རང་སློབ་ཨ་མདོ་བར་གདམས་པ་སྒྱུ་མ་ལྕགས་གྲོང་མ།
འདིར་སྣང་སྒྱུ་མ་ལྕགས་ཀྱི་གྲོང་ཁྱེར་གྱི་དབུས་ན།། འདུས་བྱས་ཉེར་ལེན་སྡུག་བསྔལ་སུམ་བརྩེགས་ཀྱི་ཕུང་པོར།། རྟེན་མེད་རིག་པའི་བུ་ཆུང་གྲོགས་མེད་དུ་འཐུམ་པའི།། འཁྲུལ་སྣང་ཉམ་ངའི་འཁོར་ལོ་ནམ་ཞིག་ན་ལྡོག་སྲིད།། སྣང་བ་མི་བདེན་བསླུ་བྲིད་སྒྱུ་མ་ཡི་གར་མཁན།། སྟོང་པ་ཕྱོགས་གཅིག་བདེན་གཉིས་ཡ་བྲལ་གྱི་ལྟ་བ།། སྣང་སྟོང་ཟུང་འཇུག་འོད་གསལ་བདེ་ཆེན་གྱི་རོལ་བས།། ལྟ་བསྒོམ་སྤྱོད་འབྲས་དག་པའི་རྣལ་འབྱོར་དེ་བདེའོ།། སོང་སོང་ས་མཐའ་བསྐོར་བའི་རྐང་རྗེས་ཀྱི་བུ་ལོན།། ལོ་ཟླའི་བྲོན་ལ་བསྐུར་བའི་ངལ་བ་དེ་བསྐྱུར་ནས།། གདན་ཧྲུལ་རྡོ་ལ་བཀོད་པའི་སྡུག་རུས་ཀྱི་སྒོམ་བསྲན།། ཉམས་ལེན་སྙིང་པོར་དྲིལ་བ་འཆུག་མེད་ཀྱི་ལས་ཡིན།། གཡོ་མེད་མཉམ་པར་བཞག་པའི་བསམ་གཏན་གྱི་ཏིང་འཛིན།། བཞུགས་སྟངས་གསུམ་དང་མི་འབྲལ་ཉམས་མྱོང་གི་རྒྱུན་ལས།། གཟིགས་སྟངས་གསུམ་གྱིས་གཅུན་པའི་སྣང་བཞི་ཡི་ལྟད་མོས།། འཁོར་འདས་གཞི་ཟད་ཡེ་གྲོལ་རྒྱལ་ས་ཆེར་སྙོགས་ཤིག། བླ་མ་ཕྱི་རུ་མི་བཞུགས་རང་སེམས་ཀྱི་ངོ་བོ།། རིག་སྟོང་གདོད་མའི་རང་ཞལ་འཕོ་བྲལ་གྱི་བླ་མ།། བྱིན་རླབས་གཞན་དུ་མ་ཚོལ་བདེ་སྟོང་གི་ཡེ་ཤེས།། རྟོགས་པའི་ཕ་ཕོགས་བཟང་པོ་བྱིན་བརྒྱུད་ཀྱི་དངོས་གྲུབ།། ཡ་ཀི་རྫོགས་པའི་སངས་རྒྱས་ཐོབ་འདོད་ཀྱི་རེ་བ།། མ་ཀི་ན་རཀ་དམྱལ་བར་ལྟུང་སྙེམས་ཀྱི་དོགས་པ།། རེ་དོགས་གཉིས་འཛིན་སྤང་བླང་བྱ་བྱེད་ལས་གྲོལ་ཚེ།། ཕ་རྗེས་བུ་ཡིས་ཟིན་པའི་བྱ་བྲལ་དེ་གུ་ཡངས།། ལྟ་བ་སྤྲོས་བྲལ་ཆོས་དབྱིངས་ཀ་དག་གི་ངོ་བོ།། ཡེངས་མེད་བསྒོམ་པ་ངང་བཞག་ཆུ་རྒྱུན་གྱི་རྣལ་འབྱོར།། མཉམ་རྗེས་དབྱེར་མེད་སྤྱོད་པ་ལྷུན་གྲུབ་ཀྱི་རྫོང་ཆེན།། འབྲས་བུ་རེ་དོགས་བྲལ་བའི་ཕ་གཞིས་དེ་ངོ་མཚར།། རིག་རྩལ་རྟོག་པ་སོ་མའི་གར་མཁན་གྱི་རྩལ་ལས།། ངག་ཚིག་རྫུན་པའི་བརྡ་རིས་སོར་མོ་ཡི་འདུ་འགོད།། མེད་སྣང་སྒྱུ་མའི་རང་གཟུགས་ཡི་གེ་ཡི་རོལ་པ།། འདི་ཡང་རྟེན་ཅིང་འབྲེལ་འབྱུང་སྟོང་ཉིད་ཀྱི་གཤིས་ལུགས།། མཚོ་སྙིང་གུ་རུའི་སྒྲུབ་གནས་ངོ་མཚར་གྱི་ཞིང་ཁམས།། རུ་དམ་པདྨའི་ཡང་དབེན་ཡབ་མེས་ཀྱི་གཤེགས་ཤུལ།། མཁའ་སྤྱོད་ས་ལ་འཕོས་པའི་འོག་མིན་གྱི་ཞིང་ཁམས།། གང་དགའ་སྐབས་ཀྱི་སྤྱོད་ཡུལ་ངེས་མེད་དུ་འགྲིམ་འོས།། རྫོགས་ཆེན་པདྨ་ཐང་ལུང་རྟོགས་པདྨའི་དགའ་ཚལ་གྱི་པདྨ་ཡང་རྫོང་འོད་གསལ་བདེ་ཆེན་ཤེལ་ཀྱི་ཕུག་པ་ནས་པདྨ་བཞད་པའི་འབངས་པདྨ་སྐལ་བཟང་དེས་བྲིས་ཕུལ།།
|