 གསུང་འབུམ་པོད་བརྒྱད་པ། གྲུབ་མཐའ་དང་ས་ལམ་སོགས།དཔལ་ལྡན་རྒྱལ་བ་ཇོ་ནང་པའི་དཔེ་ཚོགས།དགེ་བཤེས་དངོས་གྲུབ་དཔལ།གངས་ལྗོངས་རིས་མེད་མཐོ་སློབ་ཀྱི་རྩོམ་སྒྲིག་སྡེ་ཚན།མཁོ་རྒུའི་ལོངས་སྤྱོད་འཛོམས་ཀྱང་མ་བསགས་ཤིང་། །འདོད་ཡོན་འཁོར་མང་ཚོགས་ཀྱང་མ་ཞེན་པར། །བསླབ་གསུམ་སྡེ་སྣོད་རིག་པའི་བང་མཛོད་དེ། །སྤོང་དང་ཀློག་པའི་སྙིང་གི་དབུས་སུ་བསྐྱིལ། ། གྲུབ་མཐའི་རྣམ་བཞག་ལུང་རིགས་གཏེར་མཛོད་ལེགས་བཤད་འདོད་འཇོ།གྲུབ་མཐའི་རྣམ་བཞག་ལུང་རིགས་གཏེར་མཛོད་ལེགས་བཤད་འདོད་འཇོ་ཞེས་བྱ་བ་བཞུགས་སོ། ། རྒྱལ་ཀུན་པད་དཀར་ལྟར་བསྔགས་ཉི་མའི་གཉེན། །གང་གསུང་མདོ་སྔགས་ལུང་རྟོགས་དམ་པའི་ཆོས། །དེ་འཛིན་དགེ་འདུན་འཕགས་པའི་ཚོགས་རྣམས་ཀྱིས། །རྣམ་མང་གྲུབ་མཐའ་འཆད་པའི་དགེ་ལེགས་སྩོལ། །རབ་མཛེས་མཚན་དཔེས་མཛེས་སྡུག་རྫོགས་པའི་སྐུ། །རབ་སྙན་ཚངས་དབྱངས་དྲུག་ཅུའི་དབྱངས་ཀྱི་གསུང། །རབ་ཡངས་ཆོས་ཀུན་རྣམ་བཀྲ་གསལ་བའི་ཐུགས། །རབ་མང་ལུང་བསྟན་ཀུན་མཁྱེན་གཙུག་ན་རྒྱལ། །གངས་ཅན་མཁས་གྲུབ་བྱེ་བའི་གཙུག་རྒྱན་མཆོག །ཁྱབ་བདག་སྒྲོལ་བའི་མགོན་པོའི་ཉི་གཞོན་གྱིས། །འཆད་རྩོད་རྩོམ་པའི་འོད་སྣང་རབ་རྒྱས་ནས། །བསྟན་པའི་པད་ཚལ་བཞད་པའི་དགེ་ལེགས་སྩོལ། །འཕགས་བོད་དྲན་དབང་བྱེ་བའི་ལུ༷ང་རི༷གས་ཀྱི། །རིན་ཆེན་གཏེ༷ར་མཛོ༷ད་ཕྱི་ནང་གྲུབ་མཐའ་ཡི། །རྒྱ་མཚོའི་མཐར་སོན་ལེ༷གས་བཤ༷ད་འདོ༷ད་པ་འཇོ༷། །སྐལ་ལྡན་ཞིང་སར་ཆོས་ཆར་སྦྱིན་པར་བྱ། །དེ་ལ་འདིར་སྤྱོད་འཇུག་ལས། དལ་འབྱོར་འདི་ནི་རྙེད་པར་ཤིན་ཏུ་དཀའ། །སྐྱེས་བུ་དོན་སྒྲུབ་ཐོབ་པར་གྱུར་པ་ལ། །གལ་ཏེ་འདི་ལ་ཕན་པ་མ་བསྒྲུབས་ན། །ཕྱིས་འདི་ཡང་དག་འབྱོར་བ་ག་ལ་འགྱུར། །ཞེས་གསུངས་པ་ལྟར་རྙེད་དཀའ་བའི་དལ་འབྱོར་གྱི་མི་ལུས་ཁྱད་པར་ཅན་ཡིད་བཞིན་གྱི་ནོར་བུ་ལས་ལྷག་པ་རང་གཞན་གྱི་ལེགས་པའི་དོན་གང་བསྒྲུབ་ན་སྒྲུབ་ཐུབ་པ་ཅན་རྙེད་པའི་སྐབས་འདིར། གཞན་དུད་འགྲོ་དང་འཇིག་རྟེན་ཕལ་བའི་བྱ་བ་ཟ་དང་གཉིད་ལོག་འཁྲིགས་སྤྱོད་ཙམ་ལས་མ་བྱུང་ན༌། རྟེན་ཁྱད་པར་ཅན་ཐོབ་པ་དོན་མེད་དུ་སོང་ནས་སྙིང་པོ་མ་ལོན་པ་ཡིན་ཏེ། དཔེར་ན་ཡིད་བཞིན་གྱི་ནོར་བུ་རྡོའི་འཆང་བུ་དང་བརྗེས་པ་ལས་ཀྱང་ཆེས་ངན་པ་ཡིན་ནོ། །དེ་ལྟ་བས་ན་ངེས་པར་དལ་འབྱོར་གྱི་སྙིང་པོ་ཞིག་ལེན་དགོས་པ་ཡིན་ལ། དེ་ཡང་ཚེ་འདི་ཙམ་མ་ཡིན་པར་ཕྱི་མའི་དོན་ཞིག་སྒྲུབ་དགོས། དེ་ཡང་ཕྱི་མའི་འཁོར་བའི་མངོན་མཐོ་ཙམ་མ་ཡིན་པར་ཐར་བ་དང་ཐམས་ཅད་མཁྱེན་པའི་གོ་འཕང་ཐོབ་ཕྱིར་དུ་འབད་དགོས་སོ། །དེ་ཡང་ལྷ་ལས་ཕུལ་བྱུང་གི་བསྟོད་པ་ལས། བདག་ནི་སངས་རྒྱས་ཕྱོགས་མི་འཛིན། །སེར་སྐྱ་སོགས་ལ་མི་སྡང་ཡང༌། །གང་ཞིག་རིགས་པར་ལྡན་པའི་ཚིག །དེ་ཉིད་སྟོན་པར་ཡོངས་སུ་འཛིན། །ཅེས་གསུངས་པ་ལྟར་རང་གཞན་གྱི་གྲུབ་མཐའི་རྣམ་བཞག་ལེགས་པར་ཤེས་ནས་སྐྱོན་མེད་ཡོན་ཏན་དང་ལྡན་པའི་གྲུབ་མཐའ་ལ་འཇུག་དགོས་ཤིང༌། དེ་ལའང་རང་གཞན་གྱི་གྲུབ་མཐའི་རྣམ་བཞག་རྣམས་མ་འདྲེས་པར་སོ་སོར་ལེགས་པར་ཤེས་དགོས་ཏེ། དེ་མ་ཤེས་ན་དེའི་སྐྱོན་ཡོན་འདི་ཞེས་མི་ཤེས་པའི་ཕྱིར་ཏེ། དཔེར་ན་ལྷ་མི་གཉིས་མ་ཤེས་ན་དེ་གཉིས་ཀྱི་བཟང་ངན་མི་ཤེས་པ་བཞིན་ནོ། །དེའི་སླད་དུ་ལང་ཀར་གཤེགས་པ་ལས། བློ་གྲོས་ཆེན་པོ་དེ་ལྟར་གྲུབ་པའི་མཐའི་ཚུལ་དང་བསྟན་པའི་མཚན་ཉིད་ལ་ཁྱོད་དང་བྱང་ཆུབ་སེམས་དཔའ་སེམས་དཔའ་ཆེན་པོ་གཞན་དག་གིས་བརྩོན་པར་བྱའོ། །ཞེས་གསུངས་སོ། །དེ་ཡང་གྲུབ་མཐའི་ལེགས་ཉེས་བླང་དོར་ཚུལ་བཞིན་དུ་འབྱེད་པ་ལ། ཆགས་སྡང་གི་རིས་སུ་མ་བཅད་པར་བློ་གཟུ་བོར་གནས་པ་དང༌། ཆོས་རབ་ཏུ་རྣམ་འབྱེད་ཀྱི་ཤེས་རབ་དང་ལྡན་པ་དང༌། དོན་གཉེར་དང་ལྡན་པ་དང༌། གུས་པ་ཙམ་མ་ཡིན་པར་ཚུལ་གསུམ་ཚང་བའི་རིགས་པ་ཡང་དག་གིས་བསྲེགས་བཅད་བརྡར་བའི་གསེར་བཞིན་དུ་ལེགས་པར་བརྟགས་ནས་བླང་བར་བྱ་བ་ཡིན་ཏེ། དབུ་མ་བཞི་བརྒྱ་བ་ལས། གཟུར་གནས་བློ་ལྡན་དོན་གཉེར་བ། །ཉན་པོ་སྣོད་ཅེས་བྱ་བར་བཤད། །སྨྲ་བོ་ཡོན་ཏན་རྣམས་གཞན་དུ། །མི་འགྱུར་ཉན་པ་པོའང་མིན། །ཞེས་དང༌། མདོ་ལས། དགེ་སློང་དག་གམ་མཁས་རྣམས་ཀྱིས། །བསྲེགས་བཅད་བརྡར་བའི་གསེར་བཞིན་དུ། །ལེགས་པར་བརྟགས་ལ་ང་ཡི་བཀའ། །བླང་བར་བྱ་ཡི་གུས་ཕྱིར་མིན། །ཞེས་དང༌། མཉམ་མེད་ཇོ་བོ་ཆེན་པོའི་ཀྱང༌། ལེགས་པར་བརྟགས་ལ་བླང་བར་བྱ་བ་ཡིན། །དད་པ་ཙམ་དང་གུས་པ་ཙམ་གྱིས་མིན། །ཞེས་དང༌། ཐེག་མཆོག་དབུ་མ་ལས། ཇི་ལྟར་འཇུག་ཚུལ་ཅི་ཞེ་ན། །ཚད་མའི་ལུང་གི་རྗེས་འབྲང་ཞིང༌། །རིགས་པའི་ཡན་ལག་ཚང་བའི་འཇུག །ཁས་མི་ལེན་པའི་གཡོ་སྒྱུ་བཀག །ཅེས་གསུངས་སོ། །དེས་ན་ལྟ་བའི་གོལ་ས་ཤེས་ནས་སྤངས་པ་དང༌། གང་ཟག་གི་བདག་དང་ཆོས་བདག་མེད་པའི་ལྟ་བ་རྣམ་པར་དག་པ་ལ་འཇུག་པར་བྱ་བའི་ཕྱིར་རང་གཞན་གྱི་གྲུབ་མཐའི་རྣམ་བཞག་བརྗོད་པ་ལ། གྲུབ་མཐའ་སྤྱིར་བསྟན་པ། བྱེ་བྲག་སོ་སོར་བཤད་པ། དོན་བསྡུས་ཏེ་གདམས་པ་དང་གསུམ། དང་པོ་གྲུབ་མཐའ་སྤྱིར་བསྟན་པ།དང་པོ་གྲུབ་མཐའ་སྤྱིར་བསྟན་པ། དང་པོ་ནི། སངས་རྒྱས་ཀྱི་ཆོས་ཚུལ་ལ་བསྟན་པ་དང་གྲུབ་མཐའ་གཉིས་ལས། གྲུབ་མཐའ་ནི་རྣལ་འབྱོར་བ་རྣམས་ཀྱིས་ལེགས་པར་ཤེས་དགོས་ཏེ། ལང་གཤེགས་ལས། ང་ཡི་ཆོས་ཚུལ་རྣམ་གཉིས་ཏེ། །བསྟན་པ་དང་ནི་གྲུབ་མཐའ་འོ། །བྱིས་པ་རྣམས་ལ་བསྟན་པ་བཤད། །རྣལ་འབྱོར་བ་ལ་གྲུབ་མཐའ་འོ། །ཞེས་གསུངས་སོ། །དེ་ཡང་གྲུབ་མཐའ་ཞེས་པ་ནི། གཞུང་ལུགས་སོགས་ལ་སྦྱངས་ནས་རང་གི་བློ་ངོར་ལུང་རིགས་ཀྱིས་འཐད་པའི་གཞི་ལམ་འབྲས་གསུམ་གྱི་རྣམ་བཞག་ཁས་བླངས་ནས་དེ་ལས་གཞན་མ་ཡིན་པར་ཐག་བཅད་པའི་བཞེད་སྲོལ་ཞིག་ལ་གྲུབ་མཐའ་ཞེས་བརྗོད་དེ། ཤེས་རབ་སྒྲོན་མེ་ལས། མཛད་པའི་མཐའ་དང༌། ཞེས་དང༌། དེའི་འགྲེལ་བཤད་ལས། དེ་ལ་མཛད་པའི་མཐའ་ཞེས་བྱ་བ་ནི་ གྲུབ་པའི་མཐའ་སྟེ། བདག་ཉིད་ཆེན་པོ་རྣམས་ཀྱིས་མཛད་པའི་དོན་གྱི་མཐའ་ངེས་པ་ཡིན་པའི་ཕྱིར་རོ། །ཞེས་དང༌། འགྲེལ་བཤད་ཚིག་གསལ་ལས། གྲུབ་པའི་མཐའ་སྟེ། རིགས་པ་དང་ལུང་གིས་རབ་ཏུ་བསྟན་པར་རང་གི་འདོད་པ་གྲུབ་པ་ནི། དེ་ལས་ཕར་ཡང་འགྲོ་བ་མེད་པས་ན་མཐའ་འོ། །ཞེས་གསུངས་པའི་ཕྱིར་རོ། །གང་ཟག་གི་དབང་དུ་བྱས་ན་གྲུབ་མཐས་བློ་མ་བསྒྱུར་བ་དང༌། གྲུབ་མཐས་བསྒྱུར་བ་གཉིས་སོ། །དང་པོ་ནི། གཞུང་ལུགས་ལ་མ་སྦྱངས་པར་རིགས་པས་མ་བརྟགས་མ་དཔྱད་པའི་བློ་ལྷན་སྐྱེས་ཀྱིས་ཚེ་འདི་ཙམ་གྱི་དོན་དུ་ཞེན་པར་བྱེད་པའི་གང་ཟག་གོ །གཉིས་པ་གྲུབ་མཐས་བསྒྱུར་བ་ནི། བརྟགས་དཔྱད་བྱས་ནས་གཞི་ལམ་འབྲས་གསུམ་གྱི་རྣམ་བཞག་རང་གི་བློ་ངོར་གྲུབ་པའི་ཚུལ་ལུང་རིགས་ཀྱིས་སྨྲ་བར་བྱེད་པའི་གང་ཟག་ཡིན་ནོ། །དེ་ལ་ཕྱི་རོལ་བའི་གྲུབ་མཐའ་སྨྲ་བ་དང་ནང་བ་སངས་རྒྱས་པའི་གྲུབ་མཐའ་སྨྲ་བ་དང་གཉིས་སོ། །ཕྱི་ནང་གི་ཁྱད་པར་ཡོད་དེ། རང་ངམ་གཞན་འཇིགས་པ་ཅི་རིགས་ལས་སྒྲོལ་བའི་དཔུང་གཉེན་དུ་མཆོག་གསུམ་ཡིན་པར་ཡིད་ཆེས་པའི་ཁྱད་པར་བཞི་ལྡན་གྱི་སྐྱབས་འགྲོ་རྒྱུད་ལ་སྐྱེས་པའི་གང་ཟག་དེ་ནང་བ་སངས་རྒྱས་པ་དང༌། དཀོན་མཆོག་གསུམ་ལ་བློ་མི་གཏོད་པར་འཇིག་རྟེན་པའི་ལྷ་ལ་སྙིང་ཐག་པ་ནས་སྐྱབས་སུ་འགྲོ་བའི་གང་ཟག་དེ་ཕྱི་རོལ་བ་ཡིན་པའི་ཕྱིར། ཕྱི་རོལ་བའི་གྲུབ་མཐའ་སྨྲ་བ་དང་ནང་བའི་གྲུབ་མཐའ་སྨྲ་བའི་དོན་ཡོད་དེ། སྟོན་པ་བསྟན་པ་གྲུབ་མཐའ་གསུམ་གྱི་སྒོ་ནས་འབྱེད་པའི་ཕྱིར། རྟགས་ཟུར་དང་པོ་གྲུབ་སྟེ། རང་སྡེའི་སྟོན་པ་ནི་སྒྲིབ་ཀུན་ཡོངས་སུ་ཟད་པའི་ཡོན་ཏན་ཀུན་དང་ལྡན་པ་ཡིན་པའི་ཕྱིར་ཏེ། ཁྱད་པར་འཕགས་བསྟོད་ལས། བདག་ནི་སྟོན་པ་གཞན་སྤངས་ནས། །བཅོམ་ལྡན་ཁྱོད་ལ་སྐྱབས་སུ་མཆི། །དེ་ཅིའི་སླད་དུ་ཞེ་ན་ཁྱོད། །སྐྱོན་མི་མངའ་ལ་ཡོན་ཏན་ལྡན། །ཞེས་གསུངས་པའི་ཕྱིར། གཞན་གྱི་སྟོན་པ་ནི་དེ་ལས་བཟློག་པའོ། །རྟགས་ཟུར་གཉིས་པ་གྲུབ་སྟེ། རང་སྡེའི་བསྟན་པ་ནི་སེམས་ཅན་ལ་འཚེ་བ་མེད་པ་ཡིན་པའི་ཕྱིར་ཏེ། དབུ་མ་བཞི་བརྒྱ་བ་ལས། མདོར་ན་ཆོས་ནི་མི་འཚེ་བར། །དེ་བཞིན་གཤེགས་པ་རྣམས་ཀྱིས་གསུངས། །ཞེས་གསུངས་སོ། །ཕྱི་རོལ་བའི་བསྟན་པ་ནི་དེ་ལས་བཟློག་པའོ། །རྟགས་ཟུར་གསུམ་པ་གྲུབ་སྟེ། རང་སྡེ་ནི་ལྟ་བ་རྟག་གཅིག་རང་དབང་ཅན་གྱི་བདག་ཏུ་མ་གྲུབ་པར་འདོད་པའི་ཁྱད་པར་ཚང་དགོས་པའི་ཕྱིར་ཏེ། ཐེག་མཆོག་དབུ་མ་ལས། གང་ཟག་བདག་མེད་སྒོམ་པ་ཡོད་མེད་ལས། །སྲིད་ལས་གྲོལ་བ་ཡོད་མེད་རྗེས་སུ་དཔོག །ཅེས་དང༌། དེ་ལྟར་གང་ཟག་བདག་མེད་ནི། །ཐེག་པ་ཆེ་ཆུང་ཀུན་ལ་ཡོད། །ཅེས་དང༌། དེའི་ཟིན་བྲིས་ལས། གང་ཟག་གི་བདག་མེད་སྒོམ་པའི་ཚུལ་འདི་ནི། ཐེག་པ་ཆེ་ཆུང་ཀུན་ལ་ཡོད་པ་ཡིན་ཏེ། འདི་ནི་སངས་རྒྱས་ཀྱི་བསྟན་པ་ཐམས་ཅད་ཀྱི་ལྟ་བ་ཡིན་པའི་ཕྱིར་རོ། །ཅི་སྟེ་སྤྱིར་འདི་ལྟ་བུ་དང་མི་ལྡན་ན། ཚུལ་ཁྲིམས་བསྲུང་བ་དང་བཟོད་པ་ལ་གནས་པ་སོགས་དགེ་བའི་ལས་ལམ་ཇི་ལྟ་བུ་ཞིག་སྤྱོད་ན་ཡང་སངས་རྒྱས་ཀྱི་བསྟན་པ་ལ་ཞུགས་པ་མ་ཡིན་ཏེ། སྤྱིར་དགེ་བའི་ལས་ལམ་ལ་གནས་པ་ཙམ་དུ་ཟད་དོ། །ཞེས་གསུངས་སོ། །འོན་ཀྱང་དེ་ལྟ་བུའི་ལྟ་བ་ཡང་རྟག་གཅིག་རང་དབང་བའི་བདག་མེད་པའི་ལྟ་བ་ལ་བྱེད་ལ། དེ་མེད་ན་ལྟ་བའི་སྒོ་ནས་བསྟན་ལ་མ་ཞུགས་པར་གསུངས་པ་ཡིན་སྙམ་སྟེ། དེ་ལྟ་མ་ཡིན་ན་ཐེག་མཆོག་དབུ་མའི་ཟིན་བྲིས་ལས། གང་ཟག་གི་བདག་རྫས་ཡོད་སྤྱིར་དགག་པ་ནི། ཕྱི་རོལ་མུ་སྟེགས་བྱེད་རྣམས་དང་རང་སྡེ་ཉན་ཐོས་སྡེ་བ་བཅོ་བརྒྱད་ཀྱི་ནང་ན་སྡེ་བ་ལྔ་ཙམ་ཡོད་པས། ཞེས་རང་སྡེ་ལ་ང་བདག་རྫས་ཡོད་ཁས་ལེན་པ་ཡོད་པར་གསུངས་པ་དང་འགལ་བ་ཡིན་ནོ། །གཞན་སྡེ་རྣམས་ཀྱིས་རྟག་གཅིག་རང་དབང་བའི་བདག་ཁས་བླང་བ་ཡིན་ནོ།། །། གཉིས་པ་གྲུབ་མཐའི་རྣམ་བཞག་བྱེ་བྲག་ཏུ་བཤད་པ།གཉིས་པ་གྲུབ་མཐའི་རྣམ་བཞག་བྱེ་བྲག་ཏུ་བཤད་པ་ནི། བླང་དོར་རབ་གསལ་ལས། ཕྱི་ནང་གྲུབ་མཐའི་དབྱེ་བའང་མཁྱེན་བགྱི་སྟེ། །ཞེས་གསུངས་པ་ལྟར་གཞན་ཕྱི་རོལ་བའི་གྲུབ་མཐའི་རྣམ་བཞག་བཤད་པ་དང༌།རང་སྡེ་ནང་བ་སངས་རྒྱས་པའི་གྲུབ་མཐའ་བཤད་པ་དང་གཉིས། དང་པོ་ལ་མཚན་ཉིད་དབྱེ་བ་གཉིས། དང་པོ་ནི། དཀོན་མཆོག་གསུམ་ལ་སྐྱབས་སུ་མི་འགྲོ་བར་དེ་ལས་གཞན་པའི་སྟོན་པ་ཁས་ལེན་པའི་གྲུབ་མཐའ་སྨྲ་བ་དེ། ཕྱི་རོལ་བའི་གྲུབ་མཐའ་སྨྲ་བའི་མཚན་ཉིད་ཡིན་ནོ། ། གཉིས་པ་ཕྱི་རོལ་བའི་གྲུབ་མཐའི་དབྱེ་བ་ལ་མདོར་བསྟན་དང་སོ་སོར་རྒྱས་པར་བཤད་པ་དང་གཉིས། དང་པོ་ནི། བླང་དོར་རབ་གསལ་ལས། ཕྱི་བ་ལ་ཡང་ཚངས་པ་ཁྱབ་འཇུག་དང༌། ། དབང་ཕྱུག་པ་དང་རྒྱང་འཕེན་སྟག་གཟིག་པ། །ཟད་བྱེད་གཅེར་བུ་པ་སྟེ་ལྔ་རུ་གསུངས། །ཞེས་གསུངས་པ་ལྟར་སྤྱིར་གང་ཟག་གི་སྒོ་ནས་ཕྱེ་ན་ཆོས་ཉིད་ཟབ་མོ་རིམ་གྱིས་རྟོགས་ནས་ཉམས་སུ་ལེན་པ་རྣལ་འབྱོར་པ་དང༌། ཆོས་ཅན་འཁྲུལ་བའི་སྣང་བ་ལ་བདེན་པར་འཛིན་པའི་ཕལ་པ་གཉིས་ཡོད་ཅིང༌། ཕལ་པ་ལ་ཡང་གྲུབ་མཐས་བློ་བསྒྱུར་བ་ཕྱི་རོལ་མུ་སྟེགས་པ་ལ་ཕྱེ་ན་མཐའ་ཡས་པ་ཡོད་ཀྱང་རེ་ཞིག་ཚངས་པ་དང༌། ཁྱབ་འཇུག་པ་དང༌། དབང་ཕྱུག་པ་དང༌། རྒྱང་འཕེན་པ་དང༌། ཀླ་ཀློ་སྟག་གཟིག་པ་དང༌། ཟད་བྱེད་གཅེར་བུ་པ་སྟེ་ལྔ་ཡིན་ལ། འདི་རྣམས་ཀྱི་རྣམ་བཞག་ཞིབ་པར་དཔལ་དུས་ཀྱི་འཁོར་ལོའི་འགྲེལ་ཆེན་དུ་གསལ་བར་གསུངས་ཤིང༌། དེ་རྣམས་ཉེར་ལེན་གྱི་ཕུང་པོ་ལ་བདག་དང་བདག་གིར་འཛིན་པ་ལ། ནང་པའི་རྣལ་འབྱོར་པའི་རིགས་པས་གནོད་ཅིང༌། རྣལ་འབྱོར་པ་རྣམས་ཀྱི་བློ་ལ་ཡང་ཡེ་ཤེས་དང་བསམ་གཏན་དང་སྙོམས་འཇུག་ལ་སོགས་པའི་རྟོགས་པ་མཐོ་དམན་གྱི་ཁྱད་པར་ཡོད་པས། གོང་མ་གོང་མ་མཆོག་ཏུ་གྱུར་པ་རྣམས་ཀྱིས་འོག་མ་འོག་མ་དམན་པ་རྣམས་ལ་གནོད་ཅིང་ཟིལ་གྱིས་གནོན་པས་དེ་རྣམས་ཀྱི་བློ་ཁྱད་དང་གྲུབ་མཐའི་ཁྱད་པར་བཟང་ངན་རྣམས་ཤེས་པར་བྱ་བའི་ཕྱིར་སྟོན་པའོ། །གཉིས་པ་སོ་སོར་རྒྱས་པར་བཤད་པ་ལ་ལྔ་ལས། དང་པོ་ལ་ཚངས་པ་པའི་འདོད་པ་བཤད་པ།དང་པོ་ལ་ཚངས་པ་པའི་འདོད་པ་བཤད་པ་དང༌། དེ་དགག་པ་གཉིས། དང་པོ་ནི། ཀུན་མཁྱེན་ཤེས་རབ་རྒྱལ་མཚན་གྱིས་མཛད་པའི་གྲུབ་མཐའི་རྣམ་བཞག་དོན་གསལ་ལས། ཨ་ཤྭ་མེ་དྷྭ་མི་རྟའི་སྲོག་གཅོད་ཀྱིས། །མཆོད་སྦྱིན་བྱས་ན་མཐོ་རིས་ཟེར། །ཞེས་དང༌། བླང་དོར་རབ་གསལ་ལས། ཚངས་པ་པ་ནི་རིག་བྱེད་རྟག་པ་དང༌། །རིགས་བཞི་ཚངས་པའི་ལུས་ལས་བྱུང་བ་དང༌། །རྟ་གཙང་མཆོད་སྦྱིན་བྱས་པས་མཐོ་རིས་ཀྱི། །གོ་འཕང་ཐོབ་པར་འདོད་མོད་དེ་ལྟ་ནའང༌། །ཞེས་ཚངས་བ་པ་ལ་རིག་བྱེད་པ་དང་མཆོད་སྦྱིན་པ་ཞེས་ཀྱང་བྱ་ཞིང༌། དེ་དག་མཆོད་སྦྱིན་དང༌། ངེས་བརྗོད་དང༌། སྙན་ཚིག་དང༌། སྲིད་སྲུང་སྟེ་རིག་བྱེད་བཞི་རང་བྱུང་འདུས་མ་བྱས་ཀྱི་ནམ་མཁའ་ལྟར་ཀུན་ཏུ་འགྲོ་ཞིང༌། རྟག་པ་དང༌། རིགས་བཞི་ལས་ཚངས་པའི་ཁ་ལས་བྲམ་ཟེ་རྣམས་སྐྱེས་པས་ཁ་དོག་དཀར་ཞིང་ཡེ་ཤེས་རིག་པ་དང༌། ལག་པ་ལས་རྒྱལ་རིགས་རྣམས་སྐྱེས་པས་ཁ་དོག་དམར་ཞིང་དཔའ་བ་དང༌། བརླ་གཉིས་ལས་རྗེ་རིགས་རྣམས་སྐྱེས་པས་ཁ་དོག་སེར་ཞིང་ཚོང་ལ་རྒྱུ་བས་ནོར་མང་བ་དང༌། རྐང་པ་དག་ལས་དམངས་རིགས་རྣམས་སྐྱེས་པས་ཁ་དོག་ནག་ཅིང་ཞིང་ལས་དང་རྒྱལ་པོའི་ཞབས་འབྲིང་བྱེད་པ་དང༌། རྟ་དཀར་པོ་གཙང་མ་བསད་དེ་མཆོད་སྦྱིན་བྱས་པས་མཐོ་རིས་ཀྱི་གོ་འཕང་ཐོབ་པར་འདོད་པ་ཡིན་ནོ། །གཉིས་པ་དེ་དགག་པ་ནི། དེ་ལྟར་འདོད་པ་མི་འཐད་དེ། བླང་དོར་རབ་གསལ་ལས། རིག་བྱེད་རང་བྱུང་རྟག་པ་མ་ཡིན་ཏེ། །དང་པོ་ཚངས་པའི་གདོང་བཞི་ལས་བྱུང་ཞིང༌། །ཕྱི་ནས་བྲམ་ཟེ་རྣམས་ཀྱིས་ཀློག་པ་ལས། །འདུས་བྱས་མི་རྟག་ཉིད་དུ་གྲུབ་ཕྱིར་རོ། །ཞེས་མཐོ་རིས་འདོད་པས་མེ་ལ་སྦྱིན་བསྲེག་བྱེད་ཞེས་པ་ལ་སོགས་པའི་རིག་བྱེད་ཀྱི་སྒྲ་དེ་ནི་རང་བྱུང་རྟག་པ་མ་ཡིན་ཏེ། བརྗོད་བྱའི་དོན་རྗོད་པར་བྱེད་པའི་ཕྱིར་དང༌། གང་དོན་གྱི་རྗོད་བྱེད་ཡིན་པ་དེ་ནི། མགྲིན་པ་དང་རྐན་ལ་སོགས་པའི་རྩོལ་བས་བསྐྱེད་པས་རང་བྱུང་མ་ཡིན་པར་གྲུབ་པོ། །ཅི་སྟེ་དོན་རྗོད་བྱེད་རིག་བྱེད་ཀྱི་སྒྲ་ལྟ་བུ་དེ་རིག་བྱེད་ཀྱི་སྒྲ་དངོས་མ་ཡིན་ཞིང༌། དེ་ལས་གཞན་ཡིན་ཏེ། དེ་ནི་རྣ་བའི་བུག་པའི་ནང་དུ་རིག་བྱེད་ཀྱི་སྒྲའི་དོན་ཐམས་ཅད་དང་གཅིག་ཏུ་འདྲེས་པར་གྱུར་ཅིང་རྟག་པ་དེའི་མངོན་པར་གསལ་བྱེད་ཡིན་པའི་ཕྱིར་རོ་ཞེ་ན། དེ་ལྟར་ན་མངོན་པར་གསལ་བྱེད་ཀྱི་སྒྲ་དེས་བུམ་པ་ཞེས་བརྗོད་པ་ན། རྣ་བའི་བུག་པའི་ནང་དུ་རིག་བྱེད་ཀྱི་སྒྲ་དུ་མ་ཅ་ཅོ་དར་དིར་དུ་རྟོགས་པར་བྱ་བར་འགྱུར་ཏེ། དོན་ཐམས་ཅད་དང་འདྲེས་ཤིང་རྟག་པའི་རིག་བྱེད་ཀྱི་སྒྲ་དེ་རྣ་བུག་ཏུ་གསལ་བར་བྱས་པའི་ཕྱིར་རོ། །ཡང་རིག་བྱེད་ཀྱི་སྒྲ་དོན་དང་ཐ་དད་མ་ཡིན་ཞིང༌། གཅིག་པ་ཉིད་ཡིན་ན་མེ་ལ་སྦྱིན་བསྲེག་སྦྱིན་ཞེས་མེའི་སྒྲ་བརྗོད་པ་ན་བརྗོད་པ་པོའི་ཁ་བསྲེག་པར་འགྱུར་ཏེ། མེ་ཞེས་པའི་སྒྲ་ཁ་ནང་ན་ཡོད་ཅིང་དེ་མེ་དང་གཅིག་ཡིན་པའི་ཕྱིར་རོ། ། མདོར་ན་རིག་བྱེད་བཞི་འདུས་མ་བྱས་རྟག་པ་མ་ཡིན་ཏེ། སྔར་ཚངས་པའི་གདོང་བཞི་ལས་སྐྱེས་ཤིང་ཕྱིས་བྲམ་ཟེ་རྣམས་ཀྱིས་ཀློག་པ་ཡིན་པ་གང་ཞིག དེ་ལྟ་བས་ན་འདུས་བྱས་མི་རྟག་པར་གྲུབ་པའི་ཕྱིར། རྟགས་དང་པོ་ཁས། ཡང་རིག་བྱེད་ཀྱི་སྒྲ་དེ་ནམ་མཁའ་ལྟར་ཀུན་ཏུ་འགྲོ་བ་ཡང་མ་ཡིན་ཏེ། བྲམ་ཟེ་ཁོ་ནས་ཀློག་པར་འདོད་པས་ཉི་ཚེ་བར་གྲུབ་པའི་ཕྱིར་རོ། །ཅི་སྟེ་ཀུན་ཏུ་འགྲོ་བ་ཡིན་ན་དམངས་རིགས་རྣམས་ཀྱིས་ཀྱང་ཀློག་ཏུ་རུང་པར་རིགས་པས། འགལ་བ་སྣ་ཚོགས་སྨྲ་བ་འདི་དག་ལ་ཤེས་ལྡན་རྣམས་ཀྱིས་ཡིད་ཆེས་པར་མི་བྱའོ། །བླང་དོར་རབ་གསལ་ལས། རིགས་བཞིའང་རིགས་གཅིག་ཉིད་དུ་ཐལ་འགྱུར་ཏེ། །གང་ཟག་གཅིག་གི་ལུས་ལས་བྱུང་བའི་ཕྱིར། །དཔེར་ན་ཕ་གཅིག་གིས་ནི་བསྐྱེད་པ་ཡི། །བུ་རྣམས་རིགས་གཅིག་ཉིད་དུ་འགྱུར་བ་བཞིན། །ཞེས་གལ་ཏེ་ཐམས་ཅད་ཀྱི་བྱེད་པ་པོ་ཚངས་པས་སྐྱེ་དགུ་རྣམས་བསྐྱེད་པ་ཡིན་ན་བྲམ་ཟེ་ལ་སོགས་པ་རིགས་བཞིའི་ཐ་སྙད་མི་འཐད་པར་གྱུར་ཞིང་ཐམས་ཅད་ཀྱང་རིགས་གཅིག་ཏུ་འགྱུར་ཏེ། ཚངས་པ་གཅིག་ལས་སྐྱེས་པའི་ཕྱིར། དཔེར་ན་ཕ་གཅིག་གི་བུ་རྣམས་རིགས་གཅིག་པ་བཞིན་ནོ། །ཡང་ཚངས་པའི་ཁ་ལས་བྱུང་བ་རྣམས་བྲམ་ཟེའི་རིགས་ཡིན་ན་བྲམ་ཟེ་མོ་རྣམས་བྲམ་ཟེའི་སྲིང་མོར་འགྱུར་ཏེ། སྐྱེ་གནས་གཅིག་ལས་བྱུང་བའི་བུད་མེད་ཡིན་པའི་ཕྱིར་རོ། །དེ་ལྟར་ན་སྲིང་མོ་བག་མར་བྱས་པ་ལས་ཀླ་ཀློའི་ཆོས་ལ་ཞུགས་ནས་བྲམ་ཟེའི་རིགས་ཉམས་པར་འགྱུར་ཞིང༌། རིགས་ཉམས་པ་ལས་དམྱལ་བར་འགྲོ་བར་འདོད་པའི་ཁས་བླངས་ཀྱིས་ཀྱང་གནོད་པར་འགྱུར་རོ། ། དེ་བཞིན་དུ་རྒྱལ་རིགས་ལ་སོགས་པ་ལ་ཡང་སྦྱར་རོ། །ཅི་སྟེ་ཚངས་པའི་ཁ་ལ་སོགས་པའི་སྐྱེ་གནས་ཐ་དད་པའི་དབྱེ་བས་རིགས་བཞིར་འགྱུར་རོ་ཞེ་ན། དེ་ལྟ་ན་ནི་ཨུ་དུམ་ཝ་རའི་རྩ་བ་དང་རྐེད་པ་དང་རྩེ་མོ་ལས་སྐྱེས་པའི་འབྲུ་རྣམས་ཀྱང་རོ་དང་གཟུགས་དང་ནུས་པ་ལ་སོགས་པ་ཐ་དད་པར་འགྱུར་བ་ལ་དེ་ལྟར་མ་ཡིན་ནོ། །ཁ་དོག་གི་སྒོ་ནས་རིགས་བཞི་ཐ་དད་དུ་འབྱེད་པ་ཡང་མི་འཐད་དེ། དོན་དམ་བསྙེན་པ་ལས། ཁ་ལས་སྐྱེས་པའི་རི་བོང་འཛིན་པ་ལྟར་དཀར་མིན། །དཔུང་པ་ལས་སྐྱེས་ཉིན་བྱེད་ཤར་དང་འདྲ་བ་མིན། །བརླ་ལས་སྐྱེས་པ་ལྡོང་རོས་ཁ་དོག་འདྲ་མ་ཡིན། ། རྐང་པ་ལས་སྐྱེས་མིག་སྨན་ཆེ་ལྟར་ནག་པ་མིན། །ཞེས་གསུངས་པ་ལྟར། བྲམ་ཟེ་ཁ་དོག་ནག་པོ་དང༌། དམངས་རིགས་ཁ་དོག་དཀར་པོ་ལ་སོགས་པ་སྣ་ཚོགས་སུ་སྣང་བའི་ཕྱིར་རོ། །བློ་དང་འབྱོར་པ་དང་བྱ་བའི་སྒོ་ནས་ཐ་དད་དུ་འབྱེད་པ་ཡང་མི་འཐད་དེ། གཉིས་སྐྱེས་ཡེ་ཤེས་རིགས་ལས་སྐྱེས་མིན་རྒྱལ་རིགས་ནི། །རྒྱལ་པོའི་རིགས་ལས་སྐྱེས་པས་དཔའ་བོ་རྣམས་མ་ཡིན། །རྗེ་རིགས་ཐམས་ཅད་ཕུན་སུམ་ཚོགས་དང་ལྡན་པ་མིན། །འཇིག་རྟེན་དུ་ནི་དམངས་རིགས་ལས་ཆེན་མི་བགྱིད་དོ། །ཞེས་གསུངས་པ་ལྟར་བྲམ་ཟེ་བླུན་པོ་དང་རྒྱལ་རིགས་སྡར་མ་དང་རྗེ་རིགས་དབུལ་པོ་དང་དམངས་རིགས་རྒྱལ་པོ་ལ་སོགས་པ་སྣ་ཚོགས་སུ་སྣང་བའི་ཕྱིར་རོ། །ཡང་བླང་དོར་རབ་གསལ་ལས། སྲོག་ཆགས་བསད་དེ་མཆོད་སྦྱིན་བྱས་པ་ལས། །མཐོ་རིས་གོ་འཕང་ཐོབ་པ་ག་ལ་སྲིད། །སྡིག་པ་བྱས་པས་བདེ་འགྲོ་ཐོབ་འགྱུར་ན། །ངན་འགྲོའི་སྡུག་བསྔལ་གང་ལས་འབྱུང་བར་འགྱུར། །ཞེས་རྟ་བསད་པའི་མཆོད་སྦྱིན་གྱིས་འབྲས་བུ་བདེ་འགྲོ་ཐོབ་པ་ཡང་མི་འཐད་དེ། རྒྱུ་མི་དགེ་བ་བྱས་པ་ལས་འབྲས་བུ་བདེ་བ་ཐོབ་པར་འགལ་པའི་ཕྱིར་རོ། །སྔོན་མཆོད་སྦྱིན་ལ་ཕྱུགས་གསོད་བྱེད་དང་བསད་བྱ་ཐམས་ཅད་ལྷར་སྐྱེས་པར་འདོད་པ་དྲང་སྲོང་རྒྱས་པའི་བུ་དྲང་སྲོང་ཤུ་ཀས་ཀྱང་དོན་ཏེ་མི་འཐད་པར་རིག་ནས། མཆོད་སྡོང་བཙུགས་ནས་ཕྱུགས་བསད་དེ། །ཁྲག་འདམས་བྱས་པས་མཐོ་རིས་སུ། །གལ་ཏེ་འགྲོ་བ་དེ་ལྟར་ན། དམྱལ་བར་གང་གིས་འགྲོ་བར་འགྱུར། །ཞེས་པའི་ཚིག་གིས་སུན་ཕྱུང་བ་ལྟར་རོ། །འདོད་ན། ངན་འགྲོ་མེད་པའི་ཕྱིར་མཐོ་རིས་བསྒྲུབ་ལ་འབད་མི་དགོས་པར་ཐལ་བ་དེའི་ཕྱིར་མཆོད་སྦྱིན་དོན་མེད་དོ། །དེ་བས་ན་བློ་དང་ལྡན་པ་རྣམས་ཀྱིས་གྲུབ་མཐའ་ངན་པ་དེ་དག་གི་རྗེས་སུ་འབྲང་བར་མི་བྱ་སྟེ། ཇི་སྐད་དུ་དཔལ་དུས་ཀྱི་འཁོར་ལོའི་རྒྱུད་ལས། གང་ལ་རིགས་ནི་ཚད་མར་གྱུར་པ་དེ་ལ་མི་ཡི་བདག་པོ་རིག་བྱེད་དག་ནི་ཚད་མར་འགྱུར། །གང་ལ་རིག་བྱེད་ཚད་མར་གྱུར་པ་དེ་ལ་ངེས་པར་ས་གཞིའི་གནས་སུ་མཆོད་སྦྱིན་ཚད་མ་སྟེ། །གང་ལ་མཆོད་སྦྱིན་ཚད་མར་གྱུར་པ་དེ་ལ་རྣམ་མང་ཕྱུགས་དང་མི་ལ་འཚེ་བ་ཚད་མར་འགྱུར། །གང་ལ་འཚེ་བ་ཚད་མར་གྱུར་པ་དེ་ལ་དམྱལ་བའི་འཇིགས་པ་བྱེད་པའི་སྡིག་པ་ཚད་མའོ། ། ཞེས་གསུངས་པའི་ཕྱིར་རོ། །མུ་སྟེགས་རིག་བྱེད་པའམ་གསང་བ་པ་ཞེས་པ་དང་མུ་སྟེགས་རིག་པ་ཅན་ཡང་བདག་ཤེས་པ་འདོད་པར་བསྟན་པ་སྤྱི་འགྲེལ་གྱི་རྣམ་བཤད་དུ་བཤད་དོ།། །། གཉིས་པ་ནི་ཁྱབ་འཇུག་པ་དང་དབང་ཕྱུག་པའི་འདོད་པ་བཤད་པ།གཉིས་པ་ནི་ཁྱབ་འཇུག་པ་དང་དབང་ཕྱུག་པའི་འདོད་པ་བཤད་པ་དང༌། དེ་དགག་པ་གཉིས། དང་པོ་ནི། གྲུབ་མཐའ་དོན་གསལ་ལས། བརྟན་གཡོ་ཐམས་ཅད་དབང་ཕྱུག་གིས། །བྱས་པར་འདོད་པ་ཡིན་པ་ལ། །ཞེས་དང༌། ཁྱབ་འཇུག་རྟག་པ་རང་བྱུང་ཅན། །ཡིན་ཞེས་ཟེར་བ། ཞེས་དང༌། བླང་དོར་རབ་གསལ་ལས། ཁྱབ་འཇུག་དབང་ཕྱུག་པ་དག་ཐུན་མོང་དུ། །དེ་དག་ཀུན་གྱི་བྱེད་པོ་རང་དབང་ཅན། །བདག་ཀྱང་གཅིག་པུ་ཀུན་ལ་ཁྱབ་པ་དང༌། །དུས་གསུམ་འགྱུར་མེད་རྟག་པར་འདོད་མོད་ཀྱི། །ཞེས་ཁྱབ་འཇུག་པ་ལ་བྱེ་བྲག་པ་དང་རིགས་པ་ཅན་པ་དང་གླུ་ཆོས་སུ་སྨྲ་བ་ཞེས་ཀྱང་བྱ་ཞིང༌། དབང་ཕྱུག་པ་ལ་ནི་ཞི་བ་པ་དང༌། འཁྲིག་པ་ཆོས་སུ་སྨྲ་བ་ཞེས་ཀྱང་བྱ་སྟེ། དེ་དག་ནི། ལྷ་གསུམ་པོ་ནི་གཟུགས་གཅིག་སྟེ། ཚངས་དང་ཁྱབ་འཇུག་དབང་ཕྱུག་ཆེ། ཞེས་ཚངས་པ་སྐུ་དང་ཁྱབ་འཇུག་ཐུགས་དང་དབང་ཕྱུག་གསུང་དུའང་འདོད་ཅིང༌། ལྷ་ཆེན་པོ་དེ་དག་ཐམས་ཅད་ཀྱི་བྱེད་པ་པོ་དང༌། བདག་རྟག་པ་གཅིག་པུ་ཐམས་ཅད་དུ་ཁྱབ་པ་དང༌། དུས་གསུམ་རྟག་པར་ཡོད་པ་དང༌། རང་བཞིན་འགྱུར་བ་མེད་པ་དང་ཡོན་ཏན་གསུམ་དང་ལྡན་པ་དང༌། སྟོང་ཉིད་ཞིག་པའི་མེད་དགག་ལ་སོགས་པར་འདོད་པ་ཡིན་ནོ། ། གཉིས་པ་དེ་དགག་པ་ལ། གྲུབ་མཐའི་རྣམ་བཞག་དོན་གསལ་ལས། རྟེན་འབྲེལ་མ་གཏོགས་བྱེད་གཞན་མེད། །ཀུན་རྫོབ་ལས་སྣང་གྲུབ་པར་ཐལ། །ཞེས་དང༌། སྐྱེ་འཆི་གཉིས་ཀྱི་སྡུག་བསྔལ་དག །མྱོང་བས་རང་དབང་ཅན་དུ་འགལ། །ཞེས་དང༌། བླང་དོར་རབ་གསལ་ལས། ཀུན་གྱི་བྱེད་པོ་ཡིན་ན་དགེ་སྡིག་ལས། །བདེ་སྡུག་མྱོང་བ་པོར་ཡང་ཐལ་པར་འགྱུར། །དེ་ལྟར་ན་ནི་རང་དབང་ཅན་དུ་འགལ། །རྟེན་འབྲེལ་མ་གཏོགས་བྱེད་པོ་གཞན་ཡོད་མིན། །ཞེས་གལ་ཏེ་ཁྱབ་འཇུག་དང་དབང་ཕྱུག་ཐམས་ཅད་ཀྱི་བྱེད་པ་པོ་ཡིན་ན། སེམས་ཅན་རྣམས་ཀྱི་ལས་དགེ་མི་དགེའི་བྱེད་པ་པོར་ཡང་འགྱུར་ལ། དེ་ལྟ་ན་དགེ་སྡིག་གི་འབྲས་བུ་རྣམ་སྨིན་བདེ་བ་དང་སྡུག་བསྔལ་མྱོང་བ་པོར་ཡང་འགྱུར་ཞིང༌། སེམས་ཅན་རྣམས་ཀྱི་བདེ་སྡུག་མྱོང་བ་པོ་ཡིན་ན་བདག་གཅིག་པུ་རང་དབང་ཅན་ཡིན་པར་ཡང་འགལ་བ་ཉིད་དོ། །ཅི་སྟེ་དབང་ཕྱུག་རང་ཉིད་ལས་བྱེད་པ་པོ་མ་ཡིན་ཞིང་གཞན་རྣམས་ལས་བྱེད་པ་ལ་སྦྱོར་བ་པོ་ཡིན་ནོ་ཞེ་ན། ལས་བྱེད་པ་པོ་དངོས་མ་ཡིན་ན་ཐམས་ཅད་ཀྱི་བྱེད་པ་པོ་འདོད་པ་དང་ཡང་འགལ་ཞིང༌། དབང་ཕྱུག་གིས་བསྐུལ་བའི་སེམས་ཅན་གྱིས་དབང་ཕྱུག་གི་ཐུགས་དང་འགལ་བ་མི་དགེ་བའི་ལས་བྱས་པ་ལས། ལས་ལ་སྦྱོར་བ་པོ་དབང་ཕྱུག་དེས་སེམས་ཅན་དེ་ངན་སོང་དུ་བསྐྱུར་ནས་ཚར་གཅོད་པར་འདོད་པ་དང་ཡང་འགལ་ཏེ། སེམས་ཅན་དེ་དག་ལ་རང་དབང་མེད་ཅིང་བྱེད་པ་པོ་དབང་ཕྱུག་གི་གཞན་དབང་ཉིད་དུ་གྱུར་པའི་ཕྱིར་རོ། །གཞན་ཡང་སྤྱོད་འཇུག་ལས། དབང་ཕྱུག་འགྲོ་བའི་རྒྱུ་ཡིན་ན། །རེ་ཤིག་དབང་ཕྱུག་གང་ཡིན་སྨྲོས། །འབྱུང་རྣམས་ཞེ་ན་དེ་ལྟ་མོད། །མིང་ཙམ་ལ་ནི་ཅི་ཞིག་ངལ། །ཞེས་པ་ལ་སོགས་པ་གསུངས་པ་ལྟར་དབང་ཕྱུག་འགྲོ་བ་ཐམས་ཅད་ཀྱི་བྱེད་པ་པོའམ་རྒྱུར་འདོད་པ་ཡིན་ན་དབང་ཕྱུག་དེ་གང་ཡིན་སྨྲོས་བྱས་པ་ལས་འབྱུང་བ་བཞི་པོ་ཡིན་ནོ་ཞེ་ན། དེ་ལྟར་ན་ཀུན་རྫོབ་ཏུ་རྒྱུའི་གཟུགས་འབྱུང་བ་བཞི་པོ་རྣམས་ལ་འབྲས་བུའི་གཟུགས་འབྱུང་འགྱུར་ལྔ་དབང་པོ་ལྔ་དང་དོན་ལྔ་འབྱུང་བར་ངས་ཀྱང་འདོད་པས་མིང་ཙམ་ལ་ནི་མི་བརྩོད་དོ། །འོན་ཀྱང་ས་སོགས་དུ་མ་དང༌། །མི་རྟག་གཡོ་མེད་ལྷ་མིན་ཞིང༌། །འགོམ་བྱ་ཉིད་དང་མི་གཙང་བས། །དེ་རྣམས་དབངཕྱུག་ཉིད་མ་ཡིན། །དབང་ཕྱུག་མཁའ་མིན་གཡོ་མེད་ཕྱིར། །ཞེས་གསུངས་པ་ལྟར་དོན་ལ་བརྟགས་ན་ས་ལ་སོགས་པའི་འབྱུང་བ་བཞི་པོ་རྣམས་ནི་ཁྱོད་འདོད་པའི་དབང་ཕྱུག་དེ་མ་ཡིན་ཏེ། དབང་ཕྱུག་གཅིག་པུར་འདོད་པ་ལ་འབྱུང་བ་རྣམས་ནི་དུ་མ་ཡིན་པའི་ཕྱིར་དང༌། དབང་ཕྱུག་རྟག་པར་འདོད་པ་ལ་འབྱུང་བ་རྣམས་ནི་མི་རྟག་པ་ཡིན་པའི་ཕྱིར། དབང་ཕྱུག་བློ་དང་ལྡན་པར་འདོད་པ་ལ་འབྱུང་བ་རྣམས་ལ་ནི་བློ་ཡི་གཡོ་བ་མེད་པའི་ཕྱིར་དང༌། དབང་ཕྱུག་ལྷའི་འགྲོ་བར་འདོད་པ་ལ་འབྱུང་བ་རྣམས་ནི་ལྷ་མ་ཡིན་པར་བེམ་པོ་ཡིན་པའི་ཕྱིར། དབང་ཕྱུག་མཆོད་པར་འོས་པར་འདོད་པ་ལ་འབྱུང་བ་རྣམས་ནི་རྐང་པས་འགོམ་པར་བྱ་བ་ཡིན་པའི་ཕྱིར་དང༌། དབང་ཕྱུག་གཙང་མར་འདོད་པ་ལ་འབྱུང་བ་རྣམས་ནི་གཤང་གཅི་ལ་སོགས་པའི་མི་གཙང་བས་སྦགས་པ་ཡིན་པའི་ཕྱིར་རོ། །འོན་ཀྱང་དབང་ཕྱུག་ནི་ནམ་མཁའ་ཡིན་ཞེ་ན། དེ་ཡང་མ་ཡིན་ཏེ། དབང་ཕྱུག་ནི་བློའི་གཡོ་བ་དང་བཅས་པས་ཐམས་ཅད་ཀྱི་བྱེད་པ་པོར་འདོད་པ་ལ་ནམ་མཁའ་ལ་ནི་བློའི་གཡོ་བ་མེད་ཅིང་བྱེད་པའང་ཅུང་ཟད་ཀྱང་མེད་པའི་ཕྱིར་རོ། །རྒྱུད་ལས་ཀྱང༌། དེ་ཕྱིར་དགེ་དང་མི་དགེའི་འབྲས་སྟེར་དབང་ཕྱུག་བྱེད་པ་མེད་དེ་སྲོག་ཆགས་ལས་ནི་དོར་ནས་ནི། ཞེས་གསུངས་པས། སེམས་ཅན་རྣམས་རང་གིས་བྱས་པའི་ལས་ཀྱི་འབྲས་བུ་ལ་རང་རང་ཉེ་བར་ལོངས་སྤྱོད་པ་མ་གཏོགས་པ་བྱེད་པ་པོ་དབང་ཕྱུག་ལ་སོགས་པ་གཞན་མེད་པར་གསུངས་སོ། །དོན་དམ་དུ་རྣམ་པར་དཔྱད་ན། དབུ་མ་རྩ་བར། བདག་ལས་མ་ཡིན་གཞན་ལས་མིན། །གཉིས་ལས་མ་ཡིན་རྒྱུ་མེད་མིན། །དངོས་པོ་གང་དང་གང་ན་ཡང༌། །སྐྱེ་བ་ནམ་ཡང་ཡོད་མ་ཡིན། །ཞེས་གསུངས་པ་ལྟར་ཆོས་ཐམས་ཅད་སྐྱེ་བ་མེད་པ་ཡིན་ལ་ཀུན་རྫོབ་ཏུ་རྟེན་ཅིང་འབྲེལ་བར་འབྱུང་བ་རྒྱུ་རྐྱེན་ཕན་ཚུན་ཡང་དག་པར་སྦྱོར་བ་ལས། ཟླ་བ་དང་ཆུ་ཤེལ་ཕྲད་པ་ལས་ཆུ་འབྱུང་བ་དང༌། ཉི་མ་དང་མེ་ཤེལ་ཕྲད་པ་ལས་མེ་འབྱུང་བ་དང༌། མེ་ལོང་དང་དངོས་པོ་ཕྲད་པ་ལས་གཟུགས་བརྙན་འབྱུང་བ་དང༌། ས་བོན་དང་ཆུ་ལུད་ཕྲད་པ་ལས་མྱུ་གུ་འབྱུང་བ་དང་ལས་དགེ་བ་དང༌། མི་དགེ་བ་ལས་འབྲས་བུ་འདོད་མི་འདོད་འབྱུང་བ་རྣམས་ནི། དངོས་པོའི་ཆོས་ཉིད་ཡིན་གྱི་བྱེད་པ་པོ་དང་སྤྲུལ་པ་པོ་སུ་ཡང་ཡོད་པ་མ་ཡིན་ནོ། །རྒྱན་ལས་ཀྱང༌། བརྟེན་ནས་དངོས་རབ་སྐྱེ་བ་མངོན་འཇུག་པ། །སྐྱེ་བོ་ཅི་ལྟར་གཞན་གྱིས་བྱས་ལ་རྟེན། །གང་ཞིག་ཡོད་པ་མི་མཐོང་མེད་མཐོང་བ། །འདི་འདྲའི་མུན་ནག་རྣམ་པ་འདི་གང་ཞིག །ཅེས་གསུངས་པ་ལྟར། དངོས་པོ་རྣམས་རྒྱུ་རྐྱེན་ཕན་ཚུན་རྟེན་ཅིང་འབྲེལ་པ་ལས་སྐྱེ་བར་མངོན་སུམ་དུ་མཐོང་བཞིན་དུ་བྱེད་པོ་གཞན་དབང་ཕྱུག་ལ་སོགས་པས་བྱས་པར་འདོད་པ་རྣམས་ནི་ཤིན་ཏུ་འཁྲུལ་པའོ། །དེ་ཡང་ཡོད་པ་རྟེན་འབྲེལ་གྱི་དོན་མི་མཐོང་བར་མེད་པ་བདག་དང་གཙོ་བོ་ལ་སོགས་པ་མཐོང་བ་འདི་འདྲ་བ་འདི་ནི་སྔོན་མེད་པའི་མུན་པ་ཆེན་པོ་སྟེ། མུན་པ་ཕལ་པས་ནི་ཡོད་པ་མི་མཐོང་བར་ནུས་མོད་མེད་པ་མཐོང་བར་མི་ནུས་པའི་ཕྱིར་རོ། །བླང་དོར་རབ་གསལ་ལས། བདག་ནི་རྟག་པ་གཅིག་པུ་ཐམས་ཅད་དུ། །འགྲོ་བ་ཡིན་ན་གཉེན་དང་བྲལ་བ་ཡི། །སྡུག་བསྔལ་སུས་ཀྱང་མྱོང་བར་མི་འགྱུར་ཏེ། །གཉེན་གྱི་བདག་དེ་རྟག་ཏུ་ཡོད་པའི་ཕྱིར། །ཞེས་གལ་ཏེ་བདག་རྟག་པ་གཅིག་པུ་དེ་ཡུལ་དུས་ཐམས་ཅད་དུ་གང་ཟག་ཐམས་ཅད་ལ་ཁྱབ་པར་ཀུན་ཏུ་འགྲོ་བ་ཡིན་ན། དེ་རྣམས་ཀྱིས་གཉེན་དང་བྲལ་བའི་སྡུག་བསྔལ་ནམ་ཡང་མི་མྱོང་བར་འགྱུར་ཏེ། གཉེན་གྱི་བདག་གཅིག་པུ་རང་དབང་ཅན་དེ་རྟག་ཏུ་མི་འགྱུར་བར་ཡོད་པའི་ཕྱིར་རོ། །ཡང་བླང་དོར་རབ་གསལ་ལས། གཞན་ཡང་སེམས་ཅན་གཅིག་གི་སྡུག་བསྔལ་གྱིས། །སེམས་ཅན་ཐམས་ཅད་སྡུག་བསྔལ་ཉིད་འགྱུར་ཏེ། ། སྡུག་བསྔལ་ཅན་གྱི་བདག་ཉིད་གཅིག་པུ་དེ། །ཀུན་ལ་ཁྱབ་པར་འགྲོ་བ་ཡིན་ཕྱིར་རོ། །ཞེས་སེམས་ཅན་གཅིག་གིས་གཉེན་དང་བྲལ་བ་ལ་སོགས་པའི་སྡུག་བསྔལ་དྲག་པོ་མྱོང་བའི་ཚེ། སེམས་ཅན་གཞན་ཐམས་ཅད་ཀྱིས་དེ་དང་འདྲ་བའི་སྡུག་བསྔལ་མྱོང་བར་འགྱུར་ཏེ། སྡུག་བསྔལ་ཅན་གྱི་བདག་གཅིག་པུ་ཡུལ་དུས་ཐམས་ཅད་དུ་གང་ཟག་ཐམས་ཅད་ལ་ཁྱབ་པར་ཀུན་ཏུ་འགྲོ་བའི་ཕྱིར་རོ། །ཅི་སྟེ་སེམས་ཅན་སོ་སོ་ལ་བདེ་བ་དང་སྡུག་བསྔལ་ཅན་གྱི་བདག་མི་འདྲ་བ་རེ་རེ་ཡོད་པ་ཡིན་ན་བདག་དེ་དུ་མར་འགྱུར་བས་གཅིག་པུ་རང་དབང་ཅན་ཐམས་ཅད་ལ་ཁྱབ་པར་འདོད་པ་དང་འགལ་བ་ཡིན་ནོ། །གལ་ཏེ་བདག་དེ་སད་པའི་གནས་སྐབས་ན་བྱ་བ་དང་བཅས་པ་ཡིན་ན་གཉིད་ལོག་པ་ན་བྱ་བ་དང་བྲལ་བའི་རྨོངས་པ་ཉིད་དུ་ཡང་ཅི་ལྟར་འགྲོ། རྣམ་པརདཔྱད་ན་བདག་འདི་ནི་ཀུན་ཏུ་འགྲོ་བ་དང་ཁྱབ་བདག་དང་གཙོ་བོ་དང་རྟག་པ་ཡང་མ་ཡིན་ལ། ཐམས་ཅད་ཀྱི་བྱེད་པ་པོ་ཡང་མ་ཡིན་པར་གྲུབ་པོ། །ཡང་དེའི་ཁྱབ་འཇུག་གི་འཇུག་པ་བཅུ་བཤད་མོད་འདིར་མང་དུ་དོགས་ནས་མ་བྲིས་པ་ཡིན་ལ། ཤེས་པར་འདོད་པ་དག་བསྟན་པ་སྤྱི་འགྲེལ་གྱི་རྣམ་བཤད་སོགས་ལས་ཤེས་པར་བྱའོ། །ཡང་དེའི་ཁུངས་སུ་འདུ་བ་གྲངས་ཅན་པ་སྟེ་སེར་སྐྱ་པ་ནི། སྤྱོད་པ་ལ་འཇུག་པར། གཙོ་བོ་རྟག་པ་འགྲོ་བ་ཡི། །རྒྱུ་ཡིན་པར་ནི་གྲངས་ཅན་འདོད། །སྙིང་སྟོབས་རྡུལ་དང་མུན་པ་ཞེས། །བྱ་བའི་ཡོན་ཏན་མཉམ་གནས་ནི། །གཙོ་བོ་ཞེས་བྱར་རབ་བརྗོད་དེ། །མི་མཉམ་འགྲོ་བ་ཡིན་པར་བརྗོད། །ཅེས་༼བསྟན་པ་སྤྱི་འགྲེལ་གྱི་རྣམ་བཤད༽སྙིང་སྟོབས་རྡུལ་མུན་གསུམ་མམ་ཆགས་སྡང་རྨོངས་གསུམ་མམ། བདེ་སྡུག་གཏི་མུག་གསུམ་ཆ་མཉམ་པའི་བེམ་པོ་རྟག་དངོས་གཅིག་པུ་བ་ནི། རང་བཞིན་རྒྱུའི་གཙོ་བོ་ཡིན་ལ། དེ་གསུམ་ཆ་མཉམ་པ་ལས་འགྲོ་བ་སྟེ་རྣམ་འགྱུར་འབྱུང་སྟེ་བློའམ་ཆེན་པོ་ཞེས་པའི་བེམ་པོ་ཤེལ་གྱི་མེ་ལོང་ངོས་གཉིས་པ་ལྟ་བུའི་ནང་ནས་བདག་ཤེས་རིག་གི་གཟུགས་བརྙན་འཆར་བ་ཕྱི་ནས་གཟུགས་སོགས་ཀྱི་གཟུགས་བརྙན་འཆར་བ་ཞིག རང་བཞིན་རྒྱུའི་གཙོ་བོ་ལས་ཐོག་མར་སྐྱེ་ལ། དེ་ནས་སྙིང་སྟོབས་ལས་གྱུར་བའི་ང་རྒྱལ། རྡུལ་ལས་གྱུར་བའི་ང་རྒྱལ། མུན་པ་ལས་གྱུར་བའི་ང་རྒྱལ་གསུམ་འབྱུང༌། ང་རྒྱལ་དང་པོ་གཉིས་ལས་མིག་སོགས་ནང་གི་དབང་བོ་ལྔ་དང༌། ཁ་ལག་རྐང་བ་གཤང་ལམ་གཅི་བའི་ལམ་སྟེ་ལས་ཀྱི་དབང་བོ་ལྔ་དང༌། གཉིས་ཀའི་དབང་པོ་ཡིད་དེ་དབང་བོ་བཅུ་གཅིག་དང༌། གཟུགས་སྒྲ་དྲི་རོ་རེག་བྱ་སྟེ་དེ་ཙམ་ལྔ་དང་བཅུ་དྲུག་འབྱུང་ལ། དེ་ཙམ་ལྔ་ལས་ས་ཆུ་མེ་རླུང་ནམ་མཁའ་སྟེ་འབྱུང་བ་ལྔ་སྐྱེ་བའོ། །དེ་ལས་རང་བཞིན་ནི་རྒྱུ་ཁོ་ན་བློ་ང་རྒྱལ་དེ་ཙམ་ལྔ་སྟེ་བདུན་ནི་རྒྱུ་འབྲས་གཉིས་ཀ་དབང་པོ་བཅུ་གཅིག་དང་འབྱུང་བ་ལྔ་ནི་འབྲས་བུ་ཁོ་ན། སྐྱེས་བུ་ནི་གཉིས་ཀ་མིན་པ་ཡིན་ཏེ། དབང་ཕྱུག་ནག་པོའི་གཞུང་ལས། རྩ་བའི་རང་བཞིན་ལ་ནི་འགྱུར་བ་མེད། །ཆེན་པོ་སོགས་བདུན་རྒྱུ་དང་འགྱུར་བ་ཡིན། །བཅུ་དྲུག་པོ་ནི་རྣམ་པར་འགྱུར་བ་སྟེ། །སྐྱེས་བུ་རང་བཞིན་མ་ཡིན་འགྱུར་བ་མིན། །ཞེས་གསུངས་པ་ལྟར་གྲངས་ཅན་པ་རྣམས་གཙོ་བོ་རྟག་པ་གཅིག་པུ་རང་དབང་ཅན་སྣང་བ་དང་ཤེས་པའི་སྤྱོད་ཡུལ་ལས་འདས་པ་བརྟན་གཡོ་ཐམས་ཅད་ཀྱི་རྒྱུ་ཡིན་པར་འདོད་ཅིང༌། དེའི་ངོ་བོ་ལ་སྙིང་སྟོབས་དང་རྡུལ་དང་མུན་པའི་མིང་ཅན་བདེ་སྡུག་བཏང་སྙོམས་གསུམ་ཆ་མཉམ་པ་ལ་ནི་རང་བཞིན་རྒྱུའི་གཙོ་བོ་དང༌། དེ་གསུམ་ཆ་མི་མཉམ་པ་ལས་གནས་སྐབས་རྣམ་འགྱུར་སྣ་ཚོགས་པའི་འགྲོ་བ་རྣམས་འབྱུང་བར་འདོད་དོ། །གྲངས་ཅན་པས་འདོད་པའི་བདག་ནི། བསྟན་པ་སྤྱི་འགྲེལ་གྱི་རྣམ་བཤད་ལས། མུ་སྟེགས་གྲངས་ཅན་པ་ནི། བདག་ཤེས་རིག་གི་སྐྱེས་བུ་ཞེས་ཤེས་པར་འདོད་ལ། དེ་ཡང་མཚན་ཉིད་ལྔ་ལྡན་ཏེ། ཟ་བོ་རྟག་དངོས་བྱེད་པོ་མིན་པའི་བདག །ཡོན་ཏན་བྱ་མེད་གྲངས་ཅན་རྣམས་ཀྱིས་བརྟགས། །དེ་དབྱེ་ཅུང་ཟད་ཅུང་ཟད་ལ་བརྟེན་ནས། །མུ་སྟེགས་ཅན་རྣམས་ལུགས་ནི་ཐ་དད་འགྱུར། །ཅེས་སོ། །ཤེས་བྱ་ཉེར་ལྔ་ལས་གཙོ་བོ་དང་བདག་ཤེས་རིག་གཉིས་དོན་དམ་བདེན་པ་དང༌། གཞན་ཉེར་གསུམ་བརྫུན་པར་འདོད་དེ། བསྟན་པ་སྤྱི་འགྲེལ་རྣམ་བཤད་ལས། ཡོན་ཏན་གསུམ་གྱི་རང་བཞིན་མཆོག །མཐོང་བའི་ཡུལ་དུ་གྱུར་མ་ཡིན། །མཐོང་བའི་ཡུལ་དུ་གང་གྱུར་པ། །སྒྱུ་མ་བཞིན་དུ་ཤིན་ཏུ་གསོག །ཅེས་གྲངས་ཅན་དེ་ལྟར་འདོད་པ་ཡིན་པར་ཚད་མ་ཀུན་བཏུས་སུ་བཤད་དེ། དེ་ལྟར་ན་རང་བཞིན་རྒྱུའི་གཙོ་བོ་དང་བདག་ཤེས་རིག་གཉིས་དོན་དམ་བདེན་པ། གཞན་ཉེར་གསུམ་ཀུན་རྫོབ་དུ་འདོད་པར་བཤད་དོ། ཞེས་གསུངས་སོ། །དེ་དག་དགག་པ་ནི། གཅིག་ལ་རང་བཞིན་གསུམ་ཉིད་ནི། །རིགས་མིན་དེས་ན་དེ་ཡོད་མིན། །ཡོན་ཏན་དེ་བཞིན་ཡོད་མིན་ཏེ། །དེ་ཡང་སོ་སོར་རྣམ་གསུམ་ཕྱིར། །ཡོན་ཏན་མེད་ན་སྒྲ་སོགས་ཀྱང༌། །ཡོད་ཉིད་ཤིན་ཏུ་རྒྱང་རིང་འགྱུར། །གཙོ་བོ་རྟག་པ་གཅིག་པུ་ཡིན་པའི་ལུགས་ལ་རྡུལ་མུན་སྙིང་སྟོབས་ཀྱི་རང་བཞིན་གསུམ་ཆ་མཉམ་པ་ཉིད་དུ་བདེན་པར་ཡོད་པ་ནི་རིགས་པ་མ་ཡིན་ཏེ། གཅིག་ཡིན་པ་དང་གསུམ་ཡིན་པ་ཤིན་ཏུ་འགལ་བའི་ཕྱིར་རོ། །དེ་བས་ན་གཙོ་བོ་དེ་བདེན་པར་ཡོད་པ་མ་ཡིན་པས་དེའི་འབྲས་བུ་རྣམས་ཀྱང་བདེན་པར་ཡོད་པ་མ་ཡིན་ནོ། །འོན་ཏེ་གཅིག་པ་དང་གསུམ་དུ་འགྱུར་བ་ནི་མི་འགལ་ཏེ། རྡུལ་ལ་སོགས་པ་རེ་རེའི་ངོ་བོར་གྱུར་པའི་བེམ་པོ་ཐམས་ཅད་ཀྱང་ཡོན་ཏན་གསུམ་གསུམ་གྱི་བདག་ཉིད་དུ་ཡོད་པའི་ཕྱིར་རོ་ཞེ་ན། གཙོ་བོ་བདེན་པར་མེད་པ་དེ་བཞིན་དུ་རྡུལ་མུན་སྙིང་སྟོབས་ཞེས་བྱ་བའི་ཡོན་ཏན་གསུམ་པོ་རྣམས་ཀྱང་རང་རང་ངོ་བོར་རེ་རེ་བདེན་པར་ཡོད་པ་མ་ཡིན་པར་འགྱུར་ཏེ། དེ་དག་རེ་རེ་ཡང་རྡུལ་གྱི་རྡུལ་དང་རྡུལ་གྱི་མུན་པ་དང་རྡུལ་གྱི་སྙིང་སྟོབས་ཞེས་པ་ལ་སོགས་པ་སོ་སོར་རྣམ་པ་གསུམ་གསུམ་གྱི་བདག་ཉིད་དུ་ཡོད་པའི་ཕྱིར། དེ་ལྟར་རྒྱུར་འདོད་པའི་ཡོན་ཏན་གསུམ་བདེན་པར་མེད་ན་འབྲས་བུར་འདོད་པའི་སྒྲ་སོགས་རྣམ་འགྱུར་རྣམས་ཀྱང་ཡོད་པ་ཉིད་དུ་རྒྱང་རིང་ཞིང་མེད་པར་འགྱུར་ཏེ། རྒྱུ་མེད་ན་འབྲས་བུ་མི་འབྱུང་བ་ནི་དངོས་པོའི་ཆོས་ཉིད་ཡིན་པའི་ཕྱིར་རོ། །དེ་ལྟ་བུའི་གྲངས་ཅན་པ་རྣམས་ནི་དབང་ཕྱུག་གི་གཞུང་ལ་དཔང་དུ་བྱེད་པས་དེའི་ཁོངས་སུ་འདུ་བ་ཡིན་ཏེ། བླང་དོར་རབ་གསལ་ལས། གྲངས་ཅན་པ་ནི་དབང་ཕྱུག་གྲུབ་མཐའ་ལ། །དཔང་དུ་བྱེད་པས་དེ་ཡི་བྱེ་བྲག་ཡིན། །ཞེས་གསུངས་པའི་ཕྱིར་རོ། ། གསུམ་པ་ཀླ་ཀློ་པ།གསུམ་པ་ཀླ་ཀློ་པ་ནི། བླང་དོར་རབ་གསལ་ལས། ཀླ་ཀློ་སྟག་གཟིག་པ་དག་བརྟན་གཡོ་ཡི། །བྱེད་པ་པོ་ནི་ར་ཧ་མ་ཎ་ཡིན། །ཕྱུགས་ཀྱི་མཆོད་སྦྱིན་བྱས་ན་དེ་མཉེས་ཏེ། །མཐོ་རིས་མཆོག་གི་བདེ་བ་སྟེར་བ་དང༌། །མ་མཉེས་ན་ནི་དམྱལ་བའི་སྡུག་བསྔལ་ལ། །སྦྱོར་ཞིང་མི་རྣམས་འདི་ནས་ཤི་འཕོས་ཀྱང༌། །ལུས་དེ་ཉིད་ཀྱིས་བདེ་དང་སྡུག་བསྔལ་དག །མྱོང་བར་འདོད་པ། ཞེས་ཀླ་ཀློ་སྟག་གཟིག་པ་རྣམས་ལ་ནི་སོག་པོ་ར་ཧྨ་ཎ་པ་ཞེས་ཀྱང་བྱ་ཞིང་དེ་དག་ནི་བརྟན་པ་སྣོད་ཀྱི་འཇིག་རྟེན་དང་གཡོ་བ་བཅུད་ཀྱི་འཇིག་རྟེན་ཐམས་ཅད་ཀྱི་བྱེད་པ་པོ་ལྷ་ར་ཧྨ་ཎ་ཡིན་པས་སྲོག་གི་མཆོད་སྦྱིན་གྱིས་དེ་མཉེས་པར་བྱས་ན་བདེ་བ་ལ་སྦྱོར་བ་དང༌། མ་མཉེས་ན་སྡུག་བསྔལ་ལ་སྦྱོར་བ་དང༌། ལུས་རྟག་པ་ཡིན་པས་མི་རྣམས་ཤི་འཕོས་ནས་ཀྱང་ལུས་འདི་ཉིད་ཀྱིས་མཐོ་རིས་ཀྱི་བདེ་བའམ་དམྱལ་བའི་སྡུག་བསྔལ་ལ་ལོངས་སྤྱོད་པར་འདོད་པའོ། །དེ་ནི་རིགས་པ་མ་ཡིན་ཏེ། བླང་དོར་རབ་གསལ་ལས། ཤིན་ཏུ་འཁྲུལ་པ་སྟེ། ཀུན་གྱི་བྱེད་པོར་འདོད་པའི་ལྷ་དེ་ལ། །བདེ་སྡུག་སྟེར་པའི་ནུས་པ་མེད་ཕྱིར་དང༌། །ལུས་འདིས་ཕྱི་མའི་བདེ་སྡུག་མྱོང་བ་ལ། །མངོན་སུམ་རིགས་པས་གནོད་པ་མཐོང་ཕྱིར་རོ། །ཞེས་དང༌། དཔལ་ཀྱཻའི་རྡོ་རྗེར་ཡང༌། རང་གི་རིག་པའི་འགྱུར་བ་འདི། །མནན་པ་ལས་ནི་ལས་སྐྱེ་སྟེ། །རང་གིས་བྱེད་ཅིང་རང་གི་འཕྲོག །རང་གིས་འཕྲོག་ཅིང་རང་གིས་བྱེད། །རང་རིག་རྒྱལ་བོ་རང་གཙོ་བོར། །ཞེས་གསུངས་པ་ལྟར་ལས་རྟག་པ་མ་ཡིན་ཞིང༌། རང་རང་གིས་བྱས་པའི་ལས་ཀྱི་འབྲས་བུ་རྣམ་པར་སྨིན་པ་ལ་རང་གིས་ལོངས་སྤྱོད་པ་ཡིན་གྱི་ལྷ་གཞན་ཚངས་པ་དང་དབང་ཕྱུག་དང་ར་ཧྨ་ཎ་ལ་སོགས་པ་རྣམས་ལ་བདེ་སྡུག་སྟེར་བའི་ནུས་པ་མེད་པའི་ཕྱིར་དང༌། ཁྱད་པར་ལུས་འདི་ཉིད་ཀྱིས་ཕྱི་མའི་བདེ་སྡུག་མྱོང་བར་འདོད་པ་ལ་ནི་མངོན་སུམ་གྱི་རིགས་པས་ཀྱང་གནོད་པའི་ཕྱིར་རོ།། །། བཞི་པ་ཟད་བྱེད་གཅེར་བུ་པ།བཞི་པ་ཟད་བྱེད་གཅེར་བུ་པས། བཅིང་གྲོལ་གྱི་རྟེན་བདག་གམ་སྲོག་གི་འདོད་ཚུལ་ནི། བསྡུས་རྒྱུད་ལས། སྲོག་ནི་དྲུག་གི་ལུས་ལ་ཆ་ཤས་སོ། །ཞེས་དང༌། གྲུབ་མཐའི་རྣམ་བཞག་དོན་གསལ་ལས། གེལ་བའི་ཤིང་གི་ལུས་ཚད་ནི། །སྲོག་ཀྱང་རྟག་པ་དེ་ཙམ་འདོད། །ཅེས་དང༌། བླང་དོར་རབ་གསལ་ལས། ཟད་བྱེད་གཅེར་བུ་པ་དག་སྲོག་རྟག་པ། །ལུས་ཀྱི་ཚད་དང་མཉམ་པར་འདོད་མོད་ཀྱི། །ཞེས་ཟད་བྱེད་པ་ལ་གཅེར་བུ་པ་དང་རྒྱལ་བ་པ་དང་མཆོད་འོས་པ་དང་ནམ་མཁའི་གོས་ཅན་པ་ཞེས་ཀྱང་བྱ་ཞིང༌། དེ་དག་སྲོག་ཅན་གྱི་སྡེ་དྲུག་ལ་སྲོག་རྟག་པ་ལུས་ཀྱི་ཚད་དང་མཉམ་པར་འདོད་པའོ། །དེས་ན་བསྟན་པ་སྤྱི་འགྲེལ་གྱི་རྣམ་བཤད་ལས། མུ་སྟེགས་གཅེར་བུ་པ་ཡང་གང་ཟག་གི་བདག་བེམ་པོར་འདོད་དེ། ཁྱད་པར་དུ་འཕགས་པའི་བསྟོད་པ་ལས། གཅེར་བུ་ལུས་ཀྱི་ཚད་བཞིན་དུ། །སྲོག་ནི་ཞུམ་དང་རྒྱས་པར་སྨྲ། །ཞེས་གསུངས་སོ། །དེས་ན་ཉ་ཊཱིཀ་ཡིད་ཀྱི་མུན་སེལ་ལས། ལུས་དེ་ཉིད་སྲོག་དེའོ། །སྲོག་ཀྱང་གཞན་ལ་ལུས་ཀྱང་གཞན་ནོ། །ཞེས་པ་སྟེ་དང་པོ་གཅེར་བུ་པ་སྟེ། ཞེས་པ་ནས། གཉིས་པ་གྲངས་ཅན་ཏེ་བདག་ཤེས་པ་དང་ལུས་སྲོག་ཐམས་ཅད་བེམ་པོར་འདོད་པས་སོ། །ཞེས་གསུངས་སོ། །གཅེར་བུ་པའི་འདོད་པ་དེ་དག་མི་འཐད་དེ། གྲུབ་མཐའི་རྣམ་བཞག་དོན་གསལ་ལས། དུམ་བུར་བྱས་ན་སྲོག་ནི་ཡང༌། །དེ་ནི་མང་དུ་འགྲོའམ་ཅི། །ཞེས་དང༌། བླང་དོར་རབ་གསལ་ལས། དེ་ལྟར་ན་ནི་ལག་པ་ལ་སོགས་པའི། །ཡན་ལག་བཅད་ན་སྲོག་ཀྱང་ཉམས་པར་འགྱུར། ། ལུས་ནི་ཕྲ་སྦོམ་ལ་སོགས་གྱུར་པ་ན། །སྲོག་ཀྱང་དེ་ལྟར་འགྱུར་ན་རྟག་པར་འགལ། །ཞེས་ཁྱོད་ལྟར་ན་ལག་པ་དང་རྐང་པ་ལ་སོགས་པ་ལུས་ཀྱི་ཡན་ལག་བཅད་ན་སྲོག་གི་ཆ་ཤས་ཀྱང་ཉམས་ཤིང་མི་རྟག་པར་འགྱུར་བ་དང༌། ཡང་ལུས་ཕྲ་སྦོམ་དུ་འགྱུར་བ་ན་དེ་དང་མཉམ་པའི་སྲོག་ཀྱང་ཕྲ་སྦོམ་དུ་འགྱུར་དགོས་པ་ལ། དེ་ལྟར་ན་རྟག་པར་འདོད་པ་དང་འགལ་བའི་ཕྱིར་རོ། །ཅི་སྟེ་རང་བཞིན་རྟག་ལ་རྣམ་འགྱུར་མི་རྟག་པས་འགལ་བ་མེད་དོ་ཞེ་ན། རང་བཞིན་དང་རྣམ་འགྱུར་ངོ་བོ་གཅིག་ཡིན་ན་རྟག་མི་རྟག་གཉིས་ཀ་གཞི་གཅིག་ལ་འདུ་བ་འགལ་ཞིང༌། ཐ་དད་ཡིན་ན་རང་བཞིན་མེད་པའི་རྣམ་འགྱུར་ཡང་ཡོད་པར་ཐལ་བ་ལས། དེ་ལྟར་ཡང་མ་ཡིན་ནོ། །ཡང་བླང་དོར་རབ་གསལ་ལས། གཞན་ཡང་བུར་ཤིང་འབྲུ་ལ་སོགས་པ་རྣམས། །རྐང་པས་ཆུ་འཐུངས་ནས་ནི་མེ་ཏོག་དང༌། །འབྲས་བུ་ལ་སོགས་བསྐྱེད་པར་བྱེད་པའི་ཕྱིར། །སྲོག་དང་བཅས་པར་འདོད་པ། ཞེས་གསུངས་པ་ལྟར་འདོད་དོ། །དེ་དགག་པ་ནི། བླང་དོར་རབ་གསལ་ལས། མི་འཐད་དེ། །བུར་ཤིང་དུམ་བུ་དུ་མར་བྱས་པ་ན། །སྲོག་ཀྱང་དུ་མ་ཉིད་དུ་མི་འགྱུར་རམ། །ཞེསུ་བུར་ཤིང་གི་དབྱུག་པ་གཅིག་དུམ་བུ་དུ་མར་བྱས་པ་ན་སྲོག་ཀྱང་དུ་མ་ཉིད་དུ་ཐལ་བར་འགྱུར་རོ། །དེ་ལྟར་ན་སྲོག་རྟག་པ་གཅིག་པུར་འདོད་པ་དང་འགལ་བར་འགྱུར་རོ། །ཡང་བླང་དོར་རབ་གསལ་ལས། ཅི་སྟེ་དུམ་བུ་གཅིག་ལ་སྲོག་བསྐུམས་ནས། །གཞན་རྣམས་སྲོག་དང་ལྡན་པ་མ་ཡིན་ན། །ཞེས་བུར་ཤིང་གི་དབྱུག་པ་རིང་པོ་ལ་ཡོད་པའི་སྲོག་དེ་ཐུང་ངུར་བསྐུམས་ནས་དུམ་བུ་གཅིག་སྲོག་དང་ལྡན་པ་ཡིན་གྱི་གཞན་རྣམས་ལ་སྲོག་མེད་པས་དུ་མར་མི་འགྱུར་རོ་ཞེ་ན། དེ་ལན་དུ་བླང་དོར་རབ་གསལ་ལས། དེ་དག་ས་ལ་བཙུགས་ན་སོ་སོ་ལ། །མྱུ་གུ་ལ་སོགས་སྐྱེ་བར་མཐོང་བའི་ཕྱིར། །དུམ་བུ་གཞན་རྣམས་སྲོག་དང་མི་ལྡན་པར། །འདོད་པའི་དམ་བཅའ་དང་ཡང་འགལ་བར་འགྱུར། །ཞེས་སྲོག་དང་མི་ལྡན་པར་འདོད་པའི་དུམ་བུ་དེ་དག་ལ་ཡང་སྲོག་ཡོད་པར་འགྱུར་ཏེ། དེ་དག་ས་ལ་བཙུགས་པ་ན་ཡང་རྐང་པས་ཆུ་འཐུངས་ནས་མྱུ་གུ་ལ་སོགས་པ་སྐྱེ་བར་མཐོང་བའི་ཕྱིར་རོ། །དེ་བས་ན་ནགས་ཀྱི་ལྗོན་ཤིང་ལ་སོགས་པས་འབྲས་བུ་བསྐྱེད་པ་ནི་སྲོག་ཡོད་པའི་རྒྱུ་མཚན་གྱིས་མ་ཡིན་གྱི། རྒྱུ་རྐྱེན་རྟེན་འབྲེལ་འཚོགས་པ་དངོས་པོའི་རང་བཞིན་ཡིན་ནོ། །འཁོར་བ་ལས་གྲོལ་བའི་ཐར་བ་འདོད་ཚུལ་ནི། གྲུབ་མཐའི་རྣམ་བཞག་དོན་གསལ་ལས། སྲིད་གསུམ་རྟག་པའི་སྟེང་ནས་ཀྱང༌། །ཐར་བ་གཟུགས་ཅན་ཡོད་པར་འདོད། །ཅེས་དང༌། བླང་དོར་རབ་གསལ་ལས། སྲིད་གསུམ་རྟག་པའི་སྟེང་ན་ཐར་པའི་ཚད། །དཔག་ཚད་འབུམ་ཕྲག་བཞི་བཅུ་རྩ་ལྔ་པ། །གདུགས་ཀྱི་རྣམ་པ་རྟག་པར་འདོད། ཅེས་འཇིག་རྟེན་གསུམ་པོ་འདི་ནི་ཐོག་མ་དང་ཐ་མ་མེད་ཅིང་སྐྱེ་བ་དང་འཇིག་པ་དང་བྲལ་བ་རྡོ་རྗེའི་རང་བཞིན་རྟག་པ་ཡིན་ལ། དེའི་སྟེང་ན། ཁ་བ་རྒྱ་སྤོས་མེ་ཏོག་དང༌། །བ་ཞོ་བ་མོ་མུ་ཏིག་མདོག །གདུགས་བཀན་བཟུང་བའི་དབྱིབས་འདྲ་བ། །ཐར་པ་ཡིན་པར་རྒྱལ་བས་བཤད། །ཅེས་པ་ལྟར་འཁོར་བ་ལས་གྲོལ་བ་བདེ་བའི་གནས་རྟག་པ་ཡོད་པར་འདོད་པའོ། །དེ་དགག་པ་ནི། གྲུབ་མཐའི་རྣམ་བཞག་དོན་གསལ་ལས། གཟུགས་ཅན་ཡིན་ན་ཕྲ་རབ་རྡུལ། །ཉིད་ལས་གྲུབ་ཕྱིར་རྟག་པ་འགལ། །ཞེས་དང༌། བླང་དོར་རབ་གསལ་ལས། རིགས་པ་མིན་ཏེ་གཟུགས་ཅན་གང་ཡིན་པ། །ཕྲ་རབ་རྡུལ་བསགས་པ་ལས་འབྱུང་བའི་ཕྱིར། །དེ་ཉིད་མི་རྟག་པར་ཡང་ཐལ་པར་འགྱུར། །ཞེས་དེ་ལྟར་འདོད་པ་མི་རིགས་ཏེ། འཇིག་རྟེན་གསུམ་པོ་འདི་ནི་རྡུལ་ཕྲ་རབ་རྣམས་ཀྱིས་བསྐྱེད་པ་ཡིན་གྱི་རྡུལ་ཕྲ་རབ་མེད་པར་ནི་འབྱུང་བ་མ་ཡིན་ལ་དེ་བཞིན་དུ་ཐར་པའང་གཟུགས་ཅན་ཡིན་ན་རྡུལ་ཕྲ་རབ་ཀྱིས་སྐྱེད་དགོས་ལ། གང་རྡུལ་ཕྲ་རབ་ཀྱིས་བསྐྱེད་པ་དེ་ཐམས་ཅད་ནི་མི་རྟག་ཅིང་དུས་ཀྱི་དབང་གིས་འཇིག་པར་འགྱུར་བས་ཐར་པ་གཟུགས་ཅན་རྟག་པ་དང་སྲིད་གསུམ་རྟག་པར་འདོད་པ་ནི་ཤིན་ཏུ་འཁྲུལ་པའོ། །འཁོར་བ་ལས་གྲོལ་བའི་ཐབས་ཀྱི་འདོད་ཚུལ་ནི། གྲུབ་མཐའི་རྣམ་བཞག་དོན་གསལ་ལས། གངྒཱའི་ཆུ་ནི་འཐུངས་བ་དང༌། །མེ་ལྔ་བསྟེན་ཚད་སྡིག་སྒྲིབ་རྣམས། །དག་པར་འདོད་པའི། ཞེས་གསུངས་པ་ལྟར་འཁོར་བའི་ལས་དཀར་ནག་གཉིས་ཀ་ཟད་བྱེད་ཀྱི་ཐབས་ནི་མེ་ལྔ་བསྟེན་པའི་དཀའ་ཐུབ་དང༌། གངྒཱའི་ཆུ་འཐུང་ཞིང་ཁྲུས་བྱེད་པ་སོགས་ཡིན་པར་རིགས་པས་ན། གངྒཱའི་ཆུ་ནི་འཐུངས་བ་དང་མེ་ལྔ་བསྟེན་ཚད་ཀྱི་འགྲོ་བ་རྣམས་ཀྱི་སྡིག་སྒྲིབ་རྩ་བ་ནས་དག་སྟེ་འཁོར་བའི་ལུས་ཟད་ནས་ཐར་བའི་ལུས་ཅན་གྱི་ངོ་བོར་རོ་གཅིག་པར་འདོད་པ་ཡིན་ནོ། །དེ་དགག་པ་ནི། གྲུབ་མཐའི་རྣམ་བཞག་དོན་གསལ་ལས། མེ་དང་ཆུ་ནི་མི་འཐུང་མེད། །ཅེས་གཅེར་བུ་པ་ཁྱོད་ཀྱི་གྲོལ་བའི་ཐབས་དེ་མི་རིགས་ཏེ། ལུས་ཅན་ཀུན་ཐོག་མེད་ནས་གྲོལ་ཟིན་པར་ཐལ་བའི་ཕྱིར་ཏེ། ཐོག་མེད་ནས་མེས་གདུང་མ་མྱོང་བ་དང་ཆུ་འཐུང་ཞིང་ཆུར་ཞུགས་མ་མྱོང་བ་མེད་པའི་ཕྱིར་རོ། ། ལྔ་བ་རྒྱང་འཕེན་པ།ལྔ་བ་རྒྱང་འཕེན་པ་ནི། བླང་དོར་རབ་གསལ་ལས། རྒྱང་འཕེན་པ་དག་བུར་སོགས་སྦྱར་བ་ཡི། །ནུས་པ་ལས་ནི་ཆང་སོགས་འབྱུང་བ་ལྟར། །གློ་བུར་ས་སོགས་འབྱུང་བའི་ནུས་པ་ལས། །སེམས་དང་བཅས་པའི་དབང་པོ་འབྱུང་བ་དང༌། །ཤི་ནས་སེམས་ཀྱིས་འཇིག་རྟེན་ཕ་རོལ་ཏུ། །འགྲོ་བ་མེད་པས་སྐྱེ་བ་སྔ་ཕྱི་མེད། །དེ་ཕྱིར་ཚེ་འདིར་ཇི་ལྟར་བདེ་བ་ཡི། །ཐབས་ཀྱིས་ཆོག་པར་འདོད་མོད་དེ་ལྟ་ནའང༌། །ཞེས་རྒྱང་འཕེན་པ་ལ་ནི་ཕུར་བུ་པ་དང༌། ཆད་པ་པ་དང༌། ཚུར་རོལ་མཛེས་པར་སྨྲ་བ་ཞེས་ཀྱང་བྱ་ཞིང་དེ་དག་ནི་ཨ་རུ་ར་དང་བུ་རམ་ལ་སོགས་པ་ཡང་དག་པ་སྦྱར་བའི་ནུས་པ་ལས་ཆང་འབྱུང་བ་བཞིན་དུ་སྐྱེ་བ་སྔ་མ་ནས་འོང་པ་མེད་ཀྱང་གློ་བུར་དུ་ས་ལ་སོགས་པ་ཡང་དག་པར་སྦྱར་བའི་ནུས་པ་ལས་སེམས་ཅན་རྣམས་ཀྱི་དབང་པོ་དང་བཅས་པའི་སེམས་འབྱུང་ལ། འདི་ནས་ཤི་བ་ན་སེམས་ཀྱིས་འཇིག་རྟེན་ཕ་རོལ་གྱི་ལུས་ལེན་པ་མེད་པས་ཚེ་འདིར་ཇི་ལྟར་བདེ་བའི་ཐབས་བྱས་པས་ཆོག་པར་འདོད་པ་ཡིན་ཏེ།ཇི་སྐད་དུ། ཉི་ཤར་ཆུ་བོ་ཐུར་དུ་བབ་པ་དང༌། །སྲན་ཟླུམ་ཚེར་མ་གཟེངས་རིང་རྣོ་བ་དང༌། །རྨ་བྱའི་མདོངས་ལ་སོགས་པའི་ཆོས་རྣམས་ཀུན། །སུས་ཀྱང་མ་བྱས་ངོ་བོ་ཉིད་ལས་བྱུང༌། །ཞེས་ཟེར་རོ། དེ་དགག་པ་ནི། བླང་དོར་རབ་གསལ་ལས། ས་སོགས་གཅིག་ཏུ་འདུས་པའི་ཤིང་རྣམས་ལའང༌། །འབྱུང་བའི་ནུས་པས་སེམས་ཀྱང་ཡོད་པར་འགྱུར། །ཅི་སྟེ་མེད་ན་འབྱུང་བའི་ནུས་པ་ལས། །སེམས་སྐྱེ་པ་ཡི་ནུས་པའང་མེད་པར་མཚུངས། །དེས་ན་ཚུར་རོལ་མཛེས་པར་སྨྲ་བ་ཡི། །ཚིག་འདི་དག་ནི་མངོན་པར་བརྫུན་པ་སྟེ། །མཐོ་རིས་ཐར་པའི་བདེ་བ་འདོད་རྣམས་ཀྱིས། །དེ་འདྲའི་གྲུབ་མཐའ་ངན་པ་སྤང་པར་བྱ། །ཞེས་ས་ལ་སོགས་པ་གཅིག་ཏུ་འདུས་པའི་ཤིང་རྣམས་ལ་ཡང་འབྱུང་བ་རྣམས་ཡང་དག་པར་སྦྱར་བའི་ནུས་པ་ལས་དབང་པོ་དང་བཅས་པའི་སེམས་ཡོད་པར་ཧ་ཅང་ཐལ་པར་འགྱུར་ཏེ་རིགས་པ་མཚུངས་པའི་ཕྱིར་རོ། །ཅི་སྟེ་ཤིང་ལ་སོགས་པ་བརྟན་པའི་དངོས་པོ་འདི་རྣམས་ཀྱི་རྒྱུ་འབྱུང་བ་རྣམས་ལ་སེམས་སྐྱེ་བའི་ནུས་པ་མེད་ན། འབྱུང་བ་རྣམས་ཡང་དག་པར་སྦྱར་བ་ལས་སེམས་ཅན་རྣམས་ཀྱི་དབང་པོ་དང་བཅས་པའི་སེམས་སྐྱེ་བའང་མེད་པར་མཚུངས་པས། ཚུར་རོལ་མཛེས་པར་སྨྲ་བའི་ཚིག་འདི་དག་ནི་རྫུན་པ་སྟེ་མཐོ་རིས་དང་ཐར་བའི་བདེ་བ་འདོད་པ་རྣམས་ཀྱིས་སྤང་བར་བྱའོ། །གཞན་སྡེ་དེ་དག་གིས་ཚད་མའི་གྲངས་འདོད་ཚུལ་ནི། འདི་ལྟ་སྟེ། མཚལ་མིན་པ་བསོད་ནམས་བཟང་པོའི་རྣམ་འགྲེལ་འགྲེལ་བཤད་རིན་ཆེན་འཕྲེང་བ་ལས། གྲངས་ཅན་པ་ནི་མངོན་སུམ་རྗེས་དཔག་སྒྲ་བྱུང་དང་གསུམ་ཁོ་ནའོ་ཞེས་ཟེར། རིགས་པ་ཅན་ནི་དེ་གསུམ་དང་དཔེའི་ཉེར་འཇལ་དང་བཞི་ཁོ་ནའོ་ཟེར་རོ། །རྒྱལ་དཔོག་པ་ནི་དེ་བཞི་དང་དོན་གྱིས་གོ་བ་དང༌། དངོས་པོ་མེད་པའི་ཚད་མ་དྲུག་ཁོ་ནའོ་ཟེར། ཙ་ར་ཀ་པ་ནི་རིགས་པ་དང་མི་དམིགས་པ་དང་སྲིད་པ་དང་ཞེས་གྲགས་པ་དང་སྙམ་སེམས་པ་ཞེས་པ་གཞན་དག་ཀྱང་ཡོད་དོ་ཅེས་ཟེར་རོ་ཅེས་དང༌། རྒྱང་འཕེན་པ་ནི་མངོན་སུམ་ཁོ་ན་ཚད་མ་ཡིན་གྱི་རྗེས་དཔག་ཚད་མ་མེད་དེ། རྟགས་ཐམས་ཅད་འཁྲུལ་བའི་ཕྱིར་རོ། །ཞེས་གསུངས་སོ། །གཞན་ཡང་དེ་དགག་པ་ནི། བསྟན་པ་སྤྱི་འགྲེལ་གྱི་རྣམ་བཤད་ལས། འཁོར་ལོ་དང་པོའི་ཉན་ཐོས་སྡེ་བ་དག ལས་དགེ་བ་ལས་འབྲས་བུ་བདེ་བ་ལས་མི་དགེ་བ་ལས་འབྲས་བུ་སྡུག་བསྔལ་འབྱུང་འབྲས་ས་ལའི་ས་བོན་ལས་དེའི་མྱུ་གུ་འབྱུང་ལ། ཀོ་ཊྲ་བའི་ས་བོན་ལས་ཀོ་ཊྲ་བའི་མྱུ་གུ་འབྱུང་བ་བཞིན། དེའི་ཕྱིར་ལས་ཡོད་ཅྀང་ལས་ཀྱིས་རྣམ་པར་སྨིན་པའང་ཡོད་པས་འཁོར་བར་འཁོར་བའང་ཡོད་ཅིང་འཁོར་བ་ལས་ཐར་བ་ཡོད་དོ། །ཞེས་སྟོན་པའི་གསུང་བཞིན་ཁས་བླངས་ནས་རྒྱང་འཕེན་ལ་སོགས་ལས་དང་ལས་ཀྱི་རྣམ་སྨིན་མེད་པའི་ཕྱིར་འཁོར་ཐར་མེད་དོ། །ཞེས་ཆད་པར་སྨྲ་བ་བཀག་གོ །ཞེས་གསུངས་སོ། །ཕྱི་མ་རྒྱང་འཕེན་པ་ཆད་མཐའ་སྨྲ་བ་དང་སྔ་མ་རྣམས་རྟག་མཐའ་སྨྲ་བ་ཡིན་ནོ། །ཡང་བླང་དོར་རབ་གསལ་ལས། ཕྱི་རོལ་པ་རྣམས་བདེ་བར་འདོད་ན་ཡང༌། །དེ་ཡི་ཐབས་ལ་རྨོངས་པས་དོན་མེད་པའི། །དཀའ་སྤྱད་སྡུག་བསྔལ་བརྟུལ་ཞུགས་སྣ་ཚོགས་ཀྱིས། ། རང་གཞན་བསླུ་བར་བྱེད་པ་ཤིན་ཏུ་འཁྲུལ། །ཞེས་དང༌། སྤྱོད་པ་ལ་འཇུག་པར། སྡུག་བསྔལ་འདོར་འདོད་སེམས་ཡོད་ཀྱང༌། །སྡུག་བསྔལ་ཉིད་ལ་མངོན་པར་རྒྱུག །བདེ་བ་འདོད་ཀྱང་གཏི་མུག་པས། །རང་གི་བདེ་བ་དགྲ་ལྟར་འཇོམས། །ཞེས་གསུངས་པ་ལྟར།ཕྱི་རོལ་པ་རྣམས་ཀྱང་བདེ་བ་དང་ལྡན་ཞིང་སྡུག་བསྔལ་དང་བྲལ་བར་འདོད་ནའང༌།དེ་དག་གི་ཐབས་ལ་རྨོངས་པས་མེ་ལྔ་བསྟེན་པ་དང༌། རྩེ་གསུམ་ལ་མཆོང་བ་དང༌། གཅེར་བུའི་བརྟུལ་ཞུགས་དང་ཕྱུགས་ཀྱི་མཆོད་སྦྱིན་ལ་སོགས་པ་ལ་འཇུག་པ་ནི་ཐབས་སྣ་ཚོགས་ཀྱིས་དགག་པར་བྱའོ། །ལྟ་བ་ངན་པ་དེ་དག་གིས་མཚོན་ནས་ལྟ་ངན་བཅུ་བཞི་དང་འཇིག་ཚོགས་ལ་ལྟ་བ་ཉི་ཤུ་དང་ལྟ་ངན་དྲུག་ཅུ་རྩ་གཉིས་སོགས་རྟག་ཆད་ཀྱི་ལྟ་བ་ངན་པ་ཐམས་ཅད་སྤང་བར་བྱ་དགོས་ཏེ། གྲུབ་མཐའི་རྣམ་བཞག་དོན་གསལ་ལས། དེ་སོགས་ལྟ་ངན་བཅུ་བཞི་དང༌། །འཇིག་ཚོགས་ལྟ་བ་ཉི་ཤུ་དང༌། །ལྟ་ངན་དྲུག་ཅུ་རྩ་གཉིས་ཀུན། །མི་དབང་ཁྱོད་ཀྱིས་སྤོངས་འཚལ་ལོ། །ཞེས་གསུངས་སོ། །ནང་བ་སངས་རྒྱས་པ་ལ་ཐར་ལམ་དང་ལྡན་ལ། གཞན་སྡེ་ལ་གང་ཟག་གི་བདག་མེད་སྒོམ་པ་མེད་པས་ཐར་ལམ་མེད་ཀྱང་མངོན་མཐོའི་ལམ་རྣམ་དག་ཡོད་མེད་གཉིས་ཡོད་དེ། གཞན་སྟོང་སྙིང་པོ་ལས། གཞན་སྡེ་མུ་སྟེགས་བྱེད་ཀྱི་ལྟ་གྲུབ་ནི་ཐར་བའི་ལམ་དང་བྲལ་བ་ཡིན་ལ། རང་སྡེ་སངས་རྒྱས་པའི་ལྟ་གྲུབ་ནི་ཐར་བའི་ལམ་དང་འབྲེལ་བ་ཡིན་ནོ། །མུ་སྟེགས་པ་ལ་ཐར་ལམ་མེད་ཀྱང༌། མཐོ་རིས་ཀྱི་མངོན་པར་མཐོ་བའི་ཆོས་ནི་ཡོད་མེད་གཉིས་ཏེ། རྒྱང་འཕེན་པ་སོགས་མེད་པར་ལྟ་བ་ཅན་ལས་འབྲས་ལ་སྐུར་བ་འདེབས་པ་སོགས་དང༌། འཚེ་བ་ཆོས་ཀྱི་གཙོ་བོར་སྨྲ་བ་རྣམས་ལ་མཐོ་རིས་ཀྱི་ལམ་རྣམ་དག་མེད་ཅིང༌། གྲངས་ཅན་པ་དང་གཅེར་བུ་པ་དང༌། ལྷའི་མཆོག་གི་རྗེས་འབྲང་འགའ་ཞིག་དང༌། མུ་སྟེགས་བསམ་གཏན་པ་རྣམས་ལ་ནི་མཐོ་རིས་ཀྱི་ལམ་ནི་ཡོད་དེ། སྡིག་པ་སྤངས་ཞིང་དགེ་བ་བསྒྲུབས་པས་མི་དང་འདོད་ཁམས་པའི་ལྷར་སྐྱེ་ཞིང༌། བསམ་གཏན་བཞི་བསྒོམས་པས་གཟུགས་ཁམས་སུ་སྐྱེ་བ་དང༌། གཟུགས་མེད་ཀྱི་ཏིང་ངེ་འཛིན་བཞི་བསྒོམས་པས་གཟུགས་མེད་ཁམས་སུ་སྐྱེ་བས་སོ། །མུ་སྟེགས་རྣམས་ལ་ཐར་ལམ་མེད་པའི་རྒྱུ་མཚན་ནི། གང་ཟག་གི་བདག་འཛིན་ཅེས་བྱ་བ། ང་བདག་ཏུ་འཛིན་པའི་བློ་འདི་སྤོང་བར་མི་བྱེད་པའི་རྒྱུ་མཚན་གྱིས་ཡིན་ཏེ། འཁོར་བ་ཐོག་མ་མེད་པ་ནས་བརྒྱུད་དེ་འོངས་པའི་ང་བདག་ཏུ་འཛིན་པའི་བློ་བརྟན་པོ་ཡོད་པའི་སྟེང་དུ། གྲུབ་མཐས་ཀྱང་ང་བདག་དེ་ཉིད་ཁྱད་པར་མང་བོ་དང་བཅས་ཏེ་ཡོད་པར་སྒྲུབ་ཅིང༌། དེའི་དོན་སྒོམ་པ་དང༌། བདག་འཛིན་དེ་ལ་གཉེན་པོ་གཞན་ཡང་མེད་པའི་ཕྱིར་བདག་འཛིན་སྤངས་མི་ནུས་ཤིང༌། བདག་འཛིན་དེ་ནི་ཉོན་མོངས་གཞན་ཐམས་ཅད་ཀྱི་ཡང་རྒྱུ་ཡིན་པའི་ཕྱིར་རོ། །འོན་ཀྱང་མུ་སྟེགས་བཟང་བ་དེ་རྣམས་ལ་སྐྱེ་རྒ་ན་འཆི་སོགས་མི་རྟག་པ་རགས་པ་སྒོམ་པ་དང༌། ཚེ་འདི་དང་འདོད་ཁམས་སྡུག་བསྔལ་དུ་ཤེས་པ་དང༌། གཟུགས་སོགས་དངོས་པོ་རགས་པ་རྣམས་བདེན་མེད་དུ་འདོད་པ་དང༌། འདོད་པ་ཆུང་ཞིང་ཆོག་ཤེས་པ་དང༌། བྱམས་སྙིང་རྗེ་དང༌། དགྲ་གཉེན་མཉམ་པ་ཉིད་དུ་སྒོམ་པའི་བཏང་སྙོམས་སོགས་དང༌། རྩ་བ་བཞི་སྤོང་བ་སོགས་ལྟ་སྒོམ་སྤྱོད་པ་ལེགས་པོ་ཡོད་པས་མཐོ་རིས་ཀྱི་ལམ་ནི་ཡོད་དོ། །ཞེས་གསུངས་པའི་ཕྱིར་རོ། །ཕྱི་བ་དེ་དག་ལ་ལེགས་པའི་ཆ་ཡོད་པ་དག་སུན་དབྱུང་བར་མི་བྱ་སྟེ། ཇི་སྐད་དུ་སྤྱན་རས་གཟིགས་ཀྱི་འགྲེལ་ཆེན་དྲི་མ་མེད་པའི་འོད་ལས། གང་ཞིག་ཀུན་རྫོབ་པའམ་དོན་དམ་པ་སངས་རྒྱས་ཀྱི་གསུང་དང་མཚུངས་པ་དེ་དག་ནི་སུན་དབྱུང་བར་མི་བྱའོ། ། ཞེས་དང༌། བླང་དོར་རབ་གསལ་ལས། དེ་དག་ལ་ཡང་འཚེ་བ་མེད་པ་དང༌། ། བདེན་པར་སྨྲ་དང་ཚངས་པར་སྤྱོད་ལ་སོགས། །སངས་རྒྱས་གསུང་དང་མཐུན་པའི་ཆ་སྣང་ན། །མཁས་པས་སུན་དབྱུང་བར་ཡང་མི་བྱའོ། །ཞེས་གསུངས་པ་ལྟར། བདེན་པ་གཉིས་ཀྱི་ཆ་ལ་སངས་རྒྱས་ཀྱི་གསུང་དང་མཐུན་པ་ལ་སོགས་པའི་ཡོན་ཏན་གྱི་ཁྱད་པར་སྣང་བ་རྣམས་ནི་དགག་པར་མི་བྱའོ། །ཕྱི་བའི་གྲུབ་མཐའི་རྣམ་བཞག་རེ་ཞིག་མདོར་བསྡུས་པ་ཙམ་ལས་མ་སྤྲོས་སོ། །རྒྱས་པར་དཔལ་དུས་ཀྱི་འཁོར་ལོའི་རྒྱུད་འགྲེལ་དང་ཚད་མ་སྡེ་བདུན་མདོ་དང་བཅས་པ་དང་ལེགས་ལྡན་འབྱེད་ཀྱི་རྟོག་གེ་འབར་བ་སོགས་དང་དབུ་མ་རྒྱན་རྩ་འགྲེལ་སོགས་ལས་ཤེས་པར་བྱའོ། ། སྨྲས་པ། རྟག་ཆད་མཐའ་ལྟའི་མུ་སྟེགས་གྲུབ་མཐའ་ཀུན། །མ་འདྲེས་མ་ནོར་ཟ་འོག་རི་མོ་བཞིན། །རབ་གསལ་རིན་ཕྲེང་སྐལ་བཟང་མགུལ་རྒྱན་དུ། །སྨྲ་བའི་བློ་གྲོས་འདབ་བརྒྱའི་རྣམ་དཔྱོད་བཞད། །ཅེས་གྲུབ་མཐའི་རྣམ་བཞག་ལུང་རིགས་གཏེར་མཛོད་ལེགས་བཤད་འདོད་འཇོ་ཞེས་བྱ་བ་ལས་ཕྱི་རོལ་བའི་གྲུབ་མཐའི་སྐབས་ཀྱི་ངལ་གསོ་བའི་ཚིགས་སུ་བཅད་པའོ།། །། གཉིས་པ་ནང་བ་སངས་རྒྱས་པའི་གྲུབ་མཐའ་བཤད་པ།གཉིས་པ་ནང་བ་སངས་རྒྱས་པའི་གྲུབ་མཐའ་བཤད་པ་ལ། སྤྱིར་བསྟན་པ་དང༌། བྱེ་བྲག་བཤད་པ་དང་གཉིས། དང་པོ་ཕྱིར་བསྟན་པ། དང་པོ་ནི། ལྟ་བ་བཀར་བཏགས་ཀྱི་ཕྱག་རྒྱ་བཞི་ཁས་ལེན་པའི་ནང་བ་སངས་རྒྱས་པ་དེ། ནང་བའི་གྲུབ་མཐའ་སྨྲ་བའི་མཚན་ཉིད། ལྟ་བ་བཀར་བཏགས་ཀྱི་ཕྱག་རྒྱ་བཞི་ནི། འདུས་བྱས་ཐམས་ཅད་མི་རྟག་པ། ཟག་བཅས་ཐམས་ཅད་སྡུག་བསྔལ་བ། ཆོས་ཐམས་ཅད་རྟག་གཅིག་རང་དབང་བའི་བདག་མེད་པ། མྱ་ངན་ལས་འདས་པ་ཞི་བ་རྣམས་སོ། །རང་སྡེ་ལ་རྟག་གཅིག་རང་དབང་བའི་བདག་ཁས་ལེན་མཁན་མེད་ཀྱང་རྫས་ཡོད་ཀྱི་བདག་ཁས་ལེན་མཁན་ཡོད་དེ། ཐེག་མཆོག་དབུ་མའི་ཟིན་བྲིས་ལས། གང་ཟག་གི་བདག་རྫས་ཡོད་སྤྱིར་དགག་པ་ནི་ཕྱི་རོལ་མུ་སྟེགས་བྱེད་རྣམས་དང༌། རང་སྡེ་ཉན་ཐོས་སྡེ་བ་བཅོ་བརྒྱད་ཀྱི་ནང་ན། སྡེ་བ་ལྔ་ཙམ་ཞིག་ཡོད་པས། ཞེས་དང༌། རང་སྡེ་གང་ཟག་གི་བདག་རྫས་ཡོད་དུ་སྨྲ་བ་རྣམས་ལ། ཞེས་གསུངས་སོ།། །། གཉིས་པ་བྱེ་བྲག་ཏུ་བཤད་པ།གཉིས་པ་བྱེ་བྲག་ཏུ་བཤད་པ་ལ། མིང་གི་སྒོ་ནས་མདོར་བསྟན་པ་དང༌། སོ་སོར་རྒྱས་པར་བཤད་པ་དང་གཉིས། དང་པོ་མདོར་བསྟན་པ། དང་པོ་ནི། དེ་ཡང་རིགས་ལྡན་འཇམ་དཔལ་གྲགས་པས། བྱེ་བྲག་སྨྲ་དང་མདོ་སྡེ་བ། །རྣལ་འབྱོར་སྤྱོད་དང་དབུ་མ་རུ། །འགྱུར་རོ། །ཞེས་དང༌། རྡོ་རྗེའི་སྙིང་འགྲེལ་ལས། དེ་ནས་བྱེ་བྲག་སྨྲ་བའི་གཞུང༌། །དེ་ནས་མདོ་སྡེ་པ་ཞེས་འགྱུར། །རང་ཆོས་རྣམ་ཤེས་སྨྲ་བ་དང༌། །དེ་ནས་དབུ་མའི་གཞུང་ཞེས་བྱ། །ཞེས་དང༌། གྲུབ་མཐའི་རྣམ་བཞག་དོན་གསལ་ལས། ནང་བ་ལ་ཡང་གྲུབ་མཐའ་བཞི། །བྱེ་བྲག་སྨྲ་དང་མདོ་སྡེ་བ། །རྣམ་རིག་ངོ་བོ་ཉིད་མེད་སྨྲ། །སོ་སོར་རྣམ་བཤད་བསྡུས་པར་འཚལ། །ཞེས་དང༌། བླང་དོར་རབ་གསལ་ལས། ནང་བའི་གྲུབ་མཐའ་རྣམ་པ་བཞི་ཡིན་ཏེ། །བྱེ་བྲག་སྨྲ་དང་མདོ་སྡེ་སྤྱོད་པ་དང༌། ། རྣལ་འབྱོར་སྤྱོད་པ་སེམས་ཙམ་སྨྲ་བ་དང༌། །མཐའ་བྲལ་སྟོན་པ་དབུ་མ་ཆེན་པོའོ། །ཞེས་གསུངས་པ་ལྟར་བྱེ་བྲག་སྨྲ་བ་དང༌། མདོ་སྡེ་བ་དང༌། སེམས་ཙམ་པ་དང༌། དབུ་མ་པའོ། །དེ་ལྟར་རིམ་པ་བཞི་བསྟན་པ་ནི། ཀྱཻའི་རྡོ་རྗེ་ལས། དང་པོར་གསོ་སྦྱོང་སྦྱིན་པར་བྱ། །དེ་རྗེས་བསླབ་པའི་གནས་བཅུ་སྦྱིན། །ཞེས་པ་ལྟར་ཕྱི་མ་ཚུལ་ཁྲིམས་རྣམ་དག་ལ་སྦྱར་ནས། །དེ་ལ་བྱེ་བྲག་སྨྲ་བ་བསྟན། །མདོ་སྡེ་པ་ཡང་དེ་བཞིན་ནོ། །རྣལ་འབྱོར་སྤྱོད་པ་དེ་ལས་ཕྱིས། །དེ་ཡི་རྗེས་སུ་དབུ་མ་བསྟན། །ཞེས་གསུངས་པ་ལྟར་རང་གི་མོས་པ་དང་མཐུན་པར་རིམ་གྱིས་དྲངས་ཏེ་མཐར་ཐུག་དབུ་མ་ཆེན་པོ་ལ་སྦྱར་བའི་ཆེད་དུའོ། །ལམ་ལ་ཐེག་པ་གསུམ་དང༌། ནང་བའི་གྲུབ་མཐའ་སྨྲ་བ་ལ་དེ་བཞི་པོ་གྲངས་ངེས་ཏེ། རྡོ་རྗེའི་སྙིང་འགྲེལ་ལས། ཉན་ཐོས་པ་དང་རང་རྒྱལ་འདིར། །ཐེག་པ་ཆེན་པོ་གསུམ་པ་སྟེ། །སངས་རྒྱས་པ་ཡི་བཞི་བ་དང༌། ཐུབ་པའི་གཞུང་ནི་ལྔ་བ་མེད། །ཅེས་དང༌། འཕགས་པ་ལྷས། སངས་རྒྱས་ཆོས་ནི་རྣམ་པ་བཞིར། །ཡིད་འདོད་རྣམས་ཀྱི་མངོན་མཐོང་སྟེ། །བྱེ་བྲག་སྨྲ་ལ་སོགས་པའི་ལམ། །བཤད་པའི་དེ་ཉིད་སྒྲུབ་པ་པོ། །ཞེས་གསུངས་པའི་ཕྱིར་རོ། །ནང་བའི་གྲུབ་མཐའ་སྨྲ་བ་བཞི་པོ་དེ་དག་ཐེག་ཆེན་དང་ཐེག་དམན་གྲུབ་མཐའ་སྨྲ་བ་གཉིས་དང༌། ཐེག་ཆེན་གྱི་གྲུབ་མཐར་ཞུགས་ལ་ལམ་ཐེག་དམན་དུ་ཞུགས་པ་སོགས་ཡོད་དེ། གཞན་སྟོང་སྙིང་པོ་ལས། སངས་རྒྱས་པའི་གྲུབ་མཐའ་ནི་རྣམ་པ་བཞི་སྟེ་བྱེ་བྲག་ཏུ་སྨྲ་བ་དང༌། མདོ་སྡེ་པ་དང༌། སེམས་ཙམ་པ་དང༌། དབུ་མ་པའོ། །དེ་ལ་དང་པོ་གཉིས་ནི་ཐེག་དམན་ཉན་ཐོས་པ་དང༌།ཕྱི་མ་གཉིས་ནི་ཐེག་ཆེན་པའོ། །དེ་རྣམས་ལ་ཐེག་པ་ཆེ་ཆུང་དུ་འཇོག་པ་ཡང༌། ཐེག་པ་ཆུང་ངུའི་སྡེ་སྣོད་སངས་རྒྱས་ཀྱི་བཀའ་མཐར་ཐུག་ཏུ་འདོད་པ་དང༌། ཐེག་པ་ཆེན་པོའི་གསུང་རབ་སྡེ་སྣོད་རྣམས་བཀའ་མཐར་ཐུག་ཏུ་འདོད་པས་དེ་ལྟར་བཏགས་པ་ཡིན་པས། ཐེག་དམན་སྨྲ་བ་དང་ཐེག་ཆེན་སྨྲ་བ་ཞེས་བྱ་བའི་གྲུབ་མཐའ་ཐེག་དམན་པ་དང༌། གྲུབ་མཐའ་ཐེག་ཆེན་པ་ཞེས་གྲགས་པ་ལྟར་ཡིན་ལ། གང་ཟག་དེ་ཉིད་ཐེག་ཆུང་ངམ་ཐེག་ཆེན་པར་འཇོག་པ་ནི་གྲུབ་མཐའ་ལ་མཐའ་གཅིག་ཏུ་མ་ངེས་ཏེ། ཐེག་པ་ཆེན་པོའི་བསམ་སྦྱོར་རྒྱུད་ལ་སྐྱེས་པ་ནི་ཐེག་ཆེན་པ་ཡིན་ལ། ཐེག་དམན་གྱི་བསམ་སྦྱོར་རྒྱུད་ལ་སྐྱེས་པ་ནི་ཐེག་དམན་པ་ཡིན་ཞིང༌། དེ་གཉིས་གང་ཡང་རྒྱུད་ལ་མ་སྐྱེས་ན་གསུང་རབ་གང་ཀློག་གཞུང་ཅི་བཟུང་གྲུབ་མཐའ་ཇི་ལྟར་བྱེད་ཀྱང་གང་ཟག་ཐེག་ཆེན་པ་ཡང་མ་ཡིན། གང་ཟག་ཐེག་དམན་པ་ཡང་མ་ཡིན་ནོ། །གཞན་ཡང་གྲུབ་མཐའ་ཐེག་ཆེན་འཛིན་ལ། ལམ་ཐེག་དམན་དུ་ཞུགས་པ་ཡང་ཡོད། གྲུབ་མཐའ་ཐེག་དམན་འཛིན་ལ་ལམ་ཐེག་ཆེན་དུ་ཞུགས་པ་ཡང་ཡོད། གཉིས་ཀ་ཐེག་ཆེན་པ་ཡང་ཡོད། གཉིས་ཀ་ཐེག་དམན་པ་ཡང་ཡོད། གྲུབ་མཐའ་འཛིན་ཅིང་ལམ་དུ་མ་ཞུགས་པ་ནི་ཤིན་ཏུ་ཡང་མང་ལ། ལམ་དུ་ཞུགས་པའི་གང་ཟག་ལ་གྲུབ་མཐའ་མེད་པ་ནི་ཡེ་མི་སྲིད་དོ། །ཞེས་གསུངས་པའི་ཕྱིར་རོ། །གྲུབ་མཐའ་བཞི་བོ་དེ་དག་གི་ལྟ་སྒོམ་རྣམས་ཤེས་པར་བྱས་ནས་ལུང་རིགས་ཀྱིས་འཐད་པ་རྣམས་བསྒོམ་དགོས་ཏེ། ཕྱོགས་རྒྱལ་གྱི་གཞི་ལམ་འབྲས་གསུམ་ཡང་དག་དོན་གསལ་ལས། ཡེ་ཤེས་སྙིང་པོ་ཀུན་ལས་བཏུས་པར། སངས་རྒྱས་ཆོས་ནི་རྣམ་པ་བཞིར། །ཡིད་འདོད་རྣམས་ཀྱིས་མངོན་མཐོང་སྟེ། །བྱེ་བྲག་སྨྲ་ལ་སོགས་པའི་ལམ། །བཤད་པ་དེ་ཉིད་བསྒྲུབ་པའོ། །ཞེས་གསུངས་པ་ལྟར། སངས་རྒྱས་པའི་གྲུབ་པའི་མཐའ་ཉན་ཐོས་བྱེ་བྲག་ཏུ་སྨྲ་བ་དང་མདོ་སྡེ་པའི་གྲུབ་མཐའ་གཉིས། །ཐེག་པ་ཆེན་པོ་སེམས་ཙམ་པ་དང་དབུ་མ་པའི་གྲུབ་མཐའ་རྣམ་པ་བཞི་ཅར་གྱི་ལྟ་བསྒོམ་གྱི་ལམ་ཡང་ཤེས་པར་བྱ་ཞིང་ཅི་རིགས་པ་བསྒོམ་པར་ཡང་བྱ། ཞེས་གསུངས་སོ།། །། གཉིས་པ་སོ་སོར་རྒྱས་པར་བཤད་པ།གཉིས་པ་སོ་སོར་རྒྱས་པར་བཤད་པ་ལ། བྱེ་བྲག་སྨྲ་བ། མདོ་སྡེ་བ། སེམས་ཙམ་པ། དབུ་མ་པའི་གྲུབ་མཐའ་བཤད་པ་དང་བཞི། བྱེ་བྲག་སྨྲ་བ། དང་པོ་ལ། མཚན་ཉིད། དབྱེ་བ། སྒྲ་བཤད། འདོད་ཚུལ་དང་བཞི། དང་པོ་ནི། རང་རིག་ཁས་མི་ལེན་པར་ཕྱི་དོན་གྱི་རྡུལ་ཕྲ་རགས་དོན་དམ་པར་གྲུབ་ཅིང་ཤེས་པ་རྣམ་མེད་དུ་ཡུལ་དངོས་སུ་རིག་པར་འདོད་པའི་ཐེག་དམན་གྱི་གྲུབ་མཐའ་སྨྲ་བ་དེ། བྱེ་བྲག་ཏུ་སྨྲ་བའི་མཚན་ཉིད་ཡིན་ཏེ། ཉ་ཊཱིཀ་ཡིད་ཀྱི་མུན་སེལ་ལས། བྱེ་བྲག་སྨྲ་བའི་མཚན་ཉིད་ནི། སངས་རྒྱས་པ་གང་ཞིག བློ་རང་རིག་མེད་པ་དང་ཤེས་པ་རྣམ་མེད་དུ་སྨྲ་བའི་གང་ཟག་གོ །ཞེས་གསུངས་པའི་ཕྱིར་རོ། །བྱེ་བྲག་སྨྲ་བའི་སློབ་དཔོན་ནི། ཏཱ་ར་ནཱ་ཐའི་རྒྱ་གར་ཆོས་འབྱུང་ལས། བཙུན་པ་ཆོས་སྐྱོབ་དང༌། དབྱངས་སྒྲོག་དང༌། དབྱིག་བཤེས་དང༌། སངས་རྒྱས་ལྷ་སྟེ་བཞི་བོ་དེ་ལ་བྱེ་བྲག་ཏུ་སྨྲ་བའི་སློབ་དཔོན་ཆེན་པོ་བཞི་ཞེས་གྲགས་ཏེ་རེ་རེ་ལའང་སློབ་མ་འབུམ་ཕྲག་བགྲངས་པ་ཡོད་པར་གྲགས་སོ། །ཞེས་གསུངས་སོ། །གཉིས་པ་དབྱེ་བ་ནི། ཁ་ཆེ་བྱེ་བྲག་སྨྲ་བ། ཉི་འོག་པ། ཡུལ་དབུས་ཀྱི་བྱེ་བྲག་སྨྲ་བ་དང་གསུམ་ཡོད་དོ། །འཕགས་ཡུལ་དུ་ཉན་ཐོས་སྡེ་བ་བཅོ་བརྒྱད་གྱེས་ཚུལ་ལ་འདོད་ཚུལ་མང་མོད་འདིར་ནི་རེ་ཞིག་རྩ་བའི་སྡེ་བཞི་ལས་རིམ་བཞིན་བདུན་དང་ལྔ་དང་གསུམ་དང་གསུམ་གྱེས་པ་ཡིན་ཏེ། དུལ་བ་ལྷས། འོད་སྲུང་ས་སྟོན་ཆོས་སྲུང་སྡེ། །མང་ཐོས་གོས་དམར་སློབ་མ་དང༌། །རྣམ་པར་ཕྱེ་དང་གཞི་ཀུན་པ། །ཐམས་ཅད་ཡོད་པར་སྨྲ་བ་བདུན། །ཤར་དང་ནུབ་དང་གངས་རི་གནས། །འདུས་བྱས་རྟག་པར་སྨྲ་བ་དང༌། །འཇིག་རྟེན་འདས་སྨྲ་ཕལ་ཆེན་ལྔ། །རྒྱལ་བྱེད་ཚལ་གནས་འཇིགས་མེད་གནས། །གཙུག་ལག་ཁང་ཆེན་གནས་བརྟན་གསུམ། །ས་སྒྲོག་རི་དང་བསྲུང་བ་པ། །གནས་མ་བུ་པའི་སྡེ་རྣམས་ནི། །ཀུན་གྱིས་བཀུར་བ་རྣམ་པ་གསུམ། །ཞེས་སོ། །གསུམ་པ་སྒྲ་བཤད་པ་ནི། སློབ་དཔོན་དབྱིག་བཤེས་སོགས་ཆོས་ཅན། ཁྱོད་ལ་བྱེ་བྲག་སྨྲ་བ་ཞེས་བརྗོད་པའི་རྒྱུ་མཚན་ཡོད་དེ། བྱེ་བྲག་བཤད་མཚོའི་རྗེས་སུ་འབྲང་བ་དང་དུས་གསུམ་རྫས་ཀྱི་བྱེ་བྲག་ཏུ་སྨྲ་བའི་ཕྱིར། ཁྱབ་སྟེ། འགྲེལ་བ་རྒྱལ་སྲས་མ་ལས། བྱེ་བྲག་བཤད་མཚོ། ཞེས་དང༌། དྲི་མེད་འོད་ལས། ཁ་ཆེའི་གཞུང་གི་ཆུ་གཏེར་གྱི། །བྱེ་བྲག་སྨྲ་བའི་གཞུང་འདོད་འགྱུར། །ཞེས་དང༌། བླང་དོར་རབ་གསལ་ལས། དུས་གསུམ་གཅིག་ནས་གཅིག་འགྲོའི་རྫས་གྲུབ་དང༌། །ཞེས་སོ། །བཞི་བ་འདོད་ཚུལ་ལ། གཞི་ལམ་འབྲས་གསུམ་ལས། དང་པོ་གཞིའི་འདོད་ཚུལ་ནི། དྲི་མེད་འོད་ལས། ནམ་མཁའ་དང་ནི་འགོག་རྣམ་གཉིས། །འདུས་མ་བྱས་གསུམ་རྟག་པ་སྟེ། །འདུས་བྱས་ཐམས་ཅད་སྐད་ཅིག་གམ། །བདག་གིས་སྟོང་ཞིང་བྱེད་པོ་མེད། །དབང་སྐྱེས་བློ་ནི་རྣམ་མེད་ཀྱིས། །ཕྲ་རབ་བསགས་པ་དངོས་སུ་རིག །ཁ་ཆེའི་གཞུང་གི་ཆུ་གཏེར་གྱི། །བྱེ་བྲག་སྨྲ་བའི་གཞུང་འདོད་འགྱུར། །ཞེས་དང༌། གཞན་སྟོང་སྙིང་པོ་ལས། བྱེ་བྲག་ཏུ་སྨྲ་བ་ནི། ཤེས་པ་སེམས་སེམས་བྱུང་གཉིས། ཡུལ་གཟུགས་སོགས་བཅུ། སྐྱེ་འཇིག་སོགས་ལྡན་མིན་འདུ་བྱེད། ནམ་མཁའ་སོགས་འདུས་མ་བྱས་གསུམ། ཞེས་གསུངས་པ་ལྟར་ཤེས་བྱ་ལ་དབྱེ་ན་གཞི་རྣམ་པ་ལྔ་ཡོད་དེ། སྣང་བ་གཟུགས་ཀྱི་གཞི་དང༌། གཙོ་བོ་སེམས་ཀྱི་གཞི་དང༌། འཁོར་སེམས་ལས་འབྱུང་བའི་གཞི་དང༌། མཚུངས་པར་ལྡན་པ་མིན་པའི་འདུ་བྱེད་ཀྱི་གཞི་དང༌། རྒྱུ་རྐྱེན་གྱིས་འདུས་མ་བྱས་པ་སྟེ་ཤེས་བྱ་གཞི་ལྔ་དང་ཡང་སྦྱར་ནས་སྟོན་པའི་ཕྱིར་ཏེ། བླང་དོར་རབ་གསལ་ལས། དེ་ལ་ཉན་ཐོས་བྱེ་བྲག་སྨྲ་བ་ནི། །འདུས་མ་བྱས་གསུམ་རྟག་པའི་རྫས་གྲུབ་དང༌། །འདུས་བྱས་སྐད་ཅིག་ངོ་བོར་རྫས་གྲུབ་ཅིང༌། །ཁྱད་པར་ལྡན་མིན་འདུ་བྱེད་རྫས་གྲུབ་དང༌། །ཞེས་སྐྱེ་འཇིག་གནས་གསུམ་བྲལ་བའི་ནམ་མཁའ་དང༌། སྤང་བྱའི་ས་བོན་དང་བྲལ་བ་གཉེན་པོས་སོ་སོར་བརྟགས་པས་ཐོབ་པའི་འགོག་པ་དང་རྐྱེན་མ་ཚང་བས་རེ་ཤིག་དགག་བྱ་བཀག་ཙམ་སོ་སོར་བརྟགས་པ་མ་ཡིན་པའི་འགོག་པ་སྟེ་གང་རྒྱུ་དང་རྐྱེན་མ་ཚང་བའི་སྒོ་ནས་དགག་བྱ་དེ་རེ་ཤིག་འགོག་ལ་དེའི་ས་བོན་རྣམས་བག་ལ་ཉལ་མ་བཅོམ་ཞིང་སྤང་བ་སླར་མི་ལྡོག་བར་མ་བྱས་པར་གཏན་དུ་བྲལ་བ་མ་ཡིན་པ། དཔེར་ན་མིག་ཤེས་སྐྱེས་པ་གཟུགས་ལ་མྱོང་བ་ན་རྣམ་ཤེས་གཞན་མ་སྐྱེས་པ་ལྟ་བུའམ། བྱ་རོག་སོགས་སྣང་རུང་དུ་ཡོད་པ་ན་ལྟ་འདོད་མེད་ཅིང༌། ལྟ་འདོད་ཡོད་པ་ན་དེ་ཕྱོགས་གཞན་དུ་སོང་བ་ན་རེ་ཤིག་མ་མཐོང་ཡང༌། གཏན་ནས་མི་མཐོང་བ་ནི་མ་ཡིན་ནོ། །འདུས་མ་བྱས་གསུམ་ནི། རྒྱུ་རྐྱེན་གྱིས་མ་བསྐྱེད་པ་རྟག་པའི་ངོ་བོར་རྫས་སུ་གྲུབ་པ་དང༌། འདུས་བྱས་གཟུགས་ཀྱིས་བསྡུས་པ་རྣམས་འབྱུང་བ་དང་འབྱུང་འགྱུར་རྡུལ་ཕྲན་དང་རགས་པ་གཉིས་ཡིན་ལ། རྡུལ་ཕྲན་ནི། ཕྱི་རོལ་དོན་གྲུབ་དུ། ཐ་དད་ཕྱོགས་ནས་མང་པོ་དག །འགའ་ལ་ཀུན་ནས་བསྐོར་ཙམ་དུ། །བརྗོད་པར་ཟད་ཀྱི་རྡུལ་དེ་ཡང༌། །ཆ་ཤས་བཅས་པའི་བདག་ཉིད་མིན། །ཞེས་པ་ལྟར་རགས་པ་རྩོམ་པ་ན་དབུས་རྡུལ་ལ་ཕྱོགས་དྲུག་གི་རྡུལ་གྱིས་བསྐོར་ཡང་བར་དང་བཅས་པ་ཆ་ཤས་མེད་པ་རྫས་སུ་གྲུབ་པ་དང༌། རགས་པ་ནི། རྡུལ་ཕྲན་གང་རྣམས་ཕྲད་གྱུར་ཅིང༌། །རིགས་མཐུན་བྱ་བ་གཅིག་བྱེད་པ། །དེ་རྣམས་འདུས་པ་ཞེས་བརྗོད་ན། །དེ་རྣམས་རྫས་མེད་ག་ལ་ཞིག །ཅེས་པ་ལྟར་རྡུལ་ཕྲན་དེ་རྣམས་འཛིན་པར་བྱེད་པའི་རླུང་གིས་ཕྱོགས་གཅིག་ཏུ་བསྡུས་པ་གཡག་རྔ་དང་ནེའུ་སིང་སྔོན་པོ་ལྟ་བུ་རིགས་མཐུན་ཞིང་བྱ་བ་གཅིག་བྱེད་པའི་རྫས་གྲུབ་དང༌། འདུས་བྱས་ཀྱི་ཁྱད་པར་ལྡན་མིན་འདུ་བྱེད་རྣམས་ཀྱང་གཟུགས་དང་སེམས་སེམས་བྱུང་རྣམས་ལས་ཐ་དད་པར་རྫས་སུ་གྲུབ་པར་འདོད་པའི་ཕྱིར་རོ། །ཡང་བསྟན་པ་སྤྱི་འགྲེལ་གྱི་རྣམ་བཤད་ལས། སྒོ་ལྔའི་དབང་ཤེས་ཀྱིས་གཟུང་བ་ཕྱི་དོན་བདེན་པ་བརྗེན་ཆར་གྱི་སྣང་ནས་འཛིན་གྱི། བག་ཆགས་ཀྱི་དབང་གིས་རང་ཉིད་ཕྱི་རོལ་དོན་དུ་སྣང་བའི་རྣམ་པ་མེད་པར་བྱེ་བྲག་སྨྲ་བ་འདོད། ཅེས་དང༌། བླང་དོར་རབ་གསལ་ལས། དུས་གསུམ་གཅིག་ནས་གཅིག་འགྲོའི་རྫས་གྲུབ་དང༌། །དབང་ཤེས་དོན་གྱི་རྣམ་པ་མ་ཤར་ཡང༌། །དོན་དང་ཕྲད་མ་ཐག་ཏུ་ཕྲ་རབ་རྣམས། །བསགས་པའི་རགས་པ་དངོས་སུ་རིག་པ་དང༌། །ཞེས་དུས་གསུམ་གཅིག་ནས་གཅིག་དུ་བརྒྱུད་དེ་འགྲོ་བའི་རྫས་སུ་གྲུབ་པ་དང༌། སེམས་གྱིས་བསྡུས་པ་དབང་པོའི་རྣམ་པར་ཤེས་པ་ཚོགས་དྲུག་རྣམས་ནི་དོན་གྱི་རྣམ་པ་མ་ཤར་ཡང་དོན་དང་ཕྲད་མ་ཐག་ཏུ་རྡུལ་ཕྲ་རབ་བསགས་པ་མངོན་སུམ་དུ་རིག་པ་རྫས་སུ་གྲུབ་པ་དང༌། དབང་ཤེས་ཀྱི་འཁོར་དུ་སྐྱེས་པའི་སེམས་བྱུང་རྣམས་ཀྱང་ཡུལ་གྱི་རྣམ་པ་མ་ཤར་བར་ཡུལ་རིག་པའི་རྫས་སུ་གྲུབ་པར་འདོད་དོ། །ཡང་ཤེས་བྱ་ལ་དབྱེ་ན། བདེན་པ་གཉིས་དང༌། ཟག་བཅས་ཟག་མེད་གཉིས་དང༌། ཡུལ་ཡུལ་ཅན་གཉིས་སུ་ཡོད་ལ། དང་པོ་ནི། བཅོམ་པ་དང་བློས་ཆ་ཤས་སོ་སོར་བསལ་བ་གང་རུང་གིས་རང་འཛིན་གྱི་བློ་འདོར་རུང་བའི་ཆོས་སུ་དམིགས་པ་དེ། ཀུན་རྫོབ་བདེན་པའི་མཚན་ཉིད། མཚན་གཞི་ནི་ཀ་བུམ་ལྟ་བུའོ། །བཅོམ་པ་དང་བློས་ཆ་ཤས་སོ་སོར་བསལ་བ་གང་རུང་གིས་རང་འཛིན་གྱི་བློ་འདོར་མི་རུང་བའི་ཆོས་སུ་དམིགས་པ་དེ། དོན་དམ་བདེན་པའི་མཚན་ཉིད། མཚན་གཞི་ནི་རྡུལ་ཕྲན་ཕྱོགས་ཀྱི་ཆ་མེད་དང་གཟུགས་དང་འདུས་མ་བྱས་ནམ་མཁའ་ལྟ་བུའོ། །དེ་གཉིས་ཀྱི་མཚན་ཉིད་དེ་ལྟར་འཐད་དེ། མཛོད་ལས། གང་ལ་བཅོམ་དང་བློ་ཡིས་གཞན། །བསལ་ན་དེ་བློ་མི་འཇུག་པ། །བུམ་ཆུ་བཞིན་དུ་ཀུན་རྫོབ་ཏུ། །ཡོད་དེ་དོན་དམ་ཡོད་གཞན་ནོ། །ཞེས་གསུངས་སོ། །གཉིས་པ་ཟག་བཅས་ཟག་མེད་ནི། དམིགས་པ་དང་མཚུངས་ལྡན་གང་རུང་གི་སྒོ་ནས་ཟག་པ་རྒྱས་སུ་རུང་བའི་ཆོས་དེ། ཟག་བཅས་ཀྱི་མཚན་ཉིད། མཚན་གཞི་ནི། ཉེར་ཕུང་ལྟ་བུའོ། །དམིགས་པ་དང་མཚུངས་ལྡན་གང་རུང་གི་སྒོ་ནས་ཟག་པ་རྒྱས་སུ་མི་རུང་བའི་ཆོས་དེ། ཟག་མེད་ཀྱི་མཚན་ཉིད། མཚན་གཞི་ནི། འདུས་བྱས་ལམ་བདེན་དང༌། འདུས་མ་བྱས་རྣམས་སོ། །གསུམ་པ་ཡུལ་ཡུལ་ཅན་ནི། བློ་གང་ཟག་དབང་པོ་སོགས་འདོད། ཤེས་པ་ལ་སེམས་སེམས་བྱུང་གཉིས་སོ། །ཡུལ་ལ་གཟུགས་སོགས་བཅུ་དང༌། ལྡན་མིན་འདུ་བྱེད་དང༌། འདུས་མ་བྱས་རྣམས་སོ། །གྲུབ་མཐའི་རྣམ་བཞག་དོན་གསལ་ལས། བྱེ་བྲག་སྨྲ་བས་ཤེས་བྱའི་རྫས། །ཆོས་དང་གང་ཟག་བདེན་འདོད་པ། །ཞེས་དང༌། གཞན་སྟོང་སྙིང་པོ་ལས། འདས་མ་འོངས་ཀྱི་དངོས་པོ་རྣམས་རང་རང་སོ་སོ་ནས་རྫས་སུ་གྲུབ་པར་འདོད་ཅིང༌། བདེན་གྲུབ་ཀྱི་ཆ་རེ་ཡང་ཡོད་པར་འདོད་ལ། རགས་པའི་དངོས་པོ་དང་རྒྱུན་གྱི་དངོས་པོ་སོགས་ནི་བདེན་མེད་དུ་འདོད་ཅིང༌། ཡུལ་དང་དབང་བོ་བདེན་གྲུབ་ལས་རྣམ་ཤེས་སྐྱེ། མིག་གིས་གཟུགས་དངོས་སུ་མཐོང་ཟེར་རོ། །ཞེས་ཤེས་བྱ་ལ་རྫས་གྲུབ་དང༌། བདེན་པར་གྲུབ་མ་གྲུབ་ཀྱི་ཆ་གཉིས་ཡོད་པ་སོགས་ཤེས་པར་བྱའོ། །འདིའི་ཁས་ལེན་པའི་གཞུང་ལུགས་ནི། མངོན་པ་སྡེ་བདུན་བཀར་འདོད་པ་དང༌། མདོ་སྡེ་དག་དགོངས་པ་ཅན་ཡིན་པས་ལྟ་གྲུབ་བསྟན་བཅོས་ལུགས་བཞིན་བྱེད་དགོས་པར་འདོད་ལ། བསྟན་བཅོས་བྱེ་བྲག་བཤད་མཚོའམ་བཤད་མཛོད་ལ་ངོས་འཛིན་མཛད་དེ། གཞན་སྟོང་སྙིང་པོ་ལས། བྱེ་བྲག་ཏུ་སྨྲ་བ་འདི་ནི་མངོན་པ་སྡེ་བདུན་བཀར་འདོད་ཅིང༌། མདོ་སྡེ་རྣམས་དགོངས་པ་ཅན་དང༌། དྲང་དོན་གསུངས་པ་མང་བས། ལྟ་གྲུབ་རྣམས་བསྟན་བཅོས་ཀྱི་ལུགས་བཞིན་དུ་ཁས་ལེན་དགོས་པར་འདོད་ལ། བསྟན་བཅོས་ཀྱང་བྱེ་བྲག་ཏུ་བཤད་པ་ལ་ངོས་འཛིན་ནོ། །ཞེས་གསུངས་པའི་ཕྱིར་རོ། །མངོན་པ་སྡེ་བདུན་ནི། ཡེ་ཤེས་འཇུག་པ། རབ་ཏུ་བྱེད་པ། རྣམ་ཤེས་ཀྱི་ཚོགས། ཆོས་ཀྱི་ཕུང་པོ། གདགས་པའི་བསྟན་བཅོས། འགྲོ་བའི་རྣམ་གྲངས། ཁམས་ཀྱི་ཚོགས་དང་བདུན་ནོ། །གཉིས་པ་ལམ་གྱི་རྣམ་བཞག་བཤད་པ་ལ། ལམ་གྱི་དམིགས་པ། ལམ་གྱི་སྤང་བྱ། ལམ་གྱི་རང་བཞིན་བཤད་པའོ། །དང་པོ་ནི་བདེན་བཞི་ཁྱད་ཆོས་མི་རྟག་བཅུ་དྲུག་ཡིན་ལ། དེས་མི་རྟག་པ་དང་བདག་དང་བདག་མེད་འདོད་ཚུལ་ནི། བསྟན་པ་སྤྱི་འགྲེལ་རྣམ་བཤད་ལས། འདུས་བྱས་ཀྱི་དངོས་པོ་རྫས་ཡོད་རྣམས་དུས་མཐའི་སྐད་ཅིག་གིས་སྐྱེ་འགག་བྱེད་པར་གནས་མ་བུའི་སྡེ་བ་མ་གཏོགས་བྱེ་བྲག་སྨྲ་བ་དང༌། མདོ་སེམས་དབུ་མ་བ་ཕལ་ཆེར་ཡང་འདོད་ཅིང༌། འདུས་བྱས་རྫས་ཡོད་གྲུབ་ཙམ་ནས་འཇིག་གི རང་གི་འཇིག་པ་རང་རྒྱུ་མ་ཡིན་པའི་རང་ལས་ཕྱིས་འབྱུང་དོན་གཞན་གྱིས་བསྐྱེད་མི་དགོས་ལ་དེའི་ཕྱིར་འཇིག་པའམ་མི་རྟག་པ་དེ་འདུས་བྱས་རྣམས་ཀྱི་རང་བཞིན་ནམ་གནས་ལུགས་སུ་འདོད་དོ། །དེའི་ཕྱིར་འདུས་བྱས་ཀྱི་དངོས་པོ་རྫས་ཡོད་རེ་རེ་ལ་ཡང༌། སྐྱེ་འགག་གནས་གསུམ་གྱི་སྐབས་ཅིག་ཆར་དུ་ཚང་བར་སྔར་སྨོས་པའི་དངོས་སྨྲ་དེ་རྣམས་ཀྱིས་འདོད་དགོས། ཞེས་དང༌། གཞན་སྟོང་དབུ་མ་སྙིང་པོ་ལས། འདིའི་ནང་ཚན་ཁ་ཆེ་བྱེ་བྲག་ཏུ་སྨྲ་བ་སོགས་གྲུབ་མཐའ་བཟང་བ་རྣམས་ནི། འདུས་བྱས་ཐམས་ཅད་སྐད་ཅིག་གིས་འཇིག་པས་མི་རྟག་པར་འདོད་པ་དང༌། གང་ཟག་གི་བདག་ནི་བློས་བཏགས་པ་ཙམ་མ་གཏོགས་རྫས་སུ་མེད་པར་འདོད། མང་པོས་བཀུར་བའི་སྡེ་བ་སོགས་གྲུབ་མཐའ་ངན་པ་རྣམས་ནི། འདུས་བྱས་རྣམས་མཐར་འཇིག་པས་མི་རྟག་པ་ཡིན་ཀྱང༌། སྐད་ཅིག་གིས་འཇིག་པ་མིན་ཟེར་ཞིང༌། དེ་ཕྱིར་རྒྱུན་གྱི་དངོས་པོ་ཅི་རིགས་པར་འདོད་ལ། མུ་སྟེགས་པ་རྣམས་ཀྱིས་བཏགས་པའི་ང་བདག་རྟག་པ་གཅིག་པུ་རང་དབང་ཅན་དེ་འདྲ་མེད་ཀྱང༌། སྤྱི་བདག་ཙམ་ཞིག་རྫས་གྲུབ་དང་བདེན་གྲུབ་ཏུ་འདོད། །འདི་ལ་བདག་ལྟའི་སྐྱོན་གྱིས་དངོས་སུ་ཐར་བའི་ལམ་མེད་ན་ཡང༌། དཀོན་མཆོག་ལ་སྐྱབས་སུ་སོང་ཞིང༌། ཐར་འདོད་ཀྱི་ཀུན་ནས་བསླངས་པའི་ཚུལ་ཁྲིམས་དང་ཐོས་བསམ་སྒོམ་གསུམ་ཡོད་པས། རིམ་པས་ཐར་བ་ཐོབ་པའི་སྐལ་བ་ཅན་དུ་འགྱུར་རོ། །ཞེས་དང༌། བླང་དོར་རབ་གསལ་ལས། ཕྱི་བས་བརྟགས་པའི་བདག་གིས་སྟོང་པ་དང༌། །དབང་ཕྱུག་ལ་སོགས་བྱེད་པོ་མེད་པར་འདོད། །རྟག་མི་རྟག་སོགས་གང་དུ་བརྗོད་མིན་པའི། །གང་ཟག་བདེན་པར་འདོད་པ་མི་འཐད་དེ། །ཞེས་བྱེ་བྲག་སྨྲ་བ་དག་མུ་སྟེགས་པས་བརྟགས་པའི་བདག་གིས་སྟོང་པ་དང་བྱེད་པ་པོ་དབང་ཕྱུག་ལ་སོགས་པ་མེད་པར་འདོད་པ་ནི་ལེགས་ཀྱི། སྤྱི་བདག་རྫས་གྲུབ་དང་བདེན་པར་གྲུབ་པ་དང༌། བརྗོད་དུ་མེད་པའི་གང་ཟག་གི་བདག་ཡོད་པར་འདོད་པ་ནི་རིགས་པ་མ་ཡིན་ནོ། །བརྗོད་མེད་ཀྱི་བདག་འདོད་མཁན་ནི་ཉན་ཐོས་གནས་མ་བུ་པ་ཡིན་པར་སྣང་སྟེ། བདག་དང་འཇིག་རྟེན་རྟག་མི་རྟག་དང་མཐའ་དང་ལྡན་མི་ལྡན་དང་གྲོངས་ནས་འབྱུང་མི་འབྱུང་གཉིས་མིན་དུ་འདོད་མཁན་ནི་གནས་མ་བུ་པ་ཡིན་པའི་ཕྱིར་ཏེ། ལུང་མ་བསྟན་གྱི་ལྟ་བ་བཅུ་བཞི་བཤད་པའི་སྐབས་སུ་ཉ་ཊཱིཀ་ཡིད་ཀྱི་མུན་སེལ་ལས། བཞི་བ་ནི་གནས་མ་བུ་པའི་ལྟ་བ་བཅུམ་པའོ། །ཞེས་དང༌། དབུ་མ་འཇུག་པ་ལས། ཁ་ཅིག་དེ་ཉིད་གཞན་ཉིད་རྟག་མི་རྟག །ལ་སོགས་བརྗོད་མེད་གང་ཟག་རྫས་ཡོད་འདོད། །ཅེས་དང༌། ཐེག་མཆོག་དབུ་མའི་ཟིན་བྲིས་ལས། གནས་མ་བུའི་སྡེ་བ་རྣམས་སྤྱིར་གང་ཟག་གི་བདག་རྫས་སུ་ནི་ཡོད་ལ། ཕུང་པོ་དང་གཅིག་ཏུ་ཡང་མི་བརྗོད་ཅིང་ཐ་དད་དུ་ཡང་མི་བརྗོད་པས་ན་དེ་ཉིད་གཞན་དུ་བརྗོད་དུ་མེད་པ་ཡིན་ཏེ། བཅོམ་ལྡན་འདས་ཀྱིས་ཀྱང་མདོ་ལས་དགེ་སློང་དག་ལས་བྱེད་པ་པོའི་གང་ཟག་ཡང་ཡོད། ཁུར་འཁུར་བ་པོའི་གང་ཟག་ཡང་ཡོད་དེ། རྟག་པར་མི་སྨྲ་ལ་མི་རྟག་པར་ཡང་ང་མི་སྨྲའོ། །ཞེས་ཁུར་འཁུར་བ་པོའི་གང་ཟག་རྫས་ཡོད་དུ་བསྟན་པ་དང༌། རྟག་མི་རྟག་གང་དུ་ཡང་བརྗོད་དུ་མེད་པར་གསུངས་པའི་ཕྱིར། ཞེས་ཟེར་རོ། །ཞེས་གསུངས་སོ། །དེ་དགག་པ་ནི། བླང་དོར་རབ་གསལ་ལས། དེ་ཉིད་ཤེས་པ་ཡིན་ན་བུམ་སོགས་ཀྱི། །ཤེས་པའི་རྫས་སུ་ཤེས་པ་གཞན་སྐྱེ་བས། །མི་རྟག་པར་འགྱུར་བེམ་པོ་ཡིན་ན་ཡང༌། །བདེ་སྡུག་མྱོང་བ་མེད་པས་གང་ཟག་མིན། །ཞེས་གང་ཟག་གི་བདག་དེ་ཤེས་པའི་རང་བཞིན་ཡིན་ནམ། མི་ཤེས་པའི་རང་བཞིན་ཡིན། གལ་ཏེ་ཤེས་པའི་རང་བཞིན་ཡིན་ན་མི་རྟག་པར་འགྱུར་ཏེ། ཡུལ་སྣ་ཚོགས་པ་ལ་འཇུག་པའི་ཤེས་པ་ཡིན་པའི་ཕྱིར་རོ། །དེའང་བུམ་པའི་ཤེས་པ་འགགས་པ་ན་སྣམ་བུའི་ཤེས་པ་འབྱུང་བ་ལ་སོགས་པ་སྣ་ཚོགས་སུ་འགྱུར་བས་མི་རྟག་པར་གྲུབ་པོ། ཅི་སྟེ་མི་ཤེས་པའི་རང་བཞིན་ཡིན་ན་བདེ་བ་དང་སྡུག་བསྔལ་མྱོང་བ་མ་ཡིན་པར་འགྱུར་ཞིང༌། བདེ་སྡུག་རིག་པ་མ་ཡིན་ན་གང་ཟག་ཡིན་པར་ཡང་འགལ་ལོ། །འོ་ན་བཅོམ་ལྡན་འདས་ཀྱིས་ཀྱང་ཁུར་འཁུར་བའི་གང་ཟག་ཡོད་དེ། རྟག་པར་བདག་མི་སྨྲ་ཞིང་མི་རྟག་པར་ཡང་བདག་མི་སྨྲའོ། །ཞེས་གསུངས་པ་མ་ཡིན་ནམ་ཞེ་ན། དེ་ནི་རྨི་ལམ་གྱི་གནས་སྐབས་ཀྱི་གང་ཟག་ལ་དགོངས་ནས་དགོས་པ་བདག་ཏུ་སྨྲ་བ་རྣམས་བསྟན་པར་གཞུག་པའི་དོན་དུ་ལྡེམ་པོར་དགོངས་ཏེ་གསུངས་པ་ཡིན་ནོ། །བྱེ་སྨྲ་འདི་བས་ཆོས་ཀྱི་བདག་མེད་ཕྲ་རགས་ཁས་མི་ལེན་ཏེ། ཆོས་བདག་ཏུ་གྲུབ་པར་ཁས་ལེན་པའི་ཕྱིར་ཏེ། གྲུབ་མཐའི་རྣམ་བཞག་དོན་གསལ་ལས། ཆོས་དང་གང་ཟག་བདེན་འདོད་པ། །ཞེས་གསུངས་སོ། ། གཉིས་པ་ལམ་གྱི་སྤང་བྱ།གཉིས་པ་ལམ་གྱི་སྤང་བྱ་ནི། ཉོན་མོངས་ཅན་དང༌། ཉོན་མོངས་ཅན་མ་ཡིན་པའི་སྒྲིབ་པ་གཉིས་ཡོད། དང་པོ་ནི་གཙོ་བོར་ཐར་བ་ཐོབ་པ་ལ་བར་དུ་གཅོད་པ་སྟེ། གང་ཟག་གི་བདག་འཛིན་དང༌། དེའི་དབང་གིས་བྱུང་བའི་ཉོན་མོངས་པ་རྣམས་སོ། །གཉིས་པ་ནི་སངས་རྒྱས་ཀྱི་ཟད་མི་སྐྱེའི་ཡེ་ཤེས་ཐོབ་པ་ལ་གཙོ་བོར་བར་ཏུ་གཅོད་པ་སྟེ། དེ་བཞིན་གཤེགས་པའི་ཆོས་ཟབ་ཅིང་ཕྲ་བས་མི་ཤེས་པ། ཡུལ་ཤིན་ཏུ་བསྐལ་བས་མི་ཤེས་པ། དུས་ཤིན་ཏུ་བསྐལ་བས་མི་ཤེས་པ། རྣམ་པའི་དབྱེ་བ་མཐའ་ཡས་པས་མི་ཤེས་པ་རྣམས་སོ། །གསུམ་པ་ལམ་གྱི་རང་བཞིན་ནི། ཐེག་པ་གསུམ་གྱི་ལམ་གསུམ་དང༌། དེ་རེ་རེ་ལ་ཚོགས་ལམ། སྦྱོར་ལམ། མཐོང་ལམ། སྒོམ་ལམ། མི་སློབ་ལམ་སྟེ་ལམ་ལྔའི་རྣམ་བཞག་དང༌། ཤེས་བཟོད་སྐད་ཅིག་བཅུ་དྲུག་ལས་དང་པོ་བཅོ་ལྔ་མཐོང་ལམ། བཅུ་དྲུག་པ་ལམ་རྗེས་ཤེས་སྒོམ་ལམ་ཡིན་ལ། དེ་དག་རིམ་ཅན་སྐྱེ་བར་འདོད་དོ། །ལམ་བདེན་ལ་ཤེས་པས་མ་ཁྱབ་སྟེ། ཟག་མེད་ཀྱི་ཕུང་པོ་ལྔ་ལམ་བདེན་དུ་འདོད་པའི་ཕྱིར། བྱང་ཕྱོགས་ཀྱི་ཆོས་སོ་བདུན་གྱི་རྣམ་བཞག་འདོད་ལ། ས་བཅུའི་རྣམ་བཞག་མི་འདོད་པ་ནི་རྟེན་གཞི་མདོ་སོགས་ཀྱི་དབང་གིས་ཡིན་ནོ། །གསུམ་པ་འབྲས་བུ་ནི། མཛོད་ལས། མྱུར་བ་སྲིད་པ་གསུམ་གྱི་ཐར། །ཞེས་སོགས་ལྟར་ཉན་ཐོས་ཀྱི་རིགས་ཅན་རྣམས་ཀྱིས་མི་རྟག་སོགས་བཅུ་དྲུག་ལ་ཚེ་གསུམ་སོགས་གོམས་པར་བྱས་ཏེ་ལམ་ལྔ་དང་རྒྱུན་ཞུགས་ཀྱི་འབྲས་བུ་སོགས་རིམ་གྱིས་ཐོབ་ནས་ཉན་ཐོས་ཀྱི་སྒོམ་ལམ་རྡོ་རྗེ་ལྟ་བུའི་ཏིང་ངེ་འཛིན་ལ་བརྟེན་ནས། ཉོན་མོངས་ཅན་གྱི་སྒྲིབ་པ་ཐོབ་པ་ཆད་པའི་ཚུལ་གྱིས་སྤངས་ཏེ་དགྲ་བཅོམ་པའི་འབྲས་བུ་མངོན་དུ་བྱས་པ་ཡིན་ནོ། །མཛོད་ལས། བསེ་རུ་བསྐལ་བ་བརྒྱ་ཡི་རྒྱུ། །ཞེས་གསུངས་པ་ལྟར་བསེ་རུ་རང་རྒྱལ་རྣམས་ཀྱིས་བདག་མེད་སོགས་བསྐལ་ཆེན་བརྒྱ་ལ་སོགས་པའི་བསོད་ནམས་ཀྱི་ཚོགས་དང་སྦྲེལ་ཏེ། ཚོགས་ལམ་ཆེན་པོ་མན་ཆད་དུ་ཉམས་སུ་བླངས་ཏེ་སྦྱོར་ལམ་དྲོད་ནས་མི་སློབ་ལམ་བར་སྟན་ཐོག་གཅིག་ལ་མངོན་དུ་བྱེད་དོ། །དམན་པའི་དགྲ་བཅོམ་གཉིས་སྤངས་རྟོགས་ལས་ཉམས་ནས་རྒྱུན་ཞུགས་སོགས་སུ་གྱུར་བ་ཡོད་དོ། །འོན་ཀྱང་ཚེ་དེར་སླར་སོར་ཆུད་དེ། མཛོད་ལས། འབྲས་ལས་ཉམས་པ་འཆི་བ་མེད། །ཅེས་སོ། །མཛོད་ལས། དེ་གྲངས་མེད་གསུམ་ལ་སངས་རྒྱས། །འབྱུང་ངོ་མར་ནི་འགྲིབ་པ་ཡི། །བརྒྱ་ཡི་བར་ལ་དེ་དག་འབྱུང༌། །ཞེས་བྱང་སེམས་རྣམས་ཀྱིས་ཚོགས་ལམ་གྱི་གནས་སྐབས་སུ་བསྐལ་ཆེན་གྲངས་མེད་གསུམ་གྱི་ཚོགས་བསགས་ཏེ་དུས་མར་འགྲིབ་ཀྱི་མགོ་ནས་ཚེ་ལོ་བརྒྱ་བ་ཡན་ཆད་འབྱུང་ཞིང༌། དེ་ནས་མཚན་བཟང་གི་རྒྱུ་བསྐལ་བ་བརྒྱར་བསྒྲུབས་ཏེ་སྲིད་པ་ཐ་མའི་ཚེ་བྱང་ཆུབ་ཀྱི་ཤིང་དྲུང་དུ་སྲོད་ལ་བདུད་བཏུལ། གུང་ལ་མཉམ་པར་བཞག་པའི་ཚེ་སྦྱོར་ལམ། མཐོང་ལམ། སྒོམ་ལམ་གསུམ་བསྒྲོད་དེ་ཐོ་རངས་སྐྱ་རེངས་ཤར་བ་ཙམ་ན་མི་སློབ་ལམ་མངོན་དུ་བྱེད་དོ། །དེས་ན་མཛད་པ་བཅུ་གཉིས་ལས་དང་པོ་དགུ་བྱང་སེམས་ཀྱི་མཛད་པ་དང༌། ཕྱི་མ་གསུམ་སངས་རྒྱས་ཀྱི་མཛད་པར་འདོད་དོ། །ཆོས་འཁོར་ལ་མཐོང་ལམ་གྱིས་ཁྱབ་སྟེ། བསྟན་པ་སྤྱི་འགྲེལ་གྱི་རྣམ་བཤད་ལས། བྱེ་བྲག་ཏུ་སྨྲ་བ་ནི། མཐོང་ལམ་ཁོ་ན་ཆོས་འཁོར་དུ་འདོད་པའི་རྒྱུ་མཚན་དང་བཅས་པ་མཛོད་དུ་བཤད་ལ། ཞེས་སོ། །བྱང་སེམས་སྲིད་པ་ཐ་མ་པས་བྱང་ཆུབ་མངོན་དུ་བྱེད་པའི་གནས་ནི། འདོད་ཁམས་སུ་ངེས་པས་འོག་མིན་སྟུག་པོ་བཀོད་པ་དང༌། ལོངས་སྐུའི་རྣམ་བཞག་མི་འདོད་དོ། །རྣམ་མཁྱེན་གྱི་རྣམ་བཞག་མི་བཞེད་པ་འདྲའོ། །ཆེད་དུ་བརྗོད་པའི་ཚོམ་ལས། ལུས་ཞིག་ཚོར་བ་བསིལ་བར་འགྱུར། །འདུ་ཤེས་འགག་ཅིང་འདུ་བྱེད་ཞི། །རྣམ་པར་ཤེས་པ་ནུབ་གྱུར་བ། །འདི་འདྲ་འདི་ནི་སྡུག་བསྔལ་མཐའ། །ཞེས་པ་ལྟར་ཐེག་པ་གསུམ་གྱི་དགྲ་བཅོམ་པ་ལ་ལྷག་བཅས་ཀྱིས་ཁྱབ་སྟེ། ལྷག་མེད་དུ་མྱ་ངན་ལས་འདས་པའི་ཚེ་མར་མེ་ཤི་བ་ལྟར་རིག་པ་རྒྱུན་ཆད་པར་འདོད་པའི་ཕྱིར་ཏེ། ཐེག་མཆོག་དབུ་མའི་ཟིན་བྲིས་ལས། ཐོབ་བྱའི་ཡུལ་གཏན་མེད་དུ་འདོད་པ་ནི། ཉན་ཐོས་སྡེ་གཉིས་ཀྱི་འདོད་པ་ལྟར་སྟོན་པ་སངས་རྒྱས་ཉིད་དུ་ཇི་སྲིད་མྱ་ངན་ལས་མ་འདས་པར་སེམས་ཅན་གྱི་དོན་ཅི་ཙམ་མཛད་པ་དེ་ཡིན་གྱི་ཕུང་པོ་ལྷག་མ་མེད་པའི་མྱ་ངན་ལས་འདས་པའི་དབྱིངས་སུ་ཞུགས་པ་ན། དེ་སེམས་ཅན་གྱི་དོན་སྤྱོད་པ་ལ་སོགས་པ་མེད་པར་འགོག་པ་ཙམ་ལ་གནས་པ་ཡིན་ཟེར། ཞེས་གསུངས་སོ། །བྱེ་མདོ་གཉིས་ཀས་མཐར་ཐུག་ཐེག་གསུམ་འདོད་ལ། དེ་གཉིས་ལས་གཞན་རང་སྡེ་རྣམས་ཀྱིས་གནས་སྐབས་ཐེག་གསུམ་འདོད་པ་ཡོད་ཀྱང་མཐར་ཐུག་ཐེག་གཅིག་འདོད་དེ། གཞན་སྟོང་དབུ་མའི་རྒྱན་གྱི་ལུང་སྦྱོར་ལས། བྱེ་མདོ་གཉིས་ནི་ཐེག་པ་གསུམ་གར་མཐར་ཐུག་ཏུ་འདོད། ཀླུ་སྒྲུབ་དང་ཐོགས་མེད་རྗེས་འབྲང་མ་ཡིན་པའི་དབུ་སེམས་ཀྱི་ཐེག་ཆེན་པ་མང་པོ་ཞིག གནས་སྐབས་མཐར་ཐུག་གི་དབྱེ་བ་མེད་པར་ཐེག་པ་གཅིག་ཁོ་ནར་འདོད་མོད། །ཐལ་རང་གི་སློབ་དཔོན་རྣམས་ནི་གནས་སྐབས་ཐེག་གསུམ་དུ་མི་འདོད་མཁན་མེད་ལ། ཞེས་གསུངས་སོ། །མཛོད་ལས། གཟུགས་ཕུང་དེ་མིན་སངས་རྒྱས་མི་སློབ་ཆོས། །ཞེས་པ་ལྟར་སངས་རྒྱས་དཀོན་མཆོག་ནི་དེའི་ཐུགས་རྒྱུད་ཀྱི་ཟད་མི་སྐྱེའི་ཡེ་ཤེས་ལ་འདོད་དོ། །མཛོད་ལས། བདག་གིས་མངོན་པའི་ཆོས་འདི་ཕལ་ཆེར་ནི། །ཁ་ཆེ་བྱེ་བྲག་སྨྲ་བའི་ཚུལ་གྲུབ་བཤད། །ཅེས་པ་ལྟར་བྱེ་བྲག་སྨྲ་བའི་གྲུབ་མཐའི་ཁམས་ཀྱི་རབ་དབྱེ། དབང་བོ་ཉེར་གཉིས། སེམས་སེམས་བྱུང༌། རྒྱུ་དྲུག རྐྱེན་བཞི། རྟེན་འབྲེལ་བཅུ་གཉིས། ཁམས་གསུམ་གྱི་སྣོད་བཅུད། ལས་དང་ཕྲ་རྒྱས། དགྲ་བཅོམ་རིགས་དྲུག དགེ་འདུན་ཉི་ཤུ ཞུགས་གནས་བརྒྱད། བྱང་ཕྱོགས་སོ་བདུན། ཡེ་ཤེས། སྙོམས་འཇུག་བརྒྱད་སོགས་མཛོད་ལས་དེའི་ལུགས་བཞིན་བསྟན་ཡོད་པས་དེར་ཤེས་པར་བྱ་དགོས་སོ།། །། སྨྲས་པ། བྱེ་སྨྲའི་གཞི་ལམ་འབྲས་བུའི་རྣམ་བཞག་ཀུན། །མ་འདྲེས་གྲུབ་མཐའི་བཞེད་གཞུང་བ་གམ་བཀྲ །བློ་གྲོས་སྐབས་གསུམ་རོལ་བའི་ལྷའི་པད་ཚལ། །ལེགས་བཤད་རྐང་འཐུང་ཕྲེང་བས་ཕྱོགས་ཀུན་མཛེས། །ཞེས་གྲུབ་མཐའི་རྣམ་བཞག་ལུང་རིགས་གཏེར་མཛོད་ལེགས་བཤད་འདོད་འཇོ་ཞེས་བྱ་བ་ལས་བྱེ་བྲག་སྨྲ་བའི་གྲུབ་མཐའི་སྐབས་ཀྱི་ངལ་གསོ་བའི་ཚིགས་སུ་བཅད་པའོ།། །། གཉིས་པ་མདོ་སྡེ་པའི་གྲུབ་མཐའ་བཤད་པ།གཉིས་པ་མདོ་སྡེ་པའི་གྲུབ་མཐའ་བཤད་པ་ལ། མཚན་ཉིད། དབྱེ་བ། སྒྲ་བཤད། འདོད་ཚུལ་དང་བཞི། དང་པོ་ནི། རང་རིག་དང་ཤེས་པ་ཡུལ་གྱི་རྣམ་ལྡན་དུ་སྐྱེ་བར་ཁས་ལེན་པའི་ཐེག་དམན་གྱི་གྲུབ་མཐའ་སྨྲ་བ་དེ། མདོ་སྡེ་བའི་མཚན་ཉིད་ཡིན་ཏེ། ཕར་ཊཱིཀ་ཡིད་ཀྱི་མུན་སེལ་ལས། མདོ་སྡེ་བའི་མཚན་ཉིད་ནི། ཉན་ཐོས་པ་གང་ཞིག བློ་རང་རིག་ཡོད་པར་འདོད་པའོ། །ཞེས་གསུངས་སོ། །མདོ་སྡེ་པ་ལ་རང་རིག་འདོད་པས་ཁྱབ་མ་ཁྱབ་ཅུང་ཟད་དཔྱད་རྒྱུ་སྣང་ངོ༌། །སློབ་དཔོན་ནི། རྒྱ་གར་ཆོས་འབྱུང་ལས། ཁ་ཆེའི་ཡུལ་དུ་མདོ་སྡེ་བའི་སློབ་དཔོན་ཆེན་པོ་དཔལ་ལེན། ཞེས་དང༌། ཐེག་མཆོག་དབུ་མའི་ཟིན་བྲིས་ལས། མདོ་སྡེ་བའི་བཙུན་པ་མིའུ་ཐུང༌། ཞེས་པ་ལྟར་རོ། ། གཉིས་པ་དབྱེ་བ་ནི། གཟུང་འཛིན་གྲངས་མཉམ་པ་དང༌། སྣ་ཚོགས་གཉིས་མེད་པ་དང༌། སྣ་ཚོགས་རིམ་འཛིན་པ་དང་གསུམ་ཡོད་དེ། དབྱེ་བ་དེ་གསུམ་སེམས་ཙམ་པ་ལ་ཡོད་ཀྱང་མདོ་སྡེ་པ་ལ་དེ་གསུམ་འཇོག་དགོས་པ་དབུ་མ་རྒྱན་དང་དེའི་འགྲེལ་བ་དང་འགྲེལ་བཤད་རྣམས་སུ་གསལ་བའི་ཕྱིར་ཏེ། དེ་གསུམ་བཤད་པའི་སྐབས་སུ་འགྲེལ་བཤད་ལས། གང་དག་ཅེས་བྱ་བ་ནི་ ཕྱི་རོལ་གྱི་དོན་ཡོད་པར་སྨྲ་བ་ཁ་ཅིག་ཁོ་ན་སྟེ། ཞེས་སོགས་གསུངས་པས་སེམས་ཙམ་པས་ཕྱི་དོན་མི་འདོད་པས་མདོ་སྡེ་བ་ལས་འོས་མེད་དོ། །ཡང་མདོ་སྡེ་པ་ལ། སྔ་རབས་པ་དང༌། ཕྱི་རབས་པ་གཉིས་འཇོག་དགོས་སམ་སྙམ་སྟེ། འགྲེལ་ཆེན་དྲི་མེད་འོད་སོགས་ལས་གསུངས་པའི་མདོ་སྡེ་བ་དེ་སྔ་རབས་པ་དང༌། རྣམ་འགྲེལ་ལེའུ་གསུམ་པའི་སྐབས་སུ་ཚད་མ་ལ་གཉིས་སུ་གྲངས་ངེས་པའི་རྒྱུ་མཚན་གཞལ་བྱ་ལ་རང་སྤྱི་གཉིས་སུ་ངེས་པ་དང༌། དོན་དམ་པར་དོན་བྱེད་ནུས་པ་དང་མི་ནུས་པ་གཉིས་སུ་ངེས་པས་གཞལ་བྱ་ལ་རང་སྤྱི་གཉིས་སུ་ངེས་པར་སྒྲུབ་པ་མདོ་སྡེ་བའི་ལུགས་ལས་འོས་མེད་པ་ཡིན་སྙམ། རྣམ་འགྲེལ་ལས་དེ་ལྟར་གསུངས་པ་ཡིན་ཏེ། རྣམ་འགྲེལ་ལས། གཞལ་བྱ་གཉིས་ཕྱིར་ཚད་མ་གཉིས། །ཞེས་དང༌། དོན་དམ་དོན་བྱེད་ནུས་པ་གང༌། །དེ་འདིར་དོན་དམ་ཡོད་པ་ཡིན། །གཞན་ནི་ཀུན་རྫོབ་ཡོད་པ་སྟེ། །དེ་དག་རང་སྤྱིའི་མཚན་ཉིད་བཤད། །ཅེས་དང༌། དེའི་དོན་མཚལ་མིན་པ་བསོད་ནམས་བཟང་པོའི་རྣམ་འགྲེལ་འགྲེལ་བཤད་ལས། གཞལ་བྱ་ཆོས་ཅན། རང་སྤྱི་གཉིས་སུ་ངེས་ཏེ།དོན་དམ་པར་དོན་བྱེད་ནུས་པ་དང་མི་ནུས་པ་གཉིས་སུ་ངེས་པས་སོ། །ཞེས་སོགས་གསུངས་སོ། །འོན་ཀྱང་རང་ལུགས་ཀྱི་གཞུང་རྣམས་སུ་རྣམ་འགྲེལ་རྗེས་འབྲང་གི་མདོ་སྡེ་བའི་ལུགས་གསལ་ཁ་མེད་པས་དཔྱད་པར་བྱའོ། ། གསུམ་པ་སྒྲ་བཤད་པ་ནི། མངོན་པ་སྡེ་བདུན་བཀར་མི་འདོད་ཅིང་བྱེ་བྲག་བཤད་པ་སོགས་ལ་འཁྲུལ་བ་ཡོད་པས་གྲུབ་མཐའ་ནི་མདོ་སྡེ་དང་བསྟུན་ནས་བཞག་པས་ན་མདོ་སྡེ་བ་ཞེས་བརྗོད་པ་ཡིན་ཏེ། བདེ་གཤེགས་གཞུང་གི་རང་འགྲེལ་ལས། དེ་ལྟར་མདོ་སྡེ་སྒོ་ནས་སྤྱོད་པའི་མདོ་སྡེ་པ་རྣམས་ཀྱིས། ཞེས་དང༌། མཛོད་འགྲེལ་ལས། ཁོ་བོ་ཅག་མདོ་ཚད་མ་བྱེད་ཀྱི་བསྟན་བཅོས་ཚད་མར་མི་བྱེད།ཅེས་དང༌། གཞན་སྟོང་དབུ་མའི་སྙིང་པོ་ལས། མངོན་པ་སྡེ་བདུན་སོགས་ནི་བཀའ་མ་ཡིན་ཞིང༌། བྱེ་བྲག་བཤད་པ་སོགས་བསྟན་བཅོས་ལ་འཁྲུལ་བ་ཡོད་པས་གྲུབ་མཐའ་ནི་མདོ་སྡེ་དང་བསྟུན་དགོས་པར་འདོད་དོ། །ཞེས་གསུངས་སོ། །བྱེ་མདོ་གཉིས་ཀའི་ཐེག་ཆེན་གྱི་མདོ་བཀར་ཁས་མི་ལེན་པར་སྡེ་སྣོད་ནི་ཉན་ཐོས་ལ་གསུངས་པའི་སྡེ་སྣོད་ཁོ་ན་འདོད་དེ། གཞན་སྟོང་སྙིང་པོ་ལས། གྲུབ་མཐའ་སྨྲ་བའི་སྡེ་འདི་གཉིས་ཀས་ཀྱང་སངས་རྒྱས་ཀྱི་བཀའ་ནི། ཉན་ཐོས་ཀྱི་ཆེད་དུ་གསུངས་པའི་སྡེ་སྣོད་འདི་རྣམས་ཁོ་ན་ཡིན་ཞིང༌། ཤེར་ཕྱིན་དཀོན་བརྩེགས་ཕལ་ཆེན་སོགས་ཐེག་ཆེན་གྱི་མདོར་གྲགས་པ་འདི་ཀུན་ནི་རྒྱལ་བའི་བཀའ་མ་ཡིན་ནོ། །ཐེག་པ་ཆེ་ཆུང་ནི་གང་ཟག་གི་བྱ་བའི་ཁྱད་པར་ཡིན་གྱི་གསུང་རབ་ཐ་དད་པ་མེད་དོ། །ཞེས་ཟེར་རོ། །ཞེས་གསུངས་སོ། །མདོ་སྡེ་བ་འདི་ལ་མཛོད་རང་འགྲེལ་དུ་སྐབས་འགར་དཔེ་སྟོན་པ་ཞེས་གསུངས་སོ། ། བཞི་བ་འདོད་ཚུལ་ལ། གཞིའི་འདོད་ཚུལ། ལམ་གྱི་འདོད་ཚུལ། འབྲས་བུའི་འདོད་ཚུལ་དང་གསུམ་ལས། དང་པོ་གཞི་ནི། དྲི་མེད་འོད་ལས། ཤེས་པ་རྣམ་བཅས་སྐྱེད་བྱེད་ནི། །དབང་པོའི་སྤྱོད་ཡུལ་སྣང་བ་མིན། །ནམ་མཁའ་མོ་གཤམ་བུ་དང་མཚུངས། །འགོག་པ་དང་ནི་ནམ་མཁའ་མཚུངས། །འདུ་བྱེད་བེམ་པོ་ཡོད་མ་ཡིན། །དུས་གསུམ་རྗེས་འགྲོ་དག་ཀྱང་མེད༌། །ཐོགས་པ་མེད་པའི་གཟུགས་ཡོད་མིན། །ཞེས་པ་མདོ་སྡེ་པ་ཡིས་རིག །ཞེས་དང༌། འཇམ་དཔལ་ཞལ་ལུང་ལས། རང་གི་རིག་པ་སྐྱེད་བྱེད་པ། །བལྟ་བྱ་སྤྱོད་ཡུལ་རྣམ་པ་ནི། །འདུས་མ་བྱས་པ་གསུམ་པོ་དག །མོ་གཤམ་བུ་བཞིན་མེད་པ་དང༌། །འདུ་བྱེད་ཐམས་ཅད་བེམ་ལྡོག་དང༌། །དུས་གསུམ་རྒྱུ་བ་མ་ཡིན་དང༌། །དམན་མིན་ཐོགས་མེད་གཟུགས་སུ་ནི། །མདོ་སྡེ་པ་ཡིས་རབ་ཏུ་རྟོགས། །ཞེས་གསུངས་པ་ལྟར་བླང་དོར་རབ་གསལ་ལས། མདོ་སྡེ་པ་དག་ཤེས་པ་ལ་སྣང་བའི། །ཡུལ་གྱི་རྣམ་པ་ཤེས་པ་ཉིད་ཡིན་གྱི། །རང་བས་སྔ་བ་རྣམ་པ་གཏོད་བྱེད་ཀྱི། །གཟུང་དོན་དབང་ཤེས་དེ་ཡི་སྤྱོད་ཡུལ་མིན། །ཞེས་པ་ལྟར་ཤེས་བྱ་གཞི་ལྔའི་ནང་ནས་སེམས་དབང་པོའི་ཤེས་པ་ལ་སྣང་བའི་ཡུལ་གྱི་རྣམ་པ་དེ་ཤེས་པ་ཉིད་ཡིན་གྱི་རང་བས་སྐད་ཅིག་གིས་སྔ་བ་རྣམ་པ་གཏོད་བྱེད་ཀྱི་གཟུང་དོན་ནི་དབང་ཤེས་དེའི་སྤྱོད་ཡུལ་དུ་སྣང་བ་མ་ཡིན་ཏེ། དུས་མི་མཉམ་པའི་ཕྱིར། གཟུང་འཛིན་དུས་མི་མཉམ་ཡང་འདྲ་བ་སྐྱེད་བྱེད་ཡུལ་དང་འདྲ་བར་བསྐྱེད་པས་ཡུལ་ཅན་དུ་འཇོག་སྟེ། རྣམ་འགྲེལ་ལས། དུས་ཐ་དད་པས་ཅི་ལྟར་བཟུང་། །ཞེ་ན་རིགས་པ་ཤེས་བྱ་ཡིས། །ཤེས་པའི་རྣམ་པ་འཇོག་ནུས་པའི། །རྒྱུ་ཉིད་ལ་ནི་གཟུང་པར་ཤེས། །ཞེས་གསུངས་པ་ལྟར་རོ། །སེམས་བྱུང་ཡང་ཡུལ་གྱི་རྣམ་པ་དང་བཅས་པའི་རྫས་སུ་གྲུབ་པར་འདོད་ཅིང༌། གཉིས་ཀ་ཡང་ཤེལ་དག་པ་ལ་སྣང་བའི་ཚོན་གྱི་ཁ་དོག་ཤེལ་གྱི་ངོ་བོ་ཡིན་པ་ལྟར་རང་དང་ངོ་བོ་གཅིག་པའི་དོན་གྱི་རྣམ་པར་རིག་པས་རང་རིག་མཚན་ཉིད་པ་དང་དོན་རིག་བཏགས་པ་བ་སྟེ། དོན་འཇོག་དེ་ཡི་བདག་ཉིད་ཕྱིར། །རང་རིག་ཡིན་ཡང་དོན་རིག་ཉིད། །ཅེས་གསུངས་པ་ལྟར་རོ། །གཟུགས་ཀྱི་གཞི་ཡང་སྔ་མ་ལྟར་རྩོམ་བྱེད་རྡུལ་ཕྲན་དང་དེས་བརྩམས་པའི་རགས་པ་གཉིས་ཡིན་ལ། རྡུལ་ཕྲན་རྣམས་ནི་མ་རེག་ཀྱང་བར་མེད་པས་རེག་པས་འདུ་ཤེས་སོ་ཞེས་པ་ལྟར་ཕན་ཚུན་མ་རེག་པ་ཡང་ཡིན་ལ་བར་མེད་པ་ཡང་ཡིན་པའི་རྫས་སུ་གྲུབ་པར་འདོད་དོ། །བྱེ་བྲག་སྨྲ་བས་ཕུང་སོགས་གང་ཟག་གི་བདག་གིས་སྟོང་ཞིང་གཟུགས་སོགས་རགས་པ་རྣམས་རྡུལ་རྫས་བརྒྱད་འདུས་དང་དེའི་ཚོགས་པའི་ཆོས་ཙམ་དུ་བདེན་ཞེས་འདོད་ཅིང༌། མདོ་སྡེ་བས་འདོད་ཁམས་ཀྱི་གཟུགས་རགས་པ་རྣམས་རྡུལ་རྫས་བརྒྱད་འདུས་སུ་མ་ངེས་པར་འདོད་དེ། བསྟན་པ་སྤྱི་འགྲེལ་གྱི་རྣམ་བཤད་ལས། ཆོས་འཁོར་དང་པོས་ཕུང་པོ་སོགས་ཆོས་ཐམས་ཅད་གང་ཟག་གི་བདག་གིས་སྟོང་ཞིང༌། གཟུགས་སོགས་ཕྱིའི་རགས་པ་འདི་དག་འབྱུང་བ་བཞི་དང༌། འབྱུང་འགྱུར་བཞི་སྟེ་རྡུལ་རྫས་བརྒྱད་འདུས་སམ་རྡུལ་ཕྲན་ཚོགས་པའི་ཆོས་ཙམ་དུ་བདེན་པར་གསུངས་ཏེ། མཛོད་དུ། བདག་མེད་ཕུང་པོ་ཙམ་ཉིད་དོ། །ཞེས་པ་ལྟར་རོ། །བྱེ་བྲག་སྨྲ་བ་དེར་མཐའ་གཅིག་ཏུ་ཁས་ལེན་ལ། མདོ་སྡེ་ནི་ཕལ་ཆེར་དེ་ལྟར་ཡིན་ཡང་མཐའ་གཅིག་ཏུ་མ་ངེས་སྟེ། ས་རྡོག་སྐམ་པོ་ལྟ་བུ་འབྱུང་བ་གཅིག་ལས་གྱུར་པ་དང༌། ས་རྡོག་དེ་ཉིད་རླན་དང་བཅས་པ་འབྱུང་བ་གཉིས་ལས་གྱུར་པ། ཞེས་པ་ནས། གང་དམིགས་པ་དེ་དེ་ན་ཡོད་ཀྱི་གཞན་དུ་མིན་ནོ། །ཞེས་སློབ་དཔོན་རྒྱལ་པོའི་སྲས་ཀྱིས་བཤད་དེ། མངོན་པ་ཀུན་ལས་བཏུས་ཀྱི་དོན་ནོ། །ཞེས་གསུངས་སོ། །བདེན་གཉིས་ཀྱི་མཚན་ཉིད་བྱེ་བྲག་སྨྲ་བ་ལྟར་འཇོག་པ་ཡིན་ཏེ། མདོ་སྡེ་བའི་སྐབས་སུ་བསྟན་པ་སྤྱི་འགྲེལ་གྱི་རྣམ་བཤད་ལས། རིགས་པས་ལེགས་པར་བརྟགས་ཤིང་དཔྱད་པའི་མཐར་ཐུག་གི་དོན་དམ་དུ་ཕྱིའི་རྡུལ་ཕྲན་ཆ་མེད་རེ་རེ་བ་བདེན་པར་ཡོད། ཕྱིའི་རགས་པ་དང་ཕྱི་ནང་གི་དངོས་པོའི་རྒྱུན་ནི་བརྟགས་ཤིང་དཔྱད་པའི་མཐར་ཐུག་གི་དོན་དམ་དུ་མེད་དེ། རྫ་བུམ་སོགས་ཐོ་བ་སོགས་ཀྱིས་བཅོམ་ཞིང་ཕྱེ་མར་བཏང་བ་ན། ཞིག་པའི་ཕྱིར་བུམ་པའི་བློ་མི་འཇུག་པ། ཞེས་པ་ནས། རྡུལ་ཕྲན་ཆ་མེད་རེ་རེ་བ་ནི་བཅོམ་དང་བློ་ཡི་གཞན་བསལ་ཡང་དེ་བློ་མི་འདོར་བས་དོན་དམ་དུ་བདེན་ཞེས་ཏེ། མཛོད་ལས། གང་ལ་བཅོམ་དང་བློ་ཡིས་གཞན། །བསལ་ན་དེའི་བློ་མི་འཇུག་པ། །བུམ་ཆུ་བཞིན་དུ་ཀུན་རྫོབ་ཏུ། །ཡོད་དེ་དོན་དམ་ཡོད་གཞན་ནོ། །ཞེས་སོ། །བླང་དོར་རབ་གསལ་ལས། འདུས་མ་བྱས་གསུམ་མེད་དགག་ཡིན་པས་ན། །མོ་གཤམ་བུ་བཞིན་རྫས་སུ་གྲུབ་པ་མེད། །ལྡན་མིན་འདུ་བྱེད་གཟུགས་སེམས་སེམས་བྱུང་གི །གནས་སྐབས་ཡིན་གྱི་བེམ་པོ་རྫས་གྲུབ་མིན། །ཞེས་པ་ལྟར་འདུས་མ་བྱས་ཀྱི་ནམ་མཁའ་དང་སོ་སོར་བརྟག་པའི་འགོག་པ་དང་སོ་སོར་བརྟག་མིན་གྱི་འགོག་པ་གསུམ་ནི་དགག་བྱ་བཀག་པའི་མེད་དགག་ཙམ་ཡིན་པའི་ཕྱིར་མོ་གཤམ་གྱི་བུ་དང་འདྲ་བར་རྫས་སུ་གྲུབ་པ་མེད་ཅིང༌། ལྡན་མིན་འདུ་བྱེད་ཀྱང་གཟུགས་དང་སེམས་དང་སེམས་བྱུང་གི་གནས་སྐབས་ལ་བཏགས་པ་ཙམ་ཡིན་གྱི། དེ་གསུམ་ལས་རྫས་ཐ་དད་དུ་གྲུབ་པའི་དངོས་པོར་ཡོད་པ་མ་ཡིན་ནོ། །ཡང་བླང་དོར་རབ་གསལ་ལས། དུས་གསུམ་འདུས་བྱས་སྔ་ཕྱི་ལ་ལྟོས་ནས། །བཏགས་པ་ཡིན་གྱི་རྫས་གྲུབ་མིན་པར་འདོད། །ཅེས་དང༌། དབུས་དང་མཐའ་རྣམ་པར་འབྱེད་པ་ལས། འབྲས་བུ་རྒྱུ་རྣམས་སྤྱད་ཟིན་དང༌། །དེ་བཞིན་མ་སྤྱད་གཞན་ཡིན་ནོ། །ཞེས་གསུངས་པ་ལྟར། དུས་གསུམ་ནི་འདུས་བྱས་རྒྱུ་འབྲས་སྔ་ཕྱི་ལ་ལྟོས་ནས་བཏགས་པ་ཡིན་གྱི་གཅིག་ནས་གཅིག་ཏུ་འགྲོ་བའི་རྫས་སུ་གྲུབ་པ་ནི་མེད་པར་འདོད་དོ། ། གཉིས་པ་ལམ་གྱི་རྣམ་བཞག་བཤད་པ།གཉིས་པ་ལམ་གྱི་རྣམ་བཞག་བཤད་པ་ལ། ལམ་གྱི་དམིགས་པ། ལམ་གྱི་སྤང་བྱ། ལམ་གྱི་རང་བཞིན་བཤད་པ་དང་གསུམ། དང་པོ་ནི། བདེན་བཞིའི་རྣམ་པ་མི་རྟག་བཅུ་དྲུག་དང༌། རྟེན་འབྲེལ་ཡན་ལག་བཅུ་གཉིས་རྣམས་སོ། །གཉིས་པ་ལམ་གྱི་སྤང་བྱ་ནི། གང་ཟག་གི་བདག་འཛིན་དང༌། ཉོན་མོངས་ཅན་དང༌། ཉོན་མོངས་ཅན་མ་ཡིན་པའི་སྒྲིབ་པ་བཞག་པ་སོགས་བྱེ་སྨྲ་དང་འདྲའོ། །གསུམ་པ་ལམ་གྱི་རང་བཞིན་ནི། ཐེག་པ་གསུམ་གྱི་ལམ་ལ་ཚོགས་སྦྱོར་སོགས་ལམ་ལྔའི་རྣམ་བཞག་བྱེད་དོ། །ཤེས་བཟོད་སྐད་ཅིག་མ་བཅུ་དྲུག་པོ་མཐོང་ལམ་དུ་འདོད་པའོ། །གསུམ་པ་འབྲས་བུའི་འདོད་ཚུལ་ནི། དགྲ་བཅོམ་པ་སྤངས་རྟོགས་ལས་ཉམས་པ་མི་སྲིད་པ་དང༌། སངས་རྒྱས་ཀྱི་གཟུགས་ཕུང་སངས་རྒྱས་སུ་ཁས་ལེན་པའོ། །ལྷག་མེད་མྱང་འདས་མངོན་དུ་བྱེད་ཚུལ་ཡང་བྱེ་སྨྲ་ལྟར་ཡིན་ཏེ། གྲུབ་མཐའི་རྣམ་བཞག་དོན་གསལ་ལས། མདོ་སྡེ་བ་ནི་མྱང་འདས་ཀྱི། །འབྲས་བུ་མར་མེ་བརྣལ་བ་ལྟར། །དཔྱད་ན་ཅུང་ཟད་མེད་པར་འདོད། །ཅེས་དང༌། བླང་དོར་རབ་གསལ་ལས། མྱ་ངན་འདས་ནས་ཐོགས་པ་མེད་པའི་གཟུགས། །ངོ་བོར་གྲུབ་པ་མེད་པར་འདོད་ན་ཡང༌། །ཞེས་མྱ་ངན་ལས་འདས་པ་ན། མར་མེ་ཤི་བར་གྱུར་པ་བཞིན། །དེ་ཡི་སེམས་ནི་རྣམ་པར་རོལ། །ཅེས་གསུངས་པ་ལྟར། ཐོགས་པ་མེད་པའི་ཡེ་ཤེས་ཀྱི་སྐུའམ་གཟུགས་སུ་གྲུབ་པ་ཅུང་ཟད་ཀྱང་མེད་པར་འདོད་དོ། །དེ་དགག་པ་ནི། གྲུབ་མཐའ་དོན་གསལ་ལས། གཅེར་བུ་བ་དང་མཚུངས་པའི་ཕྱིར། །ཞེས་དང༌། བླང་དོར་རབ་གསལ་ལས། འབྲས་བུ་ཐོབ་ནས་མར་མེ་བརྣལ་བ་དང༌། །མཚུངས་པར་ཅི་ཡང་མེད་པ་མ་ཡིན་ཏེ། །སྐུ་དང་ཡེ་ཤེས་རྫུ་འཕྲུལ་མངོན་ཤེས་སོགས། །དོན་གཉིས་ཕུན་སུམ་ཚོགས་པ་ཡོད་ཕྱིར་རོ། །ཞེས་པ་ལྟར་འབྲས་བུ་མཐར་ཐུག་མྱ་ངན་ལས་འདས་པ་ཐོབ་པ་ན་རྡུལ་ཕྲ་རགས་ཀྱི་ཆོས་ལས་འདས་པ་ཐོགས་པ་མེད་པའི་ཡེ་ཤེས་ཀྱི་གཟུགས་སམ་སྐུས་དུས་གསུམ་རིག་པ་མེད་ན། སངས་རྒྱས་དེ་ཐམས་ཅད་མཁྱེན་པ་མ་ཡིན་པ་དང༌། སྐུ་བཞི་དང་ལྡན་པ་མ་ཡིན་པ་དང༌། རྣམ་པ་ཐམས་ཅད་པའི་རྫུ་འཕྲུལ་སྟོན་པ་མ་ཡིན་པ་དང༌། སེམས་ཅན་ཐམས་ཅད་ཀྱི་སྐད་ཀྱིས་ཆོས་སྟོན་པ་པོ་མ་ཡིན་པ་ལ་སོགས་པར་ཐལ་བར་འགྱུར་བ་ལས་དེ་ལྟར་ཡང་མ་ཡིན་ཏེ། མཚན་ཡང་དག་པར་བརྗོད་པ་ལས། སངས་རྒྱས་སྐུ་ལྔའི་བདག་ཉིད་ཅན། །ཁྱབ་བདག་ཡེ་ཤེས་ལྔ་ཡི་བདག །སངས་རྒྱས་ལྔ་བདག་ཅོད་པཎ་ཅན། །སྤྱན་ལྔ་ཆགས་པ་མེད་པ་འཆང༌། །ཞེས་པ་ལ་སོགས་པ་གསུངས་པ་ལྟར། མི་གནས་པའི་མྱ་ངན་ལས་འདས་པ་ཐོབ་པ་ན་སྐུ་བཞི་དང་ཡེ་ཤེས་ལྔ་དང་མངོན་པར་ཤེས་པ་དྲུག་ལ་སོགས་པ་དོན་གཉིས་མཐར་ཕྱིན་པའི་ཡོན་ཏན་ཕུན་སུམ་ཚོགས་པ་མཐའ་ཡས་པ་མངའ་བའི་ཕྱིར་རོ། ། སྨྲས་པ། མདོ་སྡེ་ཚད་མར་བྱེད་པའི་གྲུབ་མཐའ་ཡི། །གཞི་ལམ་འབྲས་གསུམ་འདབ་བརྒྱའི་སྦྲང་རྩིའི་དཔལ། །བློ་ལྡན་རྐང་དྲུག་གསོས་སུ་སྨིན་གྱུར་ནས། །ཐུབ་བསྟན་ཕྱོགས་ཀུན་དར་ཞིང་རྒྱས་གྱུར་ཅིག །ཅེས་གྲུབ་མཐའི་རྣམ་བཞག་ལུང་རིགས་གཏེར་མཛོད་ལེགས་བཤད་འདོད་འཇོ་ལས་མདོ་སྡེ་བའི་གྲུབ་མཐའི་སྐབས་ཀྱི་ངལ་གསོ་བའི་ཚིགས་སུ་བཅད་པའོ།། །། གསུམ་པ་སེམས་ཙམ་པའི་གྲུབ་མཐའ་བཤད་པ།གསུམ་པ་སེམས་ཙམ་པའི་གྲུབ་མཐའ་བཤད་པ་ལ། མཚན་ཉིད། དབྱེ་བ། སྒྲ་བཤད། འདོད་ཚུལ་བཤད་པ་དང་བཞི། དང་པོ་ནི། ཕྱི་དོན་དུ་མ་གྲུབ་ཅིང་རང་རིག་པའི་འདུས་བྱས་བདེན་དངོས་འདོད་པའི་ཐེག་ཆེན་གྱི་གྲུབ་མཐའ་སྨྲ་བ་དེ། སེམས་ཙམ་པའི་མཚན་ཉིད་ཡིན་ཏེ། ཉ་ཊཱིཀ་ཡིད་ཀྱི་མུན་སེལ་ལས། སེམས་ཙམ་པའི་མཚན་ཉིད། ཐེག་ཆེན་པ་གང་ཞིག རང་རིག་པའི་འདུས་བྱས་བདེན་དངོས་འདོད་པའོ། །ཞེས་གསུངས་སོ། ། གཉིས་པ་དབྱེ་བ་ནི། སེམས་ཙམ་རྣམ་བདེན་པ་དང༌། སེམས་ཙམ་རྣམ་བརྫུན་གཉིས། དེ་གཉིས་ཀྱི་མཚན་ཉིད་དབྱེ་བ་དང་བཅས་ཏེ་འཆད་པར། ཕར་ཊཱིཀ་ཡིད་ཀྱི་མུན་སེལ་ལས། དབྱེ་ན། སེམས་ཙམ་རྣམ་བདེན་པའི་མཚན་ཉིད། ཐེག་ཆེན་སེམས་ཙམ་པ་གང་ཞིག སྒོ་ལྔའི་དོན་སྣང་དོན་དམ་པར་སེམས་སུ་བདེན་པར་འདོད་པའོ། །སེམས་ཙམ་རྣམ་བརྫུན་པའི་མཚན་ཉིད། གང་ཞིག དེ་དོན་དམ་པར་སེམས་སུ་མི་བདེན་པར་འདོད་པའོ། །ཞེས་གསུངས་སོ། ། གསུམ་པ་སྒྲ་བཤད་ནི། རྒྱུ་མཚན་ཅིའི་ཕྱིར་སེམས་ཙམ་པ་ཞེས་བྱ་ཞེ་ན། ཆོས་ཐམས་ཅད་སེམས་ཀྱི་བདག་ཉིད་ཙམ་དུ་སྨྲ་བས་སེམས་ཙམ་པའམ་རྣམ་རིག་པ་དང༌། རྣལ་འབྱོར་བའི་གཞིའི་སྒོ་ནས་ལམ་གྱི་སྤྱོད་པ་ཉམས་ལེན་གཏན་ལ་འབེབས་པས་རྣལ་འབྱོར་སྤྱོད་པ་བ་ཞེས་བྱ་སྟེ། མདོ་ལས། ཀྱེ་རྒྱལ་བའི་སྲས་དག་ཁམས་གསུམ་པོ་འདི་ནི་སེམས་ཙམ་སྟེ། ཞེས་སོགས་གསུངས་པའི་ཕྱིར་རོ། ། བཞི་བ་འདོད་ཚུལ་ལ། གཞིའི་འདོད་ཚུལ། ལམ་གྱི་འདོད་ཚུལ། འབྲས་བུའི་འདོད་ཚུལ་དང་གསུམ། དང་པོ་ནི། དྲི་མེད་འོད་ལས། ཡན་ལག་ཅན་ཞེས་བྱ་བ་མེད། །ཕྲ་རབ་རྡུལ་ཡང་ཡོད་མ་ཡིན། །རྨི་ལམ་ཉམས་སུ་མྱོང་བ་བཞིན། །དམིགས་པ་མེད་པར་རབ་ཏུ་སྣང༌། །གཟུང་དང་འཛིན་པའི་རྣམ་རོལ་བའི། །རྣམ་པར་ཤེས་པ་དོན་དམ་ཡོད། །ཅེས་པ་རྣམ་འབྱོར་སྤྱོད་པའི་གཞུང༌། །རྒྱ་མཚོའི་ཕ་རོལ་ཕྱིན་རྣམས་སྒྲོགས། །ཞེས་གསུངས་པ་ལྟར་འཆད་པ་སྟེ། བླང་དོར་རབ་གསལ་ལས། རྣལ་འབྱོར་སྤྱོད་པ་སེམས་ཙམ་སྨྲ་བ་དག །མུ་སྟེགས་ཅན་རྣམས་འདོད་པ་ལྟ་བུ་ཡི། །ཡན་ལག་ཅན་ཞེས་བྱ་བའི་བདག་མེད་ཅིང༌། །ཉན་ཐོས་སྡེ་གཉིས་འདོད་པ་ལྟ་བུ་ཡི། །ཕྲ་རབ་རྡུལ་ཡང་དཔྱད་ན་རྫས་གྲུབ་མེད། །རྨི་ལམ་སྣང་བ་བཞིན་དུ་ཕྱི་རོལ་གྱི། །དམིགས་པ་དོན་ལ་མེད་ཀྱང་བག་ཆགས་ཀྱི། །དབང་གིས་དོན་དུ་སྣང་བ་ཙམ་དུ་འདོད། །ཅེས་པ་ལྟར་མུ་སྟེགས་པ་རྣམས་ཀྱིས་བཏགས་པའི་རྟག་གཅིག་རང་དབང་ཅན་ལ་སོགས་པའི་ཡན་ལག་ཅན་ཞེས་བྱ་བའི་བདག་ནི་མེད་ཅིང༌། ཉི་ཤུ་པར། དྲུག་གིས་གཅིག་ཆར་སྦྱར་བ་ན། །ཕྲ་རབ་རྡུལ་ཆ་དྲུག་ཏུ་འགྱུར། །དྲུག་པོ་དག་ནི་གོ་གཅིག་ན། །གོང་བུའང་རྡུལ་ཕྲན་ཙམ་དུ་འགྱུར། །ཞེས་གསུངས་པ་ལ་སོགས་པའི་རིགས་པས་དཔྱད་ན། ཉན་ཐོས་སྡེ་པ་གཉིས་ཀྱི་འདོད་པའི་རྡུལ་ཕྲ་རབ་ཆ་མེད་དང༌། དེ་བསགས་པའི་ཕྱི་རོལ་གྱི་དོན་ཡང་བདེན་པར་ཡོད་པ་མ་ཡིན་ལ། ལང་ཀར་གཤེགས་པར། དོན་ཡོད་མ་ཡིན་སེམས་ཉིད་དེ། །ཕྱི་རོལ་དོན་མཐོང་ལོག་པ་ཡིན། ། ཞེས་པ་དང༌། བག་ཆགས་ཀྱིས་ནི་དཀྲུགས་པའི་སེམས། །དོན་དུ་སྣང་བ་རབ་ཏུ་འབྱུང༌། །ཞེས་གསུངས་པ་ལྟར། དོན་མེད་ཀྱང་གཟུགས་ཀྱི་གཞི་དོན་དུ་སྣང་པ་ནི་རྨི་ལམ་དུ་དོན་གྱི་རྣམ་པ་ཉམས་སུ་མྱོང་བ་བཞིན་དུ་བག་ཆགས་ཀྱི་དབང་གིས་སྣང་བ་ཙམ་ཡིན་ཞིང༌། བླང་དོར་རབ་གསལ་ལས། གཟུང་འཛིན་གཉིས་མེད་རང་རིག་རང་གསལ་གྱི། །རྣམ་ཤེས་དོན་དམ་ཡོད་པར་འདོད་མོད་ཀྱི། །ཤེས་པ་སྐད་ཅིག་ངོ་བོར་མ་གྲུབ་པས། །དེ་བསགས་རྒྱུན་ཡང་དོན་ལ་གྲུབ་པ་མེད། །ཅེས་པ་ལྟར་སེམས་ཀྱི་གཞི་རྣམ་པར་ཤེས་པ་ཚོགས་བརྒྱད་དང་དེ་དག་གི་འཁོར་སེམས་ལས་བྱུང་བ་ཐམས་ཅད་ཀྱང༌། གཟུང་དང་འཛིན་པ་མེད་པའི་ཕྱིར། །དེ་ནི་དེ་ལྟར་རང་ཉིད་གསལ། །ཞེས་པ་ལྟར་གཟུང་འཛིན་གྱི་དྲི་མས་མ་གོས་པའི་རང་རིག་རང་གསལ་དོན་དམ་པར་ཡོད་པར་འདོད་མོད། དེ་ལྟར་ཡང་རིགས་པ་མ་ཡིན་ཏེ། ཇི་སྐད་སྐད་ཅིག་མཐོང་བ་བཞིན། །ཐོག་མ་དབུས་ཀྱང་བརྟགས་པར་གྱིས། །ཐོག་མ་དབུས་དང་ཐ་མ་ཡང༌། །སྐད་ཅིག་བཞིན་དུ་བསམ་བྱས་ན། །འཇིག་རྟེན་སྐད་ཅིག་ལ་མི་གནས། །ཞེས་གསུངས་པ་ལྟར་ཤེས་པ་སྐད་ཅིག་གི་ངོ་བོར་བདེན་པར་མ་གྲུབ་པས་དེ་བསགས་པའི་རྒྱུན་ཡང་བདེན་པར་མི་འགྲུབ་པའི་ཕྱིར་དང༌། གཟུང་བ་མེད་ན་དེ་འཛིན་མེད། ཅེས་པ་ལྟར། གཟུང་བྱའི་ཡུལ་བདེན་པར་མ་གྲུབ་པས་དེ་འཛིན་གྱི་ཤེས་པའང་བདེན་པར་མ་གྲུབ་པའི་ཕྱིར་རོ། །སྔར་བཞིན་ལྡན་མིན་འདུ་བྱེད་ནི་སེམས་དང་སེམས་བྱུང་གི་གནས་སྐབས་ལ་བཏགས་པ་ཙམ་དང༌། འདུས་མ་བྱས་ཀྱང་མེད་དགག་ཡིན་པས་རྫས་སུ་གྲུབ་པ་མེད་པར་འདོད་དོ། །དེ་ལྟར་གཞན་སྟོང་སྙིང་པོ་ལས། སེམས་ཙམ་པ་ནི། གཟུགས་སོགས་ཕྱི་རོལ་གྱི་ཡུལ་རྣམས་རྨི་ལམ་གྱི་གཟུགས་སོགས་ལྟར་ཤེས་པ་ཉིད་དེ་དང་དེར་སྣང་བ་ཡིན་གྱི། ཕྱི་རོལ་ན་དེ་ལྟར་སྣང་བ་མེད་དེ་དཔེར་ན་གཟུགས་ལ་མཚོན་ན། མིག་གི་དབང་པོར་གྲགས་པ་ཡང༌། མིག་གི་རྣམ་པར་སྣང་བའི་སེམས་ཡིན་པས། མིག་རང་མཚན་པ་ཞིག་མེད་ལ། གཟུགས་སུ་གྲགས་པ་ཡང་གཟུགས་ཀྱི་རྣམ་པར་སྣང་བའི་སེམས་ཡིན་པས་གཟུགས་རང་མཚན་པ་ཞིག་མེད་ལ། གཟུགས་སུ་གྲགས་པ་ཡང་གཟུགས་ཀྱི་རྣམ་པར་སྣང་བའི་སེམས་ཡིན་པས་གཟུགས་རང་མཚན་པ་མེད་ཅིང་དེ་དག་ལས་མིག་གི་རྣམ་པར་ཤེས་པ་སྐྱེས་པར་སྣང་བ་ཙམ་ཡིན་པས༌། གསུམ་ཀར་ཡང་ཐ་དད་པར་སྣང་བ་ནི་འཁྲུལ་བ་ཡིན་ཅིང༌། ཤེས་པའི་ངོ་བོར་རྫས་གཅིག་པས། མིག་ཤེས་ཀྱི་གཟུགས་མཐོང་བ་ནི། རང་གིས་རང་མཐོང་བ་ཡིན་ཅིང༌། གཟུགས་ཀྱི་རྣམ་པ་འཆར་བའི་རྒྱུ། ཤེས་པ་ལས་གཞན་ཕྱི་རོལ་ཏུ་རྣམ་པ་གཏོད་བྱེད་གཟུགས་སུ་གྲུབ་པ་ནི་གཏན་ནས་མེད་དོ། །འོན་ཀྱང་མ་བརྟགས་མ་དཔྱད་པའི་ངོར་མིག་གིས་གཟུགས་མཐོང་ཞེས་སོགས་འདོད་ཀྱང༌། དཔྱད་ན་གཟུགས་ནི་མ་གྲུབ།གཟུགས་སུ་སྣང་བའི་ཤེས་པ་དེ་ནི་བདེན་པར་གྲུབ་བོ། །དེས་ན་འདི་ནི་རྣམ་ཤེས་སོགས་ཤེས་པ་ཐམས་ཅད་ཀྱི་ངོ་བོར་བདེན་པར་གྲུབ་ལ། ཡུལ་ཕྱི་རོལ་ན་ཡོད་པ་ལྟར་སྣང་བ་གཟུང་ཆ་དང༌། རིག་པ་ནང་ན་ཡོད་པ་ལྟར་སྣང་བ་འཛིན་ཆ་སྟེ་དེ་གཉིས་འཁྲུལ་བ་ཡིན་པས་ཕྱིར། གཟུང་འཛིན་གཉིས་མེད་ལ། གཟུང་འཛིན་གཉིས་སྤངས་པའི་རྣམ་པར་ཤེས་པ་ནི་བདེན་པར་འདོད་དོ། ཞེས་འདོད་པས་གཟུང་ཆ་དང་འཛིན་ཆ་གཉིས་ཐ་དད་མ་གྲུབ་པས་གཟུང་འཛིན་གཉིས་མེད་ཀྱི་གོ་ཆོད་པ་དང༌། རྣམ་ཤེས་ཀྱི་རང་ངོ་ཙམ་ཡེ་ཤེས་སུ་འདོད་པ་ཡིན་ནོ། །སེམས་ཙམ་ཁོ་རང་གི་རང་ལུགས་ཀྱི་གཟུང་འཛིན་བཀག་པར་རློམ་ཡང་གྲུབ་མཐའ་གོང་མས་གཞལ་ན་གཟུང་འཛིན་བཀག་པར་མ་སོང་སྟེ་གཟུང་འཛིན་རྫས་གཞན་མེད་པ་ཙམ་ཁས་བླངས་བ་ཡིན་ཀྱང༌། འཛིན་པ་རང་ངོས་ནས་ཁས་བླངས་བར་སོང་བས་སོ། །དེ་ལྟར་ན་འདིའི་འདོད་པའི་གཟུགས་སོགས་ཕྱི་དོན་དུ་སྣང་བའི་རྣམ་རིག་བདེན་གྲུབ་དང༌། རྣམ་ཤེས་ཀྱི་ངོ་ལྡོག་ཙམ་གཟུང་འཛིན་གཉིས་མིན་གྱི་ཡེ་ཤེས་སུ་འདོད་པ་དང༌། འཛིན་པའི་ངོ་བོ་རྣམ་ཤེས་ཉིད་ལ་མི་འདོད་པར་ཡུལ་དུ་སྣང་བའི་རྣམ་རིག་ལས་ཐ་དད་པར་སྣང་བའི་ཆ་ཙམ་ལ་འདོད་པ་ནི་འཁྲུལ་བ་ཡིན་ལ། གཞན་རྣམས་མ་ནོར་བའོ། །ཞེས་གསུངས་སོ། །ཡང་ལུགས་འདི་ལ་གྲུབ་མཐའི་རྣམ་བཞག་དོན་གསལ་ལས། སེམས་ཙམ་པས་ནི་ཆོས་རྣམས་ཀུན། །སྟོང་བ་ནམ་མཁའི་མེ་ཏོག་ལྟར། །ཆད་པར་ལྟ་བ་མ་རུང་པ། །མི་དབང་ཁྱོད་ཀྱིས་ཤེས་པར་འཚལ། །ཞེས་ཆོས་ཐམས་ཅད་སྟོང་བ་ནམ་མཁའི་མེ་ཏོག་ལྟར་དངོས་སུ་ཁས་མི་ལེན་ཡང་དོན་གྱིས་ཁས་ལེན་ཡིན་སྙམ་སྟེ་དཔྱད་པར་བྱའོ། །གཉིས་པ་ལམ་གྱི་འདོད་ཚུལ་ལ་གསུམ། དང་པོ་ལམ་གྱི་དམིགས་པ་ནི། བདེན་བཞིའི་ཁྱད་ཆོས་མི་རྟག་སོགས་བཅུ་དྲུག་དང༌།གཟུང་འཛིན་རྫས་ཐ་དད་དུ་གྲུབ་པས་སྟོང་བའི་ཆོས་ཀྱི་བདག་མེད་རྣམས་སོ། ། གཉིས་པ་ལམ་གྱི་སྤང་བྱ་ནི། རྩ་ཉོན་དྲུག ཉེ་ཉོན་ཉི་ཤུ་སོགས་ཉོན་སྒྲིབ་དང༌། ཆོས་ཀྱི་བདག་འཛིན་བག་ཆགས་དང་བཅས་པ་སོགས་ཤེས་སྒྲིབ་རྣམས་ཡིན་པའོ། །ཐེག་དམན་སློབ་པ་རྣམས་ཀྱིས་ཉོན་སྒྲིབ་སྤང་བྱའི་གཙོ་བོར་བྱེད་ཀྱང༌། ཤེས་སྒྲིབ་སྤང་བར་མི་བྱེད་དོ། །བྱང་སེམས་རྣམས་ཀྱིས་ཤེས་སྒྲིབ་སྤང་བྱའི་གཙོ་བོར་བྱེད་དོ། །གསུམ་པ་ལམ་གྱི་རང་བཞིན་ནི། ཐེག་པ་གསུམ་པོ་རེ་རེ་ལའང་ཚོགས་སྦྱོར་མཐོང་སྒོམ་མི་སློབ་ལམ་དང་ལྔའི་རྣམ་བཞག་བྱེད་དོ། །ལུགས་འདིར་ས་བཅུའི་རྣམ་བཞག་བྱེད་དོ། །དེ་ཡང་བྱེ་མདོ་གཉིས་ཀྱིས་ས་བཅུའི་རྣམ་བཞག་མི་བཞེད་པ་དང༌། འདིར་བཞེད་པ་ནི་རྟེན་གཞི་མདོའི་དབང་གིས་ཡིན་པའོ། །ལུགས་འདིའི་མདོ་ནི་འཁོར་ལོ་ཐ་མ་དང༌། བསྟན་བཅོས་ལུགས་འདིའི་སློབ་དཔོན་བཙུན་པ་ཆེན་པོ་ཨ་བི་ཏརྐ་དང༌། ཛྙཱ་ན་ཏ་ལ་སོགས་པ་སེམས་ཙམ་པའི་སློབ་དཔོན་ལྔ་བརྒྱ་དེ་དག་གིས་མཛད་པའི་བསྟན་བཅོས་དག་ཡིན་མོད་བོད་དུ་མ་འགྱུར་བ་ཡིན་ཏེ། གཞན་སྟོང་དབུ་མའི་རྒྱན་གྱི་ལུང་སྦྱོར་ལས། འོ་ན་སེམས་ཙམ་གྱི་མདོ་དང་བསྟན་བཅོས་ལོགས་སུ་མེད་པར་འགྱུར་སྙམ་ན། མདོ་སྡེ་ནི་ལོགས་སུ་ཡོད་པ་མ་ཡིན་ཏེ། དཔེར་ན་བྱེ་མདོ་གཉིས་ལ་ཡང་མདོ་སྡེ་ཐ་དད་མེད་པ་བཞིན་ནོ། །སེམས་ཙམ་པའི་བསྟན་བཅོས་ཐོར་བུ་འགའ་ཞིག་ནི་ཡོད་པར་གསལ་ན་ཡང༌། བྱམས་ཆོས་དང༌། ཐོགས་མེད་སྐུ་མཆེད་ཀྱི་གཞུང་གི་རྗེས་སུ་འབྲང་བ་ནི་མ་ཡིན་ཏེ། བྱང་ཆུབ་སེམས་འགྲེལ་སོགས་ཐོགས་མེད་སྐུ་མཆེད་ཀྱི་སྔོན་དུ་བྱུང་བའི་བསྟན་བཅོས་ནས་བཀག་པ་སོགས་ཀྱིས་འཕགས་པ་ནཱ་གཱ་རྫུ་ནའི་སྔ་རོལ་དུ་བྱུང་བའི་ཕྱིར་རོ། །དེས་ན་བཙུན་པ་ཆེན་པོ་ཨ་བི་ཏརྐ་དང༌། ཛྙཱ་ན་ཏ་ལ་སོགས་པ་རྣལ་འབྱོར་སྤྱོད་པའི་སློབ་དཔོན་ལྔ་བརྒྱ་བྱུང་བར་གྲགས་པ་ལྟར་ཡིན་པར་མངོན་ནོ། །དེ་དག་གི་བསྟན་བཅོས་ནི་བོད་དུ་མ་འགྱུར་བ་ཡིན་ཏེ། སྡེ་བ་བཅོ་བརྒྱད་ཀྱི་བསྟན་བཅོས་རྣམས་བཞིན་ནོ། །ཞེས་དང༌། གཞན་སྟོང་སྙིང་པོ་ལས། ཐེག་ཆེན་པ་དེ་རྣམས་ཐེག་ཆེན་གྱི་མདོ་ཐམས་ཅད་བཀར་འདོད་ཀྱང༌། སེམས་ཙམ་པ་རྣམས་ནི་མདོ་སྡེ་དགོངས་པ་ངེས་འགྲེལ་དང༌། ལང་ཀར་གཤེགས་པ་དང༌། རྒྱན་སྟུག་པོ་དང༌། ཕལ་པོ་ཆེ་སྟེ་མདོ་བཞིར་གྲགས་པ་རྣམས་ངེས་དོན་དུ་འཛིན་ཏེ། གཞན་རྣམས་དྲང་དོན་དུ་འདོད་ལ། གྲུབ་མཐའ་བྱེད་པ་པོ་ནི་སྔོན་གྱི་སློབ་དཔོན་ལྔ་བརྒྱ་པོའོ། །ཞེས་གསུངས་སོ། །དེས་ན་རང་གཞན་ཁ་ཅིག་གིས་ཐོགས་མེད་སྐུ་མཆེད་སེམས་ཙམ་པའི་སློབ་དཔོན་ཡིན་ཟེར་བ་མི་འཐད་དེ། གཞན་སྟོང་དབུ་མའི་ལུང་སྦྱོར་ལས། ཐོགས་མེད་སྐུ་མཆེད་རྗེས་འབྲང་དང་བཅས་པ་རྣམས་དབུ་མ་ཁོ་ན་ལ་ཡོངས་སུ་སྤྱོད་དོ་ཞེས་ཤེས་པར་བྱའོ། །ཞེས་སོ། །གསུམ་པ་འབྲས་བུའི་རྣམ་བཞག་ནི། ཉན་རང་གཉིས་ཀྱིས་རང་དོན་དུ་ལམ་ལྔ་རིམ་གྱིས་བགྲོད་ནས་ཉོན་སྒྲིབ་སྤངས་བ་ན་ཐེག་དམན་དགྲ་བཅོམ་པའི་གོ་འཕང་ཐོབ་པ་ཡིན་ནོ། །རང་རྒྱལ་ལ་འདོད་རྟེན་ཅན་མ་གཏོགས་མེད་པར་གསུངས་སོ། །རང་རྒྱལ་བསྐལ་བ་བརྒྱར་བསོད་ནམས་ཀྱི་ཚོགས་བསགས་པ་ཡོད་པ་དང༌། དེའི་དབང་གིས་འབྲས་བུ་ཡང་ཉན་ཐོས་ལས་མཆོག་ཡིན་པ་སོགས་ཡོན་ཏན་ཁྱད་པར་དུ་འཕགས་པ་ཡོད་པའི་ཕྱིར་རོ། །མཐར་ཐུག་ཐེག་པ་གསུམ་གྲུབ་ཏུ་འདོད་དོ། །ཐེག་ཆེན་གྱི་གྲངས་མེད་གསུམ་གྱི་ཚོགས་དང་འབྲེལ་བའི་སྒོ་ནས་ལམ་ལྔ་ས་བཅུ་བགྲོད་དེ་རྒྱུན་མཐའི་བར་ཆད་མེད་ལམ་གྱིས་སྒྲིབ་གཉིས་ཟད་པས་སྤངས་ཏེ། སྐུ་བཞི་མངོན་དུ་བྱེད་པ་ཡིན་ནོ།། །། སྨྲས་པ།ཁམས་གསུམ་སེམས་ཙམ་སྨྲ་བའི་གྲུབ་མཐའ་ཡི། །རྣམ་བཞག་ཆུ་གཏེར་ལས་འཁྲུངས་རིན་ཆེན་གཏེར། །མ་འདྲེས་ཀུན་གསལ་རྒྱུ་སྐར་རྣམ་བཀྲ་བའི། །གྲུབ་མཐའ་རྒྱ་མཚོའི་འཇུག་ངོགས་འདི་ལོངས་ཤིག །ཅེས་གྲུབ་མཐའི་རྣམ་བཞག་ལུང་རིགས་གཏེར་མཛོད་ལེགས་བཤད་འདོད་འཇོ་ཞེས་བྱ་བ་ལས་སེམས་ཙམ་པའི་གྲུབ་མཐའི་སྐབས་ཀྱི་ངལ་གསོ་བའི་ཚིགས་སུ་བཅད་པའོ།། །། བཞི་བ་དབུ་མ་པའི་གྲུབ་མཐའི་རྣམ་བཞག་བཤད་པ།བཞི་བ་དབུ་མ་པའི་གྲུབ་མཐའི་རྣམ་བཞག་བཤད་པ་ལ། མཚན་ཉིད། དབྱེ་བ། སྒྲ་བཤད། དབུ་མ་པའི་གྲུབ་མཐའ་སོ་སོའི་དོན་བཤད་པ་དང་བཞི། དང་པོ་ནི། དོན་དམ་པར་བདེན་དངོས་སོགས་སྤྲོས་མཐའ་དངོས་སུ་ཁས་མི་ལེན་པའི་ཐེག་ཆེན་གྱི་གྲུབ་མཐའ་སྨྲ་བ་དེ། དབུ་མ་པའི་མཚན་ཉིད་ཡིན་ཏེ། ཉ་ཊཱིཀ་ཡིད་ཀྱི་མུན་སེལ་ལས། དབུ་མ་པའི་མཚན་ཉིད། ཐེག་ཆེན་པ་གང་ཞིག དོན་དམ་པར་བདེན་དངོས་ཁས་མི་ལེན་པ། ཞེས་དང༌། གྲུབ་མཐའི་རྣམ་བཞག་དོན་གསལ་ལས། དབུ་མ་པས་ནི་ཆོས་རྣམས་ཀུན། །གདོད་ནས་མ་བཅོས་རང་བཞིན་སྟོང༌། །ཡོད་མེད་མཐའ་གཉིས་རྣམ་གྲོལ་བ། །མཐའ་བྲལ་རྣམ་དག་ཉིད་དུ་འདོད། །ཅེས་དབུ་མ་པས་ཆོས་ཀུན་སྤྲོས་མཐའ་ཐམས་ཅད་དང་བྲལ་བར་འདོད་པར་གསུངས་སོ། ། གཉིས་པ་དབྱེ་བ་ནི། འཁོར་ལོ་བར་བའི་རྗེས་འབྲང་གི་དབུ་མ་པ་དང༌། འཁོར་ལོ་ཐ་མའི་རྗེས་འབྲང་གི་དབུ་མ་པ་གཉིས་ཡོད་དེ། བླང་དོར་རབ་གསལ་འགྲེལ་བ་ལས། ཀུན་རྫོབ་རྣམ་ཤེས་ལ་སྣང་ཡང་དཔྱད་ན་རང་བཞིན་མེད་པར་སྟོན་པ་བཀའ་བར་བ་དང་མཐུན་པའི་དབུ་མ་དང༌། ཞེས་དང༌། དོན་དམ་ཡེ་ཤེས་ལ་སྣང་ཡང་མུ་བཞིའི་སྤྲོས་པ་དང་བྲལ་བར་སྟོན་པ་བཀའ་ཐ་མ་དང་མཐུན་པའི་དབུ་མའོ། །ཞེས་གསུངས་སོ། །ཡང་ན་དབུ་མ་རང་སྟོང་བ་དང༌། དབུ་མ་གཞན་སྟོང་བ་གཉིས་ཡོད་ལ། དབུ་མ་རང་སྟོང་བ་ཡང་སེམས་ཙམ་ལས་འདས་པའི་ཕྱིར་དབུ་མ་ཙམ་ཡིན་ཀྱང་དབུ་མ་པ་མཐར་ཐུག་མ་ཡིན་ཏེ། གཞན་སྟོང་དབུ་མའི་རྒྱན་ལས། རང་སྟོང་སེམས་ཙམ་ལས་ནི་འདས་པའི་ཕྱིར། །དབུ་མ་ཡིན་མོད་དབུ་མའི་མཐར་ཐུག་མིན། །ཞེས་གསུངས་སོ། །ཡང་དབུ་མ་པ་ལ་དབུ་མ་ཕལ་བ་དང་དབུ་མ་ཆེན་པོ་གཉིས་ཡོད་དེ། གཞན་སྟོང་སྙིང་པོ་ལས། དབུ་མ་པ་ལ་དབུ་མ་ཕལ་པ་དང་དབུ་མ་ཆེན་པོ་གཉིས་ཀྱི་ཕལ་བ་ལ་བོད་ཡུལ་འདིར་རང་སྟོང་དུ་གྲགས་ཤིང༌། རྒྱ་བོད་གཉིས་ཀར་དུ་ངོ་བོ་ཉིད་མེད་པར་སྨྲ་བ་ཞེས་གྲགས་པ་སྟེ། སློབ་དཔོན་སངས་རྒྱས་བརྐྱངས་དང༌། ལེགས་ལྡན་འབྱེད་དང༌། རྣམ་གྲོལ་སྡེ་དང༌། ཞི་བ་མཚོ་རྗེས་འབྲང་དང་བཅས་པ་རྣམས་ཀྱི་ལུགས་སོ། །ཞེས་གསུངས་སོ། །དེས་ན་གཙོ་བོར་འཁོར་ལོ་བར་བའི་རྗེས་འབྲང་གི་དབུ་མ་པ། དབུ་མ་ཕལ་བ། དབུ་མ་རང་སྟོང་བ་རྣམས་དོན་གཅིག གཙོ་བོར་འཁོར་ལོ་ཐ་མའི་རྗེས་འབྲང་གི་དབུ་མ་པ། དབུ་མ་གཞན་སྟོང་བ། འཁོར་ལོ་ཐ་མའི་རྗེས་འབྲང་གི་རྣམ་རིག་ཙམ་གྱི་དབུ་མ་པ་རྣམས་དོན་གཅིག་ཡིན་ནོ། །ཡང་དབྱེ་ན་འཇིག་རྟེན་གྲགས་སྡེ་སྤྱོད་པའི་དབུ་མ་པ། མདོ་སྡེ་སྤྱོད་པའི་དབུ་མ་པ། རྣལ་འབྱོར་སྤྱོད་པའི་དབུ་མ་པ་གསུམ་ཡོད་དེ། བསྟན་པ་སྤྱི་འགྲེལ་གྱི་རྣམ་བཤད་ལས། ཡང་གསུམ་དུ་ཡང་འབྱེད་དེ། འཇིག་རྟེན་གྲགས་སྡེ་སྤྱོད་པའི་དབུ་མ་པ། མདོ་སྡེ་སྤྱོད་པའི་དབུ་མ་པ། རྣལ་འབྱོར་སྤྱོད་པའི་དབུ་མ་པའོ། །འབྱེད་ཚུལ་གཞན་ཡང་བཤད་དོ། །དང་པོ་ནི། ཐལ་འགྱུར་བ་སྟེ་ཟླ་གྲགས་སོགས་ལ་ཟེར་ཞིང༌། ཕྱི་མ་གཉིས་ལ་རང་རྒྱུད་པ་ཟེར་རོ། །ཞེས་སོ། །ཡང་ན་འཁོར་ལོ་བར་བའི་རྗེས་འབྲང་གི་དབུ་མ་ལ། དབུ་མ་རང་རྒྱུད་པ་དང༌། དཔལ་ལྡན་ཐལ་འགྱུར་བ་དང་གཉིས་ཡོད་དེ། བསྟན་པ་སྤྱི་འགྲེལ་གྱི་རྣམ་བཤད་ལས། དབུ་མ་པ་ལ་ཐལ་འགྱུར་བ་དང་རང་རྒྱུད་པ་གཉིས་སུ་འབྱེད་ཅིང༌། ཞེས་སོ། ། གསུམ་པ་སྒྲ་བཤད་པ་ནི། རྟག་ཆད་ཀྱི་སྤྲོས་པའི་མཐའ་ཐམས་ཅད་དང་བྲལ་བའི་དབུས་ཁས་ལེན་པས་ན་དབུ་མ་པ་ཞེས་བརྗོད་དོ། ། བཞི་བ་དབུ་མ་པའི་གྲུབ་མཐའ་སོ་སོའི་དོན་བཤད་པ།བཞི་བ་དབུ་མ་པའི་གྲུབ་མཐའ་སོ་སོའི་དོན་བཤད་པ་ལ། རང་རྒྱུད་པ། ཐལ་འགྱུར་བ། དབུ་མ་གཞན་སྟོང་བའི་གྲུབ་མཐའ་བཤད་པ་དང་གསུམ། དང་པོ་རང་རྒྱུད་པ་ལ། མཚན་ཉིད། དབྱེ་བ་གཉིས། དང་པོ་ནི། འཁོར་ལོ་བར་བའི་རྗེས་འབྲང་གི་དབུ་མ་པ་གང་ཞིག རང་རྒྱུད་ཀྱི་སྦྱོར་ངག་རང་ལུགས་ལ་ཁས་བླངས་ནས་དངོས་སྨྲ་འགོག་པ། རང་རྒྱུད་པའི་མཚན་ཉིད་ཡིན་ཏེ། ཕར་ཕྱིན་ཡིད་ཀྱི་མུན་སེལ་ལས། དབུ་མ་རང་རྒྱུད་པའི་མཚན་ཉིད། དབུ་མ་གང་ཞིག རང་རྒྱུད་ཀྱི་སྦྱོར་ངག་རང་ལུགས་ལ་ཁས་བླངས་ནས་དངོས་སྨྲ་འགོག་པ། ཞེས་གསུངས་སོ། །དེའི་སྒྲ་བཤད་ནི། རང་རྒྱུད་ཀྱི་རྟགས་ཁས་བླངས་ནས་གཞན་གྱི་ལོག་རྟོག་འགོག་པར་བྱེད་པས་ན་རང་རྒྱུད་པ་ཞེས་བརྗོད་དེ། བསྟན་པ་སྤྱི་འགྲེལ་གྱི་རྣམ་བཤད་ལས། རང་ལུགས་ལ་རང་རྒྱུད་ཀྱི་རྟགས་ཁས་བླངས་ནས་གཞན་གྱི་ལོག་རྟོག་འགོག་པ་དབུ་མ་རང་རྒྱུད་པར་འདོད་དོ། །གཉིས་པ་དབྱེ་ན། མདོ་སྡེ་སྤྱོད་པའི་དབུ་མ་རང་རྒྱུད་པ་དང༌། རྣལ་འབྱོར་སྤྱོད་པའི་དབུ་མ་རང་རྒྱུད་པ་དང་གཉིས། དང་པོ་མདོ་སྡེ་སྤྱོད་པའི་དབུ་མ་རང་རྒྱུད་པའི་མཚན་ཉིད་དང༌། འདོད་ཚུལ་དང་གཉིས། དང་པོ་ནི། ཀུན་རྫོབ་ཏུ་ཕྱི་དོན་གྲུབ་པར་ཁས་ལེན་པའི་དབུ་མ་རང་རྒྱུད་པ་དེ། མདོ་སྡེ་སྤྱོད་པའི་དབུ་མ་རང་རྒྱུད་པའི་མཚན་ཉིད་ཡིན་ཏེ། བསྟན་པ་སྤྱི་འགྲེལ་གྱི་རྣམ་བཤད་ལས། ཀུན་རྫོབ་ཏུ་ཕྱི་རོལ་གྱི་དོན་གྲུབ་པར་འདོད་པའི་དབུ་མ་རང་རྒྱུད་པ་ལ། མདོ་སྡེ་སྤྱོད་པའི་དབུ་མ་བ་ཟེར་ཏེ་སློབ་དཔོན་ལེགས་ལྡན་འབྱེད་རྗེས་འབྲང་དང་བཅས་པའོ། །ཞེས་སོ། ། གཉིས་པ་འདོད་ཚུལ་ནི། ཕྱི་དོན་འདོད་ཅིང་རང་རིག་ཁས་མི་ལེན་པ་དང༌། བདེན་གཉིས་ཀྱིས་བསྡུས་པའི་ཆོས་ཐམས་ཅད་བདེན་པར་མ་གྲུབ་ལ། ཆོས་ཀྱི་བདག་མེད་ཕྲ་མོ་ཡང་བདེན་པར་གྲུབ་པས་སྟོང་བའི་མེད་དགག་ལ་འདོད་དོ། །ཉན་རང་རིགས་ངེས་ཀྱིས་གང་ཟག་གི་བདག་མེད་བསྒོམ་བྱའི་གཙོ་བོར་བྱས་པ་ལས་ཆོས་ཀྱི་བདག་མེད་མ་རྟོགས་པའོ། །ཕྱི་དོན་གྲུབ་པར་འཛིན་པའི་བློ་ཤེས་སྒྲིབ་མ་ཡིན་པར་བློ་དོན་མཐུན་དུ་འདོད་དོ། །ཉན་རང་གཉིས་ཀྱིས་སྤང་བྱ་ཉོན་སྒྲིབ་ཙམ་བྱེད་པ་དང༌། རྟོགས་བྱའི་གང་ཟག་གི་བདག་མེད་ལ་ཁྱད་པར་མེད་པར་བཞེད་དོ། །ཉན་རང་གཉིས་ལ་ཞུགས་གནས་བརྒྱད་ཀྱི་རྣམ་བཞག་མཛད་ལ། ཐེག་ཆེན་རིགས་ངེས་རྣམས་ཀྱིས་སྒྲིབ་གཉིས་རིམ་ཅན་དུ་སྤངས་བ་ཡིན་ཏེ། ས་བརྒྱད་པ་ཐོབ་པའི་སྐབས་སུ་ཉོན་སྒྲིབ་སྤངས་པ་ཡིན་པར་རྟོག་གེ་འབར་བར་གསུངས་ཏེ། དེ་ལས། གང་གི་ཕྱིར་ས་བརྒྱདཔའི་བྱང་ཆུབ་སེམས་དཔའ་ཁོ་ན་ཉོན་མོངས་པ་དང་བྲལ་བ་དགྲ་བཅོམ་པ་དང་འདྲ་ནའང་ཐབས་ཀྱིས་འདོད་པའི་ཡོན་ཏན་ལྔ་མངོན་པར་སྤྲུལ་ནས་བྱང་ཆུབ་སེམས་དཔའ་རྣམས་དང་གྲོས་སུ་མཛད་དེ། རྒྱ་ཆེ་ཞིང་རྣམ་པ་མང་བའི་ཉོན་མོངས་པ་ཅན་ལྟ་བུའི་སྤྱོད་པ་དང་སྟོན་པར་མཛད་དེ། ཞེས་གསུངས་སོ། ། གཉིས་པ་རྣལ་འབྱོར་སྤྱོད་པའི་དབུ་མ་རང་རྒྱུད་པ་བཤད་པ།གཉིས་པ་རྣལ་འབྱོར་སྤྱོད་པའི་དབུ་མ་རང་རྒྱུད་པ་བཤད་པ་ལ། མཚན་ཉིད། འདོད་ཚུལ་བཤད་པ་དང་གཉིས། དང་པོ་ནི། ཡང་དག་ཀུན་རྫོབ་ཙམ་དུ་ཕྱི་དོན་མེད་ཅིང་རང་རིག་འདོད་པའི་དབུ་མ་རང་རྒྱུད་པ་དེ། རྣལ་འབྱོར་སྤྱོད་པའི་དབུ་མ་རང་རྒྱུད་པའི་མཚན་ཉིད། མཚན་གཞི་སློབ་དཔོན་ཞི་འཚོ། སེང་བཟང་སོགས་སོ། །མཚན་ཉིད་དང་མཚན་གཞི་དེ་ལྟར་འཐད་དེ། བསྟན་པ་སྤྱི་འགྲེལ་གྱི་རྣམ་བཤད་ལས། ཡང་དག་ཀུན་རྫོབ་ཙམ་དུ་ཡང་ཕྱི་རོལ་གྱི་དོན་གྲུབ་པ་མེད་ཀྱི་ཕྱི་རོལ་དོན་དུ་སྣང་བ་ཐམས་ཅད་སེམས་ཙམ་གྱི་བདག་ཉིད་དམ་སེམས་ཀྱི་སྣང་བ་ཙམ་ཡིན་ཞེས་འདོད་པའི་དབུ་མ་རང་རྒྱུད་པ་ལ་རྣལ་འབྱོར་སྤྱོད་པའི་དབུ་མ་བ་ཞེས་བཤད་དོ། །དེ་ནི་སློབ་དཔོན་ཞི་བ་འཚོ། སེང་བཟང་ལ་སོགས་པའོ། །ཞེས་གསུངས་སོ། །གཉིས་པ་འདོད་ཚུལ་ལ། རང་རིག་འདོད་ཅིང་ཕྱི་དོན་མི་འདོད་ལ། དེ་ཙམ་མ་གཏོགས་ཕལ་ཆེར་མདོ་སྡེ་སྤྱོད་པའི་དབུ་མ་རང་རྒྱུད་པ་དང་འདྲའོ། ། གཉིས་པ་དབུ་མ་ཐལ་འགྱུར་བ།གཉིས་པ་དབུ་མ་ཐལ་འགྱུར་བ་ལ། མཚན་ཉིད། སྒྲ་བཤད། འདོད་ཚུལ་དང་གསུམ། དང་པོ་ནི། རང་རྒྱུད་ཀྱི་སྦྱོར་ངག་མི་འགོད་པར་ཐལ་འགྱུར་ཡང་དག་གིས་དངོས་སྨྲ་འགོག་པའི་དབུ་མ་རང་སྟོང་བ་དེ། ཐལ་འགྱུར་བའི་མཚན་ཉིད་ཡིན་ཏེ། ཉ་ཊཱིཀ་ཡིད་ཀྱི་མུན་སེལ་ལས། ཐལ་འགྱུར་བའི་མཚན་ཉིད། གང་ཞིག རང་ལུགས་ལ་རང་རྒྱུད་ཀྱི་སྦྱོར་ངག་མི་འགོད་པར་ཐལ་འགྱུར་ཡང་དག་གིས་དངོས་སྨྲ་འགོག་པའོ། །ཞེས་གསུངས་སོ། །མཚན་གཞི་ནི། དཔལ་ལྡན་ཟླ་བ་གྲགས་པ། སངས་རྒྱས་བསྐྱངས་སོགས་སོ། །གཉིས་པ་སྒྲ་བཤད་ནི། ཐལ་འགྱུར་ཙམ་གྱིས་གཞན་གྱི་ལོག་རྟོག་འགོག་པར་ཁས་ལེན་པས་ན་ཐལ་འགྱུར་བ་ཞེས་བརྗོད་དེ། བསྟན་པ་སྤྱི་འགྲེལ་གྱི་རྣམབཤད་ལས། རང་ལུགས་ལ་རང་རྒྱུད་ཀྱི་རྟགས་ཁས་མི་ལེན་པར་ཐལ་འགྱུར་ཙམ་གྱིས་གཞན་གྱི་ལོག་རྟོག་འགོག་པའི་དབུ་མ་པ་ནི། དབུ་མ་ཐལ་འགྱུར་པ། ཞེས་སོ། །གསུམ་པ་འདོད་ཚུལ་ནི། ཆོས་ཐམས་ཅད་རང་མཚན་གྱིས་མ་གྲུབ་པ་དང༌། བདེན་པར་མ་གྲུབ་པར་འདོད་ལ། བདེན་གྲུབ་ཀྱིས་སྟོང་བ་ཙམ་ཆོས་ཀྱི་བདག་མེད་འདོད་དོ། །ཐེག་པ་གསུམ་པོ་རང་རང་གི་ཐར་བ་ཐོབ་པ་ལ་ཆོས་ཀྱི་བདག་མེད་རྟོགས་དགོས་པར་འདོད་ཅིང༌། སྒྲུབ་བྱེད་ཀྱི་རིགས་པ་གསུམ་དང་ལུང་དགུ་ཡོད་ལ་སྔར་བདག་གིས་གཞན་སྟོང་བགྲོ་གླེང་ཐེངས་དང་པོའི་དྲིས་ལན་དུ་བཤད་ཟིན་ཏོ། །རང་རིག་མི་འདོད་དེ། དབུ་མ་ཚིག་གསལ་དང་འཇུག་པ་རྩ་འགྲེལ་སོགས་ལས་བཀག་པའི་ཕྱིར་རོ། །རྣམ་ཤེས་ཚོགས་དྲུག་ལས་བརྒྱད་མི་འདོད་པ་འདྲ་སྟེ། མདོ་ལས་ཀུན་གཞི་བསྟན་པ་ནི་སྟོང་ཉིད་ལ་དགོངས་པར་གསུངས་ཏེ། འཇུག་པ་རང་འགྲེལ་ལས། དངོས་པོ་ཐམས་ཅད་ཀྱི་རང་བཞིན་རྗེས་སུ་ཞུགས་པའི་ཕྱིར་སྟོང་ཉིད་ཁོ་ན་ཀུན་གཞིའི་རྣམ་པར་ཤེས་པའི་སྒྲས་བསྟན་པར་རིག་པར་བྱའོ། །ཞེས་གསུངས་སོ། །འོན་ཀྱང་གཞན་སྟོང་དབུ་མའི་རྒྱན་ལས། ཁྱད་པར་ཐལ་འགྱུར་སྨྲ་བ་མཆོག་ཡིན་ཀྱང༌། །ས་བོན་ཐམས་ཅད་པ་ཡི་ཀུན་གཞི་ནི། །བཀག་མོད་ཀུན་གཞིའི་ངོ་བོ་བཀག་པ་མེད། །ཅེས་ཀུན་གཞིའི་ངོ་བོ་མ་བཀག་གསུངས་པ་ལ་དཔྱད་པར་བྱའོ། །ཉོན་སྒྲིབ་མ་སྤངས་པར་ཤེས་སྒྲིབ་སྤང་བའི་མགོ་མི་རྩོམ་པར་གསུངས་སོ། །ལམ་ལྔ་ས་བཅུ། མཐར་ཐུག་སྐུ་བཞི་སོགས་བཞེད་དོ། །རང་སྟོང་བ་དེ་དག་གིས་ཐུན་མོང་དུ། དྲི་མེད་འོད་ལས། རྣམ་ཤེས་དེ་ཡང་དོན་དམ་དུ། །ཡོད་པར་མཁས་རྣམས་མི་འདོད་དེ། །གཅིག་དང་དུ་མའི་རང་བཞིན་དང༌། །བྲལ་བ་ནམ་མཁའི་པད་མོ་བཞིན། །ཡོད་མིན་མེད་མིན་ཡོད་མེད་མིན། ། གཉིས་ཀའི་བདག་ཉིད་མིན་པའང་མིན་། །མཐའ་བཞི་ལས་ནི་རྣམ་གྲོལ་བའི། །དེ་ཉིད་དབུ་མ་པ་ཡིས་རིག །ཅེས་གསུངས་པ་ལྟར་འཆད་པ་སྟེ། བླང་དོར་རབ་གསལ་ལས། དབུ་མ་པ་རྣམས་མུ་སྟེགས་འདོད་པ་ཡི། །ཡན་ལག་ཅན་ལ་སོགས་པའི་བདག་མེད་ཅིང༌། །ཉན་ཐོས་སྡེ་གཉིས་འདོད་པའི་ཕྱི་རོལ་གྱི། །དོན་ཡང་བདེན་པར་ཡོད་པ་མ་ཡིན་ལ། །ཞེས་དང༌། དབུ་མ་རྩ་བར། གལ་ཏེ་ཕུང་པོ་བདག་ཡིན་ན། །སྐྱེ་ཞིང་འཇིག་པ་ཅན་དུ་འགྱུར། །གལ་ཏེ་ཕུང་པོ་རྣམས་ལས་གཞན། །ཕུང་པོའི་མཚན་ཉིད་མེད་པར་འགྱུར། །ཞེས་པ་ལ་སོགས་པའི་རིགས་པས་མུ་སྟེགས་ཅན་ལ་སོགས་པས་འདོད་པའི་ཡན་ལག་ཅན་གྱི་བདག་བདེན་པར་གྲུབ་པ་མེད་པར་འདོད་དོ། །གྲུབ་མཐའ་བཞི་སྟོན་པའི་ཚིགས་བཅད་དྲི་མེད་འོད་ལས་གསུངས་པ། འདི་རྣམས་འཇམ་དཔལ་གྱིས་མཛད་པའི་རང་གི་ལྟ་བའི་འདོད་པ་མདོར་བསྟན་པ་དང༌། དྲི་མེད་འོད་དང༌། འཕགས་པ་ལྷས་མཛད་པའི་ཡེ་ཤེས་སྙིང་བོ་ཀུན་ལས་བཏུས་པ་དང༌། ཛེ་ཏ་རིས་མཛད་པའི་བདེ་གཤེགས་གཞུང་གི་རབ་དབྱེ་རྣམས་ལས་ཀྱང་མཐུན་པར་གསུངས་སོ། །ཡང་དེ་དག་གིས་འདི་ལྟར་འདོད་དེ། གཞན་སྟོང་སྙིང་པོ་ལས། དེ་དག་ལ་གྲུབ་མཐའ་ནང་གསེས་མི་འདྲ་བ་མང་ཡང༌། ཐམས་ཅད་མཐུན་པར་གཟུགས་སེམས་གཉིས་དང་ལྡན་མིན་འདུ་བྱེད་དེ་འདུས་བྱས་ཀྱི་དངོས་པོ་ཐམས་ཅད་དང༌། ནམ་མཁའ་སོགས་འདུས་མ་བྱས་དང༌། དངོས་མེད་ཐམས་ཅད་དེ་ཆོས་འདི་དག་ཐམས་ཅད་ནི་ཀུན་རྫོབ་ཡིན་ལ། དེ་རྣམས་ཀྱི་རང་བཞིན་བདེན་མེད་ཙམ་ནི་དོན་དམ་ཡིན་ཞིང༌། དེ་གཉིས་ངོ་བོ་གཅིག་དང་ཐ་དད་གང་དུ་ཡང་བརྗོད་དུ་མེད། རྣམ་བཞག་ཙམ་ཐ་དད་དེ། དོན་དམ་དབྱིངས་ཀྱི་ངོ་བོ་ནི་གང་ཡང་མེད་པས་སྤྲོས་བྲལ་ནམ་མཁའི་དཔེས་བསྟན། ཀུན་རྫོབ་སྣང་དུས་ན་བདེན་པས་སྟོང་ཡང༌། སྣང་བ་མ་འགག་པ་སྒྱུ་མའི་དཔེས་བསྟན། དེ་གཉིས་ཀར་ཡོད་མེད་ཡིན་མིན་སོགས་སྤྲོས་པ་ཐམས་ཅད་ལས་འདས་པར་འདོད་དོ། །གྲུབ་མཐའ་འདི་ལ་ཡང༌། དོན་དམ་ཆོས་ཉིད་དེ་སྤྲོས་པ་བཀག་ཙམ་གྱི་ནམ་མཁའ་ལྟ་བུ་ལ་འདོད་པ་དང༌། སངས་རྒྱས་ཀྱི་ཡེ་ཤེས་སོགས་ཀུན་རྫོབ་ཡིན་ཞིང་བདེན་པར་མེད་ཟེར་བ་དང༌། དོན་དམ་བདེན་པ་བདེན་མེད་དུ་འདོད་པ་དང༌། ཁྱད་པར་ཐལ་འགྱུར་བ་རྣམས་ནི་གྲུབ་མཐའི་རྣམ་བཞག་འཇོག་བཞིན་དུ་གཞན་གྱི་རྩོད་པ་ལ་འཛེམ་པའི་ཕྱིར་གང་ཡང་ཁས་མི་ལེན་པ་དང༌། ངེས་ཤེས་མ་སྐྱེས་ཀྱང་ལོག་རྟོག་ཟློག་པར་འདོད་པ་སོགས་འཁྲུལ་བ་ཡིན་ལ། གཟུང་འཛིན་གྱིས་བསྡུས་པའི་ཆོས་ཐམས་ཅད་བདེན་པར་མེད་པ་དང༌། བདེན་མེད་ཙམ་དེ་ཡང་བདེན་པར་མ་གྲུབ་པ་སོགས་ནི་མ་ནོར་བ་ཡིན་ནོ། ། ཞེས་གསུངས་སོ། །རང་སྟོང་བ་དེ་དག་གིས་ཤེར་ཕྱིན་གྱི་མདོ་སོགས་འཁོར་ལོ་བར་བ་ངེས་དོན་དང༌། དགོངས་འགྲེལ་སོགས་འཁོར་ལོ་ཐ་མ་དྲང་དོན་དུ་འདོད་དེ། གཞན་སྟོང་སྙིང་པོ་ལས། དབུ་མ་ཕལ་བ་འཛིན་པ་རྣམས་ནི། འཁོར་ལོ་ཐ་མའི་མདོ་ཐམས་ཅད་དྲང་དོན་ཡིན་ཞིང༌། འཁོར་ལོ་བར་བའི་ཤེར་ཕྱིན་གྱི་མདོ་རྣམས་ངེས་དོན་མཐར་ཐུག་གོ་ཞེས་སྨྲ། གྲུབ་མཐའ་བྱེད་པ་པོ་ཡིན་ངེས་ནི་སངས་རྒྱས་བསྐྱངས་སོགས་གོང་དུ་སྨོས་པ་དེ་རྣམས་སུ་ཟད་ལ། ཞེས་གསུངས་སོ། །ཡང་དེ་དག་གིས། ཡི་དྭགས་དུད་འགྲོ་མི་རྣམས་དང༌། །ལྷ་རྣམས་སོ་སོ་རིགས་རིགས་སུ། །དངོས་གཅིག་ཡིད་ནི་ཐ་དད་ཕྱིར། །དོན་མ་གྲུབ་པར་འདོད་པ་ཡིན་། །ཞེས་པ་ལྟར། ཆུ་ལྟ་བུ་དངོས་པོ་གཅིག་ཉིད་སེམས་ཅན་སོ་སོ་ལ་མི་འདྲ་བ་སྣ་ཚོགས་སུ་སྣང་བའི་ཕྱིར་ཉན་ཐོས་པའི་འདོད་པ་ལྟར་ཕྱི་རོལ་གྱི་དོན་ཡང་བདེན་པར་ཡོད་པ་མ་ཡིན་ལ། བླང་དོར་རབ་གསལ་ལས། སེམས་ཙམ་པ་རྣམས་འདོད་པའི་རྣམ་ཤེས་ཀྱང༌། །དོན་ལ་བདེན་པར་ཡོད་པ་མ་ཡིན་ཏེ། །གཅིག་དང་དུ་མའི་རང་བཞིན་བྲལ་བའི་ཕྱིར། །དཔེར་ན་ནམ་མཁའི་པད་མོ་ཇི་བཞིན་ནོ། །ཞེས་དང༌། རྣམ་འགྲེལ་ངེས་སུ་ཡང༌། གང་གིས་དངོས་པོ་རྣམ་དཔྱད་ན། །དེ་ཉིད་དུ་ན་དེ་དངོས་མེད། །གང་གི་ཕྱིར་ན་དེ་དག་ལ། །གཅིག་དང་དུ་མའི་རང་བཞིན་མེད། །ཅེས་གསུངས་པ་ལྟར། སྤྱིར་ཕྱི་ནང་གཟུང་འཛིན་གྱི་དངོས་པོ་ཐམས་ཅད་བདེན་པར་ཡོད་པ་མ་ཡིན་ཞིང༌། ཁྱད་པར་སེམས་ཙམ་པས་འདོད་པའི་ནང་རྣམ་པར་ཤེས་པ་དེ་ཡང་བདེན་པར་ཡོད་པ་མ་ཡིན་ཏེ། གཅིག་དང་དུ་མའི་རང་བཞིན་དང་བྲལ་བའི་ཕྱིར། ཞེས་པས་ཀུན་རྫོབ་རྣམ་ཤེས་ལ་སྣང་ཡང་དཔྱད་ན་རང་བཞིན་མེད་པར་སྟོན་པ་བཀའ་བར་པ་དང་མཐུན་པའི་དབུ་མ་པ་ཡིན་པའོ། ། སེམས་ཙམ་པ་དང་རང་སྟོང་བ་དག་གིས་སྙིང་པོའི་ངེས་གསང་དང༌། དོན་དམ་ཡེ་ཤེས་མི་འདོད་ཅིང་སློབ་དཔོན་སྔ་མ་དག་གིས་གཞན་སྟོང་ལ་དགག་པ་མ་བྱས་ལ། ཕྱིས་སུ་དགག་པ་བྱེད་པ་ཡོད་དེ། གཞན་སྟོང་སྙིང་པོ་ལས། སེམས་ཙམ་པ་དང༌། རང་སྟོང་སྨྲ་བའི་དབུ་མ་པ་འདི་གཉིས་ཀྱིས་བདེ་གཤེགས་སྙིང་པོའི་ངེས་གསང་དང༌། དོན་དམ་ཡེ་ཤེས་རང་རིག་རང་གསལ་ནི་རང་ལུགས་ལ་མི་འདོད་ཅིང་དེ་དག་གི་གནས་ཚུལ་མ་གོ་བས། སློབ་དཔོན་སྔ་མ་རྣམས་ཀྱིས་གཞན་སྟོང་ལ་དགག་པ་བྱས་པ་ནི་མེད་ལ། རྗེས་འབྲང་ཕྱིས་བྱུང་བ་རྣམས་ཀྱིས་དགག་པ་བྱེད་མོད་ཀྱང་གཞན་སྟོང་གི་གྲུབ་མཐའི་གནད་གོ་བ་ནི། གཅིག་ཀྱང་མེད་པས་ཕྱོགས་སྔ་མ་ལོངས་པའི་དགག་པ་ཤ་སྟག་གོ །ཞེས་གསུངས་པའི་ཕྱིར་རོ།། །། སྨྲས་པ། ཆོས་རྣམས་བདེན་གྲུབ་ནམ་ཡང་ཡོད་མ་མྱོང༌། །འོན་ཀྱང་ལས་འབྲས་ལ་སོགས་བྱ་བྱེད་ཀུན། །རྣམ་བཞག་འཐད་ལྡན་སྨྲ་བའི་ངོ་བོ་ཉིད། །སྨྲ་བའི་གྲུབ་མཐའི་མཛེས་ལྗོངས་འདི་ན་སྣང༌། །ཞེས་གྲུབ་མཐའི་རྣམ་བཞག་ལུང་རིགས་གཏེར་མཛོད་ལེགས་བཤད་འདོད་འཇོ་ཞེས་བྱ་བ་ལས་ངོ་བོ་ཉིད་སྨྲ་བའི་གྲུབ་མཐའི་སྐབས་ཀྱི་ངལ་གསོ་བའི་ཚིགས་སུ་བཅད་པའོ།། །། གསུམ་པ་དབུ་མ་གཞན་སྟོང་ཆེན་པོ་བའམ་འཁོར་ལོ་ཐ་མའི་རྗེས་འབྲང་གི་དབུ་མ་པའི་གྲུབ་མཐའ་བཤད་པ།གསུམ་པ་དབུ་མ་གཞན་སྟོང་ཆེན་པོ་བའམ་འཁོར་ལོ་ཐ་མའི་རྗེས་འབྲང་གི་དབུ་མ་པའི་གྲུབ་མཐའ་བཤད་པ་ལ། མཚན་ཉིད། སྒྲ་བཤད། འདོད་ཚུལ་དང་གསུམ། དང་པོ་ནི། ཡོངས་གྲུབ་གཉིས་མེད་ཀྱི་ཡེ་ཤེས་གཤིས་ལ་གྲུབ་ཅིང་གཞན་དབང་ཀུན་བརྟགས་ཀྱིས་ཆོས་རྣམས་གཤིས་ལ་མ་གྲུབ་པར་ཁས་ལེན་པའི་དབུ་མ་པ་དེ། གཞན་སྟོང་དབུ་མ་པའི་མཚན་ཉིད་ཡིན་ཏེ། བླང་དོར་རབ་གསལ་ལས། ཀུན་རྫོབ་ཆོས་རྣམས་བརྟགས་ན་མེད་པ་དང༌། །དོན་དམ་རང་བཞིན་ཆོས་དབྱིངས་དེ་བཞིན་ཉིད། །མུ་བཞིའི་སྤྲོས་པ་ཀུན་ལས་རྣམ་གྲོལ་བ། །འགྱུར་མེད་ཡོངས་གྲུབ་དོན་ལ་གནས་པར་བཞེད། །ཅེས་དང༌། ཇི་སྐད་དུ་མདོ་སྡེ་རྒྱན་ལས། ཡོད་མིན་མེད་མིན་དེ་བཞིན་མིན་གཞན་མིན། །སྐྱེ་དང་འཇིག་མེད་འཕྲི་བར་མི་འགྱུར་ཏེ། །འཕེལ་བ་མེད་ཅིང་རྣམ་པར་དག་པའང་མེད། །རྣམ་པར་དག་འགྱུར་དེ་ནི་དོན་དམ་མཚན། །ཞེས་དང༌། མདོ་སྡེ་རྒྱན་དབྱིག་གཉེན་གྱི་འགྲེལ་པར། གཉིས་སུ་མེད་པའི་དོན་ནི་དམ་པ་སྟེ། །གཉིས་སུ་མེད་པའི་དོན་དེ་ཡང་རྣམ་པ་ལྔས་ཡང་དག་པར་སྟོན་ཏོ། །ཀུན་བཏགས་པ་དང་གཞན་གྱི་དབང་གི་མཚན་ཉིད་དག་གིས་ནི་ཡོད་པ་མ་ཡིན་ནོ། །ཡོངས་སུ་གྲུབ་པའི་མཚན་ཉིད་ཀྱིས་ནི་མེད་པ་མ་ཡིན་ནོ། །ཀུན་བཏགས་པ་དང་གཞན་གྱི་དབང་དང༌། ཡོངས་སུ་གྲུབ་པ་དག་གཅིག་པ་ཉིད་མེད་པས་དེ་བཞིན་མ་ཡིན་ནོ། །དེ་དག་ཁོ་ན་ལས་གཞན་པ་ཉིད་མེད་པས་གཞན་མ་ཡིན་ནོ། །ཆོས་ཀྱི་དབྱིངས་འདུས་མ་བྱས་པ་ཡིན་པའི་ཕྱིར་སྐྱེ་བ་ཡང་མེད་འཇིག་པ་ཡང་མེད་དོ། ། ཀུན་ནས་ཉོན་མོངས་པ་དང་རྣམ་པར་བྱང་བ་དག་འགག་པ་དང་སྐྱེ་བ་ན་དེ་བཞིན་དུ་གནས་པའི་ཕྱིར་འགྲིབ་པར་ཡང་མི་འགྱུར་འཕེལ་བར་ཡང་མི་འགྱུར་རོ། །རང་བཞིན་གྱིས་ཀུན་ནས་ཉོན་མོངས་པ་ཅན་མ་ཡིན་པའི་ཕྱིར་རྣམ་པར་དག་པར་འགྱུར་བ་མེད་དོ། །གློ་བུར་གྱི་ཉོན་མོངས་པ་དང་བྲལ་བས་རྣམ་པར་མ་དག་པ་ཡང་མ་ཡིན་ཏེ། དེ་ལྟར་ན་གཉིས་སུ་མེད་པའི་མཚན་ཉིད་རྣམ་པ་ལྔ་པོ་དེ་ནི་དོན་དམ་པའི་མཚན་ཉིད་ཡིན་པར་རིག་པར་བྱའོ། །ཞེས་གསུངས་པ་ལྟར་དོན་དམ་པའི་བདེན་པ་དེ་ཀུན་བཏགས་དང་གཞན་དབང་གིས་བསྡུས་པའི་ཀུན་རྫོབ་གློ་བུར་གྱི་དྲི་མ་མཐའ་དག་གིས་སྟོང་པས་ཡོད་པའི་མཐའ་དང་བྲལ་ཞིང༌། ཡོངས་གྲུབ་ཆོས་ཀྱི་དབྱིངས་དེ་བཞིན་ཉིད་ཀྱིས་མི་སྟོང་པས་མེད་པའི་མཐའ་དང་བྲལ་ལ། དེ་དག་གཅིག་པ་ཉིད་མེད་པས་གཉིས་ཡིན་གྱི་མཐའ་དང་ཡང་བྲལ་བ་དང་དེ་དག་ལས་གཞན་མེད་པས་གཉིས་མ་ཡིན་གྱི་མཐའ་དང་བྲལ་བའོ། །ཞེས་པ་དོན་དམ་ཡེ་ཤེས་ལ་སྣང་ཡང་མུ་བཞིའི་སྤྲོས་པ་དང་བྲལ་བར་སྟོན་པ་བཀའ་ཐ་མ་དང་མཐུན་པའི་དབུ་མའོ། ། གཉིས་པ་སྒྲ་བཤད་ནི། སྟོང་གཞི་གཉིས་མེད་ཀྱི་ཡེ་ཤེས་ནི་རང་ངོས་ནས་མི་སྟོང་པ་གཞན་གཟུང་འཛིན་སོགས་སྤྲོས་པ་མཐའ་དག་གིས་གདོད་ནས་སྟོང་བ་དང༌། ཀུན་རྫོབ་གློ་བུར་གྱི་ཆོས་རྣམས་ནི་དོན་དམ་པ་གཞན་གྱི་ངོ་བོས་སྟོང་བར་སྨྲ་བས་ན་དབུ་མ་གཞན་སྟོང་བའོ། ། གསུམ་པ་འདོད་ཚུལ་ལ། གཞི་དང༌། ལམ་དང༌། འབྲས་བུའི་རྣམ་བཞག་གསུམ་ལས། དང་པོ་ལ། གཞི་ཐུན་མོང་བ་དང་། ཐུན་མོང་མ་ཡིན་པ་གཉིས་ལས། དང་པོ་ནི་གཞི་ཕུང་པོ་ལྔ་སྐྱེ་མཆེད་བཅུ་གཉིས་ཁམས་བཅོ་བརྒྱད་བདེན་པ་བཞི་སོགས་སྣང་གྲགས་ཀུན་རྫོབ་ཀྱིས་བསྡུས་པའི་ཆོས་རྣམས་ཐུན་མོང་གི་གཞི་ཞེས་བྱ་སྟེ། བདག་དང་རྟག་པ་སོགས་སྒྲོ་འདོགས་པའི་གཞི་དང༌། བདག་མེད་དང་མི་རྟག་སོགས་ཤེས་པར་བྱ་བའི་གཞི་ཡིན་པ་དང༌། མི་རྟག་པ་དང་བདག་མེད་སོགས་ཁྱད་ཆོས་རྣམས་ཀྱི་རྟེན་ནམ་ཆོས་ཅན་ཡིན་པས་ན་གཞི་ཞེས་བྱ་བའི་ཕྱིར་ཏེ། ཆོས་མངོན་པའི་མདོ་ལས། དེ་བཞིན་ཕུང་པོ་ཁམས་དབང་རྣམས། །ལས་དང་ཉོན་མོངས་དག་ལ་གནས། །ལས་དང་ཉོན་མོངས་ཚུལ་བཞིན་མིན། །ཡིད་ལ་བྱེད་པ་དག་ལ་གནས། །ཚུལ་བཞིན་མ་ཡིན་ཡིད་བྱེད་ནི། །སེམས་ཀྱི་དག་པ་ལ་རབ་གནས། །ཞེས་དང༌། བསྟན་བཅོས་མངོན་རྟོགས་རྒྱན་ལས། གཞི་ཤེས་པ་ཡི་བྱེ་བྲག་རྣམས། །ཞེས་གསུངས་པའི་ཕྱིར་རོ། །དེ་དག་གི་རྣམ་བཞག་རྒྱས་པར་ས་སྡེ་དང་སྡོམ་རྣམ་གཉིས་དང༌། ས་བཟང་གི་མངོན་པ་ཀུན་བཏུས་ཀྱི་འགྲེལ་བ་སོགས་ལས་གསལ་བར་གསུངས་ཡོད་པས་དེར་ཤེས་པར་བྱའོ།། །།གཉིས་པ་གཞི་ཐུན་མོང་མ་ཡིན་པ་ལ། ཀུན་རྫོབ་དང༌། དོན་དམ་གྱི་གཞི་ཐུན་མོང་མ་ཡིན་པ་དང་གཉིས། དང་པོ་ཀུན་རྫོབ་ཀྱི་གཞི་ཐུན་མོང་མ་ཡིན་པ་ནི། ལང་གཤེགས་ལས། ཆོས་ལྔ་དག་དང་རང་བཞིན་དང༌། །རྣམ་པར་ཤེས་པ་བརྒྱད་ཉིད་དང༌། །བདག་མེད་གཉིས་ཀྱི་དངོས་པོ་ནི། །ཐེག་པ་ཆེན་པོ་ཐམས་ཅད་འདུས། །ཞེས་དང༌། གཞན་སྟོང་དབུ་མའི་རྒྱན་ལས། ཆོས་ལྔ་རང་བཞིན་གསུམ་དང་རྣམ་ཤེས་བརྒྱད། །ཐེག་ཆེན་ཐུན་མོང་མིན་པའི་ཆོས་སྐད་རྣམས། །འཁོར་ལོ་ཐ་མའི་མདོ་སྡེ་ཤིན་ཏུ་རྒྱས། །ཞེས་གསུངས་པ་ལྟར་ཐེག་པ་ཆེན་པོའི་ཆོས་ལྔ། རང་བཞིན་གསུམ། རྣམ་ཤེས་ཚོགས་བརྒྱད། བདག་མེད་གཉིས་ཀྱི་རྣམ་བཞག་བཤད་པ་དང་བཞི། དང་པོ་ནི། ཐེག་མཆོག་དབུ་མ་ལས། ཐེག་པ་ཆེན་པོའི་ཆོས་ལྔ་བསྟན་པ་ནི། །སྒྲ་དང་ཡིད་ཀྱི་གཡོ་བའི་རང་བཞིན་གྱི། །བརྗོད་པའི་གནས་ཀྱི་སྤྱི་ནི་རྒྱུ་མཚན་ཏེ། །དེ་ལ་བླ་དྭགས་ཚིག་སྤྱི་མིང་དུ་བརྗོད། །སེམས་དང་སེམས་བྱུང་ཆོས་རྣམས་རྣམ་རྟོག་ཡིན། །དེ་བཞིན་ཉིད་ནི་བརྗོད་པའི་ཡུལ་ལས་འདས། །འཕགས་པའི་ཡེ་ཤེས་ཁོ་ནའི་སྤྱོད་ཡུལ་ལོ། །ཡང་དག་ཤེས་པ་མཉམ་བཞག་རྗེས་ཐོབ་གཉིས། །ཞེས་རྒྱུ་མཚན་དང༌། མིང་དང༌། རྣམ་པར་རྟོག་པ་དང༌། དེ་བཞིན་ཉིད་དང༌། ཡང་དག་པའི་ཤེས་པ་དང་ལྔ་བོ་ལ་ལང་གཤེགས་རྒྱན་སྡུག་སོགས་སུ་རྒྱས་པར་གསུངས་ལ། རྒྱུ་མཚན་ནི། སྒྲ་དང་ཡིད་ཀྱི་གཡོ་བའི་རྣམ་རྟོག་གི་བརྗོད་པའི་གནས་སམ་ཡུལ་གྱི་སྤྱི་ནི་རྒྱུ་མཚན་ཡིན་ལ། དེ་ཡང་དཔེར་ན་མི་རྟག་པའོ་སྙམ་པའི་རྣམ་རྟོག་གི་འཛིན་སྟངས་ཀྱི་བཟུང་བྱ་བློ་ལ་ཤར་བའི་སྤྱི་དེ་ཡིན་ནོ། །མིང་གི་ངོ་བོ་ནི་རྒྱུ་མཚན་དེ་ལ་བརྟགས་པའི་བླ་དྭགས་དང་ཚིག་སྤྱི་སྣང་བའི་སྒྲ་སྤྱིའོ། །རྣམ་རྟོག་གི་ངོ་བོ་ནི་ཁམས་གསུམ་གྱི་སེམས་དང་སེམས་བྱུང་རྣམས་ཡིན་ནོ། །དེ་བཞིན་ཉིད་ནི་ངག་གི་བརྗོད་པ་དང་ཡིད་ཀྱི་རྟོག་པའི་ཡུལ་ལས་འདས་པའི་ཆོས་ཉིད་དེ་བཞིན་ཉིད་ཡིན་ནོ། །དེ་ནི་འཕགས་པའི་ཡེ་ཤེས་ཁོ་ནའི་ཡུལ་ཡིན་པའོ། །ཡང་དག་པའི་ཤེས་པ་ནི་མཉམ་བཞག་འཇིག་རྟེན་ལས་འདས་པ་དང༌། འཕགས་པའི་རྗེས་ཐོབ་ཡེ་ཤེས་རྣམས་སོ། །རྒྱས་པར་ཐེག་མཆོག་དབུ་མའི་རྩ་འགྲེལ་སོགས་ལས་ཤེས་པར་བྱའོ། །གཉིས་པ་རང་བཞིན་གསུམ་ནི། ཀུན་བརྟགས་ཀྱི་ངོ་བོ་ནི། བརྗོད་པ་སྒྲ་རྟོག་གིས་བཏགས་པའི་བཏགས་ཆ་དེ་ཡིན་ཞིང༌། དེ་ཡང་མིང་དང་བརྡས་བཞག་པའི་མཚན་ཉིད་ལས་རང་གི་མཚན་ཉིད་ཀྱིས་མ་གྲུབ་པའི་རྫས་སུ་མ་གྲུབ་པ་གང་ཡིན་པ་ནི་ཀུན་བརྟགས་ཡིན་ཏེ། མདོ་སྡེ་དགོངས་འགྲེལ་ལས། རྣམ་པར་རྟོག་པའི་སྤྱོད་ཡུལ། ཞེས་པ་ནས། མིང་དང་བརྡས་རྣམ་པར་བཞག་པ་གང་ལགས་པ་དེ་ནི་ཀུན་བརྟགས་པའི་མཚན་ཉིད་ལགས་ཏེ། ཞེས་དང༌། མདོ་སྡེ་རྒྱན་ལས། མིང་དང་དོན་དུ་སྣང་བ་དང༌། །དོན་དང་མིང་དུ་སྣང་བ་དང༌། །ཡང་དག་མིན་རྟོག་མཚན་ཉིད་ནི། །ཀུན་བརྟགས་པ་ཡི་མཚན་ཉིད་དོ། །ཞེས་དང༌། སུམ་ཅུ་པ་ལས། རྣམ་པར་རྟོག་པ་གང་གང་གིས། །དངོས་པོ་གང་གང་རྣམ་བརྟགས་པ། །དེ་ཉིད་ཀུན་ཏུ་བརྟགས་པ་ཡི། །ངོ་བོ་ཉིད་དེ་དེ་མེད་དོ། །ཞེས་དང༌། ཐེག་མཆོག་དབུ་མ་ལས། བརྗོད་པས་བརྟགས་པའི་བརྟགས་ཆ་ཀུན་བརྟགས་དང༌། །ཞེས་དང༌། ཉ་དབོན་པའི་བསྟན་པ་སྤྱི་འགྲེལ་གྱི་རྣམ་བཤད་ལས། ཡང་དག་མིན་པའི་རྣམ་རྟོག་གིས་གཟུང་བ་ཙམ་ཡིན་གྱི་དཔྱད་མི་བཟོད་ཅིང་རྫས་སུ་ཡང་མེད་པ་ནི་ཀུན་བརྟགས་ཏེ། ཞེས་གསུངས་སོ། །ཀུན་བརྟགས་ལ་དབྱེ་ན། མཚན་ཉིད་ཡོངས་སུ་ཆད་པའི་ཀུན་བརྟགས་དང༌། རྣམ་གྲངས་པའི་ཀུན་བརྟགས་དང༌། ལྟོས་པའི་ཀུན་བརྟགས་དང་གསུམ་ཡོད་དེ། ཐེག་མཆོག་དབུ་མ་ལས། ཀུན་བརྟགས་དེ་ནི་རྣམ་པ་གསུམ་ཡིན་ཏེ། །མཚན་ཉིད་ཆད་དང་རྣམ་གྲངས་ལྟོས་པའོ། །ཞེས་གསུངས་སོ། །ཡང་ངོ་བོ་ཀུན་བརྟགས་དང༌། ཁྱད་པར་ཀུན་བརྟགས་དང་གཉིས་ཡོད་དེ། ས་བཟང་གི་ཀུན་བཏུས་འགྲེལ་བ་ལས། ངོ་བོ་ཀུན་བརྟགས་དང་ཁྱད་པར་ཀུན་བརྟགས་གཉིས་སུའང་འགྱུར་རོ། །ཞེས་དང༌། ཐེག་མཆོག་དབུ་མ་ལས། ངོ་བོ་ཉིད་དང་ཁྱད་པར་ཀུན་བརྟགས་གཉིས། །ཞེས་གསུངས་པའི་ཕྱིར་རོ། །གཞན་དབང་གི་ངོ་བོ་ནི། རང་དབང་གིས་མི་སྐྱེ་བར་རང་གི་རྒྱུ་རྐྱེན་གཞན་ལས་སྐྱེས་པའི་རྣམ་རིག་གི་བདག་ཉིད་རྫས་སུ་གྲུབ་པའི་འདུས་བྱས་གང་ཡིན་པའོ། ། དེ་ཡང་རྣམ་པར་རྟོག་པའི་སྤྱོད་ཡུལ། ཀུན་བརྟགས་པའི་གནས། འདུ་བྱེད་ཀྱི་མཚན་མ་ལ་གཞན་དབང་ཞེས་བྱ་སྟེ། དགོངས་འགྲེལ་ལས། རྣམ་པར་རྟོག་པའི་སྤྱོད་ཡུལ་ཀུན་བརྟགས་པའི་མཚན་ཉིད་ཀྱི་གནས་འདུ་བྱེད་ཀྱི་མཚན་མ་གང་ལགས་པ་དེ་ནི་གཞན་གྱི་དབང་གི་མཚན་ཉིད་ལགས་ཏེ། ཞེས་དང༌། མདོ་སྡེ་རྒྱན་ལས། རྣམ་གསུམ་རྣམ་གསུམ་སྣང་བ་ཅན། །གཟུང་དང་འཛིན་པའི་མཚན་ཉིད་དེ། །ཡང་དག་མ་ཡིན་ཀུན་རྟོག་ནི། །གཞན་གྱི་དབང་གི་མཚན་ཉིད་དོ། །ཞེས་དང༌། སུམ་ཅུ་པ་ལས། གཞན་གྱི་དབང་གི་ངོ་བོ་ཉིད། །རྣམ་རྟོག་ཡིན་ཏེ་རྐྱེན་ལས་བྱུང༌། །ཞེས་དང༌། ཐེག་མཆོག་དབུ་མ་ལས། རང་གི་རྒྱུ་རྐྱེན་ལས་སྐྱེས་རྣམ་རིག་གཞན། །ཞེས་གསུངས་སོ། །དེ་ལ་དབྱེ་ན། མ་དག་གཞན་དབང་དང༌། དག་པའི་གཞན་དབང་གཉིས་ཡོད་དེ། ཐེག་མཆོག་དབུ་མ་ལས། ཡང་ན་མ་དག་དག་པའི་འཇིག་རྟེན་གཉིས། །ཞེས་གསུངས་སོ། །ཡོངས་གྲུབ་ཀྱི་ངོ་བོ་ནི། བདག་གཉིས་ཀྱིས་སྟོང་བའི་གནས་ལུགས་དོན་དམ་པར་གྲུབ་པའི་དེ་བཞིན་ཉིད་སོ་སོ་རང་རིག་པའི་ཡེ་ཤེས་གང་ཡིན་པ་དེ་ཡིན་ཏེ། མདོ་སྡེ་དགོངས་འགྲེལ་ལས། རྣམ་པར་རྟོག་པའི་སྤྱོད་ཡུལ་ཀུན་བརྟགས་པའི་མཚན་ཉིད་ཀྱི་གནས་འདུ་བྱེད་ཀྱི་མཚན་མ་དེ་ཉིད། ཀུན་བརྟགས་པའི་མཚན་ཉིད་དེར་ཡོངས་སུ་མ་གྲུབ་ཅིང་ངོ་བོ་ཉིད་དེ་ཁོ་ནས་ངོ་བོ་ཉིད་མ་མཆིས་པ་ཉིད་ཆོས་ལ་བདག་མ་མཆིས་པ་དེ་བཞིན་ཉིད་རྣམ་པར་དག་པའི་དམིགས་པ་གང་ལགས་པ་དེ་ནི་ཡོངས་སུ་གྲུབ་པའི་མཚན་ཉིད་ལགས་ཏེ། ཞེས་དང༌། ཐེག་མཆོག་དབུ་མ་ལས། གནས་ལུགས་གདོད་མར་གྲུབ་པ་ཡོངས་གྲུབ་བོ། །ཞེས་གསུངས་པའི་ཕྱིར་རོ། །དེ་ལ་དབྱེ་ན། ཡུམ་རྒྱས་པ་སོགས་ལས་ཡོངས་གྲུབ་དགུར་གསུངས་ཏེ། དེ་བཞིན་ཉིད་དང༌། མ་ནོར་བ་དེ་བཞིན་ཉིད་དང༌། གཞན་མ་ཡིན་པའི་དེ་བཞིན་ཉིད་དང༌། ཆོས་ཉིད་དང༌། ཆོས་ཀྱི་དབྱིངས་དང༌། ཆོས་གནས་པ་ཉིད་དང༌།ཆོས་སྐྱོན་མེད་པ་ཉིད་དང༌། ཡང་དག་པའི་མཐའ་དང༌། བསམ་གྱིས་མི་ཁྱབ་པའི་དབྱིངས་ཏེ་ཡོངས་གྲུབ་དགུར་གསུངས་སོ། །ཡང་ན་ཆོས་ཉིད་འདུས་མ་བྱས་འགྱུར་བ་མེད་པའི་ཡོངས་གྲུབ་དང༌། འཕགས་པའི་ལམ་གྱི་ཡེ་ཤེས་འདུས་བྱས་ཕྱིན་ཅི་མ་ལོག་པའི་ཡོངས་གྲུབ་གཉིས་ཏེ། དབུས་མཐར། འགྱུར་མེད་ཕྱིན་ཅི་མ་ལོག་པའི། །ཡོངས་སུ་གྲུབ་པ་རྣམ་པ་གཉིས། །ཞེས་གསུངས་པ་ལྟར་ཡིན་ཞིང་དབྱེ་བ་དངོས་མ་ཡིན་ནོ། ། གསུམ་པ་རྣམ་ཤེས་ཚོགས་བརྒྱད་བཤད་པ།གསུམ་པ་རྣམ་ཤེས་ཚོགས་བརྒྱད་བཤད་པ་ལ། ཀུན་གཞི་རྣམ་པར་ཤེས་པ་དང༌། ཉོན་ཡིད་བཤད་པ་དང༌། འཇུག་ཤེས་བཤད་པ་དང་གསུམ། དང་པོ་ནི། སུམ་ཅུ་པ་ལས། དེ་ལ་ཀུན་གཞི་རྣམ་ཤེས་ནི། །རྣམ་སྨིན་ས་བོན་ཐམས་ཅད་པ། །དེ་ནི་ལེན་པ་དག་ཏུ་གནས། །རྣམ་པར་རིག་པ་མི་རིག་པ། །རྟག་ཏུ་རེག་དང་ཡིད་བྱེད་པ། །རིག་དང་འདུ་ཤེས་སེམས་པར་ལྡན། །དེ་ལ་ཚོར་བ་བཏང་སྙོམས་ཏེ། །དེ་ནི་མ་བསྒྲིབས་ལུང་མ་བསྟན། །རེག་ལ་སོགས་པའང་དེ་བཞིན་ནོ། །དེ་ནི་རྒྱུན་འབབ་ཆུ་བོ་བཞིན། །དགྲ་བཅོམ་ཉིད་ན་དེ་བཟློག་གོ །ཞེས་པ་ལྟར་ཀུན་གཞི་རྣམ་ཤེས་ཀྱི་མཚན་ཉིད་ནི། རྣམ་སྨིན་དང་ས་བོན་ཅི་རིགས་པ་བགོ་བའི་བརྟེན་གཞིར་གྱུར་བའི་མ་བསྒྲིབས་ལུང་མ་བསྟན་གྱི་དོན་གྱི་ངོ་བོ་རིག་པ་དེའོ། །ངོ་བོ་གསལ་ཞིང་རིག་པ་ཡུལ་གྱི་རྣམ་པ་མི་གསལ་བ། འཁོར་ཀུན་འགྲོ་ལྔ་ཁོ་ན་དང་བཅས་པ། ཚོར་བ་བཏང་སྙོམས་ཁོ་ནའོ། །ལྡོག་དུས་ཐེག་དམན་དགྲ་བཅོམ་ལྷག་མེད་དང༌། ཐེག་ཆེན་ས་དང་པོ་ཐོབ་དུས་སུ་མཚན་ཉིད་ལྡོག་གོ །གསུམ་པ་ཉོན་ཡིད་ནི། དེ་ལ་གནས་ཏེ་རབ་བྱུང་ཞིང༌། །དེ་ལ་དམིགས་པས་ཡིད་ཅེས་བྱ། །རྣམ་ཤེས་ངར་སེམས་བདག་ཉིད་ཅན། །བསྒྲིབས་ལ་ལུང་དུ་མ་བསྟན་པའི། །ཉོན་མོངས་བཞི་དང་རྟག་ཏུ་འགྲོགས། །བདག་ཏུ་ལྟ་དང་བདག་ཏུ་རྨོངས། །བདག་རྒྱལ་བདག་ཏུ་ཆགས་པ་སྟེ། །གང་དུ་སྐྱེས་པ་དེའོ་གཞན། །རེག་སོགས་ཀྱང་དེ་དགྲ་བཅོམ་མེད། །འགོག་པའི་སྙོམས་པར་འཇུག་ན་མེད། །འཇིག་རྟེན་འདས་པའི་ལམ་ན་མེད། །ཅེས་པ་ལྟར་ཉོན་ཡིད་ཀྱི་མཚན་ཉིད་ནི། ཀུན་གཞི་རྣམ་ཤེས་ལ་དམིགས་ནས་བདག་ཏུ་རློམ་པའི་བསྒྲིབས་ལུང་མ་བསྟན་གྱི་གཙོ་སེམས་དེའོ། །འཁོར་ཉོན་མོངས་པ་བདག་ཏུ་ལྟ་བ་དང༌། བདག་ཏུ་རྨོངས་པ་དང༌། བདག་ཏུ་ང་རྒྱལ་བ་དང༌། བདག་ཏུ་ཆགས་པ་དང་བཞིའོ། །ཁམས་གང་དུ་སྐྱེས་པ་དེའི་སས་བསྡུས་ལ། འཁོར་ཡང་དེས་བསྡུས་སོ། །ལྡོག་དུས་འགོག་སྙོམས་པ་དང་འདས་ལམ་མཉམ་བཞག་ཏུ་གནས་སྐབས་ལྡོག་ལ། དམན་པའི་དགྲ་བཅོམ་དང་ཐེག་ཆེན་མཐོང་ལམ་ཐོབ་ཚེ་མཚན་ཉིད་ལྡོག་གོ །གསུམ་པ་འཇུག་ཤེས་དྲུག་ནི། གསུམ་པ་ཡུལ་རྣམ་དྲུག་པོ་ལ། །དམིགས་པ་གང་ཡིན་དེ་དག་སྟེ། །མི་དགེ་དགེ་དང་གཉིས་མིན་པའོ། །ཀུན་ཏུ་འགྲོ་དང་བྱེ་བྲག་ངེས། །སེམས་ལས་བྱུང་བ་དགེ་བ་དང༌། དེ་བཞིན་ཉོན་མོངས་ཉེ་ཉོན་མོངས། །ཚོར་བ་གསུམ་དང་དེ་མཚུངས་ལྡན། །ཞེས་པ་ལྟར་རང་གི་བདག་རྐྱེན་མིག་དབང་ལ་བརྟེན་ནས་རང་ཡུལ་དུ་གྱུར་བའི་གཟུགས་ཀྱི་སྐྱེ་མཆེད་ཀྱི་ངོ་བོ་མཐོང་བའི་གཙོ་སེམས་དེ། མིག་གི་རྣམ་པར་ཤེས་པའི་མཚན་ཉིད། གཞན་ལྔ་ལ་རིགས་འདྲ་སྦྱར་བར་བྱའོ། །དེ་དྲུག་ལ་དགེ་མི་དགེ་ལུང་མ་བསྟན་གསུམ་ཡོད་ལ། ཚོར་བ་བདེ་སྡུག་བཏང་སྙོམས་གསུམ་དང༌། ཉོན་མོངས་པ་དང་མཚུངས་པར་ལྡན་པ་ཡོད་དོ། །འདིར་རྣམ་ཤེས་ཚོགས་བརྒྱད་མདོར་བསྡུས་པ་ཙམ་བརྗོད་པའོ། །རྒྱས་པར་ས་བཟང་གི་མངོན་པ་ཀུན་བཏུས་ཀྱི་འགྲེལ་བ་སོགས་ལས་ཤེས་པར་བྱའོ། །བཞི་བ་བདག་མེད་གཉིས་བཤད་པ་ལ། དགག་བྱ་ངོས་བཟུང་བའི་སྒོ་ནས་དེ་མེད་པར་གཏན་ལ་བབས་པ་ནི། རང་ལུགས་ལ་སྤྱིར་གང་ཟག་གི་བདག་ཏུ་གྲུབ་པའི་ཚད་མེད་ཀྱང་བརྟག་པ་མཐའ་བཟུང་གྀས་བཞག་ན་གང་ཟག་གི་བདག་ནི་རྟག་གཅིག་རང་དབང་ཅན་དུ་གྲུབ་པ་དེ་ཡིན་པའི་ཕྱིར་ཏེ། གང་ཟག་གི་བདག་ཏུ་གྲུབ་ན་བདག་འཛིན་གྱི་ཇི་ལྟར་འཛིན་པ་ལྟར་གྲུབ་དགོས་ལ། དེས་ནི་རྟག་གཅིག་རང་དབང་ཅན་དུ་གྲུབ་པར་འཛིན་པ་ཡིན་པའི་ཕྱིར་ཏེ། བདག་འཛིན་གྱིས་ཕུང་པོ་ལ་དམིགས་ནས་ངའོ་སྙམ་དུ་འཛིན་པའི་འཛིན་ཚུལ་ལ་སྔོན་གྱི་ང་དེ་ད་ལྟའི་ང་སོགས་ཡིན་སྙམ་པ་དེ་ལ་རྟག་པར་འཛིན་པ་དང༌། ང་སྙམ་པ་ཤར་དུས་དངོས་པོ་གང་ལ་ཡང་མ་འདྲེས་པའི་ཁོ་རང་གི་ངོ་བོ་ཚུགས་ཐུབ་གཅིག་ཡོད་པའི་ཁུངས་སུ་སྣང་བ་དེ་གཅིག་པུ་འཛིན་པ་ཡིན་ལ། ལོངས་སྤྱོད་དང་རྫས་འཁོར་སོགས་ལ་རང་ཉིད་བདག་པོའི་ཚུལ་དུ་ཡོད་པ་ལྟར་སྣང་བ་དེ་རང་དབང་ཅན་དུ་འཛིན་ཚུལ་ཞེས་བྱ་བ་ཡིན་པའི་ཕྱིར་ཏེ། རྗེ་སྒྲོལ་མགོན་གྱི་སྐྱེས་བུ་གསུམ་གྱི་མན་ངག་བདུད་རྩིའི་ཉིང་ཁུ་ལས། དེ་ལ་ངའམ་བདག་ཅེས་བྱ་བ་གནས་ལུགས་ལ་ཡོད་ན་ཏ་དེ་བདག་ཡིན་མོད། དེ་འདྲ་དངོས་པོ་ལ་ཡེ་མ་གྲུབ་པས་གང་ཟག་གི་བདག་དེ་འདྲ་ངོ་བོའི་སྒོ་ནས་སྟོན་རྒྱུ་མེད། འོན་ཀྱང་མེད་པ་ལ་ཡོད་པར་འཛིན་པའི་བདག་འཛིན་གྱི་འཛིན་སྟངས་རློམ་ཚུལ་དང་བསྟུན་ན་རྟག་པ་གཅིག་པུ་རང་དབང་ཅན་དུ་འཛིན་པ་ཡིན་ལ། དེ་ཡང་ན་ནང་ངས་འདི་བྱས། ང་ད་གཟོད་འདི་བྱེད་སྙམ་པ། ན་ནང་གི་ང་དེ་ད་ལྟའི་ང་འདི་ཡིན། འདི་ད་བཟོད་ཡང་འགྲོ་སྙམ་པ་དེ་རྟག་པར་འཛིན་པ་ཟེར། ང་སྙམ་པ་ཤར་དུས་ཕྱི་ནང་གི་དངོས་པོ་གཞན་སུ་དང་ཡང་མ་འདྲེས་པའི་ཁོ་རང་གི་ངོ་བོ་ཚུགས་ཐུབ་ཅིག་ཡོད་པའི་ཁུངས་སུ་སྣང་བ་དེ་གཅིག་པུར་འཛིན་པ་ཡིན། ཇི་ལྟར་རིགས་པའི་ལོངས་སྤྱོད་དམ། རྫས་སམ་འཁོར་ལ་རང་ཉིད་བདག་པོའི་ཚུལ་དུ་ཡོད་པ་ལྟར་སྣང་བ་དེ་རང་དབང་ཅན་དུ་འཛིན་པ་ཞེས་བྱ་བ་ཡིན། ཞེས་དང༌། ཐེག་མཆོག་དབུ་མའི་ཟིན་བྲིས་ལས། གང་ཟག་གི་བདག་ཏུ་ལྟ་བ་དེའི་ངོ་བོ་ནི། ཕུང་པོ་ལ་དམིགས་ནས་ངའོ་སྙམ་དུ་འཛིན་པ་ཡིན་ཞིང༌། ཁྱད་པར་རྟག་པ་ཡིན་པ། གཅིག་པུ་ཡིན་པ། རང་དབང་ཅན་ཡིན་པར་འཛིན་ཅིང༌། ཞེས་གསུངས་པའི་ཕྱིར་རོ། །ཆོས་བདག་ནི་མེད་ཀྱང་ཆོས་ཀྱི་བདག་འཛིན་གྱིས་འཛིན་ཚུལ་དང་བསྟུན་ནས་བརྟག་པ་མཐའ་བཟུང་གིས་བཞག་ཏུ་ཡོད་དེ། ཕུང་སོགས་ཀྱི་ཆོས་རྣམས་བདེན་དངོས་ཚུགས་ཐུབ་ཀྱི་ངོ་བོར་རང་བཞིན་གྱིས་གྲུབ་པ་དེ། ཆོས་ཀྱི་བདག་ཅེས་བྱ་སྟེ། ཐེག་མཆོག་དབུ་མའི་ཟིན་བྲིས་ལས། དགག་བྱ་ཆོས་ཀྱི་བདག་འཛིན་དངོས་བཟུང་བ། ཞེས་པ་ནས། འདུས་བྱས་ཀྱི་དངོས་པོ་ཚུགས་ཐུབ་པ་རང་བཞིན་གྱིས་གྲུབ་པ་ཞིག་ཡོད་ན། ངོ་བོར་རང་བཞིན་གྱིས་གྲུབ་པ་དེ། ཆོས་ཀྱི་བདག་ཅེས་བརྗོད་པ་ཡིན་ནོ། །ཞེས་གསུངས་སོ། །ཡང་ན་སྣང་གྲགས་ཀྱི་ཆོས་ཀུན་གནས་ལུགས་སུ་གྲུབ་པ་དེ་བཞག་ཆོག་གོ །གོང་དུ་བཞག་པའི་རྟག་གཅིག་རང་དབང་ཅན་དུ་གྲུབ་པའི་བདག་གིས་སྟོང་བའི་གང་ཟག་གི་བདག་མེད་ནི་ཉན་རང་རྣམས་ཀྱིས་རྟོགས་པའི་གང་ཟག་གི་བདག་མེད་ཡིན་ལ། གནས་ཚུལ་ལམ་གཤིས་ལུགས་ལ་ང་བདག་ཏུ་གྲུབ་པ་ནི་སྤྲོས་བྲལ་གྱི་གང་ཟག་གི་བདག་མེད་ཀྱི་དགག་བྱ་དང༌། གནས་ལུགས་ལ་ང་བདག་གང་ཡང་མ་གྲུབ་པ་ནི་སྤྲོས་བྲལ་གྱི་གང་ཟག་གི་བདག་མེད་ཡིན་ལ། དེ་ཐེག་ཆེན་གྱི་བསྒོམ་བྱ་དང་ཆོས་ཀྱི་བདག་མེད་ཀྱི་ནང་དུ་འདུ་བའི་ཕྱིར་ཏེ། ཤེས་རབ་སྙིང་པོའི་ཚིག་འགྲེལ་རྨད་དུ་བྱུང་བ་ལས། གང་ཟག་བདག་མེད་བྱང་ཆུབ་སེམས་དཔས་མི་སྒོམ་པ་ལྟར་གསུངས་པ་ནི། དགག་གཞི་ཕུང་པོ་ཡོད་པར་བྱས་ནས་དེའི་སྟེང་དུ་ང་བདག་མེད་པར་སྒོམ་པའི་གང་ཟག་གི་བདག་མེད་སྒོམ་ཚུལ་དེ་འདྲ་མི་བྱེད་ཅེས་པའི་དོན་ཡིན་གྱི། སྤྲོས་བྲལ་གྱི་རྣམ་པ་ཅན་གྱི་གང་ཟག་གི་བདག་མེད་ནི་རྒྱལ་སྲས་རྣམས་ཀྱི་བསྒོམ་བྱ་ཁོ་ནའོ། །གནས་ཚུལ་ལ་ང་བདག་གང་ཡང་མ་གྲུབ་པ་ནི། གང་ཟག་གི་བདག་མེད་ཡིན་ལ། གནས་ཚུལ་ལ་སྣང་གྲགས་ཀྱི་ཤེས་བྱ་གང་ཡང་ཡོད་མ་མྱོང་བ་ནི་ཆོས་ཀྱི་བདག་མེད་ཡིན་པས། སྔ་མ་ཕྱི་མའི་ནང་དུ་འདུས་པའི་ཕྱིར་ཆོས་ཀྱི་བདག་མེད་བསྒོམས་པས་གང་ཟག་གི་བདག་མེད་སྒོམ་པར་ཤུགས་ལ་འགྲུབ་བོ། །ཞེས་གསུངས་པའི་ཕྱིར་རོ། །ཆོས་ཀྱི་བདག་མེད་གཙོ་བོ་ནི་དོན་དམ་གྱི་གཞི་ཡིན་ནོ། ། གཉིས་པ་དོན་དམ་པའི་དབང་དུ་བྱས་པའི་གཞི་ཐུན་མོང་མ་ཡིན་པ།གཉིས་པ་དོན་དམ་པའི་དབང་དུ་བྱས་པའི་གཞི་ཐུན་མོང་མ་ཡིན་པ་ནི། ཆོས་ཉིད་དོན་དམ་འོད་གསལ་ཆོས་སྐུའི་གཏེར་ཆེན་པོ་གཤེགས་སྙིང་རིགས་འདུས་ཆོས་ཅན་བརྟན་དང་གཡོ་བ་ཀུན་ལ་ནམ་མཁའ་ལྟར་ཁྱབ་ཀྱང༌། སྒྲིབ་བྱེད་གློ་བུར་གྱི་དྲི་མས་བསྒྲིབས་ནས་མ་མཐོང་བའི་ཆོས་དབྱིངས་དེ་ཉིད་ནི་གཞི་ཐུན་མོང་མ་ཡིན་པ་ཡིན་ལ། དེ་ཡང་ཆོས་ཀྱི་དབྱིངས་དེ་འཁོར་འདས་གཉིས་ཀྱི་ཆོས་ཀུན་གྱི་གཞི་དང་གནས་དང་རྟེན་བྱེད་པས་ན་གཞི་ཞེས་བྱ་སྟེ། རྒྱུད་བླ་མའི་འགྲེལ་བར་མདོ་དྲངས་ནས་བཤད་པ། ཐོག་མ་མེད་པའི་དུས་ཀྱི་དབྱིངས། །ཆོས་རྣམས་ཀུན་གྱི་གནས་ཡིན་ཏེ། །དེ་ཡོད་པས་ན་འགྲོ་ཀུན་དང༌། །མྱ་ངན་འདས་པ་ཐོབ་པ་ཡིན། །ཞེས་དང༌། མདོ་ལས། དེ་བཞིན་གཤེགས་པའི་སྙིང་པོ་ནི་ཞེས་པ་ནས་གཞི་དང་གནས་དང་རྟེན་ལགས་སོ། །ཞེས་དང༌། ཀུན་མཁྱེན་ཕྱོགས་རྒྱལ་བའི་གཞི་ལམ་འབྲས་གསུམ་གྱི་ངོ་སྤྲོད་ཡང་དག་དོན་གསལ་ལས།འཁོར་འདས་ཀྱི་ཆོས་ཀུན་གྱི་གཞི་ཡིན་པས་སམ་གློ་བུར་གྱི་དྲི་མ་སྦྱང་བར་བྱ་བའི་གཞི་ཡིན་པས་གཞི་ཞེས་བྱ་སྟེ། དེ་ནི་གཞིའི་དོན་ནོ། །ཞེས་གསུངས་པའི་ཕྱིར་རོ། །དེ་ཡང་འཁོར་འདས་གཉིས་ཀྱི་གཞི་བྱེད་ཚུལ་ནི། ཇི་སྐད་དུ། རང་བཞིན་གྱིས་ནི་ཡོངས་དག་ཕྱིར། །ཉོན་མོངས་གདོད་ནས་ཟད་ཕྱིར་རོ། །ཞེས་གསུངས་པ་ལྟར་དོན་དམ་ཆོས་དབྱིངས་རང་གི་ངོ་བོ་ལ་དྲི་མས་གདོད་ནས་གོས་མ་མྱོང་བས་དོན་དམ་པའི་མྱང་འདས་ཡིན་ཞིང༌། དེ་ལ་དམིགས་ཏེ་ལམ་ཉམས་སུ་བླངས་ན་མཐར་མྱང་འདས་ཐོབ་པར་འགྱུར་པས་ཞི་བ་མྱང་འདས་ཀྱི་གཞིར་འཇོག་པ་ཡིན་ཏེ། ཐེག་མཆོག་དབུ་མ་ལས། རང་གི་ངོ་བོ་དོན་དམ་མྱ་ངན་འདས། །འདི་ལ་དམིགས་པས་ཞི་བ་ཐམས་ཅད་ཐོབ། །ཅེས་གསུངས་པའི་ཕྱིར་རོ། །དོན་དམ་ཆོས་དབྱིངས་ཀྱིས་འཁོར་བའི་གཞི་བྱེད་ཚུལ་ནི། དཔེར་ན་གསེར་ཡོད་ན་གཡའ་འབྱུང་ལ་མེད་ན་མི་འབྱུང་བ་ལྟར་དོན་དམ་ཆོས་དབྱིངས་ཡོད་པའི་མཐུ་ལས་ཟག་བཅས་འཁོར་བ་འབྱུང་བ་ཡིན་ལ་དེ་མེད་ན་འཁོར་བ་མི་འབྱུང་ངོ། །དོན་དམ་ཆོས་དབྱིངས་རྟེན་གཞིའི་ཚུལ་དུ་ཡོད་པས་འཁོར་བ་དེ་ཡང་འབྱུང་བ་ཆོས་ཉིད་ཀྱི་རིགས་པ་ཡིན་ཏེ། དཔེར་ན་ནམ་མཁའ་ལ་སྤྲིན་འབྱུང་ཞེས་པའང་དེས་དེ་དངོས་སུ་བསྐྱེད་པ་མ་ཡིན་ཀྱང་ནམ་མཁའ་དེ་སྤྲིན་སོགས་གློ་བུར་བ་འབྱུང་བའི་གཞིར་འཇོག་པ་བཞིན་དུ། དོན་དམ་ཆོས་དབྱིངས་འོད་གསལ་བའི་ཀུན་གཞིའི་ཡེ་ཤེས་ལ་བརྟེན་ནས་རྣམ་ཤེས་ཚོགས་བརྒྱད་སོགས་ཀུན་རྫོབ་འཁོར་བའི་བསྡུས་པའི་ཆོས་རྣམས་འབྱུང་བ་ཡིན་པའི་ཕྱིར་ཏེ། ཐེག་མཆོག་དབུ་མ་ལས། གསེར་ཡོད་ན་ནི་དེ་ཡི་གཡའ་བཞིན་དུ། །འཁོར་བ་ཐོག་ཐ་མེད་དེའང་དེ་ལས་ཤར། །དབྱིངས་དེ་འཁོར་བའི་རྒྱུ་ནི་མིན་མོད་ཀྱང༌། །དེ་མེད་ན་ནི་དེ་ཡང་མི་སྲིད་པས། །མཁའ་ལ་རླུང་གི་དཀྱིལ་འཁོར་རྟེན་ཞེས་ལྟར། །འཁོར་བའི་གཞིར་གྱུར་ཞེས་པའི་རྣམ་བཞག་བྱས། །ཞེས་གསུངས་པའི་ཕྱིར་རོ། །དེ་ལྟ་བུའི་རང་བཞིན་རྣམ་དག་འོད་གསལ་ཆོས་ཀྱི་དབྱིངས་དོན་དམ་རང་བྱུང་གི་དེ་བཞིན་ཉིད་དེ་ཆོས་ཅན་བརྟན་དང་གཡོ་བ་ཀུན་ལ་ཉེ་རིང་མེད་པར་གདོད་ནས་གཞིའི་ཚུལ་དུ་བཞུགས་པ་ཡིན་ཏེ། ས་བཟང་མ་ཏི་པཎ་ཆེན་གྱི་ཞལ་སྔ་ནས། གཞི་ལ་དོན་དམ་ཆོས་ཉིད་དེ་བཞིན་ཉིད། །རང་བཞིན་རྣམ་དག་འོད་གསལ་ཆོས་ཀྱི་དབྱིངས། །རང་བྱུང་ལྷན་གཅིག་སྐྱེས་པའི་ཡེ་ཤེས་སྐུ། །བརྟན་གཡོ་ཀུན་ལ་གདོད་ནས་ཁྱབ་པར་བཞུགས། །ཞེས་གསུངས་པའི་ཕྱིར། དེ་འདྲའི་གཞི་ཆོས་དབྱིངས་དེ་ལུས་ཅན་སེམས་ཅན་ཐམས་ཅད་ལ་ཁྱད་མེད་དུ་བཞུགས་པར་སྒྲུབ་བྱེད་ཀྱི་ལུང་རིགས་གཉིས་ལས། དང་པོ་ནི། དེ་བཞིན་གཤེགས་པའི་སྙིང་པོའི་མདོ་ལས། དེ་བཞིན་གཤེགས་པ་བྱུང་ཡང་རུང་མ་བྱུང་རུང༌། སེམས་ཅན་འདི་དག་ནི་རྟག་ཏུ་དེ་བཞིན་གཤེགས་པའི་སྙིང་པོ་ཅན་ཡིན་ནོ། །ཞེས་དང༌། ཡུམ་ཚུལ་བརྒྱ་ལྔ་བཅུ་པ་ལས། ཐམས་ཅད་ཀྱི་རང་བཞིན་ནི་ཡིན་པས་སེམས་ཅན་ཐམས་ཅད་དེ་བཞིན་གཤེགས་པའི་སྙིང་པོ་ཅན་ཡིན་ནོ། །ཞེས་དང༌། ཡུམ་མཆོག་དང་པོ་ལས། བྱང་ཆུབ་སེམས་དཔའ་ཀུན་ཏུ་བཟང་པོ་སེམས་ཅན་ཐམས་ཅད་ནི་དེ་བཞིན་གཤེགས་པའི་སྙིང་པོ་ཅན་ནོ། །ཞེས་སོགས་ངེས་དོན་གྱི་མདོ་རྒྱུད་མཐའ་ཡས་པ་ཡོད་ལ། རྒྱས་པར་རི་ཆོས་ངེས་དོན་རྒྱ་མཚོ་སོགས་ལས་ཤེས་པར་བྱའོ། ། གཉིས་པ་རིགས་པ་ནི། ལུས་ཅན་སེམས་ཅན་རྣམས་དེ་བཞིན་གཤེགས་པའི་སྙིང་པོ་ཅན་ཡིན་པར་བསྟན་བཅོས་རྒྱུད་བླ་སོགས་ལས་རིགས་པ་གསུམ་གསུངས་པ་འདི་ལྟ་སྟེ། ལུས་ཅན་སེམས་ཅན་རྣམས་ཆོས་ཅན། དེ་བཞིན་གཤེགས་པའི་སྙིང་པོ་ཅན་ཡིན་ཏེ། ཁྱོད་ལ་སངས་རྒྱས་ཆོས་ཀྱི་སྐུ་འཕྲོ་བ་སྟེ་ཁྱབ་པར་ཡོད་པའི་ཕྱིར་ཏེ། སངས་རྒྱས་ཡེ་ཤེས་སེམས་ཅན་གྱི་ཚོགས་ལ་ཞུགས་པའི་ཕྱིར་ཏེ། རྒྱུད་བླ་མ་ལས། རྫོགས་སངས་སྐུ་ནི་འཕྲོ་ཕྱིར་དང༌། །ཞེས་དང༌། སངས་རྒྱས་ཡེ་ཤེས་སེམས་ཅན་ཚོགས་ཞུགས་ཕྱིར། །ཞེས་གསུངས་སོ། །ལུས་ཅན་སེམས་ཅན་རྣམས་ཆོས་ཅན། དེ་བཞིན་གཤེགས་པའི་སྙིང་པོ་ཅན་ཡིན་ཏེ། སངས་རྒྱས་དང་སེམས་ཅན་གྱི་དེ་བཞིན་ཉིད་ལ་དབྱེ་བ་མེད་པའི་ཕྱིར་ཏེ། ཆོས་ཀྱི་དབྱིངས་ཀྱི་རང་བཞིན་དྲི་མ་མེད་པ་དེ་ནི་འཁོར་བ་དང་མྱང་འདས་ཀྱི་ཆོས་ཉིད་གཉིས་སུ་དབྱེར་མེད་པའི་ཕྱིར་ཏེ། རྒྱུད་བླ་མ་ལས། དེ་བཞིན་ཉིད་དབྱེར་མེད་ཕྱིར་དང༌། །ཞེས་དང༌། རང་བཞིན་དྲི་མེད་དེ་ནི་གཉིས་མེད་དེ། །ཞེས་གསུངས་སོ། །ལུས་ཅན་སེམས་ཅན་རྣམས་ཆོས་ཅན། དེ་བཞིན་གཤེགས་པའི་སྙིང་པོ་ཅན་ཡིན་ཏེ། སངས་རྒྱས་ཀྱི་སྟོབས་བཅུ་ལ་སོགས་པ་རང་བཞིན་གྱི་རིགས་སེམས་ཅན་ཐམས་ཅད་ལ་ཡོད་པའི་ཕྱིར་ཏེ། སེམས་ཅན་གྱི་རིགས་དེ་དྲི་མ་དང་བྲལ་བའི་ ཕྱིར་དང་སངས་རྒྱས་ཀྱི་རིགས་དང་ཐ་དད་མེད་པར་ཤིན་ཏུ་འདྲ་ཞིང་ཉེ་བར་སྤྱོད་ཅིང་ཡོད་པའི་ཕྱིར་ཏེ། རྒྱུད་བླ་མ་ལས། རིགས་ཡོད་ཕྱིར་ན་ལུས་ཅན་ཀུན། །རྟག་ཏུ་སངས་རྒྱས་སྙིང་པོ་ཅན། །ཞེས་དང༌། སངས་རྒྱས་རིགས་ལ་དེ་འབྲས་ཉེར་སྤྱོད་ཕྱིར། །ཞེས་གསུངས་པའི་ཕྱིར་རོ། །དེ་ལྟ་བུའི་ཆོས་དབྱིངས་དེ་ནི་རང་བཞིན་གནས་རིགས་ཀྱང་ཡིན་ཏེ། རི་ཆོས་ངེས་དོན་རྒྱ་མཚོ་ལས། ཆོས་ཉིད་རྣམ་པར་མི་རྟོག་ཅིང་འོད་གསལ་བའི་དབྱིངས་གང་ཡིན་པ་དེ་ནི་རང་བཞིན་གྱི་རིགས་སོ། །ཞེས་གསུངས་སོ། །དེ་འདྲའི་དོན་དམ་ཟག་པ་མེད་པའི་ཡེ་ཤེས་དེ་ནི་དྲི་མས་མ་དག་པའི་གནས་སྐབས་སུ་དྲི་མ་གནས་པའི་གཞི་དང༌། ཅུང་ཟད་དག་པའི་གནས་སྐབས་སུ་དྲི་མ་སྦྱོང་བའི་གཞི་དང༌། ཤིན་ཏུ་རྣམ་དག་གི་གནས་སྐབས་སུ་དྲི་མ་དག་པའི་གཞིར་བཞུགས་པ་ཡིན་པས་ནམ་མཁའ་ལྟར་ཀུན་འགྲོ་ཀུན་ཁྱབ་ཏུ་བཞུགས་པ་ཡིན་ནོ། །དེ་ལྟ་བུའི་ཆོས་ཉིད་བདེ་བར་གཤེགས་པའི་སྙིང་པོ་ནི། སངས་རྒྱས་ཀྱི་རང་བཞིན་ཉིད་ཡིན་ལ་དེ་ལ་སྟོབས་དང་མི་འཇིགས་པ་དང༌། ཏིང་ངེ་འཛིན་ཚད་མེད་པ་ལ་སོགས་པ་ཆོས་སྐུའི་ཡོན་ཏན་མཐའ་ཡས་པའི་བདག་ཉིད་དུ་གྲུབ་པ་ཡིན་ཏེ།མྱང་འདས་ཆེན་པོའི་མདོ་ལས། རིགས་ཀྱི་བུ་དེ་བཞིན་གཤེགས་པའི་སྟོབས་བཅུ་དང༌། མི་འཇིགས་པ་བཞི་དང༌། བྱམས་པ་ཆེན་པོ་དང༌། ཐུགས་རྗེ་ཆེན་པོ་དང༌། དྲན་པ་ཉེ་བར་བཞག་པ་གསུམ་དང༌། དཔའ་བར་འགྲོ་བ་ལ་སོགས་པའི་ཏིང་ངེ་འཛིན་གྱི་རྣམ་གྲངས་བྱེ་བ་ཕྲག་བརྒྱད་ཁྲི་རྣམས་དང༌། མཚན་སུམ་ཅུ་རྩ་གཉིས་དང༌། དཔེ་བྱད་བཟང་བོ་བརྒྱད་ཅུ། ཞེས་པ་ནས། དེ་བཞིན་གཤེགས་པའི་སངས་རྒྱས་ཀྱི་རང་བཞིན་ཡིན་ནོ། །ཞེས་དང༌། བསྟན་བཅོས་རྒྱུད་བླ་མ་ལས། འོད་གསལ་བྱས་མིན་དབྱེར་མེད་པར། །འཇུག་ཅན་གང་གཱའི་ཀླུང་གི་ནི། །རྡུལ་ལས་འདས་པའི་སངས་རྒྱས་ཀྱི། །ཆོས་རྣམས་ཀུན་དང་ལྡན་པ་ཉིད། །ཅེས་གསུངས་པའི་ཕྱིར། གཞན་ཡང་དེ་བཞིན་གཤེགས་པའི་སྙིང་པོའི་མདོ་ལ་སོགས་པ་ངེས་དོན་གྱི་མདོ་སྡེ་རྣམས་ཀྱི་དོན་གྱི་སྙིང་པོ་བསྡུས་ནས་རྗེ་བཙུན་བྱམས་མགོན་གྱིས་གསུངས་པ་འདི་ལྟ་སྟེ། བསྟན་བཅོས་རྒྱུད་བླ་མ་ལས། ངོ་བོ་རྒྱུ་འབྲས་ལས་ལྡན་འཇུག་པ་དང༌། །གནས་སྐབས་དེ་བཞིན་ཀུན་ཏུ་འགྲོ་བའི་དོན། །རྟག་ཏུ་མི་འགྱུར་ཡོན་ཏན་རང་བཞིན་ནི། །དོན་དམ་དབྱིངས་ཀྱི་དགོངས་དོན་ཡིན་ཞེས་བྱ། །ཞེས་རྣམ་བཞག་རྣམ་པ་བཅུ་དང༌། སངས་རྒྱས་པད་ངན་སྦྲང་རྩི་སྦྲང་མ་ལ། །སྦུན་ལ་སྙིང་པོ་མི་གཙང་ནང་ན་གསེར། །ས་ལ་གཏེར་དང་མྱུག་སོགས་འབྲས་ཆུང་དང༌། །གོས་ཧྲུལ་ནང་ན་རྒྱལ་བའི་སྐུ་དང་ནི། །བུད་མེད་ངན་མའི་ལྟོ་ན་མི་བདག་དང༌། །ས་ལ་རིན་ཆེན་གཟུགས་ཡོད་ཇི་ལྟ་བར། །གློ་བུར་ཉོན་མོངས་དྲི་མས་བསྒྲིབས་པ་ཡི། །སེམས་ཅན་རྣམས་ལ་དེ་བཞིན་ཁམས་འདི་གནས། །ཞེས་ཡོངས་གྲུབ་དེ་བཞིན་ཉིད་སེམས་ཅན་ལ་ལྟོས་ནས་སྒྲིབ་བྱེད་དྲི་མ་དགུས་བསྒྲིབས་ནས་བཞུགས་ཚུལ་དཔེ་དོན་དང་བཅས་ཏེ་གསལ་བར་གསུངས་སོ། །དེ་ལྟར་རྗེ་རྒྱལ་བ་གཉིས་པ་ཀུན་མཁྱེན་ཇོ་ནང་པ་དང༌། འཇམ་མགོན་བླ་མ་སྒྲོལ་མགོན་ཡབ་སྲས་ཀྱི་གསུང་རབ་ཀྱི་གསུང་ཟིན་དང་མཐུན་པར་གཞིའི་རྣམ་བཞག་མདོར་བསྡུས་ཏེ་བཤད་པའོ། ། གཉིས་པ་ལམ་གྱི་རྣམ་བཞག་བཤད་པ།གཉིས་པ་ལམ་གྱི་རྣམ་བཞག་བཤད་པ་ལ། དེ་ལྟར་གཞི་དོན་དམ་ཆོས་ཀྱི་དབྱིངས་ལ་དོན་དམ་གྱི་ཡོན་ཏན་ཐམས་ཅད་རང་བྱུང་དུ་མི་འབྲལ་པར་བཞུགས་ཀྱང་ལམ་ཚོགས་གཉིས་སྒྲུབ་མི་དགོས་པ་མ་ཡིན་ཏེ། སྤྲོས་བྲལ་མི་རྟོག་པའི་ལམ་གཙོ་བོར་གྱུར་བའི་རྒྱ་ཆེ་བའི་ལམ་མཐའ་དག་བསྒོམས་ཏེ་རྣམ་རྟོག་བདག་འཛིན་གཉིས་སོགས་གློ་བུར་གྱི་དྲི་མ་མཐའ་དག་བསལ་ནས་དོན་དམ་པའི་ཡེ་ཤེས་མངོན་དུ་བྱེད་དགོས་པ་གང་ཞིག ཀུན་རྫོབ་གཟུགས་སྐུ་གསར་དུ་བསྐྱེད་ནས་སེམས་ཅན་གྱི་དོན་འཁོར་བ་ཇི་སྲིད་དུ་བྱ་དགོས་པའི་ཕྱིར་ཏེ། རྒྱུ་འབྲས་དབུ་མའི་ཐིག་ལེ་ལས། གཉེན་པོ་རྣམ་པར་མི་རྟོག་ལམ་སྒོམ་བྱ། །ཞེས་དང༌། ཀུན་མཁྱེན་ཕྱོགས་རྒྱལ་བའི་གཞི་ལམ་འབྲས་གསུམ་ངོ་སྤྲོད་ཡང་དག་དོན་གསལ་ལས། དེ་ལྟར་སངས་རྒྱས་དེ་གཞི་ལ་ཡེ་ནས་བཞུགས་ཀྱང༌། སེམས་ཅན་རྣམས་འཁོར་བར་སྡུག་བསྔལ་བ་ནི། སངས་རྒྱས་དེ་ཉིད་ཉོན་མོངས་པ་གློ་བུར་གྱི་དྲི་མས་བསྒྲིབས་པའི་སྐྱོན་ལས་གྱུར་པ་ཡིན་པས་གློ་བུར་གྱི་དྲི་མ་དང་བྲལ་བར་བྱ་དགོས་ཤིང༌། གློ་བུར་གྱི་དྲི་མ་ནི་རྣམ་པར་རྟོག་པའི་ངོ་བོ་ཡིན་པས། དེའི་གཉེན་པོར་ལམ་རྣམ་པར་མི་རྟོག་པའི་ཏིང་ངེ་འཛིན་འཁོར་དང་བཅས་པ་སྒོམ་པར་བྱ་སྟེ། ཞེས་གསུངས་པ་ལྟར་ལམ་གྱི་རྣམ་བཞག་ཤེས་དགོས་པས་དེ་བཤད་པ་ལ། ལམ་གྱི་སྤང་བྱ། ལམ་གྱི་སྒོམ་བྱ། ལམ་གྱི་རང་བཞིན་བཤད་པ་དང་གསུམ། དང་པོ་ལམ་གྱི་སྤང་བྱ་ནི། ཀུན་མཁྱེན་ཕྱོགས་རྒྱལ་བའི་གཞི་ལམ་འབྲས་གསུམ་ཡང་དག་དོན་གསལ་ལས། སྔགས་དང་ཕ་རོལ་ཏུ་ཕྱིན་པའི་ཐུན་མོང་གི་སྒྲིབ་པའི་རྣམ་པར་བཞག་པ་ནི་སྒྲིབ་པ་ཞེས་བྱ་བ་ཐར་བ་དང་ཐམས་ཅད་མཁྱེན་པ་ལ་སྒྲིབ་པས་སམ། སེམས་ཅན་ཐམས་ཅད་ལ་གནས་ལུགས་ཡང་དག་པའི་དོན་གདོད་མ་ནས་བཞུགས་པའི་སངས་རྒྱས་ཆོས་ཀྱི་སྐུ་དེ་ལ་བསྒྲིབས་པས་ན་སྒྲིབ་པ་ཞེས་བྱའོ། །དེ་ལ་སྤྱིར་ཐར་པ་ལ་སྒྲིབ་པ་ཉོན་མོངས་པའི་སྒྲིབ་པ་དང༌། ཐམས་ཅད་མཁྱེན་པ་ལ་སྒྲིབ་པ་ཤེས་བྱའི་སྒྲིབ་པ་སྟེ་འདི་གཉིས་སུ་སྒྲིབ་པ་ཐམས་ཅད་འདུས་པ་ཡིན་ཏེ། རྗེ་བཙུན་བྱམས་པ་མགོན་པོས་དབུས་དང་མཐའ་རྣམ་པར་འབྱེད་པར།ཉོན་མོངས་པ་ཡི་སྒྲིབ་པ་དང༌། །ཤེས་བྱའི་སྒྲིབ་པ་ཉིད་དུ་བསྟན། །དེར་ནི་སྒྲིབ་པ་ཐམས་ཅད་དེ། །དེ་ཟད་ནས་ནི་གྲོལ་བར་འདོད། །ཅེས་གསུངས་སོ། །ཡང་ཉོན་སྒྲིབ་དང་ཤེས་སྒྲིབ་དང་སྙོམས་འཇུག་གི་སྒྲིབ་པ་གསུམ་དུའང་གསུངས་ཏེ། རྒྱུད་བླ་མར། ཉོན་མོངས་ཤེས་བྱ་སྙོམས་འཇུག་གི །སྒྲིབ་གསུམ་ལས་ནི་ངེས་གྲོལ་ཏེ། །ཞེས་སོ། ། དེ་ལ་ཉོན་སྒྲིབ་དང་ཤེས་སྒྲིབ།དེ་ལ་ཉོན་སྒྲིབ་དང་ཤེས་སྒྲིབ་ནི། རྒྱུད་བླ་མར། འཁོར་གསུམ་རྣམ་པར་རྟོག་པ་གང༌། །དེ་ནི་ཤེས་བྱའི་སྒྲིབ་པར་འདོད། སེར་སྣ་ལ་སོགས་རྣམ་རྟོག་གང༌། །དེ་ནི་ཉོན་མོངས་སྒྲིབ་པར་འདོད། །ཅེས་གསུངས་ཏེ། ལས་དང་བྱ་བ་དང་བྱེད་པ་པོ་སྟེ་འཁོར་གསུམ་དུ་རྣམ་པར་རྟོག་པ་ནི་ཤེས་སྒྲིབ་དང༌། ཕར་ཕྱིན་དང་པོ་ལྔའི་མི་མཐུན་ཕྱོགས་སེར་སྣ་ལ་སོགས་པའི་རྣམ་རྟོག་ནི་ཉོན་སྒྲིབ་དང༌། སྙོམས་འཇུག་གི་སྒྲིབ་པ་ནི་ཏིང་ངེ་འཛིན་གྱི་མི་མཐུན་ཕྱོགས་སུ་གྱུར་བ་རྣམས་ཏེ་འདི་ཤེས་བྱའི་སྒྲིབ་པའི་བྱེ་བྲག་ཡིན་ནོ། །ཡང་ཉོན་མོངས་པའི་སྒྲིབ་པ་ལ་མཐོང་སྤང་གི་ཉོན་མོངས་པ་བརྒྱ་རྩ་བཅུ་གཉིས་དང༌། སྒོམ་སྤང་གི་ཉོན་མོངས་པ་བཞི་བརྒྱ་དང་བཅུ་བཞི་ཡོད་པར་བཤད་དོ། །ཤེས་སྒྲིབ་ལ་མཐོང་སྒོམ་གྱི་ལམ་གྱི་སྤང་བྱ་གཟུང་འཛིན་གྱི་རྟོག་པ་བཞི་ཡོད་དེ། མངོན་པར་རྟོགས་པའི་རྒྱན་ལས། མཐོང་དང་སྒོམ་པའི་ལམ་དག་ལ། །གཟུང་དང་འཛིན་པའི་རྣམ་རྟོག་རྣམས། །ཉེ་བར་ཞི་བར་བྱ་བའི་ཕྱིར། །གཉེན་པོ་རྣམ་པ་བརྒྱད་ཅེས་བྱ། །ཞེས་དང༌། རྣམ་རྟོག་བཞི་བོ་རེ་རེ་ལ་ཡང་དགུ་དགུ་སྟེ་སུམ་བཅུ་རྩ་དྲུག་ཡོད་པར་བཤད་དོ། །ཡང་ན་དེ་བཞིན་གཤེགས་པའི་སྙིང་པོ་ལ་སྒྲིབ་པའི་སྒྲིབ་པ་རྣམ་པ་དགུ་གསུངས་ཏེ། ཞེས་གསུངས་སོ། །བདེ་གཤེགས་སྙིང་པོ་སྒྲིབ་བྱེད་ཀྱི་དྲི་མ་དགུ་ནི། རྒྱུད་བླ་མ་ལས། ཆགས་དང་སྡང་དང་རྨོངས་དང་དེའི། །ཀུན་ལྡང་དྲག་དང་བག་ཆགས་དང༌། །མཐོང་སྒོམ་ལམ་སྤང་མ་དག་དང༌། །དག་པའི་ས་ལ་བརྟེན་པ་ཡི། །དྲི་མ་རྣམ་དགུ །ཞེས་གསུངས་ལ། སྤང་བྱ་དེ་རྣམས་རྒྱས་པར་མངོན་པ་གོང་འོག་རྩ་འགྲེལ་དང་རྒྱུད་བླ་རྩ་འགྲེལ་ལས་ཤེས་པར་བྱའོ། །འཁོར་བའི་རྩ་བ་ནི། མ་རིག་པ་ཡིན་པར་གསུངས་སོ། །སྔགས་ཀྱི་ཐེག་པར་གསུངས་པའི་སྒྲིབ་པ་ནི། སྐུ་བཞི་ལ་སྒྲིབ་བྱེད་གནས་སྐབས་བཞིའི་སྒྲིབ་པ་བཞི་དང༌། མ་དག་འཁོར་བའི་ཕུང་ཁམས་སོགས་སྦྱང་བར་བྱ་བའི་དྲི་མ་རྣམས་ཡིན་ཏེ། གཞི་ལམ་འབྲས་གསུམ་ཡང་དག་དོན་གསལ་ལས། སྐུ་བཞིའི་བདག་ཉིད་ལ་སྒྲིབ་པར་བྱེད་པའི་སྒྲིབ་པ་འཁོར་བའི་གནས་སྐབས་རྣམ་པ་བཞིའི་སེམས་ཡིན། ཞེས་པ་ནས། མདོར་ན་མ་དག་པ་འཁོར་བའི་ཕུང་པོ་ཁམས་དང་སྐྱེ་མཆེད་ལ་སོགས་པ་གློ་བུར་པ་ཐམས་ཅད་སྒྲིབ་པའི་ངོ་བོ་སྟེ་སྦྱང་བར་བྱ་བའི་དྲི་མའོ། །ཞེས་པའོ། །སྒྲིབ་པའི་རྩ་བ་ནི་ཐིག་ལེ་འཕོ་བའི་ཆགས་པ་ཡིན་ཏེ། དཔལ་དུས་ཀྱི་འཁོར་ལོའི་རྒྱུད་ལས། ཐིག་ལེ་བཏང་ན་རྣལ་འབྱོར་རྣམས་ཀྱིས་མཆོག་གི་བདེ་བ་སྐྱེ་བའི་ས་བོན་སྤངས་ལ་ཐར་བ་གང༌། །དེ་ཕྱིར་འཁོར་བའི་བདེ་བའི་སྐད་ཅིག་འདི་ནི་སྡོམ་བརྩོན་རྣམས་ཀྱིས་ཐམས་ཅད་དུས་སུ་སྤངས་བར་བྱ། །ཞེས་དང༌། གཞི་ལམ་འབྲས་གསུམ་ཡང་དག་དོན་གསལ་ལས། འཁོར་བ་པ་རྣམས་ཀྱི་ཐིག་ལེ་འཕོ་བའི་ཆགས་པ་ནི་སྒྲིབ་པ་ཐམས་ཅད་ཀྱི་རྩ་བ་ཡིན་པར་གསུངས་སོ། །ཞེས་སོགས་རྒྱས་པར་གསུངས་སོ། ། གཉིས་པ་ལམ་གྱི་སྒོམ་བྱ།གཉིས་པ་ལམ་གྱི་སྒོམ་བྱ་ནི། ཐེག་དམན་གྱིས་མི་རྟག་སོགས་བཅུ་དྲུག་དང༌། རྟེན་འབྲེལ་བཅུ་གཉིས། ངེས་འབྱུང་གི་བསམ་པ་སོགས་བསྒོམ་ལ། ཐེག་ཆེན་གྱིས་དེ་རྣམས་ཀྱི་སྟེང་དུ་ཆོས་ཀྱི་བདག་མེད་དང༌། གཞན་དོན་ཁུར་འཁྱེར་གྱི་སྙིང་རྗེ་དང༌། ཐེག་ཆེན་སེམས་བསྐྱེད། ཕར་ཕྱིན་དྲུག་དང༌།མཐར་ཐུག་གི་སྐུ་བཞི་རྣམས་བསྒོམ་པའོ།། །། གསུམ་པ་ལམ་གྱི་རང་བཞིན་བཤད་པ།གསུམ་པ་ལམ་གྱི་རང་བཞིན་བཤད་པ་ལ། ལམ་ལྔ་དང༌། ལྟ་སྒོམ་སྤྱོད་གསུམ་གྱི་སྒོ་ནས་ལམ་བཤད་པ་དང་གཉིས།དང་པོ་ལ། མཚན་ཉིད། དབྱེ་བ། སོ་སོའི་རང་བཞིན་བཤད་པ་དང་གསུམ། དང་པོ་ནི། ཐབས་དང་ཤེས་རབ་ཟུང་དུ་འབྲེལ་བའི་དགེ་བ་གང་ཞིག རྣམ་པར་གྲོལ་བའི་འཇུག་ངོགས་སུ་གྱུར་བ་དེ། ལམ་མམ་ལམ་བདེན་གྱི་མཚན་ཉིད་ཡིན་ཏེ། མདོ་ལས། ཐབས་དང་བཅས་པའི་ཤེས་རབ་ནི་ལམ་མོ། །ཤེས་རབ་དང་བཅས་པའི་ཐབས་ནི་ལམ་མོ། །ཞེས་གསུངས་སོ། བྱེད་ལས་ནི། ཟག་པ་དང་བཅས་པ་འབྲས་བུའི་ཆོས་ཐམས་ཅད་སྡུག་བསྔལ་དུ་ཤེས་པར་བྱས་ནས་དེའི་རྒྱུ་ཉོན་མོངས་པ་སྤངས་ཞིང༌། དེ་དག་གིས་རྣམ་པར་དག་པ་མངོན་སུམ་དུ་བྱ་བའི་ཆེད་དུ་ཟག་པ་མེད་པའི་དགེ་བའི་རྩ་བ་རྣམས་བསྟེན་པ་ཡིན་ཏེ། མངོན་པ་ཀུན་བཏུས་ལས། ལམ་གང་གིས་སྡུག་བསྔལ་ཡོངས་སུ་ཤེས་པ་དང་ཀུན་འབྱུང་སྤོང་བ་དང་འགོག་པ་མངོན་དུ་བྱེད་པ་དང་ལམ་བསྒོམ་པ་སྟེ་འདི་ནི་ལམ་གྱི་མཚན་ཉིད་མདོར་བསྡུས་པའོ། །ཞེས་གསུངས་པ་ལྟར་རོ། །གཉིས་པ་དབྱེ་བ་ནི་དེ་ཉིད་ལས། ལམ་རྣམ་པ་ལྔ་སྟེ། ཚོགས་ཀྱི་ལམ་དང་སྦྱོར་བའི་ལམ་དང་མཐོང་བའི་ལམ་དང་སྒོམ་པའི་ལམ་དང་མཐར་ཕྱིན་པའི་ལམ་མོ། །ཞེས་པ་ལྟར་རོ། །ཡང་ན་ཐེག་གསུམ་གྱི་ལམ་གསུམ་ཡོད། ཉན་ཐོས་ཀྱི་ལམ་ནི། རྒྱུད་བླ་མ་ལས། མི་རྟག་སྡུག་བསྔལ་བདག་མེད་དང༌། །ཞི་བའི་སྒྲའི་ཐབས་མཁྱེན་པས། །སེམས་ཅན་སྲིད་གསུམ་སྐྱོ་བསྐྱེད་ནས། །མྱ་ངན་འདས་ལ་རབ་ཏུ་འཇུག །ཅེས་པ་ལྟར་མི་རྟག་བཅུ་དྲུག་བསམ་གཏན་ས་དྲུག་ལ་སོགས་ལ་བརྟེན་ནས་བསྒོམས་ཏེ་ཉོན་སྒྲིབ་ཀྱི་གཉེན་པོར་གྱུར་བའི་ཚོགས་ལམ་སོགས་ལམ་རྣམ་པ་ལྔའོ། །རང་རྒྱལ་གྱི་ལམ་ནི། མི་རྟག་སོགས་བཅུ་དྲུག་དང་རྟེནའབྲེལ་བཅུ་གཉིས་སོགས་བསྒོམས་སྟེ་ཉོན་སྒྲིབ་སོགས་སྤོང་བའི་ཚོགས་ལམ་སོགས་ལྔའོ། །ཕྱོགས་རྒྱལ་བ་དང་ཉ་དབོན་པ་སོགས་ཀྱིས་རང་རྒྱལ་གྱིས་གཟུང་བ་ཕྱི་དོན་མེད་པར་རྟོགས་ཏེ། ཤེས་སྒྲིབ་ཀྱི་ཕྱོགས་གཅིག་ཕྱི་རོལ་དོན་འཛིན་གྱི་རྟོག་པ་སྤངས་བར་གསུངས་སོ། །སྔོན་མེད་ལེགས་བཤད་དུ་མངོན་རྟོགས་རྒྱན་ལས། གཟུང་དོན་རྟོག་པ་སྤོང་ཕྱིར་དང༌། ཞེས་སོགས་ཀྱི་ལུང་དོན་རང་རྒྱལ་གྱིས་གཟུང་བ་བདེན་མེད་རྟོགས་པའི་དོན་མ་ཡིན་པར་གསུངས་སོ། །ཐེག་ཆེན་གྱི་ལམ་ནི་ཆོས་ཀྱི་བདག་མེད་སོགས་ལམ་ཕ་རོལ་ཏུ་ཕྱིན་པ་དྲུག་ཚོགས་ལམ་སྦྱོར་ལམ་མཐོང་ལམ་སྒོམ་ལམ་གྱི་སྐབས་སུ་བསྐལ་ཆེན་གྲངས་མེད་གསུམ་ལ་བསྒོམས་ནས་མཐར་སྒོམ་ལམ་རྡོ་རྗེ་ལྟ་བུའི་ཏིང་ངེ་འཛིན་ལ་བརྟེན་ནས་མི་སློབ་ལམ་མངོན་དུ་བྱས་ནས་སྐུ་བཞིའི་གོ་འཕང་ཐོབ་པ་ཡིན་ནོ། །གསུམ་པ་སོ་སོའི་རང་བཞིན་བཤད་པ་ལ་ལྔ་ལས། དང་པོ་ཚོགས་ལམ་ནི། ལས་དང་པོ་པ་རྣམས་ཀྱི་ཐར་བའི་ཆ་དང་མཐུན་པའི་དགེ་བའི་རྩ་བ་རྒྱུད་ཡོན་ཏན་གྱི་ཚོགས་ཀྱིས་འགེངས་ཤིང༌། རྣམ་པར་གྲོལ་བའི་འཇུག་ངོགས་སུ་གྱུར་བ། ཚོགས་ལམ་གྱི་མཚན་ཉིད་དུ་ས་བཟང་གི་རྒྱུད་བླར་གསུངས་སོ། །དེ་ལ་དབྱེ་ན་ཆུང་འབྲིང་ཆེ་གསུམ་ཡོད།ཆུང་ངུའི་གནས་སྐབས་སུ་ལུས་ཚོར་སེམས་ཆོས་དྲན་པ་ཉེ་བར་བཞག་པ་བཞི་གཙོ་ཆེར་བསྒོམ་པར་བྱ་ཞིང༌། འབྲིང་གི་གནས་སྐབས་སུ་སྡིག་པ་སྐྱེས་པ་རྣམས་སྤངས་པ་དང༌། མ་སྐྱེས་པ་རྣམས་མི་བསྐྱེད་པ་དང༌། དགེ་བ་མ་སྐྱེས་པ་རྣམས་སྐྱེད་པ་དང༌། སྐྱེས་པ་རྣམས་སྤེལ་བ་སྟེ་ཡང་དག་སྤོང་བཞི་གཙོ་བོ་བསྒོམ་པ་དང༌། ཆེན་པོའི་གནས་སྐབས་སུ་འདུན་པ་དང་བརྩོན་འགྲུས་དང་སེམས་དང་དཔྱོད་པའི་ཏིང་ངེ་འཛིན་ཏེ་རྫུ་འཕྲུལ་གྱི་རྐང་བ་བཞི་རྣམས་ཀྱང་གཙོ་ཆེར་བསྒོམ་པར་བྱའོ། །གཉིས་པ་སྦྱོར་ལམ་ནི། ཚོགས་བསགས་པ་ལས་མོས་པས་སྤྱོད་པ་རྣམས་ཀྱིས་ངེས་པར་འབྱེད་པའི་ཆ་དང་མཐུན་པའི་དགེ་བའི་རྩ་བ་བདེན་པ་རྣམས་མངོན་པར་རྟོགས་པ་ལ་རིམ་གྱིས་སྦྱོར་ཞིང་རྣམ་པར་གྲོལ་བའི་འཇུག་ངོགས་སུ་གྱུར་བ་དེ། སྦྱོར་ལམ་གྱི་མཚན་ཉིད། དབྱེ་ན། དྲོད་རྩེ་མོ་བཟོད་པ་ཆོས་མཆོག་སྟེ་བཞིའོ། །དང་པོ་གཉིས་ཀྱི་སྐབས་སུ་དད་བརྩོན་དྲན་པ་ཏིང་ངེ་འཛིན་ཤེས་རབ་སྟེ་དབང་བོ་ལྔ་གཙོ་ཆེར་བསྒོམ་པར་བྱ་ལ། ཕྱི་མ་གཉིས་ཀྱི་སྐབས་སུ་དེ་དག་སྟོབས་སུ་གྱུར་པ་ལྔ་གཙོ་ཆེར་བསྒོམ་པར་བྱ་སྟེ། དབུས་མཐའ་ལས། དབང་པོ་རྣམས་དང་སྟོབས་རྣམས་ལ། །ངེས་འབྱེད་ཡན་ལག་གཉིས་གཉིས་སོ། །ཞེས་སོ། ། གསུམ་པ་མཐོང་ལམ།གསུམ་པ་མཐོང་ལམ་ནི། ཆོས་མཆོག་གི་མཇུག་ཐོགས་སུ་འཇིག་རྟེན་ལས་འདས་པའི་ཡེ་ཤེས་ཀྱིས་འཕགས་པའི་བདེན་པ་མངོན་སུམ་གྱིས་གསར་དུ་མཐོང་བའི་སྐབས་ཀྱི་རྣམ་པར་གྲོལ་བའི་འཇུག་ངོགས་སུ་གྱུར་བ། མཐོང་ལམ་གྱི་མཚན་ཉིད། དེ་ལ་དབྱེ་ན། བདེན་པ་སོ་སོ་ལ་སྐད་ཅིག་བཞི་བཞིའི་དབྱེ་བས་སྐད་ཅིག་མ་བཅུ་དྲུག་རིམ་ཅན་དུ་སྐྱེས་པའོ། །དེའི་སྐབས་སུ་དྲན་པ་ཤེས་རབ་བརྩོན་འགྲུས་དགའ་བ་ཤིན་སྦྱངས་ཏིང་ངེ་འཛིན་བཏང་སྙོམས་ཡང་དག་བྱང་ཆུབ་ཀྱི་ཡན་ལག་གཙོ་བོར་བསྒོམ་པའོ། །བཞི་བ་སྒོམ་ལམ་ནི། བདེན་པ་མངོན་སུམ་དུ་རྟོགས་ཟིན་གོམས་པར་བྱེད་པའི་སྐབས་ཀྱི་རྣམ་པར་གྲོལ་བའི་འཇུག་ངོགས་སུ་གྱུར་པ། སྒོམ་ལམ་གྱི་མཚན་ཉིད། དབྱེ་ན། སྒོམ་ལམ་སྐོར་དགུ་ཡོད་དེ། ཁམས་གསུམ་སྤང་བྱ་ཆེན་པོའི་ཆེན་པོ་སོགས་དགུ་སྤོང་བྱེད་ཀྱི་གཉེན་པོ་ཆུང་ངུའི་ཆུང་ངུ་སོགས་དགུ་ཡོད་པའི་ཕྱིར་ཏེ། མངོན་རྟོགས་རྒྱན་ལས། ས་དགུ་ལ་ནི་ཆེན་པོ་ཡི། ཆེན་པོ་ལ་སོགས་དྲི་མ་ཡི། །གཉེན་པོ་ཆུང་ངུའི་ཆུང་ངུ་ལ། སོགས་པའི་ལམ་ནི་དག་པ་ཡིན། །ཞེས་སོ། །དེའི་སྐབས་སུ་ཡང་དག་པའི་ལྟ་བ། རྟོགས་པ། ངག ལས་ཀྱི་མཐའ། འཚོ་བ། རྩོལ་བ། དྲན་པ། ཏིང་ངེ་འཛིན་ཏེ་འཕགས་ལམ་ཡན་ལག་བརྒྱད་གཙོ་ཆེར་བསྒོམ་པའོ། །ལྔ་བ་ཐེག་པ་རང་ལམ་གྱི་མི་སློབ་ལམ་ནི། ཐེག་པ་རང་ལམ་གྱི་བགྲོད་པ་མཐར་ཕྱིན་པའི་རྣམ་གྲོལ་ལམ་གྱི་འཇུག་ངོགས་སུ་གྱུར་བ། ཐེག་པ་རང་ལམ་གྱི་མི་སློབ་ལམ་གྱི་མཚན་ཉིད། དབྱེ་ན། ཉན་རང་ཐེག་ཆེན་མི་སློབ་ལམ་དང་གསུམ་མོ། །ལམ་ལྔའི་རྣམ་བཞག་མདོར་བསྡུས་ཙམ་བརྗོད་ཟིན་ཏོ། ། ས་བཅུའི་རྣམ་བཞག་དང༌། ཟབ་ལམ་སྦྱོར་བ་ཡན་ལག་དྲུག་གི་ལམ་རྣམས་གཞན་ལས་ཤེས་པར་བྱའོ། ། གཉིས་པ་ལྟ་སྒོམ་སྤྱོད་གསུམ་གྱི་སྒོ་ནས་ལམ་བཤད་པ།གཉིས་པ་ལྟ་སྒོམ་སྤྱོད་གསུམ་གྱི་སྒོ་ནས་ལམ་བཤད་པ་ནི། འདིར་རྣམ་དག་ལེགས་པའི་ལམ་ལ། ཀུན་མཁྱེན་ཇོ་ནང་བ་ཆེན་པོའི་ལྟ་བ་ཤན་འབྱེད་ཡིད་ཀྱི་མུན་སེལ་ལས། ལྟ་སྒོམ་སྤྱོད་པ་ཆོས་ཀྱི་གཞུང༌། །ཞེས་གསུངས་པ་ལྟར་རྣམ་དག་ལེགས་པའི་ལམ་སྒྲུབ་པ་ལ་ལྟ་སྒོམ་སྤྱོད་གསུམ་ཚང་དགོས་པ་ཡིན་པས་དེ་གསུམ་ལས། དང་པོ་ལྟ་བ་ལ་ཐུན་མོང་ཡིན་མིན་གཉིས་ལས། དང་པོ་ནི། རི་ཆོས་ངེས་དོན་རྒྱ་མཚོ་ལས། ཡང་དག་པའི་ལྟ་བ་ཐུན་མོང་དུ་གྲགས་པ་ལེགས་པར་རྟོགས་པ་ལ་ནི། ཆོས་ཐམས་ཅད་གནས་ལུགས་ལ་རི་བོང་གི་རྭ་དང༌། མོ་གཤམ་གྱི་བུ་ལྟར་ཅི་ཡང་མ་རེད་ཅིང་གང་དུ་ཡང་མ་གྲུབ་པས་ནམ་མཁའི་མེ་ཏོག་ལྟ་བུར་ཐག་ཆོད་པ་དགོས་ཏེ་དེའི་ཤེས་བྱེད་རྣམས་ནི་བཀའ་འཁོར་ལོ་བར་བ་དང༌། རིགས་ཚོགས་ལ་སོགས་པ་རྣམས་སུ་གྲགས་པའི་ཕྱིར། ཞེས་དང༌། རྒྱལ་བའི་ཡུམ་ལས། ཤཱ་རིའི་བུ་དེ་ལྟར་སློབ་པའི་བྱང་ཆུབ་སེམས་དཔའ་སེམས་དཔའ་ཆེན་པོ་ནི་ཆོས་གང་ལ་ཡང་སློབ་པ་མེད་དོ། །ཞེས་དང༌། སྣ་ཚོགས་འདུ་ཤེས་བྲལ་ཞིང་ཉེ་བར་ཞི་སྤྱོད་པ། །འདི་ནི་ཤེས་རབ་ཕ་རོལ་ཕྱིན་མཆོག་སྤྱོད་པ་ཡིན། །ཞེས་དང༌། བཞི་བརྒྱ་བ་ལས། ཡོད་དང་མེད་དང་ཡོད་མེད་ཅེས། །གང་ལ་ཕྱོགས་ནི་ཡོད་མིན་པ། །ཞེས་དང༌། རྩོད་ཟློག་ལས། གལ་ཏེ་ངས་དམ་བཅས་འགའ་ཡོད། །དེས་ན་ང་ལ་སྐྱོན་ཏེ་ཡོད། །ང་ལ་དམ་བཅའ་མེད་པས་ན། །ང་ནི་སྐྱོན་མེད་ཁོ་ན་ཡིན། །ཞེས་གསུངས་པ་ལྟར་སྣང་གྲགས་ཀུན་རྫོབ་ཀྱི་ཆོས་ཐམས་ཅད་ཀྱི་སྤྲོས་པ་ཉེ་བར་ཞི་བའི་སྤྲོས་བྲལ་དུ་གཏན་ལ་ཕབ་དགོས་སོ། །ཐུན་མོང་མ་ཡིན་པའི་ལྟ་བ་ཡང༌། རྒྱུད་བླ་མ་ལས། རྣམ་དབྱེར་བཅས་པའི་མཚན་ཉིད་ཅན། །གློ་བུར་དག་གིས་ཁམས་སྟོང་གི །རྣམ་དབྱེར་མེད་པའི་མཚན་ཉིད་ཅན། །བླ་མེད་ཆོས་ཀྱིས་སྟོང་མ་ཡིན། །ཞེས་གསུངས་པ་ལྟར་དོན་དམ་རང་བྱུང་འོད་གསལ་བའི་ཡེ་ཤེས་ཉིད་གཞན་གཟུང་འཛིན་སོགས་སྤྲོས་པ་མཐའ་དག་གིས་གདོད་ནས་སྟོང་ཞིང་དོན་དམ་རང་བྱུང་འདུས་མ་བྱས་པའི་ཡོན་ཏན་སྟོབས་སོགས་ཟག་མེད་ཀྱི་ཡོན་ཏན་རྣམས་ཐོག་མེད་ནས་རང་བཞིན་འགྱུར་བ་མེད་པར་གནས་པའི་ཆོས་དབྱིངས་དེ་བཞིན་ཉིད་ཀྱི་གནས་ལུགས་ཚུལ་བཞིན་དུ་རྟོགས་པའི་མངོན་རྟོགས་ནི། ཡང་དག་པའི་ལྟ་བ་ཡིན་ནོ། །ཡང་གཞི་བདེན་པ་གཉིས་ཀ་ཟུང་འཇུག་ཏུ་ལེགས་པར་རྟོགས་ནས་ཀུན་རྫོབ་རྟེན་འབྲེལ་བསླུ་བ་མེད་པ་ལ་བླང་དོར་ཕྱིན་ཅི་མ་ལོག་པར་བྱས་ཏེ། ཡང་དག་པའི་ལྟ་བ་རྒྱུད་ལ་སྐྱེས་ན་དངོས་པོར་ཞེན་པའི་བདག་འཛིན་སོགས་དྲི་མ་གློ་བུར་བ་རྣམས་སྤོང་བར་བྱེད་པ་ཡིན་ཏེ། ས་བཟང་མ་ཏི་པཎ་ཆེན་གྱི་ཞལ་ནས། ལྟ་བ་བདེན་གཉིས་ཟུང་འཇུག་རྟོགས་པ་ཡིས། །ཀུན་རྫོབ་རྒྱུ་འབྲས་བསླུ་བ་མེད་པ་ལ། །བླང་དོར་ཚུལ་བཞིན་བགྱིས་ཏེ་དམ་པའི་དོན། །སྟོང་ཉིད་རྟོགས་ལས་དངོས་འཛིན་མཐའ་དག་སྤངས། །ཞེས་གསུངས་པའི་ཕྱིར་རོ། །ཡང་གནས་ལུགས་སུ་ཡོད་པ་ལ་ཡོད་ཅེས་དང་མེད་པ་ལ་མེད་ཅེས་སོགས་བཀའ་འཁོར་ལོ་ཐ་མ་ལྟ་བ་ཤན་འབྱེད་དོན་དུ་གསུངས་ཏེ། རྗེ་ཇོ་ནང་བའི་ལྟ་བ་ཤན་འབྱེད་ལས། ཡོད་དོ་མེད་དོ་རྟག་ཆད་སོགས། །ལྟ་བ་ཤན་འབྱེད་དོན་དུ་གསུངས། །ཞེས་གསུངས་སོ། །སྤྱིར་སྤྲོས་བྲལ་དུ་གནས་ལུགས་ལ་ལྟ་བ་ནི་མཉམ་བཞག་གི་ལྟ་བ་དང༌། བཀའ་འཁོར་ལོ་ཐ་མ་ལྟར་ཡོད་མེད་སོགས་ཤན་འབྱེད་ནས་བདེན་གཉིས་གནས་ལུགས་ཇི་ལྟ་བར་ལྟ་བ་ནི་རྗེས་ཐོབ་ཀྱི་ལྟ་བ་ཡིན་ནོ། །དེ་ལྟར་ཡང་དག་པའི་ལྟ་བ་ཚུལ་བཞིན་དུ་ཤེས་དགོས་ལ། མ་ཤེས་ན་སྤྱོད་པ་དང་སྒོམ་པ་ལས་ཀྱང་ཉམས་པར་འགྱུར་ཏེ། ལྟ་བ་ཤན་འབྱེད་ཡིད་ཀྱི་མུན་སེལ་ལས། ལྟ་བ་འཁྲུལ་ན་སྤྱོད་པ་ནོར། །དེ་ནས་སྒོམ་པ་ཉམས་པར་འགྱུར། །དེ་ཕྱིར་ཐོག་མར་ལྟ་བ་གཅེས། །ཞེས་གསུངས་པའི་ཕྱིར་རོ།། །། གཉིས་པ་སྒོམ་བཤད་པ།གཉིས་པ་སྒོམ་བཤད་པ་ལ། རྒྱལ་བ་སངས་རྒྱས་བཅོམ་ལྡན་འདས་ཀྱི་མདོ་དང་སྔགས་ཀྱི་དགོངས་དོན་མཐའ་དག་འགལ་བ་མེད་པར་ཚུལ་བཞིན་དུ་ཉམས་སུ་ལེན་པ་ནི་སྒོམ་པ་ཡིན་ལ། དེ་ལྟར་བཀའ་འཁོར་ལོ་གསུམ་གྱི་དགོངས་དོན་མཐར་ཐུག་ཉམས་སུ་བླངས་པས་བདེ་གཤེགས་སྙིང་པོ་ཡིད་བཞིན་གྱི་ནོར་བུའི་དྲི་མ་རགས་པ་དང་ཕྲ་བ་དང་ཤིན་ཏུ་ཕྲ་བ་རྣམས་སྦྱོང་བའི་ཚུལ་དང་མཐུན་པར་དེ་བཞིན་གཤེགས་པའི་ཐུགས་རྗེ་ཆེན་པོ་བསྟན་པའི་མདོ་ལས་གསུངས་ཤིང༌། དེ་ཡང་འཁོར་ལོ་དང་པོ་ནི། ཐེག་ཆེན་གྱི་ངེས་དོན་ཟབ་མོ་སྒོམ་པའི་སྔོན་འགྲོ་དང་ཡང་རྗེས་སུ་མཐུན་ཞིང༌། འཁོར་ལོ་གཉིས་པ་ནི་ཟབ་མོའི་དོན་ལ་མཉམ་པར་བཞག་པའི་ཏིང་ངེ་འཛིན་ཁྱད་པར་ཅན་ཉམས་སུ་ལེན་པ་དང་ཡང་མཐུན་ལ། འཁོར་ལོ་གསུམ་པ་ནི། ཏིང་ངེ་འཛིན་ཁྱད་པར་ཅན་སྐྱེས་པ་ན་ཡོད་མེད་ལ་སོགས་པ་ལེགས་པར་ཕྱེ་སྟེ་ངོ་སྤྲད་གསང་སྔགས་ཟབ་མོ་དང་ཡང་མཐུན་པར་རི་ཆོས་ངེས་དོན་རྒྱ་མཚོ་ལས་གསུངས་སོ། །དེ་ལ་སྒོམ་ཐུན་མོང་བ་བྱམས་སྙིང་རྗེ་དང༌། བདག་གཞན་མཉམ་རྗེ་དང༌། བསྐྱེད་རིམ་སྒོམ་པ་ལ་སོགས་པ་སྒོམ་ཐུན་མོང་བ་རྣམས་ཐུན་མོང་གི་གཞུང་ལུགས་སུ་གྲགས་པ་ལྟར་རོ། །ཐུན་མིན་གྱི་སྒོམ་ནི་འཁོར་ལོ་ཕྱི་མ་གཉིས་དང་གསང་སྔགས་རྡོ་རྗེ་ཐེག་པ་དོན་གཅིག་མོད་ཀྱི་ཉམས་སུ་ལེན་པ་ན་ལ་ཟློ་བ་ཆོས་ཉིད་ཟབ་མོ་ལ་འཁོར་ལོ་བར་བ་དང་མཐུན་པར་རྟོག་མེད་སྤྲོས་བྲལ་དུ་མཉམ་པར་བཞག་ནས་རྗེས་ཐོབ་ཏུ་ཤན་འབྱེད་པའི་ཚེ་ཆོས་རྣམས་ལ་ཡང་དག་པར་སོ་སོར་རྟོག་པ་ན་འཁོར་ལོ་ཐ་མ་དང་རྡོ་རྗེ་ཐེག་པ་ལས་གསུངས་པ་བཞིན་དུ་ལེགས་པར་རྣམ་པར་ཕྱེ་སྟེ་ངོ་སྤྲད་ན་ཐེག་པ་ཆེན་པོའི་གསུང་རབ་ཐམས་ཅད་ཀྱི་དོན་ཟབ་མོ་ཉམས་སུ་ལེན་པའི་དོན་ཚང་ལ་མ་ནོར་ཞིང་ཡོངས་སུ་དག་པ་ཉིད་དུ་འགྱུར་བས་གནས་ལུགས་ལ་ཡོད་མེད་དང་རང་རང་གི་ངོ་བོས་སྟོང་མི་སྟོང་དང་རྣམ་བཅད་ཡོངས་གཅོད་དང་མེད་དགག་མ་ཡིན་དགག་དང༌། སྤངས་པ་དང་རྟོགས་པ་ལ་སོགས་པ་མདོར་ན་གཤིས་ལ་ཇི་ལྟར་གནས་པ་བཞིན་དུ་ལེགས་པར་ཕྱེ་སྟེ་ཡང་དག་པའི་གནས་ལུགས་ཕྱིན་ཅི་མ་ལོག་པ་དེ་ཐོས་བསམ་གྱིས་ལེགས་པར་རྟོགས་པར་བྱས་ནས་ཀུན་རྫོབ་གློ་བུར་བའི་ཉེས་ཚོགས་གྱིས་དབེན་པའི་དོན་དམ་རང་བྱུང་འདུས་མ་བྱས་པའི་ཡོན་ཏན་རང་ཆས་སུ་དབྱེར་མེད་པའི་ཆོས་སྐུ་དེ་བཞིན་ཉིད་དེ་ཞི་ལྷག་ཟུང་འབྲེལ་དུ་ཡང་དག་པར་སྒོམ་པ་དེ་ཡིན་པའི་ཕྱིར་ཏེ། ཐེག་མཆོག་དབུ་མ་ལས། སྒོམ་པས་ཞི་ལྷག་ཟུང་འཇུག་དབུ་མ་ཡིན། །ཞེས་གསུངས་པའི་ཕྱིར། གོང་དུ་བཤད་པ་བཞིན་མཉམ་བཞག་གི་སྐབས་སུ་འཁོར་གསུམ་རྣམ་པར་རྟོག་པ་བཅོམ་པའི་ཕྱིར་དུ་རང་སེམས་རང་བྱུང་གཉུག་མ་དོན་གྱི་འོད་གསལ་གྱི་ཡེ་ཤེས་ལ་སྤྲོས་བྲལ་དུ་མཉམ་པར་བཞག་དགོས་ཏེ། རྒྱུད་ལས། རྣམ་རྟོག་མ་རིག་ཆེན་པོ་སྟེ། །འཁོར་བའི་རྒྱ་མཚོར་ལྟུང་བྱེད་ཡིན། །མི་རྟོག་ཏིང་འཛིན་ལ་གནས་ན། །མཁའ་བཞིན་དྲི་མ་མེད་པར་འགྱུར། །ཞེས་གསུངས་པའི་ཕྱིར། དེ་ལྟར་ཚུལ་བཞིན་བསྒོམ་ན་བླང་དོར་མ་ནོར་བ་དང༌། ཟབ་མོའི་དོན་རྟོགས་པ་དང༌། དངོས་འཛིན་སོགས་སྤངས་པ་དང༌། མ་སྒོམ་ན་ལྟ་སྤྱོད་བཟང་ཡང་ཕན་པར་མི་འགྱུར་ཏེ། སྤྱོད་འཇུག་ལས། ལུས་ཀྱི་འདི་དག་སྤྱད་པར་བྱ། །ཚིག་ཙམ་བརྗོད་པས་ཅི་ཞིག་འགྲུབ། །སྨན་དཔྱད་བཀློགས་པ་ཙམ་གྱིས་ནི། །ནད་པ་དག་ལ་ཕན་གྱུར་རམ། །ཞེས་དང༌། རྗེ་སྒྲོལ་མགོན་གྱི་ཞལ་སྔ་ནས། སྒོམ་པ་མེད་ན་ལྟ་སྤྱོད་ཀྱང༌། །ས་འོག་གཏེར་བཞིན་ཕན་མི་ཐོགས། །ཞེས་དང༌། ལྟ་སྤྱོད་བཟང་པོ་མང་བཤད་ཀྱང༌། །སྒོམ་དང་སྒྲུབ་དང་བྲལ་བ་ལ། །སེམས་དང་ཆོས་སུ་མ་འདྲེས་པའི། །དགོས་དུས་ཕན་ཐོགས་འབྱུང་བ་དཀའ། །ཞེས་སོགས་གསུངས་སོ། ། གསུམ་པ་སྤྱོད་པ་བཤད་པ།གསུམ་པ་སྤྱོད་པ་བཤད་པ་ལ། ཇོ་ནང་ས་བཟང་མ་ཏི་པཎ་ཆེན་གྱི་ཞལ་སྔ་ནས། འདུལ་བ་མདོ་སྡེ་མངོན་པའི་སྡེ་སྣོད་ལས། །གསུང་བཞིན་ཚུལ་ཁྲིམས་ཏིང་འཛིན་ཤེས་རབ་ཀྱི། །བསླབ་པ་གསུམ་ལ་རྟག་ཏུ་སློབ་པ་དང༌། །སྡེ་སྣོད་གསུམ་ཡང་མཁྱེན་པར་བགྱིད། །ཅེས་དང༌། ཐེག་མཆོག་དབུ་མ་ལས། སྤྱོད་པ་བླང་དོར་མ་ནོར་དབུ་མ་སྟེ། །ཞེས་གསུངས་པ་ལྟར་ཆོས་འདུལ་བའི་སྡེ་སྣོད་ལས་གསུངས་པའི་སོ་སོར་ཐར་བའི་དགག་སྒྲུབ་ཀྱི་བསླབ་བྱ་སོགས་ཚུལ་ཁྲིམས་ཀྱི་བསླབ་ཁྲིམས་ཚུལ་བཞིན་དུ་སྤྱོད་པ་དང༌། མདོ་སྡེའི་སྡེ་སྣོད་ལས་བཤད་པའི་ཏིང་ངེ་འཛིན་གྱི་བསླབ་པ་ལ་སློབ་པ་དང༌། མངོན་པའི་སྡེ་སྣོད་ལས་བཤད་པའི་ཤེས་རབ་ཀྱི་བསླབ་པ་ལ་རྟག་ཏུ་བརྩོན་པ་སོགས་བླང་དོར་མ་ནོར་བ་རྒྱལ་བའི་བཀའ་བཞིན་དུ་སྒྲུབ་པ་ནི་སྤྱོད་པ་དམ་པའོ། །མདོར་ན་སོར་བྱང་སྔགས་གསུམ་གྱི་སྡོམ་པའི་མི་མཐུན་ཕྱོགས་རྣམས་སྤངས་ནས་བསླབ་བྱ་རྣམས་ལ་རྟག་ཏུ་སློབ་དགོས་སོ། །སོར་བྱང་སྔགས་གསུམ་གྱི་བསླབ་བྱ་རྣམས་བདག་གིས་སྡོམ་གསུམ་གྱི་བསླབ་བྱ་དྭངས་གསལ་བདུད་རྩིའི་ཆུ་གཏེར་དུ་བཤད་ཡོད་པས་དེར་ཤེས་པར་བྱའོ། །དེ་ལྟ་བུ་ལ་སྤྱོད་དགོས་པའི་གནད་ཡང་རྒྱུ་འབྲས་རྟེན་འབྲེལ་བསླུ་བ་མེད་པའི་ཕྱིར་ཏེ། ཐམས་ཅད་མཁྱེན་པ་ཏཱ་ར་ནཱ་ཐའི་ཞལ་ནས། རྒྱུ་འབྲས་རྟེན་འབྲེལ་བསླུ་བ་མེད་པའི་ཕྱིར། །ལག་ལེན་སྤྱོད་པ་རྣམ་པར་དག་པ་གཅེས། །ཞེས་གསུངས་སོ། །དེ་འདྲའི་ལྟ་སྒོམ་སྤྱོད་པ་ཡ་མ་བྲལ་བར་ཐམས་ཅད་མ་ཚང་བར་མེད་པར་སློབ་དགོས་ཏེ། རྗེ་བཙུན་སྒྲོལ་མགོན་གྱི་ཞལ་ནས། དེ་གསུམ་གཅིག་ལ་གཅིག་རྟེན་ལགས། །ལྟ་མེད་ཀྱི་སྤྱོད་པ་བཟང་ན་ཡང༌། །མཚན་འཛིན་འཁོར་བའི་རྒྱུ་ཞིག་ལགས། །སྤྱོད་པ་ཉམས་པའི་ལྟ་བ་ནི། །བསོད་ནམས་ཚོགས་ཀྱང་མ་རྫོགས་ལ། །ཆད་ལྟའི་གཡང་ལ་ལྷུང་ཉེན་ཡོད། །སྒོམ་པ་མེད་ན་ལྟ་སྤྱོད་ཀྱང༌། །ས་འོག་གཏེར་བཞིན་ཕན་མི་ཐོགས། །ཞེས་གསུངས་པའི་ཕྱིར། ལྟ་སྒོམ་སྤྱོད་གསུམ་ཐམས་ཅད་བསླབ་པ་གསུམ་གྱི་ནང་དུ་འདུ་སྟེ། ཇི་སྐད་དུ། སངས་རྒྱས་སེམས་ཅན་སྤྱི་མེས་དེས། །སེམས་ཅན་རྣམས་ལ་ཕན་དོན་དུ། །ཚུལ་ཁྲིམས་ཤེས་རབ་སེམས་ཞེས་པའི། །བསླབ་པ་རྣམ་གསུམ་གསུངས་པ་ཡིན། །ཚུལ་ཁྲིམས་བསླབ་པ་སྤྱོད་པ་སྟེ། །ཤེས་རབ་བསླབ་པ་ལྟ་བ་ཡིན། །སྒོམ་པ་སེམས་ཀྱི་བསླབ་པ་སྟེ། །བསླབ་གསུམ་འདི་ལ་ནན་ཏན་འཚལ། །ཞེས་གསུངས་པའི་ཕྱིར་རོ། །འདིར་ལྟ་སྒོམ་སྤྱོད་གསུམ་དང་སྦྱར་ནས་ལམ་གྱི་རྣམ་བཞག་ཙམ་བཀོད་པ་ནི་རི་ཆོས་ངེས་དོན་རྒྱ་མཚོ་ལྟར་བཤད་ཁུལ་བྱས་པའོ། ། གསུམ་པ་འབྲས་བུ་བཤད་པ།གསུམ་པ་འབྲས་བུ་བཤད་པ་ལ། དེ་ལྟར་ཕྱིན་ཅི་མ་ལོག་པའི་ལྟ་སྒོམ་སྤྱོད་གསུམ་གྱི་ལམ་ཚོགས་གཉིས་ཡོངས་སུ་རྫོགས་པ་ལས་འབྲས་བུ་སྤང་བྱ་སྒྲིབ་གཉིས་མ་ལུས་པ་ཟད་པའི་སངས་རྒྱས་ཀྱི་གོ་འཕང་ལེགས་པར་ཐོབ་ནུས་ཏེ། བསྟན་བཅོས་རྒྱུད་བླ་མ་ལས། རང་བཞིན་འོད་གསལ་ཞེས་བརྗོད་གང་ཡིན་ཉི་དང་མཁའ་བཞིན་གློ་བུར་གྱི། །ཉོན་མོངས་ཤེས་བྱའི་སྤྲིན་ཚོགས་སྟུག་པོའི་སྒྲིབ་པ་ཡིས་ནི་བསྒྲིབས་གྱུར་བ། །དྲི་མེད་སངས་རྒྱས་ཡོན་ཏན་ཀུན་ལྡན་རྟག་བརྟན་གཡུང་དྲུང་སངས་རྒྱས་ཉིད། །དེ་ནི་ཆོས་ལ་མི་རྟོག་རྣམ་འབྱེད་ཡེ་ཤེས་དག་ལ་བརྟེན་ནས་འཐོབ། །ཅེས་དང༌། འཕགས་པ་ཀླུ་སྒྲུབ་ཀྱི་ཞལ་སྔ་ནས། ས་བོན་གྱུར་བའི་དབྱིངས་དེ་ཉིད། །ཆོས་རྣམས་ཀུན་གྱི་རྟེན་དུ་འདོད། །རིམ་གྱིས་སྦྱང་བར་གྱུར་པ་ལས། །སངས་རྒྱས་བྱང་ཆུབ་ཐོབ་པར་འགྱུར། །ཞེས་གསུངས་པའི་ཕྱིར། དེ་ལྟར་ཐོབ་པའི་འབྲས་བུ་ལ་རྣམ་པ་གཉིས་ལས། དང་པོ་བྲལ་འབྲས་ནི། ཆོས་སྐུ་གང་ཡིན་པ་འགྱུར་མེད་ཡོངས་གྲུབ་དང༌། དེ་བཞིན་ཉིད་ཀྱི་སྐུ་ལ་བྲལ་བའི་ཡོན་ཏན་སྟོབས་དང་མི་འཇིགས་པ་དང༌། མ་འདྲེས་པའི་ཆོས་བཅོ་བརྒྱད་ལ་སོགས་པའི་དོན་དམ་སངས་རྒྱས་ཀྱི་ཡོན་ཏན་ཀུན་དང་ལྡན་པ་དེ་ཉིད་ཡིན་པ་དང༌། གཉིས་པ་སྨིན་འབྲས་ནི་གཟུགས་སྐུ་གང་ཡིན་པ་ལ་ཀུན་རྫོབ་གཟུགས་སྐུའི་མཚན་དཔེ་སོགས་སྨིན་པའི་ཡོན་ཏན་རྣམས་དང་ལྡན་པའི་གཟུགས་སྐུ་དེ་ཡིན་པར་གསུངས་ཏེ། རྒྱུད་བླ་མ་ལས། དང་པོའི་སྐུ་ནི་སྟོབས་ལ་སོགས། །བྲལ་བའི་ཡོན་ཏན་དག་དང་ལྡན། །གཉིས་པ་སྐྱེས་བུ་ཆེན་པོའི་མཚན། །རྣམ་སྨིན་ཡོན་ཏན་དག་དང་ལྡན། །ཞེས་དང༌། གཞི་ལམ་འབྲས་གསུམ་ངོ་སྤྲོད་ཡང་དག་དོན་གསལ་ལས། གཞིའི་སངས་རྒྱས་དེ་གློ་བུར་གྱི་དྲི་མ་དང་བྲལ་བར་གནས་གྱུར་པ་ལ་འབྲས་བུ་སངས་རྒྱས་ཆོས་ཀྱི་སྐུ་ཕྱག་རྒྱ་ཆེན་པོའི་དངོས་གྲུབ་ཐོབ་པ། ཞེས་པ་ནས། ཆོས་སྐུ་ཐོབ་པའི་བྱིན་བརླབས་ལས་གདུལ་བྱ་རྒྱུད་དག་པ་རྣམས་ལ་མཚན་དང་དཔེ་བྱད་ཀྱི་བདག་ཉིད་སྐུའི་སྣང་བ་ཤར་བས་དོན་མཛད་པ་ནི་གཟུགས་ཀྱི་སྐུ་ཡིན་ཏེ། དེ་དག་ནི་འབྲས་བུའི་དོན་ནོ། །ཞེས་གསུངས་པའི་ཕྱིར། དེ་ལྟར་ཐོབ་པའི་འབྲས་བུ་ལ་སྐུ་གསུམ་དང་སྐུ་བཞི་རྣམས་དབྱེར་ཡོད་དེ། ཇི་སྐད་དུ། སངས་རྒྱས་རྣམས་ཀྱི་སྐུ་དབྱེ་བ། །རང་བཞིན་ལོངས་སྤྱོད་རྫོགས་པ་དང༌། །གཞན་ནི་སྤྲུལ་བའི་སྐུ་ཡིན་ཏེ། །དང་པོ་གཉིས་པོའི་རྟེན་ཡིན་ནོ། །ཞེས་དང༌། མངོན་རྟོགས་རྒྱན་ལས། ངོ་བོ་ཉིད་ལོངས་རྫོགས་བཅས་དང༌། །དེ་བཞིན་གཞན་པ་སྤྲུལ་བ་ནི། །ཆོས་སྐུ་མཛད་པ་དང་བཅས་པ། །རྣམ་པ་བཞིར་ནི་ཡང་དག་བརྗོད། །ཅེས་གསུངས་པའི་ཕྱིར་རོ། །ཡང་སྟོང་གཞི་དོན་དམ་ཆོས་ཀྱི་སྐུ་བཞི་ནི། གཞི་འབྲས་དབྱེར་མེད་དུ་བཞུགས་པའི་རྡོ་རྗེ་བཞི་ཡིན་ཏེ། ཡེ་ཤེས་ལེའུ་ལས། རྒྱལ་བའི་སྐུ་ཡི་རྡོ་རྗེ་ཡུལ་དང་ཡུལ་ཅན་རྣམས་ཀྱི་བགྲོད་བྱ་མིན་པ་རྣམ་པ་ཐམས་ཅད་པ། །གསུང་གི་རྡོ་རྗེ་སེམས་ཅན་ཐམས་ཅད་རང་སྙིང་སྐད་རྣམས་དག་གི་ཆོས་ནི་གོ་བར་བྱེད་པའོ། །རྡོ་རྗེ་ཅན་གྱི་ཐུགས་ཀྱི་རྡོ་རྗེ་སེམས་ཅན་རྣམས་ཀྱི་སེམས་ཀྱི་རང་བཞིན་མཐའ་དག་ས་ལ་གནས། །དྲི་མེད་ནོར་བུ་ལྟ་བུ་དངོས་པོ་རྣམས་ཀྱི་འཛིན་བྱེད་གང་ཡིན་དེ་ཉིད་ཡེ་ཤེས་རྡོ་རྗེའོ། །ཞེས་གསུངས་པའི་ཕྱིར་རོ། ། སྨྲས་པ། མདོ་རྒྱུད་ཀུན་གྱི་དགོངས་དོན་མཐར་ཐུག་པའི། །ངེས་གསང་གཞན་སྟོང་དབུ་མ་ཆེན་པོ་ཡི། །རྣམ་བཞག་མཁས་གྲུབ་བྱེ་བའི་སྙིང་ནོར་མཆོག །དམ་པའི་གསུང་བཞིན་བདེན་པའི་ཚངས་ཐིག་བཏབ། །ཅེས་གྲུབ་མཐའི་རྣམ་བཞག་ལུང་རིགས་གཏེར་མཛོད་ལེགས་བཤད་འདོད་འཇོ་ཞེས་བྱ་བ་ལས་གཞན་སྟོང་དབུ་མ་ཆེན་པོའི་གྲུབ་མཐའི་རྣམ་བཞག་གི་སྐབས་ཀྱི་ངལ་གསོ་བའི་ཚིགས་སུ་བཅད་པའོ། ། གསུམ་པ་དོན་བསྡུས་ཏེ་གདམས་པ།གསུམ་པ་དོན་བསྡུས་ཏེ་གདམས་པ་ནི། བླང་དོར་རབ་གསལ་ལས། མདོར་ན་ཕྱི་རོལ་པ་རྣམས་འདོད་པ་ཡི། །བྱེད་པོ་རང་དབང་ཅན་དང་བདག་མེད་ཅིང༌། །སྲོག་གི་མཆོད་པས་མཐོ་རིས་ཐོབ་པ་དང༌། །རྒྱུ་འབྲས་གཏན་ནས་མེད་པའང་མི་འཐད་ལ། །དེ་ཡང་དྲི་མེད་འོད་ལས། ལུས་དང་ངག་དང་ཡིད་ཀྱི་ལས། །དགེ་དང་མི་དགེ་གང་བྱེད་པ། །དེ་འབྲས་སེམས་ཅན་ལོངས་སྤྱོད་དེ། །ལྷ་གཞན་འབྲས་བུ་སྟེར་བ་མིན། །ཞེས་གསུངས་པ་ལྟར་སེམས་ཅན་རྣམས་རང་གི་ལས་ཀྱི་འབྲས་བུ་ལ་ལོངས་སྤྱོད་པ་ཡིན་གྱི། བྱེད་པ་པོ་བདག་དང་དབང་ཕྱུག་ལ་སོགས་པ་སུ་ཡང་མེད་ཅིང༌། སྲོག་གཅོད་ལ་སོགས་པ་མི་དགེ་བ་སྤྱད་པ་ལས་ནི་ངན་སོང་དུ་ལྟུང་བ་ཉིད་དོ། །ཡང་བླང་དོར་རབ་གསལ་ལས། ཉན་ཐོས་བྱེ་བྲག་སྨྲ་བའི་འདོད་པ་ཡི། །བརྗོད་དུ་མེད་པའི་གང་ཟག་བདག་ཀྱང་མེད། །མདོ་སྡེ་པ་ལྟར་མྱ་ངན་འདས་པ་ཡང༌། །མར་མེ་ཤི་བ་ལྟ་བུའི་གཏན་མེད་མིན། །ཞེས་དང༌། རྒྱན་ལས། གང་ཟག་བཏགས་པར་ཡོད་ཉིད་དུ། །རྗོད་བྱེད་རྫས་སུ་མ་ཡིན་ནོ། །མི་དམིགས་ཕྱིན་ཅི་ལོག་པ་དང༌། །ཀུན་ནས་ཉོན་མོངས་ཉོན་མོངས་རྒྱུར། །ཞེས་གསུངས་པ་ལྟར། ལས་རྒྱུ་འབྲས་ལ་ཡིད་ཆེས་པའི་དོན་དུ་ཀུན་གཞིའི་རྒྱུན་ལ་གང་ཟག་ཅེས་བཏགས་པ་ཙམ་ཡིན་གྱི། དོན་དམ་དུ་རྫས་སུ་གྲུབ་པ་ཡོད་པ་མ་ཡིན་ཏེ། ཡོད་ན་ཚད་མ་ལ་སྣང་དུ་རུང་བ་ལས་མི་དམིགས་པའི་ཕྱིར་དང༌། དེ་ལྟར་འཛིན་པ་ནི་ཕྱིན་ཅི་ལོག་ཡིན་ཞིང༌། ཕྱིན་ཅི་ལོག་གི་དམིགས་པ་དོན་ལ་མི་གནས་པའི་ཕྱིར་དང༌། ངོ་བོའང་ཀུན་ནས་ཉོན་མོངས་པ་ཡིན་ཞིང་ཀུན་ནས་ཉོན་མོངས་གཞན་རྣམས་ཀྱིའང་རྒྱུ་བྱེད་པའི་ཕྱིར་རོ། །མདོ་སྡེ་པའི་འདོད་པ་ལྟར། མྱ་ངན་ལས་འདས་ཕྱིན་ཆད་ནམ་མཁའ་ལ་འཇའ་ཡལ་བ་ལྟར་གཏན་ནས་མེད་པ་རྣམས་ཀྱང་མི་ཤེས་པའི་དབང་དུ་བྱས་པ་སྟེ། ཆོས་ཀྱི་དབྱིངས་ཀྱི་བསྟོད་པ་ལས། ཇི་ལྟར་ཡི་དྭགས་རྣམས་ཀྱིས་ནི། །རྒྱ་མཚོ་སྐམ་པར་མཐོང་བ་ལྟར། །དེ་བཞིན་མི་ཤེས་པས་སྒྲིབ་པས། །སངས་རྒྱས་རྣམས་ནི་མེད་པར་བཏགས། །ཞེས་གསུངས་པ་ལྟར་རོ། །བླང་དོར་རབ་གསལ་རྩ་འགྲེལ་ལས། ཉན་ཐོས་སྡེ་གཉིས་འདོད་པའི་ཕྱི་རོལ་གྱི། །དོན་ཡང་དོན་ལ་རྫས་སུ་གྲུབ་པ་མེད། །སེམས་ཙམ་པ་རྣམས་འདོད་པའི་རྣམ་ཤེས་ཀྱང༌། །དཔྱད་ན་དོན་ལ་ཡོད་པ་མ་ཡིན་ལ། །ཞེས་ཉན་ཐོས་སྡེ་གཉིས་ཀྱིས་འདོད་པའི་ཕྱི་རོལ་ཀྱི་དོན་དང་སེམས་ཙམ་པ་འདོད་པའི་རྣམ་ཤེས་ཀྱང་སྣང་ཙམ་དུ་ཡོད་མོད། དཔྱད་ན་དོན་དམ་དུ་བདེན་པར་ཡོད་པ་མིན་ཏེ། མི་རྟག་ཡེ་ཤེས་རྒྱུ་བ་ལ། །དོན་དུ་སྣང་བ་མེད་ཕྱིར་ཡང༌། །དོན་མེད་ཁུང་དུ་ཆུད་པར་བྱ། །དེ་མེད་པས་ན་རྣམ་རིག་མེད། །ཅེས་གསུངས་པ་ལྟར་རོ། །བླང་དོར་རབ་གསལ་ལས། སྣང་མེད་དབུ་མ་པ་དག་འདོད་པ་ཡི། །དོན་དམ་ཅི་ཡང་མེད་པའང་མ་ཡིན་པས། །མཐའ་བྲལ་དབུ་མ་ཆེན་པོའི་དོན་དེ་ཉིད། །གྲུབ་མཐའི་མཐར་ཐུག་ལེགས་པར་མཁྱེན་ན་ལེགས། །ཞེས་པ་དང༌། རྒྱན་ལས། མེད་པ་གང་ཡིན་དེ་ཉིད་ནི། །ཡོད་པ་ཡི་ནི་དམ་པ་ཡིན། །རྣམ་པ་ཀུན་ཏུ་མི་དམིགས་པ། །དམིགས་པ་ཡི་ནི་མཆོག་ཏུ་འདོད། །ཅེས་གསུངས་པ་ལྟར། མེད་ཅིང་མི་དམིགས་པར་གསུངས་པ་ཐམས་ཅད་ཀུན་རྫོབ་གློ་བུར་དྲི་མ་རྣམས་དཔྱད་ན་མེད་པ་ལ་དགོངས་པ་ཡིན་གྱི་དོན་དམ་ཆོས་ཀྱི་དབྱིངས་རང་བཞིན་གྱིས་རྣམ་པར་དག་པ་ནི་མེད་པ་མ་ཡིན།རྣམ་ཤེས་འཁྲུལ་བ་ལ་སྣང་བ་མ་དག་པའི་སྣང་བ་འདི་རྣམས་འགག་ན་རིམ་གྱིས་མངོན་དུ་འགྱུར་བའི་ཕྱིར་རོ། །བླང་དོར་རབ་གསལ་ལས། དེ་ལྟར་ཤེས་ནས་ནང་བའི་ལེགས་བཤད་ལ། །བརྟེན་ནས་ཕྱི་བའི་འཁྲུལ་བ་རྣམས་དགག་ཅིང༌། །ནང་བ་ལ་ཡང་རྣལ་འབྱོར་བློ་ཁྱད་ཀྱིས། །གོང་མ་གོང་མའི་མཆོག་ཏུ་ཤེས་པར་བྱ། །ཞེས་དོན་དེ་ཡང་ཇི་སྐད་དུ། འདི་ལྟར་ཆོས་རྣམས་ཐམས་ཅད་ནི། །བདག་མེད་དམ་པའི་དོན་དུ་ན། །སྟོང་ཉིད་བདག་ཏུ་དམིགས་པ་ནི། །ཉེས་པར་བཤད་པ་ཁོ་ན་ཡིན། །ཞེས་གསུངས་པ་ལྟར་ཆོས་རྣམས་ཀྱི་གནས་ལུགས་ཟབ་མོ་བདག་མེད་པ་དང་སྟོང་པ་ཉིད་སྟོན་པའི་ལེགས་བཤད་ལ་བརྟེན་ནས་ཕྱི་རོལ་པ་རྣམས་བདག་དང་གཙོ་བོ་དང་དབང་ཕྱུག་ལ་སོགས་པ་བདེན་པར་འདོད་པའི་འཁྲུལ་པ་རྣམས་དགག་པར་བྱ་ཞིང༌། ཡེ་ཤེས་སྙིང་པོ་ཀུན་ལས་བཏུས་པ་ལས། སངས་རྒྱས་ཆོས་ནི་རྣམ་པ་བཞིར། །ཡིད་འདོད་རྣམས་ཀྱིས་མངོན་མཐོང་སྟེ། །བྱེ་བྲག་སྨྲ་ལ་སོགས་པའི་ལམ། །བཤད་པ་དེ་ཉིད་བསྒྲུབ་པའོ། །ཞེས་པ་ལྟར། ནང་བའི་ཆོས་རྣམས་ཀྱང་གྲུབ་མཐའ་བཞི་ལ་བརྟེན་ནས་བསྟན་པ་ལྟར་ཤེས་པར་བྱ་སྟེ། རིམ་གྱིས་མཆོག་ཏུ་གྱུར་པ་རྣམས་བསྒྲུབ་ཅིང་ཉམས་སུ་བླང་བར་བགྱིའོ། །དེ་ཡང་སེམས་ཙམ་ལ་བརྟེན་ནས་ཉན་ཐོས་པ་ཕྱི་རོལ་གྱི་དོན་བདེན་པར་འདོད་པ་དགག་ཅིང༌། སྣང་མེད་དབུ་མ་ལ་བརྟེན་ནས་སེམས་ཙམ་དུ་བདེན་པར་འདོད་པའང་བཀག་ལ། སྣང་བཅས་དབུ་མ་ལ་བརྟེན་ནས་སྣང་མེད་དུ་བདེན་པར་འདོད་པའང་བཀག་ནས་མཐར་ཐུག་ཆོས་ཀྱི་དབྱིངས་མུ་བཞིའི་སྤྲོས་པ་དང་བྲལ་པར་རྟོགས་པར་བྱ་སྟེ། ལང་གཤེགས་ལས། སེམས་ཙམ་ལ་ནི་བརྟེན་ནས་སུ། །ཕྱི་རོལ་དོན་དུ་མི་རྟོག་གོ །སྣང་བ་མེད་ལ་བརྟེན་ནས་ནི། །སེམས་ཙམ་ལས་ནི་འདའ་བར་བྱ། །ཡང་དག་དམིགས་ལ་བརྟེན་ནས་སུ། །སྣང་མེད་ལས་ཀྱང་འདའ་བར་བྱ། །སྣང་མེད་གནས་པའི་རྣལ་འབྱོར་པས། །ཐེག་པ་ཆེན་པོ་མི་མཐོང་ངོ། །ཞེས་དང༌། དུས་ཀྱི་འཁོར་ལོའི་བསྡུས་རྒྱུད་ལས། (ཉན་ཐོས་སྡེ་གཉིས་འདོད་པ་ལྟར)སྲིད་གསུམ(དོན་དུ་སྣང་བ་འདི་རྡུལ)ཕྲ་རགས་གཟུགས་མིན་འདིར་ནི་རྣམ་པར་ཤེས་པའོ། །ཞེས་སེམས་ཙམ་པས་ཟེར་ལ། དེ་བཞིན་དུ་རྣམ་པར་ཤེས་པ་ཉིད་དོན་དམ་དུ་མེད་པར་སྣང་མེད་དབུ་མ་པ་རྣམས་འདོད་དོ། །ཡང་ཇི་སྐད་དུ། གང་གི་འགྱུར་མེད་དང་བྲལ་མི་རྣམས་ཀྱིས་ནི་སྟོང་བ་ཉིད་དེ་གཟུང་ནས་སྟོང་པར་ལྟ་བྱེད་པ། །དེས་ན་གཙོ་བོ་གང་ཞིག་འཕོ་མེད་ལྷན་སྐྱེས་སྐུའི་བདེ་བ་དག་ནི་སྔགས་ཀྱི་ཐེག་པར་བསྟན། །ཞེས་གསུངས་པ་ལྟར་སྣང་བཅས་སམ་གཞན་སྟོང་དབུ་མ་ཆེན་པོ་རྣམས་ཀྱིས་བཞེད་པ་ཡིན་པའི་ཕྱིར་རོ། ། སྨྲས་པ། རྨད་བྱུང་ཐོས་བསམ་བརྩོན་པའི་བློ་གྲོས་གངས་ཀྱི་རི། །ཐུགས་རྗེའི་ཉིན་བྱེད་དྲོད་ཀྱིས་བཞུས་པའི་འབབ་ཆུའི་རྒྱུན། །ཕྱི་ནང་གྲུབ་མཐའ་འཛིན་མར་འཁྱིལ་བའི་ཆུ་མཚོ་ལ། །བློ་ལྡན་སྐལ་བཟང་གདེངས་ཅན་བྱེ་བས་རོལ་བར་མཛོད། །འདི་ནི་འདོད་འཇོའི་དཔག་བསམ་ཤིང་བཞིན་དུ། །ལེགས་པར་བཤད་པའི་རིན་ཆེན་འདོད་འབྱུང་གཏེར། །ལེགས་པར་བཤད་པ་བཤེས་གཉེན་དམ་པའི་དྲིན། །ཉེས་བཤད་མཆིས་ན་མཁས་གྲུབ་མདུན་སར་འཆགས། །འདིར་འབད་དགེ་བས་ཕྱི་ནང་གྲུབ་མཐའ་ཀུན། །ལེགས་པར་འབྱེད་པའི་བློ་གྲོས་དཔལ་ཐོབ་ཅིང༌། །རྒྱལ་བའི་བསྟན་ལ་ཡིད་ཆེས་ལུང་རིགས་ཀྱིས། །ངེས་པ་རྙེད་ནས་ཐུབ་བསྟན་གསལ་བར་ཤོག །དོན་དམ་བདེ་བར་གཤེགས་པའི་བྱིན་རླབས་དང༌། །སངས་རྒྱས་ཆོས་ཚོགས་སླུ་བ་མེད་པའི་འཕྲུལ། །བསྟན་སྲུང་རྒྱ་མཚོའི་མཐུ་སྟོབས་ནུས་པ་ཡིས། །ལེགས་བཤད་ཆར་གྱིས་ཕྱོགས་ཀུན་ཁྱབ་གྱུར་ཅིག །ཅེས་གྲུབ་མཐའི་རྣམ་བཞག་ལུང་རིགས་གཏེར་མཛོད་ལེགསབཤད་འདོད་འཇོ་ཞེས་བྱ་བ་འདི་ནི་ལྕམ་འདའ་དགོན་གྱི་མཁན་བློ་ཆོས་ཀྱིས་འཇམ་པའི་དབྱངས་ཀྱི་གསེར་སྐུ་དར་དང་བཅས་ཏེ་གསུང་གིས་བསྐུལ་བ་དང༌། གྲྭ་བཙུན་པ་བསམ་བཟང་གི་འདུལ་བ་གཞན་ཕན་སྣང་བའི་མཛོད་དང་དར་བཅས་བསྐུལ་ངོར་སྤྲང་འཁྱམས་པ་ངག་དབང་དངོས་གྲུབ་དཔལ་ལམ་དབྱངས་ཅན་ངག་གི་རོལ་མཚོ་ནས་རང་ལུགས་ཀྱི་དམ་པ་གོང་མའི་གསུང་ལས་བསྡུས་ཏེ་རབ་གནས་ཐམས་ཅད་འདུལ་ཞེས་པའི་ས་གའི་ཟླ་བའི་ཚེས་གསུམ་གྱི་གཟའ་སྐར་ཕུན་སུམ་ཚོགས་པའི་ཉིན་རྫོགས་པར་བྲིས་པ་འདིས་ཀྱང་རྒྱལ་བའི་བསྟན་པ་རིན་པོ་ཆེ་སྒོ་ཐམས་ཅད་ནས་ཕྱོགས་དུས་ཀུན་ཏུ་རྒྱས་པར་གྱུར་ཅིག ། །།སརྦ་མངྒ་ལམ།། །། ས་ལམ་གྱི་རྣམ་བཞག་ཐེག་གསུམ་གསལ་བའི་ཤེལ་དཀར་མེ་ལོང་།ས་ལམ་གྱི་རྣམ་བཞག་ཐེག་གསུམ་གསལ་བའི་ཤེལ་དཀར་མེ་ལོང་ཞེས་བྱ་བ་བཞུགས་སོ། ། ཨོཾ་གུ་རུ་བུདྡྷ་བོ་དྷི་ས་ཏྭ་བྷྱོ་ན་མོ་ན་མ། །གྲངས་མེད་བསྐལ་བར་ཚོགས་གཉིས་རབ་བསགས་ནས། །ས་ལམ་བགྲོད་པ་མཐའ་དག་མཐར་ཕྱིན་ཏེ། །སྐུ་བཞིའི་རྒྱལ་བའི་དཔལ་ལ་རོལ་བ་ཡི། །མཉམ་མེད་ཤཱཀྱ་སེང་གེའི་ཞབས་ལ་འདུད། །དུས་གསུམ་རྒྱལ་དང་སྲས་བཅས་ལ་སོགས་ཀྱིས། །རྣམ་གྲོལ་ཞི་བའི་གོ་འཕང་བགྲོད་པའི་ལམ། །ཐེག་གསུམ་མངོན་རྟོགས་ས་ལམ་རྣམ་བཞག་ཀུན། །མ་ནོར་གསལ་བར་མདོར་བསྡུས་བཤད་པར་བྱ། །དེ་ལ་འདིར་ས་ལམ་གྱི་རྣམ་བཞག་མདོར་བསྡུས་ཙམ་བརྗོད་པ་ལ། ལམ་བཤད་པ་དང༌། ས་བཤད་པ་དང་གཉིས། དང་པོ་ལ་སྐྱེས་བུ་གསུམ་གྱི་ལམ་བཤད་པ་དང༌། ལམ་དངོས་བཤད་པ་དང་གཉིས། དང་པོ་ལ་ཐོག་མར་ལམ་ཐམས་ཅད་ཀྱི་རྩ་བ་དགེ་བའི་བཤེས་གཉེན་ཚུལ་བཞིན་དུ་བསྟེན་པ་ལ་རག་ལས་པས་ན་བླ་མ་ང་བཅུ་བ་སོགས་ལས་གསུངས་པ་ལྟར་བླ་མ་བསམ་སྦྱོར་གཉིས་ཀྱིས་ལེགས་པར་བསྟེན་དགོས། དེ་ཡང་སྐྱོན་རྟོགས་ཀྱི་བློ་འགོག་པར་བྱས་ནས་ཅི་མཛད་ལེགས་པར་མཐོང་བའི་མོས་གུས་བྱ་ལ། བདག་ལ་སངས་རྒྱས་ཀུན་ལས་ལྷག་པར་བཀའ་དྲིན་ཆེ་བ་དྲན་པའི་སྒོ་ནས་ཆོས་མཐུན་གྱི་བཀའ་བཞིན་བསྒྲུབ་པའོ། །དེ་ནས་སྐྱེས་བུ་གསུམ་གྱི་ལམ་བཤད་པ་ལ། འཁོར་བའི་མངོན་མཐོ་ཙམ་གཙོ་བོར་དོན་དུ་གཉེར་བའི་གང་ཟག་དེ། སྐྱེས་བུ་ཆུང་ངུའི་མཚན་ཉིད་ཡིན་ཏེ། ལམ་སྒྲོན་ལས། གང་ཞིག་ཐབས་ནི་གང་དག་གིས། །འཁོར་བའི་བདེ་བ་ཙམ་དག་ལ། །རང་ཉིད་དོན་དུ་གཉེར་བྱེད་པ། །དེ་ནི་སྐྱེས་བུ་ཐ་མར་ཤེས། །ཞེས་སོ། །འཁོར་བའི་མངོན་མཐོ་ཙམ་གཙོ་བོར་དོན་གཉེར་གྱིས་ཟིན་པའི་དགེ་བ་དེ། སྐྱེས་བུ་ཆུང་ངུའི་ལམ་གྱི་མཚན་ཉིད། མཚན་གཞི།སྐྱེས་བུ་ཆུང་ངུའི་རྒྱུད་ཀྱི་མི་དགེ་བཅུ་སྤོང་གི་དགེ་བ་དང་འཆི་བ་མི་རྟག་པར་རྟོགས་པའི་བློ་ལྟ་བུའོ། །སྡིག་པའི་ལས་ལ་འཛེམ་པའི་རང་ཁོ་ནའི་དོན་དུ་ཐར་བ་བགྲོད་པའི་ལམ་ལ་གནས་པའི་གང་ཟག སྐྱེས་བུ་འབྲིང་གི་མཚན་ཉིད་ཡིན་ཏེ། ལམ་སྒྲོན་ལས། སྲིད་པའི་བདེ་ལ་རྒྱབ་ཕྱོགས་ཤིང༌། །སྡིག་པའི་ལས་ལས་ལྡོག་བདག་ཉིད། །གང་ཞིག་རང་ཞི་ཙམ་དོན་གཉེར། །སྐྱེས་བུ་དེ་ནི་འབྲིང་ཞེས་བྱ། །ཞེས་གསུངས་སོ། །རང་ཁོ་ནའི་དོན་དུ་ཐར་བར་བགྲོད་པའི་མངོན་རྟོགས། སྐྱེས་བུ་འབྲིང་གི་ལམ་གྱི་མཚན་ཉིད། མཚན་གཞི་ནི། དེའི་རྒྱུད་ཀྱི་མི་རྟག་སོགས་བཅུ་དྲུག་རྟོགས་པའི་ལམ་ལྟ་བུའོ། །ས་མཚམས་ནི་དམན་ལམ་དུ་ཞུགས་མ་ཐག་ནས་ཉན་རང་དགྲ་བཅོམ་ལྷག་མེད་ཀྱི་བར་དུ་ཡོད། གཞན་དོན་དུ་གཙོ་བོར་བླ་ན་མེད་པའི་ཐར་བར་བགྲོད་པའི་གང་ཟག་དེ། སྐྱེས་བུ་ཆེན་པོའི་མཚན་ཉིད་ཡིན་ཏེ། ལམ་སྒྲོན་ལས། རང་རྒྱུད་གཏོགས་པའི་སྡུག་བསྔལ་ཀྱིས། །གང་ཞིག་གཞན་གྱི་སྡུག་བསྔལ་ཀུན། །ཡང་དག་ཟད་པར་ཀུན་ནས་འདོད། །སྐྱེས་བུ་དེ་ནི་མཆོག་ཡིན་ནོ། །ཞེས་གསུངས་སོ། །གཞན་དོན་དུ་གཙོ་བོར་བླ་ན་མེད་པའི་ཐར་བར་བགྲོད་པའི་ལམ་དེ། སྐྱེས་བུ་ཆེན་པོའི་ལམ་གྱི་མཚན་ཉིད། མཚན་གཞི་ནི། གཞན་དོན་ཁུར་དུ་ཁྱེར་བའི་སྙིང་རྗེ་ཆེན་པོ་དང༌། བྱང་ཆུབ་ཀྱི་སེམས་དང༌། དེའི་རྒྱུད་ཀྱི་སྟོང་ཉིད་རྟོགས་པའི་བློ་ལྟ་བུའོ། །ས་མཚམས་ནི་གཞན་དོན་ཁུར་ཁྱེར་གྱི་སྙིང་རྗེ་རྒྱུད་ལ་སྐྱེས་པ་ནས་སངས་རྒྱས་ཀྱི་སའི་བར་དུ་ཡོད། དེ་ཡང་ཐར་བའི་ལམ་ལ་ཞུགས་པ་ལ་ངེས་འབྱུང་གི་བསམ་པ་དགོས་ལ། ངེས་འབྱུང་གི་བསམ་པ་བཅོས་མ་མ་ཡིན་པ་ནི། འཁོར་བའི་ཕུན་ཚོགས་མཐའ་དག་མེ་འབར་བའི་འོབས་ལྟར་མཐོང་ནས་དེ་ལས་ཐར་འདོད་ཀྱི་བློ་བཅོས་མ་མ་ཡིན་པ་ལ་ངེས་འབྱུང་གི་བསམ་པ་ཞེས་བྱ་ལ།དེ་རྒྱུད་ལ་སྐྱེས་ན་ཐར་བའི་སྒོར་ཞུགས་ལ། དེ་རྒྱུད་ལ་མ་སྐྱེས་ན་ཐར་བའི་ལམ་དུ་མ་ཞུགས་པ་ཞེས་བྱའོ། །དེས་ན་ཐར་བར་འཇུག་པའི་སྒོ་ནི་ངེས་འབྱུང་གི་བསམ་པའོ། །འཁོར་བའི་མངོན་མཐོའི་གོ་འཕང་ཐོབ་པ་ལ་ངེས་པར་བློ་སྦྱོང་དགོས་པའི་ལམ་དེ། སྐྱེས་བུ་ཆུང་འབྲིང་ཐུན་མོང་གི་ལམ་གྱི་མཚན་ཉིད། མཚན་གཞི་ནི། མི་དགེ་བཅུ་སྤོང་གི་ཚུལ་ཁྲིམས་དང༌། འཆི་བ་མི་རྟག་པར་རྟོགས་པའི་བློ་ལྟ་བུའོ། །འཁོར་བའི་མངོན་མཐོ་གང་ཡང་ཐོབ་པ་ལ་བློ་སྦྱོང་མི་དགོས་པར་ཐར་བ་ཐོབ་པ་ལ་ངེས་པར་བློ་སྦྱོང་དགོས་པའི་ལམ་དེ། སྐྱེས་བུ་ཆེ་འབྲིང་ཐུན་མོང་གི་ལམ་གྱི་མཚན་ཉིད། མཚན་གཞི་ནི། མི་རྟག་སོགས་བཅུ་དྲུག་རྟོགས་པའི་བློ་ལྟ་བུའོ། །དམན་པའི་ཐར་བ་གང་རུང་ཐོབ་པ་ལ་བློ་སྦྱོང་མི་དགོས་པར་བླ་མེད་བྱང་ཆུབ་ཐོབ་པ་ལ་ངེས་པར་བློ་སྦྱོང་དགོས་པའི་ལམ་དེ། སྐྱེས་བུ་ཆེན་པོའི་ཐུན་མོང་མ་ཡིན་པའི་ལམ་གྱི་མཚན་ཉིད། མཚན་གཞི་ནི། སྐྱེས་བུ་ཆེན་པོའི་སྙིང་རྗེ་ཆེན་པོ་དང༌། ཆོས་ཀྱི་བདག་མེད་རྟོགས་པའི་བློ་ལྟ་བུའོ། །སྐྱེས་བུ་གསུམ་གྱི་ལམ་གྱི་རྣམ་བཞག་རྒྱས་པར་ལམ་རིམ་རྣམས་ལས་ཤེས་པར་བྱའོ། ། གཉིས་པ་ལམ་དངོས་བཤད་པ།གཉིས་པ་ལམ་དངོས་བཤད་པ་ལ། འདིར་ལམ་གྱི་རྣམ་བཞག་དག་ས་བཟང་གི་མདོ་སྡེ་རྒྱན་གྱི་རྣམ་བཤད་ཐེག་ཆེན་རབ་གསལ་སྣང་བ་ལྟར་བཤད་པ་ལ། རྟེན་གྱི་ཁྱད་པར། སྤྱིའི་རྣམ་གཞགསོ་སོའི་ངོ་བོ་དང་གསུམ། དང་པོ་ལ་ལུས་དང་བསམ་པའི་རྟེན་གཉིས་ལས། དང་པོ་ལམ་སྐྱེ་བའི་ལུས་རྟེན་ནི་སྤྱིར་བཏང་ལ། ཇི་སྐད་དུ། མཐུན་པར་གྱུར་བའི་ཡུལ་ན་གནས་པ་དང༌། །སྐྱེས་བུ་དམ་པ་ལ་ནི་བརྟེན་པ་དང༌། །བདག་གིས་ལེགས་སྨོན་སྔོན་ཡང་བསོད་ནམས་བགྱིས། །འཁོར་ལོ་ཆེན་པོ་བཞི་ནི་ཁྱོད་ལ་མངའ། །ཞེས་པ་ལྟར་འཁོར་ལོ་བཞི་དང་ལྡན་ཞིང་སྒྲིབ་པ་གསུམ་དང་བྲལ་བའི་ལྷ་དང་མི་རྣམས་ཀྱི་ལུས་ཏེ། མཛོད་ལས། མཚམས་མེད་པ་ཡི་ལས་རྣམས་དང༌། །ཉོན་མོངས་ཤས་ཆེ་ངན་འགྲོ་དང༌། །འདུ་ཤེས་མེད་པའི་སེམས་ཅན་དང༌། །སྒྲ་མི་སྙན་སྒྲིབ་གསུམ་དུ་འདོད། །ཅེས་པ་ལྟར་མཚམས་མེད་ལྔ་བྱས་པ་ལས་ཀྱི་སྒྲིབ་པ་ཅན་དང༌། ཟ་མ་ལ་སོགས་པ་ཉོན་མོངས་པ་ཤས་ཆེ་བའི་སྒྲིབ་པ་ཅན་དང༌། ངན་སོང་གསུམ་དང་ལྷ་ཚེ་རིང་པོ་དང་སྒྲ་མི་སྙན་པ་རྣམས་ནི་སྐྱེ་བའི་རྟེན་མ་ཡིན་པར་གསུངས་སོ། །དམིགས་བསལ་ནི་ཐེག་ཆེན་པའི་ལུགས་ལ་དུད་འགྲོ་ལའང་སྐྱེ་སྟེ་སྡོང་པོ་བཀོད་པར། གྲོང་ཁྱེར་སྐྱིད་པའི་འབྱུང་གནས་སུ་འཇམ་དཔལ་གྱིས་རྒྱ་མཚོ་ནས་འོངས་པའི་ཀླུ་རྣམས་ལ་སེམས་བསྐྱེད་མཛད་པ་དང༌། ཟ་མ་ཏོག་བཀོད་པར། ཡུལ་འཁོར་མོ་འཇིག་ཏུ་འཇིག་རྟེན་དབང་ཕྱུག་གིས་ཡི་དྭགས་དང་སྲིན་བུའི་རིགས་མང་པོ་བདེན་པ་མཐོང་པ་ལ་བཀོད་པར་གསུངས་པ་ལྟར་རོ། །གནས་པའི་རྟེན་ནི་ཉན་ཐོས་པའི་ལུགས་ཀྱིས་ཁམས་གསུམ་ཅི་རིགས་པར་གནས་ཤིང་ཐེག་ཆེན་པའི་ལུགས་ཀྱིས་སངས་རྒྱས་དང་བྱང་ཆུབ་སེམས་དཔའི་རྣམ་འཕྲུལ་བསམ་གྱིས་མི་ཁྱབ་པས་འགྲོ་བ་ཐམས་ཅད་ན་ཡོད་དེ། སྤྱན་རས་གཟིགས་དབང་ཕྱུག་གིས་དམྱལ་བར་གཤེགས་པ་དང༌། སྐྱེས་རབས་ལས་དུད་འགྲོར་གྱུར་པའི་བྱང་ཆུབ་སེམས་དཔའ་མང་དུ་གསུངས་པ་དང༌། མ་དྲོས་པས་ཞུས་པར་ཡང༌། ཀླུའི་རྒྱལ་པོ་དེ་ཉིད་ས་བཅུ་པར་གསུངས་པ་ལྟར་རོ། །གཉིས་པ་སེམས་རྟེན་ནི་ཚོགས་ལམ་གྱི་ཐོས་བསམ་སྒོམ་གསུམ་འདོད་པའི་སེམས་ལ་བརྟེན་པ་གཙོ་ཆེ་ལ། སྦྱོར་ལམ་ནི་མཛོད་ལས། སྒོམ་བྱུང་མི་ལྕོགས་མེད་པ་དང༌། །ཁྱད་པར་བསམ་གཏན་ས་པའོ། །ཞེས་པ་ལྟར་དང་པོའི་ཉེར་བསྡོགས་མི་ལྕོགས་པ་མེད་པ་དང༌། དངོས་གཞི་ཙམ་ཁྱད་དང་དངོས་གཞི་ཕྱི་མ་གསུམ་སྟེ་ས་དྲུག་ལ་བརྟེན་ཅིང་མཐོང་ལམ་ཡང་དེ་ནི་ཆོས་མཆོག་དང་ས་གཅིག་ཅེས་པ་ལྟར་སྦྱོར་ལམ་དང་འདྲ་ལ། སྒོམ་ལམ་ཁམས་གསུམ་གྱི་ས་དགུ་ཅར་ལ་བརྟེན་ཞེས་ས་བཟང་གི་ཀུན་བཏུས་འགྲེལ་བར་གསུངས་སོ། །ཐེག་ཆེན་པའི་མངོན་རྟོགས་ཕལ་ཆེར་དངོས་གཞི་ལ་བརྟེན་པ་སྟེ། ཐེག་ཆེན་ཚོགས་ལམ་ཆེན་པོ་ནས་ཆོས་རྒྱུན་གྱི་ཏིང་ངེ་འཛིན་ཐོབ་སྟེ་ཆོས་ཀྱི་རྒྱུན་གྱི་ཏིང་འཛིན་སྐྱེས་པ་ལ་བརྟེན་ནས་ནི་ཡུལ་སངས་རྒྱས་སྤྲུལ་པའི་སྐུ་རྣམས་ལས། ཆེད་དུ་བྱ་བ་ཞི་གནས་ཏིང་ངེ་འཛིན་དང་ཡེ་ཤེས་ལྷག་མཐོང་ཡངས་པ་ཐོབ་པར་བྱ་བའི་ཕྱིར། ངོ་བོ་བདག་མེད་མངོན་སུམ་དུ་མཐོང་བའི་ཐབས་གདམས་ངག་རྒྱ་ཆེན་པོ་རྙེད་པར་འགྱུར་བའོ། ། གཉིས་པ་སྤྱིའི་རྣམ་དབྱེ།གཉིས་པ་སྤྱིའི་རྣམ་དབྱེ་ལ། མཚན་ཉིད་མཚན་གཞི་བྱེད་ལས་དབྱེ་བ་ངེས་ཚིག་དངོས་བཏགས་དང་དྲུག་ལས། དང་པོ་ནི་གང་ལ་ཞུགས་ནས་མྱ་ངན་ལས་འདས་པར་ཕྱིན་པའི་མངོན་རྟོགས། ཡང་ན་ཐབས་དང་ཤེས་རབ་ཟུང་དུ་འཇུག་པའི་དགེ་བ་གང་ཞིག་རྣམ་པར་གྲོལ་བའི་འཇུག་ངོགས་སུ་གྱུར་པ་དེ། ལམ་གྱི་མཚན་ཉིད་ཡིན་ཏེ། མདོ་ལས། ཐབས་དང་བཅས་པའི་ཤེས་རབ་ནི་ལམ་མོ། །ཤེས་རབ་དང་བཅས་པའི་ཐབས་ནི་ལམ་མོ། །ཞེས་གསུངས་སོ། །དེ་བཞིན་དུ་ཚོགས་ཆོས་བདེན་བཞིའི་རྣམ་བཤད་དང་ས་བཟང་གི་རྒྱུད་བླའི་འགྲེལ་བར་གསུངས་སོ། །གཉིས་པ་མཚན་གཞིའི་དངོས་པོ་ནི། ཐེག་པ་རང་ལམ་གྱི་བྱང་ཆུབ་འདོད་པས་ཀུན་ནས་བསླངས་པའི་སྒོ་གསུམ་གྱི་དགེ་བ་བྱང་ཆུབ་ཏུ་བསྔོས་པའི་ལམ་ལྟ་བུའོ། །གསུམ་པ་བྱེད་ལས་ནི་ཟག་པ་དང་བཅས་པ་འབྲས་བུའི་ཆ་ཐམས་ཅད་སྡུག་བསྔལ་དུ་ཤེས་པར་བྱས་ནས་དེའི་རྒྱུ་ལས་དང་ཉོན་མོངས་པ་སྤོང་ཞིང༌། དེ་དག་གི་རྣམ་པར་དག་པ་མངོན་སུམ་དུ་བྱ་བའི་ཆེད་དུ་ཟག་པ་མེད་པའི་དགེ་བའི་རྩ་བ་རྣམས་བསྟེན་པར་བྱེད་པ་སྟེ། ཀུན་ལས་བཏུས་པར། ལམ་གང་གིས་སྡུག་བསྔལ་ཡོངས་སུ་ཤེས་པ་དང་ཀུན་འབྱུང་སྤོང་བ་དང་འགོག་པ་མངོན་དུ་བྱེད་པ་དང་ལམ་སྒོམ་པ་སྟེ། ལམ་གྱི་མཚན་ཉིད་མདོར་བསྡུས་པའོ། །ཞེས་གསུངས་པ་ལྟར་རོ། །བཞི་བ་དབྱེ་བ་ནི་ཐེག་པ་གསུམ་གྱི་ལམ་གསུམ་དང༌། འཇིག་རྟེན་དང་འཇིག་རྟེན་ལས་འདས་པའི་ལམ་གཉིས་དང༌། སྦྱོར་བ་བར་ཆད་མེད་ལམ་རྣམ་གྲོལ་ལམ་ཁྱད་པར་གྱི་ལམ་བཞི་དང༌། ཞི་གནས་དང་ལྷག་མཐོང་གི་ལམ་གཉིས་དང༌། མཉམ་གཞག་དང་རྗེས་ཐོབ་ཀྱི་ལམ་གཉིས་དང༌། སློབ་པ་དང་མི་སློབ་པའི་ལམ་གཉིས་ལ་སོགས་པའོ། །ལྔ་བ་ངེས་ཚིག་ནི་མྱ་ངན་ལས་འདས་པར་བགྲོད་པའི་གཞིར་གྱུར་པ་ཡིན་པས་ལམ་ཞེས་བྱའོ། །དྲུག་པ་དངོས་བཏགས་ལ། ལམ་ལ་ཕྱིན་བྱེད་དང་ཕྱིན་ཟིན་གྱི་ལམ་གཉིས་སུ་ཕྱེ་ནས་སྔ་མའི་དབང་དུ་བྱས་ན་མི་སློབ་ལམ་ལམ་བཏགས་པ་བ་ཡིན་ཀྱང་སྤྱིར་ལམ་མཚན་ཉིད་པར་བཞག་ན་སྐབས་ཐམས་ཅད་དུ་གསུང་རབ་ཀྱི་ཐ་སྙད་ལ་མི་གནོད་དམ་སྙམ། དེས་ན་ས་བཟང་གི་མདོ་སྡེ་རྒྱན་གྱི་རྣམ་བཤད་ལས། ཐེག་པ་ཆེན་པོ་བ་རྣམས་ཀྱི་ནི་སྤངས་རྟོགས་མཐར་ཕྱིན་པའི་ཕྱིར་ལམ་བཏགས་པ་བ་དང་འབྲས་བུ་མཚན་ཉིད་པ་ཡིན་ནོ། །ཞེས་སོགས་གསུངས་བའི་དགོངས་པ་ཡང་ཕྱིན་བྱེད་ཀྱི་ལམ་དངོས་མ་ཡིན་པ་ལ་དགོངས་པ་ཡིན་པར་སྣང་ངོ༌། ། གསུམ་པ་སོ་སོའི་ངོ་བོ་བཤད་པ།གསུམ་པ་སོ་སོའི་ངོ་བོ་བཤད་པ་ལ། ཚོགས་ལམ། སྦྱོར་ལམ། མཐོང་ལམ། སྒོམ་ལམ། མཐར་ཕྱིན་པའི་ལམ་བཤད་པ་དང་ལྔ། དང་པོ་ཚོགས་ལམ་བཤད་པ་ལ། མཚན་ཉིད་སྤངས་རྟོགས་ཡོན་ཏན་དབྱེ་བ་བྱེད་ལས་ངེས་ཚིག་ངོ་བོ་བཤད་པ་དང་བདུན། དང་པོ་ཚོགས་ལམ་གྱི་མཚན་ཉིད་ནི། ཐེག་པ་རང་རང་གི་བྱང་ཆུབ་ཏུ་སེམས་བསྐྱེད་ནས་དྲོད་མ་ཐོབ་ཀྱི་བར་གྱི་དགེ་བ་གང་ཞིག་མྱ་ངན་ལས་འདས་པར་ཕྱིན་པར་བྱེད་པའི་ཐབས་སུ་གྱུར་པའོ། །ཡང་ན་ལས་དང་པོ་པ་རྣམས་ཀྱིས་ཐར་བའི་ཆ་དང་མཐུན་པའི་དགེ་བའི་རྩ་བ་རྒྱུད་ཡོན་ཏན་གྱི་ཚོགས་ཀྱིས་འགེངས་ཤིང་རྣམ་པར་གྲོལ་བའི་འཇུག་ངོགས་སུ་གྱུར་བ་ཚོགས་ལམ་གྱི་མཚན་ཉིད་དུ་ས་བཟང་གི་རྒྱུད་བླར་གསུངས་ལ། ལམ་ཕྱི་མ་རྣམས་ཀྱི་སྐབས་སུ་མཚན་ཉིད་སྔ་ཕྱི་གཉིས་རེ་བཞག་པ་སྔ་མ་ས་བཟང་གི་མདོ་སྡེ་རྒྱན་གྱི་རྣམ་བཤད་ལྟར་དང་ཕྱི་མ་དེའི་རྒྱུད་བླའི་འགྲེལ་བ་བཞིན་ཡིན་པར་ཤེས་པར་བྱ། ས་མཚམས་ནི་ཐེག་པ་རང་ལམ་གྱི་བྱང་ཆུབ་ཏུ་སེམས་བསྐྱེད་ནས་དྲོད་མ་ཐོབ་ཀྱི་བར་དུ་ཡོད་དོ། །གཉིས་པ་སྤངས་རྟོགས་ནི། སྤང་བྱ་ཤིན་ཏུ་རགས་པ་འཁོར་བའི་སྡུག་བསྔལ་སྐྱེད་བྱེད་རྣམས་རྣམ་པར་སུན་འབྱིན་པའི་གཉེན་པོས་སྤངས་པ་དང༌། ཤེས་རབ་གསུམ་གྱིས་བདག་མེད་གཉིས་སྤྱིའི་ཚུལ་དུ་རྟོགས་པའོ། །གསུམ་པ་ཡོན་ཏན་ནི། ཚོགས་ལམ་ཆུང་འབྲིང་ཆེ་གསུམ་ལ་རིམ་བཞིན་དྲན་པ་ཉེ་བར་བཞག་པ་བཞི་དང་ཡང་དག་པར་སྤོང་བ་བཞི་དང་རྫུ་འཕྲུལ་གྱི་རྐང་བ་བཞི་ཐོབ་ལ། ཐེག་ཆེན་ཚོགས་ལམ་དུ་ཆོས་རྒྱུན་གྱི་ཏིང་ངེ་འཛིན་ལ་བརྟེན་ནས་སངས་རྒྱས་རྣམས་ལས་ཆོས་ཉན་ཅིང་གཞུང་དང་དོན་འཛིན་ནུས་པ་དང༌། སྤྱན་ལྔ་དང་མངོན་ཤེས་ལྔ་ཐོབ་པ་ལ་སོགས་པའོ། ། བཞི་བ་དབྱེ་བ་ནི། ཐོག་མར་སྐྱེས་པའི་ཚོགས་ལམ། བར་དུ་སྐྱེས་པའི་ཚོགས་ལམ། ཐ་མར་སྐྱེས་པའི་ཚོགས་ལམ་སྟེ་ཆུང་འབྲིང་ཆེ་གསུམ་ཡོད། དབང་པོའི་སྒོ་ནས་ཆེ་འབྲིང་ཆུང་གསུམ་ཡོད་པར་གསུངས། ཐེག་པའི་སྒོ་ནས་ཐེག་པ་གསུམ་གྱི་ཚོགས་ལམ་གསུམ་ཡོད། ཉན་ཐོས་ཚོགས་ལམ་གྱི་མཚན་ཉིད། ཉན་ཐོས་ཀྱི་བྱང་ཆུབ་ཏུ་སེམས་བསྐྱེད་ནས་ཉན་ཐོས་ཀྱི་དྲོད་མ་ཐོབ་བར་གྱི་དགེ་བ་གང་ཞིག་ཉན་ཐོས་ཀྱི་མྱ་ངན་ལས་འདས་པར་ཕྱིན་པར་བྱེད་པའི་ཐབས་སུ་གྱུར་པ། དབྱེ་ན་ཆེ་འབྲིང་ཆུང་གསུམ་ཡོད། །རང་རྒྱལ་གྱི་ཚོགས་ལམ་གྱི་མཚན་ཉིད། རང་རྒྱལ་གྱི་བྱང་ཆུབ་ཏུ་སེམས་བསྐྱེད་ནས་རང་རྒྱལ་གྱི་དྲོད་མ་ཐོབ་བར་གྱི་དགེ་བ་གང་ཞིག་རང་རྒྱལ་གྱི་མྱ་ངན་ལས་འདས་པར་ཕྱིན་པར་བྱེད་པའི་ཐབས་སུ་གྱུར་པའོ། །ཐེག་ཆེན་ཚོགས་ལམ་གྱི་མཚན་ཉིད། ཐེག་ཆེན་བྱང་ཆུབ་ཏུ་སེམས་བསྐྱེད་ནས་ཐེག་ཆེན་གྱི་དྲོད་མ་ཐོབ་བར་གྱི་དགེ་བ་གང་ཞིག་མི་གནས་པའི་མྱང་འདས་སུ་ཕྱིན་པར་བྱེད་པའི་ཐབས་སུ་གྱུར་པ་དེ་ཡིན་ནོ། །མིང་གི་རྣམ་གྲངས་ནི་ལས་དང་པོ་པའི་ས་དང་དད་པའི་ས་དང་ཚོགས་ལམ་དང་ཐར་པ་ཆ་མཐུན་ལ་སོགས་པའོ། ། ལྔ་བ་བྱེད་ལས་ནི། རྒྱུད་ཡོངས་སུ་སྨིན་པར་བྱེད་པ་དང༌། སྦྱོར་ལམ་འདྲེན་པར་བྱེད་པ་ལ་སོགས་པའོ། ། དྲུག་པ་ངེས་ཚིགདྲུག་པ་ངེས་ཚིག་ནི། རྒྱུད་ཡོན་ཏན་གྱི་ཚོགས་ཀྱིས་འགེངས་ཤིང་ཐར་པར་འགྲོ་བའི་གཞི་ཡིན་པས་ན་ཚོགས་ལམ་ཞེས་པའམ་ཐེག་པ་རང་ལམ་གྱི་ཚོགས་བསགས་པའི་ལམ་གྱི་དང་པོ་ཡིན་པས་སོ། །བདུན་པ་ངོ་བོ་ནི། ཚོགས་ཀྱི་ལམ་གང་ཞེ་ན། སོ་སོ་སྐྱེ་བོའི་ཚུལ་ཁྲིམས་དང༌། དབང་པོའི་སྒོ་སྡོམ་པ་དང༌། ཟས་ཀྱི་ཚོད་ཤེས་པ་དང༌། ནམ་གྱི་ཆ་སྟོད་དང་ཆ་སྨད་ལ་མི་ཉལ་བར་རྣལ་འབྱོར་ལ་བརྩོན་པ་དང༌། ཤེས་བཞིན་དུ་མངོན་པར་དགའ་བའོ་ཞེས་གསུངས་པ་ལྟར། དལ་འབྱོར་རྙེད་པར་དཀའ་བ་དང་འཆི་བ་མི་རྟག་པ་རྗེས་སུ་དྲན་པའི་སྒོ་ནས། ལས་རྒྱུ་འབྲས་ལ་མངོན་པར་ཡིད་ཆེས་པར་བྱ་སྟེ། སྤྱོད་འཇུག་ལས། སྤོང་བའི་སེམས་ནི་ཐོབ་པ་ལས། །ཚུལ་ཁྲིམས་ཕ་རོལ་ཕྱིན་པར་བཤད། ། ཅེས་པ་ལྟར་སེམས་ཅན་ལ་གནོད་འཚེ་གཞི་དང་བཅས་པ་སྤོང་བ་སྡོམ་པའི་ཚུལ་ཁྲིམས་དང༌། ལུས་ངག་ཡིད་གསུམ་དགེ་བ་ལ་འཁོལ་བ་དགེ་བ་ཆོས་སྡུད་དང༌། དེ་དག་ཀྱང་གཞན་དོན་དུ་སྤྱོད་པ་སེམས་ཅན་དོན་བྱེད་ཀྱི་ཚུལ་ཁྲིམས་རྣམས་རྣམ་པར་དག་པ་བསྲུང་བ་དང༌། མདོ་ལས། མིག་གིས་གཟུགས་རྣམས་མཐོང་སྟེ་མཚན་མར་མི་འཛིན་མངོན་རྟགས་སུ་མི་འཛིན་ཞེས་གསུངས་པ་ལྟར། དབང་པོ་རྣམས་ཡུལ་ལ་འཇུག་པ་ན་དྲན་པ་དང་ཤེས་བཞིན་གྱིས་ཟིན་པར་བྱས་ཏེ། ཆགས་སྡང་གི་ཉོན་མོངས་པ་སྐྱེ་བ་བསྲུང་ཞིང་སྡོམ་པར་བྱེད་པ་དང༌། བཤེས་སྤྲིང་ལས། ཁ་ཟས་སྨན་དང་འདྲ་བར་རིག་བགྱིས་ནས། །འདོད་ཆགས་ཞེ་སྡང་མེད་པར་བསྟེན་བགྱི་སྟེ། །རྒྱགས་ཕྱིར་མ་ལགས་སྒེག་པའི་ཕྱིར་མ་ལགས། །འཚག་ཕྱིར་མ་ལགས་ལུས་གནས་འབའ་ཞིག་ཕྱིར། །ཞེས་གསུངས་པ་ལྟར་ཆོས་ཀྱི་དོན་དུ་ལུས་གནས་པའི་ཆེད་དུ་སྡིག་པ་དང་མ་འདྲེས་པའི་ཁ་ཟས་གཙང་མ་ཚོད་ཟིན་པར་བརྟེན་པ་དང༌། རིགས་པའི་བདག་ཉིད་ཉིན་པར་ཐམས་ཅད་དང༌། །མཚན་མོ་དེ་བཞིན་སྟོད་སྨད་ཐུན་བཟླས་ནས། །མནལ་ཚེའང་འབྲས་མེད་ཉིད་དུ་མི་འགྱུར་བར། །དྲན་ལྡན་དེ་སྲིད་བར་དུ་མནལ་བར་མཛོད། །ཅེས་གསུངས་པ་ལྟར་ནམ་གྱི་ཆ་སྟོད་སྨད་ལ་མི་ཉལ་བར་ཞི་གནས་དང་ལྷག་མཐོང་གི་རྣལ་འབྱོར་ལ་བརྩོན་པར་བྱེད་པ་དང༌། སྤྱོད་འཇུག་ལས། ལུས་དང་སེམས་ཀྱི་གནས་སྐབས་ལ། །ཡང་དང་ཡང་དུ་བརྟག་བྱ་བ། །དེ་ཉིད་ཁོ་ན་མདོར་ན་ནི། །ཤེས་བཞིན་བསྲུང་བའི་མཚན་ཉིད་དོ། །ཞེས་གསུངས་པ་ལྟར་སྒོ་གསུམ་གྱི་སྤྱོད་པ་ལ་རང་རིག་གིས་བརྟགས་ནས་རུང་བ་རྣམས་སྤྱོད་ཅིང་མི་རུང་བ་རྣམས་སྤོང་བ་ཤེས་བཞིན་དུ་གནས་པ་སྟེ། ཐར་པའི་རྒྱུར་གྱུར་པའི་དགེ་བ་ལྟུང་བས་འགྱོད་པ་མེད་ཅིང་དགའ་བ་ལས་སེམས་མཉམ་པར་འཇོག་པ་དང༌། མཉམ་པར་བཞག་པ་ལས་ཡང་དག་པ་ཇི་ལྟ་བ་བཞིན་དུ་ཤེས་པ་ལ་སོགས་པ་དང༌། འཕགས་པའི་ནོར་བདུན་ལ་སྤྱོད་པ་དང༌། ཆོས་སྤྱོད་བཅུའི་སྒྲུབ་པ་ལ་བརྩོན་པ་དང༌། ལུང་རྣམ་དག་ཐོས་པ་ལས་བྱུང་བ་དང༌། རིགས་པས་ངེས་པས་ངེས་པར་བསམས་པ་ལས་བྱུང་བ་དང༌། ཏིང་འཛིན་ཟབ་མོ་བསྒོམས་པ་ལས་བྱུང་བའི་ཤེས་རབ་རྣམས་ལ་བརྟེན་ནས་མཐོང་ལམ་བརྒྱུད་ནས་སྐྱེ་ཞིང་སྦྱོར་ལམ་དངོས་སུ་སྐྱེ་བའི་ལམ་འདི་ཉིད་ལ་ལས་དང་པོ་པ་རྣམས་ཀྱིས་བསླབ་པར་བྱའོ། །གཞན་ཡང་ཚོགས་ལམ་ཆུང་ངུའི་གནས་སྐབས་སུ་ལུས་ཚོར་སེམས་ཆོས་དྲན་པ་ཉེ་བར་བཞག་པ་བཞི་གཙོ་ཆེར་སྒོམ་པ་དང་ཚོགས་ལམ་འབྲིང་གི་གནས་སྐབས་སུ་སྡིག་པ་སྐྱེས་པ་རྣམས་སྤངས་པ་དང༌། མ་སྐྱེས་པ་རྣམས་མི་བསྐྱེད་པ་དང༌། དགེ་བ་མ་སྐྱེས་པ་རྣམས་སྐྱེད་པ་དང༌། སྐྱེས་པ་རྣམས་སྤེལ་བ་སྟེ་ཡང་དག་པར་སྤོང་བ་བཞི་གཙོ་བོར་སྒོམ་པ་དང་ཚོགས་ལམ་ཆེན་པོའི་གནས་སྐབས་སུ་འདུན་པ་དང་བརྩོན་འགྲུས་དང་སེམས་དང་དཔྱོད་པའི་ཏིང་ངེ་འཛིན་ཏེ་རྫུ་འཕྲུལ་གྱི་རྐང་བ་བཞི་གཙོ་ཆེར་སྒོམ་པའོ། །ཐེག་ཆེན་གྱིས་མོས་སྤྱོད་ཀྱི་སའི་བར་ལ་གྲངས་མེད་གཅིག་དང༌། མ་དག་ས་བདུན་གྱི་བར་ལ་གྲངས་མེད་གཉིས་པ་དང༌། དག་པ་ས་གསུམ་གྱི་བར་ལ་གྲངས་མེད་གསུམ་པ་སྟེ། བསྐལ་པ་གྲངས་མེད་གསུམ་དུ་ཚོགས་བསགས་པ་ལ་བརྟེན་ནས་སངས་རྒྱས་ཐོབ་པར་གསུངས་པའི་གྲངས་མེད་དང་པོ་ནས་བརྩམས་ཏེ་འཁོར་བའི་སྡུག་བསྔལ་མཐའ་དག་ལས་ངེས་པར་འབྱུང་ཞིང༌། ཐར་པ་ཆེན་པོའི་བདེ་བ་ཐོབ་པར་འདོད་པས་ཐེག་པ་ཆེན་པོ་ལ་དད་ཅིང་མོས་པ་རྣམ་པར་འཕེལ་བར་བྱེད་པ་དེ་ནི། དཔེ་ཇི་ལྟར་ན་ཆུ་མང་པོ་ཡིས་རྒྱ་མཚོ་ཡོངས་སུ་གང་བ་དེ་བཞིན་དུ་དགེ་བའི་ཆོས་བསོད་ནམས་དང་ཡེ་ཤེས་ཀྱི་ཚོགས་རྣམས་རིམ་གྱིས་ཡང་དག་པར་རྫོགས་པ་ལ་བརྟེན་ནས་གདམས་ངག་ཟབ་མོ་ཐོབ་པའོ། །ཐེག་ཆེན་ཚོགས་ལམ་གྱི་གནས་སྐབས་སུ་སེམས་དྲུག་གི་འཇུག་ཚུལ་ནི། རྩ་བའི་སེམས་ནི་ཐོག་མར་མདོ་ལ་སོགས་པའི་མིང་ས་བཅུ་པའི་མདོ་སྡེ་ནི་འདིའོ་ཞེས་པ་ལ་སོགས་པ་ཉིད་ལ་སེམས་མཉམ་པར་འཇོག་གོ །གཉིས་པ་རྗེས་སུ་དཔྱོད་པའི་སེམས་ནི། རྩ་བའི་སེམས་ལ་མཉམ་པར་བཞག་པའི་རྗེས་དེ་ནས་མདོ་ལ་སོགས་པ་དེ་དག་གི་རྗོད་བྱེད་ཀྱི་ཚིག་རབ་ཏུ་དབྱེ་བ་ལ་ཡང་ཕྱིན་ཅི་མ་ལོག་པར་དཔྱོད་པར་བྱེད་པའོ། ། གསུམ་པ་རྣམ་པར་དཔྱོད་པའི་སེམས་ནི། མདོའི་སྡེ་ལ་སོགས་པ་དེ་དག་གི་སོ་སོའི་ནང་ཚན་རྣམས་ལ་ཚུལ་བཞིན་དུ་མིང་དང་ཚིག་དེ་དག་གིས་བསྟན་པའི་དོན་ཡང་ཞིབ་ཏུ་རྣམ་པར་དཔྱོད་པ་སྟེ་དོན་དང་ཡི་གེ་དག་ལ་བརྟེན་ནས་སོ། །བཞི་པ་ངེས་པར་འཛིན་པའི་སེམས་ནི། སྔར་རྗེས་སུ་དཔྱད་པ་དང་རྣམ་པར་དཔྱད་པ་དེ་རྣམས་ཀྱི་དོན་དེ་དག་ནི་འདི་ཁོ་ན་ཡིན་གྱི་གཞན་ནི་མ་ཡིན་ནོ་ཞེས་བྱ་བར་དེ་དག་གི་རྒྱུ་མཚན་ངེས་པར་བཟུང་ནས་གཏན་ལ་འབེབས་པའོ། ། ལྔ་པ་སྡོམ་པའི་སེམས་ནི། མདོ་སྡེ་ལས་ཚིག་དང་ཡི་གེ་མང་པོ་འབྱུང་ཡང་ཐམས་ཅད་ཀྱི་དོན་བསྡུས་ན་འདི་ཙམ་ཞིག་ཏུ་ཟད་དོ་ཞེས་རྩ་བའི་སེམས་སུ་བསྡུད་ཅིང་སྡོམ་པའོ་ཞེས་འགྲེལ་ཆེན་ལས་འབྱུང་བ་ལྟར་རོ། ། དྲུག་པ་སྨོན་པའི་སེམས་ནི། གདམས་ངག་མནོས་པ་དེའི་དོན་ས་དང་ལམ་དང་འབྲས་བུ་ཡོན་ཏན་ཁྱད་པར་ཅན་ནི་ཐོབ་པར་བྱ་བའི་ཕྱིར། རིམ་གྱིས་སྒོམ་པས་དེ་ནས་དོན་དེ་དག་ལ་རབ་ཏུ་བརྩོན་པ་དེ་ལ་འདུན་པ་དང་ལྷན་ཅིག་སྨོན་པར་བྱེད་པའི་སེམས་རྣམ་པར་དག་པ་འབྱུང་བའོ། །སེམས་གནས་པའི་ཐབས་དགུ་བསྒྲུབས་ནས་བྱང་ཆུབ་སེམས་དཔའ་དེའི་ལུས་དང་སེམས་ཀྱི་གནས་ངན་ལེན་ཅི་རིགས་པ་བྲལ་བར་ལས་སུ་རུང་བར་གྱུར་ཏེ། ཤིན་ཏུ་སྦྱངས་པ་ཆེན་པོ་ཐོབ་ནས་དེ་ཉིད་ཁྱད་པར་དུ་འཕགས་པར་འགྲོ་བ་ཡིས་བསམ་གཏན་བཞིའི་དངོས་གཞིའི་གནས་པ་ཁྱད་པར་ཅན་དེ་རྣམས་ཐོབ་པོ། །འདོད་སེམས་དགུ་སྒྲུབ་ཚུལ་དང་ཞི་ལྷག་སྒྲུབ་ཚུལ་རྣམས་གཞན་ལས་ཤེས་པར་བྱ་སྟེ། འདིར་ཚིག་ཚོགས་མང་བས་མ་སྤྲོས་སོ། ། གཉིས་པ་སྦྱོར་ལམ་བཤད་པ།གཉིས་པ་སྦྱོར་ལམ་བཤད་པ་ལ། མཚན་ཉིད་སྤངས་རྟོགས་ཡོན་ཏན་དབྱེ་བ་བྱེད་ལས་ངེས་ཚིག་ངོ་བོ་བཤད་པ་དང་བདུན། དང་པོ་མཚན་ཉིད་ནི། ཚོགས་ལམ་རྫོགས་ནས་མཐོང་ལམ་མ་ཐོབ་བར་གྱི་དགེ་བ་གང་ཞིག་མྱ་ངན་ལས་འདས་པར་ཕྱིན་པར་བྱེད་པའི་ཐབས་སུ་གྱུར་པ།ཡང་ན་ཚོགས་བསགས་པ་ལས་མོས་པས་སྤྱོད་པ་རྣམས་ཀྱིས་ངེས་པར་འབྱེད་པའི་ཆ་དང་མཐུན་པའི་དགེ་བའི་རྩ་བ་བདེན་པ་རྣམས་མངོན་པར་རྟོགས་པ་ལ་རིམ་གྱིས་སྦྱོར་ཞིང་རྣམ་པར་གྲོལ་བའི་འཇུག་ངོགས་སུ་གྱུར་བའོ། །མཚན་གཞི་ནི། ངེས་འབྱེད་ཆ་མཐུན་གྱི་དྲོད་ལྟ་བུའོ། །ས་མཚམས་ནི་ཚོགས་ལམ་རྫོགས་ནས་མཐོང་ལམ་མ་ཐོབ་ཀྱི་བར་དུ་ཡོད། གཉིས་པ་སྤངས་རྟོགས་ནི། ཐེག་པ་རང་ལམ་གྱི་སྤང་བྱའི་གཙོ་བོའི་ཀུན་བརྟགས་རྣམ་པར་མགོ་གནོན་པར་བྱེད་ལ། ཉན་ཐོས་སྦྱོར་ལམ་གྱིས་ཉོན་མོངས་པ་ཀུན་བརྟགས་དང་རང་རྒྱལ་སྦྱོར་ལམ་གྱིས་ཤེས་སྒྲིབ་རགས་པ་ཀུན་བརྟགས་དང༌། ཐེག་ཆེན་སྦྱོར་ལམ་པས་ཤེས་བྱའི་སྒྲིབ་པ་ཀུན་བརྟགས་རྣམས་རྣམ་པར་གནོན་པའི་ཚུལ་གྱིས་སྤོང་ཞིང་ཐེག་པ་རང་རང་གི་བསྒོམ་བྱའི་གཙོ་བོ་ལ་སྒོམ་བྱུང་གི་རྟོག་པ་ཐོབ་པའོ། །གསུམ་པ་ཡོན་ཏན་ནི། མཛོད་ལས། རྩེ་མོ་ཐོབ་པ་རྩ་མི་འཆད། །བཟོད་ཐོབ་ངན་སོང་ཡོངས་མི་ལྟུང༌། །ཞེས་པ་ལྟར་དྲོད་ཐོབ་པ་ནས་མཐོང་ལམ་སྐྱེ་བའི་སྔ་ལྟས་སུ་དྲོད་ལྟ་བུའི་ཡེ་ཤེས་ཐོབ་པ་དང༌། རྩེ་མོ་ཐོབ་པ་ནས་དགེ་རྩ་མི་ཆད་པ་དང༌། བཟོད་པ་ཐོབ་པ་ནས་ལས་ཉོན་གྱི་ངན་སོང་དུ་མི་འགྲོ་བ་དང༌། ཆོས་མཆོག་ཏུ་འཇིག་རྟེན་པའི་དགེ་བ་མཆོག་ཐོབ་པ་ཡིན་ལ། ཡུམ་དང་དེའི་རྒྱན་ལས། དབང་པོ་རྣོན་པོས་རྫོགས་པའི་བྱང་ཆུབ་ལས་ཕྱིར་མི་ལྡོག་པའི་རྟགས་ཐོབ་པར་གསུངས་པ་ལ་སོགས་པ་རྣམས་སོ། ། བཞི་བ་དབྱེ་བ་ནི། སྦྱོར་ལམ་དྲོད་རྩེ་མོ་བཟོད་པ་ཆོས་མཆོག་བཞི། དེ་རེ་རེ་ལ་ཆུང་འབྲིང་ཆེ་གསུམ་ཡོད། ཡང་ཉན་ཐོས་རང་རྒྱལ་ཐེག་ཆེན་གྱི་སྦྱོར་ལམ་གསུམ་ཡོད། ཉན་ཐོས་ཀྱི་སྦྱོར་ལམ་གྱི་མཚན་ཉིད། ཉན་ཐོས་ཀྱི་ཚོགས་ལམ་རྫོགས་ནས་ཉན་ཐོས་ཀྱི་མཐོང་ལམ་མ་ཐོབ་བར་གྱི་དགེ་བ་གང་ཞིག་ཉན་ཐོས་གྱི་མྱ་ངན་ལས་འདས་པར་ཕྱིན་པར་བྱེད་པའི་ཐབས་སུ་གྱུར་པ། གཞན་གཉིས་དེས་ཤེས་པར་བྱའོ། །ཐེག་ཆེན་སྦྱོར་ལམ་དྲོད་སོགས་ཀྱི་ཁྱད་པར་སོགས་ནི། ཐེག་ཆེན་སྦྱོར་ལམ་དྲོ་བར་གྱུར་པ་དང་རྩེ་མོ་དང་བཟོད་པ་དང་ཆོས་མཆོག་སྟེ་བཞི་ལས། དང་པོ་ནི་ཚོགས་ལམ་ཐར་པ་ཆ་མཐུན་རྫོགས་པའི་རྗེས་དེ་ནས་སྦྱོར་ལམ་ངེས་པར་འབྱེད་པའི་ཆ་དང་མཐུན་པ་རྣམས་ཏེ། བསམ་གཏན་དང་མངོན་ཤེས་ལ་བརྟེན་ནས་ཐེག་པ་བླ་ན་མེད་པའི་སྣོད་དེ་འདྲར་གྱུར་པའི་བྱང་ཆུབ་སེམས་དཔའ་དམིགས་པ་ལ་སེམས་མཉམ་པར་བཞག་པས་ཆོས་ཐམས་ཅད་ཡིད་ཀྱིས་བརྗོད་པ་ཙམ་མ་གཏོགས་པ་ཕྱི་རོལ་གྱི་དོན་ཀུན་རབ་ཏུ་མི་མཐོང་ངོ༌། །ཡིད་ཀྱིས་བརྗོད་པ་ཁོ་ན་རང་དང་སྤྱིའི་མཚན་ཉིད་དུ་སྣང་བ་དེ་ནི་བདེན་པ་རྣམས་ལ་གཟུང་བ་རང་བཞིན་མེད་པར་རྟོགས་པའི་ཆོས་ཀྱི་སྣང་བ་ཐོབ་པའི་ཞི་གནས་ལྷག་མཐོང་མཚུངས་ལྡན་དང་བཅས་པ་སྟེ། གཙུབ་ཤིང་ལས་མེ་འབྱུང་བ་ལྟར་ཟག་མེད་ཡེ་ཤེས་མེ་ལྟ་བུ་སྐྱེ་བའི་སྔ་ལྟས་ཡིན་པས་དྲོ་བར་གྱུར་པ་ཞེས་བྱའོ། །གཉིས་པ་རྩེ་མོ་ནི་གཟུང་བ་མེད་པར་རྟོགས་པའི་ཆོས་ཀྱི་སྣང་བ་དེ་ཉིད་སྔ་མ་ལས་གོང་དུ་འཕེལ་བར་བྱ་བའི་ཕྱིར། ཅུང་ཟད་ཙམ་གྱིས་ཆོག་པར་འཛིན་པ་ལ་མི་གནས་པའི་བརྩོན་འགྲུས་བར་ཆད་ཀྱི་མི་གཡོ་བའི་བརྟན་པོ་རྟག་ཏུ་རྩོམ་པ་དེ་ནི་བདེན་པ་རྣམས་ལ་སྣང་བ་མཆེད་པའི་ཞི་གནས་ལྷག་མཐོང་མཚུངས་ལྡན་དང་བཅས་པ་སྟེ། དགེ་བའི་རྩ་བ་གཡོ་བ་རྣམས་ཀྱི་རབ་མཐའ་ཡིན་པས་རྩེ་མོར་གྱུར་པ་ཞེས་བྱའོ། ། གསུམ་པ་བཟོད་པ་ནི་སླར་ཡང་གཟུང་བ་རང་བཞིན་མེད་པར་རྟོགས་པའི་ཆོས་ཀྱི་སྣང་བ་དེ་ཉིད་སྔ་མ་ལས་ཀྱང་ཆེས་ཆེར་འཕེལ་ཞིང་མཆེད་པར་གྱུར་ནས་ནི། འདི་ཐམས་ཅད་སེམས་ཁོ་ནར་ཟད་དོ་ཞེས་རྟོགས་པའི་ཕྱིར་སེམས་ཙམ་ལ་ནི་གནས་པར་འགྱུར་ཞིང༌།དེ་ནས་དོན་དུ་སྣང་བ་འདི་མ་ལུས་པ་ཀུན་སེམས་ཀྱི་བདག་ཉིད་དུ་རབ་ཏུ་མཐོང་བར་འགྱུར་གྱི། སེམས་ལས་གཞན་པ་ནི་མ་ཡིན་ནོ་ཞེས་བྱ་བར་རིག་ཅིང༌། སྣང་བ་ཐམས་ཅད་སེམས་ཙམ་དུ་རྟོགས་པ་དེའི་ཚེ་བྱང་ཆུབ་སེམས་དཔའ་དེ་ཡི་གཟུང་བ་བདེན་པར་འཛིན་པའི་རྣམ་པར་གཡེང་བ་འདི་སྤོང་བར་འགྱུར་བ་དེ་ཁོ་ན་ཉིད་ཀྱི་ཕྱོགས་གཅིག་ལ་ཞུགས་པ་དང༌། དེ་ནས་བྱང་ཆུབ་སེམས་དཔའ་དེ་ལ་འཛིན་པ་སེམས་ཙམ་དུ་བདེན་པའི་རྣམ་པར་གཡེང་བ་འབའ་ཞིག་ལུས་ཀྱང་འཛིན་མེད་དུ་རྟོགས་པའི་རྗེས་སུ་སོང་བའི་ཞི་གནས་ལྷག་མཐོང་མཚུངས་ལྡན་དང་བཅས་པ་སྟེ་མི་གཡོ་བའི་སྒོ་ནས་བདེན་པ་མཐོང་བའི་ལམ་དང་རྗེས་སུ་མཐུན་པའི་བཟོད་པ་ཞེས་བྱའོ། །བཞི་པ་ཆོས་མཆོག་ནི་བཟོད་པའི་རྟོགས་པ་མཐར་ཕྱིན་པ་དེའི་ཚེ། མཐོང་ལམ་སྐྱེ་བ་གཞན་གྱིས་བར་ཆད་མེད་པའི་ཏིང་ངེ་འཛིན་ཞི་གནས་དང་ལྷག་མཐོང་མཚུངས་ལྡན་དང་བཅས་པ་ལ་མྱུར་དུ་རེག་པ་སྟེ། འཕགས་པའི་ལམ་རྩལ་གྱིས་འདྲེན་ནུས་པས་འཇིག་རྟེན་པའི་ཆོས་ཀྱི་མཆོག་ཅེས་བྱའོ། ། མིང་གི་རྣམ་གྲངས་།མིང་གི་རྣམ་གྲངས་ནི། སྦྱོར་ལམ་དང་དོན་མངོན་རྟོགས་དང་ངེས་འབྱེད་ཆ་མཐུན་ལ་སོགས་པའོ། །ལྔ་བ་བྱེད་ལས་ནི། མཐོང་ལམ་འདྲེན་པར་བྱེད་པ་དང༌། ཐར་པ་ཐོབ་པར་བྱེད་པ་ལ་སོགས་པའོ། ། དྲུག་པ་ངེས་ཚིག་ནི། བདེན་པ་མངོན་པར་རྟོགས་པ་ལ་སྦྱོར་ཞིང་ཐར་པར་འགྲོ་བའི་གཞི་ཡིན་པས་ན་སྦྱོར་ལམ་ཞེས་བྱའོ། ། བདུན་པ་ངོ་བོ་ནི་སྦྱོར་ལམ་ཁོ་ན་ཡིན་པ་ཚོགས་ལམ་རྫོགས་ནས་མཐོང་ལམ་སྐྱེ་བ་དང་རྗེས་སུ་མཐུན་པ་དྲོ་བ་ལ་སོགས་པ་བཞི་ཡིན་ཞིང་དེ་དག་རིམ་གྱིས་འཆད་པ་ནི། དྲོ་བར་གྱུར་པ་གང་ཞེ་ན་སོ་སོ་རང་གིས་བདེན་པ་རྣམས་ལ་སྣང་བ་ཐོབ་པའི་ཏིང་ངེ་འཛིན་དང་ཤེས་རབ་མཚུངས་པར་ལྡན་པ་དང་བཅས་པའོ། །ཞེས་གསུངས་པ་ལྟར་གཞན་གྱི་སྒྲ་དང་རྟགས་ལ་མ་བརྟེན་པར་སྒོམ་པ་པོ་རང་གི་རིག་པའི་ཡེ་ཤེས་ཀྱིས་བདེན་བཞིའི་དབང་དུ་བྱས་པའི་ཆོས་རྣམས་ལ་དམིགས་ནས་མཉམ་པར་བཞག་པ་ན། ནང་འཛིན་པ་ཙམ་རྟོགས་པར་གཟུང་བ་ཕྱི་རོལ་གྱི་དོན་མེད་པར་རྟོགས་པའི་སྣང་བ་ཐོབ་པའི་ངོ་བོ་ཏིང་ངེ་འཛིན་ཞི་གནས་དང་ཤེས་རབ་ལྷག་མཐོང་གྲོགས་དེ་དག་དང་མཚུངས་ལྡན་གྱི་སེམས་སེམས་བྱུང་དང་བཅས་པ་རྣམས་སོ། །དེ་བཞིན་དུ་རྩེ་མོ་གང་ཞེ་ན་སོ་སོ་རང་གིས་བདེན་པ་རྣམས་ལ་སྣང་བ་ཕྱེད་པའི་ཏིང་ངེ་འཛིན་དང་ཤེས་རབ་མཚུངས་པར་ལྡན་པ་དང་བཅས་པའོ། །ཞེས་གསུངས་པ་ལྟར་སྔར་བཞིན་སོ་སོ་རང་རིག་ཡེ་ཤེས་ཀྱིས་བདེན་པ་རྣམས་ལ་གཟུང་བ་མེད་པར་རྟོགས་པའི་སྣང་བ་དེ་ཉིད་སྔ་མ་ལས་གོང་དུ་ཕྱེད་ཅིང་འཕེལ་བར་འགྱུར་པའི་ཞི་གནས་ལྷག་མཐོང་མཚུངས་ལྡན་དང་བཅས་པའོ། །བདེན་པའི་རྗེས་སུ་མཐུན་པའི་བཟོད་པ་གང་ཞེ་ན་སོ་སོ་རང་གིས་བདེན་པ་རྣམས་ལ་ཕྱོགས་གཅིག་ལ་ཞུགས་པ་དང་རྗེས་སུ་སོང་བའི་ཏིང་ངེ་འཛིན་དང་ཤེས་རབ་མཚུངས་པར་ལྡན་པ་དང་བཅས་པའོ། །ཞེས་གསུངས་པ་ལྟར་སོ་སོ་རང་རིག་ཡེ་ཤེས་ཀྱིས་བདེན་པ་རྣམས་ལ་དོན་དུ་སྣང་བ་ཐམས་ཅད་སེམས་ཁོ་ནར་སྣང་བས་ཕྱོགས་གཅིག་གཟུང་བ་རང་བཞིན་མེད་པ་ལ་ཞུགས་པ་དང༌། འཛིན་པ་མེད་པར་རྟོགས་པའི་རྗེས་སུ་མཐུན་པར་ཞུགས་པའི་ཞི་གནས་ལྷག་མཐོང་མཚུངས་ལྡན་དང་བཅས་པ་སྟེ། དེ་གསུམ་ནི་གཟུང་བ་རང་བཞིན་མེད་པར་རྟོགས་པའི་ཡེ་ཤེས་ཀྱི་གསལ་སྣང་ཆུང་ངུ་དང་འབྲིང་དང་ཆེན་པོར་གྱུར་པའོ། །འཛིན་པའི་ཆོས་ཀྱི་མཆོག་གང་ཞེ་ན་སོ་སོ་རང་གིས་བདེན་པ་རྣམས་ལ་དེ་མ་ཐག་པའི་སེམས་ཀྱི་ཏིང་ངེ་འཛིན་དང་ཤེས་རབ་མཚུངས་པར་ལྡན་པ་དང་བཅས་པའོ། །ཞེས་གསུངས་པ་ལྟར་སོ་སོ་རང་རིག་ཡེ་ཤེས་ཀྱིས་བདེན་པ་རྣམས་ལ་དེ་མ་ཐག་པའི་རྗེས་སུ་མཐོང་ལམ་སྐྱེས་ནས་འཛིན་པའང་མེད་པས་རྟོགས་པར་འགྱུར་བའི་ཞི་གནས་ལྷག་མཐོང་མཚུངས་ལྡན་དང་བཅས་པ་སྟེ། དེ་དག་གི་དང་པོ་གཉིས་སུ་དབང་པོ་ལྔ་དང༌། ཕྱི་མ་གཉིས་སུ་སྟོབས་ལྔ་གཙོ་བོར་སྒོམ་ཞིང་ཐོབ་པའོ། ། གསུམ་པ་མཐོང་ལམ་བཤད་པ།གསུམ་པ་མཐོང་ལམ་བཤད་པ་ལ། མཚན་ཉིད་སྤངས་རྟོགས་ཡོན་ཏན་དབྱེ་བ་བྱེད་ལས་ངེས་ཚིག་ངོ་བོ་བཤད་པ་དང་བདུན། དང་པོ་མཚན་ཉིད་ནི། ཆོས་མཆོག་རྫོགས་ནས་སྒོམ་ལམ་མ་སྐྱེས་པར་གྱི་དགེ་བ་གང་ཞིག་མྱ་ངན་ལས་འདས་པར་ཕྱིན་པར་བྱེད་པའི་ཐབས་སུ་གྱུར་པ།ཡང་ན་ཆོས་མཆོག་གི་མཇུག་ཐོགས་སུ་འཇིག་རྟེན་ལས་འདས་པའི་ཡེ་ཤེས་ཀྱིས་འཕགས་པའི་བདེན་པ་མངོན་སུམ་གྱིས་གསར་དུ་མཐོང་བའི་སྐབས་ཀྱི་རྣམ་པར་གྲོལ་བའི་འཇུག་ངོགས་སུ་གྱུར་བའོ། །ས་མཚམས་ནི་ཐེག་པ་རང་ལམ་གྱི་སྦྱོར་ལམ་རྫོགས་ནས་སྒོམ་ལམ་མ་སྐྱེས་ཀྱི་བར་དུ་ཡོད་དོ། །གཉིས་པ་སྤངས་རྟོགས་ནི། ཐེག་པ་རང་རང་གི་མཐོང་སྤང་ས་བོན་རྩ་བ་ནས་སྤངས་ཏེ། ཐེག་པ་རང་ལམ་གྱི་སྒོམ་བྱའི་གཙོ་བོའི་བདག་མེད་ཀྱི་དོན་མངོན་སུམ་དུ་མཐོང་ཞིང་ཆོས་ཅན་ཇི་སྙེད་པའི་དོན་ཡང་ཅི་རིགས་པར་གསར་དུ་མངོན་སུམ་དུ་རྟོགས་པའོ། །གསུམ་པ་ཡོན་ཏན་ནི། སྔར་གྱི་སྤངས་རྟོགས་དེ་དག་དང༌། ཐེག་ཆེན་ལ་ཡོན་ཏན་བརྒྱ་ཕྲག་བཅུ་གཉིས་རྗེས་ཐོབ་ཏུ་འབྱུང་བའི་ནུས་པ་ལ་སོགས་པ་ཐོབ་པའོ། ། བཞི་བ་དབྱེ་བ་ནི། གང་ཟག་གིས་ཕྱེ་ན་ཞུགས་གནས་གཉིས་དང༌། ཐེག་པས་ཕྱེ་ན་མཐོང་ལམ་གསུམ་དང༌། ངོ་བོས་ཕྱེ་ན་ཤེས་བཟོད་སྐད་ཅིག་བཅུ་དྲུག་ཡོད། བྱེ་བྲག་སྨྲ་བས། མཛོད་ལས། བཟོད་དང་ཤེས་པ་གོ་རིམ་བཞིན། །བར་ཆད་མེད་དང་རྣམ་གྲོལ་ལམ། །དེ་ལས་སྐད་ཅིག་བཅོ་ལྔ་ནི། །མ་མཐོང་མཐོང་ཕྱིར་མཐོང་བའི་ལམ། །ཞེས་པ་ལྟར་བཟོད་པ་བརྒྱད་བར་ཆད་མེད་ལམ་དང༌། ཤེས་པ་བརྒྱད་རྣམ་གྲོལ་ལམ་དང༌། སྐད་ཅིག་དང་བོ་བཅོ་ལྔ་ནི་མཐོང་ལམ་དང༌། བཅུ་དྲུག་པ་ལམ་རྗེས་ཤེས་ནི་སྒོམ་ལམ་འདོད་ལ། །ཡང་དེ་ལ་དབྱེ་ན་མཐོང་ལམ་རབ་ཆད་མེད་ལམ་དང་རྣམ་གྲོལ་ལམ་གཉིས་དང་དེ་མ་ཡིན་པའི་མཐོང་ལམ་དང་གསུམ་ཡོད། མཐོང་ལམ་བར་ཆད་མེད་ལམ་གྱི་མཚན་ཉིད། རང་གི་ངོས་སྐལ་གྱི་མཐོང་སྤང་གི་དངོས་གཉེན་དུ་གྱུར་བའི་བདག་མེད་ལ་རྩེ་གཅིག་ཏུ་མཉམ་པར་བཞག་པའི་ཡེ་ཤེས་དེ་ཡིན་ནོ། །དེ་ལ་དབྱེ་ན། ཆོས་བཟོད་བཞི་ཡོད། མཐོང་ལམ་རྣམ་གྲོལ་ལམ་གྱི་མཚན་ཉིད། རང་དངོས་སུ་འདྲེན་བྱེད་ཀྱི་བར་ཆད་མེད་ཀྱི་ངོས་སྐལ་ཀྱི་མཐོང་སྤང་ལས་རྣམ་པར་གྲོལ་བའི་ལམ་དེའོ། །དེ་ལ་དབྱེ་ན་ཆོས་ཤེས་བཞི་ཡོད། དེ་གཉིས་གང་རུང་མ་ཡིན་པའི་མཐོང་ལམ་ནི་རྗེས་བཟོད་བཞི་དང་རྗེས་ཤེས་བཞིའོ། །མཐོང་ལམ་རྗེས་ཐོབ་ཡེ་ཤེས་ཉ་ཊཱིཀ་ཡིད་ཀྱི་མུན་སེལ་ལས་ཡོད་པར་གསུངས་ཏེ། དེ་ལས། བྱེ་བྲག་སྨྲ་བ། མཐོང་ལམ་ལ་རྗེས་ཐོབ་མེད་པར་འདོད་ཀྱང༌། ཐེག་པ་ཐུན་མོང་བའམ་ཆེན་པོ་ལྟར་ན་རྗེས་ཐོབ་ཡེ་ཤེས་ཡོད་པར་བཤད་དེ་གཞུང་དུ་སྟོན་ནོ། །ཞེས་སོ། །འོན་ཀྱང་ས་བཟང་གི་མདོ་སྡེ་རྒྱན་གྱི་རྣམ་བཤད་སོགས་ན་སྒོམ་ལམ་ལ་རྗེས་ཐོབ་ཡེ་ཤེས་གསལ་བར་བཤད་ཀྱང་མཐོང་ལམ་རྗེས་ཐོབ་ཡེ་ཤེས་མེད་པའི་ཚིག་ཉམས་དུ་མ་སྣང་བས་དཔྱད་པར་བྱའོ། །མིང་གི་རྣམ་གྲངས་ནི། མཐོང་ལམ་བདེན་པ་མངོན་རྟོགས་སོགས་དོན་གཅིག་གོ ། ལྔ་བ་བྱེད་ལས་ནི། སྒོམ་ལམ་འདྲེན་པར་བྱེད་པ་དང༌། འཕགས་པ་ཐོབ་པར་བྱེད་པ་ལ་སོགས་པའོ། །དྲུག་པ་ངེས་ཚིག་ནི། དེ་ཁོ་ན་ཉིད་སྔར་མ་མཐོང་བ་མཐོང་ཞིང་འཕགས་པའི་སར་ཕྱིན་པར་བྱེད་པས་ན་མཐོང་ལམ་ཞེས་པའོ། །བདུན་པ་ངོ་བོ་ནི། མཐོང་བའི་ལམ་གང་ཞེ་ན། མདོར་བསྡུ་ན་འཇིག་རྟེན་པའི་ཆོས་ཀྱི་མཆོག་གི་འཇུག་ཐོགས་སུ་མི་དམིགས་པའི་ཏིང་ངེ་འཛིན་མཚུངས་པར་ལྡན་པ་དང་བཅས་པའོ། །ཞེས་གསུངས་པ་ལྟར་བདག་རྐྱེན་ཆོས་མཆོག་ལ་བརྟེན་ནས་དུས་ཀྱང་དེའི་རྗེས་སུ་བར་ཆད་མེད་པར་ངོ་བོ་འཇིག་རྟེན་ལས་འདས་པའི་ཡེ་ཤེས་ཀྱིས་གཟུང་འཛིན་གཉིས་ཀ་མི་དམིགས་པར་རྟོགས་པའི་ཞི་གནས་ལྷག་མཐོང་མཚུངས་ལྡན་དང་བཅས་པའོ། །དེ་ལ་རིག་པ་དྲུག་བཅུ་པའི་འགྲེལ་བར། སྐད་ཅིག་མ་གཅིག་ཁོ་ན་ལ་དེ་ཁོ་ན་ལ་དེ་ཁོ་ན་ཉིད་མཐོང་སྟེ། ངོ་བོ་གཅིག་པའི་ཡེ་ཤེས་ཁོ་ན་ལ་ཆར་ཕྱེ་ནས་སྐད་ཅིག་བཅུ་དྲུག་ཏུ་བཞག་པ་ནི་དེ་ལྟ་བུ་བསྟན་པས་གདུལ་བྱ་ལ་ཕན་གདགས་པའི་ཆེད་དུའོ། །ཞེས་པ་དང༌། བརྒྱད་སྟོང་འགྲེལ་པར། འབྲས་བུ་མངོན་པར་རྟོགས་པ་ལ་ལྟོས་ནས་སྐད་ཅིག་མ་གཅིག་དང༌། བདེན་པ་སོ་སོ་ལ་ལོག་རྟོག་བསལ་བའི་སྒོ་ནས་སྐད་ཅིག་མ་བཅུ་དྲུག་གོ །ཞེས་པ་དང༌། ཐུབ་པ་དགོངས་རྒྱན་དུ། སྡུག་བསྔལ་ཆོས་བཟོད་མཐོང་ལམ་མཚན་ཉིད་པ་དང༌། གཞན་རྣམས་ནི་བཏགས་པའོ་ཞེས་པ་ལ་སོགས་པའང་གསུང་མོད་ཀྱི། འདིར་ཡང་མཐོང་བའི་ལམ་ལ་རབ་ཏུ་དབྱེ་ན་སྡུག་བསྔལ་ལ་ཆོས་ཤེས་པའི་བཟོད་པ་དང༌། སྡུག་བསྔལ་ལ་ཆོས་ཤེས་པ་དང༌། སྡུག་བསྔལ་ལ་རྗེས་སུ་རྟོགས་པའི་བཟོད་པ་དང༌། སྡུག་བསྔལ་ལ་རྗེས་སུ་རྟོགས་པའི་ཤེས་པ་དང༌། དེ་བཞིན་དུ་ཀུན་འབྱུང་དང་འགོག་པ་དང་ལམ་ལ་ཡང་སྦྱར་ཏེ་གསུངས་པ་ལྟར། བདེན་པ་སོ་སོ་ལ་དམིགས་ནས་རང་རང་གི་མཐོང་སྤང་གི་སྒྲིབ་པ་སྤོང་བ་ཆོས་ཤེས་པའི་བཟོད་པ་དང༌། སྒྲིབ་པ་སྤངས་ནས་ཀྱང་རྣམ་གྲོལ་ཉམས་སུ་མྱོང་བར་བྱེད་པ་ཆོས་ཤེས་པ་དང༌། དེ་ལྟར་སྐད་ཅིག་དང་པོ་གཉིས་འཕགས་པའི་ཆོས་རྣམས་ཀྱི་རྒྱུར་རྟོགས་པ་རྗེས་སུ་ཤེས་པའི་བཟོད་པ་དང༌། སྐད་ཅིག་གསུམ་པོ་དེ་ཉིད་རང་རིག་པའི་ཚུལ་གྱིས་འཛིན་པའི་རྗེས་སུ་ཤེས་པ་སྟེ། བདེན་པ་རེ་རེ་ལ་སྐད་ཅིག་མ་བཞི་བཞིའི་དབྱེ་བས་སྐད་ཅིག་མ་བཅུ་དྲུག་སྟན་ཐོག་གཅིག་ཏུ་མཉམ་གཞག་གི་རྒྱུན་ཅིག་ལ་རིམ་པ་བཞིན་པར་མ་ཆད་བར་སྐྱེ་སྟེ། གཟུངས་དབང་གི་མདོ་ལས་ཀྱང༌། གང་བརྒྱད་པ་འབྲས་བུ་མ་ཐོབ་པར་ལྡང་བ་འདི་ནི་གནས་མེད་དོ། །ཞེས་གསུངས་པ་ལྟར་རོ། །དེ་དང་ལྷན་ཅིག་བྱང་ཆུབ་ཀྱི་ཡན་ལག་བདུན་སྒོམ་པའོ། ། མཐོང་ལམ་ཐོབ་ཚུལ་ནི་སྦྱོར་ལམ་ཆོས་མཆོག་ཡོངས་སུ་རྫོགས་པའི་རྗེས་དེ་ནས་བྱང་ཆུབ་སེམས་དཔའ་འཕགས་པ་དེས་ནི་ཡེ་ཤེས་དེ་འཇིག་རྟེན་པ་རྣམས་ལ་མེད་ཅིང་འཇིག་རྟེན་པའི་སྤྱོད་ཡུལ་མ་ཡིན་པས། འཇིག་རྟེན་ལས་འདས་པའི་ཡེ་ཤེས་བདེན་པ་བཞིའི་ཆོས་ཉིད་མངོན་སུམ་དུ་རྟོགས་པ། ཉན་རང་ལ་སོགས་པ་ལས་མཆོག་ཏུ་གྱུར་པས་ཐེག་པ་བླ་ན་མེད་པ། གཟུང་བ་དང་འཛིན་པ་རྣམ་པར་མི་རྟོག་ཅིང་མཐོང་བས་སྤང་བར་བྱ་བའི་ཉོན་མོངས་པའི་དྲི་མ་མེད་པ་ཡུལ་དང་ཡུལ་ཅན་དུ་འཛིན་པ་གཉིས་དང་བྲལ་བའི་ཞི་གནས་ལྷག་མཐོང་མཚུངས་ལྡན་དང་བཅས་པ་ཐོབ་པ་སྟེ། མདོ་ལས་ཀྱང༌། ཆོས་རྣམས་ལ་ཆོས་ཀྱི་མིག་རྡུལ་མེད་ཅིང་དྲི་མ་དང་བྲལ་བ་རྣམ་པར་དག་པ་སྐྱེས་སོ། །ཞེས་གསུངས་པ་ལྟར་རོ། །ས་དང་པོར་མཐོང་ལམ་ཐོབ་པ་འདི་ནི་བྱང་ཆུབ་སེམས་དཔའ་དེས་བསྐལ་པ་དཔག་ཏུ་མེད་པར་ཚོགས་གཉིས་བསགས་པ་ཉིད་ཀྱིས་མཐོང་སྤང་མ་ལུས་པ་ཤིན་ཏུ་རྣམ་པར་དག་པར་འགྱུར་བའོ། །རྒྱལ་བའི་སྲས་རྣམས་སེམས་ཅན་རྣམས་ལ་བདེ་བ་དང་མི་འབྲལ་བར་འདོད་པའི་དགའ་བ་ཚད་མེད་པ་དང་ཕན་པ་དང་བདེ་བར་འདོད་པའི་བྱམས་པ་ཚད་མེད་པ་གང་ཡིན་པ་དང༌། དེ་དག་སྒྲུབ་པའི་དོན་དུ་སྦྱོར་བ་གང་ཡིན་པ་དང༌། གཞན་དོན་གྱི་དཀའ་སྤྱད་དང་ལོག་སྒྲུབ་ཀྱིས་མི་སྐྱོ་བ་གང་ཡིན་པ་དེ་དག་ནི་སྲིད་པ་དག་ན་ཤིན་ཏུ་ངོ་མཚར་ཆེ་བ་ཡང་ཡིན་ནོ། །ལམ་ལེགས་པར་ཤེས་པ་ལ་ལམ་གྱི་སྤང་བྱ་མི་མཐུན་ཕྱོགས་ཤེས་དགོས་པས་འདིར་སྤང་བྱའི་གྲངས་ཙམ་བརྗོད་ན་ས་བཟང་གི་མདོ་སྡེའི་རྒྱན་གྱི་རྣམ་བཤད་ཐེག་ཆེན་རབ་གསལ་སྣང་བ་ལས། སྤྱིར་ཐར་པ་དང་ཐམས་ཅད་མཁྱེན་པའི་གེགས་སམ་བར་དུ་གཅོད་པ་ནི་སྒྲིབ་པ་ཡིན་ཞིང༌། ངོ་བོས་ཕྱེ་ན་དབུས་མཐའ་ལས། ཉོན་མོངས་པ་ཡི་སྒྲིབ་པ་དང༌། །ཤེས་བྱའི་སྒྲིབ་པ་དག་ཏུ་བསྟན། །དེར་ནི་སྒྲིབ་པ་ཐམས་ཅད་དེ། །དེ་ཟད་ནས་ནི་གྲོལ་བར་འགྱུར། །ཞེས་གསུངས་པ་ལྟར་འདོད་ཆགས་ལ་སོགས་པ་སེམས་ཀྱི་རྒྱུད་རབ་ཏུ་མ་ཞི་བར་བྱེད་ཅིང༌། ཐར་པ་ཐོབ་པའི་གེགས་སུ་གྱུར་པ་ཉོན་མོངས་པའི་སྒྲིབ་པ་དང༌། ཞེས་པ་ནས། ཉོན་མོངས་པ་ཅན་མ་ཡིན་པའི་མི་ཤེས་པ་ཤེས་བྱ་ཤེས་པའི་གེགས་སུ་གྱུར་པ་ནི་ཤེས་བྱའི་སྒྲིབ་པ་སྟེ། ཏིང་ངེ་འཛིན་ལ་སྙོམས་པར་འཇུག་མི་ཤེས་པ་སྙོམས་འཇུག་གི་སྒྲིབ་པ་ནི་ཤེས་བྱའི་སྒྲིབ་པའི་ཁྱད་པར་རོ། །ཉོན་མོངས་པ་ལ་གཉེན་པོ་རིམ་གྱིས་ཕྱེ་ན་ཀུན་བརྟགས་ཀྱི་ཆ་རྣམས་མཐོང་བས་སྤང་བར་བྱ་བ་དང༌། ལྷན་སྐྱེས་ཀྱི་ཆ་རྣམས་སྒོམ་པས་སྤང་བར་བྱ་བ་གཉིས་ཀྱི་དང་པོ་ནི། འདོད་པའི་ཁམས་ན་བདེན་པ་བཞི་ལ་ཉོན་མོངས་པ་བཅུའི་འཇིག་ཚོགས་ལ་ལྟ་བ་དང་མཐར་འཛིན་པའི་ལྟ་བ་དང༌། ལོག་པར་ལྟ་བ་དང་ཐེ་ཚོམ་སྟེ་བཞིས་དངོས་སུ་ལོག་པར་རྟོགས་པ་དང༌། མཆོག་འཛིན་གཉིས་དང༌། འདོད་ཆགས་དང་ང་རྒྱལ་དང་ཁོང་ཁྲོ་སྟེ་ལྔས་ལོག་ཞུགས་ལ་སོགས་པར་རྟོགས་པ་དང༌། མ་རིག་པས་གཉིས་ཀ་ལ་ལོག་པར་རྟོགས་པ་སྟེ་བཞི་བཅུ་དང༌། ཁམས་གོང་མ་གཉིས་ན་ཁོང་ཁྲོ་མེད་པས་བདེན་པ་བཞི་ལ་ཉོན་མོངས་དགུས་ལོག་པར་ཞུགས་པ་སོ་དྲུག་པ་གཉིས་ཏེ། ཀུན་ལས་བཏུས་པར། དེ་དག་མདོར་བསྡུ་ན་ཉོན་མོངས་པ་བརྒྱ་རྩ་བཅུ་གཉིས་ནི་མཐོང་བས་ནི་སྤང་བར་བྱ་བའི་རིས་སོ་ཞེས་གསུངས་པ་རྣམས་སོ། །སྒོམ་སྤང་ནི་འཁོར་བ་ཐོག་མ་མེད་པ་ནས་བརྒྱུད་དེ་འོངས་པའི་ལྷན་སྐྱེས་ཐ་ན་བྱ་དང་རི་དྭགས་ལ་སོགས་པ་ལའང་ཡོད་པ་སྟེ། འདོད་པའི་ཁམས་ན་ཉོན་མོངས་པ་དྲུག་གིས་ཡུལ་ལ་ལོག་པར་ཞུགས་པ་དང༌། ཁམས་གོང་མ་གཉིས་ཁོང་ཁྲོ་མ་གཏོགས་པ་ལྔ་ལྔས་ལོག་པར་ཞུགས་པས་བཅུ་དྲུག་སྟེ། དེ་དག་མདོར་བསྡུ་ན་བཅུ་དྲུག་ནི་སྒོམ་པས་སྤང་བར་བྱ་བའི་རིས་སོ། །ཞེས་དང༌། ཉ་ཊཱིཀ་ཡིད་ཀྱི་མུན་སེལ་ལས། ཁོང་ཁྲོ་མ་གཏོགས་པ་ལྔ་པོ་དེ་ལ་ཁམས་གསུམ་ས་དགུར་རེ་རེ་ལའང་ཆུང་འབྲིང་ཆེ་དགུ་དགུ་ཡོད་ཅིང་འདོད་པའི་ཁོང་ཁྲོ་དགུ་དང་བཅས་པས་བཞི་བརྒྱ་བཅུ་བཞིར་ཡོད་དོ། །ཞེས་གསུངས་པ་ལྟར་རོ། །ཤེས་སྒྲིབ་ལ་གཟུང་འཛིན་གྱི་རྟོག་པ་བཞིའམ་སོ་དྲུག་ལ་མཐོང་སྤང་དང་སྒོམ་སྤང་གཉིས་རེ་ཡོད་ལ། །ཕྱི་མ་ལ་སྐོར་དགུ་སོགས་ཡོད་དོ། །སྤང་བྱ་ཀུན་བརྟགས་མཐོང་སྤང་དང་སྤང་བྱ་ལྷན་སྐྱེས་སྒོམ་སྤང་ཡིན་ཏེ། ས་བཟང་གི་མདོ་སྡེ་རྒྱན་གྱི་རྣམ་བཤད་ལས། མཐོང་བའི་ལམ་གྱི་ཞོར་ལ་ཤེས་སྒྲིབ་ཀུན་བརྟགས་རྣམས་ཀྱང་སྤོང་མོད་ཀྱི། སྤང་བྱའི་གཙོ་བོ་ཉེས་སྤྱོད་ཆེན་པོའི་རྐྱེན་དུ་གྱུར་པ་ཀུན་བརྟགས་ཉོན་མོངས་པའི་སྒྲིབ་པ་རྣམས་ཐམས་ཅད་སྤངས་ཏེ་ཡང་དག་པར་ཟད་པར་བྱས་ནས་སྒོམ་པའི་ལམ་གྱིས་ཉོན་སྒྲིབ་ལྷན་སྐྱེས་རྣམས་ཀྱང་སྤོང་མོད་ཀྱི། གཙོ་ཆེར་ཤེས་བྱའི་སྒྲིབ་པ་ལྷན་སྐྱེས་རྣམས་སྤང་བའི་ཕྱིར་ཆོས་ཉིད་མངོན་སུམ་དུ་མཐོང་ཟིན་ཏེ་སྒོམ་པ་ལ་ནི་རབ་ཏུ་སྦྱོར་རོ། ། མདོར་ན་ས་དང་པོའི་སྟོད་ཀྱི་ཆ་ལ་མཐོང་སྤང་སྤངས་ཏེ་མཐོང་ལམ་ཡོངས་སུ་རྫོགས་པར་ཐོབ་ནས། སྨད་ཀྱི་ཆ་ནས་ས་བཅུ་པའི་བར་ལ་སྒོམ་ལམ་གྱིས་ཤེས་བྱའི་སྒྲིབ་པ་གཙོ་བོར་སྤོང་ཞིང་གཞན་དོན་དུ་སྐྱེ་བ་ལེན་པའི་ནུས་ལྡན་གྱི་ཉོན་མོངས་པ་ཕྲ་མོ་ཆེད་དུ་གཉེར་ནས་མི་སྤོང་བའི་རང་བཞིན་ཅན་ཡིན་ཡང་དེས་ཉོན་མོངས་པའི་ཉེས་པ་མི་སྐྱེད་ལ། དེ་ཡང་བྱང་ཆུབ་ཐོབ་པ་ན་ཤེས་སྒྲིབ་ལྷག་མ་དང་ཅིག་ཅར་སྤོང་སྟེ། ཞེས་གསུངས་སོ། ། བཞི་བ་སྒོམ་ལམ་བཤད་པ།བཞི་བ་སྒོམ་ལམ་བཤད་པ་ལ། མཚན་ཉིད་སྤངས་རྟོགས་ཡོན་ཏན་དབྱེ་བ་བྱེད་ལས་ངེས་ཚིག་ངོ་བོ་བཤད་པ་དང་བདུན། དང་པོ་སྒོམ་ལམ་གྱི་མཚན་ཉིད་ནི། རང་ལམ་གྱི་མཐོང་ལམ་རྫོགས་ནས་ཐེག་པ་རང་གི་མི་སློབ་ལམ་མ་ཐོབ་བར་གྱི་དགེ་བ་གང་ཞིག་མྱ་ངན་ལས་འདས་པར་ཕྱིན་པར་བྱེད་པའི་ཐབས་སུ་གྱུར་པ། ཡང་ན་བདེན་པ་མངོན་སུམ་དུ་རྟོགས་ཟིན་གོམས་པར་བྱེད་པའི་སྐབས་ཀྱི་རྣམ་པར་གྲོལ་བའི་འཇུག་ངོགས་སུ་གྱུར་བའོ། །ས་མཚམས་རང་ལམ་གྱི་མཐོང་ལམ་རྫོགས་ནས་རང་ལམ་གྱི་མི་སློབ་ལམ་མ་སྐྱེས་ཀྱི་བར་དུ་ཡོད་དོ། །གཉིས་པ་སྤངས་རྟོགས་ནི། ཉན་རང་གཉིས་ཀས་རང་ལམ་གྱི་སྒོམ་སྤང་རྣམས་རིམ་གྱིས་སྤངས་ཤིང་དེ་དག་སྤངས་པའི་གྲོལ་ལམ་ཐོབ་པ་དང༌། ཐེག་ཆེན་གྱིས་སྒོམ་སྤང་རྣམས་རིམ་གྱིས་སྤངས་ཤིང༌། ཆོས་དབྱིངས་བསྟོད་པར། །ཇི་ལྟར་ཚེས་པའི་ཟླ་བ་ནི། །{ད་ཅིག་སྐད་ཅིག་རྒྱས་པར་མཐོང༌། །དེ་བཞིན་ས་ལ་ཞུགས་རྣམས་ཀྱིས། །རིམ་གྱིས་རིམ་གྱིས་འཕེལ་བར་མཐོང༌། །ཞེས་གསུངས་པ་ལྟར་ཆོས་ཉིད་མངོན་སུམ་དུ་རྟོགས་པའང་གོང་ནས་གོང་དུ་འཕེལ་བར་འགྱུར་བའོ། །གསུམ་པ་ཡོན་ཏན་ནི། ས་གཉིས་པ་ནས་སྟོང་ཕྲག་བཅུ་གཉིས་ལ་སོགས་པར་རིམ་གྱིས་འཕེལ་བར་འགྱུར་བ་རྣམས་སོ། །བཞི་བ་དབྱེ་བ་ནི། ངོ་བོས་ཕྱེ་ན་མཉམ་རྗེས་གཉིས་དང༌། རྣམ་པས་ཕྱེ་ན་ཆེ་འབྲིང་དགུ་དང༌། ཐེག་པས་ཕྱེ་ན་རྣམ་པ་གསུམ་ལ་སོགས་པའོ། །མིང་གི་རྣམ་གྲངས་ནི། སྒོམ་ལམ་དང་རྗེས་ལ་མངོན་རྟོགས་སོགས་དོན་གཅིག་གོ །ལྔ་བ་བྱེད་ལས་ནི་རང་གི་ཡོན་ཏན་ཐོབ་པར་བྱེད་པ་དང༌། གཞན་དག་ཡོངས་སུ་སྨིན་པར་བྱེད་པ་ལ་སོགས་པའོ། །དྲུག་པ་ངེས་ཚིག་ནི། ཆོས་ཉིད་སོགས་མཐོང་ཟིན་གོམས་པར་བྱེད་ཅིང་ཐར་པར་འགྲོ་བའི་གཞི་ཡིན་པས་ན་སྒོམ་ལམ་ཞེས་བྱའོ། །བདུན་པ་ངོ་བོ་ནི། སྒོམ་པའི་ལམ་ལ་སྡུག་བསྔལ་བ་དང་ཀུན་འབྱུང་བ་དང་འགོག་པ་དང་ལམ་ཤེས་རྣམས་ཏེ། ཆོས་ཤེས་དང་རྗེས་སུ་རྟོགས་པའི་ཤེས་པའི་ཕྱོགས་རྣམས་དང་དེ་དང་མཚུངས་པར་ལྡན་པའི་ཏིང་ངེ་འཛིན་བསམ་གཏན་དང་པོ་ནས་ཅི་ཡང་མེད་པའི་སྐྱེ་མཆེད་ཀྱི་བར་དུའོ། །ཞེས་གསུངས་པ་ལྟར་སྒོམ་ལམ་ཟག་མེད་ཀྱི་སྐབས་སུ་ཡང་དམིགས་ཡུལ་བདེན་པ་བཞིའི་ཆོས་ཉིད་ལ་དམིགས་ནས་རྣམ་པ་དེ་དག་མངོན་སུམ་དུ་ཤེས་པའི་ཡེ་ཤེས་རིམ་གྱིས་གོམས་པར་བྱེད་པ་སྟེ། དེ་ཡང་བདེན་པ་བཞིའི་ཆོས་ཉིད་སྤང་བྱས་དག་པའི་རྣམ་གྲོལ་ཉམས་སུ་མྱོང་བ་ཆོས་ཤེས་པ་བཞི་དང༌། དེ་དག་གི་གནས་ལུགས་རང་རིག་པའི་ཚུལ་གྱིས་རྟོགས་པ་རྗེས་སུ་རྟོགས་པའི་ཤེས་པ་བཞིའི་ཕྱོགས་སྒོམ་ལམ་གྱིས་བསྡུས་པ་རྣམས་དང༌། ལྷག་མཐོང་ཤེས་པ་བརྒྱད་པོ་དེ་དག་མཚུངས་ལྡན་གྱི་ཏིང་འཛིན་ཞི་གནས་བསམ་གཏན་དང་པོའི་ཉེར་བསྡོགས་མི་ལྕོགས་པ་མེད་པ་ནས་ཅི་ཡང་མེད་པའི་སྐྱེ་མཆེད་ཀྱི་བར་ཟག་མེད་དུ་སྐྱེ་བ་ལ་མཉམ་པར་འཇོག་པའོ། །དེ་དག་ཀྱང་སྤང་བྱ་རིམ་གྱིས་སྤོང་ཚུལ་གྱིས་ཕྱེ་ན་ཡུམ་གྱི་རྒྱན་དུ། ས་དགུ་ལ་ནི་ཆེན་པོ་ཡི། །ཆེན་པོ་ལ་སོགས་དྲི་མ་ཡི། །གཉེན་པོ་ཆུང་ངུའི་ཆུང་ངུ་ལ། །སོགས་པའི་ལམ་ནི་དག་པ་ཡིན། །ཞེས་གསུངས་པ་ལྟར་འདོད་པ་ནས་སྲིད་རྩེའི་བར་ཁམས་གསུམ་གྱི་ས་དགུ་པོ་རེ་རེ་ན་ཡང་སྤང་བྱ་སྒོམ་སྤང་ཆེན་པོའི་ཆེན་པོ་ལ་དགུ་དགུ་ཡོད་པ་རྣམས་གཉེན་པོ་སྒོམ་ལམ་ཆུང་ངུའི་ཆུང་ངུ་ལ་སོགས་པ་དགུ་དགུ་རིམ་གྱིས་སྐྱེ་བས་སྤོང་བ་སྟེ། དེ་ཡང་རེ་རེ་ཞིང་སྤང་བྱ་སྒོམ་སྤང་ཆེན་པོའི་ཆེན་པོ་དང་ཆེན་པོའི་འབྲིང་པོ་དང་ཆེན་པོའི་ཆུང་ངུ་རྣམས། གཉེན་པོ་སྒོམ་ལམ་ཆུང་ངུའི་ཆུང་ངུ་དང་ཆུང་ངུའི་འབྲིང་པོ་དང༌། ཆུང་ངུའི་ཆེན་པོ་རྣམས་ཀྱིས་སྤོང་ཞིང༌། དེ་བཞིན་དུ་སྒོམ་སྤང་འབྲིང་པོའི་ཆེན་པོ་དང་འབྲིང་པོའི་འབྲིང་པོ་དང་འབྲིང་པོའི་ཆུང་ངུ་རྣམས། སྒོམ་ལམ་འབྲིང་པོའི་ཆུང་ངུ་དང་འབྲིང་པོའི་འབྲིང་པོ་དང་འབྲིང་པོའི་ཆེན་པོ་རྣམས་ཀྱིས་སྤོང་ལ། སྒོམ་སྤང་ཆུང་ངུའི་ཆེན་པོ་དང་ཆུང་ངུའི་འབྲིང་པོ་དང་ཆུང་ངུའི་ཆུང་ངུ་རྣམས་སྒོམ་ལམ་ཆེན་པོའི་ཆུང་ངུ་དང་ཆེན་པོའི་འབྲིང་པོ་དང་ཆེན་པོའི་ཆེན་པོ་རྣམས་ཀྱིས་སྤང༌། འགག་པ་དང་གཉེན་པོ་སྐྱེ་བ་དུས་མཉམ་པའི་ཚུལ་གྱིས་སྤོང་བའོ། །དེ་ལ་སྤང་གཉེན་ཆེ་ཆུང་དོད་སྙོམས་སུ་སྤོང་བར་རིགས་སོ་སྙམ་ན། སྤང་བྱ་ཆེན་པོ་ནི་རྒྱུད་ལ་འབྱུང་བ་རྟོགས་སླ་ཞིང་དྲི་མ་ཆེ་ལོང་འདྲ་བར་གཉེན་པོ་ཆུང་ངུས་ཀྱང་སེལ་ལ། སྤང་བྱ་ཆུང་ངུ་ནི་དཔྱད་དཀའ་ཞིང་རྒྱུད་ལ་ཞེན་པས་དྲི་མ་ཕྲ་མོ་དང་འདྲ་བར་གཉེན་པོ་ཆེན་པོས་བསལ་དགོས་པའི་ཕྱིར་དང༌། ཐོག་མར་ལམ་ཆེན་པོ་སྐྱེ་བ་མི་སྲིད་ཅིང་དེ་སྐྱེས་པ་ན་ཉོན་མོངས་པ་ཆེན་པོའང་མི་སྲིད་པའི་ཕྱིར་སྤང་བྱ་ཆེ་རིམ་ནས་འགག་པ་དང་གཉེན་པོ་ཆུང་རིམ་ནས་སྐྱེ་བར་གསུངས་སོ། །དེའི་སྐབས་སུ་འཕགས་པའི་ལམ་ཡན་ལག་བསྒོམས་ཞིང་ཐོབ་པ་ཡིན་ནོ། །སྒོམ་ལམ་ལ་ཇི་ལྟར་སྦྱོར་ཚུལ་ནི། མཐོང་ལམ་ཐོབ་པའི་རྗེས་དེ་ནས་བྱང་ཆུབ་སེམས་དཔའ་འདི་ནི་ས་དང་པོའི་སྟོད་ཀྱི་ཆ་ལ་མཐོང་ལམ་ཐོབ་པའི་ལྷག་མའི་ས་ནས་བརྩམས་ཏེ་ས་བཅུ་པའི་བར་རྣམས་སུ་ཆོས་ཉིད་མཐོང་ཟིན་སྒོམ་པའི་ལམ་འདི་ལ་མཉམ་གཞག་དང་རྗེས་ཐོབ་ཀྱི་ཡེ་ཤེས་རྣམ་པ་གཉིས་པོ་དག་བསྒོམ་པའི་ཕྱིར་རབ་ཏུ་སྦྱོར་བར་བྱེད་དོ། །རྫོགས་པར་འགྱུར་ཚུལ་ནི་སྔར་ལས་ས་དང་པོ་ཐོབ་ཅིང༌།དེ་ནས་མ་དག་པ་ས་བདུན་གྱི་བར་ལ་གྲངས་མེད་གཅིག་དང་དག་པ་ས་གསུམ་གྱི་བར་ལ་གྲངས་མེད་གཅིག་སྟེ། ས་ཐོབ་ནས་ཀྱང་བསྐལ་པ་གྲངས་མེད་གཉིས་ནི་རྫོགས་པ་ཡིས་སྒོམ་པ་ཡི་ནི་ལམ་མཐར་ཕྱིན་པར་གྱུར་ཏེ། སྒོམ་པའི་ཐ་མ་ས་བཅུ་ཡོངས་སུ་རྫོགས་པར་ཐོབ་ནས་ནི་བྱང་ཆུབ་སེམས་དཔའ་ཆེན་པོ་དེ་ལ་ཕྱོགས་བཅུའི་སངས་རྒྱས་ཐམས་ཅད་ཀྱི་འོད་ཟེར་ཆེན་པོས་དབང་བསྐུར་བས་ཆོས་ཀྱི་རྒྱལ་པོའི་རྒྱལ་ཚབ་ཏུ་འགྱུར་བའོ། ། ལྔ་བ་ཐེག་པ་རང་ལམ་གྱི་མཐར་ཕྱིན་པའི་ལམ་བཤད་པ།ལྔ་བ་ཐེག་པ་རང་ལམ་གྱི་མཐར་ཕྱིན་པའི་ལམ་བཤད་པ་ལ། མཚན་ཉིད་སྤངས་རྟོགས་ཡོན་ཏན་དབྱེ་བ་བྱེད་ལས་ངེས་ཚིག་ངོ་བོ་བཤད་པ་དང་བདུན། དང་པོ་མཚན་ཉིད་ནི། ཐེག་པ་རང་ལམ་གྱི་མི་སློབ་པའི་རྒྱུད་ལ་མངའ་བའི་དགེ་བ་གང་ཞིག་མྱ་ངན་ལས་འདས་པར་ཕྱིན་པར་གྱུར་པ། ཡང་ན་ཐེག་པ་རང་ལམ་གྱི་བགྲོད་པ་མཐར་ཕྱིན་པའི་རྣམ་གྲོལ་ལམ་གྱི་འཇུག་ངོགས་སུ་གྱུར་བ་དེ། ཐེག་པ་རང་ལམ་གྱི་མི་སློབ་ལམ་གྱི་མཚན་ཉིད་དོ། །ལམ་གྱི་བགྲོད་པ་མཐར་ཕྱིན་པའི་རྣམ་གྲོལ་ལམ་གྱི་འཇུག་ངོགས་སུ་གྱུར་བ་དེ། མི་སློབ་ལམ་གྱི་མཚན་ཉིད། མཚན་གཞི་ནི། ཀུན་རྫོབ་གསར་བྱུང་གི་མཐར་ཐུག་གི་མཁྱེན་པ་ལྟ་བུའོ། །དབྱེ་ན། ཇི་ལྟ་བ་རྟོགས་པའི་རྣམ་མཁྱེན་དང་ཇི་སྙེད་པ་རྟོགས་པའི་རྣམ་མཁྱེན་དང་གཉིས་ཡོད། གཉིས་པ་སྤངས་རྟོགས་ནི། རང་རང་གི་ཐར་པའི་གེགས་སུ་གྱུར་པ་མ་ལུས་པ་སྤངས་པ་དང༌། རང་རང་གི་སྤང་བྱས་དག་པའི་བདག་མེད་སོགས་མངོན་སུམ་ཀྱིས་རྟོགས་པའོ། ། གསུམ་པ་ཡོན་ཏན་ནི་ཐུན་མོང་དུ་དགྲ་བཅོམ་པ་ཟག་པ་ཟད་པ་ཉོན་མོངས་པ་མེད་པ་ཞེས་པ་ལ་སོགས་པ་ཡུམ་གྱི་གླེང་གཞི་ལས་འབྱུང་བ་རྣམས་དང༌། ཁྱད་པར་དུ་སྟོབས་དང་མི་འཇིགས་པ་ལ་སོགས་པ་རྣམས་ཐོབ་པའོ། ། བཞི་བ་དབྱེ་བ་ནི། ཐེག་པ་གསུམ་གྱིས་ཕྱེ་བས་མི་སློབ་ལམ་གསུམ་ཡོད། ཉན་ཐོས་ཀྱི་མི་སློབ་ལམ་གྱི་མཚན་ཉིད་ནི། ཉན་ཐོས་ཀྱི་མི་སློབ་པའི་རྒྱུད་ལ་མངའ་བའི་དགེ་བ་གང་ཞིག་ཉན་ཐོས་ཀྱི་མྱ་ངན་ལས་འདས་པར་ཕྱིན་པར་གྱུར་པ་དེའོ། །དེས་གཞན་གཉིས་ལ་ཤེས་པར་བྱའོ། །མིང་གི་རྣམ་གྲངས་ནི། ཐེག་པ་རང་ལམ་གྱི་མི་སློབ་ལམ། ཐེག་པ་རང་ལམ་གྱི་དགྲ་བཅོམ་པའི་ལམ། ཐེག་པ་རང་ལམ་གྱི་མཐར་ཕྱིན་པའི་ལམ་རྣམས་སོ། །ལྔ་བ་བྱེད་ལས་ནི། ཐུན་མོང་དུ་རྣམ་གྲོལ་ཉམས་སུ་མྱོང་བ་དང༌། ཁྱད་པར་དུ་འཕྲིན་ལས་སྤྲོ་བ་ལ་སོགས་པའོ། །དྲུག་པ་ངེས་ཚིག་ནི། བསླབ་པ་མཐར་ཕྱིན་པར་བགྲོད་པས་ན་མཐར་ཕྱིན་པའི་ལམ་ཞེས་པའོ། །བདུན་པ་ངོ་བོ་ནི། རང་ལམ་གྱི་མཐར་ཕྱིན་པའི་ལམ་གང་ཞེ་ན། ཐེག་པ་རང་ལམ་གྱི་སྤང་བྱའི་གནས་ངན་ལེན་ཐམས་ཅད་རྒྱུན་བཅད་པ་དང༌། ཕྲད་པའི་ཐོབ་པ་རྣམས་ཀྱི་རྒྱུན་ཆད་པ་དང༌། བྲལ་བའི་ཐོབ་པ་རྣམས་ཐོབ་པའི་ཕྱིར་རྡོ་རྗེ་ལྟ་བུའི་ཏིང་ངེ་འཛིན་ལ་བརྟེན་ནས། དེ་མ་ཐག་ཏུ་གནས་མ་ལུས་པར་གྱུར་ཏེ་ཟད་པར་ཤེས་པ་དང་མི་སྐྱེ་བ་ཤེས་པའོ། །ཞེས་གསུངས་པ་ལྟར་སྤང་བྱ་བག་ཆགས་དང་བཅས་པ་སྤངས་པས་ཟག་བཅས་ཀྱི་ཐོབ་པ་རྣམས་རྒྱུན་ཆད་ཀྱི། ཆད་མེད་ཀྱི་ཐོབ་པ་རྣམས་ཐོབ་པའི་ཕྱིར་དངོས་ཀྱི་རྒྱུ་རྡོ་རྗེ་ལྟ་བུའི་ཏིང་ངེ་འཛིན་ལ་བརྟེན་ནས་དབྱིངས་རང་བཞིན་གྱིས་དག་པ་སྤང་བྱ་གློ་བུར་གྱི་དྲི་མ་མཐའ་དག་དང་བྲལ་བའི་ཚུལ་གནས་མ་ལུས་པར་ཡོངས་སུ་གྱུར་ཏེ། རྒྱུ་ཀུན་འབྱུང་མ་ལུས་པ་ཟད་པའི་འགོག་པ་ཤེས་པ་དང༌། འབྲས་བུ་སྡུག་བསྔལ་མཐའ་དག་སྤངས་ནས་མི་སྐྱེ་བ་ཤེས་པའི་ཡེ་ཤེས་མཐར་ཐུག་པ་ཐོབ་པའོ། །ཐེག་ཆེན་མི་སློབ་ལམ་གང་ལ་བརྟེན་ནས་འགྲུབ་ཚུལ་ནི། དཔེར་ན་རྫས་ཀྱི་དངོས་པོ་རྡོ་རྗེ་ཕ་ལམ་རྫས་གཞན་གྱིས་མི་ཤིགས་པ་བཞིན་དུ། རྟེན་སྒོམ་ལམ་ཆེན་པོའི་ཆེན་པོ་རྡོ་རྗེ་ལྟ་བུའི་ཏིང་ངེ་འཛིན་མཚན་མ་དང་རྣམ་པར་རྟོག་པས་མི་ཕྱེད་ཅིང་མི་ཤིགས་པ་ཐོབ་པ་ལ་བརྟེན་ནས་ནི། སྔར་མཐོང་སྤང་དང་བྲལ་ནས་འཇིག་རྟེན་ལས་འདས་པའི་ལམ་དུ་གནས་གྱུར་པར་མ་ཟད། འདིར་གནས་ངན་ལེན་མཐའ་དག་དང་བྲལ་ནས་མི་སློབ་པའི་ལམ་དུ་གནས་མ་ལུས་པ་གཞན་དུ་གྱུར་པ་མཐར་ཐུག་པ་ཉོན་མོངས་པ་དང་ཤེས་བྱའི་སྒྲིབ་པ་ཀུན་གྱི་དྲི་མ་མེད་པར་གྱུར་པ་ལས་མཐར་ཕྱིན་པའི་འབྲས་བུ་གྲུབ་པའོ། ། རྩ་བའི་ས་བཅད་གཉིས་པ་ས་བཤད་པ།རྩ་བའི་ས་བཅད་གཉིས་པ་ས་བཤད་པ་ལ། ཡོན་ཏན་དུ་མའི་རྟེན་དུ་གྱུར་བའི་མངོན་རྟོགས་དེ། ས་ལམ་གཉིས་སུ་ཕྱེ་བའི་སའི་མཚན་ཉིད། མཚན་གཞི་ནི། ཚོགས་ལམ་ལྟ་བུའོ། །དེ་ལ་དབྱེ་ན་ཐེག་པ་གསུམ་གྱི་ས་གསུམ་ཡོད། ཡང་བསམ་གཏན་ས་དྲུག་ཡོད་དེ། བསམ་གཏན་དང་ཉེར་་བསྡོགས་མི་ལྕོགས་མེད་དང༌། དང་བོའི་དངོས་གཞི་ཙམ་པོ་བ་དང་ཁྱད་པར་གྱི་དངོས་གཞི། གཉིས་པའི་དངོས་གཞི། གསུམ་པའི་དངོས་གཞི། བཞི་བའི་དངོས་གཞི་རྣམས་སོ། །ཁམས་གསུམ་ས་དགུ་ནི་འདོད་སེམས་དང་བསམ་གཏན་བཞི་དང་གཟུགས་མེད་བཞིའོ། །ཟག་མེད་ས་དགུ་ཡོད་དེ། ཟག་མེད་ཀྱི་བསམ་གཏན་ས་དྲུག་དང༌། གཟུགས་མེད་དང་བོ་གསུམ་གྱིདངོས་གཞི་ཟག་མེད་རྣམས་སོ། །ངེས་ཚིག་ནི་འཇིག་རྟེན་ན་སའི་རྒྱུ་བ་སེམས་ཅན་དང་མི་རྒྱུ་བ་རྩི་ཤིང་ནགས་ཚལ་གྱི་རྟེན་བྱེད་པ་བཞིན་དུ་ཡོན་ཏན་ཐམས་ཅད་སྐྱེ་བའི་རྟེན་བྱེད་པས་ན་ས་ཞེས་བྱའོ། །ས་ལམ་གཉིས་སུ་ཕྱེ་བའི་ས་ནི་ས་བཏགས་བ་ཡིན་ལ། ས་མཚན་ཉིད་པ་ནི་འབྱུང་བ་བཞིའི་ནང་ཚན་དུ་གྱུར་བའི་ས་ཡིན་ལ། དེའི་མཚན་ཉིད་ནི་སྲ་ཞིང་འཐས་པའི་འབྱུང་བ་དེའོ། །གཞན་ཡང་ཐེག་དམན་གྱི་ས་དང་ཐེག་ཆེན་གྱི་ས་དང་གཉིས་ཡོད། ཐེག་དམན་གྱི་ས་ལ་དམན་པ་ས་བརྒྱད་ཡོད་དེ། དཀར་བོ་རྣམ་པར་མཐོང་བའི་ས། རིགས་ཀྱི་ས། བརྒྱད་པའི་ས། མཐོང་བའི་ས། བསྲབས་པའི་ས། འདོད་ཆགས་དང་བྲལ་བའི་ས། བྱས་པ་རྟོགས་པའི་ས། རང་སངས་རྒྱས་ཀྱི་ས་དང་བརྒྱད་ཡོད་པའི་ཕྱིར་རོ། །ཐེག་ཆེན་གྱི་ས་ལ། བྱང་སེམས་སོ་སྐྱེས་ཀྱི་ས་དང་ཐེག་ཆེན་འཕགས་པའི་ས་དང་གཉིས་ཡོད། དང་པོ་ལ་རང་ཡིན་གྱི་ཚོགས་ཀྱི་ས་དང་སྦྱོར་ལམ་གྱི་ས་དང་གཉིས། ཐེག་ཆེན་གྱི་འཕགས་པའི་སའི་མཚན་ཉིད་ནི། ཐེག་ཆེན་འཕགས་པའི་སྙིང་རྗེ་ཆེན་པོ་སོགས་ཀྱིས་ཟིན་པའི་ཟག་མེད་ཡེ་ཤེས་གང་ཞིག ཐེག་ཆེན་གྱི་སྤངས་རྟོགས་ཡོན་ཏན་གྱི་རྟེན་དུ་གྱུར་པའོ། །དེ་ལ་དབྱེ་ན་བྱང་འཕགས་ཀྱི་ས་དང་སངས་རྒྱས་ཀྱི་ས་དང་གཉིས། དང་པོ་བྱང་འཕགས་ཀྱི་ས་བཤད་པ།དང་པོ་བྱང་འཕགས་ཀྱི་ས་བཤད་པ་ལ་བཅུ། དང་པོ་བྱང་འཕགས་ཀྱི་སའི་མཚན་ཉིད་ནི། ཡོན་ཏན་བརྒྱ་ཕྲག་བཅུ་གཉིས་སོགས་ཀྱིས་རྟེན་བྱེད་པའི་སློབ་འཕགས་ཀྱི་ས་དེའོ། །གཉིས་པ་སྒྲ་བཤད་ནི། འབྱུང་བོ་དཔག་མེད་འཇིགས་མེད་ཕྱིར། །དཔག་ཏུ་མེད་པ་དེ་དག་ལ། །ཕྱི་ཕྱིར་གོང་དུ་འགྲོ་ལྡན་ཕྱིར། །དེ་དག་ཉིད་ནི་སར་འདོད་དོ། །ཞེས་པ་ལྟར་བྷུ་མི་ཞེས་པ་ས་སྟེ་བྷཱུ་ཏ་འབྱུང་བོ་སྟེ་སེམས་ཅན། ཨ་མི་ཏ་དཔག་མེད། བྷཱུ་ལས་ཨ་བྷ་ཡ་ཞེས་སྦྱར་ན་འཇིགས་མེད།ཡང་ཨ་མི་ཏ་དཔག་མེད་དེ་ཡོན་ཏན་དཔག་ཏུ་མེད་པ་ཅན་ནོ། །ཡང་ན་སེམས་ཅན་དཔག་ཏུ་མེད་པ་རྣམས་ཀྱི་འཇིགས་པ་ཐམས་ཅད་སྤང་བར་བྱ་བའི་ཕྱིར་རོ། །གསུམ་པ་དབྱེ་བ་ནི། ས་དང་པོ་རབ་ཏུ་དགའ་བ། གཉིས་པ་དྲི་མ་མེད་པ། གསུམ་པ་འོད་བྱེད་པ། བཞི་བ་འོད་འཕྲོ་བ། ལྔ་བ་སྦྱང་དཀའ་བ། དྲུག་པ་མངོན་དུ་གྱུར་བ། བདུན་པ་རིང་དུ་སོང་བ། བརྒྱད་པ་མི་གཡོ་བ། དགུ་བ་ལེགས་པའི་བློ་གྲོས། བཅུ་བ་ཆོས་ཀྱི་སྤྲིན་དང་བཅུའོ། །བཞི་པ་ས་ཐོབ་པའི་རྨི་ལམ་གྱི་རྟགས་ནི། ས་དང་པོ་ལ་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་གཏེར་བྱེ་བ་ཁྲག་ཁྲིག་བརྒྱ་སྟོང་གིས་ཡོངས་སུ་གང་བར་མཐོང་ངོ༌། །ཞེས་པ་ནས། ས་བཅུ་བར་དེ་བཞིན་གཤེགས་པའི་སྐུ་མཐོང་སྟེ་ཁ་དོག་གསེར་ལྟ་བུ་འོད་འདོམས་གང་བ་ཚངས་པ་བྱེ་བ་ཁྲག་ཁྲིག་བརྒྱ་སྟོང་དུ་མས་ཡོངས་སུ་བསྐོར་ཞིང་མདུན་གྱིས་བལྟས་ནས་ཆོས་སྟོན་པ་མཐོང་ངོ༌། །ཞེས་པའི་བར་བཅུ་བོ་གསེར་འོད་དང་བློ་གྲོས་མི་ཟད་པས་ཞུས་པ་གཉིས་ཅར་ལས་གསུངས་སོ། ། ལྔ་བ་སའི་ཡོན་ཏན་བཤད་པ།ལྔ་བ་སའི་ཡོན་ཏན་བཤད་པ་ལ། ས་དང་པོའི་རྗེས་ཐོབ་ཏུ་ཡོན་ཏན་བརྒྱ་ཕྲག་བཅུ་གཉིས་ཐོབ་སྟེ། ༡ སྐད་ཅིག་གཅིག་གིས་ཏིང་ངེ་འཛིན་བརྒྱ་སོ་སོར་ཐོབ་ཅིང་སྙོམས་པར་འཇུག་གོ ། ༢ དེ་བཞིན་དུ་སངས་རྒྱས་བརྒྱ་མཐོང་བ། ༣ དེ་རྣམས་ཀྱིས་བྱིན་གྱིས་བརླབས་པ་ཤེས་པ། ༤ འཇིག་རྟེན་གྱི་ཁམས་བརྒྱ་གཡོ་བར་བྱེད་པ། ༥སྣང་བར་ཡང་བྱེད་པ།༦ ཞིང་བརྒྱར་འགྲོ་བ། ༧ སེམས་ཅན་བརྒྱ་ཡོངས་སུ་སྨིན་པར་བྱེད་པ། ༨བསྐལ་བ་བརྒྱར་གནས་པ། ༩ སྔོན་དང་ཕྱི་མའི་མཐར་འཇུག་པ། ༡༠ ཆོས་ཀྱི་སྒོ་བརྒྱ་རྣམ་པར་འབྱེད་པ། ༡༡ ལུས་བརྒྱ་སྟོན་པར་བྱེད་པ། ༡༢ལུས་དང་ལུས་ལ་ཡང་བྱང་ཆུབ་སེམས་དཔའ་འཁོར་བརྒྱ་དང་ལྡན་པར་སྟོན་པར་བྱེད་པའོ། །དེ་བཞིན་དུ་བསྒྲེས་ཏེ། ས་གཉིས་པ་སོགས་ལ་ཡོན་ཏན་སྟོང་ཕྲག་བཅུ་གཉིས་དང༌། ས་གསུམ་པར་འབུམ་ཕྲག་བཅུ་གཉིས། ས་བཞི་བར་བྱེ་བ་བརྒྱ་དང༌། ས་ལྔ་བར་བྱེ་བ་སྟོང་དང༌། ས་དྲུག་པར་བྱེ་བ་འབུམ། ས་བདུན་པར་བྱེ་བ་ཁྲག་ཁྲིག་འབུམ་དང༌། ས་བརྒྱད་པར་སྟོང་གསུམ་འབུམ་ཕྲག་བཅུའི་རྡུལ་ཕྲ་རབ་ཀྱི་རྡུལ་སྙེད་དང༌། ས་དགུ་པར་སྟོང་གསུམ་གྱི་འཇིག་རྟེན་གྱི་ཁམས་གྲངས་མེད་འབུམ་ཕྲག་བཅུའི་རྡུལ་ཤིན་ཏུ་ཕྲ་བ་སྙེད་དང༌། ས་བཅུ་བར་ཕྱོགས་བཅུའི་སངས་རྒྱས་ཀྱི་ཞིང་གྲངས་མེད་པ་ལས་འདས་པའི་རྡུལ་ཕྲ་མོ་ཇི་སྙེད་པ་དེ་སྙེད་དོ། །དྲུག་པ་སྐྱེ་བ་ལེན་ཚུལ་ནི། བློ་ལྡན་རྣམས་ཀྱི་ལས་དང་ནི། །གཞན་ཡང་སྨོན་ལམ་དག་དང་ནི། །ཏིང་ངེ་འཛིན་དང་དབང་འབྱོར་བའི། །དབང་གིས་སྐྱེ་བར་འདོད་པ་ཡིན། །ཞེས་པ་ལྟར་མོས་སྤྱོད་པ་རྣམས་ལས་ཀྱིས་འདོད་པའི་གནས་སུ་སྐྱེ་བ་དང༌། ས་ཐོབ་པ་རྣམས་སེམས་ཅན་སྨིན་པའི་ཕྱིར་དུ་དུད་འགྲོ་སོགས་གནས་དམན་པར་སྐྱེ་བ་ནི་སྨོན་ལམ་གྱི་དབང་དང༌། བསམ་གཏན་རྣམས་བཟློག་ནས་འདོད་ཁམས་སུ་སྐྱེ་བ་ཏིང་ངེ་འཛིན་གྱི་དབང་དང༌། སྤྲུལ་བས་དགའ་ལྡན་ན་གནས་པ་སོགས་དབང་འབྱོར་བའི་དབང་གིས་སྐྱེ་བ་སྟེ་དབང་གི་སྐྱེ་བ་བཞིའོ། །རྣམ་སྨིན་གྱི་སྐྱེ་བ་འཛིན་ཚུལ་ནི། ས་བཅུ་ཐོབ་པ་རྣམས་རིམ་བཞིན་དུ། ཛམྦུའི་གླིང༌། གླིང་བཞི། སུམ་ཅུ་རྩ་གསུམ། འཐབ་བྲལ། དགའ་ལྡན། འཕྲུལ་དགའ། གཞན་འཕྲུལ་དབང་བྱེད་ཀྱི་རྒྱལ་བོ་དང༌། སྟོང་གི་བདག་པོ་ཚང་པ། སྟོང་གཉིས་ཀྱི་བདག་པོ། སྟོང་གསུམ་གྱི་བདག་པོ་གནས་གཙང་མའི་ལྷའི་རྒྱལ་བོ་རྣམས་སུ་ཕལ་ཆེར་སྐྱེའོ། །བདུན་པ་བསླབ་པ་གསུམ་ལ་སློབ་ཚུལ་ནི།ཆོས་ཉིད་རབ་ཏུ་རྟོགས་ནས་འདིར། །ལྷག་པའི་ཚུལ་ཁྲིམས་ལྷག་སེམས་དང༌། །ལྷག་པའི་ཤེས་རབ་ལ་རྗེས་སློབ། །ཞེས་པ་ལྟར་ས་དང་པོར་ཆོས་ཉིད་རྟོགས་ནས། གཉིས་པར་ཚུལ་ཁྲིམས་ཀྱི། གསུམ་པར་སེམས་ཀྱི་བསླབ་པ་དང༌། བཞི་བར་བྱང་ཕྱོགས་ལ་མཁས་པ། ལྔ་བར་བདེན་གཉིས་ལ་མཁས་པ། དྲུག་པར་རྟེན་འབྲེལ་ལ་མཁས་པ་སྟེ་གསུམ་པོ་དེར་ཤེས་རབ་ཀྱི་བསླབ་པ་ལ་སློབ་པོ། །དེ་ལྟར་བསླབས་པས་ས་བདུན་པར་མཚན་མ་མེད་ཅིང་མངོན་པར་འདུ་བྱེད་པའི་ཡེ་ཤེས། བརྒྱད་པར་མཚན་མ་དང་འདུ་བྱེད་པ་གཉིས་ཀ་མེད་ཅིང་ཞིང་དག་པ། དགུ་བར་སེམས་ཅན་སྨིན་པར་བྱེད་པ། བཅུ་བར་གཟུངས་དང་ཏིང་ངེ་འཛིན་གྱི་སྒོ་རྣམས་འགྲུབ་པའི་འབྲས་བུ་སྟེ། འབྲས་བུ་དམ་པ་འདི་བཞི་ནི། །ས་བཞི་བོ་ལ་རབ་ཏུ་བརྟེན། །ཞེས་སོ། །བརྒྱད་པ་ཕར་ཕྱིན་ལ་སྤྱོད་ཚུལ་དང་ལྷག་ཚུལ་ནི། ས་དང་པོར་སྦྱིན་པའི་ཕར་ཕྱིན་སྤྱོད་པ་ནས་དྲུག་པར་ཤེས་རབ་ཀྱི་ཕར་ཕྱིན་ལ་སྤྱོད་པ་དང༌། བདུན་པར་ཐབས་ཀྱི་ཕར་ཕྱིན་དང༌། བརྒྱད་པར་སྨོན་ལམ་གྱི་ཕར་ཕྱིན་དང༌། དགུ་བར་སྟོབས་ཀྱི་ཕར་ཕྱིན་དང༌། བཅུ་བར་ཡེ་ཤེས་ཀྱི་ཕར་ཕྱིན་གཙོ་བོར་སྤྱོད་ཅིང་གཞན་ཕལ་བའི་ཚུལ་གྱིས་སྤྱོད་དེ། དབུས་མཐར། ཁྱད་པར་ཅན་དང་ཁྱད་མེད་ནི། །ས་བཅུ་དག་ཏུ་ཤེས་པར་བྱ། །ཞེས་སོ། ། དགུ་བ་སྤངས་རྟོགས་ཀྱི་ཁྱད་པ།དགུ་བ་སྤངས་རྟོགས་ཀྱི་ཁྱད་པར་ནི། ས་བཅུ་བོའི་རྟོགས་པ་ལ་ཁྱད་ཅི་ཡོད་ཅེ་ན། མཉམ་གཞག་ཏུ་ཆོས་ཉིད་ཙམ་རྟོགས་པ་ཁྱད་པར་མེད། ཆོས་ཉིད་བཅུ་ལ་སྒྲིབ་པ་བཅུ་སྤངས་པའི་རིམ་གྱིས་ངེས་པ་འདྲེན་ཚུལ་ལ་ཁྱད་ཡོད་པར་བསྟན་ཏོ། །ཡོངས་སྦྱོང་གི་དོན་ནི་ས་དེ་དང་དེ་ལ་གསུངས་པའི་ཆོས་དེ་དང་དེ་དག་ཡོངས་སུ་སྦྱང་ཞིང་དག་པར་བྱ་བ་ཉིད་ས་དེ་དང་དེ་ཡོངས་སུ་སྦྱོང་ཞིང་དག་པ་ཡིན་ནོ། །དེ་ལ་སྦྱང་གཞི་ནི། ཀུན་ཏུ་འགྲོ་བའི་དོན་ལ་སོགས་པ་ཆོས་ཀྱི་དབྱིངས་རྣམ་པ་བཅུའོ། །སྦྱང་བྱ་དྲི་མ་ནི་ཉོན་མོངས་ཅན་མ་ཡིན་པའི་མི་ཤེས་པ་བཅུའོ། །སྦྱོང་བྱེད་ཐབས་ནི། འཁོར་གསུམ་དུ་རྟོག་པའི་རང་བཞིན་མི་དམིགས་པར་རྟོགས་པའོ། །སྦྱོང་མཁན་ནི། ས་དེ་དང་དེ་ལ་གནས་པའི་བྱང་སེམས་སོ། །སྦྱོང་ཚུལ་ནི། ས་དང་པོར་ཡོངས་སྦྱོང་བཅུ། གཉིས་པར་ཡོངས་སྦྱོང་བརྒྱད། གསུམ་པར་ལྔ། བཞི་བར་བཅུ། ལྔ་པར་བཅུ། དྲུག་པར་བཅུ་གཉིས། བདུན་པར་སྤངས་གཉེན་གྱི་སྒོ་ནས་ཉི་ཤུ་པ་གཉིས། བརྒྱད་པར་བརྒྱད། དགུ་བར་བཅུ་གཉིས། ས་བཅུ་བར་དགུ་བའི་ཡོངས་སྦྱོང་བཅུ་གཉིས་པོ་རྫོགས་པར་སྦྱངས་བ་ཉིད་བཅུ་བའི་ཡོངས་སྦྱོང་ཡིན་པར་ཉ་ཊཱིཀ་ཡིད་ཀྱི་མུན་སེལ་ལས་གསུངས་སོ། །དེ་དག་བསྒོམས་ནས་སྦྱང་བའོ། །བཅུ་བ་འབྲས་བུ་ནི། ས་ཕྱི་མ་ཕྱི་མ་གནས་སྐབས་ཀྱི་འབྲས་བུ། མཐར་ཐུག་གི་འབྲས་བུ་སངས་རྒྱས་ཀྱི་ས་ཀུན་ཏུ་འོད་དོ། །བྱང་འཕགས་ཀྱི་ས་འདི་རྣམས་ཉ་ཊཱིཀ་ལྟར་བྲིས་པའོ། །དོན་གཉིས་མཐར་ཕྱིན་ཐོབ་ཚུལ་ནི། སངས་རྒྱས་ཀྱི་ས་གང་ལ་གནས་ན་འཁོར་བ་ཇི་སྲིད་པར་མངོན་པར་རྫོགས་པར་བྱང་ཆུབ་པ་དང་མྱ་ངན་ལས་འདས་པར་ཡང་སྟོན་པ་ལ་སོགས་པ་རྣམ་འཕྲུལ་མཐའ་ཡས་པའི་སྒོ་ནས་སེམས་ཅན་ཀུན་ལ་ཕན་པ་དང་བདེ་བའི་ཕྱིར། འཕྲིན་ལས་ལྷུན་གྱིས་གྲུབ་ཅིང་རྒྱུན་མི་འཆད་པར་རབ་ཏུ་སྒྲུབ་པར་བྱེད་པ་ཤེས་བྱ་ཇི་ལྟ་བ་དང་ཇི་སྙེད་པའི་རྣམ་པ་ཐམས་ཅད་མངོན་སུམ་གྱིས་མཁྱེན་པ་རྫོགས་པའི་སངས་རྒྱས་ཀྱི་གོ་འཕང་བླ་ན་མེད་པ་སྤངས་རྟོགས་མཐར་ཕྱིན་པ་ཐོབ་པའོ།། །། སྨྲས་པ། ཐེག་གསུམ་རྣམ་བཞག་ལྷ་ཡི་པད་ཚལ་ལ། །གདུལ་བྱ་རྐང་དྲུག་ཚོགས་རྣམས་འཇུག་ཕྱིར་དུ། །མདོར་བསྡུས་ཚིག་གིས་གསལ་བར་བཀོད་པ་འདི། །མཐའ་བྲལ་དབུ་མའི་ལུགས་བཞིན་ཇི་སྐད་བཤད། །འོན་ཀྱང་བདག་བློ་མི་ཤེས་མུན་པས་བསྒྲིབས། །རྒྱ་ཆེའི་ལམ་རྣམས་གྲངས་མང་ཟབ་ཅིང་ཕྲ། །དེ་སླད་ཉེས་སྐྱོན་ཅི་མཆིས་ཚོགས་རྣམས་ཀུན། །ཆོས་སྤྱན་ལྡན་པའི་མཁས་ལ་བཟོད་པར་གསོལ། །འདིར་སྨྲས་བསོད་ནམས་རྣམ་དཀར་དལ་འབབ་ཀླུང༌། །དུས་གསུམ་རྒྱལ་བའི་བསོད་ནམས་དང་འདྲེས་ཏེ། །ནམ་མཁའི་མཐའ་མཉམ་ལུས་ཅན་སེམས་ཅན་གྱི། །སྡུག་བསྔལ་ཚ་གདུང་མ་ལུས་སེལ་བར་ཤོག །བདག་ནི་ཚེ་རབས་སྐྱེ་གནས་ཐམས་ཅད་དུ། །མཚན་ལྡན་བླ་མའི་བརྩེ་བས་རྗེས་བཟུང་ཞིང༌། །ཟབ་དང་རྒྱ་ཆེའི་ལམ་ལ་རབ་བརྩོན་ཏེ། །བསྟན་དང་འགྲོ་བའི་དོན་ཆེན་བསྒྲུབ་པར་ཤོག །ཅེས་ས་ལམ་གྱི་རྣམ་བཞག་ཐེག་གསུམ་གསལ་བའི་ཤེལ་དཀར་མེ་ལོང་ཞེས་བྱ་བ་འདི་ནི་ས་བཟང་གི་མདོ་སྡེ་རྒྱན་གྱི་རྣམ་བཤད་གཙོ་བོར་བྱས་ཏེ་རང་ལུགས་ཀྱི་དམ་པ་གོང་མའི་གསུང་བཞིན་རྒྱ་ནག་སྤོས་ངད་ལྡན་པའི་གྲོང་ཁྱེར་ནས་གྲྭ་བཙུན་པ་ངག་དབང་དངོས་གྲུབ་དཔལ་གྱིས་ཐུན་གསུམ་གྱི་ཡུན་ལ་རྫོགས་པར་སྦྱར་བའོ། །འདིས་ཀྱང་རྒྱ་ཆེ་བའི་ལམ་གྱི་བསྟན་པ་ཕྱོགས་བཅུ་ཀུན་ཏུ་དར་ཞིང་རྒྱས་པར་གྱུར་ཅིག ། །།ཛ་ཡནྟུ། ཡུམ་མདོ་ལས་བཤད་པའི་རྒྱལ་སྲས་ཞེ་ལྔའི་བཤད་པ་པད་དཀར་ཕྲེང་བ།ཡུམ་མདོ་ལས་བཤད་པའི་རྒྱལ་སྲས་ཞེ་ལྔའི་བཤད་པ་པད་དཀར་ཕྲེང་བ་ཞེས་བྱ་བ་བཞུགས་སོ། ། བསྟན་པའི་བདག་པོ་མཉམ་མེད་ཐུབ་པའི་དབང་པོ་ལ་ཕྱག་འཚལ་ལོ། །འགྲོ་ལ་བྱ༵མས་པ༵འི་ཟླ་བའི་དཀྱིལ་འཁོར་རྫོགས། །འགྲོ་ལ་བརྩེ་བའི་ཐུགས་རྗེའི་འོད་དཀར་ཅན། །འགྲོ་ལ་རྒྱལ་ཡུམ་མངོ༵ན་རྟོགས་གསལ་མཛད་པ། །འགྲོ་བའི་གཙུག་རྒྱན་མི་ཕམ་མགོན་ལ་འདུད། །རྒྱལ་སྲས་ཟླ་བ་བརྩེ་བའི་བདག་ཉིད་ཅན། །རྒྱལ་སྲས་རྣམས་ཀྱི་རྣམ་བཞག་རྒྱལ་ཡུམ་ལས། །རྒྱལ་སྲས་གསུམ་དང་ཞེ་ལྔ་གསུངས་པ་རྣམས། །རྒྱལ་སྲས་རྗེས་སུ་སློབ་ཕྱིར་བཤད་པར་བྱ། །དེ་ལ་འདིར་བདག་ཅག་གི་སྟོན་པ་ཐུགས་རྗེ་ཅན་དེས་ཤེར་མདོ་ལས་ཐེག་ཆེན་དགེ་འདུན་དཀོན་མཆོག་གི་སྐབས་སུ་རྒྱལ་སྲས་ཀྱི་རྣམ་བཞག་གསུངས་པ་དག་འདིར་བརྗོད་པར་བྱ་བ་ལ། བཅོམ་ལྡན་འདས་ལ་ཞུ་བ་དང༌། ལན་བསྟན་པ་དང་གཉིས། དང་པོ་བཅོམ་ལྡན་འདས་ལ་ཞུ་བ་ནི། ཉི་ཁྲི་ལྔ་སྟོང་པ་ལས། ཤཱ་ར་དྭ་ཏིའི་བུས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས། བྱང་ཆུབ་སེམས་དཔའ་སེམས་དཔའ་ཆེན་པོ་གང་ཤེས་རབ་ཀྱི་ཕ་རོལ་ཏུ་ཕྱིན་པའི་རྣལ་འབྱོར་འདིས་སྤྱོད་པ་དེ་གང་ནས་ཤི་འཕོས་ཏེ་འདིར་སྐྱེས་པ་ལགས། འདི་ནས་ཤི་འཕོས་ནས་ནི་གང་དུ་སྐྱེ་བར་འགྱུར། ཞེས་བཅོམ་ལྡན་འདས་ལ་ཤཱ་རིའི་བུས་ཞུས་སོ། ། གཉིས་པ་ལན་ལ། དབྱེ་བ་བསྡུས་ནས་གསུམ་བསྟན་པ་དང༌། དབྱེ་བ་རྒྱས་པར་བཤད་པ་དང་གཉིས། དང་པོ་ལ། མདོར་བསྟན་རྒྱས་བཤད་གཉིས་ལས། དང་པོ་ནི། ཉི་ཁྲི་ལྔ་སྟོང་པ་ལས། བཅོམ་ལྡན་འདས་ཀྱིས་བཀའ་སྩལ་པ། ཤཱ་ར་དྭ་ཏིའི་བུ། བྱང་ཆུབ་སེམས་དཔའ་སེམས་དཔའ་ཆེན་པོ་གང་ཤེས་རབ་ཀྱི་ཕ་རོལ་ཏུ་ཕྱིན་པའི་རྣལ་འབྱོར་འདིའི་རྣམ་པར་སྤྱོད་པ་དེ་ནི་སངས་རྒྱས་ཀྱི་ཞིང་གཞན་ནས་ཤི་འཕོས་ཏེ་འདིར་སྐྱེས་པའམ། དགའ་ལྡན་གྱི་ལྷའི་རིས་དང་མིའི་ནང་ནས་ཤི་འཕོས་ཏེ་འདིར་སྐྱེས་པར་ཤེས་པར་བྱའོ། །ཞེས་གསུངས་སོ། །གཉིས་པ་རྒྱས་པར་བཤད་པ་གསུམ་ལས། དང་པོ་སངས་རྒྱས་ཀྱི་ཞིང་ནས་འདིར་སྐྱེས་པའི་རྒྱལ་སྲས་ནི། ཉི་ཁྲི་ལྔ་སྟོང་པ་ལས། ཤཱ་ར་དྭ་ཏིའི་བུ། དེ་ལ་བྱང་ཆུབ་སེམས་དཔའ་སེམས་དཔའ་ཆེན་པོ་གང་སངས་རྒྱས་ཀྱི་ཞིང་གཞན་ནས་ཤི་འཕོས་ཏེ་འདིར་སྐྱེས་པ་དེ་ནི།འདི་ལྟར་ཤེས་རབ་ཀྱི་ཕ་རོལ་ཏུ་ཕྱིན་པའི་རྣལ་འབྱོར་ལ། རྣལ་འབྱོར་མྱུར་དུ་འགྲུབ་པ་སྟེ། ཚེ་རབས་འདི་འདས་ནས་ཀྱང་ཆོས་ཟབ་མོ་འདི་དག་དེ་ལ་མངོན་དུ་འགྱུར་རོ། །དེ་ནས་ཀྱང་ཤེས་རབ་ཀྱི་ཕ་རོལ་ཏུ་ཕྱིན་པའི་རྣལ་འབྱོར་ལ་མཉམ་པར་གཞོག་གོ །སངས་རྒྱས་ཀྱི་ཞིང་གང་དང་གང་ན། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་བཞུགས་ཤིང་འཚོ་སྐྱོང་བ་དེ་དང་དེ་དག་ཏུའང་སྐྱེ་བར་འགྱུར་ཏེ། དེ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དེ་དག་ལའང་བསྙེན་བཀུར་བྱེད་པར་འགྱུར་རོ། །ཞེས་གསུངས་སོ། ། གཉིས་པ་དགའ་ལྡན་ནས་འདིར་སྐྱེས་པའི་རྒྱལ་སྲས།གཉིས་པ་དགའ་ལྡན་ནས་འདིར་སྐྱེས་པའི་རྒྱལ་སྲས་ནི། ཉི་ཁྲི་ལྔ་སྟོང་པ་ལས། ཤཱ་ར་དྭ་ཏིའི་བུ། དེ་ལ་བྱང་ཆུབ་སེམས་དཔའ་སེམས་དཔའ་ཆེན་པོ་གང་དགའ་ལྡན་གྱི་ལྷའི་རིས་ནས་ཤི་འཕོས་ནས་འདིར་སྐྱེས་པ་དེ་ནི་ཚེ་གཅིག་གིས་ཐོགས་པ་སྟེ། དེ་ནི་ཕ་རོལ་ཏུ་ཕྱིན་པ་དྲུག་ལ་ཉམས་པ་མེད་པའོ། །གཟུངས་ཀྱི་སྒོ་དང་ཏིང་ངེ་འཛིན་གྱི་སྒོ་ཐམས་ཅད་ཀྱང་དེར་མ་འདུས་པ་མེད་དོ། །ཞེས་གསུངས་སོ། །མདོ་སྔ་མ་དང་འདི་གཉིས་འཕགས་པའི་ལུགས་ལ་ཉ་ཊཱིཀ་ལས་རྒྱུན་ཞུགས་ཞུགས་པ་དབང་རྣོན་གྱི་མིང་ཅན་གྱི་བྱང་སེམས་སྟོན་བྱེད་དུ་སྦྱར་ནས་བཤད་དོ། །དེ་དང་དེའི་མིང་ཅན་གྱི་བྱང་སེམས་ལ་སྦྱར་བ་འོག་མ་ཐམས་ཅད་འཕགས་པའི་ལུགས་ཡིན་པར་ཤེས་དགོས་སོ། ། གསུམ་པ་མི་ནས་མིར་སྐྱེས་པའི་རྒྱལ་སྲས།གསུམ་པ་མི་ནས་མིར་སྐྱེས་པའི་རྒྱལ་སྲས་ནི། ཉི་ཁྲི་ལྔ་སྟོང་པ་ལས། ཤཱ་ར་དྭ་ཏིའི་བུ། བྱང་ཆུབ་སེམས་དཔའ་སེམས་དཔའ་ཆེན་པོ་གང་མིའི་ནང་ནས་ཤི་འཕོས་ནས། མི་དང་སྐལ་བ་མཉམ་པ་ཉིད་དུ་སྐྱེས་པ་དེ་ནི། ཕྱིར་མི་ལྡོག་པའི་བྱང་ཆུབ་སེམས་དཔའ་སེམས་དཔའ་ཆེན་པོ་མ་གཏོགས་པར་དབང་པོ་རྟུལ་བ་ཡིན་ཏེ། ཤེས་རབ་ཀྱི་ཕ་རོལ་ཏུ་ཕྱིན་པའི་རྣལ་འབྱོར་ལའང་མྱུར་དུ་མཉམ་པར་གཞོག་པ་མ་ཡིན་ནོ། དེ་ལ་གཟུངས་ཀྱི་སྒོ་དང༌། ཏིང་ངེ་འཛིན་གྱི་སྒོ་རྣམས་ཀྱང་མྱུར་དུ་མངོན་དུ་མི་འགྱུར་རོ། །ཤཱ་ར་དྭ་ཏིའི་བུ། གང་ཁྱོད་ཀྱིས་དེ་སྐད་དུ། བྱང་ཆུབ་སེམས་དཔའ་སེམས་དཔའ་ཆེན་པོ་གང་ཤེས་རབ་ཀྱི་ཕ་རོལ་ཏུ་ཕྱིན་པའི་རྣལ་འབྱོར་འདི་ལ་སྙོམས་པར་འཇུག་པ་དེ། འདི་ནས་ཤི་འཕོས་ནས་གང་དུ་སྐྱེ་བར་འགྱུར་ཞེས་སྨྲས་པ་ནི། ཤཱ་ར་དྭ་ཏིའི་བུ། བྱང་ཆུབ་སེམས་དཔའ་སེམས་དཔའ་ཆེན་པོ་དེ་སངས་རྒྱས་ཀྱི་ཞིང་འདི་ནས་ཤི་འཕོས་ནས། གང་ན་སངས་རྒྱས་བཅོམ་ལྡན་འདས་རྣམས་བཞུགས་ཤིང་འཚོ་སྐྱོང་བའི་སངས་རྒྱས་ཀྱི་ཞིང་དེ་ནས་དེར་འགྲོ་སྟེ། ནམ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་སངས་རྒྱས་ཀྱི་བར་དུ། ནམ་ཡང་སངས་རྒྱས་བཅོམ་ལྡན་འདས་རྣམས་དང་བྲལ་བར་མི་འགྱུར་རོ།། །།ཞེས་གསུངས་སོ། །ཉ་ཊཱིཀ་ལས། མདོ་འདི་རྒྱུན་ཞུགས་ཞུགས་པ་དབང་རྟུལ་གྱི་མིང་ཅན་སྟོན་བྱེད་དུ་སྦྱར་རོ། །གཉིས་པ་རྒྱལ་སྲས་བྱང་སེམས་ཀྱི་དབྱེ་བ་རྒྱས་པར་བཤད་པ་ལ་ཞེ་ལྔ་ལས། དང་པོ་ལྷ་ཚེ་རིང་པོར་སྐྱེས་པའི་རྒྱལ་སྲས།དང་པོ་ལྷ་ཚེ་རིང་པོར་སྐྱེས་པའི་རྒྱལ་སྲས་ནི། ཉི་ཁྲི་ལྔ་སྟོང་པ་ལས། ཤཱ་ར་དྭ་ཏིའི་བུ། བྱང་ཆུབ་སེམས་དཔའ་སེམས་དཔའ་ཆེན་པོ་ཐབས་ལ་མི་མཁས་པ་དག་བསམ་གཏན་བཞི་པོ་ལ་མཉམ་པར་གཞོག་ཅིང༌། ཕ་རོལ་ཏུ་ཕྱིན་པ་དྲུག་ལའང་སྤྱོད་དེ། དེ་དག་བསམ་གཏན་ཐོབ་པས་ལྷ་ཚེ་རིང་པོའི་ནང་དུ་སྐྱེས་ཤིང༌། གལ་ཏེ་མིའི་ནང་དུ་སྐྱེ་བ་ཐོབ་ནས། སངས་རྒྱས་བཅོམ་ལྡན་འདས་དེ་དག་ལ་བསྙེན་བཀུར་བྱེད་ནའང༌། དེ་དག་དབང་པོ་རྟུལ་ཞིང་དབང་པོ་མི་རྣོ་བའང་ཡོད་དོ། །ཞེས་གསུངས་སོ། །མདོ་འདི་ཉ་ཊཱིཀ་ལས་ཆགས་བྲལ་སྔོན་སོང་གི་འབྲས་བུ་བར་བ་གཉིས་ཀྱི་དབང་རྟུལ་ལ་སྦྱར་ནས་བཤད་དོ། ། གཉིས་པ་བསམ་གཏན་སྤངས་ནས་འདོད་པར་སྐྱེས་པའི་རྒྱལ་སྲས།གཉིས་པ་བསམ་གཏན་སྤངས་ནས་འདོད་པར་སྐྱེས་པའི་རྒྱལ་སྲས་ནི། ཉི་ཁྲི་ལྔ་སྟོང་པ་ལས། ཤཱ་ར་དྭ་ཏིའི་བུ། གཞན་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་བསམ་གཏན་ལའང་མཉམ་པར་གཞོག་ལ། ཤེས་རབ་ཀྱི་ཕ་རོལ་ཕྱིན་པ་ལའང་སྤྱོད་དེ། དེ་དག་ཐབས་ལ་མི་མཁས་པས་བསམ་གཏན་རྣམས་སྤངས་ནས་ཕྱིར་འདོད་པའི་ཁམས་སུ་སྐྱེ་བའང་ཡོད་དེ། ཤཱ་ར་དྭ་ཏིའི་བུ། བྱང་ཆུབ་སེམས་དཔའ་སེམས་དཔའ་ཆེན་པོ་དེ་དག་ཀྱང་དབང་པོ་རྟུལ་བ་ཡིན་ཏེ། དབང་པོ་རྣོ་བ་མ་ཡིན་ནོ། །ཞེས་གསུངས་སོ། ། གསུམ་པ་སངས་རྒྱས་འཚོ་སྐྱོང་བ་དེར་སྐྱེས་པའི་རྒྱལ་སྲས།གསུམ་པ་སངས་རྒྱས་འཚོ་སྐྱོང་བ་དེར་སྐྱེས་པའི་རྒྱལ་སྲས་ནི། ཉི་ཁྲི་ལྔ་སྟོང་པ་ལས། ཤཱ་ར་དྭ་ཏིའི་བུ། འདི་ལྟར་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་བསམ་གཏན་དང་པོ་ནས། བཞི་པ་ལའང་སྙོམས་པར་འཇུག བྱམས་པ་ལའང་སྙོམས་པར་འཇུག སྙིང་རྗེ་དང༌། དགའ་བ་དང༌། བཏང་སྙོམས་ལའང་སྙོམས་པར་འཇུག ནམ་མཁའ་མཐའ་ཡས་སྐྱེ་མཆེད་ལའང་སྙོམས་པར་འཇུག རྣམ་ཤེས་མཐའ་ཡས་སྐྱེ་མཆེད་དང༌། ཅུང་ཟད་མེད་པའི་སྐྱེ་མཆེད་དང༌། འདུ་ཤེས་མེད་འདུ་ཤེས་མེད་མིན་སྐྱེ་མཆེད་ལའང་སྙོམས་པར་འཇུག དྲན་པ་ཉེ་བར་བཞག་པ་བཞི་ལའང་སྙོམས་པར་འཇུག ཡང་དག་པར་སྤོང་པ་བཞི་དང༌། རྫུ་འཕྲུལ་གྱི་རྐང་བ་བཞི་དང༌། དབང་པོ་ལྔ་དང༌། སྟོབས་ལྔ་དང༌། བྱང་ཆུབ་ཀྱི་ཡན་ལག་བདུན་དང༌། འཕགས་པའི་ལམ་ཡན་ལག་བརྒྱད་པ་ལའང་སྙོམས་པར་འཇུག སྙིང་རྗེ་ཆེན་པོ་ལའང་སྙོམས་པར་འཇུག་སྟེ། སྙིང་རྗེ་ཆེན་པོ་དང་ལྡན་པ་དེ་དག་ཐབས་མཁས་པས་བསམ་གཏན་གྱི་དབང་གིས་མི་སྐྱེ། ཚངས་པའི་རྣམ་པར་སྤྱོད་པའི་དབང་གིས་མི་སྐྱེ། གཟུགས་མེད་པའི་སྙོམས་པར་འཇུག་པའི་དབང་གིས་མི་སྐྱེ་སྟེ། སངས་རྒྱས་བཅོམ་ལྡན་འདས་རྣམས་གང་ན་བཞུགས་ཤིང་འཚོ་སྐྱོང་བ་དེ་དང་དེ་དག་ཏུ་སྐྱེ་བར་འགྱུར་བ་ཡོད་དོ། །དེ་དག་ནི་ཤེས་རབ་ཀྱི་ཕ་རོལ་ཏུ་ཕྱིན་པའི་རྣལ་འབྱོར་དང་མ་བྲལ་བས། བསྐལ་པ་བཟང་པོ་འདི་ཉིད་ལ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་འཚང་རྒྱའོ། །ཞེས་གསུངས་སོ། །མདོ་འདི་ཉ་ཊཱིཀ་ལས་ཆགས་བྲལ་སྔོན་སོང་གི་འབྲས་བུ་བར་བ་གཉིས་ཀྱི་དབང་རྣོན་ལ་སྦྱར་ནས་བཤད་དོ། ། བཞི་བ་རྒྱལ་རིགས་སོགས་རིགས་མཐོར་སྐྱེས་པའི་རྒྱལ་སྲས།བཞི་བ་རྒྱལ་རིགས་སོགས་རིགས་མཐོར་སྐྱེས་པའི་རྒྱལ་སྲས་ནི། ཉི་ཁྲི་ལྔ་སྟོང་པ་ལས། ཤཱ་ར་དྭ་ཏིའི་བུ། གཞན་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་བསམ་གཏན་བཞི་པོ་ལའང་སྙོམས་པར་འཇུག བྱམས་པ་དང༌།སྙིང་རྗེ་དང༌། དགའ་བ་དང༌། བཏང་སྙོམས་ལའང་སྙོམས་པར་འཇུག ནམ་མཁའ་མཐའ་ཡས་སྐྱེ་མཆེད་དང༌། རྣམ་ཤེས་མཐའ་ཡས་སྐྱེ་མཆེད་དང༌། ཅུང་ཟད་མེད་པའི་སྐྱེ་མཆེད་དང༌། འདུ་ཤེས་མེད་འདུ་ཤེས་མེད་མིན་སྐྱེ་མཆེད་ལའང་སྙོམས་པར་འཇུག་ཅིང༌། དེ་དག་ཐབས་མཁས་པས་བསམ་གཏན་དང༌། ཏིང་ངེ་འཛིན་དང༌། སྙོམས་པར་འཇུག་པའི་དབང་གིས་མི་སྐྱེ་བའང་ཡོད་དེ། དེ་དག་ནི་ཕྱིར་འདོད་པའི་ཁམས་འདིར་སྐྱེས་ཀྱང༌། རྒྱལ་རིགས་ཆེ་ཞིང་མཐོ་བའམ། བྲམ་ཟེའི་རིགས་ཆེ་ཞིང་མཐོ་བའམ། ཁྱིམ་བདག་གི་རིགས་ཆེ་ཞིང་མཐོ་བའི་རིགས་སུ་སྐྱེ་སྟེ། དེའང་སྲིད་པ་ལ་བསྐམ་པའི་ཕྱིར་མ་ཡིན་གྱི། སེམས་ཅན་ཡོངས་སུ་སྨིན་པར་བྱ་བའི་ཕྱིར་རོ། །ཞེས་གསུངས་སོ། །མདོ་འདི་ཉ་ཊཱིཀ་ལས་རྒྱུན་ཞུགས་མིའི་རིགས་ནས་རིགས་སྐྱེའི་མིང་ཅན་གྱི་བྱང་སེམས་ལ་སྦྱར་ནས་བཤད་དོ། ། ལྔ་བ་རྒྱལ་ཆེན་བཞི་སོགས་སྐལ་བ་མཉམ་པར་སྐྱེས་པའི་རྒྱལ་སྲས།ལྔ་བ་རྒྱལ་ཆེན་བཞི་སོགས་སྐལ་བ་མཉམ་པར་སྐྱེས་པའི་རྒྱལ་སྲས་ནི། ཉི་ཁྲི་ལྔ་སྟོང་པ་ལས། ཤཱ་ར་དྭ་ཏིའི་བུ།འདི་ལྟར་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་བསམ་གཏན་བཞི་པོ་ལའང་སྙོམས་པར་འཇུག བྱམས་པ་དང༌། སྙིང་རྗེ་དང༌། དགའ་བ་དང༌། བཏང་སྙོམས་ལའང་སྙོམས་པར་འཇུག ནམ་མཁའ་མཐའ་ཡས་སྐྱེ་མཆེད་ལའང་སྙོམས་པར་འཇུག རྣམ་ཤེས་མཐའ་ཡས་སྐྱེ་མཆེད་དང༌། ཅུང་ཟད་མེད་པའི་སྐྱེ་མཆེད་དང༌། འདུ་ཤེས་མེད་འདུ་ཤེས་མེད་མིན་སྐྱེ་མཆེད་ལའང་སྙོམས་པར་འཇུག་ཅིང༌། དེ་དག་ཐབས་མཁས་པས་བསམ་གཏན་དང༌། ཏིང་ངེ་འཛིན་དང༌། སྙོམས་པར་འཇུག་པའི་དབང་གིས་མི་སྐྱེ་བའང་ཡོད་དེ། དེ་དག་ནི་རྒྱལ་པོ་ཆེན་པོ་བཞིའི་རིས་ཀྱི་ལྷ་རྣམས་དང་སྐལ་བ་མཉམ་པར་བྱའོ། །སུམ་ཅུ་རྩ་གསུམ་དང༌། མཚེ་མ་དང༌། དགའ་ལྡན་དང༌། འཕྲུལ་དགའ་དང༌། གཞན་འཕྲུལ་དབང་བྱེད་ཀྱི་ལྷ་རྣམས་དང་སྐལ་བ་མཉམ་པར་སྐྱེས་ཏེ། དེ་དག་ན་གནས་ཤིང་སེམས་ཅན་རྣམས་ཡོངས་སུ་སྨིན་པར་བྱེད་དོ། །སངས་རྒྱས་ཀྱི་ཞིང་ཡོངས་སུ་དག་པར་བྱེད་དོ། །སངས་རྒྱས་བཅོམ་ལྡན་འདས་རྣམས་ཀྱང་མཉེས་པར་བྱེད་དོ། །ཞེས་གསུངས་སོ། །མདོ་འདི་ཉ་ཊཱིཀ་ལས་རྒྱུན་ཞུགས་ལྷའི་རིགས་ནས་རིགས་སྐྱེའི་མིང་ཅན་གྱི་བྱང་སེམས་ལ་སྦྱར་ནས་བཤད་དོ། ། དྲུག་པ་ཚངས་པའི་འཇིག་རྟེན་སྐྱེས་ཏེ་ཆོས་སྟོན་པ་བསྐུལ་བའི་རྒྱལ་སྲས།དྲུག་པ་ཚངས་པའི་འཇིག་རྟེན་སྐྱེས་ཏེ་ཆོས་སྟོན་པ་བསྐུལ་བའི་རྒྱལ་སྲས་ནི། ཉི་ཁྲི་ལྔ་སྟོང་པ་ལས། ཤཱ་ར་དྭ་ཏིའི་བུ། འདི་ལྟར་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་ཤེས་རབ་ཀྱི་ཕ་རོལ་ཏུ་ཕྱིན་པ་ལ་སྤྱོད་པ་དག་ཐབས་མཁས་པས་བསམ་གཏན་བཞི་པོ་ལའང་སྙོམས་པར་འཇུག བྱམས་པ་དང༌། སྙིང་རྗེ་དང༌། དགའ་བ་དང༌། བཏང་སྙོམས་ལའང་སྙོམས་པར་འཇུག ནམ་མཁའ་མཐའ་ཡས་སྐྱེ་མཆེད་ལའང་སྙོམས་པར་འཇུག རྣམ་ཤེས་མཐའ་ཡས་སྐྱེ་མཆེད་དང༌། ཅུང་ཟད་མེད་པའི་སྐྱེ་མཆེད་དང༌། འདུ་ཤེས་མེད་འདུ་ཤེས་མེད་མིན་སྐྱེ་མཆེད་ལའང་སྙོམས་པར་འཇུག་པ་ཡོད་དེ། དེ་དག་ནི་འདི་ནས་ཤི་འཕོས་ནས་ཚངས་པའི་འཇིག་རྟེན་དུ་སྐྱེའོ། །དེ་དག་དེ་ནའང་ཚངས་པ་ཚངས་ཆེན་དབང་ཆེན་པོ་དང་ལྡན་པ་བརྒྱ་ཕྲག་བཅུ་ལ་དབང་སྒྱུར་བ་དེ་ལྟ་བུའི་སེམས་ཅན་གྱི་ནང་ནའང་མཆོག་དམ་པ་ཕུལ་དུ་བྱ་བར་འགྱུར་ཏེ། དེ་དག་དེ་ན་འཁོད་ཅིང༌། གང་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་མངོན་པར་སངས་རྒྱས་ཤིང་ཆོས་ཀྱི་འཁོར་ལོ་བསྐོར་བ་བཞུགས་པ་དེ་ལྟ་བུའི་སངས་རྒྱས་ཀྱི་ཞིང་ནས་སངས་རྒྱས་ཀྱི་ཞིང་དུ་རྒྱུ་ཞིང་དོང་ངོ༌། །དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དེ་དག་ལའང་ཆོས་ཀྱི་འཁོར་ལོ་བསྐོར་བའི་དོན་དུ་གསོལ་བ་གདབ་པ་བྱེད་དོ། །ཞེས་གསུངས་སོ། ། བདུན་པ་ཚེ་གཅིག་གིས་ཐོགས་པ་དགའ་ལྡན་དུ་སྐྱེས་ནས་འདིར་སྐྱེ་བའི་རྒྱལ་སྲས།བདུན་པ་ཚེ་གཅིག་གིས་ཐོགས་པ་དགའ་ལྡན་དུ་སྐྱེས་ནས་འདིར་སྐྱེ་བའི་རྒྱལ་སྲས་ནི། ཉི་ཁྲི་ལྔ་སྟོང་པ་ལས། ཤཱ་ར་དྭ་ཏིའི་བུ། འདི་ལྟར་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་ཚེ་གཅིག་གིས་ཐོགས་པ། ཤེས་རབ་ཀྱི་ཕ་རོལ་ཏུ་ཕྱིན་པ་ལ་སྤྱོད་པ་དག་ཐབས་མཁས་པའི་བསམ་གཏན་བཞི་པོ་ལའང་སྙོམས་པར་འཇུག བྱམས་པ་དང༌། སྙིང་རྗེ་དང༌། དགའ་བ་དང༌། བཏང་སྙོམས་ལའང་སྙོམས་པར་འཇུག ནམ་མཁའ་མཐའ་ཡས་སྐྱེ་མཆེད་ལའང་སྙོམས་པར་འཇུག རྣམ་ཤེས་མཐའ་ཡས་སྐྱེ་མཆེད་དང༌། ཅུང་ཟད་མེད་པའི་སྐྱེ་མཆེད་དང༌།འདུ་ཤེས་མེད་འདུ་ཤེས་མེད་མིན་སྐྱེ་མཆེད་ལའང་སྙོམས་པར་འཇུག དྲན་པ་ཉེ་བར་བཞག་པ་བཞི་དང༌། ཡང་དག་པར་སྤོང་བ་བཞི་དང༌། རྫུ་འཕྲུལ་གྱི་རྐང་བ་བཞི་དང༌། དབང་པོ་ལྔ་དང༌། སྟོབས་ལྔ་དང༌། བྱང་ཆུབ་ཀྱི་ཡན་ལག་བདུན་དང༌། འཕགས་པའི་ལམ་ཡན་ལག་བརྒྱད་པ་ལའང་བསྒོམ། སྟོང་པ་ཉིད་དང༌། མཚན་མ་མེད་པ་དང༌། སྨོན་པ་མེད་པའི་ཏིང་ངེ་འཛིན་ལའང་སྙོམས་པར་འཇུག་ཅིང༌། དེ་དག་གི་དབང་གིས་མི་སྐྱེ་བའང་ཡོད་དེ། དེ་དག་སངས་རྒྱས་བཅོམ་ལྡན་འདས་མངོན་དུ་གྱུར་པ་རྣམས་བསྙེན་བཀུར་ཅིང༌། དེ་དག་ཏུ་ཚངས་པའི་སྤྱོད་པ་སྤྱད་དེ། དགའ་ལྡན་གྱི་ལྷ་དང་སྐལ་བ་མཉམ་པར་སྐྱེ་སྟེ། དེ་དག་དེར་ཚེའི་ཚུལ་བཞིན་དུ་གནས་ནས། དབང་པོ་མ་ཉམས་པ་དང་དྲན་ཞིང་ཤེས་བཞིན་དུ་ལྷ་བྱེ་བ་ཁྲག་ཁྲིག་བརྒྱ་སྟོང་དུ་མས་བསྐོར་ཏེ་མདུན་དུ་བྱས་ནས་འདིར་སྐྱེ་བ་བསྟན་ཏེ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་སངས་རྒྱས་ནས་སངས་རྒྱས་ཀྱི་ཞིང་སྣ་ཚོགས་དག་ཏུ་ཆོས་ཀྱི་འཁོར་ལོ་བསྐོར་བ་དག་ཀྱང་ཡོད་དོ། །ཞེས་གསུངས་སོ། ། བརྒྱད་པ་མངོན་ཤེས་ཐོབ་ཅིང་སངས་རྒྱས་ཀྱི་ཞིང་བརྒྱུད་པའི་རྒྱལ་སྲས།བརྒྱད་པ་མངོན་ཤེས་ཐོབ་ཅིང་སངས་རྒྱས་ཀྱི་ཞིང་བརྒྱུད་པའི་རྒྱལ་སྲས་ནི། ཉི་ཁྲི་ལྔ་སྟོང་པ་ལས། ཤཱ་ར་དྭ་ཏིའི་བུ། འདི་ལྟར་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་མངོན་པར་ཤེས་པ་དྲུག་ཐོབ་པ་དག་འདོད་པའི་ཁམས་སུའང་མི་སྐྱེ། གཟུགས་ཀྱི་ཁམས་དང༌། གཟུགས་མེད་པའི་ཁམས་སུའང་མི་སྐྱེ་བར། དེ་དག་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ལ་རིམ་གྲོ་དང༌། བཀུར་སྟི་དང༌། བསྟི་སྟང་དང༌། མཆོད་པ་བྱེད་ཅིང་སངས་རྒྱས་ཀྱི་ཞིང་ནས་སངས་རྒྱས་ཀྱི་ཞིང་དུ་འདོང་བ་དག་ཀྱང་ཡོད་དོ། །ཞེས་གསུངས་སོ། ། དགུ་བ་དམན་པའི་སྒྲ་མེད་པའི་སངས་རྒྱས་ཞིང་བརྒྱུད་པ།དགུ་བ་དམན་པའི་སྒྲ་མེད་པའི་སངས་རྒྱས་ཞིང་བརྒྱུད་པ་ནི། ཉི་ཁྲི་ལྔ་སྟོང་པ་ལས། ཤཱ་ར་དྭ་ཏིའི་བུ། འདི་ལྟར་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་མངོན་པར་ཤེས་པ་དྲུག་ཐོབ་པ་དག མངོན་པར་ཤེས་པ་དྲུག་པོ་དེ་དག་གིས་རྣམ་པར་རྩེ་ཞིང་སངས་རྒྱས་ཀྱི་ཞིང་གང་ན། ཐེག་པ་ཆེན་པོ་མ་གཏོགས་པར་ཉན་ཐོས་ཀྱི་ཐེག་པ་དང༌། རང་སངས་རྒྱས་ཀྱི་ཐེག་པའི་སྒྲའང་མི་གྲག་པ་དེ་ལྟ་བུའི་སངས་རྒྱས་ཀྱི་ཞིང་ནས་སངས་རྒྱས་ཀྱི་ཞིང་དུ་འདོང་བ་དག་ཀྱང་ཡོད་དོ། །ཞེས་གསུངས་སོ། ། བཅུ་བ་ཚེ་དཔག་མེད་ལྟ་བུའི་སངས་རྒྱས་ཀྱི་ཞིང་བརྒྱུད་པའི་རྒྱལ་སྲས།བཅུ་བ་ཚེ་དཔག་མེད་ལྟ་བུའི་སངས་རྒྱས་ཀྱི་ཞིང་བརྒྱུད་པའི་རྒྱལ་སྲས་ནི། ཉི་ཁྲི་ལྔ་སྟོང་པ་ལས། ཤཱ་ར་དྭ་ཏིའི་བུ། འདི་ལྟར་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་མངོན་པར་ཤེས་པ་དྲུག་ཐོབ་པ་དག །མངོན་པར་ཤེས་པ་དེ་དག་གིས་རྣམ་པར་རྩེ་ཞིང་སངས་རྒྱས་ཞིང་གང་ན། སེམས་ཅན་རྣམས་ཀྱི་ཚེ་དཔག་ཏུ་མེད་པ་དེ་ལྟ་བུའི་སངས་རྒྱས་ཀྱི་ཞིང་ནས། སངས་རྒྱས་ཀྱི་ཞིང་དུ་འདོང་བ་དག་ཀྱང་ཡོད་དོ། །ཞེས་གསུངས་སོ། ། བཅུ་གཅིག་པ་མུན་གླིང་དུ་དཀོན་མཆོག་གི་སྒྲ་བསྒྲགས་པའི་རྒྱལ་སྲས།བཅུ་གཅིག་པ་མུན་གླིང་དུ་དཀོན་མཆོག་གི་སྒྲ་བསྒྲགས་པའི་རྒྱལ་སྲས་ནི། ཉི་ཁྲི་ལྔ་སྟོང་པ་ལས། ཤཱ་ར་དྭ་ཏིའི་བུ། འདི་ལྟར་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་མངོན་པར་ཤེས་པ་དྲུག་ཐོབ་པ་དག འཇིག་རྟེན་གྱི་ཁམས་གང་ན་སངས་རྒྱས་ཀྱི་སྒྲ་མི་གྲག་པ་དང༌། ཆོས་ཀྱི་སྒྲ་མི་གྲག་པ་དང༌། དགེ་འདུན་གྱི་སྒྲ་མི་གྲག་པ་དེ་ལྟ་བུའི་འཇིག་རྟེན་གྱི་ཁམས་ནས་འཇིག་རྟེན་གྱི་ཁམས་སུ་འདོང་ཞིང་སངས་རྒྱས་ཀྱི་ལེགས་པ་བརྗོད། ཆོས་ཀྱི་ལེགས་པ་བརྗོད། དགེ་འདུན་གྱི་ལེགས་པ་བརྗོད་ཅིང༌། སེམས་ཅན་དེ་དག་ཀྱང་སངས་རྒྱས་ཀྱི་སྒྲ་དང༌། ཆོས་ཀྱི་སྒྲ་དང༌། དགེ་འདུན་གྱི་སྒྲ་དེས་སེམས་དང་བར་གྱུར་ཏེ། གང་ན་སངས་རྒྱས་བཅོམ་ལྡན་འདས་རྣམས་བཞུགས་པ་དེ་དག་ཏུ་སྐྱེ་བར་འགྱུར་བར་བྱེད་པ་དག་ཀྱང་ཡོད་དོ། །ཞེས་གསུངས་སོ། ། བཅུ་གཉིས་པ་ཁམས་གསུམ་དུ་སྐྱེས་ནས་སེམས་ཅན་གྱི་དོན་བྱེད་པའི་རྒྱལ་སྲས།བཅུ་གཉིས་པ་ཁམས་གསུམ་དུ་སྐྱེས་ནས་སེམས་ཅན་གྱི་དོན་བྱེད་པའི་རྒྱལ་སྲས་ནི། ཉི་ཁྲི་ལྔ་སྟོང་པ་ལས། ཤཱ་ར་དྭ་ཏིའི་བུ། འདི་ལྟར་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་དང་པོ་སེམས་བསྐྱེད་ཕྱིན་ཆད། བསམ་གཏན་བཞི་དང༌། ཚད་མེད་པ་བཞི་དང༌། གཟུགས་མེད་པའི་སྙོམས་པར་འཇུག་པ་བཞི་དང༌། མངོན་པར་ཤེས་པ་ལྔ་དང༌། དྲན་པ་ཉེ་བར་བཞག་པ་བཞི་དང༌། ཡང་དག་པར་སྤོང་པ་བཞི་དང༌། རྫུ་འཕྲུལ་གྱི་རྐང་བ་བཞི་དང༌། དབང་པོ་ལྔ་དང༌། སྟོབས་ལྔ་དང༌། བྱང་ཆུབ་ཀྱི་ཡན་ལག་བདུན་དང༌། འཕགས་པའི་ལམ་ཡན་ལག་བརྒྱད་པ་དང༌། དེ་བཞིན་གཤེགས་པའི་སྟོབས་བཅུ་དང༌། མི་འཇིགས་པ་བཞི་དང༌། སོ་སོ་ཡང་དག་པར་རིག་པ་བཞི་དང༌། བྱམས་པ་ཆེན་པོ་དང༌། སྙིང་རྗེ་ཆེན་པོ་དང༌། སངས་རྒྱས་ཀྱི་ཆོས་མ་འདྲེས་པ་བཅོ་བརྒྱད་དག་ཀྱང་ཐོབ་ནས། དེ་དག་ནམ་ཡང་འདོད་པའི་ཁམས་སུ་ཡང་མི་སྐྱེ། གཟུགས་ཀྱི་ཁམས་དང༌། གཟུགས་མེད་པའི་ཁམས་སུའང་མི་སྐྱེ་ཞིང༌། དེ་དག་ཏུའང་སེམས་ཅན་རྣམས་ཀྱི་དོན་བྱེད་པ་ཡོད་དོ། །ཞེས་གསུངས་སོ། ། བཅུ་གསུམ་པ་ཕྱིར་མི་ལྡོག་པའི་ས་ཐོབ་པའི་རྒྱལ་སྲས།བཅུ་གསུམ་པ་ཕྱིར་མི་ལྡོག་པའི་ས་ཐོབ་པའི་རྒྱལ་སྲས་ནི། ཉི་ཁྲི་ལྔ་སྟོང་པ་ལས། ཤཱ་ར་དྭ་ཏིའི་བུ། འདི་ལྟར་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་ཕ་རོལ་ཏུ་ཕྱིན་པ་དྲུག་ལ་སྤྱོད་པ་དག དང་པོ་སེམས་བསྐྱེད་པ་ཉིད་ཀྱིས་བྱང་ཆུབ་སེམས་དཔའི་སྐྱོན་མེད་པར་བཞུགས་ནས། ཕྱིར་མི་ལྡོག་པའི་ས་ཐོབ་པའང་ཡོད་དོ། །ཞེས་གསུངས་སོ། །མདོ་འདི་ཉ་ཊཱིཀ་ལས་ཕྱིར་མི་འོང་འདུ་བྱེད་མེད་པར་འདའ་བའི་མིང་ཅན་གྱི་བྱང་སེམས་ལ་སྦྱར་ནས་གསུངས་སོ། ། བཅུ་བཞི་པ་སངས་རྒྱས་ནས་ཆོས་ཡུན་རིང་དུ་གནས་པའི་རྒྱལ་སྲས།བཅུ་བཞི་པ་སངས་རྒྱས་ནས་ཆོས་ཡུན་རིང་དུ་གནས་པའི་རྒྱལ་སྲས་ནི། ཉི་ཁྲི་ལྔ་སྟོང་པ་ལས། ཤཱ་ར་དྭ་ཏིའི་བུ། འདི་ལྟར་ཡང་སེམས་དཔའ་སེམས་དཔའ་ཆེན་པོ་དང་པོ་སེམས་བསྐྱེད་པ་ཉིད་ཀྱིས། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་འཚང་རྒྱ་ཞིང༌། མངོན་པར་སངས་རྒྱས་ནས་ཆོས་ཀྱི་འཁོར་ལོ་བསྐོར་ཏེ། སེམས་ཅན་ཚད་མེད་གྲངས་མེད་པའི་དོན་བྱས་ནས། ཕུང་པོ་མ་ལུས་པའི་མྱ་ངན་ལས་འདས་པའི་དབྱིངས་སུ་ཡོངས་སུ་མྱ་ངན་ལས་འདའ་ཞིང༌། དེ་དག་ཡོངས་སུ་མྱ་ངན་ལས་འདས་ནས་ཀྱང༌། དམ་པའི་ཆོས་བསྐལ་པའམ། བསྐལ་པ་བས་ལྷག་པར་གནས་པ་དག་ཀྱང་ཡོད་དོ། །ཞེས་གསུངས་སོ། །མདོ་འདི་ཉ་ཊཱིཀ་ལས་ཕྱིར་མི་འོང་སྐྱེས་ནས་འདའ་བའི་མིང་ཅན་གྱི་བྱང་སེམས་ལ་སྦྱར་ནས་གསུངས་སོ། ། བཅོ་ལྔ་པ་སངས་རྒྱས་ཀྱི་བརྒྱུད་དེ་སངས་རྒྱས་ལ་ལྟ་བའི་རྒྱལ་སྲས།བཅོ་ལྔ་པ་སངས་རྒྱས་ཀྱི་བརྒྱུད་དེ་སངས་རྒྱས་ལ་ལྟ་བའི་རྒྱལ་སྲས་ནི། ཉི་ཁྲི་ལྔ་སྟོང་པ་ལས།ཤཱ་ར་དྭ་ཏིའི་བུ། འདི་ལྟར་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་དང་པོ་སེམས་བསྐྱེད་པ་ཉིད་ཀྱིས། ཤེས་རབ་ཀྱི་ཕ་རོལ་ཏུ་ཕྱིན་པའི་རྣལ་འབྱོར་ལ་སྙོམས་པར་འཇུག་ཅིང༌།དེ་དག་བྱང་ཆུབ་སེམས་དཔའ་བྱེ་བ་ཁྲག་ཁྲིག་བརྒྱ་སྟོང་དུ་མ་དང་ལྷན་ཅིག་སངས་རྒྱས་ཀྱི་ཞིང་ནས་སངས་རྒྱས་ཀྱི་ཞིང་དུ་སངས་རྒྱས་བཅོམ་ལྡན་འདས་རྣམས་བལྟ་བ་དང༌། སེམས་ཅན་ཡོངས་སུ་སྨིན་པར་བྱ་བ་དང༌། སངས་རྒྱས་ཀྱི་ཞིང་ཡོངས་སུ་དག་པར་བྱ་བའི་དོན་དུ་འདོང་བ་དག་ཀྱང་ཡོད་དོ། །ཞེས་གསུངས་སོ། ། བཅུ་དྲུག་པ་སྙོམས་འཇུག་དགུ་ལ་སྙོམས་པར་འཇུག་པའི་རྒྱལ་སྲས།བཅུ་དྲུག་པ་སྙོམས་འཇུག་དགུ་ལ་སྙོམས་པར་འཇུག་པའི་རྒྱལ་སྲས་ནི། ཉི་ཁྲི་ལྔ་སྟོང་པ་ལས། ཤཱ་ར་དྭ་ཏིའི་བུ། བྱང་ཆུབ་སེམས་དཔའ་སེམས་དཔའ་ཆེན་པོ་ཤེས་རབ་ཀྱི་ཕ་རོལ་ཏུ་ཕྱིན་པ་ལ་སྤྱོད་པ། བསམ་གཏན་བཞི་ཐོབ་པ། ཚད་མེད་པ་བཞི་དང༌། གཟུགས་མེད་པའི་སྙོམས་པར་འཇུག་པ་བཞི་ཐོབ་པ་དག བསམ་གཏན་དང༌། ཚད་མེད་པ་དང༌། གཟུགས་མེད་པའི་སྙོམས་པར་འཇུག་པ་དེ་དག་གིས་ཚུལ་དུ་མར་རྣམ་པར་རྩེ་ཞིང༌། འདི་ལྟ་སྟེ། བསམ་གཏན་དང་པོ་ལ་སྙོམས་པར་འཇུག་གོ །དེ་དག་བསམ་གཏན་དང་པོ་དེ་ལས་ལངས་ནས། འགོག་པའི་སྙོམས་པར་འཇུག་པ་ལ་མཉམ་པར་གཞོག་གོ །འགོག་པའི་སྙོམས་པར་འཇུག་པ་ལས་ལངས་ནས། བསམ་གཏན་གཉིས་པ་ལ་སྙོམས་པར་འཇུག་གོ །བསམ་གཏན་གཉིས་པ་ལས་ལངས་ནས། འགོག་པའི་སྙོམས་པར་འཇུག་པ་ལ་མཉམ་པར་གཞོག་གོ །དེ་ལས་ལངས་ནས་བསམ་གཏན་གསུམ་པ་ལ་སྙོམས་པར་འཇུག་གོ །དེ་ལས་ལངས་ནས་འགོག་པའི་སྙོམས་པར་འཇུག་པ་ལ་མཉམ་པར་གཞོག་གོ །དེ་ལས་ལངས་ནས་བསམ་གཏན་བཞི་པ་ལ་སྙོམས་པར་འཇུག་གོ །དེ་ལས་ལངས་ནས་འགོག་པའི་སྙོམས་པར་འཇུག་པ་ལ་མཉམ་པར་གཞོག་གོ །དེ་ལས་ལངས་ནས་ནམ་མཁའ་མཐའ་ཡས་སྐྱེ་མཆེད་ལའང་སྙོམས་པར་འཇུག་གོ །དེ་ལས་ལངས་ནས་འགོག་པའི་སྙོམས་པར་འཇུག་པ་ལ་མཉམ་པར་གཞོག་གོ །དེ་ལས་ལངས་ནས་རྣམ་ཤེས་མཐའ་ཡས་སྐྱེ་མཆེད་ལ་སྙོམས་པར་འཇུག་གོ །དེ་ལས་ལངས་ནས་འགོག་པའི་སྙོམས་པར་འཇུག་པ་ལ་མཉམ་པར་གཞོག་གོ །དེ་ལས་ལངས་ནས་ཅུང་ཟད་མེད་པའི་སྐྱེ་མཆེད་ལ་སྙོམས་པར་འཇུག་གོ །དེ་ལས་ལངས་ནས་འགོག་པའི་སྙོམས་པར་འཇུག་པ་ལ་མཉམ་པར་གཞོག་གོ །དེ་ལས་ལངས་ནས་འདུ་ཤེས་མེད་འདུ་ཤེས་མེད་མིན་སྐྱེ་མཆེད་ལ་སྙོམས་པར་འཇུག་གོ །དེ་ལས་ལངས་ནས་འགོག་པའི་སྙོམས་པར་འཇུག་པ་ལ་མཉམ་པར་གཞོག་གོ །ཤཱ་ར་དྭ་ཏིའི་བུ། དེ་ལྟར་བྱང་ཆུབ་སེམས་དཔའ་སེམས་དཔའ་ཆེན་པོ་ཤེས་རབ་ཀྱི་ཕ་རོལ་ཏུ་ཕྱིན་པ་ལ་སྤྱོད་པ་ཐབས་མཁས་པ་དང་ལྡན་པ་རྣམས་བསམ་གཏན་དང༌། ཚད་མེད་པ་དང༌། ཏིང་ངེ་འཛིན་དང༌། སྙོམས་པར་འཇུག་པ་འདི་དག་ཡང་དང་ཡང་དུ་རྣམ་པར་མནན་ཅིང་སྙོམས་པར་འཇུག་པ་དག་ཀྱང་ཡོད་དོ། །ཞེས་གསུངས་སོ། །མདོ་འདི་ཉ་ཊཱིཀ་ལས་ཕྱིར་མི་འོང་ལུས་མངོན་བྱེད་ཀྱི་མིང་ཅན་གྱི་བྱང་སེམས་ལ་སྦྱར་ནས་གསུངས་སོ། ། བཅུ་བདུན་པ་དྲན་ཉེ་སོགས་ཐོབ་ཅིང་རྒྱུན་ཞུགས་སོགས་ལ་འགོད་པའི་རྒྱལ་སྲས།བཅུ་བདུན་པ་དྲན་ཉེ་སོགས་ཐོབ་ཅིང་རྒྱུན་ཞུགས་སོགས་ལ་འགོད་པའི་རྒྱལ་སྲས་ནི། ཉི་ཁྲི་ལྔ་སྟོང་པ་ལས། ཤཱ་ར་དྭ་ཏིའི་བུ། འདི་ལྟར་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་དྲན་པ་ཉེ་བར་བཞག་པ་དང༌།ཡང་དག་པར་སྤོང་བ་དང༌། རྫུ་འཕྲུལ་གྱི་རྐང་བ་དང༌། དབང་པོ་དང༌། སྟོབས་དང༌། བྱང་ཆུབ་ཀྱི་ཡན་ལག་དང༌། འཕགས་པའི་ལམ་ཡན་ལག་བརྒྱད་པ་ཐོབ་པ། འཕགས་པའི་བདེན་པ་རྣམས་དང། བསམ་གཏན་རྣམས་དང༌། ཚད་མེད་པ་རྣམས་དང༌། གཟུགས་མེད་པའི་སྙོམས་པར་འཇུག་པ་རྣམས་དང༌། རྣམ་པར་ཐར་བ་བརྒྱད་དང༌། མཐར་གྱིས་གནས་པའི་སྙོམས་པར་དགུ་དང༌། སྟོང་པ་ཉིད་དང༌། མཚན་མ་མེད་པ་དང༌། སྨོན་པ་མེད་པ་དང༌། མངོན་པར་ཤེས་པ་རྣམས་ཐོབ་པ། ཏིང་ངེ་འཛིན་རྣམས་དང༌། གཟུངས་ཀྱི་སྒོ་རྣམས་ཐོབ་པ། དེ་བཞིན་གཤེགས་པའི་སྟོབས་བཅུ་དང༌། མི་འཇིགས་པ་བཞི་དང༌། སོ་སོ་ཡང་དག་པར་རིག་པ་བཞི་དང༌། སངས་རྒྱས་ཀྱི་ཆོས་མ་འདྲེས་པ་བཅོ་བརྒྱད་ཐོབ་པ་དང༌། རྣམ་པར་ཐར་བའི་སྒོ་གསུམ་པོ་ཐོབ་ཀྱང་རྒྱུན་དུ་ཞུགས་པའི་འབྲས་བུ་དང༌། ལན་གཅིག་ཕྱིར་འོང་བའི་འབྲས་བུ་དང༌། ཕྱིར་མི་འོང་བའི་འབྲས་བུ་དང༌། དགྲ་བཅོམ་པ་ཉིད་དང༌། རང་བྱང་ཆུབ་ཐོབ་པར་མི་བྱེད་ཀྱི། ཤེས་རབ་ཀྱི་ཕ་རོལ་ཏུ་ཕྱིན་པ་ལ་སྤྱོད་ཅིང༌། ཐབས་མཁས་པས་ཡོངས་སུ་བཟུང་བས་འཕགས་པའི་ལམ་ཡན་ལག་བརྒྱད་པ་སེམས་ཅན་རྣམས་ལ་སྟོན་པར་བྱེད་དེ། སེམས་ཅན་དེ་དག་དེས་རྒྱུན་དུ་ཞུགས་པའི་འབྲས་བུ་ཐོབ་པར་འགྱུར་བ་དང༌། ལན་གཅིག་ཕྱིར་འོང་བའི་འབྲས་བུ་དང༌། ཕྱིར་མི་འོང་བའི་འབྲས་་བུ་དང༌། དགྲ་བཅོམ་པ་ཉིད་དང༌།རང་བྱང་ཆུབ་ཐོབ་པར་འགྱུར་བར་བྱེད་པ་དག་ཀྱང་ཡོད་དེ། ཤཱ་ར་དྭ་ཏིའི་བུ། ཉན་ཐོས་དང་རང་སངས་རྒྱས་ཀྱི་འབྲས་བུ་ཐོབ་པར་བྱ་བའི་ཡེ་ཤེས་གང་ཡིན་པ་དེ་ནྀ་བྱང་ཆུབ་སེམས་དཔའ་སེམས་དཔའ་ཆེན་པོའི་བཟོད་པ་ཡིན་ཏེ། ཤཱ་ར་དྭ་ཏིའི་བུ། བྱང་ཆུབ་སེམས་དཔའ་སེམས་དཔའ་ཆེན་པོ་གང་ཤེས་རབ་ཀྱི་ཕ་རོལ་ཏུ་ཕྱིན་པ་དེ་ལྟ་བུས་དེ་ལྟར་རྣམ་པར་སྤྱོད་པ་དེ་དག་ནི་ཕྱིར་མི་ལྡོག་པ་ཡིན་པར་ཤེས་པར་བྱའོ། །ཞེས་གསུངས་སོ། ། བཅོ་བརྒྱད་པ་ཕྱིན་དྲུག་ལ་གནས་ཏེ་དགའ་ལྡན་གྱི་གནས་སྦྱོང་བའི་རྒྱལ་སྲས།བཅོ་བརྒྱད་པ་ཕྱིན་དྲུག་ལ་གནས་ཏེ་དགའ་ལྡན་གྱི་གནས་སྦྱོང་བའི་རྒྱལ་སྲས་ནི། ཉི་ཁྲི་ལྔ་སྟོང་པ་ལས། ཤཱ་ར་དྭ་ཏིའི་བུ། འདི་ལྟར་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་ཕ་རོལ་ཏུ་ཕྱིན་པ་དྲུག་ལ་གནས་ཤིང༌། དགའ་ལྡན་གྱི་གནས་ཡོངས་སུ་སྦྱོང་བ་དག་ཀྱང་ཡོད་དེ། ཤཱ་ར་དྭ་ཏིའི་བུ། བྱང་ཆུབ་སེམས་དཔའ་སེམས་དཔའ་ཆེན་པོ་དེ་དག་ནི་བསྐལ་པ་བཟང་པོ་པར་ཤེས་པར་བྱའོ། །ཞེས་གསུངས་སོ། ། བཅུ་དགུ་བ་བསམ་གཏན་སོགས་ཐོབ་ཅིང་བདེན་བཞི་ཁོང་དུ་ཆུད་ནས་རྟོགས་པ།བཅུ་དགུ་བ་བསམ་གཏན་སོགས་ཐོབ་ཅིང་བདེན་བཞི་ཁོང་དུ་ཆུད་ནས་རྟོགས་པ། བཅུ་དགུ་བ་བསམ་གཏན་སོགས་ཐོབ་ཅིང་བདེན་བཞི་ཁོང་དུ་ཆུད་ནས་རྟོགས་པར་མི་བྱེད་པ་ཚེ་གཅིག་གི་ཐོགས་པའི་རྒྱལ་སྲས་ནི། ཉི་ཁྲི་ལྔ་སྟོང་པ་ལས། ཤཱ་ར་དྭ་ཏིའི་བུ། འདི་ལྟར་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་ཤེས་རབ་ཀྱི་ཕ་རོལ་ཏུ་ཕྱིན་པ་ལ་སྤྱོད་པ། བསམ་གཏན་བཞི་ཐོབ་པ། ཚད་མེད་པ་བཞི་དང༌། གཟུགས་མེད་པའི་སྙོམས་པར་འཇུག་པ་བཞི་དང༌། བྱང་ཆུབ་ཀྱི་ཕྱོགས་ཀྱི་ཆོས་སུམ་ཅུ་རྩ་བདུན་ཐོབ་པ། མངོན་པར་ཤེས་པ་དྲུག་ཐོབ་པ། དེ་བཞིན་གཤེགས་པའི་སྟོབས་བཅུ་དང༌། མི་འཇིགས་པ་བཞི་དང༌། སོ་སོ་ཡང་དག་པར་རིག་པ་བཞི་དང༌། སངས་རྒྱས་ཀྱི་ཆོས་མ་འདྲེས་པ་བཅོ་བརྒྱད་ཐོབ་པ་དག་འཕགས་པའི་བདེན་པ་བཞི་ཁོང་དུ་ཆུད་པར་བྱ་བའི་དོན་དུ་སྤྱོད་ཀྱང༌། བདེན་པ་བཞི་རྟོགས་པར་མི་བྱེད་དག་ཀྱང་ཡོད་དེ། ཤཱ་ར་དྭ་ཏིའི་བུ། བྱང་ཆུབ་སེམས་དཔའ་སེམས་དཔའ་ཆེན་པོ་དེ་དག་ནི་ཚེ་གཅིག་གིས་ཐོགས་པར་ཤེས་པར་བྱའོ། །ཞེས་གསུངས་སོ། །མདོ་འདི་ཉ་ཊཱིཀ་ལས་ཕྱིར་འོང་ཚེ་གཅིག་བར་ཆད་གཅིག་པའི་མིང་ཅན་གྱི་བྱང་སེམས་ལ་སྦྱར་ནས་གསུངས་སོ། ། ཉི་ཤུ་པ་འཇིག་རྟེན་བརྒྱུད་ཅིང་སེམས་ཅན་བསྐུལ་བའི་རྒྱལ་སྲས།ཉི་ཤུ་པ་འཇིག་རྟེན་བརྒྱུད་ཅིང་སེམས་ཅན་བསྐུལ་བའི་རྒྱལ་སྲས་ནི། ཉི་ཁྲི་ལྔ་སྟོང་པ་ལས། ཤཱ་ར་དྭ་ཏིའི་བུ། འདི་ལྟར་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་ཕ་རོལ་ཏུ་ཕྱིན་པ་དྲུག་ལ་སྤྱོད་པ་དག་འཇིག་རྟེན་གྱི་ཁམས་ནས་འཇིག་རྟེན་གྱི་ཁམས་སུ་འདོང་ཞིང༌། དེ་དག་གི་སེམས་ཅན་རྣམས་བྱང་ཆུབ་ཏུ་ཡང་དག་པར་བསྐུལ་བ་བྱེད་ཅིང༌། སངས་རྒྱས་ཀྱི་ཞིང་ཡོངས་སུ་དག་པར་བྱེད་པ་དག་ཀྱང་ཡོད་དེ། ཤཱ་ར་དྭ་ཏིའི་བུ། བྱང་ཆུབ་སེམས་དཔའ་སེམས་དཔའ་ཆེན་པོ་དེ་དག་ནི་བསྐལ་བ་གྲངས་མེད་ཚད་མེད་པས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་འཚང་རྒྱའོ། །ཞེས་གསུངས་སོ། ། ཉེར་གཅིག་པ་སེམས་ཅན་གྱི་དོན་ལ་བརྩོན་ཞིང་སྒོ་གསུམ་དག་པའི་རྒྱལ་སྲས།ཉེར་གཅིག་པ་སེམས་ཅན་གྱི་དོན་ལ་བརྩོན་ཞིང་སྒོ་གསུམ་དག་པའི་རྒྱལ་སྲས་ནི། ཉི་ཁྲི་ལྔ་སྟོང་པ་ལས། ཤཱ་ར་དྭ་ཏིའི་བུ། འདི་ལྟར་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་ཕ་རོལ་ཏུ་ཕྱིན་པ་དྲུག་ལ་གནས་ཤིང་སེམས་ཅན་རྣམས་ཀྱི་དོན་དུ་རྟག་པར་བརྩོན་ཏེ། ནམ་ཡང་གནོད་པར་འགྱུར་བའི་ཚིག་མི་སྨྲ། གནོད་པ་དང་ལྡན་པའི་ལུས་ཀྱི་ལས་དང༌། ཡིད་ཀྱི་ལས་མི་བྱེད་པ་དག་ཀྱང་ཡོད་དོ། །ཞེས་གསུངས་སོ། ། ཉེར་གཉིས་པ་སངས་རྒྱས་ཀྱི་ཞིང་བརྒྱུད་ཅིང་ངན་འགྲོའི་རྒྱུད་གཅོད་པའི་རྒྱལ་སྲས།ཉེར་གཉིས་པ་སངས་རྒྱས་ཀྱི་ཞིང་བརྒྱུད་ཅིང་ངན་འགྲོའི་རྒྱུད་གཅོད་པའི་རྒྱལ་སྲས་ནི། ཉི་ཁྲི་ལྔ་སྟོང་བ་ལས། ཤཱ་ར་དྭ་ཏིའི་བུ། འདི་ལྟར་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་ཕ་རོལ་ཏུ་ཕྱིན་པ་དྲུག་ལ་གནས་ཤིང་སེམས་ཅན་གྱི་དོན་དུ་རྟག་ཏུ་བརྩོན་པས། སངས་རྒྱས་ཀྱི་ཞིང་ནས་སངས་རྒྱས་ཀྱི་ཞིང་དུ་འདོང་ཞིང༌། སེམས་ཅན་རྣམས་ཀྱི་ངན་སོང་གི་ལམ་གསུམ་པོ་རྒྱུན་གཅོད་པ་དག་ཀྱང་ཡོད་དོ། །ཞེས་གསུངས་སོ། །མདོ་འདི་ཉ་ཊཱིཀ་ཏུ་ཕྱིར་མི་འོང་འདུ་བྱེད་དང་བཅས་ཏེ་འདའ་བའི་མིང་ཅན་གྱི་བྱང་སེམས་ལ་སྦྱར་ནས་གསུངས་སོ། ། ཉེར་གསུམ་པ་སྦྱིན་པའི་ཕར་ཕྱིན་ལྷུར་ལེན་པའི་རྒྱལ་སྲས།ཉེར་གསུམ་པ་སྦྱིན་པའི་ཕར་ཕྱིན་ལྷུར་ལེན་པའི་རྒྱལ་སྲས་ནི། ཉི་ཁྲི་ལྔ་སྟོང་བ་ལས། ཤཱ་ར་དྭ་ཏིའི་བུ། འདི་ལྟར་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་ཕ་རོལ་ཏུ་ཕྱིན་པ་དྲུག་ལ་གནས་ཤིང་སྦྱིན་པའི་ཕ་རོལ་ཏུ་ཕྱིན་པ་ལྷུར་བྱས་ཏེ། སེམས་ཅན་རྣམས་ཀྱི་བདེ་བའི་ཡོ་བྱད་ཐམས་ཅད་ཉེ་བར་བསྒྲུབ་ཅིང༌། ཟས་འདོད་པ་རྣམས་ལ་ཟས་དང༌། སྐོམ་འདོད་པ་རྣམས་ལ་སྐོམ་དང༌། བཞོན་པ་འདོད་པ་རྣམས་ལ་བཞོན་པ་དང༌། མེ་ཏོག་དང༌། སྤོས་དང༌། ཕྲེང་བ་དང༌། བྱུག་པ་དང༌། མལ་སྟན་དང༌། གོས་དང༌། རྒྱན་དང༌། འཚོ་བ་དང༌། ཁྱིམ་འདོད་པ་རྣམས་ལ་ཁྱིམ་གྱིས་ཡོངས་སུ་སྡུད་ཅིང་འཚོ་བའི་ཡོ་བྱད་སྐྱོན་མེད་པ་ཡོངས་སུ་བསྒྲུབ་པ་དག་ཀྱང་ཡོད་དོ། །ཞེས་གསུངས་སོ། ། ཉེར་བཞི་པ་ཚུལ་ཁྲིམས་ཀྱི་ཕར་ཕྱིན་ལྷུར་ལེན་པའི་རྒྱལ་སྲས།ཉེར་བཞི་པ་ཚུལ་ཁྲིམས་ཀྱི་ཕར་ཕྱིན་ལྷུར་ལེན་པའི་རྒྱལ་སྲས་ནི། ཉི་ཁྲི་ལྔ་སྟོང་བ་ལས། ཚུལ་ཁྲིམས་ཀྱི་ཕ་རོལ་ཏུ་ཕྱིན་པ་ལྷུར་བྱས་ཏེ། སེམས་ཅན་རྣམས་ལུས་དང་ངག་དང་ཡིད་ཀྱི་སྡོམ་པ་ལ་རབ་ཏུ་འགོད་པ་དག་ཀྱང་ཡོད་དོ། །ཞེས་གསུངས་སོ། །ཉེར་ལྔ་པ་བཟོད་པའི་ཕར་ཕྱིན་ལྷུར་ལེན་པའི་རྒྱལ་སྲས་ནི། ཉི་ཁྲི་ལྔ་སྟོང་བ་ལས། བཟོད་པའི་ཕ་རོལ་ཏུ་ཕྱིན་པ་ལྷུར་བྱས་ཏེ། སེམས་ཅན་རྣམས་ཁྲོ་བ་མེད་པ་དང༌། གནོད་སེམས་མེད་པ་ལ་རབ་ཏུ་འགོད་པ་དག་ཀྱང་ཡོད་དོ། །ཞེས་གསུངས་སོ། ། ཉེར་དྲུག་པ་བརྩོན་འགྲུས་ཀྱི་ཕར་ཕྱིན་ལྷུར་ལེན་པའི་རྒྱལ་སྲས།ཉེར་དྲུག་པ་བརྩོན་འགྲུས་ཀྱི་ཕར་ཕྱིན་ལྷུར་ལེན་པའི་རྒྱལ་སྲས་ནི། ཉི་ཁྲི་ལྔ་སྟོང་པ་ལས། བརྩོན་འགྲུས་ཀྱི་ཕ་རོལ་ཏུ་ཕྱིན་པ་ལྷུར་བྱས་ཏེ། སེམས་ཅན་རྣམས་དགེ་བའི་ཆོས་ཐམས་ཅད་ལ་མངོན་པར་བརྩོན་པ་ལ་རབ་ཏུ་འགོད་པ་དག་ཀྱང་ཡོད་དོ། །ཞེས་གསུངས་སོ། ། ཉེར་བདུན་པ་བསམ་གཏན་གྱི་ཕར་ཕྱིན་ལྷུར་ལེན་པའི་རྒྱལ་སྲས།ཉེར་བདུན་པ་བསམ་གཏན་གྱི་ཕར་ཕྱིན་ལྷུར་ལེན་པའི་རྒྱལ་སྲས་ནི། ཉི་ཁྲི་ལྔ་སྟོང་བ་ལས། བསམ་གཏན་གྱི་ཕ་རོལ་ཏུ་ཕྱིན་པ་ལྷུར་བྱས་ཏེ། སེམས་ཅན་རྣམས་ཞི་གནས་རྩེ་གཅིག་ཏུ་བྱ་བ་དང༌། འདོད་པ་ལས་དབེན་པ་ལ་རབ་ཏུ་འགོད་པ་དག་ཀྱང་ཡོད་དོ། །ཞེས་གསུངས་སོ། །ཉེར་བརྒྱད་པ་ཤེས་རབ་ཀྱི་ཕར་ཕྱིན་ལྷུར་ལེན་པའི་རྒྱལ་སྲས་ནི། ཉི་ཁྲི་ལྔ་སྟོང་བ་ལས། ཤེས་རབ་ཀྱི་ཕ་རོལ་ཏུ་ཕྱིན་པ་ལྷུར་བྱས་ཏེ། སེམས་ཅན་རྣམས་ཆོས་ཐམས་ཅད་ལ་མངོན་པར་ཞེན་པ་མེད་པར་འགོད་པ་དག་ཀྱང་ཡོད་དོ། །ཤཱ་ར་དྭ་ཏིའི་བུ། འདི་ལྟར་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་ཕ་རོལ་ཏུ་ཕྱིན་པ་དྲུག་ལ་གནས་ཤིང༌། ཤེས་རབ་ཀྱི་ཕ་རོལ་ཏུ་ཕྱིན་པ་ལྷུར་བྱས་ཏེ། དེ་བཞིན་གཤེགས་པའི་སྐུ་ཅི་འདྲ་བ་དེ་འདྲ་བའི་ལུས་སུ་མངོན་པར་སྤྲུལ་ཏེ། སེམས་ཅན་དམྱལ་བའི་སེམས་ཅན་རྣམས་དང༌། བྱོལ་སོང་གི་སྐྱེ་གནས་པའི་སེམས་ཅན་རྣམས་དང༌། གཤིན་རྗེའི་འཇིག་རྟེན་པའི་སེམས་ཅན་རྣམས་ལ་ངན་སོང་ཐམས་ཅད་ལས་ཡང་དག་པར་འདའ་བའི་ཕྱིར་ཆོས་སྟོན་པ་དག་ཀྱང་ཡོད་དོ། །ཞེས་གསུངས་སོ། ། ཉེར་དགུ་བ་སངས་རྒྱས་སུ་སྤྲུལ་ནས་ཤར་གྱི་ཞིང་དུ་མར་ཆོས་སྟོན་པའི་རྒྱལ་སྲས།ཉེར་དགུ་བ་སངས་རྒྱས་སུ་སྤྲུལ་ནས་ཤར་གྱི་ཞིང་དུ་མར་ཆོས་སྟོན་པའི་རྒྱལ་སྲས་ནི། ཉི་ཁྲི་ལྔ་སྟོང་བ་ལས། ཤཱ་ར་དྭ་ཏིའི་བུ། འདི་ལྟར་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་ཕ་རོལ་ཏུ་ཕྱིན་པ་དྲུག་ལ་གནས་ཤིང༌། སངས་རྒྱས་ཀྱི་སྐུ་ཅི་འདྲ་བ་དེ་འདྲ་བའི་ལུས་སུ་མངོན་པར་སྤྲུལ་ནས། ཤར་ཕྱོགས་ཀྱི་སངས་རྒྱས་ཀྱི་ཞིང་གངྒཱའི་ཀླུང་གི་བྱེ་མ་སྙེད་དག་ཏུ་འདོང་ཞིང་སེམས་ཅན་རྣམས་ལ་ཆོས་སྟོན་པ་དང༌། དེ་བཞིན་གཤེགས་པ་རྣམས་ལ་བསྙེན་བཀུར་བྱེད་པ་དང༌། ཆོས་ཉན་ཅིང་བྱང་ཆུབ་སེམས་དཔའི་དགེ་འདུན་དང༌། སངས་རྒྱས་ཀྱི་ཞིང་གི་ཡོན་ཏན་རྣམ་པར་ཕྱེ་བ་དག་ཀྱང་མཐོང་བར་བྱེད་ཅིང༌། དེ་དག་སངས་རྒྱས་ཀྱི་ཞིང་དེ་དག་གི་མཚན་མ་ཡོངས་སུ་བཟུང་སྟེ། དེ་བས་ཀྱང་རྒྱ་ཆེ་བ་ཁྱད་པར་དུ་འཕགས་པའི་སངས་རྒྱས་ཀྱི་ཞིང་མང་པོ་ཡོངས་སུ་བསྒྲུབ་ཅིང༌། སངས་རྒྱས་ཀྱི་ཞིང་དེ་དག་ཏུ་བྱང་ཆུབ་སེམས་དཔའ་སེམས་དཔའ་ཆེན་པོ་ཚེ་གཅིག་གིས་ཐོགས་པ་ཤ་སྟག་སྐྱེ་བར་བྱེད་པ་དག་ཀྱང་ཡོད་དོ། །ཞེས་གསུངས་སོ། ། སུམ་ཅུ་པ་ལྷོ་ནས་སོ་བརྒྱད་པ་སྟེང་གི་སངས་རྒྱས་སུ་སྤྲུལ་ནས་གངྒཱའི་ཀླུང་གི་བྱེ་མ་སྙེད་དུ་གདོང་ཞིང་ཆོས་སྟོན་པའི་བར་གྱི་རྒྱལ་སྲས་དགུ།སུམ་ཅུ་པ་ལྷོ་ནས་སོ་བརྒྱད་པ་སྟེང་གི་སངས་རྒྱས་སུ་སྤྲུལ་ནས་གངྒཱའི་ཀླུང་གི་བྱེ་མ་སྙེད་དུ་གདོང་ཞིང་ཆོས་སྟོན་པའི་བར་གྱི་རྒྱལ་སྲས་དགུ་ནི། ཉི་ཁྲི་ལྔ་སྟོང་བ་ལས། དེ་བཞིན་དུ་ལྷོ་དང༌། ནུབ་དང༌། བྱང་དང༌། བྱང་ཤར་དང༌། ཤར་ལྷོ་དང༌། ལྷོ་ནུབ་དང༌། ནུབ་བྱང་དང༌། འོག་དང༌། སྟེང་གི་ཕྱོགས་ཀྱི་ཕྱོགས་རེ་རེ་ཞིང༌། སངས་རྒྱས་ཀྱི་ཞིང་གངྒཱའི་ཀླུང་གི་བྱེ་མ་སྙེད་དག་ཏུ་འདོང་ཞིང༌། སེམས་ཅན་རྣམས་ལ་ཆོས་སྟོན་པ་དང༌། དེ་བཞིན་གཤེགས་པ་རྣམས་ལ་བསྙེན་བཀུར་བྱེད་པ་དང༌། ཆོས་ཉན་ཅིང་བྱང་ཆུབ་སེམས་དཔའི་དགེ་འདུན་དང༌། སངས་རྒྱས་ཀྱི་ཞིང་གི་ཡོན་ཏན་རྣམ་པར་ཕྱེ་བ་དག་ཀྱང་མཐོང་བར་བྱེད་ཅིང༌། དེ་དག་སངས་རྒྱས་ཀྱི་ཞིང་དེ་དག་གི་མཚན་མ་ཡོངས་སུ་བཟུང་སྟེ། དེ་བས་ཀྱང་རྒྱ་ཆེ་བ་ཁྱད་པར་དུ་འཕགས་པའི་སངས་རྒྱས་ཀྱི་ཞིང་མང་པོ་ཡོངས་སུ་བསྒྲུབ་ཅིང༌། སངས་རྒྱས་ཀྱི་ཞིང་དེ་དག་ཏུ་བྱང་ཆུབ་སེམས་དཔའ་སེམས་དཔའ་ཆེན་པོ་ཚེ་གཅིག་གིས་ཐོགས་པ་ཤ་སྟག་སྐྱེ་བར་བྱེད་པ་དག་ཀྱང་ཡོད་དོ། །ཞེས་གསུངས་སོ། །སྐབས་འདིར་ཡུམ་གསུམ་གནོད་འཇོམས་ལས་ཕྱོགས་བཅུ་སྡོམ་པའི་སྒོ་ནས་རྒྱལ་སྲས་ཞིག་གསུངས་ཏེ། དེ་ལས། སུམ་ཅུ་རྩ་བདུན་པ་དག་ནི། ཕྱོགས་བཅུའི་སེམས་ཅན་ཡོངས་སུ་སྨིན་པར་བྱས་ནས་ཕྱོགས་བཅུའི་སངས་རྒྱས་རྣམས་ལ་བསྙེན་བཀུར་བྱས་ཏེ། དེ་ན་མཐོང་བའི་སངས་རྒྱས་ཀྱི་ཞིང་གི་ཡོན་ཏན་གྱི་ཁྱད་པར་བཟུང་ནས་བདག་གི་སངས་རྒྱས་ཀྱི་ཞིང་དུ་བསྒྲུབས་ཏེ། དེ་ནི་སྐྱེ་བ་གཅིག་གིས་ཐོགས་པར་གནས་སོ། །ཞེས་གསུངས་པའོ། །སོ་དགུ་བ་མཚན་དང་ལྡན་ཞིང་ལུས་དག་པའི་རྒྱལ་སྲས་ནི། ཉི་ཁྲི་ལྔ་སྟོང་བ་ལས། ཤཱ་ར་དྭ་ཏིའི་བུ། འདི་ལྟར་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་ཕ་རོལ་ཏུ་ཕྱིན་པ་དྲུག་ལ་སྤྱོད་པའི་ཚེ། མི་ཆེན་པོའི་མཚན་སུམ་ཅུ་རྩ་གཉིས་དང་ལྡན་པར་བྱས་ཏེ། དབང་པོ་གསལ་ཞིང་ཡོངས་སུ་དག་པ་དང་ལྡན་པར་གྱུར་ནས། དེ་དག་ལུས་ཡོངས་སུ་དག་པ་དེ་དག་གིས་སྐྱེ་བོ་མང་པོ་དགའ་བ་དང་མོས་པ་བསྐྱེད་དེ། དེ་དག་འགྲོ་བ་མང་པོའི་སྙིང་དུ་སྡུག་ཅིང་ཡིད་དུ་འོང་བ་དང༌། སེམས་ཅན་དེ་དག་ཀྱང་སེམས་མོས་པར་གྱུར་པའི་དགེ་བའི་རྩ་བ་དེ་ཉིད་ཀྱིས་མཐར་གྱིས་ཐེག་པ་གསུམ་གྱིས་ཡོངས་སུ་མྱ་ངན་ལས་འདའ་བར་བྱེད་པ་དག་ཀྱང་ཡོད་དོ། །ཤཱ་ར་དྭ་ཏིའི་བུ། བྱང་ཆུབ་སེམས་དཔའ་སེམས་དཔའ་ཆེན་པོ་འདི་ལྟར་ཤེས་རབ་ཀྱི་ཕ་རོལ་ཏུ་ཕྱིན་པ་ལ་སྤྱོད་པའི་ཚེ། ལུས་ཡོངས་སུ་དག་པ་དང༌། ངག་ཡོངས་སུ་དག་པ་དང༌། ཡིད་ཡོངས་སུ་དག་པ་ལ་བསླབ་པར་བྱའོ། །ཞེས་གསུངས་སོ། །མདོ་འདི་ཉ་ཊཱིཀ་ཏུ་ཕྱིར་མི་འོང་མཐོང་ཆོས་ཞིའི་མིང་ཅན་གྱི་བྱང་སེམས་ལ་སྦྱར་ནས་གསུངས་སོ། ། བཞི་བཅུ་པ་དབང་པོ་དག་ཅིང་བདག་བསྟོད་གཞན་སྨོད་མི་བྱེད་པའི་རྒྱལ་སྲས།བཞི་བཅུ་པ་དབང་པོ་དག་ཅིང་བདག་བསྟོད་གཞན་སྨོད་མི་བྱེད་པའི་རྒྱལ་སྲས་ནི། ཉི་ཁྲི་ལྔ་སྟོང་བ་ལས། ཤཱ་ར་དྭ་ཏིའི་བུ། འདི་ལྟར་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་ཕ་རོལ་ཏུ་ཕྱིན་པ་དྲུག་ལ་སྤྱོད་པ་དག་དབང་པོ་ཤིན་ཏུ་གསལ་བ་ཐོབ་ནས། དེ་དག་དབང་པོ་ཤིན་ཏུ་གསལ་བ་དེ་དག་གིས་བདག་མི་བསྟོད་ཅིང་གཞན་མི་སྨོད་པ་དག་ཀྱང་ཡོད་དོ། །ཞེས་གསུངས་སོ། ། བཞི་བཅུ་རྩ་གཅིག་པ་སེམས་བསྐྱེད་ནས་ངན་སོང་མི་ལྟུང་བའི་རྒྱལ་སྲས།བཞི་བཅུ་རྩ་གཅིག་པ་སེམས་བསྐྱེད་ནས་ངན་སོང་མི་ལྟུང་བའི་རྒྱལ་སྲས་ནི། ཉི་ཁྲི་ལྔ་སྟོང་བ་ལས། ཤཱ་ར་དྭ་ཏིའི་བུ། འདི་ལྟར་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་དང་པོ་སེམས་བསྐྱེད་ཕྱིན་ཆད། སྦྱིན་པའི་ཕ་རོལ་ཏུ་ཕྱིན་པ་དང༌། ཚུལ་ཁྲིམས་ཀྱི་ཕ་རོལ་ཏུ་ཕྱིན་པ་ལ་གནས་ཤིང༌། ཕྱིར་མི་ལྡོག་པའི་ས་མ་ཐོབ་ཀྱི་བར་དུ་ནམ་ཡང་དབུལ་བར་མི་འགྱུར་ཞིང༌། ལོག་པར་འགྲོ་བ་དང༌། ངན་སོང་དུ་མི་ལྟུང་བ་དག་ཀྱང་ཡོད་དོ། །ཞེས་གསུངས་སོ། ། བཞི་བཅུ་རྩ་གཉིས་པ་སེམས་བསྐྱེད་ནས་དགེ་བཅུའི་ལམ་མི་གཏོང་བའི་རྒྱལ་སྲས།བཞི་བཅུ་རྩ་གཉིས་པ་སེམས་བསྐྱེད་ནས་དགེ་བཅུའི་ལམ་མི་གཏོང་བའི་རྒྱལ་སྲས་ནི། ཉི་ཁྲི་ལྔ་སྟོང་བ་ལས། ཤཱ་ར་དྭ་ཏིའི་བུ། འདི་ལྟར་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་དང་པོ་སེམས་བསྐྱེད་ཕྱིན་ཆད། ཕྱིར་མི་ལྡོག་པའི་ས་མ་ཐོབ་ཀྱི་བར་དུ་ནམ་ཡང་དགེ་བ་བཅུའི་ལས་ཀྱི་ལམ་མི་གཏོང་བ་དག་ཀྱང་ཡོད་དོ། །ཞེས་གསུངས་སོ། །བཞི་བཅུ་རྩ་གསུམ་པ་འཁོར་སྒྱུར་གྱི་ལུས་བཟུང་ནས་སེམས་ཅན་ཡོངས་སུ་སྡུད་དེ་དགེ་བཅུ་ལ་འགོད་པའི་རྒྱལ་སྲས་ནི། ཉི་ཁྲི་ལྔ་སྟོང་བ་ལས། ཤཱ་ར་དྭ་ཏིའི་བུ། འདི་ལྟར་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་སྦྱིན་པའི་ཕ་རོལ་ཏུ་ཕྱིན་པ་དང༌། ཚུལ་ཁྲིམས་ཀྱི་ཕ་རོལ་ཏུ་ཕྱིན་པ་ལ་གནས་ཤིང༌། འཁོར་ལོས་བསྒྱུར་བའི་རྒྱལ་པོར་གྱུར་ནས། དེ་དག་དགེ་བ་བཅུའི་ལས་ཀྱི་ལམ་རྣམས་ལ་སེམས་ཅན་རབ་ཏུ་འགོད་པ་དང༌། སྦྱིན་པ་དང༌། ངག་སྙན་པས་སེམས་ཅན་ཡོངས་སུ་སྡུད་པ་དག་ཀྱང་ཡོད་དོ། །ཞེས་གསུངས་སོ། །བཞི་བཅུ་རྩ་གཉིས་པ་དང་བཞི་བཅུ་རྩ་གསུམ་པ་འདི་གཉིས་གཅིག་ཏུ་བྱས་ནས་ཡུམ་གསུམ་གནོད་འཇོམས་ལས་གསུངས་ཏེ། དེ་ལས། སྦྱིན་པ་དང་ཚུལ་ཁྲིམས་ཀྱི་ཕ་རོལ་ཏུ་ཕྱིན་པ་ལ་ལྷུར་ལེན་ཅིང་ཚེ་རབས་ཀུན་ཏུ་འཁོར་ལོས་བསྒྱུར་བར་གྱུར་ནས། རྫུ་འཕྲུལ་གྱི་སྟོབས་དེས་སེམས་ཅན་རྣམས་བསྡུས་ཏེ་སྦྱིན་པ་དང་ཚུལ་ཁྲིམས་ལ་འགོད་དོ། །ཞེས་གསུངས་སོ། །འདི་གཉིས་འབུམ་གྱི་གནོད་འཇོམས་སུ་སོ་སོར་གསུངས་ཏེ། དེ་༧༢ལས། ཤཱ་ར་དྭ་ཏིའི་བུ་འདི་ལྟར་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་དང་པོ་སེམས་བསྐྱེད་ཕྱིན་ཆད་ཕྱིར་མི་ལྡོག་པའི་ས་མ་ཐོབ་ཀྱི་བར་ཏུ་ནམ་ཡང་དགེ་བ་བཅུའི་ལས་ཀྱི་ལམ་མི་གཏོང་བ་དག་ཀྱང་ཡོད་དོ། །ཞེས་བྱ་བ་ནི། བྱང་ཆུབ་སེམས་དཔའ་ཁ་ཅིག་དགེ་བཅུའི་ལས་ཀྱི་ལམ་ལྟ་བུར་བླངས་ནས་ས་དང་པོ་ཐོབ་པར་བྱས་ཏེ། སེམས་ཅན་རྣམས་ཀྱང་དགེ་བ་བཅུ་ལ་འགོད་པ་དག་ཀྱང་ཡོད་དོ། །ཞེས་བསྟན་པ་སྟེ་དེ་ནི་བཞི་བཅུ་གཉིས་པའོ། །ཞེས་དང༌། འཁོར་ལོས་བསྒྱུར་བའི་རྒྱལ་པོར་གྱུར་ནས་སེམས་ཅན་རྣམས་དགེ་བ་བཅུ་ལ་བཀོད་དེ། བསྡུ་བ་རྣམ་པ་གཉིས་ཀྱིས་སྡུད་པ་དག་ཀྱང་ཡོད་དོ། །ཞེས་བསྟན་པ་སྟེ། དེ་བཞི་བཅུ་གསུམ་པའོ། །ཞེས་གསུངས་སོ། །བཞི་བཅུ་རྩ་བཞི་པ་འཁོར་སྒྱུར་གྱི་ལུས་བཟུང་ནས་སངས་རྒྱས་བྱེ་བ་ཁྲིག་ཁྲིག་བརྒྱ་སྟོང་ལ་མཆོད་པའི་རྒྱལ་སྲས་ནི། ཉི་ཁྲི་ལྔ་སྟོང་བ་ལས། ཤཱ་ར་དྭ་ཏིའི་བུ།འདི་ལྟར་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་སྦྱིན་པའི་ཕ་རོལ་ཏུ་ཕྱིན་པ་དང༌།ཚུལ་ཁྲིམས་ཀྱི་ཕ་རོལ་ཏུ་ཕྱིན་པ་ལ་གནས་ཤིང༌། འཁོར་ལོས་སྒྱུར་བའི་རྒྱལ་སྲིད་ཡོངས་སུ་བཟུང་སྟེ། འཁོར་ལོས་སྒྱུར་བའི་རྒྱལ་སྲིད་བརྒྱ་སྟོང་དུ་མ་ལ་གནས་ཤིང་དེ་ལ་གནས་ནས་སངས་རྒྱས་བྱེ་བ་ཁྲག་ཁྲིག་བརྒྱ་སྟོང་དུ་མ་མཉེས་པར་བྱེད་དེ། སངས་རྒྱས་བཅོམ་ལྡན་འདས་དེ་དག་ལ་ཡོ་བྱད་ཐམས་ཅད་དང༌། མཆོད་པ་སྣ་ཚོགས་ཀྱིས་རིམ་གྲོ་དང་བཀུར་སྟི་དང་བསྟི་སྟང་དང་མཆོད་པ་བྱེད་པ་དག་ཀྱང་ཡོད་དོ། །ཞེས་གསུངས་སོ། །ཡང་མདོ་འདི་ཉ་ཊཱིཀ་ཏུ་ཕྱིར་མི་འོང་མཐོང་ཆོས་ཞིའི་མིང་ཅན་གྱི་བྱང་སེམས་ལ་སྦྱར་ནས་གསུངས་སོ། ། བཞི་བཅུ་རྩ་ལྔ་བ་ལྟ་ངན་ཅན་ལ་ཆོས་ཀྱི་སྣང་བ་འབྲལ་བར་མི་བྱེད་པའི་རྒྱལ་སྲས།བཞི་བཅུ་རྩ་ལྔ་བ་ལྟ་ངན་ཅན་ལ་ཆོས་ཀྱི་སྣང་བ་འབྲལ་བར་མི་བྱེད་པའི་རྒྱལ་སྲས་ནི། ཉི་ཁྲི་ལྔ་སྟོང་བ་ལས། ཤཱ་ར་དྭ་ཏིའི་བུ། འདི་ལྟར་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་ཕ་རོལ་ཏུ་ཕྱིན་པ་དྲུག་ལ་གནས་ཤིང༌། སེམས་ཅན་ལོག་པར་ལྟ་བའི་མུན་པ་ཅན་རྣམས་ལ། སངས་རྒྱས་ཀྱི་ཆོས་ཀྱིས་སྣང་བར་བྱེད་ཅིང༌། བདག་ཉིད་ཀྱང་ནམ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་སངས་མ་རྒྱས་ཀྱི་བར་དུ། སངས་རྒྱས་ཀྱི་ཆོས་སྣང་བ་དེའང་ནམ་ཡང་འབྲལ་བར་མི་བྱེད་པ་དག་ཀྱང་ཡོད་དེ། ཤཱ་ར་དྭ་ཏིའི་བུ། འདི་ནི་བྱང་ཆུབ་སེམས་དཔའ་སེམས་དཔའ་ཆེན་པོ་སངས་རྒྱས་ཀྱི་ཆོས་ལ་ཡང་དག་པར་བྱུང་བ་ཡིན་ནོ། །ཞེས་གསུངས་སོ། །འཕགས་པའི་ལུགས་ལ་མདོ་འདི་ཉ་ཊཱིཀ་ཏུ་དགྲ་བཅོམ་ཞུགས་པའི་མིང་ཅན་གྱི་བྱང་སེམས་ལ་སྦྱར་ནས་གསུངས་སོ། །དེ་ལྟར་འཐད་དེ། ཉི་ཁྲི་ལྔ་སྟོང་བའི་བཤད་པ་རྫོགས་ལྡན་ལས། ༡ ཤཱ་ར་དྭ་ཏིའི་བུ། ཕྲེང་ཕྱེད་དང་གཉིས་ན། འདོད་པའི་ཁམས་སུ་མིའི་ནང་དུ་སྐྱེ་བའང་ཡོད་དོ། །༢ ཕྲེང་གཅིག་ན། རྣོ་བ་ཡང་མ་ཡིན་ནོ། ། ༣ ཤཱ་ར་དྭ་ཏིའི་བུ། ཕྲེང་དྲུག་ན། འཚང་རྒྱའོ། ། ༤ཤཱ་ར་དྭ་ཏིའི་བུ། ཕྲེང་ལྔ་ན། ཕྱིར་རོ། །༥ ཤཱ་ར་དྭ་ཏིའི་བུ། ཕྲེང་དྲུག་ན། མཉེས་པར་བྱེད་དོ། །༦ཤཱ་ར་དྭ་ཏིའི་བུ། ཕྲེང་བདུན་ན། གསོལ་བ་བཏབ་པ་བྱེད་དོ། །༧ ཕྲེང་བདུན། དག་ཀྱང་ཡོད་དོ། །དཔེར་ན་བདག་ཅག་གི་བཅོམ་ལྡན་འདས་བྱམས་པ་ལྟ་བུའོ། །ཞེས་དབུ་མ་པ་གསུངས། ༨ ཕྲེང་གཉིས་ལྷག་ན། འདོད་པ་དག་ཀྱང་ཡོད་དོ། ། ༩ ཤཱ་ར་དྭ་ཏིའི་བུ། ཕྲེང་གཉིས་ན། དག་ཀྱང་ཡོད་དོ། ། ༡༠ ཤཱ་ར་དྭ་ཏིའི་བུ། ཕྲེང་གཉིས་ན་འདོང་བ་དག་ཀྱང་ཡོད་དོ། ། ༡༡ ཤཱ་ར་དྭ་ཏིའི་བུ། ཕྲེང་གསུམ་ན། བྱེད་པ་དག་ཀྱང་ཡོད་དོ། །༡༢ ཕྲེང་ལྔ་ན། དོན་བྱེད་པ་ཡོད་དོ། །༡༣ ཕྲེང་ཅིག་ལྷག་ན། ས་འཐོབ་པར་ཡོད་དོ། ། ༡༤ ཕྲེང་ཕྱེད་དང་གསུམ་ན། གནས་པ་དག་ཀྱང་ཡོད་དོ། །༡༥ཕྲེང་གསུམ་ན། འདོང་པ་དག་ཀྱང་ཡོད་དོ། །༡༦ ཕྲེང་བཅུ་གཅིག་ན། རྣམ་པར་མནན་ཅིང་ཐོད་རྒལ་དུ་ཞེས་ཁྲི་བརྒྱད་སྟོང་པར་གསུངས། དག་ཀྱང་ཡོད་དོ། །༡༧ ཕྲེང་ཕྱེད་བཅུ་ན། ཤེས་པར་བྱའོ། །༡༨ ཕྲེང་གཉིས་ན་བསྐལ་བ་བཟང་པོ་འདི་ལས་སངས་རྒྱས་པར་ཤེས་ན་འཚང་རྒྱའོ། །དཔེར་ན་འཕགས་པ་འཇམ་དཔལ་གཞོན་ནུར་གྱུར་པ་ལ་སོགས་པ་ལྟ་བུའོ། །ཞེས་དབུ་མ་པ་གསུངས། ༢པར་བྱའོ། ། ༡༩ ཕྲེང་བཞི་ན་ཐོགས་པར་ཤེས་པར་བྱའོ། །༢༠ ཕྲེང་ཕྱེད་དང་གསུམ་༡ ཕྲེང་གཉིས་ན། ཡིད་ཀྱི་ལས་མི་བྱེད་ཅིང་སེམས་ཅན་རྣམས་ལ་ཆོས་འཆད་པ་དག་ཀྱང་ཡོད་དོ། །༢༢ ཕྲེང་གཉིས་ན། གཅོད་པ་དག་ཀྱང་ཡོད་དོ། །༢༣ ཕྲེང་གསུམ་ན་སྒྲུབ་པ་དག་ཀྱང་ཡོད་དོ། །༢༤ ཕྲེང་གཅིག་ན་དག་ཀྱང་ཡོད་དོ། །༢༥ ཕྲེང་གཅིག་ན། དག་ཀྱང་ཡོད་དོ། །༢༦ ཕྲེང་གཅིག་ན་འགོད་པ་དག་ཀྱང་ཡོད་དོ། །༢༧ ཕྲེང་གཅིག་ན་འགོད་པ་དག་ཀྱང་ཡོད་དོ། །༢༨ ཕྲེང་གསུམ་ན། སྟོན་པ་དག་ཀྱང་ཡོད་དོ། ། ༢༩ ཕྲེང་བཞི་ན། བྱེད་པ་དག་ཀྱང་ཡོད་དོ། །༣༠ དེ་བཞིན་དུ་ལྷོ་དང༌། ༣༡ ནུབ་དང༌།༣༢ བྱང་དང༌།༣༣བྱང་ཤར་དང༌། ༣༤ ཤར་ལྷོ་དང༌། ༣༥ ལྷོ་ནུབ་དང༌། ༣༦ ནུབ་བྱང་དང༌།༣༧འོག་དང༌། ༣༨ སྟེང་གི་ཕྱོགས་རེ་རེ་ཞིང༌། ཕྲེང་གསུམ་ལྷག་ན། བྱེད་པ་དག་ཀྱང་ཡོད་དོ། །༣༩ཕྲེང་ལྔ་ན། བསླབ་པར་བྱའོ། །༤༠ ཕྲེང་གཉིས་ན་མི་སྨོད་པ་དག་ཀྱང་ཡོད་དོ། །༤༡ ཕྲེང་གཉིས་ན་མི་ལྟུང་བ་དག་ཀྱང་ཡོད་དོ། །༤༢ ཕྲེང་གཅིག་ན། མི་གཏོང་བ་དག་ཀྱང་ཡོད་དོ། །༤༣ ཕྲེང་གཉིས་ན་སྡུད་པ་དག་ཀྱང་ཡོད་དོ། །༤༤ ཕྲེང་གསུམ་ན། མཆོད་པ་བྱེད་པ་དག་ཀྱང་ཡོད་དོ། ། ༤༥ ཕྲེང་གཉིས་ན། སྣང་བ་དེའང¿དེ་དང༌། དགེ་འདུན་དཀོན་མཆོག་ལ་¿ནམ་ཡང་འབྲལ་བར་མི་བྱེད་པ་དག་ཀྱང་ཡོད་དེ། ཞེས་གསུངས་སོ། །གཞུང་ཁ་ཅིག་ཏུ་རྒྱལ་སྲས་ཞེ་བརྒྱད་ཅེས་གྲགས་ཀྱང་འདིར་རྒྱལ་སྲས་ཞེ་ལྔ་བགྲང་ཚུལ་ནི་འབུམ་གྱི་གནོད་འཇོམས་དང་ཆོས་རྗེ་ཀུན་མཁྱེན་གྱི་ཉི་ཁྲི་ལྔ་སྟོང་བའི་བཤད་པ་རྫོགས་ལྡན་གྱི་ལུགས་ལྟར་བཀོད་པའོ། ། སྨྲས་པ། རྒྱལ་སྲས་དཔའ་བོས་གཅེས་འཛིན་བདུད་དཔུང་མ་ལུས་བཅོ༵༷མ། །རྒྱལ་སྲས་དཔའ་བོས་ཚ་གདུང་འཇོམས་ནས་ཞི་བསིལ་ལྡ༵༷ན། །རྒྱལ་སྲས་དཔའ་བོས་སྙིང་རྗེས་མཚོན་རྣོན་མྱ་ངན་འད༵༷ས། །རྒྱལ་སྲས་དཔའ་བོས་ཐེག་ཆེན་ལམ་དུ་དྲངས་བར་མཛ༵༷ད། །འདི་སྨྲས་དགེ་བས་བདག་གཞན་བརྗེ་བའི་རྒྱལ་སྲས་སེམས། །རིང་མིན་ཐོབ་ནས་མ་ལུས་སེམས་ཅན་རྒྱལ་སྲས་སེམས། །མངོན་དུ་གྱུར་ནས་ནམ་ཡང་མི་འབྲལ་རྒྱལ་སྲས་སེམས། །སྟོབས་བཅུ་མངའ་བའི་རྒྱལ་བསྟན་ཕྱོགས་ཀུན་ཁྱབ་གྱུར་ཅིག །ཅེས་པ་འདི་ནི་རྒྱལ་ཁམས་ཉུལ་བའི་དངོས་གྲུབ་དཔལ་གྱིས་ཇོ་ནང་བརྩེ་ཆེན་མཐོ་སློབ་ནས་གྲོ་བཞིན་ཟླ་བའི་ཚེས་ཉེར་བརྒྱད་ཀྱི་དགོང་ཐུན་དང་མཚན་ཐུན་དང་པོ་གཉིས་ལ་རྫོགས་པར་བྲིས་པའོ། ། མཁྱེན་གསུམ་རྣམ་དབྱེ་པདྨོ་འབྱེད་པའི་ཉི་ཟེར།མཁྱེན་གསུམ་རྣམ་དབྱེ་པདྨོ་འབྱེད་པའི་ཉི་ཟེར་ཞེས་བྱ་བ་བཞུགས་སོ།། དྲིན་ཅན་བླ་མ་དབྱེར་མེད་འཇམ་པའི་དབྱངས། །སྤྱི་བོར་བསྟེན་བཞིན་མཁྱེན་གསུམ་རྣམ་པ་དབྱེ། །གཞི་ཤེས་པ་ཡི་རྣམ་པ་ཉེར་བདུན་ནི། །མེད་པ་༡མི་སྐྱེ་༢དབེན་པ་༣མི་རྫི་བ་༤། །གནས་མེད་༥ནམ་མཁའ་༦བརྗོད་མེད་༧་མིང་མེད་པ་༨། །འགྲོ་མེད་༩་མི་འཕྲོགས་༡༠་མི་ཟད་༡༡་སྐྱེ་བ་མེད་༡༢། །བྱེད་པ་པོ་མེད་༡༣་ཤེས་པ་པོ་མེདདང༡༤། །འཕོ་བ་པོ་མེད་༡༥་འདུལ་བ་པོ་མེད་པ་༡༦། །ངོ་བོ་ཉིད་མེད་༡༧་མ་སྐྱེས་༡༨་མ་འགགས་པ་༡༩། ། བཟོད་མ་ནས་ཞི་༢༠་རང་བཞིན་མྱ་ངན་འདས་༢༡། །ཀུན་ནས་ཉོན་མེད་༢༢་རྣམ་པར་བྱང་བ་མེད་༢༣། །གོས་པ་མེད་པ་༢༤་སྤྲོས་པ་མེད་ཉིད་དང་༢༥། །རློམ་མེད་༢༦་མི་གཡོ་༢༧་བ་ཡི་རྣམ་པ་ཡིན། །ལམ་ཤེས་པ་ཡི་རྣམ་པ་སོ་དྲུག་ནི། །འདོད་ཆགས་བྲལ་བ་༢༨་མི་གནས་༢༩་ཞི་བ་༣༠་དང༌། །འདོད་ཆགས་༣༡་ཞེ་སྡང་༣༢་གཏི་མུག་མེད་པ་དང་༣༣། །ཀུན་ནས་ཉོན་མོངས་མེད་པ་༣༤་སེམས་ཅན་མེད་༣༥། །ཚད་མེད་༣༦་མཐའ་གཉིས་མ་འབྲེལ་༣༧་ཐ་མི་དད་༣༨། །མཆོག་འཛིན་མེད་པ་༣༩་རྣམ་པར་མི་རྟོག་པ་༤༠། །གཞལ་མེད་༤༡་ཆགས་པ་མེད་པ་༤༢་མི་རྟག་དང་༤༣། །སྡུག་བསྔལ་༤༤་སྟོང་བ་༤༥་གང་ཟག་བདག་མེད་པ་༤༦། །ཚད་མ་མེད་དང་༤༧་སྟོང་ཉིད་བཅུ་དྲུག་ནི། །ནང་སྟོང་༤༨་ཕྱི་སྟོང་༤༩་ཕྱི་ནང་སྟོང་བ་ཉིད་༥༠། །སྟོང་བ་ཉིད་སྟོང་༥༡་ཆེན་པོ་སྟོང་བ་ཉིད་༥༢། །དོན་དམ་སྟོང་བ་༥༣་འདུས་བྱས་སྟོང་བ་ཉིད་༥༤། །འདུས་མ་བྱས་སྟོང་༥༥་མཐའ་ལས་འདས་པ་སྟོང་༥༦། །ཐོག་མཐའ་མེད་སྟོང་༥༧་དོར་མེད་སྟོང་བ་ཉིད་༥༨། །རང་བཞིན་སྟོང་དང་༥༩་ཐམས་ཅད་སྟོང་པ་དང་༦༠། །རང་གི་མཚན་ཉིད་སྟོང་ཉིད་༦༡་མི་དམིགས་སྟོང་༦༢། །དངོས་པོ་མེད་པའི་ངོ་བོ་ཉིད་སྟོང་བ་༦༣། །ལམ་ཤེས་ཉིད་ཀྱི་རྣམ་པ་སཽ་དྲུག་གོ །རྣམ་མཁྱེན་རྣམ་པ་བརྒྱ་རྩ་བཅུ་རྣམས་ནི། ། ལུས་༦༤་ཚོར་༦༥་སེམས་༦༦་ཆོས་དྲན་པ་ཉེར་བཞག་པ་༦༧། །དགེ་ཆོས་མ་སྐྱེས་རྣམས་བསྐྱེད་༦༨་སྐྱེས་པ་སྲུང་༦༩། །མི་དགེ་མ་སྐྱེས་མི་སྐྱེད་༧༠་སྐྱེས་པ་སྤངས་༧༡། །འདུན་པ་༧༢་བརྩོན་འགྲུས་༧༣་སེམས་༧༤་དཔྱོད་རྫུ་འཕྲུལ་རྐང་༧༥། །དད་༧༦་བརྩོན་༧༧་དྲན་༧༨་ཏིང་༧༩་ཤེས་རབ་དབང་པོ་དང་༨༠། །དད་༨༡་བརྩོན་༨༢་དྲན་༨༣་ཏིང་༨༤་ཤེས་རབ་སྟོབས་དག་དང་༨༥། །དྲན་༨༦་ཆོས་རབ་ཏུ་རྣམ་འབྱེད་༨༧་བརྩོན་འགྲུས་༨༨་དང༌། །ཤིན་སྦྱངས་༨༩་དགའ་༩༠་ཏིང་༩༡་བཏང་སྙོམས་ཡན་ལག་༩༢་བདུན། །ཡང་དག་ལྟ་བ་༩༣་རྟོག་པ་༩༤་ངག་༩༥་ལས་མཐའ་༩༦། །འཚོ་བ་༩༧་རྩོལ་བ་༩༨་དྲན་པ་༩༩་ཏིང་ངེ་འཛིན་༡༠༠། །སྟོང་བ་༡༠༡་མཚན་མ་༡༠༢་སྨོན་མེད་རྣམ་ཐར་༡༠༣་གསུམ། །གཟུགས་ཅན་གཟུགས་ལྟ་༡༠༤་གཟུགས་མེད་གཟུགས་ལྟ་དང་༡༠༥། །སྡུག་པའི་རྣམ་ཐར་༡༠༦་སྤྲུལ་བའི་ལམ་རྣམ་གསུམ། །ནམ་མཁའ་མཐའ་ཡས་༡༠༧་རྣམ་ཤེས་མཐའ་ཡས་དང་༡༠༨། །ཅི་ཡང་མེད་དང་༡༠༩་སྲིད་རྩེ་༡༡༠་འགོག་རྣམ་ཐར་༡༡༡། །མཐོང་ཆོས་བདེ་བར་གནས་པའི་ལམ་ལྔ་ཡིན། །བསམ་གཏན་དང་པོ་༡༡༢་གཉིས་༡༡༣་གསུམ་༡༡༤་བཞིའི་སྙོམས་འཇུག་༡༡༥། །ནམ་མཁའ་མཐའ་ཡས་༡༡༦་རྣམ་ཤེས་མཐའ་ཡས་དང་༡༡༧། །ཅི་ཡང་མེད་དང་༡༡༨་སྲིད་རྩེ་༡༡༩་འགོག་སྙོམས་འཇུག་༡༢༠། །འདས་ལམ་དགུ་ཡིན་སྡུག་བསྔལ་༡༢༡་ཀུན་འབྱུང་༡༢༢་དང༌། །འགོག་༡༢༣་ལམ་ཆོས་བཟོད་སྤོང་པའི་ལམ་༡༢༤་བཞི་དང༌། །སྦྱིན་པ་༡༢༥་ཚུལ་ཁྲིམས་༡༢༦་བཟོད་པ་༡༢༧་བརྩོན་འགྲུས་དང་༡༢༨། །བསམ་གཏན་༡༢༩་ཤེས་རབ་༡༣༠་ཐབས་དང་༡༣༡་སྨོན་ལམ་༡༣༢་སྟོབས་༡༣༣། །ཡེ་ཤེས་ཕར་ཕྱིན་༡༣༤་སངས་རྒྱས་ལམ་རྣམ་བཅུ། །གནས་དང་གནས་མིན་༡༣༥་ལས་དང་རྣམ་སྨིན་༡༣༦་དང༌། །མོས་པ་སྣ་ཚོགས་༡༣༧་ཁམས་ཀྱི་རབ་དབྱེ་དང་༡༣༨། །དབང་བོ་མཆོག་དམན་༡༣༩་ཐམས་ཅད་འགྲོ་བའི་ལམ་༡༤༠། །ཀུན་བྱང་༡༤༡་སྔོན་གནས་རྗེས་དྲན་༡༤༢་འཆི་འཕོ་སྐྱེ་༡༤༣། །ཟག་པ་ཟད་པ་མཁྱེན་པའི་སྟོབས་༡༤༤་རྣམ་བཅུ། །རྟོགས་པ་ཕུན་ཚོགས་༡༤༥་བར་ཆད་ཚེས་བསྟན་པ་༡༤༦། །ངེས་འབྱུང་ལམ་བསྟན་༡༤༧་སྤངས་རྫོགས་མི་འཇིགས་༡༤༨་བཞི། །ཆོས་༡༤༩་དོན་༡༥༠་ངེས་ཚིག་༡༥༡་སྤོབས་སོ་སོར་༡༥༢། །སོ་སོར་རིག་བཞིའི་སྐུ་ལ་འཁྲུལ་མི་མངའ་༡༥༣། །གསུང་ལ་ཅ་ཅོ་མེད་པ་༡༥༤་དྲན་ཉམས་མེད་༡༥༥། །ཐུགས་ནི་མཉམ་པར་མ་བཞག་པ་ནི་མེད་༡༥༦། །ཐ་དད་འདུ་ཤེས་མེད་དང་༡༥༧་མ་བརྟགས་པའི། །བཏང་སྙོམས་མི་མངའ་༡༥༨་སྤྱོད་པས་བསྡུས་པ་དྲུག །འདུན་༡༥༩་བརྩོན་༡༦༠་དྲན་༡༦༡་ཏིང་༡༦༢་ཤེས་རབ་༡༦༣་རྣམ་གྲོལ་ལས། །ཉམས་མེད་པ་༡༦༤་སྟེ་རྟོགས་པས་བསྡུས་པ་དྲུག །སྐུ་༡༦༥་གསུང་༡༦༦་ཐུགས་༡༦༧་འཕྲིན་ཡེ་ཤེས་སྔོན་འགྲོ་ཞིང༌། །རྗེས་སུ་འབྲང་སྟེ་འཕྲིན་ལས་བསྡུས་པ་གསུམ། །འདས་༡༦༨་དང་མ་འོངས་༡༦༩་ད་ལྟ་ཆགས་ཐོགས་མེད་༡༧༠། །ཡེ་ཤེས་མངའ་སྟེ་ཡེ་ཤེས་ཀྱིས་བསྡུས་གསུམ། །དེ་དག་མ་འདྲེས་ཆོས་ནི་བཅོ་བརྒྱད་དང༌། །དེ་བཞིན་༡༧༡་རང་བྱུང་༡༧༢་སངས་རྒྱས་རྣམ་པ་༡༧༣་སྟེ། །མཁྱེན་གསུམ་རྣམ་སྡོམ་བཅུ་ཕྲག་བཅུ་བདུན་དང༌། །གསུམ་གྱི་རྣམ་པའི་དབྱེ་བའི་གྲངས་ཉིད་དོ། ། ཞེས་མཁྱེན་གསུམ་རྣམ་དབྱེ་པདྨོ་འབྱེད་པའི་ཉི་ཟེར་ཞེས་བྱ་བ་འདི་ནི་དངོས་གྲུབ་དཔལ་ནས་རང་ལོ་ཉེར་གཅིག་པ་ལ་ངེས་དོན་རྟག་བརྟན་བཤད་སྒྲུབ་འཕེལ་རྒྱས་གླིང་ནས་བྲིས་པའོ། །འདི་བྲིས་དགེ་བས། །མཁྱེན་གསུམ་རྣམ་པ། །སྦྱོར་བ་གཅིག་གིས། །ཉམས་སུ་ལེན་ཤོག། །། བློ་ལྡོག་རྣམ་བཞིའི་བཤད་པ་གཞན་ཕན་ཉི་མ།བློ་ལྡོག་རྣམ་བཞིའི་བཤད་པ་གཞན་ཕན་ཉི་མ་ཞེས་བྱ་བ་བཞུགས་སོ། ། དལ་འབྱོར་རྙེད་དཀའ་བཤད་པ།དལ་འབྱོར་རྙེད་དཀའ་བཤད་པ། ཨོཾ་སྭ་སྟི། །རྒྱལ་བ་སྟོན་པ་བཅོམ་ལྡན་རྫོགས་སངས་རྒྱས། །སྡུག་བསྔལ་མ་ལུས་སེལ་བའི་དམ་པའི་ཆོས། །ཚོགས་མཆོག་དམ་པ་དགེ་འདུན་རིན་ཆེན་ལ། །འགྲོ་རྣམས་སྡུག་བསྔལ་བསྒྲལ་ཕྱིར་སྐྱབས་སུ་བསྟེན། །བློ་ལྡོག་རྣམ་བཞི་ཐོས་བསམ་སྒོམ་པ་ཡིས། །སྡུག་ཀུན་འཁོར་བའི་ཆོས་ལ་ཞེན་ལྡོག་ནས། །ངེས་འབྱུང་ཐར་བའི་ལམ་ལ་འབད་པའི་ཆེད། །བློ་ལྡོག་རྣམ་བཞིའི་རྣམ་བཞག་བཤད་པར་བྱ། །དེ་ལ་འདིར་ཚེ་འདི་ཕྱིའི་འཁོར་བ་ལ་ཞེན་པ་ལྡོག་པའི་ཆེད་དུ་བློ་ལྡོག་རྣམ་པ་བཞི་བཤད་པ་ལ་བཞི་ལས། དང་པོ་དལ་འབྱོར་རྙེད་དཀའ་བཤད་པ་ནི། བླང་དོར་རབ་གསལ་ལས། དེ་ཡང་དལ་འབྱོར་མི་ལུས་རིན་པོ་ཆེ། །འཁོར་བའི་རྒྱ་མཚོ་ཆེ་ལས་སྒྲོལ་བའི་གྲུ། །ཐར་བའི་གླིང་དུ་འདྲེན་པའི་དེད་དཔོན་མཆོག །ཐོབ་པའི་དུས་འདིར་བརྩོན་པས་འབད་འཚལ་ལོ། །ཞེས་གསུངས་པ་ལྟར་རང་གི་ལུས་དང་གནས་དང་ལོངས་སྤྱོད་དང་ཡུལ་ཕྱོགས་སོགས་ཐམས་ཅད་ལ་གཞིག་འགྲེལ་ཞིག་བཏང་སྟེ། བདག་གིས་ད་རེས་ཐོབ་པའི་མི་ལུས་འདི་འདྲ་བ་ལར་ནས་ཤིན་ཏུ་རྙེད་པར་དཀའ། འདི་དོན་མེད་དུ་མི་གཏོང༌། ཆོས་ལ་འཁོལ་བ་ཅིག་བྱེད་དགོས་སྙམ་དུ་བསམ་ལ། དེ་ཡང་དལ་འབྱོར་རྙེད་དཀའ་སྒོམ་པ་ལ་བཞི་ལས། དང་པོ་ངོ་བོའི་སྒོ་ནས་དལ་འབྱོར་རྙེད་དཀའ་སྒོམ་པ་ནི། དཔལ་མགོན་འཕགས་པ་ཀླུ་སྒྲུབ་ཀྱི་ཞལ་སྔ་ནས། དམྱལ་བ་ཡི་དྭགས་དུད་འགྲོ་དང༌། །ཀླ་ཀློ་ཚེ་རིང་ལྷ་དང་ནི། །ལོག་ལྟ་ཅན་དང་སངས་རྒྱས་སྟོངས། །ལྐུགས་པ་འདི་དག་མི་ཁོམ་བརྒྱད། །ཅེས་པ་ལྟར་ལས། ༡ དམྱལ་བ་ན་ཚ་གྲང་གི་སྡུག་བསྔལ་ཤུགས་དྲག་པ་དང༌། ༢ཡི་དྭགས་ན་བཀྲེས་སྐོམ་གྱི་སྡུག་བསྔལ་བཟོད་བླག་མེད་པས་མནར་བས་ཆོས་སྒྲུབ་པའི་ལོངས་སྐབས་སྐད་ཅིག་ཀྱང་མེད། དུད་འགྲོ་ནི་བཀོལ་སྤྱོད་དང་ཕན་ཚུན་འཚེ་བ་དང་བླུན་རྨོངས་པའི་སྡུག་བསྔལ་ལ་སྤྱོད་པས་ཆོས་བྱེད་མི་ཁོམས། ༤ ལྷ་ཚེ་རིང་པོ་ནི་འདུ་ཤེས་མེད་པའི་ངང་དུ་ཚེ་རྫོགས་ནས་ཆོས་བྱེད་དུ་མི་ཁོམས། ༥ མིར་སྐྱེས་ཀྱང་ཆོས་མེད་ས་ཆ་ཡུལ་ཕྱོགས་མཐའ་འཁོབ་ཀླ་ཀློར་སྐྱེས་པའམ། ༦ སངས་རྒྱས་མ་བྱོན་པའི་འཇིག་རྟེན་ཁམས་སུ་སྐྱེས་པའམ། སངས་རྒྱས་བྱོན་པའི་ཞིང་ཁམས་སུ་ཡང་ཆོས་དར་བའི་ས་ཆ་ནི་རྒྱ་ཆུང༌། ༧ ཆོས་དར་བའི་ཡུལ་ཕྱོགས་སུ་སྐྱེས་ཀྱང་ལོག་ལྟ་ཅན་ཆོས་ལ་སྡང་བའམ། ༨ གླེན་ལྐུགས་སུ་གྱུར་ནས་བླང་དོར་གྱི་གནས་གང་ཡང་མི་གོ་བར་སོང་ན་ཆོས་བྱེད་པའི་སྐལ་བ་མི་འདུག་པ་ལས། བདག་གིས་ད་རེས་མི་ཁོམ་པ་བརྒྱད་ལས་ལོག་ནས་ཆོས་བྱེད་ནུས་སུ་རུང་བའི་ལུས་ཞིག་ཐོབ་འདུག་སྙམ་དུ་དལ་བ་བརྒྱད་སྒོམ་མོ། །དེ་ནས་འབྱོར་བ་བཅུ་སྒོམ་པ་ནི། དཔལ་མགོན་འཕགས་པ་ཀླུ་སྒྲུབ་ཀྱི་ཞལ་སྔ་ནས། མི་ཉིད་དབུས་སྐྱེས་དབང་བོ་ཚང༌། །ལས་མཐའ་མ་ལོག་གནས་ལ་དད། །སངས་རྒྱས་བྱོན་དང་དེས་ཆོས་གསུངས། །བསྟན་པ་གནས་དང་དེའི་རྗེས་འཇུག །གཞན་ཕྱིར་སྙིང་ནི་བརྩེ་བའོ། །ཞེས་པ་ལྟར་ཏེ། ༡ མི་ལུས་མ་ཐོབ་ན་ཆོས་དང་མི་མཇལ་བས་བདག་སྤྱིར་མི་ལུས་ཐོབ། ཆོས་མེད་ཡུལ་མཐའ་འཁོབ་ཏུ་སྐྱེས་ན་ཆོས་སྒྲུབ་པའི་སྐལ་བ་མེད་པས་དགོས་སུ་ཡུལ་དབུས་ཆོས་དར་བར་སྐྱེས། ༣ དབང་པོ་མ་ཚང་ན་ཆོས་སྒྲུབ་པའི་གེགས་གྱུར་བ་ཡིན་པས་ཡང་དགོས་སུ་དབང་བོ་སྒོ་ལྔ་ཚང་བས་སྤང་བླང་ཤེས་སུ་རུང༌། ༤ ལས་མཐའ་ལོག་ན་མི་དགེ་བ་ལ་སྤྱོད་ཅིང་ཆོས་ལ་རྒྱབ་ཀྱིས་ཕྱོགས་པ་ལས་ཞེ་དགོས་སུ་ལྟ་བ་ལོག་པ་དང་མ་ཕྲད་ཙམ། མཚམས་མེད་ལྟ་བུ་ལོག་པར་ལྟ་བའི་ལས་ཀྱང་མ་བྱས་ཙམ། ༥དད་པའི་གནས་སངས་རྒྱས་ཀྱི་བསྟན་པ་ལ་མ་དད་ན་ཆོས་ལ་ཡིད་མི་ཕྱོགས་པས། གནས་དམ་པའི་ཆོས་འདུལ་བ་ལ་དད་པ་སྐྱེར་རུང་བ་ཙམ་དུ་འདུག་པས་རང་གི་འབྱོར་བ་ལྔ་ཚང་འདུག ༦འཇིག་རྟེན་དུ་སངས་རྒྱས་ཀྱང་བྱོན་ཟིན།༧ དམ་པའི་ཆོས་ཀྱང་གསུངས་ཟིན། ༨ བསྟན་པ་ཡང་མ་ནུབ་པར་གནས། ༩ ཆོས་ལ་གསར་དུ་འཇུག་པ་ཡང་མང་བའི་སྐབས་སུ་ཡོད། ༡༠ ཆོས་བྱེད་རྣམས་ལ་གཞན་དགེ་བའི་བཤེས་གཉེན་གྱིས་སྙིང་བརྩེ་བའི་སྒོ་ནས་ཆོས་བསྟན་པ་དང༌། སྦྱིན་བདག་གིས་དད་པའི་སྒོ་ནས་ཟས་གོས་ཡོ་བྱད་སོགས་ཀྱང་སྟེར་བ་པོ་མང་པོ་ཡོད་པས་ཆོས་མཐུན་གྱི་འཚོ་བ་འབྱོར་དུ་རུང་བའི་སྐབས་སུ་འདུག་པས་གཞན་འབྱོར་ལྔ་བོ་ཡང་བདག་ལ་ཚང་དེ་ལྟར་ན་མི་ཁོམ་པ་བརྒྱད་ལས་ལོག འབྱོར་བ་བཅུ་ཚང་བའི་ལུས་འདི་ལྟ་བུ་ཤིན་ཏུ་རྙེད་དཀའ། སྐབས་འདིར་ཆོས་ལ་འབད་དགོས། གལ་ཏེ་ཆོས་སྒྲུབ་པའི་མཐུན་རྐྱེན་འདི་འདྲ་ཚང་བ་རྙེད་པར་དཀའ་ལ། འདི་ལས་ལྷག་པ་རྙེད་མི་སྲིད་པས་ཚེ་འདི་ལ་དམ་ཆོས་ཡང་དག་པ་ཞིག་སྒྲུབ་མ་ཐུབ་ན་ད་སྐྱེ་བ་ནས་ཚེ་རབས་ཐམས་ཅད་དུ་སྒྲུབ་མི་ནུས་པས་ངན་སོང་སོགས་སུ་རྒྱུན་སྡོད་བཅས་ཏེ་གནས་དགོས་པ་ལས་མ་འདས་པར་འདུག་སྙམ་པ་རྒྱུ་མཚན་དྲན་པའི་སྒོ་ནས་ཡང་ཡང་བསམ་མོ། ། གཉིས་པ་གྲངས་ཀྱི་སྒོ་ནས་དལ་འབྱོར་རྙེད་དཀའ་སྒོམ་པ།གཉིས་པ་གྲངས་ཀྱི་སྒོ་ནས་དལ་འབྱོར་རྙེད་དཀའ་སྒོམ་པ་ནི། བླང་དོར་རབ་གསལ་ལས། སེམས་ཅན་སྤྱི་ཡི་གྲངས་ལ་ལེགས་བསམ་ན། །མི་ལུས་ཐོབ་པ་མེད་པ་ཙམ་དུ་སྣང༌། །ཞེས་གསུངས་པ་ལྟར་སེམས་ཅན་རྣམས་ཀྱི་ནང་ན་ངན་སོང་གི་འགྲོ་བ་ནི་ཤིན་ཏུ་མང༌། དཔེར་ན། ས་ཆེན་པོའི་རྡུལ་ཙམ་ཡིན། མཐོ་རིས་ཀྱི་འགྲོ་བ་ནི་ཤིན་ཏུ་ཉུང༌། དཔེར་ན་སེན་མོའི་སྟེང་གི་རྡུལ་ཙམ་ཡིན། ཡང་དམྱལ་བ་ནི། ས་གཞི་ཆེན་པོའི་རྡུལ་ཕྲན་ཙམ། ཡི་དྭགས་ནི། ཁ་བ་བུ་ཡུག་འཚུབས་པ་ཙམ། དུད་འགྲོ་བྱིངས་ན་གནས་པ་ནི། རྒྱ་མཚོ་ཆེན་པོ་ལ་ཆང་གར་མའི་སྦང་མ་ཙམ། དུད་འགྲོ་ཁ་འཐོར་བ་ནི། ས་གཞི་རི་ཀླུང་བར་སྣང་ཐམས་ཅད་ཁེངས་པ་ཙམ། ལྷ་དང་མིའི་འགྲོ་བ་ནི། དེ་རྣམས་ལ་ལྟོས་ན་སྲིད་མཐའ་ཙམ་ཡིན་པར་འདུག དེ་ལས་ཀྱང་སྤྱིར་མིའི་འགྲོ་བ་ཉུང༌། དགོས་སུ་འཛམ་བུ་གླིང་གི་མི་ཉུང༌། ཡང་དགོས་སུ་ཆོས་བྱེད་པའི་མི་ལུས་ནི་སྲིད་མཐའ་ཙམ་དུ་འདུག་སྟེ། ད་རེས་ཅིས་ཀྱང་ཆོས་ལ་འབད་དགོས་སྙམ་དུ་ཡང་ཡང་བསྒོམ་དགོས་སོ། ། གསུམ་པ་དལ་འབྱོར་གྱི་མི་ལུས་འདི་རྒྱུའི་སྒོ་ནས་རྙེད་དཀའ་བ་སྒོམ་པ།གསུམ་པ་དལ་འབྱོར་གྱི་མི་ལུས་འདི་རྒྱུའི་སྒོ་ནས་རྙེད་དཀའ་བ་སྒོམ་པ་ནི། བླང་དོར་རབ་གསལ་ལས། འཇིག་རྟེན་དགེ་བ་སྤྱོད་པ་དཀོན་པའི་ཕྱིར། །དགེ་འབྲས་མི་ལུས་ཐོབ་པ་ཤིན་ཏུ་དཀོན། །ཞེས་གསུངས་པ་ལྟར་དལ་འབྱོར་གྱི་མི་ལུས་ཐོབ་པ་ལ་ཚུལ་ཁྲིམས་རྣམ་པར་དག་པའི་གཞི་བཟུང༌། སྦྱིན་སོགས་དགེ་བ་མང་པོས་གྲོགས་བྱས། སྨོན་ལམ་དྲི་མ་མེད་པས་མཚམས་སྦྱར་བ་དགོས་ཀྱང༌། སེམས་ཅན་གྱི་ནང་ན་སྡིག་པའི་ལས་བྱེད་པ་ནི་ཆེས་མང་སྟེ་མཐའ་མེད། དགེ་བའི་ལས་བྱེད་པ་ནི་སྤྱི་ཙམ་ནས་ཀྱང་ཤིན་ཏུ་ཉུང་བ་ཡིན་ལ། དགེ་བའི་ནང་ནས་ཀྱང་མི་ལུས་འཕེན་ཐུབ་པའི་ཚུལ་ཁྲིམས་སྲུང་བ་ནི་ཆེས་ཤིན་ཏུ་དཀོན་པས་དེའི་ཕྱིར་མི་ལུས་རྙེད་དཀའ་བ་ཡིན། དེའི་སྟེང་དུ་ཡང་འབྱོར་བ་བཅུ་ཚང་ཞིང་ཆོས་དང་མཇལ་བ་ལ་བསོད་ནམས་མང་པོ་གསོག་དགོས་པས་འདི་འདྲ་ཤིན་ཏུ་རྙེད་དཀའ་བ་ཡིན་ཡང་སྔོན་སྟེས་དབང་གིས་དགེ་བ་ཆེ་རབ་ཅིག་ལན་གཅིག་བསགས་ཡོད་འདུག་པས་ད་རེས་དལ་འབྱོར་གྱི་ལུས་འདི་ཐོབ་འདུག ད་འདི་ནས་རྡོག་སྣ་ཞིག་འགྲེད་ནས་ངན་སོང་དུ་ལྷུང་ཕྱིན་ཆད་དེ་ནས་ཐར་བ་དང་ཐམས་ཅད་མཁྱེན་པ་མི་ཐོབ་པ་མ་ཟད་བདེ་འགྲོའི་སྒྲ་ཙམ་ཡང་བསྐལ་བ་མུ་མཐའ་ཡས་པར་ཐོས་དཀའ་བའི་ངན་སོང་གི་སྡུག་བསྔལ་བརྒྱུད་མར་མྱོང་དགོས་པ་ཡིན་པས་ན་ད་ནི་ཕྱི་བཤོལ་ཀྱི་ལེ་ལོའི་དབང་དུ་མི་གཏོང་བར་ཉི་མ་དེ་རིང་ནས་བཟུང་སྟེ་དཀོན་མཆོག་གསུམ་གྱི་ཞབས་ལ་འཇུས་ནས་ཆོས་ལ་འབད་པར་བྱ་སྙམ་དུ་ཐག་བཅད་པའི་སྒོ་ནས་བསྒོམ་པར་བྱའོ། ། བཞི་བ་དཔེའི་སྒོ་ནས་རྙེད་དཀའ་བ།བཞི་བ་དཔེའི་སྒོ་ནས་རྙེད་དཀའ་བ་ནི། དཔལ་མགོན་ཀླུ་སྒྲུབ་ཀྱིས། རྒྱ་མཚོ་ཆེར་གཡེངས་གཉའ་ཤིང་བུ་ག་དང༌། །རུལ་སྦལ་འཕྲད་པ་བས་ཀྱང་དུད་འགྲོ་ལས། །མི་ཉིད་ཆེས་ཐོབ་དཀའ་བས་མི་དབང་གིས། །དམ་ཆོས་སྤྱོད་པས་དེ་འབྲས་མཆིས་པར་མཛོད། །ཅེས་དང༌། ཞི་བ་ལྷས། རྒྱ་མཚོ་ཆེར་གཡེངས་གཉའ་ཤིང་གི། །བུ་གར་རུས་སྦལ་མགྲིན་ཆུད་ལྟར། །མི་ཉིད་ཤིན་ཏུ་རྙེད་དཀའ་གསུངས། །ཞེས་གསུངས་པ་ལྟར་སྟོང་གསུམ་རྒྱ་མཚོར་གྱུར་བའི་སྟེང་ན་རླུང་གིས་སྐད་ཅིག་ཀྱང་མི་སྡོད་པར་དེད་འགྲོ་བའི་གཉའ་ཤིང་དང༌། མཚོ་དེའི་གཏིང་ན་རུས་སྦལ་མིག་ལོང་བ་ལོ་བརྒྱ་རེ་ན་མཚོ་ཁར་འོང་བ་ཞིག་ཡོད་ན་དེ་གཉིས་འཕྲད་པ་དཀའ་བ་ལྟར་དལ་འབྱོར་རྙེད་དཀའ་བ་ཡིན་ནོ། །དེ་ལྟར་ཤིན་ཏུ་རྙེད་དཀའ་བའི་མི་ལུས་འདི་ལན་ཅིག་ཐོབ་པའི་སྐབས་འདིར་དོན་ཆེན་པོ་ཞིག་སྒྲུབ་དགོས་པར་འདུག སྐྱེ་བ་ནས་སྐྱེ་བར་འཁོར་བའི་བདེ་བ་ཕུན་སུམ་ཚོགས་པ་འདོད་ན་ཡང་མི་ལུས་འདི་ལ་བརྟེན་ནས་འབད་མེད་དུ་སྒྲུབ་ནུས། འཁོར་བ་ལས་ཐར་པའི་ཉན་རང་གི་བྱང་ཆུབ་སྒྲུབ་ན་ཡང་ད་རེས་སྒྲུབ་ནུས། བླ་ན་མེད་པའི་བྱང་ཆུབ་སྒྲུབ་པར་འདོད་ཀྱང་ད་རེས་ཀྱི་སྐབས་འདིར་སྒྲུབ་པའི་མཐུན་རྐྱེན་མ་ཚང་བ་མེད་པ་ཡིན་ལ། མི་ལུས་འདི་འདྲ་བ་ཞིག་མ་ཐོབ་ན། ཐར་བ་དང་སངས་རྒྱས་ལྟ་ཅི་སྨོས། འཁོར་བའི་བདེ་སྐྱིད་ཕུན་སུམ་ཚོགས་པ་གཅིག་ཀྱང་སྒྲུབ་མི་ཤེས་པས་ད་རེས་རང་མི་ལུས་ལ་སྙིང་བོ་ལེན་དགོས་སྙམ་དུ་བསྒོམ། དེ་བཞིན་དུ་གལ་ཏེ་མི་ལུས་ལན་ཅིག་ཐོབ་པ་འདི་དོན་མེད་དུ་སོང་ན་རང་གིས་རང་བསླུས་པ་འདི་ལས་ཆེ་བ་མེད་དེ། ཇི་སྐད་དུ། སྤྱོད་འཇུག་ལས། འདི་འདྲའི་དལ་པ་རྙེད་ནས་ནི། །བདག་གིས་དགེ་གོམས་མ་བྱས་ན། །འདི་ལས་བསླུས་པ་གཞན་མེད་དེ། །འདི་ལས་རྨོངས་པའང་གཞན་མེད་དོ། །ཞེས་གསུངས་པ་ལྟར་རང་གིས་རང་ཉིད་ལ་བསླུས་ཚབས་ཆེ། རིན་པོ་ཆེའི་གླིང་དུ་ཕྱིན་ནས་སྟོང་ལྡོག་བྱས་པ་དང་འདྲ། འདོད་དོན་ཁྱད་པར་ཅན་གང་བསྒྲུབས་ཀྱང་འགྲུབ་ཏུ་རུང་བའི་རྟེན་ཁྱད་པར་ཅན་ལན་ཅིག་ཐོབ་པ་ལ་བྱ་བ་གང་ཡང་མ་བྱས་པར་དོན་མེད་དུ་ཐལ་འགྲོ་བ་འདི་རང་སྐྱོན་ཆེ་བར་འདུག ད་སྔ་དེ་ཙམ་ཞིག་དོན་མེད་དུ་སོང༌། སྐྱེ་བ་འདི་ནི་འདུན་མ་གཏན་ལེགས་དང་གཏན་ཉེས་ཀྱི་སོ་མཚམས་ཡིན་པས་ད་ནི་ཉི་མ་དེ་རིང་ནས་བརྩམས་ཏེ་དོན་མེད་དུ་མ་ལུས་པར་ཆོས་ལ་འབད་དགོས་སྙམ་དུ་ཡང་ཡང་བསམ་པའོ། །ཡང་ཚེ་འདིའི་བདེ་སྐྱིད་དང་བྱ་བྱེད་རྣམས་བློས་མི་ཐོངས་སྙམ་ན། འཇིག་རྟེན་ན་ཡང་ཕུགས་སྐྱིད་ཡུན་རིང་བ་ཅིག་ཡོད་ན། འཕྲལ་ཞག་འགའ་ཟླ་ཤས་སོས་དལ་བའི་བདེ་བ་ལ་མི་ལྟ་བར་ཕུགས་ཀྱི་དེ་སྒྲུབ་པ་ལ་འབད་རྩོལ་བྱེད་དགོས་པ་ལྟར་སྐྱེ་བ་གཏན་གྱི་བདེ་སྐྱིད་སྒྲུབ་པའི་ཕྱིར་ཚེ་འདིའི་བྱ་བ་ལ་མ་ཆགས་པར་ཆོས་ཀྱི་བྱ་བ་ལ་འབད་དགོས་སྙམ་དུ་བསམ་པའོ། །དེ་དག་གིས་ནི། དལ་འབྱོར་འདི་ནི་རྙེད་པ་ཤིན་ཏུ་དཀའ། །སྐྱེས་བུ་དོན་གྲུབ་ཐོབ་པར་གྱུར་པ་ལ། །གལ་ཏེ་འདི་ལ་ཕན་པ་མ་བསྒྲུབས་ན། །ཕྱིས་འདི་ཡང་དག་འབྱོར་བར་ག་ལ་འགྱུར། །ཞེས་པ་ལྟར་མི་ལུས་རྙེད་དཀའ་ཞིང་རྙེད་པ་དོན་དང་ལྡན་པར་བྱ་སྙམ་དུ་བསམ་ནས་བསྒོམ་པར་བྱའོ། །（2）འཆི་བ་མི་རྟག་པ་བསམ་པ། གཉིས་པ་འཆི་བ་མི་རྟག་པ་བསམ་པ།གཉིས་པ་འཆི་བ་མི་རྟག་པ་བསམ་པ་ལ། བླང་དོར་རབ་གསལ་ལས། འདུས་བྱས་མི་རྟག་རྟག་པར་འཛིན་པས་འཁྲུལ། །ངེས་པར་འཆི་ཞིང་འཆི་རྐྱེན་ཤིན་ཏུ་མང༌། །ནམ་འཆི་ངེས་མེད་མྱུར་བ་ཉིད་དུ་འཆི། །བྱུང་ཚེ་མི་བཟློག་དེ་ཕྱིར་དགེ་ལ་འབད། །ཅེས་གསུངས་པ་ལྟར་འཆི་བ་མི་རྟག་པ་བཤད་པ་ལ་གསུམ་ལས། དང་བོ་ངེས་པར་མྱུར་དུ་འཆི་བ་བསམ་པ་ནི། མདོ་ལས། བྱུང་དང་འབྱུང་བར་གྱུར་པ་ཇི་སྙེད་པ། །ཀུན་གྱིས་ལུས་འདི་བཏང་ནས་འགྲོ་བ་དང༌། །དེ་ཀུན་འཇིག་པར་མཁས་པས་རྟོགས་བགྱི་སྟེ། །ཆོས་ལ་གནས་བགྱི་ངེས་པར་སྤྱད་པ་སྤྱོད། །ཅེས་གསུངས་པ་ལྟར། གནས་གང་དུ་གནས་ཀྱང་འཆི་བ་ལས་མ་འདས། གྲོགས་སུ་དང་འགྲོགས་ཀྱང་འཆི་བ་ལས་མ་འདས། ས་སྟེང་གི་འགྲོ་བ་སྔར་བྱུང་བ་ཐམས་ཅད་ཀྱང་ཤི། ད་གཟོད་འབྱུང་འགྱུར་ཐམས་ཅད་ཀྱང་འཆི། ད་ལྟ་དངོས་སུ་ཡོད་པའི་འགྲོ་བ་འདི་ཐམས་ཅད་ཀྱང་འཆི་བ་ལས་གྲོལ་བ་སུ་ཡང་མེད། རང་རེ་བཙས་ནས་ཉི་མ་དེ་རིང་ཡན་ཆད་དུ་རང་དང་ཉེ་བ་ཡང་ཇི་ཙམ་ཞིག་ཤི། བར་མ་དང་དགྲ་ཡང་ཇི་ཙམ་ཞིག་ཤི། དེ་རྣམས་ཤི་སྟེ་བདག་ལ་སྡོད་པའི་གདེང་ཡོད་པའང་མིན། སྤྱིར་འཆི་བ་ལས་འོས་མི་འདུག དགོས་སུ་ཚེ་ལ་སྣོན་ཁ་རྒྱག་མཁན་ནི་མེད། དེ་ཡང་བླང་དོར་རབ་གསལ་ལས། ལུས་ཅན་རྣམས་ནི་དང་པོ་སྐྱེས་ཙམ་ནས། །ལམ་གཞན་མི་འགྲོ་འཆི་བདག་གྲོང་དུ་འགྲོ །དཔེར་ན་རི་དྭགས་རྒྱ་རུ་ཚུད་པ་རྣམས། །རྔོན་པའི་དྲུང་དུ་ཉེ་བར་འགྲོ་བ་བཞིན། །ཞེས་གསུངས་པ་ལྟར་དུས་སྐད་ཅིག་ཀྱང་སྡོད་པ་མེད་པར་ཚེའི་སྟེང་ནས་འབྲིད་པ་ཡིན་པས་སྐད་ཅིག་རེ་རེ་སོང་ནས་འཆི་བ་ལ་ཇེ་ཉེ། ཞག་རེ་ཞག་རེ་སོང་ནས་དེ་བས་ཉེ་རུ་སོང༌། ཟླ་བ་རེ་རེ་སོང་གིན་ལྷག་པར་ཉེ་རུ་སོང༌། ལོ་གཅིག་གཅིག་སོང་གིན་ལྷག་པར་ཉེ་རུ་སོང་བ་ཡིན་ཏེ། དཔེར་ན་སེམས་ཅན་ཞིག་གསོད་སར་ཁྲིད་པ་ན་གོམ་པ་རེ་རེ་སྤོས་ན་འཆི་བ་ལ་ཇེ་ཉེ་ཇེ་ཉེར་འགྲོ་བ་བཞིན་ནོ། །དེ་བས་ན་མྱུར་དུ་འཆི་བ་ཡིན། བདག་གིས་ཆོས་ཉམས་སུ་ལེན་དགོས་ན། ད་དུང་རྒས་པ་ལ་ནི་མ་ཐུག་རིམ་པས་བྱས་པས་ཆོག་སྙམ་ན། ཚེ་ཐུང་འདི་ལ་དེ་འདྲའི་ལོང་ཡོད་བྱེད་མི་ཉན། དཔེར་ན་ཚེ་ལོ་དྲུག་ཅུའི་དབང་དུ་བྱེད་ན་གཞོན་པའི་དུས་སུ་ནི་ཆོས་མ་བྱུང་བར་ཡར་འདས། རྒས་ནས་ནི་ཆོས་བྱེད་བློ་བྱས་ཀྱང་ལུས་སེམས་ཀྱི་སྟོབས་ཟད་པས་བོགས་སྐྱེད་མི་འབྱུང༌། དེའི་ལྷག་མའི་ཕྱེད་ནི་གཉིད་ཀྱིས་འདས། གཞན་ཡང་ལྟོ་རྒྱབ་ཀྱི་ཕྱིར་དང༌། འགྲོ་འདུག་དང་གཡེང་བ་སོགས་དོན་མེད་སྣ་ཚོགས་ཀྱི་དབང་དུ་འགྲོ་བས་འདུན་པ་དང་བརྩོན་འགྲུས་ཆེ་བ་ཞིག་གི་དབང་དུ་བྱས་ཀྱང་ཆོས་རང་ཉམས་ལེན་བྱས་པའི་ཚད་ལ་ཡུན་རིང་མི་ཡོང་བ་འདུག དམ་པ་རྣམས་ཀྱི་དུས་ཇི་སྙེད་ཅིག་འབད་པ་བྱས་ཏེ་རྟོགས་པའི་ཆོས་དེ་བདག་གིས་མྱུར་དུ་རྟོགས་དགོས་ན། ཚེ་ཐུང་འདི་ལ་ཆོས་ལ་ཕྱི་འགྱངས་དང༌། ལེ་ལོ་དང་བར་སྐབས་སུ་བཤོལ་བའི་ཐབས་ཡེ་མི་འདུག་སྙམ་དུ་བསམས་ནས་ཡང་ཡང་བསྒོམ་པར་བྱའོ། །གཉིས་པ་ནམ་འཆི་ཆ་མེད་བསམ་པ་ནི། འོ་སྐོལ་རྣམས་སྤྱིར་ཚེ་ཐུང་བར་མ་ཟད་ནམ་འཆི་ཆ་མེད་པ་ཡིན། གལ་ཏེ་སྟེས་དབང་ལེགས་ན་སྔོན་གྱི་ལས་ཀྱིས་འཕངས་པའི་ཚེ་ལོ་དྲུག་ཅུ་བདུན་ཅུ་ཙམ་འཕངས་པ་སྲིད་ཀྱང༌། རང་རེ་ལ་ཚེ་དེ་ཙམ་མེད་དེ་འོང༌། ཡོད་དུ་ཆུག་ཀྱང་ཉི་མ་དེ་རིང་ནས་རྩི་རྒྱུ་མིན། ཕྱེད་ཙམ་སོང་ཟིན་ནམ་ཕལ་ཆེར་སོང་ཟིན། ཡང་གཅིག་ཏུ་ན་སྔོན་གྱི་ལས་ཀྱིས་ཚེ་ལོ་སུམ་ཅུའམ་བཞི་བཅུ་ཙམ་ལས་མ་འཕངས་པ་ཡང་སྲིད། འཆི་བདག་སྒོ་དྲུང་ན་སླེབ་ཚར་བའི་ཚོད་དུ་གདའ། ཚེ་འདིའི་དགྲ་གཉེན་ནོར་རྫས་འཁོར་གཡོག་གྲོགས་པོ། བདེ་སྡུག་གཏམ་གསུམ་འདི་ཀུན་དང་ཡུན་རིང་འགྲོགས་སྐབས་མི་འདུག ཅིས་ཀྱང་ཅི་བྱེད་སྙམ་པ་དང༌། ཇི་སྐད་དུ། ས་དང་ལྷུན་པོ་རྒྱ་མཚོ་ཉི་མ་བདུན། །འབར་བས་བསྲེགས་པའི་ལུས་ཅན་འདི་དག་ཀུན། །ཐལ་བ་ཡང་ནི་ལུས་པར་མི་འགྱུར་ན། །ཤིན་ཏུ་ཉམ་ཆུང་མི་ལྟ་སྨོས་ཅི་འཚལ། །ཞེས་པ་ལྟར་ལུས་ཤ་ཁྲག་རྣག་གི་ཕུང་བོ་འདི་ནི་ཉམ་རེ་ཆུང༌། དབུགས་མི་བརྟན་སྟོན་ཀའི་ན་བུན་བཞིན་དུ་ནམ་ཡལ་འགྲོ་ཆ་མེད། སེམས་ལ་རང་དབང་མ་ཐོབ་གང་ལ་ཡང་གདེངས་མི་འདུག་པས་ནམ་འཆི་ཆ་མེད། ཇི་སྐད་དུ། དེ་རིང་ཁོ་ན་མི་འཆི་ཞེས། །བདེ་བར་འདུག་པ་རིགས་མ་ཡིན། །བདག་ནི་མེད་པར་འགྱུར་བའི་དུས། །དེ་ནི་གདོན་མི་ཟ་བར་འབྱུང༌། །ཞེས་དང༌། བླང་དོར་རབ་གསལ་ལས། དེ་རིང་ཙམ་ཡང་གནས་པའི་གདེངས་མེད་ཅིང༌། །འཆི་བའི་ཚེ་ན་དམ་ཆོས་མ་གཏོགས་པ། །སྐྱོབ་བར་ནུས་པ་འགའ་ཡང་མ་མཆིས་པས། །ད་ལྟ་ཉིད་དུ་བརྩོན་པར་མཛད་ན་ལེགས། །ཞེས་གསུངས་པ་ལྟར་ནམ་འཆི་ཆ་མེད་ཡང་ཡང་བསྒོམ་པར་བྱའོ། །གསུམ་པ་འཆི་རྐྱེན་ངེས་པ་མེད་པ་སྒོམ་པ་ནི། ཀླུ་སྒྲུབ་ཀྱི་ཞལ་ནས། འཆི་བའི་རྐྱེན་ནི་མང་བ་སྟེ། །གསོན་པ་ཡི་ནི་ཉུང་ཟད་ཅིག །དེ་དག་ཉིད་ཀྱང་འཆི་བའི་རྐྱེན། །དེ་བས་རྟག་ཏུ་ཆོས་མཛོད་ཅིག །ཅེས་དང༌། སློབ་དཔོན་ཨརྱ་དེ་ཝས། འཆི་བའི་རྐྱེན་ནི་ཤིན་ཏུ་མང༌། །འཚོ་བའི་རྐྱེན་ནི་ཤིན་ཏུ་ཉུང༌། །དེ་ཡང་འཆི་བའི་རྐྱེན་དུ་འགྱུར། །ཞེས་གསུངས་པ་ལྟར། ཕྱིའི་རྐྱེན་མི་དང་དུད་འགྲོ་དང་གདོན་ལ་སོགས་པ་སེམས་ཅན་དུ་གཏོགས་པ་དང༌། གཡང་ས་དང་འཕྲུལ་ཆས་མེ་ཆུ་ལ་སོགས་པ་སྣོད་དང་འབྱུང་བར་གཏོགས་པ། ནང་ལུས་ལ་ནད་རིགས་བཞི་བརྒྱ་རྩ་བཞི་ལ་སོགས་པ་མདོར་ན་འཆི་རྐྱེན་ལ་འདིས་མི་བྱེད་བྱ་བ་མེད། ལུས་གནས་བྱེད་འཚོ་བའི་རྐྱེན་དུ་འདོད་པ་ཟས་གོས་གནས་མལ་སྨན་ལ་སོགས་པ་ཡིན་ན། ཁ་ཟས་མ་འཕྲོད་པ་དང༌། སྨན་ལོག་པ་སོགས་འཚོ་བའི་རྐྱེན་དེ་ཀུན་ཡང་ནམ་ཞིག་ན་འཆི་རྐྱེན་དུ་འགྱུར་ཏེ། ལུས་སྲོག་ལ་རྒོལ་བའི་རྐྱེན་ངན་ཁ་བ་བུ་ཡུག་འཚུབས་པ་ལྟ་བུའི་དབུས་ན་བདག་གནས་པ་ཡིན་ན། འཆི་རྐྱེན་ངེས་པ་མེད་སྙམ་དུ་ཡང་ཡང་བསྒོམ་པར་བྱའོ། ། བཞི་པ་འཆི་བ་ལ་ཆོས་མ་ཡིན་པ་ཅིས་ཀྱང་མི་ཕན་པར་བསམ་པ།བཞི་པ་འཆི་བ་ལ་ཆོས་མ་ཡིན་པ་ཅིས་ཀྱང་མི་ཕན་པར་བསམ་པ་ནི། ཇི་སྐད་དུ། ཞི་བ་ལྷས། གཤིན་རྗེའི་སྐྱེས་བུས་ཟིན་པ་ལ། །གཉེན་གྱིས་ཅི་ཕན་བཤེས་ཅི་ཕན། །ཞེས་པ་ལྟར་འཆི་བའི་དུས་ན་ནོར་རྫས་མང་ཡང་ཏིལ་འབྲུ་ཙམ་ཡང་འཁྱེར་དབང་མེད། གཉེན་གྲོགས་གཡོག་འཁོར་རྗེ་དཔོན་སོགས་རྩ་འཛིང་ཆེ་ཡང་བྲན་གྱི་ཐ་མ་ཁྱེའུ་གཅིག་ཙམ་ཞིག་རང་ལ་འཁྲིད་དབང་ཡང་མེད་ཁོ་ལ་རྗེས་སུ་འབྲང་དབང་ཡང་མེད། འདི་ཐམས་ཅད་བྱེ་བྲལ་བྱེད་པ་ཆོས་ཉིད་ཡིན། ཅིས་ཀྱང་ཕན་པ་མེད་སྙམ་སྐྱུག་ལོག་གེ་བ་བསྒོམ་དགོས། དགྲ་གཉེན་བདེ་སྡུག་གཏམ་བཟང་ངན་ཐམས་ཅད་ལ་དེ་བཞིན་དུ་སྦྱར། དེ་དག་གིས་ཚེ་ཕྱི་མ་མི་ཕན་པ་མ་ཟད་ཚེ་འདིའི་སྲོག་ཆད་པའི་སྡུག་བསྔལ་ཡང་རང་གཅིག་པུས་མྱོང་དགོས་ཏེ། ཇི་སྐད་དུ། བདག་ནི་མལ་ན་འདུག་བཞིན་དུ། །གཉེན་བཤེས་ཀུན་ཀྱིས་མཐའ་སྐོར་ཡང༌། །སྲོག་འཆད་པ་ཡི་ཚོར་བ་ནི། །བདག་ཉིད་གཅིག་པུས་མྱོང་བར་འགྱུར། །ཞེས་དང༌། བླང་དོར་རབ་གསལ་ལས། ཡིད་འོང་གཉེན་དང་བསྐྱངས་པའི་འཁོར་གཡོག་དང༌། །བརྩིགས་པའི་མཁར་དང་བསགས་པའི་ནོར་རྫས་སོགས། །བདེ་བའི་ཡོ་བྱད་དུ་མས་མཐའ་སྐོར་ཡང༌། །འཆི་བའི་སྡུག་བསྔལ་རང་ཉིད་གཅིག་པུས་མྱོང༌། །ཞེས་གསུངས་པས་སོ། །འོ་ན་འདི་དག་རྗེས་སུ་མི་འབྲང་ན་གང་རྗེས་སུ་འབྲང་སྙམ་ན། རང་གིས་བསགས་པའི་ལས་དགེ་སྡིག་གཉིས་པོ་རྗེས་སུ་འབྲང༌། སྡིག་པ་བྱས་ཟིན་པ་དེ་ཡང་ཤུལ་དུ་བཞག་ཐབས་མེད་རྟག་ཏུ་གནོད་པ་ཡིན། དགེ་བ་གང་བསགས་པ་དེས་ཀྱང་བདག་ལ་ཕན་པ་ཡིན་ཤུལ་དུ་ནི་མི་ལུས། ཆོས་ལྡན་རབ་འབྱོར་གྱི་ཞལ་ནས་ཀྱང༌། དགེ་དང་སྡིག་པ་མ་གཏོགས་པ། །འགྲོ་བ་ཐམས་ཅད་ཕྱིར་ལྡོག་ནས། །འགའ་ཡང་ཁྱོད་རྗེས་མི་འབྲང་བར། །མཁྱེན་པར་གྱིས་ལ་ལེགས་པར་དཔྱོད། །ཅེས་གསུངས་པ་ལྟར་བསམ་པ་དང༌། དེ་ལྟར་ན་ངེས་པར་འཆི། མྱུར་དུ་འཆི། ནམ་འཆི་ཆ་མེད། འཆི་བ་ལ་གཞན་ཅིས་ཀྱང་མི་ཕན། འཆི་ཁ་ཕན་ཆད་སྐྱེ་བ་མཐའ་མེད་དུ་ཕན་ནུས་པ་ནི་དམ་པའི་ཆོས་ཁོ་ན་ཡིན་ན། ད་ལྟ་ཉིད་དུ་ཆོས་ལ་འབད་པར་བྱའོ་སྙམ་དུ་བསྒོམ་དགོས་ཏེ། སྤྱོད་འཇུག་ལས། བསྐལ་བ་དུ་མར་རབ་དགོངས་མཛད་པ་ཡི། །ཐུབ་དབང་རྣམས་ཀྱིས་འདི་ཉིད་ཕན་པར་གཟིགས། །ཞེས་གསུངས་པས་སོ། །ད་ལྟ་རང་རེ་རྣམས་ནམ་ཞིག་འཆི་དགོས་སྙམ་པ་ཙམ་ཡོད་ཀྱང་ནམ་འཆི་ངེས་མེད་ཀྱི་འདུ་ཤེས་རྒྱུད་ལ་མ་སྐྱེས་པས་རྟག་འཛིན་གྱི་དབང་གིས་ཚེ་འདིའི་དོན་བྱ་ཁོ་ན་ལ་གཡེངས་ནས་ཚེ་འདིའི་བདེ་སྐྱིད་སྙན་གསུམ་བསྒྲུབ་པའི་བྱ་རྩོལ་ལ་ཞེན་པའི་སྐབས་འདིར་གློ་བུར་དུ་འཆི་བདག་གི་བདུད་ཀྱིས་ཞགས་ནག་བཟུང༌། ཨམ་གཙིགས་བསྡམས། སོ་ཞོ་ངོམས་ནས་དྲུང་དུ་སླེབས་ཙ་ན། དཔའ་བའི་དཔུང༌། བཙན་པོ་ཤེད། ཕྱུག་པོའི་རྒྱུ། མཁས་པའི་གཏམ། མཛེས་མའི་གཟུགས། མགྱོགས་པའི་བང་གང་གིས་ཀྱང་བཟློག་མི་ནུས་ཏེ། ལྕགས་ཀྱི་སྒམ་ཆུང་སྲུབ་མེད་པ་ཞིག་ཏུ་བཅུག་ནས་དཔའ་བའི་སྐྱེས་བུ་རྣོ་བའི་མཚོན་ཐོགས་པ་འབུམ་ཕྲག་དུ་མས་མདའ་རྩེ་དང་མདུང་རྩེ་ཕྱི་ལ་བསྟན་ནས་བསྐོར་ཏེ་བསྡད་ཀྱང་བསྲུང་རྒྱུ་དང་གབ་རྒྱུ་སྤུ་རྩེ་ཙམ་ཡང་མེད་པར་འཆི་བདག་གི་གཤིན་རྗེ་དེས་ཞགས་ནག་རྐེ་ལ་རྒྱབ། གདོང་}ོ་ཧམ་མེ། མིག་མཆི་མ་སྐྱ་ཙ་རེ། མགོ་དང་རྐང་ལག་གིས་ཡོབ་ཡོབ་བྱེད་བཞིན་ཚེ་ཕྱི་མའི་ལམ་པོ་ཆེར་ཁྲིད་འགྲོ་བ་མ་གཏོགས། དཔའ་བོས་བཀྱེ་ས་མེད། བཙན་པོས་བསྒོ་ས་མེད། དཔལ་འབྱོར་གྱིས་བསླུ་ས་མེད། བྲོས་ས་མེད། གབ་ས་མེད། སྐྱབས་དང་སྐྱོབ་པ། མགོན་དང་དཔུང་གཉེན། ཐབས་དང་ཐུགས་རྗེ་གང་ཡང་མེད་པ་མ་ཟད། སྨན་པའི་རྒྱལ་པོ་དངོས་སུ་བྱོན་ཀྱང་ཚེ་ཟད་པའི་འཆི་བ་ལ་བཤོལ་མི་ཐེབས་པ་ཡིན་པས། དུས་ད་ལྟ་ཉིད་ནས་ཕྱི་བཤོལ་སོགས་ལེ་ལོ་དང་རྣམ་གཡེང་གི་དབང་དུ་མི་འགྲོ་བར་འཆི་ཁར་ཕན་པའི་དམ་ཆོས་ཡང་དག་པ་ཞིག་སྒྲུབ་དགོས་སྙམ་དུ་ཞེ་ཐག་པ་ནས་བསྒོམ་པར་བྱའོ། །ད་ནི་འཆི་བ་མི་རྟག་པ་འདི་བསྒོམ་པ་ལ་རྩ་བའི་ཚིག་ལྔ་ཞེས་བྱ། དང་པོ་མི་སྡོད་འགྱུར་བ་བསམ། །གཞན་དག་ཤི་བ་མང་དུ་བསམ། །འཆི་རྐྱེན་མང་པོ་ཡང་ཡང་བསམ། །འཆི་ཁར་ཇི་ལྟར་འགྱུར་སྙམ་བསྒོམ། །ཤི་ནས་ཇི་ལྟར་འགྱུར་བར་བསམ། །རང་རེ་སྐྱེས་ནས་མ་ཤིའི་བར་དུ་ཡང་ཕུང་བོའི་རྒྱུན་འདི་རྟག་ཏུ་འགྱུར་ཞིང་འགྲོ། བདག་དང་པོ་བུ་ཆུང་གི་དུས་ན་དེ་འདྲ། བྱིས་པའི་དུས་ན་དེ་འདྲ། ལང་ཚོ་ཙ་ན་དེ་འདྲ། ད་ནི་འདི་འདྲ་སྙམ་པ་དང༌། འཆི་བ་ལ་ཇེ་ཉེ་ཇེ་ཉེར་འགྲོ་བ་དེར་འདུག ཅིས་ཀྱང་མི་ཕན་སྙམ་དུ་རིག་པ་བཅུན་ལ་སྐྱོ་ལྷང་ལྷང་བ་ལ་སེམས་བཞག རང་རེས་དྲན་ནས་ད་ལྟ་ཡན་ཆད་ལ་ཡུལ་འདི་ན་མི་འདི་འདྲ་ཅིག་ཡོད་པ་ཡང་ཤི་འདུག དེ་ན་དེ་འདྲ་ཞིག་ཡོད་པ་ཡང་ཤི་འདུག་སྙམ་དུ་རེ་རེ་ནས་ཞིབ་ཏུ་བགྲངས། རང་བས་རྒན་པ་ཡང་ཇི་ཙམ་ཞིག་ཤི་འདུག མཉམ་པ་དང་གཞོན་པ་ཡང་ཇི་ཙམ་ཞིག་ཤི་འདུག་བསམས་ན། ད་ལྟ་ཡོད་པ་བས་ཤི་བ་མང༌། དེ་དག་ཀྱང་ཚེ་ཚད་དུ་ཐུབ་ནས་ཤི་བ་ཙམ་ཆེར་མི་འདུག ཕལ་ཆེར་དུས་མིན་བར་མ་དོར་ཤི། བདག་ཀྱང་དེ་ལྟ་བུའི་ཆོས་ཉིད་ཡིན། དེ་ལྟ་བུའི་རང་བཞིན་ལས་མ་འདས། སྔར་དེ་དག་གི་གསེབ་ཏུ་མ་སོང་བ་ཁར་རྗེ་ཆེ། མ་ཤི་གོང་དུ་ཆོས་གཤའ་མ་ཞིག་མི་བྱེད་པའི་ཐབས་མེད་སྙམ་དུ་བསམ། གཞན་མི་དང་དུད་འགྲོ་ཤི་བ་ཐོས་སམ། མཐོང་ངམ། བྱིས་པ་ནས་རྒན་པོའི་བར་དུ་ལང་ཚོ་འགྱུར་བ་མཐོང་ངམ། མ་ཤི་བ་ཉིད་ལ་ཡང་ཁ་དྲགས་པོ་ཁ་ཞན་པོར་སོང་བ་དང༌། ཞན་པོ་དྲགས་པོར་སོང་བ་དང༌། ཕྱུག་པོ་སྤྲང་བོར་སོང་བ་སོགས་གང་མཐོང་གང་ཐོས་ཀྱང་མི་རྟག་པ་ལྷང་གིས་དྲན་ཏེ། བདག་གམ་བདག་གི་ཕྱོགས་དང༌། བདག་གི་ལོངས་སྤྱོད་སོགས་ཀྱང་འདི་ལྟ་བུའི་རང་བཞིན་ཡིན། འདི་ལྟ་བུའི་ཆོས་ཉིད་ཡིན་སྙམ་དུ་བསམ། དེ་ནས་གོང་བཞིན་འཆི་བའི་རྐྱེན་མང་བར་བསམས་ཏེ། རང་གི་གདོང་དུ་བྱུང་བའི་དངོས་པོ་ཐམས་ཅད་ལ་འདི་ཀུན་གྱིས་ཀྱང་བདག་འཆི་བའི་རྐྱེན་ཇི་ལྟར་བྱེད་མི་ཤེས། ད་ལྟ་རང་ཡང་ཇི་ལྟར་འགྱུར་མི་ཤེས་སྙམ་དུ་བསམ། དེས་ན་ཕྱི་ནང་སྣོད་བཅུད་ཀྱི་ཆོས་འདི་དག་ཐམས་ཅད་ལ་རྟག་པ་དང་བརྟན་པ་གཅིག་ཙམ་ཡང་མེད་དེ། སྐྱེས་པ་ཐམས་ཅད་མི་རྟག་སྟེ་འཆི། བསགས་པ་ཐམས་ཅད་མི་རྟག་སྟེ་འཛད། འདུས་པ་ཐམས་ཅད་མི་རྟག་སྟེ་བྲལ། བརྩིགས་པ་ཐམས་ཅད་མི་རྟག་སྟེ་འགྱེལ། མཐོན་པོ་ཐམས་ཅད་མི་རྟག་སྟེ་ལྷུང༌། དེ་ལྟར་དགྲ་གཉེན་དང་སྐྱིད་སྡུག་བཟང་ངན་སོགས་མདོར་ན་ལས་ཉོན་གྱི་དབང་གིས་བྱུང་བ་ཐམས་ཅད་མི་རྟག་པ་ཡིན་ལ། མཐོན་པོ་གནམ་ལྟ་བུ། བཙན་པོ་ཐོག་ལྟ་བུ། ཕྱུག་པོ་ཀླུ་ལྟ་བུ། མཛེས་པོ་ལྷ་ལྟ་བུ། འཕྱོར་པོ་འཇའ་ཚོན་ལྟ་བུ། སུ་དང་གང་ལ་ཡང་འཆི་བ་གློ་བུར་དུ་སླེབ་ཙ་ན་རང་དབང་སྐད་ཅིག་ཀྱང་མེད་པར་གཅེར་བུ་ལག་སྟོང་མཆན་དུ་བཅུག་ནས་རྒྱུ་ནོར་དང་གཉེན་ཉེ་དུ་དང་འཁོར་སློབ་མ་སྡེ་འབངས་བཟའ་བཏུང་ལོངས་སྤྱོད་ཐམས་ཅད་འབྲལ་མི་ཕོད་བཞིན་དུ་མར་གྱི་དཀྱིལ་ནས་སྤུ་བཏོན་པ་བཞིན་དུ་རང་གཅིག་པུ་ཚེ་ཕྱི་མ་འགྲོ་དགོས། གྲྭ་སྟོང་ཕྲག་མང་པོའི་མགོ་དཔོན་གྱི་བླ་མ་ཡིན་ཀྱང་གྲྭ་པ་གཅིག་ཙམ་ཁྲིད་དབང་མེད། རྒྱལ་ཁབ་ཆེན་མོའི་དཔོན་པོ་ཡིན་ཀྱང་གཡོག་པོ་མི་གཅིག་ཀྱང་ཁྲིད་ས་མེད། འཛམ་གླིང་གི་རྒྱུ་རྫས་ཀྱི་བདག་པོ་ཡིན་ནའང་ཁབ་སྐུད་པ་གཅིག་ཙམ་ཡང་ཁྱེར་དབང་མེད། ཐ་ན་རང་གི་གཅེས་པར་བསྐྱངས་བའི་ལུས་ཀྱང་ཤུལ་དུ་བསྐྱུར་ནས་འགྲོ་དགོས། དེའི་ཚེ་ན་གསོན་དུས་སུ་འབྱོར་ཕྱུག་གཟུགས་མཛེས་སོགས་ཇི་ལྟར་ཡིན་ཡང༌། རོ་ཞེས་བྱ་བ་མཐོང་ན་འཇིགས་པ། ངམ་ནག་པ། ལྗི་ཡོར་རེ་བ་ཞིག་ཏུ་གནས་གྱུར་བ་ཡིན་ལ། ཇི་སྐད་དུ། རྗེ་མི་ལས། རོ་ཞེས་བྱ་མཐོང་ན་འཇིགས་པ་དེ། །དུས་ད་ལྟ་ལུས་ཀྱི་རྩ་ན་འདུག །ཅེས་གསུངས་པ་ལྟར་རོ་དེ་ཐག་པས་བསྡམ།ཡོལ་བས་བསྒྲིབ། ས་དང་རྡོ་བས་བརྟེན་ནས་བཞག་པའི་དུས་སུ་གཅེས་དགུ་དམར་དགུ་ཇི་ལྟར་ལྟ་བུ་ཞིག་ཡིན་ཀྱང་ཡ་ང་བ་དང་སྐྱུགས་བྲོ་བའི་གནས་སུ་གྱུར་བ་ལ་བསམ་ནས་དམ་ཆོས་ལ་བརྩོན་དགོས། འཆི་བའི་ཚེ་མི་དགེ་བའི་སེམས་ཀྱིས་འཆི་ན་ནི་གནད་གཅོད་ཀྱི་ལས་ལ་སོགས་པ་སྡུག་བསྔལ་འཇིགས་སུ་རུང་བ་ཡོད། འཆི་བ་དེ་འདོད་བཞིན་དགའ་བཞིན་དུ་ཡོང་པ་མིན། མི་འདོད་བཞིན་དུ་ཐོག་ཏུ་འབབ་པ་ཡིན། དགའ་བཞིན་སྐྱིད་བཞིན་དུ་འཆི་བ་མ་ཡིན། སྡུག་བསྔལ་ཤུགས་དྲག་པོ་དང་བཅས་ཏེ་འཆི་བ་ཡིན། འཇིག་རྟེན་ཕ་རོལ་ཆ་རྒྱུས་ཡོད་ནས་མ་ཡིན། ཆ་མེད་ཀྱི་ཡུལ་དུ་རྒྱུས་མེད་འཁྱམ་པ་ཡིན་སྙམ་པ་དང༌། བདག་ཤི་ཟིན་པའི་གནས་སྐབས་ན། ལུས་སེམས་གཉིས་ནི་བྱེད་བྲལ་དུ་སོང༌། ལུས་འདི་ནི་ཡང་ན་ས་ལ་སྐུངས་ནས་སྲིན་འབུའི་ཕུང་པོ་གཅིག་གམ། ཡང་ན་ཆུ་ལ་སྐྱུར་ནས་ཉ་སྲམ་གྱི་ཟས་གཅིག་གམ། མེ་ལ་བསྲེགས་ནས་རུས་པ་སྤར་གང་ངམ། རིའམ་ཐང་ལ་བསྐྱལ་ནས་བྱ་ཁྱིའི་ཁ་ན་ཕར་ཡེར་རེ་རེ་བ་གཅིག་གམ། མཐར་ཞག་ཤས་ནས་ཤུལ་ཙམ་ཡང་མི་ལུས། ད་ལྟ་གཅེས་གཅེས་མོར་བྱས་པའི་ལུས་ཀྱི་ཐ་མ་ནི་དེ་འདྲ། སེམས་ནི་ལས་ཀྱི་ཁུར་ཐོགས་ནས་གར་སྐྱེ་ངེས་པ་མེད་པའི་གནས་སུ་འགྲོ་དགོས་ན། ད་ལྟ་ཆོས་མི་བྱེད་པའི་ཐབས་རང་མི་འདུག་གམ། ཕྱིས་ནས་ཕྱི་བཤོལ་དུ་འཇོག་པའི་ཐབས་རང་འདུག་གམ་སྙམ་དུ་བསམ། དེ་རྣམས་ཀྱིས་གཞུག་སྡོམས་ཏེ། ད་ལྟ་རང་ཆོས་གཤའ་མ་ཞིག་བྱེད་སྙམ་པའི་གོ་ཆ་ཡོད་པ་བཞིན་ཆོས་ཀྱི་མགོ་ཐོན་གཞུག་འཁྱོངས་ནས། རང་ཡང་དགའ་བཞིན་དུ་ཚེའི་དུས་བྱེད། གཞན་ཀུན་གྱིས་ཀྱང་ཁོ་ལ་ཆོས་གཤའ་མ་ཞིག་བྱུང་ཟེར་ནས་སྨོན་བཞིན་དུ་ཚེའི་དུས་བྱེད་པ་གཅིག་ལ་གཏད་སོ་འཚོལ་དགོས། དེ་ལ་ཆོས་བསྒོམ་དགོས། བརྟན་པ་ཐོབ་དགོས། གོམས་དགོས། ལྷོངས་སུ་གྱུར་དགོས་པ་འདུག བརྟན་པ་ནི་མ་ཐོབ། གལ་ཏེ་ན་རྐྱེན་ངན་པ་དང་འཕྲད། རང་གི་བློ་ལས་སུ་མ་རུང༌། ཆོས་ཀྱི་གཞུག་མ་འཁྱོངས། ཆོས་དང་འགལ། རང་ཡང་འགྱོད། གཞན་ཀུན་གྱིས་ཀྱང་སྨད་ར་དིར་རེ་འཆི་བ་ཞིག་ཡོང་ཉན་ཡོད་ལ། དེས་ན་བཀའ་བརྒྱུད་གོང་མའི་རྣམ་ཐར་བཞིན་ཕ་ཡུལ་རྒྱབ་དུ་བསྐྱུར། གནས་ཆོས་སྒྲུབ་པའི་འགལ་རྐྱེན་དང་བྲལ་བའི་དབེན་པར་བསྡད། གྲོགས་ཆོས་མཐུན་ནམ་རི་དྭགས་དང་འགྲོགས། གྱོང་ལྟོ་གོས་གཏམ་གསུམ་ལ་བསྐུར་ནས་བློ་ཕུགས་ཆོས་ལ་གཏད། ཆོས་ཕུགས་སྤྲང་ལ་གཏད། སྤྲང་ཕུགས་ཤི་ལ་གཏད། ཤི་ཕུགས་གྲོགས་སྟོང་ལ་གཏད་དེ། བཀའ་གདམས་གོང་མའི་གཏད་པ་བཞི་པོ་འདི་མཐར་འཁྱོར་བ་ཞིག་བྱེད་དགོས་སྙམ་དུ་སྙིང་ཐག་པ་ནས་བསམ་དགོས། རྗེ་མི་ལས།ང་འཆི་བས་འཇིགས་ནས་རི་ལ་ཕྱིན། །ནམ་འཆི་ཆ་མེད་བསྒོམས་བསྒོམས་པས། འཆི་མེད་གཉུག་མའི་བཙན་ས་ཟིན། །ད་འཆི་བའི་འཇིགས་པ་བོར་ཏེ་ཐལ། །ཞེས་གསུངས་སོ། །ཆོས་གཤའ་མ་ཞིག་ལ་ད་ལྟ་རང་ཞུགས་ཏེ་མ་ཤི་བར་དུ་འཁྱོངས་པ་ཞིག་གཞན་སྨོན་ལ་རང་བདེ་བ་ཞིག་ངེས་པར་བྱེད་སྙམ་དུ་ཞེ་མནའ་ཡང་ཡང་བསྐྱལ། དེང་སང་གི་ཆོས་པ་ཀུན་ལ་གཉེན་པོ་འདི་ཀ་གནད་དུ་ཆེ་ཞེས་རྗེ་ཏཱ་ར་ནཱ་ཐས་ལམ་རིམ་བདུད་རྩི་ཉིང་ཁུ་ལས་གསུངས་སོ། །ཡང་པོ་ཏོ་བའི་ཞལ་ནས། ཆོས་གཅིག་ཏུ་བྱ་བ་ལ་མི་རྟག་པ་བསྒོམ་པ་འདི་གལ་ཆེ་སྟེ། འཆི་བ་མི་རྟག་པ་འདི་བསྒོམ་ན། དང་པོ་ཆོས་ལ་འཇུག་པའི་རྒྱུ་བྱེད། བར་ཏུ་དགེ་སྦྱོར་ལ་སྐུལ་བའི་རྐྱེན་བྱེད། ཐ་མ་ཆོས་མཉམ་པ་ཉིད་དུ་རྟོགས་པའི་གྲོགས་བྱེད། ཡང་མི་རྟག་པ་འདི་བསྒོམ་ན་དང་པོ་ཚེ་འདིའི་གདོས་ཐག་ཆོད་པའི་རྒྱུ་བྱེད། བར་དུ་འཁོར་བ་མཐའ་དག་ལ་ཞེན་པ་ལྡོག་པའི་རྐྱེན་བྱེད། ཐ་མ་མྱ་ངན་ལས་འདས་པའི་ལམ་དུ་འཇུག་གྲོགས་བྱེད། ཡང་མི་རྟག་པ་འདི་བསྒོམ་ན་དང་པོ་དད་པ་བྱེད་པའི་རྒྱུ་བྱེད། བར་དུ་བརྩོན་འགྲུས་རྩོམ་པའི་རྐྱེན་བྱེད། ཐ་མར་ཤེས་རབ་སྐྱེ་བའི་གྲོགས་བྱེད། ཡང་མི་རྟག་པ་འདི་བསྒོམས་ཤིང་བརྒྱུད་ལ་སྐྱེས་ན་དང་པོ་ཆོས་ཚོལ་བའི་རྒྱུ་བྱེད། བར་དུ་ཆོས་སྒྲུབ་པའི་རྐྱེན་བྱེད། ཐ་མ་ཆོས་མཐར་ཕྱིན་པའི་གྲོགས་བྱེད། ཅེས་གསུངས་ལ། དེ་བཞིན་དུ་ཕ་དམ་པའི་ཞལ་ནས། མི་རྟག་པ་འདི་རྒྱུད་ལ་སྐྱེས་ན་དང་པོ་ཆོས་ལ་འཇུག་པའི་རྒྱུ་བྱེད། བར་དུ་བརྩོན་འགྲུས་ཀྱི་ལྕག་བྱེད། མཐར་འོད་གསལ་ཆོས་སྐུ་ཐོབ་པར་བྱེད། ཅེས་གསུངས་སོ། །འཆི་བ་མི་རྟག་པ་ཚུལ་བཞིན་དུ་མ་བསྒོམ་ན་ཆོས་ཞུ་ལོ་ཐོས་ལོ་བྱེད་ལོ་སྒྲུབ་ལོ་ཇི་ལྟར་བྱེད་ཀྱང་མཐར་ཆོས་དྲེད་དུ་འགྱུར་བ་ཡིན་ཏེ། ཕ་དམ་པའི་ཞལ་ནས། བོད་ཀྱི་ཆོས་བྱེད་པ་ལ་ཤི་སྙམ་པ་གཅིག་ཀྱང་མི་སྣང་བ་ལ། ལུས་པ་ནི་གཅིག་ཀྱང་མ་མཐོང༌། ལར་སེར་གོས་གྱོན་ནས་ནོར་བསགས་པ་ལ་དགའ་ཚད་འདིས་འཆི་བདག་གཤིན་རྗེ་ལ་ཟས་ནོར་འཇལ་བ་ཨེ་ཡིན་སྙམ། ནོར་བཟང་བཟང་ཐམས་ཅད་ཚགས་བྱེད་ལུགས་ལ། དམྱལ་བ་ལ་ལྐོག་འདུན་འཇལ་བ་ཨེ་ཡིན་སྙམ། བོད་ཀྱི་ཆོས་པ་འདི་ཚོ་མཐོང་ན་དགོད་རེ་བྲོ་ཧ་ཧ་ཧ། ཐོས་པ་སུ་ཆེ་ང་རྒྱལ་ཆེ། །སྒོམ་པ་སུ་བཟང་ཟས་ནོར་གསོག །དབེན་པ་སུ་བརྟེན་འདུ་འཛི་མང༌། །རང་ཡུལ་གང་སྤངས་ངོ་ཚ་མེད། །དེ་ཚོ་ཆོས་ལ་དྲེད་པ་ཡིན། །དེ་ཚོ་སྡིག་ལ་དགའ་བ་ཡིན། །ཞེས་གསུངས་པ་ནི་དོན་ལ་གནས་པ་ཡིན་པས་སེམས་ལ་བཟུང་བར་ཞུ། འཆི་བ་མི་རྟག་པ་བཤད་ཟིན་ཏོ། ། འཁོར་བའི་སྡུག་བསྔལ་བསམ་པ།འཁོར་བའི་སྡུག་བསྔལ་བསམ་པ། གསུམ་པ་འཁོར་བའི་སྡུག་བསྔལ་བསམ་པ་ལ། ངན་སོང་གི་སྡུག་བསྔལ་བསམ་པ་དང༌། མཐོ་རིས་ཀྱི་སྡུག་བསྔལ་བསམ་པ་དང༌། འཁོར་བ་སྤྱིའི་སྡུག་བསྔལ་བསམ་པ་དང་གསུམ་ལས།དང་པོ་ནི། འཁོར་བ་འདི་མཐོ་དམན་གང་དུ་སྐྱེས་ཀྱང་སྡུག་བསྔལ་གྱི་རང་བཞིན་མ་ཡིན་པ་ཅུང་ཟད་ཀྱང་མེད་ལ། དེའི་ནང་ནས་ངན་སོང་གསུམ་གྱི་སྡུག་བསྔལ་ནི་བཟོད་དཀའ་བ་ཡིན་པ་དང་སྐྱེས་བུ་ཆུང་ངུས་ཀྱང་ཤེས་དགོས་པས་ཐོག་མར་ངན་སོང་གི་སྡུག་བསྔལ་བསམ་པ་ལ། དམྱལ་བའི་སྡུག་བསྔལ་བསམ་པ། ཡི་དྭགས་ཀྱི་སྡུག་བསྔལ་བསམ་པ། དུད་འགྲོའི་སྡུག་བསྔལ་བསམ་པ་གསུམ་ལས། དང་པོ་ནི། ཚ་བའི་དམྱལ་བ་བརྒྱད་ཀྱི་སྡོམ། ཡང་སོས་ཐིག་ནག་བསྡུས་འཇོམས་དང༌། །ངུ་འབོད་ངུ་འབོད་ཆེན་པོ་དང༌། །ཚ་བ་རབ་ཚ་མནར་མེད་པའོ། །ཞེས་གསུངས་པ་ལྟར་ཚ་དམྱལ་བརྒྱད་ནི་འཛམ་བུ་གླིང་གི་ལྷོ་ངོས་ཀྱི་ས་འོག་ཏུ་སྟེང་འོག་རིམ་པ་བརྒྱད་དུ་ཆགས་ཏེ་ས་གཞི་དང་རི་ཐང་ཐམས་ཅད་ལྕགས་སྲེག་ལས་གྲུབ་པ་མེ་ལྕེ་ཁྲུ་གང་བ་དུས་རྟག་པར་འབར་བས་ལུས་ཀྱི་ཕྱི་ནང་ཐམས་ཅད་བསྲེག་པ་སྐད་ཅིག་ཀྱང་རྒྱུན་ཆད་དུ་མེད་པ་དང༌། དམྱལ་སྲུང་རྣམས་ཀྱིས་ལྕགས་ཞུན་དང་ཟངས་ཞུན་ཁོལ་མ་ཁར་བླུགས་པས་ནང་ཁྲོལ་ཐམས་ཅད་ཚིག་ཅིང་མེ་འབར་བ་དང༌། ཟངས་ཞུན་ཁོལ་མའི་ནང་དུ་འཚེད་པ་དང༌། ལྕགས་ཀྱི་ཐོ་བ་ཆེན་པོའི་གཏུན་དུ་བརྡུངས་ནས་ཕྱེ་མར་འཐག་པ་དང༌། སྟྭ་རེ་དང་སྟྭེའུ་ལ་སོགས་པས་ཀྱང་རྒྱུན་མི་ཆད་པར་གཤག་ཅིང་གཏུབ་པ་དང༌། དེ་ལ་སོགས་པའི་སྟེང་དུ་ནད་རིགས་བཞི་བརྒྱ་རྩ་བཞིས་དུས་གཅིག་ཏུ་གཟིར་པ་ལ་སོགས་པ་སྡུག་བསྔལ་དཔག་ཏུ་མེད་པ་དུས་གཅིག་ཏུ་མྱོང་དགོས་པ་སོགས་མི་བཟད་པའི་སྡུག་བསྔལ་ལ་གྲངས་ཀྱི་མཐའ་མེད། དམྱལ་བའི་སེམས་ཅན་ནི་ལས་ཀྱི་དབང་གི་སྡུག་བསྔལ་ཅི་ཙམ་ཆེ་བ་བཞིན་སྡུག་བསྔལ་མྱོང་བའི་རིག་པ་ཇེ་གསལ་དུ་འགྲོ་ཞིང༌། བཟོད་སྲན་ཤིན་ཏུ་ཆུང་བ་ཡིན་པས་སྡུག་བསྔལ་ཤིན་ཏུ་ཆེ་ཞིང་ཅུང་ཟད་ཀྱང་བཟོད་མི་ཐུབ་བཞིན་དུ་དམྱལ་བ་ཡང་སོས་པ་རྣམས། མི་ལོ་ལྔ་བཅུ་ལ་རྒྱལ་ཆེན་རིགས་བཞི་པའི་ཞག་གཅིག་ཏུ་བརྩིས་པའི་དེའི་རང་ལོ་ལྔ་བརྒྱ་ཡང་སོས་པའི་ཞག་གཅིག་ཏུ་བྱས་པའི་རང་ལོ་ལྔ་བརྒྱའི་བར་དུ་གནས་པ་དང༌། ཐིག་ནག་དང༌། བསྡུས་འཇོམས། ངུ་འབོད། དུ་འབོད་ཆེན་པོ། ཚ་བ་དང་ལྔ་ནི་རང་རང་གི་སྔ་མ་སྔ་མའི་ལོ་གྲངས་བརྒྱད་འགྱུར་བརྒྱད་འགྱུར་དང༌། རབ་ཏུ་ཚ་བ་དང་མནར་མེད་པ་གཉིས་ནི་ལོ་གྲངས་ཀྱིས་གཞལ་དུ་མེད་པས་ཚ་བ་བར་བསྐལ་ཕྱེད་དང༌། མནར་མེད་པ་བར་བསྐལ་གཅིག་ཏུ་གནས་དགོས་ཏེ། མངོན་པ་མཛོད་ལས། མི་རྣམས་ཀྱི་ལོ་ལྔ་བཅུ་ལ། །འདོད་པ་དག་གི་ལྷ་རྣམས་ལས། །འོག་མ་དག་གི་ཉིན་ཞག་གཅིག །དེས་ན་ཚེ་ལོ་ལྔ་བརྒྱའོ། །གོང་མ་གཉིས་ཀ་ཉིས་འགྱུར་རོ། །ཞེས་དང༌། ཡང་སོས་ལ་སོགས་དྲུག་རིམ་བཞིན། །འདོད་ལྷའི་ཚེ་དང་ཉིན་ཞག་མཉམ། །ཞེས་གསུངས་སོ། །འཇུག་སྡོམ་སྟེ་བསམ་པ་ནི། དེ་ལྟར་སྡུག་བསྔལ་དོས་ནི་དྲག་ཡུན་ནི་རིང༌། ད་ལྟ་མེ་ཕྲ་མོ་གཅིག་ལ་སོར་མོའི་རྩེ་མོ་ཙམ་ཡང་ཡུད་ཙམ་རེ་ཡང་འཇོག་ཏུ་མི་བཏུབ་ན་ནམ་ཞིག་དེ་ལྟ་བུ་རང་གི་ཐོག་ཏུ་བབས་ན། བཟོད་པའི་གོ་སྐབས་ཅུང་ཟད་ཀྱང་མི་འདུག་སྟེ། ལན་གཅིག་དེར་སྐྱེས་ཟིན་ནས་ཟློག་པའི་ཐབས་མེད། ད་ལྟ་ཟློག་པའི་ཐབས་ཡོད་དེ་དེར་སྐྱེ་བའི་རྒྱུ་ལས་ངན་སྡིག་པ་དག་སྦྱངས་ན་ཟློག་པའི་ཐབས་དེ་ཁོ་ན་ཡིན། དེར་མི་སྐྱེ་བའི་ཕྱིར་ཆོས་ལ་འབད་དགོས་སྙམ་དུ་བསམ་མོ། །གྲང་དམྱལ་གྱི་སྡུག་བསྔལ་བསམ་པར་བྱ་སྟེ། གྲང་དམྱལ་བརྒྱད་ཀྱི་སྡོམ་ནི། ཆུ་བུར་ཆུ་བུར་རྡོལ་བ་ཅན། །ཨ་ཆུ་ཀྱི་ཧུད་སོ་ཐམ་པ། །ཨུཏྤལ་པདྨ་པད་ཆེར་གས། །ཞེས་སོ། །གྲང་དམྱལ་བརྒྱད་ནི། འཛམ་བུའི་གླིང་གི་བྱང་ངོས་ཀྱི་ས་འོག་ཏུ་སྟེང་འོག་རིམ་པ་བརྒྱད་དུ་ཆགས་ཏེ། །ཐམས་ཅད་འདྲ་བར་ས་གཞི་དང་རི་ཐང་ཐམས་ཅད་ཆེས་གྲང་བའི་ཆབ་རོམ་ཤིན་ཏུ་གཏིང་འཐུགས་པ་ལས་གྲུབ་པ། ཤ་རུས་ཀྱི་གཏིང་དུ་ཞེན་པའི་རླུང་རྒྱུ་བ་དང་ཁ་བ་བུ་ཡུག་འཚུབ་པ་རྒྱུན་མི་ཆད་པ། ཉི་ཟླའི་འོད་མེད་ཅིང་མུན་ནག་འཐིབ་པའྀ་གནས། ལྷག་སྐྱོབ་སྤོས་མེ་ཙམ་དང་གོས་ལྷན་པ་ཙམ་ཡང་མེད་པའི་གནས་སུ་དམྱལ་བའི་སེམས་ཅན་རྣམས་ལུས་གཅེར་བུར་སྐྱེས་ཏེ། གྲང་བས་ཤིན་ཏུ་གདུང་བས་ལུས་ཐམས་ཅད་ཆུ་བུར་གྱིས་ཁྱབ་པ་དང༌། གྲང་ཆེས་པས་སོ་འཐམ་པ་དང༌། ལུས་ཐམས་ཅད་གྲང་བས་གདུང་བས་ཚལ་པ་མང་དུ་གས་པ་དང༌། ནང་རོལ་ཐམས་ཅད་ཆབ་རོམ་དུ་གྱུར་ཏེ། ལུས་གས་པའི་ནང་ནས་ཕྱིར་ཏོན་པ་དང༌། ལུས་ཐམས་ཅད་གས་པའི་རྨ་ནང་ནས་སྲིན་བུ་མཆུ་རྣོན་པོ་མང་དུ་བྱུང་བས་ཟ་བ་དང༌། ནད་ཀྱི་རིགས་སྣ་ཚོགས་ཀྱིས་དུས་གཅིག་ཏུ་བཏབ་པ་སོགས་སྡུག་བསྔལ་དཔག་ཏུ་མེད་པ་མྱོང་ཞིང་སྐད་ཅིག་ཀྱང་བཟོད་མི་ཐུབ་བཞིན་དུ། ཆུ་བུར་ཅན་ཁལ་བརྒྱད་ཅུ་ཤོང་བའི་སྣོད་ནི་ཏིལ་སྦྱངས་གཅིག་སྟེ། ཏིལ་སྦྱངས་གཅིག་ཏིལ་གྱིས་ཕྱུར་བུར་བཀང་ནས་ལོ་བརྒྱ་རེ་ན་ཏིལ་རེ་བྱུང་ནས་ཏིལ་ཐམས་ཅད་ཟད་པའི་བར་དང༌། དམྱལ་བ་ཆུ་བུར་རྡོལ་བ་དང༌། སོ་འཐམ་པ་དང༌། ཨ་ཅུ་ཟེར་བ་དང༌། ཀྱེ་ཧུད་ཟེར་བར་དང༌། ཨུཏྤལ་ལྟར་གས་པ་དང༌། པདྨ་ལྟར་གས་པ་དང༌། པདྨ་ལྟར་ཆེར་གས་པ་རྣམས་ནི་རིམ་པ་བཞིན་དུ་རང་རང་གི་དམྱལ་བ་སྔ་མ་སྔ་མ་ལས་ཚེ་ཚད་ཉི་ཤུ་ཉི་ཤུའི་འགྱུར་གྱི་བར་དུ་གནས་དགོས་ཏེ། བླང་དོར་རབ་གསལ་ལས། །ཏིལ་ཁལ་བརྒྱད་བཅུས་གང་བའི་བང་བ་ན། །ལོ་བརྒྱ་རེ་ན་ཏིལ་རེ་བྱུང་བ་ཡིས། །ཟད་པར་གྱུར་པ་ཆུ་བུར་ཅན་གྱི་ཚེ། །འོག་མ་འོག་མ་ཉི་ཤུ་འགྱུར་དུ་གསུངས། །ཞེས་གསུངས་པས་སོ། །ཉེ་འཁོར་གྱི་དམྱལ་བའི་སྡུག་བསྔལ་བསམ་པ་འདི་ནི་མངོན་པ་ལས། བརྒྱད་པོ་ཀུན་ལས་ལྷག་བཅུ་དྲུག །དེ་དག་གི་ནི་ངོས་བཞི་ན། །མེ་མ་མུར་དང་རོ་མྱགས་དང༌། །སྤུ་གྲི་ལམ་སོགས་ཆུ་བོ་ཡིན། །ཞེས་བྱུང༌། དེ་ཡང་དམྱལ་བའི་དངོས་གཞི་ཚ་དམྱལ་བརྒྱད་པོ་རེ་རེ་ལ་ཡང་སོ་སོའི་ཕྱོགས་བཞི་པོ་རྣམས་སུ་ཉེ་འཁོར་བ་བཞི་པོ་འདི་རྣམས་ཆ་ཚང་བ་རེ་རེ་ཡོད་པ་ཡིན། ཚ་དམྱལ་གྱི་ཉེ་འཁོར་ན་མེ་མ་མུར་གྱི་འོབས་ཞེས་པ་འོབས་ཆེན་པོ་མདག་མེ་རབ་ཏུ་ཚ་བས་ནང་ཐམས་ཅད་ཁྱབ་པའི་ནང་དུ་ལུས་ཀྱི་ཤ་རུས་ཐམས་ཅད་བསྲེག་པ་དང༌། རོ་མྱགས་ཀྱི་འདམ་ཞེས་པ་རོ་རུལ་བ་སོགས་མི་གཙང་བ་རྩོག་དགུས་གང་བའི་འོབས་ཆེན་པོའི་ནང་དུ་ཚུད་ནས་མི་གཙང་བའི་དྲི་ངས་སྙིང་དང་མགོ་འགས་པ་དང༌། དེའི་ནང་ནས་སྲིན་བུ་ལྕགས་ཀྱི་མཆུ་ཅན་མང་དུ་བྱུང་བས་ལུས་འབིག་ཅིང་ནང་རོལ་ཐམས་ཅད་འབྱིན་པ་དང༌། སྤུ་གྲིའི་ཐང་ཞེས་པ་ས་གཞི་ཐམས་ཅད་རལ་གྲི་རྣོན་པོ་སོར་བཞི་པས་བར་མཚམས་མེད་པར་གཏམས་པས་རྐང་པ་གཡས་བཏེགས་ན་གཡོན་པ་གཅོད། གཡོན་པ་བཏེགས་ན་གཡོན་པ་སོས་ཤིང་གཡས་པ་གཅོད། རེས་འགྱེལ་ནས་ལུས་ཐམས་ཅད་གཅོད་པ་དང༌། རལ་གྲི་ལོ་མའི་ནགས་ཚལ་ཞེས་པ་ཡལ་ག་ཐམས་ཅད་རལ་གྲི་རྣོན་པོ་ཅན་གྱི་ནགས་ཚལ་རྒྱ་ཆེན་པོས་ཁྱབ་པའི་གནས་སུ་ནགས་ཚལ་རླུང་གིས་བསྐྱོད་པའི་རལ་གྲིའི་ཡལ་ག་རྣམས་ཆད་པའི་རལ་གྲི་རྣོན་པོའི་ཆར་བབ་པས་ལུས་ཐམས་ཅད་དུམ་བུ་སྟོང་དུ་གཏུབ་པ་དང༌། ཤལ་མ་ལིའི་སྡོང་པོ་ཞེས་པ་ངོས་ཐམས་ཅད་ལྕགས་ཀྱི་ཚེར་མ་ཤིན་ཏུ་རྣོན་པོ་དུ་མས་གང་བའི་སྡོང་པོ་མང་དུ་སྐྱེས་པའི་གནས་སུ་དམྱལ་བའི་སེམས་ཅན་རྣམས་ཁྱི་སྲེ་བོ་འཇིགས་སུ་རུང་བ་ལ་སོགས་པས་བདས་ཏེ་ཤིང་ལ་འཛེགས་པ་ན་ཚེར་མ་ཐམས་ཅད་ཁ་ཐུར་དུ་བལྟས་པས་ཕུགས་ཤིང་གཤག་བཞིན། ཤིང་གི་རྩེར་སླེབ་ཚེ། ཁྭ་ཏ་སོགས་བྱ་གདུག་པ་ཅན་རྣམས་ཀྱིས་མིག་འབྲིད་ཅིང་ཀླད་པ་ཟ་བར་བྱེད། ཡང་མར་འབྲོས་པ་ན་ཚེར་མ་རྣམས་ཁ་གྱེན་དུ་བལྟས་པས་སྔར་ལྟར་ལུས་ཐམས་ཅད་འབིག་བཞིན་ཤིང་གི་རྩ་བར་ཕྱིན་པ་དང༌། ཡང་ཤིང་ལ་འཛེགས་པ་སོགས་འཁོར་མོར་བྱེད་པའོ། །གསུམ་པོ་དེ་མཚོན་ཆའི་གནོད་པ་ཡིན་པས་གཅིག་ཏུ་སྡོམས་སོ། །ཐལ་ཚན་གྱི་ཆུ་བོ་ཞེས་པ་ནང་ཐམས་ཅད་ཐལ་ཚན་གྱིས་གང་བའི་ཆུ་བོའི་ནང་དུ་བྱིང་ནས་ལུས་ཀྱི་ཤ་ལྤགས་ཐམས་ཅད་ཚིག་ནས་རུས་གོང་དཀར་པོར་གྱུར་པ་ན་སྟེང་དུ་ཕྱིན། དེ་མ་ཐག་ཤ་ལྤགས་ཐམས་ཅད་སླར་འཚོ་བ། ཡང་ནུབ་ནས་ཚིག་པ་སོགས་སྡུག་བསྔལ་དཔག་ཏུ་མེད་པ་ཡོད་དོ། །དམྱལ་པ་ཉི་ཚེ་བ་ནི། ཚ་དམྱལ་དང་གྲང་དམྱལ་གྱི་མཐའ་བསྐོར་དང༌། རྒྱ་མཚོའི་འགྲམ་དང་རི་བྲག་ས་སྟེང་ཁང་ཁྱིམ་སོགས་གནས་ངེས་མེད་དུ་གནས་ཏེ། མཚན་མོར་ལྷའི་བདེ་བ་ལྟ་བུ་མྱོང་ནས་ཉིན་མོ་ཁྲོ་ཆུ་ཁོལ་མ་འཐུང་བའི་སྡུག་བསྔལ་དང༌། དེ་ལས་ལྡོག་པ་དང༌། ཀ་བའི་ནང་དུ་ཀ་བ་ལྟ་བུའི་ལུས་བླངས་ནས་ཁང་བའི་འགེབ་ཐམས་ཅད་རང་གི་ལུས་ཀྱིས་མི་ཐེག་པའི་སྡུག་བསྔལ་དང༌། དེ་བཞིན་དུ་ཕྱག་མ་དང༌། ཐག་པ་དང༌། གྲལ་གདན་དང༌། གཏུན་དང༌།མེ་ཐབ་ལྟ་བུ་ལ་སོགས་པ་འདི་མེད་བསམ་པ་མེད་པར་གསུངས་སོ། ། གཉིས་པ་ཡི་དྭགས་ཀྱི་སྡུག་བསྔལ་བསམ་པ།གཉིས་པ་ཡི་དྭགས་ཀྱི་སྡུག་བསྔལ་བསམ་པ་ནི། འཛམ་བུ་གླིང་གི་ས་འོག་དཔག་ཚད་ལྔ་བརྒྱ་ན་ཡི་དྭགས་ཀྱི་གྲོང་སེར་སྐྱ་ཞེས་བྱ་བ། སྤང་ལག་མཐིལ་ཙམ་ཡང་མེད་ཅིང་ས་གཞི་རིད་པ་གསེགས་མས་ཁྱབ་པ། བཏུང་བ་ཆུ་ཐིག་ཙམ་དང༌། ཟས་ཤིང་ཐོག་ཙམ་ཡང་མེད་པའི་གནས་སུ་ལས་ངན་གྱིས་འཕངས་ནས་གནས་པ་ཡོད་ལ། སྤྱིར་ཡི་དྭགས་ལ་ཕྱིའི་སྒྲིབ་པ་ཅན། ནང་གི་སྒྲིབ་པ་ཅན། ཟས་སྐོམ་གྱི་སྒྲིབ་པ་ཅན་གསུམ་ཡོད་ལ། དང་པོ་ཕྱིའི་སྒྲིབ་པ་ཅན་ནི། ལོ་མང་བོར་ཟས་སྐོམ་ཡེ་མི་རྙེད། རྒྱང་རིང་བོ་ནས་ཟས་ཀྱི་ཕུང་པོ་མཐོང་ཡང་དྲུང་དུ་ཕྱིན་ན་ཤུལ་ཙམ་ཡང་མེད་པར་སྟོང་བ་ལྟར་མཐོང་བ་དང༌། ཆུ་ཀླུང་ཆེན་པོའི་འགྲམ་དུ་ཕྱིན་ན། གསེག་མ་དང་བྱེ་མའི་གྲོག་པོར་འགྲོ་བ་དང༌། ལྗོན་ཤིང་འབྲས་བུ་རྒྱས་པའི་དྲུང་དུ་གཏུགས་ནའང༌། ཤིང་སྐམ་པོར་འགྱུར་བ་སོགས་ཡོད། འགའ་ཞིག་ལ་སྲིན་པོ་མང་པོས་བསྲུངས་ཏེ་མི་གཏོང་བ་ཡང་ཡོད་དོ། ། གཉིས་པ་ནང་གི་སྒྲིབ་པ་ཅན།གཉིས་པ་ནང་གི་སྒྲིབ་པ་ཅན་ནི། ཁ་ཁབ་མིག་ཙམ་དུ་གྱུར་ནས་དང་པོར་བཟའ་བཏུང་ཁར་མི་ཆུད། ཅུང་ཟད་ཆུད་ན་ཡང་ཟས་རྣམས་འགྲམ་ཕུག་ཡངས་པོ་དེར་སྟོར། བཏུང་བ་རྣམས་ཁའི་དུག་ཆེན་པོས་སྐམ། གལ་ཏེ་བཟའ་བཏུང་མིད་ཀྱང་མགྲིན་པ་གཞུ་རྒྱུད་ལྟར་ཕྲ་བ་ནས་མི་འགྲོ། སོང་ཡང་ལྟོ་བ་རིའི་གཏོས་ཙམ་ཡོད་པས་ལྟོ་ཁེངས་བའི་དུས་མེད་པ་ཡིན་ནོ། ། གསུམ་པ་ཟས་སྐོམ་གྱི་སྒྲིབ་པ་ཅན་ནི། བཟའ་བཏུང་ཟོས་ཚད་ཁོང་ནང་དུ་མེ་འབར་བར་སོང་ནས་ཚིག་པ་དང༌། དང་པོ་ཉིད་ནས་ཀྱང་མེ་འདག་དང་བཤང་གཅི་དང་རྣག་ཁྲག་ལ་སོགས་པ་ངན་པ་དང་སྡུག་བསྔལ་སྐྱེད་པ་ཁོ་ན་ཟ་དགོས་ཀྱི། བཟང་པོ་ཡེ་མི་རྙེད་པ་ཡིན། ཡི་དྭགས་དེ་ཐམས་ཅད་སྤྱིར་ན་དུས་རྟག་ཏུ་བཀྲེས་པ་དང་སྐོམ་པའི་སྡུག་བསྔལ་བཟོད་གླགས་མེད་པ་ཡིན། གོས་དང་བྲལ་ཏེ་ཚད་པས་ཚིག་པ་དང༌། གྲང་བས་མནར་པའི་སྡུག་བསྔལ་དཔག་ཏུ་མེད། དགུན་གྲང་དུས་ཉི་མའི་འོད་ཀྱིས་ཀྱང་གྲང་རོགས་བྱེད་པ། སོས་ག་ཚད་དུས་སུ་ཟླ་བའི་འོད་ཀྱིས་ཀྱང་ཚིག་སྟེ་འོང༌། ཆར་བབ་ན་མེ་ཆར་བབས་ཏེ་ཚིག་པའི་སྣང་བ་འབྱུང༌། དུས་རྟག་ཏུ་འཚོལ་འགྲོས་ཀྱི་བྲེལ་བས་ངལ་ཞིང་ཐང་ཆད་པའི་སྡུག་བསྔལ་དང༌། ཟས་སྐོམ་ཡེ་མ་བྱུང་བས་ལུས་སྐམས་པ་ལྟ་བུར་གྱུར། རུས་ཚིགས་སུམ་བརྒྱ་དྲུག་ཅུ་འཁྲོགས་པས་རྡོ་ངར་མ་འཐབས་པ་ལྟར་མེ་ལྕེ་ཉུག་ཉུག་པ་འབྱུང༌། ཕན་ཚུན་དགྲར་གྱུར་བས་བཟུང་བ་དང་འཆིང་བ་དང༌། རྡེག་པ་དང༌། ཆད་པས་གཅོད་པའི་འཇིགས་པ་ཡང་ཡོད། ཞར་བ་རང་འབྲོགས་ཟེར་བའི་ཚུལ་གྱིས་བསྟད་པ་མེད་པར་ཡང་འཇིགས་སྐྲག་ཆེན་པོས་འབྲོས། དེ་འདྲ་བའི་སྡུག་བསྔལ་དོས་དྲག་པ་དང༌། ཡི་དྭགས་ཕལ་མོ་ཆེའི་ཚེ་ཚད་མི་ལོ་སྟོང་ཕྲག་བཅོ་ལྔ་ཐུབ་པས་ཡུན་རིང་བའོ། །དེར་མ་འདུས་པ་མིན་ཀྱང་ད་ལྟའི་ཡི་དྭགས་ཁ་འཐོར་བ་མཁའ་ལ་རྒྱུ་བའི་འདྲེ་བཀྲེན་འདི་རྣམས་ཀྱིས་གཞན་ལ་གནོད་པ་བྱས་པས་སླར་ཡང་ངན་སོང་དུ་འགྲོ་བ་དང༌། ཤུགས་ལ་མ་བསམ་ཀྱང་དུག་ཆེན་པོས་གཞན་ལ་གནོད་པ་འབྱུང་བ་དང༌། མཐུ་བོ་ཆེས་རྡུང་རྡེག་བྱེད་པ་དང༌། མ་ཉེས་མ་ལན་པ་ལ་འདྲེས་བྱས་སོ་ཞེས་ཁག་ངན་བྱུང་བའི་ཚེ། སེམས་ལ་སྡུག་བསྔལ་ཆེན་པོ་སྐྱེ་བ་ཡོད་པར་གསུངས་སོ། ། གསུམ་པ་དུད་འགྲོའི་སྡུག་བསྔལ་བསམ་པ།གསུམ་པ་དུད་འགྲོའི་སྡུག་བསྔལ་བསམ་པ་ནི། དེ་ལ་དུད་འགྲོ་བྱིངས་ན་གནས་པ་དང་ཁ་འཐོར་བ་དང་གཉིས་ལས། དང་པོ་ནི། རྒྱ་མཚོའི་ནང་དུ་ཀླུ་དང་ཆུ་སྲིན་ལ་སོགས་པ་རྒྱ་མཚོའི་ནང་ཐམས་ཅད་གང་བར་ཡོད་པ་རྣམས་ཏེ། བདེ་བ་སྒྲུབ་པའི་ཐབས་མི་ཤེས། སྡུག་བསྔལ་དང་མི་འདོད་པ་བསལ་བའི་ཐབས་མི་ཤེས་པའི་རྨོངས་པ་ནི་སྡུག་བསྔལ་མཐའ་ཡས་པ་འབྱུང་བའི་རྒྱུ་ཡིན་པས་བླུན་རྨོངས་ཀྱི་སྡུག་བསྔལ་ནི་དུད་འགྲོ་རྣམས་ཀྱི་སྡུག་བསྔལ་གྱི་གཙོ་བོ་དང་ཐུན་མོང་བ་ཡིན་ཞིང༌། དེའི་སྟེང་དུ་ཆུ་སྲིན་སོགས་སྲོག་ཆགས་ཆེན་པོ་རྣམས་ཀྱིས་ཆུང་ངུ་དུ་མ་ཅིག་ཆར་དུ་ཟ་བ་དང༌། དུང་འབུ་སོགས་ཆུང་ངུ་དུ་མས་ཆེན་པོ་རྣམས་ཕུག་སྟེ་ཟ་བ་དང༌། རྒྱ་མཚོའི་རླབས་ཀྱིས་བསྐྱོད་དེ་གནས་གཅིག་ཏུ་སྡོད་པའི་དབང་མེད་པས་ཕྱོགས་ཐམས་ཅད་དུ་འཁྱམས་དགོས་བ་དང༌། དེ་སྐབས་སུ་འཇིགས་པ་སྣ་ཚོགས་དང་འཕྲད་པ་དང༌། གཞན་ཡང་སྐྱེ་རྒ་ན་འཆི་སོགས་སྡུག་བསྔལ་བསམ་ལས་འདས་པ་ཡོད་དོ། ། གཉིས་པ་དུད་འགྲོ་ཁ་འཐོར་བ་ནི། མི་དང་ལྷའི་ཡུལ་ན་ཡོད་པ་འདི་རྣམས་ཡིན། མིས་བདག་ཏུ་མ་བཟུང་བ་རྣམས་ནི་ཕན་ཚུན་གཅིག་གིས་གཅིག་ཟ་བ། རྔོན་པས་གསོད་པ། དགྲ་བྱུང་གི་དོགས་པ་དང༌། ཚ་གྲང་དང་བཀྲེས་སྐོམ་གྱིས་ཆེས་གདུང་བ་ལ་སོགས་པ་སྡུག་བསྔལ་འདི་མེད་བསམ་པ་གཅིག་མེད་པས་རྟག་ཏུ་སེམས་ལ་བདེ་བ་མེད། མིས་བདག་ཏུ་བཟུང་བ་རྣམས་ཀྱང་སྤུ་འཛིང་པ་དང༌། སྣ་འབིགས་པ་དང༌། བརྡེག་པ་དང༌། ཁུར་ལྕི་བས་ངལ་བ་སོགས་དང༌། ཤ་དང་ཁྲག་དང་པགས་པ་དང་རུས་པའི་ཕྱིར་གསོད་པ་སོགས་གསོད་གཅོད་བཀོལ་སྤྱད་ཀྱི་སྡུག་བསྔལ་མང་པོ་ཡོད་ལ། གཙོ་བོར་སྡུག་བསྔལ་གྱི་གཙོ་བོ་ཤིན་ཏུ་རྨོངས་བས་གཅིག་ལ་གཅིག་ཟ་བ་ཡིན་ཏེ། མི་ཤ་ཆགས་པའི་དགྲ་ལ་ཟོན་བྱེད་པ་ལྟར་རྟག་ཏུ་གནས་དགོས་པ་ཡིན་ནོ། །དེ་རྣམས་ཀྱི་གནད་བསྡུས་ཏེ་བསམ་པ་ལ། དེ་ལྟར་ངན་སོང་གསུམ་གྱི་སྡུག་བསྔལ་བསམ་ཙ་ན་བཟོད་པའི་ཐབས་མི་འདུག དེ་ལས་སྐྱོབ་པའི་སྐྱབས་ཤིག་དགོས་པར་འདུག སྐྱབས་སུས་ཐུབ་ན། ཚངས་པའམ། བརྒྱ་བྱིན་ནམ་འཁོར་ལོས་སྒྱུར་བའི་རྒྱལ་པོས་ཀྱང་སྐྱོབ་མི་ཐུབ་ན། གཞན་འདི་བ་ཀུན་གྱིས་ག་ལ་ཐུབ། འོ་ན་སུས་ཐུབ་ན་དཀོན་མཆོག་གསུམ་གྱིས་ཐུབ། བདག་ལྷ་ཇོ་བོ་དཀོན་མཆོག་རིན་པོ་ཆེ་གསུམ་ལ་སྐྱབས་སུ་འགྲོ། སངས་རྒྱས་ལ་སྟོན་པ་ཞུ། ཆོས་ལ་ནི་ཉམས་ལེན་ཞུ། དགེ་འདུན་ལ་ནི་དེ་སྒྲུབ་པའི་གྲོགས་ཞུ་བ་ཡིན་སྙམ་དུ་བསམ། ཡང་སྐྱབས་པ་སངས་རྒྱས་ལ་བསྐྱབས་ཀྱང༌། སྐྱོབ་པ་ཆོས་ཀྱིས་སྐྱོབ་བྱ་བ་ཡིན། ཇི་སྐད་དུ། ཐུབ་རྣམས་སྡིག་པ་ཆུ་ཡིས་འཁྲུ་བར་མི་མཛད་ལ། །འགྲོ་བའི་སྡུག་བསྔལ་ཕྱག་གིས་ཀྱང་ནི་སེལ་མི་མཛད། །ཉིད་ཀྱི་རྟོགས་པ་གཞན་ལ་སྤོ་བར་མཛད་པ་མིན། །ཆོས་ཉིད་བདེན་པ་བསྟན་པས་གྲོལ་བར་མཛད་པ་ཡིན། །ཞེས་གསུངས་པ་ལྟར་སངས་རྒྱས་ཀྱིས་ཀྱང་མི་ཆུས་ཁྱེར་བ་སྐྲ་ནས་འཛིན་པ་ལྟར་སྐྱབ་ཏུ་མི་བཏུབ། ཆོས་བཤད་ཆོས་བཞིན་བྱེད་དུ་བཅུག་ནས་སྐྱོབ་པ་ཡིན། སངས་རྒྱས་ལ་དད་པ་བསྒོམས་ཏེ། དེས་གསུངས་པའི་ཆོས་ནས་ཇི་སྐད་བཤད་པ་བཞིན་བྱ། འཕགས་པའི་དགེ་འདུན་རྣམས་ཀྱིས་ཇི་འདྲ་མཛད་འདུག་པ་དེ་བཞིན་དུ་རང་རེ་ཡང་དེའི་ལད་མོ་བཟློས་ཏེ་བྱེད་སྙམ་པ་རྒྱུན་དུ་བསྒོམ་མོ། ། གཉིས་པ་མཐོ་རིས་ཀྱི་སྡུག་བསྔལ་བསམ་པ།གཉིས་པ་མཐོ་རིས་ཀྱི་སྡུག་བསྔལ་བསམ་པ་ལ། མིའི་སྡུག་བསྔལ་དང༌། ལྷ་མིན་གྱི་སྡུག་བསྔལ་དང༌། ལྷའི་སྡུག་བསྔལ་བསམ་པ་དང་གསུམ་ལས། དང་པོ་ནི། བདག་ལས་ཀྱི་དབང་གིས་འགྲོ་བ་རིགས་དྲུག་ཏུ་སྐྱེ་བ་ལེན་པར་འགྱུར་པ་ལས་ངན་སོང་གསུམ་དུ་སྐྱེས་ན་སྡུག་བསྔལ་ནི་དེ་འདྲ། བླང་དོར་རབ་གསལ་ལས། མངལ་ནས་སྐྱེ་བ་དོག་པའི་སྡུག་བསྔལ་དང༌། །ན་ཚོད་འགྱུར་བ་རྒས་པའི་སྡུག་བསྔལ་དང༌། །ཁམས་འགྱུར་བ་ལས་ན་བའི་སྡུག་བསྔལ་དང༌། །སྲོག་འགྱུར་བ་ལས་འཆི་བའི་སྡུག་བསྔལ་དང༌། །ཞེས་གསུངས་པ་ལྟར་མིར་སྐྱེས་ན་སྐྱིད་དོ་སྙམ་ན་དེར་ཡང་མི་སྐྱིད་དེ་མི་ལ་སྡུག་བསྔལ་གྱི་གཙོ་བོ་སྐྱེ་རྒ་ན་འཆིའི་སྡུག་བསྔལ་བཞི་ཡོད་པ་ལས། དང་པོ་སྐྱེ་བའི་སྡུག་བསྔལ།དང་པོ་སྐྱེ་བའི་སྡུག་བསྔལ་ནི། མི་ཕལ་ཆེར་ལ་མངལ་སྐྱེས་ཡིན། མངལ་དུ་ཟླ་བ་དགུའམ་བཅུའི་བར་དུུ་གནས་དགོས་ན། མངལ་གནས་དེ་ལ་དོག་པའི་སྡུག་བསྔལ་དང༌། མུན་གནག་པའི་སྡུག་བསྔལ་དང༌། དྲི་མི་ཞིམ་པའི་སྡུག་བསྔལ་གསུམ་རྟག་ཏུ་ཡོད། མ་དེ་བཀྲེས་བའི་ཚེ་གཡང་ཟ་བའི་རྣམ་པ་དང༌། འགྲངས་བའི་ཚེ་རིས་ནོན་པ་ལྟ་བུ་དང༌། བཟའ་བཏུང་དྲོན་མོ་ཟོས་འཐུངས་བྱས་ན་ཆུ་ཚན་དུ་བཙོས་པ་ལྟ་བུ་དང༌། གྲང་མོ་ཟོས་འཐུངས་བྱས་ན་འཁྱགས་རུམ་དུ་བསྐྱུར་བ་ལྟ་བུའི་སྡུག་བསྔལ་ཡོད། མངལ་ནས་ཕྱི་རུ་བཙའ་བའི་ཚེ་ཡང་ཏིལ་མར་འཚིར་བའི་ཤིང་གི་བར་དུ་བཅེར་བ་ལྟ་བུ་དང༌། ཚིགས་ཐམས་ཅད་བྱེ་ཞིང་ཞིག་པ་ལྟ་བུའི་སྡུག་བསྔལ་ཡོད། བཙས་མ་ཐག་ཏུ་གང་ལ་རེག་ཀྱང་རྩུབ་སྟེ། དར་འཇམ་པོས་དཀྲིས་ཀྱང་ཚེར་མའི་དོང་དུ་བསྐྱུར་བ་ལྟ་བུ་དང༌། གཞན་གྱི་ལག་ཏུ་བླངས་པ་ན། བྱེའུ་ཁྲས་ཁྱེར་བ་ལྟ་བུའི་སྡུག་བསྔལ་ཡོད། ད་ལྟ་རང་རེས་མ་དྲན་པར་ཟད། དྲན་ན་གཞན་མི་དགོས་པར་སྐྱེ་བའི་སྡུག་བསྔལ་གཅིག་པུ་ལ་བསམ་ཀྱང་མིར་སྐྱེས་པ་ལ་བདེ་བ་ཅི་ཡང་མི་འདུག བདག་ལས་ཀྱི་དབང་གིས་འཁོར་བར་སྐྱེ་བ་མི་ལེན་པའི་ཆོས་ཅིག་བྱ་དགོས། མིའི་འགྲོ་བ་མངལ་སྐྱེས་ཀྱི་སྡུག་བསྔལ་ནི་དེ་ལྟ་བུར་འདུག སྤྱིར་ཁམས་གསུམ་གང་དུ་སྐྱེས་ཀྱང་སྡུག་བསྔལ། འགྲོ་བ་གང་དུ་སྐྱེས་ཀྱང་སྡུག་བསྔལ། སྐྱེ་གནས་ཇི་ལྟ་བུར་སྐྱེས་ཀྱང་སྡུག་བསྔལ་ཏེ། སྡུག་བསྔལ་རྣམ་པ་ལྔ་དང་ལྡན་པའོ། །དེ་ཡང་སྐྱེ་བ་སྡུག་བསྔལ་དང་ལྡན་པ་ཞེས་བྱ་བ་ཚོར་བ་དྲག་པོ་དང་བཅས་ཏེ་སྐྱེ་དགོས། སྐྱེ་བ་གནས་ངན་ལེན་དང་ལྡན་པ་བྱ་བ་ཉོན་མོངས་པ་སྐྱེད་འཕེལ་གྱི་ས་བོན་དང་ལྡན་པར་སྐྱེ་དགོས། སྐྱེ་བ་སྡུག་བསྔལ་གྱི་གནས་སུ་གྱུར་པ་བྱ་བ། སྐྱེས་པ་ལས་རྒ་ནད་འཆི་བ་སོགས་སྡུག་བསྔལ་གཞན་འབྱུང་བ་ཡིན། སྐྱེ་བ་ཉོན་མོངས་ཀྱི་གནས་སུ་གྱུར་པ་བྱ་བ་སྐྱེ་བ་བླངས་པས་ཕྱིས་རྐྱེན་དང་འཕྲད་ནས་ཉོན་མོངས་བ་མང་པོ་སྐྱེས་ཤིང་དེས་ཀུན་ནས་སླང་པའི་ལས་དུ་མ་གསོག་པའོ། ། སྐྱེ་བ་ཉིད་དབང་མེད་དུ་འཇིག་པས་སྡུག་བསྔལ་བ་བྱ་བ་ནི། སྐྱེ་བ་ཉིད་སྐད་ཅིག་སྐད་ཅིག་གིས་འཇིག་པའོ། །དེ་ལྟར་ན་སྐྱེ་བ་སྡུག་བསྔལ་བའོ་སྙམ་དུ་བསྒོམ་མོ། ། གཉིས་པ་རྒས་པའི་སྡུག་བསྔལ།གཉིས་པ་རྒས་པའི་སྡུག་བསྔལ་ནི། མི་རྣམས་ལ་རྒས་པའི་སྡུག་བསྔལ་ཡོད་དེ། རྒས་པའི་ཚེ་ཉམས་པའི་སྡུག་བསྔལ་ལྔ་ཡོད། ཁ་དོག་ཉམས་པ་བྱ་བ་ཤ་མདོག་དང་མདངས་ལེགས་པོ་རྣམས་ནུབ་སྟེ་ཁ་དོག་མི་སྡུག་པ་ནག་སྦམ་པའམ། སྔོ་ཐལ་གྱིས་འགྲོ མགོ་སྤྲ་བའི་མེ་ཏོག་ལྟར་སྐྱ་བ་དང༌། དབང་པོ་ཀུན་གྱི་བཀྲག་མདངས་ཤོར་བ་ཡིན། དབྱིབས་ཉམས་པ་བྱ་བ་ནི། སོ་ནི་ལྷུང༌། ལུས་ནི་གུག་གུག་པོར་སོང༌། ཡན་ལག་རྣམས་ནི་འཁྱོགས། ཤ་ནི་སྐམས། ལྤགས་པ་ནི་ལྷོད། གདོང་བྱད་ནི་གྲས་གདན་རྙིང་བ་ལྟར་གཉེར་མས་ཁེངས་པ་ལ་གང་ལ་བལྟས་ཀྱང་མི་མཛེས་པའོ། །མཐུ་སྟོབས་ཉམས་པ་བྱ་བ་ནི། རྗེ་མི་ལས། བརྟོད་ཕུར་འདོན་པའི་ལྡངས་ལུགས་དང་གཅིག །བྱ་ལ་འཇབ་པའི་འགྲོ་ལུགས་དང་གཉིས། །ས་དོ་ཆད་པའི་སྡོད་ལུགས་དང་གསུམ། །ཞེས་གསུངས་པ་ལྟར་ལྡང་བ་ན་སུག་བཞི་འཛུགས། འགྲོ་བ་ན་འཁྱོར། འདུག་པ་ན་ཚྭ་དོ་ཐག་པ་ཆད་པ་བཞིན་སྡོད། སྨྲ་བ་ན་ལྡབ་ལྡིབ་ལས་མེད་པ་ལ་སོགས་པའོ། །དབང་བོ་ཉམས་པ་བྱ་བ་ནི། མིག་མི་གསལ་རྣ་བ་འོན་པ་སོགས་གཞན་གྱིས་བལྟས་ན་རྫུས་འདེབས་པ་འདྲ་བར་འགྱུར། ལོངས་སྤྱོད་ཉམས་པ་བྱ་བ་ནི། ཁ་ཟས་ཉུང་ན་བཀྲེས། མང་ན་མི་འཇུ་བ་ལ་སོགས་པ་འདོད་ཡོན་ལ་སྤྱད་དུ་མེད་པའོ། །བདག་ཀྱང་རྒས་པའི་སྡུག་བསྔལ་མ་སྤངས་པས།ཚེ་རིང་རྒས་ལོང་བྱུང་ན་ཐ་མ་རྒས་པར་འགྱུར། གཉེན་བཤེས་དང་དགྲ་གཉེན་འགྲོ་བ་འདི་ཀུན་ཀྱང་དེ་དང་འདྲ་སྙམ་དུ་བསྒོམ་པའོ། ། གསུམ་པ་ན་བའི་སྡུག་བསྔལ་བསམ་པ།གསུམ་པ་ན་བའི་སྡུག་བསྔལ་བསམ་པ་ནི། སྡུག་བསྔལ་གཞན་ཡང་ཡོད་དེ། སྔོན་གྱི་ལས་དང་འཕྲལ་གྱི་རྐྱེན་ལས་ནད་རྣམ་པ་སྣ་ཚོགས་པ་འབྱུང་བ་ཡིན། ན་བ་དེ་ཡང་སྡུག་བསྔལ་ལྔ་སྟེ། སྡུག་བསྔལ་དང་ཡིད་མི་བདེ་འཕེལ་བ་ཞེས་བྱ་བ་ནི། ཟུག་རྔུ་དངོས་ཀྱི་སྡུག་བསྔལ་ཡིན། ལུས་ཀྱི་རང་བཞིན་འགྱུར་བ་ནི་ཤ་ཞུ་ལྤགས་པ་སྐམས་པ་ལ་སོགས་པའོ། །ཡུལ་ཡིད་དུ་འོང་བ་སྤྱད་དབང་མེད་པ་དང༌། ཡིད་དུ་མི་འོང་བ་ངེས་པར་བསྟེན་དགོས་པ་གཉིས་ནི་ཟས་དང་སྤྱོད་ལམ་འདོད་པ་བྱེད་དུ་མེད་ཅིང༌། མི་འདོད་པའི་སྨན་ཁ་བ་དང་མེ་གཏར་སོགས་བསྟེན་དགོས་པའོ། །སྲོག་གི་དབང་བོ་དང་འབྲལ་བ་ཞེས་བྱ་བ་ནི། འཆི་བའམ་འཆིར་དོགས་པས་སྡུག་བསྔལ་བ་སྟེ། ན་བ་རང་བས་ཀྱང་འཆི་བའི་སྡུག་བསྔལ་སྔོན་བསུ་བ་ཡིན། བདག་ཀྱང་ན་བ་ལས་མ་ཐར་ན་བར་འགྱུར་དེ་འོང༌། བདག་གི་བཤེས་ལ་སོགས་པ་དགྲ་གཉེན་འགྲོ་བ་འདི་ཀུན་ཀྱང་དེ་དང་འདྲའོ་སྙམ་དུ་བསྒོམ་པར་བྱའོ། ། བཞི་བ་འཆི་བའི་སྡུག་བསྔལ།བཞི་བ་འཆི་བའི་སྡུག་བསྔལ་ནི། འཆི་བའི་སྡུག་བསྔལ་རྣམ་པ་ལྔ་ཡོད་དེ། ༡ ལོངས་སྤྱོད་ཕུན་སུམ་ཚོགས་པ་དང་འབྲལ། ༢ རྩ་འཛིང་ཕུན་སུམ་ཚོགས་པ་དང་འབྲལ༌། ༣ འཁོར་གྲོགས་ཕུན་སུམ་ཚོགས་པ་དང་འབྲལ། ༤ཕངས་ཤིང་སྡུག་པའི་ལུས་དང་ཡང་འབྲལ། ༥འཆི་བ་ཉིད་སྡུག་བསྔལ་དང་ཡིད་མི་བདེ་དྲག་པོ་དང་བཅས་པའོ། །རང་རེ་མངོན་པར་ཞེན་ཅིང་ཆགས་པའི་ཡུལ་ཕྱོགས་སམ། ཁང་ཁྱིམ་མམ། ནོར་རྫས་སམ། ཡར་གྱི་དཔོན། མར་གྱི་གཡོག་ཐད་ཀའི་གྲོགས་པོ་ཐམས་ཅད་དང་བྲལ་ཞིང༌། གནད་གཅོད་ཀྱི་སྡུག་བསྔལ་ཆེན་པོ་དང་བཅས་ཏེ་འཆི་དགོས་པ་སོགས་འཆི་བ་མི་རྟག་པ་བཤད་པའི་སྐབས་སུ་བསྟན་པ་ལྟར་བསྒོམ་པར་བྱའོ། ། སྡུག་བསྔལ་གཞན་ཡང་ཡོད་དེ། འདོད་པ་བཙལ་ཏེ་མ་རྙེད་པས་སྡུག་བསྔལ། དེ་ཡང་ལོངས་སྤྱོད་དམ། ཁ་དྲག་གམ། མངའ་ཐང་འཕྲན་བུ་བསྒྲུབ་པའི་ཕྱིར་དུ་སྲོག་ལ་མ་ལྟས་པར་འཁྲུག་པ་ལ་ཡང་འཇུག ལོ་ཟླ་མང་པོར་བགྲོད་དགོས་པའི་བྱེས་སུ་ཡང་འགྲོ། དུས་བཞིར་ཟིན་པ་དང་འཁོར་བ་མེད་པའི་ལས་ལ་རྟག་ཏུ་འཇུག རྐང་ཁྲག་ནི་རྡོ། ལག་ཁྲག་ནི་ཤིང་བྱས་ནས་ལྟོགས་སྐོམ་ཐམས་ཅད་ནི་དང་དུ་བླངས། ཚ་གྲང་ཐམས་ཅད་ནི་ཁྱད་དུ་བསད། ཉིན་མཚན་ཀུན་ཏུ་ནི་དལ་བ་མེད། ཤ་ཁྲག་ལྦུ་བར་སོང་སོང་ལས་བྱས་ཀྱང་ལྟོ་རྒྱབ་ཙམ་ཡང་མ་འབྱོར། འབད་པ་བྱས་པ་དོན་མེད་དུ་སོང་བས་སེམས་ལ་ཡི་ཆད་སྐྱེ། གཞན་ཡང་མི་སྡུག་པ་དང་ཕྲད་པའི་སྡུག་བསྔལ་བྱ་བ་ཡོད། རང་ཉིད་དགྲ་བོའི་དབང་དུ་སོང་བའམ། ནད་དང་སྡུག་བསྔལ་དྲག་པོ་ཐོག་ཏུ་བབ་པའམ། གསོད་པར་བྱེད་པའི་སྲོག་ཆགས་དང་འཕྲད་པའམ། གཡངས་སུ་ལྷུང་བའམ། ཆུས་ཁྱེར་བའམ། གཏམ་ངན་པ་ཐོས་པའམ། བཙོན་དུ་གཞུག་པ་དང་ཆད་པས་བཅད་པ་མྱོང་བ་ལ་སོགས་པ་ཡིན། གཞན་ཡང་སྡུག་པ་དང་བྲལ་པའི་སྡུག་བསྔལ་བྱ་བ་ཡོད། ཕ་མ་སྤུན་ཟླ་ཁྱིམ་ཐབ་གྲོགས་ལ་སོགས་པ་མེད་ཐབས་མེད་པ་དང་བྲལ་ཙ་ན་སེམས་ལ་བཟོད་ཐབས་མེད་པའི་སྡུག་བསྔལ་ལུས་ཚུན་ཆད་ཀྱང་རྒུད་ནས་འགྲོ་བ་ཡོད། དེ་བཞིན་དུ་ནོར་སྟོར་རླག་བྱུང་པའམ། མངའ་ཐང་ཉམས་པའམ། དབང་ཐང་ཤོར་བའམ། རང་གི་ཡིད་ཆགས་ཤིང་བློ་སྨོན་པའི་གནས་ཅི་འདྲ་ཞིག་ཉམས་ཀྱང་སེམས་ལ་མྱ་ངན་ཆེན་པོ་སྐྱེ་བ་ཡིན་སྙམ་དུ་ཡང་ཡང་བསྒོམ་པར་བྱའོ། ། གཉིས་པ་ལྷ་མིན་གྱི་སྡུག་བསྔལ་བསམ་པ།གཉིས་པ་ལྷ་མིན་གྱི་སྡུག་བསྔལ་བསམ་པ་ནི། རང་བཞིན་གྱིས་ལྷའི་དཔལ་ལ་ཕྲག་དོག་པས་སེམས་ལ་མི་བདེ་བ་ཆེན་པོ་རྟག་ཏུ་ཡོད། དུས་དུས་ན་ལྷ་དང་འཐབ་པ་ལས་ལྷ་མིན་བསོད་ནམས་ཀྱི་སྟོབས་ཆུང་བས་གསོད་པ་དང་བརྡེག་པ་དང་ཡན་ལག་གཅོད་པ་དང་འདྲལ་བ་ལ་སོགས་པའི་སྡུག་བསྔལ་ཤིན་ཏུ་མང༌། ཕལ་ཆེར་ནག་ཕྱོགས་ཡིན་པས་ཆོས་ལ་མི་དགའ། འགའ་ཞིག་མོས་སུ་ཆུག་ཀྱང་རྣམ་སྨིན་གྱི་སྒྲིབ་པ་ཅན་ཡིན་པས་རྟོགས་པ་ཁྱད་པར་ཅན་སྐྱེ་བའི་སྐལ་པ་མེད་དོ། ། གསུམ་པ་ལྷའི་སྡུག་བསྔལ་བསམ་པ།གསུམ་པ་ལྷའི་སྡུག་བསྔལ་བསམ་པ་ནི། འདོད་པའི་ཁམས་ཀྱི་ལྷར་སྐྱེས་ན་སྡུག་བསྔལ་བ་སྟེ་འདོད་ཡོན་ལ་བག་མེད་པར་སྤྱད་པས་ཚེ་ཟད་དུ་འགྲོ་བ་མ་གོ་བར་ཟད། གཞན་ཡང་ལྷ་དབང་ཆུང་བ་རྣམས་དབང་ཆེ་བས་གནས་ནས་བསྐྲད་པས་སྡུག་བསྔལ། བསོད་ནམས་ཆུང་བ་འགའ་ཞིག་པི་ཝང་རེ་ཙམ་མ་གཏོགས་ཡོ་བྱད་གང་ཡང་མེད་པས་ཤིན་ཏུ་འཕོངས་བའང་ཡོད། དེ་དག་གིས་ལྷ་གཞན་འབྱོར་པ་ཆེན་པོ་རྣམས་མཐོང་བ་ན། རང་གི་བསོད་ནམས་ལ་ཡི་ཆད་པའི་སེམས་ཀྱི་སྡུག་བསྔལ་དཔག་ཏུ་མེད་པ་ཡོད། ཁྱད་པར་རྒྱལ་ཆེན་བཞིའི་རིགས་དང་སུམ་ཅུ་རྩ་གསུམ་པའི་གནས་ན་ལྷ་མ་ཡིན་དང་འཐབ་པའི་སྡུག་བསྔལ་ཤིན་ཏུ་ཆེ། འདོད་ཁམས་ཀྱི་ལྷ་ཐམས་ཅད་ལ་ཐུན་མོང་དུ་འཆི་འཕོ་བ་དང་ལྟུང་བའི་སྡུག་བསྔལ་ཞེས་བྱ་བ་ཡོད་དེ། དེ་ལ་ལྷ་རྣམས་འཆི་བའི་སྔོན་རོལ་ཞག་བདུན་ནས་འཆི་ལྟས་ལྔ་འབྱུང་བ་སྟེ། ལུས་ཀྱི་ཁ་དོག་མི་སྡུག་བར་འགྱུར་བ་དང༌། ཡིད་སྐྱོ་ཞིང་སྟན་ལ་མི་དགའ་བ་དང་མེ་ཏོག་གི་ཕྲེང་བའི་རྒྱན་རྣམས་རྙིང་པ་དང༌། གོས་ལ་དྲི་མ་ནག་པོ་ཆགས་པ་དང༌། ལུས་ལས་རྔུལ་འབྱུང་བ་རྣམས་སོ། །དེ་རྣམས་བྱུང་བ་ན་རང་རང་གི་གཡོག་དང་གྲོགས་ཕོ་མོ་རྣམས་ཀྱིས་ཀྱང་སྤངས་ཏེ། ལྷ་གཞན་གྱི་དྲུང་དུ་འགྲོ་ལ། ལྷའི་འདོད་ཡོན་ལ་ནི་ཆགས་ཀྱང་དབང་མེད་དུ་འབྲལ་བར་ཤེས། ཟློག་ཐབས་ནི་མེད། རྔ་མོ་རྟེའུ་སྟོར་བ་ལྟ་བུ་དང༌། ཀླུ་ནམ་མཁའ་ལྡིང་གིས་ཁྱེར་བ་ལྟ་བུ་དང༌། ཉ་བྱེ་ཚན་ལ་བསྒྲེས་པ་ལྟ་བུ་དང༌། རྒྱ་མཚོ་ཆེན་པོའི་དབུས་སུ་གྲུ་ཞིག་པ་ལྟ་བུའི་སྡུག་བསྔལ་འབྱུང༌། དུས་རིང་ཐུང་ནི་ལྷའི་ཞག་བདུན་ཡིན་ན་ཐུང་ཤོས་རྒྱལ་ཆེན་བཞིའི་རིགས་ཀྱི་དབང་དུ་བྱས་ཀྱང་མི་ལོ་ཕྱེད་དང་བཞི་བརྒྱ་ཡིན། དོས་ནི་དྲག ཡུན་ནི་རིང༌། ལྟུང་བའི་སྡུག་བསྔལ་བྱ་བ་ལྷ་རྣམས་ཤི་བའི་འོག་ཏུ་ལྷར་སྐྱེ་བ་ནི་སྲིད་མཐའ་ཙམ། མིར་སྐྱེ་བ་ཡང་ཤིན་ཏུ་ཉུང༌། ཕར་ཆེར་ངན་སོང་དུ་སྐྱེ་བ་ཡིན། ཇི་སྐད་དུ། ལྷ་ཡི་འཇིག་རྟེན་དག་ནས་འཕོས་བ་ལ། །གལ་ཏེ་དགེ་བའི་ལྷག་མ་འགའ་མེད་ན། །དེ་ནས་དབང་མེད་དུད་འགྲོ་ཡི་དྭགས་དང༌། །དམྱལ་བར་གནས་པ་གང་ཡང་རུང་བར་འགྱུར། །ཞེས་གསུངས། ལྷ་རྣམས་ཀྱི་མངོན་ཤེས་འོག་ཏུ་འཇུག་པས་འཆི་ཁར་གང་དུ་སྐྱེ་བ་ལེན་པ་ཤེས་ནས་མིར་སྐྱེ་ནའང་འདོད་ཡོན་གྱིས་མིག་མི་ཁེངས་ཤིང༌། སྡུག་བསྔལ་མང་པོ་ཅན་དུ་མཐོང༌། གལ་ཏེ་ངན་སོང་གསུམ་དུ་སྐྱེ་ན། དེའི་སྡུག་བསྔལ་མྱོང་དགོས་པར་ཤེས་ནས་སེམས་ཀྱི་སྡུག་བསྔལ་ལ་བཟོད་གླགས་མེད་པ་འབྱུང་བ་ཡིན་ཏེ། ངན་སོང་གསུམ་གྱི་ལུས་ཀྱི་སྡུག་བསྔལ་བས་དེའི་སེམས་ཀྱི་སྡུག་བསྔལ་ཆེ་བ་ཡོད་སྙམ་དུ་བསྒོམ་པར་བྱའོ། །ཁམས་གོང་མའི་ལྷར་སྐྱེས་ན་བདེ་བ་ཡོད་དམ་སྙམ་ན། དེར་ཡང་བདེ་བ་མེད་དེ། ཁམས་གོང་མ་དེ་དག་ན། སོ་སོ་སྐྱེ་བོས་ལྟས་ན་སྡུག་བསྔལ་མངོན་འགྱུར་བ་མེད་ཀྱང་འཕགས་པས་གཟིགས་ན་འདུ་བྱེད་ཀྱི་སྡུག་བསྔལ་ཁོ་ནའི་རང་བཞིན་ལས་མ་འདས་པ་དང༌། ཏིང་ངེ་འཛིན་གྱིས་མྱོས་པ་ལྟར་གྱུར་པས་སོ་སོ་སྐྱེ་བོ་རྣམས་ཡོན་ཏན་གོང་ནས་གོང་དུ་འགྲོ་བ་མེད་ཅིང༌། ཏིང་ངེ་འཛིན་གྱི་རོ་མྱང་བས་རོ་མྱང་ཅན་གྱི་ཏིང་ངེ་འཛིན་དེ་འབྲལ་མི་ཕོད་ཅིང༌། དེས་རང་རང་གི་ཏིང་ངེ་འཛིན་ཉམས་ནས་འཆི་བར་འགྱུར་བའང་ཡོད། སྒོས་སུ་དེ་ན་གནས་པའི་འགྲོ་བ་སོ་སོ་སྐྱེ་བོ་ཐམས་ཅད་སྔོན་གྱི་ལས་ཀྱིས་འཕེན་པ་ཟད་པ་ན། སླར་ཡང་འདོད་པའི་ཁམས་སུ་སྐྱེ་བ་ལེན་ཏེ། སྔོན་མིའི་རྟེན་ལ་འཇིག་རྟེན་པའི་ཏིང་ངེ་འཛིན་བསྒོམས་པའི་སྐབས་དང༌། སྐབས་དེར་བསམ་གཏན་གཟུགས་མེད་ཀྱི་ཏིང་ངེ་འཛིན་ལ་ཉམས་བདེ་བདེ་འདྲ་བ་སོས་དལ་དལ་འདྲ་བར་འདུག་ཀྱང་ཡིད་བརྟན་ཅི་ཡང་མ་བྱུང་བར་སྐྱེ་བོ་ཕལ་བར་ཉམས་ཏེ། ཉོན་མོངས་དྲག་ལ་སྡུག་བསྔལ་ཆེ་བར་སོང་བ་དེ་འདྲ་བ་ལ་སྙིང་བོ་ཅི་ཡང་མེད་པར་ཤེས་པར་བྱས་ནས་བསྒོམ་པར་བྱའོ། ། གསུམ་པ་འཁོར་བ་སྤྱིའི་སྡུག་བསྔལ་བསམ་པ།གསུམ་པ་འཁོར་བ་སྤྱིའི་སྡུག་བསྔལ་བསམ་པ་ནི། དམྱལ་བ་དང་ཡི་དྭགས་དང་དུད་འགྲོ་དང་མི་དང་ལྷ་མ་ཡིན་དང་འདོད་ཁམས་ཀྱི་ལྷ་དང་གཟུགས་དང་གཟུགས་མེད་བའི་ལྷའི་བར་དུ་སྡུག་བསྔལ་དེ་འདྲ་ན། ཁམས་གསུམ་འཁོར་བ་འདི་ཀུན་སྡུག་བསྔལ་གསུམ་མམ་དྲུག་གམ་བརྒྱད་ལ་སོགས་པ་སྡུག་བསྔལ་གྱི་རང་བཞིན་ཅན་དང༌། སྡུག་བསྔལ་གྱི་ཡོ་ལངས། སྡུག་བསྔལ་གྱི་འཁྲུལ་འཁོར། སྡུག་བསྔལ་གྱི་ཁོང་འཚངས་ཅན་དང༌། སྡུག་བསྔལ་གྱིས་ཀུན་ཏུ་བསྐོར་བ་ཡིན། སྡུག་བསྔལ་མེ་ལྟར་འབར། ཆུ་ལྟར་འཁྲུགས། རླུང་ལྟར་གཡེངས། རི་ལྟར་ནོན་པ་ཡིན་པ་ལས་མ་འདས་པས། མེའི་འོབས་ལྟ་བུ། སྲིན་མོའི་གླིང་ལྟ་བུ། རྒྱ་མཚོའི་ཀློང་ལྟ་བུ། མཚོ་ཆའི་རྩེ་ལྟ་བུ། མི་གཙང་བའི་འདམས་ལྟར་བདེ་བའི་གོ་སྐབས་ཅུང་ཟད་མེད་པར་གནས་གང་དུ་གནས་ཀྱང་སྡུག་བསྔལ་གྱི་གནས། ལུས་ཅི་འདྲ་བླངས་ཀྱང་སྡུག་བསྔལ་གྱི་ལུས། གྲོགས་སུ་དང་འགྲོགས་ཀྱང་སྡུག་བསྔལ་གྱི་གྲོགས། ལོངས་སྤྱོད་ཅི་ལ་ལོངས་སྤྱད་ཀྱང་སྡུག་བསྔལ་གྱི་ལོངས་སྤྱོད་ཡིན་ཏེ། མདོ་དྲན་པ་ཉེར་བཞག་ལས། སེམས་ཅན་དམྱལ་བ་དམྱལ་མེས་ཉམས། །ཡི་དྭགས་བཀྲེས་ཤིང་སྐོམ་པས་ཉམས། །དུས་འགྲོ་གཅིག་ལ་གཅིག་ཟས་ཉམས། །མི་དག་འཚོ་བ་ཐུང་བས་ཉམས། །ལྷ་མིན་འཐབ་ཤིང་རྩོད་པས་ཉམས། །ལྷ་དག་བག་མེད་པ་ཡིས་ཉམས། །འཁོར་བ་ཁབ་ཀྱི་རྩེ་མོ་ན། །བདེ་བ་ནམ་ཡང་ཡོད་མ་ཡིན། །ཞེས་དང༌། རྗེ་བཙུན་བྱམས་པས། འགྲོ་ལྔ་དག་ན་བདེ་བ་མེད། །མི་གཙང་ཁང་བར་དྲི་ཞིམ་མེད། །ཅེས་དང༌། ཨོ་རྒྱན་ཆེན་པོས། འཁོར་བ་འདི་ལ་ཁབ་གྱི་རྩེ་ཙམ་ཡང༌། །བདེ་བ་ནམ་ཡང་ཡོད་མ་ཡིན་ཞེས་གསུངས། །ཅུང་ཟད་བདེ་ཡང་འགྱུར་བའི་སྡུག་བསྔལ་ཡོད། །ཅེས་གསུངས་སོ། །སྡུག་བསྔལ་དེ་ཡང་རྣམ་པ་གསུམ་སྟེ། ༡ སྡུག་བསྔལ་གྱི་སྡུགབསྔལ་ཞེས་བྱ་བ། ཚ་གྲང་ནད་ལ་སོགས་པ་ཚོར་བ་སྡུག་བསྔལ་ཐམས་ཅད་ཡིན། ༢ འགྱུར་བའི་སྡུག་བསྔལ་ཞེས་བྱ་བ་ཚེ་དང་ལོངས་སྤྱོད་ལ་སོགས་པ་ཐ་ན་བསམ་གཏན་གྱི་བདེ་བ་ཚུན་ཆད་དེ་ཟག་བཅས་ཀྱི་ཚོར་བ་བདེ་བ་ཐམས་ཅད་ཡིན། དེ་ཡང་འཁོར་བསྒྱུར་གྱི་མངའ་ཐང་ལོངས་སྤྱོད་ཀྱི་བདེ་བ་ལ་སོགས་པ་མིའི་བདེ་བ་དང༌། བསམ་གཏན་གསུམ་པ་མན་ཆད་ཀྱི་ལྷའི་བདེ་བ་ལ་སོགས་པ་འཁོར་བའི་བདེ་བ་ཇི་སྙེད་མཆིས་པ་ཐམས་ཅད་ནི་སྡུག་བསྔལ་གྱི་རང་བཞིན་མ་ཡིན་པ་གཅིག་ཀྱང་མེད་དེ། གཟུགས་མཛེས་པ་ལ་སོགས་པ་ཚོར་བ་བདེ་བའི་དམིགས་པ་དང༌། ཚོར་བདེ་དང་མཚུངས་ལྡན་གྱི་སེམས་དང་འདུ་ཤེས་ལ་སོགས་པ་ཚོར་བ་བདེ་བའི་གྲོགས་དང༌། ཚོར་བདེའི་བདག་རྐྱེན་མིག་དབང་ལ་སོགས་པ་ཚོར་བ་བདེ་བའི་རྟེན་དང༌། ཟག་བཅས་ཀྱི་ཚོར་བ་བདེ་བ་རང་ཉིད་དང་བཅས་པ་རྣམས་ནི། དཔེར་ན་ནད་ཚབ་པོ་ཆེ་ཞིག་གིས་བཏབ་པའི་ཚེ་རེ་ཞིག་ན་ནད་ཀྱི་གདུང་བ་ཆེན་པོ་དེ་ཞི་ནས་ནད་ཆུང་ངུ་ཙམ་ལུས་པ་དེ་ལ་བདེ་བར་སྣང་བ་ལྟར། ཡུན་རིང་པོར་དམྱལ་བའི་སྡུག་བསྔལ་ལ་སོགས་པ་སྡུག་བསྔལ་ཤུགས་དྲག་པོས་མནར་མནར་བའི་རྗེས་སུ་ལྷ་མིའི་གནས་སུ་སྐྱེ་ཚེ་སྡུག་བསྔལ་དྲག་པོ་དེ་ཞི་བའི་སྡུག་བསྔལ་ཤུགས་ཆུང་ངུ་ཞིག་མངོན་དུ་གྱུར་པ་ལ་བདེ་བར་སྣང་བ་ཡིན་གྱི་ངོ་བོ་ཉིད་ཀྱིས་བདེ་བ་མ་ཡིན་པའི་ཕྱིར་ཏེ། འཁོར་བའི་བདེ་བ་དེ་དག་རང་གི་ངོ་བོའི་སྒོ་ནས་བདེ་བ་ཡིན་ན་སྡུག་བསྔལ་གྱི་རྒྱུ་ནད་སོགས་ཅི་ཙམ་ཆེ་བ་བཞིན་དུ་སྡུག་བསྔལ་ཆེས་ཆེར་འགྲོ་བ་བཞིན། བཀྲེས་པའི་ཚེ་ཟས་ཅི་ཙམ་ཟོས་བཞིན་བདེ་བ་ཆེར་འགྲོ་བ་དང༌། གྲང་བའི་ཚེ་མེ་དང་ཉི་འོད་བསྟེན་ཅི་ཙམ་དྲགས་པ་བཞིན་བདེ་བ་ཇེ་ཆེར་འགྲོ་དགོས་ཀྱང༌། ཟས་ཧ་ཅིང་ཟོས་དྲགས་པ་དང་མེ་དང་ཉི་མའི་འོད་ཧ་ཅང་བསྟེན་དྲགས་ན་སྡུག་བསྔལ་འབྱུང་བ་ལྟ་བུ་ཡིན་པའི་ཕྱིར་རོ། །འདི་ཟས་རང་གི་ངོ་བོས་བདེ་བའི་རང་བཞིན་ཡིན་ན་ཟས་བདེ་བ་བསྟེན་པ་ཅི་ཙམ་མང་བ་བཞིན་བདེ་བའི་ཚོར་བ་ཆེས་ཆེར་འགྲོ་དགོས་པ་དང༌། དེ་ལྟར་མ་ཡིན་པ་གཉིས་ལ་ངེས་པ་དྲངས་ནས་གཞན་ཐམས་ཅད་ལ་སྦྱར་བའོ། །གཞན་ཡང་ལུས་དང་ལོངས་སྤྱོད་སྙན་གྲགས་ལ་སོགས་པ་འཁོར་བའི་བདེ་འབྱོར་ཐམས་ཅད་ཀྱིས་ནི་རང་ཉིད་རྟག་པ་དང་བརྟན་པ་དང་སྙིང་པོ་ཡོད་པ་ལྟར་དུ་བསྟེན་ནས་རང་ཅག་སོ་སྐྱེས་རྣམས་དེ་དག་ལ་ཆགས་པ་དང༌། དེའི་ཆེད་དུ་སེར་སྣ་དང་འདོད་ཆགས་དང་ང་རྒྱལ་ལ་སོགས་པ་ཉོན་མོངས་པའི་ལས་དུ་མ་གསོག་བཅུག་པའི་སྒོ་ནས་བསླུས་བསླུས་ཏེ། མཐར་རང་ཉིད་རྟག་མི་ཐུབ་པས་འགག་ཅིང་ཟད་པར་འགྱུར་བའི་རྒྱུ་ལས་མི་བཟོད་པའི་སྡུག་བསྔལ་ལ་སྦྱོར་བ་དང༌། ཅི་ཙམ་ལོངས་སྤྱོད་ཀྱང་ནམ་ཡང་ཚིམ་པ་མེད་པ་མ་ཟད་ལྷག་པར་ཡང་འདོད་པ་ཆེས་ཆེར་འཕེལ་བ་ལས་སྙིང་པོ་ཅུང་ཟད་ཀྱང་མེད་པས་སྡུག་བསྔལ་ཁོ་ནའི་རང་བཞིན་ཡིན་སྙམ་དུ་ཡང་ཡང་བསམ་པས་འཁོར་བའི་བདེ་འབྱོར་ལ་སྡུག་བསྔལ་དུ་མཐོང་ནས་ཞེན་པ་ལོག་པར་བྱའོ། །འདུ་བྱེད་ཀྱི་སྡུག་བསྔལ་ཞེས་བྱ་བ་སྡུག་བསྔལ་དེ་གཉིས་ཀའི་གཞི་འདུ་བྱེད་ཉེ་བར་ལེན་པའི་ཕུང་པོ་ཙམ་འདི་སྡུག་བསྔལ་ཐམས་ཅད་ཀྱི་འབྱུང་གནས་དང་ཞིང་ས་ཡིན། འདི་ཟག་བཅས་ཀྱི་ཚོར་བ་བཏང་སྙོམས་ཁོ་ན་དང་ལྡན་པའི་ཚེ་འདུ་བྱེད་ཀྱི་སྡུག་བསྔལ་ཁོ་ནའི་མིང་ཐོགས་པ་ཡིན། ཁྱད་པར་དུ་སྤྱིར་འཁོར་བའི་སྡུག་བདེན་གྱི་དངོས་པོ་ཐམས་ཅད་དང༌། ལྷག་པར་ཡང་རང་རྒྱུད་ཀྱི་འཁོར་བ་ཉེར་ཕུང་འདི་ཁྱབ་པ་འདུ་བྱེད་ཀྱི་སྡུག་བསྔལ་དུ་སྒོམ་པར་བྱ་བ་ནི་ཤིན་ཏུ་གལ་ཆེ་བས་འདི་ལྟར་སྒོམ་པར་བྱ་སྟེ། འཁོར་བས་བསྡུས་པའི་དངོས་པོ་འདི་དག་ཐམས་ཅད་ནི་རྒྱུ་ལས་དང་ཉོན་མོངས་པས་བསྐྱེད་པ་ཁོ་ན་ཡིན་ལ་ལས་ཉོན་གཉིས་ཀྱིས་ནི་རང་གི་འབྲས་བུ་དེ་ཉོན་མོངས་པ་སྐྱེ་བའི་མཐུན་རྐྱེན་དུ་མ་གྱུར་པའི་དངོས་པོ་ཁོ་ནར་བསྐྱེད་པ་ཆོས་ཉིད་ཡིན་པས་ཉོན་མོངས་པ་སྐྱེ་བའི་རྒྱུ་མཐུན་དུ་མ་གྱུར་པའི་འཁོར་བའི་དངོས་པོ་གཅིག་ཀྱང་མེད་དེ། རང་ཅག་གི་རྒྱུད་ལ་ཉོན་མོངས་པ་མངོན་གྱུར་དུ་མེད་ཀྱང༌། གཟུགས་མཛེས་པ་དང་འཕྲད་པ་ན་དེས་འདོད་ཆགས་རང་དབང་མེད་པར་འདྲེན་པ་དང༌། མི་སྡུག་པས་ཁོང་ཁྲོ་འདྲེན་པ་དང༌། ལོངས་སྤྱོད་ཀྱིས་སེར་སྣ་དང་བརྣབ་སེམས་རང་དབང་མེད་པར་བསྐྱེད་པ་ལ་སོགས་པ་འཁོར་བའི་དངོས་པོ་ཐམས་ཅད་ནི་ཉོན་མོངས་པ་དབང་མེད་དུ་འདྲེན་པའི་མཐུན་རྐྱེན་མ་ཡིན་པ་གཅིག་ཀྱང་མེད། ཉོན་མོངས་པས་ནི་འཁོར་བའི་སྡུག་བསྔལ་མི་བཟད་པ་ཡང་ཡང་བསྐྱེད་ཅིང་འཁོར་བའི་སྡུག་བསྔལ་ལས་ནམ་ཡང་མི་ཐར་བ་དང༌། ཐར་བའི་སྲོག་རྩ་བཅད་དེ་བདེ་བའི་གོ་སྐབས་ནམ་ཡང་མེད་པར་བྱེད། དེས་ན་ལས་ཉོན་གྱིས་བསྐྱེད་པའི་སྡུག་བདེན་གྱི་དངོས་པོ་འདི་ནི་ཉོན་མོངས་པ་དང་མཐུན་པའི་སྒོ་ནས་སྡུག་བསྔལ་གྱི་རང་བཞིན་ཁོ་ན་ཡིན་སྙམ་དུ་བསམ། གཞན་ཡང་འདུས་བྱས་མི་རྟག་པ་ཡིན་ན་རང་ཉིད་མི་རྟག་པའི་སྒོ་ནས་སྡུག་བསྔལ་ཕྱི་མ་ལ་སྦྱོར་བས་ཁྱབ་པ་མེད་ཀྱང་ལས་ཉོན་གྱིས་བསྐྱེད་པའི་ཟག་བཅས་ཀྱི་དངོས་པོ་རྣམས་ནི་རང་རྒྱུ་ལས་ཉོན་གྱིས་སྐད་ཅིག་ནས་འཇིག་པའི་དངོས་པོར་ཡང་བསྐྱེད། རང་ཉིད་ཞིག་པའི་རྗེས་སུ་སྡུག་བསྔལ་ཕྱི་མ་སྐྱེད་བྱེད་དུ་ཡང་བསྐྱེད་པས་ཟག་བཅས་སྡུག་བདེན་གྱི་དངོས་པོ་འདི་དག་ནི། དཔེར་ན་མིའི་ཉེར་ཕུང་འདི་རྟག་ན་དམྱལ་བའི་སྡུགབསྔལ་སོགས་ཕྱི་མའི་སྡུག་བསྔལ་རྣམས་འབྱུང་མི་དགོས་ཀྱང་དེ་མི་རྟག་པའི་རྒྱུ་ལས་དམྱལ་བ་ལ་སོགས་པ་ཕྱི་མའི་སྡུག་བསྔལ་དུ་མ་རིམ་གྱིས་འབྱུང་བ་བཞིན་དུ་རང་ཉིད་ཀྱི་ངོ་བོ་རྟག་མི་ཐུབ་པའི་དབང་གིས་འཁོར་བ་ཐོག་མེད་ནས་ཐ་མའི་བར་དུ་སྡུག་བསྔལ་འདི་མ་མྱོང་བྱ་བ་གཅིག་ཀྱང་མེད་པར་མྱོང་བ་ཡིན་ལ། དེ་བཞིན་དུ་དཔེར་ན་ལོངས་སྤྱོད་དང་འདོད་ཡོན་གྱི་རྒྱུ་ལས་འདོད་ཆགས་ཀྱི་ལས་བསགས་པས་དམྱལ་བའམ་ཡི་དྭགས་སུ་སྐྱེ་བ་ལ་སོགས་པ་ཚེ་ཕྱི་མའི་སྡུག་བསྔལ་དུ་མ་དང༌། འདོད་ཡོན་དང་ལོངས་སྤྱོད་སྒྲུབ་པའི་སྡུག་བསྔལ། དེ་དང་བྲལ་བའི་སྡུག་བསྔལ། དེ་ལ་བརྟེན་ནས་དགྲས་བཅོམ་པ་དང༌། ནད་ཕོག་པ་ལ་སོགས་པ་ཚེ་འདིའི་སྡུག་བསྔལ་དཔག་ཏུ་མེད་པ་འབྱུང་བ་ལ་སོགས་པ་འདི་ཕྱིའི་སྡུག་བསྔལ་དུ་མའི་གནས་སུ་མ་གྱུར་པའི་འཁོར་བའི་ཆོས་གཅིག་ཀྱང་མེད་དེ། གཟུགས་མེད་ཀྱི་ཉེར་ཕུང་མི་རྟག་པའི་རྒྱུ་ལས་དམྱལ་བའི་སྡུག་བསྔལ་ལ་སོགས་པ་ཕྱི་མའི་སྡུག་བསྔལ་གྲངས་མེད་པ་འབྱུང་བ་བཞིན། རང་ཉིད་མི་རྟག་པའི་རྒྱུ་ལས་རྒྱུན་ཕྱི་མའི་སྡུག་བསྔལ་དུ་མས་མི་སྦྱོར་བའི་ཆོས་གཅིག་ཀྱང་མེད་པའི་ཕྱིར་རོ། །དེས་ན་ལས་ཉོན་གྱིས་བསྐྱེད་པའི་སྡུག་བདེན་འདི་དག་ནི་རང་གི་ངོ་བོ་མི་རྟག་པ་ཡིན་པའི་སྒོ་ནས་སྡུག་བསྔལ་བའི་རང་བཞིན་ཀྱང་ཡིན་སྙམ་དུ་བསམ། གཞན་ཡང་རང་ཅག་གི་ལུས་འདི་ལས་ཉོན་གྱིས་ནད་འབྱུང་བ་དང༌། རྒས་པར་འགྱུར་བ་དང༌། འཆི་བར་འགྱུར་བ་དང༌། བཀྲེས་སྐོམ་གྱི་སྡུག་བསྔལ་འབྱུང་བ་ཅན་སོགས་སུ་བསྐྱེད་པས་ནད་མི་འབྱུང་བ་དང༌། རྒས་པར་མི་འགྱུར་བ་སོགས་སུ་ཅི་དགར་བསྒྱུར་དུ་མེད་པའི་ལས་ཉོན་གྱི་གཞན་དབང་ཅན་ཡིན་པ་དང༌། རང་ཅག་གི་སེམས་འདི་ཡང་ལས་དང་ཉོན་མོངས་པས་ཆགས་སྡང་སོགས་ཉོན་མོངས་པའི་རྗེས་སུ་འཇུག་པ་ཅན་དང༌། ཚ་གྲང་ལ་སོགས་པའི་སྡུག་བསྔལ་མྱོང་བ་ཅན་དང༌། སྡུག་བསྔལ་མཐའ་དག་གི་རྩ་བ་ཉོན་མོངས་པའི་བག་ཆགས་མཐའ་དག་འཛིན་པ་ཅན་སོགས་སུ་བསྐྱེད་པས་སེམས་ཉོན་མོངས་པའི་རྗེས་སུ་མི་འཇུག་པ་དང༌། ཚ་གྲང་ལ་སོགས་པའི་སྡུལ་བསྔལ་མི་མྱོང་བ་སོགས་སུ་ཅི་དགར་བསྒྱུར་དུ་མེད་པའི་ལས་ཉོན་གྱི་གཞན་དབང་ཅན་ཡིན་པ་དང༌། ཕྱི་རོལ་གྱི་དངོས་པོ་རྣམས་ཀྱང་ལས་ཉོན་གྱིས་མཛེས་པ་ཐམས་ཅད་འདོད་ཆགས་དང༌། མི་སྡུག་པ་རྣམས་ཞེ་སྡང་དང༌། བར་མ་རྣམས་བདེན་འཛིན་བསྐྱེད་པའི་མཐུན་རྐྱེན་དུ་འགྱུར་བ་དང༌། ལོངས་སྤྱོད་རྣམས་སེར་སྣ་དང༌། གཡོ་སྒྱུ་ལ་སོགས་པ་དང༌། ཚ་རེག་གྲང་རེག་དག་ཚ་གྲང་གི་སྡུག་བསྔལ་སྐྱེད་བྱེད་དུ་བསྐྱེད་པ་ལ་སོགས་པ་ཉོན་མོངས་སྐྱེད་པའི་མཐུན་རྐྱེན་དུ་མ་བསྐྱེད་པ་གཅིག་ཀྱང་མེད་པས་མཛེས་པའི་དངོས་པོ་ཐམས་ཅད་འདོད་ཆགས་ཀྱི་རྒྱུར་མི་འགྱུར་བ་ལ་སོགས་པ་དང༌། ཚ་རེག་རྣམས་ཚ་བའི་སྡུག་བསྔལ་གྱི་རྒྱུར་མི་འགྱུར་བ་སོགས་སུ་ཅི་དགར་བསྒྱུར་དུ་མེད་པའི་ལས་ཉོན་གྱི་གཞན་དབང་ཅན་ནོ། །དེས་ན་ལས་ཉོན་གྱིས་བསྐྱེད་པའི་སྡུག་བདེན་འདི་དག་ནི་ལས་ཉོན་གྱི་གཞན་དབང་ཅན་ཡིན་པའི་སྒོ་ནས་ཀྱང་སྡུག་བསྔལ་བའོ་སྙམ་དུ་བསམ། ཁྱད་པར་དུ་རང་གི་ལུས་སེམས་གཉིས་ཀྱི་སྟེང་དུ་སྦྱར་ནས་བསམ་པར་བྱ་སྟེ། རང་རྒྱུད་ཀྱི་ཟག་བཅས་ཀྱི་ལུས་འདི་མེད་ན་ལུས་འདི་ལ་བརྟེན་ནས་བྱུང་བའི་འདི་ཕྱིའི་སྡུག་བསྔལ་གང་ཡང་མི་འབྱུང་བ་ཡིན་པ་ལ། ལུས་འདི་ལ་བརྟེན་ནས་ནད་སྣ་ཚོགས་ཀྱི་སྡུག་བསྔལ། ཚ་གྲང་དང་བཀྲེས་སྐོམ་གྱི་སྡུག་བསྔལ། རྒས་པའི་སྡུག་བསྔལ། འཆི་བའི་སྡུག་བསྔལ་ལ་སོགས་པ་ཚེ་འདིའི་སྡུག་བསྔལ་མཐའ་ཡས་པ་དང༌། ལུས་གསོ་བའི་ཆེད་དུ་སྲོག་གཅོད། མ་བྱིན་པ་ལེན་པ་ལ་སོགས་པ་མི་དགེ་བའི་ལས་དུ་མ་བསགས་པ་དང༌། ལུས་ལ་ཆགས་པའི་འདོད་ཆགས་དང༌། ལུས་ཀྱི་སྒོ་ནས་ང་རྒྱལ་དང༌། ལུས་འདི་ལ་གནོད་པ་ལ་ཁོང་ཁྲོ་བ་ལ་སོགས་པ་ལུས་ལ་བརྟེན་ནས་ཉོན་མོངས་པ་སྣ་ཚོགས་སྐྱེ། ཉོན་མོངས་པས་ལས་བསགས། ལས་ཉོན་གཉིས་ཀྱིས་ཚེ་ཕྱི་མའི་སྡུག་བསྔལ་མཐའ་ཡས་པ་བསྐྱེད་པ་དང༌།རང་གི་སེམས་འདིས་ནི་ནད་དང་བཀྲེས་སྐོམ་ལ་སོགས་པ་མི་འདོད་པའི་དངོས་པོ་ཐོག་ཏུ་བྱུང་བ་ན་དེ་ལ་ཉེར་ལེན་བྱེད་པའི་སྒོ་ནས་ཚེ་འདིར་ཡང་སྡུག་བསྔལ་དཔག་ཏུ་མེད་པ་མྱོང་བ་དང༌། སེམས་འདིས་ཉོན་མོངས་པ་དང་འཁོར་བར་འཕེན་པའི་ལས་བརྒྱ་ཕྲག་གི་བག་ཆགས་ཐམས་ཅད་མི་གཏོང་བར་དམ་དུ་འཛིན་པའི་སྒོ་ནས་ཚེ་ཕྱི་མའི་སྡུག་བསྔལ་མཐའ་ཡས་པ་ལ་སྦྱོར་བ་དང༌། ལྷག་པར་ཡང་རང་རྒྱུད་ཀྱི་ཟག་བཅས་ཀྱི་ཕུང་པོ་ལྔ་པོ་འདི་མེད་ན་ཕྱི་མའི་འཁོར་བའི་ཉེར་ལེན་མེད་པས་འཁོར་བར་གཏན་ནས་སྐྱེ་མི་དགོས་པ་ཡིན་པ་ལ། ད་ལྟའི་ཉེར་ཕུང་འདིས་ཚེ་ཕྱི་མའིའཁོར་བ་ཐམས་ཅད་ཀྱི་རྒྱུན་བཟུང་བ་དང་ཉེར་ལེན་གྱི་རྒྱུ་བྱེད་པའི་སྒོ་ནས་ཚེ་ཕྱི་མའི་འཁོར་བ་དང་འཁོར་བའི་སྡུག་བསྔལ་མཐའ་ཡས་པ་རྣམས་རིམ་པ་བཞིན་བསྐྱེད་པས་ན། རང་རྒྱུད་ཀྱི་འཁོར་བའམ་ལུས་སེམས་གཉིས་པོ་འདི་ནི་དམྱལ་བ་མནར་མེད་ཀྱི་སྡུག་བསྔལ་ལས་ཀྱང་གནོད་ཚབས་ཆེ་བའི་སྡུག་བསྔལ་གྱི་དངོས་པོ་ཡིན་ཏེ། དམྱལ་བ་མནར་མེད་ཀྱི་སྡུག་བསྔལ་གྱིས་ལན་འགའ་རེ་ལས་རྒྱུན་མི་ཆད་པར་སྡུག་བསྔལ་མྱོང་བར་མི་བྱེད། རང་རྒྱུད་ཀྱི་འཁོར་བ་འདིས་ནི་ཐོག་མ་མེད་པའི་དུས་ནས་མཐར་འཁོར་བ་འདི་མ་སྤང་བར་དུ་སྡུག་བསྔལ་ལ་མི་སྦྱོར་བའི་དུས་སྐབས་སྐད་ཅིག་ཀྱང་མེད་སྙམ་པ་སོགས་ཡང་ཡང་བསྒོམས་པས་སྤྱིར་འཁོར་བ་ཐམས་ཅད་དང༌།ཁྱད་པར་དུ་རང་རྒྱུད་ཀྱི་འཁོར་བ་འདི་སྡུག་བསྔལ་གྱི་རང་བཞིན་དུ་མཐོང་ནས་འཇིགས་སྐྲག་ཤུགས་དྲག་པོ་དང༌། ཞེན་ལོག་གི་བསམ་པ་བསྐྱེད་པར་བྱའོ། །འདུ་བྱེད་ཀྱི་སྡུག་བསྔལ་འདི་ལས་མ་ཐར་ན་གཞན་གཉིས་ལས་ཐར་བ་མེད་པས་ཅིས་ཀྱང་སྡུག་བསྔལ་གསུམ་ལས་ཐར་བར་བྱ་སྙམ་དུ་བསྒོམ་པར་བྱའོ། །གོང་དུ་བཤད་པ་ལྟར་༡སྐྱེ་བ་སྡུག་བསྔལ། ༢ རྒས་པ་སྡུག་བསྔལ། ༣ ན་བ་སྡུག་བསྔལ། ༤ འཆི་བ་སྡུག་བསྔལ། ༥ མི་སྡུག་པ་དང་ཕྲད་པས་སྡུག་བསྔལ། ༦ སྡུག་པ་དང་བྲལ་བས་སྡུག་བསྔལ། ༧ འདོད་པ་བཙལ་གྱིས་མ་རྙེད་པས་སྡུག་བསྔལ། ༨ ཕུང་པོ་རང་ཉིད་འདུ་བྱེད་ཀྱི་སྡུག་བསྔལ་ཡིན་པར་ཤེས་པར་བྱས་ནས། ཁམས་གསུམ་འཁོར་བ་ཐམས་ཅད་སྡུག་བསྔལ་བརྒྱད་ཀྱི་ངོ་བོ་ཡིན་སྙམ་དུ་བསྒོམ་པར་བྱའོ། །ཡང་འཁོར་བ་འདི་ལ་སྡུག་བསྔལ་རྣམ་གྲངས་དྲུག་ཅེས་བྱ་བ་ཡོད་དེ། དང་པོ་ངེས་པ་མེད་པས་སྡུག་བསྔལ་བའི་ཉེས་པ་ནི། དགྲ་གཉེན་དང་ཕ་བུ་དང༌། གནས་ལུས་ལོངས་སྤྱོད་ཐམས་ཅད་མ་ངེས་པ་ཁོ་ནར་འགྲོ་བ་སྟེ། ཇི་སྐད་དུ། ཕ་ནི་བུ་ཉིད་མ་ནི་ཆུང་མ་ཉིད། །སྐྱེ་བོ་དགྲར་གྱུར་པ་ཡང་བཤེས་ཉིད་དང༌། །ལྡོག་པ་ཉིད་དུ་མཆི་བས་དེ་སླད་དུ། །འཁོར་བ་དག་ན་ངེས་པ་འགའ་མ་མཆིས། །ཞེས་གསུངས་པ་ལྟ་བུའོ། ། གཉིས་པ་ངོམས་མི་ཤེས་པའི་ཉེས་པ།གཉིས་པ་ངོམས་མི་ཤེས་པའི་ཉེས་པ་ནི། འདོད་ཡོན་ཇི་ཙམ་སྤྱད་ཀྱང་ངོམས་པ་མེད། སྡུག་བསྔལ་ཇི་ཙམ་མྱོང་ཡང་སུན་རྒྱུ་མེད་པའོ། །མྱ་ངན་བསལ་བ་ལས། ཡང་དང་ཡང་དུ་དམྱལ་བ་ན། །ཟངས་ཞུན་བསྐོལ་བ་གང་འཐུངས་པ། །རྒྱ་མཚོའི་ནང་གི་ཆུ་ལ་ཡང༌། །དེ་ཡི་ཚད་ཙམ་ཡོད་མ་ཡིན། །ཁྱི་དང་ཕག་ཏུ་གྱུར་པ་ན། །མི་གཙང་པ་ནི་གང་ཟོས་པ། །རི་ཡི་རྒྱལ་པོ་ལྷུན་པོ་ཡི། །ཚད་ལས་ཤིན་ཏུ་ལྷག་པར་འགྱུར། ། ཞེས་སོགས་གསུངས་སོ། ། གསུམ་པ་ལུས་ཡང་ཡང་འདོར་བའི་ཉེས་པ།གསུམ་པ་ལུས་ཡང་ཡང་འདོར་བའི་ཉེས་པ་ནི། ཡང་ཡང་འཆི་བ་མྱོང་དགོས་པ་སྟེ། རེ་རེས་བདག་ཉིད་རུས་པའི་ཕུང་པོ་ནི། །ལྷུན་པོ་མཉམ་པ་རྙེད་ཅིག་འདས་གྱུར་ཏེ། །ཞེས་གསུངས་སོ། །བཞི་བ་ཡང་ཡང་ཉིང་མཚམས་སྦྱོར་བའི་ཉེས་པ་ནི། སྐྱེ་བ་མཐའ་མེད་པ་ལེན་དགོས་པ་སྟེ། མ་ཡི་ཐུག་མཐའ་རྒྱ་ཤུག་ཚིག་གུ་ཙམ། །རི་བུར་བགྲངས་ཀྱང་ས་ཡིས་ལང་མི་འགྱུར། །ཞེས་གསུངས་སོ། །ལྔ་པ་ཡང་ཡང་མཐོ་དམན་དུ་འགྱུར་བའི་ཉེས་པ་ནི། བརྒྱ་བྱིན་དུ་གྱུར་ཀྱང་ས་སྟེང་ཏུ་ལྷུང༌། འཁོར་ལོས་སྒྱུར་རྒྱལ་དུ་གྱུར་ཀྱང་བྲན་གྱི་ཐ་མར་སྐྱེ། ཚེ་གཅིག་པོ་དེ་ཉིད་ལ་ཡང་བདེ་སྡུག་མཐོ་དམན་འབྱོར་རྒུད་གང་ལ་ཡང་ཡིད་བརྟན་ཅུང་ཟད་ཀྱང་མེད་པ་སྟེ། བརྒྱ་བྱིན་འཇིག་རྟེན་མཆོད་འོས་གྱུར་ནས་ཀྱང༌། །ལས་ཀྱི་དབང་གིས་ཕྱིར་ཡང་ས་སྟེང་ལྷུང༌། །འཁོར་ལོས་སྒྱུར་བ་ཉིད་དུ་གྱུར་ནས་ཀྱང༌། །འཁོར་བ་དག་ཏུ་ཡང་བྲན་ཉིད་དུ་འགྱུར། །མཐོ་རིས་བུ་མོའི་ནུ་མ་རྐེད་པ་ལ། །རེག་པས་བདེ་བ་ཡུན་རིང་མྱོང་ནས་སླར། །དམྱལ་བར་འཐག་གཅོད་དབྲད་པའི་འཁྲུལ་འཁོར་གྱི། །རེག་པ་ཤིན་ཏུ་མི་བཟད་བསྟེན་འཚལ་ལོ། །ཞེས་གསུངས་སོ། །དྲུག་པ་གཅིག་པུར་གྲོགས་མེད་པས་སྡུག་བསྔལ་བའི་ཉེས་པ་ནི། སྐྱེ་ན་ཡང་གཅིག་པུར་སྐྱེ། འཆི་ན་ཡང་གཅིག་པུར་འཆི། རྒས་པ་དང་ན་བ་ཡང་གཅིག་པུར་མྱོང༌། བར་དོར་འགྲོ་བ་ཡང་གཅིག་པུར་འགྲོ་དགོས་ན། འགྲོགས་བཤེས་མཛའ་བ་ཐམས་ཅད་སྙིང་པོ་མེད་པའོ། །དེ་ལྟར་ན་འཁོར་བ་ཐམས་ཅད་སྡུག་བསྔལ་དྲུག་གི་རང་བཞིན་གྱི་སྡུག་བསྔལ་ཏེ། ཡ་གི་སྲིད་པའི་རྩེ་མོར་སྐྱེས་ཀྱང་མནར་མེད་ཀྱི་འགྲམ་རྡོར་འགྲོ་བ་ལ་ཚེགས་མེད། སྡུག་བསྔལ་ཡང་ལ་ཡང་བསྲངས་ཁོ་ན་ཡིན། ཁང་བ་མེ་འབར་བའི་ནང་དུ་ཚུད་པ་དང་འདྲ། ཚོང་བ་སྲིན་མོའི་གླིང་དུ་ཚུད་པ་དང་འདྲ། འབྲོག་དགོན་ལམ་མེད་པར་འཁྱམས་པ་དང་འདྲ་བས། ཅིས་ཀྱང་མྱུར་དུ་འདི་ལས་ཐར་བར་བྱ་སྙམ་དུ་ཡང་ཡང་བསམ་པར་བྱའོ། །དེ་ལྟར་སྡུག་བསྔལ་བ་ལེགས་པར་ཤེས་ནས་དེ་འདོར་བ་ལ་རྒྱུ་ཀུན་འབྱུང་བདེན་པ་སྤང་བར་བྱ་དགོས། ཀུན་འབྱུང་བདེན་པ་ནི་ཉོན་མོངས་པ་དང་དེའི་དབང་གི་བྱུང་བའི་ལས་གཉིས་ཡིན་ནོ། །དེས་ན་མདོ་ལས། སྡུག་བསྔལ་ཤེས་པར་བྱའོ། །ཀུན་འབྱུང་སྤང་བར་བྱའོ། །ཞེས་གསུངས་པའི་ཉམས་ལེན་གྱི་རིམ་པ་ཤེས་པར་བྱའོ། ། ལས་རྒྱུ་འབྲས་བསམ་པ།།ལས་རྒྱུ་འབྲས་བསམ་པ། བཞི་བ་ལས་རྒྱུ་འབྲས་བསམ་པ་ནི། ལས་འབྲས་སྤྱིར་བསམ་པ་དང༌། བྱེ་བྲག་ཏུ་བསམ་པའོ། །དང་པོ་ནི། ལས་དཀར་པོ་དགེ་བ་ལས་འབྲས་བུ་བདེ་བ་ཁོ་ན་འབྱུང༌། ལས་ནག་པོ་སྡིག་པ་ལས་འབྲས་བུ་སྡུག་བསྔལ་ཁོ་ན་འབྱུང་སྟེ། བླང་དོར་རབ་གསལ་ལས། མི་དགེ་བ་ལས་སྡུག་བསྔལ་ཐམས་ཅད་དང༌། །ཁྱད་པར་ངན་འགྲོའི་གནོད་པ་ཐམས་ཅད་འབྱུང༌། །དགེ་བ་ལས་ནི་བདེ་འགྲོ་ཐམས་ཅད་དང༌། །རྣམ་པ་ཀུན་ཏུ་བདེ་ཆེན་ཐོབ་པར་གསུངས། །ཞེས་གསུངས་སོ། །དེས་ན་དཀར་ནག་ལས་འབྲས་སོ་སོར་ངེས་པས་ཀྱང་སྤང་བླང་བྱེད་དགོས། ལས་དགེ་སྡིག་གང་ཡིན་ཡང་རུང༌། རྒྱུ་ལས་ཀྱི་དུས་ན་ཆུང་ངུ་ལས་མེད་ཀྱང་འབྲས་བུ་རྣམ་སྨིན་གྱི་དུས་ན་འཕེལ་ཆེ་སྟེ། འགྱུར་ཆུང་ཤོས་རང་ལ་ཡང་བརྒྱ་འགྱུར་སྟོང་འགྱུར་དུ་འཕེལ། འགྱུར་ཆེ་བ་ལ་ཚད་བཟུང་དུ་མེད་པས་སྤང་བླང་གལ་ཆེ། མདོ་སྡེ་ལས་བརྒྱ་བ་ལས། ལུས་ཅན་དག་གི་ལས་རྣམས་ནི། །བསྐལ་བ་བརྒྱར་ཡང་ཆུད་མི་ཟ། །ཚོགས་ཤིང་དུས་ལ་བབས་པ་ན། །འབྲས་བུ་དེ་ཉིད་སྨིན་པར་འགྱུར། །ཞེས་དང༌། བླང་དོར་རབ་གསལ་ལས། ལས་ཀྱི་བག་ཆགས་སྣ་ཚོགས་ཀུན་གཞི་ལ། །གནས་པ་བསྐལ་བ་བརྒྱར་ཡང་ཆུད་མི་ཟ། །རྐྱེན་རྣམས་འཚོགས་ཤིང་དུས་ལ་བབས་པ་ན། །འབྲས་བུ་རིམ་པ་བཞིན་དུ་སྨིན་པར་གསུངས། །ཞེས་དང༌། རྒྱལ་བོ་ལ་གདམས་པའི་མདོ་ལས། །དུས་ཀྱི་ཉེན་ཏེ་རྒྱལ་བོ་འགྲོ་གྱུར་ན། །ལོངས་སྤྱོད་མཛའ་དང་བཤེས་རྣམས་རྗེས་མི་འབྲངས། ། སྐྱེས་བུ་དག་ནི་གང་ནས་གར་འགྲོ་ཡང༌། །ལས་ནི་གྲིབ་མ་བཞིན་དུ་རྗེས་སུ་འབྲང༌། །ཞེས་གསུངས་པ་ལྟར་རང་གིས་བྱས་པའི་ལས་དཀར་ནག་རྣམས་ནི་གཉེན་པོས་མ་བཅོམ་ན། འབྲས་བུ་མ་སྨིན་གྱི་བར་དུ་ཆུད་འཛའ་བ་མི་སྲིད། སྤྱི་རྒྱུ་དང་འབྲས་བུ་གཉིས་ལས་འབྲས་བུ་ཆེ་བ་ཡིན་ལ། དེས་ན་སྡིག་པ་ཆུང་ངུ་ལས་འབྲས་བུ་སྡུག་བསྔལ་ཆེན་པོ་བསྐྱེད་པ་དང་དགེ་སྡིག་གང་ཡིན་ཡང་ཆུང་ངུ་མང་དུ་བསགས་ན་ཆེན་པོར་འགྱུར་བ་ཡིན་ཏེ། མདོ་མཛང་བླུན་ལས། སྡིག་པ་ཆུང་ངུ་དག་ལ་ཡང༌། །མི་གནོད་སྙམ་དུ་བརྙས་མི་བྱ། །མེ་མདག་ཆུང་ངུ་དག་གིས་ཀྱང༌། །རྩྭ་ཕུང་རི་ཙམ་སྲེག་པར་བྱེད། །ཅེས་དང༌། དགེ་བ་ཆུང་ངུ་དག་ལ་ཡང༌། །མི་ཕན་སྙམ་དུ་བརྙས་མི་བྱ། །ཆུ་ཡི་ཐིགས་པ་བསགས་པ་ཡིས། །སྣོད་ཆེན་རིམ་གྱིས་གང་བར་འགྱུར། །ཞེས་གསུངས་སོ། །རང་གིས་མ་བྱས་ན་ལས་དཀར་ནག་གང་ཡང་རང་རྒྱུད་ལ་འབྱུང་བ་མི་སྲིད་པས། རང་ཉིད་བླང་དོར་གྱི་གནས་ལ་གཟབ་པ་གལ་ཆེ་སྙམ་དུ་བསྒོམ་པར་བྱའོ། ། གཉིས་པ་སོ་སོར་བསྒོམ་པ།གཉིས་པ་སོ་སོར་བསྒོམ་པ་ལ། ནག་པོའི་རྒྱུ་འབྲས་བསམ་པ་དང༌། དཀར་པོའི་རྒྱུ་འབྲས་བསམ་པ་དང་གཉིས་ལས། དང་བོ་ནི་འདི་ལྟར་ངན་སོང་གསུམ་དང༌། མཐོ་རིས་ཀྱི་སྡུག་བསྔལ་ཐམས་ཅད་ཀྱང་རྒྱུ་མེད་རྐྱེན་མེད་པ་ལས་བྱུང་བ་མ་ཡིན། རྒྱུ་མི་དགེ་བའི་ལས་ལས་བྱུང་ངོ་སྙམ་དུ་དམིགས་པའི་གཞི་བཅས་ནས་མི་དགེ་བ་དེ་ཡང་རྣམ་གྲངས་མང་མོད་ཀྱི་བླང་དོར་གྱི་གནས་ལ་གལ་ཆེ་བ་རགས་པ་ཆེ་ལོང་ཙམ་དུ་བསྡུས་ན། མི་དགེ་བ་བཅུ་སྟེ། དེ་ལ་ལུས་ཀྱི་ལས་རྣམ་པ་གསུམ་གྱི་སྲོག་གཅོད་པ་ནི། མཛོད་ལས། སྲོག་གཅོད་པ་ནི་བསམས་བཞིན་དུ། །མ་ནོར་གཞན་ནི་བསད་པའོ། །ཞེས་གསུངས་པ་ལྟར་སྲོག་གཅོད་འདོད་ཀྱིས་བསམ་བཞིན་དུ་གསད་བྱ་མ་ནོར་པར་བསད་པ། གསད་བྱ་དེ་མ་ཤི་བར་དུ་གསོད་སེམས་རྒྱུན་མ་ལྡོག་པའོ། ། མ་བྱིན་པར་ལེན་པ།མ་བྱིན་པར་ལེན་པ་ནི། མཛོད་ལས། མ་བྱིན་ལེན་པ་གཞན་གྱི་ནོར། །མཐུ་དང་འཇབ་བུས་བདག་གིར་བྱེད། །ཅེས་གསུངས་པ་ལྟར་གཞན་གྱི་ནོར་རང་ལ་མ་བྱིན་པ་འཕྲོག་པའམ་བརྐུས་པ་སོགས་ཇི་ལྟར་ཡིན་ཡང་རུང་སྟེ། རང་གིས་ཐོབ་པོ་སྙམ་པའི་བློ་སྐྱེས་པའོ། །འདོད་པས་ལོག་པར་གཡེམ་པ་ནི། ཡུལ་བགྲོད་པར་བྱ་བ་མ་ཡིན་པ་ལ་མི་ཚངས་པར་སྤྱོད་པ་འཁྲིག་པའི་ཆོས་བསྟེན་པའོ། །ཚངས་པར་སྤྱོད་པའི་བརྟུལ་ཞུགས་ཁས་བླངས་པས་ནི། མི་ཚངས་བར་སྤྱོད་པ་ཅི་འདྲ་ཞིག་བསྟེན་ཀྱང་ལོག་གཡེམ་ཁོ་ན་ཡིན་ནོ། །ངག་གི་ལས་བཞི་ལས་རྫུན་དུ་སྨྲ་བ་ནི། འདུ་ཤེས་བསྒྱུར་ནས་ཤེས་བཞིན་དུ་མི་བདེན་པར་སྨྲས་ལ། སྨྲ་བའི་ཡུལ་མིའི་འགྲོ་བར་གྱུར་པ་དེས་གོ་བ་ནའོ། ། ཕྲ་མ་ནི།ཕྲ་མ་ནི། མི་མཐུན་པ་མེད་པའི་འགྲོ་བ་གཉིས་འཁོན་པར་བྱ་བའི་ཕྱིར་དུ་ཕུང་དཀྲུགས་ཀྱི་ཚིག་སྨྲས་ཤིང་ཕ་རོལ་ཀྱིས་གོ་བ་ནའོ། །ཚིག་རྩུབ་པོ་ནི། དངོས་སུ་ཐོས་པར་དེའི་སྐྱོན་བརྗོད་པ་སོགས་ཞེ་ལ་འཕོག་པའི་ཚིག་སྨྲས་ཤིང་དེས་གོ་བའོ། །ངག་འཁྱལ་ནི། དེ་གསུམ་མ་ཡིན་པ་གཞན་ཉོན་མོངས་ཅན་གྱི་ཚིག་ཐམས་ཅད་དེ་ཁ་གསག་དང་གཞོགས་སློང་དང་གླུ་དང་ཟློས་གར་དང་དམག་གི་གཏམ་དང་སྨད་འཚོང་མའི་གཏམ་དང་ཚོང་གི་གཏམ་ལ་སོགས་པ་དང༌། ལྟ་བ་ལོག་པའི་ཆོས་ཀྱི་གཏམ་ལ་སོགས་པའོ། །ཡིད་ཀྱི་ལས་གསུམ་ལ་བརྣབ་སེམས་ནི། གཞན་གྱི་ནོར་དང་བུད་མེད་དང་ཁྱིམ་དང་འཁོར་གཡོག་དང་ཡུལ་ལ་སོགས་པ་རང་གིར་བྱེད་འདོད་པའི་བསམ་པ་གཏིང་ཚུགས་པར་བྱེད་པའོ། །གནོད་སེམས་ནི། གཞན་ལ་གནོད་པར་བྱེད་འདོད་དང་སྡུག་བསྔལ་འབྱུང་བར་གྱུར་ཅིག་པའི་བསམ་པ་གཏིང་ཚུགས་པའོ། ། ལོག་ལྟ།ལོག་ལྟ་ནི། བླང་དོར་རབ་གསལ་ལས། ལོག་པར་ལྟ་བ་དགེ་དང་མི་དགེ་སོགས། །རྒྱུ་འབྲས་བདེན་པ་མེད་ཅེས་ལྟ་བའོ། །ཞེས་གསུངས་པ་ལྟར་ལས་འབྲས་མི་བདེན་པ་དང༌། ཚེ་སྔ་ཕྱི་དང༌། དཀོན་མཆོག་གསུམ་སོགས་མེད་པར་འཛིན་པ་དམ་པོ་འཆང་བ་ཡིན་ཏེ། དེ་ལྟར་བཅུ་བོ་དེ་ནི་ལས་ལམ་རྫོགས་པའི་དབང་དུ་བྱས་ལ། བསམ་བཞིན་མ་ཡིན་པ་ལ་ནོར་བར་བསད་པ་སོགས་བཅུ་པོའི་ཕྱོགས་མཐུན་ཐམས་ཅད་ཀྱང་ངེས་པར་སྤོང་དགོས་པའི་ལས་ནི་ཡིན་ནོ། །དེས་ན་བདག་གིས་ཐོག་མ་ཉིད་དུ་ངེས་པར་སྤོང་དགོས་པའི་ལས་ནི་འདི་དག་ཡིན་ནོ་སྙམ་དུ་ཡང་ཡང་་བསྒོམ་པར་བྱའོ། །ད་ནི་མི་དགེ་བ་དེ་དག་གི་འབྲས་བུ་བསམ་པར་བྱ་སྟེ། རྣམ་སྨིན་གྱི་འབྲས་བུ།རྣམ་སྨིན་གྱི་འབྲས་བུ་ནི། བླང་དོར་རབ་གསལ་ལས། མི་དགེ་བཅུ་པོ་ཤས་ཆེར་སྤྱོད་པ་ཡིས། །རྣམ་སྨིན་འབྲས་བུ་དམྱལ་བའི་སྡུག་བསྔལ་ཏེ། །བར་མས་ཡི་དྭགས་གནས་སུ་སྐྱེ་བ་དང༌། །ཆུང་ངུས་དུད་འགྲོའི་གནས་སུ་འཕེན་པར་གསུངས། །ཞེས་པ་ལྟར་མི་དགེ་བ་བཅུ་པོ་འདི་རྣམས་རེ་རེ་ཡང་སྟོབས་ཆེན་པོ་བྱས་པ་དང༌། ཡང་ཡང་བྱས་ན་དམྱལ་བར་སྐྱེ། འབྲིང་དུ་བྱས་ན་ཡི་དྭགས་སུ་སྐྱེ། སྟོབས་ཆུང་བ་དང་ཉུང་ངུར་སྤྱད་པས་དུད་འགྲོར་སྐྱེ་བ་ཡིན་ནོ། །མི་དགེ་བ་དེ་དག་གི་མྱོང་བ་རྒྱུ་མཐུན་གྱི་འབྲས་བུ་ནི། སྲོག་བཅད་པས་ཚེ་ཐུང་བར་འགྱུར་བ་དང༌། མ་བྱིན་པར་བླངས་པས་ལོངས་སྤྱོད་ཆུང་བ་དང༌། ལོག་གཡེམ་གྱིས་དགྲ་མང་བ་དང༌། རྫུན་གྱིས་རང་ལ་སྐུར་བ་མང་པ་དང༌། ཕྲ་མས་གྲོགས་དང་འཁོན་པ་དང༌། ཚིག་རྩུབ་ཀྱིས་གཏམ་མི་སྙན་པ་ཐོས་པ་དང༌། ངག་འཁྱལ་སྨྲས་པས་རང་གི་ཚིག་ལ་གཞན་གྱིས་མི་ཉན་པ་དང༌། བརྣབ་སེམས་ཀྱིས་རེ་བ་མི་འགྲུབ་པ་དང༌། གནོད་སེམས་ཀྱིས་སེམས་ལ་སྡུག་བསྔལ་དང་འཇིགས་སྐྲག་འབྱུང་བ་དང༌། ལོག་ལྟས་ཤིན་ཏུ་གླེན་ཅིང་གཏི་མུག་པར་འགྱུར་བ་ཡིན་ནོ། ། བྱེད་པ་རྒྱུ་མཐུན།བྱེད་པ་རྒྱུ་མཐུན་ནི། སྔར་ལས་དེ་དང་དེ་བྱས་པས་ཕྱིས་ཀྱང་དེ་དང་དེ་ལ་དགའ་བའོ། །བདག་པོའི་འབྲས་བུ་ནི། ཕྱི་རོལ་སྣོད་ཀྱི་འཇིག་རྟེན་ལ་འབྱུང་སྟེ། སྲོག་གཅོད་ཀྱིས་འབྲུ་དང་སྨན་ལ་སོགས་པ་མཐུ་ཆུང་བར་འགྱུར་བ་དང༌། མ་བྱིན་ལེན་གྱིས་ལོ་ཉེས་པ་དང༌། ལོག་གཡེམ་གྱིས་ས་ཕྱོགས་རྡུལ་ཚུབ་ཆེ་ཞིང་དྲི་ང་བ་དང༌། རྫུན་གྱིས་ནི་ས་ཕྱོགས་མཐོ་དམན་ཅན་བགྲོད་མི་བདེ་བར་འགྱུར་བ་དང༌། ཕྲ་མས་ས་ཕྱོགས་ཚ་སྒོ་ཅན་དུ་འགྱུར་བ་དང༌། ཚིག་རྩུབ་ཀྱིས་བྱེ་མ་དང་གསེག་མ་སོགས་འཕེལ་བ་དང༌། ངག་འཁྱལ་གྱིས་དུས་ལོག་ཏུ་འགྱུར་ཏེ། དགུན་ནི་རུལ། དཔྱིད་ནི་རེངས། དབྱར་ནི་ཐན། སྟོན་ནི་ཞོད་པ་ལ་སོགས་པའོ། །བརྣབ་སེམས་ཀྱིས་འབྲུ་ཕྲ་བར་གྱུར་བ་དང༌། གནོད་སེམས་ཀྱིས་རོ་མི་ཞིམ་པར་འགྱུར་བ་དང༌། ལོག་ལྟས་ནི་འབྲུ་རྩ་བ་ནས་མི་ཆགས་པར་བྱེད་དེ། དེ་ལྟ་ན་རྒྱུ་མཐུན་པའི་འབྲས་བུ་འདི་དག་དང༌། བདག་པོའི་འབྲས་བུ་འདི་རྣམས་ལས་དེ་དང་དེ་བྱས་པའི་སྐྱེ་བ་དེ་ཉིད་ལ་འབྱུང་བའང་ཡོད། སྐྱེ་བ་ཕྱི་མའི་གནས་སྐབས་མཐོ་རིས་སུ་སྐྱེས་པའི་སྐབས། དུས་ངེས་མེད་སྣ་ཚོགས་པར་ཡང་འབྱུང་བའོ། །དེ་ལྟར་ན་མི་དགེ་བ་བཅུ་པོ་འདི་ནི་སྡུག་བསྔལ་མི་འདོད་པ་སྣ་ཚོགས་པའི་གཞིར་གྱུར་པའི་ཕྱིར། འདི་རྣམས་ཕྱིན་ཆད་སྲོག་ལ་བབ་ཀྱང་མི་བྱ། སྔར་བྱས་པ་ཐམས་ཅད་ཀྱང་སྦྱོང་པའི་ཐབས་ལ་འབད་དགོས་སྙམ་དུ་ཡང་ཡང་བསྒོམ་པར་བྱའོ། །ད་ནི་དགེ་བའི་ལས་བསམ་པར་བྱ་སྟེ། མཐོ་རིས་ཀྱི་ལུས་རྟེན་ཐོབ་པ་དང༌། གཞན་ཡང་འཁོར་བའི་བདེ་བ་གང་ཅི་ཡོད་པ་ཐམས་ཅད་དགེ་བའི་ལས་ལས་འབྱུང༌། འཇིག་རྟེན་ལས་འདས་པ་བྱང་ཆུབ་རྣམ་པ་གསུམ་ཡང་དགེ་བ་ལས་འབྱུང་བ་ཡིན་ན། བདག་གིས་སྡིག་པ་ཐམས་ཅད་སྤངས༌། དགེ་བ་ཐམས་ཅད་ལ་ཅི་ནུས་སུ་སློབ་དགོས་པ་ལས་བསླབ་རྒྱུའི་དགེ་བ་ཡང་རིགས་མང་མོད་ཀྱི། དགེ་བ་ཐམས་ཅད་ཀྱི་ཐོག་མའི་འཇུག་སྒོ་ནི། ཆོས་དཀར་པོ་དགེ་བ་བཅུ་ཞེས་བྱ་བ་ཡིན་ནོ། །དེ་ནི་སྔར་བསྟན་པའི་མི་དགེ་བ་བཅུ་བོ་དེ་རྣམས་ཡིད་ཀྱིས་སྤངས་ནས་ལུས་ངག་གིས་སླར་ལོག་པའི་སྤོང་བའི་སེམས་པ་སྤྱོད་ལམ་དང་བཅས་པ་དེ་ཡིན་ན། བདག་འདི་ལ་རྟག་ཏུ་གནས་པར་བྱའོ་སྙམ་དུ་ཡང་ཡང་བསྒོམ། དེ་ལ་མི་དགེ་བ་བཅུ་ཡིད་ཀྱིས་སྤངས་པའི་གོ་དོན་ནི། དེ་རྣམས་ཉེས་དམིགས་ཅན་དང་སྐྱོན་ཆེན་པོར་ཤེས་ནས་ནམ་དུ་ཡང་མི་འདོད་པ་དེ་ཡིན་ལ། ལུས་ངག་གིས་སླར་ལོག་པ་ནི། བཅུ་པོ་དེ་དག་དུས་རྒྱུན་དུའམ། དལ་བར་འདུག་པའི་དུས་སུ་མི་བྱེད་པར་མ་ཟད། དེ་དག་བྱས་ན་ཁེ་ཡོད་པ་ལྟར་སྣང་ཞིང༌། འབད་རྩོལ་མི་དགོས་པར་བྱེད་ཐུབ་པའི་སྐབས་བྱུང་ཡང་སྔར་ཡིད་ཀྱིས་སྤངས་པ་དེ་དྲན་པའི་བྱ་བ་ངན་པ་དེ་ལ་ཡེ་ནས་འཇུག་པར་མི་བྱེད་པ་སྟེ། ལུས་ངག་གི་བདུན་པོ་ལ་ནི་འདི་གཉིས་ཀར་ཚང་བ་དགོས་ལ། ཡིད་ཀྱི་ལས་གསུམ་ལ་ཡིད་ཀྱིས་སྤངས་པ་ཁོ་ནས་ཆོག་གོ། མི་དགེ་བ་ལ་མི་རུང་བར་སེམས་པ་དེ་ཀ་སྤོང་སེམས་ཡིན་ལ། དེ་ནི་མི་རུང་བ་ཡིན་པ་ལ་མི་རུང་བར་ལེགས་པར་ཤེས་པ་ནི་ལམ་གཉེན་པོའི་ཆོས་སུ་འགྱུར་ཞིང༌། འདི་ཚུལ་ཁྲིམས་ཀྱི་ངོ་བོ་ཡིན། སྤོང་སེམས་ཤུགས་ཆེ་བ་ལན་འགའ་རེ་བྱུང་ན། གཉིད་རྨུགས་དང་རྣམ་གཡེང་ལ་སོགས་པས་བར་ཆོད་ཀྱང༌། དེ་ལྟ་བུའི་རྐྱེན་དམིགས་པའི་ཚེ། ཉེས་སྤྱོད་དེ་སྐྱོན་དུ་ཤེས་ནས་མི་བྱེད་ཅིང་སྡོམ་པར་འགྱུར་རོ། །འདི་ནི་སྔར་གྱི་སེམས་པ་དེའི་ཤུགས་ལས་བྱུང་བ་ཡིན་པས་ཤུགས་དེ་ཡང་ས་བོན་གྱི་མཐུ་ལས་ཡིན་ཏེ། དེའི་ཕྱིར་མི་དགེ་བ་བཅུ་སྤོང་བའི་སེམས་པ་ས་བོན་དང་བཅས་པ་ནི་དགེ་བ་བཅུ་ཡིན་པར་རྗེ་བཙུན་གྱིས་གསུངས་སོ། །ད་ནི་དགེ་བ་བཅུའི་ཕན་ཡོན་བསམ་པར་བྱ་སྟེ། དེ་ཡང་ལས་དགེ་བ་བཅུ་ཆེར་སྤྱད་པ་ལས་རྣམ་སྨིན་གྱི་འབྲས་བུ་ལྷའི་སྐྱེ་བ་ལེན། ཆུང་ངུར་སྤྱད་པ་ལས་རྣམ་སྨིན་གྱི་འབྲས་བུ་མི་ལུས་ཐོབ། དགེ་བ་ཡིན་ཡང་བསམ་པ་མ་དག་པ་སོགས་སྲ་བསྲེ་ཅན་གྱིས་ནི་ལྷ་མིན་དུ་སྐྱེ་བར་མདོ་ལས་བཤད། རྒྱུ་མཐུན་པ་དང་བདག་པོའི་འབྲས་བུ་ཡང་སྔར་མི་དགེ་བཅུའི་སྐབས་སུ་བཤད་པ་དེ་ཉིད་ཕྱིན་ཅི་ལོག་ཏུ་འབྱུང་སྟེ། ཚེ་རིང་འབྱོར་བ་དགྲ་སྤངས་དང༌། །བསྟོད་དང་གྲོགས་མང་སྙན་པའི་གཏམ། །ཚིག་བཙུན་བསམ་པ་འགྲུབ་པ་དང༌། །ཡིད་བདེ་བ་དང་བློ་གྲོས་འཕེལ། །འདི་དག་དགེ་བའི་རྒྱུ་མཐུན་བཅུ། །མཐུ་ཆེ་ལོ་ལེགས་ཉམས་དགའ་བ། །མཐོ་དམན་སྙོམས་དང་ཞིང་ས་གཤིན། །རྩ་ཤིང་རྒྱས་དང་དུས་ཚིགས་རན། །འབྲུ་སྤོམ་རོ་ཞིམ་འབྲས་བུ་རྒྱས། །དགེ་བ་བཅུ་ཡི་བདག་འབྲས་ཡིན། ཞེས་སོ། །དེ་ལྟར་དགེ་བ་བཅུ་ལ་གནས་པ་ནི། ཚེ་འདི་དང་ཕྱི་མར་རྟག་ཏུ་བདེ་བའི་རྒྱུ་ཡིན་པས་བདག་དགེ་བ་བཅུ་ལ་རྟག་ཏུ་གནས་པར་བགྱིའོ་སྙམ་དུ་ཡང་ཡང་བསྒོམ་དགོས་སོ། །ལས་འབྲས་བསླུ་བ་མེད་པ་ཡིན་པར་གྲུབ་སྟེ། བླང་དོར་རབ་གསལ་ལས། ལས་འབྲས་བསླུ་བ་མེད་པར་རྒྱལ་བ་ཡིས། །བདེན་པར་གསུངས་ལ་ཅིས་ཀྱང་ཡིད་ཆེས་འཚལ། །ཞེས་གསུངས་སོ། །འདི་དག་གི་སྐབས་སུ་ལས་འབྲས་ཀྱི་དབྱེ་བ་ཞིབ་མོར་ཤེས་པ་གལ་ཆེ་བས་ཡང་དང་ཡང་དུ་བླ་མས་བཤད་ཅིང༌། མདོ་སྡེ་ལས་བརྒྱ་བ་སོགས་ལ་བལྟ་བར་བྱ་ཞིང༌། སློབ་མས་བློ་ལ་སྐྱོང་བ་དང༌། ཁ་ཕྱིར་ལྟས་སུ་མ་སོང་པར་རང་ཐོག་ཏུ་འགེལ་བ་ཁོ་ན་གནད་ཆེའོ། ། ད་ནི་ལས་འབྲས་བསམས་པའི་ཆོས་སྐོར་རྣམས་ཀྱི་སྙིང་བོའི་གྲུབ་དོན།ད་ནི་ལས་འབྲས་བསམས་པའི་ཆོས་སྐོར་རྣམས་ཀྱི་སྙིང་བོའི་གྲུབ་དོན་ནི། སྔར་ཇི་སྐད་བསྟན་པའི་དཀར་ནག་གི་ལས་འབྲས་བསམ། སྡིག་པ་མི་དགེ་བའི་ལས་སྔར་བྱས་ཟིན་ལ། སྟོབས་བཞི་ཚང་བའི་བཤགས་པ་འབུལ་བ་གལ་ཆེ། རྟེན་གྱི་སྟོབས་སྐྱབས་འགྲོ་དང་སེམས་བསྐྱེད་དང༌། གཉེན་པོ་ཀུན་ཏུ་སྤྱོད་པའི་སྟོབས་སྡིག་སྦྱོང་གི་དགེ་བ་གང་འགྲུབ་པ་དང༌། སུན་འབྱིན་པའི་སྟོབས་སྔར་བྱས་ལ་དུག་ཁོངས་སུ་སོང་བ་ལྟ་བུའི་འགྱོད་སེམས་དང༌། སླར་ལྡོག་པའི་སྟོབས་ཕྱིན་ཆད་སྲོག་ལ་བབ་ཀྱང་མི་བྱེད་སྙམ་པའི་སྡོམ་སེམས་ཏེ། དེ་བཞི་ཚང་བར་བྱའོ། །མཁན་པོ་སློབ་དཔོན་བླ་མ་རྟེན་གསུམ་དགེ་འདུན་ལ་སོགས་པའི་དྲུང་དུ་མཐོལ་བཤགས་ཡང་ཡང་འབུལ་བ་དང༌། དེ་དག་མ་འཛོམས་ཀྱང༌། རྒྱལ་བ་སྲས་བཅས་མཁའ་དབྱིངས་གང་བ་ལ་དམིགས་ཏེ་བཤགས་པ་འབུལ། བཤགས་ཚིག་ཕུང་བོ་གསུམ་པའི་མདོ་སོགས་དང༌། རང་གིས་སྡིག་པ་བགྱིས་པ་གང་ཡིན་པ་དེ་འདི་ལྟར་བགྱིས་སོ་ཞེས་མ་སྦས་མ་གསང་བར་བརྗོད་པ་ཉིད་གནད་ཆེ་བ་ཡིན་ནོ། །མི་དགེ་བཅུར་མ་ཟད་སྡིག་པ་མི་དགེ་པའི་ལས་སུ་གཏོགས་པ་ཆེ་ཆུང་ཐམས་ཅད་རང་ཡང་མི་བྱེད། གཞན་ཡང་བྱེད་དུ་མི་འཇུག སྡིག་པ་ལ་ཡི་རང་བའམ་དགའ་བར་མི་བྱ། བསྟོད་ཅིང་བསྔགས་པར་ཡང་མི་བྱ་སྙམ་དུ་བསྒོམ། དཀར་པོ་དགེ་བའི་ལས་ནི་ལས་ལམ་བཅུ་བོ་དེར་མ་ཟད་གཞན་གྱི་སྲོག་བསྐྱབས་པ་དང༌། འཚོ་བ་སྟེར་བ་དང༌། ཡོ་བྱད་སྤྱིན་པ་དང༌། ཚུལ་ཁྲིམས་སྲུང་བ་དང༌། དཀོན་མཆོག་མཆོད་པ་དང༌། དད་པ་ལ་སོགས་པའི་དགེ་བར་གཏོགས་སོ་ཅོག་རང་གིས་ཀྱང་ཅི་ལྕོགས་སུ་སྒྲུབ་གཞན་ཡང་བྱེད་དུ་འཇུག རང་གཞན་གྱིས་དགེ་བ་བྱས་པ་ལ་ཡི་རང་བྱ། བསྔགས་པ་ཡང་བརྗོད་པར་བྱའོ་སྙམ་དུ་བསམ། ཡང་དགེ་སྡིག་གཉིས་མ་ཡིན་པའི་ལས་ལུང་མ་བསྟན་ཞེས་བྱ་བ་འགྲོ་འཆག་ཉལ་འདུག་སོགས་ངེས་མེད་སྣ་ཚོགས་པ་ཞིག་འདུག་པ། དེ་དག་ལ་རྣམ་པར་སྨིན་པའི་འབྲས་བུ་མེད་ཀྱང་དོན་མེད་དུ་དུས་འདའ་བར་འདུག ལེ་ལོ་དང་རྣམ་གཡེང་གི་རྒྱུ་ལས་དེ་དག་གི་དབང་དུ་འགྲོ་ཡིན་འདུག་པ་ལ། ཕྱིན་ཆད་ལེ་ལོ་རྣམ་གཡེང་གི་དབང་དུ་མི་བཏང༌། ལས་ལུང་མ་བསྟན་འབྱུང་བའི་དོད་དུ་ཡང་དགེ་བ་འབའ་ཞིག་ལ་བློ་དང་བྱ་སྤྱོད་བསྒྱུར་བར་བྱའོ་སྙམ་དུ་བསྒོམ་པར་བྱ་དགོས་སོ། །ཟག་བཅས་ཀྱི་ལས་དེ་དག་ནི་ཉོན་མོངས་པ་ལས་བྱུང་ལ། ཉོན་མོངས་པ་ལ་དབྱེ་ན་རྩ་ཉོན་དྲུག་སོགས་མང་ན་ཡང་རྩ་བ་འདོད་ཆགས་ཞེ་སྡང་གཏི་མུག་གསུམ་ཡིན་ཏེ། བཤེས་སྤྲིངས་ལས། འདོད་ཆགས་ཞེ་སྡང་གཏི་མུག་གསུམ། །དེས་བསྐྱེད་ལས་ནི་མི་དགེ་བའོ། །ཞེས་གསུངས་པའི་ཕྱིར། དེ་དག་གི་རྩ་བ་མ་རིག་པ་ཡིན་པས་དེའི་གཉེན་པོ་རིག་པ་ཡེ་ཤེས་བདག་མེད་རྟོགས་པའི་ཤེས་རབ་བསྐྱེད་དགོས་ལ། གང་ཟག་གི་བདག་མེད་རྟོགས་པའི་ཤེས་རབ་མེད་ན་སྲིད་པ་འཁོར་བ་ལས་གྲོལ་བ་མེད་དེ། ཐེག་མཆོག་དབུ་མ་ལས། གང་ཟག་བདག་མེད་སྒོམ་པ་ཡོད་མེད་ལས། །སྲིད་ལས་གྲོལ་བ་ཡོད་མེད་རྗེས་སུ་དཔོག །ཅེས་གསུངས་པའི་ཕྱིར་རོ། །སྤྱིར་ནང་བསྟན་ལ་འཇུག་པའི་སྒོ་སྐྱབས་འགྲོ་ཡིན་ན། དེ་ཡང་བརྒྱུད་ལ་སྐྱེས་པ་ལ་དད་པ་གལ་ཆེ་བ་ཡིན་ལ། དེ་ལ་ཡང་དཀོན་མཆོག་གསུམ་གྱི་ཡོན་ཏན་ཤེས་དགོས་པ་ཡིན་ཏེ། རྗེ་ཏཱ་ར་ནཱ་ཐའི་ཞལ་སྔ་ནས། ཆོས་ཀྱི་རྩ་བ་སྐྱབས་འགྲོ་དང༌། སྐྱབས་འགྲོའི་རྩ་བ་དད་པ་ཡིན་ཞིང༌། དད་པའི་རྩ་བ་སྟོན་པ་བཅོམ་ལྡན་འདས་ཀྱི་རྣམ་ཐར་གོ་བ་ལ་རག་ལས། ཞེས་གསུངས་པས་སོ། །སྐྱབས་འགྲོ་རྒྱུད་ལ་སྐྱེ་བ་ལ་སྡུག་བསྔལ་ཅི་རིགས་ལ་འཇིགས་སྐྲག་སྐྱེས་ནས་དཀོན་མཆོག་ལ་དེ་ལས་སྐྱོབས་པའི་ནུས་པ་ཡོད་པར་ཤེས་དགོས་པ་ཡིན་ནོ། །ངེས་འབྱུང་གི་བསམ་པ་རྒྱུད་ལ་མ་སྐྱེས་ན་ཞི་བ་ཐར་བ་ཐོབ་པ་མེད་པ་ཡིན་པར་འཕགས་པ་ལྷས། གང་ལ་འདི་སྐྱོ་ཡོད་མིན་ན། །དེ་ལ་ཞི་གུས་ག་ལ་ཡོད། །ཅེས་གསུངས་ལ། ངེས་འབྱུང་གི་བསམ་པ་རྒྱུད་ལ་སྐྱེ་བ་ལ་འཁོར་བ་སྡུག་བསྔལ་ལམ་སྡུག་བདེན་ཤེས་དགོས་པ་ཡིན། དེ་ཤེས་པ་ལ་བློ་ལྡོག་རྣམ་བཞི་ཤེས་དགོས་ཏེ། རྗེ་བདག་ཉིད་ཆེན་པོས། དལ་འབྱོར་རྙེད་དཀའ་ཚེ་ལ་ལོང་མེད་པ། །ཡིད་ལ་གོམས་པས་ཚེ་འདིའི་སྣང་ཤས་ལོག །ལས་འབྲས་མི་བསླུ་འཁོར་བའི་སྡུག་བསྔལ་རྣམས། །ཡང་ཡང་བསམ་ན་ཕྱི་མའི་སྣང་ཤས་ལྡོག །དེ་ལྟར་གོམས་པས་འཁོར་བའི་ཕུན་ཚོགས་ལ། །ཡིད་སྨོན་སྐད་ཅིག་ཙམ་ཡང་མི་སྐྱེ་ཞིང༌། །ཉིན་མཚན་ཀུན་ཏུ་ཐར་བ་དོན་གཉེར་བློ། །བྱུང་ན་དེ་ཚེ་ངེས་འབྱུང་སྐྱེས་པ་ལགས། །ཞེས་གསུངས་སོ། །མདོར་ན་སྐྱེས་བུ་ཆུང་འབྲིང་ཆེ་གསུམ་གང་གི་ལམ་རྒྱུད་ལ་སྐྱེ་བ་ལ་བློ་ལྡོག་རྣམ་བཞི་འདི་གལ་ཆེ་བ་ཡིན་ནོ། །ཆོས་ཆོས་བཞིན་དུ་འགྲོ་བ་ལ་འདི་བསྒོམ་དགོས། དེང་སང་རྫོགས་ཆེན་ཕྱག་ཆེན། ཟབ་ལམ་རྡོ་རྗེའི་རྣལ་འབྱོར་སོགས་ལ་མཐོ་སྙེག་བྱེད་ཀྱང་སྐྱབས་འགྲོ་མེད་ན་ནང་བསྟན་གྱི་སྒོར་མི་ཆུད། ངེས་འབྱུང་གི་བསམ་པ་མེད་ན་ཆོས་གང་བསྒྲུབ་ཁུལ་བྱེད་ནའང་ཐར་བའི་རྒྱུར་མི་འགྲོ། བྱང་ཆུབ་མཆོག་ཏུ་སེམས་བསྐྱེད་པ་མེད་ན་རྫོགས་པའི་སངས་རྒྱས་ཀྱི་གོ་འཕང་ཐོབ་པའི་རྒྱུར་མི་འགྱུར་བའམ་ཐེག་ཆེན་གྱི་ཆོས་སུ་མི་འགྱུར་བ་ཡིན་པས་རང་བློ་དང་འཚམས་པའི་ཆོས་དང༌། ལམ་གྱི་གོ་རིམ་ཡོད་པ་དང༌། ཚིག་འདོན་པ་ཙམ་མ་ཡིན་པར་དོན་བསམ་པ་སོགས་ཡན་ལག་ཚང་བར་བྱས་ནས་ཉམས་སུ་ལེན་དགོས་སོ། ། སྨྲས་པ། དལ་འབྱོར་རྙེད་དཀའ་འཆི་བ་མི་རྟག་པ། །འཁོར་བ་སྡུག་བསྔལ་ལས་འབྲས་བསླུ་མེད་པའི། །ཆོས་ཚུལ་གནས་ལ་ཐོས་བསམ་སྒོམ་པ་ཡིས། །རྣམ་གྲོལ་ཆོས་ཀྱི་གོ་འཕང་ཐོབ་པར་སྨོན། །དེ་ལྟར་བློ་ལྡོག་རྣམ་བཞིའི་བཤད་པ་གཞན་ཕན་ཉི་མ་ཞེས་བྱ་བ་འདི་ནི་རྒྱལ་རོང་པཱ་ལ་དགོན་གྱི་གྲྭ་བཙུན་ལྷག་བསམ་པ་གསལ་སྟོང་གིས་སྟོན་པའི་གསེར་སྐུ་དར་བཅས་བསྐུལ་ངོར་དངོས་གྲུབ་དཔལ་གྱིས་བྲིས་པའོ། །འདིས་གཞན་ལ་ཕན་པ་རྒྱ་ཆེན་པོ་འབྱུང་བར་གྱུར་ཅིག །སརྦ་མངྒ་ལཾ། འཕགས་པ་དཀོན་མཆོག་གསུམ་རྗེས་སུ་དྲན་པའི་མདོའི་མཆན་བུ་དྲི་མེད་མེ་ལོང་།འཕགས་པ་དཀོན་མཆོག་གསུམ་རྗེས་སུ་དྲན་པའི་མདོའི་མཆན་བུ་དྲི་མེད་མེ་ལོང་ཞེས་བྱ་བ་བཞུགས་སོ། ། སངས་རྒྱས་དང་ཆོས་དང་དགེ་འདུན་དཀོན་མཆོག་གསུམ་གྱི་ཡོན་ཏན་རྗེས་སུ་དྲན་པའི་རྩ་བའམ་སྙིང་པོར་གྱུར་བའི་མདོ་ཞེས་བྱ་བ་གང་ན་བཞུགས་ན་འདི་ན་བཞུགས་ཞེས་པའོ། །སོ། །ཞེས་པ་རྫོགས་ཚིག་གོ། །མཚན་ལ། རྒྱ་གར་སྐད་དུ། ཨཱརྱ་རཏྣ་ཏྲ་ཡ་ཨ་ནུ་སྨྲྀ་ཏི་སཱུ་ཏྲ། བོད་སྐད་དུ། འཇིག་རྟེན་ལས་ཁྱད་པར་དུ་འཕགས་པ་དཀོན་མཆོག་གསུམ་རྗེས་སུ་དྲན་པའི་མདོ། །ཞེས་བྱུང༌། མཆོག་གསུམ་རྗེས་དྲན་གྱི་མདོ་ཚན་སོ་སོར་བྱས་ནས་སངས་རྒྱས་རྗེས་དྲན་ཀྱི་མདོའི་མཚན་ལ། རྒྱ་གར་སྐད་དུ། ཨཱརྱ་བུདྡྷ་ཨ་ནུ་སྨྲྀ་ཏི། བོད་སྐད་དུ། འཕགས་པ་སངས་རྒྱས་རྗེས་སུ་དྲན་པ། ཞེས་གསུངས་པ་དང༌། ཆོས་རྗེས་དྲན་གྱི་མཚན་ལ། རྒྱ་གར་སྐད་དུ། དྷརྨ་ཨ་ནུ་སྨྲྀ་ཏི། བོད་སྐད་དུ། ཆོས་རྗེས་སུ་དྲན་པ། ཞེས་གསུངས་པ་དང༌། དགེ་འདུན་རྗེས་སུ་དྲན་པའི་མདོའི་མཚན་ལ། རྒྱ་གར་སྐད་དུ། སང་གྷ་ཨ་ནུ་སྨྲྀ་ཏི། བོད་སྐད་དུ། དགེ་འདུན་རྗེས་སུ་དྲན་པ། ཞེས་གསུངས་ཡོད་དོ། །རྗེས་སུ་དྲན་པའི་དོན་ནི། དངོས་པོ་ལ་ཡོན་ཏན་ཇི་ལྟར་ཡོད་པ་ལྟར་མ་ནོར་བར་རྗེས་སུ་ཞུགས་པ་ཡིན་ལ། རྗེས་སུ་དྲན་པའི་དགོས་པ་ནི་དཀར་པོའི་ཆོས་མཐའ་དག་གི་རྩ་བར་གྱུར་པ། ཡུལ་མཆོག་ལ་དད་པ་བསྐྱེད་པའི་ཆེད་དུ་ཡིན་ལ། དད་པ་དང་མོས་པ་དང་གུས་པ་གསུམ་པོ་སྐབས་འདིར་དོན་གྱི་གཙོ་བོ་ལ་གཅིག་པར་འགྱུར་ཞིང་ཆ་ཤས་ཕྲ་མོ་ནས་ཁྱབ་ཆེ་ཆུང་ཅུང་ཟད་ཡོད་པར་རྗེ་བཙུན་གྱིས་གསུངས་ལ། དེ་ཡང་དད་པ་ནི་རྣམ་པ་གསུམ་སྟེ། དང་བའི་དད་པ་དང༌། ཡིད་ཆེས་པའི་དད་པ་དང༌། འདུན་པའི་དད་པའོ། །དང་པོ་ནི། འདིར་དཀོན་མཆོག་གསུམ་གྱི་ཡོན་ཏན་ཐོས་ནས། ཡོན་ཏན་རྣམས་མཆོག་ཏུ་འཛིན་ཅིང༌། མཆོག་ཏུ་ཤེས་པ་དང༌། དེ་ཡང་ཡིད་ལ་དགའ་བ་ཕུན་སུམ་ཚོགས་པའི་བློ་དང་མཚུངས་པར་ལྡན་པའོ། །ཡིད་ཆེས་པའི་དད་པ་ནི། དེ་བཞིན་གཤེགས་པ་ལ་ཡོན་ཏན་དེ་དང་དེ་ཡོད་པར་ཡིད་ཆེས་པ་དང༌། ལུང་གི་ཆོས་ནས་ཇི་སྐད་བཤད་པ་ལ། དོན་བདེན་ཞིང་ངེས་པའི་ཚིག་ཏུ་ཡིད་ཆེས་པ་དང༌། རྟོགས་པའི་ཆོས་དང༌། དགེ་འདུན་ལ་ཡང་དེ་དང་དེའི་ཡོན་ཏན་དང་ལྡན་པར་ཡིད་ཆེས་པ་དང༌། དོན་དམ་པའི་ཆོས་འགོག་པའི་བདེན་པ་ཡང༌། སྐྱོན་ཐམས་ཅད་དང་བྲལ་བར་ཡིད་ཆེས་པ་དང༌། གང་སྐྱོན་ཐམས་ཅད་དང་བྲལ་བ་དེ་ནི་ཡོན་ཏན་ཐམས་ཅད་དང་ལྡན་པ་ཡིན་ནོ། །འདོད་པའམ་འདུན་པའི་དད་པ་ནི། སངས་རྒྱས་དང་དགེ་འདུན་གྱི་གོ་འཕང་ཐོབ་པར་འདུན་ཅིང་འདོད་པ་དང༌། ལུང་གི་ཆོས་ཁོང་དུ་ཆུད་པར་འདོད་པ་དང༌། དོན་དམ་དབྱིངས་ཀྱི་ཆོས་མངོན་དུ་བྱ་བར་འདོད་པ་དང༌། རྟོགས་པའི་ཆོས་རྒྱུད་ལ་བསྐྱེད་པར་འདོད་པ་རྣམས་འདུན་པའི་དད་པ་དངོས་ཡིན་ལ། རྣམ་གྲངས་ཙམ་དུ་དཀོན་མཆོག་མཆོད་པར་འདོད་པ་དང༌། ཡོན་ཏན་བསྒྲག་པར་འདོད་པ་དང༌། ལུང་གི་ཆོས་དར་བར་འདོད་པ་ལ་སོགས་པ་ཡང་འདུན་པའི་དད་པ་ཡིན་ནོ། །དེ་དག་ཀྱང་དང་བ་དང་ཡིད་ཆེས་པའི་དད་པ་སྔོན་དུ་སོང་བས་ནི་དེ་ལྟར་ཡིན་གྱི། ཁེའི་ཕྱིར་དང༌། གྲགས་པ་འདོད་པ་དང༌། འགྲན་པའི་ཕྱིར་མཆོད་པ་ལ་སོགས་དེ་རྣམས་འདོད་པ་ནི། དེ་དང་དེར་འདུན་པ་ཙམ་ཡིན་ཡང་དད་པ་ནི་མ་ཡིན་ནོ། །མོས་པ་ཞེས་བྱ་བ་ནི། ངེས་པའི་དངོས་པོ་ལ་ངེས་པར་འཛིན་པ་སྟེ། སྐབས་འདིར་ནི་གང་ཡོན་ཏན་དང་ལྡན་པ་དང༌། གང་མི་བསླུ་བ་དེ་ལ་ཡོན་ཏན་དང་ལྡན་པར་ཤེས་ཤིང་མི་བསླུ་བར་ཤེས་པ་སྟེ། གཙོ་ཆེར་ཡིད་ཆེས་པའི་དད་པ་ཡིན་ནོ། །ཡང་མངོན་པ་ལས། དགའ་དང་གུས་ཉིད་ངོ་ཚ་ཤེས། །ཞེས་ཀྱང་འབྱུང་མོད། སྐབས་འདིར་གུས་པ་ནི་ཡུལ་དེ་ཉིད་མཆོག་ཏུ་ཤེས་པ་ཡིན་པས། ཕལ་ཆེར་དང་བའི་དད་པར་འདུ་བར་རྗེ་བཙུན་གྱིས་གསུངས་སོ། །གང་དཀོན་མཆོག་གསུམ་ལ་དད་པ་ཕུན་སུམ་ཚོགས་པ་དང་ལྡན་པ་དེས་ནི་སྐྱབས་འགྲོ་ལེན་པར་འགྱུར་ཞིང༌། སོ་སོ་ཐར་པའི་སྡོམ་པ་ལེན་པ་དང་བྱང་ཆུབ་ཏུ་སེམས་བསྐྱེད་པར་ཡང་འགྱུར་ལ། བསླབ་པ་གསུམ་དང་ཕ་རོལ་ཏུ་ཕྱིན་པ་དག་ལ་ཡང་འཇུག་པར་འགྱུར་བས། ལམ་ཐམས་ཅད་ཀྱི་རྩ་བ་ནི་དད་པ་ཡིན་ཏེ། མདོ་ལས། དད་པ་སྔོན་འགྲོ་མ་ལྟར་བསྐྱེད་པ་སྟེ། །ཡོན་ཏན་ཐམས་ཅད་བསྲུངས་ཤིང་འཕེལ་བར་བྱེད། །ཅེས་གསུངས་སོ། །དེ་ཡང་དཀོན་མཆོག་གསུམ་རྗེས་སུ་དྲན་པ་ལ་རག་ལས་པ་ཡིན་ནོ། །འགྱུར་ཕྱག་ལ་གཞུང་འགའ་ལ། ཐམས་ཅད་མཁྱེན་པ་ལ་ཕྱག་འཚལ་ལོ། །ཞེས་བྱུང་ལ། གཞུང་འགའ་ཞིག་ཏུ། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །ཞེས་བྱུང་བའོ། །དེའི་དོན་སྤྱི་དང་མཐུན་པར་ཤེས་པར་བྱའོ། ། དེ་ལ་དང་པོར་སངས་རྒྱས་རྗེས་སུ་དྲན་པའི་དབང་དུ་བྱས་ནས། ཐོག་མར་མདོར་བསྡུས་ཏེ་འཆད་པ་ལ། འདི་ལྟར་སངས་རྒྱས་བཅོམ་ལྡན་འདས་ཞེས་པ་ལ་སོགས་པས་བསྟན་ལ། དེ་ལ་འདི་ལྟར་ཞེས་པ་ནི། འཆད་པར་འགྱུར་བའི་ཡོན་ཏན་ཐམས་ཅད་འདི་ལྟ་སྟེ་ཞེས་པ་ཡིན་ལ། དེ་ཡང་ཚིག་དགུས་དོན་དགུ་མདོར་བསྡུས་ནས་འཆད་དེ། སྡོམ་ནི། ༡བགེགས་བཅོམ་པ་དང་༢བཤད་པ་དང༌། ། ༣སྤངས་དང་༤ཡེ་ཤེས་ཕུན་ཚོགས་དང༌། །༥རྒྱུ་དང་༦ཇི་ལྟར་གཤེགས་པ་དང༌། །༧འཇིག་རྟེན་ལ་གཟིགས་༨སྐལ་ལྡན་འདུལ། །༩སྟོན་པ་ཉིད་དེ་ཡོན་ཏན་དགུ། །གང་ལ་གནས་པའི་གཞི་ཉིད་དོ། །ཞེས་སོ། །དེ་ལ་༡བགེགས་བཅོམ་པ་ནི། སངས་རྒྱས་བཅོམ་ལྡན་འདས་ཞེས་པ་ནི། བཅོམ་ལྡན་གྱི་མཚན་ཉིད་གང་ལ་མངའ་བའི་སངས་རྒྱས་དེ་ནི་ཞེས་པའོ། །དེ་ལ་བགེགས་ནི་ཕུང་པོ་དང༌། ཉོན་མོངས་པ་དང༌། འཆི་བདག་དང༌། ལྷའི་བུའི་བདུད་བཞི་ལས། དང་པོ་གསུམ་སྤངས་ཤིང༌། བཞི་པས་གནོད་པ་བྱེད་པའི་ཡུལ་ལས་འདས་པའི་ཕྱིར། བདུད་བཞི་བཅོམ་པའི་ཡོན་ཏན་དང་ལྡན་པའོ། །དེ་ལ་བྷ་ག་ཝཱན་ཞེས་བྱ་བ་ལ། བཅོམ་ལྡན་དང༌། སྐལ་ལྡན་དང༌། ལེགས་ལྡན་ལ་སོགས་པ་དོན་སྣ་ཚོགས་པར་འགྱུར་བའི་ཕྱིར། དྲང་སྲོང་སེར་སྐྱ་དང༌། རྒྱལ་རིགས་ནག་པོ་ལ་སོགས་པ་ལ་ཡང༌། བཅོམ་ལྡན་དུ་གྲགས་པའི་ཕྱིར་ན། དེ་ལས་ཁྱད་པར་དུ་འབྱེད་པའི་དོན་དུ་འཇིག་རྟེན་ལས་འདས་པ་ཉིད་ཀྱི་ཕྱིར་འདས་ཞེས་པ། སྔོན་གྱི་ལོ་ཙཱ་བ་བྱང་ཆུབ་སེམས་དཔའ་རྣམས་ཀྱིས་བླ་ཐབས་སུ་བསྣན་པ་ཡིན་གྱི། ལེགས་སྦྱར་གྱི་སྐད་ལ་སྐབས་འདིར་འདས་པའི་སྒྲ་ནི་མེད་དོ། །༢བཤད་པ་ཕུན་སུམ་ཚོགས་པ་ནི། དེ་བཞིན་གཤེགས་པ་ནི། རང་ཉིད་ཀྱིས་ཕྱིན་ཅི་མ་ལོག་པར་རྟོགས་པ་བཞིན་དུ། གཞན་ལ་ཡང་ཕྱིན་ཅི་མ་ལོག་པར་སྟོན་པ་སྟེ། དེ་བཞིན་ནི་དེ་ཁོ་ན་བཞིན་གྱི་ཕྱིན་ཅི་མ་ལོག་པའི་དོན་ཡིན་ལ། གཤེགས་པ་ནི་རང་གིས་རྟོགས་པའམ་གཞན་རྟོགས་སུ་འཇུག་པའོ། །༣ སྤངས་པ་ཕུན་སུམ་ཚོགས་པ་ནི་དགྲ་བཅོམ་པ་ཞེས་པས་བསྟན་ཏེ། དགེ་བའི་ཆོས་ལ་གནོད་པ་བྱེད་པས་ན་ཉོན་མོངས་པ་བག་ཆགས་དང་བཅས་པ་ནི་དགྲ་སྟེ། དེ་སྤངས་པའི་ཚུལ་གྱིས་བཅོམ་པའོ། །༤ ཡེ་ཤེས་ཕུན་སུམ་ཚོགས་པ་ནི། ཡང་དག་པར་རྫོགས་པའི་སངས་རྒྱས་ཞེས་པ་ནི། ཕྱིན་ཅི་མ་ལོག་པར་ཤེས་བྱའི་དཀྱིལ་འཁོར་ཡོངས་སུ་རྫོགས་པ་ལ། མི་གཉིད་སངས་པ་བཞིན་དུ་མི་ཤེས་པ་མཐའ་དག་པ་སངས་ཤིང༌། པདྨ་ཁ་ཕྱེ་བ་ལྟར་བློ་གྲོས་ཀྱི་སྣང་བ་རྣམ་པ་ཐམས་ཅད་དུ་རྒྱས་པ་ཡིན་ནོ། །སྤངས་པ་དང་ཡེ་ཤེས་དེ་གཉིས་ནི་སྒྲུབ་པ་ཕུན་སུམ་ཚོགས་པ་ཞེས་ཀྱང་བྱ་ལ། དེ་གཉིས་དང་བཤད་པ་ཕུན་སུམ་ཚོགས་པ་སྟེ་གསུམ་དང་ལྡན་པ་ནི། འགྲོ་བའི་དོན་ཕྱིན་ཅི་མ་ལོག་པ་སྐྱོན་མེད་པར་སྤྱོད་ནུས་པའི་ཕྱིར། སྟོན་པ་ཕུན་སུམ་ཚོགས་པ་ཡིན་ཏེ། དེ་ཡང་སྟོན་པ་སངས་རྒྱས་ཁོ་ན་ལ་ཡོད་ཀྱི། དྲག་པོ་དང༌། ཁྱབ་འཇུག་ལ་སོགས་པ་གང་ལ་ཡང་ཡོད་པ་མ་ཡིན་པས། ཐུན་མོང་དུ་མ་གྱུར་པའི་ཡོན་ཏན་ནོ། །དེ་ལ་དྲང་སྲོང་རྒྱས་པ་ལ་སོགས་པ་ནི། ལྟག་འོག་འགལ་བར་སྨྲ་བ་དང༌། སྒྲ་ངན་གྱི་འཐབ་མོ་ལ་ལུང་བསྟན་པ་ཐོག་ཏུ་མ་བབས་པས་ཆོས་ཐམས་ཅད་ལ་བློ་གྲོས་རྒྱས་པ་མ་ཡིན་ལ། དགའ་བྱེད་ལ་སོགས་པ་འདོད་ཆགས་ཀྱི་དབང་དུ་གྱུར་པ་དང༌། སྡུག་བསྔལ་གྱིས་འཁོལ་ཞིང་སྡིག་པ་སྤྱོད་པ་དེ་དག་ལ་ནི། རང་ཉིད་ཉོན་མོངས་པའི་གཞན་དབང་དུ་གྱུར་པས། གཞན་སྐྱོབ་པའི་ནུས་པ་ཅི་ཞིག་ཡོད། གང་ཞིག་རང་རྒྱལ་ལ་སོགས་པ་ཡང་དག་པར་རྟོགས་ཀྱང༌། མི་སྨྲ་བ་དེས་ནི་གཞན་རྗེས་སུ་འཛིན་པར་མི་ནུས་པས། དེའི་ཕྱིར་བཤད་པ་ཕུན་ཚོགས་སྨོས་སོ། །དེ་ལྟ་བུའི་༥སྟོན་པ་ཕུན་སུམ་ཚོགས་པ་ཐོབ་པའི་རྒྱུ་ལ། རིག་པ་དང་ཞབས་སུ་ལྡན་པ་ཞེས་པའི་རིག་པ་ནི་ཡང་དག་པའི་ལྟ་བ་ཡིན་ལ། ཞབས་ནི་རྟོག་པ་དང༌། ངག་དང༌། ལས་ཀྱི་མཐའ་དང༌། འཚོ་བ་དང༌། རྩོལ་བ་དང༌། དྲན་པ། ཏིང་ངེ་འཛིན་འཕགས་པའི་ལམ་རྣམས་ཡིན་ལ། རིག་པ་ནི་གང་ཤེས་པར་བྱ་བ་དང༌། སྤང་བྱ་དང་བླང་བྱའི་གནས་རྣམས་མ་ནོར་བར་མངོན་སུམ་གྱིས་མཐོང་བས་མིག་དང་འདྲ་བ་ཡིན་ལ། དེ་དང་རྗེས་སུ་མཐུན་པར་སྒྲུབ་ཅིང་སྤྱོད་པ་ནི། མིག་གིས་བལྟས་པའི་ལམ་ལ་འགྲོ་བ་དང་འདྲ་བས། ཞབས་སུ་ལྡན་པའོ། །༦ ཇི་ལྟར་གཤེགས་པ་ནི། བདེ་བར་གཤེགས་པ་ཞེས་པ་ནི། སུ་ག་ཏ་ཞེས་པའི་སྒྲ་ལས་དྲངས་ནས། བདེ་བར་གཤེགས་པ། ལེགས་པར་གཤེགས་པ། རབ་ཏུ་གཤེགས་པ་ཞེས་བྱ་བར་འགྱུར་ན། ལམ་བདེ་བ་ནས་འབྲས་བུ་བདེ་བར་གཤེགས་པའི་ཕྱིར་ཏེ། ལམ་གྱི་དུས་ན་བྱ་བ་མ་ཡིན་པ་སྤངས་ཤིང༌། གཞན་གྱི་བསྔགས་པ་མ་ཡིན་པ་མི་འབྱུང་བ་དང༌། རང་ཞུམ་པ་དང་འཛེམ་བག་མེད་ཅིང༌། ཡིད་བདེ་བ་མང་པོའི་བྱ་བས་བསྒྲུབ་པ་དང༌། འབྲས་བུའི་དུས་ན་སྡུག་བསྔལ་གྱི་རིགས་ཐམས་ཅད་སྤངས་ཤིང༌། ཟག་པ་མེད་པའི་བདེ་བ་ཕུན་སུམ་ཚོགས་པ་བརྙེས་པའི་ཕྱིར་རོ། །འདི་ནས་བརྩམས་ཏེ་གསུམ་ནི་འཕྲིན་ལས་ཀྱི་དབང་དུ་བྱས་སོ། །དེ་ལ་༧ འཇིག་རྟེན་ལ་གཟིགས་པ་ནི། འཇིག་རྟེན་མཁྱེན་པ་ཞེས་པ་ནི། ཐུགས་རྗེ་ཆེན་པོས་སེམས་ཅན་ལ་རྟག་ཏུ་གཟིགས་པས། སེམས་ཅན་བདེ་བའམ་སྡུག་བསྔལ་དང་ལྡན་པ་དང༌། འབྱོར་པ་དང༌། རྒུད་པ་དང༌། སྐལ་བ་དང་ལྡན་པ་དང༌། མི་ལྡན་པ་དང༌། འདུལ་བའི་དུས་ལ་བབ་པ་དང༌། མ་བབ་པ་དང༌། འདུལ་བའི་ཐབས་ཐམས་ཅད་མཁྱེན་པའོ། །༨ སྐལ་ལྡན་འདུལ་བར་མཛད་པ་ནི། མི་མཆོག་གམ་སྐྱེས་བུ་འདུལ་བ་ཁ་ལོ་བསྒྱུར་བ་བླ་ན་མེད་པ་ཞེས་པ་ནི། མི་མཆོག་གམ་སྐྱེས་བུ་ནི་སྐལ་བ་དང་ལྡན་པ་སྟེ། དེ་དག་གིས་སེམས་རྒྱུད་འདུལ་བས་བྱང་ཆུབ་གསུམ་ལ་འགོད་པར་མཛད་པའོ། །དངོས་སུ་ཐར་བའི་ལམ་གྱིས་འདུལ་བའི་སྐལ་བ་མེད་པ་རྣམས་ནི། ངན་འགྲོ་ལས་འདོན་པ་དང༌། སྡུག་བསྔལ་ཆེན་པོ་རྣམས་ཆུང་ངུར་བསྒྱུར་བ་དང༌། མཐོ་རིས་ཀྱི་ལམ་ལ་འགོད་པར་མཛད་པ་ཡིན་ལ། མཐོ་རིས་དང་བྱང་གྲོལ་གང་ལ་ཡིན་ཡང་རུང་སྟེ། ཆེན་པོའི་སྐལ་བ་ལྡན་པ་ཆུང་ངུ་ལ་སྦྱར་བ་ནི་ནམ་ཡང་མི་སྲིད་དོ། ། ཁ་ལོ་བསྒྱུར་བ་ནི། ཇི་ལྟར་འདུལ་བའི་ཚུལ་གྱི་ཐབས་ལ་མཁས་པ་སྟེ། རྟ་དང་གླང་པོ་ཆེ་དང་ཤིང་རྟའི་ཁ་ལོ་བསྒྱུར་བ་རྣམས་ཀྱིས། དེ་དང་དེ་ལམ་དུ་འཇུག་པ་ལ་མཁས་པས་ལམ་བདེ་བ་ལ་སྦྱོར་བ་བཞིན་ནོ། །བླ་ན་མེད་པ་ནི། ཁ་ལོ་བསྒྱུར་བའི་ཁྱད་པར་སྟོན་པ་སྟེ། ཤིན་ཏུ་འདུལ་དཀའ་བ། འདོད་ཆགས་ཆེས་ཆེ་བ་གཅུང་དགའ་བོ་དང༌། ཞེ་སྡང་རབ་ཏུ་འབར་བ་སོར་མོའི་འཕྲེང་བ་དང༌། གཏི་མུག་ཤིན་ཏུ་འཐུག་པ་བྲན་བུ་དང་སྐྱོང་བ་ལ་སོགས་པ་དང༌། ང་རྒྱལ་ལྷག་པར་མཐོ་བ་སྟེང་རྒྱས་འོད་སྲུང་ལ་སོགས་པ་ཡང་ཉན་ཐོས་ཀྱི་བྱང་ཆུབ་ལ་བཞག་པར་མཛད་པ་ལྟ་བུའོ། །ཞེས་འཆད་དོ། །༩ འཕྲིན་ལས་དེ་གང་ལ་གནས་པའི་སྟོན་པ་ཉིད་ཀྱི་དོན་ནི། ལྷ་དང་མི་རྣམས་ཀྱི་སྟོན་པ་ཞེས་ནི། ཁམས་གསུམ་དུ་གཏོགས་པའི་སེམས་ཅན་ཐམས་ཅད་ཀྱི་སྟོན་པ་ཡིན་ཡང༌། ལྷ་དང་མི་སྨོས་པ་ནི། ལྷ་དང་མི་རྣམས་ལ་ནི་བདེན་པ་མཐོང་བའམ། དགེ་སྦྱོང་ཚུལ་གྱིས་འབྲས་བུ་ཐོབ་པའམ། འཕགས་པའི་ས་ཐོབ་པ་མཐོང་གི། གཞན་ལ་ནི་མ་མཐོང་ལ། འགྲོ་བའི་མཆོག་ཀྱང་དེ་ཡིན་པས་གདུལ་བྱའི་གཙོ་བོ་དེ་དག་ཡིན་པས་འདིར་སྨོས་པ་ཡིན་པར་རྗེ་བཙུན་ཏཱ་ར་ནཱ་ཐས་གསུངས་སོ། །དེ་ལྟ་བུའི་ཡོན་ཏན་གང་ལ་མངའ་བའི་གཞི་སྟོན་པ་ནི། སངས་རྒྱས་བཅོམ་ལྡན་འདས་སོ་ཞེས་སླར་ཡང་ཟློས་ཏེ་སྨོས་པའོ། །འདི་ལ་ཟློས་པའི་སྐྱོན་ནི་མེད་དེ། སྔ་མ་ནི་ཡོན་ཏན་གྱི་ངོ་བོ་སྟོན་པའི་ཕྱིར་ཡིན་ལ། འདིར་ནི་ཡོན་ཏན་གང་ལ་མངའ་བའི་གཞི་སྐྱེས་བུའི་གཙོ་བོ་ཉིད་གོ་བའི་ཕྱིར་རོ། ། ད་ནི་རྒྱས་པར་བཤད་པའི་རིམ་པ་རྣམས་བརྗོད་པ།ད་ནི་རྒྱས་པར་བཤད་པའི་རིམ་པ་རྣམས་བརྗོད་པར་བྱ་སྟེ། སྡོམ་ནི། ༡གཏན་དུ་བཞུགས་དང་༢སྐུའི་རང་བཞིན། །༣གང་ལ་བརྟེན་དང་༤བྱ་བ་༥ཐབས། །༦གནས་དང་༧མ་ཆགས་༨སྤངས་པ་དང༌། ཡེ་ཤེས་ཇི་ལྟས་དོན་མཛད་པ། །༩དོན་བསྡུ་རྣམས་སུ་ངེས་པར་བྱ། །ཞེས་སོ། །དེ་བཞིན་གཤེགས་པ་དེ་ནི་བསོད་ནམས་དག་གི་རྒྱུ་མཐུན་པ། དགེ་བའི་རྩ་བ་རྣམས་ཆུད་མི་ཟ་བ་ཞེས་པའི་ཚིག་གཉིས་ཀྱིས། གཏན་དུ་བཞུགས་པ་སྟེ། དེ༵་བཞི༷ན་གཤེ༵གས་པ༵་ནི༵། ལྷག་མེད་ཀྱི་དབྱིངས་སུ་ཡོན་ཏན་ཟད་པར་མི་འགྱུར་བར་རྟག་ཏུ་སེམས་ཅན་གྱི་དོན་མཛད་པ་སྟོན་ཏེ་འཁོར་བ་པའི་དགེ་བ་ནི་རྣམ་སྨིན་བྱུང་ཟིན་ནས་ཟད་པར་འགྱུར་བ་དང༌། ཉན་རང་གི་དགེ་བ་ཡང་ལྷག་མེད་ཀྱི་དབྱིངས་སུ་ཟད་པར་འགྱུར་བ་ཉིད་ཀྱིས། བསོད་ནམས་ཀྱི་རྒྱུ་མཐུན་པ་རྟག་ཏུ་གནས་པ་མ་ཡིན་ལ། སངས་རྒྱས་ནི་སྔོན་བྱང་ཆུབ་སེམས་དཔའི་སྐབས། སྦྱིན་སོགས་ཐམས་ཅད་རང་ཉིད་ཀྱི་བདེ་བའི་དོན་དུ་མ་བསྔོས་ཤིང༌། སེམས་ཅན་ཐམས་ཅད་ཀྱི་ཐར་པའི་དོན་དུ་བསྔོས་པས། དེ་མ་འགྲུབ་ཀྱི་བར་དུ་མི་ཟད་པ་དང༌། ཆོས་ཀྱི་དབྱིངས་དང་མཉམ་པར་བསྒོམ་པའི་ཕྱིར་ཡང་སྟེ། བསོ༵ད་ན༷མས་ད༷ག་གི༷་རྒྱུ༷་དང་རྗེས་སུ་མཐུ༵ན་པ༵་འབྲས་བུ་ཡང་མི་ཟད་པའོ། །དེ་ལྟར་ཡང་རྒྱུད་བླ་མ་ལས། རྒྱུ་མཐའ་ཡས་དང་སེམས་ཅན་ཟད་མེད་དང༌། །བརྩེ་དང་སྤྲུལ་དང་མཁྱེན་དང་ཕུན་ཚོགས་ལྡན། །ཆོས་ཀྱི་དབང་ཕྱུག་འཆི་བའི་བདུད་བཅོམ་དང༌། །ངོ་བོ་མེད་ཕྱིར་འཇིག་རྟེན་མགོན་པོ་རྟག །ཅེས་གསུངས་པ་ལྟར་རོ། །དེ་ཉིད་ཀྱི་ཕྱིར་ན་དགེ༵་བ༵འི་རྩ༵་བ༵་རྣ༵མས་ཆུ༵ད་མི༵་ཟ༵་བ༵་སྟེ། སྔོན་དགེ་བའི་རྩ་བ་མཛད་པ་ཐམས་ཅད་ཀྱི་འབྲས་བུ་རྒྱུན་ཆད་པ་མེད་པ་ཉིད་ཀྱི་ཕྱིར་རོ། །བཟོད་པས་བརྒྱན་པ། བསོད་ནམས་ཀྱི་གཏེར་རྣམས་ཀྱི་གཞི། དཔེ་བྱད་བཟང་པོ་རྣམས་ཀྱིས་སྤྲས་པ། མཚན་རྣམས་ཀྱི་མེ་ཏོག་རྒྱས་པ། སྤྱོད་ཡུལ་རན་པར་མཐུན་པ། མཐོང་ན་མི་མཐུན་པ་མེད་པ་ཞེས་པ་ཚིག་དྲུག་པོའི་འདི་རྣམས་ཀྱིས། ༢ སྐུའི་རང་བཞིན་ཁྱད་པར་རྣམས་བསྟན་ཏེ། སྔར་རྟག་ཏུ་སེམས་ཅན་གྱི་དོན་རྒྱུན་མི་ཆད་པར་མཛད་དོ་ཞེས་བསྟན་ན། འགྲོ་དོན་མཛད་པའི་སྐུ་དེ་ཇི་ལྟ་བུ་ཞེས་པ་ལ་འདི་བསྟན་ཏེ། དེ་ཡང་གཟུགས་ཀྱི་སྐུའོ། །དེ་ལ་རྩ་བའི་རྒྱུ་བཤད་པ་ནི། བཟོད་པས་བརྒྱན་པ་སྟེ། བཟོད་པའི་མཐུ་ལས་སྐུ་བོང་ཚོད་ཆེས་འཕགས་ཤིང༌། ཁ་དོག་དང་དབྱིབས་མཛེས་པ་ཕུན་སུམ་ཚོགས་པ། རྒྱུ་བཟོད་པས་བརྒྱན་པའི་འབྲས་བུ། མཛེས་པ་ཉིད་རྒྱན་གྱི་དོན་ཏེ་སྐུ་ལ་རང་བཞིན་གྱིས་གྲུབ་པའོ། །དེ་ནི་མི་མཐུན་ཕྱོགས་ཁྲོ་བ་དང༌། འཁོན་དུ་འཛིན་པ་སྤངས་ཤིང༌། རྒྱུ་བཟོད་པ་ཉིད་བསྟེན་པའི་འབྲས་བུའོ། །བསོ༵ད་ན༵མས་ཀྱི༵་གཏེ༵ར་རྣ༵མས་ཀྱི༵་གཞི༵་ཞེས་པ་ནི་རབ་ཏུ་དབྱེ་བའི་རྒྱུ་བཤད་པ་སྟེ། སྐུའི་བ་སྤུའི་ཁུང་བུ་རེ་རེ་ཡང་འགྲོ་བ་ཐམས་ཅད་ཀྱི་བསོད་ནམས་ཀྱི་ཕུང་པོ་བཅུ་འགྱུར་བཅུ་འགྱུར་གྱིས་འགྲུབ་པོ་ཞེས་སོགས་བསོད་ནམས་མཐའ་ཡས་པ་སོ་སོ་སོ་སོ་ལས། སྐུའི་ཆ་ཤས་དང་མཚན་དཔེ་སོགས་སོ་སོར་གྲུབ་པ་སྟེ། འདིར་གཏེར་ཞེས་བྱ་བ་ནི་དཔག་ཏུ་མེད་པའི་དོན་ནོ། །དོན་འདི་རྒྱས་པ་བློ་གྲོས་མི་ཟད་པས་བསྟན་པའི་མདོ་ལས་བརྩོན་འགྲུས་མི་ཟད་པའི་སྐབས་ལས་རྟོགས་པར་བྱའོ། །༣ངོ་བོའི་དབང་དུ་བྱས་ནས་དཔེ་བྱད་བཟང་པོ་རྣམས་ཀྱིས་སྤྲས་པ་ཞེས་པ་ནི། དཔེ་བྱད་བརྒྱད་ཅུ་ལ་སོགས་པའོ། །མཚན་རྣམས་ཀྱི་མེ་ཏོག་རྒྱས་པ་ནི། མཚན་བཟང་པོ་སུམ་ཅུ་རྩ་གཉིས་ལ་སོགས་པ་སྟེ། སྐུ་རང་གི་ངོ་བོ་ཕུན་སུམ་ཚོགས་པ་བསྟན་ཏེ། མེ་ཏོག་རྒྱས་པ་ནི་རྒྱན་དང་འདྲ་བའི་དོན་ཏེ། སྤྲས་པ་ནི་དེའི་འཁོར་ཡིན་པའི་ཕྱིར་མཚན་རྣམས་མཛེས་པར་བྱེད་པའི་དོན་ནོ། །སྤྱོད་ཡུལ་རན་པར་མཐུན་པ་ནི་གནས་སྐབས་ཕུན་སུམ་ཚོགས་པ་སྟེ་གཤེགས་པ་དང་བཞུགས་པ་ལ་སོགས་པ་ཅི་མཛད་ཀྱང༌། ཧ་ཅང་རྟབ་པ་ཡང་མ་ཡིན། ཧ་ཅང་དལ་བ་ཡང་མ་ཡིན་པ་ལ་སོགས་པ། གཞན་གྱི་མཐོང་ན་མི་མཛེས་པའི་སྐྱོན་གདགས་པའི་གཞིར་གྱུར་པ་མེད་པའོ། །མཐོང་ན་མི་མཐུན་པ་མེད་པ་ནི། སྐུའི་བྱེད་ལས་ཕུན་སུམ་ཚོགས་པ་སྟེ། གཤེགས་པ་དང༌། བཞུགས་པ་དང༌། མནལ་བ་དང༌། བསོད་སྙོམས་གསོལ་བ་དང༌། གཟིགས་པ་དང༌། གསུང་བ་ལ་སོགས་པ་ཐམས་ཅད་ལ་འདི་ཉིད་ཉོན་མོངས་སོ་སྙམ་པ་དང་གཞན་རྣམས་སྐྲག་པ་དང་གདུང་བ་དང༌། སྲེད་པ་བསྐྱེད་པ་སོགས་ནམ་ཡང་མེད་ལ། སྐུ་དང་འབྲེལ་བའི་སྤྱོད་པ་གང་མཐོང་བ་དང་ཐོས་པ་ཐམས་ཅད་དད་དང་སྙིང་རྗེ་དང༌། ངེས་པར་འབྱུང་བ་དང༌། བརྩོན་འགྲུས་དང༌། ཡང་དག་པའི་ཤེས་རབ་སྐྱེ་བ་དང་སྡུག་བསྔལ་ཞི་བ་ལ་སོགས་པ་གཞན་གྱི་དགེ་བའི་རྒྱུ་འབའ་ཞིག་ཏུ་འགྲོ་ཞིང་དང་བ་འདྲེན་པའོ། །དེ་ལ་མི་མཐུན་པ་ནི། ཡུལ་དེ་ལ་མ་དད་པའམ། མཐོང་བ་པོ་རང་ཉིད་ལ་ཉོན་མོངས་པའི་རྣམ་པར་རྟོག་པ་སྐྱེ་བའོ། །དེ་ལྟར་ཡང༌། ལུས་ཅན་རྣམས་ཀྱིས་ཁྱོད་མཐོང་ན། །སྐྱེས་བུ་དམ་པ་ལེགས་པར་འཚལ། །མཐོང་བ་ཙམ་གྱིས་རབ་དད་པར། །མཛད་པ་ཁྱོད་ལ་ཕྱག་འཚལ་ལོ། །ཞེས་སོ། །དད་པས་མོས་པ་རྣམས་ལ་མངོན་པར་དགའ་བ། ཤེས་རབ་ཟིལ་གྱིས་མི་ནོན་པ། སྟོབས་རྣམས་ལ་བརྫི་བ་མེད་པ། ཞེས་ཚིག་གསུམ་གྱིས་༣གང་ལ་བརྟེན་ནས་སེམས་ཅན་གྱི་དོན་མཛད་པ་དེ་སྟོན་ཏེ། སྟོན་པའི་དྲུང་དུ་འོང་བ་ནི་བསམ་པ་གཉིས་ཀྱིས་འོང་སྟེ། དད་པའི་བསམ་པ་དང༌། ཟིལ་གྱིས་གནོན་པའི་བསམ་པའོ། །དད་པ་ཡང་ཁ་ཅིག་ནི་སྔོན་གྱི་དགེ་བའི་རྩ་བས་བསྐྱེད་ནས་ཐེ་ཚོམ་གྱིས་འོང་པ་ཡང་ཡོད་དེ་དད་པར་གཏོགས་ལ། ཁ་ཅིག་རབ་ཏུ་དད་པ་ཉིད་ཀྱིས་འོང་བ་ནི། དེ་ལྟར་དད་པས་སྟོན་པའི་ཆོས་ཐོབ་པར་མོས་པས་འོང་སྟེ། དེ་ཐམས་ཅད་སྐུ་མཐོང་བ་དང༌། གསུང་ཐོས་པས་རབ་ཏུ་དང་ཞིང་མངོན་པར་དགའ་བ་སྐྱེ་བ་ཡིན་ནོ། །ཟིལ་གྱིས་གནོན་པའི་བསམ་པས་འོང་བའང་གཉིས་ཏེ། ཤེས་རབ་ཀྱིས་ཟིལ་གྱིས་གནོན་པར་འདོད་པ་གཅེར་བུ་པ་བདེན་སྨྲ་ལ་སོགས་པ་དང༌། ལུས་སྟོབས་ཀྱི་ཟིལ་གྱིས་གནོན་པར་འདོད་པ་གནོད་སྦྱིན་འབྲོག་གནས་ལ་སོགས་པ་སྟེ་དེ་དག་འདུལ་པའི་ཕྱིར། དེ་བཞིན་གཤེགས་པ་ནི་མི་མཁྱེན་པ་མེད་ཅིང་མཁྱེན་པ་མཐའ་ཡས་ལ། སྣོད་དང་འཚམ་པར་ཆོས་གསུང་བའི་སྤོབས་པ་དང་ལྡན་པའི་ཕྱིར། དེ་བཞིན་གཤེགས་པའི་ཤེས་རབ་ནི་གཞན་གྱི་ཟིལ་གྱིས་གནོན་པ་མེད་པ་དང༌། རྡོ་འཕངས་པའི་མདོ་ལས་གསུངས་པ་ལྟར། དེ་བཞིན་གཤེགས་པའི་སྐུའི་སྟོབས་མཐའ་ཡས་པ་མངའ་བའི་ཕྱིར། དེ་བཞིན་གཤེགས་པའི་སྐུའི་སྟོབས་ལ་སྐྱེས་བུ་གཞན་གྱི་སྟོབས་ཀྱིས་རྫི་བར་ནུས་པ་མེད་པའི་དོན་ནོ། །སྟོབས་རྣམས་ལ་རྫི་བ་མེད་པ་ནི། སྟོབས་བཅུའི་ཡེ་ཤེས་དང་ལྡན་པའི་ཕྱིར། ཕ་རོལ་པོ་སུས་ཀྱང་གཞོམ་དུ་མེད་པའོ། །སེམས་ཅན་ཐམས་ཅད་ཀྱི་སྟོན་པ། བྱང་ཆུབ་སེམས་དཔའ་རྣམས་ཀྱི་ཡབ་འཕགས་པའི་གང་ཟག་རྣམས་ཀྱི་རྒྱལ་པོ། མྱ་ངན་ལས་འདས་པའི་གྲོང་ཁྱེར་དུ་འགྲོ་བ་རྣམས་ཀྱི་དེད་དཔོན། ཞེས་པའི་ཚིག་བཞི་པོ་འདིས། ༤སེམས་ཅན་གྱི་དོན་མཛད་པའི་བྱ་བ་གང་ཡིན་པ་སྟོན་ཏེ། སེ༵མས་ཅ༵ན་ཐ༵མས་ཅ༵ད་ལ་བདེ་བའི་ལམ་མམ། རྒྱུ་སྟོ༵ན་པར་མཛད་དེ་དཔེར་ན་ངན་འགྲོ་ཁ་ཅིག་ནི་སྐུ་ལས་འོད་ཟེར་སྤྲོས་པས་སྡུག་བསྔལ་ཞི་ཞིང༌། དད་པ་བསྐྱེད་ནས་བདེ་འགྲོ་ལ་འགོད་པར་མཛད་པ་དང༌། བདེ་འགྲོ་རྣམས་ཀྱང་སྦྱིན་པ་དང་ཚུལ་ཁྲིམས་ལ་སོགས་པ་སྣ་ཚོགས་པ་ལ་བཀོད་ནས། རིམ་གྱིས་བྱང་ཆུབ་གསུམ་ལ་སྨིན་པར་མཛད་དོ། །སེམས་ཅན་དེ་རྣམས་ཀྱི་ནང་ནས་ཐེག་པ་ལ་ཞུགས་པའི་དབང་དུ་མཛད་ནས་ཕྱི་མ་གསུམ་སྟེ། དེ་ལ་བྱང་ཆུབ་སེམས་དཔའ་རྣམས་ཀྱི་ཡབ་ཅེས་པས་ནི། ཐེག་པ་ཆེན་པོ་ལ་སངས་རྒྱས་ཀྱི་རིགས་ཅན། བྱང་ཆུབ་སེམས་དཔའ་རྣམས་ནི་སངས་རྒྱས་ཀྱི་ཆོས་ལས་སྐྱེས་ཤིང༌། སྐུ་གསུང་ཐུགས་དང་མཛད་པའི་སྒོ་ནས། སངས་རྒྱས་ཉིད་དང་རྣམ་པ་འདྲ་རུང་དུ་གནས་པའི་ཕྱིར། སངས་རྒྱས་ཀྱི་སྲས་ཡིན་ལ། དེ་བཞིན་གཤེགས་པ་ནི་དེའི་ཡབ་སྟེ་དེ་དག་གི་ཡོན་ཏན་གང་ལས་ཐོབ་པའི་ཡུལ་ཡིན་པས་སོ། །འཕགས་པའི་གང་ཟག་རྣམས་ཀྱི་རྒྱལ་པོ་ཞེས་པ་ནི་ཉན་རང་གི་རིགས་ཅན་རྒྱུན་དུ་ཞུགས་པ་དང༌། ཕྱིར་འོང་དང༌། ཕྱིར་མི་འོང་དང༌། ཉན་ཐོས་དགྲ་བཅོམ་པ་དང་རང་རྒྱལ་ལ་སོགས་པ་སྟེ། དེ་རྣམས་ནི་སངས་རྒྱས་ཀྱི་ཆོས་ཀྱིས་འཚོ་བ་ཡིན་ཀྱང༌། དེ་བཞིན་གཤེགས་པ་དང་འདྲ་བའི་ཕྱོགས་སུ་མ་སླེབས་པའི་ཕྱིར་འབངས་ཕལ་པ་ལྟ་བུ་ཡིན་པས་སངས་རྒྱས་ནི་དེའི་རྒྱལ་པོའོ། །མྱ་ངན་ལས་འདས་པའི་གྲོང་ཁྱེར་དུུ་འགྲོ་བ་རྣམས་ཀྱི་དེད་དཔོན་ནི་ཐེག་པ་གསུམ་ཅར་གྱི་མྱ་ངན་ལས་འདས་པའི་དབང་དུ་བྱས་པ་སྟེ། དེར་འགྲོ་འདོད་པ་རྣམས་མ་ནོར་བར་འཁྲིད་པའི་ཕྱིར་དེད་དཔོན་ཏེ། དཔེར་ན་ཚོང་པ་རྣམས་ཀྱི་གཙོ་བོ་ཚོང་པ་ཀུན་གྱི་སྣ་དྲངས་ཏེ་འགྲོ་བ་ནི་དེད་དཔོན་ཏེ། གྲོང་ཁྱེར་ནི་བསྟི་བའི་གནས་ཏེ་ཐར་པའོ། །ཡེ་ཤེས་དཔག་ཏུ་མེད་པ། སྤོབས་པ་བསམ་གྱིས་མི་ཁྱབ་པ། གསུང་རྣམ་པར་དག་པ། དབྱངས་སྙན་པ། སྐུ་བྱད་བལྟ་བས་ཆོག་མི་ཤེས་པ་སྐུ་མཚུངས་པ་མེད་པ་ཞེས་ཚིག་དྲུག་གིས་༥གཞན་དོན་མཛད་པའི་ཐབས་བསྟན་ཏོ། །དེ་ལ་ཐུགས་ཀྱི་འཕྲིན་ལས་ནི། ཡེ་ཤེས་དཔག་ཏུ་མེད་པ་ནི། སེམས་ཅན་རྣམས་ཀྱི་ཁམས་དང་མོས་པ་དང་དབང་ཕ་པོ་དང༌། བག་ལ་ཉལ་ཐམས་ཅད་མཁྱེན་པས་འགྲོ་དོན་གྱི་དུས་དང་ཐབས་ཐམས་ཅད་མ་ནོར་བར་སྤྱོད་པའོ། །གསུང་གི་འཕྲིན་ལས་ནི། སྤོབས་པ་བསམ་གྱིས་མི་ཁྱབ་པ་ནི། དེ་ལ་ཡི་གེ་ལ་བརྟེན་པ་ནི་ཚིག་གཅིག་ལ་བརྟེན་ནས། ཚིག་གི་རྣམ་གྲངས་གཞན་དང་གཞན་གྱིས་བསྟན་ན། བསྐལ་པ་དཔག་ཏུ་མེད་པར་བསྟན་ཡང་མི་ཟད་པ་དང༌། དོན་ལ་བརྟེན་པ་ནི་བསྐལ་པ་དཔག་ཏུ་མེད་པར་སེམས་ཅན་མཐའ་ཡས་པས་དོན་མི་འདྲ་བ་ཁོ་ནས། དུས་གཅིག་ཏུ་ཞུ་བ་ཞུས་ཀྱང་དུས་གཅིག་ཁོ་ནར་གསུང་མི་འདྲ་བ་གསུང་ཐ་དད་པ་སྣ་ཚོགས་རྩོལ་མེད་དུ་བྱུང་ནས་སོ་སོ་ལ་མ་འཛིངས་པར་ལན་ཐེབས་ལ། གསུང་གཅིག་ཁོ་ནས་ཀྱང་དོན་མཐའ་ཡས་པ་སོ་སོ་ཐ་དད་པའི་ལན་དུ་ཡང་འབྱུང་བ་དང༌། གསུང་མཐའ་ཡས་པས་ཀྱང་གདུལ་བྱ་གཅིག་གི་ཡེ་ཤེས་མཐའ་མེད་དུ་འཕེལ་བར་ཡང་འགྱུར་བས། སྤོབས་པ་ནི་ཆོས་སྟོན་པ། བསམ་གྱིས་མི་ཁྱབ་པ་ནི་སྟོན་ཚུལ་ངོ་མཚར་རྨད་དུ་བྱུང་བའོ། ། གསུང་རྣམ་པར་དག་པ།གསུང་རྣམ་པར་དག་པ་ནི། ངག་གི་སྐྱོན་བརྫུན་སྨྲ་བ་དང༌། ང་རོའི་སྐྱོན་གདངས་མི་སྙན་པ་དང༌། བྱེད་ལས་ཀྱི་སྐྱོན་ཡིད་མི་བདེ་བར་བྱེད་པ་སོགས་དང༌། རྩོལ་པའི་སྐྱོན་ཧ་ཅང་མྱུར་ཆེས་པ་ལ་སོགས་པ། གསུང་ལ་སྐྱོན་མཐའ་དག་སྤངས་ཤིང་རྣམ་པར་དག་པ་དང༌། གསུང་གི་ཡོན་ཏན་གྱི་སྒོ་ནས་དབྱངས་སྙན་པ་ནི། ཐེག་དམན་ལྟར་ན་གསུང་དབྱངས་ཡན་ལག་ལྔ་ལྡན་ནམ། ཐེག་ཆེན་ལྟར་ན་ཡན་ལག་དྲུག་ཅུ་ལ་སོགས་པའོ། ། སྐུའི་འཕྲིན་ལས་ནི། སྐུ་བྱད་བལྟ་བས་ཆོག་མི་ཤེས་པ་ནི། སྐུའི་ཡན་ལག་དང་ཉིང་ལག་གི་ཆ་ཤས་རེ་རེའི་མཛེས་སྡུག་གིས་ཀྱང༌། ཁམས་གསུམ་གྱི་མཛེས་པ་ཐམས་ཅད་ཟིལ་གྱིས་གནོན་པའི་ཕྱིར། བལྟས་པས་ཚིམ་པ་མེད་པའོ། །སྐུ་མཚུངས་པ་མེད་པ་ནི། ཁམས་གསུམ་དང་འགྲོ་བ་དྲུག་དང༌། སྐྱེ་གནས་བཞིར་གཏོགས་པ་རྣམས་ལ། བཅོམ་ལྡན་འདས་ཀྱི་སྐུའི་ཁ་དོག་དང་དབྱིབས་ལས་ལྷག་པ་ལྟ་སྨོས་ཀྱང་ཅི་དགོས། མཉམ་པར་མཚུངས་པ་འགའ་ཡང་མ་དམིགས་པའོ། །འདོད་པ་དག་གིས་མ་གོས་པ། གཟུགས་དག་གིས་ཉེ་བར་མ་གོས་པ། གཟུགས་མེད་པ་དག་དང་མ་འདྲེས་པ་ཞེས་ཚིག་གསུམ་གྱིས་བཅོམ་ལྡན་འདས་དེ། ༦གང་ལ་གནས་པ་བསྟན་ཏེ། དེ་ཡང་ཁམས་གསུམ་ལ་མི་གནས་ཏེ་ཆོས་ཀྱི་དབྱིངས་ལ་བཞུགས་ཤིང༌། ཁམས་གསུམ་དུ་སྤྱོད་པ་ན་ཡང་ཁམས་གསུམ་གྱི་སྐྱོན་གྱིས་མ་གོས་ཞེས་པའོ། །དེ་ལ་འདོ༵ད་ཁམས་ན་སེམས་ཅན་གྱི་དོན་མཛད་པའི་ཚེ། འདོད་པ༵་ལ་འདུན་པ་དང༌། གནོད་སེམས་ད༵ག་གི༵ས་མ༵་གོ༵ས་པ༵་དང་གཟུ༵གས་དང་གཟུགས་མེད་པའི་ཁམས་སུ་སྤྱོད་པའི་ཚེ། དེ་ད༵ག་གི༵ས་བསམ་གཏན་ལ་སྙོམས་པར་འཇུག་པའི་སྐྱོན་སྲེད་པ། ལྟ་བ་དང༌། ང་རྒྱལ་དང༌། ཐེ་ཚོམ་ལ་སོགས་པས་ཉེ༵་བ༵ར་ཏེ་ལྷག་པར་མ༵་གོས་ཞེས་པ་དེ་ཡང་འདོད་གཟུགས་དག་ནི་ལུས་ངག་དང་འབྲེལ་བའི་ཕྱིར་དེ་དང་དེས་མ་གོས་པ་ཞེས་མཚུངས་པར་སྦྱར་ལ། གཟུ༵གས་མེ༵ད་ཁམས་ན་གོས་པའི་ཚུལ་དེ་མེད་པའི་ཕྱིར། མ༵་འདྲེ༵ས་པ༵་ཞེས་བསྟན་པར་བཞེད་དེ། གཟུགས་མེད་ཁམས་ན་གཟུགས་མེད་པ་ཁོ་ནའི་ལུགས་ལྟར་ན་སྒྲ་ཇི་བཞིན་དུ་སྦྱར་ལ། གཟུགས་ཡོད་པའི་ལུགས་ལའང༌། དེ་ཤིན་ཏུ་ཕྲ་བ་ཡིན་པའི་ཕྱིར། དེ་ལྟར་འཆད་པ་མི་འགལ་ལོ། །མདོར་བསྟན་སྡུག་བསྔལ་ལས་རྣམ་པར་གྲོལ་བ། རྒྱས་བཤད་ཕུང་པོ་དག་ལས་རབ་ཏུ་རྣམ་པར་གྲོལ་བ། ཁམས་རྣམས་དང་མི་ལྡན་པ། སྐྱེ་མཆེད་རྣམས་བསྡམས་པ་ཞེས་ཚིག་བཞིས་སེམས་ཅན་གྱི་དོན་སྤྱོད་པ་ན་༧གང་ལ་ཡང་མ་ཆགས་པར་བསྟན་ཏེ། སྲིད་ཞིའི་སྡུག་བསྔལ་མ་ལུས་པ་ལས་གྲོལ་བའོ། །ཕུང་པོ་རྣམས་ནི་ཡང་ཡང་སྐྱེ་བའི་མཚན་ཉིད་ཅན་གྱི་ཕྱིར། དེ་བཞིན་གཤེགས་པ་སྐྱེ་བ་མེད་པས་དེ་ལས་རབ་ཏུ་རྣམ་པར་གྲོལ་བའོ། ། ཁམས་རྣམས་ནི་རྣམ་ཤེས་ཡུལ་འཛིན་པ་སྐྱེ་བའི་སྒོར་འཇོག་ན། ཡུལ་དང་ཤེས་པ་ལ་བརྟེན་པའི་ཉོན་མོངས་པ་སྤངས་པའི་ཕྱིར། ཁམས་རྣམས་དང་མི་ལྡན་པ། སྐྱེ་མཆེད་ནི་མཐོང་བ་ལ་སོགས་པ་སྐྱེ་བའི་རྒྱུའི་སྒོ་ནས་འཇོག་ལ། དེ་ལ་བརྟེན་པའི་ཉོན་མོངས་རྣམས་བསྡམས་ཟིན་པའི་ཕྱིར། སྐྱེ་མཆེད་རྣམས་བསྡམས་པའོ། །མདོར་བསྡུ་ན་ངེས་པའི་དོན་དུ་ཕུང་ཁམས་སྐྱེ་མཆེད་ལས་འདས་པའི་ཡེ་ཤེས་ཀྱི་སྐུའོ། །ད་ནི་༨སྤངས་པ་དང་ཡེ་ཤེས་ཀྱིས་འགྲོ་དོན་མཛད་ཚུལ་སྟོན་ཏེ། དེ་ལས་མདུད་པ་རྣམས་བཅད་པ། ཡོངས་སུ་གདུང་བ་དག་ལས་རྣམ་པར་གྲོལ་བ། སྲེད་པ་ལས་གྲོལ་བ། ཆུ་བོ་ལས་བརྒལ་བ། ཞེས་ཚིག་བཞིས་དང་པོར་སྤངས་པ་ཇི་ལྟ་བུ་ཞིག་གི་སྒོ་ནས་སེམས་ཅན་གྱི་དོན་མཛད་པ་དེ་བསྟན་ཏེ། ཉོན་མོངས་པ་ཐམས་ཅད་བསྡུ་ན། ཡུལ་དང་ཕྲད་པ་མདུད་པའི་མཚན་ཉིད་ཅན་སྲེད་པ་དང༌། མ་ཕྲད་པ་ཡོངས་སུ་གདུང་བའི་མཚན་ཉིད་ཅན་ཆུ་བོའོ། །དེ་ཡང་མདུ༵ད་པ༵་བཅ༵ད་པ༵་ཉིད་ཀྱི་ཕྱིར་སྲེ༵ད་པ༵་ལ༵ས་གྲོ༵ལ་བ༵འོ། །ཡོ༵ངས་སུ༵་གདུ༵ང་བ༵་ལ༵ས་རྣ༵མ་གྲོ༵ལ་བ༵འི་ཕྱིར་ཆུ༵་བོ༵་ལ༵ས་བརྒ༵ལ་བ༵འོ། །ཞེས་སྦྱར་ཏེ་དེ་ལ་མདུད་པ་ནི། མ་གྲོལ་བ་འཆིངས་པའི་དོན་ཏེ་དེ་བཅད་པ་ནི། ལུས་དང་ལོངས་སྤྱོད་སོགས་ཕྲད་པའི་ཡུལ་ལ་སྲེད་པ་བཅད་པ་དང༌། ཡོངས་སུ་གདུང་བ་ནི་མ་ཕྲད་པའི་ཡུལ་ལ་དམིགས་ནས་ཉོན་མོངས་ཤས་ཆེར་ཀུན་ཏུ་སྤྱོད་པ་དེ་སྤངས་པའོ། །ཞེས་ཏེ་དེས་ན་སྲེད་པ་ནི་ཁམས་གསུམ་གྱི་ཡོངས་སུ་བསྡུས་པའི་སྲེད་པ་དང༌། ཆུ་བོ་ནི་ཆུ་བོ་དང་འདྲ་བར་རྒྱུན་ཕྱོགས་སུ་ཁྱེར་བ་སྟེ། ཉོན་མོངས་པས་སེམས་དབང་མེད་དུ་འཁྱེར་བའོ། །དེ་ཡང་བཞི་སྟེ། འདོད་པ་དང༌། སྲིད་པ་དང༌། མ་རིག་པ་དང༌། ལྟ་བའི་ཆུ་བོའོ། །ཡེ་ཤེས་ཡོངས་སུ་རྫོགས་པ། འདས་པ་དང་མ་བྱོན་པ་དང་ད་ལྟར་བྱོན་པའི་སངས་རྒྱས་བཅོམ་ལྡན་འདས་རྣམས་ཀྱི་ཡེ་ཤེས་ལ་གནས་པ། མྱ་ངན་ལས་འདས་པ་ལ་མི་གནས་པ། ཡང་དག་པ་ཉིད་ཀྱི་མཐའ་ལ་གནས་པ། ཞེས་ཚིག་བཞིས་གཉིས་པ་ཡེ་ཤེས་ཇི་ལྟ་བུའི་སྒོ་ནས་སེམས་ཅན་གྱི་དོན་མཛད་པ་བསྟན་ཏོ། །ཡེ་ཤེས་ནི་གསུམ་སྟེ། རྣམ་པ་ཐམས་ཅད་མཁྱེན་པའི་ཡེ་ཤེས་ཀྱིས་ཤེས་བྱ་ཐམས་ཅད་མཁྱེན་པ་དང༌། ཐ་དད་མེད་པར་མཁྱེན་པའི་ཡེ་ཤེས་ཀྱིས་སངས་རྒྱས་ཐམས་ཅད་མཉམ་པ་ཉིད་དུ་གཟིགས་པ་དང༌། མི་གནས་པ་མཁྱེན་པའི་ཡེ་ཤེས་ཀྱིས། འཁོར་འདས་ཀྱི་མཐའ་ལ་མི་གནས་ཤིང༌། ཡང་དག་པའི་མཐའ་ལ་གནས་པ་སྟེ། དེ་དག་ཀྱང་གོ་རིམ་བཞིན་དུ་སྦྱར་རོ། །དང་པོའི་དབང་དུ་བྱས་ནས་ཡེ༵་ཤེ༵ས་ནི་དུས་གསུམ་གྱི་ཤེས་བྱའི་དཀྱིལ་འཁོར་མ་ལུས་པ་རྣམས་ལ་ཡོང༵ས་སུ༵་རྫོ༵གས་པ༵ར་ཁྱབ་པའོ། །འད༵ས་པ༵་ད༵ང་མ༵་བྱོ༵ན་པ༵་ད༵ང་ད༵་ལྟ༵ར་བྱོ༵ན་པ༵འི་ས༵ངས་རྒྱ༵ས་བཅོ༵མ་ལྡ༵ན་འད༵ས་རྣ༵མས་ཀྱི༵་ཡེ༵་ཤེ༵ས་ནི་སངས་རྒྱས་གཅིག་གི་ཡེ་ཤེས་ཡིན་ལ༵། སངས་རྒྱས་གཅིག་གི་ཡེ་ཤེས་ཉིད་དུས་གསུམ་གྱི་སངས་རྒྱས་ཐམས་ཅད་ཀྱི་ཡེ་ཤེས་ཀྱང་ཡིན་པས་ན་དེ་ལ་གན༵ས་པ༵འོ། །དེ་ཡང་ཐ་དད་མེད་པར་མཁྱེན་པའོ། །མྱ་ངན་ལས་འདས་པའི་ས་ལ་མི་གནས་པ་ནི། མྱ་ངན་ལས་འདས་པའི་མཐའ་དམན་པའི་མྱང་འདས། གཞན་དོན་རྒྱུན་ཆད་པའི་དབྱིངས་ཀྱི་ས་ལ་མི་གནས་པའོ། །ཡང་དག་པ་ཉིད་ཀྱི་མཐའ་ནི། ཡང་དག་པ་ཁོ་ནའི་མཐའ་སྟེ། དེ་བཞིན་ཉིད་ཆོས་ཀྱི་དབྱིངས་ཤིན་ཏུ་རྣམ་པར་དག་པ་ཆོས་ཀྱི་སྐུ་ལ་གནས་པ་སྟེ། འདིས་འཁོར་བ་ལ་མི་གནས་པར་བསྟན་པས། འདི་གཉིས་༩སྡོམ་པ་ནི་མི་གནས་པའི་མྱང་འདས་སོ། །སེམས་ཅན་ཐམས་ཅད་ལ་གཟིགས་པའི་ས་ལ་བཞུགས་པ་སྟེ་ཞེས་པ་ནི། ཐམས་ཅད་ཀྱི་དོན་བསྡུའི་ཚིག་སྟེ། དེ་བཞིན་གཤེགས་པའི་སྐུ་གསུམ་ལས། ཆོས་ཀྱི་སྐུ་ནི་སེ༵མས་ཅ༵ན་ཐ༵མས་ཅ༵ད་ཀྱི་ཆོས་ཉིད་ལ༵་རང་གི་རང་བཞིན་དུ་གཟི༵གས་ཤིང་གཡོ་བ་མེད་པར་བཞུགས་པ་དང༌། ལོངས་སྤྱོད་རྫོགས་པ༵འི་སྐུ་ནི་དག་པའི་སེམས་ཅན་སེམས་དཔའ་ཆེན་པོ་རྣམས་ཀྱི་སེམས་ཀྱི་རྒྱུད་ལ་གཟིགས་ཤིང༌། ཆོས་སྟོན་པས་བཞུགས་པ་དང༌། མཆོག་གི་སྤྲུལ་པའི་སྐུ་ནི་ཉན་ཐོས་ལ་སོགས་པ་དང༌། སོ་སོ་སྐྱེ་བོ་བློའི་མིག་ཡོངས་སུ་དག་པ་རྣམས་སེམས་ཀྱི་རྒྱུད་གྲོལ་བར་བྱ་བའི་ཕྱིར། དེ་དག་གི་ཁམས་དང་མོས་པ་གཟིགས་པའི་གནས་སམ་ས༵་ལ༵་བཞུ༵གས་པ༵་ཡིན་ནོ། །དེ་ལྟར་ན་རྗེས་དྲན་ཕྱི་མ་འདི་ནི། གཏན་དུ་བཞུགས་པ་དང༌། སྐུའི་རང་བཞིན་དང༌། གང་ལ་བརྟེན་པ་དང༌། བྱ་བ་དང༌། ཐབས་དང༌། གནས་དང༌། མ་ཆགས་པ་དང༌། སྤངས་པ་དང་ཡེ་ཤེས་ཇི་ལྟ་བུས་འགྲོ་བའི་དོན་མཛད་པ་དང༌། དོན་བསྡུ་སྟེ་དོན་ཚན་དགུས་བསྡུས་པ་ཡིན་ནོ། །འདི་དག་ནི་སངས་རྒྱས་བཅོམ་ལྡན་འདས་ཀྱི་སྐུ་ཆེ་བའི་ཡོན་ཏན་ཡང་དག་པ་རྣམས་སོ། །ཞེས་པ་ནི་གོང་དུ་བསྟན་པའི་ཡོན་ཏན་ཐམས་ཅད་གཞན་ལ་མེད་ཅིང་དེ་བཞིན་གཤེགས་པ་ལ་མངའ་བའི་ཆེ་བ་ཡིན་ནོ། །ཞེས་པས་རིགས་མཐུན་ཕྲ་མོ་ཡོད་སྲིད་ཀྱང་རྫོགས་པར་གཞན་ལ་མེད་པའི་དོན་ནོ། །དེ་དག་ནི་སངས་རྒྱས་རྗེས་དྲན་གྱི་དོན་བཤད་པའོ། །གཉིས་པ་ཆོས་རྗེས་སུ་དྲན་པའི་མདོ་ལ། ཤེས་བྱའི་ཆོས་རྣམས་ཀྱི་ནང་ནས་མཆོག་གམ་དམ་པའི་ཆོས་ནི་ཞེས་པ་ལུང་དང་རྟོགས་པ་དང་མྱ་ངན་ལས་འདས་པའི་ཆོས་གསུམ་ཅི་རིགས་པ་ལ་སྦྱར་རོ། །ཐོག་མར་དགེ་བ་ནི་དང་པོ་ཐོས་པའི་དུས་ན། དོན་ངེས་ཤིང་ཡིད་ཆེས་པའི་དད་པ་བསྐྱེད་པ་དང༌། བར་དུ་དགེ་བ་ནི་བསམ་པའི་དུས་ན་ཆོས་ལས་ཇི་སྐད་བཤད་པ་ལྟར་གྱི་ཕན་ཡོན་དང་འབྲས་བུ་རྣམས་ཐོབ་པར་རིག་ནས་དགའ་བར་འགྱུར་བ་དང༌། ཐ་མར་དགེ་བ་ནི་སྒོམ་པའི་དུས་ན་དེ་ཁོ་ན་ཉིད་ཕྱི་ཅི་མ་ལོག་པར་རྟོགས་པའི་བློ་གྲོས་ཀྱི་རྒྱུ་བྱེད་པའི་དོན་ནོ། །ཡང་ན་བསླབ་གསུམ་ལ་སྦྱར་ན་རུང་ངོ༌། ། དོན་བཟང་པོ།དོན་བཟང་པོ་ནི། ཀུན་རྫོབ་དང་དོན་དམ་པའི་བདེན་པ་མ་འཁྲུལ་བར་སྟོན་པའོ། ། དེས་ན་དོན་མེད་པ་དང་དོན་ཆུང་བ་མ་ཡིན་ནོ། །ཚིག་འབྲུ་བཟང་པོ་ནི། གོ་བདེ་ཞིང་འཛིན་སླ་ལ་བརྗོད་པ་བདེ་ཞིང་སྙན་པའོ། །མ་འདྲེས་པ་ནི། གཞན་མུ་སྟེགས་བྱེད་ལ་སོགས་པ་དང་ཐུན་མོང་མ་ཡིན་པའི་ཡོན་ཏན་དང་ལྡན་པ་སྟེ། ཕྲ་བའི་མི་རྟག་པ་དང༌། འདུ་བྱེད་ཀྱི་སྡུག་བསྔལ་དང༌། བདག་མེད་ལ་སོགས་པ་སྟོན་པ་དང་ལྡན་པའོ། །ཡོངས་སུ་རྫོགས་པ་ནི་འདོད་པའི་ཉོན་མོངས་པའི་ཉི་ཚེའི་གཉེན་པོ་ལྟ་བུ་མ་ཡིན་གྱི། ཁམས་གསུམ་ཆར་གྱི་ཉོན་མོངས་སྤོང་བའོ། །ཡོངས་སུ་དག་པ་ནི། རང་བཞིན་རྣམ་པར་དག་པའི་གནས་ལུགས་ཆོས་དབྱིངས་དང༌། དེ་ལ་དམིགས་པའི་ཡེ་ཤེས་སོ། །ཡོངས་སུ་བྱང་བ་ནི་གློ་བུར་གྱི་དྲི་མ་སྦྱོང་བྱེད་དང་དེ་སྤངས་པའི་བྲལ་འབྲས་གཉིས་སོ། །དེ་ལྟར་ན་དགེ་བ་གསུམ་དང༌། དོན་ཚིག་བཟང་བ་སྟེ་ལྔ་པོ་ནི། ལུང་གི་ཆོས་ཀྱི་ཡོན་ཏན་གཙོ་བོར་བསྟན་པ་ཡིན་ལ་མ་འདྲེས་པ་སོགས་བཞི་ནི། ཚངས་སྤྱོད་ཡོན་ཏན་བཞི་ལྡན་ཞེས་བྱ་སྟེ། ཡུལ་འདུས་མ་བྱས་ཀྱི་དམ་ཆོས་དང༌། ཡུལ་ཅན་རྟོགས་པའི་དམ་ཆོས་ཀྱི་ཆེ་བའོ། །ཚངས་སྤྱོད་ཡོན་ཏན་བཞི་ནི། མདོ་སྡེ་རྒྱན་ལས། གཞན་དང་ཐུན་མོང་མ་ཡིན་ལེགས་པར་གསུངས་པ་ཞེས་འབྱུང་སྟེ། མུ་སྟེགས་ཅན་རྣམས་ཀྱིས་བསྟན་པའི་ཆོས་ནི་ཉེས་པར་བཤད་པ་སྟེ། ཐར་པའི་ལམ་མ་ཡིན་པ་ལ་ལམ་དུ་འདུ་ཤེས་པའི་ཕྱིར་དང༌། ཁ་ཅིག་ནི་ངན་སོང་གི་ལམ་ལ་མཐོ་རིས་ཀྱི་ཆོས་སུ་འདུ་ཤེས་པའི་ཕྱིར་དང༌། ཁ་ཅིག་མཐོ་རིས་ཀྱི་ལམ་སྟོན་ཡང༌། དྲི་མ་ཅན་དང་མ་ཚང་པ་དག་སྟོན་པའི་ཕྱིར་རོ། །བཅོམ་ལྡན་འདས་ཀྱིས་བསྟན་པ་ནི་དེ་ལས་ལྡོག་པའི་ཕྱིར་ལེགས་པར་གསུངས་པའོ། །ཡང་དག་པར་བསྟན་པ་༼དཔེར་ལ་ལར་མཐོང་བ༽ནི། ཀུན་རྫོབ་དང་དོན་དམ་པའི་གནས་སྐབས་གང་ཡིན་ཀྱང་རུང༌། སོ་སོའི་མཚན་ཉིད་ཕྱིན་ཅི་མ་ལོག་པར་སྟོན་པའོ། །ནད་མེད་པ་ནི། ཉོན་མོངས་པ་དང༌། བག་ལ་ཉལ་གྱི་སྒྲིབ་པ་ཐམས་ཅད་ཀྱི་གཉེན་པོར་འགྱུར་པའི་ཕྱིར་སྒྲིབ་པའི་ནད་མེད་པའོ། །དུས་ཆད་པ་མེད་པ་ཞེས་པ་ནི། འདུས་མ་བྱས་ཀྱི་དབྱིངས་འགྱུར་བ་མེད་ཅིང་འཇིག་པ་མེད་པ་དང༌། འཕགས་པའི་ལམ་གྱི་ཡེ་ཤེས་ཀྱང་ཉམས་པ་མེད་པ་དང༌། སྤངས་བྱ་སྤངས་ཟིན་པ་སླར་ཡང་སྤོང་མི་དགོས་པ་རྣམས་ཀྱི་དོན་ནོ། །ཉེ་བར་གཏོད་པ་ཞེས་པ་ནི། ཨུ་པ་ནཱ་ཡི་ཀ་ཞེས་པའི་སྒྲ་ལས་དྲངས་ན། ཉེ་བར་འདྲེན་པ་སྟེ། ཉོན་མོངས་པ་དང་སྡུག་བསྔལ་གྱིས་བསྡུས་པའི་འཁོར་བ་སྤངས་པའི་ཚུལ་གྱིས་ཟག་མེད་ཀྱི་དབྱིངས་སུ་གཏོད་ཅིང་འདྲེན་པའི་དོན་ཡིན་ལ། འདིའི་འགྲེལ་པར་ལོ་ཙཱ་བས་རིག་པ་དང་ལྡན་པ་ཞེས་བསྒྱུར་ཏེ། དེ་ལྟར་ན་ཨུ་པ་རྱ་ཡི་ཀ་ཞེས་པ་ཡིན་དགོས་ཀྱང༌། བཤད་པ་དང་ཅུང་མི་འགྲིག་གོ། །འདི་མཐོང་བ་ལ་དོན་ཡོད་པ་ནི། གང་ཞིག་ཆོས་མཐོང་བ་ལས། འབྲས་བུ་རྣམས་ཀྱི་མཆོག་ཐོབ་ཅིང༌། སླར་མི་ལྡོག་པའི་ཕྱིར་དོན་ཡོད་པའོ། །རྒྱ་སྐད་ཀྱི་དཔེ་འགའ་ཞིག་ལས། ཨེ་ཧི་པ་ཤྱི་ཀཿཞེས་འབྱུང་བ། འདིར་ལྟོས་ཤིག་ཅེས་བསྒྱུར་ཏེ། འོན་ཀྱང་དཀྱུས་ལྟར་ལེགས་སོ། ། མཁས་པ་རྣམས་ཀྱིས་སོ་སོར་རང་གིས་རིག་པར་བྱ་བ་ཞེས་པ་ནི། མཁས་པའི་སྒྲ་ནི་འཕགས་པ་ཡིན་ལ། དེ་རྣམས་ཀྱི་མཉམ་གཞག་ཡེ་ཤེས་རྣམ་པར་མི་རྟོག་པས་མངོན་སུམ་དུ་རྟོགས་པར་བྱ་བ་ཡིན་གྱི། རྣམ་པར་ཤེས་པ་དང་རྟོག་གེའི་ཡུལ་མ་ཡིན་ནོ། །བཅོམ་ལྡན་འདས་ཀྱིས་གསུངས་པའི་ཆོས་འདུལ་བ་ལ་ལེགས་པར་སྟོན་པ་ཞེས་པ་ནི། སོ་སོར་རང་གི་རིག་པར་བྱ་བ་ཡིན་ཡང༌། ལུང་གིས་མི་སྟོན་པ་ནི་མ་ཡིན་ཏེ། དེ་བཞིན་གཤེགས་པའི་བཀའ་ནི་ཆོས་ཀྱི་སྐུའི་རྒྱུ་མཐུན་པ་ཡིན་པས། ཆོས་ཀྱི་སྐུ་ལ་ཇི་ལྟར་མངའ་བ་བཞིན་ལུང་ལས་འབྱུང་བས། སོ་སོར་རང་གིས་རིག་བྱ་དེ་ལུང་ལས་ཀྱང་བཤད་ཅེས་པའོ། །ལེགས་པར་སྟོན་པ་ཞེས་པ་ལ་རྒྱ་སྐད་འགའ་ཞིག་ཏུ༌། སུ་པྲ་གེ་དི་ཏ་ཞེས་འབྱུང་བ་ལྟར་ན་ལེགས་པར་རབ་ཏུ་ཕྱེ་བ་ཞེས་པར་འགྱུར་རོ། །ངེས་པར་འབྱུང་བ་ནི་འཁོར་བ་ལས་ངེས་པར་འབྱུང་བའོ། །རྫོགས་པའི་བྱང་ཆུབ་ཏུ་འགྲོ་བར་བྱེད་པ་ནི། ལུང་ལ་དམིགས་ནས་ལམ་གྱིས་འགྲོ་བར་བྱེད་པ་སྟེ། ཐེག་ཆེན་ཉིད་ཀྱི་ལམ་ལྟ་ཅི་སྨོས། བརྒྱུད་པའི་སྒོ་ནས་ནི་ཉན་རང་གི་ལམ་ཡང་འདི་ཡིན་ཏེ། ཉན་ཐོས་ལྷག་མེད་དུ་ཞུགས་པར་འདོད་པ་རྣམས་ཀྱང༌། དུས་ཡུན་རིང་པོ་འདས་པའི་འོག་ཏུ་གདོན་མི་ཟ་བར་ཐེག་ཆེན་དུ་འཇུག་པའི་ཕྱིར་རོ། །འདིས་ནི་མཐར་ཐུག་ཐེག་པ་གཅིག་ཏུ་བསྟན་ཏོ། །མི་མཐུན་པ་མེད་ཅིང་ཞེས་པ་ནི། རྟོགས་བྱའི་ཆོས་ཉིད་ཀྱང་གཅིག་ཡིན་ཅིང༌། འཕགས་པ་རང་ས་ཐད་མཉམ་པ་རྣམས་ནི་ཉམས་མྱོང་གི་ཆོས་མི་འདྲ་བ་གཏན་མེད་པའོ། །འདུས་པ་དང་ལྡན་པ་ནི། གང་ཤེས་པ་གཅིག་གིས་རྣམ་པ་དུ་མ་ཡོངས་སུ་འཛིན་པས་རྣམ་པ་རྣམས་གཅིག་ལ་འདུས་པ་ལྟ་བུའི་ཡོན་ཏན་དང་ལྡན་པ་སྟེ། ཡེ་ཤེས་གཅིག་ཉིད་ཀྱིས་མི་རྟག་པ་དང༌། སྡུག་བསྔལ་བ་དང༌། བདག་མེད་པ་ལ་སོགས་པ་མཐའ་དག་རྟོགས་པའོ། །བརྟེན་པ་ཡོད་པ་ནི། དགེ་བའི་ཆོས་མ་ལུས་པ་ཐམས་ཅད་ཀྱང༌། ཆོས་ཀྱི་དབྱིངས་དེ་བཞིན་གཤེགས་པའི་སྙིང་པོ་ལ་བརྟེན་པ་ཡིན་ལ། དེ་ཉིད་ཆོས་དཀོན་མཆོག་གི་མཐར་ཐུག་པའོ། །རྒྱུ་བ་བཅད་པ་ནི་རྣམ་རྟོག་ཟག་བཅས་ཀྱི་སེམས་དང་སེམས་བྱུང་གི་རྒྱུ་བ་ཐམས་ཅད་ཡོངས་སུ་ཆད་པ་སྟེ། དེ་བཞིན་གཤེགས་པའི་ས་ལ་རྣམས་པ་ཐམས་ཅད་དུ་དང༌། བྱང་ཆུབ་སེམས་དཔའ་འཕགས་པ་རྣམས་ཀྱི་མཉམ་གཞག་ཏུ་ཡང༌། ཀུན་གཞི་ལས་གཞན་པ་ཐམས་ཅད་འགགས་པའོ། །དེ་ལྟར་དམ་པའི་ཆོས་ཀྱི་ཡོན་ཏན་རྗེས་སུ་དྲན་ནས་ད་ལྟ་དམ་པའི་ཆོས་རིན་པོ་ཆེ་དང་འཕྲད་པ་འདི་སྐལ་བ་བཟང་སྙམ་དུ་རང་གི་ནུས་པ་དང་བསྟུན་པའི་དམ་ཆོས་གཟུང་དགོས་ལ། དེ་ཡང༌། དབུས་མཐའ་རྣམ་འབྱེད་ལས། ཡི་གེ་འབྲི་མཆོད་སྦྱིན་པ་དང༌། །ཉན་དང་ཀློག་དང་ལེན་པ་དང༌། །འཆད་དང་ཁ་ཏོན་བྱེད་པ་དང༌། །དེ་སེམས་པ་དང་སྒོམ་པའོ། །ཞེས་གསུངས་པ་ལྟར་ཉམས་སུ་ལེན་པའི་སྒོ་ནས་མི་ཚེ་དོན་ལྡན་དུ་འབད་པར་ངེས་པར་བྱ་དགོས་སོ། །དམ་པའི་ཆོས་ཐོས་པ་དང༌། གཟུང་བ་དང༌། འཆད་པ་དང༌། དོན་སེམས་པའི་ཕན་ཡོན་ཡང་ཚད་མེད་དཔག་ཏུ་མེད་པ་དག་མདོ་དང་བསྟན་བཅོས་ལས་ཤེས་པར་བྱའོ། །གསུམ་པ་དགེ་འདུན་རྗེས་དྲན་གྱི་མདོའི་དོན་འཆད་པ་ལ། ཐེག་པ་ཆེན་པོའི་དགེ་འདུན་ནི་ཞེས་པ་ལྟར་ན། དགེ་འདུན་ནི་བདུད་བྱེ་བ་ཁྲག་ཁྲིག་གིས་ཀྱང་ལམ་ལས་དབྲལ་བར་མི་ནུས་པས་ན་མི་ཕྱེད་པའི་འདུན་པ་དང་ལྡན་པ་ཞེས་པའོ། །འཇིག་རྟེན་ལས་འདས་པའམ་དམིགས་པ་ཆེན་པོ་སོགས་བདུན་ལྡན་པས་ན་ཐེག་པ་ཆེན་པོའོ། །སྐབས་འདིར་བྱང་ཆུབ་སེམས་དཔའ་ཕྱིར་མི་ལྡོག་པའི་དགེ་འདུན་རྣམས་ཡིན་ལ། དེའི་དབང་དུ་བྱས་ན་ལེགས་པར་བཞུགས་པ་ནི་ཚུལ་ཁྲིམས་རྣམ་པ་གསུམ་ལ་གནས་པའམ་ལམ་ཡང་དག་པར་ཞུགས་པའོ། །རིགས་པར་ཞུགས་པ་ནི་ཏིང་ངེ་འཛིན་མཐའ་ཡས་ལ་ཞུགས་པའོ། །དྲང་པོར་ཞུགས་པ་ནི་རྟག་པ་དང་ཆད་པའི་མཐའ་ལ་མི་གནས་པར། ཆོས་ཀྱི་དབྱིངས་མཉམ་པ་ཉིད་ལ་ཞུགས་པ་སྟེ། དེ་གསུམ་རིམ་ཅན་དུ་ཚུལ་ཁྲིམས་དང་སེམས་དང་ཤེས་རབ་ཀྱི་བསླབ་པའོ། །མཐུན་པར་ཞུགས་པ་ནི། ཐམས་ཅད་ཀྱང་ལྟ་བ་དང༌། སྤྱོད་པ་དང༌། དམིགས་པའི་ཡུལ་དང༌། འགྲོ་བའི་དོན་སྤྱོད་པ་ལ་མི་མཐུན་པ་ཅུང་ཟད་ཀྱང་མེད་པའི་ལམ་ལ་ཞུགས་པའོ། །ཐལ་མོ་སྦྱར་བའི་འོས་སུ་གྱུར་པ་ནི། གང་ཞིག་གཞན་གྱིས་མ་མཐོང་བའི་ཆོས་ཉིད་ཟབ་མོ་མཐོང་བའི་ཕྱིར་རོ། །ཕྱག་བྱ་བའི་འོས་སུ་གྱུར་པ་ནི། སེམས་ཅན་འཁོར་བ་ལས་སྒྲོལ་བའི་སྙིང་རྗེ་ཆེན་པོ་ཅན། བདག་ཉིད་ཀྱི་དོན་ཡོངས་སུ་སྤངས་བས། སྐྱེས་བུ་དམ་པའི་སྤྱོད་པ་ཆེན་པོ་དང་ལྡན་པའི་ཕྱིར་རོ། །བསོད་ནམས་ཀྱི་དཔལ་གྱི་ཞིང་ཞེས་པ་ནི། བསོད་ནམས་ཡང་ཡིན་ལ་དཔལ་ཡང་ཡིན་པས་བསོད་ནམས་ཀྱི་ཚོགས་ཆེན་པོ་དང་ལྡན་པ་དང༌། ཞིང་དེ་གུས་པ་བྱ་བའི་ཡུལ་དུ་གྱུར་པའོ། །ཡོན་ཡོངས་སུ་སྦྱོང་བ་ཆེན་པོ་ནི། ཉེས་པ་སྤངས་ཤིང༌། ཡོན་ཏན་གྱི་ཚོགས་བསམ་གྱིས་མི་ཁྱབ་པས་ཉེར་བར་བརྒྱན་པ། མཐའ་ཡས་པ་ལ་ཕན་པ་ཉེ་བར་སྒྲུབ་པའི་ཕྱིར། རང་ཉིད་ཡོན་གྱི་ཕུང་པོ་སྟོང་གསུམ་དང་མཉམ་པས་རྟག་ཏུ་མཆོད་ཀྱང་རང་ཉིད་ལ་སྒྲིབ་པར་མི་འགྱུར་ཞིང༌། འབུལ་བ་པོ་ལ་ཆེས་ཕན་པའོ། །འདི་མན་ནས་སྦྱིན་གནས་མཆོག་ཡིན་པར་བསྟན་པ་ཡིན་ལ། དེ་ཡང་སྦྱིན་པའི་གནས་སུ་གྱུར་པ་ནི། སྦྱིན་པའི་ཞིང་ཁྱད་པར་ཅན་ཏེ། ཞིང་གི་སྐྱོན་རྩྭ་སྤངས་པ་ལྟ་བུ་སྟེ། མཐོང་བས་སྤངས་པར་བྱ་བའི་ཀུན་ནས་ཉོན་མོངས་པ་རྣམས་ཡོངས་སུ་སྤངས་པས། སྦྱིན་པ་པོ་ལ་འབྲས་བུ་མཐའ་ཡས་པར་འཕེལ་བའོ། །ཀུན་ཏུ་ཡང་སྦྱིན་པའི་གནས་སུ་གྱུར་པ་ཆེན་པོའོ། །ཞེས་པ་ནི། དོན་སྔ་མ་དང་འདྲ་བ་ལས་སྒོམ་པས་སྤངས་པར་བྱ་བའི་རིགས་ཉོན་མོངས་པ་དང༌། ཤེས་བྱ་དང་སྙོམས་འཇུག་གི་སྒྲིབ་པས་བསྡུས་པ་མང་དུ་བྱང་བའི་ཕྱིར་འབྲས་བུ་ཟད་མི་ཤེས་པ་ཁོ་ནའོ། །ཀུན་ཏུ་ནི་གནས་སྐབས་ཀུན་ཏུའོ། །འདིར་བཤད་པའི་དཀོན་མཆོག་རྗེས་དྲན་གྱི་མདོ་འདི་ཐེག་ཆེན་གྱི་མདོ་ཡིན་ནོ། །དགེ་འདུན་ལ་བཀུར་སྟི་དང་མཆོད་པ་ཅི་ནུས་བྱ་བར་རིགས་ཏེ། བསོད་ནམས་ཚད་མེད་པ་འབྱུང་བར་འགྱུར་བའི་ཕྱིར་ཏེ། མདོ་ལས། གང་ཞིག་ཟླ་བ་རེ་རེ་ལ། །མཆོད་སྦྱིན་བརྒྱ་སྟོང་མཉམ་བྱས་པས། །དགེ་འདུན་རྣམས་ལ་དད་བྱས་པ། །དེ་ཡི་བཅུ་དྲུག་ཆར་མི་ཕོད། །ཅེས་གསུངས་པ་སོགས་མདོ་ལས་རྒྱ་ཆེར་གསུངས་སོ། ། མཇུག་བསྡུ་བ་ནི། འཕགས་པ་དཀོན་མཆོག་གསུམ་རྗེས་སུ་དྲན་པའི་མདོ་རྫོགས་སོ། །ཞེས་འཕགས་པ་དཀོན་མཆོག་གསུམ་རྗེས་སུ་དྲན་པའི་མདོའི་མཆན་བུ་དྲི་མེད་མེ་ལོང་ཞེས་བྱ་བ་འདི་ནི་ངག་དབང་དངོས་གྲུབ་དཔལ་གྱིས་རྗེ་བཙུན་ཏཱ་ར་ནཱ་ཐའི་འགྲེལ་བ་ལྟར་མདོར་བསྡུས་སུ་བཀོད་པའོ། །འདིས་ཀྱང་མཆོག་གསུམ་ལ་མི་ཕྱེད་པའི་དད་པ་བརྟན་པའི་རྒྱུར་གྱུར་ཅིག མངྒ་ལཾ། ལྟ་བ་རབ་གསལ་ཆོས་ཀྱི་ཉིན་བྱེད་སྣང་བ།ལྟ་བ་རབ་གསལ་ཆོས་ཀྱི་ཉིན་བྱེད་སྣང་བ། ལྟ་བ་རབ་གསལ་ཆོས་ཀྱི་ཉིན་བྱེད་སྣང་བ་ཞེས་བྱ་བ་བཞུགས་སོ། ། ལྷ་ཡི་ཅོད་པན་བདུད་བཅོམ་ཉི་མའི་གཉེན། །བདེན་པའི་རྔ་གསང་གང་དེའི་ལྗགས་ཀྱི་སྐད། །བརྩེ་བས་རབ་བསྐུལ་དར་དིར་བསྡུར་བ་དེ། །ཁ་བའི་ཡུལ་ལ་སྙན་པའི་གདངས་ཀྱིས་ཁྱབ། །རིས་མེད་བསྟན་འཛིན་རྒྱུ་སྐར་བསྟར་བའི་དབུས། །འོད་ཀྱི་ལམ་ལམ་ལྷང་ངེར་གསལ་བ་ཡི། །རལ་གྲི་འཛིན་པ་བློ་བཟང་རྒྱལ་བའི་གར། །ས་ཡི་སྨན་ལྗོངས་གསོ་བའི་དཔྱིད་དུ་ཤར། །གང་གི་གསང་གསུམ་གསེར་གྱི་ག་བུར་ལས། །ཆར་ཆིལ་བསྙིལ་བའི་རྩི་བཅུད་འཛད་མེད་རྒྱུན། །ཟད་མེད་འཐུང་བའི་ཚིམ་པར་མི་ངོམས་པ། །སྲས་དང་ཡང་སྲས་ས་ཆེན་མུ་མཐར་བརྡོལ། །སྐུ་ཡི་གེ་སར་ཚ་བ་རོང་ནས་བལྟམས། །མཁྱེན་པའི་གཏེར་སྒོ་དབུས་ཀྱི་ཞིང་ནས་ཕྱེས། །མདོ་སྨད་ས་རུ་འོད་ཀྱི་ཐིག་ལེ་འགྱེད། །ང༷ག་དབ༷ང་གྲ༷གས་པ༷་སྲས་ཀྱི་ཐུ་བོ་མཆོག །ནག་ནོག་དྲི་བྲལ་གསེར་སྦྱང་བཙོ་མ་ཡི། །དགེ་ལྡན་ལེགས་བཤད་རིགས་ལམ་ལས་འོང་བ། །ཡང་དག་ལྟ་བའི་ལྡིང་ཁང་ཡང་རྩེ་ནས། །སྙན་འཇེབས་དབྱངས་ཀྱིས་ས་གསུམ་གཉིད་ལས་བསླངས། །ཁྱོད་ཀྱི་མཛད་འཕྲིན་ཁྲི་གདུག་སེར་བོའི་ཟླར། །ངོ་མཚར་དྭངས་བ་ཡིད་ཁོང་སྙིང་ནས་མཆེད། །གངས་ལ་བཞག་པའི་ཁྱེད་ཀྱི་ཞབས་རྗེས་དེ། །ལོ་ཟླ་ཁྲི་མ་འབུམ་གྱི་ཤུལ་ན་གསལ། །དེ་ལ་འདིར་རི་བོ་དགེ་ལྡན་པའི་ལྟ་བ་ལས་བརྩམས་ནས་ཅུང་ཟད་བརྗོད་པ་ལ། རྣམ་བཤད་ཀྱི་སྐབས་སུ་ལུགས་འདི་ལ་ཆོས་རྣམས་རྟོག་པའི་དབང་གིས་བཞག་པ་ཙམ་གྱིས་འཇོག་ཚུལ་ཤེས་ན། དེ་ལས་བཟློག་སྟེ་འཛིན་པའི་བདེན་འཛིན་བདེ་བླག་ཏུ་ཤེས་པར་འགྱུར་བས། ཞེས་གསུངས་པ་ལྟར་འདིའི་དོན་བཤད་པ་ལ། ཆོས་རྣམས་རྟོག་པའི་ཕར་བཏགས་པ་ཙམ་དུ་བསྟན་པ་དང༌། དེའི་ལྡོག་ཟླ་དེ་བདེན་པར་གྲུབ་ཚད་དུ་བསྟན་པ་དང༌། མིང་བརྡས་ཕར་བཏགས་ཙམ་ལ་བྱ་བྱེད་ཐམས་ཅད་རུང་བར་བསྟན་པ་དང་གསུམ།དང་པོ་ནི། གཟུགས་ནས་རྣམ་མཁྱེན་གྱི་བར་གྱི་ཆོས་ཐམས་ཅད་ལ་མིང་རྐྱང་བར་བཏགས་ཙམ་ལས་གདགས་གཞིའི་ངོས་ནས་རྡུལ་ཙམ་ཡང་མེད་པའི་ཕྱིར། དེར་ཐལ། རང་གི་གདགས་གཞིའི་ཕུང་ཁམས་ལ་གང་ཟག་དང༌། ང་ཞེས་མིང་རྐྱང་བ་ཕར་བཏགས་ཙམ་མ་གཏོགས་གདགས་གཞིའི་ཚོགས་ཙམ་དང་རྒྱུན་དང་རེ་རེ་བ་དེ་དག་གི་ཆ་གང་ཡང་གང་ཟག་དང་ང་མ་ཡིན་པའི་ཕྱིར། དེར་ཐལ། དཔེར་ན་བྲག་ཕུག་ལྟ་བུའི་མུན་པ་བབས་པའི་ཐག་ཁྲ་འཁྱིལ་ལུགས་དང་ཁ་དཽག་སོགས་སྦྲུལ་འདྲ་བ་ལ་འཁྲུལ་བས་འདི་སྦྲུལ་ལོ་སྙམ་པའི་ཚེ་ཐག་པ་དེ་ལ་རྟོག་པ་ལ་ཕར་སྦྲུལ་དུ་སྣང་བའམ་སྦྲུལ་གྱི་མིང་བརྡས་ཕར་བཏགས་ཙམ་མ་གཏོགས་ཐག་པའི་ཆ་གང་ཡང་སྦྲུལ་དུ་གྲུབ་པ་མེད་པ་བཞིན་ཡིན་པའི་ཕྱིར་ཏེ། རིན་ཆེན་འཕྲེང་བ་རུ་གཟུགས་ཀྱི་དངོས་པོ་རང་ངོས་མེད་པར་མིང་གིས་བཏགས་ཙམ་ཡིན་པའི་ཕྱིར། ནམ་མཁའ་ཡང་ནི་མིང་ཞིག་བཏགས་པ་ཙམ་མོ། །རྒྱུ་འབྱུང་བ་རང་བཞིན་གྱིས་མེད་ན་འབྲས་བུའི་གཟུགས་རྣམས་རང་བཞིན་གྱིས་གྲུབ་པ་ལྟ་ག་ལ་ཡོད། ཆོས་ཐམས་ཅད་རང་ངོས་ནས་གྲུབ་པ་མེད་པ་དེའི་ཕྱིར་ན་མིང་གིས་བཏགས་ཙམ་པ་ཉིད་ཀྱང་རང་བཞིན་གྱིས་གྲུབ་པ་མེད་པར་གསུངས་པ་དང༌། བཞི་བརྒྱ་བའི་སྐབས་སུ་རང་སྣང་བའི་སྒོ་ནས་འཇོག་བྱེད་ཀྱི་རྟོག་པ་མེད་པར་ནི་འདོད་ཆགས་ལ་སོགས་པ་ལ་རང་ངོས་ནས་གྲུབ་པའི་ཡོད་པ་ཉིད་ཡོད་པ་མིན་ན། ཞེས་སོགས་དང༌། ཡབ་སྲས་མཇལ་བའི་མདོ་ལས། རྒྱལ་པོ་ཆེན་པོ་སྐྱེས་བུ་གང་ཟག་ནི་ཁམས་དྲུག་ལ་ཕར་བཏགས་པ། ཞེས་པ་ནས། བཏགས་གཞི་སའི་ཁམས་ནི་ཐ་སྙད་དེ་བློས་ཕར་བཏགས་ཙམ་མ་གཏོགས་པར་སའི་ཁམས་ཉིད་དུ་རང་ངོས་ནས་གྲུབ་པ་མི་དམིགས་ཏེ། གདགས་གཞིའི་ཐ་སྙད་དེ་བཏགས་ཙམ་གྱིས་ས་ཁམས་དེ་ཡང་བུད་མེད་མིན། སྐྱེས་པ་མིན་གྱི། རྒྱལ་པོ་ཆེན་པོ་དེ་ལྟར་དོན་དེ་དག་ཡང་དག་པ་སྟེ་ཚུལ་ཇི་ལྟ་བ་བཞིན་དུ་ཤེས་རབ་ཀྱིས་རྟོགས་པར་གྱིས་ཤིག་ཅེས་དེ་བཞིན་དུ་གང་ཟག་གི་གདགས་གཞིའི་ཁམས་ལྷག་མ་ལྔ་ལ་ཡང་སྦྱར་ནས་གསུངས་པའི་ཕྱིར་རོ། །མདོ་དེའི་དོན་བསྡུས་ནས་རིན་ཆེན་ཕྲེང་བ་ལས། སྐྱེས་བུ་ནི་ལུས་ཀྱི་ས་ཁམས་མིན་དེ་བཞིན་དུ་ཆུ་ཁམས་མ་ཡིན་མེ་ཁམས་མིན་རླུང་མིན་ནམ་མཁའ་ཡང་མིན། རྣམ་ཤེས་ཀྱང་མ་ཡིན་ལ་ཁམས་དྲུག་པོ་དེ་ཚོགས་པ་ཡང་མིན་ན། དེ་དག་ལས་གཞན་ན་གདགས་གཞི་ལ་མ་ལྟོས་པར་ཡང་སྐྱེས་བུ་གང་ཞིག་ཡོད་དེ་མེད་པས་སྐྱེས་བུ་ནི་མིང་གིས་བཏགས་པ་ཙམ་མོ། །ཞེས་གསུངས་པའི་ཕྱིར། འདི་དག་དཔེར་ན་མུན་བབ་པ་ལ་ཐག་ཁྲ་འཁྱིལ་བ་སྦྲུལ་དུ་སྣང་ཚེ་སྣང་རྒྱུའི་སྦྲུལ་དེ་ཐག་ཁྲ་ལས་དོན་གཞན་དུ་མེད། ཐག་ཁྲའི་ཆ་ཀུན་ཚོགས་པ་དང་ཆ་ཤས་རེ་རེ་ནས་གང་ཡང་སྦྲུལ་དུ་གྲུབ་པ་མེད་པར་རྟོག་པས་ཕར་བཞག་པའི་རྟོག་པས་ཕར་བཞག་པའི་རྟོག་ལ་ཕར་སྣང་བ་ཁོ་ན་ཡིན་ནོ། །དེ་བཞིན་དུ་བུམ་པ་དེ་རང་གི་གདགས་གཞི་མཆུ་ལྟོ་སོགས་རེ་རེ་ནས་དང༌། དེ་ཀུན་ཚོགས་པ་དང༌། དེ་དག་ལས་དོན་གཞན་གང་དུ་ཡང་མེད་པར་བློ་ལ་སྣང་བ་ཙམ་དང༌། བུམ་པའི་གདགས་གཞི་མཆུ་ལྟོ་སོགས་ཀྱང་གོང་ལྟར་རང་རང་གི་གདགས་གཞིའི་ཚོགས་པ་དང་རེ་རེ་བ་སོགས་མིན་ནོ། ། ཡང་ན་ཐག་པ་ལ་སྦྲུལ་ལྟར་བུམ་པ་གདགས་གཞི་དང་བཅས་པ་དེ་བློ་ལ་ཕར་སྣང་བ་ལས་གང་དུ་སྣང་བའི་གཞི་དེར་རང་གི་སྡོད་ལུགས་ཅུང་ཟད་ཀྱང་མེད་པས་རྟོག་པས་བཏགས་ཙམ་ཡིན་པ་བཞིན་ཆོས་ཐམས་ཅད་ལ་འདྲའོ། །དེ་ཡང་བུམ་པ་དེ་རྟོག་པ་ལ་སྣང་བའི་དབང་གིས་བུམ་པ་ཞེས་མིང་བཏགས་པ་ལས་གདགས་གཞིའི་ངོས་ནས་བཙལ་ན་ཅུང་ཟད་ཙམ་གྲུབ་པ་མེད་པ་ལ་བསམ་ན་བུམ་པ་ནི་བུམ་པ་ཞེས་པའི་མིང་རྐྱང་དེ་ལས་མེད་པས་མིང་རྐྱང་བཏགས་ཡོད་ཟེར་བ་བཞིན་དུ་ཆོས་ཐམས་ཅད་ཀྱང་དེ་ལྟར་ཡིན་ནོ། །དེ་ལྟར་རྟོག་པས་བཞག་པ་ཡང༌། བུམ་འཛིན་རྟོག་པ་ལ་བུམ་པ་སྣང་བའི་དབང་གིས་བུམ་པར་བཞག བུམ་པ་རྟག་འཛིན་རྟོག་པ་ལ་བུམ་པ་རྟག་པར་སྣང་བའི་དབང་གིས་བུམ་པ་རྟག་སྣང་བཞག བུམ་པ་བདེན་འཛིན་རྟོག་པ་ལ་བུམ་པ་བདེན་གྲུབ་ཏུ་སྣང་བས་བུམ་པ་བདེན་སྣང་བཞག་པ་སོགས་ཆོས་ཐམས་ཅད་རྟོག་པ་ལ་སྣང་བའི་དབང་གིས་བཞག་པ་ཡིན་ཏེ། རྟོག་པ་ཡིན་ན་ཁྱོད་ཀྱི་སྤྱིར་བློ་དེས་ཆོས་དེ་བཞག་པ་ནི་བློ་དེས་ངེས་ངོར་རྙེད་པ་དེ་བློ་དེས་བཞག་པ་ཡིན་པར་བྱེད་པ་ཡིན་པས་བདེན་འཛིན་དང་བུམ་པ་རྟག་འཛིན་རྟོག་པ་སོགས་ཀྱིས་བཞག་པའི་ཆོས་མེད་པས་དེ་དག་གིས་ཤེས་བྱ་འཇོག་མི་ནུས་ཀྱང༌། བདེན་འཛིན་སོགས་དེ་དག་གིས་སྣང་ངོའི་སྒོ་ནས་ཤེས་བྱ་འཇོག་ནུས་པ་གང་ཞིག བུམ་འཛིན་རྟོག་པ་སོགས་རང་གི་འཛིན་སྟངས་ཀྱི་ཡུལ་ཡོད་པའི་བློ་རྣམས་ཀྱིས་ཤེས་བྱ་འཇོག་ཐུབ་པ་སྨོས་མི་དགོས་པའི་ཕྱིར། ཕྱི་མ་སླ། དང་པོ་གྲུབ་སྟེ། བདེན་འཛིན་གྱིས་ཆོས་འཇོག་མི་ནུས་ཀྱང་དེས་སྣང་བའི་སྒོ་ནས་འཇོག་ནུས་པའི་ཕྱིར། དེར་ཐལ། དེའི་འཛིན་སྟངས་བདེན་གྲུབ་མེད་པས་དེས་ཆོས་གང་ཡང་འཇོག་མི་ཐུབ་ཀྱང༌། དེ་རང་གི་སྣང་བ་ལ་ཚད་མ་ཡིན་པའི་ཕྱིར། ཁྱབ་སྟེ། ཚད་མས་རང་ཡུལ་འཇོག་ཐུབ་པ་ལ་གྲུབ་མཐའ་ཀུན་མཐུན་པའི་ཕྱིར། མ་ཁྱབ་མཚམས་ཀྱི་རྟགས་གྲུབ་སྟེ། བདེན་འཛིན་དེ་ཚད་མིན་དང་ལོག་ཤེས་ཡིན་ཀྱང་དེ་རང་གི་སྣང་བ་ལ་ཚད་མ་ཡིན་པའི་ཕྱིར། དེར་ཐལ། དེ་གཉིས་སྣང་ཅན་གྱི་ཤེས་པ་ཡིན་པའི་ཕྱིར། ཁྱབ་སྟེ། གཉིས་སྣང་ཅན་གྱི་ཤེས་པ་ཡིན་ན་རང་གི་སྣང་བ་ལ་མངོན་སུམ་ཚད་མ་ཡིན་པས་ཁྱབ་པའི་ཕྱིར་རོ། །ཁོ་ན་རེ། ཐལ་འགྱུར་བའི་ལུགས་ལ་བུམ་པ་སོགས་ཡོད་པ་དང༌། བུམ་པ་རྟག་པ་སོགས་མེད་པའི་རྣམ་བཞག་འཇོག་ཏུ་མེད་པར་ཐལ། ཆོས་ཐམས་ཅད་བློ་ལ་སྣང་བ་ཙམ་གྱིས་ཕར་བཏགས་པ་ཙམ་དུ་ཟད་པ་གང་ཞིག བློ་འགའ་ཞིག་ལ་བུམ་པ་རྟག་པ་དང༌། ཐག་ཁྲ་སྦྲུལ་དང༌། རི་བོང་རྭ་སོགས་སྣང་བའི་ཕྱིར་ཞེ་ན་གཏན་མ་ཁྱབ་སྟེ། ཆོས་ཐམས་ཅད་རྟོག་པས་བཏགས་ཙམ་ཡིན་ཀྱང་ཡོད་མེད་བཟང་ངན་ལ་སོགས་པའི་རྣམ་བཞག་ཤིན་ཏུ་རུང་བའི་ཕྱིར། དེར་ཐལ། བུམ་པ་ནི་རང་གི་ངོས་ནས་གྲུབ་པ་ཡོད་མེད་བཙལ་ན་མེད་ཀྱང་དེ་ལྟར་མ་བཙལ་བར་འཇིག་རྟེན་ཡོངས་ཀྱི་སྣང་ངོར་ཡོད་མེད་དང་སྣང་ཙམ་དུ་ཆུ་སྐྱོར་བའི་བྱ་བ་བྱེད་ནུས་མི་ནུས་དང༌། བློ་ལ་རང་དུས་སྐད་ཅིག་གཉིས་པའི་དུས་སུ་མི་སྡོད་པར་སྣང་རྒྱུ་ཞིག་ཏུ་གནས་མི་གནས་དང༌། རང་རྒྱུ་གང་ལས་སྐྱེས་པ་སོགས་དཔྱད་ན་རང་གི་ངོ་བོ་ཡོད་པ་དང༌། ཆུ་སྐྱོར་བའི་དོན་བྱེད་པ་དང་མི་རྟག་པ་དང༌། རྒྱུ་ལས་སྐྱེས་པ་ཡིན་པ་སོགས་བུམ་པ་སྣང་ཙམ་དེ་ལ་དཔྱོད་པའི་བློ་སྤྱི་ལ་འཆར་རྒྱུ་ཡོད་པ་དང༌། བུམ་པ་རང་གི་ངོ་བོས་གྲུབ་པ་ལ་མི་དཔྱོད་པར་སྣང་ཙམ་གྱི་བུམ་པ་ལ་སྣང་ཙམ་དུ་རང་དུས་གཉིས་པར་མི་སྡོད་པར་འཆར་བ་དང༌། རི་བོང་གི་རྭ་རི་བོང་གི་མགོ་ལ་ཡོད་པ་ནི་མ་བརྟགས་ཉམས་དགའི་བློ་རྟོག་མེད་ལ་མི་འཆར་བ་དང༌། སྨིག་རྒྱུའི་ཆུ་ཆུར་གྲུབ་པས་ཆུའི་དོན་བྱེད་པར་སྐྱེས་བུ་རྣམས་ལ་རྒྱུན་དུ་སྣང་བ་ཞིག་བྱུང་ན་ནི་དེ་ལ་ཡང་ཆུ་ཞེས་འཇོག་རིགས་ཀྱང་དེ་ལྟར་མི་སྣང་བ་ལ་སོགས་པའི་ཕྱིར་ཏེ། ནས་གྲོ་གཉིས་རྒྱུ་འབྲས་དང་བཅས་པ་ལ་སོགས་པ་ནི་རྟོག་པས་བཏགས་ཙམ་ལས་ཅུད་ཟད་ཀྱང་མེད་ཀྱང་བློ་སྤྱི་ལ་ནས་ལས་གྲོ་དང་གྲོ་ལས་ནས་འབྱུང་བ་མི་སྣང་བས་དེ་གཉིས་རྒྱུ་འབྲས་མིན་པ་དང༌། ཚེ་སྔ་ཕྱིའི་སྣང་བ་རྣམས་འཆར་ནུས་པའི་བློ་ངོར་དགེ་བར་སྣང་བའི་རྒྱུ་ལས་བདེ་བར་སྣང་བའི་འབྲས་བུ་འབྱུར་བར་སྣང་བའི་སྒོ་ནས་དེ་གཉིས་རྒྱུ་འབྲས་ཡིན་པ་དང༌། སྡིག་པ་ཡིན་པར་སྣང་བའི་རྒྱུ་ལས་བདེ་བ་ཡིན་པར་སྣང་བའི་འབྲས་བུ་མི་འབྱུང་བར་སྣང་བའི་སྒོ་ནས་དེ་གཉིས་རྒྱུ་འབྲས་མིན་པར་བཞག་པ་སོགས་ལས་འབྲས་དང་འཁོར་འདས་ཀྱི་རྣམ་བཞག་དང༌། ཡོད་མེད་དང་ཡིན་མིན་སོགས་ཀྱི་རྣམ་བཞག་ཐམས་ཅད་ནི་རང་འཇོག་པའི་བློ་དེ་དོན་མཐུན་གྱི་བློ་ཡིན་པར་སྣང་རྒྱུའི་བློ་དེ་ལ་ཇི་ལྟར་སྣང་བའི་སྒོ་ནས་འཇོག་རུང་བའི་ཕྱིར་རོ། །འདིར་རང་རྒྱུད་པས་ཆོས་རྣམས་རྟོག་པས་བཏགས་ཙམ་མིན་པར་འདོད་པ་དང༌། ཐལ་འགྱུར་བས་ཡིན་པར་འདོད་པ་ནི། རང་བཞིན་གྱིས་མེད་ན་མེད་དགོས་པར་འདོད་མི་འདོད་ཀྱི་དབང་གིས་ཡིན་ཏེ། རྟོག་པས་བཏགས་ཙམ་གྱི་དོན་ནི་རྟོག་པས་འཛིན་སྟངས་ལ་བཟུང་བ་ལ་བྱེད་པ་མ་ཡིན་གྱི་རྟོག་པ་ལ་ཕར་སྣང་ཙམ་ལ་བྱེད་པ་ཡིན་ལ། རང་རྒྱུད་པས་བུམ་པ་སོགས་རང་གི་ངོས་ནས་མ་གྲུབ་པར་རྟོག་པ་ལ་ཕར་སྣང་བ་ཙམ་ཡིན་ན་བུམ་པ་མ་ཡིན་པ་དག་ལ་བུམ་པར་སྣང་བ་ཙམ་གྱིས་ཀྱང་བུམ་པའི་དོན་བྱེད་དགོས་ཀྱང་མི་ནུས་པ་དང༌། བུམ་པ་བདེན་འཛིན་གྱི་རྟོག་པ་ལ་གང་སྣང་བ་ཐམས་ཅད་བདེན་གྲུབ་ཁོ་ནར་སྣང་ལ། བདེན་གྲུབ་ཀྱི་ཆོས་ནི་ཅུང་ཟད་ཀྱང་མེད་པར་འདོད། ཐལ་འགྱུར་བས་ནི་རྟོག་པ་ཡིན་ན་ཁྱོད་ཀྱིས་ཆོས་གཅིག་སྣང་བའི་སྒོ་ནས་འཇོག་ཐུབ་པས་ཁྱབ་སྟེ། བུམ་པ་བདེན་འཛིན་གྱི་རྟོག་པ་དེས་བདེན་གྲུབ་འཇོག་མི་ཐུབ་ཀྱང་བུམ་པ་བདེན་སྣང་གི་ཆ་ཙམ་དང༌། བུམ་པ་ཡུལ་དུ་གྲུབ་པའི་ཆ་ཙམ་དང༌། བུམ་པ་དེ་རང་ཐ་དད་པའི་ཆ་ཙམ་སྣང་བའི་ཆ་ལ་མ་འཁྲུལ་བས་དེས་དེ་དག་འཇོག་ཐུབ་པའོ། །སྤྱིར་བདེན་འཛིན་འཛིན་སྟངས་དང་སྣང་ཡུལ་གཉིས་ཀ་ལ་འཁྲུལ་བ་ཡིན་ནོ། །རང་རྒྱུད་པའི་བློ་གནོད་མེད་ནི་བུམ་འཛིན་མངོན་སུམ་ལ་བུམ་པ་རྟག་པར་སྣང་བ་དང༌། བུམ་འཛིན་རྟོག་མེད་ལ་བུམ་པའི་དོན་སྤྱི་བུམ་པར་སྣང་ཡང་འཛིན་སྟངས་ཀྱི་ཡུལ་བུམ་པ་ལ་མ་འཁྲུལ་བའི་ཤེས་པ་ཡིན་པ་ལྟ་བུ་རང་གི་འཛིན་སྟངས་ཀྱི་ཡུལ་ལ་མ་འཁྲུལ་བའི་ཤེས་པ་དེ་ཡིན་ཏེ། འཛིན་སྟངས་ཀྱི་ཡུལ་ཡོད་པའི་ཤེས་པ་ཡིན་ན་ཡོད་པའི་ཡུལ་ལ་རང་ངོས་ནས་གྲུབ་པའི་ཆོས་ཡིན་པས་ཁྱབ་ཕྱིར་རང་མཚན་གྱིས་གྲུབ་པ་ལ་ཚད་མར་སོང་བའི་ཤེས་པ་ཡིན་པས་ཁྱབ་པའི་ཕྱིར་རོ། །འཛིན་སྟངས་ཀྱི་ཡུལ་ལ་འཁྲུལ་བའི་ཤེས་པ་རྣམས་ནི་ཆ་གང་ལ་ཡང་ཚད་མར་འགྲོ་བ་མི་སྲིད་པས་དེས་ཡུལ་གང་ཡང་ཡོད་པར་འཇོག་མི་ནུས་སོ། །བུམ་པ་བདེན་འཛིན་རྟོག་པ་ལ་སྣང་བ་ཙམ་གྱིས་བུམ་པ་དེ་ཡོད་པར་འཇོག་ཐུབ་ན། དེ་ལ་སྣང་བའི་བུམ་པ་དེ་བཙལ་བས་རྙེད་དགོས། འཚོལ་ཚེ་ཇི་ལྟར་དཔྱད་ཀྱང་བདེན་འཛིན་ལ་སྣང་བའི་བུམ་པ་དེའི་ངོས་ན་ནི་གོང་དུ་བཤད་པ་ལྟར་བདེན་གྲུབ་ཀྱི་བུམ་པ་ལས་གཞན་གང་ཡང་མ་དམིགས་པས་བདེན་འཛིན་ལ་སྣང་བའི་བུམ་པ་དེ་གདགས་གཞིའི་ངོས་ནས་ཅུང་ཟད་མི་རྙེད་པས་དེ་ལ་བུམ་པ་དེ་སྣང་བས་བུམ་པ་འཇོག་མི་ནུས་པ་བཞིན་དུ་ལོག་ཤེས་ཐམས་ཅད་ཀྱང་འདྲའོ་བསམ་པ་ཡིན་ནོ། །ཐལ་འགྱུར་བས་ནི་དེ་ལྟར་བཙལ་ན་བདེན་འཛིན་ལ་སྣང་རྒྱུའི་བུམ་པ་མ་ཟད་ཁྱོད་རང་གི་བུམ་འཛིན་ཚད་མ་ལ་སྣང་བའི་བུམ་པ་ཡང་ཅུང་ཟད་ཀྱང་མི་རྙེད་པས་དེ་གཉིས་རང་ངོས་ནས་མེད་པ་ལ་ཡང་འདྲ་མཉམ་ཡིན་ཞིང༌། བུམ་འཛིན་ཚད་མ་ཡང་རང་གི་འཛིན་སྟངས་ཀྱི་ཡུལ་གྱི་བུམ་པ་ལ་ནི་འཁྲུལ་བ་ཁོ་ན་ཡིན་ཀྱང་དེས་བུམ་པ་བཟུང་བའི་སྒོ་ནས་ཡོད་པར་འཇོག་ཐུབ་ན། བུམ་པ་བདེན་འཛིན་ཀྱང་བུམ་པ་བདེན་གྲུབ་ལ་འཁྲུལ་ཡང་དེ་ལ་བུམ་པ་སྣང་བའི་སྒོ་ནས་ཀྱང་བུམ་པ་འཇོག་ཅིའི་ཕྱིར་མི་ཐུབ་སྟེ་ཐུབ་པར་ཐལ། ཆོས་ཐམས་ཅད་བློ་ལ་སྣང་ཙམ་གྱིས་མ་བཞག་ན་གཏན་མི་རྙེད་པ་གང་ཞིག སྣང་ཙམ་གྱིས་འཇོག་ན་ནི་ལོག་ཤེས་ལ་བུམ་པ་སྣང་ན་ཡང་བུམ་པ་སྣང་བ་ཡིན། ཚད་མ་ལ་བུམ་པ་སྣང་ན་ཡང་བུམ་པ་སྣང་བ་ཡིན་པའི་ཕྱིར། སེམས་ཅན་གྱི་ས་ལ་ཆོས་ཐམས་ཅད་ཡོད་པར་འཇོག་བྱེད་ལ་འཁྲུལ་ཤེས་ཁོ་ན་ལས་མེད་དོ། །བུམ་པ་བདེན་འཛིན་དེ་བུམ་པ་བདེན་གྲུབ་ལ་ལོག་ཤེས་དང༌། བུམ་པ་སྣང་བ་ལ་ཚད་མ་ཡིན་ཏེ། ཁྱོད་ཀྱིས་བུམ་པ་བདེན་པར་མེད་ཀྱང་བདེན་པར་བཟུང་བ་གང་ཞིག ཁྱོད་ལ་བུམ་པའི་ཆ་སྣང་བ་ཙམ་གྱི་བུམ་པ་ཡོད་པའི་ཕྱིར། ཞེས་བཞེད་དོ།། གཉིས་པ་དེའི་བཟློག་ཟླ་བདེན་པར་གྲུབ་པའི་ཚད་དུ་བསྟན་པ།གཉིས་པ་དེའི་བཟློག་ཟླ་བདེན་པར་གྲུབ་པའི་ཚད་དུ་བསྟན་པ་ནི། གལ་ཏེ་མིང་གིས་བཏགས་ཙམ་གྱི་བཟློག་ཟླ་མིང་གི་ཐ་སྙད་ཀྱི་དབང་གིས་བཞག་པ་ཙམ་མ་ཡིན་པའི་ཡོད་པ་དེ། བདེན་པར་གྲུབ་ཚད་ཡིན་ཏེ། བློ་ལ་ཕར་སྣང་ཙམ་མ་ཡིན་པར་རང་གི་ངོས་ནས་གྲུབ་པ་དེ། དོན་དམ་དཔྱོད་བྱེད་ཀྱི་རྟགས་ཀྱིས་དགག་བྱ་དང༌། རང་ངོས་ནས་གྲུབ་པ་དེ། ཆོས་དང་གང་ཟག་གཉིས་སུ་ཕྱེ་བའི་ཆོས་ཀྱི་སྟེང་དུ་གྲུབ་པ་ཆོས་ཀྱི་བདག་དང༌། གང་ཟག་གི་སྟེང་དུ་གྲུབ་པ་གང་ཟག་གི་བདག་དང༌། དེ་ཁྱད་གཞི་ཆོས་ཀྱི་སྟེང་དུ་མེད་པ་ཆོས་ཀྱི་བདག་མེད་ཕྲ་མོ་དང༌། གང་ཟག་གི་སྟེང་དུ་མེད་པ་གང་ཟག་གི་བདག་མེད་ཕྲ་མོ་ཡིན་པའི་ཕྱིར། དེར་ཐལ། ཆོས་ཐམས་ཅད་རང་གི་མིང་དང་རྟོག་པས་ཕར་བཏགས་ཙམ་ལས་རང་གི་ངོ་བོས་མེད་པ་དེ་རང་གི་གནས་ལུགས་མཐར་ཐུག་ཡིན་པའི་ཕྱིར། དེར་ཐལ། གནས་ལུགས་མཐར་ཐུག་གི་བཟློག་ཟླར་ཞེན་པ་བདེན་འཛིན་ཡིན་པ་གང་ཞིག ཆོས་རྣམས་མིང་གིས་བཏགས་ཙམ་མ་ཡིན་པར་རང་ངོས་ནས་གྲུབ་པར་ཞེན་ནས་བདེན་འཛིན་དུ་འགྱུར་བའི་ཕྱིར། ཡབ་སྲས་མཇལ་བའི་མདོ་ལས། རྒྱལ་པོ་ཆེན་པོ་ཆོས་རྣམས་རེ་རེ་ནས་རང་གི་ངོ་བོས་གྲུབ་པ་ཡོད་མེད་བཙལ་ན་ཐ་སྙད་ཅེས་པ་སྒྲ་རྟོག་གིས་ཕར་བཏགས་པ་ཙམ་མ་གཏོགས་རང་གི་ངོ་བོས་གྲུབ་པའི་མིག་གི་སྐྱེ་མཆེད་མི་དམིགས་སོ། ། ཞེས་སོགས་དང༌། དེ་ཉིད་ལས། དེ་ལྟར་ཆོས་ཐམས་ཅད་ཕར་བཏགས་ཙམ་མ་ཡིན་པར་གྲུབ་པ་གཅིག་མ་དམིགས་ན་རང་གི་ངོས་ནས་གྲུབ་པའི་ལུང་སྟོན་པ་པོ་སངས་རྒྱས་ནི་གང༌། ལུང་བསྟན་བྱ་བྱང་ཆུབ་སེམས་དཔའ་ནི་གང༌། སངས་རྒྱས་ཀྱིས་བྱང་ཆུབ་སེམས་དཔའ་རྣམས་ལུང་བསྟན་པ་ནི་གང་གི་ཡོད། སངས་རྒྱས་བྱང་སེམས་ཀྱི་གདགས་གཞིའི་གཟུགས་ནི་གཟུགས་ཀྱི་ངོ་བོ་ཉིད་ཀྱིས་སྟོང་བ་ནས་དེ་ལྟར་རྣམ་པར་ཤེས་པའི་བར་དུའོ། །ཞེས་དང༌། དེ་བཞིན་དུ་ཆོས་འདི་དག་ནི་ཐ་སྙད་དེ་རྟོག་པས་བཏགས་ཙམ། མིང་གིས་བཏགས་ཙམ། བརྡ་སྟེ་རྟོག་ངོར་སྣང་ཙམ། ཀུན་རྫོབ་སྟེ་རང་བཞིན་གྱིས་གྲུབ་པར་སྣང་ཡང་རང་བཞིན་གྱིས་སྟོང་བའི་རྫུན་པ་ཙམ། ཚིག་གིས་བརྗོད་བ་ཙམ། བུམ་པའོ་ཀ་བའོ་ཞེས་སོགས་སུ་མིང་བཏགས་པ་ཙམ་སྟེ། ཚུལ་དེ་ལ་མཁས་པ་རྣམས་ཀྱིས་མངོན་པར་ཏེ་དགའ་ཞིང་དད་པར་བྱའི་མི་འཕྱའོ།། ཞེས་གསུངས་པའི་ཕྱིར་རོ། ། གསུམ་པ་མིང་བརྡས་བཏགས་པ་ཙམ་ལ་བྱ་བྱེད་ཐམས་ཅད་རུང་བར་བསྟན་པ།གསུམ་པ་མིང་བརྡས་བཏགས་པ་ཙམ་ལ་བྱ་བྱེད་ཐམས་ཅད་རུང་བར་བསྟན་པ་ནི། ཆོས་ཐམས་ཅད་མིང་རྐྱང་བཏགས་ཡོད་ཙམ་ལས་མེད་ཀྱང་འཁོར་འདས་ཀྱི་བྱ་བྱེད་བཟང་ངན་ཐམས་ཅད་དུ་ཐམས་ཅད་རུང་སྟེ། ཆོས་རྣམས་རང་ངོས་ནས་གྲུབ་པ་མེད་པར་ངེས་པས་རྗེས་སུ་ཡང་རང་ངོས་ནས་གྲུབ་མ་གྲུབ་མི་འཚོལ་བར་བློ་ལ་སྣང་ཙམ་འདི་ལ་སྣང་བ་ལྟར་རུང་མི་རུང་གི་ཁྱད་པར་ཡང་མ་བརྟགས་པའི་བློ་ངོར་འཆར་བ་ནི་ཡོད་ལ།ཤར་བ་ལྟར་དུ་རྣམ་བཞག་ཐམས་ཅད་བྱེད་དུ་ཡོད་པའི་ཕྱིར། དེར་ཐལ། ཤེས་བྱའི་ཆོས་འདི་དག་ཐམས་ཅད་ནི་ཐག་ཁྲ་ལ་སྦྲུལ་དུ་སྣང་བ་དང༌། སྤྱོད་འཇུག་ལས། དབྱིབས་སུ་བཀོད་ལུགས་མི་འདྲ་བའི་ཁྱད་པར་གྱིས། ཐོ་ཡོར་ལ་ནི་མིར་སྣང་བའི་བློ་སྐྱེ་བ་བཞིན་ཡིན་ནོ། །གོང་གི་ལུང་དེ་དག་ནི་འབྲུ་འགྲེལ་དང་བཅས་ཏེ་བཀོད་པའོ། ། སྨྲས་པ། མཐའ་བྲལ་དབུ་མ་ཆེན་པོའི་ཤིང་རྟ་ཆེ། །རིགས་ལམ་གསེར་གྱི་ལམ་སྲོལ་ལས་དྲངས་ནས། །ཚུལ་བཞིན་གསལ་མཛད་བསྟན་པའི་མིག་གཅིག་པུ། །རྒྱལ་བ་གཉིས་པའི་བཞེད་དགོངས་ཅི་བཞིན་སྨྲས། །མདོ་སྨད་ཞིང་དུ་ངག་དབང་གྲགས་པ་ཡིས། །ཆོས་སྡེ་བརྒྱ་དང་རྩ་བརྒྱད་ཕྱག་བཏབ་པའི། །ཐོག་མའི་ཆོས་སྡེ་ཨ་འདུས་ཞེས་གྲགས་པའི། །ཕུན་སུམ་ཚོགས་པའི་གནས་མཆོག་ཡིད་དགའ་གནས། །གསེར་གྱི་ཏོག་རྒྱན་དབྱིངས་སུ་མཐོ་བ་ཡི། །འདུ་ཁང་ཆེན་པོ་སྲིད་ན་མཛེས་པ་དེའི། །དགའ་སྟོན་བཀྲ་ཤིས་སྟོན་མོ་བྱེ་བར་སྡེབ། །ཤིག་ཚིག་མུ་ཏིག་འོད་དཀར་ཕྲེང་བ་བསྟར། །སྐྱེ་འགྲོའི་རྒུད་པ་ལྷག་མེད་ཞི་ཕྱིར་དུ། །བདེ་སྐྱིད་འཁྱིལ་བའི་གནས་འདིར་བདེ་ལེགས་ཤོག །ཅེས་པ་འདི་ནི་ཨ་འདུས་དགོན་དགའ་ལྡན་དར་རྒྱས་གླིང་གིས་བསྐུལ་ངོར་རྒྱལ་ཁམས་པ་དངོས་གྲུབ་དཔལ་གྱིས་བྲིས་པའོ། ། དཔལ་ཡུལ་དགོན་ཆེན་གྱི་ནང་བསྟན་མཁས་པའི་བགྲོ་གླེང་ཐེངས་བདུན་པའི་སྐབས་སུ་གནང་བའི་་བཀའ་སློབ།དཔལ་ཡུལ་དགོན་ཆེན་གྱི་ནང་བསྟན་མཁས་པའི་བགྲོ་གླེང་ཐེངས་བདུན་པའི་སྐབས་སུ་གནང་བའི་བཀའ་སློབ། ཐབས་མཁས་ཐུགས་རྗེས་ཤཱཀྱའི་རིགས་སུ་འཁྲུངས། །གཞན་གྱིས་མི་ཐུབ་བདུད་ཀྱི་དཔུང་འཇོམས་པ། །གསེར་གྱི་ལྷུན་པོ་ལྟ་བུར་མཛེས་པའི་སྐུ། །ཤཱཀྱའི་རྒྱལ་པོ་དེ་ལ་ཕྱག་འཚལ་ལོ། །ཆོས་འཁོར་གསུམ་གྱི་དགོངས་པ་ཇི་བཞིན་མཁྱེན། །རྒྱུད་སྡེ་བཞི་ཡི་དེ་ཉིད་ཐུགས་སུ་ཆུད། །འགྲོ་བ་ཀུན་ལ་མ་ནོར་ལམ་སྟོན་པ། །ཀུན་མཁྱེན་ཆོས་ཀྱི་རྗེ་ལ་གསོལ་བ་འདེབས། །དེ་རིང་འདིར་སྔ་འགྱུར་རྙིང་མའི་གདན་ས་དྲུག་གི་ཡ་གྱལ་དཔལ་ཡུལ་དགོན་ཆེན་གྱི་ནང་བསྟན་མཁས་པའི་བགྲོ་གླེང་ཐེངས་བདུན་པའི་སྐབས་འདིར། བདག་གིས་ཡིན་ན་བགྲོ་གླེང་བཀོད་སྒྲིག་པས་བཀོད་སྒྲིག་གནང་བ་བཞིན་གཞན་སྟོང་དབུ་མ་ཆེན་པོའི་ལྟ་གྲུབ་ཀྱི་ཕྱོགས་ནས་ཚིག་ཁ་ཤས་ཤིག་ཞུ་རྒྱུ་དེ་ཡིན། དེ་ཡིན་ན་དེ་རིང་འདི་ནས་རང་གིས་ཞུ་བསམ་རྒྱུ་གཙོ་བོ་དྲང་ངེས་ལས་བརྩམས་ཏེ་ཚིག་ཁ་ཤས་ཞུ་བསམ་པ་ཡིན། དེ་ཡིན་ན་དང་པོ་དྲང་ངེས་འབྱེད་ཚུལ་དང༌། དྲང་དོན་དང་ངེས་དོན་གྱི་མདོའི་དགོངས་དོན་བདེན་པ་གཉིས་ཀྱི་རྣམ་བཞག་བཤད་པ་དང་རྩ་བའི་ས་བཅད་དམ་སྡེ་ཚན་གཉིས་ལྟ་བུའི་སྟེང་ནས་ཞུ་རྒྱུ་དེ་ཡིན། དེ་ཡང་དང་པོ་དྲང་ངེས་འབྱེད་པ་དེ་གཞན་སྟོང་དབུ་མ་ཆེན་པོའི་ལྟ་གྲུབ་གཏན་ལ་འབེབས་པའི་སྐབས་སུ་དྲང་ངེས་འབྱེད་ཡོང་དུས་བདག་ཅག་གི་སྟོན་པ་ཐུགས་རྗེ་ཅན་གྱིས་ཆོས་འཁོར་རིམ་པ་གསུམ་གསུངས་པའི་ནང་ནས་བཀའ་འཁོར་ལོ་ཐ་མ་ངེས་དོན་མདོ་བཅུ། སྙིང་པོའི་མདོ་བཅུ་ལ་སོགས་པ་དེ་ངེས་དོན་མཐར་ཐུག་གི་མདོ་ཡིན་པ་དེ་སངས་རྒྱས་བཅོམ་ལྡན་འདས་རང་གི་དགོངས་པ་རང་གིས་འགྲེལ་བའི་མདོ་སྡེ་དགོངས་པ་ངེས་འགྲེལ་ལ་བརྟེན་ནས་བཀྲལ་བ་རེད། སྤྱིར་བཏང་གཞན་སྟོང་དབུ་མ་ཆེན་པོའི་རང་ལུགས་ལས་བརྩམས་ཏེ་བསམ་བློ་བཏང་ན་འཁོར་ལོ་ཐོག་མཐའ་བར་གསུམ་གྱི་དགོངས་དོན་མཐར་ཐུག་དེ་གཞན་སྟོང་དབུ་མ་ཆེན་པོའི་ལྟ་གྲུབ་ཏུ་གནས་པ་རེད་ཅེས་གསུང་གི་ཡོད་པ་རེད། ཡིན་ན་ཡང་འཁོར་ལོ་དང་པོའི་སྐབས་སུ་མི་གསལ་བའི་ཚུལ་གྱིས་བསྟན་པ་དང༌། བར་བར་ཅུང་ཟད་གསལ་བའི་ཚུལ་གྱིས་བསྟན་པ་དང༌། ཐ་མར་ལེགས་པ་རྣམ་པར་ཕྱེས་ནས་ཐང་མར་བརྡལ་བའི་ཚུལ་གྱིས་བསྟན་པར་གསུངས་ཡོད་པ་རེད། དེ་ཡང་འཁོར་ལོ་ཐ་མ་ངེས་དོན་མཐར་ཐུག་གི་མདོ་ཡིན་པ་དེ། སངས་རྒྱས་བཅོམ་ལྡན་འདས་རང་གི་དགོངས་པ་རང་གིས་འགྲེལ་བའི་མདོ་སྡེ་དགོངས་པ་ངེས་འགྲེལ་དང༌། མྱང་འདས་ཆེན་པོའི་མདོ། སོར་ཕྲེང་གི་མདོ། བློ་གྲོས་མི་ཟད་པའི་མདོ། གཟུངས་རྒྱལ་གྱིས་ཞུས་པའི་མདོ་སོགས་ཀྱི་སྐབས་སུ་དྲང་ངེས་བཤད་པ་དེ་དགོངས་པ་གཅིག་དང་དབྱངས་གཅིག་གིས་འཁོར་ལོ་ཐ་མ་ངེས་དོན་དུ་བཀྲལ་ཡོད་པ་དེ་འདྲ་ཞིག་རེད། དེ་འདྲ་ཡིན་དུས་སངས་རྒྱས་བཅོམ་ལྡན་འདས་ལ་དོན་དམ་ཡང་དག་འཕགས་ཀྱིས། འཁོར་ལོ་དང་པོའི་སྐབས་སུ་གཟུགས་ནས་འཕགས་ལམ་ཡན་ལག་བར་གྱི་ཆོས་ཐམས་ཅད་རང་གི་མཚན་ཉིད་ཀྱི་གྲུབ་གྲུབ་ཅེས་པ་ལྟ་བུར་བཀའ་བསྩལ་བ། དེ་ནས་འཁོར་ལོ་བར་བའི་སྐབས་སུ་གཟུགས་ནས་རྣམ་མཁྱེན་གྱི་བར་ཆོས་ཐམས་ཅད་འགྲེས་རྐང་བརྒྱ་རྩ་བརྒྱད་ངོ་བོ་ཉིད་མེད་པར་གསུངས་པས་སྒྲས་ཟིན་ལྟར་ན་འགལ་བར་ལྟར་སྣང་ན་ཡང༌། སངས་རྒྱས་བཅོམ་ལྡན་འདས་ནི་གཟིགས་པ་རྣམ་པར་དག་པའི་མཐར་སོན་པ་ཡིན་པས། དོན་ལ་འགལ་བ་མེད་པའི་རྒྱུ་མཚན་གྱིས་འཁོར་ལོ་བར་པའི་སྐབས་སུ་ཆོས་ཐམས་ཅད་རང་གི་ངོ་བོ་ཉིད་མེད་པར་གསུངས་པ་ཅི་ལ་དགོངས་ནས་གསུངས་པ་ཡིན་ཞེ་ན། ཞེས་དོགས་པ་སྐྱེས་བའི་ཚུལ་གནང་སྟེ་དྲི་བ་ཞུས་པའི་ལན་དུ། མདོ་སྡེ་དགོངས་པ་ངེས་འགྲེལ་གྱི་སྐབས་སུ། ངས་ངོ་བོ་ཉིད་མེད་པར་གསུངས་པ་འདི་ལྟ་སྟེ། དོན་དམ་ཡང་དག་འཕགས། ངས་ཆོས་ཐམས་ཅད་ངོ་བོ་ཉིད་མེད་པར་གསུངས་པ་ནི་ངོ་བོ་ཉིད་མེད་པ་གསུམ་ལ་དགོངས་ནས། ངས་ཆོས་རྣམས་ཀྱི་ངོ་བོ་ཉིད་མེད་པ་ཉིད་རྣམ་པ་གསུམ་པོ་འདི་ལྟ་སྟེ། མཚན་ཉིད་ངོ་བོ་ཉིད་མེད་པ་ཉིད་དང༌། སྐྱེ་བ་ངོ་བོ་ཉིད་མེད་པ་ཉིད་དང༌། དོན་དམ་པ་ངོ་བོ་ཉིད་མེད་པ་ཉིད་ལ་དགོངས་ནས་ཆོས་ཐམས་ཅད་ངོ་བོ་ཉིད་མེད་པའོ་ཞེས་བསྟན་ཏོ། །ཞེས་མདོར་བསྟན་ནས་དེའི་དོན་རྒྱས་པར་བཤད་པ་ལ། མདོ་སྡེ་དགོངས་པ་ངེས་འགྲེལ་ལས། དོན་དམ་ཡང་དག་འཕགས་དེ་ལ་ཆོས་རྣམས་ཀྱི་མཚན་ཉིད་ངོ་བོ་ཉིད་མེད་པ་གང་ཞེ་ན། ཀུན་བཏགས་པའི་མཚན་ཉིད་གང་ཡིན་པའོ།། དེ་ཅིའི་ཕྱིར་ཞེ་ན། འདི་ལྟར་དེ་ནི་མིང་དང་བརྡས་རྣམ་པར་བཞག་པའི་མཚན་ཉིད་ཡིན་གྱི། རང་གི་མཚན་ཉིད་ཀྱིས་རྣམ་པར་གནས་པ་ནི་མ་ཡིན་པས་དེའི་ཕྱིར་དེ་ནི་མཚན་ཉིད་ངོ་བོ་ཉིད་མེད་པ་ཉིད་ཅེས་བྱའོ། །དོན་དམ་ཡང་དག་འཕགས་ཆོས་རྣམས་ཀྱི་སྐྱེ་བ་ངོ་བོ་ཉིད་མེད་པ་གང་ཞེ་ན། ཆོས་རྣམས་ཀྱི་གཞན་གྱི་དབང་གི་མཚན་ཉིད་གང་ཡིན་པའོ། །དེ་ཅིའི་ཕྱིར་ཞེ་ན། འདི་ལྟར་དེ་ནི་རྐྱེན་གཞན་གྱི་སྟོབས་ཀྱིས་བྱུང་བ་ཡིན་གྱི། བདག་ཉིད་ཀྱིས་ནི་མ་ཡིན་པས་དེའི་ཕྱིར་སྐྱེ་བ་ངོ་བོ་ཉིད་མེད་པ་ཉིད་ཅེས་བྱའོ། །དོན་དམ་ཡང་དག་འཕགས་ཆོས་རྣམས་ཀྱི་དོན་དམ་པ་ངོ་བོ་ཉིད་མེད་པ་གང་ཞེ་ན། རྟེན་ཅིང་འབྲེལ་བར་འབྱུང་བའི་ཆོས་གང་དག་སྐྱེ་བ་ངོ་བོ་ཉིད་ཀྱིས་ངོ་བོ་ཉིད་མེད་པ་དེ་དག་ནི་དོན་དམ་པའི་ངོ་བོ་ཉིད་མེད་པ་ཉིད་ཀྱིས་ངོ་བོ་ཉིད་མེད་པ་ཡང་ཡིན་ནོ། །དེ་ཅི་ཕྱིར་ཞེ་ན། དོན་དམ་ཡང་དག་འཕགས་ཆོས་རྣམས་ལ་རྣམ་པར་དག་པའི་དམིགས་པ་གང་ཡིན་པ་དེ་ནི་ངས་དོན་དམ་པ་ཡིན་པར་ཡོངས་སུ་བསྟན་ལ། གཞན་གྱི་དབང་གི་མཚན་ཉིད་དེ་ནི་རྣམ་པར་དག་པའི་དམིགས་པ་མ་ཡིན་པས་དེའི་ཕྱིར་དོན་དམ་པའི་ངོ་བོ་ཉིད་མེད་པ་ཉིད་ཅེས་བྱའོ། །དོན་དམ་ཡང་དག་འཕགས་གཞན་ཡང་ཆོས་རྣམས་ཀྱི་ཡོངས་སུ་གྲུབ་པའི་མཚན་ཉིད་གང་ཡིན་པ་དེ་ཡང་དོན་དམ་པ་ངོ་བོ་ཉིད་མེད་པ་ཉིད་ཅེས་བྱའོ། །ཞེས་སོགས་ཀྱིས་ཤེར་ཕྱིན་གྱི་མདོར་ཆོས་ཐམས་ཅད་ངོ་བོ་ཉིད་མེད་པར་བསྟན་པ་ནི། ངོ་བོ་ཉིད་མེད་པ་རྣམ་པ་གསུམ་ལ་དགོངས་ནས་གསུངས་པ་དེ་མདོ་སྡེ་དགོངས་པ་ངེས་འགྲེལ་ལས་གསལ་ཞིང་རྒྱས་པར་གསུངས་ཡོད་པ་རེད། དེ་ལ་བརྟེན་ནས་གཞན་སྟོང་དབུ་མ་ཆེན་པོའི་དགོངས་པ་དེ་དེ་ལ་བརྟེན་ནས་བཀྲལ་དགོས་པ་ཆགས་འདུག་ཡོད་པ་རེད། དེའི་རྒྱུ་མཚན་གྱིས་དེ་ནས་གཞན་སྟོང་དབུ་མ་ཆེན་པོའི་རང་ལུགས་ལ་བསམ་བློ་བཏང་ན་ངེས་དོན་གྱི་མདོ་བཅུ་དང༌། སྙིང་པོའི་མདོ་བཅུ། སྔགས་རྒྱུད་སྡེ་རྣམ་པ་བཞི། དེའི་ནང་གི་སྔགས་བླ་མེད་ཀྱི་རྒྱུད་སྡེ། དེའི་ནང་ནས་ལྷག་པར་དུ་དཔལ་དུས་ཀྱི་འཁོར་ལོའི་རྒྱུད། དེའི་དགོངས་འགྲེལ་སོགས་སེམས་འགྲེལ་སྐོར་གསུམ་གྱི་མན་ངག་ལ་བརྟེན་ནས་གཞན་སྟོང་དབུ་མ་ཆེན་པོའི་ལྟ་གྲུབ་དེ་བཀྲལ་བ་ཞིག་རེད། དེའི་རྒྱུ་མཚན་གྱིས་སངས་རྒྱས་བཅོམ་ལྡན་འདས་ཀྱིས་བཀའ་འཁོར་ལོ་ཐ་མ་དང༌། སྔགས་རྒྱུད་སྡེ་བཞིའི་དགོངས་དོན་དེ་གཞན་སྟོང་དབུ་མ་ཆེན་པོའི་ལྟ་གྲུབ་ཏུ་གནས་ཡོད་པར་ངེས་པར་བཀྲལ་བའི་སྟེང་ནས་དེའི་དགོངས་འགྲེལ་གྱི་མཁན་པོ་ལ་བསམ་བློ་བཏང་ན། དཔལ་མགོན་འཕགས་པ་ཀླུ་སྒྲུབ་ཀྱིས། དབུ་མ་རིགས་ཚོགས་དྲུག་གི་སྐབས་སུ་ཆོས་ཐམས་ཅད་བདེན་གྲུབ་ཀྱི་སྤྲོས་པ་དང་བྲལ་བ་དེ་གཏན་ལ་ཕབ་ནས། དེའི་རྗེས་སུ་འཁོར་ལོ་ཐ་མའི་སྐབས་སུ་ཆོས་རྣམས་ཀྱི་གནས་ལུགས་མཐར་ཐུག་རང་བཞིན་འོད་གསལ་བའི་ཡེ་ཤེས་དེ་རྩལ་བཏོན་བྱས་ནས་གཞན་སྟོང་དབུ་མ་ཆེན་པོའི་ལྟ་གྲུབ་དེ་ཆོས་དབྱིངས་བསྟོད་པ་སོགས་བསྟོད་ཚོགས་དྲུག་གི་སྐབས་སུ་གསུངས་པ་རེད། དེའི་རྒྱུ་མཚན་གྱིས་དཔལ་མགོན་འཕགས་པ་ཀླུ་སྒྲུབ་དེ་ཉིད་སངས་རྒྱས་བཅོམ་ལྡན་འདས་ཀྱིས་ལུང་གི་བསྟན་ཡོང་དུས། ཡོད་དང་མེད་པའི་ཕྱོགས་འཇིག་པ་ཞེས་པ་ལྟར་ཀླུ་སྒྲུབ་ཀྱིས་ཡོད་པའི་མཐའ་འཇིག་པར་བྱེད་པ་འཁོར་ལོ་བར་བའི་དགོངས་འགྲེལ་གཙོ་བོར་བྱས་ནས་དབུ་མ་རིགས་ཚོགས་དྲུག་ལ་སོགས་པ་མཛད་པ་ཡིན་པ་དེ་དང༌། མེད་པའི་མཐའ་འགོག་པར་བྱེད་པ་དབུ་མ་བསྟོད་ཚོགས་དྲུག་ལ་སོགས་པ་གསུངས་པ་ཡིན་པར་དབུ་མ་གཞན་སྟོང་བས་དགོངས་པ་བཀྲལ་གྱི་ཡོད་པ་རེད། ལྷག་པར་དུ་གཞན་སྟོང་དབུ་མ་ཆེན་པོའི་ལྟ་གྲུབ་འགྲེལ་བྱེད་ཀྱི་བསྟན་བཅོས་གཙོ་བོ་དེ་སངས་རྒྱས་བཅོམ་ལྡན་འདས་རང་གི་རྒྱལ་ཚབ་ཏུ་མངའ་གསོལ་བ་རྗེ་བཙུན་བྱམས་པ་མགོན་པོས་བྱམས་ཆོས་སྡེ་ལྔ་ལ་བརྟེན་ནས་གསུང་གི་ཡོད་པ་རེད། དེའི་ནང་གི་གཙོ་བོ་དེ་རྒྱུད་བླ་མ་ལ་བརྟེན་ནས་གཞན་སྟོང་དབུ་མ་ཆེན་པོའི་ལྟ་གྲུབ་དེ་བཀྲལ་གྱི་ཡོད་པ་རེད། མདོར་ན་དཔལ་མགོན་འཕགས་པ་ཀླུ་སྒྲུབ་དེ་ཡང་གཞན་སྟོང་དབུ་མའི་སྲོལ་འབྱེད་དང་དབུ་མ་སྤྱིའི་སློབ་དཔོན་ཞིག་བཞག་གི་ཡོད་པ་དེ་དང༌། དེ་ནང་བཞིན་དུ་འཕགས་པ་ཐོགས་མེད་ལ་མཚོན་པ་ཡིན་ན་འཕགས་པ་ཐོགས་མེད་ཀྱིས་རྒྱུད་བླ་ཐོགས་འགྲེལ་གྱི་སྐབས་སུ་གཞན་སྟོང་དབུ་མ་ཆེན་པོའི་ལྟ་གྲུབ་དེ་གསུང་གི་ཡོད་པ་དེ་འདྲ་རེད། དེ་ནང་བཞིན་དུ་གཞན་སྟོང་དབུ་མ་ཆེན་པོའི་གཞི་ཐུན་མོང་བའི་རྣམ་བཞག་དེ་ས་སྡེ་ལྔ་སྡོམ་རྣམ་གཉིས་ལ་སོགས་པའི་སྐབས་སུ་གསུང་གི་ཡོད་པ་དེ་འདྲ་ཞིག་རེད། དེའི་རྒྱུ་མཚན་གྱིས་མདོར་ན་ཀླུ་ཐོགས་རྣམ་གཉིས་གཞན་སྟོང་དབུ་མ་ཆེན་པོའི་ཤིང་རྟའི་སྲོལ་འབྱེད་ཡིན་པས་རྒྱ་གར་འཕགས་པའི་ཡུལ་དུ་རྒྱ་ཆེར་ཕྱེས་པ་ཡིན་པར་གཞན་སྟོང་དབུ་མ་ཆེན་པོའི་ལྟ་གྲུབ་ཁས་ལེན་པ་རྣམས་ཀྱིས་བཞག་གི་ཡོད་པ་རེད། དེ་ཡང་ཁ་ཅིག་གིས་འདོད་པ་ལྟར་ན་འཕགས་པ་ཐོགས་མེད་དེ་ཉིད་སེམས་ཙམ་པའི་སློབ་དཔོན་ཡིན་ཞེས་ལབ་མཁན་ཡོད་པ་རེད། ཡིན་ན་ཡང་རང་ལུགས་ལ་དེ་མ་ཡིན་པར་སེམས་ཙམ་པའི་སློབ་དཔོན་ནི། རྗེ་ཐམས་ཅད་མཁྱེན་པ་ཏཱ་ར་ནཱ་ཐའི་རྒྱ་གར་ཆོས་འབྱུང་གི་སྐབས་སུ་གསུངས་པ་ནང་བཞིན། དཔལ་མགོན་འཕགས་པ་ཀླུ་སྒྲུབ་མ་བྱོན་པའི་སྔ་རོལ་དུ་སེམས་ཙམ་པའི་སློབ་དཔོན་ཨ་བི་ཏར་ཀ་ལ་སོགས་པའི་སློབ་དཔོན་ལྔ་བརྒྱ་ལ་སོགས་པ་བྱུང་བ་དེ་དག་ཡིན་པར་འདོད་པ་རེད། རྗེ་ཐམས་ཅད་མཁྱེན་པ་ཏཱ་ར་ནཱ་ཐ་མ་བྱོན་པའི་སྔ་རོལ་ཏུ་སེམས་ཙམ་པའི་སློབ་དཔོན་དེ་དམིགས་བསལ་གྱིས་འཇོག་པའི་ལོ་རྒྱུས་ཀྱི་ཁུངས་གང་ཡང་མ་རྙེད་པ་ལྟ་བུ་བྱས་ནས་འཕགས་པ་ཐོགས་མེད་བཞག་པ་ལས་གཞན་བཞག་རྒྱུ་མ་རྙེད་པ་ཞིག་རེད། དེའི་རྗེས་སུ་རྗེ་བཙུན་ཐམས་ཅད་མཁྱེན་པ་ཏཱ་ར་ནཱ་ཐས་རྒྱ་གར་ཆོས་འབྱུང་བརྩམས་པའི་རྗེས་སུ་སྔ་འགྱུར་རྙིང་མའི་མཁས་དབང་ཆེན་པོ་ཀ་ཐོག་དགེ་རྩེ་མ་ཧཱ་པཎྜི་ཏའི་གྲུབ་མཐའ་རབ་གསལ་སྣང་བའི་ནང་ན་ཡང་རྗེ་ཐམས་ཅད་མཁྱེན་པ་ཏཱ་ར་ནཱ་ཐས་བཞེད་པ་ལྟར་གཅིག་པ་གཅིག་མཚུངས་བྱས་ནས་གསུང་གི་ཡོད་པ་རེད། དེར་མ་ཟད་དགེ་རྩེ་མ་ཧཱ་པཎྜི་ཏ་ལྟ་བུ་ལ་མཚོན་པ་ཡིན་ན་སྔ་འགྱུར་རྙིང་མའི་ནང་ནས་གཞན་སྟོང་ཁས་ལེན་པ་རྣམས་ཀྱི་ནང་ནས་རྗེ་ཐམས་ཅད་མཁྱེན་པ་ཏཱ་ར་ནཱ་ཐ་དང་གཞན་སྟོང་དབུ་མ་ཁས་ལེན་ཚུལ་དགོངས་པ་གཅིག་དང་དབྱངས་གཅིག་གིས་གཏན་ལ་ཕབ་ལ། བརྡ་ཆད་སྦྱར་ཚུལ་སོགས་གང་གི་ཕྱོགས་ནས་ཡང་ཆ་འདྲ་བ་གཅིག་པ་གཅིག་ཀྱང་ཞིག་ཡིན་པ་དེ་ཁོང་གིས་གཞུང་རྣམས་ལས་གསལ་བ་ནང་བཞིན་ཆགས་འདུག་ཡོད་པ་རེད་ལགས།དེའི་རྒྱུ་མཚན་གྱིས་ཇོ་ནང་རང་ལུགས་ཡིན་ན་དཔལ་ལྡན་ཟླ་བ་གྲགས་པ་དང་སློབ་དཔོན་ལེགས་ལྡན་འབྱེད་ལ་སོགས་པ་དེ་དག་རྗེ་ཐམས་ཅད་མཁྱེན་པ་ཏཱ་ར་ནཱ་ཐའི་གཞན་སྟོང་དབུ་མའི་རྒྱན་གྱི་སྐབས་སུ་པཎྜི་ཏ་མཆོག་ཏུ་གྱུར་བ་ཡིན་ན་ཡང་སངས་རྒྱས་ཀྱི་ལུང་གིས་ཟིན་པ་དང་ས་ཐོབ་པའི་བྱང་ཆུབ་སེམས་དཔའ་མིན་ཞེས་གསུངས། དེའི་རྒྱུ་མཚན་གྱིས་ས་བཅུ་པའི་དབང་ཕྱུག་རྒྱལ་ཚབ་བྱམས་པ་མགོན་པོ་དང༌། ས་གསུམ་པ་ལ་གནས་པ་འཕགས་པ་ཐོགས་མེད་གཉིས་དང་ཆ་འདྲ་བ་མ་ཡིན་པར་བཤད་ཡོད་པ་རེད། དེའི་རྒྱུ་མཚན་གྱིས་དགོངས་འགྲེལ་མཁན་པོ་ལ་བསམ་བློ་བཏང་ན་འདྲ། བསྟན་བཅོས་ཀྱི་སྒོ་ནས་བསམ་བློ་བཏང་ན་འདྲ་གང་གི་སྒོ་ནས་ཀྱང་ཁྱད་པར་དུ་འཕགས་པ་ཡིན་ཞེས་རང་ལུགས་ཀྱིས་རྩལ་འདོན་བྱས་ནས་དེ་འདྲ་གསུང་གི་ཡོད་པ་རེད། ཡིན་ན་ཡང་གཞན་སྟོང་དབུ་མ་ཆེན་པོའི་རང་ལུགས་ཀྱི་གྲུབ་མཐའ་རྩལ་འདོན་བྱས་ན་དེ་འདྲ་གསུང་གི་རེད་ཞུས་པ་མ་གཏོགས་གཞན་ངན་པ་ཞིག་རེད་ཅེས་ནམ་ཡིན་ན་ལབ་གི་མེད། སྤྱིར་བཏང་ང་ཚོས་གྲུབ་མཐའ་རིས་མེད་བྱེད་རྒྱུ་ཧ་ཅང་གལ་ཆེན་པོ་ཞིག་རེད། ཡིན་ན་ཡང་རང་ལུགས་རྣམ་པར་བཞག་ན་དེ་འདྲ་བཞག་དགོས་པ་རེད། དཔེར་ན་དཔལ་ལྡན་ཟླ་བ་གྲགས་པས། བསྟན་བཅོས་ལས་དཔྱད་རྩོད་ལ་ཆགས་པའི་ཕྱིར། །མ་མཛད་རྣམ་གྲོལ་ཕྱིར་ནི་དེ་ཉིད་བསྟན། །གལ་ཏེ་དེ་ཉིད་རྣམ་པར་བཤད་པ་ན། །གཞན་གཞུང་འཇིག་པར་འགྱུར་ན་ཉེས་པ་མེད། །རང་གི་ལྟ་ལ་ཆགས་དང་དེ་བཞིན་དུ། །གཞན་གྱི་ལྟ་ལ་འཁྲུག་གང་རྟོག་པ་ཉིད། །དེ་ཕྱིར་འདོད་ཆགས་ཁོང་ཁྲོ་རྣམས་བསལ་ཏེ། །རྣམ་དཔྱོད་པ་ནི་མྱུར་དུ་གྲོལ་བར་འགྱུར། །ཞེས་གསུངས་པ་ནང་བཞིན་དུ་ང་ཚོས་རིས་མེད་བྱེད་རྒྱུ་ཧ་ཅང་གལ་ཆེན་པོ་རེད། ཡིན་ནའང་གལ་ཏེ་དེ་ཉིད་རྣམ་པར་བཤད་པ་ན། །གཞན་གཞུང་འཇིག་པར་འགྱུར་ན་ཉེས་པ་མེད། །ཅེས་གསུངས་པ་ནང་བཞིན་གྱི་དུ་རང་ལུགས་ཀྱི་གྲུབ་མཐའ་རྣམ་པར་བཤད་པ་དེའི་ཚེ། རང་གིས་གྲུབ་མཐའ་རྩལ་འདོན་བྱས་ནས་མ་བཤད་རང་བཤད་ཅིག་ཆགས་འདུག་ཡོད་པ་དེ་འདྲ་ཞིག་རེད་ཞུ་རྒྱུ་དེ་ཡིན། བོད་ཁ་བ་གངས་ཅན་གྱི་ལྗོངས་འདིར་གཟུ་བཙན་རྣམ་གཉིས་ལས་བརྒྱུད་དེ་ཀུན་མཁྱེན་དོལ་པོ་པའི་བར་དུ། གཞན་སྟོང་དབུ་མ་ཆེན་པོའི་ལྟ་གྲུབ་དེ་གསང་ཆོས་བྱས་ཏེ་གཅིག་ནས་གཅིག་ནས་ཏུ། སྙན་ནས་སྙན་དུ་བརྒྱུད་པ་ཞིག་རེད། དེ་ནས་ཀུན་མཁྱེན་དོལ་པོ་ཤེས་རབ་རྒྱལ་མཚན་དཔལ་བཟང་པོས་བཀའ་བསྡུ་བཞི་བ་མཛད་ནས་སེམས་ཀྱི་རང་བཞིན་འོད་གསལ་བ་དེ་བེམ་སྟོང་ཆད་སྟོང་ཙམ་མ་ཡིན་པར་འོད་གསལ་བའི་དོན་དམ་པའི་ཡོན་ཏན་རྣམ་པ་ཀུན་ལྡན་ཡིན་པ་གཏན་ལ་ཕབ་ནས། དེ་ཡང་སེམས་འགྲེལ་སྐོར་གསུམ་གྱི་མན་ངག་ལ་བརྟེན་ནས་ཁོང་གིས་ཐད་ཀར་ཐད་ཀར་ལམ་ཉམས་སུ་བླངས་ནས་ཉམས་རྟོགས་རྒྱུད་ལས་བསྟན་པ་ལྟར་ཐད་ཀར་རྒྱུད་ལ་སྐྱེས་ནས་སངས་རྒྱས་དང་བྱང་ཆུབ་སེམས་དཔའ་རྣམས་ཀྱིས་བསྒྱུར་མི་ཐུབ་པའི་ངེས་ཤེས་ཁྱད་པར་ཅན་རྙེད་པར་ཁོང་གིས་དེ་འདྲ་གསུངས་ཡོད་པ་རེད། ཀུན་མཁྱེན་དོལ་པོ་པས་བཀའ་བསྡུ་བཞི་བའི་སྐབས་སུ་ཆོས་དབྱིངས་དེ་ཡེ་ཤེས་ཡིན་པར་རྩལ་འདོན་བྱས་ནས་གསུངས་ཡོད་པ་རེད། དེ་ནས་ཡོད་མེད་ཡིན་མིན་གང་ཡང་ཁས་མི་ལེན་པའི་ལྟ་བ་དེ་ཀུན་མཁྱེན་དོལ་པོ་པས་ལྟ་བ་ཤན་འབྱེད་ཀྱི་སྐབས་སུ་དགག་པ་བཏང་སྟེ། དེ་ནས་ཡོད་པ་མ་ཡིན་ན་མེད་པར་གྲུབ་དགོས་ཀྱི་འདུག དཔེར་ན་དབུལ་བོ་ཞིག་ལ་གསེར་ཡོད་པ་ཨེ་ཡིན་དྲིས་ཚེ། གསེར་ཡོད་པ་མིན་ཟེར་ན། གསེར་མེད་པ་དེ་གྲུབ་འགྲོ་གི་འདུག དེ་གྲུབ་པའི་རྒྱུ་མཚན་ཡོད་མེད་བར་ན་ཕུང་སུམ་མེད་པའི་རྒྱུ་མཚན་གྱིས་ཡིན་པ་སོགས་ཀྱི་སྒོ་ནས་ལུང་རིགས་མང་པོའི་སྒོ་ནས་ཡོད་མིན་མེད་མིན་གང་ཡང་ཁས་ལེན་མིན་པའི་ལྟ་བ་དེ་མི་འཐད་པར་གསུངས་ཡོད་པ་ཞིག་རེད། དེ་ཡང་མེད་དགག་ཙམ་མ་ཡིན་པར་རང་བཞིན་འོད་གསལ་བའི་ཡེ་ཤེས་ཤིག་ཡིན་པ་དང༌། དོན་དམ་པའི་མཚན་ཡང་དག་པར་བརྗོད་པ་དང་སེམས་འགྲེལ་སྐོར་གསུམ་གྱི་མན་ངག་ལ་སོགས་པ་ལ་བརྟེན་ནས་གསལ་ཞིང་རྒྱས་པར་གཏན་ལ་ཕབ་ཡོད་པ་རེད། མདོར་ན་གཞན་སྟོང་དབུ་མ་ཆེན་པོའི་ལྟ་གྲུབ་དེ་གཞི་ལམ་འབྲས་གསུམ་ལས་བརྩམས་ཏེ། རི་ཆོས་ངེས་དོན་རྒྱ་མཚོ་སོགས་ཀྱི་སྐབས་སུ་གཏན་ལ་ཕབ་ཡོད་པ་རེད། དེ་ཡན་གྱིས་དྲང་ངེས་ལས་བརྩམས་ཏེ།གཞན་སྟོང་བསྟན་སའི་གཞུང་ཁུངས་དང་སྲོལ་འབྱེད་ཀྱི་སློབ་དཔོན་ཙམ་བརྗོད་པ་ཡིན། ད་དྲང་ངེས་ཀྱི་ཁྱད་པར་ཕྱེ་བའི་སྐབས་སུ། ངེས་དོན་དོན་དམ་བདེན་པ་བསྟན་བྱའི་གཙོ་བོར་བྱས་པའི་མདོ་ངེས་དོན་གྱི་མདོ་དང༌། དྲང་དོན་ཀུན་རྫོབ་བདེན་པ་བསྟན་བྱའི་གཙོ་བོར་བྱས་ཏེ་བསྟན་པའི་མདོ་ཞིག་དྲང་དོན་གྱི་མདོ་ལ་བཞག་ནས། དྲང་ངེས་ཀྱི་ཁྱད་པར་དེ་ལྟར་འཇོག་པ་དང༌། འཁོར་ལོ་ཐ་མ་ལ་སོགས་ངེས་དོན་གྱི་མདོའི་མཚན་གཞིར་འཇོག་གི་ཡོད་པ་རེད། དེའི་སྟེང་ནས་དྲང་ངེས་ལས་བརྩམས་ཏེ་མདོར་བསྡུས་ཤིག་ཞུས་ནས། ད་རྩ་བའི་ས་བཅད་གཉིས་པ་དྲང་ངེས་ཀྱི་མདོ་གཉིས་ཀྱི་དགོངས་དོན་བདེན་གཉིས་ཀྱི་རྣམ་བཞག་བཤད་པ་ལ། དྲང་ངེས་ལས་བརྩམས་ཡོང་དུས། ངེས་དོན་དོན་དམ་བདེན་པ་བསྟན་བྱའི་གཙོ་བོར་བྱས་ནས་བསྟན་པའི་མདོའི་དགོངས་དོན་དོན་དམ་བདེན་པ་དང༌།དྲང་དོན་ཀུན་རྫོབ་བདེན་པ་བསྟན་བྱའི་གཙོ་བོར་བྱས་ནས་བསྟན་པའི་མདོའི་དགོངས་དོན་ཀུན་རྫོབ་བདེན་པ་དང་གཉིས་ཡོད་པ་རེད། སངས་རྒྱས་བཅོམ་ལྡན་འདས་ཀྱིས་ཆོས་གང་བསྟན་པ་ཡིན་ན་བདེན་པ་གཉིས་ལ་བརྟེན་ནས་གསུང་གི་ཡོད་པ་རེད། དེས་ན་བདེན་པ་གཉིས་ཀྱི་རྣམ་དབྱེ་ཤེས་ན་ཐུབ་པའི་བཀའ་ལ་མི་རྨོངས་བར་འགྱུར་རོ། །ཞེས་ཀུན་མཁྱེན་དོལ་པོ་པ་ཤེས་རབ་རྒྱལ་མཚན་དཔལ་བཟང་པོས་བཀའ་བསྩལ་གནང་ཡོད་པ་རེད། དེའི་རྒྱུ་མཚན་གྱིས་དྲང་ངེས་ཀྱི་བསྟན་བྱའི་དོན་དོན་དམ་བདེན་པ་དང་ཀུན་རྫོབ་བདེན་པའི་རྣམ་བཞག་མདོ་ཙམ་ཞིག་བརྗོད་ན། དང་པོ་དོན་དམ་བདེན་པའི་རྣམ་བཞག་ལས་མཚན་ཉིད་ནི། འཕགས་པའི་ཡེ་ཤེས་དམ་པའི་ཡུལ་གང་ཞིག གཤིས་ལ་རང་གི་ངོ་བོ་བདེན་པས་མི་སྟོང་བ་དོན་དམ་བདེན་པའི་མཚན་ཉིད་ཡིན་པར་གསུང་ཡོད་པ་རེད་ཞུ་རྒྱུ་དེ་ཡིན། དེ་འདྲ་ཡིན་ན་གཞན་སྟོང་དབུ་མ་ཆེན་པོའི་ལྟ་གྲུབ་དེ་རྒྱུད་བླ་མའི་སྐབས་སུ་ཚིག་གསལ་བོ་བྱས་པའི་སྒོ་ནས་མར་བསྟན་ཡོང་དུས། རྣམ་དབྱེར་བཅས་པའི་མཚན་ཉིད་ཅན། །གློ་བུར་དག་གིས་ཁམས་སྟོང་གི། རྣམ་དབྱེར་མེད་པའི་མཚན་ཉིད་ཅན། །བླ་མེད་ཆོས་ཀྱིས་སྟོང་མ་ཡིན། །ཞེས་དེ་འདྲ་གསུང་གི་ཡོད་པ་རེད། དེ་འདྲ་གསུངས་པའི་སྐབས་སུ་གང་རེད་ཟེར་ན། རྣམ་དབྱེར་བཅས་པའི་མཚན་ཉིད་ཅན། །གློ་བུར་དག་གིས་ཁམས་སྟོང་གི། །ཞེས་པས་ཁམས་བདེ་བར་གཤེགས་པའི་སྙིང་པོ་དེ་དགག་བྱའི་བདེན་གྲུབ་དང་སྤྲོས་པའི་བདེན་གྲུབ་ཀྱིས་སྟོང་བ་མ་ཟད། ཀུན་རྫོབ་སྣང་གྲགས་ཀྱིས་བསྡུས་པའི་གཟུང་འཛིན་གྱི་སྤྲོས་པ་མཐའ་དག་གིས་སྟོང་པ་ཡིན་པས་སྤྲོས་བྲལ་ཡིན་པ་སོགས་སྟོང་ཕྱོགས་ནས་གཏན་ལ་ཕབ། དེ་ཡང་གཙོ་བོ་རང་ལུགས་ཡིན་ན། འཁོར་ལོ་བར་བས་རྒྱུད་སྦྱོང་བ་སྔོན་དུ་སོང་ནས་འཁོར་ལོ་ཐ་མ་བསྟན་དགོས་པ་རེད་མ་གཏོགས། འཁོར་ལོ་བར་བའི་རྒྱུད་སྦྱོང་བ་སྔོན་དུ་མ་སོང་ན་འཁོར་ལོ་ཐ་མའི་གདུལ་བྱར་གྱུར་ཐུབ་ཀྱི་མ་རེད། འཁོར་ལོ་ཐ་མའི་གདུལ་བྱ་དེ་དབང་པོ་རྣོན་པོ་ཞིག་ལ་བསྟན་དགོས་པར་གསུང་གི་ཡོད་པ་རེད། གོ་རིམ་བྱས་ནའང་དེ་འདྲ་ཞིག་རེད། དེའི་རྒྱུ་མཚན་གྱིས་འཁོར་ལོ་བར་བར་སྤྲོས་བྲལ་གྱི་དབུ་མ་གཏན་ལ་ཕབ་འགྲོ་གི་ཡོད་པ་རེད། སྤྲོས་བྲལ་དུ་གཏན་ལ་ཕབ་ཡོང་དུས་མཉམ་གཞག་གི་སྐབས་སུ་ཡོད་མེད་ཡིན་མིན་གང་ཡང་འཛིན་པ་མེད་པར་སྤྲོས་བྲལ་དུ་འཁོར་ལོ་བར་བ་ལྟར་སྤྲོས་བྲལ་དུ་མཉམ་པར་བཞག་དགོས་པ་རེད། དེ་ཡང་ཀུན་མཁྱེན་དོལ་པོ་པ་ཤེས་རབ་རྒྱལ་མཚན་དཔལ་བཟང་པོས་རི་ཆོས་ངེས་དོན་རྒྱ་མཚོའི་སྐབས་སུ། མཉམ་གཞག་ལ་ཟློ་བའི་སྐབས་སུ་འཁོར་ལོ་བར་པ་དང་མཐུན་པར་རྟོག་མེད་སྤྲོས་བྲལ་དུ་མཉམ་པར་བཞག་དགོས་ལ། གསང་སྔགས་རྡོ་རྗེ་ཐེག་པ་དང་འཁོར་ལོ་ཐ་མ་གཉིས་ཀའི་སྐབས་སུ་མཉམ་བཞག་ཏུ་སྤྲོས་བྲལ་དུ་མཉམ་པར་བཞག་དགོས་པ་དེ་འདྲ་གསུང་གི་ཡོད་པ་རེད། དེ་ཡང་ཆོས་ཉིད་དེ་བཞིན་གཤེགས་པའི་སྙིང་པོ་དེ་སྤྲོས་པ་ཐམས་ཅད་དང་བྲལ་བ་ཡིན་ཟེར་གི་ཡོད་པ་རེད། སྤྲོས་པ་ཐམས་ཅད་དང་བྲལ་བ་ཡིན་ན་ཡང་ཡེ་ཤེས་ཡིན་པ། དོན་དམ་བདེན་པ་ཡིན་པ། དོན་དམ་པར་གྲུབ་པ། གནས་ལུགས་སུ་གྲུབ་པ། སྟོབས་བཅུ་མི་འཇིགས་པ་བཞི་ལ་སོགས་པའི་སངས་རྒྱས་ཀྱི་ཟག་མེད་ཀྱི་ཆོས་སྡེ་ཚན་ཉེར་གཅིག་ཐམས་ཅད་དང་ལྡན་པ། གདོད་མ་ཉིད་ནས་བཞུགས་པ་ལ་འགལ་བ་མེད་གསུང་འདུགདེ་ཡང་དོན་དམ་པ་སྤྲོས་པ་མ་ཡིན་པར་ཁོ་སྤྲོས་བྲལ་གྱི་ཚུལ་གྱིས་ལྡན་པར་གསུང་གི་ཡོད་པ་རེད། སྤྱི་ཡོངས་ཀྱི་ཆ་ནས་རྗེས་ཐོབ་ཤན་འབྱེད་ཀྱི་སྐབས་སུ་བསམ་བློ་བཏང་ན། ཡོད་པ་ལ་ཡོད་པར་བལྟས་ན་ཡོད་པའི་སྐྱོན་དུ་འགྱུར་གི་མ་རེད། མེད་པ་ལ་མེད་པར་ལྟ་ན་མེད་པའི་སྐྱོན་དུ་འགྱུར་ཏུ་མི་འགྱུར། རྟག་པ་ལ་རྟག་པར་བལྟས་ན་རྟག་པའི་སྐྱོན་དུ་མི་འགྱུར། མི་རྟག་པ་ལ་མི་རྟག་པར་བལྟས་ན་མི་རྟག་པའི་སྐྱོན་དུ་འགྱུར་བ་མ་ཡིན་པར་གསུང་གི་ཡོད་པ་རེད། མཉམ་བཞག་གི་སྐབས་སུ་ཆོས་ཀྱང་སྤོང་ན་ཆོས་མ་ཡིན་པ་ལྟ་སྨོས་ཀྱང་ཅི་དགོས། ཞེས་རྡོ་རྗེ་གཅོད་པ་ལ་སོགས་པའི་སྐབས་སུ་གསུངས་པ་ནང་བཞིན་སྤྲོས་པ་ཐམས་ཅད་དང་བྲལ་བའི་སྤྲོས་བྲལ་དུ་མཉམ་པར་བཞག་གི་ཡོད་པ་རེད། དོན་དམ་བདེན་པ་བདེན་པར་གྲུབ་ཀྱང་སྟོང་ཕྱོགས་ནས་བསམ་བློ་བཏང་ན། དགག་བྱའི་བདེན་གྲུབ་དང་སྤྲོས་པའི་བདེན་པར་མ་གྲུབ་པ་ཡིན་ཏེ། རྗེ་བཙུན་ཏཱ་ར་ནཱ་ཐས། ཐེག་མཆོག་དབུ་མ་ལས། དགག་བྱའི་བདག་ནི་ནམ་ཡང་ཡོད་མ་ཡིན། །ཞེས་གསུངས་པ་ལྟར་ཁྱད་པར་འབྱེད་ཤེས་དགོས་པ་རེད། དེ་ཡང་ཀོང་སྤྲུལ་ཡོན་ཏན་རྒྱ་མཚོས། ཇོ་ནང་པའི་འདོད་པ་ཁ་ཅིག་གིས་མ་གོ་ནས། དགག་བྱའི་བདེན་གྲུབ་དང་དོན་དམ་བདེན་པ་ཞེས་པའི་བདེན་པ་གཉིས་ཁྱད་པར་ཕྱེ་བ་ཧ་མ་གོ་ནས་མང་པོ་ཞིག་འཁྲུལ་འགྲོ་གི་འདུག་ཅེས་རྒྱུད་བླའི་འགྲེལ་བའི་སྐབས་སུ་གསུངས་པ་ནང་བཞིན་རེད། ཇོ་ནང་རང་ལུགས་ལ་བསམ་བློ་བཏང་ན། དོན་དམ་བདེན་པ་དགག་བྱའི་བདེན་པར་མ་གྲུབ། དེས་ན་དགག་བྱའི་བདག་ནི་ནམ་ཡང་ཡོད་མ་ཡིན། །ཞེས་གསུངས་ལ། དེ་ལྟར་ཇི་སྐད་དུ། ཀུན་རྫོབ་སྤྲོས་པའི་བདེན་གྲུབ་ངེད་མི་འདོད། །སྤྲོས་པའི་བདེན་གྲུབ་ཡོད་ན་ཀུན་རྫོབ་སྟེ། །ཞེས་རྗེ་ཐམས་ཅད་མཁྱེན་པ་ཏཱ་ར་ནཱ་ཐས་གཞན་སྟོང་དབུ་མའི་རྒྱན་གྱི་སྐབས་སུ་དེ་ལྟར་གསུངས་ཡོད་པས་ཡིན་ལ། དགག་བྱ་བདེན་པར་མ་གྲུབ་ཅེས་གསུངས་པ་རེད། དེས་ན་བདེན་པར་གྲུབ་ཅེས་པའི་བདེན་པ་དེ་གང་རེད་ཟེར་ན། དབུ་མ་རྩ་ཤེས་ཀྱི་སྐབས་སུ། མྱ་ངན་འདས་པ་བདེན་གཅིག་པུ། །ཞེས་པའི་བདེན་པ་དེ་རེད། བདེན་པ་ཞེས་པ་དེ་དོན་དམ་བདེན་པ་ཞེས་པའི་བདེན་པ། སྣང་ཚུལ་དང་གནས་ཚུལ་མཐུན་པའི་བདེན་པ་མི་བསླུ་བ་ལ་བདེན་པ་བཞག་པ་རེད། བདེན་པ་ཡིན་ན་བདེན་པ་ཡིན་པར་གྲུབ་དགོས་པ་སྟེ། དཔེར་ན་ཡོད་པ་ཡིན་ན་ཡོད་པར་གྲུབ་དགོས་པ་བཞིན་རེད་ཅེས་གསུངས་པས་ཚིག་གི་སྟེང་ནས་བརྡ་ཆད་ཙམ་མ་གཏོགས་ཁྱད་པར་ཡོད་པ་མ་རེད། དོན་ལ་ཁྱད་པར་མེད་ན་ཡང་གཞན་སྟོང་དབུ་མ་ཆེན་པོའི་ལྟ་གྲུབ་ཇོ་ནང་རང་ལུགས་ལ་བསམ་བློ་བཏང་ན། དོན་དམ་བདེན་པ་ཞེས་པའི་བདེན་པ་ཡིན་ན་བདེན་པར་གྲུབ་ཅེས་པའི་བརྡ་ཆད་ཀྱི་སྒོ་ནས་གཏན་ལ་ཕབ་ཡོད་པའི་རྒྱུ་མཚན་གྱིས་བརྡ་ཆད་དེའི་སྟེང་ནས་འགྲོ་དགོས་པ་ཞིག་ཆགས་འདུག་ཡོད་པ་དེའི་སྟེང་ནས་ཁྱད་པར་དེ་འབྱེད་ཤེས་དགོས་པ་རེད་མ་གཏོགས། ཡང་མང་པོ་ཞིག་གིས་དེ་ཧ་གོ་གི་ཡོད་པ་མ་རེད། དེ་ལྟར་གྲུབ་པའི་ཚིག་ཟིན་ཡང༌། སངས་རྒྱས་བཅོམ་ལྡན་འདས་ཀྱིས་མདོ་ཡི་གནས་སྐབས་སུ་ལྷན་གཅིག་སྐྱེས་པའི་སྐུ་ལ་སོགས་པ་སྐུ་གསུམ་པ་ཡང་དག་པ་གྲུབ་པ་ཡིན་ཏེ། ཞེས་གསུངས་པ་དང༌། དེ་བཞིན་དུ་སློབ་དཔོན་ཀླུ་སྒྲུབ་ཀྱིས་མཛད་པའི་ག་ལས་འཇིགས་མེད་ཀྱི་སྐབས་སུ། དོན་དམ་པར་གྲུབ་པས་ན་དོན་དམ་བདེན་པའོ།། ཞེས་གསུངས་པ་སོགས་མདོ་རྒྱུད་ཀྱི་ལུང་ཧ་ཅང་མང་དུ་མཆིས་ལགས། མདོར་ན་གཞན་སྟོང་དབུ་མ་ཆེན་པོའི་ལྟ་གྲུབ་དེ་སྤྲོས་པ་ཐམས་ཅད་དང་བྲལ་བའི་གཞིའི་གནས་ལུགས་ཡེ་ཤེས་ཤིག་ཡིན་པ་གཏན་ལ་ཕབ་ཀྱིན་ཡོད་པ་རེད། འོད་གསལ་བའི་ཡེ་ཤེས་དེ་སྟོང་ཕྱོགས་ནས་བསམ་བློ་བཏང་ན་ཀུན་རྫོབ་ཀྱི་སྤྲོས་པ་མཐའ་དག་གིས་སྟོང་བ་རེད། དགག་བྱ་བདེན་པར་མ་གྲུབ་པ་མ་ཟད། ཀུན་རྫོབ་ཀྱི་ཆོས་གང་ཡང་རང་སྟེང་དུ་མ་གྲུབ་པས་ཀུན་རྫོབ་ཀྱི་སྤྲོས་པ་ཐམས་ཅད་དང་བྲལ་བའི་འོད་གསལ་བའི་ཡེ་ཤེས་དེ་སྟོང་ཕྱོགས་ནས་བསམ་བློ་བཏང་ན་དེ་ལྟར་རེད། གནས་ལུགས་མཐར་ཐུག་དེ་སྣང་ཕྱོགས་ནས་བསམ་བློ་བཏང་ན་ཁོ་རང་རང་བཞིན་འོད་གསལ་བའི་ཡེ་ཤེས་མ་བཅོས་པ་ཞིག་ཡིན་པར་གསུངས་པ་རེད། མ་བཅོས་པའི་འོད་གསལ་བའི་སེམས་དེ་དོན་དམ་པའི་ཡོན་ཏན་ཐམས་ཅད་སྟོབས་བཅུ། མི་འཇིགས་པ་བཞི། མ་འདྲེས་པའི་ཆོས་བཅོ་བརྒྱད་ལ་སོགས་པ་རང་ཆས་སུ་སྐུ་གསུམ་ཡོངས་སུ་རྫོགས་པའི་བདག་ཉིད་ཀྱི་ཡེ་ཤེས་ཀྱི་ངོ་བོར་ཡེ་གདོད་མ་ནས་རང་ཆས་སུ་གྲུབ་པ་ཡིན་པའི་རྒྱུ་མཚན་གྱིས། རྒྱུད་བླ་མའི་སྐབས་སུ། རྣམ་དབྱེར་མེད་པའི་མཚན་ཉིད་ཅན། །བླ་མེད་ཆོས་ཀྱི་སྟོང་མ་ཡིན། །ཞེས་བླ་ན་མེད་པའི་དོན་དམ་པའི་དབྱིངས་དང་དབྱེར་མེད་པའི་བླ་ན་མེད་པའི་དོན་དམ་པའི་ཆོས་རྣམས་ཀྱིས་མི་སྟོང་ཞེས་གསུངས་པ་དང༌། དེ་ནང་བཞིན་དུ་རྒྱུད་བླ་མའི་སྐབས་གཉིས་པའི་སྐབས་སུ། འོད་གསལ་བྱས་མིན་དབྱེར་མེད་པར། །འཇུག་ཅན་གང་གཱའི་ཀླུང་གི་ནི། །རྡུལ་ལས་འདས་པའི་སངས་རྒྱས་ཀྱི། །ཆོས་རྣམས་ཀུན་དང་ལྡན་པ་ཉིད། །ཅེས་ཆོས་རྣམས་ཐམས་ཅད་ཀྱི་ཡོན་ཏན་དང་ལྡན་པ་ཡིན་པ་དེ་འདྲ་གསུང་གི་ཡོད་པ་རེད། དཔེར་ན། སྔ་འགྱུར་རྙིང་མ་ལྟ་བུ་ལ་མཚོན་ན་ཀུན་མཁྱེན་ཀློང་ཆེན་རབ་འབྱམས་ཀྱི་ཡིད་བཞིན་མཛོད་ཀྱི་སྐབས་སུ། འགྱུར་མེད་དོན་དམ་བདེན་པའི་རང་བཞིན་ནི། །འོད་གསལ་བདེ་གཤེགས་སྙིང་པོ་ལྷུན་གྲུབ་སྟེ། །སྟོང་གསལ་རིག་པ་དབྱེར་མེད་ཆོས་ཉིད་དོ། །ཞེས་འོད་གསལ་བ་ཡིན་པ་དང༌། བདེ་གཤེགས་སྙིང་པོ་ཡིན་པ་དང༌། ཡོན་ཏན་ལྷུན་གྲུབ་ཡིན་པ་དང༌། སྟོང་གསལ་ཡིན་པ་དང༌། རིག་པ་ཡིན་པ་དང༌། ཆོས་ཉིད་ཡིན་པར་གསུངས་ཡོད་པ་ལས་ལྷག་ཅིག་གཞན་སྟོང་དབུ་མ་པའི་ལུགས་ལ་གསུང་གི་མེད་པ་རེད་ལགས། ཀུན་མཁྱེན་ཀློང་ཆེན་རབ་འབྱམས་པས་གནས་ལུགས་མཛོད་ཀྱི་གནས་སྐབས་སུ། སེང་གེ་རྫོགས་ཀྱི་རྒྱུད་ལུང་དྲངས་ནས། གཞི་ལ་བཞུགས་པའི་རིག་པ་ནི། །ཡེ་ཤེས་དབྱིངས་ན་སྐུ་གསུམ་རྫོགས། །ཞེས་གསུངས་ནས་གཞི་ལ་བཞུགས་པའི་རིག་པ་དེ་ཡེ་ཤེས་དབྱིངས་ལ་སྐུ་གསུམ་ཡོངས་སུ་རྫོགས་པ་ཞིག་རེད་ཅེས་གསུངས་པ་ནང་བཞིན་གཞན་སྟོང་བའི་དོན་དམ་པའི་ཡོན་ཏན་དེ་རྩལ་འདོན་བྱས་ནས་གསུང་གི་ཡོད་པ་ཞིག་རེད། མདོར་ན་སྔ་འགྱུར་རྙིང་མའི་འོད་གསལ་རྫོགས་པ་ཆེན་པོའི་ལྟ་གྲུབ་དེ་སྔགས་བླ་མེད་ལ་སྦྱར་ནས་གསུངས་ཡོང་དུས་དེ་དང་དུས་འཁོར་གྱི་རྒྱུད་ནས་གསུངས་པ་ཕལ་ཆེར་གཅིག་མཚུངས་ཡིན་པར་སྙམ། འོན་ཀྱང་མི་འདྲ་བ་འདོད་མཁན་ཡོད་སྲིད་པ་རེད། ཡིན་ན་ཡང་རྡོ་གྲུབ་འཇིགས་མེད་བསྟན་པའི་དབང་ཕྱུག་གིས་མགུར་འབུམ་ནང་དུ། ལར་རྫོགས་ཆེན་བློ་འདས་རིག་པ་དང༌། །དུས་འཁོར་ལུགས་ཀྱི་ཆོས་སྐད་གཉིས། །མིང་འདོགས་ཚུལ་ཙམ་ལས་སོ་སོར་མེད། །ཅེས་སོ་སོར་མེད་གསུངས་པ་རེད་མ་གཏོགས། སོ་སོར་ཡོད་ཅེས་མ་གསུངས་པས་སོ། །དེ་ནས་ཀུན་རྫོབ་སྣང་གྲགས་ཀྱིས་བསྡུས་པའི་ཆོས་ཐམས་ཅད་རང་བཞིན་གྱིས་མེད་པ་ཡིན་ནམ་ཞེ་ན། རང་བཞིན་གྱིས་མེད་པར་འདོད་ལ། དེ་ཐོག་མར་འཁོར་ལོ་བར་པའི་སྐབས་སུ་བདག་མེད་གཉིས་གཏན་ལ་ཕབ་དགོས་སམ་ཞེ་ན་དགོས་པ་རེད། དེ་མ་ཟད་ཐེག་པ་ཆེན་པོའི་དབང་དུ་བྱས་ན་ཆོས་ཐམས་ཅད་བདག་མེད་གཉིས་ཀ་ཡིན་པར་གཏན་ལ་ཕབ་དགོས་གི་ཀྱི་ཡོད་པ་རེད། དོན་དམ་བདེན་པ་ཡང་བདག་ཏུ་མ་གྲུབ་སྟེ། གང་ཟག་གི་བདག་ཏུ་མ་གྲུབ། ཆོས་བདག་ཏུ་ཡང་མ་གྲུབ་པ་ཡིན་པས་སོ།།དེ་ཡང་རྗེ་བཙུན་ཏཱ་ར་ནཱ་ཐས། ཆོས་རྣམས་བདག་མེད་གཉིས་ཀ་ཡིན་པའི་ཕྱིར། །ངོ་བོའི་སྒོ་ནས་དབྱེ་བ་ཡོད་མིན་ཏེ། །དགག་བྱ་ཟློག་ཚུལ་སྒོ་ནས་ལྡོག་པས་ཕྱེ། །ཞེས་དེ་འདྲ་གསུངས་ཡོད་པ་རེད། དེའི་རྩ་བ་དབུ་མའི་མན་ངག་ཁྱད་འཕགས་སུ་ཀུན་མཁྱེན་དོལ་པོ་པས་བརྩམས་ཡོང་དུས། ཆོས་ཐམས་ཅད་གང་ཟག་གི་བདག་ཏུ་མ་གྲུབ། ཆོས་བདག་ཏུ་མ་གྲུབ་ཅེས་སྦྱར་ནས་གསུངས་ཡོད་པ་ནང་བཞིན་རེད། གཞན་གྱིས་བདེ་གཤེགས་སྙིང་པོ་འདོད་ཚུལ་དེ། སྤྱི་གཙོ་བོ་ལ་སོགས་པ་དང་བདག་ཤེས་རིག་གི་སྐྱེས་བུ་འདོད་ཚུལ་དང་མཚུངས་པར་ཐལ་ཟེར་ན། ཅིའི་ཕྱིར། མི་མཚུངས་པའི་རྒྱུ་མཚན་དེ་གང་རེད་ཟེར་ན། ཇོ་ནང་རང་ལུགས་ལ་མཚོན་པ་ཡིན་ན། རི་ཆོས་ལས། དེ་ལ་བདེ་གཤེགས་སྙིང་པོ་བདག་གཉིས་ཀྱིས་སྟོང་པའི་ཕྱིར་མུ་སྟེགས་བྱེད་ཀྱི་བདག་དང་མི་མཚུངས་ཤིང༌། ཞེས་གསུངས་པ་ལྟར་ཆོས་ཐམས་ཅད་བདག་གཉིས་ཀྱིས་སྟོང་པ་ཇོ་ནང་རང་ལུགས་ཀྱིས་ཁས་ལེན་པ་གང་ཞིག གཞན་མུ་སྟེགས་པས་བདག་ཏུ་གྲུབ་པར་ཁས་ལེན་པའི་ཕྱིར་ན་མི་མཚུངས་ཞེས་ལན་བཏབ་པ་ཡིན་ལ། དེ་ཡང་མདོ་སྡེ་ལང་ཀར་གཤེགས་པའི་སྐབས་སུ། སངས་རྒྱས་བཅོམ་ལྡན་འདས་རང་ཉིད་ཀྱིས་དེ་ལྟར་ཕྱི་རོལ་བའི་བདག་དང་མི་འདྲ་བའི་ཁྱད་པར་དེ་ལྟར་གསུངས་ཡོད་ལ། དེ་ཡང་ལང་གཤེགས་ལས། རྟག་པ་བརྟན་པ་ཐེར་ཟུག་པར་ནི་བརྗོད་ན། བཅོམ་ལྡན་འདས་དེ་བཞིན་གཤེགས་པའི་སྙིང་པོར་སྨྲ་བ་འདི་ནི་མུ་སྟེགས་བྱེད་ཀྱི་བདག་ཏུ་སྨྲ་བ་དང་ཇི་ལྟར་མི་འདྲ་བ་ལགས། ཞེས་ཞུས་པའི་ལན་དུ། བཅོམ་ལྡན་འདས་ཀྱིས་བཀའ་བསྩལ་པ་བློ་གྲོས་ཆེན་པོ་ངའི་དེ་བཞིན་གཤེགས་པའི་སྙིང་པོ་བསྟན་པ་ནི་མུ་སྟེགས་ཅན་གྱི་བདག་ཏུ་སྨྲ་བ་དང་མཚུངས་པ་མ་ཡིན་ཏེ། བློ་གྲོས་ཆེན་པོ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ནི། སྟོང་པ་ཉིད་དང། ཡང་དག་པའི་མཐའ་དང་མྱ་ངན་ལས་འདས་པ་དང་མ་སྐྱེས་པ་དང་མཚན་མ་མེད་པ་དང། སྨོན་པ་མེད་པ། ཞེས་སྟོང་པ་ཆེན་པོ་ཡིན་པའི་རྒྱུ་མཚན་གྱིས་མི་འདྲ་ཞེས་ལན་བཏབ་ནས་གསུངས་ཡོད་པ་སོགས་མདོར་ན་རབ་དང་རིམ་པ་མང་པོས་མི་འདྲ་བའི་རྒྱུ་མཚན་བཤད་རྒྱུ་ཡོད་པ་རེད། དེས་ན་མ་གཞིའི་ཆ་ནས་རྩ་བ་ཉིད་ནས་འདྲ་བ་མ་ཡིན། སྤྱིར་བཏང་གྲུབ་མཐའ་དེ་ལ་ནང་པ་སངས་རྒྱས་པའི་ཐར་ལམ་གཙོ་བོ་ཡོད་མེད་ཡང་གང་ཟག་གི་བདག་མེད་སྒོམ་པ་ཡོད་མེད་ཀྱི་སྒོ་ནས་འཇོག་གི་ཡོད་པ་རེད། རྗེ་ཐམས་ཅད་མཁྱེན་པ་ཏཱ་ར་ནཱ་ཐས། ཐེག་མཆོག་དབུ་མའི་སྐབས་སུ། གང་ཟག་བདག་མེད་སྒོམ་པ་ཡོད་མེད་ལས། །སྲིད་ལས་གྲོལ་བ་ཡོད་མེད་རྗེས་སུ་དཔོག །ཅེས་གསུངས་ཡོད་པ་རེད། འཁོར་བའི་རྩ་བ་ལ་གང་ཟག་གི་བདག་འཛིན་བཞག་ནས་དེའི་ཞེན་ཡུལ་མེད་པར་རྟོགས་པའི་གང་ཟག་གི་བདག་མེད་རྟོགས་པའི་ཤེས་རབ་སྒོམ་པ་མེད་ན་འཁོར་བའི་རྩ་བའམ་འཁོར་བ་ལས་གྲོལ་བར་མི་ནུས་པར་ཇོ་ནང་བས་ཁས་ལེན་པ་རེད། དེ་ནས་ཀུན་རྫོབ་ཀྱི་ཆོས་ཐམས་ཅད་བདེན་པར་མེད་པ་རེད། དེ་གནས་ལུགས་མཐར་ཐུག་ཏུ་མི་བཞག་པའི་རྒྱུ་མཚན་གང་རེད་ཟེར་ན། ཀུན་རྫོབ་ཀྱི་ཆོས་རྣམས་བདེན་པར་མེད་པ་དང༌། རྟག་གཅིག་རང་དབང་བའི་བདག་ཏུ་མ་གྲུབ་ན་ཡང༌། དེ་ཙམ་གྱིས་གནས་ལུགས་མཐར་ཐུག་འཇོག་གི་ཡོད་པ་མ་རེད། དེས་ན་གནས་ལུགས་མཐར་ཐུག་ཟེར་བ་དེ་གང་རེད་ཟེར་ན། ཀུན་རྫོབ་སྣང་གྲགས་ཀྱིས་བསྡུས་པའི་ཆོས་འདི་དག་ཐམས་ཅད་ང་ཚོའི་སེམས་ཀྱིས་སྣང་བ་ཙམ་རེད་མ་གཏོགས་ཆོས་རྣམས་ཀྱི་རང་བཞིན་མཐར་ཐུག་མ་ཡིན་ལ། རང་བཞིན་ཟེར་བ་དེ་གང་འདྲ་ཞིག་རེད་ཟེར་ན། དེ་ཁམས་བདེ་བར་གཤེགས་པའི་སྙིང་པོའི་ཡེ་ཤེས་ཡིན་པར་གསུང་གི་ཡོད་པ་རེད། དཔེར་ན། ཆུ་ཞིག་རྙོག་གིས་གོས་པ་ཡིན་ན་ཆུ་དེ་རང་བཞིན་གྱིས་བཞག་བཞག་ན་ཆུའི་རྙོག་དེ་དྭངས་འགྲོ་དུས་དེའི་ཤུལ་ན་དྭངས་ཆ་ཞིག་ཡོད་པ་ནང་བཞིན་སེམས་དེ་ཉོན་མོངས་པའི་རྟོག་པ་སྣ་ཚོགས་གྱིས་རྙོག་པ་དང་བཅས་ཡོད་ནའང་སེམས་དེ་ཁོ་རང་མ་བཅོས་པར་བཞག་ན་མ་བཅོས་པ་དེ་མངོན་དུ་གྱུར་ཐུབ་ཀྱི་ཡོད་པ་རེད། དེའི་རྒྱུ་མཚན་གྱིས་ང་ཚོའི་འདི་ཡིན་འདི་མིན་གྱི་རྟོག་ཚོགས་ཆེད་ཞེན། གཏད་ཞེན། འཛིན་ཞེན་ལ་སོགས་པའི་རྟོག་ཚོགས་ཐམས་ཅད་ཀྱི་སྤྲོས་པ་དང་བྲལ་བའི་སྒོ་ནས་རང་བཞིན་འོད་གསལ་བའི་སེམས་དེ་ལ་མ་མཅོས་པར་མཉམ་པར་བཞག་ན་མངོན་དུ་གྱུར་བའི་མ་བཅོས་པའི་སངས་རྒྱས་ཀྱི་རང་བཞིན་འོད་གསལ་བའི་སེམས་ཤིག་ཡོད་པ་དེ་ཉིད་ཆོས་ཉིད་བདེ་བར་གཤེགས་པའི་ཡེ་ཤེས་ཀྱི་སྙིང་པོ་རེད། དེ་རྣམ་པ་ཀུན་ལྡན་རེད། རྣམ་ཀུན་མཆོག་ལྡན་གྱི་སྟོང་གཟུགས་ཡིན་པར་གསུང་གི་ཡོད་པ་རེད། དེ་ཡང་དཔལ་དུས་ཀྱི་འཁོར་ལོ་རྒྱུད་ཀྱི་སྐབས་སུ། སྲིད་པ་གསུམ་ལས་འདས་ཀྱང་སྲིད་པ་གསུམ་གྱི་རྣམ་པ་ཅན། །ཞེས་པ་ལྟར་རྣམ་ཀུན་མཆོག་ལྡན་གྱི་སྟོང་གཟུགས་ཀྱི་སྐུ་ཡིན་པ་རེད། དེ་ཤེས་པ་ཞིག་ཡིན་ན་ཡང་ཇི་ལྟར་དུ་རྣམ་པ་སྣ་ཚོགས་འཆར་རུང་བ་རེད། མེ་ལོང་ནང་དུ་གཟུགས་བརྙན་ཇི་འདྲ་ཡིན་ན་ཤར་དུ་རུང་བ་ཞིག་ཡིན་པ་ནང་བཞིན་དུ་ཁོ་རང་རྣམ་པ་སྣ་ཚོགས་ཀྱི་རྣམ་ཀུན་མཆོག་ལྡན་གྱི་སྟོང་གཟུགས་རྡོ་རྗེའི་སྐུ་དང་ཞིང་ཁམས་རྣམ་པ་ཐམས་ཅད་ཀྱི་བདག་ཉིད་དུ་ཤར་ཐུབ་པ་རང་བཞིན་འོད་གསལ་བའི་ཡེ་ཤེས་གདོད་མ་ཉིད་ནས་རང་ཆས་སུ་བཞུགས་པའི་ཡོན་ཏན་དེ་དེ་འདྲ་ཞིག་གི་སྟེང་ནས་གསུང་གི་ཡོད་པ་རེད། མདོའི་སྐབས་སུ་ཡང་སྟོང་གསུམ་དར་ཡུག་ཆེན་མོའི་མདོའི་གནས་སྐབས་སུ། དཔེ་དོན་སྣ་ཚོགས་ཀྱིས་སྒོ་ནས་གཏན་ལ་ཕབ་ཡོད་པ་རེད། སྟོང་གསུམ་དར་ཡུག་ཆེན་མོའི་མདོ་དེང་སང་བཀའ་འགྱུར་གྱི་ཁྲོད་ན་ཡོད་པ་རེད། རྣམ་པ་ཚོས་གཟིགས་ཏ། དཔེ་གང་འདྲ་ཞིག་གི་སྒོ་ནས་གསུངས་ཡོད་པ་དང༌། ཆོས་ཐམས་ཅད་ཀྱི་གནས་ལུགས་མཐར་ཐུག་གང་འདྲ་ཞིག་ཡིན་པ་རྒྱས་ཤིང་གསལ་བར་གསུང་གི་ཡོད་པ་རེད། ཡིན་ན་ཡང་ད་རེས་ང་ཚོས་འདི་འདྲའི་ཆུ་ཚོད་ཐུང་ཐུང་གི་སྐབས་ཐམས་ཅད་ཞུ་ཁོམ་གྱི་མི་འདུག མདོར་ན་རྣམ་ཀུན་མཆོག་ལྡན་གྱི་སྟོང་གཟུགས་ཡེ་ཤེས་རྡོ་རྗེའི་སྐུ་ཡིན་པ་ཞིག་གི་སྟེང་ནས་གསུང་གི་ཡོད་པ་རེད་ཞུ་རྒྱུ་དེ་ཡིན། གཞན་སྟོང་ངོས་འཛིན་ས་དེ་སེམས་ཀྱི་རང་བཞིན་འོད་གསལ་བ་དེ་བཞག་གི་ཡོད་པ་རེད། དེ་འདྲ་བསམ་བློ་བཏང་ཡོང་དུས་ང་རང་གིས་བསམ་ཚུལ་ཡིན་ན་སྤྱིར་བཏང་བོད་ན་ལྟ་བ་གྲགས་ཆེན་པོ་ཁས་ལེན་ཀུན་བྲལ་གྱི་ལྟ་བ་ལྟ་བུ་དང༌། ཆོས་ཐམས་ཅད་ཀྱི་རང་བཞིན་མེད་པ་གནས་ལུགས་མཐར་ཐུག་ཁས་ལེན་པ་དང༌། གཞན་སྟོང་དབུ་མ་ཆེན་པོ་ཁས་ལེན་པ་ལྟ་བུ་སྟེ་བོད་ན་ལྟ་བ་གྲགས་ཆེ་བ་གསུམ་བྱུང་གི་ཡོད་པ་རེད། ཡིན་ན་ཡང་སྔ་འགྱུར་རྙིང་མ་ལ་བསམ་བློ་བཏང་ན་འོད་གསལ་རྫོགས་པ་ཆེན་པོ་དང་འཁོར་ལོ་ཐ་མའི་དགོངས་པ་འགྲེལ་བའི་ཚེ་བསམ་ན་རང་བཞིན་འོད་གསལ་བའི་སེམས་ཀྱི་སྟེང་ནས་གཏན་ལ་ཕབ་པ་མ་གཏོགས་པ་ཡོད་མེད་ཡིན་མིན་གང་ཡང་ཁས་མི་ལེན་པ་ཙམ་གྱིས་བཞག་པ་ཡིན་ན་ཅུང་ཙམ་ཡོང་གི་མེད་པ་ཞིག་བསམ་སོང༌། དེ་བཞིན་དུ་ས་སྐྱ་བ་ལྟ་བུ་མཚོན་པ་ཡིན་ནའང་གོ་རམས་པ་སོགས་ཀྱིས་ཡོད་མེད་ཡིན་མིན་གང་ཡང་ཁས་མི་ལེན་པའི་ཁས་ལེན་ཀུན་བྲལ་གྱི་ལྟ་བ་བཤད་པ་རེད། ཡིན་ན་ཡང་ས་སྐྱའི་སྔགས་ཀྱི་སྐབས་སུ་ལམ་འབྲས་བཤད་ཡོང་དུས། གསལ་སྟོང་འཛིན་མེད་ཀྱི་རིག་པ་ཞེས་རིག་པ་གཅིག་གི་སྟེང་ནས་འགྲེལ་བཤད་གནང་ཚེ་ཁས་ལེན་ཀུན་བྲལ་ཙམ་བཤད་ན་གནས་ལུགས་མཐར་ཐུག་དེ་བཤད་ཐུབ་ཀྱི་མེད་པ་ཞིག་རེད་བསམ་སོང༌། ལྟ་བ་མཐར་ཐུག་དེ། སྔགས་ཀྱི་བསྟན་ཡུལ་གྱི་གདུལ་བྱ་ལས་ལྷག་གི་དབང་རྣོན་ཞིག་ཡོད་རྒྱུ་མ་རེད། དེ་གནས་ལུགས་མཐར་ཐུག་གཏན་ལ་ཕབ་པ་སྐབས་སུ་བབས་པ་ཡིན་པ་རེད། དེས་ན་སྔགས་ཀྱི་སྐབས་སུ་བསྟན་ཡོང་དུས་སེམས་ཀྱི་རང་བཞིན་འོད་གསལ་གྱི་སྒོ་ནས་བཤད་དགོས་པར་འདུག་བསམ་གྱི་ཡོད་ལགས། དེ་ནང་བཞིན་དུ་བཀའ་བརྒྱུད་པ་ལ་མཚོན་པ་ཡིན་ན་ཡང་ཕྱག་ཆེན་གསུངས་པའི་སྐབས་སུ་ཡང་འོད་གསལ་བའི་ཡེ་ཤེས་ཀྱི་སྟེང་ནས་གསུངས་པ་ཨེ་ཡིན་ན་བསམ་གྱི་འདུག དེས་ན་རང་བཞིན་འོད་གསལ་བའི་ཡེ་ཤེས་ཀྱི་སྟེང་ནས་གཏན་ལ་ཕབ་གི་ཡོད་པ་དེ་འདྲ་རེད། ཡིན་ན་ཡང་བོད་ཀྱི་མཁས་པ་རྣམས་ཀྱིས་དགོངས་པ་གཅིག་དང་དབྱངས་གཅིག་ཡིན་པར་བསམ་བློ་བཏང་ན་རི་བོ་དགེ་ལྡན་པ་ལྟ་བུ་ལ་མཚོན་ན་རྗེ་རིན་པོ་ཆེས་རང་བཞིན་གྱིས་མེད་པའི་སྟེང་ནས་གཙོ་བོ་གཏན་ལ་ཕབ་གི་ཡོད་པ་རེད། ཡིན་ན་ཡང་པཎ་ཆེན་བསོད་ནམས་གྲགས་པས། ཕྱག་ཆེན་མཛེས་པའི་རྒྱན་དྲུག་ཅེས་གསུངས་ཡོད་པ་རེད། དེའི་ནང་ཡུལ་དང་ཡུལ་ཅན་གཉིས་ཀྱི་ནང་ནས་ཡུལ་ཅན་གྱི་ལྟ་བ་དེ་གཙོ་བོ་གཏན་ལ་ཕབ་ཡོང་དུས་ཡེ་ཤེས་རྩལ་འདོན་བྱས་ནས་གསུང་གི་འདུག རྗེ་བདག་ཉིད་ཆེན་པོ་ལྟ་བུ་ལ་མཚོན་པ་ཡིན་ན་རྗེ་བདག་ཉིད་ཆེན་པོས་གསུང་པོ་ཏི་བཅོ་བརྒྱད་ཡོད་པའི་ནང་ནས་པོ་ཏི་དང་པོའི་ནང་གི་ཞུ་ལན་བདུད་རྩིའི་སྨན་མཆོག་ཅེས་པའི་གཞུང་དེའི་ནང་ན་རྗེ་རིན་པོ་ཆེ་ལ་ལྷོ་བྲག་ལས་ཀྱི་རྡོ་རྗེ་ལ་བརྒྱུད་ནས་གསང་བདག་ཕྱག་ན་རྡོ་རྗེས་དངོས་སུ་གསུང་ཡོང་དུས་སེམས་ཀྱི་རང་བཞིན་འོད་གསལ་བ་ཚོལ་ཅིག ཅེས་གདམས་འདུག དེང་སང་གསུང་འབུམ་ཁྲོད་ན་བཞུགས་ཡོད་པ་རེད། དེ་ནང་བཞིན་དུ་གནས་ལུགས་མཐར་ཐུག་རྟོགས་དགོས་ན་རང་བཞིན་འོད་གསལ་བའི་སེམས་བདེ་བར་གཤེགས་པའི་ཡེ་ཤེས་སྙིང་པོ་དེ་མ་རྟོགས་ན་གནས་ལུགས་མཐར་ཐུག་རྟོགས་པ་དེ་འགྲོ་ས་མ་རེད་སྙམ། ད་སྐར་མ་གཅིག་མ་གཏོགས་དུས་ཚོད་མི་འདུག དེ་ཡན་ཆད་དུ་དོན་དམ་བདེན་པའི་སྐོར་རགས་རམ་ཙམ་ཞུས་ཟིན་པ་དེ་རེད། དེ་ནས་ཀུན་རྫོབ་ཀྱི་རྣམ་བཞག་དེ། རྣམ་ཤེས་ཀྱི་ཡུལ་གང་ཞིག གཤིས་ལ་རང་གི་ངོ་བོ་བདེན་པས་སྟོང་བ་དེ། ཀུན་རྫོབ་བདེན་པའི་མཚན་ཉིད་ཅེས་གསུང་གི་ཡོད་པ་རེད། ཀུན་རྫོབ་བདེན་པ་ལ་ཡང་དག་ཀུན་རྫོབ་དང་ལོག་པའི་ཀུན་རྫོབ་གཉིས་ཡོད། ཡིན་ན་ཡང་ཀུན་རྫོབ་དེ་འཁྲུལ་བའི་སྣང་བ་ཙམ་མ་གཏོགས་མེད་པ་རེད། འོན་ཀྱང་སྣང་བ་ཙམ་དེ་འགོག་གི་ཡོད་པ་མ་རེད། སྣང་ཙམ་དུ་འགོག་པའི་དབུ་མ་པ་སུ་ཡང་མེད་པའི་ཕྱིར་ཞེས་བླ་མ་མི་ཕམ་ཚང་གིས་གསུངས་ཡོད་པ་ནང་བཞིན་རེད། སྣང་ཙམ་དེ་ཚད་མས་གྲུབ་པར་ཀུན་མཁྱེན་དོལ་པོ་པས་ལྟ་བ་ཤན་འབྱེད་ཀྱི་སྐབས་སུ་གསུངས་ཡོད་པ་རེད། རྗེ་ཐམས་ཅད་མཁྱེན་པ་ཏཱ་ར་ནཱ་ཐས་ཐེག་མཆོག་དབུ་མའི་སྐབས་སུ་ཐ་སྙད་ཚད་གྲུབ་མང་པོ་ཞིག་གསུང་གི་ཡོད་པ་རེད་ཞུ་རྒྱུ་དེ་ཡིན། དེ་ཡིན་ན་མདོ་ཏིང་ངེ་འཛིན་རྒྱལ་པོའི་སྐབས་སུ། མིག་དང་རྣ་བ་སྣ་ཡང་ཚད་མ་མིན། །ལྕེ་དང་ལུས་དང་ཡིད་ཀྱང་ཚད་མ་མིན། །གལ་ཏེ་དབང་པོ་འདི་དག་ཚད་ཡིན་ན། །འཕགས་པའི་ལམ་གྱིས་ཁྱེད་ལ་ཅི་ཞིག་བྱ། །ཞེས་གསུངས་པ་ནི་ཆོས་རྣམས་ཀྱི་གནས་ལུགས་དེ་ཁོ་ན་ཉིད་ལ་བསམ་བློ་བཏང་ནས་གསུངས་པ་རེད། དེ་ནང་བཞིན་དུ་དཔལ་ལྡན་ཟླ་བ་གྲགས་པས་དབུ་མ་འཇུག་པའི་སྐབས་སུ་གལ་ཏེ་འཇིག་རྟེན་ཚད་མ་ཡིན་ན་ནི། །འཇིག་རྟེན་དེ་ཉིད་མཐོང་བས་འཕགས་གཞན་གྱིས། །ཅི་དགོས་འཕགས་པའི་ལམ་གྱིས་ཅི་ཞིག་བྱ། །བླུན་པོ་ཚད་མར་རིགས་པའང་མ་ཡིན་ནོ། །རྣམ་ཀུན་འཇིག་རྟེན་ཚད་མིན་དེ་ཡི་ཕྱིར། །དེ་ཉིད་སྐབས་སུ་འཇིག་རྟེན་གནོད་པ་མེད། །ཅེས་ཆོས་རྣམས་ཀྱི་གནས་ལུགས་མཐར་ཐུག་དེ་ཁོ་ན་ཉིད་བཤད་པའི་སྐབས་སུ་འཇིག་རྟེན་གྱི་གནོད་པ་མེད་པ་དང༌། འཇིག་རྟེན་དོན་ནི་འཇིག་རྟེན་གྲགས་ཉིད་ཀྱིས། །གལ་ཏེ་སེལ་ན་འཇིག་རྟེན་གྱིས་གནོད་འགྱུར། །ཞེས་འཇིག་རྟེན་གྱིས་གྲགས་པས་གྲུབ་པའི་དོན་དེ་འཇིག་རྟེན་གྲགས་ཚོད་ལྟར་བཞག་དགོས་པར་གསུང་གི་ཡོད་པ་རེད། འདིའི་སྐབས་སུ་འཇིག་རྟེན་ཁོ་རང་ཚད་མ་སོང་ཡོད་པ་མ་རེད། མངོན་སུམ་དུ་ཇི་ལྟ་བ་བཞིན་དུ་རྟོགས་ཡོད་པ་མ་རེད། དེའི་རྒྱུ་མཚན་གྱིས་དེ་ལ་ལྟོས་དགོས་པ་མ་རེད་ཅེས་གསུངས་ཡོད་པ་རེད་མ་གཏོགས་པའི་གནས་ལུགས་དེ་ཁོ་ན་ཉིད་འཇོག་བྱེད་ཀྱི་མངོན་སུམ་ཚད་མ་ཞིག་སོ་སོ་སྐྱེས་བོའི་རྒྱུད་ན་མེད་པ་ཞིག་གསུངས་པ་རེད། སྤྱིར་བཏང་ཐ་སྙད་ཚད་གྲུབ་ཡིན་པ་དེ་ཇོ་ནང་རང་གིས་དགོངས་པ་ཡིན་པར་ཇོ་ནང་གཞུང་ཆེན་ཁག་གི་སྐབས་སུ་ཡང་ནས་ཡང་དུ་དགོངས་པ་གཅིག་དང་དབྱངས་གཅིག་གིས་གསུང་གི་ཡོད་པ་རེད་ཞུས་པ་ཡིན། ཡིན་ན་ཡང་དཔེར་ན་རི་བོ་དགེ་ལྡན་པས་ཀུན་རྫོབ་ཀྱི་ཆོས་ཀུན་རྟོག་པས་བཏགས་ཙམ་ཡིན་པར་ཁས་ལེན་པ་ལས་དེ་འཁྲུལ་སྣང་ཡིན་པར་མི་བཞེད་པ་ལ། ཇོ་ནང་བས་ཀུན་རྫོབ་རྣམས་འཁྲུལ་བ་མ་ཡིན་ཀྱང་འཁྲུལ་བའི་སྣང་བ་རེད། དེའི་རྒྱུ་མཚན་གྱིས་འཁྲུལ་སྣང་ཙམ་མ་གཏོགས་ཀུན་རྫོབ་ཀྱི་ཆོས་ཐམས་ཅད་གནས་ལུགས་ལ་མེད་ཟེར་གི་ཡོད་པ་རེད། འཁྲུལ་བའི་སྣང་བ་དེ་སྣང་ཙམ་གྱིས་འཇོག་ཐུབ་དགོས་པ་རེད། དེ་ལས་ལྷག་ཏུ་བཙལ་སོང་ན་རང་ངོས་ནས་མ་གྲུབ་པས་རྙེད་དུ་ཡོད་པ་མ་ཡིན་པར་དོན་དམ་དཔྱོད་བྱེད་ཀྱི་རིགས་པ་ཆགས་འགྲོ་གི་རེད་ཞུ་རྒྱུ་དེ་ཡིན། མདོར་ན་དེ་འདྲ་ཞིག་གི་སྟེང་ནས་ཁྱེད་རྣམས་ལ་ཞུས་བཞག་པ་དེ་ཡིན། ད་འདི་ནས་ཆུ་ཚོད་ཚར་སོང་བས་ལྟ་གྲུབ་ཅིག་བཤད་དགོས་ན་ཁ་བྱང་ཙམ་མ་གཏོགས་ཆུ་ཚོད་ཀྱི་རྐྱེན་པས་ཞུ་ཐུབ་གི་མི་འདུག་ལགས། དེ་ཙམ་གྱིས་འཇོག་རྒྱུ་ཡིན་ལགས། དེ་ནས་རྣམ་པ་ཚོས་དྲི་བ་གནང་ཡོང་དུས་དྲི་བ་གཅིག་རེ་གཅིག་རེ་དྲིས་ན་སྟབས་བདེ་བོ་འདུག དྲི་བ་གཅིག་དྲིས་ནས་ངས་ལན་བཏབ་ཟིན་པ་ཡིན་ན་སླར་ཡང་དྲིས་པ་ཡིན་ན་དྲི་བ་དང་ལན་གྱི་གོ་རིམ་ཞིག་ཡོང་བས་ན་རང་གིས་འབོད་སྐུལ་ཞུས་པ་དེ་ཡིན། དེ་མ་གཏོགས་ཞུ་རྒྱུ་མེད། ཐུགས་རྗེ་ཆེ། སྔ་འགྱུར་རྙིང་མའི་གདན་ས་ཆེན་མོ་དཔལ་ཡུལ་དགོན་ནས་གནང་བའི་གཞན་སྟོང་དབུ་མའི་སྐོར་གྱི་དྲི་བ་དྲིས་ལན།སྔ་འགྱུར་རྙིང་མའི་གདན་ས་ཆེན་མོ་དཔལ་ཡུལ་དགོན་ནས་གནང་བའི་གཞན་སྟོང་དབུ་མའི་སྐོར་གྱི་དྲི་བ་དྲིས་ལན། དྲིས་ལན་གསུང་པ་པོ། ཇོ་ནང་དགེ་བཤེས་དངོས་གྲུབ་དཔལ། དྲི་བ། དཔལ་ལྡན་ཟླ་བ་གྲགས་པས། བསྟན་བཅོས་ལས་དཔྱད་རྩོད་ལ་ཆགས་པའི་ཕྱིར། །མ་མཛད་རྣམ་གྲོལ་ཕྱིར་ནི་དེ་ཉིད་བསྟན། །གལ་ཏེ་དེ་ཉིད་རྣམ་པར་བཤད་པ་ན། །གཞན་གཞུང་འཇིག་པར་འགྱུར་ན་ཉེས་པ་མེད། །ཅེས་གསུངས་པ་ལྟར་ཇོ་ནང་ཏཱ་ར་ནཱ་ཐའི་གཞུང་ལུགས་གཞིར་བཞག་སྟེ་གཞན་སྟོང་དབུ་མ་ཆེན་པོ་རྩལ་འདོན་མཛད་ནས་བཤད་པའི་སྐབས་སུ། ཁྱེད་ཀྱིས་དེ་མ་ཐག་གསུངས་པ་དེ་ག་ནང་བཞིན་རེད། འོན་ཀྱང༌། ཁྱེད་འདྲ་ལ་ཆ་བཞག་ན། ང་ཚོ་སློབ་གླིང་ཚང་མས་ཧ་ལས་པ་རེ་བ་ཆེན་པོ་བྱེད་ས་ཞིག་ཡིན་པའི་ངོས་ནས། གྲུབ་མཐའ་དང་འཆད་ཚུལ་ཙམ་ཞིག་གི་དབང་དུ་མ་བཏང་བར། ཁྱེད་རང་ཉིད་ཀྱི་དགོངས་ཚུལ་ལ། སངས་རྒྱས་བཅོམ་ལྡན་འདས་ཀྱི་མཐར་ཐུག་གི་དགོངས་པ་དེ་གཞན་སྟོང་ལྟར་དུ་གནས་པ་རེད་ཅེས་བཞེད་ཀྱིན་ཡོད་དམ། ཡང་ན་རང་སྟོང་ལྟར་དུ་གནས་པ་ཡིན་པར་དགོངས་ཀྱིན་ཡོད། ལན། ཚོགས་བསགས་སྒྲིབ་སྦྱོང་དང་སྐྱེས་སྦྱང་གི་ཤེས་རབ་སོགས་ཆ་གང་ཐད་ནས། ང་རང་ལ་མཚོན་ན་གཞན་སྟོང་དབུ་མ་ཆེན་པོའི་ལྟ་བ་རྟོགས་ཡོད་ཟེར་དགོས་ན་དཀའ་ལས་ཁག་པོ་རེད་དེ། གཞུང་ཆེན་རྣམས་ལ་ལྟ་རྟོག་བྱེད་ཡོང་དུས། མདོ་ཕྱོགས་ལ་མཚོན་ན། སངས་རྒྱས་རང་ཉིད་ཀྱི་དགོངས་པ་རང་ཉིད་ཀྱིས་བཀྲལ་བའི་མདོ་སྡེ་དགོངས་པ་ངེས་འགྲེལ་ལས་ལྷག་ཅིག་དགོངས་འགྲེལ་ཡོད་པ་མ་རེད་ལ། དེའི་སྐབས་སུ་གཞན་སྟོང་དབུ་མ་ཆེན་པོ་གསུངས་པ་རེད། སྔགས་ཕྱོགས་ལ་བསམ་ན། སྔགས་བླ་མེད་ལས་ལྷག་པའི་སྔགས་ཤིག་ཡོད་པ་མ་རེད་ལ། སྔགས་བླ་མེད་ལས་གཞན་སྟོང་དབུ་མ་ཆེན་པོ་རྩལ་འདོན་གནང་ཡོད་པ་རེད། དཔེར་ན། རྒྱུད་རྡོར་ཕྲེང་དུ། སྟོང་པ་ཉིད་དང་རང་རིག་དང༌། །ཐམས་ཅད་བདག་ཉིད་རྟག་བཞུགས་པ། །རྣལ་འབྱོར་གཅིག་པུས་རྟོགས་པ་སྟེ། །རྟོག་གེ་བ་ཡི་སྤྱོད་ཡུལ་མིན། །ཞེས་གསུངས་པ་དང༌། ལྷག་པར་དུ་དཔལ་དུས་ཀྱི་འཁོར་ལོའི་རྒྱུད་དུ་གཞན་སྟོང་གི་སྟོང་ཚུལ་ལྟར་ཚིག་ཟིན་ལ་རྩལ་འདོན་མཛད་ཡོད་པར་མ་ཟད། འཇམ་དཔལ་གྱི་ལྟ་འདོད་མདོར་བསྟན་ལས། ཕུང་པོ་རྣམ་དཔྱད་སྟོང་ཉིད་ནི། །ཆུ་ཤིང་བཞིན་དུ་སྙིང་པོ་མེད། །རྣམ་པ་ཀུན་གྱི་མཆོག་ལྡན་པའི། །སྟོང་ཉིད་དེ་ལྟར་འགྱུར་མ་ཡིན། །ཞེས་རྣམ་ཀུན་མཆོག་ལྡན་གྱི་སྟོང་ཉིད་དེ་དཔྱད་པའི་སྟོང་ཉིད་དང་མི་འདྲ་བར་མཆོག་ཏུ་གསུངས་པ་སོགས། མདོ་རྒྱུད་ཀྱི་ལུང་ལ་གཞི་བཅོལ་ན་ལྟ་བའི་མཐར་ཐུག་གཞན་སྟོང་དབུ་མ་ཆེན་པོ་རེད་བསམ་པ་དང༌། ད་ལྟ་ཡིན་ན་ཡང་ཇོ་ནང་པར་དུས་འཁོར་གྱི་སྦྱོར་བ་ཡན་ལག་དྲུག་གི་ཉམས་ལེན་མཛད་སྲོལ་མ་ཉམས་པར་ཡོད་པ་ནང་བཞིན་དུ། རང་ཡིན་ན་ཡང་ཆུང་དུས་འདྲ་ཞིག་ནས། སྦྱོར་བ་ཡན་ལག་དྲུག་ལ་འདུག་ཁུལ་ཞིག་བྱས་པ་ཡིན། དེའི་སྐབས་སུ་ཡང་གཞན་སྟོང་དབུ་མ་ཆེན་པོ་ཇི་ལྟ་བ་བཞིན་དུ། རྣམ་ཀུན་མཆོག་ལྡན་གྱི་དོན་དམ་སྟོང་གཟུགས་ཀྱི་སྐུ་དུས་ཀྱི་འཁོར་ལོའི་རྒྱུད་ལས་གསུངས་པ་ལྟར་འཆར་བ་ཐུན་མོང་དུ་མི་མང་པོ་ལ་ཡོང་གིན་ཡོད་པ་རེད། དེ་ལ་མཚོན་ན་ཡང་རྒྱུད་ཀྱི་དགོངས་པ་མ་ནོར་བའི་བདེན་དཔང་རེད་བསམ་གི་ཡོད། ལྟ་བ་དེ་རྒྱུད་ཀྱི་དགོངས་པ་མ་ཡིན་ན་དེ་བསྒོམས་པས་རྒྱུད་ཇི་ལྟ་བ་བཞིན་དུ་རྟགས་སྣང་རྣམས་ཡོང་ལུགས་ཡོད་པ་མ་རེད། དེས་ན། རང་ལ་མཚོན་ན། གཞན་སྟོང་གི་ལྟ་བ་འདི་རྒྱུད་ཀྱི་དགོངས་པ་མ་ནོར་བ་དང་མ་འཁྲུལ་བ་རེད་འདུག་བསམ་པའི་ཡིད་ཆེས་གཏིང་ནས་ཡོད་པ་ཡིན།དྲི་བ། ཀུན་མཁྱེན་མི་ཕམ་རྒྱ་མཚོའི་དབུ་མ་རྒྱན་གྱི་སྐབས་སུ། ཇོ་ནང་ཏཱ་ར་ནཱ་ཐ་དང༌། རྗེ་བདག་ཉིད་ཆེན་པོ། དེ་བཞིན་དུ་ས་སྐྱ་པ་དང༌། བཀའ་བརྒྱུད་པའི་མཁས་གྲུབ་ཐམས་ཅད་ཀྱི་ལུང་དྲངས་ཏེ། དགོངས་པ་མཐར་ཐུག་གཅིག་ཡིན་པ་དང༌། དེ་ཡང་རང་སྟོང་ལྟར་དུ་སྒྲུབ་འདུག་བསམ་སོང༌། འོན་ཀྱང་ཁྱེད་ཀྱིས་གསུང་བཤད་གནང་ཡོང་དུས། ཀུན་མཁྱེན་མི་ཕམ་པའི་གསུང་ལ་སྔ་རྩོམ་དང་ཕྱི་རྩོམ་གཉིས་སུ་ཕྱེས་ཏེ་ངེས་ཤེས་སྒྲོན་མེ་སོགས་སྔ་རྩོམ་དང༌། གཞན་སྟོང་སེང་གེའི་ང་རོ་སོགས་ཕྱིས་རྩོམ་དུ་བཞེད་དེ་མི་ཕམ་པའི་དགོངས་པ་མཐར་ཐུག་གཞན་སྟོང་ལྟར་དུ་གནས་པར་གསུངས་པས་དེ་ཇི་ལྟར་ཡིན། ད་དུང་ཀུན་མཁྱེན་མི་ཕམ་པས། བདག་ལ་གཞན་སྟོང་སྒྲུབ་པའི་ཁུར་མེད་ཀྱང༌། །རོང་ཀློང་རྣམ་གཉིས་ཀླུ་སྒྲུབ་གཞུང་དང་མཐུན། །ཞེས་གསུངས་པས། དགེན་ཁྱེད་ཀྱིས་ཀུན་མཁྱེན་མི་ཕམ་པའི་གཞུང་རྣམས་ཀྱི་དགོངས་པ་དངོས་གནས་ག་རེ་ཞིག་རེད་དགོངས་ཀྱིན་ཡོད། ལན། དེ་རིང་འདིར་མང་པོ་ཞིག་ལ་ངོ་འཚོ་རྒྱུ་དང་མཐུན་པོ་བཟོ་རྒྱུའི་དོན་ཙམ་མ་ཡིན་པར། སྤྱིར་བཏང་གིས་རང་གི་ནམ་རྒྱུན་བསམ་ཚུལ་ལ། ས་དགེ་བཀའ་རྙིང་ཇོ་ནང་ཆ་ཚང་གིས་སྤྲོས་བྲལ་གཏན་ལ་དབབ་ཚུལ་གཅིག་མཚུངས་ཡིན་པ་དང༌། སྤྲོས་བྲལ་གཏན་ལ་འབེབ་པའི་སྐབས་སུ་བདག་མེད་རྟོགས་པའི་ཡེ་ཤེས་དེ་སྤྲོས་པའི་བདག་ཏུ་གྲུབ་པར་འཛིན་པའི་གཉེན་པོར་འགྲོ་ཚུལ་དང༌། དེ་ལ་བརྟེན་ནས་ཐར་བའི་ལམ་ཡོད་པ་གཅིག་མཚུངས་རེད། ཡིན་ན་ཡང་མེད་དགག་ཅིག་དང་ཡེ་ཤེས་གཉིས་གཞི་མཐུན་དུ་དུས་ནམ་ཡང་སྒྲུབ་ཐུབ་ཀྱི་མ་རེད། ཇོ་ནང་བའི་ལུགས་ལ། མདོ་དང་ཁུངས་ཐུབ་ཀྱི་བསྟན་བཅོས་དག་ན། ཡོད་མིན་མེད་མིན་དང་ཁས་ལེན་མེད་པར་གསུངས་པའི་དགོངས་པ་དེ། མཉམ་བཞག་ཏུ་ཡོད་མེད་ཡིན་མིན་གྱི་འཛིན་པ་གང་ཡང་ཞུགས་མི་རུང་བའི་དོན་དུ་བཀྲལ་ནས། རྗེས་ཐོབ་ཤན་འབྱེད་ཀྱི་སྐབས་ལ་སླེབས་པ་ན་ཡོད་མེད་ཡིན་མིན་ཤན་ཕྱེས་ཏེ་བཤད་ཀྱིན་ཡོད་པ་རེད། དཔེར་ན། མདོ་སྡེ་རྒྱན་དུ། ཡོད་མིན་མེད་མིན་དེ་བཞིན་མིན་གཞན་མིན། །ཞེས་པའི་དོན། སློབ་དཔོན་དབྱིག་གཉེན་གྱི་མདོ་སྡེ་རྒྱན་དབྱིག་འགྲེལ་དུ་གསུང་ཡོང་བ་ན། ཡོངས་གྲུབ་དེ་ཉིད་ཀུན་བཏགས་གཞན་དབང་གི་ངོ་བོར་ཡོད་པ་མ་ཡིན་པ་དང༌། ཡོངས་གྲུབ་དེ་ཉིད་དོན་དམ་པའི་ངོ་བོར་མེད་པ་མ་ཡིན་ཞེས་ཁྱད་པར་སོ་སོ་ལ་སྦྱར་ནས་གསུངས་ཡོད་པ་རེད། དེ་ལས་གཞན་དུ། ཐད་ཀར་ཡོད་མེད་ཡིན་མིན་གང་མ་ཡིན་ཞེས་གསུངས་ཀྱིན་མེད་པ་རེད། དེ་ནས་བླ་མ་མི་ཕམ་ཚང་ལ་མཚོན་ན། ངེས་ཤེས་སྒྲོན་མེའི་གཞུང་གི་སྟོད་དུ་ཞིབ་ཏུ་འབྲུ་འགྲེལ་བྱས་ཏེ་བལྟས་ཡོང་དུས། གོ་རམས་པའི་འཇུག་འགྲེལ་གྱི་གསུང་ཚུལ་དང་གཅིག་མཚུངས་ཆགས་འདུག་བསམ་པ་སྐྱེས་སོང༌། འོན་ཀྱང་ཁྱེད་རྣམ་པས་ཞིབ་ཏུ་བརྡར་ཤ་གཅོད་ཀྱིན་ཡོད་པ་ཡིན་པས། ཡིན་མིན་རང་རང་གི་ངོས་ནས་བལྟ་དགོས་པ་ཞིག་རེད། བརྟག་དཔྱད་བྱེད་པ་ན་ཡང༌། གཟུར་གནས་བློ་ལྡན་དོན་གཉེར་པ། །ཉན་པོ་སྣོད་ཅེས་བྱ་བ་བཤད། །ཅེས་གསུངས་པ་བཞིན་དུ་གཟུ་བོར་གནས་པ་ངེས་པར་དུ་དགོས་པ་རེད་མ་གཏོགས། གཟུ་བོར་མ་གནས་ན་གནས་ལུགས་དེ་གྲུབ་མཐའ་ལ་ཞེན་པས་སྒྲིབ་འགྲོ་གི་རེད། སླ྄ོབ་དཔོན་དཔའ་བོས། བདག་ནི་སྟོན་པའི་ཕྱོགས་མི་འཛིན། །སེར་སྐྱ་སོགས་ལ་མི་སྡང་ཡང༌། །གང་ཞིག་རིགས་པར་ལྡན་པའི་ཚིག །དེ་ཉིད་སྟོན་པར་ཡོངས་སུ་འཛིན། །ཞེས་གསུངས་པ་ལྟར་དགོས་པ་རེད། འོན་ཀྱང་ངེས་ཤཻས་སྒྲོན་མེའི་གཞུང་གི་སྨད་ནས་ཀློང་ཆེན་མཛོད་བདུན་ནང་དུ་གསུང་པ་བཞིན་མང་པོ་ཞིག་གསུང་འདུག་བསམ་པ་དེ་ང་རང་གི་བསམ་ཚུལ་ཡིན། བླ་མ་མི་ཕམ་ཚང་གི་དུས་འཁོར་རྒྱུད་འགྲེལ་དང༌། གཉུག་སེམས་སྐོར་གསུམ། གཞན་སྟོང་སེང་གེའི་ང་རོ་ལ་སོགས་པའི་སྐབས་སུ་གཞན་སྟོང་རྐྱང་བ་གསུང་གི་འདུག སྐུ་ཚེ་སྟོད་སྨད་ལས་སྨད་ཀྱི་དགོངས་པ་དང༌། གཞུང་ཡིན་ན་ཡང་ཕྱི་རྩོམ་དབང་བཙན་པ་དང༌། གདུལ་བྱ་ལ་བསམ་ན་ཡང་སྔགས་དང་གཉུག་སེམས་ཀྱི་སྐོར་གསུང་དགོས་ཀྱི་གདུལ་བྱ་དབང་པོ་རྣོ་བ་རེད། དེས་ན་བླ་མ་མི་ཕམ་ཚང་གི་དགོངས་པ་དེ་གཞན་སྟོང་ལྟར་དུ་གནས་པ་རེད་བསམ་གྱིན་ཡོད། བླ་མ་མི་ཕམ་ཚང་གིས། བདག་ལ་གཞན་སྟོང་སྒྲུབ་པའི་ཁུར་མ་མཆིས། །གསུངས་པ་དེ་དངོས་གནས་ཡོད་པ་རེད་དེ། དེའི་དོན་དམ་ཆོས་སོགས་ཀྱིས་ཇོ་ནང་བ་ལ་དགག་པ་མཛད་པ་ལ། བླ་མ་མི་ཕམ་ཚང་གིས་དེ་འགོག་པའི་སྐབས་སུ། ཁོ་བོས་ཇོ་ནང་བའི་ཕྱོགས་འཛིན་བཟུང་སྟེ། དགག་ལན་བྱེད་དགོས་ཀྱི་ཁུར་དེ་མེད་གསུངས་པ་ལས། ལྟ་བ་གཞན་སྟོང་ཁོ་བོས་སྒྲུབ་ཀྱིན་མེད་གསུངས་པ་གཏན་ནས་མ་རེད། གཞན་སྟོང་སེང་གེའི་ང་རོ་ན། ངེད་འཁྲུལ་བ་ཀུན་རྫོབ་དང་མ་འཁྲུལ་བ་དོན་དམ་དུ་བཞེད་པའི་ལུགས་ལ། དོན་དམ་པར་གྲུབ་པ་ནམ་ཡང་དགག་མི་རུང་བས། ཞེས་ངེད་ཅེས་གསུངས་ཡོད་པ་རེད། གལ་སྲིད་གཞན་སྟོང་གི་ལྟ་བ་གསུངས་པ་དེ་ཇོ་ནང་བའི་འདོད་པ་གསུངས་པ་ཙམ་ཡིན་ན། ངེད་ཅེས་གསུངས་དགོས་དོན་ཡོད་པ་མ་རེད། ལྷག་པར་དུ་ཀུན་མཁྱེན་ཀློང་ཆེན་རབ་འབྱམས་ཀྱི་གསུང་ཚུལ་དེ་གཞན་སྟོང་ཁོ་ན་ཡིན་པ་དང༌། ཀཿཐོག་དགེ་རྩེ་པནྚི་ཏའི་གཞུང་རྣམས་ཇོ་ནང་གི་གསུང་ཟིན་དང་གཅིག་པ་གཅིག་མཚུངས་བྱུང་གི་ཡོད་པར་མ་ཟད། རྫོགས་ཆེན་གྱི་ལྟ་བ་དང་གཞན་སྟོང་གི་ལྟ་བ་གཅིག་པ་བྱས་ནས་མང་པོ་བསྒྲུབས་ཡོད་པ་རེད། དེ་ཐམས་ཅད་རང་གི་ལྟ་ཚུལ་ཙམ་ཡིན་པས། འགྲིག་མེད་ས་ཅི་ཡོད་ན་དགོངས་འགལ་མེད་པར་ཞུ་ཞུས་པ་ཡིན།དྲི་བ། རིན་པོ་ཆེ་མཆོག་གིས་དེ་མ་ཐག་ཏུ་རྩ་ཤེས་ལས། མྱ་ངན་འདས་པ་བདེན་གཅིག་པུ། །གསུངས་པ་བཞིན་དུ་དོན་དམ་བདེན་པ་བདེན་པར་གྲུབ་པ་རེད་ཅེས་གསུངས་སོང་བ་འདྲ། བདེན་པར་གྲུབ་ལུགས་དེ། གཅིག་དུ་བྲལ་ལྟ་བུའི་དོན་དཔྱོད་རིགས་པས་དཔྱད་ན་རང་ཡང་བདེན་པར་གྲུབ་གསུངས་པ་རེད་དམ། ཡང་ན་རྣམ་རྟོག་གི་ཡུལ་ལས་འདས་པ་ཙམ་ལ་བདེན་པར་གྲུབ་པ་དང་གཞན་སྟོང་ཞེས་གསུངས་པ་རེད།ལན། རང་སྟོང་པ་དང་གཞན་སྟོང་གཉིས་ལ་མི་འདྲ་བའི་གནད་ཆེ་ཐང་དེ་གང་ན་ཡོད་པ་རེད་ཅེ་ན། རང་སྟོང་བ་དག་གིས་དོན་དམ་བདེན་པ་དེ་སྟོང་པ་ཅིར་ཡང་མ་གྲུབ་ཙམ་ལས། སྣང་ཕྱོགས་སྐུ་དང་ཡེ་ཤེས་ཀྱི་རྣམ་པ་གསུང་གིན་མེད་པ་རེད། གཞན་སྟོང་བ་རྣམས་ཀྱིས། མ་དག་ཀུན་རྫོབ་ཀྱི་སྣང་བ་ཐམས་ཅད་གདོད་ནས་བྲལ་བའི་དབྱིངས་དོན་དམ་འདུས་མ་བྱས་པ་དེ། སྐུ་རྣམ་པ་ཐམས་ཅད་པ་དང༌། ཡེ་ཤེས་མཐའ་ཡས་པར་བཞུགས་ཡོད་པར་གསུངས་པ་རེད། ངས་ལྟ་ཚུལ་ལ་རང་སྟོང་གཞན་སྟོང་གི་མི་འདྲ་བའི་གནད་དེ་ན་ཡོད་པ་རེད་བསམ་གྱིན་ཡོད། དེ་ལས་གཞན་དུ། དོན་དམ་བདེན་པ་དེ་དོན་དམ་བདེན་པ་ཞེས་པའི་བདེན་པ་དེར་གྲུབ་ཀྱི་ཡོད་པ་རེད་དེ། དེ་ཚིག་ཙམ་གྱི་ཁྱད་པར་རཻད་མ་གཏོགས། དགག་བྱའི་བདེན་གྲུབ་ལྟ་བུ་ཞིག་ནམ་ཡང་འཇོག་གི་མ་རེད། དོན་དམ་བདེན་པ་བདེན་པར་གྲུབ་ལུགས་དེ་དོན་དམ་བདེན་པ་དོན་དམ་པར་བདེན་པ་ཡིན་ལུགས་དེ་རེད། རྗེ་བདག་ཉིད་ཆེན་པོའི་འཇུག་ཊཱིཀ་དགོངས་པ་རབ་གསལ་ན། སྔ་མའི་དོན་དམ་ནི་ཤེས་བྱ་ལ་སྲིད་ལ། ཕྱི་མའི་དོན་དམ་ནི་ཤེས་བྱ་ལ་མི་སྲིད་པའི་ཕྱིར། ཞེས་དོན་དམ་པར་གྲུབ་མ་གྲུབ་ཅེས་པ་ལ། རིག་ཤེས་ལ་དོན་དམ་དུ་བྱས་ཏེ། དེའི་ངོར་གྲུབ་ཚུལ་ཞིག་དང༌། དགག་བྱའི་བདེན་པར་གྲུབ་ཚུལ་གཉིས་ཡོད་པ་རེད་ཅེས་གསལ་བར་ཕྱེས་བཞག་འདུག དེས་ན་ཇོ་ནང་བའི་དོན་དམ་བདེན་པར་གྲུབ་ཅེས་པའི་སྟེང་ནས་གནད་འགག་དང་ཁྱད་པར་ཆེན་པོ་བྱུང་ཡོད་པ་མ་རེད་བསམ་གྱིན་ཡོད། འོན་ཀྱང༌། དོན་དམ་ཡེ་ཤེས་ཡིན་པ་དང༌། སྐུ་དང་ཞིང་ཁམས་ཐམས་ཅད་པ་ཡིན་པ་དང༌། སེམས་ཀྱི་རང་བཞིན་འོད་གསལ་བ་འདི་རང་བྱུང་གི་ཡེ་ཤེས་ཡིན་པ་དང༌། དེ་འདྲའི་ཡེ་ཤེས་དེ་འདུས་མ་བྱས་ཡིན་པ་དང༌། རྟག་པ་རང་བྱུང་ཞིག་ཡིན་པ་དང༌། རྣམ་ཀུན་མཆོག་ལྡན་གྱི་སྟོང་གཟུགས་ཡིན་པ་དང༌། མཆོག་ཏུ་མི་འགྱུར་བའི་ཡེ་ཤེས་བདེ་བ་ཆེན་པོ་ཡིན་པ་སོགས་གནད་འགག་ཆེན་པོ་རྣམས་དེ་ཚོ་ཡིན་པ་རེད་བསམ་གྱིན་ཡོད།དྲི་བ། དོན་དམ་བདེན་པ་ཆོས་ཅན། བདེན་པར་མེད་དེ། བདེན་པའི་གཅིག་དང་དུ་མ་དང་བྲལ་བའི་ཕྱིར་ཞེ་ན། ལན་གང་འདེབས་རྒྱུ་ཡིན་པ་དང༌། དོན་དམ་བདེན་པ་རིགས་པའི་དཔྱད་བཟོད་དུ་གྲུབ་བམ་ཅི་ཡིན་ལགས།ལན། དོན་དམ་བདེན་པ་ཆོས་ཅན། བདེན་པར་མ་གྲུབ་སྟེ། བདེན་པའི་གཅིག་དང་དུ་མ་གང་དུ་ཡང་མ་གྲུབ་ཕྱིར་ཞེ་ན། རྟགས་མ་གྲུབ་ཅེས་ལན་མཛད་ཀྱིན་ཡོད་པ་རེད། དོན་དམ་བདེན་པ་རིགས་པས་དཔྱད་བཟོད་དུ་གྲུབ་པར་ཁས་ལེན་པ་རེད། དཔེར་ན། ཀུན་མཁྱེན་ཀློང་ཆེན་པའི་གྲུབ་མཐའ་མཛོད་ལས། ཆོས་ཅན་གང་ཞིག་རིགས་པས་དཔྱད་གཟོད་དུ་གྲུབ་པ་དེ་རང་རྒྱུད་པའི་དོན་དམ་བདེན་པའི་མཚན་ཉིད་དུ་གསུངས་བཞག་འདུག་ཨ། དེ་ནང་བཞིན་དུ་ང་ཚོས་ཀྱང་ཁས་ལེན་པ་རེད། དོན་དམ་དཔྱོད་བྱེད་ཀྱི་རིགས་པས་དཔྱད་པ་ན། དོན་དམ་བདེན་པ་རྟོགས་ཡོང་གི་རེད། དཔེར་ན། ཀུན་རྫོབ་ཀྱི་ཆོས་རྣམས་ཀུན་རྫོབ་དཔྱོད་བྱེད་ཀྱི་བློ་ངོ་ན་གྲུབ་པ་ལྟར། དོན་དམ་བདེན་པ་ཡང་དོན་དམ་དཔྱོད་བྱེད་ཀྱི་བློ་ལ་བརྟེན་ནས་འཇོག་དགོས་པ་རེད། དེས་ན་དོན་དམ་དཔྱོད་པའི་རིགས་པའི་རྙེད་དོན་རེད། དོན་དམ་དཔྱོད་བྱེད་ཀྱི་རིགས་པའི་ངོར་གྲུབ་ལུགས་དེ་དེ་ལས་གང་ཡང་ཡོད་པ་མ་རེད། བུ་སྟོན་ཐམས་ཅད་མཁྱེན་པ་ཡིན་ན། དོན་དམ་པ་བདེན་པ་ཡིན་ཡང་བདེན་པར་མ་གྲུབ་ཞུ་གི་རེད་ལ། ཀུན་མཁྱེན་དོལ་པོ་པས་བདེན་པ་ཡིན་ན་བདེན་པར་གྲུབ་དགོས། ཡོད་པ་ཡིན་ན་ཡོད་པར་གྲུབ་དགོས་པ་ལྟར་གསུངས་པ་རེད། དེས་ན་སྔོན་མའི་གསུང་རྒྱུན་ལ། བུ་དོལ་རྣམ་གཉིས་ཚིག་གི་ར་ལ་རྩོད་ཟེར་སྲོལ་ཡོད་པ་རེད། བདེན་པ་ཡིན་པར་ཁས་ལེན་པ་གཞིར་བཞག་ཐོག བདེན་པར་གྲུབ་ཅེས་ར་སྒྲ་དེ་སྦྱར་མིན་ལ་རྩོད་པ་ལས། བདེན་པར་གྲུབ་མིན་ཐད་ནས་དོན་གྱིས་གནད་གཅིག་པ་རེད།དྲི་བ། རང་གིས་མ་ཤེས་པའི་དབང་གིས་ཁྱེད་ལ་བཀའ་འདྲི་ཞིག་ཞུ་རྒྱུ་འདུག གང་ཡིན་ཞེ་ན། རྩ་བ་ཤེས་རབ་ལས། རང་བཞིན་དང་ནི་བཅོས་མིན་དང༌། །གཞན་ལ་ལྟོས་པ་མེད་པ་ཡིན། །ཞེས་པའི་སྐབས་ཀྱི་ཁྱད་ཆོས་གསུམ་ལྡན་བཤད་པ་དེ་གཞན་སྟོང་སྨྲ་བ་རྣམས་ཀྱིས་གནས་ལུགས་མཐར་ཐུག་ལ་སྦྱར་ནས་བཤད་པ་ན། དགེ་ལྡན་པ་ལྟ་བུའི་ལུགས་ལ་རང་བཞིན་བཅོས་མིན་དུ་བཞག་ན་དགག་བྱར་འགྱུར་བ་ཨེ་རེད།ལན། དགེ་ལྡན་པས་ཀྱང་གནས་ལུགས་མཐར་ཐུག་མ་བཅོས་པར་ཁས་ལེན་པ་རེད། འོན་ཀྱང༌། མ་བཅོས་པ་ཡིན་ལུགས། རྗེ་ཏཱ་ར་ནཱ་ཐས། མ་བཅོས་སོ་མ་རང་ཤར་ལྷན་ནེ་བ། །ལྷུན་འགྲུབ་འབད་རྩོལ་མེད་པའི་ངང་དུ་བཞག །ཅེས་གསུངས་པ་བཞིན་ང་ཚོས་དོན་དམ་རྟེན་འབྲེལ་མ་ཡིན་ཟེར་བ་རེད། རྟེན་འབྲེལ་མིན་པའི་སྒྲུབ་བྱེད་ཀྱང༌། རྩ་ཤེས་ཀྱི་སྐབས་སུ། རང་བཞིན་དང་ནི་བཅོས་མིན་དང༌། །གཞན་ལ་ལྟོས་པ་མེད་པ་ཡིན། །ཞེས་གསུངས་ཡོད་པ་རེད། ཇོ་ནང་བ་མ་ཟད། དེའི་དོན་བུདྡྷ་པ་ལི་ཏ་དང༌། ཟླ་བ་གྲགས་པའི་ཚིག་གསལ་དུ་ཡང་རང་བཞིན་དེ་གཞན་ལ་མ་ལྟོས་པ་ཡིན་པར་བཀྲལ་ཡོད་པ་རེད། དེས་ན་རང་སྟོང་པ་དག་གིས་འགྲེལ་ཚུལ་ལ་ཡང་རང་བཞིན་གནས་ལུགས་མཐར་ཐུག་དེ། རྟེན་འབྲེལ་མ་ཡིན་པ་དང་གཞན་ལ་མ་བརྟེན་པའི་གསུང་ཚུལ་དེ་ཡོང་གི་འདུགདྲི་བ། བུམ་པ་གནས་ལུགས་སུ་མ་གྲུབ་ཅེས་པའི་བུམ་པ་གནས་ལུགས་སུ་མ་གྲུབ་ཚུལ་ཇི་ལྟར་ཡིན།ལན། བུམ་པ་དེ་ཡིན་ལུགས་དངོས་མ་ཞིག་མ་ཡིན་པར། འཁྲུལ་བའི་སྣང་བ་ཙམ་ཞིག་གྱུར་པ་ཡོད་རེད། དེས་ན་གནས་ལུགས་མཐར་ཐུག་དེ་ལས་གཞན་དུ་ད་དུང་འཚོལ་རྒྱུ་ཡོད་པ་ཞིག་རེད། རྗེ་ཏཱ་ར་ནཱ་ཐའི་སྔོན་མེད་ལེགས་བཤད་ན་དཔེ་དང་བཅས་ཏེ་ཇི་ལྟར་གསུངས་ཡོད་པ་རེད་ཅེ་ན། གང་ཟག་ལ་ལར་དུང་སེར་བོ་ཞིག་སྣང་བཞིན་པ་ཡིན་ན་ཡང༌། དུང་སེར་བོ་དེ་ཡིན་ལུགས་ལ་མེད་པར་མ་ཟད། སྣང་བ་དེས་དུང་དཀར་བོའི་ངོ་བོ་མཐོང་བ་ལ་སྒྲིབ་པར་ཡང་བྱེད་པ་རེད། ཀུན་རྫོབ་ཅེས་པ་ཡང་ལེགས་སྦྱར་གྱི་སྐད་དུ་པྲི་ཏ་སྒྲིབ་པ་ལ་འཇུག་པས། གནས་ལུགས་མཐོང་བ་ལ་ཁོས་སྒྲིབ་འདུག་ཡོད་པས་ན། ནམ་ཞིག་དུང་སེར་སྣང་དང་བྲལ་བ་ན། སྟོང་རྐྱང་ཙམ་མིན་པའི་དུང་གི་ཡིན་ལུགས་དཀར་པོ་ཞིག་སྣང་བ་བཞིན་དུ། ཀུན་རྫོབ་འཁྲུལ་བའི་སྣང་བ་ཐམས་ཅད་ལྡོག་ཡོང་བ་ན། དེའི་ཤུལ་དུ་སྟོང་རྐྱང་མེད་དགག་ཅིག་མིན་པར། སྐུ་དང་ཡེ་ཤེས་ཞིང་ཁམས་ཐམས་ཅད་པའི་བདག་ཉིད་ཅན། རང་བཞིན་འོད་གསལ་བའི་ཡེ་ཤེས་དེ་མངོན་དུ་གྱུར་ཡོང་གིན་ཡོད་པ་རེད་ཞུ་རྒྱུ་དེ་ཡིན། འོན་ཀྱང༌། དེ་འདྲའི་གནས་ལུགས་དེ་བློ་བདེན་འཛིན་གྱིས་ཇི་ལྟར་བཟུང་བ་ལྟར་གྲུབ་སོང་ན། སྤྲོས་པའི་བདེན་པར་གྲུབ་སོང་བ་རེད། དེས་ན་སྤྲོས་པའི་བདེན་པར་གྲུབ་པ་ཡོད་པ་མ་ལགས། ཀུན་རྫོབ་རྣམས་དེ་ལྟར་དོན་ལ་མེད་ན་ཡང༌། ཀུན་རྫོབ་ནང་གསེས་ཀྱི་སྒོ་ནས། ཀུན་རྫོབ་ཀྱི་ཀུན་རྫོབ། ཀུན་རྫོབ་ཀྱི་དོན་དམ་འཇོག་ཆོག་གི་རེད།དྲི་བ། བུམ་པ་རང་བཞིན་གྱིས་མ་གྲུབ་ཟེར་བ་བུམ་པ་དགག་བྱ་བདག་གི་ངོ་བོར་མ་གྲུབ་པ་དང༌། བུམ་པ་རང་བཞིན་གྱིས་གྲུབ་ཟེར་བ་ན་བུམ་པ་དགག་བྱའི་བདེན་གྲུབ་ཏུ་སོང་བ་རེད་དམ། དེ་ལྟ་ན། ཆོས་ཉིད་རང་བཞིན་གྱིས་གྲུབ་ཟེར་བ་ན་ཆོས་ཉིད་དགག་བྱ་བདག་གི་ངོ་བོར་གྲུབ་ཅེས་པར་འགྱུར་རམ་ཅི།ལན། དཔེར་ན། བྱ་ནམ་མཁའ་ལ་འཕུར་ན་ངོ་མཚར་རྒྱུ་མེད་ཀྱང༌། མི་ནམ་མཁའ་ལ་འཕུར་ན་ངོ་མཚར་རྒྱུ་ཡོད་པ་རེད། དེ་བཞིན་དུ། བུམ་པ་རང་བཞིན་གྱིས་གྲུབ་ན་སྤྲོས་པའི་བདག་ཏུ་གྲུབ་དགོས་པ་ཡིན་ཡང༌། ཆོས་ཉིད་རང་བཞིན་གྱིས་གྲུབ་ན་སྤྲོས་པའི་བདག་ཏུ་གྲུབ་དགོས་པ་མ་རེད། བུམ་པ་སྤྱིར་བཏང་ནས། སྤྲོས་པའི་ཕ་རོལ་ན་འཚོལ་དུ་མེད་པ་དང༌། ཆོས་ཉིད་སྤྲོས་པ་དང་བྲལ་བར་རང་བཞིན་གྱིས་སྣང་གནས་མཐུན་པ་ཞིག་ཡིན་པ་རེད།དྲི་བ། སྙིང་པོ་བསྟན་པའི་མདོའི་སྐབས་སུ་མཚན་དང་དཔེ་བྱེད་ཀྱིས་བརྒྱན་པའི་དེ་བཞིན་གཤེགས་པའི་སྐུ་དྲི་མས་མ་གོས་པ་སེམས་ཅན་ཐམས་ཅད་ཀྱི་ལུས་ཀྱི་ནང་ན་གནས་པ་གསུངས་པ་དེ་ཉིད་སྒྲ་ཇི་བཞིན་དུ་ཁས་ལེན་ནམ། དགོངས་པ་ཅན་དུ་འགྲེལ་བ་རེད།ལན། དེ་སྒྲ་ཇི་བཞིན་དུ་ཁས་ལེན་དགོས། ཡིན་ན་ཡང་ལུས་ཀྱི་ནང་ན་ཡོད་ཅེས་པ་དེ་ཉིད་སྐུ་ལ་གཟུངས་གཞུག་བཞག་པ་ལྟ་བུའི་རྫས་གྲུབ་ཀྱི་ངོ་བོ་མ་ཡིན་པར། ལུས་ཅན་སེམས་ཅན་ཐམས་ཅད་འཁྲུལ་བའི་སྣང་བ་རེད། དེའི་གཞིའི་གནས་ལུགས་མཐར་ཐུག་གི་ཚུལ་དུ་ཡོད་ཚུལ་དེ་རེད། སེམས་ཅན་ཞེས་བྱ་བ་འཁྲུལ་སྣང་ཙམ་ལས་གནས་ལུགས་དོན་ལ་མ་གྲུབ་པ་ཡིན་པས། སེམས་ཅན་གྱི་གནས་ལུགས་མཐར་ཐུག་དེ་འཚོལ་ཡོང་བ་ན། གཞིའི་ཡིན་ལུགས་དེ། ངོ་བོ་ཉིད་སྐུ་དག་པ་གཉིས་ལྡན་གྱི་དབྱིངས་རེད། དེ་ལ་མཚན་བཟང་གིས་བརྒྱན་ཞེས་པ། ཡེ་ཤེས་དེ་ཉིད་དོན་དམ་པའི་མཚན་བཟང་གི་རྣམ་པར་འཆར་བ་ཙམ་གྱི་དོན་དམ་པའི་མཚན་བཟང་རེད། ང་ཚོའི་ལུགས་ལ། ཀུན་རྫོབ་ཀྱི་མཚན་བཟང་དང༌། དོན་དམ་གྱི་མཚན་བཟང་གཉིས་ཕྱེ་བ་རེད། རྣམ་མཁྱེན་ལ་ཡང༌། ཀུན་རྫོབ་གསར་བྱུང་གི་རྣམ་མཁྱེན་དང༌། དོན་དམ་པའི་རྣམ་མཁྱེན་གཉིས་ཡོད་པ་རེད། ཀུན་རྫོབ་ཀྱི་དེ་དག་རྒྱུ་རྐྱེན་ལས་གསར་དུ་བསྒྲུབ་དགོས་པ་རེད། ཆོས་ཉིད་ཀྱི་མཚན་བཟང་སོགས། སེམས་ཅན་ཐམས་ཅད་ལ་རང་ཆས་སུ་ཡོད་ཀྱང༌། དེ་ཐོབ་ཡོད་པ་མ་རེད། དེ་མངོན་དུ་གྱུར་ཡོད་པ་མ་རེད། སེམས་ཅན་ལ་ལྟོས་ཏེ་སྒྲིབ་པས་བསྒྲིབས་ཏེ་ཡོད་པ་ཡིན་ན་ཡང༌། གདོད་མ་ཉིད་ནས་རང་ཆས་སུ་བཞུགས་འདུག་ཡོད་པ་རེད་ཞུ་རྒྱུ་དེ་ཡིན། དོན་དམ་པའི་མཚན་བཟང་དེ་ཡེ་ཤེས་ཤིག་རེད། དེ་རྣམ་པ་ཐམས་ཅད་པར་འཆར་ན་ཡང་ཆོག་གི་ཡོད་པ་རེད། དཔེར་ན། བུམ་འཛིན་ཤེས་པ་དེ་བུམ་པ་དང་འདྲ་བ་ཞིག་ཏུ་སྐྱེ་བཞིན་ཡོད་པ་ཡིན་ན་ཡང༌། མིག་ཤེས་དེ་བུམ་པ་མ་རེད། དེ་བཞིན་དུ་དོན་དམ་པའི་ཡེ་ཤེས་དེ་ཉིད་རྣམ་པ་ཐམས་ཅད་པར་འཆར་ཆོག་གི་རེད། ཀརྨ་མི་བསྐྱོད་རྡོ་རྗེའི་རྗེ་བཙུན་ངལ་གསོའི་ནང་དུ། མཚན་བཟང་མི་ལྡན་ན་ཡང་རང་བཞིན་འོད་གསལ་བའི་ཤེས་པ་དེ་རྟག་ཏུ་བཞུགས་པའི་འདུས་མ་བྱས་སུ་ཁས་བླངས་ཏེ། སེམས་ཅན་དེ་ཉིད་སངས་རྒྱས་ཐོབ་པ་ན་འོད་གསལ་བའི་ཤེས་པ་དེ་ལ་ཡང་མཚན་བཟང་སོགས་ལྡན་ཡོང་གི་རེད་གསུངས་ཡོད་པ་རེད། ཡིན་ན་ཡང༌། སེམས་ཅན་གྱི་འོད་གསལ་བའི་ཤེས་པ་དེ་འདུས་མ་བྱས་རྟག་པར་ཁས་བླངས་ཚར་བ་ན། སངས་རྒྱས་ཐོབ་པ་ན། གསར་དུ་ཀུན་རྫོབ་པའི་འདུས་བྱས་ཀྱི་མཚན་བཟང་སོགས་ཐོབ་ཚུལ་ཡོད་པ་མ་རེད། དེས་ན། ང་ཚོས་དོན་དམ་པའི་མཚན་བཟང་ཞེས་པ་དོན་དམ་རང་ཉིད་འཇོག་གི་རེད། དོན་དམ་པའི་མཚན་བཟང་ཡིན་ན་གཟུགས་ཡིན་མི་དགོས་པ་དང༌། དོན་དམ་པའི་དབུ་སྐྲ་དེ་དབུ་སྐྲ་མ་ཡིན་པར་ཁས་ལེན་པ་རེད། དོན་དམ་པའི་མཚན་ཡང་དག་པར་བརྗོད་པའི་སྐབས་སུ། འདོད་ཆགས་ཆེན་པོ་དང་གཏི་མུག་ཆེན་པོ་ཞེས་སོགས་ཆེན་པོའི་སྒྲ་སྦྱར་བ་རྣམས། འདོད་ཆགས་དང་གཏི་མུག་རང་མཚན་པ་མ་ཡིན་པ་བཞིན་དུ། དུས་ཀྱི་འཁོར་ལོའི་རྒྱུད་དུ་ཡང༌། ཁྱོད་ནི་སྲིད་པ་གསུམ་ལས་འདས་ཀྱང་སྲིད་པ་གསུམ་གྱི་རྣམ་པ་ཅན། །ཞེས་སྲིད་གསུམ་ལས་འདས་པའི་སྲིད་གསུམ་གྱི་རྣམ་ཅན་ཞིག་གསུང་གིན་ཡོད་པ་དེ་རེད།དྲི་བ། ཁྱེད་ཀྱིས་འཇམ་མགོན་མི་ཕམ་རིན་པོ་ཆེའི་དགོངས་པ་གཞན་སྟོང་ལྟར་དུ་གནས་པ་གསུངས་སོང༌། འོ་ན། གཞུང་སྤྱིའི་དཀའ་གནད་ལས། རང་ལུགས་ནི་རབ་ལན་དུ་གསལ་ཏེ་རང་སྟོང་སྨྲ་བའི་ལུགས་སོ། །ཞེས་རང་སྟོང་ཡིན་པར་གསུང་པས་དེ་ཇི་ལྟར་ཡིན།ལན། སྤྱིར་ན་བླ་མ་མི་ཕམ་ཚང་གི་བདེན་གཉིས་འཇོག་ཚུལ་ལ། སྣང་སྟོང་བདེན་གཉིས་དང༌། གནས་སྣང་བདེན་གཉིས་གཉིས་སུ་ཕྱེ་བ་ལས། སྣང་སྟོང་བདེན་གཉིས་སྐབས་སུ་རང་གི་ངོ་བོས་སྟོང་ཞེས་པ་དགག་བྱའི་བདེན་གྲུབ་ཀྱིས་སྟོང་པའི་ཁྱད་པར་མ་སྦྱར་ཀྱང་དོན་ལ་དགག་བྱའི་བདེན་གྲུབ་ཀྱིས་སྟོང་པ་ཙམ་ལ་གོ་དགོས་པས་རང་སྟོང་གསུངས་ཡོད་ཀྱང༌། དེ་ལྟར་བཤད་པ་དེ་སྣང་སྟོང་བདེན་གཉིས་བཤད་པའི་སྐབས་སུ་རེད། དུས་འཁོར་དང༌། སྔགས་ཀྱི་དོན་འཆད་པ་ན། གནས་སྣང་བདེན་གཉིས་གཙོ་བོར་གསུང་གིན་ཡོད་པ་རེད། ད་དུང་གཉུག་སེམས་སྐོར་གསུམ་གྱི་སྐབས་སུ། གཉུག་མའི་ཡེ་ཤེས་ཀྱི་སྟེང་ནས་གསུངས་འདུག་པར་མ་ཟད། རྙིང་མ་རང་གི་མཁས་པ་འགའ་རེས་གཉུག་སེམས་མི་རྟག་པར་ཁས་ལེན་པ་དེ། རྣམ་ཤེས་ནི་མི་རྟག་པའོ། །ཡེ་ཤེས་ནི་རྟག་པའོ་ཞེས་པའི་མདོ་དྲངས་ནས་མི་འཐད་པར་བསྒྲུབས་བཞག་འདུག་ཨ། ད་དུང་བླ་མ་མི་ཕམ་པས་རྫོགས་པ་ཆེན་པོ་དེ་གནས་ལུགས་མཐར་ཐུག་ཏུ་ཁས་ལེན་པ་ཡིན་པས། རྫོགས་པ་ཆེན་པོ་དེ་འོད་གསལ་བའི་ཡེ་ཤེས་ཀྱི་སྟེང་ནས་མ་བཤད་རང་བཤད་ཆགས་འདུག་ཡོད་པ་རེད། ང་རང་ཆུང་དུས་ཀྱི་དགོན་པ་དེ་སྔོན་མའི་ལོ་རྒྱུས་ཡིན་ན་ཀཿཐོག་གི་དགོན་ལག་ཅིག་ཡིན་པ་རེད། དེས་དབང་གིས་སྐུ་གསུམ་ཆོ་ག་དང་ཐོས་གྲོལ་ལྟ་བུ་མང་པོ་འདོན་མྱོང་ཡོད། དེ་དག་གི་སྐབས་སུ་ཡང༌། ཨོཾ་ཨཿཧཱུཾ། ཡེ་ནས་རང་གྲོལ་སངས་རྒྱས་ཀུན་ཀྱི་ཡབ། །ཆོས་སྐུ་ཀུན་ཏུ་བཟང་ལ་གསོལ་བ་འདེབས། །ཞེས་སྣང་ཕྱོགས་ཀྱི་ཆ་ནས་གསུང་གིན་འདུག་མ་གཏོགས། སྟོང་རྐྱང་ཙམ་ཞིག་གི་ཆ་ནས། ཡེ་ཤེས་མ་ཡིན། སྐུ་གསུམ་མ་ཡིན་ཞེས་གསུང་གིན་ཡོད་པ་མ་རེད། ཀུན་མཁྱེན་ཀློང་ཆེན་རབ་འབྱམས་ཀྱིས་སེང་གེ་རྩལ་རྫོགས་ཀྱི་མདོ་དྲངས་ནས་བཤད་པ་ན། གཞི་ན་བཞུགས་པའི་རིག་པ་དེ། །ཡེ་ཤེས་དབྱིངས་ན་སྐུ་གསུམ་རྫོགས། །ཞེས་སྣང་ཕྱོགས་སྐུ་གསུམ་གྱི་རང་བཞིན་ཞིག་གསུངས་ཡོད་པ་རེད་མ་གཏོགས། སྟོང་རྐྱང་ཙམ་ཞིག་གི་ཆ་ནས་གཏན་དུ་གསུངས་ཡོད་པ་མ་རེད། སློབ་གཉེར་བྱེད་སྟངས་ཀྱི་ཐད་ནས། དང་པོ་མདོ་མཚན་ཉིད་ཐེག་པ་ལ་སྦྱོང་བཞིན་པ་ཡིན་པས། མཐར་ཐུག་སྔགས་ཀྱི་དེ་ཉིད་སོགས་འཆད་པ་ན་ཡང་དེའི་ཤན་ཞུགས་འགྲོ་བ་མང་པོ་ཡོང་གིན་འདུག་སྙམ་ལགས།དྲི་བ། གཞན་སྟོང་དབུ་མ་ཆེན་པོ་ཞེས་པ་དེ་གཙོ་བོ་བདེ་གཤེགས་སྙིང་པོའི་སྟོང་ཆ་ནས་ངོས་འཛིན་དགོས་པ་རེད་དམ། ཡང་ན་གསལ་བའི་ཆ་ནས་ངོས་འཛིན་དགོས་པ་རེད། ལན། སྟོང་བའི་ཆ་ནས་ཀྱང་འཇོག་དགོས་པ་རེད་ལ། སྣང་ཕྱོགས་ནས་ཀྱང་འཇོག་དགོས་པ་རེད། བདེ་གཤེགས་སྙིང་པོ་མ་ཡིན་དགག་ཏུ་བཞེད་པ་ཡིན་པས། དགག་བྱ་སྤྲོས་པ་བཀག་ཅིང་དེའི་ཤུལ་ནས་ཡེ་ཤེས་ཤིག་སྒྲུབ་རྒྱུ་ཡོད་པ་དེ་ཁས་ལེན་གྱིན་ཡོད་པ་རེད། བླ་མ་མི་ཕམ་གྱིས། གཞན་རྣམས་མ་ཡིན་དགག་ཏུ་འདོད། །གསུང་པ་བཞིན་དུ་མ་ཡིན་དགག་ཏུ་འདོད་པ་རེད། རང་བཞིན་གསལ་བ་ཞེས་པ་དེ། རང་བཞིན་མཐར་ཐུག་དེ་ཉིད་གསལ་བའི་རང་བཞིན་དུ་བཞུགས་པ་དེ་རེད་མ་གཏོགས། ཀུན་རྫོབ་ཀྱི་ཤེས་པ་གསལ་བ་ཞིག་གཏན་ནས་མ་རེད། དཔལ་མགོན་འཕགས་པ་ཀླུ་སྒྲུབ་ཀྱི་ཆོས་དབྱིངས་བསྟོད་པར། ས་ཡི་ནང་ན་གནས་པའི་ཆུ། །དྲི་མ་མེད་པར་ཡང་དག་གནས། །ཉོན་མོངས་ནང་ན་ཡེ་ཤེས་ཀྱང༌། །དེ་བཞིན་དྲི་མ་མེད་པར་གནས། །ཞེས་དང༌། རྒྱུད་ཀྱི་སྐབས་སུ་ཡང༌། སོ་སོ་རང་རིག་རྟག་བཞུགས་པ། །རྟོག་གེ་བ་ཡི་སྤྱོད་ཡུལ་མིན། །ཞེས་དང༌། རྒྱུད་བླ་མ་ལས། ཟག་པ་མེད་པའི་ཤེས་པ་སྦྲང་མའི་རྩི་དང་འདྲ། །ཞེས་དང༌། དུས་འཁོར་འགྲེལ་ཆེན་དྲི་མེད་འོད་ལས། སྐད་ཅིག་གཅིག་དང་དུ་མ་དང་བྲལ་བའི་ཡེ་ཤེས་ནི་རྒྱལ་བ་རྣམས་ཀྱིས་དེ་ཁོ་ན་ཉིད། ཅེས་གསུངས་ཡོད་པ་རེད། སྐད་ཅིག་གཅིག་དང་དུ་མ་དང་བྲལ་བའི་ཡེ་ཤེས་ཞེས་གསུངས་ཡོང་བ་ན་མི་རྟག་པ་ཞིག་ཡིན་ཚུལ་ཡོད་པ་མ་རེད།མཇུག་མཐར། ཁྱེད་རྣམ་པས་འདི་ལྟ་བུའི་བཀོད་སྒྲིག་ཕུན་སུམ་ཚོགས་པ་གནང་བ་ལ་ཐུགས་རྗེ་ཆེ་ཞུས་པ་ཡིན། མཇུག་མཐར་ཆོས་རྗེ་ཀུན་མཁྱེན་རིན་པོ་ཆེའི་ཞལ་ནས། བདག་ནི་ཚེ་རབས་ཐམས་ཅད་དུ། །བསྟན་པ་གསལ་བར་བྱེད་པར་ཤོག །བསྟན་པ་གསལ་བར་མ་ནུས་ན། །བསྟན་པའི་ཁུར་ཆེན་ཁུར་བར་ཤོག །ཁུར་ཆེན་ཁུར་བར་མ་ནུས་ན། །བསྟན་པ་སེམས་ཁྲལ་བྱེད་པ་དང༌། །བསྟན་པ་ཉམས་ཀྱིས་དོགས་པ་ཡིས། །བྱ་ར་ཙམ་ཡང་བྱེད་པར་ཤོག །ཕན་བདེ་འབྱུང་བའི་གནས་གཅིག་པུ། །བསྟན་པ་ཡུན་རིང་གནས་པ་དང༌། །བསྟན་པ་འཛིན་པའི་སྐྱེས་བུ་རྣམས། །སྐུ་ཚེ་ཞབས་པད་བརྟན་གྱུར་ཅིག །བཀའ་དྲིན་ཆེ། ཐུགས་རྗེ་ཆེ། ཏིང་ངེ་འཛིན་རྒྱལ་པོ་ལས། མིག་དང་རྣ་བ་སྣ་ཡང་ཚད་མ་མིན། །ཞེས་སོགས་དོན་བ༷༵ཤད་པ།སྤྲོས་བྲལ་དབུ་མའི་ལམ་སྟོན་ཀླུ་ཐོགས་རྣམ་གཉིས་ལ་ཕྱག་འཚལ་ལོ། །ཏིང་ངེ་འཛིན་རྒྱལ་པོ་ལས། མིག་དང་རྣ་བ་སྣ་ཡང་ཚད་མ་མིན། །ཞེས་སོགས་ཀྱིས་ཀུན་རྫོབ་རྟོགས་པའི་ཚད་མ་དགག་པ་མ་ཡིན་ནམ་ཞེ་ན་མ་ཡིན་ཏེ། ལུང་དེའི་དོན་ནི་འཇིག་རྟེན་སོ་སྐྱེས་ཀྱི་རྒྱུད་ཀྱི་དབང་ཤེས་སོགས་ཆོས་ཉིད་ལ་མངོན་སུམ་དུ་རྟོགས་པའི་ཚད་མ་མ་ཡིན་པའི་དོན་ཡིན་པའི་ཕྱིར་ཏེ། བདེ་མཆོག་བསྟོད་ཆེན་གྱི་རང་འགྲེལ་ཕན་བདེའི་རྒྱ་མཚོ་ལས། དེ་ཡང་ཏིང་ངེ་འཛིན་རྒྱལ་བོ་ལས། མིག་དང་རྣ་སྣ་ཡང་ཚད་མ་མིན། །ལྕེ་དང་ལུས་དང་ཡིད་ཀྱང་ཚད་མ་མིན། །གལ་ཏེ་དབང་པོ་འདི་དག་ཚད་ཡིན་ན། །འཕགས་པའི་ལམ་གྱི་སུ་ལ་ཅི་ཞིག་བྱ། །ཞེས་པ་འཇུག་ཤེས་དྲུག་གི་ཆོས་ཉིད་མངོན་སུམ་དུ་རྟོགས་པ་མེད་པའི་དོན། ཞེས་དང༌། དབུ་མ་འཇུག་པ་ལས། གལ་ཏེ་འཇིག་རྟེན་ཚད་མ་ཡིན་ན་ནི། འཇིག་རྟེན་དེ་ཉིད་མཐོང་བས་འཕགས་གཞན་གྱིས། །ཅི་དགོས་འཕགས་པའི་ལམ་གྱིས་ཅི་ཞིག་བྱ། །བླུན་པོ་ཚད་མར་རིགས་པའང་མ་ཡིན་ནོ། །རྣམ་ཀུན་འཇིག་རྟེན་ཚད་མིན་དེ་ཡི་ཕྱིར། །དེ་ཉིད་སྐབས་སུ་འཇིག་རྟེན་གནོད་པ་མེད། །འཇིག་རྟེན་དོན་ནི་འཇིག་རྟེན་གྲགས་ཉིད་ཀྱིས། །གལ་ཏེ་སེལ་ན་འཇིག་རྟེན་གྱིས་གནོད་འགྱུར། །ཞེས་དང༌། འཇུག་པ་རང་འགྲེལ་ལས། གལ་ཏེ་འཇིག་རྟེན་ཚད་མ་ཡིན་ན་ནི། །འཇིག་རྟེན་དེ་ཉིད་མཐོང་བས་འཕགས་གཞན་གྱིས། །ཅི་དགོས་འཕགས་པའི་ལམ་གྱིས་ཅི་ཞིག་བྱ། །བླུན་པོ་ཚད་མར་རིགས་པ་འང་མ་ཡིན་ནོ། །འཇིག་རྟེན་ཚད་མ་ཉིད་དུ་ཁས་བླངས་པ་ཡིན་པ་དང༌། དེ་ཉིད་དེ་ཁོ་ན་ཉིད་མཐོང་བ་ཡིན་པའི་ཕྱིར་མ་རིག་པ་སྤངས་པ་ཡིན་པར་ཁས་བླང་བར་བྱ་དགོས་ན། གང་གི་ཕྱིར་བླུན་པོ་ནི་ཚད་མར་རིགས་པ་ཡང་མ་ཡིན་ནོ། །གང་ལ་གང་གི་ཡུལ་ཅན་གྱི་མི་ཤེས་པ་ཡོད་པ་དེ་ནི་དེ་ལ་ཚད་མ་ཉིད་མ་ཡིན་པར་མཐོང་སྟེ། དཔེར་ན་ནོར་བུ་རིན་པོ་ཆེ་ལ་སོགས་པ་བརྟགས་པ་ལ་དེ་མི་ཤེས་པ་རྣམས་ལྟ་བུའོ། །མིག་ལ་སོགས་པ་དག་ཁོ་ནས་དེ་ཁོ་ན་ཉིད་ངེས་པའི་ཕྱིར། འཕགས་པའི་ལམ་ཁོང་དུ་ཆུད་པར་བྱ་བའི་ཕྱིར། ཚུལ་ཁྲིམས་དང༌། ཐོས་པ་དང༌། བསམ་པ་དང༌། བསྒོམ་པ་ལ་སོགས་པའི་བསྒྲིམ་པ་འབྲས་བུ་དང་བཅས་པ་མ་ཡིན་པར་ཡང་འགྱུར་བ་ཞིག་ན་དེ་ནི་དེ་ལྟར་ཡང་མ་ཡིན་ནོ། །དེའི་ཕྱིར། རྣམ་ཀུན་འཇིག་རྟེན་ཚད་མིན་དེ་ཡི་ཕྱིར། །དེ་ཉིད་སྐབས་སུ་འཇིག་རྟེན་གནོད་པ་མེད། །ཇི་སྐད་བཤད་པའི་ཚུལ་འདི་ལས་ན་དེ་ཁོ་ན་ཉིད་ཀྱི་སྐབས་སུ་འཇིག་རྟེན་རྣམ་པ་ཐམས་ཅད་དུ་ཚད་མ་མ་ཡིན་ཞིང༌། དེ་ཁོ་ན་ཉིད་ཀྱི་སྐབས་སུ་འཇིག་རྟེན་གྱིས་གནོད་པ་ཡང་མ་ཡིན་ནོ། །འོ་ན་ཅི་ལྟར་འཇིག་རྟེན་གྱིས་གནོད་པར་འགྱུར་ཞེ་ན། བཤད་པ། འཇིག་རྟེན་དོན་ནི་འཇིག་རྟེན་གྲགས་ཉིད་ཀྱིས། །གལ་ཏེ་སེལ་ན་འཇིག་རྟེན་གྱིས་གནོད་འགྱུར། །དཔེར་ན་ཁ་ཅིག་གིས་ངའི་རྫས་ཕྲོགས་སོ་ཞེས་སྨྲས་པ་དང༌། ཅིག་ཤོས་ཀྱིས་དེ་ལ་བརྒལ་ཞིང་བརྟགས་པ། རྫས་དེ་ཅི་ཞིག་ཡིན། དེས་བུམ་པའོ་ཞེས་སྨྲས་པ་ལ། བུམ་པ་ནི་རྫས་མ་ཡིན་ཏེ། གཞལ་བྱ་ཡིན་པའི་ཕྱིར་རྨི་ལམ་གྱི་བུམ་པ་བཞིན་ནོ་ཞེས་དེ་དེས་སུན་འབྱིན་པར་བྱེད་པ་དེ་ལྟ་བུ་ལ་སོགས་པའི་ཡུལ་ལ་འཇིག་རྟེན་པའི་དོན་འཇིག་རྟེན་པའི་གྲགས་པ་ཉིད་ཀྱིས་སེལ་བར་བྱེད་པ་ལ་འཇིག་རྟེན་གྱིས་གནོད་པར་འགྱུར་གྱི། གང་གི་ཚེ་འཕགས་པའི་གཟིགས་པ་ལ་གནས་ཏེ། སྐྱེ་བོ་མཁས་པ་ཚད་མར་བྱེད་པ་དེའི་ཚེ་ནི་འཇིག་རྟེན་གྱི་གནོད་པ་ཡོད་པ་མ་ཡིན་ནོ། །ཞེས་གསུངས་པས་ལེགས་པར་གྲུབ་ལ། དེ་ལྟར་ཟླ་བའི་ལུགས་ལ་ཡོད་པ་དང་རང་བཞིན་གྱིས་གྲུབ་པའི་ཁྱད་པར་ཡོད་དེ། འཇུག་འགྲེལ་ལས། གཟུགས་བརྙན་རང་བཞིན་མེད་པའི་རྒྱུ་དང་འབྲས་བུའི་རྣམ་པར་བཞག་པ་ཡང་ཤེས་བཞིན་དུ། མཁས་པ་སུ་ཞིག་གཟུགས་དང་ཚོར་བ་ལ་སོགས་པ་རྒྱུ་དང། འབྲས་བུ་ལས་ཐ་དད་མེད་པར་གནས་པ་རྣམས་ཡོད་པ་ཙམ་ཞིག་ཏུ་དམིགས་པས། རང་བཞིན་དང་བཅས་པར་ངེས་པར་བྱེད། དེའི་ཕྱིར་ཡོད་པར་དམིགས་ཀྱང་རང་བཞིན་གྱིས་སྐྱེ་བ་མེད་དོ། །ཞེས་པའི་ཕྱིར་རོ། །ཡང་སློབ་དཔོན་མཁས་པ་ཆེན་པོ་བྷ་བྱས་ཀླུ་ཐོགས་དགོངས་པ་གཅིག་ཏུ་བསྒྲུབས་ནས་གསུངས་སྐབས་སུ། དབུ་མ་རིན་པོ་ཆེའི་སྒྲོན་མ་ལས། བཅོམ་ལྡན་འདས་ཀྱིས་ཀྱང་ཀུན་རྫོབ་ཀྱི་ཆོས་སྔོན་དུ་མ་སོང་ཞིང་དེ་མ་རྟོགས་པར་དོན་དམ་པའི་ཆོས་རྟོགས་པར་མི་ནུས་སོ་ཞེས་གསུངས་སོ། །སློབ་དཔོན་ཟླ་བ་གྲགས་པའི་ཞལ་སྔ་ནས། ཐབས་སུ་གྱུར་པ་ཀུན་རྫོབ་བདེན་པ་དང༌། །ཐབས་ལས་བྱུང་བ་དོན་དམ་བདེན་པ་གཉིས། །གཉིས་པོའི་དབྱེ་བ་གང་གིས་མ་རྟོགས་ན། །དེ་ནི་ལོག་པར་རྟོགས་ནས་ངན་འགྲོར་འགྲོ། །ཞེས་གསུངས་སོ། །གཞན་དུ་ཀུན་རྫོབ་སྤངས་པ་ཡི། །སྟོང་ཉིད་ལྟ་ལ་མངོན་ཞེན་ན། །གསོར་མི་རུང་བའི་ལྟ་ཅན་ཏེ། །སྨན་པས་བཏང་བའི་ནད་པ་བཞིན། །འདིར་ནི་གཞན་དག་གིས་རྒལ་བ། །ཁྱེད་ཅག་ཉིད་ཀྱིས་ཕུང་པོ་ལ་སོགས་པའི་ཆོས་ཁས་བླངས་ནས། ཡང་དེ་ཉིད་འགོག་པར་བྱེད་པས་ཁས་བླངས་པས་གནོད་དོ། །དེ་བཞིན་དུ་ཡུལ་སོ་སོར་ངེས་པ་ལ་འཇུག་པ་ཉིད་ནི་དབང་པོ་རྣམས་ཀྱི་མངོན་སུམ་ཡིན་པས་མཐོང་བ་ལས་ལྷག་པའི་ཚད་མ་ནི་གཞན་མེད་ལ། ཁྱེད་ཅག་ཉིད་ཀྱང་ཡུལ་རྣམས་ཉམས་སུ་མྱོང་བ་ཡིན་ལ། འཇིག་རྟེན་པས་ཀྱང་མངོན་སུམ་དུ་ཉམས་སུ་མྱོང་བ་ཡིན་པས་དེ་དག་ཡོད་བཞིན་དུ་འགོག་པས་མངོན་སུམ་གྱིས་ཀྱང་གནོད་དོ། །དེ་བཞིན་དུ་རི་ཁྲོད་པ་དང༌། བ་ལང་རྫི་ཡན་ཆད་ལ་གྲགས་པའི་སྲ་བ་དང༌། གཤེར་བ་དང༌། ཚ་བ་དང༌། གཡོ་བ་ལ་སོགས་པའི་ཆོས་འཇིག་རྟེན་ལ་གྲགས་པའི་ཆོས་ཐམས་ཅད་སེལ་བར་བྱེད་པས་གྲགས་པས་ཀྱང་གནོད་དོ། །ཞེས་གསུངས་པའོ། །རང་ཉིད་མ་འདུལ་བར་གཞན་འདུལ་བར་རློམ་པའི་དངོས་གྲུབ་དཔལ་གྱིས་བསྒྲིགས་པའོ།། གཞན་སྟོང་དབུ་མའི་ལྟ་གྲུབ་ལ་བྱི་དོར་ཆེད་དུ་ཅུང་ཟད་བརྗོད་པ།གཞན་སྟོང་དབུ་མའི་ལྟ་གྲུབ་ལ་བྱི་དོར་ཆེད་དུ་ཅུང་ཟད་བརྗོད་པ། ཀུན་མཁྱེན་དོལ་པོ་པ་ལ་ཕྱག་འཚལ་ལོ། །ཟབ་ཞི་སྤྲོས་བྲལ་བདེན་པའི་རྒྱལ་ཁམས་ན། །རང་བཞིན་འོད་གསས་དོན་དམ་བདེན་པའི་དབྱིངས། །ཐ་སྙད་རྫུན་པའི་རྟེན་འབྲེལ་སྒྱུ་མའི་ཆོས། །སྣང་སྟོང་འགག་མེད་རོལ་བའི་ཚུལ་འདི་མཚར། །དེ་ལ་འདིར་ཇི་སྐད་དུ། ལོག་པའི་ལམ་ལ་མཐའ་མེད་ཕྱིར།། དེ་དག་འདིར་ནི་སྤྲོ་བྱ་མིན། །ཞེས་གསུངས་པ་ལྟར་ལོག་རྟོག་མཐའ་དག་འགོག་དགོས་ན་མཐའ་མེད་པས་དགོས་པ་ཆེར་མེད་མོད། གཞན་སྟོང་དབུ་མའི་ལྟ་གྲུབ་ལ་བྱི་དོར་རམ་དག་ཐེར་ཆེད་དུ་ཅུང་ཟད་བརྗོད་ན་ཇོ་ནང་རང་ལུགས་ལ་ཀུན་རྫོབ་ཀྱི་ཆོས་ཀུན་མེད་པར་འདོད་ན་མི་རུང་བ་ཡིན་ཀྱང་གྲུབ་མཐའི་རྒྱུད་བསླད་ཟིན་པ་རྣམས་ལ་ཞུ་རྒྱུ་མིན། བློ་གཟུ་བོར་གནས་པའི་བློ་ལྡན་དོན་གཉེར་ཅན་རྣམས་ལ་ལུང་འགའ་ཞིག་སྤྲོ་བར་བྱ་སྟེ། འཕགས་པ་ཀླུ་སྒྲུབ་ཀྱི་བྱང་ཆུབ་སེམས་འགྲེལ་ལས། ཆོས་རྣམས་སྟོང་པ་འདི་ཤེས་ནས། །ལས་དང་འབྲས་བུ་བསྟེན་པ་གང། །ངོ་མཚར་བས་ཀྱང་འདི་ངོ་མཚར། །རྨད་བྱུང་བས་ཀྱང་འདི་རྨད་བྱུང། །ཞེས་དང༌། རིམ་ལྔ་ལས། སྣང་བ་དང་ནི་སྟོང་པ་དག །སོ་སོའི་ཆར་ནི་ཤེས་གྱུར་ནས། །གང་དུ་ཡང་དག་འདྲེས་གྱུར་པ། །ཟུང་དུ་འཇུག་པར་དེ་བཤད་དོ། །ཞེས་དང༌། སྤྱོད་འཇུག་ལས། ཇི་ལྟར་མཐོང་ཐོས་ཤེས་པ་དག །འདིར་ནི་དགག་པར་བྱ་མིན་ཏེ། །འདིར་ནི་སྡུག་བསྔལ་རྒྱུར་གྱུར་པ། །བདེན་པར་རྟོག་པ་བཟློག་བྱ་ཡིན། །ཞེས་དང༌། དབུ་མ་སྣང་བ་ལས། འཕགས་པ་ལང་ཀར་གཤེགས་པ་ལས་ཀྱང༌། བརྟགས་པའི་དངོས་པོ་མེད་པ་སྟེ། །གཞན་གྱི་དབང་ནི་ཡོད་པ་ཡིན། །སྒྲོ་འདོགས་པ་དང་སྐུར་འདེབས་པའི། །མཐའ་ལ་རྟོག་པ་བརླག་པར་འགྱུར། །བརྟགས་པའི་ངོ་བོ་ཉིད་ཀྱིས་ནི། །ཆོས་རྣམས་ཐམས་ཅད་མ་སྐྱེས་པ། །གཞན་གྱི་དབང་ལ་བརྟེན་ནས་ནི། །མི་རྣམས་ཀྱི་ནི་རྣམ་རྟོག་སྐྱེ། །ཞེས་གསུངས་ཏེ། འདི་ལས་ནི་གཞན་གྱི་དབང་གི་ངོ་བོ་ཉིད་རྟེན་ཅིང་འབྲེལ་བར་འབྱུང་བ་ནི་དོན་དམ་པར་ཡོད་ལ། དེ་ལ་ཀུན་བརྟགས་པའི་ངོ་བོ་ཉིད་ཀྱིས་སྐྱེ་བ་མེད་པ་ལ་སོགས་པར་བཤད་དོ་ཞེས་བསྟན་པར་འགྱུར་རོ། །ཡང་དེ་ཉིད་ལས། ཕུང་པོ་ལ་ནི་བདག་མེད་དེ། །བདག་ལའང་ཕུང་པོ་མེད་པ་ཉིད། །དེ་དག་ཇི་ལྟར་རྟག་བཞིན་མིན། །དེ་དག་མེད་པ་ཉིད་ཀྱང་མིན། །ཞེས་གསུངས་ཏེ། དགག་པ་འདི་གཉིས་ཀྱིས་ཀྱང་ཕུང་པོ་རྣམས་ཡོད་པ་ཉིད་དུ་བསྟན་པ་ཡིན་ནོ། །སྟོང་པ་ཉིད་ཆེན་པོའི་མདོ་ལས་ཀྱང༌། ལས་ཀྱང་ཡོད། རྣམ་པར་སྨིན་པ་ཡང་ཡོད་དེ། བྱེད་པ་པོ་ནི་མི་དམིགས་སོ་ཞེས་གསུངས་པ་དེ་དང་ཡང་འགལ་ཏེ། འདི་ལྟར་གལ་ཏེ་དོན་དམ་པར་ལས་ཀྱང་ཡོད། རྣམ་པར་སྨིན་པ་ཡང་ཡོད་ན་ནི་དེའི་ཚེ་ཆོས་ཐམས་ཅད་ངོ་བོ་ཉིད་མེད་པར་མི་འགྱུར་རོ། །འོན་ཏེ་ཀུན་རྫོབ་ཏུ་ཡོད་ན་ནི་དེའི་ཚེ་བྱེད་པ་པོ་ཡང་ཀུན་རྫོབ་ཏུ་ཡོད་པས་བྱེད་པ་པོ་མི་དམིགས་སོ་ཞེས་བརྗོད་པར་མི་བྱའོ། །ཡང་འཕགས་པ་ལང་ཀར་གཤེགས་པ་ལས།ཇི་ལྟར་བྱིས་པས་རྣམ་བརྟགས་ལྟར། །དངོས་པོ་ཐམས་ཅད་ཡོད་པ་ཉིད། ། གལ་ཏེ་ཇི་ལྟར་མཐོང་དེ་ཉིད། །ཐམས་ཅད་དེ་ཉིད་མཐོང་བར་འགྱུར། །ཆོས་རྣམས་ཐམས་ཅད་མེད་པའི་ཕྱིར། །ཀུན་ནས་ཉོན་མོངས་དག་པ་མེད། །དེ་དག་ཇི་ལྟར་མཐོང་བཞིན་མིན། །དེ་དག་མེད་པ་ཉིད་ཀྱང་མིན། །ཞེས་གསུངས་ཏེ། འདི་ལས་ནི་ཆོས་ཐམས་ཅད་མེད་པ་ཉིད་ཡིན་ན་ཀུན་ནས་ཉོན་མོངས་པ་དང༌། རྣམ་པར་བྱང་བ་ལ་སྐུར་པ་འདེབས་པའི་ཉེས་པར་ཐལ་བར་འགྱུར་རོ་ཞེས་བསྟན་པ་ཡིན་ནོ། ། ཞེས་དང༌། ཀུན་མཁྱེན་དོལ་པོ་པའི་ལྟ་བ་ཤན་འབྱེད་ལས། ཤེས་བྱ་འདི་ལ་རྒྱལ་བ་མཁས། །རྒྱལ་བས་བརྫུན་མིན་བདེན་པ་གསུངས། །བདེན་པའི་ཆོས་འཁོར་གསུམ་དུ་གསུངས། །ཆོས་འཁོར་དང་པོ་བདེན་བཞི་གསུངས། །དེས་ན་འགོག་པའི་བདེན་པ་བདེན། །རྒྱུ་འབྲས་བདེན་པ་རྟོགས་ཕྱིར་ཡིན། །བར་པ་མཚན་ཉིད་མེད་པ་གསུངས། །དེས་ན་མཐའ་བཞི་སྤྲོས་བྲལ་བདེན། །ཀུན་རྫོབ་རང་སྟོང་རྟོགས་ཕྱིར་ཡིན། །ཐ་མ་དོན་དམ་ངེས་པ་གསུངས། །དེས་ན་ཟབ་མོ་སྣང་བའང་བདེན། །འགྱུར་མེད་ཡོངས་གྲུབ་རྟོགས་ཕྱིར་ཡིན། ། ཆོས་ཀུན་བདེན་པའང་བཞི་རུ་ཕྱེ། །ཡོད་པའི་དབྱེ་གྲངས་ཡིན་པའི་ཕྱིར། །འགོག་པའི་བདེན་པའང་ཡོད་པར་འགྱུར། །ཤེས་བྱ་བདེན་པ་གཉིས་སུ་བསྡུ། །ཤེས་བྱའི་བསྡུས་གྲངས་ཡིན་པའི་ཕྱིར། །དོན་དམ་བདེན་པའང་ཤེས་བྱར་འགྱུར། །ཤེས་བྱ་ཡིན་ན་ཡོད་དམ་མེད། །ཡོད་ན་དོན་དམ་མཐའ་མེད་གྲུབ། །འཁོར་གསུམ་དག་ཅིག་དངོས་སུ་འཕེན། །མེད་པ་ཁྱེད་ཀྱིས་བསྒྲུབ་མི་ནུས། །གལ་ཏེ་བསྒྲུབ་ན་ལོག་བསྒྲུབ་འགྱུར། །ཡོངས་སུ་གྲགས་པའང་འཇིག་བྱེད་དང། །འོན་ཀྱང་འཁོར་གསུམ་འདི་ཡང་འཁོར། །ཡོད་པ་མིན་ཞེས་བརྗོད་པ་ཡིས། །དོན་དེ་མེད་པར་མི་སྟོན་ན།། དབུལ་བའི་ཕུང་པོ་གསེར་རྣམ་དག །ཡོད་མེད་དྲིས་པས་ཡོད་མེད་ཅེས། །སྨྲ་ན་གསེར་མེད་མི་ཤེས་སམ། །མེད་པ་མིན་ཞེས་བརྗོད་པ་ཡིས། །ཆོས་དེ་ཡོད་པར་མི་སྟོན་ན། །ཕྱུག་པོ་དག་ལ་ལོངས་སྤྱཽད་དག །ཡོད་མེད་དྲིས་པས་མེད་མིན་ཞེས། །སྨྲ་ན་ནོར་ཡོད་མི་ཤེས་སམ། །ཞེས་དང༌། ཆོས་དེ་དགེ་བ་ཡིན་ནམ་མིན། །དགེ་བ་ཡིན་ན་ཡོད་དམ་མེད། ། ཡོད་ན་ཡོད་ལ་ཅི་ཞིག་སྡང། །འཁོར་གསུམ་དག་ཅིག་འདིར་ཡང་འཁོར། །མེད་ན་མེད་ལས་ཀུན་མེད་པས། །ལམ་བདེན་དགེ་བའང་མེད་འགྱུར་ལ། །མེད་མཐའི་ཕྱིར་ནའང་འཁོར་གསུམ་འཁོར། །ཞེས་དང༌། འབྲས་མེད་མ་ཡིན་གཞི་འབྲས་གསུངས། །ལམ་ཀུན་འབྲས་བུ་ཡོད་མིན་ན། །ལམ་བསྒྲུབ་དམ་པ་དུ་མ་ཡང། ། འབྲས་མེད་རྒྱུ་ལ་འབད་དམ་ཀྱེ། །འབྲས་བུ་ཡོད་ན་མིན་པ་འགལ། །དེ་མིན་འགོག་པ་པོ་མིན་ན། །འགོག་ཡོད་མིན་ན་སྤངས་པ་འགལ། ། སྐྱོན་རྣམས་སྤངས་པ་ཡོད་མིན་ནམ། །གཉེན་པོ་ཡོན་ཏན་སྐྱེ་མི་སྲིད། །སྲིད་ན་སྐྱོན་སྤངས་ངལ་བ་འཁྲུལ། །སྤངས་རྟོགས་མཐར་ཕྱིན་ཡོད་མིན་ན། །སངས་རྒྱས་དག་ཀྱང་ཇི་ལྟར་ཡོད། །ཀུན་མཁྱེན་ཡོད་པ་མ་ཡིན་ན། །ཀུན་གྱི་སྐྱབས་དང་དཔང་པོ་སུ། །ཡོད་མིན་དག་གིས་སྐྱོན་གྱི་ནི། །སྐྱབས་མེད་སྐྱབས་ནི་ཚོལ་བ་ཡི། །སྐྱབས་དག་མ་རྙེད་གོང་དུ་ཡང། །སྐྱབས་ཡོད་མིན་ཏེ་མེད་པའི་ཕྱིར། །སྐྱབས་ཚོལ་ངལ་བས་ཅི་ཞིག་བྱ། །འབྲས་བུ་ཡིན་ཀྱང་ཡོད་མིན་ན། །གཟུགས་སྐུ་དག་ཀྱང་ཡོད་མིན་ལ།། འབྲས་བུ་ཀུན་ཀྱང་ཡོད་མིན་ན། །སྡིག་འབྲས་སྡུག་བསྔལ་ངེས་པའང་ཅི། །ཡོད་མིན་འབྲས་བུར་གྲུབ་ན་ནི། །ཡོན་ཏན་བསྒྲུབ་པའི་སྐྱེ་བོ་ཡིས། །འབྲས་བུ་ཡོན་ཏན་མ་གྲུབ་བོ། །ཡོན་ཏན་ཡོད་པ་མེད་པའི་ཕྱིར། །ཡོན་ཏན་བསྒྲུབ་ངལ་ཅི་ཞིག་བྱ། །སླར་ཡང་ཡོན་ཏན་མི་བསྒྲུབས་ན། །ནོར་མེད་སྐྱེ་བོས་ནོར་བསྒྲུབས་པ། ། འབད་རྩོལ་མ་བསླབས་གོང་དུ་ཡང། །འབྲས་བུ་ནོར་ཡོད་མིན་ལ་ཡོད། །ནོར་སྒྲུབ་རྩོལ་བས་ཅི་ཞིག་བྱ། །སྡིག་སྤྱོད་སྐྱེ་བོ་དག་ལའང། །འགོག་བདེན་ཡོད་ཡིན་དེ་ཡོད་ཕྱིར། །དེས་ཀྱང་འགོག་པ་འགྲུབ་འགྱུར་རམ། །འབྲས་ཀུན་རྣམ་དག་གཉིས་སུ་ངེས། །སྐྱེད་འབྲས་སྔར་མེད་གསར་དུ་བྱས། །བྲལ་འབྲས་སྔར་ཡོད་གསར་མ་བྱས། །དེ་ཕྱིར་འབྲས་ཀུན་ཡོད་པར་འགྱུར། །ཡོད་པ་མིན་ན་འབྲས་བུ་མིན། །འབྲས་བུ་ཡིན་ན་མེད་པ་མིན། །འབྲས་བུ་ལ་ལ་ཡོད་མིན་ནམ། །ལ་ལ་ཡོད་པ་མིན་ན་ནི། །རྒྱུ་རྐྱེན་ལ་ལ་ནུས་མེད་ལ། །ལ་ལ་ནུས་དང་བཅས་པར་འགྱུར།། འདི་ཡོད་ཕྱིར་ན་འདི་འབྱུང་ཞེས། །རྒྱུ་འབྲས་ངེས་དང་བརྫུན་པར་འགྱུར། །མི་བརྫུན་རྒྱུ་རྐྱེན་ནུས་མཉམ་ལ། །འབྲས་བུ་སྐྱེས་མཉམ་རྟེན་འབྲེལ་ཆེ། །གཞི་ནི་ཆོས་ཉིད་རྒྱུ་དེ་ལ། །ལམ་བདེན་རྐྱེན་གྱིས་གསལ་བྱ་སྟེ། །འབྲས་བུ་བདེ་འབྱུང་རྟེན་འབྲེལ་ཆེ། །གཞི་ལ་འབྲས་ཡོད་མིན་ན་ནི། །མཁྱེན་པ་གསུམ་ཡང་ཡོད་མིན་མཚུངས། །རྣམ་མཁྱེན་ཡོད་པ་མིན་ན་ནི། །རང་འབྲས་འཕགས་བཞི་སུ་ཡིས་བསྐྱེད།། ཡོད་མེད་རྣམ་པ་སུ་ཡིས་གཞལ། །ལམ་དག་ཤེས་པས་ཅི་ཞིག་བྱ། །གཞི་དག་ཤེས་པའང་སུ་ཡིས་མཐོང། །ཆོས་རྣམས་ཀུན་གྱི་རྟེན་ཡིན་ཕྱིར། །འགོག་བདེན་ཆོས་ཉིད་ཡོད་པར་འགྱུར། །ཞེས་དང། །ཁྱེད་ཀྱི་ཟབ་མོ་སྟོང་པ་དེ། །ནམ་མཁའ་དག་དང་མཚུངས་མི་མཚུངས། །མཚུངས་ན་མཁའ་སྤྱོད་ཕྱིར་ཏེ་ཡོད། །མི་མཚུངས་སྟོང་པ་མིན་པའི་ཕྱིར། །ཆོས་དེ་དངོས་པོ་ཡིན་པར་འགྱུར། །ནམ་མཁའ་དག་ཀྱང་ཡོད་མིན་ན། །ས་སོགས་འབྱུང་བ་བརྟེན་པ་ཅི། །གཞན་དག་རྟེན་ཕྱིར་མཁའ་ཡོད་འགྱུར། །དེ་མཚུངས་ཆོས་ཀྱང་ཡོད་པར་འགྱུར། །ཡོད་པ་སྐྱོན་མིན་ཡོད་འཛིན་སྐྱོན། །རྟག་པ་སྐྱོན་མིན་རྟག་འཛིན་སྐྱོན། །དངོས་པོ་སྐྱོན་མིན་དངོས་འཛིན་སྐྱོན།།ཞེས་གསུངས་ལ། དེ་ལྟར་རྗེ་བཙུན་ཏཱ་ར་ནཱ་ཐའི་ཐེག་མཆོག་དབུ་མ་ལས། སྙིང་པོ་མེད་ན་ཆོས་ཉིད་མེད་པར་ འགྱུར། །ཆོས་ཉིད་མེད་ན་ཆོས་ཅན་ག་ལ་ཡོད། །དེ་མེད་ན་ནི་མཚན་ཉིད་འཛིན་པ་མེད། །དེ་ཡང་མེད་ན་ཤེས་བྱ་རིག་བྱ་དང། །རྟོགས་བྱ་མཐོང་བ་ལ་སོགས་མེད་པར་འགྱུར། །མེད་ན་ཀུན་རྫོབ་ཇི་ལྟར་སྣང་ཙམ་ལ། །སྐུར་མི་འདེབས་ཞེས་ཟེར་བའང་བསླུ་ཚིག་ཙམ། །སྣང་ན་ཤེས་རིག་རྟོགས་མཐོང་མེད་པར་འགལ། །ཞེས་གསུངས་ལ།ཀུན་མཁྱེན་དོལ་པོ་པ་ཤེས་རབ་རྒྱལ་མཚན་གྱི་བཀའ་བསྡུ་བཞི་པའི་དོན་བསྟན་རྩིས་ཆེན་པོའི་འགྲེལ་པ་ཕྱོགས་མེད་རིས་མེད་ལས། གལ་ཏེ་གཤིས་ལུགས་ལ་ཡོད་པའི་དོན་དམ་བདེ་གཤེགས་སྙིང་པོ་མེད་པར་བལྟས་ན་མེད་ལྟའི་སྐྱོན་དུ་འགྱུར་མོད། ཆད་ལྟའི་སྐྱོན་དུ་ཅི་ལ་འགྱུར་ཞེ་ན། གཤིས་ལ་མེད་པ་དང་གཤིས་ལ་ཆད་པ་དོན་གཅིག་པའི་ཕྱིར་དང། རྟེན་མེད་ན་བརྟེན་པ་མི་སྲིད་པའི་ཕྱིར་དང། ཁྱབ་བྱེད་ཁེགས་ན་ཁྱབ་བྱ་ཁེགས་པའི་ཕྱིར།དོན་དམ་མེད་ན་ཀུན་རྫོབ་ཀྱང་མེད་པས་ཐམས་ཅད་མེད་པ་དང་ཆད་པའི་སྐྱོན་དུ་འགྱུར་བའི་ཕྱིར་རོ། །དེ་བཞིན་དུ། ཡེ་ཤེས་མེད་ན་རྣམ་ཤེས་མེད་པས། ཀུན་གཞི་ཡེ་ཤེས་མེད་ན་ཀུན་གཞི་རྣམ་ཤེས་མི་སྲིད་དོ། །ཆོས་ཉིད་མེད་ན་ཆོས་རྣམས་མི་སྲིད་པས། དབུ་མ་མེད་ན་མཐའ་མ་མི་སྲིད་དོ། །རང་བཞིན་གཉུག་མ་མེད་ན་བཅོས་མ་གློ་བུར་མི་སྲིད་པས། རང་བཞིན་གྱིས་རྣམ་བྱང་མྱང་འདས་མེད་ན་ཀུན་ནས་ཉོན་མོངས་འཁོར་བ་མི་སྲིད་དོ། །ཞེས་དང༌། དེ་རྣམས་ཀྱིས་ནི་ཁ་ཅིག་བདེན་པ་ཤེས་བྱ་ལ་མི་སྲིད་པས། བདེན་པ་གཉིས་ལ་དབྱེ་གཞི་མེད་ཅིང། བདེན་པ་སྲིད་ན་ལྟས་ངན་ཡིན་ཞེས་འདོད་པ་ལ་སོགས་པ་དང། རྣམ་གཅོད་ཙམ་མ་གཏོགས་པ་ཡོངས་གཅོད་དུ་གྲུབ་པ་འགའ་ཡང་མེད། ཅེས་སོགས་དང།ཀུན་རྫོབ་ཀྱི་རྣམ་བཞག་དབུ་མ་པའི་རང་ལུགས་ལ་མེད་པས་འཇིག་རྟེན་གྲགས་སྡེའམ་སེམས་ཙམ་པའམ་མདོ་སྡེ་པའི་རྗེས་སུ་འབྲང་ཞེས་འདོད་པ་ལ་སོགས་པ་རྫོགས་ལྡན་གྱི་ཆོས་དང་འགལ་བའི་ལྟ་ངན་མང་པོ་སུན་ཕྱུང་བ་ཡིན་ནོ། །འགལ་འདུས་སྐྱོན་ཡོད་སྐྱོན་མེད་ལ་སོགས་དང། །ཞེས་སོག་གསུངས་པ་དང༌། ཞེས་དང༌། ཀུན་མཁྱེན་དོལ་པོ་པས་མཛད་པའི་སློབ་དཔོན་བློ་གྲོས་སེང་གེས་དྲིས་ལན་ལས། ཡང་ཀུན་བཏགས་ཤེས་བྱ་ཨེ་ཡིན་ཞེས་པ་འདི་ལ་ཡོངས་སུ་བརྟགས་པའི་གཟུགས་ནས་སངས་རྒྱས་ཀྱི་ཆོས་རྣམས་ཀྱི་བར་ཞེས་པ་དང༌། དངོས་པོ་མེད་པའི་གཟུགས་སོགས་ཞེས་པ་ལ་སོགས་པ་ཤེས་ཕྱིར་དབུ་མའི་རང་འགྲེལ་རྣམས་སུ་རྒྱ་ཆེར་གསུངས་ཤིང༌། བྱམས་ཆོས་དང་ས་སྡེ་ལ་སོགས་པར་ཤེས་པར་བྱ་བ་ཡིན་པར་འདོད་པ་རྣམས་ཀྱིས་ནི་ཤེས་པའི་མིག་བཙུམས་པ་ཉིད་དུ་ཟད་དོ། །ཞེས་དང༌། ཉ་ཊཱིཀ་ཡིད་ཀྱི་མུན་སེལ་ལས། རྣམ་མཁྱེན་གྱི་དམིགས་པ་འཐད་པ་ལ་ལོག་རྟོག་ནི་རྣམ་མཁྱེན་ནམ་བར་ཆད་མེད་རྩེའི་དམིགས་པ་མི་འཐད་པར་ཐལ། འདུས་བྱས་དང་འདུས་མ་བྱས་ཀྱི་ཁམས་དག་དངོས་པོ་སྟེ་རང་བཞིན་མེད་པ་ཉིད་ཀྱིས་སོ་ཞེ་ན། ཞེས་པ་ནས། དོན་དམ་དུ་རང་བཞིན་མེད་པས་དམིགས་པ་མི་འཐད་པའི་ཁྱབ་པ་མེད་དེ། བར་ཆད་མེད་རྩེའམ་རྣམ་མཁྱེན་ཆོས་ཅན། དོན་དམ་པར་ཆོས་ཐམས་ཅད་དངོས་པོ་མེད་པས་ཁྱོད་ཀྱི་དམིགས་ པ་གཏན་མེད་དུ་མི་འགྱུར་ཏེ། དོན་དམ་པར་བདེན་པའི་དངོས་པོ་མེད་པའི་རྟེན་འབྲེལ་སྒྱུ་མ་ལྟ་བུ་དང་བདེན་སྟོང་གི་ཆོས་དབྱིངས་ཀུན་རྫོབ་ཏུ་ཁྱོད་ཀྱི་དམིགས་པར་འཐད་པས་སོ། །ཞེས་དང༌། སངས་རྒྱས་དཀོན་མཆོག་ལ་ལོག་པར་རྟོག་པ་ནི། སངས་རྒྱས་དཀོན་མཆོག་མེད་པར་ཐལ། རྟོགས་པར་བྱ་བ་ཅི་ཡང་མེད་པས་སོ། །ཞེ་ན། ལན་གསུམ་དང། ཤེས་བྱ་ཆོས་ཅན། དོན་དམ་པར་རྟོགས་བྱའི་དངོས་པོ་མེད་པས་སངས་རྒྱས་དཀོན་མཆོག་མེད་པར་མི་འགྱུར་ཏེ། ཆོས་ཀུན་བདེན་སྟོང་གི་ཡང་དག་པའི་དོན་ རྟོགས་པའི་ཡེ་ཤེས་མཐར་ཐུགས་ཡོད་པས་སོ། །ཡང་དག་པའི་དོན་རབ་ཏུ་རྟོགས་པས་དེའི་ཕྱིར་སངས་རྒྱས་ཞེས་བྱའོ། །ཞེས་སོགས་སོ། །ཆོས་དཀོན་མཆོག་ལ་ལོག་རྟོག་ནི། ལུང་རྟོགས་ཀྱི་ཆོས་དཀོན་མཆོག་མེད་པར་ཐལ། དོན་ལ་མེད་པར་མིང་དུ་བཏགས་པ་ཙམ་དུ་ཟད་པས་སོ། །ཞེ་ན། སྔར་ལྟར་དང། ཤེས་བྱ་ཆོས་ཅན། དོན་དམ་པར་ཆོས་ཐམས་ཅད་མིང་ཙམ་དུ་ཟད་པས་ཆོས་དཀོན་མཆོག་མེད་པར་མི་འགྱུར་ཏེ། དེ་ལྟར་ཡིན་ཀྱང་དེ་བཞིན་ཉིད་དང་ཡང་དག་མཐའ་སོགས་ཀྱི་ཆོས་དང་དོན་དམ་པར་ཆོས་ཐམས་ཅད་མིང་དང་མཚན་མ་ཙམ་མངོན་ལོག་རྟོག་དེ་བློའི་ངོ་བོ་ཇི་ཞིག་ཡིན་ཞེ་ན། དབུ་མ་པས། ཆོས་ཐམས་ཅད་རང་བཞིན་མེད་པ་དང་དམིགས་རྣམ་སོགས་ཁས་ལེན་པ་འདི་ཕན་ཚུན་འགལ་བའི་དོན་བསྒྲུབ་པས་ན་དོན་ལ་མི་འཐད་པར་སེམས་ཤིང། དེ་ཉིད་ཀྱིས་ན་ལོག་པ་ཉིད་ཡིན་པར་ཐེ་ཚོམ་གྱི་ངོ་བོ་སྟེ་ཡིད་གཉིས་སུ་གྱུར་པ་ཞིག་གོ། །ཞེས་དང༌། རང་ལུགས་ནི། སྤང་གཉེན་མེད་པར་ཐལ། བླང་དོར་མེད་པའི་ཕྱིར། ལྟ་བུ་ལ་མཚོན་ན། དབུ་མ་པས། ཆོས་ཐམས་ཅད་རང་བཞིན་མེད་བྱས་པ་ལ། འོ་ན། རི་བོང་གི་རྭ་ལྟར་གཏན་མེད་ཡིན་པར་ཁས་ལེན་པ་ཡིན་སྙམ་ནས། བླང་དོར་མེད་པའི་ཕྱིར། ཞེས་ཟེར་བ་དེ། ཀུན་རྫོབ་སྒོ་ཅན་གྱི་ཀླན་ཀ་སྟེ། ཀུན་རྫོབ་ཀྱི་དབང་དུ་བྱས་པའམ་ཀུན་རྫོབ་ལ་བསམས་ནས་རྩོད་པ་ལ་ཟེར་ལ། དོན་དམ་གྱི་ལན་ནི། ཁོ་བོ་ཅག བླང་དོར་མེད་ཟེར་བ། དོན་དམ་དུ་ཡིན་གྱི་ཀུན་རྫོབ་ཏུ་མིན་པས། རྟགས་མ་གྲུབ་ཅེས་པ་ལྟ་བུའོ།།ཞེས་སོགས་རྒྱ་ཆེར་གསུངས་ནས་ཀུན་རྫོབ་ཏུ་ཡོད་པས་ཡོད་གོ་ཆོད་པ་དང༌། བུམ་པ་བུམ་པས་མ་སྟོང་བ་དང༌། བ་ལང་བ་ལང་གིས་མ་སྟོང་བ་སོགས་ཀུན་མཁྱེན་དོལ་པོ་པ་དང༌། ཉ་དབོན་ཀུན་དགའ་དཔལ་རྣམ་གཉིས་ཀྱིས་གསུངས་ཏེ། རི་ཆོས་ངེས་དོན་རྒྱ་མཚོ་ལས། ཡང་མདོ་དེ་ཉིད་དུ། བ་ལང་ལ་རྟ་མེད་པ་དང་རྟ་ལ་བ་ལང་མེད་པ་དཔེར་མཛད་ནས་དོན་དམ་ཆོས་ཉིད་མྱང་འདས་ཆེན་པོ་རང་གིས་མི་སྟོང་བའི་གཞན་སྟོང་དུ་བཀའ་བསྩལ་པ། འདི་ལྟ་སྟེ། རིགས་ཀྱི་བུ་འདི་ལྟར་མྱ་ངན་ལས་འདས་པ་ནི་སྔ་ནས་མེད་པ་སྟེ། འཇིམ་པའི་ཚེ་རྫ་མ་མེད་པ་ལྟ་བུ་མ་ཡིན། འགགས་ཏེ་མེད་པ་སྟེ་རྫ་མ་ཞིག་ནས་མེད་པ་ལྟ་བུ་ཡང་མ་ཡིན། གཏན་མེད་པ་སྟེ་རུས་སྦལ་གྱི་སྤུ་དང་རི་བོང་གི་རྭ་ལྟ་བུ་ཡང་མ་ཡིན་ཏེ་གཅིག་ལ་གཅིག་མེད་པ་དང་ནི་མཐུན་ནོ། །རིགས་ཀྱི་བུ་ཁྱོད་སྨྲ་བ་ལྟར་བ་ལང་ལ་རྟ་མེད་མོད་ཀྱི་བ་ལང་མེད་ཅེས་བྱར་མི་རུང་ངོ། །རྟ་ལ་བ་གླང་མེད་མོད་ཀྱི་རྟ་ཡང་མེད་ཅེས་བྱར་མི་རུང་ངོ། ། མྱ་ངན་ལས་འདས་པ་ཡང་དེ་དང་འདྲ་སྟེ། ཉོན་མོངས་པ་ལ་མྱ་ངན་ལས་འདས་པ་མེད། མྱ་ངན་ལས་འདས་པ་ལ་ཉོན་མོངས་པ་མེད་དེ་དེ་བས་ན་གཅིག་ལ་གཅིག་མེད་པ་ཞེས་བྱའོ། །ཞེས་སོགས་རབ་ཏུ་རྒྱས་པར་བཞུགས་སོ། ། ཞེས་སོགས་དང༌། ཉ་དབོན་ཀུན་དགའ་དཔལ་གྱིས་མཛད་པའི་དོལ་པོ་པའི་བསྟན་པ་སྤྱི་འགྲེལ་གྱི་རྣམ་བཤད་དགོངས་པ་རྣམ་གསལ་ཡིད་ཀྱི་མུན་སེལ་ལས། གལ་ཏེ་ཆོས་ཐམས་ཅད་རང་རང་ངོ་བོས་སྟོང་ཞེས་ཁྱད་པར་གྱི་ཚིག་གང་ཡང་མ་སྦྱར་བར་སྤྱིར་དེ་སྐད་འདོད་དམ་བརྟགས་ཤིང་དཔྱད་པའི་དེ་ཁོ་ན་ཉིད་ཀྱི་དོན་དམ་པར་ཞེས་དེ་སྐད་འདོད། དེ་ལྟར་ན་བདེན་པ་གཉིས་སུ་རྣམ་དབྱེ་བྱས་པའི་བཀའ་བསྟན་བཅོས་ཐམས་ཅད་ནོར་བ་ཁོ་ནར་འགྱུར་ཞིང། གཞི་གྲུབ་ཅུང་ཟད་ཀྱང་མེད་པར་འགྱུར་རོ། ། ཞེས་དང༌། དེ་ལྟར་ན་དགོངས་པ་ངེས་པར་འགྲེལ་གྱི་མདོར། འཁོར་ལོ་བར་བ་དྲང་དོན་དུ་གསུངས་པའི་དགོངས་པ་ཡང། འཁོར་ལོ་བར་བར་གཟུགས་སོགས་མེད་པ་དང། མ་སྐྱེས་པ་ལ་སོགས་པ་གསུངས་པ་ཡང་དོན་དམ་དཔྱོད་པའི་རིགས་པས་དཔྱད་བཟོད་ཀྱི་དོན་དམ་དུ་མེད་པ་ལ་སོགས་ལ་དགོངས་ཀྱི་སྒྲ་ཇི་བཞིན་པ་མ་ཡིན་པའི་ཕྱིར་དང། ཞེས་དང༌། རང་སྟོང་སྟོང་ཉིད་མཆོག་ཏུ་སྨྲ་བ་རྣམས་ཀྱིས་ནི་དགེ་བ་དགེ་བས་སྟོང། སྡིག་པ་སྡིག་པས་སྟོང་ཞེས་སོགས་སྒྲ་ཇི་བཞིན་པར་ཆོས་ཐམས་ཅད་རང་གིས་སྟོང་བར་ཁས་བླངས་དགོས་སོ། །དེ་ལྟར་ཁས་ལེན་ན་ཆད་ལྟ་ལས་ཀྱང་ཆེས་ཆད་ལྟར་འགྱུར་རོ། །ཞེས་དང༌། བསྟན་པ་སྤྱི་འགྲེལ་གྱི་རྣམ་བཤད་ཀྱིས་ཀུན་རྫོབ་ཀྱི་ཁས་ལེན་ཚུལ་བཤད་སྐབས་ལས། དེ་ལ་འཕགས་པ་ཀླུ་སྒྲུབ་ནི། རྣལ་འབྱོར་སྤྱོད་པའི་དབུ་མ་བ་ལྟར་ཀུན་རྫོབ་ཀྱི་རྣམ་བཞག་མཛད་པར་གསལ་ཏེ། རིགས་པ་དྲུག་ཅུ་བ་ལས། དགོས་པའི་དབང་གིས་རྒྱལ་བ་རྣམས། །ང་དང་ངའི་ཞེས་གསུངས་པ་ལྟར། །ཕུང་པོ་ཁམས་དང་སྐྱེ་མཆེད་རྣམས། །དེ་བཞིན་དགོས་པའི་དབང་གིས་གསུངས། །འབྱུང་བ་ཆེ་ལ་སོགས་བཤད་པ། །རྣམ་པར་ཤེས་སུ་ཡང་དག་འདུ། །ཞེས་དང། བྱང་ཆུབ་སེམས་འགྲེལ་ལས། རང་ལུགས་ལ་ཀུན་གཞིའི་རྣམ་ཤེས་ཀྱང་ཡོད་པར་བཤད་དོ། །ཞེས་དང༌། བཀའ་བསྡུ་ལྔ་བ་ལས། ལོངས་སྐུའི་རྟེན་ཆོས་སྐུ་ཡོད་པ་མ་ཡིན་ན། སྤྲུལ་སྐུས་གསུངས་པའི་ཆོས་རྣམས་ཡོད་པ་མིན་པར་འགྱུར། སྤྲུལ་སྐུས་གསུངས་པའི་ཆོས་ཡོད་པ་མིན་ན་ཆོས་ལ་བླང་དོར་བྱེད་པའི་དགེ་འདུན་དང་སྐྱེས་བུ་ཡོད་པ་མིན་པར་འགྱུར། ཆོས་ལ་བླང་དོར་བྱེད་མཁན་གྱི་སྐྱེས་བུ་ཡོད་པ་མ་ཡིན་ན་ལས་རྒྱུ་འབྲས་ལ་བླང་དོར་བྱེད་པ་པོ་ཡོད་པ་མིན་པར་འགྱུར། ལས་རྒྱུ་འབྲས་ལ་བླང་དོར་བྱེད་པ་པོ་ཡོད་པ་མིན་ན། ལས་རྒྱུ་འབྲས་ལ་བླང་དོར་བྱེད་པ་ལས་བྱུང་བའི་འབྲས་བུ་མཐོ་རིས་དང་ཐར་བ། འཁོར་བ་དང་ངན་སོང་སོགས་མེད་པར་ཁས་བླང་དགོས་ཏེ། རྒྱང་འཕེན་པའི་གསང་ཚིག་འཛིན་པ་དང་བཟོད་བྱུང་མི་གདའ་འམ། ཞེས་དང། ཀུན་རྫོབ་གཟུགས་ཀྱི་སྐུ་ཡོད་པའི་རྒྱུ་མཚན་གྱིས་དེའི་རྟེན་དོན་དམ་ཆོས་སྐུ་ཡོད་པར་བསྒྲུབས།ཞེས་དང། རྒྱང་འཕེན་པ་སྐྱེ་བ་སྔ་ཕྱི་དང་ལས་འབྲས་སོགས་ཡོད་པ་ལ་མེད་པར་ལྟ་བས་ཆད་ལྟ་ཟེར་བ་ཡིན་གྱི།ཞེས་དང། ཁ་ཅིག་ཀུན་རྫོབ་སྣང་ཙམ་འདི་ཡང་འགོག །ཁ་ཅིག་དོན་དམ་བདེན་པ་མེད་དོ་ལོ། །གཉིས་ཀ་དྲིལ་ནས་ཤེས་བྱ་ཡུལ་ནས་ཕུད། །རི་བོང་རྭ་ལ་སུ་ཞིག་རྩོད་པ་ཡིན། །ཞེས་དང། ཀུན་རྫོབ་ཆོས་ཀུན་བདེན་པར་ཤེས་ཀྱང་ཤེས་པ་མ་ཡིན་བརྫུན་པ་སླུ་བའི་ཆོས་ཅན་ཡིན། །ཀུན་རྫོབ་ལས་འབྲས་མེད་པར་ཤེས་ཀྱང་ཤེས་པ་མ་ཡིན་ངན་སོང་གསུམ་དུ་འཕེན་བྱེད་ཡིན། །ཞེས་དང༌། བདེན་གཉིས་གསལ་བའི་ཉི་མ་ལས། དབྱེ་གཞི་ནི་ཤེས་བྱ་ཙམ་མོ། །ཞེས་བདེན་གཉིས་ཀྱི་དབྱེ་གཞི་ཤེས་བྱ་ཡིན་པར་གསུངས་སོ། །ཇོ་ནང་ལོ་ཙཱ་མ་ཏི་པཎ་ཆེན་བློ་གྲོས་རྒྱལ་མཚན་གྱི་མདོ་སྡེ་རྒྱན་གྱི་རྣམ་བཤད་ལས། ཐམས་ཅད་མེད་པར་སྟོན་པས་བཀའ་མ་ཡིན་ཞེས་པའང་རིགས་པ་མ་ཡིན་ཏེ། མེད་དོ་ཞེས་པའི་སྒྲ་ནི་བྱིས་པས་ཀུན་བཏགས་པ་བཞིན་མེད་ཅེས་དོན་གཞན་ལ་དགོངས་ནས་གསུངས་པ་ཡིན་གྱི། ཀུན་རྫོབ་གཞན་དབང་དང་དོན་དམ་ཡོངས་གྲུབ་མེད་པར་ནི་སྟོན་པ་མ་ཡིན་པའི་ཕྱིར་བཀའི་མཆོག་ཏུ་གྲུབ་པོ། །ཞེས་དང༌། ས་བཟང་གི་སྤྱོད་འཇུག་ལས། བདེན་གཉིས་མི་འཐད་པར་ཐལ་བ་སྤངས་བ་ནི། ཞེས་པ་ནས། མདོ་ལས། དགེ་སློང་དག་འདི་ཡོད་ན་འདི་འབྱུང་སྟེ། འདི་སྐྱེས་པ་ལས་འདི་སྐྱེའོ། །ཞེས་གསུངས་པ་ལྟར་རྒྱུ་སྔོན་དུ་སོང་བ་ལས་ཕྱིས་འབྲས་བུ་དེ་འབྱུང་བར་ངེས་ཤིང་རྟོགས་པ་རྣམས་ཡོད་པའི་དུས་ན་རྒྱུ་འབྲས་དུས་ན་རྒྱུ་འབྲས་སྣང་ཙམ་དུ་བདེན་པ་དེའང་ཡོད་པས་བདེན་གཉིས་ཀྱི་རྣམ་བཞག་ཀྱང་ཡོད་དེ། དེ་ལྟར་མིན་པར་རྒྱུ་འབྲས་སུ་སྣང་ཙམ་འདི་འགགས་ནས་མེད་པའི་དུས་ན་ཀུན་རྫོབ་མེད་པ་ཉིད་ཡིན་ཡང༌། མྱ་ངན་འདས་པ་བདེན་གཅིག་པུ། །ཞེས་གྲུབ་པས་སྐྱོན་ཅུང་ཟད་ཀྱང་མེད་དོ། །དེས་ན་དོན་དམ་པར་སྟོང་བ་ཉིད་ཡིན་ཡང་ཀུན་རྫོབ་རྟེན་ཅིང་འབྲེལ་བར་འབྱུང་བ་ཡོད་པ་ནི་མི་འགལ་ཏེ། ༼འཕགས་པ་ཀླུས༽སྟོང་ཉིད་ཁོ་ནའི་ཆོས་རྣམས་ལ། །སྟོང་བའི་ཆོས་རྣམས་འབྱུང་བར་འགྱུར། །ཞེས་དང༌། སྟོང་ལ་འདི་དག་ཀུན་འཐད་ཀྱི། །མི་སྟོང་པ་ལ་འཐད་མ་ཡིན། །ཞེས་གསུངས་པ་ལྟར་རོ། །ཞེས་གསུངས་སོ། །མདོ་སྡེ་དགོངས་པ་ངེས་འགྲེལ་ལས་ཤེར་ཕྱིན་གྱི་སྒྲས་ཟིན་ལྟར་ཆོས་ཐམས་ཅད་མེད་པར་ཁས་ལེན་ན་དོན་དམ་མ་ཟད་ཀུན་བཏགས་དང་གཞན་དབང་གཉིས་ལ་བསྐུར་བ་བཏབ་པར་གསུངས་ཏེ། དོན་དམ་ཡང་དག་འཕགས་ཞུས་ཀྱི་ལེའུ་ལས། རང་གི་ལྟ་བ་མཆོག་ཏུ་འཛིན་པར་གནས་པ་དེ་དག་གིས་ནི་ཆོས་དེ་ཐོས་ན་ངའི་དགོངས་བཤད་པ་ཟབ་མོ་ཡང་དག་ཇི་ལྟ་བ་བཞིན་མི་ཤེས་ཏེ། ཆོས་དེ་ལ་མོས་ཀྱང་ཆོས་འདི་དག་ཐམས་ཅད་ནི་ངོ་བོ་ཉིད་མེད་པ་ཁོ་ན་ཡིན་ནོ། །ཆོས་འདི་དག་ཐམས་ཅད་ནི་མ་སྐྱེས་པ་ཁོ་ནའོ། །མ་འགགས་པ་ཁོ་ནའོ། །གཟོད་མ་ནས་ཞི་བ་ཁོ་ནའོ། །རང་བཞིན་གྱིས་མྱ་ངན་ལས་འདས་པ་ཁོ་ནའོ་ཞེས་ཆོས་ཀྱི་དོན་ལ་སྒྲ་ཇི་བཞིན་དུ་ཁོ་ནར་མངོན་པར་ཞེན་པར་བྱེད་དེ། དེ་དག་གཞི་དེས་ན་ཆོས་ཐམས་ཅད་ལ་མེད་པར་ལྟ་བ་དང༌། མཚན་ཉིད་མེད་པར་ལྟ་བ་འཐོབ་པར་འགྱུར་ཏེ། མེད་པར་ལྟ་བ་དང༌། མཚན་ཉིད་མེད་པར་ལྟ་བ་ཐོས་ནས་ཀྱང་ཐམས་ཅད་ལ་མཚན་ཉིད་ཐམས་ཅད་ཀྱིས་སྐུར་བ་འདེབས་ཏེ། ཆོས་རྣམས་ཀྱི་ཀུན་བརྟག་པའི་མཚན་ཉིད་ལ་སྐུར་བ་འདེབས། ཆོས་རྣམས་ཀྱི་གཞན་གྱི་དབང་གི་མཚད་ཉིད་དང༌། ཡོངས་སུ་གྲུབ་པའི་མཚན་ཉིད་ལ་ཡང་བསྐུར་བ་འདེབས་སོ། །དེ་ཅིའི་ཕྱིར་ཞེ་ན། དོན་དམ་ཡང་དག་འཕགས་འདི་ལྟར་གཞན་གྱི་དབང་ཉིད་དང༌། ཡོངས་སུ་གྲུབ་པའི་མཚན་ཉིད་ཡོད་ན་ནི། ཀུན་བརྟགས་པའི་མཚན་ཉིད་ཀྱང་རབ་ཏུ་ཤེས་པར་གྱུར་ན། དེ་ལ་གང་དག་གཞན་གྱི་དབང་གི་མཚན་ཉིད་དང༌། ཡོངས་སུ་གྲུབ་པའི་མཚན་ཉིད་ལ་མཚན་ཉིད་མེད་པར་མཐོང་བ་དེ་དག་གིས་ནི་ཀུན་བརྟགས་པའི་མཚན་ཉིད་ལ་ཡང་སྐུར་པ་བཏབ་པ་ཡིན་པའི་ཕྱིར་ཏེ། དེ་ལྟ་བས་ན་དེ་དག་ནི་མཚན་ཉིད་རྣམ་པ་གསུམ་ཆར་ལ་ཡང་སྐུར་པ་འདེབས་པ་ཞེས་བྱའོ། །ཞེས་དང༌། འཕགས་པ་ཐོག་མེད་ཀྱིས་དོན་དམ་མ་ཟད་ཀུན་བཏགས་གཞན་དབང་གཉིས་མེད་པར་སྨྲ་ན་བསྐུར་འདེབས་ཆེན་པོ་ཡིན་པ་དང༌། ཤེས་བྱ་ལ་རྨོངས་བ་དང༌། མེད་ལྟ་ཡིན་པས་དམྱལ་བར་འགྲོ་བར་གསུངས་ཏེ། བྱང་ས་ལས། དེ་བས་ན་གང་ཟག་ཁ་ཅིག་ཤེས་པར་དཀའ་བའི་མདོ་སྡེ་ཐེག་པ་ཆེན་པོ་དང་ལྡན་པ་ཟབ་མོ་སྟོང་པ་ཉིད་དང་ལྡན་པ་དགོངས་པའི་དོན་བསྟན་པ་དག་ཐོས་ན་བཤད་པའི་དོན་ཡང་དག་པ་ཇི་ལྟ་བ་བཞིན་དུ་མ་ཤེས་ནས་ཚུལ་མ་ཡིན་པར་རྣམ་པར་བརྟགས་ཏེ་རིགས་པ་མ་ཡིན་པས་བསྐྱེད་པའི་རྟོགས་པ་ཙམ་གྱིས་འདི་ཐམས་ཅད་ནི་བཏགས་པ་ཙམ་དུ་ཟད་དེ། འདི་ནི་དེ་ཁོ་ན་ཉིད་ཡིན་ནོ། །སུ་ཞིག་འདི་ལྟར་ལྟ་བ་དེ་ནི་ཡང་དག་པར་ལྟ་བ་ཡིན་ནོ་ཞེས་དེ་ལྟར་ལྟ་ཞིང་དེ་སྐད་སྨྲའོ། །དེ་དག་གི་ལྟར་ན་འདོགས་པའི་གཞིའི་དངོས་པོ་ཙམ་ཡང་མེད་པས་འདོགས་པ་དེ་ཉིད་ཀྱང་ཐམས་ཅད་ཀྱི་ཐམས་ཅད་མེད་པར་འགྱུར་ན་བཏགས་པ་ཙམ་གྱི་དེ་ཁོ་ན་ལྟ་ཡོད་པར་ག་ལ་འགྱུར་ཏེ། དེ་བས་ན་རྣམ་གྲངས་དེས་ན་དེ་དག་གིས་ནི་དེ་ཁོ་ན་ཉིད་བཏགས་པ་དེ་གཉིས་ཀ་ལ་ཡང་སྐུར་པ་འདེབས་པར་འགྱུར་ཏེ། བཏགས་པ་དེ་ཁོ་ན་ལ་སྐུར་པ་བཏབ་པས་ན་མེད་པར་ལྟ་བའི་གཙོ་བོ་ཡིན་པར་རིག་པར་བྱའོ། །དེ་ལྟར་ན་མེད་པ་དེ་ནི་ཚངས་པ་མཚུངས་པར་སྤྱོད་པ་མཛངས་པ་རྣམས་ཀྱིས་སྨོན་པའི་འོས་པ་མ་ཡིན་པ་དང་འགྲོགས་པར་མི་བྱ་བ་ཡིན་ཏེ། དེ་ནི་བདག་ཉིད་ཀྱང་ཕུང་བར་བྱེད་ལ་འཇིག་རྟེན་གང་དེའི་ལྟ་བ་ལ་སོགས་པ་ཡང་ཕུང་བར་བྱེད་དོ། །བཅོམ་ལྡན་འདས་ཀྱིས་འདི་ལ་དགོངས་ནས་འདི་ན་ལ་ལ་གང་ཟག་ཏུ་ལྟ་བ་ནི་བླའི། ལ་ལ་སྟོང་པ་ཉིད་ལ་ལོག་པར་ཟིན་པ་ནི་དེ་ལྟ་མ་ཡིན་ནོ་ཞེས་བཀའ་སྩལ་ཏོ། ། དེ་ཅིའི་ཕྱིར་ཞེ་ན། གང་ཟག་ཏུ་ལྟ་བ་ཅན་གྱི་སྐྱེ་བོ་ནི་ཤེས་བྱ་ལ་རྨོངས་པ་འབའ་ཞིག་ཏུ་ཟད་ཀྱི། ཤེས་བྱ་ཐམས་ཅད་ལ་སྐུར་པ་འདེབས་པ་མ་ཡིན་ཏེ་གཞི་དེས་སེམས་ཅན་དམྱལ་བ་རྣམས་སུ་སྐྱེ་བར་མི་འགྱུར་ལ་གཞན་ཆོས་འདོད་པ་དང་སྡུག་བསྔལ་ལས་རྣམ་པར་ཐར་པར་འདོད་པ་དག་ཀྱང་ཕུང་བར་མི་བྱེད་ཅིང་སླུ་བར་མི་བྱེད་ལ་ཆོས་དང་བདེན་པ་ལ་ཡང་འགོད་པར་བྱེད་དོ། །བསླབ་པའི་གཞི་དག་ལ་ཡང་གཡེལ་བར་མི་འགྱུར་རོ། །སྟོང་པ་ཉིད་ལ་ལོག་པར་ཟིན་པ་ནི་ཤེས་བྱའི་དངོས་པོ་ལ་ཡང་རྨོངས་ལ་ཤེས་བྱ་ཐམས་ཅད་ལ་ཡང་སྐུར་པ་འདེབས་ཏེ། གཞི་དེས་སེམས་ཅན་དམྱལ་བ་རྣམས་སུ་ཡང་སྐྱེ་བར་འགྱུར་ལ་གཞན་ཆོས་འདོད་པ་དང༌། སྡུག་བསྔལ་ལས་ཐར་འདོད་པ་རྣམས་ཀྱང་ཕུང་བར་བྱེད་དོ། །བསླབ་པའི་གཞི་དག་ལ་ཡང་གཡེལ་བར་འགྱུར་ཏེ། དེ་ལྟར་ཡང་དག་པ་ཇི་ལྟ་བ་བཞིན་གྱི་དངོས་པོ་ལ་སྐུར་པ་འདེབས་པ་ནི་ཆོས་འདུལ་བ་འདི་ལས་རབ་ཏུ་ཉམས་པ་ཡིན་ནོ། །ཞེས་གསུངས་སོ། །མཁས་མཆོག་གཞན་གྱི་ལུགས་ལ་མདོ་སྡེ་དགོངས་པ་ངེས་འགྲེལ་དྲང་དོན་གྱི་མདོར་བཞེད་པས་གནོད་པར་མི་འགྲོ་ལུགས་ཞིག་ཡོད་ཀྱང་ཇོ་ནང་གིས་མདོ་དེ་ངེས་དོན་གྱི་མདོར་ཁས་ལེན་པས་ཀུན་རྫོབ་མེད་པར་སྨྲ་བ་ལ་ཆེར་གནོད་དོ། །ལུང་རིགས་ཧ་ཅང་མང་ནའང་དེ་ཙམ་ལས་དགོས་པ་ཆེར་མ་མཐོང་ངོ་། །ཇོ་ནང་རང་ལུགས་ཀྱི་གྲུབ་མཐའི་བབས་ལ་ཀླུ་ཐོགས་དགོངས་པ་གཅིག་ཏུ་བཀྲལ་བ་དང༌། མདོ་སྡེ་དགོངས་པ་ངེས་འགྲེལ་དང་ས་སྡེ་ལྔ་སོགས་རང་གཞུང་དུ་ཁས་ལེན་བཞིན་དུ་ཀུན་རྫོབ་མེད་པར་འདོད་པ་ལུང་རིགས་མཐའ་ཡས་པ་དང་འགལ་བར་འགྱུར་རོ། །སྤྱིར་སྟོང་བ་གཏན་ལ་ཕབ་ཚེ་སྣང་བ་འགོག་དགོས་པར་བསམ་པ་ནི་སྣང་སྟོང་ཟུང་འཇུག་དང༌། རང་བཞིན་གྱི་མེད་པ་དང་མེད་པའི་ཁྱད་པར་གཏན་ནས་མ་ཤེས་པ་མ་ཟད་སྣང་བ་ཀུན་རྫོབ་ཏུ་ཡོད་ཅེས་ཚིག་ཙམ་ལས་དོན་ལ་གོ་བ་གཏན་ནས་མ་ཆགས། བུམ་པ་དང་བདེན་གྲུབ་གཅིག་ཏུ་ཞེན་པའི་ངོར་བུམ་པའི་ངོ་བོ་བདེན་གྲུབ་འགོག་ན་བུམ་པ་བཀག་ནས་འཇོག་མི་ཤེས་པ་རེད། དཔེར་ན་བརྟག་པ་སྒྲ་དོན་དང་བུམ་པ་གཅིག་ཏུ་འཁྲུལ་བའི་མུ་སྟེགས་པ་རྣམས་ཀྱིས་བུམ་པ་མ་ཡིན་པར་ལོག་པར་སྣང་བ་རང་མཚན་ཡིན་པ་དགག་ཚེ་བུམ་པ་རང་མཚན་ཡིན་པར་འཇོག་མི་ཤེས་པ་བཞིན་ནོ། །རྒྱང་འཕེན་པས་དོན་དམ་ཀུན་རྫོབ་ཁྱད་མི་ཕྱེ་བར་གཏན་མེད་ཡིན་ཞེས་ཟེར་བ་སྒོ་ཀུན་ནས་མཚུངས་སོ། །བློ་རགས་པ་ཁ་ཅིག་ཀུན་རྫོབ་ཡོད་མེད་ཟེར་བ་དོན་ལ་ཁྱེད་མེད་དེ། མེད་ཟེར་བ་རྣམས་ཀྱིས་རང་བཞིན་གྱིས་མེད་པས་ན་མེད་ཟེར་བ་དང༌། ཡོད་པར་འདོད་པ་རྣམས་ཀྱིས་རང་བཞིན་གྱིས་མེད་ཀྱང་ཐ་སྙད་དུ་ཡོད་པས་ཡོད་ཅེས་བཤད་པ་རེད་ཟེར་ན། དེ་མི་རིགས་དེ། ཕྱི་ནང་གི་གྲུབ་མཐའ་སྨྲ་བ་ཀུན་ཀྱིས་ཆོས་དེ་ཡོད་མེད་རྩོད་ཚེ་ཆོས་དེ་ཡོད་མེད་འཇོག་བྱེད་ཚད་མ་ཡོད་མེད་ཀྱིས་བཞག་ལ། ཐ་སྙད་དུ་ཡོད་པས་ཡོད་གོ་མི་ཆོད་པས་ལུགས་ལ་ཐ་སྙད་དུ་ཡོད་ཚུལ་བདེན་འཛིན་གྱི་ངོར་བདེ་གྲུབ་ཡོད་པ་ཙམ་ལས་འཇོག་མི་ཤེས་སོ། །འཛམ་གླིང་གི་ཤེས་ཡོན་པ་རྣམས་ལ་རྒྱུ་འབྲས་དང་རྟེན་འབྲེལ་དང་སྐྱེ་བ་སྔ་ཕྱི་དང་ནང་བའི་སྟོན་པའི་ཡོན་ཏན་ཡོད་ཅེས་སྨྲ་ན་མཛེས་སོ། །གྲོང་དགེའི་ངག་ཚིག་ལུང་རིགས་གང་ཡང་མེད་པ་དང་འདི་མི་འདྲའོ། །སྤྱིར་ལྟ་གྲུབ་མ་འདྲ་ན་ཡང་ལྟ་བ་མཉམ་གནས་ཀྱི་འདུ་ཤེས་དང་སེམས་ཅན་ཁམས་དབང་མི་འདྲ་བ་ཡིན་པ་ལ་ཐུགས་བསམ་བཞེས་ནས་བྱམས་བརྩེས་མཐུན་པར་གནས་དགོས་སོ། །བོད་ཀྱི་ཆོས་བརྒྱུད་རྣམས་ལས་ཇོ་ནང་རང་ལུགས་ལ་ཀུན་རྫོབ་བདེན་པ་ཡོད་པར་རྩལ་འདོན་བྱས་ནས་ཇོ་ནང་ཀུན་མཁྱེན་དོལ་པོ་སོགས་ཀྱིས་གསལ་བར་མཛད་ཡོད་ཀྱང་རང་གཞན་མང་པོ་ལ་ཆོས་རབ་ཏུ་རྣམ་འབྱེད་ཀྱི་བློ་གྲོས་གཞན་པ་དང༌། ལ་ལས་འོལ་ཚོད་བྱས་ནས་ཇོ་ནང་ལུགས་ལ་ཀུན་རྫོབ་མེད་པར་འདོད་པ་རེད་ཅེས་པའི་ཕྱིན་ཅི་ལོག་སྨྲ་བའི་རྗེས་སུ་མི་འཇུག་པར་ངན་འགྲོ་ལས་སྐྱོབས་པའི་ཕྱིར་དུ་ཀུན་མཁྱེན་དོལ་པོ་པའི་བྱིན་རླབས་ཀྱི་འོད་སྟོང་ལ་བརྟེན་ནས་དངོས་གྲུབ་དཔལ་གྱིས་བཀོད་པའོ། །འདི་བཀོད་དགེ་བས། ། འགྲོ་བ་ཀུན་གྱིས། །བདེ་གཤེགས་སྙིང་པོ། །མྱུར་ཏུ་ཐོབ་ཤོག ། རྒྱ་བོད་མཁས་པས་ཞིབ་ཆ་གསལ་བར་མ་བཤད་པའི་སྔོན་མེད་ལེགས་བཤད་ཀྱི་གཏམ།རྒྱ་བོད་མཁས་པས་ཞིབ་ཆ་གསལ་བར་མ་བཤད་པའི་སྔོན་མེད་ལེགས་བཤད་ཀྱི་གཏམ། བླ་མ་དང་མགོན་པོ་འཇམ་པའི་དབྱངས་ལ་ཕྱག་འཚལ་ལོ། །རིས་མེད་རྒྱལ་བསྟན་ཚུལ་བཞིན་འདོམས་མཛད་པའི། །དཔལ་ལྡན་བླ་མའི་ཞབས་ལ་གུས་འདུད་ནས། །འཕགས་བོད་མཁས་པས་གསལ་བར་མ་བསྟན་པའི། །མཉན་བྱ་གཏན་ཚིགས་ཡིན་ཚུལ་བདག་གིས་སྤྲོ། །དེ་ལ་འདིར་ལུང་འགལ་ལྔ་བའི་སྐབས་སུ་རྣམ་འགྲེལ་ལས། ཁྱད་པར་རྣམ་པར་གཅོད་པ་ཡི། །གཏན་ཚིགས་སུ་འགྱུར་མ་མཐོང་ཕྱིར། །ཞེས་པའི་སྐབས་སུ་སྤྱིར་མཉན་བྱ་སྒྲ་མི་རྟག་པར་སྒྲུབ་པའི་རྟགས་ཡང་དག་མ་ཡིན་པར་ཐུན་མོང་མ་ཡིན་པའི་གཏན་ཚིགས་ཡིན་པར་བསྟན་པ་ཡིན་ནམ་ཞེ་ན། མ་ཡིན་ཏེ། མཉན་བྱ་སྒྲ་མི་རྟག་པར་སྒྲུབ་པའི་རྟགས་ཡང་དག་ཡིན་པའི་ཕྱིར་ཏེ། སློབ་དཔོན་ཆེན་པོ་མཁས་པ་དཔལ་རིན་ཆེན་འབྱུང་གནས་ཞི་བའི་ནང་གི་ཁྱབ་པ་ལས། ཐུན་མོང་མ་ཡིན་གཏན་ཚིགས་ཀྱི། །རྒོལ་བ་རྨོངས་ལ་ལྟོས་པ་ཡིན། །ཞེས་དང། བློ་གཡེར་བག་ཅན་ནི་ཡང་དཔེའི་སྦྱོར་བ་ལ་ལྟོས་པ་མ་ཡིན་ནོ། །དེ་ཕྱིར་དཔེ་ལ་ཆགས་རྣམས་ལ། །བུམ་པའི་དཔེ་ནི་བསྟན་པར་མཛད། །དེ་མི་དགོས་ལ་དོན་མེད་ཡིན། །ནང་གི་ཁྱབ་པ་བློ་ལྡན་ལའོ། །ཞེས་དང། ཉ་དབོན་ཀུན་དགའ་དཔལ་གྱི་ཚད་མའི་རྒྱས་འགྲེལ་ཡིད་ཀྱི་མུན་སེལ་ལས། མཁས་གྲུབ་ཤནྟི་བ་ཡང་རྨོངས་པ་ལ་དཔེ་དགོས་པས། མཉན་བྱ་སྒྲ་མི་རྟག་པར་སྒྲུབ་པའི་རྟགས་ཡང་དག་ཡིན་ཕྱིར། མཁས་པ་རྣམས་ལ་ནི། གཏན་ཚིགས་འབའ་ཞིག་བརྗོད་པར་ཟད། །ཅེས་པས་བསྟན་ཞེས་ནང་གི་ཁྱབ་པར་བཤད་དེ་ལེགས་སམ་སྙམ་མོ། །ཞེས་གསུངས་པའི་ཕྱིར། སློབ་དཔོན་ཆོས་མཆོག་གིས་ཀྱང་མཉན་བྱ་སྒྲ་མི་རྟག་པར་སྒྲུབ་པའི་རྟགས་ཡང་དག་ཏུ་བཞེད་ལ། དེ་ལྟ་ན་ཕྱོགས་གླང་གིས། ཇི་སྐད་དུ། དབུས་ན་ཐུན་མོངས་མིན་མ་ངེས། །ཞེས་དང༌། ཁྱད་པར་མཉན་པར་བྱ་བ་ཡང་རྟགས་ཡིན་ནོ་ཞེ་ན་དེ་ཡང་རིགས་པ་མ་ཡིན་ནོ། །ཞེས་དང༌། རྣམ་འགྲེལ་ལས། ཁྱད་པར་རྣམ་པར་གཅོད་པ་ཡི། །གཏན་ཚིགས་སུ་འགྱུར་མ་མཐོང་ཕྱིར། །ཞེས་གསུངས་པ་སོགས་དང་འགལ་ལོ་ཟེར་ན། མ་གྲུབ་སྟེ། ལུང་དེ་དག་གི་དོན་ནི། ཚད་མ་སྡེ་བདུན་མདོ་དང་བཅས་པའི་སྐབས་ཀྱི་ཕྱོགས་སྔ་སྒྲའི་ཚངས་པ་བ་དང༌། རིགས་བྱེད་པས་སྒྲ་ནམ་མཁའི་ཡོན་ཏན་དུ་ཁས་བླངས་པས་རྒོལ་བ་དེ་དག་གིས། སྒྲ་རྟག་པར་འདོད་པ་མ་ཟད་སྒྲའམ་མཉན་བྱ་ཡིན་ན་རྟག་པས་ཁྱབ་པར་འདོད་པས། རྒོལ་བ་དེ་དག་གིས་མཉན་བྱ་དེ་སྒྲ་མི་རྟག་པ་དང་རྟག་པར་སྒྲུབ་པའི་མཐུན་ཕྱོགས་མི་མཐུན་ཕྱོགས་གང་ལ་མ་རྟོགས་པས་ན་དེ་རྣམས་ཀྱི་ངོར་ཐུན་མོང་མ་ཡིན་པའི་མ་ངེས་པའི་གཏན་ཚིགས་ཡིན་ཞེས་པ་སྟེ། དེ་དག་གིས་མཉན་བྱ་ཡིན་ན་རྟག་པ་ཡིན་པས་ཁྱབ་པ་ཁས་ལེན་པས་མཐུན་དཔེ་ཡང་དག་མེད་དོ། །སྤྱིར་བཏང་མཉན་བྱའི་རྟགས་ཀྱིས་སྒྲ་མི་རྟག་པར་སྒྲུབ་པའི་མཐུན་དཔེ་ནི། དུང་གི་མཉན་བྱ་དང༌། གསལ་བྱེད་ཀྱི་ཡི་གེ་ཀ་ལྟ་བུ་མཐའ་ཡས་པ་ཡོད་དོ། །སྤྱིར་ཚད་མ་སྡེ་བདུན་མདོ་དང་བཅས་པའི་ཚད་གཞུང་དག་གིས་རྒོལ་བ་དངོས་སུ་མ་སྦྱར་ཡང་དགག་ཡུལ་གྱི་ཕྱོགས་སྔ་བྱེ་བྲག་པའི་དབང་དུ་བྱས་པ་ཆེས་མང་སྟེ། སྲོག་ལྡན་གསོན་ལུས་བདག་བཅས་སུ་སྒྲུབ་པའི་མི་མཐུན་ཕྱོགས་ལ་མ་མཐོང་བར་གསུངས་པ་དང༌། ལུས་ཅན་དུང་སྒྲ་མི་རྟག་པར་སྒྲུབ་པའི་མཐུན་ཕྱོགས་མི་མཐུན་ཕྱོགས་ལ་ཆ་གཉིས་སུ་འཇུག་པའི་གཏན་ཚིགས་སུ་བཤད་པ་བྱས་ཡོད་པ་སོགས་སྐབས་དུ་མར་ཤེས་པར་བྱ་དགོས་སོ། །མཁས་པ་ཤནྟི་པ་སོགས་ཀྱིས་རྒོལ་བ་རྨོངས་ལ་ལྟོས་པ་ཡིན། །ཞེས་པའི་སྐབས་ཀྱི་རྒོལ་བ་རྨོངས་བ་ནི་རིག་བྱེད་པ་དག་སྒྲ་ནམ་མཁའི་ཡོན་ཏན་དུ་བཞག་ནས་སྒྲ་རྟག་པར་ཁས་ལེན་པ་དག་ཡིན་པར་ཚད་མ་སྡེ་བདུན་ཀྱི་སྤྱི་གཞུང་གིས་སྒྲུབ་ཚུལ་གྱིས་གྲུབ་པོ། །མཉན་བྱ་དང་སྒྲ་གཉིས་ཀྱི་མིང་དོན་གྱི་འབྲེལ་བ་ངེས་པའི་རྒོལ་བས་མཉན་བྱ་མི་རྟག་པར་ངེས་ན་སྒྲ་མི་རྟག་པར་ངེས་མི་དགོས་ཏེ། དཔེར་ན་ཚད་མའི་དམིགས་པའི་རྟགས་ཀྱིས་ཡོད་པ་བདག་མེད་པར་སྒྲུབ་པའི་རྒོལ་བས། ཚད་མས་དམིགས་པ་དང་ཡོད་པའི་མིང་དོན་གྱི་འབྲེལ་བ་ངེས་ཤིང་ཚད་མས་དམིགས་པ་བདག་མེད་དུ་རྟོགས་ལ་ཡོད་པ་བདག་ཡོད་མེད་ལ་ཤེས་འདོད་ཞུགས་པ་སྲིད་པ་ལྟ་བུའོ། །མདོར་ན་མཉན་བྱ་སྒྲ་མི་རྟག་པར་སྒྲུབ་པའི་རྟགས་ཡང་དག་ཡིན་པ་ལ་གནོད་བྱེད་མེད་ཅིང་སྒྲུབ་བྱེད་ཡོད་ལ། གལ་ཏེ་མཉན་བྱ་སྒྲ་མི་རྟག་མི་རྟག་གང་དུའང་སྒྲུབ་པའི་ཐུན་མོང་མ་ཡིན་པའི་མ་ངེས་པའི་གཏན་ཚིགས་ཡིན་ཟེར་ན། དེ་མི་རིགས་པར་ཐལ། དོན་བྱེད་ནུས་པའི་རྟགས་ཀྱིས་མཉན་བྱ་མི་རྟག་པར་ངེས་པའི་རྒོལ་བ་ལ་མཉན་བྱ་དེ་སྒྲ་མི་རྟག་པར་སྒྲུབ་པའི་རྗེས་ཁྱབ་ཡིན་པའི་ཕྱིར། དེར་ཐལ། དེ་ལ་དེ་སྒྲུབ་ཀྱི་རྗེས་ཁྱབ་ཀྱི་མཚན་ཉིད་ཚང་བའི་ཕྱིར། མ་གྲུབ་ན། ཟུར་གང་མ་ཚང་བ་སྨྲོས་ཤིག དེ་འདྲའི་རྒོལ་བ་ལ་མཉན་བྱ་དེ་སྒྲུབ་ཀྱི་རྗེས་ཁྱབ་ཡིན་པ་དམིགས་བསལ་ཡིན་ཟེར་ན། སྤྱིར་བཏང་དང་དམིགསབསལ་གྲངས་མང་ཉུང་མེད་པར་ཐལ་བ་དང༌། དེ་འདྲའི་དམིགས་བསལ་ལ་གྲངས་མེད་མཐའ་མེད་པ་ཡོད་པར་ཐལ་ལོ། ། སྨྲས་པ། ལེགས་བཤད་གཏམ་འདི་རྣ་བར་སོན་པ་ན། །བསྒྱུར་དཀའི་སྐྱོ་མ་སྔ་བཙན་མི་བྱེད་པར། །གཟུར་གནས་རྟོག་དཔྱོད་དྲང་པོས་བྱེད་འཚལ་ཞིང༌། །མི་མཐུན་ལུགས་རིགས་མཆིས་ན་སྐྱེས་ཀྱི་མཆོག །རྒྱ་བོད་མཁས་པས་ཞིབ་ཆ་གསལ་བར་མ་བཤད་པའི་སྔོན་མེད་ལེགས་བཤད་ཀྱི་གཏམ་འདི་ནི་རྔ་ཡུལ་ཀིརྟི་དགོན་ཆེན་གྱི་རིགས་ལམ་རྩོམ་སྒྲིག་ཁང་ནས་བསྐུལ་ངོར་དངོས་གྲུབ་དཔལ་གྱིས་བྲིས་པའོ། ། སྦྱིན་སྲེག་གི་ཕན་ཡོན་ལས་ཡམ་ཤིང་སོགས་བསྲེགས་པའི་ཕན་ཡོན།སྦྱིན་སྲེག་གི་ཕན་ཡོན་ལས་ཡམ་ཤིང་སོགས་བསྲེགས་པའི་ཕན་ཡོན་ནི། སྦྱིན་སྲེག་གི་ཕན་ཡོན་ལས་སྲེག་རྫས་ཡམ་ཤིང་དང༌། ཀུ་ཤ་ཡོངས་དཀར་སོགས་རྫས་ཆེན་དེ་བསྲེགས་པའི་ཕན་ཡོན་ནི། རིམ་པ་བཞིན་གཟི་བརྗིད་བསྐྱེད་པ་དང༌། ཐམས་ཅད་བསྲུང་བར་བྱེད་པ་སོགས་ཕན་ཡོན་དུ་མ་འབྱུང་སྟེ། སློབ་དཔོན་ཆེན་པོ་སྟོང་ཉིད་རྡོ་རྗེས་མཛད་པའི་ཧེ་རུ་ཀ་ཉེ་བར་འབྱུང་བ་ཞེས་བྱ་བའི་དཀྱིལ་འཁོར་གྱི་ཆོ་ག་ལས། སྲེག་རྫས་སོ་སོའི་འབྲས་བུ་བསྟན། །ཇི་ལྟར་བདག་གིས་མ་བསྟན་པ། །བླ་མའི་ལུང་ལས་ཤེས་པར་བྱ། །ཞིང་ཁམས་དག་པར་འཇུག་པའི་ཕྱིར། །ས་གཞི་ཡོངས་སུ་གཟུང་བ་ཡིན། །ཐབ་ཀྱིས་གཞལ་ཡས་ཁང་ཐོབ་འགྱུར། །མར་གྱིས་འབྲས་བུ་སྨིན་པར་བྱེད། །ཡམ་ཤིང་གིས་ནི་གཟི་བརྗིད་བསྐྱེད། །བུད་ཤིང་དཔའ་བོ་ཆེན་པོ་སྟེ། །ཀུ་ཤས་ཐམས་ཅད་སྲུང་བར་བྱེད། །ཡུངས་ཀར་དཀར་པོས་ཞི་བར་བྱེད། །མ་གྲུགས་འབྲས་ཀྱིས་རྒྱས་པར་འགྱུར། །ཏིལ་གྱིས་སྡིག་པ་ཐམས་ཅད་སྲེག ། སོ་བས་དམིགས་པའི་དངོས་གྲུབ་སྟེར། །མ་ཤས་སྟོབས་ཆེན་སྐྱེད་པར་བྱེད། ། ནས་ཀྱིས་རྐང་མགྱོགས་དངོས་གྲུབ་འགྱུར། །དཱུར་བས་ཚེ་ནི་སྲིང་བར་བྱེད། །གྲོ་ཡིས་ནད་རྣམས་ཞི་བར་འགྱུར། །སྦྲང་བཅས་འོ་མས་ཤེས་རབ་འཕེལ། །ཞོ་ཟན་གྱིས་ནི་ཀུན་སྟེར་འགྱུར། །མེ་ཡིས་དངོས་གྲུབ་བརྒྱད་པོ་དང༌། །ཇི་ལྟར་འདོད་པའི་དངོས་གྲུབ་སྟེར། །ཡི་དམ་གྱི་ནི་དཀྱིལ་འཁོར་གྱིས། །མཆོག་གི་དངོས་གྲུབ་འགྲུབ་པར་འགྱུར། །ལྷག་མས་ལས་ཀྱི་བྱེ་བྲག་ཤེས། །ཞི་བ་ལ་སོགས་དངོས་གྲུབ་ཡིན། དགང་གཟར་ཤེས་རབ་རང་བཞིན་ཏེ། །བླུགས་གཟར་ཐབས་སུ་ཡང་དག་བཤད། །ཁ་སྦྱོར་གཉིས་མེད་ཡེ་ཤེས་ཡིན། །དེ་ལས་གཉིས་མེད་བཅུད་འཛག་པ། །ཡེ་ཤེས་ཆེན་པོའི་བདུད་རྩིར་འདོད། །སྦྱོར་བ་དེ་ཡིས་མེ་ལྷ་མཆོད། །བདག་ཀྱང་དེ་ཡི་སྦྱོར་བས་བཤད། །དེ་ལྟར་སྦྱིན་སྲེག་རྩོམ་བྱེད་ན། །དེ་ཡིས་དངོས་གྲུབ་མཆོག་ཏུ་གྱུར། །ཅེས་གསུངས་སོ།། ཚོགས་མཆོད་ཕུལ་བ་ལས་གནས་སྐབས་རྐྱེན་ངན་སེལ་ཚུལ།ཚོགས་མཆོད་ཕུལ་བ་ལས་གནས་སྐབས་རྐྱེན་ངན་སེལ་ཚུལ། ཚོགས་མཆོད་ཕུལ་བ་ལས་གནས་སྐབས་རྐྱེན་ངན་སེལ་བར་གསུངས་ཏེ། དམ་ཚིག་གནད་ཐེམ་ལས། རྐྱེན་ངན་ཚོགས་དང་གཏོར་མས་བསལ། །ཞེས་དང༌། མཐར་ཐུག་ན་འགྱུར་མེད་བདེ་ཆེན་ཐོབ་པའི་རྒྱུར་འགྱུར་ཏེ། དེ་ལས། བདག་གཞན་ཚོགས་རྫོགས་སྒྲིབ་སྦྱོང་ཞིང༌། །བདེ་ཆེན་མཆོག་གི་གནས་ཐོབ་ཕྱིར། །གསང་བའི་ཚོགས་ཀྱི་འཁོར་ལོ་བྱ། །ཞེས་དང༌། དེ་བཞིན་དུ་བསོད་ནམས་ཀྱི་དགེ་བ་རྣམས་ལས་ཚོགས་མཆོད་འདིན་མཆོག་ཡིན་པར་གསུངས་ཏེ། རྡོ་རྗེ་དྲ་བ་ལས། བསོད་ནམས་ནང་ན་ཚོགས་འཁོར་མཆོག །ཚེ་འདིར་བསམ་པ་ཀུན་འགྲུབ་ཅིང༌། །བགེགས་དང་བར་ཆད་ཞི་བ་དང༌། །ཕྱི་མ་རིག་འཛིན་རྒྱལ་བའི་ཞིང༌། །ཀུན་ཏུ་བཟང་པོ་ཐོབ་པར་འགྱུར། །ཞེས་དང༌། དམ་ཚིག་ཉམས་པ་བསྐང་ཕྱིར་དུ་ཚོགས་མཆོད་འདིས་འཐུས་པར་གསུངས་ཏེ། ཕུར་བའི་རྒྱུད་ལས། དམ་ཚིག་ཉམས་པ་བསྐང་བའི་ཕྱིར། །ནང་གི་ཚོགས་ཀྱི་འཁོར་ལོ་བྱ། །ཞེས་དང༌། ཚོགས་འཁོར་འདི་ལ་བརྟེན་ནས་གནས་སྐབས་དང་མཐར་ཐུག་གི་ལེགས་ཚོགས་རྣམས་ངང་གིས་འཕེལ་བར་གསུངས་ཏེ། རྡོ་རྗེ་ཕུར་བའི་རྒྱུད་ལས། ཁམས་གསུམ་ཉོན་མོངས་ཀུན་སྒྲོལ་བྱེད། །མཆོག་དང་ཐུན་མོང་དངོས་གྲུབ་ཐོབ། །རྒྱལ་བོ་བྲམ་ཟེ་ཁྱིམ་བདག་ཚོགས། །དྲེགས་པའི་བསོད་ནམས་དབང་དུ་འདུ། །གནོད་གདུག་ཞི་ཞིང་འབྱོར་བ་འཕེལ། །གདུག་ཅིང་སྡང་སེམས་ལྡན་པ་སྒྲོལ། །དེའི་ཕྱིར་ཚོགས་ཀྱི་འཁོར་ལོ་ཡང༌། །མཁས་པས་བྱ་བར་བཤད་པ་ཡིན། །ཞེས་གསུངས་སོ། ། བདག་ཅག་གི་སྟོན་པ་འཁྲུངས་འདས་ཀྱི་ལོ་ཚིགས་ངོས་འཛིན།བདག་ཅག་གི་སྟོན་པ་འཁྲུངས་འདས་ཀྱི་ལོ་ཚིགས་ངོས་འཛིན། ཇོ་ནང་ཕྱོགས་ལས་རྣམ་རྒྱལ་གྱི་བསྟན་རྩིས་ལྟར་ན་སྟོན་པ་ཐུགས་རྗེ་ཅན་༼ཕྱི་ལོ་སྔོན་གྱི་ལོ་༩༡༢ས་བྱ་ལ་༽སྐུ་འཁྲུངས་ནས་རབ་བྱུང་བཅུ་བདུན་པའི་སྒྱུར་བྱེད་ཅེས་པ་ས་མོ་ཕག་གི་ལོ་ཤར་བའི་དུས་ཡན་ཆད་དུ་ལོ་༢༩༣༠འདས་ལ། སངས་རྒྱས་ཀྱིས་༼ཕྱི་ལོ་སྔོན་གྱི་ལོ་༨༧༧ཤིང་སྤྲེལ་ལ༽ཆོས་གསུངས་ནས་༢༨༩༥ འདས་ལ། སངས་རྒྱས་༼ཕྱི་ལོ་སྔོན་གྱི་ལོ་༨༣༢ ས་སྦྲུལ་ལ་༽མྱ་ངན་ལས་འདས་ནས་༢༨༥༠འདས་ཟིན་ཏོ། །ཕུག་ལུགས་ལྟར་ན་སངས་རྒྱས་༼ཕྱི་ལོ་སྔོན་གྱི་ལོ་༩༦༡ལྕགས་སྤྲེལ་ལ༽འཁྲུངས་ནས་༢༩༧༩འདས། ༼ཕྱི་ལོ་སྔོན་གྱི་ལོ་ ༩༢༧ཤིང་རྟ་ལ༽ཆོས་གསུངས་ནས། ༢༩༤༥འདས། ༼ཕྱི་ལོ་སྔོན་གྱི་ལོ་༨༨༡ལྕགས་འབྲུག་ལ༽མྱ་ངན་ལས་འདས་ནས། ༢༨༩༩འདས། དེས་ན་ཇོ་ནང་ཕྱོགས་རྒྱལ་བ་དང་ཕུག་ལུགས་གཉིས་ཀྱི་བར་ལ་ལོ་༤༩ཁྱད་པར་བྱུང་ལ། དེ་ཡང་དུས་འཁོར་རྒྱུད་གསུང་བའི་དུས་ངོས་འཛིན་མི་འདྲ་བ་སོགས་ཀྱིས་ཡིན་ཏེ། ཇོ་ནང་ཕྱོགས་རྒྱལ་དང་མཁས་གྲུབ་རྗེ་དང༌། ཀུན་མཁྱེན་འཇམ་དབྱངས་བཞད་པ་སོགས་ཀྱིས་སངས་རྒྱས་སངས་རྒྱས་པའི་ཕྱི་ལོ་ནག་པའི་ཟླ་བར་གསུངས་པར་བཞེད་པ་དང༌། ཕུག་ལུགས་དང་མཚུར་ལུགས་སོགས་ཀྱིས་སངས་རྒྱས་མྱ་ངན་ལས་འདས་པའི་ལོའི་ནག་ཟླ་ལ་དུས་འཁོར་རྩ་རྒྱུད་གསུངས་པར་བཞེད་པའི་ཕྱིར་རོ། །ཀུན་མཁྱེན་ཀློང་ཆེན་པའི་ཆོས་འབྱུང་ལྟར་ན་སངས་རྒྱས་ཀྱིས་༼ ཕྱི་ལོ་སྔོན་གྱི་ལོ་༡༤༧༣ས་བྱི་ལ་༽ཆོས་གསུངས་ནས་༣༤༩༡འདས་ཟིན་པའོ། །གནས་བརྟན་སྡེ་བའི་ལུགས་ལ་སྟོན་ཤཱཀྱ་ཐུབ་པ་ཕྱི་ལོ་སྔོན་གྱི་ལོ༥༤༥ ༼མེ་འབྲུག་༽ལ་མྱ་ངན་འདས་པ་ལྟར་ན་ད་ལྟའི་བར་དུ་༢༥༦༣འདས་ཟིན་ལ། སངས་རྒྱས་ཀྱི་བསྟན་པ་ལོ་ལྔ་སྟོང་དུ་གནས་པའི་དབང་དུ་བྱེད་ན་སྟོན་པས་ཆོས་གསུངས་པ་ནས་༢༦༠༨ཡིན་ལ། ད་བསྟན་པ་ལོ་ལྔ་སྟོང་དུ་གནས་པའི་ལྷག་མ་ལོ་༢༤༣༨ཡོད་པར་སེམས་སོ། །ཀུན་མཁྱེན་དོལ་པོ་པའི་འདས་ཚིགས་ངོས་འཛིན།ཀུན་མཁྱེན་དོལ་པོ་པའི་དངོས་སློབ་ཆོས་གྲགས་དཔལ་གྱིས་ཟླ་བཅུ་གཅིག་པའི་ཚེས་དྲུག་ལ་གསལ་བར་གསུང་པ་མ་ཟད་སྤུར་སྦྱངས་པའི་དུས་ཚེས་ཡང་འདི་ལྟར་རྣམ་ཐར་ཁྱད་འཕགས་སམ་གསལ་སྒྲོན་ལས། སྟག་ལོ་ཟླ་བ་དང་པོའི་ཚེས་དྲུག་ལ་སྤུར་སྦྱངས་པའི་ཚེ་ན་ངོ་མཚར་བའི་ལྟས་ཇི་ལྟ་བུ་བྱུང་ཞེ་ན། ཆུ་འཛིན་བྲལ་བའི་ནམ་མཁའ་དྭངས་པ་ལ། །འཇའ་འོད་ཤིན་ཏུ་གསལ་བའི་ཟླུམ་པོ་མཆོག །ཅེས་གསུངས་པ་འདིས་ཟླ་བཅུ་བའི་ཚེས་དྲུག་ཡིན་པ་གསལ་བར་གསུངས་ལ། གལ་ཏེ་ཟླ་བ་བཅུ་བ་ཡིན་ན་སྟག་ལོའི་ཟླ་བ་༡པོའི་ཚེས་༦ལ་སྤུར་སྦྱངས་བའི་བར་ཞག་དགུ་བཅུ་སོང་བས་མི་ལེགས། བཅུ་གཅིག་པའི་ཚེས་དྲུག་ལ་ཡིན་ན་ཐུགས་དམ་ལ་བཞུགས་རིང་སོགས་མ་རྩིས་ན་དུས་ཕར་ཆེར་འགྲིག་པའོ། །ཞེས་དངོས་གྲུབ་དཔལ་གྱིས།ཇོ་ནང་གི་རྒྱུད་པའི་བླ་མ་འགའི་འཁྲུངས་འདས་ལོ་ཚིགས་ངོས་བཟུང་བ།ཀུན་སྤངས་ཐུགས་རྗེ་བརྩོན་འགྲུས་རབ་བྱུང་བཞི་པའི་ཆུ་ཡོས་ཕྱི་ལོ༡༢༤༣ལ་འཁྲུངས། རབ་བྱུང་ལྔ་པའི་ཆུ་གླང་ཕྱི་ལོ་ ༡༣༡༣ ལོར་འདས། ཇོ་ནང་གི་རྩ་བའི་གདན་སའམ་ཐོག་མའི་དགོན་པ་རི་ཁྲོད་ཆེན་མོ་ནི། གྲུབ་ཐོབ་ཆེན་པོ་ཀུན་སྤངས་ཐུགས་རྗེ་བརྩོན་འགྲུས་ཀྱིས་རབ་བྱུང་ལྔ་པའི་ཤིང་རྟ་ཕྱི་ལོ་ ༡༢༩༤ ལོར་གདན་ས་བསྐྱངས་པས་གནས་མིང་ཆོས་བརྒྱུད་ལ་ཐོགས་ནས་ཇོ་ནང་རི་ཁྲོད་ཞེས་གྲགས།ཇོ་ནང་ཕྱོགས་ལས་རྣམ་རྒྱལ། རབ་བྱུང་ལྔ་པའི་མེ་རྟ་ཕྱི་ལོ་ ༡༣༠༦ ལོར་ཡུལ་མངའ་རིས་སུ་འཁྲུངས། རབ་བྱུང་དྲུག་པའི་མེ་སྟག་ཕྱི་ལོ་ ༡༣༨༦ ལོར་སྐུ་གཤེགས།དྲུང་རཏྣ་ཤྲཱིའམ་རིན་ཆེན་དཔལ་ནི། མདོ་ཁམས་རྒྱལ་མོ་ཚ་བ་རོང་ཡུལ་བྱེ་མ་ཐང་དུ་རབ་བྱུང་དྲུག་པའི་ལྕགས་སྟག་ཕྱི་ལོ་༡༣༥༠ ལོར་སྐུ་འཁྲུངས། རབ་བྱུང་བདུན་པའི་ཤིང་ཡོས་ཕྱི་ལོ་ ༡༤༣༥ ལོར་འདས།ཛམ་ཐང་ཆོས་རྗེ་དགོན་དྲུང་དཀའ་བཞི་རིན་ཆེན་དཔལ་གྱིས་རབ་བྱུང་བདུན་པའི་ལྕགས་འབྲུག་ཕྱི་ལོ་ ༡༤༠༠ ལོར་ཕྱག་བཏབ། རབ་བྱུང་བཅུ་པའི་ཤིང་ཡོས་ཕྱི་ལོ་ ༡༦༡༥ ལོར་རྗེ་བཙུན་ཏཱ་ར་ནཱ་ཐས་ཇོ་ནང་རྟག་བརྟན་ཕུན་ཚོགས་གླིང་ཕྱག་བཏབ། དུས་རབས་བཅུ་བཞིའི་དུས་དཀྱིལ་ཙམ་དུ་ཚེས་བཅུ་སྐུ་འཕྲེང་དང་པོ་རཏྣ་ཀིརྟིས་དགོན་འདི་ཕྱག་འདེབས་བྱས་པར་སྣང། ལོ་ཚིགས་གསལ་བོ་མི་འདུག་ལགས། ཛམ་ཐང་གཙང་པ་དགོན་རབ་བྱུང་བཅུ་གཉིས་པའི་ལྕགས་ཁྱི་ཕྱི་ལོ་ ༡༧༣༠ ལོར་གཙང་པ་ངག་དབང་བསྟན་འཛིན་རྣམ་རྒྱལ་གྱིས་བཏབ། འབའ་མདའ་ཐུབ་བསྟན་དགེ་ལེགས་རྒྱ་མཚོ་རབ་བཅུ་བཞི་པའི་ཤིང་འབྲུག་ཕྱི་ལོ་༡༨༤༤ ལོ་སྐུ་འཁྲུངས། རབ་བྱུང་བཅོ་ལྔ་པའི་ཤིང་འབྲུག་ཕྱི་ལོ་༡༩༠༤ལོར་འདས།ངག་དབང་ཡོན་ཏན་བཟང་པོ་རབ་བྱུང་བཅུ་དྲུག་པའི་ས་སྟག་ཕྱི་ལོ། ༡༩༣༨ ལ་འཁྲུངས། རབ་བྱུང་བཅུ་བདུན་པའི་ཆུ་རྟ་ཕྱི་ལོ་༢༠༠༢ ལོར་འདས། དུས་མ་ཡིན་པའི་ཟས་སྤངས་པའི་དུས་ཀྱི་ངོས་འཛིན།དུས་མ་ཡིན་པའི་ཟས་སྤངས་པའི་དུས་ཀྱི་ངོས་འཛིན། དགེ་ཚུལ་དང་དགེ་སློང་རྣམས་ཀྱིས་གུང་ཚིགས་གསོལ་བའི་དུས་ནི་སྐྱ་རེངས་ཤར་བ་ནས་ཉིན་གུང་གི་མཐའི་བར་རམ་ཕྱི་དྲོའི་སྔ་རོལ་བར་ཡིན་ལ། དུས་རུང་གི་ཟས་ཟ་མི་རུང་བའི་དུས་ནི་ཉིན་གུང་ཡོལ་བའམ་རང་གནས་པའི་ཉི་མ་ཕྱེད་ཡོལ་ནས་སྐྱ་རེངས་མ་ཤར་བའི་བར་གྱི་དུས་དེ་ཡིན་ནོ། །མདོ་རྩ་ལས། རང་གི་ཕྱེད་ཡོལ་ནས་སྐྱ་རེངས་འཆར་བའི་བར་དུ་ནི་དུས་མ་ཡིན་ནོ། །དེ་ཉིད་ལ་ཤེས་གཙོའོ། །བཅའ་བར་བྱ་བ་དང་བཟའ་བར་བྱ་བ་ཟོས་ནའོ། །ཞེས་སོ། །གླེང་གཞིའི་དབང་དུ་བྱས་ན་བཅུ་བདུན་སྡེས་ནུབ་མོ་ཟས་ཟོས་པ་ལས་ལྟུང་བྱེད་དུ་བཅས་སོ། །ཁ་ཅིག་ཉིན་ཕྱེད་དང་ཉིན་ཕྱེད་ཡོལ་བ་གཉིས་ཀྱིས་ཁྱད་པར་མ་ཤེས་ནས་ཉིན་མོའི་ཆ་ལ་ཆ་གཉིས་ཙམ་ཕྱེས་ནས་ཕྱི་མ་ཕྱི་དྲོ་བཞག་པ་མི་རིགས་ཏེ། ཕྱི་དྲོ་ནི་ཉིན་མོའི་དུས་ལ་སྔ་དྲོ་ཉིན་གུང་ཕྱི་དྲོ་སྟེ་ཆ་གསུམ་ཕྱེ་བའི་ཕྱི་མ་ཡིན་པའི་ཕྱིར་ཏེ། འདུལ་བ་ལུང་གཞི་ལས། ཉིན་མཚན་གྱི་ཆ་བརྗོད་པར་བྱ་སྟེ། སྔ་དྲོ་དང༌། གུང་དང༌། ཕྱི་དྲོ་དང༌། མཚན་མོའི་ཐུན་དང་པོ་དང༌། ཐུན་དང་པོའི་ཕྱེད་དང༌། གུང་ཐུན་དང༌། གུང་ཐུན་གྱི་ཕྱེད་དང༌། ཐུན་ཐ་མ་དང༌། ཐུན་ཐ་མའི་ཕྱེད་དང༌། ཞེས་སོགས་ཉིན་ཞག་གཅིག་ལ་དུས་ཉེར་གཉིས་ཕྱེ་བའི་དང་པོ་གསུམ་ནི་སྔ་དྲོ་དང་ཉིན་གུང་ཕྱི་དྲོ་གསུམ་ཡིན་པར་གསལ་ལ། ཤཱཀྱ་འོད་ཀྱི་སུམ་བརྒྱ་བ་ལས། རང་གླིང་སྐྱ་རེངས་དང་པོ་སོགས་བཟུང་ནས། །ཉི་མ་ཕྱེད་པར་འདིར་ནི་དུས་ཡིན་ཏེ། །དེ་ཡོལ་གང་ཞིག་དུས་རུང་ཟ་བྱེད་དེ། །ཉེས་བྱས་ལྕགས་ཀྱི་གོང་བུའི་ཟས་རྣམས་ཟ། །ཞེས་ཉིན་ཕྱེད་དུས་རུང་གསུངས་པ་དང༌།སུམ་བརྒྱ་བའི་རང་འགྲེལ་འོད་ལྡན་ལས། །རང་གླིང་སྐྱ་རེངས་དང་པོ་སོགས་བཟུང་ནས། །ཉི་མ་ཕྱེད་བར་འདི་ནི་དུས་ཡིན་ཏེ། །དེ་ཡོལ་གང་ཞིག་དུས་རུང་ཟ་བྱེད་དེ། །ཉེས་བྱས་ལྕགས་ཀྱི་གོང་བུའི་ཟས་རྣམས་ཟ། །རང་གི་གླིང་གི་སྐྱ་རེངས་དང་པོ་ལ་སོགས་པ་ནས་བཟུང་ནས་ཉི་མ་ཕྱེད་ཀྱི་བར་འདི་ནི་དུས་ཡིན་ནོ། །རང་གི་གླིང་གི་སྒྲས་སྐྱ་རེངས་ལ་ཡང་སྦྱར་བར་བྱ་སྟེ། རང་གི་གླིང་གི་སྐྱ་རེངས་ནས་བཟུང་ནས། རང་གི་གླིང་གི་ཉི་མ་ཕྱེད་ཀྱི་བར་ཞེས་བྱ་བའི་དུས་དེ་ཡོལ་ནས། དགེ་ཚུལ་གང་ཞིག་བཟའ་བ་དུས་སུ་རུང་བ་ཟ་བ་སྟེ། མིད་པ་དེ་ཉེས་བྱས་ཀྱི་ལྕགས་ཀྱི་གོང་བུ་རྣམས་ཟ་བ་ཡིན་ནོ། །ཉེས་བྱས་ཉིད་ལྕགས་ཀྱི་གོང་བུའི་ཟས་རྣམས་ཡིན་ནོ་ཞེས་ཚིག་སྦྱར་རོ། །རྣམས་ཞེས་མང་པོར་སྨོས་པ་ནི་ཁམ་རེ་རེ་ལ་ཉེས་བྱས་ཡིན་ནོ་ཞེས་བསྟན་པའི་ཕྱིར་རོ། །རྣམ་པར་འབྱེད་པ་ལས། དུས་མ་ཡིན་པ་རྣམ་པ་གཉིས་ཏེ། སྐྱ་རེངས་མ་ཤར་བ་ནས་ཉི་མ་ཕྱེད་ཡོལ་བའོ་ཞེས་གསུངས་པ་ནི་བྱེ་བྲག་མ་ཕྱེད་པར་གསུངས་པའི་ཕྱིར་འདིར་སྐྱ་རེངས་སྤྱིར་སྨོས་པ་ཡིན་ནོ། །ཞེས་གསུངས་བ་ཞིབ་གཟིགས་བྱེད་རྒྱུ་དང༌། ཚིགས་མཛོད་དུ་མར་དེ་ལྟར་བཤད་ལ། དུས་འཁོར་འགྲེལ་ཆེན་དྲི་མེད་འོད་ལས། དུས་ནི་གསུམ་སྟེ་སྔ་དྲོ་དང་ཉིན་གུང་དང་ཕྱི་འཕྲེད་དོ། །ཞེས་གསུངས་སོ། །ལག་ལེན་དོག་མཐའ་བཟུང་དགོས་པས་ཁ་ཅིག་གིས་བཤད་པ་འཐད་སྙམ་ན། དེ་མི་རིགས་ཏེ། མདོ་རྒྱུད་གང་ན་ཡང་ཉིན་གུང་ལ་ཕྱི་དྲོ་ཡོད་པར་གསུངས་པ་མེད་པར་མ་ཟད། དེ་ལྟ་ན་ཕྱི་དྲོའི་ཁ་ཟས་སྤོང་མཁན་ཉུང་ངུར་འགྲོ་བའི་འགལ་རྐྱེན་དུ་འགྱུར་བ་དང༌། དུས་མ་ཡིན་པའི་ཟས་ཟ་བའི་ལྟུང་བ་འདུ་ཤེས་གཙོ་བོ་ཡིན་པས་དོན་ལ་དུས་མ་ཡིན་པ་དེ་ཉིད་ལ་དུས་མ་ཡིན་པར་ཤེས་དགོས་པས་སོ། །དེས་ན་འདུལ་བའི་བཅས་འགལ་ཡིན་མིན་འདུལ་བ་ལ་ལྟོས་དགོས་པ་ལས་རང་བཟོར་མི་འོས་སོ། །ཕྱི་ཟླ་བརྒྱད་པ་འདིར་མདོ་སྨད་རྔ་ཡུལ་ལྟ་བུ་ལ་ཆུ་ཚོད་དྲུག་པ་ནས་ནམ་ལངས་དགུང་མོ་ཆུ་ཚོད་༢༠དང་སྐར་མ་༣༥ལ་ས་རུབ་པའི་དབང་དུ་བྱས་ན་ཉིན་དུས་ལ་ཆུ་ཚོད་བཅུ་བཞི་དང་སྐར་མ་སུམ་ཅུ་ཡོད་ལ། དེ་ཆ་གསུམ་བཏང་ན་ཆ་གཉིས་པའི་མཇུག་ཆུ་ཚོད་༡༥བ་དང་སྐར་མ་༤༠ནས་རྫོགས་པ་ཡིན། ཆུ་ཚོད་༡༥བ་དང་སྐར་༤༡ནས་ཕྱི་དྲོའི་འགོ་བཟུང་བས་དེ་ཕན་ཆད་ནས་དུས་མ་ཡིན་པའི་ཟས་སྤང་བར་བྱའོ། །དེ་བཞིན་དུ་ཕྱི་ཟླའམ་ཡེ་ཟླ་དང་པོ་ལ་ནམ་ལངས༧་༤༥-མུན་རུབ༡༨་༡༨དབང་ཏུ་བྱས་ན་ཉིན་དུས་ཆུ་ཚོད་བཅུ་གཅིག་ཡོད་ལ་དེ་ཆ་གསུམ་བྱས་ནས་ཆ་གསུམ་པའི་མགོ་ཆུ་ཚོད་བཅུ་བཞི་པ་དང་སྐར་ལྔ་བཅུ་རྩ་གཅིག་ནས་ཕྱི་དྲོའི་མགོ་བཟུང་བ་སོགས་ཤེས་དགོས་སོ།།བླ་བྲང་བཀྲ་ཤིས་འཁྱིལ་གྱི་དགེ་བའི་བཤེས་གཉེན་ཞིག་གིས་བླ་བྲང་བཀྲ་ཤིས་འཁྱིལ་བའི་རི་ཁྲོད་གོང་ནས་བཤེས་གཉེན་ཞིག་གིས་ཞལ་གསུང་ལ་དེ་འདྲ་བཤད་ཅེས་ཡང་བདག་གིས་ཐོས་ལ། དེ་ནི་འདུལ་གཞུང་དང་མཐུན་པའོ། །དེ་འདྲ་མ་ཡིན་པར་སྨྲ་ན་དུས་མ་ཡིན་པའི་ཟས་ཟ་བའི་ལྟུང་བ་བཅས་པའི་དགག་བྱ་སོགས་མ་ཤེས་པའོ། །བོད་ཀྱི་བླ་མ་རྣམས་ཀྱི་ཁྲོད་ན་འདི་དང་མི་འདྲ་བ་གསུངས་པ་ཡོད་སྲིད་ཀྱང་རྒྱ་གར་འཕགས་པའི་ཡུལ་གྱི་གཞུང་ལུགས་ན་མེད་དོ། །དེས་ན་དུས་མ་ཡིན་པའི་ཟས་ཟ་བའི་ལྟུང་བའི་དགག་བྱ་དང་དགོས་པ་ཤེས་པར་བྱ་དགོས་སོ། །འདི་ཆོས་འདུལ་བ་དང་མཐུན་པའི་སྒོ་ནས་དུས་མ་ཡིན་པའི་ཟས་སྤངས་བ་མང་དུ་འགྲོ་ཕྱིར་དུ་ངག་དབང་དངོས་གྲུབ་དཔལ་གྱིས་སྤེལ་བའོ། ། ལྔ་བསྡུས་ཀྱི་མིང་ཚིག་བརྗོད་པ།འདས་ལོ་ནི། འདིར་ཁྱིམ་ལོ་གཙོ་བས་གཟའ་རང་རང་གི་ཞག་གསུམ་མཐུན་ལོ་དང། དྲུག་ཅུའི་སྐོར་མཐུན་དག་པའི་ལོ་ཚོགས་ལས་ཅི་ཙམ་འདས་ཟིན་པ་དང། ད་ལྟ་གནམ་ལོ་གང་ལ་གནས་པ་སོགས་དུས་སྐབས་སོ་སོར་མ་འདྲེས་པར་འབྱེད་པའི་གཞིར་གལ་ཆེ་བ་ཞིག་ཡིན་ནོ། ཁྱིམ་ཟླ་ནི། ཁྱིམ་ཞག་སུམ་ཅུ་ཚང་བའི་དུས་ཀྱི་མིང་སྟེ། ཉི་མས་རང་འགྲོས་ཀྱིས་ཡུལ་གྱི་ཆུ་ཚོད་མདའ་ཡོན་ཟླ་བ་བགྲོད་པའི་ཡུན་ཚད་དེ་ལ་ཁྱིམ་ཟླ་ཞེས་བྱའོ། །ཟླ་དག གཟའ་རྣམས་རང་རང་གི་ཚེས་ཟླའི་དཀྱིལ་འཁོར་དང། ཉིན་ཟླའི་དཀྱིལ་འཁོར། ཁྱིམ་ཟླའི་དཀྱིལ་འཁོར་བཅས་ལས་སྐབས་དེའི་ཚེས་ཟླ་སོགས་ཅི་ཙམ་ཞིག་འཁོར་ཟིན་པའི་མཚམས་རྣམ་པར་དག་པ་དེའི་ནང་གསེས་ཀྱི་ཚེས་ཟླ་དག་པ་ལ་གནས་གཉིས་ལས་སྟེང་མ་ཟླ་གྲངས་དང། འོག་མ་ཚེས་ཟླ་གཅིག་རེ་ལྔའི་ཆར་བྱས་པའི་ཆ་གྲངས་ཡིན།དེ་ལ་ཟླ་འཕྲོ་དང་མདའ་རོའི་ལྷག་མ་ཞེས་ཀྱང་ཟེར། ཁྱིམ་ཟླ་དག་པ་ནི་འདས་ལོ་ཁྱིམ་གྱིས་བསྒྱུར། འདས་ཟླ་བསྲེ་བ་ཙམ་གྱིས་འགྲུབ། ཟླ་འཕྲོ་བརྩི་མི་དགོས།ཚེས་ཟླ་དག་པ། འདས་པའི་ལོ་དེ་ཟླ་བའི་གྲངས་སུ་སྤེལ་བའི་ཚོགས་དེ་ལ་ཟེར་ཞིང༌། ཡང་ན་འདས་ལོ་དེ་འདས་ཟླའི་གྲངས་སུ་སྤེལ་ནས་མདའ་རོས་བསྒྲུབས་པའི་ཨང་ཀའི་ཚོགས་དེ་ལ་ཟེར། མིང་བསྡུས་ན་ཚེས་ཀྱི་ཟླ་དག་ཅེས་ཀྱང་ཟེར། དབྱེ་ན། ཟླ་བ་རེ་རེ་ལ་ཟླ་དག་རེ་རེ་སྟེ། ནག་པ་ཟླ་བའི་ཟླ་དག་དང༌། ས་ཀ་ཟླ་བའི་ཟླ་དག སྣྲོན་ཟླ་བའི་ཟླ་དག་སོགས་ལོ་གཅིག་ལ་ཟླ་དག་བཅུ་གཉིས་སམ་བཅུ་གསུམ་ཡོད། །རྣམ་འགྲེལ་གསེར་ཤིང་ལས། བརྩི་བྱའི་འདས་ལོ་གང་ཡིན་པ་དེ་ཉིད་ཉི་མས་བསྒྱུར་ལ་ནག་པ་སོགས་འདས་ཟླ་བསྲེས་ཏེ་ཁྱིམ་ཟླའི་ཚོགས་སུ་བྱས་པ་ལས། ཚེས་ཟླ་ཇི་ཙམ་མང་བའི་ཆ་བསྣན་པའི་ཆེད་དུ་གནས་གཉིས་ཀྱི་འོག་མ་མིག་གིས་བསྒྱུར་ནས་རྩིས་འཕྲོར་ཟླ་བ་སྟེ་གཅིག་བྱིན་ལ་མདའ་རོས་བགོས་པའི་རྙེད་ནོར་གནས་སྟེང་མར་བསྲེའོ། །དེས་ནི་ཚེས་ཟླ་རྣམ་པར་དག་པར་བྱེད་པའི་ཆོ་གའོ། །འདིར་ཁྱིམ་ཟླ་ལས་ཚེས་ཟླ་སྒྲུབ་པ་དེ་ལ་དགོས་པ་ཅི་ཞེ་ན། དེ་ལྟར་སྒྲུབ་དགོས་ཏེ། ཡན་ལག་ལྔའི་ངེས་པ་གཙོ་བོར་ཚེས་ཞག་ལས་བརྩམས་ཏེ་འཆར་བའི་ཕྱིར་རོ། །ཞེས་གསུངས་སོ།།ཚེས་ཞག་རྟགས་ལོངས་ནི།ཚེས་ཞག་རེའི་ཡུན་ཚད་དེ་ཆུ་ཚོད་ལྔ་བཅུ་ང་དགུ་དང༌།ཆུ་སྲང་གསུམ། དབུགས་བཞི། ཆ་ཤས་བཅུ་དྲུག་ཙམ་ཡོད་དོ།།གཟའི་རྟགས་ལོངས་ནི། དུས་ཀྱི་རྟག་ལོངས་ཡིན། དེ་ཡང་ཉིན་རེར་སྤྱོད་པ་ཆ་སྙོམས་སུ་བྱས་པའི་གཟའ་ཚེས་སམ་ཚེས་ཀྱི་རྟག་ལོངས་ཏེ། གྲུབ་པའི་གཟའི་རྟག་ལོངས་ལྟར་ན་ཡུན་ཚད་ནི། ཆུ་ཚོད་ང་དགུ། ཆུ་སྲང་གསུམ། དབུགས་བཞི། རི་རོའི་ཆ་བཅུ་དྲུག་བཅས་ཡིན་ལ། བྱེད་པའི་གཟའི་རྟག་ལོངས་ལྟར་ན་ཡུན་ཚད་ནི། ཆུ་ཚོད་ང་དགུ། ཆུ་སྲང་གསུམ། དབུགས་བཞི་བཅས་ཡོད་དོ། །མདའ་རོ་ནི། དྲུག་ཅུ་རེ་ལྔའི་མངོན་བརྗོད་ཡིན་ལ། ཁྱིམ་གྱི་ཟླ་བ་དང་ཚེས་ཀྱི་ཟླ་བ་དག་གི་ཁྱད་པར་དབྱེ་བྱེད་ཀྱི་གྲངས་ཀ་ཞིག་སྟེ། ཚེས་ཀྱི་ཟླ་བ་དང་ཁྱིམ་གྱི་ཟླ་བ་ལྟོ་སྦྱར་ནས་བསྒྲིག་པ་ན་ཁྱིམ་གྱི་ཟླ་ཕྱེད་རེ་ལྔ་སོང་མཚམས་སུ་ཚེས་ཀྱི་ཟླ་ཕྱེད་རེ་བདུན་ལོངས་ཡོད་པས་ཚེས་ཀྱི་ཟླ་ཕྱེད་གཉིས་ལྷག་མ་ཡོད་པ་དེ་བསྡོམ་ན་ཟླ་ཕྱེད་གཉིས་དེ་ཟླ་བ་གཅིག་ཡིན་པས་སྐབས་དེར་ཟླ་ལྷག་ཐོན་པ་ཡིན། ཁྱིམ་གྱི་ཟླ་ཕྱེད་རེ་ལྔ་ནི་ལོ་གཉིས་དང་ཁྱིམ་ཟླ་བརྒྱད། ཁྱིམ་ཕྱེད་གཅིག་གམ་ཁྱིམ་ཞག་བཅོ་ལྔ་དང་བཅས་པའི་ཡུན་ཚད་ཡིན། དུས་འཁོར་བསྡུས་རྒྱུད་ལས། དུས་ཀྱིས་བསྒྱུར་ལ་མཁའ་མེ་ཟླ་བའི་རྣམ་པར་དབྱེ། །ཞེས་ཁྱིམ་ཟླ་བཞི་ཆར་ཕྱེས་པའི་ཆ་བརྒྱ་དང་སུམ་ཅུ་རེ་སོང་བ་ན་ཚེས་ཟླའི་བཞི་ཆ་བརྒྱ་སོ་བཞི་སྟེ་ཟླ་བ་གཅིག་རེ་ལྷག་མར་ཐོན་པར་གསུངས་པ་དེ་དང་དོན་ལ་གཅིག་ཡིན་ནོ། །རི་རོ་ནི། ཉི་མའི་རྟག་ལོངས་ཀྱི་ཆ་ཤས་ཏེ། རི་རོ་ཞེས་པ་ནི་དྲུག་ཅུ་རེ་བདུན་གྱི་མངོན་བརྗོད་ཡིན་ལ། དབུགས་གཅིག་གི་ཡུལ་གྱི་ལོངས་སྤྱོད་དེ་དྲུག་ཅུ་རེ་བདུན་གྱི་ཆ་ཤས་སུ་ཕྱེས་པ་དེའོ། །རིགས་ལྡན་སྙིང་ཐིག་ལས། གྱེན་རིམ་རི་རོ་དུས་མཁའ་རོ། །ཞེས་བྱུང་ངོ།། འདོད་ཆ་ནི། ཆ་བཅུ་གསུམ་དུ་བྱས་པའི་ཆ་སྟེ། དཔེར་ན། དེ་ཡི་གཟུགས་བུག་གཟུགས་བུག་ཆ་འདོད་པས་བགོས་ན་རི་མཁའ་རིའི་ཆར་འགྱུར་ཞེས་པ་ལྟ་བུ།རི་མཁས་རིའི་ཆ་ནི། གཟའ་རྟག་ལོངས་ཀྱི་ཆ་ཤས་ཏེ། རི་མཁའ་རི་ཞེས་པ་ནི་བདུན་བརྒྱ་དང་བདུན་གྱི་མངོན་བརྗོད་ཡིན་ལ། དབུགས་གཅིག་གི་ཡུན་ཚད་དེ་བདུན་བརྒྱ་དང་བདུན་གྱི་ཆ་ཤས་སུ་ཕྱེས་པ་དེའོ། །རིགས་ལྡན་སྙིང་ཐིག་ལས། རི་མཁའ་རི་དང་དུས་མཁའ་རོ། །ཞེས་བྱུང་ངོ། །རིལ་པོ། ཚེས་རེའི་ཟླ་བའི་རྐང་བ་རེ་སྤྱོད་པའི་ལོངས་སྤྱོད་ལ་རིལ་བོ་ཞེས་བྱ་ལ། ཚེས་རེ་ལ་རིལ་བོ་རེ་དང་རང་གི་ཆ་ཤས་སུམ་ཅུ་རེ་སྤྱོད་ལ། དེས་ཟླ་བའི་རྐང་ཆོག་ལ་བརྟེན་ནས་ཚེས་རེའི་སྒེར་གྱི་ཐུན་མོང་མ་ཡིན་པའི་འཕེལ་འགྲིབ་ཡུན་ཚད་དེ་གཏན་ལ་འབེབ་པར་བྱེད། རིགས་ལྡན་སྙིང་ཐིག་ལས། རིལ་བོར་ཚེས་བསྲེས་མ་ནུས་བགོ ། ཞེས་བྱུང་ངོ། །རིལ་པོའི་འཁོར་ལོ་ནི། ཟླ་བའི་རྐང་བ་ལ་རིམ་དང་རིམ་མིན་བསྡོམས་ན་རྐང་བ་ཉེར་བརྒྱད་ཡོད་པས་རིལ་བོའི་འཁོར་ལོའམ་གྲངས་ཚད་ལངས་པ་ནི་ཉེར་བརྒྱད་ཡིན། རིགས་ལྡན་སྙིང་ཐིག་ལས། སྟེང་བསྲེ་དེ་ཡང་ནོར་ལག་གིས། །བསྒྲིལ་བས་རིལ་ཆ་གསལ་བོར་སྟོན། །ཞེས་བྱུང་ངོ།།ཆ་ཤས་འཁོར་ལོ། རིལ་ཆ་ཞེས་པའི་ཆ་ཤས་དེའི་འཁོར་ལོའམ་གྲངས་ཀ་ལོངས་ཚད་དེ། བརྒྱ་དང་ཉེར་དྲུག་ལོངས་པ་དེ་ཡིན་ལ། རིགས་ལྡན་སྙིང་ཐིག་ལས། དུས་ཁྱིམ་ཐོབ་པ་སྟེང་མར་བསྲེ། །ཞེས་བྱུང་ངོ།།ཉི་བར་ནི། གང་བརྩི་བའི་ཚེས་ཞག་དེ་རྫོགས་མཚམས་སུ་ཉི་མ་ལུག་ཁྱིམ་ལས་ལོངས་སྤྱོད་ཅི་ཙམ་འདས་ཟིན་པའི་ཡུལ་གྱི་ཆུ་ཚོད་རྗེས་འབྲང་བཅས་གྲུབ་ཀྱང་རྐང་ལོངས་སྣོན་འཕྲི་མ་བྱས་པས་ཉིན་ཞག་དེའི་སྐར་གནས་དངོས་སུ་འགྱུར་མི་འགྱུར་ལ་ངེས་པ་མེད་པས་ན་བར་བ་སྟེ་ཕུང་གསུམ་པ་ཞེས་པའི་དོན། གཟའ་ལྔ་སྐབས་ཀྱི་དྲག་རྐང་ཞི་དལ་ཡང་དེ་ཉིད་ཡིན།གཟའ་དྷྲུ་ནི། གཟའི་ཟླ་ལོངས་ཕྱོགས་གཅིག་ཏུ་དྲིལ་བ་ལ་གཟའི་དྷྲུ་ཝ་བརྩི་བྱའི་ཟླ་བ་སྔ་མའི་གནམ་སྟོང་གི་རེས་གཟའ་དང། ཚེས་ཞག་དེ་རྫོགས་མཚམས་ཀྱི་ཆུ་ཚོད་རྒྱུན་དང་བཅས་པའོ། །དེ་ལ་གནས་དྲུག་ལས་གནས་དང་པོ་གཟའ་གནས། གཉིས་པ་ཆུ་ཚོད་གནས། གསུམ་པ་ཆུ་སྲུང་གནས། བཞི་བ་བུགས་གནས། ལྔ་བ་རི་རོའི་གནས། བདུན་པ་རི་མཁའ་རིའི་གནས་སོ། །གཟའི་འཁོར་ལོ་ནི། གཟའི་གནས་ཀྱི་གྲངས་ཀ་ལོངས་ཚད་དེ། གནས་དེར་གྲངས་བདུན་ཟིན་པ་ན་གཟའི་འཁོར་ལོ་གཅིག་ལོངས་པ་ཡིན། རིགས་ལྡན་སྙིང་ཐིག་ལས། ཐིག་མཚམས་ཐུབ་པས་དོར་བའི་ལྷག །ཅེས་བྱུང་ངོ།།སྐར་མའི་འཁོར་ལོ་ནི། སྐར་མའི་གནས་ཀྱི་གྲངས་ཀ་ལོངས་ཚད་དེ། ཉི་ཤུ་བདུན་གྱི་གྲངས་ཀ་ཟིན་པ་ན་སྐར་མའི་འཁོར་ལོ་གཅིག་ལོངས་པ་ཡིན། རིགས་ལྡན་སྙིང་ཐིག་ལས། ཐིག་མཚམས་འཁོར་ལོས་དོར་བའི་ལྷག ། ཅེས་བྱུང་ངོ།།ཆུ་ཚོད་འཁོར་ལོ་ནི། ཆུ་ཚོད་གནས་ཀྱི་གྲངས་ཀ་དྲུག་ཅུ་ཟིན་པ་ན་ཆུ་ཚོད་ཀྱི་འཁོར་ལོ་གཅིག་ལོངས་པ་ཡིན། རིགས་ལྡན་སྙིང་ཐིག་ལས། ཐིག་མཚམས་ཐུབ་པས་དོར་བའི་ལྷག ། ཅེས་བྱུང་ངོ།།དབུགས་ཀྱི་འཁོར་ལོ་ནི། སྐར་རྩིས་འདིར་དུས་དབུགས་གནས་ཀྱི་གྲངས་ཀ་ལོངས་ཚད་དེ། གནས་དེར་གྲངས་དྲུག་ཟིན་པ་ན་དབུགས་ཀྱི་འཁོར་ལོ་གཅིག་ལོངས་པ་ཡིན། རིགས་ལྡན་སྙིང་ཐིག་ལས། རི་མཁའ་རི་དང་དུས་མཁའ་རོ། །ཞེས་གསུངས་སོ།།ཉི་དྷྲུ་ནི། འདས་པའི་ཚེས་ཟླ་རྫོགས་མཚམས་སུ་ཉི་མའི་ཟླ་ལོངས་ཕྱོགས་གཅིག་ཏུ་བསྡོམས་པ་ལ་ཉི་མའི་ངེས་པའམ་ཉི་མའི་དྷྲུ་ཝ་ཟེར་བའི་བསྡུས་ཚིག་ཡིན།ཟླ་དག་ནི། གཟའ་རྣམས་རང་རང་གི་ཚེས་ཟླའི་དཀྱིལ་འཁོར་དང། ཉིན་ཟླའི་དཀྱིལ་འཁོར། ཁྱིམ་ཟླའི་དཀྱིལ་འཁོར་བཅས་ལས་སྐབས་དེའི་ཚེས་ཟླ་སོགས་ཅི་ཙམ་ཞིག་འཁོར་ཟིན་པའི་མཚམས་རྣམ་པར་དག་པ་དེའི་ནང་གསེས་ཀྱི་ཚེས་ཟླ་དག་པ་ལ་གནས་གཉིས་ལས་སྟེང་མ་ཟླ་གྲངས་དང། འོག་མ་ཚེས་ཟླ་གཅིག་རེ་ལྔའི་ཆར་བྱས་པའི་ཆ་གྲངས་ཡིན། དེ་ལ་ཟླ་འཕྲོ་དང་མདའ་རོའི་ལྷག་མ་ཞེས་ཀྱང་ཟེར། ཁྱིམ་ཟླ་དག་པ་ནི་འདས་ལོ་ཁྱིམ་གྱིས་བསྒྱུར། འདས་ཟླ་བསྲེ་བ་ཙམ་གྱིས་འགྲུབ། ཟླ་འཕྲོ་བརྩི་མི་དགོས།ཚེས་ཟླ་དག་པ་ནི། འདས་པའི་ལོ་དེ་ཟླ་བའི་གྲངས་སུ་སྤེལ་བའི་ཚོགས་དེ་ལ་ཟེར་ཞིང༌། ཡང་ན་འདས་ལོ་དེ་འདས་ཟླའི་གྲངས་སུ་སྤེལ་ནས་མདའ་རོས་བསྒྲུབས་པའི་ཨང་ཀའི་ཚོགས་དེ་ལ་ཟེར། མིང་བསྡུས་ན་ཚེས་ཀྱི་ཟླ་དག་ཅེས་ཀྱང་བརྗོད། དབྱེ་ན། ཟླ་བ་རེ་རེ་ལ་ཟླ་དག་རེ་རེ་སྟེ། ནག་པ་ཟླ་བའི་ཟླ་དག་དང༌། ས་ཀ་ཟླ་བའི་ཟླ་དག སྣྲོན་ཟླ་བའི་ཟླ་དག་སོགས་ལོ་གཅིག་ལ་ཟླ་དག་བཅུ་གཉིས་སམ་བཅུ་གསུམ་ཡོད། །རྣམ་འགྲེལ་གསེར་ཤིང་ལས། བརྩི་བྱའི་འདས་ལོ་གང་ཡིན་པ་དེ་ཉིད་ཉི་མས་བསྒྱུར་ལ་ནག་པ་སོགས་འདས་ཟླ་བསྲེས་ཏེ་ཁྱིམ་ཟླའི་ཚོགས་སུ་བྱས་པ་ལས། ཚེས་ཟླ་ཇི་ཙམ་མང་བའི་ཆ་བསྣན་པའི་ཆེད་དུ་གནས་གཉིས་ཀྱི་འོག་མ་མིག་གིས་བསྒྱུར་ནས་རྩིས་འཕྲོར་ཟླ་བ་སྟེ་གཅིག་བྱིན་ལ་མདའ་རོས་བགོས་པའི་རྙེད་ནོར་གནས་སྟེང་མར་བསྲེའོ། །དེས་ནི་ཚེས་ཟླ་རྣམ་པར་དག་པར་བྱེད་པའི་ཆོ་གའོ། །འདིར་ཁྱིམ་ཟླ་ལས་ཚེས་ཟླ་སྒྲུབ་པ་དེ་ལ་དགོས་པ་ཅི་ཞེ་ན། དེ་ལྟར་སྒྲུབ་དགོས་ཏེ། ཡན་ལག་ལྔའི་ངེས་པ་གཙོ་བོར་ཚེས་ཞག་ལས་བརྩམས་ཏེ་འཆར་བའི་ཕྱིར་རོ། །ཞེས་གསུངས།ཟླ་རྐང་ནི། ཟླ་བ་སྐར་མའི་གནས་སུ་འགྲོ་བའི་བགྲོད་པ་ལ་ལྟོས་ནས་འཇོག་ལ།དེ་ཡང་རྐང་པ་བཅུ་བཞི་ཚེས་ཟླ་རེ་ལ་ལན་གཉིས་རེ་འགྲོ་བས་རྐང་པ་ཉེར་བརྒྱད་དུ་འགྱུར་ཞིང། འགྲོས་མྱུར་བུལ་གྱི་དབང་གིས་ཆུ་ཚོད་ང་བཞི་ནས་རེ་བཞིའི་བར་མི་འདྲ་བ་ཡོད།རྐང་སྔོན་ནི། རྐང་ལོངས་རེའུ་མིག་ནང་དུ་རྐང་སྡོམ་ཆུ་ཚོད་གང་དུ་ཡོད་པའི་བྱ་ར་དེའི་འོག་ན་གནས་པའི་སྒྱུར་བྱེད་ཀྱི་རི་མོ་དེ་ནི་ཁྱིམ་རེའམ་སྐར་མ་རེའི་རྐང་པའི་ནོར་དང་བུ་ལོན་གྱི་ཚད་ཡིན། རྐང་སྡོམ་མ་ཟིན་ན་བྱ་ར་དང་པོ་དེས་འཛིན་དགོས་སོ། །རྐང་སྔོན་ནམ་བསྒྱུར་བྱེད་རེ་མིག་ནི།ཟླ་བའི་རྐང་ཆོག་བྱེད་སྐབས་རྐང་འཛིན་གྱིས་བཟུང་བྱའི་རེའུ་ཁང་ཞིག་སྟེ། སྔ་རྐང་གི་སྐབས་སྟེང་ནས་རིམ་བཞིན་ ༥ དང་ ༥ དང་ ༥ དང་ ༤ དང་ ༣ དང་ ༢ དང་ ༡ བཅས་བདུན་དང༌། ཕྱི་རྐང་གི་སྐབས་གོ་རིམ་སྔ་མ་ལས་ལོག་སྟེ། རིམ་བཞིན་ ༡ དང་ ༢ དང་ ༣ དང་ ༤ དང་ ༥ དང་ ༥ དང་ ༥ བཅས་བཅུ་བཞི་ཡོད། དེ་ནི་ཉིན་རེའི་ཚེས་ཀྱི་འཕེལ་འགྲིབ་ཡུན་ཚད་ཀྱི་ཆ་ཡིན་པས་སྒྱུར་བྱེད་ཡིན་ལ། དེས་ཆ་ཤས་དྷྲུ་ཝ་བསྒྱུར་པའི་སྒོ་ནས་ཡང་རྒྱུའི་ལོངས་སྤྱོད་སྒྲུབ་པ་ཡིན། །རིགས་ལྡན་སྙིང་ཐིག་ལས། རྐང་བཟུང་སྔོན་མས་ཆ་ཤས་བསྒྱུར། །ཞེས་བྱུང་ངོ།། རྐང་སྡོམ་ནི། གཟའ་དེ་དང་དེའི་རྐང་པའི་ལོངས་སྤྱོད་ཀྱི་ཆུ་ཚོད་དེ། དེ་ཡང་ཅིག་ཤོས་བར་བའི་ལོངས་སྤྱོད་དང་སྣོན་འཕྲི་གང་རུང་དུ་སྡོམ་པར་བྱེད་པ་དེས་ད་ལྟ་སྤྱོད་བཞིན་པའི་གཟའ་དེའི་རྒྱུན་གྱི་ལོངས་སྤྱོད་རྟོགས་པར་འགྱུར་ལ། རིགས་ལྡན་སྙིང་ཐིག་ལས།སྔ་རྐང་ཟོན་ཟིན་བསྡམ་བྱ་ཞིང༌། །ཕྱི་རྐང་ལ་ནི་ཟ་རྒྱུ་སྡོམ། །ཞེས་བྱུང་ངོ།། ཡང་དག་རྒྱུ་བའི་ལོངས་སྤྱོད་ནི། གཟའ་དེའི་རྐང་ཆོག་གིས་བསྒྲུབས་པའི་ལོངས་སྤྱོད་ལ་སྔ་རྐང་ཕྱི་རྐང་གི་སྣོན་ཕྲི་གང་རུང་གིས་དག་པར་མ་བྱས་པའི་ལོངས་སྤྱོད་དེ་ལ་ཟེར། །རིགས་ལྡན་སྙིང་ཐིག་ལས། ཡང་རྒྱུའི་ཆུ་ཚོད་རྗེས་འབྲང་བཅས། །སྔ་རྐང་བསྣན་ལ་ཕྱི་རྐང་ཕྲི། །ཞེས་བྱུང་ངོ།། གཟའ་ཕྱེད་དག་པ། གཟའ་དག་གི་ཆེད་དུ་གཟའ་བར་ལ་ཟླ་རྐང་གིས་སྣོན་འཕྲི་བྱས་ནས་ཉི་རྐང་གིས་ད་དུང་སྣོན་འཕྲི་མ་བྱས་པས་ན་ཕྱེད་དག་བརྗོད།སྐྱེས་ཁྱིམ་ནི། ཤར་གླིང་དབུས་མའི་ཚངས་ཐིག་སྟེང་དུ་ཀརྚའི་ཐོག་མར་ཉི་མ་སྐྱེས་མ་ཐག་ཏུ་རང་འགྲོས་གཡོན་འཁོར་གྱིས་གཟའ་སོ་སོའི་སྐྱེས་སྐར་སྟེང་དུ་སླེབས་ཏེ་རླུང་འགྲོས་ཀྱིས་ཤར་གླིང་དབུས་མའི་ཚངས་ཐིག་ཐད་དུ་སླེབས་པ་དང་ལྷན་ཅིག་ཏུ་གཟའ་རྣམས་སྐྱེས་པའི་རྒྱུ་སྐར། དེ་ལ་སྐྱེས་སྐར་ཡང་ཟེར། ཉི་མ་ནབས་སོའི་ཆུ་ཚོད་ ༤༥། ཟླ་བ་ཐ་སྐར་ཆུ་ཚོད་ ༠། མིག་དམར་མཆུའི་ཆུ་ཚོད་ ༣༠། ལྷག་པ་ལྷ་མཚམས་ཆུ་ཚོད་ ༣༠། ཕུར་བུ་མེ་བཞིའི་ཆུ་ཚོད་ ༣༠། པ་སངས་ནབས་སོའི་ཆུ་ཚོད་ ༠། སྤེན་པ་སྣྲུབས་ཀྱི་ཆུ་ཚོད་ ༠། སྐར་ ༡༨། སྒྲ་གཅན་ནག་པའི་ཆུ་ཚོད་ ༠། མཇུག་རིང་ཆུ་སྨད་ཆུ་ཚོད་ ༠། སྟེང་དུ་སྐྱེས་པའོ། །ཉི་རྐང་ནི། རིག ཉི་མ་སྐར་མའི་གནས་སུ་འགྲོ་བའི་བགྲོད་པ་ལ་ལྟོས་ནས་འཇོག་ལ། དེ་ཡང་རྐང་པ་དྲུག་ཁྱིམ་ལོ་རེ་ལ་ལན་གཉིས་འགྲོ་བས་རྐང་པ་བཅུ་གཉིས་སུ་འགྱུར་ལ། སྤྱད་ཟིན་པ་དང་མ་སྤྱད་པའི་ཚད་དང་རྐང་སྡོམ་ནི་རེའུ་མིག་ལྟར་རོ། །ཉི་རྐང་རེ་མིག་ནི། ཉི་མ་དག་པར་སྒྲུབ་བྱེད་ཀྱི་ཆོ་གའི་གཙོ་བོ་ཞིག་སྟེ། ལུགས་འབྱུང་ལྡོག་སྡོམ་པའི་རེ་ཁང་དྲུག་ཡོད་ལ། ཕྲེང་དང་པོ་དེ་རྐང་འཛིན་དང་ཕྲེང་གཉིས་པ་རྐང་བཟུང་གདོང་མ་དང༌། ཕྲེང་ཐ་མ་དེ་རྐང་སྡོམ་ཡིན་ལ། ཁྱོན་སྡོམ་ལང་ཚེ་བཅོ་བརྒྱད་ཡོད་པ་དང༌། སྟེང་ནས་རིམ་བཞིན་ལང་ཚེ་གསུམ་ནི་སྔ་རྐང་དང་ལྷག་མ་གསུམ་ནི་ཕྱི་རྐང་བཅས་ཡིན་ལ། སྔ་མ་གསུམ་རིམ་བཞིན་ཀརྐཊ་སེང་བུ་གསུམ་དང་ཆུ་བུམ་ཉ་གསུམ་རྣམས་ལ་ཡོད་དུས་སྔ་རྐང་དང༌། སྲང་སྡིག་གཞུ་གསུམ་དང་ལུག་གླང་འཁྲིག་གསུམ་རྣམས་ལ་སྤྱོད་དུས་ཕྱི་རྐང་གི་སྐབས་སུ་སླེབ་བོ། །རིགས་ལྡན་སྙིང་ཐིག་ལས། བགོས་ཐོབ་ནོར་གྱིས་ཉི་རྐང་བཟུང༌། །ཞེས་བྱུང་གཟའ་དག་ནི། རེས་གཟའ་དག་པ་སྟེ་ལྔ་བསྡུས་ཀྱི་ནང་གསེས། ཚེས་ལོངས་རྫོགས་མཚམས་ཀྱི་རེས་གཟའ་དང། ཆུ་ཚོད། ཆུ་སྲང་སོགས་གསལ་བར་སྟོན་པའོ། །ཉི་དག་ནི། ཉི་མ་སྐར་གནས་དེའི་སྟེང་དུ་སླེབས་པ་ནས་བརྩམས་ཏེ་ཉིན་དེའི་ཚེས་ལོངས་རྫོགས་པར་སྤྱོད་པའི་གྲངས་ཡིན།ཉི་མ་རྣམ་དག་ནི། ལྔ་བསྡུས་ཀྱི་ནང་ཚན་ཞིག་སྟེ། མིའི་སྣང་ཚུལ་གྱི་དབང་དུ་བྱས་ཏེ་ཉི་མ་རྒྱུ་སྐར་གང་དུ་ཡོད་པའི་ལོངས་སྤྱོད་ད་ལྟ་བ་སྟོན་པའི་ཨང་གྲངས་དེ་ལ་ཟེར་ཞིང༌། རྣམ་པར་དག་པའི་ཚུལ་ནི་ཉི་དྷྲུ་ལས་ཉི་བར་དང་དེ་ལས་ཉི་མ་རྣམ་དག་འབྱུང་ལ། ལོངས་སྤྱོད་ནི་ཡུལ་དུས་གཉིས་ལས་ཡུལ་གྱི་ལོངས་སྤྱོད་ཡིན་ལ། འདས་ལུས་ནི་ལོངས་སྤྱོད་ལ་གང་ཡོད་པ་དེ་འདས་པ་ཡིན་ལ། འདས་པའི་མཚམས་ནི་ཉིན་གྱི་ཐོག་མ་དེ་འཇོག་ཅེས་གྲགས་མོད། རིགས་ལྡན་སྙིང་ཐིག་ལས། ཉིན་དེའི་ཚེས་ལོངས་ཟད་མཚམས་ཡིན་པར་གསུངས། ལུས་པ་ནི་ཉི་དག་དེས་ཉིན་ཞག་ཡུན་ཚད་ལ་ཕྲི་ལྷག་ལ་གང་བྱུང་བ་དེ་ཉིན་དེར་ལུས་པའི་ལོངས་སྤྱོད་ཡིན། ཡུན་ཚད་ནི་ཉིན་ཞག་སྔ་མའི་ཉི་དག་དེས་ཉིན་ཞག་ཕྱི་མའི་ཉི་དག་ལ་འཕྲི་ལྷག་གང་ཡོད་པ་དེ་ཡུན་ཚད་ཡིན་ལ། རིགས་ལྡན་སྙིང་ཐིག་ལས། ཉི་མའི་ལོངས་སྤྱོད་རང་ཉིད་ཀྱིས། །སྐར་གནས་དེ་སྟེང་སླེབས་པ་ནས། །བརྩམས་ཏེ་རགས་པར་དེ་ཉིན་གྱི། །ཚེས་ལོངས་རྫོགས་པར་སྤྱོད་པའི་གྲངས། །ཞེས་བྱུང་ངོ། ། གྲངས་ཀྱི་མངོན་བརྗོད།གྲངས་ཀྱི་མངོན་བརྗོད་ཅེས་བྱ་བ་བཞུགས་སོ། ། ༼གཅིག་གི་མིང་གི་རྣམ་གྲངས༽ ༼རང་བཞིན༽ཆོས་ཐམས་ཅད་ཀྱི་རང་བཞིན་བདག་མེད་པར་གཅིག་ཡིན་པས་གྲངས་གཅིག་མཚོན། ༼གཟུགས༽གྲངས་ཀ་གཅིག་མཚོན་ཏེ། ལུས་ཀྱི་ཕུང་པོར་གྲུབ་པའི་གཟུགས་ནི་གཅིག་ཡིན་པས་སོ། ། ༼བསེ་རུ༽རི་དྭགས་བསེ་རུ་ལ་རྭ་གཅིག་ལས་མི་སྐྱེ་བས་གྲངས་གཅིག་མཚོན། ༼ཟླ་བ་དང་འོད་དཀར་ཅན།༽ཟླ་བ་གཅིག་ལས་མེད་པས་གྲངས་གཅིག་མཚོན། ༼རི་བོང་ཅན༽ཟླ་བ་ལ་རི་བོང་གི་གཟུགས་བརྙན་གཅིག་ཡོད་པས་གྲངས་གཅིག་མཚོན་པ་ཡིན་ནོ།།༼གཉིས་ཀྱི་མིང་གི་རྣམ་གྲངས༽ ༼མིག༽མིག་ལ་གཡས་གཡོན་གཉིས་ཡོད་པས་གྲངས་གཉིས་མཚོན། ༼ཟུང༌།༽ཟུང་དུ་འབྲེལ་བ་ལ་ཡ་གཉིས་དགོས་པས་གྲངས་གཉིས་མཚོན། ༼བགྲོད་པ༽ལོ་གཅིག་ལ་ཉི་མ་ལྷོ་བགྲོད་དང༌། བྱང་བགྲོད་གཉིས་ཡོད་པས་གྲངས་གཉིས་མཚོན། ༼ཐབས་ཤེས༽ཐབས་དང་ཤེས་རབ་གཉིས་སུ་ངེས་པས་གྲངས་གཉིས་མཚོན། ༼འཁྲིག་པ༽འཁྲིག་པ་སྤྱོད་པ་ལ་ཕོ་མོ་གཉིས་དགོས་པས་གྲངས་གཉིས་མཚོན། ༼སྦྱོར་བ༽ཁ་སྦྱོར་སྐབས་ཕོ་མོ་གཉིས་དགོས་པས་གྲངས་གཉིས་མཚོན། ༼གཤིན་རྗེ༽གཤིན་རྗེ་ལ་ཕོ་མོ་གཉིས་ཡོད་པས་གྲངས་གཉིས་མཚོན། ༼མཚེ་མ༽དུས་གཅིག་ཏུ་ཕྲུ་གུ་གཉིས་མཉམ་དུ་སྐྱེས་པས་གྲངས་གཉིས་མཚོན། ༼ལག་པ༽ལག་པ་ལ་གཡས་གཡོན་གཉིས་ཡོད་པས་གྲངས་གཉིས་མཚོན་པ་ཡིན་ནོ།།༼གསུམ་གྱི་མིང་གི་རྣམ་གྲངས།༽ ༼འཇིག་རྟེན། ༽འཇིག་རྟེན་ལ་ས་འོག་དང༌། ས་སྟེང༌། ས་བླ་སྟེ་གསུམ་ཡོད་པས་གྲངས་གསུམ་མཚོན། ༼ཚ་བ༽ལྒ་སྐྱ་དང༌། པི་པི་ལིང༌། ཕོ་བ་རིས་གསུམ་ལ་ཚ་བ་གསུམ་ཟེར་བས་གྲངས་གསུམ་མཚོན། ༼ཡོན་ཏན༽རྡུལ་དང༌། མུན་པ། སྙིང་སྟོབས་ཀྱི་ཡོན་ཏན་གསུམ་ཡོད་པས་གྲངས་གསུམ་མཚོན། ༼མེ༽ འཛམ་གླིང་ལྷོ་ཕྱོགས་ཀྱི་རྟ་གདོང་མེ་དང༌། ཁྱིམ་གྱི་ཉི་མ་དང༌། བསྲེག་བྱ་ཟ་བའི་མེ་སྟེ་མེ་གསུམ་ཡོད་པས་གྲངས་གསུམ་མཚོན། ཡང་ན་བསྐལ་པའི་མེ་དང༌། ཁྱིམ་གྱི་མེ་དང༌། ལྷོ་ཡི་མེ་བཅས་སོ། ། ༼སྲིད་པ༽ས་འོག་ས་སྟེང་ས་བླའི་ས་གསུམ་ཡོད་པས་གྲངས་གསུམ་མཚོན། ༼རྩེ་མོ༽མཚོན་ཆ་ཏྲི་ཤུ་ཟེར་བ་ཕལ་ཆེར་རྩེ་མོ་གསུམ་ཡོད་པས་གྲངས་གསུམ་མཚོན་པ་ཡིན་ནོ།།༼བཞིའི་མིང་གི་རྣམ་གྲངས༽ ༼ཆུ་གཏེར༽ རི་རབ་ཀྱི་ཕྱོགས་བཞིའི་རྒྱ་མཚོ་བཞི། ༼རྒྱ་མཚོ༽རྒྱ་མཚོ་ཆེན་པོ་ལ་ཁ་དོག་གིས་ཕྱེ་ན་དཀར་སྔོ་དམར་སེར་བཞི་ཡོད་པས་གྲངས་བཞི་མཚོན། ༼ཆུ་བོ༽ རྒྱ་གར་དུ། གངྒཱ་དང༌། པཀྵུ། སི་ཏཱ། སིནྡྷུ་སྟེ་ཆུ་བོ་ཆེན་པོ་བཞི་ཡོད་པས་གྲངས་བཞི་མཚོན། ༼སྡེ་པ༽སྔར་རྒྱ་གར་གྱི་ནང་པ་སངས་རྒྱས་པ་ལ་གནས་བརྟན་པ་དང༌། ཐམས་ཅད་ཡོད་པར་སྨྲ་བ། མང་པོས་བཀུར་བ། ཕལ་ཆེན་པ་སྟེ་རྩ་བའི་སྡེ་པ་ལ་བཞི་ཡོད་པས་གྲངས་བཞི་མཚོན། ༼རིགས་བྱེད༽མཆོད་སྦྱིན་དང༌། ངེས་བརྗོད། སྲིད་སྲུང༌། སྙན་དངགས་བཅས་བཞི་ཡོད་པས་གྲངས་བཞི་མཚོན། ༼བདུད༽བདུད་ལ་ལྷའི་བུ་དང༌། ཉོན་མོངས་པ། འཆི་བདག་ཕུང་པོ་བཅས་བཞི་ཡོད་པས་གྲངས་བཞི་མཚོན། ༼ཟུང་ལྡན༽གྲངས་ཀ་བཞི་སྟེ། ཟུང་ནི་གཉིས་ཀྱི་དོན་ཡིན་ལ། གྲངས་ཀ་བཞི་ལ་ཟུང་གཉིས་ཡོད་པས་ན་ཟུང་ལྡན། འོན་ཀྱང་གཉིས་ལ་ཟུང་ལྡན་བརྗོད་པའི་སྐབས་ཡོད་དོ།།༼ལྔའི་མིང་གི་རྣམས་གྲངས༽ ༼འདོད་ཡོན༽གཟུགས་སྒྲ་དྲི་རོ་རེག་བྱ་སྟེ་འདོད་ཡོན་ལྔ་ཡོད་པས་སོ། ། ༼ཉེར་སྤྱོད༽མེ་ཏོག་སོགས་མཆོད་པའི་ཉེར་སྤྱོད་ལྔ་བགྲང་བའི་ལུགས་སྲོལ་ཡོད་པས་གྲངས་ལྔ་མཚོན། ༼འབྱུང་བ༽འབྱུང་བ་ལ་ས་ཆུ་མེ་རླུང་ནམ་མཁའ་སྟེ་ལྔ་ཡོད་པས་གྲངས་ལྔ་མཚོན། ༼མདའ༽བདུད་དགའ་རབ་དབང་ཕྱུག་གི་མདའ་ལ་མྱོས་བྱེད་དང༌། སྲེད་བྱེད། རྨོངས་བྱེད། སྐེམ་བྱེད། འཆིང་བྱེད་བཅས་ལྔ་ཡོད་པས་གྲངས་ལྔ་མཚོན། ༼དབང་པོ༽མིག་དང༌། རྣ་བ། སྣ། ལྕེ། ལུས་ཏེ་དབང་པོ་ལ་ལྔ་ཡོད་པས་གྲངས་ལྔ་མཚོན། ༼ཕུང་པོ༽ཕུང་པོ་ལ་གཟུགས་དང༌། ཚོར་བ་དང༌། འདུ་ཤེས་དང༌། འདུ་བྱེད་དང༌། རྣམ་ཤེས་ལྔ་ཡོད་པས་གྲངས་ལྔ་མཚོན་པ་ཡིན་ནོ། །༼དྲུག་གི་མིང་གི་རྣམ་གྲངས།༽ ༼མཚམས༽ལོ་རེར་དཔྱིད་དང༌། སོ་གདབྱར། སྟོན། དགུན་སྟོད། དགུན་སྨད་དེ་མཚམས་ལ་དྲུག་ཡོད་པས་གྲངས་དྲུག་མཚོན། ༼རོ༽མངར་བ་དང་སྐྱུར་བ། ཁ་བ། བསྐ་བ། ཚ་བ། ལན་ཚ་བ་དྲུག་ཡོད་པས་གྲངས་དྲུག་མཚོན། ༼དུས༽དཔྱིད་དང་སོ་ག དབྱར། སྟོན། དགུན་སྟོད། དགུན་སྨད་དེ་དུས་མཚམས་ལ་དྲུག་ཡོད་པས་གྲངས་དྲུག་མཚོན། ༼འགྲོ་བ༽འགྲོ་བ་རིགས་དྲུག་ཡོད་པས་གྲངས་དྲུག་མཚོན། ༼བྲོ་བ༽བྲོ་བ་ལ་མངར་བ་དང༌། སྐྱུར་བ། ཁ་བ། བསྐ་བ། ཚ་བ། ལན་ཚྭ་བ་བཅས་དྲུག་ཡོད་པས་གྲངས་དྲུག་མཚོན་པ་ཡིན་ནོ། །༼བདུན་གྱི་མིང་གི་རྣམ་གྲངས།༽ ༼རིན་ཆེན༽ནོར་བུ། བཙུན་མོ། བློན་པོ། གླང་པོ། རྟ་མཆོག དམག་དཔོན་ཏེ་རྒྱལ་སྲིད་རིན་ཆེན་ལ་བདུན་ཡོད་པས་གྲངས་བདུན་མཚོན། ༼ས་འཛིན༽རི་རབ་ཀྱི་མཐའ་སྐོར་དུ་གཉའ་ཤིང་འཛིན་དང༌། གཤོལ་མདའ་འཛིན། སེང་ལྡེང་ཅན། ལྟ་ན་སྡུག་རྟ་རྣ། རྣམ་འདུད། མུ་ཁྱུད་འཛིན་ཏེ་གསེར་གྱི་ས་འཛིན་བདུན་ཡོད་པས་གྲངས་བདུན་མཚོན། ༼ཐུབ་པ༽རྣམ་གཟིགས་དང༌། གཙུག་ཏོར་ཅན། ཐམས་ཅད་སྐྱོབ། འཁོར་བ་འཇིག གསེར་ཐུབ། འོད་སྲུང༌། ཤཱཀྱ་ཐུབ་པ་སྟེ་ཐུབ་པ་ལ་བདུན་ཡོད་པས་གྲངས་བདུན་མཚོན། ༼གླིང༽རི་རབ་ཀྱི་ཁོར་ཡུག་ཏུ་ཟླ་བ་དང༌། འོད་དཀར། ཀུ་ཤ། མིའམ་ཅི། ཁྲུང་ཁྲུང༌། དྲག་པོའི་གླིང༌། འཛམ་གླིང་ཆེན་པོ་བཅས་གླིང་བདུན་ཡོད་པས་གྲངས་བདུན་མཚོན། ༼དྲང་སྲོང༽འོད་ཟེར་ཅན་དང༌། ཉི་མ། རྒྱུན་ཤེས། འོད་ཡངས། ལྷ་མིན་འཇོམས། མཆོད་སྦྱིན་ཅན། གནས་འཇོག་སྟེ་སྐར་མ་སྨིན་བདུན་ལ་གནས་པའི་དྲང་སྲོང་བདུན་ཡོད་པས་གྲངས་བདུན་མཚོན། ༼གཟའ༽ཉི་མ་དང༌། ཟླ་བ། མིག་དམར། ལྷག་པ། ཕུར་བུ། པ་སངས། སྤེན་པ་སྟེ་རེས་གཟའ་བདུན་ཡོད་པས་གྲངས་བདུན་མཚོན། ༼རེས་གཟའ༽རེས་གཟའ་ལ་བདུན་ཡོད་པས་གྲངས་བདུན་མཚོན། ༼རྟ༽ཉི་མ་ལ་རླུང་དང༌། ཡིད་མགྱོགས། མདོག་ལྔ་པ། ཐིག་ལེ་ཅན། ངེས་བརྗོད། ཤིན་ཏུ་རྒྱལ་མཚན། རི་འཇོམས་ཏེ་རྟ་བདུན་ཡོད་པས་གྲངས་བདུན་མཚོན་པ་ཡིན་ནོ། །༼བརྒྱད་ཀྱི་མིང་གི་རྣམ་གྲངས༽ ༼ལྷ༽ལྷ་ཆེན་ལ་ཚངས་པ་དང༌། བྷྲིངྒི་རི་དྷི། དྲག་པོ། དབང་ཕྱུག སྨིན་དྲུག ཚོགས་བདག ལེགས་ལྡན་ནག་པོ། བི་ཏྲི་པ་ཏྲ་སྟེ་བརྒྱད་ཡོད་པས་གྲངས་བརྒྱད་མཚོན། ༼བཀྲ་ཤིས༽གདུགས་དང༌། གསེར་ཉ། བུམ་པ། པད་མ། དུང་དཀར། དཔལ་བེའུ། རྒྱལ་མཚན། འཁོར་ལོ་སྟེ་བཀྲ་ཤིས་པའི་རྟགས་ལ་བརྒྱད་ཡོད་པས་གྲངས་བརྒྱད་མཚོན། ༼ཀླུ༽ཀླུ་ཆེན་ལ་མཐའ་ཡས་དང༌། འཇོག་པོ། སྟོབས་རྒྱུ། རིགས་ལྡན། ནོར་རྒྱས་བུ། དུང་སྐྱོང༌། པད་མ། པད་མ་ཆེན་པོ་སྟེ། བརྒྱད་ཡོད་པས་གྲངས་བརྒྱད་མཚོན། ༼གདེངས་ཅན༽ཀླུ་ལ་མིང་གཞན་གདེངས་ཅན་ཡང་ཟེར་བས་ཀླུ་བརྒྱད་ཡོད་པས་གྲངས་བརྒྱད་མཚོན། ༼སྦྲུལ༽ཀླུ་ཆེན་བརྒྱད་དུ་ཕྱེ་བའི་ལྟོ་འགྲོ་སྟེ་སྦྲུལ་ལ་བརྒྱད་ཡོད་པས་གྲངས་བརྒྱད་མཚོན། ༼ལྟོ་འགྲོ་དང་བྲང་འགྲོ༽སྦྲུལ་ལ་ལྟོ་འགྲོ་དང་བྲང་ཟེར་བས་བརྒྱད་མཚོན། ༼ནོར་ལྷ༽ནོར་ལྷ་ལ་ཆུ་ལྷ་དང༌། བརྟན་པ། ཟླ་བ། འཛིན་བྱེད། རླུང༌། མེ། ནམ་ལངས། འོད་བྱེད་བཅས་བརྒྱད་ཡོད་པས་གྲངས་བརྒྱད་མཚོན་པ་ཡིན་ནོ།། ༼ནོར༽ནོར་ལྷ་དང་མཚུངས་པས་གྲངས་བརྒྱད་མཚོན། ༼དབྱིག༽ནོར་ལྷའི་མིང་ལ་བརྒྱད་ཡོད་པས་གྲངས་བརྒྱད་མཚོན་པ་ཡིན་ནོ།།༼དགུ་བའི་མིང་གི་རྣམ་གྲངས༽ ༼སྲིན་པོ༽གཏེར་དགུ་ལ་སྲུང་བ་པོ་སྲིན་པོ་དགུ་ཡོད་པས་གྲངས་དགུ་མཚོན། བཤད་སྲོལ་གཞན་ཞིག་ལ་ལངྐ་གྲོང་ཁྱེར་དགུའི་བདག་པོ་སྲིན་པོ་དགུ་ཡོད་པས་གྲངས་དགུ་མཚོན་པ་ཡིན་ནོ།། ༼བུ་ག༽ལུས་ཀྱི་བུ་ག་ལ་དགུ་ཡོད་པས་གྲངས་དགུ་མཚོན། ༼གཏེར༽གཏེར་ལ་པད་མ་ཅན་དང༌། དུང་ཅན། པད་མ་ཆེན་པོ། ཆུ་སྲིན་ཅན། རུས་སྦལ་ཅན། རྔ་ཅན། དགའ་བ་ཅན། སྔོན་པོ། འཛིན་བྱེད་ཅེས་དགུ་ཡོད་པས་གྲངས་ཀ་དགུ་མཚོན། ༼རྩ༽མིའི་གཟུགས་པོར་རྩ་གསུམ་དང་འཁོར་ལོ་དྲུག་སྟེ་རྩ་ལ་དགུ་ཡོད་པས་གྲངས་དགུ་མཚོན་པ་ཡིན་ནོ།།༼བཅུའི་མིང་གི་རྣམ་གྲངས།༽ ༼འཇུག་པ༽ཉ་དང༌། རུས་སྦལ། ཕག་རྒོད། མིའི་སེང་གེ་མིའུ་ཐུང༌། ཤིང་རྟ་བཅུ་པའི་བུ་རཱ་མ་ཎ། ཛམཱད་ཨགྣིའི་བུ་རཱ་མ་ཎ། ནག་པོ། སངས་རྒྱས་ཤཱཀྱ་ཐུབ་པ། རིགས་ལྡན་བྲམ་ཟེའི་བུ་ཀརྐི་ཙེ་བཅས་ཁྱབ་འཇུག་ལ་འཇུག་པ་བཅུ་ཡོད་པས་གྲངས་བཅུ་མཚོན། ༼ཁྲོ་བོ༽དཔལ་ལྡན་གཙུག་གཏོར་གནོད་མཛེས་ཤིན་ཏུ་སྟོབས། །དབྱུག་སྔོན་རྨུགས་བྱེད་འདོད་པའི་རྒྱལ་པོ་དང༌། །ཁེངས་བྱེད་མི་གཡོ་རེངས་བྱེད་སྟོབས་པོ་ཆེ། །རབ་བརྗིད་ཁྲོ་རྒྱལ་བཅུ་ལ་ཕྱག་འཚལ་ལོ། །ཞེས་གསུངས་པ་ལྟར་ནང་གི་སྲུང་འཁོར་གྱི་ཕྱོགས་བཅུར་བཞུགས་ནས་སྒྲུབ་པ་པོ་ལ་སྲུང་བའི་ཁྲོ་བོ་བཅུ་ཡོད་པས་གྲངས་བཅུ་མཚོན། ༼སྒྲ་སྒྲོགས༽གྲངས་ཀ་བཅུ་སྟེ། སྲིན་པོའི་རྒྱལ་པོ་སྒྲ་སྒྲོག་ལ་མགྲིན་པ་བཅུ་ཡོད་པས་དེ་ལྟར་ཐོགས། ༼ཕྱོགས༽ཕྱོགས་བཞི་མཚམས་བཞི་སྟེང་འོག་སྟེ་ཕྱོགས་ལ་བཅུ་ཡོད་པས་གྲངས་བཅུ་མཚོན། ༼འབྱོར་པ༽མི་ཡིན་པ་དང༌། ཡུལ་དབུས་སུ་སྐྱེས་པ། དབང་པོ་ཚང་བ། ལས་ཀྱི་མཐའ་མ་ལོག་པ། གནས་ལ་དད་པ་སྟེ་རང་འབྱོར་ལྔ་དང༌། སངས་རྒྱས་འཇིག་རྟེན་དུ་བྱོན་པ། དེས་དམ་པའི་ཆོས་སྟོན་པ། བསྟན་པ་གནས་པ། དེའི་རྗེས་སུ་ཞུགས་པ། གཞན་ཕྱིར་སྙིང་བརྩེ་བས་རྗེས་སུ་བཟུང་བ་སྟེ་གཞན་འབྱོར་ལྔ་བཅས་འབྱོར་བ་བཅུས་གྲངས་བཅུ་མཚོན་པའོ།། ༼སྟོབས༽ གནས་དང་གནས་མ་ཡིན་པ་མཁྱེན་པའི་སྟོབས་དང། ལས་ཀྱི་རྣམ་སྨིན་མཁྱེན་པའི་སྟོབས། མོས་པ་སྣ་ཚོགས་མཁྱེན་པའི་སྟོབས། ཁམས་སྣ་ཚོགས་མཁྱེན་པའི་སྟོབས། དབང་བོ་མཆོག་དམན་མཁྱེན་པའི་སྟོབས། ཐམས་ཅད་དུ་འགྲོ་བའི་ལམ་མཁྱེན་པའི་སྟོབས། བསམ་གཏན་རྣམ་ཐར་ཏིང་འཛིན་སྙོམས་འཇུག་སོགས་མཁྱེན་པའི་སྟོབས། སྔོན་གནས་རྗེས་དྲན་མཁྱེན་པའི་སྟོབས། འཆི་འཕོ་དང་སྐྱེ་བ་མཁྱེན་པའི་སྟོབས། ཟག་པ་ཟད་པ་མཁྱེན་པའི་སྟོབས་དང་བཅུ་ཡོད་པས་གྲངས་བཅུ་མཚོན། ༼སོར་མོ༽རྐང་ལག་གཉིས་སོ་སོར་སོར་མོ་བཅུ་རེ་ཡོད་པས་གྲངས་བཅུ་མཚོན་ནོ།།༼བཅུ་གཅིག་གི་མིང་གི་རྣམ་གྲངས༽ ༼དྲག་པོ༽མ་སྐྱེས། རྐང་གཅིག འཕེལ་བ། དྲག་པོ། བརྩོན་འགྲུས་ལྡན། འཕྲོག་བྱེད། བདེ་འབྱུང༌། སྤྱན་གསུམ་པ། གཞན་ལས་རྒྱལ་བ། དབང་ལྡན། ས་གསུམ་པ་བཅས་དྲག་པོའི་ལྷ་བཅུ་གཅིག་ཡོད་པས་བཅུ་གཅིག་མཚོན། ལྷ་དབང་ཕྱུག་ལ་མ་སྐྱེས་སོགས་མིང་བཅུ་གཅིག་ཡོད་པས་བཅུ་གཅིག་ཞེས་བཤད་པ་ཡོད་དོ།། ༼དབང་ཕྱུག༽ལྷ་དབང་ཕྱུག་ཆེན་པོའི་མིང་གི་རྣམ་གྲངས་ལ་མ་སྐྱེས་རྐང་གཅིག་དང༌། འཕེལ་བ་དང༌། བསྟོད་པ། དྲག་པོ། བཙོན་འགྲུས་ལྡན། འཕྲོག་བྱེད། བདེ་འབྱུང༌། སྤྱན་གསུམ། གཞན་ལས་རྒྱལ་བ། དབང་ལྡན། ས་གསུམ་པ་བཅས་བཅུ་གཅིག་ཡོད་པས་གྲངས་བཅུ་གཅིག་མཚོན་ནོ།།མ་སྐྱེས་རྐང་གཅིག་གཉིས་གཅིག་བགྲེང་ནས་བསྟོད་པ་སྣོན་པ་དང༌། མ་སྐྱེས་དང་རྐང་གཅིག་སོ་སོར་བགྲེང་བའི་ཚུལ་གཉིས་ཡོད་པས་གང་ཡིན་དཔྱད་འཚལ། ༼བདེ་བྱེད༽ལྷ་དབང་ཕྱུག་ཆེན་པོའི་མིང་གི་རྣམ་གྲངས་ལ་མ་སྐྱེས་རྐང་གཅིག་དང༌། འཕེལ་བ། བསྟོད་པ་སོགས་བཅུ་གཅིག་ཡོད་པས་གྲངས་བཅུ་གཅིག་མཚོན ༼བདེ་འབྱུང༽ལྷ་དབང་ཕྱུག་ཆེན་པོའི་མིང་གི་རྣམ་གྲངས་ཡིན་པས་གྲངས་བཅུ་གཅིག་མཚོན་ནོ།། ༼འཕྲོག་བྱེད༽ལྷ་དབང་ཕྱུག་ཆེན་པོའི་མིང་ལ་བདེ་བྱེད་དང༌། བདེ་འབྱུང༌། དྲག་པོ་སོགས་བཅུ་གཅིག་ཡོད་པས་གྲངས་བཅུ་གཅིག་མཚོན་ནོ།།༼བཅུ་གཉིས་ཀྱི་མིང་གི་རྣམ་གྲངས༽ ༼ཉི་མ༽ཉི་མ་ལ་ཁྱིམ་གྱི་བདག་པོ་སྟེ། དབང་པོ་དང༌། བྱེད་པོ། ལམ་པ། ཆར་འབེབས། བསྟོད་བྱེད། སྔོན་མིན། སྔོན་འཕགས། མི་གཟུགས། ཁྱབ་འཇུག འོད་ཅན། ཆུ་བདག་གཤིན་རྗེ་བཅས་བཅུ་གཉིས་ཡོད་པས་གྲངས་བཅུ་གཉིས་མཚོན་ནོ། །༼རྟེན་འབྲེལ༽རྟེན་འབྲེལ་ལ་མ་རིག་པ་དང་འདུ་བྱེད་རྣམ་ཤེས་སོགས་ཡན་ལག་བཅུ་གཉིས་ཡོད་པས་གྲངས་བཅུ་གཉིས་མཚོན། ༼ཁྱིམ༽ཉི་མ་ལ་བུམ་པ། ཉ། ལུག འཁྲིག་པ། གླང༌། ཀརྐ་ཊ། སེང་གེབུ་མོ། སྲང༌། སྡིག་པ། གཞུ། ཆུ་སྲིན་བཅས་ཁྱིམ་བཅུ་གཉིས་ཡོད་པས་གྲངས་བཅུ་གཉིས་མཚོན་ནོ།།༼བཅུ་གསུམ་གྱི་མིང་གི་རྣམ་གྲངས།༽གདུགས་རིམ༽གདུགས་བརྩེགས་པའི་རིམ་པ་སྟེ་མཆོད་རྟེན་ལ་གདུགས་རིམ་པ་བཅུ་གསུམ་ཡོད་པས་གྲངས་བཅུ་གསུམ་མཚོན་ནོ།། ༼སྣ་ཚོགས༽འདོད་པ་དང༌། དུས་དང༌། གང་བ་ལ་སོགས་པ་སྣ་ཚོགས་ཀྱི་ལྷ་ལ་བཅུ་གསུམ་ཡོད་པས་གྲངས་བཅུ་གསུམ་མཚོན། ༼ལུས་མེད༽འདི་བདུད་དགའ་རབ་དབང་ཕྱུག་གི་མིང་གི་རྣམ་གྲངས་ཡིན་ལ་དེས་མྱོས་བྱེད་མ་དང༌། གློག་གི་འོད་ཅན་མ། ཐིག་ལེ་མཆོག་མ། པད་དཀར་མ། ལག་བཟང་མ། དགའ་བའི་ཤིང་རྟ་མ། མེ་ནཱ་ཀསྐྲ་འདྲེས་མ། ལེགས་རྒྱན་མ། མུཉྫ་སྐྱེས་མ། ཨ་ལ་མྦུ་ཥཱ། ཆུ་ཤིང་བྲལ་ཅན་མ། སྐེད་ལེགས་མ་བཅས་ལྷའི་སྨད་འཚོང་མ་བཅུ་གསུམ་སྤྲུལ་པས་ན་གྲངས་བཅུ་གསུམ་མཚོན་ནོ།། ༼འདོད་པ༽འདོད་པའི་ལྷ་སྟེ་མྱོས་བྱེད་མ་དང༌། གློག་གི་འོད་ཅན་སོགས་གོང་དུ་བཤད་པའི་ལྷའི་སྨད་འཚོང་མ་བཅུ་གསུམ་ཡོད་པས་གྲངས་བཅུ་གསུམ་མཚོན། ༼མྱོས་བྱེད༽ལྷའི་སྨད་འཚོང་མ་བཅུ་གསུམ་དེ་དག་འདོད་པས་མྱོས་པའི་རྒྱུ་ཡིན་པས་འདོད་པ་དང་མྱོས་བྱེད་ཀྱིས་གྲངས་བཅུ་གསུམ་མཚོན་པ་ཡིན་ནོ།།༼བཅུ་བཞིའི་མིང་གི་རྣམ་གྲངས།༽ ༼མ་ནུ༽རྒྱ་གར་དུ་མིའི་རིམ་པ་མི་འདྲ་བ་བཞིར་ཕྱེ་བའི་ནང་ནས་རྒྱལ་རིགས་ལ་རྐང་ཐང་དང༌། རྟ་པ། གླང་ཆེན། ཤིང་རྟ་པ་བཞི་དང༌། བྲམ་ཟེའི་རིགས་ལ་ནགས་གནས་དང༌། ཁྱིམ་གནས། དཀའ་ཐུབ་པ་གསུམ། རྗེ་རིགས་ལ་ཡིག་མཁན་དང༌། ཚོང་པ། སྨན་པ་གསུམ། དམངས་རིགས་ལ་ས་གཞི་རྨོ་བ་དང༌། བ་ལང་སྐྱོང་བ། འཇིམ་ལས་པ། ཁྱིམ་གནས་པ་བཞི་བཅས་བསྡོམས་ན་བཅུ་བཞི་ཡོད་པས་གྲངས་བཅུ་བཞི་མཚོན། ༼ཤེད་བུ༽མ་ནུའི་མིང་གི་རྣམ་གྲངས་ཡིན་པས་གྲངས་བཅུ་བཞི་མཚོན། ༼ཡིད༽ཡིད་ཅན་ནམ་སེམས་ཅན་གྱི་སྲིད་པ་བཅུ་བཞི་ཡོད་པས་གྲངས་བཅུ་བཞི་མཚོན། ༼སྲིད་པ༽དུས་འཁོར་ལས་བསྟན་པ་སྟེ། འདོད་ལྷ་རིགས་དྲུག་དང་གཟུགས་དང་གཟུགས་མེད་ཀྱིས་ཕྱེ་བས་ལྷ་བརྒྱད་དང༌། དུད་འགྲོ་ལ་སྐྱེ་གནས་ཀྱིས་ཕྱེ་བས་བཞི་དང༌། མི་དང་དམྱལ་བ་དང་བཅས་སྲིད་པ་ལ་བཅུ་བཞི་ཡོད་པས་གྲངས་བཅུ་བཞི་མཚོན། ༼སྲིད་པའི་གནས༽སྔར་གྱི་སྲིད་པ་བཅུ་བཞི་ཡིན་པ་འདྲའོ།།༼བཅོ་ལྔའི་མིང་གི་རྣམ་གྲངས།༽ ༼ཚེས༽རགས་པར་ཟླ་བའི་ཕྱོགས་རེར་ཚེས་ཞག་དང་ཉིན་ཞག་གཉིས་ཀ་བཅོ་ལྔ་རེ་ཡོད་པས་གྲངས་བཅོ་ལྔ་མཚོན་ནོ།།༼བཅུ་དྲུག་གི་མིང་གི་རྣམ་གྲངས༽ ༼ཆ་ཤས༽ཟླ་བ་ལ་ཆ་ཤས་བཅུ་དྲུག་ཡོད་པས་གྲངས་བཅུ་དྲུག་མཚོན། ༼རྒྱལ་བོ༽སྔོན་རྒྱ་གར་དུ་མ་ག་དྷ་སོགས་ཡུལ་ཆེན་ཏེ་རྒྱལ་ཕྲན་བཅུ་དྲུག་ལ་རྒྱལ་པོ་རེ་ཡོད་པ་རྣམས་ཁྱོན་བསྡོམས་རྒྱལ་པོ་བཅུ་དྲུག་ཡོད་པས་གྲངས་བཅུ་དྲུག་མཚོན ༼མི་བདག༽འདི་རྒྱལ་པོའི་མིང་གི་རྣམ་གྲངས་ཡིན་པས་གྲངས་བཅུ་དྲུག་མཚོན་ནོ།།༼བཅུ་བདུན་གྱི་མིང་གི་རྣམ་གྲངས༽ ༼གནས༽གཟུགས་ཁམས་གནས་རིགས་བཅུ་བདུན་ཡོད་པས་གྲངས་བཅུ་བདུན་མཚོན་པར་ད་ལྟ་བཞག་མཁན་ཡོད་དོ། །བསམ་གཏན་དང་པོའི་གནས་གསུམ་ནི། ཚངས་རིས་དང༌། ཚངས་པ་མདུན་ན་འདོན། ཚངས་པ་ཆེན་པོའོ། །བསམ་གཏན་གཉིས་པའི་གསུམ་ནི། འོད་ཆུང་དང༌། ཚད་མེད་འོད། འོད་གསལ་ལོ། །བསམ་གཏན་གསུམ་པའི་གསུམ་ནི། དགེ་ཆུང་དང༌། ཚད་མེད་དགེ དགེ་རྒྱས་སོ། །བསམ་གཏན་བཞི་པའི་བརྒྱད་ནི། སྤྲིན་མེད་དང༌། བསོད་ནམས་སྐྱེས། འབྲས་བུ་ཆེ་བ། མི་ཆེ་བ། མི་གདུང་བ། གྱ་ནོམ་སྣང་བ། ཤིན་ཏུ་མཐོ་བ། འོག་མིན་ཏེ་བརྒྱད་ལས་དང་པོ་གསུམ་སོ་སྐྱེའི་གནས་དང༌། ཕྱི་མ་ལྔ་འཕགས་པ་ཁོ་ནའི་གནས་ཏེ་གནས་གཙང་ལྔ་ཞེས་གྲགས་སོ། །༼བཅོ་བརྒྱད༽ ༼ཉེས་སྐྱོན༽གྲངས་ཀ་བཅོ་བརྒྱད་མཚོན་ཏེ། གཟུགས་མི་སྡུག་པ། སྐྲ་བྱི་བ། དཔྲལ་བ་ཆུང་བ། མདོག་སེར་སྐྱ། མིག་སེར་བ། སྨིན་མཚམས་འབྱར་བ། སྣ་ལེབ་པ། སོ་སྟོ་བ། དིག་པ། སྨིག་ཟླུམ་པ། མིག་ཆུང་བ། སྒུར་བ། ལྟོ་བ་ཆེ་བ། དཔུང་བ་དང་རྗེ་ངར་ཐུང་བ། སྤུ་ཅན། རྐང་བ་དང་ལག་པ་མི་མཉམ་པ། ཚིགས་སྦོམ་པ། ཁ་དང་ལུས་ལས་དྲི་ངན་པ་འབྱུང་བ་བཅས་ལུས་ལ་མི་སྡུག་པ་སྐྱོན་ནམ་ཉེས་པ་བཅོ་བརྒྱད་ཡོད་པས་སོ། །མ་འོངས་པར་རབ་བྱུང་བཅོ་བརྒྱད་པ་ལ་རབ་ཁམས་ཞེས་བརྗོད་པར་བྱའོ།། ༼ཁམས༽རྣམ་ཤེས་ཀྱི་ཁམས་དྲུག་དང༌། དབང་པོའི་ཁམས་དྲུག ཡུལ་གྱི་ཁམས་དྲུག་སྟེ་ཁམས་ལ་བཅོ་བརྒྱད་ཡོད་པས་གྲངས་བཅོ་བརྒྱད་མཚོན་ནོ།།༼ཉེར་བཞིའི་མིང་གི་རྣམ་གྲངས༽ ༼རྒྱལ་བ༽གྲངས་ཀ་ཉེར་བཞི་མཚོན་ཏེ། ལང་ཀར་གཤེགས་པའི་མདོ་ལས་གསུངས་པའི་རྒྱལ་བ་སྟེ་སངས་རྒྱས་ཉེར་བཞི་ཡོད་པར་གསུངས་པས་ནའོ།། ༼ཡུལ༽༡ པ་ལི་ར་མ་ལ་ཡ། ༢ ཛ་ལནྦྷ་ར། ༣ ཨཽ་ཌི་ཡ་ན། ༤ ཨརྦུཏ། ༥ གཽ་ད་ཝ་རི། ༦ ར་མེ་ཤྭ་རི། ༧ དི་ཝི་ཀོ་ཧྲི། ༨ མཱ་ལ་ཝ། ༩ ཀཱ་མ་རུ་པ། ༡༠ ཨོ་ཧྲེ། ༡༡ ཧྲི་ཤ་ཀུ་ནི། ༡༢ ཀོ་ས་ལ། ༡༣ ཀ་ལིངྐ། ༡༤ ལམ་པ་ཀ ༡༥ ཀཉྩི། ༡༦ ཧི་མ་ལ་ཡ། ༡༧ པྲེ་ཏ་པུ་རི། ༡༨ གྲི་ཧ་དེ་ལྭ་ཏ། ༡༩ སོ་ར་ཥ། ༢༠ སུ་ཝརྣ་དཱི་པ། ༢༡ ནཱ་ག་ར། ༢༢ སིན་དྷུ། ༢༣ མ་རུ། ༢༤ ཀུ་ལུ་ཏ་བཅས་ཕྱི་ནང་གི་ཡུལ་ཉེར་བཞི་ཡོད་པས་གྲངས་ཉེར་བཞི་མཚོན་ནོ།།༼ཉེར་ལྔའི་མིང་གི་རྣམ་གྲངས༽ ༼དེ་ཉིད༽གཙོ་བོ་དང༌། ཆེན་པོ་དང༌། ང་རྒྱལ་དང༌། གཟུགས་སྒྲ་དྲི་རོ་རེག་བྱ་སྟེ་དེ་ཙམ་ལྔ་དང༌། ས་ཆུ་མེ་རླུང་ནམ་མཁའ་སྟེ་འབྱུང་བ་ལྔ་དང༌། ངག ལག་པ། རྐང་པ། རྐུབ། འདོམས་ཀྱི་དབང་པོ་སྟེ་ལས་ཀྱི་དབང་པོ་ལྔ་དང༌། མིག རྣ་བ། སྣ། ལྕེ། པགས་པའམ་ལུས་ཀྱི་དབང་པོ་སྟེ་བློའི་དབང་པོ་ལྔ་དང༌། གཉིས་ཀའི་བདག་ཉིད་ཅན་ཡིད་ཀྱི་དབང་པོ་སྟེ་དབང་པོ་བཅུ་གཅིག་དང༌། བདག་ཤེས་རིག་གི་སྐྱེས་བུ་སྟེ་ཉི་ཤུ་རྩ་ལྔ་ཡོད་པས་གྲངས་ཉེར་ལྔ་མཚོན་ནོ། །༼ཉེར་བདུན་གྱི་མིང་གི་རྣམ་གྲངས༽ ༼འཁོར་ལོ༽རྒྱུ་སྐར་གྱི་གོ་ལའི་འཁོར་ལོ་ལ་ཉེར་བདུན་ཡོད་པས་གྲངས་ཉེར་བདུན་མཚོན། ༼སྐར་མ༽གྲོ་བཞིན་དང་བྱི་བཞིན་གཉིས་གཅིག་ཏུ་བྱས་ན་རྒྱུ་སྐར་ལ་ཉེར་བདུན་ཡོད་པས་གྲངས་ཉེར་བདུན་མཚོན། ༼རྒྱུ་སྐར༽༡ སྨིན་དྲུག ༢ སྣར་མ། ༣ མགོ། ༤ ལག ༥ ནབས་སོ། ༦ རྒྱལ། ༧ སྐག ༨ མཆུ། ༩ གྲེ། ༡༠ དབོ། ༡༡ མེ་བཞི། ༡༢ ནག་པ། ༢༣ ས་རི། ༡༤ ས་ག ༡༥ ལྷ་མཚམས། ༡༦ སྣྲོན། ༡༧ སྣྲུབས། ༡༨ ཆུ་སྟོད། ༡༩ ཆུ་སྨད། ༢༠ གྲོ་བཞིན། ༢༡ མོན་གྲེ། ༢༢ མོན་གྲུ། ༢༣ ཁྲུམས་སྟོད། ༢༤ ཁྲུམས་སྨད། ༢༥ ནམ་གྲུ། ༢༦ ཐ་སྐར། ༢༧ བྲ་ཉེ་སྟེ་ཉེར་བདུན་ཡོད་པས་གྲངས་ཉེར་བདུན་མཚོན་ནོ།།༼སུམ་ཅུ་རྩ་གཉིས་ཀྱི་མིང་གི་རྣམ་གྲངས༽ ༼སོ༽མི་ཕལ་ཆེར་གྱི་སོ་ལ་འགྲམ་སོ་དང་བཅས་སོ་གཉིས་ཡོད་པས་གྲངས་སུམ་ཅུ་སོ་གཉིས་མཚོན། ༼གཉིས་སྐྱེས༽སོ་ཡི་མིང་སྟེ། ཐེངས་གཉིས་ལ་སྐྱེས་པས་སོ། །སོའི་མིང་གི་རྣམ་གྲངས་ཡིན་པས་གྲངས་སུམ་ཅུ་སོ་གཉིས་མཚོན་པ་ཡིན་ནོ། །༼ཐིག་ལེའི་མིང་གི་རྣམ་གྲངས༽ ༼སྟོང་བ༽ ༼ནམ་མཁའ༽ནམ་མཁའ་སྟོང་པ་ཡིན་པས་གྲངས་ཀླད་སྐོར་མཚོན་པ་ཡིན་ནོ། །ཞེས་གྲངས་ཀྱི་མངོན་བརྗོད་ཅེས་བྱ་བ་འདི་ནི་སྐར་རྩིས་ཀྱི་སྔོན་འགྲོ་ཁྲིད་པའི་དབུ་བཟུང་དུས་སུ་དངོས་གྲུབ་དཔལ་གྱིས་རབ་གནས་ལྕགས་བྱི་ལོའི་ནག་ཟླ་ཚེས་༡༦གི་ཕྱི་དྲོ་ལ་བྲིས་པའོ། ། ཡངས་པའི་ནོར་ལྡན་ཁྱོན་གྱི་ཐ་གྲུ་ཀུན། །བྱམས་བརྩེ་ཀུན་སྙོམས་འོ་ཆབ་རྒྱུན་བཟང་གིས། །ལུས་ཅན་སེམས་ཀྱི་བུམ་པ་ཡོངས་འགེངས་ཏེ། །མཛའ་གཅུགས་དགའ་བདེས་ཕྱོགས་ཀུན་འཚོ་གྱུར་ཅིག །རྐང་གཉིས་རྐང་བཞི་ནུར་འགྲོས་འདབ་ཆགས་སོགས། །བདེ་དོན་བརྩོན་ཞིང་སྡུག་བསྔལ་སྤོང་འདུན་པའི། །རིས་མེད་འགྲོ་བའི་སེམས་ཀྱི་ཞིང་ས་ལ། །བཅོས་མིན་ལྷག་བསམ་དྲི་མེད་སྨིན་པར་ཤོག །དྲང་སྲོང་ཆེན་པོའི་བདེན་པའི་བྱིན་མཐུ་དང༌། །ཐེག་གསུམ་ཚོགས་ཀྱི་རྣམ་དཀར་དག་པ་དང༌། །བདག་ཅག་རྩེ་གཅིག་སྨོན་པའི་བསམ་པ་རྣམས། །ཡོངས་སུ་བཟླུམས་ཏེ་ཐུབ་བསྟན་རྒྱས་བྱེད་ཤོག ། རིམ་གཉིས་སྨོན་ལམ་གྱིས་བསྟན་དོན་ལ་བཀའ་འདྲིའི་ལན།བཀའ་འདྲི་དང་པོའི་ལན།རིམ་གཉིས་སྨོན་ལམ་གྱིས་བསྟན་དོན་ལ་བཀའ་འདྲིའི་ལན།བཀའ་འདྲི་དང་པོའི་ལན། ཞི་སོགས་འཕྲིན་ལས་བཅུ་གཉིས་པོ། །ཞེས་པའི་སྐབས་ཀྱི་འཕྲིན་ལས་བཅུ་གཉིས་ནི། བསྐྱེད་རིམ་བདུད་རྩིའི་བུམ་བཟང་ལས། ཞི་རྒྱས་གཞི་ལ་གསུམ། དབང་དགུག་པ་བསྐྱོད་གསུམ་སྟེ་འཇམ་པོ་དྲུག བསད་བསྐྲད་དབྱེ་གསུམ། རྨོངས་རེངས་གདབ་གདབ་གསུམ་སྟེ་རྩུབ་པོ་དྲུག་དང་བཅུ་གཉིས་སོ། །ཞེས་དང༌། དཔལ་བདེ་མཆོག་གི་རྒྱུད་ལས། དབང་དང་དགུག་པ་དབྱེ་བ་དང༌། །བསད་དང་བསྐྲད་པ་ལ་སོགས་དང༌། །རྨུགས་དང་རེངས་པར་བྱ་བ་དང༌། །རྨོངས་དང་དེ་བཞིན་ཕུར་བུས་གདབ། །ཚིག་འཕྲོག་ལྐུགས་པར་གྱུར་པ་དང༌། །འོན་དང་དེ་བཞིན་ལོང་བ་དང༌། །མ་ནིང་ཉིད་དུ་བྱ་བ་དང༌། །གཟུགས་ནི་ཡོངས་སུ་བརྗེ་བ་འོ། །ཞེས་གསུངས་པ་ལྟར་ཡིན་ལ། འདིར་ཞི་བའི་ལས་ཀྱི་གསལ་ཁ་མ་བྱུང་ཡང་སྔ་ཕྱིར་མང་དུ་གསུངས་ཏེ་དེ་བསྣན་པས་བཅུ་གཉིས་སོ། །ཞེས་རྗེ་བཙུན་རིན་པོ་ཆེའི་བདེ་མཆོག་བསྟོད་པའི་རང་འགྲེལ་དུ་གསུངས་ཤིང༌། འདི་དག་མཚོན་ཙམ་ལས་རྒྱུད་གཞན་དུ་ལས་རིམ་བརྒྱ་སོགས་ལས་རབ་འབྱམས་གསུངས་པར་གཞུང་དེར་གསུངས་སོ། །འབའ་འདའི་དུས་འཁོར་ཡོངས་རྫོགས་མཇུག་ན་ལས་ཆེན་བཅུ་གཉིས་ཡོད་ལགས།བཀའ་འདྲི་གཉིས་པའི་ལན། གྲུབ་ཆེན་བརྒྱད་གཞུང་གང་ནས་གསུངས་ཤེ་ན། གུར་དང་བདེ་མཆོག་ལས་བགྲང་ཚུལ་མི་འདྲ་བ་སོགས་གསུངས་ཏེ། བདེ་མཆོག་བསྟོད་པའི་རང་འགྲེལ་ལས། ཐུན་མོང་གི་དངོས་གྲུབ་འབྲིང་པོ་གྲུབ་པ་ཆེན་པོ་བརྒྱད་ནི། ལྷ་མོ་བཞིས་ཞུས་པ་ལས། རྫས་བརྒྱད་ཡན་ལག་སྒྲུབ་པ་བཤད། །རིལ་ལུ་མིག་སྨན་དངོས་གྲུབ་དང༌། །ས་འོག་རལ་གྲིའི་དངོས་གྲུབ་དང༌། །མཁའ་ལ་འཕུར་དང་མི་སྣང་དང༌། །ཤི་བ་མེད་དང་ནད་འཇོམས་སོ། །ཞེས་དང༌། གུར་ལས། མིག་སྨན་དང་ནི་རྐང་མགྱོགས་དང༌། །རལ་གྲི་དང་ནི་ས་འོག་འགྲུབ། །རིལ་ལུ་དང་ནི་མཁའ་སྤྱོད་ཉིད། །མི་སྣང་བ་དང་བཅུད་ཀྱིས་ལེན། །ཞེས་སོགས་རྒྱུད་སོ་སོ་ནས་འདྲེན་ཚུལ་མི་གཅིག་པ་མང་པོ་བྱུང་ཡང༌། རྒྱུད་འདི་ཉིད་ལས། ས་འོག་སྟེང་འགྲོ་རལ་གྲི་དང༌། །ཚར་གཅོད་ཕན་འདོགས་ཉིད་དང་ནི། །རིལ་ལུ་མིག་སྨན་རྟེན་རྣམས་སམ། །རྐང་མགྱོགས་དག་གམ་བཅུད་ཀྱིས་ལེན། །ཞེས་པ་ལྟར་བརྒྱད་དང༌། ཞེས་གསུངས་སོ། །འབའ་མདའ་བླ་མའི་བསྐྱེད་རིམ་གྱི་མཇུག་ཏུའང་གསུངས་ཡོད། བཀའ་འདྲི་གསུམ་པའི་ལན། སྟོང་བ་མཚན་མ་རྣམ་བཅུར་འགྱུར། །ཞེས་པའི་དོན། སྟོང་པ་དུ་བ་སྨིག་རྒྱུ་མེ་ཁྱེར་མར་མེ། ནག་མོ་སེར་མོ་དམར་མོ་དཀར་མོ། མཆོག་གི་ཆ་དང་ཐིག་ལེའི་ཆ་སྟེ་རྟགས་སམ་མཚན་མ་བཅུ་རུ་འགྱུར་ཞེས་པའི་དོན་ཡིན་ལ། མཚན་མ་བཅུ་ཞེས་པ་རྟགས་བཅུའི་རྣམ་གྲངས་ཡིན་ཞིང༌། གྲངས་བགྲང་ཚུལ་ཡང་འདྲའོ། །བཀའ་འདྲི་བཞི་བའི་ལན། རྣལ་འབྱོར་གསུམ་གྱི་ལམ་ལ་བསླབས། །ལུས་ངག་ཡིད་གསུམ་སྒྲིབ་པ་སྦྱངས། །སྤྱོད་པ་གསུམ་གྱི་མཐར་ཕྱིན་ཏེ། །རྡོ་རྗེ་གསུམ་པོ་མངོན་གྱུར་ཤོག །ཅེས་པའི་སྐབས་ཀྱི་རྣལ་འབྱོར་གསུམ་ནི། སྐུ་རྡོ་རྗེའི་རྣལ་འབྱོར་སོར་སྡུད་དང་བསམ་གཏན་གཉིས། གསུང་རྡོ་རྗེའི་རྣལ་འབྱོར་སྲོག་རྩོལ་དང་འཛིན་པ་གཉིས། ཐུགས་རྡོ་རྗེའི་རྣལ་འབྱོར་རྗེས་དྲན་དང་ཏིང་ངེ་འཛིན་གཉིས་ཏེ་གསུམ་ཡིན་ནོ། ། སྤྱོད་པ་གསུམ།སྤྱོད་པ་གསུམ་ནི། རྡོ་རྗེ་རྣལ་འབྱོར་གྱི་ལམ་གསུམ་གྱི་སྤྱོད་པ་གསུམ་ལ་བྱེད། རྡོ་རྗེ་གསུམ་ནི། སྐུ་རྡོ་རྗེ། གསུང་རྡོ་རྗེ། ཐུགས་རྡོ་རྗེ་སྟེ་གསུམ་ཡིན་ནོ། །བཀའ་འདྲི་ལྔ་བའི་ལན། སྤྱན་ལྔ་རིམ་གྱིས་མངོན་དུ་གྱུར། །ཞེས་པའི་སྤྱན་ལྔ་ནི། སོར་སྡུད་ཡེ་ཤེས་ཤའི་སྤྱན། བསམ་གཏན་ནས་འཛིན་པ་མཐར་མ་ཕྱིན་བར་ལྷའི་སྤྱན། འཛིན་པའི་མཐར་བྱང་སེམས་འཛག་མེད་དུ་གྲུབ་པའི་དུས་ཀྱི་འཛིན་པ་སངས་རྒྱས་ཀྱི་སྤྱན། རྗེས་དྲན་ཤེས་རབ་ཀྱི་སྤྱན། ཏིང་ངེ་འཛིན་ཡེ་ཤེས་ཀྱི་སྤྱན་ཡིན་ལ། སྤྱན་ལྔ་ནི་འགྲེལ་ཆེན་དྲི་མེད་འོད་ལས་བཤད་དེ། དེས་ན་ཆོས་ཡང་དག་པར་སྡུད་པ་ལས་བཅོམ་ལྡན་འདས་ཀྱི་སྤྱན་ལྔ་ཞེས་གསུངས་སོ། །དེ་ལྟར་རིམ་པས་ཤའི་སྤྱན་དང་ལྷའི་སྤྱན་དང་སངས་རྒྱས་ཀྱི་སྤྱན་དང་ཤེས་རབ་ཀྱི་སྤྱན་དང་ཡེ་ཤེས་ཀྱི་སྤྱན། ཞེས་སོ། །བཀའ་འདྲི་དྲུག་པའི་ལན། རིགས་དྲུག་དམ་ཚིག་སྡོམ་པ་བསྟེན། །ཁམས་དྲུག་སྒྲིབ་པ་བྲལ་བ་ཡིས། །ཞེས་པའི་སྐབས་ཀྱི་རིགས་དྲུག་ནི། མི་བསྐྱོད་པའི་རིགས། རིན་ཆེན་འབྱུང་ལྡན་གྱི་རིགས། རྣམ་པར་སྣང་མཛད་ཀྱི་རིགས། དོན་ཡོད་གྲུབ་པའི་རིགས། རྡོ་རྗེ་སེམས་དཔའི་རིགས། པདྨའི་རིགས་ཏེ་དྲུག་པོ་ཡིན་པར་གཞུང་འགའ་ཞིག་ཏུ་གསུངས་ལ། སྤྱིར་རྒྱལ་བ་རིགས་དྲུག་ལ་རྣམ་པར་སྣང་མཛད། མི་བསྐྱོད་པ། རིན་ཆེན་འབྱུང་ལྡན། སྣང་བ་མཐའ་ཡས། དོན་ཡོད་གྲུབ་པ། རྡོ་རྗེ་སེམས་དཔའ་རྣམས་བགྲང་བར་དུས་འཁོར་བསྐྱེད་རིམ་བདུད་རྩིའི་བུམ་བཟང་དུ་གསུངས་སོ། །དེ་ནས་ཁམས་དྲུག་ནི། ས་ཆུ་མེ་རླུང་གི་ཁམས་དང༌། ནམ་མཁའི་ཁམས། ཡེ་ཤེས་ཀྱི་ཁམས་ཏེ་དྲུག་ཡིན་ནོ། །བཀའ་འདྲི་བདུན་པའི་ལན། །རྣལ་འབྱོར་གནས་སྐབས་བཅུ་པོ་བགྲོད། །དབང་བཅུ་སྟོབས་བཅུ་མངོན་དུ་གྱུར། །ཕྱི་ནང་རྣམ་བཅུ་དག་པར་ཤོག །ཅེས་པའི་སྐབས་ཀྱི་རྣལ་འབྱོར་བཅུ་ནི། འདོད་པའི་གནས་སྐབས་དང་པོ་ཆགས་ཡུལ་སེམས་ལ་བསམ་པའི་བདེ་བ་དང་རྣམ་པ་མཐུན་པའི་རྗེས་དྲན་སོགས་བཅུ་བཤད་པ་དེ་ཡིན་སྙམ། འདོད་པའི་གནས་སྐབས་བཅུ་རྒྱུད་ལས་བཤད་ཅིང་འདིའི་སྐོར་སྦྱོར་ཊཱིཀ་སྤྱི་དོན་གྱི་རྗེས་དྲན་སྐབས་ནའང་གསལ་ལོ། །དེ་ནས་དབང་བཅུ་ནི། ༡ཚེ་ལ་དབང་བ། ༢ སེམས་ལ་དབང་བ། ༣ ཡོ་བྱད་ལ་དབང་བ། ༤ ལས་ལ་དབང་བ། ༥ སྐྱེ་བ་ལ་དབང་བ། ༦ མོས་པ་ལ་དབང་བ། ༧ སྨོན་ལམ་ལ་དབང་བ། ༨ རྫུ་འཕྲུལ་ལ་དབང་བ། ༩ ཡེ་ཤེས་ལ་དབང་བ། ༡༠ ཆོས་ལ་དབང་བ་རྣམས་ཡིན་ལ་འདི་དག་གི་དག་དོན་ནི། ཕྱོགས་རྒྱལ་རྒྱུད་མཆན་གྱི་ཡེ་ལེའུ་སྐབས་དང་སྨན་ཆུ་ཁ་བའི་མཚན་བརྗོད་འགྲེལ་བ་སོགས་སུ་གསལ་ལ་མདོ་ཕྱོགས་ཀྱི་གཞུང་ཅི་རིགས་སུའང་གསལ་ལོ། ། དེ་ནས་སྟོབས་བཅུ།དེ་ནས་སྟོབས་བཅུ་ནི། མཚན་བརྗོད་འགྲེལ་པ་དྲི་མ་མེད་པའི་འོད་ལས། ཐུབ་དབང་སྟོབས་བཅུ་ཁྱབ་པའི་བདག །ཅེས་པ་སྟོབས་བཅུ་ནི། བསམ་པའི་སྟོབས་དང༌། ལྟ་བའི་སྟོབས་དང༌། སྦྱོར་བའི་སྟོབས་དང༌། ཤེས་རབ་ཀྱི་སྟོབས་དང༌། སྨོན་ལམ་གྱི་སྟོབས་དང༌། ཐེག་པའི་སྟོབས་དང༌། སྤྱོད་པའི་སྟོབས་དང༌། རྣམ་པར་འཕྲུལ་པའི་སྟོབས་དང༌། བྱང་ཆུབ་པའི་སྟོབས་དང༌། ཆོས་ཀྱི་འཁོར་ལོ་བསྐོར་བའི་སྟོབས་སོ། །ཞེས་སོ། །དེ་ནས་ཕྱི་ནང་རྣམ་བཅུ་ནི། ཕྱི་མ་དག་པ་འཁོར་བའི་གནས་ཀྱི་ས་དཀྱིལ་དང་ཆུ་དཀྱིལ་སོགས་བཅུ། ནང་གི་མ་དག་པ་འཁོར་བའི་སྐབས་ཀྱི་དཔྲལ་བ་རླུང་ཁམས། མགྲིན་པ་མེ་ཁམས་སོགས་བཅུ་ཡིན་ནོ། །བཀའ་འདྲི་བརྒྱད་པའི་ལན། འཕོ་བ་བཅུ་གཉིས་རྒྱུ་བ་འགགས། །ཞེས་པའི་སྐབས་ནས་བསྟན་པའི་འཕོ་བ་བཅུ་གཉིས་ནི། དབང་མདོར་བསྟན་གྱི་འགྲེལ་བ་ལས།དུས་སྦྱོར་དང་ཁྱིམ་དང། འཕོ་བ་ཡང་དོན་གཅིག་གོ ། དེ་ལྟ་བུའི་འཕོ་བ་བཅུ་གཉིས་ནི་ཉིན་ཞག་གཅིག་སྟེ་དེ་ལ་དབུགས་ཉི་ཁྲི་ཆིག་སྟོང་དྲུག་བརྒྱའོ། །དབུགས་ཐམས་ཅད་ལ་རང་རང་གི་ཆ་ལ་སུམ་ཅུ་རྩ་གཉིས་སུ་བགོས་པའི་ཆ་གཅིག་ཙམ་ཞིག་དབུ་མ་ནས་འབབ་པ་མཉམ་པར་རྒྱུ་བའི་རླུང་ཡིན་ནོ། ། འཕོ་བ་བཅུ་གཉིས་པོ་དེ་ཡང་ལྟེ་བའི་རྩ་འདབ་བཅུ་གཉིས་དང་སྦྱོར་བས། དང་པོ་ལུག། གསུམ་པ་འཁྲིག་པ། ལྔ་པ་སེང་གེ། བདུན་པ་སྲང༌།དགུ་པ་གཞུ། བཅུ་གཅིག་པ་བུམ་པ་རྣམས་ནི་ཁ་ཡར་བ་ཡིན་པའི་ཕྱིར་མི་མཉམ་པ་ཞེས་བྱ་ལ། དེ་རྣམས་གཡོན་གྱི་རྩ་འདབ་དྲུག་ལ་རིམ་བཞིན་འབྱུང་ངོ། །གཉིས་པ་གླང། བཞི་པ་ཀརྐ་ཊ། དྲུག་པ་བུ་མོ། བརྒྱད་པ་སྡིག་པ། བཅུ་པ་ཆུ་སྲིན། བཅུ་གཉིས་པ་ཉ་རྣམས་ཁ་འཆམ་པ་ཡིན་པའི་ཕྱིར་མཉམ་པ་ཞེས་བྱ་སྟེ། གཡས་ཀྱི་རྩ་འདབ་དྲུག་ལ་རིམ་བཞིན་འབྱུང་ངོ། །ཞེས་སོ། །བཀའ་འདྲི་དགུ་བའི་ལན། བདེན་དོན་རྣམ་པ་བཅུ་གཉིས་ལྡན། །དེ་ཉིད་རྣམ་པ་བཅུ་དྲུག་རིག །ཅེས་པའི་སྐབས་ནས་བསྟན་པའི་བདེན་དོན་བཅུ་གཉིས་ནི། དོན་དམ་པའི་རྟེན་འབྲེལ་བཅུ་གཉིས་དང༌། དོན་དམ་པའི་ཁྱིམ་བཅུ་གཉིས་དང༌། དོན་དམ་པའི་ཟླ་བ་བཅུ་གཉིས། དོན་དམ་པའི་ལྷ་ཆེན་བཅུ་གཉིས། དོན་དམ་པའི་ཚིགས་ཆེན་བཅུ་གཉིས་རྣམས་འཇོག་སྟེ། སྨན་ཆུ་ཁ་བའི་མཚན་བརྗོད་འགྲེལ་བ་ལས། དོན་དམ་པའི་ཉི་མའི་ཁྱིམ་བཅུ་གཉིས་ཀྱི་བདེན་པའི་དོན་གྱི་ཡན་ལག་གི་རྣམ་པ་ས་བཅུ་གཉིས། ཞེས་དང༌།དོན་དམ་པའི་རྟེན་འབྲེལ་བཅུ་གཉིས་དང༌། ཁྱིམ་བཅུ་གཉིས་དང༌། ཟླ་བ་བཅུ་གཉིས། ལྷ་ཆེན་བཅུ་གཉིས། ཚིགས་ཆེན་བཅུ་གཉིས་ཀྱང་ས་བཅུ་གཉིས་པོ་འདི་ཉིད་ཡིན་ནོ། །ཞེས་པ་ལྟར་ཡིན་པ་ལས་མཛོད་རང་འགྲེལ་སོགས་སུ་བདེན་བཞི་རང་གི་ངོ་བོ་ལ་དམིགས་རྣམ་བཞི་སོགས་ཕྱེས་ཏེ་བདེན་དོན་བཅུ་གཉིས་ཕྱེ་ཚུལ་ཡོད་པ་སྐབས་འདི་དང་མི་འདྲའོ། ། དེ་ནས་དེ་ཉིད་བཅུ་དྲུག།དེ་ནས་དེ་ཉིད་བཅུ་དྲུག་ནི། དོན་དམ་གྱི་ཟླ་བ་དེ་ཁོ་ན་ཉིད་ཀྱི་དགའ་བ་རྣམ་པ་བཅུ་དྲུག་ཡིན་ཏེ། རི་ཆོས་ངེས་དོན་རྒྱ་མཚོ་ལས། དེ་ནས་(གཉིས་པ་ནི་འགོག་བདེན་གྱི)སྐུའི་དགའ་བ་དང། གསུང་གི་དགའ་བ་དང། ཐུགས་ཀྱི་དགའ་བ་དང། ཡེ་ཤེས་ཀྱི་དགའ་བ་དང། དེ་བཞིན་དུ་སྐུའི་མཆོག་དགའ་དང། གསུང་གི་མཆོག་དགའ་དང། ཐུགས་ཀྱི་མཆོག་དགའ་དང། ཡེ་ཤེས་ཀྱི་མཆོག་དགའ་དང། དེ་བཞིན་དུ་སྐུའི་ཁྱད་པར་དགའ་བ་དང། གསུང་གི་ཁྱད་པར་དགའ་བ་དང། ཐུགས་ཀྱི་ཁྱད་པར་དགའ་བ་དང། ཡེ་ཤེས་ཀྱི་ཁྱད་པར་དགའ་བ་དང། དེ་བཞིན་དུ་སྐུའི་ལྷན་ཅིག་སྐྱེས་པའི་དགའ་བ་དང། གསུང་གི་ལྷན་ཅིག་སྐྱེས་པའི་དགའ་བ་དང། ཐུགས་ཀྱི་ལྷན་ཅིག་སྐྱེས་པའི་དགའ་བ་དང། ཡེ་ཤེས་ཀྱི་ལྷན་ཅིག་སྐྱེས་པའི་དགའ་བ་སྟེ། དེ་ལྟ་བུའི་(འགོག་བདེན་གྱི)དེ་ཉིད་རྣམ་པ་བཅུ་དྲུག་གང་གི་ཚེ་རྣལ་འབྱོར་པས་རིག་པ་དེའི་ཚེ་དེ་ཉིད་རྣམ་པ་བཅུ་དྲུག་རིག་ཅེས་བཅོམ་ལྡན་འདས་ཀྱིས་གསུངས་སོ། ། ཞེས་དང༌། སྨན་ཆུ་ཁ་བའི་མཚན་བརྗོད་འགྲེལ་བ་ལས། དོན་དམ་གྱི་ཟླ་བ་དེ་ཁོ་ན་ཉིད་ཀྱི་དགའ་བ་རྣམ་པ་བཅུ་དྲུག ཅེས་གསུངས་སོ། ། རྡོ་རྗེ་མི་འཁྲུགས་པའི་གཟུངས་སྔགས་ཀྱི་དོན་དང་ཕན་ཡོན་ཉུང་བསྡུས།རྡོ་རྗེ་མི་འཁྲུགས་པའི་གཟུངས་སྔགས་ཀྱི་དོན་དང་ཕན་ཡོན་ཉུང་བསྡུས། ན་མོ་རཏྣ་ཏྲ་ཡཱ་ཡ། ཨོཾ་ཀཾ་ཀ་ནི་ཀཾ་ཀ་ནི། རོ་ཙ་ནི་རོ་ཙ་ནི། ཏྲོ་ཊ་ནི་ཏྲོ་ཊ་ནི། ཏྲཱ་ས་ནི་ཏྲཱ་ས་ནི། པྲ་ཏི་ཧ་ན་པྲ་ཏི་ཧ་ན། སརྦ་ཀརྨ་པ་རཾ་པ་རཱ་ཎི་མེ་སྭཱ་ཧཱ། ཞེས་པའི་དོན་ནི། ན་མོ་རཏྣ་ཏྲ་ཡཱ་ཡ། ཞེས་པ། དཀོན་མཆོག་གསུམ་ལ་ཕྱག་འཚལ་ལོ།། ཨོཾ་ཞེས་པ་དཔལ། ཀཾ་ཀ་ནི་ཀཾ་ཀ་ནི། ཞེས་པ་སྡིག་པ་རྣམས་སྡིག་པ་རྣམས། རོ་ཙ་ནི་རོ་ཙ་ནི། ཞེས་པ་འགག་པར་གྱིས་འགག་པར་གྱིས། ཏྲོ་ཊ་ནི་ཏྲོ་ཊ་ནི། ཞེས་པ་ཆད་པར་གྱིས་ཆད་པར་གྱིས། ཏྲཱ་ས་ནི་ཏྲཱ་ས་ནི། སྐྲག་པར་གྱིས་སྐྲག་པར་གྱིས། པྲ་ཏི་ཧ་ན་པྲ་ཏི་ཧ་ན། ཞེས་པ་སོ་སོར་བསྣུན་སོ་སོར་བསྣུན། སརྦ་ཀརྨཱ་པ་རཾ་པ་རཱ་ཎི། ཞེས་པས་ལས་གཅིག་ནས་གཅིག་ཏུ་བརྒྱུད་ཏེ་ཕ་རོལ་ཏུ་འགྲོ་བར་གྱིས་ཤིག མེ་ནི་བདག སྭཱ་ཧཱ། ཞེས་པ་གཞི་ཚུགས་པའི་དོན་ཡིན་པས་ན། རང་གཞན་སེམས་ཅན་ཀུན་གྱི་སྡིག་སྒྲིབ་ལ་སྐྲག་ཅིང་འཇིགས་པས་སྐྱབས་གནས་བསླུ་མེད་དཀོན་མཆོག་གསུམ་གྱི་བདག་ཉིད་རྡོ་རྗེ་མི་འཁྲུགས་པ་ལ་ལུས་ངག་ཡིད་ཀྱིས་གུས་པས་ཕྱག་འཚལ་ལོ་སྐྱབས་སུ་མཆིའོ། །སྤངས་རྟོགས་ཀྱི་ཡོན་ཏན་ཕུན་སུམ་ཚོགས་པའི་དཔལ་དང་ལྡན་པ་ཁྱེད་ཀྱིས། སྡིག་པ་ལན་གཅིག་ཙམ་མ་ཡིན་པར་ཚེ་རབས་ཐོག་མེད་ནས་བསགས་པའི་སྡིག་པ་དང་སྡིག་པའི་འབྲས་བུ་སྡུག་བསྔལ་ཇི་སྙེད་ཡོད་པ་ཐམས་ཅད་ཀྱི་རྒྱུན་བག་ཆགས་དང་བཅས་པའི་སྡིག་པ་རྣམས་སྡིག་པ་རྣམས་འགག་པར་གྱིས་ཤིག་འགག་པར་གྱིས་ཤིག སྡིག་པ་འབྲེལ་ཆགས་པར་གནས་པ་ཀུན་དུམ་བུ་དུམ་བུ་ཆད་པར་གྱིས་ཤིག་ཆད་པར་གྱིས་ཤིག དགྲ་བགེགས་ལྟ་བུའི་སྡིག་པ་རྣམས་སྐྲག་པར་གྱིས་ཤིག་སྐྲག་པར་ཀྱིས་ཤིག ཐོག་མེད་ནས་གོམས་པའི་སྟོབས་ཀྱིས་སྲ་ཞིང་འཁྲིག་པ་སྡིག་པ་ཀུན་སོ་སོར་བསྣུན་པར་གྱིས་ཤིག་སོ་སོར་བསྣུན་པར་གྱིས་ཤིག ཚེ་རབས་གྲངས་མེད་པ་ནས་ལས་གཅིག་ནས་གཅིག་ཏུ་བརྒྱུད་ཏེ་འོང་བ་ཐམས་ཅད་སེམས་རྒྱུད་འོད་གསལ་བ་ལས་ཕ་རོལ་ཏུ་འགྲོ་བར་བྱས་ནས་གཏན་ཆོམ་པར་གྱིས་ཤིག བདག་གི་སེམས་རྒྱུད་སྡིག་པ་འདག་པའི་གཞི་ཤིན་ཏུ་བརྟན་པོ་ཚུགས་པར་མཛོད་ཅིག ཅེས་གསོལ་ཞིང་སྨོན་པའོ། །སྡིག་པ་རྣམས་སྡིག་པ་རྣམས་བཟློས་པ་ནན་གྱིས་བཟུང་བའམ་ཐབས་ཤེས་གཉིས་ཀྱི་སྤང་བྱ་སོ་སོར་སྦྱར་ལ། དེ་ལས་གཞན་ལ་ཡང་གཉིས་རེ་སྨོས་པ་ཐབས་ཤེས་གཉིས་ལ་སོ་སོར་སྦྱར་ནས་འགག་པར་གྱིས་འགག་པར་གྱིས་ཞེས་སྦྱར་ན་རུང་ངོ་།། ཕན་ཡོན།ཕན་ཡོན། རྒྱ་གར་སྐད་དུ། ཨཱརྱ་སརྦ་ཀརྨ་ཨཱ་བ་ར་ཎ་བི་ཤོ་དྷ་ནི་ནཱ་མ་དྷཱ་རཱ་ཎཱི། བོད་སྐད་དུ། འཕགས་པ་ལས་ཀྱི་སྒྲིབ་པ་ཐཾད་རྣམ་པར་སྦྱོང་བ་ཞེས་བྱ་བའི་གཟུངས། བཅོམ་ལྡན་འདས་མི་འཁྲུགས་པ་ལ་ཕྱག་འཚལ་ལོ། །ན་མོ་རཏྣ་ཏྲ་ཡཱ་ཡ། ཨོཾ་ཀྃ་ཀ་ནི་ཀྂ་ཀ་ནི། རོ་ཙ་ནི་རོ་ཙ་ནི། ཏྲོ་ཊ་ནི་ཏྲོ་ཊ་ནི། ཏྲཱ་ས་ནི་ཏྲཱ་ས་ནི། པྲ་ཏི་ཧ་ན་པྲ་ཏི་ཧ་ན། སརྦ་ཀརྨ་པ་རྃ་པ་རཱ་ཎི་མེ་སྭཱཧཱ། གཟུངས་སྔགས་འདིའི་ཆོ་ག་ནི། འདི་ཡིན་ཏེ། རྟག་ཏུ་བཟླས་བརྗོད་བྱས་ན། ལས་གཅིག་ནས་གཅིག་ཏུ་བརྒྱུད་པ་ཐམས་ཅད་རྣམ་པར་དག་པར་འགྱུར་རོ། །དུས་གསུམ་དུ་བཟླས་བརྗོད་བྱས་ན། མཚམས་མེད་པ་ལྔ་ཡང་བྱང་བར་འགྱུར་རོ། །ལན་གཅིག་བཟླས་བརྗོད་བྱས་ན། ལྟས་ངན་པ་དང༌། རྨི་ལམ་ངན་པ་དང༌། བཀྲ་མི་ཤིས་པ་རྣམས་མེད་པར་འགྱུར་རོ། །ལུས་ལ་འཆང་ངམ། གླེགས་བམ་ལ་བྲིས་ནས་མགུལ་དུ་ཐོགས་ཏེ་འཆང་ན། དུས་མ་ཡིན་པར་འཆི་བ་རྣམས་གཏན་དུ་འབྱུང་བར་མི་འགྱུར་རོ། །གང་ཞིག་སྙིང་རྗེས་ནོན་ཏེ་རི་དྭགས་དང༌། བྱ་དང༌། མི་དང༌། མི་མ་ཡིན་པ་རྣམས་ཀྱང་རུང་སྟེ་འཆི་བའི་རྣ་ཁུང་དུ་བརྗོད་ན། དེ་ངན་སོང་དུ་འགྲོ་བར་མི་འགྱུར་རོ། །ཡང་ན་ཤི་སྟེ་དུས་ལས་འདས་ན་ཤི་འཕོས་པའི་མིང་ནས་སྨོས་ཏེ་དེའི་ཕྱིར་བྱམས་པ་དང་སྙིང་རྗེས་ལན་བརྒྱའམ། སྟོང་ངམ། འབུམ་བརྗོད་ན། སེམས་ཅན་དེ་སེམས་ཅན་དམྱལ་བར་སྐྱེས་སུ་ཟིན་ཀྱང་དེའི་མོད་ལ་ཐར་པར་འགྱུར་རོ། །སའམ། ཏིལ་ལམ། ཡུངས་ཀར་རམ། ཆུ་གང་ཡང་རུང་བ་ལ་བཟླས་བརྗོད་བྱས་ཏེ་ཤི་བའི་ལུས་ལ་གཏོར་རམ། ཁྲུས་བྱས་ནས་དེའི་འོག་ཏུ་བསྲེགས་པའམ། ཡང་ན་མཆོད་རྟེན་གྱི་ནང་དུ་བཅུག་སྟེ་བཞག་ལ། རིག་སྔགས་ཀྱང་བྲིས་ནས་མགོ་ལ་བཏགས་ན། དེ་ངན་སོང་དུ་སྐྱེས་པ་ཡང་ཞག་བདུན་གྱིས་གདོན་མི་ཟ་བར་ཐར་ཏེ་བདེ་འགྲོ་མཐོ་རིས་ཀྱི་འཇིག་རྟེན་དུ་སྐྱེ་བར་འགྱུར་བའམ། ཡང་ན་རང་གི་སྨོན་ལམ་གྱི་དབང་གིས་སྐྱེ་བར་འགྱུར་རོ། ། གང་ཞིག་ཟླ་བ་ཉ་བའི་ཚེ་ཁྲུས་བྱས་ལ་གཙང་མར་བྱས་ཏེ་དུས་གསུམ་དུ་གོས་བརྗེ་ཞིང་ཁ་ཟས་མི་ཟ་བའམ། ཡང་ན་ཁ་ཟས་དཀར་བག་བཟའ་ཞིང༌། སྐུ་གདུང་དང་ལྡན་པའི་མཆོད་རྟེན་བསྐོར་བཞིན་དུ་གང་གི་མིང་དང་ལྡན་པས་ལན་འབུམ་བཟླས་བརྗོད་བྱས་ན། དེ་ངན་སོང་ནས་ཐར་ཏེ་གནས་གཙང་མའི་ལྷའི་རིས་སུ་སྐྱེས་ནས་སྒྲུབ་པ་པོའི་ཐད་དུ་འོངས་ཏེ་མཆོད་པར་བྱེད་ཅིང་ལུས་ཀྱང་སྟོན་ལ། ལེགས་སོ་ཞེས་བྱ་བ་ཡང་བྱིན་ནས་ལན་གསུམ་བསྐོར་བ་བྱས་ཏེ་མི་སྣང་བར་འགྱུར་རོ། །དེའི་མིང་བྲིས་ལ་གཟུངས་སྔགས་བཟླས་བརྗོད་བྱེད་ཅིང་མཆོད་རྟེན་འབུམ་བྱས་ལ། གདུགས་དང༌། རྒྱལ་མཚན་དང༌། བ་དན་ལ་སོགས་པས་ལེགས་པར་མཆོད་ནས་རྒྱ་མཚོ་ཆེན་པོ་དང༌། ཡང་ན་ཆུ་ཀླུང་དུ་བཏང་ན། དེས་སེམས་ཅན་དམྱལ་བ་ལ་སོགས་པ་ནས་ཐར་པར་འགྱུར་རོ། །ཡང་ན་དེ་ལྟར་མཆོད་པ་བྱས་ནས་མཇུག་ཏུ་ལམ་གྱི་བཞི་མདོར་མཆོད་རྟེན་ཆེན་པོ་བྱས་ཏེ་གདུགས་དང༌། རྒྱལ་མཚན་དང༌། བ་དན་ལ་སོགས་པས་ལེགས་པར་མཆོད་ལ། འཕགས་པའི་དགེ་འདུན་ལ་ཡང་མཆོད་སྟོན་གསོལ་ནས་ཡོན་ཡང་ཕུལ་ཏེ་ལེགས་པར་མཆོད་ནས་ཆེ་གེ་མོ་ཞིག་གི་དགེ་བའི་རྩ་བར་གྱུར་ཅིག ། འདི་ཁོ་ནས་བདེ་འགྲོ་མཐོ་རིས་ཀྱི་འཇིག་རྟེན་དུ་སྐྱེ་བར་གྱུར་ཅིག ། ཅེས་ཀྱང་ཤེས་པར་བྱས་ན། དེ་ཁོ་ན་བཞིན་དུ་སྐྱེས་ནས་ལུས་ཀྱང་སྟོན་ཅིང་ལེགས་སོ་ཞེས་བྱ་བ་ཡང་བྱིན་ནས་མི་སྣང་བར་འགྱུར་རོ། །མཚམས་མེད་པ་ལྔ་བྱེད་བྱེད་པའམ། དམ་པའི་ཆོས་སྤོང་བའམ། འཕགས་པ་ལ་སྐུར་པ་བཏབ་པ་ཡང་རུང་སྟེ་འཆི་གར་རྩིག་པ་ལ་གཟུངས་སྔགས་འདི་བྲིས་པ་མཐོང་ན་ཡང་དེའི་ལས་ཀྱི་སྒྲིབ་པ་ཐམས་ཅད་ཟད་པར་འགྱུར་ན། འདོན་པ་དང༌། བཟླས་བརྗོད་བྱས་པ་ལྟ་ཅི་སྨོས། དེ་བཞིན་གཤེགས་པ་དེ་ཉིད་བྱོན་ནས་འདི་སྐད་དུ་རིགས་ཀྱི་བུ་ཚུར་ངའི་གན་དུ་ཤོག་ཅེས་ཀྱང་གསུང་བར་འགྱུརོ། །འཕགས་པ་ལས་ཀྱི་སྒྲིབ་པ་ཐམས་ཅད་རྣམ་པར་སྦྱོང་བ་ཞེས་བྱ་བའི་གཟུངས་རྫོགས་སོ།། །། དཀོན་མཆོག་བརྩེགས་པའི་ཁ་པོད་ཀྱི་འཕགས་པ་དེ་བཞིན་གཤེགས་པ་མི་འཁྲུགས་པའི་བཀོད་པ།དཀོན་མཆོག་བརྩེགས་པའི་ཁ་པོད་ཀྱི་འཕགས་པ་དེ་བཞིན་གཤེགས་པ་མི་འཁྲུགས་པའི་བཀོད་པ། དཀོན་མཆོག་བརྩེགས་པའི་ཁ་པོད་ཀྱི་འཕགས་པ་དེ་བཞིན་གཤེགས་པ་མི་འཁྲུགས་པའི་བཀོད་པ་ཞེས་བྱ་བ་ཐེག་པ་ཆེན་པོའི་མདོ་ལས། དེ་བཞིན་གཤེགས་པ་མི་འཁྲུགས་པའི་སྐུ་གླང་པོ་ཆེའི་ཁྲི་པད་མའི་གདན་ལ་བཞུགས་པའི་བཀོད་པ་སྟོང་བྱེད་དུ་འཇུག་ན་གང་གི་ཚེ་རིགས་ཀྱི་བུ་དང༌། རིགས་ཀྱི་བུ་མོ་དེ་འཆི་བའི་དུས་བྱེད་པར་འགྱུར་བའི་ཚེ། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མི་འཁྲུགས་པ་ཉན་ཐོས་ཀྱི་དགེ་འདུན་གྱིས་ཡོངས་སུ་བསྐོར་ཅིང་བྱང་ཆུབ་སེམས་དཔའི་ཚོགས་ཀྱིས་མདུན་དུ་བདར་ཏེ་གཤེགས་པར་འགྱུར་ཞིང་དེས་ཀྱང་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མི་འཁྲུགས་པ་དེ་མདུན་ན་བཞུགས་པ་མཐོང་བར་འགྱུར་རོ། །མཐོང་ནས་ཀྱང་སེམས་དགའ་བར་འགྱུར་ཞིང་མི་བརྗེད་པ་དང༌། སེམས་མི་གཡེང་བར་འཆི་བའི་དུས་བྱེད་པར་འགྱུར་ཏེ།འཆི་བའི་དུས་བྱས་ནས་ཀྱང་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མི་འཁྲུགས་པའི་སངས་རྒྱས་ཀྱི་ཞིང་འཇིག་རྟེན་གྱི་ཁམས་མངོན་པར་དགའ་བ་དེ་ཉིད་དུ་སྐྱེ་བར་འགྱུར་རོ། །ཞེས་གསུངས་པ་དང༌། རྗེ་བཙུན་ཏཱ་ར་ནཱ་ཐའི་མངོན་དགའི་སྨོན་ལམ་ལས། རྒྱབ་ཚབ་དམ་པའི་མཚན་ཐོས་སྨོན་ལམ་འདེབས། །ཕྱོགས་བཅུའི་ཞིང་ཁམས་དག་པར་སྒྲུབ་པ་དང༌། །གཞན་དག་ཞིང་དེར་སྨོན་ལམ་འདེབས་སུ་འཇུག །མི་འཁྲུགས་ཞིང་གི་མདོ་དེར་སྤྱོད་པ་དང༌། །གླང་བོའི་ཁྲི་དང་པདྨ་ལ་ཞུགས་པའི། །སྐུ་གཟུགས་སྟོང་ཕྲག་སྒྲུབ་པར་བྱེད་པ་སོགས། །ཁྱེད་སྐུ་བགྲང་ཡས་དགེ་འདུན་ཚོགས་ཀྱིས་བསྐོར། །མངོན་སུམ་མཐོང་ནས་ཞིང་དེར་འགྲོ་བར་འགྱུར། །སངས་རྒྱས་བདེན་པའི་ཚིག་གིས་དེ་སྐད་གསུངས། །ཞེས་གསུངས་ལ། ཀུན་དགའ་གྲོལ་མཆོག་གི་རྡོ་རྗེ་མི་འཁྲུགས་པའི་ལྷ་དགུའི་ཆོ་ག་ཉུང་ངུ་རྣམ་གསལ་ལས། ཁྱེད་གསུངས་སྔགས་ཟབ་རྟག་ཏུ་དུས་གསུམ་མམ། །ལན་གཅིག་བཟླས་པའི་ལས་ཀུན་ཟད་པ་དང༌། །མཚམས་མེད་སྦྱོང་དང་བར་ཆད་ཀུན་སེལ་བའི།། བཅོམ་ལྡན་མི་འཁྲུག་མགོན་ལ་ཕྱག་འཚལ་ལོ། །སྔགས་བྲིས་ལུས་ལ་བཏགས་པ་ཙམ་གྱིས་ཀྱང༌། །དུས་མིན་འཆི་སྤོང་སྙིང་རྗེས་དུད་འགྲོ་སོགས། །འཆི་ཚེ་རྣ་བར་བསྒྲག་པས་ངན་འགྲོ་བཟློག །བཅོམ་ལྡན་མི་འཁྲུགས་མགོན་ལ་ཕྱག་འཚལ་ལོ། །གང་གི་ཆེད་དུ་མིང་སྨོས་བརྩེ་བ་ཡིས། །བརྒྱ་སྟོང་འབུམ་ཕྲག་གང་རུང་བཟླས་བརྗོད་ཀྱིས། །དམྱལ་བར་སྐྱེས་པའང་མོད་ལ་ཐར་མཛད་པ། །བཅོམ་ལྡན་མི་འཁྲུག་མགོན་ལ་ཕྱག་འཚལ་ལོ། །ཞེས་གསུངས་པ་ལྟར་མི་འཁྲུགས་པའི་སྐུ་གཟུགས་སྟོང་ཕྲག་རེ་བཞེངས་པའམ་མི་འཁྲུགས་པའི་གཟུངས་འབུམ་ཕྲག་རེ་བཟླས་ན་ངན་སོང་ལས་ཐར་ནས་མངོན་པར་དགའ་བའི་ཞིང་དུ་སྐྱེ་བར་གསུངས་མཁན་ནི་བདག་ཅག་གི་སྟོན་པ་ཐུགས་རྗེ་ཅན་སོགས་ཡིན་པས་བདེན་པའི་གསུང་ལ་ཡིད་གཉིས་བྱ་བའི་གནས་མེད་པས་ཡིད་ཆེས་བྱའོ། །བླ་རྒན་ཞིག་གིས་སྐྱེ་རྟགས་བཤད་པ་དང་འདི་མི་འདྲའོ། །དེས་ན་ཚེ་འདས་རྣམས་ཀྱི་དོན་དུ་མི་འཁྲུགས་པའི་སྐུ་གཟུགས་སྟོང་ཕྲག་རེ་དང་གཟུངས་འབུམ་རེ་འབད་པར་བྱའོ། །དགུ་བ་ནས་བཅུ་བའི་བར་གསེང་ལ་དངོས་གྲུབ་དཔལ་ནས་ཕྱོགས་བསྡུས་བྱས་ནས་བཀོད་པའོ། ། དཔལ་ཆེན་རྡོ་རྗེ་གཞོན་ནུའི་ཟློག་པ་བསྡུས་པ།དཔལ་ཆེན་རྡོ་རྗེ་གཞོན་ནུའི་ཟློག་པ་བསྡུས་པ་བཞུགས་སོ། ། ཧཱུཾ། འཁོར་ལོ་རྩིབ་བཅུ་རབ་ཏུ་འབར་བའི་དབུས། །གྲུ་གསུམ་མཐིང་ནག་འབར་བའི་དཀྱིལ་འཁོར་ནས། །ཁྲོ་བོའི་རྒྱལ་བོ་ཁྲག་འཐུང་ཧེ་རུ་ཀ །ཐུགས་དམ་དུས་ལ་བབ་པོ་དབྱིངས་ནས་བཞེངས། །མ་རུང་འདུལ་ཕྱིར་དྲག་པོའི་སྐུར་བསྟན་ནས། །སྔགས་འཆང་རིག་འཛིན་སྒྲུབ་པོ་བདག་ཅག་ལ། །སྐུ་གསུང་ཐུགས་ཀྱི་བྱིན་རླབས་དཔལ་བསྐྱེད་ནས། །སྡང་དགྲ་གནོད་པའི་བགེགས་རྣམས་བཟློག་པ་དང༌། །རྐྱེན་ངན་བར་ཆད་ཞི་བར་བྱིན་གྱིས་རློབས།། ཧཱུཾ། ཡབ་ཅིག་དཔལ་ཆེན་རྡོ་རྗེ་གཞོན་ནུ་དང༌། །དཔལ་གྱི་ཡུམ་ཆེན་འཁོར་ལོ་རྒྱས་འདེབས་མ། །ཡབ་ཡུམ་ཐབས་དང་ཤེས་རབ་རོལ་བ་ལས། །ཕྱོགས་བཅུའི་ཁྲོ་བོའི་ཚོགས་རྣམས་སྤྲོས་པ་ནི། །ཕྱོགས་བཅུའི་འཁོར་ལོ་འབར་བའི་རྩིབས་དབུས་ན། །ཁྲོ་བོ་བཅུ་དང་སྲས་མཆོག་ཁྲ་ཐབས་དང༌། །དབང་ཕྱུག་ཉེར་བརྒྱད་ཕུར་སྲུང་བསྟན་སྲུང་སོགས། །འཁོར་བཅས་ཁྱེད་ཀྱི་ཐུགས་དམ་དུས་ལ་བབ། ། ཕྱོགས་བཅུའི་གཟའ་སོགས་གནོད་པ་ཐམས་ཅད་ཟློག །ཟློག་གོ་དམར་ཆེན་གཏོར་མ་འདི་ཡིས་ཟློག །སྒྱུར་རོ་ལྟས་ངན་ཆོ་འཕྲུལ་ཐམས་ཅད་བསྒྱུར། །ཟློག་བསྒྱུར་བཅོལ་བའི་འཕྲིན་ལས་གྲུབ་པར་མཛོད། །༩༠༣༣༠0 ཧཱུཾ། དེ་རིང་རྣལ་འབྱོར་བདག་ཅག་འཁོར་བཅས་ཀྱི། །ལུས་ཀྱི་ན་ཚ་ཐམས་ཅད་གཏོར་མས་ཟློག །སེམས་ཀྱི་སྡུག་བསྔལ་ཐམས་ཅད་གཏོར་མས་ཟློག །ནད་རིགས་ངན་པ་ཐམས་ཅད་གཏོར་མས་ཟློག །གདོན་བགེགས་གནོད་པ་ཐམས་ཅད་གཏོར་མས་ཟློག །མི་འདོད་ཕྱོགས་ངན་ཐམས་ཅད་གཏོར་མས་ཟློག །སྐག་དང་བྱུར་ཆག་ཐམས་ཅད་གཏོར་མས་ཟློག །བསམ་ངན་སྦྱོར་རྩུབ་ཐམས་ཅད་གཏོར་མས་ཟློག །དགྲ་དང་དམོད་མོ་ཐམས་ཅད་གཏོར་མས་ཟློག །དུས་མིན་འཆི་བ་ཐམས་ཅད་གཏོར་མས་ཟློག །མཐུ་གཏད་མནན་སྲེག་ཐམས་ཅད་གཏོར་མས་ཟློག །མི་མཐུན་རྐྱེན་ངན་ཐམས་ཅད་གཏོར་མས་ཟློག །ལྟས་ངན་རིགས་གྱུར་ཐམས་ཅད་གཏོར་མས་ཟློག །མདོར་ན་དམར་ཆེན་གཏོར་མ་འདི་ཡི་མཐུས། །ངན་པ་ཟློག་ལ་རྩུབ་མོ་ཐམས་ཅད་བསྒྱུར། །ཐམས་ཅད་སྡང་བའི་དགྲ་ལ་བཟློག་ཅིང་བསྒྱུར། །ཐམས་ཅད་གནོད་པའི་བགེགས་ཀྱི་སྟེང་དུ་བྷྱོ། །གཏོར་མ་འདི་ཡིས་མི་བཟློག་གང་ཡང་མེད། །གཏོར་མ་འདི་ཡིས་མི་བསྒྱུར་གང་ཡང་མེད། །གཏོར་མ་འདི་ཡིས་ཐམས་ཅད་མི་ཟློག་ཏུ། །བླ་མ་ཡི་དམ་བདེན་པའི་བྱིན་རླབས་དང༌། །དམ་ཅན་སྲུང་མས་མཐུ་རྩལ་བྱིན་གྱིས་རློབས། །རྣལ་འབྱོར་བདག་གིས་ཏིང་འཛིན་བྱིན་གྱིས་བརླབ། །དེ་ཕྱིར་བདག་ཅག་དཔོན་སློབ་འཁོར་བཅས་ལ། །མི་མཐུན་རྐྱེན་ངན་བར་ཆད་ཐམས་ཅད་ཀུན། །སྡང་བའི་དགྲ་དང་གནོད་པའི་བགེགས་ལ་བྷྱོཿ༩0 ༣༣0 འུར་ཆེམ༠༣༠༣༠0 དཔལ་ཆེན་རྡོ་རྗེ་གཞོན་ནུའི་ཟློག་པ་བསྡུས་པ་འདི་ནི་བཟློག་སྟོང་གི་གྲངས་ཀ་བསོག་སྐབས་མཁོ་ཕྱིར་གཞན་གྱི་ངོར་ངག་དབང་དངོས་གྲུབ་དཔལ་ནས་ཕྱོགས་བསྒྲིག་བྱས་པའོ།། ཕྱག་འཚལ་ཉེར་གཅིག་གི་བསྟོད་པའི་རྣམ་བཤད་ལས་ཁོལ་བྱུང་བྱས་པ།ཕྱག་འཚལ་ཉེར་གཅིག་གི་བསྟོད་པའི་རྣམ་བཤད་ལས་ཁོལ་བྱུང་བྱས་པ། རྗེ་བཙུན་ཏཱ་ར་ནཱ་ཐའི་ཕྱག་འཚལ་ཉེར་གཅིག་གི་བསྟོད་པའི་རྣམ་པར་བཤད་པ་ལས། ཚིགས་བཅད་ཉི་ཤུ་པ་ཕྱག་འཚལ་ཉི་མ་སོགས་ལ། ཉི་མ་དང་ཟླ་བ་འོད་ཟེར་རབ་ཏུ་རྒྱས་པ་ལྟ་བུའི་སྤྱན་གཉིས་ཕ་རོལ་འོད་ཟེར་འབར་བ་རབ་ཏུ་གསལ་བའི་གཟིགས་པས་འགྲོ་བ་རྣམས་ལ་ཡོངས་སུ་གཟིགས་པ་ན། ངན་འགྲོ་ལ་སོགས་པ་སྡུག་བསྔལ་ཅན་གྱི་འགྲོ་བ་མཐའ་དག་བདེ་བ་ལ་འགོད་པར་མཛད་པ་སྟེ། ཏཱ་རའི་སྔགས་ལན་གཉིས་སུ་བརྗོད་པ། ཏུཏྟཱ་རའི་སྔགས་དང་བཅས་ལ་བཟླས་པ་ཡིས་ཤིན་ཏུ་དྲག་པོ་སྟེ་གསོ་བར་དཀའ་བའི་རིམས་ནད་མ་ལུས་པ་ཡང་སེལ་བར་མཛད་པའོ། །གནས་སྐབས་སུ་ཡེ་གེ་བཅུ་པའི་སྔགས་ཀྱི་རིམས་ནད་ཞི་བ་དང༌། ནད་ཡམས་གཅོད་པ་དང། ནད་འགོ་བ་རྣམས་བསྲུང་བར་སྟོན་ལ། དོན་གྱི་གཙོ་བོ་ནི་ཡི་གེ་བཅུ་པ་བཟླས་པས། དྲག་པོའི་རིམས་ནད་དང་འདྲ་བའི་ཉོན་མོངས་པ་མ་ལུས་པ་ཞི་བར་བྱེད་པའོ། །སྐབས་འདིར་སྤྱན་གཉིས་ཉི་ཟླ་འདྲ་བར་སྦྱར་བ་ནི། སྤྱན་གཡས་པའི་འོད་ཀྱིས་ཉེ་བར་འཚེ་བ་རྣམས་སྐྲག་པར་བྱེད་ཅིང༌། སྡིག་པ་དང་སྡུག་བསྔལ་བསྲེག་པར་བྱེད་པས་ཉི་མ་ལྟ་བུའི་འོད་དང༌། གཡོན་པའི་འོད་ཟེར་གྱིས་ཚེ་དང་ལོངས་སྤྱོད་དང་བདེ་བ་སྩོལ་བའི་ཕྱིར། བདུད་རྩི་སྤྲོ་བར་བྱེད་པ་ཟླ་བའི་འོད་དོ། །ཏཱ་ར་གཉིས་བརྗོད་ཅེས་པ་འདིས་ནི་ཏཱ་རེ་གཉིས་དང་ཏུཏྟཱ་རེ་སྟེ་གོང་དུ་ཡི་གེ་བཅུ་པའི་ངག་ཅེས་གསུངས་པ་དེ་ཉིད་ངོས་འཛིན་པའོ། །དེས་ན་ཨོཾ་ཏཱ་རེ་ཏུཏྟཱ་རེ་ཏུ་རེ་སྭཱཧཱ་ཅེས་ཡོངས་སུ་གྲགས་པ་ལྟེ། སྒྲོལ་མ་ཞི་བའི་བསྙེན་སྒྲུབ་ལས་གསུམ་གའི་སྔགས་སོ། །སྦས་པའི་དོན་ནི། ཉི་ཟླའི་བརྡས་ནང་གི་ཁུ་རྡུལ་གཉིས་ཡིན་ལ། དེ་ཡིས་ཡོངས་སུ་གང་བའི་སྤྱན་ནི་དབུ་མའི་སྟེང་འོག་གི་སྣ་གཉིས་ཡིན་ཞིང། དེ་ལས་ཡེ་ཤེས་འབྱུང་བའི་ཕྱིར་འོད་གསལ་བའོ། །ཏཱ་ར་གཉིས་ནི་སྒྲོལ་བ་ཅེས་པ་སྟེ། བདེ་སྟོང་གིས་སྲིད་ཞི་གཉིས་ཀྱི་མཐའ་ལས་སྒྲོལ་བའོ། །ཏུཏྟཱ་ར་ནི་གདུང་བ་སྟེ་དཀའ་ཐུབ་ཡིན་ལ། ཉི་མ་མཐུར་དུ་གནོན་པ་དང། ཟླ་བ་གཙུག་ཏོར་དུ་དྲངས་ཏེ་འགྱུར་མེད་ཀྱི་དཀའ་ཐུབ་འདིས་ནི་ཐིག་ལེ་འཕོ་བའི་རིམས་ནད་སེལ་བའོ། །དངོས་གྲུབ་དཔལ་གྱིས་ཁོལ་དུ་བྱུང་བའོ། ། ཇོ་ནང་གིས་སྒྲུབ་པ་རང་དབང་བར་མི་འདོད་པ་སོགས་རང་སྟོང་གཞན་སྟོང་གནད་འདྲ་བ་ཡོད་པར་བསྟན་པ།ཇོ་ནང་གིས་སྒྲུབ་པ་རང་དབང་བར་མི་འདོད་པ་སོགས་རང་སྟོང་གཞན་སྟོང་གནད་འདྲ་བ་ཡོད་པར་བསྟན་པ། སྟོན་པ་ཐུགས་རྗེ་ཅན་ལ་ཕྱག་འཚལ་ལོ། །དེ་ལ་འདིར་རང་སྟོང་བ་དང་གཞན་སྟོང་བ་གཉིས་ཀྱིས་དོན་དམ་བདེན་པར་བདེན་པ་གྲུབ་པར་འདོད་པ་དངོས་སུ་ཁས་ལེན་མི་ལེན་སོགས་ཚིག་ཟིན་མི་མཐུན་ཀྱང་ལྟ་བའི་གནད་ལ་མི་འདྲ་བ་མེད་པར་སྣང་སྟེ། རང་སྟོང་བ་རྣམས་ཀྱིས་དོན་དམ་བདེན་པའམ་ཆོས་ཉིད་བདེན་པར་མེད་པར་གསུངས་པ་ནི་དགག་བྱའི་བདེན་གྲུབ་དང་སྤྲོས་པའི་བདེན་མེད་ཡིན་པར་དགོངས་ནས་གསུངས་པ་ལས་བདེན་པ་ཡིན་པར་ཁས་བླངས་བ་ཡིན་པ་གང་ཞིག གཞན་སྟོང་དབུ་མ་རྣམས་ཀྱིས། རྩ་ཤེས་ལས། མྱ་ངན་འདས་པ་བདེན་གཅིག་པུ། །ཞེས་གསུངས་པ་ལྟར་གྱི་སྣང་ཚུལ་དང་གནས་ཚུལ་མཐུན་པའི་བདེན་པར་གྲུབ་པ་ཁས་བླངས་བ་ལས་དགག་བྱའི་བདེན་གྲུབ་དང་ཆོས་བདག་ཏུ་གྲུབ་པར་མི་བཞེད་པའི་ཕྱིར། རྩ་རྟགས་དང་པོ་གྲུབ་སྟེ། འཇུག་ཊཱིཀ་དགོངས་པ་རབ་གསལ་ལས། དགག་བྱ་ལ་དོན་དམ་གྱི་ཁྱད་པར་སྦྱར་བའི་དོན་དམ་ལ་གཉིས་ཤེས་དགོས་ཏེ། ཐོས་བསམ་སྒོམ་གསུམ་གྱི་རིགས་ཤེས་ལ་དོན་དམ་དུ་བྱས་ནས་དེས་སྔར་བཤད་པ་ལྟར་མ་གྲུབ་པ་གཅིག་དང༌། བློའི་དབང་གིས་བཞག་པ་མིན་པར་དོན་གྱི་སྡོད་ལུགས་སུ་ཡོད་པ་ལ། དོན་དམ་དུ་ཡོད་པར་བཞག་པ་གཉིས་ཀྱི་དང་པོའི་དོན་དམ་དང༌། དེའི་ངོར་གྲུབ་པ་ཡང་ཡོད་ལ། ཕྱི་མའི་དོན་དམ་དང་དེར་ཡོད་པ་གཉིས་ཀ་མི་སྲིད་དོ། །དེས་ན་ཕྱི་མའི་དོན་དམ་དུ་ཡོད་པ་ལ་སྔ་མའི་དོན་དམ་དུ་ཡོད་པས་ཁྱབ་ཀྱང༌། སྔ་མའི་ཡོད་འཛིན་ནི་ལྷན་སྐྱེས་ཀྱི་བདེན་འཛིན་མིན་ལ། དེའི་བདེན་འཛིན་ལ་ནི་ཕྱི་མའི་ཡོད་འཛིན་དགོས་སོ།།འདི་མ་ཕྱེད་པར་དགག་བྱའི་ཚད་འཛིན་རིགས་པས་དཔྱད་བཟོད་དང༌། དཔྱད་བཟོད་ཀྱི་དངོས་པོ་ལ་འཛིན་པ་མང་དུ་བྱུང་ཞིང༌། ཞེས་གསུངས་སོ།། རྩ་རྟགས་གཉིས་པ་གྲུབ་སྟེ། ཀུན་མཁྱེན་དོལ་པོ་པ་ཤེས་རབ་རྒྱལ་མཚན་གྱི་རི་ཆོས་ལས། གལ་ཏེ་ཆོས་གང་ལ་ཡང་བདེན་པ་མེད་པས་དོན་དམ་པར་བདེན་པ་མི་སྲིད་དོ། །ཞེ་ན་མ་ཡིན་ཏེ། ཀུན་རྫོབ་ཏུ་མི་བདེན་ན་ཀུན་རྫོབ་ཀྱི་བདེན་པར་མི་རུང་བས་ཀུན་རྫོབ་བདེན་པ་གང་ཡིན་པ་དེ་ཀུན་རྫོབ་ཏུ་བདེན་གྱི། དོན་དམ་དུ་མི་བདེན་པ་ཇི་ལྟ་བ་དེ་བཞིན་དུ། དོན་དམ་དུ་མི་བདེན་ན་དོན་དམ་བདེན་པར་མི་རུང་བས་དོན་དམ་བདེན་པ་གང་ཡིན་པ་དེ་དོན་དམ་དུ་བདེན་གྱི་ཀུན་རྫོབ་ཏུ་བདེན་པ་མ་ཡིན་ནོ། །ཞེས་དང༌། བདེན་གཉིས་གསལ་བའི་ཉི་མ་ལས། དོན་དམ་པའི་བདེན་པ་ནི། འཕགས་པ་རྣམས་ཀྱི་ཕྱིན་ཅི་ལོག་ཐུགས་སུ་ཆུད་པས་ཆོས་རྣམས་སྐྱེ་བ་མེད་པར་གཟིགས་པ་གང་ཡིན་པ་སྟེ། དེ་ནི་དེ་དག་ཉིད་ལ་དོན་དམ་པར་བདེན་པ་ཉིད་ཡིན་པས་དོན་དམ་བདེན་པའོ། །ཞེས་དང༌། འཕགས་པའི་ཤེས་ཡུལ་དུ་བདེན་པས་བདེན་པའོ། །ཞེས་དང༌། རི་ཆོས་ངེས་དོན་རྒྱ་མཚོ་ལས། འདིར་གནས་ལུགས་མཐར་ཐུག་པའི་སྐུ་གཅིག་ཉིད་དུ་ཟད་པ་ནི་དོན་དམ་པའི་སྐུ་སྟེ། མྱ་ངན་འདས་པ་བདེན་གཅིག་པུ། །ཞེས་དང། གང་བྱང་ཆུབ་མ་ཡིན་པའི་ཆོས་དེ་གང་ཡང་མེད་དོ། །ཞེས་དང། ཆོས་ཀྱི་དབྱིངས་ལས་མ་གཏོགས་པ། །འདི་ལྟར་ཆོས་ཡོད་མ་ཡིན་ཏེ། །ཞེས་ཆོས་དབྱིངས་ཀྱི་སྐུ་མ་གཏོགས་པ་ཆོས་ཐམས་ཅད་གཤིས་ཀྱི་གནས་ལུགས་ལ་མེད་པར་གསུངས་པ་དང། གཅིག་པུ་སྲ་མཁྲེགས་རྡོ་རྗེའི་བདག །ཅེས་དང། བདེན་པ་གཅིག་སྟེ་གཉིས་པ་མེད། །ཅེས་དང། བདེན་པ་ནི་གཅིག་པུ་གཉིས་མ་ཡིན་པ་སྟེ། འདི་ལྟ་སྟེ། འགོག་པའི་བདེན་པའོ། །ཞེས་པ་ལ་སོགས་པས་གང་གསུངས་པ་མཐར་ཐུག་གི་གནས་ལུགས་ལ་བདེན་པ་གཅིག་པུ་དོན་དམ་པའི་བདེན་པ་ཆོས་ཉིད་ཀྱི་སྐུ། ཞེས་དང༌། རྒྱུད་བླ་མ་ལས། བདག་དང་བདག་མེད་སྤྲོས་པ་དང༌། །ཉེ་བར་ཞི་བའི་དམ་པའི་བདག །ཅེས་དང༌། རྗེ་ཏཱ་ར་ནཱ་ཐས། ཀུན་རྫོབ་སྤྲོས་པའི་བདེན་གྲུབ་ངེད་མི་འདོད། །སྤྲོས་པའི་བདེན་གྲུབ་ཡོད་ན་ཀུན་རྫོབ་སྟེ། །ཞེས་དང༌། དགག་བྱའི་མཚན་ཉིད་ནམ་ཡང་ཡོད་མ་ཡིན། །ཞེས་དང༌། ཐེག་མཆོག་དབུ་མ་ལས། ཆོས་རྣམས་བདག་མེད་གཉིས་ཀ་ཡིན་པའི་ཕྱིར། །ངོ་བོའི་སྒོ་ནས་དབྱེ་བ་ཡོད་མིན་ཏེ། །དགག་བྱ་ལོག་ཚུལ་སྒོ་ནས་ལྡོག་པས་ཕྱེ། །ཞེས་གསུངས་པས་སོ། །གཞན་ཡང་ཇོ་ནང་བས་དོན་དམ་བདེན་པའམ་བདེ་གཤེགས་སྙིང་པོ་དེ་སྒྲུབ་པ་རང་དབང་མ་ཡིན་པ་མ་ཟད་མ་ཡིན་དགག་ཡིན་པར་འདོད་དེ། ཟབ་དོན་ཉེར་གཅིག་ལས། དགག་པའི་རྟག་པ་བདེན་སྤྱི་ཙམ་དེ་ཡང་མིན། སྒྲུབ་པ་རང་དབང་ཅན་གྱི་རྟག་པ་དེ་འདྲར་འདོད་པའང་མིན། འདི་ནི་སྤྲོས་བྲལ་ཏེ། དངོས་པོ་སྒྲུབ་པ་མི་རྟག་པ་དང། དངོས་མེད་དགག་པ་རྟག་པ་གཉིས་ཀ་ལས་གྲོལ་བའི་དབྱིངས་འགྱུར་མེད་དེ་ཡིན། ཞེས་དང། རྒྱུ་འབྲས་དབུ་མའི་ཐིག་ལེ་ལས། དོན་དམ་རང་གི་ངོ་བོས་སྟོང་པར་ལྟ། །གསུངས་པའི་དགོངས་པ་དོན་དམ་ལ་དམིགས་ནས། །བློ་ཡིས་བཟུང་ལྟར་མ་གྲུབ་པ་ལ་དགོངས། །ཅེས་དང༌། ལམ་རིམ་བདུད་རྩིའི་ཉིང་ཁུ་ལས། ང་སྙམ་པ་ཤར་དུས་ཕྱི་ནང་གི་དངོས་པོ་གཞན་སུ་དང་ཡང་མ་འདྲེས་པའི་ཁོ་རང་གི་ངོ་བོ་ཚུགས་ཐུབ་ཅིག་ཡོད་པའི་ཁུངས་སུ་སྣང་བ་དེ་གཅིག་པུར་འཛིན་པ་ཡིན། ཇི་ལྟར་རིགས་པའི་ལོངས་སྤྱོད་དམ། རྫས་སམ་འཁོར་ལ་རང་ཉིད་བདག་པོའི་ཚུལ་དུ་ཡོད་པ་ལྟར་སྣང་བ་དེ་རང་དབང་ཅན་དུ་འཛིན་པ་ཞེས་བྱ་བ་ཡིན། འཛིན་སྟངས་ཀྱིས་དེ་ལྟར་བཟུང་ཡང་དེ་ལྟ་བུར་མ་གྲུབ། ཅེས་དང༌། ཏཱ་ར་ནཱ་ཐའི་ཟུང་འཇུག་རབ་གསལ་ལས། སྟོང་གཟུགས་དང་མི་འགྱུར་བའི་བདེ་བ་ཟུང་དུ་འཇུག་པ་དེ་ནི་དགག་སྒྲུབ་དང་དངོས་པོ་དངོས་མེད་དང་ཡོད་མེད་ཡིན་མིན་གྱི་མཐའ་ལས་འདས་པ་དོན་དམ་འདུས་མ་བྱས་པ་ཡིན་པའི་ཕྱིར། དངོས་པོ་སྒྲུབ་པ་རང་དབང་ཅན་མིན་མོད། རྒྱུ་མཚན་མེད་ཀྱང་དངོས་པོར་འགྱུར་རོ་ཞེས་ནན་གྱིས་འཕུར་བར་བྱེད་ན་ནི་ཧ་ཅང་ཐལ་བའི་དབང་གིས་སྤྱོད་པ་སྟེ། ཞེས་དང༌། རི་ཆོས་ངེས་དོན་རྒྱ་མཚོ་ལས། ཆོས་ཉིད་ནི་སྟོང་གཞི་དང་མ་ཡིན་དགག་ཡིན་གྱི་སྟོང་ཙམ་དང་མེད་དགག་མ་ཡིན་པའི་ཕྱིར་རོ། །ཞེས་དང༌། གནས་ལུགས་ཟབ་མོ་ལ་སྐྱོན་ཐམས་ཅད་རང་བཞིན་གྱིས་མེད་ཅིང་མ་གྲུབ་པས་རྣམ་གཅོད་དང་དགག་པ་དང་སྤངས་པ་རང་བཞིན་པ་ཚང་ཞིང། དེ་དག་གི་གཞི་ལ་ཆོས་ཉིད་ཀྱི་ཡོན་ཏན་ཐམས་ཅད་རང་བཞིན་གྱིས་ཚང་བས་ཡོངས་གཅོད་དང་སྒྲུབ་པ་དང་མ་ཡིན་དགག་ཏུ་གྱུར་པའི་རྟོགས་པ་རང་བཞིན་པ་གདོད་ནས་ཚང་བར་ཡང་ཡང་བཤད་ཅིང་འཆད་པར་འགྱུར་བའི་ཕྱིར་དང༌།དཀོན་མཆོག་གསུམ་གྱི་བསྟོད་པ་སློབ་དཔོན་མ་ཊི་ཙེ་ཊ(མའི་ཁོལ་པོ)ས་མཛད་པའི་འགྲེལ་པར་ཡང། དེ་ཕྱིར་མི་མངའ་ཞེས་བྱ་བའི་དགག་པ་འདི་ནི་མ་ཡིན་པར་དགག་པ་སྟེ་རྣམ་པར་རྟོག་པའི་རིགས་དེ་དག་ནི་ཡོད་པ་མ་ཡིན་ལ། དེས་དབེན་པའི་ཡེ་ཤེས་རང་བཞིན་གྱིས་འོད་གསལ་བ་ནི་མངའ་བས་སོ། །ཞེས་སློབ་དཔོན་མཁས་པ་ཆེན་པོ་རྒྱལ་བའི་སྲས་ཀྱིས་གསུངས་པའི་ཡང་ཕྱིར་རོ། །ཞེས་རི་ཆོས་ངེས་དོན་རྒྱ་མཚོ་ལས་གསུངས་སོ།། ཀུན་མཁྱེན་དོལ་པོ་པའི་སྟོང་ཉིད་ཀྱི་རབ་ཏུ་དབྱེ་བ་ཁྱད་འཕགས་ལས། ཡང་རྣམ་པ་གཉིས་ཏེ། སྟོང་གཞི་ཡོན་ཏན་མང་པོ་ཅན་མ་ཡིན་དགག་ཡིན་པའི་སྟོང་པ་ཉིད་དང༌། སྟོང་ཙམ་སྒྲུབ་ཆོས་ཙམ་གྱིས་དོར་བ་མེད་འགག་ཡིན་པའི་སྟོང་ཉིད་དོ། །ཞེས་དང༌། ཟབ་དོན་ཉེར་གཅིག་ལས། དགག་པའི་རྟག་པ་བདེན་སྤྱི་ཙམ་དེ་ཡང་མིན། སྒྲུབ་པ་རང་དབང་ཅན་གྱི་རྟག་པ་དེ་འདྲར་འདོད་པའང་མིན། འདི་ནི་སྤྲོས་བྲལ་ཏེ། དངོས་པོ་སྒྲུབ་པ་མི་རྟག་པ་དང། དངོས་མེད་དགག་པ་རྟག་པ་གཉིས་ཀ་ལས་གྲོལ་བའི་དབྱིངས་འགྱུར་མེད་དེ་ཡིན། ཞེས་གསུངས་སོ།།ཀུན་མཁྱེན་ཀློང་ཆེན་པའི་ཡིད་བཞིན་མཛོད་ལས། མི་བདེན་བསླུ་ཕྱིར་ཀུན་རྫོབ་བདེན་པ་ལགས། །ཞེས་དང༌། འགྱུར་མེད་དོན་དམ་བདེན་པའི་རང་བཞིན་ནི། །འོད་གསལ་བདེ་གཤེགས་སྙིང་པོ་ལྷུན་གྲུབ་སྟེ། །སྟོང་གསལ་རིག་པ་དབྱེར་མེད་ཆོས་ཉིད་དོ། །ཞེས་དང༌། ཚིག་དོན་མཛོད་ལས། སེང་གེ་རྩལ་རྫོགས་ལས། གཞི་ལ་གནས་པའི་རིག་པ་ནི། །ཡེ་ཤེས་དབྱིངས་ན་སྐུ་གསུམ་རྫོགས། །ཞེས་དང༌། རྒྱུད་བླ་མ་ལས། འོད་གསལ་བྱས་མིན་དབྱེར་མེད་པར། །འཇུག་ཅན་གང་གའི་ཀླུང་གི་ནི། །རྡུལ་ལས་འདས་པའི་སངས་རྒྱས་ཉིད། །ཆོས་རྣམས་ཀུན་དང་ལྡན་པ་ཉིད། །ཅེས་དང༌། འཇམ་དཔལ་གྱི་ལྟ་བ་མདོར་བསྟན་ལས། ཕུང་པོ་རྣམ་དཔྱད་སྟོང་བ་ཉིད། །ཆུ་ཤིང་ཇི་བཞིན་སྙིང་པོ་མེད། །རྣམ་པ་ཐམས་ཅད་མཆོག་ལྡན་པའི།།སྟོང་ཉིད་དེ་ལྟར་གྱུར་མ་ཡིན། །ཞེས་གསུངས་སོ། །དེ་ལྟར་སྔ་འགྱུར་རྙིང་མའི་མཁས་དབང་འཇུ་མི་ཕམ་གྱི་གཞན་སྟོང་སེངྒེའི་ང་རོ་ལས། ངེད་འཁྲུལ་བ་ཀུན་རྫོབ་དང་མ་འཁྲུལ་བ་དོན་དམ་དུ་འདོད་པའི་ལུགས་ལའང་མ་འཁྲུལ་བའི་དོན་དམ་དང། དེ་མ་འཁྲུལ་བའི་བདེན་པར་གྲུབ་པ་དགག་མི་རུང་བར། ཞེས་དང། དམ་ཆོས་དོགས་སེལ་ལས། དོན་དམ་པར་གྲུབ་ན་བདེན་པར་གྲུབ་པ་ཡིན་ཏེ། དོན་དམ་དཔྱོད་བྱེད་ཀྱི་རིགས་པས་རྙེད་དོན་མཐར་ཐུག་ཡིན་པ་གང་ཞིག མཐར་ཐུག་དཔྱོད་པའི་རིག་ངོར་བདེན་ཞིང། དེ་ཡོངས་གཅོད་སྒྲུབ་པའི་ཚུལ་གྱིས་དེའི་ཡུལ་དུ་གྲུབ་པའི་ཕྱིར། ཞེས་དང༌། རྙིང་མའི་མཁས་དབང་དགེ་རྩེ་འགྱུར་མེད་ཚེ་དབང་མཆོག་གྲུབ་ཀྱི་གྲུབ་མཐའ་ངེས་དོན་གསལ་བྱེད་ལས། དེས་ན་བཀའ་མདོ་རྒྱུད་རྣམས་དང། ས་བཅུའི་བྱང་སེམས་འཕགས་པ་སངས་རྒྱས་གཉིས་པ་ལྟ་བུ་དེ་རྣམས་ཀྱིས་མདོའི་འགྲེལ་པ་བྱམས་ཆོས་ལྔ་དང༌། སྔགས་ཀྱི་སེམས་འགྲེལ། སྤྱན་རས་གཟིགས་ཀྱི་དྲི་མེད་འོད་དང། རྡོ་རྗེ་སྙིང་པོའི་དགྱེས་རྡོར་གྱི་འགྲེལ་པ། ཕྱག་ན་རྡོ་རྗེའི་བདེ་མཆོག་གི་འགྲེལ་པ་རྣམས་སུ་གསུངས་པའི་ངེས་དོན་དབུ་མ་ཆེན་པོ་དེ་ལ་བོད་ཀྱི་ལྗོངས་སུ་གཟུ་དགའ་རྡོར་དང་བཙན་ཁ་བོ་ཆེ་རྣམ་གཉིས་ཀྱིས་མཻ་ཏྲི་པའི་བརྒྱུད་འཛིན་ཁ་ཆེ་རིན་རྡོར་དང་ས་ཛྫ་ན་ལས་རྒྱུད་བླ་སོགས་བྱམས་ཆོས་མན་ངག་ལྟར་གྱི་བཤད་པ་གསན་ནས་སྤེལ་ཞིང། ཀུན་མཁྱེན་རང་བྱུང་རྡོ་རྗེས་དེ་ཉིད་རྩལ་དུ་བཏོན་ནས། རྣམ་ཤེས་ཡེ་ཤེས་དབྱེ་བ་དང། སྙིང་པོ་བསྟན་པ། ཟབ་མོ་ནང་དོན་སོགས་མཛད། དེ་ཉིད་ཀྱི་སློབ་མར་གྱུར་པ་ཀུན་མཁྱེན་ཀློང་ཆེན་པས་འཁོར་ལོ་ཐ་མའི་བདེ་གཤེགས་སྙིང་པོའི་རྣམ་བཞག་རྒྱས་པར་བཀྲལ་བས་དེ་ཉིད་ངེས་དོན་མཐར་ཐུག་ཏུ་བཞེད་ཅིང། རྫོགས་ཆེན་གྱི་གཞི་འབྲས་དང་མཐུན་པར་ཆོས་སྐད་ཅི་རིགས་པའི་སྒོ་ནས་རྫོགས་ཆེན་དང་མཚམས་སྦྱོར་བའི་ངེས་དོན་གྱི་དགོངས་པ་མ་ནོར་བར་བཀྲལ་བར་མཛད་ལ། གཞན་སྟོང་སེངྒེའི་སྒྲས་ས་སྟེང་ཁྱབ་པར་མཛད་པ་པོ་ནི་ཀུན་མཁྱེན་དོལ་པོ་པ་༼ཤེས་རབ་རྒྱལ་མཚན་༽སྟེ་ཐོག་མར་ཐལ་འགྱུར་བཞེད་པ། རང་བྱུང་ཞབས་ཀྱིས་ཁྱོད་ཀྱིས་ད་ལྟའི་འདི་མིན་པའི་ལྟ་བ་ཞིག་དང་འཕྲད་པར་འགྱུར་གསུངས་པ་བཞིན་བྱམས་ཆོས་མན་ངག་གི་བཤད་པ་གསན་ཞིང་སྦྱོར་བ་ཡན་ལག་དྲུག་པ་ཉམས་སུ་བཞེས་པས་ཐུགས་དམ་ན་འཕར་ནས་གཞན་སྟོང་གི་ལྟ་བ་ཐུགས་ལ་འཁྲུངས་ཤིང་བྱམས་ཆོས་ཀྱི་འགྲེལ་པ་དང། ངེས་དོན་རྒྱ་མཚོ་སོགས་དེ་སྟོན་པའི་བསྟན་བཅོས་མང་དུ་མཛད། གཞན་སྟོང་ཞེས་པ་གྲུབ་ཐོབ་ཡུ་མོ་པས་གསར་དུ་རྙེད་པ་ལས་ཁུངས་གཞན་མེད་ཚུལ་མཁས་པ་འགའ་ཞིག་གིས་གསུངས་ཀྱང་གཞན་སྟོང་གི་མཚན་གཞི། རྒྱལ་བ་བྱམས་པས། རྣམ་དབྱེར་བཅས་པའི་༼མཚན་ཉིད་ཅན། །གློ་བུར་དག་གིས་ཁམས་སྟོང་གི། །རྣམ་དབྱེ་མེད་པའི་མཚན་ཉིད་ཅན། །བླ་མེད་ཆོས་ཀྱི་སྟོང་མ་ཡིན། །༽སོགས་ཀྱིས་དངོས་སུ་བསྟན་པའི་ཕྱིར་དང། དེའང་སྟོང་ཉིད་མེད་དགག་ཏུ་སྨྲ་བའི་ལུགས་ལ་ཐུགས་ཞེན་ཆེ་བའི་རྣམ་འགྱུར་ཙམ་ཟད། ཞེས་གསུངས་ལ། དེ་ལྟར་བཀའ་བརྒྱུད་པའི་མཁས་དབང་ཀརྨ་པ་རང་བྱུང་རྡོ་རྗེའྀ་རྣམ་ཤེས་ཡེ་ཤེས་འབྱེད་པའི་བསྟན་བཅོས་ལས། ཆོས་དབྱིངས་སྤྲོས་བྲལ་དཀྱིལ་འཁོར་དུ། །རྫོགས་པ་འཁོར་འདས་ཐོག་མེད་ཀུན། །གཅིག་དང་ཐ་དད་བྲལ་བ་རུ། །བཞུགས་པ་ངོ་བོ་ཉིད་སྐུར་བཞེད། །ཅེས་དང༌། དེ་བཞིན་གཤེགས་པའི་སྙིང་པོ་བསྟན་པ་ལས། ཀྱེ་མ་ཆོས་སྐུ་ཡོན་ཏན་འདི། །བདེན་པའི་རྟོགས་ལ་བདེན་ཤེས་ཡིན། །ཞེས་དང༌། །དེ་བས་རྩ་རླུང་ཐིག་ལེ་རྣམས། །དག་པ་དག་པའི་གཟུགས་སྐུ་སྟེ། །མ་སྦྱང་མ་དག་གཟུགས་སྐུ་འདོད། །ཅེས་དང༌། དེ་བཞིན་གཤེགས་པའི་གནས་སྐབས་གསུམ། །བརྗོད་ཀྱང་སངས་རྒྱས་གསར་སྐྱེས་མིན། །ཇི་ལྟར་སྔ་བཞིན་ཕྱིས་དེ་བཞིན། །མི་འགྱུར་སངས་རྒྱས་སྙིང་པོ་ཡིན། །ཞེས་དང༌། རྒྱལ་བའི་ཡེ་ཤེས་སེམས་ཅན་ལ། །ཞུགས་ཀྱང་དེ་བཞིན་གོས་པ་མེད། །འདི་ལ་འཁྲུལ་བའི་མིང་མི་བརྗོད། །ཅེས་དང༌། བཀའ་བརྒྱུད་པའི་མཁས་པའི་དབང་ཕྱུག་ཀོང་སྤྲུལ་ཡོན་ཏན་རྒྱ་མཚོའི་རྒྱུད་བླའི་འགྲེལ་བ་ལས། ལོ་ཙཱ་གཟུ་བཙན་རྣམ་གཉིས་ལས་བརྒྱུད་པའི་བྱམས་ཆོས་སྒོམ་ལུགས་པ་རྣམས་དང༌། མངའ་བདག་མཻ་ཏྲི་ཞབས་ཀྱིས་བྲམ་ཟེ་ཆེན་པོ་ཡབ་སྲས་ཀྱི་གདམས་ངག་བརྙེས་ནས་སྔགས་དང་རྗེས་སུ་མཐུན་པའི་ཕར་ཕྱིན་གྱི་མན་ངག་དེ་ཁོ་ན་ཉིད་བཅུ་པ་སོགས་མཛད། དེ་ལས་རྗེ་མར་པས་གསན་ཏེ། ཐེག་པའི་མཐར་ཐུག་སྙིང་པོའི་དོན། །མཐའ་བྲལ་ཡིད་ལ་མི་བྱེད་པ། །ཆོས་ཕྱག་རྒྱ་ཆེ་ལ་ངོ་སྤྲོད་བགྱེས། །ཞེས་སོགས་གསུངས་པ་དང༌། རྗེ་སྒམ་པོ་པའི་ཞལ་ནས། འོ་སྐོལ་གྱི་ཕྱག་རྒྱ་ཆེན་པོ་འདིའི་གཞུང་ཉིད་བཅོམ་ལྡན་བྱམས་པའི་མཛད་པའི་ཐེག་པ་ཆེན་པོ་རྒྱུད་བླ་མའི་བསྟན་བཅོས་ཡིན་ནོ། །ཞེས་གསུངས་ཤིང༌། ཐར་པ་རིན་པོ་ཆེའི་རྒྱན་སོགས་དེ་ཉིད་ཀྱི་གསུང་རབ་རྣམས་སུའང་གསལ་བར་མཛད་པའི་རྗེས་སུ། དཔལ་ལྡན་ཕག་མོ་གྲུབ་ཡབ་སྲས། རྒྱལ་བ་གཉིས་པ་རང་བྱུང་ཞབས་སོགས་སྙིང་པའི་དོན་མངོན་སུམ་དུ་གཟིགས་པའི་ས་བཅུའི་དབང་ཕྱུག་རྣམས གཅིག་ཏུ་འབྲང་བར་མཛད་ཅིང༌། སྐྱོབ་པ་འཇིག་རྟེན་གསུམ་གྱི་མགོན་པོས་ཀྱང་སྙིང་པོ་དོན་འདི་ཉིད་ལས་བརྩམས་ཏེ་རྨད་དུ་བྱུང་བའི་ཆོས་ཀྱི་འཁོར་ལོ་བསྐོར་བ་དང༌། དེ་ཉིད་ཀྱི་སྐུའི་སྐྱེ་བ་ཕྱི་མ་ཀུན་མཁྱེན་དོལ་པོ་སངས་རྒྱས་ཀྱིས་ཀྱང་ངེས་དོན་སྙིང་པོའི་བཀའི་བསྡུ་བ་བཞི་བ་མཛད་པ་དང༌། ཟི་ལུང་པཎ་ཆེན། རྗེ་བཙུན་ཐམས་ཅད་མཁྱེན་པ་ཏཱ་ར་ནཱ་ཐ། ཀུན་མཁྱེན་བསྟན་པའི་ཉིན་བྱེད་སོགས་ཀྱང་ཞལ་གྱིས་བཞེས་ཚུལ་ཕྲན་བུ་ཙམ་ལས་ལྟ་བའི་གནད་གཅིག་ཏུ་འབབ་པ་ཁོ་ན་ཡིན་ཅིང༌། གཞན་ཡང་མངའ་བདག་མཻ་ཏྲི་པའི་དངོས་སློབ་པཎྜི་ཏ་བཛྲ་པཱ་ཎིས་དེ་ཁོ་ན་ཉིད་བཅུ་པ་རྩ་འགྲེལ་སོགས་བོད་དུ་རྒྱ་ཆེར་བཤད་པ་རྣམས་ཀྱང་འདི་ཉིད་འདི་ཉིད་ཀྱི་དོན་སྟོན་པའི་ཕྱག་ཆེན་གྱི་བཀའ་སྲོལ་ཡིན་པ་དང༌། མཻ་ཏྲི་པའི་དངོས་སློབ་དམ་པ་སངས་རྒྱས་ཀྱིས་ཀྱང་ངོ་བོ་ཕ་རོལ་ཏུ་ཕྱིན་པ། གསང་སྔགས་དང་རྗེས་སུ་མཐུན་པའི་ཕྱག་རྒྱ་ཆེན་པོའི་ཆོས་ལ་དམ་ཆོས་སྡུག་བསྔལ་ཞི་བྱེད་ཅེས་བྱ་བའི་མཚན་གསོལ་ནས་བོད་དུ་སྔ་ཕྱིར་གསུང་པ་རྣམས་ཀྱང་དོན་སྔ་མ་དངཚུངས་པས། མདོར་ན་མངའ་བདག་མཻ་ཏྲི་གུབྟ་ནས་བརྒྱུད་པའི་བཤད་པ་དང་གདམས་ངག་གི་བཀའ་སྲོལ་ཐམས་ཅད་ནི་ཚིག་བརྗོད་ཙམ་ལས་དོན་གཅིག་ཏུ་འབབས་སོ། །ཞེས་གསུངས་སོ། །སྔོན་བྱོན་དམ་པས་གསུང་རྒྱུན་ལ་བུ་དོལ་རྣམ་གཉིས་ཚིག་གི་ར་ལ་རྩོད། །ཅེས་པས་ཚིག་ཙམ་ལས་དོན་ལ་གནད་འགག་ཆེར་མེད་པ་རིས་མེད་ཀྱི་གཏམ་ཡིན་ནོ། །དེ་དག་དགོངས་པ་གཅིག་ཏུ་འགྲོ་ཚུལ་ཡོད་པར་སྣང་སྟེ། པཎ་ཆེན་བློ་བཟང་ཆོས་རྒྱན་གྱིས། ལྷན་ཅིག་སྐྱེས་སྦྱོར་གའུ་མ། །ལྔ་ལྡན་རོ་སྙོམས་ཡི་གེ་བཞི། །ཞི་བྱེད་གཅོད་ཡུལ་རྫོགས་ཆེན་དང༌། །དབུ་མའི་ལྟ་ཁྲིད་ལ་སོགས་པ། །སོ་སོར་མིང་འདོགས་མང་ན་ཡང༌། །ངེས་དོན་ལུང་རིགས་ལ་མཁས་ཤིང༌། །ཉམས་མྱོང་ཅན་གྱི་རྣལ་འབྱོར་བས། །དཔྱད་ན་དགོངས་པ་གཅིག་ཏུ་འདུས། །ཞེས་གསུངས་ལ། དེ་ལྟར་ཉམས་སུ་ལེན་ན་ལྟ་བ་མཐར་ཐུག་གནད་གཅིག་ཏུ་འགྲོ་བའི་ཆོས་ཚུལ་ནི། རྗེ་ཏཱ་ར་ནཱ་ཐའི་ཞལ་སྔ་ནས། དོན་དམ་གནས་ལུགས་འགྱུར་མེད་ཡོངས་གྲུབ་སྲ་བརྟན་གཡུང་དྲུང་དཔྱད་མི་བཟོད་པས་རང་གི་ངོ་བོས་སྟོང་མི་དགོས་པའི་དོན་དམ་སྟོང་ཉིད་ཅེས་གཞན་སྟོང་ལུགས་སུ་གྲགས་པ་འདི་ཉིད་ད་ལྟའི་སྐབས་སུ་བློའི་ཡུལ་ལམ་ཚིག་ཏུ་བརྗོད་པའི་སྐབས་སུ་དགག་སྒྲུབ་མི་མཐུན་པ་འདུག་ཀྱང། མཉམ་པར་བཞག་པའི་ཚེ་གཞན་སྟོང་ཇི་ལྟ་བ་བཞིན་དུ་གནས་ལུགས་བརྗོད་བྲལ་ལམ་སྤྲོས་བྲལ་ལ་མཐུན་འགྲོ་བས་མཉམ་པར་འཇོག་པའི་སྐབས་ཀྱང་བློའི་རི་མོ་ཐམས་ཅད་སྟོང་ཉིད་དུ་ཐག་བཅད། ཡོད་མེད་རྟག་ཆད་སྟོང་མི་སྟོང་ཐམས་ཅད་ལས་འདས་པའི་གསལ་སེང་ངེ་རྗེན་ནེ་ལྷན་ནེ་ལྷོད་དེ་ཤིག་གེ་བསྐྱང་བ་རང་རིག་རྗེན་པར་རྟོགས་པའི་འཇོག་བསྒོམས་སྐབས། ཉམས་སུ་བླངས་ན་ཐམས་ཅད་མཐུན་པས། དོན་དམ་ལ་ནི་ཁྱད་པར་མེད་དོ། །སྒོམས་ཞིང་རྟོགས་ན་མཐུན་འགྲོ། ཞེས་གསུངས་པ་ནི་ལེགས་བཤད་བླ་ན་མེད་པ་ཡིན་པར་སེམས་སོ། །འོན་ཀྱང་མེད་དགག་དང་མ་ཡིན་དགག་གཞི་གཅིག་ཏུ་འདུ་མི་ནུས་ཀྱང་གནད་འགག་གཅིག་ཏུ་འབབ་ཚུལ་དང༌། སྤྲོས་འཛིན་གྱི་གཉེན་པོ་འགྲོ་བ་གཅིག་མཚུངས་ཡིན་པར་སྣང་ངོ༌།། བོད་ཀྱི་གྲུབ་མཐའ་སྨྲ་བའི་ནང་ན་ལྟ་བ་མེད་དགག་དང་མ་ཡིན་དགག་འདོད་ཚུལ་གྱི་ཁྱད་པར་ནི། འཇུ་མི་ཕམ་གྱི་དབུ་མ་ངེས་ཤེས་སྒྲོན་མེ་ལས། དགེ་ལྡན་ལྟ་བ་མེད་དགག་འདོད། །གཞན་རྣམས་མ་ཡིན་དགག་ཏུ་འདོད། །ཅེས་དང༌། རི་ཆོས་ངེས་དོན་རྒྱ་མཚོ་ལས། ཆོས་ཉིད་ནི་སྟོང་གཞི་དང་མ་ཡིན་དགག་ཡིན་གྱི་སྟོང་ཙམ་དང་མེད་དགག་མ་ཡིན་པའི་ཕྱིར་རོ། །ཞེས་དང༌། གནས་ལུགས་ཟབ་མོ་ལ་སྐྱོན་ཐམས་ཅད་རང་བཞིན་གྱིས་མེད་ཅིང་མ་གྲུབ་པས་རྣམ་གཅོད་དང་དགག་པ་དང་སྤངས་པ་རང་བཞིན་པ་ཚང་ཞིང༌། དེ་དག་གི་གཞི་ལ་ཆོས་ཉིད་ཀྱི་ཡོན་ཏན་ཐམས་ཅད་རང་བཞིན་གྱིས་ཚང་བས་ཡོངས་གཅོད་དང་སྒྲུབ་པ་དང་མ་ཡིན་དགག་ཏུ་གྱུར་པའི་རྟོགས་པ་རང་བཞིན་པ་གདོད་ནས་ཚང་བར་ཡང་ཡང་བཤད་ཅིང་འཆད་པར་འགྱུར་བའི་ཕྱིར་དང༌། དཀོན་མཆོག་གསུམ་གྱི་བསྟོད་པ་སློབ་དཔོན་མ་ཊི་ཙེ་ཊས་མཛད་པའི་འགྲེལ་པར་ཡང༌། དེ་ཕྱིར་མི་མངའ་ཞེས་བྱ་བའི་དགག་པ་འདི་ནི་མ་ཡིན་པར་དགག་པ་སྟེ་རྣམ་པར་རྟོག་པའི་རིགས་དེ་དག་ནི་ཡོད་པ་མ་ཡིན་ལ། དེས་དབེན་པའི་ཡེ་ཤེས་རང་བཞིན་གྱིས་འོད་གསལ་བ་ནི་མངའ་བས་སོ། །ཞེས་སློབ་དཔོན་མཁས་པ་ཆེན་པོ་རྒྱལ་བའི་སྲས་ཀྱིས་གསུངས་པའི་ཡང་ཕྱིར་རོ། །ཞེས་དང༌། ཀུན་མཁྱེན་དོལ་པོ་པའི་སྟོང་ཉིད་ཀྱི་རབ་ཏུ་དབྱེ་བ་ཁྱད་འཕགས་ལས། ཡང་རྣམ་པ་གཉིས་ཏེ། སྟོང་གཞི་ཡོན་ཏན་མང་པོ་ཅན་མ་ཡིན་དགག་ཡིན་པའི་སྟོང་པ་ཉིད་དང༌། སྟོང་ཙམ་སྒྲུབ་ཆོས་ཙམ་གྱིས་དོར་བ་མེད་འགག་ཡིན་པའི་སྟོང་ཉིད་དོ། །ཞེས་གསུངས་སོ། །དེས་ན་གཞན་སྟོང་བ་རྣམས་ཀྱི་ཆོས་དབྱིངས་བདེན་པར་གྲུབ་ཅེས་པ་ནི་རྩ་ཤེས་ལས། མྱ་ངན་འདས་པ་བདེན་གཅིག་པུ། །ཞེས་གསུངས་པ་ལྟར་ཐེག་ཆེན་འཕགས་པའི་ཆོས་ཉིད་རྟོགས་པའི་ཉམས་བཞག་གིས་གཟིགས་པ་ལྟར་བདེན་པ་ཡིན་པ་དང༌། སྣང་ཚུལ་དང་གནས་ཚུལ་མཐུན་པས་བདེན་པར་གྲུབ་པ་ལས་དགག་བྱ་ཆོས་བདག་དང་ཕྱི་རོལ་བ་སོགས་ལྟར་སྤྲོས་པའི་བདེན་པར་གྲུབ་པ་མི་འདོད་པས་གྲུབ་པའི་གནད་མི་འདྲ་བ་མེད་ན་ཆགས་སྡང་གིས་ཕྱོགས་རིས་སུ་མི་འགྲོ་བར་རིས་མེད་ལ་འབད་ན་མ་འོངས་བོད་ཁ་བ་གངས་ཅན་པའི་བསྟན་སྲིད་འཕེལ་རྒྱས་སུ་འགྱུར་བའི་སྒོ་དམ་པ་ཡིན་ནོ། །འདིར་གོ་དོན་གཙོ་བོར་མ་བཤད་པར་ལུང་མང་པོར་བཀོད་པ་ནི་ཞིབ་འཇུག་པ་རྣམས་ཀྱི་དཔྱད་གཞིའི་ཆེད་དུ་བཀོད་པའོ། །གཞན་གྱིས་བསྐུལ་ངོར་སྤྲང་འཁྱམ་པ་ངག་དབང་དངོས་གྲུབ་དཔལ་གྱིས་བྲིས་པའོ། ། དྲིས་ལན་ཆོས་རྗེ་ཀུན་མཁྱེན་དོལ་པོ་པ་རང་གི་ལུང་གིས་གསལ་བྱེད།དྲིས་ལན་ཆོས་རྗེ་ཀུན་མཁྱེན་དོལ་པོ་པ་རང་གི་ལུང་གིས་གསལ་བྱེད་ཅེས་བྱ་བ་བཞུགས་སོ། ། དྲི་བ། དྲང་ངེས་རྣམ་འབྱེད་ལས། གང་དག་ཤེར་ཕྱིན་ལ་སོགས་པ་ཞེས་པ་ནས་འཕགས་པ་ཡབ་སྲས་ལ་སོགས་པའི་ལུགས་ལས་ཀྱང་ཕྱི་རོལ་ཏུ་གྱུར་པའོ། །ཞེས་པའི་སྐབས་ཀྱི་ཕྱོགས་སྔ་ཇོ་ནང་བ་ཡིན་པར་དྲང་ངེས་འགྲེལ་བ་དག་ཞལ་མཐུན་པ་དང༌། ཕྱི་རོལ་ཏུ་འགྱུར་ཚུལ་ཡོངས་གྲུབ་བདེན་གྲུབ་ཏུ་འདོད་པའི་གནད་ཀྱིས་ཡིན་པར་གསུངས་མོད། ཇོ་ནང་བས་ཡོངས་གྲུབ་བདེན་གྲུབ་ཏུ་འདོད་ཚུལ། ཡོངས་གྲུབ་བདེན་པའི་ངོ་བོའམ། དོན་དམ་བདེན་པའི་ངོ་བོ་ཙམ་དུ་འདོད་པ་རི་ཆོས་ངེས་དོན་རྒྱ་མཚོ་ལས། འདི་ཡང་ཀུན་བརྟགས་དང་གཞན་དབང་གིས་སྟོང་བའི་ཆོས་ཉིད་ཡོངས་གྲུབ་དོན་དམ་དུ་ཡོད་པར་གསུངས་པའི་ཕྱིར། ཞེས་གསུངས་པ་ལ་བརྟག་ན། དོན་དམ་ཙམ་དུ་འདོད་པར་གསལ་བ་དང༌། རྗེས་འཇུག་མཁས་པ་དག་གིས་ཀྱང་ཡོངས་གྲུབ་བདེན་གྲུབ་གསུངས་པ་ཡོངས་གྲུབ་དོན་དམ་ཙམ་དུ་གསུངས་པ་ཡིན་ཞེས་ནན་གྱིས་གསུངས་འདུག་པས། དེ་ལྟར་ཡིན་ན་ཇི་ལྟར་འཕགས་པ་ཡབ་སྲས་ཀྱི་གསུངས་ལས་ཕྱི་རོལ་ཏུ་གྱུར་པ་ཡིན་ཞེས་པའོ། །འདི་ལ་ཆོས་རྗེ་ཀུན་མཁྱེན་ཆེན་པོའི་གཞུང་འགའ་ལས་གསུང་པའི་གསུང་ཟིན་ཁོ་ན་ལྟར་ལན་མདོར་བསྡུས་སུ་བརྗོད་པ་ལ། གང་དག་ཤེར་ཕྱིན་ལ་སོགས་པ་ཞེས་པ་ནས་འཕགས་པ་ཡབ་སྲས་ལ་སོགས་པའི་ལུགས་ལས་ཀྱང་ཕྱི་རོལ་ཏུ་གྱུར་པའོ། །ཞེས་པའི་སྐབས་ཀྱི་ཕྱོགས་སྔ་ཇོ་ནང་བར་བཞེད་ན་མི་རིགས་པར། ཇོ་ནང་བའི་དེ་ལྟར་ཁས་ལེན་མེད་ཚུལ་དང༌། ཇོ་ནང་རང་ལུགས་འཕགས་པ་ཡབ་སྲས་ཀྱི་གསུང་ལས་ཕྱི་རོལ་ཏུ་གྱུར་བ་མིན་ཚུལ་ཏེ་གཉིས་ལས།དང་པོ་ནི། རྗེ་བདག་ཉིད་ཆེན་པོའི་དྲང་ངེས་ལེགས་བཤད་སྙིང་ལོ་ལས། གང་དག་ཤེར་ཕྱིན་ལ་སོགས་པའི་མདོ་རྣམས་ལས་ཆོས་ཐམས་ཅད་ངོ་བོ་ཉིད་མེད་པར་གསུངས་པ། ཀུན་རྫོབ་ཀྱི་ཆོས་ཐམས་ཅད་ལ་དགོངས་ཀྱི། དོན་དམ་པ་ལ་དགོངས་པ་ནི་མིན་ནོ། །ཞེས་འཆད་པ་ནི། དགོངས་འགྲེལ་དང་ཐོགས་མེད་སྐུ་མཆེད་ཀྱི་གཞུང་དང་འགལ་ཞིང༌།འཕགས་པ་ཡབ་སྲས་ལ་སོགས་པའི་ལུགས་ལས་ཀྱང་ཕྱི་རོལ་ཏུ་གྱུར་པའོ། །ཞེས་གསུངས་པའི་ཕྱོགས་སྔ་མ་ལ། རྗེས་འབྲང་ཕལ་གྱིས་ཇོ་ནང་བ་ཡིན་པར་བཞེད་ཀྱང༌། འདོད་པ་དེ་རིགས་པའི་འཕུལ་གྱིས་ཇོ་ནང་བར་བཞག་པ་ཡིན་ན་ནི་དེར་ཟད་ཀྱི། ཀུན་མཁྱེན་དོལ་པོ་པ་ཆེན་པོའི་གཞུང་ལས། ཤེར་ཕྱིན་གྱི་མདོ་ལས་ངོ་བོ་ཉིད་མེད་པར་གསུངས་པའི་དགོངས་པ་ཀུན་རྫོབ་ཁོ་ན་ལས། དོན་དམ་ལ་མ་གསུངས་པར་མི་བཞེད་དེ། དེས་ན་དེའི་ཕྱོགས་སྔ་ལ་ཇོ་ནང་ཀུན་མཁྱེན་ཆེན་པོ་མ་ཡིན་པར། མཁས་པ་གཞན་ཞིག་ཡིན་ནམ་སེམས་སོ། ། རྗེས་འབྲང་དག་གིས་གསུངས་པ་ནི་དགོས་པས་སམ། པནྚི་ཏས་ཐུགས་ཉམས་མ་བཞག་པ་གང་རུང་ཞིག་ལས་མི་འདའ་སྟེ། རི་ཆོས་ངེས་དོན་རྒྱ་མཚོ་ལས། འཁོར་ལོ་བར་པའི་གཞུང་གཞན་དང་གཞན་དུ་ཡང། རང་སྟོང་མ་ཡིན་པ་ལ་རང་སྟོང་དུ་གསུངས་པ་ཐམས་ཅད་དྲང་དོན་དགོངས་པ་ཅན་ཉིད་དུ་ཁོང་དུ་ཆུད་པར་བྱ་སྟེ། ལེགས་པར་རྣམ་པར་ཕྱེ་བའི་མན་ངག་ཐུན་མོང་མ་ཡིན་པའི་སྒྲོན་མེ་ལ་བརྟེན་ནས་སོ། །ཞེས་དང༌། དེ་ལྟ་བས་ན་རང་སྟོང་དུ་གནས་པ་རྣམས་རང་སྟོང་དུ་སྟོན་པ་ལ་ནི་འགལ་བ་ཅུང་ཟད་ཀྱང་མེད་ཅིང། རང་སྟོང་མ་ཡིན་པ་ལ་རང་སྟོང་དུ་གསུངས་པ་ཇི་སྙེད་ཡོད་པ་རྣམས་ནི་སྔར་བསྟན་པ་བཞིན་དུ་དྲང་དོན་དགོངས་པ་ཅན་ཉིད་དུ་རིག་པར་བྱའོ། །འདི་ལ་དགོངས་ནས། འཕགས་པ་རྔ་བོ་ཆེ་ཆེན་པོའི་མདོར་ཡང། བཅོམ་ལྡན་འདས་ཐེག་པ་ཆེན་པོ་ལ་ཡང་སྟོང་པ་ཉིད་ཀྱི་དོན་སྟོན་པའི་མདོ་མང་དུ་མཆིས་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། སྟོང་པ་ཉིད་སྟོན་པ་གང་ཅི་ཡང་རུང་བ་དེ་ཐམས་ཅད་ནི་དགོངས་པ་ཅན་དུ་རིག་པར་བྱ་ལ། བླ་ན་མེད་པའི་མདོ་འདི་ལྟ་བུ་འདི་དག་ནི་དགོངས་པ་ཅན་མ་ཡིན་པར་རིག་པར་བྱའོ། །ཞེས་པ་ལ་སོགས་པ་གསུངས་སོ། །ཞེས་འཁོར་ལོ་བར་བའི་དངོས་ཟིན་ལ་རང་སྟོང་མ་ཡིན་པ་རང་སྟོང་དུ་གསུངས་པ་ཡོད་པར་བཞེད་པ་གང་ཞིག རང་སྟོང་མ་ཡིན་པ་རང་སྟོང་དུ་གསུངས་པ་དེ་དོན་དམ་ངོ་བོ་ཉིད་ཀྱིས་མེད་པར་གསུངས་པའི་མདོ་རྣམ་འཇོག་པའི་ཕྱིར་དང༌། གཞན་ཡང་རི་ཆོས་ངེས་དོན་རྒྱ་མཚོ་ལས། འདིར་དགོངས་གཞི་ནི། ཆོས་ཀྱི་དབྱིངས་ལ་སོགས་པ་དེ་རྣམས་སུ་འཛིན་པ་དང། དེ་རྣམས་ཀྱིས་ཁྱབ་པའི་ཆོས་ཅན་ཀུན་རྫོབ་ཐམས་ཅད་རང་སྟོང་ཡིན་པ་ལ་དགོངས་ནས། དེ་སྐད་གསུངས་པ་སྟེ། གཟུགས་སོགས་ཆོས་ཐམས་ཅད་ལ་ཚན་པ་གསུམ་དུ་གསུངས་པ་ལས། རང་སྟོང་དུ་གསུངས་པ་རྣམས་ཀུན་བརྟགས་གཞན་དབང་གིས་གཟུགས་སོགས་ལ་དགོངས་པའི་ཕྱིར་རོ། །དེ་བཞིན་དུ་ཆོས་ཀྱི་དབྱིངས་མེད་པའི་ཕྱིར་བྱང་ཆུབ་སེམས་དཔའ་སྔོན་གྱི་མཐར་མི་དམིགས་སོ། །དེ་བཞིན་ཉིད་དང། ཡང་དག་པའི་མཐའ་དང། བསམ་གྱིས་མི་ཁྱབ་པའི་དབྱིངས་མེད་པའི་ཕྱིར། བྱང་ཆུབ་སེམས་དཔའ་སྔོན་གྱི་མཐར་མི་དམིགས་སོ། །ཞེས་གསུངས་པ་གང་ཡིན་པ་དེ་ཡང། སྔ་མ་བཞིན་དུ་དྲང་དོན་དགོངས་པ་ཅན་ཡིན་ཏེ། ཆོས་དབྱིངས་དེ་བཞིན་ཉིད་མེད་པ་མ་ཡིན་ཡང། དེ་ལ་གློ་བུར་བའི་ཆོས་རྣམས་དབྱེར་མེད་དུ་མེད་པ་ལ་དགོངས་ནས་དེ་སྐད་གསུངས་ཏེ། དེ་དང་དེར་འདུ་ཤེས་པ་དང་རྣམ་པར་རྟོག་པ་ཞི་བར་བྱ་བའི་དོན་དུའོ། །དེ་བཞིན་དུ། ཆོས་ཀྱི་དབྱིངས་ངོ་བོ་ཉིད་མེད་པའི་ཕྱིར་བྱང་ཆུབ་སེམས་དཔའ་སྔོན་གྱི་མཐར་མི་དམིགས་སོ། །དེ་བཞིན་ཉིད་དང་ཡང་དག་པའི་མཐའ་དང་བསམ་གྱིས་མི་ཁྱབ་པའི་དབྱིངས་ངོ་བོ་ཉིད་མེད་པའི་ཕྱིར། བྱང་ཆུབ་སེམས་དཔའ་སྔོན་གྱི་མཐར་མི་དམིགས་སོ། །ཞེས་གསུངས་པ་ཡང། ཆོས་དབྱིངས་དེ་བཞིན་ཉིད་རང་གི་ངོ་བོ་མེད་པ་ལ་དགོངས་པ་མ་ཡིན་གྱི། གཞན་གློ་བུར་བའི་ཆོས་རྣམས་ཀྱི་ངོ་བོ་ཉིད་མེད་པ་ལ་དགོངས་ནས་དེ་སྐད་གསུངས་ཏེ། འདིར་ཡང་དགོས་པ་ནི་སྔ་མ་བཞིན་ནོ། །ཞེས་དང༌། རི་ཆོས་ངེས་དོན་རྒྱ་མཚོ་ལས། གལ་ཏེ་དོན་དམ་ཆོས་ཉིད་རང་གི་ངོ་བོས་མི་སྟོང་ན། ཆོས་ཐམས་ཅད་ངོ་བོ་ཉིད་མེད་པར་གསུངས་པ་དང་འགལ་ལོ། །ཞེ་ན། སྐྱོན་མེད་དེ། དེ་དང་དེའི་དགོངས་པ་མི་འགལ་བའི་ཕྱིར་རོ། །ཇི་ལྟར་མི་འགལ་ཞེ་ན། ཀུན་བརྟགས་ལ་ངོ་བོ་མེད་པ་ནི་རང་གི་མཚན་ཉིད་ཀྱིས་མེད་པ་སྟེ། ཀུན་རྫོབ་ཙམ་མམ་ལོག་པའི་ཀུན་རྫོབ་ཏུ་གྲུབ་པ་ཙམ་ལས་ཀུན་རྫོབ་བདེན་པའམ་ཡང་དག་ཀུན་རྫོབ་ཏུ་ཡང་མ་གྲུབ་པོ། །གཞན་དབང་ངོ་བོ་ཉིད་མེད་པ་ནི་ཀུན་རྫོབ་ཏུ་གཞན་ལས་སྐྱེ་བའི་ངོ་བོར་ཡོད་ཀྱང་རང་ལས་སྐྱེ་བའི་ངོ་བོར་མེད་ཅིང་ཡང་དག་པར་ན་ཅིར་ཡང་མ་གྲུབ་པ་སྟེ། དེ་ལྟར་དེ་གཉིས་ནི་རང་སྟོང་ཡིན་པའི་ཕྱིར་རང་གི་ངོ་བོ་མེད་པའོ། །དེ་གཉིས་མེད་པའི་གཞི་ཆོས་ཉིད་ཡོངས་གྲུབ་ནི་རང་གི་ངོ་བོ་མེད་པ་མ་ཡིན་ཡང་དེ་ལས་གཞན་པ་ཀུན་རྫོབ་ཀྱི་ཆོས་རྣམས་ཀྱི་ངོ་བོ་ཉིད་མེད་པའི་གཞི་ཡིན་པའི་ཕྱིར། དོན་དམ་བདེན་པའི་ངོ་བོ་སྟེ། ངོ་བོ་ཉིད་ཀྱི་སྐུའམ་རང་བཞིན་པའི་སྐུ་རང་བཞིན་འོད་གསལ་རང་བཞིན་ལྷན་ཅིག་སྐྱེས་པའི་ཡེ་ཤེས་རང་བཞིན་རྣམ་དག་རང་བཞིན་ལྷུན་གྲུབ་རང་བཞིན་དུ་གནས་པའི་རིགས་སོ། །ངོ་བོ་མེད་ལུགས་དེ་ལྟར་ཤེས་ན་ཡོད་མེད་དང་རྟག་ཆད་དང་སྒྲོ་སྐུར་གྱི་མཐར་མ་ལྷུང་བའི་དབུས་རྟོགས་པའི་ཕྱིར་དབུ་མའི་ལམ་ལས་མི་ཉམས་པར་གསུངས་ཏེ། དགོངས་འགྲེལ་དུ། ཆོས་རྣམས་ངོ་བོ་ཉིད་མེད་ཆོས་རྣམས་མ་སྐྱེས་དང། །ཆོས་རྣམས་མ་འགགས་ཆོས་རྣམས་གཟོད་ནས་ཞི་བ་དང། །ཆོས་རྣམས་ཐམས་ཅད་རང་བཞིན་མྱ་ངན་འདས་པར་ནི། །དགོངས་པ་མེད་པར་མཁས་པ་སུ་ཞིག་སྨྲ་བར་བྱེད། །མཚན་ཉིད་ངོ་བོ་ཉིད་མེད་སྐྱེ་བ་ངོ་བོ་ཉིད་མེད་དང། །དོན་དམ་ངོ་བོ་ཉིད་མེད་དོ་ཞེས་ངས་བཤད་དེ། །མཁས་པ་གང་ཞིག་དགོངས་པ་དེ་ལྟར་ཤེས་པ་ནི། །ཡོངས་སུ་ཉམས་པར་འགྱུར་བའི་ལམ་དུ་དེ་མི་འགྲོ། །ཞེས་དང༌།འཕགས་པ་ཐོགས་མེད་ཀྱི་ཞལ་སྔ་ནས་ཀྱང། ཤིན་ཏུ་རྒྱས་པ་ལས། ཆོས་ཐམས་ཅད་ངོ་བོ་ཉིད་མེད་དོ་ཞེས་གང་གསུངས་པ་དེ་ལ་དགོངས་པ་གང་ཡིན་ཞེ་ན། བདག་ཉིད་ལས་མི་འབྱུང་བ་དང། རང་གི་བདག་ཉིད་དུ་མེད་པ་དང། རང་གི་ངོ་བོ་ལ་མི་གནས་པ་དང། བྱིས་པས་བཟུང་བ་བཞིན་དུ་མཚན་ཉིད་མེད་པའི་ཕྱིར་རོ། །ཡང་ཀུན་ཏུ་བརྟགས་པའི་ངོ་བོ་ཉིད་ལ། མཚན་ཉིད་ངོ་བོ་ཉིད་མེད་པ་དང། གཞན་གྱི་དབང་ལ་སྐྱེ་བ་ངོ་བོ་ཉིད་མེད་པ་དང།ཡོངས་སུ་གྲུབ་པ་ལ་དོན་དམ་པ་ངོ་བོ་ཉིད་མེད་པའི་ཕྱིར་རོ། །ཞེས་དང། དེ་དང་གནད་གཅིག་པ་རྒྱལ་བ་བྱམས་པའི་ཞལ་སྔ་ནས་ཀྱང་གསུངས་ཏེ། མེད་པའི་སྟོང་བ་ཉིད་ཤེས་ཤིང། །དེ་བཞིན་ཡོད་པའི་སྟོང་སྟོང་ཉིད་དང། །རང་བཞིན་སྟོང་པ་ཉིད་ཤེས་ན། །སྟོང་པ་ཤེས་པ་ཞེས་བརྗོད་དོ། །ཞེས་ཀུན་བརྟགས་གཞན་དབང་བཅོས་མ་གློ་བུར་པ་ཡིན་པས་རང་གི་ངོ་བོ་མེད་པ་རང་སྟོང་དང། ཆོས་ཉིད་ཡོངས་གྲུབ་རང་བཞིན་གཉུག་མ་ཡིན་པས་གཞན་གྱི་ངོ་བོ་མེད་པ་གཞན་སྟོང་བསྟན་ཏོ། །དེ་ལྟ་བས་ན་ཆོས་ཐམས་ཅད་ངོ་བོ་ཉིད་མེད་པར་གསུངས་པས་ཆོས་ཉིད་རང་གི་ངོ་བོ་མེད་པར་མི་འགྱུར་ཏེ། ཆོས་དང་ཆོས་ཉིད་ཐ་དད་པའི་ཕྱིར་རོ། །དེ་དག་དབྱེར་མེད་དུ་འདོད་པ་ལ་ནི་ལུང་རིགས་ཀྱི་གནོད་པ་དཔག་ཏུ་མེད་དོ། །ཞེས་ཀུན་མཁྱེན་དོལ་པོ་པ་ཤེས་རབ་རྒྱལ་མཚན་གྱིས་ཤེར་ཕྱིན་གྱི་མདོ་ལས་དོན་དམ་པ་བདེན་པ་ངོ་བོ་ཉིད་མེད་པར་གསུངས་པར་མ་ཟད། དེའི་དགོངས་གཞི་དོན་དམ་པ་ངོ་བོ་ཉིད་མེད་པར་གསལ་བར་གསུངས་པས་ཀུན་རྫོབ་ཁོ་ན་ལ་དགོངས་པར་གསུངས་པའི་གནས་མེད་པའི་ཕྱིར་རོ།། གཉིས་པ། ཇི་ལྟར་འཕགས་པ་ཡབ་སྲས་ཀྱི་གསུངས་ལས་ཕྱི་རོལ་ཏུ་གྱུར་པ་ཡིན་ཞེས་པ་ལ། འཕགས་པ་ཡབ་སྲས་ཀྱི་གསུང་ལས་ཕྱི་རོལ་ཏུ་གྱུར་བ་མིན་ཚུལ་ནི། གོང་དུ་བཤད་པ་ལྟར་ཁོ་བོ་ནི་སྐབས་འདིའི་ཕྱོགས་སྔ་ཀུན་མཁྱེན་ཇོ་ནང་པ་ཡིན་པར་མི་སེམས་ཤིང༌། རྗེས་འབྲང་དག་གི་གསུང་ཟིན་ལྟར་ཕྱོགས་སྔ་ཀུན་མཁྱེན་ཇོ་ནང་པ་ཡིན་ན་ནི། འཕགས་པ་ཡབ་སྲས་ཀྱི་གསུང་ལས་ཅུང་ཟད་ཀྱང་ཕྱི་རོལ་ཏུ་གྱུར་པ་མིན་ཏེ། ཆོས་ཉིད་དོན་དམ་བདེན་པ་བདེན་གྲུབ་ཏུ་བཞེད་པ་དེ་ཡང༌། བདག་གཉིས་ཀྱི་རང་བཞིན་ནམ། འཇིག་རྟེན་ཀུན་རྟོག་གིས་བརྟགས་པའི་བདེན་གྲུབ་ཏུ་བཞེད་པའི་དོན་གཏན་ནས་མ་ཡིན་ཏེ། རི་ཆོས་ངེས་དོན་རྒྱ་མཚོ་ལས། དེ་ལ་བདེ་གཤེགས་སྙིང་པོ་བདག་གཉིས་ཀྱིས་སྟོང་བའི་ཕྱིར་མུ་སྟེགས་བྱེད་ཀྱི་བདག་དང་མི་མཚུངས་ཤིང། ཞེས་དང༌། ཡང་དེ་ལས། དཔལ་རྙོག་པ་མེད་པའི་རྒྱུད་དུ་ཡང། སངས་རྒྱས་ཐམས་ཅད་འདུས་པའི་བདག །མྱུར་བར་བྱིན་གྱིས་རློབ་པར་འགྱུར། །སངས་རྒྱས་ཐམས་ཅད་འདུས་པའི་བདག །སངས་རྒྱས་ཀུན་གྱི་སྡོམ་པའི་བདག །ཅེས་པ་ལ་སོགས་པའི་དོན་ཡང་མི་སྲིད་པར་འགྱུར་ཏེ། དེ་དག་ལས་དོན་གཞན་དུ་གྱུར་པའི་བདག་ནི་ཐམས་ཅད་མཁྱེན་པས་མ་གསུངས་ཤིང། ཁོ་བོ་ཅག་ཀྱང་མི་འདོད་ལ། མིང་གཞན་ནི་ཤིན་ཏུ་མང་བར་གསུངས་པའི་ཕྱིར། མིང་ཙམ་ལས་འཁྲུལ་བར་མི་བྱ་སྟེ། དོན་ལ་རྟོན་པ་ཉིད་ལས་སོ། །ཞེས་དང༌། དེའི་ཕྱིར་འཁོར་ལོ་ཕྱི་མ་གཉིས་དང་རྡོ་རྗེ་ཐེག་པའི་དོན་གཅིག་མོད་ཀྱི་ཉམས་སུ་ལེན་པ་ན་ལ་ཟློ་བ་ཆོས་ཉིད་ཟབ་མོ་ལ་འཁོར་ལོ་བར་པ་དང་མཐུན་པར་རྟོག་མེད་སྤྲོས་བྲལ་དུ་མཉམ་པར་བཞག་ནས་རྗེས་ཐོབ་ཏུ་ཤན་འབྱེད་པའི་ཚེ་ཆོས་རྣམས་ལ་ཡང་དག་པར་སོ་སོར་རྟོག་པ་ན་འཁོར་ལོ་ཐ་མ་དང་རྡོ་རྗེའི་ཐེག་པ་ལས་གསུངས་པ་བཞིན་དུ་ལེགས་པར་རྣམ་པར་ཕྱེ་སྟེ་ངོ་སྤྲད་ན་ཐེག་པ་ཆེན་པོའི་གསུང་རབ་ཐམས་ཅད་ཀྱི་དོན་ཟབ་མོ་ཉམས་སུ་ལེན་པ་ཚང་ལ་མ་ནོར་ཞིང་ཡོངས་སུ་དག་པ་ཉིད་དུ་འགྱུར་རོ། །ཞེས་ཆོས་ཉིད་སྤྲོས་པའི་མཚན་མ་གང་དུ་ཡང་མ་གྲུབ་པར་གསུངས་པའི་ཕྱིར་རོ། །དེས་ན་བདེན་པར་གྲུབ་པ་ཞེས་པ། བདེན་པ་དང་རྫུན་པ་ཞེས་པའི་བདེན་པ་མི་བསླུ་བ་དེ་ཉིད་ཀྱི་དོན་དང༌། དོན་དམ་པར་ཡོད་པ་ཞེས་པའི་དོན་ཡང་ཡང་དག་ཡེ་ཤེས་ཀྱི་ཡུལ་དུ་ཡོད་ཚུལ་ཡིན་ཏེ། ཀུན་མཁྱེན་ཆེན་པོའི་བཀའ་བསྡུ་བཞི་པ་ལས། མྱང་འདས་ཆེན་པོ་བདེན་པར་གསུངས་པ་དང། ། འགོག་བདེན་བདེན་པའི་མཆོག་ཏུ་གསུངས་པ་དང། །དེ་བཞིན་ཉིད་བདེན་གཞན་ནི་བརྫུན་པ་དང། །བདེན་དོན་བཅུ་གཉིས་ལ་སོགས་གཤིས་ལུགས་ཀྱི། །བདེན་པ་མཐར་ཐུག་རྫོགས་ལྡན་ཆོས་ལས་གསུངས། །ཞེས་དང༌། རི་ཆོས་ངེས་དོན་རྒྱ་མཚོ་ལས། དོན་དམ་པར་ཡོད་པ་དང། དོན་དམ་པར་བདེན་པའི་ཕྱིར་རོ། །དེ་ཡང་བྷཱུ་ཏ་ཀོ་ཊི། ཞེས་པ་འདིར་ཡོད་པའི་མཐར་ཐུག་པ་དང་བདེན་པའི་མཐར་ཐུག་པ་ལ་འཇུག་པའི་དོན་ཉིད་ཀྱིས་ཤེས་པར་བྱའོ། །དེ་ཉིད་མཐར་ཐུག་གི་སངས་རྒྱས་ཡིན་ཞིང་འདི་ལ་དགོངས་ནས་བཅོམ་ལྡན་འདས་ཀྱིས། ཁྱེའུ་བཞིའི་ཏིང་ངེ་འཛིན་གྱི་མདོར།གང་མི་བདེན་པ་དེ་དེ་བཞིན་ཉིད་མ་ཡིན་ནོ། །གང་དེ་བཞིན་ཉིད་མ་ཡིན་པ་དེ་དེ་བཞིན་གཤེགས་པ་མ་ཡིན་ནོ། །ཞེས་སོགས་རྒྱ་ཆེར་གསུངས་སོ། །གལ་ཏེ་ཆོས་གང་ལ་ཡང་བདེན་པ་མེད་པས་དོན་དམ་པར་བདེན་པ་མི་སྲིད་དོ། །ཞེ་ན་མ་ཡིན་ཏེ། ཀུན་རྫོབ་ཏུ་མི་བདེན་ན་ཀུན་རྫོབ་ཀྱི་བདེན་པར་མི་རུང་བས་ཀུན་རྫོབ་བདེན་པ་གང་ཡིན་པ་དེ་ཀུན་རྫོབ་ཏུ་བདེན་གྱི། དོན་དམ་དུ་མི་བདེན་པ་ཇི་ལྟ་བ་དེ་བཞིན་དུ། དོན་དམ་དུ་མི་བདེན་ན་དོན་དམ་བདེན་པར་མི་རུང་བས་དོན་དམ་བདེན་པ་གང་ཡིན་པ་དེ་དོན་དམ་དུ་བདེན་གྱི་ཀུན་རྫོབ་ཏུ་བདེན་པ་མ་ཡིན་ནོ། །དེ་ཡང། འཕགས་པ་ཀླུ་སྒྲུབ་ཞབས་ཀྱིས་རང་འགྲེལ་ག་ལས་འཇིགས་མེད་དུ། དོན་དམ་པའི་བདེན་པ་ནི་འཕགས་པ་རྣམས་ཀྱིས་ཕྱིན་ཅི་ལོག་ཐུགས་སུ་ཆུད་པས་ཆོས་ཐམས་ཅད་སྐྱེ་བ་མེད་པར་གཟིགས་པགང་ཡིན་པ་སྟེ། དེ་ནི་དེ་དག་ཉིད་ལ་དོན་དམ་པར་བདེན་པ་ཉིད་ཡིན་པས་དོན་དམ་པའི་བདེན་པའོ། །ཞེས་དང། འགྲེལ་མཆོག་འདི་བོད་མར་འདོད་པ་རྣམས་ནི་འཁྲུལ་ཏེ། སློབ་དཔོན་སྤྱན་རས་གཟིགས་བརྟུལ་བཞུགས་ཀྱིས་མཛད་པའི་ཊཱི་ཀ་དང། ཇོ་བོའི་ལམ་སྒྲོན་གྱི་རང་འགྲེལ་དུ། དབུ་མ་རྩ་ཤེ་ལ་འགྲེལ་པ་བརྒྱད་ཡོད་དེ། སློབ་དཔོན་བདག་ཉིད་ཀྱིས་མཛད་པའི་ག་ལས་འཇིགས་མེད་དང། ཞེས་སོགས་གསུངས་པའི་ཕྱིར་རོ། །ཞེས་དང༌། ཆོས་རྗེ་ཀུན་མཁྱེན་ཆེན་པོས་དཔོན་བྱང་ལ་ཕུལ་བའི་ལྟ་བ་ཤན་འབྱེད་ལས། ཡང་དག་པར་མེད་པ་དང། ཡོད་པའི་དོན་ནི། ཆོས་དང་ཆོས་ཉིད་ལ་རྒྱལ་བ་བྱམས་པས་གསུངས་ཏེ། མཐར་ཐུག་གི་དབུ་མ་ཆོས་དང་ཆོས་ཉིད་རྣམ་པར་འབྱེད་པ་ལས། གཉིས་པོ་དག་ནི་གཅིག་ཉིད་དང༌། །སོ་སོ་བ་ཡང་མ་ཡིན་ཏེ། །ཡོད་པ་དང་ནི་མེད་པ་དག །ཁྱད་པར་ཡོད་དང་མེད་ཕྱིར་རོ། །ཞེས་པ་དང། མཐར་ཐུག་གི་དབུ་མ་མདོ་སྡེའི་རྒྱན་དུ་ཡང། བྱིས་པ་ཡང་དག་ཉིད་བསྒྲིབས་ནས། །ཡང་དག་མིན་པ་ཀུན་ཏུ་སྣང། །བྱང་ཆུབ་སེམས་དཔས་དེ་བསལ་ནས། །ཡང་དག་ཉིད་ནི་ཀུན་ཏུ་སྣང། །ཞེས་པ་དང། དོན་མེད་པ་དང་དོན་ཡོད་དག །མི་སྣང་སྣང་བ་ཉིད་ཤེས་བྱ། །ཞེས་པ་དང། འགྲོ་བ་དག་ནི་དེ་ལས་གཞན་ཡང་ཅུང་ཟད་ཡོད་མིན་ལ། །འགྲོ་བ་མ་ལུས་པ་ཡང་དེ་ལ་ཀུན་ཏུ་རྨོངས་པའི་བློས། །ཡོད་པ་ཀུན་ནས་སྤངས་ཏེ་མེད་ལ་མངོན་ཞེན་གང་ཡིན་པ། །འཇིག་རྟེན་རྨོངས་པའི་རྣམ་པ་ཚབས་ཆེན་འདི་ཁོ་ཇི་ལྟ་བུ། །ཞེས་པ་ལ་སོགས་པས་ཀུན་བཏགས་གཞན་དབང་གི་ཆོས་རྣམས་ནི་ཡང་དག་པར་མེད་པ་དང། ཆོས་ཉིད་ཡོངས་གྲུབ་ནི་ཡང་དག་ཏུ་ཡོད་པར་བསྟན་ཏེ། འདི་དག་གིས་ཀྱང་རང་སྟོང་དང་གཞན་སྟོང་གི་དོན་བསྟན་པ་ཡིན་ནོ། །ཞེས་གསུངས་པའི་ཕྱིར་རོ། །འདིར་ཀུན་མཁྱེན་ཇོ་ནང་བ་ཆེན་པོ་རང་གི་གཞུང་ལས་ལན་མདོར་བསྡུས་ཤིག་སྐུལ་ངོ་མ་ལྡོག་ཙམ་དུ་ཤར་མར་བྱས་ཀྱི། ཐུགས་སྲས་བུ་ཆེན་དག་དང་རྗེ་ཏཱ་ར་ནཱ་ཐ་སོགས་ཀྱི་གཞུང་ལུགས་ཀྱི་ཟུར་བརྒྱན་པར་ཡང་མ་བྱས་ལ། ཀུན་མཁྱེན་ཆེན་པོའི་གཞུང་གི་བཞེད་པ་ད་དུང་ཞིབ་པ་དང་རྒྱས་པར་ནི་ཁོང་གི་གཞུང་ཆེན་ཁག་ལ་མཇལ་བར་ཞུ་བ་ཡིན་ནོ། །ཅེས་རྗེ་བདག་ཉིད་ཆེན་པོ་ལ་དད་གུས་ཆེ་པའི་ངག་དབང་དངོས་གྲུབ་དཔལ་གྱིས་ཕུལ་བའོ།། གསང་ཕུ་ནེའུ་ཐོག་གི་མཁན་རབས་དྲུག་པ་ཕྱྭ་པ་ཆོས་ཀྱི་སེང་གེ།གསང་ཕུ་ནེའུ་ཐོག་གི་མཁན་རབས་དྲུག་པ་ཕྱྭ་པ་ཆོས་ཀྱི་སེང་གེ། 1109---1169རྒྱལ་བའི་བསྟན་པ་འབྱུང་གནས་དཔལ་ལྡན་གསང་ཕུ་ནེའུ་ཐོག་གི་མཁན་རབས་དྲུག་པ་ཕྱྭ་པ་ཆོས་ཀྱི་སེང་གེ་མཆོག་ནི་བོད་རབ་བྱུང་གཉིས་པའི་ས་མོ་གླང་སྤྱི་ལོ་1109ལ་ཡུལ་དབུས་ཀྱི་ཆ་སྟག་རྩེ་རྫོང་ཁོངས་ཕྱྭ་ཞེས་པའི་སར་སྐུ་འཁྲུངས། ཁོང་ན་གཞོན་པའི་དུས་སུ་ཐུགས་རིག་ཤིན་ཏུ་བཟང་བས་རྩེད་རའི་ནང་དུ་ཡང༌། ཀུན་བཏགས་ཀྱི་རྩེད་མོ་རྩེས་རྩེས་ནས། །གཞན་དབང་གི་ལྕི་བ་མ་བཏུས་ན། །ཡོངས་གྲུབ་ཀྱི་ཨ་མས་བརྡུང་དུ་འོང༌། །ཞེས་པའི་གླུ་དབྱངས་ལེན་པ་སོགས་ངོ་མཚར་བའི་མཛད་སྤྱོད་ཀྱི་སྙན་པ་དགེ་བཤེས་རྒྱ་དམར་བ་བྱང་ཆུབ་གྲགས་ཀྱིས་གསན་ཏེ། ཕ་མ་ལས་བསླངས་ནས་ཞབས་ཕྱི་ལ་ཉར་གནང་མཛད་པ་བརྒྱུད། རྒྱ་དམར་བའི་མདུན་ནས་དབུ་ཚད་བྱམས་ཆོས་སོགས་ལ་སྦྱང་པ་མཛད། ཞང་ཚེ་སྤོང་ཆོས་ཀྱི་བླ་མ་ལས་རབ་ཏུ་བྱུང་སྟེ་མཚན་ཆོས་ཀྱི་སེང་གེ་ཞེས་གསོལ། ཞང་ཆོས་ཀྱི་བླ་མ་དང་ཉང་བྲན་ཆོས་ཀྱི་ཡེ་ཤེས་གཉིས་ཀྱི་མདུན་ནས། ཕར་ཕྱིན་དང་བསླབ་བཏུས་སྤྱོད་འཇུག་སོགས་མདོ་ཕྱོགས་ཀྱི་གཞུང་ལུགས་ཀུན་ལ་གསན་བསམ་དཔྱིས་ཕྱིན་པ་མཛད། བྱ་བྲལ་འདུལ་འཛིན་བརྩོན་འགྲུས་འབར་ལས་བསྙེན་པར་རྫོགས་ཏེ། འདུལ་བའི་གཞུང་ལུགས་མཐའ་དག་ལ་སྦྱང་པ་མཛད་དེ་སོར་མདོ་དང༌། འདུལ་བ་འོད་ལྡན་གྱི་འགྲེལ་བ། དགེ་ཚུལ་གྱི་བསླབ་བྱ་སོགས་འདུལ་བའི་དགོངས་འགྲེལ་གྱི་བསྟན་བཅོས་མང་པོ་བརྩམས། དེ་ནས་དགུང་ལོ་ཉེར་གསུམ་ཙམ་ལ་སྐྱེས་སྟོབས་ཀྱི་ཤེས་རབ་ལས་ལྷག་པའི་ལྷའི་བྱིན་རླབས་ཞུགས་པས། རིག་པའི་རྣམ་དཔྱོད་ཀྱི་མཐུ་ཐོགས་པ་མེད་པ་ཞིག་བརྙེས་ནས་དབུ་ཚད་བྱམས་ཆོས་སོགས་ཀྱི་གཞུང་འགྲེལ་མང་པོ་བརྩམས་ཏེ་མཚན་སྙན་ཤིན་ཏུ་རྒྱས། དེ་ནས་རབ་བྱུང་གསུམ་པའི་ཆུ་སྤྲེལ་སྤྱི་ལོ་༡༡༥༢ནས་ལྕགས་སྟག་སྤྱི་ལོ་༡༡༧༠བར། གསང་ཕུ་ནེའུ་ཐོག་གི་གདན་རབས་དྲུག་པ་གནང་ནས། རིན་ཆེན་འབྱོར་ལྡན་གྱི་གསང་ཕུའི་གདན་རབས་ལས། ཁ་ཅིག་ཕྱྭ་པ་ཆོས་སེང་གིས་དང་པོ་ལོ་བཅོ་བརྒྱད་གདན་ས་པ་མཛད། ལོ་བཅོ་བརྒྱད་རིང་གདན་ས་བསྐྱངས་ཏེ་རིགས་ལམ་བྱང་བའི་ཆེད། ཚད་བསྡུས་དང་དབུ་བསྡུས་ཀྱི་སྲོལ་ཐོག་མར་ཕྱེས་ཏེ། ཚད་མ་བསྡུས་པ་ཡིད་ཀྱི་མུན་སེལ་རང་འགྲེལ་དང་བཅས་པ། ཡིད་ཀྱི་མུན་སེལ་རྐྱང་པ་གཉིས་བརྩམས་ཏེ། བསྡུས་གྲྭའི་ལམ་སྲོལ་གསར་བཏོད་གནང་བ་བརྒྱུད། དམ་བཅའ་བ་དེ་ཚོགས་པའི་དབུས་སུ་བཞུགས་ཏེ་རྣམ་ཐར་སྒོ་བཞིའི་ལན་འདེབས་ཚུལ་དང༌། རྟགས་གསལ་བ་ཚོགས་པའི་དཀྱིལ་ནས་ལངས་ཏེ་དྷཱི།་ཆོས་ཅན་ཞེས་ཐལ་འགྱུར་འཕེན་པའི་སྒོ་ནས་རྟགས་གསལ་བཙུགས་ཏེ་ཁྱབ་མཐའ་འགོད་པ། རྒྱུ་མཚན་འདྲི་བ། འཁོར་གསུམ་དང་ཚ་རྒྱག་པ་སོགས་ཀྱིས་སློབ་གཉེར་གྱི་ལམ་སྲོལ་ཕྱེས་བས། ཚད་མའི་རིགས་ལམ་གྱི་སྒོ་ནས་དབུ་ཚད་བྱམས་ཆོས་སོགས་ཀྱི་སློབ་གཉེར་ལ་འཕེལ་རྒྱས་འགྲོ་བའི་སྐུལ་ལྕག་ཆེན་པོ་བྱུང་སྟེ། གསང་ཕུའི་གདན་ས་མཛད་རྗེས་ཞང་གྲོ་ལུང་པའི་ཞབས་སུ་འབད་པ་ཆེན་པོས་གཏུགས་ཏེ། རྔོག་ལོའི་ཁ་ཆེ་ནས་བརྒྱུད་པ་ཕར་ཕྱིན་གཙོ་བོར་གྱུར་པའི་མདོ་ཕྱོགས་ཀྱི་བཤད་རྒྱུན་རྣམས་ལ་ཁུངས་ཐུབ་ཀྱིས་ཞུན་ཐར་བཅད་དེ་གསན། སྤྱིར་ཁོང་གིས་གཞུང་ལུགས་བཞི་བཅུ་ཙམ་གྱི་རྣམ་བཤད་མཛད་ཅིང་གྲུབ་མཐའི་སྤྱི་ཁོག་རྔོག་ལོ་དང་མཐུན་ཀྱང༌། ཁོང་ནི་རིགས་ལམ་ལ་ཞིབ་ཆ་ཆེ་བས་གནས་སྐབས་འཛིན་མཚམས་ཕྲན་ཚེགས་ལ་ཡང་དགག་པ་མང་པོ་མཛད། རྡུལ་ཕྲན་ཐུག་མེད་དང་སྟོང་ཉིད་བདེན་གྲུབ་ཏུ་འདོད་པར་བཤད་པ་ནི། ཤར་གསུམ་དབུ་མའི་སྟོང་ཐུན་ནམ་དབུ་མ་བསྡུས་པ་དེ་ཁོ་ན་ཉིད་ཀྱི་བདེན་གཉིས་ཀྱི་མཚན་ཉིད་བཤད་པའི་སྐབས་སུ་གསལ་བ་དང༌། སློབ་དཔོན་ཟླ་བ་གྲགས་པའི་ལུགས་ལ་ཆོས་ཅན་མཐུན་སྣང་དུ་མ་གྲུབ་ན་ཐལ་བ་འགོད་པ་མི་འཐད་པ་སོགས་ཉེས་ཆེན་བརྒྱད་ཀྱི་དགག་པ་མཛད་པས། རྒྱ་གར་དུ་ཡང་དཔལ་ལྡན་ཟླ་བའི་ལུགས་ཀྱི་དབུ་མ་བོད་དུ། ཕྱྭ་པ་ཆོས་སེང་གིས་དར་རྒྱས་མ་བཅུག་པའི་གྲགས་གཡེར་ཆེན་པོ་བྱུང་སྟེ། སྐབས་དེ་དུས་ཙམ་ན་དཔལ་ལྡན་ཟླ་བའི་ཞབས་ཀྱི་དབུ་མའི་དགོངས་པ་འགྲེལ་བ་ལ་འགྲན་ཟླ་དང་བྲལ་བ། པཎྜི་ཏ་ཛཱ་ཡ་ཨ་ནནྟ་བོད་དུ་ཕེབས་ཏེ་རྩོད་པ་མཛད་པས་ཕྱྭ་པ་ཆོས་སེང་མ་ཐུབ་པར། པཎྜི་ཏ་ཕམ་སྟེ་ཞལ་སྐྱེངས་གནང་ནས་བོད་དུ་བཞུགས་མ་ནུས་པར་གྲགས། རྒྱ་ནག་ཏུ་ཕེབས་ཏེ་ལོ་གསུམ་རིང་འཇམ་དབྱངས་ཀྱི་སྒྲུབ་པ་མཛད་དེ་བཞུགས། དེ་རྗེས་སྤོབས་པ་ཅུང་ཟད་རྙེད་དེ་སླར་ཡང་བོད་དུ་ཕེབས་ཏེ་ཕྱྭ་པ་དང་རྩོད་པའི་ཤག་འགྱེད་པར་དགོངས་ཀྱང༌། བོད་རབ་བྱུང་གསུམ་པའི་ས་མོ་གླང་ལོ་སྟེ་སྤྱི་ལོ་1169ཕྱྭ་པ་ཞི་བར་གཤེགས་ཟིན། གང་གི་དབུ་མའི་སྟོང་ཐུན་ལས་བདེན་གཉིས་ཀྱི་མཚན་ཉིད་བཤད་པའི་སྐབས་སུ། དོན་དམ་བདེན་པའི་མཚན་ཉིད་ནི་མཐར་ཐུག་འཇལ་བའི་ཚད་མའི་ཡུལ་དུ་བདེན་པ་སྟེ། ལྡོག་པ་འགའ་ཞིག་ལ་ཁྱད་པར་དཔྱད་པས་བདེན་པའི་ཞེན་པ་བཟློག་ཏུ་མེད་པ་ནི་དཔྱད་བཟོད་པ་ཡིན་ལ། དེ་འཇལ་བ་ནི་མཐར་ཐུག་འཇལ་བའི་ཚད་མ་ཡིན་ལ། དེའི་གཞལ་བྱར་བདེན་པ་དོན་དམ་པའི་བདེན་པའོ་ཞེས་གསུངས་པ་དང༌། ཡང་དབུ་མ་པ་དག་ནི་རྒྱུན་དང་རིལ་བོ་ནི་སྐད་ཅིག་དང་རྡུལ་དུ་ཕྱེ་བས་བདེན་པའི་ཞེན་པ་བཟློག་པར་བྱ་བ་ཡིན་ཞིང༌། རྡུལ་ཕྲན་དང་སྐད་ཅིག་ཀྱང་དེ་ཉིད་ལ་ཕྱོགས་བཅུ་དང་ཐོག་མ་དང་དབུས་དང་ཐ་མར་ཕྱེ་བས་བདེན་པའི་ཞེན་པ་བཟློག་པར་བྱ་བ་ཡིན་ལ། དེ་བཞིན་དུ་ཆ་ཐུག་པ་མེད་པས་ཆ་ལའང་ཆར་ཕྱེ་བའི་མཁས་པའི་དབང་པོ་ལགས་སོ། །དམ་པ་གང་ནི་བསམ་བཞིན་དུ་བོད་ཁ་བ་གངས་ཅན་པའི་ཡུལ་འདིར་རིགས་ལམ་དྲི་མ་མེད་པའི་སྒོ་བརྒྱ་བྱེ་བའི་སྒོ་ནས་གཞུང་ལུགས་ཟབ་དོན་གོ་དཀའ་བ་ལེགས་པར་ཕྱེ་བ་ཡིན་པས་དམ་པ་གང་གི་རིགས་ལམ་ལ་འབད་རིགས་སོ། །དངོས་གྲུབ་དཔལ་ནས། ཇོ་ནང་རི་ཁྲོད་ཀྱི་བྱུང་བ་དང་འབྲེལ་ཏེ་ཆོས་རྗེ་ཀུན་མཁྱེན་ཇོ་ནང་པའི་རྣམ་ཐར་མདོར་བསྡུས་པ།ཇོ་ནང་རི་ཁྲོད་ཀྱི་བྱུང་བ་དང་འབྲེལ་ཏེ་ཆོས་རྗེ་ཀུན་མཁྱེན་ཇོ་ནང་པའི་རྣམ་ཐར་མདོར་བསྡུས་པ་ཞེས་བྱ་བ་བཞུགས་སོ། ། དེ་ལ་འདིར་གང་གླེང་བར་བྱ་བ་ནི། ༧ཆོས་རྗེ་ཀུན་མཁྱེན་དོལ་པོ་བ་ཤེས་རབ་རྒྱལ་མཚན་དཔལ་བཟང་པོ་ནི། བོད་གངས་རིའི་ལྗོངས་ཀྱི་ནང་བ་སངས་རྒྱས་པའི་ཆོས་བརྒྱུད་ཆེན་པོ་ལྔའི་ཡ་གྱལ་དཔལ་ལྡན་རྒྱལ་བ་ཇོ་ནང་གི་གཞན་སྟོང་དབུ་མ་ཆེན་པོའི་གཞི་ལམ་འབྲས་གསུམ་གྱི་གྲུབ་མཐའི་བཞེད་སྲོལ་རྒྱ་ཆེར་བོད་འདིར་ཐོག་མར་འབྱེད་པ་པོ་ཡིན་ལ། དེ་ཡང་རྔ་བོ་ཆེའི་མདོ་སྡེ་ལས། ལི་ཙ་བཱི་གཞོན་ནུ་འཇིག་རྟེན་ཐམས་ཅད་ཀྱིས་མཐོང་ན་དགའ་བ་ཞེས་བྱ་བ་མ་འོངས་པའི་དུས་ན་ཀ་ཡོ་རིའི་རྒྱུད་དུ་ངའི་མིང་འཆང་བའི་དགེ་སློང་དུ་གྱུར་ཏེ། ཞེས་སོགས་གསུངས་པ་དང༌། གཙུག་ཏོར་རྣམ་པར་རྒྱལ་མའི་རྒྱུད་ལས། བདེ་གཤེགས་མྱ་ངན་འདའ་འོག་ནས། །ལོ་ནི་སྟོང་ཕྲག་ཕྱེད་རིང་ཚེ། །གདོང་དམར་ཡུལ་དུུ་ང་འདྲ་བའི། །བསྟན་པ་འཛིན་པའི་དགེ་སློང་ཞིག །ཆུ་བོ་ལྗོན་ཤིང་འཕྲེང་མཛེས་སུ། །ཀ་ཡོ་རི་ཡི་གྲོང་ཁྱེར་དུ། །ཡབ་ནི་ཡེ་ཤེས་དབང་ཕྱུག་ཆེ། །ཡུམ་ནི་ཚུལ་ཁྲིམས་རྒྱན་ཞེས་གྲགས། །སྲས་ནི་སངས་རྒྱས་མིང་ཅན་འབྱུང༌། །ང་ཡི་བསྟན་པའི་རྒྱལ་མཚན་འཛུག །ཆོས་ཀྱི་དུང་འབུད་དར་ཕྱར་འགྱུར། །ཞེས་སོགས་མདོ་རྒྱུད་དུ་མ་ནས་ཡང་ཡང་ལུང་བསྟན་པ་ལྟར་ཕྱི་ལོ༡༢༩༢་རབ་ལོ༢༦༦ལོར་ཡུལ་མངའ་རིས་དོལ་པོ་པན་ཚང་ཀ་ཡོ་རིའི་གྲོང་ཁྱེར་དུ་ཡབ་ཡེ་ཤེས་དབང་ཕྱུག་དང་ཡུམ་ལྷ་མོ་ཚུལ་ཁྲིམས་རྒྱན་གཉིས་ཀྱི་སྲས་སུ་རབ་བྱུང་ལྔ་བ་ཆུ་ཕོ་འབྲུག་ལ་ཆེས་ངོ་མཚར་བའི་མཛད་ཚུལ་དང་བཅས་སྐུ་བལྟམས། ཡུལ་དུ་བླ་མ་སྐྱི་སྟེངས་པ་སོགས་བླ་མ་མང་རབ་བསྟེན། ཆོས་ཀྱང་རྙིང་མ་དང་དབུ་མ་རིག་ཚོགས་སོགས་དང༌། རིག་གནས་བཟོ་གནས་ཕྲ་མོ་མང་པོ་ཆུང་ངུའི་དུས་ནས་ཚེགས་མེད་དུ་མཁྱེན། དགུང་ལོ་བཅུ་གཅིག་ལ་མཁན་པོ་ཚུལ་ཁྲིམས་སྙིང་པོ་སོགས་ལས་དགེ་ཚུལ་གྱི་སྡོམ་པ་བླངས་ནས་མཚན་ཤེས་རབ་རྒྱལ་མཚན་བཏགས་ཤིང་ཀ་རི་ཀ་དང་གཞུང་འགྲེལ་སོགས་གསན། དགུང་ལོ་བཅུ་དྲུག་ལ་སྐྱི་སྟོན་འཇམ་དབྱངས་གྲགས་པ་དང་མཇལ་ནས་འཕྲེང་བ་སྐོར་གསུམ་སོགས་ཟབ་ཆོས་མང་དུ་གསན། དགུང་ལོ་ཉེར་གཅིག་ནས་སླར་བླ་མ་སྐྱི་སྟོན་པ་སོགས་ཀྱི་དྲུང་ནས་ཕར་ཚད་མངོན་གསུམ་དང༌། སྤྱོད་འཇུགརྒྱས་འབྲིང་བསྡུས་གསུམ་སོགས་ཤེར་ཕྱིན་གྱི་མདོ་རྣམས་ཡུད་ཙམ་གསན་པས་ཐམས་ཅད་ཐུགས་སུ་ཆུད། དབུས་གཙང་གི་སྡེ་ཕལ་ཆེར་དུ་གྲྭ་སྐོར་ལ་ཕེབས་པས་མཁྱེན་རབ་ཀྱི་རྩལ་དང༌། རིག་པའི་རྣམ་འགྱུར་ཕུལ་དུ་བྱུང་ཞིང༌། ཤེར་ཕྱིན་འབུམ་པ་སོགས་མདོ་སྡེ་དུ་མའི་ཚིག་མཐའ་དག་ཐུགས་ལ་བྱང་བར་བཞུགས་པ་དང༌། གཞུང་ཆེ་ཆུང་གང་ལ་ཡང་ཐོགས་པ་མེད་པར་མཁྱེན་པ་རྒྱས་པས་ཐམས་ཅད་ཀྱིས་ཀྱང་ཀུན་མཁྱེན་རང་དུ་འདུག་ཅེས་བསྔགས་པས་ཀུན་མཁྱེན་གྱི་མཚན་དེ་དུས་ནས་ཀྱང་ཐོགས། སྤྱིར་མདོ་སྔགས་ཀྱི་ཆོས་གསན་པའི་བླ་མ་སུམ་ཅུ་ལྷག་མངའ་བ་ལས་མཆོག་ཏུ་གྱུར་པ་སྐྱི་སྟོན་འཇམ་དབྱངས་ལ། མདོ་སྔགས་ཀྱི་གཞུང་ཆེ་ཆུང་དཔག་མེད་གསན། དུས་འཁོར་གྱི་ཕྱོགས་ལ་ཡང་དང་བོར་བླ་མ་འདིའི་དྲུང་དུ་དབང་རྒྱུད་མན་ངག་ཐམས་ཅད་ལ་ཤིན་ཏུ་མཁས་པར་མཛད། འཆད་ཉན་ཟུར་ཆོས་པ་ཡང་ལོ་ཤས་མཛད་ནས་ཆོས་ལུང་ཚོགས་པའི་མཁན་ཆེན་བསོད་ནམས་གྲགས་པ་སོགས་དགེ་འདུན་གྲངས་ཚང་ལས་བསྙེན་རྫོགས་ཞུས་ཤིང༌། འདུལ་བ་མདོ་རྩ་གཞུང་འགྲེལ་བཅས་པ་གསན་ཅིང་མཁྱེན། དགུང་ལོ་སོ་གཅིག་པ་ཕྱི་ལོ་༡༣༢༢རབ་ལོ༢༩༦ལོར་ཇོ་ནང་རི་ཁྲོད་ཆེན་མོར་ཕེབས། གནས་མཆོག་དེ་ནི་ཇོ་ནང་གི་རྩ་བའི་གདན་སའམ་ཐོག་མའི་དགོན་སྡེ་ཡིན་ཞིང༌། གནས་དེ་ནི། སློབ་དཔོན་ཆེན་པོ་པདྨ་འབྱུང་གནས་བོད་དུ་བྱོན་པའི་དུས་སུ། ཇོ་ནང་ནགས་རྒྱལ་གྱི་རི་ལ་ལན་མང་དུ་ཕེབས་ནས་བཞུགས། དེ་རྗེས་སུ་རིག་པ་འཛིན་པའི་ས་ལ་བཞུགས་པ། སྣུབས་ཆེན་ནམ་མཁའི་སྙིང་པོ་ལ་སོགས་པས་སྒྲུབ་གནས་སུ་མཛད། དེའི་རྗེས་ནས་ཀུན་སྤངས་ཐུགས་རྗེ་བརྩོན་འགྲུས་དང༌། བྱང་སེམས་རྒྱལ་བ་ཡེ་ཤེས་དང༌། མཁས་བཙུན་ཡོན་ཏན་རྒྱ་མཚོ་རྣམས་བཞུགས། དེ་ནས་གནས་འདིར་༧ཆོས་རྗེ་ཀུན་མཁྱེན་དོལ་པོ་བ་ཤེས་རབ་རྒྱལ་མཚན་དཔལ་བཟང་པོ་ཕེབས་ཤིང་ལོ་བཅོ་ལྔའི་བར་དུ་གདན་སར་བཞུགས་ལ། མཁས་བཙུན་ཆེན་པོ་ལ་སྤྱིར་དབང་དང་གདམས་པ་མང་དུ་གསན། སྦྱོར་དྲུག་གི་ཁྲིད་གསན་ཏེ་ཉམས་སུ་བླངས་པ་ལ་བརྟེན་ནས་སོར་བསམ་སྲོག་རྩོལ་མཐར་ཕྱིན་པའི་རྟགས་རྒྱུད་ནས་བཤད་པ་བཞིན་མངའ། དེ་ཡང་བླ་མའི་བཀའ་ནན་ཆེན་པོས་དགུང་ལོ་སོ་ལྔ་པར་གདན་སར་ཕེབས། མཁས་བཙུན་ཆེན་པོ་ཤིན་ཏུ་དགྱེས་ནས་དབང་ལུང་ཁྲིད་གསུམ་སོགས་བླ་མ་ཉིད་ལ་མངའ་བའི་ཆོས་ཐམས་ཅད་སྩལ། སྤྱིར་སྐྱི་སྟོན་འཇམ་དབྱངས་དང་མཁས་བཙུན་ཆེན་པོ་ལ་ཆོས་གསན་པ་ནི་མཐའ་ཡས་ཀྱང་འདིར་མ་སྤྲོས་སོ། །གཞན་ཡང་བཀའ་དང་བསྟན་བཅོས་འགྱུར་རོ་འཚལ་རྫོགས་པར་ནན་ཏན་དང་བཅས་པས་ཚར་གཅིག་གཟིགས། དེའི་དོན་ཐམས་ཅད་མ་འདྲེས་པར་ཐུགས་སུ་ཆུད། གཞན་སྟོང་གི་ལྟ་སྒོམ་ཁྱད་པར་ཅན་ནི་མཁའ་སྤྱོད་བདེ་ལྡན་དུ་བཞུགས་པའི་ཚེ་ཐུགས་ལ་འཁྲུངས་པ་ཡིན་ཀྱང་ལོ་ཤས་ཤིག་གཞན་ལ་མ་གསུངས། གདན་སར་ཕེབས་ནས་ལོ་ཤས་ནས་སྐུ་འབུམ་ཆེན་མོའི་རྨང་འདིངས་པ་དང་བཟང་ལྡན་གོང་གི་ཆོས་ཁྲིར་བཞུགས། བཤེས་གཉེན་དམ་པ་བཅུ་ལྷག་ལ་སྙིང་པོའི་མདོ་བཅུའི་བཤད་པ་རང་བཞེད་རྩལ་དུ་བཏོན་ནས་རྒྱས་པར་གསུངས། གཞན་སྟོང་སྟོན་པའི་གསུང་རབ་རི་ཆོས་ངེས་དོན་རྒྱ་མཚོ་སོགས་མང་དུ་མཛད་དཔེ་རྣམས་དང་ཆོས་སྐད་ཕྱོགས་ཐམས་ཅད་དུ་ཁྱབ་པས་མཁས་པ་ཕལ་གྱི་བློར་མ་ཤོང་དངོས་སུ་འབེལ་གཏམ་རྩོད་པ་ཞུས་པ་རྣམས་རྒྱ་མཚོ་ལ་ཁ་བ་བབ་པ་བཞིན་དུ་སོང་བས་དངོས་སུ་མཇལ་བ་རྣམས་གྲུབ་མཐའ་ལ་ངེས་ཤེས་དང་བླ་མ་ལ་དད་པ་ཐོབ་པ་ཤ་སྟག་བྱུང༌། ཐུབ་བསྟན་སྤྱི་དང་ངེས་དོན་དབུ་མ་ཆེན་མོ་མདོ་སྔགས་ཀྱི་གནས་ལུགས་མཐར་ཐུག་ཏུ་ལུང་རིགས་དྲི་མ་མེད་པས་གཏན་ལ་ཕབས་ཏེ་རྒྱུ་དང་འབྲས་བུའི་ཐེག་པའི་ཆོས་སྒོ་མཐའ་དག་གསལ་བར་བྱས། དགུང་ལོ་བདུན་ཅུ་སོན་པ་ལྕགས་མོ་གླང་གི་ལོའི་དགུན་ཟླ་ར་བ་ཡར་ངོའི་ཚེས་དྲུག་གི་སྲོད་ཐུན་དང་བོའི་དུས་སུ་གཟུགས་སྐུ་ཆོས་དབྱིངས་སུ་བསྡུ་བར་མཛད་དོ། །རྗེ་ཇོ་ནང་པ་ཆེན་པོ་གང་གི་དངོས་སློབ་སངས་རྒྱས་བྱང་སེམས་ཀྱི་རྣམའཕྲུལ་ཐུགས་སྲས་བཅུ་གསུམ་སོགས་བྱུང་བའོ། །ཆོས་རྗེ་ཀུན་མཁྱེན་དང་ཇོ་ནང་རི་ཁྲོད་གཉིས་ཀྱི་བྱུང་བ་ཆེས་མདོར་བསྡུས་པའོ། །སྤྲང་འཁྱམས་པ་དངོས་གྲུབ་དཔལ་གྱིས་བྲིས་པའོ། ། རྗེ་བཙུན་ཏཱ་ར་ནཱ་ཐའི་ལམ་རིམ་མཇུག་སྡོམ་གྱི་འགྲེལ་བ་དད་པའི་འོད་སྣང་།རྗེ་བཙུན་ཏཱ་ར་ནཱ་ཐའི་ལམ་རིམ་མཇུག་སྡོམ་གྱི་འགྲེལ་བ་དད་པའི་འོད་སྣང་ཞེས་བྱ་བ་བཞུགས་སོ། ། ཨོཾ་སྭ་སྟི། ཡོན་ཏན་མཐར་ཐུག་མ་ལུས་འབྱུང་བའི་གནས། །བྱང་ཆུབ་སེམས་མཆོག་རིན་ཆེན་དམ་པ་ཡི། །མངའ་བདག་འཕགས་མཆོག་རྒྱལ་དང་རྒྱལ་སྲས་རྣམས། །སྒོ་གསུམ་གུས་པས་སྤྱི་གཙུག་རྒྱན་དུ་མཛེས། །དཔལ་ལྡན་མར་མེ་མཛད་ཀྱི་བྱམས་བརྩེ་ལས། །གང་ཟག་གཅིག་གིས་ཉམས་སུ་ལེན་པའི་ཐབས། །མདོ་སྔགས་མ་ལུས་གནད་དུ་དྲིལ་བའི་གཞུང༌། །བྱང་ཆུབ་ལམ་གྱི་སྒྲོན་མེའི་བསྟན་བཅོས་བཞད། །གངས་ལྗོངས་མཁས་མང་ཉིན་བྱེད་དབང་པོ་ཡིས། །དེ་ཡི་དགོངས་འགྲེལ་རྒྱས་བསྡུས་དུ་མ་མཛད། །རྒྱུ་སྐར་དབུས་ན་ཁྱད་འཕགས་རི་བོང་ཅན། །ལམ་རིམ་བདུད་རྩིའི་ཉིང་ཁུ་ཞེས་བྱ་བའི། ། མཇུག་སྡོམ་ཚིག་དོན་གོ་སླའི་འགྲེལ་བ་ཞིག ། ངག་གི་རྒྱུད་མང་དཀྲོལ་ལ་དགའ་བ་འབུམ། ། དེ་ལ་འདིར་རྗེ་བཙུན་ཏཱ་ར་ནཱ་ཐས་མཛད་པའི་ལམ་རིམ་བདུད་རྩིའི་ཉིང་ཁུའི་མཇུག་སྡོམ་གྱི་བར་སྐབས་ཀྱི་ཚིགས་སུ་བཅད་པའི་དོན་འཆད་པ་ལ། སྐྱེས་བུ་གསུམ་གྱི་ལམ་གྱི་བསྡུས་དོན་དང༌། འཆི་བ་མི་རྟག་པ་གལ་ཆེ་བ་དང༌། ལས་འབྲས་བསླུ་མེད་ལ་ཡིད་ཆེས་སྐྱེ་བ་གལ་ཆེ་བ་དང༌། ཐེག་པ་ཆེན་པོའི་ཐབས་ཤེས་བཤད་པ་དང་བཞི། དང་པོ་ལ་སྐྱེས་བུ་ཆུང་ངུའི་ལམ་གྱི་རྩ་བ་དང༌། སྐྱེས་བུ་འབྲིང་གི་ལམ་གྱི་རྩ་བ་དང༌། སྐྱེས་བུ་ཆེན་པོའི་ལམ་གྱི་རྩ་བ་དང༌། བསྡུས་ཏེ་གསོལ་བ་གདབ་དགོས་པར་བཤད་པ་དང་བཞི།དང་པོ་ནི། རྩ་བར། དད་པ་རྣམ་དག་སྐྱེས་བུ་ཆུང་ངུའི་ལམ། །ཞེས་གསུངས་ལ། དེའི་དོན་ནི། མཆོག་གསུམ་དང་ལས་འབྲས་སོགས་ལ་དད་པ་རྣམ་པར་དག་པ་ནི། ལམ་སྒྲོན་གྱི་དངོས་བསྟན་གྱི་སྐྱེས་བུ་ཆུང་ངུའི་ལམ་རྒྱུད་ལ་སྐྱེ་བའི་སྒོ་ལྟ་བུ་ཡིན་ལ། དེ་ཡང་མངོན་མཐོ་ལྷ་མིའི་གོ་འཕང་འཐོབ་བྱེད་ཀྱི་ལམ་སྒྲུབ་པ་ལ། ལས་འབྲས་ལ་ཡིད་ཆེས་ཀྱི་དད་པ་སྐྱེས་ནས་ངན་སོང་ངམ་སྡུག་བསྔལ་གྱི་སྡུག་བསྔལ་ལ་འཇིགས་སྐྲག་སྐྱེས། དཀོན་མཆོག་གསུམ་ལ་ཡིད་ཆེས་ཀྱི་དད་པ་བསྐྱེད་ནས་སྐྱབས་སུ་འགྲོ་དགོས་པས་ན་སྐྱེས་བུ་ཆུང་ངུའི་ལམ་ལ་བློ་སྦྱོང་པ་ལ་དད་པ་གལ་ཆེའོ། །དེ་ཡང་རྗེ་བཙུན་ཏཱ་ར་ནཱ་ཐའི་རྣམ་ཐར་མ་བཅོས་ལྷུག་པ་ལས། ཆོས་ཀྱི་རྩ་བ་སྐྱབས་འགྲོ་དང༌། སྐྱབས་འགྲོའི་རྩ་བ་དད་པ་ཡིན་ཞིང། དད་པའི་རྩ་བ་སྟོན་པ་བཅོམ་ལྡན་འདས་ཀྱི་རྣམ་ཐར་གོ་བ་ལ་རག་ལས། ཞེས་གསུངས་པ་ལྟར་ཡིན་ལ། སྤྱིར་དཀར་བོའི་ཆོས་རང་རྒྱུད་ལ་སྐྱེ་བ་ལ་དད་པ་ཡོད་དགོས་ཏེ། མདོ་ལས།དད་པ་མེད་པའི་མི་རྣམས་ལ། །དཀར་བོའི་ཆོས་ནི་མི་འབྱུང་སྟེ། །ས་བོན་མེ་ཡིས་འཚིག་པ་ལ། །མྱུ་གུ་སྔོན་པོ་ཇི་བཞིན་ནོ། །ཞེས་དང༌། ཇི་སྐད་དུ། བླ་མ་སྐུ་བཞིའི་གངས་རི་ལ། །མོས་གུས་ཀྱི་ཉི་མ་མ་ཤར་ན། ། བྱིན་རླབས་ཀྱི་ཆུ་རྒྱུན་མི་འབེབས་པས། །སེམས་མོས་གུས་འདི་ལ་ནན་ཏན་མཛོད། །ཅེས་གསུངས་སོ། །དད་པ་དང་ཤེས་རབ་གཉིས་ཟུང་འབྲེལ་དུ་བྱས་ནས་ལམ་ལ་སློབ་དགོས་ཏེ། མདོ་མྱང་འདས་ལས། དད་པ་ཡོད་ཅིང་ཤེས་རབ་མེད་པ་ནི། །མ་རིག་རྨོངས་པ་འཕེལ་བའི་རྒྱུ། །ཤེས་རབ་ཡོད་ཅིང་དད་པ་མེད་པ་ནི། །ལོག་པའི་ལྟ་བ་འཕེལ་བའི་རྒྱུ། །ཞེས་གསུངས་ལ། དད་ཤེས་གཉིས་ལས་ཉོན་མོངས་པ་སྤོང་བ་ལ་ཤེས་རབ་གཙོ་བོ་ཡིན་ཀྱང་སྔོན་དུ་དད་པ་འགྲོ་དགོས་པ་ཡིན་ཏེ། ཇི་སྐད་དུ། མདོ་ལས། དད་པ་སྔོན་འགྲོ་མ་ལྟར་བསྐྱེད་པ་སྟེ། །ཡོན་ཏན་ཐམས་ཅད་བསྲུང་ཞིང་འཕེལ་བར་བྱེད། །ཅེས་དང༌། དབུ་མ་རིན་ཆེན་ཕྲེང་བ་ལས། འདི་གཉིས་གཙོ་བོ་ཤེས་རབ་སྟེ། །འདི་ཡི་སྔོན་འགྲོ་དད་པ་ཡིན། །ཞེས་གསུངས་པ་ལྟར་ཡིན་ནོ། །དད་པ་དང་མི་དགེ་བཅུ་སྤོང་གི་དགེ་བ་ལ་བརྟེན་ནས་འཁོར་བའི་བདེ་བ་ཙམ་དོན་དུ་གཉེར་བར་བྱེད་པའི་སྐྱེས་བུ་ནི། སྐྱེས་བུ་ཆུང་ངུ་ཁྱད་པར་ཅན་ཡིན་ཏེ། བྱང་ཆུབ་ལམ་སྒྲོན་ལས། གང་ཞིག་ཐབས་ནི་གང་དག་ལས། །འཁོར་བའི་བདེ་བ་ཙམ་དག་ལ། །རང་ཉིད་དོན་དུ་གཉེར་བྱེད་པ། །དེ་ནི་སྐྱེས་བུ་ཐ་མར་ཤེས། །ཞེས་གསུངས་སོ། ། གཉིས་པ་སྐྱེས་བུ་འབྲིང་གི་ལམ་གྱི་རྩ་བ།གཉིས་པ་སྐྱེས་བུ་འབྲིང་གི་ལམ་གྱི་རྩ་བ་ནི། རྩ་བར། ངེས་འབྱུང་རྣམ་དག་སྐྱེས་བུ་འབྲིང་གི་ལམ། །ཞེས་གསུངས་ལ། དེའི་དོན་ནི། ཡང་ཐར་བའི་འཇུག་སྒོ་ནི་ངེས་འབྱུང་གི་བསམ་པ་རྣམ་པར་དག་པ་ཡིན་པས་དེ་ཙམ་རྒྱུད་ལ་སྐྱེས་པ་ནས་སྐྱེས་བུ་འབྲིང་གི་ལམ་རྒྱུད་ལ་སྐྱེས་པ་ཞེས་བྱའོ། །དེ་ཡང་འཁོར་བའི་ཕུན་ཚོགས་མཐའ་དག་ལ་མེ་འབར་བའི་འོབས་ལྟར་མཐོང་ནས་དེ་ལས་ཐར་འདོད་ཀྱི་བློ་བཅོས་མ་མ་ཡིན་པའི་བསམ་པ་ནི། ངེས་འབྱུང་གི་བསམ་པ་རྣམ་དག་ཡིན་ལ། དེ་འདྲའི་ངེས་འབྱུང་གི་བསམ་པ་མེད་ན་དགེ་བ་ཇི་ལྟར་བསྒྲུབས་ཀྱང་ཞི་བ་ཐར་བ་ཐོབ་པའི་ཐབས་སུ་མི་འགྱུར་ཏེ། དབུ་མ་བཞི་བརྒྱ་བ་ལས། གང་ལ་འདི་སྐྱོ་ཡོད་མིན་པ། །དེ་ལ་ཞི་གུས་ག་ལ་ཡོད། །ཅེས་གསུངས་སོ། །དེས་ན་ཐར་བའི་རྒྱུ་བསྒྲུབ་པ་ལ་ཐོག་མར་ངེས་འབྱུང་གི་བསམ་པ་གལ་ཆེ་བའོ། །སྲིད་པ་འཁོར་བའི་བདེ་བ་ལ་ཞེན་པ་ལོག་སྟེ་སྡིག་པའི་ལས་ལ་འཛེམ་ཞིང་རང་ཁོ་ནའི་དོན་དུ་ཐར་བ་དོན་དུ་གཉེར་བའི་སྐྱེས་བུ་ནི་སྐྱེས་བུ་འབྲིང་ཞེས་བྱ་སྟེ། ལམ་སྒྲོན་ལས། སྲིད་པའི་བདེ་ལ་རྒྱབ་ཕྱོགས་ཤིང༌། །སྡིག་པའི་ལས་ལས་ལྡོག་བདག་ཉིད། །གང་ཞིག་རང་ཞི་ཙམ་དོན་གཉེར། །སྐྱེས་བུ་དེ་ནི་འབྲིང་ཞེས་བྱ། །ཞེས་གསུངས་སོ། །ཐེག་པ་ཆེན་པོའི་ཆོས་ལ་བློ་སྦྱོང་པ་ལ་སྐྱེས་བུ་ཆུང་འབྲིང་དང་ཐུན་མོང་གི་ལམ་ལ་བློ་སྦྱོང་དགོས་ཀྱང་ཆུང་འབྲིང་གི་ལམ་དངོས་ལ་ཞུགས་མི་རུང་ངོ༌། ། གསུམ་པ་སྐྱེས་བུ་ཆེན་པོའི་ལམ་གྱི་རྩ་བ་བསྟན་པ།གསུམ་པ་སྐྱེས་བུ་ཆེན་པོའི་ལམ་གྱི་རྩ་བ་བསྟན་པ་ནི། རྩ་བར། ལྷག་བསམ་རྣམ་དག་སྐྱེས་བུ་ཆེན་པོའི་ལམ། །ཞེས་གསུངས་ལ། དེའི་དོན་ནི། ལྷག་བསམ་རྣམ་དག་རྒྱུད་ལ་སྐྱེས་པ་ནས་སྐྱེས་བུ་ཆེན་པོའི་ལམ་རྒྱུད་ལ་སྐྱེས་པ་ཡིན་ལ། ལྷག་བསམ་རྣམ་དག་ནི་སེམས་ཅན་ཐམས་ཅད་སྡུག་བསྔལ་དང་བྲལ་བ་བདག་གིས་བྱའོ་སྙམ་པའི་སྙིང་རྗེ་ཆེན་པོ་ཡིན་ནོ། །རང་གི་སྡུག་བསྔལ་གྱིས་མཚོན་ནས་སེམས་ཅན་ཀུན་ཀྱི་སྡུག་བསྔལ་བྲལ་བར་བདག་གིས་བྱའོ་སྙམ་པའི་སྙིང་རྗེས་ཟིན་པའི་དགེ་བ་དེ་སྐྱེས་བུ་ཆེན་པོའི་ལམ་ཡིན་ཏེ། ལམ་སྒྲོན་ལས། རང་རྒྱུད་གཏོགས་པའི་སྡུག་བསྔལ་གྱིས། །གང་ཞིག་གཞན་གྱི་སྡུག་བསྔལ་ཀུན། །ཡང་དག་ཟད་པར་ཀུན་ནས་འདོད། །སྐྱེས་བུ་དེ་ནི་མཆོག་ཡིན་ནོ། །ཞེས་གསུངས་སོ། །དེ་འདྲའི་སྙིང་རྗེ་ཆེན་པོ་ནི་ཉན་རང་གི་བསམ་པ་ལས་ལྷག་པའི་སྙིང་རྗེ་ཡིན་པས་ལྷག་པའི་བསམ་པ་ཡིན་ནོ། ། བཞི་བ་བསྡུས་ཏེ་གསོལ་བ་གདབ་དགོས་པ་ནི། རྩ་བར། རྣམ་དག་ལམ་གསུམ་ཐོབ་པར་བྱིན་གྱིས་རློབས། །ཞེས་སྐྱེས་བུ་ཆུང་འབྲིང་ཆེན་པོའི་ལམ་རྣམ་དག་ལ་བློ་སྦྱོང་བའི་ཉམས་ལེན་ཐོབ་པར་ཟབ་མོ་ལྟ་བའི་བརྒྱུད་པ་དང༌། རྒྱ་ཆེན་སྤྱོད་པའི་བརྒྱུད་པ། ཉམས་ལེན་བྱིན་རླབས་ཀྱི་བརྒྱུད་པ་གསུམ་གྱི་དཔལ་ལྡན་བླ་མ་རྣམས་ཀྱིས་བྱིན་གྱིས་རློབས་ཤིག་ཅེས་གསོལ་བ་གདབ་པར་བྱའོ། ། གཉིས་པ་འཆི་བ་མི་རྟག་པ་གལ་ཆེ་བ།གཉིས་པ་འཆི་བ་མི་རྟག་པ་གལ་ཆེ་བ་ནི། རྩ་བར། མི་རྟག་འཆི་བ་རྒྱུད་ལ་མ་སྐྱེས་ན། །ཇི་ལྟར་འབད་ཀྱང་ཚེ་འདིའི་ཁ་འཛིན་ཅན། །རང་བློ་ཆོས་སུ་འགྲོ་བར་མི་འདུག་པས། །ཆོས་བརྒྱད་འཆིང་བ་གྲོལ་བར་བྱིན་གྱིས་རློབས། །ཞེས་གསུངས་ལ། དེའི་དོན་ནི། ས་བཟང་གི་བླང་དོར་རབ་གསལ་ལས། འདུས་བྱས་མི་རྟག་རྟག་པར་འཛིན་པས་འཁྲུལ། །ངེས་པར་འཆི་ཞིང་འཆི་རྐྱེན་ཤིན་ཏུ་མང༌། །ནམ་འཆི་ངེས་མེད་མྱུར་བ་ཉིད་དུ་འཆི། །བྱུང་ཚེ་མི་བཟློག་དེ་ཕྱིར་དགེ་ལ་འབད། །ཅེས་གསུངས་པ་ལྟར་ངེས་པར་འཆི་བ། ནམ་འཆི་ཆ་མེད་པ། འཆི་རྐྱེན་ངེས་པ་མེད་པ་ལ་སོགས་པ་ལ་ཞིབ་པར་བསམ་ནས་མི་རྟག་པའི་འཆི་བ་སྒོམ་པས་ཡིད་འགྱུར་གྱི་མྱོང་བ་རྒྱུད་ལ་མ་སྐྱེས་ན་དགེ་བ་སོགས་ཇི་ལྟར་འབད་པ་བྱེད་ཁུལ་བྱས་ཀྱང་ཚེ་ཕྱི་མ་དང་ཚེ་འདི་གཉིས་ལས་ཚེ་འདིའི་ཁ་འཛིན་ཅན་ནམ་ཕྱོགས་བཟུང་ནས་བྱ་སྤྱོད་ཐམས་ཅད་བརྩོན་པར་འགྲོ་བས་ན། རང་གི་བློ་དམ་པའི་ཆོས་ཀྱི་ཕྱོགས་སུ་འགྲོ་བར་མི་འདུག་པ་ཡིན་པས། བདག་གི་རྒྱུད་ལ་རྙེད་ན་དགའ་ལ་མ་རྙེད་ན་མི་དགའ་བ་དང༌། སྙན་ན་དགའ་ལ་མི་སྙན་ན་མི་དགའ་བ་དང༌། བསྟོད་ན་དགའ་ལ་སྨད་ན་མི་དགའ་བ་དང༌། བདེ་ན་དགའ་ལ་མི་བདེ་ན་མི་དགའ་བའི་འཇིག་རྟེན་ཆོས་བརྒྱད་ཀྱི་འཆིང་བ་ལས་གྲོལ་བར་ཟབ་མོ་ལྟ་བའི་བརྒྱུད་པ་དང༌། རྒྱ་ཆེན་སྤྱོད་པའི་བརྒྱུད་པ། ཉམས་ལེན་བྱིན་རླབས་ཀྱི་བརྒྱུད་པ་རྣམས་ཀྱིས་བྱིན་གྱིས་རློབས་ཤིག་ཅེས་སྨོན་པའོ། །སྤྱིར་འཆི་བ་མི་རྟག་པ་སྒོམ་པ་གལ་ཆེ་སྟེ། པོ་ཏོ་བའི་ཞལ་ནས། ཆོས་གཅིག་ཏུ་བྱ་བ་ལ་མི་རྟག་པ་བསྒོམ་པ་འདི་གལ་ཆེ་སྟེ། འཆི་བ་མི་རྟག་པ་འདི་བསྒོམ་ན།དང་པོ་ཆོས་ལ་འཇུག་པའི་རྒྱུ་བྱེད། བར་དུ་དགེ་སྦྱོར་ལ་སྐུལ་བའི་རྐྱེན་བྱེད། ཐ་མ་ཆོས་མཉམ་པ་ཉིད་དུ་རྟོགས་པའི་གྲོགས་བྱེད། ཡང་མི་རྟག་པ་འདི་བསྒོམས་ན་དང་པོ་ཚེ་འདིའི་གདོས་ཐག་ཆོད་པའི་རྒྱུ་བྱེད། བར་དུ་འཁོར་བ་མཐའ་དག་ལ་ཞེན་པ་ལྡོག་པའི་རྐྱེན་བྱེད། ཐ་མ་མྱ་ངན་ལས་འདས་པའི་ལམ་དུ་འཇུག་གྲོགས་བྱེད། ཡང་མི་རྟག་པ་འདི་བསྒོམས་ན་དང་པོ་དད་པ་བྱེད་པའི་རྒྱུ་བྱེད། བར་དུ་བརྩོན་འགྲུས་རྩོམ་པའི་རྐྱེན་བྱེད། ཐ་མར་ཤེས་རབ་སྐྱེ་བའི་གྲོགས་བྱེད། ཡང་མི་རྟག་པ་འདི་བསྒོམས་ཤིང་རྒྱུད་ལ་སྐྱེས་ན་དང་པོ་ཆོས་འཚོལ་བའི་རྒྱུ་བྱེད། བར་དུ་ཆོས་སྒྲུབ་པའི་རྐྱེན་བྱེད། ཐ་མར་ཆོས་མཐར་ཕྱིན་པའི་གྲོགས་བྱེད། ཅེས་དང༌། ཕ་དམ་པའི་ཞལ་ནས། མི་རྟག་པ་འདི་རྒྱུད་ལ་སྐྱེས་ན་དང་པོ་ཆོས་ལ་འཇུག་པའི་རྒྱུ་བྱེད། བར་དུ་བརྩོན་འགྲུས་ཀྱི་ལྕག་བྱེད། མཐར་འོད་གསལ་ཆོས་སྐུ་ཐོབ་པར་བྱེད། ཅེས་གསུངས་སོ། །གསུམ་པ་ལས་འབྲས་བསླུ་མེད་ལ་ཡིད་ཆེས་སྐྱེ་བ་གལ་ཆེ་བ་ནི། རྩ་བར། ལས་འབྲས་བསླུ་མེད་ཡིད་ཆེས་མ་སྐྱེས་ན། །ཆོས་སྤྱོད་ཐམས་ཅད་བཟང་བརྫུའི་ངང་དུ་འཆོར། །སྒྲུབ་པ་ལྷུར་ལེན་སྐད་ཀྱང་གཞན་ངོར་ཐལ། །ཆོས་ལ་ཡིད་ཆེས་སྐྱེ་བར་བྱིན་གྱིས་རློབས། །ཞེས་གསུངས་ལ། དེའི་དོན་ནི། རྒྱུ་ལས་དགེ་མི་དགེ་དང་དེའི་འབྲས་བུ་བདེ་སྡུག་སོགས་བསླུ་བ་མེད་པ་ལ་ཡིད་ཆེས་པའི་བློ་རང་རྒྱུད་ལ་ལེགས་པར་མ་སྐྱེས་ན་རང་གིས་ཆོས་སྤྱོད་ཀྱི་བྱ་བ་བརྩོན་ཁུལ་བྱེད་པ་ཐམས་ཅད་ཀྱང་རང་ཉིད་གཞན་ངོར་བཟང་བརྫུའི་ངང་ཚུལ་དུ་འཆོར་བར་འགྱུར་བ་ཡིན་པས་རང་གིས་སྒྲུབ་པ་ཉམས་ལེན་ལྷུར་ལེན་པ་ཡིན་ཞེས་དེ་སྐད་བཤད་ཀྱང་དོན་ལ་གཞན་ངོར་ཆོས་པའི་གཟུགས་བརྙན་ཙམ་དུ་ཐལ་བར་འགྱུར་བ་ཡོད་སྲིད་པས་གནས་དེ་ལྟ་བུ་ལ་གཟབ་པར་བྱའོ། །དེས་ན་དམ་ཆོས་ལ་ཡིད་ཆེས་རྣམ་དག་རྒྱུད་ལ་མྱུར་དུ་སྐྱེ་བར་བླ་མ་དང་མཆོག་གསུམ་གྱིས་བྱིན་གྱིས་རློབས་ཤིག་ཅེས་གསོལ་བ་གདབ་པར་བྱ། སྤྱིར་བླང་དོར་རབ་གསལ་ལས། མི་དགེ་བ་ལས་སྡུག་བསྔལ་ཐམས་ཅད་དང༌། །ཁྱད་པར་ངན་འགྲོའི་གནོད་པ་ཐམས་ཅད་འབྱུང། །དགེ་བ་ལས་ནི་བདེ་འགྲོ་ཐམས་ཅད་དང༌། །རྣམ་པ་ཀུན་ཏུ་བདེ་ཆེན་ཐོབ་པར་གསུངས། །ཞེས་གསུངས་པ་ལྟར་ལས་དགེ་བ་བྱས་པ་ལས་འབྲས་བུ་བདེ་བ་འབྱུང་བ་དང༌། ལས་མི་དགེ་བ་བྱས་པ་ལས་འབྲས་བུ་སྡུག་བསྔལ་འབྱུང་བ་མི་བསླུ་བ་ཡིན་ཏེ། མདོ་སྡེ་ལས་བརྒྱ་བ་ལས། ལུས་ཅན་དག་གི་ལས་རྣམས་ནི། །བསྐལ་བ་བརྒྱར་ཡང་ཆུད་མི་ཟ། །ཚོགས་ཤིང་དུས་ལ་བབ་པ་ན། ། འབྲས་བུ་དེ་ཉིད་སྨིན་པར་འགྱུར། །ཞེས་དང༌། བླང་དོར་རབ་གསལ་ལས། ལས་ཀྱི་བག་ཆགས་སྣ་ཚོགས་ཀུན་གཞི་ལ། ། གནས་པ་བསྐལ་བ་བརྒྱར་ཡང་ཆུད་མི་ཟ། །རྐྱེན་རྣམས་ཚོགས་ཤིང་དུས་ལ་བབ་པ་ན། །འབྲས་བུ་རིམ་པ་བཞིན་དུ་སྨིན་པར་གསུངས། །ཞེས་དང། རྒྱལ་བོ་ལ་གདམས་པའི་མདོ་ལས། དུས་ཀྱིས་ཉེན་ཏེ་རྒྱལ་བོ་འགྲོ་གྱུར་ན། །ལོངས་སྤྱོད་མཛའ་དང་བཤེས་རྣམས་རྗེས་མི་འབྲང༌། ། སྐྱེས་བུ་དག་ནི་གང་ནས་གར་འགྲོ་ཡང༌། །ལས་ནི་གྲིབ་མ་བཞིན་དུ་རྗེས་སུ་འབྲང། །ཞེས་གསུངས་པས་སོ། །བཞི་བ་ཐེག་པ་ཆེན་པོའི་ཐབས་ཤེས་བཤད་པ་ལ། ཐེག་ཆེན་གྱི་ཐབས་དང་ཤེས་རབ་བཤད་པ་གཉིས་ལས། དང་པོ་ཐེག་ཆེན་གྱི་ཐབས་ནི། རྩ་བར། བྱམས་དང་སྙིང་རྗེ་རྒྱུད་ལ་མ་སྐྱེས་ན། །སྒྲུབ་ལ་བརྩོན་ཡང་ཐེག་པ་དམན་པར་གོལ། །འགྲོ་བ་ཀུན་གྱི་སྡུག་བསྔལ་ཁུར་ཁྱེར་ནས། །བྱང་ཆུབ་སེམས་མཆོག་འབྱོང་བར་བྱིན་གྱིས་རློབས། །ཞེས་གསུངས་ལ།དེའི་དོན་ནི། སེམས་ཅན་རྣམས་ལ་བདེ་བ་དང་ལྡན་འདོད་ཀྱི་བྱམས་པ་ཆེན་པོ་དང་སྡུག་བསྔལ་བྲལ་བར་འདོད་པའི་སྙིང་རྗེ་ཆེན་པོ་རྒྱུད་ལ་ལེགས་པར་མ་སྐྱེས་ན་ལམ་ཉམས་ལེན་གྱི་སྒྲུབ་པ་ལ་བརྩོན་པ་ཇི་ལྟར་བསྐྱེད་པར་བྱེད་ན་ཡང་ཉན་ཐོས་རང་རྒྱལ་གྱི་ཐེག་པ་དམན་པའི་ལམ་དུ་ཞུགས་པར་འགྱུར་ནས་ལམ་ནོར་བའམ་གོལ་བར་འགྱུར་རོ། །རྒྱུ་མཚན་དེས་ན་ནམ་མཁའ་དང་མཉམ་པའི་འགྲོ་བ་ཀུན་གྱི་སྡུག་བསྔལ་མ་ལུས་པ་བདག་གིས་བསྒྲལ་བར་བྱ་སྙམ་པའི་ཁུར་ཁྱེར་གྱི་སྙིང་རྗེ་བསྐྱེད་ནས་སེམས་ཅན་ཐམས་ཅད་ཀྱི་དོན་དུ་ཡང་དག་པར་རྫོགས་པའི་བྱང་ཆུབ་ཐོབ་པར་འདོད་པའི་བྱང་ཆུབ་ཀྱི་སེམས་རིན་པོ་ཆེ་མཆོག་བདག་གི་རྒྱུད་ལ་འབྱོང་བར་ཟབ་མོ་ལྟ་བའི་བརྒྱུད་པ་དང༌། རྒྱ་ཆེན་སྤྱོད་པའི་བརྒྱུད་པ། ཉམས་ལེན་བྱིན་རླབས་ཀྱི་བརྒྱུད་པ་གསུམ་གྱི་དཔལ་ལྡན་བླ་མ་རྣམས་ཀྱིས་བྱིན་གྱིས་རློབས་ཤིག་ཅེས་གསོལ་བ་གདབ་པར་བྱའོ། །དེ་ལྟར་བྱང་ཆུབ་ཀྱི་སེམས་བསྒོམས་ན་བསོད་ནམས་རྒྱ་ཆེན་པོ་བསགས་ཏེ། དཔའ་བྱིན་གྱིས་ཞུས་པའི་མདོ་ལས། བྱང་ཆུབ་སེམས་ཀྱི་བསོད་ནམས་གང༌། །གལ་ཏེ་དེ་ལ་གཟུགས་མཆིས་ན། །ནམ་མཁའི་ཁམས་ནི་ཀུན་གང་སྟེ། །དེ་ནི་དེ་བས་ལྷག་པར་འགྱུར། །ཞེས་དང༌། སྤྱོད་འཇུག་ལས། བྱང་ཆུབ་སེམས་བསྐྱེད་གྱུར་བའི་སྐད་ཅིག་ལ། །འཁོར་བའི་བཙོན་རར་བསྡམས་པའི་ཉམ་ཐག་རྣམས། །བདེ་གཤེགས་རྣམས་ཀྱིས་སྲས་ཞེས་རབ་བརྗོད་ཅིང༌། །འཇིག་རྟེན་ལྷ་མིར་བཅས་པས་ཕྱག་བྱར་འགྱུར། །ཞེས་གསུངས་པས་སོ། ། གཉིས་པ་ཐེག་པ་ཆེན་པོའི་ཤེས་རབ།གཉིས་པ་ཐེག་པ་ཆེན་པོའི་ཤེས་རབ་ནི། རྩ་བར། སྤྲོས་ཀུན་རང་གྲོལ་སྟོང་ཉིད་མ་རྟོགས་ན། །ཆོས་ཀུན་སྒྱུ་མ་ལྟ་བུར་མི་ཤེས་ཤིང༌། །མཚན་འཛིན་དབང་སོང་རང་སེམས་མི་གྲོལ་བས། །གནས་ལུགས་མཐར་ཐུག་རྟོགས་པར་བྱིན་གྱིས་རློབས། །ཞེས་གསོལ་བ་གདབ་པར་བྱའོ། །ཞེས་གསུངས་ལ། དེའི་དོན་ནི། བདག་དང་སྐྱེ་འགག་སོགས་ཀྱི་སྤྲོས་པ་ཀུན་རང་གི་ངོ་བོ་རང་བཞིན་གྱིས་གྲུབ་པ་ལས་གྲོལ་བའི་སྟོང་བ་ཉིད་མ་རྟོགས་པ་ཡིན་ན་ཀུན་རྫོབ་སྣང་གྲགས་ཀྱིས་བསྡུས་པའི་ཆོས་ཀུན་བདེན་པར་སྣང་ཡང་བདེན་པར་མ་གྲུབ་པ་དཔེར་ན་རྫས་སྔགས་ལ་བརྟེན་ནས་རྟ་གླང་དུ་སྣང་ཡང་སྣང་བ་ལྟར་མ་གྲུབ་པ་སྒྱུ་མ་ལྟ་བུར་ཡིན་ཡང་དེ་ལྟར་མི་ཤེས་ཤིང་རྟོགས་པར་མི་འགྱུར་ན་བདེན་པར་གྲུབ་པའི་མཚན་མར་འཛིན་པའི་དབང་དུ་སོང་ནས་རང་སེམས་ཉོན་ཤེས་ཀྱི་སྒྲིབ་པ་ལས་མི་གྲོལ་བ་ཡིན་ཏེ།དཔལ་མགོན་འཕགས་པ་ཀླུ་སྒྲུབ་ཀྱིས། མཚན་མ་མེད་པར་མ་རྟོགས་པར། །ཁྱོད་ཀྱིས་ཐར་བ་མེད་པར་གསུངས། །དེ་ཕྱིར་ཁྱོད་ཀྱིས་ཐེག་ཆེན་ལས། ། དེ་ནི་ཚང་བར་བསྟན་པ་ལགས། །ཞེས་གསུངས་སོ། །རྒྱུ་མཚན་དེ་བས་ན་གནས་ལུགས་མཐར་ཐུག་དོན་དམ་ཆོས་ཀྱི་དབྱིངས་རྟོགས་པར་ཟབ་མོ་ལྟ་བའི་བརྒྱུད་པ་དང༌། རྒྱ་ཆེན་སྤྱོད་པའི་བརྒྱུད་པ། ཉམས་ལེན་བྱིན་རླབས་ཀྱི་བརྒྱུད་པ་གསུམ་གྱི་དཔལ་ལྡན་བླ་མ་རྣམས་ཀྱིས་བྱིན་གྱིས་རློབས་ཞེས་གསོལ་བ་གདབ་པར་བྱའོ། །འཁོར་བ་ལས་གྲོལ་བ་ལ་གང་ཟག་གི་བདག་མེད་སྒོམ་དགོས་ཏེ། ཐེག་མཆོག་དབུ་མ་ལས། གང་ཟག་བདག་མེད་སྒོམ་པ་ཡོད་མེད་ལས། །སྲིད་ལས་གྲོལ་བ་ཡོད་མེད་རྗེས་སུ་དཔོག །ཅེས་གསུངས་སོ། །ཐེག་ཆེན་གྱི་ཐར་བ་ཐོབ་པ་ལ་སྟོང་ཉིད་སྒོམ་དགོས་ལ་སྟོང་ཉིད་རྟོགས་པའི་ཤེས་རབ་མེད་ན་གཞན་རྣམས་ཀྱིས་བྱང་ཆུབ་ཐོབ་མི་ནུས་ཏེ། ཡུམ་མདོ་ལས། ཤེས་རབ་མེད་ན་མིག་མེད་ཕ་རོལ་ཕྱིན་ལྔ་འདི། །དམིགས་བུ་མེད་པས་བྱང་ཆུབ་རེག་པར་ནུས་མ་ཡིན། །ཞེས་དང༌། སྤྱོད་འཇུག་ལས། ཡན་ལག་འདི་དག་ཐམས་ཅད་ནི། །ཐུབ་པས་ཤེས་རབ་དོན་དུ་གསུངས། །ཞེས་གསུངས་པས་སོ། །སྟོང་ཉིད་ལ་ཐོས་བསམ་བྱས་ནས་ཐེ་ཚོམ་ཙམ་ཞིག་ཟོས་ནའང་སྲིད་པ་འཁོར་བ་ཧྲུལ་བོར་བྱེད་ནུས་ཏེ། དབུ་མ་བཞི་བརྒྱ་བ་ལས། ཐེ་ཚོམ་ཟོས་པ་ཙམ་གྱིས་ཀྱང༌། །སྲིད་པ་ཧྲུལ་བོ་བྱེད་པར་འགྱུར། །ཞེས་གསུངས་སོ། །དེས་ན་ཐབས་ཤེས་ཡ་མ་བྲལ་བར་ཐེག་ཆེན་གྱི་ལམ་ལ་སློབ་དགོས་སོ། ། སྨྲས་པ། སྐྱེས་བུ་གསུམ་དང་མི་རྟག་འཆི་བ་དང༌། །ལས་འབྲས་བསླུ་མེད་ཐེག་ཆེན་ཐབས་ཤེས་ཀུན། །ལམ་གྱི་གནད་ཀུན་བསྡུས་པའི་གདམས་ངག་འདི། །ལེགས་པར་བཟུང་ནས་ཉམས་སུ་ལེན་པར་གྱིས། །འདིར་འབད་དགེ་བས་མཁའ་མཉམ་སྐྱེ་བོ་ཀུན། །སྐྱེས་བུ་གསུམ་གྱི་ལམ་ལ་བསླབ་བྱས་ཏེ། །ཚོགས་གཉིས་རྫོགས་ནས་དོན་གཉིས་མཐར་ཕྱིན་ནས། །གཞན་དོན་ལྷུན་གྲུབ་རྒྱུན་མི་འཆད་པར་ཤོག །ཅེས་རྗེ་བཙུན་གྱི་ལམ་རིམ་མཇུག་སྡོམ་གྱི་འགྲེལ་བ་དད་པའི་འོད་སྣང་འདི་ནི་འདོད་ཆུང་ཆོག་ཤེས་ངང་སྒྲུབ་པ་ལ་རྩེ་གཅིག་ཏུ་གཞོལ་བ་གཙང་གོང་རྡོ་རྗེ་སློབ་དཔོན་ངག་དབང་བསམ་གཏན་བཟང་བོ་དང་བླ་མ་ཚུལ་འཕགས་རྣམ་གཉིས་ཀྱིས་བཀས་བསྐུལ་བ་ལ་བརྟེན་ནས་ངག་དབང་དངོས་གྲུབ་དཔལ་གྱིས་ཆུ་སྟོད་ཟླ་བའི་ཚེས་ཉེར་དྲུག་གི་སྔ་དྲོར་རྫོགས་པར་བྲིས་པའོ།། །།འདིས་ཀྱང་སྐྱེས་བུ་གསུམ་གྱི་ལམ་ལ་སློབ་པའི་རྒྱུར་གྱུར་ཅིགསརྦ་མངྒ་ལཾ། ། སྐྱེས་བུ་གསུམ་གྱི་ལམ་རིམ་གྱི་སྨོན་ལམ།སྐྱེས་བུ་གསུམ་གྱི་ལམ་རིམ་གྱི་སྨོན་ལམ་བཞུགས་སོ། ། རྗེ་བཙུན་དཔལ་ལྡན་བླ་མ་དམ་པ་ལ་ཕྱག་འཚལ་ལོ། །ངན་སོང་ལ་སོགས་སྡུག་བསྔལ་སྲིད་མཚོ་ལ། །སྐྱོ་བ་སྐྱེས་ནས་སྐྱབས་འགྲོར་བྱེད་པ་དང༌། །སྡིག་པ་སྤངས་ནས་དགེ་ལ་བརྩོན་པ་ནི། །སྐྱེས་བུ་ཆུང་དང་ཐུན་མོང་ཡིན་པའི་ལམ། །ཁམས་གསུམ་འཁོར་བ་མཐའ་དག་སྡུག་བསྔལ་དུ། །ངེས་ནས་ངེས་འབྱུང་སེམས་ཀྱིས་ཟིན་པ་ཡི། །བདེན་བཞི་མི་རྟག་བཅུ་དྲུག་ལམ་བསྒོམ་པ། །སྐྱེས་བུ་འབྲིང་དང་ཐུན་མོང་ལམ་རིམ་ཡིན། །མ་རྒན་འགྲོ་རྣམས་རྫོགས་བྱང་ཐོབ་པའི་ཕྱིར། །ལྷག་བསམ་རྣམ་དག་བྱང་ཆུབ་སེམས་བསྐྱེད་དང༌། །ཕ་རོལ་ཕྱིན་དྲུག་ཐབས་ཤེས་ཟུང་འཇུག་བཅས། །སྐྱེས་བུ་ཆེན་པོའི་ཐུན་མོང་མིན་པའི་ལམ། །དེ་ལྟར་རྣམ་དག་ལམ་གསུམ་ཐོས་བསམ་གྱིས། །ཤེས་ནས་ཉིན་མཚན་དུས་ཀུན་བསྒོམ་པ་ཡིས། །ལམ་ལྔ་ས་བཅུ་རིམ་གྱིས་བགྲོད་པ་དང༌། །མཐར་ཐུག་སྐུ་བཞིའི་རྒྱལ་སར་གནས་པར་ཤོག །ཅེས་པ་འདི་ནི་སྐྱེས་བུ་གསུམ་གྱི་ལམ་རིམ་གྱི་སྨོན་ལམ་དུ་དངོས་གྲུབ་དཔལ་གྱིས་སྨྲས་པའོ། ། ག་ལས་འཇིགས་མེད་རང་འགྲེལ་ཡིན་མིན་དཔྱད་པ།ག་ལས་འཇིགས་མེད་རང་འགྲེལ་ཡིན་མིན་དཔྱད་པ། དབུ་མ་རྩ་བའི་འགྲེལ་བ་མཆོག་ཏུ་གྱུར་བ་འདི་ནི་ཁ་ཅིག་གིས་བོད་ཀྱིས་བརྩམས་པའི་འགྲེལ་བ་ཡིན་པར་འདོད་པ་ཧ་ཅང་འཁྲུལ་བ་སྟེ། འཁྲུལ་བའི་རྒྱུ་མཚན་གང་ཞེ་ན།སྤྱན་རས་གཟིགས་བརྟུལ་ཞུགས་ཀྱིས་མཛད་པའི་ཤེས་རབ་སྒྲོན་མེའི་འགྲེལ་བཤད་དུ་དེ་ཉིད་རང་འགྲེལ་ཡིན་པར་གསུངས་པ་དང༌། དེ་བཞིན་དུ་ཇོ་བོ་རྗེ་དཔལ་ལྡན་ཨ་ཏི་ཤས་མཛད་པའི་ལམ་སྒྲོན་རང་འགྲེལ་ལམ་དཀའ་འགྲེལ་དུ། དབུ་མ་རྩ་ཤེས་ལ་འགྲེལ་པ་བརྒྱད་ཡོད་དེ། སློབ་དཔོན་བདག་ཉིད་ཅེས་པ་དཔལ་མགོན་འཕགས་པ་ཀླུ་སྒྲུབ་རང་ཉིད་ཀྱིས་མཛད་པའི་ག་ལས་འཇིགས་མེད་དང༌། ཞེས་སོགས་ཀྱི་སྐབས་སུ་དབུ་མ་རྩ་ཤེས་ཀྱི་འགྲེལ་བ་བརྒྱད་ཡོད་པར་གསུངས་འདུག འོན་ཀྱང་དེང་སང་བོད་དུ་འགྱུར་ཡོད་པ། རང་འགྲེལ་དེ་དང༌། སློབ་དཔོན་སངས་རྒྱས་བསྐྱངས་ཀྱི་འགྲེལ་བ་བུདྡྷ་པ་ལི་ཏ། དཔལ་ལྡན་ཟླ་བ་གྲགས་པའི་རྩ་ཤེས་འགྲེལ་བ་ཚིག་གསལ་དང༌། དེ་ནས་སློབ་དཔོན་ལེགས་ལྡན་འབྱེད་ཀྱི་ཤེས་རབ་སྒྲོན་མེ་བཅས་མ་གཏོགས་འགྱུར་མེད།དེ་ཡང་མཁས་པའི་གཙུག་རྒྱན་རྗེ་བློ་བཟང་གྲགས་པ་ཁོང་མ་བྱོན་པའི་སྔ་རོལ་ཏུ་ག་ལས་འཇིགས་མེད་དེ་རང་འགྲེལ་ཡིན་པར་རྩོད་མེད་དུ་གྲགས་པ་ཡིན་པར་གསུང་གི་འདུག དེ་ཡང་བསྟན་པ་སྔ་དར་གྱི་སྐབས་སུ་སྔ་འགྱུར་རྙིང་མའི་ཁྲོད་ཀྱི་ལོ་ཆེན་བཻ་རོ་ཙ་ན་སོགས་མཁས་པ་བཞིས་མཛད་པའི་གསང་སྔགས་ལུང་གི་བང་མཛོད་དུ།རང་འགྲེལ་ག་ལས་འཇིགས་མེད་ཅེས་སོགས་རང་འགྲེལ་ཡིན་པར་མང་པོ་ཞིག་གསུང་གི་འདུག བསྟན་པ་ཕྱི་དར་གྱི་སྐབས་སུ་བུ་སྟོན་རིན་པོ་ཆེ་དང་བཅོམ་ལྡན་རིག་པའི་རལ་གྲི་དང་ཀུན་མཁྱེན་དོལ་པོ་པ་ཤེས་རབ་རྒྱལ་མཚན་དཔལ་བཟང་པོ་སོགས་རྗེ་བདག་ཉིད་ཆེན་པོ་མ་བྱོན་པའི་སྔོན་གྱི་མཁས་པ་ཐམས་ཅད་ཞལ་མཐུན་པར་ག་ལས་འཇིགས་མེད་དེ་རང་འགྲེལ་ཡིན་པར་གསུངས་ཡོད་རེད། སྤྱིར་ན་འདི་མང་པོ་ཞུ་དགོས་ཀྱིན་མི་འདུག་མོད། འོན་ཀྱང་འདི་དཔལ་མགོན་འཕགས་པ་ཀླུ་སྒྲུབ་ཀྱི་གསུང་ཡིན་དུས་རང་གཞན་ཚང་མས་ཁས་ལེན་དགོས་ཀྱིན་ཡོད་པ་དང༌། ཁོང་ཚོས་གཞུང་འདི་རང་འགྲེལ་མ་ཡིན་པར་བཞག་པ་དེ་ཡང་འདི་རང་སྟོང་དུ་བཀྲལ་བཞག་ན་དེའི་སྒྲའི་ཟིན་ལ་འོས་ཤིང་འཚམ་པ་ཞིག་ཡོང་གི་མེད་པས་ཕྱོགས་གཅིག་ནས་དེའི་སྒོ་ནས་ཀྱང་མ་ཡིན་པར་བཞེད་པ་རེད། གཞན་རྗེ་བདག་ཉིད་ཆེན་པོས་དྲང་ངེས་ལེགས་བཤད་སྙིང་བོར། ག་ལས་འཇིགས་མེད་ལ་རང་འགྲེལ་གྱི་དོན་མེད་པར་རིགས་པ་གཉིས་དང༌། རྩ་ཤེས་ཊཱིཀ་ཆེན་དུ་ཡང་རིགས་པ་གཉིས་སྟེ་རིགས་པ་བཞི་སྦྱོར་མཁན་འདུག མདོར་ན་དྲང་ངེས་ལེགས་བཤད་སྙིང་བོའི་སྐབས་སུ།རབ་བྱེད་ཉེར་བདུན་པའི་འགྲེལ་བ་ག་ལས་འཇིགས་མེད་ལས། བཙུན་པ་འཕགས་པ་ལྷས་ཀྱང༌། ཉན་པ་པོ་མཉན་བྱ་དང༌། །སྨྲ་བོ་འབྱུང་བ་ཤིན་ཏུ་དཀོན། །དེ་ཕྱིར་མདོར་ན་འཁོར་བ་ནི། །མཐའ་ཡོད་མ་ཡིན་མཐའ་མེད་མིན། །ཞེས་བཤད་དོ། །ཞེས་བཞི་བརྒྱ་པའི་ལུང་ཤེས་བྱེད་དུ་དྲངས་པས་རང་འགྲེལ་གྱི་དོན་མེད་དོ། །ཞེས་སློབ་མའི་ལུང་བླ་མས་མི་བཀོད་པའི་རྒྱུ་མཚན་གྱིས་སྒྲུབ་པ་དང༌། ཡང་དེ་ལས། སངས་རྒྱས་བསྐྱངས་དང་ལེགས་ལྡན་འབྱེད་དང་ཟླ་བ་གྲགས་པའི་འགྲེལ་པར་འགྲེལ་པ་དེའི་ཟུར་ཙམ་ཡང་མ་བྱུང་བས་ཀྱང་ཤེས་སོ། །ཞེས་གལ་ཏེ་ག་ལས་འཇིགས་མེད་རང་འགྲེལ་ཡིན་ན་གཞུང་དེ་དག་གི་སྐབས་སུ་དྲང་དགོས་ལ་མ་དྲང་པའི་ཕྱིར་ཞེས་པ་སྟེ་རིགས་པ་གཉིས་གསུངས་པ་རེད། ཕྱིས་སུ་རྗེ་རིན་པོ་ཆེའི་རྗེས་འབྲངས་པ་དགེ་ལུགས་པ་སྤྱི་དང་ཀུན་མཁྱེན་གོ་རམས་པ་སོགས་ཀྱང་རྗེ་རིན་པོ་ཆེའི་རྗེས་སུ་འབྲངས་ཏེ་རང་འགྲེལ་མིན་པར་བཞེད་མཁན་མང་པོ་འདུག དེ་འདྲ་གསུངས་ཡོང་དུས་རང་ལུགས་ལ་ག་ལས་འཇིགས་མེད་དེ་རང་འགྲེལ་ཡིན་པར་གཞིར་བཞག་རེད། དེའི་སྟེང་ནས་ཅུང་ཟད་བཤད་ན། གཅིག ཕལ་ཆེར་དེང་སང་བོད་དུ་འགྱུར་ཡོད་པའི་ག་ལས་འཇིགས་མེད་དེར། བཙུན་པ་འཕགས་པ་ལྷས་ཀྱང༌། ཞེས་པ་སོགས་མཆན་དཀྱུས་སུ་ཤོར་སོང་བ་ཡིན་པར་སྣང༌། སྤྱིར་ན་རྒྱ་གཞུང་མང་པོ་ལ་མཆན་དཀྱུས་སུ་ཤོར་བ་མང་པོ་བཤད་རྒྱུ་འདུག ཁྱད་པར་དུ་འདི་ལ་མཆན་དཀྱུས་སུ་ཤོར་བར་སྣང་བའི་རྒྱུ་མཚན། དབུ་མ་རྩ་བ་ཤེས་རབ་དང་ག་ལས་འཇིགས་གཉིས་ཀའི་སྐབས་དེར་སྤྱིར་བདེན་དངོས་ཀྱི་མཐའ་སྟོང་མི་སྟོང་བཤད་པ་དང༌།དབུ་མ་བཞི་བརྒྱ་བའི་དེའི་སྐབས་དེར་འཁོར་བའི་ཕྱི་མཐའ་མཐའ་ཡོད་མེད་བཤད་པའི་སྐབས་ཆགས་འདུག དེས་ན་དེ་དེའི་སྒྲུབ་བྱེད་དུ་མི་འགྲོ་བས་མཆན་དཀྱུས་སུ་ཤོར་བ་ཡིན་པར་སྣང༌། གཉིས། ཡང་གཞན་ཞིག་ནས་བསམ་བློ་གཏང་ན། སློབ་མའི་ལུང་བླ་མས་མི་དྲང་བར་ཡང་མི་གྲུབ་པས་དེ་སྒྲུབ་བྱེད་དུ་དྲངས་ན་ཡང་མི་ཆོག་པ་མེད་སྙམ། དཔེར་ན་སློབ་དཔོན་ཕྱོགས་གླང་དང་སློབ་དཔོན་དཀོན་མཆོག་འབངས་གཉིས་ཀ་ལྟ་བུར་མཚོན་ན་བླ་སློབ་ཀྱང་རེད། དེའི་སྟེང་སློབ་དཔོན་དཀོན་མཆོག་འབངས་དེ་སློབ་དཔོན་ཕྱོགས་གླང་དང་ཐུགས་རྒྱུད་ཀྱི་རྟོགས་པ་མཉམ་པ་ལྟ་བུར་གསུངས་པ་རེད། ཁོང་གཉིས་ཀ་ཧ་ལས་པའི་ཐུགས་བརྩེ་མཐུན་ས་འདྲ་བོ་ཡིན་ས་རེད། དེའི་རྒྱུ་མཚན་གྱིས། སློབ་དཔོན་དཀོན་མཆོག་འབངས་ཀྱིས་མཛད་པའི་བསྟན་བཅོས་རེ་ལ་སློབ་དཔོན་ཕྱོགས་གླང་གིས་འགྲེལ་བཤད་གནང་བཞག་པ་ཡོད་པར་རྗེ་ཏཱ་ར་ནཱ་ཐའི་རྒྱ་གར་ཆོས་འབྱུང་དུ་གསུངས་ཡོད། དེས་ན་སློབ་མའི་གསུང་ལ་བླ་མས་འགྲེལ་བ་བརྩམས་ན། སློབ་མའི་ལུང་དེ་ཡང་བླ་མའི་དྲངས་ན་མི་ཆོག་རྒྱུ་མེད་སྙམ། གསུམ། དེ་རང་འགྲེལ་ཡིན་ན་འགྲེལ་བ་ཁག་གི་སྐབས་སུ་དྲང་དགོས་ལ་མ་དྲང་བའི་ཕྱིར་ཞེས་པ་འདི་ལ་ཡང༌། སྤྱིར་བཏང་སློབ་དཔོན་ལེགས་ལྡན་འབྱེད་ཀྱི་ཤེས་རབ་སྒྲོན་མེ་སོགས་ཀྱི་སྐབས་སུ། འགྲེལ་བར་ཞེས་པ་མང་པོ་ཞིག་ཐོན་གི་འདུག དེའི་འགྲེལ་བ་དེ་ག་ལས་འཇིགས་མེད་ཡིན་སྙམ། བཞི། དེ་ལས་གཞན་གཞུང་དེ་དག་གི་སྐབས་སུ་ཡིན་ན། ག་ལས་འཇིགས་མེད་ཀྱིས་རྩོམ་གཞི་བྱས་ནས་འགྲེལ་ཡོང་དུས་ཚིག་ཕལ་ཆེར་ག་ལས་འཇིགས་མེད་ཀྱི་ཚིག་རང་སོར་བཞག་ཡོད་པས་གཅིག་རེ་གཅིག་རེ་ལུང་འདྲེན་དགོས་ན་ལུང་འདྲེན་ཚོད་ཡོད་རྒྱུ་མ་རེད། དེ་ཡང་བཅོམ་ལྡན་རིག་པའི་རལ་གྲིའི་རྩ་ཤེས་འགྲེལ་བར། སློབ་དཔོན་ལེགས་ལྡན་འབྱེད་དང་སངས་རྒྱས་བསྐྱངས་དེ་དག་གིས་རང་འགྲེལ་གྱི་མགོ་ནས་མཇུག་བར་ཕལ་ཆེར་དྲངས་འདུག འོན་ཀྱང་སངས་རྒྱས་བསྐྱངས་ཀྱིས་ཐལ་འགྱུར་མ་གཏོགས་རང་རྒྱུད་ཀྱི་སྦྱོར་བ་བཀོད་མི་འདུག་ཅེས་གསུངས་འདུག དེའི་རྒྱུ་མཚན་གྱིས་གོང་གི་རིགས་པ་དེ་དག་གིས་རང་འགྲེལ་དུ་ཁས་ལེན་པ་ལ་མི་གནོད་པ་འདྲ་ཞིག་རེད་སྙམ། དེས་ན་རང་ལུགས་ལ་རྩ་ཤེས་འགྲེལ་བ་ག་ལས་འཇིགས་མེད་རང་འགྲེལ་ཡིན་པ་དང༌།དེ་ཡང་རྒྱ་གར་གྱི་སློབ་དཔོན་སྤྱན་རས་གཟིགས་བརྟུལ་བཞུགས་ཀྱིས་མཛད་པའི་ཤེས་རབ་སྒྲོན་མེའི་འགྲེལ་བཤད་དུ་གསུངས་པ་དང༌། ཇོ་བོ་རྗེ་དཔལ་ལྡན་ཨ་ཏི་ཤས་ཀྱང༌། སློབ་དཔོན་བདག་ཉིད་ཀྱིས་མཛད་པའི་ག་ལས་འཇིགས་མེད་ཅེས་དེང་སང་ཡང་ལམ་སྒྲོན་དཀའ་འགྲེལ་དུ་ཚིག་ཟིན་ཇི་ལྟ་བར་འདུག དེ་ཡང་ཇོ་བོ་རྗེ་ཡིན་ན། དཔལ་ནཱ་ལེནྡྲ་དང་བི་ཀྲ་མ་ཤཱི་ལ་གཉིས་ཀྱི་དེའི་སྐབས་ཀྱི་པནྜི་ཏ་ཆེས་མཆོག་ཏུ་གྱུར་པ་ཞིག་རེད། དེས་ན་ཁོང་རྣམ་པས་ཀྱང་གལ་ཏེ་དེ་རང་འགྲེལ་མ་ཡིན་ན་རང་འགྲེལ་ཡིན་ཞེས་གསུང་རྒྱུ་མ་རེད་སྙམ་མོ། །ཞེས་པ་དངོས་གྲུབ་དཔལ་གྱིས་བྲིས་པ་དགེའོ། |