གང་བྱུང་སྐྱིད་སྡུག་རོ་སྙོམས་སུ་ཤར་བའི་བླ་མའི་གསོལ་འདེབས་བྱིན་རླབས་མཆོག་སྩོལ་ཞེས་བྱ་བ།
ཆོས་སྐུའི་བླ་མ་ཆོས་ཉིད་སྤྲོས་པ་བྲལ། ལོངས་སྐུའི་བླ་མ་མཚན་རྫོགས་ཡོན་ཏན་འབར།། སྤྲུལ་སྐུའི་བླ་མ་མཁྱེན་གཉིས་ཡེ་ཤེས་རྒྱས།། སྐུ་གསུམ་ཀུན་འདུས་བླ་མར་གསོལ་བ་འདེབས།། བླ་མ་ཕྱི་རུ་མི་བཞུགས་ནང་དུ་སྟེ།། སེམས་ཉིད་རྫོགས་པའི་སངས་རྒྱས་གདོད་མའི་གཤིས།། རྒྱལ་ཀུན་ངོ་བོ་མཁའ་མཉམ་གསང་གསུམ་གྱིས།། འབྲལ་མེད་སྙིང་གི་དབུས་ནས་རྟག་སྐྱོངས་ཤིག། འདིར་སྣང་མཐོ་རིས་འབྱོར་བ་ཀུན་ཚོགས་པས།། སྐྱིད་པའི་ཡང་རྩེར་སྙེམས་ལ་ཕྱོགས་གྱུར་ཚེ།། ཁྱེད་སྐུའི་གཟི་བྱིན་འབར་བའི་ཚམ་རྔམ་གྱིས།། ཆོས་བརྒྱད་ཞེན་པའི་རི་བོ་རྩེ་ནས་སྙིལ།། མི་འདོད་འཕྲལ་རྐྱེན་ངན་པའི་ཐོག་བརྫིས་ཀྱིས།། སྐྱོ་སུན་སྡུག་གི་སྙིང་སྐྲན་འཆའ་ཉེའི་སྐབས།། ཁྱེད་གསུང་བདུད་རྩིའི་བཅུད་ཀྱིས་དབུགས་ཕྱུངས་ནས།། སྙིང་གི་བདེ་ཆེན་ནང་ནས་སྦར་བར་མཛོད།། ཨ་འཐས་འཁྲུལ་བའི་རང་གཟུགས་རྨོངས་པའི་ཁམས།། ལུང་དུ་མ་བསྟན་གཡེང་བས་དུས་བྲོན་ན།། ཁྱེད་ཐུགས་རྡོ་རྗེ་རྣོན་པོའི་ཡེ་ཤེས་ཀྱིས།། རྣམ་འབྱེད་ཤེས་རབ་འབར་བའི་བློ་མཐུ་སྩོལ།། མདོར་ན་ལེགས་ཉེས་སྐྱིད་སྡུག་གང་བྱུང་ཡང་།། རོ་སྙོམས་རྟོགས་པའི་བྱིན་བརྒྱུད་ཡོངས་རྫོགས་ཏེ།། མ་ནོར་དྲི་མེད་ལྟ་བསྒོམ་སྤྱོད་པ་ཡིས།། གཞི་ལམ་འབྲས་བུའི་ཡོན་ཏན་མཐར་ཕྱིན་ཤོག། ཅེས་པའང་ཤྲཱི་སེང་ཆོས་གྲྭའི་སྡེ་སྣོད་འཛིན་པ་འཇིགས་མེད་སྟོབས་ལྡན་གྱི་ངོར་པདྨ་སྐལ་བཟང་གིས་འཕྲལ་བྲིས།
|