ཉིན་ཞིག་གི་ཉིན་ཐོའི་རྩོམ་ཐུང་རང་འགྲོས་མ།

ཕྱི་རུ་ཅུང་ཟད་འབྱོར་བའི་རྐྱེན་ཚོགས་ཀྱང་།།
ནང་དུ་སེམས་ཀྱི་ལང་ཚོའི་རྟེན་གཞིས་དབེན།།
ནུབ་མཐའི་ཡུལ་འདིའི་ཡིད་ཅན་འགྲོ་ཀུན་གྱིས།།
རྣམ་དཀར་རྒྱལ་བའི་འཕྲིན་ལས་ལ་རེག་ཤོག།
ཉིན་བྱེད་ལྷོ་བགྲོད་འཆར་ནུབ་ཕྱོགས་མཉམ་ཞིང་།།
སྣང་བའི་གོ་སྐབས་མུན་པས་ཡོངས་འཕྲོག་པར།།
སླར་ཡང་བྱང་བགྲོད་སྣང་བའི་སྐབས་ཕྱེད་པ།།
ཇི་བཞིན་དམ་ཆོས་ཉིན་བྱེད་རྟག་འཆར་ཤོག།
མཐའ་ཡས་འགྲོ་བའི་ཉེར་འཚོར་བདག་འགྱུར་བའི།།
རྣམ་དག་སྨོན་པའི་རང་གཟུགས་ཡིད་བཞིན་དབང་།།
འབྲེལ་ཚད་བདེ་ལ་འགོད་པའི་རྟེན་འབྱུང་མཐུས།།
ས་འདི་དགེ་བའི་བཀྲ་ཤིས་རྟག་འཆར་ཤོག།
ཤར་ནུབ་རྒྱལ་ཁམས་ཉུལ་བའི་ཡུལ་སྐོར་པ།།
བོད་བན་ཆོས་ཀྱི་གླེགས་བམ་སྨྲ་བ་ཅན།།
པདྨའི་མིང་མཐའ་བཟང་པོས་བརྒྱན་པ་དེས།།
འགྲུལ་བཞུད་ཞག་སའི་གནས་མལ་སྟོབ་དེར་བྲིས།།
ཤིང་བྱ་ལོར་ཡོ་རོབ་ནུབ་མཐའི་ཡུལ་གྲུ་དགུན་དུས་ཉི་ཞལ་མཐོང་བ་དཀོན་པའི་ས་ཆ་ཞིག་ནས་བྲིས་ཏེ་གནས་དེར་བཞག།