བ་དང༌། རྣམ་པར་བཞག་བྱའི་འབྲས་བུ་དང༌། མཚོན་བྱ་རྣམས་དོན་གཅིག མཚན་གཞི་ནི་ཡོད་དེ། མི་རྟག་པ་ལྟ་བུའོ། །དོན་བྱེད་ནུས་པའི་རྣམ་བཞག་ཆོས་གསུམ་ཚང་བ་དེ། དོན་བྱེད་ནུས་པའི་མཚོན་བྱའི་མཚན་ཉིད། མཚན་གཞི་ནི་ཡོད་དེ། དངོས་པོ་དེ་ཡིན་པའི་ཕྱིར། དོན་བྱེད་ནུས་པའི་རྣམ་བཞག་ཆོས་གསུམ་འདྲེན་པའི་ཚེ། སྤྱིར་མཚོན་བྱ་ཡིན་པ། རང་གི་མཚན་གཞིའི་སྟེང་དུ་གྲུབ་པ། དོན་བྱེད་ནུས་པ་ལས་གཞན་པ་ཞིག་གི་མཚོན་བྱ་མ་ཡིན་པ་དང་གསུམ་པོ་དེ་འདྲེན་དགོས་པའི་ཕྱིར། ཆོས་གཞན་གྱི་རྣམ་བཞག་ཆོས་གསུམ་འདྲེན་ཚུལ་རིགས་འདྲ། དོན་བྱེད་ནུས་པའི་རྣམ་བཞག་ཆོས་གསུམ་གང་རུང་དང༌། བློ་ཡུལ་དུ་བྱ་རུང་གི་རྣམ་བཞག་ཆོས་གསུམ་གང་རུང་གཉིས་ལ་ཡིན་མིན་གྱི་མུ་བཞི་ཡོད་པ་ཤེས་པར་བྱའོ། །མཚན་ཉིད་ཡིན་ན། ཁྱོད་ཀྱི་རྣམ་བཞག་ཆོས་གསུམ་ཚང་བ་དེ། ཁྱོད་ཀྱི་མཚོན་བྱའི་མཚན་ཉིད་ཡིན་པས་ཁྱབ། ཁྱོད་ཀྱི་རྣམ་བཞག་ཆོས་གསུམ་ཚང་བའི་རྣམ་བཞག་ཆོས་གསུམ་ཚང་བ་དེ། ཁྱོད་ཀྱི་རྣམ་བཞག་ཆོས་གསུམ་ཚང་བའི་མཚོན་བྱའི་མཚན་ཉིད་ཡིན་པས་ཁྱབ། ཁྱོད་ཀྱི་རྣམ་བཞག་ཆོས་གསུམ་ཚང་བའི་རྣམ་བཞག་ཆོས་གསུམ་ཚང་བའི་རྣམ་བཞག་ཆོས་གསུམ་ཚང་བ་དེ། ཁྱོད་ཀྱི་རྣམ་བཞག་ཆོས་གསུམ་ཚང་བའི་རྣམ་བཞག་ཆོས་གསུམ་ཚང་བའི་མཚོན་བྱའི་མཚན་ཉིད་ཡིན་པས་ཁྱབ་པ་སོགས་ལྷག་མ་རྣམས་ལ་རིགས་འགྲེ་སྦྱོར་ཚུལ་ཤེས་པར་བྱའོ། །རྣམ་བཞག་ཆོས་གསུམ་མ་ཚང་བ་དེ། མཚོན་བྱ་མ་ཡིན་པའི་མཚན་ཉིད། མཚན་གཞི་ནི་ཡོད་དེ། སྔོ་སེར་ལྟ་བུའོ། །བདག་ཏུ་མ་གྲུབ་པ་ཡིན་ན་ཁྱོད་ཀྱི་རྣམ་བཞག་ཆོས་གསུམ་མ་ཚང་བ་དེ། ཁྱོད་ཀྱི་མཚོན་བྱ་མ་ཡིན་པའི་མཚན་ཉིད་ཡིན་པས་ཁྱབ། རྣམ་འཇོག་ཆོས་གསུམ་ཚང་བ། མཚན་ཉིད་ཀྱི་མཚན་ཉིད། རྣམ་པར་འཇོག་བྱེད་ཆོས་གསུམ་ཚང་བ་དང༌། རྫས་ཡོད་ཆོས་གསུམ་ཚང་བ་དང༌། རྣམ་པར་འཇོག་བྱེད་ཀྱི་རྒྱུ་དང༌། མཚན་ཉིད་རྣམས་དོན་གཅིག། མཚན་གཞི་ནི་ཡོད་དེ། བློའི་ཡུལ་དུ་བྱ་རུང་དེ་ཡིན་པའི་ཕྱིར། འདི་དག་གི་སྐབས་སུ་མཚན་ཉིད་ཅེས་པ་ནི་མ་ཁྱབ་ཁྱབ་ཆེས་དོན་ལྡོག་ཏུ་མི་སྲིད་པའི་སྐྱོན་གསུམ་དང་བྲལ་བའི་མཚན་ཉིད་ཀྱི་དབང་དུ་བྱས་པའོ། །རྣམ་འཇོག་ཆོས་གསུམ་འདྲེན་ཚུལ་ཡོད་དེ། སྤྱིར་མཚན་ཉིད་ཡིན་པ། རང་གི་མཚན་གཞིའི་སྟེང་དུ་གྲུབ་པ། རང་གི་མཚོན་བྱ་གང་ཡིན་པ་དེ་ལས་གཞན་པ་ཞིག་གི་མཚན་ཉིད་མ་ཡིན་པ་དང་གསུམ་པོ་དེ་ཡིན་པའི་ཕྱིར། དངོས་པོའི་མཚན་ཉིད་ཀྱི་མཚན་ཉིད་ཡོད་དེ། དངོས་པོའི་རྣམ་འཇོག་ཆོས་གསུམ་ཚང་བ་དེ་ཡིན་པའི་ཕྱིར། དངོས་པོའི་མཚན་ཉིད་ཀྱི་མཚན་ཉིད་ཀྱི་མཚན་ཉིད་ཡོད་དེ། དངོས་པོའི་མཚན་ཉིད་ཀྱི་རྣམ་འཇོག་ཆོས་གསུམ་ཚང་བ་དེ་ཡིན་པའི་ཕྱིར། དེའི་མཚན་གཞི་ཡོད་དེ། དངོས་པོའི་རྣམ་བཞག་ཆོས་གསུམ་ཚང་བ་དེ་ཡིན་པའི་ཕྱིར། མཚན་ཉིད་མ་ཡིན་པའི་མཚན་ཉིད་ཡོད་དེ། རྣམ་འཇོག་ཆོས་གསུམ་མ་ཚང་བ་དེ་ཡིན་པའི་ཕྱིར། བདག་མེད་ཡིན་ན་ཁྱོད་ཀྱི་རྣམ་འཇོག་ཆོས་གསུམ་མ་ཚང་བ་དེ། ཁྱོད་ཀྱི་མཚན་ཉིད་མ་ཡིན་པའི་མཚན་ཉིད་ཡིན་པས་ཁྱབ་པའི་ཕྱིར་རོ། །མཚན་མཚོན་བརྩེགས་ཚུལ་ཞིབ་པར་བསྡུས་གྲྭའི་སྤྱི་དོན་རིན་ཆེན་སྒྲོན་མེ་ལས་ཤེས་པར་བྱའོ། ། གསུམ་པ་དེ་ལ་རྩོད་པ་སྤོང་བ།གསུམ་པ་དེ་ལ་རྩོད་པ་སྤོང་བ་ལ། དངོས་པོ་ཆོས་ཅན། རང་གི་མཚན་གཞིའི་སྟེང་དུ་གྲུབ་པར་ཐལ། མཚོན་བྱ་ཡིན་པའི་ཕྱིར། འདོད་ན། དངོས་པོ་ཆོས་ཅན། རང་གི་མཚན་གཞི་ཁྱོད་ཡིན་པར་ཐལ། ཁྱོད་རང་གི་མཚན་གཞིའི་སྟེང་དུ་གྲུབ་པའི་ཕྱིར་ན་མ་ཁྱབ། མ་གྲུབ་ན། དངོས་པོ་ཆོས་ཅན། ཁྱོད་རང་གི་མཚན་གཞིའི་སྟེང་དུ་གྲུབ་པར་ཐལ། ཁྱོད་རང་གི་མཚན་གཞིའི་སྟེང་དུ་ཡོད་པའི་ཕྱིར། ཁ་ཅིག་ན་རེ། ཤེས་བྱ་ཆོས་ཅན། ཁྱོད་ཀྱི་མཚན་ཉིད་མཚན་ཉིད་ཡིན་པར་ཐལ། ཁྱོད་ཀྱི་མཚན་ཉིད་ཡིན་ན་མཚན་ཉིད་ཡིན་དགོས་པའི་ཕྱིར་ན་མ་ཁྱབ། མ་གྲུབ་ན། ཤེས་བྱ་ཆོས་ཅན། ཁྱོད་ཀྱི་མཚན་ཉིད་ཡིན་ན་མཚན་ཉིད་ཡིན་དགོས་པར་ཐལ། ཁྱོད་མཚོན་བྱ་ཡིན་པའི་ཕྱིར། རྩ་བར་འདོད་ན། ཤེས་བྱའི་མཚན་ཉིད་ཆོས་ཅན། མཚན་ཉིད་མ་ཡིན་པར་ཐལ། མཚོན་བྱ་ཡིན་པའི་ཕྱིར། མ་གྲུབ་ན། ཤེས་བྱའི་མཚན་ཉིད་ཆོས་ཅན། དེར་ཐལ། ཁྱོད་ཀྱི་མཚན་ཉིད་ཡོད་པའི་ཕྱིར། མ་གྲུབ་ན། དེར་ཐལ། ཤེས་བྱའི་རྣམ་འཇོག་ཆོས་གསུམ་ཚང་བ་དེ་ཡིན་པའི་ཕྱིར། ཁ་ཅིག་ན་རེ། དོན་བྱེད་ནུས་པའི་མཚོན་བྱ་དོན་བྱེད་ནུས་པའི་མཚོན་བྱ་ཡིན་པར་ཐལ། དོན་བྱེད་ནུས་པའི་མཚོན་བྱ་མཚོན་བྱ་ཡིན་པའི་ཕྱིར་ན་མ་ཁྱབ། ཁ་ཅིག་མཚན་ཉིད་མཚན་ཉིད་ཡིན་པར་ཐལ། མཚོན་བྱ་མཚོན་བྱ་ཡིན་པའི་ཕྱིར་ན་མ་ཁྱབ་པ་སྔར་བཤད་པ་དག་གིས་ཤེས་ནུས་སོ།། །། བཅུ་གཅིག་པ་ཆ་བའི་ལུགས་ཀྱི་རྫས་ལྡོག་གི་རྣམ་བཞག་བཤད་པ།བཅུ་གཅིག་པ་ཆ་བའི་ལུགས་ཀྱི་རྫས་ལྡོག་གི་རྣམ་བཞག་བཤད་པ་ལ། དགག་བཞག་གཉིས་ལས། དང་པོ་ལ། ཁ་ཅིག་ན་རེ། ཡོད་པ་གང་ཞིག ཁྱོད་ཁྱོད་རང་ཡིན་ན་ཁྱོད་རྫས་ཆོས་ཡིན་པས་ཁྱབ་ཟེར་ན། དངོས་མེད་ཆོས་ཅན། རྫས་ཆོས་ཡིན་པར་ཐལ། ཡོད་པ་གང་ཞིག ཁྱོད་ཁྱོད་རང་ཡིན་པའི་ཕྱིར། རྟགས་སླ། རྩ་བར་འདོད་ན། དངོས་མེད་ཆོས་ཅན། ཁྱོད་གཞི་གྲུབ། ཁྱོད་ཁྱོད་རང་ཡིན། ཁྱོད་མ་ཡིན་པ་ཁྱོད་མ་ཡིན། ཁྱོད་ཀྱི་ལྡོག་པ་རྫས་ཆོས་དང་མི་འགལ་བར་ཐལ། ཁྱོད་རྫས་ཆོས་ཡིན་པའི་ཕྱིར། འདོད་ན། དངོས་མེད་ཆོས་ཅན། ཁྱོད་མ་ཡིན་པ་ཁྱོད་མ་ཡིན་པར་ཐལ། ཁྱོད་རྫས་ཆོས་ཡིན་པའི་ཕྱིར། འདོད་ན། དངོས་མེད་མ་ཡིན་པ་དངོས་མེད་ཡིན་པར་ཐལ། དངོས་མེད་མ་ཡིན་པ་ཡོད་པའི་ཕྱིར། མ་ཁྱབ་ན། དངོས་མེད་ཆོས་ཅན། ཁྱོད་མ་ཡིན་པ་དངོས་མེད་ཡིན་པར་ཐལ། ཁྱོད་མ་ཡིན་པ་ཡོད་པའི་ཕྱིར། ཁ་ཅིག་ན་རེ། ལྡོག་ཆོས་ཡིན་ན་ལྡོག་ཆོས་དང་པོ་གསུམ་པོ་གང་རུང་ཡིན་པས་ཁྱབ་ཟེར་ན། རྫས་ཆོས་དང་འགལ་བ་ཆོས་ཅན། ལྡོག་ཆོས་དང་པོ་གསུམ་པོ་གང་རུང་ཡིན་པར་ཐལ། ལྡོག་ཆོས་ཡིན་པའི་ཕྱིར། ཁྱབ་པ་ཁས། མ་གྲུབ་ན། རྫས་ཆོས་དང་འགལ་བ་ཆོས་ཅན། ལྡོག་ཆོས་ཡིན་པར་ཐལ། རྫས་ཆོས་ཀྱི་རྫས་མཐུན་ཡིན་པའི་ཕྱིར། མ་གྲུབ་ན། རྫས་ཆོས་དང་འགལ་བ་ཆོས་ཅན། རྫས་ཆོས་ཀྱི་རྫས་མཐུན་ཡིན་པར་ཐལ། ཁྱོད་གཞི་གྲུབ། ཁྱོད་ཁྱོད་རང་ཡིན། ཁྱོད་མ་ཡིན་པ་ཁྱོད་མ་ཡིན། ཁྱོད་ཀྱི་ལྡོག་པ་རྫས་ཆོས་ཀྱི་རྫས་མཐུན་དང་མི་འགལ་བ་ཡིན་པའི་ཕྱིར། རྟགས་དང་པོ་སླ། རྟགས་གཉིས་པ་མ་གྲུབ་ན། རྫས་ཆོས་དང་འགལ་བ་ཆོས་ཅན། རྫས་ཆོས་དང་འགལ་བ་ཡིན་པར་ཐལ། ཁྱོད་རྫས་ཆོས་དང་ཐ་དད། ཁྱོད་ཀྱང་ཡིན་རྫས་ཆོས་དང་འགལ་བ་ཡིན་པའི་གཞི་མཐུན་པ་མེད་པའི་ཕྱིར། རྟགས་དང་པོ་སླ། གཉིས་པ་མ་གྲུབ་ན། རྫས་ཆོས་ཀྱང་ཡིན། རྫས་ཆོས་དང་འགལ་བ་ཡིན་པའི་གཞི་མཐུན་པ་མེད་པར་ཐལ། རྫས་ཆོས་ཡིན་ན་རྫས་ཆོས་དང་མི་འགལ་བ་ཡིན་པས་ཁྱབ་པའི་ཕྱིར། དེར་ཐལ། རྫས་ཆོས་ཡིན་ན། ཁྱོད་ཁྱོད་རང་ཡིན་ཁྱོད་ཀྱི་ལྡོག་པ་རྫས་ཆོས་དང་མི་འགལ་བ་ཡིན་དགོས་པའི་ཕྱིར། གོང་གི་རྟགས་གསུམ་པ་མ་གྲུབ་ན། རྫས་ཆོས་དང་འགལ་བ་མ་ཡིན་པ་ཆོས་ཅན། རྫས་ཆོས་དང་འགལ་བ་མ་ཡིན་པར་ཐལ། རྫས་ཆོས་དང་མི་འགལ་བ་ཡིན་པའི་ཕྱིར། མ་གྲུབ་ན། རྫས་ཆོས་དང་འགལ་བ་མ་ཡིན་པ་ཆོས་ཅན། རྫས་ཆོས་དང་མི་འགལ་བ་ཡིན་པར་ཐལ། ཁྱོད་ཀྱང་ཡིན་རྫས་ཆོས་ཡིན་པའི་གཞི་མཐུན་པ་ཡོད་པའི་ཕྱིར། མ་གྲུབ་ན། རྫས་ཆོས་དང་འགལ་བ་མ་ཡིན་པ་ཆོས་ཅན། ཁྱོད་ཀྱང་ཡིན་རྫས་ཆོས་ཡིན་པའི་གཞི་མཐུན་པ་ཡོད་པར་ཐལ། དངོས་པོ་དེ་ཡིན་པའི་ཕྱིར། རྩ་བར་འདོད་ན། རྫས་ཆོས་དང་འགལ་བ་ཆོས་ཅན། ལྡོག་ཆོས་དང་པོ་གསུམ་པོ་གང་རུང་མ་ཡིན་པར་ཐལ། རང་ཉིད་ལྡོག་ཆོས་མ་ཡིན་པ་གང་ཞིག རང་མ་ཡིན་པའི་ལྡོག་ཆོས་མ་ཡིན། ལྡོག་ཆོས་ཕུང་སུམ་ཙམ་པོ་བ་ཡང་མ་ཡིན་པའི་ཕྱིར། རྟགས་རེ་རེ་ནས་གྲུབ་སྟེ། འཆད་འགྱུར་གྱི་དེ་གསུམ་གྱི་དོན་དེ་དག་མ་ཚང་བའོ། །ཁ་ཅིག་ན་རེ། ལྡོག་ཆོས་སུ་གྱུར་པའི་དངོས་པོ་དེ། རྫས་ཆོས་ཡིན་ཟེར་ན། དེ་ཆོས་ཅན། ཁྱོད་ཁྱོད་རང་ཡིན་པར་ཐལ། ཁྱོད་རྫས་ཆོས་ཡིན་པའི་ཕྱིར། རྟགས་དངོས། འདོད་ན། ལྡོག་ཆོས་སུ་གྱུར་པའི་དངོས་པོ་ཆོས་ཅན། ལྡོག་ཆོས་སུ་གྱུར་པའི་དངོས་པོ་མ་ཡིན་པར་ཐལ། རྫས་ཆོས་སུ་གྱུར་བའི་དངོས་པོ་ཡིན་པའི་ཕྱིར། མ་གྲུབ་ན། དེ་ཆོས་ཅན། དེར་ཐལ། རྫས་ཆོས་གང་ཞིག དངོས་པོ་ཡིན་པའི་ཕྱིར། དང་པོ་ཁས། གཉིས་པ་སླ། ཁ་ཅིག་དེ་རང་ཡིན་ལྡོག་ཆོས་ཡིན་ཟེར་ན། ལྡོག་ཆོས་སུ་གྱུར་པའི་དངོས་པོ་ཆོས་ཅན། ཁྱོད་མ་ཡིན་པ་ཁྱོད་ཡིན་པར་ཐལ། ཁྱོད་རང་ཡིན་ལྡོག་ཆོས་ཡིན་པའི་ཕྱིར། རྟགས་ཁས། འདོད་ན། ལྡོག་ཆོས་སུ་གྱུར་པའི་དངོས་པོ་མ་ཡིན་པ་ཆོས་ཅན། ཁྱོད་ལྡོག་ཆོས་སུ་གྱུར་བའི་དངོས་པོ་མ་ཡིན་པར་ཐལ། ཁྱོད་དངོས་མེད་ཡིན་པའི་ཕྱིར། མ་གྲུབ་ན། ལྡོག་ཆོས་སུ་གྱུར་པའི་དངོས་པོ་ཆོས་ཅན། ཁྱོད་མ་ཡིན་པ་དངོས་མེད་ཡིན་པར་ཐལ། ཁྱོད་དངོས་པོ་ཡིན་པའི་ཕྱིར། ཁ་ཅིག་དེ་ལྡོག་ཆོས་ཕུང་སུམ་ཙམ་པོ་བ་ཡིན་ཟེར་ན། ལྡོག་ཆོས་སུ་གྱུར་པའི་དངོས་པོ་ཆོས་ཅན། ཁྱོད་མ་ཡིན་པ་ཁྱོད་ཡིན་པར་ཐལ། ཁྱོད་ལྡོག་ཆོས་ཕུང་སུམ་ཙམ་པོ་བ་ཡིན་པའི་ཕྱིར། རྟགས་ཁས། འདོད་ན། སྔར་བཀག་ཟིན། ཁ་ཅིག་དེ་རང་མ་ཡིན་པའི་ལྡོག་ཆོས་ཡིན་ཟེར་ན། ལྡོག་ཆོས་སུ་གྱུར་པའི་དངོས་པོ་ཆོས་ཅན། ཁྱོད་ཁྱོད་རང་མ་ཡིན་པར་ཐལ། ཁྱོད་རང་མ་ཡིན་པའི་ལྡོག་ཆོས་ཡིན་པའི་ཕྱིར། འདོད་ན། དེ་ཆོས་ཅན། ཁྱོད་ལྡོག་ཆོས་སུ་གྱུར་བའི་དངོས་པོ་མ་ཡིན་པ་དེ་མི་འཐད་པར་ཐལ། ཁྱོད་ལྡོག་ཆོས་སུ་གྱུར་བའི་དངོས་པོ་ཡིན་པའི་ཕྱིར་ཏེ། ལྡོག་ཆོས་གང་ཞིག དངོས་པོ་ཡིན་པའི་ཕྱིར། དང་པོ་མ་གྲུབ་ན། ལྡོག་ཆོས་སུ་གྱུར་པའི་དངོས་པོ་ཆོས་ཅན། ལྡོག་ཆོས་ཡིན་པར་ཐལ། རང་མ་ཡིན་པའི་ལྡོག་ཆོས་ཡིན་པའི་ཕྱིར། རྟགས་ཁས། གཞན་ཡང་ལྡོག་ཆོས་སུ་གྱུར་པའི་དངོས་པོ་ཆོས་ཅན། ལྡོག་ཆོས་དང་པོ་གསུམ་པོ་གང་རུང་མ་ཡིན་པར་ཐལ། རྫས་མཐུན་ནམ་རྗེས་མཐུན་བཞི་པོ་གང་རུང་ཡིན་པའི་ཕྱིར། མ་གྲུབ་ན། དེ་ཆོས་ཅན། དེར་ཐལ། རྫས་ཆོས་ཀྱི་རྫས་མཐུན་ཡིན་པའི་ཕྱིར། མ་གྲུབ་ན། དེ་ཆོས་ཅན། དེར་ཐལ། ཁྱོད་གཞི་གྲུབ། ཁྱོད་ཁྱོད་རང་ཡིན། ཁྱོད་མ་ཡིན་པ་ཁྱོད་མ་ཡིན། ཁྱོད་ཀྱི་ལྡོག་པ་རྫས་ཆོས་ཀྱི་རྫས་མཐུན་དང་མི་འགལ་བ་ཡིན་པའི་ཕྱིར། དང་པོ་སླ། གཉིས་པ་མ་གྲུབ་ན། ལྡོག་ཆོས་སུ་གྱུར་པའི་དངོས་པོ་ཆོས་ཅན། ལྡོག་ཆོས་སུ་གྱུར་པའི་དངོས་པོ་ཡིན་པར་ཐལ། ལྡོག་ཆོས་གང་ཞིག དངོས་པོ་ཡིན་པའི་ཕྱིར། རྟགས་རེ་རེ་ནས་སྔར་བཤད་པ་རྣམས་ཀྱིས་གྲུབ་པ་ཡིན་ནོ། ། གཉིས་པ་རང་ལུགས་བཞག་པ།གཉིས་པ་རང་ལུགས་བཞག་པ་ལ། རྫས་ཆོས་ཀྱི་དོན་ཡོད་དེ། ཁྱོད་གཞི་གྲུབ། ཁྱོད་ཁྱོད་རང་ཡིན། ཁྱོད་མ་ཡིན་པ་ཁྱོད་མ་ཡིན། ཁྱོད་ཀྱི་ལྡོག་པ་རྫས་ཆོས་དང་མི་འགལ་བ་ཡིན་པའི་གཞི་མཐུན་པ་དེ་ཡིན་པའི་ཕྱིར། །རྫས་ཆོས་བཞག་ཏུ་ཡོད་དེ། ཤེས་བྱ། དངོས་པོ། བུམ་པ། ཀ་བ་རྣམས་ཡིན་ནོ། །རང་ཡིན་ལྡོག་ཆོས་ཀྱི་དོན་ཡོད་དེ། ཁྱོད་གཞི་གྲུབ། ཁྱོད་ཁྱོད་རང་ཡིན། ཁྱོད་མ་ཡིན་པ་ཁྱོད་ཡིན། ཁྱོད་ཀྱི་ལྡོག་པ་རང་ཉིད་ལྡོག་ཆོས་ཀྱི་ལྡོག་པ་དང་མི་འགལ་བ་དེ་ཡིན་པའི་ཕྱིར། རང་ཡིན་ལྡོག་ཆོས་བཞག་ཏུ་ཡོད་དེ། དངོས་མེད། བདག་ཏུ་མ་གྲུབ་པ་སོགས་སོ། །རང་མ་ཡིན་གྱི་ལྡོག་ཆོས་ཀྱི་དོན་ཡོད་དེ། ཁྱོད་གཞི་གྲུབ། ཁྱོད་ཁྱོད་རང་མ་ཡིན། ཁྱོད་མ་ཡིན་པ་ཁྱོད་མ་ཡིན། ཁྱོད་ཀྱི་ལྡོག་པ་རང་མ་ཡིན་གྱི་ལྡོག་པ་དང་མི་འགལ་བ་དེ་ཡིན་པའི་ཕྱིར། རང་མ་ཡིན་གྱི་ལྡོག་ཆོས་བཞག་ཏུ་ཡོད་དེ། ཀ་བུམ་གཉིས། ཡིན་པ་མི་སྲིད་པའི་ཤེས་བྱ། བུམ་པའི་ལྡོག་པ་སོགས་ཡིན་ནོ། །ལྡོག་ཆོས་ཕུང་སུམ་ཙམ་པོ་བའི་དོན་ཡོད་དེ། ཁྱོད་གཞི་གྲུབ། ཁྱོད་ཁྱོད་རང་མ་ཡིན། ཁྱོད་མ་ཡིན་པ་ཁྱོད་ཡིན། ཁྱོད་ཀྱི་ལྡོག་པ་ལྡོག་ཆོས་ཕུང་སུམ་ཙམ་པོ་བ་དང་མི་འགལ་བ་དེ་ཡིན་པའི་ཕྱིར། ལྡོག་ཆོས་ཕུང་སུམ་ཙམ་པོ་བ་བཞག་ཏུ་ཡོད་དེ། དངོས་པོའི་སྤྱི། ཀ་བའི་སྤྱི་སོགས་སོ། །དེ་བཞིན་དུ་སོ་སོའི་རྗེས་མཐུན་རྣམས་ཀྱི་དོན་དང་གཞི་ལྡོག་ཤེས་པར་བྱའོ།། མཚན་ཉིད་དང་རྫས་ཆོས་ལ་མུ་བཞི། དེ་བཞིན་དུ་གཞན་བདུན་ལ་མུ་བཞི་ཡོད་མེད་དང། དེ་ལྟར་མཚོན་བྱ་དང་དངོས་པོ་སོགས་དང་རྫས་ལྡོག་བརྒྱད་པོ་རེ་རེ་ལ་མུ་བཞི་ཡོད་མེད་དཔྱད་པར་བྱའོ། ། གཞན་ཡང་གཏན་ཚིགས་རིགས་པའི་དོན་བསྡུས་ལས། རྫས་ཆོས་དང་ལྡོག་ཆོས་ལ་མཚན་ཉིད་རིམ་པ་བཞིན། གཞི་གྲུབ། ཁྱོད་ཁྱོད་རང་ཡིན། ཁྱོད་མིན་ཁྱོད་མ་ཡིན་པ་དང༌། གཞི་གྲུབ། ཁྱོད་ཁྱོད་མ་ཡིན་པའམ་ཁྱོད་མ་ཡིན་ཁྱོད་ཡིན་དུ་གྲུབ་པ་གང་རུང་ཡིན་པའོ། །དབྱེ་ན་དང་པོ་ལ་དངོས་ཀྱི་འགལ་ཟླ་སྲིད་པ་དང་མི་སྲིད་པའི་རྫས་ཆོས་གཉིས་སོ། །གཉིས་པ་ལ། རང་ཉིད་ཡིན་པ་དང་མིན་པའི་ལྡོག་ཆོས་གཉིས་སོ། །ཞེས་གསུངས་སོ། ། བཅུ་གཉིས་པ་རང་ལུགས་ཀྱི་རྫས་ལྡོག་གི་རྣམ་བཞག་བཤད།བཅུ་གཉིས་པ་རང་ལུགས་ཀྱི་རྫས་ལྡོག་གི་རྣམ་བཞག་བཤད་པ་ལ། དགག་བཞག་སྤོང་གསུམ་ལས། དང་པོ་ནི། ཁ་ཅིག་ན་རེ། རྫས་ཆོས་ཡིན་ན་ཁྱོད་ཁྱོད་རང་ཡིན་པས་ཁྱབ་ཟེར་ན། སྔོ་སེར་གཉིས་ཆོས་ཅན། ཁྱོད་ཁྱོད་རང་ཡིན་པར་ཐལ། རྫས་ཆོས་ཡིན་པའི་ཕྱིར། ཁྱབ་པ་ཁས། མ་གྲུབ་ན། སྔོ་སེར་གཉིས་ཆོས་ཅན། རྫས་ཆོས་ཡིན་པར་ཐལ། རྫས་ཡོད་ཡིན་པའི་ཕྱིར། མ་ཁྱབ་ན་ཁྱབ་པ་ཡོད་པར་ཐལ། རྫས་ཆོས་དང༌། གཞན་དབང༌། རྫས་ཡོད། རང་རྐྱ་འཛིན་ཐུབ་པའི་རྫས་ཡོད་རྣམས་དོན་གཅིག་ཡིན་པའི་ཕྱིར། མདོ་སྡེ་བའི་ལུགས་ལ་རྫས་ཡོད་དང་དངོས་པོ་དོན་གཅིག འདི་བས་རྫས་ཡོད་དང༌། རང་རྐྱ་འཛིན་ཐུབ་པའི་རྫས་ཡོད་གཉིས་མི་འདྲའོ། །ཁ་ཅིག་སྔོ་སེར་གཉིས་ཆོས་ཅན། རྫས་ཆོས་མ་ཡིན་པར་ཐལ། ལྡོག་ཆོས་ཡིན་པའི་ཕྱིར། མ་གྲུབ་ན། དེ་ཆོས་ཅན། ལྡོག་ཆོས་ཡིན་པར་ཐལ། ཁྱོད་ཁྱོད་རང་མ་ཡིན་པ་ཡིན་པའི་ཕྱིར་ན་མ་ཁྱབ། རྩ་བར་འདོད་ན། སྔོ་སེར་གཉིས་ཆོས་ཅན། ལྡོག་ཆོས་མ་ཡིན་པར་ཐལ། བཏགས་ཡོད་མ་ཡིན་པའི་ཕྱིར། མ་ཁྱབ་ན་ཁྱབ་པ་ཡོད་པར་ཐལ། ལྡོག་ཆོས་དང་བཏགས་ཡོད་དང་ཀུན་བརྟགས་ཀྱི་ཆོས་རྣམས་དོན་གཅིག་ཡིན་པའི་ཕྱིར། ཁ་ཅིག་ན་རེ། རྫས་ཡོད་བཞི་པོ་གང་རུང་ཡིན་ན་རྫས་ཡོད་ཡིན་པས་ཁྱབ་ཟེར་ན། ཀུན་བརྟགས་ཆོས་ཅན། རྫས་ཡོད་ཡིན་པར་ཐལ། རྫས་ཡོད་བཞི་བོ་གང་རུང་ཡིན་པའི་ཕྱིར། ཁྱབ་པ་ཁས། མ་གྲུབ་ན། ཀུན་བརྟགས་ཆོས་ཅན། རྫས་ཡོད་བཞི་བོ་གང་རུང་ཡིན་པར་ཐལ། རིགས་པས་གྲུབ་པའི་རྫས་ཡོད་ཡྀན་པའི་ཕྱིར། མ་གྲུབ་ན། ཀུན་བརྟགས་ཆོས་ཅན། རིགས་པས་གྲུབ་པའི་རྫས་ཡོད་ཡྀན་པར་ཐལ། རིགས་པས་གྲུབ་པའི་ཆོས་ཡིན་པའི་ཕྱིར། མ་གྲུབ་ན། དེ་ཆོས་ཅན། རིགས་པའི་གྲུབ་པའི་ཆོས་ཡིན་པར་ཐལ། ཚད་མས་གྲུབ་པའི་ཆོས་ཡིན་པའི་ཕྱིར། མ་གྲུབ་ན། དེ་ཆོས་ཅན། དེར་ཐལ། གཞི་གྲུབ་པའི་ཕྱིར། རྩ་བར་འདོད་ན། ཀུན་བརྟགས་ཆོས་ཅན། རྫས་ཡོད་མ་ཡིན་པར་ཐལ། བཏགས་ཡོད་ཡིན་པའི་ཕྱིར། མ་གྲུབ་ན། དེ་ཆོས་ཅན། བཏགས་ཡོད་ཡིན་པར་ཐལ། རྟོག་པས་བཏགས་ཙམ་གྱི་ཆོས་ཡིན་པའི་ཕྱིར། མ་གྲུབ་ན། དེ་ཆོས་ཅན། དེར་ཐལ། དངོས་མེད་ཀྱི་ཆོས་ཡིན་པའི་ཕྱིར། གཞན་ཡང་རྟག་པ་ཆོས་ཅན། རྫས་ཡོད་ཡིན་པར་ཐལ། རྫས་ཡོད་བཞི་བོ་གང་རུང་ཡིན་པའི་ཕྱིར། ཁྱབ་པ་ཁས། མ་གྲུབ་ན། རྟག་པ་ཆོས་ཅན། རྫས་ཡོད་བཞི་བོ་གང་རུང་ཡིན་པར་ཐལ། བརྟན་པའི་རྫས་ཡོད་ཡིན་པའི་ཕྱིར། མ་གྲུབ་ན། དེ་ཆོས་ཅན། དེར་ཐལ། བརྟན་པ་མི་འགྱུར་བའི་རྫས་ཡོད་ཡིན་པའི་ཕྱིར། མ་གྲུབ་ན། དེ་ཆོས་ཅན། དེར་ཐལ། རྟག་པ་ཡིན་པའི་ཕྱིར། མ་ཁྱབ་ན་ཁྱབ་པ་ཡོད་པར་ཐལ། བརྟན་པ་མི་འགྱུར་བའི་རྫས་ཡོད་དང་རྟག་པ་གཉིས་དོན་གཅིག་ཡིན་པའི་ཕྱིར། རྩ་བར་འདོད་ན། རྟག་པ་ཆོས་ཅན། རྫས་ཡོད་མ་ཡིན་པར་ཐལ། རྫས་དང་ཆོས་གཉིས་ཀ་མ་ཡིན་པའི་ཕྱིར། མ་གྲུབ་ན། རྟག་པ་ཆོས་ཅན། དེར་ཐལ། རྫས་མ་ཡིན་པའི་ཕྱིར། ཁ་ཅིག་ན་རེ། དོན་བྱེད་ནུས་པའི་རྫས་ཡོད་ཡིན་ན། རྫས་ཡོད་ཡིན་པས་ཁྱབ་ཟེར་ན། ལྡན་མིན་འདུ་བྱེད་རྣམས་ཆོས་ཅན། རྫས་ཡོད་ཡིན་པར་ཐལ། དོན་བྱེད་ནུས་པའི་རྫས་ཡོད་ཡིན་པའི་ཕྱིར། ཁྱབ་པ་ཁས། མ་གྲུབ་ན། དེ་ཆོས་ཅན། དེར་ཐལ། དོན་བྱེད་ནུས་པ་ཡིན་པའི་ཕྱིར། མ་གྲུབ་ན། དེ་ཆོས་ཅན། དེར་ཐལ། དངོས་པོ་ཡིན་པའི་ཕྱིར། མ་གྲུབ་ན། དེ་ཆོས་ཅན། དངོས་པོ་ཡིན་པར་ཐལ། དངོས་པོ་ལ་རྫས་ཡོད་དང་བཏགས་ཡོད་གཉིས་ཡོད་པ་ལས་བཏགས་ཡོད་ཡིན་པའི་ཕྱིར། རྩ་བར་འདོད་ན། ལྡན་མིན་འདུ་བྱེད་རྣམས་ཆོས་ཅན། རྫས་ཡོད་མ་ཡིན་པར་ཐལ། བཏགས་ཡོད་ཡིན་པའི་ཕྱིར། མ་གྲུབ་ན། དེ་ཆོས་ཅན། བཏགས་ཡོད་ཡིན་པར་ཐལ། སྔོན་མེད་ལེགས་བཤད་ལས། ལྡན་མིན་འདུ་བྱེད་ཞེས་གྲགས་ཏེ། འདུས་བྱས་ཀྱི་ཕུང་པོའི་ཕྱོགས་གཅིག་གམ་ཕྱེད་ཕྱི་མ་སྟེ། བཏགས་པའི་འདུ་བྱེད་དང༌། ཞེས་གསུངས་པའི་ཕྱིར། ཁ་ཅིག་ན་རེ། དངོས་པོ་ཡིན་ན་རང་རྐྱ་འཛིན་མི་ཐུབ་པའི་བཏགས་ཡོད་ཡིན་པས་ཁྱབ་ཟེར་ན། སྒྲ་ཆོས་ཅན། རང་རྐྱ་འཛིན་མི་ཐུབ་པའི་བཏགས་ཡོད་ཡིན་པར་ཐལ། དངོས་པོ་ཡིན་པའི་ཕྱིར། ཁྱབ་པ་ཁས། འདོད་ན། སྒྲ་ཆོས་ཅན། རང་རྐྱ་འཛིན་མི་ཐུབ་པའི་བཏགས་ཡོད་མ་ཡིན་པར་ཐལ། རང་རྐྱ་འཛིན་ཐུབ་པའི་རྫས་ཡོད་ཡིན་པའི་ཕྱིར། མ་གྲུབ་ན། དེ་ཆོས་ཅན། རང་རྐྱ་འཛིན་ཐུབ་པའི་རྫས་ཡོད་ཡིན་པར་ཐལ། རང་ཉིད་ཚད་མའི་ངེས་པ་ལ་ཐ་སྙད་དང་དོན་གཞན་ལ་ལྟོས་མི་དགོས་པའི་རང་མཚན་དུ་གྲུབ་པ་ཡིན་པའི་ཕྱིར། མ་གྲུབ་ན། དེ་ཆོས་ཅན། རང་ཉིད་ཚད་མའི་ངེས་པ་ལ་ཐ་སྙད་དང་དོན་གཞན་ལ་ལྟོས་མི་དགོས་པའི་རང་མཚན་དུ་གྲུབ་པ་ཡིན་པར་ཐལ། གཟུགས་ཀྱི་སྐྱེ་མཆེད་ནས་རེག་བྱའི་སྐྱེ་མཆེད་བར་གང་རུང་ཡིན་པའི་ཕྱིར། མ་ཁྱབ་ན་ཁྱབ་པ་ཡོད་པར་ཐལ། དེ་ལྔ་བོ་གང་རུང་དང་འདུས་བྱས་ཀྱི་ཤེས་པ་དང༌། དབང་པོ་གཟུགས་ཅན་གང་ཡིན་ན་རང་ཉིད་ཚད་མའི་ངེས་པ་ལ་ཐ་སྙད་དང་དོན་གཞན་ལ་ལྟོས་མི་དགོས་པའི་རང་མཚན་དུ་གྲུབ་པ་ཡིན་པས་ཁྱབ་པ་ཡིན་ནོ། །ཁ་ཅིག་ན་རེ། བཏགས་ཡོད་གསུམ་པོ་གང་རུང་ཡིན་ན་བཏགས་ཡོད་ཡིན་པས་ཁྱབ་ཟེར་ན། གང་ཟག་གི་བདག་ཆོས་ཅན། བཏགས་ཡོད་ཡིན་པར་ཐལ། བཏགས་ཡོད་གསུམ་པོ་གང་རུང་ཡིན་པའི་ཕྱིར། ཁྱབ་པ་ཁས། མ་གྲུབ་ན། གང་ཟག་གི་བདག་ཆོས་ཅན། བཏགས་ཡོད་གསུམ་པོ་གང་རུང་ཡིན་པར་ཐལ། ཀུན་བརྟགས་ཡིན་པའི་ཕྱིར། མ་ཁྱབ་ན་ཁྱབ་པ་ཡོད་པར་ཐལ། བཏགས་ཡོད་གསུམ་པོ་འདྲེན་པའི་ཚེ་ན། ཀུན་བརྟགས་དང༌། ལྡན་མིན་འདུ་བྱེད་དང༌། ཡོངས་གྲུབ་གསུམ་པོ་དེ་འདྲེན་པའི་ཕྱིར། མ་ཁྱབ་མཚམས་ཀྱི་རྟགས་མ་གྲུབ་ན། གང་ཟག་གི་བདག་ཆོས་ཅན། ཀུན་བརྟགས་ཡིན་པར་ཐལ། མཚན་ཉིད་ཡོངས་ཆད་ཀྱི་ཀུན་བརྟགས་ཡིན་པའི་ཕྱིར། མ་གྲུབ་ན། དེ་ཆོས་ཅན། མཚན་ཉིད་ཡོངས་ཆད་ཀྱི་ཀུན་བརྟགས་ཡིན་པར་ཐལ། མེད་རྒྱུའི་ཀུན་བརྟགས་ཡིན་པའི་ཕྱིར། མ་གྲུབ་ན། དེ་ཆོས་ཅན། དེར་ཐལ། མེད་པ་ཡིན་པའི་ཕྱིར། རྩ་བར་འདོད་ན། གང་ཟག་གི་བདག་ཆོས་ཅན། བཏགས་ཡོད་མ་ཡིན་པར་ཐལ། རྟོག་པས་བཏགས་ཙམ་ཀྱི་ཆོས་མ་ཡིན་པའི་ཕྱིར། མ་གྲུབ་ན། དེ་ཆོས་ཅན། དེར་ཐལ། ཆོས་མ་ཡིན་པའི་ཕྱིར། གཉིས་པ་རང་ལུགས་བཤད་པ།གཉིས་པ་རང་ལུགས་བཤད་པ་ལ། རྫས་ཆོས་སམ་རྫས་ཡོད་ཀྱི་མཚན་ཉིད་ཡོད་དེ། རང་ཉིད་ཚད་མའི་ངེས་པ་ལ་ཐ་སྙད་དང་དོན་གཞན་ལ་ལྟོས་མི་དགོས་པའི་རང་མཚན་དུ་གྲུབ་པ་དེ་ཡིན་པའི་ཕྱིར་ཏེ། ས་བཟང་ཀུན་བཏུས་འགྲེལ་བ་ལས། མཚན་ཉིད་ནི། ཆོས་གང་ཞིག རང་གི་ངོ་བོ་ཡིད་ཀྱི་དབང་པོའམ་བློའི་སྤྱོད་ཡུལ་དུ་གྱུར་བ་དེ་བརྗོད་པ་སྒྲ་དང་མིང་ལ་སོགས་པའི་ཐ་སྙད་ལའང་མི་ལྟོས་ཤིང༌། དེ་ལས་གཞན་རྟགས་དང་དཔེ་དང་མཚན་ཉིད་ལ་སོགས་པ་རྣམ་པར་འཇོག་བྱེད་དོན་གཞན་ལ་མི་ལྟོས་པ་ནི་རྫས་སུ་ཡོད་པའོ། །ཞེས་གསུངས་སོ། །མཚན་གཞི་ནི་ཡོད་དེ། གཟུགས་དང་སེམས་དང་སེམས་བྱུང་ལྟ་བུའོ། །གཟུགས་ཆོས་ཅན། ཁྱོད་ལ་རྫས་ཆོས་ཞེས་བརྗོད་པའི་རྒྱུ་མཚན་ཡོད་དེ། རྫས་ཡང་ཡིན་ཆོས་ཡང་ཡིན་པས་ན་དེ་ལྟར་བརྗོད་པའི་ཕྱིར། དེ་ལ་རྫས་ཡོད་ཞེས་བརྗོད་པའི་རྒྱུ་མཚན་ཡོད་དེ། རྫས་སུ་ཡོད་པས་ན་དེ་ལྟར་བརྗོད་པའི་ཕྱིར། རྫས་ཡོད་ལ་སྒྲའི་བརྗོད་རིགས་ཀྱི་དབྱེ་ན་བཞི་ཡོད་དེ། ས་བཟང་གི་ཀུན་བཏུས་འགྲེལ་བ་ལས། རྫས་ཡོད་དང་བཏགས་ཡོད་དུ་འཇོག་ཚུལ་ནི། དོན་བྱེད་ནུས་པ་དང༌། རིགས་པས་གྲུབ་པ་དང༌། བརྟན་པ་དང༌། རང་རྐྱ་ཐུབ་པའི་རྫས་ཡོད་བཞི་ལས། འདིར་ཕྱི་མ་ཁོ་ནས་རྫས་ཡོད་དུ་འཇོག་སྟེ། ཞེས་གསུངས་པའི་ཕྱིར། ལྡོག་ཆོས་སམ་བཏགས་ཡོད་ཀྱི་མཚན་ཉིད་ཡོད་དེ། རང་ཉིད་ཚད་མའི་ངེས་པ་ལ་ཐ་སྙད་དང་དོན་གཞན་ལ་ལྟོས་དགོས་པའི་རྟོག་བཏགས་ཙམ་དུ་གྲུབ་པའི་ཆོས་དེ་ཡིན་པའི་ཕྱིར་ཏེ། ས་བཟང་གི་ཀུན་བཏུས་འགྲེལ་བ་ལས། ཆོས་གང་ཞིག ཡིད་ཀྱི་དབང་པོའམབློའི་སྤྱོད་ཡུལ་དུ་གྱུར་བ་དེ་བརྗོད་པ་སྒྲ་དང་མིང་ལ་སོགས་པ་ལ་ལྟོས་ཤིང༌། དེ་ལས་གཞན་གདགས་གཞི་ལ་སོགས་པ་རྣམ་པར་འཇོག་བྱེད་རྒྱུ་མཚན་ལ་ལྟོས་པ་དང་བཅས་པ་ནི། བཏགས་པའི་ཡོད་པའི་མཚན་ཉིད་ཅན་ཏེ། ཞེས་གསུངས་སོ། །མཚན་གཞི་ནི། མི་རྟག་པ་དང༌། ནམ་མཁའ་ལྟ་བུའོ། །ཡོངས་གྲུབ་སྐབས་འགར་རྫས་ཡོད་དང༌། སྐབས་འགར་བཏགས་ཡོད་དུ་གསུངས་པ་ཡོད་ཀྱང་རང་ལུགས་ལ་རྫས་བཏགས་གང་ཡང་མ་ཡིན་ནམ་སྙམ་མོ། ། གསུམ་པ་དེ་ལ་རྩོད་པ་སྤོང་བ།གསུམ་པ་དེ་ལ་རྩོད་པ་སྤོང་བ་ལ། ཁ་ཅིག་ན་རེ། ལྡོག་པ་ཡང་ཡིན་ཆོས་ཡང་ཡིན་པའི་གཞི་མཐུན་པ་ཡིན་ན་ལྡོག་ཆོས་ཡིན་དགོས་པར་ཐལ། རྫས་ཡང་ཡིན་ཆོས་ཡང་ཡིན་པའི་གཞི་མཐུན་པ་ཡིན་ན་རྫས་ཆོས་ཡིན་དགོས་པའི་ཕྱིར་ན་མ་ཁྱབ། དེ་གཉིས་མི་འདྲ་བའི་ཕྱིར། ཁ་ཅིག་ན་རེ། འདུས་མ་བྱས་པའི་ནམ་མཁའ་ཆོས་ཅན། རིགས་པས་གྲུབ་པའི་རྫས་ཡོད་ཡིན་པར་ཐལ། གཞི་གྲུབ་པའི་ཕྱིར། འདོད་ན། འདུས་མ་བྱས་པའི་ནམ་མཁའ་ཆོས་ཅན། རིགས་པས་གྲུབ་པའི་རྫས་ཡོད་མ་ཡིན་པར་ཐལ། རིགས་པས་གྲུབ་པའི་བཏགས་ཡོད་ཡིན་པའི་ཕྱིར། མ་གྲུབ་ན། དེ་ཆོས་ཅན། རིགས་པས་གྲུབ་པའི་བཏགས་ཡོད་ཡིན་པར་ཐལ། ཚད་མས་གྲུབ་པའི་བཏགས་ཡོད་ཡིན་པའི་ཕྱིར་ན་མ་ཁྱབ། དེ་ཆོས་ཅན། ཚད་མས་གྲུབ་པའི་བཏགས་ཡོད་ཡིན་པར་ཐལ། བཏགས་ཡོད་ཡིན་པའི་ཕྱིར་རོ། །སྔོན་བྱོན་དམ་པའི་གསུང་རབ་ན་རྫས་ཡོད་བཏགས་ཡོད་འཇོག་ཚུལ་མི་འདྲ་བ་དུ་མ་གསུང་མོད་བདག་གིས་རེ་ཞིག་ས་སྡེ་སོགས་དང་རང་ལུགས་ཀྱི་གཞུང་ཆེན་རྣམས་ཀྱི་བཞེད་ཕྱོགས་གཅིག་ཏུ་དྲིལ་ནས་འབྲི་ཁུལ་བྱས་པའོ། །འོན་ཀྱང་གཟུར་གནས་བློ་ལྡན་རྣམས་ཀྱིས་སླར་དཔྱད་པར་བྱའོ། ། གཞན་ཡང་གཏན་ཚིགས་རིགས་པའི་དོན་བསྡུས་ལས། རྫས་དང་ལྡོག་པའི་མཚན་ཉིད་ནི་རིམ་པ་ལྟར། ངོ་བོར་སྐྱེས་པ་དང༌། རང་མ་ཡིན་པ་ལས་ལོག་པར་གནས་པའོ། །ཞེས་གསུངས་སོ།། །། བཅུ་གསུམ་པ་ཁྱབ་པ་སྒོ་བརྒྱད་ཀྱི་རྣམ་བཞག་བཤད་པ།བཅུ་གསུམ་པ་ཁྱབ་པ་སྒོ་བརྒྱད་ཀྱི་རྣམ་བཞག་བཤད་པ་ལ། དགག་བཞག་གཉིས་ལས། དང་པོ་ཁ་ཅིག་ན་རེ། རྟགས་གསལ་དང་བཅས་པའི་ཐལ་འགྱུར་ཡིན་ན། ཁྱོད་ཀྱི་ཁྱབ་པ་སྒོ་བརྒྱད་པོ་གང་རུང་ངེས་པས་ཁྱབ་ཟེར་ན། དངོས་མེད་ཡིན་པར་ཐལ། མཚོན་བྱ་ཡིན་པའི་ཕྱིར་ཞེས་པའི་ཐལ་འགྱུར་ཆོས་ཅན། ཁྱོད་ཀྱི་ཁྱབ་པ་སྒོ་བརྒྱད་པོ་གང་རུང་ངེས་པར་ཐལ། རྟགས་གསལ་དང་བཅས་པའི་ཐལ་འགྱུར་ཡིན་པའི་ཕྱིར། ཁྱབ་པ་ཁས། མ་གྲུབ་ན། དངོས་མེད་ཡིན་པར་ཐལ། མཚོན་བྱ་ཡིན་པའི་ཕྱིར་ཞེས་པའི་ཐལ་འགྱུར་ཆོས་ཅན། རྟགས་གསལ་དང་བཅས་པའི་ཐལ་འགྱུར་ཡིན་པར་ཐལ། རྟགས་གསལ་ཐ་དད་ཀྱི་ཐལ་འགྱུར་ཡིན་པའི་ཕྱིར། མ་གྲུབ་ན། དེ་ཆོས་ཅན། རྟགས་གསལ་ཐ་དད་ཀྱི་ཐལ་འགྱུར་ཡིན་པར་ཐལ། དངོས་མེད་ཀྱིས་གསལ་བ་དང༌། མཚོན་བྱས་རྟགས་བྱས་པའི་ཐལ་འགྱུར་ཡིན་པའི་ཕྱིར། རྩ་བར་འདོད་ན། དངོས་མེད་ཡིན་པར་ཐལ། མཚོན་བྱ་ཡིན་པའི་ཕྱིར་ཞེས་པའི་ཐལ་འགྱུར་ཆོས་ཅན། ཁྱོད་ཀྱི་ཁྱབ་པ་སྒོ་བརྒྱད་པོ་གང་རུང་མ་ངེས་པར་ཐལ། ཁྱོད་ཀྱི་ཁྱབ་པ་རྣལ་མ་བཞི་བོ་གང་རུང་མ་ངེས་པ་གང་ཞིག ཁྱོད་ཀྱི་ཁྱབ་པ་ཕྱིན་ཅི་ལོག་བཞི་བོ་གང་རུང་མ་ངེས་པའི་ཕྱིར། དང་པོ་མ་གྲུབ་ན། དེ་འདྲའི་ཐལ་འགྱུར་ཆོས་ཅན། ཁྱོད་ཀྱི་ཁྱབ་པ་རྣལ་མ་བཞི་བོ་གང་རུང་མ་ངེས་པར་ཐལ། ཁྱོད་ཀྱི་རྗེས་ཁྱབ་རྣལ་མ་མ་ངེས་པ་གང་ཞིག ལྡོག་ཁྱབ་རྣལ་མ་ཡང་མ་ངེས། ཐུར་ཁྱབ་རྣལ་མ་ཡང་མ་ངེས། འགལ་ཁྱབ་རྣལ་མ་ཡང་མ་ངེས་པའི་ཕྱིར། དང་པོ་མ་གྲུབ་ན། དེ་འདྲའི་ཐལ་འགྱུར་ཆོས་ཅན། ཁྱོད་ཀྱི་རྗེས་ཁྱབ་རྣལ་མ་མ་ངེས་པར་ཐལ། ཁྱོད་ཀྱི་རྗེས་ཁྱབ་ཀློང་བའི་ཚེ་ན་མཚོན་བྱ་ཡིན་ན་དངོས་མེད་ཡིན་པས་ཁྱབ་བ་ཀློང་རིགས་པ་གང་ཞིག མཚོན་བྱ་ཡིན་ན་དངོས་མེད་ཡིན་པས་མ་ཁྱབ་པའི་ཕྱིར། དང་པོ་མ་གྲུབ་ན། མཚོན་བྱ་ཡིན་ན་དངོས་མེད་ཡིན་པས་ཁྱབ་བ་དེ་འདྲའི་ཐལ་འགྱུར་གྱི་རྗེས་ཁྱབ་རྣལ་མ་ཀློང་ཚུལ་ཡིན་པར་ཐལ། མཚོན་བྱ་ཡིན་ན་དངོས་མེད་ཡིན་པས་ཁྱབ་བ་དེ་འདྲའི་ཐལ་འགྱུར་གྱི་རྗེས་ཁྱབ་ཀློང་ཚུལ་དངོས་ཡིན་པའི་ཕྱིར། མ་གྲུབ་ན། དེར་ཐལ། རྟགས་གསལ་དང་ལྡན་པའི་ཐལ་འགྱུར་གང་དང་གང་གི་རྗེས་ཁྱབ་ཀློང་བའི་ཚེ་ན་རྟགས་དེ་ཡིན་ན་གསལ་བ་དེ་ཡིན་པས་ཁྱབ་པ་ཀློང་རིགས་པ་གང་ཞིག དངོས་མེད་གསལ་བར་བཀོད་པ་དང་མཚོན་བྱ་རྟགས་སུ་བཀོད་པའི་ཐལ་འགྱུར་ཡིན་པའི་ཕྱིར། རྟགས་གཉིས་པ་མ་གྲུབ་ན། བུམ་པ་ཆོས་ཅན། དངོས་མེད་ཡིན་པར་ཐལ། མཚོན་བྱ་ཡིན་པའི་ཕྱིར། ཁྱབ་པ་ཁས། གོང་གི་རྟགས་གཉིས་པ་མ་གྲུབ་ན། དེ་འདྲའི་ཐལ་འགྱུར་ཆོས་ཅན། ཁྱོད་ཀྱི་ལྡོག་ཁྱབ་རྣལ་མ་མ་ངེས་པར་ཐལ། ཁྱོད་ཀྱི་ལྡོག་ཁྱབ་ཀློང་བའི་ཚེ་ན་དངོས་མེད་མ་ཡིན་ན་མཚོན་བྱ་མ་ཡིན་པས་ཁྱབ་པ་ཀློང་རིགས་པ་གང་ཞིག དངོས་མེད་མ་ཡིན་ན་མཚོན་བྱ་མ་ཡིན་པས་ཁྱབ་པ་མེད་པའི་ཕྱིར། ཕྱི་མ་སླ། དང་པོ་མ་གྲུབ་ན། དེར་ཐལ། རྟགས་གསལ་དང་བཅས་པའི་ཐལ་འགྱུར་གང་དང་གང་གི་ལྡོག་ཁྱབ་ཀློང་བའི་ཚེ་ན་གསལ་བ་དེ་མ་ཡིན་ན་རྟགས་དེ་མ་ཡིན་པས་ཁྱབ་པ་ཀློང་རིགས་པ་གང་ཞིག དངོས་མེད་གསལ་བར་བཀོད་པ་དང་མཚོན་བྱ་རྟགས་སུ་བཀོད་པའི་ཐལ་འགྱུར་ཡིན་པའི་ཕྱིར། གོང་གི་རྟགས་གསུམ་པ་མ་གྲུབ་ན། དེ་འདྲའི་ཐལ་འགྱུར་ཆོས་ཅན། ཁྱོད་ཀྱི་ཐུར་ཁྱབ་རྣལ་མ་མ་ངེས་པར་ཐལ། དངོས་མེད་ཡིན་ན་མཚོན་བྱ་ཡིན་པས་ཁྱབ་པ་དེ་ཁྱོད་ཀྱི་ཐུར་ཁྱབ་དུ་ཀློང་རིགས་པ་གང་ཞིག དངོས་མེད་ཡིན་ན་མཚོན་བྱ་ཡིན་པས་ཁྱབ་པ་མེད་པའི་ཕྱིར། དང་པོ་གྲུབ་སྟེ། རྟགས་གསལ་དང་བཅས་པའི་ཐལ་འགྱུར་གང་དང་གང་གི་ཐུར་ཁྱབ་ཀློང་བའི་ཚེ་གསལ་བ་དེ་ཡིན་ན་རྟགས་དེ་ཡིན་པས་ཁྱབ་བ་དེ་ཀློང་རིགས་པ་གང་ཞིག དངོས་མེད་གསལ་བར་བཀོད་པ་དང་མཚོན་བྱ་རྟགས་སུ་བཀོད་པའི་ཐལ་འགྱུར་ཡིན་པའི་ཕྱིར། གོང་གི་རྟགས་བཞི་བ་མ་གྲུབ་ན། དེ་འདྲའི་ཐལ་འགྱུར་ཆོས་ཅན། ཁྱོད་ཀྱི་འགལ་ཁྱབ་རྣལ་མ་མ་ངེས་པར་ཐལ། མཚོན་བྱ་ཡིན་ན་དངོས་མེད་མ་ཡིན་པས་ཁྱབ་པ་དེ་ཁྱོད་ཀྱི་འགལ་ཁྱབ་དུ་ཀློང་རིགས་པ་གང་ཞིག མཚོན་བྱ་ཡིན་ན་དངོས་མེད་མ་ཡིན་པས་ཁྱབ་པ་མེད་པའི་ཕྱིར། རྟགས་དང་པོ་སྔར་ལྟར་བསྒྲུབ། རྩ་རྟགས་གཉིས་པ་མ་གྲུབ་ན། དེ་འདྲའི་ཐལ་འགྱུར་ཆོས་ཅན། ཁྱོད་ཀྱི་ཁྱབ་པ་ཕྱིན་ཅི་ལོག་བཞི་པོ་གང་རུང་མ་ངེས་པར་ཐལ། ཁྱོད་ཀྱི་རྗེས་ཁྱབ་ཕྱིན་ཅི་ལོག་མ་ངེས་པ་གང་ཞིག ལྡོག་ཁྱབ་ཕྱིན་ཅི་ལོག་ཡང་མ་ངེས། ཐུར་ཁྱབ་ཕྱིན་ཅི་ལོག་ཡང་མ་ངེས། འགལ་ཁྱབ་ཕྱིན་ཅི་ལོག་ཡང་མ་ངེས་པའི་ཕྱིར། དང་པོ་མ་གྲུབ་ན། དེ་འདྲའི་ཐལ་འགྱུར་ཆོས་ཅན། ཁྱོད་ཀྱི་རྗེས་ཁྱབ་ཕྱིན་ཅི་ལོག་མ་ངེས་པར་ཐལ། ཁྱོད་ཀྱི་རྗེས་ཁྱབ་ཕྱིན་ཅི་ལོག་ཀློང་བའི་ཚེ་མཚོན་བྱ་ཡིན་ན་དངོས་མེད་མ་ཡིན་པས་ཁྱབ་པ་ཀློང་རིགས་པ་གང་ཞིག མཚོན་བྱ་ཡིན་ན་དངོས་མེད་མ་ཡིན་པས་ཁྱབ་པ་མེད་པའི་ཕྱིར། དང་པོ་གྲུབ་སྟེ། ཐལ་འགྱུར་དེ་དང་དེའི་རྗེས་ཁྱབ་ཕྱིན་ཅི་ལོག་དང་འགལ་ཁྱབ་དོན་གཅིག་ཡིན་པ་སོགས་ཡིན་པའི་ཕྱིར། ཕྱི་མ་སླ། གོང་གི་རྟགས་གཉིས་པ་མ་གྲུབ་ན། དེ་འདྲའི་ཐལ་འགྱུར་ཆོས་ཅན། ལྡོག་ཁྱབ་ཕྱིན་ཅི་ལོག་ཡང་མ་ངེས་པར་ཐལ། ཁྱོད་ཀྱི་ལྡོག་ཁྱབ་ཕྱིན་ཅི་ལོག་ཀློང་བའི་ཚེ་ན་དངོས་མེད་མ་ཡིན་ན་མཚོན་བྱ་མ་ཡིན་པ་མ་ཡིན་པས་ཁྱབ་པ་ཀློང་རིགས་པ་གང་ཞིག དངོས་མེད་མ་ཡིན་ན་མཚོན་བྱ་མ་ཡིན་པ་མ་ཡིན་པས་ཁྱབ་པ་མེད་པའི་ཕྱིར། དང་པོ་གྲུབ་སྟེ། རྟགས་གསལ་དང་བཅས་པའི་ཐལ་འགྱུར་གང་དང་གང་གི་ལྡོག་ཁྱབ་ཕྱིན་ཅི་ལོག་ཀློང་ཚེ་གསལ་བ་དེ་མ་ཡིན་ན་རྟགས་དེ་མ་ཡིན་པ་མ་ཡིན་པས་ཁྱབ་པ་དེ་ཀློང་རིགས་པ་སོགས་ཡིན་པའི་ཕྱིར། གཉིས་པ་མ་གྲུབ་ན། དོན་བྱེད་ནུས་པ་ཆོས་ཅན། མཚོན་བྱ་མ་ཡིན་པ་མ་ཡིན་པར་ཐལ། དངོས་མེད་མ་ཡིན་པའི་ཕྱིར། འདོད་མི་ནུས་ཏེ། མཚོན་བྱ་མ་ཡིན་པའི་ཕྱིར། གོང་གི་རྟགས་གསུམ་པ་མ་གྲུབ་ན། དེ་འདྲའི་ཐལ་འགྱུར་ཆོས་ཅན། ཁྱོད་ཀྱི་ཐུར་ཁྱབ་ཕྱིན་ཅི་ལོག་མ་ངེས་པར་ཐལ། ཁྱོད་ཀྱི་ཐུར་ཁྱབ་ཕྱིན་ཅི་ལོག་ཀློང་བའི་ཚེ་དངོས་མེད་ཡིན་ན་མཚོན་བྱ་མ་ཡིན་པས་ཁྱབ་པ་ཀློང་རིགས་པ་གང་ཞིག དངོས་མེད་ཡིན་ན་མཚོན་བྱ་མ་ཡིན་པས་ཁྱབ་པ་མེད་པའི་ཕྱིར། དང་པོ་གྲུབ་སྟེ། རྟགས་གསལ་དང་བཅས་པའི་ཐལ་འགྱུར་གང་དང་གང་གི་ཐུར་ཁྱབ་ཕྱིན་ཅི་ལོག་ཀློང་ཚེ་གསལ་བ་དེ་ཡིན་ན་རྟགས་དེ་མ་ཡིན་པས་ཁྱབ་པ་དེ་ཀློང་རིགས་པ་ཡིན་པ་སོགས་ཡིན་པའི་ཕྱིར། གོང་གི་རྟགས་བཞི་བ་མ་གྲུབ་ན། དེ་འདྲའི་ཐལ་འགྱུར་ཆོས་ཅན། ཁྱོད་ཀྱི་འགལ་ཁྱབ་ཕྱིན་ཅི་ལོག་མ་ངེས་པར་ཐལ། ཁྱོད་ཀྱི་འགལ་ཁྱབ་ཕྱིན་ཅི་ལོག་ཀློང་བའི་ཚེ་མཚོན་བྱ་ཡིན་ན་དངོས་མེད་མ་ཡིན་པ་མ་ཡིན་པས་ཁྱབ་པ་དེ་ཀློང་རིགས་པ་གང་ཞིག མཚོན་བྱ་ཡིན་ན་དངོས་མེད་མ་ཡིན་པ་མ་ཡིན་པས་ཁྱབ་པ་མེད་པའི་ཕྱིར། རྟགས་དང་པོ་གྲུབ་སྟེ། རྟགས་གསལ་དང་བཅས་པའི་ཐལ་འགྱུར་གང་དང་གང་གི་འགལ་ཁྱབ་ཕྱིན་ཅི་ལོག་ཀློང་ཚེ་རྟགས་དེ་ཡིན་ན་གསལ་བ་དེ་མ་ཡིན་པ་མ་ཡིན་པས་ཁྱབ་པ་དེ་ཀློང་རིགས་པ་སོགས་ཡིན་པའི་ཕྱིར། ཁ་ཅིག་ན་རེ། རྗེས་ཁྱབ་གྲུབ་པའི་ཐལ་འགྱུར་ཡིན་ན། ཐུར་ཁྱབ་གྲུབ་པའི་ཐལ་འགྱུར་ཡིན་པས་ཁྱབ་ཟེར་ན། དངོས་པོ་ཡིན་པར་ཐལ། གཟུགས་ཡིན་པའི་ཕྱིར་ཞེས་པའི་ཐལ་འགྱུར་ཆོས་ཅན། ཐུར་ཁྱབ་གྲུབ་པའི་ཐལ་འགྱུར་ཡིན་པར་ཐལ། རྗེས་ཁྱབ་གྲུབ་པའི་ཐལ་འགྱུར་ཡིན་པའི་ཕྱིར། ཁྱབ་པ་ཁས། མ་གྲུབ་ན། དེ་འདྲའི་ཐལ་འགྱུར་ཆོས་ཅན། དེར་ཐལ། གཟུགས་ཡིན་ན་དངོས་པོ་ཡིན་པས་ཁྱབ་པ་ཁྱོད་ཀྱི་རྗེས་ཁྱབ་གང་ཞིག དེ་གྲུབ་པའི་ཕྱིར།དང་པོ་མ་གྲུབ་ན། དེ་འདྲའི་ཐལ་འགྱུར་ཆོས་ཅན། གཟུགས་ཡིན་ན་དངོས་པོ་ཡིན་པས་ཁྱབ་པ་ཁྱོད་ཀྱི་རྗེས་ཁྱབ་ཡིན་པར་ཐལ། ཁྱོད་དངོས་པོའི་གསལ་བ་དང༌། གཟུགས་ཀྱི་རྟགས་བྱས་པའི་ཐལ་འགྱུར་ཡིན་པའི་ཕྱིར། རྩ་བར་འདོད་ན། དངོས་པོ་ཡིན་ན་གཟུགས་ཡིན་པས་ཁྱབ་པ་ཡོད་པར་ཐལ། དེ་འདྲའི་ཐལ་འགྱུར་དེའི་ཐུར་ཁྱབ་རྣལ་མ་ངེས་པའི་ཕྱིར། རྟགས་ཁས། ཁ་ཅིག་ན་རེ། ཐལ་འགྱུར་དེའི་རྗེས་ཁྱབ་རྣལ་མ་ངེས་ན་ཐལ་འགྱུར་དེའི་འགལ་ཁྱབ་རྣལ་མ་མ་ངེས་པས་ཁྱབ་ཟེར་ན། ཤེས་བྱ་ཆོས་ཅན། ཀྭ་བུམ་གཉིས་ཡིན་པར་ཐལ། རྟགས་དངོས་གཉིས་ཡིན་པའི་ཕྱིར་ཞེས་པའི་ཐལ་འགྱུར་ཆོས་ཅན། ཁྱོད་ཀྱི་འགལ་ཁྱབ་རྣལ་མ་མ་ངེས་པར་ཐལ། ཁྱོད་ཀྱི་རྗེས་ཁྱབ་རྣལ་མ་ངེས་པའི་ཕྱིར། ཁྱབ་པ་ཁས། མ་གྲུབ་ན། ཤེས་བྱ་ཆོས་ཅན། ཀྭ་བུམ་གཉིས་ཡིན་པར་ཐལ། རྟགས་དངོས་གཉིས་ཡིན་པའི་ཕྱིར་ཞེས་པའི་ཐལ་འགྱུར་ཆོས་ཅན། ཁྱོད་ཀྱི་རྗེས་ཁྱབ་རྣལ་མ་ངེས་པར་ཐལ། ཁྱོད་ཀྱི་རྗེས་ཁྱབ་ཀློང་བའི་ཚེ་ན། རྟག་དངོས་གཉིས་ཡིན་ན་ཀྭ་བུམ་གཉིས་ཡིན་པས་ཁྱབ་བ་ཀློང་རིགས་པ་གང་ཞིག རྟག་དངོས་གཉིས་ཡིན་ན་ཀྭ་བུམ་གཉིས་ཡིན་པས་ཁྱབ་བ་ཡོད་པའི་ཕྱིར། རྟགས་དང་པོ་མ་གྲུབ་ན། དེ་འདྲའི་ཐལ་འགྱུར་ཆོས་ཅན། ཁྱོད་ཀྱི་རྗེས་ཁྱབ་ཀློང་བའི་ཚེ་ན། རྟག་དངོས་གཉིས་ཡིན་ན་ཀྭ་བུམ་གཉིས་ཡིན་པས་ཁྱབ་བ་ཀློང་རིགས་པ་ཡིན་པར་ཐལ། ཁྱོད་ཀྭ་བུམ་གཉིས་གསལ་བ་དང༌། རྟག་དངོས་གཉིས་རྟགས་སུ་བཀོད་པའི་ཐལ་འགྱུར་ཡིན་པའི་ཕྱིར། མ་ཁྱབ་ན་ཁྱབ་པ་ཡོད་པར་ཐལ། ཐལ་འགྱུར་གང་དང་གང་གི་རྗེས་ཁྱབ་ཀློང་བའི་ཚེ་ན་རྟགས་དེ་ཡིན་ན་གསལ་བ་དེ་ཡིན་པའི་ཁྱབ་པ་ཀློང་རིགས་པ་ཡིན་པའི་ཕྱིར། རྩ་བར་འདོད་ན། ཤེས་བྱ་ཆོས་ཅན། ཀྭ་བུམ་གཉིས་ཡིན་པར་ཐལ། རྟགས་དངོས་གཉིས་ཡིན་པའི་ཕྱིར་ཞེས་པའི་ཐལ་འགྱུར་ཆོས་ཅན། ཁྱོད་ཀྱི་འགལ་ཁྱབ་རྣལ་མ་ངེས་པར་ཐལ། ཁྱོད་ཀྱི་འགལ་ཁྱབ་རྣལ་མ་ཀློང་བའི་ཚེ་ན། རྟག་དངོས་གཉིས་ཡིན་ན་ཀྭ་བུམ་གཉིས་མ་ཡིན་པས་ཁྱབ་པ་ཀློང་རིགས་པ་གང་ཞིག རྟག་དངོས་གཉིས་ཡིན་ན་ཀྭ་བུམ་གཉིས་མ་ཡིན་པས་ཁྱབ་པའི་ཕྱིར། ཁ་ཅིག་ན་རེ། ཐལ་འགྱུར་དེའི་ཐུར་ཁྱབ་རྣལ་མ་ངེས་པའི་ཐུར་ཁྱབ་རྣལ་མ་ངེས་ན། ཐལ་འགྱུར་དེའི་ཐུར་ཁྱབ་རྣལ་མ་ངེས་པས་ཁྱབ་ཟེར་ན། ཆོས་དུང་ཆོས་ཅན། དངོས་པོ་ཡིན་པར་ཐལ། གཟུགས་ཡིན་པའི་ཕྱིར་ཞེས་པའི་ཐལ་འགྱུར་ཆོས་ཅན། ཁྱོད་ཀྱི་ཐུར་ཁྱབ་རྣལ་མ་ངེས་པར་ཐལ། ཁྱོད་ཀྱི་ཐུར་ཁྱབ་རྣལ་མ་ངེས་པའི་ཐུར་ཁྱབ་རྣལ་མ་ངེས་པའི་ཕྱིར། ཁྱབ་པ་ཁས། མ་གྲུབ་ན། ཆོས་དུང་ཆོས་ཅན། དངོས་པོ་ཡིན་པར་ཐལ། གཟུགས་ཡིན་པའི་ཕྱིར་ཞེས་པའི་ཐལ་འགྱུར་ཆོས་ཅན། ཁྱོད་ཀྱི་ཐུར་ཁྱབ་རྣལ་མ་ངེས་པའི་ཐུར་ཁྱབ་རྣལ་མ་ངེས་པར་ཐལ། ཁྱོད་ཀྱི་ཐུར་ཁྱབ་ཀློང་བའི་ཚེ་ན་དངོས་པོ་ཡིན་ན་གཟུགས་ཡིན་པས་ཁྱབ་པ་ཡིན་ལ། གཟུགས་ཡིན་པར་ཐལ།དངོས་པོ་ཡིན་པའི་ཕྱིར་ཞེས་པའི་ཐལ་འགྱུར་གྱི་ཐུར་ཁྱབ་ཀློང་བའི་ཚེ་ན་གཟུགས་ཡིན་ན་དངོས་པོ་ཡིན་པས་ཁྱབ་པ་ཀློང་རིགས་པ་གང་ཞིག གཟུགས་ཡིན་ན་དངོས་པོ་ཡིན་པས་ཁྱབ་པའི་ཕྱིར། རྩ་བར་འདོད་ན། ཆོས་དུང་ཆོས་ཅན། དངོས་པོ་ཡིན་པར་ཐལ། གཟུགས་ཡིན་པའི་ཕྱིར་ཞེས་པའི་ཐལ་འགྱུར་ཆོས་ཅན། ཁྱོད་ཀྱི་ཐུར་ཁྱབ་རྣལ་མ་མ་ངེས་པར་ཐལ། ཁྱོད་ཀྱི་ཐུར་ཁྱབ་ཀློང་བའི་ཚེ་ན། དངོས་པོ་ཡིན་ན་གཟུགས་ཡིན་པས་ཁྱབ་པ་ཀློང་རིགས་པ་གང་ཞིག དངོས་པོ་ཡིན་ན་གཟུགས་ཡིན་པས་ཁྱབ་པ་མ་གྲུབ་པའི་ཕྱིར། རྟགས་དང་པོ་མ་གྲུབ་ན། ཆོས་དུང་ཆོས་ཅན། དངོས་པོ་ཡིན་པར་ཐལ། གཟུགས་ཡིན་པའི་ཕྱིར་ཞེས་པའི་ཐལ་འགྱུར་ཆོས་ཅན། ཁྱོད་ཀྱི་ཐུར་ཁྱབ་ཀློང་བའི་ཚེ་ན་དངོས་པོ་ཡིན་ན་གཟུགས་ཡིན་པས་ཁྱབ་པ་ཀློང་རིགས་པ་ཡིན་པར་ཐལ། ཁྱོད་དངོས་པོའི་གསལ་བ་དང༌། གཟུགས་ཀྱི་རྟགས་བྱས་པའི་རྟགས་གསལ་གཉིས་ཀ་དང་ལྡན་པའི་ཐལ་འགྱུར་ཡིན་པའི་ཕྱིར། མ་ཁྱབ་ན་ཁྱབ་བ་ཡོད་པར་ཐལ། རྟགས་གསལ་གཉིས་ཀ་དང་ལྡན་པའི་ཐལ་འགྱུར་གང་དང་གང་གི་ཐུར་ཁྱབ་ཀློང་བའི་ཚེ་ན་གསལ་བ་དེ་ཡིན་ན་རྟགས་དེ་ཡིན་པས་ཁྱབ་པ་ཀློང་དགོས་པ་ཡིན་པའི་ཕྱིར། ཁ་ཅིག་ན་རེ། ཐལ་འགྱུར་དེའི་འགལ་ཁྱབ་རྣལ་མ་ངེས་པའི་ཐུར་ཁྱབ་རྣལ་མ་ངེས་ན་ཐལ་འགྱུར་དེའི་ཐུར་ཁྱབ་རྣལ་མ་ངེས་པས་ཁྱབ་ཟེར་ན། མེད་པ་ཡིན་པར་ཐལ། ཡོད་པ་ཡིན་པའི་ཕྱིར་ཞེས་པའི་ཐལ་འགྱུར་ཆོས་ཅན། ཁྱོད་ཀྱི་ཐུར་ཁྱབ་རྣལ་མ་ངེས་པར་ཐལ། ཁྱོད་ཀྱི་འགལ་ཁྱབ་རྣལ་མ་ངེས་པའི་ཐུར་ཁྱབ་རྣལ་མ་ངེས་པའི་ཕྱིར། ཁྱབ་པ་ཁས། མ་གྲུབ་ན། མེད་པ་ཡིན་པར་ཐལ། ཡོད་པ་ཡིན་པའི་ཕྱིར་ཞེས་པའི་ཐལ་འགྱུར་ཆོས་ཅན། ཁྱོད་ཀྱི་འགལ་ཁྱབ་རྣལ་མ་ངེས་པའི་ཐུར་ཁྱབ་རྣལ་མ་ངེས་པར་ཐལ། ཁྱོད་ཀྱི་འགལ་ཁྱབ་ཀློང་བའི་ཚེ་ན་ཡོད་པ་ཡིན་ན་མེད་པ་མ་ཡིན་པས་ཁྱབ་པ། མེད་པ་མ་ཡིན་པར་ཐལ། ཡོད་པ་ཡིན་པའི་ཕྱིར་ཞེས་པའི་ཐལ་འགྱུར་གྱི་ཐུར་ཁྱབ་ཀློང་བའི་ཚེ་ན་མེད་པ་མ་ཡིན་ན་ཡོད་པ་ཡིན་པས་ཁྱབ་པ་ཀློང་རིགས་པ་གང་ཞིག མེད་པ་མ་ཡིན་ན་ཡོད་པ་ཡིན་པས་ཁྱབ་པའི་ཕྱིར་རོ། །རྩ་བར་འདོད་ན། མེད་པ་ཡིན་པར་ཐལ། ཡོད་པ་ཡིན་པའི་ཕྱིར་ཞེས་པའི་ཐལ་འགྱུར་ཆོས་ཅན། ཁྱོད་ཀྱི་ཐུར་ཁྱབ་རྣལ་མ་མ་ངེས་པར་ཐལ། ཁྱོད་ཀྱི་ཐུར་ཁྱབ་ཀློང་བའི་ཚེ་ན། མེད་པ་ཡིན་ན་ཡོད་པ་ཡིན་པས་ཁྱབ་པ་ཀློང་རིགས་པ་གང་ཞིག མེད་པ་ཡིན་ན་ཡོད་པ་ཡིན་པས་ཁྱབ་པ་མེད་པའི་ཕྱིར་རོ། ། གཉིས་པ་རང་ལུགས་བཤད་པ།གཉིས་པ་རང་ལུགས་བཤད་པ་ལ། རྟགས་གསལ་དང་བཅས་པའི་ཐལ་འགྱུར་རྣམས་ཀྱི་ཁྱབ་པ་སྒོ་བརྒྱད་ཀློང་ཚུལ་ནི་འདི་ལྟ་སྟེ། རྟགས་དེ་ཡིན་ན་གསལ་བ་དེ་ཡིན་པས་ཁྱབ་བ་ཀློང་ཚུལ་ནི། རྗེས་ཁྱབ་ཀློང་ཚུལ་དང༌། རྟགས་དེ་ཡིན་ན་གསལ་བ་དེ་མ་ཡིན་པས་ཁྱབ་པ་ཀློང་ཚུལ་འདི་འགལ་ཁྱབ་རྣལ་མ་ཀློང་ཚུལ་དང༌། གསལ་བ་དེ་ཡིན་ན་རྟགས་དེ་ཡིན་པས་ཁྱབ་པ་ཀློང་ཚུལ་འདི་ཐུར་ཁྱབ་རྣལ་མ་ཀློང་ཚུལ་དང༌། གསལ་བ་དེ་མ་ཡིན་ན་རྟགས་དེ་མ་ཡིན་པས་ཁྱབ་པ་ཀློང་ཚུལ་འདི་ལྡོག་ཁྱབ་རྣལ་མའི་ཀློང་ཚུལ་དང༌། རྟགས་དེ་ཡིན་ན་གསལ་བ་དེ་མ་ཡིན་པས་ཁྱབ་པ་ཀློང་ཚུལ་འདི་རྗེས་ཁྱབ་ཕྱིན་ཅི་ལོག་གི་ཀློང་ཚུལ་དང༌། རྟགས་དེ་ཡིན་ན་གསལ་བ་དེ་མ་ཡིན་པ་མ་ཡིན་པས་ཁྱབ་པ་ཀློང་ཚུལ་འདི་འགལ་ཁྱབ་ཕྱིན་ཅི་ལོག་གི་ཀློང་ཚུལ་དང༌། གསལ་བ་དེ་ཡིན་ན་རྟགས་དེ་མ་ཡིན་པས་ཁྱབ་པ་ཀློང་ཚུལ་འདི་ཐུར་ཁྱབ་ཕྱིན་ཅི་ལོག་གི་ཀློང་ཚུལ་དང༌། གསལ་བ་དེ་མ་ཡིན་ན་རྟགས་དེ་མ་ཡིན་པ་མ་ཡིན་པས་ཁྱབ་བ་དེ་ལྡོག་ཁྱབ་ཕྱིན་ཅི་ལོག་གི་ཀློང་ཚུལ་ཡིན་ནོ། །ཁྱབ་སྒོ་རེ་གཉིས་ཀྱི་རྩི་ཚུལ་རེ་མིག་བློ་གསལ་མིག་འབྱེད་ལས་ཤེས་པར་བྱའོ། །དེ་ལྟར་ལེགས་པར་དཔྱད་ན་རིང་པོར་མི་ཐོགས་པར་ཤེས་བྱའི་གནས་ལ་བློ་གྲོས་པད་མོ་རྒྱས་པར་འགྱུར་རོ།། །། བཅུ་བཞི་པ་ཁས་ལེན་སོང་ཚུལ་གྱི་རྣམ་བཞག་བཤད་པ།བཅུ་བཞི་པ་ཁས་ལེན་སོང་ཚུལ་གྱི་རྣམ་བཞག་བཤད་པ་ལ། དགག་བཞག་སྤོང་གསུམ་ལས། དང་པོ་ནི། མདོ་སྡེ་བ་ལྟར་ན་ཁ་ཅིག་ན་རེ། དངོས་དངོས་མེད་གཉིས་ལས་དངོས་པོ་ཡིན་པར་ཁས་ལེན་ཟེར་ན། འོ་ན་ཁྱོད་དངོས་པོ་ཡིན་པར་ཐལ། དངོས་པོ་ཡིན་པའི་ཕྱིར། རྟགས་ཁས། འདོད་ན། ཁྱོད་ཀྱི་རྒྱུ་ཁྱོད་ཀྱི་རྒྱུ་ཡིན་པར་ཐལ། ཁྱོད་དངོས་པོ་ཡིན་པའི་ཕྱིར། འདོད་ན། ཁྱོད་ཀྱི་རྒྱུ་མེད་ན་ཁྱོད་མེད་དགོས་པར་ཐལ། ཁྱོད་ཀྱི་རྒྱུ་ཁྱོད་ཀྱི་རྒྱུ་ཡིན་པའི་ཕྱིར། འདོད་ན། རྟག་པ་ཆོས་ཅན། ཁྱོད་མེད་པར་ཐལ། ཁྱོད་ཀྱི་རྒྱུ་མེད་པའི་ཕྱིར། མ་གྲུབ་ན། རྟག་པ་ཆོས་ཅན། ཁྱོད་ཀྱི་རྒྱུ་མེད་པར་ཐལ། ཁྱོད་རྟག་པ་ཡིན་པའི་ཕྱིར། གོང་དུ་འདོད་མི་ནུས་ཏེ། གཞི་གྲུབ་པའི་ཕྱིར། ཁ་ཅིག་ཁྱོད་དངོས་མེད་ཡིན་ལ། རང་དངོས་པོ་ཡིན་ཟེར་ན། རང་གི་རྒྱུ་ཡོད་པར་ཐལ། རང་དངོས་པོ་ཡིན་པའི་ཕྱིར། འདོད་ན། རང་གི་རྒྱུ་མེད་ན་རང་མེད་དགོས་པར་ཐལ། རང་གི་རྒྱུ་ཡོད་པའི་ཕྱིར། འདོད་ན། རྟག་པ་ཆོས་ཅན། རང་མེད་པར་ཐལ། རང་གི་རྒྱུ་མེད་པའི་ཕྱིར། ཁྱབ་པ་ཁས། མ་གྲུབ་ན། རྟག་པ་ཆོས་ཅན། རང་གི་རྒྱུ་མེད་པར་ཐལ། རང་རྟག་པ་ཡིན་པའི་ཕྱིར། ཁ་ཅིག་ན་རེ། ཡོད་པ་ཆོས་ཅན། རང་གི་རྒྱུ་ཡོད་པར་ཐལ། རང་ཡོད་པའི་ཕྱིར་ཞེས་པའི་ཐལ་འགྱུར་གྱི་གསལ་བ་ལ་འདོད་ལན་བཏབ་པས་རང་གི་རྒྱུ་ཡོད་པར་འདོད་ཅེས་རྩི་རིགས་ཟེར་ན། དེ་མི་རིགས་པར་ཐལ། དེ་ལ་འདོད་ལན་བཏབ་པས་ཡོད་པའི་རྒྱུ་ཡོད་པར་འདོད་ཅེས་རྩི་རིགས་པ་ཡིན་པའི་ཕྱིར། དེར་ཐལ། མྱུ་གུ་ཆོས་ཅན། རང་གི་རྒྱུ་ཡོད་པར་ཐལ། དངོས་པོ་ཡིན་པའི་ཕྱིར་ཞེས་པའི་ཐལ་འགྱུར་གྱི་གསལ་བ་ལ་འདོད་ལན་བཏབ་པས་མྱུ་གུའི་རྒྱུ་ཡོད་པར་འདོད་ཅེས་རྩི་རིགས་པ་ཡིན་པའི་ཕྱིར། དེར་ཐལ། མྱུ་གུ་ཆོས་ཅན། རང་གི་རྒྱུ་ལས་སྐྱེས་པ་ཡིན་པར་ཐལ། དངོས་པོ་ཡིན་པའི་ཕྱིར་ཞེས་པའི་ཐལ་འགྱུར་གྱི་གསལ་བ་ལ་འདོད་ལན་བཏབ་པས་མྱུ་གུ་མྱུ་གུའི་རྒྱུ་ལས་སྐྱེས་པ་ཡིན་པར་འདོད་ཅེས་རྩི་རིགས་པ་ཡིན་པའི་ཕྱིར། དེར་ཐལ། འདུས་བྱས་ཡིན་ན་རང་གི་རྒྱུ་ལས་སྐྱེས་པ་ཡིན་པའི་ཁྱབ་པའི་ཕྱིར། ཁ་ཅིག་ན་རེ། འདུས་བྱས་ཡིན་ན་རང་གི་རྒྱུ་ལས་སྐྱེས་པ་ཡིན་པས་མ་ཁྱབ་པར་ཐལ། གདམས་ངག་ཆོས་ཅན། རང་གི་རྒྱུ་ལས་སྐྱེས་པ་ཡིན་པར་ཐལ། འདུས་བྱས་ཡིན་པའི་ཕྱིར་ཞེས་པའི་ཐལ་འགྱུར་གྱི་གསལ་བ་ལ་འདོད་ལན་མི་ཐེབས་པའི་ཕྱིར། དེར་ཐལ། དེ་ལ་འདོད་ལན་བཏབ་པས་གདམས་ངག་གི་རྒྱུ་ལས་སྐྱེས་པ་ཡིན་པར་འདོད་ཅེས་རྩི་རིགས་པ་གང་ཞིག གདམས་ངག་གི་རྒྱུ་ལས་སྐྱེས་པ་མ་ཡིན་པའི་ཕྱིར། རྟགས་དང་པོ་མ་གྲུབ་ན། དེ་ལ་འདོད་ལན་བཏབ་པས་དེ་ལྟར་རྩི་རིགས་པར་ཐལ། གདམས་ངག་ཆོས་ཅན། རང་གི་ལྡོག་པ་ཡིན་པར་ཐལ། གཞི་གྲུབ་པའི་ཕྱིར་ཞེས་པའི་ཐལ་འགྱུར་གྱི་གསལ་བ་ལ་འདོད་ལན་བཏབ་པས་གདམས་ངག་གི་ལྡོག་པ་ཡིན་པར་འདོད་ཅེས་རྩི་རིགས་པ་ཡིན་པའི་ཕྱིར། དེར་ཐལ། གདམས་ངག་ཆོས་ཅན། རང་དང་གཅིག་ཡིན་པར་ཐལ། གཞི་གྲུབ་པའི་ཕྱིར་ཞེས་པའི་ཐལ་འགྱུར་གྱི་གསལ་བ་ལ་འདོད་ལན་བཏབ་པས་གདམས་ངག་དང་གཅིག་ཡིན་པར་འདོད་ཅེས་རྩི་རིགས་པ་ཡིན་པའི་ཕྱིར། དེར་ཐལ། གདམས་ངག་ཆོས་ཅན། རང་ཡིན་པར་ཐལ། གཞི་གྲུབ་པའི་ཕྱིར་ཞེས་པའི་ཐལ་འགྱུར་གྱི་གསལ་བ་ལ་འདོད་ལན་བཏབ་པས་གདམས་ངག་ཡིན་པར་འདོད་ཅེས་རྩི་རིགས་པ་ཡིན་པའི་ཕྱིར། དེར་ཐལ། གདམས་ངག་ཆོས་ཅན། ཁྱོད་ཡིན་པར་ཐལ། གཞི་གྲུབ་པའི་ཕྱིར་ཞེས་པའི་ཐལ་འགྱུར་གྱི་གསལ་བ་ལ་འདོད་ལན་བཏབ་པས་གདམས་ངག་ཡིན་པར་འདོད་ཅེས་རྩི་རིགས་ཤིང་འདོད་ལན་མི་ཐེབས་པ་དེ་ཡིན་པའི་ཕྱིར་ཟེར་ན་མ་ཁྱབ་སྟེ། ཁྱོད་སྒྲ་རྣམས་ལ་ཡོད་སྒྲུབ་དང་ཡིན་སྒྲུབ་སོགས་ལ་རེ་རེ་ལས་ལྷག་བཤིག་མི་དགོས་ལ། རང་སྒྲ་ཡིན་སྒྲུབ་ཕལ་ཆེར་ལ་རྩོད་གཞི་གཉིས་རེ་བཤིག་དགོས་པའི་ཕྱིར། ཁ་ཅིག་ན་རེ། སྒྲ་ཆོས་ཅན། ཁྱོད་དང་གཅིག་ཡིན་པར་ཐལ། གཞི་གྲུབ་པའི་ཕྱིར་ཞེས་པའི་ཐལ་འགྱུར་གྱི་གསལ་བ་ལ་འདོད་ལན་བཏབ་པས་སྒྲ་དང་གཅིག་ཡིན་པར་འདོད་ཅེས་རྩི་མི་རིགས་པ་ཡིན་པར་ཐལ། དེ་ལ་འདོད་ལན་བཏབ་པས་སྒྲ་སྒྲ་དང་གཅིག་ཡིན་པར་འདོད་ཅེས་རྩི་རིགས་པ་ཡིན་པའི་ཕྱིར། དེར་ཐལ། སྒྲ་ཆོས་ཅན། ཁྱོད་ཀྱི་རྒྱུ་ལས་སྐྱེས་པ་ཡིན་པར་ཐལ། དངོས་པོ་ཡིན་པའི་ཕྱིར་ཞེས་པའི་ཐལ་འགྱུར་གྱི་གསལ་བ་ལ་འདོད་ལན་བཏབ་པས་སྒྲ་སྒྲའི་རྒྱུ་ལས་སྐྱེས་པ་ཡིན་པར་འདོད་ཅེས་རྩི་རིགས་པ་ཡིན་པའི་ཕྱིར། དེར་ཐལ། སྒྲ་ཆོས་ཅན། རང་གི་རྒྱུ་ལས་སྐྱེས་པ་ཡིན་པར་ཐལ། དངོས་པོ་ཡིན་པའི་ཕྱིར་ཞེས་པའི་ཐལ་འགྱུར་གྱི་གསལ་བ་ལ་འདོད་ལན་བཏབ་པས་སྒྲ་སྒྲའི་རྒྱུ་ལས་སྐྱེས་པ་ཡིན་པར་འདོད་ཅེས་རྩི་རིགས་པ་ཡིན་པའི་ཕྱིར་ན་མ་ཁྱབ་པའོ། །ཁ་ཅིག་ན་རེ། སྒྲ་ཆོས་ཅན། བདག་སྐྱེས་ཡིན་པར་ཐལ། དངོས་པོ་ཡིན་པའི་ཕྱིར་ཞེས་པའི་ཐལ་འགྱུར་གྱི་གསལ་བ་ལ་འདོད་ལན་བཏབ་པས་སྒྲ་སྒྲ་ལས་སྐྱེས་པ་ཡིན་པར་འདོད་ཅེས་རྩི་རིགས་པ་ཡིན་པར་ཐལ། སྒྲ་ཆོས་ཅན། རང་གི་རྒྱུ་ལས་སྐྱེས་པ་ཡིན་པར་ཐལ། དངོས་པོ་ཡིན་པའི་ཕྱིར་ཞེས་པའི་ཐལ་འགྱུར་གྱི་གསལ་བ་ལ་འདོད་ལན་བཏབ་པས་སྒྲ་སྒྲའི་རྒྱུ་ལས་སྐྱེས་པ་ཡིན་པར་འདོད་ཅེས་རྩི་རིགས་པ་ཡིན་པའི་ཕྱིར་ན་མ་ཁྱབ། འདོད་ན། མྱུ་གུ་ཆོས་ཅན། བདག་ཉིད་ཀྱི་རྒྱུ་ལས་སྐྱེས་པ་ཡིན་པར་ཐལ། དངོས་པོ་ཡིན་པའི་ཕྱིར་ཞེས་པའི་ཐལ་འགྱུར་གྱི་གསལ་བ་ལ་འདོད་ལན་བཏབ་པས་མྱུ་གུ་མྱུ་གུའི་རྒྱུ་ལས་སྐྱེས་པ་ཡིན་པར་འདོད་ཅེས་རྩི་རིགས་པ་ཡིན་པར་ཐལ། འདོད་པའི་ཕྱིར། འདོད་ན། ཕྱི་རོལ་གྲངས་ཅན་པ་ལ་མྱུ་གུ་ཆོས་ཅན། བདག་ལས་སྐྱེས་པ་ཡིན་པར་ཐལ་ཞེས་འཕང་བའི་ཚེ་ན་མྱུ་གུ་མྱུ་གུ་ལས་སྐྱེས་པ་ཡིན་པར་འདོད་ཅེས་རྩི་རིགས་པ་ཡིན་པར་ཐལ། འདོད་པའི་ཕྱིར། རྟགས་ཁས། འདོད་ན། དེ་ལ་མྱུ་གུ་ཆོས་ཅན། བདག་ལས་སྐྱེས་པ་ཡིན་པར་ཐལ་ཞེས་འཕང་བའི་ཚེ་ན་འདོད་མི་རིགས་པར་ཐལ། མྱུ་གུ་མྱུ་གུ་ལས་སྐྱེས་པར་གྲངས་ཅན་པས་མི་འདོད་པའི་ཕྱིར། འདོད་མི་ནུས་ཏེ། དེ་འདྲའི་ཐལ་འགྱུར་ལ་འདོད་ལན་བཏབ་པས་གང་བཀོད་པ་ལྟར་མྱུ་གུ་བདག་སྐྱེས་ཡིན་པར་འདོད་ཅེས་རྩི་རིགས་ཤིང་འདོད་ལན་མི་ཐེབས་པ་ཡིན་པའི་ཕྱིར་རོ། །འོན་ཀྱང་སྒྲ་ནི་བརྗོད་འདོད་རྗེས་འབྲང་ཡིན་པས་སྐབས་ཐོབ་ཀྱི་ཤེས་པར་བྱའོ། །བསྡུས་གྲྭ་འགའ་ཞིག་ཏུ་བདག་སྒྲ་གཉིས་རེ་བཤིག་པར་གསུངས་སོ། །ཁ་ཅིག་ན་རེ། ཀྭ་བུམ་གཉིས་ཡིན་ན་ཀྭ་བུམ་གཉིས་ཡིན་པས་ཁྱབ་ན། ཀྭ་བུམ་གཉིས་ཡིན་པས་ཁྱབ་ཟེར་ན། རི་བོང་རྭ་ཆོས་ཅན། ཀྭ་བུ་གཉིས་ཡིན་པར་ཐལ། ཀྭ་བུམ་གཉིས་ཡིན་ན་ཀྭ་བུམ་གཉིས་ཡིན་པས་ཁྱབ་པའི་ཕྱིར། ཁྱབ་པ་ཁས། མ་གྲུབ་ན། རི་བོང་རྭ་ཆོས་ཅན། ཀྭ་བུམ་གཉིས་ཡིན་ན་ཀྭ་བུམ་གཉིས་ཡིན་པས་ཁྱབ་པར་ཐལ། ཀྭ་བུམ་གཉིས་ཡིན་ན་གང་དྲན་དྲན་ཡིན་པས་ཁྱབ་པའི་ཕྱིར། མ་གྲུབ་ན། རི་བོང་རྭ་ཆོས་ཅན། ཀྭ་བུམ་གཉིས་ཡིན་ན་གང་དྲན་དྲན་ཡིན་པས་ཁྱབ་པར་ཐལ། གང་ཟག་གི་བདག་ཏུ་མ་གྲུབ་པ་ཡིན་པའི་ཕྱིར། རྩ་བར་འདོད་ན། རི་བོང་རྭ་ཆོས་ཅན། ཀྭ་བུམ་གཉིས་མ་ཡིན་པར་ཐལ། བདག་ཏུ་མ་གྲུབ་པའི་ཕྱིར། ཁ་ཅིག་ན་རེ། དུས་དང་རྣམ་པ་ཐམས་ཅད་དུ་ཡོད་མེད་གང་རུང་ཡིན་ན་དུས་དང་རྣམ་པ་ཐམས་ཅད་དུ་ཡོད་པ་ཡིན་པས་ཁྱབ་ཟེར་ན། བུམ་པ་ཆོས་ཅན། དུས་དང་རྣམ་པ་ཐམས་ཅད་དུ་ཡོད་པ་ཡིན་པར་ཐལ། དུས་དང་རྣམ་པ་ཐམས་ཅད་དུ་ཡོད་མེད་གང་རུང་ཡིན་པའི་ཕྱིར། ཁྱབ་པ་ཁས། མ་གྲུབ་ན། བུམ་པ་ཆོས་ཅན། དུས་དང་རྣམ་པ་ཐམས་ཅད་དུ་ཡོད་མེད་གང་རུང་ཡིན་པར་ཐལ ཁྱོད་ཡོད་མེད་གང་རུང་མ་ཡིན་པའི་དུས་དང་རྣམ་པ་ཐམས་ཅད་མི་སྲིད་པའི་ཕྱིར། རྩ་བར་འདོད་ན། བུམ་པ་ཆོས་ཅན། དུས་དང་རྣམ་པ་ཐམས་ཅད་དུ་ཡོད་པ་མ་ཡིན་པར་ཐལ། རང་གི་རྒྱུ་དུས་དང༌། རང་གི་འབྲས་བུའི་དུས་སུ་ཡོད་པ་མ་ཡིན་པའི་ཕྱིར། མ་གྲུབ་ན། བུམ་པ་ཆོས་ཅན། རང་གི་རྒྱུ་དུས་དང༌། རང་གི་འབྲས་བུའི་དུས་རེ་རེའི་ཚེ་ཡོད་པ་མ་ཡིན་པར་ཐལ། ཁྱོད་དངོས་པོ་ཡིན་པའི་ཕྱིར། ཁ་ཅིག་ན་རེ། དངོས་པོ་ཡིན་པར་ཐལ། ཀ་བ་དང་གཅིག་ཡིན་པའི་ཕྱིར། མ་གྲུབ་ན། ཀ་བ་ཆོས་ཅན། ཁྱོད་དང་གཅིག་ཡིན་པར་ཐལ། ཀ་བ་དང་གཅིག་ཡིན་པ་གང་ཞིག ཀ་བ་དང་གཅིག་ཡིན་ན་ཁྱོད་དང་གཅིག་ཡིན་དགོས་པའི་ཕྱིར་ཟེར་ན་མ་ཁྱབ། དེ་ལ་རྟགས་མ་གྲུབ་ཀྱི་ལན་མི་ཐེབས་པ་ཡིན་ཏེ། དེ་ལ་རྟགས་དང་པོ་མ་གྲུབ་ཀྱི་ལན་ཡང་མི་ཐེབས། གཉིས་པ་མ་གྲུབ་ཀྱི་ལན་མི་ཐེབས། བསྡོམས་རྟགས་མ་གྲུབ་ཀྱི་ལན་ཡང་མི་ཐེབས་པ་ཡིན་པའི་ཕྱིར། མ་གྲུབ་ན། ཀ་བ་ཆོས་ཅན། ཁྱོད་དང་གཅིག་ཡིན་པར་ཐལ། ཀ་བ་དང་གཅིག་ཡིན་པ་གང་ཞིག ཀ་བ་དང་གཅིག་ཡིན་ན་ཁྱོད་དང་གཅིག་ཡིན་དགོས་པའི་ཕྱིར་ཞེས་པའི་ཐལ་འགྱུར་གྱི་རྟགས་དང་པོ་མ་གྲུབ་ཀྱི་ལན་མི་ཐེབས་ཏེ། དེ་ལ་རྟགས་དང་པོ་མ་གྲུབ་ཀྱི་ལན་བཏབ་པས་ཀ་བ་ཀ་བ་དང་གཅིག་ཡིན་པར་རྟགས་མ་གྲུབ་ཅེས་རྩི་དགོས་ཤིང༌། ཀ་བ་ཀ་བ་དང་གཅིག་ཡིན་པའི་ཕྱིར། དེ་འདྲའི་ཐལ་འགྱུར་གྱི་རྟགས་གཉིས་པ་མ་གྲུབ་ཀྱི་ལན་མི་ཐེབས་ཏེ། དེ་ལ་རྟགས་གཉིས་པ་མ་གྲུབ་ཀྱི་ལན་བཏབ་པས་ཀ་བ་དང་གཅིག་ཡིན་ན་ཀ་བ་དང་གཅིག་ཡིན་པར་རྟགས་མ་གྲུབ་ཅེས་རྩི་དགོས་ཤིང༌། ཀ་བ་དང་གཅིག་ཡིན་ན་ཀ་བ་དང་གཅིག་ཡིན་དགོས་པའི་ཕྱིར། དེ་འདྲའི་ཐལ་འགྱུར་ལ་བསྡོམས་རྟགས་མ་གྲུབ་ཀྱི་ལན་མི་ཐེབས་ཏེ།ཀ་བ་ཀ་བ་དང་གཅིག་ཡིན་པ་གང་ཞིག ཀ་བ་དང་གཅིག་ཡིན་ན་ཀ་བ་དང་གཅིག་ཡིན་དགོས་པའི་ཕྱིར། ཁ་ཅིག་ན་རེ། དངོས་པོ་ཡིན་པར་ཐལ།སྔོ་སེར་གཉིས་མ་ཡིན་པ་དང་དངོས་པོ་གཉིས་ཀ་ཡིན་པའི་ཕྱིར། མ་གྲུབ་ན།སྔོ་སེར་གཉིས་མ་ཡིན་པ་དང་དངོས་པོ་གཉིས་ཀ་ཡིན་པར་ཐལ། སྔོ་སེར་གཉིས་མ་ཡིན་པར་གྱུར་བའི་དངོས་པོ་ཡིན་པའི་ཕྱིར། མ་གྲུབ་ན། སྔོ་སེར་གཉིས་ཆོས་ཅན།མ་ཡིན་པར་གྱུར་བའི་དངོས་པོ་ཡིན་པར་ཐལ། དངོས་པོ་ཡིན་པའི་ཕྱིར། ཟེར་ན་མ་ཁྱབ། བྱས་པ་ལ་ཁོ་ན་རེ། སྔོ་སེར་གཉིས་མ་ཡིན་པ་དང་དངོས་པོ་གཉིས་ཀ་ཡིན་པར་ཐལ། སྔོ་སེར་གཉིས་མ་ཡིན་པ་དང་དངོས་པོ་གཉིས་ཀའི་གཞི་མཐུན་ཡིན་པའི་ཕྱིར། དེར་ཐལ། མ་ཡིན་པ་དང་དངོས་པོ་གཉིས་ཀའི་གཞི་མཐུན་ཡོད་པའི་ཕྱིར་ན་མ་ཁྱབ། རྟགས་གྲུབ་སྟེ། ས་སེར་པོ་དེ་ཡིན་པའི་ཕྱིར། རྩ་བར་འདོད་ན། སྔོ་སེར་གཉིས་མ་ཡིན་པ་དང་དངོས་པོ་གཉིས་ཀ་མ་ཡིན་པར་ཐལ། སྔོ་སེར་གཉིས་མ་ཡིན་པ་དང་དངོས་མེད་གཉིས་ཀ་ཡིན་པའི་ཕྱིར། མ་གྲུབ་ན། སྔོ་སེར་གཉིས་མ་ཡིན་པ་དང་དངོས་མེད་གཉིས་ཀ་ཡིན་པར་ཐལ། དངོས་མེད་ཡིན་པའི་ཕྱིར། མ་ཁྱབ་ན་ཁྱབ་པ་ཡོད་པར་ཐལ། དངོས་མེད་ཡིན་ན་སྔོ་སེར་གཉིས་མ་ཡིན་པ་དང་དངོས་མེད་གཉིས་ཀ་ཡིན་པས་ཁྱབ་པར་ཐལ། དངོས་མེད་ཡིན་ན་དངོས་པོ་མ་ཡིན་པ་དང་དངོས་མེད་གཉིས་ཀ་ཡིན་པས་ཁྱབ་པའི་ཕྱིར། མ་གྲུབ་ན། དངོས་མེད་ཡིན་ན་དངོས་པོ་མ་ཡིན་པ་དང་དངོས་མེད་གཉིས་ཀ་ཡིན་པས་ཁྱབ་པར་ཐལ། དངོས་མེད་ཡིན་ན་དངོས་པོ་མ་ཡིན་པ་དང་དངོས་མེད་གཉིས་ཀའི་གཞི་མཐུན་པ་ཡིན་པས་ཁྱབ་པའི་ཕྱིར། མ་གྲུབ་ན། དངོས་པོ་མ་ཡིན་པ་དང་དངོས་མེད་གཉིས་ཆོས་ཅན། འགལ་བ་ཡིན་པར་ཐལ། ཐ་དད་ཅིང་གཞི་མཐུན་མི་སྲིད་པ་ཡིན་པའི་ཕྱིར། རྟགས་རེ་རེ་ནས་ཁས།འདོད་ན། དངོས་པོ་མ་ཡིན་པ་དང་དངོས་མེད་གཉིས་ཆོས་ཅན། བདག་ཏུ་མ་གྲུབ་པ་ཡིན་ན་ཁྱོད་ཀྱི་གཞི་མཐུན་མ་ཡིན་པས་ཁྱབ་པར་ཐལ། ཁྱོད་ཕན་ཚུན་ཐ་དད་ཅིང་གཞི་མཐུན་མི་སྲིད་པ་ཡིན་པའི་ཕྱིར། རྟགས་ཁས། འདོད་མི་ནུས་ཏེ། དངོས་མེད་ཡིན་ན་ཁྱོད་གཉིས་ཀ་ཡིན་པས་ཁྱབ་པའི་ཕྱིར། ཁ་ཅིག་ན་རེ། རྟག་པ་ཆོས་ཅན། རྟག་པར་རྟོགས་པའི་ཚད་མ་ཡོད་པ་དང་རྟག་པ་གཉིས་ཀ་ཡིན་པར་ཐལ། རྟག་པ་ཡིན་པའི་ཕྱིར་ཟེར་ན། འགལ་ཁྱབ་ལ་འཕུད་རིགས་པ་ཡིན་པར་ཐལ། རྟག་པ་ཡིན་ན་རྟག་པར་རྟོགས་པའི་ཚད་མ་ཡོད་པ་དང་དངོས་པོ་གཉིས་ཀ་ཡིན་པས་ཁྱབ་པའི་ཕྱིར། དེར་ཐལ། རྟག་པ་རྟག་པར་རྟོགས་པའི་ཚད་མ་ཡོད་པ་དང་དངོས་པོར་རྟོགས་པའི་ཚད་མ་ཡོད་པ་གཉིས་ཀ་ཡིན་པའི་ཕྱིར། མ་གྲུབ་ན། དེར་ཐལ། རྟག་པ་རྟག་པར་རྟོགས་པའི་ཚད་མ་ཡོད་པ་དང་དངོས་པོ་གཉིས་ཀ་ཡིན་པའི་ཕྱིར། མ་གྲུབ་ན། རྟག་པ་རྟག་པར་རྟོགས་པའི་ཚད་མ་ཆོས་ཅན། ཡོད་པ་དང་དངོས་པོ་གཉིས་ཀ་ཡིན་པར་ཐལ། རྟག་དངོས་གང་རུང་དང་དངོས་པོ་གཉིས་ཀ་ཡིན་པའི་ཕྱིར། ཁ་ཅིག་ན་རེ། རྟག་པར་རྟོགས་པའི་ཚད་མ་ཡོད་པ་དང་དངོས་པོ་གཉིས་ཀ་མ་ཡིན་པར་ཐལ། རྟག་པར་རྟོགས་པའི་ཚད་མ་ཡོད་པ་དང་རྟག་པར་རྟོགས་པའི་ཚད་མ་མེད་པ་གཉིས་ཀ་མ་ཡིན་པའི་ཕྱིར། མ་གྲུབ་ན། རྟག་པར་རྟོགས་པའི་ཚད་མ་ཆོས་ཅན། ཁྱོད་ཡོད་པ་དང་ཁྱོད་མེད་པ་གཉིས་ཀ་མ་ཡིན་པར་ཐལ། བདག་མེད་ཡིན་པའི་ཕྱིར་ན་མ་ཁྱབ། བདག་མེད་ཡིན་ན་ཁྱོད་ཡོད་པ་དང་ཁྱོད་མེད་པ་གཉིས་ཀ་མ་ཡིན་པས་མ་ཁྱབ་ཀྱང༌། བདག་མེད་ཡིན་ན་ཡོད་པ་དང་མེད་པ་གཉིས་ཀ་མ་ཡིན་པས་ཁྱབ་ཅེས་ཁས་ལེན་དགོས་པ་ཡིན་པའི་ཕྱིར། ཁ་ཅིག་ན་རེ། མ་ཡིན་པར་གྱུར་བའི་དངོས་མེད་ཡིན་ན་དངོས་མེད་ཡིན་པས་ཁྱབ་པར་ཐལ། མ་ཡིན་པར་གྱུར་བའི་དངོས་མེད་ཡིན་པའི་ཕྱིར་ཟེར་ན་མ་ཁྱབ། འདོད་ན། དངོས་པོ་ཆོས་ཅན། དངོས་མེད་ཡིན་པར་ཐལ། མ་ཡིན་པར་གྱུར་བའི་དངོས་མེད་ཡིན་པའི་ཕྱིར། ཁྱབ་པ་ཁས། མ་གྲུབ་ན། དངོས་པོ་མ་ཡིན་པར་གྱུར་བའི་དངོས་མེད་ཡིན་པར་ཐལ། དངོས་པོ་མ་ཡིན་པ་དང༌། དངོས་མེད་གཉིས་ཀ་ཡིན་པའི་ཕྱིར། མ་གྲུབ་ན། དངོས་པོ་མ་ཡིན་པ་དང༌། དངོས་མེད་གཉིས་ཀ་ཡིན་པར་ཐལ། དངོས་མེད་ཡིན་པའི་ཕྱིར། ཡང་ཁ་ཅིག ཡིན་པར་གྱུར་བའི་དངོས་མེད་ཡིན་པར་ཐལ། ཡིན་པ་ཡིན་པའི་ཕྱིར་ཟེར་ན། དེ་ལ་ཁ་ཅིག་གིས་འོ་ན་མ་ཡིན་པ་མ་ཡིན་པར་ཐལ། ཡིན་པ་ཡིན་པའི་ཕྱིར། རྟགས་ཁས། འདོད་ན། མ་ཡིན་པ་མ་ཡིན་པ་དང་ཡིན་པ་གཉིས་ཀ་ཡིན་པར་ཐལ། མ་ཡིན་པ་མ་ཡིན་པ་གང་ཞིག ཡིན་པ་ཡིན་པའི་ཕྱིར། རྟགས་རེ་རེ་ནས་ཁས། འདོད་ན། མ་ཡིན་པ་ཆོས་ཅན། མ་ཡིན་པ་དང་ཡིན་པ་གཉིས་ཀ་མ་ཡིན་པར་ཐལ། གང་ཟག་གི་བདག་མེད་ཡིན་པའི་ཕྱིར་ཟེར། དེ་ལ་རིགས་པ་མགོ་མཚུངས་བརྗོད་ན། ཡིན་མིན་གཉིས་ཀྱི་ནང་ནས་མ་ཡིན་པར་ཐལ། ཁྱོད་ཀྱི་རིགས་པ་དེའི་ཕྱིར། འདོད་ན། མ་ཡིན་པ་ཡིན་པ་དང་མ་ཡིན་པ་གཉིས་ཀ་ཡིན་པར་ཐལ། མ་ཡིན་པ་ཡིན་པ་གང་ཞིག མ་ཡིན་པ་ཡིན་པའི་ཕྱིར། རྟགས་རེ་རེ་ཁས། འདོད་ན། མ་ཡིན་པ་ཆོས་ཅན། ཡིན་པ་དང་མ་ཡིན་པ་གཉིས་ཀ་མ་ཡིན་པར་ཐལ། གང་ཟག་གི་བདག་མེད་ཡིན་པའི་ཕྱིར། ཁྱབ་པ་འགྲིགས། ཁ་ཅིག་ན་རེ། མ་ཡིན་པ་ཡིན་པར་ཐལ། ཡིན་མིན་གང་རུང་གང་ཞིག ཡིན་པ་མ་ཡིན་པའི་ཕྱིར་ཟེར་ན། རྟགས་ཕྱི་མ་མ་གྲུབ་པོ། ། གཉིས་པ་རང་ལུགས་བཤད་པ།གཉིས་པ་རང་ལུགས་བཤད་པ་ལ། ཁས་ལེན་སོང་ཚུལ་ཡོད་དེ། ཡོད་མེད་གཉིས་ཀྱི་ནང་ནས་ཡོད་པ་དང༌། སྤྱི་དང་བྱེ་བྲག་གཉིས་ཀྱི་ནང་ནས་བྱེ་བྲག་དང༌། དངོས་དང་དངོས་མེད་གཉིས་ཀྱི་ནང་ནས་དངོས་མེད་དང༌། ཡིན་མིན་གཉིས་ཀྱི་ནང་ནས་ཡིན་པ་ཡིན་པར་ཁས་ལེན་དགོས་པ་ཡིན་པའི་ཕྱིར། ཀྭ་བུམ་གཉིས་མ་ཡིན་པ་དང་དངོས་མེད་གཉིས་ཀ་ཡིན་པར་ཁས་བླངས་བས་ཀྭ་བུམ་གཉིས་དེ་མ་སོང་བར་སྤྱིར་ཁས་ལེན་སོང་བ་ཡིན་པའི་ཕྱིར། ཀྭ་བུམ་གཉིས་ཡོད་པ་དང་དངོས་པོ་གཉིས་ཀ་ཁས་བླང་བས་སྤྱིར་མ་སོང་བར་ཀྭ་བུམ་གཉིས་དེ་ཁས་ལེན་སོང་བ་ཡིན་པའི་ཕྱིར། དངོས་མེད་དུ་རྟོགས་པའི་ཚད་མ་ཡོད་པ་དང་དངོས་པོ་གཉིས་ཀ་ཡིན་པར་ཁས་བླང་བས་སྤྱིར་མ་སོང་བར་དངོས་མེད་དུ་རྟོགས་པའི་ཚད་མ་དེ་སོང་བ་ཡིན་ཏེ། དངོས་མེད་དུ་རྟོགས་པའི་ཚད་མ་ཡོད་པ་དང་དངོས་པོ་གཉིས་ཀའི་གཞི་མཐུན་དུ་འཇོག་པར་ཁས་བླང་བས་སྤྱིར་མ་སོང་བར་དངོས་མེད་དུ་རྟོགས་པའི་ཚད་མ་དེ་སོང་བ་ཡིན་པའི་ཕྱིར། དེར་ཐལ། གཞི་གྲུབ་ན། ཡོད་པ་དང་དངོས་པོ་གཉིས་ཀ་མ་ཡིན་པས་མ་ཁྱབ་པ་ལ་དངོས་མེད་དུ་རྟོགས་པའི་ཚད་མ་དེ་བཞག་ཆོག་པ་ཡིན་པའི་ཕྱིར་རོ། །ཡོད་པ་ཡིན་ན་འདུས་བྱས་དང་འདུས་མ་བྱས་གང་རུང་ཡིན་པས་ཁྱབ་ཅེས་པ་དང༌། ཡོད་པ་ཡིན་ན་འདུས་བྱས་དང་འདུས་མ་བྱས་གང་རུང་ཡིན་དགོས་ཞེས་པ་དང༌། ཡོད་པ་ཡིན་ན་འདུས་བྱས་དང་འདུས་མ་བྱས་གང་རུང་ཡིན་ཞེས་པ་རྣམས་ལ་ཁས་ལེན་སོང་ཚུལ་ཁྱད་པར་མེད་དེ། དེ་རྣམས་ཁྱབ་མཐའི་མིང་གི་རྣམ་གྲངས་ཡིན་པའི་ཕྱིར་རོ། ། གསུམ་པ་དེ་ལ་རྩོད་པ་སྤོང་བ།གསུམ་པ་དེ་ལ་རྩོད་པ་སྤོང་བ་ལ། ཁོ་ན་རེ། རྣམ་མཁྱེན་ཆོས་ཅན། མ་ཡིན་པ་དང་དངོས་པོ་གཉིས་ཀ་ཡིན་པར་ཐལ། མ་ཡིན་པ་ཡིན་པ་གང་ཞིག དངོས་པོ་ཡིན་པའི་ཕྱིར་ཟེར་ན། བསྡོམས་རྟགས་མ་གྲུབ་ཀྱི་ལན་ཐེབས་པ་ཡིན་ཏེ། རྣམ་མཁྱེན་མ་ཡིན་པ་དང་དངོས་མེད་གཉིས་ཀ་ཡིན་པའི་ཕྱིར། དེར་ཐལ། རྣམ་མཁྱེན་མ་ཡིན་པ་དང་དངོས་མེད་གཉིས་ཀའི་གཞི་མཐུན་པ་ཡིན་པའི་ཕྱིར། དེར་ཐལ། དངོས་མེད་ཡིན་པའི་ཕྱིར། ཡང་ཁོ་ན་རེ། རྣམ་མཁྱེན་མི་རྟག་པ་དང་རྟག་པ་གཉིས་ཀ་ཡིན་པར་ཐལ། འདོད་པའི་ཕྱིར་ན་མ་ཁྱབ། འདོད་མི་ནུས་ཏེ། རྣམ་མཁྱེན་མི་རྟག་པ་དང་རྟག་པ་གཉིས་ཀ་ཡིན་པར་ཁས་བླངས་བས་རྣམ་མཁྱེན་དེ་མི་རྟག་པ་དང་རྟག་པ་གཉིས་ཀ་རེ་རེ་ནས་ཡིན་པར་ཁས་ལེན་སོང་བའི་ཕྱིར། མདུན་གྱི་གཞི་འདིར་ཤེས་བྱ་ཤེས་བྱ་དང་གཅིག་ཡིན་མིན་དང༌། མདུན་གྱི་གཞི་འདིར་ཆོས་ཐམས་ཅད་རྟོགས་པའི་ཚད་མ་ཡོད་མེད་གང་ཁས་ལེན་པ་དང༌། ཆོས་ཐམས་ཅད་ཡོད་པར་རྟོགས་པའི་ཚད་མ་མདུན་གྱི་གཞི་འདིར་ཡོད་ཅེས་པ་དང༌། མདུན་གྱི་གཞི་འདིར་ཆོས་ཐམས་ཅད་ཡོད་པར་རྟོགས་པའི་ཚད་མ་ཡོད་ཅེས་པ་གཉིས་འདྲ་མི་འདྲ་རྣམས་དཔྱད་པར་བྱའོ།། །། བཅོ་ལྔ་བ་དྲུག་སྒྲའི་རྣམ་བཞག་མདོར་བསྡུས་ཙམ་བཤད་པ།བཅོ་ལྔ་བ་དྲུག་སྒྲའི་རྣམ་བཞག་མདོར་བསྡུས་ཙམ་བཤད་པ་ལ། ཁ་ཅིག་ན་རེ། རྣམ་མཁྱེན་ཆོས་ཅན། དངོས་པོར་རྟོགས་པའི་ཚད་མ་ཡིན་པར་ཐལ། ཚད་མ་གང་ཞིག དངོས་པོ་ཁྱོད་ཀྱི་གཞལ་བྱ་ཡིན་པའི་ཕྱིར། འདོད་ན། འདོད་ལན་རྩིས་པས། རྣམ་མཁྱེན་དངོས་པོར་རྟོགས་པའི་ཚད་མ་ཡིན་པར་འདོད་ཟེར་ན། འོ་ན་ཚད་མ་ཡིན་པར་ཐལ། རྣམ་མཁྱེན་དངོས་པོར་རྟོགས་པའི་ཚད་མ་ཡིན་པའི་ཕྱིར། རྟགས་ཁས། ཁྱབ་སྟེ། སྒྲ་དངོས་པོར་རྟོགས་པའི་ཚད་མ་ཡིན་ན་ཚད་མ་ཡིན་པས་ཁྱབ་པའི་ཕྱིར། དེར་ཐལ། སྒྲ་ཡོད་པར་རྟོགས་པའི་ཚད་མ་ཡིན་ན་ཚད་མ་ཡིན་དགོས་པའི་ཕྱིར། མ་གྲུབ་ན། སྒྲ་ཆོས་ཅན། ཁྱོད་ཡོད་པར་རྟོགས་པའི་ཚད་མ་ཡིན་ན་ཚད་མ་ཡིན་པས་ཁྱབ་པར་ཐལ། ཁྱོད་གཞི་གྲུབ་པའི་ཕྱིར། རྩ་བར་འདོད་ན། དངོས་མེད་མ་ཡིན་པར་ཐལ། ཚད་མ་ཡིན་པའི་ཕྱིར། གཞན་ཡང་བདག་ཏུ་མ་གྲུབ་པ་ཡིན་ན་དངོས་པོར་རྟོགས་པའི་ཚད་མ་མ་ཡིན་པས་ཁྱབ་པར་ཐལ། རྣམ་མཁྱེན་ཆོས་ཅན། དངོས་པོར་རྟོགས་པའི་ཚད་མ་ཡིན་པར་ཐལ། ཚད་མ་ཡིན་པའི་ཕྱིར་ཞེས་པའི་ཐལ་འགྱུར་ལ་འདོད་ལན་མི་ཐེབས་པའི་ཕྱིར། དེར་ཐལ། དེ་ལ་འདོད་ལན་བཏབ་པས་རྣམ་མཁྱེན་དངོས་པོར་རྟོགས་པའི་ཚད་མ་ཡིན་པར་འདོད་ཅེས་རྩི་རིགས་པ་གང་ཞིག རྣམ་མཁྱེན་དངོས་པོ་རྟོགས་པའི་ཚད་མ་མ་ཡིན་པའི་ཕྱིར། གོང་གི་འདོད་ལན་བཏབ་ཚུལ་དེ་ལྟར་མི་འཐད་པར་ཐལ། རྣམ་མཁྱེན་ཆོས་ཅན། དངོས་པོར་རྟོགས་པའི་ཚད་མ་ཡིན་པར་ཐལ། ཚད་མ་ཡིན་པའི་ཕྱིར་ཞེས་པའི་ཐལ་འགྱུར་ལ་འདོད་ལན་རྩིས་པས། རྣམ་མཁྱེན་རྣམ་མཁྱེན་དངོས་པོ་རྟོགས་པའི་ཚད་མ་ཡིན་པར་འདོད་ཅེས་རྩི་རིགས་པ་ཡིན་པའི་ཕྱིར། མ་གྲུབ་ན། དེར་ཐལ། རྣམ་མཁྱེན་ཆོས་ཅན།ཡོད་པར་རྟོགས་པའི་ཚད་མ་ཡིན་པར་ཐལ། ཚད་མ་ཡིན་པའི་ཕྱིར་ཞེས་པའི་ཐལ་འགྱུར་གྱི་གསལ་བ་ལ་འདོད་ལན་བཏབ་པས་རྣམ་མཁྱེན་རྣམ་མཁྱེན་ཡོད་པར་རྟོགས་པའི་ཚད་མ་ཡིན་པར་འདོད་ཅེས་རྩི་རིགས་པ་ཡིན་པའི་ཕྱིར། དེར་ཐལ། རྣམ་མཁྱེན་ཆོས་ཅན། ཡོད་པར་རྟོགས་པའི་ཚད་མ་ཡོད་པར་ཐལ། ཚད་མ་ཡིན་པའི་ཕྱིར་ཞེས་པའི་ཐལ་འགྱུར་གྱི་གསལ་བ་ལ་འདོད་ལན་བཏབ་པས་རྣམ་མཁྱེན་ཡོད་པར་རྟོགས་པའི་ཚད་མ་ཡིན་པར་འདོད་ཅེས་རྩི་རིགས་པ་གང་ཞིག ཡིན་འགོད་དང་ཡོད་འགོད་གཉིས་ཀྱི་རྩི་ཚུལ་ལ་མི་འདྲ་བའི་ཁྱད་པར་ཆེན་པོ་ཡོད་པའི་ཕྱིར། ཡང་རྣམ་མཁྱེན་ཆོས་ཅན། དངོས་པོར་རྟོགས་པའི་ཚད་མའི་རྒྱུ་ཡིན་པར་ཐལ། དངོས་པོ་ཡིན་པའི་ཕྱིར་ཞེས་པའི་ཐལ་འགྱུར་གྱི་གསལ་བ་ལ་འདོད་ལན་བཏབ་པས་རྣམ་མཁྱེན་དངོས་པོར་རྟོགས་པའི་ཚད་མའི་རྒྱུ་ཡིན་པར་འདོད་ཟེར་ན། དེ་མི་འཐད་པར་ཐལ། དེ་ལ་འདོད་ལན་བཏབ་པས་རྣམ་མཁྱེན་རྣམ་མཁྱེན་དངོས་པོར་རྟོགས་པའི་ཚད་མའི་རྒྱུ་ཡིན་པར་འདོད་ཅེས་རྩི་རིགས་པ་ཡིན་པའི་ཕྱིར། དེར་ཐལ། དངོས་པོ་ཡིན་ན་དངོས་པོར་རྟོགས་པའི་ཚད་མའི་རྒྱུ་ཡིན་པར་འདོད་ཅེས་རྩི་རིགས་པ་ཡིན་པའི་ཕྱིར། དེར་ཐལ།དངོས་པོ་ཡིན་ན་ཡོད་པར་རྟོགས་པའི་ཚད་མའི་རྒྱུ་ཡིན་པས་ཁྱབ་པའི་ཕྱིར་རོ། ། དགག་གཞི་རྩི་ཚུལ་ལ། ཁ་ཅིག་ན་རེ། བུམ་པའི་དགག་གཞི་ཆོས་ཅན། ཤེས་བྱ་ཡིན་པར་ཐལ། གཞི་གྲུབ་པའི་ཕྱིར་ཞེས་པའི་ཐལ་འགྱུར་གྱི་གསལ་བ་ལ་འདོད་ལན་བཏབ་པས་བུམ་པའི་དགག་གཞི་ཆོས་ཅན་གྱི་སྟེང་དུ་བུམ་པའི་དགག་གཞི་ཤེས་བྱ་ཡིན་པར་འདོད་ཅེས་རྩི་རིགས་པ་ཡིན་པའི་ཕྱིར་ཟེར་ན། དེ་ལྟར་རྩི་མི་རིགས་པ་ཡིན་པར་ཐལ། དེ་འདྲའི་ཐལ་འགྱུར་གྱི་གསལ་བ་ལ་འདོད་ལན་བཏབ་པས་བུམ་པའི་དགག་གཞི་ཆོས་ཅན་གྱི་སྟེང་དུ་བུམ་པའི་དགག་གཞི་བུམ་པའི་དགག་གཞི་ཆོས་ཅན་གྱི་སྟེང་དུ་ཤེས་བྱ་ཡིན་པར་འདོད་ཅེས་རྩི་རིགས་པ་ཡིན་པའི་ཕྱིར། དེར་ཐལ། བུམ་པའི་དགག་གཞི་ཆོས་ཅན། བུམ་པའི་དགག་གཞི་ཡིན་པར་ཐལ། ཁྱོད་ཡོད་པ་གང་ཞིག བུམ་པ་མེད་པའི་ཕྱིར་ཞེས་པའི་ཐལ་འགྱུར་ལ་འདོད་ལན་བཏབ་པས་བུམ་པའི་དགག་གཞི་ཆོས་ཅན་གྱི་སྟེང་དུ་བུམ་པའི་དགག་གཞི བུམ་པའི་དགག་གཞི་ཆོས་ཅན་གྱི་སྟེང་དུ་བུམ་པའི་དགག་གཞི་ཡིན་པར་འདོད་ཅེས་རྩི་རིགས་པ་ཡིན་པའི་ཕྱིར་རོ། །ཀྭ་བུམ་གཉིས་ཀའི་དགག་གཞི་ཆོས་ཅན། བུམ་པའི་དགག་གཞི་ཡིན་པར་ཐལ། ཀྭ་བུམ་གཉིས་ཀའི་དགག་གཞི་ཡིན་པའི་ཕྱིར་ཟེར་ན་མ་ཁྱབ། འདོད་ན། ཀྭ་བུམ་གཉིས་ཀའི་དགག་གཞི་ཆོས་ཅན། བུམ་པའི་དགག་གཞི་མ་ཡིན་པར་ཐལ། བུམ་པ་ཡོད་པའི་ཕྱིར། དེར་ཐལ། ཀྭ་བུམ་གཉིས་ཀའི་དགག་གཞི་ཡིན་ན་བུམ་པ་མེད་པས་མ་ཁྱབ་པའི་ཕྱིར་ཟེར་ན་ཁ་ཅིག་མ་ཁྱབ་ཟེར། ཁྱབ་སྟེ། ཁྱོད་ཀྱི་སྟེང་དུ་བུམ་པ་ཡོད་པ་ལ་ཁྱོད་ཐམས་ཅད་ཀྱི་སྟེང་དུ་བུམ་པ་ཡོད་མི་དགོས་པའི་ཕྱིར། འོ་ན་ཀྭ་བུམ་གཉིས་ཀའི་དགག་གཞི་ཆོས་ཅན། ཀྭ་བུམ་གཉིས་ཡོད་པར་ཐལ། ཀ་བ་ཡོད་པ་གང་ཞིག བུམ་པ་ཡོད་པའི་ཕྱིར་ཟེར་ན། བསྡོམས་རྟགས་མ་གྲུབ་ཅེས་ལན་བཏབ་དགོས་པ་ཡིན་ནམ་དཔྱད་པར་བྱའོ།། །། བཅུ་དྲུག་པ་ཐལ་འགྱུར་ཆུང་ངུའི་རྣམ་བཞག་མདོར་བསྡུས་ཙམ་བཤད་པ།བཅུ་དྲུག་པ་ཐལ་འགྱུར་ཆུང་ངུའི་རྣམ་བཞག་མདོར་བསྡུས་ཙམ་བཤད་པ་ལ། སྤྱིར་ཐལ་འགྱུར་ལ། རྟགས་ཆོས་རེ་རེ་ཙམ་འགོད་པའི་ཐལ་འགྱུར་དང༌། རྩོད་གཞི་རྟགས་གསལ་དང་བཅས་པའི་ཐལ་འགྱུར་དང༌། ཆོས་ཅན་དུ་མ་བརྩེགས་པའི་ཐལ་འགྱུར་འགོད་ཚུལ་དང༌། གསལ་སྤུངས་ཀྱི་ཐལ་འགྱུར་འགོད་ཚུལ་དང༌། རྟགས་སྤུངས་ཀྱི་ཐལ་འགྱུར་འགོད་ཚུལ་དང༌། སྦུབས་ཚང་གི་ཐལ་འགྱུར་འགོད་ཚུལ་དང་དྲུག་ལས། དང་པོ་ཡོད་དེ། ཐལ་འགྱུར་དུ་བཀོད་འདོད་ནས། རྟག་པ་ཡིན་པའི་ཕྱིར་ཞེས་པའི་ཐལ་འགྱུར་དང༌། རྟག་པ་ཡིན་པར་ཐལ། ཞེས་པའི་ཐལ་འགྱུར་རེ་རེ་ནས་དེ་ཡིན་པའི་ཕྱིར། གཉིས་པ་ཡོད་དེ། སྒྲ་ཆོས་ཅན། མི་རྟག་པ་ཡིན་པར་ཐལ། བྱས་པ་ཡིན་པའི་ཕྱིར་ཞེས་པའི་ཐལ་འགྱུར་དེ་ཡིན་པའི་ཕྱིར། གསུམ་པ་ཡོད་དེ། རྣམ་མཁྱེན་ཆོས་ཅན། སྒྲ་ཆོས་ཅན། ཤེས་བྱ་ཆོས་ཅན། དངོས་པོ་ཡིན་པར་ཐལ། དོན་བྱེད་ནུས་པ་ཡིན་པའི་ཕྱིར། ཞེས་པའི་ཐལ་འགྱུར་དེ་ཡིན་པའི་ཕྱིར། བཞི་བ་ཡོད་དེ། སྒྲ་ཆོས་ཅན། ཡོད་པ་ཡིན་པར་ཐལ། ཤེས་བྱ་ཡིན་པར་ཐལ། བྱས་པ་ཡིན་པར་ཐལ། གཟུགས་ཡིན་པའི་ཕྱིར་ཞེས་པའི་ཐལ་འགྱུར་དེ་ཡིན་པའི་ཕྱིར། ལྔ་བ་ཡོད་དེ། རྣམ་མཁྱེན་ཆོས་ཅན། གཞལ་བྱ་ཡིན་པར་ཐལ། བློའི་རྟོགས་པར་བྱ་བ་ཡིན་པའི་ཕྱིར། ཚད་མའི་རྟོགས་པར་བྱ་བ་ཡིན་པའི་ཕྱིར། ཡོད་པ་ཡིན་པའི་ཕྱིར་ཞེས་པའི་ཐལ་འགྱུར་ལྟ་བུའོ། །དྲུག་པ་སྦུབས་འཚངས་ཀྱི་ཐལ་འགྱུར་འགོད་ཚུལ་ལ་གཉིས་ཡོད་དེ། རྩོད་གཞི་སྦུབས་འཚངས་དང༌། གསལ་བ་སྦུབས་འཚངས་དང་གཉིས་ཡོད་པའི་ཕྱིར། དང་པོ་ཡོད་དེ། རྣམ་མཁྱེན་ཆོས་ཅན། ཤེས་བྱ་ཆོས་ཅན། ཡོད་པ་ཆོས་ཅན། དངོས་པོ་ཡིན་པར་ཐལ། དངོས་པོ་ཡིན་པའི་ཕྱིར་ཞེས་པའི་ཐལ་འགྱུར་གྱི་རྟགས་གྲུབ་པར་ཐལ། བདག་མེད་ཡིན་པའི་ཕྱིར་ཞེས་པའི་ཐལ་འགྱུར་གྱི་རྗེས་ཁྱབ་རྣལ་མ་ངེས་པར་ཐལ། བདག་མེད་ཡིན་པའི་ཕྱིར་ཞེས་པའི་ཐལ་འགྱུར་དེ་ཡིན་པའི་ཕྱིར། དེ་འདྲའི་ཐལ་འགྱུར་དེ་རྩོད་གཞི་སྦུབས་འཚངས་ཀྱི་ཐལ་འགྱུར་ཡིན་ཚུལ་ཡོད་དེ། དེ་འདྲའི་ཐལ་འགྱུར་གྱི་ཕྱིར་སྒྲ་དང་པོ་གཉིས་ཀྱིས་ཆོས་ཅན་ཕྱི་མ་གཉིས་སྦུབས་སུ་དྲངས་པའི་ཕྱིར། དེར་ཐལ། དངོས་པོ་ཡིན་པའི་ཕྱིར་ཞེས་པ་དེས་ཡོད་པ་ཆོས་ཅན་ཞེས་པ་སྦུབས་སུ་དྲངས། བདག་མེད་ཡིན་པའི་ཕྱིར་ཞེས་པ་དེས་ཤེས་བྱ་ཆོས་ཅན་ཞེས་པ་དེ་སྦུབས་སུ་དྲངས་ནས་རྣམ་མཁྱེན་རྩོད་གཞི་ལུས་པ་ཡིན་པའི་ཕྱིར། དེར་ཐལ། དེའི་རྟགས་གསལ་རྩོད་གཞི་གསུམ་ངོས་འཛིན་པའི་ཚེ་ན། རྣམ་མཁྱེན་གྱིས་རྩོད་གཞི། ཤེས་བྱ་ཆོས་ཅན། ནས་རྗེས་ཁྱབ་རྣལ་མ་ངེས་ཀྱིས་བར་གསལ་བ། བདག་མེད་རྟགས་བྱས་པའི་ཐལ་འགྱུར་ཡིན་པའི་ཕྱིར། གཉིས་པ་གསལ་བ་སྦུབས་འཚངས་ཀྱི་ཐལ་འགྱུར་ཡོད་དེ། རྣམ་མཁྱེན་ཆོས་ཅན། དངོས་པོ་ཡིན་པར་ཐལ། བྱས་པ་ཡིན་པར་ཐལ། སྐད་ཅིག་མ་ཡིན་པར་ཐལ། མི་རྟག་པ་ཡིན་པར་ཐལ། དོན་བྱེད་ནུས་པ་ཡིན་པའི་ཕྱིར་ཞེས་པའི་ཐལ་འགྱུར་གྱི་རྟགས་གྲུབ་པའི་ཕྱིར་ཞེས་པའི་ཐལ་འགྱུར་གྱི་རྗེས་ཁྱབ་རྣལ་མ་ངེས་པའི་ཕྱིར་ཞེས་པའི་ཐལ་འགྱུར་ལ་ཁྱབ་པ་ཡོད་པའི་ཕྱིར། ཞེས་པའི་ཐལ་འགྱུར་དེ་ཡིན་པའི་ཕྱིར། དེར་ཐལ།དེ་འདྲའི་ཐལ་འགྱུར་གྱི་རྟགས་ཀྱི་ཕྱིར་སྒྲ་སྔ་མ་སྔ་མས་ཐལ་བ་ཕྱི་མ་ཕྱི་མ་སྦུབས་སུ་དྲངས་པ་ཡིན་པའི་ཕྱིར། དེར་ཐལ། དོན་བྱེད་ནུས་པ་ཡིན་པའི་ཕྱིར་ཞེས་པ་དེས་མི་རྟག་པ་ཡིན་པར་ཐལ་ཞེས་པ་དེ་སྦུབས་སུ་དྲངས། རྟགས་གྲུབ་པའི་ཕྱིར་ཞེས་པ་དེས་སྐད་ཅིག་མ་ཡིན་པར་ཐལ་ཞེས་པ་དེ་སྦུབས་སུ་དྲངས། རྗེས་ཁྱབ་རྣལ་མ་ངེས་པའི་ཕྱིར་ཞེས་པ་དེས་བྱས་པ་ཡིན་པར་ཐལ་ཞེས་པ་དེ་སྦུབས་སུ་དྲངས་པ་ཡིན་པའི་ཕྱིར། དེར་ཐལ། དེ་འདྲའི་ཐལ་འགྱུར་གྱི་རྟགས་གསལ་རྩོད་གཞི་གསུམ་ངོས་འཛིན་པའི་ཚེ་ན།རྣམ་མཁྱེན་རྩོད་གཞི། དངོས་པོས་གསལ་བ། བྱས་པ་ཡིན་པར་ཐལ་ཞེས་པ་ནས། ཁྱབ་པ་ཡོད་པའི་བར་གྱིས་རྟགས་བྱས་པའི་ཕྱིར། ཡང་ཁ་ཅིག་ན་རེ། རྟགས་གསལ་ཐ་མི་དད་ཀྱི་ཐལ་འགྱུར་ཡིན་ན་ཁྱོད་ཀྱི་རྟགས་གསལ་གཉིས་ཀ་ཐ་མི་དད་ཡིན་པས་ཁྱབ། ཁྱོད་ཀྱི་རྟགས་གསལ་གཉིས་ཀ་ཐ་མི་དད་ཡིན་ན་ཁྱོད་རྟགས་གསལ་ཐ་མི་དད་ཀྱི་ཐལ་འགྱུར་ཡིན་པས་ཁྱབ་ཟེར་ན། དང་པོ་ལ། རྟག་པ་ཡིན་པར་ཐལ། རྟག་པ་ཡིན་པའི་ཕྱིར་ཞེས་པའི་ཐལ་འགྱུར་ཆོས་ཅན། ཁྱོད་ཀྱི་རྟགས་གསལ་གཉིས་ཀ་ཐ་མི་དད་ཡིན་པར་ཐལ། ཁྱོད་རྟགས་གསལ་ཐ་མི་དད་ཀྱི་ཐལ་འགྱུར་ཡིན་པའི་ཕྱིར། ཁྱབ་པ་ཁས། མ་གྲུབ་ན། རྟག་པ་ཆོས་ཅན། ཁྱོད་ཡིན་པར་ཐལ། ཁྱོད་ཡིན་པའི་ཕྱིར་ཞེས་པའི་ཐལ་འགྱུར་རྟགས་གསལ་ཐ་མི་དད་ཀྱི་ཐལ་འགྱུར་ཡིན་པར་ཐལ། ཁྱོད་བདག་མེད་ཡིན་པའི་ཕྱིར། རྩ་བར་འདོད་ན། རྟག་པ་ཡིན་པར་ཐལ། རྟག་པ་ཡིན་པའི་ཕྱིར་ཞེས་པའི་ཐལ་འགྱུར་ཆོས་ཅན། ཁྱོད་ཀྱི་རྟགས་གསལ་གཉིས་ཀ་ཐ་མི་དད་མ་ཡིན་པར་ཐལ། ཁྱོད་ཀྱི་རྟགས་གསལ་གཉིས་ཀ་ཕན་ཚུན་ཐ་དད་ཡིན་པའི་ཕྱིར། གཉིས་པ་ལ། མེད་པ་ཡིན་པར་ཐལ། རི་བོང་རྭ་ཡིན་པའི་ཕྱིར་ཞེས་པའི་ཐལ་འགྱུར་ཆོས་ཅན། ཁྱོད་རྟགས་གསལ་ཐ་མི་དད་ཀྱི་ཐལ་འགྱུར་ཡིན་པར་ཐལ། ཁྱོད་ཀྱི་རྟགས་གསལ་གཉིས་ཀ་ཐ་མི་དད་ཡིན་པའི་ཕྱིར། ཁྱབ་པ་ཁས། མ་གྲུབ་ན། དེ་ཆོས་ཅན། དེར་ཐལ། ཁྱོད་ཀྱི་རྟགས་གསལ་གཉིས་ཀ་རེ་རེ་ནས་མེད་ངེས་ཡིན་པའི་ཕྱིར། གོང་དུ་འདོད་མི་ནུས་ཏེ། ཁྱོད་རྟགས་གསལ་ཐ་དད་ཀྱི་ཐལ་འགྱུར་ཡིན་པའི་ཕྱིར། དེར་ཐལ། ཁྱོད་མེད་པས་གསལ་བ། རི་བོང་རྭས་རྟགས་བྱས་པའི་ཐལ་འགྱུར་ཡིན་པའི་ཕྱིར། ཡང་ཁ་ཅིག་ན་རེ། ཐལ་འགྱུར་དེའི་བཀོད་ཚོད་ཀྱི་རྟགས་གྲུབ་ན་ཐལ་འགྱུར་དེའི་རྟགས་གྲུབ་པས་ཁྱབ་ཟེར་ན། གཟུགས་ཆོས་ཅན། ཤེས་བྱ་ཡིན་པར་ཐལ། རྟག་པ་ཡིན་པའི་ཕྱིར་ཞེས་པའི་ཐལ་འགྱུར་ཆོས་ཅན། དེར་ཐལ། དེའི་ཕྱིར། ཁྱབ་པ་ཁས། མ་གྲུབ་ན། དེ་ཆོས་ཅན། ཁྱོད་ཀྱི་བཀོད་ཚོད་ཀྱི་རྟགས་གྲུབ་པར་ཐལ། རྟག་པ་དེ་ཁྱོད་ཀྱི་བཀོད་ཚོད་ཀྱི་རྟགས་ཡིན་པ་གང་ཞིག དེ་གྲུབ་པའི་ཕྱིར། རྩ་བར་འདོད་ན། གཟུགས་ཆོས་ཅན། ཤེས་བྱ་ཡིན་པར་ཐལ། རྟག་པ་ཡིན་པའི་ཕྱིར་ཞེས་པའི་ཐལ་འགྱུར་ཆོས་ཅན། ཁྱོད་ཀྱི་རྟགས་མ་གྲུབ་པར་ཐལ། ཁྱོད་ཀྱི་རྟགས་ལ་རྟགས་མ་གྲུབ་ཀྱི་ལན་ཐེབས་པའི་ཕྱིར། མ་གྲུབ་ན། དེ་ཆོས་ཅན། དེར་ཐལ། ཁྱོད་ཀྱི་རྟགས་ལ་རྟགས་མ་གྲུབ་ཀྱི་ལན་བཏབ་པའི་ཚེ་སྒྲ་རྟག་པ་ཡིན་པ་རྟགས་མ་གྲུབ་ཅེས་རྩི་རིགས་པ་གང་ཞིག སྒྲ་རྟག་པ་མ་ཡིན་པའི་ཕྱིར། བྱས་པ་ལ་ཁོ་ན་རེ། སྒྲ་རྟག་པ་དེ་དེ་འདྲའི་ཐལ་འགྱུར་གྱི་རྟགས་ཡིན་པར་ཐལ། དེའི་རྟགས་མ་གྲུབ་པའི་རྒྱུ་མཚན་སྒྲ་རྟག་པ་ཡིན་པར་མ་གྲུབ་པའི་རྒྱུ་མཚན་གྱི་འཇོག་པའི་ཕྱིར་ན་མ་ཁྱབ། ཁ་ཅིག་གིས་ཐལ་འགྱུར་དེའི་རྟགས་གྲུབ་ན་བཀོད་ཚོད་ཀྱི་རྟགས་གྲུབ་པས་ཁྱབ་ཟེར་ན། རི་བོང་རྭ་ཆོས་ཅན། མེད་དེ། ཚད་མས་མ་དམིགས་པ་ཡིན་པའི་ཕྱིར་ཞེས་པའི་ཐལ་འགྱུར་ཆོས་ཅན།དེར་ཐལ། དེའི་ཕྱིར། ཁྱབ་པ་ཁས། ཐལ་འགྱུར་དེའི་བཀོད་ཚོད་ཀྱི་རྟགས་མ་གྲུབ་པར་ཐལ། ཚད་མས་མ་དམིགས་པ་དེ་དེའི་བཀོད་ཚོད་ཀྱི་རྟགས་གང་ཞིག དེ་མེད་པའི་ཕྱིར། ཚིག་འཁྲིའི་དབང་དུ་བྱས་ན། དངོས་པོས་གསལ་བ་དངོས་པོས་རྟགས་བྱས་པའི་ཐལ་འགྱུར་ཡིན་ན་རྟགས་གསལ་ཐ་མི་དད་ཀྱི་ཐལ་འགྱུར་ཡིན་པས་ཁྱབ་ཟེར་ན། གཟུགས་ཆོས་ཅན། ཡོད་པ་ཡིན་པར་ཐལ། དངོས་པོསགསལ་བ་དངོས་པོ་ཡིན་པའི་ཕྱིར་ཞེས་པའི་ཐལ་འགྱུར་ཆོས་ཅན།དེར་ཐལ། དེའི་ཕྱིར། ཁྱབ་པ་ཁས། རྟགས་གྲུབ་སྟེ། སྒྲས་རྩོད་གཞི། ཡོད་པས་གསལ་བ། དངོས་པོསགསལ་བ་དངོས་པོས་རྟགས་བྱས་པའི་ཐལ་འགྱུར་ཡིན་པའི་ཕྱིར། དེར་ཐལ། སྒྲས་རྩོད་གཞི། ཡོད་པས་གསལ་བ། དངོས་པོས་གསལ་བ་དངོས་པོས་རྟགས་བྱས་པའི་ཐལ་འགྱུར་ངོས་འཛིན་རྒྱུ་ཡོད་པའི་ཕྱིར། རྩ་བར་འདོད་མི་ནུས་ཏེ། རྟགས་གསལ་ཐ་དད་ཀྱི་ཐལ་འགྱུར་ཡིན་པའི་ཕྱིར།དེར་ཐལ། སྒྲས་རྩོད་གཞི། ཡོད་པས་གསལ་བ། དངོས་པོས་གསལ་བ་དངོས་པོས་རྟགས་བྱས་པའི་ཐལ་འགྱུར་ཡིན་པའི་ཕྱིར། ཁ་ཅིག་ན་རེ། སྒྲས་རྩོད་གཞི། ཡོད་པས་གསལ་བ། དངོས་པོས་གསལ་བ་དངོས་པོས་རྟགས་བྱས་པའི་ཐལ་འགྱུར་ཡིན་ན་རྟགས་གསལ་རྩོད་གཞི་གསུམ་ག་དང་ལྡན་པའི་ཐལ་འགྱུར་ཡིན་པས་ཁྱབ་ཟེར་ན། སྒྲས་རྩོད་གཞི། ཡོད་པས་གསལ་བ། དངོས་པོས་གསལ་བ་དངོས་པོ་ཡིན་པའི་ཕྱིར་ཞེས་པའི་ཐལ་འགྱུར་ཆོས་ཅན། དེར་ཐལ། དེའི་ཕྱིར། འདོད་མི་ནུས་ཏེ། རྟགས་ཙམ་བཀོད་པའི་ཐལ་འགྱུར་ཡིན་པའི་ཕྱིར།ཁ་ཅིག་ན་རེ། དངོས་པོ་ཡིན་པར་ཐལ། དངོས་པོ་ཡིན་པའི་ཕྱིར་ཞེས་པའི་ཐལ་འགྱུར་གྱི་རྟགས་མིན་ཟེར་ན། དངོས་པོ་ཡིན་པར་ཐལ། དངོས་པོ་ཡིན་པའི་ཕྱིར་ཞེས་པའི་ཐལ་འགྱུར་གྱི་རྟགས་ཡིན་པར་ཐལ། དངོས་པོ་ཡོད་པ་ཡིན་པར་ཐལ། དངོས་པོ་ཡོད་པ་ཡིན་པའི་ཕྱིར་ཞེས་པའི་ཐལ་འགྱུར་གྱི་རྟགས་ཡིན་པའི་ཕྱིར། མ་གྲུབ་ན། ཡོད་པ་ཡིན་པར་ཐལ། དངོས་པོ་ཡིན་པའི་ཕྱིར་ཞེས་པའི་ཐལ་འགྱུར་གྱི་རྟགས་འཇོག་པའི་ཚེ་ན། དངོས་པོ་དེ་འཇོག་དགོས་པའི་ཕྱིར། དེར་ཐལ།ཡོད་པ་ཡིན་པར་ཐལ། དངོས་པོ་ཡིན་པའི་ཕྱིར་ཞེས་པའི་ཐལ་འགྱུར་གྱི་རྟགས་ངོས་འཛིན་རྒྱུ་ཡོད་པའི་ཕྱིར་རོ།། །། བཅུ་བདུན་པ་དུས་གསུམ་གྱི་རྣམ་བཞག་བཤད་པ།བཅུ་བདུན་པ་དུས་གསུམ་གྱི་རྣམ་བཞག་བཤད་པ་ལ། དགག་བཞག་སྤོང་གསུམ་ལས། དང་པོ་ནི། ཁ་ཅིག་ན་རེ། གཞི་གྲུབ་ན། འདས་མ་འོངས་ད་ལྟ་བ་གསུམ་པོ་གང་རུང་ཡིན་པས་ཁྱབ་ཟེར་ན། ཤེས་བྱ་ཆོས་ཅན། འདས་མ་འོངས་ད་ལྟ་བ་གསུམ་པོ་གང་རུང་ཡིན་པར་ཐལ། གཞི་གྲུབ་པའི་ཕྱིར། ཁྱབ་པ་ཁས། མ་གྲུབ་ན། དེ་ཆོས་ཅན། དེར་ཐལ། ཚད་མས་གྲུབ་པའི་ཕྱིར། རྩ་བར་འདོད་ན། ཤེས་བྱ་ཆོས་ཅན། འདས་མ་འོངས་ད་ལྟ་བ་གསུམ་པོ་གང་རུང་མ་ཡིན་པར་ཐལ།ད་ལྟ་བ་མ་ཡིན་པ་གང་ཞིག འདས་པ་ཡང་མ་ཡིན། མ་འོངས་པ་ཡང་མ་ཡིན་པའི་ཕྱིར། རྟགས་དང་པོ་མ་གྲུབ་ན། ཤེས་བྱ་ཆོས་ཅན། ད་ལྟ་བ་མ་ཡིན་པར་ཐལ། དངོས་པོ་མ་ཡིན་པའི་ཕྱིར། མ་ཁྱབ་ན་ཁྱབ་བ་ཡོད་པར་ཐལ། དངོས་པོ་དང་ད་ལྟ་བ་དོན་གཅིག་ཡིན་པའི་ཕྱིར། གཉིས་པ་མ་གྲུབ་ན། ཤེས་བྱ་ཆོས་ཅན། འདས་པ་མ་ཡིན་པར་ཐལ། དངོས་པོ་གཞན་ཞིག་པའི་ཆ་མ་ཡིན་པའི་ཕྱིར། ཁྱབ་སྟེ། འདས་པ་དང༌།ཞིག་ཆ་དང༌། ཞིག་པ་དང༌། གཞན་ཞིག་པའི་ཆ་རྣམས་དོན་གཅིག་ཡིན་པའི་ཕྱིར།གསུམ་པ་མ་གྲུབ་ན། ཤེས་བྱ་ཆོས་ཅན། མ་འོངས་པ་མ་ཡིན་པར་ཐལ། ཆོས་གཞན་མ་སྐྱེས་པའི་ཆ་མ་ཡིན་པའི་ཕྱིར། ཁྱབ་སྟེ། མ་འོངས་པ་དང༌། ཆོས་གཞན་མ་སྐྱེས་པའི་ཆ་དང༌། དངོས་པོ་གཞན་མ་སྐྱེས་པའི་ཆར་གྱུར་བའི་མེད་དགག་རྣམས་དོན་གཅིག་ཡིན་པའི་ཕྱིར། ཁ་ཅིག་ན་རེ། བུམ་པའི་དུས་སུ་འདས་པའམ་བུམ་པ་ལ་ལྟོས་ཏེ་འདས་པ་ཡིན་ན་བུམ་པའི་འདས་པ་ཡིན་པས་ཁྱབ། བུམ་པ་ལ་ལྟོས་ཏེ་མ་འོངས་པ་ཡིན་ན་མ་འོངས་པ་ཡིན་པས་ཁྱབ་ཟེར་ན། དང་པོ་ལ། བུམ་པའི་རྒྱུ་ཆོས་ཅན། བུམ་པའི་འདས་པ་ཡིན་པར་ཐལ། བུམ་པ་ལ་ལྟོས་ཏེ་འདས་པ་ཡིན་པའི་ཕྱིར། ཁྱབ་པ་ཁས། མ་གྲུབ་ན། བུམ་པའི་རྒྱུ་ཆོས་ཅན། བུམ་པ་ལ་ལྟོས་ཏེ་འདས་པ་ཡིན་པར་ཐལ། བུམ་པ་ལ་ལྟོས་ཏེ་ཐལ་ཟིན་པ་ཡིན་པའི་ཕྱིར། མ་གྲུབ་ན། བུམ་པ་ཆོས་ཅན། ཁྱོད་ཀྱི་རྒྱུ་ཁྱོད་ལ་ལྟོས་ཏེ་འགག་ཟིན་པ་ཡིན་པར་ཐལ། ཁྱོད་དངོས་པོ་ཡིན་པའི་ཕྱིར། རྩ་བར་འདོད་ན། བུམ་པའི་རྒྱུ་ཆོས་ཅན། བུམ་པའི་འདས་པ་མ་ཡིན་པར་ཐལ། འདས་པ་མ་ཡིན་པའི་ཕྱིར། མ་གྲུབ་ན། དེ་ཆོས་ཅན། འདས་པ་མ་ཡིན་པར་ཐལ། ཞིག་ཟིན་པ་མ་ཡིན་པའི་ཕྱིར། དེར་ཐལ། དངོས་པོ་ཡིན་པའི་ཕྱིར། གཉིས་པ་ལ། བུམ་པའི་འབྲས་བུ་ཆོས་ཅན། བུམ་པའི་མ་འོངས་པ་ཡིན་པར་ཐལ། བུམ་པ་ལ་ལྟོས་ཏེ་མ་འོངས་པ་ཡིན་པའི་ཕྱིར། ཁྱབ་པ་ཁས། མ་གྲུབ་ན། དེ་ཆོས་ཅན། བུམ་པ་ལ་ལྟོས་ཏེ་མ་འོངས་པ་ཡིན་པར་ཐལ། བུམ་པའི་དུས་སུ་མ་འོངས་པ་ཡིན་པའི་ཕྱིར། མ་གྲུབ་ན། བུམ་པ་ཆོས་ཅན། ཁྱོད་ཀྱི་འབྲས་བུ་ཁྱོད་ཀྱི་དུས་སུ་མ་འོངས་པ་ཡིན་པར་ཐལ། ཁྱོད་དངོས་པོ་ཡིན་པའི་ཕྱིར། རྩ་བར་འདོད་ན། བུམ་པའི་འབྲས་བུ་ཆོས་ཅན། བུམ་པའི་མ་འོངས་པ་མ་ཡིན་པར་ཐལ། མ་འོངས་པ་མ་ཡིན་པའི་ཕྱིར། མ་གྲུབ་ན། དེ་ཆོས་ཅན། མ་འོངས་པ་མ་ཡིན་པར་ཐལ། ད་ལྟ་བ་ཡིན་པའི་ཕྱིར། མ་གྲུབ་ན། དེ་ཆོས་ཅན། ད་ལྟ་བ་ཡིན་པར་ཐལ། དངོས་པོ་ཡིན་པའི་ཕྱིར། ཁ་ཅིག་ན་རེ། མ་འོངས་པ་མེད་པར་ཐལ། སྐྱེ་བ་ལ་མངོན་དུ་ཕྱོགས་པ་མེད་པའི་ཕྱིར་ན་མ་ཁྱབ། མ་གྲུབ་ན། སྐྱེ་བ་ལ་མངོན་དུ་ཕྱོགས་པ་མེད་པར་ཐལ། འདུས་བྱས་ཡིན་ན་སྐྱེས་ཟིན་པ་ཡིན་པས་ཁྱབ། དེ་ལས་གཞན་ལ་སྐྱེ་བ་མེད་པའི་ཕྱིར། ཁ་ཅིག་སྐྱེ་བ་ལ་མངོན་དུ་ཕྱོགས་པ་ཡོད་པར་ཐལ། མྱུ་གུ་སྐྱེ་བ་ལ་མངོན་དུ་ཕྱོགས་པ་ཡོད་པའི་ཕྱིར་ན་མ་ཁྱབ། མ་གྲུབ་ན། དེར་ཐལ། མྱུ་གུ་སྐྱེ་བ་ལ་མངོན་དུ་ཕྱོགས་པའི་དུས་ཡོད་པའི་ཕྱིར། མ་གྲུབ་ན། དེར་ཐལ། མྱུ་གུའི་དངོས་རྒྱུའི་དུས་དེ་ཡིན་པའི་ཕྱིར། ཁ་ཅིག་ན་རེ། མྱུ་གུ་སྐད་གཅིག་གཉིས་པའི་དུས་དེ་མྱུ་གུ་འཇིག་དུས་ཡིན་ཟེར་ན། མྱུ་གུ་སྐད་ཅིག་གཉིས་པའི་དུས་ཆོས་ཅན། མྱུ་གུ་འཇིག་དུས་མ་ཡིན་པར་ཐལ། མྱུ་གུ་གནས་དུས་ཡིན་པའི་ཕྱིར། མ་གྲུབ་ན། མྱུ་གུ་ཆོས་ཅན། ཁྱོད་སྐད་ཅིག་སྔ་ཕྱི་བར་གསུམ་གྱི་དུས་དེ་ཁྱོད་ཀྱི་གནས་དུས་ཡིན་པར་ཐལ། ཁྱོད་སྐད་ཅིག་སྔ་ཕྱི་བར་གསུམ་ཀའི་བདག་ཉིད་ཅན་གྱི་དངོས་པོ་ཡིན་པའི་ཕྱིར། ཁ་ཅིག་ན་རེ། མྱུ་གུ་འཇིག་དུས་མེད་པར་ཐལ། མྱུ་གུ་སྐད་ཅིག་གཉིས་པའི་དུས་དེ་མ་ཡིན་པའི་ཕྱིར་ན་མ་ཁྱབ། མྱུ་གུའི་རང་དུས་དེ་ལས་སྐད་ཅིག་གཉིས་པའི་དུས་དེ་མྱུ་གུ་འཇིག་དུས་ལ་འཇོག་དགོས་པའི་ཕྱིར། དེར་ཐལ། མྱུ་གུ་དེ་ནམ་འཇིག་ཅེ་ན། རང་དུས་དེ་ལས་སྐད་ཅིག་གཉིས་པར་འཇིག་ཅེས་བཤད་དགོས་པའི་ཕྱིར། ཁ་ཅིག་ན་རེ། ཞིག་པའི་དངོས་པོ་ཡོད་པར་ཐལ། འགག་པའི་དངོས་པོ་ཡོད་པའི་ཕྱིར། མ་གྲུབ་ན། འགག་པའི་དངོས་པོ་ཡོད་པར་ཐལ། ཤི་བའི་མི་ཡོད་པའི་ཕྱིར། མ་གྲུབ་ན། ཤི་བའི་མི་ཡོད་པར་ཐལ། མི་ཤི་བ་ཡོད་པའི་ཕྱིར་ན་མ་ཁྱབ། ཁ་ཅིག་ན་རེ། ཤི་བའི་མི་ཡོད་པར་ཐལ། བསད་པའི་མི་ཡོད་པའི་ཕྱིར། མ་གྲུབ་ན། དེར་ཐལ། ལྷ་ལུང་དཔལ་གྱི་རྡོ་རྗེས་གླང་དར་མ་བསད་པའི་ཕྱིར་ན་མ་ཁྱབ། བྱས་པ་ལ་ཁོ་ན་རེ། གླང་དར་མའི་སྲོག་དབང་འགག་པར་ཐལ། ལྷ་ལུང་དཔལ་རྡོར་གྱིས་གླང་དར་མའི་སྲོག་དབང་འགག་པར་བྱས་པའི་ཕྱིར་ན་མ་ཁྱབ། ཁྱོད་རང་ལ་སྣང་བས་བསལ་བྱའི་མུན་པ་འགག་པར་ཐལ། སྣང་བ་རང་གི་བསལ་བྱའི་མུན་པ་འགག་པར་བྱས་པའི་ཕྱིར། ཁྱབ་པ་འགྲིག གཞན་ཡང་སྒྲིབ་པ་འགག་པ་ཐལ། རྒྱུན་མཐའི་བར་ཆད་མེད་ལམ་གྱིས་སྒྲིབ་པ་འགག་པར་བྱས་པའི་ཕྱིར། ཁྱབ་པ་འགྲིག ཁ་ཅིག་ན་རེ། ཞིག་པའི་དངོས་པོ་ཡོད་པར་ཐལ། འདས་པའི་དངོས་པོ་ཡོད་པའི་ཕྱིར། མ་གྲུབ་ན། འདས་པའི་དངོས་པོ་ཡོད་པར་ཐལ། འདས་པའི་མི་ཡོད་པའི་ཕྱིར། མ་གྲུབ་ན། འདས་པའི་མི་ཡོད་པར་ཐལ། འདས་པའི་སངས་རྒྱས་ཡོད་པའི་ཕྱིར་ཟེར་ན་མ་ཁྱབ། མ་གྲུབ་ན། འདས་པའི་སངས་རྒྱས་ཡོད་པར་ཐལ། དུས་གསུམ་གྱི་སངས་རྒྱས་ཡོད་པའི་ཕྱིར་རོ། ། གཉིས་པ་རང་ལུགས་བཤད་པ།གཉིས་པ་རང་ལུགས་བཤད་པ་ལ། ད་ལྟ་བའི་མཚན་ཉིད་ཡོད་དེ། རང་གི་ངོ་བོ་སྐྱེས་ལ་མ་འགག་པ་དེ་ཡིན་པའི་ཕྱིར། ད་ལྟ་བ་དང་དངོས་པོ་དོན་གཅིག། མྱུ་གུ་སྐྱེ་བ་ལ་མངོན་དུ་ཕྱོགས་པའི་དུས་ཡོད་དེ། མྱུ་གུའི་དངོས་རྒྱུའི་དུས་དེ་ཡིན་པའི་ཕྱིར། མྱུ་གུ་སྐྱེ་བའི་དུས་ཡོད་དེ། མྱུ་གུ་སྐད་ཅིག་དང་པོའི་དུས་དེ་ཡིན་པའི་ཕྱིར། མྱུ་གུ་གནས་དུས་བཞག་དུ་ཡོད་དེ། མྱུ་གུའི་སྐད་ཅིག་སྔ་ཕྱི་བར་གསུམ་གའི་དུས་དེ་ཡིན་པའི་ཕྱིར། མྱུ་གུའི་འཇིག་དུས་བཞག་དུ་ཡོད་དེ། མྱུ་གུའི་རང་དུས་དེ་ལས་སྐད་ཅིག་གཉིས་པའི་དུས་དེ་ཡིན་པའི་ཕྱིར། མ་འོངས་པའི་མཚན་ཉིད་ཡོད་དེ། དངོས་པོ་དེ་སྐྱེ་བའི་རྒྱུ་ཡོད་ལ་རྐྱེན་མ་ཚང་བའི་དབང་གིས་རེ་ཞིག་མ་སྐྱེས་པའི་ཆར་གྱུར་བའི་མེད་དགག་དེ་ཡིན་པའི་ཕྱིར། མྱུ་གུའི་མ་འོངས་པའི་མཚན་ཉིད་ཡོད་དེ། མྱུ་གུ་སྐྱེ་བའི་རྒྱུ་ཡོད་ལ། རྐྱེན་མ་ཚང་བའི་དབང་གིས་རེ་ཞིག་མྱུ་གུ་མ་སྐྱེས་པའི་ཆར་གྱུར་བའི་མེད་དགག་དེ་ཡིན་པའི་ཕྱིར། མྱུ་གུའི་མ་འོངས་པ་དང་མྱུ་གུའི་མ་འོངས་པའི་དུས་གཉིས་མི་འདྲ་སྟེ། དེ་གཉིས་འགལ་བ་ཡིན་པའི་ཕྱིར། དེར་ཐལ། མྱུ་གུའི་རྒྱུ་དུས་དེ་མྱུ་གུ་མ་འོངས་པའི་དུས་ཡིན་ལ། མྱུ་གུའི་མ་འོངས་པ་མ་ཡིན་པའི་ཕྱིར། མྱུ་གུའི་རྒྱུའི་དུས་སུ་མྱུ་གུ་མ་སྐྱེས་པའི་ཆ་དེ་མྱུ་གུའི་མ་འོངས་པ་ཡིན་ལ། མྱུ་གུའི་མ་འོངས་པའི་དུས་མ་ཡིན་པའི་ཕྱིར། འདས་པའི་མཚན་ཉིད་ཡོད་དེ། རང་གི་དགག་བྱའི་དངོས་པོ་དེ་སྐྱེས་ཟིན་འགག་པའི་ཆ་དེ་ཡིན་པའི་ཕྱིར། མྱུ་གུའི་འདས་པའི་མཚན་ཉིད་ཡོད་དེ། མྱུ་གུ་འགག་པའི་ཆ་དེ་ཡིན་པའི་ཕྱིར། མྱུ་གུའི་ཞིག་པ་དང་མྱུ་གུའི་འདས་པ་གཉིས་དོན་གཅིག མྱུ་གུའི་འདས་པ་དང་མྱུ་གུའི་འདས་པའི་དུས་གཉིས་མི་གཅིག་སྟེ། མྱུ་གུའི་འབྲས་དུས་དེ་མྱུ་གུའི་འདས་པའི་དུས་ཡིན་ལ། མྱུ་གུའི་འདས་པ་མ་ཡིན་པའི་ཕྱིར། མྱུ་གུའི་ཞིག་པ་དེ་མྱུ་གུའི་འདས་པ་ཡིན་ལ། མྱུ་གུའི་འདས་པའི་དུས་མ་ཡིན་པའི་ཕྱིར། གཏན་ཚིགས་རིགས་པའི་དོན་བསྡུས་ལས་དུས་གསུམ་གྱི་མཚན་ཉིད་འདི་ལྟར་གསུངས་ཏེ། དེ་ལས། སྔ་ཕྱིའི་སྒོ་ནས་དབྱེ་ན། འདས་མ་འོངས་ད་ལྟར་བྱུང་བ་སྟེ་གསུམ་མོ། །མཚན་ཉིད་ནི་རིམ་པ་ལྟར། སྔོན་བྱུང་བའི་སྟོབས་ཀྱིས་འགགས་པ་དང༌། ས་བོན་ཡོད་སྟོབས་ཀྱིས་ཕྱིས་འབྱུང་འགྱུར་ཡིན་པ་དང༌། སྐྱེས་ལ་མ་འགགས་པའོ། །ཞེས་གསུངས་སོ། །དུས་གསུམ་འདོད་ཚུལ། བྱེ་བྲག་སྨྲ་བས་དུས་གསུམ་དངོས་པོ་དང། དཔལ་ལྡན་ཐལ་འགྱུར་བས་དུས་གསུམ་དང་ཞིག་པ་དངོས་པོ་འདོད་པའོ།། གསུམ་པ་དེ་ལ་རྩོད་སྤོང་ལ།གསུམ་པ་དེ་ལ་རྩོད་སྤོང་ལ། ཁ་ཅིག་ན་རེ། འདས་པའི་དངོས་པོ་ཡོད་པར་ཐལ། འདས་པའི་དུས་ཡོད་པའི་ཕྱིར་ན་མ་ཁྱབ། ཁོ་ན་རེ་ཁྱབ་པ་ཡོད་པར་ཐལ། དུས་ཡིན་ན་དངོས་པོ་ཡིན་དགོས་པའི་ཕྱིར་ན་མ་ཁྱབ། ཁ་ཅིག་ན་རེ། འདས་པའི་དུས་ཆོས་ཅན། འདས་པའི་དུས་མ་ཡིན་པར་ཐལ། ད་ལྟ་བའི་དུས་ཡིན་པའི་ཕྱིར། མ་གྲུབ་ན། འདས་པའི་དུས་ཆོས་ཅན། ད་ལྟ་བའི་དུས་ཡིན་པར་ཐལ། ད་ལྟ་བ་དང་དུས་གཉིས་ཀ་ཡིན་པའི་ཕྱིར་ན་མ་ཁྱབ། རྟགས་གྲུབ་སྟེ། དུས་ཡིན་པའི་ཕྱིར།ཁ་ཅིག་ན་རེ། འདས་པའི་སངས་རྒྱས་མེད་པར་ཐལ། སངས་རྒྱས་མར་མེ་མཛད་དེ་མ་ཡིན་པའི་ཕྱིར། མ་གྲུབ་ན། སངས་རྒྱས་མར་མེ་མཛད་ཆོས་ཅན། འདས་པའི་སངས་རྒྱས་མ་ཡིན་པར་ཐལ། ད་ལྟ་བའི་སངས་རྒྱས་ཡིན་པའི་ཕྱིར། མ་གྲུབ་ན། སངས་རྒྱས་མར་མེ་མཛད་ཆོས་ཅན། ད་ལྟ་བའི་སངས་རྒྱས་ཡིན་པར་ཐལ། ད་ལྟ་བ་དང་སངས་རྒྱས་གཉིས་ཀ་ཡིན་པའི་ཕྱིར་ན་མ་ཁྱབ། ད་ལྟར་གྱི་དུས་ལ་འདས་པའི་སངས་རྒྱས་ཡིན་པས་འདས་པའི་སངས་རྒྱས་ལ་བཞག་པའི་ཕྱིར། འོ་ན་འདས་པའི་དངོས་པོ་ཡོད་པར་ཐལ། ད་ལྟར་གྱི་དུས་ལ་འདས་པའི་དངོས་པོ་ཡོད་པའི་ཕྱིར་ན་མ་ཁྱབ་པ་ཡིན་ནོ།། །། བཅོ་བརྒྱད་པ་རང་མཚན་སྤྱི་མཚན་གྱི་རྣམ་བཞག་བཤད་པ།བཅོ་བརྒྱད་པ་རང་མཚན་སྤྱི་མཚན་གྱི་རྣམ་བཞག་བཤད་པ་ལ། རྣམ་འགྲེལ་ལས། དོམ་དམ་དོན་བྱེད་ནུས་པ་གང༌། །དེ་འདིར་དོན་དམ་ཡོད་པ་ཡིན། །གཞན་ནི་ཀུན་རྫོབ་ཡོད་པ་སྟེ། །དེ་དག་རང་སྤྱིའི་མཚན་ཉིད་བཤད། །ཅེས་པའི་གཞུང་འདི་བྱུང༌། དེའི་མཐའ་དཔྱད་པ་ལ། དགག་བཞག་སྤོང་གསུམ་ལས། དང་པོ་ནི། ཁ་ཅིག་ན་རེ། མངོན་སུམ་གྱི་ཚད་མའི་གཞལ་བྱ་ཡིན་ན་རང་མཚན་ཡིན་པས་ཁྱབ། རྗེས་དཔག་གི་ཚད་མའི་གཞལ་བྱ་ཡིན་ན་སྤྱི་མཚན་ཡིན་པས་ཁྱབ་ཟེར་ན། དང་པོ་ལ། ཤེས་བྱ་ཆོས་ཅན། རང་མཚན་ཡིན་པར་ཐལ། མངོན་སུམ་གྱི་ཚད་མའི་གཞལ་བྱ་ཡིན་པའི་ཕྱིར། ཁྱབ་པ་ཁས། མ་གྲུབ་ན། དེར་ཐལ། གཞི་གྲུབ་པའི་ཕྱིར། ཁྱབ་སྟེ། ནང་བའི་གྲུབ་མཐའ་བཞི་གའི་གཞི་གྲུབ་ན་མངོན་སུམ་གྱི་ཚད་མའི་གཞལ་བྱ་ཡིན་པས་ཁྱབ་པར་བཞེད་པ་ལ་མི་འདྲ་བ་མེད་ལ། གཞི་གྲུབ་ན་མངོན་སུམ་གྱི་ཚད་མའི་དངོས་གཞལ་ཡིན་པས་ཁྱབ་པ་དབུ་མ་བས་འདོད་ལ། མདོ་སྡེ་བས་མངོན་སུམ་ཚད་མའི་དངོས་གཞལ་དང་དངོས་པོ་དང་དོན་དམ་བདེན་པ་དང་རང་མཚན་དང་གཞན་དབང་དང་རྟེན་འབྲེལ་རྣམས་དོན་གཅིག་ཡིན་པར་བཞེད་དོ། །རྩ་བར་འདོད་ན། ཤེས་བྱ་ཆོས་ཅན། རང་གི་མཚན་ཉིད་ཀྱིས་གྲུབ་པར་ཐལ། རང་མཚན་ཡིན་པའི་ཕྱིར། རྟགས་ཁས། འདོད་མི་ནུས་ཏེ། སྤྱི་མཚན་ཡིན་པའི་ཕྱིར། དེར་ཐལ། རྟོག་བཏགས་ཙམ་དུ་གྲུབ་པའི་ཆོས་ཡིན་པའི་ཕྱིར། ཁ་ཅིག་ན་རེ། གཞི་གྲུབ་ན་རང་མཚན་ཡིན་པས་ཁྱབ་ཟེར་ན། ནམ་མཁའ་ཆོས་ཅན། རང་མཚན་ཡིན་པར་ཐལ། གཞི་གྲུབ་པའི་ཕྱིར། ཁྱབ་པ་ཁས། འདོད་ན། ནམ་མཁའ་ཆོས་ཅན། རང་གི་མཚན་ཉིད་ཀྱིས་གྲུབ་པར་ཐལ། རང་མཚན་ཡིན་པའི་ཕྱིར། རྟགས་ཁས། འདོད་ན། ནམ་མཁའ་ཆོས་ཅན། རང་གི་མཚན་ཉིད་ཀྱིས་མ་གྲུབ་པར་ཐལ། རྟོག་པས་བཏགས་པ་ཙམ་ཡིན་པའི་ཕྱིར། མ་གྲུབ་ན། ནམ་མཁའ་ཆོས་ཅན། རྟོག་པས་བཏགས་པ་ཙམ་ཡིན་པར་ཐལ། དངོས་མེད་ཀྱི་ཆོས་ཡིན་པའི་ཕྱིར། ཁ་ཅིག་ན་རེ། རྟོག་པས་བཏགས་ཙམ་ཡིན་ན་སྤྱི་མཚན་ཡིན་པས་ཁྱབ་ཟེར་ན། གང་ཟག་གི་བདག་ཆོས་ཅན། སྤྱི་མཚན་ཡིན་པར་ཐལ། རྟོག་པས་བཏགས་ཙམ་ཡིན་པའི་ཕྱིར། ཁྱབ་པ་ཁས། འདོད་ན། ཡོད་པར་ཐལ། སྤྱི་མཚན་ཡིན་པའི་ཕྱིར། འདོད་མི་ནུས་ཏེ། མེད་པ་ཡིན་པའི་ཕྱིར། མདོ་སྡེ་བའི་ལུགས་ལ་ཁ་ཅིག་ན་རེ། ཤེས་བྱ་འཛིན་པའི་རྟོག་པ་ཆོས་ཅན། སྤྱི་མཚན་ཡིན་པར་ཐལ།ཀུན་རྫོབ་བདེན་པ་ཡིན་པའི་ཕྱིར། མ་གྲུབ་ན། དེ་ཆོས་ཅན། ཀུན་རྫོབ་བདེན་པ་ཡིན་པར་ཐལ། ཀུན་རྫོབ་བདེན་པ་ཞེས་པའི་ཚིག་ཟུར་གྱི་ཀུན་རྫོབ་ཡིན་པའི་ཕྱིར་ན་མ་ཁྱབ། རྟགས་གྲུབ་སྟེ། ཀུན་རྫོབ་བདེན་པ་ཞེས་པའི་ཚིག་ཟུར་གྱི་ཀུན་རྫོབ་རྟོག་པ་ལ་བྱས་ནས་ཤེས་བྱ་དེའི་ཡུལ་དུ་ཡོད་པས་ན་ཀུན་རྫོབ་བདེན་པ་ཞེས་སྒྲ་བཤད་པ་ཡིན་པའི་ཕྱིར། རྩ་བར་འདོད་ན། ཤེས་བྱ་འཛིན་པའི་རྟོག་པ་ཆོས་ཅན། ཁྱོད་སྣང་ཡུལ་དུ་བྱེད་པའི་མངོན་སུམ་མེད་པར་ཐལ། སྤྱི་མཚན་ཡིན་པའི་ཕྱིར། རྟགས་ཁས། འདོད་མི་ནུས་ཏེ། ཁྱོད་སྣང་ཡུལ་དུ་བྱེད་པའི་མངོན་སུམ་ཡོད་པར་ཐལ། ཁྱོད་ཉམས་མྱོང་གི་རང་རིག་དེ་ཡིན་པའི་ཕྱིར། མ་གྲུབ་ན། དེ་ཆོས་ཅན། ཁྱོད་སྣང་ཡུལ་བྱེད་པའི་ཉམས་མྱོང་གི་རང་རིག་ཡོད་པར་ཐལ། ཁྱོད་ཤེས་པ་ཡིན་པའི་ཕྱིར། གཉིས་པ་རང་ལུགས་བཤད་པ།གཉིས་པ་རང་ལུགས་བཤད་པ་ལ། སྒྲ་རྟོག་གིས་བཏགས་པ་ཙམ་མ་ཡིན་པར་རང་གི་མཚན་ཉིད་ཀྱིས་གྲུབ་པའི་ཆོས་དེ་རང་མཚན་གྱི་མཚན་ཉིད། རང་མཚན་དང་གཞན་དབང་དང༌། རྫས་ཡོད། རྫས་ཡོད་ཀྱི་དངོས་པོ་རྣམས་དོན་གཅིག མཚན་གཞི་ནི། སེམས་སེམས་བྱུང་དང༌། གཟུགས་སོགས་དེ་ཡིན་ནོ། །མདོ་སྡེ་བའི་ལུགས་ལ་རང་མཚན་གྱི་མཚན་ཉིད་ཡོད་དེ། གཏན་ཚིགས་རིགས་པའི་དོན་བསྡུས་ལས། རང་མཚན་དང་སྤྱི་མཚན་ལ། མཚན་ཉིད་རིམ་པ་ལྟར། དོན་དམ་པར་དོན་བྱེད་ནུས་པ་དང༌། དོན་དམ་པར་དོན་བྱེད་མི་ནུས་པའི་ཆོས་ཞེས་པའོ། །དབྱེ་ན། དང་པོ་ལ་བེམ་པོ་དང་ཤེས་པ་རང་མཚན་གཉིས་སོ། །གཉིས་པ་ལ་དངོས་པོ་ཡིན་མིན་གྱི་དབང་གི་གཉིས་སམ། སྤྱི་ཡིན་མིན་གྱི་དབང་གིས་གཉིས་སོ། །ཞེས་གསུངས་སོ། །འདི་བས་ལུགས་ལ་དོན་དམ་བདེན་པ་དང༌། དངོས་པོ་དང༌། གཞན་དབང༌། རང་མཚན་རྣམས་དོན་གཅིག སྤྱི་མཚན་དང༌། ཀུན་རྫོབ་བདེན་པ་དང༌། དངོས་མེད་ཀྱི་ཆོས་རྣམས་དོན་གཅིག སྤྱི་མཚན་ལ། ཀུན་བཏགས་དང༌། ཡོངས་གྲུབ་གཉིས་སོ། །གོང་གི་ལུང་གི་ཚིག་ཟིན་དང་བསྟུན་ན་ཅུང་ཟད་དཔྱད་རྒྱུ་སྣང༌། རང་ལུགས་ལ། བཏགས་ཡོད་ཀྱི་དངོས་པོ་རྣམས་ཀུན་བཏགས་ཡིན་པས་རང་མཚན་མ་ཡིན་ལ། དེས་ན་རང་མཚན་ལ་རྫས་ཡོད་ཀྱི་དངོས་པོ་ཡིན་དགོས། དོན་དམ་དེ་བཞིན་ཉིད་དེ་རང་སྤྱི་གང་ཡང་མ་ཡིན་ནམ་སྙམ། སྤྱི་མཚན་གྱི་མཚན་ཉིད་ཡོད་དེ། སྒྲ་རྟོག་གིས་བཏགས་པ་ཙམ་གྱི་ཆོས་དེ་ཡིན་པའི་ཕྱིར། སྤྱི་མཚན་དང་བཏགས་ཡོད་ཀྱི་ཆོས་དོན་གཅིག བཏགས་ཡོད་ལ། བཏགས་ཡོད་ལྡན་མིན་དང༌། བཏགས་ཡོད་འབའ་ཞིག་པ་དང་གཉིས་ཡོད་པར་ཐེག་མཆོག་ཊཱིཀ་ཟིན་ལྟར་ཤེས་པར་བྱའོ། །མཚན་ཉིད་གསུམ་གྱི་མཚན་ཉིད་ནི། གཏན་ཚིགས་རིགས་པའི་དོན་བསྡུས་ལས། མཚན་ཉིད་གསུམ་ནི། ཀུན་བཏགས། གཞན་དབང༌། ཡོངས་གྲུབ་སྟེ། མཚན་ཉིད་རིམ་པ་ལྟར། དོན་ལ་མེད་བཞིན་དུ་རྟོག་པས་སྒྲོ་བཏགས་པའི་བརྟགས་ཆ་དང༌། རྒྱུ་རྐྱེན་ལ་བརྟེན་ནས་བཟུང་འཛིན་དུ་སྣང་བའི་རྟེན་འབྲེལ་དང༌། མི་རྟོག་ཡེ་ཤེས་ཀྱི་ཡུལ་དུ་གྲུབ་པའི་དོན་དམ་ཞེས་པའོ། །དབྱེ་ན། ཀུན་བརྟགས་ལ་མཚན་ཉིད་ཡོངས་སུ་ཆད་པའི་དང༌། རྣམ་གྲངས་པའི་ཀུན་བརྟགས་གཉིས་སོ། །གཞན་དབང་ལ་དག་པ་དང་མ་དག་པའི་གཞན་དབང་གཉིས་སོ། །དག་པ་གཞན་དབང་ནི་བཟུང་འཛིན་དུ་སྣང་བའི་འཕགས་པའི་ལམ་རྣམས་སོ། །ཡོངས་གྲུབ་ལ་འགྱུར་མེད་ཡོངས་གྲུབ་དང་ཕྱིན་ཅི་མ་ལོག་པའི་ཡོངས་གྲུབ་གཉིས་སོ། །ཞེས་གསུངས་པའི་ཕྱིར་རོ། །བྱེ་བྲག་སྨྲ་བའི་ལུགས་ལ། ཀུན་རྫོབ་བདེན་པའི་མཚན་ཉིད། བཅོམ་པའམ་བློས་བསལ་བའི་སྒོ་ནས་རང་འཛིན་གྱི་བློ་འདོར་དུ་རུང་བའི་ཆོས་དེ་ཡིན་པའི་ཕྱིར། དོན་དམ་བདེན་པའི་མཚན་ཉིད་ཡོད་དེ། བཅོམ་པའམ་བློས་བསལ་བའི་སྒོ་ནས་རང་འཛིན་གྱི་བློ་འདོར་དུ་མི་རུང་བའི་ཆོས་དེ་ཡིན་པའི་ཕྱིར། མཛོད་ལས། གང་ལ་བཅོམ་དང་བློ་ཡིས་གཞན། །བསལ་ན་དེ་བློ་མི་འཇུག་པ། །བུམ་ཆུ་བཞིན་དུ་ཀུན་རྫོབ་ཏུ། །ཡོད་དེ་དོན་དམ་ཡོད་གཞན་ནོ། །ཞེས་གསུངས་སོ། །མདོ་སྡེ་བའི་ལུགས་ལ། རྟོག་པས་སྒྲོ་མ་བཏགས་པར་དོན་བྱེད་ནུས་པ། དོན་དམ་བདེན་པའི་མཚན་ཉིད། རྟོག་པས་སྒྲོ་བཏགས་པའི་ཆོས། ཀུན་རྫོབ་བདེན་པའི་མཚན་ཉིད་དོ། །འདི་བས་རང་མཚན་སྒྲའི་དངོས་ཡུལ་མ་ཡིན་ཏེ། རྣམ་འགྲེལ་འགྲེལ་བ་རིན་ཆེན་ཕྲེང་བ་ལས། བརྗོད་བྱེད་སྒྲ་ཡི་དངོས་ཡུལ་ཡིན་པ་དང་མིན་པ་གཉིས་སུ་ངེས་པའི་ཕྱིར། ཞེས་གསུངས་པའི་ཕྱིར། བདེན་གཉིས་ཀྱི་མཚན་ཉིད་བདེན་གཉིས་གསལ་བའི་ཉི་མ་ལྟར་ན། རྣམ་ཤེས་ཀྱི་ཡུལ་གང་ཞིག གཤིས་ལ་རང་གི་ངོ་བོ་བདེན་པས་སྟོང་བ་ནི། ཀུན་རྫོབ་བདེན་པའི་མཚན་ཉིད་དང༌། འཕགས་པའི་ཡེ་ཤེས་དམ་པའི་ཡུལ་གང་ཞིག གཤིས་ལ་རང་གི་ངོ་བོ་བདེན་པས་མི་སྟོང་བ་ནི། དོན་དམ་བདེན་པའི་མཚན་ཉིད། ཅེས་གསུངས་སོ། །མཚན་ཉིད་གསུམ་དང་བདེན་གཉིས་ཞིབ་པར་གཞན་ལས་ཤེས་པར་བྱའོ། །ཡུལ་དུས་རང་བཞིན་མ་འདྲེས་པའི་དོན་ལ་དཔྱད་པར་བྱའོ། །གསུམ་པ་དེ་ལ་རྩོད་པ་སྤོང་བ་ལ། ཁོ་ན་རེ། གཟུགས་ཆོས་ཅན། རང་མཚན་ཡིན་པར་ཐལ། རང་གི་མཚན་ཉིད་ཀྱིས་གྲུབ་པའི་དངོས་པོ་ཡིན་པའི་ཕྱིར། རྟགས་ཁས། འདོད་ན། གཟུགས་ཆོས་ཅན། རང་གི་མཚན་ཉིད་ཡིན་པར་ཐལ། རང་མཚན་ཡིན་པའི་ཕྱིར་ན་མ་ཁྱབ། འདོད་མི་ནུས་ཏེ། ཐལ་འགྱུར་དེ་ལ་འདོད་ལན་བཏབ་པས་གཟུགས་གཟུགས་ཀྱི་མཚན་ཉིད་ཡིན་པར་འདོད་ཅེས་རྩི་རིགས་པ་གང་ཞིག དེ་ལྟར་དུ་འདོད་ལན་མི་ཐེབས་པའི་ཕྱིར། ཡང་གཟུགས་ཆོས་ཅན། རང་གི་མཚན་ཉིད་ཀྱིས་གྲུབ་པར་ཐལ། རང་མཚན་ཡིན་པའི་ཕྱིར་ཞེས་པའི་ཐལ་འགྱུར་ལ་འདོད་ལན་རྩི་བའི་ཚེ་རང་སྒྲ་བཤིག་མི་དགོས་སམ་དཔྱད། གྲུབ་མཐའ་གོང་འོག་ཀུན་གྱི་ལུགས་ལ་ཁ་ཅིག་ན་རེ། ཤེས་བྱ་ཆོས་ཅན། ཀུན་རྫོབ་བདེན་པ་ཡིན་པར་ཐལ། རྟོག་བཏགས་ཀྱི་ཆོས་ཡིན་པའི་ཕྱིར། འདོད་ན། ཤེས་བྱ་ཆོས་ཅན། ཀུན་རྫོབ་བདེན་པ་མ་ཡིན་པར་ཐལ། ཀུན་རྫོབ་བརྫུན་པ་ཡིན་པའི་ཕྱིར་ཟེར་ན་མ་ཁྱབ། མ་གྲུབ་ན། ཤེས་བྱ་ཆོས་ཅན། ཀུན་རྫོབ་རྫུན་པ་ཡིན་པར་ཐལ། ཀུན་རྫོབ་ཀུན་རྫོབ་ཡིན་པའི་ཕྱིར་རོ།། །། བཅུ་དགུ་བ་སེལ་འཇུག་དང་སྒྲུབ་འཇུག་གི་རྣམ་བཞག་བཤད་པ།བཅུ་དགུ་བ་སེལ་འཇུག་དང་སྒྲུབ་འཇུག་གི་རྣམ་བཞག་བཤད་པ་ལ། རྣམ་འགྲེལ་ལེའུ་དང་པོ་ལས། རྗེས་སུ་དཔག་པ་ལས་ཀྱང་དངོས། །ཞེས་པ་ནས།དེ་ཙམ་སེལ་བའི་སྤྱོད་ཡུལ་ཅན། །ཞེས་སེལ་འཇུག་དང༌། དེ་ཕྱིར་དངོས་པོ་མཐོང་བ་ཡིས། །ཡོན་ཏན་མཐའ་དག་མཐོང་བ་ཉིད། །ཅེས་སྒྲུབ་འཇུག་གི་དོན་སྟོན་པའི་གཞུང་འདི་བྱུང༌། དེའི་མཐའ་དཔྱད་པ་ལ། དགག་བཞག་སྤོང་གསུམ་ལས། ཁ་ཅིག་ན་རེ། སྒྲ་རྟོག་ཐམས་ཅད་སེལ་འཇུག་ཡིན་ཟེར་ན། འོ་ན་སྒྲ་ཐམས་ཅད་སེལ་འཇུག་ཡིན་པར་ཐལ། སྒྲ་རྟོག་ཐམས་ཅད་སེལ་འཇུག་ཡིན་པའི་ཕྱིར། རྟགས་ཁས། འདོད་ན། སྒྲ་ཐམས་ཅད་རང་ཡུལ་ལ་འཇུག་པར་ཐལ། དེ་རང་ཡུལ་ལ་སེལ་འཇུག་ཡིན་པའི་ཕྱིར། འདོད་ན། སྒྲ་ཐམས་ཅད་ཡུལ་ཅན་ཡིན་པར་ཐལ། སྒྲ་ཐམས་ཅད་རང་ཡུལ་ལ་སེལ་འཇུག་ཡིན་པའི་ཕྱིར། འདོད་མི་ནུས་ཏེ། སྒྲ་ལ་ཡུལ་ཅན་ཡིན་མིན་གཉིས་ཡོད་པའི་ཕྱིར། བསེ་བསྡུས་སོགས་སུ་གང་ཟག་དང་དབང་པོ་གཉིས་སེལ་འཇུག་མ་ཡིན་པར་གསུངས་ལ། ར་སྟོད་བསྡུས་གྲྭར་གང་ཟག་ལ་སེལ་འཇུག་དང་སྒྲུབ་འཇུག་གཉིས་ཡོད་པར་བཤད། རང་ལུགས་གཏན་ཚིགས་རིགས་པའི་དོན་བསྡུས་སུ། གང་ཟག་སེལ་འཇུག་དང་སྒྲུབ་འཇུག་གི་མཚན་གཞི་དངོས་སུ་མ་གསུངས་མོད། དེར་དེ་གཉིས་ཀའི་མཚན་ཉིད་བཞག་པ་ལྟར་ན་གང་ཟག་ལ་སེལ་འཇུག་དང་སྒྲུབ་འཇུག་གཉིས་ཡོད་དམ་དཔྱད། ཁ་ཅིག་སྒྲུབ་འཇུག་གི་བློ་ཡིན་ན་མངོན་སུམ་གྱི་ཚད་མ་ཡིན་པས་ཁྱབ་ཟེར་ན། གངས་རི་སྔོན་པོར་སྣང་བའི་དབང་ཤེས་ཆོས་ཅན། མངོན་སུམ་གྱི་ཚད་མ་ཡིན་པར་ཐལ། སྒྲུབ་འཇུག་གི་བློ་ཡིན་པའི་ཕྱིར། ཁྱབ་པ་ཁས། མ་གྲུབ་ན། གངས་རི་སྔོན་པོར་སྣང་བའི་དབང་ཤེས་ཆོས་ཅན། སྒྲུབ་འཇུག་གི་བློ་ཡིན་པར་ཐལ། རང་ཡུལ་ལ་སྒྲུབ་འཇུག་གི་བློ་ཡིན་པའི་ཕྱིར། མ་གྲུབ་ན། དེ་ཆོས་ཅན། རང་ཡུལ་ལ་སྒྲུབ་འཇུག་གི་བློ་ཡིན་པར་ཐལ། རྟོག་མེད་ཀྱི་འཁྲུལ་ཤེས་ཡིན་པའི་ཕྱིར། མ་ཁྱབ་ན་ཁྱབ་པ་ཡོད་པར་ཐལ། རྟོག་མེད་འཁྲུལ་ཤེས་ཡིན་ན་རང་ཡུལ་ལ་འཇུག་པ་གང་ཞིག རང་ཡུལ་ལ་སེལ་འཇུག་མ་ཡིན་པས་ཁྱབ་པའི་ཕྱིར། ཁྱབ་སྟེ། རྗོད་བྱེད་ཀྱི་སྒྲ་དང་བློ་གཉིས་ཀ་རང་ཡུལ་ལ་འཇུག་པ་ལ་སེལ་འཇུག་དང་སྒྲུབ་འཇུག་གང་རུང་མ་ཡིན་པར་རང་ཡུལ་ལ་འཇུག་ཚུལ་མེད་པའི་ཕྱིར། ཁ་ཅིག་ན་རེ། རང་ཡུལ་དུ་གྱུར་བའི་སེལ་བ་ལ་འཇུག་ན་སེལ་འཇུག་ཡིན་པས་ཁྱབ། རང་ཡུལ་དུ་གྱུར་བའི་སྒྲུབ་པ་ལ་འཇུག་ན་སྒྲུབ་འཇུག་ཡིན་པས་ཁྱབ་ཟེར་ན། དང་པོ་ལ། རྟག་དངོས་གཉིས་ཀྱིས་སྟོང་བའི་སྒྲ་མངོན་སུམ་དུ་རྟོགས་པའི་མངོན་སུམ་ཚད་མ་ཆོས་ཅན། སེལ་འཇུག་ཡིན་པར་ཐལ། རང་ཡུལ་དུ་གྱུར་བའི་སེལ་བ་ལ་འཇུག་པའི་ཕྱིར། ཁྱབ་པ་ཁས། མ་གྲུབ་ན། དེ་ཆོས་ཅན།རང་ཡུལ་དུ་གྱུར་བའི་སེལ་བ་ལ་འཇུག་པར་ཐལ། རྟག་དངོས་གཉིས་ཀྱིས་སྟོང་བའི་སྒྲ་ལ་འཇུག་པ་གང་ཞིག དེ་སེལ་བ་ཡིན་པའི་ཕྱིར། གཉིས་པ་ལ། གཟུགས་འཛིན་རྟོག་པ་ཆོས་ཅན། སྒྲུབ་འཇུག་ཡིན་པར་ཐལ། རང་ཡུལ་དུ་གྱུར་བའི་སྒྲུབ་པ་ལ་འཇུག་པའི་ཕྱིར། ཁྱབ་པ་ཁས། མ་གྲུབ་ན། གཟུགས་འཛིན་རྟོག་པ་ཆོས་ཅན། རང་ཡུལ་དུ་གྱུར་བའི་སྒྲུབ་པ་ལ་འཇུག་པར་ཐལ། ཁྱོད་གཟུགས་ལ་འཇུག་པ་གང་ཞིག གཟུགས་ཁྱོད་ཀྱི་ཡུལ་དུ་གྱུར་བའི་སྒྲུབ་པ་ཡིན་པའི་ཕྱིར། རྟགས་དང་པོ་མ་གྲུབ་ན། གཟུགས་ཆོས་ཅན། ཁྱོད་འཛིན་རྟོག་པ་ཁྱོད་ལ་འཇུག་པར་ཐལ། ཁྱོད་གང་ཟག་གི་བདག་ཏུ་མ་གྲུབ་པ་ཡིན་པའི་ཕྱིར། རྟགས་གཉིས་པ་མ་གྲུབ་ན། གཟུགས་ཆོས་ཅན། གཟུགས་འཛིན་རྟོག་པའི་ཡུལ་དུ་གྱུར་བའི་སྒྲུབ་པ་ཡིན་པར་ཐལ། གཟུགས་འཛིན་རྟོག་པའི་ཡུལ་གང་ཞིག སྒྲུབ་པ་ཡིན་པའི་ཕྱིར། གོང་དུ་འདོད་ན། གཟུགས་འཛིན་རྟོག་པ་ཆོས་ཅན། སྒྲུབ་འཇུག་མ་ཡིན་པར་ཐལ། སེལ་འཇུག་ཡིན་པའི་ཕྱིར། མ་གྲུབ་ན། གཟུགས་འཛིན་རྟོག་པ་ཆོས་ཅན། སེལ་འཇུག་ཡིན་པར་ཐལ། རྗོད་བྱེད་ཀྱི་སྒྲ་དང་རྟོག་པ་གང་རུང་ཡིན་པའི་ཕྱིར། འོན་ཀྱང་སངས་རྒྱས་ཀྱི་གསུང་དུ་གྱུར་བའི་རྗོད་བྱེད་ལ་དཔྱད་པར་བྱའོ། །ཁ་ཅིག་ན་རེ། རང་ཡུལ་ལ་ཆ་ཤས་སུ་ཕྱེ་ནས་འཇུག་པ་སེལ་འཇུག་གི་མཚན་ཉིད། དེའི་དོན་རང་ཡུལ་དུ་གྱུར་བའི་ཆ་འགའ་ཞིག་ཡུལ་དུ་བྱེད་ལ་འགའ་ཞིག་ཡུལ་དུ་མི་བྱེད་པ་དེ་དེའི་དོན་ཡིན་ལ། དཔེར་ན་བུམ་པ་ལ་མཚོན་ན་བུམ་པ་དང་གྲུབ་བདེ་དབྱེར་མེད་ཀྱི་རྫས་འགའ་ཞིག་ཡུལ་དུ་བྱེད་ལ། འགའ་ཞིག་ཡུལ་དུ་མི་བྱེད་པ་ནི་བུམ་པ་ལ་སེལ་འཇུག་གི་དོན་ཡིན་ཟེར་ན། འོ་ན་རྟོག་པ་ཆོས་ཅན། རང་ཡུལ་གྱི་ཆ་འགའ་ཞིག་ཡུལ་དུ་བྱེད་ལ་འགའ་ཞིག་ཡུལ་དུ་མི་བྱེད་པ་དེ་ཡིན་པར་ཐལ། སེལ་འཇུག་ཡིན་པའི་ཕྱིར། ཁྱབ་པ་ཁས། མ་གྲུབ་ན། རྟོག་པ་ཆོས་ཅན། སེལ་འཇུག་ཡིན་པར་ཐལ། རྗོད་བྱེད་ཀྱི་སྒྲ་དང་རྟོག་པ་གང་རུང་ཡིན་པའི་ཕྱིར། རྩ་བར་འདོད་མི་ནུས་པར་ཐལ། གཞི་གྲུབ་ན་རྟོག་པས་ཡུལ་དུ་བྱེད་པ་ཡིན་པས་ཁྱབ་པའི་ཕྱིར། དེར་ཐལ། གཞི་གྲུབ་ན་རྟོག་པའི་ཡུལ་ཡིན་པས་ཁྱབ་པའི་ཕྱིར་རོ། ། གཉིས་པ་རང་ལུགས་བཤད་པ།གཉིས་པ་རང་ལུགས་བཤད་པ་ལ། སེལ་འཇུག་གི་མཚན་ཉིད་ཡོད་དེ། རང་ཡུལ་ལ་འདོད་པའི་དབང་གིས་འཇུག་པ་དེ་ཡིན་པའི་ཕྱིར། སེལ་འཇུག་ལ་དབྱེ་ན་གཉིས་ཡོད་དེ། རྗོད་བྱེད་དང༌། རྟོག་པ་གཉིས་ཡོད་པའི་ཕྱིར། བུམ་འཛིན་རྟོག་པ་བུམ་པ་ལ་སེལ་འཇུག་བྱེད་ཚུལ་ཡོད་དེ། དེས་བུམ་པ་མ་ཡིན་པ་རྣམ་པར་བཅད་ནས་བུམ་པ་ལ་འཇུག་པ་དེ་ཡིན་པའི་ཕྱིར། སྒྲུབ་འཇུག་གི་མཚན་ཉིད་ཡོད་དེ། རང་ཡུལ་ལ་དངོས་དབང་གིས་འཇུག་པ་དེ་ཡིན་པའི་ཕྱིར། རང་ཡུལ་ལ་སྒྲུབ་འཇུག་གི་བློའི་མཚན་ཉིད་ཡོད་དེ། རང་ཡུལ་ལ་དངོས་དབང་གིས་འཇུག་པའི་བློ་དེ་ཡིན་པའི་ཕྱིར། རང་ཡུལ་ལ་དངོས་དབང་གིས་འཇུག་པ་དང༌། རང་ཡུལ་ལ་སྒྲུབ་འཇུག་གི་བློ་གཉིས་དོན་གཅིག ཡང་ན་དེ་གཉིས་ཀྱི་མཚན་ཉིད་ནི།གཏན་ཚིགས་རིགས་པའི་དོན་བསྡུས་ལས། སྣང་འཇུག་དང་སེལ་འཇུག་ཏུ་དབྱེ་བ་ལ་མཚན་ཉིད་ནི་རིམ་པ་ལྟར། ཆ་ཤས་སུ་མ་ཕྱེ་བར་ཡུལ་གསལ་བའི་རིག་པ་དང༌། ཡུལ་ཡུལ་ཅན་འཇུག་པའི་ཚུལ་གང་ཞིག ཆ་ཤས་སུ་ཕྱེ་ནས་སྒྲ་དོན་ལ་འཇུག་པའོ། །དབྱེ་ན་གཉིས་ཀ་ལ་ཕྱིན་ཅི་ལོག་མ་ལོག་གཉིས་སོ། །རྟོག་མེད་ཤེས་པ་སྣང་བས་འཇུག སྒྲ་རྟགས་རྟོག་པ་སེལ་བས་འཇུག །ཅེས་བྱའོ། །ཞེས་གསུངས་པའི་ཕྱིར། རྟགས་སེལ་འཇུག་ཡིན་པར་གསུངས་པ་དང༌། རང་ལུགས་ལ་མིང་ཚིག་སྐབས་དུ་མར། ལྡན་མིན་ཡིན་པར་གསུངས་ཕྱིར། སེལ་འཇུག་ཡིན་མིན་དཔྱད་པར་བྱའོ། །སྒྲུབ་འཇུག་གི་བློ་ཡིན་ན་རང་ཡུལ་རྟོགས་པས་མ་ཁྱབ་སྟེ། རྟོག་མེད་ལོག་ཤེས་རྣམས་སྒྲུབ་འཇུག་གི་བློ་ཡིན་པའི་ཕྱིར། བུམ་པ་མངོན་སུམ་དུ་རྟོགས་པའི་བློ་ཡིན་ན་བུམ་པ་དང་གྲུབ་བདེ་དབྱེར་མེད་ཀྱི་རྫས་གཅིག་པ་ཐམས་ཅད་མཐོང་བས་ཁྱབ་སྟེ། རྣམ་འགྲེལ་ལས། དོན་གྱི་རང་གི་ངོ་བོ་ལ། །བདག་ཉིད་མངོན་སུམ་ཡིན་པ་ལ། །ཚད་མ་གཞན་གྱིས་བརྟག་བྱ་གང༌། །མ་མཐོང་ཆ་གཞན་ཅི་ཞིག་ཡོད། །ཅེས་གསུངས་པའི་ཕྱིར། བུམ་འཛིན་མངོན་སུམ་ཡིན་ན་བུམ་པ་དང་གྲུབ་བདེ་དབྱེར་མེད་ཀྱི་རྫས་གཅིག་པ་ཐམས་ཅད་རྟོགས་པས་མ་ཁྱབ་ལ། བུམ་པ་མི་རྟག་པ་བུམ་པ་དང་གྲུབ་བདེ་དབྱེར་མེད་ཀྱི་རྫས་གཅིག་པ་ཡིན་ཀྱང་བུམ་འཛིན་མངོན་སུམ་ཡིན་ན་དེ་རྟོགས་པས་མ་ཁྱབ་པའི་ཕྱིར་རོ། ། གསུམ་པ་དེ་ལ་རྩོད་པ་སྤོང་བ།གསུམ་པ་དེ་ལ་རྩོད་པ་སྤོང་བ་ལ། ཁ་ཅིག་ན་རེ། སྒྲ་འཛིན་རྣ་ཤེས་ཆོས་ཅན། ཁྱོད་ཡིན་ན། སྒྲ་དང་གྲུབ་བདེ་དབྱེར་མེད་ཀྱི་རྫས་གཅིག་པ་ཐམས་ཅད་ཡུལ་དུ་བྱས་ནས་སྒྲ་ལ་འཇུག་པའི་བློ་ཡིན་པས་ཁྱབ་པར་ཐལ། ཁྱོད་ཡིན་ན་སྒྲ་ལ་སྒྲུབ་འཇུག་གི་བློ་ཡིན་པས་ཁྱབ་པའི་ཕྱིར། མ་གྲུབ་ན། སྒྲ་འཛིན་རྣ་ཤེས་ཆོས་ཅན། ཁྱོད་ཡིན་ན་སྒྲ་ལ་སྒྲུབ་འཇུག་གི་བློ་ཡིན་པས་ཁྱབ་པར་ཐལ། ཁྱོད་ཡིན་ན་སྒྲ་མངོན་སུམ་དུ་སྣང་ཡུལ་དུ་བྱས་ནས་སྒྲ་ལ་འཇུག་པའི་བློ་ཡིན་པས་ཁྱབ་པའི་ཕྱིར། རྩ་བར་འདོད་ན། གྲངས་ཅན་པའི་རྒྱུད་ཀྱི་སྒྲ་འཛིན་རྣ་ཤེས་ཆོས་ཅན། ཁྱོད་སྒྲ་དང་གྲུབ་བདེ་དབྱེར་མེད་ཀྱི་རྫས་གཅིག་པ་ཐམས་ཅད་སྣང་ཡུལ་དུ་བྱས་ནས་སྒྲ་ལ་འཇུག་པར་ཐལ། ཁྱོད་སྒྲ་འཛིན་རྣ་ཤེས་ཡིན་པའི་ཕྱིར།འདོད་ན། གྲངས་ཅན་པའི་རྒྱུད་ཀྱི་སྒྲ་འཛིན་རྣ་ཤེས་ཆོས་ཅན། ཁྱོད་སྒྲ་མི་རྟག་པར་སྣང་བའི་བློ་ཡིན་པར་ཐལ། ཁྱོད་སྒྲ་དང་གྲུབ་བདེ་དབྱེར་མེད་ཀྱི་རྫས་གཅིག་པ་ཐམས་ཅད་སྣང་བའི་བློ་ཡིན་པ་གང་ཞིག སྒྲ་མི་རྟག་པ་སྒྲ་དང་གྲུབ་བདེ་དབྱེར་མེད་ཀྱི་རྫས་གཅིག་པ་ཡིན་པའི་ཕྱིར། འདོད་ན། དེ་ཆོས་ཅན། ཁྱོད་སྒྲ་མི་རྟག་པ་རྟོགས་པའི་བློ་ཡིན་པར་ཐལ། ཁྱོད་སྒྲ་མི་རྟག་པ་སྣང་བའི་བློ་ཡིན་པའི་ཕྱིར་ན་མ་ཁྱབ། འོ་ན་ཁྱོད་རང་ལ་ཟླ་གཅིག་ཟླ་གཉིས་སྣང་བའི་དབང་ཤེས་ཆོས་ཅན། ཁྱོད་ཟླ་གཅིག་ཟླ་བ་གཉིས་ཡིན་པར་རྟོགས་པའི་བློ་ཡིན་པར་ཐལ། ཟླ་གཅིག་ཟླ་གཉིས་ཡིན་པར་སྣང་བའི་བློ་ཡིན་པའི་ཕྱིར། ཁྱབ་པ་འགྲིག ཟླ་གཅིག་ཟླ་གཉིས་སྣང་བའི་དབང་ཤེས་ཆོས་ཅན། ཟླ་གཅིག་ཟླ་གཉིས་ཡིན་པར་སྣང་བའི་བློ་ཡིན་པར་ཐལ། ཟླ་གཅིག་ཟླ་གཉིས་ཡིན་པར་མཐོང་བའི་བློ་ཡིན་པའི་ཕྱིར་རོ།། །། ཉི་ཤུ་པ་བརྗོད་བྱ་རྗོད་བྱེད་ཀྱི་རྣམ་བཞག་བཤད་པ།ཉི་ཤུ་པ་བརྗོད་བྱ་རྗོད་བྱེད་ཀྱི་རྣམ་བཞག་བཤད་པ་ལ། དགག་བཞག་སྤོང་གསུམ་ལས། དང་པོ་ནི། ཁ་ཅིག་ན་རེ། མིང་ཡིན་ན་དོན་གྱི་ངོ་བོ་ཙམ་སྟོན་པའི་སྒྲ་ཡིན་པས་ཁྱབ་ཟེར་ན། སྒྲ་མི་རྟག་ཅེས་བརྗོད་པའི་སྒྲ་ཆོས་ཅན། དོན་གྱི་ངོ་བོ་ཙམ་སྟོན་པའི་སྒྲ་ཡིན་པར་ཐལ། མིང་ཡིན་པའི་ཕྱིར། ཁྱབ་པ་ཁས། མ་གྲུབ་ན། སྒྲ་མི་རྟག་ཅེས་བརྗོད་པའི་སྒྲ་ཆོས་ཅན། མིང་ཡིན་པར་ཐལ། ཁྱོད་སྒྲ་མི་རྟག་པའི་མིང་ཡིན་པའི་ཕྱིར། མ་གྲུབ་ན། སྒྲ་མི་རྟག་པ་ཆོས་ཅན། ཁྱོད་ཅེས་བརྗོད་པའི་སྒྲ་ཁྱོད་ཀྱི་མིང་ཡིན་པར་ཐལ། ཁྱོད་གང་ཟག་གི་བདག་མེད་ཡིན་པའི་ཕྱིར། རྩ་བར་འདོད་ན། སྒྲ་མི་རྟག་ཅེས་བརྗོད་པའི་སྒྲ་ཆོས་ཅན། དོན་གྱི་ངོ་བོ་ཙམ་སྟོན་པའི་སྒྲ་མ་ཡིན་པར་ཐལ། དོན་གྱི་ངོ་བོ་དང་ཁྱད་པར་སྦྱར་ནས་སྟོན་པའི་སྒྲ་ཡིན་པའི་ཕྱིར། མ་གྲུབ་ན། དེ་ཆོས་ཅན། དེར་ཐལ། སྒྲ་དང་སྒྲའི་ཁྱད་པར་མི་རྟག་པ་གཉིས་སྦྱར་ནས་སྟོན་པའི་སྒྲ་ཡིན་པའི་ཕྱིར། དེར་ཐལ། སྒྲ་མི་རྟག་པ་སྟོན་པའི་སྒྲ་ཡིན་པའི་ཕྱིར། ཁ་ཅིག་ན་རེ། རྣམ་འགྲེལ་ལས།ཡི་གེ་དོན་མེད་ཅན་འགྱུར་ཞིང༌། །ཞེས་པའི་དོན་དུ་བསམ་ནས། ཡི་གེ་ཡིན་ན་རྗོད་བྱེད་ཀྱི་སྒྲ་མ་ཡིན་པས་ཁྱབ་ཟེར་ན། བ་ལང་ཞེས་པའི་སྒྲ་ཆོས་ཅན། རྗོད་བྱེད་ཀྱི་སྒྲ་མ་ཡིན་པར་ཐལ། ཡི་གེ་ཡིན་པའི་ཕྱིར། ཁྱབ་པ་ཁས། རྟགས་གྲུབ་སྟེ། མཛོད་འགྲེལ་ལས། མིང་གི་མཐའ་ནི་ཡི་གེ་སྟེ། །དཔེར་ན་བ་ལང་ཞེས་པའི་སྒྲ་ལྟ་བུའོ། །ཞེས་གསུངས་པའི་ཕྱིར་རོ། །གོང་དུ་འདོད་མི་ནུས་ཏེ། མིང་ཡིན་པའི་ཕྱིར། མ་གྲུབ་ན། དེ་ཆོས་ཅན། མིང་ཡིན་པར་ཐལ། བ་ལང་གི་མིང་ཡིན་པའི་ཕྱིར། ཁ་ཅིག་ན་རེ། ཡི་གེ་ཡིན་ན་མིང་ཡིན་པས་ཁྱབ་ཟེར་ན། མིང་ཚིག་ཡི་གེ་གསུམ་དུ་ཕྱེ་བའི་ཡི་གེ་ཆོས་ཅན། མིང་ཡིན་པར་ཐལ། ཡི་གེ་ཡིན་པའི་ཕྱིར། རྩ་བར་འདོད་མི་ནུས་ཏེ། དོན་གྱི་ངོ་བོ་མི་སྟོན་པའི་ཕྱིར། དེར་ཐལ།དེས་དོན་མི་སྟོན་པའི་ཕྱིར། རྣམ་འགྲེལ་ལས། ཡི་གེ་དོན་མེད་ཅན་འགྱུར་ཞིང༌། །ཞེས་གསུངས་པའི་ཕྱིར། ཁ་ཅིག་ན་རེ། ཆོས་དེའི་མིང་ཡིན་ན་ཆོས་དེའི་དངོས་མིང་ཡིན་པས་ཁྱབ་ཟེར་ན། ཉི་མའི་དཀྱིལ་འཁོར་ལ་ཉི་མ་ཞེས་བརྗོད་པའི་སྒྲ་ཆོས་ཅན། དེའི་དངོས་མིང་ཡིན་པར་ཐལ། མིང་ཡིན་པའི་ཕྱིར། ཁྱབ་པ་ཁས། མ་གྲུབ་ན། དེར་ཐལ། བཏགས་མིང་ཡིན་པའི་ཕྱིར། དེ་ཆོས་ཅན།དེར་ཐལ། ཉི་མའི་དཀྱིལ་འཁོར་ལ་འབྲེལ་བ་རྒྱུ་མཚན་དུ་བྱས་ནས་བཏགས་པའི་མིང་ཡིན་པའི་ཕྱིར། རྩ་བར་འདོད་ན། ཉི་མའི་དཀྱིལ་འཁོར་ཆོས་ཅན། ཉི་མ་ཡིན་པར་ཐལ། ཉི་མ་ཞེས་བརྗོད་པའི་སྒྲ་དངོས་མིང་དུ་འཇུག་པའི་གཞི་ཡིན་པའི་ཕྱིར། ཉི་མའི་དཀྱིལ་འཁོར་ཆོས་ཅན། གང་ཟག་ཡིན་པར་ཐལ། ཉི་མ་ཡིན་པའི་ཕྱིར། འདོད་མི་ནུས་ཏེ། གཟུགས་ཡིན་པའི་ཕྱིར། ཁ་ཅིག་ན་རེ། ཆོས་དེ་ཞེས་པའི་སྒྲ་དངོས་མིང་དུ་འཇུག་པའི་གཞི་ཡིན་ན། ཆོས་དེ་ཡིན་པས་ཁྱབ་ཟེར་ན། ཀ་བའི་ལྡོག་པ་ཆོས་ཅན། ཀ་བའི་ལྡོག་པ་ཡིན་པར་ཐལ། ཀ་བའི་ལྡོག་པ་དངོས་མིང་དུ་འཇུག་པའི་གཞི་ཡིན་པའི་ཕྱིར། མ་གྲུབ་ན། དེ་ཆོས་ཅན། ཁྱོད་ཁྱོད་ཅེས་པའི་སྒྲའི་དངོས་མིང་དུ་འཇུག་པའི་གཞི་ཡིན་པར་ཐལ། ཁྱོད་གང་ཟག་གི་བདག་མེད་ཡིན་པའི་ཕྱིར། ཁ་ཅིག་ན་རེ། ཆོས་དེའི་མིང་ཡིན་ན་ཆོས་དེའི་དངོས་མིང་དང་བཏགས་མིང་གང་རུང་ཡིན་པས་ཁྱབ་ཟེར་ན། ཤེས་བྱ་ཞེས་བརྗོད་པའི་སྒྲ་ཆོས་ཅན། དངོས་པོའི་དངོས་མིང་དང་བཏགས་མིང་གང་རུང་ཡིན་པར་ཐལ། ཁྱོད་དངོས་པོའི་མིང་ཡིན་པའི་ཕྱིར། དེར་ཐལ། ཁྱོད་དངོས་པོའི་སྤྱི་མིང་ཡིན་པའི་ཕྱིར། རྩ་བར་འདོད་ན། ཤེས་བྱ་ཞེས་བརྗོད་པའི་སྒྲ་ཆོས་ཅན། དངོས་པོའི་དངོས་མིང་དང་བཏགས་མིང་གང་རུང་མ་ཡིན་པར་ཐལ། དངོས་པོའི་དངོས་མིང་མ་ཡིན་པ་གང་ཞིག བཏགས་མིང་མ་ཡིན་པའི་ཕྱིར། དང་པོ་མ་གྲུབ་ན། དེ་ཆོས་ཅན། དངོས་པོའི་དངོས་མིང་མ་ཡིན་པར་ཐལ། དངོས་པོའི་སྤྱི་མིང་ངམ་ཐུན་མོང་གི་མིང་ཡིན་པའི་ཕྱིར། དེར་ཐལ། ཤེས་བྱ་ཞེས་བརྗོད་པའི་སྒྲ་དེ་ཤེས་བྱའི་གསལ་བའི་དབྱེ་བ་མཐའ་དག་གི་ཐུན་མོང་གི་མིང་ཡིན་པའི་ཕྱིར། རྟགས་གཉིས་པ་མ་གྲུབ་ན། དངོས་པོ་ཆོས་ཅན། ཤེས་བྱ་མ་ཡིན་པར་ཐལ། ཁྱོད་ལ་ཤེས་བྱ་ཞེས་བརྗོད་པའི་སྒྲ་བཏགས་མིང་དུ་འཇུག་པའི་ཕྱིར། རྟགས་ཁས། ཁ་ཅིག་ན་རེ། ཆོས་དེའི་མིང་ཡིན་ན་ཆོས་དེ་ལ་འཇུག་པས་ཁྱབ་ཟེར་ན། མི་སྟོབས་ལྡན་ལ་སེངྒེ་ཞེས་བརྗོད་པའི་སྒྲ་ཆོས་ཅན། ཁྱོད་མི་སྟོབས་ལྡན་ལ་འཇུག་པར་ཐལ། ཁྱོད་མི་སྟོབས་ལྡན་གྱི་མིང་ཡིན་པའི་ཕྱིར། ཁྱབ་པ་ཁས། མ་གྲུབ་ན། དེ་ཆོས་ཅན། དེར་ཐལ། མི་སྟོབས་ལྡན་གྱི་བཏགས་མིང་ཡིན་པའི་ཕྱིར། དེར་ཐལ། མི་དེ་ལ་སྟོབས་ཆེ་བ་རྒྱུ་མཚན་དུ་བྱས་ནས་སེངྒེ་ཞེས་བཏགས་པ་ཡིན་པའི་ཕྱིར། རྩ་བར་འདོད་ན། མི་སྟོབས་ལྡན་ཆོས་ཅན། ཁྱོད་ལ་སེངྒེ་ཞེས་པའི་མིང་ཁྱོད་ལ་མི་འཇུག་པར་ཐལ། ཁྱོད་སེངྒེ་མ་ཡིན་པའི་ཕྱིར། ཁ་ཅིག་ན་རེ། རྗོད་བྱེད་ཀྱི་སྒྲ་ཡིན་ན་རིགས་བརྗོད་ཀྱི་སྒྲ་ཡིན་པས་ཁྱབ་ཟེར་ན། བུམ་པའི་ལྡོག་པ་ཞེས་བརྗོད་པའི་སྒྲ་ཆོས་ཅན། དེར་ཐལ། དེའི་ཕྱིར། ཁྱབ་པ་ཁས། འདོད་ན། བུམ་པའི་ལྡོག་པ་ཆོས་ཅན། ཁྱོད་ཅེས་པའི་སྒྲ་རིགས་བརྗོད་ཀྱི་སྒྲ་མ་ཡིན་པར་ཐལ། ཁྱོད་རིགས་སྤྱི་མ་ཡིན་པའི་ཕྱིར། དེར་ཐལ། ཁྱོད་ཀྱི་བྱེ་བྲག་མེད་པའི་ཕྱིར། ཁ་ཅིག་ན་རེ། རིགས་བརྗོད་ཀྱི་སྒྲ་དང༌། ཚོགས་བརྗོད་ཀྱི་སྒྲ་གཉིས་འགལ་བ་ཡིན་ཟེར་ན། དེ་མི་འཐད་པར་ཐལ། རི་བོ་ཞེས་བརྗོད་པའི་སྒྲ་དེ་དེ་གཉིས་ཀའི་གཞི་མཐུན་པ་ཡིན་པའི་ཕྱིར། མ་གྲུབ་ན། རི་བོ་ཞེས་བརྗོད་པའི་སྒྲ་ཆོས་ཅན། རིགས་བརྗོད་དང་ཚོགས་བརྗོད་ཀྱི་སྒྲ་གཉིས་ཀ་ཡིན་པར་ཐལ། རིགས་བརྗོད་ཀྱི་སྒྲ་ཡིན་པ་གང་ཞིག ཚོགས་བརྗོད་ཀྱི་སྒྲ་ཡིན་པའི་ཕྱིར། དང་པོ་མ་གྲུབ་ན། རི་བོ་ཆོས་ཅན། ཁྱོད་ཅེས་པའི་སྒྲ་རིགས་བརྗོད་ཀྱི་སྒྲ་ཡིན་པར་ཐལ། ཁྱོད་རིགས་སྤྱི་ཡིན་པའི་ཕྱིར། གཉིས་པ་མ་གྲུབ་ན། རི་བོ་ཆོས་ཅན། ཁྱོད་ཅེས་པའི་སྒྲ་ཚོགས་བརྗོད་ཀྱི་སྒྲ་ཡིན་པར་ཐལ། ཁྱོད་ཚོགས་སྤྱི་ཡིན་པའི་ཕྱིར། ཁ་ཅིག་ན་རེ། ཆོས་བརྗོད་ཀྱི་སྒྲ་དང་ཆོས་ཅན་བརྗོད་པའི་སྒྲ་གཉིས་འགལ་ཟེར་ན། དེ་མི་འཐད་པར་ཐལ། སྒྲ་མི་རྟག་ཅེས་བརྗོད་པའི་སྒྲ་དེ་དེ་གཉིས་ཀའི་གཞི་མཐུན་པ་ཡིན་པའི་ཕྱིར། མ་གྲུབ་ན། སྒྲ་མི་རྟག་ཅེས་བརྗོད་པའི་སྒྲ་ཆོས་ཅན། དེ་གཉིས་ཀ་ཡིན་པར་ཐལ། ཆོས་བརྗོད་ཀྱི་སྒྲ་ཡིན་པ་གང་ཞིག ཆོས་ཅན་བརྗོད་པའི་སྒྲ་ཡིན་པའི་ཕྱིར། རྟགས་དང་པོ་མ་གྲུབ་ན། སྒྲ་མི་རྟག་ཅེས་བརྗོད་པའི་སྒྲ་ཆོས་ཅན། ཆོས་བརྗོད་ཀྱི་སྒྲ་ཡིན་པར་ཐལ། མི་རྟག་པ་ལ་ལྟོས་ཏེ་ཆོས་བརྗོད་ཀྱི་སྒྲ་ཡིན་པའི་ཕྱིར། མ་གྲུབ་ན། དེ་ཆོས་ཅན། དེར་ཐལ། སྒྲ་ཁྱད་གཞི་དང་མི་རྟག་པ་དེའི་ཁྱད་ཆོས་ལྟ་བུར་བརྗོད་པའི་སྒྲ་ཡིན་པའི་ཕྱིར། རྟགས་གཉིས་པ་མ་གྲུབ་ན། སྒྲ་མི་རྟག་ཅེས་བརྗོད་པའི་སྒྲ་ཆོས་ཅན། ཆོས་ཅན་བརྗོད་པའི་སྒྲ་ཡིན་པར་ཐལ། སྒྲ་ལ་ལྟོས་ཏེ་ཆོས་ཅན་བརྗོད་པའི་སྒྲ་ཡིན་པའི་ཕྱིར། དེར་ཐལ། སྒྲ་ཁྱད་གཞི་དང་མི་རྟག་པ་དེའི་ཁྱད་ཆོས་ལྟ་བུར་བརྗོད་པ་ཡིན་པའི་ཕྱིར། ཁ་ཅིག་ན་རེ། སྤྱིར་ཆོས་བརྗོད་ཀྱི་སྒྲ་དང་ཆོས་ཅན་བརྗོད་པའི་སྒྲ་གཉིས་མི་འགལ་ཀྱང་གཞི་གཅིག་ལ་ལྟོས་ཏེ་དེ་གཉིས་འགལ་བ་ཡིན་ཟེར་ན། དེ་མི་འཐད་པར་ཐལ། གཞི་གཅིག་ལ་ལྟོས་ཏེ་དེ་གཉིས་ཀྱི་གཞི་མཐུན་ཡོད་པའི་ཕྱིར། དེར་ཐལ། བྱས་པ་གཅིག་པོ་ལ་ལྟོས་ནས་དེ་གཉིས་ཀྱི་གཞི་མཐུན་ཡོད་པའི་ཕྱིར། དེར་ཐལ། བྱས་པ་བྱས་པ་ཡིན་ནོ། །ཞེས་བརྗོད་པའི་སྒྲ་དེ་ཡིན་པའི་ཕྱིར། གཉིས་པ་རང་ལུགས་བཤད་པ།གཉིས་པ་རང་ལུགས་བཤད་པ་ལ། བརྗོད་བྱའི་མཚན་ཉིད་ཡོད་དེ། བརྡའི་དབང་གིས་གོ་བར་བྱ་བ་དེ་ཡིན་པའི་ཕྱིར། བརྗོད་བྱ་དང༌། ཡུལ་དང༌། གཞལ་བྱ་རྣམས་དོན་གཅིག རྗོད་བྱེད་ཀྱི་སྒྲའི་མཚན་ཉིད་ཡོད་དེ། བརྡའི་དབང་གིས་རང་ཡུལ་གོ་བྱེད་ཀྱི་མཉན་བྱ་དེ་ཡིན་པའི་ཕྱིར། དེ་ལྟར་གཏན་ཚིགས་རིགས་པའི་དོན་བསྡུས་ལས། བརྗོད་བྱ་དང་རྗོད་བྱེད་ལ་མཚན་ཉིད་རིམ་པ་ལྟར། བརྡ་ལས་རང་མིང་གི་གོ་བྱ་དང༌། བརྗོད་བྱ་བློ་ཡུལ་དུ་སྟོན་བྱེད། ཅེས་པའོ། །དབྱེ་ན། དང་པོ་ལ་དངོས་དང་ཞེན་པའི་བརྗོད་བྱ་གཉིས་སོ། །གཉིས་པ་རྗོད་བྱེད་ལ་དངོས་ཤུགས་ཀྱི་རྗོད་བྱེད་དམ། མིང་གི་ཚོགས། ཚིག་གི་ཚོགས། ངག་གི་ཚོགས་དང་གསུམ་མོ། །ཕྱི་མ་གསུམ་ཀྱི་མཚན་ཉིད་རིམ་པ་ལྟར། ཡི་གེ་དུ་མ་འདུས་ནས་དོན་གྱི་ངོ་བོ་ཙམ་རྗོད་བྱེད་དང༌། དོན་འགའ་ཞིག་ཁྱད་པར་དུ་མ་དང་བཅས་ཏེ་རྗོད་བྱེད་དུ་གྲུབ་པ་དང༌། ཁྱད་པར་དུ་མའང་གཞི་དུ་མ་སྦྱར་ཏེ་རྗོད་བྱེད་དུ་གྲུབ་པའོ། །ཞེས་གསུངས་སོ། །མིང་གི་མཚན་ཉིད་འདི་དེ་གསུམ་དུ་ཕྱེ་བའི་མིང་གི་མཚན་ཉིད་དེ་ཡིན་ནམ་སྙམ། མིང་ཚིག་སོགས་རྩོམ་བྱེད་ཀྱི་གཞིར་གྱུར་བའི་སྐད་ཀྱི་གདངས་དེ། མིང་ཚིག་ཡི་གེ་གསུམ་དུ་ཕྱེ་བའི་ཡི་གེའི་མཚན་ཉིད། མཚན་གཞི་ནི། མིང་ཚིག་སོགས་རྩོམ་བྱེད་ཀྱི་གཞིར་གྱུར་བའི་ཀ་སོགས་གསལ་བྱེད་ཡི་གེ་དེ་ཡིན་ནོ། །མིང་ལ་དབྱེ་ན། དངོས་མིང་བཏགས་མིང་གཉིས།དངོས་མིང་གི་མཚན་ཉིད་ཡོད་དེ། རང་ཉིད་ལ་བརྟེན་ནས་ཆོས་དེ་ཐུན་མོང་མ་ཡིན་པར་གོ་བར་བྱེད་ནུས་ཞིང༌། ཆོས་དེ་ལ་ཐོག་མར་བརྡ་སྦྱར་བའི་མིང་དེ་ཡིན་པའི་ཕྱིར། བཏགས་མིང་གི་མཚན་ཉིད་ཡོད་དེ། རང་ཉིད་ཆོས་དེ་ལ་མི་འཇུག་པར་ཆོས་དེ་ལ་ཐོག་མར་བརྡ་སྦྱར་བའི་མིང་དེ་ཡིན་པའི་ཕྱིར། ཡང་རྗོད་བྱེད་ཀྱི་སྒྲ་ལ་བརྗོད་བྱའི་སྒོ་ནས་དབྱེ་ན་རིགས་བརྗོད་ཀྱི་སྒྲ་དང་ཚོགས་བརྗོད་ཀྱི་སྒྲ་གཉིས་ཡོད་པའི་ཕྱིར། དེ་གཉིས་ཀའི་མཚན་ཉིད་ནི། གཏན་ཚིགས་རིགས་པའི་དོན་བསྡུས་ལས། རིགས་བརྗོད་དང་ཚོགས་བརྗོད་ལ་མཚན་ཉིད་རིམ་པ་ལྟར། རང་གི་ཞེན་པའི་བརྗོད་བྱ་བྱེ་བྲག་ཏུ་གྲུབ་པ་བརྗོད་པའི་ཚིག་དང༌། རང་གི་ཞེན་པའི་བརྗོད་བྱ་རྡུལ་རྫས་བརྒྱད་ཚོགས་བརྗོད་པའི་ཚིག་ཅེས་པའོ། །དེ་གཉིས་ལ་མུ་བཞི་ཡོད་དོ། །ཞེས་གསུངས་པའི་ཕྱིར། རིགས་བརྗོད་ཀྱི་སྒྲ་ཡིན་ལ་ཚོགས་བརྗོད་ཀྱི་སྒྲ་མ་ཡིན་པ་ནི། ཤེས་བྱ་ཞེས་བརྗོད་པའི་སྒྲ་དེ་ཡིན་པའི་ཕྱིར། ཚོགས་བརྗོད་ཀྱི་སྒྲ་ཡིན་ལ་རིགས་བརྗོད་ཀྱི་སྒྲ་མ་ཡིན་པའི་མུ་ཡོད་དེ། ཀྭ་བུམ་གཉིས་ཞེས་བརྗོད་པའི་སྒྲ་དེ་ཡིན་པའི་ཕྱིར། གཉིས་ཀ་ཡིན་པའི་མུ་ཡོད་དེ། བུམ་པ་ཞེས་བརྗོད་པའི་སྒྲ་དེ་ཡིན་པའི་ཕྱིར། གཉིས་ཀ་མ་ཡིན་པའི་མུ་ཡོད་དེ། བུམ་པ་དང་གཅིག་ཅེས་བརྗོད་པའི་སྒྲ་དེ་ཡིན་པའི་ཕྱིར། ཡང་རྗོད་བྱེད་ཀྱི་སྒྲ་དེ་ལ་དབྱེ་ན། སྨྲ་བ་པོ་དང༌། ཉན་པ་པོའི་བརྗོད་འདོད་ཀྱི་དབང་གིས་ཆོས་བརྗོད་ཀྱི་སྒྲ་དང༌། ཆོས་ཅན་བརྗོད་པའི་སྒྲ་གཉིས་ཡོད། གཞི་དེ་ཁྱད་གཞི་ལྟ་བུར་བརྗོད་པའི་སྒྲ་དེ། གཞི་དེ་ལ་ལྟོས་ཏེ་ཆོས་ཅན་བརྗོད་པའི་སྒྲའི་མཚན་ཉིད། འདི་དང་ཁྱད་པར་གཞན་མི་སྤོང་གི་སྒྲ་གཉིས་དོན་གཅིག སྒྲ་ལ་ལྟོས་ཏེ་ཆོས་བརྗོད་ཀྱི་སྒྲ་བཞག་ཏུ་ཡོད་དེ། སྒྲའི་མི་རྟག་ཅེས་བརྗོད་པའི་སྒྲ་དེ་ཡིན་པའི་ཕྱིར། དེར་ཐལ། སྒྲའི་མི་རྟག་ཅེས་བརྗོད་པའི་སྒྲས། མི་རྟག་པ་ཁྱད་གཞི་དང༌། སྒྲ་དེའི་ཁྱད་ཆོས་ལྟ་བུར་བརྗོད་པ་ཡིན་པའི་ཕྱིར། གཞི་དེ་ཁྱད་ཆོས་སུ་སྟོན་པའི་སྒྲ་དེ། གཞི་དེ་ལ་ལྟོས་ཏེ་ཆོས་བརྗོད་ཀྱི་སྒྲའི་མཚན་ཉིད། འདི་དང་ཁྱད་པར་གཞན་སྤོང་གི་སྒྲ་གཉིས་དོན་གཅིག སྒྲ་ལ་ལྟོས་ཏེ་ཆོས་ཅན་བརྗོད་པའི་སྒྲ་བཞག་ཏུ་ཡོད་དེ། སྒྲ་མི་རྟག་ཅེས་བརྗོད་པའི་སྒྲ་དེ་ཡིན་པའི་ཕྱིར། དེར་ཐལ། སྒྲ་མི་རྟག་ཅེས་བརྗོད་པའི་སྒྲ་འདིས། སྒྲ་ཁྱད་གཞི་དང་མི་རྟག་པ་དེའི་ཁྱད་ཆོས་ལྟ་བུར་བརྗོད་པ་ཡིན་པའི་ཕྱིར། ཡང་བརྗོད་བྱེད་ཀྱི་སྒྲ་ལ་ཚིག་ཕྲད་ཀྱི་སྒོ་ནས་དབྱེ་ན། མི་ལྡན་རྣམ་གཅོད་ཀྱི་སྒྲ་དང༌། གཞན་ལྡན་རྣམ་གཅོད་ཀྱི་སྒྲ་དང༌། མི་སྲིད་རྣམ་གཅོད་ཀྱི་སྒྲ་གསུམ་ཡོད་ལ། མི་ལྡན་རྣམ་གཅོད་ཀྱི་སྒྲའི་མཚན་ཉིད་ཡོད་དེ། གཞི་དེ་ལ་ཁྱད་ཆོས་དེ་མི་ལྡན་པ་རྣམ་པར་བཅད་ནས་ལྡན་པ་ཁོ་ནར་སྟོན་པའི་སྒྲ་ དེ་ཡིན་པའི་ཕྱིར། མཚན་གཞི་ནི། སྒྲ་མི་རྟག་པ་ཁོ་ན་ཡིན་ཞེས་པའི་སྒྲ་ལྟ་བུའོ། །སྒྲ་མི་རྟག་པ་ཁོ་ན་ཡིན་ཞེས་པའི་སྒྲ་འདིས་སྒྲ་ལས་གཞན་མི་རྟག་པ་ཡོད་པ་མི་གཅོད་ཀྱི་སྒྲ་མི་རྟག་པ་མ་ཡིན་པ་རྣམ་པར་བཅད་ནས། སྒྲ་མི་རྟག་པར་སྟོན་པར་བྱེད་པ་དེ་ཡིན་པའི་ཕྱིར། དཔེར་ན་ནག་པ་འཕུང་སྐྱེན་པ་ཡིན་ཞེས་པ་འདིས་ནག་པ་ལས་གཞན་པ་འཕུང་སྐྱེན་པ་ཡོད་པ་མི་གཅོད་ཀྱི། ནག་པ་འཕུང་མི་སྐྱེན་པ་རྣམ་པར་བཅད་ནས་ནག་པ་འཕུང་སྐྱེན་པ་ཁོ་ནར་སྟོན་པ་ཡིན་པའི་ཕྱིར། གཞན་ལྡན་རྣམ་གཅོད་ཀྱི་སྒྲའི་མཚན་ཉིད་ཡོད་དེ། གཞི་དེ་མ་ཡིན་པའི་གཞན་ལ་ཆོས་དེ་ལྡན་པ་རྣམ་པར་བཅད་ནས་གཞི་དེ་ཁོ་ན་ལ་ལྡན་པར་སྟོན་པའི་སྒྲ་དེ་ཡིན་པའི་ཕྱིར། མཚན་གཞི་ནི། སྒྲ་ཁོ་ན་ཉན་བྱ་ཡིན་ཞེས་བརྗོད་པའི་སྒྲ་ལྟ་བུའོ། །སྒྲ་ཁོ་ན་ཉན་བྱ་ཡིན་ཞེས་བརྗོད་པའི་སྒྲ་འདིས་སྒྲ་ལས་གཞན་ལ་ཉན་བྱ་ཡོད་པ་བཅད་ནས་སྒྲ་ཉན་བྱ་ཡིན་པར་སྟོན་པ་ཡིན་པའི་ཕྱིར། སྲིད་སྒྲུབ་འཕུང་སྐྱེན་ནོ་ཞེས་བརྗོད་པའི་སྒྲ་འདིས་སྲིད་སྒྲུབ་ལས་གཞན་པའི་སྲིད་སྒྲུབ་ལྟ་བུའི་འཕུང་སྐྱེན་པ་ཡོད་པ་བཅད་ནས་སྲིད་སྒྲུབ་འཕུང་སྐྱེན་པ་ཁོ་ནར་སྟོན་པ་ཡིན་པའི་ཕྱིར། མི་སྲིད་རྣམ་གཅོད་ཀྱི་སྒྲའི་མཚན་ཉིད་ཡོད་དེ། གཞི་དེ་ལ་ཆོས་དེ་མི་སྲིད་པ་རྣམ་པར་བཅད་ནས་སྲིད་པ་ཁོ་ནར་སྟོན་པའི་སྒྲ་དེ་ཡིན་པའི་ཕྱིར། མཚན་གཞི་ནི། ཨུཏྤལ་སྔོན་པོ་སྲིད་པ་ཁོ་ན་ཡིན་ཞེས་པའི་སྒྲ་ལྟ་བུའོ། །སྒྲ་འདིས་ཨུཏྤལ་ལས་གཞན་པའི་སྔོན་པོ་མི་གཅོད་ཀྱི་ཨུཏྤལ་སྔོན་པོ་མི་སྲིད་པ་རྣམ་པར་བཅད་ནས་ཨུཏྤལ་སྔོན་པོ་སྲིད་པ་ཁོ་ནར་སྟོན་པ་ཡིན་པའི་ཕྱིར། དེ་གསུམ་ཀའི་མཚན་ཉིད་དང་མཚན་གཞི་དེ་ལྟར་འཐད་དེ། རྣམ་འགྲེལ་ལས། ཆོས་ཀྱི་ཚིག་ཕྲད་ཐ་དད་པར། །བྱེད་པས་མི་ལྡན་གཞན་ལྡན་པ། །ཤིན་ཏུ་མི་སྲིད་རྣམ་གཅོད་བྱེད། །ཁྱད་པར་ཁྱད་པར་ཅན་དག་དང༌། །བྱ་བ་དག་ནི་ལྷན་ཅིག་སྦྱོར། །དེ་སྦྱར་མེད་ཀྱང་བརྗོད་འདོད་ལས། །དེ་དོན་ཉིད་ནི་རྟོགས་པར་འགྱུར། །ཞེས་དང༌། དེ་ལྟར་གྲགས་དང་ནུས་པ་དང༌། །སྒྲ་ནི་བརྗོད་འདོད་རྗེས་འབྲང་ཕྱིར། །ཞེས་གསུངས་པའི་ཕྱིར་རོ། ། གསུམ་པ་དེ་ལ་རྩོད་པ་སྤོང་བ།གསུམ་པ་དེ་ལ་རྩོད་པ་སྤོང་བ་ལ། ཁ་ཅིག་དངོས་མིང་དང་བཏགས་མིང་འགལ་བར་ཐལ། གཞི་མི་སྟོབས་ལྡན་ལྟ་བུའི་དངོས་མིང་བཏགས་མིང་འགལ་བའི་ཕྱིར་ན་མ་ཁྱབ། འདོད་མི་ནུས་ཏེ། སེངྒཻ་ཞེས་པའི་སྒྲ་དེ་དངོས་མིང་བཏགས་མིང་གཉིས་ཀ་ཡིན་པའི་ཕྱིར། མ་གྲུབ་ན། སེངྒེ་ཞེས་བརྗོད་པའི་སྒྲ་ཆོས་ཅན།དངོས་མིང་བཏགས་མིང་གཉིས་ཀ་ཡིན་པར་ཐལ། ཁྱོད་སེངྒེའི་དངོས་མིང་གང་ཞིག མི་སྟོབས་ལྡན་གྱི་བཏགས་མིང་ཡིན་པའི་ཕྱིར། ཁ་ཅིག་ན་རེ། སྒྲ་ཁོ་ན་ཉན་བྱ་ཡིན་པར་ཐལ། སྒྲ་ཁོ་ན་ཉན་བྱ་ཡིན་ཞེས་བརྗོད་པའི་སྒྲ་འདིས་སྒྲ་ལས་གཞན་ལ་མཉན་བྱ་ཡོད་པ་བཅད་ནས་སྒྲ་ཁོ་ནར་མཉན་བྱར་སྟོན་པ་གང་ཞིག སྒྲ་ལས་གཞན་མཉན་བྱ་མེད་སྒྲ་ཉན་བྱ་ཡིན་པའི་ཕྱིར། འདོད་ན། སྒྲ་ཁོ་ན་ཉན་བྱ་ཡིན་པར་ཐལ། སྒྲ་ཁོ་ན་མཉན་བྱ་ཡིན་ཞེས་བརྗོད་པའི་སྒྲ་འདི་རྗོད་བྱེད་ཀྱི་སྒྲ་དོན་མཐུན་ཡིན་པའི་ཕྱིར། འདོད་ན། སྒྲ་ཁོ་ན་ཡོད་པར་ཐལ། སྒྲ་ཁོ་ན་མཉན་བྱ་ཡིན་པའི་ཕྱིར་ཟེར་ན་མ་ཁྱབ། སྒྲ་ཁོ་ན་ཆོས་ཅན། ཡོད་པ་ཡིན་པར་ཐལ། མཉན་བྱ་ཡིན་པའི་ཕྱིར་ཟེར་ན་སྒྲ་ཁོ་ན་དེ་ཡོད་པ་ཡིན་པར་འདོད་ཅེས་དེ་སྒྲ་སྦྱར་ནས་འདོད་ཅེས་བྱའོ། ། དེས་རྟག་པ་ཁོ་ན་ཡོད་པར་ཐལ། རྟག་པ་ཁོ་ན་རྟག་པ་ཡིན་པའི་ཕྱིར་ཞེས་པ་སོགས་ལ་ལན་འདེབས་ཚུལ་ཤེས་པར་བྱའོ།། །། ཉེར་གཅིག་པ་དགག་སྒྲུབ་ཀྱི་རྣམ་བཞག་བཤད་པ།ཉེར་གཅིག་པ་དགག་སྒྲུབ་ཀྱི་རྣམ་བཞག་བཤད་པ་ལ། དགག་བཞག་གཉིས་ལས། དང་པོ་དངོས་པོ་ཡིན་ན་སྒྲུབ་པ་ཡིན་པས་ཁྱབ་ཟེར་ན། བུམ་པ་མ་ཡིན་པ་ལས་ལོག་པའི་བུམ་པ་ཆོས་ཅན། སྒྲུབ་པ་ཡིན་པར་ཐལ། དངོས་པོ་ཡིན་པའི་ཕྱིར། ཁྱབ་པ་ཁས། མ་གྲུབ་ན། དེ་ཆོས་ཅན། དངོས་པོ་ཡིན་པར་ཐལ།གཟུགས་ཡིན་པའི་ཕྱིར། དེར་ཐལ། བུམ་པ་ཡིན་པའི་ཕྱིར། རྩ་བར་འདོད་ན། བུམ་པ་མ་ཡིན་པ་ལས་ལོག་པའི་བུམ་པ་ཆོས་ཅན། སྒྲུབ་པ་མ་ཡིན་པར་ཐལ། དགག་པ་ཡིན་པའི་ཕྱིར། དེར་ཐལ། རང་དངོས་དུ་རྟོགས་པའི་བློས་དགག་བྱ་དངོས་སུ་བཅད་ནས་རྟོགས་པར་བྱ་བའི་ཆོས་ཡིན་པའི་ཕྱིར། མ་ཁྱབ་ན་ཁྱབ་པ་ཡོད་པར་ཐལ། རང་དངོས་སུ་རྟོགས་པའི་བློས་དགག་བྱ་དངོས་སུ་བཅད་ནས་རྟོགས་པར་བྱ་བའི་ཆོས་དེ་དགག་པའི་མཚན་ཉིད་ཡིན་པའི་ཕྱིར། ཁ་ཅིག་ན་རེ། རང་གི་དངོས་མིང་གི་མཐར་མེད་ཚིག་སྦྱར་བའི་ཆོས་ཡིན་ན་མེད་དགག་ཡིན་པས་ཁྱབ་ཟེར་ན། སངས་རྒྱས་ཚེ་དཔག་མེད་ཆོས་ཅན། དེར་ཐལ། དེའི་ཕྱིར། ཁྱབ་པ་ཁས། མ་གྲུབ་ན། དེ་ཆོས་ཅན། དེར་ཐལ། སངས་རྒྱས་ཚེ་དཔག་མེད་ཅེས་བརྗོད་པའི་སྒྲ་ཁྱོད་ཀྱི་དངོས་མིང་ཡིན་པ་གང་ཞིག དེའི་མཐར་མེད་ཚིག་སྦྱར་བ་མངོན་སུམ་གྱིས་གྲུབ་པའི་ཕྱིར། རྩ་བར་འདོད་ན། སངས་རྒྱས་ཚེ་དཔག་མེད་ཆོས་ཅན། མེད་དགག་མ་ཡིན་པར་ཐལ། དངོས་པོ་ཡིན་པའི་ཕྱིར། དེར་ཐལ། གང་ཟག་ཡིན་པའི་ཕྱིར། སྔ་མ་ལ་ཁྱབ་པ་ཡོད་པར་ཐལ། མེད་དགག་ཡིན་ན་དངོས་མེད་ཡིན་པས་ཁྱབ་པའི་ཕྱིར། ཁ་ཅིག་ན་རེ། དགག་པ་ཡིན་ན་རང་གི་དངོས་མིང་ལ་དགག་ཚིག་སྦྱར་བའི་ཆོས་ཡིན་པས་ཁྱབ་ཟེར་ན། ནམ་མཁའ་ཆོས་ཅན། རང་གི་དངོས་མིང་ལ་དགག་ཚིག་སྦྱར་བའི་ཆོས་ཡིན་པར་ཐལ། དགག་པ་ཡིན་པའི་ཕྱིར། ཁྱབ་པ་ཁས། མ་གྲུབ་ན། ནམ་མཁའ་ཆོས་ཅན། དགག་པ་ཡིན་པར་ཐལ། མེད་དགག་ཡིན་པའི་ཕྱིར། དེར་ཐལ། འདུས་མ་བྱས་པའི་ནམ་མཁའ་ཡིན་པའི་ཕྱིར། ཁ་ཅིག་ན་རེ། གཟུགས་ཆོས་ཅན། དགག་པ་ཡིན་པར་ཐལ། རང་དངོས་སུ་རྟོགས་པའི་བློས་རང་གི་དགག་བྱ་དངོས་སུ་བཅད་ནས་རྟོགས་དགོས་པའི་ཆོས་ཡིན་པའི་ཕྱིར། མ་གྲུབ་ན། གཟུགས་ཆོས་ཅན། དེར་ཐལ། རང་དངོས་སུ་རྟོགས་པའི་རྟོག་པ་དེས་རང་གི་དགག་བྱ་དངོས་སུ་བཅད་ནས་རྟོགས་དགོས་པའི་ཆོས་ཡིན་པའི་ཕྱིར། མ་གྲུབ་ན། གཟུགས་ཆོས་ཅན། དེར་ཐལ། རང་འཛིན་པའི་རྟོག་པས་རང་མ་ཡིན་པ་རྣམ་པར་བཅད་ནས་རྟོགས་དགོས་པའི་ཆོས་ཡིན་པའི་ཕྱིར་ན་མ་ཁྱབ། མ་གྲུབ་ན། གཟུགས་ཆོས་ཅན། ཁྱོད་འཛིན་རྟོག་པས་ཁྱོད་མ་ཡིན་པ་རྣམ་པར་བཅད་ནས་རྟོགས་དགོས་པའི་ཆོས་ཡིན་པར་ཐལ། གཞི་གྲུབ་པའི་ཕྱིར། ཁ་ཅིག་ན་རེ། མ་ཡིན་དགག་ཡིན་ན་རང་ཞེས་བརྗོད་པའི་སྒྲས་རང་གི་དགག་བྱ་བཀག་ཤུལ་དུ་ཆོས་གཞན་མ་ཡིན་དགག་དང་སྒྲུབ་པ་གང་རུང་དངོས་སུ་འཕེན་པའི་ཆོས་ཡིན་པས་ཁྱབ་ཟེར་ན། ལྷས་སྦྱིན་ཚོན་པོ་ཉིན་པར་ཟས་མི་ཟ་བ་ཆོས་ཅན། དེར་ཐལ། དེའི་ཕྱིར། ཁྱབ་པ་ཁས། མ་གྲུབ་ན། ལྷས་སྦྱིན་ཚོན་པོ་ཉིན་པར་ཟས་མི་ཟ་བ་ཆོས་ཅན། མ་ཡིན་དགག་ཡིན་པར་ཐལ། རང་ཞེས་བརྗོད་པའི་སྒྲས་དགག་བྱ་ཚིག་ཟིན་ལ་བཀག་ནས་ཆོས་གཞན་མ་ཡིན་དགག་དང་སྒྲུབ་པ་གང་རུང་འཕེན་པར་བྱེད་པ་ཡིན་པའི་ཕྱིར། དེར་ཐལ། རང་ཞེས་བརྗོད་པའི་སྒྲས་ཉིན་པར་ཟས་ཟ་བ་དངོས་སུ་བཀག་ནས་མཚན་མོ་ཟ་བ་ཤུགས་ལ་འཕངས་པ་གང་ཞིག མཚན་མོ་ཟ་བ་སྒྲུབ་པ་ཡིན་པའི་ཕྱིར། རྩ་བར་འདོད་མི་ནུས་ཏེ། ལྷས་སྦྱིན་ཚོན་པོ་ཉིན་པར་ཟས་མི་ཟ་བ་ཞེས་པའི་སྒྲ་འདིས་རང་གི་དགག་བྱ་ཚིག་ཟིན་ལ་དངོས་སུ་བཀག་ནས་ཆོས་གཞན་མ་ཡིན་དགག་དང་སྒྲུབ་པ་གང་རུང་དངོས་སུ་མི་འཕེན་ཀྱང་ཤུགས་ལ་འཕེན་པར་བྱེད་པ་དེ་ཡིན་པའི་ཕྱིར། དེར་ཐལ། ལྷས་སྦྱིན་ཚོན་པོ་ཉིན་པར་ཟས་མི་ཟ་བ་ཞེས་པའི་སྒྲ་འདིས་ཉིན་པར་ཟས་ཟ་བ་བཀག་ནས་མཚན་མོ་ཟ་བ་ཤུགས་ལ་འཕེན་པ་ཡིན་པའི་ཕྱིར། བྱས་པ་ལ་ཁོ་ན་རེ། ལྷས་སྦྱིན་ཚོན་པོ་ཉིན་པར་ཟས་མི་ཟ་བ་ཞེས་པའི་སྒྲ་འདིས་རང་གི་དགག་བྱ་ཚིག་ཟིན་ལ་དངོས་སུ་བཀག་ནས་ཆོས་གཞན་མ་ཡིན་དགག་དང་སྒྲུབ་པ་གང་རུང་ཤུགས་ལ་འཕེན་པར་བྱེད་པ་དེ་མ་ཡིན་པར་ཐལ། བྲམ་ཟེ་ཆང་མི་འཐུང་བ་ཞེས་པའི་སྒྲ་འདིས་རང་གི་དགག་བྱ་ཚིག་ཟིན་ལ་དངོས་སུ་བཀག་ནས་ཆོས་གཞན་མ་ཡིན་དགག་དང་སྒྲུབ་པ་གང་རུང་ཤུགས་ལ་འཕེན་པར་བྱེད་པ་མ་ཡིན་པའི་ཕྱིར་ན་མ་ཁྱབ། རྟགས་གྲུབ་སྟེ། བྲམ་ཟེ་ཆང་མི་འཐུང་བ་ཞེས་པའི་སྒྲ་འདིསབྲམ་ཟེ་ཆང་འཐུང་བ་དངོས་སུ་བཀག་ནས་ཆོས་གཞན་མ་ཡིན་དགག་དང་སྒྲུབ་པ་གང་རུང་འཕེན་པར་བྱེད་པ་མ་ཡིན་པའི་ཕྱིར། དེར་ཐལ། བྲམ་ཟེ་ཆང་མི་འཐུང་བ་མེད་དགག་ཏུ་འཇོག་དགོས་པ་ཡིན་པའི་ཕྱིར། རྟོག་གེ་འབར་བ་ལས། མེད་པར་དགག་པ་ནི་དངོས་པོའི་ངོ་བོ་ཉིད་ཙམ་ཞིག་འགོག་པར་ཟད་ཀྱི་དེ་དང་འདྲ་བ་དེ་མ་ཡིན་པ་གཞན་གྱི་དངོས་པོ་བསྒྲུབ་པར་མི་བྱེད་པ་སྟེ། དཔེར་ན་བྲམ་ཟེ་ཆང་བཏུང་བར་མི་བྱའོ་ཞེས་བྱ་བ་དེ་ཙམ་ཞིག་འགོག་པར་ཟད་ཀྱི་དེ་ལས་གཞན་པའི་བཏུང་བ་བཏུང་ངོ་ཞེའམ་མི་བཏུང་ངོ་ཞེས་མ་བརྗོད་པ་ལྟ་བུའོ། །ཞེས་གསུངས་སོ། །ཁ་ཅིག་ན་རེ། རང་བརྗོད་པའི་སྒྲས་ཆོས་གཞན་མ་ཡིན་དགག་དང་སྒྲུབ་པ་གང་རུང་འཕེན་པར་བྱེད་པ་ཡིན་ན་རང་ཉིད་དགག་པ་ཡིན་པས་ཁྱབ་ཟེར་ན། བྱས་པ་ཆོས་ཅན། རང་ཉིད་དགག་པ་ཡིན་པར་ཐལ། རང་བརྗོད་པའི་སྒྲས་ཆོས་གཞན་མ་ཡིན་དགག་དང་སྒྲུབ་པ་གང་རུང་འཕེན་པར་བྱེད་པ་ཡིན་པའི་ཕྱིར། ཁྱབ་པ་ཁས། མ་གྲུབ་ན། བྱས་པ་ཆོས་ཅན། ཁྱོད་ཅེས་བརྗོད་པའི་སྒྲས་ཆོས་གཞན་མ་ཡིན་དགག་དང་སྒྲུབ་པ་གང་རུང་འཕེན་པར་བྱེད་པ་ཡིན་པར་ཐལ། ཁྱོད་ཅེས་བརྗོད་པའི་སྒྲས་ཁྱོད་ཀྱི་རྒྱུ་རྐྱེན་འཕེན་པར་བྱེད་པ་ཡིན་པའི་ཕྱིར། རྩ་བར་འདོད་ན། བྱས་པ་ཆོས་ཅན། དགག་པ་མ་ཡིན་པར་ཐལ། སྒྲུབ་པ་ཡིན་པའི་ཕྱིར། མ་གྲུབ་ན། བྱས་པ་སྒྲུབ་པ་ཡིན་པར་ཐལ། དངོས་པོ་སྒྲུབ་པ་ཡིན་པ་གང་ཞིག དེ་གཉིས་འདྲ་བའི་ཕྱིར། ཁ་ཅིག་ན་རེ། བྱས་པ་ཆོས་ཅན། སྒྲུབ་པ་མ་ཡིན་པར་ཐལ། དགག་པ་ཡིན་པའི་ཕྱིར། མ་གྲུབ་ན། བྱས་པ་དགག་པ་ཡིན་པར་ཐལ། སྒྲ་བྱས་པ་དགག་པ་ཡིན་པའི་ཕྱིར། མ་གྲུབ་ན། དེར་ཐལ། སྒྲ་བྱས་པ་ཡིན་ནོ། །ཞེས་པའི་སྒྲ་འདིས་སྒྲ་བྱས་པ་མ་ཡིན་པ་རྣམ་པར་བཅད་ནས་བརྗོད་དགོས་པའི་ཆོས་ཡིན་དགོས་པའི་ཕྱིར་ཟེར་ན་མ་ཁྱབ། འོ་ན་ཁྱོད་རང་ལ་གཟུགས་དགག་པ་ཡིན་པར་ཐལ། གཟུགས་ཞེས་བརྗོད་པའི་སྒྲས་གཟུགས་མ་ཡིན་པ་རྣམ་པར་བཅད་ནས་བརྗོད་དགོས་པའི་ཆོས་ཡིན་པའི་ཕྱིར། འདོད་ན། སྒྲུབ་པ་མེད་པར་ཐལ། གཟུགས་སྒྲུབ་པ་མ་ཡིན་པའི་ཕྱིར། འདོད་མི་ནུས། ཁ་ཅིག་གཟུགས་དེ་གཟུགས་ཞེས་བརྗོད་པའི་སྒྲས་གཟུགས་མ་ཡིན་པ་རྣམ་པར་བཅད་ནས་བརྗོད་དགོས་པའི་ཆོས་མིན་ཟེར་ན། དེ་ཡིན་པར་ཐལ། གཟུགས་དེ་གཟུགས་ཞེས་བརྗོད་པའི་སྒྲ་འདིས་གཟུགས་མ་ཡིན་པ་རྣམ་པར་བསལ་ནས་བརྗོད་དགོས་པའི་ཆོས་ཡིན་པའི་ཕྱིར། དེར་ཐལ། གཟུགས་ཞེས་བརྗོད་པའི་སྒྲ་གཟུགས་ལ་སེལ་འཇུག་ཡིན་པའི་ཕྱིར། ཁྱབ་སྟེ། སེལ་འཇུག་ཅེས་པའི་སེལ་བའི་དོན་ནི་ཆོས་དེ་མ་ཡིན་པ་རྣམ་པར་སེལ་བ་ལ་ལྟོས་དགོས་པ་ཡིན་པའི་ཕྱིར། ཁ་ཅིག་ཤེས་རབ་སྒྲོན་མེ་ལས། མ་ཡིན་དགག་དེར་སྒྲུབ་པར་མི་བྱ་སྟེ། དེ་ནི་དངོས་པོ་སྒྲུབ་པ་ཤས་ཆེ་བའི་ཕྱིར། ཞེས་པའི་དོན་དུ་བསམས་ནས་མ་ཡིན་དགག་དགག་པ་མིན་ཟེར་ན། དེ་མི་འཐད་པར་ཐལ། མ་ཡིན་དགག་དགག་པ་ཡིན་པའི་ཕྱིར། མ་གྲུབ་ན། མ་ཡིན་དགག་ཆོས་ཅན། དགག་པ་ཡིན་པར་ཐལ། དགག་པའི་དབྱེ་བ་ཡིན་པའི་ཕྱིར། མ་གྲུབ་ན། དེ་ཡིན་པར་ཐལ། ཞི་མཚོའི་ཚད་ཆེན་ལས། འདི་ནི་སེལ་བ་རྣམ་གཉིས་ཏེ། །མ་ཡིན་དགག་དང་མེད་པའོ། །ཞེས་དང༌། ལྡོག་པ་བསྡུས་པ་ལས། དགག་པའི་རྣམ་གྲངས་ཇི་སྙེད་པ། །མེད་དང་མ་ཡིན་གཉིས་སུ་འདུས། །ཞེས་གསུངས་པའི་ཕྱིར། གཉིས་པ་རང་ལུགས་བཤད་པ།གཉིས་པ་རང་ལུགས་བཤད་པ་ལ། དགག་པའི་མཚན་ཉིད་ཡོད་དེ། རང་དངོས་སུ་རྟོགས་པའི་རྟོག་པ་དེས་རང་གི་དགག་བྱ་དངོས་སུ་བཅད་ནས་རྟོགས་དགོས་པའི་ཆོས་དེ་ཡིན་པའི་ཕྱིར། མཚན་གཞི་ནི། དེ་བཞིན་ཉིད་དང༌། བདག་མེད་ལྟ་བུའོ། །དགག་པ་ལ་དབྱེ་ན་གཉིས་ཡོད་དེ། མ་ཡིན་དགག་དང་མེད་དགག་གཉིས་ཡོད་པའི་ཕྱིར། མ་ཡིན་དགག་གི་མཚན་ཉིད་ཡོད་དེ། རང་ཞེས་བརྗོད་པའི་སྒྲས་རང་གི་དགག་བྱ་བཀག་ཤུལ་དུ་ཆོས་གཞན་མ་ཡིན་དགག་དང་སྒྲུབ་པ་གང་རུང་འཕེན་པའི་དགག་པ་དེ་ཡིན་པའི་ཕྱིར། མཚན་གཞི་ནི། བུམ་པ་མེད་པའི་ས་ཕྱོགས་ལྟ་བུའོ། །མེད་དགག་གི་མཚན་ཉིད་ཡོད་དེ། རང་ཞེས་བརྗོད་པའི་སྒྲས་རང་གི་དགག་བྱ་བཀག་ཤུལ་དུ་ཆོས་གཞན་མ་ཡིན་དགག་དང་སྒྲུབ་པ་གང་རུང་མི་འཕེན་པའི་དགག་པ་དེ་ཡིན་པའི་ཕྱིར། མཚན་གཞི་ནི། བུམ་པ་མེད་པ་ལྟ་བུའོ། །དགག་པ་ལ་དབྱེ་ན་ལྔ་ཡོད་དེ། རང་ཞེས་བརྗོད་པའི་སྒྲས་རང་གི་དགག་བྱ་ཚིག་ཟིན་ལ་དངོས་སུ་བཀག་ནས་ཆོས་གཞན་མ་ཡིན་དགག་དང་སྒྲུབ་པ་གང་རུང་དངོས་སུ་འཕེན་པ་དང༌། ཤུགས་ལ་འཕེན་པ་དང༌། དངོས་ཤུགས་གཉིས་ཀར་འཕེན་པ་དང༌། སྐབས་ཐོབ་ཀྱིས་འཕེན་པ་དང༌། རང་ཞེས་བརྗོད་པའི་སྒྲས་དགག་བྱ་ཚིག་ཟིན་ལ་བཀག་ནས་ཆོས་གཞན་མ་ཡིན་དགག་དང་སྒྲུབ་པ་གང་རུང་མི་འཕེན་པ་དང་ལྔ་ཡོད་པའི་ཕྱིར། དང་པོ་རང་ཞེས་བརྗོད་པའི་སྒྲས་རང་གི་དགག་བྱ་ཚིག་ཟིན་ལ་དངོས་སུ་བཀག་ནས་ཆོས་གཞན་མ་ཡིན་དགག་དང་སྒྲུབ་པ་གང་རུང་དངོས་སུ་འཕེན་པ་ཡོད་དེ། བུམ་པ་གང་ཟག་གི་བདག་མེད་ཡོད་པ་དེ་ཡིན་པའི་ཕྱིར། མ་གྲུབ་ན། དེ་ཆོས་ཅན། རང་ཞེས་བརྗོད་པའི་སྒྲས་རང་གི་དགག་བྱ་ཚིག་ཟིན་ལ་དངོས་སུ་བཀག་ནས་ཆོས་གཞན་མ་ཡིན་དགག་དང་སྒྲུབ་པ་གང་རུང་དངོས་སུ་འཕེན་པའི་དགག་པ་ཡིན་པར་ཐལ། རང་ཞེས་བརྗོད་པའི་སྒྲས་རང་གི་དགག་བྱ་ཚིག་ཟིན་ལ་དངོས་སུ་བཀག་པ་གང་ཞིག ཆོས་གཞན་མ་ཡིན་དགག་དང་སྒྲུབ་པ་གང་རུང་དངོས་སུ་འཕེན་པ་ཡིན་པའི་ཕྱིར། རྟགས་དང་པོ་གྲུབ་སྟེ། བུམ་པ་གང་ཟག་གི་བདག་མེད་ཡོད་པ་ཞེས་བརྗོད་པའི་སྒྲ་འདིས་བུམ་པ་གང་ཟག་གི་བདག་ཚིག་ཟིན་ལ་འགོག་པར་བྱེད་པ་ཡིན་པའི་ཕྱིར། རྟགས་གཉིས་པ་གྲུབ་སྟེ། བུམ་པ་གང་ཟག་གི་བདག་མེད་ཡོད་པ་ཞེས་བརྗོད་པའི་སྒྲ་འདིས་ཡོད་པ་དངོས་སུ་འཕངས་པ་ཡིན་པའི་ཕྱིར། གཉིས་པ་རང་ཞེས་བརྗོད་པའི་སྒྲས་རང་གི་དགག་བྱ་ཚིག་ཟིན་ལ་དངོས་སུ་བཀག་ནས་ཆོས་གཞན་མ་ཡིན་དགག་དང་སྒྲུབ་པ་གང་རུང་ཤུགས་ལ་འཕེན་པའི་དགག་པ་བཞག་ཏུ་ཡོད་དེ། ལྷས་སྦྱིན་ཚོན་པོ་ཉིན་པར་ཟས་མི་ཟ་བ་དེ་ཡིན་པའི་ཕྱིར། དེར་ཐལ། ལྷས་སྦྱིན་ཚོན་པོ་ཉིན་པར་ཟས་མི་ཟ་བ་ཞེས་པའི་ཚིག་འདིས་རང་གི་དགག་བྱ་ཉིན་པར་ཟས་ཟ་བ་དངོས་སུ་བཀག་ནས་མཚན་མོ་ཟ་བ་ཤུགས་ལ་འཕེན་པ་གང་ཞིག མཚན་མོར་ཟ་བ་སྒྲུབ་པ་ཡིན་པའི་ཕྱིར། རྟགས་ཕྱི་མ་དེར་ཐལ། ཟས་ཟ་བ་སྒྲུབ་པ་ཡིན་པའི་ཕྱིར། གསུམ་པ་རང་ཞེས་བརྗོད་པའི་སྒྲས་རང་གི་དགག་བྱ་ཚིག་ཟིན་ལ་དངོས་སུ་བཀག་ནས་ཆོས་གཞན་མ་ཡིན་དགག་དང་སྒྲུབ་པ་གང་རུང་དངོས་ཤུགས་གཉིས་ཀར་འཕེན་པའི་དགག་པ་བཞག་ཏུ་ཡོད་དེ། ལྷས་སྦྱིན་ཚོན་པོ་ཉིན་པར་ཟས་མི་ཟ་བ་ལུས་རིད་པ་མ་ཡིན་པ་ཡོད་པ་དེ་ཡིན་པའི་ཕྱིར། དེར་ཐལ། ལྷས་སྦྱིན་ཚོན་པོ་ཉིན་པར་ཟས་མི་ཟ་བ་ལུས་རིད་པ་མ་ཡིན་པ་ཡོད་པ་ཞེས་པའི་སྒྲ་འདིས་ཉིན་པར་ཟས་ཟ་བ་དངོས་སུ་བཀག་ནས་མཚན་མོར་ཟ་བ་ཤུགས་ལ་འཕངས། ལུས་རིད་པ་མ་ཡིན་པ་ཡོད་པ་དངོས་སུ་འཕངས་པ་གང་ཞིག མཚན་མོ་ཟ་བ་སྒྲུབ་པ་དང་ལུས་རིད་པ་མ་ཡིན་པ་ཡོད་པ་མ་ཡིན་དགག་ཡིན་པའི་ཕྱིར། བཞི་བ་རང་ཞེས་བརྗོད་པའི་སྒྲས་རང་གི་དགག་བྱ་ཚིག་ཟིན་ལ་དངོས་སུ་བཀག་ནས་ཆོས་གཞན་མ་ཡིན་དགག་དང་སྒྲུབ་པ་གང་རུང་སྐབས་ཐོབ་ཀྱི་འཕེན་པའི་དགག་པ་བཞག་ཏུ་ཡོད་དེ། གང་ཟག་གཅིག་བྲམ་ཟེའི་རིགས་དང་རྒྱལ་རིགས་གང་རུང་དུ་ངེས་ནས་ཁྱད་པར་མ་ངེས་པའི་ཚེ་འདི་ནི་བྲམ་ཟེ་མ་ཡིན་ཞེས་པའི་སྒྲ་འདིས་བྲམ་ཟེ་ཡིན་པ་ཚིག་ཟིན་ལ་དངོས་སུ་བཀག་ནས་རྒྱལ་རིགས་ཡིན་པ་སྐབས་ཐོབ་ཀྱིས་འཕངས་པ་ཡིན་པའི་ཕྱིར། ལྔ་བ་རང་ཞེས་བརྗོད་པའི་སྒྲས་དགག་བྱ་ཚིག་ཟིན་ལ་བཀག་ནས་ཆོས་གཞན་མ་ཡིན་དགག་དང་སྒྲུབ་པ་གང་རུང་མི་འཕེན་པ་བཞག་ཏུ་ཡོད་དེ། བདག་མེད་དེ་ཡིན་པའི་ཕྱིར། དེར་ཐལ། བདག་མེད་ཅེས་བརྗོད་པའི་སྒྲ་འདིས་ཆོས་གཞན་མ་ཡིན་དགག་དང་སྒྲུབ་པ་གང་རུང་དངོས་སུ་མི་འཕེན་ཤུགས་ལ་ཡང་མི་འཕེན་སྐབས་ཐོབ་ཀྱིས་མི་འཕེན་པ་ཡིན་པའི་ཕྱིར། དེ་དག་ལས་དང་པོ་བཞི་མ་ཡིན་དགག་དང༌། ཕྱི་མ་མེད་དགག་ཏུ་འཇོག་དགོས་པ་ཡིན་པའི་ཕྱིར། དབུ་མ་ཆེན་པོ་སློབ་དཔོན་དབྱིག་གཉེན་གྱིས། ཡོད་པ་དང་ནི་འགོག་པ་དང༌། །གཞན་པ་ཉིད་དང་འདྲ་བ་དང༌། །སྨད་དང་ཉུང་དང་བྲལ་དོན་དང༌། །གཉེན་པོ་དག་ལ་འདི་ཡོད་དོ། །ཞེས་གསུངས་པ་ལྟར་དགག་སྒྲ་རྣམ་པ་བདུན་ཡོད་དེ། དང་པོ་དགག་བྱ་བཀག་ཙམ་གྱི་མེད་དགག་སྟོན་པའི་དགག་སྒྲ་ནི། བདག་མེད་དང་བུམ་མེད་ཅེས་པའི་སྒྲ་ལྟ་བུའོ། །གཉིས་པ་གཞན་པར་སྟོན་པའི་དགག་སྒྲ་ནི། སྐམ་ས་ན་ཆུ་མེད་ཅེས་བརྗོད་པའི་སྒྲ་ལྟ་བུའོ། །གསུམ་པ་མི་འདྲ་བར་སྟོན་པའི་དགག་སྒྲ་ནི། མི་དང་མི་འདྲ་བའི་གང་ཟག་ལ་མི་དང་འདྲ་བ་མ་ཡིན་ཞེས་བརྗོད་པའི་སྒྲ་ལྟ་བུའོ། །བཞི་བ་སྨད་པར་སྟོན་པའི་དགག་སྒྲ་ནི། ཡོན་ཏན་ཅན་གྱི་བླ་མ་མེད་པ་ལ་བླ་མ་མེད་ཅེས་པ་བརྗོད་པའི་སྒྲ་ལྟ་བུའོ། །ལྔ་བ་ཉུང་བར་སྟོན་པའི་དགག་སྒྲ་ནི། སྐྱེས་བུ་གཟུགས་ཆུང་བ་ལ་གཟུགས་མེད་ཅེས་བརྗོད་པའི་སྒྲ་ལྟ་བུའོ། །དྲུག་པ་བྲལ་བར་སྟོན་པའི་དགག་སྒྲ་ནི། ཆུ་མེད་པའི་དགོན་པ་དང༌། དགྲ་བཅོམ་པ་ལ་ཉོན་མོངས་པ་དང་བྲལ་ཞེས་བརྗོད་པ་ལྟའོ། ། བདུན་པ་གཉེན་པོར་སྟོན་པའི་དགག་སྒྲ་ནི། མ་རིག་པ་ཞེས་བརྗོད་པའི་སྒྲ་ལྟ་བུའོ། །ཡང་དགག་པ་ལ་དབྱེ་ན་བཅོ་ལྔ་ཡོད་དེ། ལྡོག་པ་བསྡུས་པ་ལས། མེད་དང་གཞན་དང་འདྲ་བ་དང༌། །དམན་དང་ཞུམ་དང་ཞན་པ་དང༌། །ཕྲ་དང་ཉུང་དང་མྱུར་བ་དང༌། །ཆུང་དང་ལྷག་མ་མེད་པ་དང༌། །འགའ་ལས་མཐའ་དག་མ་ཡིན་དང༌། །མི་མཐུན་གཉེན་པོ་བྲལ་བ་ཡི། །རྣམ་གྲངས་བཅོ་ལྔ་བཤད་པ་ཡིན། །ཞེས་གསུངས་སོ། །འདི་རྣམས་ཀྱི་མཚན་གཞི་བསྡུས་གྲྭའི་སྤྱི་དོན་རིན་ཆེན་སྒྲོན་མེ་ལས་ཤེས་པར་བྱའོ། །མཁས་པ་དུ་མས་དགག་པ་དང་སེལ་བ་དང་གཞན་སེལ་དང་ལྡོག་པ་བཞི་དོན་གཅིག་ཡིན་པར་བཞེད་ལ། འདིར་བཀའ་བཞི་བ་བསོད་ནམས་བཟང་པོའི་གསུང་སྒྲོས་ལྟར་རེ་ཞིག་བཤད་ན། གཏན་ཚིག་རིགས་པའི་དོན་བསྡུས་ལས། རྫས་དང་ལྡོག་པའི་མཚན་ཉིད་ནི་རིམ་པ་ལྟར་ངོ་བོ་སྐྱེས་པ་དང༌། རང་མ་ཡིན་པ་ལས་ལོག་པར་གནས་པའོ། །དེ་དང་གཞན་སེལ་དོན་གཅིག་གོ །དབྱེ་ན་དང་པོ་རྫས་ལ་རྫས་གཅིག་ཐ་དད་གཉིས་སོ། །གཉིས་པ་ལྡོག་པའམ་གཞན་སེལ་ལ་ཤིང་རང་མཚན་ལྟ་བུ་དོན་གྱི་གཞན་སེལ། ཤིང་འཛིན་རྟོག་པ་ལ་སྣང་བའི་ཤིང་གི་རྣམ་པ་ཕྱི་རོལ་ཤིང་དུ་སྒྲོ་བཏགས་ཆ་ལྟ་བུ་བློ་ལ་སྣང་བའི་གཞན་སེལ། ཤིང་མིན་ལས་ལོག་པ་ལྟ་བུ་ལྡོག་པ་མེད་དགག་གི་གཞན་སེལ་དང་གསུམ་མོ། །ཞེས་དང༌། དེ་ལས། ཁྱབ་མཉམ་དོན་གཅིག་པ་ནི། ཡུལ་དང་གཞལ་བྱ་བདག་མེད་དང་གཞི་གྲུབ་གཞན་སེལ་ཡོད་པ་སོགས་སོ། །ཞེས་གསུངས་སོ། །སྒྲུབ་པའི་མཚན་ཉིད་ཡོད་དེ། རང་དངོས་སུ་རྟོགས་པའི་རྟོག་པ་དེས་རང་གི་དགག་བྱ་དངོས་སུ་བཅད་ནས་རྟོགས་པར་བྱ་བ་མིན་པའི་ཆོས་དེ་ཡིན་པའི་ཕྱིར། དབྱེ་ན། དངོས་པོར་གྱུར་བའི་སྒྲུབ་པ་དང༌། དངོས་མེད་དུ་གྱུར་བའི་སྒྲུབ་པ་གཉིས་སོ། །དེ་ལྟར་གཏན་ཚིགས་རིགས་པའི་དོན་བསྡུསལས། དགག་པ་དང་སྒྲུབ་པ་ལ་མཚན་ཉིད་ནི་རིམ་པ་ལྟར། བློས་རྣམ་བཅད་དུ་གྲུབ་པ་དང༌། ཡོངས་གཅོད་དུ་གྲུབ་པ་ཞེས་པའོ། །དབྱེ་ན། དང་པོ་ལ་མེད་དགག་དང་མ་ཡིན་དགག་གཉིས་ཏེ། མཚན་ཉིད་ནི་རིམ་པ་ལྟར་དགག་བྱ་བཀག་ཤུལ་དུ་སྒྲུབ་ཆོས་མ་བསྒྲུབས་པར་རྣམ་བཅད་ཙམ་དུ་གྲུབ་པ་དང༌། དགག་བྱ་བཀག་ཤུལ་དུ་སྒྲུབ་ཆོས་སུ་བསྟན་བྱ་ཡིན་པའོ། །གཉིས་པ་སྒྲུབ་པ་ལ་དངོས་པོར་ཡོད་པའི་སྒྲུབ་པ་དང༌། དངོས་པོར་མེད་པའི་སྒྲུབ་པ་གཉིས་སོ། །ཞེས་གསུངས་སོ།། །། ཉེར་གཉིས་པ་འགལ་འབྲེལ་ཆེ་བའི་རྣམ་བཞག་བཤད་པ།ཉེར་གཉིས་པ་འགལ་འབྲེལ་ཆེ་བའི་རྣམ་བཞག་བཤད་པ་ལ། དགག་བཞག་སྤོང་གསུམ་ལས། ཁ་ཅིག་ན་རེ། འགལ་བ་ཡིན་ན་དངོས་འགལ་གཉིས་པོ་གང་རུང་ཡིན་པས་ཁྱབ་ཟེར་ན། གསེར་བུམ་ཟངས་བུམ་གཉིས་ཆོས་ཅན། དེར་ཐལ། དེའི་ཕྱིར། ཁྱབ་པ་ཁས། མ་གྲུབ་ན། དེ་ཆོས་ཅན། འགལ་བ་ཡིན་པར་ཐལ། ཐ་དད་ཅིང་གཞི་མཐུན་མི་སྲིད་པ་ཡིན་པའི་ཕྱིར། རྩ་བར་འདོད་ན། གསེར་བུམ་ཟངས་བུམ་གཉིས་ཆོས་ཅན། དངོས་འགལ་གཉིས་པོ་གང་རུང་མ་ཡིན་པར་ཐལ། ཕན་ཚུན་སྤངས་འགལ་གྱི་དངོས་འགལ་མ་ཡིན་པ་གང་ཞིག ལྷན་གཅིག་མི་གནས་འགལ་གྱི་དངོས་འགལ་མ་ཡིན་པའི་ཕྱིར། དང་པོ་མ་གྲུབ་ན། དེ་གཉིས་ཆོས་ཅན། ཕན་ཚུན་གཅིག་ཡིན་པ་རྣམ་པར་བཅད་པས་གཅིག་ཤོས་ཡིན་པ་ཡོངས་གཅོད་ལ་གྲུབ་པར་ཐལ། ཕན་ཚུན་སྤངས་འགལ་གྱི་དངོས་འགལ་ཡིན་པའི་ཕྱིར། འདོད་ན། གཞི་དེ་གསེར་བུམ་ཡིན་པ་རྣམ་པར་བཅད་པས་གཞི་ཟངས་བུམ་ཡིན་པ་ཡོངས་གཅོད་ལ་གྲུབ་པར་ཐལ། འདོད་པའི་ཕྱིར། འདོད་མི་ནུས་ཏེ། ཀ་བ་དེ་གསེར་བུམ་ཡིན་པ་རྣམ་པར་བཅད་པས་ཟངས་བུམ་ཡིན་པར་གོ་མི་ནུས་པའི་ཕྱིར། གོང་གི་རྟགས་གཉིས་པ་མ་གྲུབ་ན། གསེར་བུམ་ཟངས་བུམ་གཉིས་ཆོས་ཅན། དངོས་སུ་གནོད་བྱ་གནོད་བྱེད་ཡིན་པར་ཐལ། ལྷན་གཅིག་མི་གནས་འགལ་གྱི་དངོས་འགལ་ཡིན་པའི་ཕྱིར། འདོད་མི་ནུས་ཏེ། དེ་གཉིས་ཕན་ཚུན་གང་གི་ཕྱོགས་ནས་གནོད་བྱ་གནོད་བྱེད་མ་ཡིན་པའི་ཕྱིར། ཁ་ཅིག་ན་རེ། འགལ་བ་ཡིན་ན་ཕན་ཚུན་སྤངས་འགལ་ཡིན་པས་ཁྱབ་ཟེར་ན། འོ་ན་ལྷན་ཅིག་མི་གནས་འགལ་ཡིན་ན་ཕན་ཚུན་སྤངས་འགལ་ཡིན་པས་ཁྱབ་པར་ཐལ། འགལ་བ་ཡིན་ན་ཕན་ཚུན་སྤངས་འགལ་ཡིན་པས་ཁྱབ་པའི་ཕྱིར། རྟགས་ཁས། འདོད་ན། ལྷན་ཅིག་མི་གནས་འགལ་ལ་བརྟེན་པའི་འགལ་ཟླ་དམིགས་པའི་གཏན་ཚིགས་ཡིན་ན་ཕན་ཚུན་སྤངས་འགལ་ལ་བརྟེན་པའི་འགལ་ཟླ་དམིགས་པའི་རྟགས་ཡིན་པས་ཁྱབ་པར་ཐལ། ལྷན་ཅིག་མི་གནས་འགལ་ཡིན་ན་ཕན་ཚུན་སྤངས་འགལ་ཡིན་པས་ཁྱབ་པའི་ཕྱིར། རྟགས་ཁས། འདོད་མི་ནུས་ཏེ། གཞུང་ཚད་ཐུབ་གང་ན་ཡང་ལྷན་ཅིག་མི་གནས་འགལ་ལ་བརྟེན་པའི་འགལ་ཟླ་དམིགས་པའི་གཏན་ཚིགས་དང༌། ཕན་ཚུན་སྤངས་འགལ་ལ་བརྟེན་པའི་འགལ་ཟླ་དམིགས་པའི་རྟགས་གཉིས་ཀྱི་ཡིན་པ་མ་གསུངས་པའི་ཕྱིར། ཁ་ཅིག་ན་རེ། ལྷན་ཅིག་མི་གནས་འགལ་ཡིན་ན་ལྷན་ཅིག་མི་གནས་འགལ་གྱི་དངོས་འགལ་ཡིན་པས་ཁྱབ་ཟེར་ན། དུ་བ་དྲག་འཕྱུར་བ་དང༌། གྲང་རེག་གཉིས་ཆོས་ཅན། དེར་ཐལ།དེའི་ཕྱིར། ཁྱབ་པ་ཁས། འདོད་ན། དེ་གཉིས་ཆོས་ཅན། ལྷན་ཅིག་མི་གནས་འགལ་གྱི་དངོས་འགལ་མ་ཡིན་པར་ཐལ། ལྷན་ཅིག་མི་གནས་འགལ་གྱི་བརྒྱུད་འགལ་ཡིན་པའི་ཕྱིར། ཁ་ཅིག་ན་རེ། ལྷན་ཅིག་མི་གནས་འགལ་གྱི་དངོས་འགལ་ཡིན་ན་ཤེས་པ་ཡིན་པས་ཁྱབ་ཟེར་ན། སྣང་བ་དང་མུན་པ་གཉིས་ཆོས་ཅན། ཤེས་པ་ཡིན་པར་ཐལ། ལྷན་ཅིག་མི་གནས་འགལ་གྱི་དངོས་འགལ་ཡིན་པའི་ཕྱིར། དེ་འཆད་པ་ལ། མདོ་ལས། ཉི་མའི་དཀྱིལ་འཁོར་མངོན་པར་ཤར་བའི་ཚེ་མུན་པའི་གནས་མེད་ཅིང་མི་དམིགས་སོ། །ཞེས་གསུངས་པའི་ཕྱིར། ཁ་ཅིག་ན་རེ། སྣང་མུན་གཉིས་ལྷན་ཅིག་མི་གནས་འགལ་མ་ཡིན་པར་ཐལ། ཚ་རེག་དང་གྲང་རེག་ལྟར་སྐད་ཅིག་དང་པོར་འཕྲད། གཉིས་པར་ནུས་ཆུང་བྱས། གསུམ་པར་ནུས་མེད་དུ་བསྐྱེད་དགོས་པ་མ་ཡིན་པའི་ཕྱིར་ན་མ་ཁྱབ། ལྷན་ཅིག་མི་གནས་འགལ་གྱི་དངོས་འགལ་ལ་གནོད་བྱེད་དེས་གནོད་བྱ་དེའི་རྒྱུན་གཅོད་ཚུལ་མི་འདྲ་བ་གཉིས་ཡོད་པས། སྣང་མུན་གཉིས་ལྷན་ཅིག་མི་གནས་འགལ་གྱི་དངོས་འགལ་ཡིན་ཀྱང༌། ཚ་རེག་དང་གྲང་རེག་ལྟར་མ་ཡིན་པར་གཞི་དེར་སྣང་བ་སྐྱེ་བ་དང་དེའི་བསལ་བྱའི་མུན་པ་འགག་པ་དུས་མཉམ། གཞི་དེར་སྣང་བ་སྐྱེ་བ་ལ་མངོན་དུ་ཕྱོགས་པ་དང༌། དེའི་བསལ་བྱའི་མུན་པ་འགག་པ་ལ་མངོན་དུ་ཕྱོགས་པ་དུས་མཉམ། གཞི་དེར་སྣང་བ་སྐྱེས་ཟིན་པ་དང༌། དེའི་བསལ་བྱའི་མུན་པ་འགག་ཟིན་པ་དུས་མཉམ་པ་ཡིན་པའི་ཕྱིར། ཁ་ཅིག་ན་རེ། ལྷན་ཅིག་ཏུ་གནས་མི་སྲིད་པ་ཡིན་ན་ལྷན་ཅིག་མི་གནས་འགལ་ཡིན་པས་ཁྱབ་ཟེར་ན། ཚེ་སྔ་ཕྱི་གཉིས་ཆོས་ཅན། དེར་ཐལ། དེའི་ཕྱིར། དེར་ཐལ། ལྷན་ཅིག་ཏུ་གནས་པ་ཅུང་ཟད་ཀྱང་མི་སྲིད་པའི་ཕྱིར། རྩ་བར་འདོད་ན། དེ་གཉིས་ཆོས་ཅན། གནོད་བྱ་གནོད་བྱེད་ཡིན་པར་ཐལ། ལྷན་ཅིག་མི་གནས་འགལ་ཡིན་པའི་ཕྱིར། རྟགས་ཁས། འདོད་མི་ནུས་ཏེ། ཕན་འདོགས་བྱ་འདོགས་བྱེད་ཡིན་པའི་ཕྱིར། དེར་ཐལ། རྒྱུ་འབྲས་ཡིན་པའི་ཕྱིར། ཁ་ཅིག་ན་རེ། བདག་མེད་རྟོགས་པའི་ཤེས་རབ་ཡིན་ན་རང་གི་དངོས་སྐལ་གྱི་གང་ཟག་གི་བདག་འཛིན་དང་ལྷན་ཅིག་མི་གནས་འགལ་ཡིན་པས་ཁྱབ་ཟེར་ན། སངས་རྒྱས་འཕགས་པའི་རྒྱུད་ཀྱི་ཤེས་རབ་ཆོས་ཅན། དེར་ཐལ། དེའི་ཕྱིར། དེར་ཐལ། སངས་རྒྱས་འཕགས་པའི་རྒྱུད་ཀྱི་ཤེས་རབ་ཡིན་པའི་ཕྱིར། གོང་དུ་འདོད་ན། སངས་རྒྱས་འཕགས་པའི་རྒྱུད་ཀྱི་ཤེས་རབ་ཆོས་ཅན། ཁྱོད་དང་རང་གི་དངོས་སྐལ་གྱི་གང་ཟག་གི་བདག་འཛིན་གཉིས་དམིགས་པ་གཅིག་ལ་དམིགས་ནས་འཛིན་སྟངས་དངོས་སུ་འགལ་བའི་སྒོ་ནས་ཁྱོད་དེ་ལ་དངོས་སུ་གནོད་བྱེད་ཡིན་པར་ཐལ། ཁྱོད་དེ་ལ་ལྷན་ཅིག་མི་གནས་འགལ་གྱི་དངོས་འགལ་དུ་གྱུར་བའི་ཤེས་པ་ཡིན་པའི་ཕྱིར། འདོད་མི་ནུས་ཏེ། དེའི་གནོད་བྱ་སངས་རྒྱས་འཕགས་པའི་རྒྱུད་ཀྱི་བདག་འཛིན་མེད་པའི་ཕྱིར། གཞན་ཡང་འཛམ་བུ་གླིང་གི་སྣང་བ་དང༌། སྒྲ་མི་སྙན་གྱི་མུན་པ་གཉིས་དང༌། འཛམ་བུ་གླིང་གི་མཚན་མོའི་ཟླ་འོད་དང་འཛམ་བུ་གླིང་གི་མུན་པ་གཉིས་སོགས་ལྷན་ཅིག་མི་གནས་འགལ་མ་ཡིན་པ་ཤེས་པར་བྱའོ། །ཚ་རེག་སྐད་ཅིག་དང་པོ་དེ་གྲང་རེག་སྐད་ཅིག་གཉིས་པའི་ནུས་ཆུང་གི་གྲང་རེག་ལ་གནོད་བྱེད་ཡིན་པར་ཤེས་པར་བྱའོ། ། གཉིས་པ་རང་ལུགས་བཤད་པ།གཉིས་པ་རང་ལུགས་བཤད་པ་ལ། གཏན་ཚིགས་རིགས་པའི་དོན་བསྡུས་ལས། འགལ་བ་དང་འབྲེལ་བ་ལ། མཚན་ཉིད་རིམ་པ་ལྟར། མི་མཐུན་པར་གནས་པ་དང༌། ཕན་ཚུན་ཐ་དད་ཅིང་དེ་བཀག་ནས་དེ་ཁེགས་པའོ། །དབྱེ་ན། དང་པོ་ལ་ཕན་ཚུན་སྤངས་འགལ་དང༌། ལྷན་ཅིག་མི་གནས་འགལ་གཉིས་སོ། །མཚན་ཉིད་ནི་རིམ་པ་ལྟར། རྒྱུན་གཅད་བྱ་གཅོད་བྱེད་མིན་བཞིན་དུ་མཚན་ཉིད་མི་མཐུན་ཙམ་གྱི་འགལ་བར་གྲུབ་པ་དང༌། རྒྱུན་གཅད་བྱ་གཅོད་བྱེད་དུ་གྱུར་བའི་སྒོ་ནས་མི་མཐུན་པར་གནས་པའོ། །དབྱེ་ན་དང་པོ་ལ། བྱས་མ་བྱས་ལྟ་བུ་དངོས་འགལ་དང༌། བུམ་པ་དང་མ་བྱས་པ་ལྟ་བུ་བརྒྱུད་འགལ་གཉིས་སོ། །གཉིས་པ་ལ་ཡང་ཚ་གྲང་ལྟ་བུ་དངོས་འགལ་དང༌། དུ་བ་དྲག་འཕྱུར་བ་དང་གྲང་རེག་ལྟ་བུ་བརྒྱུད་འགལ་དུ་དབྱེར་རུང་ཞིང༌། སྣང་མུན་ལྟ་བུ་བེམ་པོར་གྱུར་བ་དང༌། ངེས་ཤེས་དང་སྒྲོ་འདོགས་ལྟ་བུ་ཤེས་པར་གྱུར་བའི་དང༌། བྱ་རོག་དང་འུག་པ་ལྟ་བུ་སྲོག་ཆགས་གྱུར་བའི་ལྷན་ཅིག་མི་གནས་འགལ་དང་གསུམ་མམ། ཞེས་པ་ནས། རྟག་མི་རྟག་ལྟ་བུ་ཚད་མས་གནོད་པ་དངོས་དང༌། བྱས་པ་དང་རྟག་པ་ལྟ་བུ་ཚད་མས་གནོད་པའི་སྟོབས་ཀྱིས་འགལ་བ་སྟེ་བརྒྱུད་འགལ་ལོ་ཞེས་བྱ་བ་ནི་མཁས་པ་ཉ་ཡི་བཞེད་པ་སྟེ། གཞུང་ལུགས་ཀྱི་གནད་ཀྱི་དོན་ནོ། །གཉིས་པ་འབྲེལ་བ་ལ། བདག་གཅིག་འབྲེལ་བ་དང༌། དེ་བྱུང་འབྲེལ་བ་སྟེ་དེ་དང་རྫས་ཐ་དད་མ་ཡིན་ཞིང༌། དེ་ཡི་ཁྱབ་བྱ་ཡིན་པའོ། །དེ་དང་རྫས་ཐ་དད་ཅིང་དེ་ཡི་ཁྱབ་བྱ་ཡིན་པའོ། །དབྱེ་ན་དང་པོ་ལ་དངོས་པོའི་དབང་གིས་དང༌། བརྡའི་དབང་གིས་བདག་གཅིག་འབྲེལ་གཉིས་ཏེ། བྱས་མི་རྟག་དང་གྲགས་རྟགས་ཀྱི་རྟགས་ཆོས་ཀྱི་འབྲེལ་པ་ལྟ་བུའོ། །གཉིས་པ་དེ་བྱུང་འབྲེལ་ལ། དངོས་པོའི་དབང་གིས་དང༌། ཁས་བླངས་ཀྱི་དབང་གིས་དེ་བྱུང་འབྲེལ་གཉིས་ཏེ། མེ་དུ་དང༌། ཡིད་ཆེས་འབྲས་རྟགས་ཀྱི་རྟགས་ཆོས་ཀྱི་འབྲེལ་བ་ལྟ་བུའོ། །དང་པོ་རྒྱུ་འབྲས་མཚན་ཉིད་པ་དང་རྒྱུ་ཚོགས་གཅིག་པའི་དེ་བྱུང་འབྲེལ་བ་གཉིས་སོ། །ཞེས་པ་གསུངས་པའི་ཕྱིར། ཞིབ་ཆ་ཅུང་ཟད་རེ་དགོས་སོ། །ཕན་ཚུན་སྤངས་འགལ་གྱི་དངོས་འགལ་གྱི་མཚན་ཉིད་ཡོད་དེ། རྣམ་བཅད་ཡོངས་གཅོད་ཀྱི་སྒོ་ནས་མི་མཐུན་པར་གནས་པ་ཙམ་དེ་ཡིན་པའི་ཕྱིར། མཚན་གཞི་ནི་ཡོད་དེ། བུམ་པ་དང་བུམ་པ་མ་ཡིན་པ་དེ་གཉིས་ཡིན་པའི་ཕྱིར། བུམ་པ་དང་བུམ་པ་མ་ཡིན་པ་གཉིས་ཆོས་ཅན། ཕན་ཚུན་སྤངས་འགལ་གྱི་དངོས་འགལ་ཡིན་ཏེ། རྣམ་བཅད་ཡོངས་གཅོད་ཀྱི་སྒོ་ནས་མི་མཐུན་པར་གནས་པ་དེ་ཡིན་པའི་ཕྱིར། དེར་ཐལ། གཞི་གང་ཞིག་བློ་གཅིག་གིས་བུམ་པ་ཡིན་པར་ཡོངས་གཅོད་ལ་གྲུབ་ན་བུམ་པ་མ་ཡིན་པ་ཡིན་པར་རྣམ་བཅད་ལ་ཁེགས་དགོས་ལ། བུམ་པ་མ་ཡིན་པ་ཡིན་པར་རྣམ་བཅད་ལ་ཁེགས་ན་བུམ་པ་ཡིན་པར་ཡོངས་གཅོད་ལ་གྲུབ་དགོས་པ་ཡིན་པའི་ཕྱིར། ཕན་ཚུན་སྤངས་འགལ་གྱི་བརྒྱུད་འགལ་གྱི་མཚན་ཉིད་ཡོད་དེ། རྣམ་བཅད་ཡོངས་གཅོད་ཀྱི་སྒོ་ནས་འགལ་བ་མ་ཡིན་ཞིང་མི་འཐུན་པར་གནས་པ་ཙམ་དེ་ཡིན་པའི་ཕྱིར། མཚན་གཞི་ནི། བྱས་རྟག་གཉིས་ལྟ་བུའོ། །དེ་གཉིས་ཆོས་ཅན། ཕན་ཚུན་སྤངས་འགལ་གྱི་བརྒྱུད་འགལ་ཡིན་ཏེ། གཞི་གཅིག་བྱས་པ་ཡིན་པར་རྟོགས་པའི་བློ་དེས་རྟག་པ་མ་ཡིན་པར་རྟོགས་མི་དགོས་ལ། གང་བྱས་པ་ཡིན་པ་དེ་མི་རྟག་པ་ཡིན་ལ། མི་རྟག་པ་དང་རྟག་པ་གཉིས་དངོས་སུ་འགལ་བའི་སྒོ་ནས་རྟག་པ་དང་བྱས་པ་གཉིས་བརྒྱུད་པའི་འགལ་བ་ཡིན་པའི་ཕྱིར། ལྷན་ཅིག་མི་གནས་འགལ་གྱི་དངོས་འགལ་གྱི་མཚན་ཉིད་ཡོད་དེ། དངོས་སུ་གནོད་བྱ་གནོད་བྱེད་དུ་ཞུགས་པའི་སྒོ་ནས་རྒྱུན་ནུས་མཚུངས་སུ་འགྲོགས་སུ་མི་རུང་བའི་དངོས་པོ་དེ་ཡིན་པའི་ཕྱིར། མཚན་གཞི་ནི། སྣང་མུན་གཉིས་དང༌། ཚ་གྲང་གཉིས་ལྟ་བུའོ། །ལྷན་ཅིག་མི་གནས་འགལ་གྱི་དངོས་འགལ་བཤད་པའི་དགོས་པ་ཡོད་དེ། སྤང་གཉེན་གྱི་རྣམ་བཞག་ལེགས་པར་ཤེས་པའི་ཆེད་ཡིན་པའི་ཕྱིར། ལྷན་ཅིག་མི་གནས་འགལ་གྱི་བརྒྱུད་འགལ་གྱི་མཚན་ཉིད་ཡོད་དེ། དངོས་སུ་གནོད་བྱ་གནོད་བྱེད་མ་ཡིན་པར་རྒྱུན་ནུས་མཚུངས་སུ་འགྲོགས་སུ་མི་རུང་བའི་དངོས་པོ་དེ་ཡིན་པའི་ཕྱིར། མཚན་གཞི་ནི། དུ་བ་དྲག་ཕྱུར་བ་དང་གྲང་རེག་ལྟ་བུའོ། ། གསུམ་པ་རྩོད་པ་སྤོང་བ།གསུམ་པ་རྩོད་པ་སྤོང་བ་ལ། བྱམས་པ་དང་ཞེ་སྡང་གཉིས་ཆོས་ཅན། ལྷན་ཅིག་མི་གནས་འགལ་གྱི་དངོས་འགལ་ཡིན་པར་ཐལ། དངོས་སུ་གནོད་བྱ་གནོད་བྱེད་དུ་ཞུགས་པའི་སྒོ་ནས་རྒྱུན་ནུས་མཚུངས་སུ་འགྲོགས་སུ་མི་རུང་བའི་དངོས་པོ་དེ་ཡིན་པའི་ཕྱིར། དེར་ཐལ། བྱམས་པ་ཞེ་སྡང་གི་དངོས་སུ་གནོད་བྱེད་དང༌། ཞེ་སྡང་བྱམས་པའི་དངོས་སུ་གནོད་བྱ་ཡིན་ལ་དེ་གཉིས་འཕྲད་པའི་སྐད་ཅིག་གཉིས་པར་བྱམས་པས་ཞེ་སྡང་གི་རྒྱུན་ནུས་ཆུང་དུ་བྱེད་པ་ཡིན་པའི་ཕྱིར། རྩ་བར་འདོད་མི་ནུས་ཏེ། རྣམ་འགྲེལ་ལས། བྱམས་སོགས་རྨོངས་དང་འགལ་མེད་ཕྱིར། །ཤིན་ཏུ་ཉེས་པ་ཚར་གཅོད་མིན། །ཞེས་གསུངས་པའི་ཕྱིར་ན་མ་ཁྱབ་སྟེ། ལུང་དེའི་དོན་ནི་བྱམས་པས་ཞེ་སྡང་གི་དངོས་གཉེན་བྱེད་མི་ཐུབ་ཅེས་པའི་དོན་ཡིན་པའི་ཕྱིར། ཁ་ཅིག་ན་རེ། རྟག་མི་རྟག་གཉིས་ཆོས་ཅན། ཕན་ཚུན་སྤངས་འགལ་གྱི་དངོས་འགལ་ཡིན་པར་ཐལ། རྣམ་བཅད་ཡོངས་གཅོད་ཀྱི་སྒོ་ནས་མི་མཐུན་པར་གནས་པ་དེ་ཡིན་པའི་ཕྱིར། འདོད་ན། དེ་གཉིས་ཆོས་ཅན། ཁྱོད་གཉིས་པོ་གང་རུང་མ་ཡིན་པའི་ཕུང་སུམ་པ་མེད་པར་ཐལ། ཁྱོད་་ཕན་ཚུན་སྤངས་འགལ་གྱི་དངོས་འགལ་ཡིན་པའི་ཕྱིར། འདོད་ན། དེ་གཉིས་ཆོས་ཅན། ཁྱོད་གང་རུང་མ་ཡིན་པའི་ཕུང་སུམ་པ་ཡོད་པར་ཐལ། རི་བོང་རྭ་དེ་དེ་གཉིས་གང་ཡང་མ་ཡིན་པའི་ཕྱིར་ན་མ་ཁྱབ། རི་བོང་རྭ་དེ་གཉིས་གང་ཡང་མ་ཡིན་པ་ཡིན་ཀྱང་དེ་གཉིས་གང་རུང་མ་ཡིན་པའི་ཕུང་སུམ་པ་མ་ཡིན་པའི་ཕྱིར། དེར་ཐལ། དེ་གཉིས་གང་རུང་མ་ཡིན་པའི་ཆོས་མི་སྲིད་པའི་ཕྱིར་རོ།། །། ཉེར་གསུམ་པ་ཐལ་འགྱུར་ཆེ་བའི་རྣམ་བཞག་བཤད་པ།ཉེར་གསུམ་པ་ཐལ་འགྱུར་ཆེ་བའི་རྣམ་བཞག་བཤད་པ་ལ། དགག་བཞག་སྤོང་གསུམ་ལས་དང་པོ་ནི། ཁ་ཅིག་ན་རེ། རྟགས་གསལ་ཐ་དད་ཀྱི་ཐལ་འགྱུར་ཡིན་ན། ཐལ་འགྱུར་ཡང་དག་ཡིན་པས་ཁྱབ་ཟེར་ན། མ་བྱས་པ་ཡིན་པར་ཐལ། རྟག་པ་ཡིན་པའི་ཕྱིར་ཞེས་པའི་ཐལ་འགྱུར་ཆོས་ཅན། ཐལ་འགྱུར་ཡང་དག་ཡིན་པར་ཐལ། རྟག་གསལ་ཐ་དད་ཀྱི་ཐལ་འགྱུར་ཡིན་པའི་ཕྱིར། ཁྱབ་པ་ཁས། འདོད་མི་ནུས་ཏེ། རྩོད་གཞི་དང་མི་ལྡན་པའི་ཐལ་འགྱུར་ཡིན་པའི་ཕྱིར། མ་ཁྱབ་ན་ཁྱབ་པ་ཡོད་པར་ཐལ། ཐལ་འགྱུར་ཡང་དག་ཡིན་ན་རྟགས་གསལ་རྩོད་གཞི་གསུམ་ག་དང་ལྡན་པའི་ཐལ་འགྱུར་ཡིན་པས་ཁྱབ་པའི་ཕྱིར། ཁ་ཅིག་ན་རེ། ཐལ་འགྱུར་དང་སུན་འབྱིན་དང་ཀླན་ཀ་གསུམ་དོན་གཅིག་ཟེར་ན། འོ་ན་སུན་འབྱིན་ཡིན་ན་ཐལ་འགྱུར་ཡིན་པས་ཁྱབ་པར་ཐལ། དེ་གཉིས་དོན་གཅིག་ཡིན་པའི་ཕྱིར། རྟགས་ཁས། འདོད་ན། སྔ་རྒོལ་གྱིས་སྒྲ་ཆོས་ཅན། མི་རྟག་པ་ཡིན་པར་ཐལ། དངོས་པོ་ཡིན་པའི་ཕྱིར། ཞེས་པའི་ཐལ་འགྱུར་བཀོད་པ་ལ། ཕྱི་རྒོལ་གྱིས་རྟགས་མ་གྲུབ་ཅེས་ལན་བཏབ་པ་དེ་ཆོས་ཅན། ཐལ་འགྱུར་ཡིན་པར་ཐལ། སུན་འབྱིན་ཡིན་པའི་ཕྱིར། རྟགས་གྲུབ་སྟེ། སྔ་རྒོལ་གྱིས་དེ་འདྲའི་ཐལ་འགྱུར་བཀོད་པ་ལ་ཕྱི་རྒོལ་གྱིས་རྟགས་མ་གྲུབ་པ་དང༌། ཁྱབ་པ་འགལ་བ་དང༌། ཁྱབ་མེད་ཀྱི་ལན་བཏབ་པ་རེ་རེ་ནས་སུན་འབྱིན་ཡིན་པའི་ཕྱིར། ཁ་ཅིག་ན་རེ། ཕ་རོལ་བོ་ལ་མི་འདོད་པའི་ཐལ་བ་འཕེན་པའི་ཐལ་འགྱུར་ཡང་དག་ཡིན་ན། སྒྲུབ་བྱེད་འཕེན་པའི་ཐལ་འགྱུར་ཡང་དག་ཡིན་པས་ཁྱབ་ཟེར་ན། སྒྲ་རྟག་པ་དང་བྱས་པར་འདོད་པའི་གང་ཟག་གི་ངོར་སྒྲ་ཆོས་ཅན། མི་རྟག་པ་ཡིན་པར་ཐལ། བྱས་པ་ཡིན་པའི་ཕྱིར་ཞེས་པའི་ཐལ་འགྱུར་ཆོས་ཅན། དེར་ཐལ། དེའི་ཕྱིར། མ་གྲུབ་ན། དེ་ཆོས་ཅན། དེར་ཐལ། ཕ་རོལ་བོ་ལ་མི་འདོད་པའི་ཐལ་བ་འཕེན་པའི་ཐལ་འགྱུར་གང་ཞིག ཐལ་འགྱུར་ཡང་དག་ཡིན་པའི་ཕྱིར། དང་པོ་མ་གྲུབ་ན། དེ་ཆོས་ཅན། གང་ཟག་དེའི་ངོར་མི་འདོད་པའི་ཐལ་བ་འཕེན་པའི་ཐལ་འགྱུར་ཡིན་པར་ཐལ། དེའི་ངོར་སྒྲ་མི་རྟག་པར་མི་འདོད་བཞིན་དུ་ཐལ་བ་འཕེན་པའི་ཐལ་འགྱུར་ཡིན་པའི་ཕྱིར། གཉིས་པ་མ་གྲུབ་ན། དེ་འདྲའི་ཐལ་འགྱུར་ཆོས་ཅན། ཐལ་འགྱུར་ཡང་དག་ཡིན་པར་ཐལ། བྱས་པའི་རྟགས་ཀྱིས་སྒྲ་མི་རྟག་པ་ཐལ་ངག་གི་སྒོ་ནས་སྒྲུབ་པར་བྱེད་པའི་ཐལ་འགྱུར་ཡང་དག་ཡིན་པའི་ཕྱིར། རྩ་བར་འདོད་ན། དེ་འདྲའི་ཐལ་འགྱུར་ཆོས་ཅན། ཁྱོད་ཀྱི་རྟགས་ཚད་མས་བསལ་ཞིང༌། ཁྱབ་པ་ཚད་མས་གྲུབ་པར་ཐལ། ཁྱོད་སྒྲུབ་བྱེད་འཕེན་པའི་ཐལ་འགྱུར་ཡང་དག་ཡིན་པའི་ཕྱིར། འདོད་མི་ནུས་ཏེ། དེ་འདྲའི་ཐལ་འགྱུར་གྱི་རྟགས་ཚད་མས་གྲུབ་པའི་ཕྱིར། དེར་ཐལ། སྒྲ་བྱས་པ་ཡིན་པའི་ཕྱིར། ཁ་ཅིག་ན་རེ། སྒྲུབ་བྱེད་འཕེན་པའི་ཐལ་འགྱུར་ཡིན་ན་སྒྲུབ་བྱེད་འཕེན་པའི་ཐལ་འགྱུར་ཡང་དག་ཡིན་པས་ཁྱབ་ཟེར་ན། གྲངས་ཅན་པས་བདག་རྟག་པར་སྒྲུབ་འདོད་ནས། བདག་ཆོས་ཅན། སྐད་ཅིག་མ་ཡིན་པར་ཐལ། འཇིག་པའི་ཕྱིར་ཞེས་འཕངས་པའི་ཐལ་འགྱུར་ཆོས་ཅན། དེར་ཐལ། དེའི་ཕྱིར། མ་གྲུབ་ན། དེ་ཆོས་ཅན། དེར་ཐལ། སྐད་ཅིག་མ་མ་ཡིན་པའི་རྟགས་ཀྱིས་བདག་མི་འཇིག་པར་སྒྲུབ་པར་བྱེད་པའི་སྒྲུབ་བྱེད་འཕེན་པའི་ཐལ་འགྱུར་ཡིན་པའི་ཕྱིར། རྩ་བར་འདོད་ན། བདག་རྟག་པར་སྒྲུབ་པར་བྱེད་པའི་རྟགས་སྦྱོར་ཡང་དག་ཡོད་པར་ཐལ། དེ་འདྲའི་ཐལ་འགྱུར་དེ་སྒྲུབ་བྱེད་འཕེན་པའི་ཐལ་འགྱུར་ཡང་དག་ཡིན་པའི་ཕྱིར། འདོད་མི་ནུས་ཏེ། བདག་རྟག་པ་མ་ཡིན་པར་སྒྲུབ་པར་བྱེད་པའི་རྟགས་སྦྱོར་ཡང་དག་ཡོད་པའི་ཕྱིར། ཁ་ཅིག་ན་རེ། སྒྲ་ཆོས་ཅན། མི་རྟག་པ་ཡིན་ཏེ། བྱས་པའི་ཕྱིར་ཞེས་པའི་སྦྱོར་བ་འདི་ཐལ་འགྱུར་ཡིན་པར་ཐལ། སྒྲ་ཆོས་ཅན། མི་རྟག་པ་ཡིན་པར་ཐལ། བྱས་པ་ཡིན་པའི་ཕྱིར་ཞེས་པའི་ཐལ་འགྱུར་འདི་ཐལ་འགྱུར་ཡིན་པའི་ཕྱིར་ན་མ་ཁྱབ། རྩ་བར་འདོད་ན། སྒྲ་ཆོས་ཅན། མི་རྟག་པ་ཡིན་ཏེ། བྱས་པའི་ཕྱིར་ཞེས་པའི་སྦྱོར་བ་འདི་ཆོས་ཅན། ཐལ་འགྱུར་མ་ཡིན་པར་ཐལ། སྦྱོར་བ་ཡིན་པའི་ཕྱིར། མ་གྲུབ་ན། དེ་ཆོས་ཅན། སྦྱོར་བ་ཡིན་པར་ཐལ། སྦྱོར་བ་ཡང་དག་ཡིན་པའི་ཕྱིར། མ་གྲུབ་ན། དེ་ཆོས་ཅན། སྦྱོར་བ་ཡང་དག་ཡིན་པར་ཐལ། སྒྲ་ཆོས་ཅན། མ་བྱས་པ་ཡིན་པར་ཐལ། རྟག་པ་ཡིན་པའི་ཕྱིར་ཞེས་པའི་ཐལ་འགྱུར་གྱི་བཟློག་དོན་གྱི་སྦྱོར་བ་ཡང་དག་ཡིན་པའི་ཕྱིར། མ་གྲུབ་ན། དེ་ཆོས་ཅན། དེར་ཐལ། སྒྲ་ཆོས་ཅན། མ་བྱས་པ་ཡིན་པར་ཐལ། རྟག་པ་ཡིན་པའི་ཕྱིར་ཞེས་པའི་ཐལ་འགྱུར་འདི་སྒྲུབ་བྱེད་འཕེན་པའི་ཐལ་འགྱུར་ཡང་དག་གང་ཞིག རང་གི་ཆོས་ལོག་རང་གི་ཤེས་འདོད་ཆོས་ཅན་གྱི་སྟེང་དུ་རྟགས་ལོག་སྒྲུབ་པ་ལ་ཚུལ་གསུམ་འཕེན་པའི་ཐལ་འགྱུར་རྣམ་དག་ཡིན་པའི་ཕྱིར། རྟགས་རེ་རེ་ནས་གྲུབ་སྟེ། འདི་འདྲའི་ཐལ་འགྱུར་གྱི་ཤུགས་ལ་སྒྲ་ཆོས་ཅན། མི་རྟག་སྟེ། བྱས་པའི་ཕྱིར་ཞེས་པའི་རྟགས་སྦྱོར་ཡང་དག་འདི་འཕངས་པ་གང་ཞིག སྒྲ་དེའི་ཤེས་འདོད་ཆོས་ཅན་དང༌། བྱས་པ་དེའི་ཆོས་ལོག་དང༌། མི་རྟག་པ་དེའི་རྟགས་ལོག་ཏུ་ངོས་འཛིན་དགོས་པའི་ཕྱིར་རོ། ། གཉིས་པ་རང་ལུགས་བཤད་པ།གཉིས་པ་རང་ལུགས་བཤད་པ་ལ། ཐལ་འགྱུར་གྱི་མཚན་ཉིད་ཡོད་དེ། རྒོལ་བ་སྐབས་བབས་ལ་མི་འདོད་པའི་ཐལ་བར་འཕེན་པའི་རིགས་གནས་དེ་ཡིན་པའི་ཕྱིར། དབྱེ་ན་ཐལ་འགྱུར་ཡང་དག་དང་ལྟར་སྣང་གཉིས། ཐལ་འགྱུར་ཡང་དག་གི་མཚན་ཉིད་ཡོད་དེ། ཕྱི་རྒོལ་གྱི་བློ་ངོར་གྲུབ་ཅེས་པའི་བློ་ལ་ཚད་མ་དང༌། ཡིད་དཔྱོད་དང༌། ལོག་ཤེས་འཇོག དེ་ལ་རང་ཉིད་འགོད་ཡུལ་གྱི་ཕྱི་རྒོལ་ཡང་དག་གི་བློ་ངོར་རྟགས་དང་ཁྱབ་པ་གྲུབ་ཅིང་དེའི་ངོར་དམ་བཅའ་ལ་ཚད་མས་བསལ་བ་འབབ་པའི་རྟགས་སྟོན་པའི་ཐལ་ངག་རྣམ་དག་དེ་ཡིན་པའི་ཕྱིར། དབྱེ་ན་སྒྲུབ་བྱེད་འཕེན་པའི་ཐལ་འགྱུར་ཡང་དག་དང༌། སྒྲུབ་བྱེད་མི་འཕེན་པའི་ཐལ་འགྱུར་ཡང་དག་དང་གཉིས། སྒྲུབ་བྱེད་འཕེན་པའི་ཐལ་འགྱུར་ཡང་དག་གི་མཚན་ཉིད་ཡོད་དེ། རང་གི་ཆོས་ལོག་དེ་རང་གི་ཤེས་འདོད་ཆོས་ཅན་གྱི་སྟེང་དུ་རང་གི་རྟགས་ལོག་བསྒྲུབ་པ་ལ་ཚུལ་གསུམ་འཕེན་པའི་ཐལ་འགྱུར་རྣམ་དག་དེ་ཡིན་པའི་ཕྱིར། སྒྲུབ་བྱེད་འཕེན་པའི་ཐལ་འགྱུར་ཡང་དག་ཡིན་ན། རང་ཉིད་ཀྱི་སོང་ཚོད་ཀྱི་རྟགས་གང་འགོད་པ་སྐབས་སུ་བབ་པའི་ཕྱི་རྒོལ་ཡང་དག་གིས་ཁས་བླངས་ཤིང༌། ཚད་མས་མ་གྲུབ་པ་དང༌། ཁྱབ་པ་ཚད་མས་གྲུབ་ཅིང་དམ་བཅའ་ཚད་མས་བསལ་བ་ཞུགས་པ་གཅིག་དགོས་ཏེ། སྒྲུབ་བྱེད་འཕེན་པའི་ཐལ་འགྱུར་ཡང་དག་གང་དང་གང་གིས་སོང་ཚོད་ཀྱི་རྟགས་ཚད་མས་གྲུབ་ན། དེས་འཕངས་པའི་སྦྱོར་བ་ཡང་དག་གི་དམ་བཅའ་ལ་ཚད་མས་བསལ་བ་འབབ་ཅིང༌། ཁྱབ་པ་ཚད་མས་མ་གྲུབ་ན་དེས་འཕངས་པའི་སྦྱོར་བ་ཡང་དག་གི་ལྡོག་ཁྱབ་མི་འགྲུབ་ལ། དམ་བཅའ་ལ་ཚད་མས་བསལ་བ་མ་ཞུགས་ན་དེས་འཕངས་པའི་སྦྱོར་བའི་ཕྱོགས་ཆོས་མི་འགྲུབ་པའི་ཕྱིར། གཏན་ཚིགས་རིགས་པའི་དོན་བསྡུས་ལས། སྒྲུབ་བྱེད་འཕེན་པའི་ཐལ་འགྱུར་ལ། །ཆོས་ཅན་ལྡོག་ཁྱབ་ཚད་མས་གྲུབ།།བསལ་བ་ཚད་བསལ་རྟགས་ཁས་བླངས། །དགོས་ཀྱི་གཞན་ལ་མ་ཡིན་ནོ། །ཞེས་གསུངས་སོ། །སྒྲུབ་བྱེད་འཕེན་པའི་ཐལ་འགྱུར་ཡང་དག་ལ་དབྱེ་ན། ལྡོག་པ་རང་རིགས་འཕེན་པའི་ཐལ་འགྱུར་ཡང་དག་དང༌། ལྡོག་པ་གཞན་རིགས་འཕེན་པའི་ཐལ་འགྱུར་ཡང་དག་གཉིས། དེ་གཉིས་ཀའི་མཚན་ཉིད་སོགས་ནི། གཏན་ཚིགས་རིགས་པའི་དོན་བསྡུས་ལས། དང་པོ་ལ་རང་རིགས་འཕེན་པ་དང༌། གཞན་རིགས་འཕེན་པ་གཉིས་ཏེ། མཚན་ཉིད་ནི་རིམ་པ་ལྟར། སྒྲུབ་བྱེད་འཕེན་པའི་ཐལ་འགྱུར་ཡང་དག་གང་ཞིག རང་གིས་འཕངས་པའི་རང་རྒྱུད་ཀྱི་རྟགས་དང༌། རང་གི་རྟགས་རང་གི་སྒྲུབ་བྱའི་ཆོས་དང་འབྲེལ་ཚུལ་དང༌། དགག་བྱ་དང་འགལ་ཚུལ་གྱི་ཆ་ནས་བཏགས་པའི་དགོས་མིང་མཐུན་པར་འགྱུར་བ་དང་མི་མཐུན་པར་འགྱུར་བའོ། །དབྱེ་ན་དང་པོ་ལ། མེ་དང་ཙནྡན་མེ་དང་ནི། །དུ་བ་ལྟོས་བཅས་རྣམ་བཞི་ཡིས། །གྲང་རེག་བ་མོ་སྤུ་ལོང་དང༌། །ངེས་པ་འགོག་ན་རིམ་པ་བཞིན། །རང་བཞིན་འགལ་བ་དམིགས་པ་དང༌། །ཁྱབ་བྱེད་འགལ་བའི་ཁྱབ་བྱ་དམིགས། །རྒྱུ་དང་འགལ་བའི་འབྲས་དམིགས་དང༌། །རང་བཞིན་འགལ་བའི་ཁྱབ་བྱ་བཞི། །ཞེས་པ་ལྟར་བཞིའོ། །ཞེས་གསུངས་ལ། དེའི་དབྱེ་བ་ལ་བཞི་ལས་དང་པོ་རང་བཞིན་འགལ་བའི་རང་བཞིན་དམིགས་པའི་ཐལ་འགྱུར་ཡོད་དེ། མེ་སྟོབས་ཆེན་པོས་ཁྱབ་པར་གནོན་པའི་གཞིར་ཆོས་ཅན། མེ་སྟོབས་ཆེན་པོས་ཁྱབ་པར་གནོན་པ་མ་ཡིན་པར་ཐལ། གྲངས་རེག་རྒྱུན་ཆགས་སུ་གནས་པའི་ཕྱིར་ཞེས་པའི་ཐལ་འགྱུར་དེ་ཡིན་པའི་ཕྱིར། དེ་འདྲའི་ཐལ་འགྱུར་ཆོས་ཅན། རང་བཞིན་འགལ་བའི་རང་བཞིན་དམིགས་པའི་ཐལ་འགྱུར་ཞེས་བརྗོད་པའི་རྒྱུ་མཚན་ཡོད་དེ། དེའི་ཐལ་འགྱུར་གྱི་དགག་བྱའི་ཆོས་ཀྱི་རང་བཞིན་མེ་སྟོབས་ཆེན་པོ་དང་འགལ་བ་གྲང་རེག་དམིགས་པ་རྟགས་སུ་བཀོད་པའི་ཐལ་འགྱུར་ཡིན་པའི་ཕྱིར། འདི་གཞན་ལ་རིགས་འགྲེ་སྦྱར། གཉིས་པ་ཁྱབ་བྱེད་འགལ་བའི་ཁྱབ་བྱ་དམིགས་པའི་ཐལ་འགྱུར་ཡོད་དེ། ཙནྡན་གྱི་མེ་སྟོབས་ཆེན་པོས་ཁྱབ་པར་གནོན་པའི་གཞིར་ཆོས་ཅན། ཙནྡན་གྱི་མེ་སྟོབས་ཆེན་པོས་ཁྱབ་པར་གནོན་པ་མ་ཡིན་པར་ཐལ། བ་མོའི་རེག་པ་རྒྱུན་ཆགས་སུ་གནས་པའི་ཕྱིར་ཞེས་པའི་ཐལ་འགྱུར་དེ་ཡིན་པའི་ཕྱིར། གསུམ་པ་རྒྱུ་དང་འགལ་བའི་འབྲས་བུ་དམིགས་པའི་ཐལ་འགྱུར་ཡོད་དེ། དུ་བ་དྲག་འཕྱུར་བས་ཁྱབ་པར་གནོན་པའི་གཞིར་ཆོས་ཅན། དུ་བ་དྲག་འཕྱུར་བས་ཁྱབ་པར་གནོན་པ་མ་ཡིན་པར་ཐལ། གྲང་འབྲས་སྤུ་ལོང་བྱེད་རྒྱུན་ཆགས་སུ་གནས་པའི་ཕྱིར་ཞེས་པའི་ཐལ་འགྱུར་དེ་ཡིན་པའི་ཕྱིར། གོང་གི་ལུང་གི་དངོས་ཟིན་ལྟར་ན་འདི་གསུམ་གྱི་རྟགས་ཀྱི་ལོག་ཕྱོགས་ཆོས་དང་ཆོས་ཀྱི་ལོག་ཕྱོགས་རྟགས་སུ་བཀོད་དགོས་སོ། །བཞི་བ་རང་བཞིན་འགལ་བའི་ཁྱབ་བྱ་དམིགས་པའི་ཐལ་འགྱུར་ཡོད་དེ། བུམ་པ་ཆོས་ཅན། འཇིག་ངེས་མ་ཡིན་པར་ཐལ། རང་འཇིག་པ་རྒྱུ་དོན་གཞན་ལ་ལྟོས་པའི་ཕྱིར་ཞེས་པའི་ཐལ་འགྱུར་དེ་ཡིན་པའི་ཕྱིར། གཉིས་པ་གཞན་རིགས་འཕེན་པའི་ཐལ་འགྱུར་ཡོད་དེ། གཏན་ཚིགས་རིགས་པའི་དོན་བསྡུས་ལས། གཉིས་པ་ལ། མེ་དང་དུ་བ་དེ་བཞིན་མེ། །ཤིང་མེད་པ་དང་མེ་མེད་པས། །བ་མོ་བ་མོའི་རེག་པ་གཉིས། །སྤུ་ལོང་ཤ་བ་དུ་བ་འགོག །ཁྱབ་བྱེད་འགལ་བ་དམིགས་པ་དང༌། །ཁྱབ་བྱེད་འགལ་བའི་འབྲས་བུ་དང༌། །རྒྱུ་དང་འགལ་བའི་རང་བཞིན་དང༌། །ཁྱབ་བྱེད་མ་དམིགས་རྒྱུ་མ་དམིགས། །རྣམས་ཀྱིས་འགལ་ཁྱབ་དམིགས་པ་དང༌། །རྒྱུ་དང་འགལ་བའི་ཁྱབ་བྱ་དང༌། །འགལ་འབྲས་དམིགས་དང་རང་བཞིན་རྟགས། །འབྲས་རྟགས་རང་རྒྱུད་འཕེན་པ་ཡིན། །ཞེས་པ་ལྟར་ལྔའོ། །སྒྲུབ་བྱེད་མི་འཕེན་པའི་ཐལ་འགྱུར་ཡང་དག་གི་མཚན་ཉིད་ཡོད་དེ། ཁྱོད་ཀྱི་ཆོས་ལོག་ཁྱོད་ཀྱི་ཤེས་འདོད་ཆོས་ཅན་སྟེང་དུ་ཁྱོད་ཀྱི་རྟགས་ལོག་སྒྲུབ་པ་ལ་ཚུལ་གསུམ་སྒྲུབ་བྱེད་བཀོད་པ་མ་ཚང་བའི་ཐལ་འགྱུར་ཡང་དག་དེ་ཡིན་པའི་ཕྱིར། མཚན་གཞི་ནི། སྒྲ་ཆོས་ཅན། མི་རྟག་པ་ཡིན་པར་ཐལ། བྱས་པ་ཡིན་པའི་ཕྱྀར་ཞེས་པའི་ཐལ་འགྱུར་དེ་ཡིན་དགོས་པའི་ཕྱིར། སྒྲ་ཆོས་ཅན། མི་རྟག་པ་ཡིན་པར་ཐལ། བྱས་པ་ཡིན་པའི་ཕྱྀར་ཞེས་པའི་ཐལ་འགྱུར་ཆོས་ཅན། ཁྱོད་ཀྱི་ཆོས་ལོག་ཁྱོད་ཀྱི་ཤེས་འདོད་ཆོས་ཅན་སྟེང་དུ་ཁྱོད་ཀྱི་རྟགས་ལོག་སྒྲུབ་པ་ལ་ཚུལ་གསུམ་སྒྲུབ་བྱེད་བཀོད་པ་མ་ཚང་བ་དེ་ཡིན་ཏེ། ཁྱོད་ཀྱི་ཆོས་ལོག་ངོས་འཛིན་པའི་ཚེ་རྟག་པ་དེ་ངོས་འཛིན་དགོས། ཁྱོད་ཀྱི་རྟགས་ལོག་ངོས་འཛིན་པའི་ཚེ་ན་མ་བྱས་པ་དེ་ངོས་འཛིན་དགོས། ཤེས་འདོད་ཆོས་ཅན་ངོས་འཛིན་པའི་ཚེ་ན་སྒྲ་དེ་ངོས་འཛིན་དགོས་ལ། དེ་ལྟར་ན་སྒྲ་ཆོས་ཅན། མ་བྱས་པ་ཡིན་ཏེ། རྟག་པ་ཡིན་པའི་ཕྱིར་ཞེས་པའི་སྦྱོར་བ་འདིའི་རྟགས་ཀྱི་ཚུལ་གསུམ་ཚང་ཟེར་དགོས་ཀྱང༌། དེ་མི་ཚང་བ་ཡིན་པའི་ཕྱིར་རོ། ། གསུམ་པ་རྩོད་པ་སྤོང་བ།གསུམ་པ་རྩོད་པ་སྤོང་བ་ལ། ཁ་ཅིག་ན་རེ། ཐལ་འགྱུར་ཡང་དག་ཆོས་ཅན། ཐལ་འགྱུར་ཡང་དག་ཡིན་པར་ཐལ། རང་ཉིད་འགོད་ཡུལ་གྱི་ཕྱི་རྒོལ་ཡང་དག་གི་བློ་ངོར་རྟགས་དང་ཁྱབ་པ་གྲུབ་ཅིང་དེའི་ངོར་དམ་བཅའ་ལ་ཚད་མས་བསལ་བ་འབབ་པའི་རྟགས་སྟོན་པའི་ཐལ་ངག་རྣམ་དག་དེ་ཡིན་པའི་ཕྱིར། འདོད་ན། ཐལ་འགྱུར་ཡང་དག་ཆོས་ཅན། ཁྱོད་ཀྱི་རྟགས་གསལ་རྩོད་གཞི་ངོས་འཛིན་པའི་ཚེ་ན། སྒྲ་རྩོད་གཞི། མི་རྟག་པ་གསལ་བ། བྱས་པ་རྟགས་སུ་བཀོད་པ་ཡིན་པར་ཐལ། ཁྱོད་ཀྱི་རྟགས་གསལ་རྩོད་གཞི་ངོས་འཛིན་རྒྱུ་ཡོད་པ་གང་ཞིག དེ་ལྟར་ངོས་མ་བཟུང་ན་གཞན་བཟུང་རྒྱུ་མེད་པའི་ཕྱིར། འདོད་ན། ཐལ་འགྱུར་ཡང་དག་ཆོས་ཅན། སྒྲུབ་བྱེད་མི་འཕེན་པའི་ཐལ་འགྱུར་ཡང་དག་ཡིན་པར་ཐལ། སྒྲ་རྩོད་གཞི། མི་རྟག་པ་གསལ་བ། བྱས་པ་རྟགས་སུ་བཀོད་པའི་ཐལ་འགྱུར་ཡིན་པའི་ཕྱིར་ཟེར་ན་རྟགས་མ་གྲུབ་སྟེ། སྒྲ་རྩོད་གཞི། མི་རྟག་པ་གསལ་བ། བྱས་པ་རྟགས་སུ་བཀོད་ཀྱང་དེ་ལྟར་བཀོད་པའི་ཐལ་འགྱུར་མ་ཡིན་པའི་ཕྱིར། དེར་ཐལ། ཁྱོད་ལ་དེ་ཡིན་མིན་དུ་མ་ཞིག་ཡོད་པའི་ཕྱིར།དཔེར་ན། རྗེས་དཔག་གིས་བུམ་པ་རྟོགས་ཀྱང་རྗེས་དཔག་བུམ་པ་རྟོགས་པའི་རྗེས་དཔག་མ་ཡིན་པ་བཞིན་ནོ།། །། ཉེར་བཞི་པ་རྒྱུ་འབྲས་ཆེ་བའི་རྣམ་བཞག་བཤད་པ།ཉེར་བཞི་པ་རྒྱུ་འབྲས་ཆེ་བའི་རྣམ་བཞག་བཤད་པ་ལ། དགག་བཞག་སྤོང་གསུམ་ལས། དང་པོ་ལ། ཁ་ཅིག་ན་རེ། འདུས་བྱས་ཡིན་ན་ཁྱོད་ཀྱི་རྒྱུ་དྲུག་ཀ་ཡོད་པས་ཁྱབ་ཟེར་ན། བུམ་པ་ཆོས་ཅན། ཁྱོད་ཀྱི་རྒྱུ་དྲུག་ཀ་ཡོད་པར་ཐལ། འདུས་བྱས་ཡིན་པའི་ཕྱིར། ཁྱབ་པ་ཁས། རྟགས་སླ། འདོད་ན། བུམ་པ་ཆོས་ཅན། ཁྱོད་ཀྱི་རྒྱུ་དྲུག་ཀ་མེད་པར་ཐལ། ཁྱོད་ཀྱི་བྱེད་རྒྱུ་དང་ལྡན་ཅིག་འབྱུང་རྒྱུ་དང༌། སྐལ་མཉམ་གྱི་རྒྱུ་གསུམ་ཡོད་པ་གང་ཞིག གཞན་གསུམ་མེད་པའི་ཕྱིར། དང་པོ་གྲུབ་སྟེ། བུམ་པའི་རྒྱུ་དེ་བུམ་པའི་བྱེད་རྒྱུ་དང༌། བུམ་པའི་དངོས་རྒྱུའི་འབྱུང་བཞིའི་རྡུལ་དེ་བུམ་པའི་ལྷན་ཅིག་འབྱུང་རྒྱུ་དང༌། བུམ་པའི་རྒྱུར་གྱུར་བའི་ལྟོ་ལྡིར་བ་དེ་བུམ་པའི་སྐལ་མཉམ་གྱི་རྒྱུ་ཡིན་པའི་ཕྱིར། གཉིས་པ་གྲུབ་སྟེ། བུམ་པའི་རྣམ་སྨིན་གྱི་རྒྱུ་མེད་པ་གང་ཞིག བུམ་པའི་ཀུན་འགྲོའི་རྒྱུ་ཡང་མེད། བུམ་པའི་མཚུངས་ལྡན་གྱི་རྒྱུ་ཡང་མེད་པའི་ཕྱིར། དང་པོ་མ་གྲུབ་ན། བུམ་པ་ཆོས་ཅན། ཁྱོད་ཀྱི་རྣམ་སྨིན་གྱི་རྒྱུ་མེད་པར་ཐལ། ཁྱོད་རྣམ་སྨིན་གྱི་འབྲས་བུ་མ་ཡིན་པའི་ཕྱིར། དེར་ཐལ། ཁྱོད་སྐྱེས་བུའི་རྒྱུད་ཀྱི་བསྡུས་པའི་ཆོས་མ་ཡིན་པའི་ཕྱིར། ཁྱབ་སྟེ། རྣམ་སྨིན་ཡིན་ན། ངོ་བོ་མ་བསྒྲིབས་ལུང་མ་བསྟན་དང༌། སེམས་ཅན་གྱི་རྒྱུད་ཀྱིས་བསྡུས་པ། རང་གི་རྒྱུར་གྱུར་བའི་དགེ་མི་དགེ་གང་རུང་ལས་ཕྱིས་འབྱུང་བ་སྟེ་ ཁྱད་པར་གསུམ་དང་ལྡན་པས་ཁྱབ་པའི་ཕྱིར་ཏེ། མཛོད་ལས། རྣམ་སྨིན་ལུང་དུ་མ་བསྟན་ཆོས། །སེམས་ཅན་བརྗོད་ལུང་བསྟན་ཕྱིས་འབྱུང༌། །ཞེས་གསུངས་པའི་ཕྱིར། རྟགས་གཉིས་པ་མ་གྲུབ་ན། བུམ་པ་ཆོས་ཅན། ཁྱོད་ཀྱི་ཀུན་འགྲོའི་རྒྱུ་མེད་པར་ཐལ། ཁྱོད་ཉོན་མོངས་ཅན་མ་ཡིན་པའི་ཕྱིར། གསུམ་པ་མ་གྲུབ་ན། བུམ་པ་ཆོས་ཅན། ཁྱོད་ཀྱི་མཚུངས་ལྡན་གྱི་རྒྱུ་མེད་པར་ཐལ། ཁྱོད་བེམ་པོ་ཡིན་པའི་ཕྱིར། ཁ་ཅིག་ན་རེ། རྒྱུ་ཡིན་ན་རྒྱུ་དྲུག་ཀ་ཡིན་པས་ཁྱབ་ཟེར་ན། བུམ་པ་ཆོས་ཅན། རྒྱུ་དྲུག་ཀ་ཡིན་པར་ཐལ། རྒྱུ་ཡིན་པའི་ཕྱིར། འདོད་ན། བུམ་པ་ཆོས་ཅན། རྣམ་སྨིན་གྱི་རྒྱུ་ཡིན་པར་ཐལ། རྒྱུ་དྲུག་ཀ་ཡིན་པའི་ཕྱིར།འདོད་ན། བུམ་པ་ཆོས་ཅན། དགེ་མི་དགེ་གང་རུང་ཡིན་པར་ཐལ། རྫས་སྤྱི་གཉིས་འགོད་ཆོད་རྣམ་སྨིན་གྱི་རྒྱུ་ཡིན་པའི་ཕྱིར། ཁྱབ་སྟེ། མཛོད་ལས། རྣམ་སྨིན་རྒྱུ་ནི་མི་དགེ་དང༌། དགེ་བ་ཟག་བཅས་རྣམ་ཁོ་ན། །ཞེས་གསུངས་པའི་ཕྱིར། གཞན་ཡང་སྒྲ་ཆོས་ཅན། རྒྱུ་དྲུག་ཀ་ཡིན་པར་ཐལ། རྒྱུ་ཡིན་པའི་ཕྱིར། ཁྱབ་པ་ཁས། འདོད་ན། སྒྲ་ཆོས་ཅན། མཚུངས་ལྡན་གྱི་རྒྱུ་ཡིན་པར་ཐལ། རྒྱུ་དྲུག་ཀ་ཡིན་པའི་ཕྱིར། འདོད་ན། དེ་ཆོས་ཅན། ཤེས་པ་ཡིན་པར་ཐལ། མཚུངས་ལྡན་གྱི་རྒྱུ་ཡིན་པའི་ཕྱིར། མ་ཁྱབ་ན་ཁྱབ་པ་ཡོད་པར་ཐལ། མཚུངས་ལྡན་གྱི་རྒྱུ་ཡིན་ན་སེམས་སེམས་བྱུང་གང་རུང་གིས་བསྡུས་པའི་ཤེས་པ་ཡིན་པས་ཁྱབ་པའི་ཕྱིར་ཏེ། མཛོད་ལས། མཚུངས་ལྡན་རྒྱུ་ནི་སེམས་དག་དང༌། །སེམས་བྱུང་རྟེན་མཚུངས་ཅན་རྣམས་སོ། །ཞེས་གསུངས་པའི་ཕྱིར། གཞན་ཡང་སྒྲ་ཆོས་ཅན། ཀུན་འགྲོའི་རྒྱུ་ཡིན་པར་ཐལ། རྒྱུ་དྲུག་ཀ་ཡིན་པའི་ཕྱིར། འདོད་ན། དེ་ཆོས་ཅན། ཉོན་མོངས་ཅན་ཡིན་པར་ཐལ། ཀུན་འགྲོའི་རྒྱུ་ཡིན་པའི་ཕྱིར། ཁྱབ་སྟེ། མཛོད་ལས། ཀུན་འགྲོ་ཞེས་བྱ་ཉོན་མོངས་ཅན། །ཞེས་གསུངས་པའི་ཕྱིར། གོང་དུ་འདོད་མི་ནུས་ཏེ། སྒྲ་དང་གཅིག་ཡིན་པའི་ཕྱིར། ཁ་ཅིག་ན་རེ། རྐྱེན་བཞི་དང་འབྲས་བུ་དང་པོ་བཞི་འགལ་བ་ཡིན་ཟེར་ན། འོ་ན་རྐྱེན་བཞི་ཀ་ཡིན་ན་འབྲས་བུ་དང་པོ་བཞི་མ་ཡིན་པས་ཁྱབ་པར་ཐལ། འདོད་པའི་ཕྱིར། འདོད་ན། འཕེན་བྱེད་དགེ་བའི་ལས་ཀྱི་རྣམ་སྨིན་དུ་གྱུར་བའི་ཡིད་ཀྱི་རྣམ་ཤེས་ཆོས་ཅན། འབྲས་བུ་དང་པོ་བཞི་མ་ཡིན་པར་ཐལ། རྐྱེན་བཞི་ཀ་ཡིན་པའི་ཕྱིར། ཁྱབ་པ་ཁས། མ་གྲུབ་ན། དེ་ཆོས་ཅན། རྐྱེན་བཞི་ཀ་ཡིན་པར་ཐལ། རྒྱུ་རྐྱེན་ཡིན་པ་གང་ཞིག དེ་མ་དག་རྐྱེན་ཡང་ཡིན། དམིགས་རྐྱེན་ཡང་ཡིན། བདག་རྐྱེན་ཡང་ཡིན་པའི་ཕྱིར། དང་པོ་གྲུབ་སྟེ། རང་འབྲས་སྐྱེད་བྱེད་ཡིན་པའི་ཕྱིར་ཏེ། དངོས་པོ་ཡིན་པའི་ཕྱིར། གཉིས་པ་གྲུབ་སྟེ། རང་འབྲས་ཤེས་པ་ཕྱི་མ་བསྐྱེད་པའི་ཤེས་པ་ཡིན་པའི་ཕྱིར། གསུམ་པ་གྲུབ་སྟེ། རང་འཛིན་མངོན་སུམ་ཚད་མ་ཡུལ་གྱི་རྣམ་ལྡན་དུ་གཙོ་བོར་བསྐྱེད་པའི་རྒྱུ་ཡིན་པའི་ཕྱིར་ཏེ། དངོས་པོ་ཡིན་པའི་ཕྱིར། བཞི་བ་གྲུབ་སྟེ། རང་གི་འབྲས་བུའི་ཡིད་ཤེས་ཀྱི་བདག་རྐྱེན་དུ་གྱུར་བའི་ཡིད་དབང་ཡིན་པའི་ཕྱིར། རྩ་བར་འདོད་ན། འཕེན་བྱེད་དགེ་བའི་ལས་ཀྱི་རྣམ་སྨིན་དུ་གྱུར་བའི་ཡིད་ཀྱི་རྣམ་ཤེས་ཆོས་ཅན། འབྲས་བུ་དང་པོ་བཞི་ཡིན་པར་ཐལ། རྣམ་སྨིན་གྱི་འབྲས་བུ་ཡིན་པ་གང་ཞིག རྒྱུ་མཐུན་གྱི་འབྲས་བུ་ཡང་ཡིན། བདག་པོའི་འབྲས་བུ་ཡང་ཡིན། སྐྱེས་བུ་བྱེད་པའི་འབྲས་བུ་ཡིན་པའི་ཕྱིར། དང་པོ་མ་གྲུབ་ན། དེ་ཆོས་ཅན། རྣམ་སྨིན་གྱི་འབྲས་བུ་ཡིན་པར་ཐལ། རང་གི་རྒྱུར་གྱུར་བའི་དགེ་བའི་ལས་ཀྱི་རྣམ་སྨིན་ཡིན་པའི་ཕྱིར། གཉིས་པ་མ་གྲུབ་ན། དེ་ཆོས་ཅན། རྒྱུ་མཐུན་གྱི་འབྲས་བུ་ཡིན་པར་ཐལ། རང་གི་རྒྱུ་རང་དང་ས་གཅིག་པའམ་རྣམ་པ་མཐུན་པའི་འབྲས་བུ་ཡིན་པའི་ཕྱིར། གསུམ་པ་དང་བཞི་བ་གྲུབ་སྟེ། དངོས་པོ་ཡིན་པའི་ཕྱིར། ཁ་ཅིག་ན་རེ། རང་གི་འབྲས་བུར་གྱུར་བའི་རྣམ་སྨིན་གྱི་རྒྱུ་ཡིན་ན་རྣམ་སྨིན་གྱི་རྒྱུ་ཡིན་པས་ཁྱབ་ཟེར་ན། ངན་འགྲོའི་སྲོག་དབང་སྐད་ཅིག་དང་པོ་དེ་ཆོས་ཅན། དེར་ཐལ། དེའི་ཕྱིར། ཁྱབ་པ་ཁས། མ་གྲུབ་ན། ངན་འགྲོའི་སྲོག་དབང་སྐད་ཅིག་དང་པོ་དེ་ཆོས་ཅན། དེར་ཐལ། ཁྱོད་ཀྱི་འབྲས་བུར་གྱུར་བའི་རྣམ་སྨིན་ཡོད་པའི་ཕྱིར། དེར་ཐལ། ངན་འགྲོའི་སྲོག་དབང་སྐད་ཅིག་གཉིས་པ་དེ་ཡིན་པའི་ཕྱིར། རྩ་བར་འདོད་མི་ནུས་ཏེ། ལུང་མ་བསྟན་ཡིན་པའི་ཕྱིར། དེར་ཐལ། རྣམ་སྨིན་ཡིན་པའི་ཕྱིར། ཁྱབ་པ་གོང་དུ་བསྒྲུབས་ཟིན་ཏོ། ། གཉིས་པ་རང་ལུགས་བཤད་པ།གཉིས་པ་རང་ལུགས་བཤད་པ་ལ། རྒྱུ་བཤད་པ་དང༌། འབྲས་བུ་བཤད་པ་དང༌། རྐྱེན་བཤད་པ་དང་གསུམ། དང་པོ་ནི། ཆོས་དེའི་ཕན་འདོགས་བྱེད་ཆོས་དེའི་རྒྱུའི་མཚན་ཉིད། དབྱེ་ན། བྱེད་རྒྱུ་དང༌། ལྷན་ཅིག་འབྱུང་རྒྱུ་དང༌། སྐལ་མཉམ་གྱི་རྒྱུ་དང༌། མཚུངས་ལྡན་གྱི་རྒྱུ་དང༌། ཀུན་འགྲོའི་རྒྱུ་དང༌། རྣམ་སྨིན་གྱི་རྒྱུ་དང་དྲུག་ཡོད་པའི་ཕྱིར་ཏེ། མཛོད་ལས། བྱེད་རྒྱུ་ལྷན་ཅིག་འབྱུང་བ་དང༌། །སྐལ་མཉམ་མཚུངས་པར་ལྡན་པ་དང༌། །ཀུན་ཏུ་འགྲོ་དང་རྣམ་སྨིན་དང༌། །རྒྱུ་ནི་རྣམ་པ་དྲུག་ཏུ་འདོད། །ཅེས་གསུངས་པའི་ཕྱིར་རོ། །རང་འབྲས་སྐྱེད་བྱེད་ཀྱི་རྒྱུའི་ངོ་བོ་ཉིད་དུ་གནས་པ་དེ། བྱེད་རྒྱུའི་མཚན་ཉིད། བུམ་པ་སྐྱེད་བྱེད་ཀྱི་ངོ་བོ་ཉིད་དུ་གནས་པ། བུམ་པའི་བྱེད་རྒྱུའི་མཚན་ཉིད། མཚན་གཞི་ནི། བུམ་པའི་ཉེར་ལེན་ལྟ་བུའོ། །ཆོས་དེ་དང་ཚོགས་པ་གཅིག་པའི་སྒོ་ནས་ཕན་འདོགས་པའི་ཆོས་དེ། ཆོས་དེའི་ལྷན་ཅིག་འབྱུང་རྒྱུའི་མཚན་ཉིད། རོ་སྐད་ཅིག་དང་པོ་ལྟ་བུའོ། །འདི་ལ་ས་བཟང་ཀུན་བཏུས་འགྲེལ་བ་ལས། མཚན་ཉིད་ནི། འབྲས་བུའི་ཆོས་གང་དག་གྲོགས་སུ་ངེས་པའི་ཆོས་དེ་ཡོད་ན་དེ་དང་ལྷན་ཅིག་འབྱུང་གི་གྲོགས་སུ་ངེས་པའི་ཆོས་གང་ཡང་རུང་བ་མ་ཚང་ན་ཆོས་དེའང་འབྱུང་བ་མ་ཡིན་པ་ནི་གྲོགས་ཀྱི་སྒོ་ནས་ཕན་ཚུན་རྒྱུའི་རྐྱེན་དུ་བལྟ་སྟེ་ཞེས་པའོ། །དཔེ་བརྗོད་ནི། འདི་ལྟ་སྟེ། གྲོགས་སུ་ངེས་པའི་འབྱུང་བ་རྣམས་ཕན་ཚུན་རླུང་མེད་ན་མེ་འབར་བ་མི་འབྱུང་བ་དང༌། འབྱུང་བ་ལས་གྱུར་བ་རྣམས་ཕན་ཚུན་གཟུགས་མེད་ན་རོ་མི་འབྱུང་བ་ལྟ་བུའོ། །དེའང་རྒྱུ་འབྲས་དུས་མཉམ་སྟོན་པ་མ་ཡིན་གྱི་རྒྱུའི་ཚོགས་པ་ཚར་གཅིག་པའི་ཆ་ནས་བཞག་པ་སྟེ། ནུས་པ་འཇུག་པ་མེད་པར་ནི། །རོ་མེད་དེ་ཉིད་གཞན་གྱི་རྒྱུ། །ཞེས་གསུངས་པའི་ཕྱིར། རང་འབྲས་རང་དང་རིགས་འདྲ་སྐྱེད་བྱེད་དེ། སྐལ་མཉམ་གྱི་རྒྱུའི་མཚན་ཉིད། དད་པ་སྐད་ཅིག་དང་པོ་ལྟ་བུའོ། །མཚུངས་ལྡན་དུ་གྱུར་བའི་སྒོ་ནས་ཕན་འདོགས་བྱེད་ཀྱི་རིགས་སུ་གནས་པའི་ཤེས་པ་དེ། མཚུངས་ལྡན་གྱི་རྒྱུའི་མཚན་ཉིད། མཚན་གཞི་ནི་གཞན་རིག་གི་ཤེས་པ་རྣམས་སོ། །འདི་ལ་ས་བཟང་ཀུན་བཏུས་འགྲེལ་བ་ལས། མཐུན་པར་རྟོགས་པས་ཇི་ལྟ་བུ་ཞེ་ན། མཚུངས་ལྡན་རྒྱུ་ནི་སེམས་རྣམས་དང༌། སེམས་བྱུང་རྟེན་མཚུངས་ཅན་རྣམས་སོ། །ཞེས་གསུངས་ཤིང༌། འདིར་ཡང་དེ་དང་མཐུན་པར་མཚན་ཉིད་ནི། རིག་པའི་ཆོས་གང་དག་གཙོ་འཁོར་དུ་གྱུར་བ་ལྷན་ཅིག་འབྱུང་པས་དམིགས་པ་དང་མཐུན་ཞིང་མཚུངས་པར་རྟོགས་ཀྱི། མཚུངས་ལྡན་དུ་ངེས་པའི་ཆོས་གང་ཡང་རུང་བ་མ་ཚང་ན་དམིགས་པ་མཐུན་པར་རྟོགས་པ་མ་ཡིན་པ་དེ་དག་ཕན་ཚུན་རྒྱུའི་རྐྱེན་དུ་བལྟ་སྟེ་ཞེས་པའོ། །མཚན་གཞི་ནི། འདི་ལྟ་སྟེ། རྟེན་མཚུངས་པའི་སེམས་དང་སེམས་ལས་བྱུང་བ་ཕན་ཚུན་གྲོགས་བྱས་ནས་དམིགས་པ་མཐུན་པར་རྟོགས་པ་རྣམས་སོ། །དུས་མཚུངས་པ་རྣམས་ནི་མ་ཡིན་ཏེ་ རྒྱུ་འབྲས་ཡིན་པའི་ཕྱིར་རོ། །འདིས་ནི་སེམས་བྱུང་རྫས་ཐ་དད་དུའང་བསྟན་ཅིང༌། ཞེས་གསུངས་སོ། །རང་གི་འབྲས་བུར་གྱུར་བའི་ཉོན་མོངས་ཅན་ཕྱི་མ་སྐྱེད་བྱེད་ཀྱི་ཉོན་མོངས་ཅན་དེ། ཀུན་འགྲོའི་རྒྱུའི་མཚན་ཉིད། ཉོན་མོངས་པ་དང་དེ་དང་མཚུངས་ལྡན་རྣམས་སོ། །འདི་ལ་ཐེག་མཆོག་དབུ་མའི་ཟིན་བྲིས་ལས། ཀུན་འགྲོའི་རྒྱུ་འདི་ཡང་སྐལ་མཉམ་གྱི་རྒྱུའི་ཁོངས་སུ་ཕལ་ཆེར་འདུ་བ་ཡིན་ལ། མི་འདུ་བ་དག་ཀྱང་ཡོད་པ་ནི་ཡིན་ཏེ། རྒྱུ་ཉོན་མོངས་པ་ལས་འབྲས་བུ་ཉོན་མོངས་སྐྱེད་པར་བྱེད་པ་ཡང་རིགས་དང་ས་མ་ངེས་པ་རྣམས་ནི་དེར་མི་འདུའོ། །ཞེས་སོགས་གསུངས་སོ། །མཛོད་ལས་ས་མཚུངས་དགོས་པར་གསུངས་པས་སྐབས་འདི་དང་མི་འདྲ་བའོ། །རང་འབྲས་རྣམ་སྨིན་འབྱིན་བྱེད་དུ་ལུང་དུ་བསྟན་པའི་ཆོས་དེ། རྣམ་སྨིན་གྱི་རྒྱུའི་མཚན་ཉིད། མཚན་གཞི་ནི། མི་དགེ་བ་དང༌། དགེ་བ་ཟག་བཅས་རྣམས་སོ། །དགེ་མི་དགེ་ལུང་མ་བསྟན་གྱི་མཚན་ཉིད་ནི། གཏན་ཚིགས་རིགས་པའི་དོན་བསྡུས་ལས། དགེ་མི་དགེ་ལུང་མ་བསྟན་གསུམ་གྱི་མཚན་ཉིད་ནི་རིམ་པ་ལྟར། ལུང་དུ་བསྟན་པའི་ཆོས་གང་ཞིག དམ་པ་རྣམས་ཀྱིས་བསྔགས་པར་འོས་པ་དང༌། གང་ཞིག་དམ་པ་རྣམས་ཀྱིས་སྨད་པར་འོས་པ་དང༌། དགེ་མི་དགེ་གང་ཡང་མིན་པའི་ཆོས་ཞེས་པའོ། །ཞེས་གསུངས་པའི་ཕྱིར། དེ་གསུམ་གྱི་མཚན་གཞི་ནི་རིམ་པ་ལྟར། དད་པ་དང༌། ཁོང་ཁྲོ་དང༌། བུམ་པ་ལྟ་བུའོ། །གཉིས་པ་འབྲས་བུ་བཤད་པ་ལ། ཕན་འདོགས་བྱ། འབྲས་བུའི་མཚན་ཉིད། འབྲས་བུ་ལ་སྒྲས་བརྗོད་ཀྱི་དབྱེ་ན། རྣམ་སྨིན་གྱི་འབྲས་བུ། རྒྱུ་མཐུན་གྱི་འབྲས་བུ། སྐྱེས་བུའི་བྱེད་འབྲས། བདག་འབྲས། བྲལ་འབྲས་དང་ལྔ་ཡོད་པའི་ཕྱིར། རང་རྒྱུ་དགེ་བ་ཟག་བཅས་དང་མི་དགེ་བ་གང་རུང་གི་ནུས་པ་རིམ་གྱིས་སྨིན་པ་ལས་བྱུང་ཞིང་མ་སྒྲིབ་ལུང་མ་བསྟན་གྱི་ཉེར་ཕུང་དེ། རྣམ་སྨིན་གྱི་འབྲས་བུའི་མཚན་ཉིད། རྣམ་སྨིན་དང༌། རྣམ་སྨིན་གྱི་འབྲས་བུ་དོན་གཅིག མཚན་གཞི་ནི། ཟག་བཅས་ཉེར་ལེན་གྱི་ཕུང་པོ་ལྔ་དེ་ཡིན་ནོ། །རང་གི་རྒྱུ་དང་འདྲ་བའི་འདུས་བྱས་དེ། རྒྱུ་འཐུན་གྱི་འབྲས་བུའི་མཚན་ཉིད། མཚན་གཞི་ནི། བུམ་པའི་འབྲས་བུར་གྱུར་པའི་བུམ་པ་ལྟ་བུའོ། །རང་གི་རྒྱུའི་སྟོབས་ལས་སྐྱེས་པ་དེ། སྐྱེས་བུ་བྱེད་འབྲས་ཀྱི་མཚན་ཉིད། མཚན་གཞི་ཡོད་དེ། གཟུགས་དེ་ཡིན་པའི་ཕྱིར། དེ་ཆོས་ཅན། ཁྱོད་ལ་སྐྱེས་བུའི་བྱེད་འབྲས་ཞེས་བརྗོད་པའི་རྒྱུ་མཚན་ཡོད་དེ། སྐྱེས་བུས་ལས་བྱེད་པ་ལྟར་རྒྱུ་རྐྱེན་ཚོགས་པས་བསྐྱེད་པས་ན་དེ་ལྟར་བརྗོད་པའི་ཕྱིར། རང་རྒྱུའི་རང་དབང་དུ་བསྐྱེད་པར་བྱ་བ། བདག་འབྲས་ཀྱི་མཚན་ཉིད། འདུས་བྱས་ཡིན་ན་སྐྱེས་བུའི་བྱེད་འབྲས་དང་བདག་འབྲས་གཉིས་ཀ་ཡིན་པས་ཁྱབ། གཉེན་པོ་ཤེས་རབ་ཀྱི་སྟོབས་ཀྱིས་རང་གི་སྤང་བྱ་ཟད་པའི་བྲལ་བ་དེ། བྲལ་བའི་འབྲས་བུའི་མཚན་ཉིད། བྲལ་བ་བློ་ཡིས་ཟད་པའོ། །ཞེས་པ་ལྟར་རོ། །སོ་སོར་བརྟག་འགོག་དང་བྲལ་འབྲས་གཉིས་དོན་གཅིག། ཆོས་དབྱིངས་བྲལ་བའམ་ཟད་པ་ཡིན་ཀྱང་བྲལ་འབྲས་མཚན་ཉིད་པ་མ་ཡིན་ནམ་སྙམ། མཚན་གཞི་ནི། སྒོམ་ལམ་རྡོ་རྗེ་ལྟ་བུའི་ཏིང་ངེ་འཛིན་གྱིས་སྒྲིབ་པ་དང་བྲལ་བ་དེའོ། །གསུམ་པ་རྐྱེན་གྱི་མཚན་ཉིད། རང་གི་འབྲས་བུ་འགྲུབ་བྱེད་དེ་ཡིན་པའི་ཕྱིར། རྐྱེན་དེ་ལ་དབྱེ་ན་བཞི་ཡོད་དེ། རྒྱུའི་རྐྱེན་དང༌། དེ་མ་ཐག་རྐྱེན་དང༌། དམིགས་རྐྱེན་དང༌། བདག་རྐྱེན་དང་བཞི་ཡོད་པའི་ཕྱིར། རྒྱུའི་རྐྱེན་གྱི་མཚན་ཉིད་ཡོད་དེ། རང་འབྲས་སྐྱེད་བྱེད་དེ་ཡིན་པའི་ཕྱིར། རྒྱུ་དང་རྐྱེན་དང་རྒྱུ་རྐྱེན་རྣམས་དོན་གཅིག དེ་མ་ཐག་རྐྱེན་གྱི་མཚན་ཉིད་ཡོད་དེ། རང་འབྲས་ཤེས་པ་མྱོང་བ་གསལ་རིག་ཏུ་གཙོ་བོར་དངོས་སུ་སྐྱེད་བྱེད་དེ་ཡིན་པའི་ཕྱིར། དམིགས་རྐྱེན་གྱི་མཚན་ཉིད་ཡོད་དེ། རང་འབྲས་ཤེས་པ་ཡུལ་གྱི་རྣམ་ལྡན་དུ་གཙོ་བོར་དངོས་སུ་སྐྱེད་བྱེད་དེ་ཡིན་པའི་ཕྱིར། བདག་རྐྱེན་གྱི་མཚན་ཉིད་ཡོད་དེ། རང་འབྲས་འབྱུང་བ་ལ་དབང་བྱེད་པའི་ཚུལ་གྱིས་སྐྱེད་བྱེད་དེ་ཡིན་པའི་ཕྱིར། རྐྱེན་བཞིའི་མཚན་ཉིད་འཇོག་ཚུལ་དེ་ལྟར་འཐད་དེ། ས་བཟང་གི་ཀུན་བཏུས་འགྲེལ་བ་ཤེས་བྱ་རབ་གསལ་སྣང་བ་ལས། འབྲས་བུའི་ངོ་བོར་སྐྱེད་པ་རྒྱུའི་རྐྱེན་དང༌། ཁྱད་པར་ཤེས་རིག་ཕྱི་མ་སྐྱེད་པ་དེ་མ་ཐག་པའི་རྐྱེན་དང༌། ཤེས་པ་ཡུལ་གྱི་རྣམ་ལྡན་དུ་སྐྱེད་པ་དམིགས་པའི་རྐྱེན་དང༌།འབྲས་བུ་འབྱུང་བ་ལ་དབང་བྱེད་པ་བདག་པོའི་ཀྱང་རྐྱེན་གྱི་མཚན་ཉིད་ཅན་དུ་བལྟའོ། །ཞེས་གསུངས་པའི་ཕྱིར་རོ། །ཤེས་པ་ཡིན་ན་རྐྱེན་བཞི་ལས་སྐྱེ་བས་ཁྱབ་མ་ཁྱབ་ལ་གསུངས་ཟིན་གཉིས་ཡོད་དེ། ས་བཟང་གི་ཀུན་བཏུས་འགྲེལ་བ་ལས། སེམས་སེམས་བྱུང་རྐྱེན་བཞི་ལས་སྐྱེ་བ་ཡང་སྲིད་པའི་དབང་དུ་བྱས་ཀྱི་ཁྱབ་པའི་དོན་ནི་མ་ཡིན་ནོ་ཞེས་ཟེར་རོ། །ཞེས་པ་ནས། རྐྱེན་བཞི་སྲིད་པའི་དོན་ཙམ་དུ་འདོད་པའང་མི་རིགས་ཏེ། སྡེ་བ་ཐམས་ཅད་ཀྱིས་ཀྱང་སེམས་སེམས་བྱུང་ཐམས་ཅད་རྐྱེན་བཞི་ལས་སྐྱེ་བར་བཤད་པའི་ཕྱིར། ཞེས་གསུངས་པ་དང༌། དེ་ལས། རིག་པ་གང་ཡིན་རྐྱེན་བཞི་ལས་སྐྱེ་བའི་ངེས་པ་ནི་མེད་དེ། དོན་དུ་ན་ཤེས་པ་འཁྲུལ་བ་ལ་དམིགས་རྐྱེན་མེད་པའི་ཕྱིར་རོ། །ཞེས་གསུངས་པ་དང་གཉིས་སོ། ། གསུམ་པ་རྩོད་པ་སྤོང་བ།གསུམ་པ་རྩོད་པ་སྤོང་བ་ལ། ནམ་མཁའ་ཆོས་ཅན། བུམ་པའི་བྱེད་རྒྱུ་ཡིན་པར་ཐལ། བུམ་པ་ལས་གཞན་པའི་ཆོས་ཡིན་པའི་ཕྱིར་ན་མ་ཁྱབ། ཁྱབ་པར་ཐལ། མཛོད་ལས། རང་ལས་གཞན་པ་བྱེད་རྒྱུའི་རྒྱུ། ཞེས་གསུངས་པའི་ཕྱིར་ན་མ་ཁྱབ་སྟེ། དེ་ནི་བྱེ་བྲག་སྨྲ་བས་ལུགས་ལ་གསུངས་པའོ། །རྣམ་སྨིན་གྱི་སྔ་ལོགས་སུ་བྱུང་བ་ཆོས་ཅན། ལུང་དུ་བསྟན་པའི་ཆོས་ཡིན་པར་ཐལ། རྣམ་སྨིན་གྱི་རྒྱུ་ཡིན་པའི་ཕྱིར། རྟགས་མ་གྲུབ་པོ། །དེ་ལྟར་བྱས་པ་ལ་ཁོ་ན་རེ། རྣམ་སྨིན་ཆོས་ཅན། ཁྱོད་ཀྱི་སྔ་ལོགས་སུ་བྱུང་བ་ཁྱོད་གྱི་རྒྱུ་ཡིན་པར་ཐལ། ཁྱོད་དངོས་པོ་ཡིན་པའི་ཕྱིར་ཟེར་ན། རྣམ་སྨིན་དེའི་སྔ་ལོགས་སུ་བྱུང་བ་རྣམ་སྨིན་དེའི་རྒྱུ་ཡིན་པར་འདོད་ཅེས་བྱའོ། །དགེ་བ་ཟག་བཅས་དང་མི་དགེ་བ་གཉིས་ཆོས་ཅན། དགེ་བ་དང་མི་དགེ་བ་གང་རུང་ཡིན་པར་ཐལ། རྣམ་སྨིན་གྱི་རྒྱུ་ཡིན་པའི་ཕྱིར་ན་མ་ཁྱབ། ཁྱབ་པར་ཐལ། མཛོད་ལས། རྣམ་སྨིན་རྒྱུ་ནི་མི་དགེ་དང༌། དགེ་བ་ཟག་བཅས་རྣམས་ཁོ་ན། །ཞེས་གསུངས་པའི་ཕྱིར་ན་ཡང་མ་ཁྱབ་སྟེ། རྫས་སྤྱི་གཉིས་འགོད་ཆོད་ན་དེ་ལ་དེ་གཉིས་གང་རུང་གིས་ཁྱབ་ཅེས་པའོ། །ཐུབ་པ་སངས་རྒྱས་བཅོམ་ལྡན་འདས་ཆོས་ཅན། ཚད་མའི་སྐྱེས་བུ་མཐར་ཐུག་ཡིན་པར་ཐལ། རྒྱུ་བསམ་སྦྱོར་ཕུན་སུམ་ཚོགས་པ་གོམས་པ་མཐར་ཕྱིན་པའི་གང་ཟག་ཡིན་པའི་ཕྱིར་ཏེ། ཚད་མ་མདོ་ལས། ཚད་མར་གྱུར་བ་འགྲོ་ལ་ཕན་བཞེད་པ། །སྟོན་པ་བདེར་གཤེགས་སྐྱོབ་ལ་ཕྱག་འཚལ་ལོ། །ཞེས་གསུངས་པའི་ཕྱིར། ཡང་ཐུབ་པ་སངས་རྒྱས་བཅོམ་ལྡན་འདས་ཆོས་ཅན། དོན་གཉིས་ཕུན་སུམ་ཚོགས་པ་དང་ལྡན་པ་ཡིན་ཏེ། རང་དོན་སྤངས་རྟོགས་ཕུན་སུམ་ཚོགས་པ་དང་ལྡན་པ་གང་ཞིག གཞན་དོན་གཟུགས་སྐུ་རྣམ་གཉིས་དང་ཐབས་འཕྲིན་ལས་ཕུན་སུམ་ཚོགས་པ་དང་ལྡན་པ་ཡིན་པའི་ཕྱིར། ཞེས་སྟོན་པར་བྱེད་པ་ལ། ཚད་མ་རྣམ་འགྲེལ་ལས། རྟོག་པའི་དྲ་བ་རྣམ་བསལ་ཞིང༌། །ཟབ་ཅིང་རྒྱ་ཆེའི་སྐུ་མངའ་བ། །ཀུན་ཏུ་བཟང་པོའི་འོད་ཟེར་དག །ཀུན་ནས་འཕྲོ། ཞེས་གསུངས་པའི་ཕྱིར་རོ།། །། སྨྲས་པ།དུས་གསུམ་རྒྱལ་བ་རྣམས་ཀྱི་ངོ་བོ་ཉིད། །རྗེ་བཙུན་དམ་པ་རྣམས་ཀྱི་བཀའ་དྲིན་ལས། །མངོན་ཚད་གཙོ་བྱས་ལེགས་བཤད་ནོར་བུའི་ཚོགས། །ཕྱོགས་གཅིག་བསྡུས་པའི་རིགས་འཕྲུལ་འདི་ཉིད་གྲུབ། །གསུང་རབ་རིགས་པའི་རྗེས་འབྲང་ཡིན་པའི་ཕྱིར། །དོན་དེ་སེམས་ལ་བཟུང་ནས་ཐོག་མ་རུ། །སྤུན་གྲོགས་རིགས་སྨྲ་ཡོངས་དང་ཆབས་ཅིག་ཏུ། །རིགས་ལམ་འདི་ལ་སྦྱངས་བ་ནན་ཏན་མཛོད། །ཐོས་བསམ་སྒོམ་པའི་གྲུ་གཟིངས་ལ་བརྟེན་ནས། །གཞུང་ལུགས་རྒྱ་ཆེའི་རྒྱ་མཚོ་ཤེས་འདོད་རྣམས། །འགྲན་བསམ་ཕྲག་དོག་བསམ་པ་རིང་དོར་ལ། །རིགས་ལམ་བདུད་རྩིའི་དགའ་སྟོན་མྱང་བར་མཛོད། །འདིར་འབད་དགེ་བས་ཚེ་རབས་ཀུན་ཏུ་ཡང༌། །མཚན་ལྡན་བླ་མས་འགྲོ་ཀུན་རྗེས་བཟུང་ཞིང༌། །རིགས་ལམ་དྲི་མ་མེད་པ་ལ་བརྟེན་ནས། །རྒྱལ་བསྟན་མ་ལུས་འཛིན་པའི་སྣོད་གྱུར་ཅིག །ཅེས་ཚད་མའི་དགོངས་དོན་ཕྱོགས་གཅིག་ཏུ་དྲིལ་བ་བསྟན་བཅོས་བསྡུས་གྲྭའི་རྣམ་བཞག་གཞུང་བརྒྱ་གསལ་བའི་རིགས་ལམ་བློ་གསལ་ཡིད་ཀྱི་མུན་སེལ་ཞེས་བྱ་བ་འདི་ནི་རང་ལུགས་ཀྱི་དམ་པ་གོང་མ་རྣམས་ཀྱི་བཞེད་སྲོལ་གཞིར་བཟུང་ནས་དགག་བཞག་སྤོང་གསུམ་སོགས་ས་བཅད་རྣམས་བསྡུས་གྲྭའི་སྤྱིའི་སྒྲོས་ཀྱིས་བརྒྱན་ཏེ། སྔ་ཕྱི་དུ་མར་བློ་གསལ་དམ་པ་དུ་མས་བསྐུལ་ངོར་༧ ངག་དབང་དངོས་གྲུབ་དཔལ་གྱིས་མགོ་ལོག་གི་ཐོག་མའི་ཆོས་སྡེ་ཨ་སྐྱོང་དགོན་དུ་རབ་བྱུང་བཅུ་བདུན་པའི་ས་བྱིའི་སྣྲོན་ཟླའི་ཚེས་དགུ་ལ་དབུ་བཟུང་ནས་ཉིན་བཅུ་གསུམ་ཙམ་གྱིས་རྫོགས་པར་སྦྱར་བའོ། །འདིས་ཀྱང་ངེས་དོན་གྱི་བསྟན་པ་འདི་ཉིད་རིགས་ལམ་དྲི་མ་མེད་པའི་སྒོ་ནས་ཕྱོགས་དུས་ཐམས་ཅད་དུ་དར་ཞིང་རྒྱས་ལ་ཡུན་རིང་དུ་གནས་པར་གྱུར་ཅིག །སརྦ་མངྒ་ལམ།། །། ཐལ་འགྱུར་གྱི་ཁྱབ་སྒོ་རེ་གཉིས་ཀྱི་རེ་མིག་བློ་གསལ།ཐལ་འགྱུར་གྱི་ཁྱབ་སྒོ་རེ་གཉིས་ཀྱི་རེ་མིག་བློ་གསལ་མིག་འབྱེད། ཨང་གྲངས།ཐལ་འགྱུར།༡ གཟུགས་ཡིན་པར་ཐལ། དངོས་པོ་ཡིན་པའི་ཕྱིར།༢ མཚོན་བྱ་ཡིན་པར་ཐལ། བེམ་པོ་ཆོས་ཅན། རྟག་པ་ཡིན་པའི་ཕྱིར།༣ དངོས་པོ་ཡིན་པར་ཐལ། གཟུགས་ཡིན་པའི་ཕྱིར། ༤ བྱས་པ་ཡིན་པར་ཐལ། བདག་མེད་ཡིན་པའི་ཕྱིར།༥ བྱས་པ་ཡིན་པར་ཐལ། གཟུགས་མ་ཡིན་པའི་ཕྱིར། ༦ བདག་མེད་ཡིན་པར་ཐལ། བདག་མེད་མ་ཡིན་པའི་ཕྱིར། ཨང༌།རྗེས་ཁྱབ།འགལ་ཁྱབ།ཐུར་ཁྱབ།ལྡོག་ཁྱབ།རྗེས་ཕྱིན།འགལ་ཕྱིན།ཐུར་ཕྱིན།ལྡོག་ཕྱིན།རེ་བཞི།༡༡༡༣༡༡༡༣༡༡༢༢༢༢༠༠༢༢༠༠༨༣༣༣༡༣༣༣༡༣༢༠༤༢༢༤༤༢༢༤༤༢༤༥༡༡༡༣༡༡༡༣༡༢༦༧༧༧༥༧༧༧༥༥༢ཨང་གྲངས།ཐལ་འགྱུར།༡བདག་མེད་ཡིན་པར་ཐལ། རྟག་པ་ཡིན་པའི་ཕྱིར། ༢རྟག་དངོས་གཉིས་ཡིན་པར་ཐལ། དངོས་པོ་ཡིན་པའི་ཕྱིར། ༣གཟུགས་ཡིན་པར་ཐལ། དངོས་པོ་མ་ཡིན་པའི་ཕྱིར། ༤ཀ་བུམ་གཉིས་ཡིན་པར་ཐལ། བདག་མེད་ཡིན་པའི་ཕྱིར།༥ཡོད་པ་ཡིན་པར་ཐལ། ཀ་བུམ་གཉིས་ཡིན་པའི་ཕྱིར། ༦ཀ་བུམ་གཉིས་ཡིན་པར་ཐལ། ཀ་བུམ་གཉིས་ཡིན་པའི་ཕྱིར། ཨང༌།རྗེས་ཁྱབ།འགལ་ཁྱབ།ཐུར་ཁྱབ།ལྡོག་ཁྱབ།རྗེས་ཕྱིན།འགལ་ཕྱིན།ཐུར་ཕྱིན།ལྡོག་ཕྱིན།རེ་བཞི།༡༤༤༢༦༤༤༢༦༣༢༢༤༤༦༢༤༤༦༢༣༢༣༣༣༣༡༣༣༣༡༢༠༤༥༥༧༥༥༥༧༥༤༤༥༦༦༤༤༦༦༤༤༤༠༦༧༧༧༥༧༧༧༥༥༢ ཨང་གྲངས།ཐལ་འགྱུར།༡བྱས་པ་ཡིན་པར་ཐལ། བདག་མེད་པ་ཡིན་པའི་ཕྱིར།༢བདག་མེད་ཡིན་པར་ཐལ། ཀ་བུམ་གཉིས་ཡིན་པའི་ཕྱིར།༣བདག་མེད་མ་ཡིན་པར་ཐལ། ཀ་བུམ་གཉིས་མ་ཡིན་པའི་ཕྱིར།༤བདག་མེད་ཡིན་པར་ཐལ། ཡོད་པ་ཡིན་པའི་ཕྱིར།༥རྟག་དངོས་གཉིས་མ་ཡིན་པར་ཐལ། ཀ་བུམ་གཉིས་ཡིན་པའི་ཕྱིར།༦བྱས་པ་ཡིན་པར་ཐལ། བྱས་པ་ཡིན་པའི་ཕྱིར། ཨང༌།རྗེས་ཁྱབ།འགལ་ཁྱབ།ཐུར་ཁྱབ།ལྡོག་ཁྱབ།རྗེས་ཕྱིན།འགལ་ཕྱིན།ཐུར་ཕྱིན།ལྡོག་ཕྱིན།རེ་བཞི།༡༢༢༤༤༢༢༤༤༢༤༢༧༧༥༧༧༧༥༧༥༢༣༥༥༧༥༥༥༧༥༤༤༤༤༤༢༦༤༤༢༦༣༢༥༧༧༥༧༧༧༥༧༥༢༦༤༤༤༤༤༤༤༤༣༢ ༈ རྗེས་ཁྱབ་ཁྱབ་བ་སྒོ་བརྒྱད་ནང་གི་གཅིག་ཙམ་ངེས་པའི་ཐལ་འགྱུར་དང༌། ལྡོག་ཁྱབ་ཁྱབ་བ་སྒོ་བརྒྱད་ནང་གི་གཅིག་ཙམ་ངེས་པའི་ཐལ་འགྱུར་གཉིས་ལ་མུ་བཞི་ཡོད་དེ། དང་པོ་ནི། དངོས་པོ་དང་གཅིག་མ་ཡིན་པར་ཐལ། དངོས་པོ་ཡིན་པའི་ཕྱིར། གཉིས་པ་ནི། བུམ་པ་ཡིན་པར་ཐལ། ཀ་བ་ཡིན་པའི་ཕྱིར། གསུམ་པ་ནི། བུམ་པ་ཡིན་པར་ཐལ། གཟུགས་ཡིན་པའི་ཕྱིར། བཞི་བ་ནི། དངོས་པོ་ཡིན་པར་ཐལ། དངོས་པོ་ཡིན་པའི་ཕྱིར། ༈ རྗེས་ཁྱབ་ཁྱབ་བ་སྒོ་བརྒྱད་ནང་གི་གཉིས་ཙམ་ངེས་པའི་ཐལ་འགྱུར་དང༌། ལྡོག་ཁྱབ་ཁྱབ་བ་སྒོ་བརྒྱད་ནང་གི་གཉིས་ཙམ་ངེས་པའི་ཐལ་འགྱུར་གཉིས་ལ་མུ་བཞི་ཡོད་དེ། དང་པོ་ནི། ཡོད་པར་ཐལ། བདག་མེད་ཡིན་པའི་ཕྱིར། གཉིས་པ་ནི། བདག་མེད་མ་ཡིན་པར་ཐལ། ཡོད་པ་མ་ཡིན་པའི་ཕྱིར། གསུམ་པ་ནི། རྣམ་མཁྱེན་ཆོས་ཅན། བུམ་པ་ཆོས་ཅན། རྟག་པ་ཡིན་པར་ཐལ། བུམ་པ་ཆོས་ཅན། རྟག་པ་ཡིན་པའི་ཕྱིར། བཞི་བ་ནི། ཀ་བ་ཡིན་པར་ཐལ། བུམ་པ་ཡིན་པའི་ཕྱིར་ཞེས་པ་ལྟ་བུའོ། །ཆོས་གྲོགས་རྣམས་ཀྱིས་དག་བཅོས་མཛད་པར་ཞུ་ཞུ། དངོས་གྲུབ་དཔལ་གྱིས་བྲིས་པའོ། ། ཆ་བའི་ལུགས་ཀྱི་རྫས་ལྡོག་བརྒྱད་ཀྱི་མུ་བཞི་བརྩི་ཚུལ་བློ་གསར་ཐོག་མའི་འཇུག་སྒོ།ཆ་བའི་ལུགས་ཀྱི་རྫས་ལྡོག་བརྒྱད་ཀྱི་མུ་བཞི་བརྩི་ཚུལ་བློ་གསར་ཐོག་མའི་འཇུག་སྒོ་ཞེས་བྱ་བ་བཞུགས་སོ། ། དངོས་པོ་དང་རྫས་ལྡོག་བརྒྱད་པོ་རེ་རེ་དང་མུ་བཞི་ཡོད་པ་ལས། དང་པོ་དངོས་པོ་དང་རྫས་ཆོས་ལ་མུ་བཞི་ལས། དང་པོ་ལ་ལྡོག་ཆོས་སུ་གྱུར་བའི་དངོས་པོ་ཆོས་ཅན། གཉིས་པ་ལ་ཤེས་བྱ་ཆོས་ཅན། གསུམ་པ་ལ་དངོས་པོ་དང་བུམ་པ་སོགས་སོ། །དངོས་པོ་དང་རང་ཉིད་ལྡོག་ཆོས་ལ་མུ་བཞི། དང་པོ་རྟག་པར་རྟོགས་པའི་ཚད་མ་མི་རྟག་པ་ཆོས་ཅན། གཉིས་པ་ལ་ཤེས་བྱ་དང་ཐ་དད་ཆོས་ཅན། གསུམ་པ་ལ་བདག་མེད་དུ་རྟོགས་པའི་ཚད་མ་ཚད་མ་ཆོས་ཅན། དངོས་པོ་དང་རང་མ་ཡིན་པའི་ལྡོག་ཆོས་ལ་མུ་བཞི། དང་པོ་ནི་ཡོད་པར་རྟོགས་པའི་ཚད་མ་མི་རྟག་པ་ཆོས་ཅན། གཉིས་པ་རང་ཉིད་ལྡོག་ཆོས་ཆོས་ཅན། གསུམ་པ་ལ་ཀ་བུམ་གཉིས་ཆོས་ཅན། དངོས་པོ་དང་ལྡོག་ཆོས་ཕུང་སུམ་ཙམ་པོ་བ་ལ་མུ་བཞི།དང་པོ་ནི་རྫས་ཆོས་སུ་གྱུར་བའི་དངོས་པོ་ཆོས་ཅན། གཉིས་པ་ནི་བུམ་པའི་སྤྱི་དང༌། གསུམ་པ་ལ་རྟག་པར་རྟོགས་པའི་ཚད་མ་མི་རྟག་པ་ཆོས་ཅན། དངོས་པོ་དང་རྫས་ཆོས་ཀྱི་རྫས་མཐུན་ལ་མུ་བཞི། དང་པོ་ལ་བུམ་པ་དང་དངོས་པོ་ལྟ་བུའོ། །གཉིས་པ་ལ་རྫས་ཆོས་དང་འགལ་བ་ཆོས་ཅན། གསུམ་པ་ལ་ལྡོག་ཆོས་སུ་གྱུར་བའི་བུམ་པ་ཆོས་ཅན། རང་ཉིད་ལྡོག་ཆོས་ཀྱི་རྫས་མཐུན་དང་དངོས་པོ་ལ་མུ་བཞི། དང་པོ་ལ་རང་ཉིད་ལྡོག་ཆོས་མ་ཡིན་པ་ཆོས་ཅན། གཉིས་ཀ་ཡིན་པ་རང་ཉིད་ལྡོག་ཆོས་མ་ཡིན་པར་རྟོགས་པའི་ཚད་མ་མི་རྟག་པ་ཆོས་ཅན། རང་མིན་ལྡོག་ཆོས་ཀྱི་རྫས་མཐུན་དང་དངོས་པོ་ལ་མུ་བཞི། དང་པོ་ནི་རང་མིན་ལྡོག་ཆོས་ཆོས་ཅན། གཉིས་ཀ། རང་མ་ཡིན་པའི་ལྡོག་ཆོས་སུ་རྟོགས་པའི་ཚད་མ་ཚད་མ་ཆོས་ཅན། ལྡོག་ཆོས་ཕུང་སུམ་ཙམ་པོ་བའི་རྫས་མཐུན་དང་དངོས་པོ་ལ་མུ་བཞི། དང་པོ་ནི། ལྡོག་ཆོས་ཕུང་སུམ་ཙམ་པོ་བ་དང་བུམ་པའི་སྤྱི་གང་རུང་ཆོས་ཅན། གཉིས་ཀ་ལ་ལྡོག་ཆོས་ཕུང་སུམ་ཙམ་པོ་བ་དང་བུམ་པའི་སྤྱི་གང་རུང་རྟོགས་པའི་ཚད་མ་ཚད་མ་ཆོས་ཅན། ༈ རྫས་ལྡོག་བརྒྱད་པོ་རེ་རེ་དང་ཁྱོད་ལ་མུ་བཞི་ཡོད་པའི་རྫས་ལྡོག་བརྒྱད་ལ། རྫས་ཆོས་ལ་དངོས་པོ་ཆོས་ཅན། རང་ཉིད་ལྡོག་ཆོས་ལ། རྟག་པ། གཅིག རང་མིན་ལྡོག་ཆོས་ལ། མཚན་ཉིད། ཐ་དད། ལྡོག་ཆོས་ཕུང་སུམ་ཙམ་པོ་ལ། རྟག་པར་རྟོགས་པའི་ཚད་མ་མི་རྟག་པ་ཆོས་ཅན། ༈ རྫས་ལྡོག་བརྒྱད་པོ་རེ་རེ་དང་མུ་བཞི་ཡོད་པའི་རང་ཉིད་ལྡོག་ཆོས་ལ། རྟག་པ། རྫས་ཆོས་དང་རྟག་པ་ལ་མུ་བཞི་ནི། དང་པོ་ལ། དངོས་པོ་ཆོས་ཅན། མཚོན་བྱ་ཆོས་ཅན། གསུམ་པ་ལ་ཤེས་བྱ་ཆོས་ཅན། རང་ཉིད་ལྡོག་ཆོས་དང་རྟག་པ་ལ་མུ་བཞི་ནི། བདག་མེད་དུ་རྟོགས་པའི་ཚད་མ་ཚད་མ་ཆོས་ཅན། གཉིས་པ་ལ་རང་ཉིད་ལྡོག་ཆོས་ཆོས་ཅན། གསུམ་པ་ལ་བདག་མེད་ཆོས་ཅན། རང་མ་ཡིན་པའི་ལྡོག་ཆོས་དང་རྟག་པ་ལ་མུ་བཞི།དང་པོ་ནི་ཀ་བུམ་གཉིས། གཉིས་པ་སྤྱི། གསུམ་པ་ལ་བུམ་པའི་བྱེ་བྲག་ཆོས་ཅན། ལྡོག་ཆོས་ཕུང་སུམ་ཙམ་པོ་དང་རྟག་པ་ལ་མུ་བཞི། དང་པོ་ནི་རྟག་པར་རྟོགས་པའི་ཚད་ཚད་མ་ཆོས་ཅན། གཉིས་པ་ལ་བུམ་པའི་ལྡོག་པ་ཆོས་ཅན། གསུམ་པ་ལ་བུམ་པའི་སྤྱི་ཆོས་ཅན། རྫས་ཆོས་ཀྱི་རྫས་མཐུན་དང་རྟག་པ་ལ་མུ་བཞི། ལྡོག་ཆོས་སུ་གྱུར་བའི་དངོས་པོ་ཆོས་ཅན། གཉིས་པ་ལ་བྱེ་བྲག་མ་ཡིན་པ་ཆོས་ཅན། གསུམ་པ་ལ་རྫས་ཆོས་དང་འགལ་བ་ཆོས་ཅན། རང་ཉིད་ལྡོག་ཆོས་ཀྱི་རྫས་མཐུན་དང་རྟག་པ་ལ་མུ་བཞི།༼དང་པོ་ནི་རང་ཉིད་ལྡོག་ཆོས་ཞེས་བརྗོད་པའི་སྒྲ་དོན་མཐུན་ཆོས་ཅན། འདི་ལ་དཔྱད།༽ གཉིས་པ་ལ་ལྡོག་ཆོས་སུ་གྱུར་བའི་རྟག་པ་ཆོས་ཅན། གསུམ་པ་ལ་རང་ཉིད་ལྡོག་ཆོས་མ་ཡིན་པ་ཆོས་ཅན། བུམ་པ་དང་ཐ་དད་ཀྱང་ཡིན་རང་མིན་ལྡོག་ཆོས་མིན་པ་དང་རང་ཡིན་ལྡོག་ཆོས་མིན་པ་གང་རུང་ཡིན་པའི་གཞི་མཐུན་པ་ཆོས་ཅན། རང་མ་ཡིན་གྱི་ལྡོག་ཆོས་ཀྱི་རྫས་མཐུན་དང་རྟག་པ་ལ་མུ་བཞི། དང་པོ་ནི་རང་མ་ཡིན་གྱི་ལྡོག་ཆོས་རྟོགས་པའི་ཚད་མ་ཚད་མ་ཆོས་ཅན། གཉིས་པ་ལ་གཅིག་ཆོས་ཅན། གསུམ་པ་ལ་རང་མིན་ལྡོག་ཆོས་ཡིན་པ་ཆོས་ཅན། ལྡོག་ཆོས་ཕུང་སུམ་ཙམ་པོ་བའི་རྫས་མཐུན་དང་རྟག་པ་ལ་མུ་བཞི། དང་པོ་ནི་ལྡོག་ཆོས་ཕུང་སུམ་ཙམ་པོ་བ་དང་བུམ་པའི་བྱེ་བྲག་གང་རུང་རྟོགས་པའི་ཚད་མ་ཚད་མ་ཆོས་ཅན། གཉིས་པ་ལ་འགོག་བདེན་ཆོས་ཅན། གསུམ་པ་ལ་ལྡོག་ཆོས་ཕུང་སུམ་ཙམ་པོ་བ་དང་བུམ་པའི་སྤྱི་གང་རུང་ཆོས་ཅན། ༈ རྫས་ཆོས་དང་མཚན་ཉིད་ལ་མུ་བཞི་ནི། ཤེས་བྱ་ཆོས་ཅན། གཉིས་པ་བུམ་པ་དང་སོ་སོ་བ་མ་ཡིན་པའི་ཆོས་ཆོས་ཅན། གསུམ་པ་བློའི་ཡུལ་དུ་བྱ་རུང་ཆོས་ཅན། རང་ཉིད་ལྡོག་ཆོས་དང་མཚན་ཉིད་ལ་མུ་བཞི་ནི། དང་པོ་ནི་མཚོན་བྱ་ཆོས་ཅན། གཉིས་པ་ནི་ལྟོ་ལྡིར་བ་ཆོས་ཅན། གསུམ་པ་ནི་དོན་བྱེད་ནུས་སྟོང་ཆོས་ཅན། རང་མ་ཡིན་གྱི་ལྡོག་ཆོས་དང་མཚན་ཉིད་གཉིས་ལ་མུ་བཞི། དང་པོ་ནི་མཚན་ཉིད་ཆོས་ཅན། གཉིས་པ་ལྟོ་ལྡིར་བ་ཆོས་ཅན། གསུམ་པ་ཡིན་པ་མི་སྲིད་པའི་བློའི་ཡུལ་དུ་བྱ་རུང་ཆོས་ཅན། རྫས་ཆོས་ཀྱི་རྫས་མཐུན་དང་མཚན་ཉིད་ལ་མུ་བཞི། ལྡོག་ཆོས་སུ་གྱུར་བའི་དངོས་པོ་ཆོས་ཅན། གཉིས་པ་གཟུགས་སུ་རུང་བ་ཆོས་ཅན། གསུམ་པ་ལ་ལྡོག་ཆོས་སུ་གྱུར་བའི་དོན་བྱེད་ནུས་པ་ཆོས་ཅན། རང་ཉིད་ལྡོག་ཆོས་ཀྱི་རྫས་མཐུན་དང་མཚན་ཉིད་ལ་མུ་བཞི། དང་པོ་ལ་རང་ཉིད་ལྡོག་ཆོས་མ་ཡིན་པ་ཆོས་ཅན། གསུམ་པ་ལ། ཁྱོད་གཞི་གྲུབ་ཁྱོད་ཁྱོད་རང་ཡིན། ཁྱོད་མ་ཡིན་པ་ཁྱོད་ཡིན་ཁྱོད་ཀྱི་ལྡོག་པ་རང་ཉིད་ལྡོག་ཆོས་དང་མི་འགལ་བ་མ་ཡིན་པ་ཆོས་ཅན། རང་མིན་ལྡོག་ཆོས་དང་མཚན་ཉིད་ལ་མུ་བཞི། དང་པོ་ལ་རང་མ་ཡིན་གྱི་ལྡོག་ཆོས་ཆོས་ཅན། གསུམ་པ་རང་མིན་ལྡོག་ཆོས་ཀྱི་མཚན་ཉིད་གང་ཡིན་དེ་ཆོས་ཅན། ལྡོག་ཆོས་ཕུང་སུམ་ཙམ་པོ་བ་དང་མཚན་ཉིད་གཉིས་ལ་མུ་བཞི། དང་པོ་ལྡོག་ཆོས་ཕུང་སུམ་ཙམ་པོ་བ་དང་བུམ་པའི་སྤྱི་གང་རུང་ཆོས་ཅན། གཉིས་པ་ཤེས་བྱ་ཆོས་ཅན། གསུམ་པ་དངོས་པོའི་སྤྱི་ཆོས་ཅན། ༈རྫས་ཆོས་དང་རྟག་པར་རྟོགས་པའི་ཚད་མ་མི་རྟག་པ་གཉིས་ལ་མུ་བཞི། དང་པོ་བུམ་པ་ཆོས་ཅན། གཉིས་པ་རྟག་པ་ཆོས་ཅན། གསུམ་པ་ཤེས་བྱ་ཆོས་ཅན། དེ་ལྟར་རིག་པའི་གནས་ལ་བློ་སྦྱང་ན་ཀུན་མཁྱེན་ཐོབ་པའི་ཉེར་ལེན་དུ་འགྱུར་རོ། །སི་དྡྷི་ཤྲཱིས་བསྒྲིགས་པའོ། །ཞུ་དག་བྱེད་པར་ཞུ། སརྦ་མངྒ་ལཾ། བློ་རིག་གི་རྣམ་བཞག་ཉུང་གསལ་ལེགས་བཤད་གསེར་གྱི་ཉི་མ།བློ་རིག་གི་རྣམ་བཞག་ཉུང་གསལ་ལེགས་བཤད་གསེར་གྱི་ཉི་མ་ཞེས་བྱ་བ་བཞུགས་སོ། ། ཨོཾ་སྭ་སྟི། བྱང་ཆུབ་མཆོག་ཏུ་ཐུགས་བསྐྱེད་གྲངས་མེད་གསུམ། །རྒྱལ་བ་རྒྱ་མཚོའི་ཚོགས་ལ་ལེགས་བརྟེན་ནས། །ས་ལམ་མཐར་ཕྱིན་སྐུ་བཞི་མངོན་མཛད་པ། །ཐུབ་པའི་མཁྱེན་བརྩེས་འགྲོ་འདི་རྟག་ཏུ་སྐྱོངས། །རྒྱལ་ཀུན་མཁྱེན་པ་གཅིག་བསྡུས་འཇམ་པའི་དབྱངས། །ངེས་དོན་རྒྱལ་མཚན་འཛིན་པ་དོལ་པོ་པ། །མདོ་སྔགས་བསྟན་པའི་མཛོད་འཛིན་སྒྲོལ་མགོན་རྗེ། །ལེགས་བཤད་སྨྲ་བའི་མཁྱེན་རབ་སྩལ་ཏུ་གསོལ། །མཁྱེན་བརྩེའི་ཆུ་གཏེར་ཟབ་ཅིང་རྒྱ་ཆེའི་གནས། །ཡོན་ཏན་རིན་ཆེན་རྣམ་མང་འབྱུང་བའི་གཏེར། །རྨད་བྱུང་འཕྲིན་ལས་རླབས་ཕྲེང་འབུམ་གཡོ་བ། །ཡོངས་འཛིན་དམ་པ་རྣམས་ལ་གུས་པས་འདུད། །ཤེས་བྱའི་གནས་ཀུན་ཇི་བཞིན་རྟོགས་པ་ལ། །མེད་དུ་མི་རུང་བློ༷་རི༷ག་རྣ༷མ་བཞ༷ག་གང༌། །མངོན་ཚད་དགོངས་དོན་གཙོར་བྱས་ཉུ༷ང་གས༷ལ་བའི། །ལེ༷གས་བཤ༷ད་གསེ༷ར་གྱི༷་ཉི༷་མ༷འི་འོད་སྣང་སྤྲོ། །དེ་ལ་འདིར་གང་དག་བླང་དོར་གྱི་གནས་དག་ལེགས་པར་ཁོང་དུ་ཆུད་དེ་རྣམ་པར་གྲོལ་བའི་ལམ་བཟང་ལ་བརྟེན་ནས་ཐར་བ་དང་ཐམས་ཅད་མཁྱེན་པའི་གོ་འཕང་བླ་ན་མེད་པ་མངོན་དུ་བྱེད་པར་འདོད་པའི་ལུས་ཅན་དག་གིས་ནི། སྙིང་པོ་མེད་པའི་སྲིད་པའི་བྱ་བ་ཀུན་རིང་དུ་སྤངས་ནས། རྒྱལ་བའི་ཆོས་ཚུལ་མ་ལུས་པ་ལ་ཐོས་བསམ་གྱིས་ལེགས་པར་འཇུག་དགོས་སོ། །དེ་ཡང་ཡུལ་ཅན་བློའི་རྣམ་བཞག་རྣམས་ལེགས་པར་མ་ཤེས་ན་ཉོན་མོངས་སོགས་སྤང་བྱ་དང་གཉེན་པོ་ས་ལམ་གྱི་རྣམ་བཞག་སོགས་དཔྱིས་ཕྱིན་པར་ཤེས་པར་མི་འགྱུར་བའོ། ། གཞུང་གི་དོན། དེས་ན་འདིར་བློ་རིག་གི་རྣམ་བཞག་བཤད་པ་ལ། ཡུལ་ཅན་བློའི་རྣམ་བཞག་དང༌། ཡུལ་གྱི་རྣམ་བཞག་བཤད་པ་དང་གཉིས། དང་པོ་ལ། མཚན་ཉིད་དང༌། དབྱེ་བ་བཤད་པ་གཉིས། དང་པོ་ལ་དགག་བཞག་གཉིས་ལས། དང་པོ་ནི། ཁ་ཅིག་ན་རེ། རང་རིག་ཆོས་ཅན། རང་ཡུལ་གྱི་རྣམ་པ་ཤར་བར་ཐལ། རང་ཡུལ་སྣང་བའི་བློ་ཡིན་པའི་ཕྱིར། འདོད་ན། རང་རིག་ཆོས་ཅན། རང་ཡུལ་གྱི་རྣམ་པ་མ་ཤར་བར་ཐལ། ཡུལ་ཡུལ་ཅན་གྱི་གཉིས་སྣང་ནུབ་པའི་བློ་ཡིན་པའི་ཕྱིར་ན་མ་ཁྱབ། རྟགས་དེར་ཐལ། རང་རིག་ཡིན་པའི་ཕྱིར། ཁྱབ་སྟེ། དབུ་མ་རྒྱན་ལས། དེ་ཡི་རང་གི་རིག་པ་ནི། །བྱ་དང་བྱེད་པའི་དངོས་པོ་མིན། །ཞེས་གསུངས་པའི་ཕྱིར། ཡང་ཁ་ཅིག་ན་རེ། རང་ཡུལ་སྣང་བ་བློའི་མཚན་ཉིད་ཟེར་ན། སྐྱེས་བུ་ཆོས་ཅན། བློ་ཡིན་པར་ཐལ། རང་ཡུལ་སྣང་བའི་ཕྱིར། ཁྱབ་པ་ཁས། འདོད་མི་ནུས་ཏེ། ལྡན་མིན་འདུ་བྱེད་ཡིན་པའི་ཕྱིར། གཉིས་པ་རང་ལུགས་བཞག་པ་ལ། རང་ཡུལ་སྣང་བའི་རིག་པ་དེ། བློའི་མཚན་ཉིད། བློ་གང་དང་གང་ཡིན་ཀྱང་རང་ཡུལ་དེ་བུམ་པ་ལྟ་བུའི་ཡོད་པའམ་རི་བོང་གི་རྭ་ལྟ་བུའི་མེད་པ་ཞིག་ཡིན་ཡང་རུང་རང་ཡུལ་དེ་བློ་གང་གི་ངོར་སྣང་ཞིང་འཆར་བའི་རིག་པ་ཞིག་ཡིན་ཞེས་པའོ། །མཚན་གཞི་ནི། མིག་ཤེས་དང༌། དད་པ་དང༌། ཞེ་སྡང་དང༌། ཚད་མ་ལྟ་བུའོ། །འཆི་བ་མི་རྟག་པ་རྟོགས་པའི་ཤེས་པ་ཆོས་ཅན། བློ་ཡིན་ཏེ། ཡུལ་འཆར་བ་དང་སྣང་བ་དེ་ཡུལ་དེ་རིག་པའི་དོན་ཡིན་པ་གང་ཞིག ཁྱོད་ཡུལ་འཆར་བ་དང་སྣང་བའི་ཤེས་པ་ཡིན་པའི་ཕྱིར། རྣམ་འགྲེལ་ལས། དེ་ལྟར་བློ་ལ་བློ་འདོད་ན། །བློ་ནི་རང་ཉིད་རིག་པར་གྲུབ། །ཅེས་སོ། །བློའི་མིང་གི་རྣམ་གྲངས་ཡོད་དེ། བློ་ཤེས་པ་གསལ་བ་རིག་པ་རྣམས་དོན་གཅིག་པའི་ཕྱིར། གསལ་བའི་བེམ་མིན་དེ། རང་ཤེས་པ་ཡིན་པའི་མཚན་ཉིད། རྣམ་འགྲེལ་ལས། དེ་ཕྱིར་ངེད་ཀྱི་བློ་རང་ཉིད། །གསལ་བའི་ངོ་བོ་རབ་གསལ་ཞིང༌། །ཞེས་དང༌། རང་ཉིད་རབ་ཏུ་གསལ་ཕྱིར་དོན། །དེ་ཡི་ངོ་བོ་རབ་གསལ་ཡིན། །ཞེས་དང༌། དབུ་མ་རྒྱན་ལས། རྣམ་ཤེས་བེམ་པོའི་རང་བཞིན་ལས། །ལྡོག་པ་རབ་ཏུ་སྐྱེ་བ་སྟེ། །ཞེས་གསུངས་པའི་ཕྱིར་རོ། ། གཉིས་པ་དབྱེ་བ་བཤད་པ་ལ། བློ་རིག་བདུན་དུ་དབྱེ་བ།།བློ་རིག་བདུན་དུ་དབྱེ་བ། བློ་རིག་བདུན་དུ་དབྱེ་བ། རྟོགས་པའི་བློ་དང་མ་རྟོགས་པའི་བློ་གཉིས་སུ་དབྱེ་བ། ཚད་མ་དང་ཚད་མིན་གཉིས་སུ་དབྱེ་བ། རྟོག་བཅས་དང་རྟོག་མེད་གཉིས་སུ་དབྱེ་བ། འཁྲུལ་ཤེས་དང་མ་འཁྲུལ་བའི་ཤེས་པ་གཉིས་སུ་དབྱེ་བ། སེམས་སེམས་བྱུང་བཤད་པ་དང་དྲུག དང་པོ་བློ་རིག་བདུན་དུ་དབྱེ་བ་ལ། ཡིད་དཔྱོད། སྣང་ལ་མ་ངེས་པ། བཅད་ཤེས། ལོག་ཤེས། ཐེ་ཚོམ། མངོན་སུམ། རྗེས་དཔག་དང་བདུན་ཡོད་པའི་ཕྱིར། དང་པོ་ཡིད་དཔྱོད་ཀྱི་རྣམ་བཞག་བཤད་པ་ལ། ཚད་མ་མདོའི་སྒྲ་བྱུང་དགག་པའི་ལེའུ་ལས། སྒྲ་ཡི་བརྗོད་པར་བྱ་བའི་དོན། །ཇི་བཞིན་དོན་ནི་བརྟག་པ་གང༌། །ཞེས་པའི་དོན་དེ་ཞི་འཚོའི་ཚད་ཆེན་སྒྲ་བྱུང་འགོག་པའི་ལེའུ་ལས། སྒྲ་ལས་བྱུང་བ་གང་ཡིན་པ། །ཞེས་པ་ནས། རྗེས་སུ་དཔག་པའང་མ་ཡིན་ཏེ། དེ་ཡི་མཚན་ཉིད་བྲལ་ཕྱིར་རོ། །ཞེས་པའི་གཞུང་འདི་བྱུང༌། དེའི་མཐའ་དཔྱད་པ་ལ་དགག་བཞག་གཉིས་ལས། དང་པོ་ནི། ཁ་ཅིག་གིས། ཚད་མིན་གྱི་བློ་ལ་བཅད་ཤེས་ལོག་ཤེས་ཐེ་ཚོམ་སྣང་ལ་མ་ངེས་པ་བཞིར་ངེས་ཟེར་ན། འོ་ན་ཆོས་དེའི་དོན་གོ་ཡང་ཐེ་ཚོམ་མ་ཆོད་པ་ཞིག་དང་ཆོད་ཟིན་པ་གཉིས་མེད་པར་ཐལ། ཚད་མིན་གྱི་བློ་ཡིན་ན་དེ་བཞི་གང་རུང་ཡིན་པས་ཁྱབ་པའི་ཕྱིར། རྟགས་ཁས། འདོད་མི་ནུས་ཏེ། མདོ་ལས། དོན་གོ་རྣམ་གཉིས་མཐའ་གཅིག་ཏུ། །ཞེས་དང༌། དེའི་རང་འགྲེལ་ལས། མཐའ་གཅིག་ཏུ་ངེས་པ་དང༌། མཐའ་གཅིག་ཏུ་མ་ངེས་པའོ། །ཞེས་དང༌། མཐའ་ཅིག་ཏུ་མ་ངེས་པ་ཅན་ཉིད་ཀྱི་དོན་གྱི་གོ་བ་ནི་ཚད་མ་མ་ཡིན་ཏེ། ཐེ་ཚོམ་གྱི་རྒྱུ་ཡིན་པའི་ཕྱིར། ཞེས་གསུངས་པའི་ཕྱིར་རོ། ། གཉིས་པ་རང་ལུགས།གཉིས་པ་རང་ལུགས་ནི། རང་གི་རྟེན་གཏན་ཚིགས་ལ་བརྟེན་ནས་དངོས་སུ་སྒྲོ་འདོགས་གཅོད་པའི་ངེས་པ་དང་མངོན་སུམ་གཉིས་གང་ཡང་མ་ཡིན་ཞིང༌།རང་ཡུལ་བདེན་པ་ལ་མཐའ་གཅིག་ཏུ་གསར་དུ་ཞེན་པའི་བློ་ཡིན་པ་དེ། ཡིད་དཔྱོད་ཀྱི་མཚན་ཉིད། རང་གི་རྟེན་གཏན་ཚིགས་ལ་བརྟེན་ནས་དངོས་སུ་སྒྲོ་འདོགས་ཆོད་པའི་ངེས་པ་དང་བྲལ་ཞེས་པས་རྗེས་དཔག་དང་ཡིད་དཔྱོད་ཀྱི་གཞི་མཐུན་ཡོད་པ་གཅོད། མངོན་སུམ་མ་ཡིན་ཞེས་པས་མངོན་སུམ་དང་ཡིད་དཔྱོད་ཀྱི་གཞི་མཐུན་ཡོད་པ་གཅོད། རང་ཡུལ་བདེན་པ་ཞེས་པས་ལོག་ཤེས་དང་དེའི་གཞི་མཐུན་གཅོད། མཐའ་གཅིག་ཏུ་ཞེས་པས་ཐེ་ཚོམ་དང་དེའི་གཞི་མཐུན་གཅོད། གསར་དུ་ཞེས་པས་བཅད་ཤེས་དང་དེའི་གཞི་མཐུན་གཅོད་པའོ། །དེ་ལ་དབྱེ་ན་རྒྱུ་མཚན་ཅན་གྱི་ཡིད་དཔྱོད་དང༌། རྒྱུ་མཚན་མེད་པའི་ཡིད་དཔྱོད་གཉིས་ཡོད་པའོ། །དང་པོ་ནི། བྱས་པའི་རྟགས་ཀྱིས་སྒྲ་མི་རྟག་པར་དཔྱོད་ཚེ་སྒྲ་མི་རྟག་པ་ཚད་མས་མ་ངེས་ཀྱང་ཚིག་སྤྱི་ཙམ་གྱིས་སྒྲ་མི་རྟག་པ་ལ་གོ་བ་ལེགས་པར་ཆགས་པའི་བློ་ལྟ་བུའོ། །གཉིས་པ་ནི། བྱས་པ་སོགས་རྒྱུ་མཚན་ལ་མ་བརྟེན་པར་སྒྲ་མི་རྟག་པ་མཐའ་གཅིག་ཏུ་ཡིན་ནོ་སྙམ་པའི་བློ་ལྟ་བུའོ། ། གཉིས་པ་སྣང་ལ་མ་ངེས་པ་བཤད་པ་ལ།གཉིས་པ་སྣང་ལ་མ་ངེས་པ་བཤད་པ་ལ། དགག་བཞག་གཉིས་ལས། དང་པོ་ནི། ཁ་ཅིག་ན་རེ། སྣང་ལ་མ་ངེས་པའི་མཚན་ཉིད་ཀྱི་ཟུར་དུ་སྣང་ལ་མ་ངེས་པ་ཞེས་སྨྲས་པ་མི་འཐད་པར་ཐལ། དེ་ལྟར་ན་མངོན་སུམ་ཐམས་ཅད་སྣང་ལ་མ་ངེས་པའི་བློར་འགྱུར་པ་ཡིན་པའི་ཕྱིར། དེར་ཐལ། མངོན་སུམ་གྱིས་རང་ཡུལ་ངེས་པ་མེད་པའི་ཕྱིར། དེར་ཐལ། རང་འགྲེལ་ལས། མངོན་སུམ་ནི་གང་གིས་ཀྱང་ངེས་པར་བྱེད་པ་མ་ཡིན་ནོ། །ཞེས་གསུངས་པའི་ཕྱིར་ན་མ་ཁྱབ་སྟེ། ལུང་དེའི་དོན་ནི་མངོན་སུམ་རྟོག་བྲལ་ཡིན་པས་ངེས་ཤེས་ངེས་རྟོག་གིས་ངེས་མི་ནུས་ཞེས་པ་ལུང་དེའི་དོན་ཡིན་པའི་ཕྱིར། དེར་ཐལ། མཛོད་ལས། ངེས་པར་རྟོག་དང་རྗེས་དྲན་པའི། །རྣམ་པར་རྟོག་པའི་རྣམ་མི་རྟོག །ཅེས་གསུངས་པའི་ཕྱིར། གལ་ཏེ་དེ་ལྟར་མ་ཡིན་ན་སྡུག་བདེན་མི་རྟག་པ་མངོན་སུམ་དུ་རྟོགས་པའི་རྣལ་འབྱོར་མངོན་སུམ་ཆོས་ཅན། ཁྱོད་ཀྱིས་སྡུག་བདེན་མི་རྟག་པ་དང་གྲུབ་བདེ་དབྱེར་མེད་ཀྱི་རྫས་གཅིག་པ་ཐམས་ཅད་མངོན་སུམ་དུ་མ་ངེས་པར་ཐལ། ཁྱོད་མངོན་སུམ་ཡིན་པའི་ཕྱིར། ཁྱབ་པ་ཁས། འདོད་མི་ནུས་ཏེ། རྣལ་འབྱོར་མངོན་སུམ་ལ་སོ་སྐྱེ་ལྟར་རང་ཡུལ་སྣང་ལ་མ་ངེས་པ་གཅིག་མེད་པའི་ཕྱིར། དེར་ཐལ། རྣལ་འབྱོར་མངོན་སུམ་ཡིན་ན་རང་ཡུལ་དེ་དང་གྲུབ་བདེ་དབྱེར་མེད་ཀྱི་རྫས་གཅིག་པ་ཐམས་ཅད་མངོན་སུམ་དུ་ངེས་པས་ཁྱབ་པའི་ཕྱིར། རྟགས་གྲུབ་སྟེ། རྣམ་འགྲེལ་ལས། བློ་གྲོས་ཆེན་པོས་མཐོང་ཉིད་ནས། །རྣམ་པ་ཐམས་ཅད་ངེས་པར་བྱེད། །ཅེས་གསུངས་པའི་ཕྱིར། དེ་ལ་ཁ་ཅིག་ན་རེ། རང་ཡུལ་དུ་གྱུར་བའི་འདུས་བྱས་མངོན་སུམ་དུ་མཐོང་བའི་མངོན་སུམ་ཡིན་ན་རང་ཡུལ་དེ་དང་གྲུབ་བདེ་དབྱེར་མེད་ཀྱི་རྫས་གཅིག་པ་མཐའ་དག་མངོན་སུམ་དུ་རྟོགས་པས་ཁྱབ་པར་ཐལ། རྣམ་འགྲེལ་ལས། བློ་གྲོས་ཆེན་པོས་མཐོང་ཉིད་ནས། །ཞེས་སོགས་གསུངས་པའི་ཕྱིར་ན་མ་ཁྱབ་སྟེ། བློ་གྲོས་ཆེན་པོ་རྣལ་འབྱོར་མངོན་སུམ་གྱི་དབང་དུ་བྱས་པའོ། །ཁ་ཅིག་ན་རེ། རང་ཡུལ་དུ་གྱུར་བའི་འདུས་བྱས་མངོན་སུམ་དུ་མཐོང་བའི་མངོན་སུམ་ཡིན་ན། རང་ཡུལ་དེ་དང་གྲུབ་བདེ་དབྱེར་མེད་གྱི་རྫས་གཅིག་པ་ཐམས་ཅད་མངོན་སུམ་དུ་རྟོགས་པས་ཁྱབ་པར་ཐལ། རྣམ་འགྲེལ་ལས། ཚད་མ་གཞན་གྱིས་བརྟག་བྱ་གང༌། །མ་མཐོང་ཆ་གཞན་ཅི་ཞིག་ཡོད། །ཅེས་གསུངས་པའི་ཕྱིར་མ་ཁྱབ་སྟེ། ཆོས་དེ་མངོན་སུམ་དུ་མཐོང་ན་མངོན་སུམ་དུ་རྟོགས་པས་མ་ཁྱབ་པའི་ཕྱིར། དེར་ཐལ། གྲངས་ཅན་པའི་སྒྲ་འཛིན་དབང་ཤེས་ཀྱིས་སྒྲ་མི་རྟག་པ་མངོན་སུམ་དུ་མཐོང་ཀྱང་མངོན་སུམ་དུ་མ་རྟོགས་པའི་ཕྱིར་རོ། ། གཉིས་པ་རང་ལུགས་བཞག་པ་ལ། མཚན་ཉིད། དབྱེ་བ་གཉིས། དང་པོ་ནི། རང་གི་འཇུག་ཡུལ་གསལ་བར་སྣང་བ་ཡང་ཡིན། རང་ཡུལ་མ་ངེས་པ་ཡང་ཡིན་པའི་གཞི་མཐུན་པར་གྱུར་པའི་མ་འཁྲུལ་བའི་རིག་པ་དེ། སྣང་ལ་མ་ངེས་པའི་བློའི་མཚན་ཉིད། སྣང་ལ་མ་ངེས་པའི་བློ་ནི། མེད་པ་གསལ་སྣང་ཅན་གྱི་རྟོག་མེད་ལོག་ཤེས་ལྟ་བུ་མ་ཡིན་པར་རང་གི་འཇུག་ཡུལ་ཏེ་བཟུང་བྱའི་ཡུལ་བུམ་པ་སོགས་གསལ་བར་སྣང་བ་ཡང་ཡིན། དེ་གསལ་བར་སྣང་ཡང་རང་ཡུལ་དེ་མ་ངེས་པའམ་མ་རྟོགས་པའི་བློ་ཡིན་པའི་གཞི་མཐུན་པའི་རིག་པ་དེ་ཡིན་ནོ། ། གཉིས་པ་དབྱེ་བ་ནི། རང་ཡིན་པར་གྱུར་བའི་དབང་མངོན་དང༌། ཡིད་མངོན་དང༌། རང་རིག་མངོན་སུམ་གསུམ་ཡོད་ལ། སྣང་ལ་མ་ངེས་པར་གྱུར་བའི་རྣལ་འབྱོར་མངོན་སུམ་མེད་དོ། །རྣལ་འབྱོར་མངོན་སུམ་ལ་གང་སྣང་ངེས་པས་ཁྱབ་པའོ། །དང་པོ་སྣང་ལ་མ་ངེས་པར་གྱུར་བའི་དབང་པོའི་མངོན་སུམ་ནི། མིག་གིས་གཟུགས་ཡིད་འོང་མཐོང་བ་ལ་ལྷག་པར་ཆགས་པའི་གནས་སྐབས་ཀྱི་རྣ་བས་སྒྲ་ཆེན་པོ་ཐོས་པའི་སྒྲ་འཛིན་དབང་མངོན་ལྟ་བུ་ཡིན་ཏེ། རྣམ་འགྲེལ་ལེའུ་གསུམ་པ་ལས། ཡིད་གཅིག་ཡིན་ཕྱིར་གཞན་ལ་ནི། །ཆགས་པ་གཞན་ལ་མི་འགྲོའི་ཕྱིར། །ཤེས་གཞན་མི་སྐྱེ་ཞེ་ན་མིན། །ལ་ལར་ཅིག་ཅར་འབྱུང་ཕྱིར་རོ། །འཇུག་པ་མཚུངས་ལ་མཚུངས་པའི་ཕྱིར། །ཐམས་ཅད་ཚེ་གཞན་རྟོགས་མི་འགྱུར། །ཞེས་གསུངས་པའི་ཕྱིར་རོ། །སྣང་ལ་མ་ངེས་པའི་ཡིད་མངོན་ནི། སོ་སྐྱེས་ཀྱི་རྒྱུད་ཀྱི་དུས་མཐའི་སྐད་ཅིག་མ་གཅིག་གི་དབང་དུ་བྱས་པའི་ཡིད་མངོན་ལྟ་བུའོ། །སྣང་ལ་མ་ངེས་པའི་རང་རིག་ནི། སོ་སྐྱེས་ཀྱི་རྒྱུད་ཀྱི་དུས་མཐའི་སྐད་ཅིག་མ་གཅིག་གི་དབང་དུ་བྱས་པའི་རང་རིག་དང་རྒྱང་འཕེན་པའི་རྒྱུད་ཀྱི་རྗེས་དཔག་ཉམས་མྱོང་གི་རང་རིག་ལྟ་བུའོ། ། གསུམ་པ་བཅད་ཤེས་བཤད་པ་ལ།གསུམ་པ་བཅད་ཤེས་བཤད་པ་ལ། ཚད་མ་ཀུན་བཏུས་ལས། ཡང་ཡང་ཤེས་པ་མ་ཡིན་ཏེ། །ཐུག་པ་མེད་འགྱུར་དྲན་སོགས་བཞིན། །ཞེས་དང༌། རྣམ་འགྲེལ་ལས། བྱ་བ་གྲུབ་ཅན་ལས་ལ་ནི། །གང་ཞིག་རང་གི་ལས་མི་བྱེད། །ཅེས་དང༌། འཐད་ལྡན་ཆེ་བ་ལས། མངོན་སུམ་དང་རྗེས་སུ་དཔག་པ་དག་གི་སྐད་ཅིག་མ་དང་པོ་ནི་ཚད་མ་ཡིན་ལ། དེའི་རྒྱུན་དུ་གྱུར་བ་གྲུབ་པ་དང་བདེ་བ་ཐ་མི་དད་པ་ཕྱི་མ་རྣམས་ཚད་མ་ཡིན་པ་སྤངས་པ་ཡིན་ནོ། །ཞེས་པའི་གཞུང་འདི་དག་བྱུང༌། དེ་ལ་མཐའ་དཔྱད་པ་ལ་དགག་བཞག་གཉིས་ལས། དང་པོ་ཁ་ཅིག་ན་རེ། མངོན་སུམ་བཅད་ཤེས་མི་འཐད་པར་ཐལ། བཅད་ཤེས་ཡིན་ན་ཚད་མ་སྔ་མའི་གཞལ་བྱ་དྲན་པའི་རྟོག་པ་བཅད་ཤེས་ཡིན་དགོས་པའི་ཕྱིར། དེར་ཐལ། མདོ་ལས། དྲན་དང་མངོན་འདོད་ཅེས་བྱའོ། །ཞེས་དང༌། རྣམ་འགྲེལ་ལས། གཟུང་བ་འཛིན་ཕྱིར་ཀུན་རྫོབ་ནི། །མི་འདོད། ཅེས་དང༌། ལྷ་དབང་བློས། རྣམ་པར་མི་རྟོག་པའི་ཤེས་པ་ཕྱི་མ་ཇི་ལྟ་བ་བཞིན་དུ་ཡོངས་སུ་བཟུང་བའི་དོན་གྱི་ཡུལ་ཅན་དྲན་བཞིན་དུ་སྐྱེ་བ་དེ་ལྟར་ན། ཞེས་གསུངས་པའི་ཕྱིར་ན་མ་ཁྱབ་སྟེ། བཅད་ཤེས་ལ་མངོན་སུམ་གྱི་བཅད་ཤེས་དང༌། དྲན་ཤེས་རྟོག་བཅས་ཀྱི་བཅད་ཤེས་དང༌། ངེས་ཤེས་ཀྱི་བཅད་ཤེས་དང་གསུམ་ལས་དྲན་ཤེས་རྟོག་བཅས་ཀྱི་བཅད་ཤེས་གཙོ་བོ་བཤད་སྐབས་ཡིན་པའི་ཕྱིར། རྩ་བར་འདོད་མི་ནུས་ཏེ། མངོན་སུམ་ལ་བཅད་ཤེས་ཡོད་པའི་ཕྱིར། དེར་ཐལ། ཚད་མ་མདོ་ལས། ཡང་ཡང་ཤེས་པ་མ་ཡིན་ཏེ། །ཞེས་དང༌། རང་འགྲེལ་ལས། གང་ལན་གཅིག་མ་ཡིན་པར་དོན་དེ་ཉིད་སོ་སོར་ངོ་ཤེས་པ་ཡོད་མོད། དེ་ལྟ་ན་ཡང་ཚད་མ་གཞན་ནི་མ་ཡིན་ནོ། །ཞེས་དང༌། འཐད་ལྡན་གྱི་ལུང་སྔར་བཀོད་པ་དེའི་ཕྱིར་རོ། །གཞན་ཡང་རྣམ་མཁྱེན་སྐད་ཅིག་དང་པོ་ཆོས་ཅན། ཁྱོད་སྐད་ཅིག་གཉིས་པ་བཅད་ཤེས་ཡིན་པར་ཐལ། ཁྱོད་རྒྱུན་དང་ལྡན་པའི་མངོན་སུམ་ཚད་མ་ཡིན་པའི་ཕྱིར་ན་མ་ཁྱབ་སྟེ། རྣམ་མཁྱེན་སྐད་ཅིག་དང་པོས་ཆོས་ཐམས་ཅད་གསར་དུ་རྟོགས་ཀྱང་དེ་སྐད་ཅིག་གཉིས་པ་ཡང་སྔར་ལས་རྟོགས་ཚུལ་གཞན་ཡོད་པའི་སྤྱོད་ཡུལ་ཅན་ཡིན་ཏེ། རྟོག་གེའི་སྐད་ལས། འདིའི་སྤྱོད་ཡུལ་སྔར་མེད་པ་ཡིན་པས་སྔར་མ་གཏོགས་པའི་སྤྱོད་ཡུལ་ཅན་ནོ། །ཞེས་གསུངས་པའི་ཕྱིར་རོ། །ཡང་སྔོ་འཛིན་མིག་ཤེས་ཚད་མ་སྐད་ཅིག་གཉིས་པ་ཆོས་ཅན། བཅད་ཤེས་མ་ཡིན་པར་ཐལ། རང་དང་དུས་མཉམ་པའི་སྔོན་པོ་ལ་ཚད་མ་ཡིན་པའི་ཕྱིར་ཞེས་སོགས་སྐབས་དུ་མར་འདི་འདྲའི་རིགས་དཔྱད་རྒྱུ་ཅུང་ཟད་སྣང་ངོ༌། ། གཉིས་པ་རང་ལུགས་བཞག་པ།གཉིས་པ་རང་ལུགས་བཞག་པ་ལ། མཚན་ཉིད། དབྱེ་བ་གཉིས། དང་པོ་ནི། རང་འདྲེན་བྱེད་ཀྱི་ཚད་མ་སྔ་མས་རྟོགས་ཟིན་པའི་དོན་སླར་རྟོགས་པའི་བློ་དེ་བཅད་ཤེས་ཀྱི་མཚན་ཉིད་ཡིན་ཏེ། གཏན་ཚིགས་རིགས་པའི་དོན་བསྡུས་ལས། རང་གི་ཚད་མ་སྔ་མས་བཟུང་ཟིན་གྱི་དོན་ལ་བསྣན་ནས་འཇུག་པའི་ཤེས་པ་ཞེས་པའོ། །ཞེས་གསུངས་པའི་ཕྱིར། དཔྱད་ཤེས་སམ་བཅད་ཤེས་ནི། རང་འདྲེན་བྱེད་ཀྱི་ཚད་མ་སྔ་མས་རྟོགས་ཟིན་པའི་དོན་དེ་ལ་ཚད་མའི་བྱེད་པ་མ་ཉམས་པའི་སྒོ་ནས་དོན་དེ་ལ་སླར་ཡང་འཛིན་པར་བྱེད་པ་སྟེ་བསྣན་ནས་འཛིན་པར་བྱེད་པ་ལས་རང་གི་ཡུལ་དེ་གསར་དུ་རྟོགས་པ་དང་སྒྲོ་འདོགས་གསར་དུ་གཅོད་པའི་ལས་མི་བྱེད་པའི་རིག་པ་དེའོ། ། སྒྲ་བཤད་ནི། སྒྲོ་འདོགས་བཅད་ཟིན་པ་སླར་ཤེས་པས་ན་བཅད་ཤེས་ཞེས་བརྗོད་པའི་ཕྱིར།སྒྲོ་འདོགས་བཅད་ཟིན་པ་སླར་ཤེས་པས་ན་བཅད་ཤེས་ཞེས་བརྗོད་པའི་ཕྱིར། གཉིས་པ་དབྱེ་བ་ལ། མངོན་སུམ་གྱི་དྲངས་པའི་བཅད་ཤེས་དང༌། རྗེས་དཔག་གི་དྲངས་པའི་བཅད་ཤེས་གཉིས་ཡོད་ལ། ཡང་ན་མངོན་སུམ་གྱི་རྒྱུན་དུ་གྱུར་བའི་བཅད་ཤེས་དང༌། རྗེས་དཔག་གི་རྒྱུན་དུ་གྱུར་བའི་བཅད་ཤེས་དང༌།དེ་གཉིས་གང་རུང་མ་ཡིན་པའི་བཅད་ཤེས་དང་གསུམ་ཡོད། དང་པོ་མངོན་སུམ་གྱི་རྒྱུན་དུ་གྱུར་བའི་བཅད་ཤེས་ལ་དབྱེ་ན། དབང་མངོན་གྱི་བཅད་ཤེས། ཡིད་མངོན་ཀྱི་བཅད་ཤེས། རང་རིག་མངོན་སུམ་གྱི་བཅད་ཤེས། རྣལ་འབྱོར་མངོན་སུམ་གྱི་བཅད་ཤེས་དང་བཞི་ཡོད། དེ་དག་གི་མཚན་གཞི་རིམ་བཞིན། དབང་མངོན་ཚད་མ་སྐད་ཅིག་གཉིས་པ་དང༌། གཞན་སེམས་ཤེས་པའི་མངོན་ཤེས་སྐད་ཅིག་གཉིས་པ་དང༌། སྔོ་འཛིན་མིག་ཤེས་ཉམས་མྱོང་གི་རང་རིག་ཚད་མ་སྐད་ཅིག་གཉིས་པ་དང༌། སྡུག་བདེན་མི་རྟག་པ་རྟོགས་པའི་རྣལ་འབྱོར་མངོན་སུམ་སྐད་ཅིག་གཉིས་པ་ལྟ་བུའོ། ། བཞི་བ་ལོག་ཤེས་བཤད་པ།བཞི་བ་ལོག་ཤེས་བཤད་པ་ལ། ཚད་མ་མདོ་ལས། ཡོན་ཏན་སྤྱི་གནས་གཅིག་པ་ལ། །འཁྲུལ་བའི་ལོག་པས་ཤེས་པར་འགྱུར། །ཞེས་བྱུང༌། དེ་ལ་མཐའ་དཔྱད་པ་ལ་དགག་བཞག་གཉིས་ལས། རང་གི་ཞེན་ཡུལ་མེད་པའི་ཤེས་པ་དེ། ལོག་ཤེས་ཀྱི་མཚན་ཉིད་ཟེར་ན། མངོན་སུམ་རྣམས་ཆོས་ཅན། ལོག་ཤེས་ཡིན་པར་ཐལ། རང་གི་ཞེན་ཡུལ་མེད་པའི་ཤེས་པ་ཡིན་པའི་ཕྱིར། དེར་ཐལ། རྟོག་མེད་ཤེས་པ་ཡིན་པའི་ཕྱིར། ཁྱབ་སྟེ། ཞེན་ཡུལ་ཡོད་པའི་ཤེས་པ་ཡིན་ན་རྟོག་པ་ཡིན་པས་ཁྱབ་པའི་ཕྱིར་རོ། ། གཉིས་པ་རང་ལུགས་བཞག་པ།གཉིས་པ་རང་ལུགས་བཞག་པ་ལ། མཚན་ཉིད། དབྱེ་བ་གཉིས། དང་པོ་ནི། རང་གི་འཛིན་སྟངས་ལ་འཁྲུལ་བའི་རིག་པ་དེ། རང་ཉིད་ལོག་ཤེས་ཡིན་པའི་མཚན་ཉིད། གཉིས་པ་དབྱེ་བ་ནི། རྟོག་མེད་ལོག་ཤེས་དང༌། རྟོག་པར་གྱུར་བའི་ལོག་ཤེས་གཉིས། དང་པོའི་མཚན་ཉིད་ནི། རང་གི་འཛིན་སྟངས་ལ་འཁྲུལ་བའི་གསལ་སྣང་ཅན་གྱི་རིག་པ་དེ། རྟོག་མེད་ལོག་ཤེས་ཀྱི་མཚན་ཉིད། དེ་དབྱེ་ན། དབང་ཤེས་སུ་གྱུར་བའི་རྟོག་མེད་ལོག་ཤེས་དང༌། ཡིད་ཤེས་སུ་གྱུར་བའི་རྟོག་མེད་ལོག་ཤེས་གཉིས་ཡོད། དང་པོའི་མཚན་ཉིད་ནི། རང་གི་འཛིན་སྟངས་ལ་འཁྲུལ་བའི་གསལ་སྣང་ཅན་གྱི་དབང་ཤེས་སུ་གྱུར་བའི་རིག་པ་དེའོ། །དེ་ལ་དབྱེ་ན་ལྔ་ཡོད་དོ། ། གཉིས་པའི་མཚན་ཉིད་ནི། རང་གི་འཛིན་སྟངས་ལ་འཁྲུལ་བའི་གསལ་སྣང་ཅན་གྱྀ་ཡིད་ཤེས་སུ་གྱུར་བའི་རིག་པ་དེའོ། །མཚན་གཞི་ནི། སྒྲ་རྟག་པ་གསལ་བར་སྣང་བའི་ཡིད་ཤེས་ལྟ་བུའོ། ། གཉིས་པ་རྟོག་པ་ལོག་ཤེས།གཉིས་པ་རྟོག་པ་ལོག་ཤེས་ནི། རང་གི་འཛིན་སྟངས་ལ་འཁྲུལ་བའི་ཞེན་རིག་དེ། རྟོག་པར་གྱུར་བའི་ལོག་ཤེས་ཀྱི་མཚན་ཉིད། མཚན་གཞི་ནི། རི་བོང་རྭ་འཛིན་རྟོག་པ་དང་གང་ཟག་གི་བདག་འཛིན་གྱི་ཞེན་རིག་ལྟ་བུའོ། ། ལྔ་བ་ཐེ་ཚོམ་འཆད་པ་ལ། ཚད་མ་མདོ་ལས། དེ་ཡི་ཕྱིར་དེ་དེར་སྣང་ལ། །ཐེ་ཚོམ་ཟ་བར་རིགས་ཞེ་ན། །ཞེས་པའི་གཞུང་འདི་བྱུང༌། འདིའི་སྐབས་སུ་མཐའ་དཔྱད་པ་ལ། དགག་བཞག་གཉིས་ལས། དང་པོ་ལ་ཁ་ཅིག་ན་རེ།ཐེ་ཚོམ་ཡིན་ན་རྩ་ཉོན་ཡིན་པས་ཁྱབ་ཟེར་ན། རིགས་ངེས་ཉན་ཐོས་དགྲ་བཅོམ་པའི་རྒྱུད་ཀྱི་ཕྱི་རོལ་དོན་དུ་གྲུབ་བམ་མ་གྲུབ་སྙམ་པའི་ཐེ་ཚོམ་ཆོས་ཅན།ཐེ་ཚོམ་མ་ཡིན་པར་ཐལ། རྩ་ཉོན་མ་ཡིན་པའི་ཕྱིར། ཁྱབ་པ་ཁས། རྟགས་དེར་ཐལ། ཉོན་མོངས་པ་སྤང་ཟིན་པའི་གང་ཟག་གི་རྒྱུད་ཀྱི་བློ་ཡིན་པའི་ཕྱིར། རྩ་བར་འདོད་ན། དེ་ཆོས་ཅན། ཐེ་ཚོམ་ཡིན་པར་ཐལ། ཡུལ་གཏན་ལ་མ་ཕེབས་པར་ཡིད་གཉིས་སུ་གྱུར་བའི་བློ་ཡིན་པའི་ཕྱིར། ཁྱབ་སྟེ། དེ་ཐེ་ཚོམ་གྱི་མཚན་ཉིད་ཡིན་པར་གཏན་ཚིགས་རིགས་པའི་དོན་བསྡུས་ལས་གསུངས་པའི་ཕྱིར་རོ། །ཁ་ཅིག་ན་རེ། ཉན་རང་དགྲ་བཅོམ་པའི་རྒྱུད་ཀྱི་ཆོས་བདག་ཏུ་གྲུབ་བམ་མ་གྲུབ་སྙམ་པའི་རྩེ་གཉིས་པའི་བློ་ཆོས་ཅན། རྩ་ཉོན་ཡིན་པར་ཐལ། ཐེ་ཚོམ་ཡིན་པའི་ཕྱིར་ཟེར་ན་མ་ཁྱབ་སྙམ། ཁྱབ་སྟེ། རྩ་ཉོན་དྲུག་གྲངས་འདྲེན་ཚེ་ཐེ་ཚོམ་དེ་གཅིག་ལ་འདྲེན་དགོས་པའི་ཕྱིར་ཟེར་ན་མ་གྲུབ་སྟེ། རྩ་ཉོན་གྱི་ཐེ་ཚོམ་དེ་རྩ་ཉོན་ཡིན་ཀྱང་ཐེ་ཚོམ་དེ་རྩ་ཉོན་མ་ཡིན་ཞེས་བྱ་དགོས་ཏེ། ས་བཟང་གི་མངོན་པ་ཀུན་བཏུས་ལས། ཐེ་ཚོམ་གང་ཞེ་ན། དེ་ནི་ཉོན་མོངས་ཅན་མ་ཡིན་པ་ཕྱོགས་འདི་ན་ལྷ་ཡོད་དམ་མེད་སྙམ་པ་ལྟ་བུ་ཤེས་བྱའི་སྒྲིབ་པས་བསྡུས་པའང་ཡོད་མོད། འདིར་ནི་ཉོན་མོངས་པ་ཅན་དམིགས་ཡུལ་ལས་འབྲས་དང་དཀོན་མཆོག་ཀྱང་བདེན་བཞིར་འདུ་བས་འཕགས་པའི་བདེན་པ་བཞི་པོ་རྣམས་ལ་ཡིད་གཉིས་ཟ་ཞིང་ཡོད་མེད་ལ་སོགས་པ་མཐའ་གཞན་དུ་དོགས་པ་དང་བཅས་པས་བློ་སྣ་ཚོགས་སུ་བྱེད་པ་སྟེ། ངེས་པ་མ་སྙེད་ན་བླང་དོར་མི་རྩོམ་པས་དག་པའི་ཕྱོགས་རྣམས་ལ་སྤྲོ་བས་མི་འཇུག་པའི་རྟེན་བྱེད་པའི་ལས་ཅན་ནོ། །ཞེས་གསུངས་པའི་ཕྱིར། འདིར་ནི་ཞེས་པས་རྩ་ཉོན་བཤད་པའི་སྐབས་འདིར་ནི་ཞེས་པའོ། ། གཉིས་པ་རང་ལུགས་བཞག་པ་ལ། མཚན་ཉིད། དབྱེ་བ་གཉིས། དང་པོ་ནི། རང་གི་ཡུལ་གཏན་ལ་མ་ཕེབས་པར་ཡིད་གཉིས་སུ་གྱུར་བའི་བློ་དེ། ཐེ་ཚོམ་གྱི་མཚན་ཉིད་ཡིན་ཏེ། གཏན་ཚིགས་རིགས་པའི་དོན་བསྡུས་ལས། ཡུལ་གཏན་ལ་མ་ཕེབས་པར་ཡིད་གཉིས་སུ་གྱུར་བའི་བློ། ཞེས་གསུངས་པའི་ཕྱིར་རོ། ། གཉིས་པ་དབྱེ་བ་ནི། དོན་འགྱུར་གྱི་ཐེ་ཚོམ། དོན་མི་འགྱུར་གྱི་ཐེ་ཚོམ། ཆ་མཉམ་པའི་ཐེ་ཚོམ་དང་གསུམ་ཡོད། དང་པོ་ཚེ་འདི་རྟག་གམ་མི་རྟག་ཕལ་ཆེར་མི་རྟག་ལས་ཆེ་སྙམ་པའི་ཐེ་ཚོམ་ལྟ་བུའོ། །གཉིས་པ་ནི་ཚེ་འདི་རྟག་གམ་མི་རྟག་ཕལ་ཆེར་རྟག་ལས་ཆེ་སྙམ་པའི་ཐེ་ཚོམ་ལྟ་བུའོ། །གསུམ་པ་ནི། ཚེ་འདི་རྟག་གམ་མི་རྟག་ཇི་འདྲ་ཞིག་ཡིན་སྙམ་པའི་ཐེ་ཚོམ་ལྟ་བུ་ཡིན་པའི་ཕྱིར་རོ། ། དྲུག་པ་མངོན་སུམ་བཤད་པ།དྲུག་པ་མངོན་སུམ་བཤད་པ་ལ། མངོན་སུམ་ཡང་དག་བཤད་པ་དང༌། མངོན་སུམ་ལྟར་སྣང་བཤད་པ་དང་གཉིས། དང་པོ་འཆད་པ་ལ། ཚད་མ་མདོ་ལས། མིང་དང་རིགས་སོགས་སྦྱོར་བ་ཡིས། །རྟོག་པ་དང་བྲལ་མངོན་སུམ་མོ། །ཞེས་དང༌། རྣམ་འགྲེལ་ལས། མངོན་སུམ་རྟོག་བྲལ་མ་འཁྲུལ་བ། ། ཞེས་པའི་གཞུང་འདི་དག་བྱུང༌། འདི་ལ་མཐའ་དཔྱད་པ་ལ། དགག་བཞག་གཉིས་ལས། དང་པོ་ནི། ཁ་ཅིག་ན་རེ། རྟོག་བྲལ་མ་འཁྲུལ་བའི་རིག་པ་མངོན་སུམ་གྱི་མཚན་ཉིད་མ་ཡིན་པར་ཐལ། དེའི་མཚན་ཉིད་ལ་རྟོག་བྲལ་ཙམ་བཞག་ན་ཆོག་པའི་ཕྱིར་ཏེ། རྟོག་པ་དང་བྲལ་མངོན་སུམ་མོ། །ཞེས་གསུངས་པའི་ཕྱིར་ན་མ་ཁྱབ་སྟེ། མ་འཁྲུལ་བ་གོང་དུ་བཤད་ཟིན་པའི་དབང་དུ་བྱས་པའོ། །ཡང་ཁ་ཅིག་ན་རེ། ཚད་མ་མདོ་ལས། མངོན་སུམ་ལྟར་སྣང་རབ་རིབ་བཅས། །ཞེས་པའི་ལུང་དོན་མ་གྲུབ་པར་ཐལ། འཕྲལ་གྱི་འཁྲུལ་རྒྱུས་བསླད་པའི་དུང་སེར་སྣང་གི་དབང་ཤེས་མངོན་སུམ་ཡིན་པའི་ཕྱིར་ཟེར་ན། དེ་ལ་རྒྱལ་དབང་བློས་མ་ཁྱབ་སྟེ། དེ་འདྲའི་དབང་ཤེས་དེ་དུང་སེར་པོ་ལ་མངོན་སུམ་ལྟར་སྣང་དང༌། དུང་གི་དབྱིབས་ལ་མངོན་སུམ་ཡིན་པ་མི་འགལ་བ་ཡིན་པར་འདོད་དེ། དེས་མཛད་པའི་འགྲེལ་བར། དེ་ལྟ་མོད་ཀྱང་སེར་པོ་ལ་འཁྲུལ་དབྱིབས་ལ་མ་འཁྲུལ་བས་འདོད་པའི་དོན་ཐོབ་པའི་ཕྱིར། མངོན་སུམ་ཉིད་དུ་རྣམ་པར་བཞག་སྟེ། ཞེས་གསུངས་སོ། །སློབ་དཔོན་ཆོས་མཆོག་ན་རེ། དེ་མི་འཐད་པར་ཐལ། དུང་སེར་པོར་སྣང་བའི་དབང་ཤེས་དེ་ལ། སེར་པོའི་མ་བསླད་པའི་ཆ་གཅིག་མེད་པར་འདོད་པའྀ་ཕྱིར་ཏེ། འཐད་ལྡན་ཆུང་བ་ལས། ལོག་ཤེས་ཡིན་ན་ཤིང་དང་ཇི་ལྟར་ཕྲད་ཅེ་ན། ཅུང་ཟད་ཀྱང་ཕྲད་པ་མེད་དེ། གང་ཡོངས་སུ་བཅད་པའི་ཤིང་ནི་རྣམ་པ་སྣ་ཚོགས་སུ་འགྲོ་བ་དེ་ཡིན་ལ། ཤིང་ནི་འགྲོ་བ་མེད་པས་ཅུང་ཟད་ཀྱང་ཕྲད་པ་མེད་དོ། །གཉིས་པ་རང་ལུགས་བཞག་པཞེས་གསུངས་པའི་ཕྱིར་རོ། ། གཉིས་པ་རང་ལུགས་བཞག་པ།གཉིས་པ་རང་ལུགས་བཞག་པ་ལ། མཚན་ཉིད། དབྱེ་བ། རྐྱེན་གསུམ་བཤད་པ་དང་གསུམ། དང་པོ་ནི། རྟོག་བྲལ་མ་འཁྲུལ་བའི་ཤེས་པ་དེ། མངོན་སུམ་གྱི་མཚན་ཉིད་ཡིན་ཏེ། རྣམ་འགྲེལ་ལས། མངོན་སུམ་རྟོག་བྲལ་མ་འཁྲུལ་བ། །ཞེས་གསུངས་པའི་ཕྱིར། མངོན་སུམ་གྱི་ཟུར་ལ་རྟོག་བྲལ་ཞེས་པས་རྟོག་པ་རྣམས་མངོན་སུམ་ཡིན་པ་སེལ་ལ། མ་འཁྲུལ་བ་ཞེས་པས་རྟོག་མེད་འཁྲུལ་ཤེས་རྣམས་རྟོག་པ་དང་བྲལ་ཡང་རང་གི་སྣང་ཡུལ་ལ་མ་འཁྲུལ་བ་མ་ཡིན་པས་དེ་དག་མངོན་སུམ་ཡིན་པ་སེལ་བའོ། །མ་འཁྲུལ་བའི་ཤེས་པ་ཡིན་ན་མངོན་སུམ་ཡིན་པས་ཁྱབ་ཀྱང་རྟོག་བྲལ་སྨོས་པ་ནི་དཔྱོད་པ་བ་སོགས་དབང་ཤེས་རྟོག་བཅས་སུ་འདོད་པ་དང༌། ཁ་ཅིག་རྟོག་པ་དང་མངོན་སུམ་གྱི་གཞི་མཐུན་འདོད་པའི་ལོག་རྟོག་བསལ་བའི་ཆེད་དུ་ཡིན་ནོ། །ཡང་ན་རྟོག་པ་དང་བྲལ་ཞིང་བག་ཆགས་གཏན་བྱུང་གི་མི་བསླུ་བའི་ཤེས་པ་དེ། མངོན་སུམ་གྱི་མཚན་ཉིད་ཡིན་ཏེ། རྣམ་ངེས་ལས། གཞན་བག་ཆགས་བརྟན་པའི་ཕྱིར་འཁོར་བ་ཇི་སྲིད་པར་རྗེས་སུ་འབྲེལ་བ་དེ་ནི་ཐ་སྙད་དུ་མི་བསླུ་བ་ལ་ལྟོས་ཏེ་འདིར་ཚད་མ་ཡིན་ནོ། །ཞེས་དང༌། དེའི་འཐད་ལྡན་ལས། རྣམ་པར་རིག་པ་ཙམ་དུ་སྨྲ་བ་ལ་ནི། སློབ་དཔོན་གྱིས་བག་ཆགས་བརྟན་དང་མི་བརྟན་པ་དག་གི་རྣམ་པར་བཞག་པ་མཐོང་ལ། ཞེས་གསུངས་པའི་ཕྱིར། གཉིས་པ་དབྱེ་བ་ལ། དབང་མངོན། ཡིད་མངོན། རང་རིག་མངོན་སུམ། རྣལ་འབྱོར་མངོན་སུམ་དང་བཞི་ཡོད། དང་པོ་དབང་མངོན་གྱི་མཚན་ཉིད། རང་གི་ཐུན་མོང་མ་ཡིན་པའི་བདག་རྐྱེན་དབང་པོ་གཟུགས་ཅན་པ་ལས་བྱུང་ཞིང༌། རྟོག་བྲལ་མ་འཁྲུལ་བའི་གཞན་རིག་དེ་ཡིན་ལ། དེ་ལ་དབྱེ་ན། གཟུགས་འཛིན་དབང་མངོན་ནས་རེག་བྱ་འཛིན་པའི་དབང་མངོན་བར་ལྔ་ཡོད། དེ་རེ་རེ་ལ་རང་ཡིན་པར་གྱུར་བའི་ཚད་མ་དང༌། བཅད་ཤེས་དང༌། སྣང་ལ་མ་ངེས་ཀྱི་བློ་གསུམ་རེ་ཡོད། གཉིས་པ་ཡིད་མངོན་ཀྱི་མཚན་ཉིད། རང་གི་ཐུན་མོང་མ་ཡིན་པའི་བདག་རྐྱེན་ཡིད་དབང་ལ་བརྟེན་ནས་དངོས་སུ་སྐྱེས་པའི་རྟོག་བྲལ་མ་འཁྲུལ་བའི་གཞན་རིག་གི་ཤེས་པ། མཚན་གཞི་ནི། གཞན་སེམས་ཤེས་པའི་མངོན་ཤེས་ལྟ་བུའོ། །འདིར་དངོས་སུ་བསྟན་པའི་ཡིད་མངོན་གྱི་མཚན་ཉིད། དབང་པོའི་མངོན་སུམ་གྱིས་དེ་མ་ཐག་རྐྱེན་ལས་བྱུང་བའི་རྟོག་བྲལ་མ་འཁྲུལ་བའི་གཞན་རིག མཚན་གཞི་ནི། དབང་ཤེས་ཀྱི་དྲངས་བའི་ཡིད་མངོན་ལྟ་བུའོ། །འདིར་བསྟན་ཡིད་མངོན་སྐྱེ་ཚུལ་ལ། ཚད་མ་རྣམ་འགྲེལ་གྱི་འགྲེལ་བཤད་རིན་ཆེན་ཕྲེང་བ་ལས། འདིར་ཆོས་མཆོག་སོགས་དབང་ཤེས་ཀྱི་རྒྱུན་མཐར་ཡིད་མངོན་གཅིག་སྐྱེ་ཞིང་རྒྱུན་མེད་པར་བཞེད་དོ། །ཆུ་མིག་པ་དབང་ཤེས་སྐད་ཅིག་གཉིས་པ་མན་ཡིད་མངོན་དུ་བཞེད། བྲམ་ཟེ་ཆེན་པོ་འགྲོས་གསུམ་པ་བཞེད། ད་ལྟ་དེ་འཐད་པར་བྱེད་པ་མང་ངོ༌། །ཞེས་གསུངས་པའི་ཕྱིར། སློབ་དཔོན་ཆོས་མཆོག་གིས་འདིར་བསྟན་ཡིད་མངོན་ཤིན་ལྐོག་ཡིན་པས་མདོ་ལས། གཟུགས་ཤེས་པ་ནི་རྣམ་པ་གཉིས་ཏེ། མིག་དང་ཡིད་ལ་བརྟེན་པའོ། །ཞེས་དང༌། ཚད་མ་མདོ་ལས། ཡིད་ཀྱང་དོན་དང༌། ཞེས་པ་ལྟ་བུའི་ལུང་ལ་བརྟེན་ནས་རྟོགས་དགོས་པར་འདོད་དེ། འཐད་ལྡན་ཆུང་བ་ལས། ཡིད་ཀྱི་མངོན་སུམ་བཤད་པ་ནི་གྲུབ་པའི་མཐའ་ལ་གྲགས་པ་ཙམ་ཡིན་གྱི་འདི་སྒྲུབ་པར་བྱེད་པའི་ཚད་མ་ཡོད་པ་མ་ཡིན་ནོ། །ཞེས་གསུངས་པའི་ཕྱིར་རོ། །སྔར་བཟུང་ཟིན་པ་འཛིན་པའི་བཅད་ཤེས་མ་ཡིན་ཏེ། རྟོག་གེའི་སྐད་ལས། སྐད་ཅིག་གཉིས་པ་འཛིན་པའི་ཕྱིར། །བཟུང་ཟིན་པ་འཛིན་པ་ཉིད་བསལ་ལོ། །ཞེས་དང༌། རྣམ་འགྲེལ་གྱི་འགྲེལ་བཤད་རིན་ཆེན་ཕྲེང་བ་ལས། ཡིད་མངོན་ཆོས་ཅན། དེ་མ་ཐག་རྐྱེན་དབང་སྔོན་གྱི་ཡུལ་ལས་ཡུལ་གཞན་ཉིད་འཛིན་བྱེད་དེ། དེ་ཡི་སྐད་ཅིག་གཉིས་པ་རང་གི་གཟུང་དོན་ཡིན་པས་སོ། །ཞེས་གསུངས་པའི་ཕྱིར་རོ། ། གསུམ་པ་རང་རིག་མངོན་སུམ་བཤད་པ།གསུམ་པ་རང་རིག་མངོན་སུམ་བཤད་པ་ལ། མཚན་ཉིད། དབྱེ་བ། སྒྲུབ་བྱེད་བཤད་པ་དང་གསུམ། དང་པོ་ནི། འཛིན་རྣམ། རང་རིག་གི་མཚན་ཉིད། རྟོག་བྲལ་མ་འཁྲུལ་བའི་འཛིན་རྣམ། རང་རིག་མངོན་སུམ་གྱི་མཚན་ཉིད། གསར་དུ་མི་བསླུ་བའི་རྟོག་བྲལ་གྱི་འཛིན་རྣམ། རང་རིག་མངོན་སུམ་ཚད་མའི་མཚན་ཉིད་ཡིན་ནོ། །གཉིས་པ་དབྱེ་ན། རང་ཡིན་པར་གྱུར་བའི་ཚད་མ། བཅད་ཤེས། སྣང་ལ་མ་ངེས་པའི་རང་རིག་གསུམ་ཡོད། མཚན་གཞི་རིམ་པ་བཞིན་དུ། མིག་ཤེས་ཉམས་སུ་མྱོང་བའི་རང་རིག་སྐད་ཅིག་དང་པོ་ལྟ་བུ་ཚད་མ་དང༌། དེ་འདྲའི་སྐད་ཅིག་གཉིས་པ་ལྟ་བུ་བཅད་ཤེས་དང༌། སོ་སྐྱེས་ཀྱི་རྒྱུད་ཀྱི་ཐུང་མཐའི་སྐད་ཅིག་མའི་ངོ་བོར་གྱུར་བའི་ཡིད་མངོན་འཛིན་པའི་རང་རིག་ལྟ་བུ་སྣང་ལ་མ་ངེས་པའོ། །གསུམ་པ་སྒྲུབ་བྱེད་ནི། སྔོ་འཛིན་མིག་ཤེས་ཆོས་ཅན། རང་མྱོང་ཅན་གྱི་ཤེས་པ་ཡིན་ཏེ། རང་དྲན་པའི་དྲན་ཤེས་ཡོད་པའི་ཤེས་པ་ཡིན་པའི་ཕྱིར། འདོད་ན། རང་མྱོང་བྱེད་ཀྱི་རང་རིག་ཡོད་པར་ཐལ། རང་མྱོང་བྱེད་ལ་རང་རིག་གཞན་རིག་གང་རུང་དུ་ངེས། གཞན་རིག་གི་མྱོང་བྱེད་ཐུག་མེད་ཀྱིས་ཁེགས་པའི་ཕྱིར། རྣམ་ངེས་ལས། དུས་ཕྱིས་དྲན་པ་ལས་ཀྱང་སྟེ། །ཚུལ་གཉིས་དང་ནི་རང་རིག་གྲུབ། །མ་མྱོང་བ་ནི་མེད་ཕྱིར་ཡང༌། །ཞེས་དང༌། རྣམ་འགྲེལ་ལས། དྲན་པ་ལས་ཀྱང་བདག་རིག་གྲུབ། །ཅེས་གསུངས་པའི་ཕྱིར། རང་རིག་འདོད་པ་དང་མི་འདོད་པ་དག་གིས་རྩོད་པ་རྩོད་ལན་སོགས་ཤེས་པར་བྱའོ། །རང་རིག་ཏུ་གྱུར་བའི་བཅད་ཤེས་མེད་པར་ཐལ། བཅད་ཤེས་ཉམས་མྱོང་གི་རང་རིག་དེ་བཅད་ཤེས་ལ་ཚད་མ་ཡིན་པའི་ཕྱིར་ན་མ་ཁྱབ་སྟེ། དེ་དེ་ལ་ཚད་མ་ཡིན་ཀྱང་དེའི་ཡང་སྐད་ཅིག་གཉིས་པ་བཅད་ཤེས་ཡིན་ཞེས་བྱས་ཆོག་པའི་ཕྱིར། དཔེར་ན་མངོན་སུམ་ཚད་མ་བཞིན་ནོ་ཞེས་ཟེར་དགོས་སམ་དཔྱད་པར་བྱའོ། ། བཞི་བ་རྣལ་འབྱོར་མངོན་སུམ་འཆད་པ།བཞི་བ་རྣལ་འབྱོར་མངོན་སུམ་འཆད་པ་ལ། ཚད་མ་མདོ་ལས། རྣལ་འབྱོར་རྣམས་ཀྱི་བླ་མས་བསྟན། །མ་འདྲེས་པ་ཡི་དོན་ཙམ་མཐོང༌། །ཞེས་དང༌། རྣམ་འགྲེལ་ལས། རྣལ་འབྱོར་ཤེས་པ་སྔར་བཤད་པ། །དེ་དག་གི་དེ་གོམས་བྱུང་ཡིན། །ཞེས་པ་ནས། ལྷག་མ་ཉེ་བར་བསླད་པ་ཡིན། །ཞེས་པའི་གཞུང་འདི་བྱུང༌། འདིར་རྣལ་འབྱོར་མངོན་སུམ་ལ་མཚན་ཉིད། དབྱེ་བ། སྒྲུབ་བྱེད་གསུམ། དང་པོ་ནི། རང་གི་ཐུན་མོང་མ་ཡིན་པའི་བདག་རྐྱེན་དུ་གྱུར་བའི་ཞི་ལྷག་ཟུང་འབྲེལ་གྱི་ཏིང་ངེ་འཛིན་ལ་བརྟེན་ནས་རང་ཡུལ་ཡང་དག་པའི་དོན་ལ་རྟོག་བྲལ་མ་འཁྲུལ་བའི་མཁྱེན་པ། རྣལ་འབྱོར་མངོན་སུམ་གྱི་མཚན་ཉིད། དེ་ལ་དབྱེ་ན། རང་ཡིན་གྱི་ཚད་མ་དང༌། བཅད་ཤེས་གཉིས་ཡོད། ཡང་ན་རང་ཡིན་ཀྱི་ཐེག་པ་གསུམ་གྱི་མཐོང་སྒོམ་མི་སློབ་ལམ་གསུམ་ཡོད། རྣལ་འབྱོར་མངོན་སུམ་ལ་སྣང་ལ་མ་ངེས་པ་མེད་དེ། དེ་ཡིན་ན་རང་ལ་སྣང་བ་ཐམས་ཅད་ངེས་པས་ཁྱབ་པའི་ཕྱིར་ཏེ། བློ་གྲོས་ཆེན་པོས་མཐོང་ཉིད་ནས། །རྣམ་པ་ཐམས་ཅད་ངེས་པར་བྱེད། །ཅེས་གསུངས་པའི་ཕྱིར་རོ། ། གསུམ་པ་སྒྲུབ་བྱེད།གསུམ་པ་སྒྲུབ་བྱེད་ནི། བརྩེ་བ་དང་བདག་མེད་རྟོགས་པའི་ཤེས་རབ་རེ་རེ་ནས་ཆོས་ཅན། གོམས་རྐྱེན་དང་མ་བྲལ་བར་བསྒོམ་པ་ལས་བསྒོམ་བྱའི་དོན་ལ་གསལ་སྣང་རབ་ཀྱིས་མཐར་ཕྱིན་འབྱུང་རུང་ཡིན་ཏེ། རྟེན་བརྟན་པ་གོམས་པར་བྱས་ཟིན་འབད་རྩོལ་སྐྱར་མ་ལ་མི་ལྟོས་པའི་སེམས་རྒྱུད་ཀྱི་ཆོས་ཡིན་པའི་ཕྱིར། དཔེར་ན། འདོད་ཆགས་བཞིན། ཇི་སྐད་དུ། རྣམ་འགྲེལ་ལས། དེ་ཕྱིར་ཡང་དག་ཡང་དག་མིན། །གང་གང་ཤིན་ཏུ་གོམས་གྱུར་པ། །གོམས་པ་ཡོངས་སུ་རྫོགས་པ་ན། དེ་གསལ་མི་རྟོག་བློ་འབྲས་ཅན། །ཞེས་གསུངས་པའི་ཕྱིར། དེས་ན་རྟེན་སེམས་གསལ་རིག་ཙམ་ཡིན་ལ། དེ་བརྟན་པར་རིག་པ་ཙམ་གྱི་ཡ་མཐའ་དང་མ་མཐའ་ཐུག་མེད་དུ་སྒྲུབ་པའི་རིགས་པས་གྲུབ་པའི་ཕྱིར་ཏེ། རྒྱན་ལས། དབང་པོ་ཡིད་ཀྱི་ཤེས་པ་ལས། །ཡིད་ཀྱི་ཤེས་པའང་དེ་ལས་ཡིན། །དེ་ལས་ཀྱང་ཡང་དེར་འགྱུར་ཕྱིར། །སྲིད་པ་ཐོག་མཐའ་མེད་པར་གནས། །ཞེས་གསུངས་པའི་ཕྱིར་རོ། ། གསུམ་པ་རྐྱེན་གསུམ་བཤད་པ།གསུམ་པ་རྐྱེན་གསུམ་བཤད་པ་ལ། མདོར་བསྡུས་ཙམ་བརྗོད་ན། རང་འབྲས་ཤེས་པ་ཡུལ་གྱི་རྣམ་ལྡན་དུ་གཙོ་བོར་བསྐྱེད་པའི་རྐྱེན་དེ། དམིགས་རྐྱེན་གྱི་མཚན་ཉིད་ཡིན་ཏེ། ས་བཟང་གི་མངོན་པ་ཀུན་བཏུས་འགྲེལ་བ་ལས། ཤེས་པ་ཡུལ་གྱི་རྣམ་ལྡན་བསྐྱེད་པ། དམིགས་པའི་རྐྱེན་དང༌། ཞེས་གསུངས་སོ། །རང་འབྲས་ཤེས་པ་ཕྱི་མ་གསལ་རིག་ཏུ་གཙོ་བོར་སྐྱེད་བྱེད་དེ། དེ་མ་ཐག་རྐྱེན་གྱི་མཚན་ཉིད་ཡིན་ཏེ། དེ་ལས། ཁྱད་པར་ཤེས་རིག་ཕྱི་མ་སྐྱེད་པ་དེ་མ་ཐག་པའི་རྐྱེན་དང༌། ཞེས་གསུངས་པའི་ཕྱིར། རང་འབྲས་རང་དབང་དུ་གཙོ་བོར་བསྐྱེད་པའི་རྐྱེན་དེ། བདག་རྐྱེན་གྱི་མཚན་ཉིད་ཡིན་ཏེ། འབྲས་བུ་འབྱུང་བ་ལ་དབང་བྱེད་པ་བདག་པོའི་རྐྱེན་གྱི་མཚན་ཉིད་ཅན་དུ་ལྟའོ། །ཞེས་གསུངས་པའི་ཕྱིར་རོ། ། གཉིས་པ་མངོན་སུམ་ལྟར་སྣང་བཤད་པ།གཉིས་པ་མངོན་སུམ་ལྟར་སྣང་བཤད་པ་ལ། མཚན་ཉིད། དབྱེ་བ་གཉིས། དང་པོ་ནི། རང་གི་སྣང་ཡུལ་ལ་འཁྲུལ་བའི་བློ། མངོན་སུམ་ལྟར་སྣང་གི་མཚན་ཉིད། མཚན་གཞི་ནི། རྗེས་དཔག་ལྟ་བུའོ། །གཉིས་པ་དབྱེ་བ་ནི། རྟོག་པ་དང་རྟོག་མེད་མངོན་སུམ་ལྟར་སྣང་གཉིས། དང་པོའི་མཚན་ཉིད། རང་གི་སྣང་ཡུལ་ལ་འཁྲུལ་བའི་ཞེན་རིག གཉིས་པའི་མཚན་ཉིད། རང་གི་བདག་རྐྱེན་དབང་པོ་སླད་པ་ལས་སྐྱེས་པའི་ཞེན་བྲལ་གྱི་རིག་པ། ཡང་ན་དབྱེ་ན་ཚད་མ་མདོ་ལྟར་བདུན་ཡོད་དེ། ཚད་མ་མདོ་ལས། འཁྲུལ་དང་ཀུན་རྫོབ་ཤེས་པ་དང༌། །རྗེས་དཔག་རྗེས་སུ་དཔག་ལས་བྱུང༌། །དྲན་དང་མངོན་འདོད་ཅེས་བྱའོ། །མངོན་སུམ་ལྟར་སྣང་རབ་རིབ་བཅས། །ཞེས་གསུངས་ལ། དང་པོ་ནི། སྨིག་རྒྱུ་ཆུར་འཛིན་གྱི་རྟོག་པ་ལྟ་བུ་རྟོག་པ་དོན་མི་མཐུན་དང༌། གཉིས་པ་ནི། བུམ་འཛིན་རྟོག་པ་ལྟ་བུ་རྟོག་པ་དོན་མཐུན་གྱི་ཀུན་རྫོབ་དོན་སྤྱི་སྣང་ཡུལ་དུ་བྱེད་པའི་རྟོག་པ་རྣམས་དང༌། གསུམ་པ་ནི། རྟགས་འཛིན་སེམས་ཀྱི་རྟོག་པ་དང༌། བཞི་བ་ནི།་རྟགས་ཅན་རྗེས་དཔག་དང༌། ལྔ་བ་ནི། འདས་པའི་དོན་མི་བརྗེད་པར་དྲན་པའི་དྲན་རྟོག་དང༌། དྲུག་པ་མ་འོངས་པའི་དོན་མངོན་པར་འདོད་པའི་རྟོག་པ་དང༌། བདུན་པ་དུང་སེར་སྣང་གི་དབང་ཤེས་ལྟ་བུ་རྟོག་མེད་ལོག་ཤེས་རྣམས་སོ། །དེ་ལས་དང་པོ་དྲུག་རྟོག་པ་མངོན་སུམ་ལྟར་སྣང་དང༌། བདུན་པ་རྟོག་མེད་མངོན་སུམ་ལྟར་སྣང་ཡིན་པའོ། །ཡང་ན་རྣམ་འགྲེལ་ལས་མངོན་སུམ་ལྟར་སྣང་བཞི་བསྟན་ཏེ། རྣམ་འགྲེལ་ལེའུ་གསུམ་པ་ལས། མངོན་སུམ་ལྟར་སྣང་རྣམ་པ་བཞི། །རྟོག་པའི་ཤེས་པ་རྣམ་གསུམ་དང༌། །རྟེན་སླད་པ་ལས་བྱུང་བ་ཅན། །རྟོག་པ་མེད་པ་གཅིག་ཡིན་ནོ། །ཞེས་དང༌། དེའི་ཐད་ཀྱི་རྣམ་འགྲེལ་གྱི་འགྲེལ་བཤད་རིན་ཆེན་ཕྲེང་བ་ལས། མངོན་སུམ་ལྟར་སྣང་ཆོས་ཅན། ཁྱོད་ལ་རྣམ་པ་བཞིར་ཡོད་དེ། ཁྱོད་ཀྱི་ནང་ཚན་ལ་བརྡ་བརྟེན་ཅན་དང་དོན་གཞན་ལ་སྒྲོ་གདོགས་པ་དང་ལྐོག་ཏུ་གྱུར་བའི་དོན་ཅན་ཏེ་རྟོག་པའི་ཤེས་པ་རྣམ་གསུམ་དང༌། བརྟེན་བསླད་པ་ལས་བྱུང་བ་རྟོག་མེད་འཁྲུལ་ཤེས་རྣམས་ཡོད་པས་སོ། །ཞེས་གསུངས་སོ། །བརྡ་བརྟེན་ཅན་ནི་གོང་གི་ཀུན་རྫོབ་ཤེས་པ་དང༌། དོན་གཞན་ལ་སྒྲོ་གདོགས་པ་ནི་རྟོག་པ་དོན་མི་མཐུན་འཁྲུལ་བའི་ཤེས་པ་དང༌། རྟོག་པ་མངོན་སུམ་ལྟར་སྣང་ཕྱི་མ་བཞི་ནི་ལྐོག་གྱུར་དོན་ཅན་གྱི་རྟོག་པ་མངོན་སུམ་ལྟར་སྣང་ཡིན་པའོ། ། བདུན་པ་རྗེས་དཔག་བཤད་པ།བདུན་པ་རྗེས་དཔག་བཤད་པ་ལ། ཚད་མ་མདོ་ལས། རང་དོན་ནི།ཚུལ་གསུམ་རྟགས་ལས་དོན་མཐོང་ཡིན། །ཞེས་དང༌། རིགས་ཐིགས་ལས། དེ་ལ་རང་གི་དོན་ནི་རྗེས་སུ་དཔག་པར་བྱ་བ་ཚུལ་གསུམ་པའི་རྟགས་གསུམ་ལས་ཤེས་པ་གང་ཡིན་པའོ། །ཞེས་པའི་གཞུང་འདི་དག་བྱུང༌། དེ་ལ་རྗེས་དཔག་བཤད་པ་ལ་དགག་བཞག་གཉིས་ལས། དང་པོ་ནི། ཁ་ཅིག་ན་རེ། རྗེས་དཔག་སྐད་ཅིག་གཉིས་པ་རྗེས་དཔག་ཡིན་ཟེར་ན། དེ་མི་འཐད་པར་ཐལ། རྗེས་དཔག་ནི་རྟགས་བཀོད་པ་ལས་སྐྱེས་པའི་དྲན་པ་ལས་དངོས་སུ་སྐྱེས་པ་ཞིག་དགོས་པའི་ཕྱིར། དེར་ཐལ། ཚུལ་གསུམ་པའི་རྟགས་བཀོད་པའི་དྲན་པ་ལས་རང་དོན་རྗེས་དཔག་དངོས་སུ་སྐྱེས། སྒྲུབ་ངག་བཀོད་པ་ལས་ཚུལ་གསུམ་དྲན་པ་དངོས་སུ་སྐྱེས་པའི་ཕྱིར་ཏེ། རྣམ་ངེས་ལས། མ་ཡིན་ཏེ། འཇུག་པ་ཐ་དད་པའི་ཕྱིར་རོ། །ཞེས་དང༌། དེའི་འཐད་ལྡན་ལས། བརྒྱུད་པའི་ཁྱད་པར་མེད་པ་ཡིན་ཡང་དངོས་ཀྱི་འདི་དག་གི་བྱ་བ་ནི་ཐ་དད་པ་ཡོད་པ་ཡིན་ནོ། །ཞེས་གསུངས་པའི་ཕྱིར་རོ། ། གཉིས་པ་རང་ལུགས་བཤད་པ།གཉིས་པ་རང་ལུགས་བཤད་པ་ལ། མཚན་ཉིད། དབྱེ་བ་གཉིས། དང་པོ་རྗེས་དཔག་གི་མཚན་ཉིད། རང་གི་རྟེན་ཚུལ་གསུམ་པའི་རྟགས་ཡང་དག་ལ་དངོས་སུ་བརྟེན་ནས་རང་གི་གཞལ་བྱ་ལྐོག་གྱུར་ལ་མི་བསླུ་བའི་ཤེས་པ། མཚན་གཞི་ནི་བྱས་པའི་རྟགས་ལ་དངོས་སུ་བརྟེན་ནས་སྡུག་བདེན་མི་རྟག་པ་གསར་དུ་རྟོགས་པའི་བློ་ལྟ་བུའོ། །རྗེས་དཔག་དང་རྗེས་དཔག་གི་ཚད་མ་དོན་གཅིག རྗེས་དཔག་ནི་རྟགས་ལྟར་སྣང་བཀོད་པ་ལས་སྐྱེས་པ་མ་ཡིན་པར་རྟགས་ཡང་དག་ལ་བརྟེན་ཞིང༌། རང་གི་ཡུལ་དེ་རང་ལ་མངོན་དུ་མ་གྱུར་བར་ལྐོག་ཏུ་གྱུར་བ་དང༌། མི་བསླུ་བ་ནི་རང་གི་འཛིན་སྟངས་ལ་མི་བསླུ་བ་སྟེ་རང་གིས་ཡུལ་གཞལ་བ་དེ་གཞལ་བ་ལྟར་གྲུབ་པའི་ཤེས་པའོ། ། གཉིས་པ་རྗེས་དཔག་གི་དབྱེ་བ།གཉིས་པ་རྗེས་དཔག་གི་དབྱེ་བ་ལ། དངོས་སྟོབས་རྗེས་དཔག་དང༌། གྲགས་པའི་རྗེས་དཔག་དང༌། ཡིད་ཆེས་རྗེས་དཔག་དང་གསུམ། དང་པོ་ནི།རང་གི་རྟེན་དངོས་སྟོབས་ཀྱི་རྟགས་ཡང་དག་ལ་དངོས་སུ་བརྟེན་ནས་རང་གི་གཞལ་བྱ་ཅུང་ཟད་ལྐོག་གྱུར་ལ་མི་བསླུ་བའི་ཞེན་རིག་དེ། དངོས་སྟོབས་རྗེས་དཔག་གི་མཚན་ཉིད། མཚན་གཞི་ནི། བྱས་པའི་རྟགས་ཀྱིས་སྒྲ་མི་རྟག་པ་རྟོགས་པའི་རྗེས་དཔག་ལྟ་བུའོ། །དངོས་སྟོབས་ཀྱི་རིགས་པ་ནི་རྟགས་དེ་ཡིན་ན་བསྒྲུབ་བྱ་དེ་ཡོད་དགོས་པ་དང༌། རྟགས་དེ་ཡིན་ན་བསྒྲུབ་བྱའི་ཆོས་དེ་ཡིན་དགོས་པ་ནི་གྲགས་པ་ཙམ་མ་ཡིན་པར་ཀུན་རྫོབ་གནས་ཐབས་ཀྱི་དབང་དུ་བྱས་ན་རང་བཞིན་ལ་གྲུབ་པའི་རྟགས་ཞིག་དགོས་སོ། ། གཞལ་བྱ་ཅུང་ཟད་ལྐོག་གྱུར་ནི་སྐབས་དེར་མངོན་སུམ་གྱིས་ངེས་མི་ནུས་ལ་ལུང་ལ་བརྟེན་ནས་ངེས་མི་དགོས་པར་རིགས་པ་ཙམ་གྱིས་རྟོགས་ནུས་པའི་ཆོས་དེའོ། ། གཉིས་པ་གྲགས་པའི་རྗེས་དཔག།གཉིས་པ་གྲགས་པའི་རྗེས་དཔག་ནི། རང་གི་རྟེན་གྲགས་རྟགས་ཡང་དག་ལ་དངོས་སུ་བརྟེན་ནས་བརྡའམ་འདོད་པ་ཙམ་གྱིས་བཞག་པའི་ཡུལ་ལ་མི་བསླུ་བའི་ཞེན་རིག གྲགས་པའི་རྗེས་དཔག་གི་མཚན་ཉིད། མཚན་གཞི་ནི། རྟོག་ཡུལ་ན་ཡོད་པའི་རྟགས་ཀྱིས་རི་བོང་ཅན་ཟླ་སྒྲས་བརྗོད་རུང་དུ་རྟོགས་པའི་རྗེས་དཔག་ལྟ་བུའོ། །གྲགས་རྟགས་ནི་དངོས་སྟོབས་ཀྱི་རྟགས་ལྟ་བུ་མ་ཡིན་པར་གྲགས་པའི་རྟགས་ཀྱིས་བསྒྲུབ་གཞི་དེ་བསྒྲུབ་བྱའི་ཆོས་དེ་ཡིན་པར་སྒྲུབ་པར་བྱེད་པའི་གཏན་ཚིགས་ཡིན་ནོ། །གཏན་ཚིགས་དང་བསྒྲུབ་བྱའི་ཆོས་གཉིས་བརྡ་འདོད་ཙམ་གྱིས་བཞག་པ་ཞིག་དགོས་སོ། ། གསུམ་པ་ཡིད་ཆེས་རྗེས་དཔག།གསུམ་པ་ཡིད་ཆེས་རྗེས་དཔག་ནི། རང་གི་རྟེན་ཡིད་ཆེས་ཀྱི་རྟགས་ཡང་དག་ལ་དངོས་སུ་བརྟེན་ནས་རང་གི་གཞལ་བྱ་ཤིན་ཏུ་ལྐོག་གྱུར་ལ་མི་བསླུ་བའི་ཞེན་རིག་དེ། ཡིད་ཆེས་རྗེས་དཔག་གི་མཚན་ཉིད། མཚན་གཞི་ནི། དཔྱད་གསུམ་གྱིས་དག་པའི་ལུང་ལ་བརྟེན་ནས་སྙིང་པོའི་མདོའི་བསྟན་བྱའི་དོན་མི་བསླུ་བར་རྟོགས་པའི་རྗེས་དཔག་ལྟ་བུའོ། །ཡིད་ཆེས་ཀྱི་རྟགས་ནི་དངོས་སྟོབས་ཀྱི་རྟགས་དང་གྲགས་རྟགས་ཙམ་མ་ཡིན་པར་གཞལ་བྱ་དཔོག་པ་པོས་ཡིད་ཆེས་ལེགས་པར་རྙེད་པའི་རྟགས་ཞིག་དགོས་སོ། །ཤིན་ལྐོག་ནི་མངོན་སུམ་མ་ཟད་དངོས་སྟོབས་ཀྱི་རྟགས་ཀྱིས་ངེས་མི་ནུས་པར་ཡིད་ཆེས་ཀྱི་ལུང་སོགས་ལ་བརྟེན་ནས་ངེས་དགོས་སོ། །རྗེས་དཔག་ལ་སྒྲའི་བརྗོད་རིགས་ཀྱིས་དབྱེ་ན། གཞན་དོན་རྗེས་དཔག་དང༌། རང་དོན་རྗེས་དཔག་གཉིས་ཡོད། དང་པོ་དང་སྒྲུབ་ངག་ཡང་དག་དོན་གཅིག གཉིས་པ་དང་རྗེས་དཔག་དོན་གཅིག་གོ ། གཉིས་པ་རྟོགས་པའི་བློ་དང་མ་རྟོགས་པ།གཉིས་པ་རྟོགས་པའི་བློ་དང་མ་རྟོགས་པའི་བློ་གཉིས་སུ་དབྱེ་བ་ལ། རྟོགས་པའི་བློ་དང༌། མ་རྟོགས་པའི་བློ་བཤད་པ་དང་གཉིས། དང་པོ་རྟོགས་པའི་བློ་འཆད་པ་ལ། རྣམ་འགྲེལ་ལས། ངེས་པ་རྣམས་ཀྱིས་མ་ངེས་ལ། །དེ་ནི་ཇི་ལྟར་དེ་ཡུལ་ཡིན། །ཞེས་བྱུང༌། དེའི་དོན་ལ་མཚན་ཉིད་དང༌། དབྱེ་བ་བཤད་པ་དང་གཉིས། བློ་དེའི་བྱེད་པ་ལ་བརྟེན་ནས་ཆོས་དེ་ལ་སྒྲོ་འདོགས་བཅད་སྟོབས་ཀྱིས་ངེས་པ་འདྲེན་ནུས་པ། བློ་དེས་ཆོས་དེ་རྟོགས་པའི་མཚན་ཉིད་ཡིན་ཏེ། བློ་དེས་ཆོས་དེ་ངེས་པ་ན་རང་གི་འཛིན་སྟངས་འགལ་བའི་སྒྲོ་འདོགས་གཅོད་པའི་ཕྱིར་ཏེ། དཔེར་ན་སྒྲ་མི་རྟག་པར་ངེས་པའི་རྗེས་དཔག་གིས་སྒྲ་ལ་རྟག་འཛིན་གྱི་སྒྲོ་འདོགས་གཅོད་པ་བཞིན་ཡིན་པའི་ཕྱིར་ཏེ། ངེས་པ་དང་ནི་སྒྲོ་འདོགས་ཡིད། །གནོད་བྱ་གནོད་བྱེད་ངོ་བོའི་ཕྱིར། །འདི་ནི་སྒྲོ་འདོགས་དབེན་པ་ལ། །འཇུག་ཅེས་བྱ་བར་ཤེས་པ་ཡིན། །ཞེས་གསུངས་པའི་ཕྱིར་རོ། ། གཉིས་པ་དབྱེ་ན། དངོས་རྟོགས་དང༌། ཤུགས་རྟོགས་གཉིས་ལས། བློ་དེ་ལ་ཡུལ་དེའི་རྣམ་པ་ཤར་བའི་སྒོ་ནས་རྟོགས་པ་དེ། བློ་དེས་ཡུལ་དེ་དངོས་སུ་རྟོགས་པའི་མཚན་ཉིད། མཚན་གཞི་ནི། གཟུགས་འཛིན་མིག་ཤེས་ཀྱི་གཟུགས་ཀྱི་སྐྱེ་མཆེད་རྟོགས་པ་ལྟ་བུའོ། །འཆི་བ་མི་རྟག་པ་དངོས་སུ་རྟོགས་པའི་བློས་འཆི་བ་རྟོགས་པ་ལྟ་བུའོ། །བློ་དེ་ལ་ཆོས་དེའི་རྣམ་པ་མ་ཤར་བར་ཆོས་གཞན་གྱི་རྣམ་པ་ཤར་བའི་སྒོ་ནས་ཆོས་དེ་ལ་སྒྲོ་འདོགས་བཅད་ནས་ངེས་པ་འདྲེན་ནུས་པ་དེ། ཆོས་དེ་ཤུགས་ལ་རྟོགས་པའི་མཚན་ཉིད། མཚན་གཞི་ནི། མི་རྟག་པའི་རྣམ་པ་ཤར་ནས་མི་རྟག་པ་མ་ཡིན་པ་ལས་ལོག་པ་ཤུགས་ལ་རྟོགས་པ་ལྟ་བུའོ། ། དངོས་རྟོགས་དང་ཤུགས་རྟོགས་ཀྱི་ཚུལ་ལ། ཚད་མ་དང་ཚད་མིན་གྱི་དངོས་རྟོགས་ཤུགས་རྟོགས་གཉིས་ལས། དང་པོ་ཚད་མས་དངོས་རྟོགས་ཤུགས་རྟོགས་ལ། མངོན་སུམ་གྱིས་དངོས་རྟོགས་ཤུགས་རྟོགས་དང༌། རྗེས་དཔག་གིས་དངོས་རྟོགས་ཤུགས་རྟོགས་དང་གཉིས་ཡོད་པའི་ཕྱིར་རོ། ། གཉིས་པ་མ་རྟོགས་པའི་བློ་ལ། མཚན་ཉིད། དབྱེ་བ་གཉིས། དང་པོ་ནི། རང་གི་གཞལ་བྱ་ལ་སྒྲོ་འདོགས་བཅད་སྟོབས་ཀྱིས་ངེས་པ་མི་འདྲེན་པའི་རིག་པ་དེ། མ་རྟོགས་པའི་བློའི་མཚན་ཉིད། མཚན་གཞི་ནི། ཡིད་དཔྱོད་ལྟ་བུའོ། ། གཉིས་པ་དབྱེ་བ་ནི། མ་རྟོགས་ལོག་རྟོག་ཐེ་ཚོམ་གསུམ། དང་པོ་ལ་སྣང་ལ་མ་ངེས་པ་དང༌། རྟོག་མེད་ལོག་ཤེས་གཉིས་ཡོད། གཉིས་པ་ལ་རང་ཡིན་གྱི་ཀུན་བཏགས་དང་ལྷན་སྐྱེས་གཉིས་ཡོད། གསུམ་པ་ལ་གོང་ལྟར་གསུམ་ཡོད་པའོ། ། གསུམ་པ་ཚད་མ་དང་ཚད་མིན་གཉིས་སུ་དབྱེ་བ།གསུམ་པ་ཚད་མ་དང་ཚད་མིན་གཉིས་སུ་དབྱེ་བ་ལ། ཚད་མ་བཤད་པ་དང༌། ཚད་མིན་བཤད་པ་གཉིས། དང་པོ་ཚད་མའི་ངོ་བོ་འཆད་པ་ལ། ཚད་མ་མདོ་ལས། ཚད་མར་གྱུར་བ་འགྲོ་ལ་ཕན་བཞེད་པ། །ཞེས་དང༌། རྣམ་འགྲེལ་ལས། ཚད་མ་བསླུ་མེད་ཅན་ཤེས་པ། །དོན་བྱེད་ནུས་པར་གནས་པ་ན། །མི་བསླུ། ཞེས་དང༌། མ་ཤེས་དོན་ཀྱི་གསལ་བྱེད་ཀྱང༌། །ཞེས་པའི་གཞུང་འདི་དག་བྱུང༌། ཚད་མའི་གྲངས་ངེས་འཆད་པ་ལ། ཚད་མ་མདོ་ལས། མངོན་སུམ་དང་ནི་རྗེས་སུ་དཔག །ཚད་མའོ་མཚན་ཉིད་གཉིས་གཞལ་བྱ། །ཞེས་དང༌། རྣམ་འགྲེལ་ལས། གཞལ་བྱ་གཉིས་ཕྱིར་ཚད་མ་གཉིས། །ཞེས་དང༌། རྣམ་འགྲེལ་གྱི་འགྲེལ་བཤད་རིན་ཆེན་ཕྲེང་བ་ལས། ཚད་མའི་གྲངས་བྱེད་པ་ན་ཆོས་ཅན། ཚད་མའི་ཁྱད་པར་ལ་མངོན་སུམ་རྗེས་དཔག་གཉིས་སུ་གྲངས་ངེས་ཏེ། གཞལ་བྱ་ལ་རང་སྤྱི་གཉིས་སུ་གྲངས་ངེས་པའི་ཕྱིར། ཞེས་སོགས་ཀྱི་གཞུང་འདི་དག་བྱུང༌། གྲངས་ངེས་ཀྱི་དགོས་པ་དེ་ཉིད་འཆད་པར་བྱེད་པ་ལ། རྣམ་འགྲེལ་ལེའུ་གསུམ་པ་ལས། དེ་ཕྱིར་ཚད་མ་གཉིས་མཐོང་བའི། །གཅིག་དང་གསུམ་ལ་སོགས་པ་སེལ། །ཞེས་དང༌། དེའི་ཐར་འབྱུང་སྦས་པའི་རྟོག་གེའི་སྐད་ལས། གཉིས་ཞེས་སྨོས་པས་གཅིག་དང་གསུམ་དང་བཞི་དང་ལྔ་དང་དྲུག་དང་བདུན་དུ་འདོད་པ་སེལ་བ་ཡིན་པའི་ཕྱིར། ཞེས་དང༌། རྣམ་འགྲེལ་གྱི་འགྲེལ་བཤད་རིན་ཆེན་ཕྲེང་བ་ལས། གྲངས་ཅན་པ་ནི། མངོན་སུམ་རྗེས་དཔག་སྒྲ་བྱུང་དང་གསུམ་ཁོ་ནའོ་ཞེས་ཟེར། རིགས་པ་ཅན་ནི་དེ་གསུམ་དང་དཔེ་ཉེར་འཇལ་དང་བཞི་ཁོ་ནའོ་ཟེར་རོ། །རྒྱལ་དཔོག་པ་ནི། དེ་བཞི་དང་དོན་གྱི་གོ་བ་དང༌། དངོས་པོ་མེད་པའི་ཚད་མ་དང་དྲུག་ཁོ་ནའོ་ཟེར། ཙ་ར་ཀ་པ་ནི། རིགས་པ་དང་མི་དམིགས་པ་དང་སྲིད་པ་དང་ཞེས་གྲགས་པ་དང༌། སྙམ་སེམས་པ་ཞེས་པ་གཞན་དག་ཀྱང་ཡོད་དོ་ཞེས་ཟེར་རོ། །ཞེས་དང༌། རྒྱང་འཕེན་པ་ནི། མངོན་སུམ་ཁོ་ན་ཚད་མ་ཡིན་གྱི་རྗེས་དཔག་ཚད་མ་མེད་དེ། རྟགས་ཐམས་ཅད་འཁྲུལ་བའི་ཕྱིར་རོ། །ཞེས་པ་ནས། དེ་དགག་པ་ནི། ཚད་མ་མདོར། མངོན་སུམ་དང་ནི་རྗེས་སུ་དཔག །ཞེས་སོགས་ཀྱི་གཞུང་འདི་དག་བྱུང༌། དེའི་མཐའ་དཔྱད་པ་ལ། དགག་བཞག་གཉིས་ལས། དང་པོ་ནི། ཁ་ཅིག མི་བསླུ་བའི་ཤེས་པ་ཚད་མའི་མཚན་ཉིད་ཡིན་ཏེ། ཚད་མ་བསླུ་མེད་ཅན་ཤེས་པ། །ཞེས་གསུངས་པའི་ཕྱིར་ཟེར་ན་མ་ཁྱབ། འོ་ན་ཁྱོད་ལྟར་ན་བཅད་ཤེས་ཆོས་ཅན། ཚད་མ་ཡིན་པར་ཐལ། མི་བསླུ་བའི་ཤེས་པ་ཡིན་པའི་ཕྱིར། ཁྱབ་པ་ཁས། འདོད་ན། རང་ཡུལ་དེ་གསར་དུ་རྟོགས་པའི་བློ་ཡིན་པར་ཐལ། ཚད་མ་ཡིན་པའི་ཕྱིར། རྟགས་ཁས། ཁྱབ་སྟེ། ཚད་མ་རྣམ་འགྲེལ་ལས། མ་ཤེས་དོན་གྱི་གསལ་བྱེད་ཀྱང༌། ཞེས་དང༌། ཚད་མ་ཀུན་བཏུས་ལས། ཡང་ཡང་ཤེས་པ་མ་ཡིན་ཏེ། །ཐུག་པ་མེད་འགྱུར་དྲན་སོགས་བཞིན། །ཞེས་གསུངས་པའི་ཕྱིར། གཞན་ཡང་ཚད་མའི་མཚན་ཉིད་ཀྱི་ཟུར་དུ་གསར་དུ་ཞེས་སྨོས་དགོས་པར་ཐལ། གསར་དུ་ཞེས་པས་དྲན་པ་སོགས་ཚད་མ་ཡིན་པ་བསལ་བ་ཡིན་པའི་ཕྱིར། དེར་ཐལ། ཛེ་ཏཱ་རིའི་བྱིས་པ་འཇུག་པའི་རྟོག་གེ་ལས། མ་བཟུང་བ་འཛིན་པ་སྨོས་པ་ནི་དྲན་པ་ལ་སོགས་པ་བསལ་ལོ། །ཞེས་གསུངས་པའི་ཕྱིར། ཚད་མའི་མཚན་ཉིད་ཀྱི་ཟུར་གྱི་ཤེས་པ་ཞེས་པའི་དོན་ཚང་ན་མི་བསླུ་བའི་དོན་ཚང་བས་མ་ཁྱབ་པར་ཐལ། སྨིག་རྒྱུ་ཆུར་འཛིན་གྱི་མིག་ཤེས་ལ་ཤེས་པ་ཞེས་པའི་དོན་ཚང་བ་གང་ཞིག མི་བསླུ་བ་ཞེས་པའི་དོན་མ་ཚང་བའི་ཕྱིར། རྟགས་དང་པོ་སླ། གཉིས་པ་གྲུབ་སྟེ། ཚད་མའི་མཚན་ཉིད་ཀྱི་ཟུར་དུ་མི་བསླུ་བ་སྨོས་པས་སྨིག་རྒྱུ་ཆུར་འཛིན་སོགས་ཚད་མ་ཡིན་པ་བསལ་བ་ཡིན་པའི་ཕྱིར། དེར་ཐལ། ཛེ་ཏཱ་རིའི་བྱིས་པ་འཇུག་པའི་རྟོག་གེ་ལས། བསླུ་བ་མེད་པ་ཅན་ཞེས་སྨོས་པས་བསླུ་བར་བྱེད་པའི་སྨིག་རྒྱུ་ལ་ཆུར་འཛིན་པ་ལ་སོགས་པ་བསལ་ལོ། །ཞེས་གསུངས་སོ། །ཚད་མའི་མཚན་ཉིད་ཀྱི་ཟུར་དུ་ཤེས་པ་སྨོས་པས་ནི་བྱེ་བྲག་སྨྲ་པས་མིག་དབང་གཟུགས་ཅན་པ་ཚད་མར་འདོད་པ་དང༌། རིགས་བྱེད་པས་རིགས་བྱེད་རྟག་པ་དང་རང་བྱུང་གི་ཚད་མར་འདོད་པ་ལ་སོགས་པ་བསལ་བའི་ཆེད་ཡིན་ཏེ། རྟོག་གེའི་སྐད་ལས། ཤེས་པ་ཞེས་སྨོས་པས་ནི་ཤེས་པ་མ་ཡིན་པའི་དབང་པོ་ལ་སོགས་པ་བསལ་ལོ། །ཞེས་གསུངས་པའི་ཕྱིར་རོ། །སྤྱིར་མི་བསླུ་བ་ལ་ཡུལ་མི་བསླུ་བ་དང༌། ཡུལ་ཅན་མི་བསླུ་བ་གཉིས་ཡོད་ཀྱང༌། ཚད་མའི་མཚན་ཉིད་ཀྱི་ཟུར་གྱི་མི་བསླུ་བ་ནི། ཡུལ་ཁོ་ན་ཡིན་ན་ཡུལ་སྟེང་དུ་ཚད་མས་གཞལ་བ་ལྟར་གྲུབ་པ། ཡུལ་ཅན་ཡིན་ན་དེའི་སྟེང་དུ་རང་གི་གཞལ་བྱ་གཞལ་བ་ལྟར་གྲུབ་པ་ཞིག་དགོས་སམ་སྙམ་སྟེ། ལྷ་དབང་བློའི་འགྲེལ་བ་ལས། དོན་གྱི་རང་གི་ནུས་པ་གྲུབ་ནས་ཇི་ལྟར་འདོད་པའི་དོན་དེ་ལྟ་བུའི་ངོ་བོ་མི་བསླུ་བ་ནི་ཡུལ་གྱི་ཆོས་དང༌། ཞེས་དང༌། ཤེས་པ་མི་བསླུ་བ་ནི་ཡུལ་ཅན་གྱི་ཆོས་ཅན་ཡིན་ནོ། །ཞེས་གསུངས་པའི་ཕྱིར་རོ། ། གཉིས་པ་རང་ལུགས་བཤད་པ།གཉིས་པ་རང་ལུགས་བཤད་པ་ལ། མཚན་ཉིད། དབྱེ་བ། གྲངས་ངེས་དང་གསུམ། དང་པོ་ནི། གསར་དུ་མི་བསླུ་བའི་ཤེས་པ། ཚད་མའི་མཚན་ཉིད་ཡིན་ཏེ། གཏན་ཚིགས་རིགས་པའི་དོན་བསྡུས་ལས། རང་གི་གཞལ་བྱ་ལ་གསར་དུ་མི་བསླུ་བའི་ཤེས་པ། ཞེས་གསུངས་པའི་ཕྱིར་རོ། ། གཉིས་པ་དབྱེ་བ་ལ། མངོན་སུམ་ཚད་མ་དང༌། རྗེས་དཔག་ཚད་མ་གཉིས། དང་པོའི་མཚན་ཉིད་ནི། རྟོག་བྲལ་མ་ཁྲུལ་བའི་གསར་དུ་མི་བསླུ་བའི་རིག་པ། མངོན་སུམ་ཚད་མའི་མཚན་ཉིད། མཚན་གཞི་ནི། ཡུལ་རྟོགས་པའི་སྔོ་འཛིན་མིག་ཤེས་སྐད་ཅིག་དང་པོ་ལྟ་བུའོ། །དབྱེ་ན། དབང་མངོན་ཚད་མ་དང༌། ཡིད་མངོན་ཚད་མ་དང༌། རང་རིག་ཚད་མ་དང༌། རྣལ་འབྱོར་མངོན་སུམ་ཚད་མ་དང་བཞི་ཡོད་ལ། རང་གི་ཐུན་མོང་མ་ཡིན་པའི་བདག་རྐྱེན་དབང་པོ་གཟུགས་ཅན་པ་ལས་བྱུང་བའི་རྟོག་བྲལ་མ་འཁྲུལ་བའི་གསར་དུ་མི་བསླུ་བའི་རིག་པ། དབང་མངོན་གྱི་ཚད་མའི་མཚན་ཉིད། དབྱེ་ན་ལྔ་ཡོད། རང་གི་ཐུན་མོང་མ་ཡིན་པའི་བདག་རྐྱེན་ཡིད་དབང་ལ་བརྟེན་ནས་བྱུང་བའི་རྟོག་བྲལ་མ་འཁྲུལ་བའི་གསར་དུ་མི་བསླུ་བའི་རིག་པ། ཡིད་མངོན་གྱི་ཚད་མའི་མཚན་ཉིད། མཐོང་ལམ་བར་ཆད་མེད་ལམ་ལྟ་བུའོ། །རྟོག་བྲལ་མ་འཁྲུལ་བའི་གསར་དུ་མི་བསླུ་བའི་འཛིན་ནམ། རང་རིག་མངོན་སུམ་ཚད་མའི་མཚན་ཉིད། མཚན་གཞི་ནི། རྣམ་མཁྱེན་ཉམས་མྱོང་གི་འཛིན་རྣམ་ལྟ་བུའོ། །རང་གི་ཐུན་མོང་མ་ཡིན་པའི་བདག་རྐྱེན་ཞི་ལྷག་ཟུང་འབྲེལ་གྱི་ཏིང་ངེ་འཛིན་ལས་བྱུང་ཞིང་རང་ཡུལ་ཡང་དག་པའི་དོན་ལ་རྟོག་བྲལ་མ་འཁྲུལ་བའི་གསར་དུ་མི་བསླུ་བའི་ཤེས་པ། རྣལ་འབྱོར་མངོན་སུམ་ཚད་མའི་མཚན་ཉིད། མཚན་གཞི་ནི། རྣམ་མཁྱེན་དང༌། མཐོང་ལམ་མཉམ་བཞག་སྐད་ཅིག་དང་པོ་ལྟ་བུའོ། ། གཉིས་པ་རྗེས་དཔག་ཚད་མ་ལ། མཚན་ཉིད། དབྱེ་བ་གཉིས། དང་པོ་ནི། རང་གི་རྟེན་རྟགས་ཡང་དག་ལ་བརྟེན་ནས་གསར་དུ་མི་བསླུ་བའི་ཞེན་རིག རྗེས་དཔག་གི་ཚད་མའི་མཚན་ཉིད། མཚན་གཞི་ནི། དལ་འབྱོར་རྙེད་དཀའ་རྟོགས་པའི་རྗེས་དཔག་ལྟ་བུའོ། །དབྱེ་ན། དངོས་སྟོབས་རྗེས་དཔག་ཚད་མ་དང༌། གྲགས་པའི་རྗེས་དཔག་ཚད་མ་དང༌། ཡིད་ཆེས་རྗེས་དཔག་ཚད་མ་དང་གསུམ་ཡོད་པའོ། ། ཡང་ཚད་མ་རྣམ་འགྲེལ་ལས། རང་ལས་རང་གི་ངོ་བོ་རྟོགས། །ཐ་སྙད་ལས་ནི་ཚད་མ་ཉིད། །བསྟན་བཅོས་རྨོངས་པ་ཟློག་བྱེད་ཡིན། །ཞེས་པའི་སྐབས་སུ་ཚད་མ་ལ་རང་ལས་ངེས་ཀྱི་ཚད་མ་དང༌། གཞན་ལས་ངེས་ཀྱི་ཚད་མ་གཉིས་བསྟན་པའོ། །ཁ་ཅིག་ན་རེ། ཚད་མ་ཡིན་ན་རང་ལས་ངེས་ཀྱི་ཚད་མ་ཡིན་པས་ཁྱབ་ཟེར་ན། རྒྱང་རིང་པོ་ནས་ཡལ་འདབ་ཅན་གྱི་ཤིང་རང་གི་ངོ་བོ་ངེས་ལ་ཁྱད་པར་མ་ངེས་པའི་དབང་པོའི་མངོན་སུམ་ཆོས་ཅན། དེར་ཐལ། དེའི་ཕྱིར། དེར་ཐལ། དབང་མངོན་ཚད་མ་ཡིན་པའི་ཕྱིར། རྩ་བར་འདོད་མི་ནུས་ཏེ། དེ་གཞན་ལས་ངེས་ཀྱི་ཚད་མ་ཡིན་པའི་ཕྱིར། དེར་ཐལ། སྤྱི་རང་ལས་ངེས་ཤིང་ཁྱད་པར་གཞན་ལས་ངེས་ཀྱི་ཚད་མ་ཡིན་པའི་ཕྱིར། དེར་ཐལ། འཐད་ལྡན་ལས། ཤིང་གི་ཁྱད་པར་ཉིད་མེད་ན་མི་འབྱུང་བ་ནི་གཞན་ལས་ངེས་སོ། །ཞེས་གསུངས་པའི་ཕྱིར། ཡང་ཁ་ཅིག་གིས། རང་ལས་ངེས་ཀྱི་ཚད་མའི་མཚན་ཉིད། རང་ཉིད་ཚད་མ་ཡིན་པར་ངེས་པ་ལ་བློ་གཞན་ལ་ལྟོས་མི་དགོས་པའི་རིག་པ། གཞན་ལས་ངེས་ཀྱི་ཚད་མའི་མཚན་ཉིད། དེ་ལྟར་ལྟོས་དགོས་པའི་རིག་པ་དེ་ཡིན་ཟེར་ན། དང་པོ་ལ་ཕའི་རྒྱུད་ཀྱི་བུའི་གཟུགས་འཛིན་པའི་དབང་མངོན་གོམས་པ་ཅན་ཆོས་ཅན། མཚན་ཉིད་དེར་ཐལ། མཚོན་བྱ་དེའི་ཕྱིར། དེར་ཐལ། ཆོས་ཅན་དེའི་ཕྱིར། རྩ་བར་འདོད་ན། དེ་ཆོས་ཅན། རང་ཉིད་ཚད་མ་ཡིན་པར་ངེས་པར་ཐལ། འདོད་པའི་ཕྱིར། འདོད་མི་ནུས་ཏེ། དེའི་བཟུང་དོན་གྱི་ཡུལ་ཡིན་ན་ཤེས་པ་མ་ཡིན་དགོས་པའི་ཕྱིར། རྣམ་འགྲེལ་ལས། དབང་པོའི་སེམས་ནི་ངེས་ཕྱིར་རོ། །ཞེས་གསུངས་པའི་ཕྱིར་རོ། །ཡང་ཁ་ཅིག་གིས་རང་ལས་ངེས་ཀྱི་ཚད་མ་ཡིན་ན་རང་ཚད་མ་ཡིན་པའི་ཆ་ལ་ཚད་མར་སོང་བས་ཁྱབ་པར་ཐལ། དེ་ལ་རང་ལས་ངེས་ཞེས་པའི་གོ་དོན་ཡོད་པའི་ཕྱིར་ན་མ་ཁྱབ་སྟེ། རང་གི་གཞལ་བྱའི་དོན་ཡུལ་སྟེང་དུ་གྲུབ་པ་མེད་ན་རང་ཉིད་མི་འབྱུང་བའི་འབྲེལ་བ་ལ་ངེས་པ་རང་སྟོབས་ཀྱིས་འདྲེན་ནུས་པ་དེ་དེའི་གོ་དོན་ཡིན་པའི་ཕྱིར་ཏེ། རྣམ་ངེས་ལས། མངོན་སུམ་ཡང་ནི་དོན་མེད་ན། །མི་འབྱུང་བ་ལ་ཚད་མ་ཡིན། །ཞེས་གསུངས་པའི་ཕྱིར། ཁྱབ་སྟེ། མངོན་སུམ་ཡང་ནི་ཞེས་པས་རང་ལས་ངེས་ཀྱི་མངོན་སུམ་གོམས་པ་ཅན་སོགས་དུ་མ་ཡོད་པ་མ་ཟད། རྗེས་དཔག་ཡིན་ན་རང་ལས་ངེས་ཀྱི་ཚད་མ་ཡིན་པས་ཁྱབ་པ་དེ་བསྟན། དོན་མེད་ན་ཞེས་པས་རང་གི་གཞལ་བྱའི་སྟེང་ན་དོན་གྲུབ་པ་མེད་ན་ཞེས་བསྟན། མི་འབྱུང་བ་ལ་ཞེས་པས་རང་གི་གཞལ་བྱའི་ཡུལ་སྟེང་དུ་གྲུབ་པ་མེད་ན་མི་འབྱུང་བའི་འབྲེལ་བ་དེ་དེའི་ཡུལ་དུ་བསྟན། ཚད་མ་ཡིན་ཞེས་པས་རང་གི་གཞལ་བྱའི་དོན་ཡུལ་སྟེང་དུ་གྲུབ་པ་མེད་ན་རང་ཉིད་མི་འབྱུང་བའི་འབྲེལ་བ་ལ་ཚད་མར་འགྲོ་ཚུལ་བསྟན་པའི་ཕྱིར་རོ། །དེས་ན། རང་གི་གཞལ་བྱའི་ཡུལ་སྟེང་དུ་དོན་གྲུབ་པ་མེད་ན་རང་ཉིད་མི་འབྱུང་བའི་འབྲེལ་བ་ལ་ངེས་པ་རང་སྟོབས་ཀྱིས་འདྲེན་ནུས་པའི་ཚད་མ་དེ། རང་ལས་ངེས་ཀྱི་ཚད་མའི་མཚན་ཉིད། མཚན་གཞི་ནི། རྗེས་དཔག་ལྟ་བུའོ། །རྣལ་འབྱོར་མངོན་སུམ་ཐམས་ཅད་དང༌། རང་རིག་མངོན་སུམ་དུ་གྱུར་བའི་ཚད་མ་དང༌། མངོན་སུམ་གོམས་པ་ཅན་དང༌། རྗེས་དཔག་ཚད་མ་ཐམས་ཅད་རང་ལས་ངེས་ཀྱི་ཚད་མ་ཡིན་ཏེ། རྟོག་གེའི་སྐད་ལས། རྣལ་འབྱོར་བའི་ཤེས་པ་དང༌། རང་རིག་པའི་ཤེས་པ་ནི་རང་ཉིད་ཁོ་ན་ལས་ཚད་མ་ཉིད་དོ། །རྗེས་སུ་དཔག་པ་ནི་ངེས་པའི་བདག་ཉིད་ཀྱི་ཕྱིར་རང་ཉིད་ཁོ་ན་ལས་ཚད་མའོ། །ཞེས་སློབ་དཔོན་གྱིས་གསུངས་སོ། །ཞེས་གསུངས་པའི་ཕྱིར་རོ། །རང་གི་གཞལ་བྱའི་ཡུལ་སྟེང་དུ་དོན་མ་གྲུབ་ན་རང་ཉིད་མི་འབྱུང་བ་ལ་ངེས་པ་གཞན་སྟོབས་ཀྱིས་འདྲེན་པར་བྱེད་པའི་ཚད་མ། གཞན་ལས་ངེས་ཀྱི་ཚད་མའི་མཚན་ཉིད། མཚན་གཞི་ནི། དོན་ལ་མེའི་ཁ་དོག་ཡིན་ཞིང་རྒྱང་རིང་པོ་ནས་ཁ་དོག་དམར་ལམ་པ་ཙམ་རྟོགས་པའི་དབང་མངོན་ལྟ་བུའོ། །དེ་ལ་དབྱེ་ན། མངོན་སུམ་དང་པོ་བ་དང༌། མངོན་སུམ་ཡིད་མ་གཏད་པ་དང༌། འཁྲུལ་རྒྱུ་ཅན་དང་གསུམ་ཡོད་དེ། ཨུཏྤལ་ངོ་མི་ཤེས་པའི་གང་ཟག་གི་རྒྱུད་ཀྱི་ཨུཏྤལ་ལའི་སྟེང་གི་ཁ་དོག་སྔོ་ཙམ་རྟོགས་པའི་དབང་མངོན་ལྟ་བུ་དང་པོ་ཡིན། ཡིད་གཟུགས་མཛེས་པ་ལ་ཆགས་དུས་ཀྱི་སྒྲ་འཛིན་གཞན་ལས་ངེས་ཀྱི་དབང་མངོན་ལྟ་བུ་གཉིས་པ་ཡིན། རྒྱང་རིང་པོ་ནས་མེའི་ཁ་དོག་མཐོང་བ་ལ་མེའི་ཁ་དོག་ཡིན་མིན་གྱི་ཐེ་ཚོམ་འདྲེན་པའི་མངོན་སུམ་ཚད་མ་ལྟ་བུ་གསུམ་པ་ཡིན་པའི་ཕྱིར་རོ། ། གསུམ་པ་ཚད་མའི་གྲངས་ངེས།གསུམ་པ་ཚད་མའི་གྲངས་ངེས་ལ། དགག་བཞག་གཉིས་ལས། དང་པོ་ནི། ཁ་ཅིག་ན་རེ། ཚད་མ་ལ་མངོན་སུམ་དང་རྗེས་དཔག་གི་ཚད་མ་གཉིས་སུ་གྲངས་ངེས་པའི་རྒྱུ་མཚན་ཡོད་དེ། ཚད་མ་གཉིས་ཀྱི་གཞལ་བྱ་ལ་རང་སྤྱི་གཉིས་སུ་གྲངས་ངེས་པའི་རྒྱུ་མཚན་གྱིས་ཡིན་པའི་ཕྱིར། དེར་ཐལ། གཞལ་བྱ་གཉིས་ཕྱིར་ཚད་མ་གཉིས། །ཞེས་གསུངས་པའི་ཕྱིར་ཟེར་ན་མ་ཁྱབ། འོ་ན་ཚད་མ་གཉིས་ཀྱི་གཞལ་བྱ་ལ་རང་སྤྱི་གཉིས་སུ་སོ་སོར་ངེས་པར་ཐལ། འདོད་པའི་ཕྱིར། འདོད་ན། རྗེས་དཔག་ཚད་མའི་གཞལ་བྱ་ལ་སྤྱི་མཚན་གྱིས་ཁྱབ་པ་དང༌། མངོན་སུམ་ཚད་མའི་གཞལ་བྱ་ལ་རང་མཚན་གྱིས་ཁྱབ་པར་ཐལ། འདོད་པའི་ཕྱིར། འདོད་མི་ནུས་ཏེ། དེ་གཉིས་རེ་རེའི་གཞལ་བྱ་ལ་རང་སྤྱི་གཉིས་གཉིས་ཡོད་པའི་ཕྱིར། དེར་ཐལ། རང་སྤྱི་གང་རུང་ཡིན་ན་རང་ཉིད་རྟོགས་པའི་ཚད་མ་གཉིས་པོ་རེ་རེ་ནས་ཡོད་པས་ཁྱབ་པའི་ཕྱིར། དེར་ཐལ། ཚད་མ་དེ་གཉིས་ཀྱི་གཞལ་བྱ་ལ་གཉིས་གཉིས་ཡོད་པའི་ཕྱིར་ཏེ། བྱིས་པ་འཇུག་པའི་རྟོག་གེའི་སྐད་ལས། དེ་ལྟར་ན་ནི་ཚད་མའི་ཡུལ་ནི་རྣམ་པ་གཉིས་ཏེ་བཟུང་བར་བྱ་བ་དང་ཞེན་པར་བྱ་བའོ། །ཞེས་གསུངས་པའི་ཕྱིར་རོ། །ཚད་མ་ཡིན་ན་རང་ཡིན་པར་གྱུར་བའི་མངོན་རྗེས་གང་རུང་ཡིན་པས་ཁྱབ་པར་ཐལ། དེ་ལ་དེ་གཉིས་སུ་གྲངས་ངེས་པ་ཡིན་པའི་ཕྱིར་ཟེར་ན་མ་ཁྱབ། འོ་ན་ཁྱོད་རང་ལ་གྲངས་ངེས་ཡིན་ན་དངོས་འགལ་གཅོད་པའི་གྲངས་ངེས་ཡིན་དགོས་པར་ཐལ། འདོད་པའི་ཕྱིར། འདོད་མི་ནུས་ཏེ། གྲངས་ངེས་དེ་ལ་ལོག་རྟོག་སེལ་བའི་གྲངས་ངེས། དགོས་པ་ཅན་གྱི་གྲངས་ངེས། རིགས་བསྡུས་ཀྱི་གྲངས་ངེས། དངོས་འགལ་གཅོད་པའི་གྲངས་ངེས་དང་བཞི་ཡོད་པའི་ཕྱིར། དང་པོ་གྲུབ་སྟེ། ཚད་མ་ལ་རང་ཡིན་པར་གྱུར་བའི་མངོན་རྗེས་གཉིས་སུ་གྲངས་ངེས་པ་དེ་དངོས་འགལ་གཅོད་པའི་གྲངས་ངེས་མ་ཡིན་པ་གང་ཞིག ལོག་རྟོག་སེལ་བའི་གྲངས་ངེས་ཡིན་པའི་ཕྱིར། དང་པོ་གྲུབ་སྟེ། ཚད་མ་ཡིན་ན་དེ་གཉིས་གང་རུང་ཡིན་པས་མ་ཁྱབ་པའི་ཕྱིར། ཁྱབ་སྟེ། དངོས་འགལ་གཅོད་པའི་གྲངས་ངེས་ལ་ནི། ཤེས་བྱ་ལ་རྟག་མི་རྟག་གཉིས་སུ་གྲངས་ངེས་པ་དེ་དངོས་འགལ་གཅོད་པའི་གྲངས་ངེས་ཡིན་པས་དེ་གཉིས་གང་རུང་མ་ཡིན་པའི་ཤེས་བྱ་མེད་པ་ལྟ་བུ་གཅིག་དགོས་པའི་ཕྱིར། གཉིས་པ་གྲུབ་སྟེ། དེ་གཉིས་སུ་གྲངས་ངེས་པ་དེ་ཚད་མ་ལ་གཅིག་དང་གསུམ་དང་བཞི་དང་ལྔ་ལ་སོགས་པ་འདོད་པའི་ལོག་རྟོག་སེལ་བའི་གྲངས་ངེས་ཡིན་པའི་ཕྱིར་ཏེ། རྟོག་གེ་སྐད་ལས། རྣམ་པ་གཉིས་ཞེས་པའི་ཚིག་གིས་གཅིག་དང་གསུམ་དང་བཞི་དང་ལྔ་དང་དྲུག་ཅེས་ལོག་པར་རྟོག་པ་རྣམས་བསལ་བའོ། །ཞེས་གསུངས་པའི་ཕྱིར་རོ། །གཉིས་པ་རང་ལུགས་ལ། ཚད་མ་ལ་གཉིས་སུ་གྲངས་ངེས་ཏེ། དེ་ལ་མངོན་སུམ་ཚད་མ་དང༌། རྗེས་དཔག་ཚད་མ་གཉིས་སུ་གྲངས་ངེས་པའི་ཕྱིར། ཚད་མ་ལ་དེ་གཉིས་སུ་གྲངས་ངེས་བྱས་པའི་དགོས་པ་ཡོད་དེ། དེ་ལ་གཅིག་ཏུ་གྲངས་ངེས་པ་དང་གསུམ་དུ་གྲངས་ངེས་པ་སོགས་འདོད་པའི་ལོག་རྟོག་སེལ་བའི་ཆེད་ཡིན་པའི་ཕྱིར། ཚད་མ་ལ་དེ་གཉིས་སུ་གྲངས་ངེས་པའི་རྒྱུ་མཚན་ཡོད་དེ། དེའི་གཞལ་བྱ་ལ་སྣང་ཡུལ་གྱི་རང་སྤྱི་གཉིས་སུ་གྲངས་ངེས་པའི་རྒྱུ་མཚན་གྱིས་ཡིན་པའི་ཕྱིར། དེར་ཐལ། གཞལ་བྱ་རང་མཚན་སྣང་ཡུལ་དུ་བྱེད་པའི་སྒོ་ནས་མངོན་སུམ་ཚད་མ་དང༌། སྤྱི་མཚན་སྣང་ཡུལ་དུ་བྱེད་པའི་སྒོ་ནས་རྗེས་དཔག་གཉིས་སུ་གྲངས་ངེས་པ་ཡིན་པའི་ཕྱིར། གཞན་ཡང་གཞལ་བྱ་ཆོས་ཅན། ཁྱོད་ལ་མངོན་ལྐོག་གཉིས་སུ་གྲངས་ངེས་པར་ཐལ། གཞལ་བྱ་དེ་རང་ལ་མངོན་སུམ་དུ་སྣང་བའི་སྒོ་ནས་འཇལ་བ་དང༌། རང་ལ་ལྐོག་ཏུ་གྱུར་བའི་སྒོ་ནས་འཇལ་བ་ལས་མ་གཏོགས་པའི་གཞལ་བྱ་འཇལ་ཚུལ་གཞན་ནི་ཡོད་པ་མ་ཡིན་པའི་ཕྱིར། དེས་ན། ཚད་མ་ཆོས་ཅན། ཁྱོད་ལ་མངོན་རྗེས་གཉིས་སུ་ངེས་ཏེ། གཞལ་བྱ་མངོན་ལྐོག་གཉིས་སུ་ངེས་ཤིང་མངོན་གྱུར་དངོས་སུ་འཇལ་བའི་མངོན་སུམ་ཚད་མ་དང༌། གཞལ་བྱ་ལྐོག་གྱུར་དངོས་སུ་འཇལ་བའི་ཚད་མ་རྗེས་དཔག་ཡིན་པ་ཉིད་ཡིན་པའི་ཕྱིར། དེའི་ཕྱིར་ཚད་མ་གསུམ་ལ་སོགས་པ་དང་གཅིག་ཁོ་ན་འདོད་པའི་གྲངས་ནི་བསལ་བ་ཡིན་ཏེ། རྣམ་འགྲེལ་ལས། མངོན་སུམ་ལྐོག་ཏུ་གྱུར་བ་ལས། །གཞལ་བྱ་གཞན་ནི་ཡོད་མ་ཡིན། །དེ་ཕྱིར་གཞལ་བྱ་གཉིས་ཉིད་ཀྱིས། །ཚད་མ་གཉིས་སུ་བཞེད་པ་དང༌། །གཞལ་བྱ་གཉིས་ནི་མཐོང་བའི་ཕྱིར། །གསུམ་གཅིག་གྲངས་ནི་གསལ་བ་ཡིན། །ཞེས་གསུངས་པའི་ཕྱིར་རོ། ། གཉིས་པ་ཚད་མིན་བཤད་པ།གཉིས་པ་ཚད་མིན་བཤད་པ་ལ། མཚན་ཉིད། དབྱེ་བ་གཉིས། གསར་དུ་མི་བསླུ་བ་མ་ཡིན་པའི་རིག་པ། ཚད་མིན་གྱི་ཤེས་པའི་མཚད་ཉིད། མཚན་གཞི་ནི། སྒྲ་མི་རྟག་པར་རྟོགས་པའི་དཔྱད་ཤེས་དང༌། སྒྲ་རྟག་འཛིན་རྟོག་པ་ལྟ་བུའོ། །ཚད་མིན་གྱི་ཤེས་པ་ནི་དཔྱད་ཤེས་ལྟ་བུ་ཡུལ་ལེགས་པར་ངེས་པས་ཡུལ་དང་འཛིན་སྟངས་མི་བསླུ་བ་ཡིན་ཡང་རང་ཡུལ་གསར་དུ་རྟོགས་པ་མ་ཡིན་པས་གསར་དུ་མི་བསླུ་བ་མ་ཡིན་པ་དང༌། ཡིད་དཔྱོད་ལྟ་བུ་རང་ཡུལ་གསར་དུ་རྟོགས་པར་བྱེད་བཞིན་པ་ཡིན་ཡང་འཛིན་སྟངས་མི་བསླུ་བ་མ་ཡིན་པ་ལྟ་བུ་གསར་དུ་མི་བསླུ་བ་མ་ཡིན་པའི་རིག་པ་སྟེ། མདོར་ན་རང་ཡུལ་གསར་དུ་རྟོགས་པ་དང་མི་བསླུ་བ་དང་ཁྱད་པར་གཉིས་ཀ་དང་མི་ལྡན་པའི་རིག་པ་དེ་ཡིན་ཞེས་པའོ། ། གཉིས་པ་དབྱེ་བ་ལ། བཅད་ཤེས་དང༌། ཡིད་དཔྱོད་དང༌། སྣང་ལ་མ་ངེས་པའི་བློ་དང༌། ཐེ་ཚོམ་དང༌། ལོག་ཤེས་དང་ལྔ་ཡོད་ལ། དེ་དག་གི་ངོ་བོ་སོགས་གོང་དུ་བཤད་ཟིན་ཏོ། །དེ་དག་ཆོས་ཅན། ཚད་མིན་གྱི་ཤེས་པ་ཡིན་ཏེ། དཔྱད་ཤེས་མི་བསླུ་བའི་ཤེས་པ་ཡིན་ཡང་གསར་རྟོགས་ཀྱི་ཤེས་པ་མ་ཡིན། ཡིད་དཔྱོད་གསར་དུ་རང་ཡུལ་ཡོད་པ་ཞིག་འཛིན་པའི་བློ་ཡིན་ཡང་ཡུལ་ལ་སྒྲོ་འདོགས་མ་ཆོད་པས་འཛིན་སྟངས་འགྱུར་བའི་བསླུ་བའི་ཤེས་པ་ཡིན་ལ། སྣང་ལ་མ་ངེས་པ་ནི། ཡུལ་མི་བསླུ་བ་གསལ་བར་སྣང་བའི་བློ་ཡིན་ཡང་ཡུལ་མ་རྟོགས་པས་འཛིན་སྟངས་འགྱུར་བའི་བསླུ་བའི་ཤེས་པ་ཡིན་ལ། ཐེ་ཚོམ་ནི་ཡུལ་མ་རྟོགས་པས་འཛིན་སྟངས་ལ་བསླུ་བ་དང༌། ལོག་ཤེས་ནི་ཡུལ་ཕྱིན་ཅི་ལོག་ཏུ་བཟུང་ཕྱིར་དེ་དང་འཛིན་སྟངས་འགལ་བའི་གཉེན་པོས་དེའི་འཛིན་སྟངས་འདོར་བར་འགྱུར་བས་ན་བསླུ་བའི་ཤེས་པ་ཡིན་པའི་ཕྱིར་རོ། ། བཞི་བ་རྟོག་བཅས་དང་རྟོག་མེད་གཉིས་སུ་དབྱེ་བ།བཞི་བ་རྟོག་བཅས་དང་རྟོག་མེད་གཉིས་སུ་དབྱེ་བ་ལ། རྟོག་པ་བཤད་པ་དང༌། རྟོག་མེད་བཤད་པ་གཉིས། དང་པོ་ནི། རྣམ་འགྲེལ་ལས། མིང་དང་རིགས་སོགས་སྦྱོར་བ་ཡིས། །རྟོག་པ། ཞེས་དང༌། ཤེས་གང་གང་ལ་སྒྲ་དོན་འཛིན། །དེ་ནི་དེ་ལ་རྟོག་པ་འདོད། །ཞེས་པའི་གཞུང་འདི་དག་བྱུང༌། མཐའ་དཔྱད་པ་ལ། དགག་བཞག་གཉིས་ལས། དང་པོ་ནི། རྟོག་པ་ཡིན་ན་སྒྲ་སྤྱི་ཁྱོད་ཀྱི་སྣང་ཡུལ་ཡིན་པས་ཁྱབ་ཟེར་ན། བ་ལང་གི་རྒྱུད་ཀྱི་བུ་འཛིན་རྟོག་པ་ཆོས་ཅན། སྒྲ་སྤྱི་སྣང་ཡུལ་དུ་བྱས་པའི་རྟོག་པ་ཡིན་པར་ཐལ། རྟོག་པ་ཡིན་པའི་ཕྱིར། ཁྱབ་པ་ཁས། འདོད་མི་ནུས་ཏེ། བརྡ་མི་ཤེས་པའི་གང་ཟག་གི་རྒྱུད་ཀྱི་རྟོག་པ་ཡིན་པའི་ཕྱིར། གཞན་ཡང་སྒོམ་བྱུང་དུ་གྱུར་བའི་རྟོག་པ་ཆོས་ཅན། སྒྲ་སྤྱི་ཁྱོད་ཀྱི་སྣང་ཡུལ་ཡིན་པར་ཐལ། རྟོག་པ་ཡིན་པའི་ཕྱིར། ཁྱབ་པ་ཁས། འདོད་མི་ནུས་ཏེ། སྒྲ་སྤྱི་ཟད་པའི་རྟོག་པ་ཡིན་པའི་ཕྱིར། དེར་ཐལ། སྒོམ་བྱུང་ཡིན་པའི་ཕྱིར་རོ། ། གཉིས་པ་རང་ལུགས་བཤད་པ།གཉིས་པ་རང་ལུགས་བཤད་པ་ལ། མཚན་ཉིད། དབྱེ་བ་གཉིས། སྒྲ་དོན་སྣང་ཡུལ་དུ་བྱེད་པའི་ཞེན་རིག རྟོག་པའི་མཚན་ཉིད། མཚན་གཞི་ནི། བུམ་པ་འཛིན་པའི་ཞེན་རིག་ལྟ་བུའོ། །མཚན་ཉིད་དེའི་ཟུར་གྱི་སྒྲ་དོན་ཞེས་པ་ནི་རྟོག་པའི་སྣང་ཡུལ་བྱེད་པ་ལས་སྒྲ་སྤྱི་དོན་སྤྱི་སོ་སོར་བྱེད་པ་མ་ཡིན་ལ། དེ་ཡང༌། སྒྲ་དོན་ཆོས་ནི་རྣམ་པ་གསུམ། །ཞེས་པའི་སྒྲ་དོན་དང་འདྲ་བའོ། །སྒྲ་དོན་འདྲེས་རུང་ཞེས་པ་ནི་སྒྲ་སྤྱི་དང་དོན་སྤྱི་སོ་སོར་བྱེད་པ་ཡིན་པར་ཤེས་དགོས་སོ། །ཡང་ན་རྟོག་པའི་མཚན་ཉིད་ཡོད་དེ། གཏན་ཚིགས་རིགས་པའི་དོན་བསྡུས་ལས། བརྗོད་བྱ་རྗོད་བྱེད་འདྲེས་རུང་སྣང་བའི་བློ། ཞེས་གསུངས་ལ། དེ་ལྟར་རྣམ་ངེས་ལས་གསུངས་ཏེ། ཇི་སྐད་དུ། རྟོག་པ་ནི་རྗོད་པ་དང་འདྲེས་རུང་བར་སྣང་བའི་ཤེས་པ་སྟེ། ཞེས་གསུངས་པའི་ཕྱིར་རོ། ། གཉིས་པ་ལ་དབྱེ་ན། རྟོག་པ་དོན་མཐུན་དང༌། དོན་མི་མཐུན་གཉིས་ཡོད། རང་གི་འཛིན་སྟངས་ལ་མ་འཁྲུལ་བའི་ཞེན་རིག རྟོག་པ་དོན་མཐུན་གྱི་མཚན་ཉིད། མཚན་གཞི་ནི། འཆི་བ་མི་རྟག་པ་རྟོགས་པའི་ཞེན་རིག་ལྟ་བུའོ། །རང་གི་འཛིན་སྟངས་ལ་འཁྲུལ་བའི་རིག་པ། རྟོག་པ་དོན་མི་མཐུན་གྱི་མཚན་ཉིད། མཚན་གཞི་ནི། ཚེ་འདི་རྟག་པར་འཛིན་པའི་ཞེན་རིག་ལྟ་བུའོ། །ཐབས་ཁྱད་པར་ཅན་གྱི་རྟོག་པ་རྣམས་ཀྱི་འཛིན་སྟངས་ཀྱི་ཡུལ་ཡོད་མེད་དཔྱད་པར་བྱའོ། ། ཡང་རྟོག་པ་ལ་དབྱེ་ན། ཐོས་བྱུང་དང༌། བསམ་བྱུང་དང༌། སྒོམ་བྱུང་དུ་གྱུར་བའི་རྟོག་པ་གསུམ་ཡོད། སྒྲ་སྤྱི་ཙམ་གྱི་སྒོ་ནས་ངེས་པ་རྙེད་པའི་ཞེན་རིག་དེ། ཐོས་བྱུང་དུ་གྱུར་བའི་རྟོག་པའི་མཚན་ཉིད། མཚན་གཞི་ནི། སྒྲ་མི་རྟག་པ་འཛིན་པའི་ཡིད་དཔྱོད་ལྟ་བུའོ། །དོན་ལ་བསམ་ནས་ཚད་མས་ངེས་པ་རྙེད་པའི་ཞེན་རིག བསམ་བྱུང་དུ་གྱུར་བའི་རྟོག་པའི་མཚན་ཉིད། མཚན་གཞི་ནི། སྡུག་བདེན་མི་རྟག་པ་རྟོགས་པའི་རྗེས་དཔག་ལྟ་བུའོ། །བསམ་བྱུང་གི་དོན་ལ་ཡང་ཡང་འདྲིས་པར་བྱས་པའི་ཤིན་སྦྱངས་ཁྱད་པར་ཅན་གྱིས་ཟིན་པའི་ཞེན་རིག་དེ། སྒོམ་བྱུང་དུ་གྱུར་བའི་རྟོག་པའི་མཚན་ཉིད། མཚན་གཞི། བསམ་གཏན་གྱི་དངོས་གཞི་གྱུར་བའི་ཞེན་རིག་ལྟ་བུའོ། །གཞན་ཡང་རྟོག་པ་ལ་དབྱེ་ན། མིང་སྦྱོར་རྟོག་པ་དང༌། དོན་སྦྱོར་རྟོག་པ་གཉིས། བརྡ་དུས་ཀྱི་དོན་དང༌། ཐ་སྙད་དུས་ཀྱི་མིང་སྦྱར་ནས་འཛིན་པའི་ཞེན་རིག་དེ། མིང་སྦྱོར་རྟོག་པའི་མཚན་ཉིད། མཚན་གཞི་ནི། ལྟོ་ལྡིར་བ་ལ་བུམ་པའོ་སྙམ་དུ་འཛིན་པའི་རྟོག་པ་ལྟ་བུའོ། །དོན་ལ་མིང་གི་ཐ་སྙད་མ་སྦྱར་བར་འཛིན་པའི་རྟོག་པ་དེ། དོན་སྦྱོར་རྟོག་པའི་མཚན་ཉིད། མཚན་གཞི་ནི་སྐྱེས་བུ་རྟ་ཞོན་པ་འདི་སུ་ཡིན་སྙམ་དུ་འཛིན་པའི་རྟོག་པ་ལྟ་བུ་དང༌། སྒོམ་བྱུང་གི་རྟོག་པ་ལྟ་བུའོ། ། གཉིས་པ་རྟོག་མེད་བཤད་པ།གཉིས་པ་རྟོག་མེད་བཤད་པ་ལ། རྣམ་འགྲེལ་ལས། གསལ་བར་སྣང་བ་ཅན་བློ་གང༌། །དེ་ནི་དེ་ལ་རྟོག་མེད་འདོད། །ཅེས་དང༌། མངོན་སུམ་ལེའུ་ལས། རྟོག་པའི་དྲ་བ་རྣམ་བསལ་བས། །གསལ་བ་ཉིད་དུ་སྣང་བ་ཡིན། །ཞེས་པའི་གཞུང་འདི་དག་བྱུང༌། རང་ཡུལ་གསལ་བར་སྣང་བའི་བློ་དེ་རྟོག་མེད་ཤེས་པའི་མཚན་ཉིད་ཡིན་ཏེ། གཏན་ཚིགས་རིགས་པའི་དོན་བསྡུས་ལས། རང་ཡུལ་གྱི་རྣམ་པ་གསལ་བར་སྣང་བའི་བློའོ། །ཞེས་གསུངས་པའི་ཕྱིར། དེ་ལ་དབྱེ་ན། མངོན་སུམ་དང༌། མེད་པ་གསལ་སྣང་ཅན་གྱི་རྟོག་མེད་ལོག་ཤེས་གཉིས་ཡོད་དོ། ། ལྔ་བ་འཁྲུལ་ཤེས་དང་མ་འཁྲུལ་བའི་ཤེས་པ་གཉིས་སུ་དབྱེ་བ།ལྔ་བ་འཁྲུལ་ཤེས་དང་མ་འཁྲུལ་བའི་ཤེས་པ་གཉིས་སུ་དབྱེ་བ་ལ། འཁྲུལ་ཤེས་དང༌། མ་འཁྲུལ་བའི་ཤེས་པ་བཤད་པ་ལ་གཉིས། དང་པོ་ནི། རང་གི་སྣང་ཡུལ་ལ་འཁྲུལ་བའི་རིག་པ། འཁྲུལ་ཤེས་ཀྱི་མཚན་ཉིད། མཚན་གཞི་ནི། གངས་རི་སྔོ་སྣང་གི་དབང་ཤེས་དང༌། སྒྲ་རྟག་འཛིན་རྟོག་པ་དང༌། སྒྲ་མི་རྟག་པར་འཛིན་པའི་རྟོག་པ་ལྟ་བུའོ། །འཁྲུལ་ཤེས་ནི་རང་གི་འཛིན་སྟངས་ཀྱི་ཡུལ་ལ་འཁྲུལ་མ་འཁྲུལ་གང་ཡིན་ཡང་སྣང་ཡུལ་དེ་མེད་པ་ཡོད་པར་འཁྲུལ་བའམ་དེ་མ་ཡིན་ལ་ཡིན་པར་སྣང་བའི་བློ་དེ་ཡིན་ནོ། །གངས་རི་སྔོ་སྣང་གི་དབང་ཤེས་ཆོས་ཅན། འཁྲུལ་ཤེས་ཡིན་ཏེ། གངས་རི་སྔོན་པོ་མ་ཡིན་བཞིན་དུ་དེར་འཁྲུལ་བའི་ཕྱིར། སྒྲ་རྟག་པར་འཛིན་པའི་རྟོག་པ་ཆོས་ཅན། འཁྲུལ་ཤེས་ཡིན་ཏེ། ཁྱོད་སྒྲ་རྟག་པའི་དོན་སྤྱི་དེ་སྒྲ་རྟག་པ་མ་ཡིན་བཞིན་དེར་སྣང་བའི་ཕྱིར། སྒྲ་མི་རྟག་པ་འཛིན་པའི་རྟོག་པ་ཆོས་ཅན། འཁྲུལ་ཤེས་ཡིན་པར་ཐལ། ཁྱོད་སྒྲ་མི་རྟག་པའི་དོན་སྤྱི་དེ་སྒྲ་མི་རྟག་པ་མ་ཡིན་བཞིན་དུ་དེར་སྣང་བའི་ཤེས་པ་ཡིན་པའི་ཕྱིར་རོ། །གཉིས་པ་དེ་ལ་དབྱེ་ན། རྟོག་མེད་འཁྲུལ་ཤེས་དང༌། རྟོག་པ་འཁྲུལ་ཤེས་གཉིས་ཡོད་དོ། །ཡང་ན་འཁྲུལ་ཤེས་ལ་བློ་དོན་མཐུན་དང༌། དོན་མི་མཐུན་གཉིས་ཡོད། དང་པོ་ནི། རྟོག་པ་དོན་མཐུན་རྣམས་འཁྲུལ་ཤེས་དང་བློ་དོན་མཐུན་གྱི་གཞི་མཐུན་ཡིན་ནོ། །གཉིས་པ་མ་འཁྲུལ་བའི་ཤེས་པ་ལ། མཚན་ཉིད། དབྱེ་བ་གཉིས། དང་པོ་ནི། རང་གི་སྣང་ཡུལ་ལ་མ་འཁྲུལ་བའི་རིག་པ། མ་འཁྲུལ་བའི་ཤེས་པའི་མཚན་ཉིད། འདི་དང་རྟོག་མེད་མ་འཁྲུལ་བའི་ཤེས་པ་གཉིས་དོན་གཅིག གཉིས་པ་དབྱེ་བ་ལ། དབང་པོའི་མངོན་སུམ་དང༌། ཡིད་ཀྱི་མངོན་སུམ་དང༌། རྣལ་འབྱོར་མངོན་སུམ་དང་གསུམ་ཡོད་དོ། །སྣང་ཡུལ་ལ་མ་འཁྲུལ་བའི་ཤེས་པ་ཡིན་ན་འཛིན་སྟངས་ལ་མ་འཁྲུལ་བའི་ཤེས་པ་ཡིན་པས་ཁྱབ་སྟེ། རྟོག་པ་ཐམས་ཅད་སྣང་ཡུལ་ལ་མ་འཁྲུལ་བ་མེད་པས་སྣང་ཡུལ་ལ་མ་འཁྲུལ་བའི་ཤེས་པ་ཡིན་ན་རྟོག་མེད་ཡིན་དགོས། རྟོག་མེད་ཤེས་པ་རྣམས་སྣང་ཡུལ་ལ་འཁྲུལ་ན་འཛིན་སྟངས་ཀྱི་ཡུལ་ལ་འཁྲུལ་བས་ཁྱབ་པའི་ཕྱིར་རོ། ། དྲུག་པ་སེམས་སེམས་བྱུང་བཤད་པ།དྲུག་པ་སེམས་སེམས་བྱུང་བཤད་པ་ལ། དེ་གཉིས་ཀའི་མཚན་ཉིད་བཤད་པ། མཚུངས་ལྡན་རྣམ་པ་ལྔ་མཚུངས་བཤད་པ། དེ་གཉིས་རྫས་ཐ་དད་བཤད་པ། དེ་གཉིས་ཀྱི་དབྱེ་བ་བཤད་པ་དང་བཞི། དབུས་མཐའ་རྣམ་འབྱེད་ལས། དེ་ལ་དོན་མཐོང་རྣམ་པར་ཤེས། །དེ་ཡི་ཁྱད་པར་སེམས་ལས་བྱུང༌། །ཞེས་གསུང་པ་ལྟར། དོན་གྱི་ངོ་བོ་རིག་པར་བྱེད་པའི་ཤེས་པ། སེམས་ཀྱི་མཚན་ཉིད། མཚན་གཞི་ནི། མིག་གི་རྣམ་པར་ཤེས་པ་ལྟ་བུའོ། །རྣམ་པར་ཤེས་པའི་མཚན་ཉིད་དམ་རང་བཞིན་ནི། ཡུལ་གྱི་ངོ་བོ་རྣམ་པར་རིག་ཅིང་ཤེས་པར་བྱེད་པའི་མཚན་ཉིད་ཅན་ཏེ། རང་རང་གི་དམིགས་པའི་ངོ་བོ་སོ་སོར་རྟོགས་པའི་རང་བཞིན་ཅན་ནི་སེམས་སམ་རྣམ་པར་ཤེས་པ་ཞེས་བྱའོ། །དོན་གྱི་ཁྱད་པར་རིག་པར་བྱེད་པའི་ཤེས་པ། སེམས་བྱུང་གི་མཚན་ཉིད། མཚན་གཞི་ནི། དད་པ་དང༌། བརྩོན་འགྲུས་ལྟ་བུའོ། །དེའང་གཟུགས་སྒྲ་ལ་སོགས་པའི་ཆོས་ཅན་རྟེན་ལྟ་བུར་སྣང་བ་ནི་དོན་གྱི་ངོ་བོ་ཡིན་ལ། དེ་རྣམས་དམིགས་པར་བྱེད་པ་རྣམ་པར་ཤེས་པའི་ཚོགས་བརྒྱད་ནི་སེམས་ཡིན་ཞིང༌། བདེ་སྡུག་གི་གནས་ཡིད་དུ་འོང་མི་འོང་ལ་སོགས་པ་དངོས་པོ་དེའི་ཆོས་བརྟེན་པ་ལྟ་བུར་སྣང་བ་ནི་དོན་གྱི་ཁྱད་པར་ཡིན་ལ། དེ་རྣམས་དམིགས་པར་བྱེད་པ་ཚོར་བ་ལ་སོགས་པ་ལྔ་བཅུ་རྩ་གཅིག་ནི་སེམས་ལས་བྱུང་བ་ཡིན་ནོ། ། གཉིས་པ་སེམས་སེམས་བྱུང་མཚུངས་ལྡན་རྣམ་པ་ལྔ་མཚུངས་བཤད་པ།གཉིས་པ་སེམས་སེམས་བྱུང་མཚུངས་ལྡན་རྣམ་པ་ལྔ་མཚུངས་བཤད་པ་ནི། ཕུང་བོ་ལྔ་པར། སེམས་ལས་བྱུང་བའི་ཆོས་རྣམས་གང་ཞེ་ན། ཆོས་གང་དག་སེམས་དང་མཚུངས་པར་ལྡན་པ་རྣམས་སོ། །ཞེས་པ་ལྟར་གཙོ་བོར་གྱུར་པའི་སེམས་དང་དེའི་འཁོར་དུ་གྱུར་བའི་སེམས་ལས་བྱུང་བ་དག་ནི་དོན་རྣམ་པ་ལྔས་ཕན་ཚུན་ལྷན་ཅིག་མི་འབྲལ་བར་གནས་པས་མཚུངས་པར་ལྡན་པ་སྟེ། དེ་ཡང༌། མཛོད་ལས། སེམས་དང་སེམས་བྱུང་དང༌། །རྟེན་དང་དམིགས་དང་རྣམ་བཅས་དང༌། །མཚུངས་པར་ལྡན་པ་རྣམ་པ་ལྔ། །ཞེས་པ་ལྟར་རྟེན་དང་དམིགས་པ་དང་རྣམ་པ་དང་དུས་དང་རྫས་མཚུངས་པའོ། །དེ་ལ་རྟེན་མཚུངས་པ་ནི། གཙོ་འཁོར་གཉིས་ཀ་དབང་པོ་གཅིག་ལ་བརྟེན་པ་སྟེ། མིག་གི་རྣམ་ཤེས་མིག་གི་དབང་པོ་ལ་བརྟེན་པ་ན་དེའི་འཁོར་ཚོར་བའང་མིག་གི་དབང་པོ་ལ་བརྟེན་པ་ལྟ་བུའོ། །དམིགས་པ་མཚུངས་པ་ནི། ཡུལ་གཅིག་ལ་དམིགས་པ་སྟེ། མིག་གི་རྣམ་ཤེས་གཟུགས་ལ་དམིགས་པ་ན་དེའི་འཁོར་ཚོར་བའང་གཟུགས་ལ་དམིགས་པ་ལྟ་བུའོ། །རྣམ་པ་མཚུངས་པ་ནི།འཛིན་སྟངས་ཀྱི་གཟུང་བྱ་གཅིག་པ་སྟེ། མིག་གི་རྣམ་ཤེས་སྔོན་པོའི་རྣམ་པ་ཅན་དུ་སྐྱེས་པ་ན་དེའི་འཁོར་ཚོར་བའང་སྔོན་པོའི་རྣམ་པ་ཅན་དུ་སྐྱེས་པ་ལྟ་བུའོ། །དུས་མཚུངས་པ་ནི།དུས་ཅིག་ཅར་དུ་འབྱུང་བ་མིག་གི་རྣམ་ཤེས་ནམ་བྱུང་བ་ན་དེའི་འཁོར་ཚོར་བའང་འབྱུང་བ་ལྟ་བུའོ། །རྫས་མཚུངས་པ་ནི། རིགས་འདྲ་གྲངས་མཉམ་པ་སྟེ། མིག་གི་རྣམ་ཤེས་རྫས་གཅིག་པ་ན་དེའི་འཁོར་ཚོར་བའང་རྫས་གཅིག་ཁོ་ན་ཡིན་པ་ལྟ་བུའོ། །མཚུངས་ལྡན་ལྔ་ཀ་སྨོས་པ་ནི། དམིགས་པ་མཚུངས་པ་ཙམ་ལས་མ་སྨོས་ན་རྣམ་ཤེས་གཞན་དང་ཡིད་ཤེས་ཀྱང་མཚུངས་ལྡན་དུ་ཐལ་བར་འགྱུར་བས་རྣམ་པ་མཚུངས་པའང་སྨོས་ལ། དེ་གཉིས་ལས་གཞན་མ་སྨོས་ན།གང་ཟག་གཉིས་ཀྱིས་ཟླ་བ་གང་བ་ལ་ལྟ་བའི་མིག་ཤེས་གཉིས་ཀྱང་མཚུངས་ལྡན་དུ་ཐལ་བར་འགྱུར་བས་རྟེན་མཚུངས་པའང་སྨོས་ཤིང༌། དེ་གསུམ་ལས་གཞན་མ་སྨོས་ན་མིག་ཤེས་དོན་མཐུན་སྔ་ཕྱི་གཉིས་ཀྱང་མཚུངས་ལྡན་དུ་ཐལ་བར་འགྱུར་བས་དུས་མཚུངས་པའང་སྦྱོར་ཏེ། དེ་བཞི་ལས་གཞན་མ་སྨོས་ན་ཁྲ་བོ་འཛིན་པའི་མིག་ཤེས་རྫས་དུ་མར་འདོད་པའི་ལོག་རྟོག་འབྱུང་བས་དེ་སེལ་བ་ལ་རྫས་མཚུངས་པའང་སྨོས་སོ། །བྱེ་བཤད་ལས་ཀྱང༌། གནས་དང་དམིགས་པ་དང་རྣམ་པ་དང་རྫས་མཚུངས་པ་ཉིད་རྣམས་ལས་སེམས་ཀྱི་རྗེས་སུ་འབྲངས་པའི་ཕྱིར་མཚུངས་པར་ལྡན་པས་ན་མཚུངས་པར་ལྡན་པ་རྣམས་ཞེས་བྱའོ། །ཞེས་པ་ལྟར་རོ། །མཐུན་རྟོགས་ཀྱི་མཚུངས་ལྡན་ནི། མངོན་པ་ཀུན་བཏུས་ལས། མཐུན་པར་རྟོགས་པའི་མཚུངས་པར་ལྡན་པ་གང་ཞེ་ན། སེམས་དང་སེམས་ལས་བྱུང་བའི་ཆོས་རྣམས་དམིགས་པ་གཅིག་ལ་མཐུན་པར་རྟོགས་པའོ། །མཐུན་པར་རྟོགས་པའི་མཚུངས་པར་ལྡན་པ་དེ་ཡང༌། གཞན་གྱི་དངོས་པོ་དང་ཡིན་གྱི་བདག་གི་དངོས་པོས་ནི་མ་ཡིན་ནོ། །མཐུན་པ་གཉིས་ཡིན་གྱི་མི་མཐུན་པ་གཉིས་ནི་མ་ཡིན་ནོ། །དུས་འདྲ་བ་གཉིས་ཡིན་གྱི་དུས་མི་འདྲ་བ་གཉིས་ནི་མ་ཡིན་ནོ། །མཐུན་པའི་ཁམས་དང་ས་བ་གཉིས་ཡིན་གྱི་མི་མཐུན་པའི་ཁམས་དང་ས་བ་གཉིས་ནི་མ་ཡིན་ནོ། །ཞེས་གསུངས་པ་ལྟར་རོ། །སེམས་དང་སེམས་བྱུང་གཉིས་ཀས་གཟུགས་ལ་སོགས་པའི་རྣམ་པ་མཐུན་པར་འཛིན་པས་རྣམ་པ་མཚུངས་པར་བཞག་ཅིང༌། གཟུགས་སོགས་ཀྱི་ངོ་བོའི་རྣམ་པ་དང་ཁྱད་པར་གྱི་རྣམ་པ་མི་འདྲ་བར་འཛིན་པས།མི་མཚུངས་པའི་ཁྱད་པར་ཡང་རྣམ་པར་འཇོག་སྟེ། དཔེར་ན་མིག་གི་རྣམ་ཤེས་ཀྱིས་གཟུགས་ཀྱི་ངོ་བོའི་རྣམ་པ་འཛིན་པ་ན། དེའི་འཁོར་རེག་པས་གཟུགས་ཀྱི་ཁྱད་པར་སྡུག་མི་སྡུག་ལ་སོགས་པའི་རྣམ་པ་འཛིན་ཞིང༌། ཚོར་བས་ཕན་གནོད་ལ་སོགས་པའི་རྣམ་པ་འཛིན་ལ། འདུ་ཤེས་ཀྱིས་ཐ་སྙད་སྣ་ཚོགས་སུ་གདགས་པར་བྱ་བའི་མཚན་མའི་རྣམ་པ་འཛིན་པ་ལྟ་བུའོ། ། དེ་ལྟར་ཡང་ཡིད་ཀྱི་ས་ལས།གང་སྡུག་པ་དང་མི་སྡུག་པ་དང་གཉིས་ཀ་ལས་བཟློག་པའི་མཚན་ཉིད་དེ་རེག་པས་རིག་པར་བྱེད་དོ། །དེ་ཉིད་ལས་གང་ཕན་པ་དང་གནོད་པ་གཉིས་ཀ་ལས་བཟློག་པའི་མཚན་ཉིད་དེ་ཚོར་བས་རིག་པར་བྱེད་དོ། །དེ་ཉིད་ལས་གང་སྐྱེས་པ་དང་བུད་མེད་ལ་སོགས་པའི་ཐ་སྙད་ཀྱི་མཚན་མའི་མཚན་ཉིད་དེ་འདུ་ཤེས་ཀྱིས་རིག་པར་བྱེད་དོ། །ཞེས་གསུངས་ཤིང༌། མཛོད་འགྲེལ་ལས་ཀྱང༌། རྣམ་པ་རེ་རེ་ནས་བྱེ་བྲག་ཏུ་གཅོད་པའི་ཕྱིར་རྣམ་པ་དང་བཅས་པ་རྣམས་སོ། །ཞེས་པ་དང༌། དེའི་འགྲེལ་བཤད་དུ། གང་བ་སྤེལ་གྱིས། རྣམ་པར་ཤེས་པ་སྔོན་པོ་ལ་སོགས་པའི་རྣམ་པ་བྱེ་བྲག་ཏུ་གཅོད་ལ། དམིགས་པ་དེ་ཉིད་ཚོར་བས་མྱོང་ངོ༌། །འདུ་ཤེས་ཀྱིས་ཡོངས་སུ་གཅོད་དོ། །ཞེས་པ་དང༌། རྒྱལ་པོའི་སྲས་ཀྱིས། དམིགས་པའི་དེ་ཉིད་ལ་རྣམ་པར་ཤེས་པས་སྤྱིའི་ངོ་བོར་དམིགས་པར་བྱ་བའི་ཚུལ་དུ་འཛིན་ལ། བྱེ་བྲག་གི་ངོ་བོར་ཚོར་བས་མྱང་བར་བྱ་བའི་ཚུལ་དུ་འཛིན་ཏོ། །འདུ་ཤེས་ཀྱིས་ཡོངས་སུ་གཅོད་པར་བྱ་བའི་ཚུལ་དུ་འཛིན་ཏོ་ཞེས་པ་ལ་སོགས་པ་གསུངས་པ་བཞིན་ནོ། ། གསུམ་པ་སེམས་སེམས་བྱུང་རྫས་ཐ་དད་དུ་བཤད་པ།གསུམ་པ་སེམས་སེམས་བྱུང་རྫས་ཐ་དད་དུ་བཤད་པ་ལ། སློབ་དཔོན་ཟླ་བ་གྲགས་པས་ནི། སེམས་དང་སེམས་བྱུང་རྫས་ཐ་དད་དུ་བཞེད་དེ། ཇི་སྐད་དུ། དབུ་མ་ཕུང་བོ་ལྔ་བར། གཙོ་བོ་སེམས་ནི་སེམས་ལས་བྱུང་བ་མ་ཡིན་པར་ཇི་ལྟར་ཤེས། གང་སེམས་ཀྱི་བྱ་བའི་ངོ་བོ་ལོགས་ཤིག་ཏུ་རང་རྒྱུད་དུ་གྲུབ་པ། སེམས་པ་ཡིད་ཀྱི་ལས་དང༌། དད་པ་སེམས་ཀྱི་དྭངས་པ་དང༌། རྟོག་པ་སེམས་རྩིང་བ་ཞེས་བྱ་བ་ལ་སོགས་པར་བརྗོད་པས། སེམས་ལས་བྱུང་བ་སེམས་ཀྱི་གནས་སྐབས་ནི་མ་ཡིན་ནོ། །ཇི་ལྟར་ཞེ་ན༌། དོན་ཐ་དད་དུ་འགྱུར་བས་སོ་ཞེས་པ་ལ་སོགས་པ་གསུངས་པའི་ཕྱིར་རོ། །འཕགས་པ་ཐོགས་མེད་ཀྱི་བཞེད་པ་ནི། རྣམ་པར་གཏན་ལ་དབབ་པ་བསྡུ་བ་ལས། དགེ་སྦྱོང་དང་བྲམ་ཟེ་ལ་ལ་མིང་ལས་སེམས་ཙམ་ཞིག་རྫས་སུ་འདོད་ལ། སེམས་ལས་བྱུང་བའི་ཆོས་རྣམས་ནི་མི་འདོད་པ་གང་དག་ཡོད་པ་དེའང་མི་འཐད་དོ། །ཞེས་པ་ལ་སོགས་པ་རྒྱས་པར་གསུངས་ནས། བསྡུས་པ་ནི། ལྔ་ཉིད་འཐད་པ་མེད་ཕྱིར་དང༌། །དེ་ཡི་གནས་སྐབས་སྐྱོན་ཕྱིར་དང༌། །བྱེད་རྒྱུ་བྱེ་བྲག་མེད་ཕྱིར་དང༌། །ལུང་དང་འགལ་བར་འགྱུར་ཕྱིར་རོ། །ཞེས་སེམས་ལས་བྱུང་བ་རྫས་སུ་མེད་ན་ཚོར་བ་འདུ་ཤེས་འདུ་བྱེད་གསུམ་རྣམ་ཤེས་སུ་འདུས་པས་ཕུང་བོ་ལྔའི་རྣམ་གཞག་མི་འཐད་པར་ཐལ་བའི་ཕྱིར་དང༌། ཅི་སྟེ་གནས་སྐབས་ཀྱི་བྱེ་བྲག་ལས་ལྔར་རྟོག་ན། གནས་སྐབས་དེ་དག་ཕན་ཚུན་བྱེད་ལས་ཐ་དད་ཡོད་ན་ནི་མཚན་ཉིད་མི་འདྲ་བས་རྫས་ཐ་དད་དུ་གྲུབ་ཅིང༌། མེད་ན་ཡང་གནས་སྐབས་ཐ་དད་དུ་བརྟག་པ་དོན་མེད་པའི་སྐྱོན་ཅན་དུ་འགྱུར་བའི་ཕྱིར་དང༌། སྐད་ཅིག་གཅིག་ལ་གནས་སྐབས་སྣ་ཚོགས་སུ་འགྱུར་བའི་བྱེད་རྒྱུ་ཁྱད་པར་ཅན་མེད་པའི་ཕྱིར་དང༌། ལུང་ལས། འདོད་ཆགས་དང་ཞེ་སྡང་དང་གཏི་མུག་གིས་ཉེ་བར་ཉོན་མོངས་ཅན་དུ་གྱུར་པའི་སེམས་ནི་རྣམ་པར་གྲོལ་ལོ་ཞེས་གསུངས་ཤིང༌། གཅིག་ལ་ནི་འཆིང་བྱ་འཆིང་བྱེད་གཉིས་མ་གྲུབ་པས་དེ་དག་འགལ་བའི་ཕྱིར་དང༌། ཡང་ལུང་ལས། ལྷན་ཅིག་སྐྱེས་པའི་ཚོར་བ་དང་འདུ་ཤེས་དང་སེམས་པ་ཞེས་གསུངས་ཤིང༌། གཅིག་ལ་ནི་ལྷན་ཅིག་དང་འདྲེས་པ་ལ་སོགས་པའི་སྒྲ་མི་རུང་བས་དེ་དག་འགལ་བར་འགྱུར་བའི་ཕྱིར་རོ། །གཞན་ཡང་རྫས་གཅིག་ཡིན་ན་མཚུངས་ལྡན་གྱི་རྒྱུ་འབྲས་མ་ཡིན་པར་ཐལ་བའི་ཕྱིར་དང༌།སེམས་ཉོན་མོངས་པ་རྣམས་དང་ངོ་བོ་གཅིག་པ་ཡིན་ན། ངོ་བོ་ཉིད་ནི་སྤང་དུ་མི་རུང་བས། གཏན་རྣམ་པར་མི་འདག་པའི་ཡང་སྐྱོན་དུ་ཐལ་བར་འགྱུར་བའི་ཕྱིར་སེམས་དང་སེམས་ལས་བྱུང་བ་རྣམས་རྫས་ཐ་དད་དུ་གསུངས་སོ། །འདི་དག་ནི་ས་བཟང་གི་མངོན་པ་ཀུན་བཏུས་ཀྱི་འགྲེལ་བ་ཤེས་བྱ་རབ་གསལ་སྣང་བའི་གསུང་ཟིན་ཇི་ལྟ་བ་བཞིན་བཤད་པ་ཡིན་ལ། རྒྱས་པར་དེར་ཤེས་པར་བྱའོ། །སྤྱིར་བཤད་པའི་རྣམ་གྲངས་མང་པས་བཤད་ཟིན་པ་དང་འཆད་པར་འགྱུར་བའི་དགག་སྒྲུབ་ཀྱི་སྐབས་མང་པོར་རང་གཞན་གྱི་བཤད་པའི་རྣམ་གྲངས་ལ་མཁས་པས་ཤེས་རབ་འཕེལ་བའི་ཆེད་དུ་ཤེས་དགོས་པ་ཡིན་གྱི། འདི་ནི་བདེན་གྱི་གཞན་ནི་གཏི་མུག་གོ་ཞེས་བྱ་བར་ནི་མཐའ་གཅིག་ཏུ་མི་གཟུང་ཞིང༌། གང་ལུང་རིགས་དང་མཐུན་པ་དེ་ཉིད་འཐད་ལྡན་དུ་གཟུང་བར་བྱའོ། ། བཞི་བ་སེམས་དང་སེམས་བྱུང་གི་དབྱེ་བ་བཤད་པ།བཞི་བ་སེམས་དང་སེམས་བྱུང་གི་དབྱེ་བ་བཤད་པ་ལ། སེམས་ཀྱི་དབྱེ་བ་དང༌། སེམས་བྱུང་གི་དབྱེ་བ་བཤད་པ་དང་གཉིས། དང་པོ་ལ་རྒྱན་སྟུག་པོ་བཀོད་པའི་མདོ་ལས་ཀྱང༌། སེམས་ནི་ཀུན་གཞིའི་རྣམ་ཤེས་དེ། །དེ་ལ་ངར་འཛིན་ཡིད་ཡིན་ནོ། །ཡུལ་ལ་རྣམ་པར་རིག་པ་གང༌། །དེ་ནི་འཇུག་པའི་རྣམ་ཤེས་འདོད། །ཅེས་གསུངས་པ་ལྟར་ཀུན་གཞིའི་རྣམ་ཤེས་བཤད་པ། ཉོན་ཡིད་བཤད་པ། འཇུག་ཤེས་དྲུག་བཤད་པ་དང་གསུམ། དང་པོ་ཀུན་གཞི་རྣམ་པར་ཤེས་པ་ཉིད་འཆད་པ་ལ། མཚན་ཉིད་དང༌། དེའི་དོན་དང༌། ཀུན་གཞིའི་བག་ཆགས་དང༌། སྒོ་བྱེད་བཤད་པ་དང་བཞི། དང་པོ་མཚན་ཉིད་ནི། ཐེག་བསྡུས་སུ། མདོར་བསྡུ་ན་ཀུན་གཞིའི་རྣམ་པར་ཤེས་བའི་ངོ་བོ་ཉིད་ནི་སྨིན་པའི་རྣམ་པར་ཤེས་པའི་ས་བོན་ཐམས་ཅད་པ་སྟེ་དེས་ཁམས་གསུམ་པའི་ལུས་ཐམས་ཅད་དང་འགྲོ་བ་ཐམས་ཅད་བསྡུས་སོ་ཞེས་པ་ལྟར། རྣམ་སྨིན་དང་ས་བོན་ཐམས་ཅད་ཇི་ལྟར་རིགས་པར་བརྟེན་ཞིང་དོན་གྱི་ངོ་བོ་རིག་པ། ཀུན་གཞིའི་རྣམ་ཤེས་ཀྱི་མཚན་ཉིད་ཡིན་ཏེ། སུམ་བཅུ་བར་ཡང༌། དེ་ལ་ཀུན་གཞིའི་རྣམ་ཤེས་ནི། །རྣམ་སྨིན་ས་བོན་ཐམས་ཅད་པར། །ཞེས་པ་ལྟར་རོ། །གཉིས་པ་དེའི་དོན་བཤད་པ་ལ། ས་བོན་ཐམས་ཅད་པའི་དོན་ཡང་ཆོས་ཐམས་ཅད་ཀྱི་ས་བོན་གྱི་གནས་ཡིན་པས་སྤྱི་རིགས་ནས་ཚང་བ་ལ་བྱའོ། །དེའི་དོན་གཏན་ལ་དབབ་པ་ནི། བསྡུ་བར་གསུངས་པ་ལྟར། ནང་ཉེ་བར་ལེན་པ་དང༌། ཕྱི་རོལ་གནས་སྣོད་ཀྱི་འཇིག་རྟེན་ལ་དམིགས་ནས། རྣམ་པ་མི་གསལ་ཞིང་ཆ་ཕྲ་བས་ཡུལ་སྣང་བར་ནུས་ཙམ་པ། གྲོགས་ཀུན་འགྲོ་ལྔ་ཁོ་ན་དང་མཚུངས་པར་ལྡན་ཞིང་ཁྱད་པར་ཚོར་བ་བཏང་སྙོམས་ཁོ་ན་ཅན། ངོ་བོ་ཐར་བ་ཐོབ་པ་ལ་མ་བསྒྲིབས་ཤིང༌། དགེ་མི་དགེར་ལུང་དུ་མ་བསྟན་པ། དུས་འཁོར་བ་ཇི་སྲིད་དུ་རྒྱུན་མི་ཆད་པར་འབྱུང་བ་སྟེ། སུམ་བཅུ་པར་ཡང༌། དེ་ནི་ལེན་པ་དག་དང་གནས། །རྣམ་པར་རིག་པ་མི་རིག་པ། །རྟག་ཏུ་རེག་དང་ཡིད་བྱེད་དང༌། །རིག་དང་འདུ་ཤེས་སེམས་པར་ལྡན། །དེ་ལ་ཚོར་བ་བཏང་སྙོམས་ཏེ། །དེ་ནི་མ་བསྒྲིབས་ལུང་མ་བསྟན། །རེག་ལ་སོགས་པའང་དེ་བཞིན་ནོ། །དེ་ནི་རྒྱུན་འབབ་ཆུ་བོ་བཞིན། །ཞེས་པ་ལྟར་རོ། །གསུམ་པ་ཀུན་གཞི་བག་ཆགས་ནི། ཐེག་བསྡུས་སུ། བརྟན་ལུང་མ་བསྟན་ལྷན་ཅིག་འབྱུང༌། །སྒོ་བར་བྱེད་དང་འབྲེལ་བ་ལ། །སྒོ་བྱེད་དེ་ལས་གཞན་དུ་མིན། །འདི་ནི་བག་ཆགས་མཚན་ཉིད་དོ། །ཞེས་པ་ལྟར་རོ། །བཞི་བ་བག་ཆགས་སྒོ་བྱེད་ནི།བསྒོ་བྱ་ལ་ནུས་པ་རྗེས་སུ་འཇུག་ཏུ་རུང་བ་ཚོགས་བདུན་མཚུངས་ལྡན་དང་བཅས་པས་བསྒོ་སྟེ། ཚོགས་དྲུག་ཟག་བཅས་དགེ་མི་དགེས་རྣམ་སྨིན་དང་རྒྱུ་མཐུན་གཉིས་ཀའི་བག་ཆགས་འཇོག་ཅིང༌། ལུང་མ་བསྟན་དང་ཉོན་ཡིད་ཀྱིས་རྒྱུ་མཐུན་གྱི་བག་ཆགས་འཇོག་པར་བྱེད་དོ། །གཉིས་པ་ཉོན་ཡིད་ཀྱི་མཚན་ཉིད་སོགས་བཤད་པ་ནི། ཀུན་གཞི་རྣམ་ཤེས་ལ་དམིགས་ནས་ངར་སེམས་པའི་རྣམ་པ་ཅན་འཁོར་ཉོན་མོངས་བ་བཞི་དང་འགྲོགས་པའི་གཙོ་སེམས་དེ། ཉོན་ཡིད་ཀྱི་མཚན་ཉིད། མཚན་གཞི་ནི། ཀུན་གཞི་ལ་དམིགས་ནས་ངར་སེམས་པའི་སོ་སྐྱེས་ཀྱི་རྒྱུད་ལ་རྟག་ཏུ་འབྱུང་བའི་གཙོ་སེམས་དེའོ། ། འཇུག་ལྡོགའཇུག་ལྡོག་ནི། གནས་སྐབས་གསུམ་མ་གཏོགས་པར་ཀུན་གཞི་ལ་དམིགས་ནས་རྒྱུན་ལྡན་དུ་འབྱུང་ཞིང༌། ས་བརྒྱད་པ་ལ་གནས་གྱུར་པས་ལྡོག་སྟེ། རྒྱན་ལས། ཡིད་དང་འཛིན་དང་རྣམ་པར་རྟོག །གྱུར་ཕྱིར་རྣམ་པར་མི་རྟོག་དང༌། །ཞེས་པ་ལྟར་རོ། །སངས་རྒྱས་ས་གནས་གྱུར་མཐར་ཐུག་པ་མཉམ་ཉིད་ཀྱི་ཡེ་ཤེས་སུ་འགྱུར་ཏེ། ཉོན་མོངས་ཅན་ཡིད་གནས་གྱུར་བ། །མཉམ་ཉིད་ཡེ་ཤེས་བརྗོད་པར་བྱ། །ཞེས་པ་ལྟར་རོ། ། བྱེད་ལས་ནི། ཡིད་ཤེས་ཀྱིས་བདག་རྐྱེན་བྱེད་ཅིང༌། ཚོགས་དྲུག་མཚན་མ་ལ་འཆིང་བའི་གནས་བྱས་ནས་ཟག་བཅས་སུ་འཆིང་བ་དང༌། ཀུན་གཞི་ལ་ས་བོན་འདེབས་པར་བྱེད་དེ། ལང་ཀར་གཤེགས་པ་ལས། སེམས་ནི་རང་བཞིན་དྭངས་བ་སྟེ། །རྙོག་པ་མེད་པ་ཡིད་ཡིན་ནོ། །རྣམ་པར་ཤེས་དང་བཅས་པའི་ཡིད། །རྟག་ཏུ་བག་ཆགས་འདེབས་པར་བྱེད། །ཅེས་གསུངས་པ་ལྟར་རོ། །གསུམ་པ་འཇུག་ཤེས་དྲུག་བཤད་པ་ལ། ཡིད་ཀྱི་སར། ངོ་བོ་ཉིད་དང་གནས་དང་ནི། །དམིགས་པ་དག་དང་གྲོགས་རྣམས་དང༌། །ལས་ཏེ་སྒོ་ནི་ལྔ་པོ་ཡིས། །སེམས་ནི་ཡུལ་ལ་འཇུག་པར་བྱེད། །ཅེས་པ་ལྟར་ལྔ་ལས། དང་པོ་ངོ་བོ་ཉིད་དམ་མཚན་ཉིད་ནི། རང་ཡུལ་གཟུགས་སོགས་ལ་སོ་སོར་འཇུག་པའི་རྒྱུན་མི་བརྟན་པར་གྱུར་པའི་གཙོ་སེམས་དེ། འཇུག་ཤེས་ཀྱི་མཚན་ཉིད། འཇུག་ཤེས་དྲུག་སོ་སོའི་མཚན་ཉིད་ནི། རང་གི་ཐུན་མོང་མ་ཡིན་པའི་བདག་རྐྱེན་མིག་དབང་ལ་དངོས་སུ་བརྟེན་ནས་རང་ཡུལ་ཀྱི་གཟུགས་ཀྱི་སྐྱེ་མཆེད་ཀྱི་ངོ་བོ་འཛིན་པའི་རྣམ་ཤེས་དེ། མིག་གི་རྣམ་པར་ཤེས་པའི་མཚན་ཉིད། བདག་རྐྱེན་མིག་གི་དབང་པོ་ལ་དངོས་སུ་བརྟེན་ཅིང་ཞེས་པས་རྣམ་ཤེས་གཞན་སེལ་ལ། དམིགས་རྐྱེན་གཟུགས་ཀྱི་ངོ་བོ་ལ་དམིགས་ནས་ཞེས་པས་མཚུངས་ལྡན་གྱི་སེམས་བྱུང་སེལ་ཞིང༌། ངོ་བོ་ཉིད་ནི་རང་གི་ཡུལ་གཞན་དང་མ་འདྲེས་པར་སོ་སོར་རྣམ་པར་རིག་པའོ། །ཞེས་པ་སྟེ་རྣམ་པར་རིག་པ་ནི་འཛིན་པ་དང་རྟོགས་པ་དང་ཁོང་དུ་ཆུད་པའི་དོན་ཏོ། །རང་གི་ཐུན་མོང་མ་ཡིན་པའི་བདག་རྐྱེན་རྣ་བའི་དབང་པོ་ལ་དངོས་སུ་བརྟེན་ཅིང་རང་ཡུལ་གྱི་སྒྲ་འཛིན་པའི་རྣམ་ཤེས་དེ། རྣ་བའི་རྣམ་ཤེས་ཀྱི་མཚན་ཉིད། རང་གི་ཐུན་མོང་མ་ཡིན་པའི་བདག་རྐྱེན་སྣ་དབང་ལ་དངོས་སུ་བརྟེན་ཅིང་རང་ཡུལ་གྱི་དྲི་འཛིན་པའི་རྣམ་ཤེས་དེ། སྣའི་རྣམ་ཤེས་ཀྱི་མཚན་ཉིད། རང་གི་ཐུན་མོང་མ་ཡིན་པའི་བདག་རྐྱེན་ལྕེའི་དབང་པོ་ལ་དངོས་སུ་བརྟེན་ཅིང་རང་ཡུལ་གྱི་རོ་འཛིན་པའི་རྣམ་ཤེས་དེ། ལྕེའི་རྣམ་ཤེས་ཀྱི་མཚན་ཉིད། རང་གི་ཐུན་མོང་མ་ཡིན་པའི་བདག་རྐྱེན་ལུས་དབང་ལ་དངོས་སུ་བརྟེན་ཅིང་རང་ཡུལ་གྱི་རེག་བྱ་འཛིན་པའི་རྣམ་ཤེས་དེ། ལུས་ཀྱི་རྣམ་ཤེས་ཀྱི་མཚན་ཉིད། རང་གི་ཐུན་མོང་མ་ཡིན་པའི་བདག་རྐྱེན་ཡིད་དབང་ལ་དངོས་སུ་བརྟེན་ཅིང་རང་ཡུལ་དེ་འཛིན་པའི་རྣམ་ཤེས་དེ། ཡིད་ཀྱི་རྣམ་ཤེས་ཀྱི་མཚན་ཉིད་དོ། །དེ་དྲུག་གི་ངོ་བོ་ལུང་མ་བསྟན་ཡིན་ཡང་གྲོགས་ཀྱི་དབང་གིས་དགེ་མི་དགེ་ལུང་མ་བསྟན་གསུམ་ཀ་སྐྱེ་རུང་ངོ༌། །གཉིས་པ་གནས་ནི། ཐམས་ཅད་ཀྱིའང་ས་བོན་གྱི་གནས་ཀུན་གཞིའི་རྣམ་པར་ཤེས་པ་དང༌། དེ་མ་ཐག་པའི་གནས་འགགས་མ་ཐག་པའི་ཡིད་དང༌། སྒོ་ལྔའི་ལྷན་ཅིག་འབྱུང་བའི་གནས་རང་རང་གི་དབང་པོ་དང༌། ཡིད་ཤེས་ཀྱི་ལྷན་ཅིག་འབྱུང་བའི་གནས་ཉོན་ཡིད་དང༌། དགེ་མི་དགེར་བྱེད་པའི་གནས་འཁོར་སེམས་ལས་བྱུང་བ་རྣམས་དང༌། མཚན་མ་ལ་འཆིང་བའི་གནས་ནི་ཉོན་ཡིད་དོ། །གསུམ་པ་དམིགས་པ་ནི། གཟུགས་ལ་སོགས་པ་ཡུལ་དྲུག་གོ ། བཞི་པ་གྲོགས་ནི། ཀུན་འགྲོ་ལྔ་ལ་སོགས་པའི་སེམས་བྱུང་རྣམས་ཏེ། གང་གི་གྲོགས་སུ་གང་འབྱུང་བ་ནི་མངོན་པ་གོང་འོག་ལས་ཤེས་པར་བྱའོ། །ལྔ་བ་བྱེད་ལས་ནི། ཐམས་ཅད་ཀྱིས་རང་རང་གི་ཡུལ་འཛིན་པར་བྱེད་ལ། སྒོ་ལྔས་དགེ་བ་དང་ཉོན་མོངས་པ་ཅན་གྱི་རྗེས་སུ་འཇུག་པ་དང༌། ལས་ཀུན་ནས་སློང་བའི་རྗེས་སུ་འཇུག་ཅིང༌། སྡུག་མི་སྡུག་གི་རྗེས་སུ་འཇུག་པར་བྱེད་དོ། ། གཉིས་པ་སེམས་བྱུང་གི་དབྱེ་བ་བཤད་པ།གཉིས་པ་སེམས་བྱུང་གི་དབྱེ་བ་བཤད་པ་ལ། ཀུན་འགྲོ་ལྔ་དང༌། ཡུལ་ངེས་ལྔ་དང༌། དགེ་བ་བཅུ་གཅིག་དང༌། རྩ་ཉོན་དྲུག་དང༌། ཉེ་ཉོན་ཉི་ཤུ་དང༌། གཞན་འགྱུར་བཞི་བཤད་པ་དང་དྲུག དང་པོ་ཀུན་འགྲོ་ལྔ་བཤད་པ་ལ་ལྔ་ལས། དང་པོ་ཚོར་བ་ནི། རང་ཡུལ་གྱི་སིམ་གདུང་བར་མ་ཅི་རིགས་འཛིན་པའི་སེམས་བྱུང་དེ། ཚོར་བའི་མཚན་ཉིད། དེའི་དམིགས་པ་ནི། ཚོར་བ་ཀུན་འགྲོ་ཡིན་པའི་ཕྱིར་སྤྱི་རིགས་ནས་ཆོས་ཐམས་ཅད་དེ། རྣམ་པ་ནི། བརྒྱད་སྟོང་འགྲེལ་བར། དམིགས་པ་ལ་འཛིན་པའི་བྱེ་བྲག་ཉིད་ནི་རྣམ་པའོ། །ཞེས་གསུངས་པ་ལྟར་ཤེས་པའི་འཛིན་སྟངས་ཏེ་སིམ་པ་དང་གདུང་བ་དང་བཏང་སྙོམས་སུ་སྣང་བའོ། ། དབྱེ་ན། བསམ་གཏན་གསུམ་པ་མ་ཡིན་པའི་ཡིད་ཤེས་དང་མཚུངས་ལྡན་གྱི་སེམས་པ་ཡིད་བདེ་བ་དང༌། དབང་ཤེས་ལྔ་དང་བསམ་གཏན་གསུམ་པའི་ཡིད་ཤེས་དང་མཚུངས་ལྡན་གྱི་སིམ་པ་བདེ་བ་དང༌།རྣམ་ཤེས་ལྔ་དང་མཚུངས་ལྡན་གྱི་གདུང་བ་སྡུག་བསྔལ་དང༌། ཡིད་ཤེས་དང་མཚུངས་ལྡན་གྱི་གདུང་བ་ཡིད་མི་བདེ་བ་དང༌། སིམ་གདུང་གཉིས་ཀ་མེད་པ་བཏང་སྙོམས་དང་ལྔ་སྟེ། མཛོད་ལས། ལུས་ཚོར་སིམ་བ་མ་ཡིན་གང༌། །སྡུག་བསྔལ་དབང་པོའི་སིམ་པ་ནི། །བདེ་བའོ་བསམ་གཏན་གསུམ་པ་ན། །སེམས་ཀྱི་དེ་ནི་བདེ་དབང་པོ། །གཞན་ན་དེ་ཡིད་བདེ་བའོ། །སེམས་ཀྱི་སིམ་པ་མ་ཡིན་གང༌། །ཡིད་མི་བདེ་བའོ་བཏང་སྙོམས་ནི། །བར་མའོ་གཉིས་ཀར་མི་རྟོག་ཕྱིར། །ཞེས་པ་ལྟར་རོ། ། གཉིས་པ་འདུ་ཤེས་ནི། རང་ཡུལ་གྱི་མཚན་མ་འཛིན་པའི་སེམས་བྱུང་དེ། འདུ་ཤེས་ཀྱི་མཚན་ཉིད། དེའི་དམིགས་པ་ནི། སྤྱི་རིགས་ནས་ཆོས་ཐམས་ཅད་དེ་འདིའང་ཀུན་ཏུ་འགྲོ་བ་ཡིན་པའི་ཕྱིར་རོ། །རྣམ་པ་ནི།ཡུལ་གྱི་སྤུ་རིས་མི་འདྲ་བ་སྣ་ཚོགས་རིག་ཅིང་སྣང་བའོ། ། དབྱེ་བ་ནི་གཉིས་ཏེ།འཁོར་བ་རྟག་པ་དང་བདེ་བ་དང་བདག་དང་གཙང་བ་ལ་སོགས་པར་འདུ་ཤེས་པ་ཕྱིན་ཅི་ལོག་དང༌། དེ་ལས་ལྡོག་པ་ལ་སོགས་པར་འདུ་ཤེས་པ་ཕྱིན་ཅི་མ་ལོག་པའོ།། གསུམ་པ་སེམས་བྱུང་སེམས་པ་ནི། རང་ཡུལ་ལ་གཡོ་ཞིང་ཡུལ་དེ་ཡིད་ལ་འཇགས་པར་བྱེད་པའི་རྣམ་པ་ཅན་གྱི་སེམས་བྱུང་དེ། སེམས་བྱུང་སེམས་པའི་མཚན་ཉིད། ཁབ་ལེན་དབང་གིས་ལྕགས་གཡོ་བ་ལྟར་གང་གིས་སེམས་དམིགས་པ་ལ་མངོན་པར་འདུ་བྱེད་ཅིང་སྐུལ་བར་བྱེད་པའི་སེམས་ཀྱི་རྣམ་འགྱུར་ཡིན་ལ། བྱེད་ལས་ནི། ཇི་ལྟར་མངོན་པར་འདུས་བྱས་པ་ལྟར་དད་པ་སོགས་དགེ་བ་དང༌། ཞེ་སྡང་སོགས་མི་དགེ་བ་དང༌། སྤྱོད་ལམ་ཕལ་བ་ལ་སོགས་པ་ལུང་དུ་མ་བསྟན་པའི་ཆོས་རྣམས་ལ་སེམས་གཡོ་ཞིང་འཇུག་པར་བྱེད་པའི་ལས་ཅན་ནོ། ། བཞི་བ་རེག་པ་ནི། ཡུལ་དབང་སེམས་གསུམ་འདུས་ནས་ཡུལ་ལ་འཕྲད་ཅིང་དཔྱོད་པའི་རྣམ་པ་ཅན་གྱི་སེམས་བྱུང་དེ། རེག་པའི་མཚན་ཉིད། དེ་ཡང་ཡུལ་དབང་རྣམ་ཤེས་གསུམ་རྒྱུ་འབྲས་ཀྱི་དངོས་པོར་འདུས་ཤིང་གནས་ནས། བདེ་སོགས་འབྱུང་བ་མཐུན་པའི་དབང་པོའི་འགྱུར་བ་དང་འདྲ་བར་ཡུལ་གྱི་རྣམ་པ་ཡོངས་སུ་གཅོད་ཅིང་རྟོག་པར་བྱེད་པ་སྟེ། མདུང་ཁྱིམ་ལྟར་དེ་དང་ལྷན་ཅིག་དེ་ལས་བྱུང་བའི་ཚོར་བའི་གནས་སམ། རྟེན་བྱེད་པའི་ལས་ཅན་ནོ། །ལྔ་བ་ཡིད་བྱེད་ནི། སེམས་ཀྱི་འཇུག་པ་དམིགས་པ་ལ་སེམས་མངོན་དུ་ཕྱོགས་པར་བྱེད་ཅིང་དམིགས་པ་དེ་ཉིད་ལ་སེམས་ཡང་དང་ཡང་དུ་འཛིན་ཅིང་གཏོད་པར་བྱེད་པའི་སེམས་བྱུང་དེ། ཡིད་བྱེད་ཀྱི་མཚན་ཉིད་ཡིན་ནོ། །ཡིད་ལ་བྱེད་པ་ནི་སྐད་ཅིག་རེ་རེ་འཛིན་ལ། ཏིང་ངེ་འཛིན་ནི་ཡུན་རིང་དུ་འཛིན་པ་ཁྱད་པར་ཡིན་ལ། ཡང་སེམས་པ་ནི་ཡུལ་ལ་གཡོ་བར་བྱེད་པ་རྒྱལ་པོ་བཞེངས་སུ་འཇུག་པ་ལྟ་བུ་སྟེ། ཡིད་ལ་བྱེད་པ་ནི་དམིགས་པ་ལ་ཁྱད་པར་དུ་གཏོད་པ་རྒྱལ་པོ་སྐྱེད་མོས་ཚལ་དུ་ཁྲིད་པ་ལྟ་བུའོ། ། སྤྱིར་སེམས་ལས་བྱུང་བ་རྣམས་ཀྱི་མི་འདྲ་བའི་ཁྱད་པར་ནི་ཤིན་ཏུ་ཕྲ་བས་བརྗོད་པར་དཀའ་སྟེ། མེ་ལོང་དུ། བུར་ཤིང་འོ་མ་བུར་སོགས་ཀྱི། །མངར་བ་ཉིད་ནི་ཁྱད་པར་ཆེ། །དེ་ལྟ་མོད་ཀྱིས་དེ་བརྗོད་པར། །དབྱངས་ཅན་མས་ཀྱང་ནུས་མ་ཡིན། །ཞེས་པ་ལྟར་རོ། ། གཉིས་པ་ཡུལ་ངེས་ལྔ་བཤད་པ་ལ་ལྔ།གཉིས་པ་ཡུལ་ངེས་ལྔ་བཤད་པ་ལ་ལྔ། དང་པོ་འདུན་པ་ནི། མི་འདོད་པ་ལ་འདུན་པ་མེད་པས་དམིགས་ཡུལ་ངེས་པ་ཅན་གང་དང་གང་འདོད་པར་བྱ་བའི་དངོས་པོ་ལ་དམིགས་ནས། རྣམ་པ་ལྟ་བ་དང་ཉན་པ་དང་སེམས་པ་དང་སྒོམ་པ་ལ་སོགས་པ་དེ་དང་དེ་ལྡན་པར་བྱེད་འདོད་ཅིང་དོན་དུ་གཉེར་བའི་སེམས་ཀྱི་རྣམ་འགྱུར་ཉིད་དེ། འདུན་པའི་ངོ་བོ་ཡིན་ལ། གང་ལ་འདུན་པ་དེ་ལ་སྤྲོ་བས་འཇུག་པས་བརྩོན་འགྲུས་རྩོམ་པའི་རྟེན་བྱེད་པའི་ལས་ཅན་ནོ། །འདུན་པ་དང་སྲེད་པ་ལ་ཁྱད་པར་ཅི་ཡོད་ཅེ་ན། སྲེད་པ་ནི་ཆགས་པ་ཡིན་ལ་འདུན་པ་ནི་འདོད་པ་ཙམ་སྟེ། ཆགས་པ་དང་བྲལ་བར་འདོད་པའང་ཡོད་དོ། །གཉིས་པ་མོས་པ་ནི། ཐེ་ཚོམ་ཅན་ལ་མོས་པ་མེད་པས། དམིགས་ཡུལ་ལུང་དང་རིགས་པས་དཔྱད་ན་ཐེ་ཚོམ་མེད་པར་ངེས་པའི་དངོས་པོ་ལ་དམིགས་ནས། རྣམ་པ་ཡུལ་དེ་ཇི་ལྟར་ངེས་པ་བཞིན་མཐའ་གཅིག་ཏུ་འཛིན་པའི་སེམས་བྱུང་དེ། མོས་པའི་ངོ་བོ་ཡིན་ལ། དེ་ནི་རང་གི་གྲུབ་མཐའ་ལས་མི་འཕྲོགས་ཤིང་ཕས་རྒོལ་གྱིས་གཞན་དུ་དྲང་བར་མི་ནུས་པ་ཉིད་ཀྱི་ལས་ཅན་ནོ། །གསུམ་པ་དྲན་པ་ནི། །མ་འདྲིས་པ་ལ་དྲན་པ་མེད་པས། དམིགས་ཡུལ་སྔོན་དུ་འདྲིས་ཤིང་མྱངས་པའི་དངོས་པོ་རྣམས་ལ་དམིགས་ནས། རྣམ་པ་སེམས་ཀྱི་བརྗེད་པ་མེད་པར་སྔོན་བཟུང་བ་རྣམས་ཡང་ཡང་འཆར་བས་བརྗེད་ངས་ཀྱི་གཉེན་པོར་བྱེད་ནུས་པའི་སེམས་བྱུང་དེ། དྲན་པའི་ངོ་བོ་ཡིན་ལ། ཟིན་པ་ཆུད་མི་ཟ་བས་དམིགས་རྣམ་གཞན་ལ་སེམས་རྣམ་པར་མི་གཡེང་བའི་ལས་ཅན་ནོ། །བཞི་བ་ཏིང་ངེ་འཛིན་ནི། མ་བརྟགས་པ་ལ་དེ་མེད་པས། དམིགས་ཡུལ་བདེན་བཞི་དང་སྐྱོན་ཡོན་དང་ཞི་རགས་ལ་སོགས་པའི་རང་དང་སྤྱིའི་མཚན་ཉིད་བརྟག་པར་བྱ་བའི་དངོས་པོ་ལ་དམིགས་ནས། རྣམ་པ་སེམས་རྩེ་གཅིག་ཏུ་གནས་ཤིང་རྣམ་གཡེང་གི་གཉེན་པོ་བྱེད་པ་དེ། ཏིང་ངེ་འཛིན་གྱི་ངོ་བོ་ཡིན་ལ། མཉམ་པར་བཞག་ན་ཡང་དག་པ་ཇི་ལྟ་བ་བཞིན་དུ་ཤེས་པ་འབྱུང་བས་དེའི་རྟེན་བྱེད་བའི་ལས་ཅན་ནོ། །ལྔ་བ་ཤེས་རབ་ནི། མ་བརྟགས་པ་ལ་དེའང་མེད་པས་དམིགས་ཡུལ་བརྟག་ཅིང་དཔྱད་པར་བྱ་བ་ཉིད་ཀྱི་དངོས་པོ་ཤེས་བྱའི་ཆོས་རང་དང་སྤྱིའི་མཚན་ཉིད་འདྲེས་པ་ལྟ་བུ་རྣམས་ལ་དམིགས་ནས། རྣམ་པ་ཡང་དག་པའམ་ལོག་པའམ་དེ་གཉིས་ཀ་མ་ཡིན་པར་རབ་ཏུ་རྣམ་པར་འབྱེད་ཅིང་སོ་སོར་རྟོག་པར་བྱེད་པའི་སེམས་བྱུང་དེ། ཤེས་རབ་ཀྱི་ངོ་བོ་ཡིན་ལ། ཆོས་རྣམ་པར་ཕྱེ་བ་ལས་ངེས་པ་རྙེད་པའི་ཕྱིར་སོམ་ཉིའམ་ཐེ་ཚོམ་ཟློག་པའི་ལས་ཅན་ནོ། ། གསུམ་པ་དགེ་བ་བཅུ་གཅིག་བཤད་པ་ལ་བཅུ་གཅིག།གསུམ་པ་དགེ་བ་བཅུ་གཅིག་བཤད་པ་ལ་བཅུ་གཅིག་ལས། དང་པོ་དད་པ་ནི། དམིགས་ཡུལ་ཡོད་པ་ཉིད་དང༌། ཡོན་ཏན་ཅན་དང༌། ནུས་པ་རྣམས་ལ་རྣམ་པ་གོ་རིམ་བཞིན། མངོན་པར་ཡིད་ཆེས་པ་དང༌། དྭངས་པ་དང༌། འདོད་པ་གང་རུང་གི་རྣམ་པ་ཅན་གྱི་སེམས་བྱུང་དེ། དད་པའི་ངོ་བོ་ཡིན་ལ། ། དེའང་དགེ་སྡིག་ལས་བདེ་སྡུག་འབྱུང་བ་ལ་སོགས་པ་ལས་དང་འབྲས་བུ་མི་བསླུ་བར་ཡོད་པ་ལ་ཐེ་ཚོམ་དང་ལོག་ཤེས་མེད་པར་བདེན་ངེས་སྙམ་པས་བླང་དོར་ལ་འཇུག་པར་འདོད་པ་མངོན་པར་ཡིད་ཆེས་པའི་དད་པ་དང༌། སངས་རྒྱས་དོན་གཉིས་མཐར་ཕྱིན་པ་དང་ཆོས་བདེན་པ་གཉིས་ཟུང་དུ་འཇུག་པ་དང་དགེ་འདུན་ཡེ་ཤེས་གཉིས་དང་ལྡན་པ་ལ་སོགས་པའི་ཡོན་ཏན་ཅན་ལ་རབ་ཏུ་དགའ་ཞིང་ཡོན་ཏན་དང་ལྡན་པར་ཤེས་པས། ནོར་བུ་ཆུ་འདངས་དང་ཕྲད་ན་ཆུ་རྙོག་མ་མེད་པར་འགྱུར་བ་ལྟར་སེམས་ཀྱི་རྙོག་མ་ཉོན་མོངས་པ་མེད་པར་འགྱུར་བ་དང༌། རང་གི་རྒྱུད་ལ་སྤངས་པ་དང་རྟོགས་པའི་ཡོན་ཏན་ཁྱད་པར་ཅན་བསྒྲུབ་པ་ལ་ནུས་པ་ཐོབ་པ་དང་སྒྲུབ་པར་འདོད་པའོ། །འདུན་པ་དང་སྲེད་པའང་དད་པར་འགྱུར་རོ་ཞེ་ན། མི་འགྱུར་ཏེ་འདུན་པ་ནི་དད་པའི་འབྲས་བུ་ཡིན་ཞིང༌། སྲེད་པ་ནི་དགེ་བའི་ཡུལ་ཅན་མ་ཡིན་པའི་ཕྱིར་རོ། །གང་ལ་དད་པ་ཡོད་པ་དེ་ལ་འདུན་པ་འབྱུང་བས་དེའི་རྟེན་བྱེད་པའི་ལས་ཅན་ནོ། །གཉིས་པ་ངོ་ཚ་ཤེས་པ་ནི། ཁོ་བོ་ནི་རིགས་དང་སྡོམ་པ་དང་ཤེས་རྒྱ་ལ་སོགས་པ་ཡོན་ཏན་འདི་ལྟ་བུ་དང་ལྡན་པའི་ཕྱིར་སྡིག་པ་བྱར་མི་རུང་ངོ་ཞེས་བདག་ཉིད་རྒྱུ་མཚན་དུ་བྱས་ནས། དམ་པ་རྣམས་ཀྱིས་སྨད་ཅིང་རྣམ་སྨིན་མི་འདོད་པ་འབྱིན་པ་ཁ་ན་མ་ཐོ་བ་རྣམས་ལ་དམིགས་ནས་རྣམ་པ་འཛེམ་ཞིང་འཇིགས་པར་ལྟ་བས་སེམས་བག་འཁུམས་པའི་སེམས་བྱུང་དེ། ངོ་ཚ་ཤེས་པའི་ངོ་བོ་ཡིན་ལ། དེ་ལྡན་ན་སྒོ་གསུམ་གྱི་ཉེས་པར་སྤྱོད་པ་མི་དགེ་བ་བཅུ་ལ་ཕྱིས་མི་འཇུག་ཅིང་སྔར་བྱས་པའང་སྤོང་བས་ལེགས་པར་སྡོམ་པའི་རྟེན་བྱེད་པའི་ལས་ཅན་ནོ། །གསུམ་པ་ཁྲེལ་ཡོད་པ་ནི། སྡིག་པ་བྱས་ན་གང་ཟག་དམ་པ་རྣམས་ཀྱིས་ཁྲེལ་ཞིང་འཇིག་རྟེན་དུ་གྲགས་པ་ངན་པ་འབྱུང་བ་ནི་མི་རུང་ངོ་ཞེས་གཞན་རྒྱུ་མཚན་དུ་བྱས་ནས་ཁ་ན་མ་ཐོ་བ་ལ་དམིགས་ནས་རྣམ་པ་འཛེམ་ཞིང་བག་འཁུམས་པའི་སེམས་བྱུང་དེ། ཁྲེལ་ཡོད་པའི་ངོ་བོ་ཡིན་ལ། སྔ་མ་བཞིན་དུ་ཉེས་པར་སྤྱོད་པ་ཡང་དག་པར་སྡོམ་པ་དེའི་ལས་ཅན་ནོ། །བཞི་བ་མ་ཆགས་པའི་དགེ་རྩ་ནི། དགག་སྒྲ་ནི་མེད་པ་དང་གཞན་པ་དང་གཉེན་པོ་གསུམ་ལ་འཇུག་པ་ལས། འདིར་ཆགས་པའི་གཉེན་པོ་སྟེ། ཞེ་སྡང་མེད་པ་དང་གཏི་མུག་མེད་པ་དེ་ལའང་དེ་བཞིན་ནོ། །དེས་ན་སྲིད་པ་ནང་ཉེར་ལེན་གྱི་ཕུང་པོ་དང༌། སྲིད་པའི་ཡོ་བྱད་ཟས་གོས་དང་ནོར་ལ་སོགས་པ་ཉེ་བར་མཁོ་བ་རྣམས་ལ་དམིགས་ནས། རྣམ་པ་ཆགས་པ་མེད་ཅིང་ཡིད་འབྱུང་ལ། ཉེས་དམིགས་ཤེས་པས་ཆགས་པ་དང་དངོས་ཀྱི་གཉེན་པོ་བྱེད་པའི་སེམས་བྱུང་དེ། མ་ཆགས་པའི་དགེ་རྩའི་ངོ་བོ་ཡིན་ལ། དེ་ཡོད་ན་ཆགས་པའི་དབང་དུ་གྱུར་བའི་ཉེས་པར་སྤྱོད་པ་ལ་མི་འཇུག་པའི་རྟེན་བྱེད་པའི་ལས་ཅན་ནོ། །ལྔ་བ་ཞེ་སྡང་མེད་པའི་དགེ་རྩ་ནི། དགྲ་བོ་ལ་སོགས་པ་ཡིད་དུ་མི་འོང་བའི་སེམས་ཅན་རྣམས་དང༌། ན་ཚ་ལ་སོགས་པ་རང་རྒྱུད་ཀྱི་ཚོར་བ་སྡུག་བསྔལ་དང༌། དུག་དང་མཚོན་དང་ཚེར་མ་ལ་སོགས་པ་སྡུག་བསྔལ་གྱི་གནས་ཀྱི་ཆོས་སམ། རྒྱུ་རྣམས་ལ་དམིགས་ནས། རྣམ་པ་ཀུན་ནས་མནར་སེམས་པའམ་གནོད་པ་བྱ་བར་སེམས་པ་མེད་པ་བྱམས་པའི་བདག་ཉིད་ཅན་གྱི་སེམས་བྱུང་དེ། ཞེ་སྡང་མེད་པའི་དགེ་རྩའི་ངོ་བོ་ཡིན་ལ། འདིས་ཀྱང་ཞེ་སྡང་གིས་ཀུན་ནས་བསླངས་པའི་ཉེས་པར་སྤྱོད་པ་ལ་མི་འཇུག་པའི་རྟེན་བྱེད་པའི་ལས་ཅན་ནོ། །དྲུག་པ་གཏི་མུག་མེད་པའི་དགེ་རྩ་ནི། གདགས་གཞི་ཤེས་རབ་ལ་བཏགས་པའི་རང་སྤྱིའི་མཚན་ཉིད་ལ་སོགས་ལ་དམིགས་ནས་འཛིན་སྟངས་མི་རྨོངས་ཞིང་སོ་སོར་རྟོགས་ནས་གཏི་མུག་དང་འཛིན་སྟངས་འགལ་བའི་གཉེན་པོ་བྱེད་པའི་སེམས་བྱུང་དེ། གཏི་མུག་མེད་པའི་དགེ་རྩའི་ངོ་བོ་ཡིན་ལ། ཉེས་སྤྱོད་ཀྱི་རྒྱུ་ལ་གཏི་མུག་ཡོད་པས་ཁྱབ་པ་ལ། འདིས་གཏི་མུག་སེལ་བས་ཉེས་པར་སྤྱོད་པ་ལ་མི་འཇུག་པའི་རྟེན་བྱེད་པའི་ལས་ཅན་ནོ། །བདུན་པ་བརྩོན་འགྲུས་ནི། རྒྱན་ལས། དགེ་ལ་ཡང་དག་སྤྲོ་བ་དང༌། །ཞེས་པ་ལྟར་དགེ་བའི་ཆོས་ལ་དམིགས་ནས། རྣམ་པ་སེམས་མངོན་པར་སྤྲོ་བའི་སེམས་བྱུང་དེ། བརྩོན་འགྲུས་ཀྱི་ངོ་བོ་ཡིན་ལ། ཉོན་མོངས་པ་ཅན་ལ་སྤྲོ་བ་ནི་སྨད་པའི་ཕྱིར་ལེ་ལོ་ཉིད་དུ་གསུངས་སོ། །དེ་དང་ལྡན་ན་དགེ་བའི་ཕྱོགས་བསམ་གཏན་གྱི་དངོས་གཞི་ལ་འཇུག་པ་ལྟ་བུ་མ་ཐོབ་པ་ཐོབ་ཅིང་ཡོངས་སུ་རྫོགས་པར་བྱེད་པ་དང༌། དེ་ཉིད་ཡོངས་སུ་སྦྱངས་བར་བྱས་ཏེ་ཐོབ་ཟིན་གོང་ནས་གོང་དུ་གྱ་ནོམ་པར་སྒྲུབ་བའི་ལས་ཅན་ནོ། །བརྒྱད་པ་ཤིན་ཏུ་སྦྱངས་པ་ནི། ལུས་སེམས་གནས་ངན་ལེན་གྱི་གཉེན་པོ་ཡིན་ཞིང༌། ལུས་སེམས་ལས་སུ་རུང་བར་བྱེད་པའི་སེམས་བྱུང་དེ། ཤིན་སྦྱངས་ཀྱི་ངོ་བོ་ཡིན་ལ། དེས་ནི་གནས་ངན་ལེན་གནས་གྱུར་པར་བྱེད་པས་ཉོན་མོངས་པ་ལ་སོགས་པའི་སྒྲིབ་པ་ཐམས་ཅད་སེལ་བའི་ལས་ཅན་ནོ། །དགུ་བ་བག་ཡོད་ནི། གདགས་གཞི་དགེ་རྩ་གསུམ་དང་བརྩོན་འགྲུས་གང་རུང་ལ་བཏགས་ཞིང་རང་ཡུལ་དགེ་བ་དང་ཉོན་མོངས་དང་དེ་དག་སྐྱེ་བའི་ཡུལ་ཅི་རིགས་ལ་དམིགས་ནས་རྣམ་པ་དགེ་བ་གཅེས་སྤྲས་བྱེད་ཅིང་ཉོན་མོངས་ལ་སེམས་བསྲུང་ཞིང་བག་ཡངས་སུ་མི་གཏོང་བར་བྱེད་པའི་སེམས་བྱུང་དེ། བག་ཡོད་ཀྱི་ངོ་བོ་ཡིན་ལ། དགེ་བའི་ཆོས་གོང་འཕེལ་དུ་བྱེད་པའི་ལས་ཅན་ནོ། །བཅུ་བ་བཏང་སྙོམས་ནི། གདགས་གཞི་དགེ་རྩ་གསུམ་དང་བརྩོན་འགྲུས་གང་རུང་ཞིག་ལ་གནས་ཤིང་རྟེན་བཅས་ནས་བྱིང་རྒོད་ལ་སོགས་པ་ཀུན་ནས་ཉོན་མོངས་པ་ཅན་དུ་གནས་པ་སོགས་ལ་དམིགས་ནས་རྣམ་པ་དེ་དང་མི་མཐུན་ཞིང་སེམས་རྣལ་དུ་གནས་པས་དེ་དག་སྤོང་བར་བྱེད་པའི་སེམས་བྱུང་དེ། བཏང་སྙོམས་ཀྱི་ངོ་བོ་ཡིན་ལ། དེ་ནི་ཀུན་ནས་ཉོན་མོངས་པ་དང་མི་མཐུན་པའི་ཕྱིར་དེ་རྒྱུད་ལ་སྐྱེ་བའི་གོ་སྐབས་མི་འབྱེད་པའི་རྟེན་བྱེད་པའི་ལས་ཅན་ནོ། །བཅུ་གཅིག་པ་རྣམ་པར་མི་འཚེ་བ་ནི། གདགས་གཞི་ཞེ་སྡང་མེད་པའི་ཆར་གཏོགས་ཤིང་རང་ཡུལ་སྡུག་བསྔལ་ཅན་གྱི་སེམས་ཅན་ལ་དམིགས་ནས་སྡུག་བསྔལ་དེ་མི་བཟོད་པར་འབྲལ་བར་འདོད་པའི་སྙིང་རྗེ་བའི་རྣམ་པ་ཅན་གྱི་སེམས་བྱུང་དེ། རྣམ་པར་མི་འཚེ་བའི་ངོ་བོ་ཡིན་ལ། ངེས་ཚིག་ནི། ཀ་རུ་ཎའི་ཀཾ་བདེ་བ་དང༌། རུ་ཎད་དྷི་འགོག་པ་ཞེས་པས། གཞན་གྱི་སྡུག་བསྔལ་གྱི་ཁྱད་པར་མཐོང་ན་མི་བཟོད་ཅིང་རང་གི་བདེ་བ་འགོག་ནུས་པ་སྙིང་རྗེ་བའི་སེམས་ཉིད་དེ། རྣམ་པར་འཚེ་བའི་གཉེན་པོ་ཡིན་པས་གཞན་གྱི་ལུས་དང་ལོངས་སྤྱོད་ལ་ཐོ་མི་འཚམ་པའི་ལས་ཅན་ནོ། ། བཞི་བ་རྩ་ཉོན་བཤད་པ་ལ་དྲུག།བཞི་བ་རྩ་ཉོན་བཤད་པ་ལ་དྲུག་ལས། དང་པོ་འདོད་ཆགས་ནི། ཁམས་གསུམ་ན་ཡོད་པའི་ལུས་དང་ལོངས་སྤྱོད་གང་རུང་ལ་དམིགས་ནས། རྣམ་པ་དེ་སྣང་ཞིང་རིག་པས་རྗེས་སུ་ཆགས་ཤིང་ཞེན་པ་མཆེད་ནས་འབྲལ་དཀའ་བར་གྱུར་པའི་སེམས་བྱུང་དེ། འདོད་ཆགས་ཀྱི་ངོ་བོ་ཡིན་ལ། དེ་ནི་ཆགས་ཤིང་སྲེད་པའི་དབང་གིས་སྡུག་བསྔལ་གསུམ་དང་ལྡན་པའི་ཉེར་ལེན་གྱི་ཕུང་པོ་འགྲུབ་པས་དེ་སྐྱེད་པའི་ལས་ཅན་ནོ། །རྣམ་འགྲེལ་ལས་ཀྱང༌། བདག་ལ་ཆགས་པ་དང་ལྡན་པའི། །བདེ་སྡུག་དོར་ཐབས་འདོད་པ་ཡིས། །སེམས་ཅན་གཞན་གྱིས་བཀྲི་མིན་པ། །དམན་པའི་གནས་ནི་ཡོངས་སུ་ལེན། །ཞེས་པ་ལྟར་རོ། །གཉིས་པ་ཁོང་ཁྲོ་བ་ནི། མི་མཐུན་པའི་སེམས་ཅན་རྣམས་དང༌། རང་རྒྱུད་ཀྱི་སྡུག་བསྔལ་དང༌། མཚོན་ཆ་ལ་སོགས་པ་སྡུག་བསྔལ་གྱི་གནས་ཀྱི་ཆོས་རྣམས་ལ་དམིགས་ནས། རྣམ་པ་ཀུན་ནས་མནར་ཞིང་གནོད་པ་བྱ་བར་སེམས་པའི་སེམས་བྱུང་དེ། ཞེ་སྡང་གི་ངོ་བོ་ཡིན་ལ། ཞེ་སྡང་ཟུག་རྔུའི་སེམས་འཆད་ན། །ཡིད་ནི་ཞི་བ་ཉམས་མི་མྱོང༌། །དགའ་དང་བདེ་བ་མི་འཐོབ་ལ། །གཉིད་མི་འོང་ཞིང་བརྟན་མེད་འགྱུར། །ཞེས་པ་ལྟར་རང་ཉིད་རེག་པ་བདེ་བ་དང་ལྷན་ཅིག་མི་གནས་པའི་ལས་ཅན་དང༌། གཞན་དག་གསོད་ཅིང་འཆིང་བ་ལ་སོགས་པ་ཉེས་པར་སྤྱོད་པ་འཕེལ་བའི་རྟེན་བྱེད་པའི་ལས་ཅན་ནོ། །གསུམ་པ་ང་རྒྱལ་ནི། བདག་རྐྱེན་འཇིག་ཚོགས་ལ་ལྟ་བ་ལ་བརྟེན་ནས་འདི་ནི་བདག་གོ །འདི་རྣམས་བདག་གིའོ་ཞེས་རིགས་དང་ལོངས་སྤྱོད་ལ་སོགས་པའི་འབྱོར་བ་ལ་དམིགས་ནས། རྣམ་པ་སེམས་ཁེངས་ཤིང་མཐོ་བས་གཞན་ལས་ལྷག་པར་རློམ་པའི་སེམས་བྱུང་དེ། ང་རྒྱལ་གྱི་ངོ་བོ་ཡིན་ལ། བླ་མ་དང་ཡོན་ཏན་ཅན་རྣམས་ལ་འགྱིང་ཞིང་སྲི་ཞུ་མི་བྱེད་པས་མི་གུས་པ་དང༌། ཁོང་ཁྲོ་ལྟར་དངོས་སུ་སྡུག་བསྔལ་མི་སྐྱེད་ཀྱང༌། ངན་འགྲོར་ང་རྒྱལ་གྱིས་འཁྲིད་ཅིང༌། །མི་ཡི་དགའ་སྟོན་བཅོམ་པ་དང༌། ། གཞན་གྱི་ཟན་ཟའི་བྲན་དང་ནི། །གླེན་དང་མི་སྡུག་ཅན་དུ་འགྱུར། །ཞེས་པ་ལྟར་ཡང་སྲིད་ཕྱི་མ་ལ་སྡུག་བསྔལ་སྣ་ཚོགས་འབྱུང་བའི་རྟེན་བྱེད་པའི་ལས་ཅན་ནོ། །བཞི་པ་མ་རིག་པ་ནི། རིག་པའི་འགལ་ཟླ་གྱུར་བའི་རྨོངས་ཙམ་གྱི་སེམས་བྱུང་དེ། མ་རིག་པའི་ངོ་བོ།རྩ་ཉོན་གྱི་མ་རིག་པ་ནི། རིག་པ་ཤེས་རབ་ཀྱི་མི་མཐུན་པའི་ཕྱོགས་སུ་གྱུར་བའི་ཉོན་མོངས་པ་ཅན་ཀུན་ཏུ་རྨོངས་ཙམ་གྱི་སེམས་བྱུང་དེ། རྩ་ཉོན་གྱི་མ་རིག་པའི་ངོ་བོ་ཡིན་ལ། རྟེན་ཁམས་གསུམ་པ་ལ་ཡོད་ལ། ཀུན་ནས་ཉོན་མོངས་པ་ཐམས་ཅད་འབྱུང་ཞིང་འཕེལ་བའི་རྟེན་བྱེད་པའི་ལས་ཅན་ནོ། །རྣམ་འགྲེལ་ལས་ཀྱང༌། དེ་ཉིད་ཕྱིར་ནི་ཉེས་རྣམས་ཀྱི། །རྒྱུ་ནི་གཏི་མུག་ཡིན་པར་གསུངས། །ཞེས་པ་ལྟར་རོ། །ལྔ་བ་ཐེ་ཚོམ་ནི། དེ་ནི་ཉོན་མོངས་ཅན་མ་ཡིན་པ་ཕྱོགས་འདི་ན་ལྷ་ཡོད་དམ་མེད་སྙམ་པ་ལྟ་བུ་ཤེས་བྱའི་སྒྲིབ་པས་བསྡུས་པའང་ཡོད་པར་ས་བཟང་གི་ཀུན་བཏུས་འགྲེལ་བར་གསུངས་ལ། རྩ་ཉོན་གྱི་ཐེ་ཚོམ་ནི། རང་ཡུལ་ཡིད་གཉིས་སུ་འཇུག་པའི་རྩ་ཉོན་དེ། རྩ་ཉོན་གྱི་ཐེ་ཚོམ་ངོ་བོ་ཡིན་ལ། ཡང་དག་པའི་ཕྱོགས་རྣམས་ལ་སྤྲོ་བས་མི་འཇུག་པའི་རྟེན་བྱེད་པའི་ལས་ཅན་ནོ། །དྲུག་པ་ལྟ་བ་ནི། རྟོག་པའི་བདག་ཉིད་ཀྱི་ཤེས་རབ་ཉོན་མོངས་པ་ཅན་ཏེ། དེ་ཉིད་དམིགས་པ་དང་རྣམ་པ་ཐ་དད་པའི་དབྱེ་བས་ལྔ་ཡོད་པ་ལས། དང་པོ་འཇིག་ཚོགས་ལ་ལྟ་བ་ནི། སཏྐ་ཡ་ཞེས་པའི་སད་ཅེས་པ། ཤཌི་འཇིག་པ་ལའོ་ཞེས་པ་དང༌། ཀཱ་ཡ་ཞེས་པ་ཙི་སོགས་པ་ལའོ། །ཞེས་པའི་བྱིངས་ལས་བསྒྲུབས་པས། འཇིག་ཅིང་མི་རྟག་པ་དུ་མ་འདུས་ཤིང་ཚོགས་པའི་ཉེ་བར་ལེན་པ་དང་བཅས་པའི་ཕུང་པོ་ལྔ་བོ་དག་ལ་དམིགས་ནས་རྣམ་པ་ངོ་བོ་ཉིད་ཀྱི་བདག་གམ་ཕན་འདོགས་བྱེད་ཀྱི་བདག་གིར་རྗེས་སུ་ལྟ་ཞིང་རྣམ་པར་འབྱེད་པའི་སེམས་བྱུང་དེ། འཇིག་ལྟའི་ངོ་བོ་ཡིན་ལ། དེའང་རང་རྒྱུད་དུ་གྱུར་པ་ལ་བདག་དང༌། གཞན་རྒྱུད་དུ་གྱུར་བ་དང་མ་ཟིན་པ་ལ་བདག་གིར་ལྟ་བ་དང༌། གང་གི་ཚེ་རྣམ་ཤེས་ལ་བདག་ཏུ་ལྟ་བ་དེའི་ཚེ་ཕུང་བོ་གཞན་བཞི་ལ་བདག་གིར་ལྟ་བ་དང༌། གྲངས་ཅན་དང་གཅེར་བུ་དང་སྤྱོད་པ་བ་ལ་སོགས་པ། བདག་ཤེས་རིག་ཏུ་འདོད་པ་ན་མིང་བཞི་ལ་བདག་དང་གཟུགས་ལ་བདག་གིར་ལྟ་བ་དང༌། བྱེ་བྲག་པ་ལ་སོགས་པ་བདག་བེམ་པོར་འདོད་པ་ན་མིག་སོགས་བདག་ཏུ་རློམ་པས་གཟུགས་ལ་བདག་དང་མིང་བཞི་ལ་བདག་གིར་ལྟ་བ་ལ་སོགས་པ་དེ་ཡིན་པར་ས་བཟང་གིས་ཀུན་བཏུས་འགྲེལ་བར་གསུངས་སོ། །ལྟ་བ་ངན་པའི་བྱེ་བྲག་སྣ་ཚོགས་པ་ཐམས་ཅད་འདི་ལ་བརྟེན་ནས་འབྱུང་བས་ལྟ་བ་ཐམས་ཅད་ཀྱི་རྟེན་བྱེད་པའི་ལས་ཅན་ནོ། །ཟག་བཅས་ལ་དམིགས་པའི་ལྟ་བ་ཐམས་ཅད་ཀྱང་འཇིག་ཚོགས་ལ་ལྟ་མོད་ཀྱི། བདག་ལ་འཇིག་ཚོགས་ལས་གཞན་པའི་ཡུལ་མེད་པས་དེ་སྐད་ཅེས་བཤད་དེ། མདོ་ལས། དགེ་སྤྱོང་ངམ་བྲམ་ཟེ་གང་ལ་ལ་དག་བདག་དང་བདག་གིར་ཡང་དག་པར་རྗེས་སུ་ལྟ་བ་དེ་དག་ཐམས་ཅད་ནི་ཉེ་བར་ལེན་པའི་ཕུང་པོ་ལྔ་པོ་འདི་དག་ལ་ལྟ་བ་ཁོ་ནར་ཟད་དོ་ཞེས་པ་ལྟར་རོ། །གཉིས་པ་མཐར་ལྟ་ནི། ཉེར་ཕུང་དང་འཇིག་ལྟས་བཟུང་བའི་བདག་སོགས་ལ་དམིགས་ནས། རྣམ་པ་རྟག་ཆད་གང་རུང་དུ་རྗེས་སུ་ལྟ་བའི་ཤེས་རབ་ཉོན་མོངས་ཅན་གྱི་སེམས་བྱུང་དེ། མཐར་ལྟའི་ངོ་བོ་ཡིན་ལ། མཐའ་གཉིས་དང་བྲལ་བའི་རྟེན་འབྲེལ་ཤེས་པ་དབུ་མའི་ལམ་གྱིས་འཁོར་བ་ལས་ངེས་པར་འབྱུང་བའི་བར་དུ་གཅོད་པའི་ལས་ཅན་ནོ། །གསུམ་པ་ལྟ་བ་མཆོག་འཛིན་ནི། འཇིག་ཚོགས་དང་མཐར་འཛིན་དང་ལོག་ལྟ་ལ་སོགས་པ་ལྟ་བ་ངན་པ་རྣམས་དང༌། ལྟ་བ་དེ་དག་གང་ལས་བྱུང་བའི་གནས་ལྟ་བ་པོའི་ལུས་ཉེ་བར་ལེན་པའི་ཕུང་པོ་ལྔ་པོ་དག་ལ་དམིགས་ནས། རྣམ་པ་མཆོག་ཏུ་འཛིན་པའི་ཤེས་རབ་ཉོན་མོངས་ཅན་དེ། ལྟ་བ་མཆོག་འཛིན་གྱི་ངོ་བོ་ཡིན་ལ། ལྟ་བ་ངན་པ་ལ་ཡོན་ཏན་དུ་འཛིན་པས་མངོན་པར་ཞེན་ཅིང་ཡོངས་སུ་མི་གཏོང་བའི་རྟེན་བྱེད་པའི་ལས་ཅན་ནོ། །བཞི་བ་ཚུལ་ཁྲིམས་བརྟུལ་ཞུགས་མཆོག་འཛིན་གྱི་ལྟ་བ་ནི། ཚུལ་ཁྲིམས་བརྟུལ་ཞུགས་ངན་པ་དང༌། དེ་དག་གང་ལས་འབྱུང་བ་ཉིད་ཀྱི་གནས་ཉེ་བར་ལེན་པའི་ཕུང་པོ་ལྔ་བོ་དག་ལ་དམིགས་ནས། འདག་གྲོལ་འབྱིན་གསུམ་དུ་ལྟ་བའི་ཤེས་རབ་ཉོན་མོངས་ཅན་གྱི་སེམས་བྱུང་དེ། ཚུལ་ཁྲིམས་བརྟུལ་ཞུགས་མཆོག་འཛིན་གྱི་ངོ་བོ་ཡིན་ལ། དེས་ཐར་བའི་ཆེད་དུ་འབད་ཀྱང་ངེས་པར་མི་འབྱུང་བའི་ཕྱིར་ངལ་བ་འབྲས་བུ་མེད་པའི་རྟེན་བྱེད་པའི་ལས་ཅན་ནོ། །ལྔ་བ་ལོག་ལྟ་ནི། ཚེ་སྔ་ཕྱི་དང་ལས་འབྲས་སོགས་ཡོད་པའི་ཆོས་ལ་དམིགས་ནས་རྣམ་པ་དེ་དག་མཐའ་གཅིག་ཏུ་མེད་པར་ལྟ་བའི་ཤེས་རབ་ཉོན་མོངས་ཅན་གྱི་སེམས་བྱུང་དེ། ལོག་ལྟའི་ངོ་བོ་ཡིན་ལ། རྒྱུ་འབྲས་ལ་སྐུར་འདེབས་ཀྱི་ལོག་ལྟ་ནི་དགེ་བའི་རྩ་བ་གཅོད་པའི་ལས་ཅན་དང༌། ཐམས་ཅད་ཀྱང་མི་དགེ་བའི་རྩ་བ་དུག་གསུམ་གྱི་ས་བོན་གསོ་བས་དེ་ཉིད་དམ་དུ་འཛིན་པའི་རྟེན་བྱེད་པའི་ལས་ཅན་དང༌། མི་དགེ་བ་བྱས་ཀྱང་སྐྱོན་མེད་སྙམ་པས་དེ་ལ་འཇུག་པའི་ལས་ཅན་དང༌། དགེ་བ་བྱས་ཀྱང་འབྲས་བུ་མེད་སྙམ་པས་དེ་ལ་མི་འཇུག་པའི་ལས་ཅན་ནོ། །ལྟ་བ་ལྔ་པོ་འདི་དག་ལས་ལྟ་བ་དང་པོ་བཞི་ནི། སྒྲོ་འདོགས་པའི་ལྟ་བ་ཞེས་བྱ་སྟེ་ཤེས་བྱ་ཕུང་པོ་ལྔ་ལ་འཇིག་ཚོགས་ལྟ་བས་བདག་དང་བདག་གི་བའི་ངོ་བོ་ཉིད་དུ་སྒྲོ་འདོགས་པ་དང༌། མཐར་འཛིན་ལྟ་བས་ཁྱད་པར་རྟག་པ་དང་ཆད་པ་ཉིད་དུ་སྒྲོ་འདོགས་པ་དང༌། ལྟ་བ་མཆོག་འཛིན་གྱིས་ལྟ་བ་ངན་པ་ལ་མཆོག་དང་གཙོ་བོ་ལ་སོགས་པར་སྒྲོ་འདོགས་པ་དང༌།ཚུལ་ཁྲིམས་བརྟུལ་ཞུགས་མཆོག་འཛིན་གྱིས་དེ་དག་ལ་འདག་པ་དང་གྲོལ་བའི་རྒྱུར་སྒྲོ་འདོགས་པའི་ཕྱིར། །ལོག་ལྟ་ནི་རྒྱུ་འབྲས་ལ་སོགས་པ་ཡོད་པའི་དངོས་པོ་བསལ་ནས་སྐུར་བ་འདེབས་པའི་ལྟ་བའོ། །འཇིག་ཚོགས་ལ་ལྟ་བ་ཉི་ཤུ་ནི། མདོ་ལས། གཟུགས་བདག་དང་དབྱེར་མེད་ཡིན་པར་ལྟ་བ་དང༌། གཟུགས་བདག་དང་ཐ་དད་དུ་ལྡན་པ་དང༌། གཟུགས་བདག་གིས་དབང་བསྒྱུར་བྱ་ཡིན་པ་དང༌། གཟུགས་ལ་བདག་ཚོགས་པ་གཅིག་ཏུ་གནས་པ་དང༌། དེ་བཞིན་དུ།ཚོར་བ་དང༌། འདུ་ཤེས་དང༌། འདུ་བྱེད་རྣམས་ལའང་སྦྱར་བ་དང༌། མཐར་རྣམ་པར་ཤེས་པ་བདག་ཡིན་པར་ལྟ་བ་དང༌།རྣམ་པར་ཤེས་པ་བདག་དང་ལྡན་པ་དང༌། རྣམ་པར་ཤེས་པ་བདག་གི་ཡིན་པ་དང༌། རྣམ་པར་ཤེས་པ་ལ་བདག་གནས་སོ་ཞེས་བྱ་བ་དང༌། འགའ་ཞིག་ཏུ་འཇིག་ཚོགས་ལ་ལྟ་བའི་རིའི་རྩེ་མོ་ཉི་ཤུ་ཞེས་ཀྱང་འབྱུང་བ་དེ་བསྡུ་ན་གཉིས་སུའང་འདུ་བས། བདག་ཏུ་ལྟ་བ་ནི་དུ་ཡིན། བདག་གིར་ལྟ་བ་ནི་དུ་ཡིན་ཞེ་ན། གཟུགས་བདག་ཡིན་པར་ལྟ་བ་ནས་རྣམ་པར་ཤེས་པ་བདག་ཡིན་པར་ལྟ་བའི་བར་ལྔ་ནི་བདག་ཏུ་ལྟ་བའོ། །དེའང་གཟུགས་སོགས་ཕུང་པོ་ལྔ་དང་བདག་གཞི་མཐུན་དུ་འཛིན་པའི་ཕྱིར་རོ། ། ལྷག་མ་བཅོ་ལྔ་པོ་ཐམས་ཅད་ནི་བདག་གིར་ལྟ་བ་ཞེས་པ་གཅིག་ཏུ་འདུའོ། ། ལྔ་བ་ཉེ་བའི་ཉོན་མོངས་པ་བཤད་པ་ལ་ཉི་ཤུ།ལྔ་བ་ཉེ་བའི་ཉོན་མོངས་པ་བཤད་པ་ལ་ཉི་ཤུ་ལས། དང་པོ་ཁྲོ་བ་ནི། གནོད་པར་བྱེད་པའི་རྒྱུ་སོགས་ལ་དམིགས་ནས་གདགས་གཞི་ཁོང་ཁྲོ་ལ་བཏགས་པ་རྣམ་པ་སེམས་ཀྱིས་ཀུན་ནས་མནར་སེམས་ཞིང་གནོད་པ་བྱ་བར་འདོད་པའི་སེམས་བྱུང་དེ། ཁྲོ་བའི་ངོ་བོ་ཡིན་ལ། བྱེད་ལས་གཞན་ལ་གནོད་པ་སྣ་ཚོགས་ཤོམ་པའི་རྟེན་བྱེད་པའི་ལས་ཅན་ནོ། །གཉིས་པ་འཁོན་འཛིན་ནི། ཁོང་ཁྲོའི་ཆར་གཏོགས་པ་ཁྲོས་པའི་འོག་ཏུ་གནོད་བྱེད་ལ་དམིགས་ནས། རྣམ་པ་ཁོང་ཁྲོའི་རྒྱུན་མི་གཏོང་བར་དམ་དུ་གནོད་པར་བྱེད་འདོད་པའི་སེམས་བྱུང་དེ། འཁོན་འཛིན་གྱི་ངོ་བོ་ཡིན་ལ། མི་བཟོད་པའི་རྟེན་བྱེད་པའི་ལས་ཅན་ནོ། །གསུམ་པ་འཆབ་པ་ནི། གཏི་མུག་གི་ཆར་གཏོགས་པས་མི་དགེ་བ་ལ་དམིགས་ནས་ཁ་ན་མ་ཐོ་བ་ཉེས་ལྟུང་མཁྱུད་ཅིང་སྦེད་པའི་རྣམ་པ་ཅན་གྱི་སེམས་བྱུང་དེ། འཆབ་པའི་ངོ་བོ་ཡིན་ལ། བྱེད་ལས་བདེ་བ་ལ་རེག་པར་མི་གནས་པའི་རྟེན་བྱེད་པའི་ལས་ཅན་ནོ། །བཞི་བ་འཚིག་པ་ནི། གདགས་གཞི་ཁོང་ཁྲོ་འཕེལ་བའི་ཆར་གཏོགས་པ། རྒྱུ་ཁྲོ་བ་དང་ཁོན་དུ་འཛིན་པ་ལས་བྱུང་བས་དེ་དག་སྔོན་དུ་འགྲོ་བའི་ངོ་བོ་སེམས་ཀྱི་ཀུན་ནས་མནར་སེམས་པ་དྲག་པོ་ཚིག་རྩུབ་ཀུན་ནས་སློང་བར་བྱེད་པའི་སེམས་བྱུང་དེ། འཚིག་པའི་ངོ་བོ་ཡིན་ལ། བསོད་ནམས་མ་ཡིན་པ་ངག་གི་ཉེས་སྤྱོད་འཕེལ་བའི་ལས་ཅན་དང༌། འགྲོགས་པར་དཀའ་བས་གྲོགས་བཟང་པོ་དང་ལྷན་ཅིག་དགའ་བ་ལ་རེག་པར་མི་གནས་པའི་ལས་ཅན་ནོ། །ལྔ་བ་ཕྲག་དོག་ནི། གདགས་གཞི་ཞེ་སྡང་གི་ཆར་གཏོགས་པ་རྒྱུ་རྙེད་བཀུར་ལ་ལྷག་པར་ཆགས་ནས། དམིགས་ཡུལ་གཞན་གྱི་རིགས་དང་ལོངས་སྤྱོད་དང་ཚུལ་ཁྲིམས་དང་ཐོས་པ་ལ་སོགས་པ་ཡོན་ཏན་ཕུན་སུམ་ཚོགས་པའི་ཁྱད་པར་ལ། རྣམ་པ་མི་བཟོད་པར་གྱུར་པ་སེམས་ཁོང་ནས་ཁྱབ་པར་འཁྲུགས་པའི་སེམས་བྱུང་དེ། ཕྲག་དོག་གི་ངོ་བོ་ཡིན་ལ། གཞན་གྱི་ལེགས་པའི་ཡོན་ཏན་ལ་ཡིད་མི་བདེ་བ་དང༌། དེའི་དབང་གིས་རང་ཉིད་བདེ་བ་ལ་རེག་པར་མི་གནས་པའི་ལས་ཅན་ནོ། །དྲུག་པ་སེར་སྣ་ནི། གདགས་གཞི་འདོད་ཆགས་ཀྱི་ཆར་གཏོགས་པ་རྒྱུ་རྙེད་པ་དང་བཀུར་སྟི་ལ་ལྷག་པར་ཆགས་ནས། དམིགས་ཡུལ་རང་གི་ཟས་དང་ནོར་ལ་སོགས་པའི་ཡོ་བྱད་རྣམས་ལ།རྣམ་པ་སེམས་ཀྱིས་ཀུན་ཏུ་འཛིན་ཞིང་གཏོང་མི་ཕོད་པར་གྱུར་པའི་སེམས་བྱུང་དེ། སེར་སྣའི་ངོ་བོ་ཡིན་ལ། དེས་ཡོ་བྱད་མཁོ་བ་མ་ཟད་མི་མཁོ་བ་རྣམས་ཀྱང་བསགས་པས་མ་བསྙུངས་ཤིང་འཕེལ་བའི་རྟེན་བྱེད་པའི་ལས་ཅན་ནི་སྐྱེས་བུ་བྱེད་པའི་འབྲས་བུ་ཡིན་ནོ། །རྣམ་སྨིན་གྱི་འབྲས་བུ་ནི། སེར་སྣ་ཅན་ནི་ཡི་དྭགས་གནས་སུ་སྐྱེ་བར་འགྱུར། ཅི་སྟེ་མིར་སྐྱེས་ན་ཡང་དེ་ཚེ་དབུལ་པོར་འགྱུར། །ཞེས་པ་ལྟར་རོ། །བདུན་པ་སྒྱུ་ནི། རྒྱུ་རྙེད་བཀུར་ལ་ལྷག་པར་ཆགས་ནས་རྩ་བ་ཡོ་བྱད་ལ་འདོད་ཆགས་དང་ལོག་འཚོའི་ཉེས་པ་མ་རིག་པའི་གཏི་མུག་གི་ཆར་གཏོགས་པ་ངོ་བོ་གཞན་བསླུ་བའི་སྦྱིན་པ་དང་ཚུལ་ཁྲིམས་ལ་སོགས་པ་ཡོན་ཏན་ཡང་དག་པ་མ་ཡིན་ཡང་ཡིན་པ་ལྟར་ཀུན་ཏུ་སྟོན་པའི་སེམས་ཀྱི་རྣམ་འགྱུར་དེ། སྒྱུའི་ངོ་བོ་ཡིན་ལ། ཚུལ་འཆོས་ཀྱིས་བསྒྲུབས་པའི་ཡོ་བྱད་ལ་ལོངས་སྤྱོད་པས་ཚེ་འདིར་ལོག་པས་འཚོ་བའི་རྟེན་བྱེད་ཅིང་ཕྱི་མ་ལ་ངན་འགྲོར་ལྟུང་བའི་ལས་ཅན་ནོ། །བརྒྱད་པ་གཡོ་ནི། རྒྱུ་རྙེད་པ་དང་བཀུར་སྟི་ལ་ལྷག་པར་ཆགས་ནས།རྩ་བ་འདོད་ཆགས་དང་གཏི་མུག་གི་ཆར་གཏོགས་པ། ངོ་བོ་རང་གི་རྒྱུད་ལ་ཉེས་པ་ཡང་དག་པར་ཡོད་ངེས་པ་གཞན་དུ་བསྒྱུར་ཞིང་གཏམ་རླུང་ལ་བསྐུར་བ་ལ་སོགས་པའི་ཐབས་སྣ་ཚོགས་ཀྱིས་སྐྱོང་ཞིང་སྦེད་པའི་སེམས་ཀྱི་རྣམ་འགྱུར་དེ། གཡོའི་ངོ་བོ་ཡིན་ལ། འདི་ནི་ཟུར་གྱིས་གསང་ཞིང་འཆབ་པ་ནི་གསལ་པོར་གསང་བས་ཐ་དད་དོ། །བདག་ཉིད་ཀྱི་ཚུལ་མི་སྟོན་པ་ནི་གདམས་ངག་གི་སྣོད་མ་ཡིན་པའི་ཕྱིར་ཡང་དག་པའི་གདམས་ངག་རྙེད་པའི་བར་དུ་གཅོད་པའི་ལས་ཅན་ནོ། །དགུ་བ་རྒྱགས་པ་ནི། ཟག་པ་དང་བཅས་པའི་ཕུན་སུམ་ཚོགས་པ་གང་ཡང་རུང་བ་རང་ལ་མཐོང་བ་ལ་དམིགས་ནས། རྩ་བ་འདོད་ཆགས་ཀྱི་ཆར་གཏོགས་པའི་རྣམ་པ་འགའ་ཞིག་སྲེད་པ་དང་ཡིད་བདེ་བ་ཉོན་མོངས་པ་ཅན་གྱི་སེམས་ཡོངས་སུ་གཏུགས་ཤིང་གང་བའི་སེམས་བྱུང་དེ། རྒྱགས་པའི་ངོ་བོ་ཡིན་ལ། ཆགས་སོགས་རྩ་བའི་ཉོན་མོངས་པ་དང༌། ཁྲོ་སོགས་ཉེ་བའི་ཉོན་མོངས་པ་ཐམས་ཅད་ཀྱི་རྟེན་བྱེད་པའི་ལས་ཅན་ནོ། །ང་རྒྱལ་ནི།གཞན་གྱི་ཡོན་ཏན་ལ་ལྟོས་ནས་ཁེངས་པ་ཡིན་ལ། འདི་རང་གི་ཆོས་ལ་ཆགས་པས་གང་བ་ཡིན་པའི་ཕྱིར། ཁྱད་པར་ཡོད་དེ། མཛོད་ལས། ང་རྒྱལ་ཁེངས་ཉིད་རྒྱགས་པ་སྟེ། །རང་གི་ཆོས་ལ་ཆགས་པ་ཡིས། །སེམས་ནི་ཡོངས་སུ་གཏུགས་པའོ། །ཞེས་པ་ལྟར་རོ། །བཅུ་པ་རྣམ་འཚེ་ནི།ཁོང་ཁྲོ་བའི་ཆར་གཏོགས་པ་གསོད་པ་ལ་སོགས་པའི་འཚེ་བར་བྱེད་པའི་སྙིང་བརྩེ་བ་མེད་པའི་སེམས་བྱུང་དེ། རྣམ་འཚེ་ཡིན་ལ། གཞན་གྱི་རྒྱུད་ལ་སྡུག་བསྔལ་དང་ཡིད་མི་བདེ་བ་སྣ་ཚོགས་བསྐྱེད་པས་རྣམ་པར་མཐོ་འཚམ་པའི་ལས་ཅན་ནོ། །བཅུ་གཅིག་པ་ངོ་ཚ་མེད་པ་ནི། གདགས་གཞི་དུག་གསུམ་གང་རུང་གི་ཆར་གཏོགས་པ་ལས། དེ་བྱ་བའི་ཆོས་མ་ཡིན་པར་ཤེས་བཞིན་དུ་སྡིག་པ་ཁ་ན་མ་ཐོ་བས་བདག་གི་ཆོས་རྒྱུ་མཚན་དུ་བྱས་བ་ལས་མི་འཛེམ་པའི་སེམས་བྱུང་དེ། ངོ་ཚ་མེད་པའི་ངོ་བོ་ཡིན་ལ། རྩ་བའི་ཉོན་མོངས་པ་དང༌། ཉེ་བའི་ཉོན་མོངས་པ་ཐམས་ཅད་ཀྱི་འཕེལ་བའི་གྲོགས་བྱེད་པའི་ལས་ཅན་ནོ། །བཅུ་གཉིས་པ་ཁྲེལ་མེད་པ་ནི། དུག་གསུམ་གང་རུང་གི་ཆར་གཏོགས། ཆོས་དང་འཇིག་རྟེན་གཉིས་ཀ་དང་མི་མཐུན་པར་ཤེས་བཞིན་དུ། སྡིག་པ་ཁ་ན་མ་ཐོ་བས་གཞན་དགེ་བའི་བཤེས་གཉེན་ལ་སོགས་པ་རྒྱུ་མཚན་དུ་བྱས་པ་ལས་ཀྱང་མི་མཛེམ་པའི་སེམས་བྱུང་དེ། ཁྲེལ་མེད་པའི་ངོ་བོ་ཡིན་ལ། ཉོན་མོངས་པ་དང་ཉེ་བའི་ཉོན་མོངས་བ་ཐམས་ཅད་ཀྱི་གྲོགས་བྱེད་པའི་ལས་ཅན་ནོ། །བཅུ་གསུམ་པ་རྨུགས་པ་ནི། གདགས་གཞི་གཏི་མུག་གི་ཆར་གཏོགས་པ་སེམས་བླུན་པར་གྱུར་ནས་མི་གཡོ་ཞིང༌། དམིགས་པ་ལ་གཏོད་མི་ནུས་པས་ལས་སུ་མི་རུང་ཞིང་བྱིང་བར་གྱུར་པ་ཉིད་ཀྱི་སེམས་བྱུང་དེ། རྨུགས་པའི་ངོ་བོ་ཡིན་ལ། དགེ་བ་ལ་བཀོལ་དུ་མི་རུང་ཞིང་ཉོན་མོངས་པ་དང་ཉེ་བའི་ཉོན་མོངས་པ་ཐམས་ཅད་ལ་གཏི་མུག་གིས་ཁྱབ་པས་མཚུངས་ལྡན་གྱི་གྲོགས་བྱེད་པའི་ལས་ཅན་ནོ། །བཅུ་བཞི་པ་རྒོད་པ་ནི། ཡུལ་སྡུག་ཅིང་དགའ་བར་འོས་པའི་ཁ་དོག་དང་དབྱིབས་ལ་སོགས་པའི་མཚན་མའི་རྗེས་སུ་འཇུག་པའི་འདོད་ཆགས་ཀྱི་ཆར་གཏོགས་པའི་སྔོན་རྒོད་རྒོད་པ་དང་རྩེ་རྩེ་བ་དྲན་ནས་སེམས་རྣམ་པར་མ་ཞི་ཞིང་འཕྲོ་བར་གྱུར་བའི་སེམས་བྱུང་དེ། རྒོད་པའི་ངོ་བོ་ཡིན་ལ། ཏིང་ངེ་འཛིན་ཞི་བའི་བདག་ཉིད་ཅན་གྱི་གནས་པ་དང་མི་མཐུན་པས་དེ་ཉིད་ཀྱི་བར་དུ་གཅོད་པའི་ལས་ཅན་ནོ། །བཅོ་ལྔ་པ་མ་དད་པ་ནི། གཏི་མུག་གི་ཆར་གཏོགས་པ། དམིགས་ཡུལ་དགེ་པའི་ཆོས་ལས་འབྲས་སོགས་ཡིད་མི་ཆེས་པ་སོགས་དད་པའི་མི་མཐུན་ཕྱོགས་སུ་གྱུར་བའི་སེམས་བྱུང་དེ། མ་དད་པའི་ངོ་བོ་ཡིན་ལ། མ་དད་ན་སྦྱོར་བ་ལ་འདུན་པ་མེད་པའི་ཕྱིར་ལེ་ལོའི་རྟེན་བྱེད་པའི་ལས་ཅན་ནོ། །བཅུ་དྲུག་པ་ལེ་ལོ་ནི། གཏི་མུག་གི་ཆར་གཏོགས་པ་དགེ་བ་ལ་སེམས་མངོན་པར་མི་སྤྲོ་བའི་སེམས་བྱུང་དེ། ལེ་ལོའི་ངོ་བོ་ཡིན་ལ། བྱ་བ་ངན་པ་ལ་སྦྱོར་ཞིང་བརྩོན་འགྲུས་ཀྱི་མི་མཐུན་ཕྱོགས་ཡིན་པས་དགེ་བའི་ཕྱོགས་ལ་སྦྱོར་བའི་བར་དུ་གཅོད་པའི་ལས་ཅན་ནོ། །བཅུ་བདུན་པ་བག་མེད་ནི། གདགས་གཞི་དུག་གསུམ་གང་རུང་གི་ཆར་གཏོགས་པ་དགེ་བའི་ཆོས་རྣམས་མི་སྒོམ་ཞིང་ཡིད་ལ་མི་བྱེད་པ་དང༌། ཟག་པ་དང་བཅས་པའི་ཆོས་ཆགས་སོགས་ཉོན་མོངས་པ་རྣམས་ལ་སེམས་མི་སྲུང་ཞིང་མི་ཟློག་པས་བག་ཡངས་སུ་གཏོང་བའི་སེམས་བྱུང་དེ། བག་མེད་ཀྱི་ངོ་བོ་ཡིན་ལ། སྤང་བྱ་མི་དགེ་བ་འཕེལ་བ་དང༌། གཉེན་པོ་དགེ་བ་འགྲིབ་པའི་རྟེན་བྱེད་པའི་ལས་ཅན་ནོ། །བཅོ་བརྒྱད་པ་བརྗེད་ངས་ནི། ཆགས་སོགས་ཉོན་མོངས་པ་དང་མཚུངས་པར་ལྡན་པས་དེའི་དམིགས་པ་དྲན་ཞིང༌། དགེ་བའི་དམིགས་པ་མི་གསལ་བས་བརྗེད་པར་གྱུར་པའི་སེམས་བྱུང་དེ། བརྗེད་ངས་ཀྱི་ངོ་བོ་ཡིན་ལ། ཉོན་མོངས་པའི་ཡུལ་ལ་སེམས་གཡེང་བའི་རྟེན་བྱེད་པའི་ལས་ཅན་ནོ། །བཅུ་དགུ་བ་ཤེས་བཞིན་མ་ཡིན་པ་ནི། ཆགས་སོགས་ཉོན་མོངས་པ་དང་མཚུངས་པར་ལྡན་པའི་སྒོ་ནས་ཤེས་རབ་ཕྱིན་ཅི་ལོག་ཏུ་གྱུར་བའི་སེམས་བྱུང་དེ། ཤེས་བཞིན་མ་ཡིན་པའི་ངོ་བོ་ཡིན་ལ། ། དེས་ལུས་ཀྱི་འགྲོ་འོང་དང༌། ངག་གི་སྨྲ་བརྗོད་དང༌། སེམས་ཀྱི་རྟོག་དཔྱོད་ལ་སོགས་པའི་སྤྱོད་པ་ལ་ལེགས་པར་མ་བརྟགས་པར་མི་ཤེས་བཞིན་དུ་འཇུག་པ་སྟེ། ཐོས་ལྡན་དད་པ་ཅན་དང་ནི། །བརྩོན་པ་ལྷུར་ལེན་དུ་མ་ཡང༌། །ཤེས་བཞིན་མི་ལྡན་སྐྱོན་ཆགས་པས། །ལྟུང་བའི་རྙོག་དང་བཅས་པར་གྱུར། །ཞེས་པ་ལྟར་གནང་བཀག་གི་ཆ་མི་ཤེས་པས་ལྟུང་བ་འབྱུང་བའི་རྟེན་བྱེད་པའི་ལས་ཅན་ནོ། །འདུལ་བའི་མ་མོ་བསྡུ་བར་ཡང༌། ལྟུང་དེའི་རྒྱུ་ཡང་རྣམ་བཞི་སྟེ། །མི་ཤེས་པ་དང་བག་མེད་དང༌། །ཉོན་མོངས་མང་དང་མ་གུས་པའོ། །ཞེས་གསུངས་པ་ལས་འདི་ནི་དང་པོའོ། །ཉི་ཤུ་བ་རྣམ་གཡེང་ནི། དུག་གསུམ་གང་རུང་གི་ཆར་གཏོགས་པའི་སེམས་ཏིང་ངེ་འཛིན་ལ་སོགས་པ་དགེ་བའི་དམིགས་པ་ལས་ཡུལ་སྣ་ཚོགས་ལ་རྣམ་པར་འཕྲོ་བར་འགྱུར་བའི་སེམས་བྱུང་དེ། རྣམ་པར་གཡེང་བའི་ངོ་བོ་ཡིན་ལ། དེས་ཏིང་ངེ་འཛིན་ལ་གེགས་བྱེད་པའི་ཕྱིར་འཇིག་རྟེན་པའམ་འཇིག་རྟེན་ལས་འདས་པའི་ལམ་གྱི་ས་ལ་འདོད་ཆགས་དང་བྲལ་བའི་བར་དུ་གཅོད་པའི་ལས་ཅན་ནོ། ། དྲུག་པ་གཞན་འགྱུར་བཞི་བཤད་པ་ལ་བཞི།དྲུག་པ་གཞན་འགྱུར་བཞི་བཤད་པ་ལ་བཞི་ལས། དང་པོ་གཉིད་ནི། གཏི་མུག་གི་འཆར་གཏོགས་པ་འཇུག་པ་རང་དབང་མེད་པར་སེམས་ནང་དུ་བསྡུས་པར་བྱེད་པའི་སེམས་བྱུང་དེ། ཉེ་ཉོན་གྱི་གཉིད་ཀྱི་ངོ་བོ་ཡིན་ལ། བརྩམ་པའི་བྱ་བ་མ་ལུས་པ་ཤོར་བའི་རྟེན་བྱེད་པའི་ལས་ཅན་ནོ། །གཉིས་པ་འགྱོད་པ་ནི། བྱ་བ་དེ་ལྟ་བུ་མི་བྱེད་པ་ཡིན་ཏེ་སྙམ་པའི་སེམས་ཀྱི་རྣམ་འགྱུར་ཡིད་ལ་གཅགས་པ་མི་དགའ་བ་དང་མཚུངས་པར་ལྡན་པའི་སེམ་བྱུང་དེ། འགྱོད་པའི་ངོ་བོ་ཡིན་ལ། བྱེད་ལས་ནི། འདིས་ཏིང་ངེ་འཛིན་ལ་སྒྲིབ་པས་དམིགས་པ་ལ་སེམས་རྩེ་གཅིག་ཏུ་གནས་པའི་བར་དུ་གཅོད་པའི་ལས་ཅན་ནོ། །གསུམ་པ་གཞན་འགྱུར་གྱི་རྟོག་པ་ནི། མངོན་པར་མི་རྟོག་པའི་དུས་སུ་སེམས་པའམ། མངོན་པར་རྟོག་པའི་དུས་སུ་སྐྱོན་ཡོན་འབྱེད་པའི་ཤེས་རབ་ལ་བརྟེན་ནས་བཏགས་པ་ཡུལ་དྲུག་ཅི་རིགས་ལ་དམིགས་ནས་རྣམ་པ་དོན་རགས་པ་ཙམ་ཚོལ་བའི་སེམས་བྱུང་དེ། གཞན་འགྱུར་གྱི་རྟོག་པའི་ངོ་བོ་ཡིན་ལ། བཞི་བ་དཔྱོད་པ་ནི། སེམས་པའམ་ཤེས་རབ་ལ་བརྟེན་ནས་ཡུལ་དྲུག་གང་རུང་ལ་དམིགས་ནས་དོན་ཞིབ་པར་དཔྱོད་པའི་སེམས་བྱུང་དེ། དཔྱོད་པའི་ངོ་བོ་ཡིན་ལ། དེ་གཉིས་ཀའི་བྱེད་ལས་ནི། རྟོག་དཔྱོད་དགེ་བས་བདེ་བ་ལ་རེག་པར་གནས་པ་དང༌། མི་དགེ་བས་དེ་ལ་རེག་པར་མི་གནས་པའི་རྟེན་བྱེད་པའི་ལས་ཅན་ནོ། །འདི་གཉིས་ལ་གྲུབ་མཐའི་ཁྱད་པར་དུ་མ་ཡོད་དོ། །སེམས་སེམས་བྱུང་གི་རྣམ་བཞག་འདི་དག་ནི་མངོན་པ་ཀུན་བཏུས་དང་ས་བཟང་གི་ཀུན་བཏུས་འགྲེལ་བ་ཤེས་བྱ་རབ་གསལ་སྣང་བ་ཇི་ལྟ་བ་བཞིན་བཤད་ཁུལ་བྱས་པའོ། ། རྩ་བའི་ས་བཅད་གཉིས་པ་ཡུལ་གྱི་རྣམ་བཞག་བཤད་པ།རྩ་བའི་ས་བཅད་གཉིས་པ་ཡུལ་གྱི་རྣམ་བཞག་བཤད་པ་ལ། མཚན་ཉིད། དབྱེ་བ་གཉིས། དང་པོ་ནི། བློའི་རིག་པར་བྱ་བ། ཡུལ་གྱི་མཚན་ཉིད་ཡིན་ཏེ། གཏན་ཚིགས་རིགས་པའི་དོན་བསྡུས་ལས། རིག་པར་བྱ་བ། ཞེས་གསུངས་པའི་ཕྱིར། གཉིས་པ་དབྱེ་བ་ནི། གཏན་ཚིགས་རིགས་པའི་དོན་བསྡུས་ལས། །ཡུལ་ལ་དབྱེ་ན། ཡུལ་དུ་བྱས་ཚུལ་མི་འདྲ་བའི་སྒོ་ནས་དང༌། རྟོགས་དཀའ་སླའི་སྒོ་ནས་དབྱེ་ཚུལ་དང་གཉིས། དང་པོ་ལ་དབྱེ་ན། སྣང་ཡུལ། བཟུང་ཡུལ། ཞེན་ཡུལ། འཇུག་ཡུལ་དང་བཞིའོ། །མཚན་ཉིད་ནི་རིམ་པ་ལྟར། སྣང་ནས་རིག་པར་བྱ་བ་དང༌། རང་འཛིན་ཤེས་པ་མ་འཁྲུལ་བ་ལ་རང་འདྲ་བའི་རྣམ་པ་དངོས་སུ་སྐྱེད་བྱེད་ཀྱི་བེམ་པོ་དང༌། ཞེན་ནས་རིག་པར་བྱ་བ་དང༌། ཚད་མའི་གཞལ་བ་ལས་བླང་དོར་བྱར་རུང་བའོ། །སྣང་ཡུལ་ཤེས་པ་ཀུན་ལ་ཡོད། །བཟུང་ཡུལ་དོན་རིག་གཉིས་ཀྱིས་འཛིན། །ཞེན་ཡུལ་རྟོག་པ་ཁོ་ནས་ཞེན། །འཇུག་ཡུལ་ལ་ནི་ཚད་མ་དང༌། །དཔྱད་ཤེས་སྐྱེས་བུ་གསུམ་གྱིས་འཇུག །ཅེས་གསུངས་པའི་ཕྱིར། གཉིས་པ་རྟོགས་དཀའ་སླའི་སྒོ་ནས་དབྱེ་ན། མངོན་གྱུར། ཅུང་ཟད་ལྐོག་གྱུར། ཤིན་ཏུ་ལྐོག་གྱུར་དང་གསུམ། མངོན་སུམ་ཚད་མའི་དངོས་སུ་རྟོགས་པར་བྱ་བ། མངོན་གྱུར་གྱི་མཚན་ཉིད། དངོས་སྟོབས་རྗེས་དཔག་ཚད་མའི་དངོས་སུ་རྟོགས་པར་བྱ་བ། ཅུང་ཟད་ལྐོག་གྱུར་གྱི་མཚན་ཉིད། ཡིད་ཆེས་རྗེས་དཔག་གི་རྟོགས་པར་བྱ་བ་དེ། ཤིན་ཏུ་ལྐོག་གྱུར་གྱི་མཚན་ཉིད་ཡིན་ཏེ། གཏན་ཚིགས་རིགས་པའི་དོན་བསྡུས་ལས། གཞལ་བྱ་མངོན་གྱུར་ལྐོག་གྱུར་ཤིན་ཏུ་ལྐོག་གྱུར་གསུམ་མོ། །མཚན་ཉིད་རིམ་པ་ལྟར་རྟོགས་པ་པོའི་མངོན་སུམ་དང༌། རྗེས་དཔག་མཚན་ཉིད་པས་དང༌། ལུང་ཙམ་གྱིས་གྲུབ་པའི་དོན་ཞེས་པའོ། །ཞེས་གསུངས་པའི་ཕྱིར་རོ། །དེ་ལྟར་མངོན་ཚད་ལས་བཤད་པའི་བློ་རིག་གི་རྣམ་བཞག་རྣམས་ལེགས་པར་ཤེས་ན་སྤང་བླང་དང༌། དོན་དང་དོན་མ་ཡིན་པ་དང༌། ས་ལམ་གྱི་མངོན་རྟོགས་རྣམས་ལེགས་པར་ཤེས་ནས་མཐར་ཐུག་མི་གནས་པའི་མྱ་ངན་ལས་འདས་པའི་གྲོང་ཁྱེར་དུ་སྒྲོད་པར་འགྱུར་བའོ། ། སྨྲས་པ། མངོན་ཚད་ལས་བྱུང་བློ་རིག་རྣམ་བཞག་ཀུན། །མ་འདྲེས་གསལ་བའི་ངག་གི་བཀོད་པ་ཡི། །ལེགས་བཤད་དྲི་མ་མེད་པའི་དཔལ་འདི་ཉིད། །ཐུབ་བསྟན་པད་མའི་དཔལ་ལ་མཛེས་གྱུར་ཅིག །དགེ་འདིས་ཚེ་རབས་ཀུན་ཏུ་བློ་རིག་གི །ཆོས་ཚུལ་གསལ་བའི་བློ་གྲོས་དཔལ་ཐོབ་ཅིང༌། །བླང་དོར་ཚུལ་བཞིན་སྒྲུབ་ལ་རབ་བརྩོན་ནས། །འགྲོ་ཀུན་ཕན་བདེའི་ཉེར་འཚོ་བདག་གྱུར་ཅིག །སྐྱེ་བ་ཀུན་ཏུ་ཚེ་རབས་ཀུན་ཏུ་ཡང༌། །མཚན་ལྡན་བླ་མའི་བརྩེ་བས་རྗེས་བཟུང་ནས། །ཞི་བསིལ་ཆོས་ཀྱིས་རང་རྒྱུད་ལེགས་སྨིན་ནས། །ཐུབ་བསྟན་གསལ་བའི་སྒྲོན་མེ་བདག་གྱུར་ཅིག །ཅེས་བློ་རིག་གི་རྣམ་བཞག་ཉུང་གསལ་ལེགས་བཤད་གསེར་གྱི་ཉི་མ་ཞེས་བྱ་བ་འདི་ནི་བློ་ལྡན་དུ་མས་བསྐུལ་བ་དང༌། ཇོ་ནང་བཤད་གྲྭ་མདོ་སྔགས་སློབ་གླིང་ངེས་དོན་རིག་པའི་དགའ་ཚལ་གྱི་སློབ་མ་རྣམས་ལ་མཁོ་ཕྱིར་དུ་རྒྱ་བོད་ཀུན་ལ་ཉུལ་བའི་སྤྲང་འཁྱམས་པ་ངག་དབང་དངོས་གྲུབ་དཔལ་གྱིས་མདོ་སྔགས་སློབ་གླིང་དབུ་འཛུགས་སྐབས་ཆོས་ཁྲིད་དུ་མའི་ཞར་ལ་ཤར་འཛམ་ཐང་བསམ་འགྲུབ་ནོར་བུའི་གླིང་དུ་རབ་གནས་ཀུན་འཛིན་ཞེས་པ་ས་བྱིའི་གྲོ་བཞིན་ཟླ་བའི་ཚེས་དགུ་ལ་རྫོགས་པར་བྲིས་པའོ། །འདིས་ཀྱང་སྤྱིར་རྒྱལ་བའི་བསྟན་པ་རིན་པོ་ཆེ་དང་ཁྱད་པར་དུ་མཐའ་བྲལ་གཞན་སྟོང་གི་ལྟ་གྲུབ་ཕྱོགས་ཐམས་ཅད་དུ་དར་ཞིང་རྒྱས་ལ་ཡུན་རིང་དུ་གནས་པར་གྱུར་ཅིག ། །།སརྦ་མངྒ་ལམ། རྟགས་རིགས་ཀྱི་རྣམ་བཞག་ལེགས་བཤད་དྲི་མ་མེད་པའི་འོད།རྟགས་རིགས་ཀྱི་རྣམ་བཞག་ལེགས་བཤད་དྲི་མ་མེད་པའི་འོད་ཅེས་བྱ་བ་བཞུགས་སོ། ། ཨོཾ་སྭ་སྟི། ཚོགས་གཉིས་རྒྱ་ཆེན་རོལ་མཚོ་ལས་འཁྲུངས་སྐུ་བཞིའི་བང་རིམ་ཅན། །མཁྱེན་བརྩེའི་ཉི་ཟླས་རབ་མཛེས་འཕྲིན་ལས་དཔག་བསམ་ཤིང་གིས་མཛེས། །སྐལ་བཟང་གདུལ་བྱའི་འགྲོ་རྣམས་སྲིད་མཚོ་ལས་སྒྲོལ་བདེ་སྟེར་བའི། །ཐུབ་དབང་རི་རྒྱལ་མཆོག་ལ་ཀུན་ནས་དད་པས་ཕྱག་འཚལ་ལོ། །གང་གི་ལེགས་བཤད་རབ་གསལ་འོད་སྟོང་གིས། །མ་རིག་མུན་སེལ་ཤེས་རབ་སྣང་བའི་དཔལ། །སྨྲ་བའི་ཟླ་བ་ཕྱོགས་གླང་ཆོས་གྲགས་སོགས། །ཚད་མའི་སྲོལ་འབྱེད་རྣམས་ལ་གུས་པས་འདུད། །སྲིད་ཞིའི་གདུང་བ་སེལ་བའི་སྨན། །རྣམ་གྲོལ་ལམ་བཟང་སྟེར་བའི་གཉེན། །རྒྱལ་བསྟན་རིན་ཆེན་འབྱུང་བའི་གནས། །ཚད་མའི་བརྒྱུད་འཛིན་ཀུན་ལ་གུས། །རྣམ་མང་ལུང་ལ་བློ་གྲོས་ཆེས་གསལ་བའི། །གནས་ལུགས་རྟོགས་པའི་མཁྱེན་རབ་འོད་འབར་བ། །མཐའ་ཡས་འགྲོ་བའི་འདྲེན་མཆོག་ཆོས་ཀྱི་རྗེ། །རྗེ་བཙུན་དམ་པ་རྣམས་ལ་སྐྱབས་ཕྱག་འཚལ། །ཆོས་ཀུན་མ་ལུས་གསལ་བར་སྟོན་པ་ཡི། །རྒྱལ་བའི་གསུང་རབ་ཀུན་ལ་ལྟ་བའི་མིག །ལྟ་ངན་མུན་སེལ་ཚ་ཟེར་འོད་བརྒྱ་བ། །རྟགས་རིགས་རྣམ་བཞག་ཉུང་གསལ་འདིར་བཤད་བྱ། །ཕྱོགས་ཞེན་ཆགས་སྡང་མུན་པས་མ་བསྒྲིབས་ཤིང༌། །བློ་གྲོས་རྣམ་པར་གསལ་བའི་སྣང་བ་ཅན། །གཟུར་གནས་ལེགས་བཤད་དོན་གཉེར་ལྡན་པ་ཡི། །སྐལ་ལྡན་གདུལ་བྱའི་ཚོགས་རྣམས་གུས་པས་ཉོན། །དེ་ལ་འདིར་གང་དག་ཐར་བ་དང་ཐམས་ཅད་མཁྱེན་པའི་གོ་འཕང་བླ་ན་མེད་པ་མངོན་དུ་བྱེད་པར་འདོད་པའི་སྐལ་བ་དང་ལྡན་པ་དེ་དག་གིས་ནི། སྙིང་པོ་མེད་པའི་སྲིད་པའི་བྱ་བ་མ་ལུས་པ་རྒྱང་རིང་དུ་སྤངས་ནས། ཟབ་པ་དང་རྒྱ་ཆེ་བའི་ཆོས་ཚུལ་རྣམ་པར་དག་པ་ལ། དད་པ་དང་བརྩོན་འགྲུས་ཀྱིས་འཇུག་པར་བྱ་དགོས་པ་ཡིན་ལ། དེ་ཡང་ཚད་མ་སྡེ་བདུན་མདོ་དང་བཅས་པའི་དགོས་དོན་གྱི་གཙོ་བོ་ནི། རང་རེའི་བསྟན་པ་དང་སྟོན་པ་སྐྱོན་མེད་དུ་བསྒྲུབས་ནས་རྣམ་གྲོལ་དོན་གཉེར་རྣམས་ཡང་དག་པའི་ལམ་བཟང་ལ་འགོད་པའི་ཆེད་ཡིན་ལ། བརྗོད་བྱ་ཡང་རིགས་སྒོ་ལས། མངོན་སུམ་དང་ནི་རྗེས་སུ་དཔག །ལྟར་སྣང་བཅས་པ་བདག་རིག་ཕྱིར། །སྒྲུབ་པ་དང་ནི་སུན་འབྱིན་དག །ལྟར་སྣང་བཅས་པ་གཞན་རིག་ཕྱིར། །ཞེས་གསུངས་པ་ལྟར་སྟོན་པ་དང་བསྟན་པ་སྐྱོན་མེད་དུ་རང་གིས་ངེས་པའི་ཐབས་མངོན་རྗེས་ཡང་དག་གཉིས་དང༌། གོལ་ས་གཅོད་ཕྱིར་དུ་ལྟར་སྣང་གཉིས་དང༌། རང་གིས་ངེས་ནས་གཞན་རྗེས་སུ་འཛིན་པའི་ཕྱིར་དུ་ཐོག་མར་ལོག་རྟོག་གི་རྩེ་གཞོམ་བྱེད་སུན་འབྱིན་དང༌། ཐེ་ཚོམ་གཅོད་བྱེད་སྒྲུབ་ངག་ཡང་དག་དང༌། དེའི་གོལ་ས་ལྟར་སྣང་གཉིས་ཏེ་རྟོག་གེའི་ཚིག་དོན་བརྒྱད་བརྗོད་བྱའི་གཙོ་བོ་ཡིན་པའོ། །དེ་ཡང་ཚད་མ་རྣམ་འགྲེལ་རང་འགྲེལ་ལས། དོན་དང་དོན་མ་ཡིན་པ་རྣམ་པར་འབྱེད་པ་ནི་རྗེས་སུ་དཔག་པ་ལ་བརྟེན་པ་ཡིན་པའི་ཕྱིར་ལ། ཞེས་གསུངས་པ་ལྟར་དོན་དང་དོན་མ་ཡིན་པ་རྣམ་པར་འབྱེད་པ་ནི་རྗེས་དཔག་ལ་རག་ལས་པ་ཡིན་ལ། དེ་ཡང་ཚད་མ་མདོ་ལས། རྗེས་དཔག་རྣམ་གཉིས་རང་དོན་ནི། །ཚུལ་གསུམ་རྟགས་ལས་དོན་མཐོང་ཡིན། །ཞེས་དང༌། རིགས་ཐིགས་ལས། རྗེས་སུ་དཔག་པ་ནི་རྣམ་པ་གཉིས་ཏེ། རང་གི་དོན་དང་གཞན་གྱི་དོན་ནོ། །དེ་ལ་རང་གི་དོན་གྱི་རྗེས་སུ་དཔག་པར་བྱ་བ་ལ་ཚུལ་གསུམ་པའི་རྟགས་ལས་ཤེས་པ་གང་ཡིན་པའོ། །ཞེས་པ་ལྟར་རྗེས་དཔག་དེས་ཀྱང་རང་གི་རྟེན་གཏན་ཚིགས་ཡང་དག་ལ་བརྟེན་ནས་ངེས་དགོས་པས་སོ། །དེས་ན་འདིར་རྗེས་དཔག་གི་རྟེན་གཏན་ཚིགས་ཀྱི་རྣམ་བཞག་བཤད་པ་ལ། །གཏན་ཚིགས་ཀྱི་རྣམ་བཞག་བཤད་པ་ལ་གཉིས། གཏན་ཚིགས་ཀྱི་རྣམ་བཞག་དངོས་དང༌། དེ་སྟོན་བྱེད་ཀྱི་གཞན་དོན་རྗེས་དཔག་བཤད་པ་དང་གཉིས། དང་པོ་ནི། རྟགས་ཀྱི་མཚན་ཉིད་བཤད་པ། དབྱེ་བ་བཤད་པ་དང་གཉིས། རྟགས་ཀྱི་མཚན་ཉིད་བཤད་པ།རྟགས་ཀྱི་མཚན་ཉིད་བཤད་པ། དང་པོ་ནི། གཏན་ཚིགས་སུ་བཀོད་པ། རྟགས་ཀྱི་མཚན་ཉིད་ཡིན་ཏེ། གཏན་ཚིགས་རིགས་པའི་དོན་བསྡུས་ལས། རྟགས་དང་དཔེ་གཉིས་ལས། དང་པོའི་མཚན་ཉིད། གཏན་ཚིགས་སུ་བཀོད་པ། ཞེས་གསུངས་སོ། །མཚན་གཞི་ནི། རི་བོང་རྭ་དང་བྱས་པ་ལྟ་བུའོ། །ཡོད་མེད་གང་རུང་ཡིན་ན་རྟགས་ཡིན་པས་ཁྱབ་སྟེ། དེ་གང་རུང་ཡིན་ན་གཏན་ཚིགས་སུ་བཀོད་པ་ཡིན་པས་ཁྱབ་པའི་ཕྱིར། བྱས་པ་ཆོས་ཅན། ཁྱོད་རྟགས་ཡིན་པར་ཐལ། ཁྱོད་གཏན་ཚིགས་སུ་བཀོད་པ་ཡིན་པའི་ཕྱིར། དེར་ཐལ། ཁྱོད་སྒྲ་ཆོས་ཅན། མི་རྟག་པ་ཡིན་ཏེ། ཁྱོད་ཡིན་པའི་ཕྱིར་ཞེས་པའི་སྦྱོར་བའི་གཏན་ཚིགས་སུ་བཀོད་པ་ཡིན་པའི་ཕྱིར། དེར་ཐལ། སྒྲ་ཆོས་ཅན། མི་རྟག་པ་ཡིན་ཏེ། ཁྱོད་ཡིན་པའི་ཕྱིར་ཞེས་པའི་སྦྱོར་བ་ཡོད་པའི་ཕྱིར། དེར་ཐལ། ཡོད་མེད་གང་རུང་ཡིན་པའི་ཕྱིར། དེ་སྒྲུབ་ཀྱི་གཏན་ཚིགས་སུ་བཀོད་པ། དེ་སྒྲུབ་ཀྱི་རྟགས་ཀྱི་མཚན་ཉིད། སྡུག་བདེན་མི་རྟག་པར་སྒྲུབ་པའི་གཏན་ཚིགས་སུ་བཀོད་པ། སྡུག་བདེན་མི་རྟག་པར་སྒྲུབ་པའི་རྟགས་ཀྱི་མཚན་ཉིད། མཚན་གཞི་ནི་སྐད་ཅིག་མ་ལྟ་བུའོ། །བྱས་རྟགས་ཀྱིས་སྒྲ་མི་རྟག་པར་སྒྲུབ་པར་བྱེད་པའི་རྟགས་སུ་བཀོད་པ། བྱས་རྟགས་ཀྱིས་སྒྲ་མི་རྟག་པར་སྒྲུབ་པར་བྱེད་པའི་རྟགས་ཀྱི་མཚན་ཉིད། མཚན་གཞི་ནི། བྱས་པ་དེ་ཡིན་ནོ། །བྱས་རྟགས་ཀྱིས་སྒྲ་མི་རྟག་པར་སྒྲུབ་པར་བྱེད་པའི་རྟགས་ཡིན་ན་བྱས་པ་དང་གཅིག་ཡིན་པས་ཁྱབ་པ་ཡིན་ནོ། ། དབྱེ་བ་བཤད་པ་ལ་གཉིས།དབྱེ་བ་བཤད་པ་ལ་གཉིས། གཉིས་པ་དབྱེ་བ་བཤད་པ་ལ། རྟགས་ཡང་དག་བཤད་པ་དང༌། རྟགས་ལྟར་སྣང་བཤད་པའོ། ། རྟགས་ཡང་དག་བཤད་པ་ལ་གསུམ། དང་པོ་ནི། རྣམ་འགྲེལ་ལས། ཕྱོགས་ཆོས་དེ་ཆས་ཁྱབ་པ་ཡི། །གཏན་ཚིགས་དེ་ནི་རྣམ་གསུམ་ཉིད། །མེད་ན་མི་འབྱུང་ངེས་ཕྱིར་རོ། །ཞེས་གསུངས་པ་ལྟར་རྟགས་ཡང་དག་གི་མཚན་ཉིད་དང༌། དབྱེ་བ་དང༌། གྲངས་ངེས་བཤད་པ་དང་གསུམ། དང་པོ་རྟགས་ཡང་དག་གི་མཚན་ཉིད་བཤད་པ་གཉིས། དང་པོ་ལ་དངོས་དང༌། ཚུལ་སོ་སོའི་མཚན་ཉིད་སོགས་བཤད་པའོ། ། ༡ དངོས་བཤད་པ། དང་པོ་ལ་དགག་བཞག་གཉིས་ལས། དང་པོ་ནི། རིག་པ་ཅན་གྱིས་ནི། ཤཱཀྱ་བློའི་འགྲེལ་བཤད་ལས། རིག་པ་ཅན་པའི་མཚན་ཉིད་ནི། སྔ་མ་དང་ལྡན་པ་དང༌། ལྷག་མ་དང་ལྡན་པ་དང༌། སྤྱིར་མཐོང་བ་ཞེས་སྨྲ་བ་ལ། རྒྱུས་འབྲས་བུ་རྗེས་སུ་དཔོག་པ་ནི་སྔ་མ་དང་ལྡན་པ་སྟེ། ཞེས་གསུངས་པ་ལྟར་གྱི་སྔ་མ་དང་ལྡན་པ་དང༌། ལྷག་མ་དང་ལྡན་པ་ནི། ཤིང་ཕུང་གཅིག་ལས་སྐྱེས་པ་དང་གཟུགས་མཚུངས་པས་ཤིང་ཏོག་ལྷག་མ་རྣམས་རོ་མངར་བ་སྒྲུབ་པའི་རྟགས་ལྷག་མ་ཅན་དང༌། ཟླ་བ་ནུབ་རིར་ནུབ་པ་མཐོང་བ་ལས་ཉི་མ་དེ་ལྟར་དུ་དཔོག་པ་སྤྱི་མཐོང་ཅན་གྱི་རྟགས་དང་རྟགས་ཐ་དད་པ་གསུམ་ཡོད་ལ། རིགས་གཏེར་རང་འགྲེལ་དུ་གྲགས་པ་ལས་དེ་དང་མི་མཐུན་པ་ཞིག་གསུངས་སོ། ། ཡང་ཕྱི་སྡེ་དུ་མ་དང་རང་སྡེ་དབང་ཕྱུག་སྡེ་སོགས་རྟགས་ཡང་དག་གི་མཚན་ཉིད། ཚུལ་དྲུག་པ་ཅན་གྱི་རྟགས་དེ་ཡིན་ལ། ཚུལ་དྲུག་ནི། ཕྱོགས་ཆོས་དང༌། མཐུན་ཕྱོགས་ལ་མཐོང་ཙམ་གྱི་རྗེས་འགྲོ་དང༌། མི་མཐུན་ཕྱོགས་ལ་མ་མཐོང་བ་ཙམ་གྱི་ལྡོག་པ་དང༌། དམ་བཅའ་ལ་ཚད་མས་གནོད་པ་མེད་པའི་ཡུལ་ཅན་དང༌། ལོག་ཕྱོགས་སྒྲུབ་བྱེད་ཀྱི་ཚད་མ་མེད་པའི་བརྗོད་པར་འདོད་པའི་གྲངས་གཅིག་པ་དང༌། ལྔ་བོ་དེ་བློ་ཡུལ་དུ་ངེས་པའི་ཤེས་པ་ཉིད་དང་དྲུག་གོ ། ཚུལ་རེ་རེ་བ་དང་གཉིས་གཉིས་དང་བཞི་དང་དྲུག་ཅན་གྱི་རྟགས་ཡང་དག་འདོད་པ་རྣམས་མི་འཐད་དེ། ཚད་མ་མདོ་ལས། ཚུལ་གཉིས་པ་དང་རེ་རེ་བ། །རྟགས་དོན་མིན་པར་དོན་གྱིས་བྱས། །ཞེས་དང༌། ཛེ་ཏཱ་རེའི་རྟོག་གེའི་སྐད་ལས། ཚུལ་གསུམ་པའི་རྟགས་སྨོས་པས་ནི། ཚུལ་གཅིག་དང༌། གཉིས་དང༌། བཞི་དང༌། ལྔ་དང༌། དྲུག་ལས་སྐྱེས་པའི་ཤེས་པའི་རྗེས་སུ་དཔག་པ་ཉིད་ཕྱིར་བཟློག་གོ །ཞེས་གསུངས་སོ། །གཞན་ཡང་རྟགས་ལྟར་སྣང་དུ་མ་ཡང་དག་ཏུ་ཐལ་བ་དང༌། རང་སྡེ་དེ་དག་ལ་སློབ་དཔོན་གྱི་ལུང་དང་འགལ་བའི་ལུང་འགལ་དྲུག་སོགས་ལུང་རིགས་ཀྱིས་དགག་ཚུལ་རྒྱས་པར་གཞན་ལས་ཤེས་པར་བྱ། འདིར་ཡི་གེ་མང་དོགས་ནས་མ་སྤྲོས་སོ། ། གཉིས་པ་རང་ལུགས་བཞག་པ།གཉིས་པ་རང་ལུགས་བཞག་པ་ནི། ཚུལ་གསུམ་ཡིན་པ། རྟགས་ཡང་དག་གི་མཚན་ཉིད་ཡིན་ཏེ། ཚད་མ་རིགས་སྒོ་ལས། གཏན་ཚིགས་ཀྱི་མཚན་ཉིད་ནི་ཚུལ་གསུམ་ཚང་པའོ། །ཚུལ་གསུམ་གང་ཞེ་ན། ཕྱོགས་ཀྱི་ཆོས་ཀྱི་ལྟོས་གཞི་ལ་ཡོད་པ་དང༌། མཐུན་པའི་ཕྱོགས་ལ་ཡོད་པ་དང༌། མི་མཐུན་ཕྱོགས་ལ་མེད་པའོ། །ཞེས་དང༌། རྣམ་འགྲེལ་ལས། ཕྱོགས་ཆོས་དེ་ཆས་ཁྱབ་པ་ཡི། །གཏན་ཚིགས། ཞེས་དང༌། རྣམ་ངེས་ལས། རྗེས་དཔག་བྱ་དང་དེ་མཚུངས་ལ། །ཡོད་དང་མེད་ལ་མེད་པར་ནི། །ངེས་པ། ཞེས་དང༌། རིགས་ཐིགས་ལས། ཚུལ་གསུམ་པ་ཉིད་ཀྱི་རྟགས་ནི་རྗེས་སུ་དཔག་པར་བྱ་བ་ལ་ཡོད་པ་ཉིད་དང༌། མཐུན་པའི་ཕྱོགས་ཉིད་ལ་ཡོད་པ་དང༌། མི་མཐུན་པའི་ཕྱོགས་ཉིད་ལ་མེད་པ་ཉིད་དུ་ངེས་པའོ། །ཞེས་དང༌། གཏན་ཚིགས་རིགས་པའི་དོན་བསྡུས་ལས། དབྱེ་ན། རྟགས་ཡང་དག་དང་ལྟར་སྣང་གཉིས་སོ། །མཚན་ཉིད་ནི་རིམ་པ་ལྟར། ཚུལ་གསུམ་ཚད་མའི་སྟོབས་ཀྱིས་ངེས་པའི་གཏན་ཚིགས་དང༌། རྟགས་སུ་བཀོད་ཅིང་ཚུལ་གསུམ་མ་ཚང་བའོ། །ཞེས་གསུངས་སོ། །ལུང་ཕྱི་མ་འདིའི་ཚིག་ལ་ཅུང་ཟད་དཔྱད་རྒྱུ་སྣང༌། མིང་གི་རྣམ་གྲངས་ནི། པཎ་ཆེན་ཐར་འབྱུང་སྦས་པའི་རྟོག་གེའི་སྐད་ལས། སྒྲུབ་པར་བྱེད་པ་དང༌། ཤེས་པར་བྱེད་པ་དང༌། གཏན་ཚིགས་དང༌། ཁྱབ་པར་བྱ་བ་ཞེས་པ་རྟགས་ཀྱི་མིང་གཞན་རྣམས་སོ། །ཞེས་དང༌། བྲམ་ཟེས་ཀྱང༌། གཏན་ཚིགས་གོ་བར་བྱེད་པ་ཡིན། ཞེས་དང༌། ཤཱཀྱས། ཁྱབ་པར་བྱ་བ་གཏན་ཚིགས་དེ་ལ། ཞེས་གསུངས་པའི་ཕྱིར། སྒྲ་བཤད་ནི། བྱས་པ་ཆོས་ཅན། སྒྲ་མི་རྟག་པར་སྒྲུབ་པར་བྱེད་པའི་རྟགས་ཞེས་བརྗོད་པའི་རྒྱུ་མཚན་ཡོད་དེ། ཁྱོད་ཀྱིས་སྒྲ་མི་རྟག་པར་སྒྲུབ་པར་བྱེད་ཅིང་མཚོན་པར་བྱེད་པས་དེ་ལྟར་བརྗོད་པའི་ཕྱིར་ཏེ། འཐད་ལྡན་ཆུང་བ་ལས། མཚོན་པར་བྱེད་ཅིང་འདིས་དོན་སྟོན་པར་བྱེད་པས་རྟགས་སོ། །ཞེས་དང༌། དུལ་བ་ལྷས། འདིས་མཚོན་པར་བྱེད་པས་ན་རྟགས་སོ། །ཞེས་གསུངས་པའི་ཕྱིར་རོ། ། ཚུལ་སོ་སོའི་མཚན་ཉིད་སོགས་བཤད་པ་ལ་གཉིས།ཚུལ་སོ་སོའི་མཚན་ཉིད་སོགས་བཤད་པ་ལ་གཉིས། གཉིས་པ་ཚུལ་སོ་སོའི་མཚན་ཉིད་སོགས་བཤད་པ་ལ། ཚུལ་སོ་སོའི་ལྟོས་གཞི་བཤད་པ་དང༌། ཚུལ་གསུམ་དངོས་བཤད་པ་དང་གཉིས། ཚུལ་སོ་སོའི་ལྟོས་གཞི་བཤད་པ་གཉིས། དང་པོ་ནི། གཏན་ཚིགས་རིགས་པའི་དོན་བསྡུས་ལས། ལྟོས་གཞི་ཕྱོགས་གསུམ་ནི། ཚུལ་དང་པོའི་ལྟོས་གཞི་ཕྱོགས་ཤེས་འདོད་ཆོས་ཅན། གཉིས་པའི་ལྟོས་གཞི་མཐུན་ཕྱོགས། གསུམ་པའི་ལྟོས་གཞི་མི་མཐུན་ཕྱོགས་སོ། །ཞེས་གསུངས་པ་ལྟར་ཕྱོགས་ཆོས་ཀྱི་ལྟོས་གཞི་ཤེས་འདོད་ཆོས་ཅན་བཤད་པ། རྗེས་ཁྱབ་དང་ལྡོག་ཁྱབ་ཀྱི་ལྟོས་གཞི་མཐུན་ཕྱོགས་མི་མཐུན་ཕྱོགས་བཤད་པ་དང་གཉིས། ཕྱོགས་ཆོས་ཀྱི་ལྟོས་གཞི་ཤེས་འདོད་ཆོས་ཅན་བཤད་པ།ཕྱོགས་ཆོས་ཀྱི་ལྟོས་གཞི་ཤེས་འདོད་ཆོས་ཅན་བཤད་པ། དང་པོ་ལ་ཤེས་འདོད་ཆོས་ཅན་གྱི་མཚན་ཉིད་བཤད་པ། དབྱེ་བ་བཤད་པ། ཤེས་འདོད་ཆོས་ཅན་གྱི་སྒྲུབ་བྱེད་ཀྱི་རིགས་པ་བཤད་པ་དང་གསུམ། དང་པོ་ནི། དེ་སྒྲུབ་ཀྱི་རྩོད་གཞིར་བཟུང་བ། ཤེས་འདོད་ཆོས་ཅན་གྱི་མཚན་ཉིད། ཡང་ན་གཏན་ཚིགས་རིགས་པའི་དོན་བསྡུས་ལས། མཚན་ཉིད་རིམ་པ་ལྟར། བསྒྲུབ་བྱ་སྤྱི་ཡི་ཕྱོགས་གཅིག་གང་ཞིག བསྒྲུབ་བྱའི་ཆོས་ཀྱི་དཔག་གཞིར་བཟུང་བ། ཞེས་གསུངས་སོ། །སྒྲ་མི་རྟག་པར་སྒྲུབ་པར་བྱེད་པའི་རྩོད་གཞིར་བཟུང་བ་དེ། སྒྲ་མི་རྟག་པར་སྒྲུབ་པར་བྱེད་པའི་ཤེས་འདོད་ཆོས་ཅན་གྱི་མཚན་ཉིད། སྒྲ་མི་རྟག་པར་སྒྲུབ་པར་བྱེད་པའི་ཤེས་འདོད་ཆོས་ཅན་དང། སྒྲ་མི་རྟག་པར་སྒྲུབ་པར་བྱེད་པའི་རྩོད་གཞི་དང༌། སྒྲ་མི་རྟག་པར་སྒྲུབ་པར་བྱེད་པའི་དཔག་གཞི་གསུམ་དོན་གཅིག དེ་སྒྲུབ་ཀྱི་རྩོད་གཞིར་བཟུང་བ་ཡང་ཡིན། ཁྱོད་སྦྱོར་བ་དེ་སྒྲུབ་ཀྱི་རྟགས་སུ་འགྲོ་རྒྱུ་དེ་ཡིན་པར་ངེས་ནས་བསྒྲུབ་བྱའི་ཆོས་སུ་འགྲོ་རྒྱུ་དེ་ཡིན་མིན་ལ་ཤེས་འདོད་ཞུགས་པའི་གང་ཟག་ཡོད་པའི་གཞི་མཐུན་པ་དེ། ཤེས་འདོད་ཆོས་ཅན་སྐྱོན་མེད་ཀྱི་མཚན་ཉིད། ཁྱོད་བྱས་རྟགས་ཀྱིས་སྒྲ་མི་རྟག་པར་སྒྲུབ་པར་བྱེད་པའི་རྩོད་གཞིར་བཟུང་བ་ཡང་ཡིན། ཁྱོད་བྱས་པར་ཚད་མས་ངེས་ནས་ཁྱོད་མི་རྟག་པ་ལ་ཤེས་འདོད་ཞུགས་པའི་གང་ཟག་སྲིད་པ་ཡང་ཡིན་པའི་གཞི་མཐུན་པར་དམིགས་པ་དེ། སྒྲ་མི་རྟག་པར་སྒྲུབ་པར་བྱེད་པའི་ཤེས་འདོད་ཆོས་ཅན་སྐྱོན་མེད་ཀྱི་མཚན་ཉིད། མཚན་གཞི་ནི་སྒྲ་དེ་ཡིན་ལ། སྒྲ་མ་ཡིན་པ་ལས་ལོག་པ་དང་ཉན་བྱ་གཉིས་རེ་རེ་ནས་དེ་མ་ཡིན་ནོ། ། གཉིས་པ་དབྱེ་བ་ནི། གཏན་ཚིགས་རིགས་པའི་དོན་བསྡུས་ལས། དབྱེ་ན་རྟགས་ཡང་དག་དང༌། འགལ་མ་ངེས་མ་གྲུབ་པའི་ཆོས་ཅན་བཞིའོ། །ཞེས་གསུངས་སོ། ། གསུམ་པ་ཤེས་འདོད་ཆོས་ཅན་གྱི་སྒྲུབ་བྱེད་ནི། སྒྲ་མ་ཡིན་པ་ལས་ལོག་པ་དང་མཉན་བྱ་གཉིས་ཆོས་ཅན། སྒྲ་མི་རྟག་པར་སྒྲུབ་པར་བྱེད་པའི་ཤེས་འདོད་ཆོས་ཅན་མ་ཡིན་པར་ཐལ། སྒྲ་མི་རྟག་པར་སྒྲུབ་པར་བྱེད་པའི་རྩོད་གཞིར་བཟུང་བ་མ་ཡིན་པའི་ཕྱིར། མ་གྲུབ་ན། དེར་ཐལ། སྒྲ་མ་ཡིན་པ་ལས་ལོག་པ་དེ་དེ་མ་ཡིན་པ་གང་ཞིག མཉན་བྱ་དེ་དེ་མ་ཡིན་པའི་ཕྱིར། དང་པོ་མ་གྲུབ་ན། སྒྲ་མ་ཡིན་པ་ལས་ལོག་པ་ཆོས་ཅན། སྒྲ་སྒྲུབ་པ་ཡིན་པར་སྒྲུབ་པར་བྱེད་པའི་ཤེས་འདོད་ཆོས་ཅན་ཡིན་པར་ཐལ། སྒྲ་མི་རྟག་པར་སྒྲུབ་པར་བྱེད་པའི་ཤེས་འདོད་ཆོས་ཅན་ཡིན་པའི་ཕྱིར། རྟགས་ཁས། འདོད་ན། སྒྲ་མ་ཡིན་པ་ལས་ལོག་པ་ཆོས་ཅན། སྒྲུབ་པ་ཡིན་པར་ཐལ། སྒྲ་སྒྲུབ་པ་ཡིན་པར་སྒྲུབ་པར་བྱེད་པའི་ཤེས་འདོད་ཆོས་ཅན་ཡིན་པའི་ཕྱིར། རྟགས་ཁས། འདོད་མི་ནུས་ཏེ། དགག་པ་ཡིན་པའི་ཕྱིར། མ་གྲུབ་ན། སྒྲ་ཆོས་ཅན། ཁྱོད་མ་ཡིན་པ་ལས་ལོག་པ་དགག་པ་ཡིན་པར་ཐལ། ཁྱོད་མ་ཡིན་པ་ལས་ལོག་པ་ཡོད་པའི་ཕྱིར། གཞན་ཡང་སྒྲ་མ་ཡིན་པ་ལས་ལོག་པ་ཆོས་ཅན། སྒྲ་མི་རྟག་པར་སྒྲུབ་པར་བྱེད་པའི་ཤེས་འདོད་ཆོས་ཅན་མ་ཡིན་པར་ཐལ། སྒྲ་མི་རྟག་པར་སྒྲུབ་པར་བྱེད་པའི་ཕྱོགས་ཆོས་ཡིན་པའི་ཕྱིར། ཁྱབ་སྟེ། དེ་སྒྲུབ་ཀྱི་རྩོད་གཞི་དང་རྟགས་གཉིས་ཀ་ཆོས་གཅིག་བཀོད་པ་ཡིན་ན་ཕྱོགས་ཆོས་མ་གྲུབ་དགོས་པའི་ཕྱིར། དེར་ཐལ། རྣམ་འགྲེལ་ལས། ཆོས་ཅན་གཏན་ཚིགས་དངོས་གྱུར་ནི། །ཤེས་བྱེད་ཉིད་དུ་མ་གྲུབ་ཕྱིར། །ཞེས་གསུངས་པའི་ཕྱིར། ཁྱབ་སྟེ། ཆོས་ཅན་ཞེས་པས་རྩོད་གཞི་དེ་བསྟན། གཏན་ཚིགས་དངོས་གྱུར་ནི་ཞེས་པས་རྩོད་གཞི་དེ་རྟགས་ཀྱི་ངོ་བོར་གྱུར་བའམ་བཀོད་པའི་ཚེ་ཞེས་བཤད། ཤེས་བྱེད་ཅེས་པས་དེ་ལྟར་བཀོད་པའི་གཏན་ཚིགས་དེ་བཤད། མ་གྲུབ་ཕྱིར་ཞེས་པས་དེ་ལྟར་བཀོད་པའི་རྟགས་དེ་གཞི་རྟགས་ཐ་དད་མེད་ནས་མ་གྲུབ་པའི་གཏན་ཚིགས་ཡིན་ཞེས་བཤད་པའི་ཕྱིར། གོང་གི་རྟགས་གཉིས་པ་མ་གྲུབ་ན། མཉན་བྱ་ཆོས་ཅན། སྒྲ་མཚོན་བྱར་སྒྲུབ་པར་བྱེད་པའི་ཤེས་འདོད་ཆོས་ཅན་སྐྱོན་མེད་ཡིན་པར་ཐལ། སྒྲ་མི་རྟག་པར་སྒྲུབ་པར་བྱེད་པའི་ཤེས་འདོད་ཆོས་ཅན་ཡིན་པ་གང་ཞིག སྒྲ་མཚོན་བྱར་སྒྲུབ་པར་བྱེད་པའི་ཤེས་འདོད་ཆོས་ཅན་སྐྱོན་མེད་ཡོད་གཞན་མི་འདྲ་བའི་རྒྱུ་མཚན་མེད་པའི་ཕྱིར། རྟགས་དང་པོ་ཁས། གཉིས་པའི་ཟུར་དང་པོ་དེར་ཐལ། སྒྲ་མཚོན་བྱར་སྒྲུབ་པར་བྱེད་པའི་ཤེས་འདོད་ཆོས་ཅན་སྐྱོན་མེད་ཡོད་པར་ཐལ། སྒྲ་མཚོན་བྱར་སྒྲུབ་པར་བྱེད་པའི་རྟགས་ཡང་དག་ཡོད་པའི་ཕྱིར། མ་གྲུབ་ན། དེ་ཡོད་པར་ཐལ། བཏགས་ཡོད་ཆོས་གསུམ་ཚང་བ་དེ་དེ་ཡིན་པའི་ཕྱིར། དེར་ཐལ། དེ་དེ་སྒྲུབ་ཀྱི་ཐ་སྙད་འབའ་ཞིག་སྒྲུབ་ཀྱི་རྟགས་ཡང་དག་ཡིན་པའི་ཕྱིར། རྩ་བར་འདོད་ན། མཉན་བྱ་ཆོས་ཅན། མཚོན་བྱ་ཡིན་པར་ཐལ། སྒྲ་མཚོན་བྱར་སྒྲུབ་པའི་ཤེས་འདོད་ཆོས་ཅན་ཡིན་པའི་ཕྱིར། འདོད་མི་ནུས་ཏེ། མཚན་ཉིད་ཡིན་པའི་ཕྱིར། དེར་ཐལ། སྒྲའི་སྐྱེ་མཆེད་ཀྱི་མཚན་ཉིད་ཡིན་པའི་ཕྱིར། གཞན་ཡང་མཉན་བྱ་ཆོས་ཅན། སྒྲ་མི་རྟག་པར་སྒྲུབ་པར་བྱེད་པའི་ཤེས་འདོད་ཆོས་ཅན་མ་ཡིན་པར་ཐལ། སྒྲ་མི་རྟག་པར་སྒྲུབ་པར་བྱེད་པའི་ཕྱོགས་ཆོས་ཡིན་པའི་ཕྱིར། དེར་ཐལ། ཁྱོད་དབང་རྣོན་ལ་རྟགས་ཡང་དག་དང་དབང་རྟུལ་ལ་ཐུན་མོང་མ་ཡིན་པའི་མ་ངེས་པའི་གཏན་ཚིགས་ཡིན་པའི་ཕྱིར་ཏེ། ནང་གི་ཁྱབ་པ་ལས། རྒོལ་བ་རྨོངས་ལ་ལྟོས་པ་ཡིན། །ཞེས་དང༌། ནང་གི་ཁྱབ་པ་བློ་ལྡན་ལའོ། །ཞེས་དང༌། ཉ་དབོན་གྱི་ཚད་ཊཱིཀ་ལས། མཁས་གྲུབ་ཤནྟི་བ་ཡང་རྨོངས་པ་ལ་དཔེ་དགོས་པས། མཉན་བྱ་སྒྲ་མི་རྟག་པར་སྒྲུབ་པའི་རྟགས་ཡང་དག་ཡིན་ཕྱིར། མཁས་པ་རྣམས་ལ་ནི། གཏན་ཚིགས་འབའ་ཞིག་བརྗོད་པར་ཟད། །ཅེས་པས་བསྟན་ཞེས་ནང་གི་ཁྱབ་པར་བཤད་དེ་ལེགས་སམ་སྙམ་མོ། །ཞེས་དང༌། རྣམ་འགྲེལ་ལས། ཁྱད་པར་རྣམ་པར་གཅོད་པ་ཡི། །གཏན་ཚིགས་སུ་འགྱུར་མ་མཐོང་ཕྱིར། །ཞེས་གསུངས་པའི་ཕྱིར། ཁ་ཅིག་དེ་སྒྲུབ་ཀྱི་རྩོད་གཞི་ཡོད་ན་དེ་སྒྲུབ་ཀྱི་ཤེས་འདོད་ཆོས་ཅན་སྐྱོན་མེད་ཡོད་པས་ཁྱབ་ཟེར་ན། འོ་ན་སྒྲ་སྒྲར་སྒྲུབ་པར་བྱེད་པའི་ཤེས་འདོད་ཆོས་ཅན་སྐྱོན་མེད་ཡོད་པར་ཐལ། སྒྲ་སྒྲར་སྒྲུབ་པར་བྱེད་པའི་རྩོད་གཞི་ཡོད་པའི་ཕྱིར། ཁྱབ་པ་ཁས། མ་གྲུབ་ན། སྒྲ་ཆོས་ཅན། ཁྱོད་སྒྲར་སྒྲུབ་པར་བྱེད་པའི་རྩོད་གཞི་ཡོད་པར་ཐལ། ཁྱོད་ཡོད་པའི་ཕྱིར། རྩ་བར་འདོད་ན། སྒྲ་ཚད་མས་ངེས་ནས་སྒྲ་སྒྲ་ཡིན་མིན་ལ་ཤེས་འདོད་ཞུགས་པའི་གང་ཟག་ཡོད་པར་ཐལ། སྒྲ་དེ་སྒྲ་སྒྲར་སྒྲུབ་པར་བྱེད་པའི་ཤེས་འདོད་ཆོས་ཅན་སྐྱོན་མེད་ཡིན་པའི་ཕྱིར། རྟགས་ཁས། འདོད་མི་ནུས་ཏེ། སྒྲ་ཚད་མས་ངེས་པའི་གང་ཟག་ཡིན་ན་སྒྲ་སྒྲར་ཚད་མས་ངེས་པའི་གང་ཟག་ཡིན་དགོས་པའི་ཕྱིར་རོ། ། ཡང་སྒྲ་ཆོས་ཅན། བྱས་རྟགས་ཀྱིས་སྒྲ་མི་རྟག་པར་སྒྲུབ་པར་བྱེད་པའི་ཤེས་འདོད་ཆོས་ཅན་སྐྱོན་མེད་ཡིན་པར་ཐལ། ཁྱོད་བྱས་རྟགས་ཀྱིས་སྒྲ་མི་རྟག་པར་སྒྲུབ་པར་བྱེད་པའི་རྩོད་གཞིར་བཟུང་བ་གང་ཞིག ཁྱོད་བྱས་པར་ཚད་མས་ངེས་ནས་ཁྱོད་མི་རྟག་པ་ཡིན་མིན་ལ་ཤེས་འདོད་ཞུགས་པའི་གང་ཟག་ཡོད་པའི་ཕྱིར། རྟགས་དང་པོ་སླ། རྟགས་ཕྱི་མ་དེར་ཐལ། བྱས་རྟགས་ཀྱིས་སྒྲ་མི་རྟག་པར་སྒྲུབ་པར་བྱེད་པའི་ཕྱི་རྒོལ་ཡང་དག་དེ་དེ་ཡིན་པའི་ཕྱིར་རོ། ། རྗེས་ཁྱབ་དང་ལྡོག་ཁྱབ་ཀྱི་ལྟོས་གཞི་མཐུན་ཕྱོགས་མི་མཐུན་ཕྱོགས་བཤད་པ།རྗེས་ཁྱབ་དང་ལྡོག་ཁྱབ་ཀྱི་ལྟོས་གཞི་མཐུན་ཕྱོགས་མི་མཐུན་ཕྱོགས་བཤད་པ། གཉིས་པ་རྗེས་ཁྱབ་དང་ལྡོག་ཁྱབ་ཀྱི་ལྟོས་གཞི་མཐུན་ཕྱོགས་མི་མཐུན་ཕྱོགས་བཤད་པ་ལ། བསྒྲུབ་བྱའི་ཆོས་བཤད་པ་དང། མཐུན་ཕྱོགས་མི་མཐུན་ཕྱོགས་བཤད་པ་དང་གཉིས། དང་པོ་ལ་དགག་བཞག་གཉིས། ཁ་ཅིག་གིས་སྐད་ཅིག་མ་ཆོས་ཅན། སྒྲ་མི་རྟག་པར་སྒྲུབ་པར་བྱེད་པའི་བསྒྲུབ་བྱའི་ཆོས་ཡིན་པར་ཐལ། བྱས་རྟགས་ཀྱིས་སྒྲ་མི་རྟག་པར་སྒྲུབ་པར་བྱེད་པའི་བསྒྲུབ་བྱའི་ཆོས་ཡིན་པའི་ཕྱིར་ཟེར་ན་མ་ཁྱབ། འདོད་མི་ནུས་ཏེ། སྒྲ་མི་རྟག་པར་སྒྲུབ་པར་བྱེད་པའི་རྟགས་ཡང་དག་ཡིན་པའི་ཕྱིར། མ་གྲུབ་ན། སྐད་ཅིག་མ་ཆོས་ཅན། སྒྲ་མི་རྟག་པར་སྒྲུབ་པར་བྱེད་པའི་རྟགས་ཡང་དག་ཡིན་པར་ཐལ། སྒྲ་མི་རྟག་པར་སྒྲུབ་པར་བྱེད་པའི་ཐ་སྙད་འབའ་ཞིག་སྒྲུབ་ཀྱི་རྟགས་ཡང་དག་ཡིན་པའི་ཕྱིར། དེར་ཐལ། ཁྱོད་མི་རྟག་པའི་མཚན་ཉིད་ཡིན་པའི་ཕྱིར། ཡང་ཁ་ཅིག་གིས་སྐད་ཅིག་མ་བྱས་རྟགས་ཀྱིས་སྒྲ་མི་རྟག་པར་སྒྲུབ་པར་བྱེད་པའི་དངོས་ཀྱི་སྒྲུབ་བྱའི་ཆོས་མིན་ཟེར་ན། སྐད་ཅིག་མ་དེ་བྱས་རྟགས་ཀྱིས་སྒྲ་མི་རྟག་པར་སྒྲུབ་པར་བྱེད་པའི་དངོས་ཀྱི་བསྒྲུབ་བྱའི་ཆོས་ཀྱི་བཟུང་བྱ་ཡིན་པར་ཐལ། བྱས་རྟགས་ཀྱིས་སྒྲ་མི་རྟག་པར་སྒྲུབ་པར་བྱེད་པའི་དངོས་ཀྱི་བསྒྲུབ་བྱའི་ཆོས་སུ་བཟུང་བྱར་གྱུར་བའི་མཚན་མཚོན་གཉིས་ཡོད་པའི་ཕྱིར། དེར་ཐལ། བྱས་པ་དེ་དོན་དང་ཐ་སྙད་གཉིས་ཀ་སྒྲུབ་པར་བྱེད་པའི་རྟགས་ཡང་དག་ཡིན་པའི་ཕྱིར། ཁ་ཅིག་གིས་རྟག་པ་མ་ཡིན་པ་དེ་སྒྲ་མི་རྟག་པར་སྒྲུབ་པར་བྱེད་པའི་ཤུགས་ཀྱི་བསྒྲུབ་བྱའི་ཆོས་ཡིན་ཟེར་ན། དེ་ཆོས་ཅན། དེ་སྒྲུབ་ཀྱི་བསྒྲུབ་བྱའི་ཆོས་ཡིན་པར་ཐལ། དེ་སྒྲུབ་ཀྱི་ཤུགས་ཀྱི་བསྒྲུབ་བྱའི་ཆོས་ཡིན་པའི་ཕྱིར། འདོད་ན། སྒྲ་རྟག་པ་མ་ཡིན་པར་སྒྲུབ་པར་བྱེད་པའི་རྟགས་ཡང་དག་གི་བསྒྲུབ་བྱའི་ཆོས་ཡིན་ན་སྒྲ་མི་རྟག་པར་སྒྲུབ་པར་བྱེད་པའི་རྟགས་ཡང་དག་གི་བསྒྲུབ་བྱའི་ཆོས་ཡིན་དགོས་པར་ཐལ། འདོད་པའི་ཕྱིར། འདོད་ན། རྟག་པ་མ་ཡིན་པ་ཆོས་ཅན། ཁྱོད་ཆོས་དང་སྐད་ཅིག་མ་མ་ཡིན་པའི་གཞི་མཐུན་པ་མ་ཡིན་པའི་རྟགས་ཀྱིས་སྒྲ་མི་རྟག་པར་སྒྲུབ་པར་བྱེད་པའི་རྟགས་ཡང་དག་གི་བསྒྲུབ་བྱའི་ཆོས་ཡིན་པར་ཐལ། ཁྱོད་ཆོས་དང་སྐད་ཅིག་མ་མ་ཡིན་པའི་གཞི་མཐུན་པ་མ་ཡིན་པའི་རྟགས་ཀྱིས་སྒྲ་རྟག་པ་མ་ཡིན་པར་སྒྲུབ་པར་བྱེད་པའི་རྟགས་ཡང་དག་གི་བསྒྲུབ་བྱའི་ཆོས་ཡིན་པའི་ཕྱིར། འདོད་ན། ཆོས་དང་སྐད་ཅིག་མ་མ་ཡིན་པའི་གཞི་མཐུན་པ་མ་ཡིན་པ་དེ་སྒྲ་མི་རྟག་པར་སྒྲུབ་པར་བྱེད་པའི་རྟགས་ཡང་དག་ཡིན་པར་ཐལ། འདོད་པའི་ཕྱིར། འདོད་མི་ནུས་ཏེ། ཆོས་དང་སྐད་ཅིག་མ་མ་ཡིན་པའི་གཞི་མཐུན་པ་མ་ཡིན་པའི་རྟགས་ཀྱིས་དེ་སྒྲུབ་ཀྱི་རྗེས་ཁྱབ་མ་གྲུབ་པའི་ཕྱིར། དེར་ཐལ། ཆོས་དང་སྐད་ཅིག་མ་མ་ཡིན་པའི་གཞི་མཐུན་པ་མ་ཡིན་པའི་རྟགས་ཀྱིས་དེ་སྒྲུབ་ཀྱི་དངོས་ཁྱབ་མ་གྲུབ་པའི་ཕྱིར། མ་གྲུབ་ན། རི་བོང་རྭ་ཆོས་ཅན། མི་རྟག་པ་ཡིན་པར་ཐལ། ཆོས་དང་སྐད་ཅིག་མ་མ་ཡིན་པའི་གཞི་མཐུན་པ་མ་ཡིན་པ་ཡིན་པའི་ཕྱིར། འདོད་མི་ནུས་ཏེ། མེད་ངེས་ཡིན་པའི་ཕྱིར། ཡང་ཁ་ཅིག་གིས་བྱས་རྟགས་ཀྱིས་སྒྲ་མི་རྟག་པར་སྒྲུབ་པར་བྱེད་པའི་དངོས་ཀྱི་བསྒྲུབ་བྱའི་ཆོས་སུ་བཟུང་བྱར་གྱུར་བ་ཡང་ཡིན་དགག་པ་ཡིན་པའི་གཞི་མཐུན་པ་ཡོད་པར་ཐལ། མི་རྟག་པ་དེ་བྱས་རྟགས་ཀྱིས་སྒྲ་མི་རྟག་པར་སྒྲུབ་པར་བྱེད་པའི་དངོས་ཀྱི་བསྒྲུབ་བྱའི་ཆོས་སུ་བཟུང་བྱ་ཡིན་པ་གང་ཞིགདགག་པ་ཡིན་པའི་ཕྱིར་ཟེར་ན། གཏན་ཚིགས་རིགས་པའི་དོན་བསྡུས་ལྟར་ན་སྒྲུབ་རྟགས་ཡང་དག་གི་དངོས་ཀྱི་བསྒྲུབ་བྱའི་ཆོས་ལ་སྒྲུབ་པ་བཟུང་དགོས་པ་དང་དགག་རྟགས་ཡང་དག་གི་དངོས་ཀྱི་བསྒྲུབ་བྱའི་ཆོས་ལ་དགག་པ་བཟུང་དགོས་པར་གསུངས་པ་སོགས་དང་བསྟུན་ནས་རེ་ཞིག་རྟགས་ཕྱི་མ་མ་གྲུབ། འོན་ཀྱང་རྣམ་འགྲེལ་ལེའུ་དང་པོའི་འགྲེལ་བ་ལས། འབྲས་བུའི་སྒོ་ནས་དགག་པ་ནི། སྒྲ་མིག་ཤེས་ཀྱི་བཟུང་བྱ་མ་ཡིན་པ་དང༌། མ་རིག་པ་དང༌། མ་སྐྱེས་པ་དང༌། བདག་མེད་པ་དང༌། མི་རྟག་པ་རྣམས་སོ། །ཞེས་དང༌། དེའི་ཐད་ཀྱི་ཤཱཀྱ་བློའི་འགྲེལ་བ་ལས། མི་རྟག་པ་ནི་རྟག་པ་ཡིན་པ་རྣམ་པར་བཅད་པའི་དགག་པའོ། །ཞེས་སོགས་རྒྱ་གཞུང་དུ་མར་མི་རྟག་པ་དགག་པ་ཡིན་པ་ལྟ་བུར་བཤད་པའི་གསུངས་ཟིན་མང་བས་དཔྱད་པར་བྱའོ། །གོང་དུ་འདོད་ན། བྱས་པ་ཆོས་ཅན། ཁྱོད་སྒྲ་མི་རྟག་པར་སྒྲུབ་པར་བྱེད་པའི་དགག་རྟགས་ཡང་དག་ཡིན་པར་ཐལ། དེ་སྒྲུབ་ཀྱི་རྟགས་ཡང་དག་གང་ཞིག དེ་སྒྲུབ་ཀྱི་དངོས་ཀྱི་བསྒྲུབ་བྱའི་ཆོས་སུ་བཟུང་བྱར་གྱུར་བ་ཡང་ཡིན་དགག་པ་ཡང་ཡིན་པའི་གཞི་མཐུན་པ་ཡོད་པའི་ཕྱིར། རྟགས་ཕྱི་མ་ཁས། ཁྱབ་སྟེ། གཏན་ཚིགས་རིགས་པའི་དོན་བསྡུས་ལས། སྒྲུབ་རྟགས་དང་དགག་རྟགས་གཉིས་ཏེ། མཚན་ཉིད་ནི་རིམ་པ་ལྟར། ཚུལ་གསུམ་གང་ཞིགབསྒྲུབ་བྱའི་ཆོས་སྒྲུབ་པ་ཡིན་པ་དང༌། གང་ཞིག བསྒྲུབ་བྱའི་ཆོས་དགག་པ་ཡིན་པའོ། །ཞེས་གསུངས་སོ། །བྱས་པ་ཆོས་ཅན། ཁྱོད་སྒྲ་མི་རྟག་པར་སྒྲུབ་པར་བྱེད་པའི་དགག་རྟགས་ཡང་དག་མ་ཡིན་པར་ཐལ། སྒྲ་མི་རྟག་པར་སྒྲུབ་པར་བྱེད་པའི་རང་བཞིན་གྱི་རྟགས་ཡང་དག་ཡིན་པའི་ཕྱིར། ཁྱབ་སྟེ། དེ་སྒྲུབ་ཀྱི་འབྲས་རང་གི་རྟགས་གཉིས་པོ་གང་རུང་ཡིན་ན་སྒྲུབ་རྟགས་ཡང་དག་ཡིན་དགོས་པའི་ཕྱིར་ཏེ། རང་འགྲེལ་གཉིས་ལས། དེ་ལ་གཉིས་ནི་དངོས་པོ་སྒྲུབ་པ་ཡིན་ལ། གཅིག་ནི་དགག་པའི་གཏན་ཚིགས་སོ། །ཞེས་གསུངས་པའི་ཕྱིར། མ་ཁྱབ་མཚམས་ཀྱི་རྟགས་གྲུབ་སྟེ། རྣམ་འགྲེལ་ལས། རང་བཞིན་ཡོད་ཙམ་དང༌། འབྲེལ་བ་ཅན་གྱི་ངོ་བོ་ཡང༌། །ཞེས་གསུངས་སོ། ། གཉིས་པ་རང་ལུགས་བཤད་པ།གཉིས་པ་རང་ལུགས་བཤད་པ་ལ། མཚན་ཉིད། དབྱེ་བ། སྒྲུབ་བྱེད་བཤད་པ་དང་གསུམ། དང་པོ་ནི། རང་གི་ཤེས་འདོད་ཆོས་ཅན་གྱི་སྟེང་དུ་དཔག་བྱར་བཟུང་བའི་དཔག་པར་བྱ་བའི་ཆོས་དེ། བསྒྲུབ་བྱའི་ཆོས་ཀྱི་མཚན་ཉིད་ཡིན་ཏེ། གཏན་ཚིགས་རིགས་པའི་དོན་བསྡུས་ལས། བསྒྲུབ་བྱའི་ཆོས་ཀྱི་མཚན་ཉིད། རང་གི་ཆོས་ཅན་གྱི་སྟེང་དུ་དཔག་བྱར་བཟུང་བའི་དཔག་བྱའི་ཆོས་སོ། །ཞེས་གསུངས་པའི་ཕྱིར། འདི་ཅུང་ཟད་ཞིབ་པའི་དབང་དུ་བྱས་ན། དཔག་པར་བྱ་བའི་ཆོས་སུ་བཟུང་བར་བྱ་བ་དེ། བསྒྲུབ་བྱའི་ཆོས་ཀྱི་མཚན་ཉིད། མཚན་གཞི་ནི། སྒྲ་མི་རྟག་པར་སྒྲུབ་པར་བྱེད་པ་ལ་མི་རྟག་པ་ལྟ་བུའོ། །སྒྲ་མི་རྟག་པར་བསྒྲུབ་པར་བྱེད་པའི་ཤེས་འདོད་ཆོས་ཅན་སྒྲའི་སྟེང་དུ་དཔག་བྱར་བཟུང་བའི་དཔག་བྱའི་ཆོས་དེ། སྒྲ་མི་རྟག་པར་སྒྲུབ་པར་བྱེད་པའི་བསྒྲུབ་བྱའི་ཆོས་ཀྱི་མཚན་ཉིད། མཚན་གཞི་ནི་མི་རྟག་པ་ལྟ་བུའོ། །གཉིས་པ་དབྱེ་བ་ནི། རྟགས་ཡང་དག་དང༌། འགལ་མ་ངེས་མ་གྲུབ་པའི་བསྒྲུབ་བྱའི་ཆོས་བཞིའོ། །ཡང་ན་དེ་སྒྲུབ་ཀྱི་དངོས་ཀྱི་བསྒྲུབ་བྱའི་ཆོས་དང༌། དེ་སྒྲུབ་ཀྱི་ཤུགས་ཀྱི་བསྒྲུབ་བྱའི་ཆོས་གཉིས་ཡོད། དེ་སྒྲུབ་ཀྱི་ཤེས་འདོད་ཆོས་ཅན་གྱི་སྟེང་དུ་དངོས་སུ་དཔག་བྱར་བཟུང་བའི་དཔག་བྱའི་ཆོས་དེ། དེ་སྒྲུབ་ཀྱི་དངོས་ཀྱི་བསྒྲུབ་བྱའི་ཆོས་ཀྱི་མཚན་ཉིད། སྒྲ་མི་རྟག་སྒྲུབ་ལ་མཚོན་ན་མི་རྟག་པ་ལྟ་བུའོ། །དེ་སྒྲུབ་ཀྱི་ཤེས་འདོད་ཆོས་ཅན་གྱི་སྟེང་དུ་ཤུགས་ཀྱི་དཔག་བྱར་བཟུང་བའི་དཔག་བྱའི་ཆོས་དེ། དེ་སྒྲུབ་ཀྱི་ཤུགས་ཀྱི་བསྒྲུབ་བྱའི་ཆོས་ཀྱི་མཚན་ཉིད། སྒྲ་མི་རྟག་པར་སྒྲུབ་པ་ལ་མཚོན་ན་མི་རྟག་པ་མ་ཡིན་པ་ལས་ལོག་པ་ལྟ་བུའོ། །བྱས་རྟགས་ཀྱིས་སྒྲ་མི་རྟག་སྒྲུབ་ཀྱི་ཤེས་འདོད་ཆོས་ཅན་གྱི་སྟེང་དུ་དཔག་བྱར་བཟུང་བའི་དཔག་བྱའི་ཆོས་དེ། བྱས་རྟགས་ཀྱིས་སྒྲ་མི་རྟག་སྒྲུབ་ཀྱི་བསྒྲུབ་བྱའི་ཆོས་ཀྱི་མཚན་ཉིད། དབྱེ་ན་དངོས་ཀྱི་བསྒྲུབ་བྱའི་ཆོས་དང། ཤུགས་ཀྱི་བསྒྲུབ་བྱའི་ཆོས་གཉིས། དང་པོ་ནི་མི་རྟག་པ་དང་སྐད་ཅིག་མ་ལྟ་བུའོ། །གཉིས་པ་ནི་དེ་གཉིས་མ་ཡིན་པ་ལས་ལོག་པ་ལྟ་བུའོ། ། གསུམ་པ་སྒྲུབ་བྱེད་ནི། བདག་ཏུ་མ་གྲུབ་པ་ཡིན་ན་བསྒྲུབ་བྱའི་ཆོས་ཡིན་པས་ཁྱབ་སྟེ། རི་བོང་རྭ་བསྒྲུབ་བྱའི་ཆོས་ཡིན་པའི་ཕྱིར། དེར་ཐལ། དེ་རང་གི་ཤེས་འདོད་ཆོས་ཅན་གྱི་སྟེང་དུ་བསྒྲུབ་པར་བྱ་བའི་ཆོས་སུ་བཟུང་བར་བྱ་བ་ཡིན་པའི་ཕྱིར། མ་གྲུབ་ན། རི་བོང་རྭ་ཆོས་ཅན། ཁྱོད་རང་གི་ཤེས་འདོད་ཆོས་ཅན་གྱི་སྟེང་དུ་བསྒྲུབ་པར་བྱ་བའི་ཆོས་སུ་བཟུང་བར་བྱ་བ་ཡིན་པར་ཐལ། ཁྱོད་སྒྲ་རི་བོང་རྭར་སྒྲུབ་པར་བྱེད་པའི་བསྒྲུབ་བྱའི་ཆོས་སུ་བཟུང་བྱ་ཡིན་པའི་ཕྱིར། མ་གྲུབ་ན། རི་བོང་རྭ་ཆོས་ཅན། ཁྱོད་སྒྲ་ཁྱོད་དུ་སྒྲུབ་པར་བྱེད་པའི་བསྒྲུབ་བྱའི་ཆོས་སུ་བཟུང་བྱ་ཡིན་པར་ཐལ། ཁྱོད་བདག་ཏུ་མ་གྲུབ་པ་ཡིན་པའི་ཕྱིར་རོ། །གཞན་ཡང་མི་རྟག་པ་ཆོས་ཅན། སྒྲ་མི་རྟག་པར་བསྒྲུབ་པར་བྱེད་པའི་བསྒྲུབ་བྱའི་ཆོས་ཡིན་པར་ཐལ། སྒྲ་མི་རྟག་པར་སྒྲུབ་པར་བྱེད་པའི་བསྒྲུབ་བྱའི་ཆོས་སུ་བཟུང་བྱ་ཡིན་པའི་ཕྱིར། མ་གྲུབ་ན། མི་རྟག་པ་སྒྲ་མི་རྟག་པར་བསྒྲུབ་པར་བྱེད་པའི་བསྒྲུབ་བྱའི་ཆོས་སུ་བཟུང་བྱ་ཡིན་པར་ཐལ། སྒྲ་མི་རྟག་པར་བསྒྲུབ་པར་བྱེད་པའི་རྟགས་ཆོས་དོན་གསུམ་ངོས་འཛིན་རྒྱུ་ཡོད་པའི་ཕྱིར། དེར་ཐལ། སྒྲ་དེ་རྩོད་གཞི་དང༌། མི་རྟག་པ་བསྒྲུབ་བྱའི་ཆོས་དང༌། བྱས་པ་དེ་སྒྲུབ་ཀྱི་རྟགས་ཡིན་པའི་ཕྱིར་རོ། ། གཉིས་པ་རྗེས་ཁྱབ་དང་ལྡོག་ཁྱབ་ཀྱི་ལྟོས་གཞི་མཐུན་ཕྱོགས་དང་མི་མཐུན་ཕྱོགས་བཤད་པ་ལ། དགག་བཞག་གཉིས་ལས། དང་པོ་ལ། ཁ་ཅིག་ན་རེ། ཤེས་འདོད་ཆོས་ཅན་དང་བསྒྲུབ་བྱའི་ཆོས་ཀྱི་སྤྱིའི་དོན་མཐུན་པ་དེ། དེ་སྒྲུབ་ཀྱི་མཐུན་ཕྱོགས་ཀྱི་མཚན་ཉིད། དེ་ལྟར་དོན་མི་མཐུན་པ་དེ་དེ་སྒྲུབ་ཀྱི་མི་མཐུན་ཕྱོགས་ཀྱི་མཚན་ཉིད་ཟེར་ན། འོ་ན་གཞལ་བྱའི་རྟགས་ཀྱིས་སྒྲ་རྟག་པར་སྒྲུབ་པའི་མཐུན་ཕྱོགས་མེད་པར་ཐལ། སྒྲ་དང་རྟག་པར་ཆོས་མཐུན་པ་མེད་པའི་ཕྱིར། འདོད་ན། གཞལ་བྱ་སྒྲ་རྟག་པར་སྒྲུབ་པའི་མཐུན་ཕྱོགས་ལ་མེད་པར་ཐལ། འདོད་པའི་ཕྱིར། འདོད་ན། རིགས་སྒོ་ལས། སྒྲ་རྟག་པ་ལ་སོགས་པའི་ཆོས་སྒྲུབ་པར་བྱ་བ་ལ་གཞལ་བྱ་ཡིན་པའི་ཕྱིར་ཞེས་བྱ་བའི་གཏན་ཚིགས་ནི་མཐུན་ཕྱོགས་དང་མི་མཐུན་པའི་ཕྱོགས་ཐམས་ཅད་ལ་འཇུག་པའི་ཐུན་མོང་གི་མ་ངེས་པ་ཞེས་བྱའོ། །ཞེས་གསུངས་པ་མི་འཐད་པར་ཐལ་ལོ། །ཡང་ཁ་ཅིག་རྣམ་ངེས་རང་འགྲེལ་ལས། མཐུན་པའི་ཕྱོགས་ནི་སྒྲུབ་པར་བྱ་བའི་ཆོས་ཀྱི་སྤྱིའི་དོན་མཐུན་པའོ། །ཞེས་པའི་བསྒྲུབ་པར་བྱ་བའི་ཆོས་ཀྱི་སྤྱི་དེ་དེ་སྒྲུབ་ཀྱི་ཆོས་དང་ཆོས་ཅན་གྱི་ཚོགས་དོན་ལ་བྱེད་ཟེར་ན། དེ་མི་འཐད་པར་ཐལ། འདིའི་དངོས་བསྟན་གྱི་སྤྱི་དེ་དེ་སྒྲུབ་ཀྱི་བསྒྲུབ་བྱའི་ཆོས་ཀྱི་སྤྱི་ཙམ་ལ་བྱེད་ཀྱི་བསྒྲུབ་བྱའི་ཆོས་སུ་འགྲོ་རྒྱུ་དེའི་བྱེ་བྲག་ཀུན་ལ་མི་བྱེད་པ་ཡིན་པའི་ཕྱིར། དེར་ཐལ། རིགས་ཐིགས་ལས། མཐུན་པའི་ཕྱོགས་ནི་བསྒྲུབ་པར་བྱ་བའི་ཆོས་ཀྱི་སྤྱི་དང་དོན་མཐུན་པའོ། །ཞེས་དང༌། དེའི་ཐད་ཀྱི་སློབ་དཔོན་ཆོས་མཆོག་གི་རིགས་ཐིགས་ཀྱི་འགྲེལ་བ་ལས། བྱེ་བྲག་བསྒྲུབ་པར་བྱ་བ་མ་ཡིན་གྱི་འོན་ཀྱང་སྤྱི་ཡིན་པ་དེ་བས་ན་འདིར་སྤྱི་བསྒྲུབ་བྱར་བསྟན་ཏེ། དེ་ནི་བསྒྲུབ་པར་བྱ་བའི་ཆོས་ཀྱང་ཡིན་ལ་སྤྱི་ཡང་ཡིན་ཏེ། བསྒྲུབ་པར་བྱ་བའི་ཆོས་ཀྱི་སྤྱིའི་ཕྱོགས་དང་མཚུངས་པ་ནི་མཐུན་པའི་ཕྱོགས་ཡིན་ནོ། །ཞེས་བྱ་བའི་དོན་ནོ། །ཞེས་གསུངས་པའི་ཕྱིར། དེ་སྒྲུབ་ཀྱི་སྒྲུབ་བྱའི་ཆོས་གང་ཡིན་པ་དེ་ སྐབས་འདིའི་སྤྱི་ལ་འཇོག་དགོས་པར་ཐལ། འཐད་ལྡན་ཆེ་བ་ལས། དེས་ན་བསྒྲུབ་པར་བྱ་བའི་ཆོས་ཀྱི་སྤྱི་ཞེས་ནི་ཚིག་མི་སྦྱོར་གྱི། འོན་ཀྱང་བསྒྲུབ་པར་བྱ་བའི་ཆོས་ཉིད་སྤྱི་ཡིན་ཏེ། ཞེས་དང༌། མདོའི་རང་འགྲེལ་ལས། དེ་ལ་ཡོད་པར་གྲུབ་པར་བྱ་བའི་ཆོས་ཀྱི་སྤྱིའི་ཕྱོགས་དང་མཐུན་པའི་ཕྱོགས་མཚུངས་པའི་དོན་ཐམས་ཅད་ཕྱོགས་ཞེས་བྱ་སྟེ། དེ་ཡང་བསྒྲུབ་བྱའི་ཆོས་སོ། །ཞེས་གསུངས་པའི་ཕྱིར། ཡང་ཁ་ཅིག་དེ་སྒྲུབ་ཀྱི་བསྒྲུབ་བྱའི་ཆོས་ཀྱིས་མི་སྟོང་བ་དེ་མཐུན་ཕྱོགས་ཀྱི་མཚན་ཉིད་དང༌། དེ་ལྟར་སྟོང་བ་དེ་མི་མཐུན་ཕྱོགས་ཀྱི་མཚན་ཉིད་ཟེར་ན། འོ་ན་བུམ་པ་ཆོས་ཅན། སྒྲ་མི་རྟག་པར་སྒྲུབ་པའི་མཐུན་ཕྱོགས་མ་ཡིན་པར་ཐལ། སྒྲ་མི་རྟག་སྒྲུབ་ཀྱི་བསྒྲུབ་བྱའི་ཆོས་ཀྱིས་མི་སྟོང་བ་དེ་མ་ཡིན་པའི་ཕྱིར། ཁྱབ་པ་ཁས། དེར་ཐལ། སྒྲ་མི་རྟག་སྒྲུབ་ཀྱི་བསྒྲུབ་བྱའི་ཆོས་མ་ཡིན་པའི་ཕྱིར། དེར་ཐལ། མི་རྟག་པའི་བྱེ་བྲག་ཡིན་པའི་ཕྱིར། མ་ཁྱབ་ན། མི་རྟག་པ་ཆོས་ཅན། ཆོས་དེ་ཁྱོད་ཀྱི་བྱེ་བྲག་ཡིན་ན་ཆོས་དེ་སྒྲ་ཁྱོད་དུ་སྒྲུབ་པའི་བསྒྲུབ་བྱའི་ཆོས་མ་ཡིན་དགོས་པར་ཐལ། ཁྱོད་བདག་མེད་ཡིན་པའི་ཕྱིར། ཡང་ཁ་ཅིག་དེ་སྒྲུབ་ཀྱི་མཐུན་ཕྱོགས་ཡིན་ན་དེ་སྒྲུབ་ཀྱི་མཐུན་ཕྱོགས་ཞེས་པའི་ཕྱོགས་ཡིན་པས་ཁྱབ། དེ་སྒྲུབ་ཀྱི་མི་མཐུན་ཕྱོགས་ལ་དེ་ལྟར་ཡིན་ཟེར་ན། འོ་ན་དེ་སྒྲུབ་ཀྱི་མཐུན་ཕྱོགས་ཡིན་ན་དེ་སྒྲུབ་ཀྱི་བསྒྲུབ་བྱའི་ཆོས་ཞེས་པའི་ཚིག་ཟུར་གྱི་བསྒྲུབ་བྱ་ཡིན་པས་ཁྱབ་པར་ཐལ། དེ་སྒྲུབ་ཀྱི་མཐུན་ཕྱོགས་ཡིན་ན་དེ་སྒྲུབ་ཀྱི་མཐུན་ཕྱོགས་ཞེས་པའི་ཕྱོགས་ཡིན་པས་ཁྱབ་པའི་ཕྱིར། ཁྱབ་སྟེ། དེ་སྒྲུབ་ཀྱི་མཐུན་ཕྱོགས་མི་མཐུན་ཕྱོགས་ཞེས་པའི་ཚིག་ཟུར་གྱི་ཕྱོགས་གཉིས་པོ་བསྒྲུབ་བྱའི་ཆོས་ལ་བྱེད་དགོས་པའི་ཕྱིར། དེར་ཐལ། དེའི་ཕྱོགས་གཉིས་ཀ་བསྒྲུབ་བྱའི་ཆོས་ལ་བྱས་ནས་དེ་སྒྲུབ་ཀྱི་བསྒྲུབ་བྱའི་ཆོས་གང་ཡིན་རྒྱུ་དེ་དང་མཚུངས་པས་ན་མཐུན་ཕྱོགས་ཞེས་བཤད་དགོས་པའི་ཕྱིར། དེར་ཐལ། འཐད་ལྡན་ཆེ་བ་ལས། མཐུན་པའི་ཕྱོགས་ནི་འགའ་ཞིག་ཕྱོགས་དང་མཐུན་པ་དེ་ཡིན་ནོ། །འདི་ལྟར་ཕྱོགས་དང་འདྲ་བའི་ཕྱིར་ན་དོན་དེ་ཉིད་ཕྱོགས་ཞེས་བརྗོད་པ་ཡིན་ནོ། །འདྲ་བའི་དོན་ཡང་མཐུན་པའི་སྒྲ་ཡིན་ཏེ། ཕྱོགས་དང་མཚུངས་པ་ནི་མཐུན་པའི་ཕྱོགས་སོ། །ཞེས་དང༌། མདོའི་རང་འགྲེལ་ལས། ཕྱོགས་ཞེས་བྱ་བ་སྟེ། དེ་ཡང་བསྒྲུབ་བྱའི་ཆོས་སོ། །ཞེས་དང༌། ཚད་ཆེན་དཀའ་འགྲེལ་ལས། མཐུན་པའི་ཕྱོགས་ནི་བསྒྲུབ་པར་བྱ་བའི་ཆོས་ཀྱི་སྤྱིའི་དོན་མཐུན་པའོ། །ཞེས་དང༌། ཐར་འབྱུང་སྦས་པའི་རྟོག་གེའི་སྐད་ལས། ཕྱོགས་དང་མཚུངས་པ་ནི་ཕྱོགས་དང་མཐུན་པ་སྟེ། ཕྱོགས་དང་ལྷན་ཅིག་འདྲ་བའི་དཔེ་ཆོས་ཅན་ནོ། །ཞེས་གསུངས་པའི་ཕྱིར། གཉིས་པ་རང་ལུགས་བཤད་པ།གཉིས་པ་རང་ལུགས་བཤད་པ་ལ། མཚན་ཉིད། དབྱེ་བ། སྒྲ་བཤད་འཇུག་དང་གསུམ། དང་པོ་ནི། དེ་སྒྲུབ་ཀྱི་བསྒྲུབ་བྱའི་ཆོས་ཀྱི་སྒྲུབ་ཚུལ་དང་མཐུན་པར་མི་སྟོང་བ་དེ། དེ་སྒྲུབ་ཀྱི་མཐུན་ཕྱོགས་ཀྱི་མཚན་ཉིད། སྒྲ་མི་རྟག་པར་སྒྲུབ་པར་བྱེད་པའི་བསྒྲུབ་བྱའི་ཆོས་ཀྱི་འགོད་ཚུལ་དང་མཐུན་པར་མི་སྟོང་བ་དེ། སྒྲ་མི་རྟག་པར་སྒྲུབ་པར་བྱེད་པའི་མཐུན་ཕྱོགས་ཀྱི་མཚན་ཉིད། དེ་དང་མི་རྟག་པ་གཉིས་དོན་གཅིག མཚན་གཞི་ནི་བུམ་པ་ལྟ་བུའོ། །དུ་ལྡན་གྱི་ལ་ལ་མེ་ཡོད་པར་སྒྲུབ་པར་བྱེད་པའི་བསྒྲུབ་བྱའི་ཆོས་ཀྱི་འགོད་ཚུལ་དང་མཐུན་པར་མི་སྟོང་བ་དེ། དུ་ལྡན་གྱི་ལ་ལ་མེ་ཡོད་པར་སྒྲུབ་པར་བྱེད་པའི་མཐུན་ཕྱོགས་ཀྱི་མཚན་ཉིད། དེ་དང་མེ་ཡོད་པ་དོན་གཅིག མཚན་གཞི་ནི། ཚང་མང་སོགས་སོ། །དེ་ལྟར་འཐད་དེ། རིགས་སྒོ་ལས། བསྒྲུབ་པར་བྱ་བའི་ཆོས་ཀྱི་སྤྱིའི་དོན་མཚུངས་པ་ཉིད་མཐུན་པའི་ཕྱོགས་ཡིན་ཏེ། འདི་ལྟར་སྒྲ་མི་རྟག་པར་སྒྲུབ་པ་ལ་བུམ་པ་ལ་སོགས་པ་ཡང་མི་རྟག་པ་ཡིན་པས་མཐུན་པའི་ཕྱོགས་སོ། །ཞེས་ཕྱོགས་ཏེ་ཞེས་པ་ཡན་ཆད་ཀྱིས་མཐུན་ཕྱོགས་སྤྱི་བཤད་ནས། འདི་ལྟར་ཞེས་སོགས་ཀྱིས་དེ་སྒྲུབ་ཀྱི་མཐུན་ཕྱོགས་ཀྱི་མཚན་གཞི་བསྟན་ཅིང༌། བུམ་པ་ལ་སོགས་པས་གང་དང་མཐུན་པའི་དཔེ་བསྟན། ཡང་སྒྲས་མཐུན་དཔེ་སོགས་སྡུད་ཅིང༌། མི་རྟག་པ་ཡིན་པས་མཐུན་པའི་ཕྱོགས་སོ། །ཞེས་པས་མི་རྟག་པ་གང་ཡིན་པ་དེ་དག་མི་རྟག་པ་ཡིན་པའི་རྒྱུ་མཚན་གྱིས་མཐུན་ཕྱོགས་སུ་འཇོག་ཅེས་བསྟན་ཏོ། ། གཉིས་པ་དབྱེ་བ་ནི། མཐུན་ཕྱོགས་དེ་ལ་ཡང་ཡིན་འགོད་ཀྱི་དབང་དུ་བྱས་པ་དང༌། ཡོད་འགོད་ཀྱི་དབང་དུ་བྱས་པ་གཉིས། དང་པོ་ནི། བསྒྲུབ་བྱའི་ཆོས་གང་ཡིན་རྒྱུ་དེ་དང་ཡིན་པར་དོན་མཐུན་པ་རྣམས་མཐུན་ཕྱོགས་དང༌། གཉིས་པ་ཡོད་འགོད་རྣམས་ལ་བསྒྲུབ་བྱའི་ཆོས་གང་ཡིན་རྒྱུ་དེ་དང་ཡོད་པར་དོན་མཐུན་པ་རྣམས་མཐུན་ཕྱོགས་ཞེས་བྱའོ། །དེས་ན་མཚོན་བྱ་མ་ཡིན་པ་བུམ་པ་མཚོན་བྱར་སྒྲུབ་པའི་མཐུན་ཕྱོགས་ཡིན་ལ། དེ་དང་རིགས་འདྲ་བ་གཞན་ལ་ཡང་ཤེས་པར་བྱའོ། །ཡང་ན་གཏན་ཚིགས་རིགས་པའི་དོན་བསྡུས་ལྟར་མཐུན་ཕྱོགས་ལ་དབྱེ་ན། འགལ་རྟགས་ཀྱི་མཐུན་ཕྱོགས་ལྟར་རྟགས་ལ་གཏན་ནས་མེད་པའི་མཐུན་ཕྱོགས་དང༌། འབྲས་རྟགས་ཕར་ཆེར་གྱི་མཐུན་ཕྱོགས་ལྟར་རྟགས་དེ་རྣམ་གཉིས་སུ་འཇུག་པའི་མཐུན་ཕྱོགས་དང༌། སྒྲ་མི་རྟག་སྒྲུབ་ལ་བྱས་པ་བཀོད་པའི་མཐུན་ཕྱོགས་ལྟར་རྟགས་ལ་ཁྱབ་བྱེད་དུ་ཡོད་པའི་མཐུན་ཕྱོགས་དང་གསུམ་ཡོད་ལ། མི་མཐུན་ཕྱོགས་ལ་དབྱེ་ན། སྒྲ་མི་རྟག་སྒྲུབ་ལ་མཚོན་ན་མེད་པ་མི་མཐུན་ཕྱོགས། གཞན་པ་མི་མཐུན་ཕྱོགས། འགལ་བ་མི་མཐུན་ཕྱོགས་དང་གསུམ། རི་བོང་རྭ་དང་པོ་དང༌། དོན་དམ་བདེན་པ་གཉིས་པ་དང༌། རྟག་པ་གསུམ་པ་ཡིན། དང་པོ་རི་བོང་རྭ་ཆོས་ཅན། སྒྲ་མི་རྟག་སྒྲུབ་ཀྱི་མེད་པ་མི་མཐུན་ཕྱོགས་ཡིན་པར་ཐལ། སྒྲ་མི་རྟག་སྒྲུབ་ཀྱི་མི་མཐུན་ཕྱོགས་གང་ཞིག མེད་པ་ཡིན་པའི་ཕྱིར། རྟགས་གཉིས་ཀ་གྲུབ་སྟེ། མེད་ངེས་ཡིན་པའི་ཕྱིར། གཉིས་པ་ནི། དོན་དམ་བདེན་པ་ཆོས་ཅན། སྒྲ་མི་རྟག་སྒྲུབ་ཀྱི་གཞན་པ་མི་མཐུན་ཕྱོགས་ཡིན་པར་ཐལ། སྒྲ་མི་རྟག་སྒྲུབ་ཀྱི་མི་མཐུན་ཕྱོགས་གང་ཞིག མི་རྟག་པ་ལས་གཞན་ཡིན་པའི་ཕྱིར། རྟགས་གཉིས་ཀ་གྲུབ་སྟེ། རྟག་པ་ཡིན་པའི་ཕྱིར། གསུམ་པ་ནི། རྟག་པ་ཆོས་ཅན། སྒྲ་མི་རྟག་སྒྲུབ་ཀྱི་འགལ་བ་མི་མཐུན་ཕྱོགས་ཡིན་པར་ཐལ། སྒྲ་མི་རྟག་སྒྲུབ་ཀྱི་མི་མཐུན་ཕྱོགས་གང་ཞིག མི་རྟག་པ་དང་འགལ་བ་ཡིན་པའི་ཕྱིར། རྟགས་རེ་རེ་ནས་གྲུབ་སྟེ། རྟག་པ་དང་གཅིག་ཡིན་པའི་ཕྱིར། དེ་དང་ཕལ་ཆེར་འདྲ་བར་གཏན་ཚིགས་རིགས་པའི་དོན་བསྡུས་ལས། དབྱེ་ན། མེས་གཞི་འགར་གྲང་རེག་འགོག་པ་ན་ཆུ་ཀླུང་ལྟ་བུ་མེད་པའི་མི་མཐུན་ཕྱོགས། རེག་བྱ་བཏང་སྙོམས་ལྟ་བུ་གཞན་པའི་མི་མཐུན་ཕྱོགས། གྲང་རེག་ལྟ་བུ་འགལ་བ་མི་མཐུན་ཕྱོགས་ཏེ་གསུམ་མོ། །ཞེས་གསུངས་སོ། ། གསུམ་པ་སྒྲ་བཤད།གསུམ་པ་སྒྲ་བཤད་འཇུག་ནི། སྒྲ་མི་རྟག་སྒྲུབ་ལྟ་བུ་ལ་མཚོན་ན་དེ་སྒྲུབ་ཀྱི་མཐུན་ཕྱོགས་དང་སྒྲ་བཤད་གཉིས་ཀ་ཡོད་པའི་མུ་ཡོད་དེ། བུམ་པ་དེ་ཡིན་པའི་ཕྱིར། མ་གྲུབ་ན། བུམ་པ་ཆོས་ཅན། དེར་ཐལ། སྒྲ་མི་རྟག་སྒྲུབ་ཀྱི་མཐུན་ཕྱོགས་གང་ཞིག སྒྲ་མི་རྟག་སྒྲུབ་ཀྱི་མཐུན་ཕྱོགས་ཀྱི་སྒྲ་བཤད་དུ་ཡོད་པའི་ཕྱིར།དང་པོ་མ་གྲུབ་ན། བུམ་པ་ཆོས་ཅན། སྒྲ་མི་རྟག་སྒྲུབ་ཀྱི་མཐུན་ཕྱོགས་ཡིན་པར་ཐལ། མི་རྟག་པ་ཡིན་པའི་ཕྱིར། གཉིས་པ་གྲུབ་སྟེ། ཁྱོད་དང་སྒྲ་གཉིས་མི་རྟག་པར་ཆོས་མཐུན་པའི་ཕྱིར། དེར་ཐལ། ཁྱོད་དང་སྒྲ་གཉིས་མི་རྟག་པ་ཡིན་པའི་ཕྱིར། སྒྲ་རྟག་པར་སྒྲུབ་པ་ལ་མཐུན་ཕྱོགས་ཡིན་ལ་མཐུན་ཕྱོགས་ཀྱི་སྒྲ་བཤད་དུ་མེད་པ་ནི། དོན་དམ་བདེན་པ་དེ་ཡིན་པའི་ཕྱིར། མ་གྲུབ་ན། དོན་དམ་བདེན་པ་ཆོས་ཅན། དེར་ཐལ། སྒྲ་རྟག་པར་སྒྲུབ་པའི་མཐུན་ཕྱོགས་ཡིན་པ་གང་ཞིག མཐུན་ཕྱོགས་ཀྱི་སྒྲ་བཤད་དུ་མེད་པའི་ཕྱིར། དང་པོ་གྲུབ་སྟེ། རྟག་པ་ཡིན་པའི་ཕྱིར། གཉིས་པ་གྲུབ་སྟེ། ཁྱོད་དང་སྒྲ་གཉིས་རྟག་པར་ཆོས་མི་མཐུན་པའི་ཕྱིར་ཏེ། ཁྱོད་རྟག་པ་གང་ཞིག སྒྲ་མི་རྟག་པ་ཡིན་པའི་ཕྱིར། སྒྲ་མི་རྟག་པར་སྒྲུབ་པར་བྱེད་པ་ལ་མཐུན་ཕྱོགས་དང་མཐུན་ཕྱོགས་ཀྱི་སྒྲ་བཤད་གཉིས་ཀ་མེད་པའི་མུ་ནི། ཡོངས་གྲུབ་དེ་ཡིན་པའི་ཕྱིར། རྟགས་སླ། དེ་སྒྲུབ་ཀྱི་མི་མཐུན་ཕྱོགས་ཀྱི་སྒྲ་བཤད་འཇུག་ལ། སྒྲ་རྟག་སྒྲུབ་ཀྱི་མི་མཐུན་ཕྱོགས་དང་སྒྲ་བཤད་གཉིས་ཀ་ཡོད་པའི་མུ་ཡོད་དེ། འཆི་བ་དེ་ཡིན་པའི་ཕྱིར། མ་གྲུབ་ན། འཆི་བ་ཆོས་ཅན།དེར་ཐལ། སྒྲ་རྟག་སྒྲུབ་ཀྱི་མི་མཐུན་ཕྱོགས་ཡིན་པ་གང་ཞིག སྒྲ་རྟག་སྒྲུབ་ཀྱི་མི་མཐུན་ཕྱོགས་ཀྱི་སྒྲ་བཤད་ཡོད་པའི་ཕྱིར། དང་པོ་མ་གྲུབ་ན། འཆི་བ་ཆོས་ཅན། སྒྲ་རྟག་སྒྲུབ་ཀྱི་མི་མཐུན་ཕྱོགས་ཡིན་པར་ཐལ། མི་རྟག་པ་ཡིན་པའི་ཕྱིར། རྟགས་གཉིས་པ་གྲུབ་སྟེ། ཁྱོད་དང་སྒྲ་གཉིས་རྟག་པར་ཆོས་མི་མཐུན་པའི་ཕྱིར། དེར་ཐལ། ཁྱོད་དང་སྒྲ་གཉིས་མི་རྟག་པ་ཡིན་པའི་ཕྱིར། སྒྲ་རྟག་སྒྲུབ་ཀྱི་མི་མཐུན་ཕྱོགས་མ་ཡིན་ལ་སྒྲ་རྟག་སྒྲུབ་ཀྱི་མི་མཐུན་ཕྱོགས་ཀྱི་སྒྲ་བཤད་ཡོད་པའི་མུ་ཡོད་དེ། ཡོངས་གྲུབ་དེ་ཡིན་པའི་ཕྱིར། ཡོངས་གྲུབ་ཆོས་ཅན། དེར་ཐལ། སྒྲ་རྟག་སྒྲུབ་ཀྱི་མི་མཐུན་ཕྱོགས་མ་ཡིན་པ་གང་ཞིག སྒྲ་རྟག་སྒྲུབ་ཀྱི་མི་མཐུན་ཕྱོགས་ཀྱི་སྒྲ་བཤད་ཡོད་པའི་ཕྱིར། དང་པོ་གྲུབ་སྟེ། སྒྲ་རྟག་སྒྲུབ་ཀྱི་མཐུན་ཕྱོགས་ཡིན་པའི་ཕྱིར། དེར་ཐལ། རྟག་པ་ཡིན་པའི་ཕྱིར། གཉིས་པ་གྲུབ་སྟེ། ཁྱོད་དང་སྒྲ་གཉིས་རྟག་པར་ཆོས་མི་མཐུན་པའི་ཕྱིར། སྒྲ་མི་རྟག་སྒྲུབ་ཀྱི་མི་མཐུན་ཕྱོགས་དང་སྒྲ་བཤད་གཉིས་ཀ་མེད་པའི་མུ་ཡོད་དེ། སྡུག་བདེན་དེ་ཡིན་པའི་ཕྱིར་རོ། ། མཐུན་ཕྱོགས་མི་མཐུན་ཕྱོགས་དངོས་འགལ་ཡིན་མིན་དཔྱད་པ་ལ། མཐུན་ཕྱོགས་མི་མཐུན་ཕྱོགས་དང་དངོས་འགལ་ཡིན་ཀྱང་མི་མཐུན་ཕྱོགས་མཐུན་ཕྱོགས་དང་དངོས་འགལ་མ་ཡིན་ཏེ། མི་མཐུན་ཕྱོགས་མེད་པའི་ཕྱིར། དེས་ན་གཞུང་རྣམས་སུ་མི་མཐུན་ཕྱོགས་ཀྱི་མཚན་ཉིད་སོགས་གསུངས་པ་སྒྲ་མི་རྟག་སྒྲུབ་ལྟ་བུའི་གཞི་ལ་སྦྱར་དགོས་སོ། །སྒྲ་མི་རྟག་སྒྲུབ་ཀྱི་མཐུན་ཕྱོགས་དང་མི་མཐུན་ཕྱོགས་གཉིས་ཀ་ཕན་ཚུན་ནས་དངོས་འགལ་ཡིན་ནོ། །དེ་ལྟར་བྱས་པ་ལ་བདག་མེད་ཡིན་ན་མཐུན་ཕྱོགས་ཡིན་པས་མ་ཁྱབ་པར་ཐལ། མི་མཐུན་ཕྱོགས་ཡོད་པའི་ཕྱིར། དེར་ཐལ། བུམ་པ་མི་མཐུན་ཕྱོགས་ཡིན་པའི་ཕྱིར། མ་གྲུབ་ན། དེར་ཐལ། སྒྲ་རྟག་པར་སྒྲུབ་པར་བྱེད་པའི་མི་མཐུན་ཕྱོགས་ཡིན་པའི་ཕྱིར་ན་མ་ཁྱབ། རྟགས་གྲུབ་སྟེ། མི་རྟག་པ་ཡིན་པའི་ཕྱིར། གོང་དུ་འདོད་མི་ནུས་ཏེ། ཡོད་ན་མཐུན་ཕྱོགས་ཡིན་པས་ཁྱབ་པ་གང་ཞིག མེད་ན་ཡང་མཐུན་ཕྱོགས་ཡིན་པས་ཁྱབ་པའི་ཕྱིར། དང་པོ་གྲུབ་སྟེ། བུམ་པ་མཐུན་ཕྱོགས་ཡིན་པའི་ཕྱིར། དེར་ཐལ། སྒྲ་མི་རྟག་པར་སྒྲུབ་པར་བྱེད་པའི་མཐུན་ཕྱོགས་ཡིན་པའི་ཕྱིར། དེར་ཐལ། མི་རྟག་པ་ཡིན་པའི་ཕྱིར། གཉིས་པ་གྲུབ་སྟེ། མི་མཐུན་ཕྱོགས་མཐུན་ཕྱོགས་ཡིན་པའི་ཕྱིར། མ་གྲུབ་ན། མི་མཐུན་ཕྱོགས་ཆོས་ཅན། མཐུན་ཕྱོགས་ཡིན་པར་ཐལ། སྒྲ་གང་ཟག་གི་བདག་ཏུ་མ་གྲུབ་པར་སྒྲུབ་པར་བྱེད་པའི་མཐུན་ཕྱོགས་ཡིན་པའི་ཕྱིར། དེར་ཐལ། བདག་ཏུ་མ་གྲུབ་པ་ཡིན་པའི་ཕྱིར། ཁོ་ན་རེ། མི་མཐུན་ཕྱོགས་ཡོད་པར་ཐལ། མི་མཐུན་དཔེ་ཡོད་པའི་ཕྱིར། དེར་ཐལ། ཆོས་མི་མཐུན་སྦྱོར་གྱི་སྒྲུབ་ངག་ཡོད་པའི་ཕྱིར་ན་མ་ཁྱབ་སྟེ། ཡོད་མེད་གང་རུང་ཡིན་ན་སྒྲ་བདག་ཏུ་མ་གྲུབ་པར་སྒྲུབ་པའི་མཐུན་དཔེ་ཡིན་པས་ཁྱབ་པའི་ཕྱིར་རོ། །གཞན་ཡང་སྒྲ་མི་རྟག་པར་སྒྲུབ་པར་བྱེད་པའི་སྐབས་ཀྱི་ཕྱོགས་སྒྲ་འཇུག་ཚུལ་དངོས་བཏགས་ཅི་རིགས་ཀྱི་སྒོ་ནས་གསུམ་ཡོད་དེ། དེ་སྒྲུབ་ཀྱི་ཤེས་འདོད་ཆོས་ཅན་དང་ཆོས་གཉིས་ཀྱི་ཚོགས་དོན་ལ་ཕྱོགས་སྒྲ་དངོས་སུ་འཇུག ཁྱབ་པ་གཉིས་ཀྱི་འབྲེལ་ཡུལ་གྱི་བསྒྲུབ་བྱའི་ཆོས་དང༌། ཕྱོགས་ཆོས་ཀྱི་ལྟོས་ཡུལ་ཤེས་འདོད་ཆོས་ཅན་གཉིས་ལ་ཕྱོགས་སྒྲ་བཏགས་མིང་དུ་འཇུག་པ་ཡིན་པའི་ཕྱིར་ཏེ། ཚད་མ་མདོ་ལས། བསྡུས་པ་བསྒྲུབ་བྱ་ཡིན་པའི་ཕྱིར། །ཆོས་དང་ཆོས་ཅན་ཁ་ཡར་བ། །དངོས་སུ་མིན་ཡང་དེའི་ཕྱོགས་གཅིག །ཡིན་ཕྱིར་བསྒྲུབ་བྱར་བཏགས་ནས་བརྗོད། །ཅེས་དང༌། འཐད་ལྡན་ཆེ་བ་ལས། རྗེས་སུ་དཔག་པའི་ཐ་སྙད་ནི་གསུམ་སྟེ། སྒྲུབ་བྱེད་ཀྱི་བསྒྲུབ་པར་བྱ་བའི་ཆོས་དང་ཆོས་ཅན་གྱི་སྤྱི་ལ་དངོས་དང༌། ཁྱབ་པའི་ཡུལ་གྱི་བསྒྲུབ་པར་བྱ་བའི་ཆོས་དང་གཏན་ཚིགས་ཀྱི་ཡུལ་ཆོས་ཅན་ལ་བཏགས་ནས་སོ། །ཞེས་གསུངས་པའི་ཕྱིར། ཁྱབ་སྟེ། སྒྲུབ་བྱེད་ཀྱི་བསྒྲུབ་པར་བྱ་བའི་ཆོས་དང་ཆོས་ཅན་གྱི་སྤྱི་ལ་དངོས་དང་ཞེས་པས། ཆོས་དང་ཆོས་ཅན་གྱི་ཚོགས་དོན་ལ་ཕྱོགས་ཀྱི་སྒྲ་དངོས་སུ་འཇུག་པ་དེ་བཤད། ཁྱབ་པའི་ཡུལ་གྱི་ཞེས་སོགས་ཀྱིས་ཤེས་འདོད་ཆོས་ཅན་དང༌། བསྒྲུབ་བྱའི་ཆོས་གཉིས་ལ་ཕྱོགས་སྒྲ་བཏགས་མིང་དུ་འཇུག་པ་དེ་བཤད་པའི་ཕྱིར། དེ་ལྟར་ཕྱོགས་ཆོས་ཞེས་པའི་ཚིག་ཟུར་གྱི་ཕྱོགས་དེ་ཤེས་འདོད་ཆོས་ཅན་ལ་བྱེད་དེ། རྣམ་འགྲེལ་རང་འགྲེལ་ལས། ཕྱོགས་ནི་ཆོས་ཅན་ནོ། །ཞེས་དང༌། རིགས་ཐིགས་ལས། རྗེས་སུ་དཔག་པར་བྱ་བ་ནི་འདིར་ཤེས་པར་འདོད་པའི་བྱེ་བྲག་དང་ལྡན་པའི་ཆོས་ཅན་ནོ། །ཞེས་དང༌། དེའི་ཐད་ཀྱི་འཐད་ལྡན་ལས། རྗེས་སུ་དཔག་པར་བྱ་བ་ནི་འདིས་ཞེས་བྱ་བ་ལ་སོགས་པ་སྨོས་ཏེ། གཏན་ཚིགས་ཀྱི་མཚན་ཉིད་གཏན་ལ་འབེབས་པའི་ཚེ་ན་ཆོས་ཅན་ཉིད་རྗེས་སུ་དཔག་པ་ཡིན་ནོ། །ཞེས་གསུངས་པའི་ཕྱིར། ཁྱབ་སྟེ། འདིའི་སྐབས་ཀྱི་རྗེས་སུ་དཔག་བྱ་དང༌། བསྒྲུབ་བྱ་དང༌། ཕྱོགས་གསུམ་མིང་གི་རྣམ་གྲངས་ཡིན་པའི་ཕྱིར་རོ། ། ཚུལ་གསུམ་དངོས་བཤད་པ་ལ་གཉིས།གཉིས་པ་ཚུལ་གསུམ་དངོས་བཤད་པ་ལ། ཕྱོགས་ཆོས་དང༌། ཁྱབ་པ་གཉིས་བཤད་པ་དང་གཉིས། ཕྱོགས་ཆོས་བཤད་པ།ཕྱོགས་ཆོས་བཤད་པ། དང་པོ་ནི། དགག་བཞག་གཉིས་ལས། དང་པོ་ནི། ཁ་ཅིག་ན་རེ། དེ་སྒྲུབ་ཀྱི་ཤེས་འདོད་ཆོས་ཅན་གྱི་སྟེང་དུ་འགོད་ཚུལ་དང་མཐུན་པར་ཡོད་པ་ཉིད་དུ་ཚད་མས་ངེས་པ་དེ། དེ་སྒྲུབ་ཀྱི་ཕྱོགས་ཆོས་ཀྱི་མཚན་ཉིད། འགོད་ཚུལ་དང་མཐུན་པར་ཡོད་པའི་དོན་ཡིན་འགོད་ལ་རྩོད་གཞི་དེ་རྟགས་དེ་ཡིན་པ་དང༌། ཡོད་འགོད་ལ་རྟགས་ཆོས་ཅན་དེ་ལ་ཡོད་པ་དེ་དེའི་དོན་ཡིན་ཟེར་ན། སྒྲ་ཆོས་ཅན། ཁྱོད་སྒྲ་མི་རྟག་པར་སྒྲུབ་པའི་ཕྱོགས་ཆོས་ཡིན་པར་ཐལ། ཁྱོད་དེ་སྒྲུབ་ཀྱི་སྒྲའི་སྟེང་དུ་འགོད་ཚུལ་དང་མཐུན་པར་ཡོད་པ་ཉིད་དུ་ངེས་པ་ཡིན་པའི་ཕྱིར། དེར་ཐལ། ཁྱོད་ཀྱི་རྟགས་ཀྱིས་དེ་སྒྲུབ་ཀྱི་འགོད་ཚུལ་ཡིན་འགོད་ཡིན་པ་གང་ཞིག སྒྲ་ཁྱོད་ཡིན་སྒྲ་ཆོས་ཅན་གྱི་སྟེང་དུ་ཁྱོད་ཡིན་པའི་ཕྱིར། རྟགས་དང་པོ་དེར་ཐལ། བྱས་རྟགས་ཀྱིས་སྒྲ་མི་རྟག་པར་སྒྲུབ་པའི་འགོད་ཚུལ་ཡིན་འགོད་ཡིན་པའི་ཕྱིར། མ་གྲུབ་ན། བྱས་པ་སྒྲ་མི་རྟག་སྒྲུབ་ཀྱི་རྟགས་ཡང་དག་མ་ཡིན་པར་ཐལ། བྱས་པ་ཡོད་ན་མི་རྟག་པ་ཡིན་པས་མ་ཁྱབ་པའི་ཕྱིར། འཁོར་གསུམ། རྟགས་ཕྱི་མ་གཉིས་གྲུབ་པར་ཐལ། སྒྲ་དང་གཅིག་ཡིན་པའི་ཕྱིར། རྩ་བར་འདོད་མི་ནུས་ཏེ། གཞི་རྟགས་ཐ་དད་མེད་ནས་མ་གྲུབ་པའི་གཏན་ཚིགས་ཡིན་པའི་ཕྱིར། མ་གྲུབ་ན། སྒྲ་ཆོས་ཅན། ཁྱོད་ཁྱོད་ཀྱི་རྟགས་ཀྱིས་ཁྱོད་མི་རྟག་པར་སྒྲུབ་པར་བྱེད་པའི་གཞི་རྟགས་ཐ་དད་མེད་ནས་མ་གྲུབ་པའི་གཏན་ཚིགས་ཡིན་པར་ཐལ། ཁྱོད་བདག་མེད་ཡིན་པའི་ཕྱིར། ཡང་ཁ་ཅིག དེ་སྒྲུབ་ཀྱི་ཤེས་འདོད་ཆོས་ཅན་གྱི་སྟེང་དུ་དེ་དང་ཐ་དད་པའི་ཚུལ་གྱིས་འགོད་པ་དེ་དེའི་མཚན་ཉིད། འགོད་ཚུལ་དང་མཐུན་པའི་དོན་སྔར་ལྟར་ཡིན་ཟེར་ན། མི་རྟག་པ་ཆོས་ཅན། ཁྱོད་སྒྲ་མི་རྟག་པར་སྒྲུབ་པའི་ཕྱོགས་ཆོས་ཡིན་པར་ཐལ། ཁྱོད་དེ་སྒྲུབ་ཀྱི་ཤེས་འདོད་ཆོས་ཅན་གྱི་སྟེང་དུ་དེ་དང་ཐ་དད་པའི་ཚུལ་གྱིས་འགོད་ཚུལ་དང་མཐུན་པར་ཡོད་པ་ཉིད་དུ་ཚད་མས་ངེས་པའི་ཕྱིར། ཁྱབ་པ་ཁས། རྟགས་དེར་ཐལ། ཁྱོད་སྒྲ་དང་ཐ་དད་སྒྲའི་སྟེང་དུ་འགོད་ཚུལ་དང་མཐུན་པར་ཡོད་པ་ཉིད་དུ་ངེས་པའི་ཕྱིར། དང་པོ་སླ། གཉིས་པ་སྔ་མ་ལྟར་བསྒྲུབ་པར་བྱ། རྩ་བར་འདོད་མི་ནུས་ཏེ། རྟགས་ཆོས་ཐ་དད་མེད་ནས་མ་གྲུབ་པའི་གཏན་ཚིགས་ཡིན་པའི་ཕྱིར། མ་གྲུབ་ན། མི་རྟག་པ་ཆོས་ཅན། ཁྱོད་ཁྱོད་ཀྱི་རྟགས་ཀྱིས་སྒྲ་ཁྱོད་དུ་སྒྲུབ་པ་རྟགས་ཆོས་ཐ་དད་མེད་ནས་མ་གྲུབ་པའི་གཏན་ཚིགས་ཡིན་པར་ཐལ། ཁྱོད་བདག་མེད་ཡིན་པའི་ཕྱིར། འདི་སོགས་སྐབས་དུ་མར་ཆོས་ཅན་ཁ་ཡར་བ་གཞིར་བཞག་པའོ། །གཞན་ཡང་མི་རྟག་པ་ཆོས་ཅན། ཁྱོད་སྒྲ་མི་རྟག་པར་སྒྲུབ་པར་བྱེད་པའི་ཕྱོགས་ཆོས་ཡིན་པར་ཐལ། མཚན་ཉིད་དེའི་ཕྱིར། འདོད་མི་ནུས་ཏེ། ཁྱོད་ཀྱི་རྟགས་ཀྱིས་དེ་སྒྲུབ་ཀྱི་ཤེས་འདོད་ཆོས་ཅན་སྐྱོན་མེད་མེད་པའི་ཕྱིར། དེར་ཐལ། སྒྲ་ཁྱོད་དུ་ངེས་ནས་སྒྲ་མི་རྟག་པ་ལ་ཤེས་འདོད་ཞུགས་པའི་གང་ཟག་མེད་པའི་ཕྱིར་རོ། །ཡང་ཁ་ཅིག་ན་རེ། ཁྱོད་ཀྱི་རྟགས་ཀྱིས་དེ་སྒྲུབ་ཀྱི་རྟགས་ཆོས་དོན་གསུམ་ཕན་ཚུན་ཐ་དད་པའི་ཚུལ་གྱིས་དེ་སྒྲུབ་ཀྱི་ཤེས་འདོད་ཆོས་ཅན་གྱི་སྟེང་དུ་འགོད་ཚུལ་དང་མཐུན་པར་ཡོད་པ་ཉིད་དུ་ངེས་པ་དེ་དེའི་མཚན་ཉིད། འགོད་ཚུལ་དང་མཐུན་པར་ཡོད་པའི་དོན་སྔར་ལྟར་ཡིན་ཟེར་ན། བྱས་པ་ཆོས་ཅན། ཁྱོད་སྒྲའི་སྟེང་དུ་སྒྲ་རྟག་དངོས་སུ་སྒྲུབ་པའི་རྟགས་ཆོས་དོན་གསུམ་ཕན་ཚུན་ཐ་དད་པའི་ཚུལ་གྱིས་དེ་སྒྲུབ་ཀྱི་ཤེས་འདོད་ཀྱི་སྟེང་དུ་འགོད་ཚུལ་དང་མཐུན་པར་ཡོད་པ་ཉིད་དུ་ངེས་པ་ཡིན་པར་ཐལ། ཁྱོད་སྒྲ་རྟག་དངོས་སུ་སྒྲུབ་པའི་ཕྱོགས་ཆོས་ཡིན་པའི་ཕྱིར། རྟགས་དེར་ཐལ། ཁྱོད་དེ་སྒྲུབ་ཀྱི་འགལ་རྟགས་ཡིན་པའི་ཕྱིར། རྩ་བར་འདོད་མི་ནུས་ཏེ། ཁྱོད་ཀྱི་རྟགས་ཀྱིས་དེ་སྒྲུབ་ཀྱི་རྟགས་ཆོས་དོན་གསུམ་མེད་པའི་ཕྱིར། དེར་ཐལ། རྟག་དངོས་ཀྱི་དངོས་པོ་མེད་པའི་ཕྱིར་རོ། ། ཕྱོགས་ཆོས་བཤད་པ། གཉིས་པ་རང་ལུགས་བཤད་པ་ལ། ཕྱོགས་ཆོས་ཀྱི་མཚན་ཉིད། དབྱེ་བ། སྒྲུབ་བྱེད་བཤད་པ་དང་གསུམ། དང་པོ་ནི། དེ་སྒྲུབ་ཀྱི་ཤེས་འདོད་ཆོས་ཅན་སྐྱོན་མེད་ལ་འགོད་ཚུལ་དང་མཐུན་པར་ཡོད་པ་ཉིད་དུ་ཚད་མས་ངེས་པ་དེ། དེ་སྒྲུབ་ཀྱི་ཕྱོགས་ཆོས་ཀྱི་མཚན་ཉིད། སྒྲ་མི་རྟག་པར་སྒྲུབ་པར་བྱེད་པའི་ཤེས་འདོད་ཆོས་ཅན་སྐྱོན་མེད་ལ་འགོད་ཚུལ་དང་མཐུན་པར་ཡོད་པ་ཉིད་དུ་ཚད་མས་ངེས་པ་དེ། སྒྲ་མི་རྟག་པར་སྒྲུབ་པར་བྱེད་པའི་ཕྱོགས་ཆོས་ཀྱི་མཚན་ཉིད། བྱས་རྟགས་ཀྱིས་སྒྲ་མི་རྟག་པར་སྒྲུབ་པར་བྱེད་པའི་ཤེས་འདོད་ཆོས་ཅན་སྐྱོན་མེད་ལ་འགོད་ཚུལ་དང་མཐུན་པར་ཡོད་པ་ཉིད་དུ་ཚད་མས་ངེས་པ་དེ། བྱས་རྟགས་ཀྱིས་སྒྲ་མི་རྟག་པར་སྒྲུབ་པར་བྱེད་པའི་ཕྱོགས་ཆོས་ཀྱི་མཚན་ཉིད། མཚན་གཞི་ནི། བྱས་པ་དེའོ། །མཚན་ཉིད་འཇོག་ཚུལ་དེ་ལྟར་འཐད་དེ། ཚད་མ་མདོ་ལས། རྗེས་དཔག་བྱ་དང་དོན་མཐུན་ལ། །ཡོད་མེད་ཉིད་ལ་མེད་པའོ། །ཞེས་པའི་རྗེས་དཔག་བྱ་དང༌། ཡོད་ཅེས་པའི་དོན་ཡོད་པའི་ཕྱིར། རྣམ་ངེས་ལས། རྗེས་དཔག་བྱ་དང་དེ་མཚུངས་ལ། །ཡོད་དང༌། ཞེས་དང༌། ཛེ་ཏཱ་རིས་ཀྱང༌། རྗེས་སུ་དཔག་པར་བྱ་བ་ལ་ཡོད་པ་ཉིད་དུ་ངེས་པ་སྟེ། ཞེས་དང༌། དུལ་བ་ལྷའི་རིགས་ཐིགས་འགྲེལ་བ་ལས། རྗེས་སུ་དཔག་པར་བྱ་བའི་མཚན་ཉིད་ལ་ཡོད་པ་ཉིད་ནི་ཚུལ་གཅིག་ཡིན་ཏེ། ཞེས་དང༌། འཐད་ལྡན་ཆེ་བ་ལས། རྗེས་སུ་དཔག་པར་བྱ་བ་ནི་ཆོས་ཅན་ནོ། །ཞེས་དང༌། མདོའི་རང་འགྲེལ་ལས། རྗེས་སུ་དཔག་པར་བྱ་བ་ནི་ཆོས་ཀྱིས་ཁྱད་པར་དུ་བྱས་པའི་ཆོས་ཅན་ནོ། །ཞེས་གསུངས་པའི་ཕྱིར་རོ། ། ཕྱོགས་ཆོས་ཀྱི་དབྱེ་བ།གཉིས་པ་ཕྱོགས་ཆོས་ཀྱི་དབྱེ་བ་ནི། གཏན་ཚིགས་རིགས་པའི་དོན་བསྡུས་ལས། ཡང་དག་གི་ཕྱོགས་ཆོས། མ་ངེས་པའི་ཕྱོགས་ཆོས། འགལ་བའི་ཕྱོགས་ཆོས་ཏེ་གསུམ་མོ། །ཡང་ན། ཕྱོགས་ཆོས་ཅན་དགུ་སྟེ། དགུ་པོ་རིམ་པ་བཞིན་དཔེར་བརྗོད་ན། སྒྲ་ཆོས་ཅན། རྟག་སྟེ། གཞལ་བྱ་ཡིན་པའི་ཕྱིར། མི་རྟག་སྟེ། བྱས་པ་ཡིན་པའི་ཕྱིར། དུང་སྒྲ་ཆོས་ཅན། རྩོལ་བ་ལས་བྱུང་སྟེ། མི་རྟག་པའི་ཕྱིར། རྟག་སྟེ། བྱས་པའི་ཕྱིར། རྟག་སྟེ། མཉན་བྱ་ཡིན་པའི་ཕྱིར། དུང་སྒྲ་ཆོས་ཅན། རྟག་སྟེ། རྩོལ་བ་ལས་བྱུང་བའི་ཕྱིར། རྩོལ་བ་ལས་མ་བྱུང་སྟེ། མི་རྟག་པ་ཡིན་པའི་ཕྱིར། དུང་སྒྲ་ཆོས་ཅན། མི་རྟག་སྟེ། རྩོལ་བ་ལས་བྱུང་བའི་ཕྱིར། རྟག་སྟེ། རེག་བྱ་ཅན་མིན་པའི་ཕྱིར་ཞེས་པ་རྣམས་ཏེ། དང་པོ་གསུམ་མཐུན་ཕྱོགས་ལ་ཁྱབ་བྱེད་དུ་འཇུག་པར་མཚུངས་པ་ལ། མི་མཐུན་ཕྱོགས་ལ་ཁྱབ་བྱེད་དུ་ཡོད་པ། གཏན་ནས་མེད་པ། ཆ་གཉིས་པ་གསུམ་མོ། །བར་བ་གསུམ་མཐུན་ཕྱོགས་ལ་གཏན་ནས་མེད་པར་མཚུངས་པ་ལ། མི་མཐུན་ཕྱོགས་ལ་ཡོད་མེད་ཆ་གཉིས་པ་གསུམ་མོ། །ཕྱི་མ་གསུམ་མཐུན་ཕྱོགས་ལ་ཆ་གཉིས་པར་མཚུངས་ལ། མི་མཐུན་ཕྱོགས་ལའང་ཡོད་མེད་ཆ་གཉིས་པ་གསུམ་སྟེ་དགུའོ། །ཞེས་གསུངས་ལ། དེ་ལྟར་འཐད་དེ། ཕྱོགས་གླང་གི་གཏན་ཚིགས་འཁོར་ལོ་ལས། གསུམ་ལ་རྣམ་པ་གསུམ་གསུམ་སྟེ། །སྟེང་འོག་གཉིས་ལ་ཡང་དག་གཉིས། །ལོགས་གཉིས་འགལ་བ་གཉིས་ཡིན་ཏེ། །ཟུར་བཞི་དངོས་ཀྱི་མ་ངེས་བཞི། །དབུས་ན་ཐུན་མོང་མིན་མ་ངེས། །གཞལ་བྱ་བྱས་དང་མི་རྟག་དང༌། །བྱས་དང་མཉན་བྱ་རྩོལ་བྱུང་དང༌། །མི་རྟག་རྩོལ་བྱུང་ལུས་ཅན་མིན། །རྟག་དང་མི་རྟག་རྩོལ་བྱུང་དང༌། །རྟག་དང་རྟག་དང་རྟག་པ་དང༌། །རྩོལ་བྱུང་མིན་དང་མི་རྟག་དང༌། །རྟག་པ་ལ་ནི་སྒྲུབ་པ་བཀོད། །ཅེས་དང༌། ཚད་མ་མདོ་ལས། ཕྱོགས་ཆོས་མཐུན་ཕྱོགས་ཡོད་མེད་དང༌། །རྣམ་གཉིས་རེ་རེ་དག་ལ་ཡང༌། །རྣམ་གསུམ་མི་མཐུན་ཕྱོགས་ལ་ཡང༌། །ཡོད་མེད་རྣམ་པ་གཉིས་ཕྱིར་རོ། །ཞེས་གསུངས་སོ། །རེག་བྱ་ཅན་མིན་པ་འདི་སྒྲ་རྟག་པར་སྒྲུབ་པར་བྱེད་པའི་མཐུན་ཕྱོགས་ལ་ཆ་གཉིས་སུ་གསུངས་པ་གང་ཡིན་ཞེ་ན། དོན་ལ་རྟག་པ་ལ་རེག་བྱ་ཅན་ཡིན་པ་མེད་ཀྱང་བྱེ་བྲག་པས་འབྱུང་བཞིའི་རྡུལ་ཕྲན་རྟག་པར་འདོད་པས་དེའི་བློ་ངོ་ལ་ལྟོས་ཏེ་ཆ་གཉིས་སུ་འཇུག་པར་བཤད་པ་ཡིན་ནོ། །མཉན་བྱ་དེ་སྒྲ་རྟག་པར་སྒྲུབ་པར་བྱེད་པའི་མཐུན་ཕྱོགས་མི་མཐུན་ཕྱོགས་གཉིས་ཀ་ལ་གཏན་མེད་དུ་གསུངས་པ་སྐབས་ཀྱི་རྒོལ་བའི་བློ་ངོར་ལྟོས་པ་ཡིན་པར་སྣང་ངོ། ། གསུམ་པ་སྒྲུབ་བྱེད་འགོད་པ།གསུམ་པ་སྒྲུབ་བྱེད་འགོད་པ་ལ། བྱས་པ་དེ་སྒྲ་མི་རྟག་པར་སྒྲུབ་པར་བྱེད་པའི་ཕྱོགས་ཆོས་ཡིན་པའི་ཤེས་བྱེད་ནི། བྱས་པ་ཆོས་ཅན། སྒྲ་མི་རྟག་པར་སྒྲུབ་པར་བྱེད་པའི་ཕྱོགས་ཆོས་ཡིན་པར་ཐལ། ཁྱོད་ཀྱི་རྟགས་ཀྱིས་སྒྲ་མི་རྟག་པར་སྒྲུབ་པར་བྱེད་པའི་ཤེས་འདོད་ཆོས་ཅན་སྐྱོན་མེད་ཡོད་པ་གང་ཞིག ཁྱོད་དེ་སྒྲུབ་ཀྱི་ཤེས་འདོད་ཆོས་ཅན་ལ་འགོད་ཚུལ་དང་མཐུན་པར་ཡོད་པ་ཉིད་དུ་ཚད་མས་ངེས་པ་ཡིན་པའི་ཕྱིར། དང་པོ་གྲུབ་སྟེ། སྒྲ་དེ་དེ་ཡིན་པའི་ཕྱིར། མ་གྲུབ་ན། སྒྲ་ཆོས་ཅན། ཁྱོད་བྱས་རྟགས་ཀྱིས་སྒྲ་མི་རྟག་པར་སྒྲུབ་པར་བྱེད་པའི་ཤེས་འདོད་ཆོས་ཅན་སྐྱོན་མེད་ཡིན་པར་ཐལ། ཁྱོད་དེ་སྒྲུབ་ཀྱི་ཤེས་འདོད་ཆོས་ཅན་དུ་བཟུང་བ་གང་ཞིག ཁྱོད་བྱས་པར་ཚད་མས་ངེས་ནས་ཁྱོད་མི་རྟག་པ་ལ་ཤེས་འདོད་ཞུགས་པའི་གང་ཟག་ཡོད་པའི་ཕྱིར། དང་པོ་མ་གྲུབ་ན། སྒྲ་ཆོས་ཅན། ཁྱོད་ཁྱོད་མི་རྟག་པར་སྒྲུབ་པར་བྱེད་པའི་ཤེས་འདོད་ཆོས་ཅན་དུ་བཟུང་བར་ཐལ། ཁྱོད་ཁྱོད་ཆོས་ཅན། མི་རྟག་པ་ཡིན་པར་ཐལ། བྱས་པ་ཡིན་པའི་ཕྱིར་ཞེས་པའི་སྦྱོར་བའི་ཆོས་ཅན་དུ་བཟུང་བའི་ཕྱིར། དེར་ཐལ། བདག་ཏུ་མ་གྲུབ་པ་ཡིན་པའི་ཕྱིར། གཉིས་པ་གྲུབ་སྟེ། བྱས་རྟགས་ཀྱིས་སྒྲ་མི་རྟག་པར་སྒྲུབ་པར་བྱེད་པའི་ཕྱི་རྒོལ་ཡང་དག་དེ་དེ་ཡིན་པའི་ཕྱིར། རྩ་རྟགས་གཉིས་པ་མ་གྲུབ་ན། བྱས་པ་ཆོས་ཅན། ཁྱོད་སྒྲ་མི་རྟག་པ་སྒྲུབ་པར་བྱེད་པའི་ཤེས་འདོད་ཆོས་ཅན་ལ་འགོད་ཚུལ་དང་མཐུན་པར་ཡོད་པ་ཉིད་དུ་ཚད་མས་ངེས་པ་ཡིན་པར་ཐལ། ཁྱོད་སྒྲ་མི་རྟག་པ་སྒྲུབ་པར་བྱེད་པའི་ཤེས་འདོད་ཆོས་ཅན་ལ་འགོད་ཚུལ་དང་མཐུན་པའི་དོན་ཚང་བ་གང་ཞིག དེའི་ཚིག་ཟུར་གྱི་ཡོད་པ་ཞེས་པའི་དོན་ཁྱོད་ལ་ཚང༌། དེའི་ཚིག་ཟུར་གྱི་ཉིད་ཅེས་པའི་དོན་ཁྱོད་ལ་ཚང༌། ཚད་མས་ངེས་པ་ཞེས་པའི་དོན་ཁྱོད་ལ་ཚང་བའི་ཕྱིར། དང་པོ་གྲུབ་སྟེ། ཁྱོད་ཀྱི་རྟགས་ཀྱིས་དེ་སྒྲུབ་ཀྱིས་འགོད་ཚུལ་ཡིན་འགོད། སྒྲུབ་ཚུལ་ཡིན་སྒྲུབ་ཡིན། སྒྲ་ཁྱོད་ཡིན། སྒྲ་ཆོས་ཅན་གྱི་སྟེང་དུ་ཁྱོད་ཡིན་པའི་ཕྱིར། ཁྱབ་སྟེ། འགོད་ཚུལ་དང་མཐུན་པའི་དོན་ཡང་ཡིན་འགོད་ཀྱི་དབང་དུ་བྱས་ན། དེ་སྒྲུབ་ཀྱི་ཤེས་འདོད་ཆོས་ཅན་དུ་འགྲོ་རྒྱུ་དེ་རྟགས་དེ་ཡིན་པ་དང༌། དེའི་སྟེང་དུ་རྟགས་དེ་ཡིན་པ་ལ་བྱེད།ཡོད་འགོད་ཀྱི་དབང་དུ་བྱས་ན། ཆོས་ཅན་དུ་འགྲོ་རྒྱུ་དེའི་སྟེང་དུ་རྟགས་དེ་ཡོད་པ་དང༌། ཆོས་ཅན་དེ་ལ་རྟགས་དེ་ཡོད་པ་ལ་བྱེད་པའི་ཕྱིར། དེར་ཐལ། དེའི་དོན་ཡོད་པའི་ཕྱིར། གོང་གི་རྟགས་གཉིས་པ་མ་གྲུབ་ན། བྱས་པ་ཆོས་ཅན། ཁྱོད་ལ་དེའི་ཚིག་ཟུར་གྱི་ཡོད་པ་ཞེས་པའི་དོན་ཚང་པར་ཐལ། ཁྱོད་དེ་སྒྲུབ་ཀྱི་དོན་ལ་ལྟོས་ཏེ་མ་གྲུབ་པའི་གཏན་ཚིགས་གང་ཡང་མ་ཡིན་པའི་ཕྱིར། ཁྱབ་སྟེ། དེའི་ཚིག་ཟུར་གྱི་ཡོད་པ་ཞེས་པས་དོན་ལ་ལྟོས་ཏེ་མ་གྲུབ་པའི་གཏན་ཚིགས་རྣམས་སེལ་བའི་ཕྱིར་ཏེ། འཐད་ལྡན་ཆུང་བ་ལས། ཡོད་པ་ཞེས་པའི་ཚིག་གིས་མིག་ཤེས་ཀྱི་བཟུང་བྱ་ཡིན་པའི་ཕྱིར་ཞེས་བྱ་བ་ལ་སོགས་པའི་མ་གྲུབ་པ་བསལ་ཏེ། ཞེས་དང༌། བྱིས་པ་འཇུག་པའི་རྟོག་གེའི་སྐད་ལས། ཡོད་པ་ཞེས་སྨོས་པས་མ་གྲུབ་པ་བསལ་ཏེ། ཞེས་གསུངས་པའི་ཕྱིར། མ་ཁྱབ་མཚམས་ཀྱི་རྟགས་གྲུབ་སྟེ། བྱས་པ་སྒྲ་མི་རྟག་སྒྲུབ་ཀྱི་གཞི་མ་གྲུབ་ནས་མ་གྲུབ་པ་དང༌། གཞི་རྟགས་ཀྱི་འབྲེལ་བ་མེད་ནས་མ་གྲུབ་པ་དང༌། ཕྱོགས་གཅིག་ལ་ལྟོས་ནས་མ་གྲུབ་པ་དང༌།ཐ་དད་མེད་ནས་མ་གྲུབ་པ་གང་ཡང་མ་ཡིན་པའི་ཕྱིར་རོ། །གོང་གི་རྟགས་གསུམ་པ་མ་གྲུབ་ན། བྱས་པ་ཆོས་ཅན། ཁྱོད་ལ་སྒྲ་མི་རྟག་སྒྲུབ་ཀྱི་ཕྱོགས་ཆོས་ཀྱི་མཚན་ཉིད་ཀྱི་ཚིག་ཟུར་གྱི་ཉིད་ཅེས་པའི་དོན་ཁྱོད་ལ་ཚང་བར་ཐལ། ཁྱོད་ལ་དེ་སྒྲུབ་ཀྱི་ཤེས་འདོད་ཆོས་ཅན་སྐྱོན་མེད་ལ་འགོད་ཚུལ་དང་མཐུན་པའི་དོན་ཚང་བ་གང་ཞིགཁྱོད་དེ་སྒྲུབ་ཀྱི་ཕྱོགས་གཅིག་ལ་ལྟོས་ཏེ་མ་གྲུབ་པའི་གཏན་ཚིགས་མ་ཡིན་པའི་ཕྱིར། ཁྱབ་སྟེ། ཁོ་ནའམ་ཉིད་ཅེས་སྨོས་པ་ནི་ཕྱོགས་གཅིག་ལ་ལྟོས་ཏེ་མ་གྲུབ་པ་སེལ་བའི་ཆེད་ཡིན་པའི་ཕྱིར་ཏེ། དུལ་བ་ལྷའི་རིགས་ཐིགས་འགྲེལ་བ་སློབ་ཕན་ལས། ཁོ་ན་ཞེས་པས་ནི་ཕྱོགས་གཅིག་ལ་མ་གྲུབ་པ་སེལ་ཏེ། ཞེས་དང༌། འཐད་ལྡན་ཆུང་ངུ་ལས། ཉིད་ཀྱི་ཚིག་གིས་ཕྱོགས་གཅིག་ལ་མ་གྲུབ་པ་བསལ་བ་ཡིན་ཏེ། ཇི་ལྟར་ལྗོན་ཤིང་ནི་སྲོག་དང་བཅས་པ་ཡིན་ཏེ། ཉལ་བའི་ཕྱིར་རོ་ཞེས་ཕྱོགས་སུ་བྱས་པ་ལ་ལོ་མ་འཁུམས་པའི་མཚན་ཉིད་ཀྱི་ཉལ་བ་ནི་ཕྱོགས་གཅིག་ལ་མ་གྲུབ་པ་ཡིན་ཏེ། འདི་ལྟར་ཤིང་ཐམས་ཅད་ནི་མཚན་མོ་ལོ་མ་འཁུམས་པ་ལ་བརྟེན་པ་མ་ཡིན་ཏེ། འགའ་འགའ་ཙམ་ཁོ་ནར་ཟད་པ་ལྟ་བུའོ། །ཞེས་དང༌། རྟོག་གེའི་སྐད་ལས། ལོ་མ་ཟུམ་པའི་མཚན་ཉིད་ཉལ་བ་སྟེ། དེ་ཡང་ཤིང་ཐམས་ཅད་ལ་མ་གྲུབ་པོ། །ཞེས་གསུངས་པའི་ཕྱིར། ཉིད་ཡོད་པའི་ཚིག་གི་སྔར་མ་སྨོས་པར་རྗེས་སུ་སྨོས་པ་ལ་ཆོས་ཅན། དགོས་པ་ཡོད་དེ། ཉིད་ཡོད་པའི་སྔར་སྨོས་ན་རྗེས་སུ་དཔག་བྱ་ཁོ་ན་ལ་ཡོད་པ་ཕྱོགས་ཆོས་ཀྱི་མཚན་ཉིད་དུ་འགྱུར་དགོས་ལ། དེ་ལྟ་ན་སྒྲ་མི་རྟག་སྒྲུབ་ཀྱི་ཕྱོགས་ཆོས་ལ་སྒྲའི་ཐུན་མོང་མ་ཡིན་པའི་ཆོས་ཁོ་ན་དགོས་པར་འགྱུར་བ་དེ་བཅད་པའི་ཆེད་དུ་ཉིད་ཡོད་པའི་རྗེས་ལ་སྨོས་པའི་ཕྱིར་ཏེ། འཐད་ལྡན་ཆུང་ངུ་ལས། ཡོད་པའི་ཚིག་གི་རྗེས་ལ་ཉིད་སྨོས་པས་ནི་ཐུན་མོང་མ་ཡིན་པའི་ཆོས་བསལ་བ་ཡིན་ནོ། །ཇི་སྟེ་རྗེས་སུ་དཔག་པར་བྱ་བ་ཉིད་ལ་ཡོད་པ་ཞེས་སྨྲ་ན་ནི། མཉན་པར་བྱ་བ་ཁོ་ན་གཏན་ཚིགས་ཡིན་པར་འགྱུར་རོ། །ཞེས་གསུངས་པའི་ཕྱིར་རོ། །གོང་གི་རྟགས་བཞི་བ་མ་གྲུབ་ན། བྱས་པ་ཆོས་ཅན། ཕྱོགས་ཆོས་ཀྱི་མཚན་ཉིད་ཀྱི་ཚིག་ཟུར་གྱི་ཚད་མས་ངེས་པ་ཞེས་པའི་དོན་ཁྱོད་ལ་ཚང་བར་ཐལ། ཁྱོད་ཀྱི་རྟགས་ཀྱིས་དེ་སྒྲུབ་ཀྱི་སྐབས་བབ་ཀྱི་རྒོལ་བས་ཁྱོད་སྒྲ་མི་རྟག་པར་སྒྲུབ་པ་ལ་འགོད་ཚུལ་དང་མཐུན་པར་ཚད་མས་ཡོད་པ་ཉིད་དུ་ངེས་ནས་སྒྲ་མི་རྟག་པར་ཤེས་འདོད་ཞུགས་པ་སྲིད་པའི་ཕྱིར། ཁྱབ་སྟེ། དེའི་ཚིག་ཟུར་གྱི་ཚད་མས་ངེས་པའི་དོན་དེ། དེ་སྒྲུབ་ཀྱི་སྐབས་བབ་ཀྱི་རྒོལ་བས་ཚད་མས་ངེས་མ་ངེས་ལ་བྱེད་ཀྱི། ཚད་མ་སྤྱི་ལྡོག་དང་གང་ཟག་སྤྱི་ལྡོག་གིས་ཚད་མས་ངེས་མ་ངེས་ལ་བྱེད་པ་མ་ཡིན་པའི་ཕྱིར། དེར་ཐལ། དེའི་ཚིག་ཟུར་ལ་ཚད་མས་ངེས་པ་སྨོས་པའི་དགོས་པ་བློ་ལ་ལྟོས་ནས་མ་གྲུབ་པ་དང་རྒོལ་བ་ལ་ལྟོས་ནས་མ་གྲུབ་པ་སེལ་བའི་ཆེད་ཡིན་པའི་ཕྱིར། རྟོག་གེའི་སྐད་ལས། ངེས་པ་ཞེས་སྨོས་པས་ནི་ཐེ་ཚོམ་ཟ་ནས་མ་གྲུབ་པ་དག་བསལ་ཏེ། ཞེས་དང༌། ཛེ་ཏཱ་རིས་ཀྱང༌། ངེས་པ་ཞེས་སྨོས་པས་ནི་ཐེ་ཚོམ་ཟ་ནས་མ་གྲུབ་པ་སོགས་བསལ་ཏེ། ཞེས་དང༌། འཐད་ལྡན་ཆུང་བ་ལས། ངེས་པ་སྨོས་པས་ནི་ཐེ་ཚོམ་ཟ་བའི་མ་གྲུབ་པ་ཐམས་ཅད་བསལ་བ་ཡིན་ནོ། །ཞེས་གསུངས་པའི་ཕྱིར་རོ། །ཁྱོད་སྦྱོར་བ་དེའི་མ་གྲུབ་པའི་གཏན་ཚིགས་ཡིན་ན་ཁྱོད་ཀྱི་རྟགས་ཀྱིས་སྦྱོར་བ་དེའི་རྟགས་མ་གྲུབ་པའི་མ་ཁྱབ་སྟེ། སྒྲ་དེ་སྒྲའི་རྟགས་ཀྱིས་སྒྲ་མི་རྟག་པར་སྒྲུབ་པར་བྱེད་པའི་མ་གྲུབ་པའི་གཏན་ཚིགས་ཡིན་པ་གང་ཞིག སྒྲའི་རྟགས་ཀྱིས་སྒྲ་མི་རྟག་པར་སྒྲུབ་པར་བྱེད་པའི་སྦྱོར་བ་དེའི་རྟགས་གྲུབ་པའི་ཕྱིར། དང་པོ་གྲུབ་སྟེ། དེ་དེ་སྒྲུབ་ཀྱི་གཞི་རྟགས་ཐ་དད་མེད་ནས་མ་གྲུབ་པའི་གཏན་ཚིགས་ཡིན་པའི་ཕྱིར། གཉིས་པ་གྲུབ་སྟེ། སྒྲ་དེ་སྒྲ་ཡིན་པར་གྲུབ་པའི་ཕྱིར་རོ། ། ཁྱབ་པ་གཉིས་བཤད།ཁྱབ་པ་གཉིས་བཤད་པ། གཉིས་པ་ཁྱབ་པ་གཉིས་བཤད་པ་ལ། དགག་བཞག་གཉིས་ལས། དང་པོ་ནི། ཁ་ཅིག་ན་རེ། དེ་སྒྲུབ་ཀྱི་མཐུན་ཕྱོགས་ལ་འགོད་ཚུལ་དང་མཐུན་པར་ཡོད་པར་ཚད་མས་ངེས་པ་དེ། དེ་སྒྲུབ་ཀྱི་རྗེས་ཁྱབ་ཀྱི་མཚན་ཉིད། དེ་སྒྲུབ་ཀྱི་མཐུན་ཕྱོགས་ལ་འགོད་ཚུལ་དང་མཐུན་པར་ཡོད་པའི་དོན་ཡང༌། ཁྱོད་དེ་སྒྲུབ་ཀྱི་བསྒྲུབ་བྱའི་ཆོས་སུ་བཟུང་བྱར་འགྲོ་རྒྱུ་དེ་ཡིན། ཁྱོད་ཡིན་ན་དེ་ཡིན་པས་ཁྱབ་པ་ཙམ་ཞིག་དེའི་དོན་ཟེར་ན། འོ་ན་མི་རྟག་པ་ཆོས་ཅན། ཁྱོད་སྒྲ་མི་རྟག་པར་སྒྲུབ་པར་བྱེད་པའི་རྗེས་ཁྱབ་ཡིན་པར་ཐལ། ཁྱོད་དེ་སྒྲུབ་ཀྱི་མཐུན་ཕྱོགས་ལ་འགོད་ཚུལ་དང་མཐུན་པར་ཡོད་པར་ཚད་མས་ངེས་པ་ཡིན་པའི་ཕྱིར། དེར་ཐལ། ཁྱོད་མི་རྟག་པ་ཡིན། ཁྱོད་ཡིན་ན་མི་རྟག་པ་ཡིན་པས་ཁྱབ་པའི་ཕྱིར། འདོད་ན། དེ་ཆོས་ཅན། དེ་སྒྲུབ་ཀྱི་བསྒྲུབ་བྱའི་ཆོས་སུ་འགྲོ་རྒྱུ་དེ་དང་འབྲེལ་བ་ཡིན་པར་ཐལ། དེ་སྒྲུབ་ཀྱི་རྗེས་ཁྱབ་ཡིན་པའི་ཕྱིར། ཁྱབ་སྟེ། དེ་དང་འབྲེལ་བ་མ་ཡིན་ན་དེ་སྒྲུབ་ཀྱི་རྗེས་ཁྱབ་དང་ལྡོག་ཁྱབ་གང་ཡང་མ་ཡིན་དགོས་པའི་ཕྱིར། ཚད་མ་རྣམ་འགྲེལ་རང་འགྲེལ་ལས། འབྲེལ་བ་མེད་པར་ནི་རྗེས་སུ་འགྲོ་བ་དང་ལྡོག་པ་དག་གང་ཡང་ངེས་མི་ནུས་སོ། །ཞེས་གསུངས་པའི་ཕྱིར། གོང་དུ་འདོད་ན། མི་རྟག་པ་ཆོས་ཅན། མི་རྟག་པ་དང་ཐ་དད་ཡིན་པར་ཐལ། དེ་དང་འབྲེལ་བ་ཡིན་པའི་ཕྱིར། བྱས་པའི་བྱེ་བྲག་ཆོས་ཅན། སྒྲ་མི་རྟག་པར་སྒྲུབ་པར་བྱེད་པའི་མཐུན་ཕྱོགས་ཁོ་ན་ལ་འགོད་ཚུལ་དང་མཐུན་པར་ཡོད་པ་ཉིད་དུ་ཚད་མས་ངེས་པ་མ་ཡིན་པར་ཐལ། རྟག་པ་ཡིན་པའི་ཕྱིར་ན་མངོན་ཚད་ཀྱི་ཐ་སྙད་ལྟར་ན་མ་ཁྱབ་པ་ཡིན་ནོ། །ཡང་ཁ་ཅིག་དེ་སྒྲུབ་ཀྱི་མཐུན་ཕྱོགས་ལ་འགོད་ཚུལ་དང་མཐུན་པར་ཡོད་པར་ཚད་མས་ངེས་པ་དེ་དེ་སྒྲུབ་ཀྱི་རྗེས་ཁྱབ་ཀྱི་མཚན་ཉིད་ཟེར་ན། ཡོད་པ་ཆོས་ཅན། སྒྲ་མི་རྟག་པར་སྒྲུབ་པར་བྱེད་པའི་རྗེས་ཁྱབ་ཡིན་པར་ཐལ། དེ་སྒྲུབ་ཀྱི་མཐུན་ཕྱོགས་ལ་འགོད་ཚུལ་དང་མཐུན་པར་ཡོད་པར་ཚད་མས་ངེས་པའི་ཕྱིར། དེར་ཐལ། དེ་སྒྲུབ་ཀྱི་མཐུན་ཕྱོགས་ལ་ཡོད་པའི་ཕྱིར། དེར་ཐལ།དེ་སྒྲུབ་ཀྱི་མཐུན་ཕྱོགས་མི་མཐུན་ཕྱོགས་གཉིས་ཀ་ལ་ཡོད་པའི་ཕྱིར། གོང་དུ་འདོད་ན། ཡོད་པ་ཆོས་ཅན། མི་རྟག་པ་ཡིན་པར་ཐལ། ཡོད་པ་ཡིན་པའི་ཕྱིར། ཡང་ཁ་ཅིག་བྱས་ན་མི་རྟག་པས་ཁྱབ་པ་དེ། བྱས་རྟགས་ཀྱིས་སྒྲ་མི་རྟག་པར་སྒྲུབ་པར་བྱེད་པའི་རྗེས་ཁྱབ་ཡིན་ཟེར་ན། འོ་ན་སྦྱོར་བ་དེའི་དངོས་ཁྱབ་གྲུབ་ན་སྦྱོར་བ་དེའི་རྗེས་ཁྱབ་གྲུབ་པའི་ཁྱབ་པར་ཐལ། དེ་གཉིས་ལ་ཁྱད་པར་མེད་པའི་ཕྱིར། རྟགས་ཁས། འདོད་ན། བྱས་པའི་རྒྱུའི་རྟགས་ཀྱིས་བྱས་པའི་རྒྱུར་གྱུར་བའི་སྒྲ་མི་རྟག་པར་སྒྲུབ་པར་བྱེད་པའི་རྗེས་ཁྱབ་གྲུབ་པར་ཐལ། དེ་སྒྲུབ་ཀྱི་སྦྱོར་བའི་དངོས་ཁྱབ་གྲུབ་པའི་ཕྱིར། ཁྱབ་པ་ཁས། རྟགས་དེར་ཐལ། བྱས་པའི་རྒྱུ་ཡིན་ན་མི་རྟག་པ་ཡིན་པས་ཁྱབ་པ་དེ་སྒྲུབ་ཀྱི་དངོས་ཁྱབ་གང་ཞིག དེ་གྲུབ་པའི་ཕྱིར།གོང་དུ་འདོད་ན། བྱས་པའི་རྒྱུ་ཆོས་ཅན། ཁྱོད་བྱས་པའི་རྒྱུར་གྱུར་པའི་སྒྲ་མི་རྟག་པ་ཡིན་པར་སྒྲུབ་པར་བྱེད་པའི་དངོས་ཀྱི་བསྒྲུབ་བྱའི་ཆོས་སུ་འགྲོ་རྒྱུ་དེ་དང་འབྲེལ་བ་ཡིན་པར་ཐལ། ཁྱོད་དེ་སྒྲུབ་ཀྱི་རྗེས་ཁྱབ་ཡིན་པའི་ཕྱིར། ཁྱབ་པ་སྔར་བསྒྲུབས་ཟིན། དེས་ན་དངོས་ཁྱབ་དང་རྗེས་ཁྱབ་དོན་མི་གཅིག་ཅིང༌།དངོས་ཁྱབ་གྲུབ་ན་ལྡོག་ཁྱབ་གྲུབ་པའི་ངེས་པ་མེད་ལ། རྗེས་ཁྱབ་དང་ལྡོག་ཁྱབ་གྲུབ་ན་ཚུལ་གསུམ་གྲུབ་པའི་ངེས་པ་མེད་དོ། །ཡང་ཁ་ཅིག སྒྲ་མི་རྟག་པར་སྒྲུབ་པའི་བསྒྲུབ་བྱའི་ཆོས་དང་འབྲེལ་སྟོབས་ཀྱིས་དེ་སྒྲུབ་ཀྱི་མཐུན་ཕྱོགས་ཁོ་ན་ལ་ཡོད་པ་ཉིད་དུ་ཚད་མས་ངེས་པ་དེ་དེ་སྒྲུབ་ཀྱི་རྗེས་ཁྱབ་ཀྱི་མཚན་ཉིད་ཟེར་ན། རང་ལྡོག་ལ་འཁྲིས་ན། མི་རྟག་པ་ཆོས་ཅན། ཁྱོད་སྒྲ་མི་རྟག་པར་སྒྲུབ་པར་བྱེད་པའི་རྗེས་ཁྱབ་ཡིན་པར་ཐལ། དེ་སྒྲུབ་ཀྱི་མཚན་ཉིད་དེའི་ཕྱིར། ཁྱབ་པ་ཁས། རྟགས་དེར་ཐལ། དེ་སྒྲུབ་ཀྱི་བསྒྲུབ་བྱའི་ཆོས་དང་འབྲེལ་བ་གང་ཞིག སྒྲ་མི་རྟག་པར་སྒྲུབ་པའི་མཐུན་ཕྱོགས་ཁོ་ན་ལ་འགོད་ཚུལ་དང་མཐུན་པར་ཡོད་པ་ཉིད་དུ་ཚད་མས་ངེས་པ་ཡིན་པའི་ཕྱིར། དང་པོ་གྲུབ་སྟེ། ཁྱོད་དེ་སྒྲུབ་ཀྱི་བསྒྲུབ་བྱའི་ཆོས་དང་ཐ་དད་ཁྱོད་དེ་ཡིན་ཞིང་དེ་མེད་ན་ཁྱོད་མེད་དགོས་པའི་ཕྱིར། གཞན་ཡང་སྒྲ་མི་རྟག་པར་སྒྲུབ་པའི་མཐུན་ཕྱོགས་ལ་ཆ་གཉིས་སུ་འཇུག་པའི་རྟགས་ཡང་དག་མེད་པར་ཐལ། སྒྲ་མི་རྟག་སྒྲུབ་ཀྱི་རྟགས་ཡང་དག་ཡིན་ན་སྒྲ་མི་རྟག་སྒྲུབ་ཀྱི་མཐུན་ཕྱོགས་ཁོ་ན་ལ་འགོད་ཚུལ་དང་མཐུན་པར་ཡོད་པ་ཉིད་དུ་ཚད་མས་ངེས་པས་ཁྱབ་པའི་ཕྱིར། རྟགས་ཁས། འདོད་མི་ནུས་ཏེ། དེ་སྒྲུབ་ཀྱི་རྗེས་ཁྱབ་ལ་གཞན་ལྡན་རྣམ་གཅོད་དགོས་པ་གང་ཞིག མི་ལྡན་རྣམ་གཅོད་སྦྱར་མི་རུང་བའི་ཕྱིར། དང་པོ་གྲུབ་སྟེ། ཁོ་ནའི་སྒྲ་ཡོད་པའི་སྔར་སྨོས་པ་ནི། དེ་སྒྲུབ་ཀྱི་མཐུན་ཕྱོགས་ལ་ཡོད་ཀྱང་མ་ཁྱབ་པའི་རྩོལ་བྱུང་གི་རྟགས་ཀྱིས་དུང་སྒྲ་མི་རྟག་པར་སྒྲུབ་པ་ལྟ་བུའི་མཐུན་ཕྱོགས་ལ་རྣམ་གཉིས་སུ་འཇུག་པའི་རྟགས་ཡང་དག་བསྟན་པའི་ཆེད་ཡིན་པའི་ཕྱིར་ཏེ། རིགས་སྒོ་ལས། མཐུན་པའི་ཕྱོགས་ཉིད་ལ་ཡོད་པར་ངེས་པ་དང༌། ཞེས་དང༌། རྟོག་གེའི་སྐད་ལས། ཡོད་པའི་སྒྲའི་སྔོན་དུ་ཁོ་ནའི་ཡི་གེས་ནི་ཕྱོགས་དང་མཐུན་པ་ཐམས་ཅད་ལ་ཁྱབ་པར་བྱེད་པ་མ་ཡིན་ཡང་རྩོལ་བ་ལས་བྱུང་བ་གཏན་ཚིགས་ཉིད་དུ་བཤད་དེ། ཞེས་གསུངས་པའི་ཕྱིར་རོ། ། གཉིས་པ་གྲུབ་སྟེ། མདོའི་རང་འགྲེལ་ལས། དེ་དང་མཐུན་པ་ཁོ་ན་ལ་ཡོད་ཅེས་ངེས་པར་བཟུང་བའི་ཕྱིར་རོ། དེ་དང་མཐུན་པ་ལ་ཡོད་པ་ཁོ་ནའོ་ཞེས་ནི་བརྗོད་པར་མི་བྱ་བའི་ཕྱིར་རོ། །ཞེས་གསུངས་སོ། །མི་ལྡན་རྣམ་གཅོད་ནི་ཁྱད་པར་རམ་ཁྱད་ཆོས་ཀྱི་འོག་ཏུ་ཚིག་ཕྲད་སྦྱར་བ་དང༌། གཞན་ལྡན་རྣམ་གཅོད་ནི་ཁྱད་པར་ཅན་ནམ་ཁྱད་གཞིའི་འོག་ཏུ་ཚིག་ཕྲད་སྦྱར་བའམ་དོན་གྱིས་དེ་ལྟར་སྦྱར་བ་དགོས་ཏེ། རྣམ་འགྲེལ་ལེའུ་བཞི་བ་ལས། ཆོས་ཀྱི་ཚིག་ཕྲད་ཐ་དད་པར། །བྱེད་པས་མི་ལྡན་གཞན་ལྡན་པ། །ཤིན་ཏུ་མི་སྲིད་རྣམ་གཅོད་བྱེད། །ཁྱད་པར་ཁྱད་པར་ཅན་དག་དང༌། །བྱ་བ་དག་ནི་ལྷན་ཅིག་བརྗོད། །ཅེས་གསུངས་པའི་ཕྱིར་རོ། ། གཉིས་པ་རང་ལུགས་བཤད་པ།གཉིས་པ་རང་ལུགས་བཤད་པ་ལ། ཁྱབ་པ་གཉིས་ཀྱི་མཚན་ཉིད། དབྱེ་བ། སྒྲ་བཤད། སྒྲུབ་བྱེད་བཤད་པ་དང་བཞི། དང་པོ་ནི། དེ་སྒྲུབ་ཀྱི་བསྒྲུབ་བྱའི་ཆོས་གང་ཡིན་རྒྱུ་དེ་དང་འབྲེལ་ཞིང་དེ་སྒྲུབ་ཀྱི་མཐུན་ཕྱོགས་ཁོ་ན་ལ་འགོད་ཚུལ་དང་མཐུན་པར་ཡོད་པར་ངེས་པའི་གཏན་ཚིགས་དེ། དེ་སྒྲུབ་ཀྱི་རྗེས་ཁྱབ་ཀྱི་མཚན་ཉིད། བྱེ་བྲག་ལ་སྦྱར་ན། སྒྲ་མི་རྟག་པར་སྒྲུབ་པའི་བསྒྲུབ་བྱའི་ཆོས་སུ་འགྲོ་རྒྱུ་མི་རྟག་པ་དང་འབྲེལ་ཞིང་སྒྲ་མི་རྟག་སྒྲུབ་ཀྱི་མཐུན་ཕྱོགས་ཁོ་ན་ལ་འགོད་ཚུལ་དང་མཐུན་པར་ཡོད་པར་ངེས་པའི་གཏན་ཚིགས་དེ། སྒྲ་མི་རྟག་པར་སྒྲུབ་པར་བྱེད་པའི་རྗེས་ཁྱབ་ཀྱི་མཚན་ཉིད་ཡིན་ཏེ། ཚད་མ་ཀུན་བཏུས་ལས། དེ་མཐུན་ལ་ཡོད་དང༌། ཞེས་དང༌། དེའི་རང་འགྲེལ་ལས། དེ་དང་མཐུན་པ་ཁོ་ན་ལ་ཡོད་ཅེས་ངེས་པར་བཟུང་བའི་ཕྱིར་རོ། །ཞེས་དང༌། རྣམ་ངེས་ལས། དེ་མཚུངས་ལ་ཡོད་དང༌། ཞེས་དང༌། དེའི་རང་འགྲེལ་ལས། དེ་བཞིན་དུ་དེ་དང་མཐུན་པ་ཉིད་ལ་ཡང་ངོ། །ཞེས་དང༌། རིགས་ཐིགས་ལས། མཐུན་པའི་ཕྱོགས་ཉིད་ལ་ཡོད་པ། ཞེས་དང༌། རིགས་སྒོ་ལས། མཐུན་པའི་ཕྱོགས་ཉིད་ལ་ཡོད་པར་ངེས་པ་དང༌། ཞེས་དང༌། ཛེ་ཏཱ་རིས། མཐུན་པའི་ཕྱོགས་ཉིད་ལ་ཡང་ཡོད་པར་ངེས་པ་ཞེས་གཞུག་གོ །ཞེས་དང༌། རྟོག་གེའི་སྐད་ལས། ཕྱོགས་དང་མཐུན་པ་ཁོ་ན་ལ་ཡོད་པར་ངེས་པ་ཞེས་པ་རྗེས་སུ་འགྲོ་བའི་མིང་ཅན་ཚུལ་གཉིས་པའོ། །ཞེས་གསུངས་པའི་ཕྱིར་རོ། །མཚན་གཞི་ནི། བྱས་པ་ལྟ་བུའོ། །རྗེས་ཁྱབ་དང༌། རྗེས་འགྲོའི་ཁྱབ་པ་དང༌། རྗེས་འགྲོའི་ཚུལ་དང༌། ཚུལ་གཉིས་པ་རྣམས་དོན་གཅིག་མིང་གི་རྣམ་གྲངས་ཡིན་ནོ། །དེ་སྒྲུབ་ཀྱི་བསྒྲུབ་བྱའི་ཆོས་སུབཟུང་རྒྱུ་དང་འབྲེལ་སྟོབས་ཀྱིས་དེ་སྒྲུབ་ཀྱི་མི་མཐུན་ཕྱོགས་ལ་མེད་པ་ཁོ་ནར་ངེས་པའི་གཏན་ཚིགས། དེ་སྒྲུབ་ཀྱི་ལྡོག་ཁྱབ་ཀྱི་མཚན་ཉིད། སྒྲ་མི་རྟག་པར་སྒྲུབ་པར་བྱེད་པའི་བསྒྲུབ་བྱའི་ཆོས་སུ་འགྲོ་རྒྱུའི་མི་རྟག་པ་དང་འབྲེལ་སྟོབས་ཀྱིས་སྒྲ་མི་རྟག་པར་སྒྲུབ་པའི་མི་མཐུན་ཕྱོགས་ལ་མེད་པ་ཁོ་ནར་ངེས་པའི་གཏན་ཚིགས་དེ། སྒྲ་མི་རྟག་པར་སྒྲུབ་པའི་ལྡོག་ཁྱབ་ཀྱི་མཚན་ཉིད་ཡིན་ཏེ། རྣམ་ངེས་ལས། མེད་ལ་མེད་པ་ནི། ངེས་པ། ཞེས་དང༌། དེའི་རང་འགྲེལ་ལས། བསྒྲུབ་པར་བྱ་དང་རིགས་མཐུན་པ་ལ་ཡོད་པའི་གཏན་ཚིགས་དེའི་མེད་པ་ལ་མེད་ཉིད་ནི་ཚུལ་གསུམ་པ་སྟེ་དེ་ཡང་ངེས་པ་ཡིན་ནོ། །ཞེས་དང༌། ཚད་མ་མདོ་ལས། མེད་ཉིད་ལ་མེད་པ། ཞེས་དང༌། དེའི་རང་འགྲེལ་ལས། མེད་ཉིད་ལ་མེད་པ་ཞེས་པས་ནི་སླར་ཡང་དེ་ཉིད་ངེས་པར་བྱ་བའི་དོན་དུ་སྟེ་མེད་པ་ཉིད་ལ་མེད་པ་ཡིན་གྱི་གཞན་ལ་ཡང་མ་ཡིན་ལ་འགལ་བ་ཡང་མ་ཡིན་ནོ། །ཞེས་པའི་དོན་ནོ། །ཞེས་དང༌། འཐད་ལྡན་ལས། དེའི་མེད་པ་མཐུན་པའི་ཕྱོགས་ཀྱི་དངོས་པོ་མེད་པ་ལ་མེད་པ་ཉིད་ཀྱི་ངོ་བོ་ནི་ཚུལ་གསུམ་པ་སྟེ། ཞེས་དང༌། ཛེ་ཏཱ་རིས། མི་མཐུན་པའི་ཕྱོགས་ལ་ཡང་མེད་པ་ཉིད་དུ་ངེས་པ་ཞིག་གཞུག་གོ །ཞེས་དང༌། དུལ་བ་ལྷའི་རིགས་ཐིགས་འགྲེལ་བར། རིགས་མི་མཐུན་ལ་གཅིག་ཏུ་མེད་པ་ཉིད་ནི་ཚུལ་གསུམ་པ་སྟེ། ཞེས་གསུངས་པའི་ཕྱིར་རོ། མཚན་གཞི་ནི་བྱས་པ་ལྟ་བུའོ། ། ལྡོག་ཁྱབ་དང༌། ལྡོག་འགྲོའི་ཁྱབ་པ་དང༌། ལྡོག་འགྲོའི་ཚུལ་དང༌། ཚུལ་གསུམ་པ་རྣམས་དོན་གཅིག་མིང་གི་རྣམ་གྲངས་ཡིན་ནོ། ། གཉིས་པ་དབྱེ་བ་ནི། རང་དོན་སྐབས་དང་གཞན་དོན་སྐབས་ཀྱི་རྗེས་ཁྱབ་དང་ལྡོག་ཁྱབ་གཉིས་གཉིས་སོ། ། ཡང་ན་རྟགས་ཡང་དག་གི་ཁྱབ་པ་གཉིས་དང༌། རྟགས་ལྟར་སྣང་གི་ཁྱབ་པ་གཉིས། རྟགས་ཡང་དག་གི་ཁྱབ་པ་གཉིས་ལ། འབྲས་རང་མ་དམིགས་པའི་རྗེས་ཁྱབ་དང་ལྡོག་ཁྱབ་གཉིས་གཉིས་སོ། ། གསུམ་པ་སྒྲ་བཤད་པ་ནི། བྱས་པ་ཆོས་ཅན། སྒྲ་མི་རྟག་པར་སྒྲུབ་པའི་རྗེས་ཁྱབ་ཀྱི་ཚུལ་ཞེས་བརྗོད་པའི་རྒྱུ་མཚན་ཡོད་དེ། ཁྱོད་སྒྲ་མི་རྟག་པར་སྒྲུབ་པའི་བསྒྲུབ་བྱའི་ཆོས་མི་རྟག་པ་དང་འབྲེལ་བས་ཁྱོད་དེ་ཡོད་པའི་རྗེས་སུ་འགྲོ་ཞིང་དེས་ཁྱབ་པར་བྱ་བ་ཡིན་པས་ན་རྗེས་ཁྱབ་དང༌། ཁྱབ་བྱ་དེའི་རང་བཞིན་ཡིན་པས་ན་ཚུལ་ཞེས་བརྗོད་པའི་ཕྱིར། ཡང་བྱས་པ་ཆོས་ཅན། ཁྱོད་ལ་དེ་སྒྲུབ་ཀྱི་ལྡོག་ཁྱབ་ཀྱི་ཚུལ་ཞེས་བརྗོད་པའི་རྒྱུ་མཚན་ཡོད་དེ། ཁྱོད་སྒྲ་མི་རྟག་སྒྲུབ་ཀྱི་ཆོས་མི་རྟག་པ་མེད་ན་ཁྱོད་ཀྱང་ལྡོག་དགོས་ཤིང༌། དེ་སྒྲུབ་ཀྱི་མི་མཐུན་ཕྱོགས་ལས་ལྡོག་པའི་ཆོས་མི་རྟག་པའི་ཁྱབ་བྱ་ཡིན་པས་ན་ལྡོག་ཁྱབ་དང༌། ཁྱབ་བྱ་དེའི་རང་བཞིན་ཡིན་པས་སམ་ཁྱབ་བྱ་དེའི་བསྒྲུབ་བྱའི་སྒྲོ་འདོགས་ལ་གནོད་པས་ན་ཚུལ་ཞེས་བརྗོད་པའི་ཕྱིར། ཚུལ་གྱི་སྐད་དོད་དུ་མ་ཡོད་ལ། ཚུལ་གསུམ་པའི་རྟགས་ཞེས་པའི་ཚུལ་གྱི་སྐད་དོད་རཱུའུ་བ་ཞེས་པ་ཡིན་ཏེ། བྱེ་བྲག་རྟོགས་བྱེད་ལས། ཏྲི་རཱུ་བ་ལིངྒ་ཚུལ་གསུམ་པའི་རྟགས། ཞེས་བཤད་པའི་ཕྱིར། རྟེན་འབྲེལ་མདོ་འགྲེལ་ལས། གཟུགས་ཞེས་བྱ་བ་ནི་གནོད་པར་གྱུར་པ་ཞེས་བྱའོ། །ཞེས་གསུངས་པའི་ཕྱིར་རོ། ། བཞི་པ་སྒྲུབ་བྱེད་ནི། བྱས་པ་ཆོས་ཅན། སྒྲ་མི་རྟག་པར་སྒྲུབ་པར་བྱེད་པའི་རྗེས་ཁྱབ་ཡིན་པར་ཐལ། སྒྲ་མི་རྟག་པར་སྒྲུབ་པའི་བསྒྲུབ་བྱའི་ཆོས་སུ་འགྲོ་རྒྱུ་མི་རྟག་པ་དང་འབྲེལ་ཞིང་སྒྲ་མི་རྟག་སྒྲུབ་ཀྱི་མཐུན་ཕྱོགས་ཁོ་ན་ལ་འགོད་ཚུལ་དང་མཐུན་པར་ཡོད་པར་ངེས་པའི་གཏན་ཚིགས་ཡིན་པའི་ཕྱིར། ཁྱབ་སྟེ།དེ་དེའི་མཚན་ཉིད་ཡིན་པའི་ཕྱིར། མ་ཁྱབ་མཚམས་ཀྱི་རྟགས་གྲུབ་སྟེ། སྒྲ་མི་རྟག་པར་སྒྲུབ་པའི་བསྒྲུབ་བྱའི་ཆོས་སུ་འགྲོ་རྒྱུ་མི་རྟག་པ་དང་འབྲེལ་བ་ཡིན་པ་གང་ཞིག སྒྲ་མི་རྟག་པར་སྒྲུབ་པར་བྱེད་པའི་མཐུན་ཕྱོགས་ཁོ་ན་ལ་འགོད་ཚུལ་དང་མཐུན་པར་ཡོད་པར་ངེས་པའི་གཏན་ཚིགས་ཡིན་པའི་ཕྱིར། རྟགས་དང་པོ་མ་གྲུབ་ན། བྱས་པ་ཆོས་ཅན། དེར་ཐལ། ཁྱོད་མི་རྟག་པ་དང་འབྲེལ་བ་ཡིན་པའི་ཕྱིར། མ་གྲུབ་ན། བྱས་པ་ཆོས་ཅན། དེར་ཐལ། ཁྱོད་མི་རྟག་པ་དང་བདག་གཅིག་འབྲེལ་ཡིན་པའི་ཕྱིར། དེར་ཐལ། ཁྱོད་མི་རྟག་པ་དང་བདག་ཉིད་གཅིག་པའི་སྒོས་ནས་ཐ་དད། མི་རྟག་པ་མེད་ན་ཁྱོད་མེད་དགོས་པའི་ཕྱིར། གོང་གི་རྟགས་གཉིས་པ་མ་གྲུབ་ན། བྱས་པ་ཆོས་ཅན། སྒྲ་མི་རྟག་པར་སྒྲུབ་པར་བྱེད་པའི་མཐུན་ཕྱོགས་ཁོ་ན་ལ་འགོད་ཚུལ་དང་མཐུན་པར་ཡོད་པར་ངེས་པའི་གཏན་ཚིགས་ཡིན་པར་ཐལ། སྒྲ་མི་རྟག་པར་སྒྲུབ་པར་བྱེད་པའི་མཐུན་ཕྱོགས་ལ་འགོད་ཚུལ་དང་མཐུན་པར་ཡོད་པའི་དོན་ཚང་བ་གང་ཞིག དེའི་ཚིག་ཟུར་གྱི་ཁོ་ན་ཞེས་པའི་དོན་ཚང༌། དེའི་ཚིག་ཟུར་གྱི་ངེས་པའི་དོན་ཚང་བའི་ཕྱིར། རྟགས་དང་པོ་མ་གྲུབ་ན། བྱས་པ་ཆོས་ཅན། སྒྲ་མི་རྟག་སྒྲུབ་ཀྱི་མཐུན་ཕྱོགས་ལ་འགོད་ཚུལ་དང་མཐུན་པར་ཡོད་པ་ཡིན་པར་ཐལ། སྒྲ་མི་རྟག་སྒྲུབ་ཀྱི་མཐུན་ཕྱོགས་མི་རྟག་པ་ལ་ཡོད་པ་ཡིན་པའི་ཕྱིར། རྟགས་སླ། ཁྱབ་སྟེ། སྒྲ་མི་རྟག་སྒྲུབ་ཀྱི་མཐུན་ཕྱོགས་ལ་འགོད་ཚུལ་མཐུན་པར་ཡོད་པ་ཞེས་སྨོས་པའི་དགོས་པ་བྱས་པ་ལྟ་བུ་སྒྲ་མི་རྟག་པར་སྒྲུབ་པའི་འགལ་རྟགས་དང༌། ཐུན་མོང་མ་ཡིན་པའི་མ་ངེས་པའི་གཏན་ཚིགས་ཡིན་པ་སེལ་བའི་ཆེད་ཡིན་པའི་ཕྱིར་ཏེ། འཐད་ལྡན་ལས། འདིར་ཡང་ཡོད་པ་སྨོས་པས་འགལ་བ་ཡིན་པ་དེ་ནི་མཐུན་པའི་ཕྱོགས་ལ་ཡོད་པ་མ་ཡིན་ནོ། །ཞེས་དང༌། ཛེ་ཏཱ་རིས། ཡོད་པ་སྨོས་པས་འགལ་བ་རྣམ་པར་གཅོད་དོ། །ཞེས་དང༌། དུལ་བ་ལྷས། འདིར་ཡོད་པ་སྨོས་པས་ནི་ཐུན་མོང་མ་ཡིན་པའི་མ་ངེས་པ་བསལ་ཏེ། ཞེས་གསུངས་པའི་ཕྱིར། གོང་གི་རྟགས་གཉིས་པ་མ་གྲུབ་ན། བྱས་པ་ཆོས་ཅན། དེའི་ཚིག་ཟུར་གྱི་ཁོ་ན་ཞེས་པའི་དོན་ཚང་བར་ཐལ། ཁྱོད་སྒྲ་མི་རྟག་སྒྲུབ་ཀྱི་མཐུན་ཕྱོགས་མི་རྟག་པ་ལ་ཡོད་པ་ལས་མི་རྟག་པ་མ་ཡིན་པ་ལ་གཏན་ནས་མེད་པའི་ཕྱིར། ཁྱབ་སྟེ། དེའི་ཚིག་ཟུར་གྱི་ཁོ་ན་སྨོས་པས་བྱས་པ་ཐུན་མོང་གི་དངོས་ཀྱི་མ་ངེས་པའི་གཏན་ཚིགས་ཡིན་པ་སེལ་བ་ཡིན་པའི་ཕྱིར་ཏེ། འཐད་ལྡན་ལས། ཉིད་སྨོས་པས་ཐུན་མོང་གི་མ་ངེས་པ་ཉིད་བསལ་ཏེ། དེ་ནི་མཐུན་ཕྱོགས་ཁོ་ན་ལ་ཡོད་པ་མ་ཡིན་གྱི་འོ་ན་ཅི་ཞེ་ན། གཉིས་ཀ་ལ་ཡོད་པ་ཡིན་ནོ། །ཞེས་དང༌། ཛེ་ཏཱ་རིས། ཉིད་སྨོས་པས་ཐུན་མོང་བ་གཅོད། ཅེས་དང༌། རྟོག་གེའི་སྐད་ལས། ཁོ་ནའི་ཡི་གེས་ཐུན་མོང་གི་རྟགས་བསལ་ཏེ། སྒྲ་རྟག་སྟེ། གཞལ་བྱ་ཉིད་ཀྱི་ཕྱིར་རོ། །ཞེས་པ་ལྟ་བུའོ། །ཞེས་གསུངས་པའི་ཕྱིར། གོང་གི་རྟགས་གསུམ་པ་མ་གྲུབ་ན། བྱས་པ་ཆོས་ཅན། སྒྲ་མི་རྟག་སྒྲུབ་ཀྱི་རྗེས་ཁྱབ་ཀྱི་མཚན་ཉིད་ཀྱི་ཚིག་ཟུར་གྱི་ངེས་པའི་དོན་ཚང་བར་ཐལ། ཁྱོད་སྒྲ་མི་རྟག་པར་སྒྲུབ་པའི་སྐབས་ཀྱི་རྒོལ་བས་བློ་སྐྱོན་སོགས་ཀྱིས་ཐེ་ཚོམ་ཟ་བའི་རྟགས་མ་ཡིན་པའི་ཕྱིར། ཁྱབ་སྟེ། འཐད་ལྡན་ལས། ངེས་པའི་ཚིག་གིས་ནི་རྗེས་སུ་འགྲོ་བ་ལ་ཐེ་ཚོམ་ཟ་བ་ལ་མ་ངེས་པ་ཉིད་བསལ་བ་ཡིན་ཏེ། ཇི་ལྟར་སྨྲ་བའི་ཕྱིར་འགའ་ཞིག་ནི་ཐམས་ཅད་མཁྱེན་པ་ཡིན་ནོ། །ཞེས་བྱ་བ་ཡིན་ཏེ། མཐུན་པའི་ཕྱོགས་ཐམས་ཅད་མཁྱེན་པ་ལ་སྨྲ་བ་ཉིད་ཐེ་ཚོམ་ཟ་བ་ཡིན་ནོ། །ཞེས་གསུངས་པའི་ཕྱིར་རོ། །གཞན་ཡང་བྱས་པ་ཆོས་ཅན། སྒྲ་མི་རྟག་པར་སྒྲུབ་པའི་ལྡོག་ཁྱབ་ཡིན་ཏེ། སྒྲ་མི་རྟག་པར་སྒྲུབ་པར་བྱེད་པའི་བསྒྲུབ་བྱའི་ཆོས་སུ་འགྲོ་རྒྱུའི་མི་རྟག་པ་དང་འབྲེལ་སྟོབས་ཀྱིས་སྒྲ་མི་རྟག་པར་སྒྲུབ་པའི་མི་མཐུན་ཕྱོགས་ལ་མེད་པ་ཁོ་ནར་ངེས་པའི་གཏན་ཚིགས་ཡིན་པའི་ཕྱིར། མ་གྲུབ་ན། བྱས་པ་ཆོས་ཅན། དེར་ཐལ། སྒྲ་མི་རྟག་པར་སྒྲུབ་པར་བྱེད་པའི་བསྒྲུབ་བྱའི་ཆོས་སུ་འགྲོ་རྒྱུའི་མི་རྟག་པ་དང་འབྲེལ་བ་གང་ཞིག སྒྲ་མི་རྟག་པར་སྒྲུབ་པའི་མི་མཐུན་ཕྱོགས་ལ་མེད་པ་ཁོ་ནར་ངེས་པའི་གཏན་ཚིགས་ཡིན་པའི་ཕྱིར། རྟགས་དང་པོ་སྔར་བསྒྲུབས་ཟིན། རྟགས་གཉིས་པ་མ་གྲུབ་ན། བྱས་པ་ཆོས་ཅན། སྒྲ་མི་རྟག་པར་སྒྲུབ་པའི་མི་མཐུན་ཕྱོགས་ལ་མེད་པ་ཁོ་ནར་ངེས་པའི་གཏན་ཚིགས་ཡིན་པར་ཐལ། སྒྲ་མི་རྟག་པར་སྒྲུབ་པའི་མི་མཐུན་ཕྱོགས་ལ་མེད་པ་ཞེས་པའི་དོན་ཚང༌། དེའི་ཚིག་ཟུར་གྱི་ཁོ་ན་ཞེས་པའི་དོན་ཚང༌། དེའི་ཚིག་ཟུར་གྱི་ངེས་པ་ཞེས་པའི་དོན་ཚང་བའི་ཕྱིར། དང་པོ་གྲུབ་སྟེ། དེ་སྒྲུབ་ཀྱི་རྟགས་གང་ཞིག འགལ་རྟགས་དང་ཐུན་མོང་མ་ཡིན་པའི་མ་ངེས་པའི་གཏན་ཚིགས་གང་ཡང་མ་ཡིན་པའི་ཕྱིར། ཁྱབ་སྟེ། འཐད་ལྡན་ཆུང་ངུ་ལས། དེ་ལ་མེད་པ་སྨོས་པས་ནི་འགལ་བ་བསལ་བ་ཡིན་ཏེ། འགལ་བ་ནི་མི་མཐུན་པའི་ཕྱོགས་ལ་ཡོད་པ་ཡིན་ནོ། །ཞེས་དང༌། འདིར་ཡང་མེད་པ་ཉིད་བཟུང་བས་འགལ་བ་བསལ་ལོ། །ཞེས་དང༌། འགྲེལ་བ་སློབ་ཕན་ལས། འདིར་མེད་པ་ཞེས་པས་ནི་ཐུན་མོང་མ་ཡིན་པའི་མ་ངེས་པ་དང༌། འགལ་བ་བསལ་ལོ། །ཞེས་གསུངས་སོ། །གོང་གི་རྟགས་གཉིས་པ་མ་གྲུབ་ན། བྱས་པ་ཆོས་ཅན། དེའི་ཚིག་ཟུར་གྱི་ཁོ་ན་ཞེས་པའི་དོན་ཚང་བར་ཐལ། ཐུན་མོང་བའི་དངོས་ཀྱི་མ་ངེས་པའི་གཏན་ཚིགས་སོགས་མ་ཡིན་པའི་ཕྱིར། ཁྱབ་སྟེ། འཐད་ལྡན་ཆུང་ངུ་ལས། ཉིད་སྨོས་པས་ནི་མི་མཐུན་པའི་ཕྱོགས་གཅིག་ཐུན་མོང་དུ་ཡོད་པ་བསལ་བ་ཡིན་ཏེ། རྩོལ་བ་ལས་བྱུང་བ་ཉིད་དུ་སྒྲུབ་པར་བྱ་བ་ལ། མི་རྟག་པ་ཉིད་ནི་མི་མཐུན་པའི་ཕྱོགས་གཅིག་གློག་ལ་སོགས་པ་ལ་ཡོད་པ་ཡིན་ལ། ནམ་མཁའ་ལ་སོགས་པ་མེད་པ་ཡིན་ནོ། །དེ་བས་ན་ངེས་པར་བྱེད་པས་འདི་བསལ་ཏོ། །ཞེས་གསུངས་པའི་ཕྱིར། ལྡོག་ཁྱབ་ལ་གཞན་ལྡན་རྣམ་གཅོད་ཀྱི་ཚིག་ཕྲད་མི་སྦྱོར་ཏེ། མཐུན་ཕྱོགས་ལ་ཆ་གཉིས་པ་ལ་ལྡོག་ཁྱབ་མ་གྲུབ་པར་འགྱུར་པ་ཡིན་ཏེ། འཐད་ལྡན་ཆུང་ངུ་ལས། མེད་པའི་སྒྲའི་སྔ་རོལ་ཏུ་ངེས་པར་བཟུང་བར་བྱས་ན་ནི་དོན་འདིར་འགྱུར་ཏེ། མི་མཐུན་ཕྱོགས་ཉིད་ལ་མེད་པ་གང་ཡིན་པ་དེ་གཏན་ཚིགས་ཡིན་ལ། དེ་ལྟ་ན་ཡང་རྩོལ་བ་ལས་བྱུང་བ་ཉིད་མཐུན་ཕྱོགས་ལ་མེད་དོ། །དེའི་ཕྱིར་དེ་དག་གཏན་ཚིགས་མ་ཡིན་པར་འགྱུར་བས་དེ་ལྟར་ན་སྔར་མ་བྱས་པའོ། །ཞེས་གསུངས་པའི་ཕྱིར་རོ། །གོང་གི་རྟགས་གསུམ་པ་མ་གྲུབ་ན། བྱས་པ་ཆོས་ཅན། དེའི་ཚིག་ཟུར་གྱི་ངེས་པ་ཞེས་པའི་དོན་ཚང་བར་ཐལ། ཐེ་ཚོམ་གྱི་ལྷག་མ་དང་ལྡན་པའི་གཏན་ཚིགས་མ་ཡིན་པའི་ཕྱིར། ཁྱབ་སྟེ། འཐད་ལྡན་ལས། ངེས་པ་སྨོས་པས་ནི་མི་མཐུན་པའི་ཕྱོགས་ལས་ལྡོག་པ་ལ་ཐེ་ཚོམ་ཟ་བ་བསལ་བ་ཡིན་ནོ། །ཞེས་དང༌། རྟོག་གེའི་སྐད་ལས། ངེས་པ་སྨོས་པས་མི་མཐུན་ཕྱོགས་ལ་ལྡོག་པར་ཐེ་ཚོམ་ཟ་བ་སྟེ། དཔེར་ན་སྐྱེས་བུ་འདི་འདོད་ཆགས་དང་བྲལ་བ་མ་ཡིན་ཏེ། སྨྲ་བ་པོ་ཉིད་ཀྱི་ཕྱིར། ཞེས་སོགས་གསུངས་པའི་ཕྱིར། གཞན་ཡང་རྗེས་ཁྱབ་ཀྱི་མཚན་ཉིད་ལ་ཟུར་བཞི་ཕྱེ་ནས་སེལ་བྱ་སོ་སོར་སྦྱར་ཚུལ་ཡོད་དེ། མཐུན་ཕྱོགས་ལ་ཡོད་པ་དང༌། མཐུན་ཕྱོགས་ཁོ་ན་ལ་ཡོད་པ་དང༌། མཐུན་ཕྱོགས་ལ་ཡོད་པར་ངེས་པ་དང༌། མཐུན་ཕྱོགས་ཁོ་ན་ལ་ཡོད་པར་ངེས་པ་དང་བཞི་ཕྱེ་ནས། ཟུར་དང་པོས་འགལ་རྟགས་དང༌། ཟུར་གཉིས་པས་དངོས་ཀྱི་མ་ངེས་པ་དང༌། ཟུར་གསུམ་པས་འགལ་བ་ལྷག་ལྡན་དང༌། ཐུན་མོང་མ་ཡིན་པའི་མ་ངེས་པ་དང༌། ཟུར་བཞི་པས་ཡང་དག་ལྷག་ལྡན་གྱི་མ་ངེས་པ་སེལ་པ་ཡིན་པའི་ཕྱིར། རྟགས་རིམ་བཞིན་དུ་གྲུབ་སྟེ། སྦྱོར་བ་དེ་སྒྲུབ་ཀྱི་འགལ་རྟགས་ཡིན་ན། དེ་སྒྲུབ་ཀྱི་མཐུན་ཕྱོགས་ལ་གཏན་མེད་དང༌། དེ་སྒྲུབ་ཀྱི་དངོས་ཀྱི་མ་ངེས་པའི་གཏན་ཚིགས་ཡིན་ན། དེ་སྒྲུབ་ཀྱི་མཐུན་ཕྱོགས་སམ་མི་མཐུན་ཕྱོགས་ཁོ་ན་ལ་མེད་པར་མཐུན་ཕྱོགས་མི་མཐུན་ཕྱོགས་གཉིས་ཀ་ལ་ཡོད་པ་དང༌། དེ་སྒྲུབ་ཀྱི་འགལ་བ་ལྷག་ལྡན་གྱི་གཏན་ཚིགས་ཡིན་ན་སྐབས་ཀྱི་རྒོལ་བས་མཐུན་ཕྱོགས་ལ་ཡོད་པར་མ་ངེས་པས་ཁྱབ་པ་དང༌། ཐུན་མོང་མ་ཡིན་པའི་མ་ངེས་པའི་གཏན་ཚིགས་ལ་སྐབས་ཀྱི་རྒོལ་བས་མཐུན་ཕྱོགས་མི་མཐུན་ཕྱོགས་གང་ལ་མ་ངེས་པ་གཅིག་དགོས་པ་དང༌། དེ་སྒྲུབ་ཀྱི་ཡང་དག་ལྷག་ལྡན་གྱི་གཏན་ཚིགས་ཡིན་ན། རང་ཉིད་རང་ཕྱོགས་ཆོས་སུ་སོང་བའི་རྒོལ་བས་དེ་སྒྲུབ་ཀྱི་མཐུན་ཕྱོགས་ལ་ཡོད་པར་ངེས་ཀྱང་མཐུན་ཕྱོགས་ཁོ་ན་ལ་ཡོད་པར་མ་ངེས་པ་གཅིག་དགོས་པའི་ཕྱིར། ལྡོག་ཁྱབ་ཀྱི་མཚན་ཉིད་ལ་ཟུར་བཞི་ཕྱེ་ནས་སེལ་བྱ་སོ་སོར་སྦྱར་ཚུལ་ཡོད་དེ། མི་མཐུན་ཕྱོགས་ལ་མེད་པ་དང༌། མི་མཐུན་ཕྱོགས་ལ་མེད་པ་ཉིད་དང༌། མི་མཐུན་ཕྱོགས་ལ་མེད་པར་ངེས་པ་དང༌། མེད་པ་ཉིད་དུ་ངེས་པ་དང་བཞི་ཕྱེ་ནས། ཟུར་དང་པོས་འགལ་རྟགས་དང༌། ཟུར་གཉིས་པས་དངོས་ཀྱི་མ་ངེས་པ་དང༌། ཟུར་གསུམ་པས་ཡང་དག་ལྷག་ལྡན་དང༌། ཐུན་མོང་མ་ཡིན་པའི་མ་ངེས་པ་དང༌། ཟུར་བཞི་པས་འགལ་བ་ལྷག་ལྡན་གྱི་མ་ངེས་པ་སེལ་པ་ཡིན་པའི་ཕྱིར། རྒྱུ་མཚན་རྗེས་ཁྱབ་ཀྱི་སྐབས་དང་རིགས་འདྲ་སྦྱར་བར་བྱའོ། ། གཉིས་པ་རྟགས་ཡང་དག་གི་དབྱེ་བ་བཤད་པ།གཉིས་པ་རྟགས་ཡང་དག་གི་དབྱེ་བ་བཤད་པ་ལ་དྲུག གཉིས་པ་རྟགས་ཡང་དག་གི་དབྱེ་བ་བཤད་པ་ལ། རྟགས་ཡང་དག་ལ་གྲངས་ངེས་ཀྱི་སྒོ་ནས་དབྱེ་བ། བསྒྲུབ་བྱའི་ཆོས་ཀྱི་སྒོ་ནས་དབྱེ་བ། བསྒྲུབ་བྱའི་སྒོ་ནས་དབྱེ་བ། སྒྲུབ་ཚུལ་གྱི་སྒོ་ནས་དབྱེ་བ། མཐུན་ཕྱོགས་ལ་འཇུག་ཚུལ་གྱི་སྒོ་ནས་དབྱེ་བ། རྒོལ་བའི་སྒོ་ནས་དབྱེ་བ་དང་དྲུག དང་པོ་ལ་འབྲས་རྟགས་ཡང་དག་དང༌། རང་བཞིན་གྱི་རྟགས་ཡང་དག་དང༌། མ་དམིགས་པའི་རྟགས་ཡང་དག་བཤད་པ་དང་གསུམ། དང་པོ་ནི། རྣམ་འགྲེལ་ལས། རྒྱུ་ལ་རང་བཞིན་ཇི་སྙེད་ཅིག །མེད་ན་མི་འབྱུང་འབྲས་བུ་ནི། །གཏན་ཚིགས། ཞེས་པའི་གཞུང་འདི་བྱུང༌། མཐའ་དཔྱད་པ་ལ་དགག་བཞག་གཉིས་ལས། དང་པོ་ནི། ཁ་ཅིག་སྒྲུབ་རྟགས་ཡང་དག་གང་ཞིག བསྒྲུབ་བྱའི་ཆོས་ལ་དེ་བྱུང་དུ་འབྲེལ་བ། འབྲས་རྟགས་ཡང་དག་གི་མཚན་ཉིད་ཡིན་ཟེར་ན། དུ་བ་ཆོས་ཅན། དུ་ལྡན་གྱི་ལ་ལ་མེ་ཡོད་པར་སྒྲུབ་པར་བྱེད་པའི་འབྲས་རྟགས་ཡང་དག་མ་ཡིན་པར་ཐལ། དེ་སྒྲུབ་ཀྱི་བསྒྲུབ་བྱའི་ཆོས་ལ་དེ་བྱུང་དུ་འབྲེལ་བ་མ་ཡིན་པའི་ཕྱིར། དེར་ཐལ། དེ་སྒྲུབ་ཀྱི་བསྒྲུབ་བྱའི་ཆོས་དངོས་མེད་ཡིན་པའི་ཕྱིར། ཁ་ཅིག དེ་སྒྲུབ་ཀྱི་ཚུལ་གསུམ་གང་ཞིག དེ་སྒྲུབ་ཀྱི་དངོས་ཀྱི་བསྒྲུབ་བྱའི་ཆོས་སུ་བཟུང་རྒྱུ་དེའི་འབྲས་བུ་ཡིན་པ་དེ། འབྲས་རྟགས་ཡང་དག་གི་མཚན་ཉིད་ཡིན་ཟེར་ན། དུ་བ་ཆོས་ཅན། དུ་ལྡན་གྱི་ལ་ལ་མེ་མ་ཡིན་པ་ལས་ལོག་པའི་མེ་སྒྲུབ་པར་བྱེད་པའི་འབྲས་རྟགས་ཡང་དག་ཡིན་པར་ཐལ། དེ་སྒྲུབ་ཀྱི་ཚུལ་གསུམ་གང་ཞིག དེ་སྒྲུབ་ཀྱི་དངོས་ཀྱི་བསྒྲུབ་བྱའི་ཆོས་སུ་བཟུང་རྒྱུ་མེ་མ་ཡིན་པ་ལས་ལོག་པའི་མེའི་འབྲས་བུ་ཡིན་པའི་ཕྱིར་ཏེ། མེའི་འབྲས་བུ་ཡིན་པའི་ཕྱིར། རྩ་བར་འདོད་ན། དུ་བ་ཆོས་ཅན། དུ་ལྡན་གྱི་ལ་ལ་མེ་མ་ཡིན་པ་ལས་ལོག་པའི་མེ་སྒྲུབ་པར་བྱེད་པའི་སྒྲུབ་རྟགས་ཡང་དག་ཡིན་པར་ཐལ། དུ་ལྡན་གྱི་ལ་ལ་མེ་མ་ཡིན་པ་ལས་ལོག་པའི་མེ་སྒྲུབ་པར་བྱེད་པའི་འབྲས་རྟགས་ཡང་དག་ཡིན་པར་འདོད་པའི་ཕྱིར། ཁྱབ་སྟེ། རྣམ་འགྲེལ་རང་འགྲེལ་ལས། གཉིས་ནི་དངོས་པོ་སྒྲུབ་པ་ཡིན་ལ། གཅིག་ནི་དགག་པའི་གཏན་ཚིགས་སོ། །ཞེས་གསུངས་པའི་ཕྱིར། འདོད་མི་ནུས་ཏེ། དུ་ལྡན་གྱི་ལ་ལ་མེ་མ་ཡིན་པ་ལས་ལོག་པའི་མེ་ཡོད་པར་སྒྲུབ་པར་བྱེད་པའི་དགག་རྟགས་ཡང་དག་ཡིན་པའི་ཕྱིར། དེར་ཐལ། དེ་སྒྲུབ་ཀྱི་ཆོས་ཡིན་ན་དགག་པ་ཡིན་པས་ཁྱབ་པའི་ཕྱིར། དེར་ཐལ། དེ་སྒྲུབ་ཀྱི་དངོས་ཀྱི་བསྒྲུབ་བྱའི་ཆོས་ཡིན་ན་མེ་མ་ཡིན་པ་ལས་ལོག་པའི་མེ་དང་གཅིག་ཡིན་པས་ཁྱབ་པའི་ཕྱིར། གཞན་ཡང་དུ་བ་ཆོས་ཅན། དུ་ལྡན་གྱི་ལ་ལ་རྟག་དངོས་གཉིས་ཀྱིས་སྟོང་བའི་མེ་ཡོད་པར་སྒྲུབ་པར་བྱེད་པའི་འབྲས་རྟགས་ཡང་དག་ཡིན་པར་ཐལ། དེ་སྒྲུབ་ཀྱི་ཚུལ་གསུམ་གང་ཞིག དེ་སྒྲུབ་ཀྱི་དངོས་ཀྱི་བསྒྲུབ་བྱའི་ཆོས་སུ་བཟུང་རྒྱུ་རྟག་དངོས་གཉིས་ཀྱིས་སྟོང་བའི་མེའི་འབྲས་བུ་ཡིན་པའི་ཕྱིར། ཁྱབ་པ་ཁས། ཞེས་སོགས་སྔར་ལྟར་དཔྱད། དེ་ལྟར་བྱས་པ་ལ་ཁ་ཅིག་གིས་དེ་སྒྲུབ་ཀྱི་རྟགས་ཡང་དག་གང་ཞིག་དེ་སྒྲུབ་ཀྱི་དངོས་ཀྱི་བསྒྲུབ་བྱའི་ཆོས་ཡིན་ན་དགག་པ་ཡིན་པས་ཁྱབ་ན་དགག་རྟགས་ཡང་དག་ཡིན་པས་མ་ཁྱབ་པར་ཐལ། དགག་རྟགས་ཡང་དག་ཡིན་ན་བསྒྲུབ་བྱའི་ཆོས་ཡིན་ན་མེད་དགག་ཡིན་པས་ཁྱབ་དགོས་པའི་ཕྱིར། དེར་ཐལ། རྣམ་འགྲེལ་ལེའུ་བཞི་བ་ལས། འདིས་ནི་དངོས་ལའང་དངོས་པོའི་ཆ། །ཁས་བླངས་མེད་པར་དགག་པ་ཉིད། །སྒྲུབ་བྱེད་སྔ་མ་དག་གིས་ནི། །མ་ཡིན་སྒྲུབ་པར་བྱེད་ཕྱིར་རོ། །ཞེས་དང༌། ཤཱཀྱ་བློའི་འགྲེལ་བ་རྨ་འགྱུར་ལས། གཏན་ཚིགས་གསུམ་པོ་དེ་ལས་རང་བཞིན་དང་འབྲས་བུའི་གཏན་ཚིགས་ནི་དངོས་པོ་སྒྲུབ་པ་སྟེ། དངོས་པོ་སྒྲུབ་པ་ནི་ཡོད་པར་སྒྲུབ་པ་ཡིན་ནོ། །གཉིས་ཁོ་ན་ཞེས་ངེས་པར་བཟུང་བར་བྱ་ཡི་དངོས་པོ་སྒྲུབ་པ་ཁོ་ན་ཞེས་བྱ་བ་ནི་མ་ཡིན་ཏེ། འདི་གཉིས་ཀྱི་དགག་པ་ཡང་སྒྲུབ་པའི་ཕྱིར། ཞེས་གསུངས་པའི་ཕྱིར་ན་མ་ཁྱབ་སྟེ། ལུང་དེ་གཉིས་ཀྱི་དོན་ནི། རྒྱུ་ཁྱབ་བྱེད་མ་དམིགས་པ་འདིས་ནི་དགག་གཞིའི་དངོས་པོ་ལའང་འབྲས་བུ་དང་ཁྱབ་བྱའི་དངོས་པོའི་ཆ་ཁས་བླང་བ་མེད་ཅིང་དེ་གཉིས་རྣམ་པར་བཅད་ཙམ་གྱི་མེད་པར་དགག་པ་ཉིད་དངོས་སུ་སྒྲུབ་པར་བྱེད་ལ། སྔ་མ་འབྲས་རང་གི་རྟགས་ཡང་དག་གིས་དངོས་སུ་སྒྲུབ་པ་སྒྲུབ་པ་དང༌། ཤུགས་ལ་མ་ཡིན་དགག་སྒྲུབ་པར་བྱེད་པ་ཡིན་ལ། ལུང་འདིས་སྒྲ་མི་རྟག་པ་མ་ཡིན་དགག་ཏུ་སྟོན་པ་ཡང་མ་ཡིན་གྱི་སྒྲ་མི་རྟག་པ་མ་ཡིན་པ་ལས་ལོག་པ་མ་ཡིན་དགག་དང༌། དེ་རྗེས་དཔག་གི་ཤུགས་རྟོགས་སུ་བསྟན་པ་ཡིན་པའི་ཕྱིར། གཞན་ཡང༌། ཁ་ཅིག་གིས། རང་བཞིན་གྱི་གཏན་ཚིགས་ཡང་དག་གི་དངོས་ཀྱི་བསྒྲུབ་བྱའི་ཆོས་ལ་དགག་པ་བཟུང་བ་ཡོད་པར་ཐལ། ཛེ་ཏཱ་རིས། སྦྱོར་བ་ནི་འཇིག་པའི་ངང་ཅན་ཡིན་པ་དེ་ནི། རང་གྲུབ་པའི་སྐད་ཅིག་གཉིས་པར་མི་གནས་པ་ཡིན་ཏེ། དཔེར་ན་གློག་ལ་སོགས་པ་ལྟ་བུའོ། །གཟུགས་ལ་སོགས་པའི་ཕུང་པོ་དེ་དག་ཀྱང་རང་གྲུབ་པའི་ཚེ་འཇིག་པའི་ངང་ཅན་ཡིན་ནོ། །ཞེས་བྱ་བ་ནི་རང་བཞིན་གྱི་གཏན་ཚིགས་སོ། །ཞེས་དང༌། ཤཱཀྱ་བློའི་འགྲེལ་བ་ལས། སྦྱོར་བ་ཡང་གང་དང་གང་གྲུབ་པའི་ཚེ་འགྲིབ་པའི་ཆོས་ཅན་ཡིན་པ་དེ། ཉེས་པའི་ཚོགས་གང་དང་ཉེ་བ་ན། དེ་དག་ཤིན་ཏུ་འཕེལ་བ་མེད་པར་འཇིག་པའི་ཆོས་ཅན་ཡིན་ཏེ། དཔེར་ན་མེ་ནི་ཆུ་ལ་སོགས་པས་ཟིལ་གྱིས་གནོན་པས་འཕེལ་བ་མེད་པ་ལྟ་བུའོ། །ཉེས་པའི་ཚོགས་དང་ཉེ་བ་ན་འགྲིབ་པའི་ཆོས་ཅན་ཡིན་ནོ། །ཞེས་བྱ་བ་ནི་རང་བཞིན་གྱི་གཏན་ཚིགས་སོ། །ཞེས་དང༌། སློབ་དཔོན་ལྷ་དབང་བློའི་ལེའུ་གཉིས་པའི་འགྲེལ་བ་ལས། སྦྱོར་བ་ནི་གང་གི་བཟུང་བ་རྟོག་པ་དང་བྲལ་པ་ཡིན་པ་དེ་ནི་རང་གི་བཟུང་བ་ལས་ཕྱིན་ཅི་ལོག་ཏུ་གྱུར་བ་ཡིན་ཏེ། དཔེར་ན་སྡུག་བསྔལ་བ་ལ་བདེ་བར་འདུ་ཤེས་པ་ལས། སྡུག་བསྔལ་བར་རྟོག་པ་དང་བྲལ་བ་ལྟ་བུའོ། །མ་རིག་པ་ཡང་རང་གི་བཟུང་བ་རྟོག་པ་དང་བྲལ་བ་ཡིན་ནོ། །ཞེས་བྱ་བ་ནི། རང་བཞིན་གྱི་གཏན་ཚིགས་སོ། །ཞེས་པ་དེ་དག་གི་སྐབས་ནས་བསྟན་པའི་གཏན་ཚིགས་དེ་དག་རང་བཞིན་གྱི་གཏན་ཚིགས་ཡིན་པ་གང་ཞིག དེ་དག་གིས་དངོས་ཀྱི་བསྒྲུབ་བྱའི་ཆོས་ལ་དགག་པ་བཟུང་བའི་ཕྱིར་ཟེར་ན། རྟགས་ཕྱི་མ་མ་གྲུབ་སྟེ། དེ་དག་གི་དངོས་ཀྱི་བསྒྲུབ་བྱའི་ཆོས་སུ་བཟུང་རྒྱུ་དེ་དག་སྒྲུབ་པ་ཡིན་པའི་ཕྱིར་རོ། །ཁ་ཅིག་གིས་དུ་བ་དེ་དུ་ལྡན་གྱི་ལ་ལ་མེ་ཡོད་པར་སྒྲུབ་པར་བྱེད་པའི་འབྲས་རྟགས་ཡང་དག་མ་ཡིན་ལ། དུ་བ་ཡོད་པ་དེ་དེ་སྒྲུབ་ཀྱི་འབྲས་རྟགས་ཡང་དག་ཡིན་ཟེར་ན། འོ་ན་དུ་བའི་རྟགས་ཀྱིས་དུ་ལྡན་གྱི་ལ་ལ་མེ་ཡོད་པར་སྒྲུབ་པར་བྱེད་པའི་འབྲས་རྟགས་ཡང་དག་མེད་པར་ཐལ། དུ་བ་དེ་དེ་མ་ཡིན་པའི་ཕྱིར། འདོད་མི་ནུས་ཏེ། རྣམ་འགྲེལ་རང་འགྲེལ་ལས། འབྲས་བུ་ནི་འདི་ན་དུ་བ་ཡོད་པའི་ཕྱིར་མེ་ཡོད་དོ་ཞེས་པ་ལྟ་བུའོ། །ཞེས་གསུངས་པའི་ཕྱིར། གཞན་ཡང༌། དུ་བ་ཆོས་ཅན། ཁྱོད་ཀྱི་རྟགས་ཀྱིས་དུ་ལྡན་གྱི་ལ་ལ་མེ་ཡོད་པར་སྒྲུབ་པར་བྱེད་པའི་རྟགས་ཡང་དག་གི་འགོད་ཚུལ་ཡིན་ན་ཡིན་འགོད་ཡིན་པས་ཁྱབ་པ་དང༌། སྒྲུབ་ཚུལ་ཡིན་ན་ཡིན་སྒྲུབ་ཡིན་པས་ཁྱབ་པ་གཉིས་ཀ་ཡོད་པར་ཐལ། ཁྱོད་དེ་སྒྲུབ་གྱི་རྟགས་གང་ཞིག ཁྱོད་ཀྱི་རྟགས་ཀྱིས་དེ་སྒྲུབ་ཀྱི་འགོད་ཚུལ་ཡོད་འགོད་དང་སྒྲུབ་ཚུལ་ཡོད་སྒྲུབ་མ་ཡིན་པའི་གཏན་ཚིགས་ཡིན་པའི་ཕྱིར། རྟགས་ཕྱི་མ་དོན་གྱིས་ཁས། དང་པོ་གྲུབ་སྟེ། ཁྱོད་དེ་སྒྲུབ་ཀྱི་རྟགས་སུ་བཀོད་པའི་ཕྱིར་ཏེ། བདག་མེད་ཡིན་པའི་ཕྱིར། གོང་དུ་འདོད་ན། དུ་བ་ཆོས་ཅན། དུ་ལྡན་ལ་ལ་ཁྱོད་ཡིན་པར་ཐལ། ཁྱོད་ཀྱི་རྟགས་ཀྱིས་དུ་ལྡན་ལ་ལ་མེ་ཡོད་པར་སྒྲུབ་པར་བྱེད་པའི་འགོད་ཚུལ་ཡིན་འགོད། སྒྲུབ་ཚུལ་ཡིན་སྒྲུབ་གང་ཞིག ཁྱོད་དེ་སྒྲུབ་ཀྱི་རྟགས་ཡང་དག་ཡིན་པའི་ཕྱིར། འདོད་ན། དུ་ལྡན་ལ་ལ་ཆོས་ཅན། དུ་བ་མ་ཡིན་པར་ཐལ། མེ་ཡིན་པའི་ཕྱིར། རྟགས་དོན་གྱི་ཁས། འཁོར་གསུམ། གཞན་ཡང་དུ་ལྡན་ལ་ལ་ཆོས་ཅན། མེ་ཡོད་དེ། དུ་བ་ཡོད་པའི་ཕྱིར། ཞེས་པའི་སྦྱོར་བ་དེ་དུ་བའི་རྟགས་ཀྱིས་དུ་ལྡན་ལ་ལ་མེ་ཡོད་པར་སྒྲུབ་པར་བྱེད་པའི་རྟགས་སྦྱོར་ཡང་དག་མ་ཡིན་པར་ཐལ། དུ་བ་དེ་དེ་སྒྲུབ་ཀྱི་འབྲས་རྟགས་ཡང་དག་མ་ཡིན་པའི་ཕྱིར། དེར་ཐལ། དེ་དེ་སྒྲུབ་ཀྱི་རྟགས་ཡང་དག་ཙམ་ཡང་མ་ཡིན་པའི་ཕྱིར། འདོད་ན། གང་ན་དུ་བ་ཡོད་ན་མེ་ཡོད་པས་ཁྱབ། དཔེར་ན་ཚང་མང་བཞིན། ལ་འདི་ལ་ཡང་དུ་བ་ཡོད་དོ། །ཞེས་པའི་སྒྲུབ་ངག་དེ་དུ་ལྡན་ལ་ལ་མེ་ཡོད་པར་སྒྲུབ་པར་བྱེད་པའི་སྒྲུབ་ངག་ཡང་དག་མ་ཡིན་པར་ཐལ། འདོད་པའི་ཕྱིར། འདོད་ན། རིགས་ཐིགས་ལས། འབྲས་བུའི་སྦྱོར་བ་ནི། གང་ན་དུ་བ་ཡོད་ན་མེ་ཡོད་པས་ཁྱབ། ཚང་མང་བཞིན། ལ་འདི་ལ་ཡང་དུ་བ་ཡོད་དེ། ཞེས་པའི་ལུང་དོན་མ་གྲུབ་པར་ཐལ། འདོད་པའི་ཕྱིར། ཡང་ཁ་ཅིག་གིས། མེའི་རང་བཞིན་ཚ་བ་གསལ་བ་དམར་འབར་བ་སོགས་ཇི་སྙེད་ཅིག་ཡོད་པ་རྣམས་དུ་བའི་རྟགས་ཀྱིས་རྒྱུ་འབྲས་ཀྱི་འབྲེལ་བ་གྲུབ་པའི་གོ་བྱའི་ཆོས་ཡིན་པར་ཐལ། དུ་བ་མེའི་རང་བཞིན་དེ་དག་དང་འབྲེལ་སྟོབས་ཀྱིས་དེ་དག་གོ་བྱེད་ཀྱི་འབྲས་བུའི་རྟགས་ཡང་དག་ཡིན་པའི་ཕྱིར། དེར་ཐལ། རྣམ་འགྲེལ་ལས། རྒྱུ་ལ་རང་བཞིན་ཇི་སྙེད་ཅིག །མེད་ན་མི་འབྱུང་འབྲས་བུ་ནི། །གཏན་ཚིགས། ཞེས་གསུངས་པའི་ཕྱིར་ན་མ་ཁྱབ་སྟེ། ལུང་དེའི་དོན་ནི་མེའི་རང་བཞིན་ཇི་སྙེད་ཅིག་ཡོད་པའི་ནང་ནས་རང་བཞིན་དེ་ཡོད་ན་དུ་བ་འབྱུང་ལ་དེ་མེད་ན་དུ་བ་མི་འབྱུང་བའི་རྒྱུ་དེ་དུ་བའི་རྟགས་ཀྱིས་རྒྱུ་འབྲས་ཀྱི་འབྲེལ་བ་གྲུབ་པའི་གོ་བྱའི་ཆོས་སུ་འཇོག་ལ། དེ་ལས་གཞན་པ་རྣམས་མི་འཇོག་ཅེས་བསྟན་པ་ཡིན་པའི་ཕྱིར། རྩ་བར་འདོད་ན། གཞི་དེར་དུ་བ་ཡོད་ན་གཞི་དེར་མེའི་རང་བཞིན་གསལ་བ་དང་དམར་འབར་བ་དང་ཚ་བ་རྣམས་ཡོད་པས་ཁྱབ་པར་ཐལ། འདོད་པའི་ཕྱིར། འདོད་ན། གཙུབ་ཤིང་གཙུབ་པ་ལས་དུ་བ་བྱུང་ལ། མེ་དམར་འབར་བ་མ་བྱུང་གོང་གི་དུ་བ་དང་ལྡན་པའི་གཞིར་ཆོས་ཅན། མེའི་རང་བཞིན་གསལ་བ་དང༌། དམར་འབར་བ་དང་ཚ་བ་གསུམ་ཡོད་པར་ཐལ། དུ་བ་ཡོད་པའི་ཕྱིར། འཁོར་གསུམ། འདོད་མི་ནུས་ཏེ། གཞི་དེར་མེའི་རང་བཞིན་གསལ་བ་དང༌། མེ་དམར་འབར་བ་མེད་ཀྱང༌། ཚ་ཞིང་སྲེག་པ་ཡོད་པས་མེ་མེད་པའི་སྐྱོན་མེད་ཅེས་སློབ་དཔོན་གྱིས་ལན་བཏབ་པ་ཡིན་པའི་ཕྱིར། རྣམ་ངེས་རྩ་བའི་རང་འགྲེལ་ལས། དུ་བ་མེ་ལས་མི་འཁྲུལ་བ་ཡིན་ན། གཙུབས་ཤིང་ལས་དུ་བ་བྱུང་བ་ཅི་ཡིན་ཞེ་ན། བུད་ཤིང་གི་འགྱུར་བའི་ཁྱད་པར་དང་ཚ་བ་ཉིད་མེ་ཡིན་པས་སྐྱོན་མེད་དོ། །ཞེས་དང༌། རང་འགྲེལ་ལས། མ་ཡིན་ཏེ། དེ་མེད་པར་འབྱུང་བ་ནི། དེ་ལས་སྐྱེ་བ་ངེས་པ་མེད་པའི་ཕྱིར་རོ། །དེ་ལྟ་བས་ན་རྒྱུ་ལ་རང་བཞིན་ཇི་སྙེད་ཅིག །མེད་ན་མི་འབྱུང་འབྲས་བུ་ནི། །དེ་དག་གི་གཏན་ཚིགས་ཡིན་ཏེ། དེ་དག་གི་འབྲས་བུ་ཉིད་དུ་ངེས་པའི་ཕྱིར་རོ། །ཞེས་གསུངས་པའི་ཕྱིར་རོ། ། གཉིས་པ་རང་ལུགས་བཤད་པ།གཉིས་པ་རང་ལུགས་བཤད་པ་ལ། འབྲས་རྟགས་ཡང་དག་གི་མཚན་ཉིད་དང༌། དབྱེ་བ། རྒྱུ་འབྲས་ངེས་བྱེད་ཀྱི་ཚད་མ་བཤད་པ་དང་གསུམ། དང་པོ་ནི། འབྲས་རྟགས་ཡང་དག་གི་མཚན་ཉིད་ཡོད་དེ། འབྲས་བུའི་ཚུལ་གསུམ་ཡིན་པ་དེ་ཡིན་པའི་ཕྱིར། ཡང་ན་དེ་སྒྲུབ་ཀྱི་སྒྲུབ་རྟགས་ཡང་དག་གང་ཞིག དེ་སྒྲུབ་ཀྱི་དངོས་ཀྱི་བསྒྲུབ་བྱའི་ཆོས་སུ་འགྲོ་རྒྱུ་དང་དེ་བྱུང་འབྲེལ་དུ་གྲུབ་པ་དེ།འབྲས་རྟགས་ཡང་དག་གི་མཚན་ཉིད་ཡིན་ཏེ། གཏན་ཚིགས་རིགས་པའི་དོན་བསྡུས་ལས། འབྲས་རང་མ་དམིགས་པའི་རྟགས་གསུམ་སྟེ། མཚན་ཉིད་རིམ་པ་ལྟར། དེ་སྒྲུབ་ཀྱི་སྒྲུབ་རྟགས་ཡང་དག་གང་ཞིག བསྒྲུབ་བྱའི་ཆོས་ལ་དེ་བྱུང་དུ་འབྲེལ་བའི་དང༌། གང་ཞིག བསྒྲུབ་བྱའི་ཆོས་ལ་བདག་གཅིག་ཏུ་འབྲེལ་བའི་དང༌། དེ་སྒྲུབ་ཀྱི་རང་གི་ཤེས་འདོད་ཆོས་ཅན་ལ་དགག་བྱའི་ཆོས་མེད་པའམ་མེད་པའི་ཐ་སྙད་འཇུག་རུང་དུ་སྒྲུབ་པའམ་ཡོད་ངེས་ཀྱི་ཐ་སྙད་དོན་མཐུན་འགོག་པའི་ཚུལ་གསུམ་རྣམས་སོ། །ཞེས་གསུངས་པའི་ཕྱིར་རོ། །འབྲས་རྟགས་ཡང་དག་དང་འདུས་བྱས་གཉིས་དོན་གཅིག་གོ ། གཉིས་པ་དབྱེ་བ་ནི། མདོ་ལས་འབྲས་རྟགས་ཀྱི་དབྱེ་བ་གསུངས་པ་དང༌། བསྟན་བཅོས་ལས་འབྲས་རྟགས་ཀྱི་དབྱེ་བ་གསུངས་པ་དང་གཉིས། དང་པོ་ནི། ཆོས་བཅུ་བའི་མདོ་ལས། དུ་བ་ལས་ནི་མེར་ཤེས་དང༌། །ཆུ་སྐྱར་ལས་ནི་ཆུ་ཤེས་ལྟར། །བྱང་ཆུབ་སེམས་དཔའ་བློ་ལྡན་གྱི། །རིགས་ནི་མཚན་མ་དག་ལས་ཤེས། །ཞེས་པས་དུ་བའི་རྟགས་ཀྱིས་དུ་ལྡན་ལར་མེ་ཡོད་པར་སྒྲུབ་པ་དང༌། ཆུ་སྐྱར་ལྡིང་བའི་རྟགས་ཀྱིས་དེ་ལྡན་གྱི་ཐང་ལ་ཆུ་ཡོད་པར་སྒྲུབ་པ་དང༌། སེམས་སྲན་ཆུང་ལ་ཉན་ཐོས་ཀྱི་ཆོས་བཤད་པས་མིག་ནས་མཆི་མ་དང་ལུས་ཀྱི་བ་སྤུ་ལྡང་བའི་རྟགས་ཀྱིས་ཉན་ཐོས་ཀྱི་རིགས་ཅན་དང༌། ང་རྒྱལ་དང་གཅིག་པུར་དགའ་ལ་རང་རྒྱལ་གྱི་ཆོས་བཤད་པས་མིག་ནས་མཆི་མ་དང་ལུས་ཀྱི་བ་སྤུ་ལྡང་བའི་རྟགས་ཀྱིས་རང་རྒྱལ་རིགས་ཅན་དང༌། རྒྱ་ཆེན་པོ་ལ་དགའ་ལ་བྱང་སེམས་ཀྱི་ཆོས་བཤད་པས་སྙིང་རྗེ་ཆེ་བས་མིག་ནས་མཆི་མ་དང་ལུས་ཀྱི་བ་སྤུ་ལྡང་བའི་རྟགས་ཀྱིས་ཐེག་ཆེན་གྱི་རིགས་ཅན་དུ་སྒྲུབ་པའི་འབྲས་རྟགས་རྣམས་བཤད་པའི་ཕྱིར་རོ། ། གཉིས་པ་བསྟན་བཅོས་ལས་བཤད་པའི་འབྲས་རྟགས་ཡང་དག་གི་དབྱེ་བ།གཉིས་པ་བསྟན་བཅོས་ལས་བཤད་པའི་འབྲས་རྟགས་ཡང་དག་གི་དབྱེ་བ་ནི། ལུང་མ་བསྟན་བརྟགས་ཚུལ་གྱི་འབྲས་རྟགས་དང༌། དད་ཅན་དུ་སྒྲུབ་པའི་འབྲས་རྟགས་དང༌། བྱང་སེམས་སུ་སྒྲུབ་པའི་འབྲས་རྟགས་དང༌། ཆགས་ཅན་དུ་སྒྲུབ་པའི་འབྲས་རྟགས་དང༌། དེ་བཞིན་གཤེགས་པར་སྒྲུབ་པའི་འབྲས་རྟགས་དང་ལྔ་ཡོད་ལ། དང་པོ་ཡོད་དེ། རྣལ་འབྱོར་སྤྱོད་པའི་ས་ལས། རྟགས་ལས་རྗེས་སུ་དཔག་པ་གང་ཞེ་ན། ད་ལྟར་རམ་སྔོན་མཐོང་བའི་མངོན་ཚན་དང་མཚན་མ་འགའ་ཞིག་གིས་འབྲེལ་བ་ལས། ཡུལ་མངོན་པར་བརྟགས་པ་གང་ཡིན་པ་སྟེ། དཔེར་ན། རུ་མཚོན་ལས་ཤིང་རྟ་རྗེས་སུ་དཔག་པ་དང༌། དུ་བ་ལས་མེ་དང༌། ནོག་དང་རྭ་ལས་བ་ལང་དང༌། ཞེས་སོགས་གསུངས་པའི་ཕྱིར། གཉིས་པ་གྲུབ་སྟེ། འཕགས་པ་རྣམས་ལ་ལྟ་འདོད་ཆེ་བའི་རྟགས་ཀྱིས་དེ་ལྡན་གྱི་སྐྱེ་བོ་དད་ཅན་དང༌། དམ་པའི་ཆོས་ཉན་འདོད་ཆེ་བ་དང་སེར་སྣ་དང་བྲལ་བ་རྣམས་རེ་རེ་ནས་དེ་ལྡན་གྱི་གང་ཟག་དེ་དད་ཅན་དུ་སྒྲུབ་པའི་འབྲས་རྟགས་ཡང་དག་ཡིན་པའི་ཕྱིར་ཏེ། ས་སྡེ་ལས། འཕགས་པ་རྣམས་ལ་ལྟ་འདོད་པ་དང༌། དམ་པའི་ཆོས་ཉན་པ་དང༌། སེར་སྣ་དང་བྲལ་བ་ལས་དད་པ་ཅན་དང༌། ཞེས་གསུངས་པའི་ཕྱིར་རོ། །གསུམ་པ་གྲུབ་སྟེ། མི་བཟོད་པའི་སྙིང་རྗེ་ཆེན་པོ་དང་ལྡན་པ་དང༌། དེས་དྲངས་པའི་སྙན་པར་སྨྲ་བ་དང༌། གཞན་དོན་ལ་སྤྲོ་བ་དང༌། དེའི་དབང་གིས་སྤར་བ་མ་འཆུམ་པ་དང༌། ངེས་དོན་གྱི་མདོ་སྡེའི་ཟབ་དོན་གྱི་དགོངས་པ་བློ་གྲོས་མི་ཟད་པ་ལྟར་འགྲེལ་བའི་རྟགས་ལྔས། དེ་ལྡན་གྱི་སྐྱེ་བོ་བྱང་སེམས་སུ་སྒྲུབ་པའི་འབྲས་རྟགས་ལྔ་བཤད་པའི་ཕྱིར་ཏེ། མདོ་སྡེ་རྒྱན་ལས། བརྩེ་དང་སྙན་པར་སྨྲ་བ་དང༌། །བསྟན་པ་ཉིད་དང་ལག་བསྐྱང་དང༌། །དགོངས་པ་ཟབ་མོ་ངེས་འགྲེལ་བ། །འདི་དག་བློ་ལྡན་རྣམས་ཀྱིས་རྟགས། །ཞེས་དང༌། ས་སྡེ་ལས། སྙིང་བརྩེ་བ་དང༌། སྙན་པར་སྨྲ་བ་དང༌། སྤར་བ་མ་འཆུབ་པ་དང༌། ཟབ་མོའི་དོན་གྱི་དགོངས་པ་ངེས་པར་འགྲེལ་བ་ལས། བྱང་ཆུབ་སེམས་དཔའ་དང༌། ཞེས་གསུངས་པའི་ཕྱིར་རོ། ། བཞི་བ་གྲུབ་སྟེ། ས་སྡེ་ལས། རྒོད་པ་དང༌། འཕྱར་བ་དང༌། ཅོ་འདྲི་བ་དང༌། རྩེ་བ་དང༌། ཅ་ཅོ་ཆེ་བ་ལས། འདོད་ཆགས་དང་བྲལ་བ་མ་ཡིན་པ་དང༌། ཞེས་གསུངས་པའི་ཕྱིར། ཆེ་བ་ཞེས་པ་ལྔ་ཀའི་མཐར་སྦྱར་བར་བྱའོ། །ལྔ་བ་གྲུབ་སྟེ། མཚན་དཔེ་གསལ་རྫོགས་ཀྱི་སྐྱེས་བུའི་རྟགས་དང༌། དེ་བཞིན་གཤེགས་པའི་ཡེ་ཤེས་དང༌། ཉེ་བར་ཞི་བ་དང༌། སྒྲུབ་པ་དང༌། མཐུ་བསམ་གྱི་མི་ཁྱབ་པའི་སྐྱེས་བུའི་རྟགས་ཀྱིས་དེ་བཞིན་གཤེགས་པར་སྒྲུབ་པའི་རྟགས་ལྔ་བཤད་པའི་ཕྱིར་ཏེ། ས་སྡེ་ལས། དེ་བཞིན་གཤེགས་པའི་མཚན་དང་དཔེ་བྱད་བཟང་པོ་རྣམས་དང༌། དེ་བཞིན་གཤེགས་པའི་ཡེ་ཤེས་དང༌། ཉེ་བར་ཞི་བ་དང༌། སྒྲུབ་པ་དང༌། མཐུ་ལས། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཐམས་ཅད་མཁྱེན་པ་དང༌། ཞེས་གསུངས་པའི་ཕྱིར་རོ། ། དོན་དེ་དག་བསྟན་བཅོས་ཚད་མ་རྣམ་འགྲེལ་དུ་འབྲས་རྟགས་ལྔ་སོགས་ཀྱིས་བཤད་དེ། རྒྱུ་དངོས་སྒྲུབ་གྱི་འབྲས་རྟགས་ཡང་དག་ནི། རྣམ་འགྲེལ་ལས། རྒྱུ་ལ་རང་བཞིན་ཇི་སྙེད་ཅིག །མེད་ན་མི་འབྱུང་འབྲས་བུ་ནི། །གཏན་ཚིགས། ཞེས་པས་བསྟན་ལ། མཚན་གཞི་ཡོད་དེ། དུ་བ་དེ་དུ་ལྡན་གྱི་ལ་ལ་མེ་ཡོད་པར་སྒྲུབ་པའི་རྒྱུ་དངོས་སྒྲུབ་ཀྱི་འབྲས་རྟགས་ཡིན་ནོ། །རྒྱུ་སྔོན་སོང་སྒྲུབ་ཀྱི་འབྲས་རྟགས་ནི། རྣམ་འགྲེལ་ལེའུ་གཉིས་པ་ལས། སྐྱེ་བ་ཡོངས་སུ་ལེན་པ་ན། །འབྱུང་རྔུབ་དབང་པོའི་བློ་དག་དང༌། །ཞེས་པས་བསྟན་ལ། མཚན་གཞི་ནི་ཡོད་དེ། ཟག་བཅས་ཀྱི་ཤེས་པ་དེ་ལྷས་བྱིན་གྱི་ཆགས་བཅས་ཀྱི་ཤེས་པ་རང་རྒྱུ་སྔོན་སོང་དུ་སྒྲུབ་པའི་འབྲས་རྟགས་ཡིན་པའི་ཕྱིར། རྒྱུ་སྤྱིའམ་རང་ལྡོག་སྒྲུབ་ཀྱི་འབྲས་རྟགས་ནི། རྣམ་འགྲེལ་ལེའུ་གཉིས་པ་ལས། རེས་འགའ་བ་ཉིད་ཡིན་པས་ན། །སྡུག་བསྔལ་འདི་རྒྱུ་བཅས་ཉིད་གྲུབ། །ཅེས་པས་བསྟན་ལ། མཚན་གཞི་ནི་ཡོད་དེ། རེ་འགའ་བའི་འདུས་བྱས་དེ། ཉེར་ལེན་གྱི་ཕུང་པོ་རང་རྒྱུ་དང་བཅས་པར་སྒྲུབ་པའི་རྒྱུ་སྤྱི་སྒྲུབ་ཀྱི་འབྲས་རྟགས་ཡང་དག་ཡིན་པའི་ཕྱིར། རྒྱུ་ཁྱད་པར་སྒྲུབ་ཀྱི་འབྲས་རྟགས་ནི། རྣམ་འགྲེལ་ལས། རྒྱུ་གཞན་དག་ནི་ཡོད་ན་ཡང༌། །དབང་པོའི་བློ་དང་ལྡན་པའི་ཕྱིར། །ཞེས་པས་བསྟན་ལ། རང་གི་དམིགས་རྐྱེན་མེད་པར་མི་སྐྱེ་བའི་དངོས་པོ་དེ། སྔོར་སྣང་དབང་ཤེས་རང་གི་དེ་མ་ཐག་རྐྱེན་ལས་གཞན་པའི་རྒྱུ་ཡོད་པར་སྒྲུབ་པའི་རྒྱུ་ཁྱད་པར་སྒྲུབ་ཀྱི་འབྲས་རྟགས་ཡང་དག་ཡིན་པའི་ཕྱིར། རྒྱུ་ཆོས་རྗེས་དཔག་གི་འབྲས་རྟགས་ཡང་དག་ནི། རྣམ་འགྲེལ་ལས། ཚོགས་པ་གཅིག་ལ་རག་ལས་པའི། །གཟུགས་ལ་སོགས་པ་རོས་རྟོགས་པ། །རྒྱུ་ཆོས་རྗེས་སུ་དཔག་པ་སྟེ། །དུ་བས་བུད་ཤིང་འགྱུར་བ་བཞིན། །ཞེས་པས་བསྟན་ལ། མཚན་གཞི་ཡོད་དེ། བུ་རོ་ད་ལྟ་བ་དེ། ཁ་ནང་བུ་རམ་གོང་བུའི་སྟེང་དུ་བུ་རོ་སྔ་མ་ལ་བུར་གཟུགས་ཕྱི་མའི་ཐོགས་པ་མེད་པའི་ལྷན་ཅིག་བྱེད་རྐྱེན་བྱེད་པའི་ནུས་པ་ཡོད་པར་སྒྲུབ་པར་བྱེད་པའི་རྒྱུ་ཆོས་རྗེས་དཔག་གི་འབྲས་རྟགས་ཡང་དག་ཡིན་པའི་ཕྱིར། རྒྱུ་ཚོགས་གྲངས་ཚང་གི་འབྲས་རྟགས་ཡང་དག་ནི། མདོ་ལས། རྒྱུ་དང་རྐྱེན་མ་ཚང་བ་མེད་པའི་ཕྱིར། ལས་ཀྱི་འབྲས་བུ་མངོན་པ་ཡང་ཡོད་དོ། །ཞེས་དང༌། རྣམ་འགྲེལ་ལས། མ་ཚང་མེད་རྒྱུ་དེ་ལ་ནི། །འབྲས་བུ་གང་གིས་ལྡོག་པར་བྱེད། །ཅེས་པས་བསྟན་ལ། མཚན་གཞི་ཡོད་དེ། རང་གི་ཉེར་ལེན་དང་ལྷན་ཅིག་བྱེད་རྐྱེན་གྱི་རྒྱུ་ཚོགས་པ་གྲངས་མ་ཚང་པར་མི་སྐྱེ་བའི་དངོས་པོ་དེ། མྱུ་གུ་རང་གི་རྒྱུ་རྐྱེན་དུ་མ་ཚོགས་པ་ལས་སྐྱེ་དགོས་པར་སྒྲུབ་པར་བྱེད་པའི་རྒྱུ་ཚོགས་གྲངས་ཚང་གི་འབྲས་རྟགས་ཡང་དག་ཡིན་པའི་ཕྱིར། དབྱེ་བ་དེ་ཡང་གཏན་ཚིགས་རིགས་པའི་དོན་བསྡུས་ལས། དུ་ལྡན་གྱི་ལ་ཆོས་ཅན། མེ་ཡོད་དེ། དུ་བ་ཡོད་པའི་ཕྱིར་ཞེས་པ་ལྟ་བུ་རྒྱུ་དངོས་སྒྲུབ་པ་དང༌། ནམ་མཁའི་དུ་བ་ཆོས་ཅན། མེ་སྔོན་དུ་སོང་སྟེ། དུ་བ་ཡིན་པའི་ཕྱིར། ཞེས་པ་ལྟ་བུ་རྒྱུ་སྔོན་སོང་སྒྲུབ་པ་དང༌། ཁ་ནང་བུར་རྡོག་ཆོས་ཅན། གཟུགས་ད་ལྟ་བ་ཡོད་དེ། རོ་ད་ལྟ་བ་ཡོད་པའི་ཕྱིར། ཞེས་པ་ལྟ་བུ་རྒྱུ་ཆོས་དཔོག་པ་དང༌། སྡུག་བསྔལ་ཆོས་ཅན། རྒྱུ་དང་བཅས་པ་ཡིན་ཏེ། རེས་འགའ་བ་ཡིན་པས་སོ། །ཞེས་པ་ལྟ་བུ་རྒྱུའི་རང་ལྡོག་སྒྲུབ་པ་དང༌། མིག་ཤེས་ཆོས་ཅན། དབང་ཡིད་ལས་གཞན་པའི་རྒྱུ་གཅིག་ཡོད་དེ། རྒྱུ་གཞན་དབང་ཡིད་ཡོད་ཀྱང་དབང་ཡིད་ལས་གཞན་པའི་རྒྱུ་གཅིག་མེད་ན་མི་སྐྱེ་བའི་དངོས་པོ་ཡིན་པའི་ཕྱིར། ཞེས་པ་ལྟ་བུ་རྒྱུ་ཁ་ཡར་བ་སྒྲུབ་པའི་འབྲས་རྟགས་དང་ལྔའོ། །ཞེས་གསུངས་པའི་ཕྱིར། དེ་ལས་བཤད་པའི་རྒྱུ་ཆོས་འབྲས་རྟགས་ལ་ཞིབ་ཆ་ཅུང་ཟད་དགོས་དེ། ཤཱཀྱ་བློས། རོ་ལས་དངོས་སུ་གཟུགས་རྗེས་སུ་དཔོག་པ་ནི་མིན་ནོ། །འོན་ཀྱང་རོའི་རྒྱུ་ཁོ་ནའི་གཟུགས་ཀྱི་ལྷན་ཅིག་བྱེད་པའི་རྒྱུའི་ནུས་པ་ཐོགས་པ་མེད་པ་ཉིད་རྗེས་སུ་དཔག་པར་བྱེད་ཅེས་དང༌། དངོས་སུ་རྟགས་ཉིད་ཡིན་པས་ནི་མིན་ཏེ། འབྲེལ་བ་མེད་པའི་ཕྱིར་རོ། །ཞེས་གསུངས་པའི་ཕྱིར་རོ། །དུ་ལྡན་གྱི་ལ་ལ་ཆོས་ཅན། མེ་ཡོད་དེ། དུ་བ་ཡོད་པའི་ཕྱིར་ཞེས་པའི་རྟགས་ཆོས་དོན་གསུམ་ངོས་འཛིན་ཚུལ་ཡོད་དེ། དུ་ལྡན་གྱི་ལ་དེ་རྩོད་གཞི། མེ་དེ་བསྒྲུབ་བྱའི་ཆོས་དང༌། དུ་བ་དེ་རྟགས་ཡིན་ལ། མེ་ཡོད་པ་འབྲས་རྟགས་ཡང་དག་གི་སྦྱོར་བའི་བསྒྲུབ་བྱའི་ཆོས་དང་དུ་བ་ཡོད་པ་དེའི་རྟགས་མ་ཡིན་པར་ཤེས་པར་བྱའོ། ། གསུམ་པ་རྒྱུ་འབྲས་ངེས་བྱེད་ཀྱི་ཚད་མ་བཤད་པ།གསུམ་པ་རྒྱུ་འབྲས་ངེས་བྱེད་ཀྱི་ཚད་མ་བཤད་པ་ནི། ཐོག་མར་མེ་དུ་གཉིས་ཀ་མ་དམིགས་པའི་དག་འཛིན་མངོན་སུམ་གཅིག དེའི་རྗེས་སུ་མེ་རྫས་ཁོ་ན་གསར་དུ་དམིགས་པའི་མངོན་སུམ་གཅིག དེའི་རྗེས་སུ་དུ་བ་ཡུལ་གཞན་ནས་འོང་པ་ལྟ་བུ་མ་ཡིན་པར་གཞི་དེར་གསར་དུ་དམིགས་པའི་མངོན་སུམ་གཅིག དེའི་རྗེས་སུ་མེ་དུ་གཉིས་ཀ་དམིགས་པའི་མངོན་སུམ་གཅིག དེའི་རྗེས་སུ་མེ་མ་དམིགས་པའི་མངོན་སུམ་གཅིག དེའི་རྗེས་སུ་དུ་བ་ཡུལ་གཞན་དུ་སོང་བ་ལྟ་བུ་མ་ཡིན་པར་གཞི་དེ་ཉིད་དུ་གསར་དུ་མ་དམིགས་པའི་མངོན་སུམ་གཅིག་སྟེ་མངོན་སུམ་ཕྲུགས་གསུམ་ལ་བརྟེན་ནས་དུ་བ་རྒྱུ་མེད་དུ་འཛིན་པ་དང་མི་མཐུན་པའི་རྒྱུ་ལས་སྐྱེས་པར་འཛིན་པའི་ལོག་རྟོག་ཁེགས་པ་ཡིན་ཏེ། སྔར་གྱི་དུ་བ་མ་དམིགས་པའི་མངོན་སུམ་གཅིག་དང༌། དེ་རྗེས་སུ་དུ་བ་དམིགས་པའི་མངོན་སུམ་གཉིས་ཀྱི་བྱེད་པ་ལ་བརྟེན་ནས་དུ་བ་རྒྱུ་མེད་ལས་སྐྱེ་བ་ཁེགས་པའི་ཕྱིར་ཏེ། དེ་གཉིས་ཀས་བྱེད་པ་ལ་བརྟེན་ནས། དུ་བ་རེ་དགའ་བའི་དངོས་པོ་ཡིན་པར་གྲུབ་པའི་ཕྱིར། ཚད་མ་ཟུང་ཕྱི་མ་གཉིས་ཀྱི་བྱེད་པ་ལ་བརྟེན་ནས་དུ་བ་མི་མཐུན་པའི་རྒྱུ་ལས་སྐྱེ་བ་ཁེགས་པ་ཡིན་ཏེ། ཚད་མ་ཟུང་དེ་གཉིས་ཀྱི་བྱེད་པ་ལ་བརྟེན་ནས་དུ་བ་དེ་མེས་ཕན་བཏགས་སྟོབས་ཀྱིས་མེ་ཡོད་མེད་ཀྱི་རྗེས་སུ་འགྲོ་ལྡོག་བྱེད་པར་གྲུབ་པའི་ཕྱིར། དེ་ཡང་མེ་དུའི་རྒྱུ་འབྲས་ཀྱི་འབྲེལ་བ་དབང་པོའི་མངོན་སུམ་ཚད་མས་སྟོབས་ཀྱིས་གྲུབ་པ་ཡིན་གྱི། དེའི་སྐབས་སུ་དབང་མངོན་ཚད་མས་དངོས་སུ་རྟོགས་པ་ནི་མ་ཡིན་ཏེ། རྒྱུ་འབྲས་ཀྱི་འབྲེལ་བ་ནི་དངོས་མེད་ཀྱི་ཆོས་ཡིན་པའི་ཕྱིར། ཁ་ཅིག་མེ་དུ་རྒྱུ་འབྲས་ངེས་བྱེད་ཀྱི་ཚད་མ་ཕྲུགས་དྲུག་ཟེར་བ་ནི་མི་འཐད་དེ། ཕྲུགས་ནི་ཟུང་ངམ་གཉིས་ཡིན་ལ། དེ་ལྟར་ན་ཡ་བཅུ་གཉིས་སུ་འགྱུར་རོ། ། རྣམ་འགྲེལ་དུ་རྒྱུ་འབྲས་ཀྱི་འབྲེལ་བ་དང༌། དེ་ངེས་བྱེད་ཀྱི་ཚད་མ་གཏན་ལ་ཕབ་པའི་དགོས་པ་ཡོད་དེ། སྤྱིར་རྒྱུ་འབྲས་ལ་མཁས་པ་དང༌། ཁྱད་པར་ཀུན་ཉོན་གྱི་རྒྱུ་འབྲས་དང༌། དེ་ཟློག་བྱེད་རྣམ་བྱང་རྒྱུ་འབྲས་ལ་མཁས་པ་དང༌། རྒྱང་འཕེན་གྱིས་རྒྱུ་མེད་ལས་འབྱུང་བར་འདོད་པའི་ལོག་རྟོག་དང༌། གྲངས་ཅན་པ་སོགས་ཀྱིས་རྒྱུ་ཡོད་པར་འདོད་ཀྱང་རྒྱུ་རྟག་པ་དང༌། རྒྱུ་ཁ་ཡར་བས་འབྲས་བུ་སྐྱེ་བར་འདོད་པ་དང༌། བརྡ་སྤྲོད་པའམ་ལུང་སྟོན་པ་ཁ་ཅིག་མེ་མེད་པར་རྒྱ་བྱིན་གྱི་སྤྱི་བོར་ཡང་དུ་བ་ཡོད་པར་འདོད་པའི་མི་མཐུན་པ་རྒྱུར་འཛིན་པའི་ལོག་རྟོག་དུ་མ་བཟློག་པའི་ཆེད་ཡིན་པའི་ཕྱིར། ཚད་ཆེན་དཀའ་འགྲེལ་ལས། འདི་ལྟར་རྟེན་ཅིང་འབྲེལ་བར་འབྱུང་བ་ཕྱིན་ཅི་མ་ལོག་པར་སྟོན་པའི་ཕྱིར། དེའི་དོན་ཕྱིན་ཅི་མ་ལོག་པར་བཟུང་བ་ལས་བདེ་འགྲོའི་རྒྱུ་ལས་དང་འབྲས་བུ་ཕྱིན་ཅི་མ་ལོག་པ་ལ་ཡིད་ཆེས་སྐྱེ་ཞིང༌། ངེས་པར་ལེགས་པའི་རྒྱུ་ཆོས་དང་གང་ཟག་ལ་བདག་མེད་པར་རྟོགས་པ་ཡང་ཐོས་པ་དང་བསམ་པ་དང་སྒོམ་པའི་རིམ་གྱི་སྐྱེའོ། །ཞེས་པ་ནས། གཞན་དག་གིས་མི་མཐུན་པའི་རྒྱུ་དང༌། ཚད་མ་འགལ་བའི་དངོས་པོ་ལ་བརྟེན་པར་འདོད་དེ། དེ་བས་ན་དེ་བསལ་བའི་སྒོ་ནས་བཅོམ་ལྡན་འདས་ཀྱིས་ཇི་ལྟ་བ་བཞིན་དུ་གསུངས་པ་ཡིན་ནོ། །ཞེས་བསྟན་པའི་དོན་དང༌། ཞེས་གསུངས་པའི་ཕྱིར་རོ། ། གཉིས་པ་རང་བཞིན་གྱི་རྟགས་ཡང་དག་བཤད་པ།གཉིས་པ་རང་བཞིན་གྱི་རྟགས་ཡང་དག་བཤད་པ་ལ། རྣམ་འགྲེལ་ལས། རང་བཞིན་ཡོད་ཙམ་དང༌། འབྲེལ་བ་ཅན་གྱི་ངོ་བོ་ཡང༌། །ཞེས་པའི་གཞུང་འདི་བྱུང༌། དེའི་མཐའ་དཔྱད་ལ། དགག་བཞག་གཉིས་ལས། དང་པོ་ནི། ཁ་ཅིག་ན་རེ། དེ་སྒྲུབ་ཀྱི་རང་བཞིན་གྱི་རྟགས་ཡང་དག་གི་མཚན་ཉིད། དེ་སྒྲུབ་ཀྱི་སྒྲུབ་རྟགས་ཡང་དག་གང་ཞིག དེ་སྒྲུབ་ཀྱི་བསྒྲུབ་བྱའི་ཆོས་ལ་བདག་གཅིག་ཏུ་འབྲེལ་བ་ཞེས་ཟེར་ན། དུ་བ་ཆོས་ཅན། དུ་ལྡན་གྱི་ལ་ལ་མེ་ཡོད་པར་སྒྲུབ་པར་བྱེད་པའི་རང་བཞིན་གྱི་རྟགས་ཡང་དག་ཡིན་པར་ཐལ། དེ་སྒྲུབ་ཀྱི་སྒྲུབ་རྟགས་ཡང་དག་གང་ཞིག དེ་སྒྲུབ་ཀྱི་བསྒྲུབ་བྱའི་ཆོས་ལ་བདག་གཅིག་ཏུ་འབྲེལ་བ་ཡིན་པའི་ཕྱིར། ཁྱབ་པ་ཁས། རྟགས་དང་པོ་སླ། རྟགས་གཉིས་པ་གྲུབ་སྟེ། དེ་སྒྲུབ་ཀྱི་བསྒྲུབ་བྱའི་ཆོས་ལ་འབྲེལ་བ་གྲུབ་པ་གང་ཞིག དེ་དང་དེ་བྱུང་འབྲེལ་གྱི་འབྲེལ་བ་མ་གྲུབ་པའི་ཕྱིར། རྟགས་ཕྱི་མ་དེར་ཐལ། དེ་སྒྲུབ་ཀྱི་བསྒྲུབ་བྱའི་ཆོས་རྟོག་བཏགས་འབའ་ཞིག་པ་ཡིན་པའི་ཕྱིར། ཁ་ཅིག་ན་རེ། དེ་སྒྲུབ་ཀྱི་རྟགས་ཡང་དག་གང་ཞིག དེ་སྒྲུབ་ཀྱི་དངོས་ཀྱི་བསྒྲུབ་བྱའི་ཆོས་སུ་འགྲོ་རྒྱུའི་ཆོས་དང་རང་བཞིན་གཅིག་ཡིན་ན། དེ་སྒྲུབ་ཀྱི་རང་བཞིན་གྱི་རྟགས་ཡང་དག་ཡིན་པས་ཁྱབ་ཟེར་ན། མེ་ཚད་མས་མ་དམིགས་པ་ཆོས་ཅན། མཚན་མོའི་རྒྱ་མཚོར་མེ་མེད་པར་སྒྲུབ་པའི་རང་བཞིན་གྱི་རྟགས་ཡང་དག་ཡིན་པར་ཐལ། དེ་སྒྲུབ་ཀྱི་རྟགས་ཡང་དག་གང་ཞིག དེ་སྒྲུབ་ཀྱི་དངོས་ཀྱི་བསྒྲུབ་བྱའི་ཆོས་སུ་འགྲོ་རྒྱུའི་ཆོས་དང་རང་བཞིན་གཅིག་ཡིན་པའི་ཕྱིར། རྟགས་དང་པོ་སླ། རྟགས་གཉིས་པ་མ་གྲུབ་ན། མེ་ཚད་མས་མ་དམིགས་པ་ཆོས་ཅན། མཚན་མོའི་རྒྱ་མཚོར་མེ་མེད་པར་སྒྲུབ་པའི་དངོས་ཀྱི་བསྒྲུབ་བྱའི་ཆོས་སུ་འགྲོ་རྒྱུའི་ཆོས་དང་རང་བཞིན་གཅིག་ཡིན་པར་ཐལ། མེ་མེད་པ་དང་རང་བཞིན་གཅིག་ཡིན་པའི་ཕྱིར། མ་གྲུབ་ན། དེ་ཆོས་ཅན། དེར་ཐལ། ཁྱོད་མེ་མེད་པའི་མཚན་ཉིད་ཡིན་པའི་ཕྱིར། མ་གྲུབ་ན། མེ་ཆོས་ཅན། ཁྱོད་ཚད་མས་མ་དམིགས་པ་ཁྱོད་མེད་པའི་མཚན་ཉིད་ཡིན་པར་ཐལ། ཁྱོད་མེད་པ་ཡོད་པའི་ཕྱིར། རྩ་བར་འདོད་ན། མེ་ཚད་མས་མ་དམིགས་པ་ཆོས་ཅན། མཚན་མོའི་རྒྱ་མཚོར་མེ་མེད་པར་སྒྲུབ་པའི་རང་བཞིན་གྱི་རྟགས་ཡང་དག་མ་ཡིན་པར་ཐལ། མཚན་མོའི་རྒྱ་མཚོར་མེ་མེད་པར་སྒྲུབ་པའི་རང་བཞིན་མ་དམིགས་པའི་རྟགས་ཡང་དག་ཡིན་པའི་ཕྱིར། མ་གྲུབ་ན། མེ་ཚད་མས་མ་དམིགས་པ་ཆོས་ཅན། མཚན་མོའི་རྒྱ་མཚོར་མེ་མེད་པར་སྒྲུབ་པའི་རང་བཞིན་མ་དམིགས་པའི་རྟགས་ཡང་དག་ཡིན་པར་ཐལ། དེ་སྒྲུབ་ཀྱི་རང་བཞིན་མ་དམིགས་པའི་རྟགས་ཡང་དག་ཏུ་གྱུར་པའི་ཐ་སྙད་འབའ་ཞིག་སྒྲུབ་ཀྱི་རྟགས་ཡང་དག་ཡིན་པའི་ཕྱིར། ཡང་ཁ་ཅིག་ཡོད་པ་དེ། སྒྲ་མི་རྟག་པར་སྒྲུབ་པར་བྱེད་པའི་ཁྱད་པར་དག་པ་པའི་རང་བཞིན་གྱི་རྟགས་ཡང་དག་ཡིན་པར་ཐལ། རྣམ་འགྲེལ་ལས། འཇིག་ལ་འབྲས་དང་ཡོད་ཉིད་བཞིན། །ཞེས་གསུངས་པའི་ཕྱིར་ན་མ་ཁྱབ་སྟེ། དེའི་སྐབས་ཀྱི་ཡོད་པའི་སྐད་དོད་ལ་བྷ་བ་ཞེས་པ་ཡོད་པ། དངོས་པོ། རྫས་སོགས་དོན་བཅུ་ལ་འཇུག་ཀྱང་འདིར་དངོས་པོ་ཞེས་པའི་དོན་ལ་གོ་དགོས་པའི་ཕྱིར། རྩ་བར་འདོད་མི་ནུས་ཏེ། ཡོད་པ་དེ་སྒྲ་མི་རྟག་པར་སྒྲུབ་པར་བྱེད་པའི་རང་བཞིན་གྱི་རྟགས་ཡང་དག་མ་ཡིན་པའི་ཕྱིར། དེར་ཐལ། ཁྱོད་ཀྱི་རྟགས་ཀྱིས་དེ་སྒྲུབ་ཀྱི་རྟགས་ཆོས་ཀྱི་འབྲེལ་བ་མ་གྲུབ་པའི་ཕྱིར། ཁྱབ་སྟེ། རང་འགྲེལ་ལས། འབྲེལ་བ་མེད་པར་རྗེས་སུ་འགྲོ་བར་ངེས་པ་དང༌། ལྡོག་པ་དག་ངེས་པ་མེད་དོ། །ཞེས་དང༌། རྣམ་ངེས་རང་འགྲེལ་ལས། རང་བཞིན་གྱི་རྟགས་ཡང་དག་གཞན་དག་གི་བདག་ཉིད་ཇི་ལྟ་བུའི་ཚད་མ་དག་གིས་རང་བཞིན་དེ་ཙམ་དང་འབྲེལ་བ་ཁོ་ན་བསྒྲུབ་པར་བྱ་བ་སྒྲུབ་པར་བྱེད་པ་དག་གོ །ཞེས་གསུངས་པའི་ཕྱིར། གཞན་སྡེ་སྔ་ཕྱི་མཐའ་དག་དང༌། ཕྱོགས་གླང་མ་བྱུང་གོང་གི་ཉན་ཐོས་སྡེ་བ་མང་པོ་ཞིག་དང་བྱུང་ཕྱིན་ཆད་ཀྱི་རང་སྡེ་སློབ་དཔོན་དབང་ཕྱུག་སྡེ་སོགས་ན་རེ། བྱས་རྟགས་ཀྱིས་སྒྲ་མི་རྟག་པར་སྒྲུབ་པའི་རྗེས་ཁྱབ་ངེས་པའི་ཚད་མ་དེས་བྱས་པའི་གསལ་བའི་དབྱེ་བ་མཐའ་དག་ལ་རྟག་འཛིན་ཀྱི་སྒྲོ་འདོགས་མ་ཆོད་པར་འདོད་ལ། དེ་འགོག་པ་ལ་དཔལ་ཆོས་ཀྱི་གྲགས་པའི་རྣམ་འགྲེལ་ལས། འཁྲུལ་བ་ཅན་གྱི་གཉེན་པོར་ནི། །ངེས་པ་བརྗོད་པར་མཛད་པ་ཡིན། །ཞེས་པའི་གཞུང་འདི་བྱུང༌། བྱས་རྟགས་ཀྱིས་སྒྲ་མི་རྟག་པར་སྒྲུབ་པའི་རྗེས་ཁྱབ་མཇལ་བའི་ཚད་མ་ཆོས་ཅན། ཁྱོད་ཀྱིས་བྱས་པའི་གསལ་བའི་དབྱེ་བ་མཐའ་དག་ལ་རྟག་འཛིན་གྱི་སྒྲོ་འདོགས་ཆོད་པར་ཐལ། འདོད་པའི་ཕྱིར།འདོད་ན། སྒྲ་ལ་རྟག་འཛིན་གྱི་སྒྲོ་འདོགས་ཆོད་པར་ཐལ། སྒྲ་དེ་བྱས་པའི་གསལ་བའི་དབྱེ་བ་ཡིན་པ་གང་ཞིག ཁྱོད་ཀྱིས་བྱས་པའི་གསལ་བའི་དབྱེ་བ་མཐའ་དག་ལ་རྟག་འཛིན་གྱི་སྒྲོ་འདོགས་ཆོད་པའི་ཕྱིར་ན་མ་ཁྱབ། དེ་འདྲའི་ཚད་མ་དེས། གཞི་བྱས་པའི་སྟེང་དུ་བྱས་པའི་གསལ་བའི་དབྱེ་བ་མཐའ་དག་ལ་སྤྱི་འགྲོའི་ཚུལ་གྱིས་སྒྲོ་འདོགས་ཆོད་ཀྱང། སྒྲ་ཁྱད་གཞིར་བཟུང་ནས་སྒྲ་ལ་རྟག་འཛིན་གྱི་སྒྲོ་འདོགས་མ་ཆོད་པའི་ཕྱིར་རོ། །དེ་ལྟར་སྤྱིས་སྟོང་བ་ངེས་ཀྱང་བྱེ་བྲག་གིས་སྟོང་བ་མ་ངེས་པ་ཡོད་དེ། ཤན་ཏི་བའི་ནང་གི་ཁྱབ་པ་ལས། ཁྱབ་པ་རྟོགས་པ་ཉིད་ཀྱིས་ཀྱང་བསྒྲུབ་པར་བྱ་བ་གྲུབ་པ་ཉིད་ཡིན་ཏེ། སྤྱི་ལ་དམིགས་པ་ཉིད་ཀྱིས་ཆོས་ཅན་གྱི་ཁྱད་པར་གྱི་ཆོས་དག་ཡོངས་སུ་མི་གཅོད་དོ། །ཞེས་དང༌། རྩ་ཤེས་ལས། བདག་ཉིད་ཡོད་པ་མ་ཡིན་ན། །བདག་གི་ཡོད་པ་ག་ལ་འགྱུར། །ཞེས་དང༌། དེའི་ཐད་ཀྱི་སངས་རྒྱས་བསྐྱངས་ཀྱི་འགྲེལ་བ་ལས། དཔེར་ན་མོ་གཤམ་གྱི་བུ་མེད་པར་དམིགས་པ་ཉིད་ལས། དེའི་མིག་སོགས་དམིགས་པར་མི་འགྱུར་རོ། །ཞེས་གསུངས་པའི་ཕྱིར་རོ། །གོང་གི་དེ་འདྲའི་རྗེས་ཁྱབ་མཇལ་བའི་ཚད་མས་སྒྲ་རྟག་འཛིན་གྱི་སྒྲོ་འདོགས་ཆོད་པ་མི་འཐད་པར་ཐལ། དེས་སྒྲོ་འདོགས་བཅད་ཟིན་ན་དེའི་རྗེས་སུ་སྒྲ་དང་རྟགས་དག་ཞན་སེལ་གྱི་ཚད་མ་དག་འཇུག་པར་མི་འགྱུར་བའི་ཕྱིར། དེར་ཐལ། རང་འགྲེལ་ལས། སྒྲ་དང་རྟགས་དག་འཇུག་པ་ནི། ཞེས་པ་ནས། སྒྲོ་འདོགས་པའི་ལོག་པར་རྟོག་པ་དང་ཐེ་ཚོམ་མེད་ན་སྒྲ་དང་རྟགས་དག་འཇུག་པར་མི་འགྱུར་ཞིང༌། གུས་པས་འཚོལ་བ་དང༌། དོན་དུ་གཉེར་བར་མི་བྱེད་དོ། །ཞེས་དང༌། ཤཱཀྱ་བློའི་འགྲེལ་བ་ལས། སྒྲོ་འདོགས་པའི་ལོག་པར་རྟོག་པ་དང་ཐེ་ཚོམ་རྣམས་བསལ་ན་སྒྲ་དང་རྟགས་དག་འཇུག་པར་མི་འགྱུར་རོ། །ཞེས་གསུངས་པའི་ཕྱིར་རོ། །ཡང་ཁ་ཅིག་ན་རེ། བྱས་རྟགས་ཀྱིས་སྒྲ་མི་རྟག་པར་རྟོགས་པའི་རྗེས་དཔག་གིས་གསར་དུ་གཅོད་རྒྱུའི་སྒྲོ་འདོགས་མེད་པར་ཐལ། ཐེ་ཚོམ་དང་སྒྲོ་འདོགས་ཀྱི་གཞི་མཐུན་མེད་པའི་ཕྱིར། དེར་ཐལ། རང་འགྲེལ་ལས། ཚད་མས་བསལ་བར་བྱ་བ་དང༌། ལོག་པར་རྟོག་པ་དང༌། ཐེ་ཚོམ་རྣམས་བསལ་ཏེ། ཞེས་སོགས་ཐེ་ཚོམ་དང་སྒྲོ་འདོགས་སོ་སོར་བཤད་པའི་ཕྱིར་ན་མ་ཁྱབ་སྟེ། ཐེ་ཚོམ་དང་མཐའ་གཅིག་ཏུ་འཛིན་པའི་སྒྲོ་འདོགས་ཀྱི་གཞི་མཐུན་མེད་པ་དེའི་དོན་ཡིན་པའི་ཕྱིར། ཐེ་ཚོམ་དང་སྒྲོ་འདོགས་ཀྱི་གཞི་མཐུན་ཡོད་དེ། དོན་མི་འགྱུར་གྱི་ཐེ་ཚོམ་དེ་དེ་ཡིན་པའི་ཕྱིར། དེར་ཐལ། ཐེ་ཚོམ་དང་སྒྲོ་འདོགས་བྱ་བ་གཅིག་པས་རྟོག་པ་བྱེ་བྲག་པ་ཡོད་པའི་ཕྱིར། དེར་ཐལ། རྣམ་འགྲེལ་ལས། ཉ་ཕྱིས་ལ་དངུལ་རྣམ་པ་ལྟར། །གལ་ཏེ་འཁྲུལ་བའི་རྒྱུ་མཚན་གྱིས། །ཡོན་ཏན་གཞན་སྦྱོར་མི་བྱེད་ན། །ཞེས་དང༌། འཐད་ལྡན་ལས། ཐེ་ཚོམ་དང་ལོག་པར་རྟོག་པ་མི་འགལ་ཏེ། དེ་གཉིས་བྱ་བ་གཅིག་པའི་ཕྱིར་རོ། །ཞེས་གསུངས་སོ། ། གཉིས་པ་རང་ལུགས་བཤད་པ་ལ། མཚན་ཉིད་དང༌། དབྱེ་བ། ཚུལ་ངེས་བྱེད་ཀྱི་ཚད་མ་བཤད་པ་དང་གསུམ། དང་པོ་ནི། རང་བཞིན་གྱི་ཚུལ་གསུམ་ཡིན་པ། རང་བཞིན་གྱི་རྟགས་ཡང་དག་གི་མཚན་ཉིད། ཡང་ན་དེ་སྒྲུབ་ཀྱི་སྒྲུབ་རྟགས་ཡང་དག་གང་ཞིག དེ་སྒྲུབ་ཀྱི་དངོས་ཀྱི་བསྒྲུབ་བྱའི་ཆོས་སུ་བཟུང་རྒྱུ་ཡིན་ན་ཁྱོད་དང་བདག་གཅིག་འབྲེལ་གྱི་འབྲེལ་བ་གྲུབ་པས་ཁྱབ་པའི་གཏན་ཚིགས་དེ། དེ་སྒྲུབ་ཀྱི་རང་བཞིན་གྱི་རྟགས་ཡང་དག་གི་མཚན་ཉིད། བྱས་པའི་རྟགས་ཀྱིས་སྒྲ་མི་རྟག་པར་སྒྲུབ་པར་བྱེད་པའི་རང་བཞིན་གྱི་ཚུལ་གསུམ་ཡིན་པ། བྱས་རྟགས་ཀྱིས་སྒྲ་མི་རྟག་པར་སྒྲུབ་པའི་རང་བཞིན་གྱི་རྟགས་ཡང་དག་གི་མཚན་ཉིད། མཚན་གཞི་ནི་བྱས་པ་དེའོ། ། གཉིས་པ་དབྱེ་བ་ནི། གཏན་ཚིགས་རིགས་པའི་དོན་བསྡུས་ལས། གཉིས་པ་ལ་དབྱེ་ན། མཐུན་ཕྱོགས་ལ་ཁྱབ་བྱེད་དུ་འཇུག་པ་དང༌། ཆ་གཉིས་སུ་འཇུག་པའི་རང་བཞིན་གྱི་རྟགས་གཉིས་སམ། རང་བཞིན་དག་པ་བ་དང༌། ཁྱད་པར་ལྟོས་པ་བའི་རང་བཞིན་གྱི་རྟགས་གཉིས་ཏེ། ཕྱི་མ་གཉིས་ཀྱི་མཚན་ཉིད་རིམ་པ་ལྟར། རང་བཞིན་གྱི་རྟགས་གང་ཞིག ཁྱོད་ཅེས་པའི་སྒྲས་རང་གི་ལྟོས་པ་བྱེད་ཆོས་མ་འཕངས་བ་དང་འཕངས་པའོ། །དང་པོ་ནི་སྒྲ་མི་རྟག་སྟེ། དངོས་པོ་ཡིན་པའི་ཕྱིར། ཞེས་པ་ལྟ་བུའོ། །ཞེས་གསུངས་སོ། །གཉིས་པ་ཁྱད་པར་ལྟོས་པ་བའི་རང་བཞིན་གྱི་རྟགས་ལ་དབྱེ་ན། བྱེད་ཆོས་ཐ་མི་དད་ལ་ལྟོས་པ་དང༌། ཐ་དད་ལ་ལྟོས་པ་གཉིས། དང་པོ་ནི། དཔེར་ན་སྒྲ་མི་རྟག་པར་སྒྲུབ་པ་ལ་སྐྱེ་ལྡན་རྟགས་སུ་བཀོད་པ་ལྟ་བུའོ། །གཉིས་པ་ལ་བྱེད་ཆོས་དངོས་སུ་འཕངས་བ་དང༌། ཤུགས་ལ་འཕངས་པ་གཉིས། དང་པོ་ནི། སྒྲ་མི་རྟག་པར་སྒྲུབ་པ་ལ་རྒྱུ་རྐྱེན་ལས་སྐྱེས་པ་རྟགས་སུ་བཀོད་པ་ལྟ་བུའོ། །གཉིས་པ་ནི། སྒྲ་མི་རྟག་པར་སྒྲུབ་པ་ལ་བྱས་པ་རྟགས་སུ་བཀོད་པའོ། །མཚན་ཉིད་དང་དབྱེ་བ་དེ་ལྟར་འཐད་དེ། རྣམ་འགྲེལ་ལེའུ་དང་པོ་ལས། རང་བཞིན་ཁྱད་པར་བྱེ་བྲག་ལ། །ལྟོས་པའམ་འོན་ཏེ་འབའ་ཞིག་པ། །བསྒྲུབ་བྱ་སྒྲུབ་པའི་ཕྱིར་བརྗོད་དེ། །འཇིག་ལ་འབྲས་དང་དངོས་ཉིད་བཞིན། །ཞེས་གསུངས་པའི་ཕྱིར་རོ། ། གསུམ་པ་ཚུལ་ངེས་བྱེད་ཀྱི་ཚད་མ་བཤད་པ།གསུམ་པ་ཚུལ་ངེས་བྱེད་ཀྱི་ཚད་མ་བཤད་པ་ལ། ཐོག་མར་རྩ་སྦྱོར་འགོད་པ་ལ། སྒྲ་ཆོས་ཅན། མི་རྟག་པ་ཡིན་ཏེ། བྱས་པ་ཡིན་པའི་ཕྱིར་ཞེས་པའོ། །དེའི་ཚུལ་སྒྲུབ་པ་ལ། ཕྱོགས་ཆོས་སྒྲུབ་པ་དང༌། ཁྱབ་པ་སྒྲུབ་པའོ། །དང་པོ་ནི་འདིའི་ཕྱོགས་ཆོས་རྒོལ་བ་ཕལ་ཆེར་གྱིས་མངོན་སུམ་གྱིས་གྲུབ་ལ། མངོན་སུམ་གྱིས་མ་གྲུབ་པའི་རྒོལ་བ་ལ། སྒྲ་ཆོས་ཅན། བྱས་པ་ཡིན་ཏེ། རྒྱུ་རྐྱེན་ལས་སྐྱེས་པའི་ཕྱིར་ཞེས་པའི་ཐ་སྙད་འབའ་ཞིག་སྒྲུབ་ཀྱི་རྟགས་ལ་བརྟེན་ནས་གྲུབ་ལ། འདིས་ཚུལ་གསུམ་ནི་མངོན་སུམ་ཀྱིས་གྲུབ་པའོ། ། གཉིས་པ་ལ་རྗེས་སུ་འགྲོ་ལྡོག་གི་ཁྱབ་པ་གྲུབ་པ་ལ་ཚད་མ་དུ་དགོས་དང༌། ཁྱབ་པ་ངེས་པའི་སྔ་རོལ་དུ་འབྲེལ་བ་ངེས་དགོས་པ་དང༌། འབྲེལ་བ་ངེས་བྱེད་ཀྱི་ཚད་མ་བཤད་པ་དང་གསུམ། །དང་པོ་རྗེས་སུ་འགྲོ་ལྡོག་གི་ཁྱབ་པ་གྲུབ་པ་ལ་ཚད་མ་གསུམ་དགོས་ཏེ། རྟགས་ཀྱི་མཚན་གཞི་ངེས་པའི་ཚད་མ་དང༌། སྒྲུབ་ཆོས་དང་དགག་ཆོས་དངོས་འགལ་དུ་ངེས་པའི་ཚད་མ་དང༌། རྟགས་དང་དགག་བྱའི་ཆོས་ཀྱི་གཞི་མཐུན་འགོག་པའི་ཚད་མ་དང་གསུམ་དགོས་པའི་ཕྱིར། གལ་ཏེ་ཚད་མ་ཕྱི་མ་གཉིས་དགོས་ཀྱི་ཚད་མ་དང་པོ་མི་དགོས་ཟེར་ན། རི་བོང་རྭའི་རྟགས་ཀྱིས་སྒྲ་མི་རྟག་པར་སྒྲུབ་པའི་རྗེས་ཁྱབ་གྲུབ་པར་ཐལ། རྟག་མི་རྟག་དངོས་འགལ་དུ་ཚད་མས་ངེས། རི་བོང་རྭ་ལ་རྟག་པ་ཁེགས་པའི་ཕྱིར། ཁྱབ་པ་ཁས། ཡང་ཁྱོད་ཀྱི་རྟགས་ཀྱིས་དེ་སྒྲུབ་ཀྱི་རྗེས་ཁྱབ་གྲུབ་པ་ལ་ཚད་མ་སྔ་ཕྱི་གཉིས་དགོས་ཀྱང་དགག་ཆོས་སྒྲུབ་ཆོས་དངོས་འགལ་ངེས་པའི་ཚད་མ་མི་དགོས་ཟེར་ན། དུང་མདོག་གི་རྟགས་ཀྱིས་ཤར་ཕྱོགས་ཀྱི་དུང་མདོག་སྔོན་པོར་སྒྲུབ་པའི་རྗེས་ཁྱབ་གྲུབ་པར་ཐལ། དུང་མདོག་ཚད་མས་ངེས། དེ་སེར་པོ་ལ་ཁེགས་པའི་ཕྱིར། མ་ཁྱབ་ན། ཁྱོད་ཀྱི་རྟགས་ཀྱིས་དེ་སྒྲུབ་ཀྱི་རྗེས་ཁྱབ་གྲུབ་པ་ལ་དགག་ཆོས་སྒྲུབ་ཆོས་དངོས་འགལ་དུ་ངེས་པའི་ཚད་མ་དགོས་པར་ཐལ། མ་ཁྱབ་པ་དེའི་ཕྱིར། འདི་ནི་རྒོལ་བ་ལ་སྦྱོར་དགོས་པའོ། །ཁྱོད་ཀྱི་རྟགས་ཀྱིས་སྒྲ་མི་རྟག་པར་སྒྲུབ་པའི་རྗེས་ཁྱབ་གྲུབ་པ་ལ་ཚད་མ་དང་པོ་གཉིས་དགོས་ཀྱང་དགག་བྱའི་ཆོས་ལ་རྟགས་འགོག་པའི་ཚད་མ་མི་དགོས་ཟེར་ན། གཞལ་བྱའི་རྟགས་ཀྱིས་སྒྲ་མི་རྟག་པར་སྒྲུབ་པའི་རྗེས་ཁྱབ་ཚད་མས་ངེས་པར་ཐལ། རྟགས་ཀྱི་མཚན་གཞི་གཞལ་བྱ་ཚད་མས་ངེས། རྟག་མི་རྟག་དངོས་འགལ་དུ་ཚད་མས་ངེས་པའི་ཕྱིར། མ་ཁྱབ་ན། ཁྱོད་ཀྱི་རྟགས་ཀྱིས་སྒྲ་མི་རྟག་པར་སྒྲུབ་པའི་རྗེས་ཁྱབ་གྲུབ་པ་ལ་རྟགས་དེ་ལ་རྟག་པ་འགོག་པའི་ཚད་མ་དགོས་པར་ཐལ། མ་ཁྱབ་པ་དེའི་ཕྱིར། དེས་ན་ཁྱོད་ཀྱི་རྟགས་ཀྱིས་དེ་སྒྲུབ་ཀྱི་རྗེས་ཁྱབ་གྲུབ་པ་ལ་རྗེས་ཁྱབ་སྒྲུབ་བྱེད་ཀྱི་ཚད་མ་གསུམ་ངེས་པར་ཚང་དགོས་ལ། དེ་ཚང་ན་ཁྱོད་ཀྱི་རྟགས་ཀྱིས་རྗེས་ཁྱབ་གྲུབ་པས་མ་ཁྱབ་པོ། ། གཉིས་པ་ཁྱབ་པ་ངེས་པའི་སྔ་རོལ་དུ་འབྲེལ་བ་ངེས་དགོས་ཏེ། རང་འགྲེལ་ལས། འབྲེལ་བ་མེད་པར་ནི་རྗེས་སུ་འགྲོ་བ་དང་ལྡོག་པ་དག་ངེས་པ་མེད་དེ། ཞེས་དང༌། རྣམ་འགྲེལ་ལས། དེ་ཉིད་ཀྱི་ཕྱིར་འབྲེལ་ཤེས་ན། །ཞེས་སོགས་གསུངས་པའི་ཕྱིར་རོ། ། གསུམ་པ་འབྲེལ་བ་ངེས་བྱེད་ཀྱི་ཚད་མ་བཤད་པ།གསུམ་པ་འབྲེལ་བ་ངེས་བྱེད་ཀྱི་ཚད་མ་བཤད་པ་ལ། བྱས་པ་མི་རྟག་པ་དང་འབྲེལ་བའི་དོན་ནི། བྱས་པ་མི་རྟག་པ་ལས་ཐ་དད། མི་རྟག་པ་ལོག་སྟོབས་ཀྱིས་བྱས་པ་ལྡོག་པར་ངེས་པ་དེ་ཡིན་ལ། བྱས་མི་རྟག་གི་འབྲེལ་བའི་དོན་ལྡོག་གི་ཕྱོགས་གཅིག་བྱས་པ་མི་རྟག་པ་ལས་ཐ་དད་ནི་མངོན་སུམ་གྱི་སྟོབས་ཀྱིས་གྲུབ་ལ། མི་རྟག་པ་ལོག་སྟོབས་ཀྱིས་བྱས་པ་ལྡོག་པ་ནི། གནོད་པ་ཅན་གྱི་རྟགས་ལ་བརྟེན་ནས་གྲུབ་པ་ཡིན་ནོ། །མི་རྟག་པ་ལོག་སྟོབས་ཀྱིས་བྱས་པ་ལྡོག་པ་དང༌། རྟག་ན་མ་བྱས་པས་ཁྱབ་པ་གཉིས་བྱས་པ་མི་རྟག་པ་ལ་འབྲེལ་བའི་དོན་ལྡོག་གི་ཕྱོགས་གཅིག་ཡིན་གྱི། རྟག་ན་མ་བྱས་པས་ཁྱབ་པ་དེ་བྱས་པའི་རྟགས་ཀྱིས་སྒྲ་མི་རྟག་པར་སྒྲུབ་པའི་ལྡོག་ཁྱབ་མ་ཡིན་ཏེ། དེ་དེ་སྒྲུབ་ཀྱི་མི་མཐུན་ཕྱོགས་ལ་ཡོད་པའི་ཕྱིར། གལ་ཏེ་རྟག་ན་མ་བྱས་པས་ཁྱབ་པ་དེ། དེ་སྒྲུབ་ཀྱི་ལྡོག་ཁྱབ་མ་ཡིན་ན་གང་རྟག་ན་མ་བྱས་པས་ཁྱབ། དཔེར་ན་འདུས་མ་བྱས་ཀྱི་ནམ་མཁའ་བཞིན། སྒྲ་ཡང་བྱས་སོ་ཞེས་པའི་སྒྲུབ་ངག་གིས་ལྡོག་ཁྱབ་དངོས་སུ་མ་བརྗོད་པར་ཐལ། རྟག་ན་མ་བྱས་པས་ཁྱབ་པ་ལྡོག་ཁྱབ་མ་ཡིན་པའི་ཕྱིར་ན་མ་ཁྱབ་སྟེ། སྒྲུབ་ངག་དེས་སྒྲ་བྱས་པ་དང༌། རྟག་ན་མ་བྱས་པས་ཁྱབ་པ་གཉིས་ཀ་བརྗོད་པ་ལ་བརྟེན་ནས་བྱས་པ་སྒྲ་མི་རྟག་པར་སྒྲུབ་པའི་མི་མཐུན་ཕྱོགས་ལ་མེད་པ་ཁོ་ནར་གོ་བར་བྱེད་ལ། དེའི་ཤུགས་ལ་བྱས་པ་དེ་དེ་སྒྲུབ་ཀྱི་མཐུན་ཕྱོགས་ཁོ་ན་ལ་ཡོད་པར་རྟོགས་ནུས་པས་སྒྲུབ་ངག་དེས་ལྡོག་ཁྱབ་དངོས་སུ་བརྗོད་ནས་རྗེས་ཁྱབ་ཤུགས་ལ་བརྗོད་པ་ཡིན་པའི་ཕྱིར་རོ། ། སྒྲ་མི་རྟག་པར་སྒྲུབ་པར་བྱེད་པའི་རྗེས་ཁྱབ་སྒྲུབ་བྱེད་ཀྱི་ལྟོས་མེད་ཀྱི་རྟགས་དང༌། ལྡོག་ཁྱབ་སྒྲུབ་བྱེད་གནོད་པ་ཅན་གྱི་རྟགས་གཉིས་ལས། དང་པོ་ལ་རྟགས་འགོད་པ་དང་ཚུལ་སྒྲུབ་པ་གཉིས་ལས། དང་པོ་ནི་བྱས་པ་ཆོས་ཅན། རང་གྲུབ་ཙམ་ནས་འཇིག་ངེས་ཡིན་ཏེ། ཁྱོད་འཇིག་པར་གྱུར་བ་རང་ལས་ཕྱིས་འབྱུང་གི་རྒྱུ་དོན་གཞན་ལ་ལྟོས་པ་མེད་པར་རང་རྒྱུ་ལས་འཇིག་པར་སྐྱེས་པའི་ཕྱིར། དཔེར་ན་གློག་བཞིན་ནོ། །གཉིས་པ་ནི། ཁྱབ་པ་དཔེའི་སྟེང་དུ་མངོན་སུམ་ཀྱི་སྟོབས་ཀྱིས་གྲུབ་ཅིང༌། ཕྱོགས་ཆོས་ནི་ཕྱིས་འབྱུང་གི་རྒྱུས་བྱས་པའི་ངོ་བོ་དངོས་མེད་ཀྱང་མི་སྐྱེད། བྱས་པའི་ངོ་བོ་དངོས་པོ་ཡང་མི་བསྐྱེད་པའི་ཕྱིར། གཉིས་པ་ལྡོག་ཁྱབ་སྒྲུབ་བྱེད་གནོད་པ་ཅན་གྱི་རྟགས་ལ། རྟགས་འགོད་པ་དང༌། ཚུལ་སྒྲུབ་པ་གཉིས། དང་པོ་ནི། རྟག་པ་ཆོས་ཅན། བྱས་པས་སྟོང་སྟེ། རིམ་དང་ཅིག་ཅར་གྱི་དོན་བྱེད་པས་སྟོང་པའི་ཕྱིར། དཔེར་ན་འདུས་མ་བྱས་ཀྱི་ནམ་མཁའ་བཞིན། ཞེས་པའོ། །གཉིས་པ་ཚུལ་སྒྲུབ་པ་ནི། ཁྱབ་པ་ཡོད་དེ། རིམ་དང་ཅིག་ཅར་གང་རུང་མ་ཡིན་པའི་དོན་བྱེད་ཚུལ་མེད་པའི་ཕྱིར། ཕྱོགས་ཆོས་ནི། ཅིག་ཆར་འབྲས་བུ་ཐམས་ཅད་མི་བསྐྱེད་པར་ཐལ། འབྲས་བུ་རྣམས་རིམ་གྱིས་སྐྱེ་བར་མངོན་སུམ་གྱིས་གྲུབ་པའི་ཕྱིར། རིམ་གྱི་འབྲས་བུ་སྐྱེ་ན། འོ་ན་རྒྱུ་ཡང་སྔ་ཕྱི་རིམ་པ་དུ་མ་ཡོད་པར་ཐལ། འབྲས་བུ་རྣམས་རིམ་གྱིས་བསྐྱེད་པ་དེའི་ཕྱིར། འདོད་ན། རྟག་པ་གཅིག་པུ་འདོད་པ་ཉམས་སོ། ། བསྟན་བཅོས་འདིར་ལྟ་བ་བཀའ་བཏགས་ཀྱི་ཕྱག་རྒྱ་བཞིའི་ནང་ནས་འདུས་བྱས་ཐམས་ཅད་མི་རྟག་པར་གཙོ་བོར་གཏན་ལ་འབེབས་ལ། དེ་ལ་བརྟེན་ནས་གང་ཟག་གི་བདག་ཡོད་པར་དམ་བཅའ་བ་ཁེགས་པ་ཡིན་ཏེ། དེ་ལ་བརྟེན་ནས་གང་ཟག་གི་བདག་རྟག་པ་ཁེགས་པའི་ཕྱིར། དེས་ན་འདིར་གཞན་སྡེ་དུ་མས་སྒྲ་ནམ་མཁའི་ཡོན་ཏན་དུ་ཁས་བླངས་ནས་རྟག་པར་སྒྲོ་འདོགས་པ་བསལ་བའི་ཕྱིར་དང༌། འདུས་བྱས་ཐམས་ཅད་མི་རྟག་པར་སྒྲུབ་པའི་ཆེད་དུ་བྱས་པའི་རྟགས་ཀྱིས་སྒྲ་མི་རྟག་པར་སྒྲུབ་པར་བྱེད་པའོ། ། གསུམ་པ་མ་དམིགས་པའི་རྟགས་ཡང་དག་བཤད་པ།གསུམ་པ་མ་དམིགས་པའི་རྟགས་ཡང་དག་བཤད་པ་ལ། མཚན་ཉིད། འཇུག་ཚུལ། དབྱེ་བ་བཤད་པ་གསུམ། དང་པོ་ལ་དགག་བཞག་གཉིས། ཁ་ཅིག་ན་རེ། དེ་སྒྲུབ་ཀྱི་ཤེས་འདོད་ཆོས་ཅན་གྱི་སྟེང་དུ་སྣང་དུ་མི་རུང་གི་ཆོས་མ་དམིགས་པ་རྟགས་སུ་བཀོད་ནས་རང་གི་དགག་བྱ་འགོག་པ་ལ་ཚུལ་གསུམ་ཚད་མས་ངེས་པའི་གཏན་ཚིགས། མ་དམིགས་པའི་རྟགས་ཡང་དག་གི་མཚན་ཉིད་ཟེར་ན། དེ་ལྟར་ན་འགལ་ཟླ་དམིགས་པའི་རྟགས་ཡང་དག་ཐམས་ཅད་མ་དམིགས་པའི་རྟགས་ཡང་དག་མ་ཡིན་པར་ཐལ་ལོ། །ཁ་ཅིག་མ་དམིགས་པའི་རྟགས་ཡང་དག་གི་མཚན་ཉིད། དེ་སྒྲུབ་ཀྱི་ཚུལ་གསུམ་ཚང་བའི་གཏན་ཚིགས་གང་ཞིག དེ་སྒྲུབ་ཀྱི་ཆོས་ཡིན་ན་མེད་དགག་ཡིན་དགོས་པ་ཞེས་ཟེར་ན། དེ་སྒྲུབ་གྱི་དངོས་ཀྱི་བསྒྲུབ་བྱའི་ཆོས་ལ་དགག་པ་བཟུང་བའི་རྟགས་ཡང་དག་ཐམས་ཅད་མ་དམིགས་པའི་རྟགས་ཡང་དག་མ་ཡིན་པར་ཐལ། མ་དམིགས་པའི་རྟགས་ཡང་དག་གི་དེ་སྒྲུབ་ཀྱི་ཆོས་ཡིན་ན་མེད་དགག་ཡིན་དགོས་པའི་ཕྱིར། རྟགས་ཁས། འདོད་ན། དེ་སྒྲུབ་གྱི་དངོས་ཀྱི་བསྒྲུབ་བྱའི་ཆོས་ལ་དགག་པ་བཟུང་བའི་རྟགས་ཡང་དག་ཐམས་ཅད་དགག་རྟགས་ཡང་དག་མ་ཡིན་པར་ཐལ། འདོད་པའི་ཕྱིར། འདོད་ན། དགག་པ་དངོས་སུ་རྟོགས་པའི་རྟོག་པ་རྣམས་དགག་རྟོག་མ་ཡིན་པར་ཐལ། འདོད་པའི་ཕྱིར། དེ་ཡང་འདོད་ན། མ་ཡིན་དགག་དངོས་སུ་རྟོགས་པའི་རྟོག་པ་རྣམས་ཆོས་ཅན། སྒྲུབ་རྟོག་ཡིན་པར་ཐལ། སྒྲུབ་རྟོག་དགག་རྟོག་གང་རུང་གང་ཞིག དགག་རྟོག་མ་ཡིན་པའི་ཕྱིར། རྟགས་ཕྱི་མ་ཁས། དེའི་རྟོགས་བྱ་ལ་སྒྲུབ་པ་ཡོད་པར་ཐལ། སྒྲུབ་རྟོག་ཡིན་པའི་ཕྱིར། མ་ཁྱབ་ན། བློ་དེའི་བཟུང་བྱ་ལ་བུམ་པ་མེད་ཀྱང་བུམ་འཛིན་རྟོག་པ་ཡིན་པ་ཞིག་ཡོད་པར་ཐལ། འདོད་པའི་ཕྱིར་རོ། ། གཉིས་པ་རང་ལུགས་བཤད་པ།གཉིས་པ་རང་ལུགས་བཤད་པ་ནི། མ་དམིགས་པའི་རྟགས་ཡང་དག་གི་མཚན་ཉིད་ཡོད་དེ། དེ་སྒྲུབ་ཀྱི་ཚུལ་གསུམ་གང་ཞིག དེ་སྒྲུབ་ཀྱི་དངོས་ཀྱི་བསྒྲུབ་བྱའི་ཆོས་ཡིན་ན་དགག་པ་ཡིན་དགོས་པ་དེ་ཡིན་པའི་ཕྱིར། བདག་ཏུ་ཚད་མས་མ་དམིགས་པའི་རྟགས་ཀྱིས། སྡུག་བདེན་བདག་མེད་དུ་སྒྲུབ་པར་བྱེད་པའི་མ་དམིགས་པའི་རྟགས་ཡང་དག་གི་མཚན་ཉིད་ཡོད་དེ། བདག་ཏུ་ཚད་མས་མ་དམིགས་པའི་རྟགས་ཀྱིས་སྡུག་བདེན་བདག་མེད་དུ་སྒྲུབ་པར་བྱེད་པའི་ཚུལ་གསུམ་གང་ཞིག དེ་སྒྲབ་ཀྱི་བསྒྲུབ་བྱའི་ཆོས་ཡིན་ན་དགག་པ་ཡིན་དགོས་པ་དེ་ཡིན་པའི་ཕྱིར། མཚན་གཞི་ནི། བདག་ཏུ་ཚད་མས་མ་དམིགས་པ་དེའོ། ། གཉིས་པ་མ་དམིགས་པའི་རྟགས་ཡང་དག་འཇུག་ཚུལ་ནི། ཚད་མས་དམིགས་པའི་སྒོ་ནས་ཡོད་པར་འཇོག་དགོས་པ་བཞིན་དུ་གཞི་གང་གི་སྟེང་དུ་དགག་བྱ་འགོག་པ་ལ་འགག་བྱ་དམིགས་པའི་ཚད་མ་བཀག་པའི་སྒོ་ནས་དགག་བྱ་འགོག་དགོས་པ་ལས་དགག་བྱ་འགོག་པའི་ཐབས་གཞན་མེད་པའི་ཕྱིར། དེ་སྐད་དུ། རྣམ་འགྲེལ་ལེའུ་གསུམ་པ་ལས། དགག་པ་ཉིད་ནི་ཐམས་ཅད་དུ། །མི་དམིགས་པ་ལས་འགྲུབ་པ་ཡིན། །ཚད་མས་གྲུབ་པར་སྨྲ་རྣམས་ཀྱི། །དོན་གྱི་བཟློག་པ་ཉིད་ལས་ཡིན། །ཞེས་དང༌། དགག་པ་གང་ཇི་སྙེད་པ་དེ་ཐམས་ཅད་མི་དམིགས་པ་ལས་ཡིན་ནོ། །ཞེས་གསུངས་སོ། །དགག་བྱ་དམིགས་པའི་ཚད་མ་བཀག་པའི་སྒོ་ནས་དགག་བྱ་འགོག་ཚུལ་ཡང་དོན་གྱི་དགག་བྱ་དམིགས་བྱེད་ཀྱི་ཚད་མ་ཁེགས་དགོས་ཀྱི་དགག་བྱ་དམིགས་བྱེད་ཀྱི་ཚད་མ་བཀག་པ་རྟགས་སུ་བཀོད་ནས་འགོག་དགོས་པ་ནི་མ་ཡིན་ནོ། ། གསུམ་པ་དབྱེ་བ་ལ། མི་སྣང་བ་མ་དམིགས་པའི་རྟགས་ཡང་དག་དང༌། སྣང་རུང་མ་དམིགས་པའི་རྟགས་ཡང་དག་གཉིས། དང་པོ་འཆད་པར་བྱེད་པ་ལ། རྣམ་འགྲེལ་ལས། ཚད་མ་རྣམས་ནི་མི་འཇུག་པ། །མེད་ལ་མི་འཇུག་འབྲས་བུ་ཅན། །ཞེས་བྱུང༌། འདི་ཡང་མདོ་ལས། གང་ཟག་གིས་གང་ཟག་ཚོད་བཟུང་བར་མི་བྱ་སྟེ། ཉམས་པར་འགྱུར་ཏ་རེ། ཞེས་པ་དེ་ལས་འཕྲོས་ལ། དེའི་དོན་ཡང་རང་ལ་མི་སྣང་བ་ཙམ་རྒྱུ་མཚན་དུ་བྱས་ནས་གཞན་རྒྱུད་ལ་ཡོན་ཏན་དེ་དང་དེ་མེད་ཅེས་བཤད་མི་རུང་ཞེས་གསུངས་པ་ཡིན་ནོ། །མཐའ་དཔྱད་པ་ལ། དགག་བཞག་གཉིས་ལས། དེ་ལ་ཁ་ཅིག་ན་རེ། གང་ཟག་དེ་ལ་ཆོས་དེ་བསྐལ་དོན་ཡིན་ན་གང་ཟག་དེའི་རྒྱུད་ཀྱི་ཚད་མ་གསུམ་གང་རུང་འཇུག་རུང་བར་ཐལ། ཆོས་དེ་གང་ཟག་དེའི་ངོ་བོར་གཞལ་བྱའི་གནས་གསུམ་གང་རུང་ཡིན་པའི་ཕྱིར་ན་མ་ཁྱབ་སྟེ། གང་ཟག་དེའི་ངོར་དོན་དེ་ལ་ཐེ་ཚོམ་ཙམ་ལས་ཚད་མ་གསུམ་གང་ཡང་མི་འཇུག་པའི་ཕྱིར། དེར་ཐལ། རྣམ་འགྲེལ་ལས། ཚད་མ་རྣམས་ནི་མི་འཇུག་པ། །ཞེས་དང༌། རྣམ་ངེས་རང་འགྲེལ་ལས། དེར་ཡང་ཡོད་ན་ནི་མངོན་སུམ་དང་རྗེས་སུ་དཔག་པ་དང་ལུང་རྣམས་ལས་གཅིག་འཇུག་པའི་ཕྱིར་ཞེ་ན། མིན་ཏེ་འགའ་ཞིག་ལ་བསྟན་བཅོས་ཀྱི་དབང་དུ་བྱས་པ་མེད་པའི་ཕྱིར། ཞེས་གསུངས་པའི་ཕྱིར། ཁ་ཅིག་གིས་ཤ་ཟ་ཚད་མས་མི་དམིགས་པ་དེ། མདུན་གྱི་གཞི་འདིར་ཤ་ཟ་ཡོད་པ་མ་ཡིན་པར་སྒྲུབ་པའི་མི་སྣང་བ་མ་དམིགས་པའི་རྟགས་ཡང་དག་ཡིན་ཟེར་ན། མདུན་གྱི་གཞི་འདིར་ཤ་ཟ་མེད་པ་ཡིན་པར་ཐལ། དེར་ཤ་ཟ་མེད་པར་སྒྲུབ་པའི་རྟགས་ཡང་དག་ཡོད་པའི་ཕྱིར། མ་གྲུབ་ན། དེར་ཐལ། ཤ་ཟ་ཚད་མས་མི་དམིགས་པ་དེ་ཡིན་པའི་ཕྱིར། རྟགས་ཁས། རྩ་བར་འདོད་མི་ནུས་ཏེ། རྣམ་ངེས་ལས། བསྐལ་བ་རྣམས་ལ་ནི། མེད་པར་ངེས་པ་ཡོད་པ་མ་ཡིན། །ཞེས་གསུངས་པའི་ཕྱིར། འདིར་མེད་པར་ངེས་པ་དང་མེད་པར་ངེས་ནུས་པ་གཉིས་ལ་ཁྱད་པར་ཡོད་དོ། །ཡང་ཁ་ཅིག་གིས། མདུན་གྱི་གཞི་འདིར་ཆོས་ཅན། ཤ་ཟ་མེད་པར་ཐལ། ཤ་ཟ་ཚད་མས་མ་དམིགས་པའི་ཕྱིར་ཟེར་ན། རྟགས་ལ་ཐེ་ཚོམ་ཟ་ཞེས་ལན་འདེབས་དགོས་ཏེ། བསྐལ་དོན་དུ་སོང་བའི་རྒོལ་བས་ཡོད་མེད་གང་དུ་དམ་བཅའ་མི་རུང་བ་དེ་ཡིན་པའི་ཕྱིར། ཁ་ཅིག་མི་སྣང་བ་མ་དམིགས་པའི་རྟགས་ཡིན་ན་སྣང་རུང་མ་དམིགས་པའི་རྟགས་ཡིན་པས་ཁྱབ་ཟེར་ན། ཤ་ཟ་བསྐལ་དོན་དུ་སོང་བའི་གང་ཟག་གིས་ཤ་ཟ་ཚད་མས་མ་དམིགས་པ་དེ། མདུན་གྱི་གཞི་འདིར་ཤ་ཟ་བསྐལ་དོན་དུ་སོང་བའི་གང་ཟག་གིས་ཤ་ཟ་ཡོད་ཅེས་དམ་བཅའ་མི་རིགས་པར་སྒྲུབ་པའི་སྣང་རུང་མ་དམིགས་པའི་རྟགས་ཡང་དག་ཡིན་པར་ཐལ། དེ་དེ་སྒྲུབ་ཀྱི་མི་སྣང་བ་མ་དམིགས་པའི་རྟགས་ཡང་དག་ཡིན་པའི་ཕྱིར། ཁྱབ་པ་ཁས། དེ་དེ་སྒྲུབ་ཀྱི་མི་སྣང་བ་མ་དམིགས་པའི་རྟགས་ཡང་དག་ཡིན་པར་ཐལ། ཤ་ཟ་བསྐལ་དོན་དུ་སོང་བའི་གང་ཟག་གིས་ཤ་ཟ་ཚད་མས་མ་དམིགས་པ་དེ་དེ་སྒྲུབ་ཀྱི་མ་དམིགས་པའི་རྟགས་ཡང་དག་གང་ཞིག མདུན་གྱི་གཞི་འདིར་ཤ་ཟ་ཡོད་ཀྱང་དེ་བསྐལ་དོན་དུ་སོང་བའི་གང་ཟག་གིས་བལྟར་མི་རུང་བ་དེ་ཡིན་པའི་ཕྱིར། དང་པོ་གྲུབ་སྟེ། གང་ཟག་དེའི་དེ་ཡོད་ཅེས་དམ་བཅའ་མི་རིགས་པ་དགག་པ་གང་ཞིག དེ་དེ་སྒྲུབ་ཀྱི་རྟགས་ཡང་དག་ཡིན་པའི་ཕྱིར། གོང་གི་རྟགས་གཉིས་པ་མ་གྲུབ་ན། དེ་འདྲའི་གང་ཟག་ཆོས་ཅན། མདུན་གྱི་གཞི་འདིར་ཤ་ཟ་ཡོད་ཀྱང་ཁྱོད་ལ་ལྟར་མི་རུང་བ་ཡིན་པར་ཐལ། ཁྱོད་དེ་ལ་བསྐལ་དོན་དུ་སོང་བའི་གང་ཟག་ཡིན་པའི་ཕྱིར། རྩ་བར་འདོད་ན། ཤ་ཟ་བསྐལ་དོན་དུ་སོང་བའི་གང་ཟག་གིས་ཤ་ཟ་ཚད་མས་མ་དམིགས་པ་ཆོས་ཅན། ཁྱོད་ཀྱི་རྟགས་ཀྱིས་མདུན་གྱི་གཞི་འདིར་ཤ་ཟ་བསྐལ་དོན་དུ་སོང་བའི་གང་ཟག་གིས་ཤ་ཟ་ཡོད་ཅེས་དམ་བཅའ་མི་རིགས་པར་སྒྲུབ་པའི་ཕྱོགས་ཆོས་ཅན་དུ་སོང་བའི་གང་ཟག་ལ། དེ་སྒྲུབ་ཀྱི་དགག་བྱའི་ཆོས་ཀྱི་བཏགས་པའི་དོན་ཤ་ཟ་མེད་པ་ལྟར་རུང་བ་དང༌། དེ་སྒྲུབ་ཀྱི་ཕྱི་རྒོལ་ཡང་དག་གིས་དེ་སྒྲུབ་ཀྱི་དགག་བྱའི་ཆོས་མེད་པར་ངེས་པ་འདྲེན་རུང་གཉིས་ཀར་ཐལ། ཁྱོད་དེ་སྒྲུབ་ཀྱི་སྣང་རུང་མ་དམིགས་པའི་རྟགས་ཡང་དག་ཡིན་པའི་ཕྱིར། རྟགས་ཁས། ཁྱབ་ཅིང༌། འདོད་མི་ནུས་ཏེ། དེ་སྒྲུབ་ཀྱི་སྣང་རུང་མ་དམིགས་པའི་རྟགས་ཡང་དག་གིས་དེ་སྒྲུབ་ཀྱི་དགག་བྱའི་ཆོས་ཡོད་ན་དེ་སྒྲུབ་ཀྱི་སྐབས་ཀྱི་ཕྱི་རྒོལ་ལ་སྣང་དུ་རུང་བ་དང༌། དེ་ལ་བརྟེན་ནས་དེ་སྒྲུབ་ཀྱི་ཕྱི་རྒོལ་ཡང་དག་གིས་གཞི་དེར་དགག་བྱའི་ཆོས་ཚད་མས་མེད་པར་ངེས་ནུས་པ་ཞིག་དགོས་པ་གང་ཞིག དེ་སྒྲུབ་ཀྱི་མི་སྣང་བ་མ་དམིགས་པའི་རྟགས་ཡང་དག་ཡིན་ན། དེ་སྒྲུབ་ཀྱི་དགག་བྱའི་བཏགས་པའི་དོན་དེ་ཡོད་ཀྱང་དེ་སྒྲུབ་ཀྱི་ཕྱོགས་ཆོས་ཅན་དུ་སོང་བའི་ཚད་མ་ལ་མི་སྣང་བ་དང༌། དེ་སྒྲུབ་ཀྱི་དགག་བྱའི་བཏགས་པའི་དོན་དེ་ཡོད་མེད་གང་དུ་མ་ངེས་པར་ཐེ་ཚོམ་ཅན་ཞིག་དགོས་པའི་ཕྱིར། དང་པོ་གྲུབ་སྟེ། རྣམ་འགྲེལ་རང་འགྲེལ་ལས། གཉིས་པ་ནི་དེ་ལ་ཚད་མ་ཡིན་ཏེ། ངེས་པའི་འབྲས་བུ་ཅན་ནོ། །ཞེས་གསུངས་པའི་ཕྱིར། གཉིས་པ་གྲུབ་སྟེ། རང་འགྲེལ་ལས། དེ་ལ་དང་པོ་ཡོད་པའི་ཐ་སྙད་དགག་པའི་ཕྱིར་ཚད་མར་བཤད་ཀྱི་ལྡོག་པ་མཐོང་བ་ལ་སོགས་པ་ལ་ཉེ་བར་སྦྱོར་བ་ནི་མ་ཡིན་ཏེ། ཐེ་ཚོམ་ཡོད་པའི་ཕྱིར། ཞེས་དང༌། རྒྱས་བཤད་སྐབས་སུ། ཡོད་མེད་ངེས་པའི་འབྲས་ཅན་མིན། །ཕྱིར་ན་ཚད་མ་ཉིད་མི་འགྱུར། །ཞེས་གསུངས་པའི་ཕྱིར། གཞན་ཡང་སྦྱོར་བ་སྐོར་གཅིག་གི་དབང་དུ་བྱས་ན་དེ་གཉིས་ཀྱི་གཞི་མཐུན་མེད་པར་ཐལ། དེ་གཉིས་ཀྱི་གོ་དོན་འགལ་བ་ཡིན་པའི་ཕྱིར། དེར་ཐལ། དེ་གཉིས་ཀས་དེ་སྒྲུབ་ཀྱི་ཤེས་འདོད་ཆོས་ཅན་གྱི་སྟེང་དུ་དགག་བྱའི་ཆོས་ཀྱི་བཏགས་པའི་དོན་ཡོད་ངེས་ཀྱི་ཐ་སྙད་དོན་མཐུན་འགོག་པ་ཙམ་འདྲ་ཡང་དགག་བྱའི་ཆོས་ཀྱི་བཏགས་པའི་དོན་དེ་རྩོད་གཞིའི་སྟེང་དུ་སྔ་མ་མི་སྣང་བ་མ་དམིགས་པས་ཡོད་མེད་གང་ལ་ཡང་དེ་སྒྲུབ་ཀྱི་ཕྱི་རྒོལ་ལ་ཐེ་ཚོམ་ཙམ་ལས་ངེས་པ་སྐྱེ་མི་ཐུབ་ཅིང༌། སྣང་རུང་མ་དམིགས་པས་དེ་སྒྲུབ་ཀྱི་ཕྱི་རྒོལ་ལ་དགག་བྱའི་ཆོས་དངོས་དེ་རྩོད་གཞིའི་སྟེང་དུ་མེད་པའི་ངེས་པ་བསྐྱེད་ཐུབ་པའི་ཁྱད་པར་སོ་སོར་བཤད་པའི་ཕྱིར་ཏེ། རང་འགྲེལ་ལས། དེ་ལྟར་མི་དམིགས་པ་འདི་གཉིས་ནི་རང་དང་བཟློག་པའི་རྒྱུ་མེད་པ་དང༌། ཡོད་པ་དག་གི་ཕྱིར། ཡོད་པའི་ཐ་སྙད་དགག་པའི་འབྲས་བུ་ཅན་ཉིད་དུ་འདྲ་སྟེ། གཅིག་ལ་ནི་ཐེ་ཚོམ་ཡོད་པའི་ཕྱིར་ལ་གཞན་ལ་ནི་བཟློག་པའི་ཕྱིར་རོ། །ཞེས་གསུངས་པའི་ཕྱིར་རོ། །རང་མི་སྣང་བ་མ་དམིགས་རྟགས་སུ་སོང་བའི་དེ་སྒྲུབ་ཀྱི་དགག་བྱའིཆོས་ཀྱི་བཏགས་པའི་དོན་དེ་ཡོད་ཀྱང་སྣང་མི་རུང་བ་ཞེས་སོགས་སྣང་རུང་གི་རྟགས་དང༌། འབྲས་རྟགས་དང༌། རང་བཞིན་གྱི་རྟགས་སོགས་གོ་ཐོབ་ཀྱི་བཤད་པ་དུ་མ་ཞིབ་ཆ་ཤེས་པར་བྱའོ། ། གཉིས་པ་རང་ལུགས་བཤད་པ།གཉིས་པ་རང་ལུགས་བཤད་པ་ལ། མི་སྣང་བ་མ་དམིགས་པའི་རྟགས་ཡང་དག་གི་མཚན་ཉིད་དང༌། འཇུག་དུས་དང༌། སྒྲ་བཤད་དང༌། དབྱེ་བ་དང༌། དགོས་པ་བཤད་པ་དང་ལྔ། དང་པོ་ནི། མི་སྣང་བ་མ་དམིགས་པའི་རྟགས་ཡང་དག་གི་མཚན་ཉིད་ཡོད་དེ། མི་སྣང་བའི་ཚུལ་གསུམ་ཡིན་པ་དེ་ཡིན་པའི་ཕྱིར། དེ་སྒྲུབ་ཀྱི་མི་སྣང་བ་མ་དམིགས་པའི་རྟགས་ཡང་དག་གི་མཚན་ཉིད། དེ་སྒྲུབ་ཀྱི་མི་སྣང་བའི་ཚུལ་གསུམ་ཡིན་པའོ། །གོ་བའི་དབང་དུ་བྱས་ན། དེ་སྒྲུབ་ཀྱི་ཕྱོགས་ཆོས་ཅན་དུ་སོང་བའི་གང་ཟག་ལ་དེ་སྒྲུབ་ཀྱི་དགག་བྱའི་ཆོས་སུ་བཏགས་པའི་དོན་གྱི་གཙོ་བོ་བསྐལ་དོན་ཡང་ཡིན། དེ་སྒྲུབ་ཀྱི་ཚུལ་གསུམ་ཡང་ཡིན་པའི་གཞི་མཐུན་པར་དམིགས་པ་དེ། དེ་སྒྲུབ་ཀྱི་མི་སྣང་བ་མ་དམིགས་པའི་རྟགས་ཡང་དག་གི་མཚན་ཉིད་ཡིན་ནོ། ། གཉིས་པ་མི་སྣང་བ་མ་དམིགས་པའི་རྟགས་ཡང་དག་འཇུག་དུས་ཡོད་དེ། ཚད་མས་དགག་པ་བྱེད་དུས་ཀྱི་དགག་གཞི་སྣང་རུང་ཡིན་ཞིང་དེ་སྒྲུབ་ཀྱི་དགག་བྱའི་ཆོས་ཀྱི་བཏགས་པའི་དོན་ཕྱི་རྒོལ་དེ་ལ་བསྐལ་དོན་དུ་སོང་ནས་སྣང་དུ་མི་རུང་བའི་དུས་དེ་མི་སྣང་བ་མ་དམིགས་པའི་རྟགས་འཇུག་པའི་དུས་ཡིན་ནོ། ། བསྐལ་དོན་རྣམ་པ་གསུམ་ཡོད་དེ། ཡུལ་གྱི་དང༌། དུས་ཀྱི་དང༌། ངོ་བོའི་བསྐལ་དོན་དང་གསུམ་ཡོད་པའི་ཕྱིར། དང་པོ་ཡོད་དེ། འདིར་གནས་པའི་ཕལ་བ་ལ་འོད་ཟེར་ཅན་གྱི་ཞིང་ཁམས་ཀྱི་འགྲོ་བའི་ཁྱད་པར་དང༌། དབྱིབས་བཀོད་ཀྱི་ཁྱད་པར་ལྟ་བུའོ། །གཉིས་པ་ཡོད་དེ། ད་ལྟའི་ཕལ་བ་ལ་མ་འོངས་པའི་དུས་ཤིན་ཏུ་རིང་པོའི་གང་ཟག་གི་ཁྱད་པར་འདི་ལྟ་བུ་འབྱུང་བ་ལྟ་བུའོ། །གསུམ་པ་ཡོད་དེ། བར་སྲིད་བསྐལ་དོན་དུ་སོང་བའི་གང་ཟག་ལ་བར་སྲིད་ལྟ་བུའོ། །དེ་གསུམ་རྣམ་ངེས་རང་འགྲེལ་ལས། ཡུལ་དང་དུས་དང་རང་བཞིན་གྱི་བསྐལ་བས་ན་བསྐལ་བ་ནི་རྣམ་པ་གསུམ་སྟེ། ཞེས་གསུངས་སོ། །བསྐལ་དོན་གྱི་དོན་ནི་གང་ཟག་དེ་ལ་དོན་དེ་བསྐལ་དོན་ཡིན་ན་དེ་ལ་དེའི་ངོར་ཚད་མ་གསུམ་གང་ཡང་མི་འཇུག་པ་ཞིག་དགོས་ཏེ། རྣམ་འགྲེལ་ལས། ཚད་མ་རྣམས་ནི་མི་འཇུག་པ། །ཞེས་གསུངས་པའི་ཕྱིར་རོ། ། གསུམ་པ་སྒྲ་བཤད་པ་ནི། ལྷའི་བར་སྲིད་ལ་བསྐལ་དོན་དུ་སོང་བའི་གང་ཟག་གིས་ལྷའི་བར་སྲིད་ཚད་མས་མ་དམིགས་པ་ཆོས་ཅན། ཁྱོད་ལ་དེ་སྒྲུབ་ཀྱི་མི་སྣང་བ་མ་དམིགས་པའི་གཏན་ཚིགས་ཞེས་བརྗོད་པའི་རྒྱུ་མཚན་ཡོད་དེ། ཁྱོད་མདུན་གྱི་གཞི་འདིར་ལྷའི་བར་སྲིད་བསྐལ་དོན་སོང་བའི་གང་ཟག་གི་རྒྱུད་ཀྱི་ལྷའི་བར་སྲིད་ཡོད་ཅེས་དམ་བཅའ་ངེས་པའི་དཔྱད་ཤེས་དོན་མཐུན་མེད་པར་སྒྲུབ་པའི་དགག་བྱའི་ཆོས་སུ་བཏགས་པའི་དོན་དེ་དེ་སྒྲུབ་ལ་ཕྱོགས་ཆོས་ཅན་དུ་སོང་བའི་གང་ཟག་ལ་སྣང་དུ་མི་རུང་བ་དང༌། རང་མིང་ལ་མ་དམིགས་པ་ལྟ་བུའི་ཚིག་ཡོད་པའི་གཏན་ཚིགས་སམ་མི་དམིགས་པའི་རྟགས་ཡིན་པས་ན་དེ་ལྟར་བརྗོད་པའི་ཕྱིར་རོ། ། བཞི་བ་དབྱེ་བ་མི་སྣང་བ་མ་དམིགས་པའི་རྟགས་ཡང་དགབཞི་བ་དབྱེ་བ་མི་སྣང་བ་མ་དམིགས་པའི་རྟགས་ཡང་དག་ལ། མི་སྣང་བའི་འབྲེལ་ཟླ་མ་དམིགས་པའི་རྟགས་ཡང་དག་དང༌། མི་སྣང་བའི་འགལ་ཟླ་དམིགས་པའི་རྟགས་ཡང་དག་གཉིས། དང་པོ་ལ་མཚན་ཉིད། དབྱེ་བ་གཉིས། དེ་སྒྲུབ་ཀྱི་མི་སྣང་བ་མ་དམིགས་པའི་རྟགས་ཡང་དག་གང་ཞིག རང་གི་དངོས་མིང་གི་མཐར་མེད་པ་ལྟ་བུའི་དགག་ཚིག་སྦྱར་བའི་ཆོས་དེ། དེ་སྒྲུབ་ཀྱི་མི་སྣང་བའི་འབྲེལ་ཟླ་མི་དམིགས་པའི་རྟགས་ཡང་དག་གི་མཚན་ཉིད་ཡིན་ནོ། །གཉིས་པ་དབྱེ་ན། མི་སྣང་བའི་རྒྱུ་ཁྱབ་བྱེད་རང་བཞིན་མ་དམིགས་པའི་རྟགས་གསུམ། ཤ་ཟ་བསྐལ་དོན་དུ་སོང་བའི་གང་ཟག་གི་རྒྱུད་ལ་ཤ་ཟ་དམིགས་བྱེད་ཀྱི་ཚད་མ་མེད་པ་དེ། མདུན་གྱི་གཞིར་འདིར་ཤ་ཟ་བསྐལ་དོན་དུ་སོང་བའི་གང་ཟག་གི་རྒྱུད་ལ་ཤ་ཟ་ངེས་པའི་བཅད་ཤེས་མེད་པར་སྒྲུབ་པའི་མི་སྣང་བའི་རྒྱུ་མ་དམིགས་པའི་རྟགས་ཡང་དག་ཡིན་ལ། བཅད་ཤེས་སྨྲས་ཚེ་དོན་མཐུན་ཟེར་མི་དགོས་ལ།ཐ་སྙད་ལ་དགོས་སོ། །ལྷ་ཡོད་པ་བསྐལ་དོན་དུ་སོང་བའི་གང་ཟག་གིས་ལྷ་ཡོད་པ་ཚད་མས་མ་ངེས་པ་དེ། མདུན་གྱི་གཞི་འདིར་ལྷ་ཡོད་པ་བསྐལ་དོན་དུ་སོང་བའི་གང་ཟག་གིས་ལྷ་ཡོད་ཅེས་དམ་བཅའ་མི་རིགས་པར་སྒྲུབ་པའི་མི་སྣང་བའི་ཁྱབ་བྱེད་མ་དམིགས་པའི་རྟགས་ཡང་དག་དང༌། ཤ་ཟ་བསྐལ་དོན་དུ་སོང་བའི་གང་ཟག་གི་རྒྱུད་ལ་ཤ་ཟ་དམིགས་བྱེད་ཀྱི་བཅད་ཤེས་ཚད་མས་མ་དམིགས་པ་དེ། མདུན་གྱི་གཞི་འདིར་ཤ་ཟ་བསྐལ་དོན་དུ་སོང་བའི་གང་ཟག་གི་རྒྱུད་ལ་ཤ་ཟ་ངེས་པའི་བཅད་ཤེས་མེད་པར་སྒྲུབ་པའི་མི་སྣང་བའི་རང་བཞིན་མ་དམིགས་པའི་རྟགས་ཡང་དག་ཡིན་ལ། སྒྲུབ་བྱེད་རྣམས་གཞན་ལས་ཤེས་པར་བྱའོ། ། དགག་བྱའི་ཆོས་ཀྱི་བཏགས་པའི་དོན་ཡིན་ན་དགག་བྱའི་ཆོས་ཡིན་པས་མ་ཁྱབ་མ་ཡིན་པས་མ་ཁྱབ་ཅེས་ཟེར་དགོས་སམ་བློ་གྲོས་དང་ལྡན་པ་དག་གིས་སླར་དཔྱད་པར་བྱའོ། ། གཉིས་པ་དེ་སྒྲུབ་ཀྱི་འགལ་ཟླ་དམིགས་པའི་མི་སྣང་བ་མ་དམིགས་པའི་རྟགས་ཡང་དག་གི་མཚན་ཉིད། དེ་སྒྲུབ་ཀྱི་མི་སྣང་བའི་འགལ་ཟླ་དམིགས་པའི་ཚུལ་གསུམ་ཡིན་པ། གོ་ཐོབ་ཀྱི་དབང་དུ་བྱས་ན། མི་སྣང་བའི་མ་དམིགས་པའི་ཚུལ་གསུམ་གང་ཞིག དེ་སྒྲུབ་ཀྱི་དགག་བྱའི་ཆོས་ཀྱི་འགལ་ཟླར་གྱུར་བའི་མ་ཡིན་དགག་དང་སྒྲུབ་པ་གང་རུང་ཡིན་པ་དེ། དེ་སྒྲུབ་ཀྱི་འགལ་ཟླ་དམིགས་པའི་མི་སྣང་བ་མ་དམིགས་པའི་རྟགས་ཡང་དག་གི་མཚན་ཉིད། མཚན་གཞི་ནི། མདུན་གྱི་གཞི་འདིར་ཤ་ཟ་བསྐལ་དོན་དུ་སོང་བའི་གང་ཟག་གི་རྒྱུད་ལ་ཤ་ཟ་ངེས་པའི་བཅད་ཤེས་མེད་པར་སྒྲུབ་པ་ལ་ཡོད་པ་ལྟ་བུའོ། ། ལྔ་བ་མི་སྣང་བ་མ་དམིགས་པའི་རྟགས་བཤད་པ།ལྔ་བ་མི་སྣང་བ་མ་དམིགས་པའི་རྟགས་བཤད་པའི་དགོས་པ་ནི། རང་རྒྱུད་ཀྱི་ཚད་མས་མ་རྟོགས་པ་རྒྱུ་མཚན་དུ་བྱས་ནས་སྡིག་པ་བསགས་པ་དང༌། སྐུར་བ་འདེབས་པ་སོགས་སྤོང་པའི་ཆེད་དུ་ཡིན་པའི་ཕྱིར་ཏེ། དཔའ་བར་འགྲོ་བའི་མདོ་ལས། བཅོམ་ལྡན་འདས་བདག་འདི་དང་སླན་ཆད་ངས་སེམས་ཅན་ཐམས་ཅད་ལ་སྟོན་པའི་འདུ་ཤེས་བྱེད་དོ། །དགེ་སློང་དག་ང་དང་ང་འདྲའི་གང་ཟག་གིས་གང་ཟག་གི་ཚོད་བཟུང་གི གཞན་གྱིས་བཟུང་ན་དམན་པར་འགྱུར་བར་ཤེས་པར་གྱིས་ཤིག ཅེས་སོགས་གསུངས་པའི་ཕྱིར་རོ། ། གཉིས་པ་སྣང་རུང་མ་དམིགས་པའི་རྟགས་བཤད་པ་ལ། གཞུང་གི་ཚིག་དོན་བཤད་པ་དང༌། མཐའ་དཔྱད་པ་དང་གཉིས། དང་པོ་ལ་གོ་དོན་དང༌། མཚན་གཞིའི་དབྱེ་བ་དང༌། དེ་ལ་རྩོད་པ་སྤོང་བའོ། །དང་པོ་སྣང་རུང་མ་དམིགས་པའི་གོ་དོན་ནི། དཀོན་བརྩེགས་ལས། འོད་སྲུང་ཡོངས་སུ་བཙལ་ན་མི་དམིགས་སོ། །ཞེས་དང༌། རྣམ་འགྲེལ་ལས། གཏན་ཚིགས་བྱེ་བྲག་ལ་ལྟོས་ནས། །འགའ་ཞིག་མེད་ཤེས་འབྲས་བུ་ཅན། །ཞེས་མ་དམིགས་པའི་གཏན་ཚིགས་འགའ་ཞིག་སྣང་རུང་གི་བྱེ་བྲག་ལ་བལྟོས་ནས་རང་གི་དགག་བྱའི་ཆོས་མེད་པ་ཤེས་པར་བྱེད་པའི་འབྲས་བུ་ཅན་ཡིན་ནོ་ཞེས་པའོ། ། གཉིས་པ་མཚན་གཞིའི་དབྱེ་བ་ནི། རྣམ་འགྲེལ་ལས། འགལ་དང་འབྲས་བུ་དག་སྒྲུབ་དང༌། །རྒྱུ་དང་ངོ་བོ་བལྟར་རུང་བའི། །བདག་ཉིད་དང་ནི་མ་གྲུབ་པ། །མེད་དོན་ཅན་མི་དམིགས་རྣམ་བཞི། །ཞེས་བྱུང༌། དེའི་དོན་ནི། རྟགས་ཀྱི་དགག་བྱའི་ཆོས་མེད་པ་གོ་བར་བྱེད་པའི་དོན་ཅན་སྣང་རུང་མ་དམིགས་པའི་རྟགས་ཆོས་ཅན། རྣམ་པ་བཞིར་ཡོད་དེ། རང་བཞིན་འགལ་དམིགས་དང༌།འགལ་བའི་འབྲས་བུ་གྲུབ་པའི་རྟགས་དག་དང༌། རྒྱུ་མ་དམིགས་པ་དང༌། ངོ་བོ་ལྟར་རུང་གི་བདག་ཉིད་དག་ནི་མ་གྲུབ་པ་དང་བཞི་ཡོད་པའི་ཕྱིར། དང་པོའི་ཞལ་ལ་ཁྱབ་བྱེད་འགལ་དམིགས་དང༌། བཞི་བའི་ཞར་ལ་ཁྱབ་བྱེད་མ་དམིགས་པ་བསྟན་ཏོ། ། གསུམ་པ་དེ་ལ་རྩོད་པ་སྤོང་བ་ནི། དེ་དང་འགལ་བ་ཡི་ནི་རྒྱུ། །དམིགས་པའི་སྦྱོར་བ་གང་ཡིན་དེ། །རྒྱུ་མཚན་དག་ནི་འགལ་བ་ཉིད། །མེད་ན་འཁྲུལ་བ་ཅན་ཡིན་ནོ། །འགལ་འབྲས་ལ་ཡང་ཡུལ་དང་ནི། །དུས་ལ་སོགས་པར་བལྟོས་པར་བཤད། །གཞན་དུ་འཁྲུལ་འགྱུར་མི་གྲང་བ། །སྒྲུབ་པ་ལ་ནི་ཐལ་བ་བཞིན། །ཞེས་བྱུང༌། དེའི་ཚིག་དོན་ནི། འགལ་འབྲས་དམིགས་པས་འགལ་ཟླ་ཁེགས་ན་འགལ་རྒྱུ་དམིགས་པས་ཀྱང་ཅེས་མི་ཁེགས་ཅེ་ན། གྲང་རེག་དེ་༷ད༷ང་འག༷ལ་བ༷་ཡི༷་ནི༷་རྒྱུ༷་དམི༷གས་པ༷འི་སྦྱོ༷ར་བ༷་ག༷ང་ཡི༷ན་པའི་རྟགས་བུད་ཤིང་དེ༷་ཆོས་ཅན། གྲང་རེག་མེད་པར་སྒྲུབ་པའི་ཁྱབ་པ་འཁྲུ༷ལ་བ༷་ཅ༷ན་ཡི༷ན་ཏེ། གྲང་རེག་གི་རྒྱུ༷་མཚ༷ན་ཏེ་རྒྱུ་ད༷ག་ནི༷་འག༷ལ་བ༷་ཉི༷ད་མེ༷ད་པའི་ཕྱིར། འོ་ན་དུ་བས་གྲང་རེག་འགོག་པ་འཁྲུལ་ལོ་ཞེ་ན། དུ་བ་ཆོས་ཅན། དེ་སྒྲུབ་ཀྱི་འག༷ལ་འབྲ༷ས་དམིགས་པའི་རྟགས་ཡང་དག་ཏུ་འགྱུར་བ་ལ༷་ཡུ༷ལ་ད༷ང་དུ༷ས་སོག༷ས་ཁྱད་པར་ཅན་ལ་ལྟོ༷ས་དགོས་པ༷ར་འདོད་དེ། དེ་ལ་ལྟོས་པ་ལས་གཞ༷ན་དུ༷་ན་ཁྱབ་པ་འཁྲུ༷ལ་བར་འགྱུ༷ར་བའི་ཕྱིར། དཔེར་ན་མི༷་གྲ༷ང་བར་སྒྲུ༷བ་པ༷་ལ༷་ནི༷་ཐ༷ལ་བ༷་བཀོད་པ་བཞི༷ན་ནོ། །ཞེས་པའོ། །ཡུལ་སོགས་ལ་ལྟོས་ཚུལ་ནི། མེའི་དྲོད་ཀྱི་ཁྱབ་པའི་ཡུལ། མེ་ད་ལྟ་བའི་འབྲས་བུར་གྱུར་བའི་དུས་དང༌། ལ་སོགས་པས་གྲང་རེག་འགོག་ནུས་ཀྱི་མེ་ལ་མི་འཁྲུལ་བའི་གནས་སྐབས་ཁྱད་པར་ཅན་ལ་བལྟོས་དགོས་པར་བསྟན་པ་ཡིན་ནོ། །ཡང་ན་མེ་དང་གྲང་རེག་གཞི་དེར་ཕྱི་རྒོལ་གྱི་མངོན་སུམ་ལ་སྣང་དུ་མི་རུང་བའི་ཡུལ། དུ་བ་སྣང་དུ་རུང་བའི་དུས་དང༌། སོགས་པས་དེ་དྲག་ཏུ་འཕྱུར་བཞིན་པའི་རྣམ་པའི་ཁྱད་པར་ལ་ལྟོས་པའོ།། གཉིས་པ་མཐའ་དཔྱད་པ།གཉིས་པ་མཐའ་དཔྱད་པ་ལ། དགག་བཞག་གཉིས། དང་པོ་ནི། ཁ་ཅིག་གིས་སྣང་རུང་མ་དམིགས་པའི་རྟགས་ཀྱི་དབྱེ་བ་བཅུ་དྲུག་གི་སྟེང་དུ་རྒྱུ་རྟགས་བཞི་བསྣན་ནས་ཉི་ཤུ་བཤད་པ་མི་འཐད་པར་ཐལ། རྒྱུ་རྟགས་བཞི་མི་འཐད་པའི་ཕྱིར། དེར་ཐལ། རྣམ་ངེས་ལས། འབྲས་བུའི་གྲུབ་ན་རྒྱུས་ཅིའི་ཕྱིར་མི་འགྲུབ་ཅེ་ན། རྒྱུའི་སྒོ་ནས་མིན་ཏེ། འཁྲུལ་བའི་ཕྱིར། དཔེར་ན་འདི་ལ་གྲང་རེག་མེད་དེ། བུད་ཤིང་ཡོད་པའི་ཕྱིར། ཞེས་དང༌། འཐད་ལྡན་ལས། རྒྱུས་མིན་ཏེ་འཁྲུལ་བའི་ཕྱིར། ཞེས་གསུངས་པའི་ཕྱིར། གཞན་ཡང་དུས་མཐའི་སྐད་ཅིག་མའི་ཡུན་ཚད་ཀྱི་མེའི་དངོས་རྒྱུའི་ནུས་པ་ཐོགས་མེད་རྟགས་སུ་བཀོད་ཟེར་ན། དེ་ཆོས་ཅན། གྲང་རེག་མེད་པར་སྒྲུབ་པའི་རྟགས་ཡང་དག་མ་ཡིན་པར་ཐལ། ཁྱོད་ཀྱི་ཡུན་ཚད་དུས་མཐའི་སྐད་ཅིག་མ་གཅིག་གི་ཡུན་ཚད་ལས་མེད་པ་གང་ཞིག དེའི་ཡུན་ལ་ཕྱོགས་ཁྱབ་ངེས་མི་ནུས་པའི་ཕྱིར། དེར་ཐལ། རྣམ་ངེས་ལས། རྟགས་མཐོང་བ་ལས་འབྲེལ་བ་ལ་བལྟོས་ཏེ་རྗེས་སུ་དཔག་པར་བྱ་བ་རྟོགས་པས་ན་སྐད་ཅིག་མ་གཅིག་ལ་བར་ཆད་མེད་པའི་དེའི་སྔ་རོལ་མེ་མངོན་སུམ་དུ་རྟོགས་པར་འགྱུར་རོ། །ཞེས་གསུངས་པའི་ཕྱིར། ཁྱབ་སྟེ། རྟགས་མཐོང་ཞེས་པས་ཕྱོགས་ཆོས་ངེས་ཚུལ་བསྟན། ལས་ཞེས་འབྱུང་ཁུངས་ཡིན་པས་ཕྱོགས་ཆོས་དང་རྟགས་ཆོས་ཀྱི་འབྲེལ་བ་གཉིས་ཅིག་ཅར་དུ་ངེས་མི་ནུས་པའི་ཚུལ་བསྟན། འབྲེལ་བ་ལ་བལྟོས་ཏེ་རྗེས་སུ་དཔག་པར་བྱ་བ་རྟོགས་པས་ན་ཞེས་པས་བསྒྲུབ་བྱ་རྟོགས་པའི་རྗེས་དཔག་སྐྱེ་ཚུལ་བསྟན། སྐད་ཅིག་མ་གཅིག་ལ་སོགས་ཀྱིས་དངོས་རྒྱུ་དང་དངོས་འབྲས་མེ་གཉིས་ཀྱི་བར་སྐད་ཅིག་མ་གཞན་གྱིས་མ་ཆོད་པས་བསྒྲུབ་བྱ་རྟོགས་ཁོམ་མེད་པས་སྒྲུབ་བྱེད་རྟོགས་པའི་སྔ་རོལ་ཏུ་མེ་མངོན་སུམ་དུ་རྟོགས་པར་བསྟན་པའི་ཕྱིར། འདི་ལ་ཅུང་ཟད་དཔྱད་རྒྱུ་སྣང༌། ཁོ་ན་རེ། རྒྱུ་ཙམ་རྟགས་སུ་བཀོད་པའི་གྲང་རེག་མེད་པར་སྒྲུབ་པའི་རྟགས་ཡང་དག་ཡོད་པར་ཐལ། རྒྱུ་འགལ་དམིགས་ཀྱི་རྟགས་ཡང་དག་ཡོད་པའི་ཕྱིར་ན་མ་ཁྱབ་སྟེ། འགལ་ཟླའི་རྒྱུ་ཙམ་རྟགས་སུ་བཀོད་ན་འཁྲུལ་བར་འགྱུར་ལ། དེ་ལྟར་མ་ཡིན་པར་རང་བཞིན་འགལ་དམིགས་ཀྱི་རྒྱུ་ཁྱད་པར་ཅན་ཞིག་བཀོད་དགོས་པའི་ཕྱིར། དེར་ཐལ། རྣམ་ངེས་ལས། གལ་ཏེ་རྒྱུ་མཚན་འགལ་ན་གོ་བར་བྱེད་པ་ཁོ་ན་སྟེ། འདི་ན་གྲང་འབྲས་སྤུ་ལོང་བྱེད་པ་ལ་སོགས་པའི་བྱེ་བྲག་དག་མེད་དེ། གདུང་བར་བྱེད་པའི་བྱེ་བྲག་དང་ཉེ་བའི་ཕྱིར། ཞེས་གསུངས་པའི་ཕྱིར། བྱེ་བྲག་ཅེས་པ་ཁྱད་པར་ཅན་ཡིན་ནོ། ། གཉིས་པ་རང་ལུགས་བཤད་པ།གཉིས་པ་རང་ལུགས་བཤད་པ་ལ། སྣང་རུང་མ་དམིགས་པའི་རྟགས་ཡང་དག་གི་མཚན་ཉིད་དང༌། འཇུག་དུས་དང༌། སྒྲ་བཤད་དང༌། དབྱེ་བ་དང༌། དགོས་པ་བཤད་པ་དང་ལྔ། དང་པོ་ནི། སྣང་རུང་མ་དམིགས་པའི་རྟགས་ཡང་དག་གི་མཚན་ཉིད་ཡོད་དེ། སྣང་རུང་མ་དམིགས་པའི་ཚུལ་གསུམ་ཡིན་པ་དེ་ཡིན་པའི་ཕྱིར། གོ་ཐོབ་བྱས་ན། ཁྱོད་དེ་སྒྲུབ་ཀྱི་མ་དམིགས་པའི་ཚུལ་གསུམ་ཡང་ཡིན། ཁྱོད་དེ་སྒྲུབ་ཀྱི་ཕྱོགས་ཆོས་ཅན་དུ་སོང་བའི་གང་ཟག་ལ་དེ་སྒྲུབ་ཀྱི་དགག་བྱའི་ཆོས་སུ་བཏགས་པའི་དོན་སྣང་རུང་ཡང་ཡིན་པའི་གཞི་མཐུན་པར་དམིགས་པ་དེ། དེ་སྒྲུབ་ཀྱི་སྣང་རུང་མ་དམིགས་པའི་རྟགས་ཡང་དག་གི་མཚན་ཉིད། མཚན་གཞི་ནི། མེ་མེད་མཚན་མོའི་རྒྱ་མཚོར་དུ་བ་མེད་པར་སྒྲུབ་པ་ལ་མེ་མེད་པ་ལྟ་བུའོ། ། གཉིས་པ་འཇུག་དུས།གཉིས་པ་འཇུག་དུས་ནི། དེ་སྒྲུབ་ཀྱི་དགག་བྱའི་ཆོས་ཀྱི་བཏགས་པའི་དོན་ཕྱི་རྒོལ་དེ་ལ་སྣང་དུ་རུང་བའི་དུས་དེ་སྣང་རུང་མ་དམིགས་པའི་རྟགས་འཇུག་པའི་དུས་ཡིན་ནོ། །དེ་ཡང་དགག་བྱ་འགོག་པ་ལ། དགག་གཞི་སྣང་དུ་རུང་བ་དང་མི་རུང་བ་གཉིས་སུ་ངེས་ལ། མི་རུང་ན་མངོན་སུམ་གྱི་སྟོབས་ཀྱིས་དགག་པ་བྱེད་པ་མི་སྲིད་དེ། མེད་དགག་ཡན་གར་པ་མངོན་སུམ་ལ་སྣང་དུ་མི་རུང་བའི་ཕྱིར། དེས་ན་དགག་གཞི་མངོན་སུམ་ལ་སྣང་དུ་མི་རུང་ན་རྗེས་དཔག་གིས་དགག་པ་བྱེད་དགོས་སོ། །དགག་གཞི་སྐབས་བབ་ཀྱི་ཕྱི་རྒོལ་གྱི་མངོན་སུམ་ལ་སྣང་དུ་རུང་བ་ལ། དགག་གཞི་ལ་དགག་བྱའི་ཆོས་སུ་འགྲོ་རྒྱུ་དེ་སྐབས་བབ་ཀྱི་ཕྱི་རྒོལ་གྱི་མངོན་སུམ་ལ་སྣང་དུ་རུང་བ་དང་མི་རུང་བ་གཉིས་སུ་ངེས་ལ། དང་པོ་ལྟར་ན། ཕལ་ཆེར་མངོན་སུམ་གྱིས་དགག་པ་བྱེད་ལ། མངོན་སུམ་གྱིས་མ་གྲུབ་ན། ཐ་སྙད་འབའ་ཞིག་སྒྲུབ་ཀྱི་རྟགས་ལ་བརྟེན་ནས་སྒྲུབ་དགོས་པས་རང་བཞིན་མ་དམིགས་པའི་རྟགས་འཇུག་པའི་དུས་ཡིན་ནོ། །དགག་གཞི་དེར་དགག་བྱའི་ཆོས་སུ་འགྲོ་རྒྱུ་དེ་སྐབས་ཀྱི་ཕྱི་རྒོལ་གྱི་མངོན་སུམ་ལ་སྣང་དུ་མི་རུང་བ་ལ་དགག་པ་བྱེད་ན། དགག་གཞིའི་སྟེང་དུ་དགག་བྱའི་ཆོས་སུ་འགྲོ་རྒྱུའི་འབྲེལ་ཟླ་མངོན་སུམ་ལ་སྣང་དུ་རུང་བ་དང༌། འགལ་ཟླ་མངོན་སུམ་ལ་སྣང་དུ་རུང་བ་གཉིས་ཡོད་ལ། དང་པོ་ལྟར་ན། དགག་བྱའི་ཆོས་སུ་འགྲོ་རྒྱུའི་འབྲེལ་ཟླ་ལ་ངོ་བོ་རྒྱུ་འབྲས་གསུམ་དུ་ངེས་ལ། ངོ་བོ་ལ་ཁྱབ་ཆུང་བ་དང༌། ཁྱབ་མཉམ་དང༌། ཁྱབ་ཆེ་བ་གསུམ་དུ་ངེས་ཤིང༌། ཁྱབ་ཆུང་བ་དགག་པས་གཞི་དེར་དགག་བྱའི་ཆོས་འགོག་མི་ནུས་ལ། དགག་གཞིའི་སྟེང་དུ་ཁྱབ་མཉམ་པ་མངོན་སུམ་ལ་སྣང་དུ་རུང་ན་རང་བཞིན་མ་དམིགས་པའི་རྟགས་འཇུག་པའི་དུས་ཡིན་ལ། དགག་གཞིའི་སྟེང་དུ་ཁྱབ་ཆེ་བ་མངོན་སུམ་ལ་སྣང་དུ་རུང་ན་ཁྱབ་བྱེད་མ་དམིགས་པའི་རྟགས་འཇུག་པའི་དུས་ཡིན་ནོ། །དགག་གཞིའི་སྟེང་དུ་དགག་བྱའི་ཆོས་སུ་འགྲོ་རྒྱུའི་རྒྱུ་དེ་སྐབས་ཀྱི་ཕྱི་རྒོལ་གྱི་མངོན་སུམ་ལ་སྣང་དུ་རུང་ན་རྒྱུ་མ་དམིགས་པའི་རྟགས་འཇུག་པའི་དུས་ཡིན་ནོ། །དགག་གཞིའི་སྟེང་དུ་དགག་བྱའི་ཆོས་སུ་འགྲོ་རྒྱུའི་དངོས་འབྲས་སྣང་དུ་རུང་བ་ཡིན་ན། དངོས་འབྲས་མ་དམིགས་པའི་རྟགས་འཇུག་པའི་དུས་ཡིན་ནོ། །དེ་ལྟར་འབྲེལ་ཟླ་མ་དམིགས་པའི་རྟགས་ལ་རྒྱུ་ཁྱབ་བྱེད་རང་བཞིན་དངོས་འབྲས་མ་དམིགས་པའི་རྟགས་བཞི་ཡོད་དོ། །དགག་གཞིའི་སྟེང་དུ་དགག་བྱའི་ཆོས་ཀྱི་འགལ་ཟླ་སྣང་དུ་རུང་བ་ཡིན་ན་འགལ་ཟླ་དམིགས་པའི་རྟགས་འཇུག་པའི་དུས་ཡིན་ནོ། །དེའི་འགལ་ཟླ་ལ་ངོ་བོ་རྒྱུ་འབྲས་བུ་གསུམ་ཡོད་ལ། དགག་གཞི་དེར་དགག་བྱའི་ཆོས་ཀྱི་འགལ་ཟླའི་ངོ་བོ་དང༌། དེའི་འབྲས་བུ་སྣང་དུ་རུང་ན་རང་བཞིན་འགལ་དམིགས་དང་འགལ་འབྲས་དམིགས་པའི་རྟགས་འཇུག་པའི་དུས་ཡིན་ནོ། །དགག་གཞི་དེར་དགག་བྱའི་ཆོས་ཀྱི་རྒྱུའི་འགལ་ཟླ་དངོས་དང་དེའི་རྒྱུ་དང་འགལ་བའི་འབྲས་བུ་སྣང་དུ་རུང་ན། རྒྱུ་འགལ་དམིགས་དང༌།རྒྱུ་དང་འགལ་བའི་འབྲས་བུ་དམིགས་པའི་རྟགས་འཇུག་པའི་དུས་ཡིན་ནོ། །དེའི་བདག་ཉིད་གཅིག་པའི་ཁྱབ་བྱེད་ཀྱི་འགལ་ཟླ་དངོས་སྣང་དུ་རུང་ན། ཁྱབ་བྱེད་འགལ་དམིགས་ཀྱི་རྟགས་འཇུག་པའི་དུས་ཡིན་ནོ། །དེའི་འབྲས་བུ་དངོས་ཀྱི་འགལ་ཟླ་སྣང་དུ་རུང་ན་འབྲས་བུ་འགལ་དམིགས་ཀྱི་རྟགས་འཇུག་པའི་དུས་ཡིན་ན་ནོ། །དེ་ལྟར་འབྲེལ་ཟླ་མ་དམིགས་པའི་རྟགས་བཞི། འགལ་ཟླ་དམིགས་པའི་རྟགས་དྲུག་སྟེ་དགག་རྟགས་བཅུར་འགྱུར་རོ། ། གསུམ་པ་སྒྲ་བཤད་ནི། མེ་ཚད་མས་མ་དམིགས་པ་ཆོས་ཅན། ཁྱོད་ལ་མེ་མེད་མཚན་མོའི་རྒྱ་མཚོར་དུ་བ་མེད་པར་སྒྲུབ་པར་བྱེད་པའི་སྣང་རུང་མ་དམིགས་པའི་གཏན་ཚིགས་ཞེས་བརྗོད་པའི་རྒྱུ་མཚན་ཡོད་དེ། མེ་མེད་མཚན་མོའི་རྒྱ་མཚོར་དུ་བ་མེད་པར་སྒྲུབ་པར་བྱེད་པའི་དགག་བྱའི་ཆོས་དེ་ཡོད་ན་ཕྱོགས་ཆོས་ཅན་དུ་སོང་བའི་རྒོལ་བ་ལ་སྣང་དུ་རུང་བ་ཡིན་པའི་མ་དམིགས་པའི་རྟགས་ཡིན་པས་དེ་ལྟར་བརྗོད་པའི་ཕྱིར། དེ་སྒྲུབ་ཀྱི་སྣང་རུང་མ་དམིགས་པའི་རྟགས་ཡང་དག་ཡིན་ན་དེ་སྒྲུབ་ཀྱི་དགག་བྱའི་ཆོས་ཡོད་ན་དེ་སྒྲུབ་ཀྱི་སྐབས་ཀྱི་ཕྱི་རྒོལ་ལ་སྣང་དུ་རུང་བ་དང༌། དེ་ལ་བརྟེན་ནས་དེ་སྒྲུབ་ཀྱི་ཕྱི་རྒོལ་ཡང་དག་གིས་དགག་བྱའི་ཆོས་ཚད་མས་མེད་པར་ངེས་ནུས་པ་ཞིག་དགོས་པ་ཡིན་ནོ། ། བཞི་བ་དབྱེ་བ་ནི། འབྲེལ་ཟླ་མ་དམིགས་པའི་སྣང་རུང་མ་དམིགས་པའི་རྟགས་ཡང་དག་དང༌། འགལ་ཟླ་དམིགས་པའི་སྣང་རུང་མ་དམིགས་པའི་རྟགས་ཡང་དག་དང་གཉིས། དང་པོ་ལ། མཚན་ཉིད་དབྱེ་བ་གཉིས། དང་པོ་ནི། སྣང་རུང་མ་དམིགས་པའི་ཚུལ་གསུམ་ཡང་ཡིན། དེ་སྒྲུབ་ཀྱི་དགག་བྱའི་ཆོས་སུ་བཏགས་པའི་དོན་གྱི་འབྲེལ་ཡུལ་མ་གྲུབ་པ་རྟགས་སུ་བཀོད་པ་ཡང་ཡིན་པའི་གཞི་མཐུན་པར་དམིགས་པ་དེ། དེ་སྒྲུབ་ཀྱི་སྣང་རུང་མ་དམིགས་པའི་འབྲེལ་ཟླ་མ་དམིགས་པའི་རྟགས་ཡང་དག་གི་མཚན་ཉིད། གཉིས་པ་དབྱེ་ན། རྒྱུ་ཁྱབ་བྱེད་རང་བཞིན་དངོས་འབྲས་མ་དམིགས་པའི་སྣང་རུང་གི་རྟགས་ཡང་དག་བཞི། དང་པོའི་མཚན་ཉིད། མ་དམིགས་པའི་སྣང་རུང་གི་ཚུལ་གསུམ་གང་ཞིག དེ་སྒྲུབ་ཀྱི་དགག་བྱའི་ཆོས་སུ་འགྲོ་རྒྱུའི་རྒྱུ་བཀག་པ་རྟགས་སུ་སྦྱར་བ། དཔེར་ན། མེ་མེད་མཚན་མོའི་རྒྱ་མཚོར་དུ་བ་མེད་པར་སྒྲུབ་པ་ལ་མེ་མེད་པ་ལྟ་བུའོ། །དེ་ལ་རྒྱུ་མ་དམིགས་པའི་གཏན་ཚིགས་ཞེས་བརྗོད་པའི་རྒྱུ་མཚན་ཡོད་དེ། མེ་ནི་དུ་བའི་རྒྱུ་ཡིན་ལ། དེ་མ་དམིགས་པ་རྟགས་སུ་བཀོད་པས་ན་དེ་ལྟར་བརྗོད་པའི་ཕྱིར། གཉིས་པ་དེ་སྒྲུབ་ཀྱི་ཁྱབ་བྱེད་མ་དམིགས་པའི་སྣང་རུང་གི་རྟགས་ཡང་དག་གི་མཚན་ཉིད། གང་ཞིག དེ་སྒྲུབ་ཀྱི་དགག་བྱའི་ཆོས་སུ་འགྲོ་རྒྱུའི་བདག་གཅིག་པའི་ཁྱབ་བྱེད་བཀག་པ་རྟགས་སུ་སྦྱར་བ། དཔེར་ན། ཤིང་གིས་དབེན་པའི་བྲག་རྫོང་ན་ཤ་བ་མེད་པར་སྒྲུབ་པ་ལ་ཤིང་མེད་པ་ལྟ་བུའོ། །དེ་ལ་ཁྱབ་བྱེད་མ་དམིགས་པའི་གཏན་ཚིགས་ཞེས་བརྗོད་པའི་རྒྱུ་མཚན་ཡོད་དེ། ཤིང་དེ་ཤ་བའི་ཁྱབ་བྱེད་ཡིན་ལ། དེ་མ་དམིགས་པ་རྟགས་སུ་བཀོད་པས་དེ་ལྟར་བརྗོད་པའི་ཕྱིར། གསུམ་པ་རང་བཞིན་མི་དམིགས་པའི་སྣང་རུང་གི་རྟགས་ཡང་དག་གི་མཚན་ཉིད། གང་ཞིག དེ་སྒྲུབ་ཀྱི་དགག་བྱའི་ཆོས་ཀྱི་རང་བཞིན་བཀག་པ་རྟགས་སུ་སྦྱར་བ། དཔེར་ན། བུམ་པ་སྣང་རུང་མ་དམིགས་པའི་ས་ཕྱོགས་བུམ་པ་མེད་པར་སྒྲུབ་པ་ལ་བུམ་པ་སྣང་རུང་ཚད་མས་མ་དམིགས་པ་ལྟ་བུའོ། །དེ་ལ་རང་བཞིན་མ་དམིགས་པའི་གཏན་ཚིགས་ཞེས་བརྗོད་པའི་རྒྱུ་མཚན་ཡོད་དེ། བུམ་པ་ཚད་མས་དམིགས་པ་དེ་བུམ་པ་ཡོད་པའི་རང་བཞིན་ཡིན་ལ། དེ་མ་དམིགས་པ་རྟགས་སུ་བཀོད་པས་དེ་ལྟར་བརྗོད་པའི་ཕྱིར། བཞི་བ་དེ་སྒྲུབ་ཀྱི་དངོས་འབྲས་མ་དམིགས་པའི་སྣང་རུང་གི་རྟགས་ཡང་དག་གི་མཚན་ཉིད། གང་ཞིག དེ་སྒྲུབ་ཀྱི་དགག་བྱའི་ཆོས་ཀྱི་དངོས་འབྲས་བཀག་པ་རྟགས་སུ་སྦྱར་བ། དཔེར་ན། དུ་བས་དབེན་པའི་ར་བ་ན་དུ་བའི་དངོས་རྒྱུ་ནུས་པ་ཐོགས་མེད་མེད་པར་སྒྲུབ་པ་ལ་དུ་བ་མེད་པ་ལྟ་བུའོ། །ཁྱོད་ལ་དངོས་འབྲས་མ་དམིགས་པའི་གཏན་ཚིགས་ཞེས་བརྗོད་པའི་རྒྱུ་མཚན་ཡོད་དེ། དུ་བའི་དངོས་རྒྱུ་ནུས་པ་ཐོགས་མེད་ཀྱི་དངོས་འབྲས་དུ་བ་ཡིན་ལ། དེ་མ་དམིགས་པ་རྟགས་སུ་བཀོད་པས་དེ་ལྟར་བརྗོད་པའི་ཕྱིར་རོ། ། གཉིས་པ་ལ་མཚན་ཉིད།གཉིས་པ་ལ་མཚན་ཉིད། དབྱེ་བ་གཉིས། དང་པོ་འགལ་ཟླ་དམིགས་པའི་སྣང་རུང་གི་རྟགས་ཡང་དག་གི་མཚན་ཉིད། དེ་སྒྲུབ་ཀྱི་དགག་བྱའི་ཆོས་ཀྱི་འགལ་ཟླ་རྟགས་སུ་སྦྱར་བའི་སྣང་རུང་མ་དམིགས་པའི་ཚུལ་གསུམ་ཡིན་པ། གཉིས་པ་དབྱེ་བ་ནི། ལྷན་ཅིག་མི་གནས་འགལ་ལ་བརྟེན་པའི་འགལ་ཟླ་དམིགས་པའི་སྣང་རུང་གི་རྟགས་ཡང་དག་དང༌། ཕན་ཚུན་སྤངས་འགལ་ལ་བརྟེན་པའི་འགལ་ཟླ་དམིགས་པའི་སྣང་རུང་གི་རྟགས་ཡང་དག་གཉིས། དང་པོ་ལ་མཚན་ཉིད། དབྱེ་བ་གཉིས། དང་པོ་ལྷན་ཅིག་མི་གནས་འགལ་ལ་བརྟེན་པའི་འགལ་ཟླ་དམིགས་པའི་སྣང་རུང་གི་རྟགས་ཡང་དག་གི་མཚན་ཉིད། དགག་བྱའི་ཆོས་དང་ལྷན་ཅིག་མི་གནས་འགལ་ལ་བརྟེན་པའི་སྒོ་ནས་མི་མཐུན་པར་གནས་པའི་འགལ་ཟླ་དམིགས་པའི་སྣང་རུང་གི་ཚུལ་གསུམ་ཡིན་པ། གཉིས་པ་དབྱེ་བ་ནི། རྣམ་འགྲེལ་ལས། རྒྱུ་འགལ་དམིགས་དང༌། ཁྱབ་བྱེད་འགལ་དམིགས་དང༌། རང་བཞིན་འགལ་དམིགས་དང༌། འགལ་འབྲས་དམིགས་པ་དང༌། འབྲས་བུ་འགལ་དམིགས་དང༌། རྒྱུ་དང་འགལ་བའི་འབྲས་བུ་དམིགས་པ་སྟེ་དྲུག་གསུངས། དཔེར་ན། རྒྱུ་འགལ་དམིགས་ནི། མེ་སྟོབས་ཆེན་པོས་ཁྱབ་པར་གནོན་པའི་ཤར་ཕྱོགས་ཀྱི་གཞིར་གྲང་འབྲས་སྤུ་ལོང་བྱེད་མེད་པར་སྒྲུབ་པ་ལ་མེ་སྟོབས་ཆེན་པོས་ཁྱབ་པར་ནོན་པ་ལྟ་བུའོ། །དེ་ལ་རྒྱུ་འགལ་དམིགས་ཀྱི་གཏན་ཚིགས་ཞེས་བརྗོད་པའི་རྒྱུ་མཚན་ཡོད་དེ། གྲང་འབྲས་སྤུ་ལོང་བྱེད་ཀྱི་རྒྱུ་གྲང་རེག་དེ་དང་འགལ་བའི་མེ་དམིགས་པ་རྟགས་སུ་བཀོད་པས་ན་དེ་ལྟར་བརྗོད་པའི་ཕྱིར། ཁྱབ་བྱེད་འགལ་དམིགས་ནི། མེ་སྟོབས་ཆེན་པོས་ཁྱབ་པར་ནོན་པའི་ཤར་ཕྱོགས་ཀྱི་གཞིར་བ་མོའི་རེག་པ་རྒྱུན་ཆགས་མེད་པར་སྒྲུབ་པ་ལ་མེ་སྟོབས་ཆེན་པོས་ཁྱབ་པར་ནོན་པ་ལྟ་བུའོ། །དེ་ལ་ཁྱབ་བྱེད་འགལ་དམིགས་ཀྱི་གཏན་ཚིགས་ཞེས་བརྗོད་པའི་རྒྱུ་མཚན་ཡོད་དེ། བ་མོའི་རེག་པའི་ཁྱབ་བྱེད་གྲང་རེག་དེ་དང་འགལ་བའི་མེ་དམིགས་པ་རྟགས་སུ་བཀོད་པས་ན་དེ་ལྟར་བརྗོད་པའི་ཕྱིར། རང་བཞིན་འགལ་དམིགས་ནི། མེ་སྟོབས་ཆེན་པོས་ཁྱབ་པར་ནོན་པའི་ཤར་ཕྱོགས་ཀྱི་གཞིར་གྲང་རེག་རྒྱུན་ཆགས་པ་མེད་པར་སྒྲུབ་པ་ལ་མེ་སྟོབས་ཆེན་པོས་ཁྱབ་པར་ནོན་པ་ལྟ་བུའོ། །དེ་ལ་རང་བཞིན་འགལ་དམིགས་ཞེས་བརྗོད་པའི་རྒྱུ་མཚན་ཡོད་དེ། གྲང་རེག་གི་རང་བཞིན་དེ་དང་འགལ་བ་མེ་ཡིན་ལ། མེ་དེ་དམིགས་པ་རྟགས་སུ་བཀོད་པས་ན་དེ་ལྟར་བརྗོད་པའི་ཕྱིར། འགལ་འབྲས་དམིགས་པ་ནི། དུ་བ་དྲག་འཕྱུར་བས་ཁྱབ་པར་ནོན་པའི་ཤར་ཕྱོགས་ཀྱི་གཞིར་གྲང་རེག་སྟོབས་ཆེན་རྒྱུན་ཆགས་པ་མེད་པར་སྒྲུབ་པ་ལ་དུ་བ་དྲག་འཕྱུར་བས་ཁྱབ་པར་ནོན་པ་ལྟ་བུའོ། ། དེ་ལ་འགལ་འབྲས་དམིགས་པ་ཞེས་བརྗོད་པའི་རྒྱུ་མཚན་ཡོད་དེ། གྲང་རེག་དང་འགལ་བ་མེ་ཡིན་ལ། དེའི་འབྲས་བུ་དུ་བ་དམིགས་པ་རྟགས་སུ་བཀོད་པས་ན་དེ་ལྟར་བརྗོད་པའི་ཕྱིར། འབྲས་བུ་འགལ་དམིགས་ནི། མེ་སྟོབས་ཆེན་པོས་ཁྱབ་པར་ནོན་པའི་ཤར་ཕྱོགས་ཀྱི་གཞིར་གྲང་རྒྱུའི་ནུས་པ་ཐོགས་མེད་མེད་པར་སྒྲུབ་པ་ལ་མེ་སྟོབས་ཆེན་པོས་ཁྱབ་པར་ནོན་པ་ལྟ་བུའོ། །དེ་ལ་འབྲས་བུ་འགལ་དམིགས་ཞེས་བརྗོད་པའི་རྒྱུ་མཚན་ཡོད་དེ། གྲང་རྒྱུའི་ནུས་པ་ཐོགས་མེད་ཀྱི་འབྲས་བུ་གྲང་རེག་དང་འགལ་བ་མེ་ཡིན་ལ། དེ་དམིགས་པ་རྟགས་སུ་བཀོད་པས་ན་དེ་ལྟར་བརྗོད་པའི་ཕྱིར། རྒྱུ་དང་འགལ་བའི་འབྲས་བུ་དམིགས་པ་ནི། དུ་བ་དྲག་འཕྱུར་བས་ཁྱབ་པར་ནོན་པའི་ཤར་ཕྱོགས་ཀྱི་གཞིར་གྲང་འབྲས་སྤུ་ལོང་བྱེད་སྟོབས་ཆེན་རྒྱུན་ཆགས་པ་མེད་པར་སྒྲུབ་པ་ལ་དུ་བ་དྲག་འཕྱུར་བས་ཁྱབ་པར་ནོན་པ་ལྟ་བུའོ། །དེ་ལ་རྒྱུ་དང་འགལ་བའི་འབྲས་བུ་དམིགས་པ་ཞེས་བརྗོད་པའི་རྒྱུ་མཚན་ཡོད་དེ། གྲང་འབྲས་སྤུ་ལོང་བྱེད་ཀྱི་རྒྱུ་གྲང་རེག་དེ་དང་འགལ་བ་མེའི་འབྲས་བུ་དུ་བ་དམིགས་པ་རྟགས་སུ་སྦྱར་བས་ན་དེ་ལྟར་བརྗོད་པའི་ཕྱིར་རོ། །ལྷན་ཅིག་མི་གནས་འགལ་ལ་བརྟེན་པའི་འགལ་ཟླ་དམིགས་པའི་རྟགས་དེ་ལ་རྒྱས་པར་དབྱེ་ན་བཅུ་གཉིས་ཡོད་དེ། འགལ་བའི་རང་བཞིན་དམིགས་པ་བཞི་དང༌།འགལ་བའི་འབྲས་བུ་དམིགས་པ་བཞི་དང༌། འགལ་བའི་ཁྱབ་བྱེད་དམིགས་པ་བཞི་དང་བཅུ་གཉིས་ཡོད་པའི་ཕྱིར། དང་པོ་འགལ་བའི་རང་བཞིན་དམིགས་པ་བཞི་བཞག་ཏུ་ཡོད་དེ། མེ་སྟོབས་ཆེན་པོས་ཁྱབ་པར་ནོན་པའི་གཞིར་གྲང་རེག་དང་གྲང་འབྲས་སྤུ་ལོང་བྱེད་དང༌། གྲང་རྒྱུའི་ནུས་པ་ཐོགས་མེད་དང༌། བ་མོའི་རེག་པ་རྣམས་རེ་རེ་ནས་མེད་པར་སྒྲུབ་པ་ལ། མེ་སྟོབས་ཆེན་པོས་ཁྱབ་པར་ནོན་པ་ལྟ་བུའོ། །གཉིས་པ་འགལ་བའི་འབྲས་བུ་དམིགས་པ་བཞི་བཞག་ཏུ་ཡོད་དེ། དུ་བ་དྲག་འཕྱུར་བས་ཁྱབ་པར་ནོན་པའི་ཤར་གཞིར་དེ་བཞི་རེ་རེ་ནས་མེད་པར་སྒྲུབ་པ་ལ་དུ་བ་དྲག་འཕྱུར་བ་ལྟ་བུའོ། །གསུམ་པ་འགལ་བའི་ཁྱབ་བྱ་དམིགས་པ་བཞི་བཞག་ཏུ་ཡོད་དེ། ཙནྡན་གྱི་མེ་སྟོབས་ཆེན་པོས་ཁྱབ་པར་ནོན་པའི་ཤར་གཞིར་དེ་བཞི་རེ་རེ་ནས་མེད་པར་སྒྲུབ་པ་ལ་ཙནྡན་གྱི་མེ་སྟོབས་ཆེན་པོ་ལྟ་བུའོ། ། གཉིས་པ་ལ་མཚན་ཉིད། དབྱེ་བ་གཉིས། དང་པོ་ཕན་ཚུན་སྤངས་འགལ་ལ་བརྟེན་པའི་འགལ་ཟླ་དམིགས་པའི་སྣང་རུང་གི་རྟགས་ཡང་དག་གི་མཚན་ཉིད། དགག་བྱའི་ཆོས་དང་ཕན་ཚུན་སྤངས་འགལ་ལ་བརྟེན་པའི་སྒོ་ནས་མི་མཐུན་པར་གནས་པའི་འགལ་ཟླ་དམིགས་པའི་སྣང་རུང་གི་ཚུལ་གསུམ་ཡིན་པ། གཉིས་པ་དབྱེ་བ་ནི། ངེས་པས་ལྟོས་པ་འགོག་པ་དང༌། ལྟོས་པས་ངེས་པ་འགོག་པའི་འགལ་ཟླ་དམིགས་པའི་སྣང་རུང་གི་རྟགས་ཡང་དག་གཉིས། མཚན་གཞི་ནི་རིམ་པ་བཞིན། བུམ་པ་འཇིག་པ་ཕྱིས་འབྱུང་གི་རྒྱུ་དོན་གཞན་ལ་ལྟོས་པ་མེད་པར་སྒྲུབ་པ་ལ་རང་གྲུབ་ཙམ་ནས་འཇིག་ངེས་ལྟ་བུ་དང༌། གོས་དཀར་པོ་རང་གྲུབ་ཙམ་ནས་ཚོན་ཅན་དུ་མེད་པར་སྒྲུབ་པ་ལ་ཚོན་ཅན་དུ་འགྱུར་བ་ལ་ཕྱིས་འབྱུང་གི་རྒྱུ་ལ་ལྟོས་པ་ལྟ་བུའོ། །ཡང་དགག་རྟགས་ཉེར་གཅིག་བཞག་ཚུལ་ཡོད་དེ། འབྲེལ་ཟླ་མི་དམིགས་པ་བཞི་དང༌། ལྷན་ཅིག་མི་གནས་འགལ་ལ་བརྟེན་པའི་འགལ་ཟླ་དམིགས་པའི་རྟགས་བཅུ་གཉིས་དང༌། ཕན་ཚུན་སྤངས་འགལ་ལ་བརྟེན་པ་གཉིས་དང༌། མི་སྣང་བ་མ་དམིགས་པ་གསུམ་དང༌། ཉེར་གཅིག་འདྲེན་ཚུལ་ཡོད་པའི་ཕྱིར། ཛེ་ཏཱ་རིས་འགལ་བའི་གཏན་ཚིགས་ཉེར་ལྔ་འདྲེན་ཚུལ་ཡོད་དེ། སྔ་མ་ཉེར་གཅིག་གི་སྟེང་དུ་འགལ་བའི་ཁྱབ་བྱ་དམིགས་པ་བཞི་དང་ཉེར་ལྔ་ཡོད་པའི་ཕྱིར། དེ་བཞི་འཇོག་ཚུལ་ཡོད་དེ། ཙནྡན་གྱི་མེ་སྟོབས་ཆེན་པོས་ཁྱབ་པར་ནོན་པའི་ཤར་གཞིར་དེ་བཞི་རེ་རེ་ནས་མེད་པར་སྒྲུབ་པ་ལ་ཤར་གྱི་རིའི་ཙནྡན་གྱི་མེ་སྟོབས་ཆེན་པོས་ཁྱབ་པར་ནོན་པ་ལྟ་བུའོ། ། ལྔ་བ་དགོས་པ་བཤད་པ།ལྔ་བ་དགོས་པ་བཤད་པ་ནི། སྣང་རུང་མ་དམིགས་པའི་གཏན་ཚིགས་བཤད་པ་ནི་སྤང་གཉེན་གྱི་རྣམ་བཞག་ལེགས་པར་ཤེས་པའི་ཆེད་ཡིན་པའི་ཕྱིར་རོ། ། གཉིས་པ་རྟགས་ཡང་དག་ལ་བསྒྲུབ་བྱའི་ཆོས་ཀྱི་སྒོ་ནས་དབྱེ་བ་གཉིས། སྒྲུབ་རྟགས་ཡང་དག་དང༌། དགག་རྟགས་ཡང་དག་གཉིས། མཚན་ཉིད་ནི་རིམ་པ་ལྟར། དེ་སྒྲུབ་ཀྱི་དངོས་ཀྱི་བསྒྲུབ་བྱའི་ཆོས་ཡིན་ན་སྒྲུབ་པ་ཡིན་དགོས་པའི་ཚུལ་གསུམ་ཡིན་པའི་གཏན་ཚིགས་དང༌། དེ་སྒྲུབ་ཀྱི་དངོས་ཀྱི་བསྒྲུབ་བྱའི་ཆོས་ཡིན་ན་དགག་པ་ཡིན་དགོས་པའི་ཚུལ་གསུམ་ཡིན་པའི་གཏན་ཚིགས། དང་པོ་ལ་དབྱེ་ན། འབྲས་རང་གཉིས། གཉིས་པ་ལ་དབྱེ་ན། མི་སྣང་བ་དང་སྣང་རུང་གི་རྟགས་ཡང་དག་གཉིས་སོ། ། གསུམ་པ་རྟགས་ཡང་དག་ལ་བསྒྲུབ་བྱའི་སྒོ་ནས་དབྱེ་བ་གསུམ་ཡོད་དེ། དངོས་སྟོབས་ཀྱི་རྟགས་ཡང་དག་དང༌། གྲགས་པའི་རྟགས་ཡང་དག་དང༌། ཡིད་ཆེས་ཀྱི་རྟགས་ཡང་དག་དང་གསུམ། དང་པོ་དངོས་སྟོབས་ཀྱི་རྟགས་ཡང་དག་གི་མཚན་ཉིད། དེ་སྒྲུབ་ཀྱི་བསྒྲུབ་བྱ་དངོས་པོ་སྟོབས་ཞུགས་ཀྱི་གྲུབ་པའི་ཚུལ་གསུམ་ཡིན་པའི་གཏན་ཚིགས། མཚན་གཞི་ནི། སྒྲ་མི་རྟག་སྒྲུབ་པ་ལ་བྱས་པ་ལྟ་བུའོ། །དེ་ལ་དབྱེ་ན་རང་ཡིན་གྱི་འབྲས་རང་མ་དམིགས་པའི་རྟགས་གསུམ་ཡོད་དོ། །དངོས་སྟོབས་ཀྱི་རིགས་པ་ནི་རྟགས་དེ་ཡིན་ན་བསྒྲུབ་བྱའི་ཆོས་དེ་ཡོད་དགོས་པ་དང༌། རྟགས་དེ་ཡིན་ན་བསྒྲུབ་བྱའི་ཆོས་དེ་ཡིན་དགོས་པ་ནི་གྲགས་པ་ཙམ་མམ་འདོད་པ་ཙམ་མ་ཡིན་པར་ཀུན་རྫོབ་གནས་ཐབས་ཀྱི་དབང་དུ་བྱས་ན་རྩོད་གཞི་དེའི་རང་བཞིན་དུ་གྲུབ་པའི་རྟགས་ཞིག་དགོས་ལ། རིགས་པ་དེའི་བསྒྲུབ་བྱ་དེ་གཞལ་བྱ་ཅུང་ཟད་ལྐོག་གྱུར་ཡིན་དགོས་ལ། དེ་ནི་སྐབས་དེར་མངོན་སུམ་གྱིས་ངེས་མི་ནུས་ལ་ལུང་ལ་བརྟེན་ནས་ངེས་མི་དགོས་པར་རིགས་པ་ཙམ་གྱིས་རྟོགས་ནུས་པའི་ཆོས་དེའོ། །གཉིས་པ་གྲགས་རྟགས་ཡང་དག་གི་མཚན་ཉིད། དེ་སྒྲུབ་ཀྱི་བསྒྲུབ་བྱ་བརྡའི་དབང་གིས་བཞག་པའི་ཚུལ་གསུམ་ཡིན་པའི་གཏན་ཚིགས།མཚན་གཞི་ནི། རི་བོང་ཅན་ཟླ་སྒྲས་བརྗོད་རུང་ཡིན་པར་སྒྲུབ་པ་ལ་རྟོག་ཡུལ་ན་ཡོད་པ་ལྟ་བུའོ། །གྲགས་རྟགས་ནི། དངོས་སྟོབས་ཀྱི་རྟགས་ལྟ་བུ་མ་ཡིན་པར་བསྒྲུབ་གཞི་དེ་བསྒྲུབ་བྱའི་ཆོས་དེ་ཡིན་པར་བརྡ་འདོད་ཙམ་གྱིས་བཞག་པ་ཞིག་དགོས་སོ། །གསུམ་པ་ཡིད་ཆེས་ཀྱི་རྟགས་ཡང་དག་གི་མཚན་ཉིད། དབྱེ་བ་གཉིས། དང་པོ་ཡིད་ཆེས་ཀྱི་རྟགས་ཡང་དག་གི་མཚན་ཉིད། དེ་སྒྲུབ་ཀྱི་བསྒྲུབ་བྱ་སྐབས་བབ་ཀྱི་ཕྱི་རྒོལ་གྱིས་ཡིད་ཆེས་ཀྱིས་གྲུབ་དགོས་པའི་ཚུལ་གསུམ་པའི་གཏན་ཚིགས། མཚན་གཞི་ནི། སྦྱིན་པའི་ལོངས་སྤྱོད་ཁྲིམས་ཀྱི་བདེ་ཞེས་པའི་ལུང་རང་གི་བསྟན་བྱའི་དོན་ལ་མི་སླུ་བར་སྒྲུབ་པ་ལ་དཔྱད་པ་གསུམ་གྱིས་དག་པའི་ལུང་ལྟ་བུའོ། །ཡིད་ཆེས་ཀྱི་རྟགས་ནི་དངོས་སྟོབས་ཀྱི་རྟགས་དང་གྲགས་རྟགས་ཙམ་མ་ཡིན་པར་གཞལ་བྱ་དཔོག་པ་པོས་ཡིད་ཆེས་ལེགས་པར་རྙེད་པའི་རྟགས་ཞིག་དགོས་སོ། །དེའི་བསྒྲུབ་བྱ་ཡང་ཤིན་ལྐོག་ཡིན་དགོས་ལ། དེ་ནི་སྐབས་དེར་མངོན་སུམ་མ་ཟད་དངོས་སྟོབས་ཀྱི་རྟགས་ལ་བརྟེན་ནས་ངེས་མི་ནུས་པར་ཡིད་ཆེས་ཀྱི་ལུང་སོགས་ལ་བརྟེན་ནས་ངེས་དགོས་སོ། །དཔྱད་པ་གསུམ་གྱིས་དག་ཚུལ་ཡོད་དེ། མཐོང་བ་མངོན་གྱུར་སྟོན་པའི་ཆ་ལ་མངོན་སུམ་ཚད་མས་གནོད་པ་མེད་པ་དང༌། མ་མཐོང་བ་ཅུང་ཟད་ལྐོག་གྱུར་སྟོན་པའི་ཆ་ལ་དངོས་སྟོབས་ཀྱིས་གནོད་པ་མེད་པ་དང༌། མ་མཐོང་བ་ཤིན་ལྐོག་སྟོན་པའི་ཆ་རྣམས་ལ་རང་ཚིག་འགལ་བ་སོགས་ཀྱིས་གནོད་པ་མེད་པ་དང་གསུམ་པོ་དེ་ཡིན་པའི་ཕྱིར་ཏེ། རྣམ་འགྲེལ་ལས། མཐོང་དང་མ་མཐོང་དངོས་པོ་ཡི། །དོན་དེ་དག་ལ་མངོན་སུམ་དང༌། །རྗེས་སུ་དཔག་རྣམ་གཉིས་ཀྱིས་ཀྱང༌། །གནོད་མེད་འདི་ནི་མི་སླུ་བའོ། །ཞེས་གསུངས་པའི་ཕྱིར། གཉིས་པ་ཡིད་ཆེས་ཀྱི་རྟགས་ཡང་དག་ལ་དབྱེ་ན། རང་ཡིན་གྱི་འབྲས་རང་མ་དམིགས་པའི་རྟགས་ཡང་དག་གསུམ་ཡོད་དེ། ཡིད་ཆེས་ཀྱི་འབྲས་རྟགས་ནི། སྦྱིན་པའི་ལོངས་སྤྱོད་ཁྲིམས་ཀྱི་བདེ་ཞེས་པའི་ལུང་རང་གི་བསྟན་བྱ་རྟོགས་པའི་བློ་སྔོན་དུ་སོང་བར་སྒྲུབ་པ་ལ་དཔྱད་པ་གསུམ་གྱིས་དག་པའི་ལུང་ལྟ་བུའོ། །ཡིད་ཆེས་ཀྱི་རང་བཞིན་གྱི་རྟགས་ནི། སྦྱིན་པའི་ལོངས་སྤྱོད་ཁྲིམས་ཀྱི་བདེ་ཞེས་པའི་ལུང་རང་གི་བསྟན་བྱའི་དོན་ལ་མི་སླུ་བར་སྒྲུབ་པ་ལ་དཔྱད་པ་གསུམ་གྱིས་དག་པའི་ལུང་ལྟ་བུའོ། །ཡིད་ཆེས་ཀྱི་མ་དམིགས་པའི་རྟགས་ནི། སྦྱིན་པའི་ལོངས་སྤྱོད་ཁྲིམས་ཀྱི་བདེ་ཞེས་པའི་ལུང་རང་གི་བསྟན་བྱའི་དོན་ལ་སླུ་བ་མེད་པར་སྒྲུབ་པ་ལ་དཔྱད་པ་གསུམ་གྱིས་དག་པའི་ལུང་ལྟ་བུ་དང་གསུམ་ཡོད་པའི་ཕྱིར་རོ། ། བཞི་བ་རྟགས་ཡང་དག་ལ་སྒྲུབ་ཚུལ་གྱི་སྒོ་ནས་དབྱེ་བ།བཞི་བ་རྟགས་ཡང་དག་ལ་སྒྲུབ་ཚུལ་གྱི་སྒོ་ནས་དབྱེ་བ་ལ། དོན་སྒྲུབ་ཀྱི་རྟགས་ཡང་དག་དང༌། ཐ་སྙད་སྒྲུབ་ཀྱི་རྟགས་ཡང་དག་དང་གཉིས། དང་པོ་དོན་སྒྲུབ་ཀྱི་རྟགས་ཡང་དག་གི་མཚན་ཉིད། དེ་སྒྲུབ་ཀྱི་དངོས་ཀྱི་བསྒྲུབ་བྱའི་ཆོས་སུ་བཟུང་བྱ་ཡང་ཡིན་མཚན་ཉིད་ཡིན་པའི་གཞི་མཐུན་པ་ཡོད་པའི་དེ་སྒྲུབ་ཀྱི་ཚུལ་གསུམ་ཚང་བའི་གཏན་ཚིགས། མཚན་གཞི་ནི། སྒྲ་སྐད་ཅིག་མར་སྒྲུབ་པ་ལ་བྱས་པ་ལྟ་བུའོ། །ཐ་སྙད་སྒྲུབ་ཀྱི་རྟགས་ཡང་དག་གི་མཚན་ཉིད། དེ་སྒྲུབ་ཀྱི་དངོས་ཀྱི་བསྒྲུབ་བྱའི་ཆོས་སུ་བཟུང་བྱ་ཡང་ཡིན་ཁྱོད་ཀྱི་མཚོན་བྱ་ཡང་ཡིན་པའི་གཞི་མཐུན་པ་ཡོད་པའི་དེ་སྒྲུབ་ཀྱི་ཚུལ་གསུམ་ཡིན་པའི་གཏན་ཚིགས། སྒྲ་མི་རྟག་སྒྲུབ་པ་ལ་བྱས་པ་ལྟ་བུའོ། །དེ་གཉིས་ཀའི་མཚན་གཞི་ནི། མེ་མེད་མཚན་མོའི་རྒྱ་མཚོར་དུ་མེད་དུ་སྒྲུབ་པ་ལ་མེ་མེད་པ་ལྟ་བུའོ། །ཐ་སྙད་འབའ་ཞིག་སྒྲུབ་ཀྱི་རྟགས་ཡང་དག་གི་མཚན་ཉིད། དེ་སྒྲུབ་ཀྱི་དངོས་ཀྱི་བསྒྲུབ་བྱའི་ཆོས་སུ་བཟུང་བྱ་ཡང་ཡིན་མཚོན་བྱ་ཡིན་པའི་གཞི་མཐུན་པ་ཡོད་ལ་མཚན་ཉིད་ཡིན་པའི་གཞི་མཐུན་པ་མེད་པའི་དེ་སྒྲུབ་ཀྱི་ཚུལ་གསུམ་ཡིན་པའི་གཏན་ཚིགས། དཔེར་ན། བུམ་པ་སྣང་རུང་མ་དམིགས་པའི་ས་ཕྱོགས་བུམ་པ་མེད་པར་སྒྲུབ་པ་ལ་བུམ་པ་ཡོད་ན་སྣང་དུ་རུང་བ་ལས་མ་དམིགས་པ་ལྟ་བུའོ། །དོན་འབའ་ཞིག་སྒྲུབ་ཀྱི་རྟགས་ཡང་དག་གི་མཚན་ཉིད་ཡོད་དེ། དེ་སྒྲུབ་ཀྱི་དངོས་ཀྱི་བསྒྲུབ་བྱའི་ཆོས་སུ་བཟུང་བྱ་ཡང་ཡིན་མཚན་ཉིད་ཡིན་པའི་གཞི་མཐུན་པ་ཡོད་ལ་མཚོན་བྱ་ཡིན་པའི་གཞི་མཐུན་པ་མེད་པའི་དེ་སྒྲུབ་ཀྱི་ཚུལ་གསུམ་ཡིན་པའི་གཏན་ཚིགས། དཔེར་ན། སྒྲ་སྐད་ཅིག་མར་སྒྲུབ་པ་ལ་བྱས་པ་ལྟ་བུའོ། །དེ་ལྟར་རྒྱུ་ཁྱབ་བྱེད་མ་དམིགས་པའི་རྟགས་ཡང་དག་གཉིས་ནི་ཐ་སྙད་དང་དོན་སྒྲུབ་གཉིས་ཀ་ཡིན་ལ། རང་བཞིན་མ་དམིགས་པའི་གཏན་ཚིགས་ནི། ཐ་སྙད་འབའ་ཞིག་སྒྲུབ་ཀྱི་གཏན་ཚིགས་ཡིན་ཏེ། རང་འགྲེལ་ལས། རྒྱུ་དང་ཁྱབ་པར་བྱེད་པ་མ་དམིགས་པ་ནི་གཉིས་ཀའི་ཡང་གཏན་ཚིགས་ཡིན་ནོ། །ཞེས་གསུངས་པའི་ཕྱིར་རོ། །འདིར་དོན་སྒྲུབ་དང་ཐ་སྙད་སྒྲུབ་ཀྱི་རྟགས་ཞེས་པའི་དོན་དང་ཐ་སྙད་ནི། མཚན་ཉིད་ལ་དོན་དང་མཚོན་བྱ་ལ་ཐ་སྙད་དུ་བྱས་པ་དང༌། སྒྲ་བློ་ལུས་གསུམ་གྱི་ཐ་སྙད་ལ་ཐ་སྙད་དང༌། དེའི་ཡུལ་ལ་དོན་དུ་བྱས་པའི་བཤད་ཚུལ་གཉིས་རེ་ཡོད་དོ། ། ལྔ་བ་རྟགས་ཡང་དག་ལ་མཐུན་ཕྱོགས།ལྔ་བ་རྟགས་ཡང་དག་ལ་མཐུན་ཕྱོགས་ལ་འཇུག་ཚུལ་གྱི་དབྱེ་ན། མཐུན་ཕྱོགས་ལ་ཁྱབ་བྱེད་དུ་འཇུག་པ་དང༌། མཐུན་ཕྱོགས་ལ་རྣམ་གཉིས་སུ་འཇུག་པའི་རྟགས་ཡང་དག་གཉིས། དང་པོའི་མཚན་ཉིད། དེ་སྒྲུབ་ཀྱི་མཐུན་ཕྱོགས་མཐའ་དག་ལ་འཇུག་པའི་ཚུལ་གསུམ་པའི་གཏན་ཚིགས། དཔེར་ན་སྒྲ་མི་རྟག་པར་སྒྲུབ་པ་ལ་བྱས་པ་རྟགས་སུ་བཀོད་པ་ལྟ་བུའོ། །གཉིས་པའི་མཚན་ཉིད། དེ་སྒྲུབ་ཀྱི་མཐུན་ཕྱོགས་འགའ་ཞིག་ལ་མི་འཇུག་པའི་དེ་སྒྲུབ་ཀྱི་ཚུལ་གསུམ་ཡིན་པའི་གཏན་ཚིགས། དཔེར་ན། དུང་སྒྲ་མི་རྟག་པར་སྒྲུབ་པ་ལ་རྩོལ་བྱུང་ལྟ་བུའོ། ། དྲུག་པ་རྒོལ་བའི་སྒོ་ནས་རྟགས་ཡང་དག།དྲུག་པ་རྒོལ་བའི་སྒོ་ནས་རྟགས་ཡང་དག་ལ་དབྱེ་ན། རང་དོན་གྱི་རྟགས་ཡང་དག་དང༌། གཞན་དོན་གྱི་རྟགས་ཡང་དག་གཉིས། དེ་གཉིས་ཀའི་མཚན་ཉིད་ཡོད་དེ། གཏན་ཚིགས་རིགས་པའི་དོན་བསྡུས་ལས། རང་དོན་དང་གཞན་དོན་གྱི་རྟགས་ཡང་དག་གཉིས་ཏེ། མཚན་ཉིད་ནི་རིམ་པ་ལྟར། སྔ་རྒོལ་གྱིས་ཕྱི་རྒོལ་ལ་བསྒྲུབ་བྱ་རྟོགས་པའི་ཐབས་སུ་བསྟན་པ་ལ་མ་ལྟོས་པར་ཚུལ་གསུམ་པའི་རྟགས་སུ་གྲུབ་པ་དང༌། ལྟོས་ནས་ཚུལ་གསུམ་པའི་རྟགས་སུ་གྲུབ་པའོ། ། དབྱེ་ན་རེ་རེ་ལའང་འབྲས་རང་མ་དམིགས་པ་གསུམ་གསུམ་མོ། །ཞེས་གསུངས་པའི་ཕྱིར་རོ། །སྐབས་དུ་མར་སྤྱིར་བཏང་དང་བྱེ་བྲག་སྒྲ་མི་རྟག་སྒྲུབ་ལྟ་བུའི་དབང་དུ་བྱས་པ་དང༌། སྐབས་ཀྱི་རྒོལ་བ་སོགས་ལ་སྦྱར་ཚུལ་ཤེས་དགོས་ཏེ། དེ་ལྟ་མ་ཡིན་ན་དངོས་འགལ་དུ་འགྱུར་བ་དུ་མ་ཡོད་དོ། ། གསུམ་པ་རྟགས་ཡང་དག་གི་གྲངས་ངེས།གསུམ་པ་རྟགས་ཡང་དག་གི་གྲངས་ངེས་ལ། དངོས་དང༌། དེ་ལ་རྩོད་པ་སྤོང་བ་དང་གཉིས། དང་པོ་རྟགས་ཡང་དག་དེ་ལ་དབྱེ་ན་སྦྱོར་བ་སོ་སོའི་དབང་དུ་བྱས་ན་འབྲས་རང་མ་དམིགས་པའི་རྟགས་ཡང་དག་གསུམ་དུ་གྲངས་ངེས་ཏེ། རྟགས་ཆོས་ཀྱི་འབྲེལ་བ་གྲུབ་པའི་ཕྱོགས་ཆོས་ཅན་གྱི་གཏན་ཚིགས་ལ་དེ་གསུམ་ཁོ་ནར་ངེས་པའི་ཕྱིར། རྣམ་འགྲེལ་ལས། དེ་ནི་རྣམ་གསུམ་ཉིད། །མེད་ན་མི་འབྱུང་ངེས་ཕྱིར་རོ། །ཞེས་དང༌། དེའི་ཐད་ཀྱི་འགྲེལ་བཤད་རིན་ཆེན་ཕྲེང་བ་ལས། ཤེས་བྱ་ཆོས་ཅན། རྟགས་ཡང་དག་ལ་འབྲས་རང་མ་དམིགས་པ་རྣམ་པ་གསུམ་ཉིད་དུ་ངེས་ཏེ། བསྒྲུབ་བྱའི་ཆོས་དང་མེད་ན་མི་འབྱུང་བའི་རང་བཞིན་འབྲེལ་བ་གྲུབ་པའི་ཕྱོགས་ཆོས་ཅན་དེ་གསུམ་ཁོ་ན་ལ་ངེས་པའི་ཕྱིར་རོ། །ཞེས་གསུངས་པའི་ཕྱིར་རོ། །གཉིས་པ་དེ་ལ་རྩོད་པ་སྤོང་བ་ལ། སྔ་ཕྱི་ལ་ལྟོས་པའི་རྩོད་པ་དང༌། དུས་མཉམ་ལ་རྩོད་པ་གཉིས། དང་པོ་འཆད་པར། རྣམ་འགྲེལ་ལས། རྒྱུ་ཚོགས་པ་ལས་འབྲས་སྐྱེ་བར། །རྗེས་སུ་དཔོག་པ་གང་ཡིན་པ། །དོན་གཞན་ལ་ནི་མི་ལྟོས་ཕྱིར། །དེ་ནི་རང་བཞིན་ཡིན་པར་བརྗོད། །ཚོགས་པའི་འབྲས་བུ་ནུས་པ་རྣམས། །འགྱུར་བ་དང་འབྲེལ་འབྲས་བུ་ལ། །མ་ངེས་པ་ནི་ཉིད་ཡིན་ཏེ། །གེགས་བྱེད་པ་དག་སྲིད་ཕྱིར་རོ། །ཞེས་གསུངས་ལ། དེའི་དོན་ནི། གཞན་སྡེ་རིག་པ་ཅན་དང་བྱེ་བྲག་སོགས་ཀྱི་སྟོན་པ་ཁ་ཅིག་ན་རེ། རྣམ་འགྲེལ་ལས། གཏན་ཚིགས་དེ་ནི་རྣམ་གསུམ་ཉིད། །ཅེས་རྟགས་ཡང་དག་ལ་འབྲས་རང་མ་དམིགས་པའི་རྟགས་ཡང་དག་གསུམ་དུ་གྲངས་ངེས་པར་བསྟན་པ་མི་འཐད་པར་ཐལ། ནས་ས་ཆུ་ལུད་དྲོད་གཤེར་རྣམས་དུས་དང་འཚམ་པར་ཚོགས་པའི་ཞིང་དེ། དེ་འདྲའི་ཤར་ཕྱོགས་ཀྱི་ཞིང་དེར་རང་འབྲས་མྱུ་གུ་སྐྱེ་བར་སྒྲུབ་པའི་རྟགས་ཡང་དག་གང་ཞིག དེ་གསུམ་པོ་གང་ཡང་མ་ཡིན་པའི་ཕྱིར་ཞེ་ན། ལན་ནི། རྟགས་ཡང་དག་ལ་དེ་གསུམ་དུ་མ་འདུས་པའི་སྐྱོན་མེད་པར་ཐལ། ནས་ས་ཆུ་ལུད་དྲོད་གཤེར་རྣམས་དུས་དང་འཚམ་པར་ཚོགས་པའི་ཞིང་དེ། དེ་འདྲའི་ཤར་ཕྱོགས་ཀྱི་ཞིང་དེར་རང་འབྲས་མྱུ་གུ་སྐྱེ་རུང་དུ་སྒྲུབ་པའི་རྟགས་ཡང་དག་ཡིན་ཀྱང་དེ་གསུམ་དུ་མ་འདུས་པའི་སྐྱོན་མེད་པ་གང་ཞིག སྐྱེ་ངེས་སུ་སྒྲུབ་པའི་རྟགས་ཡང་དག་མ་ཡིན་པའི་ཕྱིར། དང་པོ་གྲུབ་སྟེ། དེ་དེ་སྒྲུབ་ཀྱི་རང་བཞིན་གྱི་རྟགས་ཡང་དག་ཡིན་པའི་ཕྱིར། ཞེས་འཆད་པར། རྒྱུ་ཚོགས་པ་ལས་འབྲས་སྐྱེ་བར། ཞེས་པ་ནས། དེ་ནི་རང་བཞིན་ཡིན་པར་བརྗོད། །ཅེས་དང༌། རང་འགྲེལ་ལས། དེ་ལ་ནི་རྒྱུ་ཚོགས་པ་ལས་འབྲས་བུ་སྐྱེ་བར་སྲིད་པ་རྗེས་སུ་དཔོག་པ་འབའ་ཞིག་ཏུ་ཟད་དེ། ཚོགས་པ་རྣམས་ཀྱིས་འབྲས་བུ་བསྐྱེད་པར་རུང་བ་ཉིད་རྗེས་སུ་དཔོག་པའི་ཕྱིར་རོ། །རུང་བ་ཉིད་ཀྱང་ཚོགས་ཙམ་དང་འབྲེལ་བས་རང་བཞིན་དུ་འགྱུར་བ་ཁོ་ན་རྗེས་སུ་དཔོག་པ་ཡིན་ནོ། །ཞེས་གསུངས་པའི་ཕྱིར། རྩ་རྟགས་གཉིས་པ་གྲུབ་སྟེ། དེའི་རྟགས་ཀྱིས་དེར་སྐྱེ་ངེས་སུ་སྒྲུབ་པར་བྱེད་པའི་རྗེས་སུ་འགྲོ་ལྡོག་གི་ཁྱབ་པ་མ་ངེས་པའི་ཕྱིར། ཞེས་འཆད་པར། ཚོགས་པའི་འབྲས་བུ་ནུས་པ་རྣམས། །ཞེས་པ་ནས། སྲིད་ཕྱིར་རོ། །ཞེས་གསུངས་པའི་ཕྱིར་རོ། །མཐའ་དཔྱད་ཚུལ་གཞན་ལས་ཤེས་པར་བྱའོ། འདིར་མང་དོགས་ནས་མ་སྤྲོས་སོ། ། གཉིས་པ་དུས་མཉམ་ལ་བརྟེན་པའི་རྩོད་པ།གཉིས་པ་དུས་མཉམ་ལ་བརྟེན་པའི་རྩོད་པ་འཆད་པར། ཚོགས་པ་གཅིག་ལ་རག་ལས་པའི། །ཞེས་པ་ནས། དེ་ནི་འབྲས་བུའི་རྟགས་ལས་སྐྱེས། །ཞེས་བྱུང༌། བྱེ་རིག་གྲངས་ཅན་པ་གསུམ་ན་རེ། དེ་ནི་རྣམ་གསུམ་ཉིད། །ཅེས་རྟགས་ཡང་དག་ལ་གསུམ་དུ་གྲངས་ངེས་པར་འདོད་པ་མི་འཐད་པར་ཐལ། བུ་རོ་ད་ལྟ་བ་དེ། ཁ་ནང་བུ་རམ་གོང་བུའི་སྟེང་དུ་བུར་གཟུགས་ད་ལྟ་བ་ཡོད་པར་སྒྲུབ་པའི་འབྲས་རང་མ་དམིགས་པའི་རྟགས་གསུམ་པོ་གང་ཡང་མ་ཡིན་པ་གང་ཞིག དེ་སྒྲུབ་ཀྱི་རྟགས་ཡང་དག་ཡིན་པའི་ཕྱིར། དང་པོ་གྲུབ་སྟེ། དེ་སྒྲུབ་ཀྱི་རྟགས་ཆོས་ཀྱི་འབྲེལ་བ་མ་གྲུབ་པའི་ཕྱིར། དེར་ཐལ། བདག་གཅིག་འབྲེལ་དང་དེ་བྱུང་འབྲེལ་གང་ཡང་མ་གྲུབ་པའི་ཕྱིར། ཟུར་དང་པོ་གྲུབ་སྟེ། རོ་གཟུགས་གཉིས་རྫས་ཐ་དད་ཡིན་པའི་ཕྱིར། ཟུར་གཉིས་པ་གྲུབ་སྟེ། དུས་མཉམ་པ་ཡིན་པའི་ཕྱིར། ཐེག་མཆོག་དབུ་མའི་ཟིན་བྲིས་ཀྱི་གསུང་ཟིན་ལ་རྒྱུ་འབྲས་དུས་མཉམ་པ་ལྟ་བུར་གསུངས་པ་ལ་ཅུང་ཟད་དཔྱད་རྒྱུ་སྣང༌། རྩ་རྟགས་གཉིས་པ་མ་གྲུབ་ན། བུ་རོ་ད་ལྟ་བ་ཆོས་ཅན། ཁྱོད་ཁ་ནང་བུ་རམ་གོང་བུའི་སྟེང་དུ་བུར་གཟུགས་ད་ལྟ་བ་ཡོད་པར་སྒྲུབ་པར་བྱེད་པའི་རྟགས་ཡང་དག་ཡིན་པར་ཐལ། ཁྱོད་ཀྱི་རྟགས་ལ་བརྟེན་ནས་ཁ་ནང་བུ་རམ་གོང་བུའི་སྟེང་དུ་བུར་གཟུགས་ད་ལྟ་བ་ཡོད་པར་རྟོགས་པའི་རྗེས་དཔག་སྐྱེ་བ་ཡོད་པའི་ཕྱིར་ན་མ་ཁྱབ། དེ་ལ་བརྟེན་ནས་རྒྱུ་ཆོས་རྗེས་དཔག་གི་རྗེས་དཔག་སྐྱེས་པ་ཡིན་པའི་ཕྱིར། དེར་ཐལ། ཚོགས་པ་གཅིག་ལ་རག་ལས་པའི། །གཟུགས་ལ་སོགས་པ་རོས་རྟོགས་པ། །རྒྱུ་ཆོས་རྗེས་སུ་དཔག་པ་སྟེ། །དུ་བས་བུད་ཤིང་འགྱུར་བ་བཞིན། །ནུས་པ་འཇུག་པ་མེད་པར་ནི། །རོ་མེད་དེ་ཉིད་གཞན་གྱི་རྒྱུ། །དེ་ལྟར་འདས་དུས་གཅིག་རྣམས་རྟོགས། །དེ་ནི་འབྲས་བུའི་རྟགས་ལས་སྐྱེས། །ཞེས་གསུངས་པའི་ཕྱིར་རོ། །རྒྱུ་ཆོས་རྗེས་དཔག་གི་འབྲས་རྟགས་ནི་སྔར་འབྲས་རྟགས་ཀྱི་སྐབས་སུ་བཤད་ཟིན་པ་ལྟར་རོ། ། གཉིས་པ་རྟགས་ལྟར་སྣང་བཤད་པ།གཉིས་པ་རྟགས་ལྟར་སྣང་བཤད་པ་ལ། རྣམ་འགྲེལ་ལས། གཏན་ཚིགས་ལྟར་སྣང་དེ་ལས་གཞན། །ཞེས་གསུངས་ལ། དེ་ལ་མཚན་ཉིད། དབྱེ་བ་གཉིས། དང་པོ་སྦྱོར་བ་གང་ཡང་རུང་བའི་རྟགས་ལྟར་སྣང་གི་མཚན་ཉིད་ཡོད་དེ། སྦྱོར་བ་གང་ཡང་རུང་བའི་རྟགས་སུ་བཀོད་ཅིང་དེ་སྒྲུབ་ཀྱི་ཚུལ་གསུམ་མ་ཡིན་པའི་གཏན་ཚིགས་དེ་ཡིན་པའི་ཕྱིར། མཚན་གཞི་ནི། སྒྲ་རྟག་པར་སྒྲུབ་པ་ལ་བྱས་པ་ལྟ་བུའོ། ། གཉིས་པ་དབྱེ་ན། མ་གྲུབ་པའི་གཏན་ཚིགས་དང༌། འགལ་བའི་གཏན་ཚིགས་དང༌། མ་ངེས་པའི་གཏན་ཚིགས་དང་གསུམ། དང་པོ་མ་གྲུབ་པའི་གཏན་ཚིགས་ལ། མཚན་ཉིད། དབྱེ་བ་གཉིས། དང་པོ་མ་གྲུབ་པའི་གཏན་ཚིགས་ཀྱི་མཚན་ཉིད། སྦྱོར་སྐོར་གང་རུང་གི་རྟགས་སུ་བཀོད་ཅིང་ཕྱོགས་ཆོས་མ་གྲུབ་པའི་གཏན་ཚིགས། སྒྲ་མི་རྟག་པར་སྒྲུབ་པར་བྱེད་པའི་མ་གྲུབ་པའི་རྟགས་ཀྱི་མཚན་ཉིད། སྒྲ་མི་རྟག་པར་སྒྲུབ་པའི་རྟགས་སུ་བཀོད་ཅིང་སྒྲ་མི་རྟག་པར་སྒྲུབ་པའི་ཕྱོགས་ཆོས་མ་གྲུབ་པའི་གཏན་ཚིགས། མཚན་གཞི་ནི་སྒྲ་ལྟ་བུའོ། ། གཉིས་པ་དབྱེ་བ་ནི། སྦྱོར་བ་གང་རུང་གི་དོན་ལ་ལྟོས་ནས་མ་གྲུབ་པ་དང༌། བློ་ལ་ལྟོས་ནས་མ་གྲུབ་པ་དང༌། རྒོལ་བ་ལ་ལྟོས་ནས་མ་གྲུབ་པའི་གཏན་ཚིགས་དང་གསུམ། དང་པོ་ལ། གཞི་མ་གྲུབ་པའི་དབང་གིས་མ་གྲུབ་པ་དང༌། གཞི་རྟགས་ཀྱི་འབྲེལ་བ་མེད་ནས་མ་གྲུབ་པ་དང༌། ཕྱོགས་གཅིག་ལ་ལྟོས་ཏེ་མ་གྲུབ་པ་དང༌། ཐ་དད་མེད་ནས་མ་གྲུབ་པ་དང་བཞི། དང་པོ་ལ་ཆོས་ཅན་ཀྱི་ངོ་བོ་མེད་ནས་མ་གྲུབ་པ་དང༌། རྟགས་ཀྱི་ངོ་བོ་མེད་ནས་མ་གྲུབ་པ་གཉིས། དང་པོ་ནི། དཔེར་ན། བྱས་པ་དེ། གང་ཟག་གི་བདག་མི་རྟག་པར་སྒྲུབ་པ་ལ་ཆོས་ཅན་གྱི་ངོ་བོ་མེད་ནས་མ་གྲུབ་པའོ། །སྦྱོར་བ་བཀོད་ན། གང་ཟག་གི་བདག་ཆོས་ཅན། མི་རྟག་པ་ཡིན་ཏེ། བྱས་པ་ཡིན་པའི་ཕྱིར་ཞེས་པ་ལྟ་བུའོ། །གཏན་ཚིགས་འདི་ཆོས་ཅན་གྱི་ངོ་བོ་མེད་ནས་མ་གྲུབ་པ་ཡིན་ཏེ། ཁྱོད་ཀྱི་རྟགས་ཀྱིས་དེ་སྒྲུབ་ཀྱི་ཤེས་འདོད་ཆོས་ཅན་དུ་འགྲོ་རྒྱུ་དེ་གཞི་མ་གྲུབ་པ་དང་ཁྱོད་མ་ཡིན་པ་དང་གཉིས་ཀ་ཡིན་པའི་ཕྱིར། གཞན་ལ་རིགས་འགྲེས། དེ་ཡང་རང་ཉིད་ཡིན་ན་ཡོད་དགོས་པ་ཅན་གྱི་དངོས་པོར་གྱུར་བའི་སྒྲུབ་རྟགས་ཡང་དག་གི་ཆོས་ཅན་གཞི་མ་གྲུབ་པ་བཟུང་ན་མ་གྲུབ་པའི་གཏན་ཚིགས་སུ་འགྱུར་གྱི། དགག་རྟགས་ལ་ཆོས་ཅན་གཞི་མ་གྲུབ་པ་བཟུང་བ་ཡོད་དེ། རྣམ་འགྲེལ་ལེའུ་བཞི་བ་ལས། དེ་ལྟར་འདོད་པའི་བསྒྲུབ་བྱ་ལ། །གནོད་པ་འགའ་ཡང་མེད་པ་ཉིད། །གཉིས་ཀ་བསྒྲུབ་བྱ་ཉིད་ཡིན་ན། །ཆོས་ཅན་ལ་ནི་གནོད་པ་གང༌། །བསྒྲུབ་པར་བྱ་བས་ཆོས་འགོག་པས། །དེས་ནི་དེ་ལ་གནོད་ཅེས་བརྗོད། །ཅེས་དང༌། དབུ་མ་སྣང་བ་ལས། གང་ལ་མི་རྟག་པ་ལ་སོགས་པ་དངོས་པོའི་ཆོས་ཡོད་པའི་ངོ་བོར་སྒྲུབ་པར་འདོད་པ་དེ་ལ་ནི་གདོན་མི་ཟ་བར་ཐ་སྙད་ཀྱི་སྒོ་ནས་དངོས་པོར་གྱུར་བའི་ཆོས་ཅན་ལ་སོགས་པ་དགོས་ཏེ། ཞེས་པ་ནས། དེ་ཉིད་ལ་དེ་ལྟ་བུའི་གཞི་མེད་ན་བསྒྲུབ་པར་བྱ་བ་བཀག་པའི་ཕྱིར་གཞི་མ་གྲུབ་པ་ཉིད་ཀྱི་ཉེས་པ་བརྗོད་པར་བྱ་བ་ཡིན་ནོ། །ཞེས་གསུངས་པའི་ཕྱིར་རོ། །སྒྲ་མི་རྟག་པར་སྒྲུབ་པར་བྱེད་པའི་ཆོས་ཅན་གྱི་ངོ་བོ་མེད་ནས་མ་གྲུབ་པའི་གཏན་ཚིགས་མེད་དེ། སྒྲ་ཡོད་པ་ཡིན་པའི་ཕྱིར། གཉིས་པ་རྟགས་ཀྱི་ངོ་བོ་མེད་ནས་མ་གྲུབ་པ་ནི། དཔེར་ན། མོ་གཤམ་གྱི་བུ་དེ། སྐྱེས་བུ་འདི་ཆགས་བྲལ་དུ་སྒྲུབ་པར་བྱེད་པའི་རྟགས་ཀྱི་ངོ་བོ་མེད་ནས་མ་གྲུབ་པའི་གཏན་ཚིགས་ཡིན་པའོ། སྒྲ་མི་རྟག་པར་སྒྲུབ་པའི་རྟགས་ཀྱི་ངོ་བོ་མེད་ནས་མ་གྲུབ་པའི་གཏན་ཚིགས་ཡོད་དེ། གང་ཟག་གི་བདག་དེ་ཡིན་པའི་ཕྱིར། གཉིས་པ་གཞི་རྟགས་ཀྱི་འབྲེལ་བ་མེད་ནས་མ་གྲུབ་པ་ནི། དཔེར་ན། མིག་ཤེས་ཀྱི་བཟུང་བྱ་དེ། སྒྲ་མི་རྟག་པར་སྒྲུབ་པར་བྱེད་པའི་གཞི་རྟགས་ཀྱི་འབྲེལ་བ་མེད་ནས་མ་གྲུབ་པའི་གཏན་ཚིགས་ཡིན་པའོ། ། གསུམ་པ་ཕྱོགས་གཅིག་ལ་ལྟོས་ཏེ་མ་གྲུབ་པའི་གཏན་ཚིགས།གསུམ་པ་ཕྱོགས་གཅིག་ལ་ལྟོས་ཏེ་མ་གྲུབ་པའི་གཏན་ཚིགས་ལ་གཉིས། དང་པོ་ཆོས་ཅན་གྱི་ཕྱོགས་གཅིག་ལ་རྟགས་མེད་ནས་མ་གྲུབ་པ་ནི། དཔེར་ན། མཚན་མོ་ལོ་མ་ཁུམས་ཏེ་ཉལ་བ་དེ། ལྗོན་ཤིང་སེམས་ལྡན་དུ་སྒྲུབ་པར་བྱེད་པའི་ཆོས་ཅན་གྱི་ཕྱོགས་གཅིག་ལ་རྟགས་མེད་ནས་མ་གྲུབ་པའི་གཏན་ཚིགས་ཡིན་ནོ། །སྒྲ་མི་རྟག་པར་སྒྲུབ་པར་བྱེད་པའི་ཆོས་ཅན་གྱི་ཕྱོགས་གཅིག་ལ་རྟགས་མེད་ནས་མ་གྲུབ་པའི་གཏན་ཚིགས་ཡོད་དེ། རྩོལ་བྱུང་དེ་ཡིན་པའི་ཕྱིར། གཉིས་པ་ནི། རྟགས་ཀྱི་ཕྱོགས་གཅིག་ལ་ཆོས་ཅན་མེད་ནས་མ་གྲུབ་པ་ནི། དཔེར་ན། རྟོག་བྲལ་མ་འཁྲུལ་བའི་རིག་པ་དེ། ཟླ་བ་གཉིས་སྣང་གི་དབང་ཤེས་མངོན་སུམ་ཡིན་པར་སྒྲུབ་པར་བྱེད་པའི་རྟགས་ཀྱི་ཕྱོགས་གཅིག་ལ་ཆོས་ཅན་མེད་ནས་མ་གྲུབ་པའི་གཏན་ཚིགས་ཡིན་ནོ། ། དེ་དེ་སྒྲུབ་ཀྱི་རྟགས་ཀྱི་ཕྱོགས་གཅིག་ལ་ཆོས་ཅན་མེད་ནས་མ་གྲུབ་པའི་གཏན་ཚིགས་ཡིན་ཏེ། ཟླ་བ་གཉིས་སྣང་གི་དབང་ཤེས་རྟོག་བྲལ་ཡིན་ཡང་མ་འཁྲུལ་བའི་རིག་པ་མ་ཡིན་པའི་ཕྱིར། སྒྲ་མི་རྟག་པར་སྒྲུབ་པར་བྱེད་པའི་རྟགས་ཀྱི་ཕྱོགས་གཅིག་ལ་ཆོས་ཅན་མེད་ནས་མ་གྲུབ་པའི་གཏན་ཚིགས་ཡོད་དེ། ཆོས་ཡིན་ཡང་སྐད་ཅིག་མ་མ་ཡིན་པ་དེ་ཡིན་པའི་ཕྱིར་རོ། ། བཞི་པ་ཐ་དད་མེད་ནས་མ་གྲུབ་པའི་གཏན་ཚིགས།བཞི་པ་ཐ་དད་མེད་ནས་མ་གྲུབ་པའི་གཏན་ཚིགས་ལ་གསུམ། དང་པོ་རྟགས་ཆོས་ཐ་དད་མེད་ནས་མ་གྲུབ་པ་ནི། དཔེར་ན། མི་རྟག་པ་དེ། སྒྲ་མི་རྟག་པར་སྒྲུབ་པར་བྱེད་པའི་རྟགས་ཆོས་ཐ་དད་མེད་ནས་མ་གྲུབ་པའི་གཏན་ཚིགས་ཡིན་པའོ། ། གཉིས་པ་གཞི་རྟགས་ཐ་དད་མེད་ནས་མ་གྲུབ་པའི་གཏན་ཚིགས་ནི། དཔེར་ན། སྒྲ་དེ་སྒྲ་མི་རྟག་པར་སྒྲུབ་པར་བྱེད་པའི་གཞི་རྟགས་ཐ་དད་མེད་ནས་མ་གྲུབ་པའི་གཏན་ཚིགས་ཡིན་ནོ། ། གསུམ་པ་གཞི་ཆོས་ཐ་དད་མེད་ནས་མ་གྲུབ་པའི་གཏན་ཚིགས་ནི། དཔེར་ན། བྱས་པ་དེ། སྒྲ་སྒྲ་ཡིན་པར་སྒྲུབ་པར་བྱེད་པའི་གཞི་ཆོས་ཐ་དད་མེད་ནས་མ་གྲུབ་པའི་གཏན་ཚིགས་ཡིན་པའི་ཕྱིར་རོ། ། གཉིས་པ་བློ་ལ་ལྟོས་ནས་མ་གྲུབ་པའི་གཏན་ཚིགས།གཉིས་པ་བློ་ལ་ལྟོས་ནས་མ་གྲུབ་པའི་གཏན་ཚིགས་ལ། ཤེས་འདོད་མེད་ནས་མ་གྲུབ་པ་དང༌། ཐེ་ཚོམ་ཟ་ནས་མ་གྲུབ་པའི་གཏན་ཚིགས་དང་གཉིས། དང་པོ་ནི། ནང་བ་སངས་རྒྱས་པ་ལ། འདུས་བསགས་དེ། མིག་སོགས་གཞན་དོན་ཙམ་ཞིག་བྱེད་པར་སྒྲུབ་པའི་ཤེས་འདོད་མེད་ནས་མ་གྲུབ་པའི་གཏན་ཚིགས་ཡིན་པའི་ཕྱིར། སྒྲ་མི་རྟག་པ་རྟོགས་ཟིན་པའི་གང་ཟག་ལ་བྱས་པ་དེ། སྒྲ་མི་རྟག་པར་སྒྲུབ་པར་བྱེད་པའི་ཤེས་འདོད་མེད་ནས་མ་གྲུབ་པའི་གཏན་ཚིགས་ཡིན་ནོ། ། གཉིས་པ་ཐེ་ཚོམ་ཟ་ནས་མ་གྲུབ་པའི་གཏན་ཚིགས་ལ་གསུམ། དང་པོ་ཆོས་ཅན་ཀྱི་ངོ་བོ་ལ་ཐེ་ཚོམ་ཟ་ནས་མ་གྲུབ་པའི་གཏན་ཚིགས་ནི། དཔེར་ན། ཤ་ཟའི་བུམ་པ་བསྐལ་དོན་དུ་སོང་བའི་རྒོལ་བ་ལ། བྱས་པ་དེ། བསྐལ་དོན་ཤ་ཟའི་བུམ་པ་མི་རྟག་པར་སྒྲུབ་པར་བྱེད་པའི་ཆོས་ཅན་གྱི་ངོ་བོ་ལ་ཐེ་ཚོམ་ཟ་ནས་མ་གྲུབ་པའི་གཏན་ཚིགས་ཡིན་པའི་ཕྱིར། གཉིས་པ་རྟགས་ཀྱི་ངོ་བོ་ལ་ཐེ་ཚོམ་ཟ་ནས་མ་གྲུབ་པའི་གཏན་ཚིགས་ནི། དཔེར་ན། མཚན་མོའི་རྒྱ་མཚོར་སྐྱ་རྫས་མཐོང་ནས་དེ་དུ་བ་ཡིན་མིན་ཐེ་ཚོམ་ཟ་བའི་རྒོལ་བ་ལ། དུ་བ་དེ། མཚན་མོའི་རྒྱ་མཚོར་མེ་ཡོད་པར་སྒྲུབ་པར་བྱེད་པའི་རྟགས་ཀྱི་ངོ་བོ་ལ་ཐེ་ཚོམ་ཟ་ནས་མ་གྲུབ་པའི་གཏན་ཚིགས་ཡིན་པའི་ཕྱིར། གསུམ་པ་གཞི་རྟགས་ཀྱི་འབྲེལ་བ་ལ་ཐེ་ཚོམ་ཟ་ནས་མ་གྲུབ་པའི་གཏན་ཚིགས་ནི། དཔེར་ན། རྨ་བྱའི་སྒྲ་གང་ན་གྲགས་པར་མ་ངེས་པའི་རྒོལ་བ་ལ། རྨ་བྱའི་སྐད་གྲགས་པ་དེ། རི་སུལ་གསུམ་གྱི་དབུས་མ་ན་རྨ་བྱ་ཡོད་པར་སྒྲུབ་པར་བྱེད་པའི་གཞི་རྟགས་ཀྱི་འབྲེལ་བ་ལ་ཐེ་ཚོམ་ཟ་ནས་མ་གྲུབ་པའི་གཏན་ཚིགས་ཡིན་ནོ། ། གསུམ་པ་རྒོལ་བ་ལ་ལྟོས་ནས་མ་གྲུབ་པའི་གཏན་ཚིགས།གསུམ་པ་རྒོལ་བ་ལ་ལྟོས་ནས་མ་གྲུབ་པའི་གཏན་ཚིགས་ལ་གསུམ། དང་པོ་སྔ་རྒོལ་ལ་ལྟོས་ནས་མ་གྲུབ་པའི་གཏན་ཚིགས་ནི། དཔེར་ན། སྐྱེ་འཇིག་བྱེད་པ་དེ། སྔ་རྒོལ་གྲངས་ཅན་པས་ཕྱི་རྒོལ་ནང་བ་སངས་རྒྱས་པ་ལ་བློ་བདེ་སེམས་མེད་དུ་སྒྲུབ་པར་བྱེད་པའི་སྔ་རྒོལ་ལ་ལྟོས་ནས་མ་གྲུབ་པའི་གཏན་ཚིགས་ཡིན་པའོ། །དེ་ཡིན་པའི་རྒྱུ་མཚན་ནི། སྔར་མེད་གསར་དུ་སྐྱེ་བ་དང༌། སྐད་ཅིག་གིས་འཇིག་པ་བློ་བདེའི་སྟེང་དུ་ཚད་མས་མ་གྲུབ་པའི་ཕྱིར་རོ། །གཉིས་པ་ཕྱི་རྒོལ་ལ་ལྟོས་ནས་མ་གྲུབ་པའི་གཏན་ཚིགས་ནི། དཔེར་ན། ཤུན་པ་བཤུས་ན་འཆི་བ་དེ། སྔ་རྒོལ་གཅེར་བུ་པས་སངས་རྒྱས་པ་ལ་ཤིང་སེམས་ལྡན་དུ་སྒྲུབ་པར་བྱེད་པའི་ཕྱི་རྒོལ་ལ་ལྟོས་ནས་མ་གྲུབ་པའི་གཏན་ཚིགས་ཡིན་ནོ། །འདི་ཕྱི་རྒོལ་ལ་ལྟོས་ནས་མ་གྲུབ་པ་ཡིན་ཏེ། སྲོག་འགག་པ་འཆི་བའི་དོན་གང་ཞིག སངས་རྒྱས་པས་ཤིང་ལ་སྲོག་དང་རྣམ་ཤེས་འགག་པ་མ་གྲུབ་པའི་ཕྱིར། གསུམ་པ་སྔ་རྒོལ་ཕྱི་རྒོལ་གཉིས་ཀ་ལ་ལྟོས་ནས་མ་གྲུབ་པའི་གཏན་ཚིགས་ནི། དཔེར་ན། བྱས་པ་དེ། སྔ་རྒོལ་ཕྱི་རྒོལ་གཉིས་ཀས་སྒྲ་བྱས་མ་བྱས་གང་དུ་མ་ངེས་པ་ལ་སྒྲ་མི་རྟག་པར་སྒྲུབ་པར་བྱེད་པའི་རྒོལ་ཕྱི་རྒོལ་གཉིས་ཀ་ལ་ལྟོས་ནས་མ་གྲུབ་པའི་གཏན་ཚིགས་ཡིན་པའོ། །འདི་ལ་གཏན་ཚིགས་རིགས་པའི་དོན་བསྡུས་སུ། སྒྲ་ཆོས་ཅན། རྟག་སྟེ། མིག་ཤེས་ཀྱི་བཟུང་བྱ་ཡིན་པས་སོ། །ཞེས་གསུངས་སོ། ། དེ་ལྟར་ན་དོན་ལ་ལྟོས་ཏེ་མ་གྲུབ་པའི་གཏན་ཚིགས་བརྒྱད་དང༌། བློ་ལ་ལྟོས་ནས་མ་གྲུབ་པའི་གཏན་ཚིགས་བཞི་དང༌། རྒོལ་བ་ལ་ལྟོས་ནས་མ་གྲུབ་པའི་གཏན་ཚིགས་གསུམ་དང་མ་གྲུབ་པའི་གཏན་ཚིགས་བཅོ་ལྔ་ཡིན་ནོ། །གཏན་ཚིགས་རིགས་པའི་བསྡུས་དོན་དུ་གཞི་རྟགས་ཀྱི་འབྲེལ་བ་མེད་ནས་མ་གྲུབ་པའི་གཏན་ཚིགས་མ་བགྲང་བར་མ་གྲུབ་པའི་གཏན་ཚིགས་བཅུ་བཞི་གསུངས་ཏེ། དེ་ལས། གསུམ་པ་མ་གྲུབ་པའི་རྟགས་ལ། །རྒོལ་དང་ཕྱི་རྒོལ་གཉིས་ཀ་ལ། །མ་གྲུབ་པ་དང་རྣམ་པ་གསུམ། །རྟགས་དང་ཆོས་ཅན་གཞི་མ་གྲུབ། །རྟགས་དང་ཆོས་ཅན་འབྲེལ་བ་ལ། །ཐེ་ཚོམ་ཟ་བ་རྣམ་པ་གསུམ། །གཞི་ཆོས་རྟགས་ཐ་དད་མེད་གསུམ། །རྟགས་ཀྱི་ཕྱོགས་གཅིག་ཆོས་ཅན་ལ། །མ་གྲུབ་པ་དང་ཆོས་ཅན་གྱི། །ཕྱོགས་གཅིག་ལ་ནི་རྟགས་མ་གྲུབ། །ཤེས་འདོད་མེད་དང་བཅུ་བཞིའོ། །ཞེས་གསུངས་སོ། །རི་བོང་རྭ་ཡོད་མེད་གང་དུ་མི་ཤེས་པའི་རྒོལ་ཕྱི་རྒོལ་ལ་རི་བོང་རྭ་དེ། རི་བོང་རྭ་རི་བོང་རྭར་སྒྲུབ་པར་བྱེད་པའི་མ་གྲུབ་པའི་གཏན་ཚིགས་གང་དང་གང་ཡིན་མིན་དང༌། མ་གྲུབ་པའི་གཏན་ཚིགས་བཅོ་ལྔའི་ནང་ལ་བྱས་པ་རྟགས་སུ་བཀོད་པའི་སྦྱོར་སྐོར་གང་རུང་གི་རྟགས་གང་དང་གང་ཡོད་སོགས་དཔྱད་པར་བྱའོ། ། གཉིས་པ་འགལ་རྟགས་བཤད།གཉིས་པ་འགལ་རྟགས་བཤད་པ་ལ། སྦྱོར་བ་གང་རུང་གི་འགལ་རྟགས་ཀྱི་མཚན་ཉིད། དབྱེ་བ་གཉིས། དང་པོ་སྦྱོར་བ་གང་རུང་གི་འགལ་རྟགས་ཀྱི་མཚན་ཉིད། སྦྱོར་བ་དེ་སྒྲུབ་ཀྱི་ཕྱོགས་ཆོས་གྲུབ་ཅིང་རང་ཕྱོགས་ཆོས་ཅན་དུ་སོང་བའི་རྒོལ་བས་ཁྱབ་པ་ཕྱིན་ཅི་ལོག་ཏུ་ངེས་པ། སྒྲ་རྟག་པར་སྒྲུབ་པར་བྱེད་པའི་འགལ་རྟགས་ཀྱི་མཚན་ཉིད། སྒྲ་རྟག་པར་སྒྲུབ་པའི་ཕྱོགས་ཆོས་ཡིན་ཞིང༌། རང་ཕྱོགས་ཆོས་ཅན་དུ་སོང་བའི་རྒོལ་བས་ཁྱབ་པ་ཕྱིན་ཅི་ལོག་ཏུ་ངེས་པ། མཚན་གཞི་ནི། བྱས་པ་ལྟ་བུའོ། །སྤྱིར་རྟགས་སུ་བཀོད་པ་ཐམས་ཅད་རྟགས་ཡང་དག་དང་ལྟར་སྣང་གཉིས་སུ་ངེས་ལ། མཚན་ཉིད་དེའི་ཟུར་ལ་ཁྱབ་པ་ཕྱིན་ཅི་ལོག་ཏུ་ངེས་པ་ཞེས་པས་རྟགས་ཡང་དག་ཡིན་པ་བཅད་དེ། རྟགས་ཡང་དག་ཡིན་ན་ཁྱབ་པ་རྣལ་མར་ངེས་དགོས་པའི་ཕྱིར། རྟགས་ལྟར་སྣང་ལ་འགལ་མ་ངེས་མ་གྲུབ་གསུམ་དུ་ངེས་ལ། ཕྱོགས་ཆོས་ཞེས་པས་མ་གྲུབ་པའི་གཏན་ཚིགས་ཡིན་པ་བཅད་དེ། མ་གྲུབ་པའི་གཏན་ཚིགས་ཡིན་ན་ཕྱོགས་ཆོས་མ་གྲུབ་དགོས་པའི་ཕྱིར། རང་ཕྱོགས་ཆོས་ཅན་དུ་སོང་བའི་གང་ཟག་གིས་ཁྱབ་པ་ཕྱིན་ཅི་ལོག་ཏུ་ངེས་པ་ཞེས་པས་མ་ངེས་པའི་རྟགས་ཡིན་པ་སེལ་ཏེ། མ་ངེས་པའི་རྟགས་ཡིན་ན་རང་ཕྱོགས་ཆོས་ཅན་དུ་སོང་བའི་གང་ཟག་གིས་ཁྱབ་པ་རྣལ་མ་དང་ཁྱབ་པ་ཕྱིན་ཅི་ལོག་གང་དུ་ཡང་མ་ངེས་པ་དགོས་པའི་ཕྱིར་རོ། ། གཉིས་པ་དབྱེ་བ་ནི། འགལ་རྟགས་ལ་སྦྱོར་བའི་སྒོ་ནས་དབྱེ་ན། འབྲས་རང་མ་དམིགས་པའི་འགལ་རྟགས་གསུམ། མཚན་ཉིད་རིམ་བཞིན། སྦྱོར་བ་གང་རུང་གི་འགལ་རྟགས་གང་ཞིག ཁྱོད་སྦྱོར་བ་དེའི་དགག་བྱའི་ཆོས་སུ་འགྲོ་རྒྱུ་དང་དེ་བྱུང་དུ་འབྲེལ་བ། སྦྱོར་བ་གང་རུང་གི་འགལ་རྟགས་གང་ཞིག དེ་སྒྲུབ་ཀྱི་དགག་བྱའི་ཆོས་ཡིན་ན་བདག་ཉིད་གཅིག་པས་ཁྱབ་བྱེད་ཡིན་པ།སྦྱོར་བ་གང་རུང་གི་འགལ་རྟགས་གང་ཞིག དེ་སྒྲུབ་ཀྱི་དགག་བྱའི་ཆོས་ཡིན་ན་དགག་པ་ཡིན་པ། དཔེ་བརྗོད་ནི་རིམ་བཞིན། དུ་ལྡན་གྱི་ལ་ལ་མེ་མེད་པར་སྒྲུབ་པ་ལ་དུ་བ་ལྟ་བུ་དང༌། སྒྲ་རྟག་པར་སྒྲུབ་པ་ལ་བྱས་པ་ལྟ་བུ་དང༌། ཤིང་གིས་དབེན་པའི་བྲག་རྫོང་དུ་ཤ་བ་ཡོད་པར་སྒྲུབ་པ་ལ་ཤིང་མེད་པ་ལྟ་བུའོ། ། འགལ་རྟགས་ལ་བརྗོད་ཚུལ་གྱི་སྒོ།འགལ་རྟགས་ལ་བརྗོད་ཚུལ་གྱི་སྒོ་ནས་དབྱེ་ན་བཞི་ལས། དང་པོ་ཆོས་ཀྱི་ངོ་བོ་སྒྲུབ་པའི་འགལ་རྟགས་ཀྱི་མཚན་ཉིད། སྦྱོར་སྐོར་དེའི་ཕྱོགས་ཆོས་གྲུབ་ཅིང་རང་ཕྱོགས་ཆོས་ཅན་དུ་སོང་བའི་རྒོལ་བས་དེ་སྒྲུབ་ཀྱི་བསྒྲུབ་བྱའི་ཆོས་ཀྱི་ངོ་བོ་དང་ཁྱབ་པ་ཕྱིན་ཅི་ལོག་ཏུ་ངེས་པ། དཔེར་ན་སྒྲ་རྟག་པར་སྒྲུབ་པ་ལ་བྱས་པ་ལྟ་བུའོ། །སྦྱོར་བ་གང་ཡང་རུང་བའི་འགལ་རྟགས་ཡིན་ན་ཆོས་ཀྱི་ངོ་བོ་སྒྲུབ་པའི་འགལ་རྟགས་ཡིན་པས་ཁྱབ་པ་ཡིན་ནོ། །གཉིས་པ་ཆོས་ཀྱི་ཁྱད་པར་སྒྲུབ་པའི་འགལ་རྟགས་ཀྱི་མཚན་ཉིད། སྦྱོར་བ་དེ་སྒྲུབ་ཀྱི་ཕྱོགས་ཆོས་གྲུབ་ཅིང་ཞེ་འདོད་ལ་བསྒྲུབ་བྱའི་ཆོས་ཀྱི་ངོ་བོར་བཟུང་ཞིང༌། བརྗོད་ཚུལ་ལ་བསྒྲུབ་བྱའི་ཆོས་ཀྱི་ཁྱད་པར་བཟུང་བའི་ཆོས་དང་ཁྱབ་པ་ཕྱིན་ཅི་ལོག་ཏུ་རང་ཕྱོགས་ཆོས་ཅན་དུ་སོང་བས་ངེས་པ། དཔེར་ན། མིག་སོགས་དེ་འདུས་པ་མ་ཡིན་པའི་ཡུལ་ཅན་གཞན་དོན་བྱེད་པར་སྒྲུབ་པ་ལ་འདུས་བསགས་ལྟ་བུའོ། །གསུམ་པ་ཆོས་ཅན་གྱི་ངོ་བོ་སྒྲུབ་པའི་འགལ་རྟགས་ཀྱི་མཚན་ཉིད། སྦྱོར་བ་དེ་སྒྲུབ་ཀྱི་ཕྱོགས་ཆོས་གྲུབ་ཅིང་ཞེ་འདོད་ལ་བསྒྲུབ་བྱའི་ཆོས་ཀྱི་ངོ་བོར་བཟུང་ཞིང༌། བརྗོད་ཚུལ་ལ་བསྒྲུབ་བྱའི་ཆོས་ཅན་གྱི་ངོ་བོར་བཟུང་བའི་ཆོས་དང་ཁྱབ་པ་ཕྱིན་ཅི་ལོག་ཏུ་རང་ཕྱོགས་ཆོས་ཅན་དུ་སོང་བས་ངེས་པ། དཔེར་ན་བྱེ་བྲག་པས་སངས་རྒྱས་པ་ལ་དངོས་གྱུར་གྱི་ནམ་མཁའ་རྟག་པར་སྒྲུབ་པ་ལ་འདུས་མ་བྱས་བཀོད་པ་ལྟ་བུའོ། །འདིའི་ཆོས་ཅན་ནམ་མཁའ་དང་ངོ་བོ་དངོས་པོ་ལ་བྱས་ནས་འདུས་མ་བྱས་དེ། ནམ་མཁའ་དངོས་པོ་སྒྲུབ་པར་བྱེད་པའི་སྤྱིར་འགལ་རྟགས་ཡིན་ལ། འོན་ཀྱང་བྱེ་བྲག་པས་ནམ་མཁའ་མ་རྟོགས་པས་བྱེ་བྲག་པ་ལ་ཕྱོགས་ཆོས་མ་ཡིན་ནམ་དཔྱད་པར་བྱའོ། །བཞི་བ་ཆོས་ཅན་གྱི་ཁྱད་པར་སྒྲུབ་པའི་འགལ་རྟགས་ཀྱི་མཚན་ཉིད། སྦྱོར་བ་དེ་སྒྲུབ་ཀྱི་ཕྱོགས་ཆོས་གྲུབ་ཅིང་ཞེ་འདོད་ལ་བསྒྲུབ་བྱའི་ཆོས་ཀྱི་ངོ་བོར་བཟུང་ཞིང༌། བརྗོད་ཚུལ་ལ་བསྒྲུབ་བྱའི་ཆོས་ཅན་གྱི་ཁྱད་པར་བཟུང་བའི་ཆོས་དང་ཁྱབ་པ་ཕྱིན་ཅི་ལོག་ཏུ་རང་ཕྱོགས་ཆོས་ཅན་དུ་སོང་བས་ངེས་པ། དཔེར་ན་མིག་སོགས་འདུས་པ་མ་ཡིན་པའི་ཡུལ་ཅན་དེ་གཞན་དོན་བྱེད་པར་སྒྲུབ་པ་ལ་འདུས་བསགས་ལྟ་བུའོ། །དེའི་ཞེ་འདོད་ཀྱི་སྦྱོར་བ་ནི། མིག་སོགས་ཆོས་ཅན། འདུས་པ་མ་ཡིན་པའི་ཡུལ་ཅན་གྱི་དོན་བྱེད་པའམ་བདག་དོན་བྱེད་དེ། འདུས་བསགས་ཡིན་པའི་ཕྱིར་ཞེས་པ་ལྟ་བུའོ། །དེ་ཡང་གྲངས་ཅན་པས་ཤེས་བྱ་ཐམས་ཅད་ཉེར་ལྔར་གྲངས་ངེས་པར་འདོད་ལ། དེ་ལས་ཤེས་རིག་གི་སྐྱེས་བུ་ནི་བདག་དང༌། གཞན་རྣམས་བདག་གི་ལོངས་སྤྱད་བྱ་དང་དབང་བསྒྱུར་བྱ་ཡིན་ཞིང༌། མིག་སོགས་ཉེར་བཞི་པོ་བདག་གི་དགོས་པ་སྒྲུབ་པར་བྱེད་པས་བདག་གི་བར་འདོད་དོ། །དེ་དག་སྒྲུབ་བྱེད་ཡང་ཤེས་རིག་གི་སྐྱེས་བུ་བདག་ཏུ་སྒྲུབ་པའི་རིགས་པ་དང༌། གཞན་རྣམས་བདག་གི་བར་སྒྲུབ་པའི་རིགས་པ་གཉིས་ལས། དང་པོ་ནི། ཤེས་རིག་གི་སྐྱེས་བུ་ཆོས་ཅན། བདག་ཡིན་ཏེ། བཅིང་ཐར་གྱི་རྟེན་ཡིན་པའི་ཕྱིར་ཞེས་སོགས་རིགས་པ་ལྟར་སྣང་དུ་མས་སྒྲུབ་པར་བྱེད་དོ། །གཉིས་པ་མིག་སོགས་བདག་གི་བར་སྒྲུབ་པའི་སྦྱོར་བ་ནི། གྲངས་ཅན་པའི་སྨྲས་ཆོས་དང་ཞེ་འདོད་གཉིས་ལས། དང་པོ་ནི། མིག་སོགས་ཆོས་ཅན། གཞན་དོན་བྱེད་དེ། འདུས་བསགས་ཡིན་པའི་ཕྱིར། དཔེར་ན་མལ་ཆ་དང་སྟན་བཞིན། ཞེས་སྨྲ་བར་བྱེད་ལ། གཉིས་པ་ཞེ་འདོད་ནི། མིག་སོགས་ཆོས་ཅན། བདག་དོན་བྱེད་དེ། འདུས་ཤིང་བསགས་པའི་ཕྱིར། ཞེས་པའོ། །རྣམ་འགྲེལ་གྱི་འགྲེལ་བཤད་རིན་ཆེན་ཕྲེང་བ་ལས། འཕངས་བའི་ཞེ་འདོད་ཀྱི་བསྒྲུབ་བྱ་ཡིན་ན་བསྒྲུབ་བྱར་འདོད་དགོས་ཞེས་སྟོན་པས་སོ། །དཔེར་ན་གྲངས་ཅན་པས་མིག་སོགས་གཞན་དོན་བྱེད་དེ། འདུས་བསགས་ཡིན་པས་སོ། །ཞེས་བཀོད་པ་ན། མིག་སོགས་བདག་གི་དོན་བྱེད་པ་དེ། དངོས་སུ་མ་བརྗོད་ན་ཡང་བསྒྲུབ་པར་འདོད་པ་བཞིན། ཞེས་གསུངས་སོ། དེ་ལྟར་སྨྲས་ཆོས་ཀྱི་སྦྱོར་བ་དེ་ལ་འགོད་ཚུལ་གྱི་སྒོ་ནས་གཉིས་ཡོད་པ་སྔར་ལྟར་རོ། །འདུས་བསགས་ཀྱི་དོན་སྐད་ཅིག་གམ་རྡུལ་དུ་མ་འདུས་པ་ལ་བྱས་ན་བཏགས་གཞི་དང་ཅི་རིགས་ཀྱི་དབང་དུ་བྱས་ན་མིག་སོགས་ཞེས་པའི་སོགས་ཁོངས་ནས་ཤེས་བྱ་ཉེར་གསུམ་བཏོན་ནས་ཉེར་བཞི་ཆོས་ཅན་འཛིན་པ་ཡིན་ནོ། །དེ་ལྟར་ན་གྲངས་ཅན་པས་འདུས་བསགས་ཀྱི་རྟགས་ཀྱིས་དེ་སྒྲུབ་ཀྱི་ཕྱོགས་ཆོས་མ་གྲུབ་ལ་ཁས་བླངས་ཙམ་གྱིས་གྲུབ་པ་ཡིན་ལ། སྤྱིར་འདུས་བསགས་དེ། མིག་སོགས་བདག་དོན་བྱེད་པར་སྒྲུབ་པའི་འགལ་རྟགས་ཡིན་པའོ། །ཁ་ཅིག་ཆོས་ཀྱི་ཁྱད་པར་སྒྲུབ་པའི་འགལ་རྟགས་ཞེས་བཤད་པ་མི་འཐད་པར་ཐལ། ཆོས་ཀྱི་ཁྱད་པར་འགོག་པའི་འགལ་རྟགས་ཞེས་བཤད་དགོས་པའི་ཕྱིར། མ་གྲུབ་ན། དེར་ཐལ། ཕྱོགས་གླང་གིས། འདི་ནི་ཆོས་ཀྱི་ཁྱད་པར་ཕྱིན་ཅི་ལོག་ཏུ་སྒྲུབ་པའི་འགལ་བ་ཡིན་ནོ། །ཞེས་དང༌། གཏན་ཚིགས་རིགས་པའི་བསྡུས་དོན་ལས། ཆོས་ཀྱི་ངོ་བོ་དང༌། ཁྱད་པར་དང༌། ཆོས་ཅན་གྱི་ངོ་བོ་དང༌། ཁྱད་པར་འགོག་པའི་འགལ་རྟགས་བཞི་སྟེ། ཞེས་གསུངས་པའི་ཕྱིར་ན་མ་ཁྱབ་སྟེ། ལུང་དེ་གཉིས་ཀྱི་ཆོས་ཀྱི་ཁྱད་པར་འགོག་པ་དང་ཕྱིན་ཅི་ལོག་སྒྲུབ་པའི་རྟགས་ཡང་དག་དང༌། ཆོས་ཀྱི་ཁྱད་པར་སྒྲུབ་པའི་འགལ་རྟགས་ཡིན་ཞེས་པའོ། །གཞན་ལ་རིགས་འགྲེས། རྟགས་འདི་དག་ཆོས་ཅན་གྱི་སྟེང་དུ་འགལ་རྟགས་སུ་སོང་བའི་རྟགས་དེའི་ཆོས་ཀྱི་ངོ་བོ་འགོག་པར་བྱེད་པ་ལ་ཁྱད་པར་མེད་མོད་ངག་གི་འགོད་ཚུལ་གྱི་དབྱེ་བ་ཐ་དད་པ་ཙམ་ཡིན་ཏེ། རྣམ་འགྲེལ་ལེའུ་བཞི་བ་ལས། དེ་ནི་ལྟོས་ནས་ཆོས་དག་དང༌། །ཆོས་ཅན་ཁྱད་པར་ཡིན་པར་བརྗོད། །མ་བརྗོད་ན་ཡང་འདོད་པ་ནི། །སྐབས་ལས་རྟོགས་པར་འགྱུར་བ་ཡིན། །དེ་དཔེར་རྗེས་འགྲོ་མེད་པ་ཡི། །སྐྱོན་ཡང་ཇི་སྐད་བདག་གཞན་ན། །དེ་མ་གྲུབ་ཅེས་བཤད་བཞིན་ཏེ། །དེར་ནི་འདོད་ལ་གནོད་བྱེད་ཡིན། །ཞེས་དང༌། རྣམ་ངེས་ལས། རྣམ་པར་བཞག་པ་ཙམ་ཐ་དད་ཙམ་ཡིན་གྱི། དོན་ནི་མ་ཡིན་ནོ། །ཞེས་གསུངས་པའི་ཕྱིར། དེ་ཡང་བཀའ་བཞི་བ་བསོད་ནམས་བཟང་པོས་ཚུལ་འདི་ལྟར་གསུངས་ཏེ། རྣམ་འགྲེལ་གྱི་འགྲེལ་བཤད་རིན་ཆེན་ཕྲེང་བ་ལས། བདག་དོན་བྱེད་པ་ལྟ་བུ་དེ་ནི་ངག་གི་འགོད་ཚུལ་ལ་ལྟོས་ནས་ཆོས་ཀྱི་ཁྱད་པར་དང༌། ཆོས་ཅན་གྱི་ཁྱད་པར་དུ་སློབ་དཔོན་གྱིས་བརྗོད་པ་ཡིན་ལ། དོན་ལ་འགལ་རྟགས་ཀུན་འདོད་ཡུལ་བཀག་པ་གཅིག་པུར་འདུའོ། །མིག་སོགས་ཆོས་ཅན། བདག་རྟག་པ་གཞན་དོན་བྱེད་དེ། འདུས་བསགས་ཡིན་པས་སོ། །ཞེས་གྲངས་ཅན་གྱིས་བཀོད་པ་ན་ཆོས་ཅན། བདག་དོན་བྱེད་པ་དེ་ཆོས་ཀྱི་ཁྱད་པར་བརྗོད་དེ། དེར་རློམས་ནས་ཆོས་དང་གཞི་མཐུན་དུ་བརྗོད་པས་སོ། །མིག་སོགས་ཆོས་ཅན། དེ་ཡི་ཆོས་ཀྱི་ཁྱད་པར་དང་འགལ་བར་བཞག་སྟེ། བདག་དོན་བྱེད་པ་དེ་དེ་ཡི་ཆོས་ཀྱི་ཁྱད་པར་དུ་བརྗོད་ཅིང་བཟུང་སྟེ་བདག་དོན་བྱེད་པ་སྟེ། བཀག་པའི་སྒོ་ནས་དེ་ཡི་ཚོགས་དོན་བཀག་པས་སོ། །མིག་སོགས་འདུས་པ་མ་ཡིན་པའི་དོན་ནམ་ཆེད་ཆོས་ཅན། གཞན་དོན་བྱེད་དེ། འདུས་བསགས་ཡིན་པས་སོ། །ཞེས་གྲངས་ཅན་གྱིས་བཀོད་པ་ན་ཆོས་ཅན། བདག་དོན་བྱེད་པ་དེ་ཆོས་ཅན་གྱི་ཁྱད་པར་དུ་བརྗོད་དེ། དེར་རློམས་ནས་ཆོས་ཅན་དང་གཞི་མཐུན་དུ་བརྗོད་པས་སོ། །དེས་ན་འདུས་བསགས་ཆོས་ཅན། མིག་སོགས་བདག་རྟག་པའི་དོན་གཞན་དོན་བྱེད་པར་སྒྲུབ་པའི་ཆོས་ཅན་གྱི་ཁྱད་པར་དང་འགལ་བར་བཞག་སྟེ། དེ་དེ་ཡི་ཆོས་ཅན་གྱི་ཁྱད་པར་དུ་བརྗོད་ཅིང་བཟུང་སྟེ་བཀག་པའི་སྒོ་ནས་དེ་ཡི་ཚོགས་དོན་བཀག་པས་སོ། །དངོས་སུ་མ་སྨྲས་ན་བསྒྲུབ་བྱར་ཇི་ལྟར་ཤེས་ཅེ་ན། གྲངས་ཅན་ཆོས་ཅན། མིག་སོགས་བདག་དོན་བྱེད་པ་དེ་དེ་སྒྲུབ་ཀྱི་བསྒྲུབ་བྱར་དངོས་སུ་མ་བརྗོད་ཀྱང་དེ་ཡི་བསྒྲུབ་བྱར་འདོད་པར་ཐལ། ཁྱོད་སངས་རྒྱས་པ་དང་བདག་ཡོད་མེད་རྩོད་པའི་སྐབས་སུ་དེ་ཁོ་ན་དེ་ཡི་འདོད་ཡུལ་གྱི་བསྒྲུབ་བྱར་བྱས་ནས་མིག་སོགས་གཞན་དོན་བྱེད་པར་སྒྲུབ་པའི་རང་རྒྱུད་ཀྱི་སྦྱོར་ངག་མ་འཆོལ་བར་སྨྲས་པས་སོ། །བདག་དོན་བྱེད་པ་དེ་དེ་སྒྲུབ་ཀྱི་བསྒྲུབ་བྱའི་ཆོས་ཡིན་ན་སྐྱོན་ཅིར་འགྱུར་ཞེ་ན། འདུས་བསགས་ཆོས་ཅན། མིག་སོགས་བདག་དོན་བྱེད་སྒྲུབ་ཀྱི་རྟགས་ཡང་དག་མ་ཡིན་པར་ཐལ། བདག་དོན་བྱེད་པ་དེ་དེ་སྒྲུབ་གྱི་མཐུན་ཡུལ་གྱི་བསྒྲུབ་བྱ་དངོས་ཡིན་ཞིང༌། དཔེར་བཟུང་བའི་མལ་ཆ་དང་སྟན་ལ་སོགས་པ་ལ་རྗེས་འགྲོ་མི་བྱེད་པའི་ཕྱིར། ཞེས་སོགས་གསུངས་སོ། ། གསུམ་པ་མ་ངེས་པའི་གཏན་ཚིགས།གསུམ་པ་མ་ངེས་པའི་གཏན་ཚིགས་བཤད་པ་ལ། མཚན་ཉིད་དང༌།དབྱེ་བ་གཉིས། དང་པོ་སྦྱོར་བ་གང་རུང་གི་མ་ངེས་པའི་རྟགས་ཀྱི་མཚན་ཉིད། དེ་སྒྲུབ་ཀྱི་ཕྱོགས་ཆོས་གྲུབ་ཅིང༌། རང་ཕྱོགས་ཆོས་ཅན་དུ་སོང་བའི་གང་ཟག་གིས་དེ་སྒྲུབ་ཀྱི་ཁྱབ་པ་རྣལ་མ་ཡང་མ་ངེས་ཕྱིན་ཅི་ལོག་ཏུ་མ་ངེས་པ། མཚན་གཞི་ནི་སྒྲ་རྟག་པར་སྒྲུབ་པར་བྱེད་པ་ལ་གཞལ་བྱ་ལྟ་བུའོ། །མཚན་ཉིད་དེའི་ཟུར་ལ་ཕྱོགས་ཆོས་ཞེས་པས་མ་གྲུབ་པའི་གཏན་ཚིགས་སེལ་ལ། ཁྱབ་པ་རྣལ་མ་ཡང་མ་ངེས་ཞེས་པས་རྟགས་ཡང་དག་ཡིན་པ་སེལ། རང་ཕྱོགས་ཆོས་ཅན་དུ་སོང་བའི་གང་ཟག་གིས་དེ་སྒྲུབ་ཀྱི་ཁྱབ་པ་ཕྱིན་ཅི་ལོག་ཏུ་མ་ངེས་པ་ཞེས་པས་འགལ་རྟགས་སེལ་ཏེ། འགལ་རྟགས་ཡིན་ན་རང་ཕྱོགས་ཆོས་ཅན་དུ་སོང་བའི་གང་ཟག་གིས་དེ་སྒྲུབ་ཀྱི་ཁྱབ་པ་ཕྱིན་ཅི་ལོག་ཏུ་ངེས་པ་དགོས་པའི་ཕྱིར་རོ། ། གཉིས་པ་དབྱེ་བ་ལ། ཐུན་མོང་མ་ཡིན་པའི་མ་ངེས་པའི་གཏན་ཚིགས་དང༌། ཐུན་མོང་གི་མ་ངེས་པའི་གཏན་ཚིགས་གཉིས་སོ། །དང་པོ་ལ་མཚན་ཉིད། དབྱེ་བ། ཐུན་མོང་མ་ཡིན་པའི་དོན་བཤད་པ་དང་གསུམ། དེ་སྒྲུབ་ཀྱི་ཐུན་མོང་མ་ཡིན་པའི་མ་ངེས་པའི་རྟགས་ཀྱི་མཚན་ཉིད། རང་ཕྱོགས་ཆོས་ཅན་དུ་སོང་བའི་གང་ཟག་གིས་དེ་སྒྲུབ་ཀྱི་མཐུན་ཕྱོགས་ལ་ཡོད་པར་མ་ངེས་མི་མཐུན་ཕྱོགས་ལ་ཡོད་པར་མ་ངེས་པའི་དེ་སྒྲུབ་ཀྱི་མ་ངེས་པའི་གཏན་ཚིགས། རང་ཕྱོགས་ཆོས་ཅན་དུ་སོང་བའི་གང་ཟག་གིས་མཐུན་ཕྱོགས་ལ་ཡོད་པར་མ་ངེས་མི་མཐུན་ཕྱོགས་ལ་ཡོད་པར་མ་ངེས་ཞེས་པས་ཐུན་མོང་གི་མ་ངེས་པའི་གཏན་ཚིགས་སེལ་ཏེ། ཐུན་མོང་གི་མ་ངེས་པའི་གཏན་ཚིགས་ཡིན་ན་མཐུན་ཕྱོགས་མི་མཐུན་ཕྱོགས་གང་རུང་ལ་ཡོད་པར་ངེས་པ་ཞིག་དགོས་པའི་ཕྱིར། མ་ངེས་པ་ཞེས་པས་རྟགས་ཡང་དག་དང་མ་གྲུབ་པ་དང་འགལ་རྟགས་རྣམས་སེལ་ཏེ། དེ་རྣམས་གང་རུང་ཡིན་ན་མ་ངེས་པའི་གཏན་ཚིགས་མ་ཡིན་དགོས་པའི་ཕྱིར། གཉིས་པ་དབྱེ་ན། གཏན་ཚིགས་རིགས་པའི་དོན་བསྡུས་ལས། དབྱེ་ན། དང་པོ་ལ་མཐུན་ཕྱོགས་ལ་ཡོད་ཀྱང་མ་མཐོང༌། མེད་ནས་མ་མཐོང༌། མི་མཐུན་ཕྱོགས་ལ་ཡོད་ཀྱང་མ་མཐོང༌། མེད་ནས་མ་མཐོང་བ་བཞི་སྟེ། རིམ་པ་བཞིན་དཔེར་ན་སྒྲ་མི་རྟག་སྟེ་མཉན་བྱ་ཡིན་པས་སོ། །རྟག་སྟེ། མཉན་བྱ་ཡིན་པས་སོ། །གསོན་ལུས་ཆོས་ཅན། བདག་ཡོད་དེ། སྲོག་ཡོད་པས་སོ། །བདག་མེད་དེ། སྲོག་ཡོད་པས་སོ། །ཞེས་པ་ལྟ་བུའོ། །ཞེས་གསུངས་སོ། །ཕྱི་མ་འདི་གཉིས་རྒོལ་བ་ཕྱི་རོལ་བ་འགའ་ཞིག་གི་དབང་དུ་བྱས་པའོ། །སྐབས་འདིའི་མཐོང་མ་མཐོང་ཞེས་པ་སྣང་མ་སྣང་གི་དོན་མ་ཡིན་པར་ངེས་མ་ངེས་ལ་གོ་དགོས་སོ། །དེ་ལྟ་མ་ཡིན་ན། དེ་ཕྱིར་དངོས་པོ་མཐོང་བ་ཡི། །ཡོན་ཏན་མཐའ་དག་མཐོང་བ་ཉིད། །ཅེས་གསུངས་པ་སོགས་ཀྱིས་གནོད་དོ། །མཉན་བྱ་སྒྲ་མི་རྟག་པར་སྒྲུབ་པའི་ཐུན་མོང་མ་ཡིན་པའི་མ་ངེས་པའི་གཏན་ཚིགས་ཡིན་པར་གསུངས་པ་རྒོལ་བ་དབང་རྟུལ་གྱི་ངོར་ཡིན་ཏེ། རིན་ཆེན་འབྱུང་གནས་ཞི་བའི་ནང་གི་ཁྱབ་པ་ལས། ཐུན་མོང་མ་ཡིན་གཏན་ཚིགས་ཀྱི། །ཉེས་པ་རྨོངས་ལ་ལྟོས་པ་ཡིན། །ཞེས་དང༌། དེའི་ཕྱིར་དཔེ་ལ་ཆགས་རྣམས་ལ། །བུམ་པའི་དཔེ་ནི་བསྟན་པ་མཛད། །དེ་མི་དགོས་ལ་དོན་མེད་ཡིན། །ནང་གི་ཁྱབ་པ་བློ་ལྡན་ལའོ། །ཞེས་གསུངས་པའི་ཕྱིར་རོ། །གསུམ་པ་ཐུན་མོང་མ་ཡིན་པའི་དོན་ནི། རང་ཕྱོགས་ཆོས་ཅན་དུ་སོང་བའི་གང་ཟག་གིས་དེ་སྒྲུབ་ཀྱི་རྩོད་གཞི་དང༌། མཐུན་ཕྱོགས་དང་མི་མཐུན་ཕྱོགས་གཉིས་ཀྱི་ནང་ནས་རྩོད་གཞི་ལ་ཡོད་པར་ངེས་ཀྱི། མཐུན་ཕྱོགས་ལ་ཡོད་པར་མ་ངེས་མི་མཐུན་ཕྱོགས་ལ་ཡོད་པར་མ་ངེས་པ་དེ་སྒྲ་མི་རྟག་པར་སྒྲུབ་པའི་ཐུན་མོང་མ་ཡིན་པའི་རྟགས་ཡིན་པའི་དོན་ཡིན་ནོ། ། གཉིས་པ་ཐུན་མོང་གི་མ་ངེས་པའི་གཏན་ཚིགས།གཉིས་པ་ཐུན་མོང་གི་མ་ངེས་པའི་གཏན་ཚིགས་བཤད་པ་ལ། མཚན་ཉིད། དབྱེ་བ་གཉིས། དང་པོ་ཐུན་མོང་གི་མ་ངེས་པའི་གཏན་ཚིགས་ཀྱི་མཚན་ཉིད། རང་ཕྱོགས་ཆོས་ཅན་དུ་སོང་བའི་གང་ཟག་གིས་དེ་སྒྲུབ་ཀྱི་མཐུན་ཕྱོགས་ལ་ཡོད་པར་ངེས་པ་དང་མི་མཐུན་ཕྱོགས་ལ་ཡོད་པར་ངེས་པ་གང་རུང་ཡིན་པའི་མ་ངེས་པའི་གཏན་ཚིགས། སེལ་བྱ་སྦྱར་ཚུལ་སྔ་མ་དག་གིས་ཤེས་པར་བྱའོ། ། གཉིས་པ་དབྱེ་བ་ནི། དེ་སྒྲུབ་ཀྱི་ཐུན་མོང་གི་དངོས་ཀྱི་མ་ངེས་པ་དང༌། དེ་སྒྲུབ་ཀྱི་ལྷག་ལྡན་གྱི་མ་ངེས་པའི་གཏན་ཚིགས་གཉིས། དང་པོ་ལ་མཚན་ཉིད། དབྱེ་བ་གཉིས། དང་པོ་དེ་སྒྲུབ་ཀྱི་ཐུན་མོང་གི་དངོས་ཀྱི་མ་ངེས་པའི་གཏན་ཚིགས་ཀྱི་མཚན་ཉིད། མ་ངེས་པའི་གཏན་ཚིགས་གང་ཞིག རང་ཕྱོགས་ཆོས་ཅན་དུ་སོང་བའི་གང་ཟག་གིས་མཐུན་ཕྱོགས་ལ་ཡོད་པར་ངེས་མི་མཐུན་ཕྱོགས་ལ་ཡོད་པར་ངེས་པ། གཉིས་པ་དབྱེ་བ་ལ་བཞི། དང་པོ་མཐུན་ཕྱོགས་མི་མཐུན་ཕྱོགས་གཉིས་ཀ་ལ་ཁྱབ་བྱེད་དུ་འཇུག་པ་ནི། དཔེར་ན། སྒྲ་རྟག་པར་སྒྲུབ་པར་བྱེད་པ་ལ་རི་བོང་རྭ་མ་ཡིན་པ་ལྟ་བུའོ། །གཉིས་པ་མཐུན་ཕྱོགས་མི་མཐུན་ཕྱོགས་གཉིས་ཀ་ལ་ཆ་གཉིས་སུ་འཇུག་པ་ནི། དཔེར་ན། སྒྲ་རྟག་པར་སྒྲུབ་པར་བྱེད་པ་ལ་མཚོན་བྱ་ལྟ་བུའོ། །གསུམ་པ་མཐུན་ཕྱོགས་ལ་ཁྱབ་བྱེད་མི་མཐུན་ཕྱོགས་ལ་ཆ་གཉིས་སུ་འཇུག་པ་ནི། དཔེར་ན། དུང་སྒྲ་རྩོལ་བ་ལས་བྱུང་བར་སྒྲུབ་པར་བྱེད་པ་ལ་མི་རྟག་པ་ལྟ་བུའོ། །བཞི་བ་མི་མཐུན་ཕྱོགས་ལ་ཁྱབ་བྱེད་མཐུན་ཕྱོགས་ལ་ཆ་གཉིས་སུ་འཇུག་པ་ནི། དཔེར་ན། དུང་སྒྲ་རྩོལ་བ་ལས་མ་བྱུང་པར་སྒྲུབ་པར་བྱེད་པ་ལ་མི་རྟག་པ་ལྟ་བུའོ། ། གཉིས་པ་ལྷག་ལྡན་གྱི་མ་ངེས་པ།གཉིས་པ་ལྷག་ལྡན་གྱི་མ་ངེས་པ་ལ། མཚན་ཉིད། དབྱེ་བ་གཉིས། དང་པོ་ལྷག་ལྡན་གྱི་མ་ངེས་པའི་གཏན་ཚིགས་ཀྱི་མཚན་ཉིད། དེ་སྒྲུབ་ཀྱི་མཐུན་ཕྱོགས་དང་མི་མཐུན་ཕྱོགས་གང་རུང་ལ་འཇུག་པར་ངེས་ནས་གང་རུང་ལས་ལྡོག་མི་ལྡོག་ཐེ་ཚོམ་ཟ་བའི་ཐུན་མོང་བའི་མ་ངེས་པའི་གཏན་ཚིགས། མཚན་ཉིད་དེ་ལྟར་འཐད་དེ། རྣམ་འགྲེལ་ལས། གང་ཞིག་མ་མཐོང་བ་ཙམ་གྱི། །ལྡོག་པ་རབ་ཏུ་སྟོན་བྱེད་པ། །དེ་ནི་ཐེ་ཚོམ་རྒྱུ་ཡིན་ཕྱིར། །དེ་ལ་ལྷག་མ་ལྡན་ཞེས་བརྗོད། །ཅེས་དང༌། དེའི་ཐད་ཀྱི་འགྲེལ་བཤད་རིན་ཆེན་ཕྲེང་བ་ལས། ལྷག་ལྡན་གྱི་དོན་ཅི་ཞེ་ན། །སྨྲ་སོགས་ཀྱི་རྟགས་ག༵ང་ཞི༵ག་ཆོས་ཅན། སྨྲ་བ་པོ་ཕ་རོལ་པོ་ཆགས་ཅན་དུ་སྒྲུབ་པ་དེ༵་ལ༵་ལྷ༵ག་མ༵་དང་ལྡ༵ན་པ་ཞེ༵ས་བརྗོ༵ད་དེ། དེ་ཡི་ཕྱོགས་ཆོས་གང་ཞིགདེ་ཡི་མཐུན་ཕྱོགས་འགའ་ལ་ཡོད་ཀྱང་དེ༵་ཡི་མི་མཐུན་ཕྱོགས་ལ་ཐེ༵་ཚོ༵མ་གྱི་རྒྱུ༵་སྟེ་འཇུག་སྲིད་པའི་རྟགས་ཡི༵ན་པའི་ཕྱི༵ར། དེ་ཡི་མི་མཐུན་ཕྱོགས་ལ་འཇུག་སྲིད་པར་ཐལ། ཆོས་ལ་འབྲེལ་བ་མེད་པར་དེ་ཡི་མི་མཐུན་ཕྱོགས་འགའ་ལ་མ༵་མཐོ༵ང་བ༵་ཙ༵མ་གྱི༵ས་དེ་ཡི་མི་མཐུན་ཕྱོགས་ལས་ལྡོ༵ག་པ༵ར་མུ་སྟེགས་སོགས་ཀྱིས་ར༵བ་ཏུ༵་སྟོ༵ན་པར་བྱེ༵ད་པ༵་ཙམ་དེ་ཡིན་པས་སོ། །ཞེས་གསུངས་སོ། །གཉིས་པ་དབྱེ་བ་ལ། དེ་སྒྲུབ་ཀྱི་ཡང་དག་ལྷག་ལྡན་དང༌། དེ་སྒྲུབ་ཀྱི་འགལ་བ་ལྷག་ལྡན་གྱི་གཏན་ཚིགས་གཉིས། དང་པོ་དེ་སྒྲུབ་ཀྱི་ཡང་དག་ལྷག་ལྡན་གྱི་མཚན་ཉིད། རང་ཕྱོགས་ཆོས་སུ་སོང་བའི་གང་ཟག་གིས་དེ་སྒྲུབ་ཀྱི་མཐུན་ཕྱོགས་ལ་འཇུག་པར་ངེས་ཤིང་མི་མཐུན་ཕྱོགས་ལས་ལྡོག་མི་ལྡོག་ལ་ཐེ་ཚོམ་ཟ་བའི་ལྷག་ལྡན་གྱི་གཏན་ཚིགས། མཚན་གཞི་ནི། འདོད་ཆགས་དང་བྲལ་བ་བསྐལ་དོན་སོང་བའི་རྒོལ་བའི་ངོར། ངག་སྨྲ་བའི་སྐྱེས་བུ་ཕ་རོལ་བོ་འདི་འདོད་ཆགས་དང་བཅས་པར་སྒྲུབ་པ་ལ་ངག་སྨྲ་བ་ལྟ་བུའོ། །གཉིས་པ་འགལ་བ་ལྷག་ལྡན་གྱི་གཏན་ཚིགས་ཀྱི་མཚན་ཉིད། རང་ཕྱོགས་ཆོས་སུ་སོང་བའི་རྒོལ་བས་དེ་སྒྲུབ་ཀྱི་མི་མཐུན་ཕྱོགས་ལ་ཡོད་པར་ངེས་ཤིང་མཐུན་ཕྱོགས་ལས་ལྡོག་མི་ལྡོག་ཐེ་ཚོམ་ཟ་བའི་ལྷག་ལྡན་གྱི་གཏན་ཚིགས། མཚན་གཞི་ནི། འདོད་ཆགས་དང་བྲལ་བ་བསྐལ་དོན་སོང་བའི་རྒོལ་བའི་ངོར། ངག་སྨྲ་བའི་སྐྱེས་བུ་ཕ་རོལ་བོ་འདི་འདོད་ཆགས་དང་བྲལ་བར་སྒྲུབ་པ་ལ་ངག་སྨྲ་བ་ལྟ་བུའོ། །ཡང་ཁ་ཅིག་གིས་དེ་ལྟར་བཤད་པ་མི་འཐད་པར་ཐལ། ལྷག་ལྡན་གྱི་གཏན་ཚིགས་དང་མ་ངེས་པའི་གཏན་ཚིགས་དོན་གཅིག་མིང་གི་རྣམ་གྲངས་ཡིན་པའི་ཕྱིར། མ་གྲུབ་ན། དེར་ཐལ། ཤཱཀྱ་བློའི་འགྲེལ་བཤད་ལས། མཚན་ཉིད་བསྟན་པའི་ཕྱིར་གང་ཞིག་ཅེས་བྱ་བ་ལ་སོགས་པ་སྨོས་ཏེ། ལྷག་མ་དང་ལྡན་པ་ཞེས་བྱ་བའི་སྒྲ་འདི་ནི་མ་ངེས་པའི་རྣམ་གྲངས་ཡིན་ནོ། །ཞེས་གསུངས་པའི་ཕྱིར་ན་མ་ཁྱབ། འོ་ན་གཞལ་བྱ་ཆོས་ཅན། རང་ཕྱོགས་ཆོས་སུ་སོང་བའི་གང་ཟག་གིས་དེ་སྒྲུབ་ཀྱི་ཁྱབ་འབྲེལ་ལ་ཐེ་ཚོམ་སྐྱེད་བྱེད་ཀྱི་རྒྱུ་ཡིན་པར་ཐལ། དེ་སྒྲུབ་ཀྱི་ལྷག་ལྡན་གྱི་མ་ངེས་པའི་གཏན་ཚིགས་ཡིན་པའི་ཕྱིར། ཁྱབ་སྟེ། རྣམ་འགྲེལ་ལས། དེ་ནི་ཐེ་ཚོམ་རྒྱུ་ཡིན་ཕྱིར། །དེ་ལ་ལྷག་མ་ལྡན་ཞེས་བརྗོད། །ཅེས་གསུངས་པའི་ཕྱིར། མ་ཁྱབ་མཚམས་ཀྱི་རྟགས་གྲུབ་སྟེ། མ་ངེས་པའི་གཏན་ཚིགས་ཡིན་པའི་ཕྱིར། ཁྱབ་པ་ཁས། ཡང་ཁ་ཅིག་གིས། གཞལ་བྱ་ཆོས་ཅན། རྟགས་ལྟར་སྣང་ཡིན་པར་ཐལ། སྒྲ་རྟག་པར་སྒྲུབ་པའི་རྟགས་ལྟར་སྣང་ཡིན་པའི་ཕྱིར་ན་མ་ཁྱབ། སྦྱོར་བ་གང་ཡང་རུང་བའི་རྟགས་ལྟར་སྣང་ཡིན་ན་རྟགས་ལྟར་སྣང་ཡིན་མི་དགོས་ལ། སྦྱོར་བ་གང་ཡང་རུང་བའི་རྟགས་ཡང་དག་ཡིན་ན་རྟགས་ཡང་དག་ཡིན་དགོས་པ་ནི། གཙོ་ཆེ་ཆུང་དང་གསུང་རབ་ཀྱི་བརྡ་ཆད་ཀྱི་དབང་གིས་ཡིན་ནོ། །དེས་ན་གོང་གི་འགལ་མ་ངེས་མ་གྲུབ་ཀྱི་གཏན་ཚིགས་ཀྱི་མཚན་ཉིད་བཤད་པ་སོགས་དོན་ལ་སྒྲ་རྟག་སྒྲུབ་དང་སྒྲ་མི་རྟག་སྒྲུབ་ལྟ་བུའི་གཞི་ལ་སྦྱར་དགོས་སོ། །གོང་དུ་དེ་དག་གི་མཚན་ཉིད་སོགས་བཤད་པ་ལྟར་མ་བཤད་ན་རྟོག་གེའི་ཐ་སྙད་དམ་རྟོག་གེའི་སྐད་ཀྱིས་གནོད་པས་ན་དེ་ལྟར་བཤད་པ་ཡིན་ནོ། །དེ་ལྟར་རྟགས་སུ་བཀོད་པ་ཐམས་ཅད་རྟགས་ཡང་དག་དང་འགལ་མ་ངེས་མ་གྲུབ་པའི་གཏན་ཚིགས་སུ་ཐམས་ཅད་འདུས་པ་ཡིན་ཏེ། སྤྱྀར་གཏན་ཚིགས་སུ་བཀོད་པ་ལ་ཕྱོགས་ཆོས་གྲུབ་པ་དང་མ་གྲུབ་པ་གཉིས་སུ་ངེས་ལ། གྲུབ་པ་ལ་ཁྱབ་པ་རྣལ་མ་ངེས་པ་དང་མ་ངེས་པ་གཉིས་སུ་ངེས་ལ། མ་ངེས་པ་ལ་ཁྱབ་པ་ཕྱིན་ཅི་ལོག་ཏུ་ངེས་པ་དང་མ་ངེས་པ་གཉིས་སུ་ངེས་པ་ཡིན་པའོ། ། རྩ་བའི་ས་བཅད་གཉིས་པ་གཞན་དོན་རྗེས་དཔག་བཤད་པ།རྩ་བའི་ས་བཅད་གཉིས་པ་གཞན་དོན་རྗེས་དཔག་བཤད་པ་ལ། གཞན་དོན་རྗེས་དཔག་དངོས་དང༌། དེའི་ཤུགས་བསྟན་བསྒྲུབ་བྱ་བཤད་པ་དང་གཉིས། དང་པོ་ལ་མཚན་ཉིད། དབྱེ་བ། སྒྲ་བཤད་པ་དང་གསུམ། དང་པོ་ནི། ཚད་མ་མདོ་ལས། རང་གི་མཐོང་དོན་རབ་གསལ་བྱེད། །ཅེས་པས་གཞན་དོན་རྗེས་དཔག་གི་མཚན་ཉིད་བསྟན་ལ། དེ་ཡང་རང་གི་མཐོང་དོན་རབ་གསལ་བྱེད་ཅེས་པས་ཚིག་གསུམ་གྱིས་རིམ་བཞིན་བློ་སྐྱོན་དང་དོན་སྐྱོན་དང༌། སྒྲ་སྐྱོན་གསུམ་སེལ་བར་བྱེད་ལ། །དོན་ལ་ཚུལ་གསུམ་གྲུབ་ཀྱང་སྐབས་ཀྱི་གང་ཟག་གིས་མ་གྲུབ་ན་སྒྲུབ་ངག་ཡང་དག་ཏུ་མི་འགྱུར་བས་ན། རང་གིས་ཞེས་གསུངས་ལ། དོན་ལ་ཚུལ་གསུམ་མ་གྲུབ་ན་འདོད་པ་ཙམ་གྱིས་རྟགས་ཡང་དག་ཏུ་མི་འགྱུར་བས་དེ་བརྗོད་པའི་སྒྲུབ་ངག་ཀྱང་ཡང་དག་ཡིན་པ་བསལ་བའི་ཕྱིར། དོན་ཞེས་གསུངས་ལ། ཚུལ་གསུམ་དོན་ལ་གྲུབ་ཅིང༌། གྲུབ་པ་ལྟར་རང་གིས་ངེས་ཀྱང༌། གཞན་ལ་སྟོན་པ་ན། སྒྲ་ནི་མི་རྟག་སྟེ། བྱས་པ་ཡིན་པའི་ཕྱིར། དཔེར་ན་བུམ་པ་བཞིན། བུམ་པ་བྱས་པ་བཞིན་དུ་སྒྲ་ཡང་བྱས། དེའི་ཕྱིར་སྒྲ་མི་རྟག་ཅེས་པ་ལྟ་བུ། སྒྲུབ་ངག་ལྷག་ཆད་ཅན་དུ་སྨྲ་བ་བསལ་བའི་ཕྱིར། གསལ་བྱེད་ཅེས་གསུངས་སོ། །ཅིའི་ཕྱིར་སྒྲུབ་ངག་ཡན་ལག་ལྔ་ལྡན་འདི་ལྷག་ཆད་ཀྱི་སྐྱོན་དང་བཅས་ཞེ་ན། ཁྱབ་པ་བརྗོད་པ་ཆད་པ་དང་དམ་བཅའ་ཉེར་གཏོད་དང་འཇུག་སྡུད་གསུམ་བརྗོད་པ་ལྷག་པ་ཡིན་ཏེ། དཔེ་སྨོས་ཀྱང་དེ་ལ་རྟགས་ཆོས་ཀྱི་འབྲེལ་བ་མ་བསྟན་པས་ཁྱབ་པ་བརྗོད་པ་མ་ཚང་ལ། བསྒྲུབ་བྱ་སྐབས་ཀྱི་རྒོལ་བས་མ་གྲུབ་པས་དེ་བརྗོད་པས་དེས་དེ་རྟོགས་མི་ནུས་པའི་ཕྱིར་ཏེ། རྣམ་འགྲེལ་ལས། བསྒྲུབ་པར་བྱ་བ་བརྗོད་པ་ཡི། །བརྒྱུད་པ་ཡིས་ཀྱང་ནུས་པ་མེད། །ཅེས་གསུངས་སོ། །ཉེར་སྦྱོར་ཕྱོགས་ཆོས་བརྗོད་པ་དང་ཟློས་ཤིང༌། འཇུག་སྡུད་དམ་བཅའ་བརྗོད་པ་དང་ཟློས་པའོ། །དེའི་ཕྱིར་སྒྲུབ་ངག་ཡན་ལག་ལྔ་ལྡན་ལ་སྐྱོན་དང་བཅས་པའོ། །གཞན་དོན་རྗེས་དཔག་ནི་ཚིག་གི་སྐྱོན་དང་བྲལ་དགོས་ཏེ། རྣམ་ངེས་ལས། གཞན་གྱི་དོན་གྱི་རྗེས་སུ་དཔག་པར་ཚིག་གི་སྐྱོན་ཡོན་གཙོ་བོར་བྱེད་པ་ཡིན་གྱི་དོན་གྱི་ནི་མ་ཡིན་ཏེ། དོན་ཅི་ལྟ་བ་མ་ཡིན་པར་བརྗོད་པའི་སྨྲ་བ་པོ་ལ་ཀླན་ཀར་འགྱུར་བའི་ཕྱིར། ཞེས་གསུངས་སོ། །སྒྲུབ་ངག་འཆད་པའི་སྐབས་ཡན་ལག་ལྔ་ལྡན་བཤད་ཀྱང་འགོད་པའི་ཚེ་གཉིས་ལྡན་འགོད་དགོས་སོ། །ཐེག་མཆོག་དབུ་མ་ལྟར་ན་དཔྱད་རྒྱུ་ཅུང་ཟད་ཡོད་དོ། །དེས་ན། གཞན་དོན་རྗེས་དཔག་སམ་སྒྲུབ་ངག་ཡང་དག་གི་མཚན་ཉིད། རང་གིས་ངེས་པའི་ཚུལ་གསུམ་ལྷག་ཆད་དང་བྲལ་བར་གསལ་བར་སྟོན་པའི་ངག་ཡན་ལག་གཉིས་ལྡན་དེའོ། ། གཉིས་པ་དབྱེ་བ་ནི། ཆོས་མཐུན་སྦྱོར་གྱི་སྒྲུབ་ངག་ཡང་དག་དང༌། ཆོས་མི་མཐུན་སྦྱོར་གྱི་སྒྲུབ་ངག་ཡང་དག་གཉིས། དང་པོའི་མཚན་ཉིད། རྟགས་དེ་དེ་སྒྲུབ་ཀྱི་མཐུན་ཕྱོགས་ཁོ་ན་ལ་ཡོད་པར་དངོས་སུ་སྟོན་པའི་ཡན་ལག་གཉིས་ལྡན་གྱི་སྒྲུབ་ངག་ཡང་དག དཔེར་ན། གང་བྱས་ན་མི་རྟག་པ་ཡིན་པས་ཁྱབ། དཔེར་ན་བུམ་པ་བཞིན། སྒྲ་ཡང་བྱས་ཞེས་པའི་ངག་ལྟ་བུའོ། །དེ་སྐད་དུ། རིགས་སྒོ་ལས། དེ་ལ་ཆོས་མཐུན་པ་ནི་གང་ལ་རྟགས་མཐུན་པའི་ཕྱོགས་ཉིད་ལ་ཡོད་པ་སྟོན་པར་བྱེད་པ་སྟེ། གང་བྱས་པ་དེ་མི་རྟག་པར་མཐོང་སྟེ། དཔེར་ན་བུམ་པ་ལ་སོགས་པ་བཞིན་ཞེས་པའོ། །ཞེས་གསུངས་སོ། །གཉིས་པ་ཆོས་མི་མཐུན་སྦྱོར་གྱི་སྒྲུབ་ངག་ཡང་དག་གི་མཚན་ཉིད། རྟགས་དེ་དེ་སྒྲུབ་ཀྱི་མི་མཐུན་ཕྱོགས་ལ་མེད་པ་ཁོ་ན་ལ་དངོས་སུ་སྟོན་པའི་ཡན་ལག་གཉིས་ལྡན་གྱི་སྒྲུབ་ངག་ཡང་དག དཔེར་ན། གང་རྟག་ན་མ་བྱས་པ་ཡིན་པས་ཁྱབ། དཔེར་ན་འདུས་མ་བྱས་ཀྱི་ནམ་མཁའ་བཞིན། སྒྲ་ནི་བྱས་སོ། །ཞེས་པའི་ངག་ལྟ་བུའོ། །དེ་སྐད་དུ། རིགས་སྒོ་ལས། ཆོས་མི་མཐུན་པ་ཡང་གང་ལ་བསྒྲུབ་པར་བྱ་བ་མེད་པ་རྟགས་མེད་པ་ཉིད་དུ་སྟོན་པ་སྟེ། གང་རྟག་པ་དེ་བྱས་པ་མིན་པར་མཐོང་སྟེ། དཔེར་ན་ནམ་མཁའ་བཞིན་ཞེས་པའོ། །ཞེས་གསུངས་སོ། །དེ་གཉིས་གང་རུང་བསྟན་ན་རྗེས་སུ་འགྲོ་ལྡོག་གང་རུང་དངོས་སུ་རྟོགས་ནས་གང་རུང་ཤུགས་ལ་རྟོགས་པ་ཡིན་ཏེ། རྣམ་འགྲེལ་ལས། དེ་ཉིད་ཀྱིས་ཕྱིར་འབྲེལ་ཤེས་ན། །གཉིས་ལས་གང་ཡང་རུང་སྨྲས་པས། །དོན་གྱི་གོ་བས་གཅིག་ཤོས་ལ། །དྲན་པ་ཡང་དག་སྐྱེ་བར་འགྱུར། །ཞེས་གསུངས་པའི་ཕྱིར་རོ། ། གསུམ་པ་སྒྲ་བཤད་པ་ནི། སྔ་རྒོལ་ལས་གཞན་ཕྱི་རྒོལ་གྱི་དོན་ཡིན་པས་ན་གཞན་དོན་དང༌། རྗེས་དཔག་གི་རྒྱུ་ཡིན་པས་ན་རྗེས་དཔག་ཏུ་བཏགས་པའོ། །དེ་ནི་རྗེས་དཔག་དངོས་ནི་མ་ཡིན་ཏེ། ཚིག་གི་རང་བཞིན་ཡིན་པའི་ཕྱིར་རོ། །དེ་ལ་རྗེས་དཔག་ཅེས་བཏགས་པ་ལ་དགོས་པ་ཡོད་དེ། ངག་དེ་ལ་བརྟེན་ནས་བསྒྲུབ་བྱ་རྟོགས་པའི་རྗེས་དཔག་སྐྱེ་བ་ཤེས་པའི་ཆེད་ཡིན་པའི་ཕྱིར། སྒྲུབ་ངག་འགོད་པའི་དུས་དང༌། སྒྲུབ་ངག་ཡང་དག་ཏུ་སོང་བའི་དུས་དང༌། སྒྲུབ་ངག་གཉིས་ལས་གང་རུང་ལས་གཉིས་ཀ་འགོད་དགོས་པའི་རྒོལ་བ་ཡོད་མེད་དང༌། སྒྲུབ་ངག་ཡང་དག་ལ་ཡན་ལག་གཅིག་ལྡན་མེད་པ་དང༌། སྒྲུབ་ངག་གི་ཚིག་ཟུར་སོ་སོས་ཚུལ་གསུམ་སོ་སོར་བསྟན་ཚུལ་སོགས་གཞན་ལས་ཤེས་པར་བྱའོ། །འདིར་མང་དོགས་ནས་མ་སྤྲོས་སོ། །ཞར་བྱུང་དུ། གཏན་ཚིགས་རིགས་པའི་དོན་བསྡུས་ལས། རྒོལ་བ་སྟེ་དེ་ཡི་མཚན་ཉིད། གྲུབ་མཐའ་ལ་རྩོད་པར་བྱེད་པའི་གང་ཟག དེ་ལ་དབྱེ་ན། སྔ་རྒོལ་ཕྱི་རྒོལ་དཔང་པོ་དང་གསུམ་མོ། །མཚན་ཉིད་རིམ་པ་ལྟར། ཕྱོགས་སྔ་མ་ཁས་ལེན་པའི་གང་ཟག་དང༌། ཕྱོགས་ཕྱི་མ་ཁས་ལེན་པའི་གང་ཟག་དང༌། རྒོལ་ཕྱི་རྒོལ་གྱི་རྒྱལ་འཕམ་ཤན་འབྱེད་པར་ཁས་ལེན་པའི་གང་ཟག་གོ །དང་པོ་ལ་སྔ་རྒོལ་ཡང་དག་དང༌། ལྟར་སྣང་གཉིས་ཏེ། མཚན་ཉིད་རིམ་པ་ལྟར། ཕྱོགས་སྔ་མ་བཞག་པས་རྩོད་ཟླ་ཕྱི་རྒོལ་གྱི་སྤོབས་པ་འཇོམས་ནུས་ཀྱི་གང་ཟག་དང༌། དེ་མི་ནུས་པའི་གང་ཟག་གོ །གཉིས་པ་ཕྱི་རྒོལ་ཡང་དག་དང་ལྟར་སྣང་གཉིས་ཏེ། མཚན་ཉིད་རིམ་པ་ལྟར། ཕྱོགས་ཕྱི་མ་ཁས་བླངས་ཏེ་སུན་འབྱིན་ཡང་དག་བརྗོད་པས་སྔ་རྒོལ་གྱི་སྤོབས་པ་འཇོམས་ནུས་ཀྱི་གང་ཟག་དང༌། ཕྱོགས་ཕྱི་མ་ཁས་ལེན་ཞིང་སྔ་རྒོལ་གྱི་སྤོབས་པ་འཇོམས་མི་ནུས་པའི་གང་ཟག་གོ །གསུམ་པ་དཔང་པོ་ཡང་དག་དང་ལྟར་སྣང་གཉིས་ཏེ། མཚན་ཉིད་རིམ་པ་ལྟར། རྒོལ་ཕྱི་རྒོལ་གྱི་རྩོད་པའི་རྒྱལ་འཕམ་རིག་ནས་དེ་བརྡ་སྤྲོད་ནུས་ཀྱི་གང་ཟག་དང༌། དཔང་པོར་རློམ་ཞིང་རྒོལ་ཕྱི་རྒོལ་གྱི་རྒྱལ་འཕམ་ཤན་འབྱེད་མི་ནུས་པའོ། །དཔང་པོ་ལ་ཡང་རྗེས་སུ་བརྗོད་པའི་དཔང་པོ། ཤན་འབྱེད་པའི་དཔང་པོ། ཚར་གཅོད་པའི་དཔང་པོ་གསུམ་མོ། །ཞེས་གསུངས་སོ། །རྒྱས་པར་གཞན་ལས་ཤེས་པར་བྱའོ། ། ཇི་ལྟར་རྩོད་ཚུལ་ནི། སྐྱེས་སྟོབས་ཀྱི་ཤེས་རབ་ཆེ་བ་དང༌། སྒྲ་ཚད་ལ་བློ་སྦྱངས་པ་དང༌། རང་གཞན་གྱི་གྲུབ་མཐའ་ལ་ལེགས་པར་སྦྱངས་བ་ནི་རྩོད་པ་ལ་མཁས་པའི་རྒྱུ་ཡིན་ལ། བཞིན་གྱི་དཀྱིལ་འཁོར་འཛུམ་པ་དང༌། དོན་དང་ལྡན་ཞིང་གསལ་ལ་འཇམ་པའི་ངག་དང་ལྡན་པ་དང༌། སྒྱིད་ལུག་པ་དང་ང་རྒྱལ་མེད་པ་ནི། རྩོད་པ་མཛེས་པའི་རྒྱན་ཡིན་པའོ། །རྩོད་པའི་བསམ་པ་ནི། ཕ་རོལ་བོ་དམའ་བར་འདོད་པའི་ཞེ་སྡང་དང༌། རང་ཉིད་མཐོ་བར་འདོད་པའི་འདོད་ཆགས་དང༌། རིགས་ལམ་འདོར་བར་འདོད་པའི་གཡོ་སྒྱུ་རྣམས་ནི་རྩོད་པའི་བསམ་པ་ཐ་ཤལ་ཡིན་ལ། རང་གིས་ཤེས་པར་འདོད་པའི་གུས་པ་དང༌། གཞན་གྱི་ལོག་རྟོག་བསལ་བར་འདོད་པའི་སྙིང་རྗེ་དང༌། ཕ་རོལ་པོ་ལ་ཟབ་མོའི་ཆོས་བསྟན་པར་འདོད་པའི་བྱམས་པ་རྣམས་ནི་རྩོད་པའི་བསམ་པ་ཕུལ་དུ་བྱུང་བ་ཡིན་ནོ། །རྣམ་དག་རྩོད་པའི་དཔེ་ནི། རང་དང་གཞན་གྱི་གཏི་མུག་གཅོད་པ་འཁོར་ལོ་ལྟ་བུ་དང༌། སུན་འབྱིན་པའི་རླུང་གིས་མི་གཡོ་བ་ལྷུན་པོ་ལྟ་བུའོ། །ཚིག་དང་དོན་ལ་མ་རྨོངས་པ་ཐུབ་པའི་དབང་པོའི་སྲས་ལྟ་བུའོ། །རྩོད་པའི་འབྲས་བུ་ཡང་དག་ནི། རྟོགས་པ་འཕེལ་བས་རང་རྒྱུད་ཚིམ་པ་དང༌། སྙན་པའི་གྲགས་པ་ཕྱོགས་ཀུན་ཏུ་ཁྱབ་པ་དང༌། བསྟན་པ་བསྲུངས་པའི་ཆོས་ཀྱི་རྒྱལ་པོ་ཐོབ་པར་འགྱུར་བའོ། །དེས་ན་རྩོད་པའི་སྐྱོན་རྣམས་སྤངས་ནས་རྣམ་པར་དག་པའི་རྩོད་པ་ལ་བདག་ལེགས་སུ་འདོད་པ་རྣམས་ཀྱི་འབད་པར་བྱའོ། ། གཉིས་པ་དེའི་ཤུགས་བསྟན་བསྒྲུབ་བྱ་བཤད་པ།གཉིས་པ་དེའི་ཤུགས་བསྟན་བསྒྲུབ་བྱ་བཤད་པ་ལ། མཚན་ཉིད། དབྱེ་བ། སྒྲ་བཤད་པ་དང་གསུམ། དང་པོ་ནི། བསྒྲུབ་བྱའི་མཚན་ཉིད། ཆོས་དང་ཤེས་འདོད་ཆོས་ཅན་གྱི་ཚོགས་དོན་དེ་ཡིན་ཏེ། ཚད་མ་མདོ་ལས། བསྒྲུབ་བྱ་བསྡུས་པ་ཡིན་པའི་ཕྱིར། །ཆོས་དང་ཆོས་ཅན་ཁ་ཡར་བ། །དངོས་སུ་མིན་ཡང་དེ་ཕྱོགས་གཅིག །ཡིན་ཕྱིར་བསྒྲུབ་བྱར་བཏགས་ནས་བརྗོད། །ཅེས་གསུངས་སོ། །རྟགས་ཡང་དག་གི་བསྒྲུབ་བྱའི་མཚན་ཉིད། ཚུལ་གསུམ་ཚང་བའི་རྟགས་ལ་བརྟེན་ནས་རྟོགས་པར་བྱ་བའི་ཆོས་དང་ཆོས་ཅན་གྱི་ཚོགས་དོན་དེའོ། ། གཉིས་པ་དབྱེ་བ་ལ་གཉིས། དང་པོ་རང་དོན་གྱི་བསྒྲུབ་བྱའི་མཚན་ཉིད། རང་དོན་གྱི་རྟགས་ལས་དཔག་པར་བྱ་བའི་ཆོས་དང་ཆོས་ཅན་གྱི་ཚོགས་དོན། །གཉིས་པ་གཞན་དོན་གྱི་བསྒྲུབ་བྱ་བཤད་ཚུལ་ལ་གཉིས། དང་པོ་ཚད་མ་ཀུན་བཏུས་ལས་བཤད་ཚུལ་ནི། ཚད་མ་མདོ་ལས། ངོ་བོ་ཁོ་ན་བསྟན་བྱ་བ། །རང་ཉིད་འདོད་དང་མ་བསལ་བ། །ཞེས་ངོ་བོའི་དོན་སོགས་ཆོས་ལྔ་ཚང་བ་དེ། གཞན་དོན་བསྒྲུབ་བྱའི་མཚན་ཉིད་དུ་བསྟན་ལ། འདིའི་ཟུར་ལྔ་སོ་སོའི་སེལ་བྱ་སེལ་ཚུལ་ནི། ངོ་བོ་ཞེས་པས་གཞན་དོན་བསྒྲུབ་བྱ་ཡིན་ན་ཕྱི་རྒོལ་གྱིས་ གྲུབ་ཟིན་པ་བསལ་ནས་མ་གྲུབ་པ་ཞིག་དགོས་པ་བསྟན་ལ། འདོད་པ་ཞེས་པས་གཞན་དོན་བསྒྲུབ་བྱ་ཡིན་ན་རྒོལ་བས་དཔག་འདོད་ཀྱི་ཡུལ་དུ་མ་བྱས་པ་བསལ་ནས་དཔག་འདོད་ཀྱི་ཡུལ་དུ་བྱས་པ་དགོས་པར་བསྟན་པའོ། །ཁོ་ན་ཞེས་པས་མ་འོངས་པ་ན་བསྒྲུབ་བྱར་འགྱུར་རུང་གི་དཔེ་རྟགས་མ་གྲུབ་པ་ད་ལྟ་གཞན་དོན་བསྒྲུབ་བྱ་ཡིན་ནམ་སྙམ་པའི་ལོག་རྟོག་བསལ་ནས་ད་ལྟ་སྒྲུབ་བྱེད་དུ་བཀོད་བཞིན་པ་མ་ཡིན་དགོས་ལ། ། དཔེ་རྟགས་མ་གྲུབ་པ་ནི། དཔྱོད་པ་བ་དང་གྲངས་ཅན་པའི་ངོར། སྒྲ་ཆོས་ཅན། མི་རྟག་སྟེ། བྱས་པའི་ཕྱིར། དཔེར་ན་བུམ་པ་བཞིན་ཞེས་བཀོད་པའི་ཚེ་ན། སྒྲ་བྱས་པ་དཔྱོད་པ་བ་ལ་མ་གྲུབ། བུམ་པ་མི་རྟག་པ་གྲངས་ཅན་པ་ལ་མ་གྲུབ་པ་ལྟ་བུའོ། །རང་ཉིད་ཅེས་པས་བསྟན་བཅོས་མཁན་པོས་འདོད་པ་ཐམས་ཅད་གཞན་དོན་བསྒྲུབ་བྱར་ཡིན་ནམ་སྙམ་པའི་ལོག་རྟོག་སེལ་བ་ཡིན་ཏེ། དེ་ཐམས་ཅད་སྔ་#div2 རྒོལ་རང་ཉིད་ཀྱིས་ཁས་བླངས་པ་མ་ཡིན་པའི་ཕྱིར་རོ། རྒོལ་རང་ཉིད་ཀྱིས་ཁས་བླངས་པ་མ་ཡིན་པའི་ཕྱིར་རོ། ། གཉིས་པ་རིགས་སྒོ་ལས་བཤད་ཚུལ་ནི། འདིར་བསྒྲུབ་བྱའི་མཚན་ཉིད་ནི་སྒྲུབ་པའི་ཆོས་ཅན་ལ་ཆོས་ཀྱི་ཁྱད་པར་སྒྲུབ་པར་བྱེད་པ་སྟེ་རང་གིས་བསྒྲུབ་པར་བྱ་བར་འདོད་པ་འདི་ནི་སྒྲུབ་བྱ་ཡིན་ནོ། །དཔེར་ན་སྒྲ་མི་རྟག་པར་སྒྲུབ་པ་ལྟ་བུའོ། །ཞེས་གསུངས་ལ། དེ་ལས་བཤད་པའི་གཞན་དོན་བསྒྲུབ་བྱའི་མཚན་ཉིད་ནི། སྐབས་སུ་བབ་པའི་ཕྱི་རྒོལ་གྱི་ངོར་ཆོས་ཅན་ལ་ཆོས་ཀྱི་ཁྱད་པར་སྒྲུབ་པར་བྱ་བ་སྔ་རྒོལ་ཡང་དག་གིས་ཁས་བླངས་ཤིང་འདོད་པར་གྱུར་བའི་དོན་དེ་ཡིན་པའོ། ། གསུམ་པ་སྒྲ་བཤད་ནི། དེ་ནི་རྟགས་ཀྱིས་བསྒྲུབ་པར་བྱ་བས་ན་བསྒྲུབ་བྱ།ཚུལ་གསུམ་ངེས་པའི་རྗེས་སུ་དཔག་པར་བྱ་བས་ན་རྗེས་སུ་དཔག་བྱ། རྒོལ་བས་ཕྱོགས་སུ་བྱས་པས་ན་ཕྱོགས་དང༌། རྒོལ་བས་དམ་བཅས་པས་ན་དམ་བཅའ་ཞེས་བྱའོ། ། དེ་ལྟར་གཏན་ཚིགས་རྣམ་བཞག་དྲི་མ་མེད་པ་ལ་བརྟེན་ནས་རྒྱལ་བའི་ཆོས་ཚུལ་རྣམས་ལེགས་པར་ཤེས་ན་ཐར་བ་དང་ཐམས་ཅད་མཁྱེན་པའི་གོ་འཕང་ལ་རིང་མིན་མྱུར་ཏུ་བསྒྲོད་ནས་གཞན་དོན་དུ་འཁོར་བ་མ་སྟོང་གི་བར་དུ་འཕྲིན་ལས་ལྷུན་གྱིས་གྲུབ་སྟེ་འགྲོ་བ་རྣམས་སྨིན་གྲོལ་གྱི་ལམ་བཟང་ལ་འགོད་པར་མཛད་པ་ཡིན་པའོ།། །། སྨྲས་པ། ཕྱོགས་གླང་གྲགས་པའི་ལེགས་བཤད་ལས་བྱུང་བའི། །གཏན་ཚིགས་རིགས་པའི་རྣམ་བཞག་འོད་དཀར་གྱིས། །ས་གསུམ་འགྲོ་བའི་རྨོངས་པ་རབ་བསལ་ནས། །སྨིན་གྲོལ་ལམ་བཟང་གསལ་བའི་སྒྲོན་མེ་མཆོག །གསུང་རབ་རྣམ་པར་འབྱེད་པའི་ཚུལ་གསུམ་རྟ༵༷གས། །ལེགས་པར་བཤད་པའི་རྣམ་དག་ལུང་རི༵༷གས་ཀྱི༵། །རྣ༵མ་བཞ༵ག་ལེ༵གས་བཤ༵ད་དྲི༵་མ༵་མེ༵ད་པ༵འི་འོ༵ད། །ས་གསུམ་མུན་པ་སེལ་བའི་མཛེས་རྒྱན་མཆོག །བློ་གསལ་སྦྲང་འཐུང་འབོད་པའི་ལེགས་བཤད་དྲི་བསུང་ཀུན་ནས་རྒྱས། །བློ་གྲོས་གཟུགས་མཛེས་ལུང་རིགས་རྣམ་མང་གོས་བཟང་རིན་ཆེན་བཀྲ །སྔོན་བསགས་ལྷ་ཡི་བསོད་ནམས་ལས་བྱུང་བསྟན་བཅོས་ཡོངས་འདུའི་ཤིང༌། །བླ་མ་ལྷར་བཅས་དགྱེས་པའི་ཀུན་བཟང་མཆོད་སྤྲིན་དེང་འདིར་གྲུབ། །ལེགས་བཤད་ཇི་སྙེད་བཤེས་གཉེན་དམ་པ་དང༌། །སྔོན་བྱོན་དམ་པའི་ལེགས་གསུང་ཆོས་ཀྱི་དྲིན། །ལྷག་ཆད་འཁྲུལ་བའི་ཉེས་པ་ཅི་མཆིས་ཀུན། །ཆོས་སྤྱན་ལྡན་པའི་འཕགས་ཚོགས་མདུན་སར་བཤགས། །ལེགས་པར་བཤད་པའི་དགེ་འདིས་ཚེ་རབས་ཀུན། །ཀུན་མཁྱེན་ཆོས་ཀྱི་རྒྱལ་པོ་ཇོ་ནང་བའི། །བསྟན་པ་རིན་ཆེན་སྤྱི་བོའི་རྒྱན་བྱས་ཏེ། །འགྲོ་ཀུན་ཕན་བདེའི་གནས་སུ་བདག་གྱུར་ཅིག །བདག་ཀྱང་དེང་ནས་ཚེ་རབས་ཐམས་ཅད་དུ། །བློ་ལྡན་རིགས་བཟང་ང་རྒྱལ་མེད་པ་དང༌། །མཚན་ལྡན་བླ་མས་བརྩེ་བས་རྗེས་བཟུང་ནས། །ཚུལ་གནས་ཐོས་བསམ་སྒོམ་ལ་བརྩོན་པར་ཤོག །ཅེས་རྟགས་རིགས་ཀྱི་རྣམ་བཞག་ལེགས་བཤད་དྲི་མ་མེད་པའི་འོད་ཅེས་བྱ་བ་འདི་ནི་རང་ལུགས་ཀྱི་རྟགས་རིགས་ཀྱི་རྣམ་བཞག་ཞིག་རང་ལ་འབྲི་འདུན་སྔར་ནས་ཡོད་པ་དང་བློ་ལྡན་དུ་མས་སྔ་ཕྱི་དུ་མར་བསྐུལ་བ་ལ་བརྟེན་ནས། ལེགས་པར་བཤད་པའི་གསུང་རབ་དུ་མ་ལས་ཕྱོགས་གཅིག་ཏུ་དཔལ་ལྡན་ཆོས་འཕེལ་ལམ། ཀུན་བཤད་ཀྱི་མིང་ལ་དབྱངས་ཅན་ངག་གི་རོལ་མཚོ་དང༌། ཡོངས་གྲགས་སུ་དངོས་གྲུབ་དཔལ་ཞེས་འབོད་པས་རང་ལོ་སོ་དགུ་པ། རབ་བྱུང་བཅུ་བདུན་པའི་ཀུན་འཛིན་ས་བྱིའི་ལོའི་ཆུ་སྟོད་ཟླ་བའི་ཚེས་བཅུ་གཉིས་པ་བདུད་རྩི་སྦྱོར་བའི་ཉིན་ལ་རྫོགས་པར་བྲིས་པའོ།། །།འདིས་ཀྱང་གཞོན་ནུ་བློ་གསལ་རྣམས་རིགས་པའི་སྒོ་བརྒྱ་རྣམ་པར་ཕྱེས་ནས་རྣམ་གྲོལ་གྱི་ལམ་བཟང་ལ་འཇུག་པར་གྱུར་ཅིག །སརྦ་མངྒ་ལམ། །ཛ་ཡནྟུ། ཕྱོགས་སྒྲའི་རྩོད་ལན་མདོར་བསྡུས་གསལ་བའི་སྒྲོན་མེ།ཕྱོགས་སྒྲའི་རྩོད་ལན་མདོར་བསྡུས་གསལ་བའི་སྒྲོན་མེ་ཞེས་བྱ་བ་བཞུགས་སོ། ། བླ་མ་དང་མགོན་པོ་འཇམ་པའི་དབྱངས་ལ་ཕྱག་འཚལ་ལོ། །དེ་ལ་འདིར་ཕྱོགས་སྒྲའི་རྩོད་པ་བཤད་པ་ལ་བཞི་ལས། དང་པོ་དངོས་ཀྱི་རྩོད་པ་ནི། ཚད་མ་མདོ་ལས། རེ་ཞིག་ཅི་སྟེ་ཕྱོགས་ཀྱི་ཆོས་སུ་གྱུར་ཞེ་ན། ཞེས་དང༌། ཤཱཀྱ་བློའི་འགྲེལ་བཤད་ལས། མདོ་ལས་ཕྱོགས་ཆོས་ཞེས་བཤད་པ་ཕྱོགས་ནི་ཆོས་དང་ཆོས་ཅན་གྱི་སྤྱི་ལ་བྱ་ན་གཏན་ཚིགས་ནི་སྤྱིའི་ཆོས་ཉིད་ཡིན་པར་ཕྱི་རྒོལ་ལ་མ་གྲུབ་བོ། །འོན་ཏེ་གྲུབ་ན་རྗེས་སུ་དཔག་པ་དོན་མེད་དོ་ཞེ་ན། ཞེས་སོགས་གསུངས་པ་ལྟར་རྟགས་ཚུལ་དང་པོ་ལ་ཕྱོགས་ཆོས་ཞེས་བཤད་མི་རིགས་པར་ཐལ། ཕྱོགས་ཞེས་པ་ནི་ཆོས་དང་ཆོས་ཅན་གྱི་ཚོགས་དོན་དང་བསྒྲུབ་བྱ་ལ་བྱེད་པར་རྟོག་གེའི་གཞུང་ལས་གྲགས་ཤིང་མ་གྲུབ་ན་གྲགས་པའི་གནོད་ལ། འདོད་ན་རྟགས་ཚུལ་དང་པོ་རྟོགས་ན་བསྒྲུབ་བྱ་གྲུབ་པར་ཐལ་ལོ། །ཞེས་རྩོད་པ་དང༌། དེའི་ལན་ནི། དེ་འདྲའི་སྐྱོན་མེད་པར་ཐལ། རྟགས་ཚུལ་དང་བོ་འཆད་པའི་ཕྱོགས་སྒྲ་དང་བསྒྲུབ་བྱའི་སྒྲ་ནི་ཚོགས་དོན་ལ་བྱས་ན་སྐྱོན་དེ་ལྟར་ཡོད་ཀྱང་འདིར་ཤེས་འདོད་ཆོས་ཅན་ལ་ཕྱོགས་ཞེས་བཏགས་པ་ཙམ་ཡིན་པས་སྐྱོན་མེད་པའི་ཕྱིར་ཏེ། ཚད་མ་མདོའི་རང་འགྲེལ་ལས། ཅི་ལྟར་མི་འགྱུར་ཆོས་ཅན་ནི་གྲུབ་ཟིན་པའི་ཕྱིར། སྒྲུབ་པར་མི་འདོད་པས་ན་ཉེས་པ་མེད་དོ། །ཞེས་དང༌། རང་འགྲེལ་ལས། ཕྱོགས་ནི་ཆོས་ཅན་ནོ། །ཞེས་དང༌། འཐད་ལྡན་ལས། དེའི་ཕྱིར་ཕྱོགས་ཀྱི་སྒྲ་དངོས་ཀྱི་དོན་ལ་འཇུག་པར་འདོད་པ་ནི་མ་ཡིན་ནོ། །ཞེས་གསུངས་པའི་ཕྱིར་རོ། ། གཉིས་པ་དགོས་མེད་ཀྱི་རྩོད་པ།གཉིས་པ་དགོས་མེད་ཀྱི་རྩོད་པ་ནི། རང་འགྲེལ་གཉིས་ལས། གལ་ཏེ་དགོས་པ་མེད་པའི་ཕྱིར་ཉེ་བར་གདགས་པར་མི་བྱའོ་ཞེ་ན། ཞེས་དང༌། ཛྙ་ན་ཤྲིས་རྣམ་ངེས་འགྲེལ་བཤད་ལས། འདིར་སློབ་དཔོན་དབང་ཕྱུག་སྡེ་ན་རེ། དགོས་པ་མེད་པའི་ཕྱིར་གདགས་པར་མི་བྱའོ་ཞེ་ན། ཞེས་གསུངས་པ་ལྟར་རྟགས་ཚུལ་དང་པོ་འཆད་པའི་སྐབས་སུ་རྩོད་གཞི་ལ་ཕྱོགས་ཞེས་བཏགས་པ་མི་འཐད་པར་ཐལ། དེ་ལྟར་བཏགས་པ་ལ་དགོས་པ་མེད་པའི་ཕྱིར། ཁྱབ་སྟེ། སྒྲ་རིག་ལས། དགོས་པ་མེད་པར་གཙོ་བོ་ཡི། །སྒྲ་དོན་ལས་འདས་འདོད་མ་ཡིན། །ཞེས་གསུངས་པའི་ཕྱིར་ཞེས་རྩོད་ལ། དེའི་ལན་ནི། དེ་ལྟར་བཏགས་པ་ལ་དགོས་པ་ཡོད་པ་གང་ཞིག རྒྱུ་མཚན་ཡོད་པའི་ཕྱིར། དང་པོ་གྲུབ་སྟེ། དེ་ལྟར་བཏགས་ན་མཐུན་དཔེ་ཆོས་ཅན་དང་མི་མཐུན་དཔེ་ཆོས་ཅན་དག་གི་ཆོས་རྣམས་རྟགས་ཚུལ་དང་བོ་ཡིན་སྙམ་པ་ཁེགས་པའི་ཕྱིར་ཏེ། རྣམ་ངེས་རང་འགྲེལ་ལས། མ་ཡིན་ཏེ། ཆོས་ཅན་ཐམས་ཅད་ཀྱི་ཆོས་ཡིན་པ་དགག་པའི་ཕྱིར་ཏེ། ཞེས་པ་ནས། མིག་གིས་གཟུང་བ་ཡིན་པའི་ཕྱིར་ཞེས་བྱ་བ་ལ་སོགས་པ་སྤངས་པ་ཡིན་ནོ། །ཞེས་གསུངས་པའི་ཕྱིར་རོ། །གཉིས་པ་གྲུབ་སྟེ། རྩོད་གཞི་དེ་ཕྱོགས་ཀྱི་ཡ་ཀྱལ་གཅིག་ཡིན་པའི་ཕྱིར། དཔེར་ན་རས་ཡུག་གི་ཕྱོགས་གཅིག་ཚིག་པ་ལ་རས་ཡུག་ཚིག་ཅེས་ཟེར་བ་བཞིན། དེ་ལྟར་འཐད་དེ། ཚད་མ་མདོ་ལས། བསྡུས་པ་བསྒྲུབ་བྱ་ཡིན་པའི་ཕྱིར། །ཆོས་དང་ཆོས་ཅན་ཁ་ཡར་བ། །དངོས་སུ་མིན་ཡང་དེ་ཕྱོགས་གཅིག །ཡིན་ཕྱིར་བསྒྲུབ་བྱར་བཏགས་ནས་བརྗོད། །ཅེས་དང༌། དེའི་རང་འགྲེལ་ལས། ཡན་ལག་གི་དོན་ཆོས་ཙམ་དང་ཆོས་ཅན་ཁ་ཡར་བ་ནི་ཉེ་བར་བཏགས་ནས་ཡིན་པར་བརྗོད་དོ། །དེའི་ཆོས་ཡིན་པའི་ཕྱིར་ཉེས་པ་མེད་དོ། དཔེར་ན་རས་ཡུག་ཚིག་གོ་ཞེས་བྱ་བ་བཞིན་ནོ། །ཞེས་གསུངས་པའི་ཕྱིར་རོ། ། གསུམ་པ་ཉེ་བའི་རིགས་ཀྱི་རྩོད་པ།གསུམ་པ་ཉེ་བའི་རིགས་ཀྱི་རྩོད་པ་ནི། རང་འགྲེལ་གཉིས་ལས། གལ་ཏེ་ཆོས་ཞེས་བརྗོད་པས་ཀྱང་ཆོས་ཅན་ཡིན་པར་གཞི་ལྟ་གྲུབ་སྟེ། ཆོས་ཅན་ཞེས་སྨོས་པའི་ཤུགས་ཀྱིས་ཉེ་བ་ཡིན་པའི་ཕྱིར་བསྒྲུབ་པར་བྱ་བའི་ཆོས་ཅན་ཡིན་པར་གྲུབ་བོ་ཞེ་ན། ཞེས་གསུངས་པ་ལྟར་སྒྲ་མི་རྟག་པར་སྒྲུབ་པའི་ཆོས་ཅན་ཀྱི་ཆོས་ཞེས་པའི་ཆོས་ཅན་གྱི་སྒྲ་དེ་རྩོད་གཞི་ལས་མཐུན་དཔེ་ཆོས་ཅན་སོགས་ལ་མི་འཇུག་པར་ཐལ། ཆོས་ཞེས་བརྗོད་ཙམ་གྱིས་ཀྱང་ཁྱད་གཞི་ཆོས་ཅན་གཅིག་འགྲུབ་ལ། འདིར་ཆོས་ཅན་གྱི་ཆོས་ཞེས་སྨོས་པ་ན་ཆོས་ཅན་ཞེས་ལྷག་པོ་སྨོས་པའི་ཤུགས་ཀྱིས་རྩོད་གཞི་ཁོ་ན་ལ་ཉེ་བའི་ཕྱིར། དེར་ཐལ། སྒྲ་དེ་དེ་སྒྲུབ་ཀྱི་བསྒྲུབ་བྱ་སྒྲུབ་པའི་གཞིར་བློ་ལ་གནས་པའི་ཕྱིར་ཞེས་རྩོད་ལ། དེའི་ལན་ནི། དེ་མི་འཐད་པར་ཐལ། དེ་སྒྲུབ་ཀྱི་ཆོས་ཅན་ཞེས་པའི་མིང་དོན་གཉིས་ཀ་དེ་སྒྲུབ་ཀྱི་མཐུན་དཔེ་ཆོས་ཅན་བུམ་པ་ལ་ཉེ་བའི་ཕྱིར། དེར་ཐལ། བུམ་པ་དེ་དེ་སྒྲུབ་ཀྱི་སྐབས་ཀྱི་ཆོས་ཅན་ཡིན་པའི་ཕྱིར་ཏེ། རང་འགྲེལ་གཉིས་ལས། མ་ཡིན་ཏེ། དཔེའི་ཆོས་ཅན་ཡང་ཉེ་བ་ཡིན་པའི་ཕྱིར་རོ། །ཞེས་གསུངས་པའི་ཕྱིར་རོ། ། བཞི་བ་ཟློས་པའི་རིགས་ཀྱི་རྩོད་པ།བཞི་བ་ཟློས་པའི་རིགས་ཀྱི་རྩོད་པ་ནི། ཚད་མ་རྣམ་འགྲེལ་རང་འགྲེལ་ལས། དེ་ཆས་ཁྱབ་པ་ཞེས་བྱ་བས་དཔེ་ཆོས་ཅན་ལ་ཡོད་པར་གྲུབ་པས་ཆོས་ཅན་གྱི་ཆོས་སྨྲས་པའི་ཕྱིར་བསྒྲུབ་པར་བྱ་བའི་ཆོས་ཅན་ཡིན་པར་ཡོངས་སུ་བཟུང་ངོ་ཞེ་ན། ཞེས་གསུངས་པ་ལྟར་དེ་དཔེ་ལ་ཉེ་བ་མི་འཐད་པར་ཐལ། རྟགས་ཚུལ་དང་བོ་འཆད་པའི་ཚེ་ཆོས་ཅན་གྱི་ཆོས་ཞེས་པས་དཔེ་ལ་ཡོད་པར་བསྟན་ན་དེ་ཆས་ཁྱབ་པ་ཞེས་རྗེས་ཁྱབ་སྟོན་པའི་ཚིག་གིས་རྟགས་དེ་དཔེ་ལ་ཡོད་པར་བསྟན་པས་དེ་དང་ཟློས་སྐྱོན་ཡོད་ལ། དེ་ལྟར་བཟློས་པར་གོ་བའི་ཤུགས་ཀྱིས་ཆོས་ཅན་གྱི་ཆོས་ཞེས་རང་མིང་གི་སྨོས་པའི་ཕྱིར་བསྒྲུབ་པའི་ཆོས་ཅན་ཡིན་པར་བཟུང་རིག་པའི་ཕྱིར་ཞེས་རྩོད་ལ། དེའི་ལན་ནི། དེ་ལྟར་འདོད་པ་མི་འཐད་པར་ཐལ། གྲུབ་བཞིན་དུ་བསྣན་པའི་ཕྱིར་ཟློས་ནས་བཤད་ན་ཟློས་སྐྱོན་ཡོད་མི་དགོས་པ་གང་ཞིག ཤུགས་ཀྱིས་གོ་དགོས་ན་རྟོགས་དཀའ་བའི་སྐྱོན་ཡོན་པའི་ཕྱིར། དང་པོ་གྲུབ་སྟེ། རྗེས་ཁྱབ་བཤད་པས་ལྡོག་ཁྱབ་གོ་ཡང་དེའི་རྗེས་སུ་ཡང་བསྣན་ནས་བཤད་པ་བཞིན་ཡིན་པའི་ཕྱིར་ཏེ། རང་འགྲེལ་ལས། གྲུབ་བཞིན་དུ་བསྣན་པའི་ཕྱིར་ཡང་སྨོས་པ་ཡིན་པར་དགོས་པར་འགྱུར་ཏེ། མཐུན་པ་ཁོ་ན་ལ་ཡོད་པ་ཞེས་བྱ་བས་མི་མཐུན་པའི་ཕྱོགས་ལས་ལྡོག་པ་གྲུབ་མོད་ཀྱི་བསྒྲུབ་པར་བྱ་བ་མེད་པ་ལ་མེད་པ་སྨོས་པ་བཞིན་ནོ། །ཞེས་གསུངས་པའི་ཕྱིར། རྟགས་གཉིས་པ་གྲུབ་སྟེ། རང་འགྲེལ་ལས། ཤུགས་ཀྱིས་དོན་གོ་ན་རྟོགས་པར་དཀའ་བ་ཡོངས་སུ་སྤངས་པའི་ཕྱིར་ཕྱོགས་ཞེས་སྨོས་པ་ཡིན་ནོ། །ཞེས་གསུངས་པའི་ཕྱིར་རོ། །ཞེས་ཕྱོགས་སྒྲའི་རྩོད་པ་འདི་ནི་དངོས་གྲུབ་དཔལ་གྱིས་བྲིས་པའོ། །འདི་ཀྱང་རྒྱལ་བསྟན་ཡུན་རིང་དུ་གནས་པར་གྱུར་ཅིག །སརྦ་མངྒ་ལཾ། ། ཕྱོགས་ཆོས་འཁོར་ལོའི་གཏན་ཚིགས་དགུའི་རེའུ་མིག།ཕྱོགས་ཆོས་འཁོར་ལོའི་གཏན་ཚིགས་དགུའི་རེའུ་མིག་ཅེས་བྱ་བ་བཞུགས་སོ། ། སྒྲ་ཆོས་ཅན། རྟག་སྟེ། གཞལ་བྱ་ཡིན་པའི་ཕྱིར། སྒྲ་ཆོས་ཅན། མི་རྟག་སྟེ། བྱས་པའི་ཕྱིར། དུང་སྒྲ་ཆོས་ཅན། རྩོལ་བྱུང་ཡིན་ཏེ། མི་རྟག་པ་ཡིན་པའི་ཕྱིར། སྒྲ་ཆོས་ཅན། རྟག་སྟེ། བྱས་པའི་ཕྱིར། སྒྲ་ཆོས་ཅན། རྟག་སྟེ། མཉན་བྱ་ཡིན་པའི་ཕྱིར། དུང་སྒྲ་ཆོས་ཅན། རྟག་སྟེ། རྩོལ་བྱུང་ཡིན་པའི་ཕྱིར། དུང་སྒྲ་ཆོས་ཅན། རྩོལ་བྱུང་མ་ཡིན་ཏེ། མི་རྟག་པའི་ཕྱིར།དུང་སྒྲ་ཆོས་ཅན། མི་རྟག་སྟེ།རྩོལ་བྱུང་ཡིན་པའི་ཕྱིར། སྒྲ་ཆོས་ཅན། རྟག་སྟེ། རེག་བྱ་ཅན་མ་ཡིན་པའི་ཕྱིར། འདི་ལ་བཀོད་ཚུལ་མང་མོད་འདིར་སློབ་དཔོན་ཕྱོགས་གླང་གི་ཚད་མ་མདོ་དང་ཕྱོགས་ཆོས་འཁོར་ལོའི་དངོས་ཟིན་ཙམ་བཀོད་པའོ། ། ལུང་འགལ་གྱི་རྣམ་བཞག་ཉུང་གསལ་བློ་གསལ་ཡིད་ཀྱི་རྒྱན།ལུང་འགལ་གྱི་རྣམ་བཞག་ཉུང་གསལ་བློ་གསལ་ཡིད་ཀྱི་རྒྱན་ཞེས་བྱ་བ་བཞུགས་སོ། ། བླ་མ་དང་མགོན་པོ་འཇམ་པའི་དབྱངས་ལ་ཕྱག་འཚལ་ལོ། ། དེ་ལ་འདིར་ལུང་འགལ་གྱི་རྣམ་བཞག་ཅུང་ཟད་བཤད་པ་ལ། དང་པོ་སློབ་དཔོན་དབང་ཕྱུག་སྡེ་ན་རེ། རྟགས་མི་མཐུན་ཕྱོགས་ལ་མ་མཐོང་བ་ཙམ་གྱི་ལྡོག་ཁྱབ་གྲུབ་དགོས། གཞན་དུ་ན་མི་མཐུན་ཕྱོགས་མཐའ་དག་ལ་མེད་པར་ངེས་དགོས་ན་ཚུར་མཐོང་གི་ལྡོག་ཁྱབ་གྲུབ་པ་དཀའ་བར་འདོད་དོ། །དེ་ལ་ལུང་འགལ་བརྗོད་པ་ལ་དྲུག་ལས། དང་པོ་ནི། རྣམ་འགྲེལ་ལས། འཁྲུལ་བ་ཅན་གྱི་གཉེན་པོ་ནི། །མི་མཐུན་ཆོས་བརྗོད་གང་ཡིན་པ། །གལ་ཏེ་མ་མཐོང་འབྲས་ཅན་དེ། །དེ་མ་སྨོས་ཀྱང་རྟོགས་པར་འགྱུར། །མེད་ཅེས་བྱ་བའི་ཚིག་གིས་ཀྱང༌། །དེ་མེད་ཁོ་ན་མིན་གལ་ཏེ། །ཇི་ལྟར་མེད་རིགས་དེ་བརྗོད་ན། །དེ་ཚེ་མེད་ཅེས་བྱ་བར་རྟོགས། །ཞེས་བྱུང༌། དེའི་དོན་འཆད་པ་ལ། མི་མཐུན་སྦྱོར་སྨོས་པ་དོན་མེད་དུ་ཐལ་བ་ནི། གལ་ཏེ་མ་འཐོང་བས་ལྡོག་འགྱུར། །ཞེས་དྲུག་ཀའི་མགོར་སྦྱར་རོ། །སློབ་དཔོན་ཆོས་ཅན། སྦྱོར་སྐོར་གཅིག་གི་འཁྲུལ་པ་ཅན་མ་ངེས་པའི་རྟགས་དེ་རྟགས་ཡང་དག་ཡིན་པའི་གཉེན་པོར་ཆོས་མི་མཐུན་སྦྱོར་བརྗོད་པ་གང་ཡིན་པ་དོན་མེད་པར་ཐལ། རྟགས་ཆོས་འབྲེལ་པ་མེད་པར་དེ་ཡི་མི་མཐུན་ཕྱོགས་ལ་མ་མཐོང་ཙམ་གྱིས་དེ་ཡི་ལྡོག་ཁྱབ་ཀྱི་ཚུལ་གྲུབ་པའི་ཕྱིར། རྟགས་ཁས། འདོད་ན། རིགས་སྒོ་ལས། རེ་ཞིག་འགལ་བ་དང༌། མ་ངེས་པའི་གཉེན་པོར་གཉིས་ཀ་བརྗོད་པ་གང་ཡིན་པ་འདི་ནི་རིགས་སོ། ཞེས་པ་དང་འགལ་ལ། གལ་ཏེ་ཆོས་མི་མཐུན་སྦྱོར་དེ་རྟགས་ཡང་དག་གི་མི་མཐུན་ཕྱོགས་ལ་མ་མཐོང་བ་ཙམ་སྟོན་པའི་འབྲས་བུ་ཅན་ཡིན་ནོ་ཞེ་ན། རྟགས་ཡང་དག་རང་གི་མི་མཐུན་ཕྱོགས་ལ་མ་མཐོང་བ་ཙམ་ཆོས་ཅན། ཁྱོད་རྟོཊ་པའི་ཆེད་ཁོ་ནར་མི་མཐུན་སྦྱོར་སྨོས་མི་དགོས་པར་ཐལ། དེ་མ་སྨོས་ཀྱང༌། རྟགས་ཡང་དག་རང་གི་མི་མཐུན་ཕྱོགས་ལ་མཐོང་བ་ཁེགས་པའི་སྒོ་ནས་ཀྱང་ཁྱོད་རྟོགས་པར་འགྱུར་བས་སོ། །དེ་སྔར་ནས་རྟོགས་ཀྱང་མ་ངེས་པས་བློས་ངེས་པའི་ཆེད་ཁོ་ནར་མི་མཐུན་སྦྱོར་སྨོས་ཞེ་ན། མེད་ཅེས་བྱ་བའི་ཚིག་གིས་ཀྱང་སྟེ། ཆོས་མི་མཐུན་སྦྱོར་གྱི་སྒྲུབ་ངག་ཆོས་ཅན། རྟགས་ཡང་དག་རང་གི་མི་འཐུན་ཕྱོགས་ལ་མེད་པ་ཁོ་ནར་ཚད་མའི་སྟོབས་ཀྱིས་ངེས་པར་བྱེད་ནུས་པ་མ་ཡིན་པར་ཐལ། དེ་དེ་ལ་མ་འཐོང་ཙམ་ཁོ་ན་སྟོན་པས་སོ། །རྟགས་ཁས། །མ་ཁྱབ་ན། དེ་སྔར་ནས་རྟོགས་ཀྱང༌། དེ་ངེས་མི་ནུས་པ་བུད། གལ་ཏེ་འོ་ན་ཇི་ལྟར་མེད་པར་རྟོགས་པར་འགྱུར་ཞེ་ན། གང་རྟག་ན་མ་བྱས་པས་ཁྱབ། དཔེར་ན་འདུས་མ་བྱས་ནམ་མཁའ་བཞིན། སྒྲ་ནི་བྱས་ཞེས་པའི་སྒྲུབ་ངག་ཆོས་ཅན། བྱས་པ་དེ་དེ་ཡི་མི་མཐུན་ཕྱོགས་ལ་མེད་པར་རྟོགས་པར་བྱེད་ནུས་ཏེ། བྱས་པས་དེ་སྒྲུབ་ཀྱི་རྟགས་ཆོས་རང་བཞིན་འབྲེལ་པ་དེ་བརྗོད་པའི་སྒྲུབ་ངག་ཡིན་པས་སོ། །ལུང་འགལ་གཉིས་པ་ནི། རྣམ་འགྲེལ་ལས། གལ་ཏེ་མ་མཐོང་བས་ལྡོག་འགྱུར། །ཅི་སྟེ་ལྷག་ལྡན་འཁྲུལ་ཅན་ཡིན། །ཞེས་བྱུང༌། ལྷག་ལྡན་འཁྲུལ་པ་ཅན་མ་ཡིན་པར་ཐལ་བ་ནི། གལ་ཏེ་མ་འཐོང་བས་ལྡོག་ཁྱབ་ཀྱི་ཚུལ་གྲུབ་པར་འགྱུར་ན། ཟོས་པའི་ཤིང་ཐོག་རོ་མངར་ཅན་དང་ཤིང་ཕུང་གཅིག་ལས་སྐྱེས་པ་ཆོས་ཅན། དེ་ཡིན་པའི་མ་ཟོས་པའི་ཤིང་ཐོག་རྣམས་རོ་མངར་ཅན་དུ་བསྒྲུབ་པའི་ལྡོག་ཁྱབ་འཁྲུལ་བ་མ་ཡིན་པར་ཐལ། དེ་ཡི་མི་མཐུན་ཕྱོགས་འགའ་ལ་མ་འཐོང་བས་སོ། འདོད་ན། ཀུན་བཏུས་སུ། གཟུགས་ལ་སོགས་པ་མཚུངས་པས་རོ་ལ་སོགས་པ་གདོན་མི་ཟ་བར་མཚུངས་པར་འགྱུར་བ་ནི་མ་ཡིན་ནོ། །ཞེས་པ་དང་འགལ་བའོ། ། གསུམ་པ་ནི། རྣམ་འགྲེལ་ལས། ལྡོག་པ་ཅན་ཡང་གཏན་ཚིགས་འགྱུར། །ཞེས་བྱུང༌། དེའི་དོན་ནི། སྲོག་སོགས་ཡང་དག་ཏུ་ཐལ་བ་ནི། སྲོག་སོགས་ཆོས་ཅན། གསོན་ལུས་བདག་བཅས་སུ་སྒྲུབ་པའི་མི་འཁྲུལ་བའི་ལྡོག་ཁྱབ་ཅན་ཏུ་ཐལ། དེ་ཡི་མི་མཐུན་ཕྱོགས་ལ་མ་མཐོང་ཙམ་གྲུབ་པས་སོ། །ཁྱབ་པ་ཁས། འདོད་ན། གཏན་ཚིགས་ཡང་དག་དུ་ཐལ། ཕྱོགས་ཆོས་དང་ལྡོག་ཁྱབ་གྲུབ་པའི་ཕྱིར། འདོད་ན། ཚད་མ་མདོའི་རང་འགྲེལ་ལས། ལྷག་མ་ལྔ་བོ་དག་ནི་གཏན་ཚིགས་སམ་འགལ་བ་ཉིད་དུ་མ་ངེས་ཏེ་ཐེ་ཚོམ་གྱི་རྒྱུའོ། །ཞེས་པ་དང་འགལ་བའོ། །བཞི་པ་ནི། རྣམ་འགྲེལ་ལས། མ་གྲུབ་སྦྱོར་བ་བརྗོད་བྱ་མིན། །ཞེས་བྱུང༌། དེའི་འཆད་པ་ལ། མ་གྲུབ་སྦྱོར་བ་མི་རིགས་པར་ཐལ་བ་ནི། ཚིག་སྨྲ་བའི་སྐྱེས་བུ་ཕ་རོལ་པོ་ཆགས་ལྡན་དུ་བསྒྲུབ་པ་སོགས་སྦྱོར་སྐོར་གཅིག་གི་ལྡོག་ཁྱབ་ལ་ཐེ་ཚོམ་ཟ་ནས་ལྡོག་ཁྱབ་འཁྲུལ་བའི་རྟགས་ཀུན་ཆོས་ཅན། ཕྱོགས་ཆོས་ལ་ཐེ་ཚོམ་ཟ་ནས་ཕྱོགས་ཆོས་མ་གྲུབ་པ་དང་དཔེ་དོན་དུ་སྦྱར་ནས་དེ་སྒྲུབ་ཀྱི་ལྡོག་ཁྱབ་སྐྱོན་ཅན་དུ་སློབ་དཔོན་གྱིས་བརྗོད་པར་བྱ་བར་རིགས་པ་མིན་པར་ཐལ། དེ་ཡི་མི་མཐུན་ཕྱོགས་ལ་མ་མཐོང་ཙམ་གྲུབ་པའི་ཕྱིར། ཡང་ན་གཞན་དོན་སྐབས་ཀྱི་སྒྲུབ་རྟགས་ཕལ་ཆེར་གྱི་ཕྱོགས་ཆོས་རྒོལ་ཕྱི་རྒོལ་གཉིས་ཀ་དང༌། གང་རུང་གིས་མ་གྲུབ་པ་དང༌། ཐེ་ཚོམ་ཟ་བ་དང༌། ཆོས་ཅན་གཞི་མ་གྲུབ་ན་ཕྱོགས་ཆོས་མ་གྲུབ་པའི་དཔེ་བཞི་དང༌། ཕྱོགས་ཆོས་ཅན་དགུའི་རྗེས་སུ་འགྲོ་ལྡོག་གི་ཁྱབ་པ་རྒོལ་ཕྱི་རྒོལ་གཉིས་ཀ་དང་གང་རུང་གིས་མ་གྲུབ་པ་དང༌། ཐེ་ཚོམ་ཟ་བ་དང་མི་མཐུན་དཔེ་གཞི་མ་གྲུབ་པ་བཞིའི་སྔ་མ་གསུམ་དཔེ་དོན་སྦྱོར་ལ། ཐ་མ་མི་སྦྱོར་གསུངས་པ་མི་འཐད་པར་ཐལ། ཁྱབ་པ་ལ་ཐེ་ཚོམ་ཟ་ཡང་མི་ མཐུན་ཕྱོགས་ལ་མ་མཐོང་བ་ཙམ་གྱིས་ལྡོག་ཁྱབ་གྲུབ་པའི་ཕྱིར། འདོད་ན། སློབ་དཔོན་གྱི་མདོའི་རང་འགྲེལ་ལས། ཕྱོགས་ཀྱི་ཆོས་ནི་རྒོལ་བ་དང་ཕྱིར་རྒོལ་བ་གཉིས་ཀ་ལ་ངེས་པར་བཟུང་ངོ༌། ། དེ་བཞིན་དུ། མཐུན་པའི་ཕྱོགས་ལ་ཡོད་པ་དང༌། མེད་པ་ཞེས་བྱ་བ་ལ་སོགས་པ་དག་ལ་ཡང༌། ཅི་རིགས་པར་བརྗོད་པར་བྱའོ། །ཞེས་པ་དང་འགལ་བའོ། ། ལྔ་པ་ནི། རྣམ་འགྲེལ་ལས། ཁྱད་པར་རྣམ་པར་གཅོད་པ་ཡི། །གཏན་ཚིགས་སུ་འགྱུར་མ་མཐོང་ཕྱིར། །ཚད་མ་གཞན་གྱིས་གནོད་ཅེ་ན། །ད་ནི་མ་མཐོང་ལས་མེད་མིན། །དེ་བཞིན་དུ་ནི་གཞན་ལ་ཡང༌། །ཚད་མ་གཞན་གྱིས་གནོད་པ་སྲིད། །ཅེས་བྱུང༌། ཁྱད་པར་མཉན་བྱ་གཉིས་ཀ་རྣམ་པར་གཅོད་པར་ཐལ་བ་ནི། ཁྱད་པར་མཉན་བྱ་ཆོས་ཅན། རྟག་པ་ལས་ཀྱང་ལྡོག་ཚུལ་རྣལ་མར་གྲུབ། མི་རྟག་པ་ལས་ཀྱང་ལྡོག་ཚུལ་རྣལ་མར་གྲུབ་པར་ཐལ། དེ་དག་ལ་མ་འཐོང་ཙམ་གྲུབ་པའི་ཕྱིར། འདོད་ན་སྒྲ་ལ་མི་རྟག་པ་རྣམ་པར་གཅོད་པ་དང་རྟག་པ་རྣམ་པར་གཅོད་པའི་གཏན་ཚིགས་ཡང་དག་དུ་ཐལ། ཕྱོགས་ཆོས་དང་འདོད་པ་དེ་ཡི་ཕྱིར། འདོད་ན། སློབ་དཔོན་གྱིས།མཉན་པར་བྱ་བ་ཉིད་ནི་ཇི་ལྟར་ཡང་རྣམ་པར་གཅོད་པའི་གཏན་ཚིགས་མ་ཡིན་ནོ། །ཞེས་པ་དང་འགལ། གཉིས་ཀ་གཅོད་མི་ནུས་ཏེ། དེ་ལ་ཚད་མ་གཞན་གྱིས་གནོད་པས་ཕྱིར། ཞེ་ན། རྟགས་ཆོས་ཅན། རང་གི་མི་འཐུན་ཕྱོགས་འགའ་ལ་མ་འཐོང་བ་ཙམ་ཁོ་ན་ལས་རང་གི་མི་མཐུན་ཕྱོགས་ཐམས་ཅད་ལ་མེད་པར་གྲུབ་པ་མ་ཡིན་པར་ཐལ། དེ་གྲུབ་པ་ལ་ཚད་མས་གནོད་པས་སོ། །ཁྱབ་བསལ་ཁས་སོ། །མཉན་བྱ་ཁོ་ན་ལ་དེར་ཟད་ཀྱི། རྟགས་གཞན་ལ་དེ་ལྟ་མིན་ནོ། །ཞེ་ན། མཉན་བྱ་ལས་གཞན་པའི་རྟགས་ལའང་ཆོས་ཅན། ཆོས་འདྲ། དེ་བཞིན་དུ་དེས་དེར་གྲུབ་པ་ལ་ཚད་མས་གནོད་པ་སྲིད་པས་སོ། །འཁོར་གསུམ་མོ། ། དྲུག་པ་ནི། རྣམ་འགྲེལ་ལས། མ་མཐོང་ཕྱིར་རེག་མཐོང་བ་ལ། །མི་ལྡན་འཁྲུལ་བ་མེད་པ་ཅན། །ཞེས་བྱུང༌། དེའི་དོན་འཆད་པ་ལ། མ་མཐོང་བས་རེག་བྱ་འགོག་པ་རིགས་པར་ཐལ་བ་ནི། བྱེ་བྲག་པས་མཐོང་མ་མཐོང་གི་ས་ཆུ་མེ་གསུམ་ལ་ཆོས་ཅན། དྲང་མིན་དྲོ་མིན་གྱི་རེག་བྱ་མི་ལྡན་ཏེ། མ་མཐོང་བའི་ཕྱིར། ཟེར་བ་ལ། ཁྱོད་ལྟར་ན། ཤེས་བྱ་ཆོས་ཅན། དེ་འདྲའི་རེག་པ་མ་མཐོང་བ་དེ་མཐོང་མ་མཐོང་གི་ས་ཆུ་མེ་གསུམ་ལ་དེ་མེད་པར་བསྒྲུབ་པའི་ཁྱབ་པ་འཁྲུལ་པ་མེད་པ་ཅན་དུ་ཐལ། ཆོས་དེ་མ་མཐོང་ཙམ་གྱིས་ཆོས་དེ་མེད་པར་གྲུབ་པས་སོ། །འདོད་ན། རླུང་གིས་རབ་ཏུ་བྱེད་པ་ལས། གང་ཡང་གལ་ཏེ་མ་འཐོང་བ་ཙམ་གྱིས་མཐོང་བ་དག་ལ་འགོག་པར་བྱེད་ན་དེ་ཡང་རིགས་པ་མ་ཡིན་ནོ། །ཞེས་པ་དང་འགལ་བའོ། །ཞེས་པ་འདི་ནི་དཔལ་ལྡན་ཆོས་འཕེལ་ལམ་ངག་དབང་དངོས་གྲུབ་དཔལ་གྱིས་རྣམ་འགྲེལ་གྱི་འགྲེལ་བ་རིན་ཆེན་ཕྲེང་བ་ལྟར་སྨྲས་པའོ། ། བསྟན་བཅོས་མངོན་རྟོགས་རྒྱན་གྱི་སྐབས་ནས་བསྟན་པའི་དངོས་བརྒྱད་དོན་བདུན་ཅུའི་རྣམ་བཞག་མདོར་བསྡུས་ཏེ་བསྟན་པ་རྗེ་བཙུན་དམ་པའི་ཞལ་ལུང་གཞན་ཕན་ཉི་མ།བསྟན་བཅོས་མངོན་རྟོགས་རྒྱན་གྱི་སྐབས་ནས་བསྟན་པའི་དངོས་བརྒྱད་དོན་བདུན་ཅུའི་རྣམ་བཞག་མདོར་བསྡུས་ཏེ་བསྟན་པ་རྗེ་བཙུན་དམ་པའི་ཞལ་ལུང་གཞན་ཕན་ཉི་མ་ཞེས་བྱ་བ་བཞུགས་སོ། ། རྣམ་མང་ཚོགས་གཉིས་རིན་ཆེན་ལས་གྲུབ་མཚན་དཔེས་རབ་མཛེས་ལྟ་བས་མི་ངོམས་སྐུ། །རྣམ་མང་ཡན་ལག་དྲུག་ཅུས་ཤེར་ཕྱིན་ལེགས་གསུང་སྐྱེ་དགུ་མ་ལུས་ཚིམ་མཛད་གསུང༌། །རྣམ་མང་ཏིང་འཛིན་བྱེ་བས་རྣམ་བཀྲའི་སྒྲིབ་རྣམས་གྲོལ་བའི་རྣམ་ཀུན་མཁྱེན་པའི་ཐུགས། །རྣམ་མང་རྒྱལ་བས་པད་དཀར་ལྟར་བསྔགས་མཉམ་མེད་ཤཱཀྱ་སེང་གེར་གུས་པས་འདུད། ། ལུང་དང་རིགས་པས་ཡུམ་དོན་མ་ལུས་ཀུན། ། དངོས་བརྒྱད་དོན་གྱི་རྣམ་པ་བཅུ་ཕྲག་བདུན། ། གསལ་བར་བྱ་སྟེ་རྒྱན་གྱི་དགོངས་དོན་མཆོག ། ཤེས་འདོད་བློ་ལྡན་རྣམས་ཀྱིས་གསན་པར་རིགས། ། དེ་ལ་འདིར་བདག་ཅག་གི་སྟོན་པ་ཐུགས་བརྩེ་བ་ཆེན་པོས་རྒྱུད་ཡོངས་སུ་གཏམས་པ་གང་ཉིད་ཀྱིས་དང་པོར་བྱང་ཆུབ་མཆོག་ཏུ་ཐུགས་བསྐྱེད། བར་དུ་བསྐལ་བ་གྲངས་མེད་གསུམ་དུ་ཚོགས་གཉིས་བསགས། མཐར་སྐུ་བཞིའི་གོ་འཕང་མངོན་དུ་མཛད། དེ་ནས་སྔོན་གྱི་ཐུགས་བསྐྱེད་བླ་ན་མེད་པ་བཞིན་མི་མཇེད་འཇིག་རྟེན་གྱི་ཁམས་འདིར་མཆོག་གི་སྤྲུལ་བའི་སྐུའི་རྣམ་པར་རོལ་བའི་སྒོ་ནས་གདུལ་བྱ་རིགས་ཅན་གསུམ་གྱི་ཁམས་དབང་མོས་པ་བཞིན་ཆོས་ཀྱི་ཕུང་པོ་བརྒྱད་ཁྲི་བཞི་སྟོང་ངམ་ཆོས་ཀྱི་འཁོར་ལོ་རིམ་པ་གསུམ་གསུངས་ལ། དེའི་ནང་ནས་འཁོར་ལོ་བར་ཐའི་སྐབས་སུ་ཐེག་ཆེན་གྱི་ཟབ་པ་དང་རྒྱ་ཆེ་བའི་རྣམ་བཞག་རྒྱ་ཆེར་གསུངས་པ་རྣམས་རྒྱལ་ཚབ་བྱམས་མགོན་གྱིས་ཚིག་ཉུང་ངུས་དོན་ཚང་བར་བཤད་པའི་བསྟན་བཅོས་མངོན་པར་རྟོགས་པའི་རྒྱན་ལས་བསྟན་པའི་དངོས་བརྒྱད་དོན་བདུན་ཅུའི་རྣམ་བཞག་ནི་འདིར་གང་བཤད་པར་བྱ་བའི་ཆོས་སོ། །དེ་བཤད་པ་ལ། དངོས་པོ་བརྒྱད་བཤད་པ་དང༌།དོན་བདུན་ཅུ་བཤད་པ་གཉིས། དང་པོ་ནི། རྩ་བར། ཤེས་རབ་ཕ་རོལ་ཕྱིན་པ་ནི། །དངོས་པོ་བརྒྱད་ཀྱིས་ཡང་དག་བཤད། །རྣམ་ཀུན་མཁྱེན་ཉིད་ལམ་ཤེས་ཉིད། །དེ་ནས་ཐམས་ཅད་ཤེས་པ་ཉིད། །རྣམ་ཀུན་མངོན་རྫོགས་རྟོགས་པ་དང༌། །རྩེ་མོར་ཕྱིན་དང་མཐར་གྱིས་པ། །སྐད་ཅིག་གཅིག་མངོན་རྫོགས་བྱང་ཆུབ། །ཆོས་ཀྱི་སྐུ་དང་དེ་རྣམ་བརྒྱད། །ཅེས་གསུངས་སོ། །དེའི་དོན་འཆད་པ་ལ། ཤེར་ཕྱིན་བཤད་པ་དང༌། དངོས་པོ་བརྒྱད་དངོས་བཤད་པ་དང་གཉིས། དང་པོ་ནི། སོ་སོ་རང་རིག་པའི་དབྱིངས་རིག་གཉིས་སུ་མེད་པའི་ཆོས་རྣམས་ཀྱི་གནས་ལུགས་མཐར་ཐུག་དེ། ཤེར་ཕྱིན་གྱི་མཚན་ཉིད་ཡིན་ཏེ། མདོ་ལུགས་མ་ལས། ཤེར་ཕྱིན་དངོས་ནི་ཆོས་ཉིད་དེ་བཞིན་ཉིད་རང་བྱུང་གི་ཡེ་ཤེས་དོན་དམ་པའི་ཤེས་རབ་ནམ་མཁའ་ལྟར་ཀུན་ལ་ཁྱབ་པའི་ཡེ་ཤེས་ཆེན་པོ་སེམས་ཀྱི་རང་བཞིན་འོད་གསལ་བ་དེ་བཞིན་གཤེགས་པའི་སྙིང་པོ་གཉིས་སུ་མེད་པའི་གཤིས་ལུགས་ཀྱི་སངས་རྒྱས་བདེན་པ་དེ་ཁོ་ན་ཉིད་ཆོས་ཀྱི་སྐུ་བླ་ན་མེད་པའི་བྱང་ཆུབ་དེ་བཞིན་ཉིད། ཅེས་པ་ནས། མདོ་ལས། རབ་འབྱོར་ཆོས་ཐམས་ཅད་ཀྱི་དེ་བཞིན་ཉིད་གང་ཡིན་པ་དེ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་པོ་ཞེས་དང༌། གཟུགས་ཀྱི་དེ་བཞིན་ཉིད་གང་ཡིན་པ་དེ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་སྟེ། ཞེས་སོགས་ཀྱིས་ཤེར་ཕྱིན་དང༌། བྱང་ཆུབ་དང༌། དེ་བཞིན་ཉིད་རྣམས་གཅིག་ཡིན་པར་གསུངས་པ་དང༌། ཞེས་གསུངས་པའི་ཕྱིར་རོ། །གཉིས་པ་དངོས་པོ་བརྒྱད་དངོས་བཤད་པ་ལ། མདོར། རྣམ་པ་ཐམས་ཅད་མཁྱེན་པ་ཉིད་ནི་དེ་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ཀྱི་ཡིན་ནོ། །ལམ་ཤེས་པ་ཉིད་ནི་བྱང་ཆུབ་སེམས་དཔའ་རྣམས་ཀྱི་ཡིན་ནོ། །ཐམས་ཅད་ཤེས་པ་ཉིད་ནི་ཉན་ཐོས་དང་རང་སངས་རྒྱས་རྣམས་ཀྱི་ཡིན་ནོ། །ཞེས་སོགས་སོ། །ཇི་ལྟ་ཇི་སྙེད་མ་ལུས་པ་མཁྱེན་པའི་མཐར་ཐུག་གི་ཡེ་ཤེས་དེ། རྣམ་མཁྱེན་གྱི་མཚན་ཉིད་ཡིན་ཏེ།ཉ་ཊཱིཀ་ལས།ཇི་ལྟ་ཇི་སྙེད་མཁྱེན་པའི་ཡེ་ཤེས་མཐར་ཐུག་གམ་ཆོས་ཐམས་ཅད་བདེན་པའི་སྐྱེ་མེད་དུ་རྟོགས་ཤིང་དོན་གཉིས་མཐར་ཐུག་པ་སྟེ། ཞེས་པས་སོ། །ལམ་གསུམ་བདེན་པའི་རང་བཞིན་མེད་པའམ་ལམ་གསུམ་གྱི་ངོ་བོ་དམིགས་རྣམ་ཅི་རིགས་ཕྱིན་ཅི་མ་ལོག་པར་སྒོམ་པའི་ཐེག་ཆེན་སློབ་ལམ་དེ། ལམ་ཤེས་ཀྱི་མཚན་ཉིད་ཡིན་ཏེ། ཉ་ཊཱིཀ་ལས། ལམ་གསུམ་བདེན་པའི་རང་བཞིན་མེད་པའམ་ལམ་གསུམ་གྱི་ངོ་བོ་དམིགས་རྣམ་སོགས་ཕྱིན་ཅི་མ་ལོག་པར་རྟོགས་པའི་ཐེག་ཆེན་སློབ་ལམ་ཞེས་པའོ། །ཞེས་སོ། །ས་མཚམས་ཚོགས་ལམ་ནས་རྒྱུན་མཐའི་བར་ཏུ་ཡོད་དོ། །གཞི་གང་ཟག་གི་བདག་མེད་དང་གཞི་ཕུང་སྐྱེ་ཁམས་ཀྱི་ངོ་བོ་མཚན་ཉིད་དབྱེ་བ་སོགས་ཅི་རིགས་སྒོམ་པའི་ཐེག་དམན་གྱི་ལམ་དེ། གཞི་ཤེས་ཀྱི་མཚན་ཉིད་ཡིན་ཏེ། ཉ་ཊཱིཀ་ལས། གཞི་གང་ཟག་གི་བདག་མེད་ཕྱིན་ཅི་མ་ལོག་པར་རྟོགས་པའི་མཚན་འཛིན་གྱི་བློའམ་གཞི་ཕུང་སྐྱེ་ཁམས་ཀྱི་ངོ་བོ་མཚན་ཉིད་དབྱེ་བ་སོཊ་ཇི་བཞིན་དུ་རྟོགས་པའི་མཚན་འཛིན་གྱི་བློ་གང་རུང༌། ཞེས་པས་སོ། །ས་མཚམས་ཐེག་དམན་ཚོགས་ལམ་ནས་དམན་པའི་དགྲ་བཅོམ་པའི་བར་ཏུ་ཡོད་དོ། །མཁྱེན་པ་གསུམ་ལ་དབང་བསྒྱུར་ཐོབ་པའི་ཕྱིར་དུ་མཁྱེན་གསུམ་བསྡུས་ནས་བསྒོམ་པའི་བྱང་ཆུབ་སེམས་དཔའི་སྦྱོར་བ་དེ། རྣམ་རྫོགས་སྦྱོར་བའི་མཚན་ཉིད། དབྱེ་ན་སློབ་ལམ་བཞིའམ་སྦྱོར་བ་ཉི་ཤུ། ས་མཚམས་ནི་ཚོགས་ལམ་ནས་རྒྱུན་མཐའི་བར་ནའོ། །དེ་ལྟར་ཉ་ཊཱིཀ་ཡིད་ཀྱི་མུན་སེལ་ལས། དེས་ན་ཐེག་ཆེན་ཚོགས་ལམ་ནས་རྒྱུན་མཐའི་བར་ན་ཡོད། ཅེས་དང༌། མཁྱེན་པ་གསུམ་ལ་དབང་གྱུར་ཐོབ་པའི་ཕྱིར་དུ་མཁྱེན་གསུམ་བསྡུས་ནས་བསྒོམ་པའི་བྱང་ཆུབ་སེམས་དཔའི་སྦྱོར་བ། ཞེས་གསུངས་སོ། །ཆོས་ཉིད་ལ་སྒོམ་བྱུང་ཐོབ་པའི་བྱང་སེམས་ཀྱི་རྒྱུད་ཀྱི་མཁྱེན་གསུམ་བསྡུས་སྒོམ་རབ་ཏུ་གྱུར་པའི་རིགས་གནས་ཀྱི་མངོན་རྟོགས་དེ། རྩེ་སྦྱོར་གྱི་མཚན་ཉིད་ཡིན་ཏེ། ཉ་ཊཱིཀ་ལས། གསུམ་བསྡུས་བསྒོམ་རབ་ཏུ་གྱུར་པའི་སྦྱོར་བ་སྟེ། དེ་རབ་ཅེས་དང༌།རྩེ་མོའི་མངོན་རྟོགས་ནི། ཐམས་ཅད་མཁྱེན་པ་ཉིད་གསུམ་གྱི་རབ་ཀྱི་གནས་སྐབས་སོ་ཞེས་འདིར་བཤད་དོ། །ཞེས་པས་སོ། །ས་མཚམས་ནི། ཐེག་ཆེན་སྦྱོར་ལམ་དྲོད་ནས་རྒྱུན་མཐའི་བར་ན་ཡོད་དེ། ཉ་ཊཱིཀ་ལས། བདུན་ཡོད་ལ་ས་མཚམས་དྲོད་ནས་རྒྱུན་མཐའི་བར་ན་ཡོད་དེ་འོག་ཏུ་འཆད་དོ། །ཞེས་གསུངས་སོ། །མཁྱེན་གསུམ་གྱི་རྣམ་པ་གོ་རིམ་དུ་བསྒོམ་པའི་རིགས་གནས་ཀྱི་སེམས་དཔའི་སྦྱོར་བ་དེ། མཐར་སྦྱོར་གྱི་མཚན་ཉིད་ཡིན་ཏེ། ཉ་ཊཱིཀ་ལས། གསུམ་བསྡུས་བསྒོམ་གོ་རིམ་དུ་བསྒོམ་པའི་སྦྱོར་བའམ་སྦྱིན་སོགས་དཀར་ཆོས་བཅུ་གསུམ་གོ་རིམ་གྱིས་བསྒོམ་པའི་སྦྱོར་བ་སྟེ། ཞེས་པས་སོ། །དབྱེ་ན་བཅུ་གསུམ། ས་མཚམས་ནི། ཚོགས་ལམ་ནས་རྒྱུན་མཐའི་སྔ་ལོགས་བར་དུ་ཡོད་དེ། ཉ་ཊཱིཀ་ལས། ས་མཚམས་མ་མཐའ་ཚོགས་ལམ་ནས་དངོས་སུ་བྱུང་ཞིང༌། ཞེས་པ་ནས། ཐུག་གི་བར་ཞེས་པ་སྔ་ལོགས་ཚུན་ཆད་ཀྱི་དོན་ཡིན་པས་རྒྱུན་མཐའི་སྔ་ལོགས་ཚུན་ཆད།ཅེས་སོ། །མཁྱེན་གསུམ་བསྡུས་སྒོམ་མཐར་ཐུག་པའི་སྦྱོར་བ་དེ། སྐད་ཅིག་སྦྱོར་གྱི་མཚན་ཉིད་ཡིན་ཏེ། ཉ་ཊཱིཀ་ལས། གསུམ་བསྡུས་བསྒོམ་མཐར་ཐུག་པའི་སྦྱོར་བའོ། །ཞེས་སོ། །དབྱེ་བ་དང་ས་མཚམས་ནི། ཉ་ཊཱིཀ་ལས། ངོ་བོ་གཅིག་ཉིད་ཡུལ་དང་དེ་རྟོགས་ཚུལ་གྱི་སྒོ་ནས་ལྡོག་པའི་དབྱེ་བས་བཞི་ཡོད་ཅིང་ས་མཚམས་རྒྱུན་མཐའ་ཁོ་ནར་ཡོད་པར་སྡུད་འགྲེལ་ལ་སོགས་སུའོ། །ཞེས་གསུངས་སོ། ། སྦྱོར་བ་བསྒོམས་པའི་སྟོབས་ཀྱིས་ཐོབ་བྱ་མཐར་ཐུག་པའི་ཟག་མེད་ཀྱི་ཆོས་དེ། ཆོས་སྐུའི་མཚན་ཉིད་ཡིན་ཏེ། ཉ་ཊཱིཀ་ལས། ཡུམ་གྱི་སྦྱོར་བ་བསྒོམས་པའི་འབྲས་བུ་མཐར་ཐུག་གང་ཞིག་ཟག་མེད་ཀྱི་ཆོས་ཀྱི་ཡན་ལག་ཅན་ཏེ། ཞེས་སོ། །དབྱེ་ན་སྐུ་བཞི། ས་མཚམས་སངས་རྒྱས་ཀྱི་ས་ཁོ་ན་ལ་ཡོད་དོ། ། གཉིས་པ་དོན་བདུན་ཅུ་བཤད་པ་ནི། རྩ་བར། སེམས་བསྐྱེད་པ་དང་གདམས་ངག་དང༌། །ཞེས་པ་ནས། ཆོས་སྐུ་མཛད་པ་དང་བཅས་པ། །རྣམ་པ་བཞིར་ནི་ཡང་དག་བརྗོད། །ཅེས་གསུངས་སོ། །ཐེག་ཆེན་སེམས་བསྐྱེད་ཀྱི་མཚན་ཉིད། གཞན་དོན་དུ་ཡང་དག་པར་རྫོགས་པའི་བྱང་ཆུབ་འདོད་པའི་ཐེག་ཆེན་གྱི་ལམ་དེ་ཡིན་ཏེ། ཉ་ཊཱིཀ་ལས། མཚན་ཉིད་གཞན་གྱི་དོན་དུ་ཡང་དག་པར་རྫོགས་པའི་བྱང་ཆུབ་འདོད་པའི་བློའོ། །ཞེས་གསུངས་སོ། །དབྱེ་ན་སྨོན་འཇུག་གཉིས་སོགས་སོ། །ས་མཚམས་ཐེག་ཆེན་ཚོགས་ལམ་ནས་སངས་རྒྱས་ཀྱི་སའི་བར་རོ། །གདམས་ངག་གི་མཚན་ཉིད། གདུལ་བྱ་ལ་བརྗོད་བྱའི་དོན་ཕྱིན་ཅི་མ་ལོག་པར་ཐར་བ་ཐོབ་པའི་ཐབས་སུ་འདོམས་པའི་རྗོད་བྱེད་རྣམ་དག ཐེག་ཆེན་གདམས་ངག་གི་མཚན་ཉིད། ཐེག་ཆེན་གྱི་གདུལ་བྱ་ལ་བརྗོད་བྱའི་དོན་མ་ནོར་བར་ཐེག་ཆེན་གྱི་ཐར་བ་ཐོབ་པའི་ཐབས་སུ་འདོམས་པའྀ་རྗོད་བྱེད་རྣམ་དག་དེ་ཡིན་ཏེ། མདོ་ལུགས་མ་ལས། བྱང་ཆུབ་སེམས་དཔའ་ལ་ཐེག་ཆེན་གྱི་ཆོས་ཕྱིན་ཅི་མ་ལོག་པར་འདོམས་བྱེད་ཀྱི་ངག་ནི་མཚན་ཉིད་དོ། །ཞེས་གསུངས་སོ། །ཐེག་དམན་གྱི་གདམས་ངག་གི་མཚན་ཉིད། དམན་པའི་གདུལ་བྱ་ལ་བརྗོད་བྱའི་དོན་ཕྱིན་ཅི་མ་ལོག་པར་ཐེག་དམན་གྱི་ཐར་བ་ཐོབ་པའི་ཐབས་སུ་འདོམས་པའི་རྗོད་བྱེད་རྣམ་དག་དེའོ། །དབྱེ་ན། ཐེག་ཆེན་གདམས་ངག་དང༌། ཐེག་དམན་གདམས་ངག་གཉིས། ཡང་ན་རྗེས་བསྟན་དང་གདམས་པའི་གདམས་ངག་གཉིས་སོ། །ངེས་འབྱེད་ཡན་ལག་གི་མཚན་ཉིད། ཐར་ཆའི་རྟོགས་པ་སྔོན་དུ་སོང་བའི་བདེན་པ་མངོན་རྟོགས་ལ་སྦྱོར་བའི་མོས་སྤྱོད་ཀྱི་ལམ་དེ་ཡིན་ཏེ། ཀུན་བཏུས་ས་འགྲེལ་ལས། མཚན་ཉིད་ནི། མྱ་ངན་ལས་འདས་པར་བགྲོད་པའི་གཞི་གང་ཞིག་དོན་མངོན་པར་རྟོགས་པའི་གནས་སྐབས་ཀྱིས་བསྡུས་པའོ། །ཞེས་སོ། །དབྱེ་ན་དྲོད་རྩེ་མོ་བཟོད་པ་ཆོས་མཆོག་བཞིའོ། །རིགས་ཀྱི་མཚན་ཉིད། ཐར་བའི་ཡོན་ཏན་འབྱུང་བའི་རྟེན་དུ་གྱུར་པའི་གཞིའི་དགེ་བ་དེ་ཡིན་ཏེ། རྒྱུད་བླའི་འགྲེལ་བ་བཀའ་འཁོར་ལོ་ཐ་མའི་གསལ་བྱེད་ལས། རིགས་ཀྱི་མཚན་ཉིད། ཅེས་པ་ནས། ཡོན་ཏན་སྒྲོལ་ཞིང་འབྱུང་བའི་གཞིའམ་ས་བོན་ནི་རིགས་ཀྱི་དོན་ནོ། །ཞེས་སོ། །དེ་ལ་དབྱེ་ན། རང་བཞིན་གནས་རིགས་དང༌། རྒྱས་འགྱུར་གྱི་རིགས་གཉིས། དང་པོའི་མཚན་ཉིད། གང་ལ་བརྟེན་ནས་ཐར་ལམ་ལ་འབད་ན་ཐར་བ་ཐོབ་བྱེད་ཀྱི་ཆོས་ཀྱི་དབྱིངས་དེ་ཡིན་ཏེ། ཉ་ཊཱིཀ་ལས། མཚན་ཉིད་ནི། གང་ལ་བརྟེན་ནས་ཐར་ལམ་ལ་འབད་ན་ཐར་བ་ཐོབ་བྱེད་ཀྱི་འདུས་མ་བྱས་ཀྱི་དགེ་བ་ཞེས་པའོ། །ཞེས་སོ། །རྒྱས་འགྱུར་གྱི་རིགས་ཀྱི་མཚན་ཉིད། ཆོས་དབྱིངས་ལ་བརྟེན་ནས་ཐོས་སོགས་ཀྱི་རྐྱེན་གྱིས་བྱང་ཆུབ་འགྱུར་རུང་གི་དགེ་བ་འདུས་བྱས་དེ་ཡིན་ཏེ། ཉ་ཊཱིཀ་ལས། དེ་ལ་བརྟེན་ནས་རྐྱེན་གྱིས་བསྐྱེད་པའི་བྱང་ཆུབ་ཀྱི་རྒྱུར་གྱུར་པའི་དགེ་བ་འདུས་བྱས་ཐམས་ཅད་རྒྱས་པའི་རིགས་ཏེ། མཚན་ཉིད་ནི། བྱང་ཆུབ་ཀྱི་རྒྱུར་གྱུར་པའི་དགེ་བ་འདུས་བྱས་སོ། །ཐེག་གསུམ་སོ་སོར་ཡང་སྦྱར། ཞེས་སོ། །ཐེག་ཆེན་སྒྲུབ་པའི་ཤེས་པར་བྱ་བ་དེ། ཐེག་ཆེན་སྒྲུབ་པའི་དམིགས་པའི་མཚན་ཉིད་ཡིན་ཏེ། མདོ་ལུགས་མ་ལས། དམིགས་པ་སྟེ། བྱང་ཆུབ་སེམས་དཔའ་རྣམས་ཀྱི་ཤེས་པར་བྱ་བ་གང་ཡིན་པ་དེ་སྟོན་པ་འདི་ལྟ་སྟེ། ཞེས་གསུངས་སོ། །མཚན་གཞི་ནི། དོན་དམ་བདེན་པ་དང༌། ཀུན་རྫོབ་བདེན་པ་ལྟ་བུའོ། །དབྱེ་ན་བཅུ་གཅིག་ཡོད་དོ། །བྱང་སེམས་ཀྱི་སྤྱད་པ་སྤྱོད་པའི་ཐོབ་བྱའི་འདོད་དོན་དེ། ཆེད་དུ་བྱ་བའི་མཚན་ཉིད་ཡིན་ཏེ། སྔོན་མེད་ལེགས་བཤད་ལས། ཆེད་དུ་བྱ་བ་ནི་སྒྲུབ་པ་བྱེད་པའི་སྐབས་ཀྱི་འདོད་དོན་ཏེ། ཞེས་སོ། །ཕར་ཕྱིན་ཉམས་སུ་ལེན་པར་གོ་བགོས་པའི་སེམས་དཔའི་མངོན་རྟོགས་དེ།གོ་སྒྲུབ་ཀྱི་མཚན་ཉིད། ཕར་ཕྱིན་དྲུག་ལྡན་དུ་ཉམས་སུ་ལེན་པར་གོ་བགོས་པའི་སེམས་པའི་མངོན་རྟོགས་དེ། འདིར་དངོས་བསྟན་གྱི་གོ་སྒྲུབ་ཀྱི་མཚན་ཉིད་ཡིན་ཏེ། ཉ་ཊཱིཀ་ལས།མི་མཐུན་ཕྱོགས་ཀྱིས་མི་ཚུགས་པའི་གོ་ཆའི་སྒྲུབ་པའི་མཚན་ཉིད། བྱང་སེའི་སྒྲུབ་པ་གང་ཞིག བསམ་པའི་བྱ་བ་སྟེ། ཞེས་པ་ནས། འདིར་སྨོས་གོ་སྒྲུབ་ཀྱི་མཚན་ཉིད། གང་ཞིག ཕྱིན་དྲུག་རེ་རེར་དྲུག་དྲུག་ཚང་བར་ཉམས་སུ་ལེན་པར་གོ་བགོས་པའོ། །ཞེས་གསུངས་སོ། །ཐེག་ཆེན་སྦྱོར་ལམ་ཡན་གྱི་སྒོམ་བྱུང་གི་རྟོགས་པ་ལ་གནས་པའི་སྐབས་ཀྱི་བྱང་སེམས་ཀྱི་སྒྲུབ་པ་དེ། འཇུག་སྒྲུབ་ཀྱི་མཚན་ཉིད་ཡིན་ཏེ། ཉ་ཊཱིཀ་ལས། འཇུག་པའི་སྒྲུབ་པ་ནི། བྱང་སེའི་སྒྲུབ་པ་གང་ཞིག སྦྱོར་བའི་བྱ་བ། འདིར་སྨོས་འཇུག་སྒྲུབ་ཀྱི་མཚན་ཉིད། འཇུག་ཡུལ་ཐེག་ཆེན་དགུ་ཆར་རམ་གང་རུང་ལ་འཇུག་ཅིང་འཛེག་པའི་སྒྲུབ་པའོ། །དབྱེ་ན་དགུའོ། །ཞེས་གསུངས་སོ། །རང་འབྲས་བྱང་ཆེན་དངོས་སུ་ཐོབ་བྱེད་དང་ཐེག་ཆེན་སྦྱོར་ལམ་ཆོས་མཆོག་ཆེན་པོའི་རྟོགས་པ་ཐོབ་ཟིན་པའི་སྒྲུབ་པའི་གཞི་མཐུན་པ་དེ། ཚོགས་སྒྲུབ་ཀྱྀ་མཚན་ཉིད་ཡིན་ཏེ། ཉ་ཊཱིཀ་ལས། ཞུགས་ཏེ་དཔུང་གི་ཚོགས་གསོག་པའི་སྒྲུབ་པའི་མཚན་ཉིད། བྱང་སེའི་སྒྲུབ་པ་གང་ཞིག རང་འབྲས་སློབ་ལམ་མམ་མི་སློབ་པའི་བྱང་ཆེན་གྱི་རྒྱུའི་མཐར་ཐུག་པའི་ཚོགས་སྒྲུབ་པའམ་ཐོབ་པར་བྱེད་པ་སྟེ། ཞེས་གསུངས་པས་སོ། །རང་གི་ཉེར་འབྲས་རྣམ་མཁྱེན་དུ་ངེས་པར་འབྱིན་བྱེད་ཀྱི་རྒྱུན་མཐའི་ཡེ་ཤེས་དེ། ངེས་འབྱུང་སྒྲུབ་པའི་མཚན་ཉིད་ཡིན་ཏེ། མདོ་ལུགས་མ་ལས། རྒྱུན་མཐའི་ཡེ་ཤེས་རྡོ་རྗེ་ལྟ་བུའི་ཏིང་ངེ་འཛིན་སྐད་ཅིག་མའི་སྦྱོར་བའི་རང་བཞིན་ནོ། །ཞེས་གསུངས་སོ། ། ལམ་ཤེས་ཀྱི་དངོས་པོ་བཅུ་གཅིག་ནི། མཚན་འཛིན་གྱི་གཉེན་པོའི་ཡན་ལག་ཏུ་གྱུར་པའི་ལམ་ཤེས་རྫོགས་བྱེད་ཀྱི་ཡོན་ཏན་དེ། འདིར་བསྟན་ལམ་ཤེས་ཀྱི་ཡན་ལག་གི་མཚན་ཉིད་ཡིན་ཏེ། ཉ་ཊཱིཀ་ལས། མཚན་ཉིད་ནི། མཚན་འཛིན་གྱི་གཉེན་པོའི་ཡན་ལག་སྟེ།ཤེར་འབྱུང་གིས་གཉེན་པོའི་ཡན་ལག་ནི་ལམ་ཤེས་ཀྱི་ཡན་ལག་གོ །ཞེས་གསུངས་སོ། །ཉན་ཐོས་ཀྱི་ཡོན་ཏན་ཡར་ལྡན་ནམ་དེ་ལས་ལྷག་པའི་ཉན་ཐོས་ཀྱི་རྟོགས་རིགས་སུ་གནས་པའི་སྦྱོར་་་དངོས་རྗེས་གསུམ་ཚང་བའི་བྱང་སེམས་ཀྱི་མངོན་རྟོགས་དེ། ཉན་ཐོས་ཀྱི་ལམ་ཤེས་པའི་ལམ་ཤེས་ཀྱི་མཚན་ཉིད་ཡིན་ཏེ། ཉ་ཊཱིཀ་ལས། ཉན་ཐོས་ཀྱི་ལམ་ཤེས་པའི་ལམ་ཤེས་ནི། བྱང་ཆུབ་ཐོབ་པ་ངེས་པར་སློབ་དཔོན་ལ་ལྟོས་པས་སློབ་མ་སྟེ་ཉན་ཐོས་ཀྱི་ལམ་ཡོན་ཏན་ཡར་ལྡན་དུ་བྱས་ཏེ་སྦྱོར་དངོས་རྗེས་གསུམ་ཚང་བའི་སྒོ་ནས་ཕྱིན་ཅི་མ་ལོག་པར་ཤེས་པའི་བློ། ཞེས་གསུངས་་་་་་པའི་ཕྱིར་རོ། །རང་རྒྱལ་གྱི་ཡོན་ཏན་ཡར་ལྡན་ནམ་དེ་ལས་ལྷག་པའི་ཐེག་དམན་རྟོགས་རིགས་སུ་གནས་པའི་སྦྱོར་དངོས་རྗེས་གསུམ་ཚང་བའི་བྱང་སེམས་ཀྱི་མངོན་རྟོགས་དེ། རང་་་རྒྱལ་གྱི་ལམ་ཤེས་པའི་ལམ་ཤེས་ཀྱི་མཚན་ཉིད་ཡིན་ཏེ། ཉ་ཊཱིཀ་ལས།རང་རྒྱལ་གྱི་ལམ་ཤེས་པའི་ལམ་ཤེས་ནི།རང་རྒྱལ་གྱི་ལམ་ཡོན་ཏན་ཡར་ལྡན་དུ་བྱས་ཏེ་སྦྱོར་དངོས་རྗེས་གསུམ་ཚང་བའི་སྒོ་ནས་མ་ནོར་བར་ཤེས་པའི་བློ། ཞེས་གསུངས་སོ། །ཐེག་ཆེན་གྱི་བདེན་པ་མངོན་པར་རྟོགས་པའི་གནས་སྐབས་ཀྱིས་བསྡུས་པའི་མྱ་ངན་ལས་འདས་པར་བགྲོད་པའི་ཡེ་ཤེས། ཐེག་ཆེན་མཐོང་ལམ་གྱི་མཚན་ཉིད་ཡིན་ཏེ། ཀུན་བཏུས་ས་འགྲེལ་ལས། མཚན་ཉིད་ནི་མྱ་ངན་ལས་འདས་པར་བགྲོད་པའི་གཞི་གང་ཞིག་དེ་ཁོ་ན་མངོན་པར་རྟོགས་པའི་གནས་སྐབས་ཀྱིས་བསྡུས་པའོ། །ཞེས་སོ། །ཐེག་ཆེན་སྒོམ་ལམ་བློའི་ངོ་བོར་བསྐྱེད་ནས་བསྒོམས་སྟོབས་ཀྱིས་ཐོབ་པའི་འབྲས་བུུ་ཁྱད་པར་བ། སྒོམ་ལམ་གྱི་བྱེད་པའི་མཚན་ཉིད་ཡིན་ཏེ། ཉ་ཊཱིཀ་ལས། སྒོམ་ལམ་གྱི་བྱེད་པའི་མཚན་ཉིད་ནི། སྒོམ་ལམ་གྱི་འབྲས་བུ་ཁྱད་པར་བ་སྟེ་བྱ་བ་དེ་བྱེད་པ་ལ་བྱེད་པ་ཞེས་བཞག་གོ །ཡང་ན་སེམས་དུལ་བ་ལ་སོགས་པའི་འབྲས་བུ་ཁྱད་པར་བ་བྱེད་པའོ། །ཞེས་གསུངས་པའི་ཕྱིར་རོ། །ཡུམ་ཤེར་ཕྱིན་སོགས་ཡོན་ཏན་ཅན་དུ་ངེས་ཟིན་པའི་ཆོས་ལ་དམིགས་ནས་དེ་ཁོ་ན་ལྟར་ཡིན་པར་འཛིན་པའི་ཐེག་ཆེན་སྒོམ་ལམ་དེ། ཐེག་ཆེན་མོས་པ་སྒོམ་ལམ་གྱི་མཚན་ཉིད་ཡིན་ཏེ། ཉ་ཊཱིཀ་ལས། དགེ་བ་གསོག་བྱེད་ཀྱི་ཐེག་ཆེན་སྒོམ་ལམ་མོས་པའི་མཚན་ཉིད། འཕགས་པའི་སྒོམ་ལམ་ཟག་བཅས་གང་ཞིག ཡུམ་ཤེར་ཕྱིན་ཡོན་ཏན་ཅན་ལ་ཡོན་ཏན་ཅན་དུ་ངེས་ནས་འཛིན་པ་སྟེ། ཞེས་དང༌། ངོ་བོ་ནི། ཟག་བཅས་ཀྱི་སྒོམ་ལམ་གང་ཞིག ཡུམ་ཡོན་ཏན་ཅན་དུ་ངེས་པར་བྱས་པའི་དངོས་པོ་ལ་དེ་ཁོ་ན་ལྟར་ངེས་པར་འཛིན་པའོ། །ཞེས་སོ། །དོན་གསུམ་པོ་ཅི་རིགས་ལ་མོས་པའི་ཆེ་བའི་ཡོན་ཏན་ཇི་ལྟ་བ་བཞིན་རྟོགས་ནས་སངས་རྒྱས་སོགས་ཐུགས་དགྱེས་པའམ་མོས་པ་སྒོམ་ལམ་ལ་བརྟེན་ནས་དེའི་ཡོན་ཏན་བརྗོད་པ་གང་རུང་དེ། ཐེག་ཆེན་མོས་པ་སྒོམ་ལམ་གྱི་ཕན་ཡོན་གྱི་མཚན་ཉིད་ཡིན་ཏེ། ཉ་ཊཱིཀ་ལས། དེའི་ཕན་ཡོན་ནམ་འབྲས་བུ་བསྟོད་པའི་མཚན་ཉིད། སྒོམ་ལམ་རང་དོན་མོས་པའི་ཆེ་བའི་ཡོན་ཏན་ཇི་ལྟ་བ་བཞིན་རྟོགས་ནས་སངས་རྒྱས་ལ་སོགས་པ་ཐུགས་དགེས་པའི་གནས་སྐབས་སམ། རྟོགས་ནས་སངས་རྒྱས་ལ་སོགས་པས་སྟོན་པའི་ངག་གི་རིག་བྱེད་གང་ཡང་རུང་བའོ། །སྒོམ་ལམ་མོས་པའི་ཕན་ཡོན་བཀུར་བའི་མཚན་ཉིད། སྒོམ་ལམ་གཉིས་དོན་མོས་པའི་ཆེ་བ་ཞེས་སོགས། སྒོམ་ལམ་མོས་པའི་ཕན་ཡོན་བསྔགས་པའི་མཚན་ཉིད། སྒོམ་ལམ་གཞན་དོན་མོས་པའི་ཞེས་སོགས་དགོད་དོ། །ཞེས་གསུངས་པས་སོ། །དགེ་རྩ་གཞན་དོན་དུ་རྫོགས་པའི་སངས་རྒྱས་ཀྱི་གོ་འཕང་ཐོབ་ཕྱིར་དུ་སྟོབ་པའི་ཐེག་ཆེན་སྒོམ་ལམ་དེ། ཐེག་ཆེན་བསྔོ་བ་སྒོམ་ལམ་གྱི་མཚན་ཉིད་ཡིན་ཏེ། ཉ་ཊཱིཀ་ལས། དགེ་བ་མི་ཟད་པར་བྱེད་པའི་ཐེག་ཆེན་འཕགས་པའི་སྒོམ་ལམ་བསྔོ་བ་ཡིད་ལ་བྱེད་པའི་མཚན་ཉིད། ཟུར་དང་བོ་འདྲ། དགེ་བ་རྣམས་གཞན་དོན་དུ་རྫོགས་པའི་སངས་རྒྱས་ཀྱི་རྒྱུར་སྟོབ་པའོ། །ཞེས་གསུངས་པས་སོ། །རང་གཞན་གྱི་དགེ་རྩ་ཅི་རིགས་ལ་རབ་ཏུ་དགའ་བ་ཡིད་ལ་བྱེད་པའི་ཐེག་ཆེན་སྒོམ་ལམ་དེ། ཐེག་ཆེན་གྱི་རྗེས་སུ་ཡི་རང་སྒོམ་ལམ་གྱི་མཚན་ཉིད་ཡིན་ཏེ། ཉ་ཊཱིཀ་ལས། གསུམ་པ་དགེ་བ་འཕེལ་བྱེད་ཐེག་ཆེན་འཕགས་པའི་སྒོམ་ལམ་རྗེས་སུ་ཡི་རང་བ་ཡིད་ལ་བྱེད་པ་བླ་མེད་ཀྱི་མཚན་ཉིད།དང་བོ་འདྲ། རང་གཞན་གྱི་དགེ་རྩ་ལ་རབ་ཏུ་དགའ་བ་ཡིད་ལ་བྱེད་པའོ། །ཞེས་པས་སོ། །མཉམ་བཞག་ཡེ་ཤེས་སུ་གྱུར་པའི་ཐེག་ཆེན་སྒོམ་ལམ་དེ། ཐེག་ཆེན་སྒྲུབ་པ་སྒོམ་ལམ་གྱི་མཚན་ཉིད། སྒོམ་ལམ་གྱི་སྤང་བྱ་ཅི་རིགས་དག་པའི་སྤངས་པ་དེ། སྐབས་འདིའི་རྣམ་དག་གི་མཚན་ཉིད་ཡིན་ཏེ། ཉ་ཊཱིཀ་ལས། འོན་ཀྱང་སྒྲུབ་པ་ནི་ས་དགུའི་མཉམ་གཞག་དང༌། རྣམ་དག་ནི་ས་བཅུ་གཅིག་གི་སྤངས་པ་འགོག་བདེན་ཡིན་གྱི་སྒོམ་ལམ་དངོས་མིན་ཞེས་པ། མདོ་དང་རྗེ་བཙུན་གྱི་དགོངས་པའོ། །ཞེས་དང༌། སྔོན་མེད་ལེགས་བཤད་ལས། འདི་ནི་་མཉམ་བཞག་སྒྲུབ་པ་སྒོམ་ལམ་ཞེས་བྱ་ཞིང༌། རྗེས་ཐོབ་ཏུ་མོས་པ་དང༌། ཞེས་སོགས་གསུངས་པའི་ཕྱིར་རོ། ། གཞི་ཤེས་ཀྱི་དངོས་པོ་དགུ་ནི། ཐབས་ཁྱད་པར་ཅན་གྱིས་ཟིན་པའི་ཤེས་རབ་ཀྱིས་ཚུ་རོལ་ཀྱི་མཐར་མི་གནས་པའི་གཞི་ཤེས་དེ། ཤེས་པས་སྲིད་ལ་མི་གནས་པའི་གཞི་ཤེས་ཀྱི་མཚན་ཉིད། ཉ་ཊཱིཀ་ལས། དུས་གསུམ་མཉམ་ཉིད་དུ་ཤེས་པས་སྲིད་པ་ལ་མི་གནས་པའི་གཞི་ཤེས་ཀྱི་མཚན་ཉིད། ཆོས་ཀུན་བདེན་པའི་རང་བཞིན་མེད་པར་རྟོགས་པས་ཚུ་རོལ་ཀྱི་མཐར་མི་གནས་པའི་གཞི་ཤེས། ཞེས་གསུངས་པའི་ཕྱིར་རོ། །ཤེས་རབ་ཁྱད་པར་ཅན་གྱིས་ཟིན་པའི་གཞན་དོན་ཁུར་ཁྱེར་གྱི་བསམ་པས་ཕ་རོལ་གྱི་མཐའ་ལ་མི་གནས་པའི་གཞི་ཤེས་དེ། སྙིང་རྗེས་ཞི་ལ་མི་གནས་པའི་གཞི་ཤེས་ཀྱི་མཚན་ཉིད་ཡིན་ཏེ། ཉ་ཊཱིཀ་ལས། གཉིས་པ་སྙིང་རྗེ་ཆེན་པོས་ཞི་བ་ལ་མི་གནས་པའི་གཞི་ཤེས་ཀྱི་མཚན་ཉིད། མཁའ་མཉམ་སེམས་ཅན་གྱི་དོན་བྱེད་པའི་བསམ་པས་ཕ་རོལ་གྱི་མཐར་མི་གནས་པའི་གཞི་ཤེས། ཞེས་གསུངས་པའི་ཕྱིར་རོ། །མཚན་འཛིན་གྱིས་བཅིང་བའི་ཐེག་དམན་གྱི་གཞི་ཤེས་དེ། ཤེར་ཕྱིན་ལ་རིང་བའི་གཞི་ཤེས་ཀྱི་མཚན་ཉིད། ཐེག་ཆེན་གྱི་ཐབས་ཤེས་ཁྱད་པར་ཅན་གྱི་གཞི་ཤེས་དེ། ཤེར་ཕྱིན་ལ་ཉེ་བའི་གཞི་ཤེས་ཀྱི་མཚན་ཉིད་ཡིན་ཏེ། ཉ་ཊཱིཀ་ལས། གསུམ་པ་འབྲས་ཡུམ་བསྐྱེད་པའི་ཐབས་མ་ཡིན་པས་འབྲས་ཡུམ་ལ་རིང་བའི་གཞི་ཤེས་ཀྱི་མཚན་ཉིད། མིང་དང་དངོས་པོའི་མཚན་མར་འཛིན་པའི་གཞི་ཤེས། འབྲས་ཡུམ་བསྐྱེད་པའི་ཐབས་སུ་གྱུར་པ་ཉིད་ཀྱིས་འབྲས་ཡུམ་ལ་རིང་བ་མིན་པའི་མཚན་ཉིད། ཐེག་ཆེན་གྱི་ཐབས་ཤེས་རབ་ཁྱད་པར་ཅན་གྱི་གཞི་ཤེས། ཞེས་གསུངས་པའི་ཕྱིར་རོ། །བྱང་སེམས་ཀྱིས་རང་རྒྱུད་ལ་སྐྱེད་པར་བྱེད་པ་ལ་འདའ་བྱའི་དམན་པའི་གཞི་ཤེས་དེ། མི་མཐུན་ཕྱོགས་ཀྱི་གཞི་ཤེས་ཀྱི་མཚན་ཉིད། རང་གི་སྤང་བྱ་ཆགས་པའི་མཐའ་མ་ལུས་པ་འགོག་པའི་ཐབས་ཤེས་ཁྱད་པར་ཅན་གྱིས་ཟིན་པའི་མངོན་རྟོགས་དེ། གཉེན་པོའི་ཕྱོགས་ཀྱི་གཞི་ཤེས་ཀྱི་མཚན་ཉིད་ཡིན་ཏེ། ཉ་ཊཱིཀ་ལས། ལྔ་བ་མི་མཐུན་ཕྱོགས་ཀྱི་གཞི་ཤེས་ཀྱི་མཚན་ཉིད། བྱང་སེའི་མཉམ་བཞག་གི་རྟོགས་པའི་སྤང་བྱར་གྱུར་པའི་གཞི་ཤེས། དེ་ལ་གཞི་ལམ་འབྲས་བུ་ལ་མཚན་འཛིན་གསུམ་མོ། །དྲུག་པ་གཉེན་པོའི་ཕྱོགས་ཀྱི་གཞི་ཤེས་ཀྱི་མཚན་ཉིད། རང་གི་སྤང་བྱ་ཆགས་པའི་མཐའ་མ་ལུས་པ་འགོག་པའི་གཞི་ཤེས་གང་ཞིག བྱང་སེའི་རྟོགས་པ་ཡིན་པའོ། །ཞེས་གསུངས་པས་སོ། །གཟུགས་སོགས་ལ་མངོན་ཞེན་བཀག་ནས་བསྒོམ་པའི་བྱང་སེམས་ཀྱི་སྦྱོར་བ་དེ། ཤེར་ཕྱིན་ཟབ་མོའི་རྣལ་འབྱོར་གྱི་མཚན་ཉིད་ཡིན་ཏེ། མདོ་ལུགས་མ་ལས། ཤེར་ཕྱིན་ཟབ་མོའི་རྣལ་འབྱོར་ལ་སྦྱར་ནས་དེ་ལྟར་བཤད་པ་ལས་སྦྱོར་ལམ་ཁོ་ན་ལ་སྦྱར་ནས་མ་བཤད་པས་སོ། །གཟུགས་སོགས་བྱེད་པའི་མཚན་ཉིད་སོགས་དངོས་པོར་རློམ་སེམས་སུ་མེད་པའི་མཉམ་ཉིད་དུ་ཡོངས་སུ་ཤེས་པ་དེ། ཤེར་ཕྱིན་ཟབ་མོའི་རྣལ་འབྱོར་གྱི་ཕན་ཡོན་མཉམ་ཉིད་ཀྱི་མཚན་ཉིད་ཡིན་ཏེ། མདོ་ལུགས་མ་ལས། རྣ༷མ་པ་བཞི༷་པོ་དེ་ནི་སྦྱོར་བ་དེ༷འི༷་ཕན་ཡོན་ཆོས་ཐམས་ཅད་རྨི་ལམ་དང་སྒྱུ་མ་དང༌། སྨིག་རྒྱུ་དང༌།སྒྲ་བརྙན་དང༌། མིག་ཡོར་དང༌། ཆུ་ཟླ་དང༌། སྤྲུལ་པ་ལྟ་བུར་མཉ༷མ་པ༷་ཉི༷ད་དུ་ཡོངས་སུ་ཤེས་པ་ཡིན་ནོ། །ཞེས་གསུངས་པའི་ཕྱིར་རོ། །ཐེག་ཆེན་གྱི་བདེན་པ་མངོན་རྟོགས་ཀྱི་ཡེ་ཤེས་དེ། སྐབས་འདིར་དངོས་བསྟན་གྱི་མཐོང་ལམ་གྱི་མཚན་ཉིད་ཡིན་ཏེ། ཉ་ཊཱིཀ་ལས། དགུ་བ་མཐོང་ལམ་སྟེ་དེ་ལ་གཉིས་ལས་གཞི་ཤེས་དངོས་བསྟན་གྱི་མཐོང་ལམ་གྱི་མཚན་ཉིད།སྔར་ལྟར་རམ་གཞིའི་ཆོས་ཉིད་མངོན་སུམ་གྱིས་གསར་དུ་མཐོང་བའི་ཡེ་ཤེས་སོ། །དབྱེ་ན་བཅུ་དྲུག་གོ །གཞི་ཤེས་ཤུགས་བསྟན་གྱི་མཐོང་ལམ་གྱི་མཚན་ཉིད། གཞི་གང་ཟག་གམ་གཟུང་བ་བདག་མེད་མངོན་སུམ་དུ་གསར་དུ་མཐོང་ཞིང་མཚན་འཛིན་གྱི་བློ། ཞེས་གསུངས་པའི་ཕྱིར་རོ། ། རྣམ་ཀུན་གྱི་དངོས་པོ་བཅུ་གཅིག་ནི།སྦྱོར་བའི་བསྒོམ་བྱར་གྱུར་པ་དེ། སྐབས་འདིའི་རྣམ་པའི་མཚན་ཉིད་ཡིན་ཏེ། ཉ་ཊཱྀཀ་ལས། རྣམ་པ་ནི། ཡུལ་གཞིའམ་ཡུལ་ཅན་ཡེ་ཤེས་ཀྱི་བྱེ་བྲག་ཐེག་ཆེན་སྦྱོར་བའི་བསྒོམ་བྱར་གྱུར་པ། ཞེས་དང༌། ཉ་ཊཱིཀ་ལས། མཚན་ཉིད་ནི། བདེན་པའི་ཆོས་ཀྱི་རང་བཞིན་དུ་གྱུར་པའི་ཆོས་ཞིག་སྟེ། མི་རྟག་པ་འདུས་བྱས་ཀྱི་མཚན་ཉིད་དུ་བཤད་པ་བཞིན་ནོ། །ཞེས་གསུངས་པའི་ཕྱིར་རོ། །རང་ཡུལ་གྱི་བསྒོམ་བྱའི་རྣམ་པ་སྒོམ་པའི་སེམས་དཔའི་མངོན་རྟོགས་དེ། སྐབས་འདིའི་སྦྱོར་བའི་མཚན་ཉིད།དེ་ལ་དབྱེ་ན་ཉི་ཤུ་ཡོད་དེ། ཉ་ཊཱིཀ་ལས། སྦྱོར་བ་ནི། གསུམ་ལ་དབང་གྱུར་ཐོབ་པའི་ཕྱིར་དུ་བསྒོམ་བྱའི་རྣམ་པ་རྣམས་བསྡུས་ཏེ་སྒོམ་པའི་རྣལ་འབྱོར་རོ། །དབྱེ་ན་ཉི་ཤུའོ། །ཞེས་གསུངས་པའི་ཕྱིར། ཐེག་ཆེན་གྱི་སྦྱོར་བ་སྒོམ་སྟོབས་ཀྱིས་ཐོབ་པའི་ཐེག་ཆེན་ལམ་ཞུགས་ཀྱི་རྒྱུད་ཀྱི་ཡོན་ཏན་དེ། ཐེག་ཆེན་སྦྱོར་བའི་ཡོན་ཏན་གྱི་མཚན་ཉིད་ཡིན་ཏེ། ཉ་ཊཱིཀ་ལས། སྦྱོར་བའི་ཡོན་ཏན་ནི། སྦྱོར་བ་བསྒོམ་པའི་གནས་སྐབས་སམ། མཐར་ཐུག་གི་ཐོབ་བྱའི་འབྲས་བུ། དབྱེ་ན་བཅུ་བཞིའོ། །ཞེས་གསུངས་པའི་ཕྱིར། ཐེག་ཆེན་གྱི་སྦྱོར་བ་སྐྱེ་གནས་འཕེལ་བ་གསུམ་པོ་ཅི་རིགས་ལ་གེགས་བྱེད་པའི་བདུད་ལས་སུ་བཤད་པ་དེ། སྐབས་འདིའི་སྐྱོན་གྱི་མཚན་ཉིད་ཡིན་ཏེ། ཉ་ཊཱིཀ་ལས། སྦྱོར་བའི་སྐྱོན་ནི། སྦྱོར་བ་སྒོམ་པ་པོ་འགའ་ཞིག་གིས་སྦྱོར་བ་བསྒོམ་པའི་བར་དུ་གཅོད་བྱེད་ཀྱི་ལས། ཡང་ན་ཡུམ་ལ་ཐོས་བསམ་བསྒོམ་པ་གང་རུང་གི་བར་ཆད་དུ་གྱུར་པའི་ལས། དབྱེ་ན་ཞེ་དྲུག་གོ །ཞེས་གསུངས་པའི་ཕྱིར། ཉ་ཊཱིཀ་ལྟར་ན། ལམ་ཅི་རིགས་ཀྱི་རྟོགས་པ་ཁྱད་པར་ཅན་འཕྲིན་ལས་ངོ་བོ་ཉིད་གང་རུང་མཚོན་བྱེད་དམ་གོ་བྱེད་ཀྱི་ཐེག་ཆེན་གྱི་ཡོན་ཏན་དེ། སྐབས་འདིར་བསྟན་གྱི་སྦྱོར་བའི་མཚོན་པར་བྱེད་པའི་མཚན་ཉིད་ཡིན་ཏེ། ཉ་ཊཱིཀ་ལས། ལྔ་བ་སྦྱོར་བའི་མཚན་ཉིད་ནི། སྦྱོར་བ་རྣམས་ཀྱི་རྟོགས་པ་ཁྱད་པར་ཅན་འཕྲིན་ལས་ངོ་བོ་ཉིད་གང་ཡང་རུང་བ་མཚོན་བྱེད་ཡིན་པ། ཡང་ན་སྦྱོར་བ་རྣམས་རྒྱུའམ་ཁྱད་པར་ཅན་ནམ་སྦྱོར་བའི་ངོ་བོ་མཚོན་བྱེད་གང་ཡང་རུང་བ། དབྱེ་ན་དགུ་བཅུ་རྩ་གཅིག་གོ །ཞེས་གསུངས་སོ། །སོ་སོའི་ངེས་འབྱེད་ཆ་མཐུན་མ་སྐྱེས་གོང་གི་མྱང་འདས་ཀྱི་རྒྱུར་གྱུར་པའི་ལམ་དེ། ཐར་བ་ཆ་མཐུན་གྱི་མཚན་ཉིད་ཡིན་ཏེ། ཉ་ཊཱིཀ་ལས། ཐར་བའི་ཆ་དང་མཐུན་པའི་མཚན་ཉིད། སོ་སོའི་ངེས་འབྱེད་ཆ་མཐུན་མ་སྐྱེས་གོང་གི་མྱང་འདས་ཀྱི་རྒྱུར་གྱུར་པའི་དགེ་བ། ཐེག་ཆེན་གྱི་ནི་རྫོགས་པའི་བྱང་ཆུབ་ཀྱི་རྒྱུར་ཞེས་སྦྱར་རོ། །ཉན་རང་ལ་ཡང་ངོ༌། །ཞེས་གསུངས་པའི་ཕྱིར། སྐབས་འདིའི་གཙོ་བོའི་སྦྱོར་ལམ་ནི་ཕལ་ཆེར་བསམ་སྦྱོར་གཉིས་ལས་བསམ་པའི་ཆ་ནས་བསྟན་པ་དང་མཉམ་རྗེས་གཉིས་ལས་རྗེས་ཐོབ་ལ་བཤད་དགོས་ཏེ། ཉ་ཊཱིཀ་ལས། བསམ་པ་ཕུན་ཚོགས་ཅན་ངེས་འབྱེད་ཆ་མཐུན། ཞེས་དང༌། ཐེག་ཆེན་གྱི་རྗེས་ཐོབ་ཡིན་པའི་ངེས་འབྱེད་ཆ་མཐུན་གྱི་མཚན་ཉིད། དམིགས་ཡུལ་སེམས་ཅན་ཀུན་ལ་དམིགས་ནས་རྣམ་པ་དེ་དག་ལ་སེམས་མཉམ་པ་ལ་སོགས་པ་གང་རུང་ཅན་གྱི་སྦྱོར་ལམ་རྗེས་ཐོབ། དབྱེ་ན་བཅུ་གཉིས་སོ། །ཞེས་དང༌། དེ་ལྟར་ན་ངེས་པར་འབྱེད་པའི་ཆ་དང་མཐུན་པ་རྗེས་ཐོབ་དམིགས་རྣམ་གྱི་སྒོ་ནས་བཤད་པ་ཡིན། ཞེས་གསུངས་པའི་ཕྱིར་རོ། །ད་ཕྱིན་ཆད་ཐེག་དམན་དུ་མི་ལྟུང་བར་ངེས་པའི་ཐེག་ཆེན་པ་དེ། རྫོགས་བྱང་ལས་ཕྱིར་མི་ལྡོག་པའི་དགེ་འདུན་གྱི་མཚན་ཉིད།ད་ཕྱིན་ཆད་ཐེག་དམན་དུ་མི་ལྟུང་བར་ངེས་པའི་བྱང་སེམས་དེ། སློབ་པ་རྫོགས་བྱང་ལས་ཕྱིར་མི་ལྡོག་པའི་དགེ་འདུན་གྱི་མཚན་ཉིད། ད་ཕྱིན་ཆད་ཐེག་དམན་དུ་མི་ལྟུང་བར་ངེས་པའི་སྐབས་འདིའི་རྟགས་ཐོབ་པའི་བྱང་སེམས་དེ། འདིར་དངོས་བསྟན་གྱི་སློབ་པ་རྫོགས་བྱང་ལས་ཕྱིར་མི་ལྡོག་པའི་དགེ་འདུན་གྱི་མཚན་ཉིད་ཡིན་ཏེ། ཉ་ཊཱིཀ་ལས། སློབ་པ་རྫོགས་བྱང་ལས་ཕྱིར་མི་ལྡོག་པའི་ཚོགས་ཏེ་དགེ་འདུན་གྱི་མཚན་ཉིད། ད་ཕྱིན་ཆད་ཐེག་དམན་དུ་མི་ལྟུང་ངེས་པའི་རྟགས་ཐོབ་བའི་བྱང་སེམས་ཏེ་སྦྱོར་མཐོང་སྒོམ་གསུམ་པ་གསུམ་མོ། །ཞེས་གསུངས་པའི་ཕྱིར། འཁོར་འདས་ལ་བླང་དོར་དུ་བདེན་པར་རྟོག་པའི་གཉེན་པོར་འཁོར་འདས་བདེན་པའི་རང་བཞིན་མེད་པར་མཉམ་པར་བསྒོམ་པའི་དག་སའི་སྦྱོར་བ་དེ། འདིར་བསྟན་སྲིད་ཞི་མཉམ་ཉིད་ཀྱི་སྦྱོར་བའི་མཚན་ཉིད་ཡིན་ཏེ། ཉ་ཊཱིཀ་ལས། ཆོས་སྐུའི་ཡན་ལག་གམ་རྒྱུ་སྲིད་དང་ཞི་བ་མཉམ་ཉིད་ཀྱི་སྦྱོར་བའི་མཚན་ཉིད། རྣམ་སྦྱོར་གང་ཞིག འཁོར་འདས་ལ་བླང་དོར་དུ་འཛིན་པའི་རྟོག་པའི་གཉེན་པོར་འཁོར་འདས་བདེན་པའི་རང་བཞིན་མེད་པར་མཉམ་པར་བསྒོམ་པ། ཡང་ན་དག་སའི་ཞེས་སམ་རྒྱུན་མཐའི་སྦྱོར་བ་གང་ཞིག་ཅེས་སྦྱར་ཏེ་འོག་ཏུ་འཆད་དོ། །ཞེས་གསུངས་སོ། །རྣམ་སྦྱོར་གང་ཞིག རང་གང་དུ་གསར་དུ་སངས་རྒྱས་པའི་ཞིང་དེར་སྣོད་བཅུད་ཀྱི་ཉེས་པ་མེད་ཅིང་ཡོན་ཏན་དང་ལྡན་པའི་ཕྱིར་དུ་བསྒོམ་པའི་དག་སའི་སྦྱོར་བ་དེ། འདིར་བསྟན་ཞིང་དག་སྦྱོར་བའི་མཚན་ཉིད་ཡིན་ཏེ། ཉ་ཊཱིཀ་ལས། བཅུ་བ་ཉེ་བའི་ཡན་ལག་ལོངས་སྐུའི་རྒྱུ་ཞིང་དག་པ་བླ་ན་མེད་པའམ་མཆོག་ཏུ་གྱུར་པའི་སྦྱོར་བའི་མཚན་ཉིད། རྣམ་སྦྱོར་གང་ཞིག སྣོད་བཅུད་ཀྱི་འཇིག་རྟེན་ཉེས་པ་མེད་ཅིང་ཡོན་ཏན་དང་ལྡན་པའི་ཕྱིར་དུ་བསྒོམ་པ། དེ་ལ་སྣོད་བཅུད་དག་པ་གཉིས་སོ། །ཞེས་གསུངས་པའི་ཕྱིར་རོ། །སྐབས་འདིའི་ཡུལ་མངོན་སུམ་དུ་བྱ་བ་ལ་དུས་དུས་མིན་ཤེས་པས་རང་འབྲས་སངས་རྒྱས་ཀྱི་འཕྲིན་ལས་ཕུན་ཚོགས་ཐོབ་ཕྱིར་དུ་སྒོམ་པའི་དག་སའི་སྦྱོར་བ་དེ། འདིར་བསྟན་ཐབས་མཁས་སྦྱོར་བའི་མཚན་ཉིད་ཡིན་ཏེ།ཉ་ཊཱིཀ་ལས། སེམས་ཅན་ཡོངས་སུ་སྨིན་པའི་ཡན་ལག་ཐབས་མཁས་སྦྱོར་གྱི་མཚན་ཉིད། རྣམ་སྦྱོར་གང་ཞིག ཡུལ་བཅུ་མངོན་སུམ་དུ་བྱ་བ་ལ་དུས་དུས་མིན་ཤེས་པས་སངས་རྒྱས་ཀྱི་འཕྲིན་ལས་ཕུན་ཚོགས་ཀྱི་རྒྱུར་གྱུར་པ་དབྱེ་ན་བཅུའོ། །ཞེས་གསུངས་པའི་ཕྱིར་རོ། །རྩེ་སྦྱོར་གྱི་དངོས་པོ་བརྒྱད་ནི། བསྡུས་བསྒོམ་རབ་ཏུ་གྱུར་བར་མཚོན་བྱེད་དུ་གྱུར་བའི་བྱང་སེམས་ཀྱི་སྦྱོར་བ་དེ། རྟགས་ཀྱི་རྩེ་སྦྱོར་གྱི་མཚན་ཉིད་ཡིན་ཏེ། ཉ་ཊཱིཀ་ལས། སྔར་རྩེ་མོར་ཕྱིན་དང་ཞེས་བཤད་པའི་རྩེ་མོ་དེ་ཡི་རྟགས་སམ་རྟགས་ཀྱི་རྩེ་མོའི་མཚན་ཉིད། བསྡུས་བསྒོམ་རབ་ཏུ་གྱུར་བར་མཚོན་བྱེད་གང་ཞིག བྱང་སེའི་སྦྱོར་ལམ་དྲོད། ཅེས་གསུངས་པའི་ཕྱིར། བསྡུས་བསྒོམ་རབ་ཏུ་གྱུར་པའི་བསོད་ནམས་ཁྱད་འཕགས་ཀྱི་རྩེ་སྦྱོར་དེ། རྣམ་འཕེལ་གྱི་རྩེ་མོའི་མཚན་ཉིད་ཡིན་ཏེ། ཉ་ཊཱིཀ་ལས། རྣམ་འཕེལ་གྱི་རྩེ་མོའི་མཚན་ཉིད།བསྡུས་བསྒོམ་རབ་ཏུ་གྱུར་པའི་སྦྱོར་ལམ་རྩེ་མོ་གང་ཞིག བསོད་ནམས་ཁྱད་འཕགས་བཅུ་དྲུག་ཅན་ནོ། །ཞེས་གསུངས་སོ། །ཤེས་རབ་ཀྱིས་མཁྱེན་གསུམ་གྱི་ཆོས་ཡོངས་སུ་རྫོགས་པར་བསྔོས་ཤིང་སྙིང་རྗེས་གཞན་དོན་གྱི་བསམ་པ་བརྟན་པོ་ཅན་གྱི་རྩེ་སྦྱོར་དེ། བརྟན་པའི་རྩེ་སྦྱོར་གྱི་མཚན་ཉིད་ཡིན་ཏེ། ཉ་ཊཱིཀ་ལས། བརྟན་པའི་རྩེ་མོའི་མཚན་ཉིད། ཤེས་རབ་ཀྱིས་མཁྱེན་གསུམ་གྱི་ཆོས་ཡོངས་སུ་རྫོགས་པར་བསྔོས་ཤིང་སྙིང་རྗེས་གཞན་དོན་གྱི་བསམ་པ་བརྟན་པོ་ཅན་གྱི་སྦྱོར་ལམ་བཟོད་པར་གྱུར་པའོ། །ཞེས་གསུངས་པའི་ཕྱིར་རོ། །བསོད་ནམས་ཕུལ་བྱུང་མཐའ་ཡས་པ་ཅན་གྱི་དེ་ཁོ་ན་ཉིད་ལ་སེམས་རྩེ་གཅིག་ཏུ་གནས་པའི་ཏིང་ངེ་འཛིན་གྱི་རྩེ་སྦྱོར་དེ། སེམས་ཀུན་ཏུ་གནས་པའི་རྩེ་སྦྱོར་གྱི་མཚན་ཉིད་ཡིན་ཏེ། ཉ་ཊཱིཀ་ལས། སེམས་ཀུན་ཏུ་གནས་པའི་རྩེ་མོའི་མཚན་ཉིད། དེ་ཁོ་ན་ཉིད་ལ་སེམས་རྩེ་གཅིག་པའི་སྦྱོར་ལམ་ཆོས་མཆོག་གང་ཞིག བསོད་ནམས་ཕུལ་བྱུང་མཐའ་ཡས་པ་ཅན་ནོ། །ཞེས་གསུངས་པའི་ཕྱིར་རོ། །སྐབས་འདིར་མདོ་ལུགས་མ་ལས། རྟགས་དང་རྣམ་འཕེལ་ལ་སོགས་པ་བཞི་པོ་འདི་རྩེ་སྦྱོར་ཐོབ་ནས་མཐར་ཐུག་གི་བར་གྱི་ཆོས་སུ་གསུངས་པའི་ཕྱིར། དྲོད་སོགས་བཞིར་འཆད་པ་ནི་ཤེས་བྱེད་ཡིད་ཆེས་པ་མི་སྣང་ངོ༌། །སྦྱོར་ལམ་བཏགས་པ་བར་བཤད་པ་ལ་ཡང་དགོས་པ་མེད་ཅིང་གནོད་བྱེད་དང་བཅས་སོ། །ཞེས་གསུངས་པའི་ཕྱིར་རོ། །བསྡུས་སྒོམ་རབ་ཏུ་གྱུར་པའི་བྱང་སེམས་ཀྱི་བདེན་པ་མངོན་རྟོགས་དེ། མཐོང་ལམ་རྩེ་སྦྱོར་གྱི་མཚན་ཉིད་ཡིན་ཏེ། ཉ་ཊཱིཀ་ལས། མཐོང་ལམ་རྩེ་མོའི་མཚན་ཉིད། བསྡུས་བསྒོམ་རབ་ཏུ་གྱུར་པའི་བྱང་སེའི་མཐོང་ལམ། ཞེས་གསུངས་པའི་ཕྱིར་རོ། །སྒོམ་ལམ་རྩེ་སྦྱོར་ནི། བསྡུས་སྒོམ་རབ་ཏུ་གྱུར་པའི་བྱང་སེམས་ཀྱི་རྗེས་ལ་མངོན་རྟོགས་དེ། སྒོམ་ལམ་རྩེ་སྦྱོར་གྱི་མཚན་ཉིད་ཡིན་ཏེ། ཉ་ཊཱིཀ་ལས། སྒོམ་ལམ་རྩེ་མོའི་མཚན་ཉིད། བསྡུས་བསྒོམ་རབ་ཏུ་གྱུར་པའི་བྱང་འཕགས་ཀྱི་སྒོམ་ལམ་མོ། །ཞེས་གསུངས་པའི་ཕྱིར་རོ། །བསྡུས་སྒོམ་རབ་ཏུ་གྱུར་པའི་རང་འབྲས་རྣམ་མཁྱེན་གྱི་དངོས་རྒྱུར་གྱུར་པའི་བར་ཆད་མེད་ལམ་དེ། བར་ཆད་མེད་པའི་རྩེ་སྦྱོར་གྱི་མཚན་ཉིད་ཡིན་ཏེ། ཉ་ཊཱིཀ་ལས། བར་ཆད་མེད་པའི་ཏིང་ངེ་འཛིན་ནི།བསྡུས་བསྒོམ་རབ་ཏུ་གྱུར་པའི་སྒོམ་ལམ་ཆེན་པོའི་ཆེན་པོ་གང་ཞིག འབྲས་བུ་རྣམ་མཁྱེན་གྱི་དངོས་རྒྱུར་གྱུར་པའོ། །ཞེས་གསུངས་པའི་ཕྱིར་རོ། །ཡོད་པ་དང་དོན་དམ་པར་མེད་པ་གཉིས་འགལ་བར་བསམ་ནས་རྩོད་པའི་རྩོད་པ། སྐབས་འདིའི་བསལ་བྱ་ལོག་སྒྲུབ་ཀྱི་མཚན་ཉིད་ཡིན་ཏེ། ཉ་ཊཱིཀ་ལས། བསལ་བྱ་ལོག་སྒྲུབ་ཀྱི་མཚན་ཉིད། བདེན་གཉིས་འགལ་བར་བསམ་ནས་རྩོད་པའི་རྩོད་པ། ཞེས་གསུངས་པའི་ཕྱིར་རོ། ། མཐར་སྦྱོར་གྱི་དངོས་པོ་བཅུ་གསུམ་ནི། མཐར་སྦྱོར་བཅུ་གསུམ་སོ་སོའི་མཚན་ཉིད་ནི།འཁོར་གསུམ་དག་པའི་སྦྱིན་པ་གོ་རིམ་དུ་བསྒོམ་པའི་རིགས་གནས་ཀྱི་སེམས་དཔའི་སྦྱོར་བ་དེ། སྦྱིན་པའི་མཐར་སྦྱོར་གྱི་མཚན་ཉིད། དེ་བཞིན་དུ་ཕར་ཕྱིན་གཞན་ལྔའི་མཐར་སྦྱོར་གྱི་མཚན་ཉིད་རིགས་འདྲ་སྟེ། ཉ་ཊཱིཀ་ལས།མཐར་གྱིས་པའི། དངོས་པོ་བཅུ་གསུམ་ལ་སྦྱིན་པའི་མཐར་སྦྱོར་གྱི། མཐར་སྦྱོར་གང་ཞིག འཁོར་གསུམ་དག་པའི་སྦྱིན་པ་གོ་རིམ་གྱིས་བསྒོམ་པ་སྟེ་ཕར་ཕྱིན་གཞན་ལྔ་ལ་ཡང་སྦྱར་རོ། །ཞེས་གསུངས་པའི་ཕྱིར་རོ། །དོན་དམ་པར་སངས་རྒྱས་ཀྱི་ཡོན་ཏན་དྲན་པ་མེད་ཅིང་ཡིད་ལ་བྱར་མེད་པའི་ཚུལ་གྱིས་དེའི་ཡོན་ཏན་དྲན་པའི་སེམས་དཔའི་སྦྱོར་བ་དེ། སངས་རྒྱས་རྗེས་དྲན་གྱི་མཐར་སྦྱོར་གྱི་མཚན་ཉིད། དེ་བཞིན་དུ་རྗེས་དྲན་གཞན་ལྔའི་མཐར་སྦྱོར་གྱི་མཚན་ཉིད་རིགས་འདྲ་སྟེ། ཉ་ཊཱིཀ་ལས།སངས་རྒྱས་རྗེས་དྲན་གྱི་མཐར་སྦྱོར་གྱི། མཐར་སྦྱོར་གང་ཞིག དོན་དམ་པར་དེ་པའི་ཡོན་ཏན་དྲན་པ་མེད་ཅིང་ཡིད་ལ་བྱར་མེད་པའི་ཚུལ་གྱིས་ཀུན་རྫོབ་ཏུ་ཕྱིན་ཅི་མ་ལོག་པར་དྲན་པ། དེ་བཞིན་དུ་དགེ་མི་དགེ་ལུང་དུ་མ་བསྟན་པའི་ཆོས། སློབ་པ་ཕྱིར་མི་ལྡོག་གི་ཚོགས། སྡོམ་པ་གསུམ། ཆོས་དང་ཟང་ཟིང་གི་སྦྱིན་པ། ལྷར་སྐྱེས་པའི་འཕགས་པ་ཞེས་སྦྱར་ཏེ། ཆོས། དགེ་འདུན། ཚུལ་ཁྲིམས། གཏོང་བ།ལྷ་རྗེས་དྲན་གྱི་མཐར་སྦྱོར་གྱིའོ། །ཞེས་གསུངས་པས་སོ། །ཆོས་ཐམས་ཅད་དོན་དམ་པར་ངོ་བོ་ཉིད་མེད་པར་རྟོགས་ནས་བསྒོམ་པའི་མཐར་སྦྱོར་དེ། དངོས་མེད་ངོ་བོ་ཉིད་ཀྱི་མཐར་སྦྱོར་གྱི་མཚན་ཉིད་ཡིན་ཏེ། ཉ་ཊཱིཀ་ལས།དངོས་མེད་ངོ་བོ་ཉིད་དུ་ཤེས་པའི་མཐར་སྦྱོར་གྱི། མཐར་སྦྱོར་གང་ཞིག ཆོས་ཐམས་ཅད་དོན་དམ་པར་ངོ་བོ་ཉིད་མེད་པར་རྟོགས་ནས་བསྒོམ་པ། ཞེས་གསུངས་པའི་ཕྱིར་རོ། ། སྐད་ཅིག་སྦྱོར་གྱི་དངོས་པོ་བཞི་ནི། ཡེ་ཤེས་སྐད་ཅིག་མ་གཅིག་གིས་འོད་གསལ་ཆོས་ཉིད་ཀྱི་སྐུ་རྫོགས་པར་གཅིག་ཆར་དུ་མཁྱེན་པའི་སྦྱོར་བ་མཐར་ཐུག་པའི་སྐད་ཅིག་སྦྱོར་དེ།ཆོས་སྐུ་རྫོགས་པར་རྟོགས་པའི་སྐད་ཅིག་སྦྱོར་གྱི་མཚན་ཉིད་ཡིན་ནོ། །དེ་ཡང་ཉ་ཊཱིཀ་ལས། རྣམ་སྨིན་མིན་པའི་སྐད་ཅིག་མའི་སྦྱོར་བའི་མཚན་ཉིད། རྣམ་སྨིན་མིན་པའི་ཟག་མེད་གཅིག་མངོན་དུ་བྱེད་པ་ན་དེ་དང་རིགས་མཐུན་ཐམས་ཅད་གཅིག་ཅར་མངོན་དུ་བྱེད་པའི་སྐད་ཅིག་མའི་སྦྱོར་བ་སྟེ། ཞེས་གསུངས་པ་ནི་འགྲེལ་བ་དོན་གསལ་ལྟར་ཡིན་པ་ལས་ཡུམ་མདོ་དང་མངོན་རྟོགས་རྒྱན་དུ་རྣམ་པར་མ་སྨིན་པ་སྦྱར་བ་མི་སྣང་ངོ༌། །རྣམ་སྨིན་གྱི་དཀར་ཆོས་ཟག་མེད་གཅིག་མངོན་དུ་བྱེད་པ་ན་དེ་དང་རིགས་མཐུན་ཐམས་ཅད་ཅིག་ཅར་མངོན་དུ་བྱེད་པའི་སྐད་ཅིག་མའི་སྦྱོར་བ་དེ། རྣམ་པར་སྨིན་པའི་སྐད་ཅིག་སྦྱོར་གྱི་མཚན་ཉིད་ཡིན་ནོ། །ཀུན་བྱང་མཚན་ཉིད་མེད་པར་གཅིག་མངོན་དུ་བྱེད་པ་ན་དེ་དང་རིགས་མཐུན་པའི་མཚན་ཉིད་མེད་པ་ཐམས་ཅད་གཅིག་ཅར་མངོན་དུ་བྱེད་པའི་སྐད་ཅིག་མའི་སྦྱོར་བ་དེ། མཚན་ཉིད་མེད་པའི་སྐད་ཅིག་སྦྱོར་གྱི་མཚན་ཉིད་ཡིན་ཏེ། ཉ་ཊཱིཀ་ལས། རྩ་བ་ལ། རྒྱུན་མཐའི་ཡེ་ཤེས་ཆོས་ཅན། མཚན་ཉིད་མེད་པའི་སྐད་ཅིག་མ་ཡིན་ཏེ། ཆོས་གཅིག་བདེན་པའི་མཚན་ཉིད་མེད་པ་ཉིད་རྟོགས་པ་ན་དེའི་སྐད་ཅིག་མ་ནི་གཅིག་ཁོ་ན་ལ་ཆོས་རྣམས་ཐམས་ཅད་བདེན་པའི་མཚན་ཉིད་མེད་པ་ཉིད་དུ་རང་གིས་རྟོགས་པས་སོ། །དེ་ལྟར་རྟོགས་པའི་རྒྱུ་ཅི་ན། ཆོས་ཅན། དེ་ལྟར་མངོན་དུ་བྱེད་ནུས་པའི་རྒྱུ་མཚན་ཡོད་དེ། ཕྱིན་ཅི་མ་ལོག་པའི་རྒྱུ་ཆོས་ཀུན་རྨི་ལམ་དང་འདྲ་བར་གནས་པ་སྟེ་རྟོགས་ནས་ངོ་བོའི་རྒྱུ་སྦྱིན་ལ་སོགས་པ་དྲུག་ལ་གྲངས་མེད་གསུམ་སོགས་སུ་སྤྱོད་པ་ཡི་རྒྱུ་མཚན་གྱིས་སོ། །ཆོས་ཐམས་ཅད་མཚན་ཉིད་མེད་པར་ཤེས་པས་ཕར་ཕྱིན་དྲུག་མཚན་ཉིད་མེད་པར་ཤེས་སོགས་སོ། །ཞེས་གསུངས་པའི་ཕྱིར་རོ། །གཟུང་འཛིན་གཉིས་སུ་མེད་པར་གཅིག་མངོན་དུ་བྱེད་པ་ན་དེ་དང་རིགས་མཐུན་ཐམས་ཅད་གཅིག་ཅར་མངོན་དུ་བྱེད་པའི་སྐད་ཅིག་མའི་སྦྱོར་བ་དེ། གཉིས་སུ་མེད་པའི་སྐད་ཅིག་སྦྱོར་གྱི་མཚན་ཉིད་དོ། །སྐད་ཅིག་སྦྱོར་དེ་དག་གི་མཚན་ཉིད་ཉ་ཊཱིཀ་ལས། རྣམ་སྨིན་མིན་པའི་སྐད་ཅིག་མའི་སྦྱོར་བའི་མཚན་ཉིད། རྣམ་སྨིན་མིན་པའི་ཟག་མེད་གཅིག་མངོན་དུ་བྱེད་པ་ན་དེ་དང་རིགས་མཐུན་ཐམས་ཅད་གཅིག་ཅར་མངོན་དུ་བྱེད་པའི་སྐད་ཅིག་མའི་སྦྱོར་བ་སྟེ། དེ་བཞིན་དུ་རྣམ་སྨིན་དང༌། མཚན་ཉིད་མེད་པ། གཉིས་སུ་མེད་པའི་སྐད་ཅིག་མའི་མཚན་ཉིད། རྣམ་སྨིན་གྱི་དཀར་ཆོས། ཀུན་བྱང་མཚན་ཉིད་མེད་པར། གཟུང་འཛིན་གཉིས་སུ་མེད་པར་རོ། །དེ་དག་ཀྱང་རྫས་ཐ་དད་ཀྱིས་ཕྱེ་བ་མིན་གྱི་སྤྱིའི་མཚན་ཉིད་ཀྱིས་ཕྱེ་བ་རྣམ་པ་བཞིས་ནི་སྐད་ཅིག་མ་གཅིག་གིས་མངོན་པར་རྫོགས་པར་བྱང་ཆུབ་པའི་སྐབས་བསྡུས་ནས་བསྟན་ནོ། །ཞེས་གསུངས་པའི་ཕྱིར་རོ། །འབྲས་བུ་ཆོས་སྐུའི་དངོས་པོ་བཞི་ནི། དག་པ་གཉིས་ལྡན་གྱི་ཆོས་དབྱིངས་ཡེ་ཤེས་དེ། ངོ་བོ་ཉིད་སྐུའི་མཚན་ཉིད་ཡིན་ཏེ། ཉ་ཊཱིཀ་ལས། ངོ་བོ་ཉིད་ཀྱི་སྐུའི་མཚན་ཉིད།དག་པ་གཉིས་ལྡན་གྱི་ཆོས་དབྱིངས་ཡེ་ཤེས་ཏེ། རྒྱུད་བླར། ཆོས་དབྱིངས་ངོ་བོ་ཉིད་ཀྱིས་ནི། །དག་པའི་ཕྱིར་ན་འོད་གསལ་བ། །ཞེས་གསུངས་པའི་ཕྱིར་རོ། །གནས་གྱུར་པའི་མཐར་ཐུག་པའི་འདུས་བྱས་ཡེ་ཤེས་ཀྱི་ཚོགས་དེ། སྐུ་བཞིར་ཕྱེ་བའི་ཡེ་ཤེས་ཆོས་སྐུའི་མཚན་ཉིད་ཡིན་ཏེ། ཉ་ཊཱིཀ་ལས། གནས་གྱུར་པའི་འདུས་བྱས་ཡེ་ཤེས་ཀྱི་ཚོགས་མཐར་ཐུག་པ། དབྱེ་ན་སྡེ་ཚན་ཉེར་གཅིག གསལ་བ་བརྒྱ་ཞེ་བཞིའོ། །ཞེས་གསུངས་པའི་ཕྱིར། ཐེག་པ་ཆེན་པོའི་ཆོས་ལ་རྫོགས་པར་ལོངས་སྤྱོད་པའི་དང་པོའི་གཟུགས་སྐུ་མཐར་ཐུག་དེ། ལོངས་སྐུའི་མཚན་ཉིད་ཡིན་ཏེ། མདོ་ལུགས་མ་ལས། ལོངས་སྤྱོད་རྫོགས་པའི་སྐུའི་མཚན་ཉིད་ནི། གཉིས་མེད་ཡེ་ཤེས་ཀྱི་ངོ་བོ་གྱུར་པའི་མཚན་ནི་སུམ་ཅུ་རྩ་གཉིས་དང་དཔེ་བྱད་བརྒྱད་ཅུའི་བདག་ཉིད་དུ་གྱུར་པ་འདི་ཐེག་པ་ཆེན་པོའི་ཆོས་རྫོགས་པར་ཉེ་བར་ལོངས་སྤྱོད་པའི་སྐུ་ཡིན་པའི་ཕྱིར། ཐུབ་པའི་ལོངས་སྤྱོད་རྫོགས་པའི་སྐུ་ཡིན་པར་མདོ་ལས་བཞེད་དོ། །ཞེས་གསུངས་པའི་ཕྱིར་རོ། །མཐོང་སྤང་གི་མ་དག་པའི་གདུལ་བྱ་ལ་དངོས་སུ་སྣང་ནུས་པའི་གཟུགས་སྐུ་གཉིས་པ་དེ། སྤྲུལ་སྐུའི་མཚན་ཉིད་ཡིན་ཏེ། ཉ་ཊཱིཀ་ལས། སངས་རྒྱས་ཀྱི་སྤྲུལ་པའི་སྐུ་ནི། སངས་རྒྱས་ཀྱི་གཟུགས་སྐུ་གང་ཞིག མཐོང་སྤང་གིས་མ་དག་པའི་གདུལ་བྱའི་དོན་དངོས་སུ་མཛད་པ། ཞེས་གསུངས་སོ། །རང་ཐོབ་བྱེད་སངས་རྒྱས་ཀྱི་ཐུགས་རྗེ་ཆེན་པོའི་སྟོབས་ལས་ཐོབ་པའི་རྣམ་དཀར་གྱི་ཡོན་ཏན་དེ། སངས་རྒྱས་ཀྱི་འཕྲིན་ལས་ཀྱི་མཚན་ཉིད། ཡང་ན་རང་ཐོབ་བྱེད་རྟོགས་པ་ཆོས་སྐུ་ལ་བརྟེན་ནས་འདུལ་བྱའི་དོན་བསྒྲུབ་པའི་རྣམ་དཀར་གྱི་ལས་དེ། སངས་རྒྱས་ཀྱི་འཕྲིན་ལས་ཀྱི་མཚན་ཉིད་ཡིན་ཏེ། ཉ་ཊཱིཀ་ལས།ཆོས་སྐུའི་མཛད་པ་འཕྲིན་ལས་ནི། རྟོགས་པ་ཆོས་སྐུས་སྐལ་ལྡན་གདུལ་བྱའི་དོན་བསྒྲུབས་པའམ་སྒྲུབ་པའི་བྱ་བ། དབྱེ་ན་བྱེད་པ་པོ་ལ་དང༌། བྱ་བ་ལ་ཡོད་པའི་གཉིས་ལས། དང་པོའི་མཚན་ཉིད། སངས་རྒྱས་ཀྱི་འཕྲིན་ལས་གང་ཞིག རྒྱུན་མི་འཆད་ཅིང་ལྷུན་གྱིས་གྲུབ་པར་འཇུག་པ།གཉིས་པའི་མཚན་ཉིད། ཟུར་དང་པོ་འདྲ། སངས་རྒྱས་ཀྱི་གདུལ་བྱས་ཐོབ་པའི་དགེ་ལེགས་ཅི་རིགས་པ། ཞེས་དང༌། རྒྱུད་བླ་མ་ལས། ཐུགས་རྗེ་ཆེན་པོས་འཇིག་རྟེན་མཁྱེན། །འཇིག་རྟེན་ཀུན་ལ་གཟིགས་ནས་ནི། །ཞེས་དང༌། ཐེག་མཆོག་དབུ་མ་ལས།ཐུགས་རྗེ་དེ་ལས་འཕྲིན་ལས་ཟད་མེད་འབྱུང༌། །འགྲོ་རྣམས་སྡུག་བསྔལ་ཆུང་དང་ཟད་པར་མཛད། །ཅེས་གསུངས་པའི་ཕྱིར་རོ། །སྡོམ་ནི། རྣམ་མཁྱེན་མཚོན་བྱེད་དངོས་པོ་རྣམ་བཅུ་ནི། །༡ སེམས་བསྐྱེད་༢གདམས་ངག་༣ངེས་འབྱེད་ཡན་ལག་དང༌། །༤རང་བཞིན་རིགས་༥དམིགས་༦ཆེད་དུ་བྱ་བ་ཞེས། །༧ གོ་ཆ་༨འཇུག་༩ཚོགས་༡༠ངེས་འབྱུང་སྒྲུབ་རྣམས་སོ། །ལམ་ཤེས་མཚོན་བྱེད་བཅུ་གཅིག་༡ལམ་ཡན་ལག །༢ ཉན་༣རང་གི་ནི་ལམ་ཤེས་༤མཐོང་བའི་ལམ། །༥སྒོམ་ལམ་བྱེད་པ་༦མོས་སྒོམ་༧ཕན་ཡོན་༨བསྔོ། །༩རྗེས་སུ་ཡི་རང་༡༠སྒྲུབ་དང་༡༡སྒོམ་རྣམ་དག། །གཞི་ཤེས་མཚོན་བྱེད་དངོས་པོ་རྣམ་དགུུ་ནི། །༡ཤེས་པས་སྲིད་དང་༢སྙིང་རྗེས་ཞི་མི་གནས། །༣འབྲས་ཡུམ་རིང་དང་༤ཉེ་བའི་གཞི་ཤེས་དང༌། །༥མྀ་མཐུན་༦གཉེན་པོའི་ཕྱོགས་དང་༧གཞི་ཤེས་སྦྱོར། །༨དེ་ཡི་མཉམ་ཉིད་༩མཐོང་བའི་ལམ་རྣམས་སོ། །རྣམ་རྫོགས་མཚོན་བྱེད་བཅུ་གཅིག་༡རྣམ་པ་དང༌། །༢སྦྱོར་བ་༣ཡོན་ཏན་༤སྐྱོན་དང་༥མཚན་ཉིད་ཅེས། །༦ཐར་དང་༧ངེས་འབྱེད་ཆ་མཐུན་༨ཕྱིར་མི་ལྡོག །༩སྲིད་ཞི་མཉམ་ཉིད་༡༠ཞིང་དག་༡༡ཐབས་མཁས་སྦྱོར། །༡རྩེ་མོའི་རྟགས་དང་༢རྣམ་འཕེལ་༣བརྟན་པ་དང༌། །༤སེམས་ཀུན་གནས་དང་༥མཐོང་༦སྒོམ་༧བར་ཆད་མེད། །༨བསལ་བྱ་ལོག་སྒྲུབ་མཐའ་སྦྱོར་བཅུ་གསུམ་ནི། །༡ཕྱིན་དྲུག་༧རྗེས་དྲན་དྲུག་དང་༡༣ངོ་བོ་ཉིད། །སྐད་ཅིག་སྦྱོར་བ་མཚོན་བྱེད་ཆོས་རྣམ་བཞི། །༡ཆོས་རྫོགས་རྟོགས་པ༢རྣམ་སྨིན་༣མཚན་ཉིད་མེད། །༤གཉིས་སུ་མེད་པའི་སྐད་ཅིག་སྦྱོར་རྣམས་སོ། །ཆོས་སྐུ་མཚོན་བྱེད་དངོས་པོ་རྣམ་པ་བཞི། །༡ངོ་བོ་ཉིད་༢ལོངས་༣སྤྲུལ་སྐུ་༤མཛད་པ་བཅས། །དོན་གྱི་རྣམ་པ་བདུན་ཅུའི་ཕྲེང་བའོ། ། སྨྲས་པ།ཕར་ཕྱིན་དགོངས་དོན་ཟབ་ཅིང་བརླིང་པ་ལ། །འགྲེལ་ཚུལ་དུ་མས་ཕན་ཚུན་འཛིངས་བྱས་པས། །མ་རྟོགས་ལོག་རྟོག་འཁྲུལ་པ་ཅི་མཆིས་པ། །མཁས་པ་ཆོས་ཀྱི་སྤྱན་ལྡན་ཡོངས་ལ་འཆགས། ། འདི་བཤད་པ་ལས་བྱུང་བའི་རབ་དཀར་དགེ་ཚོགས་ཅི་མཆིས་པ། ། མ་ལུས་འགྲོ་རྣམས་བདེན་འཛིན་ཞགས་པས་བཅིངས་པ་ལས་གྲོལ་ཏེ། ། མི་བཟད་འཇིགས་པ་དུ་མས་གཙེས་པའི་འཁོར་བའི་བཙོན་ར་ལས། ། མྱུར་དུ་ཐར་ནས་སྐུ་གསུམ་ཆོས་སྐུའི་རྒྱལ་སར་འཇུག་པར་ཤོག །བདག་ཀྱང་ཚེ་རབས་ཀུན་ཏུ་ཐེག་མཆོག་གི །དགེ་བའི་བཤེས་ཀྱིས་རྗེས་བཟུང་རྒྱལ་སྲས་ལམ། །མཐའ་དག་སྙིང་སྟོབས་མཆོག་གིས་སྒྲུབ་པ་ལ། །སྐད་ཅིག་ཙམ་ཡང་ལྷོད་པར་མ་གྱུར་ཅིག །ཅེས་རྗེ་བཙུན་དམ་པའི་ཞལ་ལུང་གཞན་ཕན་ཉི་མ་ཞེས་བྱ་བ་འདི་ནི་རྒྱལ་བསྟན་རིས་མེད་པ་དངོས་གྲུབ་དཔལ་གྱིས་སྨྲས་པའོ། །འདིས་ཀྱང་རྒྱལ་བསྟན་ཡུན་རིང་དུ་གནས་པར་གྱུར་ཅིག །། །སརྦ་མངྒ་ལཾ། |