གཏེར་བུམ་སྦ་སྐབས་ཤིག་ལ་བྲིས་པའི་ཤིས་སྨོན།
ཧཱུྃ་ཧྲཱིཿབྷྲུྃཿ མི་འགྱུར་ཀ་ནས་དག་པའི་ཆོས་དབྱིངས་ཆེར།། རང་ཤར་ལྷུན་གྱིས་གྲུབ་པའི་རོལ་བའི་རྩལ།། འགག་མེད་རྒྱན་དུ་ཤར་བའི་སྲིད་ཞིའི་དཔལ།། ཉམས་མེད་བཅུད་དུ་དྲིལ་ཏེ་གནས་འདིར་སྦ།། ལུང་རྟོགས་ཡོན་ཏན་མཁས་བཙུན་གྲུབ་པའི་དཔལ།། དམ་པ་ཆོས་ཀྱི་བཅུད་གཡང་འདིར་སྦ་བས།། བཤད་དང་སྒྲུབ་པའི་སྣང་ཆེན་རབ་རྒྱས་ཏེ།། དགེ་འདུན་འདུས་པས་ས་ཆེན་གང་གྱུར་ཅིག། འདོད་འབྱུང་ནོར་བུའི་གཡང་དང་དགོས་འདོད་དཔལ།། ཟད་མེད་ནོར་གྱི་བང་མཛོད་འདིར་སྦ་བས།། ལོངས་སྤྱོད་འབྱོར་བ་མངའ་ཐང་མཐའ་རྒྱས་ནས།། མི་ཟད་ནམ་མཁའི་མཛོད་ལ་དབང་སྒྱུར་ཤོག། མཐོ་རིས་འབྱོར་བ་རྒྱ་མཚོའི་ཕུན་ཚོགས་དཔྱིད།། མགྲོན་དུ་འགུག་པའི་བདེ་སྐྱིད་འདིར་སྦ་བས།། རྣམ་མང་འདོད་པའི་ཡོན་ཏན་ཀུན་ཚོགས་པའི།། བདེ་དགའ་རྒྱ་མཚོ་རྟག་ཏུ་ཉམས་མ་གྱུར།། རིམ་གཉིས་གསང་ཆེན་གསང་བའི་ལམ་མཆོག་གི།། ཐར་ལམ་གདམས་པའི་ཡང་མཛོད་འདིར་སྦ་བས།། གྲུབ་གཉིས་ཡིད་བཞིན་གཏེར་ལ་དབང་འབྱོར་བའི།། ངོ་མཚར་སྣང་བའི་སྒྲོན་མེ་རྟག་འབར་ཤོག། འཁོར་འདས་སྲིད་དང་ཞི་བའི་དཔལ་དང་གཡང་།། མ་ལུས་བཅུད་དུ་དྲིལ་བའི་གཏེར་གྱི་བུམ།། རིན་ཆེན་འདུས་པའི་ས་གཞིའི་སྙིང་བཅུད་དུ།། སྦས་ཤིང་གཏམས་པས་སྣོད་བཅུད་བཀྲ་ཤིས་ཤོག།
|