བྱ་བཏང་རི་ཉལ་གྱི་འདུན་མ་ཆག་གང་མ།
ཀ་དག་ཆོས་སྐུའི་བླ་མ་ཀུན་བཟང་གི་སངས་རྒྱས།། ལྷུན་གྲུབ་ལོངས་སྐུའི་བླ་མ་རྡོ་རྗེ་ཡི་སེམས་དཔའ།། གང་འདུལ་སྤྲུལ་སྐུའི་བླ་མ་དགའ་རབ་ཀྱི་དཔའ་བོ།། ཀུན་འདུས་དྲིན་ཅན་བླ་མ་རིགས་བདག་ཏུ་རྟག་བཞུགས།། དལ་འབྱོར་རྙེད་པར་དཀའ་བ་ཡིད་བཞིན་གྱི་ནོར་འདྲ།། ཚེ་ལ་རྟག་བརྟན་མེད་པ་ནམ་མཁའ་ཡི་ན་བུན།། འཁོར་བ་སྡུག་བསྔལ་རང་བཞིན་ཐར་མེད་ཀྱི་བཙོན་ར།། དཀར་ནག་ལས་ཀྱི་རྒྱུ་འབྲས་བདེ་སྡུག་ནི་བསླུ་མེད།། དམ་པའི་བཤེས་གཉེན་ཐར་པའི་ལམ་སྟོན་གྱི་སྒྲོན་མེ།། དད་དང་སྙིང་རྗེ་བྱང་སེམས་དམ་ཆོས་ཀྱི་གཞི་རྩ།། སྐྱབས་འགྲོ་སེམས་བསྐྱེད་སྒྲིབ་སྦྱང་ཚོགས་བསགས་ཀྱི་སྒོ་ནས།། ལམ་གནད་ཀུན་འདུས་བླ་མའི་རྣལ་འབྱོར་དང་མ་འབྲལ།། གཞི་དབྱིངས་ཀ་ནས་དག་པ་ཡེ་སྟོང་གི་རང་བཞིན།། སྒྲིབ་གཉིས་མུན་པས་མ་གོས་དྲི་མེད་ཀྱི་འོད་གསལ།། ལྷུན་གྲུབ་ཡོན་ཏན་རྒྱ་མཚོ་རང་ཆས་སུ་རྫོགས་པའི།། མ་བཅོས་བདེ་ཆེན་མཉམ་ཉིད་ཕྱོགས་མེད་དུ་ཁྱབ་བདལ།། མཐའ་བརྒྱད་སྤྲོས་པས་མ་གོས་སྟོང་གསལ་གྱི་རིག་པ།། འགགས་མེད་ཐིག་ལེ་ཆེན་པོའི་ཡེ་ཤེས་ཀྱི་རང་མདངས།། སྣང་སྟོང་སྒྲིབ་གཡོག་བྲལ་བའི་སྐུ་གསུམ་གྱི་ལམ་སྣང་།། ཆོས་ཟད་མ་བཅོས་ཆོས་སྐུའི་ཡེ་ཀློང་དུ་སྐྱིལ་མཛོད།། འཁྲུལ་དང་འཁྲུལ་འཛིན་རྙོག་པ་ཆོས་དབྱིངས་སུ་དྭངས་བས།། ནང་གསལ་སྐུ་དང་ཡེ་ཤེས་རྒྱ་མཚོ་ཡི་མངའ་བདག། ཐིམ་ལ་མ་རྨུགས་ཕྲ་བའི་དབྱིངས་རུམ་དུ་ཞུགས་པས།། མཁའ་མཉམ་གཞན་དོན་འཕྲིན་ལས་འབད་མེད་དུ་རྟག་འབྱུང་།། གཞི་བདེ་ཆོས་དབྱིངས་རྗེན་པའི་གནས་ལུགས་ཀྱི་རང་ཞལ།། ལམ་བདེ་མ་བཅོས་ཞེན་མེད་ཟང་ཐལ་གྱི་རང་ངོ་།། འབྲས་བདེ་སྐུ་གསུམ་ལྷུན་རྫོགས་འཕོ་བྲལ་དུ་དག་པའི།། བདེ་ཆེན་ནང་གི་ཉི་མ་སྙིང་དབུས་སུ་བསྟེན་མཛོད།། མི་ཚེ་ཆོས་ལ་བསྒྲིལ་བའི་གཅེན་གཅུང་གི་སྣང་ཚུལ།། ཆགས་མེད་རི་ལ་ཉལ་བའི་བྱ་བཏང་གི་བརྟུལ་ཞུགས།། མི་ཚེའི་ཚད་ལ་བཙུགས་པའི་ལས་སྨོན་གྱི་མཐའ་མར།། མཁའ་སྤྱོད་དག་པའི་ཞིང་ལ་སྡེབས་གཅིག་ཏུ་ཆས་འགྲོ།། ཞེས་གཅུང་ཆོས་མཛད་མའི་སྐྱོ་བ་བསང་ཕྱིར་ལྷོ་ཕྱོགས་རྒྱ་མཚོའི་འགྲམ་ངོགས་ལྗོན་ཤིང་ཏ་མ་ལའི་བསྟར་ཕྲེང་གཡོ་བས་གྲིབ་བསིལ་འགུག་པའི་ཚལ་ནས་བྲིས་པའོ།།
|