མོས་གུས་སྒོམ་དུ་ཤར་བའི་ཉམས་དབྱངས།
སྐྱབས་གནས་ཀུན་འདུས་དྲིན་ལྡན་རྗེ་བཙུན་གྱི་བླ་མ།། མི་འབྲལ་སྤྱི་གཙུག་རྒྱན་ལ་འབྲལ་མེད་དུ་བཞུགས་ནས།། དབང་བཞིའི་ཡེ་ཤེས་བྱིན་རླབས་བདུད་རྩི་ཡི་ཆུ་རྒྱུན།། སྐལ་ལྡན་མོས་པའི་བུ་ལ་ཆད་མེད་དུ་སྩོལ་ཅིག། སྙིང་དབུས་མི་ཤིགས་དྭངས་མའི་ཐིག་ལེ་ཡི་ངོ་བོར།། རང་སེམས་བླ་མར་ཤེས་པའི་མོས་གུས་ཀྱི་གདན་ལ།། རིག་སྟོང་རིག་པའི་དབྱིངས་སུ་རོ་གཅིག་ཏུ་བཞུགས་ཏེ།། དབྱིངས་རིག་དབྱེར་མེད་ཆོས་སྐུའི་དགོངས་པ་ཡིས་སྐྱོངས་ཤིག། བློ་བྲལ་གཉུག་མའི་ཡེ་ཤེས་བསལ་བཞག་དང་བྲལ་བ།། ཟང་ཐལ་མཁའ་ལྟར་ཡངས་བའི་གཤིས་ཐོག་ལ་བཞག་པས།། ལྷུན་གྲུབ་སྣང་བའི་འོད་གསལ་འགོག་མེད་དུ་འཆར་བའི།། ཟུང་འཇུག་བྱིན་བརྒྱུད་རྟོགས་པའི་ཕ་ཕོགས་དེ་སྩོལ་ཤོག། མོས་གུས་སྒོམ་དུ་ཤར་བའི་མཉམ་བཞག་གི་ངང་ལས།། རྗེས་ཐོབ་འཁྲུལ་བ་བྲལ་བའི་ཆོས་དབྱིངས་སུ་སད་དེ།། རོ་མཉམ་དགོངས་པའི་རྩལ་ཆེན་ཚེ་ལུས་འདིར་རྫོགས་ནས།། བླ་མ་མཆོག་དང་དགོངས་ཀློང་དབྱེར་མེད་དུ་གྱུར་ཅིག། མ་རྟོག་འཁྲུལ་བར་འཕྱན་པའི་འགྲོ་ཁམས་ཀྱི་འཁྲུལ་སྣང་།། རང་གྲོལ་གཉུག་མའི་གཞི་ལ་རང་དག་ཏུ་སོང་ནས།། བདེ་ཆེན་འགྱུར་མེད་ཟུང་འཇུག་སྐུ་བཞི་ཡི་རྒྱལ་སར།། མཐའ་ཡས་སེམས་ཅན་ཕྱམ་གཅིག་གྲོལ་བ་རུ་སྨོན་ནོ།། སྲིང་ཆུང་དོན་འགྲུབ་སྒྲོལ་མའི་ངོར་ཐོལ་བྱུང་དུ་བྲིས་སོ།།
|