 གསུང་འབུམ་པོད་བཅོ་ལྔ་པ། བསྟན་པའི་གསོ་སྨན་སོགས།དཔལ་ལྡན་རྒྱལ་བ་ཇོ་ནང་པའི་དཔེ་ཚོགས།དགེ་བཤེས་དངོས་གྲུབ་དཔལ།གངས་ལྗོངས་རིས་མེད་མཐོ་སློབ་ཀྱི་རྩོམ་སྒྲིག་སྡེ་ཚན།མཁོ་རྒུའི་ལོངས་སྤྱོད་འཛོམས་ཀྱང་མ་བསགས་ཤིང་། །འདོད་ཡོན་འཁོར་མང་ཚོགས་ཀྱང་མ་ཞེན་པར། །བསླབ་གསུམ་སྡེ་སྣོད་རིག་པའི་བང་མཛོད་དེ། །སྤོང་དང་ཀློག་པའི་སྙིང་གི་དབུས་སུ་བསྐྱིལ། ། ཇོ་ནང་ཕྱོགས་སུ་འཆད་ཉན་དར་སྤེལ་མཛད་པའི་མཚན་བྱང་ཙམ་བརྗོད་པ།དགེ་བཤེས་དངོས་གྲུབ་དཔལ་གྱིས་ཇོ་ནང་ཕྱོགས་སུ་འཆད་ཉན་དར་སྤེལ་མཛད་པའི་མཚན་བྱང་ཙམ་བརྗོད་པ། ཇོ་ནང་དགེ་བཤེས་ངག་དབང་དངོས་གྲུབ་དཔལ་བཟང་པོ་མཆོག་འཕགས་ཡུལ་ནས་༢༠༠༤ལོར་ཕེབས་ནས་མདོ་ལིའི་རྡོ་ཁ་དགོན་དུ་ཕེབས་ནས་བཤད་གྲྭ་གསར་འཛུགས་གནང་ནས་ད་ལྟའི་བར་བཤད་གྲྭ་མ་ཉམས་པར་གནས་ཡོད་ལ། མཁན་མུན་སེལ་དང༌། མཁན་རས་པ་དང༌། མཁན་རིན་རྒྱམ་དང༌། མཁན་ལྷ་དབང་སོགས་གསོ་སྐྱོང་བྱས་པ་སོགས་དགོན་དེར་བཀའ་དྲིན་ཆེ་བ་དང༌། ལྕམ་མདའ་དགོན་དུ་སྔ་ཕྱིར་ཐེངས་བརྒྱད་ལྷག་ལ་ཕེབས་ནས་རྩོད་གྲྭ་གསར་འཛུགས་གནང་ནས་ད་ལྟ་ཁོང་གི་སློབ་མ་མཁན་བློ་ཆོས་དང་མཁན་པོ་དཀོན་འཕྲིན་དང་མཁན་ཀར་བློ་དང་མཁན་དོན་དམ་དཔལ་སོགས་མཁས་པ་དུ་མས་སྐྱོང་བཞིན་ཡོད། ཨ་སྐྱོང་དགོན་པར་བཤད་གྲྭ་ཆད་ནས་ལོ་བཅུ་ཕྲག་ལྷག་གི་མཚམས་༢༠༠༥་ནས་མཁན་པོ་ལས་ཐོག་པའི་ལས་འགན་ལོ་གསུམ་ཙམ་བཞེས་ནས་བཤད་གྲྭ་དང་རྩོད་པ་བཙུགས། མཁན་བསམ་བཟང་དང་མཁན་དཔལ་འབྱོར་ཚེ་རིང་སོགས་བསྐྱེད་བསྲིངས་བྱས་ནས་ད་ལྟའི་བར་དུ་བཤད་གྲྭ་མ་ཉམས་པར་གནས་ཡོད། ༢༠༠༧གི་ལོ་མཇུག་ལ་མགོ་ལོག་ལུང་སྐྱ་དགོན་དུ་ཐེག་མཆོག་དབུ་མ་དང་གཏན་ཚིགས་བསྡུས་དོན་སོགས་ཁྲིད་ནས་འཕེལ་རྒྱས་སུ་སོང་ནས་ད་ལྟའི་ཆར་དགོན་དེའི་བསྟན་བདག་འཇམ་དབྱངས་སྦྱིན་པ་དང༌། མཁན་པདྨ་བློ་གསལ་དང༌། མཁན་སྤྲུལ་བསྟན་པའི་རྒྱལ་མཚན་སོགས་འཆད་ཁྲིད་གནང་ཐུབ་པའི་མཁས་དབང་མང་པོ་བསྐྱེད་བསྲིངས་བྱས་ནས་དགོན་པ་དེ་དང་འབྲེལ་བ་ཧ་ཅང་ཟབ་མོ་ཆགས་ཡོད། མཆོག་སྤྲུལ་འཇིགས་མེད་རྡོ་རྗེ་མཆོག་གི་ཐུགས་བཀོད་ལྟར་གཙང་ཆེན་དགོན་གྱི་གྲྭ་བཞི་བཅུ་ལྷག་ཨ་སྐྱོང་དགོན་དང་ལུང་སྐྱ་གཉིས་སུ་ཕེབས་ནས་དམ་པ་གང་གི་མདུན་ནས་སློབ་སྦྱོང་གནང༌། ༢༠༠༨ཀྱི་ལོར་མཆོག་སྤྲུལ་འཇིགས་མེད་རྡོ་རྗེ་སོགས་ཀྱིས་ཡང་ཡང་རེ་བསྐུལ་ཞུས་པ་ལྟར་གཙང་ཆེན་དགོན་དུ་ཕེབས། དགོན་པ་དེར་ལམ་རིམ་ལྟ་མི་བཅུ་གཉིས་ཙམ་མཁན་འོད་རབ་མདུན་དུ་བཞུགས་པ་ལས་གཞན་བཤད་གྲྭ་མེད་ཀྱང་མཁས་དབང་གང་གིས་ལོ་གཉིས་ཀྱི་རིང་ལ་མདོ་སྔགས་སློབ་གླིང་ཞེས་པའི་དབུ་བཟུང་ནས་གྲྭ་བ་སུམ་བརྒྱ་ལྷག་འདུས་ཏེ། ཀུན་སྤྱོད་དང་འགྲིག་ལམ་བཤད་གྲྭ་བའི་གྲངས་ཀ་སོགས་འཕེལ་རྒྱས་སུ་སོང་ནས་ད་ལྟའི་བར་གོང་འཕེལ་དུ་འགྲོ་བཞིན་ཡོད། མཁན་པོ་ཡང་མང་དུ་གསོ་སྐྱོང་གནང༌། སྐབས་དེར་གཞན་སྟོང་བགྲོ་གླེང་ཐེངས་ལྔ་བའི་སྐབས་སུ་ཇོ་ནང་གི་སློབ་གཉེར་བ་ཡོངས་དང་གཙང་ཆེན་དགོན་པའི་སྦྱོར་དྲུག་པ་ཆོས་ཚན་གསུམ་དང་བཅས་པ་ལ་རྒྱུད་བླ་དོལ་ཊཱིཀ་ཁྲིད་ལུང་དང་བཅས་གནང་བ་དང༌། ཛམ་ཐང་ཆོས་རྗེ་དགོན་པའི་བཤད་གྲྭ་རྣམས་ལ་ཚད་མའི་བསྟན་བཅོས་ཡིད་ཀྱི་མུན་སེལ་སོགས་ཁྲིད་ལ། ཛམ་ཐང་ཆོས་རྗེ་དགོན་གྱི་དགོན་མ་ལག་བཅས་པའི་དམ་པ་གང་གི་མདུན་ནས་འཆད་ཉན་གཙོ་བོར་བྱས་ནས་གནས་བཞིན་ལགས། ༢༠༡༠ལོར་ཚ་ཁོ་སྟོད་པའི་དགོན་ཆེན་ཛ་འགོའི་རི་ཁྲོད་བྱང་ཆུབ་ཆོས་རྫོང་དུ་ཕེབས་ནས་ལོ་གསུམ་ཙམ་བཞུགས། ཇོ་ནང་བརྩེ་ཆེན་མཐོ་སློབ་གསར་དུ་བཙུགས་ནས་བཤད་གྲྭ་བ་སུམ་བརྒྱ་ཡས་མས་ཚོགས་ནས་བཀའ་པོད་ལྔའི་འཆད་ཉན་བཙུགས། ད་ལྟའི་བར་དམ་པ་གང་ཉིད་མཚམས་རེ་ཕེབས་པ་དང་བཤད་གྲྭའི་དགེ་རྒན་སོགས་བཀོད་སྒྲིག་བྱེད་བཞིན་ཡོད། དགོན་དེར་མཁན་པོ་དགེ་ལེགས་དང༌། མཁན་དཀོན་མཆོག་དཔལ་དང༌། མཁན་ཉི་མ་སོགས་མཁས་དབང་མང་པོ་གསོ་སྐྱོང་གནང༌། རྒྱལ་རོང་པཱ་ལ་དགོན་དུ་སྔ་ཕྱི་དུ་མར་ཕེབས། དགོན་དེར་ཁོང་གི་མདུན་ནས་མདོ་སྔགས་དང་བཅས་པ་ལ་གསན་བསམ་བྱེད་མཁན་མཁན་དབང་རྒྱལ་དང༌། མཁན་རིག་རྒྱས་སོགས་གྲྭ་བ་མང་པོ་གསོ་སྐྱོང་གནང༌། རྒྱལ་རོང་ཁང་གསར་དགོན་དུ་ཐེངས་མང་པོ་ཕེབས། མཁན་ཤེས་རབ་རིན་ཆེན་དང༌། མཁན་བཟང་ལྡན་སོགས་གྲྭ་སུམ་ཅུ་ཡས་མས་ཀྱིས་ཁོང་གི་མདུན་ནས་དཔེ་ཆ་སྦྱང་བ་མཛད། རྒྱལ་རོང་ཚག་དགོན་པར་ལན་གཉིས་ཕེབས། རབ་འབྱམས་པ་རྡོར་དྲིལ་ཐར་སོགས་མི་སུམ་ཅུ་ལ་ཉེ་བར་ལུགས་གཉིས་ཀྱིས་ལེགས་པར་བསྐྱངས། སྣར་འདུ་དགོན་པའི་རབ་འབྱམས་པ་ལམ་ཕྲན་བསྟན་སོགས་སློབ་མ་བཅུ་ཕྲག་ལྷག་བསྐྱང༌། ལྷ་ཡག་དགོན་པའི་སྐྱོར་དཔོན་སོགས་གྲྭ་བཅོ་ལྔ་ལྷག་གསོ་སྐྱོང་གནང༌། གྱང་རྒང་དགོན་པའི་མཁན་པོ་རབ་གསལ་དང་མཁན་གསལ་ལྡན་སོགས་ཀྱིས་དམ་པ་གང་གི་མདུན་ནས་བཀའ་པོད་ལྔ་སོགས་སྦྱང་བ་གནང༌། ༢༠༡༣ལོར་ཆོས་ཐང་དགོན་པར་ཕེབས་ནས་ལོ་ལྔར་བཞུགས། ཆོས་ཐང་དགོན་པ་མཁན་ཆེན་བློ་བཟང་འཕྲིན་ལས་ཀྱི་གདན་ས་ཡིན་ལ་སྔར་བཤད་གྲྭ་ལེགས་པ་ཡོད་ཀྱང༌། བར་སྐབས་བཤད་གྲྭ་ཆད་ནས་རིག་གནས་སྦྱང་བ་གནང་མཁན་མི་བདུན་ཙམ་ལས་མེད་ཀྱང་དམ་པ་གང་གི་བཀའ་དྲིན་ལ་བརྟེན་ནས་ལྔ་རིག་མཐོ་སློབ་དབུ་བརྙེས་པ་སོགས་གྲྭ་རྒྱུན་མང་དུ་འཕེལ་བས་བཤད་སྒྲུབ་གཉིས་ཀ་ཧ་ཅང་གོང་འཕེལ་དུ་གྱུར་ནས། ད་ལྟའི་ཆར་བཤད་སྒྲུབ་གཉིས་ཆར་གནས་བཞིན་པ་ཡིན་ནོ། །༢༠༡༨ལོར་མགོ་ལོག་ཉིན་ཡུལ་དགོན་དུ་ཕེབས་ནས་གྲྭ་ས་བ་སུམ་བརྒྱ་ལྷག་ཚོགས་ལ། འོན་ཀྱང་ཕྱི་ནང་གི་མིའི་བསམ་སྦྱོར་ངན་པའི་དབང་གིས་ཡུན་རིང་དུ་གནས་སྐབས་ཚོགས་མ་ཐུབ། ༢༠༡༧་ལོར་རྔ་བ་བསེ་དགོན་པར་ཕེབས་ནས་བཤད་གྲྭ་སླར་གསོ་གནང་བ་མ་ཟད་གངས་ལྗོངས་རིས་མེད་མཐོ་སློབ་ནས་དཔེ་ཁྲིད་དགེ་རྒན་མངགས ༢༠༡༨ལོར་དམ་པ་གང་དགོན་དེར་ཕེབས། བསེ་དགོན་བཤད་གྲྭར་རིས་མེད་མཐོ་སློབ་ཀྱི་གྲྭ་ས་བ་མང་པོ་དེར་ཕེབས་ཏེ་སློབ་གཉེར་བྱས་ནས་གནས་ཡོད་དོ། །གཞན་ཡང་ཇོ་ནང་གི་གཙང་ཞོལ་དགོན་དུ་གཞན་སྟོང་བགྲོ་གླེང་ཐེངས་ལྔ་བའི་སྐབས་ལྷན་ཐབས་འོད་བརྒྱ་འབར་བའི་བཤད་ཁྲིད་གནང་བ་དང་དགོན་དེར་དམ་པ་གང་གི་སློབ་མ་མཁས་པ་མང་དུ་ཡོད། གཙང་གོང་མ་དང་མགར་སྐོར་དགོན་དང་གདོང་སྐོར་དགོན་དང་རྩི་ནང་དགོན་བྱ་ཡུལ་དགོན་སོགས་སུ་དམ་པ་གང་གི་སློབ་མ་དཔེ་ཁྲིད་བྱེད་ཐུབ་པའི་མཁས་པ་དུ་མ་ཡོད། གཞན་སྟོང་བགྲོ་གླེང་ཚོགས་གཙོ་ལོ་དྲུག་མཛད་པ་དང༌། ཚད་མའི་འཛིན་གྲྭ་ཐེངས་གསུམ་ཙམ་ཚོགས་པར་མཛད་པ་དང༌། ཇོ་ནང་རང་ལུགས་ལས་བརྩམས་ནས་གསུང་རྩོམ་པོད་ཆེན་བཅོ་བརྒྱད་མཛད་པ་སོགས་ཇོ་ནང་གི་འཆད་ཉན་ཡང་དར་བསྟན་པའི་བྱེད་པོ་མཁན་ཆེན་དངོས་གྲུབ་དཔལ་ཞེས་གྲགས་ཤིང་གྲུབ་པའོ། །ཇོ་ནང་དགོན་སྡེ་ཕལ་ཆེར་ལ་དངོས་ཤུགས་བརྒྱུད་གསུམ་ནས་སློབ་ཆུང་རེ་འཛུགས་པར་འབོད་བསྐུལ་ཞུས་པ་ལྟར་དགོན་པ་རང་རང་གིས་འབད་རྩོན་བྱས་ཏེ་བཙུགས་ཡོད་ལ། ཆོས་བརྒྱུད་གཞན་ལ་ཡང་བཀའ་བརྒྱུད་གོ་ཆེའི་དགོན་པར་རི་ཆོས་དང་རྒྱུད་བླ་མ་སོགས་དཔེ་ཁྲིད་གནང༌། སྔ་འགྱུར་རྙིང་མའི་བསྟན་གཞི་ཀཿཐོག་བཅུ་ཕྲག་རིག་པའི་སློབ་གླིང་ནས་བསམ་གཟུགས་དང་མི་ཕམ་རྟགས་རིགས་དང་འགྲེལ་བ་དོན་གསལ་སོགས་དཔེ་ཁྲིད་གནང༌། མི་ཉག་དགོན་ཆེན་དུ་སྤྱོད་འཇུག་ཤེར་ལེ་དང་དབུ་མ་འཇུག་པ་དང་གཞན་སྟོང་ལྟ་བ་ཁས་ལེན་སེང་གེའི་ང་རོ་རྣམས་དཔེ་ཁྲིད་གནང༌། འབྲས་སྤུངས་སུ་བཞུགས་སྐབས་ལོ་བདུན་ཙམ་ལ་སློབ་གཉེར་བ་དུ་མར་དཔེ་ཁྲིད་གནང༌། པེ་ཅིན་ནང་བསྟན་སློབ་གླིང་དུ་སྐབས་གསུམ་པའི་མཐོ་རམས་པའི་དགེ་རྒན་དུ་ཕེབས་པ་སོགས་ཆོས་བརྒྱུད་རིས་མེད་ལ་འཆད་ཉན་དར་རྒྱས་སུ་གནང་བའི་རིས་མེད་པའོ། ། བརྩམས་པའི་གཞུང་ལུགས་དག་གི་མཚན་རགས་ཙམ་བཀོད་པ།བརྩམས་པའི་གཞུང་ལུགས་དག་གི་མཚན་རགས་ཙམ་བཀོད་པ། ངག་དབང་༧དངོས་གྲུབ་དཔལ་བཟང་པོ་མཆོག་གིས་བརྩམས་པའི་གཞུང་ལུགས་དག་གི་མཚན་རགས་ཙམ་བཀོད་པ་བཞུགས་སོ། །རྒྱལ་བསྟན་འཁོར་ལོ་ཐ་མའི་འཆད་ཉན་བསྟན་པའི་མེ་རོ་སླར་ཡང་གསོ་བར་མཛད་པའི་ངེས་དོན་གྱི་བཤེས་གཉེན་ཆེན་པོ་ལུང་རིགས་སྡེ་སྣོད་འཛིན་པའི་གཙུག་གི་ཅོད་པན་གནས་བརྟན་འགྲོ་བའི་མགོན་པོ་མཚུངས་པ་མ་མཆིས་པ་ངག་དབང་༧དངོས་གྲུབ་དཔལ་བཟང་པོ་མཆོག་གིས་བརྩམས་པའི་གཞུང་ལུགས་དག་གི་མཚན་རགས་ཙམ་བཀོད་པ་བཞུགས་སོ། །༡ པོད་དང་པོར། མཁྱེན་གསུམ་པདྨོ་འབྱེད་པའི་ཉི་ཟེར། གཞན་སྟོང་སྐལ་བཟང་མིག་འབྱེད། ངེས་གསང་ཀུ་མུད་འབྱེད་པའི་ཟླ་ཟེར། བཀའ་བསྡུ་བཞི་བའི་འགྲེལ་བ་ལུང་རིགས་གཏེར་མཛོད་ཐུབ་བསྟན་མཛེས་རྒྱན་དང༌། བཀའ་བསྡུ་བཞི་བའི་ཟུར་མཆན་ཉིན་བྱེད་སྣང་བ། གཞི་ལམ་འབྲས་བུའི་རྣམ་བཞག་ཉུང་གསལ་རིན་ཆེན་ཕྲེང་བ་ཞེས་བྱ་བ་རྣམས་བཞུགས། ༢ པོད་གཉིས་པར། རི་ཆོས་ངེས་དོན་རྒྱ་མཚོའི་བསྡུས་དོན་ཚངས་ པའི་སྒྲ་དབྱངས་ཞེས་བྱ་བ་གཞུགས། ༣པོད་གསུམ་པར། ཚད་མའི་དགོངས་དོན་བསྡུས་གྲྭའི་རྣམ་བཞག་གཞུང་བརྒྱ་གསལ་བའི་རིགས་ལམ་དང༌། བློ་རིག་གི་རྣམ་བཞག་ལེགས་བཤད་གསེར་གྱི་ཉི་མ་དང༌། རྫས་ལྡོག་བརྒྱད་ཀྱི་མུ་བཞི་དང༌། ཁྱབ་སྒོ་རེ་བཞིའི་རེའུ་མིག་བློ་གསལ་མིག་འབྱེད་ཅེས་བྱ་བ་རྣམས་བཞུགས། ༤པོད་བཞི་པར། རྟགས་རིགས་ལེགས་བཤད་དྲི་མ་མེད་པའི་འོད་དང༌། ཕྱོགས་སྒྲའི་རྩོད་ལན་མདོར་བསྡུས་གསལ་བའི་སྒྲོན་མེ་དང༌། གཙང་ཆེན་གསེར་ཁྲི་རིམ་བྱོན་གྱི་རྣམ་ཐར་གསེར་རིའི་ཕྲེང་བ་ཞེས་བྱ་བ་རྣམས་བཞུགས། ༥པོད་ལྔ་བར། ཕར་ཕྱིན་གྱི་སྤྱི་དོན་དང་མཐའ་དཔྱོད་རིན་ཆེན་ཕྲེང་བ་ལུང་རིགས་གཏེར་མཛོད་སྐལ་བཟང་ཡིད་ཀྱི་མཛེས་རྒྱན་ཞེས་བྱ་བ་ལས་སྐབས་དང་པོའི་འགྲེལ་བ་བཞུགས། ༦པོད་དྲུག་པར། ཕར་ཕྱིན་གྱི་སྤྱི་དོན་དང་མཐའ་དཔྱོད་རིན་ཆེན་ ཕྲེང་བ་ལུང་རིགས་གཏེར་མཛོད་སྐལ་བཟང་ཡིད་ཀྱི་མཛེས་རྒྱན་ཞེས་བྱ་བ་ལས་སྐབས་གཉིས་པ་མན་གྱི་འགྲེལ་བ་བཞུགས། ༦པོད་བདུན་པར། མཛོད་ཀྱི་དོགས་གཅོད་ལམ་བཟང་གསལ་བའི་སྒྲོན་མེ་ཞེས་བྱ་བ་ལས་གནས་བཞི་བ་ཡན་གྱི་འགྲེལ་བ་བཞུགས། ༨པོད་བརྒྱད་པར། མཛོད་ཀྱི་དོགས་གཅོད་ལམ་བཟང་གསལ་བའི་སྒྲོན་མེ་ཞེས་བྱ་བ་ལས་གནས་བཞི་བ་མན་གྱི་འགྲེལ་བ་དང༌། བརྟན་བཞུགས་ཀྱི་ངག་འདོན་འཆི་མེད་ཚེ་ཡི་དཔལ་སྟེར་དང༌། མཎྜལ་གྱི་བཤད་པ་ཀུན་བཟང་མཆོད་སྤྲིན་དང༌། ཨ་སྐྱོང་དགོན་གྱི་བྱུང་བ་དྲང་སྲོང་བདེན་པའི་ཚངས་ཐིགས་ཞེས་བྱ་བ་རྣམས་བཞུགས། ༩པོད་དགུ་བར། གྲུབ་མཐའི་རྣམ་བཞག་ལེགས་བཤད་འདོད་འཇོ་དང༌། ས་ལམ་གྱི་རྣམ་བཞག་ཤེར་དཀར་མེ་ལོང་དང༌། གཞན་སྟོང་གི་དོགས་གཅོད་རྡོ་རྗེའི་གཟེགས་མ་དང༌། ཞབས་བརྟན་གསོལ་འདེབས་སྣ་ཚོགས་བཅས་བཞུགས། ༡༠པོད་བཅུ་པར། གཞན་སྟོང་འགྲོ་གླེང་ཐེངས་དང་པོར་དབུ་མའི་སྐོར་གྱི་དྲི་བ་སོ་ལྔ་ཡོད་པའི་དྲི་ལན་དང༌། གཞན་སྟོང་བགྲོ་གླེང་ཐེངས་གཉིས་པའི་སྐབས་སུ་དབུ་མའི་དྲི་བ་བཅུ་དགུ་ཡོད་པའི་དྲི་ལན་དང༌། གཞན་སྟོང་བགྲོ་གླེང་ཐེངས་གསུམ་པའི་སྐབས་སུ་དབུ་མའི་དྲི་བ་ཉེར་གཅིག་གི་དྲི་ལན་དང༌། གཞན་སྟོང་བགྲོ་གླེང་ཐེངས་བཞི་པའི་སྐབས་སུ་དབུ་མའི་དྲི་བ་གསུམ་དང་ཚད་མའི་སྐོར་ལས་དྲི་བ་ཉེར་གཅིག་ཡོད་པའི་དྲི་ལན་རྣམས་བཞུགས། ༡༡པོད་བཅུ་གཅིག་པར། གཞན་སྟོང་བགྲོ་གླེང་ཐེངས་ལྔ་བར་ཕར་ཕྱིན་སྐོར་ལས་དྲི་བ་ཉེར་བདུན་ཡོད་པའི་དྲི་ལན་དང༌། གཞན་སྟོང་བགྲོ་གླེང་ཐེངས་དྲུག་པར་ཕར་ཕྱིན་སྐོར་ལས་དྲི་བ་ཉེར་བདུན་གྱི་ཡོད་པའི་དྲི་ལན་དང༌། གཞན་སྟོང་བགྲོ་གླེང་ཐེངས་བདུན་པར་ཕར་ཕྱིན་སྐོར་ལས་དྲི་བ་ཉེར་དགུ་ཡོད་པའི་དྲི་ལན་རྣམས་བཞུགས། ༡༢པོད་བཅུ་གཉིས་པར། རྡོ་རྗེ་འཆང་ངག་དབང་བརྩོན་འགྲུས་དཔལ་གྱི་རྣམ་ཐར་དང༌། རྡོ་རྗེ་འཆང་བླ་མ་དམ་པ་བཤད་སྒྲུབ་དཔལ་གྱི་རྣམ་ཐར་དད་པའི་འཇུག་ངོགས་དང༌། བླ་མ་བཤད་སྒྲུབ་དཔལ་གྱི་བླ་མའི་རྣལ་འབྱོར་དང༌། དཔལ་ཇོ་ནང་བའི་ཆོས་འབྱུང་དང་བརྒྱུད་རིམ་བླ་མའི་རྣམ་ཐར་ཞེས་བྱ་བ་རྣམས་བཞུགས། ༡༣པོད་བཅུ་གསུམ་པར། སྐྱབས་འགྲོའི་རྣམ་བཤད་ལམ་བཟང་གསལ་བའི་ཉི་མ་དང༌། སྡོམ་གསུམ་གྱི་བསླབ་བྱ་དྭངས་གསལ་བདུད་རྩིའི་ཆུ་གཏེར་དང༌། ནང་ཆོས་ཀྱི་ངོ་སྤྲོད་མདོར་བསྡུས་དང༌། མཐོང་དོན་གྱི་སྡོམ་ཚིག་གྲུབ་པའི་དགོངས་རྒྱན་དང༌། སྤྱན་རས་གཟིགས་བཅུ་གཅིག་ཞལ་གྱི་སྒོ་ནས་རུས་ཆོག་གི་ཆོ་ག་དང༌། མཆོད་རྟེན་གྱི་ཕན་ཡོན་དཔག་བསམ་ལྗོན་ཤིང་དང༌། བསྐང་བསྡུས་དུ་མ་དང༌། བསང་མཆོད་འདོད་དོན་ཀུན་འགྲུབ་ཅེས་བྱ་བ་རྣམས་བཞུགས།༡༤པོད་བཅུ་བཞི་བ། འདུལ་བའི་མཐའ་དཔྱོད། སྟོད་ཆ། ༡༥པོད་བཅོ་ལྔ་བ། འདུལ་བའི་མཐའ་དཔྱོད། སྨད་ཆ། ༡༦བསྟན་པའི་གསོས་སྨན། ༡༧དྲང་ངེས། ༡༨བློ་ལྡོག་རྣམ་བཞི་དང་སྔགས་རྒྱུད་སྡེ་བཞིའི་སྤྱི་དོན་སོགས་སོ། །པོ་ཏི་བཅོ་བརྒྱད་ཡོད། དགེ་བཤེས་དངོས་གྲུབ་དཔལ་གྱིས་ཇོ་ནང་ཕྱོགས་སུ་འཆད་ཉན་དར་སྤེལ་མཛད་པའི་མཚན་བྱང་ཙམ་བརྗོད་པའོ། ། སྡོམ་ཚིག་གི་སྐོར། བསླབ་བྱ་བཅུ་གཅིགསྡོམ་ཚིག་གི་སྐོར། བསླབ་བྱ་བཅུ་གཅིག ༡གཞན་ལ་གནོད་པ་མེད་པར་ཕན་པ་བསྒྲུབས་ནས་གཞན་གྱི་ཡིད་སེམས་ལ་དགའ་བ་བསྐྲུན་པའི་ཀུན་སྤྱོད་དགོས། ༢བྱ་བ་གང་བསྒྲུབ་ནའང་ལས་འབྲས་དྲང་བཞག་གི་བྱ་བ་སྒྲུབ་པ་ལས་ཀུན་ལ་མཐུན་པའི་བྱ་བ་སངས་རྒྱས་ཀྱིས་ཀྱང་སྒྲུབ་ཐབས་མེད། ༣ལྷག་བསམ་གྱི་སྒོ་ནས་གཡོ་སྒྱུ་དང་རང་ཆེ་ཐབས་སོགས་དང་མ་འབྲེལ་བར་ཕྱི་གསལ་ནང་གསལ་གྱིས་གཞན་དོན་བསྒྲུབ་དགོས། ༤གྲོགས་པོ་ངན་པས་ཇི་ལྟར་བསླུ་བྲིད་བྱེད་ནའང་མདུན་མ་གཅིག་དྲིལ་བྱས་ནས་རང་ཚུགས་ཡོད་དགོས། ༥སློབ་སྦྱོང་ནི་རང་གཞན་ལ་ཕན་པ་ཡོད་པའི་རིག་པའི་གནས་ལ་བརྩོན་ཤེས་བསྐྱེད་དགོས། ༦ འཇིགས་སྣང་དང་དོགས་ཟོན་ལ་གནས་ན་བྱ་བ་རླབས་ཆེན་གང་ཡང་སྒྲུབ་མི་ནུས་པས་སྤོབས་པ་དང་སྙིང་སྟོབས་བསྐྱེད་ནས་དཀའ་འགག་ལས་བརྒལ་དགོས། ༧སྐྱིད་སྡུག་གང་གི་སྐབས་ཡིན་ནའང་རང་ལ་དྲིན་ཆེན་དང་མཆོག་གསུམ་མི་བརྗེད་པར་དྲིན་གཟོ་དགོས། ༨ ཀུན་ལ་མཐུན་པ་མི་ཆོས་ཀྱི་རྩ་བ་ཡིན་མོད་ཀྱང་བྱ་སྤྱོད་ངན་པའི་རིགས་དང་མཐུན་མི་རུང༌། ༩ གྲྭ་བའི་མདུན་ལམ་ནི་ཚུལ་ཁྲིམས་ལ་གནས་ནས་ཐོས་བསམ་སྒོམ་གསུམ་བྱས་ཏེ་བསྟན་འགྲོའི་དོན་བསྒྲུབ་དགོས། ༡༠ འཚོ་བ་ནི་ལོག་འཚོ་མེད་པར་ཟས་གོས་གནས་མལ་ངན་ངོན་ཙམ་གྱི་འཚོ་བ་ལ་རོལ་ནས་འདོད་ཆུང་ཆོག་ཤེས་བྱ་དགོས། ༡༡ བསྟན་དོན་བསྒྲུབ་ན་བསྟན་པ་ཤེས་ནས་བཤད་སྒྲུབ་ལ་ལག་རྗེས་འཇོག་དགོས། རང་གི་ཉམས་མྱོང་ལ་བརྟེན་ནས་ངག་དབང་དངོས་གྲུབ་དཔལ་ནས་གང་དྲན་ཤར་མར་བྲིས་པའོ། །དེང་དུས་སུ་ཁ་ཅིག་གིས་སྡོམ་པ་ཤོར་རྗེས་སུ་གྲྭ་གོས་ཕུད་པ་ངོ་ཚ་བྱེད་པ་ནོར་འཁྲུལ་རེད། སྡོམ་པ་ཤོར་བ་ངོ་ཚ་དགོས་པ་ཞིག་རེད་མོད། སྡོམ་པ་ཤོར་ནས་གྲྭ་གོས་ཕུད་པ་ནི་ངོ་ཚ་ཡོད་པའི་རྟགས་ཡིན་པའོ། །ཡང་ན་སྡོམ་པ་ཤོར་ནས་གྲྭ་གོས་གྱོན་པ་ངོ་ཚ་མེད་པའི་རྟགས་དང༌། སྡོམ་པ་མེད་ནས་གྲྭ་གོས་ཕུད་པ་ངོ་ཚ་ཡོད་པའི་རྟགས་རེད་དོ། །དངོས་གྲུབ་དཔལ་ནས། དེང་གི་ཆར་ལྷག་བསམ་དང་ལྡན་པའི་སྐད་ཆའི་དོན་གོ་བ་ཆེས་ཉུང་བ་དང༌། གལ་ཏེ་དོན་གོ་ན་ཡང་ཕྲག་དོག་གི་དབང་གིས་ལོག་འགྲེལ་བྱས་ནས་མི་དཀར་མི་ནག་ཏུ་བསྒྱུར་ཨེ་ཐུབ་ལྟ་བ་ཆེས་མང་བ་ནི་མངོན་གསལ་ཡིན་པས། ལྷག་བསམ་གྱི་སྐད་ཆ་ལ་རྒྱབ་སྐྱོར་དང༌། དཀྲོག་གཏམ་ལ་དོགས་ཟོན་མཛོད་ཅིག ངག་དབང་དངོས་གྲུབ་དཔལ་ནས། ནང་ཆོས་ཀྱིས་དད་ལྡན་མང་ཚོགས་ལ་ཕན་གདག་དགོས་པ་ལས་དཀའ་ངལ་ལ་གཏད་མི་རུང༌། བླ་མས་སློབ་མའི་དམ་ཆོས་སྒྲུབ་པའི་ལམ་སྟོན་བྱེད་པ་ལས་འགལ་རྐྱེན་བྱེད་མི་རུང། དགོན་སྡེ་ནི་བཤད་སྒྲུབ་ཀྱི་རྟེན་གནས་བྱེད་དགོས་པ་ལས་མི་ཚོགས་མང་པོ་འདུས་སྡོད་བྱེད་ས་ཙམ་བྱེད་མི་རུང༌། དགོན་པའི་ལས་སྣེ་བས་སློབ་སྦྱོང་གི་སྣེ་ཁྲིད་བྱེད་དགོས་པ་ལས་མགོ་མཇུག་མེད་པའི་ཁྲིམས་ངན་བཟོ་མི་རུང་ངོ། །དངོས་གྲུབ་དཔལ་ནས། སྒེར་གཅོད་དང་སྤྱི་ཕན་གཉིས། བྱ་བ་གང་ཡིན་ཀྱང་ཕན་པ་མེད་པའི་ཐག་གཅོད་ནི་སྒེར་གཅོད་ཡིན་ལ། དེ་ལས་ལྡོག་པའི་ཐག་གཅོད་ནི་སྤྱི་ལ་ཕན་པ་ཡིན་པས་སྒྲུབ་འོས་པ་ཡིན། དངོས་གྲུབ་དཔལ་ནས། སྒྲུབ་འོས་པ་ཞིག་སྒྲུབ་ཆོག་པ་རང་དབང་གི་དོན་ཡིན་པ་ལས་ཁྲིམས་མེད་ལུགས་མེད་ཀྱི་བྱ་བ་གང་འདོད་བྱེད་ཆོག་པ་རང་དབང་གི་དོན་མ་ཡིན་པ་ཤེས་དགོས། ནང་པ་སངས་རྒྱས་པའི་རང་དབང་ནི་ལས་ཉོན་གྱི་གཞན་དབང་དུ་འགྲོ་མི་དགོས་པ་ཡིན་པས་གཏིང་ཟབ་པ་དང་རྒྱ་ཆེ་བ་རེད། དེང་སང་སྐྱེས་བུ་ཆོས་ཅན་དང་རྒྱུ་ཅན་གཉིས་ནོར་ཡོད་པ་མང་རབ་ཡོད་པས་དེ་གཉིས་མི་ནོར་བ་གལ་ཆེ་སྟེ། བདག་ཅག་གི་སྟོན་པས་འཁོར་ལོས་བསྒྱུར་བའི་རྒྱལ་སྲིད་ལྟ་བུ་མཆིལ་མའི་ཐལ་བ་བཞིན་སྤངས་ནས་རབ་ཏུ་བྱུང་སྟེ་དམ་ཆོས་སྒྲུབ་པ་ཡིན་པས་སོ། །ཡང་འགའ་ཞིག་ཆོས་དང་ཆབ་སྲིད་ནོར་བ་ཡང་མང་པོ་ཡོད་པས་དེ་གཉིས་འགལ་བ་ཡིན་པར་ཤེས་དགོས་ཏེ། ཇོ་བོ་རྗེས། སྤྱོད་པའི་མཆོག་འཇིག་རྟེན་པ་དང་མི་མཐུན་པ་ཡིན། ཞེས་གསུངས་སོ། །དེས་ན་བླུན་པོ་ཆུ་སྣ་གར་ཁྲིད་མི་བྱེད་པར་གྲོས་འདེབས་པའོ། །ཞེས་རྒྱལ་ཁམས་པ་དངོས་གྲུབ་དཔལ་ནས། སློབ་སྦྱོང་མཐར་ཕྱིན་པར་བྱེད་པ་ལ་བརྩོན་འགྲུས་གལ་ཆེ་བ་ཡིན་ལ། སྤྱིར་ཡོན་ཏན་མ་ལུས་པ་བརྩོན་འགྲུས་ཀྱི་རྗེས་སུ་འགྲོ་བ་ཡིན་ལ། སློབ་སྦྱོང་གི་གྲུབ་འབྲས་ལེགས་པ་ཡོང་མི་ཡོང་ནི་ཀུན་སློང་བཟང་ངན་ལ་རག་ལས་པས་སློབ་སྦྱོང་བྱེད་པའི་སྐབས་སུ་ཀུན་སློང་བཟང་པོས་ཟིན་པ་དགོས་སོ། །དགེ་བཤེས་དངོས་གྲུབ་དཔལ་ནས། དཔལ་འབྱོར་གྱི་གྲོགས་པོ་ནི་གྲོགས་བཟང་པོ།དཔལ་འབྱོར་གྱི་གྲོགས་པོ་ནི་གྲོགས་བཟང་པོ་མ་ཡིན། དཔལ་འབྱོར་གྱི་གྲོགས་པོ་ནི་གྲོགས་བཟང་པོ་མ་ཡིན། གལ་ཏེ་རང་ལ་དཔལ་འབྱོར་མེད་པར་གྱུར་བ་ཡིན་ན་གྲོགས་ཀྱིས་བོར་འགྲོ། ཕན་ཚུན་ཡིད་ཆེས་པའི་གྲོགས་པོ་ནི་འབྱོར་རྒུད་གང་གི་སྐབས་སུ་རང་གི་རྒྱབ་ན་ཡོད་པའི་གྲོགས་ཡིན་པས་གྲོགས་མཆོག་ཏུ་གྱུར་བ་ཡིན་ལ། སྤྱིར་གྲོགས་བཟང་པོ་ཞིག་ལ་བརྟེན་པ་གལ་ཆེ་བ་ཡིན་ཏེ། གྲོགས་བཟང་ངན་གྱི་དབང་གིས་རང་ཉིད་བཟང་ངན་བསྒྱུར་ཐུབ་པས་སོ། །དེ་བཞིན་དུ་སྟོན་པ་བཀའ་དྲིན་ཅན་གྱིས་ཀྱང་ཡང་ཡང་གསུངས་སོ། །རྒྱལ་ཁམས་པ་དངོས་གྲུབ་དཔལ་ནས། ང་ཚོ་ཐམས་ཅད་འཆི་དགོས་པར་མ་ཟད་འཆི་བ་ལ་མྱུར་དུ་འགྲོ་བཞིན་པ་ཡིན་ལ། དཔེར་ན་དུད་འགྲོ་ཞིག་གསོད་སར་ཁྲིད་ཚེ་གཽམ་པ་རེ་རེ་སོང་ན་གསོད་པ་ལ་ཇེ་ཉེ་ལ་འགྲོ་བ་བཞིན་ང་ཚོ་ཡང་སྐར་ཆ་རེ་རེ་སོང་བ་ན་འཆི་བ་ལ་ཇེ་ཉེ་འགྲོ་བ་ཡིན་པར་དམ་པས་གསུང་པ་དོན་དངོས་ཡིན་ལ། དེར་མ་ཟད་ནམ་འཆི་ཆ་མེད་པ་ཡིན་པས་ན་དུས་ད་ལྟ་ནས་དམ་ཆོས་མ་བསྒྲུབ་ན་རང་ཉིད་གཅིག་པུ་ཚེ་ཕྱི་མར་འགྲོ་བའི་དུས་ནི་གདོན་མི་ཟ་བར་ཡོང་ལ། དེ་ཚེ་ཕན་ངེས་པ་ནི་བསོད་ནམས་དགེ་བ་ཁོ་ནའོ། །དངོས་གྲུབ་དཔལ་ནས། རང་ལ་རེ་ལྟོས་བྱེད་པའི་མི་རྣམས་རང་གི་གཡོག་འཁོར་ཙམ་ལས་ཡོན་ཏན་གྱི་ཆ་ནས་འཕེལ་རྒྱས་མི་གཏོང་བ་ནི་འཁོར་ཡུག་རྣམས་ལ་ཚེ་འདི་ཕྱི་གཉིས་ཆར་གྱོང་རེག་པ་མ་ཟད་མི་རབས་ཕྱི་མའི་བར་དུ་རྗེས་སུ་ལུས་པ་རེད། དེས་ན་ས་རྡོ་འཛུགས་སྐྲུན་ལས་མི་གསོ་སྐྱོང་གལ་ཆེ། དངོས་གྲུབ་དཔལ་ནས། དགོན་པའི་ལས་སྣེ་མ་གཏོགས་པའི་གྲྭ་བ་རྣམས་རང་གཞན་གང་རུང་གི་དགོན་པར་བཤད་སྒྲུབ་གང་རུང་དུ་གནས་རྒྱུ་དང༌། གལ་ཏེ་དེ་མ་ནུས་ན་ལོ་རེ་ཞག་བརྒྱ་རེ་མཚམས་ལ་བཞུགས་རྒྱུ་དང་དབྱར་གནས་རེར་བཞུགས་ནུས་ན་གྲྭ་བ་བྱས་པའི་དགོས་པ་ཅུང་ཟད་འགྲུབ་སྲིད་ལ། དེ་ལྟ་མ་ཡིན་ན་གྲྭ་བ་བྱས་པ་པས་བསྟན་པར་གནོད་པ་ལས་ཕན་པ་མེད་པར་སྣང་ལ། སྤྱིར་རྒྱལ་བསྟན་ལ་ཐུགས་བསམ་བཞེས་རོགས་ཞུ། རང་ལ་ནམ་རྒྱུན་སེམས་ཁྲལ་ཡོད་པ་དེ་ཞུས་པའོ། །དངོས་གྲུབ་དཔལ་ནས། ད་དུང་འདུལ་བསྟན་གནས་ཚད།ད་དུང་འདུལ་བསྟན་གནས་ཚད། ད་དུང་འདུལ་བསྟན་གནས་ཚད། ཕུག་ལུགས་ལྟར་ན་ལྔ་བརྒྱ་ཕྲག་བཅུ་ལས་ལྔ་བརྒྱ་དྲུག་པ་ཚུལ་ཁྲིམས་ལེའུ་ནས་སུམ་བརྒྱ་གོ་དགུ་འདས་ཟིན་མ་འོངས་རྒྱལ་བསྟན་ཉིས་སྟོང་ཆིག་བརྒྱ་གཅིག་ལུས་པའི་ལོ་གསར་ཤར་མ་ཐག་ཡིན་པས། བདག་གིས་བསམ་ན་རྟགས་ཙམ་མ་བགྲང་ཆིག་སྟོང་དྲུག་བརྒྱ་གཅིག་གམ་ཡང་ན་རྟགས་ཙམ་སྐབས་ལ་རྟགས་ཙམ་འཛིན་པ་མང་བ་ལས་བསྟན་པ་གནས་ན་འདུལ་བསྟན་གནས་དགོས་པས་ད་རུང་འདུལ་བསྟན་ལོ་༢༡༠༡བཅས་ཡོད་པའོ།། དངོས་གྲུབ་དཔལ་ནས། ཁ་ཅིག་གིས་རྗེ་བཙུན་མི་ལས་ཐོས་བསམ་མ་བྱས་པ་རེད་ཟེར་བ་ནི་སྐུར་འདེབས་ཡིན་པ་ལས་རྒྱུད་བརྟག་གཉིས་རྗེ་མར་པའི་མདུན་ནས་ཚར་བཅུ་དྲུག་དང༌། རྔོག་གི་མདུན་ནས་ཚར་གཉིས་དང་བཅོ་བརྒྱད་གསན་ལུགས་ལ་གཞལ་ན་ཐོས་བསམ་རྒྱ་ཆེན་པོ་མཛད་ཡོད་པ་རེད། གཞན་ལ་རྟགས་གསལ་བཏང་ནས་རང་གིས་གཞུང་ལ་ཞིབ་ཆ་ཕྲ་ཞིབ་དང་ཉམས་ལེན་ཞིག་བྱེད་ཤེས་དགོས་པ་གལ་ཆེ། ཐོས་བསམ་སྒོམ་གསུམ་ལས་ཚོགས་བསགས་སྒྲིབ་སྦྱོང་མི་དགོས་སྙམ་པ་དེ་ནོར་བ་རེད། དེས་ན་ཚོགས་བསགས་སྒྲིབ་སྦྱང་སོགས་བསོད་ནམས་ཀྱི་ཚོགས་དང་ཐོས་བསམ་སྒོམ་གསུམ་ཡེ་ཤེས་ཀྱི་ཚོགས་གཉིས་བསགས་དགོས་པ་རེད། མ་ཤེས་པ་ཤེས་པར་བྱས་ནས་ཤེས་པ་ལག་ལེན་དུ་འདེབས་ཤེས་དགོས་པ་རེད།- དངོས་གྲུབ་དཔལ་ནས། ལོ་གསར་བའི་ནང་སེམས་ཀྱི་རེ་ཞུ་ནི། ཇོ་ནང་རྡོ་རྗེ་སློབ་དཔོན་རྣམས་ཀྱི་བཀའ་དྲིན་ལ་བརྟེན་ནས་རྒྱུད་སྡེ་སྤྱི་དང་བྱེ་བྲག་ཏུ་དཔལ་དུས་ཀྱི་འཁོར་ལོའི་དབང་ལུང་མན་ངག་ཉམས་ལེན་གྱི་ཕྱག་སྲོལ་མ་ཉམས་པར་གནས་ཡོད་པས་ཇོ་ནང་བ་རྣམས་ཀྱིས་མདོ་དོན་མཐར་ཐུག་གཞན་སྟོང་དབུ་མ་དང༌། རྒྱུད་དོན་མཐར་ཐུག་དཔལ་དུས་ཀྱི་འཁོར་ལོའི་རིམ་གཉིས་ལམ་ལ་སྦྱང་བ་མཛད་རྒྱུ་ནི་ང་ཚོའི་མདུན་ན་བཞག་པའི་འགན་འཁྲི་ཡིན་པས་དེ་ལ་སྦྱང་བ་དགོས་གལ་ཆེའོ། །ལོ་སར་སྐབས་འདིར་ཇོ་ནང་བ་རྣམས་ལ་དངོས་གྲུབ་དཔལ་གྱིས་སྨོན་ཚིག་རེ་ཞུ་དང་བཅས་གུས་ཕུལ། ལས་དང་པོ་བ་ཞིག་ལ་མཚོན་ན་ཐོས་སྒོམ་གཉིས་ལས་ཐོས་པ་གལ་ཆེ་ལ། གནས་ལུགས་རྟོགས་ཟིན་པ་ལ་སྒོམ་གལ་ཆེ་བ་རེད།རང་རང་སོ་སོས་བཤད་སྒྲུབ་ཡ་མ་བྲལ་བར་བྱེད་ཤེས་དགོས་པ་རེད། དཔེ་ཆ་མི་ཚེ་ལ་མི་འབྲལ་བར་གལ་ཆེན་པོ་ཡིན། མ་འོངས་པར་སྒོམ་བརྒྱབ་ཀྱང་དཔེ་ཆ་དང་ཁ་བྲལ་ཉན་རྒྱུ་མ་རེད།ང་ཚོར་ཕྱི་རོལ་བ་དང་ཐུན་མོང་དུ་ཡོད་པའི་མངོན་ཤེས་ཙམ་ཡང་མི་ཐོབ་པའི་རྒྱུ་མཚན་ང་ཚོས་དོན་ཤེས་པ་ཙམ་དུ་བཞག་སྟེ་ཉམས་ལེན་བྱེད་མ་ཐུབ་པ་ཡིན་པས་ཉམས་ལེན་བྱོས། དངོས་གྲུབ་དཔལ་ནས། དེང་སང་འགྲན་རྩོད་ཀྱི་དུས་རབས་ཡིན་པས་གཅིག་གིས་བདེན་པའི་གནས་ཚུལ་སྤེལ་ན་གཅིག་གིས་རྫུན་མའི་ཁྱབ་བསྒྲག་བྱེད་པ་སོགས་དག་རྫུན་སྣ་ཚོགས་ཀྱིས་མིག་འཕྲུལ་འགྱེད། ཆོས་བརྒྱུད་ཕན་ཚུན་བར་རྩོད་ཉོག་སློང་བ་དང༌། དགོན་སྡེའི་བར་རམ་ཆོས་སྡེའི་བར་རྙོག་དྲ་བཟོ་བ་དང༌། བླ་མ་རྣམས་ཀྱི་བར་དབྱེན་དཀྲུག་བྱེད་པ་སོགས་ཐབས་སྐྱོ་བའི་གནས་ཚུལ་མང་པོ་མཐོང་ཐོས་སུ་འདུག་པས་སྡིག་པའི་ལྟ་བ་ཅན་ནམ་ཕུང་དཀྲུག་ཅན་ལ་མི་རྣམས་ཀྱིས་དོགས་ཟོན་གྱིས་ཤིག དངོས་གྲུབ་དཔལ་ནས། དྲང་བདེན་གྱི་བཀག་རྡོ་གཡོ་སྒྱུ། ཆོས་ཀྱི་བཀག་རྡོ་དཔལ་འབྱོར། ཡར་རྒྱས་ཀྱི་བཀག་རྡོ་སློབ་སྦྱོང་ལ་མི་དགའ་བ། མཐུན་སྒྲིལ་གྱི་བཀག་རྡོ་གཞན་ཕམ་བདག་རྒྱལ་གྱི་བསམ་པ། དངོས་གྲུབ་དཔལ་ནས། ཞི་བ་ཐར་བ་ཐོབ་པ་ལ་ཉོན་མོངས་པ་སྤང་དགོས། དེ་སྤོང་པ་ལ་དེའི་གཉེན་པོའི་ཆོས་ཉམས་སུ་ལེན་དགོས། དེ་ཉམས་སུ་ལེན་པ་ལ་ལེན་རྒྱུའི་ཆོས་ཚུལ་བཞིན་དུ་ཤེས་དགོས། དེ་ཤེས་པ་ལ་ཐོས་བསམ་སྔོན་དུ་འགྲོ་དགོས། དེ་སྔོན་དུ་འགྲོ་པ་ལ་སྐབས་ཀྱི་བཤད་བྱའི་ཆོས་ཤེས་པའི་བླ་མ་བསྟེན་དགོས། དེ་བསྟེན་པ་ལ་བསམ་སྦྱོར་གཉིས་ཀས་ཚུལ་བཞིན་དུ་བསྟེན་དགོས། དེས་ན་བསྟན་པ་ལ་འཇུག་རིམ་ཞིག་འདའ་འོ། །སྤྲང་འཁྱམ་པ་དངོས་གྲུབ་དཔལ་ནས། ཀུན་སྤྱོད་བཟང་བོ་བཅོས་མིན་ཞིག་ཡོང་ཐུབ་པ་ནི། གཙོ་བོ་བསམ་པ་བཟང་པོ་ལ་རག་ལས་པ་ཡིན་པས་གཞན་ལ་གནོད་སེམས་དང་མགོ་སྐོར་མེད་པའི་ཕན་པའི་བསམ་པ་རྣམ་དག་དྭངས་གཙང་ཞིག་ལ་བརྩོན་དགོས། བསམ་པ་བཟང་ན་དེང་རབས་དང་མཐུན་ལ། འཇིག་རྟེན་པ་དང་ཡང་མཐུན་པར་མ་ཟད་ཆོས་དང་མཐུན་པ་རེད་ལགས། ཞེས་དངོས་གྲུབ་དཔལ་ནས། བག་ཡོད་ལ་གདམས་པ། སྟོན་པ་ཐུགས་རྗེ་ཅན་གྱིས། བག་ཡོད་པར་གྱིས་ཤིག ། ཅེས་གདམས་པ་ལྟར་ཐོས་བསམ་སྒོམ་གསུམ་སོགས་དམ་ཆོས་གང་བསྒྲུབ་པ་ཡིན་ན་བག་ཡོད་པར་བྱས་ན་དམ་ཆོས་དངོས་གནས་སུ་འགྱུར་ཐུབ་ལ། དེ་ལྟ་མིན་ན་གཞུང་ཆེན་བཀའ་པོད་ལྔ་ལ་ཐོས་བསམ་བྱེད་པ་ཡིན་ན་འདྲ། མདོ་སྔགས་ཀྱི་ཟབ་མོའི་དོན་བསྒོམ་ན་འདྲ་བདག་འཛིན་དང་ཉོན་མོངས་པའི་དབང་དུ་འགྲོ་བ་ལས་མ་འདས་ལ། དེ་ལྟར་ན་ཀུན་ཉོན་འཁོར་བའི་ཆོས་ལས་གཉེན་པོ་རྣམ་བྱང་གི་ཆོས་སུ་མི་འགྱུར་རོ། །དེས་ན་རབ་ཏུ་བྱུང་བ་ཞིག་ཡིན་ན་རྟགས་དང་ཆ་ལུགས་བརྗེ་བ་དང༌། མིང་བརྗེ་བ། བསམ་པ་བརྗེ་བ་སྟེ་བརྗེ་བ་རྣམ་པ་གསུམ་བརྗེས་ནས་རབ་ཏུ་བྱུང་བ་ཐུགས་ལ་ངེས་པར་བྱས་ནས་རབ་བྱུང་གི་བྱ་བ་སྤོང་ཀློག་གི་ལས་ལ་བརྩོན་པར་ཞུ། དངོས་གྲུབ་དཔལ་ནས། རྣམ་གཡེང་གི་སྐྱོ་གར། རྟག་ཏུ་རྣམ་གཡེང་གི་ངང་ནས་སློབ་སྦྱོང་ལ་འབད་རྩོལ་མི་བྱེད་པ་ནི་མདུན་ལམ་མེད་པའི་སྨྱོན་པ་བཞིན་ཡིན་ལ། རྟག་ཏུ་ཆཽས་གྲོགས་རྣམས་དང་རྣམ་གཡེང་བྱེད་པ་རྗེས་ལུས་ཡིན་པས་ཆོས་ལ་འབད་བརྩོན་དགོས། རྟག་ཏུ་སྤྲོ་གསེང་ཞེས་གླེང་བ་ནི་གསེར་ལས་ལྷག་པའི་དུས་ཚོད་ལ་རིན་ཐང་གི་ལྟ་བ་མེད་པ་ཡིན་པས་ནོར་འཁྲུལ་ཡིན་ལ། རྟག་ཏུ་འདུ་ཚོགས་མང་བ་ཆོས་ཀྱི་བཀག་རྡོ་ཡིན་པས་གཅིག་པུར་དམ་ཆོས་བརྩོན་པ་གལ་ཆེན་ཡིན་ནོ། །ཞེས་ཆོས་མཆེད་རྣམས་ལ་དངོས་གྲུབ་དཔལ་ནས་གུས་ཕུལ། རྒྱལ་རོང་བ་ནི་ང་ཚོ་བོད་པའི་གདོད་མའི་མི་རིགས་ཡིན་པར་མ་ཟད་སྤོབས་པ་དང་སྙིང་སྟོབས་ལྡན་པའི་མི་རིགས། མི་གཤིས་དྲང་ལ་ཕྱི་ཐག་རིང་བ་དང༌། བརྩོན་པ་དང་ལྡན་པའི་མི་རིགས་བླ་མེད་ཅིག་ཏུ་མཆིས་སོ་ཞེས་ཇོ་ནང་དགེ་བཤེས་དངོས་གྲུབ་དཔལ་གྱིས། རབ་བྱུང་བཅུ་བདུན་པའི་གསེར་འཕྱང་མེ་བྱའི་གནམ་ལོ་གསར་ཚེས་ལ་འཛམ་གླིང་སྤྱི་དང་སྒོས་སུ་གངས་ཅན་བོད་པ་ལ་ཞི་བདེ་འདྲ་མཉམ་གྱི་དཔལ་ལ་རོལ་བ་དང༌། བོད་བརྒྱུད་ཀྱི་བཅུ་ཕྲག་རིག་པའི་གནས་ལ་བརྟེན་ནས་འཛམ་གླིང་ཞི་བདེ་དང་མི་རིགས་མཐུན་སྒྲིལ་ཡོང་བའི་སྨོན་འདུན་དང༌། བོད་ཁ་བ་ཅན་རྣམས་ཀྱིས་ཕྱི་དངོས་པོའི་དཔལ་ཡོན་དང༌། ནང་ཤེས་ཡོན་གྱི་དཔལ་ལ་འབད་རྩོལ་ཆུ་བོའི་རྒྱུན་བཞིན་གནང་བའི་རེ་བསྐུལ་བཅས་འཚམས་འདྲི་བཀྲ་ཤིས་བདེ་ལེགས་ཞུ། སྤྲང་འཁྱམ་པ་དངོས་གྲུབ་དཔལ་ནས། ཆོས་པ་ཆོས་པའི་ས་ལ་འདུག་པ་ལས་སྲིད་ལ་བཀོད་འདོམས་བྱས་ཏེ་ལག་མི་བརྐྱང་རྒྱུ་དང༌། འཇིག་རྟེན་པ་འཇིག་རྟེན་པའི་འདུག་ས་ལས་ཆོས་དང་ཆོས་ཀྱི་བརྒྱུད་འཛིན་ལ་ནག་ཉེས་མི་བགོ་རྒྱུ་གལ་ཆེན་དུ་སྣང༌། དེ་ལྟ་མི་བྱེད་ན་ཆོས་པ་ཡིན་མིན་བར་ཐག་ཇེ་རིང་དུ་སོང་ན་མཐུན་སྒྲིལ་ལ་གནོད་པར་འགྱུར་རོ། །དངོས་གྲུབ་དཔལ་ནས། སྤྲུལ་སྐུ་དག་རྫུན་མ་ཤེས་ན་ཤེས་མདོག་བྱས་ནས་ངོས་འཛིན་གནང་དགོས་དོན་མེད། མི་ཤེས་བཞིན་དུ་སྤྲུལ་སྐུ་ངོས་འཛིན་གནང་ན་དེ་ལས་བསྟན་འགྲོ་ལ་གནོད་ཚབས་མེད་སྙམ། སྤྲུལ་སྐུ་དག་མ་ཡིན་ན་ངོས་འཛིན་མ་བྱས་ནའང་བསྟན་དང་འགྲོ་བའི་དོན་མཛད་པ་ལ་ཐེ་ཚོམ་མེད་དོ། །འོན་ཀྱང་རང་གིས་རང་ངོས་འཛིན་བྱེད་མཁན་ཆེས་མང་བས་དེ་འགོག་དཀའ་ཡང་དད་ལྡན་མང་ཚོགས་ཀྱིས་ཞིབ་འཇུག་གལ་ཆེ་བ་དང༌། རྫུན་མའི་ཉེས་སྐྱོན་དག་མ་ལ་མི་སྦྱར་བ་དང་དག་མའི་ཡོན་ཏན་ལ་བརྟེན་ནས་རྫུན་མ་ལ་རྨོངས་དད་མི་རིགས་སོ། །ངག་དབང་དངོས་གྲུབ་དཔལ་ནས། ཇི་སྐད་དུ། དོན་ཆེན་སྒྲུབ་ལ་འགལ་རྐྱེན་མང༌། །འཇོན་ཐང་ཅན་ལ་འགྲན་རྩོད་མང༌། །ཡར་རྒྱས་ཅན་ལ་གཉའ་གནོན་མང༌། །སེམས་བཟང་ཅན་ལ་གྱོང་གུད་མང༌། །ཞེས་གསུངས་པ་བདེན་སྙམ། སྤྱིར་སྐད་ཆ་ལ་སྐྱོན་ལྡན་གསུམ། གནས་ལུགས་མེད་པའི་སྐད་ཆ། ཞིབ་འཇུག་མེད་པའི་སྐད་ཆ། འཐེན་འཁྱེར་གྱི་སྐད་ཆ་ལ་ཡིད་གཏད་བྲལ། དེ་ལས་ལྡོག་ན་ཡིད་གཏད་འོས། དེང་སང་མིང་སོགས་གསང་བའི་དྲྭ་ཉུལ་བ་རེ་ཟུང་གིས་རྣམ་རྟོག་རི་མོ་སྣ་ཚོགས་སྤེལ་བ་ལ་ཁག་ངན་གཞན་ལ་མི་བཀལ་བར་བརྟག་དཔྱད་ཞིབ་འཇུག་བདེན་དཔང་ཡོད་པ་དགོས་པ་རེད། སྤྱིར་ཉེས་མེད་གླེང་བཙུག་ན་ལས་འབྲས་མི་བསླུ་བ་ཡིན་པས་ཀུན་གྱི་བདེན་གཏམ་ཚངས་ཐིག་ལྟ་བུ་གཏབ་ནས་བརྟག་དཔྱད་དགོས་སོ། །ཞེས་པ་འདི་ནི་གྲྭ་རྐྱང་བ་དངོས་གྲུབ་དཔལ་ནས། སློབ་མ་རྣམ་དཔྱོད་མེད་པ་ཞིག་ཡིན་ན་མཁན་སྤྲུལ་སོགས་མིང་དང་གྲགས་པ་ལ་ཡིད་རྟོན་པ་ལས་ཡོན་ཏན་ལ་མི་རྟོན། མིང་ལ་དད་པ་ལས་ཡོན་ཏན་ལ་མི་གུས། རེ་ཞིག་མི་ངོ་ལེན་པ་ལས་རང་གཞན་གྱི་དོན་ལ་ཕུགས་འདུན་མེད་པར་མང་པོ་སྣང་ངོ༌། །མི་ཚེའི་མདུན་ལམ་མེད་ན་ཁ་ལོ་བ་མེད་པའི་གྲུ་གཟིངས་དང་འདྲ་བས་མི་ཚེ་དོན་མེད་རྫོགས་ངེས་སོ། །དངོས་གྲུབ་དཔལ་ནས། ཕ་སྐད་གནས་དགོས་ན་ཕ་སྐད་བཤད་མཁན་གྱི་མི་རིགས་གལ་ཆེ། རང་གིས་རང་གི་མི་རིགས་ཉུང་ངུར་བཏང་ན་ཕ་སྐད་སུས་འཛིན། དངོས་གྲུབ་དཔལ་ནས། ཆོས་པས་བྱེད་དགོས་པ་རྣམ་བཞི། ༡ ཡོན་ཏན་ཤེས་ནས་དད་པ་དག་སྣང་བྱེད་དགོས། ༢ ཀུན་སློང་རྣམ་དག་གིས་སློབ་སྦྱོང་བྱེད་དགོས། ༣ གནས་ལུགས་རྟོགས་ནས་ཉམས་ལེན་བྱེད་དགོས། ༤ ལྷག་བསམ་རྣམ་དག་གིས་གཞན་ཕན་བྱེད་དགོས། ཞེས་པ་འདི་ནི་ངག་དབང་དངོས་གྲུབ་དཔལ་གྱིས་མི་ཚེ་དོན་ལྡན་བྱེད་པ་ལ་འདི་བཞི་གལ་ཆེ་བར་བསམ་ནས་བྲིས་པའོ། །མི་ཆོས་རྣམ་བཞི མི་ཆོས་རྣམ་བཞི།མི་ཆོས་རྣམ་བཞི། ཤེས་བྱའི་གནས་ལ་སློབ་སྦྱོང་དགོས། ཁ་ཕྱོགས་མ་ནོར་བ་དགོས། དཀའ་ཁག་དང་འཕྲད་ཚེ་ནུས་པ་འདོན་དགོས། ཀུན་སྤྱོད་ཀྱིས་གཞན་གྱིས་ཡིད་སེམས་འགུག་དགོས། ཞེས་པ་འདི་ཡང་ངག་དབང་དངོས་གྲུབ་དཔལ་གྱིས་མི་ཆོས་ལ་གལ་ཆེ་བར་མཐོང་ནས་བྲིས་པའོ། །གནས་སྐབས་དྲང་བདེན་དོར་ནས་གཡོ་སྒྱུས་སྙན་གྲགས་ཐོབ་གོ་ས་སོགས་ཐོབ་པ་སྲིད་མོད་མཐར་མཇུག་འབྲས་ལས་འབྲས་ཀྱིས་ཐག་གཅོད་པར་གདོན་མི་ཟ་བ་ཡིན་ནོ། །ངག་དབང་དངོས་གྲུབ་དཔལ་ནས། དགོས་པ་བཅོ་བརྒྱད།དགོས་པ་བཅོ་བརྒྱད། ༡ རང་ལ་རེ་ལྟོས་བྱེད་ཚེ་བརྩེ་བས་བསྐྱང་དགོས། ༢ བརྩི་འཇོག་བྱེད་ཚེ་མགོ་འཕང་དམའ་དགོས། ༣ བརྙས་བཅོས་ཚེ་ན་སེམས་དཔང་མཐོ་དགོས། ༤ འགལ་རྐྱེན་ཚེ་ན་སྤོབས་པ་བསྐྱེད་དགོས། ༥ སྐྱོན་བརྗོད་ཚེ་ན་ལེགས་ཉེས་འབྱེད་དགོས། ༦ དཀའ་ངལ་འཕྲད་ཚེ་རང་ཚུགས་ཡོད་དགོས། ༧ ཕྲག་དོག་མང་ཚེ་ཁ་ཕྱོགས་བརྟན་དགོས། ༨ བྱ་བ་བསྒྲུབ་ཚེ་ལས་འབྲས་བརྩི་དགོས། ༩ གནོད་པ་བྱེད་ཚེ་བཟོད་པ་བསྒོམ་དགོས། ༡༠དྲིན་གྱིས་བསྐྱང་ཚེ་དྲིན་ཅན་ཤེས་དགོས། ༡༡ ཕ་མ་ཡོད་ཚེ་བྱམས་བརྩེ་ཡོད་དགོས། ༡༢ བླ་མ་བཞུགས་ཚེ་དད་གུས་བྱེད་དགོས། ༡༣ གྲོགས་པོར་གྱུར་ཚེ་ཕན་ཐོགས་བརྩོན་དགོས། ༡༤ བསམ་དཀར་ཅན་ལ་ཕྱི་ཐག་རིང་དགོས། ༡༥ གཞོན་པའི་ཚེ་ན་སློབ་སྦྱོང་འབད་དགོས། ༡༦ ཐོས་པའི་ཚེ་ན་ཉམས་ལེན་བྱེད་དགོས། ༡༧ བསྒོམ་པའི་ཚེ་ན་བསྒོམ་བྱ་ཤེས་དགོས། ༡༨ བླ་མ་བསྒོམ་ཚེ་བཀའ་དྲིན་དྲན་དགོས། དངོས་གྲུབ་དཔལ་གྱིས། ངན་པ་དགུ་འཛོམ།ངན་པ་དགུ་འཛོམ། མི་ངན་པ་དགུ་འཛོམ། ༡ ཕྲག་དོག་ཅན། ༢ ཁེངས་དྲག་ཅན། ༣ འཐབ་ཀྲོལ་ཅན། ༤ གཡོ་སྒྱུ་ཅན། ༥ ངོ་གཉིས་ཅན། ༦ ཨ་གསར་ཅན། ༧ འཁྲབ་སྟོན་པ། ༨ ཧ་ཅང་རང་འདོད་ཅན། ༩ དྲིན་ལན་ལོག་འཇལ་བ། ངན་པ་དགུ་འཛོམས་ཀྱི་ཉི་མ་ཡོད་མེད་དང་གནོད་མིན་ལྐོག་གྱུར་ཡིན་མོད་མི་ངན་པ་དགུ་འཛོམས་ནི་གནོད་ངེས་པ་ཅན་ཡིན་པས་དགུ་བཟློག་བྱ་དགོས། དངོས་གྲུབ་དཔལ་གྱིས། ཁ་ཅིག་གིས་མི་རོ་དེ་སྐྲ་ས་རེད་ཟེར་འདུག ང་མི་རོ་ལ་སྐྲག་རྒྱུ་མེད་མོད་ངོ་མ་མི་བསམ་ངན་སྦྱོར་རྩུབ་ཅན་སྐྲག་ས་རེད། ཁ་ཅིག་འདྲེ་ལ་སྐྲག་ཟེར་འདུག དེ་ལས་གཡོ་ཅན་ནི་ཆེས་འཇིགས་སུ་རུང་བ་རེད། དངོས་གྲུབ་དཔལ་གྱིས། གལ་ཆེ་བ་ཉེར་ལྔ།གལ་ཆེ་བ་ཉེར་ལྔ། ༡སྤྱིར་ཚེ་འདི་ལ་འཇིག་རྟེན་གྱི་འཚོ་བ་གལ་ཆེ་ཡང་ཚེ་ཕྱི་མ་ལ་དམ་ཆོས་ཁོ་ན་གལ་ཆེ། ༢ ཕྱི་དངོས་པོའི་དཔལ་ཡོན་གལ་ཆེ་ཡང་དེ་ལས་ཀྱང་ནང་སེམས་གྱི་དཔལ་ཡོན་གལ་ཆེ། ༣ མི་ཆོས་ལ་ཀུན་དང་མཐུན་པ་གལ་ཆེ་ཡང་དེ་ལས་ཆོས་མིན་གྱི་སྤྱོད་པ་དང་མི་མཐུན་པ་གལ་ཆེ། ༤ གཞན་ལ་བསྟོད་བསྔགས་བརྗོད་པ་གལ་ཆེ་ཡང་ངོ་སྲུང་གི་ཆེད་བྱ་ངན་ལ་བསྟོད་བསྔགས་མི་བརྗོད་པ་གལ་ཆེ། ༥ སྤྱིར་སྨྲ་བ་ཉུང་བ་གལ་ཆེ་ཡང་བསྟན་འགྲོའི་དོན་དུ་སྨྲ་ཕོད་པ་གལ་ཆེ། སྤྱིར་རབ་ཏུ་བྱུང་བ་ལ་བྱ་ཉུང་དོན་ཉུང་གལ་ཆེ་ཡང་དེ་ལས་ཀྱང་གཞན་དོན་སྒྲུབ་པ་གལ་ཆེ། ༦ ཚིག་འདོན་པ་གལ་ཆེ་ཡང་དེ་ལས་ཀྱང་དོན་བསམ་པ་གལ་ཆེ། ༧ གཞན་དོན་བཤད་པ་གལ་ཆེ་ཡང་དེ་ལས་གཞན་དོན་ལག་ལེན་ལ་བརྩོན་པ་གལ་ཆེ། ༨ ཐོས་བསམ་སྒོམ་གསུམ་ལས་སྒོམ་པ་གལ་ཆེ་ཡང་དེ་ལས་ཀྱང་རྒྱུད་མ་སྦྱང་བ་ལ་ཚོགས་བསགས་དང་ཐོས་བསམ་གལ་ཆེ། ༩ བྱ་བ་སྒྲུབ་པ་ལ་ཤེས་རིག་གལ་ཆེ་ཡང་དེ་ལས་ཀྱང་ཉམས་མྱོང་གལ་ཆེ། ༡༠གྲོགས་བཟང་པོ་བསྟེན་པ་གལ་ཆེ་ཡང་དེ་ལས་ཀྱང་བཀའ་དྲིན་ཆེ་བའི་བླ་མ་མཚན་ཉིད་དང་ལྡན་པ་བསྟེན་པ་གལ་ཆེ། ༡༡ བླ་མ་ཀུན་གལ་ཆེ་ཡང་དེའི་ནང་ནས་ཉིན་རེ་རེ་བཞིན་རྟག་པར་ཆོས་ཀྱིས་སྐྱོང་མཁན་དེ་གལ་ཆེ། ༡༢ སེམས་ཅན་ཀུན་ལ་བྱམས་བརྩེས་གཟིགས་པ་གལ་ཆེ་ཡང་དེའི་ནང་ནས་ཀྱང་དམན་པར་གཟིགས་སྐྱོང་གནང་བ་གལ་ཆེ། ༡༣ སེམས་ཅན་སུ་ལ་ཡང་ཕྲག་དོག་མི་བྱེད་པ་གལ་ཆེ་ཡང་དེའི་ནང་ནས་ཀྱང་ཆོས་གྲོགས་རྣམས་ལ་ཕྲག་དོག་མི་བྱེད་པ་གལ་ཆེ། ༡༤ རིག་གཞུང་གསར་པ་གལ་ཆེ་ཡང་དེ་ལས་ཀྱང་རིག་གཞུང་རྙིང་བ་གལ་ཆེ། ༡༥ རྟེན་གསུམ་བཞེངས་པ་གལ་ཆེ་ཡང་དེ་ལས་ཀྱང་ལུང་རྟོགས་ཀྱི་བསྟན་པ་བཞེངས་པ་གལ་ཆེ། ༡༦ ཕྱིའི་འཛུགས་བསྐྲུན་གལ་ཆེ་ཡང་དེ་ལས་ཀྱང་མི་གསོ་སྐྱོང་བྱེད་པ་གལ་ཆེ། ༡༧ སུ་ལ་ཡང་རོགས་བྱེད་པ་གལ་ཆེ་ཡང་དེའི་ནང་ནས་རང་ལ་དྲིན་ཅན་དང་རེ་ལྟོས་བྱེད་པ་རྣམས་ལ་རོགས་བྱེད་པ་གལ་ཆེ། ༡༨ མཐོ་ལ་གུས་བཀུར་དགོས་པ་གལ་ཆེ་ཡང་དེ་ལས་ཀྱང་ཁྲིམས་ཀྱི་སར་འདྲ་མཉམ་གལ་ཆེ། ༡༩ གཞན་ལ་ཕན་འདོགས་པ་གལ་ཆེ་ཡང་དེ་ལས་ཀྱང་ལན་ལ་རེ་བ་མེད་པ་གལ་ཆེ། ༢༠ རང་གི་གྲུབ་མཐའ་འཛིན་པ་གལ་ཆེ་ཡང་དེ་ལས་ཀྱང་རང་གཞན་གྲུབ་མཐའ་ལ་ཆགས་སྡང་མི་བྱེད་པ་གལ་ཆེ། ༢༡ འཇིག་རྟེན་ཁྲ་ཁྲའི་དུས་ན་མིང་གལ་ཆེ་ཡང་དེ་ལས་ཀྱང་མིང་དོན་མཚུངས་པ་གལ་ཆེ། ༢༢ སྤྱི་ཚོགས་རྨོངས་པ་རྣམས་ཀྱི་ངོར་སྤྲུལ་མིང་གལ་ཆེ་ཡང་དེ་ལས་ཀྱང་བསྟན་འགྲོ་ལ་སྡེ་སྣོད་འཛིན་པ་གལ་ཆེ། ༢༣ མགོ་སྐོར་ལ་གཡོ་སྒྱུ་གལ་ཆེ་ཡང་དོན་དངོས་སུ་དེ་ལས་གནས་ལུགས་དང་དྲང་བདེན་གལ་ཆེའོ།། ༢༤ འཚོ་རྐྱེན་ལ་དངུལ་ལོ་གལ་ཆེ་ཡང་དེ་ལས་ཀྱང་བདེ་སྐྱིད་ལ་སེམས་ཀྱི་ཞི་བདེ་གལ་ཆེ། ༢༥ ཐོག་མར་ཐོས་པ་གལ་ཆེ་ཡང་དེ་ལས་ཀྱང་ཤེས་ནས་སྒོམ་པ་གལ་ཆེ། རང་གི་སྐྱེས་སྐར་༩-༩ ལ་དངོས་གྲུབ་དཔལ་ནས་གལ་ཆེ་བ་ཉེར་ལྔ་བ་འདི་བྲིས་པའོ། །སརྦ་མངྒ་ལཾ། སྒྲིག་ལམ་མེད་ས་ལ་ཤ་ཚ་བའི་བསམ་བཟང་མེད། སྒྲིག་ལམ་མེད་ས་ལ་འཐོར་ཞིག་གི་རྗེས་ལུས་ཡོད། སྒྲིག་ལམ་མེད་ས་ལ་ལྷག་བསམ་ཅན་གྱི་དབུ་ཁྲིད་མེད། འགྲིག་ལམ་མེད་ས་ལ་ཕུགས་བསམ་ཅན་གྱི་མཁས་པ་མེད། སྒྲིག་ལམ་མེད་ས་ལ་ཆོས་མེད་པའི་འཇིག་རྟེན་པ་མང༌། སྒྲིག་ལམ་མེད་ས་ལ་གཞོན་སྐྱེས་ཀྱི་མདུན་ལམ་མེད། སྒྲིག་ལམ་མེད་ས་ལ་ལྟ་སྒོམ་མཐོ་མདོག་གི་ལུང་པ་གང༌། སྒྲིག་ལམ་མེད་ས་ལ་རྨོངས་དད་ཀྱིས་རང་མགོ་སྐོར། དངོས་གྲུབ་དཔལ་ནས་གང་ཤར་དུ་སྤེལ། སློབ་སྦྱོང་མེད་པའི་མིས་ཤ་ཚ་བའི་བསམ་བཟང་མི་ཤེས། སློབ་སྦྱོང་མེད་པའི་མིས་འཐོར་ཞིག་གི་རྗེས་ལུས་དགའ་སྤྲོ་ཡོད། སློབ་སྦྱོང་མེད་པའི་མིས་ལྷག་བསམ་ཅན་གྱི་དབུ་ཁྲིད་ཧ་མི་གོ། སློབ་སྦྱོང་མེད་པའི་མིས་ཕུགས་བསམ་ཅན་གྱི་མཁས་ལ་ལྷག་པར་སྡང༌། སློབ་སྦྱོང་མེད་པའི་མིས་གཞན་ལ་གཡོ་སྒྱུ་སྣ་ཚོགས་བྱེད། སློབ་སྦྱོང་མེད་པ་ལགཞོན་སྐྱེས་ཀྱི་མདུན་ལམ་འཚོལ་མི་ཤེས། སློབ་སྦྱོང་མེད་པའི་མིས་ལྟ་སྒོམ་མཐོ་མདོག་གི་སྒོ་ནས་མོ་ལུང་བཤད། སློབ་སྦྱོང་མེད་པའི་མིས་མིང་དང་གོ་ས་ཁོ་ན་ཞེན། དངོས་གྲུབ་དཔལ་ནས་གང་ཤར་དུ་སྤེལ། ཚིགས་བཅད་སློབ་གསོའི་སྐོར།ཚིགས་བཅད་སློབ་གསོའི་སྐོར། མི་གཞི་བཟང་ངན། དྲིན་ལན་ལོག་འཇལ་བྱེད་པའི་གཤིས། །དྲིན་མེད་མིང་ཆེན་བཀུར་ལ་དགའ། །རྒྱུ་འབྱོར་ཅུང་ཟད་ཡོད་གྱུར་ན། །ཁེངས་དྲེགས་སྣང་བ་དགུང་སྔོན་དབྱིངས། །ཡོན་ཏན་ཏིལ་འབྲུ་ཙམ་ཐོབ་ན། །ང་རྒྱལ་གདེངས་ཀའི་མགོ་བོ་མཐོ། །དྲང་བདེན་མེད་པའི་གང་ཟག་གང༌། །མི་གཞི་མེད་པའི་མི་བུ་ཡིན། །དེ་འདྲ་བ་དང་རྣམ་ཀུན་ཏུ། །སྐད་ཅིག་འཕྲད་པར་མ་གྱུར་ཅིག ། ཡིད་ཆེས་འགྱུར་མེད་གྲོགས་མཆོག་དང༌། །སྐྱེ་ཀུན་འབྲལ་བ་མེད་པར་སྨོན། །དངོས་གྲུབ་དཔལ་ནས། བསྟན་པ་ཚོང་རྫས་བྱེད་པ་བདག་མ་བཟོད། །རྒྱལ་བསྟན་རྫུན་པ་བྱེད་པ་བདག་མ་བཟོད། །དགོན་སྡེར་བཤད་སྒྲུབ་མེད་པ་བདག་མ་བཟོད། །ཁྱིམ་པས་བཙུན་ཆས་བྱེད་པ་བདག་མ་བཟོད། །མི་བཟོད་སྲིན་བྱའི་ཚོགས་ལ་འོད་དཀར་འཕྲོས། །མི་བཟོད་སྒྲོ་བསྐུར་ཀུ་ཅོ་སྒྲོགས་པ་ལ། །མི་བཟོད་འཇིགས་བྲལ་བྲག་ཆ་བཞིན་ཤེས་བྱ། །མི་བཟོད་འཇིགས་པ་ངན་སོང་སྡུག་བསྔལ་གནས། །ཆོས་མེད་སྤྲང་འཁྱམ་པ་དངོས་གྲུབ་དཔལ་ནས་ཁམས་མི་ཉག་མཁས་པ་རྣམ་ལྔའི་གནས་མཆོག་ནས་ཕུལ། གངས་ལྗོངས་གསེར་ལྡན་འཛིན་མའི་ཁྱོན་ཡངས་པོར། །གངས་ལྗོངས་རིག་གཏེར་ཆོས་ཀྱི་རྔ་སྒྲ་བསྒྲགས། །གངས་ལྗོངས་རྒྱལ་བསྟན་རིས་མེད་དགའ་བའི་ཚལ། །གངས་ལྗོངས་ས་སྐྱའི་བསྟན་པ་སྲིད་འདིར་འབར། །དངོས་གྲུབ་དཔལ་ནས། གངས་ལྗོངས་བོད་པའི་ཆོས་བརྒྱུད་ཐམས་ཅད་ཀྱིས། །གངས་ལྗོངས་བསམ་ནས་རིས་མེད་མཐུན་འབྲེལ་གྱིས། །གངས་ལྗོངས་བསྟན་འཛིན་ཡིན་ན་རྒྱལ་བསྟན་སྐྱོངས། །གངས་ལྗོངས་དགེ་འདུན་ཚོགས་ལ་ཞུས་པ་ཡིན། །རྒྱལ་ཁམས་པ་དངོས་གྲུབ་དཔལ་གྱིས་སྨྲས་པའོ། །འཇིག་རྟེན་འདི་ན་ཡིད་རྟོན་མི་ཐུབ་པ། །ཕན་ཚུན་བསླུ་བས་མངོན་ལྐོག་མི་མཉམ་དང༌། །ཕྲག་དོག་འགྲན་སེམས་ཁེངས་དྲེགས་གཞན་དབང་གིས། །གཡོ་འོག་བྲན་དུ་གྱུར་བ་ཡི་རེ་མུག ། རྒྱ་བླ་ཕལ་ཆེར་རྒྱ་མིའི་བྲན་དུ་གྱུར། །བོད་བླ་ཕལ་ཆེར་དེ་ལ་ཡིད་སྨོན་ནས། །བསྟན་འཛིན་སྐྱེས་བུ་ཟད་ནས་དགོན་སྟོང་ལུས། །འོན་ཀྱང་ས་རྡོས་འགྲན་རྩོད་འུར་སྒྲོག་བྱེད། །རིས་མེད་པ་དངོས་གྲུབ་དཔལ་ནས། གཡུང་དྲུང་བསྟན་པའི་ས་གཞི་ལ། །སྔ་འགྱུར་བསྟན་པའི་སྡོང་བོ་འཁྲུངས། །བཀའ་བརྒྱུད་བསྟན་པའི་ཡལ་ཁ་གྱེས། །ས་སྐྱའི་བསྟན་པའི་ལོ་འདབ་རྒྱས། །དགེ་ལྡན་བསྟན་པའི་མེ་ཏོག་བཞད། །ཇོ་ནང་བསྟན་པའི་འབྲས་བུ་སྨིན། །གངས་ལྗོངས་ཆོས་བརྒྱུད་ཆེན་མོ་དྲུག ། བྱམས་བརྩེའི་དཔལ་ལ་རོལ་བར་སྨོན། །དངོས་གྲུབ་དཔལ་ནས། ཕྱོགས་མེད་རིས་མེད་ཁྲི་མ་འབུམ་བཤད་ཀྱང༌། །ཆོས་ལུགས་འཐེན་འཁྱེར་འཐབ་རྩོད་མི་འཕྲུལ་གྱིས། །ཆབ་སྲིད་གཡོ་སྒྱུས་བདག་བསྟོད་གཞན་སྨོད་ཀྱི། །ཆགས་སྡང་མུན་པས་བོད་འབངས་ཚོགས་ཀུན་རྨོངས། །དངོས་གྲུབ་དཔལ་ནས། བདག་ལ་གཞན་གྱིས་ཅི་ལྟར་ངན་བརྗོད་ཀྱང༌། །བྱམས་པའི་སེམས་ཀྱིས་ལྟ་བར་མ་ནུས་ན། །བདག་ཕྱོགས་བཟུང་ནས་གཞན་ལ་ངན་བརྗོད་པ། །ནམ་ཡང་མི་བྱེད་བདག་གི་རེ་བ་ཡིན། །ཞེས་དངོས་གྲུབ་དཔལ་ནས། གནས་ལུགས་རྒྱབ་འགལ་བྱས་ནས་འཚོ་བ་ལས། །བདེན་དོན་ཇི་བཞིན་བཤད་ནས་ཤི་བར་འོས། །གཡོ་སྒྱུས་གཞན་མགོ་སྐོར་བའི་འབྱོར་ལྡན་ལས། །དྲང་བདེན་སློང་མོ་བྱེད་པའི་གྲྭ་རྐྱང་ལེགས། །ཞེས་པ་འདི་དངོས་གྲུབ་དཔལ་གྱིས་སྨྲས་པའོ། །འདོད་ཡོན་ལ་ཆོག་ཤེས་མེད་ན་འདོད་རྔམས་ཀྱི་བསྐལ་མེ་འབར། །དམ་ཆོས་ལ་ཆོག་ཤེས་བསྟེན་ན་ཡོན་ཏན་གྱི་ཆུ་བོ་བསྐམ། །འདོད་པ་དངུལ་ལས་མེད་ན་ཆོས་པའི་གཟུགས་བརྙན་ལས་མི་འོང༌། །བྱ་རྒྱུ་འཇིག་རྟེན་ལས་མེད་ན་ངུར་སྨྲིག་གི་དོན་སྙིང་མེད། །ཅེས་ངག་དབང་དངོས་གྲུབ་དཔལ་གྱིས་སྨྲས་སོ། །སྲིད་འབྱོར་འཁོར་བའི་མེ་འོབས་ཆེན་པོའི་ནང༌། །བདེ་བའི་གོ་སྐབས་སྐད་ཅིག་ཙམ་མེད་པས། །ཞི་བསིལ་ཐར་བའི་གནས་ལ་བགྲོད་པའི་སླད། །ཆོས་ཀྱི་སྙིང་པོ་ཐོས་བསམ་སྒོམ་སྒྲུབ་མཛོད། །དངོས་གྲུབ་དཔལ་ནས། འཇིག་རྟེན་འཁོར་བ་མཐོ་དམན་གང་ན་ཡང༌། །ཇི་ལྟར་བསམ་ཡང་སྐྱོ་གདུང་འབྱུང་བའི་གནས། །དེ་སླད་དོན་མེད་བྱ་བ་རིང་དོར་ནས། །དམ་པའི་ལྷ་ཆོས་འབད་དེ་སྒྲུབ་དགོས་སྙམ། །དངོས་གྲུབ་དཔལ་ནས། ནང་བསྟན་མ་བརྗེད་སྤྱ ོད་ལམ་ཡག་པོ་གྱིས། །འཆི་བ་མ་བརྗེད་མྱུར་དུ་དམ་ཆོས་འབོད། །ཕྱི་མ་མ་བརྗེད་ཚེ་འདིར་ཞེན་པ་སྤོངས། །སྡུག་བསྔལ་མ་བརྗེད་ཐར་བ་ཐོབ་པར་མཛོད། །མཆོག་གསུམ་ལས་འབྲས་བསླུ་མེད་བདེན་པའི་མཐུས། །བདག་ནི་གང་དུ་འགྲོ་ཞིང་འདུག་པའི་གནས། །བཤད་སྒྲུབ་བསྟན་པའི་མི་མཐུན་ཕྱོགས་ཞི་ནས། །ངེས་དོན་ལུང་རྟོགས་བསྟན་པ་དར་བར་སྨོན། །ལྷག་པར་བདག་དང་འབྲེལ་བའི་གྲྭ་བཙུན་ཀུན། །མདོ་སྔགས་ཆོས་ཚུལ་དཔལ་ལ་ལོངས་སྤྱ ོད་ནས། །བསྟན་པ་རྣམ་དག་འཛིན་པའི་བསྟན་འཛིན་དུ། །གྱུར་ནས་བསྟན་འགྲོའི་མགོན་དུ་འགྱུར་བར་སྨོན། །བདག་ལ་སྡང་བའི་གདུག་པའི་ཚོགས་ཀུན་ལ། །བྱམས་དང་བརྩེ་བའི་མེ་ཏོག་ཆར་བསྙིལ་ཏེ། །བདག་གིས་སྒོ་གསུམ་བྱ་བ་གང་བརྩམ་པ། །གཞན་ལ་ཕན་པར་འགྱུར་བའི་སྨོན་ལམ་འདེབས། །གྲྭ་བཙུན་པ་དངོས་གྲུབ་དཔལ་གྱིས་ཤར་མར་དུ་བྲིས་པའོ། །རྣམ་ཀུན་གཅམ་བུའི་ཚིག་གི་ཟོལ་སྦྱོར་ལ། །དོགས་ཟོན་བྱས་ནས་ཤ་ཚའི་གཏམ་བཟང་ཚིག། ལེགས་པར་ཉོན་ལ་ཡིད་ལ་ཟུངས་ཤིག་དང༌། །འདི་ཕྱིའི་དོན་ཆེན་སྒྲུབ་པའི་ཐབས་མཆོག་ཡིན། །གཅམ་བུ་ཚིག་ལ་དགའ་བའི་བསམ་མེད་ཚོགས། །བསམ་བཟང་ཚིག་ལ་མཁོན་འཛིན་སྡང་མིག་བསྒྲད། །དེ་འདྲའི་རིགས་ལ་ཤ་ཚའི་གཏམ་བཤད་ལས། །རེ་ཞིག་བཏང་སྙོམས་བཞག་ན་ལེགས་པ་ཡིན། །དེ་རིང་ངལ་གསོ་ལ་ངག་དབང་དངོས་གྲུབ་དཔལ་ནས། རིགས་མཐུན་སྐྱེ་བོའི་ཚོགས་ཀྱི་འདུ་འཛོམས་ལ། །ཁ་ཕྱོགས་མེད་པའི་སྐྱེ་བོ་ངང་གིས་འདུ། །ཞར་ལ་པར་བརྙན་རྫུན་རིས་གཡོ་ཟོལ་གྱིས། །རྨོངས་པའི་ཚོགས་རྣམས་མུན་ནག་ལྟུང་བར་འགྱུར། །ཀུན་དགའ་དོན་འགྲུབ་རྫུ་འཕྲུལ་ནུས་སྟོབས་ཀྱིས། །རྒྱང་རིང་ཡུལ་གྱི་འབྱོར་མེད་ཚོགས་རྣམས་ཀུན། །སྐད་ཅིག་ཉིད་ལ་ཆོས་བརྒྱད་དགོན་པར་བཀུག། པར་བརྙན་འཇའ་ཚོན་འཛམ་གླིང་ཕ་མཐར་སྤྲོས། །དེང་སྐབས་ཀྱི་དགོན་སྡེ་རེ་ཟུང་གི་འགྲོ་ལུགས་འདི་ལྟར་ཡིན་པ་འདྲའོ། །ཀུན་ཀྱང་སྔོན་ལས་བསླུ་མེད་མཐུ་ཡིན་པས། །སྐྱིད་སྡུག་གང་བྱུང་དགའ་སྐྱོ་མི་བྱེད་པར། །འགྲོ་ཀུན་ལས་ངན་སྡིག་སྒྲིབ་དག་བྱའི་ཕྱིར། །བླ་མེད་བྱང་ཆུབ་ཐོབ་ཕྱིར་བརྩོན་པར་སྨོན། །གང་སྣང་འཁྲུལ་བ་ཨ་འཐས་སྣང་བ་ལས། །གཏད་སོ་མེད་པའི་བདེན་མེད་རྫུན་སྣང་འདི། །ལེགས་པར་ཤེས་ནས་བདེན་འཛིན་འཁྲུལ་བ་འདི། །གཞོམ་པར་གྱིས་ཤིག་ཐར་འདོད་སྐལ་ལྡན་ཚོགས། །ཇི་ལྟར་རྨི་ལམ་འཁྲུལ་སྣང་ཆོས་ཀུན་དང༌། །འདི་སྣང་ཆོས་ཀུན་རྫུན་པར་མཉམ་པ་ཡིན། །མ་འཁྲུལ་དོན་དམ་འོད་གསལ་ཆོས་སྐུའི་སར། །བགྲོད་པའི་ཐབས་མཆོག་སྟོང་ཉིད་སྙིང་རྗེ་སྒོམས། །དངོས་གྲུབ་དཔལ་ནས། དགོན་པ་ལ་སྐྱོ་བ་སྐྱེ་མི་རུང་སྤྲོ་བ་སྐྱེ་དགོས། །དམ་ཆོས་ལ་ཆོག་ཤེས་སྐྱེ་མི་རུང་སྤྲོ་བ་སྐྱེ་དགོས། །ཐོས་བསམ་ལ་དཀའ་ངལ་སྐྱེ་མི་རུང་སྤྲོ་བ་སྐྱེ་དགོས། །སྒོམ་པ་ལ་ལོ་ཟླས་མི་ཆོག་པར་མྱོང་བ་ཐོན་དགོས། །འཁོར་བ་ལ་སྤྲོ་བ་མེད་པར་སྐྱོ་བ་སྐྱེ་དགོས། །འདོད་ཡོན་ལ་སྤྲོ་བ་མེད་པར་ཆོག་ཤེས་བསྟེན་དགོས། །འཇིག་རྟེན་ལ་སྤྲོ་བ་མེད་པར་རྒྱང་དུ་དོར་དགོས། །རྣམ་གཡེང་ལ་སྤྲོ་བ་མ་བྱེད་སྤང་བར་བྱ་དགོས། །དངོས་གྲུབ་དཔལ་ནས། ཆོས་ལུགས་ཆགས་སྡང་མ་རྩོད་གངས་ཅན་པ། །བན་བོན་ཕྱི་ནང་མ་རྩོད་གངས་ཅན་པ། །གྲུབ་མཐའ་ཆེ་ཆུང་མ་རྩོད་གངས་ཅན་པ། །ཆོལ་ཁ་ཕྱོགས་རིས་མ་རྩོད་གངས་ཅན་པ། །སྙན་གྲགས་ཆེ་ཆུང་མ་རྩོད་གངས་ཅན་པ། །ཆོས་བརྒྱུད་དབུ་འཛིན་མ་རྩོད་གངས་ཅན་པ། །བཤད་སྒྲུབ་སུ་བཟང་མ་རྩོད་གངས་ཅན་པ། །བསྡུས་གྲྭ་དགོས་མིན་མ་རྩོད་གངས་ཅན་པ། །རྩོད་ན་ང་ཚོ་ཕམ་འགྲོ་གངས་ཅན་པ། །གཞན་གྱི་སྒེར་གཅོད་གཡོ་བའི་ཁྲོ་གཉེར་ལ། །འཇིགས་ནས་སྨྲ་བརྗོད་ཞི་ཞལ་འཁུམ་ན་ནི། །གཞན་དབང་གྱུར་ནས་རང་ནུས་འཇའ་ལྟར་ཡལ། །དེ་སླད་གཞན་ཕན་གད་རྒྱངས་མངོན་བཞད་བྱ། །དངོས་གྲུབ་དཔལ་ནས། རྗེས་ལུས་གཉིད་ལས་སད་པར་བྱེད་པའི་ཐབས། །གདམས་ངག་མཚང་ཐོག་རྒོལ་བའི་སྤོབས་པ་གནད། །འོན་ཀྱང་དགོས་མེད་ངག་འཁྱལ་ཙམ་སོང་ན། །སྨྲ་བ་ཉུང་ནས་རང་སེམས་འདུལ་བར་གྱིས། །དངོས་གྲུབ་དཔལ་ནས། ༄༅། །ཕུགས་རྒྱང་རིང་པོ་འཆང་ནས་སློབ་སྦྱོང་དགོས། ཀུན་སྤྱ ོད་ཀྱིས་གཞན་གྱི་ཡིད་སེམས་འགུགས་དགོས། དཀའ་ཁག་དང་འཕྲད་ཚེ་ནུས་པ་འདོན་དགོས། ལག་ལེན་བྱེད་ཚེ་ཁ་ཕྱོགས་མ་ནོར་བ་དགོས། ཞེས་སྤྲང་འཁྱམ་པ་དངོས་གྲུབ་དཔལ་ནས། འཆད་ཉན་བཀག་ན་སྒྲུབ་པ་ཉམས་ལེན་བཀག ། གྲྭ་སར་བཀག་པ་མི་བུ་རླབས་ཆེན་བཀག ། བླ་མས་སློབ་སྟོན་མེད་ན་ཐར་བ་བཀག ། རིག་གནས་བཀག་ན་མ་འོངས་མདུན་ལམ་བཀག ། དངོས་གྲུབ་དཔལ་ནས། རང་སེམས་ཆོས་ལ་སྐུལ་བའི་ཀ་རྩོམ།རང་སེམས་ཆོས་ལ་སྐུལ་བའི་ཀ་རྩོམ། ཀ་ཡེ་གསོན་དང་ཆོས་གཟུགས་འཛིན་པ་བདག ། ཁ་ཏ་གཞན་ལ་འཆད་ཁུལ་བྱས་ན་ཡང༌། །ག་ལེར་ལོང་ཡོད་བསམ་པའི་རྟག་འཛིན་མཁན། །ང་ཁྱོད་འཛིན་པའི་བདག་འཛིན་ཉོན་མོངས་ཀྱིས། །ཅ་ཅོ་ལ་སོགས་དོན་མེད་ལས་ལ་ཟད། །ཆ་ལུགས་ཆོས་དང་མཐུན་པས་མཛེས་ན་ཡང༌། །ཇ་སོགས་རྙེད་བཀུར་འདོད་རྔམས་མ་བཅོམ་པས། །ཉ་བཞིན་འཁོར་བའི་རྒྱ་མཚོར་དབང་མེད་འཁྱམས། །ཏ་ལའི་ལྗོན་པའི་ཆོས་ཀྱི་ནགས་ཚལ་ནས། །ཐ་མལ་ཚུལ་དོར་བག་ཡོད་ལྡན་པར་གྱིས། །ད་ལན་བཞིན་དུ་མཐུན་རྐྱེན་ཚང་བ་དང༌། །ན་བ་ལ་སོགས་ཉེར་འཚེ་མེད་པའི་དུས། །པ་སངས་ལྟར་དཀར་ལྷག་བསམ་འོད་དཀར་གྱིས། །ཕ་མཐར་བསྒྲོད་པའི་ཐོག་མར་གཞི་རྩ་ལ། །བ་སྤུ་གཡོ་བའི་ངེས་འབྱུང་སྒོམ་དགོས་ལགས། །མ་སྒོམ་ན་ནི་ཐར་བའི་སྒོར་མི་ཆུད། །ཙ་ལའི་སེམས་ལྡན་ཐར་འདོད་ཀུན་གྱི་གཅེས། །ཚ་ཟེར་ཅན་གྱིས་པད་ཚལ་རྒྱས་པ་བཞིན། །ཛ་ཡི་བསྟན་པའི་སྙིང་པོ་བྱང་ཆུབ་སེམས། །ཝ་མོ་ལ་སོགས་སེམས་ཅན་དོན་དུ་འབད། །ཞ་ར་འདྲ་བའི་མ་རིག་རྨོངས་དབང་གིས། །ཟ་ཉལ་འགྲོ་འདུག་འཁོར་བར་འཁོར་བ་ལས། །འ་ཅག་ཡང་ཡང་རྒྱལ་བསྟན་འཕྲད་དཀའ་བས། །ཡ་མཚན་མི་ལུས་འདི་ལ་འཆད་ཉན་གྱིས། །ར་བ་གཅིག་ནས་འཚར་ལོངས་བྱུང་བའི་གྲོགས། །ལ་ལ་ཙམ་མིན་ཀུན་ལ་གྲོགས་མཆོག་ལྟོས། །ཤ་ཚའི་གཏམ་འདི་ཉམས་སུ་ལེན་ན་ནི། །ས་ལམ་མྱུར་དུ་བགྲོད་པར་རྒྱལ་བས་གསུངས། །ཧ་ཧ་ཙམ་མིན་སྙིང་གི་དཀྱིལ་དུ་ཟུང༌། །ཨ་དོན་སྐྱེ་མེད་སྤྲོས་བྲལ་མངོན་འགྱུར་ཤོག། ཅེས་ཀ་རྩོམ་འདི་ནི་ཆོ་འཕྲུལ་ཟླ་བའི་ཚེས་བཅུ་གཉིས་ལ་ངག་དབང་དངོས་གྲུབ་དཔལ་གྱིས་བྲིས་པའོ། །ཕྱི་ཡི་ཟོལ་སྦྱོར་རྒན་གསོ་དྭ་ཕྲུག་སྐྱོང༌། །སྲོག་བསླུ་རྟེན་བཞེངས་དགེ་ལས་བྲོ་གར་འཆམ། །མཆོག་སྤྲུལ་ལ་སོགས་མིང་ཆེན་ལ་བརྟེན་ནས། །རྨོངས་བའི་སྤྱ ི་ཚོགས་མུན་རུམ་མགོ་བོ་བསྐོར། །ནང་ནས་གཡོ་སྒྱུའི་སྒྱུ་མའི་དམག་དཔུང་གིས། །དད་ལྡན་འབྱོར་ལྡན་ལག་ནས་འཕྲོག་བཅོམ་བྱས། །ཡོན་ཏན་ཅན་གྱི་སྐྱེ་བོ་བཙོན་དུ་བཅུག ། ལག་རྗེས་རང་རིགས་མི་ལ་ཕམ་ཉེས་བཟོས། །ཞེས་མིང་ཙམ་ལ་བརྟེན་ནས་མགོ་བསྐོར་སྣ་ཚོགས་བྱེད་པ་མཐོང་ནས་རང་སྐྱོན་མི་མཐོང་གཞན་སྐྱོན་སྨྲ་བ་དངོས་གྲུབ་དཔལ་གྱིས་འདི་སྨྲས་སོ། །ཡོན་ཏན་མ་མཐོང་མིང་ཙམ་ལ་དད་པ། །རྒྱུས་མེད་མི་ལ་བློ་ཕུགས་བཅོལ་བར་བྱེད། །རྟགས་དཔྱད་མ་བྱས་ལས་ལ་བརྩོན་པ་ཀུན། །བློ་གྲོས་བྱིས་བློ་འདྲ་བའི་དན་རྟགས་ཡིན། །དངོས་གྲུབ་དཔལ་ནས། ཨ་གསར་ཅན་གྱི་རང་གཤིས།ཨ་གསར་ཅན་གྱི་རང་གཤིས། ཨ་གསར་ཅན་དེ་དོན་མེད་མི་ལ་དགའ། །ཨ་གསར་ཅན་དེ་དྲིན་ཅན་ཡིན་མིན་མེད། །ཨ་གསར་ཅན་དེ་མིང་གྲགས་སྟོང་བར་དགའ། །ཨ་གསར་ཅན་དེ་ཕན་བཏགས་མ་བཏགས་མེད། །ཨ་གསར་ཅན་དེ་འགྱུར་བ་ཧ་ཅང་མང༌། །ཨ་གསར་ཅན་དེ་མཐོ་ལ་ངོ་ལེན་མང༌། །ཨ་གསར་ཅན་དེ་བློ་གཏད་ནོར་བ་ཡིན། །ཨ་གསར་ཅན་དེ་ནམ་མཁའི་འཇའ་ཚོན་འདྲ། །ཨ་གསར་ཅན་དེ་འགྲོག་པ་ཤིན་ཏུ་དཀའ། །ཨ་གསར་ཅན་དེ་སྟོང་འུར་ལངས་པ་སླ། །ཨ་གསར་ཅན་དེ་ཨ་གསར་རྟ་ལས་མགྱོགས། །ཨ་གསར་ཅན་དེ་མཇུག་མ་ལུག་རྔ་བཞིན། །ཨ་གསར་ཅན་དེ་ཕུགས་བསམ་གང་ཡང་མེད། །ཨ་གསར་ཅན་དེ་བློ་གཏད་ནམ་ཡང་མེད། །ཨ་གསར་ཅན་དེ་ཁ་ཕྱོགས་གང་ཡང་མེད། །ཨ་གསར་ཅན་དེ་ཕྱི་ནང་ཆ་མ་མཆིས། །ཨ་གསར་ཅན་དེ་སྤེན་མའི་མེ་ལྕེ་འདྲ། །ཨ་གསར་ཅན་དེ་ངོ་ཤེས་ཧ་ཅང་སླ། །ཨ་གསར་ཅན་དང་འགྲོག་ན་འགྱོད་པའི་གཞི། །ཨ་གསར་ཅན་དང་ནམ་ཡང་མ་འཕྲད་སྨོན། །ཨ་གསར་ཅན་ལ་སུན་སྣང་སྐྱེས་པའི་དངོས་གྲུབ་དཔལ་གྱིས་ཤར་མར་དུ་བྲིས་པའོ། །གཞན་གྱི་སྒེར་གཅོད་གཡོ་བའི་ཁྲོ་གཉེར་ལ། །འཇིགས་ནས་སྨྲ་བརྗོད་ཞི་ཞལ་འཁུམ་ན་ནི། །གཞན་དབང་སོང་ནས་རང་ནུས་འཇའ་ལྟར་ཡལ། །དེ་བས་གཞན་ཕན་མི་འཇིགས་གད་རྒྱངས་བསྒྲགས། །སྤྲང་འཁྱམ་པ་དངོས་གྲུབ་དཔལ་ནས། དགོས་པ་བརྒྱད་ཀྱི་ལྟ་སྒོམ་སྤྱོད་གསུམདགོས་པ་བརྒྱད་ཀྱི་ལྟ་སྒོམ་སྤྱོད་གསུམ་བཞུགས་སོ། ། ཆོས་པ་ཡོང་བར་ལས་འབྲས་ཡིད་ཆེས་དགོས། །ཡོན་ཏན་གཞི་མར་ཚུལ་ཁྲིམས་རྣམ་དག་དགོས། །སྤྱ ོད་པ་རྣམ་དག་ཚེ་མེད་གཞན་ཕན་དགོས། །ཐར་ལམ་རྣམ་དག་འཁོར་བར་སྐྱོ་བ་དགོས། །སྲིད་པ་སྤང་བར་བདག་མེད་རྟོགས་པ་དགོས། །ཐེག་པ་ཆེན་པོར་གཞན་དོན་བསམ་པ་དགོས། །སྤྲོས་བྲལ་ལྟ་བར་རང་བཞིན་འོད་གསལ་དགོས། །སྒོམ་པ་རྣམ་དག་ཏིང་འཛིན་སྐྱོན་མེད་དགོས། །ཞེས་ལྟ་སྒོམ་སྤྱོད་གསུམ་གྱི་གནད་བསྡུས་པ་འདི་ནི་ངག་དབང་དངོས་གྲུབ་དཔལ་གྱིས་སྨྲས་པའོ། །མངྒ་ལཾ། ། གཡོ་སྒྱུ་ཅན་ལ་གཟབ་པར་འཚལ།གཡོ་སྒྱུ་ཅན་ལ་གཟབ་པར་འཚལ། ཀུན་ལ་ཉེ་རིང་མེད་པ་ལེགས་མོད་ཀྱང༌། །དྲིན་ཅན་དྲིན་བཟོ་མེད་པ་ཡི་རེ་མུག། ཀུན་ལ་དག་སྣང་སྦྱོང་བ་བཟང་མོད་ཀྱང༌། །བཟང་ངན་ཁྱད་པར་མི་ཤེས་ཉོན་རེ་མོངས། །བླ་མ་མང་པོར་བསྟེན་པ་བཟང་ན་ཡང༌། །མིང་ཆེན་ཁོག་སྟོང་བསྟེན་ན་ནམ་ཀུན་ཕོངས། །ཐབས་མཁས་ཐུགས་རྗེ་ཆེ་བ་ལེགས་ན་ཡང༌། །གཡོ་སྒྱུའི་ཆབ་སྲིད་ཅན་ལ་ཆོས་དྲི་མེད། །འཁོར་སློབ་ཚུལ་བཞིན་སྐྱོང་བ་བཟང་ན་ཡང༌། །ལྟ་བ་མཐོ་མདོག་གཞན་མགོ་སྐོར་བ་མཚང༌། །དམ་ཆོས་ལམ་སྟོན་གནང་བ་བཟང་ན་ཡང༌། །ལུང་ཙམ་འདོན་པས་ཡོན་ཏན་སྐྱེ་མི་འགྱུར། །འདོད་ཆུང་ཆོག་ཤེས་སྐྱེས་བུ་བཟང་ན་ཡང༌། །སྙིགས་དུས་བསོད་ཆུང་རྣམས་ཀྱིས་བརྙས་བཅོས་བྱེད། །དྲང་བདེན་ཅན་གྱི་མི་ཞིག་ཆེས་མཛེས་ཀྱང༌། །གཡོ་སྒྱུ་ཅན་ལ་ཕྲད་དུས་གཟབ་པར་འཚལ། །གཞན་ལ་ཐོས་སྒོམ་བཤད་པ་བཟང་ན་ཡང༌། །རང་གིས་མི་སྒྲུབ་ཁ་དང་ལག་ལེན་འགལ། །ཆོས་ལུགས་རིས་མེད་བྱེད་ན་བཟང་མོད་ཀྱང༌། །རང་ལ་རང་ལུགས་མེད་པ་ཨེ་མ་མཚར། དཀོར་ཟས་ཉེས་པ་སྟོན་པ་བཟང་ན་ཡང༌། །རྒྱུན་དུ་དཀོར་ལ་རེམ་པ་ཡི་རེ་མུག། ནམ་རྒྱུན་རིག་གནས་དགོས་པར་གྱེར་ན་ཡང༌། །རང་གིས་མི་སྦྱང་མི་ཤེས་ཐབས་རེ་སྐྱོ། །ཀུན་ལ་གུས་ཞབས་བྱེད་དགོས་སྨྲ་ན་ཡང༌། །བླ་མ་ཕ་མ་གུས་ཞབས་མེད་པ་ངན། །འཛམ་གླིང་ཞི་བདེ་བྱེད་དགོས་ཟེར་ན་ཡང༌། །གཉེན་ཉེ་ཆོས་གྲོགས་ཞི་བདེ་མེད་པ་ངན། །དད་པ་རྣམ་དག་ཤིན་ཏུ་གལ་ཆེ་ཡང༌། །རྨོངས་དད་ངང་ནས་ཆོས་མི་སློབ་པ་བླུན། །དགོན་པ་གྲྭ་ཚང་སྒྲིག་ལམ་བརྩི་དགོས་མོད། །གྲྭ་སར་མི་འགྲོ་མི་ཚེ་དོན་མེད་འཛད། །རེ་ཞིག་ངན་གཡོས་གཞན་མགོ་བསྐོར་ནུས་ཀྱང༌། །ནམ་ཞིག་ལས་འབྲས་དྲང་བོས་ཐག་གཅོད་ངེས། །ནམ་གཡེང་བྱེད་པ་སྐྱིད་པོ་ཡིན་བརློམས་ཀྱང༌། །རང་གིས་རང་ཉིད་བསླུ་བ་དེ་ལས་མེད། །གྲྭ་རྐྱང་དངོས་གྲུབ་དཔལ་གྱིས། འཕྲོད་བསྟེན་རྩ་བ་ཟས་སྤྱ ོད་དང༌། །སེམས་ཁམས་སྙོམ་སྒྲིག་བྱེད་པ་གལ། །འཕྲོད་བསྟེན་ཡོད་ན་བདེ་ཐང་ཡོད། །བདེ་ཐང་ཡོད་ན་དོན་ཀུན་འགྲུབ། །དངོས་གྲུབ་དཔལ་ནས། རིན་པོ་ཆེ། ཁྱེད་ཀྱིས་གྲྭ་རྒྱབ་ན་མི་ཚེ་གཅིག་གི་ཆོས་བསྒྲུབ་པའི་རིམ་པ་ཞིག་གསུངས་ཡོད་ལ། ཡིན་ན་ལས་དང་པོ་པས་ཐོས་བསམ་བྱེད་པའི་གཞུང་གི་རིམ་པ་ཞིག་གསུང་རོགས་ཞུ་ཞུ། བདུད་འདུལ་རྡོ་རྗེས་གུས་པའི་ཕྱག་བཅས། ཞེས་པའི་གསུང་ལན་དུ། དང་པོར་བློ་སྦྱོང་ལམ་རིམ་སྡོམ་གསུམ་གསན། །རང་རྒྱུད་ཆོས་དང་འདྲེས་པའི་དགོས་པ་ཡོད། །གཞུང་ཆེན་ཐོག་མ་ཚད་མའི་རིགས་ལམ་སྦྱང༌། །གཞུང་ནི་རིགས་པའི་རྗེས་འབྲང་ཡིན་པས་གལ། །དེ་ནས་ཕར་ཕྱིན་གཞུང་ལུགས་རྒྱ་ཆེར་སྦྱང༌། །ནང་བའི་ཐུན་མིན་ལམ་ཀུན་ཤེས་པའི་གནད། །སྤྲོས་བྲལ་དབུ་མའི་གཞུང་ལུགས་ལེགས་བསླབ་ན། །མཐའ་བྲལ་ཟབ་མོ་དབུ་མའི་ལྟ་བ་རྙེད། །དེ་དག་ཆོས་འཁོར་བར་མཐའི་དགོངས་འགྲེལ་གཏོགས། །དམ་ཆོས་འདུལ་བ་སྟོན་པའི་ཚབ་ཡིན་པས། །ལེགས་པར་སྦྱང་ལ་ལག་ལེན་ཚུལ་བཞིན་འབད། །མངོན་མཛོད་གཞུང་ཆེན་དགོངས་འགྲེལ་དམ་པ་མཆོག། །ལེགས་པར་སྦྱངས་ན་དང་པོའི་དགོངས་ཆེན་རྙེད། །གསང་ཆེན་རྒྱུད་སྡེ་བཞི་ཡི་རྣམ་དབྱེ་དང༌། །ཁྱད་པར་དཔལ་ལྡན་དུས་ཀྱི་འཁོར་ལོ་ཡི། །རིམ་གཉིས་རྣམ་བཞག་ཐོས་བསམ་སྒོམ་པ་གནད། །སྦྱང་བའི་གོ་རིམ་ཆེར་མ་མཆིས་མོད་ཀྱང༌། །དབང་བོ་རབ་འབྲིང་ཐ་མའི་ཁྱད་པར་དང༌། །བརྩོན་འགྲུས་རབ་འབྲིང་ཐ་གསུམ་ལས་དབང་གིས། །རྒྱས་འབྲིང་བསྡུས་གསུམ་ཅི་རིགས་སྦྱང་བ་གནད། །མ་མཐའ་དེ་དག་བསྡུས་ཙམ་མ་བསླབ་ན། །ནང་བའི་རྒྱུན་ཤེས་ཙམ་ཡང་མེད་པར་འགྱུར། །སྔོན་བྱོན་དམ་པ་གོང་མའི་རྣམ་ཐར་བཞིན། །ཐོས་བསམ་སྒོམ་པས་མི་ཚེ་དོན་ལྡན་དགོས། །ཞེས་པ་འདི་མདོ་སྨད་ཇོ་ནང་བསྟན་པའི་མངག་བདག་ཛམ་ཐང་དགོན་ཆེན་གྱི་བསྟན་བདག་ཚ་ཁོ་རྡོ་རྗེ་དཔལ་བཟང་གི་སྐུ་ཚ་མཆོག་སྤྲུལ་བདུད་འདུལ་རྡོ་རྗེས་བསྐུལ་ངོར་ངག་དབང་དངོས་གྲུབ་དཔལ་གྱིས་གུས་ཕྱག་དང་བཅས་ཏེ་ཕུལ་བ་དགེའོ། ། སྤོང་ཀློག་གི་ལས་ལ་བསྐུལ་བ།སྤོང་ཀློག་གི་ལས་ལ་བསྐུལ་བ། རྒྱལ་བའི་བཀའ་དང་དགོངས་འགྲེལ་བསྟན་བཅོས་ལ། །ལྟ་བའི་ཤེས་རབ་བརྩོན་པ་ནུབ་གྱུར་བ། །རྩེད་ཆས་རྫུན་མར་ཉིན་མཚན་མིག་བགྲད་ནས། །དངོས་བརྒྱུད་བསྟན་ལ་གནོད་པའི་ལས་ལ་བྲེལ། །ཕ་མས་རེ་བ་བླ་མའི་བཀའ་དགོངས་ཀུན། །སངས་རྒྱས་བསྟན་དང་མི་ལུས་དོན་ལྡན་ལ། །བསམ་ནས་དོན་མེད་གཡེང་བ་རབ་སྤངས་ནས། །སྤོང་ཀློག་ལས་ཀྱིས་དལ་འབྱོར་དོན་ལྡན་མཛོད། །གཞན་ལ་བསམ་མེད་དོན་མེད་བྱིས་པ་ཟེར། །རང་གིས་དེ་འདྲ་བྱེད་ལ་ཞིབ་པར་སོམས། །ལྷ་ཆོས་མི་ཆོས་རིང་ལུགས་ཀུན་ལས་བཤོལ། །དེ་ལས་ལྡོག་ནས་གཏན་གྱི་འདུན་མར་རེམ། །བཙུན་པ་ངག་དབང་དངོས་གྲུབ་དཔལ་གྱིས། སྐུ་རིམ་གྱི་མཆོག་བསམ་པ་བཟང་པོ་གྱིས། །བྱ་བ་ལམ་འགྲོར་ལས་འབྲས་དྲང་བདེན་གྱིས། །བདེ་སྐྱིད་ཆེད་དུ་ཀུན་ལ་བཏང་སྙོམས་གྱིས། །ཉོན་མོངས་ཞི་ཕྱིར་བདག་མེད་སྒོམ་པ་གྱིས། །བསམ་ངན་འཆང་ནས་སྐུ་རིམ་བྱེད་པ་འགལ། །ལས་འབྲས་མི་རྩི་ལམ་འགྲོ་འདོད་པ་འགལ། །ཀུན་ལ་རེ་དོགས་བདེ་སྐྱིད་འཚོལ་བ་འགལ། །བདག་ཏུ་བཟུང་ནས་འཁོར་རྩ་སྤངས་འདོད་འགལ། །དངོས་གྲུབ་དཔལ་ནས། འབྲུག་འུར་སྒྲ་ཆེ་ཡང་སྟོང་སྒྲ་ཡིན། །མཁའ་འཇའ་ཚོན་ལེགས་ཀྱང་ཡལ་ནས་འགྲོ། །འཇིག་རྟེན་གྱི་སྙན་གྲགས་བྲག་ཆ་ཙམ། །སེམས་མ་ཞེན་སྒྱུ་མའི་གར་མཁན་ཡིན། །འདི་བསམ་ན་སྐྱོ་ཤས་ནང་ནས་གཡོ། །དོན་དེ་ཕྱིར་སྙིང་པོའི་ལྷ་ཆོས་ཀྱིས། །ཡིད་རྟོན་པའི་ཐར་ལམ་ཞི་བསིལ་ལ། །དུས་ཀུན་ཏུ་མ་གཡེང་འབད་པར་རིགས། །དངོས་གྲུབ་དཔལ་ནས། འགྲོ་བའི་ཕན་བདེ་སུ་ཡིས་བསྒྲུབ།འགྲོ་བའི་ཕན་བདེ་སུ་ཡིས་བསྒྲུབ། ཆོས་པ་ཕལ་ཆེར་སྲིད་འབྱོར་འདོད་རྔམས་འབར། །འཇིག་རྟེན་ཐམས་ཅད་དེ་ལ་ཡིད་སྨོན་ནས། །བསྟན་པ་རྣམ་དག་མི་མངོན་དབྱིངས་སུ་ཡལ། །སྙིགས་མའི་རང་མཚང་རྡོལ་བ་ཡིད་རེ་མུག ། བསྟན་པའི་གཟུགས་བརྙན་འཛིན་མའི་ཁྱོན་གང་ཡང༌། །བསྟན་པའི་སྙིང་པོ་ནུབ་རིར་ཡིབ་གྱུར་མོད། །བསྟན་པ་མི་ཤེས་བསྟན་པ་དར་ཞེས་གླེང༌། །བསྟན་དང་བསྟན་འཛིན་རྨོངས་བས་རང་མགོ་བསྐོར། །མཆོག་གསུམ་མི་ཤེས་དཀོན་མཆོག་སྐྱབས་སུ་འགྲོ། །དམ་ཆོས་མི་ཤེས་ཆོས་ལ་སྒོམ་སྒྲུབ་བྱེད། །བསྟན་པ་མི་ཤེས་ཁོར་ཡུག་གནོད་ཚབ་བཟོ། །སྨན་མི་ཤེས་པས་སྨན་པ་བྱེད་པ་འདྲ། །ལུང་གི་ཆོས་ལ་འཆད་ཉན་མི་བྱེད་པར། །ཐག་པས་བཅང་ནས་མཆོད་ཡུལ་ཙམ་བྱེད་པ། །རྗེས་ལུས་ཡུལ་ནས་ནམ་ཡང་འཕོ་ཐབས་མེད། །རྨོངས་དད་ཡུལ་སྲོལ་འཛིན་པའི་ཀླད་ལྗང་སྐྱོ། །རྒྱལ་བསྟན་པད་མོ་ཆུ་བོའི་གཞུང་དུ་དོར། །དངོས་གཙོ་སྨྲ་བའི་ཀླད་གསར་ཅོལ་ཆུང་ཚོགས། །ཡིད་བརྟན་མེད་པར་བབ་ཅོལ་སྒྲོ་བསྐུར་བྱེད། །རང་གི་མ་ཤེས་མེད་ཅེས་སྨྲ་བ་མཚར། །ཤེས་འཇོན་གཉིས་ལྡན་དམ་པའི་སྐྱེས་བུ་ལ། །ཕྲག་དོག་སྡང་སེམས་ངན་པའི་གཡོ་སྒྱུ་ཡིས། །སྒྲོ་འདོགས་བསྐུར་འདེབས་འབྲུག་སྒྲ་སྟོང་ལྡིར་བ། །འཇིག་རྟེན་སོ་སྐྱེས་ངང་ཚུལ་སྐྱོ་བའི་གནས། །ཨེ་མ་ད་ནི་བསྟན་པ་སུ་ཡིས་འཛིན། །འགྲོ་བའི་ཕན་དང་བདེ་བ་སུ་ཡིས་བསྒྲུབ། །ཐུགས་རྗེས་གཟིགས་ཤིག་བླ་མ་རིན་པོ་ཆེ། །ཐར་བའི་ལམ་སྣ་ཟིན་པར་བྱིན་གྱིས་རློབས། །ཅེས་པ་འདི་སྤྲང་འཁྱམ་པ་ངག་དབང་དངོས་གྲུབ་དཔལ་གྱིས། སྤྱི་ཚོགས་ཁྲ་ཁྲའི་དུས་འདིར། །རང་ཚུགས་རང་གིས་འཛིན་དགོས། །ཁ་བདེས་གཞན་པ་སྨྱོ་བཅུག ། འཁྲབ་སྟོན་གར་གྱི་མིག་འཕྲུལ། །ལ་ལས་ལྷག་བསམ་ཅུང་ཟད། །ལ་ལས་གོ་སྐབས་འཚོལ་འདུག ། ལ་ལས་སྙན་གྲགས་ཆེད་དུ། །ལ་ལས་སྟོང་འུར་སྣ་ཚོགས། །ལ་ལས་ཆགས་སྡང་ཕྱོགས་འཛིན། །ལ་ལས་ཁ་ཕྱོགས་ནོར་བ། །འཇིག་རྟེན་རྫུན་པའི་སྣང་བརྙན། །ལྟད་མོ་ཡང་ཡང་བལྟས་ན། །དབུ་མར་འཇུག་པའི་བརྡ་ཐབས། །སྒྱུ་མ་བཞིན་དུ་སྟོན་ནོ། །སྐབས་འདིའི་སྤྱི་ཚོགས་ངང་ཚུལ་ལ་གཞིགས་ནས་དངོས་གྲུབ་དཔལ་གྱིས་བྲིས་པའོ། ། ལྷག་བསམ་ཡོད་མེད་ཀྱི་གྲོགས།ལྷག་བསམ་ཡོད་མེད་ཀྱི་གྲོགས། སྐྱོན་བརྗོད་མངོན་ནས་བཤད་པ། །ཡོན་ཏན་ལྐོག་ནས་གླེང་བ། །རྒུད་ཚེ་གདུང་སེམས་མཉམ་སྐྱེད། །ལྷག་བསམ་དཀར་བའི་གྲོགས་པོ། །མངོན་ནས་ངོ་བསྟོད་འཇའ་ཚོན། །ལྐོག་ནས་སྒྲོ་བསྐུར་སྣ་ཚོགས། །རྒུད་ཚེ་རྒྱང་རིང་བཤོལ་བ། །རང་དོན་གཞོལ་བའི་གྲོགས་ངན། །རང་དོན་ཡོད་ཚེ་ཁ་འཇམ། །དགོས་མཁོ་མེད་ཚེ་མི་ཤེས། །ཇི་ལྟར་བྱམས་བརྩེས་བསྐྱངས་ཀྱང༌། །བརྗེད་པ་མི་ངན་རང་ལུགས། །ངག་དབང་དངོས་གྲུབ་དཔལ་ནས། བློ་གྲོས་བཟང་པོས་གཞུང་བརྒྱའི་དོན་འབྱེད་ཅིང༌། །སངས་རྒྱས་བསྟན་པ་ཕྱོགས་བཅུར་རབ་སྤེལ་ནས། །འཇིགས་མེད་སྤོབས་པ་རྒྱ་མཚོའི་གྲོང་ཁྱེར་དེར། །འཇུག་པའི་མཐུན་འགྱུར་མཆོག་གསུམ་སྲུང་མས་མཛོད། །ཅེས་པ་འདི་ཉིད་གཞན་ངོར་དངོས་གྲུབ་དཔལ་གྱིས་བྲིས་པ་དགེའོ། །དྲིན་བྱས་མི་ཤེས་སྤྱི་ཚོགས་རྨོངས་བ། །དྲང་བདེན་གནས་ལུགས་ཀུན་ནས་བསྒྲིབས་པའི། །ལོག་བཤད་གཡོ་སྒྱུའི་ཆབ་སྲིད་མུན་ནག ། ཆགས་སྡང་འཇིགས་པ་ཆེ་བའི་མིག་འཕྲུལ། །དངོས་གྲུབ་དཔལ་ནས། དད་ཤེས་ལྷག་བསམ་ཉམ་ཆུང་གྲྭ་རྐྱང་གི་ངང་ཚུལ། །བླུན་པོའི་དཔལ་འབྱོར་ཁུར་གྱི་དབང་ཤུགས་ཀྱིས་བཅོམ་སྟེ། །ནང་བསྟན་དགེ་འདུན་གྲལ་རིམ་མགོ་མཇུག་ཏུ་ལོགས་ནས། །ལྷ་དབང་ལྷ་མིན་དབང་བསྒྱུར་བྱེད་ཚུལ་འདི་ལས་དབང༌། །དངོས་གྲུབ་དཔལ་གྱིས། ཐོས་སྒོམ་ཡར་རྒྱས་མེད་པའི་དགོན་གནས་ལ། །ཕྱི་རྫིག་ཁང་བརྩེགས་འཇིན་རྟེན་བཀྲ་ན་ཡང༌། །འགྲེམས་སྟོན་ཁང་དང་ངོ་བོ་དབྱེར་མ་མཆིས། །བསླབ་གསུམ་རྒྱན་པའི་དགེ་འདུན་གཅེས་པར་སྐྱོངས། །འཁོར་གཡོག་མང་བའི་བླ་ཆེན་མཐོ་སར་སྐྱེས། །ཐོས་སྒོམ་མི་བརྩོན་འཇིག་རྟེན་ལས་ལ་ངལ། །རྒྱལ་སྲུང་དཔོན་འཁོར་ཚོགས་དང་དབྱེར་མ་མཆིས། །ལུང་རྟོགས་བསྟན་པའི་གཞི་འཛིན་དགེ་འདུན་དགོས། །ཆོས་མི་ཤེས་པས་ཆོས་ལོག་སྟོན་དུས་འདིར། །རང་གཞན་དོན་གང་མི་འོང་མགོ་བསྐོར་བརྩོན། །བུ་སློབ་མདུན་མ་མ་བརླག་སློབ་དཔོན་ལགས། །རང་ཚོད་རང་གིས་བཟུང་ལ་དགེ་སྦྱོར་གྱིས། །དངོས་གྲུབ་དཔལ་གྱིས་རང་གི་མཚོན་ནས་གོང་སྨོས་དང་ལྡན་པ་དག་ལ་སྨྲས་པའོ། ། བསྟོད་པའི་སྐོར།བསྟོད་པའི་སྐོར། བསྟོད་སྨོན་བཀྲ་ཤིས་ཆོས་དུང་དཀར་པོ། བློ་གྲོས་བཟང་པོས་ཤེས་བྱའི་དཀྱིལ་འཁོར་ཁྱབ། །དཔལ་ལྡན་སྐུ་གསུམ་གསང་བའི་རྒྱ་མཚོ་ཆེ། །སྐལ་བཟང་འཇུག་ངོགས་ཀླུ་དབང་རོལ་བའི་གནས། །མཐའ་ཡས་ཡོན་ཏན་རིན་ཆེན་གཏེར་དུ་གྲུབ། །ཐུགས་རྗེ་ཆེན་པོའི་རྣམ་སྤྲུལ་བྱེ་བ་ཡི། །ཞིང་ཁམས་རབ་འབྱམས་ཆུ་ཀླུང་ཟླ་བརྙན་ལྟར། །གང་ལ་གང་འདུལ་སྤྲུལ་བའི་འོད་སྟོང་གསལ། །བསྟན་འགྲོའི་དོན་ཆེན་མཛད་ལ་གུས་ཕྱག་བགྱི། །རྨད་བྱུང་བརྩེ་བས་འགྲོ་ལ་ཉེར་དགོངས་ནས། །གང་སྐུ་མི་འགྱུར་རྡོ་རྗེའི་ཁམས་བརྟན་པའི། །ཚེ་མཐའ་ཡས་པའི་ངོ་བོར་རྟག་བཞུགས་ཏེ། །ཟབ་རྒྱས་ཆོས་ཀྱི་དགའ་སྟོན་སྤེལ་བར་སྨོན། །བསེ་ཚང་བློ་བཟང་དཔལ་ལྡན་མཆོག་དགུང་གྲངས་བརྒྱད་ཅུར་ཕེབས་པའི་གྱ་སྟོན་ལ་དད་གུས་ཀྱི་སྒོ་ནས་དཔལ་ལྡན་རྒྱལ་བ་ཇོ་ནང་གི་ཆོས་བརྒྱུད་དུ་གཏོགས་པའི་མགོ་ལོག་པ་དངོས་གྲུབ་དཔལ་གྱིས་ཕུལ་བའོ། །ལྷག་བསམ་རྡུལ་མང་བརྩེགས་པའི་བྲག་དཀར་གྱི། །ཁ་བའི་སྲོལ་རྒྱུན་ཚད་ལྡན་འདབ་སྟོང་བཞད། །བོད་ཇའི་གསོལ་སྐྱེམས་འདོད་འཇོའི་དགའ་ཚལ་གླིང༌། །གངས་ལྗོངས་བོད་པའི་སྤུན་ཟླ་མགྲོན་ལ་ཕེབས། །ངག་དབང་དངོས་གྲུབ་དཔལ་ནས། རྒྱལ་བསྟན་ཡོངས་རྫོགས་རྒྱ་ཆེ་རྒྱ་མཚོ་འཁྱིལ་བའི་གངས་ལྗོངས་ཀྱི། །བསོད་ནམས་བྱེ་བས་བསྐྲུན་པའི་བླ་རུང་ཆོས་ཀྱི་ཞིང་ས་ལ། །མི་འདོད་ཉེར་འཚེའི་རྒུད་པ་ཇི་སྙེད་ཐམས་ཅད་ཡོངས་ཞི་ནས། །མི་ནུབ་ཐུབ་བསྟན་འཛིན་པའི་གན་མཛོད་གནས་སུ་འགྱུར་བར་སྨོན། །ཞེས་དངོས་གྲུབ་དཔལ་ནས་སེམས་སྐྱོ་ལྷང་ངེ་བ་ཞིག་གིས་བདག་རྐྱེན་བྱས་ནས་སྨྲས་པའོ། །སྡེ་སྣོད་གསུམ་གྱི་འཆད་ཉན་འགྲོ་ལ་སྤེལ། །ས་གསུམ་རྨོངས་བའི་མུན་པ་ཀུན་ནས་འཇོམས། །ཀརྨ་གསེར་ལྡན་འཛིན་མའི་ཕྱོགས་མཐར་རྒྱས། །བསྟན་པ་རིན་ཆེན་དར་རྒྱས་མཛད་ལ་གུས། །དངོས་གྲུབ་དཔལ་ནས་དད་གུས་ཀྱིས་བྲིས་པའོ། །ཐུབ་དབང་བསྟན་པའི་ལྷ་ལམ་ཡངས་པོ་རུ། །ཟླ་བ་བཞིན་དུ་མཁས་པའི་ཏོ་ཀེར་མཆོག ། དྲན་པ་ཡེ་ཤེས་དུས་ཀྱི་མཐར་ཡང་ནི། །དད་ཤེས་ཁང་བུར་ད་དུང་འཚོ་ཞིང་བཞུགས། །ལོ་ཡི་དྷྲུ་བ་ཕྱི་ཕྱིར་དེད་པ་ན། །བགྲང་བྱ་སྟོང་རྩའི་འཕགས་པའི་ཡུལ་དབུས་སུ། །སྨྲ་བའི་རྒྱུ་སྐར་བྱེ་བའི་ཁ་ལོ་བ། །སྨྲྀ་ཏིའི་འོད་དཀར་རི་བོའི་སྤོ་རུ་འཕོས། །ཆུ་ཤེལ་ཆ་རྫོགས་ཉ་ཚེས་ཟླ་བ་ཡིས། །ཁྲི་གདུགས་ཟེར་མདངས་བཅུད་དུ་གཞིབ་པ་ལྟར། །མཁས་པའི་མདུན་ནས་མཁས་པའི་ངང་ཚུལ་དག། གུས་རྟག་དར་གྱིས་གཙུག་གི་ནོར་བུར་བླངས། །ལུང་གི་བརྗོད་པ་བསམ་པས་གཏིང་དཔོག་པ། །བསམ་དོན་བསྒོམས་པས་གྲུབ་པའི་ས་འཛིན་ཆེ། །ངོ་མཚར་འཕྲུལ་གྱི་རྣམ་ཐར་གཏམ་གྱི་ཚོམས། །ཇོ་བོ་ཁྱེད་ནི་འཕགས་ཡུལ་སྒྲོན་མེ་ཡིན། །གདོང་དམར་ཡུལ་དུ་སྤྲིན་ནག་ལང་ལོང་གིས། །རྒྱལ་བསྟན་ཉིན་བྱེད་རེ་ཞིག་ཡིབ་པ་ན། །ལྷོ་ཡི་ཕྱོགས་ནས་ལྷར་ཡང་འཕྲོས་པ་ཡི། །ཀུན་གྱི་ཐོག་མ་སྨྲྀ་ཏི་ཛྙཱ་ནར་གྲགས། །ཁ་བ་ཅན་དུ་ཤིང་རྟ་ཆེན་པོ་ཞིག། གསེར་གྱི་ཕ་བོང་སྒོ་ཁར་བྱོན་ནའང༌། །བ་གླང་སྔོན་བཞག་བ་རྗེས་འཚོལ་བའི་གཏམ། །ཁྱེད་ཉིད་ཙམ་ལ་བྱུང་བའི་གཏམ་རྒྱུད་མིན། །ཁུར་གྱིས་ལྕིད་པའི་བཀའ་དྲིན་དེ་ནི་དབུ་ནག་སྐྱེ་འགྲོས་གསུབ་ཏུ་མེད་པའི་ཐུགས་བསྐྱེད་ཡིན། །འཛད་མཐའ་བྲལ་བའི་གང་གསུང་ཟེར་ནི་བྱིས་པས་མི་དཔོག་དམ་པ་དག་ཀྱང་བག་ཚའི་ཡུལ། །བྱིན་རླབས་འགྲོ་ལ་ཕན་པའི་སྨན་ནི་དངོས་འཛིན་གཅོང་ནད་ས་བོན་དང་བཅས་གཞོམ་པའི་གཉེན། །ཁྱེད་ཀྱི་གསང་གསུམ་ལྕེ་བརྒྱར་སྤྲུལ་ཡང་ཆ་དང་རྡུལ་ཙམ་བརྗོད་པར་ནུས་པའི་གནས་སུ་ཅི། །རྒྱུ་སྐར་འགྲན་པའི་པཎ་གྲུབ་གྲངས་མེད་ཅིག། ཤེལ་ཕྲེང་བསྟར་བཞིན་ནུབ་རིར་ཡིབ་པ་ལས། །ཀུན་དའི་ཡིད་རབ་སྐྱོ་བའི་མ་མ་ནི། །སྨྲ་བའི་མཚོན་ཆ་ཁྱེད་ལས་སུ་ཞིག་འོས། །ཁྱེད་ལ་ཇོ་བོར་བརྗོད་དེ་མི་དང་ལྷ་ཡི་གཙུག་ན་འཕགས་པའི་ནོར་བུ་ཞིག ། ཁྱེད་ལ་སྨྲྀ་ཏི་ཐོགས་ཏེ་དྲན་དང་ཡེ་ཤེས་དཔག་མེད་དུ་མའི་གན་མཛོད་ཅིག ། ཁྱེད་ལ་ཛྙཱ་ནར་གསོལ་ཏེ་ཤེས་རབ་རྣམ་དག་ཡང་དག་གཟིགས་པའི་སྤྱ ན་ཡངས་པ། །ཁྱེད་ལ་ཀིརྟི་ཞེས་བྱ་འཇིག་རྟེན་གསུམ་ན་དོན་དང་ལྡན་པའི་གྲགས་པ་འབར། །གངས་ལྗོངས་ཡུལ་གྲུ་རྒྱ་མཚོའི་ཟབ་ཡངས་ལ། །ལུས་ཅན་འདྲེན་པའི་རྒྱལ་བསྟན་གྲུ་བོ་ཆེ། །ལས་ངན་རླབས་ཀྱིས་ཕྱོགས་སུ་སྟོར་བ་ན། །མཉན་པ་ཁྱེད་ཀྱིས་སླར་ཡང་ཤིང་རྟ་དྲངས། །ཁྱེད་ནི་སྒྲ་ཚད་བརྗོད་ཚེ་ཚིག་དང་རིགས་པའི་བྱེད་པོ་ལྟར། །ཁྱེད་ནི་སྐད་གཉིས་སྨྲ་སྐབས་ལོ་ཙཱ་ཆེན་མོ་འཇིག་རྟེན་མིག ། ཁྱེད་ནི་སྙིང་རྗེའི་རང་གཟུགས་གཡོ་མེད་བྱམས་པའི་ཏིང་འཛིན་ཅན། །ཁྱེད་ལ་རྗེས་དྲན་བྱེད་དོ་གསོལ་འདེབས་དབྱངས་ཀྱི་འོ་དོད་འབོད། །དངོས་གྲུབ་དཔལ་ནས། སྐྱེ་མེད་ཀ་དག་རིག་པའི་རང་རྩལ་ལསཿ ཀློང་མདངས་འགག་མེད་རིག་པའི་རོལ་རྩལ་ལཿ ཀུན་རྟོག་རྒྱུ་བའི་རི་མོ་སྣ་ཚོགས་བཀྲཿ འཇིག་རྟེན་བདེན་རྫུན་ཡོ་ལང་མིག་འཕྲུལ་བཞིནཿ རྫུན་མའི་འཇའ་ཚོན་ཡིད་གཏད་གང་ཡང་མེདཿ དོན་དེ་སེམས་ལ་བཟུང་ནས་བཏང་སྙོམས་མཛོདཿ སྣང་ཙམ་ཆོས་ལས་བདེན་དོན་འཚོལ་ན་ལེགསཿ ཨོ་རྒྱན་མཁའ་འགྲོའི་གསང་བའི་བརྡ་གསང་ལཿ གང་ཤར་རང་གྲོལ་ཡེ་རྫོགས་ཆེན་པོའོཿ ཨེ་བཾཿགྱང་སྤྲུལ་མཆོག་དབྱིངས་ལ་དངོས་གྲུབ་དཔལ་ནས་རྩེད་མོར་གུས་ཕུལ། ཁང་དམར་ཕོ་བྲང་ལེགས་གྲུབ་བྱུང་བ་ལ་ཕུལ་བའི་བསྟོད་ཚིགཁང་དམར་ཕོ་བྲང་ལེགས་གྲུབ་བྱུང་བ་ལ་ཕུལ་བའི་བསྟོད་ཚིག རྟ་བབས་ཀ་གདུང་རྟེན་གྱི་རང་བཞིན་མཛེས། །མི་གཡོ་གསུམ་ལྡན་བཅུད་ཀྱི་ཉིང་ཁུ་རྒྱས། །ཨེ་ཝྃ་རོལ་བའི་རྣལ་འབྱོར་འདུ་ར་ཆེ། །ཁང་དམར་ཕོ་བྲང་སྲིད་པའི་རྩེ་ན་འཕགས། །མདོ་སྨད་ཇོ་ནང་ཆོས་སྡེ་ཡོངས་ཀྱི་ཐོག་མའི་གདན་ས་ཆེན་མོ་༧ཆོས་རྗེ་དགོན་གྱི་ཁང་དམར་ངེས་དོན་ཐུབ་བསྟན་བཤད་སྒྲུབ་གླིང་ལེགས་པར་གྲུབ་པ་ལ་ངག་དབང་༧དངོས་གྲུབ་དཔལ་གྱིས་སོ། །དཔལ་ལྡན་ཀ་ལ་ཙཀྲའི་ངེས་དོན་གྱི། །རིམ་གཉིས་རྣལ་འབྱོར་བྱེ་བའི་གཙུག་ལག་ཁང༌། །ཐུབ་བསྟན་བཤད་སྒྲུབ་བསྟན་པ་རྒྱས་གྱུར་ནས། །བསྐལ་བ་ཇི་སྲིད་བར་ཏུ་རབ་གནས་སྨོན། །མདོ་སྨད་ཇོ་ནང་ཆོས་སྡེ་ཡོངས་ཀྱི་ཐོག་མའི་གདན་ས་ཆེན་མོ་༧ཆོས་རྗེ་དགོན་གྱི་ཁང་དམར་ངེས་དོན་ཐུབ་བསྟན་བཤད་སྒྲུབ་གླིང་ལེགས་པར་གྲུབ་པ་ལ་དགའ་སྤྲོ་དང་བཅས་དངོས་གྲུབ་དཔལ་གྱིས་བྲིས་པའོ། །ཨོཾ་སྭ་སྟི། སྐུ་ཚེ་འཇིགས་མེད་རྟག་བརྟན་ལྷུན་རྫོགས་པའི། །མི་འགྱུར་བདེ་བའི་གསང་ཆེན་དཔལ་ལྡན་གྱི། །མཛད་འཕྲིན་འོད་སྟོང་འཛིན་མར་ཁྱབ་པ་དང༌། །ངེས་དོན་བསྟན་པ་འཛིན་པའི་མགོན་སྐྱབས་ཤོག ། ཅེས་པ་འདི་གནས་མཆོག་བྱ་ཡུལ་དགོན་གྱི་༢༠༡༨ལོའི་སྦྱོར་དྲུག་ལོ་གསུམ་མཐར་ཕྱིན་པའི་ཆོས་ཚན་གྱི་ངོར་དངོས་གྲུབ་དཔལ་ནས་གུས་ཕུལ། ཨོཾ་སྭ་སྟི། མཁྱེན་པས་མདོ་རྒྱུད་ངེས་གསང་ཀུན་མཁྱེན་པའི། །ཐུགས་རྗེས་འགྲོ་རྣམས་མ་ནོར་ལམ་བཟང་སྟོན། །མདོ་རྒྱུད་དུ་མར་རྒྱལ་བས་ལུང་གིས་བསྔགས། །མཐའ་བྲལ་གཞན་སྟོང་སྲོལ་འབྱེད་ཇོ་ནང་བ། །རྒྱལ་བསྟན་ལུང་རྟོགས་དམ་ཆོས་རིན་ཆེན་དང༌། །ཁྱད་པར་ངེས་དོན་གཞན་སྟོང་དབུ་མ་ཆེ། །ཐོས་བསམ་སྒོམ་པའི་ཉིན་མཚན་འདའ་བ་ཡི། །དགེ་འདུན་འདུས་པས་ས་གསུམ་ཁྱབ་པར་ཤོག ། ཅེས་པ་འདི་ནི་ཇོ་ནང་གི་ཞལ་འདོན་པར་བསྐྲུན་སྐབས་གྲྭ་ལྷག་བསམ་པ་བདུད་འདུལ་གྱི་བསྐུལ་ངོར་ངག་དབང་དངོས་གྲུབ་དཔལ་གྱིས་བྲིས་པའོ། །སརྦ་མངྒཾ། ། སྙན་རྩོམ་སྐོར།སྙན་རྩོམ་སྐོར། ཨོཾ་སྭ་སྟི། ཇི་ལྟ་ཇི་སྙེད་ཤེས་བྱའི་གནས་རྣམས་ཀུན། །མ་འདྲེས་གསལ་བར་སྟོན་པའི་རི་མོའི་འཕྲུལ། །གངས་ཅན་པ་ཡི་ཁྱད་ནོར་སྒྱུ་རྩལ་གྱི། །སུག་བྲིས་ཡིད་འོང་པདྨའི་དགའ་ཚལ་བཞད། །ཅེས་པ་འདི་ནི་མགོ་ལོག་ལུང་སྐྱའི་དུས་བྲིས་སྒྱུ་རྩལ་གླིང་ལ་དངོས་གྲུབ་དཔལ་གྱིས་རྗེས་སུ་ཡི་རང་དང་བཅས་ཏེ་ཕུལ། མཁྱེན་གཉིས་ཟུང་གི་ཕྱག་རྒྱའི་གར་སྟབས་ལས། །སྙན་པའི་ཆོས་སྒྲ་ཏམ་བུ་ར་ཡི་དབྱངས། །སྲིད་པའི་ཁྱོན་ལ་ཡོངས་སུ་རབ་དཀྲོལ་བས། །མི་ཤིས་རྒུད་ཚོགས་ཀུན་ནས་ཞི་བྱེད་ཀྱི། །དྲི་མ་འཆོས་ཤིང་སྲིད་ལས་སྐྱོབ་བྱེད་པ། །གདམས་ངག་བདུད་རྩིའི་བཅུད་ཀྱིས་གཏམས་པ་འདི། །དཔར་དུ་བསྐྲུན་པའི་ལེགས་བྱས་བསོད་ནམས་ཀྱིས། །ལུས་ཅན་བདེ་ཞིང་རྒྱལ་བསྟན་འཕེལ་གྱུར་ཅིག ། ཅེས་པ་འདི་ནི་བདག་སེམས་ལ་མཁྱེན་རྟོགས་ཀྱི་རིན་ཐང་ཆེ་བའི་མདོ་སྨད་ཇོ་ནང་དགོན་པའི་ཐོག་མ་ཛམ་ཐང་ཆོས་རྗེ་དགོན་པའི་མཁན་ཆེན་ཀརྨ་རྡོ་རྗེས་མཛད་པའི་ཐེག་པ་མཆོག་གི་ཟབ་གསང་ངེས་དོན་གཞན་སྟོང་དབུ་མ་ཆེན་པོའི་དོན་རབ་ཏུ་གསལ་བར་བྱེད་པ་གཟི་འབར་ནོར་བུའི་འོད་སྣང་ཞེས་པའི་བསྟན་བཅོས་ཀྱི་པར་བྱང་སྨོན་ཚིག་ཏུ་དངོས་གྲུབ་དཔལ་གྱིས་ཕུལ་བ་དགེའོ། །སྔོན་བསགས་བསོད་ནམས་སྟོབས་ལས་མངོན་འཕགས་པའི། །ཕུན་ཚོགས་ཡོན་ཏན་རིན་ཆེན་ལས་གྲུབ་ཅིང༌། །རིགས་ལམ་གད་རྒྱངས་འཕྲིན་ལས་སྟོང་འབར་བས། །ཕས་རྒོལ་ཟིན་གནོན་བློ་གྲོས་འདབ་སྟོང་བཞད། །རིགས་ལམ་རྣམ་པར་འབྱེད་པའི་ལེགས་བཤད་ཀྱི། །སྟོན་ཀའི་ཟླ་ལྟར་གསལ་བའི་འོད་དཀར་གྱིས། །འགྲོ་བློའི་རྨོངས་པའི་མུན་ཚོགས་རབ་བཅོམ་ནས། །ཐུབ་བསྟན་ལུང་རིགས་པད་དཀར་རྒྱས་གྱུར་ཅིག ། ཅེས་པ་འདི་ནི་མཁན་རྣམ་སྲས་ཀྱིས་རྟགས་རིགས་སོགས་རིགས་ལམ་གྱི་རྩོམ་ཡིག་དཔེ་སྐྲུན་བྱེད་སྐབས་སུ་བཙུན་པ་ངག་དབང་དངོས་གྲུབ་དཔལ་གྱིས་རྗེས་སུ་ཡི་རང་དང་བཅས་ཏེ་གུས་ཕུལ། ཨོཾ་སྭ་སྟི། ལྟ་སྒོམ་སྤྱ ོད་པའི་རྣམ་བཞག་རིན་ཆེན་གཏེར། །ནང་བསྟན་དཔག་བསམ་ལྗོན་པའི་འཁྲི་ཤིང་ལ། །ཚན་རིག་དེང་རབས་རིགས་པས་ཟུར་བརྒྱན་པའི། །ལེགས་བཤད་འདི་འདྲ་དུས་ཀྱི་གསོ་སྨན་མཆོག ། དངོས་གྲུབ་དཔལ་ནས་གུས་ཕུལ། ཨོཾ་སྭ་སྟི། བརྩེ་ཆེན་མུ་མེད་རྒྱ་མཚོ་འཁྲིགས་པ་ལས། །མཁྱེན་དཔྱོད་ཟླ་བའི་དཀྱིལ་འཁོར་མངོན་འཕགས་པ། །ཕན་བདེའི་འགྲོས་ཀྱིས་སྲིད་འདི་མི་འདོར་བའི། །བསྟན་འཛིན་དམ་པ་མཆོག་གི་འཁྲུངས་སྐར་བསུ། །ཐུགས་སྟོབས་གོ་ཆའི་སྤྲིན་རིམ་ལྡང་བ་ལས། །ལེགས་གསུང་འབྲུག་སྒྲས་ཀུན་རྨོངས་སེལ་བྱེད་ཅིང༌། །ཚུལ་གནས་ཐོས་བསམ་སྒོམ་པའི་རྒྱལ་མཚན་འཛིན། །འགྲོ་ཕན་བླ་མ་གང་དེའི་འཁྲུངས་སྐར་བསུ། །གདུལ་བྱའི་བསོད་ནམས་སེང་གེས་བཏེགས་པའི་ཁྲིར། །སྐུ་ཡི་ཁོ་ལག་མཚན་དཔེའི་གཟི་འབར་ཞིང༌། །འཕྲིན་ལས་གདུགས་དཀར་གཡས་སུ་རབ་འཁོར་ངང༌། །བསྟན་འགྲོའི་མགོན་དུ་ཡུན་རིང་བཞུགས་གསོལ་འདེབས། །རིན་ཆེན་རྣམ་གསུམ་ཚེ་མཐའ་ཡས་པ་དང༌། །རྣམ་པར་རྒྱལ་དང་སྒྲོལ་མ་དཀར་མོ་སོགས། །འཆི་མེད་ཚེ་ཡི་ལྷ་ཚོགས་ཐམས་ཅད་ཀྱིས། །བསྟན་འཛིན་མཆོག་གི་སྐུ་ཚེའི་འདུ་བྱེད་སྲུངས། །ཞེས་འབྲི་གུང་༧སྐྱབས་མགོན་རྡོ་རྗེ་འཆང་དཀོན་མཆོག་བསྟན་འཛིན་ཀུན་བཟང་འཕྲིན་ལས་ལྷུན་གྲུབ་དཔལ་བཟང་པོ་མཆོག་དགུང་གྲངས་དོན་ལྔ་ཕེབས་པའི་སྐུའི་འཁྲུངས་སྐར་ལ་ཇོ་ནང་པ་ངག་དབང་དངོས་གྲུབ་དཔལ་གྱིས་དད་གུས་དང་བཅས་གུས་པས་ཕུལ་བ་དགེའོ། ། གསོལ་འདེབས་སྐོར།གསོལ་འདེབས་སྐོར། ༧འཕགས་མའི་གསོལ་འདེབས་འཕྲིན་ལས་ཀུན་འགྲུབ་ཅེས་བྱ་བ་བཞུགས་སོ། །པད་ཟླའི་གདན་ལ་སེམས་མའི་དཀྱིལ་དཀྲུང་གིས། །ཐུགས་རྗེ་ཕྱོགས་མེད་ལུས་ཅན་མི་འདོར་བའི། །འཇིགས་པ་བརྒྱད་སོགས་བར་ཆད་མ་ལུས་པ། །མཚན་ཙམ་དྲན་པས་ཀུན་ནས་ཞི་མཛད་མ། །ཉེར་གཅིག་འཕགས་མ་མྱུར་མ་དཔའ་མོ་ལ། །དུས་རྣམས་ཀུན་ཏུ་དད་པས་གསོལ་འདེབས་ན། །མཆོག་དང་ཐུན་མོང་དངོས་གྲུབ་སྩོལ་བ་དང༌། །འགྲོ་འདི་དགེ་ལེགས་དཔལ་གྱིས་སྐྱོང་གྱུར་ཅིག ། ལུང་རྟོགས་རིན་ཆེན་བསྟན་པའི་སྙིང་བོ་མཆོག ། འཆད་ཉན་སྒོམ་སྒྲུབ་བཤད་སྒྲུབ་འཕྲིན་ལས་ཀྱིས། །བསྟན་པ་འཛིན་རྣམས་མི་མཐུན་ཀེག་ཀུན་ཞི། །བར་ཆད་གནོད་པ་འཇོམས་པའི་མཐུ་ཐོབ་ཤོག ། མི་དང་མི་མིན་སྐྱེ་རྒུ་མ་ལུས་པ། །ནད་མཚོན་དུག་དང་གདོན་གྱིས་གནོད་པ་ཞི། །མི་འདོད་བྲལ་ཞིང་འདོད་དོན་མ་རྙེད་པའི། །མྱ་ངན་གདུང་བ་ཐམས་ཅད་མེད་པར་མཛོད། །འདོད་པ་ཆེ་ལ་ཆོག་ཤེས་དམ་པ་ཐོབ། །ཞེ་སྡང་འབར་ལ་བཟོད་པའི་གོ་ཆ་སྤྲས། །གཏི་མུག་འགྲོ་ལ་ཤེས་རབ་རབ་རྒྱས་ཏེ། །འཇིག་རྟེན་མ་ལུས་ཀུན་ནས་དགེ་གྱུར་ཅིག། སྐྱབས་འོག་པ་ཀུན་དད་པས་གསོལ་འདེབས་ན། །སྨོན་པ་བཞིན་དུ་གང་ལ་གང་འདོད་དུ། །ཆོས་བཞིན་འགྲུབ་ཅིང་འགྲོ་ལ་ཕན་པ་ཡིས། །བདེ་བླག་ངང་གིས་ཆར་དུ་སྙིལ་བར་མཛོད། །གསོལ་བ་འདེབས་སོ་རྒྱལ་ཡུམ་འཕྲིན་ལས་མ། །བྱིན་གྱིས་རློབས་ཤིག་མཐུ་སྟོབས་དཔལ་བསྐྱེད་མ། །དེང་ནས་རེ་འོ་འཕགས་མ་སྒྲོལ་མ་མཆོག ། རྩེ་གཅིག་ཡིད་ཀྱིས་སྐྱབས་སུ་ཁྱེད་བསྟེན་ནོ། །འཕགས་མའི་གསོལ་འདེབས་འཕྲིན་ལས་ཀུན་འགྲུབ་ཅེས་བྱ་བ་འདི་ཉིད་ཚུལ་ཁྲིམས་རྒྱ་མཚོས་བསྐུལ་ངོར་ངག་དབང་དངོས་གྲུབ་དཔལ་ནས་སོ། །བཀྲ་ཤིས། དགེའོ། །ཕྱག་རྡོར་རྣམ་སྤྲུལ་བློ་བཟང་འཕྲིན་ལས་རྗེ། །མཐུ་སྟོབས་དབང་ཕྱུག་བསོད་ནམས་དཔལ་ལྡན་མཆོག ། རྟོགས་པའི་མངའ་བདག་བསོད་ནམས་བཟང་པོའི་དཔལ། །རྣམ་གསུམ་བླ་མར་ཕྱག་འཚལ་གསོལ་བ་འདེབས། །བདག་སོགས་འགྲོ་རྣམས་སྲིད་ཞིའི་འཇིགས་སྐྱོབས་ནས། །ཕྱི་མ་བྱང་ཆུབ་ལམ་ནས་མཇལ་བར་སྨོན། །ཞེས་པ་འདི་ཆོས་རབ་ནས་བསྐུལ་ངོར་དངོས་གྲུབ་དཔལ་ནས་བྲིས་པ་དགེའོ། །རྒྱལ་ཀུན་ཆོས་སྐུ་ཉག་གཅིག་བཤེས་གཉེན་དུ་སྣང་བ། །ཐུགས་རྗེ་ཕ་མཐའ་བྲལ་བའི་ཉམ་ཐག་གི་སྐྱབས་གནས། །འགྲོ་ཀུན་ཐར་བའི་དགའ་ཆེན་ཕངས་མེད་དུ་སྩོལ་མཁས། །འཇིགས་མེད་མགོན་པོ་ཁྱེད་ཞབས་ཅོད་པན་དུ་བསྟེན་ནོ། །སོར་བཅུ་སྙིང་ལ་སྦྱར་ནས་དད་གདུང་གིས་འབོད་ན། །ཕ་གཅིག་བརྩེ་བའི་རང་གཟུགས་སྙིང་ཁུང་ལ་ཕེབས་ཏེ། །བྱིན་རླབས་ཏིང་འཛིན་སྒོ་བརྒྱའི་དགའ་སྟོན་དང་བཅས་པར། །དོན་གཉིས་ལྷུན་འགྲུབ་ས་ལ་ཐོགས་མེད་དུ་སྦྱོར་ཅིག ། ཅེས་པ་འདི་ནི་དངོས་གྲུབ་དཔལ་ནས། ཀུན་ལ་མཐུན་པར་བྱེད་པའི་བྱ་རྩོམ་པ། །ཀུན་མཁྱེན་གྱིས་ནི་མ་བྱུང་ཨེ་མ་ཧོ། །འཇིག་རྟེན་མཐུན་པ་བདེན་ལས་ངན་གཡོ་མཆོག ། རང་སེམས་ཆོས་དང་མཐུན་ན་དོན་ཆེན་རྙེད། །སྤྲང་འཁྱམ་པ་དངོས་གྲུབ་དཔལ་ནས། བཀའ་དྲིན་གཞལ་མེད་བླ་མ་རིན་པོ་ཆེས། །བྱང་ཆུབ་མ་ཐོབ་བར་དུ་བརྩེ་བས་སྐྱོངས། །བདག་ལ་རེ་ས་སྐྱབས་གནས་གཞན་མ་མཆིས། །མགོན་པོ་གང་གི་ཐུགས་རྗེས་གཟིགས་པར་ཞུ། །དངོས་གྲུབ་དཔལ་ནས། དད་གུས་སྐྱོ་གདུང་དྲག་པོས་གསོལ་བ་བཏབ་པ།དད་གུས་སྐྱོ་གདུང་དྲག་པོས་གསོལ་བ་བཏབ་པ་ཞེས་བྱ་བ་བཞུགས་སོ། །ཐབས་མཁས་ཐུགས་རྗེའི་འོད་ཟེར་བྱེ་བ་ཕྲག་བརྒྱ་ཡིས། །དག་དང་མ་དག་ཞིང་ཁམས་རབ་འབྱམས་གངྒཱའི་ཀླུང༌། །གང་འདུལ་འགྲོ་བའི་ལས་དབང་མཐུན་པར་ངུར་སྨྲིག་གར། །ལེགས་བཤད་གསུང་གིས་འགྲོ་ཡིད་མུན་སེལ་གང་ལ་འདུད། །སྐལ་མེད་བདག་སོགས་བརྩེ་བས་འདོར་ནས་སུ། །མགོན་ཁྱོད་ཞིང་གཞན་བདེ་བར་གཤེགས་གྱུར་པ། །མགོན་མེད་བདག་ཅག་ལེགས་པའི་ལམ་སྟོན་དུ། །རབ་ཏུ་བརྩེ་ཆེན་རྒྱས་པའི་ཀློང་ནས་གཟིགས། །བདག་སོགས་དེང་ནས་ཚེ་རབས་ཀུན་ཏུ་ཡང༌། །ནམ་ཡང་འབྲལ་མེད་ཐུགས་རྗེས་བཟུང་ནས་སུ། །དམ་ཆོས་སྦྲང་རྩིའི་དགའ་སྟོན་འགྱེད་པ་ཡིས། །ཕྱི་མ་བྱང་ཆུབ་ལམ་དུ་དྲངས་བར་ཤོག ། ཅེས་ངག་དབང་དངོས་གྲུབ་དཔལ་གྱིས་དགེ་བའི་བཤེས་གཉེན་ཆེན་པོ་བདེ་ལེགས་རབ་རྒྱས་སྐུ་མྱ་ངན་ལས་འདས་པའི་ཚུལ་གནང་བ་ལ་དད་གུས་སྐྱོ་གདུང་དྲག་པོས་གསོལ་བ་བཏབ་པའོ། །ཚོགས་གཉིས་བྱེ་བའི་ཤིང་རྟས་རབ་དྲངས་ཤིང༌། །དོན་གཉིས་འབྲས་བུའི་ཕ་མཐར་རབ་གཤེགས་པ། །སྐུ་གཉིས་སངས་རྒྱས་བདེན་པའི་མཐུ་ཆེན་གྱིས། །ཡང་སྤྲུལ་གསར་བའི་ཉི་མ་འཆར་དུ་གསོལ། །ཐུབ་པའི་བསྟན་པ་བཤད་སྒྲུབ་ཉི་ཟླ་ཟུང༌། །བསམ་མེད་གཉིས་མེད་རྟོག་མེད་ལ་སོགས་པ། །འགོག་ལམ་རྣམ་བྱང་དམ་ཆོས་དཀོན་མཆོག་གི། །བདེན་པའི་འོད་ཀྱིས་ཡང་སྤྲུལ་མྱུར་མཇལ་ཤོག ། རིག་དང་གྲོལ་བའི་ཡོན་ཏན་ཡོངས་རྒྱས་ཤིང༌། །སྤྱ ན་དང་མངོན་ཤེས་བརྩེ་དང་ནུས་པའི་གཏེར། །དགེ་འདུན་དམ་པ་འཕགས་པའི་བདེན་ནུས་ཀྱིས། །བླ་མ་དམ་པའི་ཡང་སྤྲུལ་འཆར་དུ་གསོལ། །ལུས་ཅན་ཀུན་ཀྱི་བདེ་གཤེགས་སྙིང་པོའི་དབྱིངས། །ལྷན་ཅིག་སྐྱེས་པའི་བདེ་སྟོང་འཁོར་ལོ་ཆེ། །རང་བཞིན་འོད་གསལ་དུས་ཀྱི་འཁོར་ལོ་མཆོག ། དབྱེར་མེད་རྡོ་རྗེ་འཆང་ལ་གསོལ་བ་འདེབས། །མཚོ་དབུས་གྲུ་ཞིག་ལྟ་བུའི་སློབ་ཚོགས་ཀྱི། །མགོན་མེད་ཉམ་ཐག་སྐལ་དམན་བདག་ཅག་གིས། །བུ་ངག་སྐྱོ་བའི་ཕ་ལ་འབོད་པ་ན། །ཡབ་རྗེ་བླ་མའི་སྙན་གསན་མཛད་དུ་གསོལ། །བདེ་བ་ཆེན་པོ་ལྷན་ཅིག་སྐྱེས་པའི་སྐུ། །སྟོང་གཟུགས་འཁོར་ལོ་སྒྱུ་འཕྲུལ་རོལ་བའི་གར། །རྡོ་རྗེ་ཐེག་པའི་བདེན་མཐུ་མི་བསླུ་བས། །ལུས་ཅན་དཔལ་དུ་ཡང་སྤྲུལ་མྱུར་འབྱོན་ཤོག ། ཐུབ་བསྟན་མཁའ་ཡི་ཆོས་ཀྱི་འོད་ཟེར་མཆོག ། གདུལ་བྱའི་བསོད་ནམས་ནུབ་རིར་ཡིབ་ནའང༌། །ལས་སྐལ་མཐུན་པའི་ཤར་ཀྱི་ས་འཛིན་སྤོར། །ར་རི་མེད་པར་སླར་ཡང་འབྱོན་དུ་གསོལ། །སྐྱོ་ངག་འབོད་པའི་མྱ་ངན་སྨག་རུམ་ནས། །སྐྱོ་གདུང་སེམས་ཀྱིས་མཆི་མའི་ཆབ་རྒྱུན་འདི། །གང་ལ་རེ་བའི་ཕ་ཡིས་མ་དགོངས་ན། །གདུང་བའི་མྱོང་བ་ནམ་ཡང་བསལ་དུ་མེད། །དེ་ལྟར་བཅོས་མིན་སྙིང་གི་ཁུང་བུ་ནས། །གསོལ་བཏབ་སྨོན་པའི་མྱ་ངན་འབོད་པ་འདི། །ཕ་གཅིག་བླ་མས་ཐུགས་རྗེའི་ཀློང་ཡངས་ལ། །རྣམ་པར་འདྲེས་ཏེ་འབྲས་བུ་སྨིན་པར་ཤོག ། གསང་མཐའ་སྤྲུལ་བའི་སྐུ་ཐུབ་བསྟན་ཆོས་ཀྱི་འོད་ཟེར་རེ་ཞིག་མྱ་ངན་ལས་འདས་པའི་ཚུལ་མཛད་སྐབས་མཁན་འཇམ་དབྱངས་བསྟན་པ་དང་གུ་རུ་སོགས་ཆོས་ཚན་གསུམ་པས་སྤྲུལ་སྐུ་མྱུར་བྱོན་ཀྱི་སྨོན་ཚིག་ཞིག་དགོས་ཞེས་བསྐུལ་ངོར་ངག་དབང་དངོས་གྲུབ་དཔལ་གྱིས་དད་གུས་ཀྱིས་རྩེ་གཅིག་ཏུ་གསོལ་བ་འདེབས་པའོ། །སརྦ་མངྒ་ལཾ། ཐོས་པའི་སྒྲོན་མེས་མ་རིག་སྨག་རུམ་བསལ། །ཟབ་མོའི་གནས་ལ་ཆོས་ཀྱི་འོད་སྟོང་འབར། །གཞུང་ལུགས་གདམས་པར་ཤར་བའི་སྒྲུབ་པ་ཡིས། །དོན་གཉིས་མཐར་ཕྱིན་ཆོས་སྐུའི་སར་གནས་ཤོག ། སྐྱེ་བ་འདི་ནས་ཚེ་རབས་ཀུན་ཏུ་ཡང༌། །བསྟན་དང་འགྲོ་བའི་ཁུར་ཆེན་འཁུར་བ་ཡི། །གཞན་དོན་སྒྲུབ་ལ་སྤྲོ་བརྒྱས་བརྩོན་པ་ཡི། །འབད་པ་ནམ་ཡང་ཉམས་པ་མེད་པར་སྨོན། །མཆོག་གསུམ་ལས་འབྲས་བསླུ་མེད་བདེན་མཐུ་ཡིས། །དད་དང་དམ་ཚིག་འགྱུར་བ་མེད་པ་ཡི། །སྐལ་བཟང་འདུལ་བྱའི་ཚོགས་ཀྱི་རྒྱུད་སྨིན་ནས། །བྱང་ཆུབ་བར་དུ་མི་འབྲལ་མཉམ་གནས་ཤོག ། ཅེས་པ་འདི་ཡང་ངག་དབང་དངོས་གྲུབ་དཔལ་ནས། སྣང་སྲིད་དབང་སྡུད་པདྨ་འབྱུང་གནས་སྐུ། །ནག་ཕྱོགས་གཤེད་དུ་དགྲ་བླའི་སྐུར་བཞེངས་པ། །སེང་ཆེན་སྐྱེས་བུ་གེ་སར་འཁོར་བཅས་ཀྱིས། །བསམ་དོན་ཀུན་གྲུབ་མི་མཐུན་གཡུལ་ངོ་ཟློགས། །འདོད་སྡང་གཏི་མུག་གཡོ་སྒྱུའི་ཆོ་འཕྲུལ་གྱིས། །འཇིག་རྟེན་བསམ་པ་ཡོངས་སུ་རྫོབ་བྱེད་ཚེ། །སྐྱེས་མཆོག་དགྲ་བླ་དཔའ་བརྟུལ་འཁོར་བཅས་ཀྱིས། །འགྲོ་དོན་ཐུགས་རྗེ་བླ་ལྷག་དཔུང་བསྐྱེད་མཛོད། །སྔགས་འཆང་རྡོ་རྗེ་བཟང་བོས་བསྐུལ་ངོར་དངོས་གྲུབ་དཔལ་གྱིས་༢༠༡༨་༧་༢༩་ཉིན་བྲིས་པའོ། །གསོལ་འདེབས། ཐུབ་བསྟན་ཆོས་ཚུལ་རྒྱུ་སྐར་བྱེ་བའི་དབུས། །ཉི་མའི་གཟི་ལྟར་ཀུན་ནས་མངོན་མཐོ་བའི། །དུས་ཀྱི་འཁོར་ལོའི་རྣལ་འབྱོར་མཆོག་གྱུར་བ། །བསྟན་འགྲོའི་གསོས་གྱུར་བླ་མར་གསོལ་བ་འདེབས། །འདི་ཡང་བླ་མ་བསམ་གཏན་རྒྱ་མཚོ་དང་སྤྲུལ་དཀོན་མཆོག་བཟང་གཉིས་ཀྱིས་བསྐུལ་ངོར་ངག་དབང་དངོས་གྲུབ་དཔལ་གྱིས་བྲས་པའོ། ། རྗེས་དྲན་སྐོར།རྗེས་དྲན་སྐོར། རྒྱལ་བ་བློ་བཟང་གྲགས་པ་རྗེས་སུ་དྲན་པ། ཟབ་མོའི་ལྟ་བ་ཟླ་བ་ཇི་བཞིན་གསལ་བར་འགྲོ་ལ་བཤད། །སྒོམ་པ་བྱིང་རྒོད་བྲལ་བའི་ཞི་ལྷག་ཟུང་དུ་འཇུག་པའི་ལམ། །མདོ་སྔགས་སྤྱོད་པ་འགལ་མེད་གྲོགས་སུ་ལག་ལེན་ཇི་བཞིན་མཛད། །ལྟ་སྒོམ་སྤྱོད་གསུམ་རྣམ་དག་མཉམ་མེད་ཙོང་ཁ་བ་ལ་གུས། །བསྟན་པའི་གནད་ཀུན་མཁྱེན་པའི་ཤེས་རབ་ཉིན་བྱེད་དབང༌། །འགྲོ་ལ་བརྩེ་བས་ལུང་རིགས་འབུམ་གྱིས་ཞིབ་པར་འཆད། །སྐལ་ལྡན་ཡིད་ཀྱི་མུན་པ་སེལ་ནུས་གྲུབ་རྟགས་བསྟན། །བདག་ནི་ཁྱེད་ཀྱི་མཛད་ཀུན་སྙིང་ནས་དད་ཅིང་གུས། །དགའ་ལྡན་ལྔ་མཆོད་ཀྱི་དུས་བཟང་ལ་རིས་མེད་པ་ངག་དབང་དངོས་གྲུབ་དཔལ་ནས་རྗེ་བཙུན་རྒྱལ་བ་བློ་བཟང་གྲགས་པའི་ལྟ་སྒོམ་སྤྱོད་གསུམ་དང་མཁྱེན་བརྩེ་ནུས་གསུམ་ཁྱད་པར་དུ་འཕགས་པ་ལ་རྗེས་སུ་དྲན་པའི་གུས་ཕྱག་བཅས་ཏེ་ཕུལ། གངས་ལྗོངས་ལ་ལྷག་པར་བཀའ་དྲིན་ཆེ་བ་སློབ་དཔོན་རིན་པོ་ཆེ་པདྨ་འབྱུང་གནས་མཆོག་རྗེས་སུ་དྲན་པ་ཏམྦུ་རའི་སྒྲ་དབྱངས། རིག་སྟོང་ཆོས་སྐུའི་ངང་ལས་ཉེར་འཕོས་པ། །མཚན་དཔེའི་ཁོ་ལག་རྫོགས་པ་ཟླ་བྲལ་བ། །ལྷ་སྲིན་འདུལ་ལ་ཐོགས་མེད་རྫུ་འཕྲུལ་མངའ། །པདྨ་སཾ་བྷ་བ་ལ་མགོས་ཕྱག་འཚལ། །དེ་ཡང་གངས་རི་ར་བས་མུ་ཁྱུད་ཀྱིས་ཡོངས་སུ་བསྐོར་བའི་བསིལ་ལྗོངས་འཛིན་མའི་ལྟེ་བར་གཞིས་ཆགས་ཤིང་གནས་འཆའ་བའི་ཁ་བ་བོད་པའི་ལྗོངས་ཞེས་ཡོངས་སུ་གྲགས་པའི་གནས་མཆོག་འདིར་གནའ་ནས་ད་བར་དུ་རིག་གནས་ཀྱི་ཉིང་བཅུད་སྦྲུམ་པའི་མཁས་དང་གྲུབ་པ་བརྙེས་པའི་སྐྱེས་བུ་བགྲང་ལས་འདས་པ་ཞིག་བྱོན་པ་ཡིན། ལྷག་ཏུ་སྔ་འགྱུར་བསྟན་པའི་ཀ་ཆེན་འདེགས་མཁན་རྒྱལ་བའི་ལུང་གིས་མངོན་པར་ཟིན་པ་མཚན་བརྗོད་པར་དཀའ་བ་དོན་གྱི་སླད་དུ་མཚན་ནས་སྨོས་ན་༧ཨོ་རྒྱན་གྱི་སློབ་དཔོན་ཆེན་པོ་པདྨ་འབྱུང་གནས་ཞེས་བྱ་བ་སྲིད་པ་གསུམ་ན་མངོན་པར་འཕགས་པའི་སྐྱེས་བུ་ཆེན་པོ་གང་ནི་ཨོ་རྒྱན་གྱི་ཡུལ་དུ་མེ་ཏོག་ཕྲེང་བ་འཛིན་ཞེས་བྱ་བའི་སྲས་སུ་མཚན་དཔེའི་མེ་ཏོག་གསར་དུ་བཞད། ཆེར་ལོངས་པ་ན་རིག་པའི་གནས་ཕྲ་མོ་ཐམས་ཅད་ལ་ཚེགས་མེད་པར་བློ་གྲོས་བྱང་བར་གྱུར་ཅིང༌། འདུལ་བ་འཛིན་པ་ཞིག་ལས་སྐྱབས་འགྲོ་དང་བསླབ་པའི་གཞི་ལྔ་བླངས་མངོན་པ་དང་མདོ་སྡེའི་གཞུང་ལུགས་མང་དུ་གསན། སློབ་དཔོན་སྔགས་མཁན་ཤནྟི་རཱུ་པ་ཞེས་པ་ལས་བྱ་སྤྱོད་རྣལ་འབྱོར་རྒྱུད་གསུམ་གྱི་དབང་ཞུས་པ་དང༌། སྤྱན་རས་གཟིགས་དང་གཉིས་སུ་མེད་པ་སུ་ཁ་དེ་བ་ཞེས་པའི་གྲུབ་བརྙེས་སོགས་ཀྱི་མདུན་ནས་གསང་སྔགས་ནང་གི་གདམས་པའང་ཐོབ་པར་བྱས་སོ། །དེ་ནས་ཉམས་ལེན་ལ་རྩེ་གཅིག་ཏུ་གཞོལ་བའི་ཚེ་བདུད་ཀྱིས་བར་ཆད་ཀྱི་ཆོ་འཕྲུལ་སྣ་ཚོགས་བྱས་ཀྱང་འོད་དཔག་མེད་པས་མནལ་ལམ་དུ་ལུང་བསྟན་པ་དང་ཁྲོ་བོའི་རྒྱལ་བོ་རྟ་མགྲིན་ཡང་གཟིགས། མཁའ་འགྲོ་མ་དང་འབྱུང་བོ་མང་བོ་བྲན་དུ་འཁོལ་བ་སོགས་བར་ཆད་མཐའ་དག་དབྱིངས་སུ་ཡལ་ཏེ་ཐུན་མོང་གི་དངོས་གྲུབ་སྣ་ཚོགས་བསྒྲུབས་སོ། །དེ་རྗེས་ཡང་མནལ་ལམ་དུ་འོད་དཔག་མེད་པས་འོན་ཀྱང་འདི་ཙམ་གྱིས་ཕྱག་རྒྱ་ཆེན་པོའི་དངོས་གྲུབ་མི་ཐོབ་པས་ཁྱོད་ཀྱི་ལས་འབྲེལ་ཡོད་པའི་སློབ་དཔོན་སངས་རྒྱས་དཔལ་ཡེ་ཤེས་ཡིན་པས་དེས་བསྟན་པ་བཞིན་དུ་སྒོམས་ཤིག་ཞེས་ལུང་བསྟན་བྱུང༌། མ་ག་དྷར་བྱིན་ནས་གྲུབ་བརྙེས་སློབ་དཔོན་སངས་རྒྱས་ཡེ་ཤེས་ཀྱིས་མཁན་པོ་མཛད་ནས་དགེ་འདུན་ཕལ་ཆེན་སྡེ་པའི་སྡེ་ལ་རབ་ཏུ་བྱུང་ཞིང་བསྙེན་པར་རྫོགས་པར་མཛད་དོ། །དེ་ནས་འདུལ་བ་འཛིན་པ་ཞིག་ལ་འདུལ་བ་འབུམ་སྡེ་ལན་གཅིག་གསན་པས་འདུལ་བའི་དོན་རྣམས་ཐུགས་སུ་ཆུད་པར་མཛད། དུས་དེར་སངས་རྒྱས་ཡེ་ཤེས་ཞབས་ལ་ཤེར་ཕྱིན་གསན་པས་ལྟ་བ་ནམ་མཁའ་དང་མཉམ་པར་གྱུར། ཡང་སངས་རྒྱས་ཡེ་ཤེས་ལ་འདུས་པ་དང༌། སྒྱུ་འཕྲུལ་དྲྭ་བ་དང༌། ཟླ་གསང་ཐིག་ལེ་སོགས་རྒྱུད་དང་མན་ངག་མཐའ་དག་གསན་ནོ། །སངས་རྒྱས་ཡེ་ཤེས་ཀྱིས་ཞལ་བཀོད་མཛད་པ་ལྟར་བསྐྱེད་རྫོགས་ཟུང་འཇུག་གི་སྒྲུབ་པ་ཆེན་པོ་ཉམས་སུ་བླངས་པས་ཕྱོགས་བཅུའི་སངས་རྒྱས་མང་བོ་ཞལ་གཟིགས་ཤིང་གསུང་འདྲི་བར་བྱུང༌། མི་རིང་བ་ན་ཕྱག་རྒྱ་ཆེན་པོ་མཆོག་གི་དངོས་གྲུབ་ཀྱི་གོ་འཕང་ཐོབ། རྡོ་རྗེའི་སྐུ་མངོན་དུ་བྱས་སོ། །དེ་ལྟར་རང་དོན་ཆོས་སྐུའི་རྟོགས་པ་མངོན་དུ་བྱས་ཏེ་གཞན་དོན་འཕྲིན་ལས་མཛད་ཚུལ་ཡང༌། བཅུད་ལེན་སྨན་སོགས་ཀྱིས་གཞན་གྱི་ཚེ་བསྲིང་བ་དང༌། ལོངས་སྤྱོད་རྒྱས་པར་མཛད་པ་དང༌། ཆུ་མེད་པ་རྣམས་སུ་ཆུ་དབྱུང་བ་དང༌། ཆུ་ཆེ་བ་ས་འོག་ཏུ་འཇུག་པ་སོགས་ཐུན་མོང་སྣང་ངོར་ལ་ཡང་གནས་སྐབས་ཀྱི་ཕན་པ་སྣ་ཚོགས་མཛད་དོ། །མཁན་པོ་བོ་དྷི་ས་ཏྭའམ་ཞི་བ་འཚོའི་ཐུགས་བཀོད་ལྟར་སློབ་དཔོན་རིན་པོ་ཆེ་བོད་ཡུལ་དུ་སྤྱན་དྲངས་ནས་བོད་ཡུལ་འདིར་འདྲེ་གདུག་པ་ཅན་གྱི་གང་བ་ལ་མཐུ་སྟོབས་རྫུ་འཕྲུལ་བསམ་མི་ཁྱབ་ཀྱིས་འདྲེ་སྲིན་ཀུན་བཏུལ་ནས་བོད་ཡུལ་ལ་ཐུགས་རྗེས་འོད་སྟོང་གི་ཉི་མ་ཤར་བར་མཛད་དོ། །དེ་ཡང་སློབ་དཔོན་ཆེན་པོ་འདི་ནི་གཙོ་བོར་མི་མ་ཡིན་འདུལ་བའི་ཕྲིན་ལས་བསམ་མི་ཁྱབ་པ་ཅན་ཡིན་པས་ལམ་བར་དུ་ཡར་ལྷ་ཤམ་པོ་དང་ཐང་ལྷ། བསྟན་མ་བཅུ་གཉིས་སོགས་ལྷ་སྲིན་དཔག་ཏུ་མེད་པ་བཏུལ་ཏེ་བོད་ཡུལ་དུ་ཕེབས། རྒྱལ་བོའི་ལྷ་ཁང་གི་ས་འདུལ་མཛད་པ་དང༌། རྒྱལ་བོ་དང་འབངས་སྐལ་ལྡན་མང་བོ་རྣམས་ལ་ཀྲི་ཡ་དང༌། གསང་སྔགས་ནང་གི་དབང་བསྐུར་བར་མཛད། རྗེ་འབངས་སྐལ་ལྡན་མང་བོ་ལ་མན་ངག་ལྟ་བའི་ཕྲེང་བ་གསུངས། རྡོ་རྗེ་རྣམ་འཇོམས་དང༌། ཕུར་བུ་འབུམ་སྡེ་དང༌། གཞན་ཡང་སྒྲུབ་ཐབས་མན་ངག་ཅི་རིགས་པ་བསྟན་པ་སོགས་ཆོས་སྤྱོད་ཀྱི་བྱ་བ་རྒྱ་ཆེར་བྱས་སོ། །དེ་ནས་ལྷོ་ནུབ་སྲིན་པོའི་ཡུལ་དུ་བྱོན་པར་ཐུགས་དགོངས་བཏང་ནས་རྗེས་འཇུག་གི་སློབ་མ་རྣམས་ལ་ལྟ་སྤྱོད་ཀྱི་ཉམས་ལེན་བྱེད་པར་གདམས་ངག་གནངས་ཏེ་སྨོན་ལམ་རྒྱ་ཆེར་བཏབ། གློ་བུར་དུ་ཡར་ལ་གཤེགས་ཏེ་ཡར་ལམ་རུ་ལག་བརྒྱུད་ནས་ཕེབས། ཆིབས་ཁྲིད་པ། ལོ་སྟེ་དགུ་སྣ་གོང་དང༌། ཞང་ཉང་བཟང་ཞེས་བྱ་བ་བློན་པོ་དད་པ་ཅན་གྱིས་མང་ཡུལ་བར་དུ་སྐྱེལ། དེའི་ཚེ་ལྷོ་ནུབ་མཚམས་སུ་སྲིན་པོ་འདུལ་དུ་འགྲོ་གསུངས་ནས་ཆིབས་ཀྱི་ཁ་ནས་ནམ་མཁའ་ལ་འཕུར་ཏེ་སྤྲིན་གསེབ་ནས། ཡར་ཆོས་གོས་སྤུར་རེ་གསེག་ཤིང་ཁྲོལ་ལེ་བཞུད་པར་ཐམས་ཅད་ཀྱིས་མངོན་སུམ་དུ་མཐོང་བ་སོགས་ངོ་མཚར་མཛད་པ་རྒྱ་མཚོ་ཆེན་པོ་ལས་རེ་ཞིག་དད་པའི་ས་བོན་དང་རྗེས་དྲན་ཙམ་གྱི་ཆེད་དུ་ཉུང་བསྡུས་སུ་བརྗོད་པའོ། །དེ་ལྟར་བརྗོད་པ་ནི་ཐམས་ཅད་མཁྱེན་པ་ཏཱ་ར་ན་ཐས་མཛད་པའི་སློབ་དཔོན་པདྨའི་རྣམ་ཐར་ཡིད་ཆེས་གསུམ་ལྡན་ལྟར་རོ། །དེ་ནས་སྤྲུལ་བ་སྣ་ཚོགས་ཀྱི་སྒོ་ནས་བོད་ཁམས་འདིར་རྒྱལ་བསྟན་སྤེལ་བ་དང་འགྲོ་རྣམས་འཁོར་བའི་འདམ་ལས་དྲང་བར་མཛད་པ་ཡིན་ཏེ། བོད་ཡུལ་དུ་ཕེབས་པའི་ཇོ་བོ་རྗེ་དཔལ་ཨ་ཏི་ཤ་དང༌། ཀརྨ་པ་དང༌། ས་སྐྱ་པཎ་ཆེན་དང༌། ཇོ་ནང་ཀུན་མཁྱེན་དོལ་པོ་པ་དང༌། རྗེ་བློ་བཟང་གྲགས་པ་སོགས་ཀྱི་ངུར་སྨྲིག་གར་གྱི་རྣམ་པར་རོལ་བ་ཡིན་པས་སོ། །དེ་ཡང་བཀའ་བསྡུས་ལས། ཇི་སྐད་དུ། དེ་དུས་ང་ཡི་སྤྲུལ་བ་ས་སྐྱ་ཞེས༔ སྟོད་ཀྱི་ཕྱོགས་སུ་ཡབ་མིང་འཇམ་དཔལ་དང༔ ཡུམ་མིང་སྒྲོལ་མ་ཞེས་བྱའི་སྲས་སུ་འཁྲུངས༔ འགྲོ་མགོན་འཕགས་པ་ཀུན་དགའ་རྒྱལ་མཚན་ཞེས༔ ང་ཡི་ལྷ་ཁང་རྣམས་ལ་ཞིག་གསོས་བྱེད༔ གསང་སྔགས་བསྟན་པ་དར་ཞིང་རྒྱས་པར་བྱེད༔ ཅེས་དང༌། ཀུན་མཁྱེན་ཉ་དབོན་ཀུན་དགའ་དཔལ་གྱི་ཞལ་སྔ་ནས། སྤོས་ངད་ལྡན་ན་ཆོས་འཕགས་སེམས་དཔའ་ཆེ། །ལྷ་ལྡན་གྲོང་དུ་སྲོང་བཙན་སྒམ་པོ་སྟེ། །རྔ་ཡབ་གླིང་ན་པདྨ་འབྱུང་གནས་དཔལ། །ཤེས་རབ་རྒྱལ་མཚན་ཞབས་ལ་ཕྱག་འཚལ་ལོ། །ཞེས་དང༌། བཀའ་བསྡུས་ལས། ཐུབ་པའི་ལུང་བསྟན་མདོ་ཁམས་སྒང་ཞིག་ཏུ༔ ཨ་ཏི་ཤཱ་ཡི་སྤྲུལ་བ་བློ་བཟང་གྲགས༔ སྐྱེས་བུ་དེ་བྱོན་བོད་ལ་བདེ་སྐྱིད་འཆར༔ ཞེས་སོགས་གསུངས་སོ། །བོད་འདིར་བཀའ་དྲིན་ཆེས་ཆེར་ཆེ་བ་སློབ་དཔོན་ཆེན་པོ་པདྨ་འབྱུང་གནས་མཆོག་གི་རྗེས་སུ་དྲན་པ་ཏམྦུ་རའི་སྒྲ་དབྱངས་ཞེས་བྱ་བ་འདི་ནི་མཆོག་སྤྲུལ་ཚེ་རིང་རྡོ་རྗེའི་ཐུགས་བཀོད་ལྟར་ཧི་མ་ལའི་རིག་མཛོད་ཀྱིས་སློབ་དཔོན་པད་མ་འབྱུང་གནས་ཀྱི་རྣམ་ཐར་སྟོང་ཐང་འགྲུབ་པ་ལ་ཉེ་བའི་ཆར་སློབ་དཔོན་རིན་པོ་ཆེའི་རྗེས་དྲན་ཞིག་དགོས་ཞེས་བསྐུལ་བ་ལྟར་ངག་དབང་དངོས་གྲུབ་དཔལ་གྱིས་དད་གུས་ཀྱི་སྒོ་ནས་བྲིས་པའོ། །སརྦ་མངྒ་ལཾ། དཔལ་ལྡན་སྐུ་གསུམ་གསང་བའི་རྒྱ་མཚོ་ཆེ། །སྐལ་ལྡན་འཇུག་ངོགས་ཀླུ་དབང་རོལ་བའི་གནས། །མཐའ་ཡས་ཡོན་ཏན་རིན་ཆེན་གཏེར་དུ་གྲུབ། །གང་གི་མཛད་འཕྲིན་འོད་སྣང་ཆེར་འབར་བ། །ཐུགས་རྗེས་རྣམ་སྤྲུལ་བྱེ་བ་ཕྲག་བརྒྱ་ཡི། །ཞིང་ཁམས་རབ་འབྱམས་ཆུ་ཀླུང་ཟླ་བརྙན་ལྟར། །གང་ལ་གང་འདུལ་སྤྲུལ་བའི་འོད་སྟོང་གསལ། །བསྟན་འགྲོའི་དོན་ཆེན་མཛད་ལ་གུས་ཕྱག་བགྱི། །རྨད་བྱུང་བརྩེ་བས་དུས་ལས་ཡོལ་མེད་པར། །སླར་ཡང་བསམ་འགྲུབ་གླིང་དུ་སྐྱེ་བའི་སྤྲུལ། །མཛད་བཟང་འཆད་རྩོད་རྩོམ་ལ་དབང་འབྱོར་བ། །གཞོན་ནུ་ཉི་མ་གསར་བ་འཆར་བར་སྨོན། །ཞེས་མཁན་ཆེན་དམ་པ་དཔལ་ལྡན་རྒྱ་མཚོའི་རྗེས་དྲན་དུ་གང་གི་ཆོས་གྲོགས་དངོས་གྲུབ་དཔལ་ནས་གུས་ཕུལ། རྫོགས་པ་ཆེན་པོའི་རྣལ་འབྱོར་བ་མུན་སེལ་མཆོག་རྗེས་སུ་དྲན་པ།རྫོགས་པ་ཆེན་པོའི་རྣལ་འབྱོར་བ་མུན་སེལ་མཆོག་རྗེས་སུ་དྲན་པ། གང་ཐུགས་མཁྱེན་གཉིས་ཆུ་ཤེལ་ཆ་རྫོགས་པ། །རི་བོང་འཛིན་པས་འོད་དཀར་སྤྲོ་བ་ན། །ཡུན་རིང་གབ་པའི་སྙིང་གི་མུན་པ་ཡང༌། །ལྷག་མེད་སེལ་བའི་བཤེས་གཉེན་མཆོག་དེ་རྒྱལ། །གནས་ངན་ཀུན་ཟད་ཟུང་འཇུག་རོལ་བའི་དཀྱིལ་འཁོར་འཁོར་ལོའི་མགོན་པོ་ཁྱེད། །ཐུགས་རྗེས་རབ་བསྐུལ་སྒྱུ་འཕྲུལ་དྲྭ་བས་གང་འདུལ་ཞིང་ལ་སྣ་ཚོགས་གར། །མཐའ་ཡས་ལེགས་སྟོན་རྒྱལ་བའི་གདུང་འཚོབ་བརྟན་ཞིང་མཁས་པའི་ཚངས་སྤྱོད་ཁྱེད། །ཆུ་བུར་མིག་གི་ཕ་རོལ་གཤེགས་ཀྱང་དད་པའི་སེམས་སུ་ལྷམ་མེར་བཞུགས། །རྒྱ་མཚོའི་འཇིངས་ཀྱིས་མི་བསྒྲུན་པའི། །ཁྱེད་ཐུགས་འོ་མའི་ཆུ་གཏེར་ལ། །བཅའ་སྡོད་རེ་བའི་ལུས་ཅན་དག། མྱ་ངན་ཐང་ནས་མཆི་མ་དཀུ། །དད་གདུང་འདུན་པའི་སྐུལ་བྱེད་ཀྱིས་བསྒུལ་ཏེ། །འགྲོ་བའི་མུན་སེལ་བཤེས་གཉེན་ཞཻས་འབོད་པའི། །གྲེ་བ་འགགས་པའི་འོ་དོད་ང་རོ་དེ། །ཁྱེད་སློབ་གདུང་བའི་གཏམ་དུ་མ་དགོངས་སམ། །གངས་ཅན་ལྗོངས་སུ་སྡིག་སྤྱོད་སྤྲིན་གྱིས་རབ་བསྒྲིབས་ཏེ། །ཡིད་ཅན་སེམས་སུ་སྒྱུ་ཐབས་ཐན་གྱིས་འགེངས་བ་ན། །ཁྱེད་ཞབས་འཁོར་ལོ་སླར་ཡང་ཕེབས་པའི་སྨོན་ལམ་ནི། །མྱ་ངན་ཅན་དང་དཔྱོད་ཤེས་དག་གི་འདུན་པ་ལགས། །མང་དུ་ཐོས་པའི་མཁས་པ་ཚངས་པར་སྤྱོད་པའི་བཙུན་པ་མངོན་པར་རྟོགས་པའི་བཟང་བའི་འབྲས་བུ་ཐམས་ཅད་གཅིག་ཏུ་བསྡུས་པ་༧མཁན་མུན་སེལ་རིན་པོ་ཆེའི་རྗེས་དྲན་དུ་ཡིད་ཆེས་སྐྱོ་གདུང་དང་བཅས་ཏེ་དངོས་གྲུབ་དཔལ་གྱིས་གུས་པས་ཕུལ་བའོ། ། མཁན་ཆེན་རྡོ་རྗེ་འཆང་ངག་དབང་བློ་བཟང་འཕྲིན་ལས་རྗེས་སུ་དྲན་པ།།མཁན་ཆེན་རྡོ་རྗེ་འཆང་ངག་དབང་བློ་བཟང་འཕྲིན་ལས་རྗེས་སུ་དྲན་པ། ཡོན་ཏན་ཀུན་གྱི་གཞིར་གྱུར་ཞིང༌། །བྱིན་རླབས་དངོས་གྲུབ་རྩ་བ་སྟེ། །བླ་མ་མཆོག་དེར་གུས་བཏུད་ནས། །གང་ཞིག་རྗེས་སུ་དྲན་པར་བྱ། །བསྟན་པའི་གཞི་མ་སོ་སོར་ཐར་བ་ཡི། །གནང་བཀག་སྒྲུབ་པའི་བཅས་མཚམས་མ་ལུས་ལ། །ཞི་དུལ་བག་ཡོད་ཁྲིམས་ཀྱིས་ལེགས་བསྡམས་པ། །འདུལ་བ་འབུམ་སྡེའི་བདག་པོ་གནས་བརྟན་ཆེ། །མི་རྟག་ཕྲ་རགས་འཁོར་བའི་ཉེས་དམིགས་དང༌། །ལས་འབྲས་བསླུ་མེད་དགེ་སྡིག་བླང་དོར་རྣམས། །རྟག་ཏུ་འདོམས་ཤིང་ཚེ་འདིའི་འདུན་མ་ལ། །ཐུགས་ཡིད་གཏིང་ནས་ཞེན་པའི་འཁྲི་བ་བྲལ། །བཞེངས་བཞུགས་གཟིམ་ཕེབས་སྤྱོད་ལམ་རྣམ་བཞི་ལ། །དྲན་ཤེས་བརྟན་པོ་ལན་གཅིག་ཙམ་མིན་པར། །ཤུགས་འབྱུང་ཟིན་པའི་རྣམ་པ་དེ་ཉིད་ཀྱིས། །གཟུར་གནས་དཔྱོད་ལྡན་མོས་པ་འཕེལ་བར་འགྱུར། །བྱེ་མདོ་རྣམ་རིག་ཐལ་རང་ལ་སོགས་ཀྱི། །དགག་བྱའི་ཚུལ་ལ་གོ་བབ་ཙམ་མིན་པར། །ཡིན་མིན་ངེས་ཐག་སོམ་ཉི་བྲལ་བ་ཡི། །སྟོང་ཉིད་ཚུལ་ལ་མཁས་པའི་མཁས་པ་མཆོག ། གང་ཞིག་སྟོང་དང་རྟེན་འབྱུང་ཟབ་མོ་ཡི། །ཟུང་འཇུག་སྒྱུ་མར་ཤེས་པའི་རྣལ་འབྱོར་བ། །འདི་ཡིན་ཞེས་བྱར་སུ་ལ་སྨྲ་དགོས་ན། །དེ་ནི་ཐེ་ཚོམ་བྲལ་བར་ཁྱེད་ཉིད་འོས། །ཐ་མལ་སྣང་ཞེན་དྲི་མ་སྦྱོང་བའི་ལམ། །ལྷ་སྔགས་དཀྱིལ་འཁོར་ཏིང་འཛིན་གཡོ་མེད་ཀྱི། །བསྐྱེད་པའི་རིམ་པར་གོམས་མྱོང་རྩེར་སོན་ཞིང༌། །གྲུབ་པའི་མཚན་མ་ཐོགས་མེད་མངའ་བ་ཅན། །མ་བཅོས་རང་བབ་སེམས་ཀྱི་རང་མདངས་ལས། །སྣང་ཆ་འོད་གསལ་གཟུགས་སྐུ་འབྱམས་ཀླས་ཤིང༌། །བདེ་ཆེན་ཉམས་བརྒྱའི་སྣང་བ་རབ་འབར་བ། །རྡོ་རྗེ་འཆང་ཆེན་མི་ཡི་ཤ་ཚུགས་ཅན། །ཡི་དམ་ལྷ་ཡི་ཞལ་མཇལ་བྱིན་རླབས་གནང༌། །སྣང་སྲིད་ལྷ་འདྲེས་བྲན་དུ་ཁས་བླངས་བྱས། །ཆོས་སྲུང་རྣམས་ཀྱིས་འཕྲིན་ལས་མངོན་སུམ་སྒྲུབ། །གསང་གསུམ་ཡོན་ཏན་འཛད་པ་མེད་པའི་བདག ། མི་ནག་ཁྱིམ་པར་སྡིག་སྤངས་དགེ་སྒྲུབ་དང༌། །སྣང་མཐའ་ཡས་པའི་ཞིང་ཁམས་སྒྲུབ་པ་ཡི། །འཕྲིན་ལས་སྤེལ་བའི་ཐུགས་རྗེའི་རང་གཟུགས་ཁྱེད། །སྐལ་དམན་རྣམས་ཀྱི་གཉེན་དང་དཔུང་གཅིག་ཉིད། །བསྟན་པའི་མེ་རོ་སླར་ཡང་གསལ་བ་ན། །གཞུང་ཆེན་གླེགས་ཐག་ཁྱེད་ཀྱིས་དཀྲོལ་མིན་ན། །ཉན་བཤད་སློབ་པའི་རྣམ་པ་ཙམ་ཞིག་ཀྱང༌། །ཆེན་པོར་རློམས་པ་ཕལ་གྱིས་བྱས་པ་མེད། །སྐུ་ལ་འདོད་ཆུང་ཞི་བའི་རང་རྟགས་དོད། །གསུང་ལ་སྡེ་སྣོད་གསུམ་གྱི་ཆོས་སྒྲ་གྲགས། །ཐུགས་ལ་ཐུན་མོངས་ཐུན་མིན་ལམ་གྱིས་ཕྱུག ། དམ་པའི་ནང་གི་དམ་པ་ཟླ་བྲལ་བ། །སྡུག་བསྔལ་འགྲོ་འདི་བརྩེ་བའི་རབ་བཟུང་ནས། །ཁྱེད་ཞབས་འགྲོ་དོན་དུས་སུ་སྨིན་པ་ན། །བདག་ཀྱང་ཐུགས་རྗེའི་གྲིབ་བསིལ་ལ་བརྟེན་འདིས། །ཡིད་ལ་འཚེངས་བའི་བསམ་པ་རྟག་ཏུ་འབྱུང༌། །ཆོས་མིན་སྤྱོད་པའི་ས་འདི་རབ་གཙེས་ཤིང༌། །སྐྱབས་སུ་རེ་རྣམས་སྐྱབས་མིན་འདི་མཐོང་ཚེ། །ཁྱེད་ཀྱི་སྒོ་གསུམ་རྣམ་པར་ཐར་བ་ལ། །དྲན་གདུང་དད་པ་འགོག་མེད་ལྷག་ཏུ་མཆེད། །རྡོ་རྗེ་འཆང་དང་བསྟན་འགྲོའི་གཉེན་གཅིག་དང༌། །སངས་རྒྱས་ཀུན་དངོས་རིགས་ཀྱི་བདག་པོ་སོགས། །མཚན་གྱི་ཐོག་ཏུ་དད་པའི་རབ་སྦྱར་ཏེ། །བློ་བཟང་འཕྲིན་ལས་ཞེས་སུ་འབོད་ཀྱིན་ཡོད། །ཡིད་ཀྱི་མཁའ་ལ་ཁྱེད་སྐུ་ཤར་ནས་ཡོན་ཏན་དྲན་པའི་ཆུ་འཛིན་ལས། །གསོལ་འདེབས་སྦྲང་ཆར་ཤག་ཤག་འབབ་པས་རྟག་ཏུ་འབུས་པའི་དད་དམ་ལ། །གཡོ་ཟོར་བཅོས་མས་བསླད་པ་མེད་པར་ཉིན་མཚན་ལྟོས་མེད་རྗེས་དྲན་ན། །ཞབས་ཟུང་འཁོར་ལོ་ཚེ་རབས་ཕྲེང་བར་གཙུག་གི་ཏོག་ཏུ་ཐོབ་པར་ཤོག ། ཅེས་དཔལ་ལྡན་བླ་མ་དམ་པ་མཁས་བཙུན་བཟང་པོའི་ཡོན་ཏན་མ་ལུས་པའི་བདག་ཉིད་ལམ་རིམ་པ་གཉིས་ཀྱི་རྣལ་འབྱོར་ལ་རང་བྱན་ཆུད་པ་མཚན་བརྗོད་པར་དཀའ་ཡང་དོན་གྱི་སླད་དུ་མཚན་ནས་སྨོས་ན་བཀའ་དྲིན་འཁོར་མཐའ་དང་བྲལ་བ་རྗེ་མཁན་ཆེན་༧བློ་བཟང་འཕྲིན་ལས་དཔལ་བཟང་པོའི་སྡེ་གང་ཉིད་གཟུགས་སྐུའི་བཀོད་པ་ཆོས་དབྱིངས་སུ་བསྡུས་པའི་རྗེས་དྲན་དུ་ཚིག་དོན་གཉིས་ཅར་ལ་བཅོས་མའི་མ་བསླད་པར་གང་ཤར་ཡོན་ཏན་རྣམས་ཤར་མར་དད་གུས་ཆེན་པོས་ཆོས་སྨྲ་བ་དངོས་གྲུབ་དཔལ་གྱིས་ཕྲལ་དུ་བྲིས་པའོ། །དགེའོ། །ཚོགས་གཉིས་རབ་རྫོགས་དོན་གཉིས་མཐར་ཕྱིན་ཅིང༌། །བདེན་གཉིས་ཀུན་མཁྱེན་འཕྲིན་ལས་རྣམ་གཉིས་ཀྱིས། །མཐའ་གཉིས་རབ་བསལ་ཆོས་སྒོ་གྲངས་མེད་ཀྱིས། །འགྲོ་འདི་རྗེས་འཛིན་ཐུབ་དབང་ཉི་མ་རྒྱལ། །གང་ཞིག་དད་པའི་དྲི་བཞོན་ལྡང་བ་ཡིས། །སེམས་ཀྱི་དྲིལ་ཆུང་སྙན་པར་དཀྲོལ་གྱུར་ན། །ལྷད་མེད་དགེ་དེས་ལུས་ཅན་ཡིད་ངོགས་སུ། །དམ་པའི་རྣམ་ཐར་ལམ་མེར་གསལ་བྱེད་ཤོག ། ཚུལ་ཁྲིམས་བསིལ་སྦྱིན་བཅུ་དྲུག་ཆ་ཡི་དཀྱིལ་འཁོར་ཟླུམ་པོ་ཡོངས་སུ་རྫོགས། །ཞི་ཞིང་དུལ་ལ་འདོད་ཆུང་ཆོག་ཤེས་རྟུལ་ཞུགས་གཙང་མའི་རྒྱན་སྤྲས་པ། །གཞན་ངོར་མ་བཅོས་རང་རྒྱུད་མ་བསླད་ཀུན་ནས་དག་པའི་རྣལ་འབྱོར་མཆོག ། ཆོས་དབྱིངས་ལྷུན་འགྲུབ་ཁྱབ་པར་བརྡལ་བའི་བླ་མ་མཆོག་དེ་སྲིད་འདིའི་མགོན། །མང་དུ་ཐོས་པས་གཞུང་བརྒྱ་འབྱེད་ལ་ཆགས་ཐོགས་དྲི་མ་མི་མངའ་ཞིང༌། །བྱེ་མདོ་དབུ་སེམས་གྲུབ་པའི་མཐའ་ལ་ལུང་རིགས་སེང་གེའི་བསྒྱིང་འགྲོས་ཅན། །ནང་གི་རྣལ་འབྱོར་རིམ་གཉིས་ལམ་ལ་ཚུལ་བཞིན་བརྩོན་པ་གཅིག་པུ་རུ། །རིས་སུ་མ་ཆད་གངས་རིའི་ལྗོངས་སུ་མགྲིན་གཅིག་བསྟོད་པའི་དབྱར་རྔ་ལྡིར། །རྣམ་དག་ཞིང་གི་ཆོས་ཀྱི་སྒྲ་དབྱངས་དེར། །ཐུགས་ཡིད་བརྟན་པ་འཕྲོག་པའི་དོན་ལྡན་ཡང༌། །སྲིད་པའི་ཐང་དུ་སྡུག་བསྔལ་ཉམ་ཐག་འགྲོས། །མྱ་ངན་ང་རོ་སྒྲོག་པ་གསན་ལགས་སམ། །ཀུན་རྨོངས་འཐིབ་པོས་ཕྱོགས་ནས་རབ་གཏམས་པའི། །འགྲོ་ལྔའི་འཇིག་རྟེན་བརྩེ་བས་རྗེས་དགོངས་ཏེ། །གང་འདུལ་སྤྲུལ་བསྒྱུར་ཡ་མཚན་ལྟད་མོ་ཡིས། །ལྗོངས་འདིར་གཟུགས་སྐུའི་རོལ་བ་ངོམ་དུ་གསོལ། །ཆོས་བརྒྱད་ཆུ་འཛིན་ལང་ལོང་ལྡང་བའི་དབུས། །ཐུབ་བསྟན་ཉིན་བྱེད་ནུབ་རིར་ཉེ་བ་ཡི། །སྙིགས་མའི་ཡང་མཐའ་དུས་ཀྱི་མར་གཤམ་འདིར། །བསྟན་འཛིན་རྣལ་མ་ཁྱེད་འདྲ་ལྷག་ཏུ་དྲན། །དམ་ཆོས་ཁ་རུ་ཁྱེར་བའི་དིང་གི་ཆ་འདིར། །ཆོས་གཟུགས་བཅོས་མའི་རྫུ་བག་ཕྱི་རུ་མངོན་ཚེ། །ཁྱེད་སྐུ་གཤེགས་པའི་ཤུལ་གྱི་གཟུགས་བརྙན་ཕྲ་མོས། །ད་དུང་འགྲོ་བའི་སེམས་ལ་དགེ་བློ་སྤེལ་བཞིན། །ང་མཐོ་ང་ཆེ་མ་བརྩད་དམན་པའི་ས་ནས། །ཞིམ་ལྟོ་ཕྱི་རྫིག་མེད་པའི་གཉོམ་ཆུང་སྤྱོད་པས། །རྒྱལ་སྲས་རྣམ་ཐར་སྐྱོང་བའི་དམ་པ་ཁྱེད་འདྲ། །རྗེས་སུ་དྲན་སྐལ་འདི་ཡང་བསོད་ནམས་ཆེའོ། །ཞེས་མཁན་ཤེས་བྱ་ནས་བསྐུལ་ངོར་དངོས་གྲུབ་དཔལ་གྱིས་ཀུན་སྤངས་པ་མཁན་ཆོས་ཁྱབ་ཀྱི་རྗེས་དྲན་དུ་བྲིས་པ་དགེའོ། ། གདུང་འབོད་གསོལ་འདེབས།གདུང་འབོད་གསོལ་འདེབས། གང་ཐུགས་སྤྲོས་བྲལ་དག་པའི་ནམ་མཁའ་ལས། །འགྲོ་འདུལ་གར་དུ་ཤར་བའི་རྟ་བདུན་དབང༌། །བསིལ་སྦྱིན་འོད་ཀྱིས་བསྐྱངས་པའི་གུས་འབངས་རྣམས། །ནམ་ཡང་བརྩེ་ཆེན་ཀློང་ལས་མ་འདའ་ཞིག ། ཁྱེད་ཐུགས་ར་རིའི་དྲི་མ་ཀུན་དག་ཀྱང༌། །བདག་ཅག་སེམས་རྒྱུད་མུན་པའི་རབ་འགེངས་བས། །ཁྱོད་སྐུ་གཟུགས་སྐུ་དབྱིངས་སུ་ཡལ་བ་དེས། །མི་བཟད་མྱ་ངན་འཐིབ་པ་གཟིགས་ལགས་སམ། །ཉིན་དང་མཚན་དུ་གདུང་བས་ཤུགས་ཕྱུང་སྟེ། །དུས་ཀུན་སྐྱབས་ཀྱི་རེ་ལྟོས་འཆའ་བ་རྣམས། །རྒྱ་མཚོར་གྲུ་ཞིག་ལྟ་བུ་འདི་དགོངས་ལ། །བྱིན་རླབས་ནུས་པའི་རྩལ་ཆེན་འབྱིན་དུ་གསོལ། །རང་དོན་མཐར་ཕྱིན་ཆོས་སྐུའི་རྒྱལ་ས་ལས། །གཞན་དོན་ལྷུན་གྲུབ་གཟུགས་སྐུའི་དཔལ་བསྐྱེད་དེ། །སྐལ་དམན་བདག་ཅག་ལོག་པར་མི་གཏོང་བར། །སྣ་ཚོགས་ཚུལ་གྱིས་རྗེས་སུ་འཛིན་པར་གསོལ། །ཞེས་པ་འདི་ནི་གང་གི་སློབ་བུ་རྣམས་ཀྱི་ངོར་དངོས་གྲུབ་དཔལ་གྱིས་བྲིས་པ་དགེའོ། །གདུང་འབོད། ན་མ་ཤྲཱི་ཀཱ་ལ་ཙཀྲ་ཡ། ཀུན་ཉོན་མུན་པས་འགྲོ་བློའི་མིག་ལྡོངས་ཤིང༌། །རྒྱལ་བསྟན་ཉི་མ་ནུབ་རིར་ཉེ་བ་ན། །ཁྱེད་སྐུ་བསྟན་དང་འགྲོ་བའི་སྤྱི་དཔལ་ཆེ། །དག་པའི་ཞིང་མཆོག་གང་དུ་བཞུད་ལགས་ཀྱང༌། །མཁའ་ཁྱབ་བརྩེ་བ་ཆེན་པོའི་ཀློང་ཡངས་ནས། །གདུང་ཤུགས་ང་རོས་འབོད་པ་འདི་གསན་མཛོད། །ཐུབ་བསྟན་གསལ་བའི་ཉི་མ་ཁྱེད་ཉིད་ཀྱི། །ཐུགས་རྗེའི་གཟུགས་སྐུ་དབྱིངས་སུ་བསྡུ་བ་ན། །བདག་ཅག་དམུས་ལོངས་ལས་ངན་འཁྱམས་པོ་རྣམས། །སྐྱབས་མེད་གྲུ་ཞིག་ལྟ་བུ་འདི་གཟིགས་སམ། །ལོང་བ་ཐང་དཀྱིལ་ལྷག་པ་ལྟ་བུ་ཡི། །གདུང་བའི་ཉིན་མཚན་འདའ་བ་འདི་དགོངས་ལ། །ཉམ་ཐག་འོ་དོད་འབོད་པའི་བདག་ཅག་ལ། །སླར་ཡང་བྱམས་པའི་ཏིང་འཛིན་ཡིད་མཁའ་ལས། །གཟུགས་སྐུའི་མཚན་དཔེ་མྱུར་དུ་འཆར་བར་ཤོག ། དེ་ལྟར་གདུང་བའི་དབྱངས་ཀྱིས་སྐུལ་བ་ན། །མི་མངོན་དབྱིངས་ཀྱི་འགྲོ་བའི་སྒྲོན་མེ་ཡིས། །ལེགས་པར་གསན་ཞིང་སྨོན་པ་ཇི་བཞིན་དུ། །འགྲུབ་པའི་སྡོངས་གྲོགས་མཆོག་གསུམ་སྲུང་མས་མཛོད། །ཅེས་རྒྱ་བླ་མ་ཐུབ་བསྟན་ཉི་མའི་གདུང་འབོད་འདི་ཡང་བླ་མ་བསམ་གཏན་རྒྱ་མཚོ་དང་སྤྲུལ་དཀོན་མཆོག་བཟང་གཉིས་ཀྱིས་བསྐུལ་ངོར་ངག་དབང་དངོས་གྲུབ་དཔལ་གྱིས་མཆོག་གསུམ་ལ་གསོལ་བ་བཏབ་ནས་བྲིས་པའོ། ། སྤྲུལ་སྐུ་མྱུར་བྱོན།སྤྲུལ་སྐུ་མྱུར་བྱོན། ངེས་དོན་སྙིང་བོའི་བཤད་དང་སྒྲུབ་པའི་བསྟན། །མི་ནུབ་འཛིན་ཞིང་སྤེལ་བའི་བཤེས་གཉེན་ཆེ། །མཚན་ནས་བརྗོད་པར་དཀའ་བའི་བཀའ་དྲིན་ཅན། །འགྲོ་བློ་རྒུད་སེལ་ཐུབ་བསྟན་ཉི་མ་མཆོག ། རེ་ཞིག་དག་པའི་ཞིང་དུ་ཕེབས་ལགས་ཀྱང༌། །སྐྱབས་མེད་བདག་ཅག་སྐྱོབ་པའི་མགོན་པོ་དང༌། །བསྟན་དང་འགྲོ་བའི་རྒུད་པ་འདི་དགོངས་ལ། །སྤྲུལ་བའི་ཟློས་གར་དགེ་ལེགས་འབྱུང་གནས་ཤིག ། མྱུར་དུ་ས་གསུམ་འགྲོ་ལ་འཆར་དུ་གསོལ། །ལྷ་མིའི་རྣམ་འདྲེན་སྟོན་མཆོག་ཟས་གཙང་སྲས། །གཏད་རབས་བདུན་དང་འཕགས་པའི་གནས་བརྟན་དང༌། །རྒྱ་བོད་པཎ་གྲུབ་ཤིང་རྟ་ཆེ་རྣམས་ཀྱིས། །སྨོན་པའི་མཐུན་འགྱུར་རེ་བ་ཇི་བཞིན་མཛོད། །ཅེས་སྤྲུལ་སྐུ་མྱུར་བྱོན་གྱི་གསོལ་འདེབས་འདི་ཡང་བླ་མ་བསམ་གཏན་རྒྱ་མཚོ་དང་སྤྲུལ་དཀོན་མཆོག་བཟང་གཉིས་ཀྱིས་བསྐུལ་ངོར་ངག་དབང་དངོས་གྲུབ་དཔལ་གྱིས་བྲིས་པའོ། །ཡང་སྤྲུལ་མྱུར་བྱོན། བྱམས་བརྩེ་མཐའ་བྲལ་ཀུན་གསལ་མཁའ་ན་ཉ་གང་སྐུ་ཡི་འོད་ལམ་འགྱེད། །ཐོགས་མེད་མཁྱེན་རབ་གློག་གི་དྲྭ་བ་སྡེ་སྣོད་སྤྲིན་རུམ་གསེབ་ནས་ལྡིར། །ལྔ་བདོའི་ཐན་སྐྱ་དགུང་ལ་འཕྱུར་དུས་ལྔ་ཟུང་མཁས་པའི་འོད་སྟོང་བ། །རྒྱལ་ཀུན་མཁྱེན་བརྩེ་གཅིག་ཏུ་བཟླུམས་པ་བླ་མའི་ཞབས་ཀྱི་པདྨོར་འདུད། །ཀུན་ཉོན་སྨག་ཆེན་འཐིབ་པོས་རབ་དཀྲིགས་སྲིད་པའི་མྱ་ངན་ཐང་ཆེན་ན། །ཤེས་རབ་མིག་ལྡོང་ཐབས་ཀྱི་གྲོགས་མེད་འཁོར་བར་ཞགས་པས་རབ་འཆིང་ཚེ། །སྟོབས་བཅུ་རྫོགས་ཤིང་དུས་ལས་ཡོལ་མེད་ལྷུན་འགྲུབ་འཕྲིན་ལས་རབ་སྦྱིན་པ། །མི་ཡི་ཤ་ཚུགས་བཤེས་གཉེན་ཚུལ་བཟུང་གང་འདི་ཡིན་ལ་སོམ་ཉི་ཅི། །འོན་ཏེ་གང་སྐུ་རྟ་བདུན་དབང་པོ་དུས་ཀྱི་འགྲོས་ལ་རབ་བཅིབ་ནས། །དམན་པའི་ཡིད་ཀྱི་སྐྱ་རེངས་སྣང་བ་ད་དུང་འཆར་བར་མ་གྱུར་གོང༌། །བསོད་ནམས་རི་བོའི་ཕག་ཏུ་ཡིབ་པའི་དམུས་ལོང་དག་གི་ལས་སྐལ་འདི། །མགོན་ཁྱེད་གང་ན་ཇི་ལྟར་འཚོ་ཡང་ཐུགས་རྗེས་འདོར་བར་སྲིད་དམ་ལགས། །ཁྱེད་ཞབས་ཆོས་དབྱིངས་མཁའ་ལ་གཤེགས་ཀྱང་གདུལ་བྱའི་དད་པའི་བཀོད་ཆུ་རེར། །ཁྱེད་ཀྱི་གཟུགས་བརྙན་ད་དུང་མ་ཡལ་རེ་བའི་མཆི་མ་བཀུ་བཞིན་དུ། །ཁྱེད་ལ་རེ་ལྟོས་ལོ་ཟླར་འཛད་ན་ཐུགས་རྗེའི་རྩལ་ཆེན་རབ་བསྐྱེད་དེ། །སྤྲུལ་བའི་དཀྱིལ་འཁོར་སླར་ཡང་འཛིན་མའི་ཁམས་ལ་མྱུར་དུ་འཆར་གྲུབ་མཛོད། །བསྐྱངས་པའི་བཀའ་དྲིན་དྲན་པའི་རི་མོ་མི་ཤིགས་ལྕགས་ལ་བཏབས་པ་ལྟར། །གཞལ་མེད་སྙིང་གི་རིན་པོ་ཆེ་དེ་དབུལ་བོའི་ལག་ནས་བོར་གྱུར་ཀྱང༌། །མདོ་སྔགས་རྒྱ་མཚོའི་ངག་ལ་དབང་ཞིང་ལུང་རྟོགས་བསྟན་པ་འཛིན་མཁས་ཤིག ། འཕྲིན་ལས་རྒྱ་མཚོའི་ཟབ་ཡངས་འཁུ་བའི་སྤྲུལ་བའི་ཟློས་གར་ཉེར་འབྱོན་མཛོད། །ཅེས་པ་འདི་ནི་དྲན་པ་དགོན་ཆོས་རིག་དར་རྒྱས་སློབ་གླིང་གི་རྩོམ་རིག་སྡེ་ཚན་གྱིས་བསྐུལ་ངོར་དངོས་གྲུབ་དཔལ་གྱིས་དད་གུས་དང་བཅས་བྲིས་པ་དགེའོ། ། སྟོན་པ་ཐུགས་རྗེ་ཅན་རྗེས་དྲན་གྱི་དུས་མཆོད་དད་པའི་ཟླ་ཤེལ།སྟོན་པ་ཐུགས་རྗེ་ཅན་རྗེས་དྲན་གྱི་དུས་མཆོད་དད་པའི་ཟླ་ཤེལ། ཨོཾ་སྭ་སྟི། ལྷ་དང་བཅས་པའི་འགྲོ་བའི་སྐྱབས་གནས་མཆོག །སྟོབས་བཅུའི་མངའ་བདག་དམན་པའི་མགོན་གྱུར་བ། །རྣམ་འདྲེན་མཚུངས་མེད་ཤཱཀྱའི་དབང་བོ་ལ། །རྗེས་དྲན་དུས་མཆོད་ས་ག་ཟླ་བར་གཙོ། །དེ་ལ་འདིར་གང་ཞུ་བར་བྱ་བ་ནི། དུས་ཆེན་ཁྱད་པར་ཅན་ས་ག་ཟླ་བ་ནི། རང་ཅག་ལ་བཀའ་དྲིན་མཚུངས་ཟླ་མ་མཆིས་པ། བདག་ཅག་གི་སྟོན་པ་མཉམ་མེད་ཐུབ་པའི་དབང་པོ་མཆོག་དང་པོ་སྐུ་བལྟམས་པ་དང༌། བར་དུ་མངོན་པར་རྫོགས་པ་སངས་རྒྱས་པ་དང༌། མཐར་གཟུགས་སྐུ་ཞི་བར་གཟིམ་པ་སྟེ་དུས་ཆེན་སུམ་འཛོམས་ཀྱི་ཟླ་བ་ཡིན་ལ། དེས་ན་འདིར་སྟོན་པ་ཐུགས་རྗེ་ཅན་རྗེས་དྲན་གྱི་དུས་མཆོད་ས་ཟླའི་ཆོས་ཚོགས་རེ་ངེས་པར་ང་ཚོ་ནང་བ་སངས་རྒྱས་པ་ཡོངས་ཀྱི་འཛུགས་རྒྱུ་ཧ་ཅང་གལ་ཆེན་དུ་མཐོང༌། དེ་ཡང་འཛམ་གླིང་ཆོས་ལུགས་རང་རང་གི་སྟོན་པའི་འཁྲུངས་འདས་སོགས་ལ་རྩི་སྲུང་བྱེད་བཞིན་ཡོད་ལ། ང་ཚོ་ནང་བ་སངས་རྒྱས་པ་ཀུན་གྱིས་དུས་ཆེན་རྗེས་དྲན་མཆོད་འབུལ་བྱས་ན་བསོད་ནམས་ཀྱི་ཚོགས་རྒྱ་ཆེན་བསགས་པའི་སྒོ་འཕར་ཡངས་བ་ཡིན་པ་དང༌། རྒྱལ་བསྟན་རིན་པོ་ཆེ་ཀུན་ཏུ་སྤེལ་བའི་ཐབས་ལམ་ཡིན་པས་ཆོས་བརྒྱུད་རིས་སུ་མ་མཆིས་པ་ཀུན་གྱིས་ས་ག་ཟླ་བའི་དུས་མཆོད་རྗེས་དྲན་རེ་ཆོས་སྡེ་ཀུན་གྱིས་བྱེད་པར་གསོལ་བ་ལན་བརྒྱར་ཞུས་པ་ལགས་ན་ཐུགས་ལ་འཛིན་པར་ཞུ་ཞུ། །སྟོན་པ་གང་དེའི་རྗེས་དྲན་ས་ག་ཟླ། །འཁྲུངས་འདས་སངས་རྒྱས་མཛད་ཆེན་དུས་བཟང་འདིར། །ས་ག་ཟླ་བར་རྗེས་དྲན་ཆོས་ཚོགས་ཏེ། །བརྒྱུད་ནས་འགྲོ་ལ་དགེ་སྐུལ་དང་བཅས་པའི། །རླབས་ཆེན་ལས་ལ་ཡི་རང་གཙང་མ་ཡིས། །བཀྲ་ཤིས་སྨོན་པའི་མེ་ཏོག་མངོན་པར་ཕུལ། །ས་ག་ཟླ་བའི་དུས་མཆོད་ཚོགས་པའི་གཙོ་འགན་པ་མཁན་བློ་གྲོས་དཔལ་ལྡན་ལགས་ཀྱིས་བསྐུལ་ངོར་རྗེས་སུ་ཡི་རང་དང་བཅས་ངག་དབང་དངོས་གྲུབ་དཔལ་གྱིས་ཕུལ་བའོ། ། གཡུང་དྲུང་བོན་གྱི་སྐྱེས་ཆེན་ཞིག་རྗེས་སུ་དྲན་པ།གཡུང་དྲུང་བོན་གྱི་སྐྱེས་ཆེན་ཞིག་རྗེས་སུ་དྲན་པ། རྒྱལ་བ་གཤེན་རབ་མཆོག་གིས་ལེགས་གསུངས་པའི། །མདོ་སྔགས་ཆོས་ཚུལ་ཟབ་མོའི་བཅུད་སྨིན་པ། །འོད་གསལ་རྫོགས་པ་ཆེན་པོ་ཉམས་བཞེས་པའི། །ཀུན་སྤངས་ནམ་མཁའ་རྒྱལ་མཚན་རྗེས་སུ་དྲན། །གཞོམ་མེད་རྡོ་རྗེའི་སྐུ་མཆོག་བརྙེས་ན་ཡང༌། །རྟག་འཛིན་ཨ་འཐས་བརྟན་པའི་འགྲོ་བ་རྣམས། །ཆོས་ལ་བསྐུལ་ཕྱིར་མྱ་ངན་འདའ་མཛད་པ། །བྱ་བཏང་ནམ་མཁའ་རྒྱལ་མཚན་རྗེས་སུ་དྲན། །འོད་གསལ་རིག་སྟོང་སེམས་ཀྱི་སྟངས་ཀ་ལས། །གདོད་མའི་སྐུ་བཞི་མངོན་དུ་མཛད་ན་ཡང༌། །ལུས་ཅན་འགྲོ་བའི་དོན་དུ་དཀའ་བ་བརྒྱ། །སླར་ཡང་སྟོན་མཛད་གང་ཉིད་རྗེས་སུ་དྲན། །གཡུང་དྲུང་བོན་གྱི་བསྟན་པའི་ཉི་མའི་འོད། །ལྔ་ཕྲག་བརྒྱ་བར་གཟིམ་པས་དྲན་འཛིན་ཀློང༌། །གདུལ་བྱའི་དད་གསུམ་འོད་དུ་སྨིན་པའི་འབྲས། །ལུས་ཅན་དཔལ་དུ་སླར་ཡང་བྱོན་ཅིག་ཀྱེ། །དངོས་གྲུབ་དཔལ་གྱིས། གྲུབ་དབང་ལུང་རྟོགས་རྒྱལ་མཚན་སླད་དྲན།གྲུབ་དབང་ལུང་རྟོགས་རྒྱལ་མཚན་སླད་དྲན་ཞུ། འགྲོ་བ་མཐའ་དག་གི་མཛའ་བཤེས་དམ་པ་རྣམ་འདྲེན་སྟོབས་བཅུ་མངའ་བ་ཐུབ་མཆོག་ཤཱཀྱའི་རྒྱལ་པོ་དེ་ཉིད་ཀྱིས་གང་འདུལ་ཆོས་ཀྱི་སྒོ་མོ་བརྒྱད་ཁྲི་བཞི་སྟོང་མདོ་སྔགས་ཐེག་པ་གོང་འོག་གི་ཆོས་སྒོ་ཇི་སྙེད་ཅིག་བཀའ་བསྩལ་པ་ལས། སྤྱིར་ཐེག་པ་ཆེན་པོ་དང་ཡང་དགོས་གསང་ཆེན་རྡོ་རྗེ་ཐེག་པའི་བསྟན་པ་གསེར་སྦྱངས་བཙོ་མ་ལྟ་བུ་འདི་ཉིད་ཐུན་མོང་མིའི་འཇིག་རྟེན་འདིར་ད་ལྟའི་ཆར་མ་ནུབ་པར་གནས་པ་ནི་གངས་ཅན་ཁ་བ་བོད་ཀྱི་ཡུལ་ལུང་ཙམ་ཞིག་ཏུ་སྨྲས་ནའང་ཧ་ལམ་སྨྲ་ཆོག་པའི་དུས་སུ་སླེབས་ཡོད་པ་ཀུན་ཀྱིས་ཐུགས་ངེས་ལྟར་ལགས་ལ། གསང་ཆེན་རྡོ་རྗེ་ཐེག་པའི་བསྟན་པ་འདི་ཉིད་ཀྱི་ཉམས་བཞེས་འཁྲུལ་མེད་ཀྱི་ལམ་ནས་བྱིན་རླབས་ཀྱི་བརྒྱུད་པ་མ་ཆད་པར་གྲུབ་པའི་སར་གཤེགས་པའི་དམ་པ་རེ་རེ་ནི་ཐུབ་བསྟན་གྱི་སྲོག་ཤིང་འཛིན་པའི་ནང་ནོམ་ངོ་མ་དེ་ཡིན། དེ་ཡང་ཉེ་བའི་ཆར་བྱོན་པའི་མཚན་བརྗོད་པར་དཀའ་བ་རྟོགས་པའི་དབང་ཕྱུག་ཆེན་པོ་གྲུབ་དབང་ལུང་རྟོགས་རྒྱལ་མཚན་ནམ་བླ་མ་ཨ་ཁྱུག་རིན་པོ་ཆེར་མཚོན་ན། རྒྱུ་སྐར་གྱི་དབུས་ན་རི་བོང་འཛིན་པ་དང༌། རི་དྭགས་ཀྱི་གསེབ་ན་སེང་གེ་དང་འདྲ་བ་དམ་པ་ལས་ཀྱང་དམ་པ་ཡིད་བཞིན་གྱི་ནོར་བུ་ལྟ་བུ་ཞིག་ཡིན་ཏེ། ཁོང་ནི་རང་རྒྱུད་གྲོལ་བའི་ཡོན་ཏན་ཙམ་མ་ཟད་འགྲོ་དོན་དུས་སུ་བབ་ཅིང་ཐུགས་རྗེ་དང་སྨོན་ལམ་ཡོངས་སུ་རྫོགས་པས་མཛད་པ་འཕྲིན་ལས་འགྲན་ཟླ་དང་བྲལ་བའི་སྐྱེ་འགྲོ་སྤྱི་ལ་ཕན་པའི་ཕྱི་རྗེས་ཀྱི་རི་མོ་ཀུན་ནས་མཛེས་ཤིང་བཀྲ་བའི་བླ་མ་ཞིག་རེད། དེས་ན་ཁོང་གི་མཛད་པ་དང་རྣམ་ཐར་སྤྱི་བམ་ཙམ་ནི་སུ་ལ་བསྙད་མི་དགོས་པར་ཀུན་ཀྱིས་གསལ་མཁྱེན་ལགས་པ་ལྟར་ཡིན་པས་འདིར་གླེང་དགོས་དོན་མི་སྣང༌། ཕྱི་ཚུལ་ཙམ་མ་ཡིན་པར་བླ་མ་གང་ཉིད་ཀྱི་གསང་གསུམ་གྱི་ཡོན་ཏན་ལ་དད་པ་དང་མཛད་པ་འཕྲིན་ལས་ཀྱི་རྒྱུན་བཟང་པོ་ལ་རྗེས་སུ་ཡི་རང་ཞིང་བཀའ་དྲིན་དྲན་པའི་སྒོ་ནས། ཚིག་གིས་མི་མཚོན་པའི་རྗེས་དྲན་ཟབ་མོ་སེམས་སུ་རྟག་པར་ཉལ་བ་ཡིན། དེ་ལྟ་མོད་དེ་ད་ལན་བླ་མ་གང་ཉིད་རྗེས་དྲན་ཞིག་གི་དོད་དུ་ཚིག་དུམ་ཁ་ཤས་ཤིག་སུག་ལས་བགྱིས་པ་འདི་ཉིད་ཀྱང་འཇིག་རྟེན་མཐུན་འཇུག་གི་རྟོག་ངན་ཙམ་གྱིས་རྐྱེན་པ་མིན་པར། རིང་ནས་མོས་ཤིང་རྟག་པར་དད་པའི་དབང་གིས་བྱས་པ་ཡིན། བླ་མ་དཀོན་མཆོག་རྒྱ་མཚོའི་ཐུགས་བསྐྱེད་སྨོན་ལམ་གྱི་མཐུ་དང༌། དཀར་ཕྱོགས་ཆོས་ལ་མོས་པའི་བསྟན་སྲུང་ནུས་རྩལ་ཅན་ཐམས་ཅད་ཀྱི་ནུས་སྟོབས་དང༌། ཆོས་ཅན་རྟེན་འབྲེལ་བསླུ་བ་མེད་པའི་བདེན་མཐུ་ཟབ་མོའི་སྟོབས་ཀྱིས། རང་ཅག་ཁ་བ་གངས་ཅན་པའི་སྐྱེ་འགྲོ་རྣམ་གྱི་གཙོས། འཛམ་གླིང་རྐང་གཉིས་མཆིས་སོ་ཅོག་དང༌། ཕྱོགས་མེད་ནམ་མཁའ་ལྟར་མཐའ་ཀླས་པའི་ལུས་ཅན་རྣམས་ཀྱི་བསོད་ནམས་ཀྱི་བགོ་སྐལ་དུ། བླ་མ་གང་གི་མཛད་བཟང་འཕྲིན་ལས་ཀྱི་རྣམ་དཀར་ཉམས་པ་མེད་ཅིང༌། སློབ་བརྒྱུད་ཆོས་བཞིན་དུ་སྤྱོད་པ་ཐམས་ཅད་ཀྱི་སྐུ་ལས་གང་ལ་ཡང་བར་ཆད་ཀྱི་མིང་ཙམ་ཡང་མི་འབྱུང་བར། ཡངས་པའི་ས་ཆེན་ཀུན་ན་ཕན་བདེའི་ལེགས་ཚོགས་ཀྱི་འབྲས་བུ་སྲིད་པ་མ་སྟོང་གི་བར་དུ་ཆད་པ་མེད་པའི་སྨོན་ལམ་ལན་བརྒྱ་སྟོང་དུ་ཕུལ་བ་ལགས་སོ། །རྡོ་གྲུབ་གཏེར་ལུང་ལས། ཤར་ཕྱོགས་བློ་བཟང་བསྟན་པ་ལ། །བྱང་ཆུབ་སེམས་དཔའ་མེ་ཏྲི་ནི། །བློ་བཟང་འཕྲིན་ལས་ཞེས་པ་ཡིས། །འཇམ་དབྱངས་བསྟན་པ་གསལ་བར་བྱེད། །ཅེས་དང༌། དཔལ་ཕྱག་ན་རྡོ་རྗེའི་བྱིན་རླབས་པའི། །ཁོང་ཀརྨ་དཔའ་བོ་ཧེ་རུ་ཀས། །གནས་འདི་ལ་རྒྱན་གྱིས་བརྒྱན་གྱུར་ན། །ཡུལ་འདི་ཀས་བདེ་སྐྱིད་བོས་པ་བཞིན། །ལྷ་ཚེ་དཔག་མེད་ཀྱི་དཔལ་བྱིན་པ། །ཁོང་ཆོས་ལ་དབང་ཐོབ་དམ་པར་འགྱུར། །ཞེས་གསུངས་པ་ལྟར་གང་ཐུགས་སྡོམ་པ་གསུམ་གྱིས་ལེགས་པར་བསྡམས་ཤིང༌། གཞན་ཕན་བྱམས་བརྩེ་བྱང་ཆུབ་ཀྱི་སེམས་རིན་པོ་ཆེའི་རང་བཞིན་ལྷན་སྐྱེས་སུ་མངའ་བ། ལམ་བསྐྱེད་རྫོགས་རིམ་པ་གཉིས་ལ་མངའ་དབང་འབྱོར་བའི་ཁྱབ་བདག་རྡོ་རྗེ་འཆང་ཆེན་པོ་མཚན་བརྗོད་པར་དཀའ་ཡང་དོན་གྱི་སླད་དུ་མཚན་ནས་སྨོས་ན། མཁན་ཆེན་ངག་དབང་༧བློ་བཟང་འཕྲིན་ལས་མཚུངས་པ་མེད་པའི་སྡེ་གང་ཉིད་ཀྱི་ཞལ་གསུང༌། ད་ལྟ་རང་རེ་དག་གི་དད་གུས་བསོད་ནམས་ཀྱི་བགོ་སྐལ་དུ་བཞག་པའི་མདོ་སྔགས་ཞལ་གདམས་སོགས་ཀྱི་གསུང་སྒྲ་འདི་བསྐྲུན་པ་ཡིན་ལ། དེ་ཡང་འཕགས་པ་ཀུན་ཏུ་བཟང་པོའི་སྨོན་ལམ་ལས། འཆང་བ་དང་ནི་སྟོན་ཏམ་ཀློག་ན་ཡང༌། །དེ་ཡི་རྣམ་པར་སྨིན་པའང་སངས་རྒྱས་མཁྱེན། །ཞེས་དང༌། གཞན་ཡང་མདོ་སྡེ་རྣམས་སུ་མདོ་སྡེ་དང་སངས་རྒྱས་དང་བྱང་ཆུབ་སེམས་དཔའ་དག་གི་མཚན་སྒྲོག་པ་དང་ཐོས་པ་ཙམ་གྱི་ཕན་ཡོན་ཡང༌། བསམ་གྱིས་མི་ཁྱབ་པ་མང་པོ་རྒྱ་ཆེར་གསུངས་པ་ལྟར། ད་ལན་མགོན་པོ་གང་ཉིད་ཀྱི་གསུང་འཇིགས་པ་མེད་ཅིང་བག་ཚ་བ་ཐམས་ཅད་ལས་གྲོལ་བ། ཆོས་རྔ་ཆེན་པོ་སེངྒེའི་སྒྲ་ལྟ་བུ་འདི་ཉིད། དགོན་གྲོང་ཡུལ་ཁམས་རི་ལུང་སོགས་གང་དུ་གྲག་པ་དཻར། རྐྱེན་ངན་གདོན་བགེགས་ཀྱི་བར་ཆད་ཞི་བ་དང༌། སེམས་ཅན་གང་གི་རྣ་ལམ་དུ་ཐོས་པ་ཙམ་གྱི་ཕན་ཡོན་ཡང་བསོད་ནམས་མི་བཟད་པའི་རྒྱུར་དམིགས་ཤིང༌། ལྷག་པར་དུ། སངས་རྒྱས་ཀྱི་མཛད་པ་ཐམས་ཅད་ཀྱི་གསུང་གི་མཛད་པ་མཆོག་ལགས་ཏེ། དེས་ན། གདུལ་བྱ་རྣམས་སྡུག་བསྔལ་མཐའ་མེད་པ་ལས་སྒྲོལ་བ་ཡང༌། ལེགས་ཉེས་བླང་དོར་མ་ནོར་བར་སྟོན་པའི་གསུང་གིས་རྗེས་སུ་འཛིན་པ་འདི་ཁོ་ན་གཙོ་བོར་ལགས་པས། མདོ་སྔགས་ལམ་རིམ་པ་གཉིས་ཀྱི་ཟབ་གསུང་འདི་དག་གི་ཚིག་དོན་ཚུལ་བཞིན་དུ་མཉན་ནས། དོན་ལེགས་པར་སེམས་ཏེ། ཡང་དག་པར་སྒྲུབ་པ་ན། ཁོང་རིན་པོ་ཆེ་དང་དངོས་སུ་མཇལ་ཡང་འདི་ལས་ལྷག་པ་ཞིག་གསུང་རྒྱུ་མེད་པ་ཡིན་པས། རྗེ་བདག་ཉིད་ཆེན་པོས། མཛད་པ་ཀུན་ལས་གསུང་གི་ནི། །མཛད་པ་མཆོག་ཡིན་དེ་ཡང་ནི། །འདི་ཉིད་ཡིན་ཕྱིར་མཁས་པ་ཡིས། །འདི་ལས་སངས་རྒྱས་རྗེས་དྲན་བྱོས། །ཞེས་གསུངས་པ་ལྟར། རྗེས་དྲན་དང་མཆོད་པ་ཐམས་ཅད་ཀྱི་རྒྱལ་པོ་ཡང་གསུང་ལ་རྗེས་སུ་སློབ་པ་ཉིད་ཡིན་པར་ངེས་ཏེ། དད་གུས་དང་ལྡན་པ་རྣམས་ཀྱིས་བླ་མའི་རྗེས་དྲན་དེ་ལྟར་ལག་ལེན་ལ་ཅི་ནུས་སུ་བསྟར་ནས་ཡང་ཡང་གསན་པར་ཞུའོ། ། ཞབས་བརྟན་སྐོར།ཞབས་བརྟན་སྐོར། བླ་མ་ལེགས་གྲུབ་ཀྱི་ཞབས་བརྟན། དད་གསུམ་འཛུམ་པའི་པདྨའི་སྐྱེད་ཚལ་དུ། །རླུང་གི་ཤིང་རྟ་ཀེ་ཏའི་ཆབ་སྦྱིན་པ། །ལེགས་ཚོགས་དངོས་གྲུབ་ཐར་བའི་སྤྱི་དཔལ་ཆེ། །ལྷ་མིའི་ཅོད་པན་བླ་མའི་ཞབས་བརྟན་ཤོག ། ཅེས་པ་གྲྭ་བ་དཀོན་བཟང་གིས་བསྐུལ་ངོར་ངག་དབང་དངོས་གྲུབ་དཔལ་གྱིས་བྲིས་པའོ། །སརྦ་མངྒ་ལཾ། བླ་མ་བསོད་ནམས་དཔལ་ལྡན་གྱི་ཞབས་བརྟན། རྐང་འཐུང་ཚལ་དུ་ཡོངས་འདུའི་དཔག་བསམ་ལ། །དྲི་ལེན་ཤུགས་ཀྱིས་ལྡེམ་ལྡེམ་སྐུལ་བ་ལས། །བསོད་ནམས་དཔལ་གྱིས་དབང་བོའི་ཁམས་གསོ་བ། །མཚན་ལྡན་བླ་མའི་ཞབས་ཟུང་རྟག་བཞུགས་གསོལ། །ཞེས་པ་གྲྭ་བ་དཀོན་བཟང་གིས་བསྐུལ་ངོར་ངག་དབང་དངོས་གྲུབ་དཔལ་གྱིས་བྲིས་པའོ། །སརྦ་མངྒ་ལཾ། མཁན་སྣང་བ་དཔལ་གྱི་ཞབས་བརྟན། ཀུན་ཁྱབ་མཁའ་ནས་ཉིན་བྱེད་བདག་པོ་ཡི། །སྣང་བ་རྒྱས་པས་ལུས་ཅན་སྐྱོང་བྱེད་པ། །ལུང་རིགས་ཟེར་བརྒྱ་ཀུན་ནས་རྒྱས་པའི་དཔལ། །སྨྲ་དབང་བླ་མའི་ཞབས་པད་བརྟན་གྱུར་ཅིག ། ཅེས་པ་གྲྭ་བཙུན་པ་དཀོན་བཟང་གིས་བསྐུལ་ངོར་ངག་དབང་དངོས་གྲུབ་དཔལ་གྱིས་བྲིས་པའོ། །སརྦ་མངྒ་ལཾ། གཞོན་ནུའི་དུས་ནས་དམ་པའི་ཚུལ་འཆང་བ། །སྡོམ་གསུམ་གོས་ཀྱིས་ལུས་བཟང་ལེགས་པར་སྤུད། །མན་ངག་རྒྱ་མཚོ་རྡོལ་བའི་ཀླུ་དབང་ཆེ། །ཁྱབ་བདག་རིག་པའི་རྡོ་རྗེར་དད་པས་འདུད། །བསྐྱེད་རིམ་ལྷ་ཡི་རྣལ་འབྱོར་མཐའ་རུ་ཕྱིན། །རྫོགས་རིམ་ཟབ་མོར་ཐོལ་གྱིས་འབྱམས་ཀླས་པ། །རྣལ་འབྱོར་དཔའ་བོ་གསུམ་ལྡན་རྡོ་རྗེ་འཛིན། །བསྟན་འགྲོའི་སྤྱི་དཔལ་དེ་ལ་དབྱངས་ཀྱིས་བསྟོད། །སྲིད་པའི་འཁོར་བ་སྒྱུ་མའི་འཕྲུལ་དུ་ཤར། །སྒྱུ་མའི་འགྲོ་ལ་སྙིང་རྗེས་ཡིད་རབ་བསྐྱོད། །མདོ་སྔགས་ལམ་མཆོག་ཐབས་ཤེས་ཟུང་དུ་འཇུག ། མཁན་སྤྲུལ་ལྟ་བའི་གདེང་ལྡན་དེ་ལ་གུས། །རང་བྱུང་རིག་པའི་གནས་ལུགས་གསལ་ལེར་མངོན། །རྡོ་རྗེ་གསུམ་གྱི་རྣལ་འབྱོར་ཡང་དག་སྦྱོར། །བླ་མེད་ཐེག་པས་འགྲོ་བློ་རྒྱས་བྱེད་མཁན། །རིག་པའི་རྡོ་རྗེའི་ཞབས་ཟུང་རྟག་བརྟན་ཤོག ། ཅེས་པ་འདི་ནི་དངོས་གྲུབ་དཔལ་ནས་གུས་པས་ཕུལ་བའོ། །༄༅། །ཟླ་མེད་སྟོན་པ་རྒྱལ་ཚབ་འཇམ་དཔལ་དབྱངས། །པཎ་གྲུབ་བཅུ་བདུན་བསྟན་པའི་གཏད་རབས་བདུན། །ཡིད་བཞིན་འཁོར་ལོ་ཚེ་ཡི་ལྷ་མཆོག་བཅས། །སྐྱབས་ཡུལ་དམ་པ་རྣམས་ཀྱིས་དགེ་ལེགས་སྩོལ། །ཐུབ་བསྟན་སྤྱ ི་དང་ཇོ་ནང་རྒྱལ་བའི་བསྟན། །བཤད་དང་སྒྲུབ་པས་ཚུལ་བཞིན་འཛིན་པ་ལ། །ང༷ག་ལ་དབ༷ང་འབྱོར་དངོ༷ས་གྲུ༷བ་དམ་པའི་དཔ༷ལ། །མཚུངས་མེད་ཆོས་ཀྱི་བཤེས་གཉེན་ཞབས་བརྟན་ཤོག། ཅཻས་པ་འདི་ནི་ཇོ་ནང་གི་ཆོས་གཞི་བཀྲ་ཤིས་ཆོས་ཐང་དགོན་དང་ཛ་མགོ་བརྩེ་ཆེན་མཐོ་སློབ་ཀྱི་སློབ་མ་རྣམས་ཀྱིས་བཤེས་གཉེན་རབ་འབྱམས་པ་ངག་དབང་དངོས་གྲུབ་དཔལ་གྱི་ཞབས་བརྟན་སྨོན་ཚིག་ཅིག་དགོས་ཞེས་བསྐུལ་ངོར། ཤཱཀྱའི་དགེ་སྦྱོང་ཆོས་སྨྲ་བ་ཏཱ་ལའི་བླ་མས། རབ་བྱུང་བཅུ་བདུན་པའི་ས་ཁྱི་ལོའི་ཟླ་༡༠ཚེས་༢ཕྱི་ལོ་༢༠༡༨ ཟླ་༡༢ ཚེས་༩ ལ་སྦྱར་བའོ། ། ཇོ་ནང་དགེ་བཤེས་དངོས་གྲུབ་དཔལ་མཆོག་ལ་ཕུལ།ཇོ་ནང་དགེ་བཤེས་དངོས་གྲུབ་དཔལ་མཆོག་ལ་ཕུལ། ཇོ་ནང་དགེ་བཤེས་དངོས་གྲུབ་དཔལ་མཆོག་ལ་ཕུལ། སེར་བྱེས་དགེ་བཤེས་འཇམ་དཔལ་བློ་ཤེས་ཀྱིས། ཟབ་མོ་མདོ་སྔགས་གཞུང་བརྒྱ་སྨྲ་བ་ལ། །ལུང་རིགས་གད་རྒྱངས་གཞན་ལས་མཐོ་བ་ཅན། །དེ་དོན་བརྩེ་བས་གཞན་ལ་འདོམས་མཁས་པ། །མཉམ་མེད་དགེ་བའི་བཤེས་ཉིད་རྒྱལ་གྱུར་ཅིག ། ཀུན་མཁྱེན་རྒྱལ་བའི་གསུང་རབ་རྒྱ་མཚོ་ལ། །རྣམ་དཔྱོད་བློ་གྲོས་རྩལ་གྱིས་བསྲུབས་པ་ལས། །བྱུང་བའི་གང་གསུང་ཟླ་བ་ནོར་བུའི་འོད། །ཇོ་ནང་བསྟན་པ་གསལ་བའི་རྒྱན་དུ་ཆེ། །ཁྱད་པར་བསྟན་ལ་གཅིག་ཏུ་དད་པ་དང༌། །གཞན་ཕན་འོད་ཟེར་ཕྱོགས་བརྒྱར་འཕྲོ་བ་ཡི། །ཐོས་བསམ་སྒོམ་པའི་ཉི་མ་འོད་པོ་ཆེས། །རྒྱལ་བསྟན་ཉིན་མོར་བྱེད་འདིར་ལྷག་པར་དད། །དཔལ་ལྡན་དུས་ཀྱི་འཁོར་ལོའི་རིམ་གཉིས་ཀྱི། །དངོས་གྲུབ་རྣམ་གཉིས་སྒྲུབ་པའི་ལས་སྨོན་ཅན། །མཁས་བཙུན་བཟང་པོའི་དཔལ་མངའ་ཆོས་ཀྱི་གྲོགས། །སྐུ་ཚེ་བརྟན་ཅིང་མཛད་འཕྲིན་རྒྱས་གྱུར་ཅིག ། ཅེས་ཇོ་ནང་དགེ་བཤེས་དངོས་གྲུབ་དཔལ་མཆོག་གི་མཛད་འཕྲིན་ཕྱོགས་མང་པོ་ལ་རྒྱུན་དུ་ཡི་རང་དཔག་མེད་ཅིག་ཡོད་མུས་ལ། ལྷག་པར་རྒྱལ་བ་ཇོ་ནང་པའི་བསྟན་པ་ལ་ཁ་ཙམ་ཚིག་ཙམ་མིན་པར་གོ་རིམ་ལྡན་པའི་སློབ་གཉེར་གྱི་རྨང་གཞི་བཙུགས་ཤིང༌། འཆད་རྩོད་རྩོམ་གསུམ་གྱི་སྒོ་ནས་ལུང་རྟོགས་ཀྱི་བསྟན་པ་འཛིན་སྐྱོང་སྤེལ་གསུམ་གནང་སྟེ་རྒྱལ་བ་ཇོ་ནང་བའི་ཡང་དར་བསྟན་པའི་བྱེད་པོ་ཉིད་དུ་བཞེངས་པར་དགའ་གུས་ཡི་རང་ཚད་མེད་ངང༌། ཁོང་གི་སྐུ་ཚེ་བརྟན་ཅིང་མཛད་འཕྲིན་དབྱར་མཚོ་ལྟར་རྒྱས་པའི་སྨོན་འདུན་བཅས།སེར་བྱེས་དགེ་བཤེས་འཇམ་དཔལ་བློ་ཤེས་ཀྱིས། ཕྱི་ལོ་༢༠༡༧ཟླ་༡༠ཚེས་༢༢ཉིན་ཕུལ་བའོ། །ཨོཾ་སྭ་སྟི། བླ་མ་ཡི་དམ་སངས་རྒྱས་ཆོས་ཚོགས་དང༌། །ཚེ་ཡི་ལྷ་མཆོག་རྣམས་ལ་གསོལ་བ་འདེབས། །བསྟན་འགྲོའི་མགོན་སྐྱབས་བཤེས་གཉེན་དམ་པ་ཡི། །སྐུ་ཚེ་བརྟན་ཅིང་མཛད་འཕྲིན་རྒྱས་པར་སྨོན།¿། མཆོག་གསུམ་ལྷ་དང་ཆོས་ཉིད་བདེན་མཐུ་དང༌། །བདག་ཅག་སློབ་དབང་དད་དང་དམ་ཚིག་དང༌། །དུས་གསུམ་བསགས་པའི་དགེ་བའི་རྩ་བ་ཡིས། །རྗེ་བཙུན་བླ་མའི་ཞབས་པད་བརྟན་གྱུར་ཅིག ། ཅེས་པ་འདི་ནི་དངོས་གྲུབ་དཔལ་གྱིས་རང་གི་ཞབས་བརྟན་སྨོན་ཚིག་ཏུ་བྲིས་པའོ། །ཨོཾ་སྭ་སྟི། བླ་མ་ཡི་དམ་སངས་རྒྱས་ཆོས་ཚོགས་ཀྱིས། །བཤད་སྒྲུབ་བསྟན་པ་གསལ་བའི་སྒྲོན་མེ་ཡི། །སྐུ་ཚེ་མི་འགྱུར་རྡོ་རྗེའི་ཁམས་བརྟན་ཅིང༌། །མཛད་འཕྲིན་འོད་སྟོང་ས་གསུམ་ཁྱབ་པར་ཤོག། མ་གྱུར་འགྲོ་བའི་མུན་སེལ་རིན་པོ་ཆེ། །འགྲོ་བའི་མགོན་དུ་སྐུ་ཚེ་རབ་བརྟན་ཞིང༌། །ཟབ་རྒྱས་ཆོས་ཀྱི་ཆར་བ་བབ་པ་དང༌། །བྱང་ཆུབ་མ་ཐོབ་བར་དུ་བརྩེ་བས་སྐྱོངས། །ཞེས་པ་འདི་ནི་པཱ་ལ་དགོན་གྱི་རྡོ་རྗེ་སློབ་དཔོན་བླ་མ་བསྟན་གསལ་གྱི་ཞབས་བརྟན་གསོལ་འདེབས་སུ་དངོས་གྲུབ་དཔལ་གྱིས་བྲིས་པའོ། །ཨོཾ་སྭ་སྟི། འཆི་མེད་ཚེ་ཡི་དངོས་གྲུབ་སྩོལ་མཛད་པའི། །ཚེ་ལྷ་རྣམ་གསུམ་ཐུགས་རྗེའི་གྲུ་ཆར་གྱིས། །བསམ་གཏན་སྒྲུབ་ལ་མཁས་བཙུན་བཟང་པོ་ཡི། །སྐུ་ཚེ་རྟག་བརྟན་མི་འགྱུར་དཔལ་གནས་ཤོག ། ཆོས་ཉིད་བདེ་བར་གཤེགས་པའི་བདེན་མཐུ་ཡིས། །དཔལ་ལྡན་དུས་ཀྱི་འཁོར་ལོའི་རིམ་གཉིས་ཀྱི། །ལམ་བཟང་སྒྲུབ་ལ་གཅིག་ཏུ་གཞོལ་མཛད་པའི། །དཔལ་ལྡན་བླ་མའི་ངེས་དོན་བསྟན་དར་ཤོག། མཆོག་གསུམ་སྐྱབས་གནས་དབང་གི་རྒྱལ་པོ་ཡིས། །ཆེར་སྙིགས་དུས་མཐར་ཐུགས་བསྐྱེད་བླ་མེད་པ། །འདོད་ཆུང་ཆོག་ཤེས་སྦྱང་བའི་ཡོན་ཏན་ལྡན། །སྐྱེས་བུ་དམ་པའི་ཞབས་པད་བརྟན་པར་ཤོག ། བདག་ཅག་གུས་སློབ་ཀུན་ཀྱིས་བསགས་པ་ཡི། །རྣམ་དཀར་དགེ་ཚོགས་ཇི་སྙེད་མཆིས་པ་ཡིས། །རྒྱལ་བསྟན་འཛིན་ལ་ཟླ་དང་བྲལ་བའི་བཤེས། །སྐུ་ཚེ་བརྟན་ཅིང་མཛད་འཕྲིན་རྒྱས་པར་ཤོག ། ཅེས་པ་འདི་གང་གི་སློབ་བུ་སྦྱིན་པ་དཔལ་ནས་འདོད་ཆུང་ཆོག་ཤེས་ཀྱི་ངང་སྒྲུབ་པ་ཉམས་ལེན་བརྩོན་པ་ལྷོད་མེད་མཛད་པའི་སྐྱེས་བུ་དམ་པ་གཙང་གོང་རྡོ་རྗེ་སློབ་དཔོན་ངག་དབང་བསམ་གཏན་བཟང་པོའི་ཞབས་བརྟན་གསོལ་འདེབས་ཞིག་རྩོམ་བསྐུལ་གནང་བ་ལ་བརྟེན་ནས་དངོས་གྲུབ་དཔལ་གྱིས་དད་གུས་དང་བཅས་བྲིས་པའོ། །སརྦ་མངྒ་ལཾ། ཨོཾ་སྭ་སྟི། སྲིད་གསུམ་མཉམ་མེད་ཤཱཀྱའི་དབང་པོ་དང༌། །ཚེ་ལྷ་རྣམ་གསུམ་སངས་རྒྱས་སྟོང་རྩ་སོགས ། རབ་འབྱམས་ཞིང་གི་འཕགས་ཚོགས་ཐམས་ཅད་ཀྱིས། །དེང་འདིར་སྨོན་པའི་མཐུན་འགྱུར་སྤེལ་བར་མཛོད། །མང་ཐོས་མཁས་པའི་ཡལ་ག་ཡངས་བའི་རྩེར། །སྒྲུབ་པའི་ལོ་འབྲས་ཁུར་གྱིས་ཉེར་དུད་པའི། །འགྲོ་མང་དགེ་ལེགས་འབྱུང་བའི་དཔག་བསམ་ཤིང༌། །ལྔ་བདོའི་ལུས་ཅན་གསོས་སུ་རྟག་བཞུགས་གསོལ། །འདོད་སྡང་རྨོངས་པའི་ནགས་ཀླུང་སྟུག་པོའི་ནང༌། །དབང་མེད་ལས་ཀྱིས་རླུང་གིས་རབ་བདས་པའི། །མགོན་མེད་ཉམ་ཐག་ཀུན་གྱི་སྤྱི་དཔལ་ཆེ། །སེམས་དཔའ་མཆོག་གི་ཞབས་པད་བརྟན་གྱུར་ཅིག ། ནང་དུ་རྡོ་རྗེ་ཐེག་པ་མཆོག་བསྒྲུབས་ཏེ། །ཐུན་མོང་བཀའ་གདམས་ལམ་གྱིས་རྒྱུད་སྦྱངས་པས། །ཀུན་རྟོག་དགྲ་ཆེན་ནང་ནས་རབ་འདུལ་ཁྱེད། །བདག་ཅག་ལྟོས་བཅས་མགོན་དུ་འཚོ་བཞུགས་གསོལ། །ཞེས་མཁན་དཀོན་མཆོག་དཔལ་དང་རིན་དཔལ་གཉིས་ཀྱིས་ཞུ་རྟེན་དང་བཅས་ངེས་དོན་གྱི་བླ་མ་སྤྲུལ་རྡོ་རྗེ་དགྲ་འདུལ་གྱི་ཞབས་བརྟན་གསོལ་འདེབས་ཞུས་པའི་ངོར་དངོས་གྲུབ་དཔལ་གྱིས་དད་གུས་དང་བཅས་བྲིས་པའོ། །མཁན་ཆེན་བསྟན་པ་རབ་རྒྱས་ཀྱི་ཞབས་བརྟན་སྨོན་ཚིག ཨོཾ་སྭ་སྟི། གང་ཐུགས་འདུལ་བའི་བསླབ་ཁྲིམས་དག་པའི་གཞིར། །གཞན་ཕན་སྤྱོད་པའི་རྒྱལ་སྲས་སེམས་དཔའ་ཆེ། །རིམ་གཉིས་རྣལ་འབྱོར་མཆོག་གིས་རྒྱུད་གྲོལ་བ། །གསུམ་ལྡན་རྡོ་རྗེ་འཛིན་དེར་དད་པས་འདུད། །འགྲོ་བའི་བསོད་ནམས་རིན་ཆེན་སྤུངས་པའི་སྤོར། །ཕན་བདེའི་དྲི་བཞོན་བསིལ་བསིལ་ལྡང་དང་ལྷན། །ལུང་རྟོགས་བསྟན་པ་རབ་ཏུ་རྒྱས་བྱེད་པའི། །མཁས་གྲུབ་བཤེས་གཉེན་དམ་པའི་ཞབས་བརྟན་ཤོག ། རིན་ཆེན་རྣམ་གསུམ་བདེན་པའི་བྱིན་རླབས་དང༌། །བདག་ཅག་སྨོན་འདུན་བཟང་པོའི་ནུས་པ་ཡིས། །བསྟན་པའི་གཉེན་གཅིག་མདོ་སྔགས་བདག་པོ་ཁྱེད། །སྐུ་ཚེ་བསྐལ་བ་རྒྱ་མཚོར་ཞབས་བརྟན་ཤོག ། ཡིད་བྱེད་མཚན་མའི་མདུད་པ་རང་སར་གྲོལ། །འོད་གསལ་སྣང་བའི་གཏུམ་མོ་རབ་འབར་བ། །གནས་ལུགས་ཕྱག་རྒྱ་ཆེན་མོའི་བདེན་མཐུ་ཡིས། །གང་སྐུ་འགྲོ་བའི་མོས་ངོར་རྟག་བརྟན་ཤོག། ཅེས་པ་འདི་ནི་ངག་དབང་དངོས་གྲུབ་དཔལ་གྱིས་མཁན་ཆེན་བསྟན་པ་རབ་རྒྱས་ཀྱི་ཞབས་བརྟན་སྨོན་ཚིག་ཏུ་སྨྲས་པའོ། །ཨོཾ་སྭ་སྟི། བླ་མ་ཡི་དམ་སངས་རྒྱས་ཆོས་ཚོགས་དང༌། །ཚེ་ཡི་ལྷ་མཆོག་རྣམས་ཀྱི་ནུས་མཐུ་ཡིས། །སྐྱེས་བུ་དམ་པའི་སྐུ་ཚེ་རབ་བརྟན་ཅིང༌། །བཀྲ་ཤིས་དཔལ་འབར་སྲིད་གསུམ་མཛེས་པར་ཤོག ། དཔལ་ལྡན་བླ་མའི་ངག་གི་དབང་བསྒྱུར་བའི། །འགྲོ་ལ་ལྷག་བསམ་རྒྱ་མཚོའི་བདུད་རྩི་ཡིས། །སྲིད་པའི་ཚ་གདུང་མ་ལུས་ཞི་མཛད་པའི། །དཔལ་ལྡན་བླ་མའི་ཞབས་པད་རྟག་བརྟན་ཤོག ། ཅེས་བླ་མ་ངག་དབང་ལྷག་བསམ་རྒྱ་མཚོ་མཆོག་ལ་ཞབས་བརྟན་གསོལ་འདེབས་ཞིག་དགོས་ཞེས་གང་གི་ཚ་བོ་ཆོས་འབྱོར་རྒྱ་མཚོས་བསྐུལ་ངོར་ངག་དབང་དངོས་གྲུབ་དཔལ་གྱིས་བྲིས་པ་དགེའོ། །ངག་དབང་བསམ་གཏན་བཟང་པོའི་ཞབས་བརྟན་སྨོན་ཚིག ཨོཾ་སྭ་སྟི། དགེ་མཚན་བགྲང་བྱའི་རིན་ཆེན་ལྟེ་བ་རུ། །བཅུ་གཉིས་ཟླ་བའི་རྩིབས་ཀྱི་དྲ་བ་ཅན། །སུམ་བརྒྱ་དྲུག་ཅུའི་མུ་ཁྱུད་ངོམས་པ་འདི། །སྨོན་འདུན་ཤིས་ཚིག་སྒྲོག་བཞིན་བསུ་མ་བྱེད། །ངག་དབང་ལྷ་མོའི་མཁྱེན་གཉིས་འོད་དཀར་དང༌། །པད་དཀར་འཆང་བའི་བརྩེ་བའི་བསམ་གཏན་གཉིས། །བསོད་ནམས་སྐལ་པ་བཟང་པོའི་སྤྱི་དཔལ་དུ། །གཅིག་ཏུ་ཡོངས་བཟླུམས་བླ་མའི་ཞབས་ཟུང་བརྟན། །ཞེས་པ་འདི་གཙང་གོང་སྦྱོར་དྲུག་བའི་ཆོས་ཚན་གཅིག་གིས་བསྐུལ་ངོར་ངག་དབང་དངོས་གྲུབ་དཔལ་གྱིས་སྒྲུབ་པ་ཉམས་ལེན་ལ་ལོ་བཅུ་ཕྲག་གསུམ་ལ་བརྩོན་པའི་༧ ངག་དབང་བསམ་གཏན་བཟང་པོའི་ཞབས་བརྟན་སྨོན་ཚིག་ཏུ་དད་གུས་དང་བཅས་ཕུལ་བའོ། །དགེའོ། །བླ་མ་ཀུན་དགའ་ཚུལ་ལྡན་གྱི་ཞབས་བརྟན་སྨོན་ཚིག ཨོཾ་སྭ་སྟི།ཏིང་འཛིན་གཡོ་མེད་ལྷུན་པོའི་དཔལ་ལ་རོལ། །ཐབས་ཤེས་ཉི་ཟླའི་ཟེར་བརྒྱ་ངོམས་པ་ཡི། །རྡོ་རྗེ་འཛིན་པ་ཀུན་དགའ་ཚུལ་ལྡན་གྱི། །ཞབས་ཟུང་འཁོར་ལོ་རྩིབས་སྟོང་དྲྭ་བ་ཅན། །འགྲོ་བའི་བསོད་ནམས་རིན་ཆེན་སྤུངས་པའི་རྩེར། །འགྱུར་མེད་རྡོ་རྗེའི་ཁམས་སུ་བརྟན་པ་ལ། །མཆོག་གསུམ་བདེན་པའི་བྱིན་རླབས་བསྩལ་དུ་གསོལ། །ཞེས་མཁན་ཤེས་རབ་རིན་ཆེན་གྱི་བསྐུལ་ངོར་ངག་དབང་དངོས་གྲུབ་དཔལ་གྱིས་བླ་མ་ཀུན་དགའ་ཚུལ་ལྡན་གྱི་ཞབས་བརྟན་སྨོན་ཚིག་ཏུ་བྲིས་པའོ། །ཞབས་བརྟན་སྨོན་ཚིག ཨོཾ་སྭ་སྟི། གསང་ཆེན་རྩོལ་བྲལ་གཉུག་མའི་རྣལ་འབྱོར་ལས། །ལྷུན་འགྲུབ་སྤྲོས་བྲལ་དཀྱིལ་འཁོར་རབ་འབྱམས་ཀྱི། །ལྷན་སྐྱེས་དོན་དམ་འཁོར་འདས་སྲོག་ཆེན་དེར། །འོད་གསལ་བསལ་བཞག་མེད་པར་སྐྱབས་སུ་བསྟེན། །ཚེ་དཔག་མེད་མགོན་རྣམ་པར་རྒྱལ་མ་དང༌། །ཡིད་བཞིན་འཁོར་ལོ་རིགས་གསུམ་མགོན་པོ་སོགས། །མ་ལུས་རྒྱལ་དང་སྲས་བཅས་སེམས་དཔའི་ཚོགས། །དེང་འདིར་སྨོན་པའི་མཐུན་འགྱུར་བསྩལ་ཏུ་གསོལ། །སྲིད་གསུམ་སྒྱུ་མའི་གྲོང་ཁྱེར་ཆེན་པོ་རུ། །ཀུན་ཉོན་ལས་དང་རྐྱེན་གྱིས་འཁྱམས་པ་ཡི། །མགོན་མེད་འགྲོ་བ་ཀུན་ཀྱི་མགོན་གཅིག་པུ། །རྣལ་འབྱོར་དབང་ཕྱུག་མཆོག་གི་ཞབས་བརྟན་ཤོག ། འཇིགས་མེད་མི་ཤིགས་བདེ་སྟོང་ཟབ་མོའི་ལམ། །ཚེ་རབས་གོམས་པའི་འབྲས་བཟང་ཕུན་སུམ་ཚོགས། །བསམ་བཞིན་སྤྲུལ་བའི་ཟློས་གར་ཉེར་བཟུང་བའི། །འདྲེན་མཆོག་གང་དེའི་འཕྲིན་ལས་གེགས་མེད་ཤོག ། ཅེས་བསེ་སྤྲུལ་འཇིགས་མེད་ཕུན་ཚོགས་ཀྱི་ཞབས་བརྟན་སྨོན་ཚིག་འདི་དངོས་གྲུབ་དཔལ་གྱིས་གང་གི་སྐུ་ཚེ་བརྟན་ཞིང་མཛད་འཕྲིན་རྒྱས་པའི་སྨོན་འདུན་བཅས་ཕུལ་བ་དགེའོ། །ཞབས་བརྟན་འཕྲིན་ལས་རབ་བརྟན་ཞེས་བྱ་བ་བཞུགས། ཨོཾ་སྭ་སྟི། དོན་དམ་བདེ་གཤེགས་སྙིང་པོའི་བདེན་པའི་མཐུ། །རྨད་བྱུང་མཆོག་གསུམ་བདེན་པའི་ཐུགས་རྗེའི་དཔལ། །ཚེ་ཡི་ལྷ་མཆོག་གསུམ་གྱི་ཐུགས་བསྐྱེད་ཀྱིས། །ཀརྨ་རྡོ་རྗེའི་ཞབས་པད་བརྟན་དུ་གསོལ། །གཞོན་ནུའི་དུས་ནས་སྔོན་སྦྱང་སད་སྟོབས་ཀྱིས། །མཁས་ཤིང་གྲུབ་པའི་རྣམ་ཐར་རྨད་དུ་བྱུང༌། །བཤེས་གཉེན་དམ་པའི་སྐུ་ཚེ་རབ་བརྟན་ཅིང༌། །ས་གསུམ་འགྲོ་བའི་དཔལ་དུ་འགྱུར་བར་ཤོག ། ཅེས་ཞབས་བརྟན་འཕྲིན་ལས་རབ་བརྟན་འདི་ནི་དད་གུས་དང་བཅས་སྟེ་དངོས་གྲུབ་དཔལ་གྱིས་སྨོན་པའོ། །དགེའོ། །ཞབས་བརྟན་གསོལ་འདེབས་འདོད་འཇོའི་བུམ་བཟང་ཞེས་བྱ་བ་བཞུགས་སོ། །ཨོཾ་སྭ་སྟི། དཔལ་ལྡན་སྐུ་བཞིའི་མི་འཇིགས་ལྷུན་པོ་ལ། །འཆི་མེད་ཚེ་ཡི་དཔལ་ན་མངོན་མཐོ་བའི། །ཚེ་ཡི་ལྷ་མཆོག་རྣམས་ཀྱི་དགེ་ལེགས་ཀྱིས། །འགྲོ་བའི་མགོན་པོ་ཞབས་པད་བརྟན་དུ་གསོལ། །གསང་བདག་སྒྱུ་འཕྲུལ་མར་མེ་གཅིག་ཉིད་ལས། །རང་འདྲ་ཆད་པའི་ངུར་སྨྲིག་རྣམ་རོལ་བའི། །དམ་ཆོས་བདུད་རྩིའི་རྩེ་དགའ་འགྱེད་པ་ཡི། །འགྲོ་བའི་དཔལ་གྱུར་ཞབས་པད་བརྟན་དུ་གསོལ། །བསོད་ནམས་འོ་མའི་རྒྱ་མཚོ་འཕྱུར་བ་ལས། །རྒྱལ་བསྟན་རྒྱ་མཚོའི་གསང་མཛོད་འཛིན་པ་ལ། །རླབས་ཆེན་མཛད་པའི་ནོར་བུའི་གཏེར་བརྡོལ་བའི། །དམ་པའི་སྐྱེས་བུའི་ཞབས་པད་བརྟན་དུ་གསོལ། །འཇིགས་མེད་བདེན་གསུང་དམ་ཆོས་ནཱ་དའི་གླུ། །སྙན་དགུར་ལེན་པས་རྒྱལ་བ་རྒྱ་མཚོ་ཡི། །ཟབ་ལམ་རྡོ་རྗེའི་སྙིང་བོ་ཐང་མལ་བརྡལ། །འགྲོ་བའི་མགོན་པོའི་ཞབས་པད་བརྟན་དུ་གསོལ། །དབང་ལུང་མན་ངག་བདུད་རྩིའི་ཆུ་རྒྱུན་གྱིས། །སྐལ་བཟང་གདུལ་བྱའི་རེ་སྐོང་དཔག་བསམ་ཤིང༌། །དགོས་འདོད་ཀུན་འབྱུང་རྗེ་བཙུན་མཁས་གྲུབ་ཀྱི། །སྐུ་ཚེ་མི་འགྱུར་བསྐལ་བརྒྱར་ཞབས་བརྟན་ཤོག ། གདམས་ངག་ཆོས་ཀྱི་དཔལ་ལ་དབང་བསྒྱུར་བ། །འཇིགས་མེད་རྒྱལ་བསྟན་འཛིན་པའི་མངའ་བདག་ཆེ། །གསང་གསུམ་མི་འགྱུར་རྡོ་རྗེའི་ཁམས་བརྟན་ནས། །མཛད་འཕྲིན་འོད་སྣང་ཕྱོགས་བཅུར་རྒྱས་པར་ཤོག ། ཅེས་པ་འདི་བརྟན་ཞུགས་ཆེད་དེབ་རྩོམ་སྒྲིག་ཁང་ནས་འབྲི་བསྐུལ་གནང་བའི་ངོར་དངོས་གྲུབ་དཔལ་གྱིས་བྲིས་པ་དགེའོ།། །། ཤིས་ཚིག་དང་སྨོན་ཚིགཤིས་ཚིག་དང་སྨོན་ཚིག སྐུ་གསུམ་ཐོབ་ཕྱིར་སྨོན་པ། ཚོང་རའི་མི་ཚོགས་འདྲ་བའི་གྲྭ་སློབ་ཚོགས། །འདུས་ཀྱང་རུང་ལ་འབྲལ་ཡང་ཞེན་དོན་མེད། །རང་སེམས་ཕན་པའི་ཐོས་བསམ་སྒོམ་པ་ཡི། །དམ་པའི་ཆོས་ལ་ནན་ཏན་བྱེད་པར་སྨོན། །འཇིག་རྟེན་ཆོས་བརྒྱད་སྟོན་གྱི་སྤྲིན་ཚོགས་འདྲ། །དེ་སླད་སྲིད་འབྱོར་བདེ་བས་ཡིད་མ་ཚིམ། །གཏན་བདེའི་ཐར་བའི་ལམ་སྣ་ཟིན་པའི་ཕྱིར། །ངེས་འབྱུང་བསམ་པས་རང་རྒྱུད་གཏམ་པར་སྨོན། །མ་རྒན་འགྲོ་རྣམས་སྲིད་མཚོར་རྟག་འཁྱམ་ན། །བཅོས་མིན་བརྩེ་བས་སེམས་མཆོག་བསྐྱེད་བྱས་ཏེ། །ཡང་དག་ལྟ་བས་ལྟ་ངན་མུན་བཅོམ་ནས། །དོན་གཉིས་མཐར་ཕྱིན་སྐུ་གསུམ་ཐོབ་ཕྱིར་སྨོན། །ངག་དབང་དངོས་གྲུབ་དཔལ་གྱིས་སྨྲས་སོ། །ཕུན་ཚོགས་དགེ་ལེགས་ལྡན་པའི་དཔལ་མངའ་བ། །རྣམ་དཔྱོད་ལོ་འདབ་ཡོན་ཏན་འབྱོར་བའི་དཔྱིད། །ཆུ་བོའི་རྒྱུན་བཞིན་ཚེ་རིང་རྟག་བརྟན་ཅིང༌། །དམ་ཆོས་བདུད་རྩིའི་དཔལ་ལ་རོལ་བར་སྨོན། །ལུགས་གཉིས་ཀྱི་མཁྱེན་དཔྱོད་ཡངས་བ་གང་གི་སྐྱེས་སྐར་ལ་བཀྲ་ཤིས་བདེ་ལེགས་ཞུ། ཐོག་མར་རྒྱ་ཆེན་གཞུང་ལ་ཐོས་བསམ་གནང༌། །བར་དུ་སྤང་བླང་འཇུག་ལྡོག་མ་ནོར་བྱ། །མཐའ་མར་གཡེང་མེད་སྒོམ་པས་ཉམས་ལེན་བརྩོན། །བྱ་བཞག་གང་བྱེད་བསྟན་འགྲོའི་དོན་ཆེན་སྨོན། །ཅེས་མི་ཚེ་གཅིག་གི་མདུན་ལམ་འདི་ལྟར་འཚོལ་བར་སྨོན་པ་དང་བཅས་ངག་དབང་དངོས་གྲུབ་དཔལ་གྱིས་བྲིས་པ་དགེའོ། །ལྷག་བསམ་གསེར་གྱི་མཎྡྲྲལ་གཙང་མའི་གཞིར། །ཚུལ་ཁྲིམས་བཀྲ་ཤིས་སྡུག་གུའི་རེ་ཁཱ་ཅན། །བསྟན་གཉིས་ཅོད་པན་ཐོགས་པའི་ངུར་སྨྲིག་འཛིན། །སྡེ་སྣོད་འཛིན་པའི་མཁན་པོར་མངའ་གསོལ་ལོ། །སྡེ་སྣོད་འཛིན་པ་ལྷ་རམས་པ་མཁན་པོ་ཚུལ་ཁྲིམས་མཆོག་འབུམ་རྙིང་དགོན་གྱི་མཁན་ཁྲིར་མངའ་གསོལ་ལ་དགའ་གུས་བཅས་ངག་དབང་དངོས་གྲུབ་དཔལ་ནས་གུས་ཕུལ། ཐུབ་པའི་གསུང་རབ་ཆོས་སྒོ་བྱེ་བའི་ཁྲོད། །ཀླུ་དབང་གཙུག་གི་ནོར་བུའི་དོ་ཀེར་བཞིན། །ཡུམ་གྱི་དགོངས་ཆེན་ཐོས་སྒོམ་བྱེད་པ་ཡི། །བློ་གྲོས་བཟང་པོའི་སློབ་མཐར་ཕྱིན་ལ་རངས། །ཞེས་པ་འདི་དངོས་གྲུབ་དཔལ་གྱིས་ཕུལ་བའོ། །ཨོཾ་སྭ་སྟི། བགྲང་ཡས་བསོད་ནམས་རྡུལ་མང་བརྩེགས་པའི་སྤོར། །མཁྱེན་གཉིས་འོད་བརྒྱས་ཤེས་བྱ་ཀུན་གསལ་ཞིང༌། །བརྩེ་ཆེན་སྟོན་པ་འགྲོ་བའི་གསོས་གྱུར་དེས། །བཀྲ་ཤིས་སྟོབས་བཅུས་སྲིད་འདི་ཡོངས་བཟླུམ་ཤོག ། སྐྱཻས་པའི་སྐྲ་དང་བཏགས་པའི་ཕུ་ཐུང་ལྷན། །སྲིད་འདུན་སེམས་པ་མཆིལ་མ་བཞིན་བོར་ཏེ། །ཐུབ་པའི་རྟུལ་ཞུགས་གཙང་མས་རབ་བརྒྱན་པའི། །ཉིང་དོན་ཐོས་བསམ་སྒོམ་ལ་འབད་འདི་རྨད། །ཐུབ་པའི་ཞལ་སྐྱིན་ཆོས་སྒོ་བྱེ་བའི་ཁྲོད། །ཀླུ་དབང་གཙུག་གི་ནོར་བུའི་དོ་ཀེར་བཞིན། །རྒྱལ་ཡུམ་དོན་ཀུན་ལྷམ་མེར་གསལ་བྱེད་ཀྱི། །རྣམ་དཔྱོད་ཉི་མའི་འོད་སྟོང་སྤྲོ་ལ་རངས། །ཞེས་པ་འདི་ནི་ངག་དབང་དངོས་གྲུབ་དཔལ་གྱིས་གངས་ལྗོངས་རིས་མེད་མཐོ་སློབ་ཀྱི་ཐེངས་དགུ་བའི་ཕར་ཕྱིན་མཐར་ཕྱིན་འཛིན་གྲྭའི་དཔྱད་རྩོམ་ཡུམ་དོན་ཀུན་གསལ་གྱི་ཤིས་ཚིག་ཏུ་རྗེས་སུ་ཡི་རང་བཅས་ཕུལ་བ་དགེའོ། །ཨོཾ་སྭ་སྟི། ཀུན་རྟོག་སྤྲིན་རིས་དབྱིངས་སུ་དག་པ་ལས། །ཐུགས་རྗེའི་ཆུ་འཛིན་ཕན་པའི་ཆབ་རྒྱུན་གྱིས། །སྐྱེ་དགུའི་བསམ་པའི་ལོ་འབྲས་སྨིན་བྱེད་པ། །ཐུབ་དབང་ལྷ་ཡི་ལྷ་དེར་ལན་བརྒྱར་འདུད། །ཐོག་མེད་དུས་ནས་ད་ལྟའི་སྲིད་འདི་བར། །སྐྱེ་ཤིའི་འཁོར་བ་རེས་མོས་བསྐོར་ན་ཡང༌། །དལ་བའི་རྟེན་ལ་ངུར་སྨྲིག་རྒྱན་འཆང་བ། །འདི་ཙམ་ཞིག་ཅེས་ཉིང་དོན་སྒྲུབ་པ་གལ། །དེ་སླད་འདས་པའི་བགྲང་བྱའི་རྡོག་པོ་འགར། །ཉིན་དང་ཞག་ལ་བརྩོན་པའི་ཁུར་བསྐྱེད་དེ། །ཕ་རོལ་ཕྱིན་གཞུང་ཐོས་བསམ་གོམས་པ་ལ། །བདག་ཀྱང་ཡི་རང་བསམ་པ་རབ་ཏུ་སྐྱེས། །ད་ལྟར་ཐོབ་པའི་མི་ཚེའི་ལམ་ཁ་འདི། །ཚེ་འདི་བདེ་ཞིང་ཕྱི་མར་ཕན་པ་དང༌། །རང་གྲོལ་གཞན་འདྲེན་ལམ་གྱི་མཆོག་རིག་སྟེ། །བློ་སེམས་གཅིག་གིས་ཡུན་དུ་འབད་པར་རེ། །བག་ཡོད་རྟུལ་ཞུགས་ཁྲིམས་ཀྱི་གཞི་བརྟན་ཞིང༌། །གཡོ་མེད་དད་དམ་བརྩོན་པའི་ཏིང་འཛིན་ལས། །ཟབ་རྒྱས་ཆོས་རབ་རྣམ་པར་འབྱེད་པ་ཡི། །བསླབ་གསུམ་ནོར་གྱིས་ཡིད་རབ་འགེངས་གྱུར་ཅིག ། ཅེས་ཕར་ཕྱིན་ཐེངས་བདུན་པའི་འཛིན་གྲྭའི་དཔྱད་རྩོམ་གྱི་ཤིས་ཚིག་ཏུ་དངོས་གྲུབ་དཔལ་གྱིས་བྲིས་པ་དགེའོ། །བསོད་ནམས་རྡུལ་མང་བརྩེགས་པའི་ས་འཛིན་སྤོར། །གཟུགས་སྐུའི་མེ་ཏོག་སྨིན་པའི་དུས་བཟང་ལ། །སྐུ་ཚེ་བསྐལ་བརྒྱར་ཞབས་པད་བརྟན་པ་དང༌། །མཛད་འཕྲིན་མཐར་རྒྱས་ཡོང་བའི་འཁྲུངས་སྐར་བསུ། །དངོས་གྲུབ་དཔལ་གྱིས་བྲིས་པའོ། །རྣམ་པར་རྒྱལ་དང་ཡིད་བཞིན་འཁོར་ལོ་དང༌། །ཚེ་དཔག་མེད་མགོན་ལ་སོགས་སྐྱབས་མཆོག་གི། །མཁྱེན་བརྩེ་ནུས་པའི་ཡེ་ཤེས་ཆོས་ཆེན་གྱིས། །གང་སྐུ་འགྲོ་བློའི་ཉི་མར་རྟག་བརྟན་ཤོག། ཅེས་པ་འདི་ནི་གཞན་གྱི་ངོར་དངོས་གྲུབ་དཔལ་གྱིས་བྲིས་པའོ། །ངག་གི་དབང་ཕྱུག་ཐུབ་དབང་ཉི་མའི་གཉེན། །ལུང་རྟོགས་བསྟན་འཛིན་འཕགས་བོད་མཁས་གྲུབ་སོགས། །ཤེས་རབ་སྤྱ ན་ལྡན་སྐྱབས་གནས་རྒྱ་མཚོ་ཡིས། །གང་སྐུ་བརྟན་ཞིང་མཛད་འཕྲིན་མཐར་རྒྱས་ཤོག ། ཅེས་པ་འདི་ནི་གང་གི་སློབ་ཚོགས་ཀྱི་ངོར་དངོས་གྲུབ་དཔལ་གྱིས་བྲིས་པའོ། །ལུང་དང་རིགས་ལམ་མེད་པའི་དཔེ་ཆ་བ། །ལག་སྡོམ་དཔའ་བོ་གཡུལ་ལ་ཆས་པ་འདྲ། །རང་གི་ནང་འགལ་རང་གིས་མི་ཤེས་པར། །འཁོར་གསུམ་མགོ་བོ་འཁོར་བ་ཤེས་པར་གྱིས། །དངོས་གྲུབ་དཔལ་གྱིས། མི་ལུས་ཡིད་བཞིན་ནོར་བུ་གཏེར་བའི་བདག། དྲིན་ཆེན་མ་ཡི་བརྩེ་སེམས་ལྷད་མེད་པར། །དྭངས་གཙང་ཆུ་བོའི་རྒྱུན་འབབ་ལོ་བརྒྱ་ཚོ། །དམ་ཆོས་བདུད་རྩིའི་དཔལ་ལ་སྤྱ ོད་པར་སྨོན། །ཞེས་པ་འདི་ཆོས་གྲོགས་དམ་པ་མཁན་ཆོས་དར་གྱི་མ་དྲིན་མོ་ཆེ་ལོ་གྲངས་བརྒྱད་ཅུར་ཕེབས་པའི་དུས་བཟང་ལ་དངོས་གྲུབ་དཔལ་གྱིས་ཕུལ་བ་དགེའོ། །བོད་ཀྱི་ཟོ་དོར་རྨ་ཆེན་གྱི། །གངས་རིའི་འདབས་ཀྱི་གསེར་ལྡན་གཞིར། །འཚར་ལོངས་བྱུང་བའི་དུས་བཟང་ལ། །བཀྲ་ཤིས་བདེ་ལེགས་འབྱུང་བར་ཤོག། ཅེས་ཡེ་ཤེས་ཤེས་རབ་ཀྱི་སྐྱེས་སྐར་ལ་སིདྡྷི་ཤྲཱི་ནས་ཕུལ་བའོ། །ཨོཾ་སྭ་སྟི། ངོ་མཚར་སྐྱེ་རབས་སྤྲུལ་བའི་བཀོད་པ་དང༌། །ས་ལམ་སྤངས་རྟོགས་ལམ་གྱི་རྩལ་རྫོགས་པའི། །རང་བྲིས་ཕྱི་ནང་གསང་བའི་ལེགས་གསུང་གིས། །ཡིད་བློ་བརྟན་པ་འཕྲོག་པའི་རྣམ་ཐར་ཅན། །བྱིས་པའི་དུས་ནས་གཞན་ལ་མ་བསླབས་པར། །འཕགས་ཡུལ་བརྡ་སྤྲོད་ཅི་དགར་སྨྲ་བ་ཡི། །སྐད་གཉིས་སྨྲ་བ་ཏཱ་ར་ནཱ་ཐ་ཞེས། །གངས་ཅན་མཁས་གྲུབ་ཁྲི་མ་འབུམ་གྱི་དབུས། །མཚན་གྱི་སྙན་པ་ཉི་ཟླ་བཞིན་འབར་བ། །གསུམ་ལྡན་རྡོ་རྗེ་འཛིན་པའི་གཙོ་བོ་དེས། །འཕགས་ཡུལ་ཆོས་ཀྱི་ཆུ་གཏེར་འཁྲིགས་པ་ལས། །གངས་ཅན་སྐྱེ་འགྲོའི་དཔལ་དུ་ལེགས་དྲངས་པ། །ད་ལྟར་ཉམས་མེད་ཇི་སྙེད་ཐོབ་པ་ཀུན། །ལྷག་བསམ་དྲི་མེད་འབད་པའི་ཁུར་བཞེས་ཏེ། །རིག་པའི་རྡོ་རྗེས་ཕྱོགས་བསྡུས་སྤེལ་བའི་དགེས། །རྒྱལ་བསྟན་དར་རྒྱས་སྐྱེ་རྒུ་ཀུན་བདེ་ཞིང༌། །ཁྱད་པར་ངེས་དོན་སྙིང་པོའི་རང་ལུགས་འཛིན། །ཀུན་མཁྱེན་ཆེན་པོ་ཤེས་རབ་རྒྱལ་མཚན་གྱི། །ཆོས་བརྒྱུད་མི་ནུབ་ཕྱོགས་མཐར་དར་རྒྱས་ཤོག། ཅེས་པ་འདི་ནི་སྨྲ་བའི་སྤོབས་བ་གཟེངས་སུ་མཐོ་བའི་རིག་པའི་རྡོ་རྗེས་རྗེ་བཙུན་ཏཱ་ར་ནཱ་ཐའི་མདོ་རྒྱུད་ཀྱི་གཞུང་ལུགས་བསྒྱུར་བ་ཕྱོགས་བསྡུས་མཛད་སྐབས་ཆེད་བརྗོད་དུ་ངག་དབང་དངོས་གྲུབ་ཀྱིས་ཕུལ་བའོ། །བཀྲ་ཤིས་གང་ཞིག་གནམ་ལོ་ལྕགས་གླང་ཤར། །བཀྲ་ཤིས་གང་ཞིག་ནད་མེད་བདེ་ལྡན་ཞིང༌། །བཀྲ་ཤིས་གང་ཞིག་བསམ་དོན་ཡིད་བཞིན་འགྲུབ། །བཀྲ་ཤིས་གང་ཞིག་རྒྱལ་ཁམས་བདེ་ལེགས་ཤོག། ངག་དབང་དངོས་གྲུབ་དཔལ་གྱིས་སྨོན་པའོ། །ཐུབ་མཆོག་དགོངས་པ་རྡོ་རྗེ་ཐེག་པའི་ཚུལ། །རིག་འཛིན་དུ་མས་ཤིང་རྟས་ལེགས་དྲངས་པ། །དངོས་གྲུབ་རླབས་ཕྲེང་འབུམ་གྱིས་ལེགས་བརྒྱན་ཏེ། །ཕྱི་མཐའ་བར་དུ་ནམ་ཡང་ཉམས་མེད་ཤོག ། དངོས་གྲུབ་དཔལ་གྱིས་སྨོན་པའོ། །འགྲོགས་ཡུན་རིང་ན་འཁོར་བའི་ཆོས་ཀུན་ལ། །སུན་སྣང་མི་སྐྱེ་གཅིག་ཀྱང་མི་སྲིད་པས། །དོན་གྱི་ངལ་གསོ་ཐར་བ་རིན་པོ་ཆེ། །རང་སེམས་ཆོས་ཀྱི་དྲི་ངད་ལྡང་བར་སྨོན། །ཞེས་དངོས་གྲུབ་དཔལ་ནས་དུས་འཁོར་གྱི་རྒྱུད་གསུང་བའི་ནག་ཟླའི་ཚེས་༡༥དུས་ཆེན་ལ། སྡིག་ཟས་ཕྱིར་དུ་གཞན་སྲོག་ཟ་བ་སོགས། །གཞན་ལ་གནོད་པའི་སྒོ་གསུམ་རབ་འདུལ་ནས། །བྱམས་དང་བརྩེ་བས་མ་རྒན་འགྲོ་རྣམས་དོན། །འཁོར་བ་སྲིད་མཐའི་བར་དུ་འབད་པར་སྨོན། །བདག་ལ་བརྟེན་ནས་སེམས་ཅན་ཐམས་ཅད་ལ། །ནམ་ཡང་གང་དུ་གནོད་པ་མེད་པ་དང༌། །བདག་གིས་བྱ་བ་གང་དང་གང་རྩོམ་པ། །ཐམས་ཅད་ཕན་བདེའི་དཔལ་དུ་འགྱུར་བར་ཤོག ། ངག་དབང་དངོས་གྲུབ་དཔལ་གྱིས་བྲིས་པ་དགེའོ། ། སློབ་གསོའི་སྐོར།སློབ་གསོའི་སྐོར། གྲྭ་བས་ལྒང་ལི་རྩེ་བའི་ཉེས་སྐྱོན། དགེ་བཤེས་དངོས་གྲུབ་དཔལ། འདུལ་བ་ལུང་གཞི་ལས། རྩེད་མོ་དག་ལས་དབེན་པར་བྱའོ། །ཞེས་རབ་ཏུ་བྱུང་བ་རྣམས་རྩེད་མོ་ལས་དབེན་དགོས་པར་གདམས་ཡོད་ལ། ལུས་དབེན་པ་ནི་མ་བསྟེན་ན། །སེམས་དབེན་པ་ནི་རྙེད་མི་འགྱུར། །ཞེས་ལུས་རྩེད་མོ་སོགས་ཀྱིས་དབེན་པར་མ་བྱས་ན་སེམས་ཉོན་མོངས་པ་སོགས་ཀྱིས་དབེན་པའི་ཐབས་མེད་པ་རེད། སྤོ་ལོ་རྩེ་བའི་ཚེ་ལུས་མི་དབེན་པར་མ་ཟད་ངག་ནས་ཀི་སྐད་དམག་སྐད་རྒྱབ་པ་དང་མནའ་སྐྱེལ་བ་དང༌། སེམས་ནས་ཁོང་ཁྲོ་ཕྲག་དོག་འགྲན་སེམས་སོགས་ཀྱང་སྐྱེ་ཡོང་གི་ཡོད་པ་རེད། དེའི་དབང་གིས་ཆོས་གྲོགས་རྣམས་དང་ཕན་ཚུན་བར་འཛིང་རྩོད་བརྒྱབས་ནས་མཐུན་འབྲེལ་གཏོར་བརླག་དང་རྡོ་རྗེ་སྤུན་ལ་ཁྲོས་པའི་རྩ་ལྟུང་འབྱུང་བ་སོགས་ལས་ངན་མི་བཟད་པ་གསོག་པ་དང༌། རིན་ཐང་དང་བྲལ་བའི་དུས་ཚོད་འཕྲོ་བརླག་གཏོང་བ། སྤོ་ལོ་རྩེ་བར་ཧ་ཅང་དགའ་བ་རྣམས་ཐོས་བསམ་སྒོམ་གསུམ་ལ་མོས་པ་མེད་པར་ལུས་ངག་ཡིད་གསུམ་གྱི་སྤྱོད་པ་ཆོས་དང་མ་འདྲེས་པ་དང༌། བག་མེད་པའི་སྤྱོད་པའི་གྲངས་སུ་ཞུགས་པར་འགྱུར་བ་མངོན་སུམ་གྱིས་གྲུབ་པ་ཡིན་ལ། ཁྱིམ་པ་སུན་འབྱིན་གྱི་ལས་བསགས་ནས་བྱ་ནག་གི་གྲིབ་མ་བྱ་དཀར་ལ་ཕོག་པས་དགེ་འདུན་པ་སྤྱི་དང་བོད་བརྒྱུད་ནང་བསྟན་སྤྱི་ལ་གནོད་པ་ལྟ་བ་ཐད་ཤར་རེད། དེང་སང་གི་གྲྭ་བ་དག་གིས་སྤོ་ལོ་རྩེས་བའི་རྐྱེན་གྱིས་མ་འོངས་བའི་བསྟན་དགོན་གྱི་མིག་དཔེ་གྲྭ་ཆུང་རྣམས་ལའང་ལྒང་ལི་རྩེ་བའི་གོམས་གཤིས་ངན་པ་ཞིག་སེམས་སུ་འཇོག་པར་བྱེད་པས། གྲྭ་ཆུང་དག་གི་མ་འོངས་བའི་འགྲོ་ཕྱོགས་དང་ཀུན་སྤྱོད་ཚང་མར་གནོད་པ་སྐྱེལ་བར་མ་ཟད། ལྒང་ལི་རྩེ་སྐབས་ཕལ་ཆེ་བས་ཁྱིམ་པའི་ཆས་བྱེད་བཞིན་ཡོད་པས་བར་མ་རབ་བྱུང་ལས་ཉམས་པ་སོགས་ཆོས་འཇིག་རྟེན་གང་ལ་བསམ་ན་སྐྱོན་ཁོ་ན་ལས་མ་འདས། ཁ་ཅིག་གིས་ལུས་ཀྱི་བདེ་ཐང་དང་ལུས་རྩལ་གྱི་ཆེད་སྤོ་ལོ་རྩེས་ན་བཟང་རབས་བཤད་པ་ཡོད་ཀྱང་དེ་ནི་གནས་ལུགས་ཞིབ་ཕྲ་ནས་བསམ་བློ་མ་བཏང་བ་ཞིག་རེད། དེའི་རྒྱུ་མཚན་ནི། སྤྱིར་སྤོ་ལོ་རྩེ་བ་དེ་འཛམ་གླིང་གི་རྩེད་མོ་ཞིག་ཡིན་ཀྱང་ཤུགས་དྲག་པའི་ལུས་ཀྱི་རྩེད་མོ་ཡིན་པས་ལུས་ཀྱི་རྩ་དང་རུས་པ་ལ་གནོད་པ་རེད། ཞིང་ཆེན་སོགས་ན་རུས་པའི་སྨན་ཁང་རྣམས་ན་གཙོ་བོ་སྤོ་ལོ་རྩེ་མཁན་དག་གི་སྨན་ཁང་ཡོད་པ་རེད། རྒྱུན་དུ་སྤོ་ལོ་རྩེ་མཁན་རྣམས་ཀྱི་རུས་པ་དང་རྩ་རྒྱུས་ལ་སྐྱོན་ཤོར་བ་དང༌། རྐང་ལག་ཆག་ཀྲུམ་བྱུང་བ་སོགས་ལུས་ལ་རྨས་སྐྱོན་མང་དུ་འབྱུང་བཞིན་ཡོད་པ་མངོན་གསལ་ཡིན་པ་རེད། སྤྱིར་འཛམ་གླིང་ན་ལུས་ཀྱི་བདེ་ཐང་གི་ཆེད་ལུས་རྩལ་མང་ན་ཡང་ང་ཚོ་ནང་བ་སངས་རྒྱས་པ་ཞིག་ལ་མཚོན་ན་ལུས་ཀྱིས་ཕྱག་སྐོར་དང་ངག་གིས་ཁ་འདོན་དང་སེམས་ཀྱིས་བྱམས་བརྩེ་སོགས་བསྒོམ་ན་ལུས་སེམས་གཉིས་ཀ་ལ་བདེ་ཐང་ཡོང་ཐུབ་པར་མ་ཟད་དགེ་བ་ཡང་འགྲུབ་པ་རེད། ལྷག་པར་གྲྭ་བ་ཞིག་ལ་མཚོན་ན་རྩ་རླུང་དང་ལུས་སྦྱོང་འཁྲུལ་འཁོར་སོགས་ལ་སྦྱང་ན་ལུས་སེམས་བདེ་ཞིང་ཚེ་རིང་བར་འགྱུར་བ་རེད། ལྒང་ལི་རྩེ་བ་ལ་བརྟེན་ནས་རང་དང་རང་གྲོགས་ཀུན་སློབ་གཉེར་སོགས་ཡལ་བར་དོར་ནས་བག་མེད་པའི་སྤྱོད་པ་ལ་ཞུགས་པར་འགྱུར་བ་སོགས་རང་གཞན་གཉིས་ཀ་ལ་གནོད་པས་བླ་མ་དང་དགོན་དཔོན་སོགས་ཆོས་ཀྱི་སྣེ་ཁྲིད་རྣམས་ཀྱིས་བསྟན་དོན་དུ་བསམ་པ་དང་བཤད་པ་དང་སྒྲུབ་ཕོད་པ་མཛད་པར་ཞུ། ལོ་དུ་མའི་རིང་གི་སེམས་ཁྲལ་འདི་ལོ་སར་ལ་ཉེ་བའི་སྐབས་འདིར་བདག་ལ་རེ་ལྟོས་བྱེད་པའི་འབྲེལ་ཡོད་རྣམས་ལ་དངོས་གྲུབ་དཔལ་ནས་གུས་ཕུལ། ནང་བསྟན་རིག་གཞུང་གིས་སྤྱི་ཚོགས་འདྲ་མཉམ་ཐད་ལ་ནུས་པ་གང་འདྲ་ཐོན་ཞེས་པའི་གླེང་གཞིའི་ཐད་ནས་ཅུང་ཟད་བརྗོད་པ།ནང་བསྟན་རིག་གཞུང་གིས་སྤྱི་ཚོགས་འདྲ་མཉམ་ཐད་ལ་ནུས་པ་གང་འདྲ་ཐོན་ཞེས་པའི་གླེང་གཞིའི་ཐད་ནས་ཅུང་ཟད་བརྗོད་པ། ༼༡ནང་བསྟན་ཐོག་མར་བྱུང་རིམ་གྱི་ཡུལ་དུས་ཀྱི་གནས་བབས་བརྗོད་པའི་སྒོ་ནས་སྤྱི་ཚོགས་འདྲ་མཉམ་བསྐྲུན་པ།༽ནང་བསྟན་རིག་གཞུང་ཐོག་མར་བྱུང་རིམ་གྱི་དབང་དུ་བྱས་པ་ཡིན་ན་ཡང་རིགས་རུས་མཐོ་དམན་དང་དྲང་བདེན་མ་ཡིན་པའི་སྤྱི་ཚོགས་ལ་ཁ་གཏད་ཅིང་ངོ་རྒོལ་བྱས་ནས་འོང་བ་ཞིག་རེད།ནང་བསྟན་གྱི་སྟོན་པ་ཁོང་ཐོག་མར་སེར་སྐྱ་གྲོང་ཁྱེར་གྱི་རྒྱལ་བོའི་སྲས་སུ་འཁྲུངས་ཤིང༌། དེའི་སྐབས་ཀྱི་རྒྱ་གར་གྱི་གནས་བབ་ནི་འཆམ་མཐུན་མ་ཡིན་པའི་སྤྱི་ཚོགས་ཤིག་སྟེ། བྲམ་ཟེ་རྣམས་ཚངས་པའི་དབུ་ལས་བྱུང་བས་རིགས་དང་གོ་ས་མཐོན་པོར་བཞག་ནས། རིག་བྱེད་རྣམ་པ་བཞིའི་གཞུང་ལུགས་དག་གི་བདག་དབང་ཁོང་ཅག་ལས་གཞན་ལ་མེད་པ་དང༌། རིགས་རུས་གཞན་པ་རྣམས་ཀྱིས་དེ་ལ་བྲམ་ཟེ་རྣམས་ཀྱི་འགྲེལ་ཚུལ་ལས་ལོག་པ་འགྲེལ་བཤད་མི་ཆོག་པ་རེད། ད་དུང་དབྱར་དགུན་སྟོན་དཔྱིད་ཀྱི་བྱུང་རིམ་ཐམས་ཅད་བྲམ་ཟེ་རྣམས་ཀྱིས་ཆོ་ག་དང་མཆོད་སྦྱིན་སྤེལ་བ་ལྟ་བུའི་མཐུ་ལས་བྱུང་བར་མ་ཟད། དབུལ་བོ་དང་དམན་པ་སུ་ཞིག་ཡིན་ཡང་མི་ཤི་བ་ལྟ་བུའི་སྐབས་སུ་ཅི་ལྟར་བྱས་ཀྱང་བྲམ་ཟེ་རྣམས་ལ་ཡོན་མང་དུ་ཕུལ་དགོས་པའི་གནས་བབས་ཤིན་ཏུ་སྐྱོ་བ་ཞིག་རེད། རྒྱལ་རིགས་ཚངས་པའི་ལག་ལས་བྱུང་བས་ཆབ་སྲིད་ཀྱི་བདག་དབང་ཁོང་ཅག་ལས་གཞན་ལ་མེད། རྒྱལ་རིགས་ལ་བྲམ་ཟེའི་མདུན་ནས་རིག་བྱེད་བསླབ་པའི་བདག་དབང་ཡོད་ཀྱང༌། དེ་ལ་འགྲེལ་བཤད་བྱས་ཏེ་གཞན་ལ་སྟོན་པའི་དབང་མེད་ལ། བྲམ་ཟེ་རྣམས་ལ་རྒྱལ་བོའི་མཆོད་གནས་སུ་བཞུགས་ཏེ་དབུ་བླ་བྱེད་པའི་གོ་ས་ཡོད་ཀྱང་སྲིད་དབང་བདག་འཛུགས་བྱེད་པའི་དབང་ཆ་མེད། རྗེ་རིགས་རྣམས་ནི་ཚངས་བའི་བརླ་གཉིས་ལས་སྐྱེས་པ་ཡིན་པས་ཚོང་ལས་ཚེམ་བཟོ་སོགས་སྤྱི་ཚོགས་ཀྱི་ལས་གཉེར་མཐོ་རིམ་མང་བོ་ཁོང་ཅག་ལ་གཉེར་བའི་དབང་ཆ་ཡོད། དམངས་རིགས་རྣམས་ནི་ཚངས་པའི་རྐང་བ་གཉིས་ལས་སྐྱེས་པ་ཡིན་པས་གོང་གི་རིགས་གསུམ་གྱིས་སྒྲུབ་པར་མི་འདོད་པའི་གད་སྙིགས་བསལ་བ་དང་བ་གླང་འཚོ་སྐྱོང་སོགས་ཀྱི་བྱ་བ་བྱེད་དགོས། ད་དུང་རིགས་བཞི་བོ་གང་དུའང་མ་གཏོགས་པའི་རྡོལ་བའི་རིགས་ལྟ་བུ་རིགས་ཐོར་བུ་འགའ་ཡོད་ལ། དེ་དག་ཀྱང་ཚངས་པའི་རྐང་བ་ལས་བྱུང་བ་ཡིན་ཞིང༌། རིགས་དམན་རྡོལ་བ་དང་ཉ་བའི་རིགས་ལྟ་བུ་རྣམས་ཀྱི་ཁང་བའང་གྲོང་ཁྱེར་དུ་མཉམ་གཅིག་ཏུ་བྱེད་མི་ཆོག་པར་གྲོང་ལས་ཕྱི་རོལ་ཏུ་བྱེད་དགོས་པ་རེད། གལ་སྲིད་རིགས་དམན་པ་ཞིག་གིས་རིགས་མཐོན་པོ་ཞིག་ལ་ལག་པས་འཆང་ཙམ་བྱས་ཚེ། རིགས་མཐོན་པོ་དེས་རང་ལ་གྲིབ་ཕོག་པར་འདོད་ནས་གྲིབ་སེལ་གྱི་ཆོ་ག་འདོན་པ་དང༌། མཚམས་རེར་རིགས་དམན་པ་དེར་གཅར་རྡུང་བཅས་གཏོང་གི་ཡོད། འོན་ཀྱང་རིག་བྱེད་ཀྱི་གཞུང་ལུགས་ཁག་དང༌། ཡུལ་དེའི་མི་བྱིངས་ཀྱི་འདོད་ཚུལ་ལ་རིགས་སོ་སོ་ལ་དང་པོ་ཉིད་ནས་རང་ཉིད་ཀྱི་དབང་ནུས་ལ་ཚད་བཟུང་ཡོད་པ་དང༌། མི་སོ་སོའི་ངོས་ནས་ཀྱང་དེ་ལྟར་ངོས་ལེན་ལེགས་པར་བྱས་ཏེ་འཚོ་བ་ནི་བདེ་སྐྱིད་ཅིག་ཡིན་པར་བཤད་ཀྱིན་ཡོད། དེ་ལྟ་ནའང་མི་ཐམས་ཅད་དང་པོ་ཉིད་ནས་གཞུང་ལུགས་དང་རིག་པའི་གནས་ལ་མཁས་པ་མ་ཡིན་པར། རིམ་གྱིས་སྦྱང་ན་མཁས་པར་འགྱུར་འགྲོ་བ་དང༌། བྱིས་པ་ཆུང་ཆུང་ཞིག་ལ་དང་ཐོག་རང་ཉིད་སྐྱེས་མ་ཐག་པ་ན་ལས་ཀ་གཉེར་བའི་ནུས་པ་མེད་ཀྱང༌། ན་ཚོད་རིམ་གྱིས་སྨིན་པ་ན་ཤེད་ཤུགས་རྒྱས་པ་སོགས་ཆོས་ཉིད་ཀྱིས་གྲུབ་སྟངས་དང་གཏན་ནས་མི་མཐུན་པ་ཞིག་ཡིན་པར་མ་ཟད། རིགས་རུས་ཟེར་བ་དེར་མཐའ་གཅིག་ཏུ་ཡིད་རྟོན་རུང་བ་ཞིག་མ་ཡིན་པར། ཕོ་མོ་དག་གི་འབྲེལ་ལམ་མངོན་ལྐོག་མི་མཐུན་པའི་བྱ་བ་ལ་བརྟེན་ནས། རིགས་དམན་པའི་སྐྱེས་པའི་བརྒྱུད་པ་རིགས་མཐོ་བའི་ཆུང་མ་དག་ལ་སྐྱེ་བ་ཡོད་པར་མ་ཟད། དེ་འདྲའི་བུ་ཕྲུག་དག་རིགས་མཐོན་པོ་ཡིན་པར་བྱས་པའང་གྲངས་ཀ་མང་པོ་བྱུང་མྱོང་ཡོད་པས། རིགས་ཞེས་པ་ལ་མཐའ་གཅིག་ཏུ་ཁ་ཚོན་གཅོད་ནུས་པ་སུ་ཞིག་ལ་ཡོད། འོན་ཀྱང་རིགས་དམན་པར་སྐྱེས་པའི་བུ་ཕྲུག་དག་ལ་སློབ་སྦྱོང་གི་གོ་སྐབས་མེད་པས། རང་གི་རྟོག་པ་སད་དེ་གནས་ལུགས་དང་མཐུན་པའི་སྐད་ཆ་བཤད་ཐུབ་པ་དང་གནས་ལུགས་ལ་འཆམ་པའི་ངོ་རྒོལ་བྱེད་ནུས་པ་བྱུང་ཐུབ་ཀྱིན་མེད་ལ། ལྷག་པར་དུ་རིགས་དམན་པར་བརྩི་བའི་མི་ཞིག་གིས་སྐད་ཆ་བཤད་པ་ལ་ཡིད་རྟོན་བྱེད་མཁན་དཀོན་པར་མ་ཟད། རིགས་དམན་པའི་མི་རྣམས་ཀྱིས་ནང་ཕན་ཚུན་ལ་ཡང་གདེང་འཇོག་མི་བྱེད་པར། རང་གི་གཉའ་ནས་གནོན་མཁན་གྱི་རྒྱལ་བོ་དང་བྲམ་ཟེའི་མི་རྣམས་ལ་སེམས་ནས་ལྷ་བཞིན་དུ་བཀུར་བཞིན་ཡོད། དུས་སྐབས་དེ་ལྟ་བུའི་འདྲ་མཉམ་དང་འཆམ་མཐུན་མ་ཡིན་པའི་གནས་བབས་འོག་བཅོམ་ལྡན་འདས་ཀྱིས་གསུངས་པའི་ཆོས་ནི། སེམས་ཅན་སྤྱི་དང་ལྷག་པར་དུ་འཁོས་དམན་པ་སྡུག་བསྔལ་མནར་གཅོད་འོག་གི་འགྲོ་བ་རྣམས་ལ་གདུང་བ་སེལ་བྱེད་ཀྱི་སྨན་དཀར་བོ་ཆིག་ཐུབ་ལྟ་བུ་ཞིག་ཏུ་བྱུང་བ་རེད། བཅོམ་ལྡན་འདས་ཀྱིས། རིགས་མི་གཙོ། རུས་མི་གཙོ། བསླབ་པ་རིན་པོ་ཆེ་གཙོ་བོ་ཡིན། ཞེས་མཆོད་གནས་དང་ཡོན་ཏན་གྱི་མཐོ་དམན་ཚང་མ་བསླབ་པ་ཤེས་རབ་ཡོད་མེད་དང༌། ཏིང་ངེ་འཛིན་བརྟན་མིན་དང༌། ཚུལ་ཁྲིམས་གཙང་མིན་བཅས་ཀྱིས་མིའི་རིན་ཐང་གི་མཐོ་དམན་ཕྱེ་བའི་སྲོལ་བཞག་པ་དེ། དོན་དངོས་ཐོག་ནས་འཇིག་རྟེན་འདྲ་མཉམ་གྱི་སྤོབ་པ་བསྐྱེད་དུ་བཅུག་པ་རེད་ལ། འདྲ་མཉམ་ལ་བྱ་བ་བྱས་ཤིང་བྱས་རྗེས་བཞག་པའང་རེད། དཻར་མ་ཟད་ཡུལ་དེ་ག་ན་རླབས་ཕྲེང་ལྟར་འཕྱུར་བཞིན་པའི་སྤྱི་ཚོགས་ཀྱི་གོམས་གཤིས་དང་གཞུང་ལུགས་ཀྱི་ཐོག་ལ། འདྲ་མཉམ་གྱི་ལྟ་བ་གཞི་བཟུང་ནས་རྒོལ་བ་ཤུགས་ཆེན་པོ་ཞིག་ཀྱང་བཏང་རེད། དེས་ན་བསླབ་ན་སུ་ཡིན་ཡང་བཟང་པོར་འགྱུར་ཆོག་པའི་གནས་ལུགས་ནི་རིགས་པ་དང་ཉམས་མྱོང་གིས་གྲུབ་ཆོག་པ་ཞིག་ཡིན་པས། སངས་རྒྱས་ཀྱིས་རིགས་དམན་པ་ཞེས་ཐ་མར་བཅད་དུ་མེད་པའི་འདྲ་མཉམ་གཅིག་བཞག་པའོ། །༢དེར་མ་ཟད་ནང་བསྟན་པས་འགྲོ་བ་སེམས་ཅན་ཡོངས་རྫོགས་ལ་བྱམས་བརྩེས་ཁྱབ་པའི་འདྲ་མཉམ་བཟུང་བ། ད་དུང་འགྲོ་བ་མི་ཙམ་ལས་བརྒལ་བའི་སྲོག་ཆགས་ཆེ་ཕྲ་ཡོད་ཚད་ལའང་འདྲ་མཉམ་གྱི་གནས་ལུགས་རིགས་པ་དང་མཐུན་པའི་འགྲེལ་བཤད་དང༌། རིགས་པ་དང་མཐུན་པའི་ལག་ལེན་བྱས་ཤིང་དེའི་སྲོལ་བཏོད་པ་རེད། སེམས་ཅན་ཆུང་ངུ་དང་ཆེན་པོ་སུ་ཡིན་ཡང་རྣམ་དཔྱོད་ཡོད་མེད་ཀྱི་ཁྱད་འགྱུར་ཙམ་ལས། ལུས་སྟེང་ལ་ན་ཚ་དང་སྡུག་བསྔལ་འབྱུང་བཞིན་ཡོད་པ་དང༌། སེམས་སྟེང་ནས་བདེ་བར་འདོད་བཞིན་ཡོད་པ་གཅིག་མཚུངས་རེད། དཔེར་ན་མི་ཞིག་ལྟོགས་སྐོམ་གྱིས་མནར་བ་ན་ཟས་རག་འདོད་ཀྱི་འདུན་པ་མཆེད་པ་དང༌། དུད་འགྲོ་ཞིག་ལྟོགས་སྐོམ་གྱིས་མནར་བ་ན་ཟས་རག་འདོད་ཀྱི་འདུན་པ་སྐྱེ་བ་འདྲ་འདྲ་རེད་ལ། དེ་བཞིན་དུ། མཚོན་གྱིས་བསྣུན་པའམ། ནད་ཀྱིས་གཟིར་བའམ། གཞན་གྱིས་མནར་གཅོད་གཏོང་བ་སོགས་ཆ་གང་ཐད་ནས། མི་དང་སྲོག་ཆགས་གཞན་གྱི་བར་ལ་འདྲ་མཉམ་གྱི་གནས་ལུགས་དེ་དོགས་པ་མེད་པར་གཟིགས་ཏེ། མི་དང་འགྲོ་བ་གཞན་ལ་འདྲ་མཉམ་གྱི་སེམས་པ་སྐྱེ་དགོས་ཚུལ་དང༌། ཉམ་ཆུང་སེམས་ཅན་སུ་ལའང་གནོད་པར་བྱེད་མི་འོས་ཚུལ་གསལ་བར་གསུངས་པར་མ་ཟད། འགྲོ་བ་གཞན་གྱི་བདེ་སྡུག་རང་གི་བདེ་སྡུག་ལ་དཔེ་སྦྱར་ནས་བསམ་དགོས་ཚུལ་དང༌། དེ་ལྟར་བསམ་ན་བརྩེ་བ་དང་འདྲ་མཉམ་གྱི་བསམ་སྤྱོད་སྐྱེ་ཚུལ་བཅས་བསྟན་པ་རེད། དེའང་ཕྱོགས་གཅིག་ནས་བལྟས་ན། དུད་འགྲོ་གསོད་པ་ཆོས་སུ་འཛིན་པ་དང་དགེ་ལས་སུ་ལྟ་བ་ལ་རིགས་པ་ཡང་དག་གི་ཤགས་འགྱེད་ཅིག་ཀྱང་བྱས་པ་རེད། ཉམ་ཆུང་ལ་བརྩེ་བ་དང་འདྲ་མཉམ་གྱི་ལྟ་བ་ནི། སངས་རྒྱས་ཀྱི་གསུང་གང་ཞིག་ལ་མཇལ་ནའང་ཐམས་ཅད་ཀྱི་ནང་དུ་གཞི་རྩའི་ལྟ་གྲུབ་ཁོ་ན་བྱས་ཏེ་མ་གསུངས་པ་གཅིག་ཀྱང་མེད། བཅོམ་ལྡན་འདས་ནི་ཁ་ཙམ་ཚིག་ཙམ་མ་ཡིན་པའི་དོན་དངོས་བདེན་འཚོལ་ཐོག་ནས་བལྟས་ན། གཞན་ཕན་ཁོ་ན་བྱས་ཏེ་རང་ཉིད་ཡལ་བར་དོར་ཞིང༌། རང་ལ་འགྲོ་བ་གཞན་གྱི་ཞབས་ཕྱི་བ་དང་ལམ་སྟོན་བྱེད་མཁན་ཞིག་གི་ཐུགས་དགོངས་བཞག་པ་ལས། སློབ་མ་མང་བོའི་ནང་ནས་ཆེ་ཚུགས་དང་ང་རྒྱལ་བྱས་ཏེ། རང་ཉིད་ཀྱི་ལས་དོན་གཉེར་མཁན་ཞིག་མ་ཡིན་པར་གསལ་བོར་རྟོགས་ཐུབ། ཁོང་གིས་ནམ་ཡང་ལས་ཀ་ཐམས་ཅད་ལ་ཤེས་རབ་དང་ལྡན་པའི་ལྟ་གྲུབ་གཞིར་བཟུང་ནས་བྱེད་པ་ལས། ཟེར་སྲོལ་དང་སྔོན་བྱུང་གི་ལྷ་སྒྲུང་ཙམ་ལ་རྩ་བ་ནས་ཡིད་རྟོན་བྱེད་ཀྱིན་མེད། ཁོང་གི་ལྟ་གྲུབ་ཀྱི་རིགས་ལམ་ནི་སེམས་ཅན་གཞན་ལ་ཕན་བདེ་སྒྲུབ་ཐབས་དང་མ་འབྲེལ་བ་གཅིག་ཀྱང་མེད་པར་མ་ཟད།རང་གི་བདེ་སྐྱིད་ཀྱང་གཞན་ཕན་གྱི་ལས་དོན་ལས་རྙེད་ཐུབ་པའི་རླབས་ཆེན་གྱི་ལས་རིགས་བླ་ན་མེད་པ་དེ་ཡིན། དེས་ན་སུ་ཞིག་གི་རྒྱུད་ལ་བཅོམ་ལྡན་འདས་ཀྱི་གསུང་གི་ཉིང་དོན་རྟོགས་པའི་བློ་མིག་འཁྲུངས་སྲིད་ན། དེ་ནི་བརྩེ་བའི་མ། བང་མཛོད་ཆེན་པོ་ཡིན་ལ། གུ་ཡངས་ཀྱི་ལས་གཉེར་བ་ཆེན་པོ་ཡིན། སུ་ཞིག་གི་རྒྱུད་ལ་བཅོམ་ལྡན་འདས་ཀྱི་གསུང་གི་ཉིང་དོན་རྟོགས་པའི་བློ་མིག་འཁྲུངས་སྲིད་ན། དེ་ནི་མི་ཚེ་གཞན་དོན་དུ་སྐྱེལ་མཁན་ཡིན་ལ། འགྲོ་བ་ལ་ཞི་བདེ་བསྐྲུན་མཁན་ཡིན། སུ་ཞིག་གི་རྒྱུད་ལ་བཅོམ་ལྡན་འདས་ཀྱི་གསུང་གི་ཉིང་དོན་རྟོགས་པའི་བློ་མིག་འཁྲུངས་སྲིད་ན། དེ་ནི་འཁོས་དམན་ཉམ་ཆུང་རྣམས་ཀྱི་མགོན་དང་དཔུང་གཉེན་ཡིན་ལ། སྤྱི་ཚོགས་ལ་ཤེས་རབ་སྩོལ་བའི་སྟོན་པ་བཟང་པོ་ཞིག་ཡིན། ནང་ཆོས་ནི་ཡུལ་གྱི་རྒྱལ་ཁྲིམས་སྲུང་དགོས་པ་སོགས་ཡུལ་ཆོས་དང་བསྟུན་དགོས་པར་འདུལ་བ་ལུང་ན་གསུངས་ཡོད་པས་སྤྱི་ཚོགས་རང་ལུགས་དང་འགལ་བའི་ལྟ་གྲུབ་མེད་པ་དང༌། སྲིད་ལ་ཐེ་གཏོགས་མེད་པར་གང་ཟག་རང་ཉིད་ཆོས་ལ་དད་མོས་ཀྱི་རང་དབང་གཙང་མ་ཡོད་ལ། གང་ཟག་གཞན་ཆོས་ལ་དད་མོས་བྱེད་མིན་ཁོ་རང་ལ་རང་དབང་ལྡན་པར་ནང་ཆོས་ལས་གསུངས་ལ། ཇི་སྐད་དུ། ངས་ནི་ཁྱོད་ལ་ཐར་བའི་ལམ་སྟོན་ནོ། །ཐར་བ་ཐོབ་པ་རང་ལ་རག་ལས་ཀྱིས། །ཞེས་གསུངས་ལ། སེམས་ཅན་སོ་སོ་ཁམས་དབང་མོས་པ་སྣ་ཚོགས་པ་ཡིན་པས་ནང་ཆོས་ལ་དད་མིན་རང་ལ་རང་དབང་ལྡན་པ་ཡིན། འོན་ཀྱང་གང་ཟག་སུ་ཡིན་ཀྱང་རང་ལ་མོས་པ་ཡོད་ན་ནང་ཆོས་ལ་སློབ་སྦྱོང་འགོག་པ་ནམ་ཡང་རིགས་པ་མ་ཡིན། ནང་ཆོས་ལ་སློབ་སྦྱོང་གལ་ཆེ་བ་ཡིན་པ་ནི། སློབ་དཔོན་དབྱིག་གཉེན་གྱིས། ཆོས་རྣམས་རབ་ཏུ་རྣམ་འབྱེད་མེད་པར་ཉོན་མོངས་རྣམས། །གང་ཕྱིར་ཉེ་བར་ཞི་བར་བྱ་པའི་ཐབས་མེད་ལ། །ཞེས་སོགས་གསུངས་ལ། ནང་ཆོས་དད་པ་དང་ཤེས་རབ་ཟུང་འབྲེལ་དུ་བྱས་ནས་འཛིན་སྐྱོང་གནང་དགོས་པའོ།་ ། ༼༣ནང་བསྟན་གྱི་ལྟ་གྲུབ་དང་འདྲ་མཉམ་ལ་མང་ཚོགས་ཁྲོད་མི་གང་མང་ཤིག་གིས་སངས་རྒྱས་ཆོས་ལུགས་སློབ་རྒྱུ་ཟེར་ནས་རྨོངས་དད་རྐྱང་བའི་གནས་སུ་ལྷུང་གིན་འདུག འཇིག་རྟེན་པ་དག་མ་ཟད་རབ་བྱུང་གི་སྡེ་མི་ཉུང་བ་ཞིག་ཀྱང་དེ་བཞིན་རྨོངས་ནས་འདུག དེ་འདྲ་ཡིན་ཕྱིན་ཆོས་སློབ་པ་དག་གིས་ཀྱང་སངས་རྒྱས་ཀྱིས་བསྟན་པའི་ཆོས་དང་ཆོས་དེ་ཇི་ལྟར་སློབ་དགོས་མ་ཤེས་པར་མགོ་འཁོར་ནས་རྒྱུན་པར་ར་མིན་ལུག་མིན་ཅིག་མ་གཏོགས་ཤེས་བཞིན་མེད་པའི་རྒྱུ་རྐྱེན་གཙོ་བོ་དེ། སངས་རྒྱས་ཀྱི་གསུང་རབ་ལ་ནན་གྱིས་མ་བཀླགས་པས་སྐྱོན་རེད། གལ་ཏེ་རྡོ་རྗེ་གཅོད་པ་ལྟ་བུའི་གསུང་རིན་ཐང་དང་ལྡན་པ་གཅིག་ལ་ཉམས་ཞིབ་བྱེད་ཐུབ་ན་ད་གདོད་ཆོས་སློབ་པའི་ཉིང་དགོས་སོགས་གནད་འགག་དག་ཡོངས་སུ་རྟོགས་སྲིད། སྤྱི་ཚོགས་རང་ལུགས་ཀྱི་ཆེས་གཏིང་ཟབ་པའི་འདུ་ཤེས་འཛིན་སྟངས་ཀྱང་འཛམ་གླིང་ཆ་མཐུན་དང་མི་སོ་སོའི་ལྟོ་གོས་གནས་མལ་སོགས་འདྲ་མཉམ་འཛུགས་རྒྱུ་དེ་རེད། དེ་མིན་དཀོན་མཆོག་དང་འཇིག་རྟེན་བྱེད་པོ་ཁོ་ན་ལ་རེ་ལྟོས་མི་འཛིན་པར། མི་སོ་སོའི་རང་རང་གི་འཇིག་རྟེན་རང་གིས་འབད་པ་དང་གསར་བཏོད་ཀྱི་སྟོབས་ཤུགས་ལ་བརྟེན་ནས་གྲུབ་དགོས་པའི་གནས་ལུགས་ཤིག་ཀྱང་བསྟན་ཡོད་པ་ཡིན། འདི་དག་ནི་སྟོན་པ་ཤཱཀྱ་ཐུབ་པས་ཀྱང་ལོ་སྟོང་ཁ་ཤས་ཀྱི་ཡར་སྔོན་ནས་སེམས་ཅན་རྣམས་ལ་གསལ་བོ་གསུངས་འདུག་པ་ནི། རྒྱུ་ས་བོན་ཅི་ཞིག་བཏབ་པ་ཡིན་ན་འབྲས་བུ་དེ་ལྟར་འབྱུང་རྒྱུ་ཡིན་པ་གསལ་བོ་བརྗོད་འདུག ད་དུང་ལས་དབང་ལ་བསྒྱུར་བཀོད་གཏོང་བ་ནི་གཙོ་བོ་རང་ཉིད་ལ་རག་ལས་ཡོད་པས། རང་ཉིད་ཀྱིས་སྒོམ་སྒྲུབ་སོགས་ལ་ནན་ཏན་བྱ་དགོས། དེ་མིན་སངས་རྒྱས་ཀྱིས་ནི་ཆོས་རྣམས་རང་བཞིན་གྱིས་མ་གྲུབ་པའི་གནས་ལུགས་འདོད་བཞིན་ཡོད་པ་རེད། ༼༤ནང་བསྟན་གཞུང་ལུགས་གཞིར་བཟུང་གི་ཀུན་སྤྱོད་ཀྱིས་སྒོ་མང་བོ་ནས་ཕན་པ་རླབས་ཆེན་ལྡན་ཚུལ།༽ ནང་བའི་གཞུང་ལུགས་ནི་མི་ཚེའི་ཁ་ཕྱོགས་སྟོན་པའི་གསུང་རྩོམ་རྐྱང་བ་ལས་གྲུབ་པ་ཞིག་ཡིན་པ་ལས། ལྷས་སྤྲིངས་བའི་བཅའ་ཡིག་དང་སྒྲིག་ཡིག་ལྟ་བུ་གཅིག་ཀྱང་མེད། སྟོན་པ་ཁོང་ཉིད་ཀྱང་བདེ་སྡུག་འདོར་ལེན་གྱི་ཐབས་ཚུལ་མི་ཤེས་མཁན་ལ་ལམ་སྟོན་གྱི་དགེ་རྒན་ནམ་གནས་ལུགས་སྟོན་པ་པོ་ཙམ་ཞིག་ཡིན་པ་ལས། བདེ་བ་དང་སྡུག་བསྔལ་གྱི་བྱེད་པ་པོ་གཏན་ནས་མིན། དེ་འདྲའི་བྱེད་པ་པོ་ཞིག་དོན་ལའང་ཁས་ལེན་པ་མ་ཡིན་པར། མཆོག་སངས་རྒྱས་ནས་དམན་པ་གྲོག་འབུ་ཡན་ཆད་རང་རང་གིས་རང་རང་ཁ་ལོ་བསྒྱུར་ཆོག་པ་དང་སྒྱུར་བཞིན་པའི་གནས་ལུགས་རྣམ་དག་སྨྲ་ཞིང༌། རང་གིས་རང་ཉིད་ལེགས་པ་དང་ཉེས་པའི་གནས་སུ་ཁྲིད་པ་དང༌། ལེགས་ཉེས་བླང་དོར་གྱི་ནུས་པ་ཡང་རང་རང་སོ་སོ་ལ་ཡོད་པ་འདི་ཡང་ནང་བ་སངས་རྒྱས་པའི་འདྲ་མཉམ་གྱི་གཞི་རྩའི་ལྟ་གྲུབ་གྱི་རྨང་གཞི་གཅིག་རེད། ཀུན་སྤྱོད་ཀྱི་ཐད་ནས་བསམ་ན་ཡང༌། གལ་ཏེ་འཇིག་རྟེན་འདིར་མི་ཞིག་གིས་འདུལ་བ་ནས་གསུངས་པའི་བསླབ་པའི་སྒོ་ཀུན་ལ་བག་ཟོན་བྱས་ཏེ་བསྲུང་ནུས་ན་ལྟ་ཅི། ཕལ་ཆེར་རམ་ཕྱེད་ཉུང་ཤོས་ཤིག་ལེགས་པར་སྤྱོད་ན་ཡང་འཇིག་རྟེན་མི་ཆོས་དཔེ་སྟོན་བྱ་ཡུལ་གྱི་དམ་པ་རྣལ་མ་ཞིག་ཡིན་པར་གདོན་མི་ཟ་སྟེ། ཕམ་པ་བཞི་ལས་ཚུལ་བཞིན་བག་ཡོད་པར་གནས་པའི་གང་ཟག་ཞིག་ལ་མཚོན་ན། མི་ཚངས་སྤྱོད་སྤངས་པས་བཟའ་ཚང་དང་བུ་ཕྲུག་གི་ཆེད་དུ་འདུར་རྒྱུག་གི་ལས་ཀ་སྣ་ཚོགས་ཀྱི་གསེབ་ལས་བྱུང་བའི་ཀུན་སྤྱོད་ཉམས་པའི་སྤྱོད་ལམ་དག་གི་བྱིང་ལས་ཐར་བས་ན། འཇིག་རྟེན་འདིར་ལས་ཀ་ཉོག་འཛིང་ཅན་ཤིན་ཏུ་ཡ་ང་བ་མང་བོ་བུ་ཕྲུག་དང་བཟའ་ཚང་གི་ལས་དོན་ཁོ་ན་ལས་མཆེད་པ་མ་ཡིན་ནམ། མ་བྱིན་ལེན་དང་མི་ཆོས་བླ་མ་སྨྲ་བ་དང་སྲོག་གཅོད་སྤངས་པས་བརྐུ་འཕྲོག་དང་མགོ་སྐོར་གྱི་སྒོ་ནས་ལོངས་སྤྱོད་གཡོ་ལེན་རྩ་བ་ནས་དོར་བ་འདིས་ཀྱང་ཉེས་སྤྱོད་ཀྱི་མ་ཡུམ་མེད་པར་བྱས་པ་ཡིན་ཏེ། དེང་དུས་སུ་མཚོན་ནས་བཤད་ན། མི་རྣམས་དཔལ་འབྱོར་གྱི་རྗེས་སུ་ཁ་གདངས་ཞིང་ལག་བཟེད་དྲགས་པས་གཡོ་འཁྲུལ་གྱི་གར་འཆམ་ཇི་འདྲ་ཞིག་སྤྲུལ་དགོས་ནའང་ཚམ་ཚོམ་མེད་པའི་ཚད་དུ་སླེབས་ཡོད་པས་སོ། །ཁྲ་ཁྲ་འུར་འུར་གྱིས་འགེངས་བའི་ཞིང་ཁམས་འདི་ནས་མི་ཞིག་གིས་ལོངས་སྤྱོད་ཀྱི་ཆེད་དུ་གཡོ་ཁྲམ་མི་བྱེད་ཅིང་བཟའ་ཚང་གི་ཆེད་དུ་བདེན་དོན་མི་འདོར་བ་ཞིག་ཡོང་ན་དེ་ག་ཙམ་ཡང་འཇིག་རྟེན་ཕུལ་བྱུང་གི་སྐྱེས་བུར་འབོད་ན་མི་མཐུན་པ་ཅི་ཞིག་ཡོད་སྲིད་ཨང༌། ད་དུང་རྩྭ་ཉག་མ་གཅིག་ཀྱང་མི་གཅོད་པར་མ་ཟད་རྩྭ་སྔོན་དུ་གཤང་གཅིའི་རིགས་ཙམ་ཡང་མི་འདོར་བར་གསུངས་པས་སྐྱེ་དངོས་སྲུང་སྐྱོབ་ལ་ཡང་འདི་ལས་ཕྲ་བ་ཞིག་སུས་ཀྱང་ཁྲིམས་སུ་བྱས་མྱོང་མེད་ལ། རིགས་དང་རུས་ཀྱི་མཐོ་དམན་སོགས་མིང་རྐྱང་གིས་ལམ་ལུགས་ལས་བརྒལ་ཏེ་སོ་སོའི་ཤེས་རབ་དང་ཏིང་འཛིན་སོགས་ནང་གི་ཡོན་ཏན་བསླབ་པས་དབྱེ་བ་འབྱེད་པའི་ཕྱིར་ན་འདྲ་མཉམ་ཡང་འདི་ལས་སྔ་ཤོས་སུ་གང་གིས་ཀྱང་ཕྱེས་མེད་ཅིང༌། བསྐོ་བཞག་སོགས་ལ་ཚུལ་ཤིང་འགྲེམ་པ་དང་སྤྲོ་བ་འདྲི་བ་སོགས་ཀྱིས་མང་གཙོ་ཁོ་ནར་མ་ཟད། གསོ་སྦྱོང་གི་གནས་གཏན་ཁེལ་བྱེད་པ་ལྟ་བུར་ཡང་གང་ཟག་གཅིག་གིས་ཐག་གཅོད་རྐྱང་མིན་པར་བློ་མཐུན་བྱ་དགོས་པར་གསུངས་པས་འདི་ལས་སྔ་བའི་མང་གཙོའི་ལམ་ཁ་ཡང་སྤུས་དག་ཅིག་གང་ན་དབྱེ་མྱོང༌། གཞན་ཡང་འགྲོ་འཆག་ཉལ་འདུག་གི་སྤྱོད་ལམ་ཚུལ་མཐུན་བག་ཡོད་པའི་ཞི་དུལ་གྱི་སྤྱོད་ལམ་བྱེད་སྟངས་སྐོར་དང༌། ཆོས་གོས་གསུམ་གྱིས་མཚོན་ཏེ་དགེ་སྦྱོང་གི་གོས་བཅུ་གསུམ་སོགས་གྲ་འགྲིག་དག་གཙང་གི་སྒོ་ནས་ནབ་ཚུལ། ཟས་ཁམ་གང་ངམ་གོས་ལག་མཐིལ་ཙམ་ཡང་སྦྱིན་བདག་གི་རྒྱུ་ཆུད་ཟོས་པར་བྱེད་མི་ཆོག་པ་རྣམས་ཀྱིས་མཚོན་ཏེ་ཆད་ལྷག་དང་མ་འཐུས་པ་ཅུང་ཟད་ཀྱང་མི་མངའ་བ་འདུལ་བ་འདི་ཉིད་ལས་གཞན་སྲིད་པའི་ཁྱོན་ཀུན་ན་ཡོད་རེ་སྐན་ནོ། །དེས་ན་ཀུན་སྤྱོད་ཀྱིས་གཞན་གྱི་ཡིད་ལ་དང་བ་སྐྱེ་བར་བྱེད་པའོ། །ཆོས་འདུལ་བ་ལ་གནས་པའི་གང་ཟག་རྣམས་ཀྱིས་ཉེས་པ་རང་སེལ་དང་ཡོན་ཏན་རང་ལེན་བྱེད་པའི་ལམ་ལས་མ་བསྐུལ་རང་བཞིན་གྱིས་ཚུལ་མཐུན་དུ་བག་ཡོད་བྱེད་པ་ལས། འདི་ལ་རྒྱལ་བོའི་ཁྲིམས་དང༌། དབྱུག་པའི་སྟེང་མ་གནོན་མཁན་གང་ཡང་མེད་པ་མངོན་གསལ་སྨྲ་མི་དགོས་ཤིང༌། ཀུན་སྤྱོད་དང་ཤེས་རིག་ཡར་རྒྱས་སོགས་ཚད་མཐོ་བའི་མི་རིགས་ཤིག་གི་སྒྲིག་ལམ་དང་གནས་སྟངས་རྣམས་ཀྱང་ཆ་གང་ཐད་ནས་རྒྱལ་ཁྲིམས་དང་དབྱུག་གནོན་ཁོ་ནས་འཇིགས་སྐལ་འོག་ཏུ་གནས་མི་དགོས་པར་རང་བསམ་རང་ཤེས་ཀྱིས་གནས་ཐུབ་པ་ཡིན་ནོ། །སྤྱིར་བཏང་ནས་བཤད་ན་ཉེས་སྤྱོད་ཡོད་ཚད་ཆོས་ཀྱི་གནས་ཚུལ་དེ་གང་ཡིན་མི་ཤེས་པའི་དབང་གིས་སམ། ཤེས་ཀྱང་སྲེད་པ་ཤུགས་དྲགས་པས་འདོར་ལེན་མི་ནུས་པའམ། འདོད་ཐོག་ཏུ་མ་འཁེལ་བའི་དབང་གིས་སེམས་འཁྲུགས་པ་གསུམ་པོ་གང་རུང་ལས་བྱུང་བར་ངེས་པས། འདི་དག་ལ་ནང་ཆོས་སུ་དུག་གསུམ་ལས་ཉེས་ཚོགས་ཀུན་འབྱུང་བར་གསུངས་པ་དེ་ཉིད་ཡིན། འདི་རྣམས་ཐག་གཅོད་དགོས་ཚེ་འཚེ་མེད་ཞི་བདེའི་གན་མཛོད་ནང་བསྟན་སེམས་འདུལ་བའི་གཞུང་ལུགས་དག་ལས་ཁྱད་པར་དུ་འཕགས་པའི་རིན་ཐང་ཅན་ཞིག་སྲིད་ན་དཀོན་པ་ཡིན། ༼༥ནང་བསྟན་དངོས་མ་དང་རྫུས་མའི་དབྱེ་འབྱེད་བྱ་དགོས་པ།༽ ནང་བསྟན་རང་ངོས་ནས་འཇིག་རྟེན་འདྲ་མཉམ་དང་སྤྱི་ཕན་ཞབས་ཕྱི་སོགས་འཇིག་རྟེན་མི་ཆོས་དང་མིའི་འདོད་བློ་དང་འཚམ་པ། རྒྱལ་ཁབ་ཀྱི་སྲིད་དང་ཚན་རིག་གི་ལྟ་གྲུབ་ལ་འོས་པའི་རིན་ཐང་གཞལ་དུ་མེད་པ་ཞིག་ཡིན་ཡང༌། དེང་སང་ས་ཆ་ག་ས་གང་དུ་བླ་མ་དང་སྤྲུལ་སྐུ་དང་གྲྭ་བ་རྫུན་མ་མང་བོ་ཡོད་པ་དང༌། དེ་དག་གི་སྤྱོད་ལམ་དང་ལས་ཀ་གནོད་འཚེ་ལྡན་པ་མང་བོ་ཡོད་ཀྱང༌། དེ་དག་གིས་ནང་བསྟན་སྤྱི་དང་ནང་བསྟན་པའི་ཀུན་སྤྱོད་ཀྱི་ཚབ་ལྟ་བུར་གཏན་ནས་བྱེད་མི་རུང་ལ། དེ་ནི་ནང་བསྟན་གྱིས་འཇིག་རྟེན་ལ་བཞག་པའི་ལས་ཀ་དང་གྲུབ་འབྲས་ཤིག་ཏུ་དེ་བས་ཀྱང་ལྟ་མི་རུང༌། མི་སོ་སོའི་ལས་ཀ་བྱེད་སྟངས་ལ་འདྲ་མཉམ་མ་ཡིན་པ་དང༌། རྒྱུ་འབྱོར་འཚོལ་བའི་ལས་རིམ་དང༌། དད་པ་བེད་སྤྱད་ནས་དམངས་མགོ་སྐོར་བ་སོགས་རྣམ་པ་སྣ་ཚོགས་ཡོད་ཀྱང༌། དེ་དག་ཤཱཀྱ་ཐུབ་པའི་དགོངས་པ་མ་རེད་ལ། ནང་བའི་གཞུང་ལུགས་ཁག་ནས་བཤད་པའི་སྤྱོད་པ་མ་རེད། དེ་བཞིན་དུ་ནང་བའི་བླ་མ་དང་གྲྭ་བ་ཚད་ལྡན་དག་གི་ཚད་འཇལ་བྱེད་དེ་བས་ཀྱང་ག་ལ་ཡིན། དེས་ན་ནང་བསྟན་དངོས་ནི་ཁ་ཞེ་གཉིས་མེད་ཀྱི་གཞན་ཕན་སྒྲུབ་མཁན་ཞིག་དང༌། སྲིད་དང་དམངས་ཀྱི་བདེ་བ་ལ་ནམ་ཡང་གྲོགས་ལས་དགྲ་རུ་མི་འགྱུར་བ་ཞིག་དང༌། རྫུན་དང་རྐུ་འཕྲོག་གི་གཡོ་ཆས་ཐམས་ཅད་རིང་དུ་དོར་བ་དང༌། ཉམ་ཆུང་དང་འཁོས་དམན་རྣམས་ནམ་ཡང་རོགས་སྐྱོར་བྱེད་པའི་གནོད་མེད་ཕན་པའི་རིག་གཞུང་ཞིག་ཡིན་པའོ། །པེ་ཅིང་མཐོ་རིམ་ནང་བསྟན་སློབ་གླིང་གིས་རྩོམ་བསྐུལ་གནང་བར་བརྟེན་ནས་ངག་དབང་དངོས་གྲུབ་དཔལ་གྱིས་བྲིས་པའོ། །སརྦ་མངྒ་ལཾ། བསྟན་པ་དག་བཅོས།བསྟན་པ་དག་བཅོས། སེར་སྐྱ་མང་ཚོགས་རྣམས་ལ་ཞུ་གསོལ། སྤྱིར་རྒྱལ་བསྟན་དང་བྱེ་བྲག་བོད་ཀྱི་ནང་བསྟན་དངོས་གནས་ལ་དག་བཅོས་མི་དགོས་མོད་དེང་དུས་སུ་བོད་ཀྱི་ནང་བསྟན་ལ་གང་ཟག་སོ་སོའི་ཆགས་སྡང་གིས་བསྲེ་སླད་ཅན་དུ་གྱུར་དང་འགྱུར་བཞིན་པ་མངོན་གསལ་ཞིག་རེད། དེས་ན་དག་བཅོས་ཞིག་བྱེད་མ་ཐུབ་ན་རྒྱལ་བསྟན་ལས་ཕྱི་རོལ་ཏུ་གྱུར་པར་མ་ཟད་མང་ཚོགས་ཀྱི་མགོ་བསྐོར་གྱི་ཆ་ལག་དང་བསླུ་བྲིད་དང་ཁུར་བོ་ཞིག་དང༌། ཤི་གསོན་མང་པོའི་དཔལ་འབྱོར་ཆུད་ཟོས་སུ་འགྱུར་བ་དང་དཔལ་འབྱོར་བསྡུ་བའི་ལོག་འཚོའི་རྒྱུར་གྱུར་འདུག རྒྱུ་མཚན་དེས་ན་ངེས་པར་དག་བཅོས་དགོས་ལ། དག་བཅོས་བྱེད་ལུགས། ཆེ་ལོང་ཙམ་ཞུས་ན་དགེ་འདུན་པ་དག་བཅོས་དང༌། རྒྱལ་བསྟན་རྣམ་དག་ངོས་ཟིན་པ་གཉིས་ལ་རག་ལས་ལ། དང་པོ་དགེ་འདུན་པ་ནི་གོས་དམར་སེར་གྱོན་ཤེས་པ་ཙམ་དང་གྲོང་ཆོག་འགྲོ་ཤེས་པ་ཙམ་གྱིས་མི་ཆོག་པར་རྒྱུད་ན་མ་མཐའ་རབ་བྱུང་གི་སྡོམ་པ་ཡོད་པའི་སྟེང་ནས། ཇི་སྐད་དུ། རབ་ཏུ་བྱུང་བའི་བྱ་བ་ནི་གཉིས་ཏེ་ཀློག་པ་ཐོས་བསམ་དང་སྤོང་བ་བསམ་གཏན་ནོ། །ཞེས་གསུངས་པ་ལྟར་ཀློག་པ་ཐོས་བསམ་དང་སྤོང་བ་བསམ་གཏན་ལ་བརྩོན་པ་ཞིག་དགོས་པ་ནི་མི་སྐྱ་དང་གྲྭ་བ་གཉིས་ཀྱིས་ཤེས་དགོས། མི་སྐྱ་ཚོས་རྟོགས་པ་ལ་བརྟེན་ནས་གྲྭ་བ་དག་རྫུན་ཤེས་ནས་དག་མ་ལ་མཆོད་ཡུལ་བྱས་ན་ཚོགས་བསགས་པ་དང༌། རྫུན་མ་མཆོད་ཡུལ་ལམ་སྐྱབས་ཡུལ་བྱས་ན་ངན་སོང་དུ་འགྲོ་བའི་རྐྱེན་དུ་གྱུར་བ་ཡོད་པ་སོགས་སྤྱི་སྒེར་གཉིས་ཀ་ལ་གནོད་པའི་རྒྱུ་ཡིན་པར་ཤེས་པར་བྱས་ནས་སྤང་ན་དེ་དག་གིས་ངུར་སྨྲིག་གྱོན་པའི་ཆ་རྐྱེན་མེད་བཞིན་དུ་རབ་བྱུང་ངུར་སྨྲིག་གི་གོས་གྱོན་པའི་དམིགས་ཡུལ་ཚོ་བའི་ཆེད་དུ་རང་གི་འབད་རྩོལ་བྱས་ནས་དཔལ་འབྱོར་བསྒྲུབ་མ་འདོད་ནས་གཞན་གྱི་དཔལ་འབྱོར་གཡོ་ཐབས་ཀྱིས་ལེན་པའི་ཆེད་དམ་དམིགས་ཡུལ་དེ་ཡིན་པས་དེའི་རིགས་ལ་སྡང་སེམས་མེད་པར་བསྟན་པ་ལ་ལྷག་བསམ་གྱི་སྒོ་ནས་གྲོང་ཆོག་ལ་མ་མངག་ན་རང་ཤུགས་ཀྱིས་མེད་འགྲོ། དེའི་རིགས་རྩ་ཆེན་དུ་གཟུང་ན་ཉིན་རེ་ལས་ཉིན་རེ་ཇེ་མང་དུ་འཕེལ་ནས་ཕན་བདེ་ལ་གནོད་པའི་རྒྱུར་འགྲོའོ། །མི་ཞིག་ཤི་ན་ཁྲལ་ཙམ་མ་ཡིན་པའི་ཆོས་རྣམ་དག་ཅིག་བསམ་ན་ཚུལ་ཁྲིམས་དང་ལམ་བསྐྱེད་རྫོགས་ཀྱི་ཉམས་ལེན་དང་ལྡན་པའམ། བཤད་སྒྲུབ་ལ་བརྩོན་པ་ལ་འབྲེལ་བ་འཇོག་ན་རང་གཞན་གཉིས་ཀའི་དོན་དུ་འགྱུར་ཏེ། ལུང་ལས། ཚུལ་ཁྲིམས་ལྡན་པས་སྨོན་ལམ་འགྲུབ། །ཞེས་དང༌། རྗེ་མི་ལས། རི་ལ་སྒོམ་པའི་སྒོམ་ཆེན་དང༌། །འཚོ་བ་སྦྱོར་བའི་ཡོན་བདག་གཉིས། །སངས་མཉམ་པོར་རྒྱ་པའི་རྟེན་འབྲེལ་ཡོད། །ཅེས་གསུངས་སོ། །གཉིས་པ་རྒྱལ་བསྟན་རྣམ་དག་ངོས་ཟིན་པ་ལ། སངས་རྒྱས་གཉིས་པས། སྟོན་པའི་བསྟན་པ་རྣམ་གཉིས་ཏེ། །ལུང་དང་རྟོགས་པའི་བདག་ཉིད་དོ། །དེ་འཛིན་བྱེད་དང་སྨྲ་བྱེད་པ། །སྒྲུབ་པར་བྱེད་པ་ཁོ་ནའོ། །ཞེས་པ་ལྟར་ནང་བསྟན་ལ་ལུང་རྟོགས་གཉིས་སུ་ངེས་པ་དང་ནང་བསྟན་འཛིན་པ་ལ་ལུང་ལ་ཐོས་བསམ་དང་དེའི་དོན་སྒོམ་པ་ཁོ་ན་ངེས་པར་ཤེས་དགོས། འོན་ཀྱང་བོད་ཀྱི་རང་བཟོ་མཁན་རྣམས་ཀྱིས་ཐོས་བསམ་བྱེད་མཁན་ལ་ཆོས་པའི་མིང་ཙམ་མེད་པ་ནི་ཆོས་མ་ཤེས་པའི་ངན་རྟགས་ཞིག་ཡིན་ནོ། །ཐོས་བསམ་སྒོམ་གསུམ་ནི་ཚོགས་གཉིས་ལས་ཡེ་ཤེས་ཀྱི་ཚོགས་ཡིན་པར་ལམ་རིམ་བདུད་རྩིའི་ཉིང་ཁུ་ལས་བཤད་པ་ལྟར་རོ། །འོ་ན་བྱ་བ་ལས་ཀྱི་འཁོར་ལོ་ཞེས་རྒྱ་གར་ན་མ་གྲགས་ཀྱང་བོད་ན་གྲགས་པ་དང་གསུང་རབ་ལས་སྐུ་གསུང་ཐུགས་རྟེན་བཞེངས་ན་ཕན་ཡོན་བསམ་མི་ཁྱབ་པ་ཡོད་པར་བཤད་པ་ཅི་ཞེ་ན། བསོད་ནམས་ཀྱི་དགེ་བ་ཙམ་ཡོད་པ་དང་དུས་གཞན་ལ་དགོངས་པ་སོགས་ལྡེམ་དགོངས་ཀྱི་མདོ་དུ་མ་ཡོད་པར་སྣང་བ་དང༌། གསུང་རབ་ལ་ཐོས་བསམ་བྱེད་པའི་སྐལ་བ་མེད་མཁན་གྱི་ཆེད་དུ་ཡིན་པ་དགོངས་པ་གསལ་ལ། འོན་ཀྱང་སྐྱེས་བུ་དམ་པའི་ཁྲོད་ན་གདུལ་བྱའི་དབང་གིས་རྟེན་བཞེངས་བྱེད་མཁན་བྱུང་བ་ཡོད་མོད་ཉོན་མོངས་འདུལ་བ་ལ་བདག་མེད་མ་སྒོམ་ན་གྲོལ་བའི་ཐབས་མེད་དེ། རྗེ་ཏཱ་ར་ནཱ་ཐས། གང་ཟག་བདག་མེད་སྒོམ་པ་ཡོད་མེད་ལས། །སྲིད་ལས་གྲོལ་བ་ཡོད་མེད་རྗེས་སུ་དཔོག །ཅེས་གསུངས་པ་ལྟར་རོ། །གསལ་བཤད་ཅིག་ལ་གཞན་གྱིས་སྐྱོན་བརྗོད་པའི་ཕྱིར་མ་ཡིན་པར་སྐྱོན་སངས་བའི་ཕྱིར་བྲིས་པ་དང༌། ལྷག་པར་གྲྭ་གཞོན་ཚོགས་ཀྱིས་རང་གི་མདུན་ལམ་མི་ནོར་བའི་ཆེད་ལས་གཞན་སྐྱོན་བརྗོད་པ་ལ་དགོས་པ་མེད་དེ། དཔེར་ན་མི་གཙང་བ་སློག་ན་དྲི་ངན་འཐུལ་བ་ལས་དགོས་པ་མེད་པ་བཞིན་སྙོག་དྲྭ་ལས་གཞན་མེད་དོ། །མདོར་ན་ཕན་བདེ་འབྱུང་བའི་གནས་གཅིག་པུ། །ཞེས་གསུངས་པ་བཞིན་ནང་བསྟན་ནི་གཞན་ལ་ཕན་བདེ་བསྐྲུན་པའི་ཐབས་ལམ་དུ་འགྲོ་བ་ལས་གཞན་ལ་གནོད་པའི་རྐྱེན་དུ་མི་བསྒྱུར་བར་ལག་ཐལ་མོ་སྦྱར་ནས་རེ་བ་ཞུས་པ་ཡིན་ནོ། །ཞེས་པ་འདི་སྤྲངས་འཁྱམས་པ་ངག་དབང་དངོས་གྲུབ་དཔལ་ནས། ཞི་བའི་སློབ་གསོ་ཁོ་ནས་ཡར་རྒྱས་ཕྱིན་དཀའ།ཞི་བའི་སློབ་གསོ་ཁོ་ནས་ཡར་རྒྱས་ཕྱིན་དཀའ། སེམས་ཅན་ཁམས་དབང་མོས་པ་སྣ་ཚོགས་ཡོད་པའི་དབང་གིས་ཞི་བས་སློབ་གསོ་ཁོ་ནས་ཀུན་སྤྱོད་དང་རིག་གནས་བསམ་བློ་ཡར་རྒྱས་འགྲོ་དཀའ་ལ། དེས་ན་ནང་ཆོས་ཀྱི་དབང་དུ་བྱས་ན་སྟོན་པ་ཐུགས་རྗེ་ཅན་གྱིས་གདུལ་བྱའི་ཁམས་དབང་དང་མཐུན་པར་ཞི་རྒྱས་དབང་དྲག་གི་ལས་དུ་མ་གསུངས་པ་དང༌། རྒྱལ་ཁབ་ཅིག་སྐྱོང་བ་ལ་ཞི་དྲག་སྣ་ཚོགས་ཅན་གྱི་རྒྱལ་ཁབ་ཀྱི་རྩ་ཁྲིམས་བཟོས་ཡོད་པ་རེད། གཞན་སློབ་གྲྭ་སོགས་ཚོགས་པ་ཆེ་ཆུང་གང་ཡིན་ཡང་སྒྲིག་འཛུགས་ཅན་ཞིག་ཡིན་ན་ནི་ཞི་དྲག་སྣ་ཚོགས་ཀྱི་ཁྲིམས་ཡོད་པ་རེད། ཁྲིམས་མེད་ན་མགོ་མེད་མཇུག་མེད་ཆགས་ནས་རྗེས་ལུས་དང་འཐོར་ཞིག་གི་རྣམ་པ་ཅན་ཞིག་ཏུ་འགྱུར་ངེས། དེས་ན་ཐོག་མར་ཞི་བའི་སྒོ་མང་པོ་ནས་སློབ་གསོ་དང༌། དེས་མི་འདུལ་བའི་རིགས་ལ་ཆད་ལས་ཡང་ལྕི་དུ་མས་འདུལ་དགོས། གལ་ཏེ་མ་འདུལ་ན་བཟང་བོ་དག་ལ་ངན་པས་གྲིབ་མ་ཕོག་ནས་བཟང་བོ་དག་ཀྱང་ངན་པར་འགྲོ་བས་བཟང་ངན་གཉིས་ཀ་ལ་ཡར་རྒྱས་མེད་འགྲོ །ངག་གི་སློབ་གསོ་ལ་ཡང་ངོ་བསྟོད་རྐྱང་བ་ཙམ་གྱིས་མི་འགྲིག་སྟེ། འཇིག་རྟེན་པའི་ངག་རྒྱུན་ལ། ཤ་ཚ་བའི་གཏམ་ལ་སྙན་པོ་མེད། ཅེས་པ་དང༌། ཆོས་ཕྱོགས་ནས། གདམས་ངག་མཚང་ཐོག་ཏུ་རྒོལ་བ། ཞེས་པ་ལྟར་ཡིན་པས་སོ། །ཁ་ཅིག་ཆད་ལས་དང་རྡུང་རྡེག་མི་དགོས་པར་སློབ་གསོ་ཁོ་ནས་འདུལ་དགོས་ཟེར་མཁན་དག་ནི་ཉམས་མྱོང་མེད་པའི་སྐད་ཆ་བབ་ཅོལ་དུ་སྨྲ་བ་ཁོ་ན་རེད། འདས་པ་དང་ད་ལྟའི་ལོ་རྒྱུས་ལ་དེ་སྟར་ལག་ལྟར་བཏབ་ནས་གྲུབ་འབྲས་ཐོན་པ་དཔེ་ཙམ་ཡང་མེད་པ་རེད། སློབ་གསོ་ཁོ་ནས་ཡར་རྒྱས་གཏོང་དགོས་པ་སོགས་མིང་སྙན་སྙན་ཡོད་པ་དང་ཆད་ལས་དང་ཁྲིམས་ཞེས་པ་མིང་མི་སྙན་པ་ལྟར་སྣང་ན་ཡང་ལག་ལེན་ལ་ཡར་རྒྱས་བཏང་བ་ལ་ཁྲིམས་ཆད་མེད་དུ་མི་རུང༌། སྔོན་ཆད་ཡང་དགེ་སྐོས་སོགས་ལས་སྣ་ཐོག་ཏུ་བབ་ཚེ་ལག་ལེན་སློབ་གསོ་ཁོ་ན་དགོས་ཞེས་བཤད་ནས་འགྲིག་ཁྲིམས་འཐོར་ཞིག་སོང་ནས་མཐའ་མ་འཁྱོལ་བ་དང༌། དགོན་པ་རེ་ཟུང་གི་བཤད་སྒྲུབ་ཐོར་ཞིག་སོང་བ་སོགས་མངོན་སུམ་གྱིས་གྲུབ་པ་ཡིན་པས་ཧམ་རྒྱུགས་དང་གཡམ་རྒྱུགས་མི་བྱེད་པར་དགེ་འདུན་ཁྲིམས་ཀྱིས་འཚོ། །ཉ་མོ་ཆུ་ཡིས་འཚོ། །ཟེར་བ་ལྟར་དགོས་ལ། སྟོན་པས་ཀྱང་དགེ་སློང་ཕ་ཁྲིམས་ཀྱི་དབང་དུ་བྱས་ནས་ཁྲིམས་ཉིས་བརྒྱ་ལྔ་བཅུ་རྩ་གསུམ་གསུང་པ་རེད། ཆོས་རྒྱལ་སྲོང་བཙན་སྒམ་པོས་མི་ཆོས་གཙང་མ་བཅུ་དྲུག་གི་ཁྲིམས་བཅས་ནས་རྒྱལ་ཁྲིམས་ཆོས་བཞིན་དུ་བསྐྱང་བ་ཡིན་པ་སོགས་རེད། ལུགས་གཉིས་ལ་རྨོངས་བའི་མི་འགའ་ཞིག་ལ་དགེ་རྒན་སོགས་ཀྱིས་རང་ལ་སློབ་གསོ་ལེགས་པར་མི་གནང་བར་བག་མེད་བྱེད་དུ་བཅུག་སྟེ་གཡོ་སྒྱུ་བྱས་པ་ལ་མི་ཐབས་ཅན་དང་མི་བཟང་བོའི་མིང་བཏགས་པ་དང༌། རང་ལ་བྱམས་བརྩེས་བསྐྱངས་ནས་སློབ་གསོ་གནད་ཐོག་ཏུ་ཁེལ་བ་གནང་བ་ལ་སྒྲོ་འདོགས་དང་སྐུར་འདེབས་བྱེད་པ་དང་མི་ངན་དང་ཐབས་མེད་ཅེས་སྨྲ་བ་ནི་རྨོངས་བ་ལས་ཀྱང་ཆེས་རྨོངས་བའོ། །ཆོས་འདུལ་བ་ལས་མཁན་པོས་སློབ་བུ་རྒོད་བག་ཅན་དུ་བཏང་ན་ཤན་པ་བྱས་པ་ལས་ཉེས་པ་ཆེ་བར་ གསུངས་བའི་གནད་ཅིག་ཡོད་དོ། །ངག་དབང་དངོས་གྲུབ་དཔལ་གྱིས་གསར་སྐྱེས་ཀྱི་གྲྭ་བ་མང་པོ་སློབ་གསོ་ངན་པས་མགོ་འཁོར་བ་ལ་བསམ་ནས་ཉིན་གུང་གི་ཇ་འཐུང་ཞོར་ལ་ཁམས་ནང་ཆེན་གོ་ཆེ་དགེ་འཕེལ་དགོན་ནས་བྲིས་པའོ། ། དགོན་སྡེ་ནི།དགོན་སྡེ་ནི། རྒྱལ་བསྟན་འཛིན་སྐྱོང་སྤེལ་བའི་གནས་ཡིན་ལ། དེ་ཡང་བསྟན་པ་རྣམ་དག་དེ་ཐོས་བསམ་སྒོམ་གསུམ་གྱིས་བདག་སྐྱོང་གནང་མཁན་ནི་གཙོ་བོ་རབ་ཏུ་བྱུང་བ་རྣམས་རེད། དེས་ན་དགོན་སྡེ་ནི་རང་ལུགས་དྲི་མ་མེད་པའི་བསྟན་པ་རྣམ་དག་ཅིག་འཛིན་སྐྱོང་སྤེལ་གསུམ་བྱེད་སའི་རྟེན་གཞི་ཞིག་ཡིན་པ་ལས། དད་ལྡན་མང་ཚོགས་ཀྱི་ལག་ནས་གཡོ་ཐབས་ཀྱིས་དཔལ་འབྱོར་བསྡུ་ལེན་བྱེད་རྒྱུ་དང༌། ལྷ་ཁང་དང་གསེར་སྐུ་གང་མང་གང་ཆེ་གང་ལེགས་ལྟ་རྒྱུ་ནི་གལ་ཆེན་ཞིག་མ་ཡིན་ལ། ལྷ་སྐུ་སོགས་ནི། བསྟན་པ་ལ་མཛད་རྗེས་བླ་མེད་བཞག་མྱོང་བའི་སྐྱེས་ཆེན་དམ་པ་ཞིག་གི་མཚོན་བྱེད་དང་དེ་ཡི་བཀའ་དྲིན་གྱི་དྲན་གསོ་དང་བསོད་ནམས་བསགས་པའི་ཞིང་ངམ་རྟེན་དུ་བཞག་པ་ལས། བསྟན་པ་དངོས་མ་ཡིན་པ་ལ། དཔེར་ན་ཡུལ་ལུང་སོ་སོར་བྱས་རྗེས་ཆེ་བའི་མི་རྣམས་ལ་འདྲ་སྐུ་དང་རྡོ་རིང་བསླང་པ་ལྟ་བུ་རེད། དེས་ན་ལྷ་སྐུ་ལ་དད་རྟེན་དང་ཚོགས་བསགས་པའི་ཞིང་ཙམ་ལས། དེ་ལ་ཆེས་རིན་ཐང་ཅན་དང༌། གྲངས་མང་དགོས་དོན་མེད་པར་མ་ཟད། ཚོགས་ངན་བསགས་པའི་རྒྱུ་རུ་འགྲོ་བ་ལ་ཉེ་བས་རེ་ཟུང་ཙམ་གྱིས་ཆོག་སྙམ། ལྷ་སྐུ་ཅི་འདྲ་བཟང་ཞིང་སྤུས་ཚད་ཇི་ལྟར་མཐོ་ཡང་ཕན་ཚུན་འགྲན་རྩོད་ཀྱི་རྣམ་པ་དང་གཡོ་སྒྱུས་དང་ལོག་འཚོས་དཔལ་འབྱོར་འཚོལ་སྡུད་བྱས་ནས་ཚོགས་བསགས་ཀྱི་ཞིང་དུ་མི་འགྱུར་བ་ཡང་ཆེས་མང་བ་རེད་འདུག ལྷ་སྐུ་དེ་དག་གིས་ཆོས་ཚིག་གཅིག་ཀྱང་འཆད་ཉན་སྤེལ་གསུམ་བྱེད་ཀྱི་མེད་ལ། དོན་ལ་རིགས་གཞུང་ལྟ་བུའི་གོ་བ་ཟབ་མོའང་ཅི་ཡང་ལེན་རྒྱུ་མེད། ཚོགས་བསགས་ཀྱི་དམིགས་རྟེན་ཙམ་ལ་དོན་ངོ་མར་ཕྱི་དངོས་པོ་བཟང་ངན་ཆེ་ཆུང་མེད་པར་ནང་སེམས་ཀྱི་དད་མོས་ལ་རག་ལས་པ་ཡིན་ཏེ། གང་གི་མོས་པ་ཡིད་བྱེད་པ། །དེ་ཡི་མདུན་ན་ཐུབ་པ་བཞུགས། །ཞེས་གསུངས་པས་སོ། །རྒྱུ་མཚན་དེས་ཆོས་གང་བསྒྲུབས་ཀྱང་ནང་བསམ་པའི་ཤེས་རབ་ཀྱི་སྐྱེ་སྟོབས་ལ་རག་ལས་པ་ལས་ཕྱི་དངོས་པོ་གཙོར་མི་ཆེ་བར་བསྟན་པ་རེད། སངས་རྒྱས་བསྟན་པ་ལུང་རྟོགས་གཉིས་སུ་ངེས་ལ། དེ་གཉིས་ནི་སེམས་སྟེང་ཁོ་ནར་གནས་པ་མ་གཏོགས་གཞན་ཕྱི་རོལ་ས་རྡོ་ཞིག་ལ་གནས་ཐབས་མེད་པ་རེད། དེས་ན་དགོན་སྡེ་ནི་འཐུས་སྒོ་ཚང་བའི་མདོ་སྔགས་རིག་གནས་སམ་གཙུག་ལག་སློབ་གཉེར་གནང་ས་ཆེན་པོ་ཞིག་ཡིན་དགོས་པ་ལས་ལྷ་སྐུ་གསེར་སྐུ་རྐྱང་རྐྱང་བཤམས་སྟོན་བྱེད་ས་དཔེར་ན་དེང་དུས་ཀྱི་ལྷ་སྐུའི་ཚོང་ཁང་ལྟ་བུ་ཞིག་གཏན་མ་ཡིན། འདས་པའི་ལོ་རྒྱུས་ལ་བསམ་ན་དགོན་སྡེ་ནི་བོད་ཀྱི་སློབ་གྲྭ་ཆེན་པོ་ཞིག་ཡིན་ལ། དེ་ལས་བོད་ཀྱི་ཤེས་ཡོན་པ་རྣམས་འཚར་ལོངས་སུ་བྱུང་བ་རེད། དགོན་པ་ནི་དགོན་བདག་འཇིག་རྟེན་ལ་མཁས་པ་ཞིག་གིས་བྲན་གཡོག་ལམ་ལུགས་དར་ཁྱབ་བྱེད་སའི་གནས་གཞི་མ་ཡིན་པར་ཤེས་ཡོན་ལྡན་པའི་ནང་བའི་རབ་བྱུང་བ་གསོ་སྐྱོང་བྱེད་ས་ཞིག་དགོས། མདོར་ན་དགོན་པ་ནི་མི་སྐྱེད་སྲིང་བྱེད་ས་ལས་ས་རྡོ་སྐྱེད་སྲིང་བྱེད་སའི་གཞི་ཞིག་མ་ཡིན་པ་ཤེས་དགོས། དངོས་གྲུབ་དཔལ་ནས། རྒྱ་བླའི་མཚན་ཉིད། རྒྱ་ནང་དུ་སོང་ནས་རྫུན་གྱིས་མགོ་སྐོར་སྣ་ཚོགས་བྱེད་པའི་ངོ་ཚ་ཁྲེལ་མེད་ཀྱི་གྲྭ་བ་རྫུན་མ་དེ། རྒྱ་བླའི་མཚན་ཉིད། དེ་ལ་མ་ཁྱབ་པ་དང་ཁྱབ་ཆེས་པ་དང་དོན་ལྡོག་ཏུ་མི་སྲིད་པའི་སྐྱོན་གང་ཡང་མེད་དོ། །འོ་ན་རྒྱ་ནང་དུ་བྱོན་པའི་མཁན་བླ་སྤྲུལ་དག་མ་རྣམས་ཆོས་ཅན། རྒྱ་ནང་དུ་སོང་ནས་རྫུན་གྱིས་མགོ་སྐོར་སྣ་ཚོགས་བྱེད་པའི་ངོ་ཚ་ཁྲེལ་མེད་ཀྱི་གྲྭ་བ་རྫུན་མ་ཡིན་པར་ཐལ། རྒྱ་བླ་ཡིན་པའི་ཕྱིར་ཟེར་ན། རྟགས་མ་གྲུབ་སྟེ། རྒྱ་ནང་དུ་འགྲོ་བའི་བླ་མ་ཡིན་ན་རྒྱ་བླ་ཡིན་པས་མ་ཁྱབ་སྟེ། དཔེར་ན་ལག་པ་དང་ལྡན་ན་ལག་ལྡན་ཡིན་པས་མ་ཁྱབ་པ་བཞིན་ནོ། །ལག་ལྡན་ཞེས་པ་ནི་གླང་བོ་ཆེའི་མིང་ཡིན་ནོ། །རྒྱ་བླ་རྫུན་མ་ཡིན་ན་མཁན་པོ་དང་སྤྲུལ་སྐུ་རྫུན་མ་ཡིན་པས་ཁྱབ་ལ། སྤྲུལ་སྐུ་རྫུན་མ་ཡིན་ན་རྒྱ་བླ་ཡིན་པས་མ་ཁྱབ་སྟེ། བླ་རྒན་བསྟན་པ་དང་འགྲོ་བ་ལ་མི་སེམས་པ་རྣམས་ཀྱིས་ཆབ་སྲིད་ཀྱི་དབང་གིས་མི་ཚེ་ལ་སྤྲུལ་སྐུ་རྫུན་མ་བརྒྱ་ཕྲག་ལྷག་རེ་ངོས་འཛིན་བྱེད་བཞིན་ཡོད་པ་ནི་མངོན་སུམ་རེད། དེའི་ནང་ན་རྒྱ་ནང་དུ་མི་འགྲོ་བ་ཡང་ཡོད་དོ། །བོད་ཀྱི་ཆོས་དང་རིག་གཞུང་དང༌། ཐང་ག་དང་གསེར་སྐུ་སོགས་སྐུ་གསུང་ཐུགས་རྟེན་དང༌། སློབ་གྲྭ རྒན་གསོ་ཁང་དང༌། ཆུ་ཁའི་བྱེ་མ་དང༌། ཚོགས་དུས་མཆོད་སོགས་ནི་རྒྱ་བླ་རྣམས་ཀྱི་ཚོང་རྫས་ཡིན་པ་རེད། ད་ནི་ཚོགས་ཞིག་འཚོགས་ན་འདྲ། དར་ཆོག་རེ་འཛུགས་ནའང་རྒྱ་བླ་དང་དེའི་འཁོར་གཡོག་ལ་དོགས་འཛེམ་མ་བྱས་ན་པར་རེ་བླངས་ནས་གཡོ་སྒྱུས་གར་འཆམ་རྒྱུ་རེད། ཤེས་ཡོན་མེད་པའི་དགོན་སྡེ་དང་བླ་མ་རྣམས་བཙོང་ཟིན་ནའང་ད་དུང་རྒྱ་བླ་བཀའ་དྲིན་ཅན་ཞེས་མཐེ་བོང་གནམ་ལ་བསྟན་ནས་གནས་སོ། །དེར་མ་ཟད་ཤེས་ཡོན་ཕྲ་མོ་རེ་ཡོད་ན་ཡང་དངུལ་ལ་དུང་ཞེན་གྱིས། རྒྱ་བླས་མཐོང་ཐོས་ཀྱི་སར། རྒྱ་བླ་བཟང་རབས་དང་དྲིན་ཆེ་རབས་ཀྱི་ཁ་ཏོན་བྱེད་མཁན་ཡང་ཡོད་དོ། །དགོན་པ་དེ་ན་རྒྱ་བླ་མང་ན་རྙོག་དྲ་རྒྱུན་མི་ཆད་པ་བསམ་ཤེས་ཀུན་ལ་གསལ་བ་ལྟར་རོ། །རྒྱ་བླའི་ཚད་ཤིང་ཞེས་པའི་ཚིག་ནག་འདི་ཁམས་མི་ཉག་གི་ཡུལ་ནས་བོད་པ་མགོ་སྐོར་འོག་ཏུ་ལྟུང་བ་རྣམས་སེམས་ཀྱིས་མ་བཟོད་ནས་སྤྲང་འཁྱམ་པ་དངོས་གྲུབ་དཔལ་གྱི་ཁ་ནས་ཤོར་སོང༌། དགོན་བདག་གི་ལམ་ལུགས་ནི། དམངས་གཙོའི་ལམ་ནས་བསྐྱོད་པ་ཤིན་ཏུ་གལ་ཆེ་ལ། དེ་ཡང་དམ་པའི་ཆོས་འདུལ་བ་ལྟར་སྡེ་སྣོད་འཛིན་པ་དག་གིས་བསྟན་པའི་དབུ་ཁྲིད་ན་བསྟན་པ་དག་གཙང་དཔལ་ཡོན་ཅན་གྱི་ཁོར་ཡུག་ཅིག་ཏུ་ཆགས་ཐུབ་པ་རེད། དེ་ལྟ་མ་ཡིན་ན་སྔོན་གྱི་ལུགས་སྲོལ་ལྟར་འབྱོར་ལྡན་དང་དཔོན་རིགས་ཀྱི་སྤྲུལ་སྐུའི་ལམ་ལུགས་དང་གདུང་བརྒྱུད་དུ་སྐྱེས་པའི་མི་བུ་དག་གིས་དགོན་དཔོན་བྱེད་པའི་ལམ་ལུགས་ལྟར་མུ་མཐུད་དེ་རྒྱུན་བསྐྱང་ན། དེའི་ནང་ན་ཤེས་ཡོན་དང་ལྷག་བསམ། འཇོན་ནུས་མེད་པ་ཆེས་མང་བས་གྲྭ་བཙུན་གྱི་དགོན་སྡེའི་སྣེ་ཁྲིད་བྱེད་མི་ནུས་པས་ན་ཡར་རྒྱས་ཀྱི་བཀག་རྡོ་རུ་འགྲོ་བར་ཡང་ཅིས་ཀྱང་མང་པོ་བྱུང་དང་འབྱུང་བར་འགྱུར་བ་རེད། དགོན་དེར་རེ་ལྟོས་འཆའ་བའི་སྐྱེས་བུ་རྣམས་རྗེས་ལུས་སུ་འགྱུར་བ་འདས་པའི་ལོ་རྒྱུས་ཀྱི་རྒྱབ་ལྗོངས་ལ་བལྟས་ན་ཤེས་པ་རེད། སྤྱིར་དགོན་སྡེ་ཞིག་ལ་མཚོན་ན་དཔལ་འབྱོར་དང་ལྷ་ཁང་གསེར་ཁང་སོགས་ཀྱིས་དགོན་སྡེ་བཟུང་ན་རིན་ཐང་ཆུང་བ་མ་ཟད་རྩོད་ཉོག་ཅན་ལས་མི་འདའ་འོ། །དེ་ལས་ཐོས་བསམ་སྒོམ་གསུམ་མམ་བཤད་སྒྲུབ་ཀྱི་སྒོ་ནས་དགོན་སྡེ་བཟུང་ན་གཟི་དཔལ་གྱི་འོད་སྟོང་དང་ལྡན་པར་མ་ཟད་ལྷིང་འཇགས་ཀྱི་ཁོར་ཡུག་ཀྱང་ལྡན་ངེས་པ་ཞིག་རེད་ཅེས་སྒེར་གྱི་ལྟ་ཚུལ་ཙམ་སྤྲང་འཁྱམ་པ་ངག་དབང་དངོས་གྲུབ་དཔལ་ནས། རང་གི་ཀུན་སྤྱོད་ལེགས་ན་ཤེས་ཡོན་པ། དྲང་བདེན་པ། ལྷག་བསམ་པ་རྣམས་ཀྱིས་བསྟོད་བསྔགས་ཀྱི་མེ་ཏོག་མངོན་པར་གཏོར་ལ། འོན་ཀྱང་ཀུན་སྤྱོད་ལེགས་ན་ཕྲག་དོག་ཅན་དང་གཡོ་སྒྱུ་ཅན་དང་གོ་ས་དང་མིང་ལ་འགྲན་རྩོད་པ་དག་གིས་ཆབ་སྲིད་ཀྱི་གཡོ་སྒྱུས་མིག་འཕྲུལ་སྣ་ཚོགས་བསྟན་ནས་སྒྲོ་འདོགས་དང་སྐུར་འདེབས་ཡོང་བ་ནི་དཔེར་ན་སྟོན་པ་ལ་ལྷས་སྦྱིན་བཞིན་ནོ། །ཀུན་སྤྱོད་མི་ལེགས་ན་དེ་ལས་ལྡོག་པའོ། །སྤྱིར་མི་སུ་ཡིན་ན་རང་ལ་ཡོན་ཏན་རེ་ཡོད་ན་གཞན་གྱི་ཕྲག་དོག་བྱེད་ན་ཡང་རང་གི་གཟི་བརྗིད་ལས་མ་འདས་སོ། །འོན་ཀྱང་གཞན་གྱི་བསམ་སྦྱོར་ཇི་ལྟར་ངན་ཀྱང་གཞན་ལ་གནོད་པ་བྱེད་མི་རིགས་པར་མ་ཟད་གཞན་ལ་བྱམས་བརྩེས་བལྟ་དགོས་ཏེ། ཇི་སྐད་དུ། བདག་ལ་བརྟེན་ནས་ནམ་དུ་ཡང༌། །གཞན་ལ་གནོད་པར་མ་གྱུར་ཅིག །སྒོ་གསུམ་གང་དང་གང་བརྩམ་པ། གཞན་ལ་ཕན་པར་འགྱུར་བར་ཤོག །ཅེས་གསུངས་པ་ལྟར་རོ། །ཡིན་ན་ཡང་གཞན་གྱིས་དྲང་བདེན་མ་ཡིན་པའི་གནོན་ཤུགས་ཇི་ལྟར་སྤྲད་ཀྱང་གསལ་བཤད་བྱེད་པའི་གོ་སྐབས་ཨེ་རེག་ལྟ་བ་ལས་གནས་ལུགས་དང་བསྟན་པ་མ་འོངས་པའི་མདུན་ལམ་དང་ལས་འབྲས་དོར་མི་རུང་བར་དམ་བཅའ་འམ་ཁ་ཕྱོགས་བརྟན་དགོས་སོ། །སྤྲང་འཁྱམ་པ་ངག་དབང་དངོས་གྲུབ་དཔལ་ནས། ཐར་བ་ཐོབ་པ་ལ་ཉོན་མོངས་པའི་སྒྲིབ་པ་སྤོང་དགོས། དེ་སྤོང་བ་ལ་གཉེན་པོ་ཟག་པ་མེད་པའི་ཤེས་རབ་སོགས་ཐོས་བསམ་སྒོམ་གསུམ་གྱི་ཤེས་རབ་དགོས་ལ། དེ་ཡང་སློབ་དཔོན་དབྱིག་གཉེན་གྱི་མཛོད་རྩ་བ་ལས། ཆོས་རྣམས་རབ་ཏུ་རྣམ་འབྱེད་མེད་པར་ཉོན་མོངས་རྣམས། །གང་ཕྱིར་ཉེ་བར་ཞི་བར་བྱ་བའི་ཐབས་མེད་ལ། །ཞེས་གསུངས་སོ། །ཤེས་རབ་བསྐྱེད་པ་ལ་གཞི་ཚུལ་ཁྲིམས་རྣམ་དག་གལ་ཆེ་སྟེ། མདོ་ལས། ཚུལ་ཁྲིམས་ལ་བརྟེན་ཚུལ་ཁྲིམས་ལ་གནས་ནས། །རིམ་གྱིས་འཕགས་པའི་བདེན་པ་བཞི་བོ་དག །ཡང་དག་ཇི་བཞིན་དུ་ནི་རྟོགས་པར་འགྱུར། །ཞེས་གསུངས་སོ། །དེས་ན་ཚུལ་ཁྲིམས་ཀྱི་མཆོག་དགེ་ཚུལ་སློང་གི་སྡོམ་པ་ལེགས་པར་བསྲུང་བར་བྱའོ། །ལ་ལ་ཐར་བ་ཐོབ་པ་ལ་ཤེས་རབ་མི་དགོས་པར་འདོད་པ་དང༌། ལ་ལ་ཐར་བ་ཐོབ་པ་ལ་ཚུལ་ཁྲིམས་མི་དགོས་པར་འདོད་པའི་ཉེས་སེལ་དུ་བསྟན་ལ་ལྷག་བསམ་གྱིས་བསྐུལ་ཏེ་བཙུན་པ་དངོས་གྲུབ་དཔལ་ནས་སྨྲས་པའོ། །སྟོན་པ་ཐུགས་རྗེ་ཅན་གྱིས། བག་ཡོད་པར་གྱིས་ཤིག ཅེས་གདམས་པ་ལྟར་ཐོས་བསམ་སྒོམ་གསུམ་སོགས་དམ་ཆོས་གང་བསྒྲུབ་པ་ཡིན་ན་བག་ཡོད་པར་བྱས་ན་དམ་ཆོས་དངོས་གནས་སུ་འགྱུར་ཐུབ་ལ། དེ་ལྟ་མིན་ན་གཞུང་ཆེན་བཀའ་པོད་ལྔ་ལ་ཐོས་བསམ་བྱེད་པ་ཡིན་ན་འདྲ། མདོ་སྔགས་ཀྱི་ཟབ་མོའི་དོན་བསྒོམ་ན་འདྲ་བདག་འཛིན་དང་ཉོན་མོངས་པའི་དབང་དུ་འགྲོ་བ་ལས་མ་འདས་ལ། དེ་ལྟར་ན་ཀུན་ཉོན་འཁོར་བའི་ཆོས་ལས་གཉེན་པོ་རྣམ་བྱང་གི་ཆོས་སུ་མི་འགྱུར་རོ། །དེས་ན་རབ་ཏུ་བྱུང་བ་ཞིག་ཡིན་ན་རྟགས་དང་ཆ་ལུགས་བརྗེ་བ་དང༌། མིང་བརྗེ་བ། བསམ་པ་བརྗེ་བ་སྟེ་བརྗེ་བ་རྣམ་པ་གསུམ་བརྗེས་ནས་རབ་ཏུ་བྱུང་བ་ཐུགས་ལ་ངེས་པར་བྱས་ནས་རབ་བྱུང་གི་བྱ་བ་སྤོང་ཀློག་གི་ལས་ལ་བརྩོན་པར་ཞུ། དངོས་གྲུབ་དཔལ་ནས། གཞུང་གི་གོ་བ།གཞུང་གི་གོ་བ། གཞུང་གི་གོ་བ་ནི། གནས་ལུགས་དང་མཐུན་པ་ལུང་རིགས་ཀྱི་རྒྱབ་རྟེན་ཡོད་པ་ཞིག་དགོས། ལུང་དེ་རྒྱལ་བ་སངས་རྒྱས་ཀྱི་བཀའ་འམ་འཛམ་གླིང་མཛེས་པའི་རྒྱན་དྲུག་གི་ལུང་ལྟ་བུའི་ལུང་ཚད་མ་ཞིག་དགོས་པ་ལས། བོད་ན་མཁས་པར་གྲགས་པའི་ཁྲོད་ན་མདོ་རྒྱུད་ཀྱི་གཞུང་དང་མི་མཐུན་པར་རང་རང་གི་འདོད་ཕྱོགས་ལ་ཉེ་བར་འཁྱམ་པ་མང་དུ་མཆིས། ཇི་སྐད་དུ། ཀུན་ཀྱང་སོ་སོར་ལས་ཀྱི་རླུང་ཆེན་གྱིས། །འདོད་ཕྱོགས་ཉེ་བར་འཁྱམས་ལ་འཕགས་པས་ཀྱང༌། །བཟློག་མིན་བདག་འདྲའི་ཚིག་ཀྱང་དབྱུང་མི་ནུས། །འོན་ཀྱང་དམ་པའི་གསུངས་པ་སྨྲས་པ་ཡིན། །ཞེས་གསུངས་པ་ལྟར་ཡིན་ལ། ལུང་རིགས་དང་མ་མཐུན་ན་རང་གི་བློ་ངོར་འཆར་བ་ཙམ་དང་འདྲ་འདྲ་འགྲིག་འགྲིག་གི་རྒྱ་བསྐྱེད་པ་ནི་གོ་བ་མ་ཡིན་ལ། དེ་ལ་ཡིད་རྟོན་མ་མཆིས་པ་ནི། དཔེར་ན་རི་བོང་གི་རྭའོ་སྙམ་ན་བློ་ངོར་རྩ་རྩེ་མོ་དང་བཅས་འཆར་རྒྱུ་ཡོད་པས་སོ། །ཡང་ལུང་དུམ་རེ་ལ་བརྟེན་པའམ་རང་བློ་ལ་འཆར་བ་རྒྱུ་མཚན་དུ་བྱས་ནས་ཐག་གཅོད་མི་སྔ་བར་གཞུང་ཆེན་གྱི་དགོངས་པ་མཐའ་ཆོད་པར་དཔྱད་པར་བྱ་དགོས། ཇི་སྐད་དུ། ཆོས་ཚུལ་ཟབ་པས་ཐག་ཆོད་མི་སྔ་བར། །ཞེས་གསུངས་ལ། དེ་ཡང་གང་ཟག་སུ་འདྲ་ཞིག་ཡིན་ཀྱང༌། གང་ཟག་ལ་དག་སྣང༌།ཆོས་ལ་བརྟག་དཔྱད་བྱེད་དགོས་པ་ནི། སྟོན་པ་ཐུགས་རྗེ་ཅན་གྱིས། དགེ་སློང་དག་གམ་མཁས་རྣམས་ཀྱིས། །བསྲེག་བཅད་བརྡར་བའི་གསེར་བཞིན་དུ། །ལེགས་པར་བརྟགས་ལ་ང་ཡི་བཀའ། །བླང་བར་བྱ་ཡི་གུས་ཕྱིར་མིན། །ཞེས་གསུངས་སོ།།བོད་ཀྱི་དགོན་སྡེ་འགའ་ཞིག་གི་ཀུན་སྤྱོད་དང་ཕྱག་སྲོལ་མང་པོ་ནི་མདོ་རྒྱུད་གང་དང་མི་མཐུན་པ་དག་སངས་རྒྱས་ཀྱི་དགོངས་པ་མ་ཡིན་པར་བླ་མའི་ཆོས་ཞེས་གཞན་གྱིས་གླེང་བ་ལྟར་རེ་ཟུང་བདེན་པ་ཡོད་སྙམ། སྤྱིར་དམ་ཆོས་རྣམ་དག་ནི། ཇི་སྐད་དུ། འགྲོ་བའི་སྡུག་བ}ལ་སྨན་གཅིག་པུ། །བདེ་བ་ཐམས་ཅད་འབྱུང་བའི་གནས། །ཞེས་གསུངས་པ་ལྟར་ཡིན་པ་གདོན་མི་ཟ་བ་ཡིན་མོད། མང་པོ་ཞིག་གིས་ཆོས་ལ་སློབ་སྦྱང་མ་བྱས་པའི་རྐྱེན་གྱིས་སྡིག་བཤེས་དང་ཆོས་ལོག་དང་འཕྲད་ནས་ཆོས་མིན་ཆོས་སུ་བཟུང་བ་སྐྱ་སེར་དབང་པོ་རྣོ་རྟུལ་ཐམས་ཅད་ཀྱི་ནང་ན་འདུག དེས་ན་ནང་ཆོས་ནི་དད་ཤེས་གཉིས་ལ་བརྟེན་ནས་འཛིན་དགོས་ཏེ།མདོ་ལས། དད་པ་མེད་པའི་མི་རྣམས་ལ། །དཀར་བོའི་ཆོས་ནི་མི་འབྱུང་སྟེ། །ཞེས་དང༌། མཛོད་ལས། ཆོས་རྣམས་རབ་ཏུ་རྣམ་འབྱེད་མེད་པར་ཉོན་མོངས་རྣམས། །གང་ཕྱིར་ཉེ་བར་ཞི་བར་བྱེད་པའི་ཐབས་མེད་ལ། །ཞེས་གསུངས་སོ། །སྒོམ་མམ་ཉམས་ལེན་བྱེད་པ་ལ་ཉམས་སུ་ལེན་བྱ་ཤེས་དགོས་ལ། ཚུལ་ཁྲིམས་བསྲུང་བ་ལ་དགག་སྒྲུབ་ཀྱི་བསླབ་བྱ་སོགས་ཤེས་ནས་བསྲུང་དགོས་པ་དང༌། གདུལ་བྱ་རྗེས་སུ་འཛིན་ཚུལ་ལ་ཆོས་བསྟན་པ་ལས་གཞན་མེད་ལ། དེ་ཡང་ཆོས་ཤེས་ནས་བསྟན་པ་ལས་མ་ཤེས་ན་སྟོང་གཏམ་མང་པོས་ཕན་པ་དང་བྲལ་བ་སོགས་ཤེས་པར་བྱས་ནས་གཞུང་གི་གོ་བ་གལ་ཆེའོ། །ངག་དབང་དངོས་གྲུབ་དཔལ་ནས། ལོ་ཉི་ཤུ་མ་ལོན་པ་ཤེས་བཞིན་དུ་སྔར་ལོ་བཅུ་གསུམ་ཡས་མས་ལ་དགེ་སློང་སྒྲུབ་ཁུལ་བྱས་པ་དག་དང་གསུམ་ལས་ལྷག་ཚོགས་ཀྱིས་དགེ་སློང་སྡོམ་པ་མཉམ་དུ་ལེན་ཁུལ་བྱས་པ་རྣམས་ལ་དགེ་སློང་གི་སྡོམ་པ་ཐོབ་མེད་པས་དགེ་ཚུལ་སློང་སྒྲུབ་སྐབས་སུ་ལས་གྲལ་བའི་ནང་དུ་འགྲོ་ན་ལས་ཆགས་དཀའ་བས་སྒྲུབ་ཡུལ་ལ་དགེ་སློང་གི་སྡོམ་པ་ཐོབ་དཀའོ།། ཡུལ་ལུང་འགའ་ཞིག་ལ་མངལ་བཤོལ་དང་བཅས་ཀྱང་ལོ་ཉི་ཤུ་མ་ལོན་པའི་སྔར་དགེ་སློང་སྒྲུབ་ཁུལ་བྱས་པ་དང་མི་བཅུ་བཅོ་ལྔས་མཉམ་དུ་དགེ་སློང་གི་སྡོམ་པ་བླངས་ནས་རྗེས་སོར་ལས་གྲལ་དུ་འགྲོ་བ་མཐོང་ཐོས་སུ་ཡོད་པས་ལས་ཆགས་དཀའ་བས་གཟབ་འཚལ། དེ་འདྲ་དག་ནི་འདུལ་བསྟན་རྨ་འབྱིན་པ་དང་ཕྱག་རྗེས་མ་དག་པ་ཡིན་ལ། ཁ་ཅིག་གིས་ཧ་གོ་བཞིན་དུ་རང་ལས་གྲལ་དུ་འགྲོ་བ་ནི་མི་གཞི་ཡང་མི་ལེགས་པར་སེམས་སོ། །དངོས་གྲུབ་དཔལ་ནས། པཎ་ཆེན་སྐུ་ཕྲེང་བཅུ་བའི་རྗེས་དྲན་ཚོགས་འདུའི་སྐབས་ཀྱི་གཏམ་བཤད།པཎ་ཆེན་སྐུ་ཕྲེང་བཅུ་བའི་རྗེས་དྲན་ཚོགས་འདུའི་སྐབས་ཀྱི་གཏམ་བཤད། པཎ་ཆེན་སྣང་བ་མཐའ་ཡས་ལ་ཕྱག་འཚལ་ལོ། །ཐུགས་རྩེ་བ་ཆེན་པོས་རྗེས་སུ་གཟུང་དུ་གསོལ། འདིར་སྐབས་སུ་བབ་པའི་ཞུ་བྱ་ནི། པཎ་ཆེན་རིན་པོ་ཆེ་རྗེས་དྲན་ལས་བརྩམས་ཏེ་ཞུ་རྒྱུ་ཡིན་པས། དེ་ཡང་ཐམས་ཅད་མཁྱེན་པ་ཏཱ་ར་ནཱ་ཐས། རྗེས་སུ་དྲན་པའི་དོན་ནི་དངོས་པོ་ལ་ཡོན་ཏན་ཇི་ལྟར་ཡོད་པ་ལྟར་མ་ནོར་ཞུགས་པ། ཞེས་གསུངས་པ་ལྟར་གངས་ཅན་ལྗོངས་ཀྱི་འགྲོ་བ་སྤྱིའི་སྐྱབས་མགོན་ལུགས་གཉིས་ཀྱི་བདག་པོ་མཚན་བརྗོད་པར་དཀའ་ཡང་དོན་གྱི་སླད་དུ་མཚན་ནས་སྨོས་ན་པཎ་ཆེན་སྐུ་ཕྲེང་བཅུ་བ་ཨེར་ཏི་ནི་རྗེ་བཙུན་བློ་བཟང་འཕྲིན་ལས་ལྷུན་གྲུབ་ཆོས་ཀྱི་རྒྱལ་མཚན་དཔལ་བཟང་པོ་མཆོག་ཅེས་བྱ་བ་སྲིད་པ་གསུམ་ན་མངོན་པར་མཐོ་བ་གང་ཉིད་ནི། སྤྱི་ལོ་༡༩༣༨ལོའི་ཟླ་༢ཚེས་༣ཉིན་ཡབ་བིས་མདོ་སྟོང་དཔོན་ གུར་མགོན་ཚེ་བརྟན་དང༌། ཡུམ་བསོད་ནམས་སྒྲོལ་མ་གཉིས་ཀྱི་སྲས་སུ་སྐུ་བལྟམས། སྤྱི་ལོ་༼༡༩༤༡༽ལ་པཎ་ཆེན་ཐམས་ཅད་མཁྱེན་པའི་ཡང་སྤྲུལ་དུ་ངོས་འཛིན་གནངས་ནས། སྤྱི་ལོ་༡༩༨༩ལོའི་ཟླ་༡ཚཻས་༢༨ཉིན་གཟུགས་སྐུའི་བཀོད་པ་ཆོས་དབྱིངས་སུ་བསྡུས་པ་རེད། ཁོང་རིན་པོ་ཆེ་ནི་སྐུ་ཚེ་གང་བོར་སྐྱེ་དགུ་མ་ལུས་པ་ཐམས་ཅད་ལ་བྱམས་དང་བརྩེ་བའི་མཛད་པ་སྐྱོང་མཁན་ཞིག་ཡིན་པར་མ་ཟད། འཛམ་གླིང་གི་མི་རིགས་སྤྱི་ལ་དབང་བའི་ཞི་བདེའི་རྒྱལ་སྲས་ཆེན་པོ་ཞིག་ཡིན་པར་ཡང་ཁོང་གི་མཛད་རྣམ་ལས་གསལ་བར་རྟོགས་ཐུབ། རླབས་ཆེན་གྱི་མི་ཞཻས་པ་ནི། མི་ཚེ་གཞན་དོན་དུ་ཕུལ་བའི་སྐྱེས་བུ་ཞིག་གི་མིང་ཡིན་པ་ལས། རང་དོན་གཙོ་བོར་འཛིན་མཁན་ཞིག་ལ་མིང་དང་གོ་ས་ཇི་ལྟར་ཡོད་ཀྱང་རླབས་ཆེན་གྱི་མཚན་དེ་ཐོགས་པར་མི་འོས། དེས་ན་རླབས་ཆེན་གྱི་མི་ནི་ཤིན་ཏུ་དཀོན་ཞིང་རྙེད་པ་རེ་འགའ་ཙམ་ཞིག་ཡིན། པཎ་ཆེན་བཅུ་བ་མཆོག་ནི་ཁ་ཞེ་གཉིས་མེད་ཕྱི་གསལ་ནང་གསལ་གྱི་སྒོ་ནས་སྐུ་ཚེའི་དབུ་རྫོགས་གཞུང་གསུམ་ག་གཞན་དོན་དུ་ཕུལ་བའི་སྐྱེས་བུ་རླབས་ཆེན་ཞིག་ཡིན་པས། ང་ཚོས་ཁོང་ལ་ནམ་ཡང་རྗེས་དྲན་དང་མྱ་ངན་ཞུ་དགོས་ཤིང༌། ཁོང་ལ་རྗེས་དྲན་ཞུ་བ་དེ་རང་ཅག་གི་བསོད་ནམས་རྒྱ་ཆེན་པོ་ཞིག་ཏུ་བརྩི་བར་འོས། སྤྱིར་བཏང་ཁོང་གི་མཛད་སྤྱོད་ཆེ་ལོངས་ཀྱི་གྲངས་ཙམ་ཡང་མཐའ་མེད་ཅིག་ལགས་ན། ཞིབ་ཕྲར་བརྗོད་པ་སུ་ཞིག་གིས་མི་ནུས་མོད། འོན་ཀྱང་ད་ཐེངས་རང་ལ་བགོ་སྐལ་ལྟ་བུར་བཞག་པ་དེ། ཚོགས་ཆུང་གིས་བཀོད་སྒྲིག་ལྟར་པཎ་ཆེན་བཅུ་བ་མཆོག་གིས་ཇོ་ནང་བའི་ཆོས་བརྒྱུད་ལ་མཛད་འཕྲིན་བསྐྱང་བའི་ཕྱོགས་ནས་ཡིན་འདུག་པས། དེའི་ཐད་ནས་རང་གིས་གོ་ཐོས་དྲན་གསུམ་དུ་ཡོད་པ་ཙམ་ཞིག་མདོར་བསྡུས་ཤིག་བརྗོད་པར་བྱེད་འདོད་དེ། ༡༩༨༢ལོའི་སྟོན་ཁར་པཎ་ཆེན་ཐམས་ཅད་མཁྱེན་པ་མདོ་སྨད་རྔ་ཁོག་ཏུ་ཆིབས་བསྒྱུར་གནང་ཞིང༌། མི་དམངས་ལ་མཇལ་ཁ་དང་བཀའ་སློབ་བརྩེ་གཟིགས་ཀྱི་མཛད་ཆེན་ཁུར་དུ་བཞེས་པ་ཡོངས་སུ་གྲགས་པ་ལྟར་རེད་འདུག་ལ། དེའི་སྐབས་སུ་ཁོང་ཉིད་རྔ་ཡུལ་ཇོ་ནང་བསྭེ་དགོན་པའི་དགོན་བདག་བསྭེ་མཁར་གཉིས་གྲྭ་མང་འདུས་སྡེ་ལྷ་འབངས་དང་བཅས་པས་བཀྲ་ཤིས་མེ་ལོང་ཐང་ངམ་སྔར་གྱི་བསྭེ་དགོན་པའི་དགོན་ཤུལ་གྱི་ཐང་དུ་ཇ་ཞུས་གནང་བ་བཞིན་ཕེབས་ཤིང༌། དགོན་དེའི་སྐྱ་སེར་སྟོང་ཕྲག་ལྷག་གིས་ཕེབས་བསུ་བྱས་ཏེ། དགོན་བདག་མཁར་སྤྲུལ་རིན་པོ་ཆེ་ནས་མནྜལ་ཟབ་རྒྱས་ཕུལ། ཇོ་ནང་བའི་དབང་ལུང་མན་ངག་གི་བདག་པོ་གཅིག་པུར་གྱུར་བ་བླ་མ་ཐུགས་རྗེ་དཔལ་དང་ཡང་མཇལ་འཕྲད་བྱས། སྐབས་དེར་པཎ་ཆེན་ཐམས་ཅད་མཁྱེན་པ་མཆོག་ནས། དགོན་དེར་རྟེན་གསུམ་བསྐྱར་བཞེངས་དང༌། དགོན་པ་བསྐྱར་གསོ་ཆོག་པའི་བཀའ་ལུང་བྱིན་པར་མ་ཟད། མི་རིགས་རང་སྐྱོང་དང༌། ཆོས་དད་རང་མོས་བྱ་བའི་སྐོར་ནས་ཀྱང་བཀའ་གསུང་གང་མང་བསྩལ་བར་འདུག ཇོ་ནང་རྔ་སྟོད་རྩི་ནང་དགོན་གྱི་གྲྭ་མང་སྡེ་འབངས་གཉིས་ནས་ཀྱང་ཕེབས་བསུ་དང་ཇ་ཞུས་ཕུལ་བ་བཞིན་ཕེབས་གནང་མཛད་དེ། བྱང་སེམས་བདག་ཉིད་ཆེན་པོ་ཇོ་ནང་བའི་བླ་མ་མཁས་བཟང་རིན་པོ་ཆེ་མཆོག་ལ་ཤིན་ཏུ་ཐུགས་མཉེས་པའི་མཇལ་འཕྲད་གནང་ཞིང༌། དབུ་ཐོད་གཏུག་ནས་དད་གུས་དཔེ་མི་སྲིད་པ་གནང་བ་དང༌། རྗེས་ནས་པཎ་ཆེན་ཐམས་ཅད་མཁྱེན་པ་མཆོག་གིས། བླ་མ་མཁས་བཟང་ལ་བསྟོད་སྔགས་མང་དུ་གནང་བའི་བཀའ་གསུང་དེ་རྔ་ཡུལ་སོགས་ས་ཆ་སྟོད་སྨད་མང་བོ་ལ་ཡོངས་གྲགས་རྩོད་མེད་རླུང་ལྟར་དུ་ཁྱབ་པ་བྱུང༌། དེར་བརྟེན་ནས་རྔ་བའི་ཆོས་བརྒྱུད་རིས་མེད་ལ་བླ་མ་མཁས་བཟང་གི་མཛད་ཕྲིན་ཧ་ཅང་དར་བར་བྱུང༌། སྐབས་དེར་ལྕམ་མདའ་དགོན་པའི་མཁན་ཆེན་ཤེས་རབ་གསལ་བྱེད་ལ་མཇལ་ཁ་གནང༌། ཡང་ནོར་སྦྱིན་གཏེར་བདག་ཨརྱ་ཛམ་བྷ་ལའི་གནས་རིའི་མདུན་དུ་གནས་འཆའ་ཞིང་གཞིས་སྡོད་བྱེད་པའི་ཇོ་ནང་བའི་ཆོས་སྡེ་ཆེན་པོ་ཤར་ཛམ་ཐང་ཆོས་རྗེ་དགོན་བསམ་འགྲུབ་ནོར་བུའི་གླིང་འདི་ནི་མདོ་སྨད་ཀྱི་ཇོ་ནང་བའི་དགོན་པ་ཡོངས་ཀྱི་ཐོག་མ་དེ་ཡིན། ཆོས་རྗེ་དགོན་འདིའི་ཐོག་མར་ཕྱག་འདེབས་མཛད་པ་པོ་ནི་༡༣༥༠ - ༡༤༢༥དྲུང་རཏྣ་ཤྲཱི་ཡིན་ཞིང༌། ༡༣༨༥ལོར་ཛམ་ཐང་དགོན་ཆེན་བཏབ། དེ་རྗེས་དྲུང་རཏྣ་ཤྲཱིས་ཁོང་གི་དངོས་སློབ་ཆོས་རྗེ་སྐུ་ཕྲེང་དང་བོ་རྒྱལ་བ་བཟང་ལ་གདན་ས་གཏད་ཅིང༌། དེ་ནས་རིམ་གྱིས་ཆོས་རྗེ་སྐུ་ཕྲེང་གཉིས་པ་དཔལ་འབྱོར་བཟང་བོའམ་རྒྱལ་བ་སེང་གེ་དང༌། འདིའི་སྐུ་དུས་སུ་ཆོས་རྗེ་ཞེས་པའི་མིང་དེ་རྒྱ་ནག་གོང་མས་ཧ་ཝང་ཞེས་པའི་མཚན་གནང་བ་ལ་བརྟེན་ནས་མིང་དེ་བྱུང་བ་རེད། དེ་ནས་བཟུང་ཆོས་རྗེ་སྐུ་ཕྲེང་བཅུ་བ་བདུད་འདུལ་རྡོ་རྗེའི་བར་ཆོས་རྗེ་དགོན་པ་འདི་མ་ཉམས་པར་བྱུང་ལ། དགོན་པ་དེའི་དབོན་སྤྲུལ་རྗེ་དྲུང་ནམ་མཁའ་འཇིགས་མེད་ཀྱི་ཡང་སྤྲུལ་ཀརྨ་བསོད་ནམས་མཆོག་པཎ་ཆེན་བཅུ་བ་རིན་པོ་ཆེ་མཆོག་ཁྲོ་སྐྱབས་ཐུགས་རྗེ་ཆེན་པོར་བྱོན་སྐབས་པཎ་ཆེན་རིན་པོ་ཆེ་དང་མཇལ་ནས་པཎ་ཆེན་རིན་པོ་ཆེ་ནས་ཐུགས་བརྩེ་གཟིགས་ཀྱིས་མ་འོངས་པའི་བསྟན་སྲིད་ལ་བཀའ་སློབ་ཟབ་རྒྱས་གནང༌། ཛམ་ཐང་ན་མཉམ་དུ་དགོན་པ་གསུམ་ཡོད་པའི་ནང་གི་གཉིས་པ་ཚེས་བཅུ་དགོན་ནི། ཚེས་བཅུ་རཏྣ་ཀིརྟིས་ཕྱག་བཏབ་པ་ཡིན་ནོ། །གསུམ་པ་གཙང་བ་དགོན་ནི། ཛམ་ཐང་ཆོས་རྗེ་སྐུ་ཕྲེང་ ལྔ་བ་རྒྱལ་བ་ལྷུན་གྲུབ་གྲགས་པས་སྤྱི་ལོ་༡༧༡༧ལ་གཙང་བ་ངག་དབང་བསྟན་འཛིན་རྣམ་རྒྱལ་ཛམ་ཐང་ལ་ཕེབས་སྐབས་དགའ་བསུ་བྱས་ནས་ཆོས་རྗེ་ཁོང་གི་གཟིམ་ཆུང་གནངས་ཏེ་བཞུགས་སུ་གསོལ་བས་རིམ་གྱིས་གཙང་བ་དགོན་པ་བྱུང་ནས་ད་ལྟའི་བར་དུ་འཕེལ་རྒྱས་བྱུང་ལ། དགོན་པ་དེའི་གསེར་ཁྲི་བརྒྱད་པ་གཙང་སྤྲུལ་འཇིགས་མེད་རྡོ་རྗེ་དང༌། ཛཾ་ཐང་ཆོས་རྗེ་དགོན་པའི་དབོན་པོ་དཔལ་འཛིན་གཉིས་མདོ་སྨད་རྔ་ཡུལ་དུ་པཎ་ཆེན་རིན་པོ་ཆེ་ཕེབས་སྐབས་ཆེད་དུ་མཇལ་ཁ་ཞུས་ནས་ཛམ་ཐང་དུ་ཕེབས་པར་ཞུ་བ་ནན་གྱིས་ཕུལ། པཎ་ཆེན་རིན་པོ་ཆེ་ཁོང་གི་ཞལ་ནས་ཕེབས་པ་ལ་དགའ་སྤྲོ་ཡོད་ཚུལ་སོགས་བཀའ་སློབ་ཟབ་རྒྱས་གནང༌། རྗེས་སོར་འབར་ཁམས་ཁུལ་ནས་གནང་བ་མ་ཐོབ་པས་ཕེབས་མ་ཐུབ་པ་རེད། དེ་ནས་༡༩༨༧ལོར་ཛམ་ཐང་གཙང་ཆེན་དགོན་གྱི་རྡོ་རྗེ་སློབ་དཔོན་ལུགས་གཉིས་ཀྱི་མཁྱེན་དཔྱོད་ཡངས་བ་ངག་དབང་ཡོན་ཏན་བཟང་བོ་མཆོག་རྒྱ་ནང་པེ་ཅིང་དུ་ཕེབས་ཏེ་ཇོ་ནང་པའི་གནས་བབ་དང་དཀའ་ངལ་གྱི་རྒྱུ་མཚན་རྣམས་ཞུས་ཚེ། ཀུན་གཟིགས་པཎ་ཆེན་རིན་པོ་ཆེ་མཆོག་གིས་ཐུགས་དགྱེས་དགྱེས་མཛད་ནས། ཇོ་ནང་པའི་གཞི་ལམ་འབྲས་བུའི་ལྟ་གྲུབ་ཀྱི་ངོ་སྤྲོད་གནད་བསྡུས་ཤིག་སྐུར་ཤོག་གསུངས་ནས་བཀའ་བསྩལ། རྗེས་སུ་སླར་ཡང་ཀྲུང་གོ་བོད་བརྒྱུད་མཐོ་རིམ་ནང་བསྟན་སློབ་གླིང་སྤྲུལ་སྐུའི་སློབ་གྲྭ་གསར་དུ་འཛུགས་སྐབས་སུ། པཎ་ཆེན་རིན་པོ་ཆེས་བཀའ་སློབ་འོག་མཐོ་རིམ་ནང་བསྟན་སློབ་གླིང་ནས་གཟན་དཀར་སྤྲུལ་སྐུ་ཚང་ལ་བརྒྱུད་ནས་ཕྱག་ཡིག་དང་སློབ་བསྡུས་དཔང་ཡིག་སོགས་བསྐུར་ནས་ཀྲུང་གོ་བོད་བརྒྱུད་མཐོ་རིམ་ནང་བསྟན་སློབ་གྲྭའི་ནང་དུ་ཇོ་ནང་པའི་སྤྲུལ་སྐུའི་སློབ་མ་ཞིག་དང་ཡང་བསྐྱར་ཇོ་ནང་པའི་ལྟ་གྲུབ་རྒྱས་བསྡུས་འཚམ་པ་ཞིག་དགོས་གསུངས་པ་སོགས་ཐུགས་ཁུར་བརྩེ་གཟིགས་བླ་མེད་གནང་ཞིང༌། བཀའ་གསུངས་ལྟར་ལུགས་གཉིས་ཀྱི་མཁྱེན་དཔྱོད་ཡངས་བ་བླ་མ་ཡོན་ཏན་བཟང་པོ་མཆོག་གིས་བླ་མ་བློས་གྲགས་ཀྱི་གཞན་སྟོང་འཇིགས་མེད་གདོང་ལྔའི་ང་རོ་ལས་ཅུང་ཟད་བསྡུས་ཏེ་བསྐུར་བས། དེ་ཉིད་གངས་ཅན་རིག་པའི་སྒོ་འབྱེད་ལྡེ་མིག་གི་དཔེ་ཚོགས་སུ་དཔར་བསྐྲུན་བྱས་ཤིང༌། སྤྲུལ་སྐུའི་འཛིན་གྲྭ་དེར་ཡང་ཇོ་ནང་བའི་ཆོས་བརྒྱུད་ངོས་ནས་དངོས་ཞུགས་བྱེད་པའི་ཐོབ་སྐལ་གནང༌། བོད་ཀྱི་ཆོས་བརྒྱུད་དྲུག་སྤྱི་མཚུངས་ཀྱི་སྒོ་ནས་ཐམས་ཅད་ལ་ནང་ཆོས་མཉམ་དུ་སློབ་སྦྱོང་བྱེད་སའི་ཁོར་ཡུག་ཀྲུང་གོ་པེ་ཅིན་ནང་བསྟན་སློབ་གླིང་འདི་ཉིད་པཎ་ཆེན་རིན་པོ་ཆེའི་བཀའ་དྲིན་ལ་བརྟེན་ནས་བྱུང་བ་དང༌། ཁྱད་པར་དུ་ཇོ་ནང་བ་ལ་མཚོན་ན་ད་བར་དུ་ནང་བསྟན་སློབ་གྲྭ་དེའི་ནང་དུ་སློབ་མ་དང་དགེ་རྒན་ཕྱོགས་གང་ཐད་ནས། སྐལ་བཟང་མི་དམན་པ་ཞིག་ཤར་ཡོད་པ་འདི་ཐམས་ཅད་གཟིགས་པ་པཎ་ཆེན་རིན་པོ་ཆེ་བཅུ་བ་མཆོག་གི་བཀའ་དྲིན་ཡིན་པ་སྨོས་ག་ལ་དགོས། དེའི་རྗེས་སུ་ཡང་ཀུན་མཁྱེན་འཇམ་དབྱངས་བཞད་པས་ནང་བསྟན་སློབ་གྲྭ་དེར་ཇོ་ནང་བ་ལ་ཆོས་བརྒྱུད་སྤྱི་མཚུངས་ལྟར་སློབ་བསྡུ་སོགས་ཀྱི་ཐོབ་སྐལ་གནང་ནས་བཀའ་དྲིན་སྐྱོང་བཞིན་པ་ནི་ཇོ་ནང་བ་རྣམས་ལ་བླ་ལྷག་ཏུ་བཀའ་དྲིན་ཆེ། ཀུན་གཟིགས་རིན་པོ་ཆེ་ནི། ཆོས་བརྒྱུད་བྱེ་བྲག་པ་དང་ཆོལ་ཁ་ཕྱོགས་རེ་བ་ཙམ་མ་ཡིན་པར། བོད་མདོ་དབུས་ཁམས་གསུམ་སྤྱི་དང༌། ཆོས་བརྒྱུད་གྲུབ་མཐའ་ཐམས་ཅད་ཀྱི་བསྟན་པའི་བདག་པོ་ཡང་རེད་ལ། བདག་པོ་ཡིན་པ་བཞིན་དུ་ཕྱོགས་མེད་རིས་མེད་ཀྱི་སྒོ་ནས་གཟིགས་སྐྱོང་ཡང་སུ་ལ་ཡིན་ན་གནང་ཡོད་པ་ཞིག་རེད། ཁོང་གི་ཞལ་ནས། ང་ཨུ་ཡོན་ཀྲང་གི་གོ་གནས་ལ་བསྡད་མྱོང་ལ། ལོ་དགུ་ཟླ་བརྒྱད་ལ་མུན་ནག་ཁྲིམས་ཁང་ནས་ཉེས་མེད་བཙོན་པ་ཡང་བྱས་པ་ཡིན། འོན་ཀྱང་ངས་ཐོབ་ཤོར་དེ་ཙམ་ལ་སྣང་དོགས་རྩ་བ་ནས་བྱས་མ་མྱོང༌།ངས་སྣང་དོགས་བྱེད་ས་ནི། བོད་ཀྱི་སྐད་དང་ཡི་གེ། ཆོས་དང་རིག་གཞུང༌། ཡུལ་སྲོལ་གོམས་གཤིས་རྣམས་ལ་ང་རང་འདོད་པ་ཚིམས་པའི་བྱ་བ་ཞིག་བསྒྲུབ་མ་ཐུབ་པ་དེ་ཡིན། ཞེས་གསུངས་པ་བཞིན། ང་ཚོའི་ད་ལྟའི་ཉི་མ་འདི་ཁོང་ཐམས་ཅད་མཁྱེན་པ་མཆོག་གི་སྐུ་སྲོག་གིས་ཉོས་པའི་རིན་པ་ཞིག་རེད་འདུག་ལ། དེས་ན་ཁོང་གི་མཛད་པ་གང་ཞིག་མཛད་ཀྱང། བོད་པའི་བག་ཆགས་རྙིང་བ་ལྟ་བུ་ཆོས་ལུགས་དང་མདོ་དབུས་ཁམས་གསུམ་ལྟ་བུ་རིས་བཅད་ཀྱི་བསམ་བློའི་དབང་དུ་སོང་བ་གཅིག་ཀྱང་གཏན་ནས་མེད། བོད་རྗེས་ལུས་ཀྱི་རྣམ་པ་མ་བསྒྱུར་ན་ང་ཤི་ཡང་མིག་མི་བཙུམ། གསུངས་པ་བཞིན། ང་ཚོའི་ཁོང་གི་རྗེས་དྲན་གྱི་མཆོད་པ་རུ་བླ་ན་མེད་པའི་རིག་གཞུང་སྲུང་སྐྱོབ་དང༌། བྱམས་སྙིང་རྗེ་དང་སྤོབས་པ་ལྡན་པ་ཞིག་བཟོ་རྒྱུ་དེ་རེད་བསམས་སོང༌། ཁོང་གི་ཞལ་ནས། ཁྱེད་ཅག་གིས་ངའི་འདྲ་པར་ལྷ་ཁང་དུ་བཤམས་ནས་དད་པ་ཡོད་མདོག་གིས། སྤོས་བདུག་ཕྱག་འཚལ་བ་ལས། ངའི་ཁར་ཉོན་ལ་བོད་ཡིག་སྦྱོངས། ཚིག་བརྩིས་ཏེ་བོད་སྐད་ཤོད། གསུངས་པ་བཞིན་རེད། ཁོང་གི་མི་རིགས་སློབ་གསོའི་ཚིག་མདོར་བསྡུས་ཤིག་འདིར་ལུང་འདྲེན་དུ་འགོད་ན། ༡༩༨༦ལོར་མཚོ་སྔོན་དཔའ་ལུང་དུ་ཕེབས་ནས་སྐྱ་སེར་སོ་སོའི་ལས་ཀ་དང་མི་རིགས་ཀྱི་སྐད་ཡིག་སྐོར་གསུང་དོན། གྲྭ་བ་ཚང་མས་བསླབ་གསུམ་གྱི་ཉམས་ལེན་དང༌། མདོ་སྔགས་ཀྱི་འཆད་ཉན། སྒྲིག་ལམ་ཀུན་སྤྱོད་སོགས་མཉམ་པར་འཇོག་རྒྱུ་ཧ་ཅང་གལ་ཆེན་པོ་འདུག དེང་སང་དགོན་པ་དང་གྲྭ་བ་མཐའ་དག་ཇེ་མང་ནས་ཇེ་མང་དུ་འགྲོ་བཞིན་པ་འདི་རེད། ཚང་མ་དེ་བཞིན་རེད། འོན་ཀྱང་གྲྭ་བ་མཐའ་དག་རྣམ་པར་དག་པ་ཡིན་ན་གྲྭ་བ་མང་ན་ཡག་པོ་འདུག གྲྭ་བ་བྱས་ཀྱང་དམ་པའི་ཆོས་ཡག་པོ་མ་སྦྱངས། སྡོམ་ཁྲིམས་ཀྱང་ཡག་པོ་མ་བསྲུང་བར་བསྡད་ན་བསྟན་པ་ལ་གནོད་རྒྱུ་མ་གཏོགས་མེད་པས། འདིའི་སྐོར་ལ་དགོན་པ་སོ་སོའི་ལས་སྣ་ཚོས་ཀྱང་གྲྭ་བ་རྣམས་ལ་སློབ་གསོ་གཏོང་དགོས་ལ། གཏོང་ཡང་ངེས་པར་ཡོད་རྒྱུ་རེད། དགེ་རྒན་ཚོས་ཀྱང་རང་གི་དགེ་ཕྲུག་ལ་རིག་གནས་ཡག་པོ་སྦྱོངས་དང༌། སློབ་གཉེར་ཡག་པོ་བྱོས་ཞེས་སློབ་གསོ་ནན་མོ་གནང་དགོས་གྲོང་བ་ཚང་མ་ཡིན་ནའང་དེང་སང་ཏང་གི་སྲིད་ཇུས། ཆོས་ལྡན་རང་ལུགས་ཀྱི་སྲིད་ཇུས་ཚང་མ་ཡག་པོ་འདུག དཔལ་འབྱོར་སྲིད་ཇུས་ཡིན་ནའང་ཚང་མ་ཡང་མོ་བྱས་ནས་བསྡད་ཡོད་པ་འདི་རེད། ད་གཟོད་ཚང་མས་མཐུན་སྒྲིལ་ཡག་པོ་བྱས་ཏེ་རང་རང་ཕྱུག་པོ་ཡོང་རྒྱུར་འབད་འབུངས་བྱོས། དེ་མིན་ན་རང་རང་འདོད་པ་ལྟར་དུ་ཆོས་ཕྱོགས་ཀྱི་བྱ་བ་བཅའ་དགོས་པ་རང་རེད། དགེ་བའི་ཚོགས་གང་སྒྲུབ་ཀྱང་རང་རང་གི་འདོད་པ་ལྟར་བྱས་ཏེ་སྒྲུབ་ན་ཆོག་པ་རེད། དེ་ཡང་ང་ཚོའི་ས་ཆ་འདིར་ཆ་མཚོན་ན་རྒྱ་རིགས་དང་ཧེ་རིགས་ཚང་མ་འདྲེས་ཏེ་བསྡད་ཡོད་པ་རེད། ཁྱོད་ཚོ་ཚང་མས་ཀྱང་སངས་རྒྱས་ཀྱི་ཆོས་ལ་དད་པ་ཡག་པོ་བྱོས། བོད་རང་གི་ལ་རྒྱ་ཡག་པོ་ཟུངས། བོད་ཡིག་ཡག་པོ་སློབས། བོད་སྐད་དག་མོ་ཤོད། བོད་རང་གི་ཆ་ལུགས་ཀྱང་མ་འགྱུར་བ་དེ་འདྲ་རང་བྱོས། དེ་འདྲ་མ་བྱས་ཚེ་ཉེན་ཁ་ཆེན་པོར་ལྷུང་ཡོད་པ་རེད། ཁྱོད་ཚོས་ཀྱང་མཉམ་འཇོག་དང་དོགས་ཟོན་ཡག་པོ་མ་བྱས་ཚེ་མྱུར་དུ་མི་རིགས་ཕུང་སུམ་པ་རུ་འགྱུར་ངེས་རེད། སྤྱིར་ང་ཚོ་བོད་རིགས་འདི་ལ་མི་གྲངས་ཉུང་ཞིང༌། ཡོན་ཏན་ཀྱང་དེ་འདྲ་འཛོམས་པོ་མེད་པས་གང་ཕྱོགས་ནས་གྱོང་གུད་ཆེན་པོ་ཞིག་རེག་གི་ཡོད། འོན་ཀྱང་ཏང་གི་སྲིད་ཇུས་བཟང་བོས་མི་རིགས་རང་སྐྱོང་ལག་བསྟར་བྱས་པ་བརྒྱུད་དེ་མི་རིགས་སོ་སོས་རང་ཁྱིམ་རང་བདག་གི་བྱེད་ཕྱོགས་རྒྱུན་འཁྱོངས་བྱེད་དགོས་པ་རེད། ཡིན་ནའང༌། ཡོན་ཏན་མེད་ན་ཁེ་ལས་སོགས་བྱ་བ་གང་ཡང་སྒྲུབ་མི་ཐུབ་པས་ན། ཆུང་དུས་ནས་བྱིས་པ་ཚོར་ཡོན་ཏན་སྦྱང་དུ་ཆུགས། དེ་ཡང་དང་པོ་བོད་ཀྱི་སྐད་ཡིག་ཤེས་དགོས་པ་རེད། བོད་ཡིག་ཤེས་པའི་ཐོག་ནས་གཞན་གྱི་ཡིག་རིགས་སོགས་སྦྱངས་ནས་ཤེས་དགོས་པ་ཡིན། དེ་འདྲ་བྱས་ཚེ་མི་རིགས་འཕེལ་རྒྱས་དང་སྐད་ཡིག་སློབ་གསོ་གང་ཕྱོགས་ནས་ཡར་རྒྱས་འགྲོ་ངེས་རེད། ཅེས་གསུངས་བ་བཞིན་དུ། ཁོང་ནི་རྒྱལ་གཅེས་ཆོས་གཅེས་དང༌། རྒྱལ་ཁབ་ལ་དགའ་བ། ཏང་ལ་དགའ་བ། མི་རིགས་ལ་དགའ་བ་ཡོད་པའི་རྒྱལ་གཅེས་དཔའ་བོ་ཡིན་པས། སྤྱིར་སྐྱེ་འགྲོ་ཡོངས་དང༌། ང་ཚོའི་རྒྱལ་ཁབ་དང༌། སྒོས་ཁ་བ་རི་བའི་སྐྱབས་མགོན་ཉག་གཅིག་ཡིན་པར་མ་ཟད། པཎ་ཆེན་སྐུ་ཕྲེང་རིམ་བྱོན་ཡོངས་རྫོགས་ཀྱི་ནང་ནས། དབུ་ནག་བོད་པའི་དོན་དུ་དཀའ་ངལ་ཚད་མེད་མྱངས་ཡོད་པའི་བླ་ན་མེད་པའི་དབུ་ཁྲིད་དེ་རེད། དེས་ན་ང་ཚོས་སྙིང་ནས་ཁོང་ལ་རྗེས་དྲན་གྱི་དད་གུས་མི་བྱ་བའི་ཐབས་མེད་ལ། ཁོང་གི་རེ་བའི་ལྷག་མ་རྣམས་ལ་འབད་འབུངས་ཀྱིས་མི་བསྒྲུབ་པ་འོས་མེད་ཡིན་པས་རང་ནུས་གང་ཡོད་ཀྱིས་འབད་པར་རེ་ཞུ་བྱེད་བཞིན་ཡོད། དེ་ཙམ་ལས་དེ་རིང་ཆ་ལ་ཞུ་རྒྱུ་མེད་ལགས། མཇུག་མཐར་པཎ་ཆེན་སྣང་བ་མཐའ་ཡས་སྐུ་ཕྲེང་བཅུ་བ་མཆོག་གིས་ཐུགས་ཀྱི་བཞེད་དོན་ཐམས་ཅད་ཡིད་བཞིན་དུ་འགྲུབ་པའི་སྨོན་འདུན་ཞུ། ཐུགས་རྗེ་ཆེ། བཀྲ་ཤིས་བདེ་ལེགས་ཞུ། ཀུན་མཁྱེན་དོལ་པོ་པ་ཤེས་རབ་རྒྱལ་མཚན་གྱིས་སློབ་མ་ལ་སྤྲིང་བ་ནོར་བུའི་ཕྲེང་བ་ལས། ཚུལ་ཁྲིམས་འཆལ་བའི་ལུས་ཅན་གཞོན་ནུ་ཁྱོད། །དགེ་སློང་ཚུལ་དུ་མ་འཆོས་དཀར་པོ་གྱོན། །ཚུལ་ཁྲིམས་འཆལ་བའི་ཉེས་པས་མི་ཆོག་པར། །ཚུལ་འཆོས་ཉེས་པས་གོས་ན་མི་རུང་ངོ༌། །ཞེས་གསུངས་པ་ལྟར་ཚུལ་ཁྲིམས་འཆལ་བའི་ལུས་ཅན་གྱི་གང་ཟག་གིས་དགེ་སློང་མ་ཡིན་ན་དགེ་སློང་ཚུལ་དུ་མ་འཆོས་པར་ཁྱིམ་པའི་གོས་དཀར་བོ་སོགས་གྱོན་རོགས་ཞུ། རྒྱུ་མཚན་ཕམ་པ་བཞི་ཅི་རིགས་བྱུང་བའི་ཚུལ་ཁྲིམས་འཆལ་བའི་ཉེས་པས་མི་ཆོག་པའམ་དེས་གོས་པ་མ་ཟད་ཚུལ་ཁྲིམས་ཉམས་ཀྱང་ཚུལ་ཁྲིམས་དང་ལྡན་པ་ལྟར་འཆོས་པའི་ཉེས་པས་གོས་ན་ངན་སོང་གི་སྡུག་བསྔལ་མྱོང་བར་འགྱུར་བས་མི་རུང་བས་སོ། །དེ་ལྟར་མདོ་ལས། གང་ཞིག་བསླབ་ལ་མི་གནས་པ། །བདེ་གཤེགས་རྒྱལ་མཚན་འཛིན་པ་ལས། །བསླབ་ལ་མི་གནས་སྐད་ཅིག་གི །གཟུགས་པོར་ཁྱིམ་པར་གནས་པ་བཟང༌། །ཞེས་གསུངས་སོ། །རབ་བྱུང་གི་སྡོམ་པ་མི་ལྡན་བཞིན་དུ་རང་ལ་ལྟོས་པའི་དད་ལྡན་མང་ཚོགས་ཀྱི་མགོ་སྐོར་ན་ཆོས་དང་འཇིག་རྟེན་གང་དང་མི་འཚམས་ཏེ། སློབ་མ་ལ་སྤྲིང་བ་ནོར་བུའི་ཕྲེང་བ་ལས། ལྟོས་པའི་མི་རྣམས་བསླུ་བར་མ་བྱེད་ཅིག །ཅེས་སོ། །དེར་མ་ཟད་ཐོས་བསམ་སྒོམ་གསུམ་གང་ཡང་མི་བྱེད་ན་རབ་ཏུ་བྱུང་བའི་དགོས་པ་མི་འགྲུབ་སྟེ། འདུལ་བ་ལུང་ལས། གང་ཞིག་རབ་ཏུ་བྱུང་ཡང་ཡོན་ཏན་སྣོད་མ་གྱུར། །སྐྲ་དང་ཁ་སྤུ་བྲེགས་ཀྱང་དགེ་སྦྱོང་ཚུལ་མ་ཞུགས། །རབ་བྱུང་དེ་ནི་རབ་བྱུང་མ་ཡིན་ཁྱིམ་པའང་མིན། །ཆུ་མེད་ཁྲོན་པ་རི་མོའི་མར་མེ་ཇི་བཞིན་ནོ། །ཞེས་དང༌། རབ་ཏུ་བྱུང་བའི་བྱ་བ་ནི་གཉིས་ཏེ་ཀློག་པ་ཐོས་བསམ་དང་སྤོང་བ་བསམ་གཏན་ནོ། །ཞེས་གསུངས་སོ། །དེས་ན་ཚུལ་ཁྲིམས་དང་ལྡན་པའི་སྟེང་དུ་སྤོང་ཀློག་གི་ཡོན་ཏན་ལྡན་པར་བྱའོ། །དེ་ལྟར་བྱེད་ན་ཇི་སྐད་དུ། ཁྲིམས་ལྡན་ཡུན་རིང་འཚོ་བས་ནི། །དེ་བས་བསོད་ནམས་ཆེན་པོ་བྱེད། །ཅེས་གསུངས་སོ། །སྤྱིར་རབ་བྱུང་བ་ཐོས་བསམ་སྒོམ་གསུམ་བརྩོན་པ་རྣམས་ལ་བདག་དད་གུས་ཡོད་མོད་རབ་བྱུང་གི་སྡོམ་པ་ཙམ་བླངས་ནས་གནས་པ་རྣམས་ཀྱིས་འདོད་ཡོན་ལ་ཆོག་ཤེས་མི་བྱེད་པར་མ་ཟད་ཁྱིམ་པ་ལས་ལྷག་གི་འདོད་སེམས་ཆེ་བའི་དབང་གིས་ཐོབ་གོ་ས་དང་ལོག་པར་འཚོ་བའི་དཔལ་འབྱོར་ལ་ཆེར་བརྩོན་ན་རབ་ཏུ་བྱུང་བ་ལ་དགོས་པ་ཆེར་མ་མཐོང་ངོ༌། །དེང་དུས་ཀྱི་རབ་བྱུང་རྫུན་མའི་ངང་ཚུལ་ལ་བསམ་ནས་ངག་དབང་དངོས་གྲུབ་དཔལ་གྱིས་བྲིས་པའོ། ། དགེ་བཤེས་དངོས་གྲུབ་དཔལ་གྱི་གཏམ་བཤད།དགེ་བཤེས་དངོས་གྲུབ་དཔལ་གྱི་གཏམ་བཤད། ཇོ་ནང་བ་ལ་མཚོན་སོང་ན་ཧ་ཅང་ཁྱབ་ཆུང་ཆུང་རེད། དེས་ན་དགོན་སྡེ་གསར་འཛུགས་ཀྱི་བྱ་བ་འདི་གལ་ཆེན་རེད། གལ་སྲིད་དགོན་པ་དེའི་ནང་གནས་སྐབས་གྲྭ་བ་སྤུས་དག་པོ་གཅིག་མ་གཏོགས་མེད་ནའང་ཆོག ཡང་ན་དགེ་བསྙེན་གྱི་དགོན་པ་ཞིག་ཡིན་རུང་མ་འོངས་པ་རྒྱ་ཆེན་པོར་ཡང་འགྱུར་མི་སྲིད་པ་མ་རེད། ཆུང་ངུ་ནས་ཆེན་པོ། ཆེན་པོ་ནས་ཆུང་ངུར་འགྱུར་བ་རྒྱུན་ལྡན་ཡིན་པ་ལྟར་རེད། ཡང་སྒོས་སུ་དབུས་གཙང་ཕྱོགས་ལ་སྔོན་མ་དར་མྱོང་བའི་ཇོ་ནང་བའི་ཆོས་གཞི་ཐར་ཐོར་མང་བོ་ཡོད་པ་རེད། དེ་དག་ལ་མཚོན་ན་ད་ལྟ་ཡང་ཇོ་ནང་བར་དད་འདུན་ཡང་ཆེ་ཤོས་དང༌། དཔལ་འབྱོར་གྱི་ཕྱོགས་ནས་ཡང་ཞན་ཤོས་རེད། དངོས་གནས་རྒྱ་བླ་རྣམ་པ་ཚོར་ལྷག་བསམ་ཡོད་ན། དེ་དག་གི་ཆོས་གཞི་རྣམས་ཉམས་གསོ་དང༌། ཡང་ན་གསར་འདེབས་བྱ་རྒྱུ་གལ་ཆེན་རེད་མ་གཏོགས། དགོན་སྡེ་ཁ་ཤས་ན་གསེར་སྐུ་དང་ལྷ་ཁང་མང་དྲགས་སོང་བར་མ་ཟད། ཚོགས་གསོག་པའི་ཞིང་དུ་མི་འགྱུར་བར་ཚོགས་ངན་གསོག་ས་རུ་འགྱུར་བཞིན་ཡོད་པ། དཔེར་ན། ས་ཆ་འགའ་ཞིག་ན་དར་ལྕོགས་མང་དྲགས་ཀྱིན་ཡོད་པ་ནང་བཞིན་རེད། རྒྱ་ནང་གི་སྔོན་གྱི་ལོ་རྒྱུས་ལྡན་པའི་དགོན་གཞི་མང་པོ་ད་ལྟ་ཡུལ་སྐོར་མཛེས་ལྗོངས་དང༌། དེའི་ནང་གི་གྲྭ་ལྭ་གྱོན་པ་རྣམས་ཀྱང་འཛིན་བྱང་བཙོང་མཁན་དུ་གྱུར་འདུག་པ་ནང་བཞིན་དུ། ང་ཚོ་བོད་ནས་ཀྱང་འཛུགས་སྐྲུན་ཁོ་ནར་འབད་ན་ཉེན་ཁ་དེར་ཏག་ཏག་སླེབས་རྒྱུ་རེད། གལ་སྲིད་གསེར་སྐུ་སོགས་བཞེངས་ན་རྒྱ་ཡུལ་དང༌། ཕྱི་རྒྱལ་སོགས་ཇོ་ནང་བའི་སྐུ་གསུང་ཐུགས་རྟེན་མེད་པའི་ཡུལ་རྣམས་སུ་བཞེངས་ན་ཕན་ཁེ་ཡོད་པ་རེད། རྒྱལ་ཕྱི་ནང་གང་སར་ཕྱིན་ཡང་ང་ཚོའི་དགོན་པ་ཁ་ཤས་ལས་གཞན་ན་ཀུན་མཁྱེན་དུས་གསུམ་སངས་རྒྱས་ཀྱི་འདྲ་སྐུ་གཅིག་ཀྱང་མཐོང་རྒྱུ་མེད་ཚོད་རེད། དེ་དག་ཏུ་སྐུ་གཅིག་འཇོག་ཐུབ་ནའང་གལ་ཆེན་དོན་སྙིང་ཅན་རེད། དེ་ལས་གཞན་ང་ཚོའི་དགོན་པ་དག་གི་ནང་ལ་བཤད་སྒྲུབ་སྤུས་དག་འོང་བ་གལ་ཆེན་རེད། གོང་ས་རྒྱལ་བའི་དབང་བོས་ཀྱང་ནམ་ཡིན་ན་ཡང༌། མང་ཉུང་ལ་རག་ལས་པ་མིན་པར་སྤུས་དག་མིན་ལ་རག་ལས་པར་གསུང་བཞིན་ཡོད་པ་རེད། གལ་སྲིད་སྔགས་པ་ཡིན་ནའང་སྔགས་པའི་དགོན་པ་རྐྱང་བ་ཞིག་འཛུགས་ཐུབ་ན་ཧ་ཅང་ཡག་པོ་ཡོད་པ་རེད། འོན་ཀྱང་རབ་བྱུང་བ་རྣམས་དང་ལྷན་དུ་ཉ་དང་ཉོག་མ་བསྲེས་བཞག་ན་ཡག་པོ་མི་འདུག ལྷག་ཏུ་གྲྭ་ཇོ་མཉམ་དུ་གནས་བཅས་ན་བསྟན་པའི་ཕུང་དཀྲུག་ཆེན་པོར་འགྲོ་བ་གདོན་མི་ཟ་བ་རེད་བསམ་གྱིན་ཡོད། དགོན་པ་ཞིག་ལ་མཚོན་ན་འདུ་ཁང་རེ་དང༌། བཤད་སྒྲུབ་ཀྱི་གནས་གཞི་རེ་མེད་ཐབས་མེད་པ་ལྟ་བུ་རེད་མ་གཏོགས། རྟེན་བཞེངས་དང་གསེར་འགེབས་མང་པོ་ལ་དགོས་པ་དེ་ཙམ་མི་འདུག མདོར་ན། སྔར་ཆོས་གཞི་མེད་པའི་ཕྱོགས་སུ་ཆོས་གཞི་གསར་འདེབས་དང༌། སྔོན་གྱི་ཆོས་གཞི་གནས་པ་རྣམས་སུ་བཤད་སྒྲུབ་ཀྱི་སྒོ་ནས་སྤུས་ཇེ་དག་ཇེ་རྒྱས་སུ་བྱེད་དགོས་པ་རེད། རྗེ་བཙུན་རིན་པོ་ཆེའི་སྨོན་ལམ་ནང་དུ། མ་དར་བ་རྣམས་སུ་དར་བར་བྱེད་ཅིང༌། དར་བ་རྣམས་དག་ཅིང་འཕེལ་བ་དང༌། ཉམས་པ་རྣམས་གསོ་ནུས་པར་གྱུར་ཅིག ཅེས་པ་ནང་བཞིན་བྱ་བ་གལ་ཆེན་དོན་སྙིང་རེད། ༢༠༡༥ཇོ་ནང་ཀུན་ཕན་ལྷན་ཚོགས་སྟེང་ནས་ཇོ་ནང་བའི་དགོན་གཞི་གསར་འཛུགས་ཞེས་པའི་གྲོས་གཞིའི་ཐོག་བསྩལ་བ་སྒྲ་ལས་བཤུས་པའོ།། །། དཔེ་ཆ་ལྟ་དགོས།དཔེ་ཆ་ལྟ་དགོས། སྔོན་བྱོན་སྐྱེས་བུ་དམ་པ་རྣམས་ཀྱི་ཞལ་དངོས་སུ་མཇལ་ཡང་ཁོང་རྣམས་ཀྱི་གསུང་རབ་ལས་བཤད་པ་མ་གཏོགས་དཔེ་མཁྱུད་བྱས་ནས་མ་བསྟན་པ་མེད་པས། སྟོན་པ་ཐུགས་རྗེ་ཅན་དང་རྒྱན་དྲུག་མཆོག་གཉིས་སོགས་བླ་མ་དམ་པ་རྣམས་ལ་དངོས་སུ་མཇལ་བ་དང་ཁྱད་མེད་པའི་གསུང་རབ་ཤུལ་བཞག་འདི་རྩ་ཆེན་ཡིན་པ་ནི། སྔོན་བྱོན་དམ་པས་གསུང་གི་ཚབ་ཏུ་ཕྱི་རབས་པ་རྣམས་ལ་བཞག་པ་ཡིན། དམ་པ་ཁོང་རྣམས་ཀྱིས་མི་ཚེ་གང་ལ་ཐོས་བསམ་མཛད་པའི་རྙེད་དོན་དེ་བསྒོམས་ནས་མཐར་མངོན་སུམ་དུ་རྟོགས་ཏེ་དཔྱད་འབྲས་ཡི་གེར་བཀོད་པ་ཡིན་པས་ཚད་མའི་ལུང་གི་རྗེས་སུ་འབྲང་བ་གལ་ཆེའོ། །དེས་ན་གསུང་རབ་དེ་དག་རྡུལ་ཁྲོད་དུ་གཟིམས་སུ་བཞག་མི་འཇོག་པར། དེ་དག་ལ་བརྩོན་པ་ཤུགས་ཆེན་པོས་སློབ་སྦྱོང་དད་པ་དག་སྣང་ལྡན་པའི་སྒོ་ནས་བྱེད་དགོས་པ་རེད། དེ་ཡང་དཔེ་ཆ་གང་ཡིན་ལ་ལྟ་ན་ཤེས་རབ་འཆལ་བའི་རྒྱུ་ལ་འགྲོ་བ་ཡོད་པས་འདུལ་ལུང་ལས་དགོས་མེད་དུ་ཕྱི་རོལ་བའི་བསྟན་བཅོས་ལྟ་བ་བཀག་པ་རེད། རྗེ་བཙུན་གྱིས། ཚད་མའི་ལུང་གི་རྗེས་འབྲང་ཞིང༌། །ཞེས་གསུངས་པ་ལྟར་སྔོན་བྱོན་དམ་པའི་གསུང་ལ་བལྟས་ན། ཇི་སྐད་དུ། འཆང་བ་དང་ནི་སྟོན་ཏམ་ཀློག་ན་ཡང། །དེ་ཡི་རྣམ་པར་སྨིན་པའང་སངས་རྒྱས་མཁྱེན། །ཞེས་གསུངས་ལྟར་གསུང་རབ་དག་ནི་ཏིང་ངེ་འཛིན་སྒོ་མང་པོས་བྱིན་གྱིས་རླབས་པའི་གཟུངས་ཁྱད་པར་ཅན་ཡིན་པས་ཆོས་སྤྱོད་བཅུའི་སྒོ་ནས་བསླབ་པར་ཞུ། འཛམ་གླིང་དཔེ་ཆའི་དུས་ཆེན་ལ་དངོས་གྲུབ་དཔལ་ནས། ས་ཇོ་གཉིས་ལ་རེ་ཞུ།ས་ཇོ་གཉིས་ལ་རེ་ཞུ། ༡ བོད་མི་མང་གི་ཆོས་བརྒྱུད་སྤྱི་འཐུས་དགོས་པ་མེད་པར་མ་ཟད་འཐེན་འཁྱེར་གྱི་སྒོ་ནས་གནོད་ཚབས་ཆེན་པོ་ཡོད་པ་མངོན་གསལ་རེད། མ་འོངས་པ་ན་ཆོས་ལུགས་ཆེ་ཆུང་གི་སྒོ་ནས་འཇོག་ན་དགེ་ལུགས་པ་དང་རྙིང་མའི་བརྒྱ་ཆ་ཉུང་ཤོས་མ་གཏོགས་ཇོ་ནང་བཀའ་བརྒྱུད་ས་སྐྱ་བ་བོན་པོ་དག་ལ་མེད་ལ། ད་རུང་འཛམ་གླིང་འདིར་ཆོས་ལུགས་སྣ་མང་ཅན་ཡིན་པ་བཞིན་དུ་བོད་འདིར་ཡང་ཆོས་ལུགས་སྣ་མང་ཅན་དུ་གྱུར་དང་འགྱུར་བཞིན་པ་ཡིན་པས་རྙོག་གྲ་ཆེ་རུ་འགྲོ་བར་སྣང༌། དེས་ན་ཆོས་དོན་ལས་ཁུངས་ལ་ཆོས་བརྒྱུད་རང་རང་གི་ཚབ་མཚོན་གྱི་མི་སྣ་ཡོད་པ་ལས་མི་མང་སྤྱི་འཐུས་ལ་ཆོས་ལུགས་དང་མི་མང་གི་ཉིས་སྐལ་གྱི་སྤྱི་འཐུས་གཏན་ནས་དགོས་དོན་མེད། དེ་འཛམ་གླིང་གི་མང་གཙོ་གང་དང་ཡང་མི་མཐུན་པ་རེད། ༢ འཛམ་གླིང་གི་མང་གཙོའི་རྒྱལ་ཁབ་སུ་ཡིན་ན་སྤྱི་མཚུངས་ཀྱི་ཐོབ་ཐང་ངམ་ཁེ་དབང་ཡོད་པ་བཞིན་ཇོ་ནང་བ་ལ་ངེས་པར་སྤྱི་མཚུངས་ཀྱི་ཐོབ་ཐང་དགོས་ངེས་པ་ཅན་རེད། དེར་མ་ཟད་རྒྱ་ནག་ནས་བོད་ཀྱི་ཆོས་བརྒྱུད་དྲུག་འདྲ་མཉམ་ཞིག་པཎ་ཆེན་རིན་པོ་ཆེ་ནས་གནང་ཡོད་པ་རེད། དེ་བཞིན་དུ་༧གོང་ས་མཆོག་གིས་ལན་དུ་མར་ཡིག་ངག་གཉིས་ཀའི་སྒོ་ནས་ཇོ་ནང་བ་ལ་ཆོས་བརྒྱུད་ཆེན་པོ་གནང་བ་ལ་བདེན་པ་དང་ཐོབ་ཐང་ཡོད་པ་རེད་ཅེས་འབོད་བསྐུལ་ཞུ་བཞིན་ཡོད་པ་བརྙན་དང་སྒྲ་དང་ཡི་གེའི་བརྒྱུད་ལམ་ནས་མངོན་སུམ་ཡིན་པ་རེད། འོན་ཀྱང་བོད་ཀྱི་ཆོས་ལུགས་དང་ཆོལ་ཁའི་འཐེན་འཁྱེར་ལ་གནས་པའི་མགོ་རྒན་དག་གིས་སྒེར་གཅོད་དང་ཕྱོགས་རིས་སུ་གནས་ནས་བོད་གཞི་བྱེས་གཉིས་ཀའི་རྡོག་རྩ་གཅིག་སྒྲིལ་བྱེད་པ་ལ་སྣང་མེད་རྩ་གཏོར་དུ་བཏང་བར་མ་ཟད་ཇོ་ནང་བ་སེར་སྐྱ་འབུམ་ཕྲག་དུ་མས་རྒྱུ་མཚན་དང་གནས་ལུགས་ཡོད་པ་དག་རྡོག་རྫིས་སུ་བཏང༌། བོད་སྤྱིའི་གཟུར་གནས་མཁས་དབང་རྣམས་ཀྱིས་བོད་གཞུང་དབང་འཛིན་པ་འགའ་ཞིག་རུལ་སོང་ཅན་དུ་གྱུར་ནས་འཐེན་འཁྱེར་བྱེད་བཞིན་པའི་གནས་སུ་ངོས་འཛིན་བྱེད་བཞིན་འདུག སྤྱིར་འདྲ་མཉམ་མེད་ན་མཐུན་འབྲེལ་མེད་ལ། འདྲ་མཉམ་ནི་མཐུན་འབྲེལ་གྱི་མ་རྩ་རེད། ༣ ས་ཇོ་གཉིས་ལོ་ངོ་སྟོང་ཕྲག་ལ་ཉེ་བའི་བར་ཆོས་དམ་ཚིག་གི་འབྲེལ་བ་ཧ་ཅང་ཟབ་རྒྱས་ཡོད་པ་དང་ལོ་རྒྱུས་ནང་ས་ཇོའི་བར་ཆབ་སྲིད་ཀྱི་རྙོག་གྲ་གཏན་ནས་བྱུང་མ་མྱོང་ན་ང་ཚོའི་མི་རབས་ཀྱི་སྐབས་འདིར་ཐུགས་བསམ་རྒྱ་ཆེར་བཞེས་ནས་གུ་ཡངས་དང་བཟོད་སྒོམ་ངང་གནས་ལུགས་དང་ཆོས་དམ་ཚིག་གི་འབྲེལ་བ་ལ་བསམ་ནས་མཐུན་འབྲེལ་བྱེད་པར་འབོད་བསྐུལ་ཞུ་བཞིན་ཡོད། ས་ཇོའི་དབུ་ཁྲིད་རྣམ་པ་དང་སེར་སྐྱ་སྤྱི་ཡོངས་ནས་སྔར་ལྟར་ཕན་ཚུན་དད་གུས་བཅས་འགྱུར་མེད་དུ་གནས་པ་གུས་པ་བདག་གིས་རྗེས་སུ་ཡི་རང་ཡོད། ད་ལྟ་དང་མ་འོངས་གང་ཡིན་ན་ས་ཇོའི་མི་རེ་ཟུང་གིས་རྩོད་ཉོག་སློང་བ་སྲིད་ན་ཡང་མི་དེས་ས་ཇོ་གང་གི་ཚབ་མཚོན་མི་ནུས་པ་བོད་སྤྱིས་ཤེས་དགོས། རི་བོང་ཅལ་འདྲོགས་མི་བྱེད་རྒྱུ་གལ་ཆེ་སྙམ། རང་སྟེང་དུ་སླེབས་ཚེ་མཐུན་འབྲེལ་དགོས། བདག་ལྟ་བུ་ལ་མཚོན་ན་མགོ་བདེ་ཙམ་མ་ཡིན་པར་ས་སྐྱའི་བསྟན་དང་བསྟན་འཛིན་ལ་དགའ་གུས་དད་གསུམ་དང་ལྡན་པ་ཡིན། མདོར་ན་ས་ཇོའི་ཆོས་དམ་ཚིག་གི་འབྲེལ་བ་སྲ་བརྟན་ཅན་དུ་བྱེད་པ་ལ་རེ་ཞུ། ༤ གསལ་བཤད་ཞིག་ལ་ང་ཚོ་ཇོ་ནང་བ་རྣམས་ཀྱིས་བོད་ཀྱི་སྐྱབས་མགོན་གྱི་དགོངས་པ་དང་གནས་ལུགས་གཞིར་བཞག་ནས་སྤྱི་མཚུངས་ཀྱི་ཐོབ་ཐང་གནང་བ་ལ་ཞི་བའི་སྒོ་ནས་འབོད་བསྐུལ་ཞུ་བཞིན་འདུག་ལགས། གཞན་དག་ཆབ་སྲིད་ཀྱིས་ལོག་འགྲེལ་ཡིན་པ་མཁྱེན་དགོས། མདོར་ན་མཐུན་འབྲེལ་དང་བོད་སྤྱི་ལ་བསམ་གཞིག་གནང་རོགས་ཞུ་ཞུ། དོན་ཚན་བཞི་བོ་འདི་ནི་ངག་དབང་དངོས་གྲུབ་དཔལ་ནས་མཐུན་འབྲེལ་དང་འདྲ་མཉམ་གྱི་ཆེད་བོད་སྤྱི་ལ་༢༠༡༥་༩་༢༤་ལ་གུས་པས་ཕུལ་བའོ། ། ཇོ་ནང་གི་༧རྡོ་རྗེ་སློབ་དཔོན་རྣམས་ལ་གུས་ཕྱག་གྲངས་མེད་དང་བཅས།ཇོ་ནང་གི་༧རྡོ་རྗེ་སློབ་དཔོན་རྣམས་ལ་གུས་ཕྱག་གྲངས་མེད་དང་བཅས་ཏེ་ཞུ་གསོལ། དཔལ་ལྡན་ཇོ་ནང་བ་ལ་དབང་ལུང་ཁྲིད་གསུམ་གྱི་བརྒྱུད་པ་མ་ཉམས་པར་གནས་ཡོད་པ་ཀུན་ཁྱེད་རྣམས་ཀྱི་བཀའ་དྲིན་ཡིན་པས་ངེད་ཇོ་ནང་བ་རྣམས་ཀྱིས་བརྗེད་མི་སྲིད་པའི་བཀའ་དྲིན་གྱི་ཁུར་ཤིན་ཏུ་ལྕི། ད་ལན་བདག་གིས་རེ་ཞུ་ཆུང་ཆུང་ཞིག་ཞུས་ན། ༡ དགོན་སྡེ་སོ་སོར་དབང་ལུང་གི་བརྒྱུད་པ་སྤེལ་ནས་ཕྱི་རབས་པ་རྣམས་ལ་འཕྲོད་པར་བྱེད་རྒྱུ་དང༌། ༢ཡོན་ཏན་ཀུན་གྱི་རྩ་བ་ཚུལ་ཁྲིམས་ཡིན་པས་སྦྱོར་དྲུག་པ་རྣམས་ལ་རྩ་བ་བཞིའི་གཞི་བསམ་པ་སྦྱོར་བ་མཐར་ཐུག་གི་ངོ་སྤྲོད་ཡག་པོ་གནང་རྒྱུ་ཧ་ཅང་གལ་ཆེ། ད་སྐབས་སྦྱོར་དྲུག་བཞུགས་མི་རྣམས་ལོ་ཧ་ཅང་ཆུང་བས་སྡོམ་པ་སྲུང་མ་ཤེས་ནས་རྐུས་སོགས་བྱས་ན་ཚུལ་འཆལ་དུ་འགྱུར་བ་སོགས་རྒྱུ་མཚན་མང༌། ༣ སྦྱོར་དྲུག་ཁྲིད་སྐབས་ལྷན་ཐབས་འོད་བརྒྱ་འབར་བ་ཁྲིད་རྒྱུ་ཧ་ཅང་གལ་ཆེ་སྟེ། མཐོང་དོན་དང་སྒོམ་རིམ་ཁྲིད་ནའང་སྔོན་འགྲོའི་སྐབས་སུ་དམིགས་གནད་ཙམ་ལས་མ་གསུངས་པས་ལས་དང་པོ་ལ་སྔོན་གྱི་ཕྱག་ལེན་ལྟར་ལྷན་ཐབས་ཁྲིད་ན་བཟང་སྙམ། དཔེར་ན་སྐྱབས་འགྲོའི་སྐབས་ལྷན་ཐབས་ལས། ༡ སྐྱབས་ཡུལ་མཆོག་གསུམ་ངོ་སྤྲོད། ༢ སྐྱབས་སུ་འགྲོ་དགོས་པའི་རྒྱུ་མཚན། ༣ ཇི་ལྟར་སྐྱོབ་ཚུལ། ༤ སྐྱབས་སུ་སོང་བའི་ཚད། ༥སྐྱབས་སུ་སོང་བའི་ཕན་ཡོན། ༦ སྐྱབས་འགྲོའི་བསླབ་བྱ། ༧ ཐེག་པ་ཆེ་ཆུང་གི་སྐྱབས་འགྲོའི་ཁྱད་པར་རྣམས་བཤད་པ་མཐོང་སྒོམ་གཉིས་ན་མེད་པ་བཞིན་འོག་མ་རྣམས་ཀྱི་སྐབས་སུ་བཤད་དགོས་པ་གལ་ཆེ་བ་མང་པོ་ཡོད་པས་ཧ་ཅང་གལ་ཆེ་སྙམ། ཁྱེད་རྣམས་ཀྱིས་མ་ཤེས་པ་ག་ལ་ཡིན་མོད་བར་སྐབས་ཤིག་ནས་ཕྱག་སྲོལ་ཆད་སོང་བའི་དབང་གིས་ཡིན་སྙམ། མདོར་ན་གང་ལྟར་ཐུགས་བསམ་གནང་བར་བདག་གིས་ལག་ཐལ་མོ་སྦྱར་ནས་རེ་ཞུ་འབུལ་བའོ། །ཆོས་མེད་སྤྲང་འཁྱམ་པ་དངོས་གྲུབ་དཔལ་གྱིས་གུས་ཕུལ། ཇོ་ནང་གི་རྡོ་རྗེ་སློབ་དཔོན་དང་མཁན་པོ་དགོན་བདག་བླ་མ་རྣམས་ལ་རེ་ཞུ། བཤད་སྒྲུབ་ལ་གནོད་ཚབ་ཆེ་བའི་འགལ་རྐྱེན་ཁ་པར་བཀོལ་སྤྱོད་ཉུང་དུ་འགྲོ་བའི་ཐབས་ལམ་ཞིག་འགྲོ་བ་མིས་མ་འབད་ན་ཆོས་སྐྱོང་རྣམས་ལ་ཆོས་བསྲུང་བར་འཕྲིན་བཅོལ་མཛད་པ་ཙམ་གྱིས་འཐུས་ཤོར་ཆེན་པོ་འགྲོ་བཞིན་འདུག བཤད་སྒྲུབ་ལ་འདུག་ཡོད་ཅེས་མིང་བཏགས་ནས་དོན་ལ་དྲྭ་བའི་རྩེད་ར་ཞིག་དང་ཁྱད་མེད་ན་དོན་འབྲས་ཡོད་མེད་བསམ་གཞིག་གནང་དགོས། བྱ་བ་གང་སྒྲུབ་དགོས་ན་དཀའ་ངལ་རེ་ངེས་པར་ཡོད་ཀྱང་བསྟན་པ་སྤུས་གཙང་གི་ལག་ལེན་དངོས་ལ་འབད་དགོས་པ་ལས་སྨོན་ལམ་ཙམ་བཏབ་ནས་འདུག་ན་འགྲུབ་པའི་དུས་རི་བོང་རྭའི་སྤུན་ཟླ་ཡིན་ནོ། །ཆོས་སྡེ་གཞན་གྱིས་དེའི་ཕྱོགས་ལ་འབད་རྩོལ་ཇི་ལྟར་བྱེད་བཞིན་གཟིགས་རོགས་ཞུ། འདོད་ལྷ་རྣམས་འདོད་ཡོན་ལ་རྟག་ཏུ་གཡེང་བས་ཆོས་སྒྲུབ་མི་ཁོམ་པ་ལྟར་ང་ཚོ་ཁ་པར་ལ་རྟག་ཏུ་གཡེང་ནས་ཆོས་སྒྲུབ་མི་ཁོམ་པ་ཆགས་འགྲོ་འདུག དེས་ན་བསྟན་འཛིན་རྣམས་ལ་ཆོས་བསྲུང་བར་དངོས་གྲུབ་དཔལ་ནས་འཕྲིན་ལས་བཅོལ་བའོ། ། གངས་ལྗོངས་རིས་མེད་ལྔ་རིག་མཐོ་སློབ་ཀྱི་ཉིན་གཅིག་གི་ཆོས་སྤྱོད་ཉམས་ལེན།གངས་ལྗོངས་རིས་མེད་ལྔ་རིག་མཐོ་སློབ་ཀྱི་ཉིན་གཅིག་གི་ཆོས་སྤྱོད་ཉམས་ལེན་གྱི་རིམ་པ། ཞོགས་ཀ་ཆུ་ཚོད་དྲུག་པ་ཡས་མས་སུ་ཡར་བཞེངས་ནས། འབྱོར་ཚོད་ཀྱི་མཆོད་པ་བསྡུས་ཙམ་བཤམ་པའམ་ཡང་ན་སྤོས་ཙམ་མཆོད་དེ། སངས་རྒྱས་ཆོས་ཚོགས་མ་སོགས་ཁ་ཏོན་ཅི་རིགས་དང་སྦྲགས་ནས། འཁོར་བའི་སྡུག་བསྔལ་ལ་བསམ་གཞིག་ལེགས་པར་བཏང་ནས་འཁོར་བ་ལ་སྐྱོ་བ་ལྷང་ལྷང་བ་བསྐྱེད་ཅིང༌། སྡུག་བསྔལ་དེ་ལས་སྐྱོབ་པའི་ནུས་པ་མཆོག་གསུམ་ལ་ཡོད་པར་ཡིད་ཆེས་པའི་སྒོ་ནས་སེམས་ཅན་རྣམས་སྲིད་ཞིའི་འཇིགས་པ་ལས་བསྐྱབ་པའི་ཕྱིར་མཆོག་གསུམ་ལ་སྐྱབས་འགྲོ་སྙིང་ཐག་པ་ནས་བྱ། དེ་ནས་མར་གྱུར་འགྲོ་བ་ཀུན་རྫོགས་པའི་སངས་རྒྱས་ཐོབ་ཕྱིར་དུ་ཐོས་བསམ་སྒོམ་གསུམ་སོགས་དམ་པའི་ཆོས་ལ་བརྩོན་པར་བྱ་སྙམ་པའི་ངེས་འབྱུང་གི་བསམ་པ་དང་ཐེག་ཆེན་སྐྱབས་འགྲོ་སེམས་བསྐྱེད་སྦྲགས་ནས་སྐར་བཅུ་ལྷག་ལ་བསྒོམ། དེ་ནས་མ་ལུས་སེམས་ཅན་ཀུན་གྱི་མགོན་གྱུར་ཅིང༌། །ཞེས་སོགས་ཀྱིས་སྤྱན་འདྲེན་བྱས་ཏེ། ས་གཞི་སྤོས་ཀྱི་མ་སོགས་ཅི་རིགས་ཀྱིས་མཆོད་པ་སྐར་གཅིག་གཉིས་ཙམ་བྱ། དེ་ལྟར་གྲུབ་པ་དང་ངེས་འབྱུང་གི་བསམ་པ་དང་ཐེག་ཆེན་སྐྱབས་འགྲོ་སེམས་བསྐྱེད་རྣམས་ཀྱིས་རྩིས་ཟིན་པར་བྱས་ནས་ཐོས་བསམ་གྱི་ལས་ལ་འཇུག་པ་ཡིན། ཆུ་ཚོད་བདུན་ནས་བཅུ་བར་དཔེ་ཁྲིད་ཡོད་པ་རྣམས་དཔེ་ཁྲིད་ལ་ཕེབས་ཤིང༌། སྐབས་དེར་དཔེ་ཁྲིད་ཁེལ་མེད་པ་རྣམས་ཀྱིས་རང་ཤག་ཏུ་ཐོས་བསམ་སྒོམ་པ་ལ་འབད་པ་ལས། རྣམ་གཡེང་དང་ལོང་གཏམ་སོགས་ཀྱིས་འདའ་བར་མི་བྱེད་པར་ཆོས་སྤྱོད་ལ་བརྩོན་པར་བྱ་དགོས། ཆུ་ཚོད་བཅུ་བ་ནས་དུས་འཁོར་འཛིན་གྲྭ་སོགས་ལ་དཔེ་ཁྲིད་ཡོད་པ་རྣམས་ལས། གྲྭ་མང་ལྷག་མ་རྣམས་ཀྱིས་ཚོགས་ཁང་ནས་ངེས་འབྱུང་གི་བསམ་པ་དང་ཐེག་ཆེན་སྐྱབས་འགྲོ་སེམས་བསྐྱེད་ཀྱིས་ཀུན་ནས་བསླངས་ཏེ། བསྟན་བཅོས་མངོན་རྟོགས་རྒྱན་འདོན་དགོས། ཆུ་ཚོད་བཅུ་དང་ཕྱེད་ནས་ཀུན་སློང་ཀུན་སྤྱོད་ལེགས་པར་བཅོས་ནས། ཆོས་རར་ཕེབས་ཤིང་རྩོད་ཟླ་བསྒྲིག་རྒྱུ་དང༌། ཆུ་ཚོད་བཅུ་གཅིག་མ་ཟིན་ཙམ་ན་འཛིན་གྲྭ་བཅུ་གསུམ་པོ་སོ་སོར། སྐྱོར་དཔོན་རྣམས་ནས་སྐྱོར་སྦྱང་དང༌། དེ་ནས་ཆུ་ཚོད་བཅུ་གཅིག་དང་སྐར་ཉི་ཤུའི་སྟེང་སླར་ཡང་རྩོད་ཟླ་བསྒྲིགས་ཏེ། བཅུ་གཅིག་དང་ཕྱེད་ཀ་ནས་རིམ་གྱིས་རྩོད་པ་གྲོལ། རྩོད་པ་རྒྱུན་རིང་བྱེད་མི་རྣམས་ཀྱིས་ད་དུང་རྩོད་པ་གནང་རྒྱུ་ཡིན། ཉིན་གུང་ཇ་གསོལ་བ་སོགས་བྱ་བ་ཕྲན་ཚེགས་ཡོད་ན་སྒྲུབ་ཆོག འོན་ཀྱང་གྲྭ་མང་ཕལ་ཆེ་བས་དཔེ་ཁྲིད་དཔེ་ཀློག་སོགས་ལ་འབད་པར་བྱ་བ་ཡིན། ཆུ་ཚོད་གསུམ་པར་ངེས་འབྱུང་གི་བསམ་པ་དང་ཐེག་ཆེན་གྱི་སྐྱབས་འགྲོ་སེམས་བསྐྱེད་སྦྲགས་མ་ཀུན་སློང་གཞི་བྱས་ཏེ། སྡིག་སྒྲིབ་སྦྱོང་བ་ཡིག་བརྒྱ། སྦྱོར་དྲུག་གསོལ་འདེབས། བཟང་སྤྱོད་སྨོན་ལམ། མདོ་གདུགས་སྒྲོལ་གསུམ་སོགས་འདོན་དགོས། ཆུ་ཚོད་གསུམ་དང་སྐར་བཞི་བཅུ་ནས་གྲྭ་མང་འཛིན་གྲྭ་སྤྱི་ལ་ཐུན་མོང་དུ་ལམ་རིམ་བློ་སྦྱོང་གི་ཆོས་ཁྲིད་སྐར་ཉི་ཤུ་ཙམ་ཡོད་པ་ལེགས་པར་གསན་ཞིང༌། ཆུ་ཚོད་བཞི་བ་ཙམ་ནས་ཉི་མ་རེས་མོས་ཀྱིས།བསྡུས་གྲྭ་དང༌། རྟགས་རིགས་སོགས་དཔེ་ཁྲིད་ཡོད། གཞུང་གསར་ཡན་ཆད་ཀྱི་འཛིན་གྲྭ་རྣམས་ཀྱིས། ཆུ་ཚོད་བཞི་དང་སྐར་མ་ལྔ་བཅུ་བར་དཔེ་ཀློག་སོགས་བྱ། དེ་ནས་ཆོས་རར་རྩོད་ཟླ་བསྒྲིགས་ནས་རྩོད་པ་གནང་རྒྱུ་དང༌། ཆུ་ཚོད་ལྔ་དང་སྐར་བཅོ་ལྔ་ནས་འཛིན་གྲྭ་སོ་སོ་སྐོར་ཚོགས་བྱས་ཏེ་སྐྱོར་སྦྱང་བྱེད་རྒྱུ། ཆུ་ཚོད་ལྔ་དང་སྐར་མ་སོ་ལྔ་ནས་འཛིན་གྲྭ་སོ་སོས་དམ་བཅའ་བཙུགས་ནས་རྩོད་པ་གནང་རྒྱུ་དང༌། ཆུ་ཚོད་ལྔ་དང་སྐར་མ་ལྔ་བཅུ་ནས་རྩོད་ཟླ་ཆུ་ཚོད་དྲུག་པར་བྱ་དགོས། དེ་ནས་རྩོད་པ་རྒྱུན་རིང་བྱེད་མི་རྣམས་ལས་ལྷག་རྣམས་གྲོལ། དགོང་ཇ་གསོལ། ཆུ་ཚོད་བརྒྱད་པའི་སྟེང་རང་མོས་ཀྱིས་དགེ་རྒན་སོ་སོའི་ནང་དཔེ་ཁྲིད་ཕེབས་རྒྱུ་དང༌། དགེ་རྒན་སོ་སོས་ཀྱང༌། རྩོད་རྒྱུགས། འཆད་རྒྱུགས། བློ་འཛིན་རྣམས་རེས་མོས་བྱས་ནས་རྒྱུགས་ལེགས་པར་ལེན། ཆུ་ཚོད་དགུ་ལྷག་ནས་བཅུ་ལྷག་བར་བློ་འཛིན་བྱེད་རྒྱུ་ཡིན། དེ་ནས་རང་ཤག་ནས་དཔེ་གཟིགས་དང་ཉིན་དེར་དཔེ་ཁྲིད་གནང་བའི་དོན་དང༌། བློ་ལྡོག་རྣམ་བཞི། བྱམས་སྙིང་རྗེ། སེམས་བསྐྱེད། བདག་མེད་སོགས་བློ་ཚོད་དང་བསྟུན་ནས་སྒོམ་པར་བྱ་དགོས། ཆུ་ཚོད་བཅུ་གཅིག་ནས་གཟིམ་ན་ཡང་སྒྲིག་ལམ་གྱི་ངོས་ནས་མི་ཆོག་པ་མེད། ཉལ་ཁར་ལྟུང་བཤགས་དང་སྤྱི་བཤགས་འདོན་ཞོར་ཕྱག་ཅི་ཐུབ་རེ་འཚལ། བསྔོ་བ་སྨོན་ལམ་བཟང་བོ་བྱ་བ་རྣམས་སོ། །སྤྱིར་བཏང་སློབ་གཉེར་གྱི་བར་གསེང་དུ། སྔོན་བྱོན་སྐྱེས་བུ་དམ་པའི་རྣམ་ཐར་ལ་བལྟ་བར་བྱ་རྒྱུ་དང༌། དཔེ་ཁྲིད་དང༌། དཔེ་ཀློག རྩོད་པ། བློ་འདོན་སོགས་ཀྱི་སྐབས་སུ། ཀུན་སློང་ཡག་པོ་དང༌། རྒྱུན་དུ་རང་སེམས་ལ་བརྟག་པ་ཧ་ཅང་གལ་ཆེ་བ་ཡིན། རིམ་པ་འདི་ནི་ཉིན་བཅོ་ལྔའི་མཚམས་ནས་ངལ་གསོ་ཉིན་གཅིག་ཡོད་པ་མ་གཏོགས་རྒྱུན་གྱི་ཆོས་སྤྱོད་ཀྱི་བྱ་བའི་རིམ་པ་ཡིན་ནོ། །རིས་མེད་སློབ་གླིང་གི་སློབ་མ་རྣམས་ཀྱིས་ཀུན་སློང་ཀུན་སྤྱོད་ཀྱིས་ཐར་བའི་རྒྱུ་ལ་འགྲོ་བའི་ཆོས་ལ་བརྩོན་པར་ཞུ། བཅའ་ཡིག་ཆེན་མོ་ན་གསལ་བའི་འགྲིག་ལམ་གཞིར་བཅས་ནས་སྒེར་སོ་སོས་ཉིན་ཞག་གཅིག་གི་ཆུ་ཚོད་ཉེར་བཞི་ལ་ཆོས་སྤྱོད་སོགས་ཀྱི་རིམ་པ་རེ་མིག་ཞིག་བཟོས་ནས་དུས་ཚོད་དམ་འཛིན་གནང་བར་ཞུ་ཞུ། སློབ་གླིང་འདི་ལ་མཚོན་ན་གྲྭ་བ་ཆེས་མང་བ་མ་ཟད་སློབ་སྦྱོང་ཡར་རྒྱས་འགྲོ་བ་ལ་བསམ་ན་ཕུལ་བྱུང་ཡིན་མོད། དེང་སང་དུས་དབང་གིས་བསྟན་འཛིན་ཡོང་མིན་སེམས་ཁྲེལ་ཆེར་ཡོད་པས་ངག་དབང་དངོས་གྲུབ་དཔལ་གྱིས་སློབ་ཚོགས་ལ་རེ་ཞུ་དང་བཅས་ཏེ་གུས་ཕུལ། དབུས་གཙང་ཕྱོགས་སུ་ཇོ་ནང་གི་དགོན་སྡེ་ཉེར་དགུ་ཙམ་ཡོད་པ་རྣམས་ལ་ཇོ་ནང་གི་བླ་སྤྲུལ་དང་འབྱོར་ལྡན་རྣམས་ཀྱིས་བཤད་སྒྲུབ་ལས་གསུམ་གྱི་བྱ་བ་ལ་རྒྱབ་སྐྱོར་རོགས་རམ་མཛད་པར་ཞུ། མདོ་སྨད་ཀྱི་ཇོ་ནང་གི་དགོན་སྡེ་རྣམས་ལ་མཚོན་ན་ཕལ་ཆེ་བ་བཤད་སྒྲུབ་ལས་རྟེན་བཞེངས་ཀྱི་རྒྱས་སྤྲོས་མང་ཆེ་བའི་སྐྱོན་ལས་ཉུང་བའི་སྐྱོན་མེད་པས་མ་དར་བ་རྣམས་སུ་དར་བར་བྱེད་རྒྱུ་གནད་དམ་པའོ། །ཉེ་ཆར་བདག་དབུས་གཙང་གི་ཇོ་ནང་གི་དགོན་སྡེ་བཅུ་ཕྲག་ལྷག་ལ་ཁོང་རྣམས་ཀྱི་རེ་བ་ལྟར་སོང་བ་ཡིན། བདག་གི་ཚོར་སྣང་ལ་རྟེན་བཞེངས་དང་བཤད་སྒྲུབ་གྲྭ་རྒྱུན་གང་གི་ཕྱོགས་ནས་བསྟན་པ་ལ་ལྷག་བསམ་ལྡན་པ་རྣམས་ཀྱིས་གཟིགས་སྐྱོང་གནང་ན་ཧ་ཅང་ཡག་པོ་འདུག་བསམ་པའི་སེམས་ཚོར་བྱུང་སོང་བས་ཀུན་ལ་ཐོས་པར་དྲྭ་སྟེང་ནས་རེ་བ་ཞུས་པ་ཡིན། བདག་ལྟ་བུ་ལ་མཚོན་ན་ནང་བསྟན་ཐམས་ཅད་ལ་འདྲ་བར་དགའ་དད་ཡོད་མོད་ཧ་ཅང་ཉམ་དམའ་བའི་ཇོ་ནང་འདིའི་བསྟན་པ་སླར་གསོའི་ཆེད་དུ་དྲྭ་སྟེང་ནས་གསར་ཁྱབ་མང་དུ་སྤེལ་བ་ཡིན། དར་རྒྱས་སོང་པའི་ཆོས་བརྒྱུད་སོགས་ཀྱིས་གསར་ཁྱབ་སྤེལ་མི་དགོས་ལ། དངོས་གནས་ཀྱི་ལོ་རྒྱུས་ཡིན་ཡང་གཞན་གྱིས་རང་དོན་ཙམ་ཞེན་པར་དོགས་སྲིད་མོད་དེ་ཙམ་མིན་ལགས། དངོས་གྲུབ་དཔལ་ནས། ཇོ་ནང་དགེ་བཤེས་ངག་དབང་དངོས་གྲུབ་དཔལ་ལགས་ཀྱིས་གངས་ལྗོངས་བཀའ་བརྒྱུད་བགྲོ་གླེང་ཆེན་མོ་ཐེངས་བཅོ་ལྔ་པར་གནང་བའི་བཀའ་སློབ།ཇོ་ནང་དགེ་བཤེས་ངག་དབང་དངོས་གྲུབ་དཔལ་ལགས་ཀྱིས་གངས་ལྗོངས་བཀའ་བརྒྱུད་བགྲོ་གླེང་ཆེན་མོ་ཐེངས་བཅོ་ལྔ་པར་གནང་བའི་བཀའ་སློབ། ཟིན་བྲིས་པ་སློབ་བུ་ཡེ་ཤེས་རྣམ་རྒྱལ། གངས་ལྗོངས་བཀའ་བརྒྱུད་བགྲོ་གླེང་ཆེན་མོ་ཐེངས་བཅོ་ལྔ་པ་འདིར་ཕེབས་པའི་མཁན་བླ་སྤྲུལ་རྣམས་ཀྱི་གཙོས་སྐྱབས་གནས་འདུས་ཚོགས་རིན་པོ་ཆེའི་སྙན་ལམ་དུ་ཚིག་ཁ་ཤས་ཤིག་ཞུ་རྒྱུ་དེ་ཡིན། ཞུ་དགོས་པའི་རྒྱུ་མཚན་གོང་གི་བཀའ་བརྒྱུད་བགྲོ་གླེང་ཆེན་མོའི་ཚོགས་ཆུང་གིས་གོ་སྒྲིག་དང་རེ་འབོད་བྱས་ནས་དེ་རིང་ཚིག་ཁ་ཤས་ཤིག་ཞུ་རོགས་གྱིས་ཟེར་ནས་རེ་བ་བརྒྱབ་སོང༌། དེའི་རྒྱུ་མཚན་གྱིས་རང་གི་བསམ་ཚུལ་ཟེར་ན་འདྲ་རང་གི་ཚོར་སྣང་གི་སྐད་ཆ་མདོར་བསྡུས་ཤིག་ཞུ་རྒྱུ་དེ་ཡིན། ཡིན་ནའང་ངས་སྐར་མ་ཁ་ཤས་ནང་ལ་ཞུ་རྒྱུ་དེ་དགོས་པ་ཡོད་པས་ཆེད་དུ་ཁྱེད་རྣམ་པ་ཚོས་ཡག་པོ་ཞིག་གསན་རྒྱུ་གལ་ཆེ། མ་གསན་ན་ཁྱེད་རྣམ་པ་ཚོའི་དུས་ཚོད་འཕྲོག་བརླག་དང་ཕན་པ་གང་ཡང་འགྲུབ་རྒྱུ་མ་རེད། ཡིན་ནའང་ང་རང་གང་ཟག་སྒེར་ལ་མཚོན་ན་སྐྱེས་ཐོབ་ཀྱི་ཤེས་རབ་དང་སྦྱང་སྟོབས་ཀྱི་ཡོན་ཏན་ཕྱོགས་གང་གི་ཐད་ནས་ཁྱེད་རྣམ་པ་ཚོ་ལ་བཀའ་སློབ་ལམ་སྟོན་གནང་ནི་ཞིག་མ་རེད། འོན་ཏེ་རང་གི་ལྷག་བསམ་རྣམ་དག་གི་སྒོ་ནས་སྐད་ཆ་ཚིག་ཁ་ཤས་ཤིག་ཞུ་རྒྱུ་དེ་ཡིན། དེ་གང་ཡིན་ཟེར་ན་སྤྱི་ཡོངས་ནས་བཀའ་བརྒྱུད་བགྲོ་གླེང་ཆེན་མོ་འདི་བཙུགས་ནས་ད་ལྟའི་བར་ལོ་ངོ་བཅུ་ཕྲག་ལྷག་གི་རིང་ལ་ཧ་ལས་པའི་ཡར་རྒྱས་ཕུན་སུམ་ཚོགས་པ་འགྲོ་དང་འགྲོ་བཞིན་འདུག རང་གི་ངོས་ནས་ཡིན་ན་དགའ་བ་དང་རྗེས་སུ་ཡི་རང་ཧ་ལས་པ་ཡོད་ཞུ་རྒྱུ་དེ་ཡིན། དེའི་ཐོག་ནས་ཐམས་ཅད་ཀྱི་རིགས་ལམ་ཕྱོགས་ནས་ཡིན་ན་འཕེལ་རྒྱས་ཧ་ལས་པ་འགྲོ་ཡི་འདུག སྤྱིར་བཏང་གཞུང་ཟེར་བ་དེ་རིགས་པའི་རྗེས་སུ་འབྲང་བ་ཡིན་པའི་རྒྱུ་མཚན་གྱིས་རིགས་པ་དེ་ཧ་ཅང་གལ་ཆེན་པོ་ཞིག་ཏུ་ཆགས་འདུག་ཡོད་པ་རེད། ང་ཚོ་བོད་ཁ་བ་གངས་ཅན་པ་ལ་བསམ་བློ་བཏང་ན་སྔོན་མ་འདས་པའི་ལོ་རྒྱུས་སྟེང་ལ་གསང་ཕུའི་ཆོས་གྲྭ་དེ་རྔོག་ལེགས་པའི་ཤེས་རབ་ཀྱིས་བཏབ། དེའི་རྗེས་སུ་རྔོག་ལོ་ཙྪ་བ་བློ་ལྡན་ཤེས་རབ་རྒྱ་གར་འཕགས་པའི་ཡུལ་དུ་བྱོན་ནས་ལོ་ངོ་བཅུ་དྲུག་ལྷག་ལ་རིག་གཞུང་མ་ལུས་པ་སྦྱངས་ནས་ཕྱིས་གསང་ཕུའི་ཆོས་གྲྭར་བྱོན་ནས་རྩོད་གྲྭ་བཙུགས་ཏེ་རྩོད་གྲྭ་དེ་ཧ་ཅང་དར་ཁྱབ་ཏུ་སོང་བ་རེད། དེའི་ཕྱིས་བོད་ཁ་བ་གངས་ཅན་གྱི་ཆོས་བརྒྱུད་གཅིག་ཙམ་མ་ཡིན་པར་ཆོས་བརྒྱུད་མང་ཆེ་བའི་མཁས་དབང་མང་བོ་ཞིག་གསང་ཕུའི་ཆོས་གྲྭ་ཆེན་མོར་བྱོན་ཏེ་རིགས་ལམ་ཧ་ཅང་སྦྱངས་ནས་དར་ཁྱབ་ཏུ་ཕྱིན་པ་རེད། དཔེར་ན་རྒྱལ་བ་བཀའ་བརྒྱུད་པར་མཚོན་ན་བཀའ་བརྒྱུད་པ་རང་གི་མཁས་དབང་མང་པོ་ཞིག་གསང་ཕུའི་ཆོས་གྲྭ་བྱོན་ནས་མཁས་པའི་མཚན་སྙན་ཐོབ་པ་ཞིག་རེད། དེ་ཡིན་ན། དཔལ་ལྡན་བླ་མའི་རྣམ་ཐར། །རྗེས་འཇུག་སློབ་མས་ཉམས་ལེན། །ཟེར་བ་ནང་བཞིན་དུ་ཐམས་ཅད་ཀྱིས་རིགས་ལམ་ཡག་པོ་ཞིག་བསླབ་དགོས་རྒྱུ་དེ་གལ་ཆེན་པོ་རེད། སྤྱིར་བཏང་ཆོས་བརྒྱུད་སོ་སོའི་ནང་ན་ཁ་ཅིག་གིས་ང་ཚོ་ནི་སྒྲུབ་པའི་བཀའ་བབ་ཡིན་གྱི་བཤད་པའི་བཀའ་བབ་མ་ཡིན་ནོ་ཞེས་ཟེར། ཁ་ཅིག་གིས་ང་ཚོ་བཤད་པའི་བསྟན་པ་འཛིན་མཁན་ཡིན་གྱི་སྒྲུབ་པའི་བསྟན་པ་འཛིན་མཁན་མ་ཡིན་ནོ་ཞེས་བཤད་མཁན་ཡོད་པ་རེད། འོན་ཀྱང་བཤད་སྒྲུབ་ཟུང་འབྲེལ་དང་བཀའ་མདོ་རྒྱུད་ཀུན་ལ་ཐོས་བསམ་དང་ཉམས་སུ་ལེན་དགོས་པ་གལ་ཆེན་པོ་རེད། ང་ཚོ་བདག་ཅག་གི་སྟོན་པའི་རྗེས་འཇུག་ཡིན་པའི་ཆ་ནས་བདག་ཅག་གི་སྟོན་པ་ཐུགས་རྗེ་ཅན་གྱིས། ང་ཚོ་བཤད་པའི་བསྟན་པ་དང་སྒྲུབ་པའི་བསྟན་པ་གཉིས་ཀ་བཀའ་བབ་ཡོད་པ་རེད་མ་གཏོགས་རབ་ཏུ་བྱུང་བ་ལ་བྱ་བ་གཅིག་ལས་མེད་མ་གསུངས་ཏེ་སངས་རྒྱས་བཅོམ་ལྡན་འདས་ཀྱིས། རབ་ཏུ་བྱུང་བའི་བྱ་བ་ནི་གཉིས་ཏེ། ཀློག་པ་ཐོས་བསམ་དང༌། སྤོང་བ་བསམ་གཏན་ནོ། །ཞེས་ང་ཚོ་དགེ་འདུན་པ་ཡོངས་སུ་རྫོགས་པ་ལ་སངས་རྒྱས་བཅོམ་ལྡན་འདས་ཀྱིས་ཀློག་པ་ཐོས་བསམ་དང་སྤོང་བ་བསམ་གཏན་བྱེད་དགོས་པའི་བཀའ་སློབ་ཟབ་མོ་གནང་འདུག རྒྱུ་མཚན་དེའི་དབང་གིས་ཐམས་ཅད་ཀྱིས་བཤད་སྒྲུབ་ཟུང་འབྲེལ་བྱེད་དགོས་པ་དེ་ཧ་ཅང་གལ་ཆེན་པོ་རེད། དེའི་ཆ་ནས་དེ་རིང་ཞུ་བསམ་པ་ནི་གང་ཡིན་ཟེར་ན་རིགས་ལམ་ཧ་ཅང་ཡར་རྒྱས་འགྲོ་དང་འགྲོ་བཞིན་པ་རེད། ཡིན་ཡང་ཡར་རྒྱས་ལ་མཐའ་མེད་པས་ད་དུང་ཡར་རྒྱས་ལ་འགྲོ་དགོས་ཀི་རེད། ད་ལྟ་ཡིན་ནའང་གཞུང་རིགས་པའི་རྗེས་འབྲང་ཡིན་པའི་རྒྱུ་མཚན་གྱིས་ངེས་པར་དུ་རིགས་པ་དེ་གོང་ནས་གོང་འཕེལ་དུ་གཏོང་དགོས་པ་གལ་ཆེན་པོ་རེད་ཅེས་ཞུ་རྒྱུ་དེ་རེད། རིགས་པའི་རྒྱབ་རྟེན་ལ་ལུང་དེ་གལ་ཆེན་པོ་དང་ལུང་དེ་རབ་ཡིན་ན་ང་ཚོ་འོ་སྐོལ་གྱི་སྟོན་པ་ཐུགས་རྗེ་ཅན་གྱི་རྗེས་འཇུག་ཡིན་པས་བདག་ཅག་གི་སྟོན་པ་སངས་རྒྱས་བཅོམ་ལྡན་འདས་ཀྱིས་ཆོས་ཕུང་བརྒྱད་ཁྲི་བཞི་སྟོང་གསུངས་ཤིང་དེའི་ནང་གི་ང་ཚོ་བོད་ཁ་བ་གངས་ཅན་པའི་བགོ་སྐལ་དུ་གྱུར་བ་བཀའ་པོ་ཏི་བརྒྱ་ལྷག་དང་བསྟན་འགྱུར་པོ་ཏི་ཉིས་བརྒྱ་ལྷག་ཡོད་པས་དེ་ལ་ཐམས་ཅད་ཀྱིས་སྦྱང་བ་ཕུན་སུམ་ཚོགས་པར་བྱེད་རྒྱུ་ཧ་ཅང་གི་གལ་ཆེན་པོ་རེད། དེའི་ནང་དགོས་སུ་རྒྱལ་བ་བཀའ་བརྒྱུད་པ་ལ་མཚོན་ན་རང་རང་སོ་སོའི་མེ་ཏོག་ལྷ་བབས་ཀྱི་ལྷ་སྐལ་དེ་རྒྱལ་བ་བཀའ་བརྒྱུད་པའི་སྔོན་བྱོན་མར་མི་དྭགས་གསུམ་ནས་བཟུང་སྟེ་མཁས་དབང་རིམ་བྱོན་རྣམས་ཀྱི་སྐུའི་ཚབ་གསུང་གི་དོད་གསུང་རབ་པོ་ཏི་མང་པོ་བརྩམས་གནང་མཛད་ཡོད་པ་རེད། དེ་ཅིའི་དོན་དུ་མཛད་པ་ཡིན་ཟེར་ན་ཁྱེད་རྒྱལ་བ་བཀའ་བརྒྱུད་པའི་ཕྱི་རབས་པ་དག་གི་གདུལ་བྱ་རྣམས་ཀྱི་དོན་དང་ཆེད་དུ་ཡིན་པ་ཐམས་ཅད་ལ་ཞུ་མི་དགོས་པར་མཁྱེན་གསལ་ལྟར་རེད། དེ་ཡིན་ན་ཁྱེད་རྣམ་པས་རྒྱལ་བ་བཀའ་བརྒྱུད་པའི་མར་མི་དྭགས་གསུམ་གྱི་བསྟན་པ་འདི་འཛིན་སྐྱོང་སྤེལ་གསུམ་བྱེད་པ་རང་རང་སོ་སོའི་ཕྲག་ན་བབས་བའི་ལས་འགན་ཞིག་ཡིན་པ་ངེས་པར་དུ་ངོས་འཛིན་གསལ་བོར་ཐོབ་དགོས། དེང་སང་དུས་རབས་ཉེར་གཅིག་གི་ནང་དུ་མི་མང་བོ་ཞིག་གིས་འགན་འཁྲི་ཟེར་བའི་ཐ་སྙད་དེ་གླེང་གིན་འདུག དེས་ན་ཁྱེད་རྣམ་པའི་འགན་ཁྲི་གཙོ་བོ་དེ་གང་ཡིན་ཟེར་ན་རང་རང་སོ་སོའི་རང་གཞུང་དེ་སྦྱང་རྒྱུ་དེ་གལ་ཆེན་ནང་གི་དོན་སྙིང་ཅན་ཞིག་ཡིན་ལ་གྲུབ་འབྲས་ཡོད་པ་ཞིག་དང་རང་རང་སོ་སོའི་ལས་འགན་ཞིག་ཏུ་ཆགས་འདུག་ཡོད་པ་དེ་འདྲ་ཞིག་རེད།སྔོན་བྱོན་རྒྱལ་བ་བཀའ་བརྒྱུད་པའི་མཁས་དབང་རྣམ་པ་ཚོ་དང་དངོས་སུ་ཞལ་མཇལ་བ་ཡིན་ནའང་ཁོང་རྣམས་ཀྱིས་བརྩམས་གནང་མཛད་པའི་གསུང་པོད་དེར་ལེགས་བཤད་དག་གི་བརྗོད་བྱའི་དོན་གྱི་སྙིང་བོ་དག་དྲིལ་ནས་གསུངས་པ་ལས་ལྷག་གི་དཔེ་མཁྱུད་བྱས་ཏེ་མ་གསུངས་པ་གཅིག་ཀྱང་ཡོད་པ་མ་རེད། ཁོང་རྣམས་དངོས་སུ་མཇལ་ན་ཡང་གདུལ་བྱ་ལམ་སྟོན་བྱེད་ཚུལ་ལ་ཉིད་ཀྱི་རྟོགས་པ་གཞན་ལ་འཕོ་མིན་ཏེ། །ཆོས་ཉིད་བདེན་པ་བསྟན་པས་གྲོལ་བར་འགྱུར། །ཞེས་ཆོས་ཀྱི་གནས་ཚུལ་ཚུལ་བཞིན་དུ་བསྟན་ནས་འཁོར་བའི་སྡུག་བསྔལ་དང་ངན་སོང་ལས་གྲོལ་དགོས་པ་ཞིག་རེད། དེ་ནང་བཞིན་སངས་རྒྱས་གཉིས་པ་སློབ་དཔོན་དབྱིག་གཉེན་གྱིས། འཁོར་བའི་འདམ་ལས་འགྲོ་བ་དྲངས་མཛད་པ། །དོན་བཞིན་སྟོན་པ་དེ་ལ་ཕྱག་འཚལ། །ཞེས་གསུངས་པ་ནང་བཞིན་ཆོས་ཀྱི་གནས་ཚུལ་ཇི་བཞིན་དུ་བསྟན་ནས་འགྲོ་བ་སེམས་ཅན་རྣམས་འཁོར་བ་སྡུག་བསྔལ་གྱི་རྒྱ་མཚོ་ལས་དྲངས་དགོས་པ་རེད། དེས་ན་ཆོས་ཀྱི་གནས་ཚུལ་བཞིན་དུ་བསྟན་ཡོད་པ་དེ་སྔོན་བྱོན་རྒྱལ་བ་བཀའ་བརྒྱུད་པའི་མཁས་དབང་གོང་མ་རིམ་བྱོན་གྱིས་གསུང་པོད་ལས་བསྟན་ཡོད་པ་ལས་ལྷག་གི་ཁོང་རྣམ་པ་དངོས་སུ་ཞལ་མཇལ་ཡང་དེ་ལས་ལྷག་པའི་ང་ཚོར་ཐར་བ་དང་ཐམས་ཅད་མཁྱེན་པའི་གོ་འཕང་ཐོབ་པའི་ཐབས་གཞན་མེད་པ་ཞིག་རེད། སངས་རྒྱས་དང་བྱང་ཆུབ་སེམས་དཔའ་གང་དང་གང་གི་མཛད་པ་རྣམས་ཀྱི་ནང་གི་མཆོག་ཏུ་གྱུར་བ་ནི་གསུང་གི་མཛད་པ་ཉིད་ཡིན་པར་རྗེ་བདག་ཉིད་ཆེན་པོས་གསུངས་ཡོད་པ་རེད། དེ་ནང་བཞིན་དུ་སྔོན་བྱོན་སྐྱེས་བུ་དམ་པ་རྣམས་ཀྱིས་མཛད་པའི་ཡང་སྙིང་ངམ་མཆོག་ཏུ་གྱུར་པ་ནི་གསུང་གི་མཛད་པ་ཡིན། དེ་ལ་ཁྱེད་རྣམས་ཀྱིས་ཐོས་བསམ་སྒོམ་གསུམ་བྱེད་རྒྱུ་དེ་ཧ་ཅང་གལ་ཆེན་པོ་རེད། ཕུན་སུམ་ཚོགས་པ་ཡིན་ན་རང་རང་གི་རང་ལུགས་གཞིར་བཞག་ནས་དེ་མ་ནོར་བར་ཤེས་པའི་ཐོག་ནས་གཞན་ཕྱོགས་ཀྱི་ཆོས་བརྒྱུད་རིས་སུ་མ་ཆད་པའི་མཁས་དབང་རྣམས་ཀྱིས་གསུངས་པའི་གཞུང་ལུགས་ལ་ཐོས་བསམ་སྒོམ་གསུམ་བྱེད་ཐུབ་ན་ད་གཟོད་ཕུན་སུམ་ཚོགས་པའི་རྒྱུ་རེད། དེ་ཡིན་ན་རང་རང་སོ་སོའི་གཞུང་ལུགས་དེ་མ་ཤེས་ནས་ཁོ་རྒྱལ་བ་བཀའ་བརྒྱུད་པ་ཡིན་ཟེར་ན་མིང་ཙམ་མ་གཏོགས་པའི་དོན་གྱི་ཐོག་ནས་རྒྱལ་བ་བཀའ་བརྒྱུད་པ་མ་ཡིན་པར་ཆགས་འགྲོ་བ་རེད། ཐམས་ཅད་ཀྱིས་བསམ་བློ་ཐོངས་དང༌། དཔེར་ན་ཡེ་ཤུ་མ་ཤུ་ཀའི་ཆོས་ལུགས་ཡིན་ན་འདྲ་ཕྱི་རོལ་བའི་གཞུང་ལུགས་རྐྱང་རྐྱང་སྦྱངས་ནས་གང་ཟག་ཅིག་གིས་ཁོ་ནང་པ་སངས་རྒྱས་པ་ཡིན་ཟེར་བ་ཙམ་ཞིག་གིས་ནང་པ་སངས་རྒྱས་པ་འགྱུར་རྒྱུ་མ་རེད། ནང་པ་སངས་རྒྱས་པའི་ལྟ་སྒོམ་སྤྱོད་གསུམ་གཞི་ལམ་འབྲས་གསུམ་གང་ཡང་མི་ཤེས་མཁན་ཞིག་གིས་ནང་པ་སངས་རྒྱས་པའི་གྲུབ་མཐའ་སྨྲ་བ་ཡིན་ཟེར་ན་ད་དཀའ་མོའི་གནས་ཤིག་ཏུ་ཆགས་འགྲོ་ཡི་འདུག དེ་ནང་བཞིན་ཁྱེད་རྣམ་པ་རྒྱལ་བ་བཀའ་བརྒྱུད་པ་ཡིན་ཟེར་ན་རྒྱལ་བ་བཀའ་བརྒྱུད་པའི་གཞི་ལམ་འབྲས་གསུམ་ལྟ་སྒོམ་སྤྱོད་གསུམ་དེ་ངེས་པར་ཤེས་དགོས་པ་ཧ་ཅང་གལ་ཆེན་ནང་གི་རྩ་ཆེན་དོན་གྱི་སྙིང་པོ་ཞིག་རེད་རང་གིས་བསམ་སོང༌། ནང་དགོས་སུ་རྒྱལ་བ་བཀའ་བརྒྱུད་པ་ལ་ནང་གསེས་ཀྱི་གྲུབ་མཐའ་ཟེར་ན་ཆོས་བརྒྱུད་མང་པོ་ཞིག་ཡོད་པ་རེད། དཔེར་ན་བཀའ་བརྒྱུད་ཆེ་བཞི་ཆུང་བརྒྱད་ཟེར་བ་ཞིག་ཡོང་གི་འདུག་དེ་དག་ཐམས་ཅད་རང་རང་སོ་སོའི་གཞུང་ལུགས་ཁ་མ་ཚང་བ་ཡིན་ན་གཅིག་གི་གཅིག་ལ་ཕན་ཚུན་ཁ་སྐོང་བྱས་ནས། མདོར་ན་ཐམས་ཅད་ཀྱིས་མིང་ཙམ་ལ་མ་ཞེན་པའི་སྒོ་ནས་རྒྱལ་བ་བཀའ་བརྒྱུད་པ་ཐམས་ཅད་ཀྱིས་ཕན་ཚུན་གཅིག་གི་འདུ་ཤེས་ཡོད་ན་རྒྱལ་བ་བཀའ་བརྒྱུད་པའི་ནང་ལ་མཐུན་འབྲེལ་ཟབ་རྒྱས་ཡོང་བ་དང་ཡར་རྒྱས་ཚད་མེད་པ་ཡོང་ཐུབ་པས་དེ་ནང་བཞིན་ཨེ་ཡོང་ལྟ་རྒྱུ་ཐུགས་ངེས་མཛད་དགོས་པ་རེད་མ་གཏོགས། དེ་མིན་སོ་སོས་རང་རང་གི་མིང་ཙམ་ལ་ཞེན་ནས་རིས་སུ་བཅད་སོང་བ་ཡིན་ན་ཆགས་སྡང་དབང་དུ་འགྲོ་བ་རེད། ཆགས་སྡང་གི་དབང་གིས་བསྟན་པ་འཛིན་ཐུབ་ཀི་མ་རེད། དེའི་རྒྱུ་མཚན་གང་ཞེ་ན་བསྟན་པ་ཟེར་བ་དེ་ཆགས་སྡང་གི་གཉེན་པོ་ཡིན་པ་ལས་བསྟན་པ་ཟེར་བ་དེ་ཆགས་སྡང་དར་སྤེལ་འགྲོ་བའི་རྐྱེན་མ་རེད། དེའི་ཕྱིར་ན་ཁྱོད་དང་ང་ཟེར་ནས་ཕྱོགས་རིས་ཆགས་སྡང་བྱས་ན་བསྟན་པ་དེ་འགྲིབ་ཀི་རེད་མ་གཏོགས་བསྟན་པ་འཕེལ་རྒྱས་ལ་འགྲོ་ཐུབ་པ་མ་རེད། རྒྱུ་མཚན་དེའི་དབང་གིས་མདོར་ན་ཕྱོགས་རིས་འཐེན་འཁྱེར་མེད་པའི་ཐོག་ནས་ཐམས་ཅད་ཀྱིས་མར་མི་དྭགས་གསུམ་གྱི་བསྟན་པ་འཛིན་སྐྱོང་སྤེལ་གསུམ་བྱེད་རྒྱུ་དེ་ཁྱེད་རྣམ་པའི་ཕྲག་ཏུ་བབས་པའི་འོས་འགན་དང་འགན་ཁྲི་ཞིག་རེད་བསམ་གྱིན་ཡོད། རྒྱུ་མཚན་དེ་བས་ན་ཐམས་ཅད་ཀྱིས་རང་གཞུང་དེ་སྦྱང་རྒྱུ་ཧ་ཅང་གལ་ཆེན་རེད། ཡིན་ནའང་རང་རང་སོ་སོས་གཞུང་སྦྱངས་དུས་སུ་ཆོས་རའི་ནང་དུ་ཡོང་ནས་ལུང་དྲངས་པ་ཡིན་ན་མ་ཁྱབ་རྐྱང་རྐྱང་ལབ་ནས་ཁྱབ་ཟེར་བ་གཅིག་ཀྱང་མེད་པ་ཡིན་ན་གཞུང་ལ་སྒྲོ་འདོགས་དང་སྐུར་འདེབས་བྱས་པའི་ཉེས་པ་བསགས་པ་མ་གཏོགས་ཚོགས་བསགས་ཐུབ་པ་མ་རེད། དེས་ན་ཐམས་ཅད་ཀྱིས་གཞུང་ལུགས་ལ་བརྟགས་དཔྱད་ཡག་པོ་བྱས་ནས་ཞིབ་པར་ཐག་གཅོད་པར་འདོད་ན་ཆོས་ཚུལ་ཟབ་པའི་ཐག་གཅོད་མི་སྔ་བར། །ཞེས་གསུངས་པ་ནང་བཞིན་ཐམས་ཅད་ཀྱིས་མ་ཁྱབ་རྐྱང་རྐྱང་ཟེར་ནས་ལུང་ཞིག་ལ་ཁྱོན་ནས་ནུས་པ་མེད་ནི་བྱས་ན་ལུང་ཞིག་ལ་སྒྲོ་འདོགས་རྐྱང་རྐྱང་བྱས་ནས་ཅིག་ཅིག་ལ་དགོངས་པ་རེད་ཉུག་ཉུག་ལ་དགོངས་པ་རེད་ཟེར་ནས་གསུང་བ་བོ་ཁོ་རང་གི་དགོངས་པ་མ་ཡིན་པ་ཞིག་དགོངས་པ་རེད་ཟེར་ན་སྒྲོ་འདོགས་དང༌། ཁོའི་དགོངས་པ་ཡིན་པ་ཞིག་མ་ཡིན་ཞེས་ལབ་སོང་བ་ཡིན་ན་སྐུར་འདེབས་སུ་ཆགས་འགྲོ་བ་རེད། སྐུར་འདེབས་དང་སྒྲོ་འདོགས་བྱས་ན་ཚོགས་བསགས་མི་ནུས་པར་ཚོགས་ངན་བསགས་ཀི་རེད། སྤྱིར་ན་ང་ཚོས་དཔེ་ཆ་ལྟ་སྐབས་སུ་ཚོགས་གསོག་གིན་ཡོད་པ་རེད། དེ་ཡང་གཙོ་བོ་ཐོས་བསམ་སྒོམ་གསུམ་དེ་ཡེ་ཤེས་ཀྱི་ཚོགས་ཡིན་པས་ཡེ་ཤེས་ཀྱི་ཚོགས་བསགས་ས་ནས་རང་གིས་ཚོགས་ངན་བསགས་ན་ཡག་པོ་ཡོང་གི་མ་རེད། དེའི་ཕྱིར་ན་རང་རང་སོ་སོས་གཞུང་ལུགས་ལ་ཡིད་ཆེས་ནས་ཚིག་ཟིན་ལྟར་ཁས་ལེན་ཨེ་ཐུབ་ལྟ་རྒྱུ་དེ་རིགས་པའི་སྒོ་སྣ་ཚོགས་ཀྱིས་དཔྱད་པ་བཏང་ན་སྔོན་བྱོན་སྐྱེས་བུ་དམ་པ་རྣམས་ཀྱིས་དཔྱད་པ་མཐར་ཕྱིན་ཏེ་བརྩམས་བཞག་པ་ཞིག་ཡིན་རྒྱུ་རེད། རང་རང་སོ་སོས་ཁས་ལེན་གྱི་འཛིན་མཚམས་དང་ཐུགས་དགོངས་གཏད་ས་གཞུང་གི་ཁུངས་བཅོལ་ས་ལུང་རིགས་ཀྱི་རྒྱབ་རྟེན་འཚོལ་ས་དེ་གང་ཡིན་པ་ཞིབ་པར་དཔྱད་ན་ལུང་དོན་མང་པོ་བཞག་དགོས་ཀི་མ་རེད། དེའི་དབང་གིས་ཐམས་ཅད་ཀྱིས་རང་གཞུང་དེ་རྩ་ཆེན་པོ་དང་མཐོང་ཆེན་བྱེད་རྒྱུ་ཧ་ཅང་གལ་ཆེན་པོ་ཞིག་རེད་བསམ་འདུག །དེ་མ་ཡིན་ན་རྒྱལ་བ་བཀའ་བརྒྱུད་པའི་རང་གི་བསྟན་པ་དེ་འཛིན་སྐྱོང་སྤེལ་གསུམ་བྱེད་ཐུབ་རྒྱུ་མ་རཻད། སྔར་འདས་པའི་རྒྱབ་ལྗོངས་ཟེར་ན་འདྲ་འདས་པའི་ལོ་རྒྱུས་ཐོག་ཡར་བལྟས་ན་དགོན་སྡེ་ཟེར་ན་འདྲ་ཆོས་བརྒྱུད་སོ་སོ་ཉམས་ཆག་ཏུ་སོང་བ་དེ་རྐྱེན་གང་གི་རེད་ཅེ་ན། གཅིག་ཕྱོགས་ནས་ཆབ་སྲིད་ཀྱི་དབང་གིས་བསྟན་པ་དེ་ཆབ་སྲིད་ལ་བསྲེས་ནས་ཉམས་ཆག་ལ་སོང་བ་དང༌། གཅིག་ཕྱོགས་ནས་གཡོ་སྒྱུའི་དབང་གིས་དགེ་རྒན་དང་དཔེ་ཁྲིད་ཡིག་ཆ་གཞན་དང་གཞན་བཙུགས་ནས་བསྒྱུར་སོང་བ་རེད་འདས་པའི་ལོ་རྒྱུས་ནང་ལ་ཧ་ཅང་རྙོག་འཛིང་རེད། དེ་འདྲ་ཡིན་ན་རང་རང་སོ་སོའི་རང་ཚུགས་བཟུང་དགོས་པ་དེ་ཧ་ཅང་གལ་ཆེན་པོ་ཞིག་རེད། མི་སུ་དང་སུ་ཡིན་ན་གཞན་དང་བསྟུན་དགོས་པ་དང་རང་ལ་རང་ཚུགས་ཡོད་དགོས་པ་ཧ་ཅང་གལ་ཆེན་རེད་བསམ་རྒྱུའི་རང་གི་ཚོར་སྣང་གི་སྐད་ཆ་ཞིག་རྣམ་པ་ཚོ་ལ་ཞུས་པ་ཡིན། དེ་མ་གཏོགས་དམིགས་གསལ་གྱི་ཞུ་བྱ་མེད། ང་ལ་མཚོན་ན་གོ་ཆེ་དགོན་པ་ལ་སྔོན་ནས་དགེ་རྒན་དུ་ཐེངས་ཁ་ཤས་ལ་ཡོང་བ་ཡིན། དེའི་འབྲེལ་བའི་དབང་གིས་ད་རེབ་ཡོང་རོགས་ཀྱིས་ཟེར་ནས་ཐེངས་ཁ་ཤས་ཞུ་བ་བྱས་ནས་ད་ཐེངས་ཡོང་པ་ཡིན། ཡིན་ནའང་སྐད་ཆ་ཞུ་རྒྱུའི་འཆར་གཞི་མེད་ད་དེ་རིང་ཁོང་རྣམ་པས་སྐད་ཆ་ཞིག་བཤད་རོགས་ཀྱིས་གསུངས་སོང༌། དེའི་དབང་གིས་གོང་དུ་ས་བཅད་མ་སྟོང་བ་ཙམ་ཞིག་ཞུས་པ་ཡིན། མ་འོངས་པ་ཡིན་ན་འདྲ་འདས་པའི་ལོ་རྒྱུས་ཐོག་ལ་ང་ཚོ་དཔལ་ལྡན་རྒྱལ་བ་ཇོ་ནང་པ་དང་རྒྱལ་བ་བཀའ་བརྒྱུད་གཉིས་ཀར་མཚོན་ན་གཅིག་གཅིག་ལ་ཕན་ཚུན་ཉམས་རྒུད་གང་གི་སྐབས་སུ་ཡིན་ན་གདུང་སེམས་མཉམ་བསྐྱེད་བྱས་ནས་ཡོང་བཞག་པ་ཞིག་ཡིན་པ་ཁྱེད་རྣམ་པ་ཚང་མས་འདས་པའི་ལོ་རྒྱུས་ནང་ལ་ཡོད་པ་མཁས་དབང་རྣམ་པའི་ཐུགས་ལ་ཡོད་པ་ནང་བཞིན་རེད། བསྟན་པ་འཛིན་སྐྱོང་སྤེལ་གསུམ་ཕྱོགས་ནས་ཡིན་ན་ཀུན་མཁྱེན་དོལ་པོ་པ་ཤེས་རབ་རྒྱལ་མཚན་དཔལ་བཟང་བོའི་སྐུ་དུས་སུ་ཀརྨ་བ་རང་བྱུང་རྡོ་རྗེ་དང་ཁོང་རྣམ་པ་གཉིས་ནས་བཟུང་ད་བར་དུ་ཆོས་བརྒྱུད་ཕན་ཚུན་གཅིག་གིས་གཅིག་ལ་དབང་ལུང་ཁྲིད་གསུམ་གྱི་བརྒྱུད་པ་སྤེལ་ནས་ཡོང་བ་ཞིག་རེད། རྗེ་ཐམས་ཅད་མཁྱེན་པ་ཏཱ་ར་ནཱ་ཐའི་གསུང་འབུམ་གྱི་མཇུག་བྱང་ནང་དུ་ཤངས་པ་བཀའ་བརྒྱུད་པའི་ཆོས་བརྒྱུད་དུ་གཏོགས་པ་ཞེས་ཁོང་ཤངས་པ་བཀའ་བརྒྱུད་ཡིན་ཞེས་གསུངས་འདུག །དེའི་རྒྱུ་མཚན་གྱིས་ང་ཚོ་ཡིན་ན་གཅིག་གི་གཅིག་ལ་ཆོས་དམ་ཚིག་དང་དགོན་སྡེ་སྤྱི་དང་བྱེ་བྲག་གང་ཡིན་ཡང་ཕན་ཚུན་དམ་ཚིག་ལ་སེལ་བྱུང་མ་མྱོང་བ་དང་གཅིག་གི་གཅིག་ལ་མཐུན་འབྲེལ་ཟབ་མོ་དང་རྒྱ་ཆེ་བ་ཡིན་ན། ད་ལྟ་ང་ཚོའི་དུས་སུ་ཕན་ཚུན་གཅིག་གི་གཅིག་བར་ལ་མཐུན་འབྲེལ་དང་རྒྱབ་སྐྱོར་རོགས་རམ་བྱེད་རྒྱུ་ངས་འདི་ནས་ཁྱེད་རྣམ་པ་ཚོ་ལ་གསོལ་བ་འདེབས་པ་དང་རེ་བ་ཞུས་པ་ཡིན། དེ་མ་གཏོགས་དེ་རིང་གི་ཆ་ལ་ཞུ་རྒྱུ་མེད། མཇུག་མཐར་ཐམས་ཅད་ཀྱིས་ང་ཚོ་སངས་རྒྱས་ཀྱི་བསྟན་པ་སྤྱི་དང་བྱེ་བྲག་ངེས་དོན་གྱི་རྒྱལ་བ་བཀའ་བརྒྱུད་པའི་བསྟན་པ་འདི་དར་ཞིང་རྒྱས་ལ་ཡུན་རིང་དུ་གནས་པའི་བཀྲ་ཤིས་སྨོན་འདུན་ཞུ། ཐལ་མོ་རྡེབ་སྒྲ། ཆོས་བརྒྱུད་རིས་མེད་བྱེད་ཕྱོགས་སྐོར་ལ་ཅུང་ཟད་གླེང་བ།ཆོས་བརྒྱུད་རིས་མེད་བྱེད་ཕྱོགས་སྐོར་ལ་ཅུང་ཟད་གླེང་བ། ཞི་བདེ་དེད་དཔོན་ཆེན་པོ་སྟོན་པ་ཐུབ་པའི་དབང་པོ་ལ་སྒོ་གསུམ་གུས་པས་ཕྱག་འཚལ་ལོ། །དེ་ལ་འདིར་ཆོས་བརྒྱུད་རིས་མེད་བྱེད་ཕྱོགས་སྐོར་ལ་ཅུང་ཟད་གླེང་བ་ལ། ང་ཚོ་བོད་གངས་རིའི་ལྗོངས་ཀྱི་ཆོས་བརྒྱུད་ཐམས་ཅད་ཕན་ཚུན་བྱམས་བརྩེ་དང་དག་སྣང་གུས་བཀུར་བྱེད་དགོས་པ་གལ་ཆེན་གྱི་གནས་ཡིན་ཏེ། བོད་ཀྱི་ཆོས་བརྒྱུད་ལ་བན་བོན་གཉིས་ཡོད་ལ། ད་སྐབས་སུ་གནས་པའི་གཡུང་དྲུང་བོན་གྱི་བསྟན་པ་ཡང་ཤཱཀ་ཐུབ་བསྟན་པའི་བཀའ་དང་དགོངས་འགྲེལ་དང་ཕར་ཆེར་འདྲ་བ་མང་པོ་ཡོད་པ་དང༌། གཞི་ལམ་འབྲས་གསུམ་དང་ལྟ་སྒོམ་སྤྱོད་གསུམ་སོཊ་མིང་འདོགས་ཚུལ་མི་འདྲ་བ་ཙམ་ལས་ཁྱད་ཆེར་མེད་པར་སྣང་བ་དང༌། སྔོན་བྱོན་རིས་མེད་སྐྱེས་ཆེན་དུ་མས་བསྔགས་བརྗོད་མཛད་པས་སོ། །ཤཱཀྱ་ཐུབ་པའི་རྗེས་སུ་འཇུག་པའི་བོད་ཀྱི་ཆོས་བརྒྱུད་ཆེན་པོ་རྙིང་མ་དང༌། བཀའ་བརྒྱུད་པ་དང༌། ས་སྐྱ་བ་དང༌། ཇོ་ནང་པ་དང༌། དགེ་ལུགས་པ་དང་ལྔ་པོ་ཐམས་ཅད་ཀྱི་སྟོན་པ་གཅིག་དང༌། རྟེན་གཞིའི་བཀའ་དང་བསྟན་བཅོས་ཡང་ཕར་ཆེར་གཅིག་གྱུར་ཡིན་ལ། དེ་དག་ཐམས་ཅད་སངས་རྒྱས་ཀྱི་མདོ་སྔགས་ཀྱི་དགོངས་པར་གནས་པ་ཤ་སྟག་ཡིན་ཡང་གནས་སྐབས་སངས་རྒྱས་ཀྱིས་ཆོས་གསུང་པ་གདུལ་བྱའི་ཆེད་ཡིན་པས་སྒྲས་ཟིན་དང་མིང་འདོགས་ལུགས་དང་གཏན་ལ་ཕབ་ཚུལ་ཅུང་ཟད་མི་འདྲ་བ་ཡོད་ལ། འོན་ཀྱང་མཐར་ཐུག་མི་གནས་པའི་མྱང་འདས་ཀྱི་གྲོང་ཁྱེར་ལ་ཕྱིན་བྱེད་ཡིན་པ་ལ་ཁྱད་པར་མ་དམིགས་ཏེ། ས་དགེ་ཇོ་ནང་བཀའ་རྙིང་ཐམས་ཅད་ཀྱི་ཁྲོད་ན་བླ་མེད་བྱང་ཆུབ་ཀྱི་སར་གཤེགས་པའི་སྐྱེས་བུ་བསམ་གྱིས་མི་ཁྱབ་པ་བྱུང་བ་གཟུར་གནས་ཀྱི་སྒོ་ནས་འདས་པའི་ལོ་རྒྱུས་ལ་བལྟས་ན་གསལ་བ་ལྟར་རོ། །རང་རང་གི་བཞེད་པའི་ལྟ་གྲུབ་དེ་དག་ཉམས་སུ་ལེན་ན་ཉམས་མྱོང་ཅན་གྱི་རྣལ་འབྱོར་བས་དཔྱད་ན་སྒྲིབ་གཉིས་ཀྱི་གཉེན་པོ་དང་ཐར་བ་ཐོབ་པའི་ཐབས་སུ་འགྱུར་བ་ལ་གཅིག་མཚུངས་ཡིན་ཏེ། པཎ་ཆེན་བློ་བཟང་ཆོས་རྒྱན་གྱིས། ལྷན་ཅིག་སྐྱེས་སྦྱོར་གའུ་མ། །ལྔ་ལྡན་རོ་སྙོམས་ཡི་གེ་བཞི། །ཞི་བྱེད་གཅོད་ཡུལ་རྫོགས་ཆེན་དང༌། །དབུ་མའི་ལྟ་གྲུབ་ལ་སོགས་པ། །སོ་སོར་མིང་འདོགས་མང་ན་ཡང༌། །ངེས་དོན་ལུང་རིགས་ལ་མཁས་ཤིང༌། །ཉམས་མྱོང་ཅན་གྱི་རྣལ་འབྱོར་བས། །དཔྱད་ན་དགོངས་པ་གཅིག་ཏུ་འབབ། །ཅེས་དང༌། ཤར་སྐལ་ལྡན་རྒྱ་མཚོའི་གསུང་སྒྲོས་ལས། གཞན་གྲུབ་མཐའ་ཆོས་ལུགས་སྣ་ཚོགས་ལ། །ཡིད་གཡོ་བའི་དད་པ་སྐྱེས་ན་རབ། །དེ་མིན་ནའང་དག་སྣང་སྦྱོང་བ་དང༌། །དོན་མེད་པར་མི་སྨོད་དམ་བཅའ་ཡིན། །ཞེས་པ་དང༌། །ཆོས་རང་རང་མོས་པའི་ངོ་ན་ཟབ། །མཆོག་སངས་རྒྱས་ཐོབ་པའི་ཐབས་དམ་པ། །ས་དགེ་ལྡན་གསར་རྙིང་ཀུན་ལ་ཡོད། །ཅེས་དང༌། རྡོ་གྲུབ་འཇིགས་མེད་བསྟན་པའི་ཉི་མའི་ལྟ་མགུར་མུན་སེལ་ལས། །ལར་རྫོགས་ཆེན་བློ་འདས་རིག་པ་དང༌། །དཔལ་དུས་འཁོར་རྒྱུད་སྡེ་རང་ལུགས་ཀྱི། །ལམ་མི་འགྱུར་བདེ་བའི་སྒྲུབ་གཞི་གཉིས། །མིང་འདོགས་ཚུལ་ཙམ་ལས་སོ་སོར་མེད། །ཅེས་གསུངས་པས་སོ། །འོན་ཀྱང་འཇུ་མི་ཕམ་གྱིས། དགེ་ལྡན་ལྟ་བ་མེད་དགག་དང༌། །གཞན་རྣམས་མ་ཡིན་དགག་ཏུ་འདོད། །ཅེས་པའི་དགེ་ལྡན་པའི་འདོད་པའི་མེད་དགག་དང་གཞན་རྣམས་ཀྱི་འདོད་པའི་མ་ཡིན་དགག་གཉིས་དོན་གཅིག་མ་ཡིན་པར་མཐར་ཐུག་ཐར་བ་ཐོབ་པའི་ཐབས་སུ་འགྱུར་བ་ལ་ཁྱད་མེད་པའི་དགོངས་པར་སྣང་ངོ༌། །བོད་ཀྱི་ཆོས་བརྒྱུད་ཀུན་གྱིས་ལུགས་ལ་རང་རང་དབུ་མ་པ་ཡིན་པ་དང་རང་གིས་བཞེད་པའི་ལྟ་བ་དེ་སྤྲོས་བྲལ་ཡིན་པ་དང་མཐའ་བྲལ་ཡིན་པར་དངོས་སུ་ཁས་ལེན་པ་འདྲ་ཡང་སྤྲོས་མཐའ་དང་བྲལ་ལུགས་ཅུང་ཟད་མི་འདྲ་བ་རེ་བཤད་ནས་རང་རང་གི་ལྟ་བ་དེ་སྤྲོས་བྲལ་ཡིན་པར་ཁས་བླངས་ནས་གཞན་ལ་དགག་བཞག་མཛད་པ་ཡོད་ལ། དེ་ལ་དགག་བཞག་བསྟན་པའི་མཛེས་རྒྱན་དུ་སོང་བ་དང་མ་སོང་བར་ཆགས་སྡང་དུ་འགྲོ་བ་ཅི་རིགས་སུ་སྣང༌། སྔོན་གྱི་ལོ་རྒྱུས་ལ་ཕྱིར་དྲན་ཞིག་བྱས་ན་སྔ་འགྱུར་གྱི་སྐབས་བན་བོན་ནས་བཟུང་ད་ལྟའི་བར་རྩོད་ཉོག་ལ་བསམ་ན་མི་རིགས་གཅིག་དང་སྟོན་པ་གཅིག་གི་རྗེས་འཇུག་གི་ནང་ལ་གང་ཟག་གི་ཆགས་སྡང་ཆོས་ལ་བསྲེས་ནས་རྩོད་ཉོག་ཧ་ལས་པ་བྱུང་བ་ནི། ངོ་ཚ་བ་དང་ངོ་གནོང་དགོས་པ་ཞིག་ཡིན་པ་ཀུན་གྱིས་ཤེས་དགོས་ཏེ། ནང་ཆོས་ནི་སྤྱོད་པ་འཚེ་བ་མེད་པ་ཡིན་པས། ད་ལྟའི་ཆར་ཡང་ཆོས་བརྒྱུད་ནང་ཕན་ཚུན་ཟུར་ཟ་བྱེད་མཁན་དང༌། རྒྱ་བླ་བསམ་བློ་མེད་པ་འགའ་ཞིག་གིས་རང་དགཽན་སོགས་ཀྱི་ནང་དུ་རྩོད་ཉོག་སློང་བ་ནི་ཧ་ཅང་ཐབས་སྐྱོ་བ་ཞིག་རེད་བསམ་བཞིན་ཡོད། དེས་ན། དེང་ཕྱིན་ཆད་ལྟ་བ་གུ་ཡངས་པོའི་ངང་བྱམས་བརྩེའི་དཔལ་ལ་གུས་བཀུར་དང་རང་དབང་དང་འདྲ་མཉམ་གྱི་དཔལ་ལ་ཕན་ཚུན་རྒྱུས་ལོན་དང་ཉམས་ཞིབ་བཅས་ནས་རབ་ཡིན་ན་ཐམས་ཅད་ལ་ཉམས་ལེན་བྱེད་རྒྱུ་དང༌། དེ་མ་ནུས་ན་ཆགས་སྡང་གི་སྒོ་ནས་གཞན་ལ་གནོད་པ་མི་བྱེད་པར་རང་རང་གི་བསྟན་པ་འཛིན་སྐྱོང་སྤེལ་གསུམ་བྱེད་ན་འཚེ་མེད་ཞི་བའི་ལམ་བཟང་རྙེད་པར་འགྱུར་བས་དེ་ལྟར་འབད་པར་རེ་བསྐུལ་ཞུ། བོད་ཀྱི་ཆོས་བརྒྱུད་དེ་རྣམས་ཀྱིས་སྲོལ་འབྱེད་དང་སྲོལ་འཛིན་ཀུན་བདག་ཅག་གི་སྟོན་པ་ཐུགས་རྗེ་ཅན་གྱིས་ལུང་བསྟན་པ་ཡིན་པས་ཆགས་སྡང་བྱེད་མི་འོས་ལ། དེ་ཡང་ཆེ་བ་དྲུག་ལྡན་གྱི་སྔ་འགྱུར་རྙིང་མའི་སློབ་དཔོན་པདྨ་འབྱུང་གནས་རྒྱལ་བས་ལུང་བསྟན་པའི་ཚུལ་འདི་ལྟ་སྟེ། དབུས་གྱུར་ཚར་ལུང་བསྟན་པའི་མདོ་ལས། འདི་ནས་ལོ་ནི་བཞི་གཉིས་ན། །དྷ་ན་ཀོ་ཤའི་མཚོ་གླིང་ན། །རང་འཁྲུངས་པད་མའི་སྟེང་དུ་ནི། །པདྨ་འབྱུང་གནས་ཞེས་བྱ་བ། །གསང་སྔགས་བསྟན་པའི་བདག་པོ་འབྱུང༌། །ཞེས་དང༌། །བླ་མེད་དོན་རྫོགས་འདུས་པའི་རྒྱུད་ལས། འདི་ནས་མྱ་ངན་འདས་འོག་ཏུ། །ལོ་ནི་བཅུ་རུ་གཉིས་ཆད་ན། །འཇིག་རྟེན་ཀུན་ལས་རྒྱལ་བའི་མཆོག །ཨུ་རྒྱན་ཡུལ་དུ་ང་ཉིད་འབྱུང༌། །པདྨ་འབྱུང་གནས་ཞེས་བྱ་བ། །གསང་སྔགས་བསྟན་པ་ལུང་དུ་བསྟན། །ཞེས་གསུངས་པའི་ཕྱིར་རོ། །དེ་ལྟར་ཕྱག་ཆེན་བསྟན་པའི་བརྒྱུད་འཛིན་དཔལ་ལྡན་འགྲོ་མགོན་བཀའ་བརྒྱུད་པའི་སྐྱེས་ཆེན་དམ་པ་དྭགས་པོ་ཟླ་འོད་གཞོན་ནུ་རྒྱལ་བས་ལུང་བསྟན་པའི་ཚུལ་འདི་ལྟ་སྟེ། སྙིང་རྗེ་པདྨ་དཀར་པོའི་མདོ་ལས། ཀུན་དགའ་བོ་ང་འདས་ནས་མ་འོངས་པའི་དུས་ན་བྱང་ཕྱོགས་ཀྱི་རྒྱུད་ཆུ་བོ་རོ་ཧི་ཏའི་ཀླུང་འགྲམ་ན་དགེ་སློང་འཚོ་བྱེད་ཅེས་བྱ་བ་སྔོན་གྱི་རྒྱལ་བ་ལ་ལྷག་པར་བྱ་བ་བྱས་པ། སངས་རྒྱས་བརྒྱ་སྟོང་མང་པོ་ལ་བསྙེན་བསྐུར་བྱས་པ། དགེ་བའི་རྩ་བ་བསྐྱེད་པ། ཐེག་པ་ཆེན་པོ་ལ་ཡང་དག་པར་ཞུགས་པ། སྐྱེ་བོ་མང་པོ་ལ་ཕན་པ་དང་བདེ་བའི་ཕྱིར་ཞུགས་པ། བྱང་ཆུབ་སེམས་དཔའི་སྡེ་སྣོད་འཛིན་པ། ཐེག་པ་ཆེན་པོའི་བསྔགས་པ་བརྗོད་པ། ཐེག་པ་ཆེན་པོ་ཡང་དག་པར་སྟོན་པ་ཞིག་འབྱུང་བར་གྱུར་ཏེ། ཞེས་གསུངས་སོ། །དེ་བཞིན་དུ་དཔལ་རྒྱལ་བ་ཀརྨ་པ་ལུང་བསྟན་པའི་ཚུལ་འདི་ལྟ་སྟེ། མདོ་ཏིང་འཛིན་རྒྱལ་བོ་ལས། ང་འདས་ལོ་ནི་ཉིས་སྟོང་ན། །གདོང་དམར་ཡུལ་དུ་བསྟན་པ་བྱུང༌། །སྤྱན་རས་གཟིགས་ཀྱི་འདུལ་བྱར་འགྱུར། །བྱང་ཆུབ་སེམས་དཔའ་སེང་གེའི་སྒྲ། །ཀརྨ་པ་ཞེས་བྱ་བ་འབྱུང༌། །ཏིང་འཛིན་དབང་ཐོབ་འགྲོ་བ་འདུལ། །མཐོང་ཐོས་དྲན་རེག་བདེ་ལ་འགོད། །ཅེས་དང༌། ལང་ཀར་གཤེགས་པའི་མདོ་ལས། རབ་བྱུང་ཆས་ལ་ཞྭ་ནག་ཅན། །སྟོང་གི་བསྟན་པ་མ་ནུབ་པར། །འགྲོ་བའི་དོན་ལ་རྒྱུན་མི་ཆད། །ཅེས་གསུངས་སོ། །དེ་ལྟར་གསལ་སྟོང་འཛིན་མེད་གྱི་བསྟན་པ་འཛིན་པ་དཔལ་ས་སྐྱ་བ་ཀུན་དགའ་སྙིང་པོ་དང་ས་སྐྱ་པཎ་ཆེན་ཀུན་དགའ་རྒྱལ་མཚན་གཉིས་རྒྱལ་བས་ལུང་བསྟན་པའི་ཚུལ་རིམ་བཞིན་འདི་ལྟ་སྟེ། ཕྱག་ན་རྡོ་རྗེ་འགྲོ་བཟང་གི་རྒྱུད་ལས། འཇམ་དབྱངས་ལ་སོགས་བྱང་སེམས་ཀུན་གྱིས་ནི། །ཐུགས་རྗེའི་བདག་ཉིད་འཁོན་གདུང་བསྟན་པ་ལ། །ཀུན་དགའ་སྙིང་པོའི་ནམ་མཁའི་སྒྲ་གཅན་ལྟར། །འཛམ་གླིང་སྐྱབས་མགོན་ས་སྐྱ་བ་ཞེས་འབྱུང༌། །ཞེས་དང༌། རྒྱུ་འཕྲུལ་དྲྭ་བའི་རྒྱུད་ལས། སྐྱེ་བ་དུ་མ་འཇམ་དཔལ་རྗེས་བཟུང་ཞིང༌། །རབ་འབྱོར་སྤྲུལ་བ་ཀུན་དགའ་རྒྱལ་མཚན་ཞེས། །འཆད་རྩོད་རྩོམ་གསུམ་ཐོགས་པ་མི་མངའ་བའི། །རྩོད་ལྡན་དུས་ན་ཟླ་བྲལ་འབྱུང་བར་འགྱུར། །ཞེས་གསུངས་པའི་ཕྱིར་རོ། །དེ་ལྟར་བོད་གངས་རིའི་ལྗོངས་འདིར་སྤྲོས་བྲལ་དབུ་མ་གཞན་སྟོང་གི་བསྟན་པ་གསལ་བར་མཛད་པའི་ཀུན་མཁྱེན་དོལ་པོ་པ་ཤེས་རབ་རྒྱལ་མཚན་རྒྱལ་བས་ལུང་བསྟན་པའི་ཚུལ་འདི་ལྟ་སྟེ། གཙུགས་ཏོར་རྣམ་པར་རྒྱལ་མའི་རྒྱུད་ལས། བདེ་གཤེགས་མྱ་ངན་འདས་འོག་ནས། །ལོ་ནི་སྟོང་ཕྲག་ཕྱེད་རིང་ཚེ། །གདོང་དམར་ཡུལ་དུ་ང་འདྲ་བའི། །བསྟན་པ་འཛིན་པའི་དགེ་སློང་ཞིག ། ཆུ་བོ་ལྗོན་ཤིང་ཕྲེང་མཛེས་སུ། །ཀ་ཡོ་རི་ཡི་གྲོང་ཁྱེར་དུ། །ཡབ་ནི་ཡེ་ཤེས་དབང་ཕྱུག་ཆེ། །ཡུམ་ནི་ཚུལ་ཁྲིམས་རྒྱན་ཞེས་གྲགས། །སྲས་ནི་སངས་རྒྱས་མིང་ཅན་འབྱུང༌། །ང་ཡི་བསྟན་པའི་རྒྱལ་མཚན་འཛུག །ཆོས་ཀྱི་དུང་འབུད་དར་ཕྱར་འགྱུར། །ཞེས་དང༌། ཨ་དྲ་ཤི་ལ་བཀོད་པའི་མདོ་ལས། ཨ་དྲ་ཤི་ལས་བཅོམ་ལྡན་འདས་ལ་ཞུས་ནས། ཆོས་ཀྱི་རྒྱལ་པོས་གསོལ་པ། རྟག་ཏུ་གཟིགས་པ་སྤྱན་རས་གཟིགས། །མ་འོངས་དུས་ཀྱི་ཐ་མ་ལ། །སྙིགས་དུས་སེམས་ཅན་སྐྱོབ་པའི་ཕྱིར། མ་ཧཱ་སུ་རའི་བྱང་ཕྱོགས་སུ། །ཁ་བ་ཅན་གྱི་ཡུལ་དབུས་ན། །གྲོང་ཁྱེར་ཆེན་པོ་ཀ་ཡོ་རི། །རྣམ་པར་གྲགས་པའི་ས་བདག་ནི། །ཡེ་ཤེས་དབང་ཕྱུག་ཡབ་སྨོས་པ། །དེ་ཡི་སྲས་སུ་བལྟམས་པར་མཐོང༌། །ཞེས་གསུངས་པ་དང༌། བྷི་རི་ཧ་རིའི་མདོ་ལས། ཁ་བ་ཅན་དུ་ཚེ་ལོ་བརྒྱད་ཅུ་ན། །བསྟན་པ་ཉམས་ཏེ་ཆོས་ཉིད་ཁྱད་དུ་སོད། །ལོག་ལྟར་ཞུགས་པའི་དུས་སུ་ལོ་ཙཱ་བི། །ཆོས་ཀྱི་སྒྲོན་མེ་ཐོགས་ནས་དོལ་པོ་ཞེས། །ངའི་མིང་དུ་འཛིན་པའི་གྱ་ནོམ་པ། །ལོ་བརྒྱར་ཆོས་ཀྱི་ཆར་བ་ཕབ། །ཐེག་ཆེན་ཆོས་ཀྱི་རྔ་ཆེན་བརྡུང༌། །ཆོས་ཀྱི་མཆོད་སྦྱིན་རྒྱལ་མཚན་བཙུགས། །ཞེས་གསུངས་པས་སོ། །དེ་ལྟར་རི་བོ་དགེ་ལྡན་པའི་བསྟན་པ་གསེར་སྦྱང་བཙོ་མ་ལྟ་བུའི་ཤིང་ལྟའི་སྲོལ་འབྱེད་ཆེན་པོ་རྗེ་བླ་མ་ཤར་ཙོང་ཁ་བ་བློ་བཟང་གྲགས་པ་རྒྱལ་བས་ལུང་བསྟན་པའི་ཚུལ་འདི་ལྟ་སྟེ།འཇམ་དཔལ་རྩ་རྒྱུད་ལས། འཇིག་རྟེན་ང་ནི་མྱ་ངན་འདས། །ས་ཡི་སྟེང་འདི་སྟོང་གྱུར་ན། །ཁྱོད་ཉིད་བྱིས་པའི་གཟུགས་ཀྱིས་ནི། །སངས་རྒྱས་མཛད་པ་བྱེད་པར་འགྱུར། །དེ་ཚེ་དགོན་ཆེན་རབ་དགའ་བ། །ཁ་བ་ཅན་ན་ཡོད་པ་ཡིན། །ཞེས་དང༌། མཁའ་འགྲོ་གསང་བའི་རྒྱུད་ལས། འཇམ་དཔལ་སྤྲུལ་བ་བློ་བཟང་གྲགས། །བསྟན་པ་རྒྱས་བྱེད་ངོ་མཚར་ཅན། །ཞེས་གསུངས་པས་སོ། །དེས་ན་ང་ཚོ་བོད་པ་ཚོས་གོམས་གཤིས་ངན་རིགས་ཆོས་ལུགས་འཐེན་ཁྱེར་བྱེད་པ་སོགས་དོར་ནས་རིས་མེད་བསྟན་པ་འཛིན་པར་གོམ་ཁ་མདུན་དུ་སྤོས་དགོས། གྲུབ་མཐའ་སྨད་ན་དཔལ་དུས་འཁོར་གྱི་རྒྱུད་ལས་བསྟན་པའི་རྩ་ལྟུང་དྲུག་པ་དང༌། མདོ་ལུགས་ལྟར་ན་ཆོས་སྤངས་ཀྱི་ལས་སུ་འགྱུར་བས་གནས་འདི་ལ་གཟབ་དགོས་སོ། །གནས་སྐབས་ཚིག་མང་དོགས་ནས་དེ་ཙམ་ལས་མ་སྤྲོས་སོ། །སྤྲང་འཁྱམ་པ་དངོས་གྲུབ་དཔལ་གྱིས་རབ་རྒྱན་ཤིང་རྟ་ལོའི་རྒྱལ་ཟླའི་ཚེས་༡༨ལ་བྲིས་པའོ། ། མཐུན་འབྲེལ།མཐུན་འབྲེལ། མཐུན་འབྲེལ་ལ་དག་རྫུན་གཉིས་ཡོད་པ་ལ། ཁ་ཅིག་གིས་རང་གི་ཆོས་ལུགས་དང་བསམ་བློ། ལྟ་སྤྱོད་སོགས་མི་མཐུན་པ་ཞིག་ཡིན་ན་མི་དེ་ལ་མཐུན་འབྲེལ་མེད་ཅེས་གླེང་བ་ནི་སྒེར་གཅོད་ཀྱི་མཐུན་འབྲེལ་ལས་མ་འདས། གཞན་གྱི་གནོད་འཚེ་བྱེད་པ་ལ་དེ་འདྲ་བྱེད་པ་ནི་འོས་པ་མ་ཡིན་པའི་གནས་ཚུལ་བཤད་ན། རྙོག་དྲ་བྱེད་ཅེས་གླེང་བ་ནི། བཙན་དབང་གི་སྒོ་ནས་དབང་སྡུད་ཡིན་པ་དང༌། རང་ཉིད་མིང་དང་གོ་ས་སོགས་ཡོད་ཚད་ནས་ཡོད་ཚད་ཀྱིས་གོང་དུ་མ་བཞག་ན་གདུག་རྩུབ་ཚེར་མ་ལས་རྩུབ་པར་བྱེད་པ་ནི། ཕུང་དཀྲུག་པ་ཆེན་པོ་ཡིན་ལ། དེས་ན་མཐུན་འབྲེལ་ཡང་དག་པ་ཞིག་ཡོང་བ་ལ་གནས་ལུགས་དྲང་བདེན་འདྲ་མཉམ་དོན་གནས་ཤིག་ཡོད་ན་དོན་གྱི་མཐུན་འབྲེལ་ཡོང་ཐུབ་ལ། དེ་ལྟ་མ་ཡིན་ན་མཐུན་པའི་གནས་མེད་དོ། །ཐ་ན་གཅིག་གིས་གཅིག་ལ་གནོད་པ་མ་བྱས་ན་མཐུན་འབྲེལ་གྱི་སྒོ་དང༌། དེའི་སྟེང་དུ་བྱམས་བརྩེ་དང་བཟོད་སྒོམ་འདྲ་མཉམ་ཡོད་ན་མཐུན་འབྲེལ་གྱི་སྒོ་ཆེན་ཡིན་ནོ། །མཐུན་འབྲེལ་དངོས་གནས་པ་ནི་གཡོ་སྒྱུས་དབུ་གཏུག་པ་ཙམ་མ་ཡིན་པར་གདེང་འཇོག་དང་ཡིད་ཆེས་ཀྱི་སྒོ་ནས་སེམས་མཐུན་པ་ཡིན་ནོ། །སྤྱིར་བོད་ཁ་བ་གངས་ཅན་པ་རྣམས་ཀྱིས་བོད་མི་སུ་ལ་ཡོན་ཏན་དང་འཇོན་ཐང་དང་ལྷག་བསམ་ཡོད་ན་དེ་ལ་བརྩི་བསྐུར་དང༌། རྒྱབ་སྐྱོར་དང་རོགས་རམ་བྱས་ན་མདུན་ལམ་ལ་འཕེལ་རྒྱས་ཀྱི་འོད་སྟོང་ལྡན་པར་འགྱུར་ལ། དེ་ལྟ་མ་ཡིན་པར། སློབ་དཔོན་པད་མས། བོད་ལ་དྲིན་ཆེར་བྱས་ཀྱང་དྲིན་མི་གོ། ཞེས་གསུངས་པ་ལྟར་དྲིན་ཅན་དྲིན་ལོག་བྱས་ནས་མགོ་གནོན་ཅི་ཐུབ་བྱེད་པ་ནི་རང་གི་མི་རིགས་དང་ཆོས་བརྒྱུད་ཀྱི་གྱོང་རྒུད་ཡིན་པ་ལས། ཡོན་ཏན་ཅན་གྱི་གང་ཟག་སོ་སོ་ལ་ཇི་ལྟར་མུན་པ་ཐུབ་ན་འོད་མདངས་གསལ་བ་ནི་སྒྲོན་མེ་བཞིན་ཡིན་ནོ། །དེས་ན་ང་ཚོ་བོད་པ་ཚོས་ཆོལ་ཁ་ཆོས་ལུགས་དགོན་སྡེ་བར་འཐེན་ཁྱེར་མི་བྱེད་པར་མ་འོངས་པའི་འཕེལ་རྒྱས་ཀྱི་བསམ་བློ་གཅིག་སྒྲིལ་བྱེད་དགོས་སོ། །རྒྱལ་ཁམས་པ་དངོས་གྲུབ་དཔལ་ནས། ཇོ་ནང་བའི་དགོན་ཆེན་མང་པོས་དུས་འཁོར་སྒྲུབ་མཆོད་ཀྱི་མདུན་བསྐྱེད་གསུང་དཀྱིལ་གྱི་ལྷ་རྣམ་གྱི་སྟེང་གི་རྣལ་འབྱོར་མ་ཡབ་དང་བཅས་པའི་ལྷར་བརྒྱད་ཅུའི་སྐབས་སུ། སྒྲུབ་ཐབས་དཔག་བསམ་འཇུག་པ་ལས། གཞོན་ནུ་མ་འཁོར་དང་བཅས་པ་ནི་གདོང་དྲུག་པའོ། །ཞེས་པ་ནས་སྐུའི་དཀྱིལ་འཁོར་གྱི་ལྷ་རྣམ་གྱི་མཚན་མ་རྣམས་ལྷ་གྱུར་བ་ནི། ཞེས་པར་མཆོང་འགྲོ་བ་ནི། ཆད་པའི་སྐྱོན་ཡོད་དེ། སྒྲུབ་ཐབས་དཔག་བསམ་འཇུག་པ་ལས། གཞན་རྣམས་ནི་གདོང་གཅིག་མ། ཐམས་ཅད་ཀྱང་ཞལ་རེ་རེ་སྤྱན་གསུམ་གསུམ་པ་སྟེ། རྣལ་འབྱོར་མའི་ཐབས་བརྒྱད་ནི་སྐུ་ལྷ་ཆེན་གྱི་སྐབས་རྣམས་དང་ཕྱག་མཚན་འདྲའོ། །ཞེས་པའི་བར་ཆད་ཡོད་པ་ཤེས་དགོས་སོ། །གལ་ཏེ་དཀྱིལ་ཆོག་གི་ཆོ་ག་ལས། གདོང་དྲུག་པའོ། །སྐུའི་དཀྱིལ་འཁོར་གྱི་ལྷ་རྣམ་ལ་གནས་པའི་མཚན་མ་རྣམས་ལྷར་གྱུར་པ་ནི། ཞེས་གསུངས་པའི་ཕྱིར་ཟེར་ན་མ་ཁྱབ་པ་ཡིན་ཏེ། དེའི་གོང་དུ་དཀྱིལ་ཆོག་དེར་རང་དང་འདྲ་བའི་ཤེར་ཕྱིན་མས་འཁྱུད་པའི་བར་ལས་རྒྱལ་མཆོག་བཞིན། བདེ་གཤེགས་ཕར་མའི་མཚན་མ་ཞེས་གསུངས་ཀྱང་ནམ་མཁར་སྤྲོས་ནས་སེམས་ཅན་གྱི་དོན་བྱས་ཏེ་སླར་ཡང་བཅོམ་ལྡན་འདས་ལ་བདག་པོར་བཞུགས་པར་གྱུར། ཞེས་པའི་བར་འདོན་དགོས་པ་བཞིན་ཡིན་པ་སོགས་རྗེ་བཙུན་གྱི་གསུང་ལ་དེའི་རིགས་མང་བ་ཡིན་ནོ། །ཡང་སྐུ་དཀྱིལ་གྱི་ཚེས་ལྷ་སུམ་བརྒྱ་དྲུག་ཅུའི་སྐབས་སུ། སྒྲུབ་ཐབས་དཔག་བསམ་འཇུག་པ་ལས། གཞོན་ནུ་འཁོར་དང་བཅས་པ་ནི་གདོང་དྲུག་པའོ། །ཞེས་པ་ནས་སྐུའི་དཀྱིལ་འཁོར་གྱི་སྒོ་ལ་གནས་པའི་མཚན་མ་རྣམས་ལྷར་གྱུར་བ་ནི། ཞེས་པར་མཆོང་འགྲོ་བ་ནི། ཆད་པའི་སྐྱོན་ཡོད་དེ། སྒྲུབ་ཐབས་དཔག་བསམ་འཇུག་པ་ལས། གཞན་རྣམས་ནི་གདོང་གཅིག་པ། ཐམས་ཅད་ཀྱང་ཞལ་རེ་རེ་སྤྱན་གསུམ་གསུམ་པའོ། །ཞེས་པའི་བར་ཆད་ཡོད་པའོ། །དེའི་ནང་གི་གཞན་རྣམས་གདོང་གཅིག་པ། ཞེས་པ་གཅིག་པུའི་སྐབས་སུ་ཚེས་ལྷའི་ནང་དུ་གདོང་གཅིག་པ་སུམ་བརྒྱ་ཡོད་པས་སུམ་བརྒྱའི་ཞལ་སྒོམ་པ་ཆད་པ་སོགས་ཀྱི་སྐྱོན་ཡོད་དོ། །ལུང་རིགས་ཀྱི་སྤྲོས་པ་མང་ཡང་རེ་ཞིག་དེ་ཙམ་མོ། །གལ་ཏེ་ཁས་མི་ལེན་ན་ལྷ་དེ་དག་གི་ཞལ་ཕྱག་སྤྱན་རྣམས་སྒོམ་མི་དགོས་པའི་རྒྱུ་མཚན་གསུངས་བར་ཞུ། རང་གི་མི་ཤེས་པ་མ་ཤེས་ནས་མཆན་ནོར་རྒྱབ་པས་མང་པོ་འཁྲུལ་བའི་གཞིར་བཅས་སོ། །ཞེས་པ་འདི་གཙོ་བོར་ཇོ་ནང་གི་དབུ་ཆེན་པ་རྣམས་ལ་སྤྲང་འཁྱམ་དངོས་གྲུབ་དཔལ་ནས་ལྷག་བསམ་གྱིས་བསྐུལ་བའོ། ། དཀར་ཟས་གླེང་བ།དཀར་ཟས་གླེང་བ། སྐྱེ་འགྲོ་མཐོ་དམན་སུ་ཞིག་ཡིན་ཡང་རུང༌། འབྱོར་རྒུད་གང་གི་སྐབས་སུ་ཡིན་ཡང་ཆོག གཅིག་ཏུ་གཅེས་ཤིང་དམར་བ་ནི་ཚེ་སྲོག་འདི་ལས་ལྷག་ཅིག་སྲིད་ན་མེད་པས། ཚེ་སྲོག་གཅོད་པ་ལས་ཀྱང་ཐུ་བའི་མནར་གཅོད་གཏོང་སྟངས་ཤིག་དང༌། གནོད་པ་བྱེད་ཚུལ་ཞིག་མེད་པ་གསལ་བོ་རེད། དེས་ན་བོད་ཆོས་ལྡན་གྱི་ཞིང་ཁམས་བྱམས་སྙིང་རྗེའི་ཕ་ས་ཡིན་ཟེར་བ་ཞིག་ལ་མཚོན་ན་བྱམས་དང་སྙིང་རྗེའི་འཛིན་སྟངས་དང་སྤྱོད་པ་ལ་འགལ་བར་སོང་བའང་གཞན་གྱི་ཚེ་སྲོག་འཕྲོག་པའི་བྱ་སྤྱོད་ལས་ཐུ་བ་ཞིག་གང་ནས་ཡོད། བསམ་པའི་ནང་ནས་ཀྱང་གསོད་འདོད་ལྟ་བུའི་སྙིང་རྗེ་མེད་པ་མ་རུང་གཏུམ་པའི་བློ་ངན་ཞིག་ཇི་ལྟར་ཡོད་དེ་དཔེ་མི་སྲིད་པའི་ཚོད་རེད། དེས་ན་རང་དཔེ་གཞན་ལེན་གྱི་བསམ་པ་གཞིར་བཟུང་སྟེ་རྣམ་གསུམ་མ་དག་པའི་དམར་ཟས་སྤངས་བ་དང་སྤོང་བར་འགྱུར་བའི་ལས་དོན་ཅི་ལ་ཞུགས་ནུས་ན་དགེ་མཚན་དེ་ལས་ཆེ་བ་དང་སྤྱོད་པ་དེ་ལས་བཟང་བ་ཞིག་ལར་ནས་དཔེ་འཇོག་དཀའ་བ་རེད་ཅེས་བཤད་ནའང་ཐལ་མི་ཆེ་བའི་ངང་ཚུལ་དུ་ཆགས་འདུག ཆོས་དང་འཇིག་རྟེན་གང་ཞིག་སྒྲུབ་ཀྱང་རང་དཔེ་གཞན་འཇོག་གིས་སྒྲུབ་པ་དང༌། གཞན་སར་རང་འཇོག་གི་བསམ་མནོ་ཡོད་པ་འདི་ཅི་ནས་ཀྱང་མེད་མི་རུང༌། གལ་སྲིད་ཁ་ནས་བྱམས་སྙིང་རྗེ་དང་དྲང་བདེན་རིགས་ཞེན་སོགས་ཁ་ལབ་ནམ་རྒྱུན་ཆད་མེད་ཡིན་ནའང༌། དོན་ལག་ལེན་སྟངས་ནས་འགལ་བ་ལྟག་སྤྲོད་དུ་སོང་ཚར་ན་བཤད་པ་ཡོད་ཚད་སྟོང་བ་རེད་ལ། སྒྲུབ་པ་ཡོད་ཚད་འཁྱོག་པོ་རེད། ངག་ཐོག་ནས་བྱམས་དང་སྙིང་རྗེ་འགྲོ་བ་གཞན་ཁ་ཁྱེར་བྱེད་མཁན་ཞིག་ཡིན་ཕྱིན། སྤྱོད་པའི་སྟེང་ནས་ཀྱང་མཚོན་བྱེད་ཅིག་ངེས་པར་དུ་དགོས་པ་རེད་མ་གཏོགས། གཞན་དོན་དཀའ་སྤྱད་དང་བཟོད་པ་སྤུ་རྩེ་ཙམ་ཡང་མེད་པའི་སྟེང༌། རང་དོན་དུ་གཞན་གྱི་ཚེ་སྲོག་ལའང་མིག་མི་བཙུམ་མཁན་ཞིག་ཅི་ལ་རུང༌། དཀར་ཟས་རོལ་བ་འདིས་ཀྱང་མི་དེ་འགྲོ་བ་གཞན་ལ་བསམ་གཞིག་མི་གཏོང་བའི་སྲིན་པོ་ལྟ་བུ་ཞིག་མ་ཡིན་པར་མཚོན་ཡོད་པ་ཡིན་པས། དཀར་ཟས་བ་ནི་དགེ་ལས་པ་ཞིག་ཡིན་པར་བཤད་ཆོག་ཅིང༌། སེམས་དཀར་གཞུང་དྲང་ཞིག་ཀྱང་ཡིན་པར་མཚོན་ཡོད་པ་རེད། གལ་སྲིད་རང་གིས་དམར་ཟས་དང་ཁ་འབྲལ་མ་ཐུབ་ནའང་གཞན་གྱིས་རྣམ་གསུམ་དག་པའི་དམར་ཟས་སྤངས་པ་ལ་རྗེས་སུ་ཡི་རང་དགོས་པ་ལས། དེ་ལ་སྐྱོན་མེད་སྐྱོན་འདོགས་ཀྱི་བཤད་པ་མང་པོ་མི་བྱེད་པ་མ་མཐའི་ཚད་གཞི་རེད་བསམས་ནས་ཡོད། དམར་ཟས་གཏན་སྤངས་སམ། བསད་ཤ་གཏན་སྤངས་སམ། རྣམ་གསུམ་དག་པའི་ཤ་དུས་ཆེན་ཁག་ལ་སྤངས་བ། དམར་ཟས་ཟ་བ་ཇེ་ཉུང་དུ་གཏོང་བ་དག་གིས་མཚོན་ཏེ། དཀར་ཟས་ཀྱི་ལམ་རབ་འབྲིང་ཐ་མའི་རིམ་པ་སྐས་ཐེམ་འདྲ་བ་མང་བས། གང་རུང་ཅིག་ལ་འཇུག་ཨེ་ཐུབ་བལྟ་དགོས་པར་བསམ་མནོ་གཏོང་དགོས་པར་དངོས་གནས་དྲང་གནས་ཤིན་ཏུ་གལ་འགངས་ཆེ་བར་བསྙོན་མེད་རེད། དེ་བས་ན་འདིར་ཁོ་བོས་ཁ་བརྡ་ཐུང་ངུ་འདིར་ལུང་འདྲེན་དང་ཆོས་བཤད་འདྲ་བའི་རྒྱས་སྤྲོས་བྱས་མེད་ནའང༌། ཆོས་དང་འཇིག་རྟེན་ཆ་གང་ནས་བལྟས་ནའང་འདྲ། གཟུར་གནས་ཀྱི་མཁས་བླུན་གང་གིས་བསམ་ན་ཡང་ཆོག མངོན་སུམ་བསྙོན་མེད་ཀྱི་སྐད་ཆ་རྡོག་གཅིག་འདི་ལྷག་བསམ་ཕྱོགས་མེད་ཀྱིས་ཀུན་ནས་བསླངས་ཏེ་སྤེལ་བ་ཡིན། མཇུག་མཐར་འཇིག་རྟེན་འགྲོ་བ་ཚང་མས་གཅིག་ལ་གཅིག་ཟ་བའི་གཏུམ་སྤྱོད་རིང་དུ་སྤངས་ཏེ་འཚེ་མེད་ཞི་བདེའི་དཔལ་ལ་དུས་རྟག་ཏུ་རོལ་བར་བླ་མ་ལྷ་དང་བཅས་པའི་མདུན་སར་གསོལ་བ་བཏབ་པ་ལགས། གཞན་གྱིས་བསྐུལ་ངོར་དངོས་གྲུབ་དཔལ་གྱིས་བྲིས་པའོ། །བཀྲ་ཤིས། དགེའོ། །སློབ་གཉེར་བ་མང་རབ་ཞིག་གིས་དཔེ་ཆ་མི་ཤེས་པས་ད་དཔེ་ཆ་ལྟ་རྒྱུ་མིན་ཟེར་ནས་སློབ་སྦྱོང་འདོར་བ་ནི་ཧ་ཅང་ནོར་འཁྲུལ་རེད། དཔེ་ཆ་མི་ཤེས་པ་ནི་དཔེ་ཆ་ཤེས་པའི་ཆེད་དུ་སློབ་སྦྱོང་བྱེད་དགོས་པའི་རྒྱུ་མཚན་རེད་ལགས། དཔེར་ན་མུན་པས་སྒྲིབ་ཡོད་པའི་རྒྱུ་མཚན་གྱིས་སྣང་འོད་བསྐྱེད་ནས་མུན་པ་སེལ་དགོས་པ་བཞིན་ཡིན་ལ། སློབ་སྦྱོང་མ་བྱས་ན་སྐྱེ་བ་ནས་ཚེ་རབས་ཀུན་ཏུ་རྨོངས་པ་མ་རིག་པའི་དབང་དུ་འགྲོ་བ་ལས་མ་འདས་སོ། །དེས་ན་ལེ་ལོའི་གཉེན་པོར་བརྩོན་དགོས་ཏེ། དཔེ་ཆ་ལ་བརྩོན་ན་གནས་སྐབས་ལོ་གཅིག་གཉིས་རེ་ཆེར་མི་ཤེས་པ་ཡོད་ཀྱང་བརྩོན་པ་ཡོད་ན་དབང་པོ་རྟུལ་པོ་སྦྱངས་ནས་རྣམ་པ་ཐམས་ཅད་མཁྱེན་པའི་ངོ་བོར་འགྲོ་རྒྱུ་ཡོད་པ་སེམས་ཅན་ཐམས་ཅད་སྤྱི་མཚུངས་ཡིན་པ་རེད། དེས་ན་དཔལ་ལྡན་ཟླ་བས། ཡོན་ཏན་མ་ལུས་བརྩོན་འགྲུས་རྗེས་འགྲོ་ཞིང༌། །ཞེས་གསུངས་པས་སོ། །དེས་མཚོན་ནས་དམ་ཆོས་རྒྱུད་ལ་མེད་མཁན་ཚོས་དམ་ཆོས་བསྒྲུབ་དགོས་པ་རེད། དཔེར་ན་ཟ་རྒྱུ་མེད་མཁན་དག་གིས་ཟ་རྒྱུའི་ཕྱིར་འབད་དགོས་པ་དང་མཚུངས་སོ། །སྤྲང་འཁྱམ་པ་དངོས་གྲུབ་དཔལ་ནས། སྐུ་རིམ་གྱི་མཆོག་སྙིང་སྟོབས།སྐུ་རིམ་གྱི་མཆོག་སྙིང་སྟོབས། སྤྱིར་བྱ་བ་གང་བརྩམ་ན་བསོད་ནམས་རེ་ལྡན་དགོས་པས་དཀོན་མཆོག་ལ་སྐྱབས་འགྲོ་སོགས་སྐུ་རིམ་ལ་བརྩོན་དགོས། འོན་ཀྱང་འཇིག་རྟེན་པའམ་སོ་སྐྱེ་ཡོད་པའི་གནས་སུ་བྱ་བ་གང་བརྩམ་པ་ན་ཕྲག་དོག་སོགས་ཀྱི་དབང་གིས་གནོད་འཚེ་སྒོ་དུ་མ་ནས་རྩོམ་མཁན་ཡོད་པ་ནི་འཇིག་རྟེན་གྱི་ངང་ཚུལ་ཡིན་པས་དེའི་སྐབས་སུ་སྙིང་སྟོབས་ནི་སྐུ་རིམ་གྱི ་མཆོག་ཡིན་ལ། བྱ་བ་དེ་རྩོམ་པའི་སྐབས་སུ་གཞན་གྱིས་སྒྲོ་འདོགས་དང་སྐུར་འདེབས་སོགས་གནོད་པ་ཡོང་བ་ནི་རང་གི་བྱ་བ་དེ་གཟི་བརྗིད་དང་རྒྱལ་ཁ་ཐོབ་པའི་སྔ་ལྟས་རེད། གཞན་གྱི་གནོད་པ་མེད་ན་རྒྱལ་ཁ་དང་བཟོད་སྒོམ་བྱ་བའི་གནས་མེད་ལ། འོན་ཀྱང་གནས་ལུགས་དང་བདེན་རྫུན་ལ་བརྟག་དཔྱད་མི་བྱེད་པར་ཧམ་རྒྱུགས་གཡམ་རྒྱུགས་བྱེད་པ་དང༌། གཞན་ལ་གནོད་ཐུབ་མི་ཐུབ་གང་ཡིན་ཀྱང་རུང་ལྷག་བསམ་ཅན་གྱི་བྱ་བ་འབུར་འཇོམས་བྱེད་པ་ལ་རྩོམ་པ་ནི་ཡར་རྒྱས་མི་འགྲོ་བའི་གནད་འགག་དང་རྗེས་ལུས་སུ་འགྲོ་བའི་སྐྱོན་ཆ་ཆེ་ཤོས་ཞིག་རེད་ལགས། བོད་རྗེས་ལུས་སུ་འགྲོ་བ་ཡང་ཕྱོགས་གཅིག་གི་གནད་འགག་ཡོན་ཏན་ཅན་ལ་ཕྲག་དོག་བྱེད་པ་འདིས་ལན་པ་རེད། དེས་ན་ང་ཚོ་གངས་ཅན་པ་རྣམས་ཀྱིས་གང་ལ་ཡོན་ཏན་དང༌། ལྷག་བསམ་དང༌། འཇོན་ཐང་ཡོད་ན་དེ་ལ་རོགས་རམ་དང་རྒྱབ་སྐྱོར། རྗེས་སུ་ཡི་རང་བྱེད་དགོས་ལ། སྤྱིར་བོད་པ་ཚོས་དྲིན་ཅན་གྱི་དྲིན་ཧ་མི་གོ་བ་མ་ཟད་ལོག་སྒྲུབ་བྱེད་པ་ཆེས་མང་ལ། དེས་ན་སློབ་དཔོན་པད་མ་འབྱུང་གནས་ཀྱིས། བོད་ལ་དྲིན་ཆེར་བྱས་ཀྱང་དྲིན་མི་གོ། །ཞེས་གསུངས་པ་རེད། འོན་ཀྱང་གཞན་དོན་རྣལ་མ་སྒྲུབ་པ་ལ་ལན་དང་དྲིན་དུ་ཧ་གོ་མིན་ལ་མི་ལྟོས་པར་ལྷག་བསམ་དྲི་མ་མེད་པའི་སྒོ་ནས་སྙིང་སྟོབས་བསྐྱེད་དེ་མི་ཞིག་ཡིན་པ་དང༌། སྟོན་པའི་རྗེས་འཇུག་ཞིག་ཡིན་པའི་ཆ་ནས་གཞན་དོན་བརྩོན་དགོས་སོ། །དངོས་གྲུབ་དཔལ་ནས། བླ་སློབ་ཀྱི་དམ་ཚིགབླ་སློབ་ཀྱི་དམ་ཚིག རྗེ་བཙུན་ཏཱ་ར་ནཱ་ཐའི་ལྷན་ཐབས་འོད་བརྒྱ་འབར་བ་ལས། དེ་ཡང་དཔོན་སློབ་ཕན་ཚུན་འབྲེལ་བ་བརྟག་པ་ནི། ཆོས་ཀྱིས་མ་སྦྲེལ་གོང་དུ་བྱ་དགོས་ཀྱི། སྔར་བརྟགས་སམ་མ་བརྟགས་གང་ཡིན་ཡང༌། ཆོས་ཀྱི་འབྲེལ་བ་ཐོབ་ནས་སྐྱོན་མི་རྟོག་པར་གུས་པས་བསྟེན་དགོས་ཏེ། ཚིགས་བཅད་གཅིག་ཙམ་ཐོས་པ་ལའང༌། །གལ་ཏེ་བླ་མར་མི་འཛིན་ན། །ཁྱི་ཡི་སྐྱེ་བ་བརྒྱར་སྐྱེས་ཏེ། །སྨེ་ཤ་ཅན་དུ་སྐྱེ་བར་འགྱུར། །ཞེས་གསུངས། དེས་ན་ཕྱིས་ཀྱི་སྐྱེ་བོ་མང་པོ་ཞིག་སྔགས་ཆོས་ལ་དམ་ཚིག་ཡོད་དོ་སྐད་པའི་ཁ་བཤད་བྱེད། སྲུང་ནི་དེ་ལའང་མི་སྲུང༌། མཚན་ཉིད་པ་ལ་དམ་ཚིག་མི་ཡོང་ཟེར་ཞིང༌། མདོ་ཆོས་མང་དུ་ཐོས་པའི་བླ་མ་ལའང་མ་གུས་པ་དང་བརྙས་པ་དང་བཀུར་སྟི་མ་ཡིན་པ་ཇི་ཙམ་བྱས་ཀྱང་ཉེས་པ་མེད་པ་སྐད་སྨྲ་བ་མང་དུ་སྣང་སྟེ། བདུད་ཀྱིས་བྱིན་གྱིས་བརླབས་པ་ཁོ་ནའོ། །ཞེས་པ་ནས། དེ་ཐེག་པ་ཆཻ་ཆུང་གི་སྡེ་སྣོད་གཉིས་སོ་སོར་ཐོས་པའི་བླ་མ་ལའང་དེས་རིགས་འགྲེ་སྟེ། མདོར་ན་སྡུག་གསོག་པ་པོ་སློབ་མ་ངན་པ་སྟེ། སྤྱིར་ནས་གསང་སྔགས་ཀྱི་དབང་བསྐུར་ཞུས་དམ་ཚིག་ཐོབ་པ་ཡིན་ན་ནི། དེས་༼བླ་མ་དེ་ལ་༽སྔགས་ཆོས་ཞུས་པ་མ་ཡིན་ལ། ༼བླ་མ་དེ་ལ་༽མདོ་ལུགས་ཐེག་པ་ཆེ་ཆུང་གང་ཡིན་ཡང་རུང་སྟེ། དེ་ལྟ་བུ་ཞུས་པའི་བླ་མ་དེ་ལ་སྡིག་བསགས་ན། སྤྱིར་ཉེས་པ་ཆེ་བར་མ་ཟད་སྔགས་ཀྱི་དམ་ཚིག་ཀྱང་ཉམས་པ་ཡིན་ཏེ། རྒྱུད་རྣམས་ལས་ཀྱང༌། སློབ་དཔོན་མི་སྨད། བླ་མའི་ཐུགས་མི་དཀྲུག་ཅེས་གསུངས་ཀྱི། རྩ་ལྟུང་དང་པོའི་ཡུལ་དུ་རྡོ་རྗེ་སློབ་དཔོན་ཁོ་ནའི་ངེས་གཟུང་མ་མཛད་པ་མང་པའི་ཕྱིར་རོ། །ཞེས་པ་ནས། རྩ་ལྟུང་གི་ཐ་སྙད་ཐོབ་པར་འགྱུར་བ་ལ་ལྟུང་བ་བྱེད་མཁན་རང་ཉིད་སྔགས་ལ་ཞུགས་པ་ཞིག་དགོས་ཀྱི། ལྟུང་བ་གསོག་པའི་ཡུལ་སྔགས་ཆོས་ཀྱིས་སྦྲེལ་བ་ཁོ་ན་མི་དགོས་པར་མ་ཟད་སྔགས་པ་ཡིན་ཡང་མི་དགོས་སོ། །གནད་འདི་མ་གོ་བས་དམ་ཚིག་ཉམས་པ་ནི། མཁས་པར་རློམ་པ་དང་ཆེན་པོར་རློམ་པ་ལ་ཡང་ཤིན་ཏུ་མང༌། ཞེས་རྗེ་གསང་བདག་སྒྲོལ་བའི་མགོན་པོའི་གསུང་འདི་ཐུགས་ལ་འཛིན་དགོས་སོ། །འདུལ་བ་རྒྱ་ཆེར་འགྲེལ་བ་ལས། སྤྱོད་ཡུལ་མ་ཡིན་པའི་གནས་ལྔ་ལ་འཇུག་པར་མི་བྱའོ། །ཞེས་གསུངས་པའི་རབ་བྱུང་བ་རྣམས་འཇུག་མི་རུང་བའི་གནས་ལྔ་ནི། འདུལ་བ་མདོ་རྩ་ལས། རོལ་མོ་མཁན་གྱི་གནས་དང༌། སྨད་འཚོང་མའི་གནས་དང༌། ཆང་འཚོང་གི་གནས་དང༌། རྒྱལ་པོའི་ཕོ་བྲང༌། གདོལ་བའི་ཁྱིམ་གྱི་གནས་དག་བསྟེན་པར་མི་བྱའོ། །ཞེས་གསུངས་ལ། དེ་འདྲའི་གནས་ལྔ་ལ་རབ་ཏུ་བྱུང་བ་རྣམས་འགྲོ་བ་དང་གནས་པར་མི་བྱའོ། །དེང་དུས་སུ་དགོན་པའི་ནང་དུ་\་གར་སོགས་རྩེད་མོའི་རིགས་བཙུགས་པ་ནི་ཆོས་འདུལ་བ་དང་འགལ་བར་མ་ཟད་རྣམ་གཡེང་གི་རྒྱུ་ཆེན་པོ་བསྒྲུབ་པ་ནི་བདུད་ལས་སོ། །འོ་ན་གར་འཆམ་ལ་ལ་ཕན་ཡོན་མང་པོ་གསུངས་པ་ཅི་ཡིན་ཞེ་ན། ཕལ་ཆེར་བའི་ཉིང་དགོས་ནི་མི་མང་འདུ་འཛོམ་གྱི་ཆེད་ཡིན་སྙམ་ལགས་སོ། །དངོས་གྲུབ་དཔལ་ནས། ཚུལ་གསུམ་གྲུབ་པའི་རྟགས་གསལ་གཅིག་ཙམ་སྨྲ་མི་སྤོབས་པ་དག་གིས་སྔོན་བྱོན་དམ་པའི་གསུང་རབ་ཁས་མི་ལེན་པ་དང༌། ལུང་རིགས་ཀྱི་འགྲོ་ཕྱོགས་ཙམ་ཡང་མི་ཤེས་ཀྱང་རང་འཁོར་དཔྱོད་ཤེས་མེད་པའི་ཁྱུ་ཚོགས་ཀྱི་ནང་དབང་ཆེ་བའི་ཚིག་གིས་ལོག་པར་བཤད་པའི་རིགས་ནི། རིགས་སྨྲ་མཁས་པའི་ཚོགས་རྣམས་རྒོད་ཤོར་བ་ལས་མ་འདས་ཏེ། དེ་ལ་རྩམ་པ་ཟན་ཆང་གཅིག་གི་རིན་ཐང་མེད་པས་ན་བལྟ་རིན་ཉན་རིན་གང་ཡང་མ་མཆིས་ལ། ཇི་སྐད་དུ། བླུན་པོ་སྨྲ་བ་ཉུང་ན་བསྟན་པ་ལ་ཕན་པ་ཡིན་ནོ། །ཞེས་མཁས་གྲུབ་དགེ་ལེགས་དཔལ་བཟང་གིས་གསུངས་པ་དེས་གང་ཟག་མང་པོ་ཞིག་ལུང་བསྟན་ཟིན་ཏོ།། རང་བཟོ་ཁོ་ན་ལས་དཔྱོད་ཤེས་མེད་རིགས་དག་གིས་མཁས་གྲུབ་དམ་པའི་གསུང་རབ་བོར་ནས་རང་བཟོས་བབ་བཅོལ་སྨྲ་བ་ལ་བརྟེན་ནས་སེམས་ཚོར་འདི་བྱུང་བའོ། །དངོས་གྲུབ་དཔལ་གྱིས། དུས་ཆེན་ཁྱད་པར་ཅན་ས་ག་ཟླ་བ་ནི། ༄༅། །ཨོཾ་སྭ་སྟི། ལྷ་དང་བཅས་པའི་འགྲོ་བའི་སྐྱབས་གནས་མཆོག ། སྟོབས་བཅུའི་མངའ་བདག་དམན་པའི་མགོན་གྱུར་བ། །རྣམ་འདྲེན་མཚུངས་མེད་ཤཱཀྱའི་དབང་བོ་ལ། །རྗེས་དྲན་དུས་མཆོད་ས་ག་ཟླ་བར་གཙོ། །དེ་ལ་འདིར་གང་ཞུ་བར་བྱ་བ་ནི། དུས་ཆེན་ཁྱད་པར་ཅན་ས་ག་ཟླ་བ་ནི། རང་ཅག་ལ་བཀའ་དྲིན་མཚུངས་ཟླ་མ་མཆིས་པ། བདག་ཅག་གི་སྟོན་པ་མཉམ་མེད་ཐུབ་པའི་དབང་པོ་མཆོག་དང་པོར་སྐུ་བལྟམས་པ་དང༌། བར་དུ་མངོན་པར་རྫོགས་པ་སངས་རྒྱས་པ་དང༌། མཐར་གཟུགས་སྐུ་ཞི་བར་གཟིམ་པ་སྟེ་དུས་ཆེན་གསུམ་འཛོམས་ཀྱི་ཟླ་བ་ཡིན་ལ། དེས་ན་འདིར་སྟོན་པ་ཐུགས་རྗེ་ཅན་རྗེས་དྲན་གྱི་དུས་མཆོད་ས་ཟླའི་ཆོས་ཚོགས་རེ་ངེས་པར་ང་ཚོ་ནང་བ་སངས་རྒྱས་པ་ཡོངས་ཀྱིས་འཛུགས་རྒྱུ་ཧ་ཅང་གལ་ཆེན་དུ་མཐོང༌། དེ་ཡང་འཛམ་གླིང་ཆོས་ལུགས་རང་རང་གི་སྟོན་པའི་འཁྲུངས་འདས་སོགས་ལ་རྩི་སྲུང་བྱེད་བཞིན་ཡོད་ལ། ང་ཚོ་ནང་བ་སངས་རྒྱས་པ་ཀུན་གྱིས་དུས་ཆེན་རྗེས་དྲན་མཆོད་འབུལ་བྱས་ན་བསོད་ནམས་ཀྱི་ཚོགས་རྒྱ་ཆེན་བསགས་པའི་སྒོ་འཕར་ཡངས་བ་ཡིན་པ་དང༌། རྒྱལ་བསྟན་རིན་པོ་ཆེ་ཀུན་ཏུ་སྤེལ་བའི་ཐབས་ལམ་ཡིན་པས་ཆོས་བརྒྱུད་རིས་སུ་མ་མཆིས་པ་ཀུན་གྱིས་ས་ག་ཟླ་བའི་དུས་མཆོད་རྗེས་དྲན་རེ་ཆོས་སྡེ་ཀུན་གྱིས་བྱེད་པར་གསོལ་བ་ལན་བརྒྱར་ཞུས་པ་ལགས་ན་ཐུགས་ལ་འཛིན་པར་ཞུ་ཞུ། །སྟོན་པ་གང་དེའི་རྗེས་དྲན་ས་ག་ཟླ། །འཁྲུངས་འདས་སངས་རྒྱས་མཛད་ཆེན་དུས་བཟང་འདིར། །ས་ག་ཟླ་བར་རྗེས་དྲན་ཆོས་ཚོགས་ཏེ། །བརྒྱུད་ནས་འགྲོ་ལ་དགེ་སྐལ་དང་བཅས་པའི། །རླབས་ཆེན་ལས་ལ་ཡི་རང་གཙང་མ་ཡིས། །བཀྲ་ཤིས་སྨོན་པའི་མེ་ཏོག་མངོན་པར་ཕུལ། །ས་ག་ཟླ་བའི་དུས་མཆོད་ཚོགས་པའི་གཙོ་འགན་པ་མཁན་བློ་གྲོས་དཔལ་ལྡན་ལགས་ཀྱིས་བསྐུལ་ངོར་རྗེས་སུ་ཡི་རང་དང་བཅས་ངག་དབང་དངོས་གྲུབ་དཔལ་གྱིས་ཕུལ་བའོ། ། གསོ་སྦྱོང་བཅོ་ལྔ་དང་བཅུ་བཞི་པའི་ངོས་འཛིན།གསོ་སྦྱོང་བཅོ་ལྔ་དང་བཅུ་བཞི་པའི་ངོས་འཛིན། ཉིན་ཞག་ཡུན་ཚད། ཆུ་ཚོད། ༦༠ ངེས། ཚེས་ཞག་ཆུ་ཚོད། ༥༩ ཆུ་སྲང་༣དབུགས ༤ རི་མཁའ་རིའི་ཆ༡༦དེས་ན་ཉིན་ཞག་དང་ཚེས་ཞག་བར་ཁྱད་ནི། ཆུ་སྲང༌། ༥༦ དབུགས། ༡ རི་མཁའ་རིའི་ཆ༦༩༡ཡིན་ནོ། །འོན་ཀྱང་ཟླ་རྐང་གི་དབང་གིས་ཅུང་ཟད་ཞིབ་པར་བརྩི་རྒྱུ་ཡོད་ལགས། བར་ཁྱད་དེ་དག་གི་དབང་གིས་ཞིབ་རྩིས་ལ་ཉིན་ཞག་དང་ཚེས་ཞག་བར་ཁྱད་ལོ་གཅིག་ལ་ཉིན་ཞག་ལྔ་དང་ཆུ་ཚོད་བཞི་བཅུ་དང་ཆུ་སྲང་གཅིག་དང་དབུགས་གཉིས་དང་རི་མཁའ་རིའི་ཆ་༡༠༤ལས་མེད་ལ། ཚེས་ཞག་དང་ཁྱིམ་ཞག་བར་ཁྱད་ཉིན་ཞག་བཅུ་གཅིག་ལྷག་ལས་བཅུ་གཉིས་མེད་དོ། །དེས་དབང་གིས་ལོ་དུ་མའི་མཚམས་ནས་ལོ་འགོ་བཟུང་ཚུལ་སྐར་རྩིས་ལ་བསྟུན་དགོས་སྙམ། སྐུར་རྩིས་ཁོ་ན་ལ་བསྟུན་ན་གསོ་སྦྱོང་བཅོ་ལྔ་བ་དང་བཅུ་བཞི་བའི་ཁྱད་པར་གསུངས་པ་དོན་མེད་དུ་འགྱུར་བས་སྐར་རྩིས་ཀྱི་ལོ་འགོ་བཟུང་བ་ནས་གསོ་སྦྱོང་བཅོ་ལྔ་པ་ལ་ཞག་བཅོ་ལྔ་ལོན་པའི་ཉིན་དེར་གསོ་སྦྱོང་བྱེད་དགོས། ཡ་ཟླ་མར་ངོ་ལ་ཞག་བཅུ་བཞི་ལོན་པའི་ཉིན་དེར་གསོ་སྦྱོང་བཅུ་བཞི་པའོ། །བཅུ་བཞི་པ་དང་བཅོ་ལྔ་པ་ཞེས་པ་ཉིན་ཞག་གི་དབང་དུ་བྱས་པའོ། །བོད་ན་གསོ་སྦྱོང་བཅུ་བཞི་པ་དང་བཅོ་ལྔ་པའི་ངོས་འཛིན་མང་ན་ཡང་འདུལ་བའི་དཔྱད་པ་ཐ་སྙད་པ་ཡིན་པས་སྐྱོན་ཆེར་མེད་སྙམ། ཡང་དམིགས་བསལ་དུ། བརྗེད་པའི་དབང་གིས་གསོ་སྦྱོང་བཅོ་ལྔ་པ་དང་བཅུ་བཞི་ཡར་ངོ་མར་ངོའི་ཚེས་གཅིག་ལ་བྱས་པ་ཡོད་དེ། མདོ་རྩ་ལས། ལས་ལ་ནི་འདས་ན་ཉི་མ་ཤར་བའི་འོ། །ཞེས་གསུངས་སོ། །དངོས་གྲུབ་དཔལ་གྱིས་བྲིས་པའོ། ། སློབ་དཔོན་གྱིས་སློབ་མ་ལ་ཆོས་འཆད་མ་ཤེས་ན་འདྲ་སྐུ་ཞིག་དང་མི་མཚུངས་སམ།སློབ་དཔོན་གྱིས་སློབ་མ་ལ་ཆོས་འཆད་མ་ཤེས་ན་འདྲ་སྐུ་ཞིག་དང་མི་མཚུངས་སམ། རང་འཁོར་གྱི་ཆེད་གཞན་དུ་སློབ་སྦྱོང་འགྲོ་བ་ལ་དངོས་ཤུགས་ནས་བར་ཆད་བྱེད་ལ། འདྲ་སྐུས་དེ་འདྲ་བྱེད་མི་སྲིད། གཡོ་སྒྱུས་རང་སེམས་འདུལ་དགོས། སློབ་སྦྱོང་དགོས་པ་མེད་ཅེས་འཛེམ་མེད་དུ་སྨྲ་བར་བྱེད་མོད། རང་སེམས་འདུལ་དགོས་པ་བདེན་གྱི་ཆོས་མ་ཤེས་ན་འདུལ་བྱེད་ཅི་ཡིན་ཤེས་མ་སོང་ལགས། དེས་ན་སློབ་དཔོན་རྣམས་ཀྱིས་སློབ་མའི་ཚེ་སྔ་ཕྱིའི་མདུན་ལམ་ཐུགས་རྗེས་གཟིགས་པར་ལག་ཐལ་མོ་སྦྱར་ནས་ཞུ་བ་འབུལ་བཞིན་ཡོད། བློ་རྒྱ་བསྐྱེད་དགོས། རང་སྔོན་ཙམ་ལས་གཞན་མཐོང་དགོས། ཆབ་སྲིད་དང་ཆོས་གཉིས་མ་ནོར་བར་དགོས་སོ། །གཞན་ལ་གནོད་པའི་རྒྱུར་མི་འགྱུར་བར་ཕན་པའི་རྒྱུར་འགྱུར་བར་སྨོན། དངོས་གྲུབ་དཔལ་ནས་ངལ་གསོའི་དུས་ལ། སློབ་ཆེན་ནམ་གྲྭ་སར་བཀག་པའི་ནག་ཉེས། ལས་སྣ་བ་ཁ་ཅིག་གིས་རང་ལ་སློབ་སྦྱོང་མེད་པར་མ་ཟད་གཞན་ལ་དངོས་ཤུགས་བརྒྱུད་གསུམ་ནས་སློབ་སྦྱོང་གི་གོ་འགོག་པ་དང༌། དགོན་སྡེ་ཁ་ཅིག་གིས་རང་ལ་དགེ་རྒན་དང་སློབ་གྲོགས་སོགས་གང་གི་སྒོ་ནས་སློབ་ཆུང་ངམ་བསྡུས་ཆུང་ཞིག་གི་མཐུན་རྐྱེན་ལས་མེད་ཀྱང་གཞན་གྲྭ་སར་འགྲོ་བ་འགོག་པ་ནི་དགོན་སྡེ་རང་དང་སློབ་མ་རྣམས་ལ་གནོད་ཚབ་དེ་ལས་ཆེ་བ་མེད་པར་སྣང་ལ། དེས་ན་སློབ་མ་རྣམས་ཀྱི་ཚབ་བྱས་ནས་འཛམ་གླིང་གི་རང་བཞིན་ནམ་དུས་རབས་ཉེར་གཅིག་པ་དང་མཐུན་པར་སློབ་མ་རྣམས་སློབ་ཆེན་ནམ་གྲྭ་ས་ཆེན་པོར་གཏོང་རོགས་ཞུ་ཞུས་པ་ཡིན། སྤྱིར་སློབ་སྦྱོང་གི་གོ་སྐབས་ཤོར་བ་རྣམས་ལ་སློབ་སྦྱོང་གི་གོ་སྐབས་སྤྲད་དགོས་པ་ལས་སྒེར་གཅོད་ཀྱི་དབང་ཤུགས་ལ་བརྟེན་ནས་ཁོར་ཡུག་ཆེ་ས་ལ་སློབ་སྦྱོང་བྱེད་པ་བཀག་ནས་རང་གི་ཁོར་ཡུག་ལ་བཙུད་པ་ནི། དཔེར་ན་རྒྱ་མཚོའི་ཉ་ཞིག་བཟུང་ནས་ན་ཆུ་ཞིག་ཏུ་བཀག་པ་དང་འདྲ་ལ། སློབ་ཆུང་ཞིག་ལས་ལོ་བཅོ་ལྔར་སློབ་སྦྱོང་བྱས་ཀྱང་འཕེལ་རྒྱས་ཆེར་མི་འགྲོ་བ་ལོ་རྒྱུས་ཀྱིས་བདེན་དཔང་བྱེད་ཐུབ་པ་རེད། དེས་ན་ཆོས་འཇིག་རྟེན་གང་གི་དབང་དུ་བྱས་ན་ཡང་བར་ཆད་ཆེན་པོ་ཡིན་པ་ཤེས་དགོས། དགོན་སྡེ་གཞན་ལ་མིག་གིས་ལྟོས་དང་གསལ་འོང་ལགས། དེ་ལྟར་མ་ཡིན་ན་བླ་མ་ཞིག་ལ་མཚོན་ན་རང་གི་སློབ་མ་རྣམས་ལུགས་གཉིས་ཀྱིས་དབེན་པའི་རང་མཐའ་ལ་གནས་པའི་དུད་འགྲོ་དང་གཉིས་སུ་མེད་པར་འགྱུར་རོ། །གྲྭ་བ་ཞིག་ལ་མཚོན་ན་སློབ་སྦྱོང་བཀག་པ་དེ་ཆོས་སྒྲུབ་པ་བཀག་པ་དང་གཅིག་མཚུངས་མ་ཡིན་ནམ་ལགས། སྤྲང་འཁྱམ་པ་དངོས་གྲུབ་དཔལ་ནས་གཞན་གྱི་དཀའ་ངལ་སེལ་ཕྱིར་བརྗོད་པའོ། ། ཐར་བ་ལ་ཤེར་རབ་དང་ཚུལ་ཁྲིམས་གལ་ཆེ།ཐར་བ་ལ་ཤེར་རབ་དང་ཚུལ་ཁྲིམས་གལ་ཆེ། ཐར་བ་ཐོབ་པ་ལ་ཉོན་མོངས་པའི་སྒྲིབ་པ་སྤང་དགོས། དེ་སྤང་བ་ལ་གཉེན་པོ་ཟག་པ་མེད་པའི་ཤེས་རབ་སོགས་ཐོས་བསམ་སྒོམ་གསུམ་གྱི་ཤེས་རབ་དགོས་ལ། དེ་ཡང་སློབ་དཔོན་དབྱིག་གཉེན་གྱི་མཛོད་རྩ་བ་ལས། ཆོས་རྣམས་རབ་ཏུ་རྣམ་འབྱེད་མེད་པར་ཉོན་མོངས་རྣམས། །གང་ཕྱིར་ཉེ་བར་ཞི་བར་བྱ་བའི་ཐབས་མེད་ལ། །ཞེས་གསུངས་སོ། །ཤེས་རབ་བསྐྱེད་པ་ལ་གཞི་ཚུལ་ཁྲིམས་རྣམ་དག་གལ་ཆེ་སྟེ། མདོ་ལས། ཚུལ་ཁྲིམས་ལ་བརྟེན་ཚུལ་ཁྲིམས་ལ་གནས་ནས། །རིམ་གྱིས་འཕགས་པའི་བདེན་པ་བཞི་བོ་དག །ཡང་དག་ཇི་བཞིན་དུ་ནི་རྟོགས་པར་འགྱུར། །ཞེས་གསུངས་སོ། །དེས་ན་ཚུལ་ཁྲིམས་ཀྱི་མཆོག་དགེ་ཚུལ་སློང་གི་སྡོམ་པ་ལེགས་པར་བསྲུང་བར་བྱའོ། །ལ་ལ་ཐར་བ་ཐོབ་པ་ལ་ཤེར་རབ་མི་དགོས་པར་འདོད་པ་དང༌། ལ་ལ་ཐར་བ་ཐོབ་པ་ལ་ཚུལ་ཁྲིམས་མི་དགོས་པར་འདོད་པའི་ཉེས་སེལ་དུ་བསྟན་ལ་ལྷག་བསམ་གྱིས་བསྐུལ་ཏེ་བཙུན་པ་དངོས་གྲུབ་དཔལ་ནས་སྨྲས་པའོ། །དྲི་བ། མཁན་པོ་ཞིག་གིས་དེང་སང་གྲྭ་བ་དག་རྫུན་མང་པོས་རབ་བྱུང་ངུར་སྨྲིག་གི་གོས་གྱོན་འདུག་པ་དེ་རུང་ངམ་ཅི། དྲིས་ལན་ནི། གྲྭ་བ་དག་རྫུན་གྱི་ནང་ན་གྲྭ་གོས་གྱོན་པ་དང་མི་གྱོན་པ་མང་ལ། གྲྭ་བ་དག་མ་ཡིན་ན་གྲྭ་གོས་གྱོན་པས་ཁྱབ་པ་མེད་ན་གྲྭ་རྫུན་ལ་དེ་ལས་ཀྱང་མ་ཁྱབ་མོད། སྤྱིར་རབ་བྱུང་བ་རྣམས་ཀྱིས་གོས་ངུར་སྨྲིག་བགོ་དགོས་པ་དང་རབ་བྱུང་མ་ཡིན་པ་དག་གིས་བགོ་མི་རུང་བ་ནི། མདོ་ལས། གང་ཞིག་བསླབ་ལ་མི་གནས་པ། །བདེ་གཤེགས་རྒྱལ་མཚན་འཛིན་པ་ལས། །བསླབ་ལ་མི་གནས་སྐད་ཅིག་གི །གཟུགས་པོར་ཁྱིམ་པར་གནས་པ་བཟང༌། །ཞེས་གསུངས་པ་སོགས་འདུལ་ལུང་སྡེ་བཞི་སོགས་སུ་རྒྱ་ཆེར་གསུངས་པ་མང་མོད་ལུང་དེ་དག་སྐུ་ཉིད་ཀྱིས་མཁྱེན་པ་རེད་བསམ་ནས་མ་སྤྲོས། ཁ་ཅིག་རབ་བྱུང་མ་ཡིན་པ་དག་གིས་རབ་བྱུང་གི་གོས་གྱོན་རུང་བའི་རྒྱུ་མཚན་ལ་གོས་ངུར་སྨྲིག་གི་ཕན་ཡོན་བཤད་པའི་ལུང་མང་པོ་བཀོད་མོད། ལུང་དེ་དག་ནི་རབ་བྱུང་གི་གོས་ཀྱི་ཡོན་ཏན་བསྟན་པ་ཙམ་ལས་ཁྱིམ་པས་གྱོན་དགོས་པའི་ཤེས་བྱེད་དུ་མི་འགྲོའོ། །དཔེར་ན་སངས་རྒྱས་ཀྱི་སྐུ་གཟུགས་ལ་ཡོན་ཏན་ཡོད་ནའང་ལྷམ་ངོ་ལ་སྦྱར་ན་མི་རིགས་པ་ལྟར་ཡིན་ལ། དེས་ན་རབ་བྱུང་གི་གོས་ངུར་སྨྲིག་གྱོན་རུང་བ་དག་ནི་གྲྭ་བ་ངེས་པ་ལགས། དྲི་བ། འོ་ན་མཁན་པོ་བཙུན་མས་རབ་བྱུང་གོས་ངུར་སྨྲིག་གྱོན་མི་རུང་བ་ཡིན་ནམ། ལན། དེ་ནི་མ་ཡིན་ཏེ། བཙུན་མ་རྣམས་གྲྭ་བ་ཡིན་ཡང་གྲྭ་བ་བཙུན་མ་གཉིས་སུ་ཕྱེ་བའི་གྲྭ་བ་མ་ཡིན་པ་ཤེས་དགོས་ལ། དཔེར་ན་རྗེ་བཙུན་སྒྲོལ་མ་འཕགས་པའི་ས་ཐོབ་པས་ན་འཕགས་པ་ཡིན་ཡང་འཕགས་པ་དང་འཕགས་མ་གཉིས་སུ་ཕྱེ་བའི་འཕགས་པ་མ་ཡིན་པ་བཞིན་ཡིན་པར་སེམས་ལགས་སོ། །དངོས་གྲུབ་དཔལ་ནས་བྲིས་པའོ། ། རྒྱལ་བསྟན་ཚོང་རྫས་བྱེད་པ།རྒྱལ་བསྟན་ཚོང་རྫས་བྱེད་པ། དེང་དུས་སུ་བོད་མི་ཕལ་ཆེ་བ་ལ་རྒྱལ་བསྟན་ལ་དད་པ་མེད་པར་མ་ཟད་དམ་ཆོས་རིན་པོ་ཆེ་ནི་གཞན་མགོ་སྐོར་བའི་རིན་པོ་ཆེ་ཁོ་ནར་སྤྱད་ནས་ཚོང་རྫས་སུ་བྱེད། ཁ་ཅིག་ཤེས་ཡོན་མེད་པས་བསྟན་འགྲོར་དུང་ཞེན་ཙམ་ཡོད་ཀྱང་གནོད་པའི་བྱ་བ་ལས་ཕན་པ་སྒྲུབ་མི་ཤེས། ཁ་ཅིག་ཤེས་ཡོན་ཙམ་ཡོད་ཀྱང་ལྷག་བསམ་མེད་པས་རང་དོན་ཁོ་ན་ལས་བསྟན་འགྲོའི་དོན་བརྩོན་འདོད་མེད། ཁ་ཅིག་ཤེས་ཡོན་ལྷག་བསམ་ཙམ་ཡོད་ཀྱང་སྙིང་སྟོབས་སམ་སྤོབས་པ་མེད་པའི་དབང་གིས་བསྟན་འགྲོ་ལ་སྨན་པའི་རྣམ་དཀར་གྱི་ལས་ལ་གཞོལ་མི་ནུས་པས་བསྟན་པ་ནི་སྨྱོན་པའི་ལག་ཏུ་རལ་གྲི་བཞག་པ་ལྟར་བསྟན་པ་བསྟན་པའི་གནས་སུ་མ་བཞག་པར་ཚོང་རྫས་སུ་གྱུར་བས་ན་ཆོས་པའི་གཟུགས་ཀྱིས་བསྟན་པ་འདི་དཀྲུགས་པ་ལ་ཡིད་སྐྱོའོ། །དེས་ན་ལག་ཐལ་མོ་སྦྱར་ནས་ནང་བ་པ་ཀུན་གྱིས་མ་འོངས་པའི་རྒྱལ་བསྟན་ལ་ཐུགས་བསམ་གནང་བར་ཞུའོ། །སྤྲང་འཁྱམ་པ་བཙུན་པ་ངག་དབང་དངོས་གྲུབ་དཔལ་གྱིས་ཁམས་མི་ཉག་ནས་ཟླ་༡༢ པའི་ཚེས༡༩ ལ། ཀུན་གཟིགས་པཎ་ཆེན་རིན་པོ་ཆེའི་རྗེས་དྲན་གྱི་ཚོགས་འདུ་འདིར་ཕེབས་པའི་བོད་ཀྱི་ཆོས་བརྒྱུད་ཆེན་པོ་དྲུག་དང་གདན་ས་གསུམ་དང་གཞུང་གི་འགོ་ཁྲིད་རྣམ་པ་དང༌། སློབ་ཆེན་ཁག་གི་མི་སྣ་དང་ལོ་རྒྱུས་པ་སོགས་མཁས་དབང་རྣམ་པ་ལྷན་རྒྱས་ལ་གུས་ཕྱག་དང་བཅས་ཏེ་འཚམས་འདྲི་བཀྲ་ཤིས་བདེ་ལེགས་ཞུ། གུས་པ་བདག་ལ་མཚོན་ན་སྐྱེས་སྦྱང་གི་ཡོན་ཏན་མི་ལྡན་པའི་གྲྭ་རྐྱང་ཞིག་ཡིན་མོད་སྐབས་འདིར་ཀུན་གཟིགས་པཎ་ཆེན་རིན་པོ་ཆེའི་རྗེས་དྲན་གྱི་ཚོགས་ཆེན་འདིར་ཞུགས་པའི་གོ་སྐབས་བྱུང་བ་ལ་དགའ་སྤྲོ་ཡོད་ལགས། དེས་ན་རྗེས་དྲན་ཚོགས་ཆེན་འདི་གཙོ་སྒྲུབ་བྱེད་མཁན་གྱི་ཙོང་ཁ་བ་རིག་གནས་སྒྱུ་རྩལ་ཞིབ་འཇུག་ཚོགས་པ་སོགས་འབྲེལ་ཡོད་ཀྱི་མི་སྣ་ཡོངས་ལ་བཀའ་དྲིན་ཐུགས་རྗེ་ཆེ་ཞུ། བདག་གིས་དེ་རིང་ཞུ་རྒྱུའི་གཏམ་བཤད་ཀྱི་ཁ་བྱང་ནི་བོད་ཡར་རྒྱས་ཀྱི་ཐབས་ལམ་སློབ་གསོ་གླེང་བ་ཞེས་པ་དེ་ཡིན། དེ་ཡང་སྡེ་ཚན་གསུམ་གྱི་སྒོ་ནས་ཞུས་ན། ༡ དང་པོ་པཎ་ཆེན་རིན་པོ་ཆེའི་ཐུགས་ཀྱི་བཞེད་དོན་ཕྱོགས་ནས་ཞུས་ན། པཎ་ཆེན་མཆོག་གིས། བོད་རྗེས་ལུས་ཀྱི་རྣམ་པ་མ་བསྒྱུར་ན། ང་ཤི་ཡང་མིག་མི་བཙུམ། ཞེས་སྡོམ་ཚིག་གལ་ཆེན་གནང་བ་བཞིན་དམ་པ་གང་གི་སྐུ་ཚེ་གང་ལ་བོད་ཀྱི་རིག་གཞུང་དར་སྤེལ་གྱི་ཆེད་དུ། ཞིང་ལྗོངས་སོ་སོར་སློབ་གྲྭ་བཙུགས་པ་སོགས་འབད་བརྩོན་ཆེན་པོ་གནང་བ་ནི་བ་དེ་རིང་མཁས་དབང་རྣམ་པ་ཚོས་རབ་དང་རིམ་པ་གསུངས་ཟིན་པ་ལྟར་རེད་ལགས། ལྷག་པར་དུ་བོད་ཀྱི་ཆོས་བརྒྱུད་ཆེན་པོ་དྲུག་གི་མཁས་དབང་རྣམ་པ་གསོ་སྐྱོང་བྱེད་པའི་ལྟེ་གནས་པེ་ཅིན་དུ་བོད་བརྒྱུད་ནང་བསྟན་སློབ་གྲྭ་ཆེན་མོ་བཙུགས་ནས་སྔར་མེད་བོད་ཀྱི་ཆོས་བརྒྱུད་དྲུག་གི་གཅིག་མཐུན་གྱི་ཐོབ་ཐང་འདྲ་མཉམ་གྱི་སློབ་གྲྭ་ཆེན་མོ་གསར་འཛུགས་བྱས་པས་ཤེས་ཡོན་གྱི་གོ་སྐབས་བཟང་བོ་བྱུང་བ་ཚང་མས་མཁྱེན་གསལ་ལྟར་རེད་ལགས། སྐབས་དེ་དུས་ང་ཚོ་ཇོ་ནང་བ་ལ་མཚོན་ན་ཡང་སློབ་གྲྭ་དེར་སློབ་མ་བསྡུ་བ་དང༌། གངས་ཅན་རིག་བརྒྱའི་སྒོ་འབྱེད་ལྡེ་མིག་ཅེས་པའི་ནང་དུ་ཇོ་ནང་གྲུབ་མཐའི་གཞུང་དཔེ་བཞག་པ་དང༌། དགེ་རྒན་གདན་ཞུ་བྱས་པ་སོགས་ཆོས་བརྒྱུད་སྤྱི་མཚུངས་ཀྱི་ཁེ་དབང་གནང་བ་ནི་ང་ཚོ་ཇོ་ནང་བ་ལ་མཚོན་ན་བསྟན་པ་ཉམ་ཆུང་ཞིང་ཉག་ཕྲ་བ་ལ་བརྩེ་གཟིགས་གནང་བ་ལྷག་པར་དུ་བཀའ་དྲིན་བླ་ན་མ་མཆིས་པ་ཡིན། དེ་ཡང་དམ་པ་ཁོང་གིས་ཐུགས་བཞེད་ལ། ཇོ་ནང་ཆོས་བརྒྱུད་ལ་མཚོན་ན་སངས་རྒྱས་ཀྱི་ཆོས་འཁོར་རིམ་པ་གསུམ་སྐོར་བའི་ནང་ནས་བཀའ་ཐ་མ་ལེགས་པར་རྣམ་པར་ཕྱེ་བའི་ཆོས་འཁོར་གྱི་དགོངས་པ་རྩལ་འདོན་བྱེད་པ་དང༌། དཔལ་དུས་ཀྱི་འཁོར་ལོའི་སྒྲུབ་པ་ཉམས་ལེན་གཙོ་བོར་བྱེད་པ་ནི་འཛམ་\ིང་གི་སྟེང་ན་ཇོ་ནང་བ་གཅིག་པུ་ཕལ་ཆེར་ཡིན་པས་དེ་ཉམས་ན་སངས་རྒྱས་ཀྱི་བསྟན་པ་ཕྱོགས་གཅིག་ཉམས་པར་དགོངས་ནས་དར་རྒྱས་སུ་བཏང་བ་ཡིན་པ་རེད། པཎ་ཆེན་མཆོག་གིས་ཇོ་ནང་བའི་བསྟན་པ་ལ་ཐུགས་རྗེས་བརྩེ་གཟིགས་གནང་བ་སོགས་མདོར་ན་ཀུན་གཟིགས་པཎ་ཆེན་རིན་པོ་ཆེའི་བཞེད་དགོངས་ནི་བོད་ཡར་རྒྱས་གཏང་རྒྱུ་དེ་ཡིན་པ་རེད་བསམ་བཞིན་ཡོད། ༢ དེས་ན་སྡེ་ཚན་གཉིས་པ་སློབ་གསོ་ལེགས་བཅོས་སྐོར་ནས་ཞུས་ན། ང་ཚོ་བོད་ཡར་རྒྱས་ལ་འགྲོ་དགོས་ན་ཤེས་ཡོན་པའི་སྡེ་ཁག་གི་སློབ་གསོ་ལ་རག་ལས་པ་རེད། འོན་ཀྱང་ད་ལྟའི་ཆར་ལྟ་བ་གསར་རྙིང་ངམ་རིག་གནས་གསར་རྙིང་བར་གྱི་སློབ་གསོ་ཕན་ཚུན་སྙོམས་སྒྲིག་བྱེད་མ་ཐུབ་པའི་དབང་གིས་གཅིག་མཐུན་གྱི་སློབ་གསོའི་ཁ་ཕྱོགས་ཅིག་མེད་པར་ཆགས་འདུག དེས་ན་ང་རང་སྒེར་གྱི་ལྟ་ཚུལ་ལ་ཡོངས་ཁྱབ་རིན་ཐང་གི་སློབ་གསོ་དང་བོད་ཀྱི་སྲོལ་རྒྱུན་ནང་ཆོས་དང་འབྲེལ་བའི་སློབ་གསོ་གཉིས་འགལ་བ་ལྟག་སྤྲོད་དུ་རེ་ཟུང་གིས་བཟུང་བ་ཆེས་ནོར་འཁྲུལ་རེད་བསམ་བཞིན་ཡོད། དཔེར་ན་ནུབ་ཕྱོགས་པའི་དམངས་གཙོ་འདྲ་མཉམ་སོགས་ནི་ཡེ་ཤི་མ་ཤིའི་ཆོས་དང་འབྲེལ་ནས་དར་སྤེལ་བྱས་པ་ཡིན་ལ། དེ་ནང་བཞིན་བོད་ལ་བོད་མིའི་ཁྲག་རྒྱུན་དུ་བཞུར་བའི་ནང་ཆོས་དང་འབྲེལ་ནས་བཤད་ན་འགལ་རྐྱེན་མེད་པར་མཐུན་རྐྱེན་དང་ལྡན་པར་འགྱུར་བ་བརྒྱ་ཆ་བརྒྱ་ཐམ་པ་རེད། དེ་ཡང་དགོན་སྡེའི་སློབ་གསོ་དང་སྤྱི་ཚོགས་སློབ་གསོ་སོགས་ལ་སྙིགས་དོར་བཅུད་ལེན་བྱས་ནས་འཐུས་སྒོ་ཇེ་ཚང་དུ་གཏོང་དགོས། དེ་ཡང་སྤྱི་ཚོགས་ཀྱི་སློབ་གསོ་དེ་ཡང་སྔོན་གྱི་སྲོལ་རྒྱུན་ལྟར་ཞིང་ལས་འབྲོག་ལས་ཀྱི་རིག་གནས་མི་ཉམས་པར་བཟུང་ནས་དེང་རབས་རིག་གནས་ཀྱི་ཁ་གསབ་གཏོང་དགོས་པ་ལས། གསར་བ་ཁོ་ན་ལ་ཞེན་པ། ཡང་ན་རྙིང་བ་ཁོ་ན་ལ་ཞེན་ན་ཕྱོགས་རེ་བཟུང་ན་རྗེས་ལུས་ལས་ལྡོག་མི་ནུས་པ་ཡིན་པས། སློབ་གསོ་འཐུས་སྒོ་ཚང་བ་བྱེད་དགོས་པ་གལ་ཆེན་རེད་བསམ། ཡང་བོད་ཀྱི་དགོན་སྡེ་དུ་མར་ནང་ཆོས་ལྟར་བྱས་ན། ཚུལ་དང་མི་མཐུན་པ་ཅི་ཡང་མེད་པར་མ་ཟད། ནང་བསྟན་ནི་རིགས་མི་གཙོ་རུས་མི་གཙོ་བསླབ་པ་རིན་པོ་ཆེ་འདི་གཙོ་ཞེས་གསུངས་པ་ལྟར་ཡིན་མོད། སྟོན་པའི་བཞེད་དགོངས་དང་མི་མཐུན་པར་སྒེར་གཅོད་རང་ལུགས་བྱས་ནས་འཆད་ཉན་ལ་བཀག་འགོག་བྱས་ཏེ། དགོན་སྡེ་བཟུང་བ་དང༌། རང་གི་དམ་ཚིག་སྡོམ་པ་སྲུང་མི་ནུས་ཚེ་སྔགས་ལ་ཞུགས་མདོག་སོགས་མདོར་ན་ཆོས་ལ་བརྟེན་ནས་དཔལ་འབྱོར་དང༌། ཐོབ་གོ་ས་དང༌། ཚོང་ལས་དང༌། གཞན་ལ་མགོ་སྐོར་གྱི་བྱ་བ་སྒྲུབ་པ་སོགས། ཆོས་ལ་བརྟེན་ནས་འཇིག་རྟེན་ཆོས་བརྒྱད་སྒྲུབ་པ་ལ་སློབ་གསོ་བ་ཐམས་ཅད་ཀྱི་བསམ་བློ་གཅིག་མཐུན་བྱས་ནས་སློབ་གསོ་གནང་ན་ལེགས་པའི་ལམ་དུ་བསྐྱོད་ཐུབ་རྒྱུ་རེད། དེ་ལྟར་མ་བྱས་ན་རྒྱ་བརྒྱུད་ནང་བསྟན་དང་ལྷོ་བརྒྱུད་ནང་པ་སོགས་ཀྱིས། བོད་ཀྱི་ཆོས་ནི་ནང་བསྟན་མ་ཡིན་པར་བླ་མའི་ཆོས་ཞེས་བརྗོད་བཞིན་པ་ནི་ཆོས་ཀྱི་སྐྱོན་མ་ཡིན་པར་ཆོས་པ་རེ་ཟུང་གི་སྐྱོན་རེད། ང་ཚོ་བོད་བརྒྱུད་ནང་བསྟན་གྱི་ངོས་ནས་གཞན་ལ་འཚེ་མེད་ཞི་བའི་ལམ་བཟང༌། བྱམས་སྙིང་རྗེ་བདག་མེད་གཉིས་གཏན་ལ་ཕབ་པའི་རིམ་པ་དང༌། བདེན་བཞི་བདེན་གཉིས། ལས་འབྲས་སོགས་གང་གི་ངོས་ནས་བསམ་ན་དངོས་པོའི་གནས་ལུགས་དང་མཐུན་པ། རང་གཞན་ལ་ཕན་བདེ་མ་ལུས་པ་འབྱུང་བའི་གཞི་གཅིག་པུར་གྱུར་བ་ཡིན་པར་ནི་ཟོལ་བསྟོད་དང་དུང་ཞེན་ཙམ་མ་ཡིན་པར་གནས་ལུགས་དང་ལྡན་པ་རེད། འོན་ཀྱང་གང་ཟག་གི་ཆགས་སྡང་ཆོས་ལ་བསྲེས་ནས་ཆོས་པའི་མིང་འཛིན་པའི་གང་ཟག་ལ་ནོར་འཁྲུལ་ཡོད་པ་གོང་དུ་ཞུས་ཟིན་པ་ལྟར་རེད། ཁ་ཅིག་གིས་གང་ཟག་གི་སྐྱོན་ཆོས་ལ་སྦྱར་ནས་སྐྱོན་བརྗོད་པ་དང༌། ཁ་ཅིག་གིས་ནང་ཆོས་ལ་ཞིབ་འཇུག་དང་རྒྱུས་ལོན་མེད་པར་འོལ་ཚོད་བྱས་ནས་སྐྱོན་བརྗོད་པ་ནི་མི་རིགས་པར་ཁོ་ན་རེད། དཔེར་ན་ཁང་བ་ཞིག་གི་ནང་ཅ་དངོས་ཅི་ཡོད་མི་ཤེས་བཞིན་དུ་དེའི་ནང་གི་ཅ་དངོས་ལ་སྐྱོན་བརྗོད་པ་ཀུན་ནས་མཚུངས་ལ། ཁ་ཅིག་གིས་རང་གིས་མ་ཤེས་མ་གོ་མ་རྟོགས་པ་རྒྱུ་མཚན་དུ་བྱས་ནས་ཆོས་ལ་སྐྱོན་བརྗོད་པ་སོགས་ནི་དུག་གསུམ་ཅི་རིགས་ཀྱི་དབང་དུ་སོང་བ་ལས་མ་འདས་པར་འདུག མི་སུ་ཡིན་ན་ནང་ཆོས་ལ་དད་པ་ཡོད་མེད་རང་དབང་ཡིན་མོད་རྒྱུ་མཚན་དང་གནས་ལུགས་མེད་པར་རང་གི་འདོད་བློ་དང་མི་མཐུན་པ་ཙམ་གྱིས། ནང་ཆོས་ལ་སྐྱོན་བརྗོད་བྱེད་པ་ནི་ནང་ཆོས་ཀྱི་ཁེ་དབང་འཕྲོག་པའམ་ནང་ཆོས་ལ་ཚུལ་མིན་ཐེ་གཏོགས་དང་དམའ་འབབ་བྱེད་པ་ཡིན་པས་མི་འོས་པར་སེམས། ཆོས་པའི་མིང་ཁུར་བ་ཞིག་ཡིན་ན་ཡང༌། ཇི་སྐད་དུ། ཆོས་པའི་གཟུགས་ཀྱིས་ཆོས་མིན་བྱེད་སྲིད་པས། །ཞེས་གསུངས་པ་བཞིན་ཆོས་དང་འགལ་བའི་བྱ་བ་མི་སྒྲུབ་པ་གལ་ཆེ་སྙམ་ལགས། ནང་སེམས་ཀྱི་དཔལ་ཡོན་དང༌། ཕྱི་དངོས་པོའི་དཔལ་ཡོན་གཉིས་ལས་ཕྱི་དངོས་པོའི་དཔལ་ཡོན་གཙོ་བོར་བྱེད་པ་དག་གིས་ཚོང་ལས་དང་ལག་རྩལ། ཚན་རིག་སོགས་དངོས་པོའི་དཔལ་ཡོན་དར་སྤེལ་གཏོང་དགོས། དགོན་པ་རྣམས་ཀྱིས་གཙོ་བོ་ཕྱི་དངོས་པོའི་དཔལ་ཡོན་ལས་ནང་སེམས་ཀྱི་དཔལ་ཡོན་ཤེས་རབ་ཀྱིས་བསྟན་པ་འཛིན་དགོས་པ་རེད། ༣ གསུམ་པ་དེང་སང་ཀུན་ཀྱིས་གླེང་བའི་ཡོངས་ཁྱབ་རིན་ཐང་གི་སྐོར་ནས་ཞུས་ན། ནང་ཆོས་ལས་བཤད་པའི་ཡོངས་ཁྱབ་རིན་ཐང་ནི། གཞན་གྱིས་བཤད་པའི་ཡོངས་ཁྱབ་རིན་ཐང་ལས་ཟབ་རྒྱས་ཡིན་ཚུལ་མདོར་མཚོན་པ་ཙམ་ཞུ་རྒྱུ་ཡིན། ནུབ་ཕྱོགས་པའི་ཡོངས་ཁྱབ་རིན་ཐང་གི་དམངས་གཙོ་འདྲ་མཉམ་རང་དབང་ལས་ལྷག་པའི་ནང་ཆོས་སུ་འདྲ་མཉམ་རང་དབང་དམངས་གཙོ་ཁྲིམས་སྲུང་ནི་གཏིང་ཟབ་པ་རྒྱ་ཆེ་བ་ཞིག་ཡོད་པ་རེད། དཔེར་ན་ནུབ་ཕྱོགས་པའི་འདྲ་མཉམ་ནི་འགྲོ་བ་རྣམས་ཀྱི་ནང་ནས་མི་གཅིག་པུ་ལ་འདྲ་མཉམ་ཞིག་གླེང་བ་ལས་སེམས་ཅན་ཐམས་ཅད་ཚེ་སྲོག་གི་འདྲ་མཉམ་གྱི་ལྟ་བ་དེ་མེད་པ་རེད། དེས་ན་འགྲོ་བ་མིའི་ཐོབ་ཐང་ཞེས་པ་ནུབ་ཕྱོགས་པའི་སྐད་ཆ་ཞིག་རེད། ང་ཚོའི་སྲོལ་རྒྱུན་རིག་གནས་དང་འབྲེལ་བའི་ནང་ཆོས་ནི་མི་གཅིག་པུ་ཙམ་མ་ཡིན་པར་སེམས་ཅན་ཐམས་ཅད་བདེ་བ་འདོད་པ་འདྲ་མཉམ། སྡུག་བསྔལ་མི་འདོད་པ་འདྲ་མཉམ་ཡིན་པ་གཅིག་མཚུངས་ཡིན་པས་ཐེག་དམན་གྱི་སྡེ་སྣོད་སྐབས་སུ་གཞན་གནོད་གཞི་བཅས་སྤང་དགོས་པར་གསུངས་ནས་གཞན་ལ་སྡུག་བསྔལ་མི་བསྐྱེད་པ་དང༌། ཐེག་ཆེན་པའི་སྡེ་སྣོད་ཀྱི་སྐབས་སུ་སྦྱིན་སོགས་ཕ་རོལ་ཏུ་ཕྱིན་པ་དྲུག་སོགས་མདོར་ན་གཞན་ལ་ཕན་འདོགས་པའམ་རོགས་རམ་བྱེད་དགོས་པ་སོགས་འདྲ་མཉམ་རྒྱ་ཆེ་བ་ཞིག་གསུངས་བཞིན་ཡོད་པ་རེད། ནང་ཆོས་ལས་རིགས་མི་གཙོ་རུས་མི་གཙོ་བསླབ་པ་རིན་པོ་ཆེ་འདི་གཙོ་གསུང་བ་ལྟར་རེད། དེས་ན་འདྲ་མཉམ་ཁྱད་པར་འཕགས་པ་རེད། རང་དབང་གི་ཕྱོགས་ནས་ཡིན་ན་ནུབ་ཕྱོགས་པ་སོགས་ཀྱིས་གཞན་དབང་དང་རང་དབང་གི་ཁྱད་པར་ནི་མི་གཅིག་པུས་ཚེ་འདིར་ལུས་ངག་གནོད་པ་བྱེད་པ་ཙམ་ལ་གཞན་དབང་བཞག་ནས་རང་དབང་ནི་གཞན་ལ་གནོད་མེད་ཀྱི་ལྟོས་བཅས་ལྟོས་མེད་ཀྱི་ཚེ་འདིའི་ལུས་ངག་གི་ཁེ་དབང་ངམ་རང་དབང་ཞིག་གླེང་བཞིན་ཡོད་པ་དེ་ཙམ་རེད། ནང་ཆོས་ཀྱི་རང་དབང་ནི་སྟོན་པ་ཐུགས་རྗེ་ཅན་གྱིས། གང་ལ་རང་དབང་མེད་པ་དེ་ནི་སྡུག་བསྔལ་བའོ། །ཞེས་གསུངས་པ་ལྟར་ལས་ཉོན་གྱི་གཞན་དབང་དུ་གྱུར་ནས། ན་མི་འདོད་བཞིན་དུ་ན་དགོས་པ། འཆི་མི་འདོད་བཞིན་དུ་འཆི་དགོས་པ་སོགས་སྡུག་བསྔལ་སྣ་ཚོགས་ཡོང་བ་ནི་རང་དབང་མེད་པར་ལས་ཉོན་གྱིས་གཞན་དབང་དུ་གྱུར་སོང་བའི་དབང་གིས་རེད། ནང་ཆོས་ལ་སྐྱེ་བ་འདི་ཁོ་ན་ཙམ་མ་ཡིན་པར་ཕུགས་རྒྱང་རིང་བ་དང་སྐྱེ་བ་གཏན་གྱི་རང་དབང་གི་ཐབས་ལམ་དང་སློབ་གསོ་ཡོད་པ་རེད། དེ་ཙམ་ལས་ཆུ་ཚོད་ཀྱི་དབང་གིས་ཞིབ་ཕྲ་མ་ཞུས་པ་ཡིན་ལགས། དམངས་གཙོ་ཡང་ནང་ཆོས་ལས་སྐབས་དུ་མར་ཚུལ་ཤིང་གང་མང་བྱེད་ཚུལ་སོགས་དམ་ཆོས་འདུལ་བ་སོགས་ལས་གསུངས་ཡོད་པ་རེད། ལྟ་བ་མཉམ་གནས་ཡིན་ན་ནང་ཆོས་ལས་སེམས་ཅན་རྣམས་ཁམས་དབང་མོས་པ་མི་འདྲ་བ་ཡིན་པར་གསུངས་པར་མ་ཟད་གདུལ་བྱ་འགའ་ཞིག་གི་ངོར་གང་ཟག་གི་བདག་ཡོད་པར་གསུངས་པ་སོགས་གང་ལ་གང་འདུལ་དེ་ལ་དེར་སྟོན་པའི་རྒྱུ་མཚན་གྱིས། ལྟ་བ་མཉམ་གནས་ཡང་གསུངས་ཡོད་པ་རེད། ཤེས་བྱ་སྣ་མང་ལ་སྦྱང་དགོས་པ་ཡང་རྒྱལ་ཚབ་བྱམས་པ་མགོན་པོས། རིག་པའི་གནས་ལྔ་དག་ལ་མཁས་པར་མ་བྱས་ན། །འཕགས་མཆོག་གིས་ཀྱང་ཐམས་ཅད་མཁྱེན་ཉིད་མི་འགྱུར་ཏེ། །ཞེས་དང༌། ས་པཎ་གྱིས། རང་བློ་ཤེས་བྱ་ཀུན་ལ་མ་སྦྱངས་ན། །ཐམས་ཅད་མཁྱེན་པ་ནམ་མཁའི་མཐའ་ལས་རིང༌། །ཞེས་དང༌། རྒྱལ་སྲས་ཞི་བ་ལྷས། རྒྱལ་སྲས་རྣམས་ཀྱིས་མི་སློབ་པའི། །དངོས་དེ་གང་ཡང་ཡོད་མ་ཡིན། །ཞེས་གསུངས་པ་ལྟར་རེད། ནང་ཆོས་ལས་ཁྲིམས་སྲུང་ཡང་སངས་རྒྱས་ཀྱི་བཅས་པ་དང་དགེ་འདུན་གྱི་ནང་ཁྲིམས་སྲུང་དགོས་པར་གསུངས་པར་མ་ཟད་ཡུལ་གྱྀ་རྒྱལ་བོའི་ཁྲིམས་ཡང་སྲུང་དགོས་པར་གསུངས་པས་གྲུབ་པ་རེད་ལགས། དེས་ན་དམངས་གཙོ་འདྲ་མཉམ་རང་དབང་ཚད་ལྡན་ཞིག་ནང་ཆོས་ལས་བཤད་ཡོད་པ་དེ་དེང་རབས་ཀྱི་སློབ་གསོ་བ་སོགས་ཀྱིས་མཁྱེན་དགོས་པ་རེད་ལགས། སྤྱིར་མང་པོ་ཞུས་ན་མང་པོ་རེད་དེ། འོན་ཀྱང་དུས་ཚོད་ཀྱི་རྐྱེན་དབང་དང༌། མི་གཅིག་གིས་བསམ་ཚོད་ཀུན་ཞུ་དགོས་ན་ཆུ་ཚོད་ཐུང་ཐུང་ཞིག་ལ་རྣམ་རྟོག་གི་འཆར་སྒོ་གྲངས་མང་བས་ཞུ་བ་མི་རྫོགས་པས། དེ་ཙམ་གྱིས་མཇུག་བསྡུ་བར་བྱེད་རྒྱུ་ཡིན། མཇུག་མཐར་འཚེ་མེད་ཞི་བའི་ལམ་བཟང་ལ་བརྟེན་ནས་ཡངས་བའི་རྒྱལ་ཁམས་ཀུན་ཏུ་ཞི་བདེའི་དཔལ་ལ་རོལ་བར་སྨོན། བཀྲ་ཤིས་བདེ་ལེགས། ཐུགས་རྗེ་ཆེའོ། ། རྒྱ་བླ་གཙོ་འཁོར་ལ་སྙན་ཞུ།རྒྱ་བླ་གཙོ་འཁོར་ལ་སྙན་ཞུ། སྤྱི་ཚོགས་ཀྱི་ཁོར་ཡུག་ན་རྒྱ་བླའི་ཉེས་སྐྱོན་ཆེར་གླེང་བ་ནི། རྒྱ་བླ་ཕལ་ཆེ་བའི་ཀུན་སྤྱོད་མ་ལེགས་པའི་དབང་གིས་རེད། འོན་ཀྱང་རྒྱ་བླའི་ནང་ན་རེ་ཟུང་ལྷག་བསམ་པ་དང་དྲང་བདེན་པ་ཡོད་པ་མཐོང་ཐོས་སུ་གྱུར་བ་ཡོད། ཕལ་ཆེར་གཡོ་སྒྱུས་དཔལ་འབྱོར་བསྡུ་ལེན་བྱེད་ཚུལ་གྱི་ཐབས་ལམ་ནི་ཇག་ཚོགས་ཀྱི་སྤྱོད་པ་དང་ཀུན་ནས་མཚུངས་སོ། །ངས་དེ་རིང་བཤད་འདོད་པ་གཙོ་བོ་རྒྱ་བླའི་རྒྱབ་རྟེན་བོད་བླ་དང་དེའི་རྒྱུག་ཁྱི་རྣམས་ཀྱི་རྐུན་མ་རྐུན་ཁུག་བྱས་ནས་ཁྲི་འདོན་དང་སེར་ཕྲེང་གིས་བསུས་ནས་རྒྱ་རིགས་མང་པོ་ལ་མགོ་འཐོམ་དུ་བཅུག་ནས་དཔལ་འབྱོར་ལེན་པ་ནི་དགེ་སློང་ཞིག་ཡིན་ན་མ་བྱིན་ལེན་གྱི་ཕམ་པས་གོས་པར་འགྱུར་རོ། །རྒྱ་བླའི་རྒྱུག་ཁྱི་རྣམས་ཀྱིས་སྐེ་ལ་པར་ཆས་ཞིག་ཁུར་ནས་ཚབ་ཚུབ་ངང་གྲྭ་རྐྱང་རྣམས་ཀྱིས་སྟེང་དུ་ཕར་མཆོང་ཚུར་མཆོང་བྱས་ནས་པར་དང་བརྙན་བླངས་བ་དེའི་དམིགས་ཡུལ་ནི། ཡུན་ཐུང་ཞིག་མིན་པར་མི་ཚེ་གང་ལ་ཚོང་རྫས་བྱེད་བཞིན་ཡོད་པ་རེད། ཚོང་རྫས་ལེགས་གྲུབ་བྱུང་བ་ནས་དགོན་པ་ལ་རོགས་སྐྱོར་ཆུང་ངུ་དེ་ཡང་ཆད་འགྲོ། སྤྲུལ་སྐུ་མ་ཡིན་པ་ལ་སྤྲུལ་སྐུ་ཡིན་པ་དང་དགོན་བདག་མ་ཡིན་པ་ལ་དགོན་བདག་གི་མིང་རྫུན་བཏགས་པ་སོགས་ནི་ང་ཚོ་དད་ལྡན་མང་ཚོགས་ཀྱི་སྐྱབས་གནས་ཡིན་པ་སོགས་ཀྱི་ཆ་ནས་ཧ་ཅང་བློ་ཕམ་དགོས་པ་དང་སྐྱོ་བའི་གནས་སུ་མཐོང༌། །སྐྱབས་གནས་རྣམས་ཀྱིས་དད་ལྡན་མང་ཚོགས་ཀྱི་མགོ་སྐོར་བ་ནི་མི་འོས་སོ། །རྒྱུག་ཁྱི་རྣམས་ཀྱིས་རྒྱུགས་དངུལ་གྱི་ཆེད་ཡིན་པས་སྙིང་རྗེའི་གནས་ཡིན་པར་མ་ཟད་རྒྱ་བླའི་ངོ་དཀར་ནག་ལ་བལྟས་ནས་ཡོན་ཏན་མེད་ཀྱང་བསྟོད་ར་དང་གཞན་ལ་ཕྲག་དོག་སོགས་བྱེད་པ་ནི་ཤ་ཁྱི་དང་ཀུན་ནས་མཚུངས་སོ། །རྒྱ་བླ་བྱོན་ཚེ་འཁོར་རྗེས་འབྲང་དང་བཅས་ཕེབས་ནས་མི་འདོད་པ་རྫུན་དང་ཕྲ་མ་ཕྲག་དོག་ནང་འཁྲུག་སོགས་རྩོད་རྙོག་གི་རྩུབ་འགྱུར་གྱི་ཚལ་ནང་དུ་བསླེབས་པ་དང་འདྲའོ། །རྒྱ་བླའི་ངག་ནས་གཞན་དོན་ཁོ་ན་བཤད་ནས་སེམས་ནས་བརྣབ་སེམས་ཁོ་ནས་འཁོར་ལོ་སྐོར་བར་མ་ཟད་བདག་ལ་རྒྱ་བླ་ཞིག་གིས་བཤད་དོན་ང་ཚོ་རྒྱ་བླ་རྣམས་ལ་རྒྱ་ཆ་དགུ་བཅུ་གོ་བརྒྱད་ལ་སྡོམ་པ་མེད་པར་འདུག་ཅེས་བཤད་སོང༌། རྒྱ་བླ་ལ་ཚོང་རྫས་ཀྱི་དགོས་མཁོ་གལ་ཆེན་ནི། རྒན་གསོ་དང་སློབ་གྲྭའི་མིང་ཙམ་དང༌། སྐུ་གསུང་ཐུགས་རྟེན་གྱི་ཚོང་ལས་དང༌། རྟེན་རྙིང་བཅས་ཡིན་འདུག འདོད་དོན་གཙོ་བོ་ནི། ཁང་བ་རླངས་འཁོར་རིགས་མ་ཐོབ་གོ་ས་སོགས་སོ། །འདིར་ཚིག་ཉུང་བསྡུས་བཤད་དགོས་དོན་ནི། དགོན་པར་རྒྱུན་སྡོད་བཅས་པའི་ཤེས་ཡོན་མེད་པའི་བླ་རྒན་རྣམས་ཀྱི་རྒྱ་བླའི་རྒྱབ་བརྟེན་བཅས་ནས་མ་བྱིན་ལེན་གྱི་ཕམ་པ་འབྱུང་བ་བཟློག་ཕྱིར་དང༌། རྒྱུག་ཁྱི་རྣམས་ཀྱིས་དཔལ་འབྱོར་གྱི་ཆེད་བསྟན་པ་ཚོང་རོགས་བྱས་ནས་ལས་ངན་བསགས་པ་བཟློག་པའི་ཆེད་དང༌། གྲྭ་རྐྱང་ཤེས་ཡོན་པ་རྣམས་ཀྱིས་རྒྱ་བླ་ཁྲི་འདོན་དང་སེར་ཕྲེང་གིས་བསུ་བ་མི་འདོད་ཀྱང་དབང་འཛིན་པ་དང་སྒེར་གཅོད་པ་རྣམས་ཀྱི་བཙན་དབང་གིས་དགོན་དོན་ཡིན་མདོག་བཤད་ནས་དབང་བསྒྱུར་བྱས། དོན་ལ་དབང་འཛིན་དང་སྒེར་གཅོད་པའི་ཁུག་མ་ནང་ལ་འབབ་ཡོང་བཟང་པོ་ཡོད་པས་རེད། དེ་ལྟར་འཇིག་རྟེན་གྱི་སྒྱུ་མའི་གཡོ་སྦྱོར་བརྗོད་མཐའ་བྲལ། དེ་འདྲའི་ཉེས་སྐྱོན་མེད་པའི་རྒྱ་བླ་ལ་ཞུས་པ་མ་ཡིན་པས་དགོངས་འགལ་མེད་པར་ཞུ། རྒྱལ་ཁམས་པ་དངོས་གྲུབ་དཔལ་གྱིས་སོ། །འཆད་ཉན་མེད་ན་ད་དུང་ཡང་རྗེས་ལུས་རེད། ཇོ་ནང་གི་སྡེར་གཏོགས་པ་ཀུན་ལ་ཞུ་གསོལ། དཔལ་ལྡན་རྒྱལ་བ་ཇོ་ནང་བའི་བསྟན་པ་དར་འཕེལ་མི་འགྲོ་བའི་གནད་འགག་ནི་འཆད་ཉན་མེད་པའམ་བསྟན་པ་ལ་འཇུག་རིམ་ཆ་མ་ཚང་བའི་དབང་གིས་རེད། ང་ཚོ་ཇོ་ནང་བའི་བླ་རྒན་རྣམས་ཀྱིས་སློབ་གསོ་ལ་བརྟེན་ནས་ཐོས་བསམ་སྒོམ་གསུམ་ལས་ཉམས་པར་འགྱུར་བའི་གནས་ཚུལ་མང་པོ་མཐོང་རྒྱུ་འདུག སྤྱིར་ཆོས་གང་སྒོམ་ན་དེ་ཤེས་དགོས་ཤིང༌། སྤང་བྱ་གང་སྤང་ནའང་དེ་ངོས་ཟིན་དགོས་པ་དང༌། བྱ་བ་གང་ཞིག་བསྒྲུབ་ནའང་བྱ་བའི་གནས་བབ་ལ་རྒྱུས་ལོན་པའམ་ལེགས་པར་རྟོགས་པ་དང༌། དེར་མ་ཟད་བསྟན་པ་གཞན་ལ་འཆད་ནའང་བསྟན་པ་ཤེས་དགོས་པ་དང༌། རང་གིས་ཉམས་སུ་བླང་ནའང་ཉམས་སུ་ལེན་བྱ་དེ་ཤེས་དགོས་པ་རེད། ཐ་ན་དམངས་ཚོགས་ལ་ནང་ཆོས་ངོ་སྤྲོད་ཙམ་བྱེད་པ་ལ་ཡང་རང་གིས་ནང་ཆོས་ཤེས་དགོས་པ་གཞིར་བཞག་རེད། འཇིག་རྟེན་ན་གཞན་གྱིས་དྲི་བ་ཞིག་དྲིས་ནས་ལན་ཙམ་ཞིག་བྱ་བ་ལའང་ཤེས་རབ་ལ་མ་བརྟེན་ཐབས་མེད་པ་རེད། མདོར་ན་སྤང་བྱ་མ་རིག་པ་སེལ་བ་དང་ཐམས་ཅད་གཟིགས་པ་ཐོབ་དགོས་པ་གང་ལ་བསམ་ནའང་ཤེས་རབ་གཤིས་ཕྱིན་པ་ཞིག་སློབ་དགོས་པར་སྨོས་མ་དགོས་པ་རེད། གལ་ཏེ་ཤེས་རབ་ཀྱི་སྤྱན་མེད་ན་གང་ལ་བརྩོན་ན་མིག་ལོང་གིས་ལས་ཀ་བྱས་པ་དང་འདྲ་བར་རང་མགོ་ཐོན་པ་ཞིག་ཡོང་མི་སྲིད་པ་རེད། རང་ཅག་ཇོ་ནང་བ་ལ་མཚོན་ན་དུས་འཁོར་གྱི་རྒྱུད་དོན་ཆ་ཚང་བ་ཞིག་བཤད་མཁན་ཉིན་སྐར་གྱི་དོད་དུ་སླེབས་ཡོད་པ་ཡིན་ནའང༌། རྡོ་རྗེ་སློབ་དཔོན་རྣམས་ཀྱི་བཀའ་དྲིན་ལ་བརྟེན་ནས་དུས་འཁོར་གྱི་དབང་ལུང་མན་ངག་ཅུང་ཟད་རེ་བཞུགས་ཡོད་པས་དེ་ལ་འཆད་ཉན་སྒོམ་སྒྲུབ་བྱེད་དགོས་པ་ནི་ང་ཚོའི་ལས་འགན་གཙོ་བོ་ཞིག་ཏུ་ཆགས་འདུག་དྲན། སྔོན་བྱོན་དམ་པ་འགའ་ཞིག་གིས་ཐོས་བསམ་མ་བྱས་པར་ཉམས་རྟོགས་རྒྱུད་ལ་འཁྲུངས་སོང་བ་རེད། དེས་ན་ཐོས་བསམ་བྱེད་པ་ལ་དགོས་པ་མེད་པར་སྒོམ་བརྒྱབ་བཞག་ན་དེས་འགྲིག་པ་རེད་བཤད་མཁན་མ་མང་ན་མི་ཉུང་བ་ཞིག་ཡོད་པ་རེད། འདིར་དེ་ལ་གསལ་བཤད་མདོར་མཚོན་ཞིག་ཞུ་འདོད་སྐྱེས་བྱུང༌། སྤྱིར་ཐོས་བསམ་མ་བྱས་པར་སྒོམ་གྲུབ་པ་ནི་རྒྱུ་འབྲས་མི་བསླུ་བས་མི་སྲིད་མོད། ཚེ་འདིར་ཐོས་བསམ་གཙོ་ཆེར་མ་བྱས་ན་ཐོས་བསམ་གྱི་སྦྱངས་བ་སྔོན་དུ་སོང་ནས་ད་ལྟ་སྒོམ་ཉམས་རྟོགས་སྐྱེ་བ་ཡོད་པ་རེད། དེས་ན་སྤྱིར་བཏང་ཐོས་བསམ་དཔེ་ཀློག་མི་དགོས་བཤད་པ་ནི་སྒོམ་མི་དགོས་ཟེར་བར་དོན་གྱིས་སོང་འདུག་པ་ཡིན་ཏེ། མ་ཤེས་ན་སྒོམ་རྒྱུ་མེད་པའི་རིགས་པ་ཙམ་གྱིས་ཀྱང་གྲུབ་པས་སོ། །སྟོང་སྐད་པ་ཁ་ཅིག་གིས་མདོ་རྒྱུད་ཀྱི་ཁུངས་ཅི་ཡང་འདྲེན་དུ་མེད་པར་འདི་ཐོས་པ་ཙམ་གྱིས་གྲོལ་འགྲོ། འདི་སྒོམ་པ་ཙམ་གྱིས་འཚང་རྒྱ་འགྲོ་བ་རེད། འདི་ལས་གཞན་པའི་ཆོས་མེད། འདི་དང་བྲལ་ན་ཆོས་དང་བྲལ་བ་ཡིན་ཞེས་ཤར་ཚོད་དྲན་ཚོད་པོ་བཤད་འདུག་པ་ནི། ཆོས་ལ་བརྟེན་ནས་ཆབ་སྲིད་སྒྲུབ་པ་ཡིན་པས་དོར་བར་རིགས་སོ་ཞེས་བློ་གསལ་དག་ལ་གསལ་འདེབས་ཤིག་ཞུ། སངས་རྒྱས་བྱང་སེམས་ས་མཐོན་པོ་ལ་གནས་པ་འགའ་རེ་སེམས་ཅན་གྱི་དོན་བྱེད་པར་བསམ་བཞིན་དུ་བྱོན་པ་རེ་ཟུང་གིས་ཐོས་བསམ་མཛད་པའི་ཚུལ་མི་གནང་བ་སྲིད་ཀྱང༌། དེས་མཚོན་ནས་སོ་སྐྱེ་འཆང་བ་ཀུན་ལྡན་བདག་ལྟ་བུ་རྣམས་ཀྱིས་ཐོས་བསམ་བྱེད་མི་དགོས་པར་བཤད་པ་ནི་ཞྭ་དཔེ་ལྷམ་ལ་འགེབ་པ་དང་འདྲ་བར་བདོག སྔགས་བླ་ན་མེད་པ་ནི་དམ་ཆོས་ཀུན་གྱི་མཆོག་ཏུ་གྱུར་བ་ཡིན་པས་འདི་ཁོ་ན་སྒོམ་པས་འཐུས་ཀྱི། ཐུན་མོང་གི་གཞུང་ལ་སྦྱང་བ་གཏན་མི་དགོས་པར་བཤད་ཀྱིན་ཡོད་པ་ནི་དཔེར་བཞག་ཏེ་བཤད་ན། རིན་པོ་ཆེའི་མཆོག་ཏུ་གྱུར་བ་གསེར་ཡིན་ཡང༌། ཁྱི་ལ་གསེར་གོང་ཞིག་བྱིན་པས་ཕན་མི་ཐོགས་པ་རེད། དེ་ལས་གཞན་དུ་རང་ལ་འཚམས་པའི་ཁ་ཟས་འགའ་རེ་གཡུག་ན་ཏན་ཏན་ཕན་འགྲོ་བ་བཞིན་དུ། གང་ཟག་རང་རང་གི་རྒྱུད་ཚོད་དང་བསྟུན་ནས་ཆོས་བཤད་པ་དང་སྒྲུབ་པ་གལ་ཆེ་བ་ཁོ་ན་ཡིན། དེའང་ཇོ་བོ་རྗེ་བོད་དུ་ཕེབས་པ་ན་བླ་མ་སྐྱབས་འགྲོ་བ་དང་བླ་མ་ལས་འབྲས་པ་ཞེས་མིང་ཐོགས་སོང་བ་ཡང༌། ཇོ་བོ་ཆེན་པོས་གསང་སྔགས་བསྟན་མ་ཤེས་པ་ག་ལ་ཡིན། གསང་སྔགས་བླ་མེད་ཀྱི་བསྐྱེད་རྫོགས་བཤད་ན་རྒྱུད་ལ་སྐྱེ་བ་ཡོད་པ་དང་བག་ཆགས་འཇོག་པ་སོགས་དགོས་པ་བླ་ན་མེད་པ་ཡོད་པ་གཞིར་བཞག་རེད། འོན་ཏེ། གཞུང་ལུགས་ཆེན་པོ་དག་ལ་འཆད་ཉན་གང་ཡང་མི་དགོས་ཟེར་བ་དེ། གདུལ་བྱ་ཁམས་དབང་མི་འདྲ་བ་མང་པོར་སངས་རྒྱས་ཀྱིས་ཆོས་ཕུང་བརྒྱད་ཁྲི་བཞི་སྟོང་གསུངས་བ་དོན་མེད་དུ་སྨྲས་པར་འགྱུར་བས། རང་ཅག་ཇོ་ནང་གི་བསྟན་ལ་ལྷག་བསམ་ལྡན་པ་དག་གིས་ངེས་པར་དུ་བརྟག་དཔྱད་གཏོང་དགོས་པར་གྲུབ་འདུག ཐོས་པ་བ་རྣམས་ཀྱིས་སྒོམ་གྲྭ་བ་ལ་བླུན་སྒོམ་པ་ཞེས་འབོད་པ་དང༌། སྒོམ་གྲྭ་བ་རྣམས་ཀྱིས་ཐོས་པ་བ་དག་ལ་ང་རྒྱལ་ཅན་སོགས་སུ་འདོགས་པའི་སྒོ་ནས། ཕན་ཚུན་ངན་སྨོད་ཁོ་ན་བྱེད་པ་ནི་བདུད་སྡིག་ཅན་གྱིས་ཆོ་འཕྲུལ་རང་དུ་འདུག་པས་གཟབ་འཚལ་བ་གཅིག་ལགས། ཇོ་ནང་གི་འདས་པའི་ལོ་རྒྱུས་ལ་ཕྱི་མིག་ཅིག་བལྟས་ཡོང་ན་ཇོ་ནང་ཀུན་མཁྱེན་ཡབ་སྲས་དང་རྗེ་ཏཱ་ར་ནཱ་ཐའི་སྐུ་རིང་ལ་ཐོས་བསམ་སྒོམ་གསུམ་ཡ་མ་བྲལ་བར་ཡོད་པའི་དབང་གིས་ཇོ་བསྟན་འདི་ཅུང་ཟད་དར་འཕེལ་བྱུང་བར་ཆགས་འདུག་མོད། དེའི་རྗེས་ནས་རིམ་གྱིས་མིང་ཙམ་ལ་ཕལ་ཆེར་ཆགས་སོང་བ་འདི། ཐོས་བསམ་སྒོམ་གསུམ་ཉམས་ཆགས་འདི་ཁོ་ན་ལས་བྱུང་འདུག་དྲན། འགའ་ཞིག་གིས་བཤད་པ་ལྟར། སྒོམ་པ་ལ་སྒོམ་རྒྱུ་དེ་ཤེས་མི་དགོས་པ་ཡིན་ན། དེའི་ཁུངས་བཀའ་འགྱུར་པོད་བརྒྱ་ལྷག་དང་བསྟན་འགྱུར་པོད་ཉིས་བརྒྱ་མཆིས་པ་དག་ལས་ལུང་ཚིག་གཅིག་ཙམ་རེ་ཡོད་ན་གསུངས་རོགས་ཞུ། དེ་མེད་ན་གཏེར་རྫུན་གྲུབ་རྫུན་སྒོམ་རྫུན་རེའི་ལུང་རྫུན་ཙམ་ལ་ཡིད་རྟོན་དང་བྲལ་བས་ཁུངས་སུ་མི་ཆེ། དེས་ན་ད་ནི་ང་ཚོ་ཇོ་ནང་བ་རྣམས་ཀྱིས་བཤད་སྒྲུབ་ཀྱི་བསྟན་པ་ཟུང་འབྲེལ་དུ་བསྐྱང་དགོས་པ་དང༌། དེ་ཡང་ཉམས་སུ་བླང་བྱ་རྣམས་ཤེས་ནས་ཉམས་སུ་ལེན་དགོས་པ་ཡིན་པས་ཇོ་ནང་གི་དགོན་བདག་དང་རྡོ་རྗེ་སློབ་དཔོན་དང་མཁན་པོ་དང་ཐོས་བསམ་སྒོམ་གསུམ་ལ་བརྩོན་པའི་གྲྭ་རྐྱང་དང་གྲོང་ཆོག་པ་སོགས་ཇོ་ནང་བར་གཏོགས་པ་ཀུན་ལ་ལག་ཐལ་མོ་སྦྱར་ནས་སྤྲང་འཁྱམ་པ་དངོས་གྲུབ་དཔལ་གྱིས་ཞུས་པའོ། །ཕྱིན་ཅི་ལོག་ཏུ་མི་འགྲེལ་བར་ཞུ། དངོས་གྲུབ་དཔལ་གྱིས། གཞན་གྱི་གཡོ་སྒྱུའི་གནོན་ཤུགས་ཇི་ལྟར་ཆེ་ཡང་ཀུན་སྤྱོད་གཙང་མའི་རང་ཚུགས་དགོས། རང་གི་ཀུན་སྤྱོད་ལེགས་ན་ཤེས་ཡོན་པ།དྲང་བདེན་པ། ལྷག་བསམ་པ་རྣམས་ཀྱི་བསྟོད་བསྔགས་ཀྱི་མེ་ཏོག་མངོན་པར་གཏོར་ལ། འོན་ཀྱང་ཀུན་སྤྱོད་ལེགས་ན་ཕྲག་དོག་ཅན་དང་གཡོ་སྒྱུ་ཅན་དང་གོ་ས་དང་མིང་ལ་འགྲན་རྩོད་པ་དག་གིས་ཆབ་སྲིད་ཀྱི་གཡོ་སྒྱུའི་མིག་འཕྲུལ་སྣ་ཚོགས་བསྟན་ནས་སྒྲོ་འདོགས་དང་བསྐུར་འདེབས་ཡོང་བ་ནི་དཔེར་ན་སྟོན་པ་ལ་ལྷས་སྦྱིན་བཞིན་ནོ། །ཀུན་སྤྱོད་མི་ལེགས་ན་དེ་ལས་ལྡོག་པའོ། །སྤྱིར་མི་སུ་ཡིན་ན་རང་ལ་ཡོན་ཏན་རེ་ཡོད་ན་གཞན་གྱིས་ཕྲག་དོག་བྱེད་ན་ཡང་རང་གི་གཟི་བརྗིད་ལས་མ་འདས་སོ། །འོན་ཀྱང་གཞན་གྱི་བསམ་སྦྱོར་ཇི་ལྟར་ངན་ཡང་གཞན་ལ་གནོད་པ་བྱེད་མི་རིགས་པ་མ་ཟད་གཞན་ལ་བྱམས་བརྩེས་བལྟ་དགོས་ཏེ། ཇི་སྐད་དུ། བདག་ལ་བརྟེན་ནས་ནམ་དུ་ཡང༌། །གཞན་ལ་གནོད་པར་མ་གྱུར་ཅིག །སྒོ་གསུམ་གང་དང་གང་བརྩམ་པ། གཞན་ལ་ཕན་པར་འགྱུར་བར་ཤོག །ཅེས་གསུངས་པ་ལྟར་རོ། །ཡིན་ན་ཡང་གཞན་གྱིས་དྲང་བདེན་མ་ཡིན་པའི་གནོན་ཤུགས་ཇི་ལྟར་སྤྲད་ཀྱང་གཞན་ལ་གསལ་བཤད་བྱེད་པའི་གོ་སྐབས་ཨེ་རྙེད་ལྟ་བ་ལས་གནས་ལུགས་དང་མ་འོངས་པའི་བསྟན་པ་དང་ལས་འབྲས་འདོར་མི་རུང་བར་དམ་བཅའ་འམ་ཁ་ཕྱོགས་བརྟན་དགོས་སོ། །སྤྲང་འཁྱམ་པ་ངག་དབང་དངོས་གྲུབ་དཔལ་ནས། དེང་སང་ཁ་དང་ལག་ལེན་སོ་སོ། དེང་སང་གི་བྱ་བ།དེང་སང་ཁ་དང་ལག་ལེན་སོ་སོ། དེང་སང་གི་བྱ་བ་ནི། ༡ ཁག་གཅིག་གིས་ཁ་ནས་བཟོད་སྒོམ་དང་གུ་ཡངས་དགོས་མདོག་བཤད་ནས་ཁོག་ནས་ཁོང་ཁྲོ་དང་འཁོན་འཛིན་གཞན་ལ་གནོད་འཚེ་ཁོ་ན་རྩོམ་བཞིན་པའི་ཁ་ཁོག་གི་རིམ་པ་གཉིས་ཡོད། ༢ ཁག་གཅིག་གིས་མཐུན་འབྲེལ་བཤད་ནས་རང་གི་འོག་ན་གནས་པ་རྣམས་ལ་མི་མཐུན་པའི་རྒྱུར་དབྱིན་དཀྲུག་ཕུང་སྦྱོར་སོགས་ལྐོག་ཏུ་སློང་བར་བྱེད་དུ་བཅུག་པའི་ཕྱི་ནང་གི་རིམ་པ་གཉིས་ཡོད། ༣ ཁག་གཅིག་གི་འདོད་ཆུང་ཆོག་ཤེས་དགོས་རབས་བཤད་ནས་དོན་ལ་དཔལ་འབྱོར་སོགས་འཇིག་རྟེན་ཆོས་བརྒྱད་ཁོ་ན་རྩོམ་པའི་ཁ་དང་ལག་ལེན་གྱི་རིམ་པ་གཉིས་ཡོད། ༤ ཁག་གཅིག་གིས་ངོ་ཐུག་ཚེ་ངོ་བསྟོད་ཀྱི་ཁུ་བྱུག་གྲགས་ནས་ལྐོག་ནས་བླ་བཙག་གི་འུག་པ་དགོད་པའི་མངོན་ལྐོག་གི་རིམ་པ་གཉིས་ཡོད། ༥ ཁག་གཅིག་གིས་བསྟན་འགྲོའི་དོན་བཤད་ནས་རང་གིས་སྤྱོད་ངན་སྣ་ཚོགས་བྱས་ནས་བསྟན་འགྲོ་ལ་གནོད་པར་བྱེད་པའི་བཤད་པ་དང་བྱ་བ་འགལ་བའི་རིམ་པ་གཉིས་ཡོད་འདུག ༦ ཁག་གཅིག་གིས་ཕྱི་ལ་རིས་མེད་དགོས་པར་བཤད་ནས་ནང་ནས་རིས་ནག་གི་ཆགས་སྡང་དགོས་པར་བཤད་པའི་ཕྱི་ནང་གི་རིམ་པ་གཉིས་ཡོད་འདུག ༧ ཁག་གཅིག་གིས་ཆོས་ལ་སྐྱབས་སུ་སོང་ནས་སྒོ་དུ་མ་ནས་ཆོས་ཚོང་ཁོ་ན་བྱེད་པའི་སྐྱབས་དང་ཚོང་རྫས་ཀྱི་རིམ་པ་གཉིས་འདུག མདོར་ན་དངོས་གནས་པ་དང་གར་འཁྲབ་པ་གཉིས་ཡོད་པར་ཤེས་དགོས། མ་ཤེས་ན་འདི་འདྲ་ལ་རྟེན་ནས་འཇིག་རྟེན་པ་མང་པོ་མགོ་རྨོངས་ནས་ཆོས་དང་ཆོས་མིན་ནོར། དམ་པ་དམ་མིན་ནོར། བདེན་རྫུན་ནོར། ཆོས་དང་འཇིག་རྟེན་ནོར། བཟང་ངན་ནོར། དོན་དངོས་ཡིན་མིན་ནོར་བ་སོགས་ནོར་བའི་འཕྲེང་བ་མཐའ་ཡས་སོ། །དེས་ན་ཁ་བཤད་ལ་མི་ལྟ་བར་བྱ་བའི་བརྒྱུད་རིམ་ལ་བལྟས་ནས་བཟང་ངན་དབྱེ་འབྱེད་དགོས་པར་སེམས་སོ། །མདོ་ལས། བྱང་ཆུབ་སེམས་དཔའ་བློ་ལྡན་གྱི། །རིགས་ནི་མཚན་མ་དག་ལས་ཤེས། །ཞེས་གསུངས་པ་ལྟར་དཔྱད་ན་ཤེས་ནུས་པའོ། །འདི་ནི་ངག་དབང་དངོས་གྲུབ་དཔལ་ནས་མགོ་འཁོར་བའི་མི་དུ་མ་ལ་ཕན་ཕྱིར་དུ་བྲིས་པའོ། །བདག་ཉིད་ཆེན་མོ་རྒྱ་གར་གྱི་མ་ཧ་གན་དྷིས། ས་ཆེན་མོ་འདིས་འགྲོ་བ་མིའི་རིགས་ཀྱི་དགོས་མཁོ་སྐོང་ཐུབ་ལ། འོན་ཀྱང་མི་གཅིག་གི་ཧམ་སེམས་དེ་ནམ་ཡང་བསྐང་མི་ཐུབ། ཅེས་པའི་སྐད་ཆ་དེས་ཧམ་སེམས་ཅན་གྱི་འདོད་རྔམས་ནམ་ཡང་བརྐོང་མི་ཐུབ་པ་ཡིན་ལ། འདོད་རྔམས་ཅན་དང་བསྟུན་ན་རང་གི་མི་ཚེའི་བྱ་བཞག་དང་ཀུན་སྤྱོད་བརླག་པར་འགྱུར་བ་ཤེས་དགོས། སྤྱིར་རང་ཉིད་ཇི་ལྟར་བཟང་ན་ཡང་མི་ཐམས་ཅད་ཀྱི་འདོད་བློ་གང་བ་དང༌། མི་ཀུན་གྱིས་མཐོང་ཆེན་དུ་རྩི་མི་སྲིད། དེས་ན་མི་སུ་ཡིན་ན་ཡང་རང་གིས་ལྷག་བསམ་དང་འབྲེལ་བའི་བདེན་དྲང་གི་ཕྱག་ལས་གནང་བ་ལས་ཀུན་གྱིས་ཡིད་ནང་དུ་འཇོག་པའམ་འཐད་པའི་བྱ་བ་བསྒྲུབ་འདོད་པ་ནི་འགྲུབ་མི་སྲིད་པས་ནོར་འཁྲུལ་རེད། རང་གི་དོན་ཆེན་གྱི་བྱ་བ་བསྒྲུབ་པ་ལ་འགལ་རྐྱེན་བར་ཆད་སོགས་ཡོད་སྲིད་མོད། དེ་ལ་མགོ་མི་སྒུར་བར་བཟོད་སྒོམ་དང་སྤོབས་པ་དང་ཉམས་མྱོང་གི་རྒྱུ་རུ་བསྒྱུར་ཤེས་པ་གལ་ཆེ། བཀྲ་ཤིས་སྣ་ནག་མ་དང་ལྷན་ཅིག་པའི་དཔེ་ལྟར་བྱ་བ་ཞིག་སྒྲུབ་པ་ལ་གཞན་གྱི་ཕྲག་དོག་སོགས་ཡོང་བ་ན་རང་གི་བྱ་བ་དེ་གཟི་བརྗིད་དང་ལྡན་པའི་དན་རྟགས་ཞིག་རེད། སྤྱིར་ཀུན་དང་མཐུན་པ་མི་ཆོས་ཀྱི་རྩ་བ་ཡིན་མོད། མཐུན་ལུགས་ནི་ཆོས་པ་ཞིག་ཡིན་ན་ཆོས་དང་མཐུན་པ་ལས་ཆོས་འགལ་དང་མཐུན་མི་རུང་ལ། ཆོས་དང་མི་འགལ་ས་ཞིག་ནས་འཇིག་རྟེན་པ་དང་མཐུན་ན་བཟང་ཀྱང་ཤན་པ་ཆང་འཐུང་སོགས་གཡོ་སྒྱུ་ཅན་དང་མཐུན་ན་འཕྲལ་ཕུགས་ཀྱི་བདེ་འབྲས་བརླག་པར་འགྱུར་རོ། །ཁ་ཅིག་སྙན་གྲགས་དང་དཔལ་འབྱོར་གྱི་ཆེད་ཆོས་མིན་དང་མཐུན་པར་བྱེད་པ་ནི་གླེན་པ་གཏི་མུག་ཅན་ཡིན་ནོ། །འོན་ཀྱང་དེང་སང་ཁ་ཙམ་གྱི་ལེགས་བཤད་བྱེད་པ་མང་ཡང་ལག་ལེན་གྱི་ཚེ་ཁྱིམ་པ་ཕལ་བ་ཞིག་དང་ཁྱད་མེད་པའི་ཆོས་རྫུ་མཁན་ཇེ་མང་དུ་འགྱུར་བཞིན་པས་གཟབ་གཟབ་བྱེད་དགོས་སོ། །རྒྱལ་ཁམས་པ་དངོས་གྲུབ་དཔལ་གྱིས་རབ་རྒྱན་མེ་སྤྲེལ་ལོའི་ཆུ་སྟོད་ཟླ་བའི་ཚེས་ཉེར་དགུའི་སྲོད་ཐུན་གྱི་དུས་སུ་བྲིས་པའོ། ། གནད་བསྡུས་ནི། ལྟ་སྤྱོད་ཀྱི་སྡེ་ཚན་གཉིས།གནད་བསྡུས་ནི། ལྟ་སྤྱོད་ཀྱི་སྡེ་ཚན་གཉིས་ལས། དང་པོ་ལྟ་བའི་སྐོར་ནས་རགས་ཙམ་གླེང་ན་དངོས་གཙོ་སྨྲ་བའི་ལྟ་གྲུབ་ནི་དབང་ཤེས་ཀྱི་མངོན་སུམ་གྱི་ཡུལ་ཙམ་ལས་གཞན་ཁས་མི་ལེན་པའི་ལུགས་ཞིག་རེད། ༡ ང་ཚོ་ནང་བ་སངས་རྒྱས་པའི་ལྟ་བ་ཐུན་མོང་བ་ནི་བཀའ་རྟགས་ཀྱི་ཕྱག་བརྒྱ་བཞི་ཡིན་པས་ཁྱད་པར་ཤེས་དགོས། ནུབ་ཕྱོགས་ཀྱི་སློབ་གསོ་ཕལ་ཆེར་ཡེ་ཤུའི་ཆོས་ལུགས་དང་འབྲེལ་བ་ཡིན་པས་ཁོ་ཚོས་ཚེ་སྔ་ཕྱི་ཁས་མི་ལེན་པས་ཚེ་འདི་དང་འགྲོ་བ་མི་གཅིག་པུའི་ཐོབ་ཐང་དང་འཚོ་གནས་སྒྲུབ་ཚུལ་གྱི་ཐབས་ཙམ་ཡིན་ལ། ནང་བསྟན་གྱི་སློབ་གསོ་ནི་ཚེ་སྔ་ཕྱི་ཁས་བླངས་བའི་སྟེང་ནས་འཁོར་བའི་བདེ་བ་མ་ཟད་ཐར་བ་དང་ཐམས་ཅད་མཁྱེན་པའི་གོ་འཕང་ཐོབ་བྱེད་ཀྱི་ཐབས་ལམ་ཞིག་ཡིན་པས་ནུབ་ཕྱོགས་ཀྱི་སློབ་གསོ་དང་ནང་བསྟན་གྱི་སློབ་གསོའི་ཁ་ཕྱོགས་ཕུགས་རྒྱང་རིང་ཐུང་སོགས་ཀྱི་ཁྱད་པར་ཡོད་པ་ཤེས་དགོས། དེང་དུས་སུ་ནུབ་ཕྱོགས་ཀྱི་མཁས་པའི་གསུང་རྩ་ཆེན་དུ་རྩིས་ཏེ་བདག་ཅག་གི་སྟོན་པ་ནས་བཟུང་ད་ལྟའི་བར་གྱི་ནང་བསྟན་གྱི་མཁས་པ་རྣམས་ལ་རྩ་ཆེན་མི་རྩི་བ་དག་ནོར་བུ་ནོར་བུར་མ་ཤེས་པ་རེད་ཅེས་སོགས་བཤད། ༢ རིས་མེད་ལ་རིམ་པ་གསུམ་ཙམ་ཡོད། དང་པོ་ཉེ་རིང་ཆགས་སྡང་བྲལ་བའི་བཏང་སྙོམས་ལ་གནས་པ་ཡིན། རིམ་པ་གཉིས་པ་ནི་རང་གི་གྲུབ་མཐའི་ལུགས་ལ་གཏད་སོ་དང་བཅས་པའི་སྟེང་ནས་གཞན་གྱི་གྲུབ་མཐའ་ལ་ཞིབ་འཇུག་དང་ཉམས་ལེན་བྱེད་པ་ལྟ་བུ་ཡིན། རིམ་པ་གསུམ་པ་རང་ལུགས་ཀྱི་གྲུབ་མཐའ་ལ་སྦྱངས་ནས་གཞན་ལ་སྡང་ཞེན་མི་བྱེད་པ་ཡིན། བོད་ཀྱི་འདས་པའི་ལོ་རྒྱུས་ལྟར་ན་གང་ཟག་གི་ཆགས་སྡང་ཆོས་ལ་བསྲེས་ནས་རྙོག་དྲ་མང་པོ་བྱུང་བ་དེའི་དབང་གིས་མཐུན་འབྲེལ་མེད་པར་གྱུར་ནས་རྗེས་ལུས་ཀྱི་གྲངས་སུ་ཞུགས། དེས་ན་ད་ཕྱིན་ཆད་རིས་མེད་བྱེད་རྒྱུ་གལ་ཆེ། ༣ ལྟ་བ་རྣམ་དག་ལ་ཤེས་ཡོན་གལ་ཆེ་བས་ངེས་པར་སློབ་སྦྱོང་ལ་བརྩོན་དགོས། སློབ་སྦྱོང་བརྩོན་ཚུལ་ཡང་དགེ་བའི་བཤེས་གཉེན་བསམ་སྦྱོར་གཉིས་ཀྱིས་ཚུལ་བཞིན་དུ་བསྟེན་ནས་ཐོས་བསམ་སྒོམ་གསུམ་དགོས། འཆད་རྩོད་རྩོམ་གསུམ་ཚང་བ་སྦྱོང་དགོས། དཔེར་ན་རྩོད་པ་ལྟ་བུ་ཡིན་ན་རང་གིས་མ་ཤེས་པ་གཞན་གྱིས་ཤེས་པ་ལས་བློ་བསྐྱེད་ལོན་པ་དང་རང་གིས་ཤེས་པ་ཡང་ལུང་རིགས་ཀྱི་རྒྱབ་རྟེན་དང་བཅས་གོ་རིགས་ཟུང་དུ་འབྲེལ་བའི་ཞིབ་ཕྲ་ཤེས་པ་དང༌། རང་གི་ནོར་བ་དེ་ནོར་བར་ཤེས་པ་དང་ཕྱིན་ཆད་མྱུར་དུ་མི་བརྗེད་པ་སོགས་རྩོད་པ་ལ་ཕན་ཡོན་མང་པོ་ཡོད་པ་རེད་ཅེས་སོགས་བཤད། སྡེ་ཚན་གཉིས་པ་སྤྱོད་པ་ནི། ཆོས་འདུལ་བ་ནས་གསུང་བའི་སྤྱོད་པ་ནས་གསང་སྔགས་ཀྱི་བར་རམ་སོར་བྱང་སྔགས་གསུམ་གྱི་སྤྱོད་པ་ཧ་ཅང་མང་པོ་རེད། མདོར་བསྡུས་ན་ཐེག་དམན་སྐབས་སུ་གཞན་གནོད་གཞི་དང་བཅས་པ་སྤངས་བ་དང་ཐེག་ཆེན་གྱི་སྐབས་སུ་སྦྱིན་སོགས་ཕ་རོལ་དུ་ཕྱིན་པ་དྲུག་སོགས་ཀྱིས་གཞན་ལ་ཕན་བཏགས་པ་སྟེ་གཞན་ལ་གནོད་པ་སྤངས་ནས་ཕན་བཏགས་པ་ནི་སྤྱོད་པ་ཡིན་ལ། སྤྱིར་ནང་བསྟན་ནི་སྙིང་རྗེས་རབ་ཏུ་ཕྱེ་བ་ཡིན་པས་འཚེ་མེད་ཞི་བའི་སྤྱོད་པ་དགོས། འོན་ཀྱང་བོད་ན་ཆོས་འདུལ་བའི་རྩ་བ་བཞི་ཙམ་ཡང་སྲུང་མ་ཐུབ་ཚེ་མདོ་ལས་རིམ་པ་མཐོ་བའི་སྔགས་པ་ཡིན་མདོག་བྱེད་མཁན་གྱི་རྫུན་མ་ཆེས་མང་བ་བྱུང་དང་འབྱུང་བཞིན་པ་རེད། དེ་དག་གིས་བསམ་བློ་གཏོང་དགོས་ཀྱི་འདུག རང་རང་སོ་སོའི་ཚུལ་འཆལ་དང་བརྟུལ་ཞུགས་ཀྱི་སྤྱོད་པ་ནོར་མི་རུང༌། དེ་བཞིན་དུ་འདོར་ཞིག་དང་འཁྲུལ་ཞིག་ནོར་མི་རུང། ནང་ཆོས་ཀྱི་རྩེད་ཆས་བྱས་ཀྱང་རྒྱལ་ཁྲིམས་ཀྱི་ཆད་པ་རྒྱབ་པ་སོགས་མེད་པས་རང་གིས་བྱེད་ནུས་ཀྱང་མ་འོངས་པའི་བོད་བརྒྱུད་ནང་བསྟན་གྱི་རྒྱུན་སོགས་ནང་བསྟན་ལ་ཐུགས་བསམ་བཞེས་ནས་བསམ་པ་དཀར་དགོས། ཡང་རྒྱ་བླ་མང་པོས་རྫུན་མང་རབས་བཤད་ནས་གཞན་མགོ་སྐོར་གཏོང་བ་ནི་ནང་བསྟན་ལ་ཆེས་གནོད་པར་གྱུར་ལ། རྒྱ་བླ་དང་སྤྲུལ་རྫུན་མང་པོ་བཟོ་མཁན་ནི་བོད་བླ་རྣམས་ཡིན་ལ། དེ་ཡང་འབྱོར་ལྡན་དང་མཐོན་པོ་ལ་སྤྲུལ་སྐུས་མིང་བཏགས་པ་དང༌། རྒྱ་བླ་འབྱོར་ལྡན་ལ་སེར་ཕྲེང་གིས་བསུ་བ་ཁྲི་སྟོན་བྱེད་པ་རྒྱབ་གཉེར་ཡི་གེ་འབྲི་བ་སོགས་བྱས་ནས་རྒྱ་མི་རིགས་ཀྱི་མགོ་སྐོར་བཏང་བ་མང་པོ་འདུག ཐུགས་བསམ་བཞེས་དགོས་ས་རེད་མ་གཏོགས་རྒྱ་མི་རྣམས་སེམས་ཅན་ཐམས་ཅད་ཀྱི་གྲལ་གཏོགས་པ་རེད་ད། རྒྱ་ནང་སོང་ནས་ཞིབ་འཇུག་ཅིག་གིས་དང་ཚད་ལས་བརྒལ་བའི་རྫུན་བཟོ་བྱེད་བཞིན་མཆིས། སྤྱིར་ང་ཚོའི་བོད་བརྒྱུད་ནང་བསྟན་ལ་གཞན་གྱིས་ནང་བསྟན་མ་ཡིན་པར་བླ་མའི་ཆོས་ཞེས་བརྗོད་བཞིན་ཡོད་པ་རེད། དེའི་རྒྱུ་མཚན་བོད་བླ་མང་པོས་བུད་མེད་བསྟེན་ན་དགོས་པ་ཡོད་རབས་སོགས་རང་ཉིད་མི་དགེ་བ་བཅུ་གང་ལ་ཞུགས་ཀྱང་དགོས་པ་ཡོད་མདོག་དང༌། བླ་ཆེན་གྱི་མིང་འཛིན་པ་ལ་ཁྱིམ་ཐབ་པ་མང་བ་དང༌། ཕ་སྤྲུལ་སྐུ་ཡིན་ན་བུ་སྤྲུལ་སྐུ་ཡིན་པ་སོགས་གཅིན་རྒྱུན་ལ་ནམ་རྒྱུན་སྤྲུལ་སྐུ་བྱུང་བ་དང༌། སྤྲུལ་སྐུའི་ཚ་བོ་དབོན་པོ་ཡིན་པ་དང༌། བླ་མའི་རྒན་མོ་མཁའ་འགྲོ་མ་ཡིན་པ་དང༌། བླ་མས་འདོད་ཆུང་ཆོག་ཤེས་མི་དགོས་པར་ཁང་བ་དང་རླངས་འཁོར་རྫིག་པོ་དང་འཁོར་ལ་མཛའ་ན་མོས་སྐོར་བ་སོགས་བྱས་ནས་ཁ་ནས་འདོད་ཆུང་ཆོག་ཤེས་ཁ་དོན་བྱེད་པ་དང༌། བོད་ཀྱི་བླ་མ་ཕལ་ཆེ་བས་དབང་ལུང་བསྙེན་ཚད་སོགས་གང་ཡང་མེད་པར་གསང་སྔགས་ཁྲོམ་བསྒྲགས་བྱེད་པ་དང༌། རང་གི་ཉམས་ལེན་མི་བྱེད་པར་མི་ཚེ་གོར་དང་ཐོབ་གོ་སའི་ཆེད་དུ་མི་གསོད་པ་ངན་སྨོད་བྱེད་པ། མ་ཉེས་ཁ་གཡོག་བྱེད་པ་སོགས་མདོར་ན་ཆོས་ཆོས་ཀྱི་ས་ལ་མ་བཞག་པར་ཆོས་ལ་བརྟེན་ནས་དཔལ་འབྱོར་བསྒྲུབ། ཆོས་ལ་བརྟེན་ནས་ཆབ་སྲིད་བསྒྲུབ། ཆོས་ལ་བརྟེན་ནས་འཇིག་རྟེན་ཆོས་བརྒྱད་བསྒྲུབ་པའི་དབང་གིས་སྐྱོན་བརྗོད་སྣ་ཚོགས་བྱུང་དང་འབྱུང་བཞིན་པ་ཡིན་ལ། འོན་ཀྱང་སྐྱོན་དེ་དག་ནི་གང་ཟག་གི་སྒེར་སྐྱོན་ལས་ཆོས་ཀྱི་སྐྱོན་མ་ཡིན། ནང་ཆོས་ལས་བཤད་པའི་བདེན་པ་བཞི། བྱམས་སྙིང་རྗེ་སྟོང་ཉིད་ཀྱི་ལྟ་བ། ཕར་ཕྱིན་དྲུག་སོགས་ལ་སྐྱོན་བརྗོད་མཁན་ཉུང་ལ་དོན་དངོས་ལ་སྐྱོན་མེད་དུ་གནས་པ་ཡིན་པ་རེད། ནང་བ་ཞིག་ཡིན་པ་ནས་བཟུང་ནང་བསྟན་གྱི་དོན་བསམ་ཕོད་པ། བཤད་ཕོད་པ། སྒྲུབ་ཕོད་པ་དགོས། སྒེར་ལ་བབས་ཚེ་ཅུང་ཟད་ཙམ་ཡང་བཟོད་སྒོམ་མི་ཐུབ་པ་དང༌། སྤྱིའི་དོན་རྣམས་རྩ་མེད་དུ་གཏོང་ཡང་བཟོད་པ་བརྟེན་པ་ནི་བཟོད་པ་གོ་ལོག་པ་དང་ལྷག་བསམ་མེད་པའི་དབང་གིས་རེད། གཞན་ཡང་ནང་ཆོས་ནི་ཀྲུང་གོའི་རྒྱལ་ཁབ་ཀྱི་བཅའ་ཁྲིམས་ནང་རིག་གནས་ཀྱི་གྲལ་དུ་བཞག་མེད་པ་རེད། དེའི་རྐྱེན་གྱིས་ལོ་བཅོ་བརྒྱད་མན་ཆད་དགོན་སྡེར་ཞུགས་ནས་ནང་ཆོས་སྦྱང་བའི་གོ་སྐབས་མེད་པ་ཡིན་པས་ད་བཅའ་ཁྲིམས་ལ་བསྒྱུར་བཅོས་བཏང་ནས་ནང་བསྟན་རིག་གནས་ཀྱི་གྲལ་དུ་བཞག་རྒྱུ་དང་ལོ་བཅོ་བརྒྱད་མན་ཆད་དགོན་སྡེར་ཞུགས་ཆོག་པ་རེ་ཞུ་ཁུལ་ནང་བསྟན་དང་རྫོང་ནང་བསྟན་དང་དགོན་སྡེ་སོ་སོའི་ཀྲུང་དབྱང་ཐབས་ཕྱོགས་གཅིག་གྱུར་ཁང་ལ་འབུལ་ན་ད་ལོར་གོ་སྐབས་ཡག་ཤོས་ཞིག་རེད་ལགས། སྤྱིར་ནང་ཆོས་དང་སྐད་ཡིག་དང་རིག་གནས་སོགས་དར་སྤེལ་བྱེད་སའི་མི་རིགས་མེད་ན་རིག་གནས་གཏན་མེད་དུ་གྱུར་འགྲོ། བོད་ཀྱི་བུ་མེད་ཚོས་རང་གི་སྐྱེ་སྒོ་བཀག་ནས་མི་རིགས་རྩ་མེད་བྱེད་བཞིན་དུ་མི་རིགས་ཀྱི་སྐད་ཡིག་སོགས་གླེང་བ་ནང་འགལ་ཆེན་པོ་རེད་ཅེས་རྒྱུན་དུ་བསམ་བཞིན་ཡོད་པས་མི་རིགས་མེད་པར་མ་གཏོང་རོགས་བོད་ཀྱི་བུ་དང་བུ་མོ་ཚོ་ལགས། མཇུག་མཐར་ང་ཚོ་བོད་ཅིག་ཡིན་པའི་ཆ་ནས་ཁྲིམས་མཐུན་གྱི་མི་རིགས་དར་སྤེལ་རིག་གནས་དར་སྤེལ་བྱེད་རྒྱུ་དང༌། ནང་བ་པ་ཞིག་ཡིན་པའི་ངོས་ནས་ནང་བསྟན་དར་སྤེལ་དང་དག་བཅོས་གཙང་བཟོ་བྱེད་རོགས་ཞུ་བ་དང༌། གོང་དུ་ཞུས་པ་དེ་དག་ལས་གནས་ལུགས་དང་མི་མཐུན་པ་ཡོད་ན་བཟོད་གསོལ་ཞུ། ཐུགས་རྗེ་ཆེ། གསེར་ལྡན་རྒྱལ་ཁབ་ནས་མཐོང་ཐོས་ཀྱི་གཏམ།གསེར་ལྡན་རྒྱལ་ཁབ་ནས་མཐོང་ཐོས་ཀྱི་གཏམ། ཐེ་གོའི་གྲྭ་བ་དང་བོད་ཀྱི་གྲྭ་བའི་ཀུན་སྤྱོད་ཅུང་མི་འདྲ་ས་ ༡ ཁོང་རྣམས་ལ་བརྒྱ་ཆ་དགུ་བཅུ་གོ་བརྒྱད་སྤྱོད་ལམ་ཡག་པོ་འདུག ང་ཚོ་བོད་ལ་མཚོན་ན་ཐོས་བསམ་སྒོམ་གསུམ་གྱི་ལས་ལ་གཞོལ་བའི་གྲྭ་བ་རྣམས་བརྒྱ་ཆ་དགུ་བཅུ་གོ་བརྒྱད་ཀུན་སྤྱོད་ལེགས་ཀྱང༌། གྲོང་དགེ་བ་རེ་ཟུང་དང་གཙོ་བོ་རབ་བྱུང་མ་ཡིན་ཀྱང་རབ་བྱུང་གི་ངུར་སྨྲིག་གི་གོས་གྱོན་པ་དག་གིས་བསྲེ་ལྷད་ཅན་དུ་བྱས་ནས་རགས་ཙམ་ཡིན་ན་བརྒྱ་ཆ་བཞི་བཅུ་ལྷག་ཀུན་སྤྱོད་མི་ལེགས་པ་ཆགས་ཡོད་པ་དང༌། ༢ ཁོང་རྣམས་རབ་བྱུང་བྱེད་པའི་ཡུན་ཚད་ཐུང་ཤོས་ཉིན་བདུན་ནས་ཇི་སྲིད་འཚོའི་བར་ཡིན་པ་དང་མི་སུ་ཡིན་ན་རབ་བྱུང་ལ་བག་ཆགས་རེ་འཇོག་པའི་སྲོལ་རྒྱུན་ཡོད། རབ་བྱུང་བྱེད་མི་ནུས་ཚེ་ཁྱིམ་པ་ཁོ་ན་བྱེད་རྒྱུ་རེད། ང་ཚོའི་དང་པོ་རབ་བྱུང་བྱས་ནས་རེ་ཟུང་གི་མཐར་མ་ཕྱིན་ཚེ་མདོ་ལས་གོང་མ་སྔགས་ཀྱི་མིང་བྱང་རྫུན་མ་ལེན་པའི་སྲོལ་ངན་ཡོད་དོ། །༣ ཁོང་རྣམས་ཀྱིས་ཟས་ལ་རྒྱ་མཚོའི་ནང་གི་འབུ་སྲིན་སོགས་ཤ་རིགས་ཀུན་བཞེས་ཀྱང་ཕྱི་དྲོའི་ཁ་ཟས་མི་གསོལ་བ་ཡིན་ལ། བོད་ཀྱི་གྲྭ་བས་འབུ་སྲིན་གྱི་རིགས་ཀྱི་ཤ་ཟ་བ་ཉུང་ཡང་སྤྱིར་ཤ་ཟ་བ་མང་བ་དང་ཕལ་ཆེར་གྱིས་ཕྱི་དྲོའི་ཁ་ཟས་ཟ་བཞིན་མཆིས་སོ། །༤ཁོང་རྣམས་ལ་སྔགས་གཞུང་ལ་ཐོས་བསམ་མེད་པར་མ་ཟད་མདོ་ལུགས་ལ་ལོ་མང་པོར་འཆད་ཉན་བྱེད་པའི་ཕྱག་སྲོལ་མེད་པ་འདྲ། འོན་ཀྱང་མདོ་ལུགས་ཀྱི་དྲན་པ་ཉེར་བཞག་སོགས་ལ་ཐོས་བསམ་བྱས་ནས་སྒོམ་པའི་ཕྱག་སྲོལ་ཡོད་པར་ཐོས་སོ། །བོད་ཀྱི་གྲྭ་བ་བརྒྱ་ཆ་སུམ་ཅུ་ཡས་མས་ལ་མདོ་སྔགས་ཀྱི་གཞུང་ལ་ལོ་མང་པོར་ཐོས་བསམ་བྱེད་པའི་གོམ་སྲོལ་བཟང་པོ་ཡོད་ཀྱང་བོད་ཀྱི་གྲྭ་བ་བརྒྱ་ཆ་མང་ཤོས་ལ་གྲོང་ཆོག་དང་ཚོང་ལས་ཁྱིམ་ལས་བྱེད་པའི་ལུགས་སྲོལ་ཡོད་དོ། །རེ་ཞིག་དེ་ཙམ་མོ། །དངོས་གྲུབ་དཔལ་ནས་རྒྱ་ནག་སྐད་དུ་ཐེ་གོ་དབྱིན་སྐད་དུ་ཐེ་ལན་བོད་སྐད་དུ་གསེར་ལྡན་ཞེས་པའི་རྒྱལ་ཁབ་ལ་སོང་བའི་མཐོང་ཐོས་ཀྱི་གཏམ་འདི་སྨྲས་སོ། ། འདྲ་མཉམ་ཡོད་ན་མཐུན་འབྲེལ་ཡོད།འདྲ་མཉམ་ཡོད་ན་མཐུན་འབྲེལ་ཡོད། འདྲ་མཉམ་གྱི་ཁོར་ཡུག་ཡོད་ན་རང་བཞིན་གྱི་མཐུན་འབྲེལ་ཡོང་ངེས། འདྲ་མཉམ་མེད་ན་ཇི་ལྟར་མཐུན་འབྲེལ་གླེང་ན་ཡང་རྒྱུ་མ་ཚོགས་པ་ལས་འབྲས་བུ་འབྱུང་བ་གནས་མེད་དོ། །འོ་ན་འདྲ་མཉམ་ཇི་ལྟར་བྱེད་དགོས་ན་མཐོན་པོ་དང་བཙན་པོ། དཔལ་འབྱོར་དང་གཡོ་སྒྱུ་སོགས་ཀྱིས་ནུས་ཤུགས་ལ་བརྟེན་ནས་གཞན་ལ་དངོས་ཤུགས་བརྒྱུད་གསུམ་ནས་ཉམས་ཆག་ཅན་དུ་བཏང་བ་སོགས་གནོད་པ་མི་བྱེད་པ་གལ་ཆེན་རེད། ཐ་ན་མིང་འདོགས་ལུགས་ལ་སྤྱི་དང་བྱེ་བྲག་ལ་དབང་བསྒྱུར་གྱི་མིང་མ་ཡིན་པར་ཐད་ཀར་དྲང་བདེན་གྱི་མིང་དང་རང་ལ་འོས་པའི་མིང་གཅིག་ལས་གཞན་ལ་བེད་ཆོད་མི་བྱེད་པ་གལ་ཆེ་སྙམ། འདས་པའི་ལོ་རྒྱུས་ལ་གཞིག་ན་མིང་འདོགས་ལུགས་ཙམ་ལ་བརྟེན་ནས་དམག་འཁྲུག་སོགས་བྱས་ནས་གོད་ཆག་སྣ་ཚོགས་བྱུང་མྱོང་ཡོད་པ་རེད། དེས་ན་རྒྱུ་མཚན་དང་གནས་ལུགས་ཡོད་པའི་སྒོ་ནས་བྱ་བ་བསྒྲུབ་པ་ནི་མཁས་པའི་ལམ་ལུགས་ཞིག་རེད། འོན་ཀྱང་གནས་ལུགས་ཡོད་པ་དང་རྒྱུ་མཚན་ཡོད་པའི་སྒོ་ནས་བྱ་བ་བསྒྲུབས་ཀྱང་གཞན་གྱིས་གནོད་པ་ཡོང་མི་སྲིད་པ་མིན་ཀྱང་དེ་ནི་རང་སྐྱོན་མ་ཡིན་པར་གཞན་སྐྱོན་ཡིན་པས་ན་དེ་ལ་འགྱོད་སེམས་དང་དོགས་ཟོན་མི་དགོས་སོ། །དེས་ན་འདྲ་མཉམ་ཡོད་ན་ལྟ་བ་མཉམ་གནས་དང་མཐོ་དམན་མཉམ་གནས། འབྱོར་སྤྲང་མཉམ་གནས། དཔུང་ཆེ་ཆུང་མཉམ་གནས་ཡོང་ཐུབ་རྒྱུ་རེད། དེ་མིན་ཁྲིམས་མཐུན་ལྷིང་འཇགས་གྱི་ཞི་བདེའི་འཚོ་གནས་མེད་ན་བདེ་སྐྱིད་མེད་པར་འགྲོ་ལ། དེ་མེད་ན་འདྲ་མཉམ་གྱི་ཆེད་དུ་བྱ་བ་རྒྱབ་འགལ་མི་མཐུན་པ་མང་པོ་འབྱུང་བར་འགྱུར་བ་ལ་བརྟེན་ནས་མི་མཐུན་པའི་དཀྲུག་ཤིང་དུ་འགྱུར་ངེས་པས་ཀུན་གྱིས་ཡིད་གཟབ་གནང་དགོས་ལགས། སྤྱིར་རང་ཉིད་གནས་པའི་ཁོར་ཡུག་ཡར་རྒྱས་ལ་གཏོང་དགོས་ཀྱང་གཞན་གྱི་རང་དབང་དང་ཁེ་དབང་སོགས་ལ་རྩི་འཇོག་བྱེད་དགོས་ལ། ལྷག་པར་དུ་ང་ཚོ་ནང་བ་སངས་རྒྱས་པའི་ཆོས་ལུགས་པ་ཡིན་པའི་ངོས་ནས་ཐེག་དམན་ལས་བསྟན་པ་ལྟར་གཞན་གནོད་གཞི་དང་བཅས་པ་སྤང་དགོས་པ་དང་ཐེག་ཆེན་ལས་བཤད་པ་ལྟར་གཞན་ལ་ཕན་པ་བསྒྲུབ་དགོས་པ་ནི་རང་གི་དད་མོས་ཀྱིས་འདེམས་པའི་ལམ་ལུགས་ཞིག་ཡིན་ནོ། །བོད་བརྒྱུད་ནང་བསྟན་མཐོ་རིམ་ནས་དངོས་གྲུབ་དཔལ་གྱིས་ས་ཟླའི་ཚེས་༡༠ལ་བྲིས་པའོ། །དགེ་བར་གྱུར་ཅིག ། དཔལ་འབྱོར་འཚོལ་ལུགས་རིམ་པ་གཉིས།དཔལ་འབྱོར་འཚོལ་ལུགས་རིམ་པ་གཉིས། དཔལ་འབྱོར་འཚོལ་ལུགས་རིམ་པ་གཉིས་ཡོད། རིམ་པ་གཅིག་ནི་ཁྲིམས་མཐུན་གྱི་སྒོ་ནས་རང་གིས་ཚོང་ལས་སོགས་འབད་རྩོལ་བྱས་ནས་བོད་རང་ལ་ལྟོས་ན་ཅུང་ཟད་འབྱོར་ལྡན་དུ་ཡོད་པ་དེ་རེད། དེའི་ལམ་ལུགས་ལ་འཛམ་གླིང་གི་བསྔགས་བརྗོད་ཐོབ་བཞིན་ཡོད་པ་ཡིན་པས་དེ་དཔལ་འབྱོར་སྒྲུབ་ལུགས་ཡག་ཤོས་ཡིན་པ་རེད། རིམ་པ་གཉིས་པ་ལ་རིགས་གཉིས་ཡོད་པ་ལས། དང་པོ་ནི། ལ་ལས་སྐྱ་ཆས་གྱོན་ནས་གྲོང་ཁྱེར་སོགས་ནས་རླངས་འཁོར་འཕྲོག་བཅོམ་བྱེད་པ་དང་མིའི་ལག་ནས་བཅའ་ལག་སོགས་དངོས་སུ་འཕྲོག་བཅོམ་བྱེད་བཞིན་སོགས་ཡོད་པའི་སྡེ་ཁག་དག་རེད། རིགས་གཉིས་པ་ནི་ལ་ལས་སེར་ཆས་གྱོན་ནས་བོད་ཀྱི་སྤྲུལ་སྐུའི་ལམ་ལུགས་ལ་བརྟེན་ནས་དད་ལྡན་མང་ཚོགས་ཀྱི་མིག་ལམ་དུ་ཁྲི་འདོན་དང་སེར་ཕྲེང་གིས་བསུ་བ་དང་ལུགས་གཉིས་ཀྱི་བྱ་བཞག་ལ་རྨོངས་བའི་དགོན་དཔོན་དག་གིས་དད་ལྡན་གྱི་མི་རིགས་སོ་སོ་རྣམས་སེམས་ཅན་ཐམས་ཅད་ཀྱི་གྲལ་ཡོད་པ་མ་དགོངས་ནས་དང་པོ་ཇག་ཚོགས་ལ་རྒྱབ་གཉེར་གྱི་ཡི་གེ་སྦྱིན་པ་སོགས་མགོ་སྐོར་བའི་ལག་ཆ་མང་པོ་མཁོ་སྤྲོད་བྱེད་པ་དང༌། འགའ་ཞིག་ལ་མིང་རྫུན་རེ་བཏགས་ནས་མིང་སྟོང་དག་ལ་རྒྱབ་བརྟེན་དུ་བཅོལ་ནས་དད་ལྡན་མང་ཚོགས་ཀྱི་ལག་ནས་དཔལ་འབྱོར་བསྡུ་ལེན་བྱས་ནས་འབྱོར་ལྡན་ནམ་ཕྱུག་བདག་ཏུ་གྱུར་ནས་ས་ཆ་མང་པོ་ཉོས་ནས་བྱེ་མའི་ཚོང་ལས་དང་ཁང་བ་མང་པོ་འཛུགས་བསྐྲུན་བྱེད་པའི་དབང་གིས་ཉམ་ཆུང་འབུ་སྲིན་དུང་ཕྱིར་མང་པོའི་ཚེ་སྲོག་ཤོར་བཞིན་ཡོད་པ་དང༌། རླངས་འཁོར་ཁྲི་ཕྲག་མང་པོའི་རིན་ཐང་ཅན་བསྐོར་ནས་ཉམ་ཆུང་དུད་འགྲོའི་ཚེ་སྲོག་ལ་གནོད་བཞིན་ཡོད་པ་མངོན་གསལ་རེད། བོད་ནའང་སྔོན་དུས་ན་དགེ་སློང་དག་གིས་དབྱར་དུས་ན་སེམས་ཅན་གྱི་ཚེ་སྲོག་གི་རིན་ཐང་དམིགས་ནས་སྤང་ནང་ལ་འགྲོ་དགོས་ཚེ་ཞབས་རྗེན་དུ་བྱོན་ཀྱང་དེང་དུས་ན་ཁ་ནས་སེམས་ཅན་ཐམས་ཅད་ཀྱི་དོན་དུ་ཞེས་བརྗོད་བཞིན་སེམས་ཅན་གཞན་གྱི་ཚེ་སྲོག་སོགས་ལ་གནོད་པ་བྱེད་པ་ནི་ནེ་ཙོའི་བྱ་བ་ལས་མ་འདས་སོ། །འདིའི་རིགས་ནི་གྲྭ་བ་མ་ཡིན་པར་གྲྭ་རྫུན་ཡིན་པ་མཁྱེན་དགོས། དེ་འདྲའི་རིགས་གཉིས་ཀ་འདོད་རྔམས་ཆེ་དྲག་པ་ལས་བྱུང་ལ། ལྷག་པར་དུ་ཕྱི་མ་ནི་དད་པ་བྱེད་མཁན་གྱི་ངོས་ནས་རྨོངས་དད་དང་ཆོས་པ་དག་རྫུན་མ་ཤེས་པའི་དབང་གིས་བྱུང་བ་ཡིན་པས་དད་ལྡན་མང་ཚོགས་ཀྱིས་ཆོས་ལ་སློབ་སྦྱོང་དགོས་གལ་ཆེའོ། །དད་པ་དད་པའི་ས་ལ་གནས་ཐུབ་དགོས། བོད་ཀྱི་དགོན་སྡེ་མང་ཕྱོགས་ལ་དཔལ་འབྱོར་གྱི་ནུས་ཤུགས་ལ་བརྟེན་ནས་རྙོག་དྲ་སྣ་མང་ཅན་དུ་གྱུར་ཡོད་ལ། ད་ནི་ལེགས་བཅོས་ཞིག་མ་ཐུབ་ན་ཆོས་ལ་བརྟེན་ནས་ངན་འགྲོར་འགྲོ་བའི་ཉེན་ཁ་ཆེའོ། །འདིའི་གཉེན་པོའི་སློབ་གསོ་ནི། འདོད་ཆུང་ཆོག་ཤེས་ཞེས་པ་ལས་ལྷག་མི་དགོས་སོ། །འོན་ཀྱང་ཁ་ནས་བཤད་མཁས་པའི་མི་ཆོག་པར་ལག་ལེན་ནམ་ཉམས་སུ་ལེན་དགོས། ཉམས་སུ་ལེན་པ་ལ་ཤེས་དགོས་སོ། །མདོར་ན་ཆོས་ལ་བརྟེན་ནས་ཐོབ་གོ་ས་དཔལ་འབྱོར་སོགས་འཇིག་རྟེན་ཆོས་བརྒྱད་མི་བསྒྲུབ་པར་དམ་ཆོས་ནི་དམ་ཆོས་ཀྱི་ས་ལ་བཞག་རོགས་ཞུ། འདི་འབྲི་བའི་དམིགས་ཡུལ་ནི། སྐྱོན་བརྗོད་ཀྱི་ཕྱིར་མ་ཡིན་པར་སྐྱོན་སངས་བའི་ཆེད་དུ་ཡིན་ལགས། ཁ་བཙུམ་ནས་འདུག་ན་སྔར་བཞིན་མུ་མཐུད་དུ་རྗེས་ལུས་སུ་འགྱུར་ངེས་སོ། །བཙན་བཤོལ་བ་དངོས་གྲུབ་དཔལ་ནས། ལྟ་སྤྱོད་ཡར་སྐུལ་བདེན་གཏམ་ཚངས་པའི་སྒྲ་དབྱངས།ལྟ་སྤྱོད་ཡར་སྐུལ་བདེན་གཏམ་ཚངས་པའི་སྒྲ་དབྱངས། འཆད་མཁན། དངོས་གྲུབ་དཔལ། ཚོགས་ཆེན་འདིར་ཕེབས་པའི་བོད་ཀྱི་ཆོས་བརྒྱུད་ཆེན་པོ་དྲུག་གི་མཁན་སྤྲུལ་དང་སྔ་འགྱུར་རྙིང་མའི་གདན་ས་ཁག་ལྔའི་སྐུ་ཚབ་དང་ཆོས་གྲྭ་ཆེན་པོ་གཉིས་ཀྱི་མཁན་སྤྲུལ་རྣམ་པ་དང་གཞན་ཡང་རྫོང་ཁག་དུ་མའི་དགེ་འདུན་མཐུན་ཚོགས་དང་རྒྱལ་བསྟན་དར་སྤེལ་དང་རིག་གཞུང་དར་སྤེལ་གྱི་ཚོགས་གཙོ་རྣམ་པ་སོགས་ཚོགས་ཞུགས་མི་སྣ་ཚང་མ་ལ་འཚམས་འདྲི་བཀྲ་ཤིས་བདེ་ལེགས་ཞུ། ངས་དེ་རིང་གཏམ་བཤད་ཀྱི་ཁ་བྱང་ལ་ལྟ་སྤྱོད་ཡར་སྐལ་བདེན་གཏམ་ཚངས་པའི་སྒྲ་དབྱངས་ཞེས་པ་དེ་ཡིན། དེ་ཡང་ནམ་རྒྱུན་རང་གི་སེམས་ཀྱི་དཀའ་ངལ་ལམ་ན་ཟུག་ཡོད་པའི་ནང་བསྟན་གྱི་ལྟ་སྤྱོད་ཀྱི་ནང་ནས་ཉུང་ངུ་ཞིག་དོན་ཚན་གསུམ་གྱི་སྒོ་ནས་ཞུས་ན། ༡ དང་པོ་ནང་བ་སངས་རྒྱས་པའི་རྒྱལ་བསྟན་ལ་རང་གིས་མགོ་བཟུང་ནས་ཞབས་ཞུ་བསྒྲུབ་དགོས། ང་ཚོ་ནང་བ་སངས་རྒྱས་པ་ཞིག་ཡིན་ན་ནང་བསྟན་གྱི་དོན་བསམ་ཕོད་པ། བཤད་ཕོད་པ། སྒྲུབ་ཕོད་པ་དགོས། དེ་ཡང་བོད་ཀྱི་ནང་བསྟན་གྱི་སྣེ་ཁྲིད་པ་མཁན་སྤྲུལ་ཚོས་འདོད་ཆུང་ཆོག་ཤེས་དགོས་པ་ལས། ངག་ནས་འདོད་ཆུང་ཆོག་ཤེས་ཞེས་བཤད་ནས་རང་ཉིད་ཁང་བ་རྫིག་པོ་རླངས་འཁོར་རྫིག་པོ་མཛའ་ན་མོ་མང་པོས་མཐའ་སྐོར་བ་ཡིན་ན་བསྡུ་བའི་དངོས་པོ་བཞི་ལས་དོན་སྤྱོད་པ་དོན་མཐུན་པ་ཞིག་མ་འོངས་པ་རེད། དེང་སང་སྐྱེས་བུ་ཆོས་ཅན་དང་རྒྱུ་ཅན་ནོར་བ། ཆོས་དང་ཆབ་སྲིད་དམ་གཡོ་སྒྱུ་ནོར་བ། བསྟན་པ་དང་ས་རྡོ་ནོར་བ་མང་བའི་དུས་ཚོད་ལ་རང་གིས་འདོད་ཆུང་ཆོག་ཤེས་བྱས་ནས་ཀུན་སྤྱོད་ཡག་པོ་བྱེད་དགོས། ཀུན་མཁྱེན་མཚོ་སྣ་བས། ཚངས་པར་སྤྱོད་པ་ཉམས་པའི་རྒྱུའི་གཙོ་བོ་ཡོ་སྤྱད་བསགས་པ་ཡིན་ལ། ཞེས་གསུངས་པ་ལྟར་ཡིན་པས་མང་ཚོགས་སོགས་གང་ཟག་སུ་ཡིན་ན་དཔལ་འབྱོར་ཁོ་ནས་ཆེད་དུ་བརྩོན་པ་ཡིན་ན་དེས་མི་གསོད་དགོས་ན་རྫུན་བཤད་དགོས་ན་རྙོག་དྲ་བྱེད་དགོས་ན་བྱེད་ངེས་ཡིན་པས་ཀུན་སྤྱོད་ཡག་པོ་རྩ་བ་ནས་མེད་འགྲོ་བར་མ་ཟད། ནང་བསྟན་ལ་བསམ་ན་འདོད་ཆུང་ཆོག་ཤེས་རྩ་བ་ནས་མེད་པར་འགྱུར་རོ། །དོན་ཚན་དང་པོ་འདི་གྲྭ་བ་སྤྱི་དང་བྱེ་བྲག་ཏུ་གཙོ་བོ་དགོན་སྡེའི་སྣེ་ཁྲིད་པ་མཁན་པོ་དང་སྤྲུལ་སྐུ་རྣམས་ལ་ཞུས་པ་ཡིན། དེ་ཡང་དགོན་དཔོན་སོགས་བླ་རྒན་མང་པོས་གནས་ལུགས་ཧ་མ་གོ་བའི་དབང་གིས་སྤྲུལ་སྐུ་དང་རྒྱ་བླ་རྣམས་ལ་རྒྱབ་བརྟེན་བྱས་ནས་ཁྲི་འདོན་དང་སེར་ཕྲེང་གིས་བསུ་བ་དང་རྒྱབ་གཉེར་གྱི་ཡི་གེ་འབྲི་བ་སོགས་རྫུན་མས་རྫུན་མ་བཟོ་བཞིན་པ་འདི་ནི་སྤྱིར་རྒྱལ་བསྟན་ལ་གནོད་ཚབས་ཆེན་པོ་ཡིན་པ་བླ་རྒན་དབང་འཛིན་པ་རྣམས་ཀྱིས་ཤེས་དགོས་སོ།། ༢ དོན་ཚན་གཉིས་པ་ལྟ་སྤྱོད་ཡང་དག་ཡོང་བ་ལ་ཤེས་ཡོན་ནམ་སློབ་སྦྱོང་ལ་རག་ལས་པ་རེད། གྲྭ་གྲོང་གཉིས་ཀ་གང་ཡིན་ན་ཤེས་ཡོན་གལ་ཆེ་ལ། ལྷག་པར་དུ་གྲྭ་བ་ཞིག་ཡིན་ན་ཐོས་བསམ་སྒོམ་གསུམ་ཡ་མ་བྲལ་བར་དགོས་ལ། དེ་ཡང་འབྲོམ་སྟོན་པ་རྒྱལ་བའི་འབྱུང་གནས་ཀྱིས། ང་ཐོས་དུས་ཙ་ན་བསམ་སྒོམ་འདུག །ང་བསམ་དུས་ཙ་ན་ཐོས་སྒོམ་འདུག །ང་སྒོམ་དུས་ཙ་ན་ཐོས་བསམ་འདུག །ང་བཀའ་བརྒྱུད་ཕྱོགས་སུ་མ་ལྷུང་བ། །ཞེས་གསུངས་པ་ལྟར་དགོས་ལ། དེ་ལྟར་སློབ་སྦྱོང་ལེགས་པ་ཡོད་ན་ལྟ་སྤྱོད་ཡག་པོ་ཡོང་ལ། མེད་ན་ཆོས་པ་ཆོས་པའི་སར་མི་འདུག །དད་པ་དད་པའི་སར་མི་གནས་ལ། དེ་མ་གནས་ན་གང་ཟག་གི་ཆགས་སྡང་ཆོས་ལ་བསྲེས་ནས་བོད་བརྒྱུད་ནང་བསྟན་བསྲེ་ལྷད་ཅན་དུ་བྱེད་དང་བྱེད་བཞིན་པ་རེད། དེ་ཡང་རྒྱ་བརྒྱུད་ནང་བསྟན་སོགས་ཀྱིས་བོད་བརྒྱུད་ནང་བསྟན་ནི་ནང་བསྟན་མ་ཡིན་པར་བླ་མའི་ཆོས་རེད་ཅེས་སྐྱོན་བརྗོད་བྱེད་བཞིན་ཡོད་པ་རེད། དེའི་རྒྱུ་མཚན་ནང་ཆོས་ལས་བཤད་པའི་བྱམས་སྙིང་རྗེ་བྱང་ཆུབ་ཀྱི་སེམས་དང་བདག་མེད་གཉིས་སོགས་ལ་མ་ཡིན་པར་ཆོས་ཆོས་ཀྱི་ས་ལ་མ་བཞག་ནས་སྐུ་གསུང་ཐུགས་བཞེངས་ནས་ཡོན་བདག་གི་ལག་ནས་དཔལ་འབྱོར་བསྡུ་ལེན་བྱེད་པ་དང༌། ཆོས་ལ་བརྟེན་ནས་ཆབ་སྲིད་སྒྲུབ་པ་དང༌། ཆོས་ལ་བརྟེན་ནས་ཆོས་བརྒྱད་སྒྲུབ་པ་དང༌། ཆོས་ལ་བརྟེན་ནས་དཔལ་འབྱོར་ཀླད་པ་ཅན་གྱི་དཔལ་འབྱོར་སྒྲུབ་པ་དང་བོད་ཀྱི་བླ་རྒན་ཚུལ་འཆལ་བ་རེ་ཟུང་གིས་ཆང་དུད་དང་བུད་མེད་བསྟེན་ན་དགོས་པ་ཡོད་ཚུལ་བཤད་ནས་གཞན་མགོ་སྐོར་བ་སོགས་ལ་སྐྱོན་བརྗོད་བྱེད་བཞིན་ཡོད་པ་རེད། དེས་ན་སློབ་སྦྱོང་གལ་ཆེ་ལ། སློབ་སྦྱོང་མེད་ན་དགོན་སྡེ་འགའ་ཞིག་གི་དགོན་དཔོན་བཞིན་སྤྱིར་ཡར་རྒྱས་དང་དགོས་སུ་བསྟན་པའི་བཀག་རྡོ་ཆེན་པོ་ཆགས་ཡོད་ལ། དེས་ན་ད་ཕྱིན་ཆད་དགོན་དཔོན་ལ་སྡེ་སྣོད་འཛིན་པ་བསྟན་མཁས་གཉིས་ལྡན་གྱི་མཁས་དབང་ཞིག་མང་གཙོའི་ལམ་ནས་བཞག་ན་དགོན་སྡེའི་བྱ་བ་སྡེ་སྣོད་འཛིན་པ་དང་དགེ་འདུན་པའི་མང་གཙོ་བྱེད་དགོས་གསུངས་ཡོད་པས་དམ་ཆོས་འདུལ་བ་དང་མཐུན་ལ། དུས་རབས་ཉེར་གཅིག་པའི་འཛམ་གླིང་སྤྱིའི་འགྲོས་དང་མཐུན་པ་ཞིག་རེད། སྤྱིར་བྱ་བ་གང་སྒྲུབ་ན་ཤེས་ཡོན་དང་ལྷག་བསམ་ཉམས་མྱོང་དགོས་པའི་སྟེང་ནས་དགོན་བདག་ནི་ངེས་པར་ཚུལ་ཁྲིམས་དང་ལྡན་པ་དགོས་སོ། །དགོན་དཔོན་བླ་མ་མཚན་ཉིད་ཚང་བ་ཞིག་མེད་པའི་དབང་གིས་དགོན་སྡེ་འགའ་ཞིག་ལ་ཉོག་འཛིང་ཆེས་ཆེ་བ་ཡོང་གི་འདུག རང་གི་ཁོར་ཡུག་ན་བཤེས་གཉེན་ཚད་ལྡན་སོགས་སློབ་གཉེར་ཐོས་སྒོ་ཚང་བ་མེད་བཞིན་དུ་གྲྭ་ས་འགྲོ་བ་ལ་བཀག་སྡོམ་བྱེད་བཞིན་འདུག དེ་ལྟའི་བསམ་བློ་ནི་ཆེས་ངན་པ་ཡིན་པར་སྣང་སྟེ། རང་ལ་གཡོག་འཁོར་རེ་དང་བཤད་སྒྲུབ་ཀྱི་མིང་ཙམ་རེའི་ཆེད་དུ་གཞན་གྱི་མི་ཚེའི་མདུན་ལམ་བཀག་པས་ནའོ། །ལྟ་བ་ངན་པ་སློབ་སྦྱོང་མེད་པའི་དབང་གིས་བྱུང་སྟེ། ཟབ་པ་དང་རྒྱ་ཆེ་བའི་གནས་རྣམས་ལ་རྨོངས་བའི་དབང་གིས་རང་གིས་མི་ཤེས་པ་རྒྱུ་མཚན་དུ་བྱས་ནས་ཚེ་སྔ་ཕྱི་དང་ལས་འབྲས་ལ་བསྐུར་བ་བཏབ་མཁན་མང་པོ་ཉིན་རེ་ལས་ཉིན་རེ་ཇེ་མང་དུ་འགྲོ་བཞིན་པ་འདི་ཡང་ཤེས་ཡོན་མེད་པའི་དབང་གིས་ཡིན་པ་རེད། དེ་དག་ལ་ཤེས་ཡོན་མེད་པར་མ་ཟད་ཤེས་འཆལ་གྱི་རྒྱུ་རིག་གནས་གསར་རྗེའི་སྐབས་སུ་དངོས་གཙོ་སྨྲ་བའི་སློབ་གསོ་དེ་གཞུང་གི་སློབ་གྲྭའི་དགེ་རྒན་དང་སློབ་གྲྭ་སོགས་ལ་ཐེབས་ནས་རིམ་གྱིས་གྲྭ་བའི་ནང་བློ་གྲོས་དང་བསོད་ནམས་མི་ལྡན་པ་ལ་སློབ་གསོ་ངན་པས་མགོ་རྨོངས་བར་བྱས་པ་རེད། མདོར་ན་ལྟ་སྤྱོད་ཡར་རྒྱས་འགྲོ་བ་ལ་སློབ་སྦྱོང་དགོས་པ་རེད་ལགས། ༣ དོན་ཚན་གསུམ་པ་རབ་བྱུང་བའམ་དགེ་འདུན་པ་དག་རྫུན་ལས་བརྩམས་ནས་ཞུས་ན། ཕམ་པ་འཆབ་བཅས་བྱུང་བའམ་ཕམ་འདྲ་བྱུང་བ་སོགས་རབ་བྱུང་གི་སྡོམ་པ་མེད་པའི་རབ་བྱུང་གི་ཆ་ལུགས་ཅན་གྱི་གང་ཟག་དེ་དག་ནི་རབ་བྱུང་རྫུན་མ་ཡིན་ལ། རབ་བྱུང་གི་སྡོམ་པ་མེད་པ་དག་གིས་རབ་བྱུང་གི་གོས་ངུར་སྨྲིག་མ་གྱོན་ན་ཡག་པོ་འདུག རྒྱུ་མཚན་ནི་ལུང་ལས། བསླབ་ལ་མི་གནས་དེ་དག་ཀུན། །གཟུགས་པོར་ཁྱིམ་པར་གནས་པ་མཆོག །ཅེས་སྟོན་པ་ཐུགས་རྗེ་ཅན་གྱིས་བསླབ་པ་ལ་མི་གནས་པ་དག་གིས་རབ་བྱུང་བྱེད་པ་ལས་ཁྱིམ་པ་བྱེད་པ་མཆོག་ཡིན་པར་གསུངས་པ་དང༌། ཀུན་མཁྱེན་དོལ་པོ་པ་ཤེས་རབ་རྒྱལ་མཚན་གྱིས། ཚུལ་ཁྲིམས་འཆལ་བའི་ལུས་ཅན་གཞོན་ནུ་ཁྱོད། །དགེ་སློང་ཚུལ་དུ་མ་འཆོས་དཀར་པོ་གྱོན། །ཚུལ་ཁྲིམས་འཆལ་བའི་ཉེས་པའི་མི་ཆོག་པར། །ཚུལ་ཆོས་ཉེས་པའི་གོས་ན་མི་རུང་ངོ། །ཞེས་ཚུལ་ཁྲིམས་དང་མི་ལྡན་བཞིན་དུ་རབ་བྱུང་གི་གོས་གྱོན་ན་ཚུལ་འཆལ་གྱི་ཉེས་པས་གོས་པར་མ་ཟད་ཚུལ་ཆོས་ཀྱི་ཉེས་པས་གོས་པར་འགྱུར་བ་ནི་མི་རུང་བར་གསུངས་ལ། གཞན་ཡང་བླ་མ་མི་ཕམ་རྒྱ་མཚོས། གཏེར་སྟོན་པའམ་སྔགས་པར་ཁས་འཆེ་ན། །རབ་བྱུང་བསླབ་ལ་ལེགས་གནས་དེ་གཅིག་པུས། །གྲུབ་མཚན་མེད་ཀྱང་ཀུན་ཀྱི་མཆོད་འོས་ཡིན། །ཞེས་གསུངས་པ་ལྟར་གྲུབ་པའི་རྟགས་མཚན་མངོན་དུ་གྱུར་བའི་གང་ཟག་མ་ཡིན་ན་ཕྱི་རབ་བྱུང་གི་སྤྱོད་པས་ཞི་ཞིང་དུལ་བ་བྱེད་ན་ལེགས་པར་གསུངས་པ་དང༌། འདུལ་བ་ལུང་ལས། གང་ཞིག་རབ་ཏུ་བྱུང་ཡང་ཡོན་ཏན་སྣོད་མ་གྱུར། །སྐྲ་དང་ཁ་སྤུ་བྲེགས་ཀྱང་དགེ་སྦྱོང་ཚུལ་མ་ཞུགས། །རབ་བྱུང་དེ་ནི་རབ་བྱུང་མ་ཡིན་ཁྱིམ་པའང་མིན། །ཆུ་མེད་ཁྲོན་པ་རི་མོའི་མར་མེ་ཇི་བཞིན་ནོ། །ཞེས་གསུངས་པ་ལྟར་ཤེས་པ་གལ་ཆེ་བ་ལས་ལོང་བས་ལོང་བ་ཁྲིད་པའི་ངང་ཚུལ་ལྟར་བླ་མ་རེ་ཟུང་གིས་སློབ་སྟོན་ངན་པའམ་ཡུལ་སྲོལ་ངན་པ་སོགས་ཀྱི་དབང་གིས་རབ་བྱུང་གི་སྡོམ་པ་ཉམས་ཀྱང་སེར་མོའི་གོན་པ་གྱོན་ན་བཟང་མདོག་བཤད་པའི་དབང་གིས་སྐྱ་སེར་གཉིས་ཀའི་གཞི་མཐུན་ལྟ་བུར་བྱེད་པ་དང༌། ཁ་ཅིག་ཁ་ཟེར་ལ་འཛེམ་ནས་ཁྱིམ་པའི་གོས་གྱོན་མ་ནུས་པ་ཡང་ཉུང་ཤོས་སྲིད་ལ། གཙོ་བོ་ལས་ཀ་བྱས་ནས་རང་ཁ་གསོ་བ་དཀའ་ནས་ཆོས་ལ་བརྟེན་ནས་ལྟོ་རྒྱབ་ཚོལ་བའམ་དཀོར་ཟ་བའི་ཆེད་ཙམ་ལ་དམིགས་ནས་རབ་བྱུང་གི་གོན་པ་གྱོན་པ་ནི་དམ་ཆོས་འདུལ་བ་དང་མི་མཐུན་པ་མ་ཟད་རྒྱལ་སྤྱིའི་ཁྲིམས་ལུགས་ལ་རང་རང་གི་རྟགས་མཚན་ཆ་ལུགས་རང་ལ་དབང་བའམ་རང་ལ་ཁེ་དབང་དང་བདག་སྲུང་བྱེད་ན་ཆོག་པ་ཞིག་རེད། དེས་ན་བདག་ལེགས་སུ་འདོད་པ་རྣམས་ཀྱིས་གནས་དེ་ལྟ་བུ་ལ་གཟབ་དགོས་ཏེ། སྟོན་པ་ཐུགས་རྗེ་ཅན་གྱིས། ང་མིན་ང་འདྲ་གཅིག་གིས་བཤིག །ཅེས་གསུངས་པ་ལྟར་འགྱུར་བའི་གནས་སུ་སྣང་ངོ། །རྒྱུ་མཚན་དེས་ན་སྤྱིར་བསླབ་པ་ཕུལ་བ་དགག་བྱའི་བསླབ་བྱ་ཡིན་ཀྱང་སྡོམ་པ་གཏན་ནས་སྲུང་མ་ནུས་ན་བསླབ་པ་ཕུལ་བ་ལ་འདས་མ་ད་གསུམ་གྱི་དགོས་པ་ཡོད་དེ། སྔར་སྡོམ་པ་བསྲུངས་བའི་བསོད་ནམས་མི་ཉམས་པ་དང༌། ད་ལྟ་ཕམ་པ་མི་འབྱུང་བ་སོགས་དང༌། མ་འོངས་པ་ན་སྡོམ་པ་སླར་གསོ་བའི་སྐལ་བ་ཡོད་པ་རེད། སྤྱིར་ང་ཚོ་ནང་བ་སངས་རྒྱས་པ་ཞིག་ཡིན་པ་ནས་བཟུང་ནང་བསྟན་ལ་ཕན་མ་ཐོགས་ན་རང་ལ་བརྟེན་ནས་མི་གནོད་པ་བྱེད་དགོས། དེང་སང་བརྡ་ཕྲིན་གྱི་དུས་ཚོད་ཡིན་པས་གང་ཟག་སྒེར་བ་ཞིག་གིས་བྱ་བ་བྱེ་བྲག་པ་ཞིག་ལ་བརྟེན་ནས་ནང་བསྟན་དང་དགེ་འདུན་པ་སྤྱི་ལ་སྨོད་པ་འབྱུང་གིན་ཡོད་པ་ཁྱེད་རྣམ་པས་མཁྱེན་གསལ་ལྟར་རེད་ལགས། དད་ལྡན་མང་ཚོགས་རྣམས་ཀྱིས་གྲྭ་བ་དག་རྫུན་ཤེས་ནས་བླང་དོར་བྱེད་དགོས་པ་ལས་ཤི་གསོན་གྱི་ཆེད་འཁོར་བ་ཁ་གསོ་བའི་ཆ་རྐྱེན་དུ་ཡོན་སྦྱར་ན་ཡག་པོ་རྩ་བ་ནས་མི་འདུག སྐྱབས་གནས་གསུམ་ལས་བཞི་བ་མེད་པར་ཤེས་དགོས། འགལ་སྤོང་ངམ་སྐྱོན་སྤོང་ཞིག་བྱེད་ན་ཁ་ཅིག་གི་རང་སྐྱོན་འགེབ་པའི་ཕྱིར་སྔགས་ཀྱི་དམ་ཚིག་མི་སྲུང་བའི་ངུར་སྨྲིག་གྱོན་པ་དག་ལ་སངས་རྒྱས་མ་གཏོགས་གང་ཟག་གི་ཚོད་གང་ཟག་གིས་མི་ཟིན་པ་རེད་ཅེས་བཤད་པ་དེ་ནི་མི་རིགས་ཏེ། དེའི་དོན་མ་གོ་བ་ལས་བདག་ཅག་གི་སྟོན་པ་རང་གིས་ཚོད་བཟུང་ནས། ཇི་སྐད་དུ། ཚུལ་ཁྲིམས་འཆལ་ལ་ཐུབ་དབང་གིས། །སྔགས་སྒྲུབ་པར་ནི་མ་གསུངས་ཏེ། །ཞེས་དང༌། བྱང་ཆུབ་སེམས་དཔའ་བློ་ལྡན་གྱི། །རིགས་ནི་མཚན་མ་དག་ལས་ཤེས། །ཞེས་སོགས་གསུངས་ཡོད་པ་དང༌། དེར་མ་ཟད་གང་ཟག་གི་ཚོད་གང་ཟག་གིས་མི་ཟིན་པ་ཡིན་ན་དེ་དག་བཟང་བ་ཡིན་པ་ཁྱེད་ཀྱིས་ཤེས་པ་འགལ་བར་འགྱུར་ལ། ཡང་ཁ་ཅིག་གིས་ཚུལ་འཆལ་བ་ལ་གོས་ངུར་སྨྲིག་གྱོན་དུ་མ་བཅུག་ན་གོས་ངུར་སྨྲིག་འཕྲོག་པའི་རྩ་ལྟུང་བྱུང་ཟེར་བ་དེ་ནི་ཧ་ཅང་བློ་རྩིང་བའི་སྐྱོན་ཡིན་ཏེ། གོས་ངུར་སྨྲིག་འཕྲོག་པའི་རྩ་ལྟུང་གཞན་ལ་ཕྲག་དོག་དང་ཞེ་སྡང་གི་དབང་གིས་གོས་ངུར་སྨྲིག་འཕྲོག་ན་རྩ་ལྟུང་བྱུང་བ་ཡོད་ཀྱང་བསྟན་པ་ལ་ལྷག་བསམ་གྱི་དབང་གིས་བསྟན་པའི་མིག་ལྟོས་ལ་མི་ཡག་པ་དང་བསྟན་པ་སྤྱིའི་མཚན་སྙན་གྱི་ཆེད་དུ་སློབ་གསོ་བྱེད་པ་ལ་རྩ་ལྟུང་བྱུང་བའི་གནས་མེད་ལ། སྟོན་པ་ཐུགས་རྗེ་ཅན་གྱིས། ཚུལ་ཁྲིམས་འཆལ་བ་གནས་ནས་སྤྲད་དགོས་པར་གསུངས་བ་དང༌། སངས་རྒྱས་གཉིས་པ་སློབ་དཔོན་དབྱིག་གཉེན་རྒྱ་གར་ནས་བལ་ཡུལ་དུ་ཕེབས་སྐབས་ངུར་སྨྲིག་གྱོན་པ་དག་གིས་ཞིང་རྨོ་བ་སོགས་གཟིགས་པས་ཐུགས་སྐྱོ་ནས་སྐུ་མྱ་ངན་ལས་འདས་པའི་ལོ་རྒྱུས་ཡོད་པས་ཚུལ་ཁྲིམས་འཆལ་བས་རབ་བྱུང་གི་གོས་ངུར་སྨྲིག་གྱོན་མི་རུང་བ་སངས་རྒྱས་སམ་དམ་ཆོས་འདུལ་བའི་དགོངས་པ་ཡིན་པ་རེད། ཁ་ཅིག་གིས་དེ་དག་ལ་དག་སྣང་སྦྱང་ཁུལ་བྱེད་པ་ནི་དག་སྣང་སྦྱང་ས་ནོར་བ་རེད། དཔེར་ན་དག་སྣང་སྦྱང་ཁུལ་བྱས་ནས་མི་གཙང་བ་ཟ་བ་དང་མཚུངས་སོ། །མ་དག་པ་མ་དག་པ་ཡིན་པར་སངས་རྒྱས་ཀྱིས་གཟིགས་པ་རེད་ལགས། སྤྱིར་ཁྱིམ་པ་རྣམས་ཀྱིས་རབ་བྱུང་ནང་བཞིན་མདོ་སྔགས་ཡོངས་རྫོགས་ལ་ཐོས་བསམ་བྱེད་མ་ནུས་ན་ཡང་ནང་ཆོས་ཀྱི་གོ་བ་རགས་རིམ་དང་དགེ་འདུན་པ་མཚན་ཉིད་པ་ཡིན་མིན་གྱི་ཁྱད་པར་ཤེས་དགོས། དཔེར་ན་ཚོང་ར་ཞིག་ལ་སོང་ན་བཅའ་ལག་དག་རྫུན་གྱི་ཁྱད་པར་ཤེས་ན་དག་མ་དེ་ཉོ་ཤེས་ལ་མ་ཤེས་ན་རྫུན་མས་མགོ་གཡོག་པ་མང་བ་ལྟར་ཡིན་པ་རེད། དེས་ན་ཁྱིམ་པ་ལ་ནང་ཆོས་ངོ་སྤྲོད་གལ་ཆེ། གྲྭ་བ་རྣམས་ཀྱིས་རང་ལ་ཡིད་ཆེས་བྱེད་པའི་དད་ལྡན་མང་ཚོགས་མི་བསླུ་བ་གལ་ཆེན་རེད་མ་གཏོགས་སྤྱིར་མི་སུ་ཡིན་ན་རང་ལ་ཡིད་ཆེས་བྱེད་མི་ཞིག་ཡིན་ན་བསླུ་ཐུབ་ལ་རང་ལ་ཡིད་ཆེས་མེད་པའི་གང་ཟག་ཞིག་བསླུ་མི་ཐུབ་པ་ཡིན་པས་ན་ང་ཚོས་རང་ལ་ཡིད་ཆེས་པའི་དད་ལྡན་མང་ཚོགས་མི་བསླུ་བ་དགོས། དེ་མི་བསླུ་བ་ལ་ལུང་སྡེ་སྣོད་གསུམ་ལ་འཆད་ཉན་དང་བསླབ་པ་གསུམ་ལ་ཉམས་ལེན་དགོས་པ་རེད་ལགས། ད་དེ་རིང་གི་ཆ་ལ་དེ་ཙམ་ལས་ཞུ་རྒྱུ་མིན། སྤྱིར་མང་པོ་ཞུས་ན་མང་པོ་རེད་ཏ། ད་རུང་མཁས་དབང་མང་པོས་གསུང་བཤད་རབ་དང་རིམ་པ་མང་པོ་གནང་དགོས་པས་དེ་ཙམ་གྱིས་ཞུ་བྱ་རྫོགས་པར་བྱེད་རྒྱུ་ཡིན། མཇུག་མཐར་བོད་ཀྱི་ཆོས་བརྒྱུད་ཆེན་མོ་དྲུག་པོ་ཐམས་ཅད་ཐུགས་མཐུན་ཞིང་ཁྲིམས་གཙང་བ་དང་རྒྱལ་བསྟན་དར་ཞིང་རྒྱས་ལ་ཡུན་རིང་དུ་གནས་པའི་སྨོན་འདུན་ཞུ། ཐུགས་རྗེ་ཆེ་ཞུ། མཁན་ཆེན་ཚུལ་ཁྲིམས་བློ་གྲོས་ཀྱི་བསྡུས་གྲྭ་སྔ་འགྱུར་རྙིང་མས་ཆེད་སྦྱང་དང་གཙོ་བོ་མི་དགོས་གསུངས་པ་ནི་ཚིག་འཁྲི་ཁོ་ནས་དུས་འདའ་བ་དང་ཕ་རོལ་ལས་རྒྱལ་ཆེད་ཁོ་ནར་རྩོད་པ་ལྷུར་ལེན་ལྟ་བུར་མི་དགོས་པ་དང༌། མཚན་ཉིད་ཁ་རྐྱང་བ་མི་བྱེད་པར་ཆོས་སྦྱང་བ་རང་གཞན་ལ་ཕན་ཐོགས་པ་ཞིག་དགོས་པ་དེ་ཡིན་སྙམ། ང་རང་གི་བསམ་ཚུལ་ལ་ཚིག་འཁྲི་ཆེར་མི་དགོས་ཀྱང་སྤྱིར་བསྡུས་གྲྭ་སྦྱང་བ་གལ་ཆེ། རྒྱུ་མཚན་རྗེ་ཏཱ་ར་ནཱ་ཐས། རིགས་པའི་ཡན་ལག་ཚང་བས་འཇུག །ཅེས་དང། ཀརྨ་པ་ཞྭ་དམར་སྐུ་འཕྲེང་བདུན་པའི་བསྡུས་གྲྭ་རྩ་ཚིག་ལས། ཀུན་མཁྱེན་ཐོབ་པའི་དངོས་རྒྱུ་ཡིན། །ཞེས་གསུངས་པ་ལྟར་གཞུང་རིགས་པའི་རྗེས་འབྲང་ཡིན་པས་རིགས་ལམ་སྦྱང་དགོས། འཇུ་མི་ཕམ་གྱིས་བསྡུས་ཚན་རྩོད་རིག་སྨྲ་བའི་སྒོ་འབྱེད་བདག་གིས་རྒྱ་གར་རྣམ་གྲོལ་གླིང་ནས་མཇལ་མྱོང༌། འོན་ཀྱང་མི་ཚེ་རིགས་ལམ་རྐྱང་བ་ལ་འབད་ན་ཉིང་དགོས་ཆེར་མི་འགྲུབ་སྟེ། དཔེར་ན་བོད་ཡིག་ཤེས་པ་ལ་ཀ་ཁ་ག་ང་ཤེས་དགོས་ཀྱང་མི་ཚེ་གང་ལ་དེ་ཁོ་ན་ལ་འབད་ན་དོན་ཆེར་མ་མཆིས་པ་བཞིན་ཡིན་ནོ། །མཁན་ཆེན་དམ་པ་གང་གིས་བསྡུས་གྲྭ་ཞེས་པ་ཚིག་འཁྲི་ལ་ཐུགས་བསམ་བཞེས་ཡོད་པ་འདྲ། སྤྱིར་བོད་ཀྱི་བསྡུས་གཞུང་དུ་མར་མངོན་པ་གོང་འོག་དང་ཚད་མ་སྡེ་བདུན་སོགས་ཀྱི་བརྗོད་བྱ་གང་ལེགས་པ་ཐམས་ཅད་ཕྱོགས་གཅིག་ཏུ་བསྡུས་ནས་མཛད་པའི་གཞུང་ལུགས་ལ་བསྡུས་གཞུང་དུ་གྲགས་པར་སེམས་སོ། །སྤྱིར་མི་སུ་ལ་ཤེས་འཇོན་ཡོད་ན་དེ་ལ་རྒྱབ་སྐྱོར་རོགས་རམ་བྱེད་པར་ཞུ། གཞན་གྱིས་དྲིས་ལན་དུ་དྲང་མོའི་གཏམ་འདི་ངག་དབང་དངོས་གྲུབ་དཔལ་ནས། འཇིག་རྟེན་ན་མི་ངན་པ་ཁྱི་ལྟ་བུ་ཞེས་བརྗོད་མོད། ངས་ལྟ་ན་ཁྱི་ལ་རྩམ་རིལ་ཙམ་སྦྱིན་ནའང་བཟང་ངོ་ངན་ངོ་ཡོད་མཁན་ཞིག་ཡིན་ལ། དེང་སང་མི་ཕལ་ཆེར་བ་ཁྱི་ལས་ཀྱང་བཟང་ངོ་ངན་ངོ་མེད་པ་མ་ཟད་ཕ་མ་དང་བླ་མ་ལ་དཔལ་འབྱོར་ཕྲན་བུའི་ཆེད་དུ་སྒྲོ་འདོགས་དང་སྐུར་འདེབས་མང་བ་མངོན་སུམ་དུ་གྲུབ། དེར་མ་ཟད་ཁྱི་རྣམས་ཀྱིས་མི་ཁྲོམ་མང་པོ་ཚོགས་སར་མིང་གོ་ས་ཇི་ལྟར་ཆེ་བ་མཐོང་ཡང་རང་གི་བདག་པོའི་རྗེས་སུ་འགྲོ་ཤེས་པ་ཡིན་ལ། མི་ཕལ་ཆེར་གང་མཐོ་གང་གཉན་གྱི་རྗེས་སུ་འབྲང་ནས་བཀའ་དྲིན་ཅན་གྱི་བླ་མ་དང་བྱམས་བརྩེ་ཅན་གྱི་དྲིན་ཅན་ཕ་མ་རང་གི་མི་རིགས་སོགས་བརྗེད་འགྲོ་བ་མཐོང་ཐོས་མངོན་གྱུར་བ་ཆེས་མང་ངོ། །རང་གི་མི་རིགས་དང་བཀའ་དྲིན་ཅན་གྱི་བླ་མ་སོགས་ལ་གཞན་གྱི་ཕྲག་དོག་གི་དབང་གིས་མི་སྙན་པ་བརྗོད་པ་གོ་ས་འཕྲོག་པ་སོགས་མ་ཟད་རང་གིས་རྙོག་དྲ་བཟོས་ནས་གཞན་གྱིས་རྙོག་དྲ་བཟོས་ཞེས་རང་ཁག་གཞན་ལ་འགེལ་བའི་རྗེས་སུ་འབྲང་བ་མང་རབ་ཡོད་པ་ཤེས་ལྡན་དག་གི་སེམས་ན་གསལ་ཡང་མི་སྨྲ་བའི་བརྟུལ་ཞུགས་སུ་གནས་ལ། བླུན་པོ་དག་ཆུ་སྣ་གར་ཁྲིད་དུ་རྒྱུག་བཞིན་དུ་མཆིས་པའོ། །ཆོས་ཕྱོགས་ནས་བསམ་ན་དེ་དག་སྙིང་རྗེ་རེད། རང་གི་དམ་ཚིག་ཉམས་ནས་གཡོ་སྒྱུའི་དབང་གིས་ཚེ་འདི་མེད་ཕྱི་མེད་དུ་བྱེད་པས་སོ། །སྐྱོན་བརྗོད་ཙམ་མ་ཡིན་པར་སྐྱོན་སངས་བའི་ཆེད་ཡིན་པས་གདམས་ངག་བླངས་ན་རང་གཞན་ལ་ཕན་ཐོགས་པ་སྲིད་ལ། ལོག་པར་འགྲེལ་ན་རང་གཞན་ལ་གནོད་པའི་རྒྱུ་རུ་འགྱུར་རོ། །ཞེས་གཡོ་སྒྱུའི་སྒྱུ་འཕྲུལ་སྣ་ཚོགས་མཐོང་བའི་དབང་གིས་སྤྲང་འཁྱམ་པ་དངོས་གྲུབ་དཔལ་གྱིས་བྲིས་པའོ། ། སྤྲུལ་སྐུའི་ཁྲི་འདོན་གྱི་གནད་དོན་བོད་ལ་ཐུགསྤྲུལ་སྐུའི་ཁྲི་འདོན་གྱི་གནད་དོན་བོད་ལ་ཐུག ཉེ་ཆར་རྒྱ་ནག་ནས་རྒྱ་མི་ཞིག་གིས་སྤྲུལ་སྐུའི་མཛད་སྒོ་སྤེལ་བ་ལ་བོད་མི་མི་ཉུང་བས་ལྟ་ཚུལ་སྣ་མང་བརྗོད་བཞིན་མཆིས། བདག་གི་རྣམ་རྟོག་གི་རི་མོ་ལ་དེ་ནོར་འཁྲུལ་རེད་མོད། དེའི་གནད་དོན་གཙོ་བོ་མི་རིགས་གཞན་ན་མེད་པའི་བོད་ཀྱི་སྤྲུལ་སྐུའི་ལམ་ལུགས་རྙིང་བ་དང་ལྷག་ཏུ་འབྱོར་ལྡན་ཁྲི་འདོན་གྱི་ལམ་ལུགས་ངན་པ་དེ་ལ་ཐུག དེ་ཡང་དེང་སྐབས་སུ་སྔར་ལས་ཀྱང་ལུགས་སྲོལ་ཇེ་ངན་དུ་སོང་ནས་ཕྱུག་པོའི་སྒོ་ཁྱི་ཡང་གྲལ་མགོ་ལ་བཞག་པའི་དུས་སྐབས་ཞིག་ཡིན་པ་རེད། དེས་ན་བོད་ན་རྫུན་མས་རྫུན་མ་མིང་བཏགས་ནས་ལོང་བས་ལོང་བ་ཁྲིད་པའི་འཁྲབ་སྟོན་འདི་ལ་སྐྱོ་བྱུང༌། དེའི་གནད་དོན་བླ་རྒན་རྣམས་ཀྱིས་ཡོད་ཚད་ནས་ཡོད་ཚད་དཔལ་འབྱོར་ཡིན་སྙམ་པའི་འདུ་ཤེས་ལས་བྱུང་ལ། དེའི་ཡང་གནད་དོན་ཤེས་ཡོན་མེད་པའི་དབང་གིས་རང་ཚོད་མ་ཟིན་པ་ཡིན་པར་བདག་གི་ཀུན་རྟོག་གི་རི་མོ་ལ་སྣང་ངོ༌། །ཡང་གཅིག་བརྗོད་ན་མིང་སྟོང་ཁུར་བའི་སྐྱབས་གནས་སུ་ཁས་ཆེ་བ་དག་གིས་དད་ལྡན་མང་ཚོགས་རྣམས་བསླུས་སོང༌། ཕམ་སོང༌། མགོ་སྐོར་བཏང་སོང༌། དཔལ་འབྱོར་འཕྲོག་བཅོམ་བྱས་སོང༌། རྙོག་དྲ་བཟོས་སོང༌། ཆོས་ཚོང་རྒྱབ་སོང༌། ཐོབ་གོ་ས་རྩོད་སོང༌། ད་འདི་ལྟར་འགྲོ་ན་ཡོད་ཚད་ནས་ཕམ་ཁ་ཁུར་དགོས་པས་དད་ལྡན་མང་ཚོགས་རྣམས་གཉིད་ལས་སད་དགོས། གྲྭ་བ་རྣམས་ལ་དད་ལྡན་མང་ཚོགས་ཀྱིས་ཡིད་ཆེས་བྱེད་པས་མི་བསླུ་བ་གལ་ཆེའོ། །བདག་གྲྭ་རྐྱང་ཞིག་ལ་ཁུར་མེད་ཀྱང་སེམས་ཀྱིས་མ་བཟོད་ནས་དངོས་གྲུབ་དཔལ་ཞེས་འབོད་པས་ངག་འདི་ཤོར་སོང༌། ནོར་བ་ཡོད་ན་བཟོད་གསོལ། ཀུན་མཁྱེན་དོལ་པོ་པ་ཤེས་རབ་རྒྱལ་མཚན་འདས་ཚིགས།ཀུན་མཁྱེན་དོལ་པོ་པ་ཤེས་རབ་རྒྱལ་མཚན་འདས་ཚིགས་དངོས་ནི། ཆོས་རྗེ་ཀུན་མཁྱེན་གྱི་དངོས་སློབ་ཆོས་གྲགས་དཔལ་གྱིས་མཛད་པའི་རྣམ་ཐར་གསལ་སྒྲོན་དཔེ་རྙིང་ཐམས་ཅད་ལས། དགུང་ལོ་བདུན་ཅུ་ཐམ་པར་ལྕགས་མོ་གླང་ལ་སྐུའི་གཟི་བརྗིད་ཆེ་བར་ཀུན་གྱི་མཐོང་སྣང་དུ་ཁྲིད་སྣ་ཚོགས་པས་བུ་ཆེན་རྣམས་ཀྱི་ཆོས་སྐལ་ཡིན་གསུངས། ཞེས་པ་ནས། དེ་ནས་ཟླ་བ་བཅུ་གཅིག་པའི་ཚེས་བཞིར་ཚོགས་པ་རྣམས་ལ། ངེས་དོན་རྒྱ་མཚོ་ཁྱེད་རྣམས་ཀྱི་ཆོས་སྐལ་ཡིན་གསུངས་ནས། ཞག་གསུམ་དུ་གསུངས་པའི་ཚེ། སྔར་བས་གཟི་མདངས་ཆེ་ནས་ནམ་མཁའ་ལ་སྒྲ་འོད་གསལ་འཇའ་འོད་མེ་ཏོག་གི་ཆར་གཡོས་སོ། །ཚེས་དྲུག་གི་ཉིན་པར་ཆོས་གསུངས་པའི་དུས་སུ། སྔར་བས་ཕྱོགས་ཕྱོགས་སུ་རོལ་མོ་སྣ་ཚོགས་དང་མེ་ཏོག་འཇའ་ཚོན་སྣ་ཚོགས་པས་ཁེངས་ཏེ། ཞེས་པ་ནས། ཅུང་ཟད་ཀྱང་མེད་པའི་ངང་ལས་ཏིང་ངེ་འཛིན་དུ་བཞུགས་ནས། ཚེས་དྲུག་གི་དགོང་མོར་བདེ་བར་གཤེགས་སོ། །ཞེས་དང༌། བླ་མ་བློ་གྲོས་གྲགས་པའི་ཀུན་མཁྱེན་རྣམ་ཐར་ཚིགས་བཅད་མ་ལས། དེ་ནས་ལོ་དེའི་ཟླ་བ་བཅུ་གཅིག་པའི། །ཚེས་བཞིར་འཚོགས་པ་མང་བསྡུས་རྗེ་མཆོག་གིས། །ངེས་དོན་རྒྱ་མཚོ་ཁྱེད་རྣམས་ཆོས་སྐལ་ཡིན། །གསུངས་ནས་ཞག་གསུམ་བར་ལ་བརྩེ་ཆེན་གྱི། །ཞིབ་རྒྱས་ལེགས་གནང་ཚེ་ན་ཉིད་ཀྱི་{། །སྔར་བས་གཟི་མདངས་ཆེ་ཞིང་ནམ་མཁའ་ལས། །སྒྲ་དང་འཇའ་འོད་ཆེར་གསལ་མེ་ཏོག་ཆར། །ས་གཡོ་ལ་སོགས་རྟགས་མཚན་ཆེར་མངོན་བྱུང༌། །ཚེས་དྲུག་ཉིན་པར་ཆོས་གསུངས་དུས་སྐབས་ན། །སྔར་བས་ཕྱོགས་ཕྱོགས་རོལ་མོ་སྣ་ཚོགས་ལྡིར། །མེ་ཏོག་འཇའ་ཚོན་མང་པོས་བར་སྣང་ཁེངས། །རྗེ་ཉིད་སྤྱན་གྱིས་ནམ་མཁར་ཡང་ཡང་གཟིགས། །ཞེས་དང༌། དཔལ་དུས་ཀྱི་འཁོར་ལོའི་བརྒྱུད་པ་རིན་པོ་ཆེའི་རྟོགས་པ་བརྗོད་པ་དཔག་བསམ་གྱི་སྙེ་མ་ལས། བདུན་ཅུ་པ་ལྕགས་མོ་གླང་གི་ལོ་ཧོར་ཟླ་བཅུ་གཅིག་པའི་ཚེས་ལྔའི་ཉིན་ཁྲིད་གསར་བ་རྣམས་ལ། བླ་མའི་རྣལ་འབྱོར་རྒྱས་པ་ཅིག་གནང་ནས་འདི་ལ་རྟེན་འབྲེལ་ཐམས་ཅད་བསྒྲིག་དགོས། གལ་པོ་ཆེ་ཡིན་པས་སྒོམས་ཤིག དེ་ནས་གདན་ས་པས་གནང་ངོ་གསུང༌། ཚོགས་པ་ལ་ངེས་དོན་རྒྱ་མཚོའི་ཆོས་འཕྲོ་རེ་ཉིན་ཆེས་ཐུགས་གསལ་ཞིང༌། གཟི་མདངས་ཆེ་བའི་རྣམ་པས་ལྷག་པར་གསུང་ཆེ་བར་གསུངས་ཏེ། འུ་ཅག་གི་ཆོས་བཤད་མཚམས་དེ་ཀ་ལ་བྱེད་པ་ཡིན་ནོ་གསུངས་ནས་ཆོས་འཕྲོར་བཞག ཚེས་དྲུག་གི་ནམ་ལངས་མ་ཐག་འོད་གསལ་ལ་མཉམ་པར་གཞག་ནས་དགོང་མོ་མྱ་ངན་ལས་འདས་ཏེ། མཁའ་ཁྱབ་མཁའི་རྡོ་རྗེ་ཅན་ཡིན་མོད་ནའང༌། སྤྲུལ་པའི་སྐུ་ནི་ཞིང་བདེ་བ་ཅན་དུ་འབྱོན་པར་ཞལ་གྱིས་མཆིས་སོ་ཞེས་ཆག་ལོ་ཙཱ་བ་རིན་ཆེན་ཆོས་རྒྱལ་གྱིས་གསུངས་པས་ཀུན་མཁྱེན་དོལ་པོ་པ་འདས་དུས་དངོས་གནས་པ་ནི་བོད་ཟླ་བཅུ་གཅིག་ཡིན་པས་སོ། །ཆག་ལོ་ཙཱ་བ་རིན་ཆེན་ཆོས་རྒྱལ་མཆོག་ནི། བོད་རབ་བྱུང་བརྒྱད་པའི་མེ་ཡོས་༼༡༤༤༧༽ལོར་སྐུ་འཁྲུངས་ཤིང༌། མཚན་གྱི་རྣམ་གྲངས་ལ་ཆག་ལོ་ཙཱ་བ་རིན་ཆེན་ཆོས་རྒྱལ་དང༌། ཆག་ལོ་བཞི་བ་རིན་ཆེན་ཆོས་ཀྱི་རྒྱལ་པོ། ཏེའུ་ར་བ་རིན་ཆེན་ཆོས་ཀྱི་རྒྱལ་པོ་ཞེས་བརྗོད་དོ། །ཞེས་པ་འདི་ནི་དངོས་གྲུབ་དཔལ་གྱིས་བྲིས་པའོ། ། དུས་འཁོར་གྱི་སྒོམ་སྒྲུབ་ལ་སེམས་ཚོར་གྱི་གཏམ།དུས་འཁོར་གྱི་སྒོམ་སྒྲུབ་ལ་སེམས་ཚོར་གྱི་གཏམ། ན་མ་ཤྲཱི་ཀཱ་ལ་ཙཀྲ་ཡ། དཔལ་དུས་ཀྱི་འཁོར་ལོའི་གསང་སྔགས་ཀྱི་བསྟན་པ་འདི་བོད་གངས་རིའི་ལྗོངས་འདིར་འགྱུར་མཛད་མི་འདྲ་བ་ཉེར་བཞི་བྱུང་ནས་དར་རྒྱས་སུ་བྱུང་ལ། འགྱུར་མཛད་དེ་དག་ལས་གཙོ་བོ་ནི་རྭ་འབྲོ་གཉིས་ཡིན་ལ། རྗེས་ནས་དེ་གཉིས་ཀྱི་བརྒྱུད་པའི་ཆུ་བོ་གཅིག་ཏུ་གྱུར་པ་ཡིན་མོད་དཔལ་ལྡན་རྒྱལ་བ་ཇོ་ནང་བ་ནི་འབྲོ་ལུགས་དེ་གཙོ་ཆེར་བཟུང་བ་ཡིན་ལ། རི་བོ་དགེ་ལྡན་པའི་ཕྱོགས་ནས་མཁས་གྲུབ་རིན་པོ་ཆེས་བུ་སྟོན་རིན་ཆེན་གྲུབ་ཀྱི་རྗེས་སུ་འབྲང་ནས་རྭ་ལུགས་གཙོ་བོར་འཛིན་པ་ཡིན་ཀྱང་རྗེ་བླ་མ་ཤར་ཙོང་ཁ་པས་ཇོ་ནང་ཕྱོགས་རྒྱལ་བའི་མདུན་ནས་དུས་འཁོར་གསན་པར་རྗེའི་རྣམ་ཐར་དུ་མར་གསལ་ལ། སྔ་འགྱུར་རྙིང་མའི་མཁས་པ་དུ་མས་གསང་སྔགས་གསར་མའི་རྒྱུད་སྡེ་རྣམས་ཀྱི་ནང་ནས་མཆོག་ཏུ་གྱུར་པ་ནི་དུས་འཁོར་གྱི་རྒྱུད་འདི་ཡིན་པར་གསུངས་ཏེ། དཔེར་ན་འཇུ་མི་ཕམ་རིན་པོ་ཆེས། དུས་འཁོར་གྱི་རྒྱུད་སྡེ་ནི་རིན་པོ་ཆེ་ཟ་མ་ཏོག་ཁ་ཕྱེ་བ་ལྟར་ཡོན་ཏན་དུ་མ་དང་ལྡན་པས་ན་གསར་མའི་རྒྱུད་ཀུན་ལས་མཆོག་ཏུ་གྱུར་པ་ཡིན་པར་གསུངས་སོ། །ད་ལྟ་དུས་འཁོར་གྱི་སྒྲུབ་མཆོད་དང་དབང་ལུང་ཙམ་རེ་ཆོས་བརྒྱུད་དུ་མ་ལ་ཡོད་ཀྱང་བསྐྱེད་རྫོགས་རིམ་གཉིས་ཀྱི་ཉམས་ལེན་དང་དབང་ལུང་མན་ངག་སོགས་སྔོན་བྱོན་དམ་པས་ཕྱག་ལེན་མ་ཉམས་པར་འཛིན་སྐྱོང་གནང་བའི་ཆོས་བརྒྱུད་ནི་དཔལ་ལྡན་རྒྱལ་བ་ཇོ་ནང་བ་ཡིན་པར་གྲགས་ཤིང་ད་ལྟའི་གནས་སྐབས་སུ་གཞན་ལ་ལྟོས་ན་གྲུབ་པ་ཡིན་ཞེས་བརྗོད་ན་ཆོག་སྙམ། ཇོ་ནང་བ་ལ་མཚོན་ན་རྡོ་རྗེ་སློབ་དཔོན་རྣམས་ཀྱི་བཀའ་དྲིན་ལས་དབང་ལུང་མན་ངག་དང་མཐོང་བ་བརྒྱུད་པའི་ཕྱག་ལེན་རེ་ཅུང་ཟད་གནས་ཀྱང་དུས་འཁོར་བསྡུས་རྒྱུད་དང་འགྲེལ་ཆེན་དྲི་མེད་འོད་དང་ཕྱོགས་རྒྱལ་གྱི་རྒྱུད་མཆན་སོགས་ལ་ཐོས་བསམ་གནང་མཁན་ཉིན་སྐར་ལྟར་དཀོན་ལ། རྒྱུད་སྡེའི་དགོངས་སྙིང་དུས་འཁོར་གྱི་བསྐྱེད་རྫོགས་ཡང་སྒོམ་པའི་ཚུལ་འཛིན་མཁན་མང་ཡང་བཤད་ཤེས་མཁན་ནི་ལྐོག་གྱུར་དུ་ཡོད་ན་མ་གཏོགས་ང་ལྟ་བུའི་ཚུར་མཐོང་གི་ངོའམ་རྟོག་གེ་བའི་ངོ་ན་དཀོན་པར་སྣང༌། ང་འདྲའི་རྟོག་གེ་བས་བསམ་གཞིག་གནང་ན་མ་ཤེས་པར་སྒོམ་པའི་ཐབས་དང་བྲལ་སྙམ། དེས་ན་ད་ལྟའི་ཆར་དཔལ་དུས་ཀྱི་འཁོར་ལོའི་ཐུན་མོང་དང་ཐུན་མིན་གྱི་སྔོན་འགྲོ་དང་ཟབ་ལམ་རྡོ་རྗེའི་རྣལ་འབྱོར་སྦྱོར་བ་ཡན་ལག་དྲུག་གི་ཕྱག་ལེན་ལ་ལོ་གསུམ་བཞུགས་པའི་ཕྱག་སྲོལ་གནས་ལ། བཞུགས་མཁན་ཡང་ལོ་དགུ་དང་བཅུ་ཡས་མས་མང་དུ་སྣང༌། སྤྱིར་ལོ་ཆུང་དུས་ནས་བཞུགས་པ་ལ་རྩ་རླུང་ཐིག་ལེ་མ་ཉམས་པའི་གནས་སྐབས་ལ་ཉམས་རྟོགས་སྐྱེ་སླ་བ་ཡིན་ཡང་སྒོམ་མ་ཤེས་ན་ཉམས་རྟོགས་རང་བྱུང་དུ་སྐྱེ་བའི་གནས་མེད་དོ། །ད་ནི་གཞོན་སྐྱེས་དེ་དག་གི་དུས་ཚོད་དང་མི་ཚེ་རིན་ཐང་ཅན་ཞིག་ཏུ་འགྱུར་བའི་ཐབས་ལམ་ལ་མ་བརྩོན་ན་སྦྱོར་དྲུག་འདུག་པའི་མིང་ཙམ་ལས་དོན་སྙིང་མེད་པར་འགྱུར་བའི་ཉེན་ཁ་ཆེའོ། །བདག་གིས་ཐོས་པ་དུས་གཅིག་ན་རྒྱ་ཞིག་སྦྱོར་དྲུག་ལ་སྡད་རྗེས་༼没有意思༽དོན་སྙིང་མི་འདུག་ཅེས་བཤད་པ་ལྟར་མི་འགྱུར་བར་བྱ་དགོས། དེས་ན་རང་གི་རྣམ་རྟོག་ལ་སྔོན་འགྲོ་ལ་མ་འདུག་པའི་སྔར་ཐུན་མོང་གི་སྔོན་འགྲོའི་ཉམས་ལེན་དམིགས་པའི་གནད་ལ་ཟླ་གཅིག་ཙམ་ཐོས་བསམ་བྱས་ནས་འབུམ་ལྔ་ལ་བཞུགས། དེ་ནས་ཐུན་མིན་གྱི་སྔོན་འགྲོའི་འགོ་ནས་བསྐྱེད་རིམ་ལ་རབ་ན་དངོས་གྲུབ་ཉེར་འཚོ་ལྟ་བུའི་སྟེང་ནས་ཁྲིད་རྒྱས་པ་དང་ཐ་ན་མཐོང་དོན་དང་སྒོམ་རིམ་གྱི་གཞུང་ཁྲིད་ལ་གོ་བ་ཆགས་པར་བྱས་ནས་དུས་འཁོར་གྱི་བསྐྱེད་རིམ་བསྒོམ་ན་ལེགས་པའོ། །དེ་བཞིན་དུ་གནས་པ་རྩ་དང་གཡོ་བ་རླུང་དང་བཀོད་པ་བྱང་ཆུབ་སེམས་ཀྱི་ཐིག་ལེ་གསུམ་གྱི་གནད་དུ་བསྣུན་པའི་གཞིའི་གཙོ་བོ་དང༌། དབེན་གསུམ་དང༌། དངོས་གཞི་སྦྱོར་བ་ཡན་ལག་དྲུག་སོ་སོའི་སྐབས་སུ་ཉམས་ལེན་དམིགས་པའི་གནད་དང༌། སྒོམ་དོན་བློ་ལ་འགོད་པ་བཅས་ཐ་ན་ངག་ཐོག་ནས་བཤད་ཤེས་པར་བྱས་ནས་ད་གཟོད་བསྒོམ་ན་ལེགས་སོ། །སྤྱིར་གཞུང་བཀའ་པོད་ལྔ་གཟིགས་ཟིན་པའི་སློབ་གཉེར་བ་རྣམས་ཀྱིས་ངེས་པར་དཔལ་དུས་ཀྱི་འཁོར་ལོའི་རྒྱུད་ལ་ཐོས་བསམ་བྱེད་རྒྱུ་བདག་གིས་ལག་ཐལ་མོ་སྦྱར་ནས་གྲོས་འདེབས་ཞུ་བ་ཕུལ་བ་ཡིན། དེའི་རྒྱུ་མཚན་ནི། ཆོས་རྗེ་ཀུན་མཁྱེན་དོལ་པོ་པས་དབུ་མ་གཞན་སྟོང་ནི་དུས་འཁོར་འགྲེལ་ཆེན་དྲི་མེད་འོད་སོགས་སེམས་འགྲེལ་སྐོར་གསུམ་གྱི་མན་ངག་ལ་བརྟེན་ནས་བཀྲལ་བ་ཡིན་པ་དང༌། དེང་དུས་སུ་དུས་འཁོར་གྱི་འཆད་ཉན་འདི་ཇོ་ནང་བའི་བགོ་སྐལ་ལྟ་བུ་གྱུར་བས་སོ། །ཡང་ཞར་བྱུང་དུ་བླ་རྒན་ཁ་ཅིག་གིས་རྟགས་སྣང་རེ་ཤར་བ་ཙམ་གྱིས་ཉམས་རྟོགས་ཅན་ཡིན་ཞེས་བཤད་ཀྱང་སྤྱིར་རྟགས་སྣང་ཙམ་ཕྱི་རོལ་བ་དང་མདོ་ལུགས་ལ་ཡོད་པར་རྗེ་བཙུན་སོགས་ཀྱིས་གསུངས་པས་འོད་གསལ་གྱི་རྟགས་མཚན་ཉིད་པའི་ཉམས་རྟོགས་ཀྱི་རྟགས་སྣང་ཡིན་མིན་གྱི་ཁྱད་པར་ཤེས་དགོས་པ་དང༌། ཁ་ཅིག་གིས་སྤྲོས་བྲལ་དུ་མཉམ་པར་བཞག་པར་རློམ་ནས་སེམས་གསལ་རིག་ལ་སེམས་བཞག་པ་ནི་གསལ་ཞིང་རིག་པ་ཤེས་པའི་མཚན་ཉིད་ཅེས་པའི་སེམས་གསལ་རིག་ཙམ་ལ་མཉམ་པར་བཞག་པ་ཡིན་ལ། དེ་ཙམ་ནི་ཚོར་འདུ་རགས་པ་བཀག་པའི་འདུ་ཤེས་མེད་པའི་སྙོམས་འཇུག་ཙམ་ལ་རེག་ཐུབ་པའི་ངེས་པ་མེད་ལ། དེ་ཡང་བཀའ་བསྡུ་བཞི་བ་ལས། ཐལ་མོ་སྦྱར་ནས་གྲོས་འདེབས་ཞུ་བ་འབུལ། །རང་རིག་མེད་པའི་སེམས་ཅན་མི་སྲིད་ཅིང༌། །རང་རིག་ཡོད་ན་རང་ངོ་ཤེས་པ་ཡོད། །གལ་དེ་རང་གཞན་གང་ཡང་མི་རིག་ན། །རིག་པ་ཡིན་པར་འགལ་ཏེ་འབྱུང་ཆེན་བཞིན། །དེ་ཕྱིར་སེམས་ཅན་ཀུན་ལ་སེམས་ཡོད་ཅིང༌། །སེམས་ཡོད་ཀུན་ལ་རང་རིག་ཡོད་པའི་ཕྱིར། །རང་ངོ་ཤེས་པ་སྐྱེས་ཙམ་ཉིད་ན་ཡོད། །ཚུལ་འདི་ལུང་རིགས་མཁྱེན་པ་རྣམས་ལ་གྲགས། །ཞེས་དང༌། །དེ་ཕྱིར་རང་ངོ་ཤེས་པས་ཆོག་པ་ཡི། །ལྟ་ལོག་དེ་འདྲ་བདུད་ཀྱི་གསང་ཚིག་ཡིན། །དེ་ལྟར་རྟོགས་དང་མ་རྟོགས་པ་ལས་ནི། །ཡང་དག་ལམ་དང་ལོག་པའི་ལམ་དུ་འཇུག །དེ་ཕྱིར་རང་ངོ་ཤེས་པས་གྲོལ་ཞེས་པའི། །སྡིག་ལྟ་བདུད་ལས་དེ་འདྲ་སྤོང་གྱུར་ཅིག །ཅེས་གསུངས་སོ། །ཁ་ཅིག་གིས་ཚོར་འདུ་རགས་པ་བཀག་ཆ་དང༌། ཧད་དེ་སྡོད་པའམ་ཡིད་ཞབས་སུ་མྱོང་སྣང་ཙམ་ཡོད་པ་སོགས་སྒོམ་པ་ནི་ཀུན་རྫོབ་བློས་བྱས་ལས་མ་འདས་པར་བླ་སློབ་གཉིས་ཀས་མཁྱེན་དགོས་སོ། །དེ་ཙམ་ལས་གསང་སྒྲོག་གི་ཉེས་པ་ལ་འཇིགས་ནས་མ་སྤྲོས་སོ། །མདོ་དོན་མཐར་ཐུག་གཞན་སྟོང་དབུ་མ་དང༌།། རྒྱུད་དོན་མཐར་ཐུག་རྡོ་རྗེའི་རྣལ་འབྱོར་གྱི།། ལྟ་སྒོམ་འབྲེལ་བའི་ལམ་གྱིས་གནད་བཟུང་ནས།། ཆོས་སྒོ་མཐའ་དག་གསར་བར་བྱེད་པར་ཤོག། ཅེས་པ་འདི་ནི་དངོས་གྲུབ་དཔལ་གྱིས་གཞན་ངོར་ཤར་མར་དུ་བྲིས་པ་དགེའོ། །བདག་གི་ནང་བསྟན་གྱི་ཕྱོགས་ལ་སེམས་ཁྲལ་ཆེ་ཤོས་ནི། བླ་སྤྲུལ་མཁན་གསུམ་ཕལ་ཆེར་གྱིས་ཚེ་འདིའི་དཔལ་འབྱོར་ཁོ་ན་ལ་ཞེན་ནས་ཐབས་འཕྲུལ་སྣ་ཚོགས་ཀྱིས་དཔལ་འབྱོར་སྒྲུབ་པའི་ལམ་ཁ་འམ་གཡོ་སྒྱུའི་ཚོང་ལས་ངན་ཤོས་ཀྱི་ལམ་དུ་ཞུགས་ལ། དེ་ཡང་སྤྱི་ཚོགས་ཀྱིས་བླ་སྤྲུལ་མཁན་གསུམ་ལ་སྡེ་སྣོད་གསུམ་ལ་ཐོས་བསམ་དང་བསླབ་གསུམ་ལ་ཉམས་ལེན་གྱི་ཡོན་ཏན་གཅིག་ཀྱང་གླེང་རྒྱུ་མེད་པར་སྤྱིར་དཔལ་འབྱོར་དང་བྱེ་བྲག་རླངས་འཁོར་ཁང་བ་སོགས་རྫིག་པོ་ཡོད་མེད་ཁོ་ན་ལབ་པ་ནི་བསྟན་པ་འཇིག་པའི་སྔ་ལྟས་ཤིག་རེད། དེའི་དབང་གིས་གྲྭ་བཙུན་པ་མང་པོ་ཞིག་ཐོས་བསམ་བོར་ནས་རྒྱ་བོད་ཀྱི་མི་རིགས་མགོ་རྨོངས་བ་ལ་ཆོས་ཀྱི་རྒྱལ་བོ་དང་མཁན་ཆེན་སོགས་མིང་རྫུན་མ་དང༌། རང་ལ་ཁེ་ཁ་ཡོད་པའི་རྟེན་བཞེངས་དང་རྟེན་རྙིང་སོགས་ཀྱི་ཚོང་ལས་དང༌། མོ་ལུང་བསྟན་དང་གཡང་ཁུག་རྫུན་མ་དང༌། སློབ་གྲྭ་དང་རྒན་གསོ་ཁང་རྫུན་མ་སོགས་དྲང་བདེན་མེད་པའི་ཚོང་ལས་རྫུན་མ་བྱེད་ཕྱོགས་ལ་ཁ་ཕྱོགས་པ་ནི་གྲྭ་བའི་མདུན་ལམ་ནོར་བ་རེད་ལགས། དེ་ནོར་བ་མ་ཡིན་ན་བདག་ཅག་གི་སྟོན་པས་འཁོར་བསྒྱུར་གྱི་རྒྱལ་སྲིད་སྤངས་ནས་རབ་ཏུ་བྱུང་བ་དང་སྔོན་བྱོན་དམ་པ་རྣམས་ཀྱིས་མགྲིན་གཅིག་ཏུ་འདོད་ཆུང་ཆོག་ཤེས་གྲངས་མེད་གླེང་བ་ནོར་བར་འགྱུར་རོ། །སྤྱིར་དྲང་བདེན་དང་ལོག་འཚོ་མེད་པའི་སྒོ་ནས་དེང་དུས་སུ་བསྟན་པའི་སྦྱིན་བདག་རེ་དགོས་ཀྱང་བསྟན་འཛིན་དང་བསྟན་པའི་སྦྱིན་བདག་གཉིས་ནོར་ནས་མཁས་བཙུན་གྱི་ཡོན་ཏན་ཅི་རིགས་ལྡན་པའི་བསྟན་འཛིན་རྣམས་ཀྱིས་སྦྱིན་བདག་ལ་ཕྱག་འཚལ་བ་ནི་ནང་བསྟན་ལ་མཚོན་ན་ཧ་ཅང་མི་འོས་པས་རྗེས་ནས་སྐྱབས་འགྲོའི་ནང་བླ་མའི་ཚབ་ཏུ། འབྱོར་ལྡན་ལ་ཕྱག་འཚལ་ལོ། །ཞེས་བརྗོད་པ་ལ་ཉེ་བར་གནས་སོ། །འོན་ཀྱང་དེའི་སྡེར་གཏོགས་པ་དག་ལ་སློབ་གསོ་མི་འགྲོ་བར་མ་ཟད་ཕྲག་དོག་དང་ཉོག་དྲ་བཟོ་བ་རེད་ཅེས་ལོག་འགྲེལ་བྱེད་པས་དེ་དག་ལ་སྨྲ་འདོད་ཡང་མེད། བདག་ལྟ་བུའི་གྲྭ་རྐྱང་ཞིག་གིས་ཕྲག་དོག་གི་གནས་མ་མཆིས་ལ། དེའི་རྒྱུ་མཚན་ཟ་རིགས་བཙོང་མཁན་ཞིག་གིས་ཟ་རིགས་བཙོང་མཁན་ལ་ཕྲག་དོག་བྱེད་པ་ལས་ལྕགས་རིགས་བཙོང་མཁན་ལ་ཕྲག་དོག་མི་བྱེད་པ་ལྟར་ཡིན་ལ། བདག་ལྟ་བུ་ལ་མཚོན་ན་དཔེ་ཁྲིད་ཙམ་རེ་བྱེད་མཁན་ཡིན་ན་ཚོང་ལས་བྱེད་མཁན་ལ་ཕྲག་དོག་བྱེད་དགོས་དོན་མེད་དོ། །འོན་ཀྱང་ཟེར་རྒྱུའི་ཕོང་བར་ངེས་སོ། །ངས་ཁ་བཟུང་མ་ཤེས་པ་ཙམ་མ་ཡིན་མོད་བསྟན་པ་ཉམས་ཀྱི་དོགས་ནས་ཡོན་ཏན་ནམ་ཤེས་ཡོན་པའི་སྡེ་ཁག་ལ་ནང་བསྟན་བདག་པོ་རྒྱག་རོགས་ཞེས་ལག་ཐལ་མོ་སྦྱར་ནས་འབོད་བསྐུལ་ཞུས་བཞིན་ཡོད་ལགས། གསལ་བཤད་ཅིག་ལ་འབྱོར་ལྡན་ཐམས་ཅད་ངན་པ་རེད་ཅེས་རྩ་བ་ནས་བཤད་ཀྱི་མེད། གཡོ་སྒྱུ་དང་འབྲེལ་དཔལ་འབྱོར་གྱིས་དོན་ལ་ནང་བསྟན་གནོད་པའི་རིགས་ནི་ངན་པར་བགྲང་བ་ཡིན། མ་ཟད་བསྟན་འཛིན་དང་སྦྱིན་བདག་མ་ནོར་དགོས་ཞེས་བཤད་པ་ཡིན། དེ་ཡང་བསྟན་པའི་སྒྲོན་མེས། ཇི་སྐད་དུ། མིང་ལ་མཐུན་རྐྱེན་ཟེར་ཡང་ཆོས་ཕྱོགས་ལས། །མཉམ་མེད་འདོད་ཡོན་བདུད་ཀྱི་ཡབ་མོ་སྟེ། །ཞེས་གསུངས་སོ། །མཇུག་བསྡུ་བ་ནི། དཔལ་མགོན་འཕགས་པ་ཀླུ་སྒྲུབ་ཀྱི་ཞལ་སྔ་ནས། དཔའ་བོ་དུད་འགྲོའི་ཁྲོད་ན་ཡོད། །ཕྱུགས་པོ་ཀླ་ཀློའི་ཁྲོད་ན་ཡོད། །དོན་དང་ལྡན་པའི་གཏམ་སྨྲ་བ། །འཇིག་རྟེན་འདི་ན་ཤིན་ཏུ་དཀོན། །ཞེས་སོ། །ཆོས་མེད་སྤྲང་འཁྱམས་པ་དངོས་གྲུབ་དཔལ་ནས། གཏེར་རྟེན་ཚོགས་མི་ཉོ་ཚོང༌།གཏེར་རྟེན་ཚོགས་མི་ཉོ་ཚོང༌། རྨ་ཆེན་གྱི་གཏེར་མཛོད་སོགས་གངས་ལྗོངས་ཀྱི་གཏེར་གནས་རྣམས་ཚོང་རྫས་སུ་གྱུར་བར་མ་ཟད་དེང་སང་དཔལ་འབྱོར་ཡར་རྒྱས་འགྲོ་བཞིན་པའི་སྐབས་སུ་སྐུ་གསུང་ཐུགས་རྟེན་ཉོ་ཚོང་ཁང་ཉིན་རེ་ལས་ཉིན་རེ་མང་དུ་འགྲོ་བཞིན་པ་དང༌། ལྷ་ཁང་གསེར་ཁང་མཆོད་རྟེན་སོགས་ཀྱི་ཚོང་ལས་འཕེལ་རྒྱས་འགྲོ་བ་དང༌། ད་རུང་དེ་ལས་ལྷ་ཁང་སོགས་རྟེན་གཅིག་ལ་བརྟེན་ནས་ལྷ་ཁང་སོགས་རྟེན་བཅུའི་སྦྱིན་བདག་བཙལ་ནས་བཅུ་འགྱུར་གྱི་ཁེ་ལས་བྱེད་བཞིན་མཆིས་པ་མ་ཟད་ལོ་ངོ་དུ་མར་འགོར་འགྱང་བྱས་པ་སོགས་གཡོ་སྒྱུ་ལ་ཆེད་མཁས་པ་ཡོད། ད་རུང་ས་ཁུག་ཀྱོག་ལ་བཤད་གྲྭའི་མིང་དང་རྒན་གསོའི་མིང་དང་སློབ་གྲྭ་བའི་མིང་བཏགས་ནས་འཐུས་སྒོ་མ་ཚང་བའི་མིའི་ཚོང་རྫས་ཡང་ཧ་ཅང་མང་བ་སོགས་མདོར་ན་རྟེན་བཞེངས་རེ་དང་ཚོགས་པ་རེ་དང་ངོས་སྦྱོར་རམ་རྒྱབ་གཉེར་རྫུན་མ་ཅི་རིགས་དད་ལྡན་མི་རིགས་ལ་མགོ་བསྐོར་གྱི་ཆ་རྐྱེན་དུ་དགོས་ཀྱི་ཡོད། དེས་ན་དེ་དག་མེད་ན་མགོ་སྐོར་གྱི་ཐབས་དང་བྲལ། ད་རུང་མེས་པོའི་ཤུལ་བཞག་གི་རྟེན་རྙིང་རྣམས་ཕྱི་ལོག་ཏུ་ཕལ་ཆེར་བ་ཕྱིན་ཟིན་ཏོ། །འདི་ནི་རྒྱ་བོད་ཀྱི་འབྱོར་ལྡན་རྣམས་ཀྱི་ལག་རྗེས་ཡིན་ནོ། །ད་རུང་རྒྱ་བླ་དང་དགོན་པའི་བར་གྱི་བར་ཁེ་བ་ཡང་ཡོད། གནས་ལུགས་དེ་འདྲ་མི་ཤེས་མཁན་ཚོས་རང་ཉིད་ཚོང་རྫས་ཡིན་པ་ཧ་མི་བ་མ་ཟད་དྲིན་ཆེ་རབས་ལུང་བ་གང་བཤད་པའི་གླེན་ལྐུག་ཡང་ཡོད་པར་མཐོང་ཐོས་སོ། །རྒྱལ་ཁབ་འདི་ལ་ཐང་ག་སོགས་ཆོས་ལུགས་ཀྱི་རྫས་ལ་བརྟེན་ནས་ཁ་གསོ་བའི་མིའི་གྲངས་འབོར་ཧ་ཅང་ཡོད་ཚོད་དུ་སྣང༌། ཚོགས་བསགས་པའི་རྟེན་ཙམ་ལས་རྟེན་ཧ་ཅང་མང་ན་ཚོགས་ངན་བསགས་པའི་རྒྱུ་མི་འགྱུར་རམ་ཤེས་ལྡན་རྣམས་ཀྱིས་དཔྱད་པར་བྱའོ། །འཇིག་རྟེན་གྱི་ཚུལ་ལུགས་རེ་འགའ་ལ་ཡིད་སྐྱོ་ནས་དངོས་གྲུབ་དཔལ་གྱི་ངག་ནས་ཤོར་སོང༌། གནས་ལུགས་དང་མི་མཐུན་པ་ཡོད་ན་བཟོད་གསོལ་ཞུ་ཞུ། ཕྱག་དར་བྱ། ཁང་བུ་བརྩེགས་པའི་མདོ་ལས། བཅོམ་ལྡན་འདས་ཀྱིས་བཀའ་སྩལ་པ། ཀུན་དགའ་བོ་ཕྱག་དར་བྱས་པའི་ཕན་ཡོན་ནི་ལྔར་འགྱུར་ཏེ། ལྔ་གང་ཞེ་ན། ཀུན་དགའ་བོ་འདི་ལྟ་སྟེ། བདག་གི་སེམས་དང་བར་འགྱུར་བ་དང༌། གཞན་གྱི་སེམས་དང་བར་འགྱུར་བ་དང༌། ལྷ་རྣམས་དགའ་བར་འགྱུར་བ་དང༌། མཛེས་པའི་ལས་བྱས་ཤིང་བསགས་པ་དང༌། ལུས་ཞིག་ནས་བདེ་འགྲོ་མཐོ་རིས་ཀྱི་འཇིག་རྟེན་གྱི་ལྷ་རྣམས་སུ་སྐྱེ་བར་འགྱུར་རོ། །ཞེས་གསུངས་པས་ན་ཕྱག་དར་གྱི་ལས་ལ་བརྩོན་པར་བྱའོ། །ལོ་སར་བའི་ནང་ལ་འཚམས་འདྲི་བཀྲ་ཤིས་བདེ་ལེགས་ཞུ། སྨྲ་ཤེས་པ་དང་དོན་གོ་བའི་འགྲོ་བ་མིའི་རིགས་ལ་ཞུ་གསོལ། ལོ་རྙིང་བའི་བྱ་བ་ལེགས་ཉེས་ཇི་ལྟར་ཡིན་ཡང་དེ་སྤྱི་སྡོམ་བྱས་ནས་དེ་ལས་ལྷག་པའི་བྱ་བ་ཞིག་ལོ་གསར་བར་སྒྲུབ་འདོད་དང་འཆར་གཞི་གལ་ཆེ། དེ་ཡང་བདེ་ཐང་ངང་མི་ཞིག་འཚོ་བ་ལ་འཚོ་ཐབས་གནས་མལ་ཟ་གོས་ཙམ་དགོས་མོད། མི་ཚེ་འདིར་འཚོ་བའི་དགོས་པ་ནི་ཟ་འཐུང་ཙམ་གྱིས་ཆེད་མ་ཡིན་པར་མི་ཚེ་དོན་ལྡན་གྱི་ཆེད་ཡིན་པས་ལོ་གསར་བ་འདི་ནས་འགོ་བརྩམས་ནས་དོན་ལྡན་གྱི་བྱ་བ་ལ་བརྩོན་དགོས། ཆོས་ལུགས་པ་ཞིག་གི་དབང་དུ་བྱེད་ན་དམ་ཆོས་བསྒྲུབས་ནས་མི་ཚེ་དོན་ལྡན་དགོས་སོ། །མདོར་ན་འདས་པའི་ལོ་ཟླ་དག་རྨི་ལམ་རྨིས་པ་ལྟར་སྐད་ཅིག་གིས་རྫོགས་པ་དེ་ཉམས་མྱོང་བྱས་ནས་མ་འོངས་པར་མི་ཚེ་དམ་འཛིན་ངང་མདུན་ལམ་ཕུན་སུམ་ཚོགས་པ་ཞིག་འཚོལ་དགོས་ལ། ལོ་མ་ཟད་སྐར་ཆ་རེ་རེ་ལ་མི་ཚེ་ཇེ་ཐུང་དུ་འགྲོ་བའི་འཆི་བ་མི་རྟག་པའི་ངང་ཚུལ་ངེས་པར་གཏན་ཁེལ་བ་ཡིན་ནོ། །དངོས་གྲུབ་དཔལ་ནས་ལོ་སར་ལ་ཉེ་བའི་སྐབས་སུ་ཕུལ། ཐོས་པས་འཁོར་རྩ་མ་རིག་པ་འཇོམས་ཐུབ་པར་སློབ་དཔོན་དཔའ་བོས་རྨོངས་བའི་དགྲ་བཅོམ་མཚོན་ཆ་ཡིན། །ཐབས་ཚུལ་མན་ངག་སྟོན་པ་གྲོགས་ཀྱི་མཆོག །ཕོངས་པར་གྱུར་ཀྱང་མི་འགྱུར་མཛའ་བོ་ཡིན། །གནོད་པ་མེད་པའི་མྱ་ངན་ནད་ཀྱི་སྨན། །ཉེས་པ་ཆེན་པོ་ཡི་ནི་དཔུང་འཇོམས་པ། །གྲགས་དང་དཔལ་གྱི་གཏེར་གྱི་མཆོག་ཀྱང་ཡིན། །ཐོས་པའི་རྗེས་འཇུག་སྒྲུབ་པ་སྙིང་བོར་བྱེད། །སྐྱེ་བའི་རྫོང་ལས་ཚེགས་ཆུང་ཐར་བར་འགྱུར། །ཞེས་ཐོས་པའི་ཡོན་ཏན་དེ་ལྟར་ཡིན་ཀྱང་དེང་སང་རང་འཁོར་ནང་ན་དབང་ཆེ་བ་དག་གིས་ཐོས་པའི་སྐྱོན་མང་དུ་བགྲང་བ་ནི་ཐོས་སྒོམ་གང་ཡང་མེད་པའི་ཕོང་བའི་རྒྱུ་རུ་འགྱུར་རོ། །སངས་རྒྱས་ཀྱི་གསུང་ལས་རང་གི་ལོག་རྟོག་ཚད་མར་བྱེད་པ་དག་ཕན་དཀའ་ཡང་དངོས་གྲུབ་དཔལ་ནས་ཐོས་པ་མི་དགོས་པར་འཛིན་པ་རྣམས་ལ་སེམས་འཕྲང་ནས་སྨྲས་པའོ། །ཐོས་བསམ་སྒོམ་གསུམ་ཡ་མ་བྲལ་བར་དགོས་པ་ས་བཟང་མ་ཏི་པཎ་ཆེན་གྱི་མདོ་སྡེ་རྒྱན་གྱི་རྣམ་བཤད་ཐེག་མཆོག་རབ་གསལ་སྣང་བ་ལས། རྩ་བར། དེ་ལྟས་རྣལ་འབྱོར་ཅན་གྱི་སྒོམ་པ་གང་ཡིན་དེ་ཡང་དོན་མེད་མིན། །དེ་ལྟས་བདེ་བར་གཤེགས་ཀྱི་བསྟན་པ་གང་ཡིན་དེ་ཡང་དོན་མེད་མིན། །གལ་ཏེ་ཐོས་པ་ཙམ་གྱིས་དོན་མཐོང་འགྱུར་ན་སྒོམ་པ་དོན་མེད་འགྱུར། །གལ་ཏེ་མ་ཐོས་པར་སྒོམ་འཇུག་པར་འགྱུར་ན་བསྟན་པ་དོན་མེད་འགྱུར། །ཞེས་གསུངས་པ་ལྟར་རྟོགས་པའི་ཆོས་མཐར་ཐུག་འགོག་པའི་བདེན་པ་ནི་ལམ་ཟབ་མོ་བསྒོམས་པ་ལས་སོ་སོ་རང་གིས་རིག་པར་བྱ་བ་ཡིན་པ་དེ་ལྟ་བས་ན་ཞི་གནས་ལྷག་མཐོང་ཟུང་འཇུག་གི་རྣལ་འབྱོར་ཅན་གྱི་སྒོམ་པ་གང་ཡིན་པ་དེ་ནི་དོན་མེད་མིན་ཏེ། དོན་ཆེན་པོ་དང་ལྡན་པའོ། །ལུང་གི་ཆོས་རིགས་པ་དང་མཐུན་པར་ལེགས་པར་བཤད་པས་སྐྱེ་བོ་རྣམས་དོན་དམ་ཆོས་ལ་རིམ་གྱིས་འདྲེན་པ་དེ་ལྟ་བས་ན། བདེ་བར་གཤེགས་པ་རྣམས་ཀྱི་གསུང་རབ་ཡན་ལག་བཅུ་གཉིས་ལ་སོགས་པ་བསྟན་པ་གང་ཡིན་དེ་ཡང་དོན་མེད་མིན་ཏེ་དོན་ཆེན་པོ་དང་ལྡན་པ་ཉིད་དོ། །དེ་ལྟ་མ་ཡིན་པར་གལ་ཏེ་གསུང་རབ་ལུང་གི་ཆོས་ཐོས་པ་ཙམ་གྱིས་ཆོས་ཉིད་ཡང་དག་པའི་དོན་མངོན་སུམ་དུ་མཐོང་བར་འགྱུར་ན་ཏིང་ངེ་འཛིན་ཟབ་མོ་སྒོམ་པ་དོན་མེད་པ་ཧ་ཅང་ཐལ་བར་འགྱུར་བ་ལས་དོན་མེད་པ་མ་ཡིན་ཞིང། གལ་ཏེ་གསུང་རབ་ཟབ་མོ་མ་ཐོས་པར་ཡང་སྒོམ་པ་ལ་འཇུག་པར་འགྱུར་ན། ལུང་གི་ཆོས་རྒྱ་ཆེན་པོ་བསྟན་པ་རྣམས་དོན་མེད་པར་ཧ་ཅང་ཐལ་བར་འགྱུར་བ་ལས་དོན་མེད་པ་ནི་མ་ཡིན་ནོ། །དེ་བས་ན་ཐོས་བསམ་དང་སྒོམ་པ་གང་རུང་གིས་ཆོག་པར་མི་བཟུང་ཞིང༌། གཉི་ག་ཟུང་འཇུག་ཏུ་འཛིན་པའི་སྒོ་ནས་དམ་པའི་ཆོས་ལ་གནས་པར་བྱ་བ་སྟེ། ཀུན་ལས་བཏུས་པར་ཡང༌། སྒོམ་པ་ལ་མ་བརྟེན་པར་ཐོས་པ་དང་བསམ་པའི་སྦྱོར་བ་འབའ་ཞིག་གིས་ཀྱང་ཆོས་ལ་གནས་པ་མ་ཡིན་ལ། ཐོས་པ་དང་བསམ་པ་ལ་མ་བརྟེན་པར་སྒོམ་པའི་སྦྱོར་བ་འབའ་ཞིག་གིས་ཀྱང་ཆོས་ལ་གནས་པ་མ་ཡིན་གྱི་གཉི་ག་ལ་བརྟེན་ཏེ་གཉིས་ཀ་ལ་གནས་ན་ཆོས་ལ་གནས་པ་ཡིན་ནོ། །ཞེས་གསུངས་པ་ལྟར་རོ། །ཞེས་གསུངས་སོ། །རྗེ་བཙུན་ཏཱ་ར་ནཱ་ཐའི་རང་རྣམ་མ་བཅོས་ལྷུག་པ་ལས། དེ་བདེན་ན་ཆོས་བརྒྱད་ཆུང་ཞིང་ཆོས་ལ་གནས་པའི་རྣམ་ཐར་དུ་འདུག་སྙམ་པ་བྱུང་དེང་སང་དེ་འདྲའི་རིགས་ལ་མི་ཆོས་མི་ཤེས་པ། དགོས་དུས་མི་ཕན་པ་ཟེར་ནས་ཐམས་ཅད་ཁ་གཏོང་བར་འདུག །ཆོས་དེ་མེད་ཁུངས་མེད་དུ་བཏང་ནས་འཇིག་རྟེན་གྱི་ཁེ་ཕོགས་ལ། ཆེ་བཞག་ཆུང་བཤོལ་གྱི་ཕན་ཐོགས་རྫུས་མ་རེས་མགོ་བོ་བསྐོར་དུ་ཕྱིན་ན། མི་ནག་པ་ཚོ་དགའ་བར་མ་ཟད། ཆོས་པ་ཚོ་ཡང་དེ་ཁ་རང་དགའ་བའི་ཁུངས་ཀྱིས་བསྟོད་ར་དིར་བྱེད་པར་འདུག །མི་ཆེན་སྐྱ་སེར་ཤེས་ལྡན་ཡིན་པའི་ཁུངས་ཚོ་ཡང་དེ་ཁ་རང་དགེ་བཤེས་བཟང་བར་འཛིན་པར་འདུག འཇིག་རྟེན་པ་རྣམས་དེ་སྐད་སྨྲ་བ་ནི་ཤིན་ཏུ་བླུན་མོད་དེ། སྐྱེ་བོ་མི་ནག་པ་ཆོས་མ་གོ་ཙ་ན་ཐབས་མེད། དགག་པའི་ཡུལ་དུ་མ་བྱུང༌། ཆོས་པ་རྣམས་ཀྱི་ཁ་ནས་དེ་བཞིན་སྨྲ། ཡིད་ནས་དེ་ལྟར་སེམས་པ་ནི་ཁོ་རང་བདུད་ཀྱི་དབང་དུ་སོང་བ་དེར་འདུག ཐབས་མེད་ཀྱང་ཆོས་སམ་བསྟན་པ་རང་དེ་རྩ་བ་ནས་ནུབ་པ་ཡིན་པར་འདུག་སྙམ་ཡིད་སྐྱོ་བའི་རྒྱུ་ཁོ་ནར་གདའ། ཞེས་དང༌། རྗེ་བཙུན་ཏཱ་ར་ནཱ་ཐའི་རང་རྣམ་མ་བཅོས་ལྷུག་པ་ལས། དེང་སང་ཕལ་ཅིག་རབ་གནས་བྱེད་ཟེར་ནས། བསྙེན་སྒྲུབ་གང་ཡང་མ་སོང་བའི་འཆོལ་པ་འགའ་ཞིག་འཚོགས། ཆོ་ག་མ་དག་པ་ཅིག་ལ་གསང་སྒྲོགས་གང་ཡོད་ཡོད་བྱས། དགའ་སྟོན་ཡིན་ཟེར་མི་འགའ་ཞིག་གིས་ལྐོག་ཟས་གྲུབ་པ་དང༌། རྟེན་བཞེངས་མཁན་རང་ལ་འབུལ་བ་འདྲ་ཡོང་ལ་རེ་ཞིང༌། རྟེན་མཇལ་གཏོང་ནའང་མི་རྣམས་ཁ་སྟོང་གྲོང་སྟོང་ལ་ཐལ་བ་ཕྱུ་རེ་གཏོང་མཁན་དུ་མང་བ་འདུག་སྟེ། ངེད་ཀྱིས་ནི་དེ་འདྲ་ཡེ་མ་བྱས། ཞེས་དང༌། རྗེ་བཙུན་ཏཱ་ར་ནཱ་ཐའི་རང་རྣམ་མ་བཅོས་ལྷུག་པ་ལས། ལར་བྱ་བ་ལས་ཀྱི་འཁོར་ལོའི་དགེ་བ་བརྒྱ་ཐམ་པ་ལས། ཚུལ་ཁྲིམས་རྣམ་པར་དག་པས་ཐོས་བསམ་གྱི་དགེ་བ་གཅིག་བཟང་བ་ཡིན། དེ་འདྲ་བརྒྱ་ཐམ་པ་ལས། བདེན་བཞི་སྟོང་ཉིད་བྱང་ཆུབ་སེམས་ཀྱི་དོན་ཡིད་ལ་བྱེད་པའི་དགེ་བ་གཅིག་དགའ་བ་ཡིན། དོན་འདི་ལ་ངེས་པ་རྙེད་པས་ངེད་ལ་རློམ་སེམས་མི་ཡོང་བའི་རྒྱུ་མཚན་ཡང་དེ་ལགས། འོན་ཀྱང་དེང་སང་ཚུལ་ཁྲིམས་དག་པ་དང་སྒོམ་ཡིད་བྱེད་དེ་ཉིན་མོའི་སྐར་མ་ལས་ཀྱང་དཀོན་ནོ། །དེས་ན་བྱ་བ་ལས་ཀྱི་འཁོར་ལོ་གཙོ་བོར་བྱས་པའི་རྒྱུ་མཚན་ཡང་དེ་ན་བདོག །སངས་རྒྱས་བྱང་སེམས་ཀྱི་དགོངས་པ་སེམས་ཅན་རྣམས་གནས་སྐབས་དང་མཐར་ཐུག་གི་བདེ་བ་ལ་འགོད་པ་ཁོ་ནར་གདའ་ཡང༌། སེམས་ཅན་ལ་ཕན་པ་ལ་ཕན་འདོགས་ལུགས་ཅིག་དགོས།རབ་བྱུང་ཆོས་པའི་ཁུངས་ཀྱིས་སྐྱེ་བོ་མི་ནག་ལ་སྒུར་བ་དང། དད་རྫས་ཀྱི་ནོར་རྣམས་རྔན་པར་སྟེར་བ་དང། ནག་ཆང་ལོངས་སྤྱོད་ཀྱི་ཐེས་ལ་སྦྱོར་བ་ལ་འགྲོ་དོན་ཟེར་བ་མིན། གཞན་དོན་ཟེར་བ་ཡང་མིན། སེམས་ཅན་ལ་ཕན་པ་ཟེར་བ་ཡང་མིན། རང་དང་སྦྱིན་པ་བྱིན་པའི་ཡུལ་གཉིས་ཀར་ངན་སོང་གི་གཡང་སར་ལག་སྦྲེལ་བྱས་ནས། མཆོང་བ་ཟེར་བ་དེ་ཡིན། ཆོས་པ་ཤེས་ལྡན་འདྲ་ཡོད་ན་ཡང་གོ་ལས་ཆེ། འཇིག་རྟེན་སྐྱེ་བོ་ཤེས་ལྡན་འདྲ་ཡོད་ན་ཡང་གོ་ལས་ཆེ། ཞེས་སོ། ། པདྨ་རྫོང་གི་དགོན་སྡེ་ཉེར་བཞི་ལ་རེ་བསྐུལ།པདྨ་རྫོང་གི་དགོན་སྡེ་ཉེར་བཞི་ལ་རེ་བསྐུལ་ཞུ་ཡིག ང་ཚོ་པདྨའི་མཁས་དབང་ལྷག་བསམ་དང་ལྡན་པ་རྣམས་ཀྱིས་དཀའ་ངལ་འཛེམ་མེད་ཀྱི་སྒོ་ནས་པདྨའི་ཆོས་སྡེ་རྣམས་ཀྱི་ཀུན་སྤྱོད་དང་ཤེས་ཡོན་སོགས་ཡར་རྒྱས་ཡོང་བའི་ཆེད་དུ་པད་མ་རིག་གཞུང་དར་སྤེལ་ཆོས་ཚོགས་འདི་བཙུགས་ནས་ཐེངས་དགུ་བ་སོང་ཟིན་ལ། ད་ལོ་ཐེངས་བཅུ་བ་བོད་ཟླ་བརྒྱད་པའི་ཚེས་དགུ་ལ་ཡར་ཚོགས་དང༌། ཚེས་བཅུ་ནས་བཅུ་དྲུག་བར་དངོས་གཞི་ཡིན་པས་དགོན་སྡེ་སོ་སོའི་དགོན་བདག་བླ་མ་དང་མཁན་པོ་དང་དོ་དམ་ཁང་རྣམས་ཀྱིས་རྒྱབ་སྐྱོར་དང་ལམ་སྟོན་གནང་ནས་བཤད་གྲྭ་བ་གཙོ་བོར་གྱུར་བའི་འདུས་སྡེ་རྣམས་ཕེབས་རོགས་ཞུ། སྤྱིར་རིག་གནས་དང་སྒོས་སུ་ནང་ཆོས་དང་ཁྱད་པར་དུ་ང་ཚོ་པདྨའི་དགོན་སྡེ་རྣམས་འཛམ་གླིང་དང་དུས་རབས་ཉེར་གཅིག་གི་རང་བཞིན་ཅན་གྱི་ཤེས་ཡོན་གོང་འཕེལ་དུ་འགྲོ་བ་དང༌། མ་འོངས་པའི་འཕེལ་རྒྱས་དང༌། མཐུན་སྒྲིལ་དང་བདེ་འཇགས་སྲུང་སྐྱོབས་ཀྱི་ཆེད་དུ་མ་བསྐུལ་དང་བླངས་ངང་ཕེབས་པར་ཞུ། གལ་ཏེ་རྒྱུགས་ཀྱི་སྐོར་མེད་ན་ཡང་མ་འོངས་པའི་མདུན་ལམ་གྱི་ཆེད་དུ་ཕེབས་པར་ཞུ་ཞུ། གཞན་ཡང་དགོན་བདག་བླ་མ་དང་མཁན་པོ་སྤྲུལ་སྐུ་རབ་སྔགས་གང་ཡིན་ན་ཤར་བྱོན་ཙམ་ཞིག་ཡིན་ན་ཡང་ཕེབས་རོགས་ཞུ། ད་ལྟའི་གནས་བབས་ལ་རང་ཚུགས་བཟུང་བའི་དུས་ཙམ་མ་ཡིན་པར་གང་ལ་ལྷག་བསམ་དང་ཤེས་ཡོན་འཇོན་ཐང་ཅན་རྣམས་ཀྱི་བྱ་བ་ལ་རྒྱབ་སྐྱོར་དང་མཐུན་སྒྲིལ་བྱེད་དགོས་པའི་གནས་སུ་སྣང་བས་ཞུས་པ་ཡིན་ལགས། རེ་བསྐུལ་དོན་སྙིང་ལྡན་པར་སྨོན། བོད་ཟླ་དྲུག་པའི་ཚེས་ཉེར་དྲུག་ལ་པདྨའི་རིག་གཞུང་དར་སྤེལ་ཚོགས་པའི་གཙོ་འགན་པའི་མིང་ཙམ་འཛིན་པ་དངོས་གྲུབ་དཔལ་ནས་གུས་ཕུལ། རིགས་ལམ་ཕྱིན་ཅི་ལོག་ལ་ཡིད་མ་རྟོན།རིགས་ལམ་ཕྱིན་ཅི་ལོག་ལ་ཡིད་མ་རྟོན། དེང་སང་ཁ་ཅིག་གི་ངག་ནས་མགོ་སྔ་དང་གོ་རིམ་མེད་པའི་རྟགས་གསལ་དང་ལུས་ཀྱིས་ས་མཆོང་གནམ་མཆོང་བྱས་ནས་འཕག་འཚག་རེ་རྒྱབ་ནས་ཚ་སྟོང་དང་འཁོར་སྟོང་རེ་རྒྱབ་ན་བླུན་པོ་རིགས་ལམ་མི་ཤེས་པ་ཚོས་རྟགས་གསལ་ཡག་པོ་བཏང་སོང་ཞེས་བསྟོད་ར་བྱེད། རང་གིས་ཡང་གང་དྲན་དྲན་གྱི་སྨྱོན་པ་ལྟར་བྱས་ན་རྟགས་གསལ་ཡིན་སྙམ་པའི་མངོན་པའི་ང་རྒྱལ་ལ་གནས་པ་རྣམས་ས་ཁྱབ་རྡོ་ཁྱབ་འགྲོ་བ་འདིས་རིགས་པའི་དབང་ཕྱུག་རྣམ་གཉིས་ཀྱི་རིགས་པ་ལ་སྒྲིབ་པར་འགྱུར་ལ། ཚབས་ཆཻ་ཤོས་གཞོན་སྐྱེས་གསར་སློབ་རྣམས་རིགས་ལོག་གི་ལམ་དུ་ཁྲིད་པ་དང༌། རིགས་ལམ་མེད་པ་རྣམས་ཀྱིས་རྩོད་པ་ནི་གཞུང་དོན་ཕྱིན་ཅི་ལོག་ཏུ་འགྲེལ་བའི་མ་རིག་རྨོངས་པ་འཕེལ་བའི་རྒྱུ་ཡིན་ནོ། །གཞུང་དོན་དང་འབྲེལ་མེད་ཀྱི་རྩོད་པ་ངག་འཁྱལ་ཡིན་པས་མི་དགེ་བ་ལས་མ་འདས་སོ། །དེས་ན་ཐོག་མར་རིགས་ལམ་ལེགས་པར་ཤེས་པའི་དགེ་རྒན་རེ་བསྟེན་པ་གལ་ཆེའོ། །ཐོག་མར་བླ་མ་བརྟག་ལ་མཁས་དགོས་པའི་གནད་ཡང་དེ་ཡིན་ནོ། །ཞེས་བློ་གསར་མང་པོའི་མི་ཚེ་འཕྲོ་བརླག་ཏུ་འགྲོ་བར་མཐོང་ནས་དངོས་གྲུབ་དཔལ་གྱིས་བྲིས་པའོ། ། ལས་འབྲས་ལ་ཡིད་མ་ཆེས་ན་ཆོས་པ།ལས་འབྲས་ལ་ཡིད་མ་ཆེས་ན་ཆོས་པ་མི་ཡོང༌། ཆོས་པ་རྣམ་དག་ཡོང་བ་ལ་ངེས་པར་ལས་རྒྱུ་འབྲས་ལ་ཡིད་ཆེས་ཡོད་དགོས།ལས་འབྲས་ལ་ཡིད་ཆེས་བརྟན་པོ་ཞིག་ཡོད་ན་མངོན་ལྐོག་མེད་པའི་ལས་འབྲས་དང་སྡོམ་དམ་ཚིག་བསྲུངས་ནས་ཁ་ཙམ་མ་ཡིན་པའི་ཐོས་བསམ་སྒོམ་གསུམ་སོགས་ཆོས་ལ་བརྩོན་པ་ཡོང་ངེས་ལ། དེས་ན་ལས་འབྲས་ལ་ཡིད་ཆེས་འོང་བ་ལ་རབ་ན་དངོས་སྟོབས་རིགས་པས་སྤྱིར་རྒྱུ་ལས་འབྲས་བུ་སྐྱེ་ལ་རྒྱུ་མེད་ལས་མི་སྐྱེ་བ་བཞིན་ལས་དགེ་སྡིག་གི་འབྲས་བུ་བདེ་སྡུག་འབྱུང་བ་བསླུ་བ་མེད་པ་ཡིན་ལ། དེ་ཡང་རྒྱུ་ས་བོན་མངར་བ་བཏབ་པ་ལས་འབྲས་བུ་མངར་བ་འབྱུང་བ་དང༌། ས་བོན་ཁ་བ་བཏབ་པ་ལས་འབྲས་བུ་ཁ་བ་འབྱུང་བ་བཞིན་ལས་དགེ་བ་བྱས་པ་ལས་འབྲས་བུ་བདེ་བ་འབྱུང་བ་དང༌། ལས་མི་དགེ་བ་བསགས་པ་ལས་འབྲས་བུ་སྡུག་བསྔལ་འབྱུང་བ་མཐའ་གཅིག་ཏུ་ངེས་པ་སྟེ། དཀོན་བརྩེགས་ཀྱི་མདོ་ལས། ས་བོན་ཁ་བ་རྣམས་ཀྱི་ནི། །འབྲས་བུ་ཁ་བ་སྐྱེ་བར་འགྱུར། །ས་བོན་མངར་བ་རྣམས་ཀྱི་ནི། །འབྲས་བུ་མངར་བ་སྐྱེ་བར་འགྱུར། །དཔེ་ཟླར་བྱ་བ་འདི་ཡིས་ན། །སྡིག་པའི་རྣམ་སྨིན་ཚ་བ་དང༌། །དཀར་པོའི་འབྲས་བུ་མངར་བ་དག །མཁས་པའི་མིས་ནི་ཤེས་པར་འགྱུར། །ཞེས་གསུངས་པ་ལྟར་ཤེས་དགོས་ལ། གལ་ཏེ་དངོས་སྟོབས་ཀྱིས་རྟོགས་པ་དེ་མ་བྱུང་ན་སངས་རྒྱས་ཀྱི་གསུང་མི་བསླུ་བ་ཡིན་པས་དེ་ལ་ཡིད་ཆེས་བྱས་ནས་ལས་འབྲས་བླང་དོར་ཚུལ་བཞིན་དུ་བྱེད་དགོས། མ་བྱས་ན་རང་ཉིད་བརླག་པར་གདོན་མི་ཟ་བའོ། །དེང་སྐབས་བླ་སྤྲུལ་མཁན་གསུམ་རེ་ཟུང་གིས་ཆོས་ལ་བརྟེན་ནས་ལྟོ་གོས་ཚོལ་བ་ལས་ལས་འབྲས་ཡིད་ཆེས་ཧ་ཅང་ཞན་ཏེ། ལས་འབྲས་བླང་དོར་མི་བྱེད་པའི་ཕྱིར། ཁྱབ་སྟེ། ཡིད་ཆེས་ན་དེ་ལུགས་ལྟར་ལག་ལེན་བྱེད་དགོས་པའི་ཕྱིར་རོ། །དངོས་གྲུབ་དཔལ་གྱིས། རང་ཚོད་རགས་པ་རང་གིས་ཟིན་པས། བདག་ནི་སྔོན་སྦྱང་ཅན་ཞིག་མིན། སྤྲུལ་བའི་སྐུ་ཡང་དེ་བས་ཀྱང་མིན། འོན་ཀྱང་སྔོན་གྱི་ལས་སྨོན་ལ་བརྟེན་ནས་ཚེ་འདིར་མཚན་ཉིད་དང་ལྡན་པའི་བླ་མ་དང་མཇལ། དཀའ་སྤྱད་ལ་བརྟེན་ནས་སློབ་སྦྱོང་ཅུང་ཟད་བྱས། དཔལ་ལྡན་བླ་མའི་བཀའ་དྲིན་ཁོ་ན་ལས་སློབ་འབྲས་ཅུང་ཟད་ཐོབ་པ་བྱུང༌། གྲྭ་རྐྱང་དངོས་གྲུབ་དཔལ་གྱིས། ༈ ཚད་མའི་མཛོད་ཆེན་ཉ་དབོན་ཀུན་དགའ་དཔལ་གྱིས་མཛད་པའི་མངོན་པར་རྟོགས་པའི་རྒྱན་གྱི་བཤད་སྦྱར་ཡིད་ཀྱི་མུན་སེལ་གྱི་ལུང་གི་བརྒྱུད་རིམ། མཁན་རབས་སོ་དགུ་པ་མི་ཕམ་སེངྒེ་རབ་རྒྱས། དེས་འཇམ་དབྱངས་བློ་གཏེར་དབང་པོ། དེས་རྫོང་སར་མཁན་རབས་གཉིས་པ་དབོན་སྟོན་མཁྱེན་རབ་ཆོས་ཀྱི་འོད་ཟེར། དེས་ཁ་བཏགས་མཁན་བློ་བཟང་ཤེས་རབ། དེས་སྡེ་དགེ་དགོན་ཆེན་གྱི་མཁན་ཆེན་བསོད་ནམས་གྲགས་པ། དམ་པ་གང་གི་ཞུ་ས་དེ་བློ་བཟང་ཤེས་རབ་ཡིན་ངེས་ལ། དམ་པ་གང་གི་བདག་དངོས་གྲུབ་དཔལ་ལའོ། །གཞན་རྣམས་ཕར་ཆེར་ཡིན་པ་ལས་ཡིག་ཆ་གསལ་བར་མི་འདུག དེ་ཡང་ཚལ་མིན་པ་བསོད་ནམས་བཟང་པོའི་དངོས་སློབ་རོང་སྟོན་སྨྲ་བའི་སེང་གེ་ལ་བརྒྱུད་ནས་ད་ལྟའི་བར་དུ་གནས་པ་འདྲའོ། །རང་གིས་མི་འཇོན་ན་གཞན་གྱིས་བསྒྲུབ་པ་ལ་རྒྱབ་སྐྱོར་དང་རོགས་རམ་བྱེད་དགོས། རང་གིས་མི་ནུས་གཞན་ལ་བསྒྲུབ་ཏུ་མ་བཅུག་ན་ནམ་ཡང་ཡར་རྒྱས་མེད། རྗེས་ལུས་ཡིན། བྱ་བ་གང་ཡིན་ན་བློ་མཐུན་པའི་མང་པོ་ལ་སྟོབས་ཤུགས་ཡོད་པས་མཐུན་སྒྲིལ་གལ་ཆེ། འོན་ཀྱང་ཁ་ཙམ་ནས་ཆབ་སྲིད་ཀྱི་ལག་ཆ་ལ་མཐུན་འབྲེལ་ཞེས་ཁ་ལ་འཁྱེར་ནས་རང་གིས་བྱ་བའི་ངོས་ནས་གཞན་ལ་དངོས་ཤུགས་ནས་གནོད་པ་བྱེད་ན་ཁ་དང་ལག་ལེན་འགལ་བ་ཡིན་ལ། དེང་སྐབས་དེ་ཧ་ཅང་མང༌། ལན་ལ་རེ་བ་མེད་པར་ཕན་བཏགས་ན་དོན་གྱི་མཐུན་འབྲེལ་དང་མཐུན་སྒྲིལ་ལགས་སོ། །དངོས་གྲུབ་དཔལ་ནས། ལོ་རེ་རེར་སྤུས་ཚད་ཇེ་ངན་དུ་འགྲོ་བའི་ཚོགས་འདུ། གཏོར་བླག་གི་རྣམ་པ་ཅན། སྒེར་གཅོད་ཀྱི་རྣམ་པ་ཅན། འདྲ་མཉམ་མེད་པ། མང་གཙོ་མེད་པ། འཐེན་འཁྱེར་ཅན། ལྷག་བསམ་ཅན་ལ་མགོ་གནོན། བསྟན་འགྲོ་ལ་གནོད་པ། དབང་བསྒྱུར་གྱི་རྣམ་པ། གོ་སའི་ཆེད་དུ་ཚང་ཁ་དང་ངོ་དགའ་ཁོ་ན་ལ་འབད་པ་ཆབ་སྲིད་ཀྱི་གཡོ་སྒྱུའི་རྣམ་པ་ཅན་ཞིག་ལས་ཚོགས་འདུ་དག་མ་ཚོགས་ན་དགའ། དངོས་གྲུབ་དཔལ་ནས། གྲོན་ཆུང༌།གྲོན་ཆུང༌། དལ་འབྱོར་གྱི་མི་ལུས་ཐོབ་པ་ན་དཔལ་འབྱོར་འབད་བརྩོན་གྱིས་མི་ཚེ་འཛད་པར་བྱས་བཞག་ན་སྙིང་པོ་ཆེར་མེད་པ་རེད། ཡང་དགོས་སུ་གྲྭ་བ་ཞིག་གིས་ཐོས་བསམ་སྒོམ་པ་གང་ཡང་མི་བྱེད་པར་ལོངས་སྤྱོད་ཁོ་ན་ལ་ཁ་གདངས་འདུག་ན་དོན་དག་མེད་པ་རེད། འོན་ཀྱང༌། སྒོར་རྡོག་ཁ་ཤས་ཤིག་ཡོད་ན་གྲོན་ཆུང་མི་ཤཻས་པར་དགོས་མི་དགོས་མང་པོའི་སྟེང་བརླགས་བཞག་ན་རྩ་བ་ནས་ཡག་པོ་མི་འདུག ཁྱད་པར་དུ་སྒོར་མོ་ཁ་ཤས་དེ་ཆོས་མིན་དོན་མེད་པའི་ཕྱོགས་སུ་བཀོལ་བཞག་ན་ཡག་པོ་མེད་པ་རེད། དེའི་རྒྱུ་མཚན་ནི། ང་ཚོའི་སྒོར་མོ་འདི་ཤི་གསོན་མང་པོའི་ཤ་དང་ཁྲག་སྐྱབས་ཡོན་དུ་ཕུལ་བ་རེད། དེ་སེམས་ཀྱིས་བརྗེད་ཉན་གི་མ་རཻད། གྲྭ་ཆུང་རྣམས་ཀྱིས་དཔལ་འབྱོར་གྲོན་ཆུང་བྱེད་རྒྱུ་ཤེས་དགོས། ཡོང་འབབ་ཅུང་ཡོད་ན་ཡང་གྲྭ་བ་རེ་ཟུང་རྒྱུན་དུ་སྒོར་མོས་མ་འདང་བའི་དཀའ་ངལ་ཆགས་པ་ནི་གྲོན་ཆུང་བྱེད་མ་ཤེས་པ་རེད། དེས་ན་ངེས་པར་དགོས་མཁོ་ཡོད་ན་མ་གཏོགས་མཐོང་ཚད་མི་ཉོ་བར་དཔལ་འབྱོར་གྲོན་ཆུང་བྱེད་རིགས། དེང་ཐོག་འཛམ་གླིང་གི་དཔལ་འབྱོར་རྩོལ་སྒྲུབ་ཀྱི་རིག་གཞུང་ལས་དེ་འདྲ་བཤད་འདུག ཆོས་འདུལ་བ་ལས་ཐ་ན་གོས་རལ་ནས་གྱོན་ས་མི་འགྲོ་བར་གྱུར་ཚེ་གཙུག་ལག་ཁང་གི་གས་ཁ་སུབ་པར་བྱེད་པ་སོགས་དཔལ་འབྱོར་གྲོན་ཆུང་བྱས་ནས་ཡོན་བདག་གི་དཔལ་འབྱོར་ཆུད་ཟོས་སུ་མི་འགྲོ་བར་བྱེད་དགོས་པར་བཀའ་གནང་ཡོད་པ་སེམས་ལ་ལེགས་པར་འཛིན་དགོས་སོ།། དགེ་བཤེས་དངོས་གྲུབ་དཔལ་ནས། ༢༠༢༠ ༨ ༢༨ མིང་རེ་བཏགས་གོ་ཆོད་དོ་ཟེར་ན་དེ་ནི་ནོར་འཁྲུལ་ཡིན་ཏེ། གོ་བཀག་ན་གོ་ཆོད་པས་མ་ཁྱབ་པས་མཁན་སྤྲུལ་གྱི་མིང་འདོགས་མཁན་རྣམས་ཀྱིས་གཟབ་གཟབ་དགོས། ཡོན་ཏན་ཅན་ལ་གུས་བསྐུར་དང་བསྟོད་པ་ངེས་པར་བྱེད་དགོས་ལ། ཡོན་ཏན་ཆེར་མེད་ན་ཡང་དགོས་པ་རེ་ཡོད་ན་བསྟོད་འོས། འོན་ཀྱང་བསྟན་པ་ལ་གནོད་པའམ་སེམས་ཅན་ལ་མགོ་སྐོར་བའམ་ཁེངས་དྲག་གི་རྒྱུ་འགྲོ་ན་རྣམ་པ་ཀུན་ཏུ་བསྟོད་བསྔགས་མི་རིགས་སོ།། དངོས་གྲུབ་དཔལ་ནས། མཐོ་དམན་བར་མ་སུ་ཡིན་ན་རང་ལ་ཆོས་འཇིག་རྟེན་གྱི་དྲིན་ཆེ་ན་དྲིན་ལན་མཇལ་བ་ལུགས་གཉིས་གང་ལ་ཡང་དགོས་ལ། དེ་མ་ཟད་རང་ལ་ཆོས་འཇིག་རྟེན་གྱི་དགོས་མཁོ་རེ་ཡོད་ན་གཞན་ལ་རེ་བ་བྱེད་ཆོག གཞན་གྱིས་རང་ལ་དགོས་མཁོ་རེ་བསྒྲུབ་ན་དེ་ལ་དྲང་བདེན་ནམ་གནས་ལུགས་དང་མཐུན་པར་ལན་འཇལ་བ་དགོས་ལ། འོན་ཀྱང་དེའི་ཕྱོགས་བཟུང་ནས་ཆགས་སྡང་མི་བསགས་རྒྱུ་གལ་ཆེ་སྙམ། དངོས་གྲུབ་དཔལ་ནས། ཆོས་འབྲེལ་མ་ཐོབ་གོང་དུ་བླ་མ་གསེར་བཞིན་དུ་བརྟགས་དགོས། དེ་ལ་ཉེས་པ་ཡང་མེད་དེ། རིགས་ལྡན་པད་མ་དཀར་པོའི་དོན་དམ་བསྙེན་པ་ལས། འདོད་པའི་དངོས་གྲུབ་སློབ་དཔོན་ཞལ་གྱི་རྗེས་འབྲང་བར། །མ་ལུས་རྡོ་རྗེ་ཐེག་པར་ཐམས་ཅད་མཁྱེན་པས་གསུངས། །དེ་ཕྱིར་སློབ་མ་དམ་པ་རྣམས་ཀྱིས་བླ་མ་གསེར་བཞིན་དུ། །ཡོངས་སུ་བརྟགས་ན་སྡིག་པ་ཅུང་ཟད་ཡོད་མ་ཡིན། །ཞེས་གསུངས་པས་སོ། ། བྱ་བ་ལས་འབྲས་དང་མཐུན་པར་སྨོན་པ།བྱ་བ་ལས་འབྲས་དང་མཐུན་པར་སྨོན་པ། ཇོ་ནང་ཏཱ་ར་ནཱ་ཐས་རང་རྣམ་མ་བཅོས་ལྷུག་པ་ལས། ངས་ནི་ཁྱི་ལུད་དེ་འདྲ་ནོར་བུ་རང་ཤིན་ཏུ་ཡིན་པ་གདའ་ལགས་ཧ་ཡི་ཕ་ཕ་ཟེར་བ་མཁས་འཇུག་ཀྱག་ཁྲམ་དེ་འདྲ་སྔར་ཡང་བྱེད་མ་མྱོང༌། ད་ཡང་མི་བྱེད། གཏམ་དྲང་ཐལ་ལེ་སྨྲ་མཁན་དེ་ཡིན། རི་གཟར་གྱི་རྦབ་ལྟར་འཕོག་ཐུག་མང་སེ་བ་ཅིག་ཡོང་སྟེ། འཕོག་ཐུག་བྱུང་བ་ཚོ་རང་འཕོག་ཐུག་ཡོང་སར་བཞུགས་པས་ལན། ཞེས་གསུངས་པ་ལྟར་བསྟན་པ་དང་འགྲོ་བའི་དོན་དུ་ཆོས་དང་གནས་ལུགས་བཞིན་སྨྲ་བའི་སྤོབས་པ་ཐོགས་པ་མེད་པ་ཐོབ་པར་གྱུར་ཅིག བསྟན་འགྲོའི་དོན་ལས་རང་དོན་དུ་མཚན་སྙན་ལ་ཞེན་པ་སྐད་ཅིག་ཙམ་ཡང་མི་སྐྱེ་བར་ཤོག་ཅིག ལས་འབྲས་དང་མཐུན་པའི་བྱ་བཞག་གང་ཡང་ལྡོག་པ་མེད་པར་གྱུར་ཅིག བྱ་བ་གང་ཡིན་ན་གཞན་ལ་ཕན་པ་རེ་འབྱུང་སྲིད་པར་བྱིན་གྱིས་བརླབ་ཏུ་གསོལ། གཞན་ལ་ཕན་མེད་གནོད་པའི་བྱ་བ་གང་ཡང་རྡུལ་ཙམ་ཡང་མ་གྲུབ་པར་གྱུར་ཅིག བྱ་བ་བཟང་ངན་གང་ལ་ཡང་ཧ་ཅང་ཞེན་ཆགས་མི་ཆེ་བར་བདེན་སྟོང་སྒྱུ་མ་ལྟ་བུར་སྒོམ་པར་གྱུར་ཅིག གཞན་གྱིས་སྣང་ཚུལ་ཇི་ལྟར་ཡིན་ཀྱང་ཐབས་མཁས་ཀྱི་བྱ་བ་རྣམས་འབད་མེད་དུ་འགྱུར་པར་གྱུར་ཅིག མདོར་ན་བྱ་བ་གང་ཡིན་ན་བསྟན་འགྲོ་ལ་ཕན་པར་འགྱུར་ན་དེ་ལྟར་དུ་འགྲུབ་པར་མཆོག་གསུམ་དང་ཆོས་ཉིད་ལས་འབྲས་བདེན་པས་འགྲུབ་པར་གྱུར་ཅིག དངོས་གྲུབ་དཔལ་ནས་བྱ་བའི་བར་གསེང་ནས་སྨོན་པའོ། ། བློ་ཕམ་མེད་པར་རྒྱུན་སྐྱོང་དགོས།བློ་ཕམ་མེད་པར་རྒྱུན་སྐྱོང་དགོས། རྒྱལ་སྲས་ཞི་བ་ལྷའི་སྤྱོད་འཇུག་ལས། གལ་ཏེ་བཅོས་སུ་ཡོད་ན་ནི། །དེ་ལ་མི་དགར་ཅི་ཞིག་ཡོད། །གལ་ཏེ་བཅོས་སུ་མེད་ན་ནི། །དེ་ལ་མི་དགའ་བྱས་ཅི་ཕན། །ཞེས་གསུངས་ལྟར་སློབ་ཆེན་ལ་རྒྱུགས་ཕུལ་ནས་མ་སྤྲོད་པའི་མཇུག་འབྲས་མཐོང་ཚེ་དེ་ལ་བསྒྱུར་བཅོས་བཏང་བ་མེད་པས་སེམས་སྡུག་བྱེད་པ་ལ་ཕན་འབྲས་གཏན་ནས་མེད། དེ་ནི་མི་ཚེའི་ནང་གི་ཉམས་མྱོང་ཞིག་ལ་བརྩིས་ནས་སློབ་གཉེར་གྱི་མཚོན་ནས་གཡུར་དུ་ཟ་བའི་བྱ་བའི་གྲུབ་འབྲས་ཐོབ་པ་ལ་འབད་བརྩོན་དགོས་པར་ངོས་ཟིན་བྱ། ད་ཡོད་ཚད་ནས་ཚར་བ་མ་ཡིན་པར་དོན་འབྲས་ཐོབ་རྒྱུ་ཡོད་པའི་བྱ་བ་ཆོས་འཇིག་རྟེན་གང་གི་དབང་དུ་བྱས་ན་ཧ་ཅང་མང་རབ་ཡོད་པའི་ནང་ནས་རང་ལ་འོས་འཚམ་གྱི་བྱ་བ་ལ་འབད་དགོས། དཀའ་ངལ་རེ་རེ་བརྒྱུད་ཚེ་ཉམས་མྱོང་གི་ཤེས་རབ་དང༌། མི་ཞུམ་པའི་སེམས་སྟོབས། སྤྲོ་བས་བརྩོན་པ་རེ་རེ་འཕེལ་བར་བྱ་དགོས། རིམ་གྲོའི་མཆོག་སྙིང་སྟོབས་དང་རྒྱུན་སྐྱོང་ཡིན། དངོས་གྲུབ་དཔལ་ནས་ཉིན་གུང་གི་ངལ་གསོ་ལ་བྲིས་པ་དགེའོ། །གྲོགས་པོ་སུ་ཡིན་ན་རང་འཇོན་དང་བསྟུན་ནས་བྱ་བ་ཆེ་ཆུང་གང་ཡིན་ན་འདྲ་དེར་བརྟེན་གྲོགས་ལ་ཕན་པའི་བྱ་བ་སྒྲུབ་མཁན་ཞིག་ཡིན་པ་ལ་ཡིད་ཆེས་ཐུབ་པའི་གྲོགས་ཡིན་ལ། རང་གི་ད་ལྟ་དང་མ་འོངས་པའི་ཁེ་ཁོ་ནའི་ཆེད་དུ་བྱ་བ་སྒྲུབ་མཁན་གྱི་མི་ཞིག་ཆགས་ཚར་བ་ནས་འཇིགས་སུ་རུང་བ་གྱུར་ཟིན། མི་གཞི་མེད་ན་ཕར་ཇི་ལྟར་རྩི་འཇོག་བྱེད་ན་ང་རྒྱལ་ཁེངས་དྲག་ཆེ་རུ་སོང་ནས་རང་ལ་དགོས་མཁོ་མེད་ཚེ་གྲོགས་པོ་མིག་ལམ་ནས་བོར་བའི་རིགས་ལ་གཟབ་དགོས། མདོར་ན་འབྱོར་རྒུད་གང་གི་སྐབས་ན་འགྱུར་བ་མེད་པར་རང་གི་ཐག་ཉེ་ན་ཡོད་མཁན་གྲོགས་པོ་ཡིད་ཆེས་ས་དེ་རེད་ཅེས་བརྗོད་ཆོག དངོས་གྲུབ་དཔལ་གྱིས། ཆོས་དོན་དགོངས་པ་དབུལ་སེལ་རྒུད་སྐྱོབ་ལ་མཉམ་དུ་འཇུག་པ།ཆོས་དོན་དགོངས་པ་དབུལ་སེལ་རྒུད་སྐྱོབ་ལ་མཉམ་དུ་འཇུག་པ། ཆོས་དོན་དགོངས་པ་དབུལ་སེལ་རྒུད་སྐྱོབ་ལ་མཉམ་དུ་འཇུག་པ་ཞེས་པའི་ཁ་བྱང་སྟེང་ནས་ཞུ་ན་དོན་ཚན་གསུམ་ལས། དང་པོ། ནང་ཆོས་ཀྱིས་འཇིག་རྟེན་སྤྱིའི་དབུལ་སེལ་རྒུད་སྐྱོབ་ལ་ཕན་པ། འཛམ་གླིང་ས་སྒང་འདི་ཉིད་ནི་མི་རིགས་དང་རྒྱལ་མཚམས་ཀྱི་ཧེ་བག་མེད་པར་ཚང་མའི་རྟེན་གཞི་དང༌། འཚོ་བའི་འབྱུང་ཁུངས་གཅིག་པུ་དེ་ཡིན་པར་སྨོས་ག་ལ་དགོས། འོན་ཀྱང་ང་ཚོ་འགྲོ་བ་མིའི་ཚད་མེད་པའི་འཛད་སྤྱོད་དང༌། འཇིག་རྟེན་གྱི་བཅའ་དངོས་དག་གི་ཚད་ཅན་གྱི་འབྱུང་ཁུངས་གཉིས་དོ་མི་སྙོམས་པར་གྱུར་ཏེ། འཛམ་གླིང་སྤྱིའི་མ་འོངས་པ་ལ་ཉེན་ཁ་འཕྲད་བཞིན་པ་འདི། འཇིག་རྟེན་སྤྱིའི་དབུལ་ཕོངས་ཀྱི་དཀའ་ངལ་དུ་ངོས་འཛིན་གྱིན་ཡོད། དཔེར་ན། ད་ལྟའི་མི་རྣམས་ཀྱིས་བཟོ་བཞིན་པའི་མཁའ་དབུགས་ཀྱི་འབག་བཙོག་གིས། མ་འོངས་པར་ཉེན་ཁ་སྤྲོད་བཞིན་པ་དང༌། ད་ལྟ་ཡང་བདེ་ཐང་གི་འཚོ་བ་ལ་དངོས་སུ་ཤུགས་རྐྱེན་ངན་པ་བཞག་ཡོད་པ་ལྟ་བུས། འཇིག་རྟེན་སྤྱིའི་སྣོད་ལ་གས་ཆག་ཆེན་པོ་ཐེབས་བཞིན་ཡོད་པ་རྒྱལ་ཁབ་ཕྱི་ནང་གི་ཞིབ་འཇུག་པ་དང་མཁས་པ་མང་བོས་གསུང་བཞིན་པ་ལྟར་ལགས་ལ། མི་རྣམས་ཀྱི་སྤྱོད་པ་དེ་དག་ཀྱང་མིའི་ཚད་མེད་པའི་འདོད་སྲེད་ལས་བྱུང་བ་ཤ་སྟག་ཡིན་པས། ནང་ཆོས་ཀྱི་བྱམས་བརྩེའི་ཉམས་ལེན་དང༌། ཚད་མེད་པའི་ཧམ་སེམས་ཚོད་འཛིན་བྱེད་པའི་ཐབས་ཚུལ་དག་གིས། འཇིག་རྟེན་སྤྱིའི་དབུལ་ཕོངས་སེལ་ཐུབ་ཀྱིན་ཡོད་པ་རེད། དེས་ན། འཇིག་རྟེན་ཐུན་མོང་གི་དབུལ་སེལ་རྒུད་སྐྱོབ་ཀྱི་ཕྱོགས་ལ་ནང་ཆོས་ཀྱིས་བླ་ན་མེད་པའི་དགོས་པ་དང་གྲུབ་འབྲས་གཟེངས་སུ་ཐོན་ཡོད་པ་ཞིག་ཡིན། གཉིས་པ། ནང་ཆོས་ཀྱིས་རྒྱལ་ཁབ་སོ་སོའི་དབུལ་སེལ་རྒུད་སྐྱོབ་ལ་ཕན་ནུས་ཐོན་ཚུལ། རྒྱལ་ཁབ་གཅིག་ལ་དགོས་པའི་འབྱོར་ཕྱུག་ནི་དཔལ་འབྱོར་གཞི་རྩ་བྱས་པའི་ཐོག་ནས།རིག་པའི་གཞུང་ལུགས་དང༌། སྔོན་ཐོན་གྱི་བསམ་བློ། ཚན་རིག་ལག་རྩལ་བཅས་སྣ་ཚོགས་ཡོད་པ་ལས། ནང་ཆོས་ནི་ལུགས་སྲོལ་ཙམ་དང་ལམ་ལུགས་ཙམ་ལས་བརྒལ་ཏེ། ཤིན་ཏུ་རྒྱ་ཆེ་བའི་རིག་གཞུང་གསོན་པོ་ཞིག་རེད། ནང་ཆོས་ཀྱིས་སྔོན་ཐོན་གྱི་བསམ་བློ་དང༌། ཚན་རིག་གི་ལག་རྩལ་ལ་ཡང་ཕན་ནུས་མི་དམན་པ་ཐོབ་ཐུབ་པ་རེད། ནང་ཆོས་ནི་ལྷག་པར་དུ་མི་རིགས་དང་སྤྱི་ཚོགས་རིས་སུ་མ་ཆད་ཅིང༌། ཆབ་དཔལ་རིག་གསུམ་གང་ལ་ཡང་རིས་སུ་མ་ཆད་པར་འཁྱེར་ཆོག་ཅིང༌། ནུས་པ་འདོན་བདེ་བའི་རིག་དངོས་གྱ་ནོམ་པ་ཞིག་ཡིན་པར་སྨྲོས་མི་དགོས་སོ། །གསུམ་པ། ནང་ཆོས་ཀྱིས་གང་ཟག་སྒེར་སོ་སོའི་དབུལ་སེལ་རྒུད་སྐྱོབ་ཐད་ལ་ནུས་པ་ཐོན་ཚུལ། སྤྱིར་བཏང་གང་ཟག་སོ་སོའི་དབུལ་ཕོངས་ལ། ནང་སེམས་དང་ཕྱི་དངོས་པོའི་འཚོ་བ་གཉིས་ཆར་ནས་འགྲེལ་བཤད་བྱེད་དུ་ཡོད་པ་སྨྲོས་མ་དགོས་ཤིང༌། འོན་ཏེ་སྐབས་འདིར་གཙོ་བོ་ཕྱི་དངོས་པོའི་འཚོ་བའི་མཐུན་རྐྱེན་ཐད་ནས་བཤད་ན། འཛམ་བུ་གླིང་གི་མི་ཚང་མའི་ནུས་ཚད་གཅིག་པ་མ་ཡིན་ལ། དེར་བརྟེན། མི་གཅིག་གིས་སྒྲུབ་ཐུབ་པ་དེ་མི་གཞན་གྱིས་བྱེད་ཐུབ་པའི་ངེས་པ་མེད་མོད། འོན་ཀྱང༌། ནང་ཆོས་ལས་ལེ་ལོ་ནི་མཐའ་གཅིག་ཏུ་དགག་བྱ་ཡིན་ཞིང༌། མི་རྣམས་ཀྱི་བརྩོན་འགྲུས་ལ་བསྟོད་པ་དང༌། བརྩོན་འགྲུས་ཀྱི་ཕྱོགས་ལ་སྐུལ་བྱེད་ཤིན་ཏུ་མང་བས། སོ་སོ་རང་རང་ལ་འགན་འཁྲིའི་འདུ་ཤེས་གསལ་འདེབས་ནུས་པ་དང༌། དེ་ཡང་མི་ཚེའི་ཁ་ཕྱོགས་ཀྱི་འཚོ་བ་དྲང་བདེན་དང༌། ཤེས་རིག་སྤྱི་ཕན། རོགས་རམ་སོགས་མེད་དུ་མི་རུང་བའི་ལམ་དུ་བསྒྱུར་བས་ན། དཔལ་འབྱོར་དང་འཚོ་བ་གང་ཅིའི་ཐད་ནས་ཡིད་རྟོན་རུང་བའི་མི་ཞིག་ཏུ་བསྐྱེད་བསྲིངས་བྱེད་པ་རེད།དབུལ་ཕོངས་ཀྱིས་མི་རྣམས་ཀྱི་འཚོ་བ་ལ་ཐད་ཀར་སྡུག་བསྔལ་སྦྱིན་གྱིན་ཡོད་ལ། ནང་ཆོས་ལས་མི་རེ་རེའི་དབུལ་ཕོངས་བའི་དཀའ་ངལ་སེལ་བའི་ཐབས་སུ་གང་ཟག་སོ་སོ་དང་མཐུན་པའི་བྱ་ཐབས་འདོན་དགོས་པར་གསུངས་ཤིང༌། ལྷག་པར་དུ་ནང་པའི་ཆོས་པ་དངོས་མ་ཞིག་ཡིན་ན། བཟོད་བསྲན་དང་གདོང་ལེན་གྱི་སྤོབས་པ་མཐའ་གཅིག་ཏུ་མེད་མི་རུང་བ་ཡིན་པས། དེས་འཚོ་བའི་བརྩོན་ལེན་ལ་ཡང་གཞོགས་འདེགས་ཚད་མེད་པ་འབྱུང་གིན་ཡོད་དོ། །མཐོ་རྒྱུགས་པ་སོགས་རྒྱུགས་སྤྲོད་པ་སུ་ཡིན་ན་རང་གིས་སློབ་སྦྱོང་ལེགས་པར་བྱས་ཡོད་ན་དཀོན་མཆོག་ལ་འཕྲིན་ལས་བཅོལ་བས་ཕྲལ་རྐྱེན་བར་ཆད་སེལ་ཐུབ་མོད། རང་ལ་སློབ་སྦྱོང་ངམ་ཉེར་ལེན་གྱི་རྒྱུ་མེད་ན་འཕྲིན་ལས་བཅོལ་ཡང་བྱེ་མ་ལས་སྣུམ་མི་འབྱུང་བའི་དཔེ་ལྟར་ཡིན་ལ། སྤྱིར་ལྷག་པའི་ལྷ་ལ་གསོལ་བ་བཏབ་ནས་སློབ་སྦྱོང་ཡག་པོ་བྱས་ན་ཕུན་སུམ་ཚོགས་པ་ཡིན་པ་རེད། དེ་མིན་གསོལ་བ་བཏབ་ནས་སློབ་སྦྱོང་མི་བྱེད་པར་འདུག་བསྡད་པ་ཡིན་ན་རྗེས་ལུས་སུ་འགྲོ་བར་བོད་ཀྱི་འདས་པའི་རྒྱབ་ལྗོངས་ལ་བསམ་གཞིག་གནང་བས་ཤེས་སོ། །དངོས་གྲུབ་དཔལ་ནས། དོན་ལ་བསམ་བློ་བཏང་ནས་ཁ་འདོན་བྱེད་ན་ཡག་པོ་འདུག དེ་མིན་ཚིག་རྐྱང་ཙམ་འདོན་པ་ལས་དཔེ་ཆ་ལྟ་ན་གཞུང་དོན་ཤར་སྒོམ་བྱེད་པའི་གོ་ཆོད་པ་དང༌། དེའི་ཚེ་སེམས་ཀྱི་ཉོན་མོངས་པའི་རྣམ་རྟོག་འགོག་པ་དང་རྨོངས་བ་སེལ་བར་བྱེད་ནུས་པས་ན་དཔེ་ཆ་གཟིགས་པ་ནི། ཆོས་ཚུལ་ལ་རྨོངས་བ་བསལ་ནས་ཉོན་མོངས་པའི་རྟོག་ཚོགས་ཞི་ཞིང༌། ཡེ་ཤེས་ཀྱི་ཚོགས་ལ་གནས་པའི་དགེ་སྦྱོར་ཁྱད་འཕགས་ཡིན་པས་ལེགས་པར་སློབས་ཤིག འོན་ཀྱང་འཆད་ཉན་མ་དར་བའི་གནས་སུ་ཐོས་བསམ་གྱི་རིན་ཐང་གི་ལྟ་བའི་དབུལ་ཕོངས་པའི་ཚོགས་རྣམས་ཀྱིས་ཚིག་འདོན་ན་དགེ་བར་འཇོག་ཀྱང་དོན་བསམ་ན་དགེ་བ་དང་ཡེ་ཤེས་ཀྱི་ཚོགས་ཀྱི་ཕྱོགས་སུ་བསམ་མི་ཤེས། དེ་ཡང་ནང་ཆོས་ཀྱི་གནད་རགས་བསྡུས་ཙམ་ཡང་མ་ཤེས་པའི་ངན་རྟགས་མཁའ་ལ་འཕྱར་བའོ། །སྤྲང་འཁྱམ་པ་དངོས་གྲུབ་དཔལ་གྱིས་བྲིས་པའོ། །དགོན་སྡེའི་བསྟན་པ་བསང་བཏང་སྟེ་ཤོག་སྤག་བཀད་ནས་ཀི་སྒྲ་སྒྲོག ཡུན་ཁ་རྒྱབ་ནས་མདུད་པ་ཡུག་ཆེན་རྐེ་ལ་ཕུལ་ནས་ངོ་སོ་བསྟོད་པ་ལ་བསམ་ན་ཁོར་ཡུག་ལ་དུག་གིས་མཁའ་དབུགས་མི་གཙང་བ་དང་འབག་བཙོག་བཟོ་བ་དང༌། དམ་ཆོས་ཀྱི་དྲི་ངད་ཅུང་ཟད་མེད་པའི་བླ་མའི་ཆོས་ལུགས་སམ་ལུགས་སྲོལ་དང༌། དཔལ་འབྱོར་ལ་གནོད་པ་ཆེན་པོ་ཆགས། དེར་མ་ཟད་རྨས་སྐྱོན་བཟོ་བ་སོགས་མཐུན་ལམ་དང་བདེ་འཇགས་ལ་གནོད། འགྲན་སེམས་ཀྱི་འཐབ་རྩོད་ཡོད་པས་དགོས་པ་མེད་པར་སེམས་སོ། །སྤྱིར་ས་ཕྱོགས་གང་ན་ཡང་བསང་གསོལ་དང་མགོན་ཁང་ལ་སྐོར་ཕྱག་དང་བསང་གཏོང་བ་ཙམ་མང་དུ་འགྲོ་བའི་གནས་དེར་བསྟན་པ་འཇིག་པའི་སྔ་ལྟས་སོ། །དངོས་གྲུབ་དཔལ་ནས། ཤེས་དགོས་པའི་དོན་ངོ་སྤྲད་པ།ཤེས་དགོས་པའི་དོན་ངོ་སྤྲད་པ། གཞན་གྱིས་ཕྲག་དོག་མེད་པ་ཁྱོད་ལ་ཡོན་ཏན་མེད་པས་ཡིན། གཞན་གྱིས་སྐྱོན་བརྗོད་མེད་པ་ཁྱོད་ཀྱིས་བྱ་བཞག་སྒྲུབ་མ་ནུས་པས་ཡིན། བླུན་པོས་སྡང་བ་ནི་མཁས་པའི་ཡོན་ཏན་ལྡན་པས་ཡིན། རྒྱ་བླས་སྡང་བ་ནི་འདོད་ཆུང་ཆོག་ཤེས་ལ་དགའ་བས་ཡིན། ཆེན་པོས་ལྷག་པར་སྡང་བ་སྨྲ་བའི་སྤོབས་པ་ལྡན་པས་ཡིན། སྒྲོ་སྐུར་བྱེད་པ་ཁྱོད་ལ་འཇོན་ཐང་ལྡན་པས་ཡིན། རང་གི་ཡུལ་བས་གཞན་གྱིས་མཆོད་པ་མཁས་པ་ལྷག་བསམ་ལྡན་པས་ཡིན། རྐུན་མ་མེད་པ་ཁྱོད་ལ་དཔལ་འབྱོར་མེད་པས་ཡིན། མཁས་པས་བསྟོད་བསྐུར་བྱེད་པ་ཡོན་ཏན་མཐོང་བས་ཡིན། བླུན་པོས་བསྟོད་བསྐུར་བྱེད་པ་མིང་དང་གོ་ས་ཆེ་བས་ཡིན། སྤྱོད་ངན་ཀུན་གྱིས་སྨད་པ་ནི་བཙུན་པའི་ཡོན་ཏན་ལྡན་པས་ཡིན། ཡོན་ཏན་མེད་ཀྱང་མཚན་སྙན་རྒྱས་པ་གཡོ་སྒྱུའི་ཆོས་ལ་མཁས་པས་ཡིན། གཞན་གྱིས་ངོ་བསྟོད་མེད་པ་དཔལ་འབྱོར་མེད་པས་ཡིན། མངོན་ནས་ངོ་བསྟོད་ཡོད་པ་འབྱོར་ཕྱུག་ལྡན་པས་ཡིན། ཀུན་དང་མཐུན་པར་འདོད་པ་འཇིག་རྟེན་ངང་ཚུལ་རྨོངས་པས་ཡིན། ངལ་གསོ་ལ་དངོས་གྲུབ་དཔལ་ནས། ནོར་བ་བཅོས་དགོས་པའི་བསྐུལ་མ།ནོར་བ་བཅོས་དགོས་པའི་བསྐུལ་མ། ལྷ་སྟ་གོན་གྱི་སྔོན་དུ་ལས་ཐིག་གམ་རློན་ཐིག་གདབ་པ་ནོར་བ་ཡིན་པས་བཅོས་དགོས། དེ་ཡང་དཔལ་དུས་ཀྱི་འཁོར་ལོའི་དཀྱིལ་འཁོར་གྱི་ཆོ་ག་རྣམ་པར་བཤད་པ་བདུད་རྩིའི་རྒྱ་མཚོ་ལས། རང་ལུགས་ལ་གཅིག་ཏུ་དགོས་པ་མ་ཡིན་ཡང་གཞན་ངོར་བྱེད་པ་དང་བླ་ཆོས་ལ་ནི་ཚད་མི་བཞག་གོ །དེས་ན་རྒྱ་བོད་ཀྱི་སྔགས་པ་འགའ་ཞིག་གིས་ཐིག་ཚོན་གྱི་ལས་བྱེད་པ་གླེན་བླུན་མང་པོ་དག་འཇུག་པ་བདེ་བའི་ཕྱིར། ལྷ་སྟ་གོན་གྱི་སྔོན་དུ་ཐིག་འདེབས་པར་བྱེད་ཅིང་ཡི་གེར་ཡང་འགོད་པ་ནི། ལྷག་གནས་མི་འཆོལ་བའི་ཕྱིར་སྐམ་ཐིག་ཙམ་འདེབས་པ་ལས་ཐིག་ཆོག་མི་བྱེད་ཅིང། ལས་ཐིག་ཕྱིས་འདེབས་པ་ཡིན་པ་ལ། བོད་པ་རྗེས་མ་རྣམས་ཀྱིས་ལས་ཐིག་འདེབས་ཐེངས་གཅིག་པོ་དེས་གོ་ཉིས་ཆོད་བྱེད་པའི་བླ་ཆོས་ཀྱི་ལག་ལེན་ནོར་བ་བྱས་པ་དེ། ལག་ལེན་ཡང་དག་ཏུ་སྒྲུབ་པའི་ངོ་བོའི་ཅི་ཞིག་བྱ། འདིས་ནི་ནོར་བ་དེ་ཡང་དག་ཏུ་འབད་པས་སྒྲུབ་པ་དང། མ་ནོར་པ་ལ་ནོར་རོ་ཞེས་གྱ་གྱུ་ཐམས་ཅད་ལས་ལྷག་གནས་ཀྱི་རྗེས་སུ་ཐིག་འདེབས་པ་ཁོ་ན་ཡོད་ཅིང༌། དེ་ཡང་ཡེ་ཐིག་འབའ་ཞིག་མ་ཡིན་ཏེ། དཀར་ཐིག་ངེས་པར་གདབ་དགོས་པའི་ཕྱིར་ན། དཀྱིལ་ཆོག་ཤིན་ཏུ་བསྡུས་པ་རེ་རེ་ཙམ་མ་གཏོགས། ལས་ཐིག་འཕྲོས་གླེང་མེད་པར་འཇོག་པའི་རྒྱུ་མཚན་ཡང་མེད་པའི་ཕྱིར། གསལ་ཁ་མ་གསུངས་པ་རྣམས་ནི་ལས་ཡེ་ལྷན་ཅིག་ཏུ་སྟོན་པ་ཡིན་ནོ། །དེས་ན་དཀྱིལ་ཆོག་གཞན་རྣམས་ཀྱི་ལུགས་ལ་སྔོན་ལ་ལས་ཐིག་བཏབ་ནས་ཡེ་ཐིག་གིས་བྱིན་གྱིས་རློབས་པའི་ལུགས་གཅིག་དང། སྔོན་ལ་ཡེ་ཐིག་ཡིད་ཀྱིས་ཕབ་ནས་དེའི་ཆ་དབྱེ་བའི་ཕྱིར་ལས་ཐིག་འདེབས་པ་གཉིས་ཡོད་ལ། འདིར་ནི་ལས་ཡེའི་དབྱེ་བ་མེད་དེ། རྡོ་རྗེའི་ཐིག་ཅེས་པ་ཁོ་ནར་ཟད་དོ། །དེས་ན་ལྷ་སྟ་གོན་གྱི་གོང་དུ་ཐིག་ཆོག་དགོས་པ་ལ་རྒྱུ་མཚན་མེད་ཅིང་གནོད་བྱེད་ཡོད་པས་ལོག་རྟོག་ལ་ཞེན་པར་མི་བྱའོ། །ཞེས་གསུངས་པ་འདི་མཐོང་ཐོས་བྱས་ནས་ཡིད་ལ་བཟུང་སྟེ་ནོར་བ་བཅོས་པར་བྱའོ། །སྤྲང་འཁྱམ་པ་དངོས་གྲུབ་དཔལ་གྱིས་ཕུལ། དེ་རིང་མ་ཡུམ་གྱི་དུས་ཆེན་ལ། བརྗོད་དཀའ་བའི་ཨ་མའི་བསམ་ཚུལ་ཞིག་མིག་ཆུ་དང་འདྲེས་ནས་ངུ་ངག་གི་ལམ་ནས་ཐོན་པ་ནི། བདག་རང་ལོ་ལྔ་བའི་དུས་ན་བདག་གི་མ་དྲིན་ཅན་མ་ནད་ཚབ་ཆེན་གྱིས་ཟིན་ནས་འཆི་ཁའི་གཏམ་ལ། མ་རང་ཤི་སོང་ན་སེམས་ཁྲལ་མེད། འོན་ཀྱང་སེམས་ཁུར་ཆེ་ས་ཤུལ་ན་ཡོད་པའི་བུ་བརྒྱུད་བུ་མོ་ལོ་གསུམ་ཅན་སོགས་བུ་བརྒྱུད་རྣམས་ཡིན་ཞེས་གླེང་བཞིན་འཇིག་རྟེན་འདིའི་སྣང་བ་ནུབ་སོང་ཞེས་བདག་གི་སྤུན་ཟླ་ཆེ་བའི་ངག་ལས་དངོས་སུ་ཐོས། ཀུན་གྱིས་བྱམས་བརྩེའི་སྒོ་ནས་མ་ཎི་བསྔོ་སྨོན་གནང་བར་ཞུ། བོད་ཀྱི་སྤྱི་ཚོགས་ཀྱི་གནས་སྟངས།བོད་ཀྱི་སྤྱི་ཚོགས་ཀྱི་གནས་སྟངས། སྐྱ་སེར་ཕོ་མོ་ཕལ་ཆེར་དཔལ་འབྱོར་གྱི་བྲེལ་ཟིང་ལ་ངུ་ངག་གི་འོ་དོད་འབོད་བཞིན་ཀུན་སྤྱོད་ཀྱི་ངོ་ཚའི་གོས་ཕུད་ནས་གཅེར་བུར་རྒྱུག་བཞིན་ཡོད་ལ། དེའི་དབང་གིས་དཔལ་འབྱོར་རྫུན་མ་དང༌། ཆོས་རྫུན་མའི་སྡེ་ཚན་གཉིས་བྱུང་ལ། དེ་རྐྱེན་པས་དཔལ་འབྱོར་རྫུན་བཟོ་བ་དང༌། ཆོས་པ་རྫུན་མ་གཉིས་བྱུང༌། དེ་བྱུང་བ་ནི་སྤྱི་ཚོགས་ཆོས་འཇིག་རྟེན་ལ་རྨོངས་བའི་དབང་གིས་ཡིན་པས་ད་ནི་སྤྱི་ཚོགས་ཀྱིས་ནང་ཆོས་དང་དཔལ་འབྱོར་རིག་པ་ལ་སྦྱང་འོས་སོ། །དཔལ་འབྱོར་རྩོལ་སྒྲུབ་པ་ཁག་གཅིག་གིས་འཕྲོག་བཅོམ་གྱི་ལས་རིགས་ལ་འབད་ནས་རྐུན་མའི་ཚོགས་པ་བཙུགས་པ་དང༌། བདེ་ཐང་ལ་གནོད་པའི་ཟས་རིགས་སྣ་ཚོགས་བཟོས་ཏེ་སེམས་ཅན་མང་པོའི་ཚེ་སྲོག་འཕྲོག་ནས་དཔལ་འབྱོར་སྒྲུབ་པ་དང༌། ཆོས་ལ་བརྟེན་པའི་རྫུན་བཟོ་བ་ཁག་གཅིག་གིས་བླ་མ་སྤྲུལ་སྐུ་མཁན་པོ་རྫུན་མ་བཟོས་ནས་རྫུན་གྱི་འཁོར་ལོས་མིག་འཕྲུལ་གྱི་འཁྲབ་སྟོན་སྣ་ཚོགས་ཀྱི་སྒོ་ནས་དཔལ་འབྱོར་འཚོལ་བའི་སྡེ་ཚན་སོགས་ནི་རང་གི་དཀའ་ལས་མི་བྱེད་པར་གཡོ་སྒྱུས་དཔལ་འབྱོར་འཚོལ་བ་ཁྲིམས་ལུགས་དང་ལས་འབྲས་གང་དང་མི་མཐུན་པ་རེད། དེས་ན་སྐྱ་སེར་སུ་ཡིན་ན་རྫུན་དང་གཡོ་སྒྱུ་དང་མ་འདྲེས་པར་ལས་འབྲས་དྲང་བདེན་གྱིས་རང་གི་འབད་རྩོལ་བྱས་ནས་དཔལ་འབྱོར་འཚོལ་བ་འཇིག་རྟེན་པའི་ཡ་རབས་སྤྱོད་བཟང་དང་མཐུན་པ་རེད། སྤྱིར་ནང་ཆོས་ལས་འདོད་ཆུང་ཆོག་ཤེས་གསུངས་པ་དང་སྟོན་པ་ཐུགས་རྗེ་ཅན་གྱིས་རྒྱལ་བསྟན་དཔལ་འབྱོར་གྱིས་འཇིག་པར་བཤད་ན་ཆོས་ལུགས་པའི་མིང་ཁུར་བ་མང་པོས་གཉོམ་ཆུང་ཚུལ་མཐུན་གྱི་ངུར་སྨྲིག་གི་འདུས་སྡེ་ཚོང་རྫས་བྱས་ནས་དཔལ་འབྱོར་རྩོལ་སྒྲུབ་ཀྱི་ལས་ཁོ་ན་ལ་འཇུག་པ་དང་འཇུག་ནུས་རྒྱུ་ཅི་ཞེ་ན། སྤྱི་ཚོགས་མགོ་རྨོངས་ནས་བླ་མ་ཆེ་ཆུང་ནི་ཡོན་ཏན་ཆེ་ཆུང་དང་གཞན་ཕན་གྱི་བྱ་བ་སྒྲུབ་མིན་དང༌། རྒྱལ་བསྟན་དངོས་གནས་ལུང་རྟོགས་ཀྱི་བསྟན་པ་འཛིན་པ་ཡིན་མིན་ལ་མི་ལྟ་བར་སྤྲུལ་མིང་མཁན་མིང་ཆོས་རྒྱལ་གྱི་མིང་ཡོད་མེད་དང༌། ཁང་བ་དང་རླངས་འཁོར་རྫིག་པོ་ཡོད་མེད་དང༌། བསྟན་པའི་གཟུགས་བརྙན་རྟེན་བཞེངས་ཆེ་ཆུང་སོགས་ལ་ལྟོས་པ་ཡིན་པས་རེད། དེ་ནི་བསམ་པའི་དཔལ་ཡོན་མི་དགོས་པར་ཕྱིའི་དངོས་པོ་ཙམ་གྱིས་ཆོག་པའི་ཁ་འཁོར་ཕྱོགས་ཉེས་ཤོས་ཞིག་རེད། སྤྱི་ཚོགས་ཀྱིས་གཉོམ་ཆུང་ཚུལ་མཐུན། ཐོས་བསམ་སྒོམ་སྒྲུབ་བྱེད་པ་ལ་ཁ་ཙམ་གྱིས་ཡག་པོ་འདུག་ཅེས་བཤད་ནས་དོན་སྟེང་ནས་སམ་བྱ་བ་ལག་ལེན་ལ་དཔལ་འབྱོར་ཆེན་པོ་མིང་ཆེན་པོ་ལ་ལྟོས་པར་བྱེད་པ་མངོན་སུམ་རེད། བླ་རྫུན་གྱི་མིང་གི་འབྱུང་ཁུངས་ནི། བླ་ཆེན་གྱི་མིང་ཁུར་བའི་ཆབ་སྲིད་པ་རྣམས་ཀྱིས་རང་གི་རིགས་རུས་གྱི་སྲས་དང་ཚ་བོ་དང་ཚ་མོ་དང༌། འབྱོར་ལྡན་སོགས་ལ་ཀུན་བཟང་རྡོ་རྗེ་འཆང་མན་ཆད་དང་དྲིན་ཆེན་རྩ་བའི་བླ་མ་ཡན་ཆད་ཀྱི་རྣམ་འཕྲུལ་གྱི་མིང་བཏགས་ནས་སངས་རྒྱས་བྱང་སེམས་མགོ་གཡོག་པའི་ལག་ཆ་བྱས་པའི་རྐྱེན་ལས་བྱུང་བ་ཡིན་པས་སྤྲུལ་རྫུན་ངོས་འཛིན་བྱེད་པ་བསྟན་དང་བསྟན་འཛིན་ལ་གནོད་པ་དེ་ལས་ཆེ་བ་མེད་དོ། །བླ་མ་ཁ་ཅིག་གིས་སྤྲུལ་རྫུན་བཟོ་བ་དང་རྒྱ་བླ་ཁྲི་སྟོན་བྱེད་པ་དགོན་པ་དང་བསྟན་པའི་ཆེད་ཡིན་ཟེར་མཁན་འདུག དེ་ནི་ཧ་ཅང་ནོར་འཁྲུལ་རེད། བསྟན་དང་བསྟན་འཛིན་དཔལ་འབྱོར་དང་བརྗེ་བོ་བརྒྱབ་ནས་བསྟན་པ་གད་སྙིག་ཏུ་བྱས་པ་རེད། དེང་སྐབས་དགོན་པ་གཞུང་ལ་དཔལ་འབྱོར་ཅུང་ཟད་དགོས་ན་ཡང་ཁྲིམས་མཐུན་ལུགས་མཐུན་བྱས་ནས་ལས་འབྲས་དྲང་བཞག་བཅས་ནས་སྒྲུབ་པ་ལས་ཁ་ནས་སེམས་ཅན་ཐམས་ཅད་བདེ་བ་དང་བདེ་བའི་རྒྱུ་དང་ལྡན་པར་གྱུར་ཅིག་བརྗོད་ནས་དོན་ལ་དཔལ་འབྱོར་དང་སྙན་གྲགས་སོགས་ཀྱི་ཆེད་མགོ་སྐོར་གྱི་བྱ་བ་སྣ་ཚོགས་སྒྲུབ་པར་མི་འོས་སོ། །གནད་འགག་དེ་སེལ་ཐབས་སྤྱི་ཚོགས་ཀྱི་ནང་ཆོས་ལ་སློབ་སྦྱོང་བྱས་ནས་བསྟན་པའི་གཟུགས་བརྙན་དང་དངོས་གནས་པའི་ཁྱད་པར་དང༌། བསྟན་འཛིན་དག་རྫུན་གྱི་ཁྱད་པར་ཤེས་དགོས་སོ། །འོན་ཀྱང་སྤྱི་ཚོགས་ཀྱིས་ནང་ཆོས་སློབ་པ་ལ་ནང་ཆོས་ལ་མཁས་པའི་སྐྱེས་བུ་ཞིག་ལས་སློབ་དགོས་པ་ལས་དེང་དུས་སུ་སྤྱི་ཚོགས་སུ་ཆོས་དཔོན་གྱི་ཁྲོད་ན་བརྒྱ་ཆ་བདུན་ཅུ་ཡས་མས་ཀྱི་ཆོས་མི་ཤེས་པར་ཁ་བདེ་ལྕེ་བདེ་བྱས་ནས་འོལ་ཚོད་ཀྱི་བཤད་པ་མང་བོ་བཤད་བཞིན་པ་ནི་མངོན་སུམ་རེད། སྤྲུལ་མིང་བླ་མིང་མཁན་མིང་ཁ་བདེ་ཡིན་ན་ཆོས་ཤེས་པས་ཁྱབ་བ་གཏན་ནས་མེད་དོ། །དེས་ན་སྤྱི་ཚོགས་ཀྱིས་ཆོས་དག་རྫུན། བླ་མ་དག་རྫུན། སྤྲུལ་སྐུ་དག་རྫུན། གཏེར་སྟོན་དག་རྫུན། སྔགས་པ་དག་རྫུན། གྲྭ་བ་དག་རྫུན། ཆོས་པ་དག་རྫུན་ཤེས་དགོས། རང་དག་སྣང་ཅན་དུ་རློམས་ནས་ཐམས་ཅད་ལ་དག་སྣང་བྱེད་ཁུལ་བྱེད་པ་ནི་རང་གཞན་གྱི་གཡོ་འོག་ཏུ་ཆུད་པའི་སྔ་ལྟས་ཡིན་ནོ། །སྤྱིར་བྱ་བ་གང་བསྒྲུབ་ན་ཐོག་མར་བརྟག་དཔྱད་དགོས་སོ། །འདི་ནས་གསལ་བཤད་ལ། གཡོ་སྒྱུ་དང་མ་འདྲེས་པར་ལྷག་བསམ་གྱིས་བསྟན་ལ་བྱ་ར་བྱེད་མཁན་གྱི་བསྟན་པའི་སྦྱིན་བདག་དང༌། ཐུགས་རྒྱུད་ལ་ལུང་རྟོགས་ཀྱི་བསྟན་པ་ཡོད་པའི་སྤྲུལ་སྐུ་དང་མཁན་པོ་སོགས་མདོར་ན་དག་མའི་རིགས་ལ་དད་གུས་ཡོད་ཅེས་ཞུས་པ་ཡིན། དེས་ན་དག་མའི་རིགས་ཀྱིས་བདག་འཛིན་མངོན་དུ་མ་གྱུར་བར་བསྟན་དོན་དུ་བསམ་ཕོད་པ། བཤད་ཕོད་པ། སྒྲུབ་ཕོད་པ་དགོས་སོ། །རྫུན་མའི་རིགས་ཀྱིས་རང་ལ་བརྟེན་ནས་བསྟན་པ་ཕན་མ་ཐོགས་ན་གནོད་པ་མི་བྱེད་པར་རེ་བ་ཞུས་པ་ལས་གནོད་སེམས་གྱིས་བཤད་པ་མིན་ལགས། མདོར་ན་རྫུན་མའི་རིགས་ཀྱིས་བག་ཡོད་པར་མ་བྱས་རྒྱལ་བསྟན་རྨང་ནས་བཤིག་པར་འགྱུར་དུ་དོགས་ནས་བྲིས་པ་ལས་རང་གི་དགོས་མཁོ་དང་གནོད་འཚེའི་བསམ་པ་ནམ་ཡང་མེད་པར་མ་ཟད་ཐམས་ཅད་ལ་བྱམས་བརྩེ་ཡོད། ངས་འདི་རྫུན་མའི་རིགས་ལ་ཞུས་པ་ཡིན་ཡང་ཐུགས་ལ་གནོད་པའི་ཆེད་མ་ཡིན་པར་བསྒྱུར་བཅོས་བྱེད་པའི་ཆེད་ཁོ་ན་ཡིན་ལགས་སོ། །ཁ་ཅིག་གིས་ཆོས་པ་སྤྱི་ལ་རྒོལ་བ་གནས་ལུགས་གང་ཡང་མེད་ལ་དག་རྫུན་ཕྱེས་ནས་དགག་པ་བཏང་ན་བདེན་པ་ར་སྤྲོད་བྱེད་ཐུབ་པའོ། །དུས་རྒྱུན་དཔོན་ངན་ལམ་ལུགས་ཀྱི། །ཡོན་ཏན་མེད་པའི་ཆོས་དཔོན་དང༌། །དགོན་སྡེའི་ཕན་མེད་ཁྲིམས་ལུགས་ལ། །སྐད་ཅིག་འཕྲད་པར་མ་གྱུར་ཅིག ། དཔོན་ངན་ལམ་ལུགས་ལ་སོགས་པའི། །རྫུན་མའི་རིགས་ལ་བཀུར་བ་རྣམས། །རིང་མིན་རྨོངས་བ་ཆེ་ལས་གྲོལ། །ཡང་དག་གནས་ལུགས་བཀུར་བར་ཤོག ། ཅེས་པ་འདི་ནི་རྫུན་མའི་རིགས་ཀྱིས་སྒྲོག་གཏམ་དང་སྒྲོ་བསྐུར་སྣ་ཚོགས་སྡང་བར་བྱེད་སྲིད་ན་ཡང་བསྟན་པ་དང་འགྲོ་བ་ལ་ལྷག་བསམ་ཕྲ་མོའི་བསེར་བུས་གཡོས་ནས་ཀུན་རྟོག་གི་རི་མོ་འདི་སྤྲང་འཁྱམ་པ་ཆོས་མེད་བཙུན་གཟུགས་པ་ངག་དབང་དངོས་གྲུབ་དཔལ་གྱིས་བྲིས་པའོ། ། ང་རང་གི་དགའ་ཕྱོགས།ང་རང་གི་དགའ་ཕྱོགས། ང་རང་དགའ་ཕྱོགས་ནི། གྲྭ་རྐྱང་དཀྱུས་མའི་འཚོ་བ་རོལ་ནས་དྲང་བདེན་ལ་གནས་པ་ཡིན། བྱ་བ་ལེགས་ཉེས་གང་སྒྲུབ་ན་མངོན་ལྐོག་མེད་པར་ཕྱི་གསལ་ནང་གསལ་གྱི་སྒོ་ནས་རང་གིས་དངོས་སུ་སྒྲུབ་འདོད་པའི་སེམས་ཁམས་ཅན་ཡིན་པ་རང་བློ་རགས་པ་རང་ལ་མངོན་དུ་གྱུར་པ་ཡིན། དེས་ན་དེང་སྐབས་བླ་སྤྲུལ་མིང་འཛིན་པ་མང་དག་གིས་ཆེ་ཆེ་རྫིག་རྫིག བླ་དཔོན་ཚུགས་བཟུང་ནས་རང་གིས་ལྐོག་ནས་བཀོད་འདོམས་བཞག་ནས་རང་འཁོར་ལ་དངོས་སུ་བྱ་བ་འདྲ་མིན་བསྒྲུབ་ཏུ་བཅུག་པ་གཡོ་སྒྱུ་ལས་མ་འདས་རེད། མི་ཞིག་ལ་ཁ་བརྡ་བཤད་ན་འདྲ། ཟ་མ་ཟ་ན་འདྲ། མདོར་ན་བྱ་བ་གང་སྒྲུབ་ན་གཅིག་གིས་གཅིག་ལ་འདྲ་མཉམ་གྱི་ལྟ་ཚུལ་གྱི་སྒོ་ནས་འཚོ་བ་རོལ་འདོད་ཡོད། སློབ་མ་དང་ཆོས་གྲོགས་སོགས་གཞན་གྱིས་ཟ་མ་ཟ་རུ་སྐད་བཏང་ན་འདྲ་མཉམ་མ་ཡིན་པའི་ཟ་མ་ལྷག་པོ་བཟོ་བཀོད་བྱས་པ་དང་དོགས་འཛེམ་བྱས་ནས་ཁ་བརྡ་མི་གནང་བ་སོགས་ལ་སེམས་ཚོར་སྐྱིད་པོ་མི་འདུག དེ་ལས་ཟ་མ་ངན་ངོན་ཙམ་ལས་མེད་ན་ཡང་ཐམས་ཅད་ཟ་མ་གཅིག་གྱུར་ཡིན་ན་སེམས་ལ་སྤྲོ་སྣང་ཡོད། དེས་མཚོན་ནས་བྱ་བཞག་གང་ལ་ཡང་འདྲ་མཉམ་ཡོད་ན་སྤྲོ་བ་ཡོད། འདྲ་མཉམ་མེད་པའི་བྱ་བ་སུས་བསྒྲུབ་ན་སེམས་ཚོར་སྐྱིད་པོ་མི་འདུག སློབ་མ་ཞིག་ལ་མཚོན་ན་བརྩི་བཀུར་ཡོད་ན་དགེ་འདུན་པ་དང་ཆོས་འདུལ་བའི་བཅས་ཁྲིམས་སྲུང་བ་དང༌། སོ་སོའི་དོན་བཤད་པའི་ཆོས་ལ་ཉམས་ལེན་བྱེད་རྒྱུ་ཧ་ཅང་རེ་བ་ཆེ། ཡུལ་ལུང་ཁ་ཅིག་དཔོན་ངན་རང་ལུགས་ད་རུང་ཤུགས་དྲགས་འདུག སྤྱི་ཚོགས་རྨོངས་བ་ལ་མངོན་ལྐོག་གི་བྱ་བཞག་གཙིགས་སུ་འཛིན་པ་ཆེས་མང་ན་ཡང་རེ་ཞིག་མི་ལ་མགོ་སྐོར་བ་ཙམ་ལས་མཐར་ལས་རྒྱུ་འབྲས་ཀྱིས་ཐག་གཅོད་ཡོད་ངེས་པས་དྲང་བདེན་ལ་འབད་རིགས་སོ། །རང་ང་རྒྱལ་ཆེ་བས་ཡིན་ན་འདྲ་གང་ཡིན་ཡང་མཐོན་པོ་དང་བཙན་པོ་ཕྱུག་པོ་ལ་ཞབས་ཕྱི་སྒྲུབ་ནུས་པའི་རེ་བ་མེད་མོད། སྟོང་ཆ་དང་རྗེས་ལུས་ཡོད་པའི་ཆོས་བརྒྱུད་དང་ཡུལ་ལུང༌། མི་རིགས་ལ་ལྷག་སེམས་ཅུང་ཟད་རེའི་སྒོ་ནས་ཞབས་ཕྱི་རེ་སྒྲུབ་འདོད་ཡོད་པ་ནི་རང་གིས་རང་ལ་བཅང་བའི་རེ་བ་ཡིན་ནོ། །དེས་ན་འདྲ་མཉམ་ནི་དགའ་ཕྱོགས་ཡིན་མོད་ཆོས་ཁྲིད་སོགས་ཀྱི་སྐབས་ནང་ཆོས་ལས་བཤད་པ་ལྟར་བསླབ་པ་རྒན་པ་དང་བླ་མ་དང་དམ་པའི་ཆོས་སོགས་ཀྱི་ཆེ་བ་ཡོད་ཀྱང་འདྲ་མཉམ་མ་ཡིན་པར་མི་གཏོགས་པར་སེམས་སོ། །སྐྱེ་བ་ཀུན་ཏུ་དམན་ལ་བརྩེ་བས་གཞན་ཕན་སྒྲུབ་པར་སྨོན། ཤར་མར་ངང་དངོས་གྲུབ་དཔལ་ནས། འདོད་རྔམས་ཆེ་བའི་མཁས་བླུན་མང་པོ་དངུལ་གྱིས་སྣ་ཐག་གིས་ཡར་མར་འཁྱམ་འཁྱམ་རེ་ཁྲིད་དེ་ལྕགས་ཕུར་ལ་བཏག་ཚེ་ཀུན་སྤྱོད་དོར་ཏེ་མདུན་ལམ་དང་བསྟན་འགྲོར་མི་ལྟ་བར་འོས་འཚམས་མ་ཡིན་པའི་གཅམ་བུའི་བསྟོད་པས་རྔ་མ་གཡུགས་ནས་དངུལ་གྱི་ཟན་ཆང་ལ་རེ་བའི་ངང་ལྟོགས་སྐོམ་གྱིས་མི་ཚེ་རྫོགས་ཚིག་འབྲི་བ་རྣམས་ཀྱིས་བསམ་གཞིག་རེ་གནང་ན་མི་ལེགས་སམ། སྲོལ་རྒྱུན་རིག་གནས་རྒྱུན་སྐྱོང༌།སྲོལ་རྒྱུན་རིག་གནས་རྒྱུན་སྐྱོང༌། ཁོར་ཡུག་སྲུང་སྐྱོབ་ཀྱི་སྲོལ་རྒྱུན་ནི། ས་གཉན་རྐོ་བ་དང་ཆུ་གཉན་དཀྲུག་པ་དང༌། ཤིང་གཉན་བཅད་པ་དང༌། བྲག་གཉན་བཤིག་པ་རྣམས་མི་རུང་བ་དང༌། རི་དྭགས་བསད་པ། ཁོར་ཡུག་འབག་བཙོག་སོགས་བྱས་ན་ཡུལ་ལྷ་སོགས་ལ་ཕོག་ཐུག་སོང་ནས་ནད་གདོན་འབྱུང་བར་སྔོན་གྱི་སྲིད་པ་རྒན་པོའི་ཞལ་རྒྱུན་ལྟར་ཡིན་ལ། ཤིང་ཚེ་རིང༌། བྲག་ཚེ་རིང༌། ཆུ་ཚེ་རིང༌། ཤ་ཚེ་རིང༌། བྱ་ཚེ་རིང༌། མི་ཚེ་རིང༌། ཞེས་ཚེ་རིང་རྣམ་དྲུག་གིས་ཁོར་ཡུག་སྲུང་སྐྱོབ་ཀྱི་རིགས་མང་པོ་བསྟན་ཡོད་པ་ལྟར་ལག་ལེན་བྱེད་དགོས། སྲོལ་རྒྱུན་གྱི་རིག་གནས་ནི། བོད་ཀྱི་མི་རབས་ཆགས་ནས་ཞིང་ལས་དང་འབྲོག་ལས་ཀྱི་སྲོལ་རྒྱུན་གྱི་རིག་གནས་བཟུང་ནས་འཚོ་བ་རོལ་འོང་བ་ལྟར་ད་ལྟའི་དུས་རབས་ཉེར་གཅིག་པའི་བྲེལ་ཟིང་གི་འཚོ་བ་རོལ་བའི་སྐབས་འདིར་རོང་འབྲོག་གི་འཚོ་བ་འདི་ལྷིང་འཇགས་ངང་ང་ཚོ་ལ་འོས་འཚམ་ཞིག་ཡིན་པ་གོར་མ་ཆགས་པ་ཡིན་པས། རོང་འབྲོག་གི་འཚོ་བ་འདི་ཁེ་ལས་ཅན་དུ་བསྒྱུར་ནས་རྒྱུན་སྐྱོང་བྱས་ན་ཕྱི་རྒྱལ་གྱི་ཡུལ་ཁམས་མང་པོར་ཞིང་འབྲོག་གི་ཁེ་ལས་ཀྱི་འཚོ་བ་ཡག་པོ་རྩི་བཞིན་ཡོད་པ་ཤེས་དགོས། དེ་བཞིན་དུ་མི་རིགས་གཞན་གྱིས་གྱོ་འགེབས་བྱེད་པ་སོགས་ཀྱི་ཁང་བ་དང་མི་འདྲ་བའི་རྩིགས་པ་རྩིགས་ལུགས་དང༌། ཀ་གདུང་དང་ཐོག་ཕུབ་སྟེང་སོགས་གཞན་དང་མི་འདྲ་བའི་བོད་ཀྱི་སྲོལ་རྒྱུན་མི་ནུབ་པར་འཛིན་སྐྱོང་བྱེད་དགོས། དགོན་སྡེ་རྣམས་ཀྱིས་གསེར་གྱི་རྒྱ་ཕིབས་མང་པོས་སེར་ལྷང་ལྷང་བཅས་ན་ཆོས་འཇིག་རྟེན་གང་ལ་བསམ་ན་ལེགས་པར་མ་མཐོང་ངོ༌། །འཛམ་གླིང་གི་ཡུལ་གྲུ་ཁག་ན་ཡང་རང་གི་སྲོལ་རྒྱུན་གྱི་སྐད་དང་ཡི་གེ། ཁང་བ་དང༌། གྱོན་ཆས། ཟ་མ་སོགས་སྲོལ་རྒྱུན་བཟང་པོ་རྒྱུན་སྐྱོང་བྱེད་དང་བྱེད་བཞིན་པའི་དུས་རབས་འདིར་ང་ཚོ་བོད་མི་རྣམས་ཀྱི་རང་རང་གི་ཁེ་དབང་ཡོད་པའི་སྲོལ་རྒྱུན་མི་ནུབ་རྒྱུན་སྐྱོང་གནང་རོགས་ཞུ། པཎ་ཆེན་རིན་པོ་ཆེའི་ཞལ་སྔ་ནས། བོད་ཡིན་ན་བོད་ལྭ་གྱོན་དགོས་བ་དང་བོད་སྐད་བཤད་དགོས། ཞེས་གསུངས་པ་ལྟར་བོད་ཡིན་ན་བོད་ཀྱི་སྲོལ་རྒྱུན་གྱི་རིག་གནས་འཛིན་དགོས། རང་ཉིད་ནས་འགོ་བརྩམ་དགོས་སོ། །ཞེས་སྲོལ་རྒྱུན་ལ་བཅང་བའི་བསམ་པས་ཀུན་ནས་བསླངས་ནས་དངོས་གྲུབ་དཔལ་གྱིས་བྲིས་པའོ། །མདོ་སྡེ་༼ཨཾ༽ལས། ཡང་དུས་དེའི་ཚེ་རྒྱལ་པོ་ཀྲྀ་ཀིས་མཚན་གཅིག་ལ་རྨི་ལམ་བཅུ་རྨིས་ཏེ། དེས་སྨྲས་པ། གླང་པོ་ཆེའི་རྒྱལ་པོ་སྐར་ཁུང་ནས་བྱུང་བ་ན་མཇུག་མ་ཕྲ་མོ་ཐོགས་པ་དང༌། སྐོམ་པའི་ཕྱི་ནས་ཁྲོན་པ་སྙེག་པར་རྨི་བ་དང༌། ཕྱེ་བྲེ་གང་དང་མུ་ཏིག་བྲེ་གང་ཚོང་བྱེད་པ་དང༌། ཙན་དན་དང་ཤིང་རིན་མཉམ་པར་བྱེད་པ་དང༌། ཀུན་དགའ་ར་བ་མེ་ཏོག་དང་འབྲས་བུ་ཕུན་སུམ་ཚོགས་པ་མ་བྱིན་པར་ལེན་པ་རྣམས་ཀྱིས་ཕྲོགས་པ་དང༌། གླང་པོ་ཆེ་ཕྲུ་གུས་སྤོས་ཀྱི་གླང་པོ་འཇིགས་པར་བྱེད་པ་དང༌། སྤྲེའུ་མི་གཙང་བས་གོས་པས་གཞན་ལ་སྐུད་པ་དང༌། སྤྲེའུ་རྒྱལ་པོར་དབང་བསྐུར་བར་མཐོང་བ་དང༌། རས་གཅིག་མི་བཅྭ་བརྒྱད་ཀྱིས་དྲས་ཀྱང་མ་རལ་བ་དང༌། སྐྱེ་བོའི་ཚོགས་ཆེན་པོ་གཅིག་ཏུ་འདུས་ནས་འཐབ་པ་དང༌། རྩོད་པ་དང་གཡུལ་འགྱེད་པ་དང་མཚང་འདྲུ་བར་གྱུར་པས་འཇིགས་པ་མཐོང་ངོ༌། །ཞེས་པ་ནས། བཅོམ་ལྡན་འདས་ཀྱིས་རྨི་ལམ་དེའི་འབྲས་བུ་འདིར་བདག་ལ་ལུང་བསྟན་དུ་གསོལ། བཅོམ་ལྡན་འདས་ཀྱིས་བཀའ་སྩལ་པ། རྒྱལ་པོ་ཆེན་པོ་མ་འཇིགས་ཤིག ཁྱོད་ཀྱི་ཡུལ་འཁོར་ཉམས་པར་མི་འགྱུར་ལ། སྲོག་གི་བར་ཆད་དུ་ཡང་མི་འགྱུར་གྱིས། རྒྱལ་པོ་ཆེན་པོ་གཞན་དུ་ན་མ་འོངས་པའི་ཚེ་སྐྱེ་དགུའི་ཚེ་ལོ་བརྒྱ་ཐུབ་པ་ན་ཤཱཀྱ་ཐུབ་པ་ཞེས་བྱ་བ་ཡང་དག་པར་རྫོགས་པའི་སངས་རྒྱས་འབྱུང་སྟེ། དེའི་ཕྱི་མའི་དུས་ན་ཉན་ཐོས་རྣམས་ལུས་མ་བསྡམས་པ། སེམས་མ་བསྡམས་པ། ཚུལ་ཁྲིམས་མ་བསྡམས་པ། ཤེས་རབ་མ་བསྡམས་པ་འབྱུང་བར་འགྱུར་ཏེ། དེ་རྣམས་གཉེན་གྱི་ཚོགས་སྤངས་ནས་རབ་ཏུ་འབྱུང་བར་འགྱུར་ཏེ། དེ་ནས་གཙུག་ལག་ཁང་རྣམས་སུ་ཁྱིམ་གྱི་འདུ་ཤེས་འཇོག་པས་ཆགས་པར་འགྱུར་ཏེ། གླང་པོ་ཆེ་སྐར་ཁུང་ནས་བྱུང་བ་ན་དེའི་མཇུག་མ་ཐོགས་པ་ནི་དེའི་སྔ་ལྟས་ཡིན་ནོ། །རྒྱལ་པོ་ཆེན་པོ་ཁྱོད་ཀྱིས་སྐོམ་པའི་ཕྱི་ནས་ཁྲོན་པ་སྙེག་པར་རྨི་ལམ་དུ་མཐོང་བ་གང་ཡིན་པ་དེ་ནི་དེ་རྣམས་གཙུག་ལག་ཁང་གི་ནང་ན་ལྷན་ཅིག་གནས་པ་རྣམས་ལ་ཆོས་སྟོན་པར་འགྱུར་ཡང་དེ་རྣམས་ཉན་པར་འདོད་པར་མི་བྱེད་ཅིང་ཡིད་ལ་མི་འཇོག་སྟེ། དེའི་སྔ་ལྟས་ནི་འདི་ཡིན་ནོ། །རྒྱལ་པོ་ཆེན་པོ་ཁྱོད་ཀྱིས་ཕྱེ་བྲེ་གང་དང་མུ་ཏིག་བྲེ་གང་ཚོང་བྱེད་པར་རྨི་ལམ་དུ་མཐོང་བ་གང་ཡིན་པ་དེ་ནི་དེ་ཉིད་ཀྱི་ཉན་ཐོས་རྣམས་ཏེ། གང་བཟའ་བ་ཙམ་གྱི་དོན་དུ་དབང་པོ་དང་སྟོབས་དང་བྱང་ཆུབ་ཀྱི་ཡན་ལག་རིན་པོ་ཆེ་རྣམས་ཡང་དག་པར་སྟོན་པར་འབྱུང་བར་འགྱུར་ཏེ་དེའི་སྔ་ལྟས་ནི་འདི་ཡིན་ནོ། །རྒྱལ་པོ་ཆེན་པོ་ཁྱོད་ཀྱིས་ཙན་དན་དང་ཤིང་མཉམ་པོར་ཚོང་བྱེད་པར་རྨི་ལམ་དུ་མཐོང་བ་གང་ཡིན་པ་དེ་ནི་དེ་ཉིད་ཀྱི་ཉན་ཐོས་རྣམས་མུ་སྟེགས་ཀྱི་ཚིག་གང་ཡིན་པ་རྣམས་བཟུང་ནས་སངས་རྒྱས་ཀྱི་བཀའ་དང་སྙོམས་པ་འབྱུང་བར་འགྱུར་ཏེ་དེའི་སྔ་ལྟས་ནི་འདི་ཡིན་ནོ། །རྒྱལ་པོ་ཆེན་པོ་ཁྱོད་ཀྱིས་ཀུན་དགའ་ར་བ་འབྲས་བུ་ཕུན་སུམ་ཚོགས་པ་མ་བྱིན་པར་ལེན་པ་རྣམས་ཀྱིས་ཕྲོགས་པར་རྨི་ལམ་དུ་མཐོང་བ་གང་ཡིན་པ་དེ་ནི་དེ་ཉིད་ཀྱི་ཉན་ཐོས་ལུས་མ་བསྡམས་པ། སེམས་མ་བསྡམས་པ།ཚུལ་ཁྲིམས་མ་བསྡམས་པ། ཤེས་རབ་མ་བསྡམས་པ་རྣམས་འབྱུང་བར་འགྱུར་ཏེ། དེ་རྣམས་དགེ་འདུན་རྣམས་ཀྱི་མེ་ཏོག་གི་མཆོག་དང༌། འབྲས་བུའི་མཆོག་རྣམས་འཚོ་བའི་ཕྱིར་དགེ་འདུན་ལས་བཅད་ནས་ཁྱིམ་པ་རྣམས་ལ་སྟེར་བར་འགྱུར་ཏེ། དེའི་སྔ་ལྟས་ནི་འདི་ཡིན་ནོ། །རྒྱལ་པོ་ཆེན་པོ་ཁྱོད་ཀྱིས་གླང་པོ་ཕྲུ་གུས་སྤོས་ཀྱི་གླང་པོ་འཇིགས་པར་བྱེད་པར་རྨི་ལམ་དུ་མཐོང་བ་གང་ཡིན་པ་འདི་ནི་དེ་ཉིད་ཀྱི་ཉན་ཐོས་རྣམས་ཚུལ་ཁྲིམས་འཆལ་བ། སྡིག་པའི་ཆོས་ཅན་དེ་རྣམས་གང་དགེ་སློང་ཚུལ་ཁྲིམས་དང་ལྡན་པ། དགེ་བའི་ཆོས་ཅན་རྣམས་ཟིལ་གྱིས་གནོན་པར་བྱེད་པར་འགྱུར་ཏེ་དེའི་སྔ་ལྟས་ཡིན་ནོ། །རྒྱལ་པོ་ཆེན་པོ་ཁྱོད་ཀྱིས་སྤྲེའུ་མི་གཙང་བས་གོས་པས་གཞན་ལ་སྐུད་པར་རྨི་ལམ་དུ་མཐོང་བ་གང་ཡིན་པ་འདི་ནི་དེ་ཉིད་ཀྱི་ཉན་ཐོས་ཚུལ་ཁྲིམས་འཆལ་བ། སྡིག་པའི་ཆོས་ཅན་རྣམས་འབྱུང་བར་འགྱུར་ཏེ། དེ་རྣམས་ཀྱིས་ཚུལ་ཁྲིམས་དང་ལྡན་པ་རྣམས་ལ་སྐུར་པ་འདེབས་པར་འགྱུར་ཏེ་དེའི་སྔ་ལྟས་ཡིན་ནོ། །རྒྱལ་པོ་ཆེན་པོ་ཁྱོད་ཀྱིས་སྤྲེའུ་རྒྱལ་པོར་དབང་བསྐུར་བར་མཐོང་བ་གང་ཡིན་པ་དེ་ནི་དུས་དེའི་ཚེ་རྨོངས་པ་རྣམས་རྒྱལ་པོར་དབང་བསྐུར་བར་འགྱུར་ཏེ་དེའི་སྔ་ལྟས་ཡིན་ནོ། །རྒྱལ་པོ་ཆེན་པོ་ཁྱོད་ཀྱིས་རས་གཅིག་མི་བཅྭ་བརྒྱད་ཀྱིས་དྲས་ཀྱང་མ་རལ་བར་རྨི་ལམ་དུ་མཐོང་བ་གང་ཡིན་པ་དེ་ནི་དེ་ཉིད་ཀྱི་བསྟན་པ་སྡེ་བཅྭ་བརྒྱད་དུ་གྱེས་པར་གྱུར་ཀྱང་རྣམ་པར་གྲོལ་བའི་རས་ནི་རལ་བར་བྱ་བར་མི་ནུས་ཏེ་དེའི་སྔ་ལྟས་ཡིན་ནོ། །རྒྱལ་པོ་ཆེན་པོ་ཁྱོད་ཀྱིས་སྐྱེ་བོའི་ཚོགས་ཆེན་པོ་གཅིག་ཏུ་འདུས་ནས་འཐབ་པ་དང་རྩོད་པ་དང་གཡུལ་འགྱེད་པ་དང༌། མཚང་འདྲུ་བར་རྨི་ལམ་དུ་མཐོང་བ་གང་ཡིན་པ་དེ་ནི་དེ་ཉིད་ཀྱི་བསྟན་པ་རྩོད་པས་ནུབ་པར་འགྱུར་ཏེ་དེའི་སྔ་ལྟས་ཡིན་ནོ། །རྒྱལ་པོ་ཆེན་པོ་དེ་ལྟར་མི་བཟད་པ་རྣམས་མ་འོངས་པའི་དུས་ན་འབྱུང་བར་འགྱུར་རོ། །ཞེས་གསུངས་པ་ལ་ཞིབ་ཏུ་གཟིགས་ནས་བག་ཡོད་པར་བྱའོ། །དངོས་གྲུབ་དཔལ་ནས། དྲི་བ། དགེ་བཤེས་ལགས། དྲིན་ཅན་དེ་སུ་ཞིག་ཡིན་ལགས། ལན་ནི། འཇིག་རྟེན་གྱི་དབང་དུ་བྱས་ན་རང་ལ་བྱམས་བརྩེས་བསྐྱང་བའི་མི། དཔེར་ན་ཕ་མ་ལྟ་བུ། དེ་ལ་དྲིན་ལན་འཇལ་བ་ནི། ལྷག་བསམ་གྱིས་ཟས་གོས་སོགས་ཕན་ཐོགས་ལ་བརྩོན་པ། ཆོས་ཀྱི་དབང་དུ་བྱས་ན་ཐར་བའི་ལམ་ཚུལ་བཞིན་དུ་སྟོན་པའི་སློབ་དཔོན། མདོ་སྔགས་ལ་མཁས་པའི་བླ་མ་ལྟ་བུ། དེ་ལ་དྲིན་ལན་བཀའ་བཞིན་དུ་ཆོས་སྒྲུབ་པ་སོགས་ཡིན་ནོ། །དངོས་གྲུབ་དཔལ་ནས། ཀུན་སྤྱོད་བཟང་པོས་སློབ་གསོ་ཐེབས་པ་ཡིན།ཀུན་སྤྱོད་བཟང་པོས་སློབ་གསོ་ཐེབས་པ་ཡིན། སློབ་མ་མང་བའི་དགེ་རྒན་ཅིག་ལ་མཚོན་ན་ཀུན་སྤྱོད་ལ་ཧ་ཅང་གཟབ་གཟབ་བྱེད་དགོས། རང་གི་ཆོས་བཞིན་འདུལ་བཞིན་བྱེད་དགོས། ཐོས་བསམ་སྒོམ་གསུམ་ལས་ལ་བརྩོན་དགོས། དེ་ལས་ལྡོག་སྟེ་གྲོང་ཁྱེར་སྣ་ཚོགས་ཀྱི་མཛེས་ལྗོངས་ལ་འཁྱམ་འཁྱམ་བྱས་ནས་དྲྭ་ཐོགས་སོགས་སུ་བཀྲམ་ན་སློབ་མའི་ཚོགས་ལ་ཤུགས་རྐྱེན་ངན་པ་བཞག་པ་དང༌། སྤོ་ལོ་རྩེ་བའམ་རྩེ་བའི་མཐུན་རྐྱེན་སྒྲུབ་ན་མི་གཞི་ངན་པ་དང་ཀུན་སྤྱོད་རྩུབ་རགས་ཅན་དང༌། སློབ་སྦྱོང་ལ་མི་དགའ་བར་བསྒྱུར་བ་སོགས་དགེ་རྒན་གྱི་ཀུན་སྤྱོད་ཀྱིས་སློབ་ཚོགས་ལ་སློབ་གསོའི་ཤུགས་རྐྱེན་ཆེར་ཐེབས་བཞིན་ཡོད་པ་སེམས་ལ་འཛིན་དགོས། སྤྱིར་བཏང་གི་ཁ་ནས་མང་དུ་སྨྲས་པ་ལས་ཀུན་སྤྱོད་བཟང་པོས་སློབ་གསོ་ཐེབས་པ་ཡིན་པར་སེམས་སོ། །དེ་རིང་ངལ་གསོ་ལ་དངོས་གྲུབ་དཔལ་ནས། དཔེ་ཆ་བ་རྣམས་ལ་མཚོན་ན་ཁོར་ཡུག་ཕུན་སུམ་ཚོགས་པ་ཡིན་ན་འགྲིག་ལམ་ཡག་པོ་ཡོད་དགོས་མོད་ཁོར་ཡུག་ལ་དགེ་རྒན་དང་རྩོད་རོགས་རྒྱ་ཆེ་བ་མེད་ན་གྲྭ་ས་ཆེ་ཁག་ལ་བཏང་དགོས་པ་རེད་མ་གཏོགས། མི་ཚེ་ཐུང་ཐུང་ཡིན་པས་སློབ་སྦྱོང་གི་དུས་ཚོད་ཡོལ་འགྲོ་ལ། དེ་ཡོལ་བར་བྱས་ན་ཚེ་འདི་ཕྱི་ལ་གནོད་སྐྱོན་དེ་ལས་ཆེ་བ་མེད་པ་ཡིན་པར་ཤེས་དགོས། གཞོན་སྐྱེས་རྣམས་ཀྱི་སློབ་སྦྱོང་གི་གོ་སྐབས་ལས་སྣེ་བས་དམ་འཛིན་བྱེད་དགོས་སོ། །འདས་པའི་གནས་ཚུལ་ལ་གཞིག་ན་གཞོན་སྐྱེས་རིགས་སྨྲ་བའི་མི་ཚེ་འཕྲོ་བརླག་འགྲོ་བར་མཐོང་ནས་དངོས་གྲུབ་དཔལ་གྱིས། ཤེས་ཡོན་མེད་པའི་མི་ལ་མཁན་པོའི་མཚན་བཏགས་པ་དང༌། མི་ནོར་ཅན་ལ་སྤྲུལ་མིང་བཏགས་པ་ནི། ཆོས་ལ་བརྟེན་ནས་མི་སེར་ལ་མགོ་སྐོར་བར་མ་ཟད་བསྟན་པ་ཚོང་རྫས་སུ་བསྒྱུར་བ་ཡིན་པས་དེ་འདྲ་མིང་འདོགས་མཁན་ལ་ཆོས་ཀྱི་དྲི་ཙམ་མེད་པར་འཇིག་རྟེན་གྱི་གཡོ་སྒྱུ་ཁོ་ན་ཅན་ཡིན་པས་དོགས་ཟོན་བྱེད་དགོས། བསྟན་པ་ལ་སེམས་ནས་དངོས་གྲུབ་དཔལ་གྱིས་བྲིས་པའོ། ། རང་སྣང་ཅན་གྱི་དྲི་བ།རང་སྣང་ཅན་གྱི་དྲི་བ། རང་སྣང་ཅན་གྱི་དྲི་བ། ཐོས་པ་ཆུང་ཆུང་ང་རྒྱལ་ཅན་ཟེར་བ་བདེན་པ་ཡིན་ནམ། རིས་མེད་པའི་ལན། བདེན་པ་རེད། ཐོས་པ་ཆུང་ཆུང་ཟེར་བ་ནི་ཁ་བཤད་ཙམ་ལས་དོན་དང་ལག་ལེན་ལ་རྨོངས་བ་ཞིག་ལ་བརྗོད། དེ་ལ་ང་རྒྱལ་ཆེ་བའི་རྒྱུ་མཚན་མང་དུ་ཡོད་ཀྱང་རེ་ཟུང་ཙམ་སྨོས་ན་དེང་སྐབས་ལྟ་ལོག་པ་ཡང་དེའི་རིགས་ཀྱིས་ལྐོག་གྱུར་གྱི་གནས་དང་ཟབ་རྒྱས་ལ་རྨོངས་པའི་དབང་གིས་རང་གིས་མི་ཤེས་པ་རྒྱུ་མཚན་དུ་བྱས་ནས་ཟབ་མོའི་གནས་དང་རང་ལ་ལྐོག་གྱུར་དུ་གྱུར་བའི་གནས་ལ་སྐུར་འདེབས་མང་དུ་བྱུང་བ་ལྟ་བུ་རེད། མདོ་ལས། ཤེས་རབ་ཡོད་ཀྱང་དད་པ་མེད་པ་ནི། །ལོག་པར་ལྟ་བ་འཕེལ་བའི་རྒྱུ། །ཞེས་གསུངས་པ་བཞིན་རང་ལ་ཤིན་ལྐོག་ཏུ་གྱུར་བའི་གནས་ལ་སངས་རྒྱས་ཀྱི་ལུང་ལས་གསུང་བ་ལ་ཡིད་ཆེས་ཀྱི་དད་པའམ་ཡིད་ཆེས་རྗེས་དཔག་གི་སྒོ་ནས་འཇུག་དགོས་མོད་ཡིད་ཆེས་མེད་པས་ལྡོག་དེ་བསྐུར་བ་བཏབ་པའོ། །ཡང་ཐོས་ཆུང་དེ་འདྲའི་ནང་ན་རང་གི་བླ་མ་ལ་དད་པ་མེད་པར་མ་ཟད་ཞེ་སྡང་བའི་ཐོས་ཆུང་ཧ་ཅང་མང་བར་མངོན་སུམ་གྱིས་གྲུབ་ལ། འདིའི་རིགས་ལ་བླ་སློབ་བར་སེལ་སོང་བ་མཆིས་པས་གཟབ་འཚལ། མདོར་ན་ཐོས་ཆུང་དེ་འདྲ་ལ་ང་རྒྱལ་ཆེ་བས། ཇི་སྐད་དུ། ང་རྒྱལ་གྱི་ལྒང་བུ་ལ། །ཡོན་ཏན་གྱི་ཆུ་མི་རྡོལ། །ཞེས་གསུངས་པ་བཞིན་རྒྱུད་ལ་ཡོན་ཏན་མི་ཆགས་པའོ། །ཡང་རང་སྣང་ཅན་གྱི་དྲི་བ། སྒོམ་པ་བ་ལ་དེའི་རིགས་མཆིས་སམ་ལགས། རིས་མེད་པའི་ལན། སྒོམ་པ་བ་སྤྱིར་ཧ་ཅང་ཡག་པོ་འདུག འོན་ཀྱང་སྒོམ་པ་བ་ངན་ངོན་ལ་ང་རྒྱལ་ལས་ཕྲག་དོག་དང་རྨོངས་བ་ཧ་ཅང་ཆེ་ལ། སྒོམ་པ་ངན་པ་ཞིག་ཡིན་ན་ཕལ་ཆེར་ལུང་གི་བསྟན་པ་འཛིན་པ་ལ་ཕྲག་དོག་གིས་སྐུར་འདེབས་བྱེད་དེ། ས་སྐྱ་གྲགས་པ་རྒྱལ་མཚན་གྱི་ཞལ་ནས། ཚེ་འདི་ལ་དམིགས་པའི་བསྒོམ་པ་དེ། །དབེན་པར་བསྡད་ཀྱང་འདུ་འཛི་ཅན། །ལོང་གཏམ་སྨྲ་བའི་ཁ་ཏོན་ཅན། །ཐོས་བསམ་བྱེད་ལ་བསྐུར་པ་ཅན། །སྒོམ་པ་གཞན་ལ་ཕྲག་དོག་ཅན། །རང་གི་སྒོམ་པ་རྣམ་གཡེང་ཅན། །ཆོས་བརྒྱད་ཀྱི་བསམ་གཏན་བཤོལ་ལ་ཞོག །ཅེས་གསུངས་པ་ལྟར་རོ། །ཡང་དེ་འདྲ་ལ་རྨོངས་བ་ཆེ་བས་བླུན་སྒོམ་ཕལ་ཆེར་དུད་འགྲོའི་རྒྱུར་འགྱུར་བ་དང་གང་ཟག་གཞན་པ་ཡང་རྨོངས་བས་ལོག་ལམ་ཁྲིད་པར་བྱེད་དོ། །སྤྱིར་ཐོས་བསམ་སྒོམ་གསུམ་གྱི་ནང་ནས་སྒོམ་བཟང༌། འོན་ཀྱང་བསྒོམ་བྱ་ཐོས་བསམ་གྱི་གཏན་ལ་བབས་ནས་བསྒོམ་དགོས་སོ། །རིས་མེད་པས་ལན་དུ་སྨྲས་སོ། །སློབ་མ་ཡིན་པས་ཆ་ནས་བླ་མར་སྐྱོན་རྟོག་གི་བློ་འགོག་དགོས་མོད་ཡོན་ཏན་ཡོད་མེད་ལེགས་པར་བརྟག་དགོས།དེའི་རྒྱུ་མཚན་སྤྱིར་མདོ་རྒྱུད་དུ་མར་བླ་མར་སྐྱོན་རྟོག་གི་བློ་འགོག་དགོས་པར་གསུངས་པ་དང༌། རྒྱུད་ལས། རྩོད་ལྡན་དུས་ཀྱི་སློབ་དཔོན་སྐྱོན་དང་ཡོན་ཏན་འདྲེས། །སྐྱོན་མེད་སྡིག་པ་མེད་པ་ནམ་ཡང་ཡོད་མ་ཡིན། །ཞེས་གསུངས་པ་དང༌། དཔེར་ན་མི་ཞིག་ལ་སྐྱོན་དང་ཡོན་ཏན་གཉིས་ལས་བརྒྱ་ཆ་གོ་དགུ་ཡོན་ཏན་གྱིས་ཟིན་ན་ཡང་རྒྱ་ཆ་གཅིག་ཙམ་གྱི་སྐྱོན་དེ་མཐོང་བ་རེད། ཡི་གེ་ཞིག་འབྲི་ན་བརྒྱ་ཆ་གོ་དགུ་དག་ནའང་མ་དག་པ་གཅིག་ཡོད་ན་དེའི་ཆ་ནས་སྐྱོན་གཏོང་བ་ལས་བརྒྱ་ཆ་གོ་དགུ་དག་པའི་ཆ་ནས་ཡོན་ཏན་མི་བརྗོད་པ་བཞིན་རེད། ཡོན་ཏན་ཡོད་མེད་བརྟག་དགོས་པའི་རྒྱུ་མཚན་དེང་དུས་ཡོན་ཏན་གང་ཡང་མེད་པར་མིང་ཙམ་གྱི་རྨུ་ཐག་ལ་བརྟེན་ནས་གནས་པ་མང་དག་གིས་སློབ་མ་ཡར་རྒྱས་བཏང་མ་ཐུབ་པ་མ་ཟད་ཆོས་བརྒྱུད་ནང་དུ་མགོ་འཁོར་བར་བྱེད་པ་ཡོད་པ་སོགས་མདོར་ན་སློབ་མའི་མདུན་ལམ་ལ་གནོད་པ་མང་དུ་ཡོད་དོ། །འོན་ཀྱང་ཡོན་ཏན་མེད་ན་ཡང་དད་ལོག་མི་བྱ་བར་ཟས་ནོར་སོགས་ཟང་ཟིང་གི་ཐུགས་དགྱེས་པར་བྱས་ནས་ཡོན་ཏན་ལྡན་པའི་བླ་མ་གཞན་ལ་བསྟེན་ཆོག་པར་ཆོས་རྗེ་ཀུན་མཁྱེན་ཆེན་པོས་གསུངས་སོ། །བདག་ལས་སྣང་མ་དག་པ་ཡིན་པར་སྲིད་དོ། །ངག་དབང་དངོས་གྲུབ་དཔལ་གྱིས་རང་སྣང་མ་དག་པ་འདི་ཤོར་སོང་ངོ༌། ། རྨོངས་དད་དང་དད་པ་གླེང་བ།རྨོངས་དད་དང་དད་པ་གླེང་བ། མཐའ་དཔྱོད་ཆོས་ཁྲིད་སྐབས་གསུངས་པ། ཐུབ་པའི་རྗེས་རབས་ཀྱིས་ཟིན་བྲིས་བཏབ། བླ་མ་དང་དགེ་བའི་བཤེས་གཉེན་ལ་ཡིད་ཆེས་པའི་དད་པ་དང་དང་བའི་དད་པ་འོང་པ་ཡོད་པ་རེད། རེད་དེ་ང་ཚོས་བླ་མ་ཡོན་ཏན་ཅན་དུ་མཐོང་ནས་བླ་མ་ལ་དང་བའི་དད་པ་བསྐྱེད་དགོས་པ་རེད་མ་གཏོགས། གཞུང་ལུགས་མ་སྦྱངས་པ་འགའ་ཞིག་གིས། ང་རང་གི་དགེ་བའི་བཤེས་གཉེན་དེ་རང་ལ་ཐོབ་ན་སྙམ་དུ་སྨོན་ལམ་བྱེད་བཞིན་འདུག་སྟེ། དེ་ཐོབ་པ་ཡོད་པ་མ་རེད། དགེ་བའི་བཤེས་གཉེན་དེ་རྒྱུད་ཐ་དད་པ་ཡིན་པས་རང་ལ་ཐོབ་མི་ནུས་ཀྱང༌། ཇི་སྐད་དུ། འཁོར་དང་སྐུ་ཚེའི་ཚད་དང་ཞིང་ཁམས་དང༌། །ཁྱེད་ཀྱི་མཆོག་བཟང་བོ་ཅི་འདྲ་བར། །དེ་འདྲ་ཁོ་ནར་བདག་སོགས་འགྱུར་བར་ཤོག །ཅེས་དེ་དང་འདྲ་བ་ཞིག་བདག་ལ་ཐོབ་པར་ཤོག་ཅིག་ཞེས་སྨོན་ལམ་བཏབ་པ་ན་འགྲུབ་ཀྱི་རེད་མ་གཏོགས། རང་དང་རྒྱུད་ཐ་དད་པའི་གང་ཟག་ཅིག་རང་ལ་ཐོབ་པ་ཡོད་པ་མ་རེད། དེའི་རྒྱུ་མཚན་གྱིས་ཐར་བ་དང་ཐམས་ཅད་མཁྱེན་པ་རྫོགས་པའི་སངས་རྒྱས་ཀྱི་གོ་འཕང་ཐོབ་པར་འདོད་པའི་དད་པ་དེ། ཐོབ་ནུས་པ་ལ་འཐོབ་འདོད་པའི་དད་པ་རེད། དང་འདོད་ཡིད་ཆེས་གང་རུང་གི་རྣམ་པ་ཅན་གྱི་སེམས་བྱུང་དེ་ལ་དད་པ་ཟེར་བ་རེད། དད་པའི་ཡུལ་དེ་ཡང་བདེན་པ་ཡོད་པ་མི་བསླུ་བ་ཞིག་ལ་དམིགས་དགོས་པ་ཞིག་ཆགས་འདུག་ཡོད་པ་རེད། དེའི་རྒྱུ་མཚན་གྱིས་དད་པ་རྣམ་དག་ཡིན་མིན་དེ་དེའི་སྟེང་ནས་ཤེས་དགོས་འདུག དེ་མ་གཏོགས། སངས་རྒྱས་མིན་པའི་ཕྱི་རོལ་བ་གཅིག་ལ་སངས་རྒྱས་ཡིན་པར་དད་པ་བྱས་སོང་ན་རྨོངས་དད་རེད། དེ་ཁོ་རང་ཡིད་ཆེས་པའི་གནས་ཆགས་འདུག་ཡོད་པ་མ་རེད། དེ་བས་ང་ཚོས་ལེགས་པར་མ་ཤེས་ན་ཡང་སངས་རྒྱས་ཀྱིས་གསུངས་པ་དེ་ཡིད་ཆེས་བྱས་ནས་ལས་རྒྱུ་འབྲས་མི་བསླུ་བ་ཡིན་ནོ་བསམ་ནས། རང་གིས་དེ་ལ་ཡིད་ཆེས་བྱེད་པའི་དད་པ་དེ་དངོས་ཡོད་གནས་ཚུལ་དང་མཐུན་པ་ཞིག་རེད། དེ་ལྟར་དད་པ་བྱས་པ་དེ་མི་བསླུ་བ་ཞིག་ལ་དད་པ་བྱས་པས་ན་དད་པ་རྣམ་དག་ཀྱང་ཡིན་པ་རེད། རྨོངས་དད་ཟེར་བ་དེ། བླ་མ་མ་ཡིན་པ་ཞིག་ལ་བླ་མར་བཟུང༌། ཆོས་མ་ཡིན་པ་ལ་ཆོས་སུ་བཟུང༌། དགེ་བ་མ་ཡིན་པ་ཞིག་ལ་དགེ་བར་བཟུང༌། དགེ་བ་ཡིན་པ་ལ་དགེ་བ་མིན་པར་བཟུང་བའི་དད་པ་བྱེད་པ་རྣམས་ལ་རྨོངས་པ་ཧ་ཅང་ཤུགས་ཆེ་ཀི་རེད། ཐོས་བསམ་བྱས་པ་དེ་དགེ་བ་ཁྱད་འཕགས་ཞིག་ཡིན་ན་ཡང་དེ་དགེ་བ་མིན་པར་བཟུང༌། གསུང་རབ་ལུང་གི་ཆོས་དེ་རྒྱལ་བའི་བསྟན་པ་ཡིན་ན་ཡང་དེ་ལ་ཐོས་བསམ་བྱ་མི་དགོས་པར། ཐོས་བསམ་བྱེད་པ་དེ་ཆོས་མིན་ཞིག་བཟུང་ཡོང་གི་ཡོད་པ་རེད། དེ་འདྲའི་རིགས་དེ་ལ་རྨོངས་དད་ཟེར་བ་རེད། ད་རུང་རང་རང་གི་ཆོས་མི་སྒྲུབ་པར་གཞན་བླ་མ་ཞིག་གིས་འདྲེན་འགྲོ་གི་རེད་བསམ་ན། དངོས་ཡོད་གནས་ཚུལ་དང་མཐུན་པ་ཞིག་མ་རེད། རང་གི་ཆོས་མ་སྒྲུབ་པར་འདྲེན་པའི་ཐབས་ཡོད་པ་མ་རེད། དེའི་རྒྱུ་མཚན་གྱིས། དེ་འདྲའི་རིགས་ལ་རྨོངས་དད་ཟེར་བ་རེད། སྐབས་རེ་རང་གིས་ལེགས་པར་མ་ཤེས་ཀྱང་ཡིད་ཆེས་བྱས་ནས་འཇུག་དགོས་པ་མང་པོ་ཡོད་པ་རེད། དཔེར་ན། གཞུང་རྣམས་སུ་དབང་རྟུལ་དད་པའི་རྗེས་འབྲང་ཟེར་བ་ཞིག་འོང་གི་ཡོད་པ་རེད། ཡིན་ན་ཡང༌། དེ་དོན་ལ་དངོས་ཡོད་གནས་ཚུལ་དང་མཐུན་པ་ཞིག་ཡིན་པ་ལ། དད་པ་བྱེད་པོ་རང་གིས་མ་རྟོགས་ཀྱང་སངས་རྒྱས་ཀྱིས་གསུངས་པ་རྒྱུ་མཚན་དུ་བྱས་ནས་དད་པ་བྱེད་ན་འགྲིག་གི་ཡོད་པ་རེད། ཁ་སང་དེ་རིང་མང་པོ་ཞིག་གིས་ནང་ཆོས་ལ་སློབ་སྦྱང་མ་བྱས་པས་ན་ནང་ཆོས་ཤེས་ཀི་ཡོད་པ་མ་རེད། ད་རུང་མོ་ལུང་བསྟན་རྫུན་མ་རེ་བཤད་ན་ཁེད་འགྲོ་རྒྱུ་མང་པོ་ཡོད་པ་རེད། དེ་བཞིན་ཁ་སང་དེ་རིང་གི་སྨན་པ་ཚོ་ཡང་དེ་འདྲ་ཆགས་ཡོད་པ་རེད། སྨན་པ་མང་ཆེ་བས་སྨན་མ་ཤེས་ན་ཡང་ལག་རྩ་འདྲ་བལྟ་ཁུལ་བྱས་ནས་ཧ་མ་གོ་རུང་སྨན་རེ་སྦྱིན་ན་མཚམས་རེ་ཕན་ཐོགས་ཀྱིན་ཡོད་པ་རེད། ནད་པ་ཁོ་རང་ཚོར་ནད་རེ་དྲིས་ནས་འཁྲིས་ནད་རེ་བསམ་ན་འཁྲིས་སྨན་རེ་སྦྱིན། ང་ལ་ཕོ་ཁ་ན་གི་ཟེར་ན་ཕོ་ཁའི་སྨན་རེ་སྦྱིན་བཞག་དུས། སྨན་པས་ནད་ངོ་ཅང་མ་ཤེས་རུང་མཚམས་རེ་ཕན་ཐོགས་འགྲོ་གི་ཡོད་པ་རེད། དེ་ནང་བཞིན་ལུང་བསྟན་པ་ཚོས་ཡང༌། དེ་འདྲ་རེ་བཤད་བཞག་དུས་མང་པོ་ཞིག་གིས་སྐྱབས་བསུ་མཆི་ཟེར་ནས་རྨོངས་དད་བྱས་ཏེ་འགྲོ་གི་ཡོད་པ་རེད། དེའི་རྒྱུ་མཚན་གྱིས་རྨོངས་དད་དང་དད་པའི་ཁྱད་པར་འབྱེད་ཤེས་དགོས་པར་འདུག ཡིན་ན་ཡང༌། དེང་སང་རྨོངས་དད་དང་དད་པ་བཤད་འོང་དུས་རྒན་མོ་ཁྱི་སོས་སངས་རྒྱས་ཟེར་བ་ཞིག་འོང་གི་ཡོད་པ་རེད། འོན་ཀྱང་བྱུང་བ་དེ་དངོས་ཡོད་གནས་ཚུལ་ཡིན་མིན་དཔྱད་པ་དགོས། བོད་ཀྱི་བླ་མ་ཚོས་གསུངས་བཞག་པ་ལ་ཡིན་མིན་ཅི་རིགས་འོང་གི་ཡོད་པ་རེད། ཡིན་ན་ཡང༌། ཁྱི་སོ་སངས་རྒྱས་རེད་བསམ་འདུག་ན་དེ་རྨོངས་དད་ཡིན་མིན་དང་དེ་དད་པ་རྣམ་དག་ཞིག་ཡིན་མིན། དེ་ཡིན་ན་ཕྱི་རོལ་བ་ཚོས་ཁོ་རང་ཚོའི་སྐྱབས་གནས་དེ་སྐྱབས་གནས་མཐར་ཐུག་ཞིག་ཡིན་པ་དང༌། སྐྱོན་མཐའ་དག་ལས་གྲོལ་བ་ཡིན་བསམ་གྱིན་ཡོད་པ་དེ་ཡང་དད་པ་རྣམ་དག་ཡིན་ཆོག་མི་ཆོག་སོགས། རིགས་པས་དཔྱད་ན་དཀའ་མོ་འདྲ་འདུག དེས་ན་རང་རང་སོ་སོ་དོན་དངོས་དང་མཐུན་པ་ཞིག་གི་སྟེང་ནས་འགྲོ་དགོས་པར་འདུག མིའི་རོ་ལས་མི་ལ་སྐྲགམིའི་རོ་ལས་མི་ལ་སྐྲག དུད་འགྲོ་ལས་མི་ངན། མི་ཁ་ཤས་ཀྱིས་མི་རོ་དེ་སྐྲག་ས་ཞིག་རེད་ཅེས་བཤད་འདུག བདག་གི་རྣམ་པར་རྟོག་པ་ལ་མི་རོས་གཡོ་སྒྱུ་ཁྲམ་གསུམ་གྱིས་བསམ་སྦྱོར་ངན་པ་མི་བྱེད་ལ། མིས་དེ་ལྟར་བྱེད་པས་རོ་ལས་མི་དེ་སྐྲག་ས་ཡིན་པ་རེད། དཔེར་ན་དུད་འགྲོ་ཞིག་ལ་ཟས་ཅུང་ཟད་སྦྱིན་པ་སོགས་ཀྱིས་ཕན་བཏགས་ན་ཕྱི་ནང་ནོར་བ་མེད་པར་ཚུར་བརྩེ་བ་འཆང་གི་རེད། རང་གི་ཁྱི་དེས་མཐོ་དམན་འབྱོར་ཕྱུག་སུ་དང་འཕྲད་ཀྱང་བདག་པོའི་རྗེས་སུ་བསྙེགས་པ་ལས་གཞན་གྱི་རྗེས་སུ་འབྲང་བ་སོགས་འགྱུར་ལྡོག་མེད། མི་ནི་དེ་ལྟ་བུ་མ་ཡིན་པར་ཕར་ཁ་ཁོག་མི་བཟུང་བར་སྐད་ཆ་དྲང་མོ་བཤད་ནས་སེམས་ཀྱི་དཀྱིལ་དུ་བཟུང་ན་ཚུར་སྐྱོན་ཅན་དང་བརྙས་བཅོས་དང་གུས་མེད་ཀྱིས་བྱ་བ་བསྒྲུབ་འོང༌། རིང་དུ་བཀྱེད་ན་ཁེངས་ར་བྱེད་འོང་བ་རེད། གཅེས་སྐྱོང་བྱེད་ན་མགོ་འཕང་མཐོ་བ། དྲིན་ཅན་ལ་དྲིན་ལན་ལོག་འཇལ་བྱེད་པ། མངོན་དུ་ངོ་བསྟོད་ཀྱི་ཁུ་ཕྱུག་གྲག་ཀྱང་ལྐོག་ནས་བླ་བཙག་གི་འུག་པ་དགོད་པའི་མངོན་ལྐོག་མི་མཉམ་པ་སོགས་འཁུ་ལྡོག་མང༌། དཔེར་ན་མི་ཞིག་ལ་ཕན་བརྒྱ་བཏགས་པའམ་ལོ་ངོ་དུ་མར་ལྟོ་གོས་ཆོས་གསུམ་ཅི་རིགས་ཀྱིས་བསྐྱངས་ན་ཡང་ཐེངས་གཅིག་ཁོ་རང་གི་རེ་འདོད་ལྟར་མ་བསྒྲུབས་པ་ཡིན་ན་སྔར་གྱི་ཕན་བཏགས་པ་དྲིན་མེད་དུ་སོང་བར་མ་ཟད་གནོད་སེམས་ཡང་འཆང་གི་རེད། དེར་མ་ཟད་རང་དོན་ནམ་རང་འདོད་དང་མ་མཐུན་ན་ཕ་མ་དང་དགེ་རྒན་ལ་དྲིན་ལན་ལོག་འཇལ་བྱེད་པ་མཐོང་ཐོས་སུ་སྣང༌། དེས་ན་མི་ནི་ཆེས་འགྲོག་ས་དཀའ་བ་དང་ཆེས་སྐྲག་ས་རེད། དེས་ན་ཕར་ཕན་བཏགས་པ་དང་ཚུར་གནོད་པ་བྱས་པ་གང་ལ་ཡང་བྲག་ཆ་ལྟ་བུར་བལྟས་ཏེ་བཟོད་སྒོམ་བྱེད་པ་ལས་གཉེན་པོ་གཞན་མེད། མི་ལ་ཕན་བཏགས་པ་ཡིན་ན་ཚུར་ལན་ལ་རེ་བ་ནི་ཕལ་ཆེར་སྟོང་བསམ་ཡིན། དེས་ན་ལན་ལ་མ་རེ། བསྟན་འགྲོའི་དོན་བསྒྲུབ་ན་ལྷག་བསམ་གཙང་མའི་སྤོབས་པ་དང་སྙིང་སྟོབས་ཀྱིས་བསྒྲུབ་དགོས་པ་ལས་འཁོར་གྱིས་ལོག་སྒྲུབ་སོགས་ཡོད་པས་དཀའ་ངལ་གྱི་ལམ་རིང་བོ་ཡོད། ལྷག་པར་ཡར་རྒྱས་མ་སོང་བའི་ཡུལ་ལུང་ལ་མ་བཤད་ན་ཡར་རྒྱས་མི་འགྲོ། བཤད་ན་མི་སྐྱོན་ཅན་ཁྲོ། རྟ་རྒྱབ་བཅད་འཕག་ཟེར་བ་ལྟར་ཕྲག་དོག་གདུག་རྩུབ་དང་ལོག་འགྲེལ་གྱི་ཆབ་སྲིད་ངན་པ་ཡོང་བ་ཆོས་ཉིད་ཡིན། མི་བཟང་བོ་ཞིག་བྱེད་ན་སོ་གའི་གནམ་ངོ་དང་ཆུ་ལ་རི་མོ་བྲིས་པ་ལྟར་འགྱུར་ལྡོག་མི་བྱེད་པར་རྡོ་ལ་རི་མོ་བྲིས་པ་ལྟར་བརྟན་དགོས་སོ། །ཞེས་དེ་རིང་ངལ་གསོ་ལ་དངོས་གྲུབ་དཔལ་གྱིས། གཞན་སྟོང་དབུ་མ་ཆེན་མོའི་བགྲོ་གླེང་ཐེངས་བཅུ་དྲུག་པར་གནང་བའི་བཀའ་སློབ།གཞན་སྟོང་དབུ་མ་ཆེན་མོའི་བགྲོ་གླེང་ཐེངས་བཅུ་དྲུག་པར་གནང་བའི་བཀའ་སློབ། གསུང་བ་པོ། ཇོ་ནང་དགེ་བཤེས་དངོས་གྲུབ་དཔལ། ཟིན་བྲིས་པ། ཝ་ཤུལ་བསོད་ནམས་རྒྱས་པ། བསླབ་གསུམ་ནོར་གྱིས་ཕྱུག་པའི་དགེ་འདུན་འདུས་པ་རྒྱ་མཚོའི་སྙན་ལམ་དུ་སྒོ་གསུམ་གུས་ཕྱག་དང་བཅས་ཏེ་འཚམས་འདྲི་བཀྲ་ཤིས་བདེ་ལེགས་ཞུ། ང་རང་ལ་མཚོན་ན་སྐྱེས་སྟོབས་ཀྱི་ཤེས་རབ། སྦྱང་སྟོབས་ཀྱི་ཡོན་ཏན། ཕྱོགས་གང་གི་ཆ་ནས་དམན་པ་ཞིག་རེད། དེ་འདྲའི་རྒྱུ་མཚན་ལ་བསམ་བློ་བཏང་ན། ཁྱེད་གྲྭ་ཚང་འདུས་པ་རྒྱ་མཚོ་ལ་སློབ་གསོ་མ་ཟད། ཚིག་ཁ་ཤས་ཞུ་དགོས་ན། ཞུ་འོས་པ་ཞིག་དང་ཞུ་འཚམས་པ་ཞིག་མ་རེད། འོན་ཀྱང༌། དེང་སང་འཛམ་གླིང་རང་བཞིན་ནམ་དུས་རབས་ཉེར་གཅིག་པར་བསམ་བློ་བཏང་ན། མི་ཚང་མས་བསམ་ཚུལ་བཤད་ན། བཤད་ཆོག་པ་དང་བཤད་པའི་ཐོབ་ཐང་ངམ་ཁེ་དབང་ཡོད་པ་ཞིག་ཆགས་ཡོད་པ་རེད། དེས་ན་དེ་རིང་ང་རང་གི་བསམ་ཚུལ་ཉུང་བསྡུས་ཤིག་ཁྱེད་རྣམ་པར་ཞུ་འདོད་པ་ཡིན། དེ་རིང་གི་ཞུ་བྱ་དེ། ཐུགས་མཐུན་ཁྲིམས་གཙང་གི་སྒོ་ནས་བཤད་སྒྲུབ་ཀྱི་བསྟན་པའི་སྙིང་པོ་ལ་འབད་བརྩོན་བྱེད་དགོས། ཞེས་པའི་ཁ་བྱང་ཟེར་ན་འདྲ། གླེང་གཞི་ཞིག་གཏན་ཁེལ་བྱས་ཏེ་ཞུ་རྒྱུ་དེ་ཡིན།ཐུགས་མཐུན་ཁྲིམས་གཙང་གི་སྒོ་ནས་བཤད་སྒྲུབ་ཀྱི་བསྟན་པ་འཛིན་དགོས་པ་ཡིན་ན། དང་པོ། ཐུགས་མཐུན་པ་དེ་ཧ་ཅང་གལ་ཆེན་པོ་རེད། འོན་ཀྱང༌། ཐུགས་མཐུན་ཞེས་པ། དེང་སང་རང་རང་སོ་སོའི་ལས་འབྲས་དྲང་བདེན་དང༌། གནས་ལུགས་གཙིགས་སུ་བཟུང་ནས་གཞན་ལ་ཕན་མ་ཐོག་ན་གནོད་མི་བྱེད་རྒྱུ་དེ་རེད། དེ་ཡང༌། ལས་འབྲས་དང་མཐུན་པ། ཆོས་འདུལ་བའི་བཅའ་ཁྲིམས་དང་མཐུན་པ། འཇིག་རྟེན་མི་ཆོས་ཟེར་ན་འདྲ། རྒྱལ་ཁབ་ཀྱི་རྩ་ཁྲིམས་དང་མཐུན་པ་ཞིག་གི་སྟེང་ནས་འགྲོ་དགོས་པ་རེད་མ་གཏོགས། "ཀུན་དང་མཐུན་པ་མི་ཆོས་ཀྱི་རྩ་བ།" ཞེས་པ་དེ། རྐུན་མ་དང་མཐུན་པ། གཡོ་སྒྱུ་ཁྲམ་གསུམ་དང་མཐུན་པ། ཆབ་སྲིད་ཀྱི་གཡོ་སྒྱུ་ཅན་དང་མཐུན་པ་ཞིག་ལ་གོ་བ་མ་རེད། དེས་ན་རང་རང་སོ་སོའི་རང་ཚུགས་མ་ཤོར་བའི་ངང་ནས། གནས་ལུགས་དང་དྲང་བདེན་གལ་ཆེན་རང་བཞིན་དུ་བཟུང་ནས་འགྲོ་དགོས་པ་རེད་མ་གཏོགས་མི་ཐམས་ཅད་དང་མཐུན་པ་ཞིག་ཡོང་ཐབས་བྲལ་བ་རེད། བདག་ཅག་གི་སྟོན་པ་མཉམ་མེད་ཐུབ་པའི་དབང་པོ་ཡང་འཛམ་བུ་གླིང་འདིར་བྱོན་པ་རེད་ཏ། ཐམས་ཅད་དང་མཐུན་པ་ཞིག་མ་ཡོང་པ་རེད། ཁོང་ཐབས་ལ་མ་མཁས་པ་དང༌། བྱམས་སྙིང་རྗེ་མེད་པ་མ་རེད་ཏ། སེམས་ཅན་སོ་སོའི་ཁམས་དང་མོས་པ་སོ་སོ་བ་ཡིན་པ་དང༌། བསོད་ནམས་དང་སྨོན་ལམ་ཡོད་མེད་སྣ་ཚོགས་ཤིག་གིས་ཀུན་དང་མཐུན་པ་ཞིག་ཡོང་ཐབས་བྲལ་བ་རེད། སངས་རྒྱས་ཀྱིས་ནི་མི་མགུ་ན། །བདག་འདྲ་ངན་པའི་སྨོས་ཅི་དགོས། །ཞེས་རྒྱལ་སྲས་ཆེན་པོའི་གསུངས་པ་བཞིན། ང་རང་ལྟ་བུར་མཚོན་ན་ཐམས་ཅད་དང་མཐུན་པ་ཞིག་དགོས་བསམ་ཀྱང་དེ་ནི་སྟོང་བསམ་ཁོ་ན་མ་གཏོགས་ཀུན་དང་མཐུན་པ་ཞིག་ཆགས་ཡོང་བའི་ཐབས་ཡོད་པ་མ་རེད། འོན་ཀྱང༌། གོང་དུ་ཞུས་པ་ནང་བཞིན། གནས་ལུགས་དང་དྲང་བདེན། ལྷག་ཏུ་ང་ཚོ་རབ་བྱུང་བ་ཞིག་ལ་མཚོན་ན། ཆོས་འདུལ་བའི་བསྟན་པ་ཡང་སྙིང་དུ་བཟུང་དགོས་པ་གལ་ཆེན་པོ་རེད་བསམ། རང་གི་ངོས་ནས་བསམ་བློ་བཏང་ན་ད་སྔ་ཡན་ལ། ཆོས་བརྒྱུད་རིས་སུ་མེད་པའི་མཁས་དབང་རྣམས་ཀྱི་མདུན་ནས་དབང་ལུང་ཁྲིད་གསུམ་ཞུས་ཏེ། གང་ལ་གང་འཚམས་ཀྱི་གཞུང་ལུགས་ལ་ཡང་བལྟས། ཆོས་བརྒྱུད་དག་ལ་རང་ནུས་གང་ཡོད་ཀྱིས་ཞབས་ཕྱི་བསྒྲུབས་ནས་ཡོང་བ་ཡིན་མ་གཏོགས། ཁ་རྐྱང་བ་ཙམ་གྱིས་མཐུན་སྒྲིལ་དང་རིས་མེད་ཟེར་ནས་ཞུས་པ་མེད། བྱ་བ་ཆེ་ཆུང་གང་བསྒྲུབ་ན། དེ་ལ་འགལ་ཟླ་ཟེར་ན་འདྲ། ལྡོག་ཕྱོགས་ཤིག་ཡོད་པ་རེད། ལྷ་ཟབ་སར་བདུད་ཟེར་བ་རེད། སྤྱིར་བཏང༌། ཐང་བདེ་མོའི་སྟེང་གི་རི་མཐོན་པོ་ལ་རླུང་རྒྱབ་པ་དེ་དངོས་པོའི་ཆོས་ཉིད་ཅིག་ཡིན་པས་བྱ་བ་གང་བསྒྲུབ་ན་རང་ལ་གནས་ལུགས་དང་དྲང་བདེན་ཡོད་ན། གཞན་གྱི་བར་ཆད་དང་འགལ་བ་ཡོད་ན་ཡང་རང་གི་གཟི་བརྗིད་ཅིག་རེད། གནས་ལུགས་ཡོད་པའི་རྟགས་མཚན་ཞིག་ཀྱང་རེད། ང་རང་གྲྭ་བ་གྲྭ་རྐྱང་ཟླ་གམ་ཁེར་རྐྱང་ཞིག་རེད། ངའི་མི་ཚེའི་བརྒྱུད་རིམ་ལ་བསམ་བློ་བཏང་ན། ལོ་བཅུ་ཕྲག་ཁ་ཤས་ལ་དཔེ་ཆ་ཞིག་ལྟ་ཁུལ་བྱས་པས། གཞན་ལ་གཡོ་སྒྱུའི་སྒོ་ནས་མགོ་གཡོག་དང་མགོ་སྐོར་དང་དེའི་རིགས་ལ་བྱ་བ་སྒྲུབ་རོགས་གང་ཡང་མ་བྱས་པ་ཡིན། རང་ནུས་གང་ཡོད་ཀྱིས་ལས་འབྲས་གཙིགས་སུ་འཛིན་ཁུལ་བྱས་ཏེ་ཡོང་བ་ཡིན། ང་ཚོ་རབ་ཏུ་བྱུང་བ་ཞིག་ན། ལས་འབྲས་གཙིགས་སུ་བཟུང་ནས། རང་ལ་དྲིན་ཆེ་བ་དེ་དྲིན་ཆེན་ཡིན་པ་ངོ་ཤེས་དགོས་པ་ཞིག་རེད། ང་ཚོའི་ལྟོ་གོས་ཆས་གསུམ་ནང་པ་སངས་རྒྱས་པའི་བསྟན་པ་ལ་བརྟེན་ནས་ཡོང་གི་ཡོད་པས། ནང་ཆོས་དེ་རྩ་ཆེན་དང་མཐོང་ཆེན་བྱེད་རྒྱུ་ནི་གལ་ཆེན་པོ་རེད། ཐུགས་མཐུན་ཁྲིམས་གཙང་ཞེས་པ་ལས། ཁྲིམས་གཙང་བ་དེ་བཤད་ན། ཚུལ་ཁྲིམས་ལ་རིགས་མང་པོ་ཡོད་པ་རེད། ཡིན་ན་ཡང་དེ་རིང་འདིར་འདུས་པ་ཐམས་ཅད་ནི་དགེ་འདུན་པ་ཤ་སྟག་ཡིན་པས་དགེ་ཚུལ་སློང་གི་སྡོམ་པའི་ཕྱོགས་ནས་ཉུང་ཙམ་ཞུ་རྒྱུ་ཡིན།འདིར་འདུས་པ་ཐམས་ཅད་རབ་ཏུ་བྱུང་བའི་སྡེ་ཡིན་པས། རབ་ཏུ་བྱུང་བའི་སྡེ་ཞིག་ལ་མཚོན་ན་རང་རང་སོ་སོ་དགེ་ཚུལ་སློང་གང་ཡིན་ན་དེའི་ཚུལ་ཁྲིམས་དེ་བསྲུང་དགོས་པ་རེད། སྲུང་པ་དེ་ཡང༌། དང་པོ། སྡོམ་པ་མ་ཐོབ་པ་ཐོབ་པར་བྱེད་པ། ཐོབ་པ་མི་ཉམས་པར་བྱེད་པ་སོགས་ཡོད་པ་རེད། དེ་རིང་ངས་འདི་ནས་ཞུ་རྒྱུ་ནི་སྡོམ་པ་མ་ཐོབ་པ་ཐོབ་པར་བྱེད་རྒྱུ་ཧ་ཅང་གལ་ཆེན་པོ་རེད་བསམ་ཡོད། ང་རང་གི་བསམ་ཚུལ་འདི་འདྲ་ཞིག་རེད། དགེ་སློང་ཞིག་བསྒྲུབ་པ་ཡིན་ན། ལོ་ཉི་ཤུ་མ་ལོན་སྔོན་ནས་དགེ་སློང་སྒྲུབ་མཁན་དེ་ང་ཚོ་ཇོ་ནང་གི་དགོན་སྡེ་མང་པོ་ན་ཡོང་གི་ཡོད་པ་རེད། འོན་ཀྱང་ལོ་ཉི་ཤུ་མ་ལོན་ནས་དགེ་སློང་གི་སྡོམ་པ་དེ་ཆགས་ཀི་ཡོད་པ་མ་རེད། འདུལ་བ་མདོ་རྩའི་སྤྱི་བསྟན་གྱི་མདོ་ཚན་དྲུག་ཅུ་རེ་ལྔ་ལས་དང་པོའི་སྐབས་སུ།"ཉམས་པ་དང་མ་ཆགས་པ་གཉིས་ལྟུང་བ་ལ་སྦྱོར་ན་ཉེས་བྱས་སོ། །ཞེས་གསུངས་པ་ལྟར། མ་ཆགས་པ་ཞིག་ཡོང་གི་ཡོད་པ་རེད། དེས་ན་ང་ཚོས་དགེ་སློང་སྒྲུབ་པ་ལ་ཆ་རྐྱེན་རྣམས་ཚང་དགོས་པ་གལ་ཆེན་པོ་རེད། དགེ་ཚུལ་སློང་སྒྲུབ་པ་ལ་དགེ་སློང་ལྔ་ཚོགས་ངེས་པར་དུ་དགོས་པ་རེད་དང༌། ང་ཚོས་ལྔ་མ་ཚོགས་པར། སྔོན་དུས་སུ་གསེར་སྐུ་ཡི་ཚབ་བྱས་པ་དང་མི་གཅིག་ཙམ་གྱིས་བསྒྲུབས་པ་སོགས། མང་པོ་ཞིག་ལོ་རྒྱུས་སུ་ཡོད་པ་རེད། དེའི་དབང་གིས་སྡོམ་རྒྱུད་ཆད་འགྲོ་བ་དེ་ཡང་ཡོང་གི་ཡོད་པ་རེད། ཕྱོགས་གཞན་ཞིག་ཏུ། མི་ཚངས་སྤྱོད་ཀྱི་ཕམ་པས་མ་གོས་ན་ཡང་བླ་མ་ཁ་ཡག་ཚོས་སྤྱི་ཚོགས་ལ་མགོ་གཡོགས་མགོ་སྐོར་བྱེད་མཁན་སོགས་དང་བསྟུན་ཆེད་དུ་མི་ཆོས་སུ་རློམ་པའི་སྐད་ཆ་བཤད་པ་སོགས་ཀྱིས། མི་ཆོས་བླ་མའི་རྫུན་གྱི་ཕམ་པ་བྱུང་བ་དང༌། དེང་སང་དཔལ་འབྱོར་རྩ་ཆེན་དུ་བརྩི་བས་བླ་མ་ཁ་ཤས་ལ་མ་བྱིན་ལེན་པའི་ཕམ་པ་བྱུང་ནས་སྡོམ་རྒྱུད་ཆད་པ་སོགས་ཡོང་གི་ཨེ་ཡོད་བསམ་གི་ཡོད། མང་པོ་ཞུ་ན་མང་པོ་རེད་དང༌། སྒྲུབ་པ་པོ་གང་ཟག་གིས་ཐོབ་བློ་སྐྱེས་མ་ཤེས་པ་སོགས་མང་པོ་ཞིག་གིས་སྡོམ་རྒྱུད་ཆད་འགྲོ་གི་ཨེ་ཡོད་བསམ་ནས་ཁྱེད་རྣམས་ཀྱིས་ཐུགས་བསམ་རེ་གཏོང་རོགས་ཞུ་ཞུས་པ་ཡིན། དེས་ན། ང་ཚོས་དང་པོ་ནས་ཆོས་འདུལ་བ་ལ་སློབ་སྦྱོང་ཡག་པོ་ཞིག་བྱེད་རྒྱུ་གལ་ཆེན་པོ་རེད། ཚུལ་ཁྲིམས་སྲུང་བའི་སྐབས་སུ། རང་ཉིད་དགེ་ཚུལ་སློང་ཡིན་པའི་འདུ་ཤེས་ཡོད་རྒྱུ་དང༌། ཕམ་པས་མ་གོས་པ་དང་རང་བཞིན་གྱི་ཁ་ན་མ་ཐོ་བ་ལ་འཛེམ་པ་ཡིན་ན་དགེ་སློང་རྣམ་དག ཅེས་ཆོས་འདུལ་བའི་སྐབས་སུ་གསུངས་པ་བཞིན། རང་རང་སོ་སོ་དགེ་ཚུལ་སློང་རྣམ་དག་ཡིན་པའི་འདུ་ཤེས་ཡོད་པའི་སྒོ་ནས། ནམ་རྒྱུན་སྲུང་སེམས་ཡོད་རྒྱུ་གལ་ཆེན་པོ་རེད་མ་གཏོགས། དགེ་བ་ཟེར་ནས་སྡོམ་པ་ལེན་ཀྱང་དགེ་བ་ཞིག་ཡོང་གི་ཡོད་མེད། དམ་ཆོས་འདུལ་བ་ཡིན་ན་འདྲ། ནང་བའི་བསྟན་པ་སྤྱིའི་དབང་དུ་བྱས་ན་དེ་ཙམ་དཀའ་མོ་འདྲ་ཞིག་རེད། དེས་ན་རང་རང་སོ་སོས་ཚུལ་ཁྲིམས་བསྲུང་རྒྱུ་དང་དེ་ལ་སྲུང་སེམས་ཡོད་རྒྱུ་གལ་ཆེན་པོ་རེད་ཞུས་པ་ཡིན། ལྷག་ཏུ། བསླབ་ལ་མི་གནས་དེ་དག་ནི། །ཟོག་པོ་ཁྱིམ་པར་གནས་པ་མཆོག །ཅེས་སངས་རྒྱས་བཅོམ་ལྡན་འདས་ཀྱིས་གསུང་པ་བཞིན། ཕམ་པས་གོས་པ་ནས་བཟུང༌། དངོས་གནས་རབ་བྱུང་ངུར་སྨྲིག་གི་གོས་མི་གྱོན་རྒྱུ་གལ་ཆེན་རེད། ཆོས་རྗེ་ཀུན་མཁྱེན་རིན་པོ་ཆེས། ཚུལ་ཁྲིམས་འཆལ་བའི་ལུས་ཅན་གཞོན་ནུ་ཁྱོད། །དགེ་སློང་ཚུལ་དུ་མ་འཆོས་དཀར་པོ་གྱོན། །ཚུལ་ཁྲིམས་འཆལ་བའི་ཉེས་པས་མི་ཆོག་པར། །ཚུལ་འཆལ་ཉེས་པའི་གོས་ན་མི་རུང་ངོ༌། །ཞེས་གསུངས་པ་ནང་བཞིན་རེད། དིང་སང་དགོན་སྡེ་མང་པོའི་ནང་དུ་རྒྱུད་ལ་སྡོམ་པ་མེད་ཀྱང་ངུར་སྨྲིག་གི་གོས་གྱོན་མཁན་དང༌། རབ་བྱུང་གི་སྡེར་ཞུགས་ཡོད་མཁན་མང་པོ་ཞིག་ཡོང་གི་ཡོད་པ་རེད། དེའི་རིགས་ཀྱིས་ཁེ་བཟང་རག་གི་ཡོད་བསམ་ན་ཐང་ཏ། དོན་དངོས་སུ་ཚུལ་ཁྲིམས་འཆལ་བ་དེས་དགེ་འདུན་པའི་གནས་མལ་སྐད་ཅིག་ཙམ་ལ་ཡང་ལོངས་སུ་སྤྱད་ན་དམྱལ་བ་འགྲོ་བའི་རྒྱུ་ཡིན་པ་རེད། དེས་ན་ཚང་མས་དེའི་རིགས་ལ་གཟབ་དགོས་པ་དང༌། བསྟན་པ་དག་ཐེར་གྱི་ཕྱོགས་ལ་ང་ཚོས་འབད་འབུང་བྱེད་དགོས་པ་དང༌། གཞི་གསུམ་ལག་ལེན་དང༌། རྒྱུད་ལ་ཚུལ་ཁྲིམས་ཡོད་རྒྱུ་དེ་གལ་ཆེན་པོ་རེད། དེས་ན་གོང་དུ་ཞུས་པ་བཞིན། ཐུགས་མཐུན་ཁྲིམས་གཙང་གི་སྒོ་ནས་སངས་རྒྱས་ཀྱི་བསྟན་པ་ལུང་རྟོགས་གཉིས་འཛིན་སྐྱོང་སྤེལ་གསུམ་བྱེད་དགོས་པ་ཆགས་འདུག་ཡོད་པ་རེད། དེ་ཡང་སློབ་དཔོན་དབྱིག་གཉེན་གྱིས། སྟོན་པའི་དམ་ཆོས་རྣམ་གཉིས་དེ། །ལུང་དང་རྟོགས་པའི་སྡེ་སྣོད་དོ། །དེ་འཛིན་སྒྲུབ་པ་སྨྲ་བྱེད་པ། །སྒྲུབ་པར་བྱེད་པ་ཁོ་ན་འོ། །ཞེས་གསུངས་པ་ལྟར། སངས་རྒྱས་ཀྱི་བསྟན་པ་ལུང་རྟོགས་གཉིས་ཡིན་པ་ངོས་ཟིན་དགོས་པ་དང༌། ས་རྡོ་རི་བྲག་གི་ལས་ཀ་ལྟ་བུའི་ཕྱི་ཡི་རྣམ་པ་ཞིག་གིས་སངས་རྒྱས་ཀྱི་བསྟན་པ་འཛིན་མི་ཐུབ་པ་དང༌། ལྷ་ཁང་གསེར་ཁང་སོགས་ཀྱིས་འཆད་ཉན་མི་བྱེད་པ། ཐོས་བསམ་སྒོམ་གསུམ་མི་བྱེད་པ། མཁྱེན་གསལ་ནང་བཞིན་རེད། དེས་རྒྱུ་མཚན་གྱིས། ང་ཚོས་སངས་རྒྱས་ཀྱི་བསྟན་པའི་སྙིང་པོ་གང་ཡིན་ངོས་ཟིན་དགོས་པ་གལ་ཆེན་རེད། དགེ་འདུན་པའི་བཞུགས་གནས་ཤིག་དང༌། གཙུག་ལག་ཁང་ཞིག་དགོས་ཀི་ཡོད་པ་རེད་མ་གཏོགས། དིང་སང་ང་ཚོས་ལྷ་སའི་ཕྱོགས་ཡིན་ན་འདྲ། གཞན་དག་ལ་བསམ་བློ་བཏང་ན། སྔོན་གྱི་སྒྲུབ་གནས་ཆེན་མོ་ཁ་ཅིག་མར་ཉམས་ནས་ནང་དུ་བཙུན་མ་གཅིག་གཉིས་ཙམ་ལས་མེད་པ་ལྟ་བུ་རེད། ཡང་ཁ་ཅིག་གིས་འཛུགས་སྐྲུན་རྒྱ་ཆེན་པོ་བྱས་པས་རྐྱེན་གྱིས་བསྟན་པ་འཛིན་སའི་གནས་དེ་ཡུལ་སྐོར་ལྟེ་གནས་སམ་སྒྲུབ་གནས་ཆེན་པོ་དག་ཡུལ་སྐོར་ལྟེ་གནས་སུ་བསྒྱུར་བ་ཧ་ཅང་ཡིད་ཕངས་པ་མང་པོ་ཡོང་གི་ཡོད་པ་རེད། དེ་ལྟར་ཡིན་ན། སངས་རྒྱས་ཀྱི་བསྟན་པའི་སྙིང་པོ་ལུང་རྟོགས་གཉིས་ལ་འཆད་ཉན་ཐུབ་ཀི་མ་རེད། ལུང་གི་བསྟན་པ་ལ་ཐོས་བསམ་སྒོམ་གསུམ་བྱས་ཏེ་འགྲོ་དགོས་པ་དང༌། ཐོས་བསམ་སྒོམ་གསུམ་པོ་རྒྱུ་འབྲས་ཀྱི་གོ་རིམ་ཞིག་ཡིན་པ་དང༌། ཐམས་ཅད་མཁྱེན་པའི་གོ་འཕང་ཐོབ་པ་ལ། ཐམས་ཅད་སྦྱང་དགོས་པར་གསུངས་ཀི་ཡོད་པ་རེད། དེ་མ་ཟད། སྔགས་བླ་མེད་ཀྱི་སྐབས་སུ་ཡང༌། པདྨའི་རིགས་ཀྱི་དམ་ཚིགས་གསུངས་ཡོང་དུས། ཕྱི་ནང་གསང་བ་ཐེག་པ་གསུམ། །དམ་པའི་ཆོས་རྣམས་མ་ལུས་བཟུང༌། །ཞེས་གསུངས་པ་རེད། ཕྱི་ནང་གསང་བ་ཞེས་པ། བྱ་རྒྱུད། སྤྱོད་རྒྱུད། རྣལ་འབྱོར་གྱི་རྒྱུད། གསུམ་དང༌། ཐེག་པ་གསུམ་ཞེས་མདོ་ལུགས་ཀྱི་ཐེག་པ་གསུམ་གསུངས་པ་རེད་བ། དེ་མ་ལུས་པར་ཡོངས་སུ་བཟུང་ཞེས། དམ་ཚིགས་ཀྱི་གྲངས་སུ་བཞག་གི་ཡོད་པ་རེད། དེ་དགོས་ཡང་དགོས་རྒྱུ་རེད། སེམས་ཅན་ཐམས་ཅད་ཀྱི་དོན་དུ་སངས་རྒྱས་པ་ཡིན་ན། སེམས་ཅན་ཐམས་ཅད་རྗེས་སུ་བཟུང་དགོས་པ་རེད། རྗེས་སུ་བཟུང་བ་ལ། གདུལ་བྱ་རིགས་ཅན་གསུམ་ཡིན་ན་འདྲ་གི །གདུལ་བྱ་རིགས་ཅན་གསུམ་པོ་རྗེས་སུ་བཟུང་བའི་བསྐལ་བ་མེད་པ་ཞིག་ཡིན་ན་ཡང༌། འཇིག་རྟེན་པའི་ཆོས་བསྟན་ཏེ། འཇིག་རྟེན་གྱི་དགེ་རྩ་ཞིག་བསྐྲུན་པ་ལ། འཇིག་རྟེན་གྱི་ཆོས་དེ་བཤད་དགོས་པར་ཆགས་ཡོད་པ་རེད། དེས་རྒྱུ་མཚན་གྱིས་ཐོས་བསམ་དེ་ཧ་ཅང་གལ་ཆེན་པོ་རེད། དིང་སང་ང་ཚོས་འཆད་ཉན་བྱེད་ཡོང་དུས། འཆད་རྩོད་རྩོམ་གསུམ་གྱི་སྒོ་ནས་འཛིན་གི་ཡོད་པ་རེད། ང་ཚོས་འཆད་པའི་སྐབས་དེར། དིང་སང་ང་རང་ལས་སྣང་མ་དག་པ་ཡིན་ན་འདྲ། རང་ལ་ཆོས་རབ་ཏུ་རྣམ་འབྱེད་ཀྱི་ཤེས་རབ་མེད་པའི་དབང་གིས་ཡིན་ན་ཡང་ཐང༌། མང་པོ་ཞིག་གིས། མ་བརྟག་མ་དཔྱད་པར་བྱུང་རྒྱལ་དུ་རང་བཟོ་བྱས་ཏེ། རང་རང་སོ་སོའི་ཡིག་ཆ་ན་ཡོད་པ་དེ་མི་ལབ་པར། མེད་པ་དེ་ལབ་འགྲོ་བ་ཧ་ཅང་མང་པོ་ཡོང་གི་འདུག །དེ་ཧ་ཅང་ཉེན་ཁ་ཚ་བོ་ཞིག་ཆགས་འདུག བླ་མ་དགེ་བའི་བཤེས་གཉེན་ཚོས། ཆོས་འཆད་ཉན་སྐབས་སུ་བརྟག་དགོས་རེད་མ་གཏོགས། བདུད་ཀྱི་བཤེས་གཉེན་ཞེས་པ་མགོ་ལ་རྭ་སྐྱེས་འདུག་ཡོད་པ་ཞིག་ལོགས་སུ་ཡོད་པ་མ་རེད། རང་གི་སློབ་མ་ཚོ་ལོག་པའི་ལམ་དུ་ཁྲིད་འགྲོ་ན། བདུད་ཀྱི་བཤེས་གཉེན་ཆགས་སོང་བ་རེད། དེས་ན་འཆད་པའི་སྐབས་སུ་བསམ་བློ་གཏོང་དགོས་པ་རེད་བསམ། རྩོད་པའི་སྐབས་སུ། དམ་བཅའ་འདུག་པ་ཡིན་ན། ལྷག་པ་ལྷག་ཏུ་འདིའི་གཞན་སྟོང་བགྲོ་གླེང་ལྟ་བུ་དམ་བཅའ་ཆེན་མོའི་ཁག་འཚོགས་ཡོང་དུས། ཆོས་ཀྱི་གནད་དྲིལ་བ་ཞིག་དང༌། གྲུབ་མཐའ་སྤྱི་དང་གཞུང་སྤྱིའི་བབ་དང་མཐུན་པའི་དཀའ་གནས་ཤིག་གི་ཐོག་ནས་རྟགས་གསལ་གཏོང་དགོས་པ་རེད་མ་གཏོགས། ངག་སྒོ་ཡངས་པ་ཙམ་གྱི་སྒོ་ནས། ཡིན་ཏེ། མིན་ཏེ། ཟེར་བ་ཙམ་ཆོས་ར་ནས་བསྡུས་གྲྭ་ཅུང་ཙམ་སྦྱངས་ཟིན་པ་ཡིན་ན་དངོས་འགལ་ཞིག་གཏོང་ཐུབ་ཀི་ཡོད་པ་རེད། དཔེར་ན། ནས་ཀྱི་རྩམ་པ་ཆོས་ཅན། རྩམ་པ་ཡིན་ཏེ། ཟེར་ན་རྟགས་བཀོད་དཀའ་བ་དང༌། མེ་ཡིན་ན་ཚ་བ་ཡིན་དགོས་ཏེ་ཟེར་ན་ཡང་རྟགས་བཀོད་ཁག་པོ་འདྲ་ཆགས་རྒྱུ་རེད་དང༌། དེ་འདྲ་ཞིག་ལ་གནད་འགག་བཏང་ཟེར་བ་མ་རེད། འཇིག་རྟེན་གྱི་ཁ་དཔེར། ཉི་མ་འགྲོ་ཐབས། ཐང་མ་སྐམ་ཐབས། ཟེར་བ་ལྟ་བུ་ཞིག་ཡོང་གི་ཡོད་པ་རེད། ངག་སྒོ་ཡངས་བ་རེ་ཡིན་ན། སྐད་མཐོན་པོ་ཅན་ཚོས་མཆོང་ལྡིང་བྱས་པ་ཡིན་ན། དཔེ་ཆ་ཡག་པོ་མ་བལྟས། སློབ་སྦྱོང་གནད་དྲིལ་བ་ཞིག་མ་བྱས་པ་ཡིན་ན། ཚང་མས་མཁས་པ་རེད་ཟེར་བ་ཞིག་ཡོང་གི་ཡོད་ན་ཐང་དང༌། དོན་གྱི་མཁས་པ་དེ་ཡོང་ཐུབ་ཀི་མི་འདུག། གདན་ས་ཁག་ཏུ་འདི་འདྲ་ཞིག་རེད། ཚང་མས་འཚང་ཁ་མི་རྒྱབ་པར། དཔེ་ཆ་ཡག་པོ་ཅན། གོ་རྒྱུ་ཡོད་པར་གཏོང་མཁན་ཚོས་དོགས་དཔྱོད་ཡག་པོ་གཏོང་དུས་ཚང་མས་དེ་ལ་གསན་ནས། དེ་ལ་རྟགས་གསལ་གཏོང་ག་འཇུག་གི་ཡོད་པ་རེད།དེ་ལས་གཞན། ཡིན་ཏེ། མིན་ཏེ། ཟེར་ནས་དངོས་འགལ་ཙམ་གཏོང་བ་ལ། ཉི་མ་འགྲོ་ཐབས་ཙམ་ལས་ཕན་པ་ཆེན་པོ་ཡོད་པ་མ་རེད། དེས་ན་ངས་གང་ཞུ་གི་ཡོད་ཞུ་ན། རྩོད་པ་རྩོད་པའི་སྐབས་སུ། ལུང་རིགས་ཀྱི་རྒྱབ་ལྗོངས་ཡོད་པའི་སྟེང་ནས། གཞུང་སྤྱིའི་བབ། གྲུབ་མཐའ་སྤྱིའི་བབ། མདོར་ན། ཆོས་གཞུང་གི་དཀའ་གནས་ཤིག་གོང་འོག་བསྒྲིགས་ཏེ། འདི་འདྲའི་མཁས་དབང་མང་པོ་འཛོམས་ས་དེ་རྩོད་པ་རྩོད་དགོས་ཀི་འདུག་ཞུས་པ་ཡིན། རྟོགས་པའི་བསྟན་པ་ཡིན་ན། བསླབ་གསུམ་ཉམས་ལེན། ལྷག་པ་ལྷག་ཏུ། ང་ཚོ་དཔལ་ལྡན་རྒྱལ་བ་ཇོ་ནང་པར་མཚོན་ན། དུས་འཁོར་གྱི་སྒྲུབ་བརྒྱུད་དེ་ཧ་ཅང་ཡག་པོ་ཞིག་ཡོད་ཀི་ཡོད་པ་རེད། དེ་འཛིན་སྐྱོང་སྤེལ་གསུམ་བྱེད་རྒྱུ་གལ་ཆེན་པོ་རེད། སྤྱིར་བཏང་ཡིན་ན། བཤད་སྒྲུབ་གཉིས་པོ་འགལ་མེད་གྲོགས་སུ་བརྟེན་ནས་འགྲོ་དགོས་པ་རེད། ཁ་ཅིག་གིས། བཤད་གྲྭ་དགོས་མདོག་བྱས་ཏེ་སྒྲུབ་པ་མི་དགོས་པར་བསམ་མཁན་སྲིད་ཀྱི་རེད་དང༌། ད་སྔར་བཤད་གྲྭ་བ་ཞིག་གིས་སྒོམ་མི་དགོས་ཟེར་མཁན་ཞིག་མ་ཚོར་དང༌། བཤད་གྲྭ་བ་ཚོས། མ་ཤེས་པར་སྒོམ་ཐུབ་པ་མ་རེད་ཟེར་བ་ཞིག་ཡོང་གི་ཡོད་པས། དེའི་བར་ལ་གོ་ལོག་འདྲ་ཞིག་ཡོང་གི་ཡོད་པ་རེད། ཡང་སྒོམ་སྒྲུབ་ལ་རྩོམ་མཁན་ཚོས། བཤད་པ་མི་དགོས་པར་མང་པོ་བཤད་ཀི་ཡོད་པ་རེད། སྒོམ་ཤེས་མཁན་ཞིག་གིས་དེ་ཟེར་སྲིད་རྒྱུ་མ་རེད་དང༌། སྒོམ་མ་ཤེས་ཀྱང་ཤེས་མདོག་ཅན་ཟེར་ན་འདྲ། སྒོམ་པར་ཁས་འཆེས་པའི་མི་མང་པོ་ཞིག་གིས། རྩོད་པ་དེ་ཆགས་སྡང་འཕེལ་བའི་རྒྱུ་དང་གཞན་ལ་ཟེར་སྤྱད་ཙམ་རེད་ཟེར་ནས། དེའི་ཐོག་ལ་ཚིག་འདྲ་མི་འདྲ་མང་པོ་བཤད་རྒྱུ་ཡོད་པ་དེ། ང་ཚོར་ད་རུང་དེའི་བག་ཆགས་ཤིག་བཞག་འདུག །འོན་ཀྱང་ཐོས་བསམ་སྒོམ་གསུམ་ཡ་མ་བྲལ་བ་བྱེད་རྒྱུ་གལ་ཆེན་པོ་རེད། གང་ཤེས་པ་དེ་སྒོམ། གང་མ་ཤེས་པ་དེ་ཐོས་བསམ་བྱེད་རྒྱུ་ཧ་ཅང་གལ་ཆེན་པོ་རེད། སྤྱིར་བཏང༌། ཐམས་ཅད་མཁྱེན་པའི་གོ་འཕང་ཐོབ་པ་ལ། ཐམས་ཅད་སྦྱང་དགོས་པ་རེད་དང༌། སྔོན་གྱི་གོ་རིམ་ཞིག་ཡོད་པ་རེད། མི་ཚེ་ཐུང་ཐུང་ཞིག་ལ་ཐམས་ཅད་ཤེས་མི་ཐུབ་ན་ཡང༌། བློ་ལྡོག་རྣམ་བཞི་ཡིན་ན་འདྲ། གང་སྒོམ་དགོས་ན་དེ་ལ་སློབ་སྦྱོང་དགོས་པ་རེད། ལས་འབྲས་ལ་ཡིད་ཆེས་ཡོད་པའི་སྟེང་ནས། ཟག་བཅས་ཉེར་ལེན་་གྱི་ཕུང་པོ་འདི་མི་རྟག་པ་ཡིན་པར་ཤེས། སྡུག་བསྔལ་བ་དེ་སྡུག་བསྔལ་བ་ཡིན་པར་ཤེས། དེའི་སྟེང་དུ་འཆི་བ་མི་རྟག་པ་དེ་རྒྱུད་ལ་སྐྱེས་སོང་བ་ཡིན་ན། ཆོས་མ་བསྒྲུབ་རང་བསྒྲུབ་ཡིན་པ་ཆགས་འདུག་ཡོད་པ་རེད། ལས་འབྲས་ལ་ཡིད་ཆེས་ཡོད། རྒྱུ་མི་དགེ་བ་བྱས་པ་ལས། འབྲས་བུ་སྡུག་བསྔལ་བ་འབྱུང༌། དགེ་བ་བྱས་པ་ལས་འབྲས་བུ་བདེ་བ་འབྱུང་གི་ཡོད་པ་རེད། སྡུག་བསྔལ་ནི་མི་འདོད། བདེ་བ་ནི་འདོད་པ་དེ་ཆགས་ཡོད་པ་རེད། ཡུན་རིང་པོ་ཞིག་ལ་བསྡད་དབང་མེད་པར་འཆི་བ་མི་རྟག་པ་ཡིན་པར་ཧ་གོ་འདུག་ཡོད་པ་རེད། དེ་འདྲ་ཞིག་ལ་བསམ་བློ་གཏོང་ཡོང་ན་ད་གཟོད་ང་ཚོས་ཆོས་མ་བསྒྲུབ་རང་བསྒྲུབ་ཡིན་པ་ཆགས་འདུག་ཡོད་པ་རེད། མདོར་ན་ང་ཚོས་ཐོས་བསམ་སྒོམ་གསུམ་གྱི་བསྟན་པ་བཤད་སྒྲུབ་གཉིས་པོ་འགལ་མེད་དུ་བཟུང་དགོས་པ་རེད།དེས་ན། ང་ཚོས་བཤད་སྒྲུབ་ཀྱི་བསྟན་པ་འཛིན་ཡོང་དུས། ཆོས་རྒྱུད་རང་རང་སོ་སོའི་དགོན་སྡེར་རང་གི་ཡིག་ཆ་མ་གཏོགས་གཞན་ཁྲིད་དགོས་དོན་མེད་པ་ལྟ་བུ་ཞིག་ཆགས་འདུག་ཡོད་པ་རེད། ཡིན་ན་ཡང༌། ཆོས་རྒྱུད་གཞན་པ་ཚོའི་སྐྱེས་བུ་དམ་པ་གོང་མ་ཚོའི་དཔེ་ཆ་ལ་དཔེ་ཀློག་བརྒྱབ་ནས་ལེགས་བཤད་ལེན་དགོས་པ་རེད། དེ་ནང་བཞིན། གང་ལ་གང་འཚམ་གྲྭ་ས་ཁག་ཏུ་ཡང་གྲྭ་སར་འགྲོ་དགོས་པ་རེད།དིང་སང་གྲྭ་རྐྱང་ཚོ་ཉམ་ཆུང་བ། ཁེ་དབང་མེད་པ། བཤད་དབང་མེད་པ། འགྲོ་དབང་འདུག་དབང་མེད་པ། ཐ་ན་དཔེ་ཆ་ཞིག་ལྟ་འདོད་ཀྱང་ལྟ་དབང་མེད་པ་ལྟ་བུའི་ཉམ་ཆུང་བ་ཞིག་ཆགས་འདུག། དེ་འདྲ་དག་གིས་དཔེ་ཆར་ལྟ་བའི་དུས་ཚོད་དེ་ཕལ་ཆེར་ལོ་བཅོ་ལྔ་ནས་ཉི་ཤུའི་ནང་བར་ཙམ་ལས་ཡོང་གི་ཡོད་པ་མ་རེད། དེ་འདྲའི་དུས་ཚོད་རྩ་ཆེན་པོ་ཞིག་ཁོར་ཡུག་ཆུང་ས་ཞིག་ལ་འདུག་བཞག་པ་ཡིན་ན་གྱོང་གུད་རེད། འཛམ་གླིང་གི་སློབ་གྲྭ་ཆེ་ཆུང་གང་ཡིན་ན། དང་པོ། སློབ་ཆུང་ལ་འགྲོ་དགོས་པ་དང༌། དེ་ནས་སློབ་འབྲིང༌། དེ་ནས་སློབ་ཆེན་དང་ཞིབ་འཇུག་སློབ་མར་འགྲོ་གི་ཡོད་པ་རེད། རབ་ན། ཕྱི་རྒྱལ་གྱི་སློབ་གྲྭ་ཆེ་ཁག་ཏུ་ཡང་སློབ་སྦྱོང་ལ་འགྲོ་གི་ཡོད་པ་དེ་ཚང་མར་མཁྱེན་གསལ་ལྟར་རེད། དེས་ན། རང་གི་འཁོར་གཡོག་ཙམ་གྱི་ཆེད་དང༌། རང་གི་བསམ་བློ་ཙམ་ལ་ཤེས་རྟོགས་བཅོལ་ནས། རང་ལ་ཚེ་འདི་ཕྱིའི་རེ་ལྟོས་ཆེ་བའི་སློབ་མ་ཚོའི་མི་ཚེ་འཕྲོ་བརླག་བཏང་བཞག་པས། ཧ་ཅང་དཀའ་ངལ་ལ་འཕྲད་ཀི་འདུག དེས་ན། རང་རང་སོ་སོའི་བསམ་བློ་བཏང་ནས། གྲྭ་ས་ཁག་ཏུ་མངག་ན་འགྲིག་གི་བསམ་གི་ཡོད། གྲྭ་ས་ནས་རང་དགོན་དུ་ཕེབས་པའི་སྐབས་སུ་རང་གི་ཡིག་ཆ་ལ་འཆད་རྩོད་རྩོམ་གསུམ་བྱས་ཏེ་འཛིན་དགོས་པ་རེད། ཐོས་བསམ་སྒོམ་གསུམ་གང་ཡིན་ན་ཐོག་མར་བླ་མ་ཚུལ་བཞིན་དུ་བསྟེན་རྒྱུ་གལ་ཆེན་པོ་རེད། བླ་མ་དགེ་བའི་བཤེས་གཉེན་གྱི་ཚད་དུ་ཡང་ཆོས་ཚིགས་སུ་བཅད་པ་གཅིག་ཙམ་ནས། བླ་མ་རྟག་ཏུ་མ་བཟུང་ན། ཁྱི་ཡི་སྐྱེ་བ་ལྔ་བརྒྱ་བླངས། དེ་ནས་སྨེ་ཤ་ཅན་ཏུ་འགྱུར་ཞེས་པ་ལྟར་རེད། ཆོས་ཚིགས་སུ་བཅད་པ་གཅིག་ཙམ་ཐོས་པ་ནས་བཟུང་བླ་མ་རྟག་ཏུ་བསྟེན་དགོས་པ་ལྟ་བུར་ཆགས་འདུག །རང་ལྟ་བུར་མཚོན་ན། ཧ་ཅང་གི་སློབ་མ་མང་པོ་ཡོན་ཏན་མེད་པར་ཆགས་སོང་བ་ཡིན་ན། སེམས་ཁྲལ་ཆེན་པོ་འདུག །ནམ་རྒྱུན་དད་པ་དང་མོས་པ་ཡོད་མཁན་གྱི་རང་ལ་རེ་ལྟོས་ཆེ་བའི་སློབ་མ་ཚོར་ཕན་ཐོག་པ་དང༌། ཆོས་དམ་ཚིག་གི་འབྲེལ་བ་གཙང་མ་ཞིག་ཡོང་ཆེད་དུ་སྨོན་ལམ་རྒྱག་གི་ཡོད། དགོན་སྡེ་ཚོས་རང་རང་སོ་སོའི་ཁོར་ཡུག་ན་བཤད་སྒྲུབ་ཀྱི་བསྟན་པ་བཟུང་དགོས་པ་རེད། ཆོས་རྗེ་ཚང་ལྟ་བུར་མཚོན་ན། སྤྱིར་ན་བཤད་སྒྲུབ་གཉིས་ཡོད་པ་རེད་དང༌། ད་ལོར་དམིགས་བསལ་གྱིས་ཞུ་རྒྱུ། ང་ཚོའི་ཁོར་ཡུག་ཏུ་ཆོས་རྗེ་དགོན་པའི་གྲྭ་བ་ཚོ་དཔེ་ཆ་ཡར་རྒྱས་སུ་ཧ་ཅང་འགྲོ་གི་འདུག །ཡིན་ན་ཡང༌། རང་གི་དགོན་པར་བཤད་གྲྭ་འཛུགས་རྒྱུ་དང༌། དེ་རུ་འཆད་རྩོད་རྩོམ་གསུམ་བྱས་ཏེ་འཛིན་སྐྱོང་སྤེལ་གསུམ་བྱེད་རྒྱུའི་རེ་བ་རྒྱབ་ཀི་ཡོད། དེའི་ནང་ནས། ཤེས་རབ་བཟང་པོ་ཅན་དང༌། མི་བརྩོན་འགྲུས་ཅན་ཚོ་གྲྭ་སར་འགྲོ་ན་ཡོན་ཏན་རྒྱ་ཆེན་པོ་འཛོམས་ཐུབ་པ་རེད། དཔེར་ན། ན་ཆུ་ལྟ་བུའི་ཆུ་ཆུང་ངུ་ཞིག་ཏུ་ཉ་ཆེན་པོ་ཞིག་ཡོད་མི་ཐུབ་པ་དང༌། རྒྱ་མཚོ་དང་ཆུ་ཆེན་པོའི་ནང་དུ་ཉ་ཆེན་པོ་ཡོང་གི་ཡོད་པ་ནང་བཞིན་རེད། རང་དགོན་གཅིག་པུར་བསྡད་ནས་མཁས་པ་ཆེན་པོ་ཆགས་སོང་བའི་ལོ་རྒྱུས་མེད་པ་ལྟ་བུ་ཞིག་རེད། རང་དགོན་དུ་དགོན་པ་ཆེ་ཆུང་ཚང་མས་བཤད་སྒྲུབ་ཀྱི་སྡེ་འཛུགས་རྒྱུ་གལ་ཆེན་པོ་རེད། འོན་ཀྱང་རང་དགོན་དུ་བཤད་གྲྭ་ཡོད་པ་ཙམ་གྱིས་གྲྭ་སར་འགྲོ་ཀ་མ་བཅུག་ན་མ་འོངས་པའི་རེ་བ་རྒྱབ་ས་དང༌། མ་འོངས་པའི་མདུན་ལམ་མེད་པ་ལྟ་བུ་ཞིག་ཆགས་ཨེ་འགྲོ་བསམ་པའི་ལྟ་ཚུལ་ཡོད། སྤྱིར་བཏང༌། གྲྭ་སར་མངག་ན་རང་དགོན་དུ་བཤད་གྲྭ་འཛིན་མི་ཐུབ་པའི་དཀའ་ངལ་ཡོང་གི་རེད་དང༌། ང་ཚོས། གསེར་ནག་གི་འཕེལ་ཁ་མི་ལྟ་བར། རམ་ནག་གི་འཕེལ་ཁ་ལྟ་སོང་བ་ཡིན་ན། ཅུང་འགྲིག་གི་མེད་པ་ཨེ་ཡིན་བསམ་ནས་ཅིག་ཞུས་པ་དེ་ཡིན། དེ་རིང་ཡིན་ན། ང་འདིར་ཡོང་པ་རེད། ད་ལོར། མཆོག་སྤྲུལ་འཇིགས་མེད་རྡོ་རྗེས། ཡོང་རྒྱུའི་རེ་བ་རྒྱབ་པ་ཡིན། སྔོན་མ་ང་རྒྱ་གར་ནས་མར་ཡོང་བའི་སྐབས་དེར། ཡར་ཐང་དང༌། མགོ་ལོག་ལུང་སྐྱ་ལ་ཚོགས་པའི་སྐབས་སུ་ཁོང་གིས་སློབ་མ་བཞི་བཅུ་ལྔ་བཅུ་བསྒྲིགས་ནས་དཔེ་ཆ་ལྟ་རུ་མངགས་ནས་རྒྱབ་སྐྱོར་བྱས་ཡོད་རེད། དེ་ནས་མདོ་སྔགས་སློབ་གླིང་དུ་ལོ་གཉིས་ལ་བསྡད་པའི་རིང་ལ་ཡང་རྒྱབ་སྐྱོར་བྱས་ཡོད་པ་རེད། ད་ལྟ་ཡང་རྒྱབ་སྐྱོར་བྱེད་དང་བྱེད་བཞིན་ཡོད་པ་རེད། ཁོང་གིས་ད་ལོར་འདི་རུ་ཡིན་གཅིག་མིན་གཉིས་ཡོང་དགོས་ཀི་འདུག །གནང་བ་རེ་ཞུས་ཡོད་གསུངས་ཀི །ང་ཚོ་ལ་ཐོག་མཐའ་བར་གསུམ་དུ་ཁོང་ཡིན་ན་རྒྱབ་སྐྱོར་རོགས་རམ་བྱེད་མཁན་དང༌། སྤྱི་ཡོང་གི་ཆ་ནས། རང་གིས། མཆོག་སྤྲུལ་འཇིགས་མེད་རྡོ་རྗེ་དང༌། ལྕམ་མདའ་མཁན་པོ་ཀུན་དགའ་ཤེས་རབ་གསལ་བྱེད། བླ་མ་དཀོན་གསལ་སོགས་ཀྱིས་མཚོན་པས། རྒད་པོ་ཚོའི་ངག་རྒྱུན་དུ། སྐྱེས་སྐྱེས་ཀི་མགོ་མ་མིན་རུང༌། ཤི་ཤི་གི་རྟིང་མ་ཟེར་བ་བཞིན། ང་ཚོ་ཇོ་ནང་ཚང་གི་དངོས་གནས་བརྩི་འཇོག་དང་གུས་བཀུར་དགོས་རྒྱུ་རེད། ཁ་ཞེ་གཉིས་ཀྱིས་བསམ་པ་ཡིན། དེ་རིང་ངས་ཉ་ཉོག་མང་པོ་ཞུས་པ་ཡིན། གནས་ལུགས་དང་མི་མཐུན་པ། རྒྱལ་བའི་བཀའ་དང་འགལ་བ་གང་ཞིག་ཞུས་ཡོད་ན། སྤྱིར་བཏང༌། དེ་རིང་གི་སྐད་ཆ་ཡིན་ན་འདྲ། ད་སྔར་བསྒྲུབས་ཟིན་པའི་བྱ་བ་གང་ཡིན་ན། གནས་ལུགས་དང་རྒྱལ་བའི་བཀའ་དང་མི་མཐུན་པ་ཡོད་ན། དགེ་འདུན་འདུས་ཚོགས་རིན་པོ་ཆེ་ལ་མཐོ་ལོ་བཤགས། བཟོད་པར་གསོལ་ཞུ་དང༌། གནས་ལུགས་དང་མཐུན་པ་རེ་ཡོད་ན། ཕ་རོལ་བོར་སྐད་ཆ་བཤད་ན་ཕོག་ཐུག་འགྲོ་ས་ཡོད་པ་རེད། འོན་ཀྱང༌། ཕོག་ཐུག་འགྲོ་དགོས་ས་ཞིག་ལ་འགྲོ་དགོས་པ་རེད། སྤྱིར་བཏང༌། མེ་འབུད་སར་ས་འཚིགས་དགོས་པ་ཞིག་ཆགས་ཡོད་པ་ནང་བཞིན་རེད། ཆོས་ཕྱོགས་ཀྱི་དབང་དུ་བྱས་ན། གདམས་ངག་མཚང་ཐོག་ཏུ་རྒོལ་བ་ཞིག་དང༌། འཇིག་རྟེན་གྱི་དབང་དུ། ཤ་ཚ་བའི་གཏམ་ལ་སྙན་པོ་མེད་ཟེར་བ་ཞིག་ཡོང་སྲིད་ཀྱི་རེད། དེ་ནས། རང་གིས་ཡིན་ན། མ་འོངས་པར་གནས་ལུགས་དང་རྒྱལ་བའི་བཀའ་དཔང་པོར་བཞག་ནས་རང་གི་ཚེ་ཇི་སྲིད་དུ་གནས་པ་དེ་སྲིད་དུ་བསྟན་འགྲོའི་དོན་རེ་བསྒྲུབ་རྒྱུ་དང༌། དེའི་དོན་དུ་རང་གི་ཚེ་སྲོག་གཏོང་དགོས་ཀྱང་བློ་འགྱོད་མེད་པའི་སྨོན་ལམ་རྒྱབ་ཀི་ཡོད། དེས་ན། སྐྱབས་གནས་འདུས་ཚོགས་རིན་པོ་ཆེས། དེ་དེ་བཞིན་དུ་འགྲུབ་པའི་ཐུགས་སྨོན་སྐྱབས་འཇུག་ཞུ་ཞུ་ལགས། བདག་ནི་ཚེ་རབས་ཐམས་ཅད་དུ། །བསྟན་པ་གསལ་བར་བྱེད་པར་ཤོག །བསྟན་པ་གསལ་བར་མ་ནུས་ན། །བསྟན་པའི་ཁུར་ཆེན་ཁུར་བར་ཤོག །ཁུར་ཆེན་ཁུར་བར་མ་ནུས་ན། །བསྟན་པ་སེམས་ཁྲལ་བྱེད་པ་དང༌། །བསྟན་པ་ཉམས་ཀྱི་དོགས་པ་ཡིས། །བྱ་ར་ཙམ་ཡང་བྱེད་པར་ཤོག །ཇོ་ནང་ཡང་དར་བསྟན་པའི་སྲོལ་འབྱེད་དགེ་བའི་བཤེས་གཉེན་ཆེན་མོ་ངག་དབང་དངོས་གྲུབ་དཔལ་གྱི་གསུང་ཚན་ཞིག་ལ་ཉན་རྗེས་ཁོང་གི་སློབ་བུར་གཏོགས་པ།ཝ་ཤུལ་བསོད་ནམས་རྒྱས་པས་ནུབ་བྱང་མི་རིགས་སློབ་གླིང་ནས་ཡི་གེར་ཕབ། རང་དབང་གི་ཁོར་ཡུག་བསྐྲུན་དགོས།རང་དབང་གི་ཁོར་ཡུག་བསྐྲུན་དགོས། བྱ་བ་གང་ཞིག་ལ་བརྩོན་ན་སྤོབས་པ་དང་ལྷག་བསམ། དྲང་བདེན་དང་གནས་ལུགས་གཙིགས་སུ་བཟུང་སྟེ་རྣམ་དཔྱོད་ལ་བརྟེན་ནས་བསྒྲུབ་དགོས། འཛེམ་དོགས་ཀྱི་འཆང་རྒྱའི་སྦུབས་སུ་གནས་ན་གཞན་གྱིས་བཟང་ངན་ཇི་ལྟར་གླེང་ཡང་དོན་ལ་བྱ་བ་གང་ཡང་སྒྲུབ་མི་ནུས་པ་མ་ནིང་དང་མཚུངས་སོ། །གལ་ཏེ་བྱ་བ་ཁྱད་འཕགས་སམ་གཟི་བརྗིད་ཅན་ཞིག་བྱུང་ན་ཕྲག་དོག་ཅན་གྱིས་མིག་ནང་གི་ཚེར་མ་གྱུར་སྲིད་མོད། དེ་གཞན་སྐྱོན་དུ་ངེས་པ་མ་ཟད་དེ་གཞན་གྱི་ཉོན་མོངས་ཕྲག་དོག་མ་ལྡོག་བར་དུ་སངས་རྒྱས་ཀྱིས་ཀྱང་བྱ་ཐབས་མེད། དེས་ན་རང་ངོས་ནས་སེམས་གཙང་བས་གཞན་ཕན་གྱི་བྱ་བ་བསྒྲུབ་དགོས་པ་གལ་ཆེ། ལྷག་པར་དུ་རྗེས་ལུས་ཀྱི་ཁོར་ཡུག་ཡར་རྒྱས་འགྲོ་བ་ལ། སྲོལ་རྒྱུན་ངན་པ་དག་དོར་དགོས་ན་དཀའ་ངལ་དང་ཉོག་གྲ་སྣ་མང་ཡོད་ཀྱང་ལྷག་བསམ་རྣམ་དག་གིས་བསམ་ཕོད་པ། བཤད་ཕོད་པ། སྒྲུབ་ཕོད་པ་བྱས་ནས་མདུན་བསྐྱོད་དགོས། དེ་ལྟར་མ་བྱས་ན་སྒེར་གཅོད་མཁྲེགས་འཛིན། རང་འདོད་ཁོ་ནའི་ཁོར་ཡུག་ལས་དུས་ནམ་ཡང་བརྒལ་བའི་ཡར་རྒྱས་མེད། བཟང་ངན་གང་ཡང་མེད་པར་ཤི་ཐུབ་པ་རྩྭ་ཟན་གྱིས་འགྲུབ་ཐུབ་པ་རེད། དེས་ན་གཞན་གྱིས་ཚོད་འཛིན་གྱིས་དབང་དུ་མི་འགྲོ་བར་ཁྲིམས་མཐུན་གྱི་ཁེ་དབང༌། རང་དབང་གི་བདེ་སྐྱིད། རང་དབང་གི་འཚོ་བ། རང་དབང་གི་ཁོར་ཡུག་བསྐྲུན་དགོས། ལས་འབྲས་ལ་ཡིད་ཆེས་དང་ལྷག་བསམ་ཅན་ལ་ཤེས་ཡོན་གྱི་རྒྱབ་ལྗོངས་ཅན་མང་དུ་འཚར་ལོངས་བྱུང་ན་ཡར་རྒྱས་ཡོད་དོ། །ངལ་གསོ་ལ་དངོས་གྲུབ་དཔལ་གྱིས། ལན་མ་བཏབ་པའི་གསལ་བཤད།ལན་མ་བཏབ་པའི་གསལ་བཤད། ཁ་སང་མང་པོ་ཞིག་གིས་འཕྲིན་སྟེགས་ཤིག་ཏུ་སྤེལ་བའི་རྩོམ་ཞིག་བསྟུད་མར་ཐེངས་གང་མང་ལ་བསྐུར་བྱུང་བས། སྐྱེ་དགུ་ཁུལ་ནས་ཉལ་ཁར་འགོ་ནས་ཡིག་ཕྲེང་ཁ་ཤས་ལ་བལྟས། དེའི་རྗེས་འོག་མ་རྣམས་ལ་མཚམས་མཚམས་སུ་རགས་ཙམ་ཞིག་བལྟས་པ་ཡིན། ཉེ་ཆར་ཁོ་བོས་ཀུན་མཁྱེན་ཀློང་ཆེན་དང་འཇུ་མི་ཕམ་གཉིས་ཀྱི་དགོངས་པའི་སྐོར་ནས་ཚིག་ཁ་ཤས་བྲིས་པ་ཡིན་ལ། དེར་མུ་ར་ཀུན་བཟང་ཞེས་འབོད་པ་ཁོས་རིགས་ལམ་གྱི་འགྲོས་མེད་ཅིང་རང་ཚིག་ནང་འགལ་ཁོ་ནས་སྙིང་པོ་མེད་པའི་དགག་པ་བརྗོད་ཁུལ་གྱིས་ལྐོག་ལབ་ཀྱི་རྩོམ་ཡིག་ཅིག་བྲིས་འདུག རིགས་ལམ་རྣམ་དག་གིས་ལན་འདོན་འོས་ཤིག་ཡིན་ན་ནི་གླེང་བར་སྤྲོ་མོད། ངེད་རང་གཉིས་སྔོན་ནས་དངོས་སུ་ཐེངས་གསུམ་ཙམ་ཅུང་ཟད་བགྲོ་མྱོང་བས། ཇ་ཕོར་གང་རིན་པའི་བློ་སྐྱེད་མེད་པར་མ་ཟད་སྐར་ཆ་ཁ་ཤས་ནང་ཁ་སླ་བ་མངོན་སུམ་གྱིས་གྲུབ་ཟིན། ད་སྐབས་ཁོས་ཚོན་རྩིའི་མར་མེ་ཞིག་བཟུང་ནས་འོད་སྟོང་བདག་པོ་ལ་གསལ་བྱེད་དུ་ཕུལ་བ་ཧེ་ཧེ། རིགས་པ་དྲི་མ་མེད་པ་གོ་བའི་སྙན་གྱི་དབང་བོ་མི་གསལ་བ་གླེང་སློང་བའི་སྐབས་ཙམ་ནས་རྟོགས་ཚར་ཞིང༌། ད་རེབ་ཡང་ཅུང་ཟད་བལྟས་ཀྱང་ལུང་དྲངས་པ་དག་ནི་བདག་གིས་བཤད་པའི་རྒྱབ་རྟེན་ཁོ་ན་བཀོད་པ་ལྟ་བུ་ལས་གཞན་ཅི་ཡང་མ་གོ། བདག་གིས་ཞིབ་ཆ་བྱས་པ་གཅིག་ཀྱང་གོ་མི་འདུག་པས་ཕྱོགས་སྔའི་འདོད་པ་གཏན་མ་གོ་བར་འདུག ཁོས་ཉིན་མང་པོར་འབད་པའི་རིགས་པ་ནི། ཀློང་འཇུ་རྣམ་གཉིས་ཞེས་བརྗོད་ན་འཇུ་ཞེས་པ་མི་ཕམ་གྱི་མིང་མ་ཡིན་པས་མི་ཕམ་ལ་མི་གོ་བས་མི་རིགས་ཟེར་བ་ལ། ཀ་བུམ་གཉིས་ཞེས་བརྗོད་པས་ཀ་བ་ལ་གོ་མི་ནུས་པར་ཐལ། ཁྱེད་ཀྱི་རྟགས་རྒན་དེའི་ཕྱིར་རམ་ཀ་ཞེས་པ་ཀ་བའི་མིང་མ་ཡིན་པའི་ཕྱིར། འཁོར་གསུམ། ཧེ་ཧེ། གཞན་ཡང་སོ་ཟུར་གནུབས་གསུམ་དང༌། བུ་དོལ་སོགས་སྤྲོ་བ་གྲངས་ལས་འདས་ཀྱང༌། དེ་ཙམ་ཁ་དོག་དཀར་དམར་རྩོད་པའི་བྱིས་པ་ཡན་གྱིས་ཤེས་ནུས། ལྷག་ཏུ་རྨོངས་པས་བལྟས་ཚོད་དུ་གྲུབ་མཐའི་ཞེན་ཕྱོགས་རྩོད་པ་འདྲ་བ་ལ། མང་པོ་ཞིག་ཆོས་བརྒྱུད་ཀྱི་ཆགས་སྡང་གི་ལག་ཆ་ངན་པར་འགྱུར་དོགས་པས་ལན་འདོན་འདོད་མེད། ལན་འདོན་དགོས་ཀྱི་རིན་ཐང་ཡང་ཅི་ཡང་ཡོད་པར་མ་གོ། སྔ་འགྱུར་གྱི་མདོ་སྔགས་མན་ངག་རྒྱ་མཚོ་ལྟ་བུའི་མངའ་བདག་རིགས་པ་དྲི་མ་མེད་པ་སྨྲ་བའི་སྐྱེས་བུ་དམ་པ་རེའི་བློ་སྐྱེད་དང་གསལ་ཁ་རེ་གནང་ན་དད་གུས་དང་བཅས་རེ་བ་ལས། གདན་ས་ཆེན་པོ་དང་དཔལ་ནཱ་ལེནྜའི་རིགས་པ་གསེར་སྦྱངས་བཙོ་མ་ལྟ་བུ་དེ། རིགས་པ་མི་ཤེས་པ་ཞིག་གིས་སྐད་གཟེངས་མཐོ་བ་ཁོ་ནས་རིགས་ལམ་པར་བརྩི་བ་ཞིག་ལ་ཕུལ་ཡང་གོ་བརྡ་འཕྲོད་པའི་རེ་བ་གཏན་ནས་མེད། རིགས་ལམ་རྒྱ་མཚོ་ལྟ་བུ་ལས་འོངས་པའི་ལེགས་བཤད་དེ་རྫ་བུམ་ཞིག་ཏུ་ག་ལ་ཤོང༌། ངོ་མ་བཤད་ན་ངས་སྔོན་དུ་གསལ་བར་བཤད་ཟིན་པ་ལས་ལན་གསར་བ་གདབ་དགོས་པའི་ཚིག་གཅིག་ཙམ་ཡང་མ་མཐོང༌། གསལ་བཤད་སྒུག་ཡོད་པ་དག་ལ་གསལ་བཤད་ཙམ་ཡིན། བདག་གིས་ཀུན་མཁྱེན་ཀློང་འཇུ་རྣམ་གཉིས་ཀྱི་དགོངས་པ་ཅུང་ཟད་བཤད་པ་སྔ་འགྱུར་གྱི་གཞུང་ལ་རྒྱུས་མངའ་མེད་ཀྱང་ཡོད་པ་སྐད་དུ་འདོན་པ་ཚོས་བླུན་པོ་རྣམས་ཁ་སྟབས་ཀྱིས་བསྒྱུར་བ་མཐོང་ནས་བརྩེ་བས་ཡིད་སེམས་བསྐྱོད་པའོ། །བདག་ནི་ནང་པ་སངས་རྒྱས་པ་ཡིན་པས་ལས་འབྲས་དང་མཆོག་གསུམ་མཐའ་གཅིག་ཏུ་ཁས་ལེན་མཁན་དེ་ཡིན་ནོ། །ཁོས་ཐོག་མར་གླེང་སློང་གི་འགོ་བཟུང་ཚེ་ཆོས་ཀྱི་གནས་ཚུལ་འདི་ཡིན་ཞེས་སྨྲ་རྒྱུ་གང་ཡང་མེད་པར་ཡིད་བརྟན་མེད་པའི་རྐང་མང་བཙུགས་ནས་ངེས་བཟུང་གང་ཡང་མེད་པར་འགྲོ་བཞིན་འདུག ཁོས་ཀུན་རྫོབ་དང་ལས་འབྲས་མེད་པར་སྨྲ་བའི་ཁས་ལེན་རིལ་གྱིས་བཏང་ནས་ཁས་ལེན་ཡོད་མེད་སོགས་རྐང་བ་གསུམ་ཙམ་བཙུགས་ནས་སྨྲས་འདུག ལས་འབྲས་མེད་པར་སྨྲ་བའི་ཁས་ལེན་བཏང་ཟིན་པས་བདག་གིས་བཤད་པའི་དགོས་པ་གཅིག་གྲུབ་ཟིན་ཏོ། །ད་སྔར་ལས་འབྲས་མེད་པར་བཤད་མ་མྱོང་ཞེས་མངོན་སུམ་དུ་སྨྱོན་པ་ལས་མེད་དོ། །ཇོ་ནང་གཞུང་ལུགས་ལ་རྒྱུས་མངའ་གཏན་ནས་མེད་པར་འཁོར་ལོ་བར་བའི་དགོངས་པ་མེད་དགག་འདོད་པར་བཤད་པ་ནོར་ཏེ། ཇོ་ནང་བ་ཆེན་པོའི་བཀའ་བསྡུ་བཞི་བ་ལས། ཆོས་འཁོར་གཉིས་པའི་དོན་ཡང་དེ་བཞིན་ཉིད། །ཡོན་ཏན་དཔག་ཡས་ཚང་བ་ཡིན་པའི་ཕྱིར། །མེད་དགག་མ་ཡིན་དེ་ཕྱིར་རང་སྟོང་དང། །ཅང་མེད་སྟོང་པ་ཆད་པའི་སྟོང་པ་མིན། །རྣམ་ཀུན་མཆོག་ལྡན་སྟོང་གཞི་ཡིན་ཕྱིར་དང། །འགྱུར་མེད་མཆོག་གི་བདེ་ཆེན་ཡིན་ཕྱིར་དང། །ཞེས་སོགས་གསུངས་པས་སོ། །ནོར་བ་འདི་ནི་ཇོ་ནང་ཀུན་མཁྱེན་ཆེན་པོའི་འདོད་པ་མི་ཤེས་པ་མང་པོས་ལོག་པར་བཤད་པས་གསལ་བཤད་ཕུལ་བ་ཙམ་ཡིན། ཨུ་ཚུགས་ཀྱི་རིགས་འདི་ལྟ་བུ་ལ་གཞན་གྱིས་ལན་མ་གནང་ན་ལེགས། རང་བཞིན་བརྗོད་པ་འདི་ཐུགས་ལ་མི་འགྲོ་བ་ཡོད་ན་དགོངས་དག་ཞུ། བདག་གི་མཁན་ཆེན་འཇིགས་མེད་ཕུན་ཚོགས་ཀྱི་མདུན་ནས་སྙིང་ཐིག་ཡ་བཞིའི་དབང་སོགས་ཞུ་སྐབས་ཁོང་ཡང་ཨེ་ཡོད་སྙམ། གང་ལྟར་བླ་མ་གཅིག་པའི་རྡོ་རྗེ་སྤུན་གྲོགས་ཡིན་པས་ཐུགས་ལ་མི་གནོད་པར་ཞུ། ཞེས་སྔ་འགྱུར་བའི་བསྟན་ལ་རིང་ནས་འདྲིས་ཤིང་དད་པ་ཐོབ་པའི་ངག་དབང་དངོས་གྲུབ་དཔལ་གྱིས་སྐྱེ་དགུ་ནས་ཟི་ལིང་གི་བར་གྱི་མཁའ་ལམ་ནས་རིགས་ལམ་མི་ཤེས་པས་ཆོས་ལ་དབང་ཟ་བ་ལ་གྲོང་བའི་གོ་བ་ནག་རྡིབ་མའི་ཚུལ་གྱིས་གསལ་བཤད་འདི་བྲིས་པའོ། ། མི་གཞིའི་སློབ་གསོ།མི་གཞིའི་སློབ་གསོ། ༡ མི་གཞི་བརྟན་པ། གྲོགས་པོ་བར་བརྟན་པ། བྱ་བ་བརྟན་པ། ཁ་ཕྱོགས་བརྟན་པ། རང་ཚུགས་དགོས། ༼མི་ཆོས་གཙང་མ་བཅུ་དྲུག་ལས། ཉེ་འདུ་མཛའ་བཤེས་ལ་གཞུང་རིང་བ༽༼ངན་པའི་གྲོས་ལ་མི་ཉན་པར་རང་ཚུགས་འཛིན་པ།༽བློ་ཁོག་ཡངས་པ་དགོས་པ་ལས་ཡོན་ཏན་ཡོད་ན་གཞན་གྱིས་སྐྱོན་བརྗོད་འོང་བ་རེད། དོན་ཆུང་ལ་ཁོང་ཁྲོ་མི་བྱེད་པ། ཐག་གཅོད་སྔ་མི་ཉན་པའོ། །༢ དྲང་བདེན། ལས་འབྲས། འདྲ་མཉམ། གཞུང་དྲང་བ། ཚོད་ཟིན་པ། ༣ ཀུན་སྤྱོད། ཡ་རབ་སྤྱོད་བཟང༌། ཤེས་ཡོན་ལ་དགའ་བ། རྒན་གཞོན་བརྩི་བཀུར། འདིའི་བྱེ་བྲག་ཡོན་ཏན་ཅན་ལ་གདེང་འཇོག་གམ་ཆེ་མཐོང༌། ༼མི་ཆོས་ལས། རིགས་མཐོ་བ་དང་རྒན་པ་བརྩི་བཀུར༽ཁྱིམ་པ་སུན་འབྱིན་མི་བྱེད་པ། ཚུལ་ཁྲིམས་སྲུང་བ། འདོད་རྔམས་ཆུང་བ། རྫུན་དང་ཕྲ་མ་མི་བྱེད་པ། གྲོན་ཆུང༌། ༼ཟས་ནོར་ལ་ཚོད་ཟིན་པ༽༼ཀུན་ལ་ཕྲག་དོག་ཆུང་བ། ༽བསྟན་འགྲོ་ལ་གནོད་པའི་ལས་མི་བྱེད་པ། གཤིས་ཀ་རྩུབ་མོ་མི་བྱེད་པར་ཚིག་འཇམ་པོ་ངང་ཞེ་ས་དང་བཅས་དགོས། ༤ ལྷག་བསམ། རང་འདོད་མི་ཆེ་བར་གཞན་གྱི་བྱ་བའམ་དགེ་ལས་ལ་བརྩོན་པ། ༼མི་ཆོས་ལས། ཡུལ་མི་ཁྱིམ་མཚེས་ལ་ཕན་ཐོག་ལ་བརྩོན་པ༽གཞན་ལ་ཕར་གནོད་བྱས་ན་ཚུར་ཡང་གནོད་པ་བྱེད་པ་རེད། ༥ དྲིན་ཤེས། ༼སྔར་གྱི་དྲིན་ཅན་གྱི་མི་རྩད་གཅོད་པ༽ལོག་སྒྲུབ་མི་བྱེད་པ་གལ་ཆེའོ། །དངོས་གྲུབ་དཔལ་གྱིས། གངས་ལྗོངས་རིས་མེད་རྒྱལ་བསྟན་མཐོ་རིམ་བགྲོ་གླེང་གི་སྲོལ་ཡིགགངས་ལྗོངས་རིས་མེད་རྒྱལ་བསྟན་མཐོ་རིམ་བགྲོ་གླེང་གི་སྲོལ་ཡིག ༡ ཚོགས་གཙོ་རྒན་པ་ནི། ཚོགས་པ་དེར་དངོས་ཞུགས་ཀྱི་དགོན་སྡེ་རེ་རེས་འདེམས་ཐག་གཅོད་རྒྱུ་ཡིན། དུས་ཡུན་ལོ་གཅིག་ཡིན། ཚོགས་གཙོ་ཐེངས་གཅིག་ལས་བསྐྱར་འདེམས་གནས་སྐབས་ལོ་གཉིས་ཙམ་གྱི་རྗེས་སླར་འདེམས་ན་ཆོག ཐེངས་གཉིས་ལས་དེ་ཕན་ཆད་ཚོགས་གཙོ་འགན་ཁུར་མི་ཆོག ༢ཚོགས་གཙོ་གཞོན་པ་ནི་དེ་བཞིན་འདེམ་རྒྱུ་ཡིན། རྗེས་སོར་ཚོགས་གཙོ་གཞོན་པ་ཚོགས་གཙོ་རྒན་པ་ལ་སྟབས་མི་བདེ་བས་དགོངས་གནང་ཞུས་ན་མ་གཏོགས་འཇོག་རྒྱུ་ཡིན། གལ་ཏེ་ཚོགས་གཙོ་གཞོན་པ་ཚོགས་གཙོ་འདུག་མ་ཐུབ་ན་སླར་འདེམས་སྐོས་བྱ་རྒྱུ། ཚོགས་གཙོ་མཁན་པོ་དང་རྡོ་རྗེ་སློབ་དཔོན་དང་དགོན་བདག་སོགས་སྤེལ་ནས་རིམ་བཞིན་འདེམས་ཐོན་བྱུང་ན་ལེགས། དེ་ལྟར་ངེས་པར་མི་དགོས། ༣ རྒྱུན་ལས་མི་གསུམ་འདེམས་དགོས། ༤ ལོ་རེ་ལ་བགྲོ་གླེང་ཉིན་གཉིས་ལ་ཚོགས་རྒྱུ་ཡིན། ཉིན་རེ་སྔ་དགུང་ལ་ཆུ་ཚོད་བརྒྱད་དང་ཕྱེད། དེ་ཡང་སྔ་དགུང་སོ་སོ་ལ་ཆུ་ཚོད་བཞི་དང་སྐར་བཅོ་ལྔ་ལས་སྐར་བཅོ་ལྔ་བར་གསེང་ཡིན་ལགས། དམ་བཅའ་རེ་ལ་ཡུན་ཚད་སྐར་ཉེར་ལྔ། ཐོག་མའི་གསལ་བཤད་སྐར་བརྒྱད། དྲི་བ་དང་ལན་སྐར་བཅུ་བདུན་ཡིན། དྲིས་པ་ལ་ལན་འདེབས་ལས་གཡོ་སྒྱུས་མ་དྲིས་པ་ལ་ཆུ་ཚོད་འགྲོ་ཐབས་མི་བྱེད་པ་དང༌། གལ་ཏེ་བྱེད་ན་སྟངས་འཛིན་ཚོགས་གཙོ་རྒན་གཞོན་གྱིས་གནང་དགོས། དྲི་བ་འདྲི་མཁན་ནས་དང་པོ་དྲི་བ་ཁ་གསལ་ཉུང་ཉུང་དྲིས་ནས་ལན་མ་འགྲིག་པ་ཡོད་ན་སླར་ལུང་རིགས་ཀྱིས་གནོད་བྱེད་ཡོད་ན་མདོར་བསྡུས་ཞུས་ན་ཆོག་མོད་སྐར་བཞི་ཙམ་ནས་རྫོགས་དགོས། ཉིན་རེ་ལ་དམ་བཅའ་བ་བཅོ་བརྒྱད་ཡོད། རྒྱུན་ལས་རྣམ་པས་དྲི་ཤོག་གནང་ནས་དམ་བཅའ་བཞུགས་མི་རྣམས་ཀྱིས་ལན་ཤོག་དངོས་གསུམ་ནས་ལྔ་བར་ཡིན། རང་གི་ཁས་ལེན་འཛིན་མཚམས་གསལ་བར་བཀོད་པ་མ་ཟད་ཁུངས་ཐུབ་ཀྱི་ལུང་དགོད་དགོས། དྲི་ཤོག་སོགས་རྒྱུན་ལས་བས་གནང་དགོས། དམ་བཅའ་བཞུགས་ཐེངས་གཅིག་ལ་མི་གཅིག་གིས་དྲི་གཞི་གཅིག་ལས་ཡང་ཡང་དྲི་བ་གནང་མི་ཆོག ༥ ཚོགས་མི་མཁན་པོ་དང་དགེ་བཤེས། གྲངས་སུམ་ཅུ་ནས་ལྔ་བཅུ་བར་ཡིན། དེ་ཡང་བཀའ་པོད་ལྔ་ཆ་ཚང་སྦྱང་ཟིན་པ་ལ་དགོས། ༦ དམིགས་བསལ་གདན་ཞུའི་སྐུ་མགྲོན་བོད་སྤྱིའམ་ཆོས་བརྒྱུད་སྤྱི་ལ་མཁས་པའི་གྲགས་པ་ཡོད་པ་གཅིག་ནས་གསུམ་བར་ཅི་རིགས་ཡིན། ༧ ཚོགས་གནས་ཀྱི་དགོན་པའི་གྲྭ་བ་ཟུར་ཞུགས་གང་མང་བྱས་ན་འགྲིག ༨ སྦྱིན་བདག་ཡོད་ན་བཞུགས་ཁང་དང་ཟ་མ་བཀོད་བསྒྲིག་དགོས། ༩ བགྲོ་གླེང་ལོ་རེ་རེ་ལ་རེས་མོས་བྱས་ཏེ་དབུ་མའི་གཞུང་གཙོ་བོར་བྱས་ནས་བཀའ་པོད་ལྔ་དང་བསྔགས་བཅས་ལས་དྲི་བ་གནང་རྒྱུ་ཡིན། ༡༠ དྲི་ལན་གང་གི་སྐབས་ཡིན་ན་འཇོག་བརྡ་གཏོང་ཚེ་མཚམས་འཇོག་དགོས། ༡༡ ཚོགས་གཙོ་ཁུར་ཟིན་པ་རྣམས་མ་འོངས་འཛུམ་སྟོན་ཚོགས་པའི་ནང་དུ་འཇོག་རྒྱུ་ཡིན་ལགས། ལོ་དང་པོ་ལས་གཞན་པའི་སྐབས་སུ་ཚོགས་གཙོ་འདེམ་རྒྱུ་བློ་འདྲི་སང་དང་ཚོགས་གཙོ་སོགས་ཀྱི་འགན་བཞེས་འདེམ་རྒྱུ་ཡིན། བློ་འདྲི་ལྷན་ཚོགས་ཀྱི་ཚོགས་གཙོ་ལོ་ལྔ་ནས་འདེམས་སྐོ་དགོས། རྒྱུན་ལས་བ་དམིགས་སེལ་གྱི་དགོངས་གནང་ཞུ་མཁན་མ་གཏོགས་ལོ་གསུམ་ནས་རྗེས་ན་ཆོག སྐབས་གཉིས་ལས་ལྷག་བཞུགས་མི་ཆོག ༡༢ ཚོགས་གནས་དགོན་པ་སུ་ལ་ཚོགས་འདོད་ཡོད་པ་དག་ཡིན། ༡༣ དགོན་པ་རེའི་དམ་བཅའ་གཉིས་ཡིན། དམ་བཅའ་ལ་བཞུགས་མི་མེད་ཚེ་གསུམ་ཙམ་འདུག་ན་ཆོག ༡༤ ཆོས་ལུགས་རིས་མེད་ཀྱི་དགོན་སྡེ་སུ་ཡིན་ན་ཚོགས་པ་འདིའི་ནང་རྒྱུན་ཞུགས་བྱེད་ན་ཐོབ་ཐང་འདྲ་མཉམ་ཡིན། དེ་བཞིན་དུ་སྒེར་ངོས་ནས་མཁན་པོ་དང་དགེ་བཤེས་སུ་རྒྱུན་ཞུགས་བྱེད་ན་ཐོབ་ཐང་འདྲ་མཉམ་ཡིན། ཟུར་མཆན། དྲི་བའི་སྐབས་སུ་དེ་ཡིན་ནམ་ཞེ་ན་ཡིན་ཟེར་བའམ་མ་ཡིན་ཞེས་པའི་ལན་ཙམ་གྱིས་ཆོག རྒྱུ་མཚན་དགོད་ཟེར་ན་རྒྱུ་མཚན་ཙམ་འགོད་རོགས། གོ་རྒྱུ་གང་ཡིན་ཟེར་ན་གོ་བ་ཁ་གསལ་ཉུང་བསྡུས་གནང་རྒྱུ་དང༌། ཁུངས་ལུང་ཨེ་ཡོད་ཟེར་ན་འཐད་གར་ཡོད་མེད་གང་ཡིན་མདོར་བསྡུས་གསུང་བ་དགོས། ཚོགས་གཙོ་རྒན་གཞོན་དང་རྒྱུན་ལས་བ་རྣམས་ལ་ཁྲི་རྒྱབ་པ་སོགས་མི་དགོས་པར་མཐོ་དམན་གཅིག་མཚུངས་ཡིན། འོན་ཀྱང་གྲ་མགོའམ་གྲ་དཀྱིལ་ན་བཞུགས་ས་བཀོད་བསྒྲིག་བྱས་ན་ལེགས། ཚོགས་གཙོའི་ལས་འགན་སྲོལ་ཡིག་འདི་དང་མཐུན་པར་དངོས་གཞི་བཀོད་བསྒྲིག་བྱེད་རྒྱུ་ཡིན། མ་འོངས་འཛིན་སྐྱོང་ཚོགས་པས་འདེམས་སྐོས་རིམ་པ་དང༌། བགྲོ་གླེང་གི་རིམ་པ་སྲོལ་ཡིག་ལྟར་ཡོང་གི་མེད་ན་སྲོལ་ཡིག་ལྟར་མཐུན་པར་བྱེད་དགོས་པར་འབོད་བསྐུལ་ཞུ་དགོས། ཚོགས་གཙོ་ཟུར་བ་རྣམས་བགྲོ་གླེང་འདིར་ཕེབས་གང་ཐུབ་བྱས་ན་ལེགས། ཇོ་ནང་གཅིག་པུ་མ་ཡིན་པར་ཆོས་བརྒྱུད་རིས་མེད་ཀྱི་དགོན་སྡེ་སུ་ཞུགས་ན་ཆོག་པ་རེད། ཚོགས་པ་འདིར་གདན་འདྲེན་ཞུ་བ་ལ་བཀའ་པོད་ལྔ་འཛིན་གྲྭ་རིམ་བགྲོད་སོང་ཟིན་པའི་མཁན་པོའམ་དགེ་བཤེས་ཀྱི་མཚན་རྟགས་བཞེས་པ་དགོས། དགེ་བའི་བཤེས་གཉེན་དང་དགོན་སྡེ་དང་འགལ་བ་མ་སོང་བ་དང༌། ནང་ཆོས་སྤྱི་དང་བྱེ་བྲག་ཆོས་བརྒྱུད་སོ་སོ་ལ་ལོག་ལྟ་བྱེད་ནས་ངན་སྨྲ་མཁན་མ་ཡིན་པ་དགོས། སྐབས་བསྟུན་ནས་དམིགས་བསལ་ཡོད་ལགས། ཐེངས་དང་པོའི་ཚོགས་གཙོ་མཁན་དངོས་གྲུབ་དཔལ། མ་འོངས་འཛུབ་སྟོན་ཚོགས་པའི་གཙོ་འགན་ཞོར་ཁུར་ཡིན། ཚོགས་གཙོ་གཞོན་པ་སྤྲུལ་འཇམ་དབྱངས་སྦྱིན་པ། རྒྱུན་ལས་རྒྱལ་རོང་བ་ནས་མཁན་རབ་གསལ། རྒྱུན་ལས་བ་སྡེ་དགེ་ཀུན་དགའ་བློ་གྲོས། རྒྱུན་ལས་བ་རྔ་བ་ནས་མཁན་ཚུལ་ཁོ། རྒྱུན་ལས་བ་མི་ལྔ་ཡིན། དྲུང་ཡིག་པ་ཚུལ་ཁོ་ཡིན་ལགས། འདེམས་སྐོས་དགོན་པ་བཞི་བཅུ་ཞེ་གཅིག་གི་མི་སྣ་ཞེ་གཅིག་གིས་འདེམས་པ་ཡིན་ལགས་སོ། །དངོས་གྲུབ་དཔལ་གྱིས། རྗེས་ལུས་ཀྱི་དགོན་སྡེ།རྗེས་ལུས་ཀྱི་དགོན་སྡེ། མི་དགའ་བ་གསུམ། སློབ་གཉེར་ལ་མི་དགའ་བ། ཡོན་ཏན་ཅན་ལ་མི་དགའ་བ། འདུལ་ཁྲིམས་ལ་མི་དགའ་བ། དགའ་བ་གསུམ། ཡོན་ཏན་མེད་པ་ལ་དགའ་བ། དངུལ་ལོ་ཁོ་ན་ལ་དགའ་བ། རྗེས་ལུས་ལ་དགའ་བ། ངོ་མི་ཤེས་པ་གསུམ། དགོན་སྡེ་འཛུགས་པ་བཤད་སྒྲུབ་ཀྱི་ཆེད་ཡིན་པ་མི་ཤེས་པ། སློབ་གཉེར་བསྟན་འགྲོའི་དོན་ཡིན་པར་མི་ཤེས་པ། དགོན་སྡེའི་ཁྲིམས་བསླབ་གསུམ་གྱི་གྲོགས་སུ་འགྱུར་དགོས་པ་མི་ཤེས་པ། རྒྱབ་སྐྱོར་མེད་པ་གསུམ། ཁོར་ཡུག་གཅིག་ལ་འདྲ་མཉམ་གྱི་རྒྱབ་སྐྱོར་མེད་པ། བཤད་གྲྭ་འདུག་མཁན་ལ་རྒྱབ་སྐྱོར་མེད་པ། བསྟན་པ་དངོས་གནས་ལ་རྒྱབ་སྐྱོར་མེད་པ། རྒྱབ་སྐྱོར་ཡོད་པ་གསུམ། རྩེད་མོ་རྩེ་བ་ལ་རྒྱབ་སྐྱོར་ཡོད། གྲོང་ཆོག་གི་སྐོར་ལ་རྒྱབ་སྐྱོར་ཡོད། སློབ་གཉེར་ཐེར་གཏོག་ལ་རྒྱབ་སྐྱོར་ཡོད། དགེ་འདུན་གྱི་བྱ་བ་མ་ཡིན་པ་དང༌། འདུལ་ཁྲིམས་མ་ཡིན་པའི་ཁྲིམས་ལ་རྩ་ཆེན་དུ་བཟུང་བ་སོགས་རྗེས་ལུས་ཀྱི་དགོན་སྡེའི་རང་བཞིན་དེ་ལྟར་ཡིན་པས་དེ་འདྲ་ལ་ཡར་རྒྱས་ཐག་རིང༌། རྗེས་ལུས་ཡོད་པ་ཙམ་ནོར་འཁྲུལ་ཆེ་བ་མ་ཡིན་པར་རྗེས་ལུས་ཡོན་ཏན་ཅན་དུ་བཟུང་བ་ཧ་ཅང་ནོར་འཁྲུལ་ཚབ་ཆེ་ཤོས་སོ། །འཐུས་མིའི་བྱ་བ་ནི་མི་མང་གི་དཀའ་ངལ་ཞུ་དགོས་པའམ་སྲིད་ཞུགས་སྲིད་གླེང་བྱེད་དགོས་པ་ཞིག་རེད། ང་རང་གི་བསམ་ཚུལ་ལ་མི་མང་བཀའ་དྲིན་ཆེན་པོ་རེད་བསམ་བཞིན་ཡོད། གཞུང་ཞབས་པའི་ཟླ་ཕོགས་དང་དབུལ་ཕོངས་ལ་གནང་སྦྱིན་རྣམས་མཐར་གཏུག་ན་མང་ཚོགས་ལས་བྱུང་བ་ཁོ་ན་རེད། ཁེ་ལས་ཀྱི་བཟོ་གྲྭ་ཞིག་ལ་མཚོན་ན་བརྒྱ་ཆ་མང་པོ་ཞིག་རྒྱལ་ཁབ་ལ་ཁྲལ་འཇལ་དགོས་པ་རེད། ཁེ་ལས་བ་དེས་ཡང་བཅའ་ལག་དེ་ཉོ་མཁན་གྱི་མི་མང་གི་ལག་ནས་དངུལ་ལེན་འགྲོ་བ་དང༌། ཁ་པར་གྱི་ཟླ་ཁྲལ་ལྟ་བུ་ཡང་མི་མང་གི་ལག་ནས་ཡོང་གི་ཡོད་པ་རེད། དེ་བཞིན་སྨན་རིན་ཁ་གསབ་དང༌། ལོ་ལོན་གྱི་རོགས་དངུལ་སོགས་མང་པོ་ཞིག་མང་ཚོགས་ཀྱི་ལག་ནས་ཡོང་བ་ཡིན་པས་རྒྱལ་ཁབ་ཀྱི་དངུལ་ནི་མི་མང་གི་རྔུལ་ཆུ་བསགས་པའི་ཤ་ཁྲག་ཡིན་པས་གཞུང་ཞབས་ཀྱི་ལས་བྱེད་པ་རྣམས་ཀྱིས་མི་མང་བཀའ་དྲིན་ཆེ་བ་ཤེས་ནས་དམངས་ཕན་གྱི་བྱ་བ་དྲང་བདེན་གྱི་སྒོ་ནས་འབད་དགོས། གོང་རིམ་ནས་གནང་སྦྱིན་ཆེ་ཆུང་ཐོབ་མཁན་ཚོས་ཁེ་ཐོབ་བ་མ་ཡིན་པར་རང་མགོ་མ་ཐོན་པར་གཞན་གྱིས་རོགས་རམ་བྱེད་དགོས་བྱུང་བ་རེད། མི་མང་པོ་ཞིག་གིས་རང་གི་ཁྱིམ་མི་གནང་སྦྱིན་མེད་པས་དཀའ་ངལ་འདོན་མོད། རང་གི་བསམ་ཚུལ་ལ་གནང་སྦྱིན་ལ་བརྟེན་ནས་ཁ་གསོ་དགོས་པ་རྣམས་རང་གི་རྐང་བའི་མགོ་རང་ཡར་ལངས་ནས་འགྲོ་མ་ཐུབ་པའི་གཞན་ལ་སྐྱབས་བཅོལ་ནས་མི་ཚེ་བསྐྱལ་དགོས་བྱུང་བ་རེད། གནང་སྦྱིན་མེད་རིགས་ནི་རང་གི་ཁ་རང་གིས་གསོ་ཐུབ་པའམ་གཡོ་སྒྱུ་མ་བྱས་པར་དྲང་བདེན་ལ་གནས་པ་རེད། དེས་ན་གཞུང་ཞབས་པ་ལས་ཁེ་ལས་བ་བཟང་བ་ནི་ཁེ་ལས་བས་མི་མང་པོ་དང་རྒྱལ་ཁབ་ལ་ཞབས་ཕྱི་སྒྲུབ་ཐུབ་པས་སོ། །གནང་སྦྱིན་མི་དགོས་པའི་རིགས་ནི་རང་གི་འཚོ་བ་རང་གིས་ཐག་གཅོད་ཐུབ་ཀྱི་ཡོད་པ་རེད། སྤྲང་བོ་ལས་སྤྲང་བོ་མ་ཡིན་པ་ཞིག་རང་གིས་འབད་བརྩོན་བྱེད་འོས་སོ། །དངོས་གྲུབ་དཔལ་གྱིས་སྲིད་གྲོས་ཚོགས་ཞུགས་ཀྱི་མྱོང་ཚོར་དུ་བྲིས་པའོ། ། དཔལ་འབྱོར་གྱིས་མི་གཞི་བརླགདཔལ་འབྱོར་གྱིས་མི་གཞི་བརླག ༡ བླ་མ་རྣམས་ཀྱིས་དཔལ་འབྱོར་ཅན་ཞིག་རིག་ན་སྤྲུལ་མིང་དང་མཁན་མིང་བཏགས་ནས་རྒྱབ་གཉེར་གྱི་ཡི་གེ་རྫུན་མ་སྦྱིན། དམངས་སྒོར་དམར་པོ་ཆག་ཐོ་གཅིག་གཉིས་རེ་ཕུལ་ཚེ་ཐུགས་དགྱེས་སྙམ་བསྟན་ཏེ་སེམས་ཅན་ལ་མགོ་སྐོར་དང་བསྟན་པ་ལ་རྨ་འབྱིན་པར་བྱེད། ངོ་ཚ་མེད་པ་ཁྲེལ་མེད་པའི་སྒོ་ནས་བསྟན་པའི་སྙིང་པོ་དེ་འདྲ་བཟུང་ནས་བྱ་བཞག་སྒྲུབ། དེ་ལ་བླུན་པོ་རྣམས་ཀྱིས་རྨོངས་དད་བྱེད་པ་མངོན་གསལ་རེད། ༢ དཔོན་པོ་ཡིན་ན་ཡང་རྩ་ཁྲིམས་དང་བཅའ་ཁྲིམས་གཞུང་ལས་ཁང་དུ་ཉར་ཚགས་བྱས་ཏེ་དཔལ་འབྱོར་གྱི་ལྐོག་དངུལ་ལ་བརྟེན་ནས་འཚོ་བ་སྐྱེལ་གྱིན་ཡོད། དེ་ཡང་དྲང་བདེན་མ་ཡིན་པའི་བྱ་བཞག་སྣ་ཚོགས་སྒྲུབ་པས་དུས་རབས་གསར་བའི་ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རང་ལུགས་ཀྱི་རྗེས་སུ་འཇུག་པ་ལས་བཟློགས་ནས་མ་རྩ་རང་ལུགས་ནག་པོ་ནག་རྐྱང་གི་བྱ་བ་སྣ་ཚོགས་སྒྲུབ་པའི་དཔོན་ངན་ཧ་ཅང་མང་པོ་རེད། ༣ གྲྭ་རྐྱང་ཕལ་ཆེར་རྒྱ་བླའི་རྗེས་སུ་བསྙེགས་ནས་རང་ཉིད་ཞར་དང་ཞོར་ལ་བཙོང་ནས་གཞན་ལ་མགོ་སྐོར་བཏང༌། རང་གིས་རིན་པ་ཟོས་ཟིན་པ་བསམ་བློ་མི་བཏང་བར་རང་ཉིད་ལ་སྒོར་ཅུང་ཟད་རེག་པ་ཡིན་ན་དེའི་ཡིད་ཚིམས་ཏེ་དྲིན་ཅན་ཡིན་ཞེས་ངག་ཏུ་གྱེར་འདོན་བྱེད། ༤ དད་ལྡན་མང་ཚོགས་ཀྱི་བློ་ངོར་གྲྭ་རྐྱང་ཐོས་བསམ་ཚུལ་བཞིན་དུ་བྱེད་བཞིན་པ་མཐོང་གི་མེད་ལ། སྤྱི་ཚོགས་ཀྱི་སྟེང་རྟག་ཏུ་ཉུལ་བའི་རིགས་ཀྱི་ནང་ན་རླངས་འཁོར་རྫིག་པོ་དང་འཁོར་གཡོག་མང་པོ། སྟོད་གོས་སེར་པོ་ཕུ་རུང་ཆེན་པོ། ཁ་ནས་མི་ཆོས་བླ་མའི་རྫུན་གྱི་གསར་འགྱུར་ཆད་མེད་དུ་སྨྲ་བའི་རིགས་ལ་སྐྱབས་སུ་འཆི་ཟེར་ནས་རང་གི་རྔུལ་ཆུའི་བསགས་པའི་ཤ་ཁྲག་གི་དཔལ་འབྱོར་དག་དོན་མེད་ཆུད་ཟོས་སུ་བཏང་བ་སྙིང་རྗེ་ཡང་བསམ་བཞིན་ཡོད་ལགས། སྤྱིར་གཡོ་སྒྱུ་ཅན་གྱི་མོ་ལུང་བསྟན་བཤད་ཚེ་མངོན་ཤེས་ཅུང་ཟད་མེད་ན་ཡང་སྐབས་དོན་ཚོད་དཔག་གིས་བརྒྱ་ཆ་བརྒྱད་ཅུ་ཁེད་པའམ་ཐོག་ཏུ་འགྲོ་བ་སྲིད་པས་དེ་ལྟ་བུའི་གནས་ལ་གཟབ་འཚལ། ༥ མི་སྐྱ་མང་བོ་ཞིག་གིས་རྐུ་བྱེད་པ། ཚོང་ལོག་རྒྱབ་པ། བཤས་ཚོང་བྱེད་པ། ཉེས་མེད་རི་དྭགས་གསོད་པ། བུ་ལོན་བླངས་ནས་ཕྱིར་མི་སྤྲད་པར་རང་ལ་ཡོད་པ་སྦེད་ནས་བུ་ལོན་སྟོན་མོ་བྱེད་པ་སོགས་སྒོར་ཕྱིར་མི་སྤྲོད་པའི་རིགས་ཧ་ཅང་མང་བ་ནི་མངོན་དུ་རྐུན་ཇག་བྱེད་པ་སོགས་དྲང་བདེན་མེད་པའི་བྱ་བ་ཡིན་ལ། དེ་ཡང་དཔལ་འབྱོར་གྱིས་མི་གཞི་བརླག་པ་ཡིན་པས་གཟབ་པར་ཞུ། ༦ དགོན་སྡེ་རེ་ཟུང་གིས་མང་ཚོགས་ཀྱི་ལག་ནས་འདོན་ཡོན་ལེན་ཏེ་ཆོས་མི་འདོན་པ་དང་བསྔོ་བ་སྨོན་ལམ་ཡང་མི་བྱེད་པར་སྒོར་མོ་རེག་སོང་ན་ཁེ་ཆེན་པོ་ཐོབ་སྙམ་པ་ཧ་ཅང་ནོར་འཁྲུལ་ཡིན་པར་མ་ཟད་ཁ་ནས་ལས་འབྲས་བཤད་ཀྱང་དོན་གྱིས་ལས་འབྲས་བརྩི་སྲུང་མེད་པ་ཆགས་ཟིན་པ་རེད། རྗེས་ནས་ཚེ་འདི་ཕྱི་ཅི་རིགས་ལ་ཤ་ཁྲག་གི་བུ་ལོན་འཇལ་དགོས་པར་རྒྱལ་བས་གསུངས་པ་ལྟར་རེད། དགོན་ཆེན་ཁ་ཤས་ལ་འབྱུང་ཉེ་བར་སྣང༌། དེས་ན་བསྔོ་བ་སྨོན་ལམ་དང་སྐྱབས་འཇུག་ཞུ་བ་ཧ་ཅང་གལ་ཆེ། ༧ གཞན་ཡང་མོ་བ་ཚོས་ཚོད་དཔག་བྱས་ནས་སྨན་པར་མ་བསྟེན་ཟེར་བ་དང༌། དབུལ་ཕོངས་ལ་རིམ་གྲོ་ཆེན་པོ་སྒོར་ཁྲི་ཕྲག་གི་རིན་གྱི་འདོན་པ་བཅོས་དགོས། དེ་བདག་གི་དགོན་པའམ་བཤད་སྒྲུབ་འདི་ལ་ངེས་པར་བཅོས་དགོས་ཞེས་སྨྲ་བ་དང༌། སྨན་པ་ཁ་ཅིག་གིས་རང་གི་ནད་ངོས་མ་ཟིན་པ་དང༌། ནད་དེ་བཅོས་ཐབས་མི་ཤེས། ཉམས་མྱོང་མེད་ན་ཡང་སྨན་གོང་ཆེན་བཙོང་བ་དང༌། ཚོང་བ་རྣམས་ཀྱིས་བཅའ་ལག་རྫུན་མ་བཙོང་བ་དང༌། བཟོ་གྲྭ་རྣམས་ཀྱིས་དངོས་རྫས་རྫུན་བཟོ་བྱེད་པ། བདེ་ཐེངས་ལ་གནོད་པའི་ཟས་དང་འཐུང་ཆུའི་རིགས་བཙོང་བ་སོགས་ནི་དམིགས་ཡུལ་རང་ལ་སྒོར་གྱི་ཆེད་གཅིག་པུ་མ་གཏོགས་གཞན་གྱི་ཚེ་སྲོག་དང་དཔལ་འབྱོར་ལ་གནོད་པའི་ཕྱོགས་ནས་འཛེམས་དོགས་མེད་པར་ཐམས་ཅད་དཔལ་འབྱོར་ལ་འདོད་རྔམས་ཆེ་བ་ཁོ་ནས་ཡིན་པས་བསམ་གཞིག་གནང་རོགས། དེ་དག་ཐམས་ཅད་རྒྱུ་འབྱོར་ལ་བརྟེན་ནས་མི་གཞི་བརླག་པ་ཁོ་ན་ཡིན་པས། སྤྱིར་མི་རང་གི་འཚོ་བ་ལ་དཔལ་འབྱོར་དགོས་ཀྱང་དཔལ་འབྱོར་གྱིས་ཡོད་ཚད་ཐག་གཅོད་མི་ནུས་པས་ཡོད་ཚད་ནས་གཡོ་སྒྱུས་དཔལ་འབྱོར་ལ་མི་བརྩོན་པར་ཕྱི་དངོས་པོའི་དཔལ་ཡོན་ལས་ནང་སེམས་ཀྱི་དཔལ་ཡོན་དང་ཞི་བདེ་གལ་ཆེ་བ་ཡིན། ལུགས་ཀྱི་བསྟན་བཅོས་ཤེས་རབ་སྡོང་བུ་ལས། ཇི་སྲིད་འདོད་ཆེན་མ་གྱུར་པར། །དེ་སྲིད་ཡོན་ཏན་ཆེ་ཉིད་ཡིན། །འདོད་ཆེན་ཉིད་ལ་ཞུགས་གྱུར་ན། །ཡོན་ཏན་བཙུན་པར་ག་ལ་འགྱུར། །ཇི་སྲིད་སུ་ལའང་མི་སློང་བ། །དེ་སྲིད་དཀའ་ཐུབ་གཟི་བརྗིད་ཅན། །དཔའ་ཞིང་ཤེས་ལྡན་རིགས་མཐོ་དག །སྐྱེས་བུ་ཞེས་ཀྱང་དེ་སྲིད་བརྗོད། །ཅེས་གསུངས་པ་ལྟར་ཡིན་པས་ལག་ལེན་ལ་འབད་པར་འོས་སོ། །འདི་སྤྲང་འཁྱམ་པ་དངོས་གྲུབ་དཔལ་གྱིས་སྤྲང་ཉུལ་ལམ་གྱི་ཚོར་སྣང་ཡིན་ནོ། ། ཕྱིན་ཆོད་གཞན་ལ་འདྲི་རྟོག་བྱེད་པའི་ཆེད་དུ་བཤད་པ།ཕྱིན་ཆོད་གཞན་ལ་འདྲི་རྟོག་བྱེད་པའི་ཆེད་དུ་བཤད་པ། དེ་རིང་རང་དགོན་གྱི་ཚེ་དཔག་མེད་ལྷ་གཅིག་བུམ་གཅིག་འདོན་སར་སོང་བ་ཡིན། སྔོན་གྱི་ལུགས་སྲོལ་གཅིག་ཡིན་ས་རེད། ཚེ་དབང་རྒྱས་བསྡུས་གང་འདོན་ན་ཆོག་པ་ལ་རྒྱས་བསྡུས་གཉིས་ཀའི་ཚེ་རིལ་མན་ཆད་འདྲ་བ་ལ། རྒྱས་བསྡུས་ཀྱི་དབང་མ་ཚར་བའམ་བུམ་པའི་བདུད་རྩིའི་དབང་གི་མགོར་ཁོག་ན་མེད་རྒྱུའི་ཆེས་བསྡུས་པ་ཞིག་མགོ་ནས་འདོན་འདུག སྤྱིར་དབང་གང་ཡིན་ན་གྲངས་ཀ་བསོག་པ་ཡོད་ཀྱང་གཅིག་མ་ཚར་བའི་དཀྱིལ་ན་དབང་གཅིག་གི་མགོ་བཟུང་བ་མི་འགྲིག་སྙམ། དཔེར་ན་མི་འཁྲུགས་པ་ལྟ་བུ་ལ་མཚོན་ན་ཆུ་དབང་བསྐུར་ནས་ཅོད་པན་གྱི་དབང་གི་མགོར་དབང་བསྡུས་པ་གཞན་ཞིག་འདོན་པ་དང་འདྲ་སྙམ། དེར་མ་ཟད་དེ་རིང་གཅིག་པུ་མ་ཡིན་པར་བུམ་པའི་བདུད་རྩིའི་དབང་གི་སྐབས་བུམ་པ་ལས་གཞན་ཚེ་གཏོར་ཞིག་བཟུང་ནས་འོང་གི་མོད། ཆོ་ག་ལས། སྤྱི་བོར་རྒྱལ་བ་ཚེ་དཔག་མེད་དཀར་པོའི་ཕྱག་གི་བུམ་པ་ལས་བདུད་རྩི་དཀར་པོ་ལུད་པ་དབུ་མའི་ལམ་བརྒྱུད་ཅེས་སོགས་ནས་འཆི་མེད་བདུད་རྩིའི་བུམ་པས་སྤྱི་བོ་ནས་དབང་བསྐུར་ཞིང། ཞེས་གསལ་བར་འདུག རྒྱུན་གྱི་ལག་ལེན་ཡིན་པ་འདྲ། མཚམས་རེ་ནོར་བ་སོ་སྐྱེས་ལ་ཡོད་པ་རེད་ང་རང་ནང་བཞིན་རེད་ལགས། འདི་འབྲི་དགོས་དོན་ཕྱིན་ཆོད་གཞན་ལ་འདྲི་རྟོག་བྱེད་པའི་ཆེད་ཡིན་ལགས། སློབ་ཆེན་ནམ་གྲྭ་སར་བཀག་པའི་ནག་ཉེས།སློབ་ཆེན་ནམ་གྲྭ་སར་བཀག་པའི་ནག་ཉེས། ལས་སྣེ་བ་ཁ་ཅིག་གིས་རང་ལ་སློབ་སྦྱོང་མེད་པར་མ་ཟད་གཞན་ལ་དངོས་ཤུགས་བརྒྱུད་གསུམ་ནས་སློབ་སྦྱོང་གོ་འགོག་པ་དང༌། དགོན་སྡེ་ཁ་ཅིག་གིས་རང་ལ་དགེ་རྒན་དང་སློབ་གྲོགས་སོགས་གང་གི་སྒོ་ནས་སློབ་ཆུང་ངམ་བསྡུས་ཆུང་ཞིག་གི་མཐུན་རྐྱེན་ལས་མེད་ཀྱང་གཞན་གྲྭ་སར་འགྲོ་བ་འགོག་པ་ནི་དགོན་སྡེ་རང་དང་སློབ་མ་རྣམས་ལ་གནོད་ཚབ་དེ་ལས་ཆེ་བ་མེད་པར་སྣང་ལ། དེས་ན་སློབ་མ་རྣམས་ཀྱི་ཚབ་བྱས་ནས་འཛམ་གླིང་གི་རང་བཞིན་ནམ་དུས་རབས་ཉེར་གཅིག་པ་དང་མཐུན་པར་སློབ་མ་རྣམས་སློབ་ཆེན་ནམ་གྲྭ་ས་ཆེན་པོར་གཏོང་རོགས་ཞུ་ཞུས་པ་ཡིན། སྤྱིར་སློབ་སྦྱོང་གི་གོ་སྐབས་ཤོར་བ་རྣམས་ལ་སློབ་སྦྱོང་གི་གོ་སྐབས་སྤྲད་དགོས་པ་ལས་སྒེར་གཅོད་ཀྱི་དབང་ཤུགས་ལ་བརྟེན་ནས་ཁོར་ཡུག་ཆེ་ས་ནས་སློབ་སྦྱོང་བྱེད་པ་བཀག་ནས་རང་གི་ཁོར་ཡུག་ལ་བཙུད་པ་ནི། དཔེར་ན་རྒྱ་མཚོའི་ཉ་ཞིག་བཟུང་ནས་ན་ཆུ་ཞིག་ཏུ་བཀག་པ་དང་འདྲ་ལ། སློབ་ཆུང་ཞིག་ལས་ལོ་བཅོ་ལྔར་སློབ་སྦྱོང་བྱས་ཀྱང་འཕེལ་རྒྱས་ཆེར་མི་འགྲོ་བ་ལོ་རྒྱུས་ཀྱིས་བདེན་དཔང་བྱེད་ཐུབ་པ་རེད། དེས་ན་ཆོས་འཇིག་རྟེན་གང་གི་དབང་དུ་བྱས་ན་ཡང་བར་ཆད་ཆེན་པོ་ཡིན་པ་ཤེས་དགོས། དགོན་སྡེ་གཞན་ལ་མིག་གིས་ལྟོས་དང་གསལ་འོང་ལགས། དེ་ལྟ་མ་ཡིན་ན་བླ་མ་ཞིག་ལ་མཚོན་ན་རང་གི་སློབ་མ་རྣམས་ལུགས་གཉིས་ཀྱིས་དབེན་པའི་རང་མཐའ་ལ་གནས་པའི་དུད་འགྲོ་དང་གཉིས་སུ་མེད་པར་འགྱུར་རོ། །གྲྭ་བ་ཞིག་ལ་མཚོན་ན་སློབ་སྦྱོང་འགོག་པ་དེ་ཆོས་སྒྲུབ་པ་བཀག་པ་དང་གཅིག་མཚུངས་མ་ཡིན་ནམ་ལགས། དགོན་སྡེ་ཁ་ཅིག་ངོ་ཆུང་དག་གྲྭ་ས་མི་གཏོང་བར་ཐབས་བཀོད་ཡོད་མཁན་བཏང་བའི་ལམ་ལུགས་ཐོས་པ་ཡོད་པས་ངོ་ཆུང་ངོ་ཆེན་གཉིས་སློབ་སྦྱོང་བྱེད་པ་འདྲ་མཉམ་དགོས། ཁོར་ཡུག་ཚད་ལྡན་མ་ཡིན་པའི་ས་ཆུང་ས་ནས་སློབ་སྦྱོང་བྱས་པའི་འབྲས་བུ་དང་དགེ་རྒན་དང་ཆོས་གྲོགས་འགྲིག་ལམ་སོགས་ཚད་ལྡན་ཡོད་པའི་ཁོར་ཡུག་ལས་སློབ་སྦྱོང་བྱེད་པའི་འབྲས་བུ་གཉིས་བསྡུར་ན་བ་རྗེས་ཆུ་དང་རྒྱ་མཚོ་གཉིས་ལྟར་ཁྱད་པར་ཆེ། སློབ་སྦྱོང་བྱེད་ལ་རང་དབང་དང་འདྲ་མཉམ་མེད་ན་དོན་གྱི་རང་དབང་དང་འདྲ་མཉམ་མེད་པ་རེད། རང་སྟེང་ནས་ཡིན་ན་རང་ཉིད་གྲྭ་ས་ལ་སོང་གཞན་གྲྭ་ས་ཆེ་ཁག་ལ་བཏང་བ་མ་ཟད་སོང་ན་ཡག་པོ་ཡོད་པ་རེད་ཅེས་བཤད་གྱི་ཡོད། གྲྭ་ས་ཆེན་པོ་ལ་མི་གཏོང་ན་གནས་སྐབས་བཤད་གྲྭའི་མིང་དང་མཁན་མིང་རེ་བཏགས་པ་ཙམ་ཡོད་ཀྱང་མ་འོངས་པའི་རེ་བ་མེད་པ་མ་ཟད་ལོ་རྒྱུས་ཀྱི་ནག་ཉེས་ཅན་དང་གྲྭ་ཆུང་རྣམས་ཀྱི་མི་ཚེ་འཕྲོ་བརླག་ཏུ་འགྱུར་ངེས་པས་བསམ་གཞིག་གནང་རོགས། རྒྱ་མཚོ་ལས་ན་ཆུ་ཞིག་ནས་ཉ་ཆེན་པོ་བྱུང་མི་ཐུབ་པ་ཤེས་དགོས། འཛམ་གླིང་ན་ལྟོས་དང༌། ཞིང་ཆེན་ནས་ཞིང་ཆེན། རྒྱལ་ཁབ་ནས་རྒྱལ་ཁབ་ཏུ་སོང་ནས་སློབ་ཆེན་བྱུང་བ་ལས་ཡུལ་འཚོ་གཅིག་ཏུ་བསྡད་ནས་བྱུང་བའི་སློབ་ཆེན་མཐར་ཕྱིན་ཡོད་དམ་ལགས། རང་ས་ན་དཀའ་འགག་རེ་ཡོད་ཀྱང་དེ་བརྒལ་དགོས། ཁ་ཅིག་གིས་དགོན་ཆུང་ནས་སློབ་སྦྱོང་བྱེད་ན་ལོ་གཉིས་གསུམ་སོགས་ནས་མཁན་མིང་དང་དགེ་བཤེས་མིང་བཏགས་ཡོང་བ་བསམ་ནས་དེ་ལ་རེ་ནས་འདུག་པ་ནི་རང་གི་མགོ་རང་གི་སྐོར་བ་རེད། ཚད་གཞི་མེད་པའི་མཁན་མིང་བཏགས་པ་དང་འདོགས་མཁན་མང་མོད་དེ་ནི་བསྟན་པ་ལ་རྨ་འབྱིན་པ་དང་འགྲོ་བ་མགོ་སྐོར་བཏང་ནས་མཁན་རྫུན་བཟོས་པ་རེད། དེ་ལ་རིན་ཐང་མེད། དེས་ན་མཁན་པོའི་ལམ་ལུགས་ལ་གཞུང་ཆེན་བཀའ་པོད་ལྔ་སོགས་ལ་ཁྲིད་ལུང་ཙམ་ཐོབ་པ་མ་ཡིན་པར་བཀའ་པོད་ལྔའི་འཆད་ཉན་ཚད་ལྡན་ཡོད་ས་ཞིག་ནས་དཀའ་སྤྱད་སྡུག་རུས་བྱས་ནས་སྦྱང་འབྲས་ལེགས་པོ་ཐོབ་པ་ངེས་པར་དགོས། འདས་པའི་ལོ་རྒྱུས་ནང་སྤྲུལ་སྐུས་ཕན་ཐོག་རྒྱ་ཆེན་བྱུང་བ་མང་པོ་ཡོད་པ་རེད། འོན་ཀྱང་ད་ལྟ་ཅི་འདྲ་འདུག་འཛམ་གླིང་ལ་ལྟོས་དང་ཤེས་གསལ་ལྟར་རེད། དེ་བཞིན་དུ་མཁན་པོ་ཡང་འགྲོ་བ་ལ་ཉེན་ཁ་སླེབས་ཚར་བ་རེད། དེང་སྐབས་བཀའ་པོད་ལྔའི་ལུང་ཙམ་མ་ཐོབ་པའི་མཁན་པོ་དགེ་བཤེས་ཡོད་པས་ལེགས་བཅོས་དགོས། ལེགས་བཅོས་ཀྱི་ཆེད་དུ་སྤེལ་བ་ཡང་ཡིན། ཡང་ཁ་ཅིག་རང་དགོན་ན་བཤད་གྲྭ་མི་བཞུགས་པར་གྲྭ་ས་གཞན་དུ་སོང་ནས་དཔེ་ཆ་ཡག་པོ་མི་ལྟ་བ་མ་ཟདའགྲིག་ལམ་བརྩི་མི་ཐུབ་པའི་རིགས་ནི་གྲྭ་ས་མ་སོང་ན་ལེགས། གྲྭ་ས་འགྲོ་མཁན་གྱི་ཆ་རྐྱེན་ལ་བརྩོན་འགྲུས་ཡོད་པ། མི་གཞི་བརྟན་པ། འགྲིག་ལམ་བརྩི་བ་གསུམ་མ་མཐའ་དགོས། རབ་ན་ཤེས་རབ་ཡོད་ན་ལེགས། ཐུགས་ལ་མི་འགྲོ་བ་ཡོད་ན་དགོངས་དག་ཞུ། སྤྲང་འཁྱམ་པ་དངོས་གྲུབ་དཔལ་ནས་གཞན་གྱི་དཀའ་ངལ་སེལ་ཕྱིར་བརྗོད་པའོ། ། བསླུ་རྡོ་ངོས་འཛིན།བསླུ་རྡོ་ངོས་འཛིན། ཞིབ་ཏུ་བལྟ་བར་བྱ། རྗེ་བཙུན་ཏཱ་ར་ནཱ་ཐའི་ཞལ་གདམས་མགུར་འབུམ་ལས། ཉམས་རྟོགས་མཐོན་པོར་གྲགས་པ་མང་པོ་ཡང། །སྙིང་རྗེ་མེད་པས་ངན་པའི་ལམ་དུ་གོལ། །ཐེག་ཆེན་ཟེར་ཡང་ཐེག་པ་དམན་པར་ལྷུང། །རང་དོན་གཞན་ཕན་གཉིས་ཀ་ཤོར་བ་མང། །བདག་པས་གཞན་གཅེས་སྙིང་རྗེའི་བསམ་པ་ཅན། །ཐབས་ལ་མཁས་པ་ཐེག་པ་ཆེན་པོའི་ཆོས། །ཐེག་པ་ཆེ་ཆུང་ལྟ་བས་ཁྱད་མི་འབྱེད། །བྱང་ཆུབ་སེམས་དང་སྙིང་རྗེ་སྤྱོད་པའི་ཁྱད། །ཕྲག་དོག་ཆེ་ཞིང་ཁ་རྒོད་བསམ་པ་ངན། །ཆོས་རྒྱུད་བུ་རྒྱུད་བཟང་ཡང་ག་ལ་ཕན། །དཀའ་སྤྱད་འདུག་ཚུལ་བཟང་ཡང་བསླུ་རྡོ་༼འདིས་མང་པོ་བསླུ་བཞིན་འདུག༽ཡིན། །བྱ་བཏང་དམ་བཅའ་ཆེ་ཡང་ཚིག་སྐམ་ཡིན། །ཁྱོད་ནི་གནས་ལུགས་རྟོགས་པ་ཡིན་ནོ་ཞེས། །ཁ་འཇམ་ཞེ་གདུག་བླ་མ་གཡོ་ཅན་གྱིས། །བསྟོད་ར་བཏང་བས་རང་རྒྱུད་མ་ཐུལ་པའི། །བླུན་པོ་ཕལ་ཆེར་བླུན་དད་སྐྱེད་དུ་༼བསྟོད་ར་བྱེད་ན་རྨོངས་དད་བྱེད། ཕན་སེམས་ཀྱི་སྐྱོན་བརྗོད་ན་དད་པ་ལོགས་ནས་སྨོད་པ་བྱེད༽འཇུག །རྨོངས་པ་ཕལ་ཆེར་རང་ལ་བསྟོད་ན་དགའ། །དམ་པ་རྣམས་ནི་དྲང་པོར་སྨྲས་ན་མགུ། །ཕྱོགས་ཞེན་ཀོ་ལོང་དམ་ལ་བཟང་འདོད་ཅན། །རང་རྒྱུད་མ་ཐུལ་སྒྲུབ་པའི་དགོས་པ་སྟོར། །རང་ཉིད་བཟང་འདོད་གཞན་ལས་ངན་མི་འདོད། །ལྐོག་ཏུ་ཆོས་མིན་སྤྱོད་པ་སྣ་ཚོགས་བྱེད། །རི་ཁྲོད་འགྲིམས་ན་གྲགས་པ་ཆེ་རུ་རེ། །འདུ་འཛི་སྦངས་ཀྱིན་དད་ཅན་འདུ་ལ་རེ། །བྱ་བཏང་བྱས་ཀྱིན་ཟས་ནོར་ཡོང་དུ་རེ། །ཕམ་ཁ་བླང་གིན་ཕུགས་སུ་རྒྱལ་འདོད་ཅིག །གཞན་ལ་བསྟོད་ན་རང་ལ་བྱམས་སུ་རེ། །དག་སྣང་བྱས་ནས་དབང་དུ་བསྡུ་འདོད་དང། །གཞན་ཕྱོགས་ནུབ་ཅིང་རང་ཕྱོགས་དར་ཕྱིར་རམ། །གྲགས་པ་སྒྲོག་ཕྱིར་ཆོས་རྫུ་བྱེད་པ་ནི། །སེམས་ཅན་ཐམས་ཅད་བསླུ་བའི་སྡིག་པོ་ཆེ། །དེ་ཕྱིར་རྫུན་མེད་ཕྱི་ནང་མེད་པར་གཅེས། །སྙན་གྲགས་འདོད་པས་སློབ་མ་བསླུ་བ་དང། །རྙེད་བཀུར་འདོད་པས་དད་ཅན་བསླུ་བ་དང། །མ་རྟོགས་བཞིན་དུ་གནས་ལུགས་རྟོགས་སོ་ཞེས། །ང་རྒྱལ་བྱེད་པ་སྙིང་རྗེའི་འགལ་ཟླ་ཡིན། །བདེན་པའི་ངག་དང་དྲང་པོའི་བསམ་པ་དང། །ང་རྒྱལ་སྤངས་ནས་འགྲོ་ཀུན་གོང་དུ་འཁུར། །གཞན་སྐྱོན་མི་བསམ་རང་གི་སྐྱོན་ལ་རྟོག །བྱང་ཆུབ་སེམས་དང་སྙིང་རྗེ་རྒྱས་པར་འགྱུར། །དགྲ་གཉེན་ཚེ་འདིར་བློ་ཡིས་བཏགས་པ་ཡིན། །ཉེ་རིང་མེད་པར་ཕན་སེམས་སྙིང་རྗེ་སྒོམས། །ཞེས་པ་འདིའི་ཚིག་དོན་ལ་ཞིབ་དུ་བསམ་གཞིག་གནང་དང་གདམས་ངོ་མ་ཞིག་ཡོད་དོ། །རྒྱལ་ཁམས་པ་ཏཱ་ར་ནཱ་ཐས་བདག་ཉིད་ཀྱི་རྣམ་ཐར་ངེས་པར་བརྗོད་པའི་དེབ་གཏེར་ཤིན་ཏུ་ཞིབ་མོ་མ་བཅོས་ལྷུག་པའི་རྟོགས་བརྗོད་ལས། ཇི་སྐད་དུ། ཀྱེ་མ་བསོད་ནམས་ཟད་པའི་མི། །ལྷ་སྐལ་ཆད་ནས་འབྱུང་པོ་སྒྲུབ། །ཅེས་པ་ནས། སྔར་མི་བསྟེན་པ་ཅིག་གིས་འདྲེ་ཆེན་པོ་རེ་གསར་དུ་བསྟེན་དགོས་ན། ཁོ་རང་གི་དམ་ཚིག་བསྲེ་ལུགས་དང། ཁོ་དབང་དུ་བསྡུ་ལུགས་དང། རྟེན་འབྲེལ་བསྒྱུར་ཕྱོགས་མང་པོ་དང། སྔར་གྱི་ལྷ་དང་འཁོན་སེལ་དང། ཕྱི་འབྲང་གི་བགེགས་སེལ་ཚུལ་ཐབས་མང་པོ་ཅིག་བླ་མ་ནུས་པ་ཅུང་ཟད་ཡོད་པ་ཅིག་གིས་བྱེད་དགོས། དེ་མིན་འདྲེ་དྲག་ཤས་ཁོ་རང་དང་མུ་མ་འབྱོར་བའི་སྔོན་ལ། འཁོར་གདུག་པ་ཅན་རྣམས་ཀྱིས་གོང་ཁའི་སྒོ་ཉལ་གཏོང་བ་ཡིན། ལྷ་རྙིང་པ་ཡང་དང་འགྲས་འགྲོ་བ་ཡིན། དང་པོའི་གྲུབ་ཐོབ་ཡིན་ཟེར་བ་དེ་འདྲས་ཀྱང། གཙང་བཙན་སོགས་འཇིག་རྟེན་རང་རྒྱུད་པ་མིན། ཡེ་ཤེས་པའི་སྤྲུལ་པ་ཡིན་ཟེར་ཏེ། གནས་ཚུལ་ལ་འཇིག་རྟེན་འདས་པའང་ཡིན་སྲིད། སངས་རྒྱས་མིན་པ་སུས་ཤེས། འཕྲལ་འཇིག་རྟེན་པའི་ཚུལ་བསྟན་པ་རང་གིས། ཡེ་ཤེས་པའི་ཁྱུ་ནས་བུད། ལམ་སྣ་འདྲེན་མཁན་ཡིན་ན་འཇིག་རྟེན་པའི་ཚུལ་སྟེན་དོན་རང་མེད། སངས་རྒྱས་བྱང་སེམས་ཅིག་བཤན་པའི་ཚུལ་བསྟན་ཡོད་ན། ཁོང་བཤན་པ་དངོས་ཀྱི་བྱ་བ་བྱེད་ཀྱི། ལེགས་པར་རབ་ཏུ་ཉོན་ལ་ཡིད་ལ་བཟུང་ཤིག་དང་ཟེར་ཆོས་བཤད་མི་ཡོད། འོ་འཇིག་རྟེན་པའི་ཚུལ་བཟུང་བ་དེ་ཀ་ཁོ་འཇིག་རྟེན་པའི་ཚུལ་འཛིན་དགོས་ཙ་ན། གསོད་གཅོད་བརྡུང་འཕྲོག་རྫུན་གཏོང། མ་རུངས་པའི་ལས་བྱེད་ཀྱི། ཞིང་ཁམས་བདེ་བ་ཅན་དུ་འཁྲིད་རོགས་མི་བྱེད། དེ་རུ་དངོས་སུ་འཁྲིད་རོགས་བྱེད་པ་ལ། ཚུལ་ཡང་འཇིག་རྟེན་ལས་འདས་པའི་ཚུལ་ཅིག་ཀ་སྟོན་དགོས་པ་ལགས་མོད། དེས་ན་རང་རྒྱུད་པ་ཡིན་ཡང་འདྲ། སྤྲུལ་པ་ཡིན་ཡང་འདྲ། ཚུལ་དེ་འཇིག་རྟེན་པ་རང་དུ་འདུག་ན། འཇིག་རྟེན་པ་རང་གི་འགྲོགས་ལུགས་དང། བསྟེན་ལུགས་བྱེད་དགོས། དེ་ཡང་འཇམ་པོ་ལ་འཇམ་པོའི་འགྲོགས་ལུགས་དང། མ་རུངས་པ་ལ་མ་རུངས་པའི་བསྟེན་ལུགས་བྱེད་དགོས་པ་ཡིན། དེས་ན་འཇིག་རྟེན་འདས་པ་རང་དང། འཇིག་རྟེན་པ་ཡིན་ཀྱང་དབང་ཕྱུག་ཁྱབ་འཇུག་སོགས་ལྷའི་རྒྱལ་པོ་ཆེན་པོ་དང། མི་ཡུལ་ན་ཡོད་པའི་སྡེ་བརྒྱད་དྲག་རྩལ་ཅན་ཏེ། སྡེ་གསུམ་པོ་འདི་ལ་ཁྱད་ཆེན་པོ་རང་ཡོད་ལགས། བཅོམ་ལྡན་འདས་ཀྱི་ཞལ་མཐོང་མ་མཐོང་སོགས་ལའང་ཤིན་ཏུ་ཁྱད་ཆེ་བ་གོ་དགོས། ཞེས་གསུངས་པ་ལྟར་འཇིག་རྟེན་པའི་ཚུལ་བཟུང་བ་ཡིན་ན་འཇིག་རྟེན་པ་བཞིན་བསྟེན་དགོས་པ་ཤེས་དགོས་སོ། དངོས་གྲུབ་དཔལ་ནས། དཔེ་ཆ་བ་ལ་ཕྲག་དོགདཔེ་ཆ་བ་ལ་ཕྲག་དོག ལ་ལས་དཔེ་ཆ་བའམ་ཐོས་བསམ་པ་ཚོ་ང་རྒྱལ་ཆེ། ཕྲག་དོག་འགྲན་སེམས་ཆེ། གཞན་གྱི་སྐྱོན་བརྗོད། རང་གི་སྐྱོན་མི་གོ། དཔེ་ཆ་བལྟས་ན་ཕན་ཐོགས་ཅི། ལག་ལེན་ནི་མི་བྱེད་ཁ་བཤད་རྐྱང་རྐྱང་རེད། བརྒྱ་བཤད་སྟོང་བཤད་ཀྱང་ཚིག་གཅིག་གི་དོན་ཉམས་ལེན་མི་བྱེད་པས་མ་ཤེས་པ་དང་གཅིག་པ་རེད། དཔེ་ཆ་བ་འདི་ཚོས་ཁ་སྦྱོང་བ་རེད་མ་གཏོགས། བློ་སྦྱོང་མི་འདུག་ཟེར་བ་དང༌། དེས་ན་དཔེ་ཆ་མ་བལྟས་ན་བཟང་བ་རེད་ཅེས་སློབ་གཉེར་བ་ལ་གཡོ་སྒྱུ་དང་འདྲེས་མའི་ཕྲག་དོག་གི་ཚིག་སྨྲ་བ་རྨོངས་བ་ཁ་ཅིག་གིས་ཕྲག་དོག་གི་གཡོ་ཚིག་ཡིན་པ་ཧ་མ་གོ་བར་བདེན་དུ་བཟུང་ནས་ཐོས་བསམ་ལས་བྱོལ་བ་མང་དུ་སྣང༌། ངོ་མ་བཤད་ན་མཁས་པའི་ཁྲོད་ན་གཞན་སྐྱོན་བརྗོད་པ་ཅུང་ཟད་བྱུང་བ་བདེན་མོད། ཕལ་ཆེ་བས་སྐྱོན་དང་ཡོན་ཏན་ཤེས་ནས་ལྷག་བསམ་གྱིས་སྐད་ཆ་ལབས་པ་མང་ལ། མིག་ཡོད་པ་ཞིག་ཡིན་ན་མ་མཐའ་གད་ཁ་གཡང་ཁ་ནས་འགག་མི་དགོས་པ་ཤེས་པ་བཞིན་ཆོས་རབ་ཏུ་རྣམ་འབྱེད་ཀྱི་ཤེས་རབ་ཀྱི་མིག་ཡོད་ན་དཀའ་སྤྱད་སྡུག་རུས་བྱས་ནས་ལམ་ཉམས་ལེན་གལ་ཏེ་མ་ཐུབ་ན་ཡང་སྡིག་པ་མི་དགེ་བའི་ལས་ལ་ཅི་ནས་ཀྱང་འཛེམ་པ་རེད། དོན་ངོ་མ་བཤད་ན་ནང་ཆོས་ལ་སློབ་སྦྱོང་མ་བྱས་ན་སངས་རྒྱས་ལ་སྐྱབས་འགྲོ་དོན་མཐུན་དུ་མི་འགྲོ་སྟེ། སངས་རྒྱས་ནི་སྐྱབས་སྟོན་པ་པོར་སྐྱབས་སུ་འགྲོ་དགོས་ན་དེས་བསྟན་པའི་ལུང་ཆོས་ལ་ཐོས་བསམ་མ་བྱས་ན་སངས་རྒྱས་ལ་སྐྱབས་འགྲོ་ཡང་དག་ཏུ་བྱེད་པར་མི་འགྱུར་རོ། །ཚིག་ཙམ་འདོན་པ་ལ་ཕན་ཡོན་ཡོད་ཀྱང་དོན་བསམ་པ་དེ་ལས་བརྒྱ་འགྱུར་གྱི་ཕན་ཡོན་ཡོད་པར་གསུངས་པ་ལྟར་གྲུབ། ཚིག་དོན་གང་ཡང་མི་སེམས་པར་འཁོར་ལོ་བསྐོར་ན་ཆོས་པ་ཡིན་ན་ཚིག་མ་ཟད་དོན་ལ་བསམ་གཞིག་གནང་པ་ཡིན་ན་ཆོས་པ་མ་ཡིན་པའི་རྒྱུ་མཚན་ཅི། དེས་ན་སློབ་གཉེར་བྱེད་ཚེ་ཆོས་སྒྲུབ་པའི་རིན་ཐང་གི་ལྟ་བ་དང༌། རང་གིས་ཆོས་སྒྲུབ་བཞིན་ཡོད་པ་ངོས་ཟིན་ཡོད་དགོས། ངོ་མ་བཤད་ན་དེང་དུས་སུ་ཐུན་མོང་གི་སྣང་ཚོད་ལ་དཔེ་ཆ་ཡིན་མིན་ཐམས་ཅད་ལ་ཉམས་ལེན་བྱེད་པ་ཉུང་ཉུང་རེད། འོན་ཀྱང་ཤེས་མ་ཤེས་གཉིས་ལས་ཤེས་པ་བཟང་བ་འཛམ་གླིང་གི་དཔྱོད་ལྡན་ཀུན་ལ་དྲིས་ན་ལན་གསལ་བོར་འདེབས་ངེས་རེད། ཁ་ཅིག་སློབ་གཉེར་དར་ན་ཞེ་བློ་མི་བདེ་བ་ཕུགས་སུ་བཅང་ནས་དཔེ་ཆ་དར་ན་སྒྲུབ་གྲྭ་ཉམས་འགྲོ་ཟེར་ནས་སྒྲུབ་གྲྭ་ལ་ཤ་ཞེན་ཡོད་པའི་ཟོལ་བསྟན་པ་ཡོད་མོད། དེ་ནི་མི་རིགས་ཏེ། སྒོམ་གྱི་རྒྱུ་ཐོས་བསམ་ཇི་ལྟར་དར་ན་སྒོམ་པ་འཕེལ་ཐུབ། ད་ལྟ་རང་དགོན་གྱིས་མཚོན་དགོན་སྡེ་རེ་ཟུང་གི་བརྒྱ་ཆ་བདུན་ཅུ་ནས་དགུ་བཅུ་བར་སྤོང་ཀློག་རིང་དུ་དོར་ནས་དཔལ་འབྱོར་སོགས་ལ་གཡེང་བ་དེས་སྒྲུབ་གྲྭ་མ་ཉམས་ན་སློབ་གཉེར་བྱས་པས་སྒྲུབ་གྲྭ་ལ་མི་གནོད་པ་ཐག་གཅོད་ནུས། ཁ་ཅིག་ཐོས་བསམ་བྱེད་མི་དགོས་པར་ཚུལ་ཁྲིམས་མ་ཉམས་པ་དང༌། གྲངས་ཀ་རེ་བསོག་ན་ཆོག་པར་སྨྲ་བ་སོགས་ཧ་ཅང་མང་བ་ལ་གོ་བརྡ་རེ་སྤྲད་དགོས་མོད་ཚིག་མང་བས་རེ་ཞིག་དེ་ཙམ་ཡིན། ཁ་ཅིག་དཔེ་ཆ་ལ་ལྟ་བ་དེ་ཚེ་ཕྱི་མ་ལ་ངེས་པར་དགོས་པ་མ་ཤེས་པ་མ་ཟད་རང་དོན་ཆོས་སྒྲུབ་པ་ལ་དགོས་པ་ཧ་མི་གོ་བར་མི་གྲལ་འགྲོ་བསྐྱེད་དང་གཞན་ལ་བཤད་ཐབས་ཙམ་དུ་བཟུང་བ་ནོར་བའི་ཕྲེང་བ་མང་དུ་སྣང་ངོ། །སྤྱིར་སྒོམ་ཧ་ཅང་གལ་ཆེ་བས་འཐུས་སྒོ་ཚང་བ་ལ་འབད་རིགས། ད་ནས་བཟུང་སློབ་གཉེར་བ་ལ་ཕྲག་དོག་གིས་སྐྱོན་བརྗོད་པ་དམིགས་ཡུལ་གཞན་ཡོད་པ་ཤེས་ནས་རྣམ་མཁྱེན་སྒྲུབ་འདོད་ན་ཐོས་བསམ་སྒོམ་གསུམ་ཡ་མ་བྲལ་བ་ལ་འབད་རོགས་ཞུ། མ་ཤེས་ཤེས་པའི་ཟོལ་བསྟན་པའི་ཁ་སྟོང་བ་འབའ་ཞིག་སྨྲ་བ་བདག་འདྲ་བ་དག་ལ་ངག་དབང་དངོས་གྲུབ་དཔལ་གྱིས་བྲིས་པའོ། །རྒྱལ་བའི་བསྟན་པ་རིན་པོ་ཆེ་སྤྱིའི་རྣམ་བཞག་ལས་འཕྲོས་པའི་དཔལ་ལྡན་ཤངས་པའི་ཆོས་སྐོར་གྱི་འབྱུང་ཁུངས་ཡིད་ཀྱི་མུན་སེལ་ལས། ཁྱེད་རང་རྣམས་སྒོ་གསུམ་ཆོས་དང་བསྟུན། ངའི་རྣམ་ཐར་སྐྱོངས། བདག་བསྟོད་སྨད་ཅི་བྱེད་པ་ལ་ཆགས་སྡང་མ་བྱེད། སྐྱེས་བུ་དམ་པ་སུ་དང་མཇལ་ཡང་གུས་འདུད་ཀྱིས། རང་ལུགས་མ་སྤོང། གཞན་ལ་མ་སྨོད། ཐེག་པ་གསུམ་པོ་རང་རང་གི་བསམ་སྦྱོར་སྒྲུབ་ཐབས་གོ་རིམ་ཤེས་པའི་བླང་དོར་མ་འཁྲུལ་པར་གྱིས། ཞེས་གསུངས་པ་ལྟར་ཐུགས་ལ་བཞག་པར་ཞུ། ནང་བསྟན་ལ་གོ་བ་མ་ཆགས་པའི་སྐྱོན།ནང་བསྟན་ལ་གོ་བ་མ་ཆགས་པའི་སྐྱོན། སྙིགས་མའི་དུས་ལ་ཚུལ་ཁྲིམས་བསྲུང་དགོས་པར་མི་སྨྲ་བར་མི་སྐྱོན་མི་སྐྱོན་སྨྲ་བ་ནང་བསྟན་ལ་གོ་བ་མ་ཆགས་པའི་སྐྱོན། ནང་བསྟན་འཛིན་པ་ལ་ཐོས་བསམ་གལ་ཆེ་བར་མི་སྨྲ་བར་གཞན་སྐད་གལ་ཆེ་བར་སྨྲ་བ་ནང་བསྟན་ལ་གོ་བ་མ་ཆགས་པའི་སྐྱོན། དགོན་སྡེ་འཛིན་པ་མང་གཙོ་གལ་ཆེ་བར་མི་སྨྲ་བར་སྒེར་གཅོད་སྨྲ་བ་ནང་བསྟན་ལ་གོ་བ་མ་ཆགས་པའི་སྐྱོན། ཆོས་སྡེ་དད་ཤེས་ཀྱིས་འཛིན་དགོས་པར་མི་སྨྲ་བར་དཔལ་འབྱོར་གྱིས་འཛིན་དགོས་པར་སྨྲ་བ་ནང་བསྟན་ལ་གོ་བ་མ་ཆགས་པའི་སྐྱོན། བསྟན་པའི་སྙིང་པོ་བཤད་སྒྲུབ་ཡིན་པར་མི་སྨྲ་བར་ནང་བསྟན་ཆོས་ཚོང་སྨྲ་བ་ནང་བསྟན་ལ་གོ་བ་མ་ཆགས་པའི་སྐྱོན། ལུས་ཀྱི་རྩལ་སྦྱང་ལ་ཕྱག་སོགས་མི་སྨྲ་བར་ལྒང་ལི་སོགས་རྩེད་མོར་སྨྲ་བ་ནང་བསྟན་ལ་གོ་བ་མ་ཆགས་པའི་གཏམ། དད་ལྡན་འདུལ་བྱར་དམ་ཆོས་མི་སྨྲ་བར་སྲིད་ཀྱི་བདེ་འབྱོར་སྨྲ་བ་ནང་བསྟན་ལ་གོ་མ་ཆགས་པའི་སྐྱོན། རྒྱལ་བསྟན་འཆད་ཉན་གྱིས་འཛིན་དགོས་པར་མི་སྨྲ་བར་གསེར་ཁང་ཐོག་རྩེགས་དགོས་པར་སྨྲ་བ་ནང་བསྟན་ལ་གོ་བ་མ་ཆགས་པའི་སྐྱོན། བསྡུ་དངོས་བཞི་ཡིས་གདུལ་བྱ་རྗེས་སུ་འཛིན་དགོས་པར་མི་སྨྲ་བར་མགོ་སྐོར་སྣ་ཚོགས་སྨྲ་བ་ནང་བསྟན་ལ་གོ་བ་མ་ཆགས་པའི་སྐྱོན། ཤེས་འཇོན་ལྷག་བསམ་ཅན་ལ་རྒྱབ་སྐྱོར་མི་སྨྲ་བར་གཡོ་སྒྱུས་མ་ཉེས་ཁ་གཡོག་སྨྲ་བ་ནང་བསྟན་ལ་གོ་བ་མ་ཆགས་པའི་སྐྱོན། གཞན་ལ་བླ་མར་ཚུལ་བཞིན་དུ་བསྟེན་དགོས་པར་སྨྲ་ཡང་རང་གིས་ཚུལ་བཞིན་བསྟེན་པར་མི་བྱེད་པ་ནང་བསྟན་ལ་གོ་བ་མ་ཆགས་པའི་སྐྱོན། འདི་ཕྱིའི་སྐྱབས་གནས་བླ་མར་སྨྲ་ན་ཡང་བདེན་ཁ་རང་གིས་བཟུང་ནས་སྨྲ་བ་ནང་བསྟན་ལ་གོ་བ་མ་ཆགས་པའི་སྐྱོན། ཐོས་སྒོམ་གྱི་ཕན་ཡོན་མི་སྨྲ་བར་གླུ་གར་མཐོང་ཐོས་ཀྱི་ཕན་ཡོན་སྨྲ་བ་ནང་བསྟན་ལ་གོ་བ་མ་ཆགས་པའི་སྐྱོན། བསྟན་འཛིན་སྐྱེས་བུར་གསོ་སྐྱོང་དགོས་པར་མི་སྨྲ་བར་མིང་བཏགས་རྫུན་མ་གསོ་སྐྱོང་སྨྲ་བ་ནང་བསྟན་ལ་གོ་བ་མ་ཆགས་པའི་སྐྱོན། གང་དྲན་དུ་ཚིག་ནག་གཏམ་ནག་འདི་རིས་མེད་པའམ་དངོས་གྲུབ་དཔལ་གྱིས་སྨྲས་སོ། ། ནང་བསྟན་གྱི་རིག་གཞུང་ནི་ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རང་ལུགས་དང་ཆ་མཐུན་ཡོད་པ།ནང་བསྟན་གྱི་རིག་གཞུང་ནི་ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རང་ལུགས་དང་ཆ་མཐུན་ཡོད་པ། མཚོ་སྔོན་ཞིང་ཆེན་ཡོངས་ཀྱི་ནང་བསྟན་ཚོགས་ཆེན་འདིར་ཕེབས་པའི་གུས་པར་འོས་པའི་དབུ་ཁྲིད་རྣམ་པ་དང་ཚོགས་མི་རྣམས་ལ་འཚམས་འདྲི་བཀྲིས་བདེ་ལེགས་ཞུ། ངས་དེ་རིང་གཏམ་བཤད་ཀྱི་ཁ་བྱང་ངམ་མིང་ལ་ནང་བསྟན་གྱི་རིག་གཞུང་ནི་ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རང་ལུགས་དང་ཆ་མཐུན་ཡོད་ཚུལ་ཞེས་བྱ་བ་དེ་ཡིན། ཞུ་བའི་རིམ་པ་དེ་ཡང་ནང་བསྟན་ཀྲུང་ཧའི་རིག་གནས་དང་ཆ་མཐུན་པ་བདུན་དང་རེ་བ་གཉིས་ཀྱི་སྒོ་ནས་ཞུ་རྒྱུ་ཡིན། ༡ ནང་བསྟན་ཀྲུང་ཧའི་རིག་གནས་གཉིས་འདྲ་མཉམ་ཡིན་པར་མཐུན་པའི་ཆ་ཡོད་ཚུལ་ནི། ནང་བསྟན་རིག་གཞུང་དུ་བདག་ཅག་སྟོན་པ་འཕགས་ཡུལ་དུ་བྱོན་པའི་སྐབས་དེ་དུས་སུ་རྒྱ་གར་ན་རྒྱལ་རིགས་དང་བྲམ་ཟེའི་རིགས་དང༌། དམངས་རིགས་དང་གདོལ་བའི་རིགས་སོགས་ལ་རིགས་རུས་མཐོ་དམན་གྱི་ལྟ་ཚུལ་ཧ་ཅང་ཆེ་མོད། སྟོན་པ་ཐུགས་རྗེ་ཅན་གྱིས། ཇི་སྐད་དུ། རིགས་མི་གཙོ། རུས་མི་གཙོ། བསླབ་པ་རིན་པོ་ཆེ་གཙོ། ཞེས་སོགས་ཀྱིས་ཤེས་རབ་ཀྱི་བསླབ་པ་སོགས་བསླབ་པ་གང་ལ་ཕུན་སུམ་ཚོགས་པ་དེ་རྩ་ཆེན་དང་ཡོན་ཏན་ཅན་དུ་བསྔགས་བརྗོད་གནང་ནས་ཡོན་ཏན་ཡོད་མེད་ཀྱི་མཆོག་དམན་ཡོད་པ་ལས་རིགས་རུས་དང་དཔལ་འབྱོར་གྱི་རྫོང་མཐུག་མིན་མི་ལྟོས་པར་ནང་སེམས་ཀྱི་དཔལ་ཡོན་གལ་ཆེ་བར་གསུངས་ནས་འདྲ་མཉམ་གྱི་ཁོར་ཡུག་བཟང་བོ་བསྐྲུན་པར་མཛད་དོ། །༢ སྟོན་པ་ཐུགས་རྗེ་ཅན་གྱིས་ཐུགས་བརྩེ་བའི་སྒོ་ནས་སྒེར་གཅོད་མེད་པར་འཛམ་གླིང་འདིར་མང་གཙོ་ཚད་ལྡན་ཐོག་མར་བསྐྲུན་པ་རེད། དེའི་ཚུལ་ནི། གྲོས་བསྡུར་གྱི་སྒོ་ནས་སྤྱི་མོས་དང་མང་མོས་ཀྱི་མང་གཙོ་སྲོལ་ཕྱེས། དེ་ཡང་ཆོས་འདུལ་བ་ལུང་གི་སྐབས་སུ་ལས་བརྒྱ་རྩ་གཅིག་གི་སྐབས་སུ། ཇི་སྐད་དུ། དགེ་འདུན་པ་རྣམས་དེ་ལ་མི་བཟོད་པ་མེད་ན་ཅང་མ་གསུངས་ཤིག ཡོད་ན་གསུངས་ཤིག ཅེས་བརྗོད་ནས་ཅང་གསུང་མཁན་མེད་ན་སྤྱི་མོས་ཀྱིས་གྲོས་ཐག་བཅད་ལ། དགེ་འདུན་དབྱེན་གྱི་སྐབས་སོགས་སུ་ཚུལ་ཤིང་བཀྲམ་ནས་གང་མང་བལྟས་ནས་མང་བ་ལ་བརྡས་ཐག་བཅད་པ་སོགས་ཀྱིས་དཔེར་མཚོན་ནས་ཤེས་པར་བྱའོ། །༣ སྟོན་པ་ཐུགས་རྗེ་ཅན་གྱིས་རྨོངས་དད་ཙམ་གྱིས་མི་ཆོག་པར་ཤེས་རབ་ཀྱི་མིག་བསྐྲུན་ནས་འཇིག་རྟེན་རྒུད་པ་ལས་སྐྱོབས་དགོས་པར་ཡང་ཡང་གཏན་ལ་བབ་པ་རེད། དེ་ཡང་འཇིག་རྟེན་གྱི་དཀའ་ངལ་ཅི་སྙེད་ཡོད་པ་ཐམས་ཅད་ཀྱི་རྩ་བ་ནི་མ་རིག་པ་ཡིན་ལ། དེ་སེལ་བ་ལ་ཆོས་རབ་ཏུ་རྣམ་པར་འབྱེད་པའི་ཤེས་རབ་ལ་རེག་ལས་པར་གཏན་ལ་ཕབ། དེ་ཡང་སློབ་དཔོན་སངས་རྒྱས་གཉིས་པ་དབྱིག་གཉེན་གྱི་མཛོད་རྩ་བ་ལས། ཆོས་རྣམས་རབ་ཏུ་རྣམ་འབྱེད་མེད་པར་ཉོན་མོངས་རྣམས། །གང་ཕྱིར་ཉེ་བར་ཞི་བའི་ཐམས་མེད་ལ། །ཉོན་མོངས་པས་ནི་འཇིག་རྟེན་སྲིད་མཚོ་འདིར་འཁྱམ་སྟེ། །དེ་བས་དེ་ཕྱིར་འདི་ནི་སྟོན་པས་གསུངས་སོ། །ཞེས་སོགས་ཀྱིས་གསུངས་ལ། འཁོར་རྩ་བདག་འཛིན་སྤངས་པ་ལ་བདག་མེད་རྟོགས་པའི་ཤེས་རབ་ལ་རེག་ལས་པ་ཡིན། དེ་ཡང་ཇི་སྐད་དུ། བདག་སྲིད་མ་ལུས་ཤེས་རབ་ཀྱིས་བཅད་དེ། །ཅེས་སོགས་རྒྱ་ཆེར་གསུངས་པས་སོ། །༤ སྒེར་སེམས་དང་གཞན་ལ་གནོད་པ་མེད་པར་དམངས་ཕན་དང་སྤྱི་ཕན་གྱི་བྱ་བ་སྒྲུབ་དགོས་པར་ནང་བསྟན་རིག་གཞུང་ལས་བཤད་ལ། དེ་ཡང་རང་གཅེས་འཛིན་དང་བདག་འཛིན་དང་གནོད་སེམས་ལ་ཁ་གཏད་བྱས་ནས་དེའི་གཉེན་པོ་བྱམས་བརྩེ་དང་བདག་གཞན་མཉམ་བརྗེ་དང་བྱང་ཆུབ་ཀྱི་སེམས་རིན་པོ་ཆེ་དང་བདག་མེད་རྟོགས་པའི་ཤེས་རབ་གལ་ཆེ་བར་གསུངས་པ་མ་ཟད་ཐེག་པ་དམན་པའི་སྡེ་སྣོད་ཀྱི་སྐབས་སུ་སྤྱོད་པ་འཚེ་བ་མེད་པར་གསུངས་ནས་ཐེག་ཆེན་གྱི་སྡེ་སྣོད་ཀྱི་སྐབས་སུ་གཞན་ཕན་སྒྲུབ་དགོས་པར་གསུངས། དེའི་ཐབས་ཡང་སྦྱིན་སོགས་ཕ་རོལ་ཏུ་ཕྱིན་པ་དྲུག་དང་བསྡུ་བའི་དངོས་པོ་བཞིའི་སྒོ་ནས་སྒྲུབ་ཚུལ་ཞིབ་རྒྱས་བཀའ་སྩལ་ཡོད་དོ། །༥ དྲང་བདེན་དང་གནས་ལུགས་གཙུག་འཛིན་དགོས་པར་ནང་བསྟན་ལས་བཤད་ཚུལ་ནི། ལས་དགེ་བ་བྱས་པ་ལས་འབྲས་བུ་བདེ་བ་འབྱུང་བ་མི་བསླུ་བ་དང༌། ལས་མི་དགེ་བ་བྱས་ན་འབྲས་སྡུག་བསྔལ་འབྱུང་བ་མི་བསླུ་ཡིན་པར་ཇི་སྐད་དུ། ས་བོན་མངར་བ་བཏབ་པ་ལས། །འབྲས་བུ་མངར་བ་ཉིད་དུ་འགྱུར། །ས་བོན་ཁ་བ་བཏབ་པ་ལས། །འབྲས་བུ་ཁ་བ་ཉིད་དུ་སྨིན་པར་འགྱུར། །ཞེས་སོགས་དང༌། བདེན་བཞིའི་ཆོས་འཁོར་ལས། སྡུག་བསྔལ་ཤེས་པར་བྱའོ། །ཀུན་འབྱུང་སྤང་བར་བྱའོ། །འགོག་པ་མངོན་དུ་བྱའོ།། ལམ་བསྒོམ་པར་བྱའོ། །ཞེས་སོགས་ཀྱིས་བདེན་བཞི་མཇུག་ལྡོག་གི་རིམ་པ་སོགས་ཕྲ་ཞིབ་ནས་གསུངས་པས་དྲང་བདེན་དང་གནས་ལུགས་གསལ་བར་མཛད་དོ། །༦ འདོད་རྔམས་དང་རུལ་སོང་མེད་པར་གྲོན་ཆུང་བསྟན་པ་ནི། འདོད་ཆུང་ཆོག་ཤེས་དང་མ་བྱིན་ལེན་བཀག་པ་དང་སྦྱིན་བདག་གི་དཔལ་འབྱོར་གྲོན་ཆུང་དགོས་པར་འདུལ་ལུང་སྡེ་བཞི་ལས་རྒྱ་ཆེར་གསུངས་ལ། དཔེར་ན་ཆོས་གོས་རལ་ནས་བཙེམ་དུ་མི་རུང་ཚེ་གཙུག་ལག་ཁང་གི་གས་ཁ་གསུབ་བྱེད་དུ་བྱས་ནས་ཆུད་ཟོས་བྱེད་མི་རུང་བར་གསུང་པ་ལྟ་བུའོ། །༧ ནང་བསྟན་ནི་རྒྱལ་ཁབ་གཅེས་པ་དང༌། ཆོས་གཅེས་དང་མཐུན་པའི་ཆ་ཡོད་པ་རེད། དེའི་རྒྱུ་མཚན་ནི་འདུལ་བ་ལུང་གི་སྐབས་སུ་རྒྱལ་ཁྲིམས་བརྩི་འཇོག་དང༌། ཤོ་གམ་ཡང་རྒྱལ་ཁྲིམས་ལྟར་གཞལ་དགོས་པ་དང༌། དགེ་འདུན་པའི་གཙུག་ལག་ཁང་བཞེངས་པ་དང་རབ་ཏུ་བྱུང་བ་ལ་རྒྱལ་པོ་ལས་གནང་པ་ཐོབ་དགོས་པ་སོགས་འདུལ་བའི་བཅས་མང་པོ་སྤྱི་ཚོགས་ཀྱི་ཁ་ཟེར་ལ་བརྟེན་ནས་བཅས་པ་མཛད་བཞག་པ་རྒྱ་ཆེར་ཡོད། ཆོས་གཅེས་དགོས་པ་ནི་གཞན་གྱིས་དད་མོས་ལ་རྩི་འཇོག་དང་གྲུབ་མཐའ་སྨད་ན་རྩ་བའི་ལྟུང་བ་དྲུག་པ་ཡིན་པ་དང༌། ཆོས་སྤོང་གི་ལས་སྤངས་དགོས་པར་བཤད་ཡོད་པ་སོགས་ཀྱིས་གྲུབ་ལ། རྒྱལ་ཁབ་ཀྱི་ཁྲིམས་ལུགས་ལ་དད་མོས་རང་དབང་དང་ཆོས་སྒྲུབ་པའི་ཁེ་དབང་ཡོད་པས་ཀྲུང་གོ་ཅན་དང་མཐུན་པའི་ཆ་ཧ་ཅང་མང་དུ་ཡོད་པ་ལྟར་རོ། །གཉིས་པ་རེ་བ་གཉིས་ལས། དང་པོ། ཆོས་པ་རྫུན་མ་རྣམས་ཀྱིས་ནང་བསྟན་ལ་བརྟེན་ནས་ཚོང་ལས་དང་དད་ལྡན་མང་ཚོགས་ལ་མགོ་སྐོར་བ། དཔལ་འབྱོར་གཡོ་ལེན་མི་བྱེད་པ་སོགས་མདོར་ན་དད་པ་དད་པའི་ས་ལ་བཞག་རྒྱུ་དང༌། ཆོས་ཆོས་ཀྱི་ས་ལ་བཞག་ནས་ནང་ཆོས་ཡང་དག་པ་ལ་བརྟེན་པ་གལ་ཆེའོ། །རེ་བ་གཉིས་པ་རིག་གནས་ཕྲན་ཚེགས་ཙམ་ཤེས་པའི་གཞོན་སྐྱེས་རྣམ་པ་ཚོས་ནང་ཆོས་ཀྱི་སྙིང་དོན་ལ་ཞིབ་འཇུག་དང་རྒྱུས་ལོན་གཏན་ནས་མེད་པར་གང་ཟག་རེ་ཟུང་གི་སྒེར་སྐྱོན་དེ་ནང་ཆོས་ཀྱི་སྐྱོན་ལ་སྦྱོར་ནས་སྐྱོན་བརྗོད་པ་ནི་རྒྱུས་ལོན་མེད་པའི་སྐད་ཆ། ཞིབ་འཇུག་མེད་པའི་སྐད་ཆ། ཆོས་དད་མང་ཚོགས་ལ་ཐེར་གཏོགས་དང་ཁེ་དབང་འཕྲོག་པ་འང་འགྱུར་བས་དེ་ལྟར་མི་བྱེད་པར་རེ་བ་ཞུ། འོན་ཀྱང་ཆོས་ལ་དད་མིན་དང་ཁས་ལེན་མིན་སྒེར་ལ་རག་ལས་པ་ཞིག་རེད་ལགས། མདོར་ན་ནང་བསྟན་རིག་གཞུང་འདི་བརྗོད་བྱ་ཆ་ནས་གཞི་བདེན་གཉིས་བདེན་བཞི་མི་རྟག་སོགས་བདག་མེད་གཉིས་དང༌། ལམ་ཚོགས་གཉིས་ཟུང་འཇུག་ས་བཅུ་ལམ་ལྔ་སོགས་དང༌། འབྲས་བུ་སྐུ་གཉིས་གཟུང་འཇུག་སྐུ་བཞི་མཛད་པ་འཕྲིན་ལས་སྟོན་པ་སོགས་ནང་ཆོས་ཀྱི་རིག་གཞུང་ནི་བརྗོད་བྱ་ཆ་ནས་རྒྱ་ཆེ་བ། དོན་དངོས་སམ་གནས་ལུགས་དང་མཐུན་པ། སྤྱི་ཚོགས་ལ་ཕན་ཐོགས་ཡོད་པའི་རིག་གཞུང་འདིའི་རིན་ཐང་ངོ་ཤེས་རྒྱུ་གལ་ཆེའོ། །བཀྲ་ཤིས་བདེ་ལེགས་ཞུ། ཐུགས་རྗེ་ཆེ། དགེའོ། ། དྲིན་ཆེན་ལ་དྲིན་ཅན་དུ་ངོས་ཟིན་དགོས།དྲིན་ཆེན་ལ་དྲིན་ཅན་དུ་ངོས་ཟིན་དགོས། རང་ལ་དྲིན་ཆེ་བའི་མི་བུ་དག་ལ་དྲིན་ལན་མེད་པ་ནི་ཧ་ཅང་ཐ་ཤལ་བའི་སྤྱོད་པ་ཡིན་པ་ཤེས་དགོས། མཐོན་པོ་ཞིག་ཡིན་ཀྱང་དམན་པ་ལ་བརྙེས་བཅོས་མི་བྱེད་པར་ནུས་ཚད་ཀྱིས་ཞབས་ཕྱི་སྒྲུབ་འོས། རང་ཉིད་ཀྱི་ཐོབ་ཐང་དང་ཡོན་ཏན་འབྱོར་ཕྱུག་ཅི་རིགས་ནས་ཁྱད་པར་ཞིག་ཡོད་ན་ཡང་རང་ཉིད་ལས་དམན་པ་ཚོར་རོགས་སྐྱོར་རེ་གནང་བ་ནི་ཀུན་སྤྱོད་ཡག་པོ་ཞིག་ཡིན་པ་ཤེས་དགོས། སྤྱི་ཚོགས་ཀྱི་གནས་བབ་ལ་བཙན་པོ་ཞིག་གིས་ཇི་ལྟར་གནོད་པ་བྱས་ན་ཁོང་ཁྲོ་མི་ནུས་པར་སླར་གུས་ཞབས་བྱེད་ལ། ཉམ་ཆུང་སྟེང་ལ་དོན་མེད་ན་ཡང་ཁོང་ཁྲོ་ཟ་བ་དང་ཕྲག་དོག་བྱེད་པ་མི་གཞིའི་ཀུན་སྤྱོད་ཧ་ཅང་ངན་པར་ངེས། དེང་དུས་དགེ་བའི་བཤེས་གཉེན་ཞིག་བསྟེན་དུས་བླ་མ་དེ་སློབ་མ་ལ་ངོ་བསྟོད་ཁོ་ན་བཤད་མཁན་ཡིན་ན་དགའ་ལ། བླ་མ་དེས་སློབ་མའི་དམ་པའི་ཆོས་ཀྱི་བྱ་བ་ལ་བསམ་ཞིག་གནང་ནས་མདུན་ལམ་དང་ཀུན་སྤྱོད་དང་སྤོང་ཀློག་གི་ལས་ལ་བརྩོན་ཕྱིར་བཀའ་སྐྱོན་གནང་བ་སོགས་རང་དོན་ཡིན་པ་ཧ་མི་གོ་བ་དང༌། འཇིག་རྟེན་གྱི་ཆེ་ཐང་རྫུན་མ་རེ་བཀོད་པ་དང༌། མངོན་ནས་ངོ་བསྟོད་ཙམ་བཤད་ནས་སེམས་ལ་རང་ལ་འཁོར་གཡོག་ཙམ་གྱིས་ཆོག་པར་འཛིན་པ་ལ་བརྟག་དཔྱད་ཙམ་མི་བྱེད་པར་རང་གི་སྐྱབས་མགོན་དུ་རློམ་པ་དང༌། མིང་དང་གོ་ས་ཆེ་བ་ཡིན་ན་ཆོས་ཀྱི་དྲིན་ཆེ་ཆུང་ཆོས་འབྲེལ་ཡོད་མེད་དང་རང་ལ་ཕན་ཐོགས་མིན་ལ་མ་ལྟོས་པར་དེ་རང་གི་བླ་མ་རུ་བཟུང་ལ། གྲྭ་རྐྱང་རྣམས་ཀྱིས་གཞན་དོན་ཁོ་ན་ཐུགས་ལ་བཟུང་ནས་ཉིན་མ་རེ་རེ་འབད་པ་བྱས་ནས་རང་གི་དོན་དུ་མི་ཚེ་ཟད་པར་བྱས་ནས་དཀའ་ངལ་སྤྱོད་བཞིན་པ་འདི་མི་ཤེས་པ་ནི་འཇིག་རྟེན་ན་རང་གི་ཕ་མ་ཁྱིམ་མི་རྣམས་དྲིན་ཆེ་བ་མི་ཤེས་པར་སྡིག་གྲོགས་རེ་རྩ་ཆེན་དུ་འཛིན་མཁན་ཡོད་པ་ལྟར་རེད། མི་གཞི་ངན་པ་ཞིག་ཡིན་ན་ལོ་མང་པོར་ཆོས་འཇིག་རྟེན་གྱིས་བསྐྱངས་ན་ཡང་བླ་མའི་བཀའ་སྐྱོན་ལན་གཅིག་ཙམ་ལ་བརྟེན་ནས་ངོ་རྒོལ་བྱེད་པ་སོགས་འཇིག་རྟེན་འདི་ཆེས་འཇིགས་སུ་རུང་བའི་གནས་ཡིན་པས་གཞན་ལ་ཕན་རེ་བཏག་ན་ལན་ལ་མི་རེ་བར་གཞན་ལ་ལྷག་བསམ་གཙང་མ་དགོས། འཇིག་རྟེན་མི་འདི་མགོ་རྨོངས་བ་ཞིག་རེད། ཁྱི་ཞིག་ཡིན་ན་ཡིན་རེ་རེ་ཟས་སྦྱིན་ན་ངོས་ཟིན་ཡོད་པ་མ་ཟད་ལན་ཅིག་ཙམ་ཟས་སྦྱིན་ན་ངོ་ཤེས་ལ། དྲིན་ལན་ལོག་འཇལ་མི་བྱེད། མི་ནི་དེ་ལྟ་མ་ཡིན་པས་མིའི་བསམ་བློ་ཡར་རྒྱས་གཏོང་དགོས། བཤེས་གཉེན་རེ་ཟུང་གིས་སློབ་མ་རྣམས་ལ་ཆོས་ཚིག་བཞི་ཙམ་ཉན་ན་བླ་མར་འཛིན་དགོས་པ་ནི། མདོ་ལས། ཚིགས་བཅད་གཅིག་ཙམ་སྟོན་པ་ནས། །བླ་མ་དག་ཏུ་མ་བཟུང་ན། །ཁྱི་ཡི་སྐྱེ་བ་ལྔ་བརྒྱ་བླངས། །དེ་ནས་རྨེ་ཤ་ཅན་དུ་སྐྱེ། །ཞེས་བཤད་པ་དོན་ལ་གནས་པ་ཡིན་མོད། རང་གི་ཁ་ནས་དེ་བཤད་ནས་རང་གིས་བཤེས་གཉེན་བསྟེན་ཚུལ་མི་ལེགས་པ་མང་དུ་སྣང༌། ང་རྒྱལ་ཁེངས་དྲག་ཅན་ལ་དྲིན་ཅན་གྱི་འདུ་ཤེས་འབྱུང་དཀའ་འོ། །དངོས་གྲུབ་དཔལ་གྱིས། ངོ་བསྟོད་ལ་དགའ་བའི་མི་ལ་དོན་ལ་དྲིན་ཆེ་བ་ལས་ངོ་བསྟོད་ཀྱི་ཚིག་གམ་གཅམ་བུའི་ཚིག་རེ་བཤད་ན་སེམས་དགའ། དོན་གྱི་དྲིན་ཤེས་མཁན་ཞིག་ཡིན་ན་ངོ་བསྟོད་ཁྲི་མ་འབུམ་བཤད་པ་ལས་བསམ་བཟང་གི་སྐྱོན་ནས་བརྗོད་ན་དྲིན་ཤེས། དངོས་གྲུབ་དཔལ་གྱིས། ནང་བསྟན་རིག་གཞུང་སྤྱི་ཚོགས་རང་ལུགས་ཀྱི་ལམ་ལུགས་དང་མཐུན་ཚུལ་ཅུང་ཟད་བརྗོད་པ།ནང་བསྟན་རིག་གཞུང་སྤྱི་ཚོགས་རང་ལུགས་ཀྱི་ལམ་ལུགས་དང་མཐུན་ཚུལ་ཅུང་ཟད་བརྗོད་པ། ། ༼༡ནང་བསྟན་ཐོག་མར་བྱུང་རིམ་གྱི་ཡུལ་དུས་ཀྱི་གནས་བབས་བརྗོད་པའི་སྒོ་ནས་སྤྱི་ཚོགས་འདྲ་མཉམ་བསྐྲུན་པ།༽ནང་བསྟན་རིག་གཞུང་ཐོག་མར་བྱུང་རིམ་གྱི་དབང་དུ་བྱས་པ་ཡིན་ན་ཡང་རིགས་རུས་མཐོ་དམན་དང་དྲང་བདེན་མ་ཡིན་པའི་སྤྱི་ཚོགས་ལ་ཁ་གཏད་ཅིང་ངོ་རྒོལ་བྱས་ནས་འོང་བ་ཞིག་རེད། ནང་བསྟན་གྱི་སྟོན་པ་ཁོང་ཐོག་མར་སེར་སྐྱ་གྲོང་ཁྱེར་གྱི་རྒྱལ་བོའི་སྲས་སུ་འཁྲུངས་ཤིང༌། དེའི་སྐབས་ཀྱི་རྒྱ་གར་གྱི་གནས་བབས་ནི་འཆམ་མཐུན་མ་ཡིན་པའི་སྤྱི་ཚོགས་ཤིག་སྟེ། བྲམ་ཟེ་རྣམས་ཚངས་པའི་དབུ་ལས་བྱུང་བས་རིགས་དང་གོ་ས་མཐོན་པོར་བཞག་ནས། རིག་བྱེད་རྣམ་པ་བཞིའི་གཞུང་ལུགས་དག་གི་བདག་དབང་ཁོང་ཅག་ལས་གཞན་ལ་མེད་པ་དང༌། རིགས་རུས་གཞན་པ་རྣམས་ཀྱིས་དེ་ལ་བྲམ་ཟེ་རྣམས་ཀྱི་འགྲེལ་ཚུལ་ལས་ལོག་པ་འགྲེལ་བཤད་མི་ཆོག་པ་རེད། ད་དུང་དབྱར་དགུན་སྟོན་དཔྱིད་ཀྱི་བྱུང་རིམ་ཐམས་ཅད་བྲམ་ཟེ་རྣམས་ཀྱིས་ཆོ་ག་དང་མཆོད་སྦྱིན་སྤེལ་བ་ལྟ་བུའི་མཐུ་ལས་བྱུང་བར་མ་ཟད། དབུལ་བོ་དང་དམན་པ་སུ་ཞིག་ཡིན་ཡང་མི་ཤི་བ་ལྟ་བུའི་སྐབས་སུ་ཅི་ལྟར་བྱས་ཀྱང་བྲམ་ཟེ་རྣམས་ལ་ཡོན་མང་དུ་ཕུལ་དགོས་པའི་གནས་བབས་ཤིན་ཏུ་སྐྱོ་བ་ཞིག་རེད། རྒྱལ་རིགས་ཚངས་པའི་ལག་ལས་བྱུང་བས་ཆབ་སྲིད་ཀྱི་བདག་དབང་ཁོང་ཅག་ལས་གཞན་ལ་མེད། རྒྱལ་རིགས་ལ་བྲམ་ཟེའི་མདུན་ནས་རིག་བྱེད་བསླབ་པའི་བདག་དབང་ཡོད་ཀྱང༌། དེ་ལ་འགྲེལ་བཤད་བྱས་ཏེ་གཞན་ལ་སྟོན་པའི་དབང་མེད་ལ། བྲམ་ཟེ་རྣམས་ལ་རྒྱལ་བོའི་མཆོད་གནས་སུ་བཞུགས་ཏེ་དབུ་བླ་བྱེད་པའི་གོ་ས་ཡོད་ཀྱང་སྲིད་དབང་བདག་འཛུགས་བྱེད་པའི་དབང་ཆ་མེད། རྗེ་རིགས་རྣམས་ནི་ཚངས་བའི་བརླ་གཉིས་ལས་སྐྱེས་པ་ཡིན་པས་ཚོང་ལས་ཚེམ་བཟོ་སོགས་སྤྱི་ཚོགས་ཀྱི་ལས་གཉེར་མཐོ་རིམ་མང་བོ་ཁོང་ཅག་ལ་གཉེར་བའི་དབང་ཆ་ཡོད། དམངས་རིགས་རྣམས་ནི་ཚངས་པའི་རྐང་བ་གཉིས་ལས་སྐྱེས་པ་ཡིན་པས་གོང་གི་རིགས་གསུམ་གྱིས་སྒྲུབ་པར་མི་འདོད་པའི་གད་སྙིགས་བསལ་བ་དང་བ་གླང་འཚོ་སྐྱོང་སོགས་ཀྱི་བྱ་བ་བྱེད་དགོས། ད་དུང་རིགས་བཞི་བོ་གང་དུའང་མ་གཏོགས་པའི་རྡོལ་བའི་རིགས་ལྟ་བུ་རིགས་ཐོར་བུ་འགའ་ཡོད་ལ། དེ་དག་ཀྱང་ཚངས་བའི་རྐང་བ་ལས་བྱུང་བ་ཡིན་ཞིང༌། རིགས་དམན་རྡོལ་བ་དང་ཉ་བའི་རིགས་ལྟ་བུ་རྣམས་ཀྱི་ཁང་བའང་གྲོང་ཁྱེར་དུ་མཉམ་གཅིག་ཏུ་བྱེད་མི་ཆོག་པར་གྲོང་ལས་ཕྱི་རོལ་ཏུ་བྱེད་དགོས་པ་རེད། གལ་སྲིད་རིགས་དམན་པ་ཞིག་གིས་རིགས་མཐོན་པོ་ཞིག་ལ་ལག་པས་འཆང་ཙམ་བྱས་ཚེ། རིགས་མཐོན་པོ་དེས་རང་ལ་གྲིབ་ཕོག་པར་འདོད་ནས་གྲིབ་སེལ་གྱི་ཆོ་ག་འདོན་པ་དང༌། མཚམས་རེར་རིགས་དམན་པ་དེར་གཅར་རྡུང་བཅས་གཏོང་གི་ཡོད། འོན་ཀྱང་རིག་བྱེད་ཀྱི་གཞུང་ལུགས་ཁག་དང༌། ཡུལ་དེའི་མི་བྱིངས་ཀྱི་འདོད་ཚུལ་ལ་རིགས་སོ་སོ་ལ་དང་པོ་ཉིད་ནས་རང་ཉིད་ཀྱི་དབང་ནུས་ལ་ཚད་བཟུང་ཡོད་པ་དང༌། མྀ་སོ་སོའི་ངོས་ནས་ཀྱང་དེ་ལྟར་ངོས་ལེན་ལེགས་པར་བྱས་ཏེ་འཚོ་བ་ནི་བདེ་སྐྱིད་ཅིག་ཡིན་པར་ཤོད་ཀྱིན་ཡོད། དེ་ལྟ་ནའང་མི་ཐམས་ཅད་དང་པོ་ཉིད་ནས་གཞུང་ལུགས་དང་རིག་པའི་གནས་ལ་མཁས་པ་མ་ཡིན་པར། རིམ་གྱིས་སྦྱང་ན་མཁས་པར་འགྱུར་འགྲོ་བ་དང༌། བྱིས་པ་ཆུང་ཆུང་ཞིག་ལ་དང་ཐོག་རང་ཉིད་སྐྱེས་མ་ཐག་པ་ན་ལས་ཀ་གཉེར་བའི་ནུས་པ་མེད་ཀྱང༌། ན་ཚོད་རིམ་གྱིས་སྨིན་པ་ན་ཤེད་ཤུགས་རྒྱས་པ་སོགས་ཆོས་ཉིད་ཀྱིས་གྲུབ་སྟངས་དང་གཏན་ནས་མི་མཐུན་པ་ཞིག་ཡིན་པར་མ་ཟད། རིགས་རུས་ཟེར་བ་དེར་མཐའ་གཅིག་ཏུ་ཡིད་རྟོན་རུང་བ་ཞིག་མ་ཡིན་པར། ཕོ་མོ་དག་གི་འབྲེལ་ལམ་མངོན་ལྐོག་མི་མཐུན་པའི་བྱ་བ་ལ་བརྟེན་ནས། རིགས་དམན་པའི་སྐྱེས་པའི་བརྒྱུད་པ་རིགས་མཐོ་བའི་ཆུང་མ་དག་ལ་སྐྱེ་བ་ཡོད་པར་མ་ཟད། དེ་འདྲའི་བུ་ཕྲུག་དག་རིགས་མཐོན་པོ་ཡིན་པར་བྱས་པའང་གྲངས་ཀ་མང་པོ་བྱུང་མྱོང་ཡོད་པས། རིགས་ཞེས་པ་ལ་མཐའ་གཅིག་ཏུ་ཁ་ཚོན་གཅོད་ནུས་པ་སུ་ཞིག་ལ་ཡོད། འོན་ཀྱང་རིགས་དམན་པར་སྐྱེས་པའི་བུ་ཕྲུག་དག་ལ་སློབ་སྦྱོང་གི་གོ་སྐབས་མེད་པས། རང་གི་རྟོག་པ་སད་དེ་གནས་ལུགས་དང་མཐུན་པའི་སྐད་ཆ་བཤད་ཐུབ་པ་དང་གནས་ལུགས་ལ་འཆམ་པའི་ངོ་རྒོལ་བྱེད་ནུས་པ་བྱུང་ཐུབ་ཀྱིན་མེད་ལ། ལྷག་པར་དུ་རིགས་དམན་པར་བརྩི་བའི་མི་ཞིག་གིས་སྐད་ཆ་བཤད་པ་ལ་ཡིད་རྟོན་བྱེད་མཁན་དཀོན་པར་མ་ཟད། རིགས་དམན་པའི་མི་རྣམས་ཀྱིས་ནང་ཕན་ཚུན་ལ་ཡང་གདེང་འཇོག་མི་བྱེད་པར། རང་གི་གཉའ་ནས་གནོན་མཁན་གྱི་རྒྱལ་བོ་དང་བྲམ་ཟེའི་མི་རྣམས་ལ་སེམས་ནས་ལྷ་བཞིན་དུ་བཀུར་བཞིན་ཡོད། དུས་སྐབས་དེ་ལྟ་བུའི་འདྲ་མཉམ་དང་འཆམ་མཐུན་མ་ཡིན་པའི་གནས་བབས་འོག་བཅོམ་ལྡན་འདས་ཀྱིས་གསུངས་པའི་ཆོས་ནི། སེམས་ཅན་སྤྱི་དང་ལྷག་པར་དུ་འཁོས་དམན་པ་སྡུག་བསྔལ་མནར་གཅོད་འོག་གི་འགྲོ་བ་རྣམས་ལ་གདུང་བ་སེལ་བྱེད་ཀྱི་སྨན་དཀར་བོ་ཆིག་ཐུབ་ལྟ་བུ་ཞིག་ཏུ་བྱུང་བ་རེད། བཅོམ་ལྡན་འདས་ཀྱིས། རིགས་མི་གཙོ། རུས་མི་གཙོ། བསླབ་པ་རིན་པོ་ཆེ་གཙོ་བོ་ཡིན། ཞེས་མཆོད་གནས་དང་ཡོན་ཏན་གྱི་མཐོ་དམན་ཚང་མ་བསླབ་པ་ཤེས་རབ་ཡོད་མེད་དང༌། ཏིང་ངེ་འཛིན་བརྟན་མིན་དང༌། ཚུལ་ཁྲིམས་གཙང་མིན་བཅས་ཀྱིས་མིའི་རིན་ཐང་གི་མཐོ་དམན་ཕྱེ་བའི་སྲོལ་བཞག་པ་དེ། དོན་དངོས་ཐོག་ནས་འཇིག་རྟེན་འདྲ་མཉམ་གྱི་སྤོབ་པ་བསྐྱེད་དུ་བཅུག་པ་རེད་ལ། འདྲ་མཉམ་ལ་བྱ་བ་བྱས་ཤིང་བྱས་རྗེས་བཞག་པའང་རེད། དཻར་མ་ཟད་ཡུལ་དེ་ག་ན་རླབས་ཕྲེང་ལྟར་འཕྱུར་བཞིན་པའི་སྤྱི་ཚོགས་ཀྱི་གོམས་གཤིས་དང་གཞུང་ལུགས་ཀྱི་ཐོག་ལ། འདྲ་མཉམ་གྱི་ལྟ་བ་གཞི་བཟུང་ནས་རྒོལ་བ་ཤུགས་ཆེན་པོ་ཞིག་ཀྱང་བཏབ་རེད། དེས་ན་བསླབ་ན་སུ་ཡིན་ཡང་བཟང་པོར་འགྱུར་ཆོག་པའི་གནས་ལུགས་ནི་རིགས་པ་དང་ཉམས་མྱོང་གིས་གྲུབ་ཆོག་པ་ཞིག་ཡིན་པས། སངས་རྒྱས་ཀྱིས་རིགས་དམན་པ་ཞེས་ཐ་མར་བཅད་དུ་མེད་པའི་འདྲ་མཉམ་གཅིག་བཞག་པའོ། །༢དེར་མ་ཟད་ནང་བསྟན་པས་འགྲོ་བ་སེམས་ཅན་ཡོངས་རྫོགས་ལ་བྱམས་བརྩེས་ཁྱབ་པའི་འདྲ་མཉམ་བཟུང་བ། ད་དུང་འགྲོ་བ་མི་ཙམ་ལས་བརྒལ་བའི་སྲོག་ཆགས་ཆེ་ཕྲ་ཡོད་ཚད་ལའང་འདྲ་མཉམ་གྱི་གནས་ལུགས་རིགས་པ་དང་མཐུན་པའི་འགྲེལ་བཤད་དང༌། རིགས་པ་དང་མཐུན་པའི་ལག་ལེན་བྱས་ཤིང་དེའི་སྲོལ་བཏོད་པ་རེད། སེམས་ཅན་ཆུང་ངུ་དང་ཆེན་པོ་སུ་ཡིན་ཡང་རྣམ་དཔྱོད་ཡོད་མེད་ཀྱི་ཁྱད་འགྱུར་ཙམ་ལས། ལུས་སྟེང་ལ་ན་ཚ་དང་སྡུག་བསྔལ་འབྱུང་བཞིན་ཡོད་པ་དང༌། སེམས་སྟེང་ནས་བདེ་བར་འདོད་བཞིན་ཡོད་པ་གཅིག་མཚུངས་རེད། དཔེར་ན་མི་ཞིག་ལྟོག་སྐོམ་གྱིས་མནར་བ་ན་ཟས་རག་འདོད་ཀྱི་འདུན་པ་མཆེད་པ་དང༌། དུད་འགྲོ་ཞིག་ལྟོག་སྐོམ་གྱིས་མནར་བ་ན་ཟས་རག་འདོད་ཀྱི་འདུན་པ་སྐྱེ་བ་འདྲ་འདྲ་རེད་ལ། དེ་བཞིན་དུ། མཚོན་གྱིས་བསྣུན་པའམ། ནད་ཀྱིས་གཟིར་བའམ། གཞན་གྱིས་མནར་གཅོད་གཏོང་བ་སོགས་ཆ་གང་ཐད་ནས། མི་དང་སྲོག་ཆགས་གཞན་གྱི་བར་ལ་འདྲ་མཉམ་གྱི་གནས་ལུགས་དེ་དོགས་པ་མེད་པར་གཟིགས་ཏེ། མི་དང་འགྲོ་བ་གཞན་ལ་འདྲ་མཉམ་གྱི་སེམས་པ་སྐྱེ་དགོས་ཚུལ་དང༌། ཉམ་ཆུང་སེམས་ཅན་སུ་ལའང་གནོད་པར་བྱེད་མི་འོས་ཚུལ་གསལ་བར་གསུངས་པར་མ་ཟད། འགྲོ་བ་གཞན་གྱི་བདེ་སྡུག་རང་གི་བདེ་སྡུག་ལ་དཔེ་སྦྱར་ནས་བསམ་དགོས་ཚུལ་དང༌། དེ་ལྟར་བསམ་ན་བརྩེ་བ་དང་འདྲ་མཉམ་གྱི་བསམ་སྤྱོད་སྐྱེ་ཚུལ་བཅས་བསྟན་པ་རེད། དེའང་ཕྱོགས་ཅིག་ནས་བལྟས་ན། དུད་འགྲོ་གསོད་པ་ཆོས་སུ་འཛིན་པ་དང་དགེ་ལས་སུ་ལྟ་བ་ལ་རིགས་པ་ཡང་དག་གི་ཤགས་འགྱེད་ཅིག་ཀྱང་བྱས་པ་རེད། ཉམ་ཆུང་ལ་བརྩེ་བ་དང་འདྲ་མཉམ་གྱི་ལྟ་བ་ནི། སངས་རྒྱས་ཀྱི་གསུང་གང་ཞིག་ལ་མཇལ་ནའང་ཐམས་ཅད་ཀྱི་ནང་དུ་གཞི་རྩའི་ལྟ་གྲུབ་ཁོ་ན་བྱས་ཏེ་མ་གསུངས་པ་གཅིག་ཀྱང་མེད། བཅོམ་ལྡན་འདས་ནི་ཁ་ཙམ་ཚིག་ཙམ་མ་ཡིན་པའི་དོན་དངོས་བདེན་འཚོལ་ཐོག་ནས་བལྟས་ན། གཞན་ཕན་ཁོ་ན་བྱས་ཏེ་རང་ཉིད་ཡལ་བར་དོར་ཞིང༌། རང་ལ་འགྲོ་བ་གཞན་གྱི་ཞབས་ཕྱི་བ་དང་ལམ་སྟོན་བྱེད་མཁན་ཞིག་གི་ཐུགས་དགོངས་བཞག་པ་ལས། སློབ་མ་མང་བོའི་ནང་ནས་ཆེ་ཚུགས་དང་ང་རྒྱལ་བྱས་ཏེ། རང་ཉིད་ཀྱི་ལས་དོན་གཉེར་མཁན་ཞིག་མ་ཡིན་པར་གསལ་བོར་རྟོགས་ཐུབ། ཁོང་གིས་ནམ་ཡང་ལས་ཀ་ཐམས་ཅད་ལ་ཤེས་རབ་དང་ལྡན་པའི་ལྟ་གྲུབ་གཞིར་བཟུང་ནས་བྱེད་པ་ལས། ཟེར་སྲོལ་དང་སྔོན་བྱུང་གི་ལྷ་སྒྲུང་ཙམ་ལ་རྩ་བ་ནས་ཡིད་རྟོན་བྱེད་ཀྱིན་མེད། ཁོང་གི་ལྟ་གྲུབ་ཀྱི་རིགས་ལམ་ནི་སེམས་ཅན་གཞན་ལ་ཕན་བདེ་སྒྲུབ་ཐབས་དང་མ་འབྲེལ་བ་གཅིག་ཀྱང་མེད་པར་མ་ཟད། རང་གི་བདེ་སྐྱིད་ཀྱང་གཞན་ཕན་གྱི་ལས་དོན་ལས་རྙེད་ཐུབ་པའི་རླབས་ཆེན་གྱི་ལས་རིགས་བླ་ན་མེད་པ་དེ་ཡིན། དེས་ན་སུ་ཞིག་གི་རྒྱུད་ལ་བཅོམ་ལྡན་འདས་ཀྱི་གསུང་གི་ཉིང་དོན་རྟོགས་པའི་བློ་མིག་འཁྲུངས་སྲིད་ན། དེ་ནི་བརྩེ་བའི་མ། བང་མཛོད་ཆེན་པོ་ཡིན་ལ། གུ་ཡངས་ཀྱི་ལས་གཉེར་བ་ཆེན་པོ་ཡིན། སུ་ཞིག་གི་རྒྱུད་ལ་བཅོམ་ལྡན་འདས་ཀྱི་གསུང་གི་ཉིང་དོན་རྟོགས་པའི་བློ་མིག་འཁྲུངས་སྲིད་ན། དེ་ནི་མི་ཚེ་གཞན་དོན་དུ་སྐྱེལ་མཁན་ཡིན་ལ། འགྲོ་བ་ལ་ཞི་བདེ་བསྐྲུན་མཁན་ཡིན། སུ་ཞིག་གི་རྒྱུད་ལ་བཅོམ་ལྡན་འདས་ཀྱི་གསུང་གི་ཉིང་དོན་རྟོགས་པའི་བློ་མིག་འཁྲུངས་སྲིད་ན། དེ་ནི་འཁོས་དམན་ཉམ་ཆུང་རྣམས་ཀྱི་མགོན་དང་དཔུང་གཉེན་ཡིན་ལ། སྤྱི་ཚོགས་ཤེས་རབ་སྩོལ་བའི་སྟོན་པ་བཟང་པོ་ཞིག་ཡིན། ནང་ཆོས་ནི་ཡུལ་གྱི་རྒྱལ་ཁྲིམས་སྲུང་དགོས་པ་སོགས་ཡུལ་ཆོས་དང་བསྟུན་དགོས་པར་འདུལ་བ་ལུང་ན་གསུངས་ཡོད་པས་སྤྱི་ཚོགས་རང་ལུགས་དང་འགལ་བའི་ལྟ་གྲུབ་མེད་པ་དང༌། སྲིད་ལ་ཐེར་གཏོགས་མེད་པར་གང་ཟག་རང་ཉིད་ཆོས་ལ་དད་མོས་ཀྱི་རང་དབང་གཙང་མ་ཡོད་ལ། གང་ཟག་གཞན་ཆོས་ལ་དད་མོས་བྱེད་མིན་ཁོ་རང་ལ་རང་དབང་ལྡན་པར་ནང་ཆོས་ལས་གསུངས་ལ། ཇི་སྐད་དུ། ངས་ནི་ཁྱོད་ལ་ཐར་བའི་ལམ་སྟོན་ནོ། །ཐར་བ་ཐོབ་པ་རང་ལ་རག་ལས་ཀྱིས། །ཞེས་གསུངས་ལ། སེམས་ཅན་སོ་སོ་ཁམས་དབང་མོས་པ་སྣ་ཚོགས་པ་ཡིན་པས་ནང་ཆོས་ལ་དད་མིན་རང་ལ་རང་དབང་ལྡན་པ་ཡིན། འོན་ཀྱང་གང་ཟག་སུ་ཡིན་ཀྱང་རང་ལ་མོས་པ་ཡོད་ན་ནང་ཆོས་ལ་སློབ་སྦྱོང་འགོག་པ་ནམ་ཡང་རིགས་མ་ཡིན། ནང་ཆོས་ལ་སློབ་སྦྱོང་གལ་ཆེ་བ་ཡིན་པ་ནི། སློབ་དཔོན་དབྱིག་གཉེན་གྱིས། ཆོས་རྣམས་རབ་ཏུ་རྣམ་འབྱེད་མེད་པར་ཉོན་མོངས་རྣམས། །གང་ཕྱིར་ཉེ་བར་ཞི་བར་བྱེད་པའི་ཐབས་མེད་ལ། །ཞེས་སོགས་གསུངས་ལ། ནང་ཆོས་དད་པ་དང་ཤེས་རབ་ཟུང་འབྲེལ་དུ་བྱས་ནས་འཛིན་སྐྱོང་གནང་དགོས་པའོ། །༼༣ནང་བསྟན་གྱི་ལྟ་གྲུབ་དང་འདྲ་མཉམ་ལ་ཀྲུང་ཀོ་གུང་ཁྲན་ཏང་གི་རྒྱལ་སྤྱིའི་གཙོ་འཛིན་གྱིས་ཐུགས་གནང་བཟང་བོ་གནང་བ།༽ ཀྲུང་གོ་གུང་ཁྲན་ཏང་གི་རྒྱལ་སྤྱིའི་གཙོ་འཛིན་ཞེས་ཅིན་ཕིན་གྱིས་མཉམ་འགྲེལ་རྒྱལ་ཚོགས་སྟེང་དུ་གསུང་བཤད་གནང་བར་ཡང༌། ཉེ་བའི་ཆར་འདིར་ཀྲུང་གོའི་མང་ཚོགས་ཁྲོད་མི་གང་མང་ཤིག་གིས་སངས་རྒྱས་ཆོས་ལུགས་སློབ་རྒྱུ་ཟེར་ནས་རྨོངས་དད་རྐྱང་བའི་གནས་སུ་ལྷུང་གིན་འདུག འཇིག་རྟེན་པ་དག་མ་ཟད་རབ་བྱུང་གི་སྡེ་མི་ཉུང་བ་ཞིག་ཀྱང་དེ་བཞིན་རྨོངས་ནས་འདུག དེ་འདྲ་ཡིན་ཕྱིན་ཆོས་སློབ་པ་དག་གིས་ཀྱང་སངས་རྒྱས་ཀྱིས་བསྟན་པའི་ཆོས་དང་ཆོས་དེ་ཇི་ལྟར་སློབ་དགོས་མ་ཤེས་པར་མགོ་འཁོར་ནས་རྒྱུན་པར་ར་མིན་ལུག་མིན་ཅིག་མ་གཏོགས་ཤེས་བཞིན་མེད་པའི་རྒྱུ་རྐྱེན་གཙོ་བོ་དེ། སངས་རྒྱས་ཀྱི་གསུང་རབ་ལ་ནན་གྱིས་མ་བཀླགས་པས་སྐྱོན་རེད། གལ་ཏེ་རྡོ་རྗེ་གཅོད་པ་ལྟ་བུའི་གསུང་རིན་ཐང་དང་ལྡན་པ་གཅིག་ལ་ཉམས་ཞིབ་བྱེད་ཐུབ་ན་ད་གདོད་ཆོས་སློབ་པའི་ཉིང་དགོས་སོགས་གནད་འགག་དག་ཡོངས་སུ་རྟོགས་སྲིད། མཱ་ཁེ་སུའི་གུང་ཁྲན་རིང་ལུགས་ཀྱི་ཆེས་གཏིང་ཟབ་པའི་འདུ་ཤེས་འཛིན་སྟངས་ཀྱང་འཛམ་གླིང་ཆ་མཐུན་དང་མི་སོ་སོའི་ལྟོ་གོས་གནས་མལ་སོགས་འདྲ་མཉམ་འཛུགས་རྒྱུ་དེ་རེད། དེ་མིན་དཀོན་མཆོག་དང་འཇིག་རྟེན་བྱེད་པོ་ཁོ་ན་ལ་རེ་ལྟོས་མི་འཛིན་པར། མི་སོ་སོའི་རང་རང་གི་འཇིག་རྟེན་རང་གིས་འབད་པ་དང་གསར་བཏོད་ཀྱི་སྟོབས་ཤུགས་ལ་བརྟེན་ནས་གྲུབ་དགོས་པའི་གནས་ལུགས་ཤིག་ཀྱང་བསྟན་ཡོད་པ་ཡིན། འདི་དག་ནི་སྟོན་པ་ཤཱཀྱ་ཐུབ་པས་ཀྱང་ལོ་སྟོང་ཁ་ཤས་ཀྱི་ཡར་སྔོན་ནས་སེམས་ཅན་རྣམས་ལ་གསལ་བོ་གསུངས་འདུག་པ་ནི། རྒྱུ་ས་བོན་ཅི་ཞིག་བཏབ་པ་ཡིན་ན་འབྲས་བུ་དེ་ལྟར་འབྱུང་རྒྱུ་ཡིན་པ་གསལ་བོ་བརྗོད་འདུག ད་དུང་ལས་དབང་ལ་བསྒྱུར་བཀོད་གཏོང་བ་ནི་གཙོ་བོ་རང་ཉིད་ལ་རག་ལས་ཡོད་པས། རང་ཉིད་ཀྱིས་སྒོམ་སྒྲུབ་སོགས་ལ་ནན་ཏན་བྱ་དགོས། དེ་མིན་སངས་རྒྱས་ཀྱིས་ནི་ཆོས་རྣམས་རང་བཞིན་གྱིས་མ་གྲུབ་པའི་གནས་ལུགས་འདོད་བཞིན་ཡོད་པ་ལས། སྣང་ཚུལ་ཕྱོགས་རེ་ཞིག་ལ་འགྲེལ་བཤད་བརྒྱབ་ན་ཁོང་གི་དགོངས་པ་གཞི་ནས་མ་རྟོགས་པ་རེད། དེ་བས་གུང་ཁྲན་ཏང་མི་ཞིག་ཡིན་ན་སྟོན་པ་ཤཱཀྱ་ཐུབ་པའི་མི་ཆོས་རིག་པ། གཞན་ཕན་སོགས་ལ་བློ་སྦྱོང་ལེགས་པོ་བྱས་ན་མི་ཆོག་པ་གང་ཡང་ཡོད་མ་རེད། ཁོང་གི་གསུང་ལ་ཉན་ནས་རང་རྒྱུད་ན་འདོད་ཆགས་ཞེ་སྡང་གཏི་མུག་སོགས་མེད་པར་བཟོས་ན་དེ་བས་ཀྱང་ཅིའི་མི་ཆོགསྟོན་པ་ཤཱཀྱ་ཐུབ་པའི་གསུང་ལ་ཉན་སློབ་ཡིན་པ་རྒྱུ་མཚན་དུ་བྱས་ནས་ངས་ད་ནས་བཟུང་གུང་ཁྲན་ཏང་གི་ལངས་ཕྱོགས་ལ་རྒྱབ་འགལ་བྱས་སོང་བར་མི་འདོད། ད་དུང་རང་ཉིད་ལྷ་ཡོད་སྨྲ་བར་གྱུར་བ་ན་མཱ་ཁེ་སིའི་ལྷ་མེད་སྨྲ་བ་དང་འགལ་བར་ལྟ་བའི་བསམ་བློ་ནི་ནོར་འཁྲུལ་ཁོ་ན་ཡིན། སྟོན་པ་ཤཱཀྱ་ཐུབ་པའི་གསུང་ལའང་ཕྱོགས་སོ་སོ་ནས་གོ་བ་གཏིང་ཟབ་པ་ལེན་རྒྱུ་ཡོད་པས་བཤད་ཡམས་ཙམ་གྱིས་འགྲེལ་རྒྱག་པ་ནི་གླེན་པའི་ངང་ཚུལ་བཟུང་བ་ཁོ་ན་ལས་མ་འདས། དེའི་ཕྱིར་གུང་ཁྲན་ཏང་མིས་སངས་རྒྱས་ཆོས་ལུགས་སློབ་ཆོག་གམ་ཟེར་ན། དྲང་མོ་བཤད་ན། ཧ་ཅང་སློབ་འོས་པ་ཞིག་ཡིན། ལྷག་ཏུ་ཁོང་གིས་གསུངས་བའི་སྙིང་རྗེ་ཆེན་པོ་དང༌། སྒེར་སེམས་མེད་པ་འདི་དག་ཅིས་ཀྱང་སློབ་དགོས། ཞེས་གཏམ་བཤད་རླབས་ཆེ་ཞིང་ཉིང་དོན་ལྡན་པ་ཞིག་གསུངས་འདུག གསུང་དེས་དཔག་ན། སྲིད་འཛིན་ཁོང་གིས་ད་སྔོན་ལ་ནང་བསྟན་ལ་ཕྱག་སྐོར་ཙམ་མ་ཡིན་པའི་ཡུན་རིང་གི་དུས་ཚོད་སྤྱད་ནས་སློབ་སྦྱོང་བྱས་ཡོད་པར་མ་ཟད། ནང་ཆོས་ཀྱི་ཤེས་རབ་དང་བྱམས་བརྩེས་ཁོང་གི་ཐུགས་རྒྱུད་ལ་སྤྲོ་བ་སྐྱེས་ཡོད་པ་འདྲ། ༼༤ནང་བསྟན་གཞུང་ལུགས་གཞིར་བཟུང་གི་ཀུན་སྤྱོད་ཀྱིས་སྒོ་མང་བོ་ནས་ཕན་པ་རླབས་ཆེན་ལྡན་ཚུལ།༽ ནང་བའི་གཞུང་ལུགས་ནི་མི་ཚེའི་ཁ་ཕྱོགས་སྟོན་པའི་གསུང་རྩོམ་རྐྱང་བ་ལས་གྲུབ་པ་ཞིག་ཡིན་པ་ལས། ལྷས་སྤྲིངས་བའི་བཅའ་ཡིག་དང་སྒྲིག་ཡིག་ལྟ་བུ་གཅིག་ཀྱང་མེད། སྟོན་པ་ཁོང་ཉིད་ཀྱང་བདེ་སྡུག་འདོར་ལེན་གྱི་ཐབས་ཚུལ་མི་ཤེས་མཁན་ལ་ལམ་སྟོན་གྱི་དགེ་རྒན་ནམ་གནས་ལུགས་སྟོན་པ་པོ་ཙམ་ཞིག་ཡིན་པ་ལས། བདེ་བ་དང་སྡུག་བསྔལ་གྱི་བྱེད་པ་པོ་གཏན་ནས་མིན། དེ་འདྲའི་བྱེད་པ་པོ་ཞིག་དོན་ལའང་ཁས་ལེན་པ་མ་ཡིན་པར། མཆོག་སངས་རྒྱས་ནས་དམན་པ་གྲོག་འབུར་ཡན་ཆད་རང་རང་གིས་རང་རང་ཁ་ལོ་བསྒྱུར་ཆོག་པ་དང་བསྒྱུར་བཞིན་པའི་གནས་ལུགས་རྣམ་དག་སྨྲ་ཞིང༌། རང་གིས་རང་ཉིད་ལེགས་པ་དང་ཉེས་པའི་གནས་སུ་ཁྲིད་པ་དང༌། ལེགས་ཉེས་བླང་དོར་གྱི་ནུས་པ་ཡང་རང་རང་སོ་སོ་ལ་ཡོད་པ་འདི་ཡང་ནང་བ་སངས་རྒྱས་པའི་འདྲ་མཉམ་གྱི་གཞི་རྩིའི་ལྟ་གྲུབ་གྱི་རྨང་གཞི་གཅིག་རེད། ཀུན་སྤྱོད་ཀྱི་ཐད་ནས་བསམ་ན་ཡང༌། གལ་ཏེ་འཇིག་རྟེན་འདིར་མི་ཞིག་གིས་འདུལ་བ་ནས་གསུངས་པའི་བསླབ་པའི་སྒོ་ཀུན་ལ་བག་ཟོན་བྱས་ཏེ་བསྲུང་ནུས་ན་ལྟ་ཅི། ཕར་ཆེར་རམ་ཕྱེད་ཉུང་ཤོས་ཤིག་ལེགས་པར་སྤྱོད་ན་ཡང་འཇིག་རྟེན་མི་ཆོས་དཔེ་སྟོན་བྱ་ཡུལ་གྱི་དམ་པ་རྣལ་མ་ཞིག་ཡིན་པར་གདོན་མི་ཟ་སྟེ། ཕམ་པ་བཞི་ལས་ཚུལ་བཞིན་བག་ཡོད་པར་གནས་པའི་གང་ཟག་ཞིག་ལ་མཚོན་ན། མི་ཚངས་སྤྱོད་སྤངས་པས་བཟའ་ཚང་དང་བུ་ཕྲུག་གི་ཆེད་དུ་མདུར་རྒྱུག་གི་ལས་ཀ་སྣ་ཚོགས་ཀྱི་གསེབ་ལས་བྱུང་བའི་ཀུན་སྤྱོད་ཉམས་པའི་སྤྱོད་ལམ་དག་གི་བྱིང་ལས་ཐར་བས་ན། འཇིག་རྟེན་འདིར་ལས་ཀ་ཉོག་འཛིང་ཅན་ཤིན་ཏུ་ཡ་ང་བ་མང་བོ་བུ་ཕྲུག་དང་བཟའ་ཚང་གི་ལས་དོན་ཁོ་ན་ལས་མཆེད་པ་མ་ཡིན་ནམ། མ་བྱིན་ལེན་དང་མི་ཆོས་བླ་མ་སྨྲར་བ་དང་སྲོག་གཅོད་སྤངས་པས་བརྐུ་འཕྲོག་དང་མགོ་སྐོར་གྱི་སྒོ་ནས་ལོངས་སྤྱོད་གཡོ་ལེན་རྩ་བ་ནས་དོར་བ་འདིས་ཀྱང་ཉེས་སྤྱོད་ཀྱི་མ་ཡུམ་མེད་པར་བྱས་པ་ཡིན་ཏེ། དེང་དུས་སུ་མཚོན་ནས་བཤད་ན། མི་རྣམས་དཔལ་འབྱོར་གྱི་རྗེས་སུ་ཁ་གདངས་ཞིང་ལག་བཟེད་དྲགས་པས་གཡོ་འཁྲུལ་གྱི་གར་འཆམ་ཇི་འདྲ་ཞིག་སྤྲུལ་དགོས་ནའང་ཚམ་ཚོམ་མེད་པའི་ཚད་དུ་སླེབས་ཡོད་པས་སོ། །ཁྲ་ཁྲ་འུར་འུར་གྱིས་འགེངས་བའི་ཞིང་ཁམས་འདི་ནས་མི་ཞིག་གིས་ལོངས་སྤྱོད་ཀྱི་ཆེད་དུ་གཡོ་ཁྲམ་མི་བྱེད་ཅིང་བཟའ་ཚང་གི་ཆེད་དུ་བདེན་དོན་མི་འདོར་བ་ཞིག་ཡོང་ན་དེ་ག་ཙམ་ཡང་འཇིག་རྟེན་ཕུལ་བྱུང་གི་སྐྱེས་བུར་འབོད་ན་མི་མཐུན་པ་ཅི་ཞིག་ཡོད་སྲིད་ཨང༌། ད་དུང་རྩ་ཉག་མ་གཅིག་ཀྱང་མི་གཅོད་པར་མ་ཟད་རྩ་སྔོན་དུ་གཤང་གཅིའི་རིགས་ཙམ་ཡང་མི་འདོར་བར་གསུངས་པས་སྐྱེ་དངོས་སྲུང་སྐྱོབ་ལ་ཡང་འདི་ལས་ཕྲ་བ་ཞིག་སུས་ཀྱང་ཁྲིམས་སུ་བྱས་མྱོང་མེད་ལ། རིགས་དང་རུས་ཀྱི་མཐོ་དམན་སོགས་མིང་རྐྱང་གིས་ལམ་ལུགས་ལས་བརྒལ་ཏེ་སོ་སོའི་ཤེས་རབ་དང་ཏིང་འཛིན་སོགས་ནང་གི་ཡོན་ཏན་བསླབ་པས་དབྱེ་བ་འབྱེད་པས་ཕྱིར་ན་འདྲ་མཉམ་ཡང་འདི་ལས་སྔ་ཤོས་སུ་གང་གིས་ཀྱང་ཕྱེས་མེད་ཅིང༌། བསྐོ་བཞག་སོགས་ལ་ཚུལ་ཤིང་འགྲེམ་པ་དང་སྤྲོ་བ་འདྲི་བ་སོགས་ཀྱིས་མང་གཙོ་ཁོ་ནར་མ་ཟད། གསོ་སྦྱོང་གི་གནས་གཏན་ཁེལ་བྱེད་པ་ལྟ་བུར་ཡང་གང་ཟག་གཅིག་གིས་ཐག་གཅོད་རྐྱང་མིན་པར་བློ་མཐུན་བྱ་དགོས་པར་གསུངས་པས་འདི་ལས་སྔ་བའི་མང་གཙོའི་ལམ་ཁ་ཡང་སྤུས་དག་ཅིག་གང་ན་དབྱེ་མྱོང༌། གཞན་ཡང་འགྲོ་འཆག་ཉལ་འདུག་གི་སྤྱོད་ལམ་ཚུལ་མཐུན་བག་ཡོད་པའི་ཞི་དུལ་གྱི་སྤྱོད་ལམ་བྱེད་སྟངས་སྐོར་དང༌། ཆོས་གོས་གསུམ་གྱིས་མཚོན་ཏེ་དགེ་སྦྱོང་གི་གོས་བཅུ་གསུམ་སོགས་གྲ་འགྲིག་དག་གཙང་གི་སྒོ་ནས་ནབ་ཚུལ། ཟས་ཁམ་གང་ངམ་གོས་ལག་མཐིལ་ཙམ་ཡང་སྦྱིན་བདག་གི་རྒྱུ་ཆུད་ཟོན་པར་བྱེད་མི་ཆོག་པ་རྣམས་ཀྱིས་མཚོན་ཏེ་ཆད་ལྷག་དང་མ་འཐུས་པ་ཅུང་ཟད་ཀྱང་མི་མངའ་བ་འདུལ་བ་འདི་ཉིད་ལས་གཞན་སྲིད་པའི་ཁྱོན་ཀུན་ན་ཡོད་རེ་སྐན་ནོ། །དེས་ན་ཀུན་སྤྱོད་ཀྱིས་གཞན་གྱིས་ཡིད་ལ་དང་བ་སྐྱེ་བར་བྱེད་པའོ། །ཆོས་འདུལ་བ་ལ་གནས་པའི་གང་ཟག་རྣམས་ཀྱིས་ཉེས་པ་རང་སེལ་དང་ཡོན་ཏན་རང་ལེན་བྱེད་པའི་ལམ་ལས་མ་བསྐུལ་རང་བཞིན་གྱིས་ཚུལ་མཐུན་དུ་བག་ཡོད་བྱེད་པ་ལས། འདི་ལ་རྒྱལ་བོའི་ཁྲིམས་དང༌། དབྱུག་པའི་སྟེང་མ་གནོན་མཁན་གང་ཡང་མེད་པ་མངོན་གསལ་སྨྲ་མི་དགོས་ཤིང༌། ཀུན་སྤྱོད་དང་ཤེས་རིག་ཡར་རྒྱས་སོགས་ཚད་མཐོ་བའི་མི་རིགས་ཤིག་གི་སྒྲིག་ལམ་དང་གནས་སྟངས་རྣམས་ཀྱང་ཆ་གང་ཐད་ནས་རྒྱལ་ཁྲིམས་དང་དབྱུག་གནོན་ཁོ་ནས་འཇིགས་སྐུལ་འོག་ཏུ་གནས་མི་དགོས་པར་རང་བསམ་རང་ཤེས་ཀྱིས་གནས་ཐུབ་པ་ཡིན་ནོ། །སྤྱིར་བཏང་ནས་བཤད་ན་ཉེས་སྤྱོད་ཡོད་ཚད་ཆོས་ཀྱི་གནས་ཚུལ་དེ་གང་ཡིན་མི་ཤེས་པའི་དབང་གིས་སམ། ཤེས་ཀྱང་སྲེད་པ་ཤུགས་དྲགས་པས་འདོར་ལེན་མི་ནུས་པའམ། འདོད་ཐོག་ཏུ་མ་འཁེལ་བའི་དབང་གིས་སེམས་འཁྲུག་པ་གསུམ་པོ་གང་རུང་ལས་བྱུང་བར་ངེས་པས། འདི་དག་ལ་ནང་ཆོས་སུ་དུག་གསུམ་ལས་ཉེས་ཚོགས་ཀུན་འབྱུང་བར་གསུངས་པ་དེ་ཉིད་ཡིན། འདི་རྣམས་ཐག་གཅོད་དགོས་ཚེ་འཚེ་མེད་ཞི་བདེའི་གན་མཛོད་ནང་བསྟན་སེམས་འདུལ་བའི་གཞུང་ལུགས་དག་ལས་ཁྱད་པར་དུ་འཕགས་པའི་རིན་ཐང་ཅན་ཞིག་སྲིད་ན་དཀོན་པ་ཡིན། ༼༥རྒྱལ་ཁྲིམས་དང་ཡུལ་ཆོས་ལ་བསྟུན་དགོས་པའི་ཚུལ་འདུལ་བ་ལས་གསུང་ཚུལ་མཚོན་ཙམ།༽ ཆོས་འདུལ་བའི་ཤིང་རྟ་ཆེན་པོ་སློབ་དཔོན་ཡོན་ཏན་འོད་ཀྱི་འདུལ་བ་ལས་བརྒྱ་རྩ་གཅིག་པ་ལས། རྒྱལ་པོས་བཀྲབས་པ་ལ་སོགས་པ་མ་ཡིན་ནམ། རྒྱལ་པོས་མ་གནང་བ་མ་ཡིན་ནམ། རྒྱལ་པོས་མ་གནང་བ་ཡུལ་ཐག་མི་རིང་བ་མ་ཡིན་ནམ། ཞེས་རབ་བྱུང་གི་སྔོན་འགྲོ་དགེ་བསྙེན་ཙམ་བྱ་བ་ལ་ཡང་རྒྱལ་པོས་མ་གནང་བ་སོགས་མ་ཡིན་པར་དྲིས་ཏེ་མ་ཡིན་པ་དགོས་པར་གསུངས་པ་དང༌། འདུལ་བ་རྣམ་འབྱེད་ལས། བློན་པོ་རྣམས་ཀྱིས་སྨྲས་པ། འཕགས་པ་བཀའ་སྩལ་པ་ཅི་མཆིས། འདུན་པས་སྨྲས་པ། བཞིན་བཟང་དག་བྲམ་ཟེ་ཞིག་གིས་དགེ་འདུན་གྱི་ཕྱིར་གཙུག་ལག་ཁང་བྱེད་དུ་བཅུག་ན་ས་གཞི་རྒྱལ་པོ་དབང་བས་གང་དུ་གཙུག་ལག་ཁང་བརྩིག་ཏུ་གཞུག་པའི་ས་མེད་ན་དེའི་ཕྱིར་ས་གཞིའི་ཆེད་དུ་ལྷའི་སྙན་དུ་གསོལ་བ་ཞིག་འདོང་ན་དེ་ཁྱེད་ཅག་གིས་གྲོགས་གྱིས་ཤིག །འཕགས་པ་གང་གི་ཚེ་རྒྱལ་པོ་ཚོགས་ཉུང་ངུ་དང་དབེན་པ་ན་བཞུགས་པ་དེའི་ཚེ་ཁྱོད་སྦྲན་པར་བགྱི་ཡིས་སྤྱོན་ཅིག །ཇི་ཙམ་དུས་གཞན་ཞིག་ན་རྒྱལ་པོ་ཚོགས་ཉུང་ངུ་དང་དབེན་པ་ན་འདུག་པའི་ཚེ་བློན་པོ་དེ་དག་གིས་ཚེ་དང་ལྡན་པ་འདུན་པ་ལ། འཕགས་པ་རྒྱལ་པོ་ཚོགས་ཉུང་ངུ་དང་དབེན་པ་ན་བཞུགས་ཀྱིས་སྤྱོན་ཅིག་ཅེས་བང་ཆེན་བཏང་བ་དང༌། འདུན་པ་འོངས་ནས་རྒྱལ་པོ་ལ་ཨ་རོག་ཁྱ་ཞེས་བྱས་ཏེ་མཐའ་གཅིག་ཏུ་འདུག་གོ། །བློན་པོ་རྣམས་ཀྱིས་རྒྱལ་པོ་ལ་གསོལ་པ། ལྷ་འདི་ནི་འཕགས་པ་འདུན་པ་ཞེས་བགྱི་སྟེ། ཤཱཀྱ་ལས་རབ་ཏུ་བྱུང་བ། སྡེ་སྣོད་གསུམ་དང་ལྡན་པ། ཆོས་སྒྲོག་པ། རིགས་པ་དང་གྲོལ་བའི་སྤོབས་པ་དང་ལྡན་པ་ལགས་སོ། །རྒྱལ་པོས་སྨྲས་འཕགས་པ་བྱོན་པ་ལེགས་སོ། །ཅིའི་སླད་དུ་བྱོན། འདུན་པས་སྨྲས་པ། ལྷ་བྲམ་ཟེ་ཞིག་གིས་དགེ་འདུན་གྱི་སླད་དུ་གཙུག་ལག་ཁང་བགྱིད་དུ་སྩལ་ན། ས་གཞི་རྒྱལ་པོ་མངའ་བས་དེའི་དོག་ས་མ་མཆིས་ན་ལྷས་དོག་ས་སྩལ་བར་རིགས་སོ། །འཕགས་པ་རྒྱལ་པོའི་ཕོ་བྲང་འབའ་ཤིག་མ་གཏོགས་པ་གང་དུ་བཞེད་པ་དེར་གཙུག་ལག་ཁང་རྩིག་ཏུ་སྩོལ་ཅིག །ཅེས་དགེ་འདུན་པའི་གཙུག་ལག་ཁང་སོགས་བྱ་བ་ལ་ས་གཞི་རྒྱལ་པོ་ལ་དབང་བའི་ས་ནས་རྒྱལ་པོ་ལ་ཞུས་ཏེ། གནང་ན་བྱ་བར་གསུངས་པ་དང༌། མ་བྱིན་ལེན་གྱི་སྐབས་ཀྱི་རྣམ་འབྱེད་ལས་ཀྱང༌། བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་ལ་བཀའ་སྩལ་པ། ཀུན་དགའ་བོ་སྣམ་སྦྱར་གྱོན་ཏེ་དགེ་སློང་ཕྱི་བཞིན་འབྲང་བའི་དགེ་སྦྱོང་ཞིག་དང་སོང་ལ་རྒྱལ་པོའི་ཁབ་ཏུ་ཞུགས་ཏེ་གྲོང་ཁྱེར་རྒྱལ་པོའི་ཁབ་ཀྱི་ལམ་པོ་ཆེ་དང༌། སྲང་དང༌། བཞི་མདོ་དང༌། སུམ་མདོ་དག་དང༌། བཀའ་འདོགས་པའི་གནས་དག་ཏུ་འདུག་ལ། དད་པ་ཅན་དག་དང༌། མ་དད་པ་དག་དང༌། བྲམ་ཟེ་དང༌། ཁྱིམ་བདག་དག་དང༌། གྲོང་རྡལ་པ་དག་དང༌། ཡུལ་མི་དག་དང༌། ནོར་ཅན་དག་དང༌། ཚོང་དཔོན་དག་དང༌། དེད་དཔོན་དག་ལ་ཤེས་ལྡན་དག་ལུས་འཕགས་མའི་བུ་མ་ག་དྷར་བྱུང་བའི་རྒྱལ་པོ་མ་སྐྱེས་དགྲས་ཇི་ཙམ་མ་བྱིན་པར་བླངས་པས། གྱོད་ལ་སྐྲིན་ཅིང་སྲོག་དང་འབྲལ་བར་བྱེད་ཅེས་དྲིས་ཤིག །ཚེ་དང་ལྡན་པ་ཀུན་དགའ་བོས་བཙུན་པ་བཀའ་བཞིན་འཚལ་ཞེས་བཅོམ་ལྡན་འདས་ལས་མཉན་ནས་རྒྱལ་པོའི་ཁབ་ཏུ་ཞུགས་ཏེ་གྲོང་ཁྱེར་རྒྱལ་པོའི་ཁབ་ཀྱི་ལམ་པོ་ཆེ་དང༌། སྲང་དང༌། བཞི་མདོ་དང༌། སུམ་མདོ་དག་དང༌། བཀའ་འདོགས་པའི་གནས་དག་ཏུ་འདུག་ནས་དད་པ་ཅན་དག་དང༌། མ་དད་པ་དག་དང༌། བྲམ་ཟེ་དང༌། ཁྱིམ་བདག་དང༌། གྲོང་རྡལ་པ་དག་དང༌། ཡུལ་མི་དག་དང༌། ནོར་ཅན་དག་དང༌། ཚོང་དཔོན་དག་དང༌། དེད་དཔོན་དག་ལ་སྨྲས་པ། ཤེས་ལྡན་དག་ལུས་འཕགས་མའི་བུ་མ་ག་དྷར་བྱུང་བའི་རྒྱལ་པོ་མ་སྐྱེས་དགྲས་ཇི་ཙམ་མ་བྱིན་པར་བླངས་པས་གྱོད་ལ་སྐྲིན་ཅིང་སྲོག་དང་བྲལ་བར་བྱེད། དེ་དག་གིས་སྨྲས་པ། བཙུན་པ་ཀུན་དགའ་བོ་མ་ཤ་ཀ་ལྔ་འམ། མ་ཤ་ཀ་ལྔ་ལས་ལྷག་པས་སོ། །དེ་ནས་ཚེ་དང་ལྡན་པ་ཀུན་དགའ་བོ་རྒྱལ་པོའི་ཁབ་ནས་བྱུང་ནས། བཅོམ་ལྡན་འདས་ག་ལ་བ་དེར་སོང་སྟེ་ཕྱིན་ནས་བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ་མཐའ་གཅིག་ཏུ་འདུག་གོ། །མཐའ་གཅིག་ཏུ་འདུག་ནས་བཅོམ་ལྡན་འདས་ལ་ཚེ་དང་ལྡན་པ་ཀུན་དགའ་བོས་འདི་སྐད་ཅེས་གསོལ་ཏོ། །བཙུན་པ་བདག་གཟོད་སྣམ་སྦྱར་འཚལ་ཏེ་དགེ་སློང་སླད་བཞིན་འབྲང་བའི་དགེ་སྦྱོང་ཞིག་དང༌། རྒྱལ་པོའི་ཁབ་ཏུ་ཞུགས་ནས་གྲོང་ཁྱེར་རྒྱལ་པོའི་ཁབ་ཀྱི་ལམ་པོ་ཆེ་དང༌། སྲང་དང༌། བཞི་མདོ་དང༌། སུམ་མདོ་དག་དང༌། བཀའ་འདོགས་པའི་གནས་དག་ཏུ་མཆིས་ཏེ། དད་པ་ཅན་དག་དང༌། མ་དད་པ་དག་དང༌། བྲམ་ཟེ་དང༌། ཁྱིམ་བདག་དང༌། གྲོང་རྡལ་པ་དག་དང༌། ཡུལ་མི་དག་དང༌། ནོར་ཅན་དག་དང༌། ཚོང་དཔོན་དག་དང༌། དེད་དཔོན་དག་ལ་ཤེས་ལྡན་དག་ལུས་འཕགས་མའི་བུ་མ་ག་དྷར་བྱུང་བའི་རྒྱལ་པོ་མ་སྐྱེས་དགྲས་ཇི་ཙམ་མ་བྱིན་པར་བླངས་པས་གྱོད་ལ་སྐྲིན་ཅིང་སྲོག་དང་བྲལ་བར་བགྱིད་ཅེས་སྨྲས་ན། དེ་དག་གི་མཆིད་ནས་བཙུན་པ་ཀུན་དགའ་བོ་མ་ཤ་ཀ་ལྔ་འམ། མ་ཤ་ཀ་ལྔ་ལས་ལྷག་པས་སོ་ཞེས་མཆིའོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང༌། གླེང་གཞི་འདི་དང༌། སྐབས་འདི་ལ་དགེ་སློང་གི་དགེ་འདུན་བསྡུ་བ་མཛད་དོ། །དེ་བཞིན་གཤེགས་པ་ནི་དོན་གྱི་དབང་གཉིས་གཟིགས་པ་ན། དགེ་སློང་གི་དགེ་འདུན་སྡུད་པར་མཛད་དེ། འདི་ལྟ་སྟེ། ངའི་ཉན་ཐོས་རྣམས་ཀྱིས་ཀུན་ཤེས་པ་ཉིད་དུ་བྱ་བའི་ཕྱིར་དང༌། ངས་འདུལ་བ་ལ་བསླབ་པའི་གཞི་ལེགས་པར་བཅས་པར་འགྱུར་བའོ། །ཞེས་པ་ནས། ཇི་ཙམ་མ་བྱིན་པར་བླངས་པས་ཞེས་བྱ་བ་ནི་མ་ཤ་ཀ་ལྔ་འམ། མ་ཤ་ཀ་ལྔ་ལས་ལྷག་པས་སོ། །ཞེས་ཕམ་པ་བཞི་ལས་མ་བྱིན་ལེན་གྱི་བཅས་པ་མཛད་པའི་དུས་སུ་རྒྱལ་པོའི་ཆད་པ་ལ་ལྟོས་ཏེ་བཅས་པ་དང༌། གཞན་ཡང་ཤོ་གམ་གཞལ་བ་དང༌། གསོ་སྦྱོང་གི་གནས་སོགས་ལ་ཡང་རྒྱལ་པོ་དང་མཐུན་པར་བྱ་དགོས་པར་གསུངས་པ་མང་ཡང་རེ་ཞིང་མང་དོགས་པས་བཞག་གོ། །༼༦ནང་བསྟན་དངོས་མ་དང་རྫུས་མའི་དབྱེ་འབྱེད་བྱ་དགོས་པ།༽ནང་བསྟན་རང་ངོས་ནས་འཇིག་རྟེན་འདྲ་མཉམ་དང་སྤྱི་ཕན་ཞབས་ཕྱི་སོགས་འཇིག་རྟེན་མི་ཆོས་དང་མིའི་འདོད་བློ་དང་འཚམ་པ། རྒྱལ་ཁབ་ཀྱི་སྲིད་དང་ཚན་རིག་གི་ལྟ་གྲུབ་ལ་འོས་པའི་རིན་ཐང་གཞལ་དུ་མེད་པ་ཞིག་ཡིན་ཡང༌། དེང་སང་ས་ཆ་ག་ས་གང་དུ་བླ་མ་དང་སྤྲུལ་སྐུ་དང་གྲྭ་བ་རྫུན་མ་མང་བོ་ཡོད་པ་དང༌། དེ་དག་གི་སྤྱོད་ལམ་དང་ལས་ཀ་གནོད་འཚེ་ལྡན་པ་མང་བོ་ཡོད་ཀྱང༌། དེ་དག་གིས་ནང་བསྟན་སྤྱི་དང་ནང་བསྟན་པའི་ཀུན་སྤྱོད་ཀྱི་ཚབ་ལྟ་བུར་གཏན་ནས་བྱེད་མི་རུང་ལ། དེ་ནི་ནང་བསྟན་གྱི་འཇིག་རྟེན་ལ་བཞག་པའི་ལས་ཀ་དང་གྲུབ་འབྲས་ཤིག་ཏུ་དེ་བས་ཀྱང་ལྟ་མི་རུང༌། མི་སོ་སོའི་ལས་ཀ་བྱེད་སྟངས་ལ་འདྲ་མཉམ་མ་ཡིན་པ་དང༌། རྒྱུ་འབྱོར་འཚོལ་བའི་ལས་རིམ་དང༌། དད་པ་བེད་སྤྱད་ནས་དམངས་མགོ་སྐོར་བ་སོགས་རྣམ་པ་སྣ་ཚོགས་ཡོད་ཀྱང༌། དེ་དག་ཤཱཀྱ་ཐུབ་པའི་དགོངས་པ་མ་རེད་ལ། ནང་བའི་གཞུང་ལུགས་ཁག་ནས་བཤད་པའི་སྤྱོད་པ་མ་རེད། དེ་བཞིན་དུ་ནང་བའི་བླ་མ་དང་གྲྭ་བ་ཚད་ལྡན་དག་གི་ཚད་འཇལ་བྱེད་དེ་བས་ཀྱང་ལྟ་ག་ལ་ཡིན། དེས་ན་ནང་བསྟན་དངོས་ནི་ཁ་ཞེ་གཉིས་མེད་ཀྱི་གཞན་ཕན་སྒྲུབ་མཁན་ཞིག་དང༌། སྲིད་དང་དམངས་ཀྱི་བདེ་བ་ལ་ནམ་ཡང་གྲོགས་ལས་དགྲ་རུ་མི་འགྱུར་བ་ཞིག་དང༌། རྫུན་དང་རྐུ་འཕྲོག་གི་གཡོ་ཆས་ཐམས་ཅད་རིང་དུ་དོར་བ་དང༌། ཉམ་ཆུང་དང་འཁོས་དམན་རྣམས་ནམ་ཡང་རོགས་སྐྱོར་བྱེད་པའི་གནོད་མེད་ཕན་པའི་རིགས་གཞུང་ཅིག་ཡིན་ལ། ནང་བསྟན་ཆོས་ལུགས་ཉིད་ཀྲུང་གོ་ཅན་དུ་རྒྱུན་སྐྱོང་བྱེད་པ་ལ་བརྩོན་ན་མདུན་ལམ་ལ་འོད་སྟོང་འབར་བ་ཡོད་དོ། །མཚོ་སྔོན་ནང་བསྟན་མཐུན་ཚོགས་ཀྱིས་ལམ་སྟོན་གྱི་འོག་ནས་ངག་དབང་དངོས་གྲུབ་དཔལ་གྱིས་བྲིས་པའོ། །སརྦ་མངྒ་ལཾ། ཕྱོགས་མེད་རིས་མེད་རྟོན་པ་བཞི་ལྡན།ཕྱོགས་མེད་རིས་མེད་རྟོན་པ་བཞི་ལྡན། རྒྱལ་བས་ཡང་ཡང་མདོ་རྒྱུད་དུ་མ་ནས་ལུང་བསྟན་པའི་ཀུན་མཁྱེན་དོལ་པོ་པ་ཤེས་ རབ་རྒྱལ་མཚན་དཔལ་བཟང་པོ་ནི། རབ་བྱུང་ལྔ་པའི་ཆུ་འབྲུག་ཡེ་ལོ་༡༢༩༢ལོར་མངའ་རིས་དོལ་པོ་པན་ཚང་ཀ་ཡོ་རིའི་ཡབ་ནས་སྟོན་ཡེ་ཤེས་དབང་ཕྱུག་དང༌། ཡུམ་ཚུལ་ཁྲིམས་རྒྱན་གཉིས་ཀྱི་སྲས་སུ་འཁྲུངས། བྱིས་དུས་ཀྱི་མཚན་ལ་ཤེས་རབ་མགོན་ཞེས་གསོལ། གཞོན་དུས་ནས་ཡབ་ཡུམ་གྱི་མདུན་ལས་ཡི་གེའི་འབྲི་ཀློག་སྦྱངས། བཅུ་གསུམ་པར་སྐྱི་སྟེངས་དགོན་དུ་ཕེབས། མཁན་པོ་ཚུལ་ཁྲིམས་སྙིང་པོ་ལས་རབ་ཏུ་བྱུང༌། མཚན་ལ་ཤེས་རབ་རྒྱལ་མཚན་ཞེས་གསོལ། སྐྱི་སྟོན་འཇམ་དབྱངས་ལས་སྔགས་སྡོམ་བླངས། དབང་ལུང་ཡང་མང་པོ་ཞུས། མཁས་ཆེན་བྱང་ཆུབ་སེང་གེ་དང༌། སྟག་ཤམ་པ་ཚུལ་ཁྲིམས་བཟང་པོ་གཉིས་ལས་རྙིང་ཆོས་མང་པོ་གསན། བཅུ་དགུ་པར་གློ་བོ་བསམ་རྫོང་དུ་ཕེབས། སྐྱི་སྟོན་གྲགས་པ་རྒྱལ་མཚན་ལས་གསན་སྦྱོང་ཟླ་གཅིག་རིང་མཛད། ས་སྐྱར་སློབ་དཔོན་ཤེས་རབ་བཟང་པོ་དང༌། ཉི་ཕུ་པ་གཞོན་ནུ་བཟང་པོ་གཉིས་ལས་ཚད་མ་དང༌། མཁན་པོ་བློ་གྲོས་བསྟན་པ་ལས་ཕར་ཕྱིན། བླ་མ་འཇམ་པའི་དབྱངས་ལས་བྱམས་ཆོས་སྡེ་ལྔ། དབུ་མའི་རིགས། བསྟོད་ཚོགས། གཏམ་ཚོགས། དབང་ལུང་རྗེས་གནང་བཅས་ལོ་བཞི་རིང་སྦྱངས། མདོ་སྔགས་གཞུང་ལུགས་མང་པོ་ཐུགས་སུ་ཆུད། གསུམ་པར་དབུས་གཙང་དུ་གྲྭ་སྐོར་ཕེབས། མཁན་པོ་བསོད་ནམས་གྲགས་པ་ལས་བསྙེན་པར་རྫོགས། རྣལ་འབྱོར་པ་ནག་འབུམ་ལས་ཞི་བྱེད་དང༌། གཅོད། རྫོགས་ཆེན་སྙན་བརྒྱུད་སོགས་ཞུས། སོ་གཅིག་པར་ཇོ་ནང་དུ་ཕེབས། ཆོས་རྗེ་ཡོན་ཏན་རྒྱ་མཚོ་ལས་དུས་འཁོར་སོགས་ཟབ་ཆོས་མང་དུ་ཞུས། སོ་བཞི་པར་ཇོ་ནང་པའི་གདན་སར་ཕེབས། མདོ་སྔགས་ཀྱི་འཆད་ཉན་མཛད། ཇོ་ནང་པའི་ལྟ་བའི་གཞི་བཏིངས། སོ་དགུ་པར་མཆོད་རྟེན་ཆེན་པོ་དཔལ་ཡོན་ཅན་རྨང་བཏིངས། ལོ་བཞིའི་རིང་ལེགས་པར་གྲུབ། རབ་གནས་ཀྱང་མཛད། ཞེ་ལྔ་པར་ས་སྐྱ་དང༌། ཆུ་བཟང༌། ལྷ་རྩེ་རྫོང༌། ཤངས། སྣར་ཐང་སོགས་སུ་སྐུ་མཚམས་ལ་བཞུགས། ངོ་མཚར་བའི་རྟེན་མང་པོ་བཞེངས། ང་བདུན་པར་རྟ་ནག་ཏུ་ཕེབས། འཆད་ཉན་ལོ་གཅིག་རིང་མཛད། དབུས་སུ་ཆོས་འཁོར་བསྐོར། རབ་བྱུང་དྲུག་པའི་ལྕགས་གླང་ཕྱི་ལོ ༡༣༦༡ ལོའི་ཟླ་༡༡པའི་ཚེས་༦ལ་སྐུ་གཤེགས། གསུང་འབུམ་ནི་དུས་ཀྱི་འཁོར་ལོའི་སྐོར་ལ་བསྟན་བཅོས་སུམ་ཅུ་སོ་བརྒྱད། རི་ཆོས་ངེས་དོན་རྒྱ་མཚོར་རྒྱ་གཞུང་ཚད་ལྡན་གྱི་ལུང་སྟོང་ཕྲག་གཅིག་དང་གཉིས་བརྒྱ་ལྷག་བཀོད་གནས་གཞན་སྟོང་དབུ་མའི་ལྟ་གྲུབ་གསལ་བར་མཛད། བཀའ་བསྡུ་བཞི་བ་མཛད་སྐབས་དགྲ་བཅོམ་པ་ཆེན་པོ་སངས་རྒྱས་ཀྱི་མདོ་ལྔ་བརྒྱ་དཔང་པོར་བྱས་ནས་རྫོགས་ལྡན་ཆོས་མཆོག་གི་ལུགས་ཀྱི་སྤྲོས་བྲལ་གྱི་གཞན་སྟོང་དབྱིངས་རིག་དབྱེར་མེད་དུ་སྒྲུབ་པ་སོགས་གྲུབ་མཐའི་སྐོར་ལ་བསྟན་བཅོས་བཅུ་དྲུག ཕར་ཕྱིན་སྐོར་ལ་བསྟན་བཅོས་བདུན། གསོལ་འདེབས་སྐོར་ལ་ཉེར་ལྔ། རྡོ་རྗེ་ཕྲེང་བའི་སྐོར་ལ་གསུམ། སྤྲིང་ཡིག་སྐོར་ལ་བརྒྱད། གདམས་ངག་དང་དྲིས་ལན་སྐོར་ལ་བཅུ་གཉིས། རྣམ་ཐར་སོགས་ཀྱི་སྐོར་ལ་བཅུ་དྲུག སྨོན་ལམ་སྐོར་ལ་གསུམ། བཀྲ་ཤིས་སྐོར་ལ་བཞི་བཅས་ཁྱོན་བསྡོམས་བསྟན་བཅོས་ཆིག་བརྒྱ་བདུན་ཅུ་དོན་བཞི་ཡོད་པར་བཤད། སློབ་མ་གྲགས་ཆེ་བ་ནི་ལོ་ཙཱ་བ་བློ་གྲོས་དཔལ་བཟང་དང༌། ས་བཟང་མ་ཏི་པཎ་ཆེན། དཀོན་མཆོག་རྒྱལ་མཚན། ཇོ་ནང་ཕྱོགས་ལས་རྣམ་རྒྱལ། ཉ་དབོན་ཀུན་དགའ་དཔལ། སོགས་བུ་ཆེན་བཅུ་བཞི་སོགས་སློབ་ཚོགས་རྒྱ་ཆེ་བའོ། །དམ་པ་གང་གི་རྣམ་ཐར་ལ་མཇལ་ན་རིས་མེད་པ་ཞིག་ཡིན་པར་གསལ་ལ། དམ་པ་གང་གིས་ཞལ་སྔ་ནས། ཕྱོགས་མེད་རིས་མེད་རྟོན་པ་བཞི་ལྡན་ཞེས་ཡང་ཡང་གསུངས་པ་ལྟར་རོ། །ངག་དབང་དངོས་གྲུབ་དཔལ་ནས། ནང་ཆོས་ངོ་སྤྲོད་མདོར་བསྡུས།ནང་ཆོས་ངོ་སྤྲོད་མདོར་བསྡུས་བཞུགས་སོ། ། འཛམ་གླིང་ཞི་བདེའི་ལམ་སྟོན་སྟོན་པ་མཉམ་མེད་ཤཱཀྱ་ཐུབ་པ་ལ་ཕྱག་འཚལ་ལོ། །དང་པོ་ཐུགས་བསྐྱེད་བར་ཏུ་ཚོགས་གཉིས་བསགས། །ཐ་མ་རྟེན་འབྲེལ་ཟབ་གནད་མངོན་སུམ་གཟིགས། །ཐུགས་རྗེ་ཆེན་པོས་འགྲོ་ལ་རྟག་ཏུ་དགོངས། །མ་ནོར་ལམ་བཟང་སྟོན་ལ་གུས་ཕྱག་འཚལ། །དེ་ལ་འདིར་ནང་པ་སངས་རྒྱས་པའི་བསྟན་པ་འདི་ལ་བརྟེན་ནས་སྐྱེ་འགྲོ་སེམས་ལྡན་རྣམས་ལ་ཕན་བདེའི་འབྱུང་གནས་སུ་འགྱུར་ཚུལ་མཚོན་ཙམ་ཞིག་བརྗོད་པ་ལ་གཉིས། དང་པོ་ནང་ཆོས་ཀྱི་ངོ་སྤྲོད་དང༌། དེ་ལ་བརྟེན་ནས་ཕན་འདོགས་ཚུལ་དང་གཉིས། དང་པོ་ནང་བསྟན་ངོས་འཛིན་ནི། སྤྱིར་ནང་པ་སངས་རྒྱས་པའི་བསྟན་པ་ལ་ལུང་རྟོགས་ཀྱི་བསྟན་པ་གཉིས་སུ་ངེས་ཏེ། མཛོད་ལས། སྟོན་པའི་དམ་ཆོས་རྣམ་གཉིས་ཏེ། །ལུང་དང་རྟོགས་པའི་བདག་ཉིད་དོ། །ཞེས་པས་སོ། །ལུང་གི་ཆོས་ནི། ཞི་བདེའི་གནས་ལ་ཕྱིན་བྱེད་ཀྱི་ཐབས་མ་ནོར་བར་སྟོན་པའི་སྡེ་སྣོད་གསུམ་རྣམས་སོ། །རྟོགས་པའི་ཆོས་ནི། བསླབ་གསུམ་ཉམས་ལེན་ནས་བརྩམས་ཏེ་མཐར་ཐུག་སངས་རྒྱས་ཀྱི་བར་གྱྀ་ཉེས་སྐྱོན་སྤངས་པ་དང་དེ་སྤོང་བྱེད་ལམ་མམ་ཐབས་རྣམས་ཡིན་ནོ། །དེ་ཉམས་སུ་ལེན་ཚུལ་ནི། མཛོད་ལས། དེ་འཛིན་བྱེད་དང་སྨྲ་བྱེད་པ། །སྒྲུབ་པར་བྱེད་པ་ཁོ་ན་ཡིན། །ཞེས་པ་ལྟར་ཞིབ་འཇུག་བྱེད་པ་ཙམ་མ་ཡིན་པར་ལུང་གི་ཆོས་ལ་དད་པ་དང་ལྡན་པའི་སྒོ་ནས་ཐོས་བསམ་སམ་གསན་བསམ་བྱེད་པ་དང༌། རྟོགས་པའྀ་བསྟན་པ་ལ་བསླབ་གསུམ་ཉམས་ལེན་བྱས་ནས་གཞན་ལ་གནོད་འཚེའི་རིགས་སྲོག་གཅོད་པ་སོགས་སྡིག་པ་མི་དགེ་བ་བཅུ་སོགས་མི་བྱ་བར་འཛེམ། བྱམས་སྙིང་རྗེ་སོགས་དགེ་བ་རྣམས་རང་རྒྱུད་ལ་བསྐྱེད་པར་བྱས་ནས། རང་གི་རྒྱུད་ཀྱི་ཉོན་མོངས་སོགས་ཉེས་སྐྱོན་ནམ་བསམ་པ་ངན་པ་ཞི་བར་བྱེད་པ་དེ་ཡིན་ཏེ། ཤཱཀྱ་ཐུབ་པའི་ཞལ་སྔ་ནས། སྡིག་པ་ཅི་ཡང་མི་བྱ་ཞིང༌། །དགེ་བ་ཕུན་སུམ་ཚོགས་པར་སྤྱད། །རང་གི་སེམས་ནི་ཡོངས་སུ་འདུལ། །འདི་ནི་སངས་རྒྱས་བསྟན་པ་ཡིན། །ཞེས་གསུངས་སོ། །མདོར་ན་ནང་བསྟན་ནི་ཕྱིའི་གཟུགས་བརྙན་ཙམ་མ་ཡིན་པར་ནང་གི་བསམ་པ་བཟང་པོ་ཞིག་དགོས་ཏེ། ཇི་སྐད་དུ། བསམ་པ་དགེ་དང་མི་དགེའི་བྱེ་བྲག་ལས། །དགེ་སྡིག་ཆེ་ཆུང་གཟུགས་བརྙན་རྗེས་མི་འབྲང༌། །ཞེས་གསུངས་པས་སོ། །མདོར་ན་དམ་པའི་ཆོས་ནི་གནོད་འཚེ་སྤངས་དགོས་ཏེ། མདོ་ལས། དམ་པའི་ཆོས་ལ་སྐྱབས་སོང་བ། །འཚེ་ཞིང་གནོད་པའི་སེམས་དང་བྲལ། །ཞེས་དང༌། དབུ་མ་བཞྀ་བརྒྱ་བ་ལས། མདོར་ན་ཆོས་ནི་མི་འཚེ་བར། །དེ་བཞིན་གཤེགས་པ་རྣམས་ཀྱིས་གསུངས། །ཞེས་གསུངས་པའི་ཕྱིར་རོ། །དེང་དུས་སུ་སྤྱི་ཚོགས་ཀྱི་ཁྲོད་ན་གོང་དུ་བཤད་པ་བཞིན་ཆོས་ལ་བརྩོན་པ་ནི་ཆོས་པ་རྣམ་དག་ཡིན་མོད་ཀྱང་དཔེར་ན་ཁྲོམ་ར་ན་ཚོང་ནོར་དག་རྫུན་དུ་མ་ཡོད་པ་བཞིན་ཆོས་པའི་གཟུགས་ཀྱིས་གཡོ་སྒྱུ་དང་སེམས་ཅན་གྱི་བདེ་སྐྱིད་ལ་གནོད་པ་བྱེད་པ་སོགས་ཆོས་མིན་བྱེད་པ་དག་ནི་ཆོས་རྫུན་ཡིན་པར་ཤེས་པ་གལ་ཆེན་དུ་སྣང་ངོ༌། །དེས་ན་ཆོས་པ་རྣམ་དག་ལ་ཆོས་རྫུན་གྱི་ཉེས་པ་མི་བགོ་བར་ཞུའོ། །གཉིས་པ་དེ་ཉམས་སུ་ལེན་པ་ལ་བརྟེན་ནས་ཕན་འདོགས་ཚུལ་ནི། ཇི་སྐད་དུ། ཕན་བདེ་འབྱུང་བའི་གནས་གཅིག་པུ། །ཞེས་གསུངས་པ་ལྟར་གནས་སྐབས་ཀྱི་འཇིག་རྟེན་འདིའི་བདེ་བ་སོགས་དང༌། སྡུག་བསྔལ་ལས་ཐར་བའི་བདེ་བ་དང༌། མཐར་ཐུག་སངས་རྒྱས་ཀྱི་བདེ་བ་མ་ལུས་པ་འབྱུང་བ་ཡིན་མོད་ཀྱང་དེ་འདྲའི་རྒྱུ་འབྲས་ཀྱི་འབྲེལ་བ་ཞིབ་པར་ནང་ཆོས་ལ་སློབ་སྦྱང་མ་སོང་བ་ཞིག་གི་རྟོགས་དཀའ་བས་མ་སྤྲོས་ལ། སྐབས་འདིར་རྟོགས་སླ་བ་ཕྱོགས་ཙམ་གླེང་ན་སྡིག་པ་མི་དགེ་བ་བཅུ་ལུས་ཀྱི་སྒོ་ནས་སྲོག་གཅོད་པ། མ་བྱིན་པར་ལེན་པ། འདོད་པའི་ལོག་པར་གཡེམ་པ་གསུམ་དང༌། ངག་གི་སྒོ་ནས་རྫུན་ཕྲ་མ་ཚིག་རྩུབ་ངག་འཁྱལ་བཞི་དང༌། ཡིད་ཀྱི་སྒོ་ནས་བརྣབ་སེམས་གནོད་སེམས་ལོག་ལྟ་གསུམ་སྟེ་དེ་དག་སྤངས་ན་རང་གི་སེམས་ཡང་ཞི་བདེ་ལ་གནས་ཐུབ་པ་དང༌། གཞན་ལ་བདེ་སྐྱིད་ལ་གནས་པར་བྱེད་པའི་ཐབས་ལམ་རྨད་དུ་བྱུང་བའོ། །དེ་ཡང་དཔེར་ན་སྲོག་གཅོད་པ་སྤངས་ན་རང་ཡང་གནོད་སེམས་ལས་ལོག་པ་དང་འཁྲུག་དེར་རྟེན་རྡུང་རྡེག་སོགས་མེད་པར་རང་ཡང་བདེ་འཇགས་ལ་གནས་ཐུབ། གཞན་ལ་འགྲོ་བ་མི་ཙམ་མ་ཡིན་པར་སེམས་ཅན་ཐམས་ཅད་སྲོག་གི་གནོད་པ་ལས་ལྡོག་པའི་ཕན་འབྲས་ཡོད། དེ་བཞིན་དུ་མ་བྱིན་ལེན་པ་སྤངས་པ་སོགས་གཞན་ལ་རིགས་འདྲ་སྦྱར་ན་ཤེས་ནུས། ཡང་དཔེར་ན་དགྲ་ལྟ་བུ་ལ་བྱམས་པ་ཞིག་སྒོམ་ན་སྐབས་དེར་རང་རྒྱུད་ཀྱི་ཞེ་སྡང་ཞི་བ་དང་གཞན་ལ་གནོད་འཚེ་མི་འབྱུང་བའི་ཕན་པ་སྒྲུབ་ནུས་པ་མྱོང་བས་གྲུབ་པའོ། །སྤྱིར་ནང་ཆོས་ལས་ཞི་བདེའི་རྩ་བ་ནི་ཕྱིའི་དཔལ་འབྱོར་ཡར་རྒྱས་ཙམ་མ་ཡིན། དེའི་རྒྱུ་མཚན་ནི་ཕྱིའི་དཔལ་འབྱོར་ཇི་ལྟར་ཡོད་ན་ཡང་ནང་གི་སེམས་ལ་སྡུག་བསྔལ་གྱིས་མནར་བ་ཡོད་པ་མངོན་སུམ་གྱིས་གྲུབ་ལ། དེས་ན་བྱམས་བརྩེ་ལ་གནས་ན་རང་སེམས་བདེ་ལ་གཞན་ལ་བདེ་སྐྱིད་བསྐྲུན་ནུས། ནང་བསྟན་ནི་ཐེག་དམན་གྱི་སྐབས་སུ་ལུས་ངག་ཡིད་ཀྱི་ཉེས་སྤྱོད་ལས་ལྡོག་ནས་གཞན་ལ་གནོད་པ་སྤངས་པ་ཡིན། ཐེག་ཆེན་གྱི་སྐབས་སུ་རང་ཉིད་བྱམས་བརྩེ་ལ་གནས་ནས་གཞན་ལ་སྦྱིན་པ་བྱིན་པ་སོགས་གཞན་དོན་ཆེ་ཆུང་ཐམས་ཅད་སྒོ་དུ་མ་ནས་སྒྲུབ་པ་ཡིན་པས་རང་གཞན་ལ་ཕན་བདེ་བསྐྲུན་ནུས། དེས་ན་ཞི་བདེའི་རྩ་བ་ནང་སེམས་ཀྱི་ཞི་བདེ་ཡིན། སྤྱིར་ནང་ཆོས་ནི་ཚེ་འདིའི་བདེ་བ་ཙམ་མ་ཡིན་པར་ཚེ་ཕྱི་མའི་དོན་དང༌། དེ་ཡང་ཚེ་ཕྱི་མའི་འཁོར་བའི་བདེ་འབྱོར་གཙོ་བོ་སྒྲུབ་པ་མ་ཡིན་པར་སྡུག་བསྔལ་མ་ལུས་པ་ཞི་བའི་ཐར་བ་དང་ཤེས་བྱའི་གནས་ཀུན་མཁྱེན་པའི་མཁྱེན་པ་སྒྲུབ་པ་ནི་གཙོ་བོ་ཡིན་ནོ། །དེ་ཡང་དཔེར་ན་འཇིག་རྟེན་ན་ཞིང་ནང་དུ་ས་བོན་ནས་འབྲས་སོགས་རྒྱུ་སོ་སོ་ལས་འབྲས་བུ་སོ་སོར་འབྱུང་ལ། ཆུ་ལུད་དྲོ་གཤེར་སོགས་ཚོགས་ལུགས་ཀྱིས་འབྲས་བུ་ལ་བཟང་ངན་དུ་མ་འབྱུང་བ་བཞིན་ཚེ་འདིའི་སེམས་ཀྱི་དགེ་སྡིག་གམ་བཟང་ངན་སྣ་ཚོགས་ཀྱི་དབང་གིས་ཚེ་ཕྱི་མའི་བདེ་སྡུག་སྣ་ཚོགས་འབྱུང་བ་གདོན་མི་ཟ་བ་ཡིན་ལ། དེ་དཔེ་གང་ལས་ཤེས་ན་དཔྱིད་དུས་སུ་ས་བོན་བཏབ་དུས་སུ་འབྲས་བུ་སྣ་ཚོགས་ཡོད་པ་མངོན་སུམ་གྱིས་མ་གྲུབ་ཀྱང་སྟོན་དུས་ལྟ་བུ་འབྲས་བུ་གྲུབ་ཚེ་རྟོགས་ཐུབ་པ་བཞིན་ཚེ་འདིར་ལས་དགེ་མི་དགེ་སྣ་ཚོགས་བསགས་དུས་སུ་འབྲས་བུ་བདེ་སྡུག་མངོན་སུམ་གྱིས་མ་གྲུབ་ཀྱང་དེའི་འབྲས་བུ་བདེ་སྡུག་སྣ་ཚོགས་སེམས་ཅན་རྣམས་ཀྱི་སྟེང་དུ་བྱུང་བའི་ཚེ་ན་མངོན་སུམ་ཀྱིས་གྲུབ་ཐུབ་པའོ། །ནང་ཆོས་ཀྱི་སྐབས་རྒྱུ་རྐྱེན་མང་པོ་ཚོགས་པའི་འབྲས་བུ་སྣ་ཚོགས་འབྱུང་བར་འདོད་པ་ལས། ཆོས་ལུགས་པ་མང་པོས་བདེ་སྡུག་སོགས་འབྲས་བུ་འདི་དག་བྱེད་པ་པོ་ལྷ་གཞན་གྱིས་བྱས་པ་སོགས་ལྟར་མི་འདོད་དོ། །དེ་དག་ལེགས་པར་ཤེས་ན་ནང་བསྟན་གྱིས་ཕན་བདེ་སྒྲུབ་ཚུལ་ཤེས་ལ། འོན་ཀྱང་དེ་སྒྲུབ་ཚུལ་ནང་ཆོས་ཀྱི་ཟབ་པ་དང་རྒྱ་ཆེ་བའི་ལམ་རིམ་སོགས་གཤིས་ཕྱིན་པར་མ་ཤེས་ན་དེ་རྟོགས་དཀའ་བ་དང༌། ཚིག་ཚོགས་ཡང་མང་བོས་སྒོ་ནས་བཤད་དགོས་པས་ན་རེ་ཞིག་དེ་ཙམ་ལས་མ་སྤྲོས་སོ། །སྨྲས་པ། རྟེན་འབྲེལ་ཟབ་མོའི་གནད་རྣམས་ཚུལ་བཞིན་དུ། །མ་འདྲེས་གསལ་བར་གཟིགས་པ་སྲིད་མཐའ་ཙམ། །ལེགས་གསུང་ཟབ་མོའི་གསུང་རབ་དགོངས་དོན་ལ། །ཡིད་ཆེས་དད་པས་ཡང་དག་འཇུག་འཚལ་ལོ། །ཞེས་པ་འདི་ནི་པེ་ཅིན་ནང་བསྟན་སློབ་གླིང་གིས་རྩོམ་བསྐུལ་གནང་བ་ལ་བརྟེན་ནས་ངོ་མི་ལྡོག་ཙམ་དུ་ཛ་འགོའི་རི་ཁྲོད་བྱང་ཆུབ་ཆོས་རྫོང་ནས་ཆུ་སྟོད་ཟླ་བའི་ཚེས་བཅུ་གསུམ་གྱི་སྔ་དྲོའི་ཐུན་གསང་ལ་ངག་དབང་དངོས་གྲུབ་དཔལ་གྱིས་བྲིས་པའོ། །སརྦ་མངྒ་ལཾ། ༄༅། །འཇིག་རྟེན་སྲིད་པའི་བདེ་འབྱོར་མ་ཆགས་ཤིང༌། །འཚེ་མེད་བསྟན་པའི་གཞི་མ་ངུར་སྨྲིག་སྡེ། །རང་གི་ལས་འགན་རང་མདུན་བཞག་པ་དེ། །ལུང་རྟོགས་བཤད་སྒྲུབ་བསྟན་པ་མ་ཡིན་ནམ། །སྟོན་པའི་བསྟན་ལ་སོམས་ཤིག་ཤེས་ལྡན་འབུམ། །གཞན་ལ་ཕྲག་དོག་བསམ་པ་རིང་དོར་ནས། །མ་གཡེང་གསོན་དང་ཀུན་མཁྱེན་དབྱིག་གཉེན་གྱིས། །སྟོན་པ་འཇིག་རྟེན་མིག་ནི་ཟུམ་གྱུར་ཅིང༌། །དབང་གྱུར་སྐྱེ་བོ་ཕལ་ཆེར་ཟད་པ་ན། །དེ་ཉིད་མ་མཐོང་རང་དགར་གྱུར་པ་ཡི། །ངན་རྟོག་རྣམས་ཀྱིས་བསྟན་པ་འདི་དཀྲུགས་སོ། །རང་བྱུང་རང་བྱུང་བསྟན་པ་གཅེས་འཛིན་རྣམས། །མཆོག་ཏུ་ཞིར་གཤེགས་འགྲོ་མགོན་མེད་པ་ན། །འདོམས་མེད་ཡོན་ཏན་འཇོམས་པར་བྱེད་པ་ཡི། །དྲི་མས་དགའ་མགུར་དེང་སང་འདི་ན་སྤྱོད། །དེ་ལྟར་ཐུབ་པ་དག་གི་བསྟན་པ་ནི། །ལྐོག་མར་སྲོག་ཕྱིན་འདྲ་དང་དྲི་མ་རྣམས། །སྟོབས་དང་ལྡན་པའི་དུས་སུ་རིག་ནས་ནི། །ཐར་བ་འདོད་པ་དག་གིས་བག་ཡོད་ཀྱིས། །ཞེས་པའི་ལེགས་གསུང་དྲི་མ་མེད་པ་འདི། དེང་དུས་བདག་ཉིད་ལེགས་པར་འདོད་པ་ཡི། །སེམས་ཡོད་རྣམས་ཀྱིས་སེམས་ལ་བཞག་དགོས་སོ། །ཞེས་པ་འདི་ནི་དངོས་གྲུབ་དཔལ་གྱིས་དབྱིག་གཉེན་གྱི་ཞལ་གདམས་ཀྱི་ལུང་འདི་དེང་དུས་ལ་ཤེས་པ་གལ་ཆེ་བར་བསམ་ནས་བྲིས་པའོ། ། བོད་གངས་ཅན་གྱི་ཤེས་ལྡན་ཀུན་ལ་མཐུན་འབྲེལ་གྱི་ཞུ་ཡིགབོད་གངས་ཅན་གྱི་ཤེས་ལྡན་ཀུན་ལ་མཐུན་འབྲེལ་གྱི་ཞུ་ཡིག ཤེས་ལྡན་རྣམས་ལ་མཐུན་འབྲེལ་གོང་འཕེལ་དུ་འགྲོ་བའི་བྱེད་ཐབས་ལས་བརྩམས་ནས་མཐུན་ལམ་གྱི་སྐོར་ཅུང་ཟད་གླེང་ན་ཆོས་འཇིག་རྟེན་གང་གི་ཕྱོགས་ནས་ཡར་རྒྱས་འགྲོ་བ་ལ། མཐུན་འབྲེལ་ལམ་ཆིག་སྒྲིལ་འདི་ངེས་པར་གལ་ཆེ། དེ་ཡང་འདས་པའི་གནས་སྟངས་སམ་རྒྱབ་ལྗོངས་ལ་བལྟས་ན་མཐུན་འབྲེལ་ཡོད་པའི་སྐབས་སྤྱི་སྒེར་སུ་ཡིན་ན་ཡང་ཡར་རྒྱས་ཀྱི་རྣམ་པ་ཡོད་ལ། མཐུན་འབྲེལ་མེད་དུས་སུ་བོད་རང་ཉིད་ཀྱི་ལོ་རྒྱུས་ལ་གཞིག་ན་རྗེས་ལུས་ཀྱི་རྣམ་པའམ་ཐོར་ཞིག་གི་རྣམ་པ་དང༌། ཁྱད་པར་དུ་གང་ཟག་གི་ཆགས་སྡང་ཆོས་ལ་བསྲེས་ནས་ཆོས་བརྒྱུད་ཕན་ཚུན་ཆགས་སྡང་རྩོད་ནས་བསྟན་པ་ལ་ཉམས་ཆགས་མང་པོ་སོང་བ་དང༌། དེར་མ་ཟད་གཞན་གྱི་ལག་བརྐྱངས་ནས་དབང་བསྒྱུར་སྣ་ཚོགས་བྱེད་པ་བྱུང་བ་སོགས་གསལ་བོ་ཆགས་ཡོད་པ་རེད། དེ་ཡིན་ན་མཐུན་འབྲེལ་ལ་དོ་སྣང་དང་གཅེས་སྤྲས་བྱེད་རྒྱུ་གལ་ཆེ། མཐུན་འབྲེལ་ཞེས་པ་ཡང་ལུས་ངག་ཡིད་གསུམ་གྱི་སྒོ་ནས་མཛའ་མཐུན་བྱེད་པ་ལས་ཁ་ཙམ་གྱིས་མཐུན་འབྲེལ་བྱེད་པ་ནི་ཁ་དང་ལག་ལེན་འགལ་བས་ན་མཐུན་འབྲེལ་རྣལ་མ་དང་དོན་འབྲས་དང་ལྡན་པ་མ་ཡིན་པར་བཅོས་མ་དང་རྫུན་མ་ལས་འོང་མི་ཐུབ། དེས་ན་དཔལ་འབྱོར་སོགས་གཡོ་ཐབས་སྣ་ཚོགས་ཀྱིས་བསླུ་བྲིད་ཙམ་བྱས་ན་ཡང༌། དོན་ལ་གཞན་ལ་ལུས་ངག་ཡིད་གསུམ་གྱིས་མི་མཐུན་པ་ཁོ་ན་བྱས་ན་རང་གི་བདེ་སྐྱིད་སོགས་བྱ་བ་གང་ཡང་སྒྲུབ་མི་ནུས། དེས་ན་བྱམས་བརྩེའི་ངང་ལུས་ངག་ཡིད་གསུམ་མཐུན་པར་བྱེད་དགོས། དེ་ཡང་ཇི་སྐད་དུ། བདག་གི་སྤྱོད་དང་མཚུངས་པར་གང་སྤྱོད་པ། །དེ་དག་དང་ནི་རྟག་ཏུ་འགྲོག་པར་ཤོག།ལུས་དང་ངག་རྣམས་དང་ནི་སེམས་ཀྱིས་ཀྱང༌། །སྤྱོད་པ་དག་དང་སྨོན་ལམ་གཅིག་ཏུ་སྤྱད། །བདག་ལ་ཕན་པར་འདོད་པའི་གྲོགས་པོ་དག།བཟང་པོ་སྤྱོད་པ་རབ་ཏུ་སྟོན་པ་རྣམས། །དེ་དག་དང་ཡང་རྟག་ཏུ་འཕྲད་པར་ཤོག །ཅེས་གསུངས་པ་བཞིན་གཞན་ལ་བྱམས་བརྩེ་བསྒོམས་ནས་ཡིད་འོང་གཅེས་འཕང་གི་སེམས་ལ་བརྟེན་ན། དེའི་འབྲས་བུ་ལུས་ངག་ཞི་འཇམ་དང་གཡོ་སྒྱུ་མེད་པའི་བྱ་བ་ཞིག་སྒྲུབ་ཐུབ། དེ་ལྟར་ཐུབ་ན་ཀུན་དང་མཐུན་པ་སྤུན་ཟླ་ལྟ་བུའི་དགའ་ཞེན་ཞིག་བསྐྲུན་ནུས་པ་ནི་ངེས་ཅན་ཡིན། མཐུན་སྒྲིལ་གྱི་ཁེ་ཕན་དང་ནུས་པ་ནི། མི་སུ་ཡིན་ཀྱང་རུང་སྒེར་གཞུང་གང་གི་བདེ་ཐང་གི་བྱ་བ་བསྒྲུབ་ན་གཞན་ལ་མ་བརྟེན་ན་སྒྲུབ་མི་ནུས། གཞན་ལ་བརྟེན་དགོས་ན་མཐུན་འབྲེལ་གལ་ཆེ། ཆུང་ས་ནས་རང་དོན་དུ་བདེ་སྐྱིད་འཚོལ་བ་ལ་གཞན་གྲོགས་མཛའ་བཤེས་དུ་མ་ལ་བརྟེན་ནས་བདེ་སྐྱིད་ཚོལ་དགོས་པ་རེད། དེས་ན་མཐུན་འབྲེལ་ནི་ཤེས་ཡོན་དང་དཔལ་འབྱོར་ཐོབ་ཐང་ཉམས་ལེན་དམ་ཆོས་སོགས་འདོད་དོན་ཐམས་ཅད་ཀྱི་རྒྱལ་ཁའི་རྟེན་གནས་དང་རྟེན་གཞི་ཡིན་པ་འཛམ་གླིང་གི་མཁས་པ་དུ་མས་སྡོམ་ཚིག་བྱས་པ་ལྟར་ཡིན། ཐ་ན་རང་རང་གི་ཁེ་ཕན། རང་རང་གི་བདེ་ཐང་གི་ཆེད་ཡང་མཐུན་འབྲེལ་དགོས། དུས་རབས་ཉེར་གཅིག་པའི་སྐབས་འདིར་འཛམ་གླིང་གི་དཔྱད་ཞིབ་པ་དང༌། ཆེད་མཁས་རྣམ་པ་ཚོས་རྒྱུས་ལོན་དང་དཔྱད་ཞིབ་བྱས་ནས་སྡོམ་རྩིས་ལ་ཞི་བདེ་དང་མཐུན་འབྲེལ་གལ་ཆེ་བར་བཤད་བཞིན་པའི་དུས་ཚོད་ཞིག་ཆགས་ཡོད་པ་རེད། དེ་སྐད་དུ་ནང་ཆོས་ལས། དགེ་འདུན་མཐུན་པ་བདེ་བ་སྟེ། །ཞེས་གསུངས་པ་སོགས་ལ་ཐུགས་ངེས་མཛད་དགོས། གལ་ཏེ་མཐུན་འབྲེལ་དང་མཛའ་མཐུན་བདེ་འཇགས་སོགས་གཏོར་བཤིག་བྱས་ན་རྗེས་ནས་དེའི་ཁུར་དེ་འཁུར་མི་ནུས་པར་མཐུན་པའི་ལམ་ཚོལ་དགོས་པ་རེད། དེ་ཡང་འདས་པའི་ལོ་རྒྱུས་ནང་ལ་མི་བསད་པ་སོགས་ཇི་ལྟར་བྱས་ཀྱང་ཐམས་ཅད་རྗེས་ནས་མཐུན་ལམ་ཚོལ་དགོས་བྱུང་བ་གསལ་བོ་རེད། དེང་དུས་སུ་བརྡ་འཕྲིན་གྱི་དུས་རབས་ལ་འཛམ་གླིང་ཧྲིལ་བོ་ཁྱིམ་ཚང་གཅིག་བཞིན་མཐུན་འབྲེལ་དང་གཏོར་བཤིག་གང་བྱས་ན་ཆེས་སླ་བའི་སྐབས་འདིར་མཐུན་འབྲེལ་དང་ཞི་བདེ་དང་ལྷག་བསམ་འདི་དག་ཧ་ཅང་གལ་ཆེ། དེ་ཡང་མི་མཐུན་པའི་རྒྱུ་རྫུན་ཕྲ་མ་ཚིག་རྩུབ་དང་ལྟ་བ་མི་མཐུན་པ་སོགས་ཡིན་ལ། དེ་ནི་རབ་དང་རིམ་པས་རྣམ་པར་དཔྱད་ན་དམིགས་ཡུལ་ངེས་ཅན་ཞིག་ཡོད་ནས་ཕལ་ཆེར་ཐོག་མར་མ་བྱུང་བར་ངེས་པས་དོན་ཆུང་བ་ཞིག་ཆེ་བསྒྱུར་མི་བྱེད་པ་དང་ལུས་ངག་གི་བྱ་བ་སོགས་མི་འཇུག་པར་བཟོད་སྒོམ་དགོས། དེ་མ་ནུས་ན་མེ་སྟག་ཙམ་གྱིས་རི་བོ་བསྲེག་པ་བཞིན་རང་གཞན་གཉིས་ལ་བདེ་སྐྱིད་ཀྱི་རྩ་བ་གཏོར་བའི་རྒྱུ་ཆེས་དཀའ་ངལ་ཆེ་བ་ཡིན། དེས་ན་བདག་ཅག་གི་སྟོན་པ་ནས་བཟུང་འཛམ་གླིང་གི་ཤེས་ཡོན་གྱི་དཔལ་ལ་གནས་པ་རྣམས་ཀྱིས་མཐུན་འབྲེལ་ལ་བསྔགས་བརྗོད་ཡང་ཡང་གནང་བས་དེ་ལྟར་མཐུན་འབྲེལ་ལ་གཅེས་སྤྲས་བྱེད་རྒྱུ་ལ་འབོད་བསྐུལ་དང་རེ་ཞུའོ། །ཞེས་སྤྲང་འཁྱམས་པ་དངོས་གྲུབ་དཔལ་གྱིས་ཛ་མགོའི་རི་ཁྲོད་བྱང་ཆུབ་ཆོས་རྫོང་གི་བཤད་གྲྭ་ཇོ་ནང་བརྩེ་ཆེན་མཐོ་སློབ་ནས་ནག་ཟླའི་ཚེས༡༦གི་ཐུན་བར་ལ་བྲིས་པའོ། །ཤེས་ཡོན་གྱི་དཔལ་ཡོན་འཚོ་ཐབས། ཤེས་ཡོན་དང་སློབ་སྦྱོང་ཚད་འཕེལ་བའི་བྱེད་ཐབས་ལས་བརྩམས་ནས་ཅུང་ཟད་གླེང་ན། ཤེས་ཡོན་དང་སློབ་སྦྱོང་འཕེལ་རྒྱས་དང་སྤུས་ཚད་དང་ལྡན་པར་འགྲོ་བ་ལ་ཤེས་ཡོན་དོ་སྣང་དང༌། འཆར་གཞི་ཡག་པོ་དང་སྒྲིག་འཛུགས་སྤུས་ལེགས་དང་ལྡན་པ་དགོས། དེ་ལྟར་ཡོད་ན་ཕན་འབྲས་ལྡན་པ་དང་དོན་འབྲས་དང་ལྡན་པ་ངེས་པར་འོང་ངེས་པ་རེད། སློབ་སྦྱོང་གི་བྱེད་ཐབས་དེ་དག་མ་ལྡན་ན་སློབ་སྦྱོང་ལ་དགའ་བ་ཙམ་གྱིས་ཕན་འབྲས་དང་ལྡན་པ་མི་ཡོང༌། སྔོན་གྱི་ལོ་རྒྱུས་དང་ཡིག་ཆ་ལ་བལྟས་ན་འཆར་གཞི་དང་གཅིག་སྡུད་ཀྱི་རྣམ་པ་མེད་པའི་དབང་གིས་བྱ་བ་དུ་མ་མཇུག་ལེགས་པར་མ་བྱུང་བ་གསལ། དེས་ན་འཆར་བཀོད་ཀྱི་གཞི་བཟང་བོ་བྱ་བ་ལ། རྒྱུས་ལོན་བྱེད་དགོས། དེའི་བྱེད་སྟངས་ཡང་སྔོན་བྱོན་སྐྱེས་བུ་དམ་པ་རྣམས་ཀྱིས་བྱ་བ་གང་བྱས་ནས་སྐྱེས་བུ་དམ་པ་འོང་བ་དང༌། དེང་སང་འཛམ་གླིང་གི་མི་འཇོན་ཐང་ཅན་དང་ལྷག་བསམ་པ་དང་ཤེས་ཡོན་པ་དག་གིས་ལས་གང་བྱ་བ་ཅི་བྱས་ནས་རླབས་ཆེན་གྱི་བྱ་བ་བསྒྲུབས་པ་སོགས་ལ་དཔྱད་ཞིབ་བྱེད་དགོས། རང་ཉིད་དེ་དག་གི་བྱེད་སྟངས་དང་མཐུན་མིན་སོགས་རང་ལ་ཞིབ་འཇུག་དགོས། རང་གི་གནས་བབས་དང་གནས་སྟངས་འཕེལ་ཕྱོགས་ཤེས་པ་ནི་ཡར་རྒྱས་ཀྱི་རྨང་གཞི་ཞིག་ཡིན། མདོར་ན་སེམས་ནང་དུ་འཆར་གཞི་ལེགས་པ་དགོས། སྒྲིག་འཛུགས་ནི། འཁོར་ཡུག་བཟང་པོ་བསྐྲུན་རྒྱུ་དེ་ཡིན། དེ་ཡང་སྒྲིག་ལམ་དང་སྦྱང་གྲོགས་ཆ་རྐྱེན་སྤྱོད་ལམ་སོགས་ཕུན་སུམ་ཚོགས་པ་བྱེད་དགོས་རྒྱུ་དང༌། བསྐྱར་སྦྱང་དང་ཡང་སྦྱོང་བྱེད་པ་སློབ་སྦྱོང་གི་གཞི་རྩ་དང་འཕེལ་བའི་ཐབས་མཁས་ཞིག་ཡིན། སློབ་སྦྱོང་སོགས་བྱ་བ་གང་བྱས་ན་ཡང་དུས་ཚོད་དམ་འཛིན་གལ་ཆེ་བ་རེད། སྤྱིར་དུས་ཚོད་ཀྱི་རྫོགས་ལྡན་ཡིད་འོང་གི་ལང་ཚོ་འདི་རྫོགས་པར་བྱེད་པ་དང༌། མི་འདོད་པའི་ཐོད་པའི་གཉེར་མ་དང༌། སྐྲ་དཀར་བ་སོགས་འདིས་བྱས་པ་རེད། དེ་མ་ཟད་འཇིག་རྟེན་གྱི་རྩ་ཆེའི་ནོར་བུ་དང་ལྷུན་གྲུབ་ཀྱི་བྱ་དངོས་སོགས་དུས་ཚོད་ཀྱིས་རྫོགས་པར་བྱེད་པ་རེད། འདས་མ་འོངས་ད་ལྟ་དུས་གསུམ་གྱི་ནང་ནས་ད་ལྟའི་དུས་ཚོད་མྱུར་དུ་འགག་བཞིན་པ་ཞིག་ཡིན། ཉིན་གཅིག་གི་དུས་ཚོད་ཉེར་བཞིའི་ནང་ནས་ཆུ་ཚོད་དྲུག་ཙམ་གཉིད་ལོག་དགོས་ལ་དེ་མིན་གཉིད་མ་ལོག་ནའང་ལུས་སྲོག་ལ་མི་གནོད་པར་ཚན་རིག་ཆེད་མཁས་རྣམས་ཀྱིས་བཤད་ལ། བདག་ཅག་གི་སྟོན་པའི་ཞལ་ནས་མཚན་སྟོད་སྨད་ལ་མི་ཉལ་བར་དགེ་སྦྱོང་ལ་བརྩོན་དགོས་པར་གསུངས་པ་ལྟར་དང༌། དེའི་ལྷག་མའི་ཆུ་ཚོད་བཅོ་བརྒྱད་པོ་ཟས་ཟ་བ་སོགས་མ་གཏོགས་ཕལ་ཆེར་སློབ་སྦྱང་ལ་བརྩོན་ཐུབ་ན་སློབ་སྦྱོང་ཕུན་སུམ་ཚོགས་པ་ཞིག་འགྲུབ་ངེས། སང་ཉིན་སང་ཉིན་ཞེས་ཕྱི་བཤོལ་གྱི་ལེ་ལོའི་དབང་དུ་སོང་ན་སང་ཉིན་གྱིས་འཇིག་རྟེན་ཕ་རོལ་ཏུ་འགྲོ་བ་རེད། སང་ཉིན་ནི་སློབ་སྦྱོང་སོགས་བྱ་བ་ཐམས་ཅད་ཀྱི་ཆེས་དགྲ་བོ་ཞིག་ཡིན། དེས་ན་དུས་ཚོད་དེ་སློབ་སྦྱོང་སྐབས་སུ་ཆེས་ཐུང་ཐུང་ཞིག་དང་ཆེས་རྩ་ཆེན་དུ་རྩིས་ནས་གོ་སྐབས་མི་ཤོར་བར་བྱེད་དགོས། སློབ་སྦྱོང་དེ་ཆེས་སྤྲོ་སྣང་གི་བལྟས་ན་དགའ་སྣང་གི་སྒོ་ནས་བྱ་བ་དེ་སྒྲུབ་ཐུབ་པ་ནུབ་ཕྱོགས་ཀྱི་མཁས་པ་དུ་མས་བཤད་ལ། ནང་ཆོས་ལས། བརྩོན་གང་དགེ་ལ་སྤྲོ་བའོ། །ཞེས་དང༌། རིག་པ་ཆུང་ངུའི་དུས་ན་བསླབ། །བ་ནི་དགུན་གྱི་དུས་ན་གསོ། །ཞེས་དང༌། ཡོན་ཏན་མ་ལུས་བརྩོན་འགྲུས་རྗེས་འགྲོ་ཞིང༌། །ཞེས་གསུངས་པ་བཞིན་ནོ། །ཉི་མ་རེ་རེ་ལ་རྩིས་ཞིབ་བྱས་ནས་རང་གིས་ཤེས་མ་ཤེས་སོགས་དབྱེ་ཞིབ་དང༌། ཤེས་པ་རྣམས་དྲན་ཤེས་ཀྱིས་བྱ་ར་བྱས་ནས་གཅེས་སྐྱོང་དང་བདག་གཉེར་བྱེད་དགོས། ཟ་གཉིད་སོགས་བདེ་བ་ཆུང་བ་ཙམ་ལ་མི་ཆགས་པའི་ངང་ནས་དཀའ་སྤྱད་སྡུག་རུས་བྱེད་དགོས། དེ་སྐད་དུ། མཁས་པ་སློབ་པའི་དུས་ན་སྡུག། བདེ་བར་སྡོད་ལ་མཁས་མི་སྲིད། །བདེ་བ་ཆུང་ལ་ཆགས་པ་ཡི། །ཆེན་པོའི་བདེ་བ་ཐོབ་མི་སྲིད། །ཅེས་པ་བཞིན་ནོ། །དེ་ལྟར་བྱས་ན་རང་ཉིད་མདུན་ལམ་ཅན་དང༌། ཕན་འབྲས་ཅན་དང༌། བདེ་སྐྱིད་དང་ལྡན་པ། མི་རིན་ཐང་ཅན་དང༌། གཟི་བརྗིད་དང་ལྡན་པ་ཞིག་འོང༌། ཡང་ཤེས་ཡོན་དང་ལྡན་པ་ཙམ་གྱིས་མི་ཆོག་པར་ཉམས་ལེན་དགོས། ཉམས་ལེན་མེད་ན་ཀུན་སྤྱོད་ལ་སྐྱོན་ཞུགས་ནས་མི་ཚད་ལྡན་ཞིག་འོང་མི་ཐུབ། དེས་ན་ཤེས་ཡོན་དང་ཉམས་ལེན་ཟུང་འབྲེལ་དུ་ལྡན་ན་མི་ཡང་དག་དང་ཚད་ལྡན་ཞིག་འོང་ཐུབ། ཤེས་ཡོན་གོང་འཕེལ་སོང་བ་བཞིན་སྤྱོད་ལམ་ཡར་རྒྱས་ཀྱི་རྣམ་པ་དང་ལྡན་པ་ཞིག་བསྒྱུར་དགོས། དེ་སྐད་དུ། ཐོས་རྟགས་ཞི་ཞིང་དུལ་བ། །སྒོམ་རྟགས་ཉོན་མོངས་ཆུང་བ། །ཞེས་པ་ལྟར་རོ། །དེ་ལྟར་ན་འཆར་གཞི་སྒྲིག་འཛུགས། གཅིག་སྡུད་ཡོད་ན་སློབ་སྦྱོང་སོགས་ལེགས་འགྲུབ་འོང་ངེས། མེད་ན་བྱ་བ་མཇུག་མཐར་མི་རྫོགས་པར་གསལ། དེ་ལྟར་མདོར་མཚོན་པ་ཙམ་བཤད་པ་ནི། རྟགས་དཔྱད་ཞིབ་འཇུག་བྱས་ནས་ཤེས་ཡོན་བྱེད་སྟངས་དང༌། དེའི་གྲུབ་འབྲས་སམ་ཕན་འབྲས་ཕུན་སུམ་ཚོགས་པ་ཡོད་མེད་དཔྱད་གཞིར་བཀོད་པའོ། །ཞེས་སྤྲང་འཁྱམས་པ་དངོས་གྲུབ་དཔལ་གྱིས་ཛ་འགོའི་རི་ཁྲོད་བྱང་ཆུབ་ཆོས་རྫོང་གི་བཤད་གྲྭ་ཇོ་ནང་མཐོ་སློབ་ནས་ནག་ཟླའི་ཚེས༡༧གྱི་ཐུན་བར་ལ་བྲིས་པའོ། ། དུས་རབས་དང་བསྟུན་ནས་སྤྱོད་ལམ་གྱི་ལམ་སྟོན།དུས་རབས་དང་བསྟུན་ནས་སྤྱོད་ལམ་གྱི་ལམ་སྟོན། ཀུན་སྤྱོད་བཟང་པོ་བྱེད་ཐབས་ལས་བརྩམས་ནས་ཅུང་ཟད་གླེང་ན། ཀུན་སྤྱོད་བཟང་པོ་ཞེས་པ་ནི། ཀུན་སློང་བཟང་པོ་དང༌། ལུས་ངག་གི་སྤྱོད་པ་བཟང་པོ་ཞིག་ཡིན། དེ་ཡང་ཐོག་མར་འཇིག་རྟེན་འདིར་སྤྱོད་ཤེས་ཀྱི་སེམས་འདི་སྐྱེས་པ་རེད། དེ་ཡང་བཟང་ངན་སྐོར། བདེན་རྫུན་སྐོར། ལེགས་ཉེས་ཀྱི་སྐོར་དབྱེ་ཞིབ་བྱེད་པའི་ལྟ་ཚུལ་གྱི་སེམས་ཤེས་སྐྱེས། དེ་ནས་ཆོས་དང་འཇིག་རྟེན་གྱིས་ཕན་བཏགས་པ་ལ་བཟང་ལན་དང་དྲིན་འཇལ་བ་ལ་མི་བཟང་པོ་དང༌། དེ་མི་འཇལ་བ་ལ་སྙིང་རྗེ་སོགས་མེད་པའི་མི་ངན་པ་ཞེས་གླེང་བ་བྱུང་པ་ནས་ཀུན་སྤྱོད་ཀྱི་ལྟ་སྤྱོད་འདི་བྱུང་བར་གྲགས། ཀུན་སྤྱོད་བཟང་པོ་ཞེས་པ། འཆལ་སྤྱོད་སྡོམ་པའི་བྱ་སྤྱོད་དམ་དེ་སྡོམ་པའི་རང་བྱུང་གི་ཁྲིམས་ལ་གནས་པ་ལ་ཟེར། དེ་ཡང་ཀུན་སྤྱོད་ཚད་ངེས་ཅན་ཞིག་དགོས་པ་ལ། དང་པོ་ཆོག་ཤེས་དགོས། ཆོག་ཤེས་བསྟེན་པ་ལ་འདོད་རྔམ་ཆུང་བ། དགོས་མེད་སྟོང་གཏམ་གྱི་རིགས་ལ་ཁ་ཚོད་ཟིན་པ་དགོས། རང་གིས་དུས་རྣམ་ཀུན་ཏུ་བྱ་བ་ཅི་བྱེད་ན་ཡང་ཀུན་སྤྱོད་འཛིན་ཚུལ་དང༌། རང་གི་སྐྱོན་ཡོན་འཛིན་བཏང་ཚོད་ཟིན་པ་དགོས། ཀུན་སྤྱོད་ངན་པ་བཀག་སྡོམ་བྱེད་མ་ནུས་ན་ཀོ་ལོང་རུ་ང་ཕྲག་དོགམཁོན་འཛིང་དང་འཁྲུག་པ། ནང་དམེ་བྱེད་པ། དབྱེན་སྦྱོར། ཕྱོགས་རིས། ང་རྒྱལ་གྱི་དུས་འདའ་བའི་བསྐལ་ངན་དར། དེ་ལྟར་ཆོག་ཤེས་ཀྱི་སྟེང་ནས་ཀུན་སྤྱོད་འཕེལ་རྒྱས་འགྲོ་དགོས། །གཉིས་པ་བྱ་བ་ཆེ་ཆུང་གང་བརྩམ་པར་ཁས་བླངས་ན་འཆར་གཞི་ལྡན་པའི་སྒོ་ནས་བྱ་བ་དེ་འགྲུབ་པ་ལ་བརྩོན་དགོས། དེ་ལྟར་མ་བརྩོན་ན་ཁ་དོན་ཚིག་ལ་མ་གནས་པ་ཡིན། དེ་མ་གནས་ན་བྱ་བཞག་དེ་ལས་ཉམས་འགྲོ་བ་རེད། བྱ་བཞག་གང་བསྒྲུབ་ན་གཡོ་སྒྱུ་དང༌། མགོ་སྐོར། སླུ་བྲིད། ཁ་དཀར་སྙིང་ནག་སོགས་བྱས་ན་ཀུན་སྤྱོད་མ་དག་པའམ་མ་གཙང་བ་ཡིན། དེས་ན་བྱ་བ་གང་སྒྲུབ་དུས་ཁ་ཞེ་གཉིས་མེད། ལྷག་བསམ་རྣམ་དགདུས་ཚོད་དམ་འཛིན། བདེན་པ་དྲང་མོ་དྲང་རྐྱང་གི་ལམ་ལས་གོལ་མི་རུང༌། དེ་ལྟར་བྱས་ན་ཀུན་སྤྱོད་ཚད་མཐོན་པོར་འགྲོ་ཐུབ་ངེས། གསུམ་པ་ཀུན་སྤྱོད་ཚད་འཕེལ་ཐབས་ལ་སེམས་རྒྱ་ཆེར་བསྐྱེད་པ་གལ། དེ་ཡང་བྱ་བ་འགྲུབ་མ་འགྲུབ་ལ་བརྟེན་ནས་ཡི་ཆད། ཡི་མུགབློ་ཕམ་སོགས་མི་བྱེད་པར་བཟོད་སྒོམ་བྱེད་དགོས། གཏམ་སྤྱོད་ཡིད་འོང་གི་བྱ་བ་གྲུབ་འབྲས་ལྡན་པ་གལ། ད་དུང་རྒན་གཞོན་དང་ཡོན་ཏན་དང་ཡོན་ཏན་ཅན་ལ་གུས་ཞབས། མི་སུ་ལ་ལྷག་བསམ་ཡོད། མི་སུ་ལ་འཇོན་ཐང་ཡོད། མི་སུས་བསྟན་འགྲོའི་དོན་བསྒྲུབ་ནུས་པ་ལ་རྒྱབ་སྐྱོར་རོགས་རམ་དང་བསྔགས་བརྗོད་བྱ་དགོས། དེའི་སྟེང་ནས་ནང་བའི་ཀུན་སྤྱོད་དང་དུས་རབས་ཉེར་གཅིག་པའི་ཀུན་སྤྱོད་གང་གི་དབང་དུ་བྱས་ན་གཙང་སྦྲ་བྱེད་དགོས། སྔོན་སྲོལ་རྗེས་ལུས་ཀྱི་ལྟ་བ་མཆོག་ཏུ་བཟུང་ནས་ཚི་དྲེག་གིས་གདོང་དང་གོས་གཡོག་ན་རྗེས་ལུས་ཀྱི་རྣམ་པའི་དན་རྟགས་ཡིན་པར་མ་ཟད། འཕྲོད་རྟེན་ལ་གནོད་ཚབས་ཆེ་ཤོས་སུ་གསལ། ལུས་དང་གོས་ལ་གཙང་སྦྲ། མཛེ་དང་མཆིན་ནད་སོགས་འགོས་ནད་རིགས་ལ་དོགས་འཛེམ། ནང་ཆོས་ལས་བཤད་པ་ལྟར་བླ་མ་དང་འགལ་བའི་དམ་ཉམས་སོགས་དང་འགྲོགས་འདྲིས་མི་བྱེད། དེ་ལྟ་བུའི་སྒོ་ནས་ཀུན་སྤྱོད་ཚད་ལྡན་དགོས། ཀུན་སྤྱོད་ཚད་ལྡན་ཡོད་ན་ཁེ་ཕན་དང་བདེ་སྐྱིད་དང་དབང་ཐང་དང་མངའ་ཐང་སྟོབས་འབྱོར་ལྡན་པ། སྤྱི་ཚོགས་ཁྲོད་ན་ཀུན་གྱི་རེ་སྨོན་བྱེད་ས་དང༌། མིག་དཔེར་ལྟ་ས། སེམས་མགུལ་ཐེབས་ཐུབ། དཔེར་ན་སྤོས་དྲི་ཞིམ་པ་ཞིག་ཡོད་ན་དྲི་ངད་དེས་ཁྱབ་ནས་གཞན་ལ་དགའ་ཚོར་སྐྱེ་བ་ལྟར་ཀུན་སྤྱོད་དེས་གཞན་ལ་སྤྲོ་སྣང་དགའ་བ་ཡིད་འོང་གི་བསམ་བློ་སྐྱེ་ཐུབ། ཇི་སྐད་དུ། སྤྱོད་ལམ་གཙང་བས་ཀུན་གྱིས་ཡིད་དུ་འཐད། །སྨྲ་བ་ཉུང་བས་ཕོག་ཐུག་གཡེང་བ་མེད། །ཅེས་སོ། །ཀུན་སྤྱོད་ཚད་ལྡན་མེད་ན་གཞན་གྱིས་ཡིད་ཆེས་མི་བྱེད། གཞི་རྩའི་མདུན་ལམ་དང་ཤེས་རིག་སོགས་གང་ཡང་འགྲུབ་བྱེད་དང་བྲལ་བ་རེད། དེས་ན་ཀུན་སྤྱོད་བཟང་པོ་ལ་འབད་པར་རིགས། སྔོན་གྱི་ལོ་རྒྱུས་ཕྱིར་དྲན་ནམ་དེ་ལ་གཞིག་ན་རྒྱལ་བོ་དང་དམག་དཔོན་བླ་དཔོན་འགའ་ཞིག་རང་ཉིད་ཆེ་ཐང་དང་མཚན་སྙན་གྲགས་དང་སྟོབས་འབྱོར་མངའ་ཐང་གི་ཆེད་ཁོ་ན་སྒྲུབ་པའི་དབང་གིས་དེང་སྐབས་སུ་མིང་ཙམ་ལས་རྟོག་དཔྱོད་བྱེད་པ་ཆེས་ཉུང་ངུར་གནས། བོད་གངས་རིའི་ལྗོངས་ཀྱི་མཁན་སློབ་ཆོས་གསུམ། ས་སྐྱའི་གོང་མ་རྣམ་ལྔ། བཀའ་བརྒྱུད་པའི་མར་མི་དྭགས་གསུམ། ཇོ་ནང་ཡབ་སྲས་བཅོ་ལྔ། རྗེ་ཡབ་སྲས་གསུམ་སོགས་ཀུན་སྤྱོད་ཁུར་སྟངས་ལེགས་པའི་དབང་གིས་ད་ལྟའི་ཆ་ལ་ཡང་དགའ་བ་དང་སྤྲོ་ཤུགས་མ་ཉམས་པར་གནས་པ་དང༌། དེ་དག་གི་རྗེས་དྲན་དང་རྟོག་དཔྱོད་ཞིབ་འཇུག་བྱེད་བཞིན་པའོ། །དེང་སང་གི་དུས་བཞིན་སྤྱི་ཚོགས་ནང་མགོ་སྐོར་སླུ་བྲིད། གཡོ་སྒྱུ་ཁྲམ་གསུམ། ངོ་ཚ་ཁྲེལ་མེད། རང་མཐོང་ངམ་རང་སྣང་ཆེན་པོ། རང་ལྟ་མཆོག་འཛིན། གཞན་རྨ་འབེབས། རང་བསྟོད། ཕྲག་དོག་ཞེ་སྡང་ཧ་ཅང་དར་རྒྱས་ཀྱི་སྐབས་སུ། སྤྱི་ཚོགས་ཀྱི་མིའི་སེམས་ནང་ལ་རྟག་ཏུ་སྐྱོ་གདུང་དང༌། ཚོར་གདུང༌། དོགས་ཟོན། ཞེན་ལོག་ངང་གནས་དགོས་པ་འབྱུང་ངེས་ལ། དེ་སྐབས་སུ། ཀུན་སྤྱོད་བཟང་པོ་སེམས་དཀར་གཞུང་དྲང་གི་གཤིས་ཀབབ་ཆགས་བརྟན་རླིང་གི་སྤྱོད་པ། གཉེན་དང་གྲོགས་དང་བཤེས་གཉེན་ལ་ཕྱི་ཐག་རིང་བ། གྲོས་ངན་ལ་མི་ཞུགས་པའི་མི་ཞིག་ཡོད་ན་ཆེས་མངོན་གསལ་ཅན་ཞིག་དང༌། ཡིད་སྨོན་དང་རེ་སྨོན་གྱི་གནས་དང༌། དཔལ་ཡོན་དང་རིག་གནས་ལ་ཕན་ཐོགས་གི་གྲུབ་འབྲས་བླ་ན་མེད། དཔེར་ན་འཇིག་རྟེན་ན་མི་ཞིག་ཚོད་བགམ་པའམ་བརྟག་དཔྱད་བྱེད་སྐབས་བྱ་སྤྱོད་ལ་གས་དགོས་པ་ལས་ཁ་ཡིས་བཤད་ཚོད་ལ་མི་ལྟོས་པར་འཛམ་གླིང་གི་མཁས་དབང་དུ་མས་གཏམ་དུ་བཤད། ཀུན་སྤྱོད་ལེགས་པ་མེད་ན་མི་སྣ་རླབས་ཆེན་འབྱུང་མི་སྲིད། ཐ་ན་སྒྱུ་རྩལ་ལ་མཁས་པ་སོགས་དཔྱད་སྒོ་ཅན་གྱི་མཁས་ཆེན་མི་འབྱུང་བར་གསལ། གོང་ཞུས་ཀྱི་ཀུན་སྤྱོད་དེ་དག་ཆོས་འཇིག་རྟེན་གཉིས་ཀ་ལ་མཁོ་དགོས་དག་ཡིན། ཆོས་ཀྱི་ཀུན་སྤྱོད་ཡང་ནང་བ་སངས་རྒྱས་པ་ཞིག་ཡིན་ན་དེའི་སྟེང་དུ་སངས་རྒྱས་ཀྱི་གསུངས་པའི་མི་དགེ་བཅུ་སྤངས་བའི་དགེ་བཅུ་ལ་གནས་པ་དང༌། སྐྱབས་འགྲོའི་བསླབ་བྱ་ལ་སློབ་དགོས་པ་དང༌། རབ་བྱུང་ཞིག་ཡིན་ན་རང་རང་གི་བཅས་ཁྲིམས་ལས་མི་འདའ་བར་སྲུང་དགོས། ཇི་སྐད་དུ། ལུས་ཀྱི་སྡོམ་པ་ལེགས་པ་དང༌། །ངག་གི་སྡོམ་པ་ལེགས་པ་དང༌། །ཡིད་ཀྱི་སྡོམ་པ་ལེགས་པ་ཡིས། །ཐམས་ཅད་དུ་ནི་སྡོམ་པ་ལེགས། །ཞེས་པ་དགེ་སློང་གིས་ལུས་ངག་གི་སྤོང་བདུན་འཁོར་བཅས་སྤངས་དགོས་པ་སོགས་སོར་བྱང་སྔགས་ཀྱི་བསླབ་བྱ་མང་པོ་ཡོད་ཀྱང་སྐབས་འདིར་དགོས་གལ་ཆེར་མེད་པས་མ་སྤྲོས། སྐབས་འདིར་དགེ་འདུན་པ་རྣམས་ལ་ཞུ་བ་ནི། སྤྱོད་ལམ་འདྲ་མིན་མང་བོ་བྱས་ན་རང་གི་མདུན་ལམ་མ་ཟད་དགེ་འདུན་པ་སྤྱི་དང༌། ནང་བསྟན་སྤྱི་ལ་གནོད་སྐྱོན་ཐེབས་པས་ན་ཐུགས་བསམ་གནང་དགོས། རྒྱུད་ཀྱི་ཡོན་ཏན་མཐོང་བ་དཀའ་ན་གྲྭ་བ་ཚད་ལྡན་ཡིན་མིན་སྤྱོད་ལམ་གྱི་སྒོ་ནས་རྗེས་སུ་དཔག་དགོས། དེས་ན་གྲྭ་བ་ཀུན་གྱིས་ཐུགས་ངེས་མཛད་དགོས། འོན་ཀྱང་དེང་སང་གྲྭ་བ་མ་ཡིན་ཀྱང་གྲྭ་ཆས་བྱས་ནས་རྐུས་དང་མི་བསད་པ་སོགས་བྱ་བ་དཔྱད་མི་བཟོད་པ་བྱེད་མི་དག་ནི་གྲྭ་བ་མ་ཡིན་པར་གྲྭ་བ་རྫུན་མ་ཡིན་པར་སྤྱི་ཚོགས་ལ་ར་འཕྲོད་དགོས། དེ་དག་གྲྭ་བ་མ་ཡིན་པས་དེའི་བྱ་བ་གྲྭ་བའི་བྱ་སྤྱོད་དང་གྲྭ་བའི་ནོར་འཁྲུལ་དུ་རྩི་མི་རུང༌། དེས་ན་ནོར་འཁྲུལ་དབྱེ་ཞིབ་དགོས། ཡང་ཁ་ཅིག་འདོད་རྔམ་གྱི་དབང་གིས་ཁང་པ་རྫིག་པོ། རླངས་འཁོར་རྫིག་པོ། འཁོར་གཡོག་མོ་རིགས་མཛའ་མོ་ཁོ་ན་ལ་སྤྱོད་པ་ནི་ཆོས་པ་སྤྱིའི་མཚན་སྙན་ལ་གནོད་ངེས་པས་དེ་དག་ནི་བོད་དང་སྤྲུལ་རིགས་སྤྱི་ལ་གནོད་ཚབས་ཆེ་བ་ཡིན་པར་ངོ་འཕྲོད་དགོས། སྟོན་པའི་རྗེས་འབྲང་རྣམས་བྱ་བ་ཉུང་བ་དོན་ཉུང་བ་ཆོག་ཤེས་པ། ཀུན་སྤྱོད་གཙང་བ་ཡིན་པས་ན་དེའི་རྗེས་སུ་སློབ་དགོས། དཔེར་ན་ཆོས་སྡེ་ཞིག་ཡིན་ན་ཀུན་སྤྱོད་མི་གཙང་ན་ཡིད་ཆེས་ཀྱི་དད་མོས་ལོག་ནས་རྒྱབ་སྐྱོར་རོགས་རམ་དང་བསྙེན་བཀུར་བྱེད་མི་མེད་ན་ཆོས་སྡེ་རིམ་གྱིས་སྟོང་འཇིག་འགྲོ་ཉེན་ཆེ། འཆལ་སྤྱོད་སྡོམ་ནས་ཀུན་སྤྱོད་བཟང་ངན་ཤེས་པ་གལ། ཀུན་སྤྱོད་བཟང་བོ་དགོས་པ་གལ་ཆེན་གནད་རྩ་ཆེ་བས་དེང་དུས་སུ་འཛམ་གླིང་གི་མཁས་དབང་དུ་མས་ཀུན་སྤྱོད་ལས་བརྩམས་ནས་དཔྱད་བརྗོད་སྤེལ་བཞིན་མཆིས། བརྗོད་དགོས་མང་ཡང་རེ་ཞིག་དེ་ཙམ་མོ། །ཞེས་སྤྲང་འཁྱམས་པ་དངོས་གྲུབ་དཔལ་གྱིས་ཛ་འགོའི་རི་ཁྲོད་བྱང་ཆུབ་ཆོས་རྫོང་གི་བཤད་གྲྭ་ཇོ་ནང་བརྩེ་ཆེན་མཐོ་སློབ་རྟག་བརྟན་ལྔ་རིག་དར་རྒྱས་གླིང་ནས་ནག་ཟླའི་ཚེས ༡༩ཐུན་བར་ལ་བྲིས་པའོ། ། གཏམ་ཚོགས་མ་བཅོས་ལྷུག་པ།གཏམ་ཚོགས་མ་བཅོས་ལྷུག་པ་ཞེས་བྱ་བ་བཞུགས་སོ། ། དེ་ལ་གང་གླེང་བར་བྱ་བ་ནི་གངས་ཅན་སཱ་ལའི་སྨན་ལྗོངས་ཀྱི་སྲིད་འདིར་མཉམ་མེད་ཐུབ་པའི་དབང་པོའི་ལུང་རྟོགས་ཀྱི་བསྟན་པ་འཛིན་པའི་སྒྲུབ་བརྒྱུད་ཤིང་རྟ་བརྒྱད་དམ་སྔ་འགྱུར་རྙིང་མ་བ། ས་སྐྱ་བ། བཀའ་བརྒྱུད་པ། ཇོ་ནང་པ། དགེ་ལུགས་པ་དང་ལྔ་ཡོད་ལ། དེ་དག་ཐམས་ཅད་རྣལ་འབྱོར་ཅན་གྱིས་ཉམས་མྱོང་གིས་དཔྱད་ན་དགོངས་པ་གཅིག་དུ་འབབ་ངེས་དེ། དགེ་ལྡན་སྙན་བརྒྱུད་ལས། ལྷན་གཅིག་སྐྱེས་སྦྱོར་གའུ་མ། །ལྔ་ལྡན་རོ་སྙོམས་ཡི་གེ་བཞི། །ཞི་བྱེད་གཅོད་ཡུལ་རྫོགས་ཆེན་དང༌། །དབུ་མའི་ལྟ་ཁྲིད་ལ་སོགས་པ། །སོ་སོར་མིང་འདོགས་མང་ན་ཡང༌། །ངེས་དོན་ལུང་རིགས་ལ་མཁས་ཤིང༌། །ཉམས་མྱོང་ཅན་གྱི་རྣལ་འབྱོར་བས། །དཔྱད་ན་དགོངས་པ་གཅིག་ཏུ་འབབ། །ཅེས་གསུངས་པ་ལྟར་ཡིན་མོད་ཀྱང༌། རང་ཅག་རྣམ་ཀྱི་ལས་སྨོན་གྱི་ཐེབས་པའི་ཆོས་བརྒྱུད་ནི། དཔལ་རྒྱལ་བ་ཇོ་ནང་བ་དེ་ཉིད་ཡིན་ལ། གསེར་སྦྱང་བཙོ་མ་ལྟ་བུའི་ཆོས་བརྒྱུད་འདི་ཉིད་ཀུན་མཁྱེན་ཡབ་སྲས་སོགས་ཀྱི་དུས་སུ་འཆད་རྩོད་རྩོམ་གསུམ། ཐོས་བསམ་སྒོམ་གསུམ། བཤད་སྒྲུབ་ལས་གསུམ་གྱི་བསྟན་པ་ཆེས་ཆེར་འཕེལ་ཡོད་མོད་ཀྱང༌། ཉེ་བའི་དུས་རབས་ཀྱི་ནང་རྐྱེན་དབང་གིས་ཆོས་བརྒྱུད་འདིའི་བཤད་སྒྲུབ་སོགས་ལ་ཉམས་ཆག་ཆེར་སོང་བ་དང་འགྲོ་བཞིན་པའོ། །དེ་ལྟར་འགྲོ་བའི་རྐྱེན་ནི། ཕྱིའི་རྐྱེན་སྐྱེས་བུའི་བསམ་སྦྱོར་ངན་པ། ནང་སྐྱེས་བུའི་བསོད་ནམས་དམན་པ། གྲྭ་རྒྱུན་བདག་སྐྱོང་ལ་མ་མཁས་པ། བསྟན་འཛིན་གྱི་མིང་འཛིན་པ་རྣམས་ཀྱིས་ཐོབ་གོ་སའི་དུས་འདའ་བ་མ་གཏོགས་ལུང་རྟོགས་ཀྱི་བསྟན་པའི་མིང་ཙམ་ཤེས་པ་ལས་བཤད་སྒྲུབ་ཀྱི་སྒོ་ནས་བསྟན་པ་འཛིན་པ་ལུགས་གཉིས་བྱ་བཞག་མ་ཤེས་པ་སོགས་ནི་བསྟན་པ་ཉམས་པའི་རྒྱུ་འདས་ཟིན་པ་དེ་གའོ། །དེ་ནི་ངེས་དོན་སྙིང་པོའི་བསྟན་པ་ལ་ཐུགས་ཁྲལ་གནང་བ་རྣམས་ཀྱིས་རང་འདོད་གཅེས་འཛིན་དེ་ཅུང་ཟད་བཞག་ནས། སློབ་དཔོན་དབྱིག་གཉེན་གྱི་ཞལ་ནས། སྟོན་པའི་དམ་ཆོས་རྣམ་གཉིས་དེ། །ལུང་དང་རྟོགས་པའི་བདག་ཉིད་དོ། །དེ་འཛིན་བྱེད་དང་སྨྲ་བྱེད་པ། །སྒྲུབ་པར་བྱེད་པ་ཁོ་ནའོ། །ཞེས་གསུངས་པ་ལྟར་སངས་རྒྱས་ཀྱི་བསྟན་པ་ལུང་རྟོགས་གཉིས་སུ་ངེས་ལ། དེ་འཛིན་པར་བྱེད་པ་ཡང་ལུང་གི་བསྟན་པ་ལ་དད་པའི་སྒོ་ནས་ཐོས་བསམ་སྒོམ་གསུམ་བྱས་ནས་གཞན་ལ་སྟོན་པར་བྱེད་པ་དང༌། རང་གིས་ཚུལ་བཞིན་དུ་སྒྲུབ་པར་བྱས་ན་སངས་རྒྱས་ཀྱི་བསྟན་པ་འཛིན་པ་ཡིན་པ་ལས་ཕྱིའི་ས་རྡོ་ཞིག་གི་སྟེང་དུ་མི་གནས་པ་ཤེས་དགོས། རྟེན་བཞེངས་བྱས་ན་ཀུན་སློང་རྣམ་པར་དག་ན་ཚོགས་ཅུང་ཟད་བསག་སྲིད་ཀྱང་ལུང་རྟོགས་ཀྱི་བསྟན་པ་འཛིན་པ་དང་བྱ་ར་བྱེད་པ་བྱེ་བ་བརྒྱ་སྟོང་གི་ཆར་ཙམ་ཡང་མེད་དོ། །དེས་ན་བསྟན་པའི་གཞི་མ་དགེ་འདུན་ཡིན་པས་དགེ་འདུན་གྱི་སྡེ་བཙུགས་ནས་བཤད་སྒྲུབ་ལ་ངེས་པར་བརྩོན་པ་གལ་ཆེའོ། །དེ་ཡང་དགེ་འདུན་གྱི་སྡེ་འཕེལ་བ་ལ་གྲྭ་རྒྱུན་ལ་རག་ལས་པའི་དེ་འཚོལ་སྡུད་བྱས་ན་བསྟན་འགྲོ་གཉིས་ཀའི་དོན་དུ་འགྱུར་བ་ཡིན་ལ། དགེ་འདུན་བསྡུས་ནས་ཆོས་འདུལ་བའི་ལག་ལེན་བཞིན་འགྲིག་ལམ་ལེགས་པ་ཞིག་ངེས་པར་དགོས་ཏེ། དེ་མེད་ན་མི་རྒོད་ཀྱིས་ལུང་བ་གང་བར་འགྱུར་སྲིད། དེ་ལྟར་བསྟན་གཞི་དགེ་འདུན་གྱི་སྡེ་བཙུག་ནས་དགེ་འདུན་པ་རྣམས་ཀྱིས་དགྲ་འདུལ་གཉེན་སྐྱོང་ཚོང་ཁེ་སོགས་བྱས་ན་ཚེ་འདིར་ཡང་མི་བདེ་བ་དང༌། ཐར་བའི་སྲོག་རྩ་གཅོད་པར་འགྱུར་ཏེ། ཇི་སྐད་དུ། མ་ཤེས་འཁོར་བ་བདེན་པར་བཟུང༌། །དགྲ་འདུལ་གཉེན་སྐྱོང་བྱེད་པ་དེ། །གདུག་རྩུབ་ཚེར་མའི་གདན་དང་འདྲ། །དེ་ནི་ནམ་ཡང་བདེ་དུས་མེད། །ཐར་བ་ཐོབ་པ་ག་ལ་སྲིད། །ཅེས་གསུངས་པའི་ཕྱིར། ཡང་དཔལ་མགོན་འཕགས་པ་ཀླུ་སྒྲུབ་ཀྱྀ་ཞལ་ནས། ཟ་དང་གཉིད་ལོག་འཇིག་དང་འཁྲིག་པ་སྤྱོད། །མི་དང་ཕྱུགས་རྣམས་དེ་དག་མཉམ་པ་ཡིན། །ཆོས་ཀྱི་སྤྱོད་པའི་མི་རྣམས་ཁྱད་པར་འཕགས། །ཞེས་གསུངས་པ་ལྟར་འདོད་ཆུང་ཆོག་ཤེས་ཀྱི་སྒོ་ནས་རྣམ་དཀར་ཐོས་བསམ་གྱི་ལས་ལ་གཞོལ་དགོས། བསྟན་རྩ་དགེ་འདུན་རྣམས་ཁྱིམ་པའི་འདུག་གནས་སུ་གནས་ན་ཉེས་པ་དུ་མས་རྟག་ཏུ་གོས་པར་གསུངས་པས་འདུག་གནས་ཁྱིམ་པ་དང་མི་འདྲ་བར་དབེན་ཞིང་ཉམས་དགའ་བའི་དགོན་སྡེ་ལ་གནས་དགོས་ལ། དེ་ཡང་དགོན་སྡེ་རྣམས་ཀྱི་བླ་སྤྲུལ་བསྟན་བདག་རྣམས་ཀྱིས་ཆོག་ཤེས་བྱེད་དགོས་པ་དང་མི་དགོས་པའི་མཚམས་ལེགས་པར་ཤེས་ནས་གྲྭ་རྒྱུན་དང་ཐོས་བསམ་སྒོམ་གསུམ་སོགས་ལ་ཆོག་ཤེས་མི་བསྟེན་པ་གལ་ཆེ། གལ་ཏེ་ཆོག་ཤེས་བྱས་ནས་བཞུགས་ན་བསྟན་པའི་ཉིན་བྱེད་སྒྲིབ་པའི་བདུད་ཀྱི་བྱེད་ལས་སྙིང་ལ་ཞུགས་པ་ཡིན་ནོ། །དེས་ན་བསྟན་འཛིན་སྐུ་སྐྱེས་རྣམས་ཕྲག་དོག་འགྲན་སེམས་ཀྱི་གཡོ་འོག་མི་འགྲོ་བར་བཤད་སྒྲུབ་ལ་སྒོ་གང་ཐད་ནས་ལག་རྗེས་རེ་འཇོག་དགོས། མཁན་པོ་རྣམས་ཀྱིས་འདོད་ཡོན་བདུད་ཀྱི་གཡབ་མོ་ཡིན་པས་དཔལ་འབྱོར་འཚོལ་སྡུད་སོགས་རང་དོན་ཁོ་ན་སེམས་ལ་མི་བཟུང་བར་ཆོས་སྦྱིན་གྱི་བསོད་ནམས་དང་བསྟན་འགྲོ་ཐུགས་ལ་བཞག་ནས་རྟག་ཏུ་བཀའ་པོད་ལྔ་སོགས་མདོ་སྔགས་རིག་གནས་དང་བཅས་པར་འཆད་རྩོད་རྩོམ་གསུམ་བྱེད་དགོས། ལྷ་ལས་ཕུལ་བྱུང་བསྟོད་པ་ལས། བདག་ནི་སངས་རྒྱས་ཕྱོགས་མི་འཛིན། །སེར་སྐྱ་སོགས་ལ་མི་སྡང་ཡང༌། །གང་ཞིག་རིགས་པར་ལྡན་པའི་ཚིག །དེ་ནི་སྟོན་པར་ཡོངས་སུ་འཛིན། །ཞེས་གསུངས་པ་ལྟར་རང་གི་ལྟ་གྲུབ་དེ་ཡང་གཞན་གྱིས་ཟེར་སྒྲོས་དང་ཕྱོགས་འཛིན་གྱི་གདོན་གྱིས་མ་བསླད་པར་ཀུན་མཁྱེན་རིན་པོ་ཆེ་དང་ཐམས་ཅད་མཁྱེན་པ་ཏཱ་ར་ནཱ་ཐ་སོགས་ཀྱིས་ཇི་ལྟར་བཀའ་སྩལ་བ་བཞིན་ལུང་རིགས་ཀྱིས་སྒྲུབ་པ་ལ་འབད་པར་རིགས་སོ། །དེང་དུས་སུ་རང་ལུགས་ཀྱི་དབང་ལུང་མན་ངག་བཤད་སྒོམ་སོགས་མ་ཉམས་པར་གནས་པ་གོང་འཕེལ་བྱེད་རྒྱུ་དང༌། ཉམས་པ་སོར་ཆུད་པའི་ཐབས་ལམ་ལ་དཔེར་ན་རྒྱལ་ཁབ་ཞིག་ཡར་རྒྱས་འགྲོ་བ་ལ་གཞན་དང་གཞན་ལ་བརྟེན་ནས་ཚན་རིག་ལག་རྩལ་སོགས་སྦྱང་ནས་ཡར་རྒྱས་གཏོང་དགོས་པ་ལྟར་ང་ཚོས་གཟུར་གནས་མཁས་དབང་གདན་འདྲེན་ཞུ་བ། གྲྭ་སར་ཕེབས་པ། བཤད་གྲྭ་འཛུགས་པ། དེ་ལ་མཐུན་རྐྱེན་ལེགས་སྒྲུབ་བྱེད་པ། དགོན་སྡེ་དེའི་བློ་གསལ་གཞོན་ནུ་ཐམས་ཅད་ཀྱིས་ཐོས་བསམ་ལ་ཡུན་རིང་བརྩོན་པ། བླ་སྤྲུལ་རྣམས་ཀྱིས་དབང་ལུང་སྤེལ་བ། ཆོས་བརྒྱུད་རིས་མེད་ལ་མཐུན་ལམ་བཟུང་བ། ཁྱད་པར་རང་ཅག་གི་དགོན་སྡེ་རྣམས་ཀྱིས་ཐུགས་རྩེ་གཅིག་དྲིལ་ངང་ཚོགས་འདུ་དང་བགྲོ་གླེང་སོགས་ལ་དཀའ་ངལ་འཛེམ་མེད་དུ་བྱོན་ནས་བསྟན་པ་འཛིན་སྐྱོང་གནང་བ་སོགས། མདོར་ན་བླ་སྤྲུལ་དང་མཁན་པོ་ཀྲུས་རིན་རྒན་དགེ་བསྐོས་གྲྭ་བཙུན་ལྷ་འབངས་དང་བཅས་པའི་རང་རང་གི་འོས་བབ་ཀྱི་ལས་འགན་རྣམས་ཐོས་ཤོལ་མེད་པར་འབད་བརྩོན་བྱས་ན་ངེས་དོན་དབུ་མའི་ལུགས་བཟང་མི་ནུབ་དར་རྒྱས་སུ་འགྲོ་བའི་རྒྱུར་འགྱུར་རོ། ། ༢༠༡༣ལོའི་ཇོ་ནང་བསྟན་འགྲོ་ཀུན་ཕན་ལྷན་ཚོགས་ཐེངས་དགུ་བའི་སྐབས་སུ་དོན་ཚན་ཉེར་གཅིག་གི་སྙན་ཞུ།༢༠༡༣ལོའི་ཇོ་ནང་བསྟན་འགྲོ་ཀུན་ཕན་ལྷན་ཚོགས་ཐེངས་དགུ་བའི་སྐབས་སུ་དོན་ཚན་ཉེར་གཅིག་གི་སྙན་ཞུ། དགེ་བཤེས་དངོས་གྲུབ་དཔལ། ༡ ཡོན་ཏན་ཐམས་ཅད་ཀྱི་རྩ་བ་བཤེས་གཉེན་བསྟེན་ཚུལ་ལེགས་པ་ཞིག་དགོས་པ་ནི་བཀའ་མདོ་རྒྱུད་ཐམས་ཅད་ལས་ཡང་ཡང་གསུངས་པས་བླ་མ་བསྟེན་ཚུལ་མ་ལེགས་ན་ཚེ་འདིར་ཡང་རྐྱེན་ངན་ཐམས་ཅད་ཐོག་ཏུ་བབ་པ་ཞིག་ཡོང་བ་མཐོང་ཆོས་ཡིན་པས་གཟབ་དགོས། ཆོས་ཚིགས་སུ་བཅད་པ་གཅིག་ཙམ་ཞུས་པ་ནས་བླ་མར་གྱུར་བ་ཡིན་པ་དང༌། དེར་མ་ཟད་དེ་དང་འགལ་བར་བྱས་ན་དམ་ཉམས་ཡིན་ཏེ། ལྷན་ཐབས་འོད་བརྒྱ་འབར་བ་ལས། དཔོན་སློབ་ཕན་ཚུན་འབྲེལ་བ་བརྟག་པ་ནི། ཆོས་ཀྱིས་མ་སྦྲཻལ་གོང་དུ་བྱ་དགོས་ཀྱི། སྔར་བརྟགས་སམ་མ་བརྟགས་གང་ཡིན་ཡང༌། ཆོས་ཀྱི་འབྲེལ་བ་ཐོབ་ནས་སྐྱོན་མི་རྟོག་པར་གུས་པས་བསྟེན་དགོས་ཏེ། ཚིགས་བཅད་གཅིག་ཙམ་ཐོས་པ་ལའང༌། །གལ་ཏེ་བླ་མར་མི་འཛིན་ན། །ཁྱི་ཡི་སྐྱེ་བ་བརྒྱར་སྐྱེས་ཏེ། །སྨེ་ཤ་ཅན་དུ་སྐྱེ་བར་འགྱུར། །ཞེས་གསུངས། དེས་ན་ཕྱིས་ཀྱི་སྐྱེ་བོ་མང་པོ་ཞིག་སྔགས་ཆོས་ལ་དམ་ཚིག་ཡོད་དོ་སྐད་པའི་ཁ་བཤད་བྱེད། སྲུང་ནི་དེ་ལའང་མི་སྲུང༌། མཚན་ཉིད་པ་ལ་དམ་ཚིག་མི་ཡོང་ཟེར་ཞིང༌། མདོ་ཆོས་མང་དུ་ཐོས་པའི་བླ་མ་ལའང་མ་གུས་པ་དང་བརྙས་པ་དང་བཀུར་སྟི་མ་ཡིན་པ་ཇི་ཙམ་བྱས་ཀྱང་ཉེས་པ་མེད་པ་སྐད་སྨྲ་བ་མང་དུ་སྣང་སྟེ། བདུད་ཀྱིས་བྱིན་གྱིས་བརླབས་པ་ཁོ་ནའོ། །ཞེས་དང༌། མདོ་ལུགས་ཐེག་པ་ཆེ་ཆུང་གང་ཡིན་ཡང་རུང་སྟེ། དེ་ལྟ་བུ་ཞུས་པའི་བླ་མ་དེ་ལ་སྡིག་བསགས་ན། སྤྱིར་ཉེས་པ་ཆེ་བར་མ་ཟད་སྔགས་ཀྱི་དམ་ཚིག་ཀྱང་ཉམས་པ་ཡིན་ཏེ། རྒྱུད་རྣམས་ལས་ཀྱང༌། སློབ་དཔོན་མི་སྨད། བླ་མའི་ཐུགས་མི་དཀྲུག་ཅེས་གསུངས་ཀྱི། རྩ་ལྟུང་དང་པོའི་ཡུལ་དུ་རྡོ་རྗེ་སློབ་དཔོན་ཁོ་ནའི་ངེས་གཟུང་མ་མཛད་པ་མང་པའི་ཕྱིར་རོ། །ཞེས་གསུངས་པའི་ཕྱིར་རོ། །༢ རང་ལུགས་སྒྲུབ་བརྒྱུད་ཀྱི་བསྟན་པ་སྐྱོང་ཚུལ་ནི། སྒྲུབ་གྲྭ་ལེགས་པ་ཞིག་ཡོང་བ་ལ་ཐོས་བསམ་སྔོན་འགྲོ་ཅན་གྱི་སྒྲུབ་གྲྭ་ཚད་ལྡན་དགོས། དེ་ཡང་ཟས་ནོར་སོགས་དཔལ་འབྱོར་གྱིས་འགྲན་བསྡུར་མེད་པར་སྒོམ་སྒྲུབ་བྱེད་པ་ལ་འགྲན་བསྡུར་བྱས་ནས་སྒོམ་རྟགས་ཉོན་མོངས་ཆུང་བ་ཞིག་དགོས་ལ། རྡོ་རྗེ་སློབ་དཔོན་རྣམས་ནི་ཇོ་ནང་གི་སྒྲུབ་བརྒྱུད་བསྟན་པའི་མངའ་བདག་ཡིན་པ་དང་རང་གི་ཤེས་རྟོགས་ལ་ཕྲག་དོག་ཆུང་བ་སོགས་བླ་ན་མེད་པའི་ཡོན་ཏན་ལྡན་པའི་བསྟན་པ་འཛིན་སྐྱོང་སྤེལ་གསུམ་ལ་བཀའ་དྲིན་གཞལ་མཐའ་བྲལ། འོན་ཀྱང་ངེས་པར་དུ་སྦྱོར་དྲུག་པ་རྣམས་ལ་སྦྱོར་དངོས་རྗེས་གསུམ་དང་བློ་ལྡོག་རྣམ་བཞི་རིམ་གཉིས་ཀྱི་ལམ་གྱི་རིམ་པ་རགས་ཙམ་སོགས་ཉམས་ལེན་དམིགས་པའི་གནད་རེ་ཤེས་དགོས་པ་ལས། ལོ་གསུམ་རྫོགས་སྐབས་སུ་བསྲུང་བྱ་མ་ཤེས་པའི་དབང་གིས་མ་བྱིན་པ་ལེན་པ་སོགས་བྱས་ནས་སྡོམ་པ་མེད་པ། ཤེས་ཡོན་མེད་པ། ཡོན་ཏན་མེད་པ། སློབ་གསོ་མེད་པ། ཆོས་ཕྱོགས་ལ་འཇིག་རྟེན་ཕལ་བ་ལས་ངན་པ། དཔལ་འབྱོར་སོགས་འདོད་རྔམ་མི་ནག་པ་ཞིག་ལས་ཆེ་བ་ཡིན་ན་མི་འཕྲོ་བརླག་བཏང་བ་ཡིན་པས་ཐོག་མའི་སློབ་གསོ་ལེགས་པར་གནང་བ་གལ་ཆེའོ ། ༢ དགོན་པ་སོ་སོ་ན་བཤད་གྲྭའི་ཁོར་ཡུག་བཟང་པོ་དགོས། རྒྱུ་མཚན་ནི། དུས་རབས་ཉེར་གཅིག་པའི་སྐབས་འདིར་ཤེས་ཡོན་གྱི་དུས་རབས་ཡིན་པ་དང༌། ནང་བ་སངས་རྒྱས་པའི་ཐོབ་བྱའི་དབང་དུ་བྱས་ན་རྣམ་པ་ཐམས་ཅད་ཤེས་པའི་ཡེ་ཤེས་ཡིན་པས་དེ་ཐོབ་པ་རིགས་མཐུན་གྱི་རྒྱུ་ཐམས་ཅད་ལ་སྦྱང་དགོས་པ་དང༌། སྤང་བྱའི་དབང་དུ་བྱས་ན་མ་རིག་པ་སྤང་བྱ་ཀུན་གྱི་རྩ་བ་ཡིན་པས་དེ་སྤང་བ་ལ་རིག་པ་ཡེ་ཤེས་བསྐྱེད་ནས་སྤང་དགོས་པས་ན་ཤེས་བྱའི་གནས་ལ་འབད་པ་གལ་ཆེ།དེས་ན། རྒྱན་ལས། རིག་པའི་གནས་ལྔ་དག་ལ་སྦྱང་བ་མ་བྱས་ན། །འཕགས་མཆོག་གིས་ཀྱང་ཐམས་ཅད་མཁྱེན་ཉིད་མི་འགྱུར་ཏེ། །ཞེས་དང༌། སྤྱོད་འཇུག་ལས། རྒྱལ་སྲས་རྣམས་ཀྱི་མི་སློབ་པའི། །དངོས་ཏེ་གང་ཡང་ཡོད་མ་ཡིན། །ཞེས་དང༌། ས་པཎ་གྱིས། ཤེས་བྱ་ཀུན་ལ་མ་སྦྱང་ན། ཐམས་ཅད་མཁྱེན་པ་ནམ་མཁའི་མཐའ་ལས་རིང༌། །ཞེས་དང༌། མ་སློབ་པ་ལ་ཀུན་མཁྱེན་དུ། །འགྲོ་ན་རྒྱུ་འབྲས་ག་ལ་བདེན། །ཞེས་སོ། །ཤེས་ཡོན་མེད་ན། ཇི་སྐད་དུ། ཤེས་རབ་མེད་ན་ཡུལ་འཁོར་ལ། །བྱམས་པ་ཙམ་གྱིས་སྐྱོང་མི་ནུས། །ཞེས་པ་ལྟར་དགེ་རྒན་སོགས་སྤུས་ཚད་ལྡན་པའི་བཤད་གྲྭ་དགོས་པ་ལས། མི་འཕྲོ་བརླག་བཏང་བའི་རྐྱེན་ལྷག་བསམ་དང་ཤེས་ཡོན་མེད་པའི་དགེ་རྒན། འགྲིག་ལམ་མེད་པའི་རྩེ་ར་ཞིག་འཛུགས་པ་ནི་དོན་མེད་ཡིན་པས་གྲྭ་སར་འགྲོ་ནས་སློབ་སྦྱོང་ལེགས་པར་གནང་བ་རྣམས་ལ་བཀག་འགོག་མི་བྱེད་རྒྱུ་གལ་ཆེ། གྲྭ་སར་ཕེབས་ནས་སློབ་གཉེར་ལེགས་པར་གནང་བ་ལ་ཆགས་སྡང་གི་དབང་གིས་བར་ཆད་བྱེད་མི་རུང་བ་ནི། ཇི་སྐད་དུ། སྡིག་ཅན་ཡིན་ཞེས་རྭ་ཅན་མི་འབྱུང་ཡང༌། །གཅེས་ཤིང་ཕན་པའི་འཛུམ་གྱིས་ཟོལ་བསྟན་ནས། །རྩེ་རྒོད་གཡེང་བའི་གྲོགས་བྱེད་བག་མེད་ཀྱི། །ལས་ལ་སྦྱོར་དེ་སྡིག་པའི་གྲོགས་ཡིན་པས། །འགོ་བའི་ནད་བཞིན་རིང་དུ་སྤོངས་ཤིག་ཨང༌། །ཞེས་དང༌། སྨོན་ལམ་ལོག་པའི་རྒྱལ་བའི་བསྟན་པ་ལ། །འཁུ་བའི་ནག་ཕྱོགས་གཟུགས་ཅན་གཟུགས་མེད་སྡེ། །ཞེས་དང༌། ཆོས་ལ་བར་ཆད་བྱེད་པ་བདུད་ཀྱི་མཚན་ཉིད། ཅེས་པ་ལྟར་རོ། །༣ མཐུན་འབྲེལ་ནི། བྱམས་བརྩེ་དང་ཡིད་ཆེས་ཀྱི་སྒོ་ནས་མངོན་ལྐོག་མེད་པའི་མཐུན་འབྲེལ་ནི་ཡང་དག་པའི་མཐུན་འབྲེལ་ཡིན་ལ། དེ་ལས་གཞན་དཔལ་འབྱོར་གྱིས་བསླུ་བྲིད་སོགས་ནི་མཐུན་འབྲེལ་ཡང་དག་པ་མ་ཡིན་པའོ། །མཐུན་འབྲེལ་གཏོར་བཤིག་ནི་གཡོ་སྒྱུའི་དབང་གིས་སློབ་གསོ་སྣ་ཚོགས་བྱེད་པ། རྒྱུ་ཤེད། དཔུང་ཤེད། གཡོ་ཐབས་ཀྱིས་སྐྱོན་མེད་པ་ལ་སྐྱོན་བརྗོད་སྣ་ཚོགས་བྱེད་པ། དེའི་རིགས་ལ་རྟོག་དཔྱོད་ཙམ་ཡང་མི་བྱེད་པར་རི་བོང་ཅལ་འདྲོགས་བྱེད་པ་དང༌། ཆབ་སྲིད་སྣ་ཚོགས་ཀྱིས་མགོ་སྐོར་བ་སོགས་མདོར་ན་དེང་དུས་ནི་མིའི་སྤུས་ཚད་ཇེ་ངན་དུ་འགྲོ་བ་དང་དཔལ་འབྱོར་སོགས་ཇེ་བཟང་དུ་འགྲོ་བའི་སྐབས་འདིར་ངེས་པར་གཟབ་དགོས་པའི་གནས་སོ། །༤ དགོན་སྡེ་ཆོས་བཞིན་བསྐྱངས་ཚུལ་ནི། དགོན་བདག་སོགས་ཀྱིས་རང་འདོད་སྤངས་ནས་བཤད་སྒྲུབ་ཀྱི་བསྟན་པ་བཟུང་ནས་དྲང་བདེན་བྱེད་པ་ལས་རང་དགོན་གྱི་ནང་དང་དགོན་སྡེ་ཕན་ཚུན་བར་འཐེན་འཁྱེར་བྱེད་པ་དང་ལྷག་པར་དུ་གྲྭ་རྒྱུན་ཡང་དགོན་པ་རང་གི་ཐོབ་ཁུངས་དོ་དམ་བྱེད་པ་ལས་དགོན་པ་གཞན་ལ་གཡོ་ཐབས་སྣ་ཚོགས་ཀྱིས་བསྡུས་ནས་དགོན་སྡེ་ཕན་ཚུན་འཁྲུག་པའི་རྒྱུར་བྱེད་པ་སོགས་ནི། ཇི་སྐད་དུ། རང་གི་འཁྲུལ་བ་རང་གིས་མ་བརྟགས་ན། །ཆོས་པའི་གཟུགས་ཀྱིས་ཆོས་མིན་བྱེད་སྲིད་པའི།།ཞེས་དང༌། བསྟན་པའི་བྱ་བར་བརྟགས་ནས་སྡེ་དགོན་བསྐྱངས། །ཆགས་སྡང་རུ་མར་སོང་བ་ཡི་རེ་མུག །ཅེས་གསུངས་པ་ལྟར་ཡིན་པས་དེ་འདྲ་གཏན་སྤང་བྱེད་རྒྱུ་གལ་ཆེའོ། །༥ བསྟན་པ་དག་གཙང་གི་དགོས་མཁོ་ནི། མཁན་པོ་སྤྲུལ་སྐུ་རྡོ་རྗེ་སློབ་དཔོན་ལ་ཚད་ལྡན་ནམ་སྤུས་ཚད་ལྡན་པ་དགོས་པ་ལས་ཡོན་ཚད་མེད་ན་ཡོན་ཏན་གྱི་བཀག་རྡོ། བསྟན་པའི་ཞབས་འདྲེན། སེམས་ཅན་གྱི་བསླུ་བྲིད། མི་རིགས་ཉེས་སྐྱོན་དུ་འགྱུར་བས་སོ། །མཁན་པོ་ཞིག་ཡིན་ན་རྒྱུ་ནོར་སོགས་བྱ་བ་ངན་པ་ལ་མི་གཡེང་བར་རྒྱུན་དུ་འཆད་ཁྲིད་དང༌། ལྷག་བསམ་གྱི་སྒོ་ནས་སློབ་མ་རྣམས་ལ་ཆོས་འཇིག་རྟེན་གྱི་ལུགས་གཉིས་ལ་མཁས་པ་ཞིག་བྱེད་པའི་ཐབས་ལམ་དཀའ་ངལ་འཛེམ་མེད་ཀྱི་སྒོ་ནས་བྱེད་དགོས་སོ། །སྤྲུལ་སྐུ་ཞིག་ཡིན་ན་ཇི་སྐད་དུ། སྐུ་སྐྱེས་བསྟན་དོན་དུ་བྱོན་ན། །བཤད་སྒྲུབ་ལ་ལག་རྗེས་འཇོག་དགོས། །ཞེས་གསུངས་པ་ལྟར་ཐོས་བསམ་སྒོམ་གསུམ་བྱེད་པ་ལས། མངོན་གྱུར་བསྟན་ན་མི་ཤེས། ཅུང་ཟད་ལྐོག་གྱུར་བཤད་ན་མི་ཤེས། སྟོང་ཉིད་དང་ལྐོག་གྱུར་གྱི་གནས་ལ་ཐོགས་པ་མེད་པར་ཤེས་མདོག་གི་རྫུན་གྱི་ཆུ་གཏེར་རྡོལ་ནས་སེམས་ཅན་ལ་མགོ་སྐོར་བཏང་བའི་མི་སྣ་ཞིག་མི་བྱེད་པ་གལ་ཆེའོ། །དུས་རབས་འདི་ལ་བརྟག་དཔྱད་བྱེད་པའི་གནས་སྐབས་ཤིག་ཡིན་པས་སྐྱོན་ཕུང་འགེབས་མི་ནུས་སོ། །རྒྱ་བླ་ཞེས་གྲགས་པ་ལ་རབ་འབྲིང་ཐ་གསུམ་ཡོད། རབ་ནི་རྒྱ་མི་རིགས་ལ་ཆོས་བཤད་ནས་བླང་དོར་ཡང་དག་པའི་ལམ་ལ་འགོད་པ་རྣམས་སོ། །འབྲིང་ནི། ཆོས་ལེགས་པར་བཤད་མ་ཤེས་ན་ཡང་རྫུན་མེད་པར་དྲང་བདེན་དུ་གནས་ནས་བཤད་སྒྲུབ་ལ་མཐུན་རྐྱེན་སྦྱར་བ་རྣམས་སོ། །ཐ་མ་ནི། རང་སྐད་ཀྱི་ཆོས་གཅིག་ཙམ་བཤད་མི་ཤེས་ཀྱང་རྒྱ་ནག་སྐད་དུ་ཆོས་བཤད་པ་ལ་ཐོགས་པ་མེད་པའི་ལོ་ཙཱ་བ་ཆེན་པོ། མངོན་གྱུར་ལ་རྩ་བའི་ཁ་དོག་བཞི་ཙམ་མི་ཤེས་ཀྱང་ལྐོག་གྱུར་གནས་རྣམས་ལུང་དུ་སྟོན་པའི་ལུང་སྟོན་པ་ཆེན་པོ། བསྟན་པའི་བྱ་བར་སྒྲོ་བཏགས་ནས་དཔལ་འབྱོར་བསྡུ་བ་དང༌། སྐུ་གསུང་ཐུགས་རྟེན་རྩ་ཆེན་གཞན་ལ་འདྲེན་པའི་ཚོང་དཔོན་ཆེན་པོ། ཕྱོགས་རིས་འཐེན་ཁྱེར་གྱི་སྒོ་ནས་ཆོས་སྡེ་དཀྲུག་པའི་དམག་དཔོན་ཆེན་པོ། གཡོ་ཐབས་ཀྱིས་བུད་མེད་སོགས་འཁོར་སྣ་ཚོགས་དབང་དུུ་འདུ་བར་བྱེད་པའི་སྡེ་དཔོན་ཆེན་པོ་རྣམས་སོ། །༦ རང་ལུགས་འཛིན་སྐྱོང་གལ་ཆེ་བ་ནི། བསྟན་པ་ལ་རིས་མེད་བྱས་ནས་རང་ལུགས་ཀྱི་ཡིག་ཆ་སྦྱང་དགོས་པ་ལས་ཁ་ཙམ་གྱིས་རང་ལུགས་དགོས་ཞེས་ཟེར་ནས་དོན་གྱིས་གཞན་ལུགས་ཁོ་ན་དགའ་བ་ནི། ཇོ་ནང་བ་ནི་གཞན་གྱི་ཁོངས་སུ་ཐིམ་ཞེས་པ་ལྟར་འགྱུར་བ་ལ་ཉེ་བ་ཡིན་ལ། ཀུན་མཁྱེན་ཡབ་སྲས་ལྟ་བུའི་གསུང་ནི། ཇི་སྐད་དུ། འཆང་བ་དང་ནི་སྟོན་ཏམ་ཀློག་ན་ཡང༌། །དེ་ཡི་རྣམ་པར་སྨིན་པའང་བསམ་མི་ཁྱབ། །ཅེས་པ་ལྟར་ཏིང་ངེ་འཛིན་སྒོ་མང་པོའི་བྱིན་གྱིས་བརླབས་པའི་གཟུངས་ཁྱད་པར་ཅན་ཡིན་པས་དེ་དག་གི་གསུང་རབ་ལ་ལྟ་ན་དམ་པ་གང་དག་ལ་དངོས་སུ་མཇལ་ཡང་དེ་ལས་ལྷག་པའི་གདམས་ངག་སྟོན་རྒྱུ་མེད་པས་གསུང་རབ་དེ་དག་ལ་ཐོས་བསམ་བྱེད་པ་གལ་ཆེའོ། །༧ དུས་འཁོར་གྱི་འཆད་ཉན་འཛུགས་དགོས་པ་ནི། དུས་འཁོར་གྱི་ལམ་རིམ་གཉིས་དང་རྒྱུད་སྡེའི་འཆད་ཉན་འཐུས་སྒོ་ཚང་བ་ཞིག་དགོས། རྒྱུ་མཚན་ནི། འཛམ་གླིང་ཧྲིལ་བོ་འདིའི་སྟེང་ན་དུས་འཁོར་གྱི་ཉམས་ལེན་གྱི་རིམ་པ་ཆ་ཚང་ཡོད་པ་ཇོ་ནང་པ་ཡིན་ཞེས་ཕྱི་ནང་གཉིས་ཀས་གླེང་བཞིན་ཡོད་པ་དང༌། ང་རང་ཚོའི་ཐོག་ཏུ་བབ་པའི་ལས་འགན་གཙོ་བོ་ཡིན་པ་དང༌། རྡོ་རྗེ་སློབ་དཔོན་སོགས་ཀྱི་ཉམས་ལེན་དམིགས་པའི་གནད་ཙམ་མ་གཏོགས་རྒྱུད་ཀྱི་བཤད་པ་རྒྱ་ཆེར་གནང་མཁན་ཆེས་ཉུང་ངུར་གནས་པས་སོ། །༨ བསྟན་པ་དག་ཐེར་ངེས་པར་མ་བྱས་ན་བསྟན་པ་འཆོལ་ཉོག་ཅན་དུ་འགྱུར་ངེས། དེས་ན་རང་ལ་རབ་བྱུང་གི་སྡོམ་པ་མེད་བཞིན་དུ་རབ་བྱུང་གི་གོས་ངུར་སྨྲིག་བགོས་ནས་ཁྱིམ་པ་སུན་འབྱིན་གྱི་ལས་སྣ་ཚོགས་བསགས་པ་དང༌། འཕྲོག་བཅོམ་བྱེད་པ་སོགས་ནི། བདག་ཅག་གི་སྟོན་པས། སངས་རྒྱས་ཀྱི་བསྟན་པ་ནི་ཁོང་མིན་ཁོང་འདྲ་གཅིག་གིས་བཤིག་ཅེས་པ་ལྟར་ཡིན་པས་དུས་རབས་ཉེར་གཅིག་པའི་དུས་འདིར་ཀུན་སྤྱོད་དག་གཙང་ལྷག་པར་གལ་ཆེ་བའོ། །མི་སྐྱ་ཕོ་མོ་རྣམས་ཀྱིས་གྲྭ་བ་དག་རྫུན་ཤེས་ནས་དགེ་འདུན་སྤྱི་ལ་མི་སྨོད་པར་དགེ་འདུན་རྣམ་དག་ལ་གུས་བཀུར་དང་རྫུན་མ་མེད་པར་བྱེད་པའི་ཐབས་ལམ་ལ་འབད་དགོས། བོད་གངས་རིས་ལྗོངས་ན་སྡོམ་མེད་རྒན་པོ་གཡོ་ཁྲམ་མཁན་མང་པོས་བསྟན་པ་འཛིན་པར་རློམ་ནས་བསྟན་པ་བཤིག་པ་ནི་མང་དུ་སྣང༌། ཇི་སྐད་དུ། བསྟན་པའི་བྱ་བར་སྒྲོ་བཏགས་ནས། །ཆགས་སྡང་རུ་མར་སོང་བ་ཡི་རེ་མུག །ཅེས་གསུངས་པ་ལྟར་ལས་མ་འདས་སོ། །༩ ཆོས་ཚོགས་སོ་སོར་འགྲོ་སྐབས་དང་དྲྭ་ཐོག་སོགས་ནས་ཕྱིན་ཅི་ལོག་གི་བཤད་པ་མང་པོ་གོ་ཐོས་ཡོད་པས་འོལ་ཚོད་དང་ཧམ་པ་ཁོ་ནས་འཆད་རྩོད་གང་གི་སྒོ་ནས་ཞབས་འདྲེན་མི་བྱེད་རྒྱུ་གལ་ཆེའོ། །༡༠དོན་ཆུང་ཆུང་ཞིག་ཆེ་བསྒྱུར་མི་བྱེད་པར་བསྟན་པ་སྤྱིའི་དོན་དེ་ནང་ཆོས་མི་ཤེས་པའི་རྒད་པོ་གཡོ་སྒྱུ་ཅན་སོགས་ལ་བློ་ཕུགས་བཅོལ་ན་གནས་སྐབས་རེ་མ་གཏོགས་མཐར་ཕུང་གྱོད་ཀྱི་རྩ་བར་འགྱུར་ལ། དེས་ན་ལྷག་བསམ་དང་ཤེས་ཡོན་ལྡན་པ་ལ་ཕུགས་བློ་བཅོལ་ན་སྒེར་གཞུང་ཀུན་ལ་ཕན་ངེས་སོ། །༡༡ རང་ས་ནས་ཉོག་གྲ་བྱས་ནས་ཐོབ་གོ་ས་རྩོད་གླེང་བྱེད་པ་ལས་ཕྱོགས་སོ་སོར་དགོན་པ་འདེབས་ན་བཟང་སྙམ། །༡༢ ཇོ་ནང་སྤྱིའི་ཚོགས་འདུ་སོགས་ལ་གཞན་གྱི་ཟེར་སྒྲོས་ཙམ་མ་ཡིན་པར་དོན་གྱི་བླ་མ་དང་འགལ་བའི་དམ་ཚིག་ཉམས་པའི་རིགས་དང༌། དགོན་པ་ནས་གནས་དབྱུང་བཏང་བ་རྣམས་བཀག་སྡོམ་བྱེད་དགོས། ༡༣ ཇོ་ནང་བ་རྣམས་ཀྱིས་ཆོས་དང་མཐུན་པར་མི་རིགས་མཐུན་འབྲེལ་བྱས་ནས་བོད་ཀྱི་རིག་གནས་དར་སྤེལ་དང་སྒོས་སུ་ནང་ཆོས་དར་སྤེལ་བྱེད་པར་རེ་བ་སྙིང་ནས་ཞུ། ༡༤ གཞན་དབང་ནི། ཁེ་ཕན་གང་ཡང་མེད་པས་ཕན་པ་མེད་པའི་སྒེར་གཅོད་ཀྱི་འགྲིག་ཁྲིམས་བཞག་པ་དང༌། གནོད་འཚེའི་བསམ་སྦྱོར་ངན་པས་བྱ་བཞག་ཡང་དག་དག་ལ་བཀག་སྡོམ་བྱེད་པ་དང༌། ལས་ཉོན་གྱི་དབང་གིས་སྐྱེ་རྒ་ན་འཆི་སོགས་མི་འདོད་བཞིན་དུ་བྱེད་དགོས་པ་སོགས་ནི་རང་དབང་མེད་པ་ཡིན་ལ། དེ་ནི་སྡུག་བསྔལ་བ་ཡིན་ཏེ། བཅོམ་ལྡན་འདས་ཀྱིས་ཞལ་སྔ་ནས། གང་ལ་རང་དབང་མེད་པ་དེ་ནི་སྡུག་བསྔལ་བའོ། །ཞེས་གསུངས་པ་ལྟར་ཡིན་ནོ། དེ་ལས་བརྒལ་ནས་རང་གི་ཁེ་དབང་ཡང་དག་དང་གཞན་གྱི་རང་དབང་དང་བཅས་ཁྲིམས་ཡང་དག་པ་ལ་མི་གནོད་པའི་ཁོར་ཡུག་བཟང་པོར་ལྷིང་འཇགས་དང་བདེ་འཇགས་ངང་གནས་པ་ནི་རང་དབང་དུ་གནས་པའོ། །དེ་མ་གཏོགས་བག་མེད་ཀྱི་སྤྱོད་པ་དང༌། ཉོན་མོངས་ཀྱི་གཞན་དབང་དུ་གྱུར་བ་སོགས་ནི་རང་དབང་ལོག་པའམ་གཞན་དབང་ཞིག་ཡིན་པ་ཤེས་དགོས་སོ། །༡༥ གཙང་སྦྲ་ལ་ལུས་ངག་ཡིད་གསུམ་གྱི་གཙང་སྦྲ་དང༌། ཕྱི་ཁོར་ཡུག་གི་གཙང་སྦྲ་སོགས་ཡོད། ལུས་ཀྱི་གཙང་སྦྲ། ལུས་ལ་བྱི་དོར་བྱས་ནས་དྲི་མ་མེད་པར་བྱེད་པ་དང་ནད་སོགས་འགོག་པར་བྱེད་པ་སོགས་ལུས་ཀྱི་འཕྲོད་བསྟེན་དག་ཡིན་ལ། ངག་གི་གཙང་སྦྲ་ནི་ངག་གི་ཚིག་རྩུབ་སོགས་སྤོང་བར་བྱེད་པ་ཡིན་ལ། ཡིད་ཀྱི་གཙང་སྦྲ་ནི། ཆགས་སྡང་སོགས་སེམས་མ་རུང་པ་དག་སྤོང་བར་བྱེད་པ་ཡིན། སྔོན་བྱོན་དམ་པ་རྣམས་དེ་ལ་གནས་པ་ཡིན། ཕྱིའི་གཙང་སྦྲ་ནི་མི་གཙང་བ་ལྗན་ལྗིན་སོགས་མེད་པར་བྱི་དོར་བྱ་བ་ཡིན་ཏེ། མཛོད་ལས། ལེགས་བཤད་གསུམ་པོ་ཐམས་ཅད་ནི། །གཙང་བྱེད་རྣམ་པ་གསུམ་ཡིན་ཏེ། །ཞེས་དང༌། མཚོ་ཊཱིཀ་༩༣༩ལས། སྐབས་འདིར་འོད་ལྡན་ལས། ཐ་སྙད་པ་ཕྱིའི་གཙང་སྦྲ་དང༌། དོན་དམ་པ་ནང་གི་གཙང་སྦྲ་གཉིས་སུ་གསུངས་ཏེ། རྩ་བ་སུམ་བརྒྱ་པ་ལས། བཅོམ་ལྡན་འདས་ནང་གི་གཙང་སྦྲར་གསུངས་པ་ནི། ལུས་ལ་སོགས་པའི་སྡིག་སྤོང་གང་ཡིན་པའི་ཞེས་བཤད་དོ། །ཐ་སྙད་པ་ཕྱིའི་གཙང་སྦྲ་ནི། ས་གཉིས་ཀྱིས་བཀྲུ་བར་བྱའོ། །ཞེས་སོགས་གསུངས་པས་སོ། །དེས་ན་གཙང་སྦྲ་ནི་དེང་རབས་དང་མཐུན་པ་མ་ཟད་ནང་ཆོས་ཀྱི་དགོངས་དོན་ཡང་ཡིན་ནོ། །༡༦ མི་གཞི་ཚད་ལྡན་ནི། དྲིན་ཅན་ལ་དྲིན་ཅན་དུ་ཤེས་པ། བློ་རྒྱ་ཆེ་བ། ཕྲག་དོག་མེད་པར་གོང་མ་ལ་གུས་ཞབས་ཡོད་པ། ང་རྒྱལ་སོགས་མེད་པར་དམན་ལ་བྱམས་བརྩེ་ལྡན་པ། གྲོགས་དང་བྱ་བ་ཀུན་ལ་མཐར་སྐྱོར་ཐུབ་པ་སོགས་ཡིན་ཏེ། རྗེ་མི་ལས། ཐབས་དང་ཤེས་རབ་མི་གཞི་གསུམ། །འདི་གསུམ་རྒྱུན་གྱི་ས་མཁན་ཡིན། །ཞེས་པ་ལྟར་རོ། །མདོར་ན་ཆོས་འཇིག་རྟེན་གང་ལ་ཡང་མི་གཞི་བརྟན་པོ་དགོས། རབ་ན་ཤེས་ཡོན་དང་ལྷག་བསམ་དགོས་སོ། །༡༧ བོད་རང་གི་སྐད་ཡིག་ནི་མི་རིགས་རང་གི་སྲོག་ལྟ་བུ་ཡིན་པ་ནི་མཁས་དབང་དམ་པ་དག་གིས་བཤད་པ་ལྟར་ཡིན། དེའི་ནང་ནས་ཉིང་ཁུ་ལྟ་བུ་ནི་བོད་རང་སྐད་ཀྱི་སྟེང་དུ་ཡོད་པའི་ནང་ཆོས་ཀྱི་མདོ་སྔགས་རིག་གནས་དང་བཅས་པའི་མིང་ཚིག་རྣམས་ལ། དེའི་རྒྱུ་མཚན་བོད་རང་གི་རིག་གཞུང་གི་རྩ་བ་ནི་ནང་ཆོས་ལ་ཕལ་ཆེར་བ་ཐུག་ཡོད་པ་དང༌། དེ་དར་སྤེལ་བྱས་ན་ཚེ་འདི་དང་ཕྱི་མ་གཉིས་ཀའི་དོན་རྨད་དུ་བྱུང་བའོ། །ལྷག་པར་དུ་གྲྭ་བ་རྣམས་ཀྱི་ལས་འགན་ནི། ཕན་པ་དང་བདེ་བའི་འབྱུང་གནས་སུ་གྱུར་པའི་ནང་ཆོས་འཛིན་སྐྱོང་སྤེལ་གསུམ་བྱེད་པ་འདི་ཡིན་པས་རང་གི་ལས་འགན་གང་ཡིན་རྟོགས་དགོས་སོ། །༡༨ གྲྭ་བའི་ཁ་ཕྱོགས་གཙོ་བོ་ནི། གཡོ་སྒྱུའི་ཆབ་སྲིད་མ་ཡིན་པར་གཞན་ལ་གནོད་མེད་ཀྱི་སྒོ་ནས་ཕན་པ་སྒྲུབ་པ་དང༌། བཤད་སྒྲུབ་ལ་འབད་བརྩོན་བྱེད་དགོས་པ་རེད། དེ་ཡང་ཐེག་དམན་གྱི་སྐབས་སུ་གཞན་ལ་གནོད་འཚེ་སྤང་དགོས་པར་བཤད་པ་དང༌། ཐེག་པ་ཆེན་པོའི་སྐབས་སུ་གནོད་མེད་ཀྱི་སྒོ་ནས་གཞན་ལ་ཕན་པ་སྒྲུབ་དགོས་པར་གསུངས་པ་ལྟར་རོ། །༡༩ ང་རང་གིས་བསྟན་ལ་བྱ་བ་བྱེད་བཞིན་པ་དང་བྱེད་འདོད་ཡོད་པའི་དམིགས་ཡུལ་གཙོ་བོ་ནི་ཆོས་ཁྲིད་བྱེད་པ་དང༌། རང་ལུགས་ཀྱི་ཡིག་ཆ་དར་སྤེལ་སོགས་བཤད་སྒྲུབ་ཀྱི་བསྟན་པ་ལ་བྱ་བ་བྱེད་འདོད་ཡོད་པ་ལས་ལྷ་ཁང་གསེར་ཁང་གི་བསྟན་པ་འཛིན་འདོད་མེད། དེའི་རྒྱུ་མཚན་ནི། གོང་སྤྲུལ་གྱི་ཞལ་སྔ་ནས། ཇི་སྐད་དུ། བྱ་བ་ལས་ཀྱི་མིང་བཏགས་ནས། །ཀུན་སློང་ལོག་པའི་ལམ་གྱུར་ཏེ། །སྤྱོད་པ་སེམས་ཅན་སྡུག་ལ་སྦྱོར། །འདི་ཡང་བདུད་ཀྱི་བསྟན་པ་དར་བ་ཡིན། །ཞེས་དང༌། རྫ་དཔལ་སྤྲུལ་གྱིས། མི་ཚེ་སྟོང་ཟད་ཞིག་བསམ་ན། །ཁང་རྒན་ཞིག་གསོ་ལ་རེམས་ཤིག །ཅེས་གསུངས་པ་ལྟར་མི་བསྐྱེད་བསྲིང་བྱེད་དགོས་པ་ལས་ས་རྡོ་ཞིག་གསོ་བྱས་པ་ལ་དོན་ཆེར་མ་མཆིས་སོ། །༢༠ ཡ་ང་མེད་པར་མ་ཟད་སྤོབ་པ་བསྐྱེད་འོས་པ་ནི། རང་གི་བསྟན་པ་ལ་བྱ་ར་ཅུང་ཟད་བྱས་ནས་གྲུབ་འབྲས་རྙེད་པ་ལ། དཔེ་ཆ་ལ་གཏན་ནས་མི་དགའ་བའི་རིགས་སུ་གྱུར་བ་དང་དཔལ་འབྱོར་གྱིས་གཡོ་འོག་ཏུ་ལྷག་པ་རང་དང་མཉམ་པ་དང་འོག་མའི་ཕྲག་དོག་གི་དབང་གིས་སྒྲོ་གདོགས་སྐུར་འདེབས་སྣ་ཚོགས་བྱེད་པ་དང་སྦྱོར་ངན་སྣ་ཚོགས་རྩོམ་པ་ནི། བདག་གི་གཟི་བརྗིད་དང་སྤོབས་པ་བསྐྱེད་དགོས་པའི་གནས་སུ་བདག་གིས་ངོས་འཛིན་བྱེད་ཀྱི་ཡོད། དེའི་རྒྱུ་མཚན། བར་ཆད་བྱེད་མཁན་ནི་བདག་ཅག་གི་སྟོན་པ་ལ་ཡོད་ན་བདག་ལྟ་བུ་ལ་སྨོས་མ་དགོས། བདག་གིས་དྲང་བདེན་གྱི་ལམ་འདི་ལ་འབད་པ་ནི་རང་བློ་རགས་པ་རང་ལ་ལྐོག་ཏུ་མ་གྱུར་པས་སོ། །གྲུབ་འབྲས་ཡོད་ན་དཀའ་ངལ་འཛེམ་མེད་ཀྱི་སྒོ་ནས་བསྟན་པར་ཞབས་ཞུ་བྱེད་པ་ནི་རང་གི་ལས་འགན་ཡིན་བསམ་གྱི་ཡོད། ཕན་ཐོགས་ན་བྱ་བ་རླབས་ཆེན་གང་སྒྲུབ་ན་བར་ཆད་ཡོད་མེད་ལ་མ་ལྟོས་པར་ལུས་སྲོག་ལ་འཛེམ་མེད་ཀྱི་སྒོ་ནས་སྒྲུབ་འདོད་ཡོད། དེའི་རྒྱུ་མཚན་ནི། ཇི་སྐད་དུ། རོ་དང་མཚུངས་པའི་ལུས་པོ་འདི། །ག་དུས་ཤི་ཡང་མི་འགྱོད་དེ། །གསེར་དང་མཚུངས་པའི་རྣམ་དཔྱོད་དག །མཉམ་དུ་ཤི་ན་ཤིན་ཏུ་ཕངས། །ཞེས་གསུངས་པ་ལྟར་རང་གི་རྣམ་དཔྱོད་དེ་ལ་གྲུབ་འབྲས་མེད་པར་ཤི་ན་འགྱོད་མོད་མི་གཙང་བའི་ལུས་འདི་ག་དུས་ཤི་ན་འགྱོད་པ་མེད། ལྷག་པར་བཤད་སྒྲུབ་ཀྱི་བསྟན་པ་སྤེལ་ས་ནས་དཀའ་ངལ་འཕྲད་ནའང་དགའ་ཞིང་མགུ་བ་ཡིན། བྱ་བ་ལེགས་པར་གྲུབ་པ་ཞིག་ཡིན་ན་གཞན་གྱི་བར་ཆད་ཡོད་པ་ནི་སངས་རྒྱས་དང་སློབ་དཔོན་པད་འབྱུང་ལྟ་བུ་ལ་འབྱུང་སྲིད་པས་འཇིགས་རྒྱུ་མེད་དེ། ཇི་སྐད་དུ། དྲེགས་ལྡན་འུག་པ་ཁྲོས་པའི་ཧ་ཧ་དང༌། །བླུན་པོ་ཕག་གིས་བརྙས་པའི་ཧུམ་སྒྲ་དང༌། །བློ་ཆུང་བྱིས་པ་དགོད་པའི་སྣ་གཉེར་ལ། །འཇིགས་པའི་ཡ་ང་བདག་ལ་ཡོད་མ་ཡིན། །ཞེས་གསུངས་པ་ལྟར་ཡིན་ནོ། །དེ་རིང་ངས་འདི་ནས་དྲང་བདེན་གྱི་སྐད་ཆ་ཞིག་བཤད་འདོད་པ་ནི། ཇི་སྐད་དུ། སྐྱེ་བོ་མཁས་ཤིང་དྲང་བ་ལ། །དྲང་པོར་སྨྲས་ན་མགུ་འགྱུར་ཏེ། །བླུན་པོ་གྱ་གྱུར་སྤྱོད་རྣམས་ལ། །ཇི་བཞིན་བཤད་ཀྱང་དགོས་པ་ཆུང༌། །ཞེས་དང༌། ཕྱུགས་པོ་ཀླ་ཀློའི་ཁྲོད་ན་ཡོད། །དཔའ་བོ་དུད་འགྲོའི་ཁྲོད་ན་ཡོད། །དོན་དང་ལྡན་པའི་གཏམ་སྨྲ་བ། །འཇིག་རྟེན་འདི་ན་ཤིན་ཏུ་དཀོན། །ཞེས་པ་ལྟར་ལོ་རྒྱུས་དོན་གྱིས་བཤད་ན་ཤེས་རྟོགས་བྱུང་བ་ཞིག་ཡོད་པས་སོ། །༢༡ ཤེས་ཡོན་པའི་སྡེ་དང༌། ལྷག་བསམ་ཅན་དག་གིས་དཔལ་འབྱོར་དང་རིག་གནས་ཀྱི་དབུལ་ཕོང་བའི་ཉམས་ཐག་པ་རྣམས་ལ་ཆེ་འདོད་གྲགས་འདོད་ཙམ་མ་ཡིན་པར་བྱམས་བརྩེས་སྐྱོངས་དགོས། ལྷག་པར་ཤེས་ཡོན་གྱིས་སྟོང་ཆ་ཡོད་པའི་ཡུལ་ལ་དཀའ་ངལ་འཛེམ་མེད་ཀྱི་སྒོ་ནས་ཕྱོགས་ཐམས་ཅད་ནས་ཡར་རྒྱས་གཏོང་དགོས། སྤྱིར་གང་ལ་དྲང་བདེན་ཡོད། གང་ལ་ལས་འབྲས་ཡོད། གང་ལ་ལྷག་བསམ་ཡོད། གང་ལ་ཤེས་ཡོན་ཡོད། གང་གིས་བྱ་བ་རླབས་ཆེན་སྒྲུབ་ན་དེ་ལ་རྒྱབ་སྐྱོར་དང་རོགས་རམ་བྱེད་རྒྱུ་གལ་ཆེ་བ་ཡིན་ནོ། །རྒྱལ་ཁམས་པ་དངོས་གྲུབ་དཔལ་གྱིས་ཀུན་ཕན་ལྷན་ཚོགས་ལ་སྙན་ཞུ་ཕུལ་བའོ། ། ཇོ་ནང་ཆོས་དར་ཆེན་མོའི་མཚོན་དོན་ཕྱོགས་ཙམ་གསལ།ཇོ་ནང་ཆོས་དར་ཆེན་མོའི་མཚོན་དོན་ཕྱོགས་ཙམ་གསལ་བྱེད་གཤམ་གསལ། ཇོ་ནང་གི་ཆོས་དར་འདིའི་ཁུངས་ནི། བདག་གི་དཔེ་མཛོད་ཁང་ཞིག་ནས་རྣམ་བཅུ་དབང་ལྡན་དང་ཕྱོགས་མདོག་བཅས་པའི་རི་མོ་དང་ཡི་གེ་དར་དཀྱིལ་ཞེས་པ་བྲིས་ཡོད་པ་ཤོག་ལྷེ་ཞིག་མཐོང་སོང༌། དེ་ནི་ཀུན་མཁྱེན་དོལ་པོ་པས་ཐུགས་ཀྱི་མཁྱེན་རླབས་ལས་བྱུང་བར་སྣང་སྟེ། ཀུན་མཁྱེན་དོལ་པོ་པའི་རྣམ་ཐར་གྱི་སྐབས་སུ་ཆག་ལོ་ཙཱ་བ་རིན་ཆེན་ཆོས་རྒྱལ་གྱི་དུས་འཁོར་བརྒྱུད་པའི་རྟོགས་བརྗོད་ལས། ཇོ་མོ་ནང་དུ་དུས་འཁོར་གྱི་དར་དཀྱིལ་ཆེན་མོ་འཁྲུལ་སངས་གྲུབ། ཅེས་གསུངས་པས་སོ། །སྤྱིར་རྣམ་བཅུ་དབང་ལྡན་གྱི་བཤད་པ་ནི། ཕྱི་དུས་ཀྱི་འཁོར་ལོ་ཉི་ཟླ་གཟའ་སྐར་སོགས་ཕྱི་སྣོད་ཀྱི་འཇིག་རྟེན་དང༌། ནང་དུས་ཀྱི་འཁོར་ལོ་ཁམས་དྲུག་ལྡན་གྱི་སྐྱེས་བུའི་རྩ་རླུང་ཐིག་ལེ་དང་སྐྱེ་འཆི་བར་དོ་སོགས་རྡོ་རྗེ་ལུས་ཀྱི་གནས་ཚུལ་དང༌། གཞན་དུས་ཀྱི་འཁོར་ལོ་ནི། དཔལ་དུས་ཀྱི་འཁོར་ལོའི་སྐུ་གསུང་ཐུགས་གསུམ་གྱི་རྟེན་བརྟེན་པའི་དཀྱིལ་འཁོར་སོགས་གསང་བ་ལམ་བསྐྱེད་རྫོགས་དང༌། ཡང་གསང་དོན་དམ་པའི་བདེ་གཤེགས་སྙིང་པོའི་སྐུ་གསུང་སོགས་མཚོན་པ་སོགས་ཡིན་པར་དཔལ་དུས་ཀྱི་འཁོར་ལོའི་རྒྱུད་སྡེ་རྩ་འགྲེལ་ལས་བཤད་པ་ལྟར་ཀུན་གྱི་ཐུགས་མངའ་ལྟར་རོ། །འཁོར་ལོ་གསུམ་ཆོས་འཁོར་གསུམ་གྱི་མཚོན་དོན་ཡིན་ལ། དེའི་མཐའ་སྐོར་གྱི་མདོག་སྣ་ལྔའི་བཤད་པ་ནི་སྤྱིར་ནང་ཆོས་ཀྱི་ཆོས་དར་ལྟར་རོ། །ཕྱོགས་ཀྱི་མདོག་ནི། དཔལ་དུས་འཁོར་གྱི་རྒྱུད་ལས་བསྟན་པའི་ཕྱོགས་མདོག་ལྟར་ཡིན་ནོ། །དེའི་བཤད་པ་དུས་འཁོར་གྱི་རྒྱུད་ལྟར་རོ། །དེ་ལ་ཆ་བཅུ་གཉིས་བགོས་པ་ནི་མ་དག་པའི་ནང་འཕོ་ཆེན་བཅུ་གཉིས། ཕྱི་དུས་སྦྱོར་བཅུ་གཉིས། འཛམ་གླིང་ས་ཆེན་དུམ་བུ་བཅུ་གཉིས། གཞན་ཚེས་ལྷའི་དཀྱིལ་འཁོར་བཅུ་གཉིས། དོན་དམ་རྣམ་པ་བཅུ་གཉིས་སོགས་ཡིན་ལ། རྟེན་འབྲེལ་གྱི་སྒོ་ནི། རྫོགས་ལྡན་ཕྱི་མའི་སྐབས་སུ་འཛམ་གླིང་ས་ཆེན་དུམ་བུ་བཅུ་གཉིས་ལ་རྫོགས་ལྡན་ཆོས་མཆོག་དབུ་མ་གཞན་སྟོང་དེ་དར་ཞིང་རྒྱས་པར་རྒྱུད་ལས་གསུངས་པ་ལྟར་འགྱུར་བའི་རྟེན་འབྲེལ་གྱི་སྒོ་ཆེན་ཁྱད་པར་ཅན་ཞིག་ལེགས་སྨོན་ནོ། །པདྨ་དཀར་པོ་ནི། རིགས་ལྡན་པདྨ་དཀར་པོའི་རྣམ་སྤྲུལ། ཇོ་ནང་བསྟན་པའི་སྲོལ་འབྱེད་ཆོས་རྗེ་ཀུན་མཁྱེན་རིན་པོ་ཆེ་མཚོན་བྱེད་ཡིན་ལ། དེའི་སྟེང་གི་འཁོར་ལོ་དང་རྣམ་བཅུ་དབང་ལྡན་ནི་དམ་པ་གང་གི་ཐུགས་བརྒྱུད་ཀྱི་ལུང་རྟོགས་མཚོན་བྱེད་དང༌། ཡལ་ག་རྣམས་ནི་གང་གི་སློབ་བརྒྱུད་ཀུན་མཚོན་བྱེད་དོ། །ཆོས་དར་འདི་ཉིད་ཇོ་ནང་སྤྱིའི་མང་གཙོའི་ལམ་ལུགས་ནས་ཐག་བཅད་ཟིན་པ་ན། བཤད་པ་རྒྱ་ཆེར་བཤད་འོང༌། སྔར་ཇོ་ནང་ལ་ལྷག་བསམ་ཅན་འགའ་རེས་ཇོ་ནང་ཆོས་དར་ཞིག་རི་མོར་བཀོད་མོད་དེ་མཚོན་དོན་གང་ནས་ཀྱང་འགྲིག་པ་མེད་པའི་གསལ་བཤད་སྔར་དྲྭ་ཐོག་ནས་ཕུལ་ཟིན་པ་ལྟར་རོ། །དེས་ན་མཁན་བླ་སྤྲུལ་དུུ་མས་ཐུགས་གྲོས་བྱས་ནས་རྗེ་བཙུན་དམ་པ་ཁལ་ཁ་རིན་པོ་ཆེའི་རྣམ་བཅུ་དབང་ལྡན་ཞིག་བཞག་ན་ལེགས་ཞེས་གསུངས་པ་གཞིར་བཅས་ནས་རི་མོར་བཀོད་པའོ། །སྤྱིར་གང་ལ་དྲང་བདེན་ཡོད། གང་ལ་ལས་འབྲས་ཡོད། གང་ལ་ལྷག་བསམ་ཡོད། གང་ལ་ཤེས་ཡོན་ཡོད་ན་དེ་ལ་རྒྱབ་སྐྱོར་དང་རོགས་རམ་བྱེད་རྒྱུ་གལ་ཆེ་བ་ཡིན་ནོ། །རིས་མེད་པ་དངོས་གྲུབ་དཔལ་ནས་གུས་ཕུལ། དབུ་མ་གཞན་སྟོང་གི་ལྟ་གྲུབ་གླེང་བ། དབུ་མ་གཞན་སྟོང་གི་ལྟ་གྲུབ་གླེང་བ།དབུ་མ་གཞན་སྟོང་གི་ལྟ་གྲུབ་གླེང་བ། གསུང་མཁན། ཇོ་ནང་ཡང་དར་བསྟན་པའི་བྱེད་པོ། གསུང་ཡུལ། ལབ་དགོན་དུ་གངས་ཅན་མཁས་པའི་བགྲོ་གླེང་ཐེངས་དགུ་བ། ཟིན་བྲིས་པ། མགོ་ལོག་པ་ངག་དབང་པདྨ་བློ་གསལ། འོ་ལགས་སོ། གངས་ཅན་མཁས་པའི་ལྷན་ཚོགས་སྟེང་དུ་ཕེབས་པའི་མཁས་དབང་རྣམ་པའི་གཙོས་ཚང་མ་ལ་འཚམ་འདྲི་བཀྲ་ཤིས་བདེ་ལེགས་ཞུ། དེ་ནས་དེ་རིང་གཞན་སྟོང་དབུ་མའི་ལྟ་གྲུབ་ཀྱི་སྐོར་ནས་དུས་ཚོད་དང་བསྟུན་ཏེ་ཉུང་ཙམ་ཞིག་ཞུ་ཁུལ་བྱེད། དེ་ཡང་གྲུབ་མཐའི་ཁུངས་དང༌། ལྟ་སྒོམ་སྤྱོད་གསུམ་སྐོར་དང་རྩ་བའི་ས་བཅད་གཉིས་ཀྱི་སྟེང་ནས་ཁྱེད་རྣམས་པ་ལ་ཞུ་རྒྱུ་ཡིན། དེས་ན་མཉམ་མེད་ཐུབ་པའི་དབང་བོའི་རྗེས་འཇུག་ཡིན་པའི་བོད་གངས་རིའི་ལྗོངས་ཀྱི་གྲུབ་མཐའ་རྣམས་ལ་མཚོན་ན། སྔ་འགྱུར་རྙིང་མ་བ། དེའི་རྗེས་སུ་བཀའ་བརྒྱུད་པ། དེ་ནས་ས་སྐྱ་བ། དེའི་རྗེས་སུ་དཔལ་ལྡན་རྒྱལ་བ་ཇོ་ནང་པ། དེའི་རྗེས་སུ་རི་བོ་དགེ་ལྡན་པ་རྣམས་རིམ་གྱིས་བོད་ཁ་བ་ཅན་དུ་རིམ་གྱིས་བྱུང་བ་ཞིག་རེད། བདག་ཅག་གི་སྟོན་པ་ཤཱཀྱ་ཐུབ་པ་ནས་དཔལ་ལྡན་རྒྱལ་བ་ཇོ་ནང་བའི་བྱུང་ཚུལ་བོ་གཙོ་བོ་འཕགས་པ་འཇམ་དཔལ་ནས་བརྒྱུད་པ་ཞིག་དང༌། རྗེ་བཙུན་བྱམས་པ་མགོན་པོ་དང་འཕགས་པ་ཐོགས་མེད་ནས་བརྒྱུད་ཚུལ་གྱི་རིམ་པ་གཉིས་ཀྱི་སྒོ་ནས་བརྒྱུད་ཡོང་བ་ཞིག་རེད། དེ་ཡིན་ན་རྒྱ་གར་འཕགས་པའི་ཡུལ་གྱི་གཏད་རབས་བདུན་དང༌། དེའི་རྗེས་སུ་རྒྱན་དྲུག་མཆོག་གཉིས་ལ་སོགས་པའི་གསུང་དེ་དག་ཚད་མར་བཟུང་བ་དང་སྒྲས་ཟིན་གཞིར་བཞག་བྱས་ནས་ཇོ་ནང་གི་ལྟ་གྲུབ་འདི་རྩལ་འདོན་བྱས་ནས་བྱུང་བ་ཞིག་ཡིན་པ་ངོས་ཟིན་པའམ་ཤེས་དགོས་པ་ཞིག་རེད། རྒྱལ་བ་སངས་རྒྱས་བཅོམ་ལྡན་འདས་ཀྱིས་ལུང་གིས་མ་ཟིན་པའི་རྒྱ་གར་འཕགས་པའི་ཡུལ་ན་ཡང་ཧ་ཅང་པཎྜྀ་ཏ་མཆོག་ཏུ་གྱུར་བ་སློབ་དཔོན་ལེགས་ལྡན་འབྱེད་དང་དཔལ་ལྡན་ཟླ་བ་གྲགས་པ་སོགས་ཀྱི་སྐུ་ཚེ་ཐ་མའི་སྐབས་སྔགས་ཀྱི་གཞུང་དག ཇོ་ནང་རང་ལུགས་འཐད་ལྡན་བྱས་ནས་གསུང་གྱིན་ཡོད་ན་ཡང་དབུ་མ་འཇུག་པ་སོགས་ཀྱི་སྒྲས་ཟིན་དུ་འགའ་རེ་ཁས་མི་ལེན་པ་རེད། ཡིན་ན་ཡང་ཐམས་ཅད་མཁྱེན་པ་ཏཱ་ར་ནཱ་ཐས་ལུང་བསྟན་པའི་འཕགས་པ་མཆོག་དང་ལུང་མ་བསྟན་པ་དག་དང་མི་འདྲ་བར་གསུངས་པའི་དགོངས་པ་བཞིན་དུ། གྲུབ་མཐའི་ཁུངས་གཏུག་སའི་སྐྱེས་བུ་དམ་པ་རྣམས་ལ་བརྒྱུད་པའི་ཁུངས་ཁྱད་པར་བ་དང་བཅས་པ་རེད། དེ་ནས་ཁུངས་བཅོལ་སའི་གཞུང་ལུགས་ཡིན་ན། སངས་རྒྱས་བཅོམ་ལྡན་འདས་ཀྱིས་བཀའ་འཁོར་ལོ་རིམ་པ་གསུམ་གསུངས་པ་ལས་འཁོར་ལོ་ཐ་མ་རྩལ་འདོན་བྱས་ནས་དེའི་དགོངས་པ་མཐར་ཐུག་གཏན་ལ་ཕབ་ཡོང་དུས། ཁམས་བདེ་བར་གཤེགས་པའི་ཡེ་ཤེས་སྙིང་པོ་དེ། ཐམས་ཅད་ལ་ཆོས་ཉིད་ཀྱི་ཚུལ་དུ་ཡོད་པ་རྩལ་འདོན་བྱས་ནས་གསུང་གིན་ཡོད་པ་རེད། དེ་ཡང་རྒྱལ་བ་སངས་རྒྱས་བཅོམ་ལྡན་འདས་རང་ཉིད་ཀྱིས་མདོ་སྡེ་དགོངས་པ་ངེས་འགྲེལ་གྱི་སྐབས་སུ་བཀའ་འཁོར་ལོ་ཐ་མ་གསུང་ཡོང་དུས། འདི་ནི་བླ་ན་མ་མཆིས་པ་སྐབས་མ་མཆིས་པ་ངེས་པའི་དོན་རྩོད་པའི་གཞིའི་གནས་སུ་མ་གྱུར་པ་ལགས་སོ། །ཞེས་གསུངས་པ་བཞིན་དུ་འཁོར་ལོ་ཐ་མ་ངེས་དོན་དང༌། ཡང་མདོ་སྡེ་དགོངས་པ་ངེས་འགྲེལ་དུ་ཡང་བཀའ་འཁོར་ལོ་བར་བའི་གསུང་ཚུལ་གྲུབ་དོན་གྱི་སྐབས་སུ་གསུང་ཡོང་དུས། འདི་ནི་བླ་ན་མཆིས་པ་སྐབས་མཆིས་པ་དྲང་བའི་དོན་རྩོད་པའི་གཞིའི་གནས་སུ་གྱུར་བའོ། །ཞེས་གསུངས་པ་ལྟར་དྲང་ངེས་ཀྱི་ཁྱད་པར་ཕྱེ་བ་རེད། དེ་ཡང་བློ་གྲོས་མི་བཟད་པའི་མདོ་དང༌། གཟུངས་རྒྱལ་གྱིས་ཞུས་པའི་མདོ། སོར་མོའི་འཕྲེང་བ་ལ་ཕན་པའི་མདོ་ལ་སོགས་པའི་སྐབས་སུ་སངས་རྒྱས་བཅོམ་ལྡན་འདས་རང་ཉིད་ཀྱིས་ཤེར་ཕྱིན་གྱི་དགོངས་དོན་འགྲེལ་ཚུལ་ཟེར་ན་འདྲ། དྲང་ངེས་ཀྱི་ཁྱད་པར་དབྱེ་ཚུལ་མང་པོ་ཞིག་གསུངས་པ་ཐམས་ཅད་དགོངས་པ་གཅིག་ཏུ་དྲིལ་ནས་བཀའ་འཁོར་ལོ་ཐ་མ་ངེས་དོན་གྱི་མདོ་ཡིན་པ་སངས་རྒྱས་བཅོམ་ལྡན་འདས་རང་ཉིད་ཀྱིས་གསལ་བོར་གསུངས་ཡོད་པ་ལྟར་འཇོག་པ་རེད། དེས་ན། ཐམས་ཅད་མཁྱེན་པ་ཏཱ་ར་ནཱ་ཐའི་གཞན་སྟོང་དབུ་མའི་རྒྱན་གྱི་སྐབས་སུ། རང་གི་ལུགས་ལ་ཁུངས་གསལ་མེད་བཞིན་དུ། །གཞན་གྱི་གཞུང་མཆོག་རྣམས་ལ་བསྐུར་བ་བཏབ། །ཞེས་གསུང་གི་ཡོད་པ་རེད། ང་རང་ཉིད་ཀྱི་ངོས་ནས་ཡིན་ན་དེ་རིང་ཇོ་ནང་གི་ལྟ་གྲུབ་འཆད་ཀྱིན་ཡོད་པའི་ཆ་ནས་ཇོ་ནང་གི་ལྟ་གྲུབ་རྩལ་འདོན་བྱེད་རྒྱུ་འོས་འགན་ཞིག་རེད། དེའི་ཆ་ནས་བཀའ་འཁོར་ལོ་ཐ་མ་དེ་ངེས་དོན་གྱི་མདོ་ཡིན་པ་གཞིར་བཞག་བྱས་ནས་བཤད་པ་ཡིན་ཀྱི། བོད་གངས་རིའི་ལྗོངས་ལ་བསམ་བློ་བཏང་ན་ཆོས་བརྒྱུད་གཞན་ན་བཀའ་འཁོར་ལོ་ཐ་མ་དྲང་དོན་དང་བར་བ་ངེས་དོན་བཞེད་པའི་ལུགས་གཅིག་དང༌། བཀའ་འཁོར་ལོ་ཐ་མ་དང་བར་བ་གཉིས་ཀ་ངེས་དོན་དུ་འདོད་མཁན་གཉིས་ཡོད་པ་རེད། དཔེར་ན་སྔ་འགྱུར་རྙིང་མ་ལ་མཚོན་ན། བོད་པ་སྤྲུལ་སྐུའི་ལྟ་བ་ཤན་འབྱེད་སོགས་ཀྱི་སྐབས་སུ་འཁོར་ལོ་བར་བ་དང་ཐ་མ་གཉིས་ཀ་ངེས་དོན་ཡིན་ཞེས་བཤད་ཀྱིན་ཡོད་པ་རེད། ཡིན་ཡང་སྔ་འགྱུར་རྙིང་མའི་ཁྲོད་ན་ལོ་ཆེན་དྷརྨ་ཤྲཱིའི་ལུགས་ལ་བར་བ་ངེས་དོན་ཕྱེད་དང་ཐ་མ་ངེས་དོན་མཚན་ཉིད་པ་ཡིན་ཞེས་བཤད་ཀྱིན་ཡོད་པ་ཞིག་རེད། དཔལ་ལྡན་རྒྱལ་བ་ཇོ་ནང་བ་ལ་མཚོན་ན། བཀའ་འཁོར་ལོ་ཐ་མ་དེ་ངེས་དོན་གྱི་མདོ་ཡིན་པ་གཞིར་བཞག་བྱས་ནས་ངེས་དོན་གྱི་མདོ་བཅུ་དང་དེ་བཞིན་གཤེགས་པའི་སྙིང་པོ་བསྟན་བྱེད་ཀྱི་མདོ་སྡེ་ལ་སོགས་པ་དེ་དག་སྒྲས་ཟིན་སྒྲ་ཇི་བཞིན་པར་ཁས་བླངས་ནས་རྩལ་འདོན་བྱས་ནས་གསུང་གི་ཡོད་པ་རེད། དེ་དག་གི་དགོངས་འགྲེལ་བསྟན་བཅོས་བྱམས་ཆོས་སྡེ་ལྔ་དེ་ཡང་དགོངས་པ་གཅིག་ཏུ་དྲིལ་ནས་ཐམས་ཅད་དབུ་མ་གཞན་སྟོང་གི་ལུགས་སུ་བཀྲལ་ཡོད་པ་རེད། དཔེར་ན། རི་བོ་དགེ་ལྡན་པ་ལྟ་བུ་ལ་མཚོན་ན་བསྟན་བཅོས་མངོན་པར་རྟོགས་པའི་རྒྱན་དང་རྒྱུད་བླ་མ་གཉིས་དབུ་མ་རང་རྒྱུད་པ་དང་ཐལ་འགྱུར་པའི་ལུགས་སོ་སོར་བཀྲལ་ཡོད་པ་དང༌། འབྱེད་རྣམ་གཉིས་དང་མདོ་སྡེ་རྒྱན་སེམས་ཙམ་པའི་ལུགས་སུ་ཕྱོགས་སོ་སོ་ནས་གསུང་གི་ཡོད་པ་རེད། ཡིན་ན་ཡང་དཔལ་ལྡན་རྒྱལ་བ་ཇོ་ནང་པ་ལ་མཚོན་ན་བྱམས་ཆོས་སྡེ་ལྔ་དེ་དགོངས་པ་གཅིག་དུ་དྲིལ་ནས་མཐར་ཐུག་གི་བསྟན་བྱ་གཞན་སྟོང་དབུ་མ་ཆེན་པོ་ཡིན་པ་འགྲེལ་གྱིན་ཡོད་པ་རེད། དེ་བཞིན་འཕགས་པ་ཐོགས་མེད་ཀྱི་ས་སྡེ་ལྔ་དང་སྡོམ་རྣམ་གཉིས་སོགས་ལ་བརྟེན་ནས་ཀྱང་བཤད་ཡོད་པ་རེད། ས་སྡེ་ལྔ་སྡོམ་རྣམ་གཉིས་དེ་དག་གི་སྐབས་སྐབས་སུ་སེམས་ཙམ་པའི་འདོད་པ་རེ་ཟུང་རེ་བསྟན་པ་མ་གཏོགས། ཕལ་ཆེ་བ་གཞན་སྟོང་དབུ་མའི་ལྟ་གྲུབ་ལ་འགྲེལ་གྱིན་ཡོད་པ་རེད། དེ་ཡང༌། གཞན་སྟོང་གི་རང་ལུགས་ཀྱི་ཤིང་རྟའི་སྲོལ་འབྱེད་ཆེན་པོ་ལ་འཕགས་པ་ཐོགས་མེད་བཞག་པ་རེད། དེ་ཡང་སངས་རྒྱས་བཅོམ་ལྡན་འདས་རང་ཉིད་ཀྱིས་འཇམ་དཔལ་རྩ་རྒྱུད་ལས། ང་ནི་མྱ་ངན་འདས་འོག་ནས། །ལོ་ནི་དགུ་བརྒྱ་ལོན་པ་ན། །ཐོགས་མེད་ཅེས་བྱའི་དགེ་སློང་ནི། །བསྟན་བཅོས་དེ་ནི་དོན་ལ་མཁས། །མདོ་སྡེ་ངེས་དོན་དྲང་བའི་དོན། །རྣམ་པ་མང་པོ་རབ་ཏུ་འབྱེད། །ཅེས་རྒྱལ་བ་སངས་རྒྱས་བཅོམ་ལྡན་འདས་ཀྱིས་དྲང་ངེས་འབྱེད་པར་ལུང་བསྟན་པའི་རྗེས་སུ་འབྲངས་ནས་བཀའ་འཁོར་ལོ་ཐ་མའི་དགོངས་པ་ངེས་དོན་དུ་འགྲེལ་གྱིན་ཡོད་པ་ཞིག་རེད། ཁུངས་ཀྱི་སྒོ་ནས་མདོར་བསྡུས་ཙམ་ཞུས་པ་ཡིན། མང་པོ་དགོས་ཀི་མི་འདུག ཡིན་ཡང་ས་སྡེ་ལྔ་དང་སྡོམ་རྣམ་གཉིས་སོགས་སེམས་ཙམ་པའི་རང་གཞུང་མ་ཡིན་པར་སྒྲུབ་བྱེད་ལུང་རིགས་མང་པོ་ཞིག་གསུངས་ཡོད་པ་རེད། ཡིན་ཡང་དོགས་པ་ཡོད་ན་རྗེས་ནས་དྲི་བ་ཡོང་ན་འགྲིག་གི་འདུག མདོར་བསྡུས་ཙམ་མ་གཏོགས་ཆུ་ཚོད་ཁོམ་སྐབས་མི་འདུག གཉིས་པ། གཞི་ལམ་འབྲས་གསུམ་གྱི་ནང་ནས་ལམ་གྱི་རྣམ་བཞག་བཤད་པའི་སྐབས་དེར་ལྟ་སྒོམ་སྤྱོད་གསུམ་གསུང་གྱིན་ཡོད་པ་རེད། དེ་ཡིན་ན་ལྟ་བའི་སྒོ་ནས་གྲུབ་མཐའ་སོ་སོར་རྩལ་འདོན་བྱེད་ཚུལ་མི་འདྲ་ས་མང་པོ་རེད། ཡིན་ཡང་རང་གི་ལྟ་ཚུལ་ཡིན་ན་དགོངས་པ་གཅིག་ཏུ་དྲིལ་ན་ཚིག་ཟིན་ཙམ་མ་གཏོགས། དོན་འདྲ་ས་མང་པོ་ཆགས་འདུག སྐབས་འདིར་ལྟ་སྒོམ་སྤྱོད་གསུམ་ལས་སྤྱོད་པ་དང་སྒོམ་པ་གཉིས་མདོར་བསྡུས་ཙམ་ཞུས་ན་ཆོག་གི་འདུག སྤྱོད་པ་དེ་ཐམས་ཅད་མཁྱེན་པ་ཏཱ་ར་ནཱ་ཐའི་ཐེག་མཆོག་དབུ་མའི་སྐབས་སུ། སྤྱོད་པ་བླང་དོར་མ་ནོར་དབུ་མ་སྟེ། །ཞེས་གསུངས་པ་བཞིན་དུ་སྤྱོད་པ་མཐའ་གཉིས་སུ་མ་ལྷུང་བའི་དབུས་ན་གནས་པ་དེ་བླང་དོར་མ་ནོར་བ་ཡིན་ཞེས་པ་དང༌། དེའི་སྟེང་ནས་ནང་བ་སངས་རྒྱས་པའི་ཆོས་ཀྱི་བསླབ་བྱ་བཤད་ཡོང་དུས། མདོར་ན་ཆོས་ནི་མི་འཚེ་བ། །དེ་བཞིན་གཤེགས་པ་རྣམས་ཀྱིས་གསུངས། །ཞེས་སྤྱོད་པ་འཚེ་བ་མེད་པ་ཞིག་གི་སྟེང་ནས་གསུང་གིན་ཡོད་པ་རེད། མདོར་བསྡུ་ན། ཐེག་དམན་གྱི་སྐབས་སུ་གཞན་གནོད་གཞི་དང་བཅས་པ་སྤོང་དགོས་པ་དང༌། ཐེག་ཆེན་གྱི་སྐབས་སུ་བསྡུ་དངོས་བཞི་དང་ཕར་ཕྱིན་དྲུག་ལ་སོགས་པ་སྤྱོད་པའི་སྒོ་ནས་སེམས་ཅན་གཞན་གྱི་དོན་སྒྲུབ་པ་དེ། སྤྱོད་པ་མདོར་བསྡུས་ཙམ་རེད། རྒྱས་པར་བཤད་ན་སོར་བྱང་སྔགས་གསུམ་གྱི་དམ་ཚིག་མང་པོ་ཞིག་ཡོད་པ་རེད། ཡིན་ཡང་དེ་ཙམ་ལས་སྐབས་འདིར་རྒྱས་པར་ཞུ་མི་དགོས་པར་བྱེད། སྒོམ་པ་ནི། ཐམས་ཅད་མཁྱེན་པ་ཏཱ་ར་ནཱ་ཐས་ཐེག་མཆོག་དབུ་མའི་སྐབས་སུ། སྒོམ་པ་ཞི་ལྷག་ཟུང་འཇུག་དབུ་མའི་ཡིན། །ཞེས་གསུངས་པ་བཞིན་ཞི་ལྷག་ཟུང་དུ་འཇུག་པ་ཞིག་དབུ་མའི་ལམ་ཟེར། སྒོམ་པ་མ་ནོར་བ་མཐའ་གཉིས་སུ་མ་ལྷུང་བ་ཞི་གནས་དང་ལྷག་མཐོང་ཟུང་དུ་འཇུག་པ་ལ་སྒོམ་པ་ཞེས་གསུང་གིན་ཡོད་པ་རེད། དེ་ཡང་སྒོམ་དངོས་མཉམ་བཞག་ངོ་སྐྱོང་བའི་སྐབས་སུ་ཆོས་རྗེ་ཀུན་མཁྱེན་རིན་པོ་ཆེའི་རི་ཆོས་ངེས་དོན་རྒྱ་མཚོའི་སྐབས་སུ་བཀའ་འཁོར་ལོ་བར་བ་དང་མཐུན་པར་སྤྲོས་བྲལ་དུ་མཉམ་པར་འཇོག་དགོས་པར་གསུངས་ཡོད། དེ་ཡང༌། དང་པོ་ཀུན་རྫོབ་ཀྱི་སྟེང་དུ། རྟེན་འབྲེལ་གྱི་རིགས་པ་དང༌། གཅིག་དུ་བྲལ་གྱི་རིགས་པ་ལ་སོགས་པས་སྤྲོས་བྲལ་གཏན་ལ་ཕབ་ནས་སྒོམ་དགོས་པ་དང༌། ཆོས་ཉིད་ལ་མཉམ་པར་འཇོག་པ་ན་སྤྲོས་མཚན་གང་ཡང་མ་གྲུབ་པར་རྟོག་མེད་འོད་གསལ་དུ་མཉམ་པར་བཞག་ནས། རྗེས་ཐོབ་ཤན་འབྱེད་པའི་སྐབས་སུ་བཀའ་འཁོར་ལོ་ཐ་མའི་དགོངས་པ་རྩལ་འདོན་བྱས་ནས་བཤད་ཀྱིན་ཡོད་པ་ཞིག་རེད། སྒོམ་པ་མདོར་བསྡུས་ཙམ་ཞུས་ཁུལ་ཡིན། དེའི་སྟེང་ནས་ལྟ་བ་བཤད་ན། ཐམས་ཅད་མཁྱེན་པ་ཏཱ་ར་ནཱ་ཐས་བོད་གངས་རིའི་ལྗོངས་ན་ཐེག་དམན་པའི་ལུགས་གཙོ་བོར་འཛིན་མཁན་ཞིག་ཡོད་པ་མ་རེད། ཅེས་གསུངས་པ་ལྟར། ཐམས་ཅད་ཀྱིས་རང་རང་དབུ་མ་པ་ཡིན་པར་ཁས་ལེན་པར་མ་ཟད། ས་སྐྱ་པ། སྔ་འགྱུར་རྙིང་མ། རི་བོ་དགེ་ལྡན་པ། བཀའ་བརྒྱུད་པ་མང་ཆེ་བས་དཔལ་ལྡན་ཐལ་འགྱུར་བའི་ལུགས་ཡིན་པར་འཆད་གྱིན་ཡོད་པ་རེད། དཔལ་ལྡན་རྒྱལ་བ་ཇོ་ནང་བའི་ལུགས་ཀྱི་བཤད་སྟངས་ཡིན་ན། སྤྱིར་དབུ་མ་པ་དེ་ལ་འཁོར་ལོ་བར་བའི་རྗེས་འབྲང་གི་དབུ་མ་པ་ཞིག་དང༌། འཁོར་ལོ་ཐ་མའི་རྗེས་འབྲང་གི་དབུ་མ་པ་གཉིས་བཞག་ནས་འཁོར་ལོ་བར་བའི་རྗེས་འབྲང་གི་དབུ་མ་པ་ལ་དབུ་མ་རང་སྟོང་བ་དང༌། དེ་ལ་ནང་ཚན་དབུ་མ་ཐལ་འགྱུར་བ་དང་རང་རྒྱུད་པ་གཉིས་འགྲེལ་ཚུལ་ཡོད་པ་རེད། ཡིན་ན་ཡང༌། ཇོ་ནང་ཉ་དཔོན་ཀུན་དགའ་དཔལ་བཟང་པོའི་ཕར་ཕྱིན་ཉ་ཊཱིཀ་སྐབས་ལྔ་བའི་སྐབས་སུ་གྲུབ་མཐའ་བཞིའི་མཚན་ཉིད་གསུང་ཡོང་དུས་དཔལ་ལྡན་ཐལ་འགྱུར་བའི་མཚན་ཉིད་བཞག་པ་དེ་དབུ་མ་གཞན་སྟོང་བ་ལ་ཚང་འདུག་ཡོད་པས། དེ་ལྟར་ཡིན་ན་དཔལ་ལྡན་ཐལ་འགྱུར་བ་ལ་འཁོར་ལོ་ཐ་མའི་རྗེས་འབྲང་གི་དཔལ་ལྡན་ཐལ་འགྱུར་བ་དང་འཁོར་ལོ་བར་བའི་རྗེས་འབྲང་གི་དཔལ་ལྡན་ཐལ་འགྱུར་བ་གཉིས་བཞག་ནས་འཁོར་ལོ་བར་བའི་རྗེས་འབྲང་གི་ཐལ་འགྱུར་བ་དེ་དབུ་མ་རང་སྟོང་བ་དེའི་ནང་གི་དཔལ་ལྡན་ཟླ་བ་གྲགས་པ་སོགས་ཀྱི་རྗེས་འབྲང་དང་བཅས་པ་བཞག་པ་དང༌། འཁོར་ལོ་ཐ་མའི་རྗེས་འབྲང་གི་ཐལ་འགྱུར་བ་ལ་གཞན་སྟོང་དབུ་མ་པ་བཞག་ནས། དེའི་ལུགས་ཀྱི་ལྟ་བ་དེ་གཞན་སྟོང་དབུ་མའི་སྐབས་སུ་ཡུལ་གྱི་ལྟ་བ་དང་ཡུལ་ཅན་གྱི་ལྟ་བ་མང་པོ་བཤད་ཡོད་པ་རེད་དེ། མདོར་བསྡུས་ན་ལྟ་བ་མཐར་ཐུག་དེ། བོད་གངས་རིའི་ལྗོངས་ན་དབུ་མ་པ་མང་པོ་ཞིག་གིས་ཆོས་ཐམས་ཅད་བདེན་མེད་དུ་གཏན་ལ་ཕབ་ནས་ཆོས་ཐམས་ཅད་རང་བཞིན་གྱིས་སྟོང་བ་དེ་ལྟ་བ་མཐར་ཐུག་གམ་ཡུལ་གྱི་ལྟ་བ་གནས་ལུགས་མཐར་ཐུག་ཏུ་ཁས་ལེན་པ་ཞིག་དང༌། དེ་ནས་མཉམ་བཞག་གི་ངོ་ལ་ལྟོས་ནས་གོ་རམས་པ་སོགས་ཡོད་མེད་གང་ཡང་ཁས་མི་ལེན་པའི་ལྟ་བ་ཞིག་འདོད་མཁན་གཅིག་སྟེ་ཕྱོགས་གཉིས་དང༌། གཞན་སྟོང་བའི་ལུགས་ལ། ཀུན་རྫོབ་སྣང་གྲགས་ཀྱིས་བསྡུས་པའི་ཆོས་ཐམས་ཅད་འཁྲུལ་བའི་ངོར་སྣང་ཙམ་དུ་ཡོད་པ་རེད། ཡོད་པ་ཨེ་ཡིན་ཟེར་ན། ཡོད་པ་ཡིན་པར་ལན་འདོན་པ་རེད། ཆོས་རྗེ་ཀུན་མཁྱེན་རིན་པོ་ཆེའི་ལྟ་བ་ཤན་འབྱེད་སྐབས་སུ། ཡོད་མེད་བར་ན་ཕུང་གསུམ་མེད། །ཅེས་ཡོད་པ་མ་ཡིན་མེད་པ་ཡང་མ་ཡིན་པ་དེ་འདྲ་གསུང་གི་མེད་པ་ཞིག་རེད། ཡོད་པའང་མ་ཡིན་མེད་པ་ཡང་མ་ཡིན་ཞེས་ཁེས་ལེན་མེད་པའི་ལྟ་བ་དེ་འཕགས་པ་ཐོག་མེད་ཀྱི་མངོན་པ་ཀུན་བཏུས་སྐབས་སུ་ཐེག་ཆེན་གྱི་མདོ་སྡེ་ཟབ་མོ་ལ་བརྟེན་ནས་ལྟ་བ་ངན་པ་ཉི་ཤུ་རྩ་བརྒྱད་བྱུང་བའི་བཅུ་གསུམ་པ་དེ་ཚིག་ཟིན་ལ་བགྲང་ཡོང་དུས་ཁས་ལེན་མེད་པའི་ལྟ་བ་ཞེས་གསུངས་ཡོད་པ་རེད། དེས་ན་ཇོ་ནང་རང་ལུགས་ལ་ཁས་ལེན་མེད་པའི་ལྟ་བ་འཇོག་གྱིན་ཡོད་པ་མ་རེད། གཞན་སྟོང་ཞེས་པ་དེ་གང་ལ་ཞུ་བ་རེད་ཅེ་ན། བསྟན་བཅོས་རྒྱུད་བླ་མ་ལས། རྣམ་དབྱེར་བཅས་པའི་མཚན་ཉིད་ཅན། །གློ་བུར་དག་གིས་ཁམས་སྟོང་གི། །ཞེས་ཁམས་བདེ་བར་གཤེགས་པའི་ཡེ་ཤེས་སྙིང་པོ་དེ་ཀུན་རྫོབ་སྣང་གྲགས་ཀྱིས་བསྡུས་པའི་ཆོས་ཐམས་ཅད་ཀྱིས་སྟོང་པའམ་སྤྲོས་པ་མཐའ་དག་གིས་སྟོང་བ་ཡིན་པ་གཏན་ལ་ཕབ་ནས། རྣམ་དབྱེར་མེད་པའི་མཚན་ཉིད་ཅན། །བླ་མེད་ཆོས་ཀྱིས་སྟོང་མ་ཡིན། །ཞེས་རྣམ་དབྱེར་མེད་པ་དོན་དམ་པ་ཆོས་ཀྱི་དབྱིངས་དེ་ཉིད་སྣང་ཕྱོགས་ནས་བཤད་ན་དོན་དམ་པའི་སྐུ་དང་རྣམ་པ་ཐམས་ཅད་ཀྱི་བདག་ཉིད་ཆོས་ཉིད་བདེན་པ་མི་བསླུ་བ་གནས་ལུགས་མཐར་ཐུག་ཡོངས་གྲུབ་ཀྱི་ཡོན་ཏན་མཐའ་དག་ལྡན་པར་པ་ཞིག་ལ་ངོས་འཛིན་པ་རེད། དེ་ཡང་བསྟན་བཅོས་རྒྱུད་བླ་མའི་བཤད་བྱ་རྩ་བའི་མདོའི་སྐབས་སུ། གང་ལ་གང་མེད་པ་ནི་དེས་སྟོང་བའོ། །དེའི་ལྷག་མ་གང་ཡིན་པ་ནི་ཡོད་པའོ། །ཞེས་གསུངས་པ་ལྟར། གང་ལ་གང་མེད་པ་ནི་དེས་སྟོང་བའོ་ཟེར་བ་དེ། སྟོང་གཞི་དོན་དམ་བདེན་པ་བཞག་ནས་དེ་ལ་ཀུན་རྫོབ་སྣང་གྲགས་ཀྱིས་བསྡུས་པའི་ཆོས་ཐམས་ཅད་ཀྱིས་སྟོང་པ་གཏན་ལ་ཕབ་པ་རེད། རྣམ་དབྱེར་མེད་པའི་མཚན་ཉིད་ཅན། །བླ་མེད་ཆོས་ཀྱིས་སྟོང་མ་ཡིན་ཞེས་པ་ལྟར། དོན་དམ་སྣང་ཕྱོགས་ནས་གཏན་ལ་ཕབས་ཚུལ་ཞིག་ཞུ་དགོས་གལ་ཆེན་དུ་སྣང་ཡང་དུས་ཚོད་ཀྱི་ཁོམ་པ་མ་སོང༌། དེ་ནས་དྲི་བ་ཡོད་ན་དྲི་བ་གནོངས་དང་རྗེས་ནས་མཇུག་བསྡུ་ཉུང་ཉུང་ཞིག་ཡོད། དྲི་བ་གནང་མཁན་དགེ་བཤེས་བསོད་ནམས་བཟང་པོ། ༼ལགས་སོ་རྒན་རིན་པོ་ཆེ་ལ་དྲི་བ་ཞིག་འདྲི། གཞན་སྟོང་དབུ་མ་ཆེན་མོ་ཟེར་བ་དེ་སྒོམ་པའམ་ཉམས་སུ་ལེན་པ་ཡིན་ན་ཉོན་མོངས་པ་བདག་འཛིན་འཁོར་བའི་རྩ་བ་ཐམས་ཅད་ཀྱི་གཉེན་པོ་ཏག་ཏག་འགྲོ་ཚུལ་ཞིག་ཉམས་མྱོང་གི་སྟེང་ནས་གསུང་རོགས་ཞུ། ༽ འོ་ལགས་སོ། དེའི་ཕྱོགས་ནས་ཞུ་བསམ་གྱིན་ཡོད་ཡིན་ཡང་དུས་ཚོད་ཀྱིས་ཁོམ་མ་སོང༌། དེ་ཡང༌། གཞན་སྟོང་གཏན་ལ་འབེབས་ཚུལ་གྱི་སྟེང་ནས་བཤད་ན། དང་པོ་ཀུན་རྫོབ་སྣང་གྲགས་ཀྱིས་བསྡུས་པའི་ཆོས་ཐམས་ཅད་བདེན་སྟོང་དུ་གཏན་ལ་ཕབ་ཀྱིན་ཡོད་པ་དེ་ཤེས་དགོས་པ་གལ་ཆེན་རེད། འཁོར་ལོ་དང་པོས་རྒྱུད་མ་སྦྱངས་བར་འཁོར་ལོ་བར་བ་གསུང་བའི་གདུལ་བྱ་མ་ཡིན་པ་དང༌། དེ་བཞིན་འཁོར་ལོ་བར་བས་རྒྱུད་སྦྱངས་ཟིན་པའི་གང་ཟག་ཅིག་ལ་འཁོར་ལོ་ཐ་མ་སྟོན་དགོས་པའི་གདུལ་བྱ་ཆགས་འདུག་ཡོད་པ་རེད། དེ་ཡིན་ན་ཀུན་རྫོབ་སྣང་གྲགས་ཀྱིས་བསྡུས་པའི་ཆོས་ཐམས་ཅད་རང་བཞིན་མེད་པར་གཏན་ལ་ཕབ་ཡོང་དུས་རང་བཞིན་གྱིས་གྲུབ་པའམ་ཆོས་བདག་ཏུ་གྲུབ་པར་འཛིན་པའི་འཛིན་པ་དེའི་ཞེན་ཡུལ་སུན་བྱུང་བ་དང༌། དེའི་སྟེང་ནས་ཡང་ཀུན་རྫོབ་སྣང་གྲགས་ཀྱིས་བསྡུས་པའི་ཆོས་ཐམས་ཅད་དོན་དམ་གནས་ལུགས་ཡོངས་གྲུབ་ཀྱི་སྟེང་དུ་གང་ཡང་མ་གྲུབ་པ། དོན་དམ་གནས་ལུགས་ཡོངས་གྲུབ་དེ་སྤྲོས་པ་མཐའ་དག་གིས་སྟོང་བ་གཏན་ལ་ཕབ་ནས། འཛིན་པ་དང་རྣམ་རྟོག་ཐམས་ཅད་ཀྱི་ཞེན་ཡུལ་སུན་བྱུང་བའི་སྒོ་ནས་སྒོམ་དགོས་པ་པ་རེད། སྔགས་བླ་ན་མེད་པའི་སྐབས་སུ་རྒྱུད་སཾ་བྷུ་ཊ་ལས། རྣམ་རྟོག་མ་རིག་ཆེན་པོ་དེ། །འཁོར་བ་རྒྱ་མཚོ་ལྟུང་བྱེད་ཡིན། །མི་རྟོག་ཏིང་འཛིན་ལ་གནས་ན། །མཁའ་བཞིན་དྲི་མ་མེད་པར་འགྱུར། །ཞེས་གསུངས་པ་བཞིན་དུ། མི་རྟོག་པ་ཙམ་མ་ཡིན་པར་གནས་ལུགས་ལ་རྟོག་མེད་སྤྲོས་བྲལ་གྱི་ངང་ནས་མཉམ་པར་བཞག་ཡོང་དུས་རྣམ་པར་རྟོག་པ་གཞན་ཐམས་ཅད་བསྒྱུར་ཐུབ་པ་ཞིག་དང་དེ་དག་གི་ཞེན་ཡུལ་སུན་བྱུང་བ་དང་སྤང་ཐུབ་པ་ཞིག་ཏན་ཏན་ཡོང་གི་ཡོད་པ་རེད། དེ་ནས་རང་ལ་མྱོང་བ་ཆེན་པོ་ཡོད་པ་མ་རེད། ཡིན་ན་ཡང༌། དཔལ་ལྡན་རྒྱལ་བ་ཇོ་ནང་བ་སྒྲུབ་རྒྱུད་ཀྱི་བསྟན་པའི་བཀའ་བབས་ཞིག་ཡིན་པ་ཚང་མས་ངོས་འཛིན་ཡོད་པ་རེད། དེའི་ཆ་ནས་དཔལ་མཆོག་དུས་ཀྱི་འཁོར་ལོའི་སྦྱོར་བ་ཡན་ལག་དྲུག་གི་སྒོ་ནས་མཚམས་ལ་འདུག་པ་དང༌། ཉམས་སུ་ལེན་གྱིན་ཡོད་པ་རེད། རང་ཡང་དེ་ལྟར་ཡིན། ཡིན་ན་རྟོག་མེད་སྤྲོས་བྲལ་རྣམ་པར་མི་རྟོག་པའི་ཡེ་ཤེས་དེ་ལེགས་པོ་སྒོམ་པ་ཡིན་ན། དཔལ་དུས་ཀྱི་འཁོར་ལོའི་རྒྱུད་ལས་གསུངས་པའི་འོད་གསལ་རྟགས་བཅུ་དང༌། རི་བོ་དགེ་ལྡན་པ་ལྟ་བུ་མཚོན་ན་མཁས་གྲུབ་རྗེའི་དུས་འཁོར་འགྲེལ་བའི་སྐབས་སུ་གསུང་གི་ཡོད་པ་ནང་བཞིན་ཉམས་སྣང་དང་རྟགས་བཅུ་སོགས་འཆར་ཐུབ་པ་དང་འཆར་རྒྱུ་ཡོད་པ་དེ་རྒྱུད་སྡེའི་དགོངས་པ་མ་ནོར་བའི་རྟགས་མཚན་ཞིག་དང་བདེན་དཔང་ཡོང་ཐུབ་པ་ང་རང་ལ་ཏན་ཏན་ཡིད་ཆེས་ཡོད། དྲི་བ་གནང་མཁན། རི་བོ་དགེ་ལུགས་པའི་ལྷ་རམས་པ་འབྲུག་གྲགས།༼མཁན་རིན་པོ་ཆེ་ལ་ང་དྲི་བ་ཞིག་ཡོད། རྗེ་བཙུན་ཏཱ་ར་ནཱ་ཐའི་ཤེས་རབ་སྙིང་པོའི་འགྲེལ་བའི་ནང་ན། ཁམས་བདེ་བར་གཤེགས་པའི་སྙིང་པོ་དེ་སྣང་བ་སྒྱུ་མ་ལྟ་བུའི་ཀུན་རྫོབ་འཁྲུལ་བཅས་ཐམས་ཅད་ལྡོག་དུས་སྣང་ཡོང་བ་དུང་སེར་བོ་སྣང་བྱེད་ཀྱི་འཁྲུལ་རྒྱུ་ལྡོག་འགྲོ་དུས་དུང་དཀར་བོ་སྣང་ཡོང་བ་ལྟ་བུར་གསུངས་འདུག དེ་ན་ཁམས་བདེ་བར་གཤེགས་པའི་ཡེ་ཤེས་དེ་སྣང་སྟོང་ཟུང་འཇུག་ལས་སྣང་ཕྱོགས་ནས་གསལ་བོ་ཞིག་གསུང་རོགས།༽ ལགས་སོ། དེ་དཔེར་ན་ཀུན་རྫོབ་འཇོག་བྱེད་ཀྱི་ཚད་མ་དང༌། གནས་ལུགས་དོན་དམ་འཇོག་བྱེད་ཀྱི་ཚད་མ་གཉིས་ཡོད་པ་རེད། དེས་ན་ཀུན་རྫོབ་སྣང་གྲགས་ཀྱིས་བསྡུས་པའི་ཆོས་འདི་དག་ཐམས་ཅད་འཁྲུལ་བའི་སྣང་བ་ལས་ལྷག་གི་དཔྱད་ན་གནས་ལུགས་སུ་གྲུབ་པ་དང་གཤིས་ལུགས་སུ་གྲུབ་པ་ཡོད་པ་མ་རེད། དེ་མེད་ན། འཁྲུལ་བའི་རྒྱུ་ཐམས་ཅད་ལྡོག་ཡོང་དུས་ཀུན་རྫོབ་སྣང་གྲགས་ཀྱིས་བསྡུས་པའི་ཆོས་ཐམས་ཅད། སངས་རྒྱས་ཀྱི་ས་ན་ཤུགས་ལ་རྟོགས་པ་མ་གཏོགས་དངོས་སུ་རྟོགས་པ་མེད་ཟེར་ནས་བཤད་ཀྱིན་ཡོད་པ་རེད། དེའི་རྒྱུ་མཚན་འཁྲུལ་སྣང་དང་འཁྲུལ་རྒྱུ་ལྡོག་སོང་བས་རེད། དེ་ནས་ཁྱེད་ཀྱི་གསུངས་བ་ནང་བཞིན། སྔོན་མེད་ལེགས་བཤད་སྐབས་སུ། དུང་སེར་བོ་སྣང་བྱེད་ཀྱི་འཁྲུལ་རྒྱུ་དེ་ལྡོག་འགྲོ་དུས་སྟོང་བ་སྟོང་རྐྱང་གི་སྣང་བ་ཙམ་མ་ཡིན་པར་དེས་ཤུལ་ན་འོད་གསལ་བའི་སེམས་ཀྱི་རང་བཞིན་ཞིག་སྣང་རྒྱུ་ཡོད་པ་གསུང་གྱིན་ཡོད་པ་རེད། བསྟན་བཅོས་རྒྱུད་བླ་མ་ལས། འོད་གསལ་བྱས་མིན་དབྱེར་མེད་པར། །འཇུག་ཅན་གངྒའི་ཀླུང་གིས་ནི། །རྡུལ་ལས་འདས་པའི་སངས་རྒྱས་ཀྱི། །ཆོས་རྣམས་ཀུན་དང་ལྡན་པ་ཉིད། །ཅེས་གསུངས་པ་དང༌། སངས་རྒྱས་ཡེ་ཤེས་སེམས་ཅན་ཚོགས་ཞུགས་ཕྱིར། །ཞེས་དང༌། རྫོགས་སངས་སྐུ་ནི་འཕྲོ་ཕྱིར་དང༌། །དེ་བཞིན་ཉིད་དབྱེར་མེད་ཕྱིར་དང༌། །རིགས་ཡོད་ཕྱིར་ན་ལུས་ཅན་ཀུན། །རྟག་ཏུ་སངས་རྒྱས་སྙིང་པོ་ཅན། །ཞེས་སོགས་གསུངས་པ་ལྟར། རྣམ་བཞག་རྣམ་པ་བཅུ་དང་དཔེ་དགུ་དོན་དགུའི་སྒོ་ནས་མང་པོ་གསུང་གྱིན་ཡོད་པ་རེད། དེ་དག་གི་སྒོ་ནས་རྩལ་འདོན་བྱེད་ཡོང་དུས་ཁམས་བདེ་བར་གཤེགས་པའི་སྙིང་པོ་དེ། སྟོང་རྐྱང་ཙམ་མ་ཡིན་པར་སྣང་ཕྱོགས་ནས་འོད་གསལ་བའི་སེམས་ཀྱི་རང་བཞིན་ཅིག་སྣང་རྒྱུ་ཡོད་པ་གསུང་གྱིན་ཡོད་པ་རེད། དཔེར་ན་སྔ་འགྱུར་རྙིང་མ་ལྟ་བུ་ལ་མཚོན་ན། མཛོད་བདུན་སྐབས་སུ། རང་བཞིན་འོད་གསལ་ཀུན་གཞི་འདུས་མ་བྱས། །ཞེས་གསུངས་པ་ལྟར་རང་བཞིན་འོད་གསལ་བའི་ཆ་ནས་རྩལ་འདོན་བྱས་ནས་གསུངས་པ་ཡོད་པ་རེད། མདོ་ཕར་ཕྱིན་ཐེག་པའམ་ཡང་ན་འཁོར་ལོ་ཐ་མའི་སྐབས་སུ་འོད་གསལ་བའི་སེམས་རྩལ་འདོན་བྱས་ནས་བཤད་ཡོད་པ་དང༌། སྔགས་ཀྱི་སྐབས་སུ་འགྱུར་མེད་བདེ་བ་ཆེན་པོའི་ཡེ་ཤེས་ཐབས་ཤེས་ཟུང་དུ་འཇུག་པ་དེ། རྩལ་འདོན་བྱས་ནས་གསུང་གྱིན་ཡོད་པ་ཞིག་རེད། དྲི་བ་གནང་མཁན། དགེ་བཤེས་རོང་བོའི་ཡོན་ཏན། ༼མཁན་རིན་པོ་ཆེ་ལ་ངས་དྲི་བ་ཞིག་ཞུ། དྲི་བ་གཉིས་ཡོད། ཁྱེད་རང་གི་འཁོར་ལོ་ཐ་མའི་དགོངས་དོན་མཐར་ཐུག་དེ་གཞན་སྟོང་དབུ་མ་ཆེན་མོ་མཐར་ཐུག་གི་དབུ་མ་མཆོག་ཏུ་གྱུར་བ་རེད་ཟེར་ནས་གསུངས་སོང༌། དེ་ན་རྒྱ་གར་གྱི་པཎྜི་ཏ་གྲུབ་ཆེན་མཻ་ཏྲི་བ༼དེའི་གསུང་ཡིན་མིན་བརྟག་པའི་གནས༽འི་དེ་ཁོ་ན་ཉིད་བཅུ་བ་ཟེར་བའི་ནང་ན། བླ་མའི་ངག་གིས་མ་རྒྱན་པའི། །དབུ་མའང་འབྲིང་བོ་ཙམ་ཉིད་དོ། །ཞེས་དཔལ་ལྡན་ཟླ་བའི་མན་ངག་གིས་མ་རྒྱན་པའི་དབུ་མ་དེ་དབུ་མ་འབྲིང་བོ་ཙམ་ཡིན་ཞེས་གསུངས་འདུག ཡིན་ཡང་ཁྱེད་རང་གིས་དཔལ་ལྡན་ཟླ་བའི་དགོངས་པ་མཐར་ཐུག་པའི་དབུ་མ་དེ་དབུ་མ་ཆེན་པོ་མ་རེད་ཅེས་གསུངས་འདུག དེ་ལ་འགྲེལ་བཤད་ཅིག་གནང་རོགས། དྲི་བ་གཉིས་པ་དེ། སངས་རྒྱས་བཅོམ་ལྡན་འདས་ཀྱིས་འཁོར་ལོ་ཐ་མ་གསུངས་བ་དེ་གདུལ་བྱ་སེམས་ཙམ་པ་རྗེས་སུ་བཟུང་བའི་ཕྱིར་དུ་གསུངས་བའམ་ཡང་ན་གདུལ་བྱ་སེམས་ཙམ་པའི་ངོར་ལ་གསུངས་བ་མ་ཡིན་པའི་སྒྲུབ་བྱེད་ག་རེ་ཡོད་ལགས།༽ ལན། ལགས་སོ། མཻ་ཏྲི་བས་གསུང་དེ་དཔལ་ལྡན་ཟླ་བའི་མན་ངག་གིས་མ་བརྒྱན་པའི་ཟེར་བ་དེ་དབུ་མ་རང་སྟོང་བ་ཐལ་རང་གཉིས་ཀྱི་ཐལ་ཟློག་སྐབས་སུ་རྣམ་པ་ཚང་མས་མཁྱེན་གསལ་རེད། རྩོད་པ་རྩོད་ལན་མང་པོ་ཡོང་གྱིན་ཡོད་པ་རེད། དེས་སྐབས་སུ་ཆོས་ཐམས་ཅད་རང་ངོས་ནས་གྲུབ་པ་མེད་པར་གཏན་ལ་མ་ཕབ་པར་རང་མཚན་གྱིས་གྲུབ་པ་ཡོད་པ་གཞིར་བཞག་གི་སྟེང་ནས། བདེན་གྲུབ་མེད་པ་གཏན་ལ་ཕབས་ཡིན་ན། དབུ་མ་འབྲིང་ཙམ་མ་གཏོགས་ཡོང་བ་མ་རེད་ཟེར་བ་མ་གཏོགས། སྤྱིར་ན་དེ་ལས་ལྷག་ཅིག་མེད་ཅེས་གསུངས་བ་མ་ཡིན་པའི་རྒྱུ་མཚན། མདོ་སྡེ་ལང་ཀར་གཤེགས་པ་ལས། སེམས་ཙམ་ལ་ནི་བརྟེན་ནས་ནི། །ཕྱི་རོལ་དོན་ཡང་མི་མི་རྟོག་གོ། །སྣང་བ་མེད་པ་ལ་བརྟེན་ནས། །སེམས་ཙམ་ལས་ནི་འདའ་བར་བྱ། །ཞེས་ཆོས་ཐམས་ཅད་བདེན་པར་མེད་པ་གཏན་ལ་ཕབ་པ་ལ་བརྟེན་ནས་སྣང་མེད་དབུ་མ་ཞིག་དང༌། ཡང་དག་དམིགས་པ་ལ་བརྟེན་ནས། །སྣང་བ་མེད་ལས་འདའ་བར་བྱ། །ཅེས་སྣང་བཅས་དབུ་མ་ཞིག་འཇོག་པ་རེད། དེ་ཡང་འཇམ་དཔལ་གྱི་ལྟ་བ་མདོར་བསྟན་སྐབས་སུ། ཕུང་པོ་རྣམ་དཔྱད་སྟོང་བ་ཉིད། །ཆུ་ཤིང་བཞིན་དུ་སྙིང་པོ་མེད། །རྣམ་པ་ཐམས་ཅད་མཆོག་ལྡན་པའི། །སྟོང་ཉིད་དེ་ལྟར་གྱུར་མ་ཡིན། །ཞེས་ཕུང་པོ་རྣམ་པར་དཔྱད་པའི་སྟོང་བ་མེད་དགག་ཙམ་དེ་ཆུ་ཤིང་བཞིན་དུ་སྙིང་པོ་མེད། དེ་ནས་དོན་དམ་སྣང་ཕྱོགས་ཀྱི་ཆ་ནས་བཞག་ན། རྣམ་པ་ཐམས་ཅད་མཆོག་ལྡན་པའི། །སྟོང་ཉིད་དེ་ལྟར་གྱུར་མ་ཡིན་ཞེས་གསུངས་པ་ནང་བཞིན་རེད། དྲི་བ་དང་པོའི་ལན་དེ་ཡིན། དྲི་བ་གཉིས་པའི་ལན། བཀའ་འཁོར་ལོ་ཐ་མ་དེ་སེམས་ཙམ་པ་རྗེས་སུ་བཟུང་བའི་ཆེད་ཡིན་པར་ཇོ་ནང་རང་ལུགས་ལ་བཤད་གྱིན་ཡོད་པ་རེད། དེ་ལྟ་ན། སེམས་ཙམ་པའི་ཆེད་དུ་གསུངས་བ་འེ་རེད་ཅེས་དྲིས་བ་ཡིན་ན། ཆེད་དུ་གསུངས་བ་ཡིན་པར་འདོད་ཟེར། དེ་ཁོ་ནའི་ཆེད་དུ་གསུང་བ་ཡིན་པར་ཐལ་ཞེ་ན། ཅིའི་ཕྱིར་ཞེས་པ་ལན་འདོན་པ་ཡིན། ཐལ་སྒྲ། དྲི་བ་གནང་མཁན། སྔ་འགྱུར་རྙིང་མ་ཞིག་ཡིན་པ་འདྲ།༼དགེན་རིན་པོ་ཆེ་དྲི་བ་ཞིག་འདྲི། སྔ་འགྱུར་རྙིང་མས་བཀའ་འཁོར་ལོ་ཐ་མའི་དགོངས་པ་འགྲེལ་ཚུལ་དང་ཇོ་ནང་ཏཱ་ར་ནཱ་ཐ་སོགས་ཀྱིས་དགོངས་པ་འགྲེལ་ཚུལ་ཕལ་ཆེར་གཅིག་རེད། ཁམས་བདེ་བར་གཤེགས་པའི་སྙིང་པོ་དེ་འདོད་ཚུལ་ཡང་གཅིག་རེད། ཡིན་ན་ཡང་ཁྱེད་ཇོ་ནང་བའི་གཞུང་ལུགས་ཀྱི་དགོངས་པ་ལྟར་ན་ཁམས་བདེ་བར་གཤེགས་པའི་སྙིང་པོ་དེ་གནས་ལུགས་མཐར་ཐུག་གི་ངོར་རང་གི་ངོ་བོ་སྟོང་བའི་ཚུལ་དུ་གྲུབ་པ་རེད། རང་གི་ངོ་བོ་མི་སྟོང་བའི་བདེན་པའི་ཚུལ་དུ་གྲུབ་པ་རེད། བདེན་པའི་ཚུལ་དུ་གྲུབ་ན་གཅིག་དང་ཐ་དད་གང་རུང་གི་ཚུལ་དུ་གྲུབ་གི་ཡོད་རེད་དམ་ལས་གཞན་པའི་གྲུབ་ཚུལ་ཞིག་ཡོད་རེད་ལགས། ༽ འོ་ལགས་སོ། ཁྱེད་གི་དྲི་བ་ཟུར་དང་པོ་ཡིན་ན་སྔ་འགྱུར་རྙིང་མ་རང་གི་ལུགས་ལ་ཀུན་གཞི། གཉུག་མའི་ཡེ་ཤེས། འདུས་མ་བྱས། རིང་བཞིན་འོད་གསལ་བ་ཚིག་ཟིན་ནང་བཞིན། ཀུན་མཁྱེན་ཀློང་ཆེན་རབ་འབྱམས་ཀྱི་མཛོད་བདུན་སྐབས་སུ་རང་བཞིན་འོད་གསལ་ཀུན་གཞི་འདུས་མ་བྱས། །ཞེས་གསུངས་ཡོད་པ་རེད། ཡིན་ན་ཡང་བླ་མ་མི་ཕམ་ཚང་གི་ངེས་ཤེས་སྒྲོན་མེའི་སྐབས་སུ། འཕགས་ཡུལ་དཔལ་ལྡན་ཟླ་བ་དང༌། །བོད་ན་རོང་ཟོམ་ཆོས་བཟང་གཉིས། །དགོངས་པ་གཅིག་དང་དབྱངས་གཅིག་གིས། །ཀ་དག་སྟོང་པ་ཆེན་པོ་བསྒྲུབས། །ཞེས་གསུངས་ཚུལ་ཞིག་ཡོང་ཡོད་པ་རེད། ཡིན་ན་ཡང་སྟོང་ཕྱོགས་ནས་གཏན་ལ་ཕབ་པ་ཡིན་ན་འགྲིག་གི་རེད། རང་བཞིན་འོད་གསལ་བའི་སྣང་ཕྱོགས་ཀྱི་ཆ་ནས་མང་པོ་ཞིག་སྔ་འགྱུར་རྙིང་མས་འཆད་ཀྱིན་ཡོད་པ་དེ་ཀློང་ཆེན་མཛོད་བདུན་སྐབས་སུ་གསལ་བོར་རྩལ་འདོན་བྱས་ནས་གསུངས་ཡོད་པ་རེད། དེ་ནང་བཞིན་དེང་སང་སྔ་འགྱུར་རྙིང་མ་ལ་མཚོན་ན་མང་ཆེ་བ་འཇུ་མི་ཕམ་གྱི་རྗེས་སུ་འབྲངས་ནས་ཡིག་ཆ་རྩལ་འདོན་བྱེད་ཀྱིན་ཡོད་པ་རེད། འཇུ་མི་ཕམ་གྱི་གཞན་སྟོང་ལྟ་བ་ཁས་ལེན་སེང་གེའི་ང་རོ། སྟོང་ཐུན་སེང་གེའི་ང་རོ། གཞུང་སྤྱིའི་དཀའ་འགྲེལ་རིན་པོ་ཆེའི་ཟ་མ་ཏོག དམ་ཆོས་དོགས་སེལ་སོགས་ཀྱི་སྐབས་སུ་གཞན་སྟོང་དེ་ཉིད་གསལ་བར་གསུངས་ཡོད་པ་ཅིག་རེད། དེར་མ་ཟད་ཇོ་ནང་བའི་དོན་དམ་བདེན་པ་བདེན་པར་གྲུབ་ཚུལ་དེ། བདེན་པ་དང་མི་བསླུ་བ་རེད་ཅེས་བཤད་གི་ཡོད་པ་མ་གཏོགས་སྤྲོས་པའི་བདེན་པར་མ་གྲུབ་པ་ཇོ་ནང་བས་ཁས་ལེན་པ་རེད། དེ་ནང་བཞིན། བླ་མ་མི་ཕམ་ཚང་གི་གཞན་སྟོང་ལྟ་བ་ཁས་ལེན་སེང་གེའི་ང་རོའི་སྐབས་སུ། ངེད་འཁྲུལ་བ་ཀུན་རྫོབ་དང་མ་འཁྲུལ་བ་དོན་དམ་དུ་འདོད་པའི་ལུགས་ལ་མ་འཁྲུལ་བའི་དོན་པར་གྲུབ་པ་དགག་མི་རུང་བས། ཞེས་ཡིག་ཆའི་ཚིག་ཟིན་རེད། (ཐལ་སྒྲ།) དེ་ནང་བཞིན་དུ་ང་ཚོས་དོན་དམ་བདེན་པ་དེ་ཉིད་དགག་བྱའི་བདེན་པར་མ་གྲུབ། སྤྲོས་པའི་བདེན་པར་མ་གྲུབ་པར། མཚན་མ་སྤྲོས་པའི་བདེན་པར་ངེད་མི་འདོད། །སྤྲོས་པས་དབེན་པའི་བདེན་ཚུལ་འདི་ལྟ་བུ། །ཞེས་ཐམས་ཅད་མཁྱེན་པ་ཏཱ་ར་ནཱ་ཐས་གཞན་སྟོང་དབུ་མའི་རྒྱན་ན་གསུང་ཡོད་པ་རེད། དགག་བྱའིབདེན་པར་མ་གྲུབ། ཆོས་བདག་ཏུ་མ་གྲུབ་ཟེར་བ་ཡིན་ན་ཡང༌། བདེན་པ་དང་མི་བསླུ་བ་ཡིན་པས་བདེན་པ་ཡིན་ན་བདེན་པར་གྲུབ་དགོས་པ། ཡོད་པ་ཡིན་ན་ཡོད་པར་གྲུབ་དགོས་པ་རེད་ཅེས་བཤད་ཡོད་པ་རེད། (ཐལ་སྒྲ།) དཔེར་ན་རི་བོ་དགེ་ལྡན་པ་མཚོན་ན་འཇུག་འགྲེལ་དགོངས་པ་རབ་གསལ་གྱི་སྐབས་སུ། སྔ་མའི་དོན་དམ་དང་དེའི་ངོར་གྲུབ་པ་ཡོད་ལ། ཕྱི་མའི་དོན་དམ་དང་དེའི་ངོར་གྲུབ་པ་གཞི་མ་གྲུབ་པའི་ཕྱིར། ཞེས་གསུངས་པ་ནང་བཞིན་ང་ཚོས་ཀྱང་དོན་དམ་བདེན་པ་འཕགས་པའི་མཉམ་བཞག་ཡེ་ཤེས་ཀྱི་ངོར་བདེན་པ་དང་མི་བསླུ་བ་གནས་ལུགས་སུ་ཡོད་པ་ཞེས་བཤད་ཡོད་པ་རེད། དེ་ལས་ལྷག་གིས་ཆོས་བདག་ཏུ་གྲུབ་པ་སྒྲུབ་པ་རང་དབང་བ་ཕྱི་རོལ་བའི་འདོད་པ་ནང་བཞིན་ཞིག་གཏན་ནས་ཁས་ལེན་མེད་པ་རེད། དེ་མེད་པ་དེ་ཆོས་རྗེ་ཀུན་མཁྱེན་རིན་པོ་ཆེའི་རི་ཆོས་ངེས་དོན་རྒྱ་མཚོའི་སྐབས་སུ། ཕྱི་རོལ་བ་དང་མི་འདྲ་བའི་རྩོད་སྤོང་ལ། བདག་གཉིས་ཀྱིས་སྟོང་བའི་ཕྱིར། ཞེས་པའི་ལན་དེ་གནད་འགག་ཆེ་བའི་ལན་མདོར་བསྡུས་ན་དེ་ཙམ་རེད། (ཐལ་སྒྲ། )འདི་ཀྱང་བསྟན་པ་ཡུན་རིང་གནས་པར་གྱུར་ཅིག ། ཀློག་པ་པོ་རྣམས་ལ་ཞུ་བྱ། སྤྱིར་ཤེས་ཡོན་གྱི་ཚད་གཞི་ཞན་པ། སྒོས་ཟིན་བྲིས་ཕབ་པའི་ཉམས་མྱོང་མེད་སྟབས་སྒྲ་ཡང་གསལ་བོ་མིན་པས་ནོར་འཁྲུལ་ཅི་མཆིས་བཟོད་གསོལ་དང་ལེགས་ཚོགས་གང་མཆིས་དཔལ་ལྡན་བླ་མའི་སྐུ་ཚེ་བརྟན་པ་དང་གཞན་སྟོང་སེང་གེའི་ང་རོ་སྒྲོག་པར་ཤོག །ཟིན་བྲིས་པས། གཞན་སྟོང་གི་དཀའ་གནད་ཀྱི་དྲི་ལན་མུན་པ་སེལ་བྱེད།། གཞན་སྟོང་གི་དཀའ་གནད་ཀྱི་དྲི་ལན་མུན་པ་སེལ་བྱེད་དམ་པའི་ཞལ་ལུང༌།གཞན་སྟོང་གི་དཀའ་གནད་ཀྱི་དྲི་ལན་མུན་པ་སེལ་བྱེད་དམ་པའི་ཞལ་ལུང༌། དགེ་བཤེས་དངོས་གྲུབ་དཔལ་གྱིས་གསུངས། བླ་མ་དང་མགོན་པོ་འཇམ་དཔལ་དབྱངས་ལ་ཕྱག་འཚལ་ལོ། །དྲི་བ་དང་བོ་གཞན་སྟོང་གི་འཛིན་སྟངས་ཀྱི་ཡུལ་ལ་གཞན་སྟོང་ཆེན་པོ་འཇོག་པའི་ལུང་ཆོས་རྗེ་ཀུན་མཁྱེན་དང་རྗེ་བཙུན་ཏཱ་ར་ནཱ་ཐ་གཉིས་གྱི་ལུང་གང་འཇོག་ཅེས་པའོ། །ལན་ནི། ལགས་སོ། །གཞན་སྟོང་གི་འཛིན་སྟངས་ཀྱི་ཡུལ་ལ་གཞན་སྟོང་ཆེན་པོ་འཇོག་རྒྱུ་མ་རེད། དེ་ལྟར་འཇོག་པའི་རིགས་པ་མེད་ལ། ལུང་ཡང་མེད། དེས་ན་ཆོས་རྗེ་ཀུན་མཁྱེན་དང་རྗེ་བཙུན་ཏཱ་ར་ནཱ་ཐ་གཉིས་ཀྱིས་དེ་ལྟ་བུ་གསུངས་ཀྱང་མེད་ལ། སོ་སོར་རང་རིག་པའི་ཡེ་ཤེས་ཡིན་པས་དེས་རང་གི་ཡུལ་རྟོགས་པ་རེད་དེ། འཛིན་སྟངས་ཡུལ་སྣང་ཡུལ་ཞེན་ཡུལ་ཟེར་བ་ཞིག་དང་འཛིན་ཚུལ་བཤད་ཡོད་པ་མ་རེད། །དྲི་བ་གཉིས་པ་མཉམ་བཞག་སྐབས་སུ་སྤྲོས་པ་དང་བྲལ་བ་བསྒོམ་དགོས་མིན་ཞེས་པའོ། །ལན་ནི། མཉམ་བཞག་སྐབས་སུ་སྤྲོས་པ་དང་བྲལ་བས་སྤྲོས་བྲལ་དུ་བསྒོམ་དགོས་པ་ཡིན་ཡང༌། རང་སྟོང་དང་གཅིག་པ་ཡིན་ཞེས་གསུངས་ཡོད་པ་མ་རེད་རང་སྟོང་ཡིན་ན་ཀུན་རྫོབ་ཡིན་པས་དེ་དོན་དམ་བདེན་པ་རང་གི་ངོ་བོ་ལ་སྟོང་བ་ཆགས་ཡོད་ནི་རེད་ཡིན་ན་ཡང་མཉམ་བཞག་ལ་ཟློ་བའི་སྐབས་སུ་འཁོར་ལོ་བར་བ་ལྟར་རྟོག་མེད་སྤྲོལ་བྲལ་དུ་མཉམ་པར་བཞག་དགོས་པ་འཁོར་ལོ་བར་མཐའ་གཉིས་མཐུན་གྱི་ཡོད་པ་རེད། དེས་ན་མཉམ་བཞག་སྐབས་སུ་སྤྲོས་པ་ཐམས་ཅད་དང་བྲལ་བར་མཉམ་པར་བཞག་པ་དེའི་ཚེ་བདེན་འཛིན་གྱི་སྤྲོས་པ་མ་ཟད་ཀུན་རྫོབ་ཀྱི་སྤྲོས་པ་གཉིས་སྣང་གི་སྤྲོས་པ་འདི་ཡིན་འདི་མིན་ཆེད་ཞེན་གཏད་ཞེན་འཛིན་ཞེན་ལ་སོགས་པ་སྤྲོས་པ་ཐམས་ཅད་དང་བྲལ་བར་བསྒོམ་དགོས་པ་ཡིན། སྤྲོས་བྲལ་ནི་ཆོས་ཀྱི་དབྱིངས་ཡིན་པས་ཆོས་དབྱིངས་ཡིན་ན་གཞན་སྟོང་ཡིན་པ་མ་གཏོགས་རང་སྟོང་དང་གཅིག་པ་དང་ཀུན་རྫོབ་ནི་གཏན་ནས་མིན་ལ། དེས་ན་མཉམ་བཞག་སྐབས་སུ་འདི་ཡིན་འདི་མིན་སོགས་གང་ལ་ཡང་མི་ལྟོས་པར་སྤྲོས་བྲལ་དུ་མཉམ་པར་བཞག་པ་ཡིན། ཆོས་རྣམས་ཀྱི་གནས་ཚུལ་དེ་རྗེས་ཐོབ་ཀྱི་སྐབས་སུ་གཏན་ལ་ཕབས་དགོས་པ་རེད་མ་གཏོགས་མཉམ་བཞག་སྐབས་སུ་འདི་ཤེས་བྱ་ཡིན། རྟག་པ་ཡིན། བདེན་གྲུབ་ཡིན། བདེན་མེད་སོགས་འདི་ཡིན་འདི་མིན་སྙམ་པའི་བློ་མེད་པ་ཡིན། དེ་རྗེས་ཐོབ་ཤན་འབྱེད་ཀྱི་སྐབས་སུ་ཆོས་རྣམས་ཀྱི་གནས་ཚུལ་གཏན་ལ་ཕབ་པ་ཡིན། འཕགས་པའི་མཉམ་བཞག་ཡེ་ཤེས་ཀྱིས་གནས་ལུགས་མཐར་ཐུག་རྟོགས་པ་ཡིན་ན་ཡང་གནས་ལུགས་ཀྱི་ཁྱད་ཆོས་སམ། ཡོན་ཏན་ཐམས་ཅད་དང་ལྡན་པ་དང༌། དེ་ཡོད་པ་དང་ཡིན་པ་དེ་སོ་སོར་འབྱེད་པ་ནི་རྗེས་ཐོབ་ཤན་འབྱེད་ལ་ལྟོས་དགོས་པ་གསུངས་བ་མ་གཏོགས་མཉམ་བཞག་གིས་འཛིན་པ་ལྟར་མ་གྲུབ་པ་དང་དེ་དང་མི་མཐུན་པ་ཞིག་བཤད་དགོས་པ་མ་རེད། དྲི་བ་གསུམ་པ་རང་ལུགས་ལ་ཆོས་ཉིད་བདེན་གྲུབ་ཏུ་ཁས་ལེན་པ་དང་གཞན་གྱིས་བདེན་གྲུབ་ཏུ་ཁས་ལེན་པ་གཉིས་འདྲ་མིན་ཞེས་པའོ། །ལན་ནི། ཕྱོགས་ཡོངས་ཀྱི་ཆ་ནས་དྭོགས་པའི་གནས་ཟེར་ན་འདྲ། གཞན་སྟོང་དབུ་མ་ཆེན་པོ་འཇོག་མཚམས་ལེགས་པར་ཤེས་མེད་ན་འདྲ། ཞིབ་འཇུག་གམ་རྒྱུས་ལོན་མ་བྱས་པ་ཡིན་ན་འདྲ་གནས་ཚུལ་ཡང་དག་པར་མཁྱེན་གི་མེད་པའི་དབང་དུ་བྱས་ན་དྭོགས་པའི་གནས་ཆགས་ཡོད་པ་རེད། དེའི་རྒྱུ་མཚན་གྱིས་དེ་གཉིས་ཁྱད་པར་བཤད་དུས་གཞན་སྟོང་དབུ་མ་ཆེན་མོའི་རང་ལུགས་ལ་བདེན་པར་གྲུབ་ཅེས་བཤད་པ་དེ་འཕགས་པའི་མཉམ་བཞག་ཡེ་ཤེས་ཀྱི་ངོར་ཇི་ལྟར་གཟིགས་པ་ལྟར་སྣང་ཚུལ་དང་གནས་ཚུལ་མཐུན་པ་ལ་བྱེད་པ་རེད། དེ་ལྟར་སྣང་ཚུལ་དང་གནས་ཚུལ་དང་མཐུན་པ་ཡིན་ན་བདེན་པ་ཡིན་དགོས། དེ་ཡིན་ན་མི་བསླུ་བ་ཡིན་དགོས། དེ་ཡིན་ན་བདེན་པར་གྲུབ་དགོས་ཞེས་གཞན་སྟོང་དབུ་མ་ཆེན་པོ་ལུགས་ལ་བདེན་པར་གྲུབ་ཚུལ་དེ་ཡིན་ནོ། །གཞན་གྱི་ལུགས་ཡིན་ན་བདེན་པར་གྲུབ་ལུགས་ནི་མཉམ་བཞག་ཡེ་ཤེས་ལ་མི་ལྟོས་པར་སྤྱིར་བཏང་སྒྲ་རྟོག་གི་ངོར་སྣང་ཚུལ་དང་གནས་ཚུལ་མཐུན་པར་སྣང་བ་ནང་བཞིན་རྟོག་པས་འཛིན་པ་ལྟར་བདེན་པར་གྲུབ་དགོས་པ་ཡིན། དེ་ལྟར་གྲུབ་ན་སྤྲོས་པའི་བདེན་པར་གྲུབ་དགོས་པ་རེད། དེ་ལྟ་བུ་ནི་ཕྱི་རོལ་བས་བདེན་པར་གྲུབ་པར་ཁས་བླངས་པ་དང་འདྲ་བ་རེད། དེས་ན་དེ་གཉིས་ཁྱད་པར་ཡོད་པ་ཞིག་རེད། གཉིས་ཕྱོགས་ནས་རང་ལུགས་ལ་བདེན་པར་གྲུབ་ན་ཆོས་བདག་ཏུ་གྲུབ་དགོས་པ་མ་ཡིན། གཞན་གྱི་འདོད་པ་ལྟར་ཡིན་ན་བདེན་པར་གྲུབ་ན་ཆོས་བདག་ཏུ་གྲུབ་དགོས་པ་ཡིན། དེ་ལྟ་བུའི་ཁྱད་པར་ཡོད་པ་དེ་ཆོས་རྗེས་ཀུན་མཁྱེན་རིན་པོ་ཆེས་ཕྱི་རོལ་བའི་བདག་དང་མི་འདྲ་བའི་ལན་དུ་རང་ལུགས་ལ་བདག་ཏུ་མེད་པར་ཁས་བླངས་པའི་ཕྱིར་གསུངས་ཡོད་པ་རེད། དེ་ཡང་ཐེག་མཆོག་དབུ་མའི་ཟིན་བྲིས་ལས། དེས་ན་དོན་དམ་དབྱིངས་ཀྱི་ཡེ་ཤེས་གནས་ལུགས་ལ་བདེན་པར་གྲུབ་པ་ཆོས་ཀྱི་བདག་མ་ཡིན་ཞིང༌། དེ་བདེན་པར་འཛིན་པ་ཡང་ཆོས་ཀྱི་བདག་འཛིན་མ་ཡིན་ལ། དོན་དམ་དབྱིངས་དེ་བདེན་པར་མེད་པར་འཛིན་ན་ལོག་པར་ལྟ་བ་ཉིད་དུ་འགྱུར་བ་ཡིན་ནོ། །ཞེས་དང༌། དེ་ལས། ཆོས་ཉིད་དེ་བཞིན་ཉིད་ལ་ཀུན་རྫོབ་སྣང་གྲགས་ཀྱི་ཆོས་ཀྱི་བདག་གིས་ནམ་ཡང་གོས་མ་མྱོང་ཞིང་མེད་པ་ནི། ཆོས་ཀྱི་བདག་མེད་མཚན་ཉིད་པ་ཡིན་ལ་ཞེས་དང༌། རི་ཆོས་ངེས་དོན་རྒྱ་མཚོ་ལས། གལ་ཏེ་བདེ་གཤེགས་སྙིང་པོ་དང་བདག་གི་དབྱིངས་རྣམ་གྲངས་ཡིན་ན་མུ་སྟེགས་བྱེད་ཀྱི་བདག་དང་ཁྱད་པར་མེད་པར་འགྱུར་ལ་རྣམ་གྲངས་མ་ཡིན་ན། མིང་དེས་བསྟན་པ་ཡང་མུ་སྟེགས་ཅན་བདག་ཏུ་མངོན་པར་ཞེན་པ་རྣམས་དྲང་བར་མི་ནུས་སོ་ཞེ་ན། སྐྱོན་མེད་དེ། རྣམ་གྲངས་ཡིན་ཡང་འདི་ནི་བདག་གཉིས་ཀྱིས་སྟོང་བའི་གཞི་དེ་བཞིན་ཉིད་ཀྱི་བདག་དང་དག་པའི་བདག་ལ་སོགས་པ་ཡིན་པའི་ཕྱིར་རོ། །ཞེས་དང༌། མྱང་འདས་ཆེན་པོ་ལས། རིགས་ཀྱི་བུ་གཞན་ཡང་སྔོན་བཱ་ར་ཎ་སིར་ཆོས་ཀྱི་འཁོར་ལོ་བསྐོར་བ་ན་མི་རྟག་པ་དང་སྡུག་བསྔལ་བ་དང་སྟོང་པ་དང་བདག་མེད་པ་བསྟན་ཏོ། །ད་རྩྭ་མཆོག་གི་གྲོང་ཁྱེར་འདིར་ཆོས་ཀྱི་འཁོར་ལོ་བསྐོར་བ་ན་རྟག་པ་དང་བདེ་བ་དང་བདག་དང་ཡོངས་སུ་དག་པར་བསྟན་ཏོ། །ཞེས་དང༌། རི་ཆོས་ངེས་དོན་རྒྱ་མཚོ་ལས། འདིར་ཆོས་ཐམས་ཅད་ནི་བདག་མེད་པ་ཞེས་བྱའོ། །ཞེས་གསུངས་སོ། །དེ་ལྟར་སོ་སོར་བཤད་ན་ཁྱད་པར་ཡོད་པ་དེ་ཤེས་ཐུབ་པ་ཞིག་རེད། དྲི་བ་བཞི་པ་ཆོས་ཉིད་འཇོག་བྱེད་གྱི་གཙོ་བོ་མཉམ་བཞག་ཡེ་ཤེས་དེ་ལམ་བདེན་ཡིན་ན་དེས་རྟོགས་བྱའི་ཆོས་ཉིད་ཀྱང་འདུས་བྱས་སུ་འགྱུར་དགོས་མིན་ཞེས་པའོ། །ལན་ནི། ལམ་བདེན་འདུས་བྱས་མི་རྟག་པ་བསླུ་བའི་ཆོས་ཡིན་ན་ཡང་དེས་རྟོགས་བྱའི་དོན་དམ་བདེན་པ་མི་རྟག་པ་བསླུ་བའི་ཆོས་ཡིན་པ་དེར་དྭོགས་པ་ཆེན་པོ་ཡོད་མ་རེད། དཔེར་ན་འདུས་མ་བྱས་ནམ་མཁའ་རྟག་པ་ཡིན་ན་ཡང་དེ་རྟོགས་པའི་རྗེས་དཔག་ཚད་མ་སོགས་འདུས་བྱས་ཡིན་པ་ཀུན་རྫོབ་ཡིན་པར་འགལ་བ་མེད་པ་ནང་བཞིན་ཡིན། །དྲི་བ་ལྔ་བ་ཆོས་ཉིད་བདེན་གྲུབ་ཨེ་ཡིན་ཞེས་པའོ། །ལན་ནི། གཞན་སྟོང་དབུ་མ་ཆེན་པོའི་ལུགས་ལ་བདེན་པར་གྲུབ་པ་དེ་གོང་དུ་བཤད་པ་ལྟར་བདེན་པ་ཡིན་ན་བདེན་པར་གྲུབ་དགོས་པ་དང༌། ཡོད་པ་ཡིན་ན་ཡོད་པར་གྲུབ་དགོས་པ་དང༌། ཤེས་བྱ་ཡིན་ན་ཤེས་བྱར་གྲུབ་དགོས་བཤད་པ་ལྟར་ཡིན། ཆོས་ཉིད་བདེན་པ་ཡིན་པ་དེ་དཔལ་མགོན་འཕགས་པ་ཀླུ་སྒྲུབ་ཀྱི་རིགས་པ་དྲུག་ཅུ་པའི་སྐབས་སུ་མྱ་ངན་འདས་པ་བདེན་གཅིག་པུ། །ཞེས་པ་དང༌། བདེན་པ་མི་བསླུ་བ་ནི་གཅིག་པའོ། །ཞེས་དང༌། ཐེག་མཆོག་རབ་ཕྱེད་བརྒྱད་པའི་འགྲེལ་བ་ལས། དོན་དམ་ཆོས་ཀྱི་དབྱིངས་ཆོས་ཅན། བདེན་པར་གྲུབ་སྟེ། ཆོས་ཐམས་ཅད་ཀྱི་གནས་ཚུལ་ལ་གདོན་ནས་ལྷུན་གྲུབ་ཏུ་ཞུགས་པའི་ཕྱིར། ཞེས་དང༌། ཐེག་མཆོག་དབུ་མ་ལས། ཡེ་ཤེས་བདེན་གྲུབ་ཆོས་ཀྱི་བདག་མ་ཡིན། །དེ་ནི་མེད་པར་འཛིན་ན་ལོག་ལྟ་ཉིད། །ཅེས་དང༌། གཞན་སྟོང་སྙིང་བོ་ལས། ཆོས་ཉིད་ཀྱི་གཟུགས་སྒྲ་སོགས་ཡེ་ཤེས་ཀྱི་ཕྱོགས་ཡིན་པས་བདེན་གྲུབ་དང༌། ཞེས་སོགས་ཡང་ནས་ཡང་དུ་རྒྱ་ཆེར་གསུང་གི་ཡོད་པ་རེད། ངེས་འདིའི་མཇུག་ན་ཡང་དོན་དམ་བདེན་པ་བདེན་གྲུབ་དུ་འདོད་པ་དང༌། དགག་བྱ་བདེན་གྲུབ་དུ་མི་འདོད་པ་ལ་སོགས་པ་ཁྱད་པར་མི་འདྲ་བ་སོ་སོར་མཁས་པ་རྣམས་ཀྱིས་བཞེད་ཚུལ་མི་འདྲ་བ་ཅུང་ཟད་བཤད་ཡོང་ན་ཆོག་སྔོན་ཡང་མང་པོ་ཞིག་བཤད་ཟིན་པ་ཡིན། དྲི་བ་དྲུག་པ་གཞན་སྟོང་བློ་ཡུལ་ལས་འདས་པའི་དོན་ཅི་ཞེས་པའོ། །ལན་ནི། གཞན་སྟོང་བློ་ཡུལ་ལས་འདས་ཞེས་ཇོ་ནང་རང་གི་གཞུང་ལུགས་ལ་ཐ་སྙད་སྦྱར་ཡོད་པ་མ་རེད། དོན་དམ་བློ་ཡི་སྤྱོད་ཡུལ་མིན། །བློ་ནི་ཀུན་རྫོབ་ཡིན་པར་འདོད། །ཅེས་སྤྱོད་འཇུག་ལ་སོགས་པའི་སྐབས་སུ་གསུངས་པ་དེ་དོན་དམ་བདེན་པ་དེ་རྣམ་ཤེས་ཀྱི་སྤྱོད་ཡུལ་མིན་པའི་དོན་ཡིན། རྣམ་ཤེས་ཀྱིས་ཇི་ལྟར་གཞལ་བ་ལྟར་གྲུབ་པ་མ་རེད་ཅེས་པའོ། །རྣམ་ཤེས་ཀྱིས་སྤྲོས་པ་དང་བཅས་པར་སྣང་བ་མ་གཏོགས་རྣམ་ཤེས་ཀྱིས་སྤྲོས་པ་ཐམས་ཅད་དང་བྲལ་བར་སྣང་ཐུབ་པ་མ་རེད། དེའི་ཕྱིར་ན་དོན་དམ་བདེན་པ་དེ་ཀུན་རྫོབ་རྣམ་ཤེས་ཀྱི་ཡུལ་ལས་འདས་པ་བཤད་ཚུལ་ཞིག་ཡོད་པ་ཡིན་ན་ཡང༌། དོན་དམ་བདེན་པ་དེ་འཕགས་པའི་མཉམ་བཞག་ཡེ་ཤེས་ཀྱིས་རྟོགས་བྱ་མཐར་ཐུག་ཡིན། དེ་ཡང་མདོ་ལས། མ་མཐོང་བ་ནི་མཐོང་བ་དམ་པའོ། །ཞེས་པས་སྤྲོས་པ་ལ་སོགས་པ་དང་བཅས་པར་མ་མཐོང་ཡང་སྤྲོས་པ་ཐམས་ཅད་དང་བྲལ་བའི་གཞན་སྟོང་ངམ་ཆོས་ཉིད་མཐོང་བ་ན་མཐོང་བ་དམ་པའོ་ཞེས་གསུངས་བ་ཡིན། དེ་ཡང་སྤྱོད་འཇུག་རྣམ་བཤད་གཞུང་དོན་རབ་གསལ་༢༧༨ལས། རྣམ་ཤེས་སྤྱོད་ཡུལ་ཀུན་རྗོབ་ཀྱི་བདེན་པ་དང་ནི་ཡེ་ཤེས་ཀྱི་སྤྱོད་ཡུལ་དོན་དམ་པའི་བདེན་པ་སྟེ་འདི་དག་ནི་རིམ་པ་བཞིན་དུ་བྱིས་པས་རྟོགས་པ་ལྟར་རེ་ཞིག་མི་བསླུ་བ་དང༌། འཕགས་པས་རྟོགས་པ་ལྟར་གཏན་དུ་མི་བསླུུ་བས་བདེན་པ་གཉིས་སུ་འདོད་དོ། །དེ་ལ་དོན་དམ་པའི་བདེན་པ་ནི་བློ་རྣམ་པར་ཤེས་པ་ཡི་སྤྱོད་ཡུལ་དུ་སྣང་བ་མིན་ཞིང་ཡེ་ཤེས་ཀྱི་སྤྱོད་ཡུལ་དུ་ཆོས་ཉིད་རྣམ་ཡང་འགྱུར་བ་མེད་པར་སྣང་བ་ཡིན་ལ། སོ་སོ་སྐྱེ་བོའི་བློ་ཡུལ་དང་བཅས་པ་ནི་ཆོས་ཅན་ཀུན་རྫོབ་འཕྲུལ་བའི་སྣང་བ་ཡིན་པར་འདོད་དེ། །ཞེས་དང༌། རི་ཆོས་ངེས་དོན་རྒྱ་མཚོ་ལས། གལ་ཏེ་དོན་དམ་ཤེས་བྱ་ཡིན་ན། དོན་དམ་བློ་ཡི་སྤྱོད་ཡུལ་མིན། །ཞེས་དང༌། ཆོས་ཉིད་ཤེས་པར་བྱ་མིན་པས། །དེ་ནི་རྣམ་པར་ཤེས་མི་ནུས། །ཞེས་གསུངས་པ་དང་འགལ་ལོ་ཞེ་ན། སྐྱོན་མེད་དེ། དེ་དག་ནི་རྣམ་ཤེས་ཀྱི་བློའི་སྤྱོད་ཡུལ་མ་ཡིན་པ་དང༌། རྣམ་ཤེས་ཀྱིས་ཤེས་པར་མི་ནུས་པ་ལ་དགོངས་པའི་ཕྱིར་རོ། །ཞེས་སོ། །དྲི་བ་བདུན་པ་རང་ལུགས་ལ་དབུ་མའི་གཞུང་ལུགས་རྣམས་ཀྱི་སྐབས་སུ་གསུངས་པའི་རྟེན་འབྲེལ་གྱི་རིགས་པ་ཁས་ལེན་ནམ་ཞེས་པའོ། །ལན་ནི། དབུ་མའི་གཞུང་ལུགས་རྣམས་ཀྱི་སྐབས་སུ་གསུངས་བའི་རྟེན་འབྲེལ་གྱི་རིགས་པ་དེ་གཞན་སྟོང་དབུ་མ་ཆེན་པོའི་ལུགས་ལ་ཁས་ལེན་གྱིན་ཡོད་པ་རེད། དཔལ་ལྡན་ཟླ་བ་གྲགས་པའི་དབུ་མ་འཇུག་པའི་སྐབས་སུ་དེ་ཕྱིར་རྟེན་འབྱུང་རིགས་པ་འདི་ཡིས་ནི། །ལྟ་ངན་དྲ་བ་ཐམས་དག་གཅོད་པར་བྱེད། །ཅེས་པས་རྟེན་འབྲེལ་གྱི་རིགས་པ་དེ་རིགས་པའི་གཙོ་བོ་ཡིན་པར་གསུང་གིན་ཡོད་པ་རེད་ཏ། རང་ལུགས་ལ་རྟེན་འབྲེལ་གྱི་རིགས་པ་དེ་རིགས་པའི་གཙོ་བོ་ཡིན་པར་འདོད་གི་ཡོད་པ་མ་རེད། ཐེག་མཆོག་དབུ་མའི་སྐབས་སུ་བདག་མེད་གཏན་ཚིགས་གཙོ་བོ་གཉིས་སུ་མཐོང༌། །ཞེས་དང༌། ཐེག་མཆོག་ཟིན་བྲིས་ལས། བདག་མེད་པར་སྒྲུབ་པའི་གཏན་ཚིགས་ཀྱི་གཙོ་བོ་ནི། ངོ་བོ་འགོག་པ་གཅིག་དང་དུ་བྲལ་དང༌། ཁྱད་པར་འགོག་པ་མཐའ་བཞི་སྐྱེ་འགོག་གཉིས་སུ་མཐོང་ཞེས་གཏན་ཚིགས་ཀྱི་གཙོ་བོ་གཉིས་སུ་བཞེད་པ་ཡིན་གྱི། མུ་བཞི་སྐྱེ་འགོག་དང༌། རྟེན་འབྲེལ་གྱི་རིགས་པ་གཉིས་ནི་འོག་ཏུ་འཆད་པར་འགྱུར་བ་ལྟར་རྣམ་གྲངས་ཙམ་ཡིན་གྱི། བདག་མེད་པར་སྒྲུབ་པའི་གཏན་ཚིགས་གཙོ་བོ་མིན་པས། དབུ་མའི་གཏན་ཚིགས་ཀྱི་གཙོ་བོ་རྣམ་པ་བཞི་ཞེས་འཆད་པ་ཡང་དོན་ལ་འཐད་པ་མ་ཡིན་ནོ། །ཞེས་དང༌། དེ་ལས། འཕྲོས་དོན་ཕྲ་མོ་ཙམ་ཡིན་པས་གཏན་ཚིགས་ཀྱི་གཙོ་བོ་མ་ཡིན་པར་ཤེས་པར་བྱའོ། །གཏན་ཚིགས་ཀྱི་གཙོ་བོ་ཕྱི་རོལ་གྱི་དོན་དང་ནང་ཤེས་པ་གཉིས་ཆར་བདེན་མེད་གཏན་ལ་འབེབ་ནུས་པ་ནི། ངོ་བོ་འགོག་པ་གཅིག་དུ་བྲལ་དང༌། ཁྱད་པར་འགོག་པ་མཐའ་བཞི་སྐྱེ་འགོག་གཉིས་ཡིན་ཞིང༌། དེ་དག་གི་རྩ་བར་གྱུར་པ་ནི། མགོན་པོ་ཀླུ་སྒྲུབ་ཀྱིས་དབུ་མ་རྩ་བའི་མཆོད་བརྗོད་དུ་གསུངས་པ། གང་གིས་རྟེན་ཅིང་འབྲེལ་བར་འབྱུང༌། །འགག་པ་མེད་པ་སྐྱེ་མེད་པ། །ཆད་པ་མེད་པ་རྟག་མེད་པ། །འོང་བ་མེད་པ་འགྲོ་མེད་པ། །ཐ་དད་དོན་མིན་དོན་གཅིག་མིན། །སྤྲོས་པ་ཉེར་ཞི་ཞིར་བསྟན་པ། །ཞེས་གསུངས་པ་ལྟར། རྩ་བའི་གཏན་ཚིགས་རྣམ་པ་བཞི་ཡོད་པ་ཡིན་ཏེ། ཞེས་གསུངས་པ་ལྟར་གཅིག་དང་དུ་བྲལ་གྱི་རིགས་པ་དང༌། རྒྱུ་ལ་དཔྱད་པ་རྡོ་རྗེ་ཟེགས་མའི་རིགས་པ་གཉིས་རིགས་པའི་གཙོ་བོ་འམ་རིགས་པའི་རྒྱལ་བོ་ཡིན་པར་གསུངས་ཡོད་པ་རེད། ཀུན་རྫོབ་སྣང་གྲགས་ཀྱི་ཆོས་ཐམས་ཅད་ཆོས་ཅན་དུ་བླངས་ནས་བདེན་པར་མེད་དེ། རྟེན་འབྲེལ་ཡིན་པའི་ཕྱིར། ཞེས་བཀོད་ནས་བདེན་མེད་དུ་སྒྲུབ་ན་བདེན་མེད་སྒྲུབ་བྱེད་ཡང་དག་ཡིན། སྤྱིར་བཏང་བདེན་མེད་སྒྲུབ་བྱེད་ཀྱི་རིགས་པ་ཡང་དག་ཡིན་བཤད་ན་ཆོག ཡིན་ན་ཡང་དོན་དམ་བདེན་པ་ཆོས་ཅན། བདེན་པར་མེད་དེ། རྟེན་འབྲེལ་ཡིན་པའི་ཕྱིར། ཞེས་བཀོད་ན་རྟགས་མ་གྲུབ་ཅེས་ལབ་ན་འགྲིག་གི་རེད། དོན་དམ་བདེན་པ་རྟེན་འབྲེལ་མིན་པར་གསུངས་ཡོད་པ་རེད། ཇི་སྐད་དུ། ཀླུ་སྒྲུབ་ཀྱི་རྩ་བ་ཤེས་རབ་ལས། རང་བཞིན་དང་ནི་བཅོས་མིན་པར། །གཞན་ལ་ལྟོས་པ་མེད་པར་བཤད། །ཅེས་དང༌། འགྲེལ་བ་ག་ལས་འཇིགས་མེད་ལས། གཞན་ལ་ལྟོས་པ་མེད་པ་ཡིན། ངོ་བོ་ཉིད་ནི་བྱས་པ་ཞེས་བྱ་བར་ཇི་ལྟར་རུང་བར་འགྱུར་ཏེ། གང་གི་ཕྱིར་ངོ་བོ་ཉིད་ནི་བཅོས་མ་མ་ཡིན་པ་དང་གཞན་ལ་ལྟོས་པ་མེད་པ་ཡིན་པའི་ཕྱིར་རོ། །ཞེས་དང༌། བུདྷ་པཱ་ལི་ཏ་ལས། གང་བྱ་བས་བསྒྲུབ་པར་མི་འགྱུར་བ་དང༌། རྒྱུ་དང་རྐྱེན་ལ་ཡང་ལྟོས་པར་མི་འགྱུར་བ་རང་ཉིད་ཀྱི་ངོ་བོ་ཉིད་མི་འགྱུར་བར་འཇུག་པ་དེ་ནི་ངོ་བོ་ཉིད་ཀྱིས་རིགས་པ་ཡིན་ནོ། །གང་བྱས་པས་བསྒྲུབ་པར་འགྱུར་བ་དང་རྒྱུ་དང་རྐྱེན་ལ་ཡང་ལྟོས་པར་འགྱུར་བ་དེ་ནི་གཞན་ལ་རག་ལས་པས་གཞན་ལ་ལྟོས་པ་རང་གི་བདག་ཉིད་ཀྱིས་རབ་ཏུ་མ་གྲུབ་པ་ཡིན་པས་ངོ་བོ་ཉིད་ཅེས་བྱ་བར་ཇི་ལྟར་འཐད་པར་འགྱུར། སྨྲས་པ། གང་ལ་ལྟོས་ནས་དེ་དངོས་པོར་འགྱུར་བའི་གཞན་གྱི་དངོས་པོ་ནི་རེ་ཞིག་ཡོད་དོ། །གཞན་གྱི་དངོས་པོ་རབ་ཏུ་གྲུབ་ན། ངོ་བོ་ཉིད་ཀྱང་རབ་ཏུ་འགྲུབ་པར་འགྱུར་རོ། །ཞེས་དང༌། འགྲེལ་པ་ཤེས་རབ་སྒྲོན་མ་ལས། གཞན་ལ་ལྟོས་པ་མེད་པ་ཡིན། བཅོས་མ་མ་ཡིན་པ་ནི་རྒྱུ་དང་རྐྱེན་རྣམས་ཀྱིས་མ་བྱས་པའི་ཕྱིར་རོ། །གཞན་ལ་ལྟོས་པ་མེད་པ་ནི་བརྗོད་པ་ཁྱད་པར་ཅན་བརྟེན་པ་གཞན་ལ་ལྟོས་པ་མེད་པའི་ཕྱིར་རོ། །ཞེས་དང༌། ཤེས་རབ་སྒྲོན་མ་རྒྱ་ཆེར་འགྲེལ་བ་ལས། གཞན་ལ་ལྟོས་པ་མེད་པ་ཡིན། བཅོས་མ་མ་ཡིན་པ་ནི་རྒྱུ་དང་རྐྱེན་རྣམས་ཀྱིས་མ་བྱས་པའི་ཕྱིར་རོ། །གཞན་ལ་ལྟོས་པ་མེད་པ་ནི་བརྗོད་པ་ཁྱད་པར་ཅན་སྟེན་པ་གཞན་ལ་ལྟོས་པ་མེད་པའི་ཕྱིར་རོ་ཞེས་བྱ་བ་སྨྲས་ཏེ། དེས་ནི་མི་མཐུན་པའི་ཕྱོགས་ཀྱི་ཁྱད་པར་བསྟན་ཏོ། །ཞེས་རང་བཞིན་གང་ལ་བཅོས་པ་མེད་པ་དེ་གཞན་ལ་ལྟོས་པ་མེད་པར་གསུངས་ཡོད་པ་རེད། དེ་ལྟར་གསུངས་ཡོད་པ་དེ་མཁྱེན་དགོས། གཞན་རི་བོ་དགེ་ལྡན་པས་གཞི་གྲུབ་ན་རྟེན་འབྲེལ་ཡིན་པས་ཁྱབ་གསུངས་པ་རེད་ཏ། གཞི་གྲུབ་ན་རྟེན་འབྲེལ་ཡིན་པས་ཁྱབ་ཟེར་བ་ལ། དྭོགས་པའི་གནས་ཆགས་ཡོད་ལ། དེ་ལྟར་དྭོགས་པའི་གནས་ཆགས་ཡོད་པའི་རྒྱུ་མཚན་རྩ་ཤེས་ལས། རང་བཞིན་དང་ནི་བཅོས་མིན་པར། །གཞན་ལ་ལྟོས་པ་མེད་པར་བཤད། །ཞེས་པའི་འཐད་ཀྱི་དབུ་མ་ཚིགས་གསལ་དང་བུདྷ་པཱ་ལི་ཏ་གཉིས་ཀྱི་སྐབས་སུ་ཡང་རྒྱུ་དང་རྐྱེན་ལས་སྐྱེས་པ་ལ་སྦྱར་བ་མ་གཏོགས་གཞི་གྲུབ་ན་རྟེན་འབྲེལ་ཡིན་པས་ཁྱབ་པ་གསུངས་ཡོད་པ་མ་རེད། དེས་ན་ཀླུ་སྒྲུབ་ཀྱིས། རྟེན་ཅིང་འབྲེལ་འབྱུང་མ་ཡིན་པའི། །ཆོས་འགའ་ཡོད་པ་མ་ཡིན་ནོ། །ཞེས་གསུངས་པའི་ཕྱིར་ཟེར་ན། དེའི་ཆོས་འགའ་ཞེས་པ་དེ་འདུས་བྱས་ཀྱི་ཆོས་ཐམས་ཅད་ལ་སྦྱར་བ་ལས་ཆོས་ཐམས་ཅད་ལ་སྦྱར་དགོས་པར་མི་འདུག དེ་ཡང་འདུས་བྱས་ཀྱི་ཆོས་ལ་དགོངས་ནས་གསུངས་ཡོད་པ་དེ་ནི་ཆོས་རྗེ་ཀུན་མཁྱེན་གྱི་རི་ཆོས་ངེས་དོན་རྒྱ་མཚོ་ལས་གསུངས་སོ། །དེ་ནང་བཞིན་སངས་རྒྱས་བཅོམ་ལྡན་འདས་མདོའི་སྐབས་སུ་ཡང་ཆོས་རྣམས་ཐམས་ཅད་རྒྱུ་ལས་བྱུང༌། །ཞེས་སོགས་ཆོས་རྣམས་ཞེས་གསུངས་ཡོད་པ་རེད་དེ། རྒྱུ་ལས་བྱུང་ཞེས་གསུངས་པས་ན་འདུས་མ་བྱས་ཀྱི་ཆོས་ཐམས་ཅད་ལ་རྒྱུ་དང་རྐྱེན་ལས་སྐྱེས་བ་རང་སྡེ་ནང་བ་སངས་རྒྱས་པ་ཐམས་ཅད་ཀྱིས་ཁས་ལེན་གྱིན་མེད་པ་འདྲའོ། །དྲི་བ་བརྒྱད་པ་རང་ལུགས་ཆོས་ཉིད་ཤེས་པ་ཡིན་པའི་རྒྱུ་མཚན་ཅི་ཞེས་པའོ། །ལན་ནི། ལགས་སོ། །ཆོས་ཀྱི་དབྱིངས་ཡེ་ཤེས་ཡིན་པ་དེ་མདོ་རྒྱུད་ཐམས་ཅད་ཀྱི་སྐབས་སུ་ཆོས་དབྱིངས་ཡེ་ཤེས་ཞེས་པ་ཡང་ནས་ཡང་དུ་གསུངས་པས་གྲུབ་པ་ཞིག་ཡིན། ཡང་འདུས་མ་བྱས་ཀྱི་ཡེ་ཤེས་ཞེས་པས་ཀྱང་གྲུབ་ལ། དེ་ནང་བཞིན་མདོ་རྒྱུད་ཐམས་ཅད་ཀྱི་སྐབས་སུ་རང་བྱུང་ཡེ་ཤེས་ཞེས་པས་ཡང་གྲུབ་པ་ཞིག་རེད། དེ་ནང་བཞིན་མདོ་རྒྱུད་ཐམས་ཅད་ཀྱི་སྐབས་སུ་དབྱིངས་རིག་དབྱེར་མེད་ཞེས་པ་དེ་ཡང་གྲུབ་པ་ཞིག་རེད། དེ་མིན་ན། མདོ་རྒྱུད་ཐམས་ཅད་ཀྱི་སྐབས་སུ་དབྱིངས་རིག་དབྱེར་མེད་ཞེས་པ་དེས་ཀྱང་རྒྱུ་མཚན་ཡོད་པ་ཞིག་དང་། ཀུན་མཁྱེན་གྱིས་བཀའ་བསྡུ་བཞི་བའི་རྩ་འགྲེལ་སྐབས་སུ་ཡང་དེ་ལྟར་བསྒྲུབས་ཡོད་པ་རེད། དེ་བཞིན་དོན་དམ་པའི་མཚན་ཡང་དག་པར་བརྗོད་པའི་སྐབས་སུ་ཤེས་བཅུ་རྣམ་དག་འཆང་བ་པོ། །ཞེས་དང༌། ཐེག་མཆོག་དབུ་མའི་ཟིན་བྲིས་ལས། དོན་དམ་དབྱིངས་དེ་རིག་པར་ཡང་གྲུབ་སྟེ་རྒྱལ་བའི་ཡེ་ཤེས་ཀྱིས་མཁྱེན་པའི་ཕྱིར་རོ། །ཞེས་དང༌། བདེན་གཉིས་གསལ་བའི་ཉི་མ་ལས། དོན་དམ་བདེན་པ་གང་ཡིན། མཐར་ཐུག་གི་རིག་པ་དང་ཡེ་ཤེས་ཡིན་ཞིང༌། མཐར་ཐུག་གི་རིག་པ་དང་ཡེ་ཤེས་གང་ཡིན་དོན་དམ་བདེན་པ་དང༌། དེ་བཞིན་ཉིད་ཡིན་ལ། ཞེས་དང༌། དཔལ་ཡེ་ཤེས་ཐིག་ལེའི་ལས། རང་གི་ངོ་བོ་ཡེ་ཤེས་འོད། །བདག་རང་གི་ནི་ཡེ་ཤེས་སྐུ། །ཞེས་དང༌། མཁའ་འགྲོ་མ་རྡོ་རྗེ་གུར་ལས། རྡོ་རྗེ་འཛིན་པས་བཀའ་སྩལ་པ། ང་ནི་མེ་ལོང་ལྟ་བུའི་ཡེ་ཤེས་སོ། །ཞེས་དང༌། མཚན་བརྗོད་འགྲེལ་བ་ལས། དེ་ལ་རང་བྱུང་གི་ཡེ་ཤེས་ལྔ་བོ་ཐབས་དང་ཤེས་རབ་གཉིས་མེད་ཕྱེ་བའི་ཡེ་ཤེས་བཅུ་དང་དེ་བཞིན་དུ་ཐབས་དང་ཤེས་རབ་གཉིས་ཀྱི་ཕུང་བོ་བཅུ་དང་ཁམས་བཅུ་དང་དབང་བོ་བཅུ་དང་ཡུལ་བཅུ་དང་ལས་ཀྱི་དབང་པོ་དང་ལས་ཀྱི་དབང་བོའི་བྱ་བ་བཅུ་རྣམས་ནི་རྣམ་པར་དག་པའི་ཆོས་དབྱིངས་ཡེ་ཤེས་ཀྱི་བདག་ཉིད་ཅན་ཡེ་ཤེས་བཅུ་རྣམ་པར་དག་པ་གདོན་ནས་འཆང་བ་བོ་ཡང་ཡིན་ནོ། །ཞེས་དང་། འགྲེལ་ཆེན་དྲི་མེད་འོད་ལས། སྐད་ཅིག་གཅིག་དང་དུ་མ་དང་བྲལ་བའི་ཡེ་ཤེས་ནི་རྒྱལ་བ་རྣམས་ཀྱིས་དེ་ཁོ་ཉིད། ཅེས་དང༌། བཀའ་བསྡུ་བཞི་བ་ལས། རྣམ་ཤེས་མ་ཡིན་རང་བྱུང་ཡེ་ཤེས་ཡིན། །ཀུན་བརྟགས་མ་ཡིན་ཡོངས་གྲུབ་ཡེ་ཤེས་ཡིན། །དངོས་སྨྲ་མ་ཡིན་དབུ་མ་ཆེན་པོ་ཡིན། །བེམ་པོ་མ་ཡིན་ཀུན་ཤེས་ཀུན་རིག་ཡིན། །རྣམ་རྟོག་མ་ཡིན་མི་རྟོག་ཡེ་ཤེས་ཡིན། །ཞེས་པ་ལྟ་བུ་དང༌། ཤེས་པ་ལྔ་ཞེས་པ་ལྟ་བུ་གསུངས་ཡོད་པ་དེ་ཀུན་རྫོབ་ཀྱི་ཤེས་པ་མིན་པར་དོན་དམ་པའི་ཤེས་པ་ལ་སྦྱར་དགོས་པ་དེ་བསྟན་བཅོས་འདིའི་མཚན་ལ་ཡང་དོན་དམ་པར་མཚན་ཡང་དག་པར་བརྗོད་པ་ཞེས་མིང་བཏགས་པ་ལ་བརྟེན་ནས་ཀྱང་ཤེས་ཐུབ། དཔལ་མགོན་འཕགས་པ་ཀླུ་སྒྲུབ་ཀྱི་ཆོས་དབྱིངས་བསྟོད་པ་ལས། ས་ཡི་དཀྱིལ་ན་གནས་པའི་ཆུ། །དྲི་མ་མེད་པར་གནས་པ་ལྟར། །ཉོན་མོངས་ནང་ནས་ཡེ་ཤེས་ཀྱང༌། །དེ་བཞིན་དྲི་མ་མེད་པར་གནས། །ཞེས་དང༌། བྱམས་པ་མགོན་པོའི་རྒྱུད་བླ་མ་ལས། ཟག་པ་མེད་པའི་ཤེས་པ་སྦྲང་མའི་རྩི་དང་འདྲ། །ཞེས་སོགས་ལུང་རྒྱ་ཆེར་ཡོད་པ་དེ་རེད། ཆོས་དབྱིངས་ནི་ཡེ་ཤེས་ཡིན་པར་བཀའ་བསྡུ་བཞི་བའི་རྩ་འགྲེལ་སྐབས་སུ་རྒྱ་ཆེར་རྩལ་འདོན་བྱས་ནས་བཤད་ཡོད་པ་རེད། དྲི་བ་དགུ་པ་ཆོས་དབྱིངས་རྟོག་པས་ཇི་ལྟ་བ་བཞིན་དུ་རྟོགས་མི་ཐུབ་པའི་རྒྱུ་མཚན་ཅི་ཞེས་པའོ། །ལན་ནི། ཆོས་དབྱིངས་རྟོག་པས་ཇི་ལྟ་བ་བཞིན་དུ་རྟོགས་མི་ཐུབ་པའི་རྒྱུ་མཚན་ནི། ཆོས་དབྱིངས་དེ་སྤྲོས་པ་དང་བྲལ་བ་ཡིན་པ་གང་ཞིག རྟོག་པས་སྤྲོས་པ་ཐམས་ཅད་དང་བྲལ་བ་ཞིག་སྣང་མི་ཐུབ་པ་ཞིག་རེད། དེ་ལྟར་ཡང༌། རྟོག་པ་ལ་ཆོས་གང་དང་གང་སྣང་བ་ན་སྒྲ་སྤྱི་དོན་སྤྱི་སྣང་བ་དང་བཅས་པར་སྣང་བ་གང་ཞིག དེ་སྣང་ན་སྤྲོས་པའི་བསླད་པ་ཞུགས་པའི་ཕྱིར། དེའི་ཕྱིར་ན་ཆོས་དབྱིངས་དེ་སྤྲོས་བྲལ་ཡིན་པས་སྒྲ་རྟོག་གིས་ཇི་བཞིན་དུ་སྣང་ཐུབ་ཀྱིན་ཡོད་མ་རེད། ཀུན་རྫོབ་ཀྱི་ཆོས་ཡིན་ཕྱིན་སྤྲོས་པ་དང་བྲལ་བར་ཆགས་ཐུབ་པ་མིན་ལ། སྤྲོས་པ་འགའ་ཞིག་བདེན་གྲུབ་སོགས་དང་བྲལ་ཐུབ་ཀྱང་སྤྲོས་པ་ཐམས་ཅད་དང་བྲལ་བ་ཡོང་ཐུབ་ཀི་ཡོད་པ་མིན་ལ། དེའི་རྒྱུ་མཚན་གྱིས་དེ་སྤྲོས་པ་ཐམས་ཅད་དང་བཅས་པ་ཞིག་གིས་རྟོགས་ཀྱང་ཇི་ལྟ་བ་བཞིན་རྟོགས་མི་ཐུབ་ཞེས་པ་དེ་ལྟ་བུའི་ཁྱད་པར་ཡོད་པ་ཡིན། དྲི་བ་བཅུ་པ་ཆོས་རྗེ་ཉ་དབོན་པས་ཐེག་ཆེན་མཉམ་བཞག་ཡེ་ཤེས་ཆོས་ཉིད་གསར་དུ་རྟོགས་ཞེས་གསུངས་ཡོད་མེད་གང་ཞེས་པའོ། །ལན་ནི། ཐེག་ཆེན་མཐོང་ལམ་མཉམ་བཞག་ཡེ་ཤེས་ཀྱིས་ཆོས་ཉིད་དེ་མངོན་སུམ་དུ་རྟོགས་ཤིང་ཆོས་ཐམས་ཅད་ཀྱི་ཆོས་ཉིད་མངོན་སུམ་དུ་རྟོགས་ཞེས་ཉ་དབོན་པས་གསུངས་པ་རེད། དེ་མ་ཡིན་ན་ཡང་ཐེག་ཆེན་མཐོང་ལམ་མཉམ་བཞག་ཡེ་ཤེས་ཀྱིས་ཆོས་ཉིད་མངོན་སུམ་དུ་རྟོགས་པ་ལ་སྒྲིབ་བྱེད་ཀྱི་དྲི་མ་ཐམས་ཅད་དང་བྲལ་བའི་ཚུལ་དུ་མ་རྟོགས་ཀྱང་ཆོས་ཉིད་དེ་མངོན་སུམ་དུ་རྟོགས་པས་ཁྱབ་པར་ཞལ་གྱིས་བཞེས་པ་ལ་འགལ་བ་མེད་བསམ་གྱིན་ཡོད། སོ་སོ་སྐྱེ་བོ་ལ་བསམ་བློ་བཏང་ན་སྒྲིབ་བྱེད་ཀྱི་དྲི་མ་མ་བྲལ་བ་དང་རང་རང་གི་རྟོག་པས་འཛིན་པའི་དབང་གིས་ཡུལ་ཆོས་ཉིད་ལ་ཀ་བའི་ཆོས་ཉིད་དང་བུམ་པའི་ཆོས་ཉིད་གཉིས་ངོ་བོའི་ཁྱད་པར་མེད་ན་ཡང་དེའི་རྣམ་བཞག་ཙམ་ཐ་དད་བཞག་ན་ཆོག་པ་རེད། དེས་ན་ཆོས་ཐམས་ཅད་ཀྱི་ཆོས་ཉིད་གཅིག་ཡིན་ཀྱང་གཅིག་རྟོགས་ན་གཅིག་མ་རྟོགས་པ་ཡོད་པ་དེ་དཔེ་ཕྲན་ཙམ་ཞུ་ན། བྱེ་བྲག་སྨྲ་བའི་རང་ལུགས་ལྟ་བུར་མཚོན་ན་རྗས་གཅིག་ཡིན་ན་གཅིག་ཡིན་དགོས་པ་རེད་ད། སྒྲ་དང་རྟོག་པའི་སྒོ་ནས་སོ་སོར་ཡོད་པ་དང་མིང་སོ་སོར་ཡོད་པའི་རྒྱུ་མཚན་གྱིས་ཡུལ་གྱི་སྒོ་ནས་གཅིག་ཡིན་ན་ཡང་གཅིག་རྟོགས་ནས་གཅིག་མ་རྟོགས་པ་ཡོད་ཆོག་པ་རེད་བཤད་པ་དེ་བཞིན་གང་ཟག་སོ་སོར་སྒྲིབ་བྱེད་ཀྱི་དྲི་མ་དང་མཚན་འཛིན་སོགས་ཀྱི་དབང་གིས་རྣམ་བཞག་ཐ་དད་བཞག་ན་ཆོག་གི་ཡོད་པ་རེད། དེས་ན་གཅིག་རྟོགས་ན་གཅིག་མ་རྟོགས་པ་ཡོད་ན་ཆོག་པ་རེད། རང་གིས་ཡིན་ན་རང་ལུགས་དེ་ལྟར་འཇོག་དགོས་པ་རེད་བསམ་གྱིན་ཡོད། ཡིན་ན་ཡང་འཕགས་པའི་མཉམ་བཞག་ཡེ་ཤེས་མངོན་སུམ་དུ་རྟོགས་ན་གཅིག་རྟོགས་ན་གཅིག་མ་རྟོགས་པ་མེད་པ་དེ་རེད། ཡིན་ན་ཡང་སོ་སོར་སྐྱེ་བོས་ལུས་བྱེད་བཅིང་གི་གནད་ལ་བརྟེན་ནས་གཅིག་མངོན་སུམ་དུ་རྟོགས་ན་གཅིག་མ་རྟོགས་པ་ཡོད་པ་ཡིན། དེ་ཡང་དཔེར་ན། སོར་སྡུད་ལྟ་བུའི་སྐབས་སུ་འོད་གསལ་རྟགས་བཅུ་ནང་ནས་དུ་བ་ལྟ་བུ་མཐོང་ནས་སྨིག་རྒྱུ་ལྟ་བུ་མ་རྟོགས་པ་ལྟ་བུ་དང༌། དེ་ལ་རྟོགས་པ་བཅུ་ཡོང་བའི་ཕྱིར། དེ་ཡང་མཐོང་དོན་དང༌། བསྒོམ་རིམ་གཟུང་འཇུག་རབ་གསལ་རྣམས་ཀྱི་སྐབས་སུ་གསུངས་སོ། །ཡང་སྟོང་གཟུགས་རྣམ་པ་ཐམས་ཅད་པའི་ཆོས་ཉིད་དེ་དེའི་སྟེང་དུ་དུ་བ་ལྟ་བུ་ཆོས་ཉིད་མངོན་དུ་གྱུར་ནས་སྨིག་རྒྱུའི་ལྟ་བུ་ཆོས་ཉིད་མངོན་དུ་མ་གྱུར་ན་ཡང་ཆོག་པ་ཡིན། སྤྱིར་བཏང་རྗེ་བཙུན་ཏཱ་ར་ནཱ་ཐས་ཆོས་ཉིད་ལ་ངོ་བོའི་སྒོ་ནས་དབྱེ་བ་མེད་ཀྱང་ཆོས་ཅན་སོ་སོར་འབྲེལ་བའི་དབྱེ་བ་སྣ་ཚོགས་པ་ཡོད་ཀྱང་ཞེས་པ་དང༌། སྦྱོར་དྲུག་རྟགས་ཚད་ལ་སོགས་པའི་སྐབས་སུ་རྣམ་བཞག་ཙམ་ཐ་དད་པ་ཡིན་པར་གསུངས་བའི་དབང་གིས་གཅིག་རྟོགས་ཀྱང་གཅིག་མ་རྟོགས་པ་ཡོད་ན་ཆོག་པ་རེད་ཞུ་རྒྱུ་ཡིན། དེ་ཡང་ཉ་ཊཱིཀ་ལས། རྟོགས་པའི་ཁྱད་པར་ནི། ས་བཅུ་བོའི་རྟོགས་པ་ལ་ཁྱད་ཅི་ཡོད་ཅེ་ན། མཉམ་གཞག་ཏུ་ཆོས་ཉིད་ཙམ་རྟོགས་པ་ལ་ཁྱད་མེད་དུ་བསྟན་པ་དང༌། ཆོས་ཉིད་བཅུ་ལ་སྒྲིབ་པ་བཅུ་སྤངས་པའི་རིམ་གྱིས་ངེས་པ་འདྲེན་ཚུལ་ལ་ཁྱད་ཡོད་པར་བསྟན་པ་དང་གཉིས།དང་པོ་ནི། ས་བཅུ་གཅིག་གི་མཉམ་བཞག་ན་ཆོས་ཉིད་ཙམ་མངོན་གསུམ་དུ་རྟོགས་པར་ཁྱད་པར་མེད་དེ། ཆོས་ཐམས་ཅད་ཀྱི་ཆོས་དབྱིངས་གཅིག་ཉིད་ཡིན་པའི་ཕྱིར་ཏེ། མདོ་ལས།འཇམ་དཔལ་ཆོས་ཀྱི་དབྱིངས་གཅིག་ཡང་དག་པའི་མཐའ་གཅིག་ཡིན་ན་སྣོད་དང་སྣོད་མིན་པར་ཇི་ལྟར་བརྟགས། ཅེས་དང༌། ཨཱརྱ་དེ་བས། གང་གིས་དངོས་གཅིག་དེ་བཞིན་ཉིད་མཐོང་བ། །དེ་ཡིས་དངོས་ཀུན་དེ་བཞིན་ཉིད་དུ་མཐོང༌། །ཞེས་སོགས་མཐའ་ཡས་སོ། །གཉིས་པ་ནི། དེ་ལྟར་ཡིན་ཀྱང་ཆོས་དབྱིངས་བཅུས་སྒྲིབ་པ་བཅུ་སྤངས་པའི་སྒོ་ནས་རྗེས་ཐོབ་ཀྱི་ཡང་དག་པའི་ངེས་པ་འདྲེན་པའི་སྒོ་ནས་རྟོགས་པ་ལ་ཁྱད་པར་ཡོད་དེ། ཐམས་ཅད་ཀྱིས་ཀྱང་མཉམ་གཞག་ཏུ་ཆོས་ཉིད་དོན་དམ་པ་ཇི་ལྟ་བའི་ཚུལ་སྤྲོས་པའི་མཐའ་དང་བྲལ་བ་ན་ནམ་མཁའ་ལྟ་བུར་རྟོགས་ཤིང༌། རྗེས་ཐོབ་ཏུ་ཆོས་ཅན་ཀུན་རྫོབ་ཇི་སྙེད་པའི་ཚུལ་སྣང་ལ་རང་བཞིན་མེད་པ་སྒྱུ་མ་ལྟ་བུར་རྟོགས་ཏེ། རྣམ་པར་མི་རྟོག་པ་ལ་འཇུག་པའི་གཟུངས་ལས། རྣམ་པར་མི་རྟོག་པའི་ཡེ་ཤེས་ཀྱིས་ནི་ཆོས་ཐམས་ཅད་ནམ་མཁའི་དཀྱིལ་དང་མཚུངས་པར་མཐོང་ངོ༌། །དེའི་རྗེས་ལས་ཐོབ་པའི་ཡེ་ཤེས་ཀྱིས་ནི་ཆོས་ཐམས་ཅད་དང་སྒྱུ་མ་ལ་སོགས་པ་བརྒྱད་དང་མཚུངས་པར་མཐོང་ངོ་ཞེས་གསུངས་པ་ལྟར་རོ། །སོ་སོས་ནི་ས་དང་པོར་ཆོས་ཀྱི་དབྱིངས་རང་གཞན་ཐམས་ཅད་ཀྱི་བདག་ཉིད་དུ་ཀུན་ཏུ་འགྲོ་བའི་ཚུལ་དུ་རྟོགས་ཤིང་དེ་བཞིན་དུ་ས་གཉིས་པར་རང་བཞིན་གྱིས་འོད་གསལ་བར་མཐོང་བས་མཆོག་གི་དོན་དང༌། གསུམ་པར་བསྟན་པ་ཆོས་ཐམས་ཅད་རྟོགས་པའི་རྒྱུ་མཐུན་པའི་དོན་དང༌། བཞི་པར་གང་ལ་ཡང་བདག་གི་བར་ཡོངས་སུ་འཛིན་པ་མེད་པའི་དོན་དང༌། ལྔ་པར་རྣམ་པར་དག་པའི་དབྱིངས་སུ་རང་གཞན་གྱི་རྒྱུད་རྣམས་ཐ་དད་མེད་པའི་དོན་དང༌། དྲུག་པར་ཉོན་མོངས་རྣམས་ནི་གློ་བུར་བ་ཡིན་གྱི་རང་བཞིན་མ་ཡིན་ལ། རང་བཞིན་གྱིས་རྣམ་པར་དག་པས་གསར་དུ་རྣམ་པར་དག་པ་མིན་པའི་དོན་དང༌། བདུན་པར་མདོ་ལ་སོགས་པའི་ཆོས་ཀྱི་མཚན་མ་ཐ་དད་མེད་པའི་དོན་དང༌། བརྒྱད་པར་མི་སྐྱེ་བའི་ཆོས་ལ་བཟོད་པ་ཐོབ་པས་ཉོན་མོངས་པ་བྲི་བ་དང་རྣམ་པར་བྱང་བ་འཕེལ་བ་མེད་པའི་དོན་དང༌། ཉོན་ཡིད་གནས་གྱུར་པས་རྣམ་པར་མི་རྟོག་པ་ལ་དབང་བའི་དོན་དང༌། དབང་ཤེས་གནས་གྱུར་པས་ཞིང་དག་པ་ལ་དབང་བའི་དོན་དང༌། དགུ་པར་ཡིད་ཤེས་གནས་གྱུར་པ་ལས་སོ་སོ་ཡང་དག་པར་རིག་པའི་ཡེ་ཤེས་ལ་དབང་བའི་དོན་དང༌། བཅུ་པར་ཇི་ལྟར་བཞེད་པ་བཞིན་སྤྲུལ་ནས་སེམས་ཅན་གྱི་དོན་བྱེད་པའི་འཕྲིན་ལས་ལ་དབང་བའི་གནས་ཀྱི་དོན་དུ་རྟོགས་ཏེ། དབུས་མཐའ་ལས། ཀུན་ཏུ་འགྲོ་དོན་མཆོག་གི་དོན། །རྒྱུ་མཐུན་དོན་གྱི་མཆོག་ཉིད་དང༌། །ཡོངས་སུ་འཛིན་པ་མེད་དོན་དང༌། །རྒྱུད་རྣམས་ཐ་དད་མེད་པ་དང༌། །ཉོན་མོངས་རྣམ་དག་མིན་དོན་དང༌། །ཐ་དད་མེད་པའི་དོན་ཉིད་དང༌། །བྲི་མེད་འཕེལ་བ་མེད་དོན་དང༌། །དབང་ནི་རྣམ་པ་བཞི་ཡི་གནས། །ཞེས་གསུངས་པ་ལྟར་རོ། །ཁ་ཅིག་སྒྲོ་འདོགས་གཅོད་ཚུལ་ལ་ཁྱད་ཡོད་ཀྱང་རྟོགས་བྱའི་དོན་ལ་ཁྱད་པར་མེད་པའི་ཕྱིར་ཆོས་ཀྱི་དབྱིངས་རྟོགས་པ་ལ་ཁྱད་པར་མེད་དོ་ཞེས་ཀྱང་གསུང་མོད་ཀྱི། གློ་བུར་གྱི་དྲི་མ་རིམ་གྱིས་སྤངས་པ་ལས་ཆོས་ཀྱི་དབྱིངས་རྟོགས་པའང་གོང་ནས་གོང་དུ་འཕེལ་བར་འགྱུར་ཏེ། ཆོས་དབྱིངས་བསྟོད་པ་ལས། ཇི་ལྟར་ཚེས་པའི་ཟླ་བ་ནི། །སྐད་ཅིག་སྐད་ཅིག་རྒྱས་པར་མཐོང༌། །དེ་བཞིན་ས་ལ་ཞུགས་རྣམས་ཀྱིས། །རིམ་གྱིས་རིམ་གྱིས་འཕེལ་བར་མཐོང༌། །ཞེས་གསུངས་པ་ལྟར་རོ། །དྲི་བ་བཅུ་གཅིག་པ་རྣམ་མཁྱེན་གྱིས་ཀུན་རྫོབ་མི་སྣང་ཞེས་པའི་དོན་ཅི་ལྟར་ཡིན་ཞེས་པའོ། །ལན་ནི། རྣམ་མཁྱེན་གྱིས་ཀུན་རྫོབ་ཀྱི་ཆོས་མི་སྣང་བའི་གནད་འགག་དེ་གང་ཡིན་ཞེ་ན། དེ་ཀུན་རྫོབ་དུ་སྣང་བ་ལ་ཀུན་རྫོབ་འཁྲུལ་བའི་དབང་གིས་སྣང་དགོས་པ་རེད། དཔེར་ན་ང་ཚོས་རྡེའུ་ཤིང་མང་བོ་ཡོད་ན་ཡང་རྟ་གླང་སྣང་མི་འདུག་དེ་མི་སྣང་བའི་རྒྱུ་མཚན་འཁྲུལ་རྒྱུ་མ་ཚང་བའི་དབང་གིས་མ་སྣང་བ་རེད། འཁྲུལ་རྒྱུ་ཚང་ན་རྟ་གླང་སྣང་གིན་ཡོད་པ་རེད། དཔེར་ན་གཉིད་སད་བཞིན་པའི་གང་ཟག་དེ་ལ་རྨི་ལམ་གྱི་སྣང་བ་འབྱུང་གི་མི་འདུག་དེའི་རྒྱུ་མཚན་རྨི་ལམ་གྱི་སྣང་བ་སྐྱེ་བའི་རྒྱུ་རྐྱེན་མ་ཚང་བས་མ་སྐྱེས་པ་རེད། དེ་ནང་བཞིན་ཀུན་རྫོབ་ཆོས་འདི་དག་ཐམས་ཅད་འཁྲུལ་རྒྱུ་དབང་གིས་སྣང་བ་ཡིན། འཁྲུལ་བ་རེད་ཟེར་གི་མེད་ལ་འཁྲུལ་བའི་སྣང་བ་རེད་ཟེར་གྱིན་ཡོད། འཁྲུལ་རྒྱུ་དང་བྲལ་ན་འཁྲུལ་བའི་སྣང་བ་འབྱུང་བ་མི་སྲིད་པ་ཞིག་ཀུན་རྫོབ་གནས་ཐབས་ཀྱི་དབང་དུ་བྱས་ན་ཡང་དེ་ཡིན་གསུངས། དེའི་གནད་ཀྱིས་ཆོས་རྗེ་ཀུན་མཁྱེན་གྱིས་རྣམ་མཁྱེན་ཆོས་ཅན། འཁྲུལ་བར་ཐལ། ཀུན་རྫོབ་ཁམས་གསུམ་པ་སྣང་བའི་ཕྱིར། ཀུན་རྫོབ་ཁམས་གསུམ་པ་སྣང་ན་འཁྲུལ་དགོས་པར་བདེན་གཉིས་གསལ་བའི་ཉི་མའི་སྐབས་སུ་གསུངས་པ་ཡིན། ཡིན་ན་ཡང་ཉ་དབོན་པའི་ཉ་ཊཱིཀ་སྐབས་སུ་འོན་ཀྱང་སོ་སོར་སྐྱེ་བོ་ཇི་ལྟར་སྣང་བ་ལྟར་དུ་སྣང་ནས་མི་མཁྱེན་ཞིང་སོ་སྐྱེ་ལ་མི་སྣང་བ་ལྟར་སྣང་ནས་མཁྱེན་ཏེ་སོ་སྐྱེ་ལ་བདེན་བདེན་པོར་སྣང་ཞིང་སངས་རྒྱས་ལ་བདེན་མེད་སྒྱུ་མ་ལྟར་སྣང་ངོ་ཞེས་ཁས་བླང་ངོ༌། །ཞེས་ཀུན་རྫོབ་སྣང་ཞེས་པ་དེ་ཕར་སྣང་བའི་སྐད་ཆ་དང་ཚུར་མི་སྣང་བའི་སྐད་ཆ་ལ་སྦྱར་ན་ཆོས་རྗེ་ཀུན་མཁྱེན་རིན་པོ་ཆེའི་བདེན་གཉིས་གསལ་བའི་ཉི་མའི་སྐབས་སུ་མདོ་སྡེ་རྒྱན་གྱི་ལུང་གི་དོན་བཀྲལ་བ་དང་དགོངས་པ་གཅིག་ཏུ་འགྲོ་བ་ཡོད་པ་འདྲ་སྟེ། བདེན་གཉིས་གསལ་བའི་ཉི་མ་ལས། སངས་རྒྱས་ཀྱི་ཡེ་ཤེས་ཆོས་ཅན། ཕྱིན་ཅི་ལོག་ཏུ་ཐལ། ཀུན་རྫོབ་ཁམས་གསུམ་པ་སྣང་བའི་ཕྱིར། ཞེས་སོགས་དང༌། རྒྱུད་བླ་མ་དེ་ཉིད་སྣང་བ་༣༨ལས། ཆོས་རྗེ་པས་དབུ་ཆེན་འགའ་དོན་གྱི་ཆོས་ཉིད་དྲི་མེད་ཁོ་ན་དང་ཞེས་པ་ནས་སངས་རྒྱས་ཀྱི་ཡེ་ཤེས་མ་དག་པར་ཆོས་ཅན་རྣམས་སྣང་བར་བཞེད་པ་ངེས་ཆོས་རྗེས་དགོངས་པ་དང་འགལ་ཚབས་ཆེས་ཏེ། ཞེས་པ་ནས་ངེས་དོན་རྒྱ་མཚོའི་སྨད་ན་ཆུ་ལྟ་བུ་གཅིག་ལ་འགྲོ་བ་རིགས་དྲུག་ཏུ་སྣང་བ་དེ་སངས་རྒྱས་ལ་གང་དུ་སྣང་ཞེས་སོགས་དང་འགལ་ལོ། །ཞེས་དང༌། སྔོན་མེད་ལེགས་བཤད་ལས། ཁ་ཅིག་སངས་རྒྱས་ཀྱིས་མ་དག་པའི་སྣང་བ་ཐམས་ཅད་གཟིགས་ཀྱང༌། བདེན་འཛིན་མེད་པས་མ་འཁྲུལ་བ་ཡིན་ནོ་སྐད་ཟེར་བ་ནི། སྐྱེས་བུ་འདི་ནི་ཆོམ་པོས་བཟུང་བས་ཆོ་ངེས་འདེབས་མོད་ཀྱི། ནོར་འཕྲོག་རྒྱུ་མེད་པས་སྡུག་བསྔལ་མེད་དོ་ཞེས་ཟེར་བ་དང༌། ཞེས་དང༌། ངེས་དོན་ནོར་བུ་མཛོད་ལས། འདིར་དུས་གསུམ་མཁྱེན་ཚུལ་ཡང་ཁ་ཅིག་ནི་སངས་རྒྱས་ལ་ཤེས་བྱ་མཁྱེན་པའི་མེད་པར་འདོད་དེ་མི་ལགས་སོ། །གཞན་དག་ན་རེ། འདས་མ་འོང་ད་ལྟ་བའི་ཤུགས་ལ་མཁྱེན་གསུངས་པ་ལ་ཤེས་བྱེད་མེད་དོ། །མཁྱེན་རབ་ཀྱི་དབང་ཕྱུག་དག་དུས་ཀྱི་རྣམ་པར་བཞག་པ་ནི་རྟོག་པས་སྤྲུལ་བ་ཙམ་སྟེ་དོན་ལ་མེད་དོ། །ཞེས་དང༌། དེ་ལས། སངས་རྒྱས་ལ་འཁྲུལ་སྣང་མི་སྣང་བར་བཞེད་པ་དག་ལ་ནི་དེ་ཁོ་ན་ལེགས་པར་སེམས་སོ། །ཞེས་དང༌། ས་བཟང་གི་རྒྱུད་བླ་མའི་འགྲེལ་བ་༥༡ལས། འཕགས་པ་རྣམས་ཀྱི་མཉམ་བཞག་མཐར་ཐུག་པའི་ཚེ་ན་ཡུལ་ཅི་ཡང་སྣང་བ་མེད་པའོ། །དེ་དག་ནི་བྱིས་པ་རྣམས་ལ་སྣང་ཞིང་མ་དག་པ་གཟུང་འཛིན་གློ་བུར་བའི་དམིགས་པ་ལ་དགོངས་ནས་གསུངས་བ་ཡིན་གྱི་ཞེས་སོ། །དྲི་བ་བཅུ་གཉིས་པ་འཁོར་ལོ་བར་བའི་སྐབས་སུ་བསྟན་པའི་སྤྲོས་བྲལ་དང་འཁོར་ལོ་ཐ་མའི་སྐབས་སུ་བསྟན་པའི་སྤྲོས་བྲལ་གཉིས་འདྲ་མིན་ཞེས་པའོ། །ལན་ནི། རི་ཆོས་ངེས་དོན་རྒྱ་མཚོའི་ལམ་གྱི་རྣམ་བཞག་སྐབས་དེར་མཉམ་བཞག་ལ་ཟློ་བའི་སྐབས་སུ་འཁོར་ལོ་བར་བ་ལྟར་རྟོག་མེད་སྤྲོས་བྲལ་དུ་མཉམ་པར་བཞག་ཅེས་གསུངས་པ་རེད། དེ་བདག་མེད་སྤྲོས་བྲལ་དུ་མཉམ་པར་བཞག་ཞེས་པ་སྤྲོས་བྲལ་ལ་འཆད་ཡོད་པ་ཡིན་དེ་སྤྲོས་བྲལ་གཞན་སྟོང་ཆོས་དབྱིངས་ཡིན། བུམ་པ་བདེན་གྲུབ་ཀྱིས་སྟོང་བ་དེ་ཀུན་རྫོབ་ཆགས་ཡོད་པ་ཡིན། དེ་ཡིན་ན་ཀུན་རྫོབ་སྤྲོས་པ་དང་བྲལ་ཡོད་ནི་མ་ཡིན། བདེན་གྲུབ་ཀྱི་སྤྲོས་པ་དང་བྲལ་ན་ཡང་སྤྲོས་པ་ཐམས་ཅད་དང་བྲལ་བ་མ་རེད། དེའི་ཕྱིར་ན་འཁོར་ལོ་བར་བའི་སྐབས་སུ་བསྟན་པའི་སྤྲོས་བྲལ་དང་འཁོར་ལོ་ཐ་མའི་སྐབས་སུ་བསྟན་པའི་སྤྲོས་བྲལ་གཉིས་དོན་གཅིག་མིང་གི་རྣམ་གྲངས་ཡིན། ཡིན་ཁྱབ་མཉམ་ཡང་ཡིན། དེ་ཡང་ཀུན་མཁྱེན་དོལ་པོ་པའི་བཀའ་བསྡུ་བཞི་བའི་སྐབས་སུ། བར་བར་གསུངས་བ་དེ་བཞིན་ཉིད། །ཡོན་ཏན་དཔག་ཡས་ཚང་བ་ཡིན་ཕྱིར་དང༌། །ཞེས་པ་དེ་ལ་སོགས་པ་འཁོར་ལོ་བར་བའི་སྐབས་སུ་བསྟན་པའི་ཆོས་དབྱིངས་དང་ཐ་མའི་སྐབས་སུ་བསྟན་པའི་ཆོས་དབྱིངས་གཉིས་སྤྲོས་བྲལ་ཡིན། སྤྲོས་པ་ཐམས་ཅད་དང་བྲལ་བ་རེད། སྤྲོས་པ་ཐམས་ཅད་དང་བྲལ་བ་མཉམ་བཞག་ལ་ཟློ་བའི་སྐབས་སུ་འཁོར་ལོ་བར་མཐའ་གཉིས་ཀྱི་སྤྲོས་བྲལ་དུ་མཉམ་པར་བཞག་པ་གཅིག་མཚུངས་རེད། མཉམ་བཞག་སྐབས་སུ་རང་སྟོང་གི་ལྟ་བ་གསུངས་པ་རྩ་བ་ནས་མ་རེད། མཉམ་བཞག་སྐབས་སུ་ཀུན་རྫོབ་བདེན་མེད་དུ་བསྒྲུབས་པ་རེད་དོན་དམ་བདེན་མེད་དུ་བསྒྲུབས་པ་མ་ཡིན། སྤྲོས་པའི་བདེན་མེད་དུ་བསྒྲུབས་པ་ཡིན་སྤྲོས་པ་ཐམས་ཅད་དང་བྲལ་བ་རྟོགས་པའི་ཚེ་དོན་དམ་བདེན་པ་དེ་ཡང་ཀུན་རྫོབ་བདེན་པའི་སྤྲོས་པ་བྲལ་བ་རྟོགས་པ་མ་ཟད་སྤྲོས་པ་ཐམས་ཅད་དང་བྲལ་བར་རྟོགས་པ་ཡིན། དེས་ན་དོན་དམ་བདེན་པ་དགག་བྱ་བདེན་པར་མ་གྲུབ་པ་དང༌། སྤྲོས་པའི་བདེན་པར་མ་གྲུབ་པ་རྟོགས་ཀྱང་བདེན་པར་མེད་པ་མ་རྟོགས་ཞེས་ཞིབ་ཆ་བྱེད་དགོས། སྤྱིར་མཉམ་བཞག་སྐབས་སུ་བདེན་པར་གྲུབ་པའོ་སྙམ་པའི་ཆེད་ཞེན་གཏད་ཞེན་འཛིན་ཞེན་ལ་སོགས་པ་ཡོད་པ་མ་རེད་ཏ། མཉམ་བཞག་ལ་ཟློ་བའི་སྐབས་སུ་སྤྲོས་བྲལ་དུ་མཉམ་པར་བཞག་དགོས་པ་དང་རྗེས་ཐོབ་ཤན་འབྱེད་སྐབས་སུ་རྣམ་པར་འབྱེད་དགོས་པ་དེ་ཡིན་ནོ། །དྲི་བ་བཅུ་གསུམ་པ་ཆོས་ཉིད་རྟག་པའི་བདག་ཞེས་པའི་དོན་ཅི་ལྟར་ཡིན། དེ་ཡིན་ན་རང་དབང་བར་གྲུབ་དགོས་མིན་ཞེས་པའོ། །ལན་ནི། ཆོས་ཉིད་རྟག་པའི་བདག་ཡིན་ཚུལ་ཞེས་པ་དེའི་ལན་ནི། ཆོས་ཉིད་རྟག་པའི་བདག་ཡིན་ཚུལ་ནི་རྒྱུད་བླའི་སྐབས་སུ། བདག་དང་བདག་མེད་སྤྲོས་པ་དེ། །ཉེ་བར་ཞི་བ་དམ་པའི་བདག །ཞེས་གསུངས་བ་ལྟར་ཡིན། ཕྱི་རོལ་བས་སྒྲོ་བཏག་པསབདག་གི ་ཞི་བར་མ་ཟད་ཉན་ཐོས་སྡེ་གཉིས་ལ་སོགས་པའི་གཏན་ལ་འབེབས་པའི་རྟག་གཅིག་རང་དབང་བས་སྟོང་བའི་བདག་མེད་དེ་ཡང་ཀུན་རྫོབ་ཀྱི་ཆོས་ སྤྲོས་པ་ཡིན་པས་དེ་ཉེ་བར་ཞི་བའི་ཆོས་ཀྱི་དབྱིངས་དམ་པའི་བདག་གམ་རྟག་པའི་བདག་ཡིན་གསུངས་བ་ཡིན། བདག་དང་བདག་མེད་སྤྲོས་པ་དེ། །ཉེ་བར་ཞི་བ་དམ་པའི་བདག །ཞེས་གསུངས་པའི་སྒོ་ནས་རྒྱུད་བླ་མ་ལས་གཙང་བདེ་རྟག་བདག་གི་ཕར་ཕྱིན་གྱི་རྣམ་པ་བཞི་གསུངས་ཡོད་ལ། དེ་དམ་པའི་བདག་ཏུ་གསུངས་བ་དང་གཅིག་མཚུངས་རེད། དེའི་སྟེང་དུ་རང་ལུགས་ལ་ཆོས་ཉིད་དེ་བཞིན་གཤེགས་པའི་སྙིང་བོ་དེ་རང་དབང་དུ་གྲུབ་པ་ཨེ་ཡིན་ཟེར་ན། རང་དབང་ཏུ་གྲུབ་པ་ཡིན་ཞེས་འཆད་ཀྱིན་ཡོད་པ་མ་རེད། དེ་མ་ཡིན་པའི་རྒྱུ་མཚན་རང་གཞན་གང་ལ་མ་ལྟོས་པར་རང་ཉིད་གཞན་ལ་དབང་བསྒྱུར་བར་བྱེད་པ་པོ་དེ་རང་དབང་བའི་དོན་ཡིན་པ་དེ་རྗེ་བཙུན་ཏཱ་ར་ནཱ་ཐའི་ལམ་རིམ་བདུད་རྩི་སྙིང་ཁུའི་སྐབས་སུ་བདག་མེད་གསུངས་སྐབས་སུ་གསུངས་ཡོད་པ་རེད། རང་ལུགས་ལ་རང་དབང་དུ་ཡོད་ན་གཞན་ལ་དབང་བསྒྱུར་ཐུབ་དགོས་དེས་ན་གཞན་ལ་དབང་བསྒྱུར་བ་པོ་ཡིན་དགོས་ནི་རེད། ཆོས་ཉིད་དེ་བཞིན་གཤེགས་པའི་སྙིང་བོ་དེ་རང་ཉིད་གཞན་ལ་ལྟོས་པ་མེད་པ་ཡིན་ཀྱང་ཕྱི་རོལ་བའི་གྲངས་ཅན་པའི་ཚངས་བ་ཁྱབ་འཇུག་སོགས་ཀྱིས་སྤྱིའི་གཅོ་བོ་བདག་ཤེས་རིག་གི་སྐྱེ་བུ་ལ་སོགས་པ་འདོད་པ་བཞིན་གཞན་ལ་དབང་བསྒྱུར་བ་པོ་མ་ཡིན་པའི་རྒྱུ་མཚན་གྱིས་རང་དབང་བའི་བདག་ཏུ་མ་གྲུབ་པ་ཡིན། རང་ལུགས་ཡིག་ཆའི་དགོངས་པ་གོང་ནས་མང་བོ་ཞིག་ཞུས་ཟིན་པ་དེ་རེད། རྟག་གཅིག་རང་དབང་བའི་བདག་མ་གྲུབ་ཞེས་སོགས་མང་བོ་གསུངས་བ་དེ་རེད། དེས་ན་དེ་རིང་གི་ཆ་ལ་འདི་ནས་མཚམས་འཇོག་རྒྱུ་ཡིན། སང་ཉིན་དྲི་བ་གསར་བ་གསུམ་དགེ་བཤེས་དང་མཁན་པོ་རྣམ་པས་གནང་ན་འགྲིག་གི་རེད། ཡང་མིན་ན་སྤྱིར་བཏང་ཡོངས་གྲགས་ཀྱི་གཞན་སྟོང་རང་སྟོང་གི་དྭོགས་པ་ཡོད་ས། ཡང་མིན་ན་གཞན་སྟོང་དབུ་མ་ཆེན་པོའི་རང་གི་གཞུང་ལུགས་ཀྱིས་གསུང་ཟིན་ལ་དྭོགས་པ་ཡོད་ས་ཡང་མིན་ན་ལྟ་བའི་གནད་འགག་གི་སྟེང་ནས་གོ་དཀའ་བ་རྣམས་དྲི་བ་གནང་ན་ཡག་པོ་འདུག་བསམ་གི་ཐུགས་རྗེ་ཆེ། དྲི་བ་བཅུ་བཞི་པ་མདོ་སྡེ་དགོངས་པ་ངེས་འགྲེལ་གྱི་དགོངས་པ་རང་ལུགས་ལ་ཇི་ལྟར་བཀྲལ་ཞེས་པའོ། །ལན་ནི། འོ་ལགས་སོ། དེ་ནས་དྲི་བ་དེ་སྤྱིར་བཏང་རང་གི་ལྟ་ཚུལ་ཡིན་ན་སྤྱིར་བཏང་གྲུབ་མཐའ་བར་བ་ལས་བརྩམ་པ་ཡིན་ན་གནད་འགག་ཆེན་པོ་རེད་བསམ་གྱིན་ཡོད། དེ་ཡིན་པའི་རྒྱུ་མཚན་གང་འདྲ་རེད་ཟེར་ན། སྤྱིར་བཏང་བོད་ཁ་བ་གངས་ཅན་པའི་མཁས་དབང་རྣམས་ཀྱི་གཙུག་རྒྱན་དུ་གྱུར་བའི་རྗེ་རིན་པོ་ཆེའི་རྗེས་སུ་འབྲང་བའི་རི་བོ་དགེ་ལྡན་པ་རྣམས་ཀྱིས་མདོ་སྡེ་དགོངས་པ་ངེས་འགྲེལ་དང་ས་སྡེ་ལྔ་སོགས་ཀྱི་དགོངས་པ་བཀྲལ་ཚུལ་ཡིན་ན་གཙོ་བོ་སེམས་ཙམ་པའི་ལུགས་སུ་བཀྲལ་ནས་གཞན་དབང་སྟོང་གཞིར་བཞག་ནས་དེ་ཀུན་བཏགས་ཀྱིས་སྟོང་བའི་སྟོང་བ་དེ་ཡོངས་གྲུབ་དང་ཀུན་བཏགས་ཀྱང་རང་འཛིན་རྟོག་པའི་ཞེན་གཞིར་རང་མཚན་དུ་གྲུབ་པས་སྟོང་བ་དང་ཕྱི་དོན་དུ་གྲུབ་པས་སྟོང་བ་དེ་སེམས་ཙམ་པའི་ལྟ་བ་མཐར་ཐུག་ཏུ་བཀྲལ་ནས་མདོ་སྡེ་དགོངས་བ་ངེས་འགྲེལ་དང་ས་སྡེ་ལྔ་སོགས་ཀྱི་དགོངས་བ་བཀྲལ་བའི་ལུགས་གཅིག་བྱུང་ཡོད། ཡང་གཅིག་བསམ་བློ་བཏང་ན་ཇོ་ནང་བའི་རང་ལུགས་ཀུན་མཁྱེན་རིན་པོ་ཆེའི་རི་ཆོས་ངེས་དོན་རྒྱ་མཚོའི་སྐབས་སུ་ཀུན་བཏགས་གཞན་དབང་གཉིས་དེ་རང་གི་ངོ་བོ་མ་གྲུབ་པར་གཏན་ལ་ཕབ་ནས་དེ་གཉིས་ཀྱིས་སྟོང་བའི་གཞི་ཡོངས་གྲུབ་ཡིན་པར་གསུངས་ཚུལ་ཞིག་བྱུང་ཡོད། འདི་ལས་སྒྲ་མི་གསལ་བའི་ལེགས་པོ་ཞིག་མ་བྱུང་ངོ༌། དེས་ན་དེ་གཉིས་ལ་ལྟ་བ་བྲལ་ཚུལ་ལ་ཁྱད་པར་དང༌། བཞེད་ཚུལ་མི་འདྲ་བ་ཞིག་བྱུང་གི་ཡོད་པ་རེད། དེ་འདྲ་བྱུང་ཡོང་དུས་དེ་རིང་འདི་ནས་ཀུན་མཁྱེན་རིན་པོ་ཆེ་རང་གི་གཞན་སྟོང་དབུ་མ་ལས་བརྩམས་ཏེ་དེའི་སྟེང་ནས་གསུངས་ཁ་ཤས་ཞིག་ཞུ་རྒྱུ་དེ་ཡིན། སྤྱིར་བཏང་དཔལ་ལྡན་ཇོ་ནང་བའི་རང་ལུགས་ལ་བསམ་བློ་བཏང་ན་ས་སྡེ་ལྔ་ཡིན་ན་འདྲ། སྡོམ་རྣམ་གཉིས་ཡིན་ན་འདྲ། འཁོར་ལོ་ཐ་མའི་སེམས་ཙམ་མདོ་བཞི་ཡིན་ན་འདྲ། དེ་ཚོའི་སྐབས་སུ་སེམས་ཙམ་པའི་འདོད་པ་བསྟན་ཡོད་པ་ཨེ་ཡིན་ཟེར་ན་བསྟན་ཡོད་རེད། ཡིན་ན་ཡང་སེམས་ཙམ་པའི་ལྟ་བ་དེ་དེའི་དགོངས་དོན་མཐར་ཐུག་ཨེ་ཡིན་ཟེར་ན་དེ་མ་རེད། དེ་གནས་སྐབས་ཀྱི་དགོངས་དོན་ཙམ་ཆགས་ཡོད་པ་རེད། སེམས་ཙམ་པའི་ལྟ་བ་དེ་གནས་སྐབས་དགོངས་དོན་ཆགས་ཡོད་པ་རེད། དེའི་ཚུལ་ནི་གཞན་དབང་སྟོང་གཞིར་བཞག་ནས་དེ་ཉིད་གང་ཟག་གི་བདག་ཏུ་སྒྲོ་བཏགས་པ་ལྟར་གྱི་བདག་དུ་གྲུབ་པས་སྟོང་བ་གཏན་ལ་ཕབ་ཡོང་དུས་དེའི་སྐབས་ཀྱི་སེམས་ཙམ་པས་འདོད་པའི་ལྟ་བ་ཆགས་ཡོད་པ་ཡིན། དེའི་སྟེང་ནས་གཞན་སྟོང་དབུ་མ་ཆེན་པོ་རང་ལུགས་ལས་བརྩམས་པ་ཡིན་ན་དེ་ལྟ་བུ་དེ་རྣམ་གྲངས་བའི་དོན་དམ་ཙམ་ཆགས་ཡོད་རེད། ཡིན་ན་ཡང་དེ་ཞིབ་པར་བཤད་ན་རང་ལུགས་ལ་གཟུང་འཛིན་གཉིས་སྣང་གིས་སྟོང་བའི་གཞན་དབང་རྣམ་ཤེས་ཞིག་སེམས་ཙམ་པའི་ལུགས་ལ་ཡོངས་གྲུབ་མཚན་ཉིད་པ་དེ་ཡིན་གསུངས་པ་ཡིན། དེ་ཡང་དཔལ་དུས་ཀྱི་འཁོར་ལོའི་རྩ་རྒྱུད་ཀྱི་ལུང་ཡིན་གསུངས་བ་གཅིག་དང་ཡེ་ཤེས་སྙིང་བོ་ཀུན་ལས་བཏུས་པའི་ནང་ན་ཡོད། དེ་ནང་བཞིན་འཇམ་དཔལ་ལྟ་བ་མདོར་བསྟན་དང་དུས་འཁོར་འགྲེལ་ཆེན་དྲི་མེད་འོད་ཀྱི་སྐབས་སུ་སེམས་ཙམ་པའི་འདོད་པ་བསྟན་པའི་གཞུང་ཚིགས་སུ་བཅད་པ་ལས། གཟུང་དང་འཛིན་པ་རྣམ་གྲོལ་བའི། །རྣམ་པར་ཤེས་པ་དོན་དམ་ཡོད། །ཅེས་གསུང་པ་ལྟར་གཟུང་འཛིན་ལ་སོགས་པའི་ཀུན་བཏགས་དེ་དགག་བྱར་བཞག་ནས་དེས་སྟོང་བའི་རྣམ་ཤེས་སམ་གཟུང་འཛིན་གཉིས་དང་བྲལ་བའི་རྣམ་ཤེས་དོན་དམ་བདེན་པ་ཡིན་པར་འདོད་པ་དེ་སེམས་ཙམ་པའི་ལུགས་ལ་སྦྱར་ནས་གསུངས་པ་ཡིན། རྗེའི་རྗེས་འབྲང་གི་མཁས་པ་རྣམས་ཡིན་ན་སེམས་ཙམ་པའི་ལུགས་ལ་རང་འཛིན་རྟོག་པའི་ཞེན་གཞིར་རང་མཚན་གྱིས་གྲུབ་པས་སྟོང་བ་དེ་དང༌། གཞན་དབང་ལྟ་བུ་དེ་ཕྱི་དོན་དུ་གྲུབ་པས་སྟོང་བའི་མེད་འགག་ཅིག་སེམས་ཙམ་པའི་ལྟ་བ་མཐར་ཐུག་ཏུ་ཁས་ལེན་མཁན་མང་བོ་ཞིག་ཡོད་པ་རེད། མ་གཏོགས་སེམས་ཙམ་པའི་ལུགས་ལ་གཟུང་འཛིན་གཉིས་སུ་སྣང་བས་སྟོང་བ་དེ་ལྟ་བ་མཐར་ཐུག་ཏུ་ཁས་ལེན་པ་གཏན་ནས་མེད་པ་མ་ཡིན་པ་ཨེ་ཡིན་ན་བསམ་གྱིན་འདུག དེ་ཙམ་ཞིག་ཡིན་མ་གཏོགས་མང་བོ་བཤད་ན་ཉོག་འགྲོ་བས་མདོར་ན་སེམས་ཙམ་པའི་དགོངས་པ་འཆད་ཡོང་དུས། དང་པོ་གཞན་དབང་དེ་རྣམ་པར་རྟོག་པའི་སྤྱོད་ཡུལ་ཀུན་བཏགས་པའི་མཚན་ཉིད་ཀྱི་གནས་འདུ་བྱེད་ཀྱི་མཚན་མ་གང་ལགས་པ་དེ་ནི་གཞན་གྱི་དབང་གི་མཚན་ཉིད་ལགས་སོ། །ཞེས་མདོ་སྡེ་དགོངས་པ་ངེས་འགྲེལ་སྐབས་སུ་གཞན་དབང་ཁྱད་ཆོས་གསུམ་ལྡན་གསུངས་བའི་སྐབས་སུ་ཀུན་བཏགས་ཀྱིས་སྟོང་བ་གཏན་ལ་འབེབ་པའི་གཞི་གནས་སྐབས་གཞན་དབང་བཞག་ནས་གསུངས་ཡོད་པ་ཡིན། གཞན་དབང་ཀུན་བཏགས་གང་ཟག་གི་བདག་མེད་ཆོས་ཀྱི་བདག་མེད་གཏན་ལ་འབེབ་པའི་རྗེས་སུ་གཞན་དབང་ཁོ་རང་དེ་དོན་དམ་དཔྱོད་བྱེད་ཀྱི་རིགས་པས་དཔྱད་ན་རང་གི་ངོ་བོ་བདེན་པར་མ་གྲུབ་པར་ཆགས་ཡོད་པ་ཡིན།དེ་ཆགས་ཡོང་དུས་རང་གི་ངོ་བོ་གཤིས་ལུགས་སུ་མ་གྲུབ་པ་ཡིན། གཤིས་ལུགས་གནས་ལུགས་ཡོངས་གྲུབ་དེ་སྟོང་གཞི་བཞག་ནས་ཀུན་བཏགས་གཞན་དབང་གཟུང་འཛིན་གྱི་སྤྲོས་པ་མཐའ་དག་གདོད་ནས་སྟོང་བ་དེ་གཞན་སྟོང་དབུ་མ་ཆེན་པོ་སེམས་ཙམ་པ་ལས་ཁྱད་པར་དུ་འཕགས་པ་དེ་ལྟ་བུ་ཡོང་བ་ཡིན། དེ་ཡོང་དུས་དང་བོ་མདོ་སྡེ་དགོངས་པ་ངེས་འགྲེལ་ལེའུ་བཅུ་ཡོད་པ་དེའི་ནང་ནས་དོན་དམ་ཡང་དག་པར་འཕགས་པའི་ལེའུའི་སྐབས་སུ་ཤེར་ཕྱིན་གྱི་མདོའི་དགོངས་དོན་གསུང་ཡོང་དུས་གང་འདྲ་གསུངས་པ་ཡིན་ཟེར་ན། མདོ་སྡེ་དགོངས་པ་ངེས་འགྲེལ་སྐབས་སུ་དོན་དམ་པར་ཡང་དག་འཕགས། ངས་ཆོས་རྣམས་ཀྱི་ངོ་བོ་ཉིད་མེད་པ་ཉིད་རྣམ་པ་གསུམ་པོ་འདི་ལྟ་སྟེ། མཚན་ཉིད་ངོ་བོ་ཉིད་མེད་པ་དང་སྐྱེ་བ་ངོ་བོ་ཉིད་མེད་པ་དང་དོན་དམ་པར་ངོ་བོ་ཉིད་མེད་པ་ཉིད་ལ་དགོངས་ནས་ཆོས་ཐམས་ཅད་ངོ་བོ་ཉིད་མེད་པའོ། །ཞེས་པའི་སྐབས་སུ་ཤེར་ཕྱིན་གྱི་མདོའི་སྐབས་སུ་མཚན་ཉིད་གསུམ་གསུངས་པ་དེ་ལ་ངོ་བོ་ཉིད་མེད་པ་གསུམ་ལ་དགོངས་ནས་གསུང་པ་དེ་མདོར་བསྟན་པ་ཡིན། དེ་ནང་བཞིན་སློབ་དཔོན་དབྱིག་གཉེན་གྱི་སུམ་ཅུ་པ་ལས། ངོ་བོ་ཉིད་ནི་རྣམ་གསུམ་གྱི། །ངོ་བོ་ཉིད་མེད་རྣམ་གསུམ་ལ། །དགོངས་ནས་ཆོས་རྣམས་ཐམས་ཅད་ནི། །ངོ་བོ་ཉིད་མེད་བསྟན་པ་ཡིན། །ཞེས་གསུངས་པ་ནང་བཞིན་ཡིན། དེས་ན་ཤེར་ཕྱིན་གྱི་མདོའི་དགོངས་དོན་ངོ་བོ་ཉིད་མེད་པ་གསུམ་ལ་དགོངས་ནས་གསུངས་པ་ཡིན། དེས་ན་ངོ་བོ་ཉིད་མེད་པ་གསུམ་གང་ཡིན་ཞེ་ན། མཚན་ཉིད་ངོ་བོ་ཉིད་མེད་པ་དང༌། སྐྱེ་བ་ངོ་བོ་ཉིད་མེད་པ་དང༌། དོན་དམ་པར་ངོ་བོ་ཉིད་མེད་པ་གསུམ་པོ་དེ་ཡིན། དེ་ཡང་མདོ་སྡེ་དགོངས་པ་ངེས་འགྲེལ་སྐབས་སུ། དེ་རྣམས་གསུངས་ཡོང་དུས་གང་འདྲ་གསུངས་ཡོད་པ་ཡིན་ཟེར་ན། དེ་ལས། ཆོས་རྣམས་ཀྱི་མཚན་ཉིད་ངོ་བོ་ཉིད་མེད་པ་གང་ཞེ་ན། ཀུན་བརྟགས་པའི་མཚན་ཉིད་པ་གང་ཡིན་པའོ། །དེ་ཅིའི་ཕྱིར་ཞེ་ན། འདི་ལྟར་དེ་ནི་མིང་དང་བརྡས་རྣམ་པར་བཞག་པ་ཡིན་གྱི་རང་གི་མཚན་ཉིད་ཀྱིས་རྣམ་པར་གནས་པ་ནི་མ་ཡིན་པས་དེ་ཕྱིར་མཚན་ཉིད་ངོ་བོ་ཉིད་མེད་པ་ཉིད་ཅེས་བྱའོ། །ཞེས་པས་མཚན་ཉིད་ངོ་བོ་ཉིད་མེད་པ་བཤད་པའི་སྐབས་སུ་དེ་ལྟར་གསུངས་པ་རེད། ངོ་བོ་ཉིད་མེད་པ་གཉིས་པ་སྐྱེ་བ་ངོ་བོ་ཉིད་མེད་པ་གསུངས་པའི་སྐབས་སུ་མདོ་སྡེ་དགོངས་པ་ངེས་འགྲེལ་ལས། ཆོས་རྣམས་ཀྱིས་སྐྱེ་བ་ངོ་བོ་ཉིད་མེད་པ་ཉིད་གང་ཞེ་ན། ཆོས་རྣམས་ཀྱི་གཞན་གྱི་དབང་གི་མཚན་ཉིད་གང་ཡིན་པའོ། །དེ་ཅིའི་ཕྱིར་ཞེ་ན། འདི་ལྟར་དེ་ནི་རྐྱེན་གཞན་གྱི་སྟོབས་ཀྱིས་འབྱུང་བ་ཡིན་གྱི་བདག་ཉིད་ཀྱིས་མ་ཡིན་པས་དེའི་ཕྱིར་དེ་ནི་སྐྱེ་བ་ངོ་བོ་ཉིད་མེད་པ་ཉིད་ཅེས་བྱའོ། །ཞེས་དེ་ལྟར་གསུངས་བ་ཡིན། དེ་ལྟར་འཕགས་པ་ཐོགས་མེད་ཀྱི་བསྡུ་བ་ལས། འདུ་བྱེད་རྣམས་ནི་རྟེན་ཅིང་འབྲེལ་བར་འབྱུང་བ་ཡིན་པའི་ཕྱིར་རྐྱེན་གྱི་སྟོབས་ཀྱིས་སྐྱེ་བ་ཡིན་གྱི་རང་གིས་མི་སྐྱེ་བ་ནི་སྐྱེ་བ་ངོ་བོ་ཉིད་མེད་པ་ཉིད་ཅེས་བྱའོ། །ཞེས་གསུངས་པ་ཡིན། དེ་ནང་བཞིན་ངོ་བོ་ཉིད་མེད་པ་གསུམ་པ་དོན་དམ་པར་སྐྱེ་བ་ངོ་བོ་ཉིད་མེད་པ་གསུངས་པའི་སྐབས་སུ་མདོ་སྡེ་དགོངས་པ་ངེས་འགྲེལ་ལས། སྔ་ཕྱི་གཉིས་གསུངས་ཡོད་པ་ལས། དང་པོ་གསུངས་པའི་སྐབས་དེར། མདོ་སྡེ་དགོངས་པ་ངེས་འགྲེལ་ལས། ཆོས་རྣམས་ཀྱིས་དོན་དམ་པར་ངོ་བོ་ཉིད་མེད་པ་གང་ཞེ་ན། རྟེན་ཅིང་འབྲེལ་བར་འབྱུང་བ་ཆོས་གང་དག་སྐྱེ་བ་ངོ་བོ་ཉིད་མེད་པ་ཉིད་ཀྱིས་ངོ་བོ་ཉིད་མེད་པ་དེ་དག་ནི་དོན་དམ་པ་ངོ་བོ་ཉིད་མེད་པ་ཉིད་ཀྱིས་ངོ་བོ་ཉིད་མེད་པ་ཡང་ཡིན་ནོ། །དེ་ཅིའི་ཕྱིར་ཞེ་ན། དོན་དམ་ཡང་དག་འཕགས། ཆོས་རྣམས་ལ་རྣམ་པ་དག་པར་དམིགས་པ་གང་ཡིན་པ་དེ་ནི་དོན་དམ་པར་ཡིན་པར་ཡོངས་སུ་བསྟན་ལ། གཞན་གྱི་དབང་གི་མཚན་ཉིད་དེ་རྣམ་པར་དག་པ་མ་ཡིན་པས་དེའི་ཕྱིར་དོན་དམ་པ་ངོ་བོ་ཉིད་མེད་པ་ཉིད་ཅེས་བྱའོ། །ཞེས་གཞན་དབང་དོན་དམ་ངོ་བོ་ཉིད་མེད་པ་འཇོག་ཚུལ་གཅིག་དང༌། ཕྱི་མ་ནི། མདོ་སྡེ་དགོངས་པ་ངེས་འགྲེལ་ལས། གཞན་ཡང་ཆོས་རྣམས་ཀྱི་ཡོངས་སུ་གྲུབ་པའི་མཚན་ཉིད་གང་ཡིན་པ་དེ་ཡང་དོན་དམ་ངོ་བོ་ཉིད་མེད་པ་ཉིད་ཅེས་བྱའོ། །དེ་ཅིའི་ཕྱིར་ཞེ་ན། དོན་དམ་ཡང་དག་འཕགས། ཆོས་རྣམས་ཀྱི་ཆོས་བདག་མེད་པ་གང་ཡིན་པ་དེ་ནི། དེ་དག་ངོ་བོ་ཉིད་མེད་པ་ཉིད་ཅེས་བྱ་སྟེ་དེ་ནི་དོན་དམ་པ་ཡིན་ལ་དོན་དམ་པ་ནི་ཆོས་ཐམས་ཅད་ཀྱི་ངོ་བོ་ཉིད་མེད་པ་ཉིད་ཀྱིས་རབ་ཏུ་ཕྱེ་བ་ཡིན་པས་དེའི་ཕྱིར་དོན་དམ་པ་ངོ་བོ་ཉིད་མེད་པ་ཉིད་ཅེས་བྱའོ། །ཞེས་དོན་དམ་པ་དེ་ཆོས་ཐམས་ཅད་ཀྱི་ཆོས་བདག་ངོ་བོ་ཉིད་མེད་པ་རབ་ཏུ་ཕྱེ་བ་གསུངས་དུས་དོན་དམ་བདེན་པ་ཁྱད་གཞིར་བཟུང་ནས་དེ་ཆོས་ཐམས་ཅད་ངོ་བོ་ཉིད་མེད་རབ་ཏུ་ཕྱེ་བ་ཡིན་པར་གསུངས་པ་ཡིན། ཆོས་རྣམས་ཀྱི་ཆོས་བདག་མེད་པ་དེ་ནི་དེ་དག་ངོ་བོ་ཉིད་མེད་པ་གསུངས་བའི་སྐབས་སུ་ངོ་བོ་ཉིད་མེད་པ་གསུམ་གསུངས་བཞག་པ་རེད། དེ་ལྟར་བཤད་པའི་སྐབས་དེར་ངོ་བོ་ཉིད་མེད་པའི་བློ་ཀུན་བཏགས་ཁྱད་གཞིར་བཟུང་ནས་དེ་མཚན་ཉིད་ངོ་བོ་ཉིད་མེད་པ་གཏན་ལ་ཕབ་པ་ཞིག་ཡིན། དེའི་སྐབས་སུ་ད་རུང་སེམས་ཙམ་པའི་ལྟ་བ་མཐར་ཐུག་ཡོང་ཐུབ་ཡོད་པ་མ་རེད། ཀུན་བཏགས་རང་གི་མཚན་ཉིད་མེད་པ་དང་རང་མཚན་གྱིས་གྲུབ་པ་མེད་པ་དེ་མདོ་སེམས་ཐུན་མོང་གི་ལྟ་བ་དང༌། དབུ་སེམས་ཀྱི་ཐུན་མོང་བའི་ལྟ་བ་དང༌། མདོ་སྡེ་བ་དང་སེམས་ཙམ་པ་དབུ་མ་བ་ཐུན་མོང་བའི་ལྟ་བ་ཆགས་ཡོད་པ་ཡིན་སྙམ། དེའི་རྗེས་སུ་གཞན་དབང་སྐྱེ་བ་ངོ་བོ་ཉིད་མེད་པ་གསུང་ཡོང་དུས། གཞན་དབང་སྟོང་གཞིར་བཞག་ནས་དེ་ཉིད་སྐྱེ་བ་ངོ་བོ་ཉིད་མེད་པ་གཏན་ལ་ཕབ་ཡོང་དུས་སེམས་ཙམ་པའི་ལྟ་བ་བཤད་གི་ཡོད་པ་རེད། ཡིན་ནའང་དེ་སྟོང་བའི་གཞི་གཙོ་བོ་རྣམ་ཤེས་བཞག་ནས་དེ་ཀུན་བཏགས་གཟུང་འཛིན་ལ་སོགས་པའི་སྤྲོས་པས་སྟོང་བའི་གཟུང་འཛིན་གཉིས་དང་བྲལ་བའི་རྣམ་ཤེས་གཏན་ལ་ཕབ་དུས་སེམས་ཙམ་པའི་ལྟ་བ་མཐར་ཐུག་གཏན་ལ་ཕབ་བཞག་པ་དེའི་རྒྱུ་མཚན་གྱིས་མདོ་སྡེ་དགོངས་པ་ངེས་འགྲེལ་སྐབས་སུ་ངོ་བོ་ཉིད་མེད་པ་གསུམ་གསུངས་བའི་ནང་ནས་ངོ་བོ་ཉིད་མེད་པ་གཉིས་པ་གཞན་དབང་སྐྱེ་བ་ངོ་བོ་ཉིད་མེད་པ་གསུངས་བའི་སྐབས་དེར་ཕལ་ཆེར་སེམས་ཙམ་པའི་ལྟ་བ་རེག་ཐུབ། དེའི་སྟེང་དུ་དབུ་མ་ཆེན་པོ་གཏན་ལ་ཕབ་ཡོངས་དུས་དེ་ནས་དོན་དམ་ཆོས་ཉིད་ཡོངས་གྲུབ་དེ་དོན་དམ་པར་ངོ་བོ་ཉིད་མེད་པར་གསུངས་བའི་སྐབས་དེར་གོང་གི་ལུང་ཟིན་ལྟར་ན་ཡོངས་གྲུབ་དོན་དམ་པ་ཡིན་པར་གསུངས་པ་དེ། དོན་དམ་པ་ཡིན་ན་དོན་དམ་པར་གྲུབ་དགོས་རང་གི་ངོ་བོ་མི་སྟོང་བ་ཡིན་པ་དང་དོན་དམ་པ་ཆོས་ཐམས་ཅད་ངོ་བོ་ཉིད་མེད་པ་ཅེས་པས་ཀུན་བཏགས་ལ་སོགས་པའི་གཟུང་འཛིན་གྱི་སྤྲོས་པ་དང་གཞན་སྤྲོས་པ་ཐམས་ཅད་ཀྱིས་སྟོང་བ་དེ་ཡིན་པའི་རྒྱུ་མཚན་གྱིས་ཆོས་ཐམས་ཅད་ངོ་བོ་ཉིད་མེད་པ་རབ་ཏུ་ཕྱེ་བ་ཡིན་པས་དེའི་ཕྱིར་དོན་དམ་པར་ངོ་བོ་ཉིད་མེད་པ་ཅེས་བྱའོ།། མདོ་སྡེ་དགོངས་པ་ངེས་འགྲེལ་སྐབས་སུ་དེ་ལྟར་གསུངས་པ་ཡིན། དེའི་རྗེས་སུ་དཔེའི་དབང་དུ་བྱས་ན་ཀུན་བཏགས་ཀྱི་དཔེ་ནི། མདོ་སྡེ་དགོངས་པ་ངེས་འགྲེལ་ལས། འདི་ལྟ་སྟེ། དཔེར་ན་ནམ་མཁའི་མེ་ཏོག་ཇི་ལྟ་བ་དེ་ལྟ་བུར་ནི་མཚན་ཉིད་ངོ་བོ་ཉིད་མེདཔ་ཉིད་བལྟ་བར་བྱའོ། །ཞེས་གསུངས་བ་དང་གཞན་དབང་གི་དཔེ་གསུངས་དུས་དེ་ལས། དེ་ལ་འདི་ལྟ་སྟེ། དཔེར་ན་སྒྱུ་མ་བྱས་པ་ཇི་ལྟ་བ་དེ་ལྟ་བུར་ནི་སྐྱེ་བ་ངོ་བོ་ཉིད་མེད་པ་ཉིད་བལྟ་བར་བྱའོ། །དོན་དམ་པ་ངོ་བོ་ཉིད་མེད་པ་ཉིད་དེ་ལས་ཀྱང་གཅིག་ཀྱང་བལྟ་བར་བྱའོ། །ཞེས་སྒྱུ་མའི་དཔེའི་སྒོ་ནས་གསུངས་བ་དེ་རེད། དེའི་རྗེས་སུ་ཡོངས་གྲུབ་གསུངས་བའི་སྐབས་སུ་དེ་ལས། འདི་ལྟ་སྟེ། དཔེར་ན་ནམ་མཁའ་ནི་གཟུགས་ཀྱི་ངོ་བོ་ཉིད་མེད་པ་ཙམ་གྱིས་རབ་ཏུ་ཕྱེ་བ་དང་ཐམས་ཅད་སོང་བ་ཇི་ལྟ་བ་དེ་ལྟ་བུ་ནི་དོན་དམ་པར་ངོ་བོ་ཉིད་མེད་པ་དེ་ལས་ཆོས་བདག་མེད་པས་རབ་ཏུ་ཕྱེ་བ་དང་ཐམས་ཅད་སོང་བ་གཅིག་བལྟ་བར་བྱ་སྟེ། ཞེས་གསུངས་བའི་རྒྱུ་མཚན་གྱིས་ཁ་ཅིག་གིས་ཡོངས་གྲུབ་ཀྱི་དཔེ་དེ་ནམ་མཁར་གསུངས་བའི་རྒྱུ་མཚན་གྱིས་ནམ་མཁའ་མེད་དགག་ཡིན་པ་ནང་བཞིན་ཡོངས་གྲུབ་མེད་དགག་ཡིན་དགོས་ཟེར་ན་དཔེ་དཔེ་ཅན་རྣམ་པ་ཀུན་ཏུ་མཚུངས་དགོས་ པ་མ་རེད། དེས་ན་ནམ་མཁའ་དེ་ཐོགས་རེག་བཀག་པའི་རབ་ཏུ་ཕྱེ་བ་དང་དོན་དམ་བདེན་པ་གཟུང་འཛིན་སྤྲོས་པ་ཐམས་ཅད་མེད་པས་རབ་ཏུ་ཕྱེ་བ་ཡིན་པས་རྒྱུ་མཚན་གྱིས་དེ་གཉིས་ཆོས་མཚུངས་སྦྱར་བ་ཡིན་པ་ལས་མེད་དགག་ཡིན་པ་ཆོས་མཚུངས་སྦྱར་བ་མིན་ཞེས་རང་ལུགས་ཀྱི་གསུངས་ཚུལ་དེ་ཡིན། དེ་ལ་ཆོས་བདག་མེད་པ་རབ་ཏུ་ཕྱེ་བ་ཐམས་ཅད་སོང་བ་ཅེས་ལྟ་བར་བྱ་སྟེ། མདོ་སྡེ་དགོངས་པ་ངེས་འགྲེལ་སྐབས་སུ་དེ་འདྲའི་སྒོ་ནས་གསུངས་བ་རེད། མདོ་སྡེ་དགོངས་བ་ངེས་འགྲེལ་སྐབས་སུ་ཀུན་བཏགས་ངོས་འཛིན་པའི་ཚེ་ངོ་བོ་ལ་ཀུན་བརྟགས་པའི་ཀུན་བརྟགས་དང་ཁྱད་པར་གྱི་ཀུན་བཏགས་པའི་ཀུན་བཏགས་དེ་རང་གི་མཚན་ཉིད་ཀྱི་ངོ་བོ་ཉིད་མེད་པར་གསུངས་ཡོད་པ་རེད། དེ་ནི་གང་འདྲ་བ་རེད་ཟེར་ན། མདོ་སྡེ་དགོངས་བ་ངེས་འགྲེལ་སྐབས་སུ་རྣམ་པར་རྟོག་པའི་སྤྱོད་ཡུལ་ཀུན་བཏགས་པའི་མཚན་ཉིད་ཀྱི་གནས་འདུ་བྱེད་ཀྱི་མཚན་མ་ཞེས་གསུངས་པ་ནི་གཞན་དབང་དེ་ཡིན། དེ་ལ་ངོ་བོ་ལ་ཀུན་བཏགས་དང་ཁྱད་པར་ལ་ཀུན་བཏགས་པའི་ཀུན་བཏགས་ཀྱིས་སྟོང་བར་བསྟན་ནས་གཞན་དབང་ཀུན་བཏགས་ཀྱིས་སྟོང་བ་ཤེས་དགོས་པ་ཡིན། དེའི་རྗེས་སུ་གཞན་དབང་གི་ཁྱད་ཆོས་གསུངས་བའི་སྐབས་སུ་མདོ་སྡེ་དགོངས་པ་ངེས་འགྲེལ་ལས། རྣམ་པར་རྟོག་པའི་སྤྱོད་ཡུལ་ཡིན་པ་དང་ཀུན་བཏགས་པའི་འདོགས་སའི་གཞི་འམ་སྒྲོ་བཏགས་པའི་གཞི་ཡིན་པའི་རྒྱུ་མཚན་གྱིས་ཀུན་བཏགས་པའི་མཚན་ཉིད་ཀྱི་གནས། འདུ་བྱེད་མཚན་མ་གང་ལགས་པ་དེ་གཞན་གྱི་དབང་གི་མཚན་ཉིད་ལགས་ཏེ། ཞེས་གཞན་དབང་ཁྱད་ཆོས་གསུམ་ལྡན་དུ་གསུངས་བ་ཡིན། དེའི་རྗེས་སུ་ཡོངས་གྲུབ་གསུངས་བའི་སྐབས་སུ་གང་འདྲ་ཞིག་གསུངས་པ་རེད་ཟེར་ན། མདོ་སྡེ་དགོངས་པ་ངེས་འགྲེལ་གྱི་སྐབས་སུ་རྣམ་པར་རྟོག་པའི་སྤྱོད་ཡུལ་ཀུན་བཏགས་པའི་མཚན་ཉིད་ཀྱི་གནས་འདུ་བྱེད་ཀྱི་མཚན་མ་དེ་ཉིད་གཞན་དབང་ཡིནཔ་རེད། དེ་ཉིད་ཀུན་བཏགས་པའི་མཚན་ཉིད་དེར་ཡོངས་སུ་མ་གྲུབ་ཞེས་པས་གཞན་དབང་སྟོང་གཞིར་བཟུང་ནས་དེ་ཉིད་ཀུན་བཏགས་པའི་མཚན་ཉིད་ཡོངས་སུ་མ་གྲུབ་པར་གསུངས་བ་ཡིན། རགས་ཙམ་ཞིག་ཡིན་ན་དེ་འདྲ་གསུངས་བ་རེད། དེར་མ་གྲུབ་པ་ཡིན་གྱི་དེ་ཀུན་བཏགས་དེ་ཉིད་རང་གི་མཚན་ཉིད་མ་གྲུབ་པ་གཏན་ལ་ཕབ་ནས་གཞན་དབང་དེ་ཁོ་ནས་ངོ་བོ་ཉིད་མ་མཆིས་པ་ཆོས་ལ་བདག་མ་མཆིས་པ་དེ་བཞིན་ཉིད་རྣམ་པར་དག་པའི་དམིགས་པ་གང་ལགས་པ་དེ་ཡོངས་སུ་གྲུབ་པའི་མཚན་ཉིད་ལགས་ཞེས་གསུངས་ཡོངས་དུས། ཀུན་བཏགས་རང་གི་མཚན་ཉིད་ཀྱི་ངོ་བོ་ཉིད་མེད་པ་གཞན་དབང་སྐྱེ་བ་ངོ་བོ་ཉིད་མེད་པ་གཏན་ལ་ཕབ་པ་ཡིན་ནའང་ཀུན་བཏགས་གཞན་དབང་གཉིས་ཀ་དེ་དོན་དམ་དཔྱོད་བྱེད་ཀྱི་རིགས་པས་རྣམ་པར་དཔྱད་ཚེ་དེ་ཁོ་ན་ཉིད་མ་མཆིས་པ་ཆོས་ལ་བདག་མ་མཆིས་པ་དེ་བཞིན་ཉིད་རྣམ་པར་དག་པའི་དམིགས་པ་གང་ལགས་པ་ཡོངས་སུ་གྲུབ་པ་ཡིན་ཞེས་གསུངས་དུས་ཡོངས་གྲུབ་དེ་རྣམ་པར་དག་པའི་དམིགས་པ་ཡིན། འཕགས་པའི་མཉམ་བཞག་ཡེ་ཤེས་ཀྱི་དམིགས་པ་མཐར་ཐུག་ཀྱང་ཡིན། དེ་ནས་ཆོས་བདག་ལ་སོགས་པ་དང་ཀུན་བཏགས་གཞན་དབང་ལ་སོགས་པས་ངོ་བོ་ཉིད་མེད་པ་ཡིན་པའི་རྒྱུ་མཚན་གྱིས་ཀུན་བཏགས་མཚན་ཉིད་པ་ཡོངས་སུ་མ་གྲུབ་ངོ་བོ་ཉིད་དེ་ཁོ་ན་ངོ་བོ་ཉིད་མ་མཆིས་པ་ཆོས་ལ་བདག་མ་མཆིས་པ་དེ་བཞིན་ཉིད་རྣམ་པར་དག་པའི་དམིགས་པ་ལགས་ཏེ། ཡོངས་སུ་གྲུབ་པ་ལགས་ཏེ་གསུངས་ཡོད་པ་དེ་ཡིན། མཁས་མཆོག་གཞན་གྱིས་དཔེར་ན་ཇོ་ནང་བས་ངེས་དོན་མཐར་ཐུག་གི་མདོར་འདོད་པའི་མདོ་སྡེ་དགོངས་པ་ངེས་འགྲེལ་དང༌། ཇོ་ནང་རང་ལུགས་གཉིས་ནང་འགལ་ཡོད་པར་འགྱུར། འགལ་བའི་རྒྱུ་མཚན་ངོ་བོ་ཉིད་དེ་ཁོ་ནས་ངོ་བོ་ཉིད་མ་མཆིས་པ་ཞེས་པས་ཡོངས་གྲུབ་དེ་དགག་བྱ་བཅད་ཙམ་མེད་དགག་ཡིན་པར་སྟོན་པ་ཡིན། དེས་དེ་སྟོན་ཡོད་པར་ཐལ། མདོ་སྡེ་དགོངས་བ་ངེས་འགྲེལ་སྐབས་སུ་ཡོངས་གྲུབ་གསུངས་བའི་སྐབས་ཀྱི་ལུང་དེའི་ཕྱིར་ཟེར་ན། ཇོ་ནང་རང་ལུགས་གཞིར་བཞག་བྱས་ན་མ་ཁྱབ་གསུང་གིན་ཡོད་པ་རེད། མ་ཁྱབ་པའི་རྒྱུ་མཚན་གང་འདྲ་་རེད་ཟེར་ན། དཔེར་ན་སྤྲོས་པ་ཐམས་ཅད་ཀྱིས་སྟོང་བའི་ཡོངས་གྲུབ་དེ་ཡང་སྤྲོས་པ་ཐམས་ཅད་ཀྱིས་སྟོང་ཙམ་ཡིན་གསུངས་བ་མ་ཡིན། དགག་བྱ་སྤྲོས་པ་ཁོ་ནར་གསུངས་དུས་སྤྲོས་པ་ཁོ་ནས་སྟོང་གི་ཡོངས་གྲུབ་ཡོངས་གྲུབ་ཀྱིས་སྟོང་རྒྱུ་མ་ཡིན། དོན་དམ་གནས་ལུགས་ལ་གྲུབ་པའི་རྒྱུ་མཚན་གྱིས་ངོ་བོ་ཉིད་ཁོ་ནས་གསུངས་པ་དེའི་གོང་ནས་ཀུན་བཏགས་གཞན་དབང་གསུངས་བའི་དེ་ཁོ་ནས་སྟོང་གི་རེད་མ་གཏོགས། དོན་དམ་པའི་ཡོན་ཏན་གྱིས་མི་སྟོང་བའི་རྒྱུ་མཚན་གྱིས་ངོ་བོ་ཉིད་ཁོ་ནའི་རྣམ་བཅད་སྦྱར་བ་དེ་འདྲའི་སྟེང་ནས་གསུངས་བ་ཡིན། དཔེར་ན་བུམ་པ་ཁོ་ནས་སྟོང་བའི་གཞི་ཟེར་དུས་བུམ་པ་ལས་གཞན་མི་སྟོང་བ་བསྟན་པ་བཞིན་འདིར་ཀུན་བཏགས་གཞན་དབང་རང་གི་ངོ་བོ་སྟོང་བ་ལས་རང་གི་ངོ་བོ་མི་སྟོང་བའི་བསྟན་པ་གནད་ཀྱང་ཡིན། དེའི་རྒྱུ་མཚན་གྱིས་མདོ་སྡེ་དགོངས་པ་ངེས་འགྲེལ་སྐབས་སུ་གཞན་ཡང་ཆོས་རྣམས་ཀྱི་ཡོངས་སུ་གྲུབ་པའི་མཚན་ཉིད་གང་ཡིན་པ་དེ་ཡང་དོན་དམ་ངོ་བོ་ཉིད་མེད་པ་ཉིད་ཅེས་བྱའོ། །དེ་ཅིའི་ཕྱིར་ཞེ་ན། དོན་དམ་ཡང་དག་འཕགས། ཆོས་རྣམས་ཀྱི་ཆོས་བདག་མེད་པ་གང་ཡིན་པ་དེ་ནི། དེ་དག་ངོ་བོ་ཉིད་མེད་པ་ཉིད་ཅེས་བྱ་སྟེ་དེ་ནི་དོན་དམ་པ་ཡིན་ལ་དོན་དམ་པ་ནི་ཆོས་ཐམས་ཅད་ཀྱི་ངོ་བོ་ཉིད་མེད་པ་ཉིད་ཀྱིས་རབ་ཏུ་ཕྱེ་བ་ཡིན་པས་དེའི་ཕྱིར་དོན་དམ་པ་ངོ་བོ་ཉིད་མེད་པ་ཉིད་ཅེས་བྱའོ། །ཞེས་གསུངས་བ་དེ་རང་ལུགས་ལ་དེ་ལྟར་བཀྲལ་བ་ཡིན། དེ་ནས་མདོ་སྡེ་དགོངས་པ་ངེས་འགྲེལ་དེའི་མཇུག་ནས་གྲུབ་དོན་གསུངས་བའི་སྐབས་སུ་བཅོམ་ལྡན་འདས་ཞེས་པ་ནས་རྩོད་པའི་གཞི་གནས་སུ་གྱུར་བ་མ་ལགས་སོ། །དེའི་རྒྱུ་མཚན་གྱིས་བྱང་ས་དང་བསྡུ་བ་རྣམས་ཀྱི་སྐབས་སུ་མང་བོ་ཞིག་ལ་དང་བོ་གཞན་དབང་དེ་ཉིད་སྟོང་གཞིར་བཟུང་ནས་དེ་ཉིད་ཀུན་བཏགས་ཀྱིས་སྟོང་བ་གཏན་ལ་ཕབ་པའི་སྐབས་སུ་གཞན་དབང་རང་གི་མཚན་ཉིད་ཀྱིས་གྲུབ་པ་ཡིན་པའི་རྒྱུ་མཚན་གྱིས་གཞན་དབང་རང་གི་མཚན་ཉིད་ཀྱིས་གྲུབ་པ་ལྟ་བུར་གསུངས་ཡོད་ལ། དེ་ལྟར་གསུངས་ན་ཡང་གཞན་དབང་ཁོ་རང་གནས་ལུགས་སུ་གྲུབ་མ་གྲུབ་དེ་དོན་དམ་དཔྱོད་བྱེད་རིགས་ཤེས་ཚད་མས་དཔྱད་ཡོང་དུས། གཞན་དབང་ཁོ་རང་གི་ངོ་བོ་ཡང་རང་གི་མཚན་ཉིད་ཀྱིས་གྲུབ་ཀྱང་དོན་དམ་གཤིས་ལུགས་སམ་ཡིན་ལུགས་སུ་མ་གྲུབ་པའི་རྒྱུ་མཚན་གྱིས་གཞན་དབང་ཡང་དོན་དམ་གནས་ལུགས་སྟོང་གཞིར་བཟུང་ནས་དེ་ལ་གཞན་དབང་ཀུན་བཏགས་ལ་སོགས་པའི་སྤྲོས་པ་མཐའ་དག་ཀུན་རྫོབ་ཀྱི་སྤྲོས་པ་གཟུང་འཛིན་གཉིས་སྣང་གི་སྤྲོས་པ་བདེན་འཛིན་གྱི་སྤྲོས་པ་ལ་སོགས་པ་སྤྲོས་པ་མཐའ་དག་གིས་སྟོང་བའི་རྒྱུ་མཚན་གྱིས་ཡོངས་གྲུབ་ཆོས་ཀྱི་དབྱིངས་དེ་སྤྲོས་བྲལ་ཡིན་པ་དེ་གཞན་སྟོང་བའི་ཐུན་མོང་མ་ཡིན་པའི་ཁྱད་ཆོས་སམ་སེམས་ཙམ་པ་ལས་ཁྱད་པར་དུ་འཕགས་པ་ཞིག་ཡིན། དེས་ན་རང་ལུགས་ལ་པྲ་ཀ་ར་རྞ་སྡེ་བརྒྱད་སོགས་ཀྱི་སྐབས་སུ་དེ་ལ་གྲུབ་ནི་སྔ་མའོ། །ཞེས་སོགས་གསུང་སྐབས་སུ་གཞན་དབང་སྟོང་གཞིར་བཟུང་ནས་དེ་ནི་ཀུན་བཏགས་ཀྱིས་སྟོང་བར་གཏན་ལ་ཕབ་པའི་སྐབས་སུ་དབུ་སེམས་ཐུན་མོང་གི་ལུགས་སུ་བསྟན་པ་ཡིན། དེའི་རྗེས་སུ་གཞན་དབང་ཁོ་རང་ཡང་དོན་དམ་དཔྱོད་བྱེད་ཀྱི་རིགས་པས་དཔྱད་ན་གཤིས་ལུགས་སམ་ཡིན་ལུགས་སུ་མ་གྲུབ་ཕྱིར་གཤིས་ལུགས་ཡིན་ལུགས་སུ་ཀུན་བཏགས་གཞན་དབང་གཉིས་ཀ་སྟོང་བར་གཏན་ལ་ཕབ་ཡོང་དུས། དེའི་སྐབས་སུ་དབུ་མ་བའི་ཐུན་མོང་མ་ཡིན་པའི་ལུགས་སུ་བསྟན་པ་ཡིན། དེས་ན་རང་ལུགས་ལ་འཁོར་ལོ་ཐ་མའི་དགོངས་དོན་ལ་གནས་སྐབས་ཀྱི་དགོངས་དོན་རྣམ་གྲངས་བའི་དོན་དམ་བསྟན་དུས་སེམས་ཙམ་པའི་གྲུབ་མཐའ་ཡོང་ཡོད་ནི་རེད། མཐར་ཐུག་གི་ལྟ་བ་དེ་གཞན་སྟོང་དབུ་མའི་ལྟ་བ་དེ་བསྟན་པ་དེ་ཡིན། དེའི་རྒྱུ་མཚན་གྱིས་གཞན་སྟོང་དབུ་མ་ཆེན་མོའི་ལུགས་དང་སེམས་ཙམ་པའི་ལུགས་གཉིས་ཀ་ལ་སེམས་ཙམ་མདོ་བཞི་ལྟ་བུ་དེ་གཉིས་ཀས ་ཐུན་མོང་དུ་ཁས་ལེན་པ་ཡིན། དེ་བཞིན་དུ་བསྟན་བཅོས་ས་སྡེ་ལྔ་ཡང་སེམས་ཙམ་པའི་རང་གཞུང་ཡིན་པར་ཐལ་ཟེར་ན། ཅིའི་ཕྱིར་ཟེར་དགོས། དེར་ཐལ། སེམས་ཙམ་པའི་འདོད་པ་བསྟན་པའི་ཕྱིར་ཟེར་ན། མ་ཁྱབ་སྟེ། དཔེར་ན་ཤེར་ཕྱིན་གྱི་མདོའི་སྐབས་སུ་ཉན་ཐོས་ཀྱི་གྲུབ་མཐའ་སོགས་མང་བོ་གསུངས་ཡོད་པ་དང། དེ་བཞིན་ཉན་ཐོས་ཀྱི་རྟོགས་རིགས་སོགས་མང་བོ་གསུངས་ཡོད་ན་ཡང་དེ་ཉན་ཐོས་སྡེ་སྣོད་མ་ཡིན་པ་ནང་བཞིན་རེད། རང་ལུགས་ལ་ཐམས་ཅད་མཁྱེན་པ་ཏཱའ་ར་ནཱ་ཐསབཞེད་མཚམས་གསལ་བར་གསུངས་ཡོད་དོ། །དྲི་བ་བཅོ་ལྔ་པ་ཐོགས་མེད་སྐུ་མཆེད་སེམས་ཙམ་པའི་སློབ་དཔོན་ཡིན་མིན་གང་ཞེས་པའོ། །ལན་ནི། ཐོགས་མེད་སྐུ་མཆེད་དེ་གཞན་སྟོང་དབུ་མ་ཆེན་་པོ་ཤིང་རྟའི་སྲོལ་འབྱེད་དང་གཞན་སྟོང་དབུ་མ་ཆེན་མོའི་སློབ་དཔོན་ཡིན་ལ། དེ་ལྟར་ན་སེམས་ཙམ་པའི་ཤིང་རྟའི་སྲོལ་འབྱེད་མེད་པར་ཐལ། ཞེས་ཐལ་བ་བཏང་བ་ཡིན་ན་དེ་མེད་པར་ཐལ་བའི་སྐྱོན་ཡོད་པ་མ་རེད་ཅེས་འདོད་པ་རེད། དེ་གང་འདྲ་ཟེར་ན་ཐམས་ཅད་མཁྱེན་པ་ཏཱ་ར་ནཱ་ཐའི་རྒྱ་གར་ཆོས་འབྱུང་ཡིན་ན་འདྲ༌། གཞན་སྟོང་སྙིང་བོ་དང༌། གཞན་སྟོང་དབུ་མའི་རྒྱན་ལ་སོགས་པའི་སྐབས་དེར་སེམས་ཙམ་པའི་སློབ་དཔོན་ནི་ཀླུ་སྒྲུབ་མ་བྱུང་བའི་སྔ་རོལ་ཏུ་ཡོད་པ་དང༌། དེ་བྱུང་པའི་རྒྱུ་མཚན་ཡང་དབུ་མ་རྩ་བ་ཤེས་རབ་ལ་སོགས་པའི་སྐབས་སུ་གཙོ་བོ་སེམས་ཙམ་པའི་ལྟ་བ་དེ་དགག་ཡོད་པ་རེད། དེ་ཡིན་ན་སེམས་ཙམ་པའི་གྲུབ་མཐའ་དེ་སློབ་དཔོན་ཀླུ་སྒྲུབ་ཀྱི་སྔ་རོལ་ནས་བྱུང་དགོས་པ་ཞིག་རེད། ཐོགས་མེད་སྐུ་མཆེད་གཉིས་ནི་སློབ་དཔོན་ཀླུ་སྒྲུབ་ཀྱི་རྗེས་སུ་བྱུང་བ་ཞིག་ཡིན། དེ་ཡང་དཔལ་མགོན་འཕགས་པ་ཀླུ་སྒྲུབ་ནི་སངས་རྒྱས་མྱ་ངན་ལས་འདས་ནས་ལོ་བཞི་བརྒྱའི་མཚམས་སུ་བྱུང་བ་དང༌། འཕགས་པ་ཐོགས་མེད་སངས་རྒྱས་མྱ་ངན་ལས་འདས་ནས་ལོ་དགུ་བརྒྱའི་མཚམས་སུ་བྱུང་བ་ཡིན། དེ་ཡང་རྒྱུད་ལས། ང་ནི་མྱ་ངན་འདས་འོག་ཏུ། །ལོ་ནི་དགུ་བརྒྱ་ལོན་པ་ནས། །ཞེས་གསུངས་བ་ནང་བཞིན་རེད། དེས་ན་སེམས་ཙམ་པའི་སློབ་དཔོན་གང་ཡིན་ཟེར་ན། སློབ་དཔོན་ཨ་བྷི་སྟརྐལ་སོགས་པ་སེམས་ཙམ་པའི་སློབ་དཔོན་ལྔ་བརྒྱ་ལ་སོགས་པ་བྱུང་བ་དེ་དག་ཡིན། ཡིན་ནའང་དེ་དག་གིས་གསུངས་བའི་གཞུང་བོད་དུ་མ་འགྱུར་བ་ཡིན། དཔེར་ན། ཉན་ཐོས་སྡེ་བ་བཅོ་བརྒྱད་ལས་ སྡེ་བ་གཅིག་གཉིས་ཀྱི་སྡེ་སྣོད་མ་གཏོགས་བོད་དུ་མ་འགྱུར་བ་ནང་བཞིན་ཡིན་པར་དཔེ་དང་བཅས་པར་གསུངས་ཡོད་པ་རེད། དེ་ནང་བཞིན་སྔ་འགྱུར་རྙིང་བ་བའི་མཁས་དབང་ཆེན་པོ་ཀཿ ཐོག་དགེ་རྩའི་མ་ཧ་པནྚི་ཏ་ཁོང་གི་གསུང་འབུམ་ཡིན་ན་པོད་བཅུ་གསུམ་བཅུ་བཞི་ཡོད་ཧ་ཅང་མཁས་གྲུབ་བསམ་གྱིས་མི་ཁྱབ་པ་ཞིག་རེད། ཁོང་གིས་ཀྱང་དེ་ནང་བཞིན་ཐོགས་མེད་སྐུ་མཆེད་གཉིས་སེམས་ཙམ་པའི་སློབ་དཔོན་མ་ཡིན་པར་སེམས་ཙམ་པའི་སློབ་དཔོན་ལ་སྔོན་གྱི་ཨ་བྷི་རྟརྐ་ལ་སོགས་པའི་རྣལ་འབྱོར་སྤྱོད་པའི་སློབ་དཔོན་ལྔ་བརྒྱ་ལ་སོགས་པ་བྱུང་བར་གསུངས་ཡོད། དེ་ནང་བཞིན་རང་གིས་ཀྱང་འཐད་ཕྱོགས་སུ་བཟུང་ཡོད། དེ་གང་གི་ཕྱིར་ཟེར་ན་དེང་སང་རྒྱ་གར་འཕགས་པའི་ཡུལ་ལ་མཚོན་ན་ཏཱ་ར་ནཱ་ཐའི་རྒྱ་གར་གྱི་ཆོས་འབྱུང་ནི་དཔྱོད་ལྡན་པ་དང༌། ཞིབ་འཇུག་པ་ཤེས་ཡོན་པ་དང་ལོ་རྒྱུས་སྨྲ་བ་མང་བོ་ཞིག་གིས་རྒྱ་གར་རང་གི་དུས་རབས་དེའི་སྐབས་ཀྱི་ལོ་རྒྱུས་བརྩམས་བཞག་པའི་ལོ་རྒྱུས་ཐམས་ཅད་ལས་ཏཱ་ར་ནཱ་ཐས ་བརྩམས་པའི་ལོ་རྒྱུས་ནི་དངོས་པོ་གནས་བབས་དང་དོན་དངོས་གནས་དང་མཐུན་པ་ཡིན་པས་རྩ་ཆེན་མཐོང་ཆེན་ཞིག་ཏུ་བརྩིས་ཡོད་པ་རེད། དེའི་རྒྱུ་མཚན་གྱིས་དེ་དག་ལས་ལོ་རྒྱུས་བྱུང་བ་དེ་བདེན་དཔང་བྱེད་ཐུབ་པ་ཨེ་ཡིན་ན་བསམ་གྱིན་ཡོད། དེའི་ཕྱོགས་ནས་ཅུང་ཙམ་ཚིག་ཚོགས་མང་སོང་སྟེ་ཡིན་ནའང་དེ་དག་གྲུབ་མཐའི་ནད་འགག་ཆེ་ཤོས་དང་མཁས་དབང་རྣམས་ཀྱིས་གྲུབ་མཐའ་སྦྱར་ཚུལ་གནད་འགག་མི་འདྲ་བ་ཡིན་པ་དེའི་དབང་གིས་རི་བོ་དགེ་ལྡན་པ་ལྟ་བུའི་དབང་དུ་བྱས་པ་ཡིན་ན་ས་སྡེ་ལྔ་སེམས་ཙམ་པའི་རང་གཞུང་དུ་སྦྱར་ཡོང་དུས་དོན་དམ་སྔ་ཕྱི་གཉིས་མ་ཕྱེས་བར་ཐད་ཀར་དེ་སྦྱར་བཞག་ན་དེ་དག་གི་དགོངས་པ་འགལ་མེད་དུ་སྒྲུབ་ཐུབ་མེད་པར་འདྲ། དེ་འདྲའི་མང་བོ་ཆགས་སོང་བ་དེ་གྲུབ་མཐའ་རང་རང་གིས་བཀྲལ་ཚུལ་དབང་གིས་བྱུང་ཡོད་པ་རེད་བསམ་གྱིན་ཡོད། དེ་ཡང་གཞན་སྟོང་དབུ་མའི་རྒྱན་གྱི་ལུང་སྦྱོར་ལས། འོ་ན་སེམས་ཙམ་གྱི་མདོ་དང་བསྟན་བཅོས་ལོགས་སུ་མེད་པར་འགྱུར་སྙམ་ན། མདོ་སྡེ་ནི་ལོགས་སུ་ཡོད་པ་མ་ཡིན་ཏེ། དཔེར་ན་བྱེ་མདོ་གཉིས་ལ་ཡང་མདོ་སྡེ་ཐ་དད་མེད་པ་བཞིན་ནོ། །སེམས་ཙམ་པའི་བསྟན་བཅོས་ཐོར་བུ་འགའ་ཞིག་ནི་ཡོད་པར་གསལ་ན་ཡང༌། བྱམས་ཆོས་དང་ཐོགས་མེད་སྐུ་མཆེད་ཀྱི་གཞུང་གི་རྗེས་སུ་འབྲང་བ་མ་ཡིན་ཏེ། བྱང་ཆུབ་སེམས་འགྲེལ་སོགས་ཐོགས་མེད་སྐུ་མཆེད་ཀྱི་སྔོན་དུ་བྱུང་བའི་བསྟན་བཅོས་ནས་བཀག་པ་སོགས་ཀྱིས་འཕགས་པ་ནཱ་གཱ་རྫུ་ནའི་སྔ་རོལ་དུ་བྱུང་བའི་ཕྱིར་རོ། །དེས་ན་བཙུན་པ་ཆེན་པོ་ཨ་བི་ཏརྐ་དང་ཛྙཱ་ན་ཏ་ལ་སོགས་པ་རྣལ་འབྱོར་སྤྱོད་པའི་སློབ་དཔོན་ལྔ་བརྒྱ་བྱུང་བར་གྲགས་ལྟར་ཡིན་པར་མངོན་ནོ། །དེ་དག་གི་བསྟན་བཅོས་ནི་བོད་དུ་མ་འགྱུར་བ་ཡིན་ཏེ། སྡེ་བ་བཅོ་བརྒྱད་ཀྱི་བསྟན་བཅོས་རྣམས་བཞིན་ནོ། །ཞེས་དང༌། རྗེ་བཙུན་གྱི་རྒྱ་གར་ཆོས་འབྱུང་ལས། དཔལ་ས་ར་ཧའམ་བྲམ་ཟེ་ཆེན་པོ་སྒྲ་གཅན་འཛིན་བྲམ་ཟེའི་སྤྱོད་པ་ལ་གནས་པའི་དུས་སུ་ནི། རྣལ་འབྱོར་སྤྱོད་པའི་སློབ་དཔོན་ལྔ་བརྒྱ་པོ་དེ་རྣམས་བྱུང་བ་ཡིན་ལ། ཞེས་སོ། །དེ་ནས་དྲི་བ་གཞན་པ་རྣམས་མདོར་མཚོན་པ་ཞིག་གོང་གི་དྲི་བ་ནང་ནས་ཞུས་པ་ཡིན། དྲི་བ་བཅུ་དྲུག་པ་དོན་དམ་བདེན་པ་ཚད་མ་དང་རྟག་པ་འདོད་པ་དང་ཚད་མ་རྣམ་འགྲེལ་སྐབས་སུ་ཚད་མ་རྟག་པ་རུང་མ་ཡིན་ཞེས་པའི་དོན་ཅི་ལྟར་ཡིན་ཞེས་པའོ། །ལན་ནི། ཀུན་མཁྱེན་ཇོ་ནང་བའི་རང་ལུགས་ལ་དབྱིངས་རིག་དབྱེར་མེད་ཀྱི་ཡེ་ཤེས་རྟག་པ་ཁས་ལེན་པ་ཡིན་ན་དཔེར་ན་ཚད་མ་རྣམ་འགྲེལ་སྐབས་སུ་ཚད་མ་རྟག་པ་རུང་མ་ཡིན། །ཞེས་པ་དང་མི་འགལ་པ་ནི་ཀུན་མཁྱེན་དོལ་པོ་པ་ཤེས་རབ་རྒྱལ་མཚན་དཔལ་བཟང་བོའི་རི་ཆོས་ངེས་དོན་རྒྱ་མཚོའི་སྐབས་སུ་ཚད་མ་རྣམ་འགྲེལ་ལས་ཚད་མ་རྟག་པ་རུང་མ་ཡིན། །ཞེས་པའི་སྐབས་སུ་ཀུན་རྫོབ་པའི་ཚད་མ་ལ་རྟག་པ་རུང་མ་ཡིན་ཞེས་པའི་དོན་ཡིན་པར་མ་གཏོགས་དོན་དམ་པའི་ཚད་མ་རྟག་པ་མེད་པར་བཤད་པ་མ་ཡིན། གསང་འདུས་ཀྱི་རྒྱུད་སོགས་ཀྱི་སྐབས་སུ་སོ་སོར་རང་རིག་རྟགས་བཅུ་བོ་དེ་རྣལ་འབྱོར་པའི་དེས་རྟོག་པ་དང༌། སྒྲ་ཡི་སྤྱོད་ཡུལ་མིན། དེ་ལྟ་བུ་སྒོ་ནས་རྟག་པ་བརྟན་པ་ཐེར་ཟུག་ཡིན་པ་མང་བོ་གསུངས་ཡོད། དེ་ལྟར་འགྲེལ་ཆེན་དྲི་མེད་འོད་ལས། དེ་ནི་སྐད་ཅིག་གཅིག་དང་དུ་མ་དང་བྲལ་བའི་ཡེ་ཤེས་ནི་ཞེས་གསུངས་པའི་སྐད་ཅིག་གཅིག་དང་དུ་མ་དང་བྲལ་ན་རྟག་པ་ཞིག་ཡིན་དགོས་དེ་འདྲའི་སྒོ་ནས་མང་བོ་ཅིག་གོང་ནས་གང་ལ་གང་འཚམས་ཞུས་ཟིན་པ་དེ་ཡིན། གཞན་སྟོང་བའི་ལུགས་ལ་ཆོས་ཉིད་དེ་བཞིན་གཤེགས་པའི་སྙིང་བོ་དེ་མཚན་དཔེ་གསལ་རྫོགས་ཀྱི་རྣམ་པ་ཅན་ཡིན་པར་ཁས་ལེན་གྱིན་ཡོད་པ་རེད། དཔེར་ན་བཀའ་བརྒྱུད་པའི་ཀརྨ་ཀམ་ཚང་སྐུ་ཕྲེང་བརྒྱད་པ་མི་བསྐྱོད་རྡོ་རྗེའི་རྗེ་བཙུན་ངལ་གསོའི་སྐབས་དེར་ཡེ་ན་བཞུགས་པའི་ཡེ་ཤེས་ཆོས་ཀྱི་དབྱིངས་ཡེ་ཤེས་ཡིན་པ་བདེན་གྲུབ་ཡིན་པར་གསུངས་ཡོད། ཡིན་ནའང་མཚན་དཔེ་གསལ་རྫོགས་ཀྱིས་བརྒྱན་པ་མ་ཡིན་པ་ལྟ་བུ་གསུངས་ཡོད་པ་རེད། འོན་ཀྱང་རང་ལུགས་ལ་ཀུན་རྫོབ་ཀྱི་མཚན་དཔེས་བརྒྱན་པ་མ་ཡིན་ཀྱང་དོན་དམ་པའི་མཚན་བཟང་གིས་བརྒྱན་པར་གསུངས་པ་རེད། དེ་ནས་དོན་དམ་པའི་མཚན་བཟང་དེས་བརྒྱན་ལུགས་བརྒྱན་སྟངས་ནི་དོན་དམ་པའི་ཡེ་ཤེས་དེ་ཉིད་དོན་དམ་པའི་ཡེ་ཤེས་ལ་རྣམ་ཀུན་མཆོག་ལྡན་གྱི་དོན་དམ་པའི་མཚན་བཟང་བོ་སུམ་ཅུ་རྩ་གཉིས་དཔེ་བྱད་བཟང་བོ་བརྒྱད་ཅུས་རྣམ་པར་བརྒྱན་པའི་འཕགས་པའི་མཉམ་བཞག་ཡེ་ཤེས་ཀྱིས་ངོ་བོ་སྐུ་དང་ཞིང་ཁམས་རྣམ་པར་སྣང་ཡོང་དུས། དེ་སྣང་བ་ལྟར་གྲུབ་པ་ཡིན། དེས་ན་དོན་དམ་པའི་མཚན་བཟང་བརྒྱན་ལུགས་བརྒྱན་སྟངས་དེ་འདྲ་བ་ཞིག་ཡིན། དེའི་སྟེང་དུ་སྔགས་ཀྱི་རྣམ་ཀུན་མཆོག་ལྡན་ཡིན་ཚུལ་སོགས་བཤད་པ་རྒྱ་ཆེན་འདུག ཡིན་ན་ཡང་དེ་རིང་དེ་ཙམ་ཞིག་ཞུ་རྒྱུ་དེ་ཡིན། དྲི་བ་བཅུ་བདུན་པ་རང་སྟོང་བ་དང་གཞན་སྟོང་བ་གཉིས་ཀྱི་ལུགས་ལ་ལམ་མངོན་དུ་གྱུར་ཚུལ་འདྲ་མིན་ཞེས་པའོ། །ལན་ནི། རང་སྟོང་བ་དང་གཞན་སྟོང་བ་གཉིས་ཀྱི་ལུགས་ལ་ལམ་མངོན་དུ་གྱུར་ཚུལ་འདྲ་དང་མི་འདྲ་ཟེར་ན། རང་སྟོང་བའི་ལུགས་འདོད་ཚུལ་མང་བོ་འདུག་དཔེར་ན་རི་བོ་དགེ་ལྡན་པ་ལྟ་བུར་མཚོན་ན་གཞི་ཆོས་ཉིད་དེ་ཆོས་ཐམས་ཅད་རང་བཞིན་གྱིས་སྟོང་བ་དེ་བཞག་ནས་དེ་རྟོགས་པའི་ཡེ་ཤེས་དེ་འདུས་བྱས་ལམ་བཞག་དེ་རིམ་གྱིས་མངོན་དུ་གྱུར་མཐོང་ལམ་ཐོབ་པ་དེའི་ཚེ་ཆོས་ཉིད་མངོན་སུམ་དུ་རྟོགས་པ་མཐོང་ལམ་ཐོབ་པ་དཔེར་ན་ཐེག་པ་ཆེན་པོའི་དབང་དུ་བྱས་ན་ཐེག་ཆེན་སེམས་བསྐྱེད་རྒྱུད་ལ་སྐྱེས་པ་ནས་ཐེག་ཆེན་ཚོགས་ལམ་ཐོབ་པ་ཡིན། ལམ་དེ་ཐེག་ཆེན་སེམས་བསྐྱེད་ཀྱིས་རྩིས་ཟིན་པའི་སྟེང་དུ་ཆོས་ཉིད་ལ་བསྒོམས་བྱུང་གི་མྱོང་བ་ཐོན་པ་དེའི་ཚེ་ཐེག་ཆེན་སྦྱོར་ལམ་དུ་འཕོས་པ་ཡིན། དེ་དང་བསྐལ་ཆེན་གྲངས་མེད་གཅིག་གི་ཚོགས་ཀྱིས་བརྒྱན་པའི་སྟེང་ནས་ཐེག་ཆེན་སེམས་བསྐྱེད་ཀྱིས་རྩིས་ཟིན་པའི་སྟོང་བ་ཉིད་མངོན་སུམ་དུ་རྟོགས་པ་ན་མཐོང་ལམ་ཐོབ་པ་དེ་དང༌། དེ་ནས་མཐོང་སྤང་མ་ལུས་པ་སྤངས་ནས་སྒོམ་སྤང་ཅི་རིགས་ཀྱི་དངོས་གཉེན་ཐོག་མར་ཐོབ་པ་ནས་བསྒོམ་ལམ་དུ་འཕོས་པ་དེ་དང༌། དེ་ནས་སྒྲིབ་པ་མ་ལུས་པ་སྤངས་བ་དེའི་ཚེ་སངས་རྒྱས་པར་འདོད་པ་རེད། ཡིན་ནའང་ས་སྐྱ་བའི་མཁས་པ་མང་བོ་ཞིག་དང་བཀའ་བརྒྱུད་པའི་ཕྱོགས་ཀྱི་མཁས་པ་ཁ་ཤས་ཀྱིས་དེ་ལས་གཞན་དུ་འདོད་ཀྱིན་ཡོད། གང་འདྲ་འདོད་པ་རེད་ཟེར་ན་མཉམ་བཞག་སྐབས་སུ་ཆོས་ཉིད་དེ་མངོན་སུམ་དུ་རྟོགས་པ་དེའི་ཚེ་མཉམ་བཞག་བློ་ཁོ་རང་ཆོས་ཉིད་ལ་ཐིམ་སོང་བ་ཡིན། ཐིམ་པ་དེ་ལ་ཆོས་ཉིད་མངོན་སུམ་དུ་རྟོགས་པའི་ཐ་སྙད་དམ་བརྡ་ཆད་མཛད་བཞག་པ་ཡིན། དེ་ནས་ཆོས་ཉིད་ཁོ་རང་སྟེང་ནས་མཐོང་ལམ་སྒོམ་ལམ་ཟེར་བ་དེ་གཞི་ཆོས་ཉིད་ཀྱི་སྟེང་དུ་རིམ་བཞིན་བཞག་འགྲོ་བ་ཡིན། དེའི་ཕྱིར་མཐོང་ལམ་དང་བསྒོམ་ལམ་རྟག་པར་འདོད་ཀྱིན་ཡོད། དེས་ན་མཁས་པ་སོ་སོར་འདོད་ཚུལ་དེ་འདྲའི་མི་འདྲ་བ་བྱུང་གི་འདུག གོ་རམས་པའི་ལྟ་བ་ཤན་འབྱེད་ཀྱི་སྐབས་སུ་བློ་གཉིས་སྤྲོས་བྲལ་ངང་དུ་ཐིམ་པ་ལ་ལྟ་བ་ཆོས་དབྱིངས་མཐོང་བའི་ཐ་སྙད་མཛད་ཟེར་བ་དེ་དང་འདྲ་བ་མཁས་པ་གཞན་གྱིས་ཀྱང་གསུངས་ཡོད་པ་རེད། གཞན་སྟོང་དབུ་མ་ཆེན་པོའི་རང་ལུགས་ལ་གང་འདྲ་བ་རེད་ཟེར་ན་ཚོགས་ལམ་སྦྱོར་ལམ་མཐོང་ལམ་སྒོམ་ལམ་མི་སློབ་ལམ་ཐམས་ཅད་ལམ་བདེན་ཡིན་ལ། ལམ་བདེན་ལ་འདུས་བྱས་དགོས་པ་ཡིན། དེ་དགོས་པ་ཡང་ཆོས་རྗེ་ཀུན་མཁྱེན་རིན་པོ་ཆེའི་ཚོགས་ཆོས་བདེན་བཞི་རྣམ་བཤད་སྐབས་སུ་ལྷ་མོ་དཔལ་ཕྲེང་གི་མདོ་དྲངས་བར་བདེན་པ་ནི་བཞི་སྟེ་གསུམ་ནི་མི་རྟག་པའོ། །གཅིག་ནི་རྟག་པའོ། །ཞེས་ལུང་དྲངས་ནས་གསུངས་ཡོད། བདེན་པ་བཞིའི་ནང་ནས་ཀུན་འབྱུང་བདེན་པ་དེ་དང་སྡུག་བདེན་དང་ལམ་བདེན་གསུམ་འདུས་བྱས་ཡིན་པ་བདེན་པ་གཅིག་འགོག་བདེན་ནི་རྟག་པ་ཡིན་པ་དེ་འདྲ་བ་གསུངས་ཡོད་པ་རེད། ཇོ་ནང་རང་ལུགས་ལ་མཁས་མཆོག་ཉ་དབོན་པའི་ཉ་ཊཱིཀ་སྐབས་སུ་ལམ་བདེན་གྱི་མཚན་ཉིད། ཟག་མེད་འདུས་བྱས་གང་ཞིག འགོག་བདེན་གྱི་བྲལ་རྒྱུ་ཞེས་གསུངས་ཡོད། དེ་བཞིན་དུ་ཐམས་ཅད་མཁྱེན་པ་ཏཱ་ར་ནཱ་ཐའི་སྔོན་མེད་ལེགས་བཤད་སྐབས་སུ་ལམ་བདེན་དངོས་ནི་མཐོང་སྒོམ་མི་སློབ་ལམ་ཀུན་རྫོབ་གསར་བྱུང་གི་རྒྱུ་དང་རྐྱེན་ལས་སྐྱེ་བ་ཡིན་པར་གསལ་བར་གསུངས་ཡོད། དེ་ཡིན་ན་ཡུལ་ཆོས་ཉིད་མངོན་སུམ་དུ་མཐོང་བ་དེའི་ཚེ་ཐེག་ཆེན་མཐོང་ལམ་ཐོབ་པ་ལ་སོགས་ཐོབ་པ་ནས་རིམ་གྱིས་རིམ་གྱིས་ཇི་ལྟར་ཚེས་པའི་ཟླ་བ་དེ་རིམ་གྱིས་འཕེལ་བ་ནང་བཞིན་ཆོས་ཉིད་དེ་ལ་ཡང་ནས་ཡང་དུ་སྒོམ་པར་བྱས་ནས་གོམས་པ་དེ་མཐར་ཕྱིན་པ་ན་ཆོས་ཉིད་རྫོགས་པར་མངོན་སུམ་དུ་རྟོགས་ནས་རྣམ་པ་ཐམས་ཅད་མཁྱེན་པ་ཡེ་ཤེས་ཀྱི་ངོར་འགྲོ་བ་ཞིག་གཞན་སྟོང་དབུ་མ་ཆེན་པོའི་རང་ལུགས་སུ་བཞེད་དོ། །དྲི་བ་བཅོ་བརྒྱད་པ་གཞན་སྟོང་དབུ་མ་ཆེན་པོ་དེ་ལ་ཡུལ་གང་སྣང་མི་སྣང་ཞེས་པའོ། །ལན་ནི། གཞན་སྟོང་དབུ་མ་ཆེན་པོ་ནི་སོ་སོར་རང་རིག་པའི་ཡེ་ཤེས་ཞིག་ཡིན། དེ་སོ་སོར་རང་རིག་པའི་ཡེ་ཤེས་དང་དོན་དམ་ཆོས་དབྱིངས་བདེ་བར་གཤེགས་པའི་ཡེ་ཤེས་དེ་གཉིས་ཀ་དེ་རང་གིས་རང་རིག་པའི་ཚུལ་གྱིས་མངོན་སུམ་དུ་རྟོགས་ཡོད་པ་རེད། ཆོས་ཉིད་བདེ་བར་གཤེགས་པའི་སྙིང་བོ་དེ་ཡང་རང་གི་རང་རིག་པའི་ཚུལ་གྱིས་མངོན་སུམ་དུ་རྟོགས་པ་གཅིག་དང༌། དེར་རྟོགས་པའི་འཕགས་པའི་མཉམ་བཞག་ཡེ་ཤེས་ལམ་འདུས་བྱས་ཀུན་རྫོབ་དེས་ཀྱང་ཆོས་ཉིད་མངོན་གསུམ་དུ་རྟོགས་འདུག་ཡོད་པ་རེད། དེས་མཚོན་པའི་སངས་རྒྱས་སར་ཐུགས་རྣམ་པ་ཐམས་ཅད་མཁྱེན་པའི་རྣམ་མཁྱེན་དེས་ཀྱང་ཆོས་ཉིད་མངོན་སུམ་དུ་རྟོགས་ནས་ཆོས་ཅན་ཀུན་རྫོབ་རྣམས་མི་སྣང་བའི་ཚུལ་གྱིས་ཤུགས་ལ་མཁྱེན་པ་ཡིན་པར་ཆོས་རྗེ་ཀུན་མཁྱེན་རིན་པོ་ཆེའི་རང་ལུགས་སུ་བཞེད་པ་ཡིན། དབུ་མ་ཆེན་པོའི་ཡུལ་ཡང་ཆོས་ཉིད་རང་ཉིད་ཆགས་འདུག་ཡོད་པ་དེ་དང་འཕགས་པའི་མཉམ་བཞག་ཡེ་ཤེས་ལམ་འདུས་བྱས་དེའི་ཡུལ་ལ་ཡང་ཡུལ་ཆོས་ཉིད་དེ་ཆགས་འདུག་ཡོད་པ་རེད། དེ་ནང་བཞིན་རྣམ་མཁྱེན་གྱི་དངོས་ཡུལ་ཡང་ཆོས་ཉིད་དེ་ཆགས་འདུག་ཡོད་པ་རེད། རྣམ་མཁྱེན་གྱིས་ཆོས་ཉིད་ཡོངས་གྲུབ་དེ་སྣང་བའི་སྟེང་ནས་ཆོས་ཅན་ཀུན་རྫོབ་ལ་སོགས་པ་ཤུགས་ལ་མཁྱེན་པ་ཡིན་པར་གསུངས་ཡོད་པ་དེ་རེད། ལས་དང་པོ་པ་ང་ཚོ་ལྟ་བུ་ཞིག་གིས། དང་པོར་ཆོས་ཉིད་དེ་ལ་ཐོས་པ་བྱེད་དགོས་པ་རེད། དེ་ལ་ཐོས་པ་བྱེད་མི་ཐུབ་པ་ཞིག་དང་གོ་མི་ཐུབ་པ་ཞིག་མ་རེད། ཁ་ཅིག་གིས་ཆོས་ཉིད་ཉམས་སུ་ལེན་དགོས་པ་ཡིན་མ་གཏོགས་གོ་རྒྱུ་དང་ཐོས་རྒྱུ་ཡོད་པ་མ་རེད་ཟེར་བ་དང༌། གཞན་དགེ་བའི་བཤེས་གཉེན་གྱིས་འཆད་ན་གོ་རྒྱུ་མ་རེད་ཟེར་བ་དང༌། ངེས་དོན་མདོ་བཅུ་ལ་སོགས་པའི་སྐབས་སུ་བརྗོད་མི་ཐུབ་ཟེར་བ་སོགས་ནོར་འཁྲུལ་རེད། དེའི་རྒྱུ་མཚན་གང་འདྲ་ཡིན་ཟེར་ན་སངས་རྒྱས་བཅོམ་ལྡན་འདས་རང་ཉིད་ཀྱིས་དོན་དམ་བདེན་པ་བསྟན་བྱའི་གཙོ་བོར་བྱས་ནས་བསྟན་པའི་མདོ་དེ་ངེས་དོན་གྱི་མདོ་ཡིན་པ་བློ་གྲོས་ཆེན་པོས་ཞུས་པའི་མདོ་སོགས་ཀྱི་སྐབས་སུ་གསུངས་ཡོད་པ་ལྟ་བུ་ཡིན། སངས་རྒྱས་བཅོམ་ལྡན་འདས་ཀྱིས་ངེས་དོན་མདོ་བཅུ་སྐབས་སུ་ངེས་དོན་དོན་དམ་བདེན་པ་བཤད་པ་གང་ཞིག དེ་ཐོས་པ་དང་བསམ་པ་ལ་བརྟེན་ནས་མི་ཤེས་པ་ཡིན་ན་དེ་ལྟར་བཤད་པ་དོན་མེད་པ་ཡིན་པའི་ཕྱིར། ཇི་ལྟར་བཤད་ཀྱང་མི་ཤེས་ན་བཤད་པ་དོན་མེད་པར་ཐལ་བའི་ཕྱིར། དེས་ན་ཐོས་པས་ཀྱང་གཏན་ལ་ཕབ་རྒྱུ་ཡོད་པ་དང༌། བསམ་བྱུང་གིས་ཀྱང་ཚད་མས་ངེས་པ་རྙེད་པ་ཡོད་པ་རེད། བསམ་བྱུང་གི་ཚད་མས་ངེས་པ་རྙེད་པ་དེའི་ཚེ་བསམ་བྱུང་གི་བློ་དེས ་སྤྲོས་པ་ཐམས་ཅད་དང་བྲལ་བའི་སྒོ་ནས་རྟོགས་ཐུབ་པ་ཨེ་ཡིན་སྙམ་ན་བསམ་བྱུང་རང་གི་སྣང་ཚུལ་ལ་སྤྲོས་པ་ཐམས་ཅད་དང་བྲལ་བའི་སྒོ་ནས་རྟོགས་ཐུབ་ཀྱིན་ཡོད་པ་མ་རེད། རྟོགས་བྱ་ཆོས་ཉིད་དེ་སྤྲོས་པ་ཐམས་ཅད་དང་བྲལ་བ་རེད། དེ་རང་ལ་དོན་སྤྱིའི་མཚན་མ་སོགས་སྤྲོས་པ་དང་བཅས་པར་སྣང་བ་རེད། ཇི་ལྟ་བ་བཞིན་དུ་ཡུལ་མིན་ཞེས་པ་ཡང་དེ་འདྲའི་སྟེང་ནས་བསམ་གཞིག་ནང་དགོས་པ་ཡིན་ཞེས་ཞུ་རྒྱུ་དེ་ཡིན། ཡིན་ནའང་ཐོས་བསམ་གྱིས་གཏན་ལ་ཕབ་ནས་དེ་མངོན་སུམ་དུ་རྟོགས་པ་ལ་ཡང་ནས་ཡང་དུ་གོམས་པར་བྱས་ནས་དཔྱད་སྒོམ་དང་འཇོག་སྒོམ་བྱས་ནས་དཔྱད་སྒོམ་འཇོག་སྒོམ་སྤེལ་མར་བྱེད་པ་ཡིན་ན་དཔེར་ན་བྱ་ཕོ་མོས་བུ་ཕྲུག་གསོ་བ་བཞིན་རྟོགས་པའི་ངོར་གོང་འཕེལ་འགྲོ་ཐུབ་ཞེས་སྔ་འགྱུར་རྙིང་མའི་ཕྱོགས་ཀྱི་མཁས་དབང་མི་ཕམ་སང་གིས་དེ་འདྲའི་གསུངས་ཡོད་པ་རེད། དེ་ནང་བཞིན་རང་ལུགས་ལ་ཐམས་ཅད་མཁྱེན་པ་ཏཱ་ར་ནཱ་ཐའི་ཐེག་མཆོག་དབུ་མ་རབ་བྱེད་དྲུག་པའི་སྐབས་དེར་དཔྱོད་བྱེད་གཅིག་དང་དུ་བྲལ་གྱི་རིགས་པ་དང༌། མཐའ་བཞི་སྐྱེ་འགོག་གི་རིགས་པ་དང༌། མུ་བཞི་སྐྱེ་འགོག་གི་རིགས་པ་དང༌། རྟེན་འབྲེལ་གྱི་རིགས་པ་ལ་སོགས་པ་རིགས་པ་མང་བོའི་སྒོ་ནས་གཏན་ལ་ཕབ་ཡོད་པ་རེད་དེ་ལྟར་རྣམ་པ་ཐམས་ཅད་གྱིས་ཤེས་དགོས་རྒྱུ་གལ་ཆེན་པོ་རེདཅེས་ཞུ་རྒྱུ་དེ་ཡིན། དེའི་སྟེང་ནས་སྔགས་བླ་མེད་དང་འབྲེལ་བ་ཡིན་ན་གཅོ་བོ་དཔྱད་སྒོམ་འཇོག་སྒོམ་གཉིས་ཀྱི་ནང་ནས་འཇོག་སྒོམ་གཙོ་བོར་བྱས་ནས་རྣམ་རྟོག་མ་རིག་ཆེན་པོའི་གཉེན་པོ་སྤྲོས་བྲལ་རྣམ་པར་མི་རྟོག་པའི་ཡེ་ཤེས་དེ་བསྒོམས་ནས་མངོན་སུམ་དུ་རྟོགས་དགོས་པ་ཡིན། མ་བསྒོམས་པར་ཆོས་ཉིད་ཀྱང་མངོན་སུམ་དུ་རྟོགས་ཐུབ་པ་མ་རེད། དེ་མ་ཟད་འཆི་བ་མི་རྟག་པ་མངོན་སུམ་དུ་རྟོགས་པ་ལའང་ཡང་ནས་ཡང་དུ་བསྒོམས་ནས་བསྒོམ་བྱུང་གི་མྱོང་བ་ཐོན་ནས་རྣལ་འབྱོར་མངོན་སུམ་གྱི་ངོར་འགྲོ་དགོས་པ་དེ་ཡིན། དེ་ཡང་དཔལ་ཆོས་ཀྱི་གྲགས་པའི་རྣམ་འགྲེལ་སྐབས་སུ། ཡང་དག་ཡང་དག་མ་ཡིན་པས། །གང་གང་ཤིན་ཏུ་གོམས་གྱུར་པ། །གོམས་པ་ཡོངས་སུ་རྫོགས་གྱུར་པ། །དེ་གསལ་མི་རྟོག་བློ་འབྲས་ཅན། །ཞེས་གསུངས་པ་ནང་བཞིན་གོམས་ནས་མངོན་སུམ་དུ་རྟོགས་དགོས་པ་ཡིན། དང་བོ་ཐོས་པ་བྱས་ནས་དེ་ནས་ཡང་ནས་ཡང་དུ་གོམས་པར་བྱས་ནས་མངོན་སུམ་དུ་རྟོགས་དགོས་པ་ནི་སྤྱིར་བདེན་བཞི་མི་རྟག་བཅུ་དྲུག་ཡིན་ན་འདྲ། བདེན་གཉིས་རྣམ་བཞག་ཡིན་ན་འདྲ། ཆོས་ཕལ་ཆེ་བ་ཞིག་དེ་ལྟར་ཆགས་ཡོད་པ་དེ་ཤེས་དགོས་པ་རེད། དེ་ལྟར་བསམ་བློ་བཏང་ན་ཟབ་མོ་གནས་ལ་ཡང་ཐོས་བསམ་བྱེད་དགོས་པ་དེ་བཤད་མ་དགོས་པ་ཞིག་རེད། དང་བོ་ཐོས་པ་བྱས། དེ་ནས་ཚད་མས་སྒྲོ་འདོགས་བཅད། དེ་ནས་ཡང་ནས་ཡང་དུ་གོམས་པར་བྱས་ནས་མཐར་མངོན་སུམ་དུ་རྟོགས་དགོས་པ་ཞིག་རེད། དེ་ཡང་བླ་མའི་མན་ངག་ལ་བརྟེན་ནས་རྟོགས་ཐུབ་པ་ཡིན་ན་ཡང་གཞུང་གི་དོན་ལ་གཏན་ལ་ཕབ་དགོས་པ་ཞིག་ཡིན། སྤྱིར་བཏང་ཐམས་ཅད་མཁྱེན་པ་ཏཱ་ར་ནཱ་ཐའི་མན་ངག་འདི་ལྟ་བུ་གསུངས་ཡོད་པ་རེད། གང་རེད་ཟེར་ན་གཞུང་ལུགས་ཆེན་པོ་རྣམས་ཀྱི་སྐབས་སུ་མདོར་བསྟན་དང༌། རྒྱས་བཤད་དང༌། དོན་བསྡུས་གསུམ་གསུངས་པའི་ནང་ནས་དོན་བསྡུས་ལྟ་བུའམ་དོན་གྱི་སྙིང་བོ་ལྟ་བུ་མན་ངག་གི་ཚུལ་དུ་བྱས་ནས་སྒོམ་པའི་རིམ་པ་གཏན་ལ་ཕབ་ཡོད་པ་རེད། གཞུང་དོན་མཐར་ཐུག་ཆགས་ཡོད་པ་རེད། དེའི་རྒྱུ་མཚན་གྱིས་དབང་རྣོན་ཞིག་ཡིན་ན་མདོར་བསྡུས་ནས་བསྟན་ན་ཡང་གོ་ཐུབ་ཀྱིན་ཡོད་པ་རེད་མ་གཏོགས་དབང་རྟུལ་ཞིག་ཡིན་ན་གཞུང་གི་བཤད་པ་མདོ་བསྟན་རྒྱས་བཤད་སོགས་ལ་བརྟེན་ནས་གོ་དགོས་པ་རེད་མ་གཏོགས། མདོར་བསྡུས་བསྟན་ན་གོ་རྒྱུ་ཁག་པོ་ཆགས་འདུག་ཡོད་ལ། དེའི་རྒྱུ་མཚན་གྱིས་གཞུང་དང་འབྲེལ་བའི་མན་ངག་དགོས་པ་ཡིན། དེ་ལས་གཞན་པའི་མན་ངག་འཚོལ་བ་དེ་ཆོས་སྤོང་གི་ལས་ཡིན་པར་གསུངས་ཡོད་དེ། གཞུང་སྤངས་ནས་མན་ངག་འཚོལ་བ་དེ་ཆོས་སྤོང་གི་ལས་ཡིན་པར་གསུངས་ཡོད་པ་ཡིན། དེ་ནང་བཞིན་ཐམས་ཅད་མཁྱེན་པ་ཏཱ་ར་ནཱ་ཐས་གཞུང་གི་དོན་བསྡུས་དེ་སྙིང་བོ་མན་ངག་ཡིན་མ་གཏོགས་དེ་ལས་གཞན་གཞུང་བཤད་པའི་གོ་རིམ་མ་གཏོགས་པའི་ཉམས་ལེན་གྱི་སྙིང་བོ་མི་གོ་བར་འཛིན་པ་དེ་བདུད་ཀྱི་བྱིན་བརླབས་སྙིང་ལ་ཞུགས་པ་ཡིན། ཞེས་ཐམས་ཅད་མཁྱེན་པ་ཏཱ་ར་ནཱ་ཐས་དེ་ལྟར་གསུངས་ཀིན་ཡོད་པ་དེ་ཤེས་ནས། མདོར་ན་ང་ཚོའི་སངས་རྒྱས་བཅོམ་ལྡན་འདས་ཀྱི་མདོ་སྔགས་ཀྱི་དགོངས་པ་དེ་ཐོས་བསམ་བྱས་ནས་དེའི་དོན་གཏན་ལ་ཕབ་པ་ཙམ་གྱིས་མི་བཞག་པར་ཉམས་སུ་ལེན་པ་གལ་ཆེན་པོ་ཡིན། དེ་ལྟར་བྱེད་པ་ནི་གནད་འགག་ཆེན་པོ་རེད་བསམ་ཀྱིན་ཡོད། དེ་འདྲའི་སྟེང་ནས་དྲི་བ་དེ་རྣམས་ཀྱི་ལན་དེ་ཙམ་ཞིག་ཕུལ་བ་ཡིན། དེ་ཡང་ཐེག་མཆོག་དབུ་མའི་ཟིན་བྲིས་ལས། ཚོགས་ལམ་གྱི་དུས་སུ་ཐོས་བསམ་ལ་བརྟེན་ནས་ཆོས་ཉིད་རྣམ་པ་ཐམས་ཅད་པར་གནས་པ་དང༌། འཁོར་བའི་ཆོས་རྣམས་གློ་བུར་དུ་ཤེས་པ་ཡིན་ཞིང༌། ཞེས་སོ། །དོ་ནུབ་ཡིན་ན་དྲི་བ་མང་བོ་ཡོངས་མ་སོང༌། ཧ་ཅང་ཡག་པོ་ཆགས་སོང་མ་གཏོགས་དྲི་བ་ཧ་ཅང་ཉོག་སོང་ན་བརྗོད་ཚུལ་མང་འགྲོ། ངས་ལན་བཏབ་ན་ཡང་རྒྱས་པར་བཤད་མི་ཁོམ་པས་ཐམས་ཅདཀྱི་བློར་འབབ་ཐུབ་མིན་དང་གོང་ནས་ལན་ཞུས་པ་དེ་དག་སྤྱིར་གཞུང་ལུགས་ལ་ཐོས་བསམ་བྱས་ཡོད་པ་ཡིན་ན་གང་ལ་གང་འཚམས་ཕན་ཐོགས་སྲིད་ཀྱང་གཞུང་ལུགས་ལ་སྦྱངས་བ་མེད་ན་ངས་ལན་བཏབས་པ་དེ་མ་གོ་བ་སྲིད་གི་རེད། ཡིན་ནའང་དེ་ཙམ་མ་གཏོགས་གསར་དུ་དཔེ་ཆ་སྦྱང་དགོས་པ་ཞིག་ལ་དཔེ་ཁྲིད་བྱེད་པ་ལྟར་དགོས་ན་དྲྭ་ཚོམ་འདི་ལྟ་བུའི་ནང་ནས་གོ་བརྡ་འཕྲོད་ཀྱི་དཀའ་མོ་རེད། དྲི་བ་བཅུ་དགུ་པ་ཉ་དུག་ཆུ་ཞེས་པས་དྲི་བ་གནང་འདུག་པ་དེ་ཡིན། དེའི་ལན་ནི། དེ་ཡིན་ནའང་དྲི་བ་དེ་གསལ་བོ་ཞིག་ཁོང་གི་ཞེ་འདོད་དེ་ཧ་གོ་མ་སོང་ཏེ་མདོར་ན་ཐེག་ཆེན་སྦྱོར་ལམ་ཆོས་མཆོག་དེ་ཞེན་བློ་ཡིན་ན་འཁྲུལ་ཤེས་ཡིན་དགོས། དེས་ན་དེ་མཐོང་ལམ་ངོར་འགྲོ་བ་ཡོད་མེད་གང་ཡིན་ཞེས་དྲིས་པ་ཨེ་ཡིན་བསམ་སོང༌། དེ་ཡིན་ན་རྟོག་པ་འཁྲུལ་ཤེས་ཞིག་རྟོག་མེད་ཤེས་པའི་ངོར་ཡང་ནས་ཡང་དུ་གོམས་པ་བྱས་ན་འགྲོ་བ་ཡོད་པ་རེད། དེ་ལྟར་འགྲོ་བ་ཡོད་པ་དེ་ཡང་དཔལ་ཆོས་ཀྱི་གྲགས་པའི་ཚད་མ་རྣམ་འགྲེལ་སོགས་ཀྱི་སྐབས་སུ་རྣལ་འབྱོར་མངོན་སུམ་སྒྲུབ་བྱེད་སྒྲུབ་རིགས་པ་གསུངས་སྐབས་སུ་རྣམ་འགྲེལ་ལས། ཡང་དག་ཡང་དག་མ་ཡིན་པས། །གང་གང་ཤིན་ཏུ་གོམས་གྱུར་ན། །གོམས་པ་ཡོངས་སུ་རྫོགས་གྱུར་ན། །དེ་གསལ་མི་རྟོག་བློ་འབྲས་ཅན། །ཞེས་གསུངས་པའི་རྒྱུ་མཚན་གྱིས་ཚོགས་སྦྱོར་སོགས་ཀྱི་རྒྱུན་མཐོང་ལམ་བསྒོམ་ལམ་ལ་སོགས་པ་འདུས་བྱས་ཡེ་ཤེས་ངོར་འགྲོ་བ་ཡོད་པ་ཡིན། དྲི་བ་ཉི་ཤུ་བ་ནི་ཤེས་བྱ་ཉེར་ལྔའི་ནང་ནས་འདུས་མ་བྱས་དང་སྤྱིར་འདུས་མ་བྱས་ཞེས་པ་གཉིས་འདྲ་མིན་དང་སངས་རྒྱས་ཀྱི་ཡོན་ཏན་ལ་སངས་རྒྱས་ཡིན་པས་ཁྱབ་མིན་ཞེས་པའོ། །ལན་ནི། དེ་ཡིན་ན་མདོ་སྡེ་ཕལ་བོ་ཆེ་ལ་སོགས་པ་མདོ་སྡེ་མང་བོའི་སྐབས་སུ་སྲིད་པའི་ཤེས་བྱ་ཉེར་ལྔ་གསུངས་ཡོད་པ་རེད། འདུས་བྱས་ཉེར་བཞི་མ་བྱས་གཅིག་ཉིད་དེ། །ཞེས་ཐམས་ཅད་མཁྱེན་པ་ཏཱ་ར་ནཱ་ཐའི་ཐེག་མཆོག་དབུ་མ་དང༌། དེའི་བཤད་བྱའི་རྩ་བ་ཀུན་མཁྱེན་དོལ་པོ་པ་ཤེས་རབ་རྒྱལ་མཚན་གྱིས་མཛད་པའི་དབུ་མའི་མན་ངག་ཁྱད་འཕགས་སྐབས་སུ་གསུངས་ཡོད་པ་རེད། ཡིན་ནའང་དེའི་སྐབས་སུ་འདུས་བྱས་འདུས་མ་བྱས་ཟེར་བ་དེ་རྒྱུ་རྐྱེན་ལས་སྐྱེས་པ་མ་སྐྱེས་པ་ཙམ་ལ་མི་བྱེད་པར་ཆོས་མཆོག་རྫོགས་ལྡན་ལུགས་ལ་སྒྲ་རྟོག་གིས་བྱས་མ་བྱས་ལ་བཤད་ཡོད་པ་ཡིན། དཔེར་ན་དབུ་མ་རྩ་བ་ཤེས་རབ་སྐབས་སུ་དངོས་དང་དངོས་མེད་འདུས་བྱས་ཡིན། །ཞེས་པ་དེ་ཡང་སྒྲ་རྟོག་གིས་བྱས་པ་ལ་གསུངས་བ་ལྟར་ཡིན། དེས་ན་རང་ལུགས་ལ་རྟག་པ་ཡིན་ན་དོན་དམ་བདེན་པ་ཡིན་པས་མ་ཁྱབ་འདུས་མ་བྱས་ཀྱི་ནམ་མཁའ་སོགས་འདུས་མ་བྱས་ཡིན། དེ་ཡང་ས་བཟང་མ་ཏི་པཎ་ཆེན་གྱི་ཀུན་བཏུས་འགྲེལ་བའི་སྐབས་སུ་འདུས་མ་བྱས་བརྒྱད་ལ་སོགས་པ་གསུངས་པ་དང༌། དེ་བཞིན་དུ་ཆོས་རྗེ་ཀུན་མཁྱེན་རིན་པོ་ཆེའི་རི་ཆོས་ངེས་དོན་རྒྱ་མཚོའི་སྐབས་སུ་འདུས་མ་བྱས་ཀྱི་ནམ་མཁའ་ཞེས་ཡང་ནས་ཡང་དུ་ལན་གྲངས་དུ་མར་བཀའ་བསྩལ་བ་དང༌། ཡང་དེ་ཉིད་ཀྱིས་མཛད་པའི་བཀའ་བསྡུ་བཞི་བའི་རང་འགྲེལ་སྐབས་སུ་ཡང་བེམ་པོ་ལ་འདུས་བྱས་འདུས་མ་བྱས་ཞེས་གསུངས་ཡོད་པ་ཡིན། དེའི་སྐབས་སུ་བེམ་པོ་ནི་ཤེས་པ་མ་ཡིན་པ་ལ་བེམ་པོ་ཞེས་སྦྱར་ནས་གསུང་གིན་ཡོད་པ་རེད། རིག་པ་དེ་ལ་ཡང་འདུས་བྱས་འདུས་མ་བྱས་གཉིས་ཞེས་དེ་འདྲའི་སྒོ་ནས་གསལ་བར་གསུངས་ཡོད་ནི་རེད། སྐབས་འདིར་འདུས་བྱས་ཞེས་པ་དེ་སྒྲ་རྟོག་གིས་བྱས་པ་ཙམ་སྟེ་སྒྲ་རྟོག་གིས་ཕར་བཏགས་ནས་བཞག་པ་ལ་འདུས་བྱས་ཞེས་རྣམ་བཞག་མཛད་པ་ཡིན་པ་ལས་འདུས་བྱས་མཚན་ཉིད་པ་ལ་རྒྱུ་དང་རྐྱེན་ལས་སྐྱེས་པས་ཁྱབ། རང་གི་ཉེར་ལེན་གྱི་རྒྱུ་དང་ལྷན་ཅིག་བྱེད་རྐྱེན་ལས་སྐྱེས་བས་ཁྱབ། ཡང་ཐམས་ཅད་མཁྱེན་པ་སྒྲོལ་བའི་མགོན་པོས་ཐེག་མཆོག་དབུ་མའི་རྩ་བར་དངོས་མེད་རྒྱུ་དང་བཅས་པར་འདོད། །ཞེས་པ་དེ་ཡང་རྗེ་གང་ཉིད་ཀྱིས་ཉེར་ལེན་རྒྱུ་དང་ལྷན་ཅིག་བྱེད་རྐྱེན་ལས་སྐྱེས་པ་མ་ཡིན་པར་སྒྲ་རྟོག་གིས་བྱས་པ་ཡིན་པའི་རྒྱུ་མཚན་གྱིས་དངོས་མེད་རྒྱུ་དང་བཅས་ཞེས་རྣམ་བཞག་མཛད་ཡོད་པ་རེད། དེ་ཡང་སྤྱི་དོན་རབ་གསལ་ལས། ཚད་མའི་གཞུང་སོགས་སུ་བཤད་པའི་འདུས་བྱས་མ་བྱས་ནི། རང་གི་རྒྱུ་རྐྱེན་དུ་མ་འདུས་ནས་བྱས་པ་དང་མ་བྱས་པ་བྱེད་པ་ཡིན་ལ། དེ་འདྲའི་འདུས་བྱས་ནི་གཟུགས་ཤེས་ལྡན་མིན་འདུ་བྱེད་གསུམ་ཁོ་ན་ཡིན་གྱི་ནམ་མཁའ་སོགས་མ་ཡིན་ལ། སྤྱིར་གྱི་འདུས་བྱས་དང་འདུས་མ་བྱས་ཀྱི་དོན་ནི་དེ་ལྟར་འཛིན་དགོས་ལ། གསུང་རབ་དང་ཀུན་མཁྱེན་ཡབ་སྲས་ཀྱི་གསུང་རྣམས་སུ། ཀུན་རྫོབ་འདུས་བྱས་དང་དོན་དམ་ཆོས་ཉིད་འདུས་མ་བྱས་གསུངས་པའི་འདུས་བྱས་འདུས་མ་བྱས་ནི། སྤྱིར་བཏང་གི་འདུས་བྱས་དང་འདུས་མ་བྱས་མ་ཡིན་པར། བློ་ངོར་ཀུན་རྫོབ་མྱོང་བའི་མཚན་མ་འདུས་ནས་བྱས་པ་དང་མ་བྱས་པ་ལ་བྱེད་པ་ཡིན་ཏེ། ཞེས་སོ། །དེའི་ཕྱིར་ཁྱད་པར་ཡོད་པ་རེད་ཅེས་ཞུ་རྒྱུ་དེ་ཡིན། སངས་རྒྱས་ཀྱི་ཡོན་ཏན་ལ་སངས་རྒྱས་ཀྱིས་ཁྱབ་ཅེས་བཤད་ན་ཆོག་པ་རེད་བསམ་གྱིན་ཡོད། དེ་ནས་གོང་གི་དྲི་བ་དེར་ལན་མདོར་མཚོན་པ་ཙམ་ཞུས་པ་དེ་ཡིན་སྔོན་ནས་དེའི་ཕྱོགས་ནས་མང་བོ་ཞིག་ཞུས་ཟིན་པ་ཡིན། དྲི་བ་ཉེར་གཅིག་པ་ཇོ་ནང་རང་ལུགས་ལ་རིགས་ངོའི་དགག་བྱ་དང་གཞིའི་དགག་བྱ་ཞེས་པའི་བརྡ་ཆད་ཡོད་མེད་ཞེས་པའོ། །ལན་ནི། ཇོ་ནང་རང་ལུགས་ལ་རིགས་ངོའི་དགག་བྱ་དང་གཞིའི་དགག་བྱ་ཞེས་བརྡ་ཆད་ཀུན་མཁྱེན་ཡབ་སྲས་དང་རྗེ་བཙུན་ཏཱ་ར་ནཱ་ཐའི་གསུང་ཟིན་གང་ན་ཡོད་པ་མ་རེད། དེ་མ་ཟད་རི་བོ་དགེ་ལྡན་པར་མཚོན་པ་ཡིན་ན་ཡང་ཀུན་མཁྱེན་འཇམ་དབྱངས་བཞད་པས་རིགས་ངོས་དགག་བྱ་གཞིའི་དགག་བྱ་ཞེས་བརྡ་ཆད་མཛད་ཀྱིན་ཡོད་པ་རེད་མ་གཏོགས་ཡོངས་གྲགས་དང་སྤྱིར་བརྡ་ཆད་གྲགས་ཆེ་བ་ཞིག་མ་རེད་ཞུ་རྒྱུ་དེ་ཡིན། ཡིན་ན་ཡང་རིགས་ངོའི་སྟོང་ཉིད་ཟེར་བ་དེ་གསུང་གིན་ཡོད་པ་རེད། རིགས་ངོའི་སྟོང་ཉིད་ཟེར་བ་དེ་ཡང་འཕགས་པའི་མཉམ་བཞག་ཡེ་ཤེས་ཀྱི་ངོར་ཀུན་རྫོབ་ཀྱི་ཆོས་ཐམས་ཅད་སྟོང་བའི་གཞིའི་ཆོས་ཉིད་དེ་ལ་སྦྱར་ནས་གསུངས་པ་ཡིན་ན། དེ་འདྲའི་རིགས་ངོའི་ཆོས་ཉིད་ཅིག་ཇོ་ནང་རང་ལུགས་ལ་ཁས་ལེན་གྱིན་ཡོད་པ་རེད། དེའི་རྒྱུ་མཚན་གྱིས་ཇོ་ནང་རང་ལུགས་ལ་གཙོ་བོ་སྟོང་ཉིད་དེ་འཕགས་པའི་མཉམ་བཞག་ཡེ་ཤེས་ཀྱི་ངོར་བཞག་པ་ཡིན་ལ། དེའི་རིགས་ངོའི་སྟོང་ཉིད་ལ་སྦྱར་ནས་རྒྱ་གཞུང་དུ་མའི་སྐབས་སུ་རིགས་ངོའི་སྟོང་ཉིད་ལ་སྦྱར་ནས་གསུངས་ཡོད་པ་རེད། རྗེ་བདག་ཉིད་ཆེན་པོས་ཀྱང་དབུ་མ་སྣང་བ་མ་གཏོགས་པའི་རང་རྒྱུད་པའི་གཞུང་ཁུངས་ཐུབ་གང་ན་དགག་བྱ་ངོས་འཛིན་གསལ་བར་མི་སྣང་ཞེས་གསུངས་བ་དེ་ཡང་གཞན་པ་ཐམས་ཅད་ཀྱི་སྐབས་སུ་རིགས་ངོའི་སྟོང་ཉིད་ལ་སྦྱར་ནས་གསུངས་ཡོད་པ་དེ་གནད་འགག་ཅྀག་གི་སྟེང་ནས་གསུང་གིན་ཡོད་པ་རེད། དེའི་རྒྱུ་མཚན་གྱིས་འཕགས་པའི་མཉམ་བཞག་སོ་སོར་རང་རིག་པའི་ཡེ་ཤེས་ཀྱི་ངོར་དོན་དམ་བདེན་པ་དེ་བདེན་པ་མི་བསླུ་བ་ཆགས་ཡོད་ལ། དེའི་ངོར་ཀུན་རྫོབ་ཀྱི་སྤྲོས་པ་མཐའ་དག་གིས་གདོད་ནས་སྟོང་བ་ཡིན་པའི་རྒྱུ་མཚན་གྱིས་དགག་བྱ་ཀུན་རྫོབ་ཀྱི་སྤྲོས་པ་ལ་སོགས་པ་དང༌། དགག་བྱ་སྤྲོས་པའི་བདེན་པར་གྲུབ་པ་དང༌། དགག་བྱ་ཆོས་བདག་ཏུ་གྲུབ་པ་དག་དགག་བྱར་བཞག་ནས་དེས་སྟོང་བ་དེ་ནི་སྟོང་བའི་གཞི་ཆོས་ཉིད་ཡོངས་གྲུབ་དེ་རིགས་ངོའི་སྟོང་ཉིད་ཅེས་ཐ་སྙད་སྦྱར་ཀྱང་འདྲ་མ་སྦྱར་ཀྱང་འདྲ། མདོར་ན་གཞིའི་ཡིན་ལུགས་གནས་ལུགས་མཐར་ཐུག་ཅིག་རང་ལུགས་སུ་འཇོགས་ཐུབ་ཅེས་ཞུ་རྒྱུ་དེ་ཡིན། དྲི་བ་ཉེར་གཉིས་པ་རང་ལུགས་ལ་ཉན་རང་གིས་ཆོས་ཀྱི་བདག་མེད་རྟོགས་དགོས་མིན་དང་བདེན་འཛིན་ཤེས་སྒྲིབ་ཡིན་མིན་ཞེས་པའོ། །ལན་ནི། ཀུན་མཁྱེན་ཇོ་ནང་བའི་རང་ལུགས་ལ་ཉན་རང་གི་ཐར་བ་ཐོབ་པ་ལ་ཆོས་ཀྱི་བདག་མེད་རྟོགས་དགོས་པ་མ་རེད་ཞུ་རྒྱུ་དེ་ཡིན། དེ་ལྟར་ཡིན་པ་དེ་ཡང་ཐམས་ཅད་མཁྱེན་པ་ཏཱ་ར་ནཱ་ཐས་གཞན་སྟོང་དབུ་མའི་རྒྱན་གྱི་སྐབས་སུ། དེ་ཕྱིར་ཉན་རང་འཕགས་པ་ཆོས་ཐམས་ཅད། །ཆོས་བདག་མེད་པར་རྟོགས་ཞེས་འདི་མི་འཐད་ཅེས་གསུངས་ཡོད་པ་ནང་བཞིན་རེད། དེའི་རྒྱུ་མཚན་གྱིས་རང་ལུགས་ལ་ཀུན་མཁྱེན་དོལ་པོ་པ་དང༌། ཉ་དབོན་ཀུན་དགའ་དཔལ་ས་བཟང་མ་ཏི་པཎ་ཆེན་ཐམས་ཅད་ཀྱིས་དགོངས་བ་གཅིག་དང་དབྱངས་གཅིག་ཏུ་གསུངས་ཡོད་པ་ཡིན། དེ་ལྟར་ཡིན་པའི་སྒྲུབ་བྱེད་ཀྱི་ལུང་ནི་མདོ་སྡེ་ལང་ཀར་གཤེགས་པ་ལ་སོགས་པ་གཞུང་མང་བོ་ཞིག་ལ་བརྟེན་ནས་གསུངས་ཡོད་པ་དེ་རེད། དེའི་རྒྱུ་མཚན་གྱིས་ལུང་དེ་དག་འདིའི ་ནང་ནས་སྐུར་ན་ཆོག་གི་འདུག མཁས་མཆོག་གཞན་ཟེར་ན་འདྲ་དཔལ་ལྡན་ཟླ་བ་གྲགས་པའི་རང་ལུགས་ལ་བསམ་བློ་བཏང་ན། ཉན་རང་གིས་ཆོས་ཀྱི་བདག་མེད་རྟོགས་དགོས་པ་དེ་ཡང་ལུང་རིགས་གཉིས་ཀྱི་ནང་ནས་རིགས་པ་གསུམ་དང༌། དབུ་མ་རྩ་ཤེས་དང་ཚིག་གསལ་སྐབས་སུ་གསུངས་པས་ལུང་ཐམས་ཅད་བསྡུས་ན་ལུང་དགུ་ལ་སོགས་པའི་སྒོ་ནས་ཆོས་གྱི་བདག་མེད་རྟོགས་དགོས་པར་གསུངས་ཡོད་པ་རེད། ཡིན་ན་ཡང་གཞན་སྟོང་དབུ་མ་ཆེན་པོའི་རང་ལུགས་ལས་བརྩམས་ཏེ་བཤད་ན་གཙོ་བོ་བྱམས་ཆོས་ཀྱི་རྗེས་སུ་འབྲངས་བ་རེད། བྱམས་ཆོས་ཀྱི་རྗེས་སུ་འབྲངས་བ་ཡིན་དུས་དཔེར་ན་བསྟན་བཅོས་རྒྱུད་བླ་མའི་སྐབས་སུ། འཁོར་གསུམ་རྣམ་པར་རྟོག་པ་གང༌། །དེ་ནི་ཤེས་བྱའི་སྒྲིབ་པར་འདོད། །ཅེས་བདེན་པར་འཛིན་པའི་བདེན་འཛིན་དེ་ཤེས་སྒྲིབ་ཡིན་པར་གསུངས་ཡོད་པས་རྒྱུ་མཚན་གྱིས་ཉོན་སྒྲིབ་སྤངས་བ་ལ་བདེན་འཛིན་སྤངས་མི་དགོས་པ་ལྟ་བུ་གསུངས་ཡོད་པ་དེ་དང༌། དེ་ནང་བཞིན་བསྟན་བཅོས་མངོན་པར་རྟོགས་པའི་རྒྱན་གྱིས་སྐབས་སུ། དེ་ནི་མཚན་མ་དམིགས་དགོས་ནས། །ཐབས་མ་ཡིན་པའི་རིང་བ་དང༌། །ཐབས་གྱི་རིང་བ་མ་ཡིན་ཉིད། །མི་མཐུན་གཉེན་པོ་ཕྱོགས་དག་དང༌། །ཞེས་སོགས་གསུངས་པའི་སྐབས་དེར་ཉན་རང་གི་གཞི་ཤེས་དེ་མཚན་འཛིན་གྱིས་བཅིང་བའམ་མཚན་མར་དམིགས་པའི་སྒོ་ནས་བདེན་འཛིན་གྱི་མཚན་མའི་དམིགས་པ་དང་བཅས་པ་ཡིན་གསུངས་ཡོད་པའི་རྒྱུ་མཚན་གྱིས་རང་ལུགས་ལ་ཉན་རང་གིས་ཆོས་ཀྱི་བདག་མེད་རྟོགས་མི་དགོས་ པར་འདོད་པའི་ལུགས་ལྟར་གསུངས་ཡོད། ཡིན་ནའང་ཐེག་ཆེན་པ་དམན་ལམ་དུ་ལྟུང་བ་ཡོད་པ་རེད། དེ་ལ་བསམ་བློ་བཏང་ཡོང་ན་ཉན་རང་གིས་ཆོས་ཀྱི་བདག་མེད་རྟོགས་པ་ཨེ་ཡོད་ཟེར་ན་ཡོད་པ་སྲིད་ཅེས་བཤད་བཞག་ན་མི་ཆོག་པ་མེད། དེས་ན་དྲི་ཟུར་དང་པོའི་ལན་དེ་ཙམ་ཞུས་པ་དེ་ཡིན། ཡང་ཇོ་ནང་རང་ལུགས་ལ་བདེན་འཛིན་ཉོན་སྒྲིབ་མ་ཡིན་པ་དེ་བསྟན་བཅོས་རྒྱུད་བླའི་སྐབས་སུ་འཁོར་གསུམ་རྣམ་པར་རྟོག་པ་གང༌། །དེ་ནི་ཤེས་བྱའི་སྒྲིབ་པར་འདོད། །ཅེས་གསུངས་པ་ལྟར་ཡིན། དེས་ན་ཉོན་མོངས་བའི་སྒྲིབ་པ་གང་འཇོག་ཅེས་ཟེར་ན་རྒྱུད་བླར་སེར་སྣ་ལ་སོགས་རྣམ་རྟོག་གང༌། །དེ་ནི་ཉོན་མོངས་སྒྲིབ་པར་འདོད། །ཅེས་གསུངས་བ་ནང་བཞིན་དུ་ཉོན་མོངས་བ་འདོད་ཆགས་ཞེ་སྡང་གཏི་མུག་སེར་སྣ་ལ་སོགས་པ་ཉོན་མོངས་བའི་སྒྲིབ་པ་སྟེ། དེ་དག་ལ་ཉོན་སྒྲིབ་ཀྱི་གཙོ་བོ་ངོས་འཛིན་མཛད་ཀྱིན་ཡོད་ཅེས་ཞུ་རྒྱུ་དེ་ཡིན། དེ་ལྟར་ཡིན་པའི་སྒྲུབ་བྱེད་ནི། གཞན་སྟོང་དབུ་མ་རྒྱན་ལས། དེ་ཕྱིར་ཐེག་དམན་འཕགས་པས་ཆོས་ཐམས་ཅད། །ཆོས་བདག་མེད་པར་རྟོགས་ཞེས་འདི་མི་འཐད། །ཅེས་དང༌། དྲིས་ལན་གནད་ཀྱི་གསལ་བྱེད་ལས། རྣམ་ཐར་སྒོ་གསུམ་གྱི་ཏིང་ངེ་འཛིན་ཉན་རང་ལའང་ཡོད་པ་དང༌། མདོ་ཆེན་པོ་སྟོང་པ་ཉིད་སོགས་སྟོང་ཉིད་ཀྱི་རྣམ་གྲངས་ཐེག་དམན་ལ་ཡང་མང་དུ་འབྱུང་ཞིང༌། འོན་ཀྱང་དེ་དག་གིས་དངོས་བསྟན་ཕལ་ཆེར་བ་ནི། དངོས་པོ་རྣམས་རྒྱུ་རྐྱེན་སྣ་ཚོགས་པའི་རྟེན་འབྲེལ་ལས་འབྱུང་བས། བྱེད་པོ་ལ་སོགས་པས་སྟོངས་པ་དང༌། རགས་པ་དང༌། རྒྱུན་དུ་སྣང་བ་རྣམས་འཁྲུལ་པ་ཙམ་དུ་སྟོན་ཅིང༌། ཆོས་གང་ལ་ཡང་ང་བདག་གི་དངོས་པོས་སྟོང་པ་ཙམ་ཁོ་ན་སྣང་མོད། དེ་ཙམ་རྟོགས་པ་ལ་ཡང་སྟོང་ཉིད་རྟོགས་པའི་ཐ་སྙད་འཇུག་ཏུ་ནི་རུང་སྟེ། གང་ཟག་གི་བདག་མེད་རྟོགས་པ་ལ། བདག་མེད་རྟོགས་པའི་ཐ་སྙད་ཐོབ་པ་བཞིན་ནོ། །ཞེས་པ་ནས། མདོ་རྒྱན་གྱི་ལུགས་ལ། ཐེག་དམན་པས་བདག་མེད་གཉིས་རྟོགས་ཡོད་པར་འདོད་དགོས་པར་ཐལ་བར་མི་འགྱུར་ཞིང༌། ཞེས་པ་ནས། སྤྱིར་ནི་ཉན་རང་ལ་ཆོས་ཀྱི་བདག་མེད་རྟོགས་པ་མེད་པ་ཉིད། ལུང་རིགས་རྣམ་དག་གིས་གྲུབ་སྟེ། ཡོད་པར་འདོད་པ་རྣམས་ཀྱི་ཁུངས་སུ་འདྲེན་པའི་ལུང་རྣམས་དེའི་ཁུངས་སུ་མི་འགྱུར་ཞིང༌། རིགས་པ་རྣམས་ཀྱང་མ་ངེས་ལ། དེ་ལ་ལྡོག་ཕྱོགས་གནོད་བྱེད་ཀྱི་ལུང་དང་རིགས་པ་ཡང་མང་དུ་ཡོད་པའི་ཕྱིར་རོ། །ཞེས་དང༌། སྐྱེས་བུ་གསུམ་གྱི་ཁྲིད་ཡིག་བདུད་རྩིའི་ཉིང་ཁུ་ལས། ཉན་རང་གི་བྱང་ཆུབ་གཉིས་པོ་དེ་རང་དོན་སྤངས་རྟོགས་མ་རྫོགས། གཞན་དོན་སེམས་ཅན་ལ་ཕན་འདོགས་རྒྱ་ཆེན་པོ་དང་བྲལ། སྤངས་པ་མ་རྫོགས་ཏེ། ཉོན་མོངས་པའི་སྒྲིབ་པ་ཁོ་ན་སྤངས་ཀྱི་ཤེས་བྱའི་སྒྲིབ་པ་མ་སྤངས། རྟོགས་པ་མ་རྫོགས་ཏེ། གང་ཟག་གི་བདག་མེད་དང་གནས་སྐབས་ཀྱི་རྟེན་འབྲེལ་ཉི་ཚེ་ཙམ་རྟོགས་ཀྱི་ཆོས་ཀྱི་བདག་མེད་དང༌། རྟེན་འབྲེལ་མཐར་ཐུག་མ་རྟོགས། ཞེས་དང༌། ཉ་ཊཱིཀ་ཡིད་ཀྱི་མུན་སེལ་ལས། ཉན་རང་ལ་ཆོས་ཀྱི་བདག་མེད་རྟོགས་པ་ཡོད་མེད་དཔྱད། སྐབས་དོན་གཞི་ཤེས་གཏན་ལ་དབབ་པའོ། །དང་པོ་ནི། འཇུག་པའི་རང་འགྲེལ་དུ། དཔེ་སྔོན་དུ་བཏང་ནས། ཀྱེ་རྒྱལ་བའི་སྲས་དག་དེ་བཞིན་དུ་བྱང་སེམས་ཡང་སེམས་བསྐྱེད་མ་ཐག་ཏུ་ལྷག་པའི་བསམ་པའི་ཆེ་བ་ཉིད་ཀྱིས་ཉན་ཐོས་དང་རང་སངས་རྒྱས་ཐམས་ཅད་ཟིལ་གྱིས་གནོན་གྱི་རང་གི་བློའི་སྟོབས་ཀྱིས་རྣམ་པར་དཔྱོད་པས་ནི་མ་ཡིན་ནོ། །བྱང་ཆུབ་སེམས་དཔའི་ས་བདུན་པ་འདི་ལ་གནས་པའི་བྱང་ཆུབ་སེམས་དཔའ་ནི་རང་གི་ཡུལ་ཤེས་པའི་ཆེ་བ་ལ་གནས་པས་ཉན་ཐོས་དང་རང་སངས་རྒྱས་ཀྱི་བྱ་བ་ཐམས་ཅད་ལས་ཤིན་ཏུ་འདས་པ་ཡིན་ནོ་ཞེས་ཇི་སྐད་གསུངས་པ་ལྟ་བུའོ། །ཞེས་པ་ནས། འོན་ཀྱང་སྡུད་པར། ཐབས་མེད་ཤེས་རབ་བྲལ་བས་ཉན་ཐོས་ཉིད་དུ་ལྟུང༌། ཞེས་དང༌། མི་རྟག་ཡོངས་སུ་སྟོན་པ་བཅོས་ལ་སྤྱོད་པ་སྟེ། །ཞེས་སོགས་འདིར་ཡང༌། དེ་ནི་མཚན་མར་དམིགས་སྒོ་ནས། །ཞེས་སོགས་དང༌། གཟུགས་སོགས་ཕུང་པོ་སྟོང་ཉིད་དང༌། ཞེས་པ་ནས། སྤྱོད་པའི་འདུ་ཤེས་མི་མཐུན་ཕྱོགས། །ཞེས་སོགས་བཀའ་ཐ་མ་ཕལ་ཆེ་བ་དང༌། བཀའ་བར་པའི་མདོ་བསྟན་བཅོས་དུ་མ་ལས་ཉན་ཐོས་ལ་ཆོས་ཀྱི་བདག་མེད་རྟོགས་པ་མེད་པར་བཤད་ཅིང་རང་རྒྱལ་ལའང༌། འཛིན་པ་མི་སྤོང་ཕྱིར་དང་ནི། །ཞེས་འཛིན་པ་རང་བཞིན་མེད་པར་རྟོགས་པ་མེད་པར་བཤད་དོ། །ཞེས་པ་ནས། ཡུམ་གྱི་མདོ་བསྟན་བཅོས་རྒྱན་རྗེས་འབྲང་དང་བཅས་པར་ཉན་རང་ལ་ཆོས་ཀྱི་བདག་མེད་རྟོགས་པ་མེད་པར་ཆེས་གསལ་བར་བཤད་པས་ས་བཅུ་པ་དང་འཕགས་པ་ཀླུའི་གསུངས་དེ་དག་དགོངས་པ་ཅན་དུ་བྱ་དགོས་སམ་སྙམ་སྟེ། ཞེས་གསུངས་པའི་ཕྱིར། ཡང་ཉན་རང་གི་ཆོས་ཀྱི་བདག་མེད་མ་རྟོགས་པར་མདོ་སྡེ་དུ་མ་ལས་གསུངས་ཏེ། རྒྱན་སྡུག་པོ་བཀོད་པའི་མདོ་ལས། ཕུང་པོ་གང་ཟག་བདག་མེད་པར། །རབ་ཏུ་རྣམ་ཕྱེ་མཐོང་གྱུར་ཅིང༌། །ཆོས་ཀྱི་དངོས་ཡོད་མ་བཤིག་པར། །ཉན་ཐོས་དེ་དག་མངོན་རྟོགས་གྱུར། །བདག་མེད་གཉིས་ལ་མཁས་པ་རྣམས། །རྒྱལ་བའི་སྲས་རྣམས་སྒོམ་པར་བྱེད། །ཅེས་དང༌། དམ་ཆོས་པད་དཀར་ལས། འོད་སྲུང་ཆེན་པོས། ཆོས་འདི་ཐམས་ཅད་ཟག་མེད་ཞི་བ་སྟེ། །འགོག་པ་དང་ནི་སྐྱེ་བ་རྣམ་པར་སྤངས། །འདི་ན་ཆོས་རྣམས་གང་ཡང་མ་མཆིས་ཤེས། །དེ་ལྟར་བསམ་ན་དད་པར་མ་གྱུར་ཏོ། །ཞེས་དང༌། ལང་གཤེགས་ལས། གཞན་ཡང་བློ་གྲོས་ཆེན་པོ། ཉན་ཐོས་དང་རང་སངས་རྒྱས་ཐམས་ཅད་ནི་ཤེས་བྱའི་སྒྲིབ་པ་དང༌། ལས་ཀྱི་བག་ཆགས་མ་སྤངས་པའི་ཕྱིར་ཆོས་ལ་བདག་མེད་པ་མ་བསྒོམས་ཤིང༌། བསམ་གྱིས་མི་ཁྱབ་པར་འགྱུར་བའི་ཤི་འཕོ་བ་མ་ཐོབ་པས། ཉན་ཐོས་རྣམས་ལ་ཐེག་པ་གསུམ་དུ་བསྟན་ཏེ། ཐེག་པ་གཅིག་ཏུ་མ་ཡིན་ནོ། །ཞེས་གསུངས་པའོ། །ཡང་ཁ་ཅིག་ཉན་ཐོས་ལ་ཆོས་ཀྱི་བདག་མེད་རྟོགས་པ་མེད་ཀྱང་རང་རྒྱལ་ལ་དེ་རྟོགས་པ་ཡོད་དེ། གཟུང་བ་བདེན་མེད་རྟོགས་པ་ཡོད་པའི་ཕྱིར་ཏེ། བསྟན་བཅོས་མངོན་རྟོགས་རྒྱན་ལས། གཟུང་དོན་རྟོག་པ་སྤོང་ཕྱིར་དང༌། །ཞེས་གསུངས་པའི་ཕྱིར་ཟེར་ན་མ་ཁྱབ་སྟེ། ལུང་དེའི་དགོངས་དོན་ཐམས་ཅད་མཁྱེན་པ་ཏཱ་ར་ནཱ་ཐས་འདི་ལྟར་གསུངས་ཏེ། ཤེར་འགྲེལ་སྔོན་མེད་ལེགས་བཤད་ལས། རང་རྒྱལ་གྱིས་གཟུང་བ་ཆོས་ཀྱི་བདག་མེད་མངོན་སུམ་རྟོགས་སམ་མ་རྟོགས་ཞེ་ན། མ་རྟོགས་ཞེས་བྱའོ། །འོ་ན་ཇི་སྐད་དུ། གཟུང་དོན་རྟོག་པ་སྤོང་ཕྱིར་དང༌། །འཛིན་པ་མི་སྤོང་ཕྱིར་དང་ནི། །རྟེན་གྱི་བསེ་རུ་ལྟ་བུའི་ལམ། །ཡང་དག་བསྡུས་པ་ཤེས་པར་བྱ། །ཞེས་གསུངས་པ་མ་ཡིན་ནམ་ཞེ་ན། རང་རྒྱལ་རྣམས་ནི་རྟེན་འབྲེལ་ཡུན་རིང་དུུ་གོམས་པ་ལས། འཇིག་རྟེན་མ་རིག་པའྀ་རྐྱེན་ཅན་དུ་ཤེས་པས་ན། དེའི་ཤུགས་ཀྱིས་གཟུང་བའི་རྣམ་རྟོག་ཤིན་ཏུ་ཉམས་སྨད་པ་ཡིན་པས། དེ་ལྟ་བུའི་རྟོགས་པ་དེ་ཡང་བྱང་ཆུབ་སེམས་དཔའི་ལམ་ཤེས་ཀྱི་རྟོགས་རིགས་ཀྱི་ནང་དུ་འདུས་ཏེ། དེ་ཡང་བྱང་ཆུབ་སེམས་དཔའ་སྐབས་འགའ་ཞིག་ཏུ་ཆོས་ཐམས་ཅད་སེམས་ཀྱི་སྣང་བ་ཙམ་དུ་རྟོགས་པས། ང་བདག་དང་ཕྱི་རོལ་གྱི་དོན་གདོད་ནས་མ་གྲུབ་པར་རྟོགས་ཤིང༌། དེ་ཉིད་ཀྱང་སྤྲོས་པ་ཐམས་ཅད་དང་གདོད་ནས་བྲལ་བའི་རྣམ་པ་ཅན་ཡིན་མོད་ཀྱི། འཛིན་པ་ལ་ཆེད་གཏད་ཤུགས་ཕྱུང་ནས་སྟོང་བ་སྒོམ་པ་མེད་པས། གཟུང་དོན་གྱི་རྟོག་པ་སྤོང༌། འཛིན་པའི་རྟོག་པ་མི་སྤོང་ཞེས་ཐ་སྙད་མཛད་པ་ཡིན་གྱི། འཛིན་པའི་མངོན་ཞེན་དང་བཅས་པ་ནི་མ་ཡིན་ནོ། དེ་ལྟ་བུའི་ཡེ་ཤེས་དེས། རང་རྒྱལ་གྱི་རྟོགས་པ་གང་ཡིན་པ་དེ། རིགས་མཐུན་གྱི་ཚུལ་གྱིསབསྡུས་པ་ཡིན་པས་རང་རྒྱལ་གྱི་ལམ་གྱི་མིང་བཏགས་པ་ཙམ་མོ། །ཞེས་ཞིབ་པར་གསུངས་པ་དེ་ལྟར་ཡིན་ལ། དེ་བཞིན་དུ་ཕར་ཕྱིན་མདོ་ལུགས་མ་ལས། བྱང་ཆུབ་སེམས་དཔའི་ལམ་ཤེས་པ་ཉིད་ཀྱི་ཤེར་ཕྱིན་ནི་དོན་དམ་པ་དང༌། གཟུགས་སོགས་སྟོང་ཞེས་བྱ་བར་གཟུང་བར་མི་རྟོག་པས་གཟུང་དོན་རྟོག་པ་སྤོང་ཕྱིར་དང༌། ཀུན་རྫོབ་ཏུ་ཐེག་པ་གསུམ་ལ་སོགས་པ་བསྟན་ཅིང་ཐོབ་པའི་སྒོ་ནས་བྱེད་པ་པོའི་ཆོས་སུ་འཛིན་པ་ཡོད་པས་འཛིན་པ་མི་སྤོང་ཕྱིར་དང་ནི། རྟེན་བྱང་ཆུབ་སེམས་དཔའི་ལམ་གྱིས་བསེ་རུ་ལྟ་བུའི་ལམ་མི་དམིགས་པའི་ཚུལ་གྱིས་ཡང་དག་པར་བསྡུས་པར་ཤེས་པར་བྱའོ། །ཞེས་དང༌། ཡང་འཇུག་པ་རང་འགྲེལ་ལས། དངོས་པོ་རང་བཞིན་མེད་པར་ཡོངས་སུ་ཤེས་པ་དང་བྲལ་བའི་ཕྱིར། འཇིག་རྟེན་པའི་འདོད་ཆགས་དང་བྲལ་བ་ལྟར་དེ་དག་ཀྱང་སེམས་དང་པོ་བསྐྱེད་པའི་བྱང་ཆུབ་སེམས་དཔས་ཀྱང་རང་གི་བློས་རྣམ་པར་དཔྱད་པས་ཀྱང་ཟིལ་གྱི་གནོན་པར་འགྱུར་ལ། ཞེས་གསུངས་པའི་ཕྱིར་རོ། །གཉིས་པ་ནི། ཉན་རང་དགྲ་བཅོམ་པ་ཆོས་ཅན། ཁམས་གསུམ་གྱི་ཕྲ་རྒྱས་མ་སྤངས་པར་ཐལ། སྟོང་ཉིད་མངོན་སུམ་དུ་རྟོགས་པའི་ཡེ་ཤེས་ལ་གོམས་པ་མེད་པའི་ཕྱིར། དཔེར་ན་ཕྱི་རོལ་བའི་དྲང་སྲོང་བཞིན། རང་འགྲེལ་ལས། ཕྱི་རོལ་པ་བཞིན་དུ་ཁམས་གསུམ་ན་སྤྱོད་པའི་ཕྲ་རྒྱས་ཐམས་ཅད་སྤངས་པར་ཡང་མི་འགྱུར་རོ། །ཞེས་སོ། །གསུམ་པ་ནི། ཉན་རང་དགྲ་བཅོམ་པ་ཆོས་ཅན། གང་ཟག་གི་བདག་མེད་མཚན་ཉིད་ཚང་བ་མ་རྟོགས་པར་ཐལ། གཟུགས་ལ་སོགས་པའི་ཕུང་པོ་ལ་བདེན་པར་དམིགས་པའི་བློ་ཕྱིན་ཅི་ལོག་གི་ཞེན་ཡུལ་སུན་ཅུང་ཟད་ཀྱང་མ་བྱུང་བའི་ཕྱིར། རྟགས་ཁས། ཁྱབ་སྟེ། བདག་ཕུང་པོ་ལས་ཡན་གར་བ་མེད་ཅིང་བདག་དང་གང་ཟག་གི་གདགས་གཞི་ཕུང་པོ་ལ་བདེན་འཛིན་གྱི་ཞེན་པ་ཅུང་ཟད་ཀྱང་མ་ཕྱུང་པའི་ཕྱིར། རང་འགྲེལ་ལས། གཟུགས་ལ་སོགས་པའི་རང་གི་ངོ་བོ་ལ་དམིགས་པས་ཕྱིན་ཅི་ལོག་ཏུ་གྱུར་བའི་ཕྱིར། གང་ཟག་གི་བདག་མེད་པ་རྟོགས་པར་མི་འགྱུར་ཏེ། བདག་ཏུ་གདགས་པའི་རྒྱུ་ཕུང་པོ་ལ་དམིགས་པའི་ཕྱིར། ཞེས་སོགས་གསུངས་སོ། །སྒྲུབ་བྱེད་ཀྱི་ལུང་དགུ་ནི། འཇུག་པ་རང་འགྲེལ་དུ་བཀོད་པའི་ལུང་ལྔ་དང༌། དེ་ལས་གཞན་ཚིག་གསལ་དུ་བཀོད་པའི་ལུང་བཞི་སྟེ་དགུ་བོ་འདི་ལྟ་སྟེ། དང་པོ་ནི་རིན་ཆེན་ཕྲེང་བ་ལས། ཇི་སྲིད་ཕུང་པོ་འཛིན་ཡོད་པ། །དེ་སྲིད་དེ་ལ་ངར་འཛིན་ཡོད། །ངར་འཛིན་ཡོད་ན་ཡང་ལས་ཏེ། །དེ་ལས་ཡང་ནི་སྐྱེ་བ་ཡིན། །ལམ་གསུམ་ཐོག་མཐའ་དབུས་མེད་པ། །འཁོར་བའི་དཀྱིལ་འཁོར་མགལ་མེ་ཡི། །དཀྱིལ་འཁོར་ལྟ་བུ་ཕན་ཚུན་གྱི། །རྒྱུ་ཅན་འདི་ནི་འཁོར་བར་འགྱུར། །དེ་ནི་རང་གཞན་གཉིས་ཀ་དང༌། །དུས་གསུམ་ཉིད་དུ་མ་མཐོང་ཕྱིར། །ངར་འཛིན་པ་ནི་ཟད་པར་འགྱུར། །དེ་ནས་ལས་དང་སྐྱེ་བ་ཡང༌། །ཞེས་དང༌། གཉིས་པ་ཡང་དེ་ལས། ཇི་ལྟར་མིག་ནི་འཁྲུལ་བ་ཡིས། །ཞེས་པ་ནས། གནས་མེད་ལེན་མེད་མངའ་ངན་འདའ། །ཞེས་པའི་བར་རཽ། །གསུམ་པ་ཡང་དེ་ལས། ཐེག་པ་ཆེ་ལས་སྐྱེ་མེད་བསྟན། །གཞན་གྱི་ཟད་པ་སྟོང་བ་ཉིད། །ཟད་དང་མི་སྐྱེ་དོན་དུ་ནི། །གཅིག་པ་དེ་ཕྱིར་བཟོད་པར་གྱིས། །ཞེས་པའོ། །བཞི་བ་ནི། ཉན་ཐོས་ལ་བསྟན་པའི་མདོ་ལས། གཟུགས་ནི་དབུ་བ་བརྡོས་པ་འདྲ། །ཚོར་བ་ཆུ་ཡི་ཆུ་བུར་འདྲ། །འདུ་ཤེས་སྨིག་རྒྱུ་ལྟ་བུ་སྟེ། །འདུ་བྱེད་རྣམས་ནི་ཆུ་ཤིང་བཞིན། །རྣམ་པ་ཤེས་པ་སྒྱུ་མ་ལྟར། །ཉི་མའི་གཉེན་གྱིས་བཀའ་སྩལ་ཏོ། །ཞེས་པའོ། །ལྔ་བ་ནི་རྩ་བ་ཤེས་རབ་ལས། བཅོམ་ལྡན་དངོས་དང་དངོས་མེད་པ། །མཁྱེན་པས་ཀ་ཏྱ་ཡ་ན་ཡི། །གདམས་ངག་ལས་ནི་ཡོད་པ་དང༌། མེད་པ་གཉིས་ཀའང་དགག་པ་མཛད། །ཅེས་པའོ། །ཀ་ཏྱ་ན་ལ་གདམས་པའི་མདོ་ནི་ལུང་ཕྲན་ཚེགས་ལས། ཀ་ཏྱ་ན་གང་གི་ཕྱིར་འཇིག་རྟེན་འདི་ནི་ཕལ་ཆེར་ཡོད་པ་ཉིད་དང་མེད་པ་ཉིད་ལ་མངོན་པར་ཞེན་ཏེ། དེས་ན་སྐྱེ་བ་དང་རྒ་བ་དང་ན་བ་དང་འཆི་བ་དང་མྱ་ངན་དང་སྨྲེ་སྔགས་འདོན་པ་དང༌། སྡུག་བསྔལ་བ་དང་ཡིད་མི་བདེ་བ་དང༌། འཁྲུག་པ་དག་ལས་ཡོངས་སུ་གྲོལ་བར་མི་འགྱུར། འགྲོ་བ་ལྔའི་འཁོར་བ་ལས་གྲོལ་བར་མི་འགྱུར། འཆི་བའི་སྡུག་བསྔལ་ལས་གྲོལ་བར་མི་འགྱུར། ཞེས་པའོ། །དྲུག་པ་ནི་ཡུམ་ལས། གཟུགས་ལ་སྤྱོད་ན་མཚན་མ་ལ་སྤྱོད་ཀྱི་ཤེར་ཕྱིན་ལ་སྤྱོད་པ་མ་ཡིན་ནོ། །ཞེས་དང༌། ཉན་ཐོས་ཀྱི་ས་ལ་སློབ་པར་འདོད་པས་ཀྱང་ཤེར་ཕྱིན་ལ་བསླབ་པར་བྱའོ། །ཞེས་སོགས་སོ། །བདུན་པ་ནི། སྡུད་པ་ལས། གང་དག་བདེ་གཤེགས་ཉན་ཐོས་འགྱུར་བར་བྱ་སྙམ་དང༌། །རང་སངས་རྒྱས་དང་དེ་བཞིན་ཆོས་རྒྱལ་འགྱུར་འདོད་པ། །བཟོད་པ་འདི་ལ་མ་བརྟེན་ཐོབ་པར་མི་ནུས་ཏེ། །དཔེར་ན་ཕ་རོལ་ཚུལ་རོལ་འགྲོ་ངོགས་མི་མཐོང་བཞིན། །ཞེས་པའོ། །བརྒྱད་པ་ནི་ལྷག་བསམ་བསྟན་པའི་མདོ་ལས། དཔེར་ན་མི་ལ་ལ་ཞིག་གིས་སྒྱུ་མ་མཁན་གྱི་རོལ་མོ་བྱུང་བའི་ཚེ། སྒྱུ་མ་མཁན་གྱིས་སྤྲུལ་བའི་བུད་མེད་མཐོང་ནས། འདོད་ཆགས་ཀྱི་སེམས་བསྐྱེད་དེ། དེ་འདོད་ཆགས་ཀྱིས་སེམས་བཀྲིས་ནས་འཁོར་གྱིས་འཇིགས་ཤིང་བག་ཚ་སྟེ། སྟན་ལས་ལངས་ནས་སོང་སྟེ་དེ་སོང་ནས་ཀྱང་བུད་མེད་དེ་ཉིད་ལ་མི་སྡུག་པར་ཡིད་ལ་བྱེད་ཅིང༌། མི་རྟག་པ་དང་སྡུག་བསྔལ་བ་དང༌། སྟོང་བ་དང་བདག་མེད་པར་ཡིད་ལ་བྱེད་ན། རིགས་ཀྱི་བུ་དེ་ཇི་སྙམ་དུ་སེམས། མི་དེ་ཡང་དག་པར་ཞུགས་པ་ཡིན་ནམ་འོན་ཏེ་ལོག་པར་ཞུགས་པ་ཡིན། གསོལ་བ། བཅོམ་ལྡན་འདས་གང་བུད་མེད་མ་མཆིས་པ་ལ་མི་སྡུག་པར་ཡིད་ལ་བྱེད་ཅིང༌། མི་རྟག་པ་དང་སྡུག་བསྔལ་བ་དང་སྟོང་བ་དང༌། བདག་མེད་པར་ཡིད་ལ་བགྱིད་པའི་མི་དེའི་མངོན་པར་བརྩོན་པ་དེ་ནི་ལོག་པ་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་འདི་ན་དགེ་སློང་དང་དགེ་སློང་མ་དང༌། དགེ་བསྙེན་དང་དགེ་བསྙེན་མ་ཁ་ཅིག་མ་སྐྱེས་ཤིང་མ་བྱུང་བའི་ཆོས་རྣམས་ལ་མི་སྡུག་པར་ཡིད་ལ་བྱེད་ཅིང༌། མི་རྟག་པ་དང་སྡུག་བསྔལ་བ་དང་སྟོང་བ་དང་བདག་མེད་པར་ཡིད་ལ་བྱེད་པ་གང་ཡིན་པ་དེ་དག་ཀྱང་དེ་དང་འདྲ་བར་བལྟ་བར་བྱའོ། །ང་ནི་མི་བླུན་པོ་དེ་དག་ལ་ལམ་སྒོམ་པ་ཡིན་ནོ་ཞེས་མི་སྨྲ་སྟེ་དེ་དག་ནི་ལོག་པར་ཞུགས་པ་ཞེས་བྱའོ། །ཞེས་པའོ། །དགུ་བ་ནི་བསམ་གཏན་དཔེ་མཁྱུད་ཀྱི་མདོ་ལས། འཇམ་དཔལ་འཕགས་པའི་བདེན་པ་ཡང་དག་པ་ཇི་ལྟ་བ་བཞིན་དུུ་མ་མཐོང་བའི་སེམས་ཅན་ཕྱིན་ཅི་ལོག་བཞིས་སེམས་ཕྱིན་ཅི་ལོག་ཏུ་གྱུར་པ་རྣམས་འཁོར་བ་ཡང་དག་པ་མ་ཡིན་པ་འདི་ལས་འདའ་བར་མི་འགྱུར་རོ། །ཞེས་གསུངས་པ་དེའོ། །གཞན་ཡང་འཇིག་རྟེན་ལས་འདས་པར་བསྟོད་པ་ལས། མཚན་མ་མེད་པར་མ་རྟོགས་པར། །ཁྱོད་ཀྱིས་ཐར་བ་མེད་པར་གསུངས། །དེ་ཕྱིར་ཁྱོད་ཀྱིས་ཐེག་ཆེན་ལས། །དེ་ནི་ཚང་བར་བསྟན་པ་ལགས། །ཞེས་པས་ཆོས་ཀྱི་བདག་མེད་མ་རྟོགས་ན་ཐར་བ་མི་ཐོབ་པར་བསྟན་མ་བསྟན་དཔྱད་པར་བྱའོ། །དྲི་བ་ཉེར་གསུམ་པ་ཡོངས་གྲུབ་སྟོང་གཞིར་བཟུང་ནས་སྟོང་ཉིད་གཏན་ལ་ཕབ་ཞེས་པའི་དོན་ཅི་ལྟར་ཡིན་ཞེས་པའོ། །ལན་ནི། དྲི་བ་དེའི་དོན་གོང་དུ་རྒྱས་ཤིང་རྒྱས་པར་བཤད་ཟིན་པ་དེ་ཡིན། དེ་མ་གཏོགས་དམིགས་བསལ་ཞུ་དགོས་པ་དང་ལྷག་སོང་བ་ཞིག་དྲན་གི་མི་འདུག ཡིན་ན་ཡང་ཁོང་གིས་དེ་རིང་དྲི་བ་གནང་འདུག་ན། ཡང་བསྐྱར་གྱི་ཚུལ་དུ་ཞུ་བ་ཡིན་ན་མདོ་སྡེ་དགོངས་པ་ངེས་འགྲེལ་གྱི་སྐབས་སུ་ངོ་བོ་ཉིད་དེ་ཁོ་ནས་ངོ་བོ་ཉིད་མ་མཆིས་པ་ཉིད་ཆོས་ལ་བདག་མ་མཆིས་པ་དེ་བཞིན་ཉིད་རྣམ་པར་དག་པའི་དམིགས་པ་གང་ལགས་པ་དེ་ནི་ཡོངས་སུ་གྲུབ་པའི་མཚན་ཉིད་ལགས་ཞེས་གསུངས་པ་རེད། དེའི་དོན་ངོ་བོ་ཉིད་དེ་ཁོ་ནས་ཞེས་གསུངས་བ་དེའི་གོང་ནས་ཀུན་བཏགས་གཞན་དབང་གཉིས་བཤད་ཟིན་ནས་ཀུན་བཏགས་གཞན་དབང་གཉིས་ཀྱི་ནང་ནས་ཀུན་བཏགས་དེ་རང་གི་མཚན་ཉིད་ངོ་བོ་ཉིད་མ་ཡིན་པ་དེ་དང་གཞན་དབང་ཡིན་ན་རྐྱེན་གཞན་གྱི་སྟོབས་ཀྱིས་བྱུང་བ་ཡིན་གྱི། བདག་ཉིད་ཀྱིས་སྐྱེ་བ་མ་ཡིན་པས་སྐྱེ་བ་ངོ་བོ་ཉིད་མེད་པ་ཡིན་པ་ལ་སོགས་པ་གསུངས་ནས། དེ་དག་རང་བཞིན་གྱིས་མ་གྲུབ་པ་དེ་གཏན་ལ་ཕབ་པའི་རྗེས་སུ་གཞན་དབང་ཀུན་བཏགས་གཉིས་གནས་ལུགས་མཐར་ཐུག་ཏུ་མ་གྲུབ། གནས་ལུགས་མཐར་ཐུག་ཏུ་གཞན་དབང་ཀུན་བཏགས་གཉིས་མ་གྲུབ་པ་དེས་སྟོང་གཞི་དེ་ཡོངས་གྲུབ་བཞག་ནས་དེ་གཉིས་ངོ་བོ་ཉིད་ཁོ་ནའི་ངོ་བོ་ཉིད་མ་མཆིས་པ་ཞེས་ཁོ་ནའི་རྣམ་བཅད་སྦྱར་བ་དེ་ཡང་ཡོངས་གྲུབ་དེ་གཞན་དབང་ཀུན་བཏགས་ཀྱིས་སྟོང་བ་མ་གཏོགས་ཡོངས་གྲུབ་ཁོ་རང་རང་གི་ངོ་བོ་བདེན་པས་མི་སྟོང་བ་ཡིན་པའི་རྒྱུ་མཚན་གྱིས་ངོ་བོ་ཉིད་ཁོ་ནས་ངོ་བོ་ཉིད་མ་མཆིས་པ་གསུངས་བ་དེ་ཡིན། ཆོས་ལ་བདག་མ་མཆིས་པ་ཞེས་པ་དེ་ཆོས་ཀྱི་བདག་ཏུ་སྒྲོ་བཏགས་པ་ནང་བཞིན་ཆོས་བདག་ཏུ་མ་གྲུབ་པ་དེ་ལ་ཆོས་ལ་བདག་མ་མཆིས་པ་གསུངས་བ་དང་དེ་ནས་ངོ་བོ་ཉིད་དེ་ཁོ་ནའི་ངོ་བོ་ཉིད་མ་མཆིས་པ་ཆོས་ལ་བདག་མ་མཆིས་པ་དེ་བཞིན་ཉིད་དེ་ནི་ཆོས་རྣམས་ཀྱི་གནས་ལུགས་དེ་ཁོ་ན་ཉིད་དེ་ཡིན་པར་གསུངས་བ་རེད། རྣམ་པར་དག་པའི་དམིགས་པ་གང་ཡིན་པ་དེ་འཕགས་པའི་མཉམ་བཞག་ཡེ་ཤེས་རྣམ་པར་དག་པ་བཞག་ནས། དེའི་དམིགས་པ་དེ་ཆོས་ཉིད་ཡོངས་གྲུབ་ཡིན་པར་གསུངས་བ་མ་གཏོགས་དེའི་སྐབས་སུ་ངོ་བོ་ཉིད་དེ་ཁོ་ནས་ངོ་བོ་ཉིད་མ་མཆིས་པ་ཟེར་བ་དང༌། ཆོས་ཀྱི་བདག་མེད་ཡིན་ན་ཆོས་ཀྱི་བདག་མེད་ཀྱིས་རབ་ཏུ་ཕྱེ་བ་ཡིན་ན་མེད་དགག་ཡིན་དགོས་པ་དེ་མདོ་སྡེ་དགོངས་བ་ངེས་འགྲེལ་ཁོ་རང་གི་ཚིག་ན་གསལ་ཁ་མེད་པ་མ་ཟད་མདོ་སྡེ་དགོངས་པ་ངེས་འགྲེལ་གྱི་འགྲེལ་བཤད་རྒྱ་ནག་གི་མཁན་པོ་ཝེན་ཚེག་གིས་མཛད་པ་དང་དགོངས་འགྲེལ་འགྲེལ་བ་བམ་པོ་ལྔ་བཅུ་པ་སོགས་མདོར་ན་དགོངས་འགྲེལ་ཀྱི་འགྲེལ་བ་གྲགས་ཆེ་བ་གསུམ་སོགས་ཐམས་ཅད་ཀྱི་སྐབས་སུ་མེད་དགག་ཡིན་པར་གསུངས་བའི་ཟུར་གཅིག་ཀྱང་མེད། དེ་བཞིན་དུ་རྒྱ་གར་འཕགས་པའི་གཞུང་ན་ཡོད་པ་མ་རེད་ཅེས་མདོར་མཚོན་པ་ཞིག་ཞུས་པ་དེ་ཡིན། དེར་མ་ཟད་མདོ་སྡེ་དགོངས་པ་ངེས་འགྲེལ་དེ་སེམས་ཙམ་མདོ་བཞིའི་ནང་ནས་གཅིག་རེད། དེ་ཡིན་ན་སེམས་ཙམ་མདོ་བཞི་སེམས་ཙམ་པ་དག་གིས་ཁས་ལེན་དགོས་པ་རེད། སེམས་ཙམ་པས་སྟོང་བ་ཙམ་དང་རང་འཛིན་རྟོག་པའི་ཞེན་གཞི་རང་མཚན་གྱིས་གྲུབ་པས་སྟོང་བའི་མེད་དགག་ཅིག་སེམས་ཙམ་པའི་ལུགས་ལ་དོན་དམ་བདེན་པ་ཡིན་ཞེས་པའི་གསལ་ཁ་ཞིག་སེམས་ཙམ་པ་རང་གི་བསྟན་བཅོས་གང་ན་གསལ་ཁ་མེད་པ་ཞིག་རེད་བསམ་གྱིན་ཡོད། རང་གིས་བསམ་ཚུལ་ཙམ་ཞུ་བ་དེ་ཡིན། དེ་མ་གཏོགས་པ་མཁས་པ་གཞན་གྱི་ལུགས་ལ་ཁོང་ཚོས་ལུང་དང་རིགས་པས་སྒྲུབ་བྱེད་འགྲོ་ལུགས་སོགས་གཞི་རྩ་བའི་ཆ་ནས་མི་འདྲ་བ་ཡོང་དུས། དེ་དག་གིས་དགོངས་པ་ངེས་འགྲེལ་གྱི་དོན་བཀྲལ་ཚུལ་མི་འདྲ་བ་ཆགས་འདུག ཡིན་ནའང་གཞན་སྟོང་དབུ་མ་ཆེན་མོའི་རང་ལུགས་ལས་བརྩམས་ཏེ་བཤད་པ་ཡིན་ན་དེ་འདྲའི་སྒོ་ནས་མཐའ་གཅིག་ཏུ་བཤད་ཐུབ་པ་དང་ལུང་རིགས་ཀྱི་སྒོ་ནས་མཐའ་དཔྱད་ཐུབ་པ་ཞིག་རེད་བསམ་གྱིན་ཡོད། དྲི་བ་ཉེར་བཞི་པ་ཀུན་གཞིའི་རྣམ་ཤེས་ས་བརྒྱད་པ་ནས་ལྡོག་པ་ཡིན་ན་དེ་ཕན་ཆད་ནས་སྒྲིབ་པ་ཡོད་པ་ཨེ་རེད་ཞེས་པའོ། །ལན་ནི། ཀུན་གཞིའི་རྣམ་པར་ཤེས་པ་དེ་ས་བརྒྱད་པའི་སྐབས་སུ་གནས་གྱུར་ཐོབ་པ་ཡིན། དེ་ནས་ཀུན་གཞི་རྣམ་པར་ཤེས་པའི་རྣམ་སྨིན་གྱི་ཆ་དེ་ལྡོག་གིན་ཡོད་པ་རེད། སྡུག་བདེན་ཡིན་པའི་ཆ་དེ་ཡང་ལྡོག་གིན་ཡོད་པ་རེད། ཡིན་ནའང་དེའི་རྫས་རྒྱུན་དེ་སངས་རྒྱས་སར་འགྲོ་བ་ཡིན། དེས་ན་ས་བརྒྱད་པའི་སྐབས་སུ་གནས་སྐབས་གནས་འགྱུར་ཐོབ་པ་མ་གཏོགས་མཐར་ཐུག་གི་གནས་འགྱུར་ཀུན་གཞིའི་རྣམ་ཤེས་མེ་ལོང་ཡེ་ཤེས་ཀྱི་ངོར་མ་གྱུར་བ་རེད། ས་བརྒྱད་པ་ཕན་ཆོད་དེའི་རྒྱུན་དུ་གྱུར་བའི་བརྒྱད་ཡིད་ཡོད་ཅིང༌། དེ་ལ་ཀུན་གཞིའི་རྣམ་ཤེས་རྣམ་སྨིན་ཞེས་ཐ་སྙད་མི་ཐོགས་པ་རེད། ཀུན་གཞིའི་རྣམ་སྨིན་ནི་རྣམ་སྨིན་ཡིན་དགོས་ལ་དེ་ཡང་སློབ་དཔོན་དབྱིག་གཉེན་གྱི་སུམ་ཅུ་བའི་སྐབས་སུ་དེ་ལ་ཀུན་གཞི་རྣམ་ཤེས་ནི། །རྣམ་སྨིན་ས་བོན་ཐམས་ཅད་པ། །གསུངས་པ་ལྟར་རྣམ་སྨིན་ཡིན་དགོས་པ་རེད། དེས་ན་ས་བརྒྱད་པ་ནས་ཉོན་སྒྲིབ་སྤངས་བར་འདོད་པའི་ལུགས་ཡིན་ན་ས་བརྒྱད་པ་ནས་ཀུན་གཞི་གནས་འགྱུར་ཐོབ་ཀྱིན་ཡོད་པ་རེད། ས་དང་པོ་ནས་ཉོན་སྒྲིབ་སྤངས་བར་འདོད་པའི་ལུགས་ལྟར་ཡིན་ན་ས་དང་པོའི་སྐབས་སུ་དེའི་རྣམ་སྨིན་གྱི་ཆ་དེ་ལྡོག་ནས་དེའི་དུས་སུ་ཀུན་གཞིའི་རྣམ་ཤེས་ཀྱི་མཚན་ཉིད་ལྡོག་ནས་དེའི་ངོ་བོའམ་དེའི་རྫས་རྒྱུན་དེ་ལྡོག་ཡོད་པ་མ་རེད། དེའི་ངོ་བོ་གཙོ་སེམས་ཡིན་ཞིང་དེ་མ་ལྡོག་པ་དེ་ཐམས་ཅད་མཁྱེན་པ་ཏཱ་ར་ནཱ་ཐའི་ཐེག་མཆོག་དབུ་མའི་རྩ་འགྲེལ་སྐབས་སུ་གསལ་བར་གསུང་གྱིན་ཡོད་པ་ནང་བཞིན་རེད། དེའི་རྒྱུ་མཚན་གྱིས་དག་པ་ས་གསུམ་གྱི་སྐབས་སུ་ཤེས་སྒྲིབ་ཡོད་པ་རེད། ཤེས་སྒྲིབ་ཀྱི་བག་ཆགས་འཇོག་སའི་གཞི་ནི་ཀུན་གཞིའི་རྣམ་ཤེས་ཀྱི་རྫས་རྒྱུན་དུ་གྱུར་བའི་བརྒྱད་ཡིད་ཀྱི་སྟེང་དུ་བཞག་ཆོག་པ་རེད་ཞུ་རྒྱུ་དེ་ཡིན། དེ་ཡང་རྒྱུན་མཐའི་སྐབས་སུ་བག་ཆགས་མ་ལུས་པ་ཡོངས་སུ་ཟད་ནས་རྫོགས་པའི་སངས་རྒྱས་ཀྱི་ངོ་བོར་གྱུར་བ་དེའི་ཚེ་གནས་འགྱུར་མཐར་ཐུག་ཐོབ་ནས་སློབ་དཔོན་ཙནྡྲ་གོ་མས།ཀུན་གཞིའི་རྣམ་ཤེས་གང་ཡིན་པ། །མེ་ལོང་ཡེ་ཤེས་ཉིད་གྱུར་པ། །དེ་ཡང་ཆོས་ཀྱི་དབྱིངས་ཀྱི་ནི། །ངོ་བོ་ཉིད་དུ་འགའ་ཞིག་འདོད། །ཅེས་ཀུན་གཞིའི་མཐར་ཐུག་གནས་འགྱུར་མེ་ལོང་ཡེ་ཤེས་ངོ་བོར་གནས་གྱུར་བ་རེད་གསུངས་ནས་ཀུན་གཞིའི་རྣམ་ཤེས་ཀྱི་རྫས་རྒྱུན་སངས་རྒྱས་ཀྱི་སར་འགྲོ་བར་མ་ཟད། དེའི་རྒྱུན་ནམ་རྫས་རྒྱུན་ཆད་པ་མེད་པར་ཁས་ལེན་ཐུབ་པ་ཞིག་ཏུ་ཆགས་འདུག་ཡོད། དེ་ལྟར་ཁས་ལེན་པ་མ་ཟད་ཀུན་གཞིའི་རྣམ་ཤེས་དེ་གང་ཟག་གི་མཚན་གཞིའི་རྣམ་ཤེས་ཡིན་པའི་རྒྱུ་མཚན་གྱིས་གང་ཟག་གི་རྒྱུན་ཆད་པ་ཡང་མེད། དེའི་རྒྱུན་ཆད་པ་ཡོད་ན་ལས་འབྲས་ཆུད་ཟོས་སུ་ཐལ་བའི་ཐལ་བ་སོགས་ཐལ་བ་མང་བོ་འབབ་ཀྱིན་ཡོད་པ་དེ་ནི་སྤྱིར་གཞུང་ལྟར་ཡིན་ནོ། །་ ་ དྲི་བ་ཉེར་ལྔ་པ་སློབ་དཔོན་ཀླུ་སྒྲུབ་མ་བྱུང་གོང་དུ་སེམས་ཙམ་པའི་སློབ་དཔོན་དང་སེམས་ཙམ་པའི་སྲོལ་འཛིན་དང་སེམས་ཙམ་པའི་སྲོལ་ཡོད་མེད་ཞེས་པའོ། །ལན་ནི། ཡང་སེམས་ཙམ་པའི་སློབ་དཔོན་དེ་དཔལ་མགོན་འཕགས་པ་ཀླུ་སྒྲུབ་མ་བྱུང་གོང་དུ་སེམས་ཙམ་པའི་སློབ་དཔོན་ཡོད་པ་དང༌། སེམས་ཙམ་པའི་སྲོལ་ཡོད་པ་དང་སྲོལ་འཛིན་ཡོད་པ་དེ་དཔལ་མགོན་འཕགས་པ་ཀླུ་སྒྲུབ་ཀྱིས་དབུ་མ་རྩ་བ་ཤེས་རབ་ལ་སོགས་པའི་ཕྱོགས་སྔ་མ་དེ་གཙོ་བོ་སེམས་ཙམ་པ་བྱས་ནས་བདེན་དངོས་སུ་གྲུབ་པར་འདོད་པ་སོགས་བཀག་ཡོད་པ་དེ་དབུ་མ་རྩ་བ་ཤེས་རབ་ཀྱི་གཞུང་ན་ཐོན་འདུག་ཡོད་ཞུ་རྒྱུ་དེ་ཡིན། དེར་མ་ཟད་སྤྱིར་བཏང་ཐོགས་མེད་སྐུ་མཆེད་སེམས་ཙམ་པའི་སློབ་དཔོན་ནམ་ཤིང་རྟའི་སྲོལ་འབྱེད་ཁས་ལེན་པའི་ལུགས་ཡིན་ནའང་སློབ་དཔོན་ཀླུ་སྒྲུབ་མ་བྱུང་གོང་དུ་སེམས་ཙམ་པའི་སློབ་དཔོན་ཡོད་པར་འདོད་མཁན་ཡང་ཡོད་ལ། དཔེར་ན་ཀུན་མཁྱེན་འཇམ་དབྱངས་བཞད་པ་ཁོང་གིས་ཀྱང་སངས་རྒྱས་ཞལ་བཞུགས་པའི་སྐབས་སུ་གྲུབ་མཐའ་སྨྲ་བ་བཞི་ཀ་ཡོད་པར་གསུངས་ཡོད་པའི་ཕྱིར་ན་དེའི་སྐབས་སུ་ཤིང་རྟའི་སྲོལ་འབྱེད་ཡོད་ན་ཡང་མི་ཆོག་པ་མེད་པ་ལྟ་བུ་ཞིག་རེད། རིགས་པའི་ལམ་ནས་བསམ་བློ་བཏང་ན་དེ་འདྲ་ཡིན། དེ་ཡང་ཐམས་ཅད་མཁྱེན་པ་ཏཱ་ར་ནཱ་ཐའི་ཆོས་འབྱུང་དང་དེ་བཞིན་དུ་ཐམས་ཅད་མཁྱེན་པའི་གསུང་རབ་མང་བོ་ལས་དཔལ་མགོན་འཕགས་པ་ཀླུ་སྒྲུབ་མ་བྱུང་བའི་སྔ་རོལ་དུ་སྔོན་གྱི་རྣལ་འབྱོར་སྤྱོད་པའི་སློབ་དཔོན་ཨ་བྷི་སྟར་ཀ་ལ་སོགས་པའི་སློབ་དཔོན་ལྔ་བརྒྱ་བྱུང་བའི་ཕྱིར་ཟེར་བ་དེ་སྔོན་རྒྱ་གར་འཕགས་པའི་ལོ་རྒྱུས་ཁུངས་ཐུབ་ནང་ན་ཡོད་པ་ཞིག་གསུངས་པ་མ་གཏོགས། དེ་དག་རྫུན་ཡིན་པ་དང་རྫུན་བཤད་དགོས་པ་ཞིག་མ་རེད་ཞུ་རྒྱུ་དེ་ཡིན།དེར་མ་ཟད་སེམས་ཙམ་པའི་སློབ་དཔོན་འཕགས་པ་ཐོགས་མེད་དེ་ས་གསུམ་བརྙེས་པ་ཡིན་པའི་རྒྱུ་མཚན་གྱིས་ས་གསུམ་པ་བ་ཡིན་ན་ས་དང་བོའི་སྐབས་སུ་དབུ་མའི་ལྟ་བ་མངོན་སུམ་དུ་རྟོགས་ཡོད་པར་གསུངས་ཡོད་པ་རེད། དེ་ལྟར་ཡིན་ན་ཆོས་ཉིད་མངོན་སུམ་དུ་རྟོགས་པ་ཞིག་ཡིན་དུས་དབུ་མའི་ལྟ་བ་མངོན་སུམ་དུ་རྟོགས་པའི་སེམས་ཙམ་པ་མེད་པ་དེ་ཕལ་ཆེར་མཁས་དབང་རྣམས་ལ་ཡོངས་གྲགས་ཞིག་རེད། གཞན་ཡང་འཕགས་པ་ཐོགས་མེད་ནི་ས་གསུམ་པ་ཡིན། དེ་ན་ས་གསུམ་པ་བརྙེས་ཡོད་དུས་ས་ལམ་མཐོན་པོ་ལ་གནས་པའི་གང་ཟག་ཅིག་ཆགས་ཚར་བ་རེད། དེ་ཡིན་དུས་ཁོ་རང་གི་རང་ལུགས་སམ་ལྟ་བ་མཐར་ཐུག་དེ་གཞན་སྟོང་གི་ལུགས་སུ་ཆགས་ཚར་བ་ཡིན། དེར་མ་ཟད་འཕགས་པ་ཐོགས་མེད་རང་ཉིད་ཀྱིས་མཛད་པའི་རྒྱུད་བླའི་འགྲེལ་བ་ཐོགས་འགྲེལ་སྐབས་སུ་གསལ་བར་གསུངས་པ་ལ་བརྟེན་ནས་ཀྱང་གོ་ཐུབ་ཀྱིན་འདུག ཡང་ས་སྡེ་ལྔ་སྡོམ་རྣམ་གཉིས་ལ་སོགས་པའི་སྐབས་སུ་སེམས་ཙམ་པའི་ལྟ་བ་ཞར་བྱུང་ཅུང་ཟད་གསུངས་ཡོད་པ་རེད། དེ་ཡང་རྣམ་འགྲེལ་སྐབས་སུ་ལུགས་བརྒྱ་གསུངས་བ་བཞིན་རེད། དཔེ་དེ་ལྟར་གྲུབ་སྟེ། སློབ་དཔོན་ཤཱཀྱ་བློའི་རྣམ་འགྲེལ་འགྲེལ་བཤད་སྐབས་སུ་རྣམ་འགྲེལ་ལུགས་བརྒྱ་ལྡན་པའི་རྣམ་པར་དབྱེ་ཞེས་གསུངས་སོ། །ལུགས་གཞན་གསུངས་བ་ཙམ་གྱིས་དེའི་རང་གཞུང་ཡིན་དགོས་པ་མ་རེད། དེ་བཞིན་དུ་སེམས་ཙམ་པའི་ལུགས་ཅུང་ཟད་བཤད་པ་ཙམ་གྱིས་སེམས་ཙམ་པའི་ལུགས་ཡིན་དགོས་པ་མ་རེད། རྒྱ་གར་འཕགས་པའི་ལོ་རྒྱུས་དབང་དུ་བྱས་ན་ཡང་ས་སྡེ་ལྔའི་རྗེས་སུ་འབྲང་བའི་སེམས་ཙམ་པ་དངོས་གནས་བ་ཞིག་མཐུན་སྣང་དུ་གྲུབ་པའི་མཁས་པ་གཅིག་ཀྱང་འཇོག་རྒྱུ་མེད་དོ། །དྲི་བ་ཉེར་དྲུག་པ་གཞན་སྟོང་གི་ལྟ་གྲུབ་དེ་འཕགས་ཡུལ་མཁས་པའི་གཞུང་ཡོད་མེད་ཡོད་ན་གཞན་སྟོང་ཞེས་པའི་བརྡ་ཆད་རྒྱ་གར་འཕགས་པའི་ཡུལ་ལ་ཡོད་མེད་ཞེས་པའོ། །ལན་ནི། རིན་ཆེན་སྒྲོན་མེ་ཟེར་བ་དེ་སློབ་དཔོན་ལེགས་ལྡན་འབྱེད་ཀྱི་གཞུང་ལུགས་ཡིན་པ་དེ་མཁས་པ་རྣམས་ཀྱིས་རྩོད་མེད་དུ་བཞེད་པ་དང་མཛད་བྱང་དང་མི་མཐུན་པ་མེད་པ་ཞིག་རེད། ཡིནའང་དེའི་ནང་ནས་ཚིག་གཅིག་རགས་པ་དེ་རྩོད་པའི་སྐབས་སུ་ཐལ་རང་གཉིས་རྣམ་འབྱེད་ཉམས་སུ་ལེན་པའི་དབུ་མ་ཕྲ་བ་གཞན་སྟོང་ཞེས་པ་བོད་ན་བསྒྱུར་འདུག དེ་ནང་བཞིན་དབུ་མ་རིན་ཆེན་སྒྲོན་མེའི་ནང་ན་ཚིག་ཅི་བཞིན་པ་ཡོད་པ་མ་རེད། དེ་དང་དོན་འདྲ་བོ་ཞིག དེང་སང་ སྡེ་དགེའི་བསྟན་འགྱུར་ལ་སོགས་པའི་ཁྲོད་ན་བཞུག་པས་རྒྱ་གཞུང་རང་ཡོད་པ་ཡིན་ལ། སྤྱིར་གཞན་སྟོང་གི་ལྟ་གྲུབ་ཡོད་མེད་དེ་གཞན་སྟོང་བཤད་སྲོལ་ཡོད་མེད་ཙམ་ཞིག་བརྟེན་དགོས་པ་མ་རེད། གཞན་སྟོང་དབུ་མ་ཆེན་མོའི་ལྟ་གྲུབ་ཟེར་བ་དེ་གང་འདྲ་ཞིག་ལ་ཟེར་བ་ཡིན་ཟེར་ན། དཔེར་ན་རྒྱུད་བླ་མའི་སྐབས་སུ་རྣམ་དབྱེར་བཅས་པའི་མཚན་ཉིད་ཅན། །གློ་བུར་དག་གིས་ཁམས་སྟོང་གི། །རྣམ་དབྱེར་མེད་པའི་མཚན་ཉིད་ཅན། །བླ་མེད་ཆོས་ཀྱིས་སྟོང་མ་ཡིན། །ཞེས་གསུངས་བ་ལྟར་རང་གི་ངོ་བོ་ཀུན་རྫོབ་གློ་བུར་གྱི་སྤྲོས་པས་སྟོང་ཞིང་དོན་དམ་པའི་ཡོན་ཏན་རྣམས་ཀྱིས་མི་སྟོང་བ་གཏན་ལ་ཕབ་པ་དེ་ལས་ལྷག་པའི་གཞན་སྟོང་དབུ་མ་ཆེན་མོའི་ལྟ་གྲུབ་ཅིག་རྒྱ་གར་འཕགས་པའི་ཡུལ་ལ་མེད། བོད་ན་ཡང་མེད། དེར་མ་ཟད་གཞན་སྟོང་ཞེས་པའི་ཐ་སྙད་ཡོད་མེད་བསམ་བློ་བཏང་ན་ཀུན་མཁྱེན་ཕྱོགས་རྒྱལ་བའི་གཞི་ལམ་འབྲས་གསུམ་ཡང་དག་དོན་གསལ་སྐབས་སུ་སྟོང་ཉིད་བཅུ་བདུན་བཅོ་བརྒྱད་དམ་བཅུ་དྲུག་གསུངས་བའི་སྐབས་སུ་རང་གི་ངོ་བོ་སྟོང་བ་ཉིད་དང་གཞན་གྱི་ངོ་བོ་སྟོང་བ་ཉིད་ཅེས་པའི་སྐབས་སུ་གཞན་གྱི་ངོ་བོ་ཉིད་ཅེས་པ་ལས་ལྷག་པའི་གཞན་སྟོང་ཞེས་པའི་བརྡ་ཆད་རྒྱ་གར་འཕགས་པའི་ཡུལ་ན་ཡང་ཡོད་པ་མིན་ཞེས་གསུངས་པ་བཞིན། སྐད་དོད་ཀྱི་དབང་དུ་བྱས་ན་དེ་ལས་གཞན་ཞིག་ཡོད་པ་མ་རེད། དེ་གཉིས་སྐད་དོད་གཅིག་པ་ཆགས་འདུག་ཡོད་ནི་རེད། རང་གི་ངོ་བོ་སྟོང་བ་ཉིད་ཅེས་པའི་སྐབས་སུ་རང་སྟོང་འཆད་ཚུལ་ཡོད་པ་དང༌། གཞན་གྱི་ངོ་བོ་ཉིད་སྟོང་བ་ཉིད་ཅེས་པའི་གཞན་སྟོང་འཆད་ཚུལ་ཞིག་ཡོད་པ་རེད། དེ་ནང་བཞིན་མ་ནོར་བ་དེ་བཞིན་ཉིད་དང་གཞན་མ་ཡིན་པའི་དེ་བཞིན་ཉིད་ཟེར་བ་སོགས་ཀྱིས་ཀྱང་གཞན་སྟོང་བསྟན་ཡོད་པ་རེད། དེ་ནང་བཞིན་དབུས་མཐའ་རྣམ་འབྱེད་ལས། གང་ཟག་དང་ནི་ཆོས་རྣམས་ཀྱིས། །དངོས་པོ་མེད་འདིར་སྟོང་བ་ཉིད། །དེ་དངོས་མེད་པའི་དངོས་ཡོད་པ། །དེ་ནི་དེ་ལས་སྟོང་ཉིད་གཞན། །ཞེས་པའི་སྐབས་སུ་ཡང་ཐ་སྙད་གསལ་བའི་སྒོ་ནས་གཞན་སྟོང་བསྟན་ཡོད་པ་རེད། སྤྱི་བཏང་ཐ་སྙད་དང་བརྡ་ཆད་ཟེར་བ་དེ་གཞུང་ལུགས་སོ་སོའི་དབང་གིས་ཕར་བརྡ་ཆད་སྦྱར་བ་མ་གཏོགས་མིང་གི་བརྗོད་བྱ་རང་མཚན་དུ་གྲུབ་པ་མེད་པ་དེ་འཕགས་པ་ཐོགས་མེད་ཀྱིས་བསྡུ་བའི་སྐབས་སུ་ཡང་མིང་གི་སྔ་རོལ་བློ་མེད་ཕྱིར། །མིང་བའི་ཕྱིར་དང་མ་འདྲེས་ཕྱིར། །ཞེས་གསུངས་པ་ལ་སོགས་པའི་སྒོ་ནས་མིང་གི་བརྗོད་གཞིར་རང་མཚན་གྱིས་མ་གྲུབ་པ་དེ་ཡང་དེ་འདྲའི་སྟེང་ནས་ཤེས་ཐུབ་པ་ཞིག་རེད་ཅེས་ཞུ་རྒྱུ་དེ་ཡིན། དཔེར་ན་རང་གི་ངོ་བོ་སྟོང་བ་ཉིད་གཞན་གྱི་ངོ་བོ་སྟོང་བ་ཉིད་ཅེས་པས་རང་སྟོང་གཞན་སྟོང་གིས་བརྡ་ཆད་བྱུང་བ་མ་ཡིན་ན་དཔེར་ན་རང་སྟོང་ཅེས་པའི་བརྡ་ཆད་ཀྱང་རྒྱ་གར་འཕགས་པའི་གཞུང་ལུགས་གང་ན་འདུག་ཅེས་ཕར་དྲི་བ་ཞིག་སླེབ་འགྲོ་བ་ཡིན། དེའི་རྒྱུ་མཚན་གྱིས་ཚིག་ལ་མི་རྟོན་དོན་ལ་རྟོན་པ་ཞེས་པ་ལྟར་དུ་དོན་སྟེང་ནས་བསམ་བློ་བཏང་རྒྱུ་ཧ་ཅང་གལ་ཆེན་པོ་རེད་ཞུ་རྒྱུ་དེ་ཡིན། དྲི་བ་ཉེར་བདུན་པ་བདག་འཛིན་འཁོར་རྩ་ཡིན་མིན་ཞེས་པའོ། །ལན་ནི། གཞན་སྟོང་དབུ་མ་ཆེན་པོའི་རང་ལུགས་ལས་བརྩམས་ཏེ་བཤད་པ་ཡིན་ན་ཡང་བདག་འཛིན་ནི་འཁོར་བའི་རྩ་བ་ཡིན་ལ། བདག་འཛིན་གྱི་ཞེན་ཡུལ་མེད་པ་མ་རྟོགས་ན་འཁོར་བ་སྤངས་ཚུལ་མེད་པ་ཞིག་རེད། དེ་མེད་ན་རང་ལུགས་ལ་འཁོར་བ་མཐའ་ཅན་ཁས་ལེན་དགོས་པར་འགྱུར་ལ། དེ་ལྟར་མིན་པ་ནི་ཉ་ཊཱིཀ་ལས། འགྲེལ་ཆེན་གྱི་ཁྱད་མཚན་ཐད་དུ། ཁ་ཅིག་ན་རེ། གང་འདི་སངས་རྒྱས་ཀྱི་རིགས་ནི་ཐོག་མ་མེད་པ་ཡིན་པའམ་སངས་རྒྱས་རེ་རེ་འབྱུང་བ་ན་སེམས་ཅན་གྲངས་མེད་པ་གཅིག་ཡོངས་སུ་མྱ་ངན་ལས་འདའ་མོད་ཀྱི་དེ་ལྟ་ན་ཡང་འཁོར་བ་ལ་ཟད་པ་མེད་པས་མཐའ་ཡས་པའི་ཕྱིར་ནམ་མཁའ་དང་འདྲ་སྟེ་རི་བོ་ལ་སོགས་པའི་སྒྲིབ་གཡོགས་དུ་མ་ཡོད་ན་ཡང་ནམ་མཁའ་ཡོངས་སུ་ཟད་པ་མེད་དོ་ཞེས་ཟེར་རོ་ཞེས་སོ། །དེར་མཐའ་ཡོད་ཀྱི་ལུགས་ཀྱང་བཀོད་པ་ནི་སྔར་ཨ་བྷ་ཡའི་སྦྱོར་ངག་ལྟར་ཡོད་དོ། །གལ་ཏེ་མཐའ་ཡོད་ན་སངས་རྒྱས་ཀྱི་འཕྲིན་ལས་རྒྱུན་ཆད་པ་སྲིད་པར་འགྱུར་རོ། །མཐའ་ཡོད་བཤད་པ་ནི་བྱེ་བྲག་འགའ་ལ་དགོངས་ལ་སངས་རྒྱས་རེ་རེས་སེམས་ཅན་གྲངས་མེད་སྒྲོལ་ཡང་སངས་རྒྱས་འབྱུང་བ་ཨུ་དུམ་ཝ་རའི་མེ་ཏོག་ལྟར་དཀོན་པས་ཟད་མི་ནུས་སོ། །མདོ་ཀུན་བཏུས་འགྲེལ་བར། བྲི་བ་དང་གང་བ་མེད་པ་ནི་སེམས་ཅན་གྱི་ཁམས་མི་ཟད་པའི་ཕྱིར་ལ། མི་ཟད་པ་ཡང་སྤྱིའི་དབང་དུ་བྱས་པའི་ཕྱིར་ཏེ། སོ་སོའི་དབང་དུ་བྱས་ནས་གྲོལ་བའི་ཕྱིར་ཟད་པ་ཁོ་ནའོ། །སྤྱི་ནི་སོ་སོ་བ་འདུས་པ་མིན་ནམ། སོ་སོར་གྲོལ་བ་ཉིད་ཀྱིས་སྤྱི་ཅི་ལྟར་མི་གྲོལ། གང་ཞིག་སྣོན་པ་མེད་ལ་འབྲི་བ་ཡོད་པ་དེ་ནི་ཟད་པའི་ཆོས་ཅན་ཏེ།དཔེར་ན་འབྲུའི་ཕུང་བོ་ལྟ་བུ་ཞེ་ན། མ་ཡིན་ཏེ་རིས་སུ་ཆད་པ་མེད་པའི་ཕྱིར་དཔེ་འདྲ་བ་མིན་ནོ། །གང་ཞིག་ཕ་མཐའ་ཡོད་པ་དེ་ནི་ཟད་པར་རིགས་པ་ལས། སེམས་ཅན་གྱི་ཁམས་ནི་ནམ་མཁའི་ཁམས་དང་མཉམ་པས་ཕ་མཐའ་མེད་པས་ཅི་ལྟར་ཟད་པར་རིགས་ཞེས་ཤཱནྟིས་སོ། །དེ་ལྟར་གཉིས་ལས་སྤྱིར་མཐའ་མེད་བྱེ་བྲག་འགའ་ལ་མཐའ་ཡོད་པ་འཐད་དེ། མ་རིག་འཁྲུལ་འཁོར་འདི་ནི་ཟད་མེད་འཕེལ་བ་མེད། །ཅེས་སྡུད་པ་དང༌། ཐོག་མ་དང་ཐ་མ་མེད་པའི་སྟོང་གཞི་འཁོར་བ་ལ་བཤད་པ་ལ་སོགས་པ་མཐའ་ཡས་སོ། །མང་བོ་གྲོལ་ཡང་འཁོར་བ་ལ་བྲི་གང་མེད་དེ་རྒྱ་མཚོ་ལ་རྩྭ་རྩེས་ཆུ་འགའ་གཏོར་ཡང་བྲི་གང་མེད་པ་དང་ནམ་མཁའ་ལ་འདོམས་ཀྱིས་གཅལ་ཡང་བྲི་གང་མེད་པ་བཞིན་ཞེས་གསུངས་སོ། །གལ་ཏེ་རྒྱས་པའི་རིགས་ཡོད་ཐམས་ཅད་སངས་རྒྱས་འཐོབ་ན། དགོངས་འགྲེལ་ལས། ཉན་ཐོས་ཀྱི་རིགས་ཀྱི་གང་ཟག་ཞི་བར་བགྲོད་པ་གཅིག་པུ་བ་ནི་སངས་རྒྱས་ཐམས་ཅད་བརྩོན་པ་དང་ལྡན་པར་གྱུར་ཀྱང་བྱང་ཆུབ་ཀྱི་སྙིང་བོ་ལ་བཞག་སྟེ་བླ་མེད་རྫོགས་ཆུབ་ཐོབ་པར་བྱ་བར་མི་ནུས་སོ། །ཞེས་པ་དང་འགལ་ཞེ་ན། དེ་ནི་རེ་ཤིག་པ་ལ་དགོངས་ཀྱི་མཐར་ཐུག་སངས་རྒྱས་སུ་འགྱུར་ཏེ། ལང་གཤེགས་ལས། བློ་གྲོས་ཆེན་པོ་ཉན་ཐོས་ཀྱི་ཐེག་པ་བ་རྣམས་ཉན་ཐོས་ཀྱི་ཐེག་པ་ལས་གྲོལ་བ་མིན་གྱི་འོན་ཀྱང་དེ་དག་ནི་ཐེག་ཆེན་པའི་མཐར་ཐུག་པ་ཡིན་ནོ། །ཞེས་སོ། །བྱང་ཆུབ་སེམས་འགྲེལ་ལས། བྱང་ཆུབ་དམ་པ་ལྷག་བཅས་ལྷག་མེད་གཉིས་ཐོབ་ནས། །སྲིད་པས་སྐྲག་ཡིད་དེ་དག་ནི། །ཚེ་ཟད་ལ་དགའ་མྱ་ངན་ལས། །འདས་ཐོབ་འདུ་ཤེས་ཅན་དུ་འགྱུར། །དེ་ལ་མྱ་ངན་འདས་ཡོད་མིན། །འོན་ཀྱང་སྲིད་གསུམ་ཁམས་སུ་ནི། །སྐྱེ་བའང་དེ་ལ་ཡོད་མ་ཡིན། །ཟག་མེད་དབྱིངས་གནས་དེ་དག་ཀྱང༌། །མི་ཤེས་ཉོན་མོངས་མིན་སྤང་ཕྱིར། །ཕྱིས་ནི་སངས་རྒྱས་ཀྱིས་བསྐུལ་ནས། །བྱང་ཆུབ་ཏུ་ནི་ཚོགས་བསགས་ཏེ། །དེ་ཡང་འཇིག་རྟེན་འདྲེན་པར་འགྱུར། །ཞེས་སོ། །ཞེས་གསུངས་པའི་ཕྱིར་དང༌། རྒྱན་གྱི་ས་འགྲེལ་ལས། རྒྱུ་དང་བྲལ་ཞེས་པ་ཀུན་གཞིའི་རྣམ་པར་ཤེས་པ་ལ་ཐར་པ་ཆ་མཐུན་གྱི་དགེ་བའི་བག་ཆགས་མ་བཞག་པས་རྒྱས་འགྱུར་གྱི་རིགས་ཆད་ནས་འཁོར་བ་མཐའ་མེད་པར་གནས་པ་རྣམས་སོ། །ཞེས་དང༌། རང་བཞིན་གྱི་རིགས་ཆད་པ་ནི་མི་སྲིད་ཅིང་འཁོར་བ་མཐའ་མེད་དུ་འདོད་པའི་ལུགས་ལ་རྒྱས་འགྱུར་གྱི་རིགས་ཆད་ཡོད་ལ། མཐའ་ཅན་དུ་འདོད་པའི་ལུགས་ལ་རྒྱས་འགྱུར་གྱི་རིགས་ཆད་ཀྱང་མེད་པར་ཤེས་པར་བྱའོ། །ཞེས་སོ། །ཡང་རང་ལུགས་ལ་མཚོན་ན་གང་ཟག་བདག་མེད་བསྒོམ་པ་ཡོད་མེད་ལས། །སྲིད་ལས་གྲོལ་བ་ཡོད་མེད་རྗེས་སུ་དཔོག །ཅེས་གསུངས་དུས་ངེས་པར་དུ་གང་ཟག་གི་བདག་འཛིན་གྱི་ཞེན་ཡུལ་མེད་པར་རྟོགས་དགོས་པ་རེད། དེ་ཡང་དཔལ་ཆོས་ཀྱི་གྲགས་པའི་ཚད་མ་རྣམ་འགྲེལ་ལས། བདག་ཡོད་ན་ནི་གཞན་དུ་ཤེས། །བདག་གཞན་ཆ་ལས་འཛིན་དང་སྡང༌། །འདི་དག་་དང་ནི་ཡོངས་འབྲེལ་ལས། །ཉེས་པ་ཐམས་ཅད་འབྱུང་བར་འགྱུར། །ཞེས་དང༌། དབུ་མ་འཇུག་པའི་རྩ་བ་ལས། ཉོན་མོངས་སྐྱོན་རྣམས་མ་ལུས་འཇིག་ཚོགས་ལ། །ལྟ་ལས་བྱུང་བར་བློ་ཡིས་མཐོང་འགྱུར་ཞིང༌། །ཞེས་དང༌། དབུ་མ་འཇུག་པའི་རང་འགྲེལ་ལས།ཉོན་མོངས་པ་རྣམས་དང་སྐྱོན་རྣམས་སོ། །དེ་ལ་ཉོན་མོངས་པ་རྣམས་ནི་འདོད་ཆགས་ལ་སོགས་པ་རྣམས་སོ། །སྐྱོན་རྣམས་ནི་སྐྱེ་བ་དང་རྒ་བ་དང་ན་བ་དང་འཆི་བ་དང་མྱ་ངན་ལ་སོགས་པ་དག་གོ །དེ་དག་ནི་མ་ལུས་པར་འཇིས་ཚོགས་ལ་ལྟ་བ་ལས་བྱུང་སྟེ། ཞེས་དང༌། མདོ་ལས། འཇིག་ཚོགས་ལ་ལྟ་བའི་རྩ་བ་ཅན་འཇིག་ཚོགས་ལ་ལྟ་བའི་རྒྱུ་ཅན། འཇིག་ཚོགས་ལ་ལྟ་བའི་ཀུན་འབྱུང་བ་ཅན་དག་གོ །ཞེས་གསུངས་པ་རེད། ཡིན་ན་ཡང་དཔེར་ན་ཆོས་ཉིད་མངོན་སུམ་དུ་རྟོགས་པའི་བློས་གང་ཟག་བདག་དང་ཆོས་ཀྱི་བདག་ལ་སོགས་པ་སྤྲོས་པ་ཐམས་ཅད་ཀྱིས་སྟོང་བ་དེ་རྟོགས་ཀྱིན་ཡོད་ལ། རེད་དེ་ཆོས་ཉིད་རྟོགས་པའི་རྣམ་པར་མི་རྟོག་པའི་ཡེ་ཤེས་དེས་སྟོང་བའི་མེད་དགག་ཙམ་དེ་རྟོགས་ཀྱིན་མེད་ལ། མེད་ནའང་གང་ཟག་གི་བདག་སོགས་ཀྱིས་སྟོང་བའི་ཆོས་ཉིད་དེ་རྟོགས་དུས་དེ་ཡང་རྟོགས་དགོས་ལ། དཔེར་ན་འཇིག་རྟེན་གྱིས་གོ་སླ་བའི་དཔེར་སྦྱར་ན་བུམ་པ་མེད་པའི་ས་ཕྱོགས་རྟོགས་པའི་བློ་དེས་བུམ་པ་མེད་པ་དེ་ཤུགས་ལ་རྟོགས་དགོས་ཀྱིན་ཡོད་ལ་དེ་ནང་བཞིན་གང་ཟག་གི་བདག་མེད་སོགས་ཀྱིས་སྟོང་བའི་ཆོས་ཉིད་རྟོགས་དུས་བདག་འཛིན་གྱི་ཞེན་ཡུལ་མེད་པ་རྟོགས་དགོས་པ་རེད། དེས་ན་བདག་འཛིན་གྱི་ཞེན་ཡུལ་མེད་པར་རྟོགས་པ་ལ་བདག་མེད་དངོས་སུ་སྣང་དགོས་པའི་རྒྱུ་མཚན་གང་ཡང་ཡོད་པ་མིན་ལ། རང་གིས་བདག་འཛིན་གྱི་ཞེན་ཡུལ་མེད་པར་རྟོགས་དུས་བདག་འཛིན་ལ་གནོད་ཐུབ་པ་རེད། དེ་ཡང་ཚད་མ་རྣམ་འགྲེལ་ལས། འདི་ཡུལ་སུན་བྱུང་མེད་པ་ནི། །དེ་སྤངས་བ་ནི་ནུས་མ་ཡིན། །ཞེས་དེའི་ཞེན་ཡུལ་གྱིས་དབེན་པ་ལ་འཇུག་དགོས་ནི་རེད། དེའི་སྟེང་ནས་གཞུང་ལུགས་རྣམས་ཀྱི་སྐབས་སུ་གསུངས་པས་རིགས་པ་ཕྲ་ཞིབ་མང་བོ་ཞིག་བཤད་དགོས་ལ། དཔེར་ན་གང་ཟག་བདག་འཛིན་སྤངས་བ་ལ་གང་ཟག་བདག་འཛིན་གྱི་ཞེན་ཡུལ་མེད་པར་རྟོགས་དགོས་མིན་ཟེར་ན། སྤྱིར་བཏང་རང་རྒྱུད་ལྡན་གྱི་གང་ཟག་ལ་བསམ་བློ་བཏང་ན་དེ་དགོས་རྒྱུ་རེད་མ་གཏོགས་སྤྱིར་བཏང་ཆོས་ཀྱི་བདག་མེད་རྟོགས་པའི་རྒྱུན་མཐའི་ཡེ་ཤེས་ཀྱིས་དཔེར་ན་ཉོན་མོངས་བའི་སྒྲིབ་པ་དང་ཤེས་བྱའི་སྒྲིབ་པ་གཉིས་ཅིག་ཆར་སྤངས་བའི་མདོ་ཕར་ཕྱིན་ཐེག་པའི་ལུགས་འཕགས་སེང་གི་ལུགས་ལྟ་བུ་ལ་སྦྱར་བ་ཡིན་ན་ཡང་ཆོས་ཀྱི་བདག་མེད་མངོན་སུམ་དུ་རྟོགས་ཡོད་པ་རེད། རྒྱུན་མཐའི་བར་ཆད་མེད་ལམ་གྱིས་གང་ཟག་བདག་མེད་མངོན་སུམ་དུ་རྟོགས་ཡོད་པ་མ་རེད་དེ་གང་ཟག་བདག་འཛིན་གྱི་རྩ་བ་དེ་ཆོས་ཀྱི་བདག་འཛིན་ལ་ཐུགས་ཡོད་པའི་རྒྱུ་མཚན་གྱིས་དེའི་རྩ་བ་སྤངས་ཡོང་དུས་གང་ཟག་བདག་འཛིན་ཡང་སྤངས་ཐུབ་ཡོད་པ་རེད། དེ་ནང་བཞིན་ཉན་ཐོས་བར་ཆད་མེད་ལམ་དང་ཐེག་ཆེན་བར་ཆད་མེད་ལམ་སོགས་ཀྱིས་བདག་མེད་རྟོགས་ཡོད་པ་ཡིན་ལ། ཡིན་ནའང་འདོད་ཆགས་ཞེ་སྡང་ལ་སོགས་པའི་ཞེན་ཡུལ་མེད་པ་དེ་བར་ཆད་མེད་ལམ་གྱིས་རྟོགས་ཡོད་པ་མ་རེད། ཡིན་ནའང་འདོད་ཆགས་ཞེ་སྡང་གཏི་མུག་སོགས་ཀྱི་རྩ་བ་བདག་འཛིན་མ་རིག་པ་ཆགས་འདུག་ཡོད་པ་ཡིན་ལ། དེ་ལྟར་ཡིན་ན་དེའི་ཞེན་ཡུལ་མེད་པར་རྟོགས་པའི་རྒྱུ་མཚན་གྱིས་དེ་སྤངས་འགྲོ་དུས་འདོད་ཆགས་སོགས་ཀྱང་སྤང་ཐུབ་པ་རེད། དེ་ཡང་དཔལ་ཆོས་ཀྱི་གྲགས་པའི་ཚད་མ་རྣམ་འགྲེལ་སྐབས་སུ། གནོད་བྱ་གནོད་བྱེད་ངོ་བོ་ཕྱིར། །འདི་ནི་སྒྲོ་འདོགས་དབེན་པ་ལ། །འཇུག་ཅེས་བྱ་བ་ཤེས་པ་ཡིན། །ཞེས་གསུངས་པ་ལ་བརྟེན་ནས་ཤེས་ཐུབ་པ་ཅིག་དང་ཕྱོགས་གཅིག་ལ་བསམ་བློ་བཏང་ན་དེ་ལྟ་བུ་ཞིག་རེད། ཡང་ཅིག་བཤད་ན་མཉམ་བཞག་ལ་ཟློ་བའི་སྐབས་སུ་ཡང་དཔྱད་སྒོམ་དང་འཇོག་སྒོམ་གཉིས་ཀྱི་ནང་ནས་འཇོག་སྒོམ་བྱེད་པའི་སྐབས་དེར་སྤྲོས་པ་ཐམས་ཅད་དང་བྲལ་བའི་འོད་གསལ་བའི་སྟེང་དུ་མ་བཅོས་སོ་མ་རང་བཞིན་ལྷུན་གྲུབ་ཏུ་མཉམ་པར་བཞག་པའི་སྐབས་དེར་རྣམ་རྟོག་གི་སྤྲོས་པ་ཐམས་ཅད་དང་བྲལ་བ་རེད། རྣམ་རྟོག་དགག་དུས་བདག་འཛིན་ཡང་དགག་འགྲོ་པ་རེད། བདག་འཛིན་ཡང་རྣམ་རྟོག་གི་བྱེ་བྲག་ཅིག་ཡིན་པས་སྤྱི་ཁེགས་ན་བྱེ་བྲག་ཀྱང་ཁེགས་དགོས་པ་ཞིག་ཆགས་འདུག་ཡོད་པ་རེད། དཔེར་ན་གང་ཟག་གི་རྒྱུད་ན་ཉོན་མོངས་ཁེགས་ཡོང་དུས་ཉོན་མོངས་བའི་འདོད་ཆགས་སོགས་ཀྱང་ཁེགས་འགྲོ་བ་བཞིན་རྣམ་རྟོག་ཁེགས་དུས་འདོད་ཆགས་སོགས་ཀྱང་ཁེགས་འགྲོ་བ་རེད། དེ་ཡང་རྣམ་པར་རྟོག་པ་ཁེགས་ལུགས་ཁེགས་སྟངས་དེ་ཡང་སྤྲོས་བྲལ་མཉམ་པར་བཞག་ཡོང་དུས་སྤྲོས་པ་ལ་སོགས་པའི་ཞེན་འཛིན་གྱི་ཞེན་ཡུལ་མེད་པར་རྟོགས་པའི་སྟེང་དུ་མཉམ་བཞག་ལ་ཟློ་བའི་སྐབས་དེར་སྤྲོས་པ་ཐམས་ཅད་དང་བྲལ་བའི་དབྱིངས་ལ་མཉམ་པར་བཞག་དུས་སྤྲོས་པ་དང་བཅས་པར་འཛིན་པའི་འཛིན་པ་དེའི་ཞེན་ཡུལ་མེད་པར་རྟོགས་ཚར་བ་ཞིག་རེད། ཡང་ཟབ་ལམ་རྡོ་རྗེའི་རྣལ་འབྱོར་ཡན་ལག་དྲུག་བསྒོམས་པའི་སྐབས་དེར་ཡང་སྤྲོས་བྲལ་རྣམ་པར་མི་རྟོག་པའི་ཡེ་ཤེས་སོ་སོར་རང་རིག་པའི་ཡེ་ཤེས་དེས་ཀྱང་རྣམ་རྟོག་བདག་འཛིན་ལ་གནོད་ཚུལ་ཡང་དེ་ལྟ་བུའི་སྒོ་ནས་ཤེས་དགོས་ཀྱིན་འདུག་ཅེས་ཞུ་རྒྱུ་དེ་ཡིན། ཡང་གོང་ནས་ཁྱེད་རང་གིས་དྲི་བ་དྲི་སྟངས་དེ་གཞན་སྟོང་དབུ་མ་ཆེན་པོས་ཞེས་བྱེད་སྒྲ་སྦྱར་ནས་དེས་བདེན་འཛིན་ཞེན་ཡུལ་མེད་པར་རྟོགས་མ་རྟོགས་སྐད་ཆ་དེ་སྦྱར་དགོས་འདུག་གཞན་སྟོང་དབུ་མ་ཆེན་པོ་ཟེར་བ་དེ་ཆོས་ཉིད་བདེ་བར་གཤེགས་པའི་སྙིང་བོ་རེད། དེ་ནི་ཡེ་གདོད་མ་ནས་རང་ཆས་སུ་གྲུབ་པའི་སངས་རྒྱས་ཀྱི་ཡེ་ཤེས་ཞིག་རེད། སངས་རྒྱས་ཡེ་ཤེས་དེ་སྒྲིབ་གཉིས་སྤངས་དགོས་པ་ཡིན། དེ་ཡང་བདག་འཛིན་ལ་སོགས་པའི་ཞེན་ཡུལ་མེད་པར་རྟོགས་པའི་སྒོ་ནས་དེ་ཞེན་ཡུལ་ཡང་སུན་བྱུང་དགོས་པ་རེད། དེ་ཡང་ཆོས་ཉིད་ནི་གདོད་མ་ནས་རང་བཞིན་ལྷུན་གྱིས་གྲུབ་པ་ཞིག་ཡིན། དཔེར་ན་གཟུང་རྒྱལ་ཞུས་པའི་མདོའི་སྐབས་སུ། ཟད་པ་གཉེན་པོས་ཟད་པ་མ་ཡིན་ཏེ། །སྔོན་ནས་ཟད་པས་དེས་ཕྱིར་ཟད་ཅེས་བྱ། །ཞེས་དང༌།དེ་བཞིན་གཤེགས་པའི་སྙིང་རྗེ་ཆེན་པོ་ངེས་པར་བསྟན་པ་ཞེས་བྱ་བ་ཐེག་པ་ཆེན་པོའི་མདོ་ལས། ཟད་པ་གཉེན་པོས་ཟད་པ་མ་ཡིན་ཏེ། །སྔོན་ནས་ཟད་པས་དེ་ཕྱིར་ཟད་ཅེས་བསྟན། །ཟད་པ་གང་ཡིན་དེ་ནི་འདུས་མ་བྱས། །དེ་ལ་མཚན་ཉིད་གསུམ་ནི་ཡོད་མ་ཡིན། །དབྱིངས་དེ་གནས་པ་ཡིན་ཏེ་འགྱུར་བ་མེད། །ཞེས་དང༌། གསུངས་པ་ནང་བཞིན་རེད། དེ་ནང་བཞིན་རྒྱུད་བླ་མ་སོགས་ཀྱི་སྐབས་སུ་རང་བཞིན་གྱིས་ནི་ཡོངས་དག་ཕྱིར། །ཉོན་མོངས་གདོད་ནས་ཟད་ཕྱིར་རོ། །ཞེས་དང༌། དབུས་མཐའ་ལས། ངོ་བོ་ཉིད་དང་གཉིས་མི་སྐྱེ། །དྲི་མ་ཞི་བ་གཉིས་སུ་འདོད། །ཞེས་དང༌། དེའི་འགྲེལ་པར། ངོ་བོ་ཉིད་ཀྱི་འགོག་པ་དང༌། གཉིས་འགོག་པ་དང་རང་བཞིན་གྱིས་འགོག་པའོ། །ཞེས་དང༌། ཆོས་ཀྱི་དབྱིངས་སུ་བསྟོད་པའི་རྣམ་པར་བཤད་པ་སྙིང་པོ་གསལ་བ་ཞེས་བྱ་བ་ལས། ཆོས་ཀྱི་དབྱིངས་སྐྱེ་འགག་ཏུ་འགྱུར་བ་མེད་ཅིང་ཟད་པ་གཉེན་པོས་ཟད་པ་མ་ཡིན་ཏེ། གདོད་མ་ནས་ཟད་པས་དེ་ཕྱིར་གྲོལ་ཞེས་བསྟན། ཞེས་དང༌། འཕགས་པ་ཀླུ་སྒྲུབ་ཀྱིས། ཆོས་ཀྱི་དབྱིངས་ནི་སྐྱེ་མ་ཡིན། །ནམ་ཡང་འགག་པར་འགྱུར་བ་མེད། །དུས་རྣམས་ཀུན་དུ་ཉོན་མོངས་མེད། །ཐོག་མ་བར་མཐའ་དྲི་མ་བྲལ། །ཞེས་དང༌། རྡོ་རྗེ་གུར་དུ། བདག་དང་གཞན་དུ་འཛིན་སྤངས་ཤིང༌། །རང་གིས་རིག་པའི་ཡེ་ཤེས་ཏེ། །ཞེས་དང༌། དཔལ་གསང་བ་འདུས་པར། སེམས་ཅན་ཀུན་གྱི་སེམས་ཆེན་པོ། །རང་བཞིན་དག་ཅིང་དྲི་མ་མེད། །ཀུན་བཟང་ཐུགས་མཆོག་ཁ་ལོ་བསྒྱུར། །དཀྱིལ་འཁོར་དམ་པ་བཤད་དུ་གསོལ། །ཞེས་གདོན་མ་ནས་ཡོངས་སུ་ཟད་པ་ཡིན་པར་གསུངས་ཡོད་པ་རེད། དེ་ནང་བཞིན་དོན་དམ་པའི་མཚན་ཡང་དག་པར་བརྗོད་པའི་སྐབས་སུ་རང་བཞིན་ཉེ་བའི་ཀུན་ཉོན་མོངས། །བག་ཆགས་བཅས་པ་གཏན་སྤངས་བ། །ཞེས་གདོན་མ་ནས་རང་བཞིན་ཡོངས་སུ་དག་པ་ཡིན་པར་གསུངས་ཡོད་པ་རེད། ཡིན་ནའང་གང་ཟག་སོ་སོའི་རྒྱུད་ཀྱི་ལམ་འདུས་བྱས་ཡོད་པ་རེད། ལམ་འདུས་བྱས་འཕགས་པའི་མཉམ་བཞག་ཡེ་ཤེས་ཀྱིས་གཞན་སྟོང་དབུ་མ་ཆེན་པོ་ཟེར་ན་འདྲ་སྤྲོས་བྲལ་ཟེར་ན་འདྲ་ཆོས་ཉིད་བདེ་བར་གཤེགས་པའི་སྙིང་པོ་དེ་རྟོགས་ཡོང་དུས། སྤྲོས་འཛིན་གྱི་ཞེན་ཡུལ་མེད་པར་རྟོགས་པའི་སྟེང་ནས་སྤྲོས་འཛིན་གྱི་རྣམ་རྟོག་བདག་འཛིན་ལ་སོགས་པ་ཐམས་ཅད་ལ་གནོད་ལུགས་གནོད་སྟངས་དེ་འདྲའི་སྒོ་ནས་ཤེས་དགོས་པ་རེད། དེ་ཡང་དཔལ་ཆོས་ཀྱི་གྲགས་པའི་རྣམ་འགྲེལ་སྐབས་སུ་གནོད་བྱ་གནོད་བྱེད་ངོ་བོའི་ཕྱིར། །འདི་ནི་སྒྲོ་འདོགས་དབེན་པ་ལས། །འཇུག་ཅེས་བྱ་བར་ཤེས་པ་ཡིན། །ཞེས་གསུངས་པ་ནང་བཞིན་བཤད་ན་བཤད་རྒྱུ་ཡོད་པ་ཞིག་ཡིན། གཞན་སྟོང་དབུ་མ་ཆེན་པོའི་ལྟ་གྲུབ་ལས་བརྩམས་ཏེ་བཤད་ན་ཡང་བདག་འཛིན་གྱི་གཉེན་པོར་འགྲོ་ལུགས་འགྲོ་སྟངས་ཀྱང་དེ་འདྲའི་སྒོ་ནས་བཤད་དགོས་པ་ཞིག་རེད་ཅེས་ཞུ་རྒྱུ་དེ་ཡིན་ལགས། དྲི་བ་ཉེར་བརྒྱད་པ་ཉོན་ཡིད་གྲོགས་ཉོན་མོངས་པ་དང་བྲལ་ནས་སྤངས་ཚུལ་ཡོད་མེད་ཞེས་པའོ། །ལན་ནི། སྤྱིར་བཏང་ཉོན་ཡིད་ཞེས་བཤད་དགོས་པ་རེད། དེ་ཡང་རྒྱ་གར་ལེགས་སྦྱར་སམ་སྐྲི་ཏའི་སྐད་ཀྱི་དབང་དུ་བྱས་ན་དྲུག་པ་ཡིད་ཤེས་དང་བདུན་པ་ཉོན་ཡིད་གཉིས་ཀྱི་སྐད་དོད་གཅིག་པ་ཆགས་འདུག་ཡོད་པ་རེད། དེའི་དབང་གིས་རྒྱ་ནག་གི་བཀའ་འགྱུར་དང་བསྟན་འགྱུར་ནང་ལོགས་ན་ཉོན་ཡིད་ཟེར་བ་དེ་དང་དྲུག་པ་ཡིད་ཤེས་གཉིས་ཀྱི་སྐད་དོད་སོ་སོར་མེད་པའི་དབང་གིས་ཉོན་ཡིད་དེ་རྒྱ་གར་ལེགས་སྦྱར་སཾ་སྐྲི་ཏའི་སྐད་ཕར་སྒྲ་བསྒྱུར་བྱས་པ་དེ་འདྲ་བ་མང་པོ་ཡོད་པ་རེད། ཡིན་ནའང་བོད་ཁ་བ་གངས་ཅན་པའི་ལོ་ཙཱ་བ་རྣམས་ཀྱིས་བོད་སྐད་དུ་བ་ན་ཡིད་ཤེས་དེ་དང་ཉོན་ཡིད་གཉིས་མི་ནོར་བའི་ཆེད་དུ་ཉོན་མོངས་པའི་ཤེས་པ་ཞིག་ཉོན་ཡིད་ཅེས་བསྒྱུར་བ་རེད། དེ་ཡང་དེ་དང་མཚུངས་ལྡན་དུ་སོང་བའི་ཉོན་མོངས་པ་རྫས་ཡོད་བཞི་དང་བཏགས་ཡོད་ལྔ་ལ་སོགས་པ་ཡོད་པར་ཀུན་བཏུས་སུ་བཤད་པ་དང༌། རྫས་ཡོད་ཀྱི་ཉོན་མོངས་བཞི་ཡང་སློབ་དཔོན་དབྱིག་གཉེན་གྱི་སུམ་ཅུ་བར། ཉོན་མོངས་བཞི་དང་རྟག་ཏུ་འགྲོགས། །བདག་ཏུ་ལྟ་དང་བདག་ཏུ་རྨོངས། །བདག་རྒྱལ་བདག་ཏུ་འདུ་ཤེས་པ། །ཞེས་གསུངས་བའི་རྒྱུ་མཚན་གྱིས་མཚུངས་ལྡན་གྲོགས་ཀྱི་སྒོ་ནས་མིང་ཉོན་ཡིད་ཞེས་ཟེར་ནས་ཉོན་མོངས་ཀྱི་ཡིད་ཅེས་བརྡ་ཆད་ཅིག་བོད་ཁ་བ་གངས་ཅན་པའི་ཡུལ་ན་མཛད་ཡོད་པ་རེད། ས་བརྒྱད་པའི་སྐབས་སུ་ཉོན་ཡིད་ཟག་བཅས་དེ་གནས་སྐབས་སུ་གནས་གྱུར་ནས་ཟག་མེད་ཀྱི་ངོ་བོར་གྱུར་བ་ཡིན། དེའི་ཚེ་ཉོན་ཡིད་མ་ཡིན་པར་ཆགས་པ་ཡིན་ཏེ། ཉོན་ཡིད་ཀྱི་རྫས་རྒྱུན་དེ་གཙོ་སེམས་ཀྱི་ངོ་བོར་གནས་པ་ཡིན། དེའི་སྐབས་སུ་ཉོན་ཡིད་དང་མཚུངས་ལྡན་གྱི་ཉོན་མོངས་པ་རྣམས་མཚུངས་ལྡན་ཁ་བྲལ་བའི་སྒོ་ནས་སྤངས་བ་རང་ལུགས་ལ་འདོད་དགོས་པ་ཡིན། སྤྱིར་བཏང་གྲུབ་མཐའ་སྨྲ་བ་སོ་སོའི་ལུགས་ཡིན་ན་མཛོད་རང་ལུགས་ལ་ཕལ་ཆེར་མཚུངས་ལྡན་ཁ་བྲལ་བའི་སྒོ་ནས་སྤངས་བ་མེད་པ་ཨེ་ཡིན་བསམ་གྱིན་ཡོད། ཡིན་ནའང་ཉོན་ཡིད་མཐར་ཐུག་གནས་གྱུར་མཉམ་ཉིད་ཡེ་ཤེས་ཡིན་པར་གཞུང་དུ་མའི་སྐབས་སུ་གསུངས་གྱིན་ཡོད་པ་རེད། དེ་ཡང་རང་ལུགས་ཀྱི་དབང་དུ་བྱས་ན་ཉོན་ཡིད་གནས་གྱུར་བའི་མཉམ་ཉིད་ཡེ་ཤེས་ཞེས་གསུངས་ཡོད་པ་དེ་འདྲ་ཞིག་རེད། སྤྱིར་བཏང་མེ་ལོང་ཡེ་ཤེས། མཉམ་ཉིད་ཡེ་ཤེས། སོར་རྟོག་ཡེ་ཤེས། བྱ་གྲུབ་ཡེ་ཤེས། ཆོས་དབྱིངས་ཡེ་ཤེས་ལྔའི་ནང་ནས་ཆོས་དབྱིངས་ཡེ་ཤེས་ལ་དོན་དམ་འདུས་མ་བྱས་པའི་ཡེ་ཤེས་ཡིན་པས་ཁྱབ་བ་མཐའ་གཅིག་ཏུ་གསུངས་ཡོད་པ་རེད། དེ་ལམ་འདུས་བྱས་ཡིན་པར་གསུངས་ཡོད་པ་མ་རེད། ཡེ་ཤེས་གཞན་རྣམས་ནི་འདུས་བྱས་འདུས་མ་བྱས་གཉིས་ཡོད་པའི་རྒྱུ་མཚན་གྱིས་ཆོས་དབྱིངས་ཡེ་ཤེས་ལས་གཞན་པའི་ཡེ་ཤེས་བཞི་ལ་འདུས་བྱས་བཞི་དང་འདུས་མ་བྱས་བཞི་སྟེ་ཡེ་ཤེས་བརྒྱད་དང་དེའི་སྟེང་དུ་ཆོས་དབྱིངས་ཡེ་ཤེས་བསྣན་ཏེ་ཡེ་ཤེས་དགུ་ཞེས་རི་ཆོས་ངེས་དོན་རྒྱ་མཚོའི་འབྲས་བུའི་རྣམ་བཞག་སྐབས་སུ་གསལ་བར་གསུངས་བ་ནང་བཞིན་རང་ལུགས་ལ་འདུས་བྱས་སུ་གྱུར་བའི་མཉམ་ཉིད་ཡེ་ཤེས་ཁས་ལེན་གྱིན་ཡོད་པ་རེད། དེ་ཁས་ལེན་ན་དེའི་རྫས་རྒྱུན་སྔ་མ་སློབ་པའི་ས་ན་ཉོན་ཡིད་དེ་འཇོག་དགོས་པ་རེད། ཡིན་ནའང་ས་བརྒྱད་པ་ཡན་ཆད་ཉོན་ཡིད་ཅེས་བརྡ་ཆད་མཛད་ཡོད་པ་མ་རེད། དེའི་རྫས་རྒྱུན་དུ་གྱུར་བའི་ཤེས་པ་དེ་ལ་བདུན་པ་ཡིད་ཤེས་ཞེས་མཁས་པའི་དབང་ཕྱུག་གུང་ཐང་བསྟན་པའི་སྒྲོན་མེ་སོགས་རི་བོ་དགེ་ལྡན་པའི་སྐྱེས་ཆེན་བསམ་གྱིས་མི་ཁྱབ་པ་དེ་དག་གིས་བརྡ་ཆད་དེ་ལྟར་མཛད་ཡོད་པ་ཞིག་རེད། དེས་ན་རང་ལུགས་ལ་བརྡ་ཆད་དེ་ལྟར་མཛད་ན་མི་ཆོག་པ་མེད་པ་འདྲ་སྟེ། ཐམས་ཅད་མཁྱེན་པ་ཏཱ་ར་ནཱ་ཐའི་ཞལ་སྔ་ནས་ཀྱང་ཀུན་རྗོབ་ཆོས་སྐད་རྣམ་པ་སྣ་ཚོགས་རྣམས། །ལུང་རིགས་གཉིས་དང་མཐུན་ན་ཅི་དགར་མཛོད། །ཅེས་གསུངས་པ་ལྟར་ལུང་རིགས་གཉིས་དང་མི་འགལ་བ་ཞིག་དགོས་གསུངས་པ་རེད། སྤྱིར་ནམ་རྒྱུན་རྟག་པར་གོ་བ་ཟེར་བ་དེ་ལུང་རིགས་གཉིས་དང་མི་འགལ་བའི་གོ་བ་ཞིག་དགོས་ནི་རེད་མ་གཏོགས་ང་ཚོས་ལུང་རིགས་གང་ཡང་མེད་ནས་རང་གི་རྣམ་རྟོག་འཆར་སྒོ་རེ་བཤད་རྒྱུ་ཡོད་པ་ཙམ་གྱིས་གོ་བ་ཟེར་རྒྱུ་མ་རེད། དཔེར་ན་ང་ཚོས་རི་བོང་རྭའོ་བསམ་ན་ཡང་རྩ་རྩེ་མོ་སོགས་བློ་ངོར་འཆར་རྒྱུ་རེད་དེ་དེ་ཙམ་གྱིས་གོ་བ་ཟེར་རྒྱུ་མ་རེད། དེས་ན་གོ་བ་ཟེར་རྒྱུ་དེ་ལུང་རིགས་གཉིས་དང་མི་འགལ་བའི་གོ་བ་ལུང་རིགས་སྤྱི་དང་མཐུན་པའི་གོ་བ་ལུང་དང་རིགས་པ་དང་མི་འགལ་བའི་གོ་བ་ལུང་རིགས་ཟུང་འབྲེལ་གྱི་གོ་བ་ཡོངས་ན་གོ་བ་ཆགས་ཡོད་པ་རེད། ང་ཚོས་རིགས་པའི་ལམ་ནས་བརྟག་དཔྱད་མ་བྱས་པར་བཤད་ཡོང་དུས། དེའི་གོ་བ་དེ་གོ་བ་མ་ཡིན་བཞིན་དུ་གོ་བ་ཡིན་པར་རློམ་ནས་གོ་བ་ཡིན་པར་འཛིན་པ་དེ་རིལ་འཛིན་གྱི་རྨོངས་བ་ཞིག་རེད། ཆོས་གཅིག་གི་སྟེང་དུ་ལྡོག་ཆའི་རྣམ་པ་མཐའ་ཡས་པ་ཞིག་ཡོད་པ་དེ་གོ་ཐུབ་དུས་ཆོས་གཅིག་གི་སྟེང་དུ་ལྡོག་ཆ་མཐའ་ཡས་པ་ཡོད་པ་གཏན་ལ་ཕབ་ཟེར་ན་འདྲ་ལུང་རིགས་ཀྱིས་གཏན་ལ་ཕབ་ཡོང་དུས་ཚིག་ཙམ་མ་གཏོགས་བློ་ངོར་དེ་ཙམ་ལས་འཆར་མི་ཐུབ་པའི་རྒྱུ་མཚན་གྱིས་ཚིག་ཙམ་ཟེར་རྒྱུ་འདྲ་མྱོང་བའི་སྟེང་ནས་ཡོང་གིན་འདུག དེའི་རྒྱུ་མཚན་གྱིས་དེ་འདྲ་ཞིག་མ་རེད། དེ་ལྟ་བུའི་ལྡོག་ཆ་དུ་མ་ཡོད་པ་མ་ཤེས་པའི་དབང་དང་སྔོན་གཞུང་ལུགས་མ་ཤེས་པའི་དབང་གིས་ཁ་ཅིག་གིས་ཆོས་ཉིད་དེ་སེམས་ཅན་ཞིག་གི་ཁོག་པའི་ནང་དུ་གཟུངས་འཇུག་བཞག་པ་ལྟར་རིལ་བོ་ཞིག་རང་རྐྱ་ཐུབ་པའི་རྫས་ལྟ་བུ་ཁས་ལེན་མཁན་ཡོད་པ་རེད། དེ་ལྟར་ཁས་ལེན་ན་རང་དབང་བའི་བདག་ཁས་ལེན་པ་དང་འདྲ། དེས་ན་ཕྱི་རོལ་བའི་བདག་ཏུ་ལྟ་བ་ལྟར་བདག་ཏུ་ཁས་ལེན་པར་འགྱུར། དེ་ལྟ་བུ་མ་ཡིན་པར་ང་ཚོས་སེམས་ཅན་ཐམས་ཅད་གྱི་རྒྱུད་ལ་ཆོས་ཉིད་བདེ་བར་གཤེགས་པའི་སྙིང་བོ་ཡོད་ཟེར་བ་དེ་ཆོས་ཉིད་བདེ་བར་གཤེགས་པའི་སྙིང་བོ་དེ་ཀུན་རྫོབ་ཐམས་ཅད་འཁྲུལ་བར་སྣང་བའི་ཆོས་ཅན་དེའི་གནས་ལུགས་སམ་གཤིས་ལུགས་སུ་གྲུབ་པ་དེ་ཆོས་ཉིད་བདེ་བར་གཤེགས་པའི་སྙིང་བོ་རེད། དེ་ཡིན་དུས་དེ་ནི་ནམ་མཁའ་ལྟར་བརྟན་གཡོ་བ་ཀུན་ལ་ཡོངས་སུ་ཁྱབ་པ་ཏིལ་ལ་ཏིལ་མར་གྱིས་ཁྱབ་པ་ལྟར་ཆོས་ཉིད་ནི་ལུས་ཅན་སེམས་ཅན་ཐམས་ཅད་ལ་ཆོས་ཉིད་ཀྱི་ཚུལ་གྱིས་ཡོངས་སུ་ཁྱབ་པ་དེ་བསམ་བློ་བཏང་རྒྱུ་ཧ་ཅང་གལ་ཆེན་པོ་ཞིག་རེད། དེ་ནས་དེ་རིང་ཡན་ཆོད་ཉི་མ་ལྔ་ལ་དྲི་བ་དྲིས་ལན་དེ་རྣམ་པ་ཚོས་དྲི་བ་གང་ལ་གང་འཚམས་གནང་བ་དེ་ལ་བཀའ་དྲིན་དང་ཐུགས་རྗེ་ཆེ་ཞུ་རྒྱུ་དེ་དང་རང་གི་ངོས་ནས་ཆུ་ཚོད་དང་བྱ་བ་མང་པའི་དབང་གིས་དྲི་ལན་དེ་སྐབས་སྐབས་སུ་མདོར་བསྡུས་སུ་ཞུས་པ་དང༌། སྐབས་སྐབས་སུ་ཆུ་ཚོད་ཀྱི་དབང་གིས་དེ་འདྲ་ཙམ་ལས་རྒྱས་པར་མ་བཤད་པ་དང་བར་བར་དུ་རྒྱས་པར་ཞུས་པ་དང་གོང་ནས་བཤད་ཟིན་པ་དག་སླར་ཡང་ནས་ཡང་དུ་མང་བོ་ཞུས་ན་གཞན་པ་རྣམས་ལ་སུན་སྣང་བཟོ་བསམས་ནས་མདོར་བསྡུས་ཙམ་ཞུས་པ་དེ་ཡིན། ཡིན་ནའང་ཁྱེད་རྣམ་པའི་ཐུགས་དགོངས་མ་གང་བ་དང་དྲི་བ་དེ་ཞེ་འདོད་ཀྱི་དྲི་བ་ནང་བཞིན་གྱིས་ལན་དུ་མ་སོང་པ་ཡོད་ན་ཐམས་ཅད་ལ་མཐོལ་ལོ་བཤགས། བཟོད་པར་གསོལ། ཁྱེད་རྣམ་པ་ཆོས་སྤྱན་དང་ལྡན་པ་རྣམས་ཀྱིས་ཐུགས་ཡངས་ཆེན་པོའི་ངང་ནས་དགོངས་འགལ་མེད་པར་ཞུ། སྨྲས་པ། དགེ་འདིའི་མཚོན་ནས་དུས་གསུམ་དང་འབྲེལ་བའི། །བདག་གཞན་དགེ་བའི་རྩ་བ་ཇི་མཆིས་པ། །དེ་དག་ལ་བརྟེན་སྐྱེ་ཞིང་སྐྱེ་བ་རུ། །ཟབ་མོ་ཆོས་ཀྱི་དོན་དང་མི་མཐུན་པའི། །འཇིག་རྟེན་སྙན་གྲགས་ཐོབ་པའི་རྒྱུར་མ་སྨིན། །སྐྱེ་བ་ཀུན་ཏུ་མཚན་ལྡན་བླ་མའི་དྲུང༌། །ཐོས་བསམ་ཚུལ་བཞིན་བྱས་ནས་ལམ་གཉིས་རྫོགས། །མཐར་ཐུག་བྱང་ཆུབ་ཁོ་ནའི་རྒྱུ་གྱུར་ཅིག |